Thaum chivkeeb Vajtswv tsim lub ntuj thiab lub ntiajteb. Lub ntiajteb tsis tau muaj dabtsi thiab nyob do dus, tsaus ntuj nti thoob plaws saum nplaim dej hiavtxwv, thiab Vajtswv tus ntsujplig yuj mus yuj los saum nplaim dej. Vajtswv hais tias, “Cia li muaj qhov pom kev,” ces txawm pom kev kaj nrig tuaj. Vajtswv txaus siab heev rau qhov pom kev ntawd. Ces Vajtswv thiaj muab qhov pom kev cais tawm ntawm qhov tsaus ntuj, Vajtswv tis npe rau qhov pom kev hu ua “Nruab hnub” thiab qhov tsaus ntuj hu ua “Hmo ntuj.” Muaj caij tsaus ntuj thiab muaj caij kaj ntug, yog hnub ib. Vajtswv tis npe rau txheej saud hu ua “Ntuj.” Muaj caij tsaus ntuj thiab muaj caij kaj ntug, yog hnub ob. Vajtswv hais tias, “Tej dej uas nyob hauv qab ntuj cia li sib sau los nyob ib qhov chaw ua ke, kom av tawm tuaj,” ces txawm muaj li Vajtswv hais. Vajtswv tis npe rau cov av hu ua “Ntiajteb,” thiab cov dej uas los sib sau ua ke ntawd hu ua “Hiavtxwv.” Thiab Vajtswv pom tej uas nws tsim tau los ntawd nws txaus siab heev. Ces Vajtswv hais tais, “Lub ntiajteb cia li tuaj txhua yam nroj tsuag, qoobloo thiab tej xyoob ntoo, kom tawg paj txi txiv raws li nyias yam,” ces txawm muaj raws li Vajtswv hais. Yog li ntawd, lub ntiajteb thiaj muaj txhua yam xyoob ntoo nroj tsuag, thiab qoobloo uas txawj tawg paj txi txiv, Vajtswv pom tej uas nws tsim tau los ntawd, mas nws txaus siab heev. Muaj caij tsaus ntuj thiab muaj caij kaj ntug, yog hnub peb. Vajtswv hais tias, “Cia li muaj tej lub ci ci tshwm rau saum ntuj quas nruab hnub thiab hmo ntuj, thiab quas caij nyoog, hnub, hli thiab xyoo; tej ntawd yuav ci saum ntuj tuaj rau hauv ntiajteb no kom pom kev,” ces txawm muaj raws li Vajtswv hais. Yog li ntawd, Vajtswv thiaj tsim dua ob lub ci ci uas loj heev. Lub uas ci tshaj cia kav nruab hnub thiab lub ci tsis heev cia kav hmo ntuj; nws tsim tej hnubqub huv tibsi. Vajtswv muab tej lub ci ci ntawd teeb rau saum ntuj kom pom kev ci ntsa iab tuaj rau hauv ntiajteb, kom kav nruab hnub thiab hmo ntuj, thiab muab qhov kaj cais tawm ntawm qhov tsaus. Thiab Vajtswv pom tej uas nws tsim tau los ntawd, nws txaus siab heev. Muaj caij tsaus ntuj thiab muaj caij kaj ntug, yog hnub plaub. Vajtswv hais tias, “Cia li muaj txhua yam tsiaj muaj sia nyob hauv nruab deg, thiab cia li muaj noog ya kom puv saum nruab ntug.” Yog li ntawd, Vajtswv thiaj tsim tej tsiaj uas loj tshaj plaws nyob hauv hiavtxwv, thiab tsim txhua yam tsiaj nyob hauv nruab deg, thiab txhua yam noog huv tibsi. Thiab Vajtswv pom tej uas nws tsim ntawd, nws txaus siab heev. Vajtswv thiaj foom koob hmoov rau tej tsiaj ntawd thiab hais rau tej tsiaj uas nyob hauv nruab deg kom cia li huamvam mus puv hiavtxwv, thiab nws hais rau tej noog kom huamvam mus puv ntiajteb. Muaj caij tsaus ntuj thiab muaj caij kaj ntug, yog hnub tsib. Vajtswv hais tias, “Cia li muaj txhua yam tsiaj txhu: tsiaj nyeg, tsiaj qus, tsiaj loj, tsiaj me, nab, qav, kab thiab ntsaum raws li nyias yam,” ces txawm muaj raws li Vajtswv hais. Vajtswv tsim tej tsiaj nyeg, tsiaj qus, tsiaj loj, tsiaj me, nab, qav, kab thiab ntsaum raws li nyias yam, thiab Vajtswv pom tej uas nws tsim tau los ntawd, nws txaus siab heev. Vajtswv hais tias, “Nimno peb yuav tsim neeg kom muaj yam ntxwv zoo li peb; thiab lawv yuav muaj hwjchim kav tagnrho tej ntses hauv hiavtxwv, tej noog saum nruab ntug, tej tsiaj nyeg, tsiaj qus, tsiaj loj tsiaj me thiab kav thoob plaws lub ntiajteb no.” Yog li ntawd, Vajtswv thiaj tsim neeg, kom lawv muaj yam ntxwv zoo li Vajtswv ntag. Nws tsim muaj tus txivneej thiab tus pojniam, Vajtswv foom koob hmoov rau nkawd thiab hais tias, “Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb. Kuv tsa neb kav tej ntses hauv hiavtxwv, tej noog uas ya saum nruab ntug, thiab txhua tsav yam tsiaj uas nyob hauv ntiajteb no. Kuv tsim kom muaj txhua yam qoobloo thiab txhua yam txiv ntoo rau nej tau noj, tiamsis kuv tsim tej nroj tsuag xyoob ntoo, ua zaub rau tej noog thiab tej tsiaj uas muaj sia nyob hauv lub ntiajteb no tau noj.” Ces txawm muaj raws li Vajtswv hais. Vajtswv saib ib puas tsav yam uas nws tsim ntawd, thiab ua rau nws txaus siab heev. Muaj caij tsaus ntuj thiab muaj caij kaj ntug, yog hnub rau. Lub ntuj thiab lub ntiajteb, thiab txhua tsav yam yeej tsim tiav tas lawm. Vajtswv twb tsim ib puas tsav yam tiav tas lawm, hnub xya nws thiaj so thiab tsis ua ib yam haujlwm dabtsi li. Vajtswv foom koob hmoov rau hnub xya thiab teem hnub ntawd ua hnub tseemceeb, rau qhov ib puas tsav yam uas nws tsim twb tiav tas rau hnub ntawd lawm nws thiaj so tsis ua haujlwm dabtsi. Vajtswv tsim lub ntuj thiab lub ntiajteb raws li tau hais tas los saum no lawm. Thaum tus TSWV uas yog Vajtswv tsim lub ntuj thiab lub ntiajteb, lub ntiajteb tseem tsis tau muaj nroj tsuag xyoob ntoo thiab tsis muaj ib yam noob tuaj taus kaus li, rau qhov nws tseem tsis tau tso nag los thiab tseem tsis tau muaj neeg tawm mus ua liaj ua teb; tiamsis dej cia li txia hauv nruab tivtxwv tuaj ntxaum daim av ntiajteb noo zaws thoob plaws. Tus TSWV uas yog Vajtswv muab av los puab tau ib tug txivneej, thiab tshuab siav tshuab pa rau tus txivneej ntawd lub qhovntswg, ces tus txivneej ntawd txawm ciaj sia. Ces tus TSWV uas yog Vajtswv tsim tau ib lub vaj nyob rau sab hnubtuaj, hauv Edees, thiab nws cia tus txivneej uas nws puab los nyob rau hauv lub vaj ntawd. Vajtswv tsim txhua yam ntoo tuaj zoo nkauj kawg nkaus rau hauv thiab txi txiv zoo kawg li. Nyob rau hauv plawv vaj muaj ib tsob ntoo uas cawm txojsia thiab muaj ib tsob ntoo uas ua rau paub qhov phem thiab qhov zoo. Muaj ib tug dej txhawv hauv Edees thiab ntws mus ntxooj lub vaj ntawd; tus dej ntawd ncau ua plaub ceg ntws tawm hauv Edees mus lawm. Ces ib hu ua Pixoos, ces dej no ntws mus vij lub tebchaws Havilas. ( Lub tebchaws ntawd muaj tej tseem kub, muaj tej roj ntoo tsw qab thiab muaj tej hlaws muaj nqis.) Ces ob hu ua Kihoos, ces dej no ntws mus vij lub tebchaws Kuses. Ces peb hu ua Tikis, ces dej no ntws mus rau sab hnubtuaj uas npuab rau lub tebchaws Axilias, thiab ceg dej plaub hu ua Efalates. Ces tus TSWV uas yog Vajtswv coj tus txivneej uas nws tsim los nyob hauv lub Vaj Edees, kom nws zov thiab tu lub vaj ntawd. Vajtswv hais rau nws hais tias, “Kuv pub koj noj txhua yam txiv ntoo uas nyob hauv lub vaj no, tiamsis kuv tsis pub koj noj tsob txiv ntoo uas ua rau paub qhov phem thiab qhov zoo xwb. Koj yuav tsum tsis txhob noj tsob ntoo ntawd cov txiv; yog koj noj hnub twg, koj yuav tuag hnub ntawd.” Ces tus TSWV uas yog Vajtswv hais tias, “Tsis tsimnyog cia tus txivneej no nyob ib leeg. Kuv yuav tsim dua ib tug los nrog nws nyob ua txij ua nkawm pab nws.” Yog li ntawd, Vajtswv thiaj muab av los puab ua txhua yam tsiaj thiab txhua yam noog. Vajtswv thiaj coj tagnrho tej tsiaj thiab tej noog los rau tus txivneej ntawd tis npe; mas tej tsiaj thiab tej noog ntawd nyias thiaj muaj nyias npe raws li tus txivneej ntawd tis rau. Nws tis npe rau tej tsiaj nyeg, tsiaj qus, thiab tej noog tas lawm, tiamsis tej tsiaj ntawd yeej tsis muaj ib tug uas pab tau nws thiab yuav nrog nws ua tau txij nkawm li. Tus TSWV uas yog Vajtswv thiaj ua kom tus txivneej ntawd tsaug zog heev, thaum nws tsaug zog lawm, Vajtswv thiaj muab tus txivneej ib tug txha tav rho tawm los thiab muab lub qhov nqaij ntawd foob nqawm rov zoo li qub. Vajtswv muab tus tav ntawd los tsim ua ib tug pojniam thiab coj tus pojniam ntawd mus cob rau tus txivneej. Ces tus txivneej ntawd hais tias, “Nimno, muaj ib tug zoo li kuv lawm thiab lauj, tus no tej txha yog kuv txha, thiab tej nqaij yog kuv nqaij. ‘Nws lub npe hu ua pojniam’ rau qhov yog rho nws tawm ntawm txivneej los.” Twb yog vim li no tus txivneej thiaj tso nws niam thiab nws txiv tseg mus nrog nws tus pojniam nyob ua txij ua nkawm, thiab nkawd thiaj los koom ua ib lub cev. Tus txivneej thiab tus pojniam, nkawd ob leeg puavleej liabqab, tiamsis nkawd ib leeg tsis paub txajmuag rau ib leeg. Nab yog ib tug uas ntse tshaj txhua yam tsiaj qus uas tus TSWV uas yog Vajtswv tau tsim huv tibsi. Nab thiaj nug tus pojniam hais tias, “Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los?” Tus pojniam teb hais tias, “Wb yeej noj tau txhua yam txiv ntoo uas nyob hauv lub vaj no, tsuas yog tshwj tsob txiv ntoo hauv plawv vaj thiaj tsis noj xwb. Vajtswv yeej txwv tsis pub wb noj tsob ntoo ntawd tej txiv lossis tsis pub kov tsob ntoo ntawd; yog wb noj, wb yuav tuag.” Nab teb tus pojniam hais tias, “Tej lus ntawd tsis tseeb, neb yuav tsis tuag ib zaug li. Vajtswv hais li ntawd, rau qhov nws paub hais tias thaum twg neb noj tsob txiv ntoo ntawd, neb yuav paub qhov phem thiab qhov zoo.” Tus pojniam pom hais tias, tsob ntoo ntawd zoo nkauj thiab tej txiv ntxim qab kawg li, tsis yog li ntawd xwb, nws xav hais tias tej txiv ntoo ntawd tseem yuav ua rau nws muaj tswvyim thiab. Ces nws txawm cev tes mus de cov txiv los noj. Nws muab rau nws tus txiv noj thiab. Thaum nkawd noj tas lawm, nkawd txawm pom tseeb thiab paub hais tias nkawd liabqab, nkawd thiaj mus de nplooj txiv ncuavpias los xaws hnav. Thaum yuav tsaus ntuj nkawd hnov tus TSWV uas yog Vajtswv lub suab mus kev hauv lub vaj, nkawd thiaj khiav mus nkaum rau hauv cov ntoo lawm. Tiamsis tus TSWV uas yog Vajtswv hu tus txivneej hais tias, “Koj nyob qhov twg?” Nws teb hais tias, “Kuv hnov koj los rau hauv lub vaj no, kuv ntshai koj heev kuv thiaj khiav mus nkaum lawm, rau qhov kuv liabqab.” Vajtswv nug hais tias, “Leejtwg hais rau koj tias koj liabqab? Tsis yog koj noj tsob txiv ntoo uas kuv txwv tsis pub koj noj lawm los?” Tus txivneej teb hais tias, “Twb yog tus pojniam uas koj muab rau kuv, nws muab cov txiv ntoo ntawd rau kuv noj, kuv thiaj li tau noj lawm.” Vajtswv nug tus pojniam hais tias, “Vim li cas koj thiaj ua li ko?” Nws teb hais tias, “Nab ntxias kuv noj!” Tus TSWV uas yog Vajtswv thiaj hais rau nab hais tias, “Koj yuav raug txim vim qhov uas koj ntxias tus pojniam no ua txhaum. Tagnrho tej tsiaj huv tibsi, koj yog tus uas yuav tau ris lo lus foom tsis zoo no: txij hnub no mus, koj yuav muab koj lub plab luag saum npoo av mus li thiab noj hmoov av mus tas koj lub neej. Kuv yuav ua kom koj thiab tus pojniam no ua yeebncuab, nws tus xeebntxwv thiab koj tus xeebntxwv yuav ua yeebncuab mus li. Nws tus xeebntxwv yuav tsoo koj taubhau kom ntsoog, thiab koj yuav tom nws lub lujtaws.” Vajtswv hais rau tus pojniam ntawd tias, “Kuv yuav tsub kev txomnyem rau koj thaum koj suab menyuam thiab tsub kev mob rau koj thaum koj yug menyuam. Txawm yog li ntawd los koj tseem xav nrog koj tus txiv ua txij ua nkawm, tiamsis nws yuav tswjhwm koj.” Vajtswv hais rau Adas hais tias, “Twb yog vim koj mloog koj tus pojniam lus thiab noj cov txiv ntoo uas kuv txwv tsis pub koj noj. Vim koj tau ua li ntawd av thiaj raug foom tsis zoo. Koj yuav tau siv zog khwv mus tas simneej, koj thiaj tau noj tau haus. Av yuav tuaj nroj thiab tuaj pos, thiab koj yuav de nroj tsuag tom tej teb los ua zaub noj. Koj yuav ua teb khwv lub hws nrog, koj thiaj tau noj mus txog thaum koj rov mus rau hauv cov av uas koj tawm los. Kuv muab av los puab koj, thiab koj yuav rov mus ua av dua.” Adas tis nws tus pojniam npe hu ua Evas, rau qhov Evas yog txhua haivneeg leej niam. Tus TSWV uas yog Vajtswv txawm muab tawv tsiaj los ua ris tsho rau Adas thiab nws tus pojniam, thiab muab rau nkawd hnav. Tus TSWV uas yog Vajtswv hais tias, “Nimno tus txivneej no nws zoo li peb thiab nws paub qhov phem thiab qhov zoo lawm. Yuav tsis pub nws mus de tsob txiv ntoo uas cawm tau txojsia los noj, nyob tsam nws yuav muaj txojsia nyob mus ibtxhis.” Tus TSWV uas yog Vajtswv thiaj ntiab Adas khiav tawm hauv lub Vaj Edees thiab kom nws mus khawb av ua noj ua haus, ntawm cov av uas Vajtswv muab coj los puab nws. Thaum Vajtswv muab tus txivneej ntawd ntiab tawm lawm, Vajtswv tso ib cov qhelunpees tuav ib rab ntaj nplaim taws uas tig tau mus rau txhua phab los zov lub Vaj Edees sab hnubtuaj, tsis pub leejtwg mus ze tsob txiv ntoo uas cawm tau txojsia. Adas nrog Evas uas yog nws pojniam pw, ces Evas txawm xeeb tub. Evas yug tau ib tug tub thiab nws hais tias, “Vim tus TSWV pab kuv, kuv thiaj tau ib tug tub.” Yog li ntawd, nws thiaj tis tus tub ntawd npe hu ua Ka-ees. Tom qab ntawd nws rov yug tau ib tug tub, thiab nws tis npe hu ua Anpees. Anpees yog ib tug tub yug yaj, tiamsis Ka-ees yog ib tug tub ua qoobloo. Muaj ib hnub Ka-ees nqa tej qoobloo uas nws sau tau los coj tuaj fij rau tus TSWV. Ces Anpees kuj muab nws tej menyuam yaj uas yog thawj tug, coj tuaj tua, thiab nws xaiv tej nqaij zoo fij rau Vajtswv. Tus TSWV txaus siab heev rau Anpees thiab nws tej khoom fij, tiamsis Ka-ees thiab nws tej khoom fij tsis haum Vajtswv siab. Yog li ntawd, Ka-ees thiaj chim thiab ua ntsejmuag npautaws vog. Ces tus TSWV hais rau Ka-ees hais tias, “Vim li cas koj yuav chim ua luaj li? Vim li cas koj ua ntsejmuag npautaws vog li ko?” Yog koj yeej ua qhov zoo, kuv yuav txais koj tej khoom fij, tiamsis yog koj ua phem, txojkev txhaum zov rawv ntawm koj qhovrooj yuav tom koj. Txojkev txhaum xav ua tus kav koj, tiamsis koj yuav tsum ua kom koj kovyeej nws. Tom qab ntawd, Ka-ees hais rau nws tus kwv Anpees hais tias, “Wb tawm mus yos ua si nram teb.” Thaum nkawd mus txog nram teb lawm, Ka-ees txawm ntxeev siab rau nws tus kwv thiab muab nws tus kwv tua tuag lawm. Tus TSWV nug Ka-ees hais tias, “Koj tus kwv Anpees mus dua qhov twg lawm?” Nws teb hais tias, “Kuv tsis paub. Kuv yog tus uas saib xyuas kuv tus kwv los?” Ces tus TSWV hais tias, “Vim li cas koj yuav ua nruj ua tsiv li ko? Koj tus kwv cov ntshav uas ntws rau hauv av twb quaj hu kuv, thov kom kuv ua pauj rau koj ntag. Nimno koj raug lo lus foom tsis zoo thiab raug ntiab tawm ntawm thaj av uas nqus koj tus kwv uas koj muab tua lawm cov ntshav. Txawm yog koj khwv cog qoobloo ntau npaum li cas los tej av ntawd yuav ua rau koj tej qoobloo hlob tsis taus. Koj yuav ua neeg lojleeb mus thoob qab ntuj tsis muaj vaj tsis muaj tsev nyob.” Ka-ees hais rau tus TSWV hais tias, “Koj rau txim rau kuv hnyav tshaj qhov kuv yuav ris taus lawm. Koj ntiab kuv tawm ntawm thaj av no thiab tawm ntawm koj lub xubntiag mus. Kuv yuav ua neeg lojleeb mus thoob qab ntuj tsis muaj vaj tsis muaj tsev nyob, thiab leejtwg ntsib kuv los yuav tua kuv povtseg.” Tiamsis tus TSWV teb hais tias, “Yeej tsis tau li, yog leejtwg tua Ka-ees povtseg, mas tus ntawd yuav raug txim xya npaug ntxiv.” Yog li ntawd, tus TSWV thiaj ntaus cim rau Ka-ees lub cev kom leejtwg pom los tsis txhob tua Ka-ees povtseg. Ces Ka-ees thiaj khiav ntawm tus TSWV lub xubntiag thiab mus nyob rau ib lub tebchaws hu ua “Ncig mus ncig los” uas yog nyob ntawm lub Vaj Edees sab hnubtuaj. Ka-ees thiab nws tus pojniam yug tau ib tug tub, nkawd tis nws lub npe hu ua Enauj. Ka-ees rhawv tau ib lub nroog thiab nws muab lub nroog ntawd tis npe hu ua Enauj raws li nws tus tub lub npe. Enauj muaj ib tug tub hu ua Iladis, nws yog Mehuya-ees txiv, Mehuya-ees muaj ib tug tub hu ua Methusa-ees, thiab Methusa-ees muaj ib tug tub hu ua Lamej. Lamej yuav ob tug pojniam, ib tug hu ua Adahes thiab ib tug hu ua Xilas. Adahes yug tau ib tug tub hu ua Yanpas, Yanpas yog yawgkoob ntawm cov neeg uas yug tsiaj txhu thiab nyob tsevntaub. Yanpas muaj ib tug kwv hu ua Yunpas, Yunpas yog yawgkoob ntawm cov neeg uas txawj ntaus nkauj nogncas thiab tshuab raj. Xilas yug tau ib tug tub hu ua Tunpas Ka-ees, nws txawj ntaus txhua yam cuabyeej uas yog muab tooj muab hlau ntaus. Tunpas Ka-ees tus muam hu ua Na-amas. Lamej hais rau nws ob tug pojniam tias, “Adahes thiab Xilas, neb cia li mloog kuv hais: kuv tau tua ib tug txivneej povtseg vim nws ua rau kuv raug mob, kuv tua ib tug tub hluas povtseg vim nws ntaus kuv. Yog leejtwg tua Ka-ees nws yuav raug txim xya npaug, yog leejtwg tua kuv tus ntawd yuav raug txim xya caum xya npaug.” Adas rov nrog nws tus pojniam pw, Evas thiaj rov yug tau ib tug tub, Evas hais tias, “Vajtswv pub kuv muaj dua ib tug tub los sawv Anpees, tus uas Ka-ees muab tua lawm chaw.” Yog li ntawd, nws thiaj tis tus tub ntawd npe hu ua Xej. Xej muaj ib tug tub, thiab Xej muab tis npe hu ua Enauses. Txij thaum ntawd los neeg txawm pib tuav tus TSWV lub npe pehawm tus TSWV. Ntawm no mus yog hais txog Adas tej xeebntxwv. (Thaum Vajtswv tsim neeg, nws tsim zoo li nws tus yam ntxwv ntag. Vajtswv tsim tau ib tug txivneej thiab ib tug pojniam. Vajtswv foom koob hmoov rau nkawd, tis npe rau nkawd, thiab hu nkawd ua “Noobneej.”) Thaum Adas muaj ib puas peb caug xyoo lawm, nws muaj dua ib tug tub zoo li nws thiab nws tis npe hu ua Xej. Dhau ntawd los Adas tseem nyob tau yim pua xyoo, thiab nws tseem muaj menyuam coob leej ntxiv. Nws tuag rau thaum nws hnubnyoog muaj cuaj pua peb caug xyoo. Thaum Xej hnubnyoog muaj ib puas tsib xyoos, nws muaj ib tug tub hu ua Enauses, dhau ntawd los nws tseem ua neej nyob tau yim pua xya xyoo, thiab nws tseem muaj menyuam coob leej ntxiv. Nws tuag rau thaum nws hnubnyoog muaj cuaj pua kaum ob xyoos. Thaum Enauses hnubnyoog muaj cuaj caum xyoo, nws muaj ib tug tub, hu ua Kenas, dhau ntawd los nws tseem ua neej nyob tau yim pua kaum tsib xyoos, thiab nws tseem muaj menyuam coob leej ntxiv. Nws tuag rau thaum nws hnubnyoog muaj cuaj pua tsib xyoos. Thaum Kenas hnubnyoog muaj xya caum xyoo, nws muaj ib tug tub hu ua Mahalalees, dhau ntawd los nws tseem ua neej nyob tau yim pua plaub caug xyoo, thiab nws tseem muaj menyuam coob leej ntxiv. Nws tuag rau thaum nws hnubnyoog muaj cuaj pua kaum xyoo. Thaum Mahalalees hnubnyoog muaj rau caum tsib xyoos, nws muaj ib tug tub hu ua Yales, dhau ntawd los nws tseem ua neej nyob tau yim pua peb caug xyoo, thiab nws tseem muaj menyuam coob leej ntxiv. Nws tuag rau thaum nws hnubnyoog muaj yim pua cuaj caum tsib xyoos. Thaum Yales hnubnyoog muaj ib puas rau caum ob xyoos, nws muaj ib tug tub hu ua Enauj, dhau ntawd los nws tseem ua neej nyob tau yim pua xyoo, thiab nws tseem muaj menyuam coob leej ntxiv. Nws tuag rau thaum nws hnubnyoog muaj cuaj pua rau caum ob xyoos. Thaum Enauj hnubnyoog muaj rau caum tsib xyoos, nws muaj ib tug tub hu ua Methuxelas, dhau ntawd los nws tseem ua neej nyob hwm thiab pehawm Vajtswv tau peb puas xyoo, thiab nws tseem muaj menyuam coob leej ntxiv. Nws ua neej nyob tau peb puas rau caum tsib xyoos. Enauj ua nws lub neej nrog Vajtswv sib raug zoo, ces nws txawm cia li ploj lawm, rau qhov Vajtswv coj nws mus lawm. Thaum Methuxelas hnubnyoog muaj ib puas yim caum xya xyoo, nws muaj ib tug tub hu ua Lamej, dhau ntawd los nws tseem ua neej nyob tau xya pua yim caum ob xyoos, thiab nws tseem muaj menyuam coob leej ntxiv. Nws tuag rau thaum nws hnubnyoog muaj cuaj pua rau caum cuaj xyoos. Thaum Lamej hnubnyoog muaj ib puas yim caum ob xyoos, nws muaj ib tug tub, Lamej muab tis npe hu ua Nau-es, Lamej hais tias, “Tus menyuam no yuav pab peb ris lub nra hnyav ntawm thaj av uas raug Vajtswv foom tsis zoo lawm kom sib.” Dhau ntawd los Lamej tseem ua neej nyob tau tsib puas cuaj caum tsib xyoos, thiab nws tseem muaj menyuam coob leej ntxiv. Nws tuag rau thaum nws hnubnyoog muaj xya pua xya caum xya xyoo. Thaum Nau-es hnubnyoog muaj tsib puas xyoo lawm, nws mam li muaj peb leeg tub, Xees, Has thiab Yafej. Thaum neeg huamvam mus nyob puv ntiajteb, thiab yug tau tej ntxhais coob, muaj ib cov timtswv qaum ntuj pom cov ntxhais ntawd zoo nkauj heev, yog li ntawd lawv txawm tuaj yuav cov ntxhais uas lawv nyiam ua pojniam. Ces tus TSWV hais tias, “Kuv yuav tsis pub neeg muaj sia nyob ntev mus ibtxhis, rau qhov lawv yog neeg uas txawj tuag. Txij no mus lawv tsuas muaj sia nyob ntev li ib puas nees nkaum xyoo lawm xwb.” Tiam ntawd thiab tiam tom qab no, muaj cov neeg loj heev nyob hauv ntiajteb no, lawv yog xeebntxwv ntawm neeg ntiajteb tej ntxhais uas yuav cov timtswv qaum ntuj. Lawv yog cov neeg uas ua tau heev thiab muaj koob meej nyob txheej thaum ub los lawm. Thaum tus TSWV pom txhua tus neeg uas nyob hauv ntiajteb no, muaj lub siab ua phem ua qias, thiab xav phem txhua lub sijhawm, tus TSWV tu siab thiab khuvxim qhov uas nws tsim neeg los nyob hauv lub ntiajteb no, nws tu siab kawg li. Yog li ntawd, tus TSWV thiaj hais tias, “Kuv yuav muab cov neeg uas kuv tau tsim no, thiab tej tsiaj loj tsiaj me, tej noog uas ya saum nruab ntug ua kom puastsuaj huv tibsi mus, kuv tu siab heev vim kuv tau tsim lawv los.” Tiamsis tus TSWV txaus siab heev rau Nau-es. tiamsis dua li lwm tus Vajtswv pom hais tias sawvdaws puavleej ua txhaum huv tibsi, thiab pheej ua kev phem kev qias heev zuj zus mus thoob plaws txhua qhov txhia chaw. Vajtswv saib lub ntiajteb, nws pom kev phem kev qias puv nkaus. Rau qhov tej neeg puavleej ua phem kawg li. Vajtswv thiaj hais rau Nau-es hais tias, “Kuv txiav txim siab yuav ua kom neeg tuag tu noob. Kuv yuav ua kom lawv raug kev puastsuaj tas huv tibsi mus, rau qhov lub ntiajteb no puv nkaus lawv txojkev ua nruj ua tsiv xwb. Koj cia li mus muab cov ntoo kubtwm los txua ua ib lub nkoj, ua kom muaj ntau chav rau hauv lub nkoj ntawd thiab muab roj ntoo los leem kom thoob plaws sab hauv thiab sab nraud huv tibsi. Txua lub nkoj ntawd qhov ntev kom muaj peb puas tshim, qhov dav kom muaj tsib caug tshim, thiab qhov siab kom muaj peb caug tshim. Muab vuas vov lub nkoj ntawd thiab tseg li ib tshim thoob plaws tsis txhob xov kom ti rau saum cov vuas. Lub nkoj ntawd ua kom muaj peb tshooj thiab ua lub qhovrooj rau ib sab. Kuv yuav tso dej los nyab lub ntiajteb no kom txhua tsav yam uas muaj sia nyob raug puastsuaj mus. Txhua yam uas nyob hauv ntiajteb no yuav tuag tas huv tibsi. Tiamsis kuv yuav coglus rau koj. Koj cia li coj koj tus pojniam, koj cov tub thiab koj cov nyab mus nyob hauv lub nkoj. Npaj txhua yam zaub mov coj mus rau koj tsevneeg thiab tej tsiaj tau noj nyob hauv lub nkoj.” Nau-es thiaj ua txhua yam raws li Vajtswv tau hais. Vajtswv hais rau Nau-es hais tias, “Koj thiab koj tsevneeg cia li mus nyob hauv lub nkoj. Tagnrho tej neeg uas nyob hauv ntiajteb tiam no, kuv pom koj tib leeg xwb thiaj li ua lub neej ncaj ncees. Coj tej tsiaj uas huv ib yam xya nkawm, tiamsis cov tsiaj uas tsis huv coj ib yam ib nkawg nrog koj mus nyob hauv lub nkoj. Dua li ntawd, coj tej noog ib yam xya nkawm mus thiab. Ua li no kom txhua yam tsiaj thiab tej noog thiaj yuav muaj sia nyob thiab huamvam rau hauv lub ntiajteb no dua ntxiv. Xya hnub saum no kuv yuav tso nag los plaub caug hnub plaub caug hmo rau hauv ntiajteb no, kom txhua yam muaj sia uas kuv tsim tseg lawm raug puastsuaj tas huv tibsi mus.” Nau-es ua txhua yam raws li Vajtswv tau samhwm rau nws lawm. Thaum dej nyab ntiajteb Nau-es hnubnyoog muaj rau pua xyoo. Nau-es thiab nws pojniam, nws cov tub thiab cov nyab puavleej mus nyob rau hauv lub nkoj kom tsis raug dej nyab. Txhua yam tsiaj thiab noog, tej maum tej txiv, tej poj tej lau, tsis hais cov uas huv lossis tsis huv, puavleej nrog Nau-es mus tibsi rau hauv nkoj, raws li Vajtswv samhwm lawm. Xya hnub tom qab dej nag txawm laub lug los nyab lub ntiajteb. Thaum Nau-es hnubnyoog muaj rau pua xyoo, txwm nkaus rau hnub kaum xya lub ob hli ntuj, hnub ntawd ntuj cia li tsaus dub nciab nag laub lug saum ntuj los rau hauv ntiajteb, thiab tej qhovdej txhawv ntawm tej hauv hav phwj yaws hauv av tuaj, thiab nag los rau hauv ntiajteb no tau plaub caug hnub plaub caug hmo. Tib hnub ntawd Nau-es thiab nws pojniam coj nkawd peb tug tub: Xees, Has, Yafej thiab peb tug nyab nrog nkawd mus nyob rau hauv lub nkoj. Txhua yam tsiaj, tsis hais tsiaj nyeg thiab tsiaj qus, tsiaj loj tsiaj me, nab, qav, kab, ntsaum thiab txhua yam noog puavleej nrog lawv mus rau hauv lub nkoj huv tibsi. Txhua yam tsiaj uas muaj sia, ib yam ib tug maum thiab ib tug txiv nrog Nau-es mus nyob hauv lub nkoj, raws li Vajtswv tau samhwm rau Nau-es lawm. Ces tus TSWV mam li kaw lub qhovrooj nkoj rau. Nag yeej los tsis tu li tau plaub caug hnub, thiab dej huam siab zuj zus ua rau lub nkoj nqa hlo ntab yees lawm. Dej thiaj nyab siab heev tuaj, thiab ntsawj lub nkoj ntab yees saum nplaim dej. Dej nyab siab zuj zus mus vov tagnrho tej hauv roob siab huv tibsi, thiab dej tseem nyab dhau tej hauv roob siab ntawd rau saud kaum tsib tshim lawm thiab. Txhua yam uas muaj sia nyob hauv lub ntiajteb no tuag tas, tsis hais nas, noog, kab, ntsaum, tsiaj nyeg, tsiaj qus thiab tej neeg yeej tsis seem hlo li. Txhua yam uas txawj ua pa nyob hauv ntiajteb no tuag tas huv tibsi. Tus TSWV ua rau ib puas tsav yam uas muaj sia nyob hauv ntiajteb no, neeg, tsiaj thiab noog tuag tu noob nrho. Tsuas tshuav Nau-es thiab cov uas nrog nws mus nyob hauv lub nkoj thiaj seem thiab muaj sia nyob xwb. Dej yeej tsis nqig li tau ib puas tsib caug hnub. Vajtswv yeej nco ntsoov Nau-es thiab txhua tsav yam tsiaj uas nrog nws nyob hauv lub nkoj, nws thiaj ua kom cua ntsawj, thiab dej pib nqig zuj zus mus. Tej qhovdej txhawv hauv ntiajteb txawm txhaws thiab rooj ntug txawm kaw. Nag cia li tu, thiab dej pib nqig zuj zus tau ib puas tsib caug hnub. Ces hnub kaum xya lub xya hli ntuj lub nkoj thiaj los khuam rau saum lub hauv roob Alalaj. Dej pheej nqig zuj zus lawm, thiab hnub xiab ib lub kaum hli ntuj thiaj pom tej hauv roob tshwm tuaj. Tom qab plaub caug hnub, Nau-es thiaj qhib qhovrai nkoj tso ib tug uablag ya tawm mus, tus uablag ntawd ya yuj mus yuj los txog thaum dej nqhuab tas. Tom qab ntawd, Nau-es rov tso dua ib tug nquab ya tawm mus xyuas saib dej nqig tas lawm los tsis tau, tus nquab nrhiav tsis tau chaw tsaws li, rau qhovdej tseem nyab puv nkaus hauv ntiajteb no. Tus nquab thiaj ya rov los tsaws ntawm lub nkoj, thiab Nau-es cev tes mus muab tus nquab los rau hauv lub nkoj. Nws tos tau xya hnub ntxiv thiab rov tso dua ib tug nquab ya tawm mus saib. Thaum yuav tsaus ntuj tus nquab thiaj kwv tau ib rev nplooj txiv ntoo roj ntawm nws tus kausncauj ya rov qab los cuag Nau-es. Thaum Nau-es pom li ntawd, nws thiaj paub hais tias dej nqig ti av lawm. Ces nws rov tos tau xya hnub thiab tso dua ib tug nquab ya mus saib dua ib zaug ntxiv, tiamsis zaum no tus nquab tsis ya rov los lawm. Nau-es hnubnyoog muaj rau pua ib xyoos, rau lub ib hlis ntuj hnub xiab ib, hnub ntawd dej nqhuab tagnrho huv tibsi lawm. Nau-es yaws tej vuas uas vov lub nkoj, tsa qhovmuag saib ibncig ntawd, thiab pom av twb pib qhuav lawm. Ces hnub nees nkaum xya lub ob hlis ntuj lub ntiajteb no qhuav tagnrho. Vajtswv hais rau Nau-es hais tias, “Koj thiab koj pojniam, koj cov tub thiab koj cov nyab cia li tawm hauv lub nkoj no mus. Nej coj tagnrho tej tsiaj tsis hais tsiaj nyeg, tsiaj qus, nab, qav thiab noog huv tibsi nrog nej mus, kom tej tsiaj ntawd huamvam mus puv ntiajteb.” Yog li ntawd, Nau-es thiaj coj nws pojniam, nws cov tub thiab cov nyab tawm hauv lub nkoj mus. Tagnrho tej tsiaj loj tsiaj me uas nyob saum npoo av, tej noog uas ya saum nruab ntug, nyias ua nyias ib pab tawm hauv lub nkoj los ua tsheej pab tsheej npoj raws li nyias yam tsiaj rau sab nraud. Nau-es teeb tau ib lub thaj rau tus TSWV, nws muab tej tsiaj huv thiab tej noog ib yam ib tug coj los tua thiab muab hlawv tagnrho fij rau Vajtswv saum lub thaj ntawd. Tej pa khoom fij ntawd tsw qab ntxiag ua rau tus TSWV txaus siab heev, thiab tus TSWV xav hais tias, “Kuv yuav tsis foom phem rau lub ntiajteb ib zaug ntxiv, vim tej uas neeg ua ntawd li lawm, kuv paub neeg yeej ibtxwm xav phem thaum yau los. Kuv yuav tsis ua rau txhua yam uas muaj sia kom raug puastsuaj li uas kuv tau ua tas los no lawm. Yog lub ntiajteb no tseem muaj nyob, yuav muaj caij cog qoobloo thiab muaj caij sau qoobloo, muaj caij ntuj kub ntuj no, muaj caij ntuj qhua thiab caij ntuj nag, muaj nruab hnub thiab hmo ntuj mus ibtxhis tsis kawg.” Vajtswv foom koob hmoov rau Nau-es thiab nws cov tub hais tias, “Nej yuav muaj tub muaj ki coob, kom nej thiaj muaj xeebntxwv huamvam mus nyob puv ntiajteb. Txhua yam tsiaj, tsis hais tsiaj nyeg, tsiaj qus, nab, qav, nas, noog thiab tej ntses puavleej ntshai nej. Kuv yuav muab tej tsiaj ntawd tso rau nej kav. Txij no mus kuv pub txhua yam tsiaj, noog thiab ntses rau nej noj, ib yam li tej zaub uas kuv twb pub rau nej noj lawm. Tiamsis nej tsis txhob noj tej nqaij uas txheem ntshav, rau qhov ntshav yog yam uas ua kom muaj txojsia. Yog leejtwg tua neeg, kuv yuav rau txim tuag rau tus ntawd. Yog tej tsiaj tom neeg tuag, kuv yuav rau txim tuag rau tej tsiaj ntawd ib yam nkaus. Yog leejtwg tua neeg, mas lwm tus yuav muab tus ntawd tua ib yam nkaus, rau qhov Vajtswv tsim neeg muaj tus yam ntxwv zoo li Vajtswv. “Nej yuav muaj tubki coob, kom nej tej xeebntxwv huamvam mus nyob puv lub ntiajteb.” Vajtswv hais rau Nau-es thiab nws cov tub hais tias, “Txij no mus kuv coglus tseg rau koj thiab koj cov xeebntxwv, thiab txhua yam uas muaj sia, txhua yam noog, thiab txhua yam tsiaj uas nrog nej tawm hauv lub nkoj los. Kuv coglus tseg rau nej hais tias: kuv yuav tsis tso dej los nyab txhua yam uas muaj sia kom puastsuaj li zaum no, thiab dej yuav tsis nyab lub ntiajteb kom puastsuaj li no ib zaug ntxiv lawm. Lub cim uas kuv coglus tseg mus ibtxhis rau nej thiab txhua yam uas muaj sia, mas yog kuv yuav ua kom muaj ib tug duab zaj sawv rau saum cov huab. Tus duab zaj ntawd yog lub cim uas kuv coglus tseg nrog neeg ntiajteb ntag. Thaum twg kuv ua kom muaj huab roos saum nruab ntug, ces tus duab zaj ntawd yuav tshwm tuaj rau saum cov huab. Kuv yuav nco ntsoov tej lus uas kuv cog tseg rau nej thiab txhua yam tsiaj, mas kuv yuav tsis tso dej los nyab txhua yam uas muaj sia kom puastsuaj ib zaug ntxiv li lawm. Thaum tus duab zaj sawv tshwm saum cov huab, kuv pom tus duab zaj ntawd, kuv yuav nco txog tej lus uas kuv tau cog tseg mus ibtxhis rau nej thiab txhua yam uas muaj sia nyob hauv ntiajteb no lawm. Tus duab zaj no yog lub cim uas kuv coglus tseg rau txhua yam uas muaj sia nyob hauv ntiajteb.” Nau-es cov tub uas tawm hauv lub nkoj los yog: Xees, Has thiab Yafej. (Has yog Kana-as txiv.) Nau-es peb leeg tub no yog txhua haivneeg uas nyob hauv ntiajteb no cov yawgkoob. Nau-es yog neeg ua liaj ua teb, nws yog thawj tug uas xub cog txiv hmab ntag. Thaum nws haus kua txiv hmab, ua rau nws qaug heev, thiab nws cia li hle ris tsho pw liabqab hauv tsevntaub. Thaum Has uas yog Kana-as txiv, pom nws txiv pw liabqab li ntawd, nws txawm tawm mus hais qhia rau nws ob tug tijlaug. Ces Xees thiab Yafej thiaj mus muab tau ib lub tsho ntev nthuav kiag rau nraum nkawd nraubqaum thiab muab khuam rau saum nkawd xubpwg. Nkawd thiaj kwv thaub qab mus rau hauv lub tsevntaub coj mus npog nkawd txiv, nkawd tig ntsejmuag rau ib cag vim nkawd tsis xav pom nkawd txiv liabqab li ntawd. Thaum Nau-es zoo cawv tsim los Nau-es paub tej uas nws tus tub ntxawg ua rau nws, Nau-es thiaj hais tias, “Kana-as raug foom tsis zoo lawm! Nws yuav ua nws ob tug tijlaug qhev. Cia li ua tus TSWV uas yog Xees tus Vajtswv tsaug! Kana-as yuav ua Xees qhev mus li. Thov kom Vajtswv ua rau Yafej cajces huamvam! Thov Vajtswv cia Yafej tej xeebntxwv nrog Xees haivneeg nyob ua ke. Kana-as yuav ua Yafej qhev.” Tom qab uas dej nyab ntiajteb tas lawm, Nau-es tseem ua neej nyob tau peb puas tsib caug xyoo ntxiv, thiab nws tuag rau thaum nws hnubnyoog muaj cuaj pua tsib caug xyoo. Tom qab uas dej nyab ntiajteb tas lawm, Nau-es peb tug tub: Xees, Has thiab Yafej mam muaj tubki; cov nram qab no yog lawv cov xeebntxwv. Yafej cov tub yog: Nkaumes, Makus, Madais, Yavas, Tunpas, Mesej thiab Tilas. Lawv cov no yog yawgkoob ntawm cov neeg uas tseem ris lawv lub xeem. Cov neeg Akenas, Lifathas thiab Taunkamas yog Nkaumes cov xeebntxwv. Yavas cov xeebntxwv yog Elisas, Xapees, Kilipulus thiab Ludes, lawv yog yawgkoob ntawm cov neeg uas mus nyob raws tej koog povtxwv thiab raws tej ntug hiavtxwv. Cov no yog Yafej cov xeebntxwv uas lawv nyias mus nyob nyias ib lub tebchaws raws li nyias xeem thiab nyias pab uas hais nyias yam lus. Has cov tub yog Kuses, Iziv, Linpias thiab Kana-as, lawv cov no yog yawgkoob ntawm cov neeg uas ris lawv lub xeem. Kuses cov xeebntxwv yog Senpas, Havilas, Satas, La-amas thiab Setekas. La-amas cov xeebntxwv yog cov neeg Senpas thiab cov Dedas. Kuses muaj ib tug tub hu ua Nimelaus, nws yog thawj tug neeg uas muaj hwjchim kav tebchaws nyob hauv ntiajteb no. Vajtswv pab nws, nws thiaj ua tau ib tug neeg tua nqaij uas nto npe heev, vim li no tej neeg thiaj pheej hais tias, “Thov tus TSWV ua rau koj kom koj yog ib tug neeg tua nqaij uas nyob nto npe ib yam li Nimelaus!” Lub nroog Npanpiloos, lub nroog Elekhas thiab lub nroog Akas, yog thawj cov nroog uas nws xub kav, peb lub nroog no puavleej nyob hauv tebchaws Npanpiloos. Nws tau tawm hauv lub tebchaws ntawd mus rau hauv tebchaws Axilias thiab mus tsim lub nroog Nineves, lub nroog Lehaunpaus Iles, lub nroog Kalas thiab lub nroog Lesees uas nyob hauv ntu nruab nrab ntawm lub nroog Nineves thiab lub tuamceeb nroog Kalas. Iziv cov xeebntxwv, mas yog cov Lidias, cov Anas, cov Lehaj, cov Nafetus, cov Pathelus, cov Kaxelus thiab cov Keletes; cov Filitees yog cov neeg uas hais los saum no tej xeebntxwv. Kana-as tus tub hlob yog Xidoos, thiab Hethes yog yawgkoob ntawm cov neeg uas tseem ris nkawd lub xeem. Kana-as yog yawgkoob ntawm cov Yenpus, cov Amaules, cov Kilekasis, cov Hivis, cov Alikites, cov Xinis, cov Alevas, cov Xemalis thiab cov Hamathis. Cov Kana-as muab faib ua tej xeem tso tawm nyias mus nyob nyias, ua rau cov Kana-as tus ciamteb uas pib ntawm Xidoos sab qabteb mus txog ntua rau Nkelales uas ze rau ntawd Nkaxas, thiab sab hnubtuaj mus txog rau ntawm Xaudoos, Kaumaulas, Amas thiab Xenpauyees uas nyob ze rau Lasas. Ntawm no yog Has cov xeebntxwv uas muab faib ua tej xeem thiab tso nyias mus nyob muaj nyias ib lub tebchaws, thiab nyias hais nyias ib yam lus. Xees uas yog Yafej tus tijlaug, nws yog yawgkoob ntawm cov neeg Henplais. Xees cov tub yog Elas, Asulas, Apakesas, Lus thiab Alas, lawv puavleej yog yawgkoob ntawm cov neeg uas ris lawv lub xeem. Alas cov xeebntxwv yog cov Uxes, cov Hules, cov Nkethes thiab cov Mesekis. Apakesas yog Selas txiv thiab Selas yog Enpes txiv. Enpes muaj ob tug tub: muaj ib tug hu ua Pelej, rau qhov tiam uas nws ua neej nyob ntawd cov neeg hauv ntiajteb no tau sib faib lawm, thiab dua li ib tug hu ua Yauketas. Yauketas cov xeebntxwv yog cov Alamudas, cov Selefas, cov Haxamaves, cov Yelas, cov Hadulas, cov Uxales, cov Nikelas, cov Unpales, cov Anpimales, cov Senpas, cov Ufilis, cov Havilas thiab cov Yaunpaj. Tagnrho cov no puavleej yog Yauketas cov xeebntxwv. Lub tebchaws uas lawv nyob mas txij ntua ntawm Masas mus txog rau ntawm Sefalas uas nyob tim lub laj roob sab hnubtuaj. Cov no yog Xees cov xeebntxwv uas lawv nyias mus nyob nyias ib lub tebchaws raws li nyias xeem thiab nyias pab uas hais nyias yam lus. Tagnrho cov neeg uas hais los no puavleej yog Nau-es cov xeebntxwv, ib tiam dhau rau ib tiam raws li lawv tej haivneeg. Tom qab uas dej nyab ntiajteb thiaj muaj ntau haivneeg tawm mus nyob puv lub ntiajteb no, lawv yog Nau-es cov tub tej xeebntxwv. Thaum chivkeeb tej neeg uas nyob hauv ntiajteb no puavleej paub ib yam lus thiab hais ib yam lus xwb. Thaum lawv tsiv mus rau sab hnubtuaj, lawv thiaj mus txog rau ntawm lub tiaj nrag Npanpiloos thiab lawv txawm ua zej ua zos nyob rau ntawm lub tiaj nrag ntawd. Lawv ib leeg hais rau ib leeg hais tias, “Cia li tuaj! Peb yuav khawb av los puab ua thwvcib thiab coj mus hlawv kom tawv.” Yog li ntawd, lawv thiaj muab cov thwvcib ntawd thiab roj av nplaum lo ua ke kom ruaj khov. Lawv hais tias, “Nimno peb cia li tsim ua ib lub nroog thiab puab ib tug pejthuam kom siab nto ntuj, peb thiaj muaj koob muaj npe nyob nto moo lug thiab tsis tawg khiav mus nyob ua sab ua sua thoob ntiajteb.” Ces tus TSWV thiaj los saib lub nroog thiab tus pejthuam uas cov neeg ntawd puab. Thiab tus TSWV hais tias, “Nimno lawv yog ib pab thiab hais ib yam lus; qhov no yog tej uas lawv nyuam qhuav pib ua xwb. Tsis ntev ntshai lawv yuav ua tau txhua yam raws li lawv xav ua! Peb cia li mus ua kom lawv tej lus sib txawv thiab nyias hais nyias ib yam lus ib leeg tsis totaub ib leeg.” Yog li ntawd, tus TSWV thiaj los ua rau lawv tawg mus nyob ri sua thoob plaws hauv lub ntiajteb, thiab lawv thiaj tso tseg tsis tsim lub nroog ntawd ntxiv lawm. Yog li ntawd, thiaj muab lub nroog ntawd hu ua Npanpiloos, rau qhov tus TSWV ua rau txhua haivneeg nyias hais nyias ib yam lus, thiab nws ua rau lawv tawg ri sua ntawm qhov chaw ntawd mus nyob thoob plaws hauv lub ntiajteb no. Ntawm no mus yog Xees cov xeebntxwv. Tom qab uas dej nyab ntiajteb tas tau ob xyoos, Xees muaj hnubnyoog ib puas xyoo, nws muaj ib tug tub hu ua Apakhesas; dhau ntawd, nws tseem ua neej nyob tau tsib puas xyoo thiab muaj menyuam coob leej ntxiv. Thaum Apakhesas hnubnyoog muaj peb caug tsib xyoos, nws muaj ib tug tub hu ua Selas, dhau ntawd, nws tseem ua neej nyob tau plaub puas peb xyoos thiab muaj menyuam coob leej ntxiv. Thaum Selas hnubnyoog muaj peb caug xyoo, nws muaj ib tug tub hu ua Enpes; dhau ntawd, nws tseem ua neej nyob tau plaub puas peb xyoos thiab muaj menyuam coob leej ntxiv. Thaum Enpes hnubnyoog muaj peb caug plaub xyoos, nws muaj ib tug tub hu ua Pelej; dhau ntawd, nws tseem ua neej nyob tau plaub puas peb caug xyoo thiab muaj menyuam coob leej ntxiv. Thaum Pelej hnubnyoog muaj peb caug xyoo, nws muaj ib tug tub hu ua Le-us; dhau ntawd, nws tseem ua neej nyob tau ob puas cuaj xyoos thiab muaj menyuam coob leej ntxiv. Thaum Le-us hnubnyoog muaj peb caug ob xyoos, nws muaj ib tug tub hu ua Selus; dhau ntawd, nws tseem ua neej nyob tau ob puas xya xyoo thiab muaj menyuam coob leej ntxiv. Thaum Selus hnubnyoog muaj peb caug xyoo, nws muaj ib tug tub hu ua Nahaus; dhau ntawd, nws tseem ua neej nyob tau ob puas xyoo thiab muaj menyuam coob leej ntxiv. Thaum Nahaus hnubnyoog muaj nees nkaum cuaj xyoos, nws muaj ib tug tub hu ua Telas; dhau ntawd, nws tseem ua neej nyob tau ib puas kaum cuaj xyoos thiab muaj menyuam coob leej ntxiv. Tom qab uas Telas hnubnyoog muaj xya caum xyoo, nws mam li muaj peb tug tub uas yog: Anplas, Nahaus thiab Halas. Ntawm no mus yog Telas cov xeebntxwv. Telas cov tub yog Anplas, Nahaus thiab Halas. Halas yog Lauj txiv, Halas tuag ua ntej nws txiv thaum tseem nyob hauv lub nroog Ules, hauv tebchaws Npanpiloos uas yug nws lawm. Anplas yuav Xalais ua pojniam thiab Nahaus yuav Halas uas yog Ixakhas txiv tus ntxhais Milekas ua pojniam. Xalais yeej ibtxwm xeeb tsis taus tub. Telas coj nws tus tub Anplas, nws tus xeebntxwv Lauj uas yog Halas tus tub, thiab nws tus nyab Xalais uas yog Anplas tus pojniam, tsiv tawm hauv lub nroog Ules hauv tebchaws Npanpiloos mus nyob rau tebchaws Kana-as. Tiamsis thaum lawv tsiv los txog ntawm Halas, lawv txawm los nyob rau qhov ntawd. Telas tuag rau hauv lub nroog ntawd, thaum nws hnubnyoog muaj ob puas tsib xyoo. Vajtswv hais rau Anplas hais tias, “Koj cia li tso koj lub tebchaws, koj cov kwvtij neejtsa, thiab koj txiv lub tsev tseg, thiab sawv kev mus rau nram lub tebchaws uas kuv yuav qhia rau koj. Kuv yuav pub koj muaj xeebntxwv coob, thiab lawv yuav ua ib haivneeg tseemceeb. Kuv yuav foom koob hmoov rau koj, kom koj lub koob lub npe nyob nto moo lug, thiab koj yuav ua rau lwm leej lwm tus tau txais koob hmoov. Kuv yuav foom koob hmoov rau tus uas ua zoo rau koj, Tiamsis kuv yuav foom tsis zoo rau tus uas ua phem rau koj. Thiab kuv yuav foom koob hmoov ntawm koj mus rau txhua haivneeg uas nyob thoob plaws ntiajteb.” Thaum Anplas hnubnyoog muaj xya caum tsib xyoos, nws txawm tsiv tawm hauv lub nroog Halas raws li tus TSWV tau hais rau nws lawm, thiab Lauj nrog nws mus. Anplas coj Xalais uas yog nws tus pojniam, nws tus kwv Halas tus tub Lauj, thiab tagnrho nkawd tej cuabtam, nkawd cov tubqhe thiab ntxhais qhev uas nyob hauv lub nroog Halas, thiab lawv txawm sawv kev mus rau nram tebchaws Kana-as lawm. Thaum lawv tsiv mus txog rau hauv tebchaws Kana-as lawm, Anplas taug kev hauv lub tebchaws ntawd los txog rau ntawm tsob ntoo xeeb hauv Maules uas yog qhov chaw tseemceeb hauv lub nroog Sekhees. (Thaum lub sijhawm ntawd cov neeg Kana-as tseem nyob hauv lub tebchaws ntawd.) Tus TSWV tshwm rau Anplas pom thiab hais rau nws hais tias, “Lub tebchaws no yog lub uas kuv yuav muab pub rau koj cov xeebntxwv nyob.” Ces Anplas thiaj teeb tau ib lub thaj rau ntawm qhov chaw ntawd rau tus TSWV uas tau los tshwm rau nws pom. Tom qab ntawd, Anplas thiaj txav chaw mus rau yav qabteb ntawm lub laj roob uas nyob ntawm lub nroog Npethees sab hnubtuaj thiab nws tsa tsevntaub nyob rau ntawd. Lub nroog Npethees nyob sab hnubpoob thiab lub nroog A-is nyob sab hnubtuaj. Thaum Anplas nyob qhov ntawd nws teeb tau ib lub thaj rau tus TSWV thiab pehawm tus TSWV. Ces nws tsiv ib qhov rau ib qhov, thiaj tsiv mus nyob rau tebchaws Kana-as yav qabteb lawm. Lub sijhawm ntawd muaj kev tshaib nqhis nyob hauv tebchaws Kana-as, Anplas thiaj tsiv mus nyob nram tebchaws Iziv tau ib ntus. Thaum nws tabtom mus yuav txog ntawm tus ciamteb mus rau hauv tebchaws Iziv, nws hais rau nws tus pojniam hais tias, “Kuv paub koj yog ib tug pojniam uas zoo nkauj heev. Thaum cov Iziv pom koj, lawv yuav hais tias, koj yog kuv tus pojniam. Ces lawv yuav muab kuv tua povtseg thiab tseg koj cia. Koj cia li hais rau lawv tias, koj yog kuv tus muam xwb; yog vim muaj koj lawv thiaj yuav tseg kuv txojsia thiab ua zoo rau kuv.” Thaum Anplas mus dhau plaws ciamteb rau hauv tebchaws Iziv lawm, cov Iziv pom nws tus pojniam zoo nkauj heev. Muaj qee leej nomtswv pom Xalais zoo nkauj heev, lawv thiaj mus piav qhia rau Falaus, yog li ntawd, luag thiaj tuaj coj Xalais mus rau hauv Falaus lub loog. Vim muaj Xalais, Falaus thiaj ua zoo heev rau Anplas thiab muab yaj, muab tshis, muab nyuj, muab neesluav, muab qhev thiab muab ntxhuav pub rau Anplas. Tiamsis vim Falaus tau coj Xalais mus, tus TSWV thiaj tso tej kab mob phem los raug Falaus thiab cov neeg hauv nws lub loog hnyav heev. Falaus thiaj tso neeg mus cuag Anplas thiab nug nws hais tias, “Vim li cas koj ua li no rau kuv? Ua li cas koj tsis qhia ncaj rau kuv paub hais tias, Xalais yog koj tus pojniam? Vim li cas koj thiaj hais tias, nws yog koj tus muam, thiab cia kuv coj nws mus yuav ua kuv tus pojniam? Koj tus pojniam nyob ntawm no, cia li coj nws thiab khiav tawm mus!” Falaus samhwm rau nws cov tubtxib, lawv thiaj ntiab Anplas tawm hauv lawv lub tebchaws, nrog nws tus pojniam thiab coj txhua yam uas yog nws tug huv tibsi mus. Anplas thiaj coj nws tus pojniam thiab txhua yam uas yog nws tug, thiab Lauj nrog nws tawm hauv tebchaws Iziv mus txog rau pem Nenkes hauv tebchaws Kana-as sab qabteb. Anplas yog ib tug neeg muaj txiag npluanuj, muaj yaj, muaj tshis, muaj nyuj, muaj nyiaj thiab muaj kub ntau heev. Ces Anplas tawm ntawm qhov chaw ntawd thiab nws tsiv ib qho dhau rau ib qho, rov los rau hauv Npethees. Nws los txog ntawm qhov chaw uas nyob nruab nrab ntawm Npethees thiab A-is uas yav thaud nws tau los tsuam chaw nyob ib ntus thiab nws tau teeb ib lub thaj. Nws thiaj pehawm tus TSWV nyob qhov ntawd. Lauj tus uas nrog Anplas tsiv ua ke, kuj muaj yaj, muaj tshis, muaj nyuj, muaj cuab muaj yig thiab muaj tubtxib huv tibsi. Yog li ntawd, thiaj tsis muaj tshav zaub txaus rau nkawd tej tsiaj nyob ua ke, rau qhov nkawd muaj tsiaj txhu coob heev. Ces Anplas cov tub yug tsiaj thiab Lauj cov tub yug tsiaj thiaj sib cav sib ceg nyob tsis taus ua ke. (Lub sijhawm ntawd cov neeg Kana-as thiab cov neeg Pelixes tseem nyob hauv lub tebchaws ntawd.) Anplas thiaj hais rau Lauj hais tias, “Wb yog kwvtij txiv tub tsis tsimnyog cia koj cov neeg thiab kuv cov neeg sib cav sib ceg li no. Wb cia li sib faib nyias mus nyob nyias. Xaiv saib koj nyiam thaj chaw twg. Yog koj mus nyob sab laug, kuv mam mus nyob sab xis, yog koj mus nyob sab xis, kuv mam mus nyob sab laug.” Lauj tig saib ibncig ntawd thiab pom tagnrho lub Hav Yauladees mus thoob plaws rau ntawm Xau-as, mas muaj dej txhawv txhua qhov, ib yam li tus TSWV lub Vaj lossis zoo ib yam li lub tebchaws Iziv ntag. (Lub sijhawm ntawd yog ua ntej tus TSWV hlawv lub nroog Xaudoos thiab lub nroog Kaumaulas.) Yog li ntawd, Lauj thiaj hom tagnrho lub Hav Yauladees thiab nws thiaj tsiv mus nyob rau sab hnubtuaj lawm. Qhov uas nkawd tau sib ncaim yog li ntawd. Anplas nyob rau sab tebchaws Kana-as, thiab Lauj mus nyob hauv tej nroog uas nyob raws hav thiab mus tsa tsevntaub nyob ze lub nroog Xaudoos. Cov neeg Xaudoos ua phem ua qias thiab ua txhaum tawmtsam tus TSWV loj kawg li. Tom qab uas Lauj ncaim lawm, tus TSWV hais rau Anplas hais tias, “Koj tuaj ntawm qhov chaw uas koj nyob ko, tsa qhovmuag ua tib zoo saib mus rau sab qabteb thiab qaumteb, hnubtuaj thiab hnubpoob. Kuv yuav muab tagnrho lub tebchaws uas koj qhovmuag pom ntawd pub rau koj thiab koj cov xeebntxwv, thiab lub tebchaws ntawd yuav yog koj tug mus ibtxhis li. Kuv yuav pub kom koj muaj xeebntxwv coob heev uas tsis muaj leejtwg yuav suav txheeb li, yog leejtwg suav txheeb tej hmoov av hauv ntiajteb no, mas thiaj yuav suav txheeb koj cov xeebntxwv! Nimno, koj cia li sawv kev mus kom thoob plaws lub tebchaws no, rau qhov kuv yuav muab tagnrho lub tebchaws no pub rau koj.” Yog li ntawd, Anplas thiaj li tsiv tawm ntawm thaj chaw ntawd thiab mus tsa tsevntaub nyob ze tsob ntoo xeeb ntawm thaj chaw Males hauv lub nroog Henploos, thiab thaum nyob ntawd nws teeb tau ib lub thaj ua chaw fij khoom rau tus TSWV. Muaj plaub tug vajntxwv uas yog: Alafees tus uas kav lub nroog Npanpiloos, Ali-aus tus uas kav lub nroog Elasas, Khedaula-au-mes tus uas kav lub nroog Elas thiab Tidas tus uas kav lub nroog Nkauyees, tau tawm mus ua rog rau tsib tug vajntxwv uas yog: Npelav tus uas kav lub nroog Xaudoos, Npisas tus uas kav lub nroog Kaumaulas, Sinaj tus uas kav lub nroog Amas, Semenpes tus uas kav lub nroog Xenpauyees thiab tus vajntxwv uas kav lub nroog Npelas, (lossis yog Xau-as). Tsib tug vajntxwv no thiaj koom siab ua ke tuaj ib tog thiab txhij tubrog mus nyob rau hauv lub Hav Xidees uas tamsim no yog lub pasdej Hiavtxwv Tuag ntag. Lawv poob mus ua Khedaula-au-mes pejxeem tau kaum ob xyoos, tiamsis xyoo kaum peb lawv rov tig ntxeev siab sawv tawmtsam nws. Ces xyoo kaum plaub Khedaula-au-mes thiab cov vajntxwv uas tuaj nws tog nrog lawv cov tubrog tuaj tua cov Lefayees hauv lub nroog Atelaus Kalenais, cov Xuximes uas nyob hauv lub nroog Hames, cov Emis uas nyob hauv lub tiaj nrag Kili-athayees, thiab cov Haulis uas nyob saum cov laj roob Edoos, lawv thiaj muab cov neeg no raws tua mus ti nkaus rau ntawm ntug nroog Epalas uas nyob tom tiaj suabpuam. Ces lawv txawm tig rov qab los txog hauv lub nroog Kades (lossis yog Emisapas). Lawv ntaus tau tagnrho sab tebchaws Amalej thiab lawv tua yeej cov neeg Amaules uas nyob rau hauv lub nroog Haxaxoos Tamaj. Ces cov vajntxwv uas kav lub nroog Xaudoos, Kaumaulas, Amas, Xenpauyees thiab Npelas (lossis yog Xau-as), thiaj tau txhij lawv cov tubrog tuaj ntaus rog rau hauv lub Hav Xidees thiab tua Khedaula-au-mes uas yog tus vajntxwv kav lub nroog Elas, Tidas uas yog tus vajntxwv kav lub nroog Nkauyees, Alafees uas yog tus vajntxwv kav lub nroog Sinas, thiab Ali-aus uas yog tus vajntxwv kav lub nroog Elasas, tsib tug vajntxwv no ua rog rau plaub tug vajntxwv. Lub tiaj ntawd muaj qhov roj av nplaum ntau heev, ces thaum tus vajntxwv uas kav lub nroog Xaudoos thiab tus vajntxwv uas kav lub nroog Kaumaulas nrhiav kev khiav tawm hauv tshavrog, nkawd thiaj poob cov qhov roj av nplaum ntawd, tiamsis dua li peb tug vajntxwv khiav dim nce mus rau pem roob lawm. Ces plaub tug vajntxwv ntawd thiaj muab txhua yam uas muaj nyob hauv lub nroog Xaudoos thiab Kaumaulas, thiab tej zaub mov huv tibsi, coj khiav mus lawm. Lauj uas yog Anplas tus kwv Halas tus tub, nws nyob hauv lub nroog Xaudoos, lawv thiaj ntes tau nws thiab huab nws tej cuabtam coj mus lawm dulug. Tiamsis muaj ib tug txivneej khiav dim hauv tshavrog los hais txhua yam qhia rau Anplas uas yog neeg Henplais uas nyob ze rau ntawm Males tus uas yog neeg Amaules cov ntoo xeeb. Males thiab nws ob tug tijlaug, Esekaus thiab Aneles puavleej koom tes tuaj Anplas tog. Thaum Anplas hnov dheev hais tias, yeebncuab ntes tau nws tus kwv Halas tus tub Lauj lawm, nws thiaj hu tagnrho peb puas kaum yim leej tubrog hauv nws lub yeej tawm mus caum tua plaub tug vajntxwv ntawd txog ntua hauv lub nroog Das. Thaum tsaus ntuj lawm nws thiaj muab nws cov tubrog faib ua tej pab mus tua cov yeebncuab, plaub tug vajntxwv ntawd thiaj swb tawg khiav tas. Anplas lawv tseem raws tua mus txog ntua pem lub nroog Haunpas uas nyob ntawm Damaxes sab qaumteb, Anplas txeeb tau txhua yam uas luag coj mus lawm rov qab los huv tibsi. Thiab nws tseem coj tau nws tus kwv Halas tus tub Lauj thiab Lauj tej cuabtam, cov pojniam thiab tej neeg uas raug luag ntes tau lawm rov los tagnrho li. Thaum Anplas mus tua yeej vajntxwv Khedaula-au-mes thiab peb tug vajntxwv uas tuaj Khedaula-au-mes tog rov qab los, tus vajntxwv uas kav lub nroog Xaudoos thiaj tuaj tos nws ntawm lub Hav Saves (lossis hu ua lub Hav Vajntxwv). Mekhixedes uas ua vajntxwv kav lub nroog Xalees thiab ua ib tug povthawj rau Vajtswv tus uas muaj hwjchim loj kawg nkaus, thiaj coj ncuav thiab cawv txiv hmab tuaj pub rau Anplas, thiab foom koob hmoov rau nws hais tias, “Thov kom Vajtswv tus uas muaj hwjchim loj kawg nkaus, tus uas tsim lub ntuj thiab lub ntiajteb foom koob hmoov rau Anplas! Thov kom Vajtswv tus uas muaj hwjchim loj kawg nkaus uas tau pab koj ntaus yeej koj cov yeebncuab tau txais koob meej!” Thiab Anplas muab tej khoom uas nws mus txeeb tau rov qab los ntawd ib feem kaum pub rau Mekhixedes. Tus vajntxwv uas kav lub nroog Xaudoos hais rau Anplas hais tias, “Koj yuav txhua yam khoom huv tibsi, tiamsis thov muab kuv cov pejxeem rov qab rau kuv xwb.” Anplas teb hais tias, “Kuv tsa tes coglus tabmeeg tus TSWV, Vajtswv tus uas muaj hwjchim loj kawg nkaus, tus uas tsim lub ntuj thiab lub ntiajteb hais tias, kuv tsis yuav ib yam dabtsi uas yog koj tug. Txawm yog ib txoj xov lossis ib txoj nyuag hlua khau khiab, kuv twb tsis yuav. Koj thiaj yuav khav tsis tau hais tias, ‘Kuv yog tus uas tsa Anplas npluanuj ntag.’ Kuv yuav tsis nqa ib yam dabtsi mus rau kuv yuav li. Kuv tsuas lees yuav tej zaub mov uas kuv cov tubrog muab noj tas lawm xwb. Tiamsis cov uas koom tes pab kuv, Aneles, Esekaus thiab Males, cia lawv yuav tej uas yog lawv tug.” Tom qab ntawd, Anplas ua yogtoog thiab hnov tus TSWV hais rau nws tias, “Anplas, koj tsis txhob ntshai. Kuv yuav ua daim hlau thaiv koj thiab kuv yuav muab tej nqi zog uas zoo heev rau koj.” Tiamsis Anplas teb hais tias, “Tus TSWV uas kav ib puas tsav yam, kuv yeej ibtxwm tsis muaj tub, koj yuav muab nqi zog rau kuv ua dabtsi? Tus uas yuav tuav kuv tej qubtxeeg qubteg, ces yog Eli-exes uas yog neeg Damaxes nkaus xwb. Koj twb tsis pub menyuam rau kuv, ntshai yuav kawg kuv muab kuv tej qubtxeeg qubteg tso rau kuv ib tug tubqhe uas yug hauv kuv tsev ua tus tuav.” Ces dhau ntawd los nws rov qab hnov tus TSWV hais rau nws ib zaug ntxiv tias: “Tus tubqhe Eli-exes yuav tsis tau ua tus tuav koj tej qubtxeeg qubteg, koj tus tub uas koj yug thiaj yog tus uas yuav tuav koj tej qubtxeeg qubteg.” Vajtswv coj Anplas tawm mus rau nraum zoov thiab hais rau nws tias, “Koj tsa qhovmuag saib saum ntuj thiab suav cov hnubqub saud saib koj suav puas txheeb, koj yuav muaj xeebntxwv coob npaum li tej hnubqub ntawd ntag.” Anplas thiaj cia siab ntsoov rau tus TSWV tej lus, vim nws muaj kev cia siab, tus TSWV thiaj txaus siab heev rau nws thiab suav hais tias nws yog ib tug neeg ncaj ncees. Ces tus TSWV hais rau nws tias, “Kuv yog tus TSWV uas coj koj kev tawm hauv lub nroog Ules uas nyob hauv tebchaws Npanpiloos los, thiab kuv yuav muab lub tebchaws no pub rau koj ua koj tug mus li.” Tiamsis Anplas nug hais tias, “Tus TSWV uas kav ib puas tsav yam, yuav ua li cas kuv thiaj paub hais tias, lub tebchaws no yog kuv tug tiag?” Tus TSWV teb hais tias, “Koj cia li coj ib tug nyuj, ib tug tshis thiab ib tug laug yaj, mas peb tug tsiaj no ib tug twg yuav tsum muaj hnubnyoog peb xyoos, ib tug nquab dawb thiab ib tug nquab nyeg tuaj fij rau kuv.” Anplas coj tej tsiaj ntawd tuaj tua fij rau Vajtswv, thiab muab tej tsiaj ntawd phua ua ob sab, muab ib sab tso rau ib qho ua ob leej sib ncag zos, tiamsis nws tsis phua ob tug noog. Thaum dav npoj ya los tsaws rau saum cov nqaij ntawd, nws txawm muab tej dav ntawd lawv ya huv tibsi lawm. Thaum uas lub hnub yuav poob qho, Anplas txawm tsaug zog heev, thiab muaj ib qho tsaus nti los roos nkaus nws ua rau nws ntshai kawg li. Tus TSWV hais rau nws tias, “Koj tej xeebntxwv yuav mus nrog cov neeg txawv tebchaws nyob, lawv yuav mus ua luag qhev nyob lub tebchaws ntawd thiab yuav raug kev quab yuam tsimtxom mus txog plaub puas xyoo. Tiamsis kuv yuav rau txim rau haivneeg uas quab yuam lawv ua qhev ntawd, thiab thaum lawv tawm hauv lub tebchaws ntawd los, lawv yuav nqa nyiaj txiag txhua yam ntau heev nrog lawv los. Tiamsis koj yuav ua neej nyob laus nkoos, kaj siab lug mus txog hnub tuag, thiab koj tej xeebntxwv yuav coj koj lub cev mus faus. Tom qab uas dhau plaub tiam neeg lawm, koj cov xeebntxwv yuav tau rov qab los rau ntawm no, rau qhov kuv yuav tsis ntiab cov neeg Amaules tawm mus txog thaum lawv ua kev phem kev qias uas txaus kuv rau txim rau lawv tso.” Thaum hnubpoob qho thiab tsaus ntuj kiag lawm, tamsim ntawd txawm muaj ib cubtawg ncho pa auv niab thiab ib teg tsau cig lam lug tshwm los phua plhawv kis nruab nrab ntawm cov nqaij tsiaj ntawd mus lawm. Hnub ntawd tus TSWV txawm coglus tseg rau Anplas hais tias, “Kuv yuav muab tagnrho lub tebchaws no pub rau koj cov xeebntxwv, txij ntua ntawm Iziv tus ciamteb los mus txog ntua rau ntawm tus Dej Efalates, dua li ntawd, kuv tseem yuav muab cov Kenais, cov Kenixis, cov Kamoos, cov Hitis, cov Pelixes, cov Lefayees, cov Amaules, cov Kana-as, cov Kikasis thiab cov Yenpus tej tebchaws pub rau koj cov xeebntxwv huv tibsi.” Xalais uas yog Anplas tus pojniam yeej ibtxwm xeeb tsis taus tub li. Tiamsis nws muaj ib tug ntxhais qhev uas yog neeg Iziv hu ua Hankas, ces Xalais txawm hais rau Anplas hais tias, “Tus TSWV tseem tsis tau pub kuv muaj menyuam. Koj cia li mus nrog kuv tus ntxhais qhev pw, tej zaum nws yuav muaj taus menyuam rau kuv.” Anplas pom zoo ua raws li Xalais hais ntawd. Yog li ntawd, Xalais thiaj muab Hankas rau Anplas ua niamyau. (Qhov no yog tom qab uas Anplas twb los nyob rau hauv tebchaws Kana-as tau kaum xyoo lawm.) Anplas mus nrog Hankas pw, ces Hankas txawm xeeb tub. Thaum Hankas paub hais tias nws xeeb tub lawm, nws txawm khavtheeb heev thiab saib tsis taus Xalais. Ces Xalais hais rau Anplas hais tias, “Twb yog vim koj ntag Hankas thiaj li saib tsis taus kuv. Kuv yog tus uas muab nws rau koj, tiamsis txij thaum nws paub hais tias nws xeeb tub lawm, nws txawm cia li saib tsis taus kuv. Thov kom tus TSWV txiav txim rau wb, saib yog koj ua txhaum lossis yog kuv ua txhaum!” Anplas teb hais tias, “Nws yog koj tus ntxhais qhev uas koj tswjhwm, koj cia li ua rau nws raws li koj pom zoo.” Ces Xalais thiaj li tsimtxom Hankas heev, Hankas thiaj li khiav lawm. Tus TSWV tus timtswv los ntsib Hankas rau ntawm ib tug dej txhawv uas nyob hauv tiaj suabpuam ntawm txojkev uas mus rau hauv lub nroog Sules thiab nug hais tias, “Hankas uas yog Xalais tus ntxhais qhev, koj tuaj dabtsi ntawm no thiab koj yuav mus qhov twg?” Hankas teb hais tias, “Twb yog kuv khiav Xalais uas yog kuv tus tswv.” Tus timtswv hais tias, “Koj cia li rov qab mus cuag Xalais, thiab ua nws tus ntxhais qhev xwb.” Ces tus timtswv rov hais ntxiv tias, “Kuv yuav pub rau koj muaj xeebntxwv coob heev, kom tsis muaj leejtwg yuav suav txheeb li. Koj yuav yug tau ib tug tub, thiab koj yuav tis nws lub npe hu ua Yisamayees, rau qhov tus TSWV twb hnov koj lub suab quaj vim koj txojkev txomnyem siab lawm. Tiamsis koj tus tub yuav ua lub neej li tus neesluav qus, nws yuav tawmtsam txhua leej txhua tus, thiab txhua leej txhua tus yuav tawmtsam nws. Nws yuav ua neeg twmzeej tsis nrog kwvtij nyob ua ke.” Hankas xav hais tias, “Puas yog kuv pom Vajtswv tiag, thiab kuv tseem muaj sia nyob qhia txog zaj no?” Yog li ntawd, nws thiaj tis npe rau tus TSWV uas nrog nws hais lus ntawd tias, “Vajtswv Tus Uas Pom Tau.” Vim li ntawd, neeg thiaj hu lub qhovtshij uas nyob nruab nrab ntawm Kades thiab Npeledis hais tias, “Tus uas pom kuv thiab tus uas muaj Sia Nyob Lub Qhovtshij.” Hankas yug tau ib tug tub rau Anplas, thiab Anplas tis tus tub ntawd lub npe hu ua Yisamayees. Lub sijhawm ntawd Anplas hnubnyoog muaj yim caum rau xyoo. Thaum Anplas hnubnyoog muaj cuaj caum cuaj xyoos, tus TSWV tau rov los tshwm rau nws pom thiab hais tias, “Kuv yog Vajtswv tus uas muaj hwjchim loj kawg nkaus. Koj cia li mloog kuv lus thiab ua lub neej ncaj ncees mus kom tas koj simneej. Kuv yuav coglus tseg rau koj thiab yuav pub kom koj muaj xeebntxwv coob heev.” Anplas txawm txhos caug ntua nyo hau ua ntsejmuag ti nkaus av, thiab Vajtswv hais tias, “Tej lus uas kuv cog tseg rau koj muaj li no: koj yuav tau ua ntau haivneeg tus yawgkoob. Koj lub npe yuav tsis hu ua Anplas ntxiv lawm, tiamsis yuav hu ua Anplahas, rau qhov kuv tsa koj ua ntau haivneeg tus yawgkoob. Kuv yuav pub kom koj muaj xeebntxwv huamvam coob heev. Koj tej xeebntxwv yuav mus ua ntau haivneeg, thiab muaj qee leej yuav ua vajntxwv. “Kuv yuav ceev kuv tej lus cog tseg rau koj thiab koj tej xeebntxwv mus lawm yav tom ntej ib tiam dhau rau ib tiam uas yog cov lus cog tseg mus ibtxhis tsis kawg li. Kuv yuav yog koj tus Vajtswv thiab koj tej xeebntxwv tus Vajtswv. Kuv yuav muab lub tebchaws uas tamsim no koj tseem ua neeg poob tebchaws nyob no pub rau koj thiab koj tej xeebntxwv. Tagnrho lub tebchaws Kana-as no yuav yog koj tej xeebntxwv li mus ibtxhis, thiab kuv yuav yog lawv tus Vajtswv.” Vajtswv hais rau Anplahas hais tias, “Koj yuav tsum ceev cov lus cog tseg no, rau koj thiab koj tej xeebntxwv ib tiam dhau rau ib tiam mus ibtxhis li. Koj thiab koj tej xeebntxwv yuav tsum ua kevcai txiav tawv rau txhua tus txivneej. Txhua tus yuav tsum tau ua kevcai txiav tawv, thiab txoj kevcai txiav ntawm nqaij tawv no thiaj ua lub cim qhia hais tias, kuv cov lus cog tseg rau nej yeej nyob mus ibtxhis. Txhua tus txivneej uas nws tsis tau ua kevcai txiav tawv yuav tau muab nws rho tawm hauv kuv haivneeg, rau qhov nws tsis ceev lo lus cog tseg ntawd.” Vajtswv hais rau Anplahas hais tias, “Koj tsis txhob hu koj tus pojniam ua Xalais lawm, txij hnub no mus koj yuav tsum hu nws lub npe ua Xalas lawm xwb. Kuv yuav foom koob hmoov rau nws thiab kuv yuav pub nws muaj ib tug tub rau koj. Kuv yuav foom koob hmoov rau nws thiab nws yuav tau ua ntau haivneeg leej niam, thiab nws tej xeebntxwv yuav muaj qee leej sawv ua vajntxwv.” Anplahas txawm txhos caug ntua nyo hau ua ntsejmuag ti nkaus av, tiamsis nws tseem luag twjywm hauvsiab thaum nws xav txog hais tias, “Yuav ua li cas tus neeg uas hnubnyoog muaj ib puas xyoo lawm tseem muaj taus menyuam? Xalas twb muaj cuaj caum xyoo lawm, es nws tseem yuav xeeb taus tub thiab los?” Anplahas hais rau Vajtswv hais tias, “Thov koj cia li foom koob hmoov rau Yisamayees xwb.” Ces Vajtswv hais tias, “Tsis yog li ntawd, Xalas tus uas yog koj tus pojniam yuav yug ib tug tub rau koj thiab koj yuav tis nws lub npe hu ua Ixaj. Kuv yuav ceev kuv tej lus cog tseg nrog nws thiab nws tej xeebntxwv mus ibtxhis. Yog lo lus cog tseg uas nyob mus ibtxhis tsis kawg li. Kuv hnov tej lus uas koj tau thov kuv hais txog Yisamayees, yog li ntawd, kuv yuav foom koob hmoov rau nws thiab pub nws muaj tubki thiab xeebntxwv coob heev. Nws yuav ua kaum ob tug vajntxwv leej txiv, thiab kuv yuav pub kom nws tej xeebntxwv ua ib haivneeg uas tseemceeb. Tiamsis kuv yuav ceev kuv tej lus cog tseg nrog koj tus tub Ixaj, yog tus uas lwm xyoo rov txog lub caij no Xalas yuav yug rau koj.” Thaum Vajtswv hais tas rau Anplahas lawm, nws txawm ncaim Anplahas mus lawm. Anplahas ua raws li Vajtswv hais, tib hnub ntawd xwb nws txawm ua kevcai txiav tawv rau nws tus tub Yisamayees thiab lwm tus txivneej uas nyob hauv nws lub tsev, tagnrho tej tubqhe uas yug hauv nws tsev thiab tej tubqhe uas muab nyiaj yuav los huv tibsi. Anplahas ua kevcai txiav tawv thaum nws muaj hnubnyoog cuaj caum cuaj xyoos, thiab nws tus tub Yisamayees ua thaum muaj kaum peb xyoos. Nkawd puavleej ua kevcai txiav rau tib hnub ntawd, thiab tib txhij nrog Anplahas cov tubqhe txhua tus huv tibsi. Tus TSWV los tshwm rau Anplahas pom ntawm cov ntoo xeeb hauv thaj chaw Males. Hnub ntawd tshav ntuj kub heev nws thiaj tawm tuaj zaum ntawm nws lub tsevntaub lub qhovrooj, nws tsa qhovmuag saib pom peb tug txivneej sawv nres nroos tod. Thaum nws pom dheev lawv, nws txawm sawv tsees mus cuag lawv. Nws txhos caug ntua khoov ua ntsejmuag ti nkaus av, nws hais tias, “Kuv tus tswv, yog nej txaus siab rau kuv, thov tsis txhob dhau ntawm nej tus tubtxib no mus; kuv nyob ntawm no yuav tu nej. Cia kuv mus nqa mentsis dej tuaj rau nej ntxuav kotaw tso, thov nej so hauv qab tsob ntoo no kom los siav. Kuv tseem yuav mus nqa mentsis zaub mov tuaj rau nej noj, nej thiaj yuav muaj zog taug kev mus ntxiv. Nej twb tuaj txog ntawm kuv tsev no lawm, thov cia kuv tu nej tso.” Lawv teb hais tias, “Koj kavtsij mus ua raws li koj hais.” Anplahas maj ceev nrooj rov mus rau hauv tsevntaub thiab hais rau Xalas hais tias, “Tsawg tsuag, koj cia li mus muab ib hnab hmoov nplej uas zoo tshaj plaws los puab ua ncuav thiab muab cub.” Ces Anplahas txawm khiav loo mus rau nram pab tsiaj thiab ntes tau ib tug menyuam nyuj tseem mos thiab rog heev, coj los rau ib tug tubtxib, kom nws muab tua thiab ua tsawg tsuag kom siav. Nws thiaj muab mentsis roj mis nyuj qhuav, mentsis kua mis nyuj, thiab cov nqaij uas hau tau siav lawm, coj mus rau kiag rau ntawm cov txivneej ntawd xubntiag. Anplahas rau zaub rau mov rau lawv noj hauv qab tsob ntoo ntawd. Ces lawv nug Anplahas hais tias, “Xalas tus uas yog koj tus pojniam nyob qhov twg?” Anplahas teb hais tias, “Xalas nyob hauv tsevntaub.” Lawv cov ntawd muaj ib tug hais rau Anplahas hais tias, “Cuaj hlis tom ntej no kuv yuav rov qab tuaj dua, thiab Xalas tus uas yog koj tus pojniam yuav yug tau ib tug metub.” Xalas sawv sab hauv lub qhovrooj tsevntaub uas ncaj ntawm Anplahas nraubqaum, mloog lawv sib tham. Anplahas thiab Xalas twb laus heev, thiab Xalas los twb tseg tsis coj khaubncaws li lawm. Yog li ntawd, Xalas thiaj luag twjywm thiab xav hais tias, “Nimno kuv laus heev thiab twb dhau hnubnyoog muaj menyuam lawm, es kuv tseem yuav muaj taus kev zoo siab thiab los? Kuv tus txiv los kuj laus lawm thiab.” Ces tus TSWV nug Anplahas hais tias, “Vim li cas Xalas luag thiab hais tias, ‘Kuv twb laus npaum li no lawm, kuv tseem yuav muaj taus menyuam thiab los?’ Tus TSWV yeej ua tau ib puas tsav yam huv tibsi, raws li kuv tau hais lawm, cuaj hlis tom ntej no kuv yuav rov tuaj dua, thiab Xalas yeej yuav yug tau ib tug metub.” Xalas ntshai heev, nws thiaj tsis lees hais tias nws tau luag, nws hais tias, “Kuv tsis tau luag.” Tus TSWV teb hais tias, “Tseeb tiag, koj twb luag twjywm hauvsiab lawm.” Tom qab ntawd peb tus txivneej txawm sawv kev mus rau ntawm ib qhov chaw uas ntxim lawv yuav ntsia pom lub nroog Xaudoos, Anplahas txawm xa lawv sawv kev thiab nrog lawv mus. Thiab tus TSWV xav hais tias, “Kuv yuav tsis zais tej uas kuv tabtom yuav ua ntawd rau Anplahas. Nws cov xeebntxwv yuav tau ua ib haivneeg tseemceeb thiab muaj hwjchim heev, thiab kuv yuav foom koob hmoov ntawm nws mus rau txhua haivneeg uas nyob thoob ntiajteb. Kuv tau xaiv nws kom nws yuav tsum qhia nws cov tub thiab cov xeebntxwv kom mloog kuv lus, ua zoo thiab ua ncaj ua ncees. Yog lawv ua li ntawd, mas kuv yuav ua txhua yam rau nws raws li kuv tau coglus tseg cia lawm.” Ces tus TSWV hais rau Anplahas hais tias, “Muaj lus tsis zoo tuaj tawmtsam lub nroog Xaudoos thiab lub nroog Kaumaulas, ob lub nroog ntawd tej kev txhaum loj kawg li. Kuv thiaj los xyuas saib puas muaj tseeb raws li tej lus uas kuv hnov ntawd.” Ces ob tug txivneej txawm sawv kev mus rau hauv lub nroog Xaudoos lawm, tiamsis tus TSWV tseem nrog Anplahas nyob. Anplahas txav zog mus ze rau ntawm tus TSWV thiab nug hais tias, “Koj yuav ua kom cov neeg tsis muaj txim nrog cov neeg muaj txim raug kev puastsuaj tas huv tibsi los? Yog muaj tsib caug leej uas yog neeg ncaj ncees nyob hauv lub nroog ntawd, koj puas yuav ua kom lub nroog ntawd raug kev puastsuaj? Koj txawm yuav tsis tseg lub nroog ntawd nyob kom tsib caug leej uas ncaj ncees ntawd dim los? Tseeb tiag, koj yeej tsis muab cov neeg ncaj ncees tua nrog cov neeg txhaum ib zaug li. Yog koj ua li ntawd, cov neeg ncaj ncees yuav raug txim nrog cov neeg txhaum ua ke. Koj yeej yuav tsis ua li ntawd. Tus uas txiav txim rau tej neeg ntiajteb tagnrho yeej yog tus uas txiav txim ncaj ncees xwb.” Tus TSWV teb hais tias, “Yog kuv pom muaj txog tsib caug leej uas ncaj ncees nyob hauv lub nroog Xaudoos, kuv yuav tseg tsis tua cov neeg uas nyob hauv lub nroog vim tsib caug leej uas ncaj ncees ntawd.” Anplahas rov hais ntxiv tias, “Tus TSWV, thov koj zam txim rau kuv, rau qhov uas kuv muaj lub siab tawv rov hais koj dua ib zaug ntxiv. Tus TSWV, kuv yog neeg xwb, twb tsis tsimnyog kuv hais ib yam dabtsi rau koj li. Tiamsis yog hais tias muaj txog plaub caug tsib leeg uas ncaj ncees, es yog tsis muaj txog tsib caug leej ne, koj yeej yuav ua kom lub nroog ntawd puastsuaj tas huv tibsi, vim tu tsib leeg ntawd xwb los?” Tus TSWV teb hais tias, “Yog kuv pom muaj plaub caug tsib leeg uas ncaj ncees nyob rau hauv, kuv yuav tsis ua kom lub nroog ntawd puastsuaj.” Anplahas rov hais dua ntxiv tias, “Yog muaj txog plaub caug leej nyob hauv xwb ne?” Tus TSWV teb hais tias, “Yog kuv pom muaj plaub caug leej nyob rau hauv, kuv yuav tsis ua kom lub nroog ntawd puastsuaj.” Anplahas rov hais dua tias, “Tus TSWV, thov koj tsis txhob chim, rau qhov kuv xav rov hais dua. Yog hais tias muaj txog peb caug leej nyob hauv ne, koj ho yuav ua li cas rau?” Tus TSWV teb hais tias, “Yog kuv pom muaj peb caug leej nyob rau hauv, kuv yuav tsis ua kom lub nroog puastsuaj.” Anplahas hais tias, “Tus TSWV, thov koj zam txim rau kuv, rau qhov kuv muaj lub siab tawv thov koj dua ib zaug ntxiv. Yog hais tias muaj nees nkaum leej nyob rau hauv ne?” Tus TSWV teb hais tias, “Yog kuv pom muaj nees nkaum leej nyob rau hauv, kuv yuav tsis ua kom lub nroog puastsuaj.” Anplahas hais tias, “Tus TSWV, thov koj tsis txhob chim lauj, kuv thov hais ib zaug ntxiv xwb. Yog hais tias muaj kaum leej nyob rau hauv xwb ne, koj ho yuav ua li cas rau?” Tus TSWV teb hais tias, “Yog kuv pom muaj kaum leej nyob rau hauv, kuv yuav tsis ua kom lub nroog puastsuaj.” Tom qab uas tus TSWV nrog Anplahas tham tas lawm, nws txawm sawv kev mus, thiab Anplahas txawm rov qab los tsev lawm. Thaum ob tug timtswv mus txog rau hauv lub nroog Xaudoos twb yuav tsaus ntuj, Lauj tseem tabtom zaum ntawm roojvag nroog. Thaum nws pom dheev nkawd, nws txawm sawv tsees mus cuag nkawd. Nws mus txhos caug ntua ntawm nkawd xubntiag thiab hais tias, “Ob tug tswv, kuv tuaj ntawm no yog yuav tu neb. Thov neb mus so hauv kuv tsev. Neb los ntxuav kotaw thiab pw ib hmos hauv kuv tsev. Tagkis kaj ntug neb mam li sawv ntxov mus.” Tiamsis nkawd teb hais tias, “Wb tsis mus, hmo no wb yuav pw ntawm tshavpuam hauv lub plawv nroog no xwb.” Vim Lauj muaj siab caw nkawd tiag, nkawd thiaj nrog Lauj mus so hauv nws tsev. Lauj kom nws cov tubtxib ci ncuav thiab ua zaub ua mov qab rau ob tug qhua ntawd noj. Thaum ua tau siav lawm nkawd thiaj li noj hmo. Thaum ob tug qhua tseem tsis tau nce chaw pw, tagnrho tej txivneej uas nyob hauv lub nroog Xaudoos, tsis hais laus thiab hluas, puavleej dhia nroo ntws tuaj vij nkaus Lauj lub tsev. Lawv hu Lauj tawm tuaj thiab nug hais tias, “Ob tug txivneej uas hmo no tuaj so hauv koj tsev nyob qhov twg? Cia li coj nkawd tawm tuaj rau peb, peb yuav deev nkawd.” Lauj tawm mus rau sab nraud thiab muab qhovrooj kaw rau. Lauj hais rau lawv tias, “Cov phoojywg, thov nej tsis txhob ua phem li no lauj! Nej mloog kuv hais, kuv muaj ob tug ntxhais tseem yog nkaujxwb tsis tau tham dua hluas nraug li. Thov cia kuv coj nkawd tuaj rau nej, thiab nej xav ua li cas rau nkawd los nej cia li ua raws li nej siab nyiam. Tiamsis thov nej tsis txhob ua li cas rau ob tug txivneej ntawd, nkawd tuaj ua qhua txog hauv kuv tsev, kuv yuav tsum tsomkwm nkawd.” Tiamsis lawv teb Lauj hais tias, “Nyuag neeg txawv tebchaws ko, cia li txav kev rau peb! Koj yog leejtwg, koj muaj cai tuaj cheem peb ua dabtsi? Cia li txav kev. Yog koj tsis txav kev, peb yuav ua phem rau koj tshaj peb ua rau nkawd thiab.” Lawv cia li thawb ntiag Lauj rov qab thiab nam zog mus tsoo kom qhovrooj tawg. Tiamsis ob tug txivneej uas nyob hauv tsev qhib plho qhovrooj mus rub rhe Lauj rov qab los rau hauv tsev thiab muab qhovrooj kaw nkaus rau. Ces tamsim ntawd nkawd txawm ua rau cov txivneej uas nyob sab nraud digmuag tas huv tibsi, lawv thiaj tsis pom kev nrhiav lub qhovrooj. Ob tug txivneej ntawd hais rau Lauj hais tias, “Yog koj tseem tshuav tej tub, tej ntxhais, tej vauv lossis kwvtij neejtsa uas nyob hauv lub nroog no, kom lawv cia li tawm khiav tamsim no mus, rau qhov wb tabtom yuav ua kom lub nroog no puastsuaj mus. Tus TSWV tau hnov hais tias cov neeg hauv lub nroog no ua phem ua qias kawg nkaus li, nws thiaj txib wb los rhuav lub nroog Xaudoos no kom puastsuaj.” Ces Lauj txawm mus hais rau ob tug tub hluas uas twb qhaib nws ob tug ntxhais lawm hais tias, “Neb cia li khiav tawm hauv lub nroog no mus, rau qhov tus TSWV tabtom yuav rhuav lub nroog no kom puastsuaj.” Tiamsis nkawd xav hais tias, yog Lauj lam tso dag xwb. Thaum kaj ntug txoog ob tug timtswv twb los txhib kom Lauj maj nroos ntag. Nkawd hais tias, “Tsawg tsuag maj! Cia li coj koj pojniam thiab koj ob tug ntxhais tawm tamsim no, nej thiaj yuav tsis tuag thaum lub nroog no raug kev puastsuaj.” Lauj tseem pheej ua xyem xyav. Txawm li ntawd los tus TSWV tseem hlub tshua Lauj heev, yog li ntawd ob tug txivneej thiaj tuav Lauj, Lauj pojniam thiab Lauj ob tug ntxhais tes thiab lawv coj tawm hauv lub nroog mus. Ces ib tug timtswv txawm hais tias, “Khiav tiag kom dim! Tsis txhob tig saib rov tom qab thiab tsis txhob so hauv lub hav no. Khiav mus kom nto plaws saum cov ncov roob nej thiaj yuav tsis tuag.” Tiamsis Lauj teb hais tias, “Tus TSWV, thov tsis txhob cia peb khiav mus rau tid. Koj hlub kuv kawg nkaus thiab twb cawm kuv txojsia dim los txog txij no lawm. Tiamsis cov ncov roob ntawd nyob deb heev, ntshai tsam kev tuag caum cuag kuv, thiab kuv tuag ua ntej kuv mus txog tid. Koj puas pom lub nyuag nroog tid? Lub nroog ntawd thiaj nyob ze dua xwb. Thov cia kuv mus lawm tid, koj yeej pom hais tias yog lub nroog me, thiab yuav cawm tau kuv txojsia.” Nws teb hais tias, “Tau los mas, kuv pom zoo ntag. Kuv yuav tsis ua kom lub nroog tid puastsuaj. Tsawg tsuag! Cia li mus! Kuv tos tsis ua ib yam dabtsi mus txog thaum uas koj khiav mus txog tid tso.” Rau qhov Lauj hu lub nroog tid ua lub nroog me, thiaj muab lub nroog ntawd tis npe hu ua Xau-as. Thaum Lauj khiav mus txog ntua tim lub nroog Xau-as tabtom hnub tawm plaws tim npoo ntuj. Tamsim ntawd tus TSWV tso hluavtaws leejfaj poob saum ntuj los kub lub nroog Xaudoos thiab lub nroog Kaumaulas thiaj ua rau ob lub nroog ntawd thiab tagnrho lub tiaj nrag nrog tej neeg uas nyob rau hauv thiab txhua yam nroj tsuag qoobloo uas tuaj hauv thaj tsam ntawd raug puastsuaj tas. Tiamsis Lauj tus pojniam tig saib tom qab, nws txawm cia li khov kiag ua ib tug ncej ntsev. Hnub tom qab, thaum sawv ntxov Anplahas maj ceev nrooj mus rau tom qhov chaw uas nws sawv tim ntsej tim muag ntawm tus TSWV. Nws tsa qhovmuag saib lub nroog Xaudoos thiab lub nroog Kaumaulas tagnrho rau lub tiaj nrag ntawd, nws pom pa taws ncho auv niab hauv thaj tsam ntawd tuaj, cuag nkaus li hlawv ib daim teb. Txawm yog Vajtswv rhuav ob lub nroog hauv lub tiaj nrag uas Lauj nyob ntawd puastsuaj tas lawm los nws tseem nco ntsoov Anplahas rau nruab siab thiab tso kev rau Lauj khiav kom dim txojkev puastsuaj. Vim qhov uas Lauj ntshai nyob hauv lub nroog Xau-as, nws thiab nws ob tug ntxhais thiaj khiav mus nyob hauv ib lub qhov tsua pem cov ncov roob. Tus ntxhais hlob hais rau nws tus niamhluas hais tias, “Wb txiv twb laus heev lawm, thiab nyob thoob plaws hauv ntiajteb no tsis muaj txivneej tuaj yuav wb kom wb muaj menyuam li lawm. Cia li los, wb muab cawv txiv hmab rau txiv haus kom qaug, ces wb mus nrog txiv pw kom wb muaj menyuam.” Hmo ntawd nkawd txawm muab cawv txiv hmab rau leej txiv haus, ces tus ntxhais hlob thiaj mus nrog nws txiv pw. Leej txiv qaug cawv heev nws thiaj tsis paub hais tias nws tus ntxhais los nrog nws pw. Hnub tom qab tus ntxhais hlob hais rau nws tus niamhluas hais tias, “Nag hmo kuv twb mus nrog txiv pw lawm, ib chim tsaus ntuj wb rov muab cawv rau txiv haus dua, ces koj ho mus nrog nws pw. Ua li ntawd wb nyias thiaj muaj nyias menyuam los ntawm wb txiv.” Yog li ntawd, nkawd rov muab cawv txiv hmab rau leej txiv haus dua, ces tus ntxhais yau ho mus nrog leej txiv pw. Leej txiv kuj rov qaug cawv heev nws thiaj tsis paub hais tias nws tus ntxhais los nrog nws pw. Vim li ntawd, Lauj ob tug ntxhais thiaj xeeb tub los ntawm nkawd txiv. Lauj tus ntxhais hlob txawm yug tau ib tug tub, nws muab tis npe hu ua Mau-am. Mau-am yog yawgkoob rau haivneeg Mau-am los txog niaj hnub no. Lauj tus ntxhais yau los kuj yug tau ib tug tub thiab, nws muab tis npe hu ua Npeenamis. Npeenamis yog haivneeg Amoos tus yawgkoob los txog niaj hnub no. Anplahas tsiv tawm ntawm thaj chaw Males mus rau nram yav qabteb hauv tebchaws Kana-as thiab mus nyob rau ntawm ntu nruab nrab lub nroog Kades thiab Sus lawm. Thaum ntawd nws los nyob rau hauv lub nroog Nkelales tau ib ntus, thiab nws hais tias, Xalas tus uas yog nws tus pojniam yog nws tus muam xwb. Yog li ntawd, Vajntxwv Anpimelej uas kav lub nroog Nkelales txawm hais kom coj Xalas mus rau nws. Muaj ib hmos Vajtswv tau los tshwm rau Vajntxwv Anpimelej pom hauv nruab npau suav thiab hais rau nws hais tias, “Koj yuav raug luag tua tuag, vim koj coj tus pojniam no los, rau qhov nws twb muaj txiv lawm.” Tiamsis Anpimelej yeej tsis tau txav mus ti Xalas li, nws thiaj hais tias, “Tus TSWV, kuv twb tsis tau ua txhaum! Koj txawm yuav tua kuv thiab kuv cov pejxeem povtseg ntag los? Anplahas los yeej hais tias Xalas yog nws tus muam, thiab Xalas los yeej hais ib yam nkaus li ntawd. Kuv tau ua tej no, vim kuv tsis paub thiab kuv yeej tsis tau ua txhaum li.” Vajtswv teb hais tias, “Yog tiag, kuv yeej paub koj ua tej no, vim qhov uas koj tsis paub thiab koj tsis tau ua txhaum dabtsi, yog li ntawd, kuv thiaj tsis pub koj mus kov Xalas thiab ua txhaum tawmtsam kuv. Cia li xa tus pojniam ko rov qab mus rau nws tus txiv tamsim no. Nws yog ib tug cev Vajtswv lus, nws yuav thov Vajtswv rau koj, koj thiaj yuav tsis tuag. Tiamsis yog koj tsis xa nws rov qab, kuv qhia tseeb rau koj hais tias, koj yeej yuav tuag mus, koj thiab koj tsoom pejxeem yuav tuag tas huv tibsi.” Tagkis sawv ntxov Anpimelej hu tagnrho nws cov nomtswv tuaj thiab nws qhia tej uas tau tshwmsim ntawd rau lawv mloog, mas ua rau lawv ntshai kawg li. Ces Anpimelej thiaj hu Anplahas tuaj thiab nug hais tias, “Vim li cas koj ua tej no rau peb? Kuv tau ua txhaum dabtsi rau koj, koj thiaj coj tej kev puastsuaj no los rau kuv thiab kuv lub tebchaws? Tej uas koj ua rau kuv no yeej tsis tsimnyog ua kiag li. Vim li cas koj thiaj ua li no?” Anplahas teb hais tias, “Kuv xav hais tias tsis muaj ib tug neeg uas hwm Vajtswv nyob hauv lub nroog no nyob tsam lawv yuav muab kuv tua povtseg thiab yuav kuv tus pojniam. Nws yeej yog kuv tus muam tiag li. Nws thiab kuv yeej koom ib leeg txiv, tiamsis wb nyias muaj nyias niam, thiab kuv yuav nws ua kuv tus pojniam. Yog li ntawd, thaum Vajtswv hais kom kuv tso kuv txiv tej vajtse tseg mus nyob rau lwm lub tebchaws, kuv thiaj hais rau nws tias, ‘Koj yuav tsum ua ncaj ua ncees rau kuv thiab qhia rau txhua leej txhua tus paub hais tias kuv yeej yog koj tus nus.’ ” Ces Anpimelej thiaj tso Xalas rov qab los rau Anplahas, thiab nws tseem muab yaj, muab tshis, muab nyuj, muab tubqhe thiab ntxhais qhev pub rau Anplahas. Anpimelej hais rau Anplahas hais tias, “Tagnrho tej cheebtsam av no puavleej yog kuv li, koj yuav nyob qhov twg los tau tas raws li koj siab nyiam.” Nws ho hais rau Xalas hais tias, “Kuv muab ib txhiab daim nyiaj rau koj tus nus, ua povthawj rau txhua tus uas nrog koj nyob ua ke pom hais tias, koj tsis tau ua txhaum. Kom txhua tus paub hais tias koj yeej tsis tau ua txhaum tiag.” Tus TSWV foom koob hmoov rau Xalas raws li tej lus uas nws tau cog tseg lawm, Xalas thiaj xeeb tub thiab yug tau ib tug tub rau Anplahas thaum uas Anplahas laus heev lawm. Tus tub no yug raws li lub caij uas Vajtswv teem tseg cia lawm. Anplahas thiaj tis tus tub ntawd lub npe hu ua Ixaj, ces thaum Ixaj hnubnyoog muaj yim hnub, Anplahas thiaj muab nws ua kevcai txiav tawv, raws li Vajtswv tau samhwm tseg lawm. Anplahas hnubnyoog muaj ib puas xyoo rau thaum yug Ixaj. Xalas thiaj hais tias, “Vajtswv tau muab txojkev zoo siab thiab lub ntsejmuag luag ntxhi rau kuv. Txhua tus uas hnov zaj no lawv puavleej zoo siab nrog kuv luag.” Xalas hais ntxiv tias, “Leejtwg tseem yuav hais tau rau Anplahas hais tias, Xalas tseem tu taus menyuam thiab los? Txawm li ntawd los kuv twb yug tau ib tug tub rau Anplahas thaum nws hnubnyoog laus heev lawm.” Tus tub ntawd loj hlob zoo, thiab hnub uas nws tseg taus mis lawm, Anplahas thiaj ua ib rooj noj haus loj heev. Muaj ib hnub Hankas tus uas yog neeg Iziv, tus tub Yisamayees uas nws yug rau Anplahas, tabtom ua si nrog Xalas tus tub Ixaj. Xalas pom li ntawd nws thiaj mus hais rau Anplahas hais tias, “Cia li ntiab tus ntxhais qhev no thiab nws tus tub khiav mus. Tsis tsimnyog cia tus pojniam no tus tub tau koj tej qubtxeeg qubteg ib yam hlo li, tsuas yog kuv tus tub Ixaj xwb thiaj tsimnyog tau.” Zaj no ua rau Anplahas ntxhov siab kawg li, rau qhov Yisamayees los yog nws tus tub ib yam nkaus thiab. Tiamsis Vajtswv hais rau Anplahas hais tias, “Koj tsis txhob ntxhov siab txog tus tub thiab tus ntxhais qhev Hankas no hlo li. Cia li ua raws li Xalas hais rau koj, rau qhov koj yuav muaj xeebntxwv coob los ntawm Ixaj raws li kuv tau coglus tseg rau koj lawm. Kuv tseem yuav pub rau tus ntxhais qhev ntawd tus tub kom muaj tub coob heev, thiab lawv yuav ua tau ib haivneeg. Nws los yeej yog koj tus tub ib yam nkaus.” Hnub tom qab thaum sawv ntxov Anplahas ntim zaub tim mov thiab muab ib hnab tawv dej rau Hankas kwv saum xubpwg. Anplahas tsaws hlo tus tub rau Hankas ris nraum nraubqaum thiab ntiab nkawd khiav tawm mus. Hankas thiaj ua ib siab mus thiab ncig mus ncig los tom tiaj suabpuam Npesenpas. Thaum dej tas lawm, nws thiaj muab tus menyuam tso rau hauv ib koog ntoo thiab nws mus zaum nrug deb kwvyees li ib ncua hneev. Nws txawm xav hais tias, “Kuv tsis xav saib kuv tus tub tu siav li.” Thaum nws mus zaum ntawd, nws txawm tsa suab hlo quaj. Vajtswv hnov tus menyuam ntawd lub suab quaj, thiab Vajtswv tus timtswv thiaj hais saum ntuj tuaj rau Hankas hais tias, “Hankas, koj ntxhov siab ua dabtsi? Tsis txhob ntshai. Vajtswv twb hnov koj tus tub lub suab quaj lawm. Cia li sawv tsees mus, thiab tsaws hlo nws puag ua tib zoo ntxias nws. Kuv yuav pub kom nws muaj xeebntxwv huamvam coob mus ua tau ib haivneeg.” Ces tus TSWV thiaj qhib Hankas lub qhovmuag, thiab nws pom ib lub qhovtshij. Nws thiaj mus daus dej ntim puv nkaus rau hauv lub hnab tawv thiab muab tau mentsis rau tus tub haus. Vajtswv yeej nrog nraim tus tub ntawm mus txog thaum nws loj hlob lawm, nws nyob hauv lub tiaj suabpuam Palas, thiab nws yog ib tug uas txawj tua nqaij heev. Nws niam mus yuav tau cov neeg Iziv ib tug ntxhais los rau nws ua pojniam. Thaum lub sijhawm ntawd Vajntxwv Anpimelej nrog Fikaules, tus uas yog tus thawj saib nws cov tubrog tuaj, thiab hais rau Anplahas hais tias, “Vajtswv yeej nrog nraim koj nyob thiab pab koj ua txhua yam huv tibsi. Yog li ntawd, kuv thov coglus tseg tabmeeg Vajtswv hais tias, koj yuav tsis dag kuv, kuv tej menyuam lossis kuv tej xeebntxwv hlo li. Kuv twb yeej ua zoo rau koj lawm, yog li ntawd, koj yuav tsum tau coglus ua zoo rau kuv thiab lub tebchaws uas koj nyob no.” Anplahas teb hais tias, “Kuv txaus siab coglus li ntawd ntag.” Anplahas yws rau Anpimelej txog lub qhovtshij uas Anpimelej cov tubtxib tuaj txeeb tau lawm. Anpimelej teb hais tias, “Kuv tsis paub hais tias yog leejtwg txeeb. Koj yeej tsis tau qhia zaj no rau kuv li, yog thawj zaug uas kuv tau hnov koj piav txog zaj no xwb.” Anplahas muab tus puav yaj thiab nyuj pub rau Anpimelej, ces nkawd thiaj sib coglus. Anplahas muab xya tus menyuam yaj cais tawm hauv nws pab tsiaj, thiab Anpimelej nug nws hais tias, “Vim li cas koj ua li ntawd?” Anplahas teb hais tias, “Cia li txais yuav xya tus menyuam yaj no mus. Qhov uas kuv ua li no, yog ua kom koj nrog lees paub hais tias, kuv yog tus khawb lub qhovtshij no ntag.” Yog li ntawd, thiaj hu qhov chaw ntawd ua Npesenpas, rau qhov nkawd tau sib coglus rau ntawm thaj chaw ntawd. Tom qab uas nkawd coglus nyob ntawm Npesenpas tas lawm, Anpimelej thiab Fikaules thiaj rov qab mus rau tebchaws Filitees lawm. Ces Anplahas txawm cog ib tsob ntoo tamalis rau ntawm thaj chaw Npesenpas ntawd thiab pehawm tus TSWV uas yog Vajtswv tus muaj sia nyob mus ibtxhis. Anplahas nyob hauv tebchaws Filitees tau ntev heev. Tau ib ntu tom qab no Vajtswv txawm sim Anplahas siab. Vajtswv hu Anplahas hais tias, “Anplahas!” Anplahas teb hais tias, “Kuv nyob ntawm no.” Vajtswv hais tias, “Koj cia li coj koj tib leeg tub Ixaj uas koj hlub tshaj plaws, mus rau pem tebchaws Mauliyas. Koj cia li muab nws tua hlawv fij pub rau kuv saum lub roob uas kuv yuav qhia rau koj.” Hnub tom qab thaum sawv ntxov Anplahas sawv los txiav taws npaj coj mus hlawv khoom fij, muab taws nog rau nws tus neesluav thauj, coj Ixaj thiab coj nws ob tug tubtxib nrog nws mus. Lawv txawm sawv kev mus rau pem qhov chaw uas Vajtswv tau qhia rau Anplahas lawm. Thaum lawv mus tau peb hnub ke lawm, Anplahas tsa qhovmuag saib pom thaj chaw uas Vajtswv qhia rau nws tseem nyob deb. Ces nws txawm hais rau ob tug tubtxib tias, “Neb nrog tus neesluav nyob ntawm no. Kuv tus tub thiab kuv yuav mus pehawm Vajtswv nyob rau ped, thaum wb pehawm tas, wb mam rov qab los.” Anplahas muab cov taws uas yuav hlawv khoom fij rau Ixaj kwv, Anplahas nqa riam thiab hluavtaws. Ces nkawd txawm mus rau pem roob lawm, Ixaj hais tias, “Txiv!” Anplahas teb hais tias, “Tub, koj hais dabtsi?” Ixaj nug hais tias, “Txiv, kuv pom koj muaj hluavtaws thiab muaj taws, tiamsis tus menyuam yaj uas yuav coj mus tua hlawv fij nyob qhov twg?” Anplahas teb hais tias, “Vajtswv yuav muab ib tug menyuam yaj rau wb.” Ces nkawd ob txiv tub txawm ua ke taug kev mus lawm. Thaum nkawd mus txog ntawm qhov chaw uas Vajtswv qhia rau Anplahas lawm, Anplahas thiaj teeb tau ib lub thaj thiab muab taws tso rau saum lub thaj ntawd. Nws thiaj muab nws tus tub pav thiab coj mus tso rau saum cov taws, saum lub thaj. Ces Anplahas txawm khaws nkaus riam los yuav nkaug Ixaj. Tamsim ntawd tus TSWV tus timtswv hu tawg ntho saum ntuj tuaj rau Anplahas hais tias, “Anplahas, Anplahas!” Anplahas teb hais tias, “Kuv nyob ntawm no.” Tus timtswv hais tias, “Tsis txhob tua tus metub ko thiab tsis txhob ua li cas rau nws hlo li.” Nws hais ntxiv tias, “Nimno kuv paub hais tias koj yeej mloog lus thiab hwm Vajtswv heev, rau qhov koj tsis khuvxim koj tib leeg tub, koj zoo siab hlo coj tuaj pub rau kuv.” Anplahas tig hlo saib ib puagncig, nws pom ib tug laug yaj kub daig ntawm ib xyuv hmab. Anplahas thiaj mus muab los tua hlawv fij rau Vajtswv hloov nws tus tub chaw. Anplahas thiaj tis npe rau qhov chaw ntawd hu ua, “Tus TSWV npaj tseg.” Thiab txawm yog niaj hnub no los neeg tseem pheej hu hais tias, “Saum tus TSWV lub roob uas nws npaj tseg.” Tus TSWV tus timtswv rov hu saum ntuj tuaj rau Anplahas dua zaum ob hais tias, “Kuv coglus los ntawm kuv lub npe, kuv yuav foom koob hmoov nplua mias rau koj, tus TSWV yog tus hais li no. Rau qhov koj tau ua raws li kuv hais thiab koj tsis khuvxim koj tib leeg tub uas koj muab fij rau kuv. Kuv thiaj coglus tseg rau koj hais tias, kuv yuav pub koj muaj xeebntxwv coob npaum li tej hnubqub saum nruab ntug lossis npaum li tej suabzeb nram ntug hiavtxwv. Koj cov xeebntxwv yuav ntaus yeej lawv cov yeebncuab. Thiab kuv yuav foom koob hmoov tawm ntawm koj cov xeebntxwv mus rau txhua haivneeg uas nyob thoob ntiajteb, vim koj mloog kuv lus.” Anplahas thiaj rov qab los rau nram nws ob tug tubtxib, thiab lawv rov los rau nram Npesenpas uas yog Anplahas qhov chaw nyob lawm. Tau tsis ntev los tom qab no muaj neeg mus qhia rau Anplahas hais tias, “Milekas yug tau yim leej menyuam rau koj tus kwv Nahaus:” Uxes yog tus tub hlob, Npuxes yog nws tus kwv, Kemuyees uas yog Alas txiv, Khexes, Haxaus, Piledas, Yilafes thiab Npethuyees. Npethuyees yog Lenpekas txiv. Milekas yug tau yim leej tub no rau Nahaus uas yog Anplahas tus kwv. Nahaus tus niamyau Lehumas, yug tau Tenpas, Nkahas, Tahases thiab Ma-akas. Xalas ua neej nyob tau ib puas nees nkaum xya xyoo. Nws tuag rau ntawm Kiliyas Anpas (lossis yog Henploos) uas nyob hauv tebchaws Kana-as, Anplahas quaj ntsuag vim Xalas tuag lawm. Anplahas tso Xalas lub cev rau ntawm qhov chaw uas nws tuag ntawd. Anplahas thiaj mus cuag cov neeg Hitis thiab hais rau lawv tias, “Kuv yog neeg txawv tebchaws los nrog nej nyob hauv no xwb, thov nej muag ib thaj av rau kuv faus kuv tus pojniam.” Lawv teb hais tias, “Koj mloog peb hais tso. Koj yog ib tug thawjcoj uas muaj koob meej nyob nto moo lug rau hauv peb no, cia li coj koj tus pojniam mus faus rau hauv lub qhov tsua zoo tshaj plaws uas peb muaj. Peb txhua tus puavleej txaus siab muab ib lub qhov tsua rau koj, koj thiaj tau chaw faus koj tus pojniam.” Ces Anplahas txawm txhos caug ntua ntawm lawv xubntiag thiab hais tias, “Yog nej txaus siab yuav cia kuv faus kuv tus pojniam rau ntawm no, thov nej pab hais Xauhas tus tub Efaloos kom nws muag lub Qhov tsua Makepelas uas nyob ze rau ntawm nws thaj teb rau kuv. Thov kom nws cia li muab muag tus nqi puv ntoob rau kuv, tabmeeg rau nej sawvdaws ntawm no, kuv thiaj tau qhov chaw faus tuag ntawd los ua kuv tug.” Efaloos kuj nrog cov Hitis nyob ua ke ntawm qhov chaw sablaj uas nyob ntawm roojvag nroog thiab, nws thiaj teb tabmeeg rau cov neeg uas tuaj nyob ntawd nrog hnov hais tias, “Koj mloog kuv hais, kuv yuav muab tagnrho kuv thaj teb thiab lub qhov tsua uas nyob rau hauv pub huv tibsi rau koj. Tim ntsej tim muag ntawm kuv haivneeg, kuv yuav muab pub rau koj, koj thiaj tau chaw faus koj tus pojniam.” Anplahas txawm nyo hau ntshis hawm cov Hitis thiab hais rau Efaloos hais tias, thov koj mloog kuv hais thiab kom txhua tus nrog hnov hais tias, “Kuv muas tagnrho koj thaj teb. Thov koj txais cov nyiaj uas kuv them koj no mus, thiab kuv yuav coj kuv tus pojniam tuaj faus rau hauv.” Efaloos teb hais tias, “Thaj av no, tus nqi yog plaub puas daim nyiaj, ntawm koj thiab kuv tsis muaj dabtsi lawm. Cia li coj koj tus pojniam mus faus rau hauv.” Anplahas zoo siab hlo thiab muab nyiaj los luj kom txwm raws li Efaloos tau hais rau sawvdaws nrog hnov lawm, yog plaub puas daim nyiaj uas ntaus nqi ib yam li tu nqi uas tej tub lag tub luam siv tom tej khw ntag. Twb yog vim li ntawd, Efaloos thaj teb hauv Makepelas uas nyob rau ntawm Males sab hnubtuaj uas yog xam tagnrho thaj teb, lub qhov tsua thiab tagnrho tej ntoo uas nyob rau hauv thaj teb thoob plaws rau tej uas nyob raws ntug teb, thiaj yog Anplahas tug lawm. Yog li ntawd, thiaj muab thaj av ntawd ua Anplahas tug tim ntsej tim muag cov neeg Hitis uas tuaj koom sablaj ntawd. Ces Anplahas thiaj coj Xalas uas yog nws tus pojniam mus faus rau hauv lub qhov tsua ntawd, lub qhov tsua ntawd nyob hauv tebchaws Kana-as. Yog li ntawd, cov neeg Hitis thiaj muab thaj teb thiab lub qhov tsua uas nyob rau hauv muag rau Anplahas ua chaw faus tuag. Nimno Anplahas laus heev lawm, thiab tus TSWV tau foom koob hmoov rau txhua yam uas Anplahas ua tas los lawm. Anplahas hais rau nws tus tubtxib uas laus dua lwm tus, nws yog tus saib tagnrho Anplahas lub cuabtam hais tias, “Koj cia li muab koj txhais tes tso rau hauv kuv puabtais thiab coglus rau kuv. Kuv xav kom koj coglus rau kuv ntawm tus TSWV uas yog Vajtswv tus kav lub ntuj thiab lub ntiajteb hais tias, koj yuav tsis xaiv cov neeg hauv tebchaws Kana-as no tej ntxhais los rau kuv tus tub yuav ua pojniam. Koj yuav tsum mus rau tim kuv lub qub teb qub chaw thiab yuav kuv cov kwvtij ib tug ntxhais los rau kuv tus tub Ixaj ua pojniam.” Tiamsis tus tubtxib nug hais tias, “Yog hais tias tus ntxhais tsis kam nrog kuv los rau tebchaws no, kuv yuav ua li cas? Yuav cia kuv coj koj tus tub mus nyob rau tim koj lub qub teb qub chaw los?” Anplahas teb hais tias, “Koj nco ntsoov tsis txhob coj kuv tus tub mus nyob rau tid ib zaug li. Tus TSWV uas yog Vajtswv tus nyob saum ntuj, twb coj kuv tawm hauv kuv txiv lub tsev thiab hauv kuv cov kwvtij lub tebchaws los, thiab nws yuav muab lub tebchaws no pub rau kuv cov xeebntxwv raws li nws tau coglus tseg rau kuv lawm. Nws yuav tso nws tus timtswv ua koj ntej mus, kom koj mus nrhiav tau pojniam rau kuv tus tub. Yog tus ntxhais ntawd tsis kam nrog koj los, koj thiaj dim ntawm kuv tej lus cog tseg no. Tiamsis txwv tu nrho tsis pub koj coj kuv tus tub mus tid li.” Yog li ntawd, tus tubtxib thiaj muab nws txhais tes tso rau hauv Anplahas uas yog nws tus tswv puabtais, thiab coglus ua raws li Anplahas tau hais rau nws lawm. Tus tubtxib uas yog tus saib tagnrho Anplahas lub cuabtam, thiaj cab nws tus tswv kaum tus ntxhuav thauj tej khoom muaj nqis, thiab mus rau hauv lub nroog uas Nahaus nyob pem tebchaws Mexuputamias sab qaumteb. Thaum nws mus txog ped lawm, nws kom cov ntxhuav txhos caug rau ntawm lub qhovtshij uas nyob rau ntawm sab ntug nroog. Thaum ntawd tabtom yuav tsaus ntuj, yog lub caij uas cov pojniam tawm tuaj nqa dej. Nws thov Vajtswv hais tias, “Tus TSWV uas yog kuv tus tswv Anplahas tus Vajtswv, thov koj pab kuv kom kuv tes haujlwm tiav hnub no, thiab ua raws li tej lus uas koj tau cog tseg rau kuv tus tswv lawm. Kuv tabtom nyob ntawm lub qhovtshij uas yog qhov chaw cov hluas nkauj hauv lub nroog no tuaj nqa dej. Thaum kuv hais rau cov hluas nkauj ntawd ib tug twg hais tias, ‘Thov txo koj lub hub dej thiab pub mentsis dej rau kuv haus.’ Yog nws teb hais tias, ‘Haus mas, kuv tseem yuav daus dej rau koj cov ntxhuav txhua tus haus thiab,’ ces thov kom tus ntawd yog tus uas koj xaiv rau koj tus tubtxib Ixaj ntag. Yog qhov no tshwmsim, kuv thiaj yuav paub hais tias, koj ua raws li koj tau coglus tseg rau kuv tus tswv lawm tiag.” Thaum uas tus tubtxib thov Vajtswv tsis tau xaus, Lenpekas txawm kwv ib lub hub dej saum xubpwg tuaj txog ntua ntawd. Lenpekas yog Npethuyees tus ntxhais, Npethuyees yog Anplahas tus kwv Nahaus thiab Milekas nkawd tus tub. Lenpekas yog ib tug ntxhais uas zoo nkauj heev, thiab nws tseem yog nkaujxwb. Lenpekas thiaj nqis mus rau nram lub qhovtshij, daus dej puv nkaus rau hauv nws lub hub, thiab rov qab los. Tus tubtxib thiaj khiav loo mus cuag Lenpekas thiab hais tias, “Kuv thov haus koj cov dej mentsis.” Lenpekas teb hais tias, “Kuv tus tswv, koj cia li haus,” Lenpekas thiaj txo plhuav lub hub saum nws xubpwg los tuav rau tus tubtxib ntawd haus. Thaum nws haus tas lawm, Lenpekas hais tias, “Kuv yuav daus dej los rau koj cov ntxhuav haus kom txaus.” Nws muab lub hub dej hliv kiag rau hauv dabdej rau cov tsiaj ntawd haus tagnrho thiab rov loo mus daus dej los ntxiv dua, nws ua li ntawd rau tus tubtxib cov ntxhuav tau dej haus txhua tus li. Anplahas tus tubtxib sawv ib cag ntsia, saib puas yog tus TSWV pub kom nws tes haujlwm tiav los tsis yog. Thaum uas Lenpekas daus dej rau cov ntxhuav haus txaus lawm, tus tubtxib ntawd thiaj muab tau ib lub kauj ntswg kub hnyav ob txiaj thiab ntaus nqi ntau heev, los khawm rau Lenpekas qhovntswg thiab muab ob lub tooj npab kub hnyav kaum txiaj rau Lenpekas coj ntawm cajnpab. Tus tubtxib txawm nug hais tias, “Thov qhia rau kuv saib koj txiv yog leejtwg. Hauv nws lub tsev puas muaj chaw txaus rau kuv cov neeg thiab kuv mus so hmo no?” Lenpekas teb hais tias, “Kuv txiv yog Npethuyees uas yog Nahaus thiab Milekas nkawd tus tub ntag. Tom peb tsev muaj quavnyab thiab nyom qhuav ntau, thiab nyob tod muaj chaw rau koj so huv tibsi.” Ces tus tubtxib ntawd txawm txhos caug ntua thiab pehawm tus TSWV. Nws hais tias, “Ua tus TSWV uas yog kuv tus tswv Anplahas tus Vajtswv tsaug, Vajtswv yog tus ncaj ncees thiab ua raws li nws tau coglus tseg rau kuv tus tswv lawm tiag. Tus TSWV yeej coj kuv kev ncaj nraim tuaj rau ntawm kuv tus tswv cov kwvtij.” Tus ntxhais ntawd thiaj rov qab mus tsev thiab piav zaj no qhia rau nws niam thiab nws tsevneeg mloog. Lenpekas muaj ib tug nus hu ua Lanpas. Ces Lanpas txawm tawm plaws rau nraum zoov thiab khiav ncaj nraim mus rau tom lub qhovtshij uas Anplahas tus tubtxib nyob. Thaum Lanpas pom lub kauj ntswg thiab ob lub tooj npab uas nws tus muam coj thiab hnov tej lus uas Lenpekas piav qhia rau leej niam hais tias, yog tus txivneej ntawd hais rau nws, Lanpas thiaj li mus cuag Anplahas tus tubtxib uas sawv nrog nws cov ntxhuav nyob ze ntawm lub qhovtshij. Lanpas hais tias, “Koj cia li nrog kuv mus tom tsev. Koj yog tus uas tau txais tus TSWV txoj koob hmoov lawm. Vim li cas koj tseem yuav sawv ntawm no ua dabtsi? Kuv twb tu tau txaj chaw rau koj so tom kuv tsev lawm, thiab nyob tod yeej muaj chaw rau koj cov ntxhuav huv tibsi.” Yog li ntawd, tus tubtxib ntawd thiaj mus rau tom Lanpas tsev, thiab Lanpas thiaj tsaws tej nra ntxhuav cia, muab quavnyab thiab nyom qhuav rau cov ntxhuav noj. Ces nws nqa dej los rau Anplahas tus tubtxib thiab nws cov neeg ntxuav kotaw. Thaum rau tau hmo lawm, tus tubtxib ntawd hais tias, “Kuv yuav tsis noj pluas hmo no mus txog thaum kuv hais tas tej lus uas kuv yuav hais rau koj tso.” Lanpas teb hais tias, “Koj muaj lus dabtsi los cia li hais.” Nws pib qhia hais tias, “Kuv yog Anplahas tus tubtxib. Tus TSWV foom koob hmoov ntau kawg nkaus rau kuv tus tswv thiab nws yog ib tug neeg npluanuj heev. Tus TSWV pub rau kuv tus tswv muaj yaj, muaj tshis, muaj nyuj, muaj nyiaj, muaj kub, muaj tubqhe thiab ntxhais qhev, muaj ntxhuav thiab muaj neesluav coob kawg li. Xalas uas yog kuv tus tswv tus pojniam twb laus heev lawm los nws tseem yug tau ib tug tub rau kuv tus tswv thiab, mas kuv tus tswv muab tagnrho nws lub cuabtam rau tus tub ntawd. Kuv tus tswv kom kuv coglus hais tias kuv yuav tsum mloog nws tej lus samhwm. Nws hais tias, ‘Tsis txhob mus yuav cov neeg uas nyob hauv tebchaws Kana-as no tej ntxhais los rau kuv tus tub ua pojniam hlo li. Koj cia li mus lawm tim kuv txiv tsevneeg, mus cuag kuv cov kwvtij, thiab xaiv ib tug pojniam los rau kuv tus tub Ixaj yuav.’ Thiab kuv nug kuv tus tswv hais tias, ‘Yog tus ntxhais tsis kam nrog kuv los no, kuv yuav ua li cas?’ Nws teb hais tias, ‘Tus TSWV uas kuv yeej ibtxwm mloog nws lus, yuav tso ib tug timtswv nrog koj mus thiab yuav ua kom koj tes haujlwm tiav. Koj yuav mus yuav tau kuv txiv tsevneeg, ib tug ntxhais los rau kuv tus tub ua pojniam. Tsuas yog muaj tib qho ua rau koj dim ntawm kuv lo lus cog tseg xwb: yog koj mus hais, kuv cov kwvtij tsis kam, ces koj thiaj yuav dim ntawm kuv cov lus cog tseg no.’ “Hnub no, thaum kuv tuaj txog rau ntawm lub qhovtshij, kuv thov Vajtswv hais tias, ‘Tus TSWV uas yog kuv tus tswv Anplahas tus Vajtswv, thov koj pab kom tes haujlwm uas kuv tuaj ua no tiav. Kuv nyob ntawm lub qhovtshij no. Thaum ib tug hluas nkauj tawm tuaj kwv dej, kuv yuav thov kom nws muab dej hauv nws lub hub pub rau kuv haus. Yog nws txaus siab muab rau kuv haus thiab nws tseem mus ce los pub rau kuv cov ntxhuav haus huv tibsi, ces thov kom nws yog tus uas koj xaiv rau kuv tus tswv tus tub yuav ua pojniam ntag.’ Thaum kuv tseem thov Vajtswv twjywm hauv kuv lub siab tsis tau tas, kuv txawm pom Lenpekas kwv ib lub hub saum nws xubpwg thiab nqis mus daus dej hauv lub qhovtshij. Kuv thiaj hais rau nws tias, ‘Thov pub mentsis dej rau kuv haus.’ Nws thiaj txo kiag nws hub dej saum xubpwg los thiab hais tias, ‘Haus mas, kuv tseem yuav daus dej rau koj cov ntxhuav haus huv tibsi thiab.’ Yog li ntawd, kuv thiaj tau haus thiab nws daus dej pub rau kuv cov ntxhuav haus huv tibsi. Kuv nug nws hais tias, ‘Koj txiv yog leejtwg?’ Thiab nws teb hais tias, ‘Kuv txiv yog Npethuyees uas yog Nahaus thiab Milekas nkawd tus tub.’ Kuv thiaj muab lub kauj ntswg kub khawm nws qhovntswg thiab muab ob lub tooj npab rau nws coj ntawm nws cajnpab. Kuv thiaj txhos caug ntua pehawm thiab ua tus TSWV uas yog kuv tus tswv Anplahas tus Vajtswv tsaug, nws yog tus uas coj kuv kev ncaj nraim tuaj rau ntawm kuv tus tswv cov kwvtij, yog qhov chaw uas kuv tuaj nrhiav tau nws tus ntxhais rau kuv tus tswv tus tub. Nimno, yog nej zoo siab thiab ua ncaj rau kuv tus tswv, ces thov qhia rau kuv paub, yog tsis tau los thov qhia rau kuv paub, kom kuv thiaj paub txiav txim siab hais tias yuav ua li cas.” Lanpas thiab Npethuyees teb hais tias, “Qhov no yeej yog Vajtswv pom zoo lawm, peb tsis pom qab yuav hais tau li cas rau koj. Lenpekas nyob ntawd, koj cia li coj nws mus. Cia nws ua koj tus tswv tus tub tus pojniam, raws li tus TSWV tau hais tseg cia lawm.” Thaum Anplahas tus tubtxib hnov tej lus no lawm, nws txhos caug ntua pehawm tus TSWV. Ces nws txawm muab tej ris tsho, tej nyiaj thiab tej saw kub los rau Lenpekas. Thiab nws tseem muab tau tej khoom pub uas muaj nqi heev rau Lenpekas tus nus thiab muab rau nws niam. Ces Anplahas tus tubtxib thiab cov neeg uas nrog nws tuaj, txawm noj haus thiab pw ib hmos qhov ntawd. Tagkis kaj ntug, tus tubtxib hais tias, “Thov tso kuv rov qab mus cuag kuv tus tswv.” Tiamsis Lenpekas tus nus thiab nws niam teb hais tias, “Thov cia tus ntxhais nrog peb nyob xya yim hnub lossis kaum hnub ntxiv tso, nws mam nrog nej mus.” Tiamsis tus tubtxib teb hais tias, “Nej tsis txhob cheem kuv nyob. Tus TSWV twb ua rau kuv tes haujlwm uas kuv taug kev tuaj no tiav tas lawm, thov tso kuv rov mus cuag kuv tus tswv.” Nkawd teb hais tias, “Cia peb hu tus ntxhais los nug saib nws hais li cas.” Yog li ntawd, nkawd txawm hu Lenpekas los nug hais tias, “Koj puas zoo siab nrog tus txivneej no mus?” Lenpekas teb hais tias, “Kuv yuav mus.” Yog li ntawd, nkawd thiaj li tso Lenpekas thiab tus ntxhais qhev laus uas ibtxwm tu Lenpekas nrog Anplahas tus tubtxib thiab nws cov neeg mus. Ces lawv txawm foom koob hmoov rau Lenpekas li no: “Tus muam, thov kom koj muaj tub muaj ki ntau txhiab ntau vam leej; thov kom koj cov xeebntxwv txeeb tau lawv cov yeebncuab tej nroog!” Ces Lenpekas thiab nws cov ntxhais qhev thiaj caij ntxhuav nrog Anplahas tus tubtxib sawv kev mus tsev lawm. Ixaj tabtom tuaj txog ntawm lub tiaj suabpuam ntawm “Lub Qhovtshij uas yog Tus Muaj Sia Nyob thiab Tus Pom Kuv,” thiab nws tuaj nyob rau hauv tebchaws Kana-as sab qabteb. Thaum yuav tsaus ntuj Ixaj txawm tawm mus ncig ua si tom teb thiab nws pom ib pab ntxhuav taug kev los. Thaum Lenpekas pom dheev Ixaj, nws txawm nqis saum nws tus ntxhuav nraubqaum los, thiab nug Anplahas tus tubtxib hais tias, “Tus txivneej uas tabtom taug kev tuaj rau ntawm peb no, yog leejtwg?” Tus tubtxib teb hais tias, “Nws yog kuv tus tswv ntag.” Yog li ntawd, Lenpekas txawm muab phuam los npog nws lub ntsejmuag. Tus tubtxib thiaj qhia txhua yam uas nws mus ua tiav tas los rau Ixaj mloog. Ces Ixaj thiaj coj Lenpekas mus rau hauv lub tsevntaub uas thaud Xalas uas yog nws niam nyob, thiab Lenpekas tau los ua Ixaj tus pojniam. Ixaj hlub Lenpekas heev, txawm yog nws niam tuag lawm los nws rov muaj kev kaj siab tuaj. Anplahas yuav dua ib tug pojniam tshiab, nws lub npe hu ua Ketulas. Ketulas yug tau Xeelas, Yausas, Medas, Midias, Isanpas thiab Suas rau Anplahas. Yausas yog Senpas thiab Dedas nkawd txiv, thiab Dedas cov xeebntxwv yog cov Asulees, cov Letusees thiab cov Le-umees. Midias cov tub yog Efas, Efelas, Hanauj, Anpidas thiab Eladas. Tagnrho cov no puavleej yog Ketulas cov xeebntxwv. Anplahas tso txhua yam uas yog nws tej qubtxeeg qubteg rau Ixaj, tiamsis thaum Anplahas tseem ua neej nyob, nws twb muab nws lub cuabtam ibtxhia faib rau nws cov niamyau tej tub lawm thiab. Ces nws thiaj muab cov tub no cais mus nyob rau sab hnubtuaj, kom nyob nrug deb ntawm nws tus tub Ixaj. Anplahas ua neej nyob tau ib puas xya caum tsib xyoos. Anplahas txawm tuag thaum nws muaj hnubnyoog laus lawm, nws yog ib tug neeg laus thiab muaj hnubnyoog nyob ntev heev; nws mam tuag mus nrog nws tej kwvtij, thiab nws tej pogkoob yawgkoob uas twb xub tuag lawm nyob. Nws ob tug tub, Ixaj thiab Yisamayees coj Anplahas lub cev mus faus rau hauv lub qhov Tsua Makepelas uas nyob ze rau ntawm Males sab hnubtuaj, hauv Xauhas tus tub Efaloos uas yog neeg Hitis thaj teb. Yav nram ntej Anplahas twb muas thaj teb ntawd ntawm cov neeg Hitis lawm, lawv thiaj kwv Anplahas mus faus nrog Xalas uas yog nws tus pojniam ua ke rau hauv. Tom qab uas Anplahas tuag lawm, Vajtswv tau foom koob hmoov rau nws tus tub Ixaj. Thaum ntawd Ixaj nyob ze rau ntawm “Lub Qhovtshij uas yog Tus Muaj Sia Nyob thiab Tus Pom Kuv.” Ntawm no yog hais txog Anplahas tus tub Yisamayees cajces uas yog Xalas tus ntxhais qhev Hankas tus uas yog neeg Iziv yug rau Anplahas. Yisamayees muaj kaum ob tug tub, thiab teev lawv tej npe ib tug zuj zus uas yog pib tus tub hlob mus txog tus tub ntxawg muaj raws li no: Nenpayaus, Kedas, Anpees, Mixames, Misemas, Dumas, Maxas, Hadas, Temas, Yetus, Nafises thiab Kedemas. Lawv yog yawgkoob ntawm kaum ob xeem neeg, thiab lawv muab lawv tej zos thiab tej chaw nyob tis npe raws li lawv tej npe. Yisamayees muaj hnubnyoog ib puas peb caug xya xyoo rau thaum nws tuag mus nrog nws tej kwvtij, tej pogkoob yawgkoob uas twb xub tuag ua ntej lawm nyob. Yisamayees cov xeebntxwv nyob rau hauv cheebtsam nruab nrab ntawm Havilas thiab Sules uas ze tebchaws Iziv sab hnubtuaj ntawm txojkev mus rau pem tebchaws Axilias. Lawv nyob lawv rau ib qho tsis xyaw lawv cov kwvtij uas yog Anplahas cov xeebntxwv. Ntawm no yog hais txog Anplahas tus tub Ixaj lub neej. Ixaj hnubnyoog muaj plaub caug xyoo rau thaum nws yuav Lanpas tus muam Lenpekas uas yog Npethuyees tus ntxhais los ua pojniam. Npethuyees yog neeg Alamees uas nyob pem tebchaws Mexuputamias. Lenpekas yeej ibtxwm xeeb tsis taus tub li, Ixaj thiaj thov tus TSWV pub menyuam rau Lenpekas. Tus TSWV thiaj teb Ixaj tej lus thov, thiab Lenpekas txawm xeeb tub lawm. Lenpekas suab ob tug menyuam ntxaib. Thaum tseem tsis tau yug, nkawd ib leeg twb tuam ib leeg hauv leej niam plab lawm. Lenpekas thiaj hais tias, “Vim li cas muaj tej yam xwmtxheej zoo li no rau kuv?” Yog li ntawd, nws thiaj nug tus TSWV saib yog vim li cas. Tus TSWV hais rau Lenpekas hais tias, “Muaj ob haivneeg nyob hauv koj plab; Koj yuav yug tau ob haivneeg uas yuav sib tawmtsam. Ib tug yuav muaj zog tshaj lwm tus, tus tij yuav ua tus kwv qhev.” Thaum txog caij yug lawm, Lenpekas thiaj yug tau ob tug tub ntxaib. Thawj tug tub nqaij tawv liab, thiab tuaj plaub npws loo zoo li lub tsho ntev uas muab tej plaub tsiaj ua. Yog li ntawd, thiaj tis nws npe hu ua Exaus. Thaum uas yug tus kwv, tus kwv tuav rawv Exaus lub lujtaws. Yog li ntawd, thiaj tis nws lub npe hu ua Yakhauj. Ixaj hnubnyoog muaj rau caum xyoo rau thaum uas Lenpekas yug tau ob tug tub ntxaib ntawd. Thaum ob tug tub ntawd loj hlob tiav hluas lawm, Exaus yog ib tug uas txawj tua nqaij, nws yog ib tug neeg nyiam plob havzoov heev, tiamsis Yakhauj yog ib tug neeg ncauj lus tsawg thiab nws nyiam nyob hauv tsev xwb. Ixaj nyiam Exaus dua, rau qhov Ixaj nyiam noj tej nqaij tsiaj qus uas Exaus mus plob tua tau los, tiamsis Lenpekas nyiam Yakhauj dua. Muaj ib hnub thaum Yakhauj tabtom hau mentsis taum rau hauv qhovcub, Exaus mus plob tua nqaij los txog. Nws tshaib plab heev thiab nws hais rau Yakhauj hais tias, “Kuv tshaib plab heev lawm, thov muab koj laujkaub taum liab mentsis pub rau kuv noj.” (Twb yog vim li ntawd thiaj muab nws tis npe hu ua Edoos.) Yakhauj teb hais tias, “Yog koj muab koj lub meejmom uas yog tijlaug rau kuv, kuv thiaj yuav pub rau koj noj.” Exaus teb hais tias, “Ua li los mas! Kuv twb yuav tuag tshaib ntawm no, lub nyuag meejmom ua tij yuav muaj qabhau dabtsi rau kuv?” Yakhauj teb hais tias, “Koj yuav tsum xub coglus ua ntej rau kuv hais tias, koj yuav muab lub meejmom ua tij ntawd rau kuv tso.” Exaus thiaj coglus tseg thiab muab nws lub meejmom ua tijlaug rau Yakhauj. Ces Yakhauj txawm muab mentsis ncuav thiab mentsis taum rau Exaus. Thaum nws noj tas, ces nws txawm sawv mus lawm. Qhov ntawd twb yog Exaus ua saib tsis taus nws lub meejmom tijlaug. Rov muaj dua kev tshaib nqhis nyob hauv lub tebchaws ntawd, ib yam li tiam uas thaum Anplahas tseem ua neej nyob. Ixaj thiaj li mus cuag Anpimelej uas yog cov Filitees tus vajntxwv hauv lub nroog Nkelales. Tus TSWV los tshwm rau Ixaj pom thiab hais rau nws tias, “Koj tsis txhob khiav mus rau nram tebchaws Iziv; nyob twjywm hauv lub tebchaws no ntawm thaj chaw uas kuv qhia rau koj nyob. Nyob twjywm ntawm no xwb, kuv yuav nrog nraim koj nyob thiab foom koob hmoov rau koj. Kuv yuav muab tagnrho lub tebchaws no pub rau koj thiab koj cov xeebntxwv. Kuv yuav nco ntsoov tej lus uas kuv tau cog tseg rau koj txiv Anplahas lawm. Kuv yuav pub kom koj muaj xeebntxwv coob npaum li tej hnubqub saum nruab ntug, thiab kuv yuav muab tagnrho lub tebchaws no pub rau lawv. Thiab kuv yuav foom koob hmoov ntawm koj cov xeebntxwv mus rau txhua haivneeg uas nyob thoob ntiajteb. Kuv yuav foom koob hmoov rau koj, rau qhov Anplahas mloog kuv lus thiab coj raws li kuv tej kevcai thiab tej lus samhwm txhua lo.” Yog li ntawd, Ixaj thiaj nyob twjywm hauv lub nroog Nkelales. Thaum cov txivneej uas nyob hauv lub nroog ntawd nug txog Ixaj tus pojniam, nws teb lawv hais tias, Lenpekas yog nws tus muam xwb. Nws tsis kam qhia hais tias, Lenpekas yog nws tus pojniam, rau qhov Lenpekas zoo nkauj heev, Ixaj ntshai nyob tsam cov txivneej uas nyob hauv lub nroog ntawd tua nws povtseg thiab yuav Lenpekas. Thaum Ixaj thiab Lenpekas tseem nyob hauv lub nroog ntawd, Vajntxwv Anpimelej nyob hauv tsev xauj ntawm qhovrai pom Ixaj thiab Lenpekas tabtom sib tawb. Anpimelej thiaj tso neeg mus hais rau Ixaj hais tias, “Lenpekas twb yog koj tus pojniam ntag los sav! Vim li cas koj tseem hais tias, nws yog koj tus muam xwb?” Ixaj teb vajntxwv hais tias, “Yog kuv qhia rau sawvdaws hais tias nws yog kuv tus pojniam, nyob tsam muaj neeg siab phem muab kuv tua povtseg thiab yuav Lenpekas.” Anpimelej rov hais tias, “Yog li cas koj thiaj ua li no rau peb? Yog kuv cov pejxeem ib tug txivneej cia li mus nrog koj tus pojniam pw, ces koj yog tus uas coj txojkev txhaum ntawd los rau peb.” Anpimelej thiaj ceebtoom rau nws cov pejxeem hais tias: “Yog leejtwg lam mus zes tus txivneej no tus pojniam, mas yuav muab tus ntawd tua povtseg.” Ixaj cog qoobloo rau hauv lub tebchaws ntawd, thiab xyoo ntawd nws sau tau qoobloo ntau tshaj cov noob uas nws cog lawm ib puas npaug, rau qhov tus TSWV foom koob hmoov rau nws. Ixaj vammeej zuj zus thiab ua ib tug neeg npluanuj heev. Rau qhov Ixaj muaj tej tsiaj txhu uas yog yaj thiab nyuj coob, thiab nws tseem muaj tubtxib coob kawg li, thiaj ua rau cov neeg Filitees khib heev. Lawv thiaj muab tej qhovtshij uas nws txiv Anplahas cov tubtxib khawb thaum nws tseem ua neej nyob txhub tas huv tibsi lawm. Ces Anpimelej thiaj hais rau Ixaj hais tias, “Koj cia li khiav tawm hauv peb lub tebchaws no mus. Rau qhov koj muaj hwjchim tshaj peb lawm.” Yog li ntawd, Ixaj thiaj khiav tawm hauv lub nroog ntawd thiab mus rub tsevntaub nyob rau hauv lub Hav Nkelales, nws nyob qhov ntawd tau ib ntus. Nws thiaj li rov qab khawb cov qhovtshij uas thaum ub nws txiv Anplahas khawb cia lawm dua ib zaug ntxiv, rau qhov tom qab uas Anplahas tuag lawm, cov Filitees tau tuaj muab tej qhovtshij no txhub tas lawm. Ixaj tis npe rau cov qhovtshij no raws li tej qub npe uas thaum nws txiv tis rau lawm. Ixaj cov tubtxib mus khawb ib lub qhovtshij hauv lub hav ntawd thiab txawm muaj dej txhawv tawm los. Ces cov neeg yug yaj hauv lub nroog Nkelales tuaj nrog Ixaj cov neeg yug yaj sib txeeb thiab hais tias, “Cov qhovtshij no yog peb tug.” Yog li ntawd, Ixaj thiaj muab lub qhovtshij ntawd tis npe hu ua “Sib Txeeb.” Ixaj cov tubtxib rov khawb dua ib lub qhovtshij, thiab lawv tseem rov txeeb lub qhovtshij ntawd dua, yog li ntawd, nws thiaj tis npe rau lub qhovtshij ntawd hu ua “Sib Ntxub.” Nws thiaj khiav tawm ntawm thaj chaw ntawd mus khawb dua ib lub qhovtshij. Nyob qhov ntawd lawv tsis muaj kev sib cav sib ceg txog lub qhovtshij no ntxiv lawm, yog li ntawd, nws thiaj tis npe rau lub qhovtshij ntawd hu ua “Muaj Av Dav.” Nws hais tias, “Nimno tus TSWV pub peb muaj av dav nyob hauv lub tebchaws no, thiab peb yuav muaj kev vammeej nyob ntawm no mus li.” Ixaj thiaj tawm ntawm qhov chaw ntawd thiab mus rau tom Npesenpas. Hmo ntawd tus TSWV thiaj los tshwm rau nws pom thiab hais rau nws tias, “Kuv yog koj txiv Anplahas tus Vajtswv ntag. Koj tsis txhob ntshai, kuv nrog nraim koj nyob. Kuv yuav foom koob hmoov rau koj thiab pub rau koj muaj xeebntxwv coob raws li kuv tau coglus rau kuv tus tubtxib Anplahas lawm.” Ixaj thiaj teeb tau ib lub thaj rau ntawd thiab pehawm tus TSWV. Ces nws txawm rub nws lub tsevntaub nyob rau qhov ntawd, thiab nws cov tubtxib rov khawb dua ib lub qhovtshij. Anpimelej coj Ahuxas uas yog nws tus tuavxam thiab Fikaules uas yog nws tus thawj tubrog nrog nws tuaj hauv lub nroog Nkelales tuaj cuag Ixaj. Ixaj thiaj nug hais tias, “Vim li cas nimno nej thiaj tuaj cuag kuv? Yav nram ntej nej twb tsis nrog kuv ua phoojywg thiab nej twb ntiab kuv tawm hauv nej lub tebchaws lawm?” Lawv teb hais tias, “Nimno peb paub hais tias muaj tus TSWV nrog nraim koj nyob, thiab peb xav hais tias tsimnyog peb yuav tsum tau los sib hais kom haum thiab coglus rau koj. Peb xav kom koj coglus rau peb hais tias koj yuav tsis ua phem rau peb, ib yam li peb tsis tau ua phem rau koj. Peb yeej ua zoo rau koj thiab tso koj mus kaj siab lug. Peb paub hais tias, nimno tus TSWV foom koob hmoov rau koj lawm.” Ixaj thiaj npaj tau ib rooj mov rau lawv, lawv thiaj noj thiab haus txaus nkaus. Tagkis sawv ntxov lawv peb leeg ntawd nyias los lees nyias lus thiab nias homthawj rau nyias daim ntawv. Ces Ixaj txawm xa lawv sawv kev mus tsev kaj siab lug lawm. Hnub ntawd Ixaj cov tubtxib thiaj los piav qhia rau nws hais txog lub qhovtshij uas lawv tau mus khawb ntawd. Lawv hais tias, “Peb mus nrhiav tau ib lub qhovtshij lawm.” Ixaj thiaj tis npe rau lub qhovtshij ntawd hu ua “Coglus.” Vim li ntawd thiaj ua rau lub nroog Npesenpas tau lub npe no. Thaum uas Exaus hnubnyoog muaj plaub caug xyoo, nws yuav tau cov neeg Hitis ob tug ntxhais los ua pojniam, Yudis yog Npelais tus ntxhais thiab Npasemas yog Eloos tus ntxhais. Ob tug nyab no ua rau Ixaj thiab Lenpekas ua neej lwj siab kawg li. Nimno Ixaj laus heev thiab qhovmuag tsis pom kev lawm. Nws tso neeg mus hu nws tus tub hlob Exaus los thiab nws hais tias, “Metub!” Exaus teb hais tias, “Txiv, kuv nyob ntawm no.” Ixaj hais tias, “Koj pom hais tias kuv twb laus heev thiab kuv yuav tuag hnub twg los tsis paub li. Nqa koj rab hneevnti thiab koj cov xub, mus yos tom havzoov thiab tua nqaij nruab nrag los rau kuv noj. Ua ib pluag mov qab uas kuv nyiam, thiab nqa los rau kuv noj. Tom qab uas kuv noj tas lawm, kuv yuav foom koob hmoov rau koj zaum kawg ua ntej kuv tuag.” Thaum Ixaj tabtom hais rau Exaus ntawd, Lenpekas txawm hnov. Yog li ntawd, thaum Exaus tawm mus yos tua nqaij lawm, Lenpekas txawm hais rau Yakhauj hais tias, “Kuv hnov koj txiv hais rau Exaus hais tias, ‘Koj cia li mus yos tua nqaij thiab ua ib pluag mov qab los rau kuv noj. Tom qab uas noj npluag mov ntawd tas lawm, kuv yuav foom koob hmoov rau koj tabmeeg tus TSWV ua ntej kuv tuag.’ Tamsim no ntag lauj, metub, koj cia li mloog kuv hais thiab ua raws li kuv qhia. Koj mus nram pab tsiaj thiab ntes ob tug menyuam tshis uas rog los rau kuv, kuv yuav muab ob tug tshis ntawd tua ua ib pluag nqaij qab heev uas koj txiv nyiam heev rau koj txiv noj. Koj nqa mus rau koj txiv noj, thiab nws yuav foom nws tej koob hmoov rau koj ua ntej nws tuag.” Tiamsis Yakhauj hais rau nws niam tias, “Koj yeej paub hais tias Exaus yog neeg tuaj plaub, tiamsis kuv tej tawv nqaij dulug xwb. Nyob tsam kuv txiv cev tes plhws kuv, ces nws paub hais tias yog kuv dag nws, kuv ua li no kom kuv tau koob hmoov tiamsis ntshai kuv yuav tau nws lo lus foom tsis zoo xwb.” Nws niam teb hais tias, “Kuv tub, txhua yam uas koj txiv foom tsis zoo cia poob rau kuv ris huv tibsi, cia li ua raws li kuv twb hais rau koj lawm, mus ntes ob tug menyuam tshis los rau kuv.” Yog li ntawd, Yakhauj thiaj mus ntes tau ob tug menyuam tshis cab los rau nws niam, ces leej niam thiaj muab tua ua ib pluag nqaij qab heev uas nws txiv nyiam noj. Ces Lenpekas txawm mus muab Exaus uas yog nws tus tub hlob cev ris tsho zoo tshaj plaws uas nws khaws cia los rau Yakhauj hnav. Lenpekas thiaj muab ob daim tawv tshis los qhwv Yakhauj ob txhais cajnpab thiab qhwv Yakhauj lub cajdab qhov tsis tuaj plaub. Ces Lenpekas txawm muab cov nqaij uas qab ntawd, thiab cov mov uas nws ua tau lawm, rau nws tus tub Yakhauj. Ces Yakhauj txawm nqa mus rau nws txiv thiab hais tias, “Txiv!” Ixaj teb hais tias, “Koj hais dabtsi, koj yog kuv ob tug tub tus twg?” Yakhauj teb hais tias, “Kuv yog Exaus, koj tus tub hlob ntag, kuv twb ua nqaij siav tas raws li koj tau hais rau kuv lawm. Koj cia li sawv los thiab noj tej nqaij uas kuv nqa los rau koj, thiab foom koj tej koob hmoov rau kuv.” Ixaj nug hais tias, “Metub koj mus yos qhov twg, koj yuav tua tau nqaij los sai ua luaj li?” Yakhauj teb hais tias, “Tus TSWV uas yog koj tus Vajtswv pab kuv, kuv thiaj mus nrhiav tau sai.” Ixaj hais rau Yakhauj hais tias, “Koj cia li txav los rau ntawm kuv no, kuv yuav cev tes plhws koj, saib koj puas yog Exaus tiag los tsis yog?” Yakhauj thiaj txav zog mus rau ntawm nws txiv, Ixaj thiaj cev tes tuaj plhws Yakhauj thiab hais tias, “Koj lub suab hais lus zoo li Yakhauj lub, tiamsis koj ob txhais npab zoo li Exaus ob txhais.” Nws tsis paub Yakhauj lawm rau qhov Yakhauj ob txhais npab tuaj plaub npws loo zoo li Exaus ob txhais thiab. Nws twb yuav foom koob hmoov rau Yakhauj, tiamsis nws tseem rov nug dua ntxiv hais tias, “Koj yog Exaus tiag los?” Yakhauj teb hais tias, “Kuv yog Exaus tiag.” Ixaj hais tias, “Tsaws cov nqaij los rau kuv noj. Thaum kuv noj tas lawm, kuv mam li foom kuv tej koob hmoov rau koj.” Yakhauj thiaj tsaws hlo tsum mov los rau nws txiv noj thiab tseem ce cawv los rau nws txiv haus huv tibsi. Ces Ixaj hais rau Yakhauj hais tias, “Metub, koj cia li txav los ze thiab nwj kuv.” Thaum Yakhauj txav zog los nwj Ixaj, Ixaj hnia Yakhauj lub tsho tsw Exaus tus ntxhiab, nws thiaj foom koob hmoov rau Yakhauj. Nws hais tias, “Kuv tus tub no tus ntxhiab tsw ib yam li thaj teb uas tus TSWV twb foom koob hmoov rau lawm tus ntxhiab ntag. Thov Vajtswv tso lwg saum ntuj los rau koj tej teb kom zoo qoobloo heev! Thov nws pub rau koj tej nplej, tej txiv hmab kom ntsu heev! Thov kom txhua haivneeg tau los ua koj tubtxib, thiab thov kom tej pejxeem txhos caug ntua pe koj. Thov kom koj tau ua tus kav tagnrho koj tsoom kwvtij, thov kom koj niam cov xeebntxwv txhos caug pe koj. Thov kom cov uas tsawm foom koj raug foom tsis zoo, thiab thov kom cov uas foom koob hmoov rau koj tau txais koob hmoov zoo.” Ixaj foom koob hmoov tagnrho xwb, Yakhauj tawm plaws lawm, ces Yakhauj tus tijlaug Exaus uas mus yos tua nqaij, txawm los txog ntua. Nws muab cov nqaij ntawd ua tau qab heev thiab nqa mus rau nws txiv. Nws hais tias, “Txiv, koj cia li sawv los thiab noj tej nqaij uas kuv mus tua tau thiab ua nqa los rau koj, koj yuav foom koj tej koob hmoov rau kuv.” Ixaj nug hais tias, “Koj yog leejtwg?” Exaus teb hais tias, “Kuv yog koj tus tub hlob, Exaus ntag.” Ixaj poob siab nthav thiab ua ibce tshee hnyo, ces nws thiaj nug hais tias, “Es tus puagta tua tau nqaij los ua rau kuv noj tas lawm, ho yog leejtwg? Kuv noj tagnrho ces koj txawm los txog ntua ntag. Kuv twb foom kuv tej koob hmoov uas yog zaum kawg rau nws, thiab nws yeej tau txoj koob hmoov ntawd mus ibtxhis li lawm.” Thaum Exaus hnov dheev li ntawd, nws mob siab heev tsa hlo suab quaj thiab hais tias, “Txiv, koj cia li foom koob hmoov rau kuv ib yam nkaus thiab los mas!” Ixaj teb hais tias, “Koj tus kwv twb los dag kuv. Mas nws twb tau koj tej koob hmoov lawm.” Exaus hais tias, “Zaum no yog zaum ob uas nws txhav kuv tug. Nws lub npe yeej phim hu ua Yakhauj lawm tiag! Nws twb txeeb kuv lub meejmom uas yog tijlaug lawm, nimno nws tseem txhav kuv tej koob hmoov lawm thiab. Koj txawm tsis tshuav koob hmoov seem rau kuv li los?” Ixaj teb hais tias, “Kuv twb tsa nws los ua nom ua tswv kav koj, thiab kuv twb foom kom nws cov kwvtij tau los ua nws tubtxib huv tibsi lawm. Kuv tau foom koob hmoov kom nws muaj qoobloo thiab txiv hmab nplua mias. Metub, nimno kuv tsis tshuav ib yam dabtsi yuav foom rau koj ntxiv li lawm!” Exaus rov taij nws txiv hais tias, “Txiv, koj tej lus koob lus hmoov tsuas muaj npaum ntawd xwb los? Thov foom koob hmoov rau kuv thiab los mas!” Nws rov quaj dua. Ces Ixaj hais rau Exaus hais tias, “Koj yuav nyob lub tebchaws uas tsis zoo qoob, Thiab tsis muaj dej nag yug koj tej qoobloo. Koj yuav nrhiav noj nrhiav haus ntawm koj rab ntaj, tiamsis koj yuav ua koj tus kwv qhev. Yog thaum twg koj ntxeev siab rau nws, koj thiaj li dim ntawm nws kev tswjhwm.” Exaus txawm ntxub Yakhauj heev, rau qhov nws txiv foom koob hmoov rau Yakhauj lawm. Nws xav hais tias, “Kuv txiv hnub tuag twb los ze lawm, thaum dua nws lawm, kuv yuav muab Yakhauj tua povtseg.” Tiamsis thaum Lenpekas hnov hais tias Exaus tuav tswvyim li ntawd, nws thiaj mus hais rau Yakhauj hais tias, “Koj tus tijlaug Exaus tuav tswvyim yuav tua koj povtseg pauj qhov uas koj ua rau nws. Metub, tamsim no koj cia li ua li kuv hais. Koj kavtsij sawbsim khiav mus nrog kuv tus nus Lanpas nyob tim lub nroog Halas, thiab nrog nws nyob ib ntu, kom koj tus tijlaug tej kev chim xam, thiab nws tsis nco qab txog tej uas koj ua rau nws lawm tso. Ces kuv mam nrhiav neeg tuaj tos koj rov qab los. Vim li cas kuv yuav ua tib hnub ploj kuv ob tug tub li?” Lenpekas hais rau Ixaj hais tias, “Kuv dhuav Exaus ob tug pojniam uas yog cov neeg Hitis ntawd heev lawm. Yog Yakhauj tseem mus yuav cov neeg Hitis no ib tug ntxhais los ua pojniam thiab, ces ntshai kuv yeem tuag mus zoo dua.” Ixaj thiaj hu Yakhauj los cuag nws, foom koob hmoov rau nws, thiab hais rau nws tias, “Metub, koj tsis txhob lam yuav cov neeg Kana-as no tej ntxhais. Cia li mus lawm tim koj yawmtxiv Npethuyees tsev uas nyob tim tebchaws Mexuputamias, thiab mus yuav cov ntxhais tid ib tug los ua koj pojniam, yuav koj dablaug Lanpas cov ntxhais ib tug ntag. Thov Vajtswv tus muaj hwjchim loj kawg nkaus foom koob hmoov rau koj thiab pub koj muaj tubki coob, kom koj tau ua ntau haivneeg tus yawgkoob. Thov kom nws foom koob hmoov rau koj thiab koj tej xeebntxwv ib yam li nws foom koob hmoov rau Anplahas, thiab thov kom koj tau thaj av uas Vajtswv muab pub rau Anplahas uas koj tau los nyob no lawm ua koj tug.” Ixaj thiaj tso Yakhauj mus rau tim tebchaws Mexuputamias, mus nrog Lanpas uas yog Npethuyees uas yog neeg Alamees tus tub uas yog Yakhauj thiab Exaus nkawd niam Lenpekas tus nus hlob nyob. Exaus paub hais tias, Ixaj foom koob hmoov rau Yakhauj thiab samhwm tsis pub kom nws yuav cov neeg Kana-as tej ntxhais los ua pojniam, thiab tso nws mus nrhiav yuav pojniam rau tim tebchaws Mexuputamias lawm. Exaus paub hais tias, Yakhauj yeej mloog niam mloog txiv lus thiab nws tau mus rau tim tebchaws Mexuputamias lawm tiag. Ces Exaus thiaj paub hais tias, nws txiv Ixaj tsis nyiam cov pojniam uas yog neeg Kana-as. Yog li ntawd, nws thiaj mus yuav Anplahas tus tub Yisamayees tus ntxhais Mahelas uas yog Nenpayaus tus muam los ua pojniam. Yakhauj sawv kev ntawm lub nroog Npesenpas mus rau tim lub nroog Halas. Thaum nws mus txog ntawm ib thaj chaw, lub hnub poob qho lawm, nws thiaj pw ib hmo ntawm ib tog kev, nws muab ib lub pobzeb los rau ncoo pw tsaug zog. Nws ua npau suav pom ib tug ntaiv tuam hauv av no mus nto plaws saum ntuj, muaj cov timtswv nce mus thiab nqis los ntawm tus ntaiv ntawd. Ua ciav txawm pom tus TSWV sawv nres nroos ntawm nws ib sab. Tus TSWV hais tias, “Kuv yog Anplahas thiab Ixaj tus Vajtswv, kuv yuav muab thaj av uas koj tabtom pw ntawm ko pub rau koj thiab koj cov xeebntxwv ua nej tug. Koj cov xeebntxwv yuav coob npaum li cov hmoov av hauv ntiajteb no. Lawv yuav nthuav lawv lub tebchaws kom dav mus rau txhua fab, thiab kuv yuav foom koob hmoov ntawm koj thiab koj cov xeebntxwv mus rau txhua haivneeg uas nyob thoob ntiajteb. Nco ntsoov hais tias, kuv yuav nrog nraim koj thiab tsomkwm koj txhua qhov chaw uas koj mus, thiab kuv yuav coj koj rov los nyob rau ntawm thaj av no dua. Kuv yuav nrog nraim koj mus txog thaum kuv ua txhua yam tiav tas raws li kuv tau coglus rau koj lawm.” Yakhauj tsim dheev los thiab nws hais tias, “Tus TSWV yeej nyob ntawm no tiag lauj! Nws yeej nyob ntawm thaj chaw no, tiamsis yog kuv tsis paub xwb!” Nws ntshai heev thiab nws hais tias, “Qhov chaw no ua rau kuv ntshai heev! Lub chaw no yeej yog Vajtswv lub tsev thiab yog rooj ntug ceebtsheej ntag lauj.” Tagkis kaj ntug Yakhauj thiaj muab lub pobzeb uas nws muab los rau ncoo ntawd teeb ua qhov chaw tseemceeb nco tseg. Ces nws muab roj txiv ntoo hliv rau saum lub pobzeb thiab muab fij rau Vajtswv. Nws thiaj tis npe rau thaj chaw ntawd hu ua Npethees (Lub nroog ntawd thaum ub hu ua Luxes.) Yakhauj txawm coglus rau tus TSWV hais tias, “Yog koj nrog nraim kuv nyob thiab tsomkwm kuv taug kev mus, pub mov rau kuv noj thiab ris tsho rau kuv hnav, mus txog thaum kuv rov qab los txog rau hauv kuv txiv tsev kaj siab lug, mas koj thiaj yog kuv tus Vajtswv tiag. Lub pobzeb uas kuv teeb ua chaw nco txog no yuav yog qhov chaw pehawm koj ntag, thiab kuv yuav muab txhua yam uas koj muab rau kuv lawm ib feem kaum rau koj.” Yakhauj txawm rau siab ntso taug kev mus txog rau hauv cov neeg uas nyob sab hnubtuaj lub tebchaws. Tamsim ntawd, nws ntsia dheev pom ib lub qhovtshij nyob hauv ib daim teb, thiab muaj peb pab yaj pw pawglug ncig lub qhovtshij ntawd. Cov yaj ntawd yeej haus dej hauv lub qhovtshij no, luag muab ib daim txiag pobzeb loj heev npog lub qhovtshij ntawd. Raws li ibtxwm, luag tos thaum cov yaj los txhij rau ntawm lub qhovtshij lawm, mas cov neeg yug yaj mam li muab daim txiag pobzeb ntawd tshem tawm thiab daus dej rau cov yaj haus. Ces lawv mam li muab daim txiag pobzeb rov los npog lub qhovtshij dua. Yakhauj nug cov neeg yug yaj hais tias, “Kuv cov phoojywg, nej tuaj qhov twg tuaj?” Lawv teb hais tias, “Peb tuaj tom lub nroog Halas tuaj.” Yakhauj rov nug dua hais tias, “Nej puas paub Lanpas uas yog Nahaus tus tub?” Lawv teb hais tias, “Peb paub nws thiab.” Yakhauj rov nug hais tias, “Nws puas noj qab nyob zoo?” Lawv teb hais tias, “Nws noj qab nyob zoo thiab, koj saib tid maj, nws tus ntxhais Laxees tabtom tav nws pab yaj tuaj txog tid.” Yakhauj hais tias, “Tamsim no tseem ntxov heev tsis tau txog lub caij uas tav tej tsiaj mus tsev, ua cas nej tsis daus dej rau nej cov tsiaj haus thiab coj rov mus noj zaub dua?” Lawv teb hais tias, “Peb tsis ua li ntawd, tos txog thaum cov tsiaj los txhij rau ntawm no tso, peb mam muab daim txiag pobzeb tshem tawm, thiab daus dej rau cov tsiaj haus.” Thaum Yakhauj tabtom nrog lawv tham, Laxees txawm tav nws txiv pab yaj los txog ntua ntawd thiab. Thaum Yakhauj pom Laxees coj Yakhauj dablaug Lanpas pab yaj los txog ntua ntawd lawm, Yakhauj txawm mus rau ntawm lub qhovtshij, muab daim txiag pobzeb tshem tawm, thiab daus dej rau cov yaj haus. Nws nwj kiag Laxees thiab quaj zoo siab heev. Nws hais rau Laxees hais tias, “Kuv yog Lenpekas tus tub, kuv niam thiab koj txiv yog nusmuag ntag.” Laxees thiaj khiav mus qhia rau nws txiv, thiab thaum Lanpas hnov hais tias nws tus muam tus tub Yakhauj tuaj, nws txawm khiav loo mus tos Yakhauj, thiab coj Yakhauj los tsev. Yakhauj qhia txhua yam rau Lanpas mloog, Lanpas hais rau Yakhauj hais tias, “Tseeb lawm lauj, koj yeej yog kuv nqaij tawv thiab roj ntshav tiag.” Yakhauj nrog Lanpas nyob tau ib hlis nkaus. Lanpas hais rau Yakhauj hais tias, “Koj thiab kuv, wb txawm yog txheeb ze los tsis tsimnyog koj yuav ua haujlwm pub dawb rau kuv xwb. Koj xav yuav nqi zog pestsawg?” Lanpas muaj ob tug ntxhais, tus hlob hu ua Le-as, thiab tus yau hu ua Laxees. Le-as tsis tshua zoo nkauj, tiamsis Laxees zoo nkauj thiab txaus nyiam heev. Yakhauj nyiam Laxees dua, yog li ntawd, nws thiaj hais rau Lanpas hais tias, “Yog koj kam kuv yuav Laxees ua pojniam, kuv yuav ua haujlwm rau koj xya lub xyoo.” Lanpas teb hais tias, “Kuv zoo siab muab Laxees rau koj zoo dua li kuv muab rau lwm tus, koj cia li nrog kuv nyob ntawm no.” Yakhauj thiaj ua haujlwm xya lub xyoo kom tau Laxees ua pojniam. Txawm yog sijhawm ntev npaum li ntawd los zoo li ob peb nyuag hnub rau Yakhauj xwb, rau qhov nws nyiam Laxees heev. Ces Yakhauj hais rau Lanpas hais tias, “Kuv twb ua haujlwm puv xya lub xyoo lawm, cia li muab Laxees rau kuv yuav.” Yog li ntawd, Lanpas thiaj ua ib rooj mov thiab caw txhua tus tuaj nrog nws noj tshoob. Yog tiag mas yuav tsum muab Laxees rau Yakhauj, tiamsis hmo ntawm Lanpas muab Le-as mus rau Yakhauj, ces Yakhauj thiaj nrog Le-as pw. ( Lanpas muab nws tus ntxhais qhev Xilepas rau nws tus ntxhais Le-as ua Le-as tus ntxhais qhev.) Thaum kaj ntug Yakhauj mam li paub hais tias tus uas nrog nws pw ntawd yog Le-as. Nws thiaj mus hais rau Lanpas hais tias, “Vim li cas koj thiaj ua li no rau kuv? Kuv ua haujlwm rau koj yog xav yuav Laxees xwb. Vim li cas koj dag kuv?” Lanpas teb hais tias, “Peb cov neeg nyob tebchaws no, tsis muaj cai xub muab tus ntxhais yau qua ua ntej tus ntxhais hlob. Tos xya hnub kom ua tshoob dhau tso, kuv mam li muab Laxees rau koj, yog koj kam rov qab ua haujlwm rau kuv xya lub xyoo ntxiv.” Yakhauj kuj pom zoo ua li ntawd, ces thaum xya hnub uas ua tshoob ntawd dhau lawm, Lanpas thiaj muab Laxees rau Yakhauj yuav ua pojniam. ( Lanpas muab nws tus ntxhais qhev uas hu ua Npilehas rau Laxees ua Laxees tus ntxhais qhev.) Yakhauj nrog Laxees pw, thiab nws hlub Laxees heev dua li nws hlub Le-as. Yakhauj rov ua haujlwm rau Lanpas xya lub xyoo ntxiv. Thaum Vajtswv pom hais tias, Yakhauj hlub Le-as tsis npaum li hlub Laxees, Vajtswv thiaj cia Le-as muaj menyuam xwb, tiamsis tsis pub kom Laxees muaj menyuam. Le-as txawm xeeb tub thiab yug tau ib tug tub tiag. Nws thiaj hais tias, “Tus TSWV pom kuv tej kev lwj siab, nyaj zaum no kuv tus txiv yuav hlub kuv”; yog li ntawd, nws thiaj tis tus tub ntawd npe hu ua Lunpees. Le-as rov xeeb tub thiab yug tau ib tug tub. Nws hais tias, “Tus TSWV pub kuv rov muaj tus tub no thiab, rau qhov nws hnov hais tias, kuv tus txiv tsis hlub kuv”; yog li ntawd, nws thiaj tis tus tub ntawd npe hu ua Xime-oos. Le-as rov xeeb tub thiab yug tau ib tug tub ntxiv. Nws hais tias, “Zaum no kuv tus txiv yuav muab siab npuab kuv, rau qhov kuv twb yug tau peb tug tub rau nws lawm”; yog li ntawd, nws thiaj tis tus tub ntawd npe hu ua Levis. Le-as rov xeeb tub thiab yug tau ib tug tub ntxiv. Nws hais tias, “Zaum no kuv yuav ua tus TSWV tsaug”; yog li ntawd, nws thiaj tis tus metub ntawd npe hu ua Yudas. Ces nws txawm tseg tsis muaj menyuam lawm. Tiamsis Laxees tsis muaj ib tug menyuam rau Yakhauj li, thiab nws ntxub nws tus niamlaus heev, nws thiaj hais rau Yakhauj hais tias, “Koj yuav muab menyuam rau kuv lossis koj yuav cia kuv tuag mus.” Yakhauj chim heev rau Laxees, nws thiaj teb Laxees hais tias, “Kuv yog Vajtswv los? Vajtswv yog tus uas tsis pub koj muaj menyuam los sav.” Laxees hais tias, “Kuv tus ntxhais qhev Npilehas nyob ntawm no, koj cia li mus nrog nws pw kom nws muaj menyuam rau kuv. Ua li no kuv thiaj yuav tau ua tus tub ntawm leej niam.” Yog li ntawd, Laxees thiaj muab Npilehas rau nws tus txiv yuav, thiab Yakhauj thiaj mus nrog nws pw. Npilehas txawm xeeb tub thiab yug tau ib tug tub rau Yakhauj. Laxees hais tias, “Vajtswv txiav txim raws li nws txojkev ncaj ncees. Nws hnov kuv tej lus thov thiab pub rau kuv muaj ib tug tub lawm”; yog li ntawd, nws thiaj tis tus tub ntawd npe hu ua Das. Npilehas rov xeeb tub thiab yug tau ib tug tub rau Yakhauj. Laxees hais tias, “Kuv tau tawmtsam kuv tus niamlaus hnyav heev, nimno kuv thiaj yeej nws lawm”; yog li ntawd, nws thiaj tis tus tub ntawd npe hu ua Nathalis. Thaum Le-as paub hais tias, nws tsis muaj menyuam lawm, nws txawm muab nws tus ntxhais qhev Xilepas rau Yakhauj yuav ua niamyau. Ces Xilepas txawm yug tau ib tug tub rau Yakhauj. Le-as hais tias, “Kuv hmoov zoo kawg”; yog li ntawd, nws thiaj tis tus metub ntawd npe hu ua Khas. Xilepas rov yug tau ib tug tub rau Yakhauj, thiab Le-as hais tias, “Kuv zoo siab kawg nkaus li lauj! Nimno tej pojniam yuav hu kuv hais tias, tus zoo siab”; yog li ntawd, nws thiaj tis tus tub ntawd npe hu ua Aseles. Thaum txog caij hlais nplej Lunpees mus yos ua si tom teb thiab nws pom ib cov zaub ntug hauvpaus, nws txawm rho tau ib cov nqa los rau nws niam Le-as. Laxees hais rau Le-as hais tias, “Thov muab koj tus tub cov zaub ntug hauvpaus ob peb lub pub rau kuv.” Le-as teb hais tias, “Koj twb coj kuv tus txiv mus lawm ne, tseem tsis txaus koj siab thiab los? Nimno koj tseem tuaj thov kuv tus tub cov zaub ntug hauvpaus thiab.” Laxees teb hais tias, “Yog koj muab koj tus tub cov zaub ntug hauvpaus ob peb lub rau kuv, ib chim tsaus ntuj kuv cia Yakhauj nrog koj pw.” Thaum yuav tsaus ntuj Yakhauj rov tom teb los, Le-as tawm mus tos Yakhauj thiab hais tias, “Hmo no koj yuav tsum mus nrog kuv pw, rau qhov kuv twb muab kuv tus tub cov zaub ntug hauvpaus ntiav koj lawm.” Yog li ntawd, hmo ntawd Yakhauj thiaj mus nrog Le-as pw. Vajtswv teb Le-as tej lus thov, nws thiaj rov xeeb tub thiab yug tau ib tug tub rau Yakhauj yog tus tsib. Le-as hais tias, “Vajtswv muab nqi zog rau kuv, rau qhov kuv muab kuv tus ntxhais qhev rau kuv tus txiv yuav”; yog li ntawd, nws thiaj tis tus metub ntawd npe hu ua Ixakhas. Le-as rov xeeb tub thiab yug tau ib tug tub rau Yakhauj yog tus rau. Le-as hais tias, “Vajtswv muab tau ib qhov khoom pub rau kuv zoo kawg nkaus li. Mas zaum no kuv tus txiv yuav hlub kuv, rau qhov kuv twb yug tau rau tug tub rau nws lawm”; yog li ntawd, nws thiaj tis tus tub ntawd npe hu ua Xenpuloos. Ces tom qab ntawd nws yug tau ib tug ntxhais, thiab nws tis npe rau tus ntxhais ntawd hu ua Dinas. Vajtswv tseem nco ntsoov txog Laxees; nws thiaj teb Laxees tej lus thov thiab pub kom nws muaj menyuam. Laxees thiaj xeeb tub thiab yug tau ib tug tub. Nws hais tias, “Vajtswv pub kuv muaj tus tub no los tshem kuv txojkev txajmuag tawm. Thov kom tus TSWV pub rau kuv rov muaj dua ib tug tub ntxiv thiab”; yog li ntawd, Laxees thiaj tis tus tub ntawd npe hu ua Yauxej. Tom qab uas Laxees yug tau Yauxej lawm, Yakhauj txawm hais rau Lanpas hais tias, “Thov koj tso kuv rov qab, kuv yuav rov qab mus nyob nram kuv txiv lub tsev thiab lub tebchaws. Thov muab kuv ob tug pojniam thiab kuv cov menyuam uas kuv ua zog tau rau kuv, kuv yuav sawv kev mus. Koj yeej paub hais tias kuv ua txhua yam rau koj tiav log lawm.” Lanpas teb Yakhauj hais tias, “Thov cia kuv hais li no: raws li kuv saib yaig mas, vim muaj koj, tus TSWV thiaj foom koob hmoov rau kuv. Xam tagnrho tej nqi zog uas koj ua saib raug pestsawg kuv yuav them rau koj.” Yakhauj teb hais tias, “Kuv tau ua haujlwm zoo npaum li cas rau koj thiab koj tej tsiaj uas kuv tu huamvam npaum li cas los koj yeej paub zoo lawm. Ua ntej thaum uas kuv tsis tau los, koj muaj tsiaj tsawg heev, nimno koj tej tsiaj kuj huamvam coob kawg li lawm, thiab tus TSWV twb foom koob hmoov rau koj txhua yam uas kuv ua thiab txhua qhov uas kuv mus. Xyov yuav thaum twg kuv mam li yug taus kuv lub cuab lub yig?” Lanpas thiaj nug hais tias, “Yog li ntawd, kuv yuav muab dabtsi los ua nqi zog rau koj?” Yakhauj teb hais tias, “Kuv tsis yuav ib yam dabtsi li. Yog koj kam mas kuv yuav nyob tu koj cov tsiaj mus ntxiv xwsli: Hnub no cia kuv mus ncig xyuas thoob plaws koj cov tsiaj thiab muab txhua tus menyuam yaj dub thiab tej menyuam tshis uas txaij lossis txaij tej teev xaiv cia rau ib qho. Cov tsiaj no lauj, yog cov uas ua nqi zog rau kuv. Thaum koj tuaj saib koj thiaj paub hais tias, kuv yeej ua ncaj ncees tiag. Thaum koj tuaj tshuaj xyuas kuv tej nqi zog, yog kuv tseem muaj tej tug menyuam tshis tsis txaij lossis tsis txaij tej teev lossis muaj ib tug menyuam yaj tsis dub li, ces koj thiaj paub hais tias yog kuv nyiag los xwb.” Lanpas teb hais tias, “Kuv pom zoo yuav li uas koj hais ntag.” Tiamsis hnub ntawd Lanpas muab cov laug tshis uas txaij lossis txaij tej teev thiab cov maum tshis uas txaij lossis txaij ua tej teev lossis dawb tej teev cais, thiab nws muab tagnrho cov yaj dub cais tawm rau ib qho. Nws tso nws cov tub ua cov saib tej tsiaj ntawd, thiab muab cais mus nyob nrug deb peb hnub ke ntawm Lanpas cov tsiaj uas tseg cia rau Yakhauj tu. Yakhauj muab tej ceg cev, ceg txiv duaj thiab ceg seb laws tawv txaij ua tej kab kom pom tus txha ceg ntoo dawb paug. Nws thiaj muab cov ceg ntoo ntawd coj mus tso rau ntawm lub dabdej uas cov tsiaj los haus dej. Nws coj cov ceg ntoo mus tso rau ntawd, rau qhov cov tsiaj sib tshov thaum lawv los haus dej ua ke. Yog li ntawd, thaum cov tshis los sib tshov rau ntawm cov ceg ntoo ntawd, cov tshis txawm yug tau cov menyuam txaij ua tej kab thiab txaij ua tej teev. Yakhauj txawm muab cov menyuam yaj thiab menyuam tshis uas txaij cais tawm ntawm cov maum laus thiab muab cov maum laus tig taubhau mus rau tom Lanpas cov tsiaj uas txaij thiab dub. Qhov uas Yakhauj ua li no, twb yog nws faib kom nws muaj ib pab tsiaj ua nws tug thiab muab cais tawm ntawm Lanpas cov mus nyob ib qho. Thaum cov tsiaj uas zoo thiab khov kho sib tshov, Yakhauj muab cov ceg ntoo ntawd coj mus tso rau ntawm lub dabdej, qhov chaw uas cov tsiaj los haus dej, kom cov tsiaj los sib tshov nyob ntawm cov ceg ntoo ntawd. Tiamsis nws tsis muab cov ceg ntoo ntawd tso rau ntawm dabdej thaum cov tsiaj uas tsis khov los haus dej. Txij thaum ntawd los Lanpas thiaj tau cov tsiaj uas tsis khov lawm xwb, tiamsis cov tsiaj uas khov puavleej yog Yakhauj cov. Twb yog vim ua li no Yakhauj thiaj npluanuj. Nws muaj tsiaj txhu, muaj tubqhe thiab ntxhais qhev, muaj ntxhuav thiab muaj neesluav coob heev. Yakhauj hnov Lanpas cov tub hais tias, “Yakhauj tau muab txhua yam uas yog peb txiv li tug coj mus tas huv tibsi lawm. Nws muaj txiag npluanuj twb yog tau los ntawm peb txiv nkaus xwb.” Thiab nws paub hais tias, Lanpas tsis nrog nws sib raug zoo li ibtxwm muaj yav tas los lawm. Ces tus TSWV thiaj hais rau Yakhauj hais tias, “Koj cia li rov qab mus rau tim koj txiv thiab koj cov kwvtij lub tebchaws. Kuv yuav nrog nraim koj.” Yog li ntawd, Yakhauj thiaj tso neeg mus hais rau Laxees thiab Le-as, kom nkawd tuaj ntsib nws rau tom teb uas yog qhov chaw cov tsiaj nyob. Nws thiaj hais rau nkawd hais tias, “Kuv paub lawm hais tias, neb txiv tsis nrog kuv sib raug zoo li ibtxwm uas nws ua rau kuv los lawm, tiamsis kuv txiv tus Vajtswv yeej ibtxwm nrog nraim kuv. Neb yeej paub zoo lawm hais tias, kuv rau siab ntso ua haujlwm rau neb txiv kawg kuv lub dag lub zog li. Txawm yog kuv twb ua npaum li ntawd los nws tseem nyiag thiab hloov txo kuv tej nqi zog kaum zaus lawm. Tiamsis Vajtswv tsis pub nws ua phem rau kuv. Thaum uas Lanpas hais tias, ‘Muab cov tshis uas txaij tej teev ua nqi zog rau koj,’ ces cov tsiaj txawm yug tau menyuam txaij tagnrho. Thaum nws hais tias, ‘Muab cov tshis uas txaij tej kab ua nqi zog rau koj,’ ces cov tsiaj txawm yug tau menyuam txaij ua tej kab tagnrho. Vajtswv tau muab cov tsiaj ntawd tshem tawm ntawm neb txiv thiab coj los rau kuv. “Thaum txog caij uas cov tsiaj sib tshov kuv txawm ua ib zaj npau suav, kuv pom cov laug tshis uas tabtom ntaus maum ntawd yog cov txaij ua tej teev thiab txaij ua tej kab. Vajtswv ib tug timtswv los hais rau kuv hauv zaj npau suav ntawd hais tias, ‘Yakhauj!’ Kuv teb hais tias, ‘kuv nyob ntawm no.’ Nws hais ntxiv tias, ‘Koj saib maj cov laug tshis uas tabtom ntaus maum ntawd puavleej yog cov txaij ua tej teev thiab txaij ua tej kab xwb. Kuv tabtom ua kom muaj tej no tshwmsim los rau qhov kuv pom tej uas Lanpas ua tsis zoo rau koj. Kuv yog tus Vajtswv uas los tshwm rau koj pom nram Npethees, ntawm thaj chaw uas koj muab lub pobzeb los teeb ua chaw nco txog uas koj muab roj txiv ntoo hliv rau saud ua khoom fij thiab yog thaj chaw uas koj coglus rau kuv ntag. Nimno koj cia li npaj kom txhij thiab rov qab mus rau nram lub tebchaws uas yug koj.’ ” Laxees thiab Le-as teb Yakhauj hais tias, “Wb yeej tsis tshuav ib yam qubtxeeg qubteg uas wb txiv tseg rau wb nyob hauv wb txiv tsev li lawm. Nws saib wb ib yam li yog neeg txawv tebchaws xwb. Nws muab wb muag, thiab nimno nws muab tej nyiaj uas yog wb tej nqi ntawd siv tas huv tibsi lawm. Txhua yam uas Vajtswv muab ntawm wb txiv los lawm, puavleej yog peb thiab peb tej menyuam tug lawm. Koj cia li ua raws li tus TSWV tau hais rau koj lawm.” Lanpas tabtom mus txiav plaub yaj lawm, ces thaum uas nws tsis nyob hauv tsev lawm, Laxees txawm mus nyiag tau nws txiv cov mlom zov tsev coj mus lawm. Yakhauj nyiag kev khiav ntsiag to tsis qhia rau Lanpas paub hais tias nws khiav mus lawm. Yakhauj coj txhua yam uas yog nws tug thiab maj ceev nrooj mus hla tus Dej Efalates thiab taug kev mus rau tim lub laj roob Nkile-as lawm. Tau peb hnub tom qab muaj neeg mus qhia rau Lanpas paub hais tias, Yakhauj twb khiav lawm. Nws thiaj txhij nws cov neeg nrog nws mus caum Yakhauj qab tau xya hnub, lawv thiaj caum cuag Yakhauj rau ntawm lub roob Nkile-as. Hmo ntawd Vajtswv los hais rau Lanpas hauv nruab npau suav hais tias, “Koj ceevfaj tsis txhob mus thab Yakhauj hlo li.” Yakhauj thiaj rub tsevntaub so saum laj roob, Lanpas thiab nws cov neeg kuj rub tsevntaub so rau saum lub laj roob Nkile-as ntawd thiab. Lanpas hais rau Yakhauj hais tias, “Vim li cas koj nyiag kev khiav tawm ntawm kuv thiab coj kuv ob tug ntxhais khiav ib yam li tej pojniam uas luag ntes tau hauv tshavrog los? Vim li cas koj ua lub siab dub nyiag kev khiav ntsiag to tsis qhia rau kuv paub? Yog koj qhia kuv paub, kuv yuav xa koj sawv kev los ntawm kev zoo siab nrog tej suab hu nkauj lomzem thiab nkauj nogncas. Koj txawm tsis pub kuv nwj kuv cov xeebntxwv thiab kuv ob tug ntxhais ua kev sib ncaim li. Qhov uas koj ua tas los ntawd mas yog ruam kawg nkaus li! Kuv muaj cuabkav yuav ua rau koj raug kev puastsuaj tau, tiamsis nag hmo koj txiv tus Vajtswv los txwv tsis pub kuv ua li cas rau koj hlo li. Kuv paub qhov uas koj khiav, rau qhov koj maj rov qab mus txog tsev heev, tiamsis vim li cas koj nyiag kuv cov mlom los lawm thiab?” Yakhauj teb hais tias, “Rau qhov kuv ntshai nyob tsam koj coj koj ob tug ntxhais khiav tawm ntawm kuv mus, mas kuv thiaj tsis qhia rau koj. Tiamsis yog koj nrhiav tau peb cov ntawm no leejtwg tau coj koj cov mlom los lawm, cia li muab tus ntawd tua povtseg. Peb cov neeg puavleej nyob ntawm no nrog ua timkhawv, tshawb txhua yam uas yog koj tug nqa huv tibsi rov qab mus.” Yakhauj tsis paub hais tias, Laxees yog tus nyiag Lanpas cov mlom ntawd los. Lanpas thiaj mus tshawb hauv Yakhauj tej tsevntaub tas, ces nws mam mus tshawb hauv Le-as lub tsevntaub, thiab hauv ob tug ntxhais qhev ob lub tsevntaub, tiamsis nws nrhiav tsis tau nws cov mlom ntawd li. Ces nws mam mus tshawb hauv Laxees lub tsevntaub. Laxees yeej tau muab cov mlom uas zov tsev ntawd thiab nws muab qhwv ntsaws rau hauv lub nra ntxhuav thiab nws zaum rawv saud. Lanpas mus tshawb thoob plaws hauv cov tsevntaub, tiamsis nws nrhiav tsis pom cov mlom ntawd li. Laxees hais rau nws txiv tias, “Txiv, thov koj tsis txhob chim rau kuv, qhov uas kuv tsis muaj cuabkav los sawv ntawm koj xubntiag, twb yog kuv tabtom coj khaubncaws.” Lanpas nrhiav kawg tiamsis tsis pom nws cov mlom ntawd li. Yakhauj chim heev tswj tsis tau nws lub siab li lawm. Nws thiaj nug npautaws yos hais tias, “Kuv tau ua txhaum koj dabtsi? Kuv tau ua txhaum txoj cai twg thiaj ua rau koj muaj cai tuaj caum kuv txog qhov no? Nimno koj twb tshawb tas kuv tej khoom huv tibsi lawm, koj puas pom muaj ib yam khoom twg uas yog koj li? Cia li muab rho tawm los tso tabmeeg rau koj cov neeg thiab kuv cov neeg pom, thiab cia lawv txiav txim rau wb ob tug no saib leejtwg thiaj ua yog. Kuv nrog koj nyob tau nees nkaum xyoo, ua rau koj tej yaj tej tshis huamvam tsis tu ncua, thiab kuv yeej tsis tau tua koj tej yaj ib tug noj li. Thaum uas ib tug yaj twg raug tsiaj qus tom lawm, kuv yeej them tus ntawd huv tibsi rau koj. Kuv tsis tau coj los qhia rau koj rau qhov tsis yog tim kuv. Koj tseem yuam kom kuv them tej tsiaj uas tubsab nyiag nruab hnub thiab hmo ntuj lawm huv tibsi rau koj. Ntau zaus kuv tiv tshav ntuj kub thaum nruab hnub thiab tiv no thaum tsaus ntuj. Kuv tsis tau zoo pw tsaug zog hlo li. Yeej zoo li no los tau nees nkaum xyoo uas kuv nrog koj nyob. Kuv ua haujlwm kaum plaub xyoo los pauv koj ob tug ntxhais, thiab rau xyoo los tu koj cov tsiaj nkaus xwb. Ua npaum li ntawd los koj tseem hloov thiab txo kuv tej nqi zog kaum zaus lawm. Yog kuv txiv tus Vajtswv, Anplahas thiab Ixaj tus Vajtswv, tsis nrog kuv nyob, ces ntshai koj twb muab kuv xa rov qab tes dawb tes npliag lawm. Tiamsis Vajtswv pom kuv tej kev nyuaj siab thiab tej haujlwm uas kuv tau ua tas los lawm, nag hmo nws thiaj tau los txiav txim.” Lanpas teb Yakhauj hais tias, “Ob tug ntxhais no yog kuv ob tug, nkawd cov menyuam los yeej yog kuv tug, thiab tej tsiaj no los puavleej yog kuv li. Txhua yam uas koj qhovmuag pom ntawm no puavleej yog kuv tug. Tiamsis hnub no kuv yuav ua li cas tav tau kuv ob tug ntxhais thiab nkawd cov menyuam kev, kuv thiaj npaj siab yuav nrog koj sib hais kom haum xwb. Cia wb khaws pobzeb los teeb ua ib qhov chaw nco txog wb cov lus cog tseg no.” Yog li ntawd, Yakhauj thiaj khaws tau ib cov pobzeb los teeb cia ua lub cim nco txog. Yakhauj thiaj hais kom nws cov neeg mus khaws pobzeb los teeb ua ib pawg cia. Ces lawv txawm rau mov noj ua ke nyob ntawm pawg pobzeb ntawd ib sab. Yog li ntawd, Lanpas thiaj tis npe rau pawg pobzeb ntawd hu ua Yenkas Xahaduthas, tiamsis Yakhauj tis npe rau pawg pobzeb ntawd hu ua Nkale-es. Lanpas hais rau Yakhauj hais tias, “Pawg pobzeb no yuav ua lub cim nco txog wb tej lus cog tseg.” Twb yog vim li no thiaj tis npe rau thaj chaw ntawd hu ua Nkale-es. Lanpas hais ntxiv tias, “Thov kom tus TSWV tsomkwm wb thaum wb sib ncaim ib leeg mus nyob rau ib qho lawm.” Yog li ntawd, thiaj muab thaj chaw ntawd tis npe hu ua Mixepas. Lanpas tseem hais ntxiv tias, “Yog koj tsimtxom kuv ob tug ntxhais lossis mus yuav niamyau, txawm yog kuv tsis paub txog tej uas koj ua ntawd los xij, kom koj nco ntsoov hais tias Vajtswv yeej saib ntsoov wb ob leeg huv tibsi. Ntawm no yog cov pobzeb uas kuv sau los teeb nruab nrab ntawm koj thiab kuv, thiab ntawm no yog tus ncej zeb uas ua lub cim coglus tseg cia. Pawg pobzeb thiab tus ncej zeb no, yog ua lub cim uas nco ntsoov cia. Kuv yuav tsis hla pawg pobzeb no tuaj tua koj, thiab koj yuav tsis hla pawg pobzeb no lossis tus ncej zeb uas yog lub cim nco txog no tuaj tua kuv li. Cia Anplahas tus Vajtswv thiab Nahaus tus Vajtswv ua tus txiav txim rau wb ob leeg huv tibsi.” Ces Yakhauj thiaj tuav Vajtswv tus uas nws txiv Ixaj pehawm lub npe coglus tseg. Yakhauj thiaj muab ib tug tsiaj los tua fij rau saum lub roob ntawd, thiab nws caw tagnrho nws cov neeg los noj. Tom qab uas lawv noj mov tas lawm, lawv tseem rov pw ib hmos saum lub roob ntawd ntxiv thiab. Hnub tom qab thaum sawv ntxov Lanpas thiaj mus nwj nws cov xeebntxwv thiab nws ob tug ntxhais thiab foom koob hmoov rau lawv tas, ces nws txawm ncaim lawv rov qab mus tsev lawm. Thaum Yakhauj tabtom taug kev los cov timtswv saum ntuj los ntsib nws. Thaum Yakhauj pom cov timtswv ntawd, nws hais tias, “Ntawm no yog Vajtswv lub yeej”, yog li ntawd, Yakhauj thiaj tis npe rau thaj chaw ntawd hu ua Mahana-ees. Yakhauj tso neeg ua nws ntej mus hais rau nws tus tijlaug Exaus uas nyob hauv tebchaws Edoos. Nws qhia kom cov xa xov mus hais li no rau Exaus: “Kuv yog Yakhauj, yog koj tus tubtxib uas mloog lus, thov hais rau kuv tus tswv Exaus paub hais tias, kuv mus nrog Lanpas nyob tau ntev loo thiab tamsim no kuv tabtom rov qab los lawm. Kuv muaj nyuj, muaj neesluav, muaj yaj, muaj tshis thiab muaj qhev coob heev. Kuv muaj lus li no los thov koj uas yog tus hlob, kuv cia siab ntsoov hais tias koj yuav txaus siab rau kuv.” Thaum cov neeg uas xa xov rov qab los cuag Yakhauj, lawv hais tias, “Peb twb mus cuag koj tus tijlaug Exaus tas lawm, nws tabtom npaj sawv kev tuaj tos koj lawm ntag. Nws coj tau plaub puas leej neeg nrog nws tuaj.” Yakhauj ntshai heev thiab nyuaj siab kawg li. Nws thiaj muab nws cov neeg faib kiag ua ob pab, nws tseem muab nws cov yaj, cov tshis, cov nyuj thiab cov ntxhuav faib ua ob pab thiab. Nws xav hais tias, “Yog Exaus tuaj tua pab ua ntej los kom pab ua qab khiav tau dim.” Yakhauj thiaj thov Vajtswv hais tias, “Kuv yawgkoob Anplahas tus Vajtswv thiab kuv txiv Ixaj tus Vajtswv, thov koj mloog kuv tej lus thov lauj! Tus TSWV, koj hais kom kuv rov qab mus lawm nram kuv lub tebchaws thiab kuv cov kwvtij, thiab koj yuav pub kev tau zoo rau kuv. Twb tsis tsimnyog koj hlub thiab ua ncaj ncees rau kuv uas yog koj tus tubtxib hlo li. Thaum kuv hla tus Dej Yauladees tuaj kuv tsis muaj dabtsi li, tsuas muaj tib tug pas nrig xwb, tiamsis nimno muaj ob pab neeg thiab ob pab tsiaj coob kawg nrog kuv rov qab los. Kuv thov koj pab kom kuv dim ntawm kuv tus tijlaug Exaus lauj. Kuv ntshai heev, kuv ntshai nyob tsam nws tuaj tua peb thiab ua rau peb raug kev puastsuaj, tsis hais tej pojniam thiab menyuam huv tibsi. Thov koj nco ntsoov tej lus uas koj cog tseg hais tias, koj yuav pub kev tau zoo rau kuv thiab pub kom kuv muaj xeebntxwv coob suav tsis txheeb, ib yam li tej suabzeb nram ntug hiavtxwv.” Nws thiaj pw ib hmos ntawm thaj chaw ntawd, thiab nws thiaj xaiv tej tsiaj uas nws muaj ibtxhia coj mus pub rau nws tus tijlaug Exaus li no: ob puas tus maum tshis thiab nees nkaum tus laug tshis, ob puas tus maum yaj thiab nees nkaum tus laug yaj, peb caug tus maum ntxhuav nrog cov menyuam uas tseem mos, plaub caug tus maum nyuj thiab kaum tus heev nyuj, nees nkaum tus maum neesluav thiab kaum tus txiv neesluav. Nws muab cov tsiaj ntawd faib ua tej pab thiab nws kom nws cov tubtxib ib leeg mus saib ib pab. Nws hais rau lawv tias, “Nej cia li mus ua kuv ntej, ib pab mus kom nrug ib pab deb tsawv.” Nws hais rau thawj tug tubtxib hais tias, “Thaum twg yog kuv tus tijlaug Exaus tuaj ntsib koj thiab nws nug hais tias, ‘Koj tus tswv yog leejtwg? Koj yuav mus qhov twg? Leejtwg yog tus tswv cov tsiaj uas ua koj ntej no?’ Koj yuav tsum teb hais tias, ‘cov tsiaj no yog koj tus tubtxib Yakhauj li. Nws kom coj cov tsiaj no los pub rau Exaus uas yog nws tus tswv. Yakhauj tseem tabtom los ua peb qab.’ ” Yakhauj hais rau tus tubtxib ob thiab tus tubtxib peb, thiab txhua tus uas nws tsa los saib nws cov tsiaj ntawd ib yam nkaus hais tias: “Thaum nej ntsib Exaus nej yuav tsum hais tej lus no rau nws. Nej yuav tsum hais tias, ‘Yakhauj uas yog koj tus tubtxib, tseem ua peb qab.’ ” Yakhauj xav hais tias, “Kuv twb muab kuv tej tsiaj xa ua ntej mus pub rau nws lawm, ces thaum kuv mus ntsib nws, nyaj nws yuav zam txim rau kuv.” Yakhauj xa tej khoom pub ntawd mus ua ntej, tiamsis nws tseem rov pw ib hmos ntawm lub yeej ntawd. Hmo ntawd Yakhauj sawv coj nws ob tug pojniam, nws ob tug niamyau, thiab nws kaum ib leeg menyuam mus hla tus Dej Yanpaus. Thaum nws xa pojniam menyuam hla dhau dej tas, nws mam muab tej khoom uas yog nws tug xa rau sab dej tim ub huv tibsi thiab, tiamsis Yakhauj ib leeg tseem nyob tom qab. Ces txawm muaj ib tug txivneej los nrog Yakhauj sib qhau mus txog thaum kaj ntug txoog. Thaum tus txivneej ntawd pom hais tias, nws yuav qhau tsis yeej Yakhauj, nws thiaj ntaus Yakhauj lub ntsag ua rau Yakhauj lub pob qij txha pluam plhuav. Tus txivneej ntawm hais tias, “Hnub twb yuav tawm, koj cia li tso kuv mus.” Yakhauj teb hais tias, “Kuv yuav tsis tso koj mus txog thaum koj foom koob hmoov rau kuv tso.” Tus txivneej ntawm nug Yakhauj hais tias, “Koj npe hu li cas?” Nws teb hais tias, “Kuv npe hu ua Yakhauj.” Tus txivneej ntawd hais tias, “Koj lub npe yuav tsis hu ua Yakhauj ntxiv lawm. Rau qhov koj muaj peevxwm nrog Vajtswv thiab nrog neeg sib qhau, thiab ua rau koj yeej lawm, yog li ntawd, yuav muab koj lub npe tis hu ua Yixalayees.” Yakhauj hais tias, “Thov koj qhia koj lub npe rau kuv.” Tiamsis nws teb Yakhauj hais tias, “Vim li cas koj xav paub kuv lub npe?” Ces nws txawm foom koob hmoov rau Yakhauj. Yakhauj hais tias, “Kuv twb pom Vajtswv tim ntsej tim muag lawm, tiamsis kuv tseem muaj sia nyob.” Yog li ntawd, Yakhauj thiaj tis npe rau thaj chaw ntawd hu ua Peniyees. Thaum hnub tawm tuaj Yakhauj thiaj sawv kev hauv Peniyees mus lawm, thiab nws mus kev cegtawv pluav rau qhov mob nws lub ntsag heev. Txawm yog niaj hnub nimno los Yixalayees cov xeebntxwv yeej tsis noj thooj nqaij ntawm lub ntsag ntawd hlo li, rau qhov Vajtswv ntaus Yakhauj lub ntsag ntawd lawm. Thaum Yakhauj pom Exaus thiab plaub puas leej uas nrog Exaus ua ke tuaj, nws txawm muab nws cov menyuam faib rau Le-as, Laxees thiab rau ob tug niamyau. Nws tso ob tug niamyau thiab nkawd cov menyuam mus ua ntej, tso Le-as thiab nws cov menyuam tuaj nruab nrab, ces mam tso Laxees thiab Yauxej tuaj tom qab kawg. Yakhauj mus ua lawv ntej thiab nws txhos caug ntua hauv av pe xya pes mus ti nkaus ntawm nws tus tijlaug. Tiamsis Exaus dhia ceev nrooj mus cuag Yakhauj, puag nkaus thiab nwj nws. Nkawd ob kwvtij sib qawg quaj. Thaum Exaus tsa muag xam, nws pom dheev cov pojniam thiab cov menyuam ntawd, nws txawm nug hais tias, “Cov neeg uas nrog koj los no yog leejtwg?” Yakhauj teb hais tias, “Tijlaug, cov menyuam no yog Vajtswv tus uas ibtxwm ua zoo kawg nkaus pub rau kuv.” Ces ob tug niamyau nrog nkawd cov menyuam txav zog los thiab txhos caug ntua pe, Le-as thiab nws cov menyuam mam los thiab thaum kawg Yauxej thiab Laxees mam li txav los thiab txhos caug ntua pe. Exaus rov nug hais tias, “Ua li pab uas kuv xub tuaj ntsib ne? Pab ntawd yog leejtwg pab thiab?” Yakhauj teb hais tias, “Pab ntawd yog kuv muab rau koj, thov koj hlub kuv.” Tiamsis Exaus hais tias, “Kuv tus kwv, kuv twb muaj txaus kuv lawm, cia li ceev tej ntawd rau koj xwb.” Yakhauj hais tias, “Tijlaug, yog koj txaus siab rau kuv, thov koj cia li yuav tsis txhob yig, cia li txais tej uas kuv muab pub rau koj lawm. Kuv tau rov los pom koj mas zoo kuv siab npaum nkaus li kuv pom Vajtswv ntag, rau qhov nimno koj ua zoo kawg nkaus rau kuv. Thov koj cia li yuav tej uas kuv muab pub rau koj ntawd, Vajtswv hlub kuv thiab nws pub txhua tsav yam uas kuv xav yuav rau kuv.” Yakhauj hais tej lus mos lus muag thov mus txog thaum Exaus lees yuav lawm. Exaus hais tias, “Peb cia li npaj thiab sawv kev mus. Kuv yuav ua tus coj nej kev mus.” Yakhauj teb hais tias, “Tijlaug, koj yeej paub hais tias kuv cov menyuam tseem yau mus tsis taus ceev, thiab kuv txhawj kuv tej yaj thiab tej tsiaj txhu uas muaj menyuam mos. Yog peb yuav mus ceev nrooj, ntshai mus ib hnub xwb kuv tej tsiaj yuav tuag tas. Thov cia koj ua kuv ntej mus, thiab kuv yuav maj mam lawv koj qab los kuv tej tsiaj txhu thiab kuv cov menyuam mus taus li cas kuv yuav mus li ntawd, txog thaum kuv los cuag tau koj hauv tebchaws Edoos.” Exaus hais tias, “Yog li ntawd, kuv mam li cia kuv cov neeg ob peb leeg nrog koj.” Tiamsis Yakhauj teb hais tias, “Tijlaug, tsis tas koj yuav tso neeg pab kuv, tsuav yog koj txaus siab rau kuv xwb, ces tau lawm.” Yog li hnub ntawd, Exaus thiaj sawv kev ua ntej rov los rau tebchaws Edoos lawm. Tiamsis thaum Yakhauj mus txog ntawm Xukaus, nws txawm ua tsev rau nws nyob thiab ua nkuaj kaw nws cov tsiaj rau ntawd. Twb yog vim li no, thiaj muab thaj chaw ntawd tis npe hu ua Xukaus. Yakhauj rov qab tim tebchaws Mexuputamias los txog rau hauv lub nroog Sekhees uas nyob hauv tebchaws Kana-as tsis ntsib kev nyuaj siab dabtsi, thiab nws mus ua zos nyob ze rau ntawm ntug nroog Sekhees. Nws muab tau ib puas daim nyiaj yuav tau ib thaj av ntawm Sekhees txiv Hamaules cov xeebntxwv. Yakhauj thiaj teeb tau ib lub thaj rau ntawd thiab tis npe hu ua Ees, raws li cov Yixalayees tus Vajtswv lub npe. Muaj ib hnub Yakhauj thiab Le-as nkawd tus ntxhais Dinas, txawm tawm mus xyuas cov neeg Kana-as tej pojniam. Hamaules uas yog neeg Hivis uas yog tus thawj saib cheebtsam ntawd, thaum nws tus tub Sekhees pom Dinas, nws txawm tuaj coj Dinas mus thiab muab Dinas yuam. Rau qhov Sekhees pom Dinas zoo nkauj heev, nws thiaj ua zaj ua ntxeev ntxias kom tau Dinas yuav. Sekhees thiaj hais rau nws txiv tias, “Txiv, kuv xav kom koj mus yuav tus ntxhais ntawd los ua kuv tus pojniam.” Yakhauj paub hais tias, nws tus ntxhais raug kev txajmuag, tiamsis vim nws cov tub mus yug tsiaj rau nram teb lawm, nws thiaj tsis hais ib yam dabtsi mus txog thaum nws cov tub los tsev txhij. Hamaules uas yog Sekhees txiv thiaj tuaj thov Yakhauj, tom thawj thaum Yakhauj cov tub rov nram teb los txog tsev. Thaum lawv hnov dheev txog zaj no, ua rau lawv mob siab thiab chim heev, rau qhov uas Sekhees tau ua saib tsis tau cov Yixalayees uas yog nws muab Yakhauj tus ntxhais yuam li ntawd. Hamaules hais rau Yakhauj hais tias, “Kuv tus tub Sekhees nyiam koj tus ntxhais heev li lawm, thov cia nws yuav koj tus ntxhais ua nws tus pojniam. Thov cia peb los sib coglus, kom nej thiab peb haivneeg thiaj muaj kev txis tshoob txis kos rau peb tej menyuam. Ces nej thiaj tau nrog peb nyob hauv peb lub tebchaws no, nej yuav nyob thaj chaw twg los nyob ntawm nej nyiam, tso kev ua lag ua luam, thiab muaj ntiag tug kom ywjpheej rau nej.” Ces Sekhees hais rau Dinas txiv thiab nws cov nus hais tias, “Thov nej ua zoo rau kuv, thiab kuv yuav muab txhua yam uas nej xav tau rau nej. Thov qhia yam uas nej xav yuav rau kuv, thiab cia li hais nqi tshoob kom ntau npaum li nej xav sau, nej xav kom them npaum twg los kuv yuav them npaum ntawd rau nej, tsuav yog nej kam muab nej tus muam rau kuv yuav ua pojniam xwb.” Vim qhov uas Sekhees tau ua rau lawv tus muam Dinas raug kev txajmuag, Yakhauj cov tub thiaj teb dag ntsuav rau Sekhees thiab Hamaules nkawd. Lawv hais rau Sekhees hais tias, “Peb tsis pom zoo cia peb tus muam mus yuav ib tug txivneej twg uas tsis tau ua kevcai txiav tawv li, yog ua li ntawd mas rhuav peb ntsejmuag heev. Tsuas muaj ib qho uas nej ua raws li peb ua xwb, nej txhua tus txivneej yuav tsum tau ua kevcai txiav tawv ib yam li peb ua huv tibsi. Ces peb thiaj paub nrog nej ua tshoob ua kos. Peb thiaj yuav nrog nej nyob tau ua ke thiab peb thiaj yuav nrog nej ua tau ib haivneeg. Tiamsis yog nej tsis lees ua raws li peb hais thiab ua kevcai txiav, peb yuav coj peb tus muam los thiab khiav tawm hauv lub tebchaws no mus.” Hamaules thiab nws tus tub Sekhees pom zoo yuav raws li lawv hais ntawd, ces tus tub hluas txawm maj nroos ua raws li lawv tau hais ntawd, rau qhov nws nyiam Yakhauj tus ntxhais heev. Sekhees kuj yog ib tug uas muaj meejmom hauv nws tsevneeg. Hamaules thiab nws tus tub Sekhees thiaj mus rau ntawm qhov chaw sablaj uas nyob ntawm roojvag nroog thiab hais rau cov pejxeem hauv lub nroog hais tias: “Cov neeg no nrog peb sib raug zoo heev, cia lawv nrog peb nyob hauv lub tebchaws no thiab cia lawv mus los ywj siab. Lub tebchaws los kuj dav txaus lawv nyob thiab. Cia peb tej tub mus yuav lawv tej ntxhais thiab lawv tej tub tuaj yuav peb tej ntxhais. Lawv yeej zoo siab nrog peb nyob thiab nrog peb koom ua ib haivneeg, tiamsis muaj ib txoj kevcai uas peb yuav tsum tau ua, yog peb txhua tus txivneej yuav tsum tau ua kevcai txiav tawv li lawv. Nej puas xav tau lawv tej tsiaj txhu thiab tej khoom uas yog lawv li los ua peb tug? Yog nej xav tau, peb cia li lees yuav lawv txoj kevcai thiab cia lawv nrog peb nyob.” Tagnrho cov pejxeem sawvdaws puavleej pom zoo yuav thiab ua raws li Hamaules thiab Sekhees hais ntawd, txhua tus txivneej thiaj ua kevcai txiav tawv tagnrho. Tau peb hnub tom qab uas cov txivneej ua kevcai txiav tawv ntawd tej nqaij tseem mob, Yakhauj ob tug tub: Xime-oos thiab Levis uas yog Dinas ob tug nus, txawm nqa nkawd ob rab ntaj nyiag kev twjywm mus rau hauv nroog, thiab muab cov txivneej hauv tua tuag tas, nrog rau Hamaules thiab nws tus tub Sekhees huv tibsi. Ces nkawd thiaj coj Dinas hauv Sekhees lub tsev tawm los lawm. Tom qab uas Xime-oos thiab Levis nkawd muab cov neeg ntawd tua tuag tas lawm, Yakhauj cov tub tseem mus huab lub nroog, ua pauj qhov uas lawv tus muam raug txajmuag ntawd. Lawv cab tagnrho tej tsiaj txhu, nyuj, neesluav thiab muab txhua yam khoom uas nyob hauv nroog thiab hauv tej teb nqa huv tibsi mus lawm. Lawv coj txhua yam uas muaj nqis, ntes tej pojniam thiab menyuam, thiab nqa txhua yam uas nyob hauv lawv tej vajtse huv tibsi lawm thiab. Yakhauj hais rau Xime-oos thiab Levis hais tias, “Neb ua rau kuv tau kev ntxhov siab lawm, tamsim no cov neeg Kana-as, cov neeg Pelixes thiab cov neeg uas nyob hauv lub tebchaws no yuav ntxub kuv heev. Kuv tsis muaj neeg coob, yog lawv sib sau tuaj tawmtsam thiab tua kuv, mas peb tsevneeg yuav raug kev puastsuaj tas li.” Tiamsis nkawd teb hais tias, “Yuav cia Sekhees coj wb tus muam mus deev li tus niamntiav los?” Vajtswv hais rau Yakhauj hais tias, “Koj cia li mus nyob pem Npethees. Thiab koj cia li teeb ib lub thaj rau kuv, kuv yog Vajtswv tus uas tshwm rau koj pom thaum koj khiav koj tus tijlaug Exaus mus ntag.” Yog li ntawd, Yakhauj thiaj hais rau nws tsevneeg thiab tagnrho cov neeg uas nrog nws nyob ntawd hais tias, “Nej cia li muab cov neeg txawv tebchaws tej vajtswv uas nej muaj coj mus povtseg, ua kevcai ntxuav nej kom huv thiab hnav tej ris tsho uas ntxhua huv si lawm. Peb yuav sawv kev ntawm no mus rau pem lub nroog Npethees, qhov chaw uas kuv yuav teeb ib lub thaj rau Vajtswv tus uas tau pab kuv thaum kuv raug kev txomnyem nyuaj siab, thiab yog tus uas nrog nraim kuv txhua qhov uas kuv mus.” Yog li ntawd, lawv thiaj muab tagnrho cov neeg txawv tebchaws tej vajtswv uas lawv muaj thiab tej qhwsntsej uas lawv coj huv tibsi mus rau Yakhauj. Yakhauj thiaj coj mus faus rau ntawm tsob qab ntoo qhib uas nyob ze lub nroog Sekhees. Thaum Yakhauj thiab nws cov tub tabtom sawv kev mus, Vajtswv txawm ua ib yam txaus ntshai heev los rau cov neeg hauv tej nroog uas nyob ib puagncig lawv. Cov neeg hauv tej nroog ntawd thiaj tsis kam mus caum Yakhauj lawv qab. Yakhauj thiab nws cov neeg los txog hauv lub zos Luxes uas nimno yog lub nroog Npethees hauv tebchaws Kana-as. Nyob qhov ntawd, Yakhauj teeb tau ib lub thaj thiab nws tis npe rau thaj chaw ntawd hu ua Ees Npethees, rau qhov Vajtswv tau los tshwm rau Yakhauj pom, thaum Yakhauj khiav nws tus tijlaug mus txog ntawm qhov chaw ntawd. Lenpekas tus ntxhais qhev Denpaulas tuag thiab lawv muab faus rau hauv ib tsob qab ntoo qhib uas nyob ntawm lub nroog Npethees sab nrad. Yog li ntawd, thiaj muab tsob ntoo qhib ntawd tis npe hu ua “Tsob Ntoo Qhib Quaj Ntsuag.” Thaum Yakhauj rov hauv tebchaws Mexuputamias los Vajtswv rov los tshwm rau Yakhauj pom dua ib zaug ntxiv, thiab foom koob hmoov rau nws. Vajtswv hais rau nws hais tias, “Koj lub npe hu ua Yakhauj, tiamsis txij no mus koj lub npe yuav hu ua Yixalayees.” Yog li ntawd, Vajtswv thiaj tis Yakhauj lub npe hu ua Yixalayees. Thiab Vajtswv rov hais rau Yakhauj hais tias, “Kuv yog Vajtswv tus uas muaj hwjchim loj kawg nkaus. Koj cia li muaj tubki huamvam coob. Koj cov xeebntxwv yuav dhau mus ua ntau haivneeg, thiab koj yuav yog ntau leej vajntxwv tus yawgkoob. Kuv yuav muab lub tebchaws uas kuv muab rau Anplahas thiab Ixaj lawm pub rau koj, thiab kuv tseem yuav muab rau koj cov xeebntxwv uas nyob ntau tiam tom qab koj.” Ces Vajtswv txawm ncaim nws mus lawm. Yakhauj txhos tau ib tug ncej zeb ua cim nco txog rau ntawm qhov chaw uas Vajtswv los nrog nws tham, nws muab cawv txiv hmab thiab roj txiv ntoo hliv rau saum tus ncej zeb ntawd fij rau Vajtswv. Nws thiaj tis npe rau thaj chaw ntawd hu ua Npethees. Yakhauj thiab nws tsevneeg txawm tawm hauv Npethees mus lawm, thiab thaum tseem tshuav deb mam li mus txog hauv Efalates, Laxees txawm mob plab txog caij daws cev, thiab zaum no nws yug menyuam nyuaj heev. Thaum Laxees mob plab yuav yug tus menyuam ntawd, tus pojniam uas pab tu menyuam thiaj hais rau Laxees hais tias, “Laxees, koj tsis txhob ntshai, koj yuav tau ib tug tub ntxiv xwb.” Tiamsis thaum Laxees yuav tuag, thiab nws huas pa yuav tu siav, nws tis tus metub ntawd npe hu ua Npee-aunis, tiamsis nws txiv tis nws lub npe hu ua Npeenyamees. Thaum Laxees tuag, lawv thiaj muab nws mus faus rau ntawm ib sab ntug kev uas mus rau hauv lub zos Efalates uas nimno hu ua lub nroog Npelehees. Thiab Yakhauj txhos ib tug ncej zeb rau saum Laxees lub ntxa, ua cim nco txog Laxees lub ntxa los txog niaj hnub no. Yakhauj sawv kev mus ntxiv thiab los tsuam yeej nyob rau ntawm tus pejthuam Edeles ib sab. Thaum Yakhauj tawm hauv lub tebchaws ntawd mus lawm, Lunpees txawm mus nrog Npilehas uas yog nws txiv tus niamyau pw, thaum Yakhauj hnov txog zaj no nws chim heev. Yakhauj muaj kaum ob leeg tub. Le-as cov tub yog Lunpees (Yakhauj tus tub hlob), Xime-oos, Levis, Yudas, Ixakhas thiab Xenpuloos. Laxees cov tub yog Yauxej thiab Npeenyamees. Laxees tus ntxhais qhev Npilehas ob tug tub yog: Das thiab Nathalis. Le-as tus ntxhais qhev Xilepas cov tub yog Khas thiab Aseles. Cov tub no puavleej yug pem tebchaws Mexuputamias. Yakhauj mus xyuas nws txiv Ixaj hauv lub nroog Males uas nyob ze lub nroog Henploos, yog qhov chaw uas Anplahas thiab Ixaj nkawd nyob. Ixaj ua neej nyob tau ib puas yim caum xyoo, thiab tuag thaum nws muaj hnubnyoog laus heev lawm, nws ob tug tub Exaus thiab Yakhauj thiaj coj nws lub cev mus faus. Ntawm no mus yog Exaus cov xeebntxwv uas muaj dua ib lub npe hu ua Edoos. Exaus mus yuav cov neeg Kana-as tej ntxhais los ua pojniam: Eloos uas yog neeg Hitis tus ntxhais uas hu ua Adahes, thiab Xinpe-oos uas yog neeg Hivis tus tub Anas tus ntxhais uas hu ua Auhaulinpamas, thiab Yisamayees tus ntxhais Npasemas ua yog Nenpayaus tus muam. Adahes yug tau Elifas, Npasemas yug tau Le-uyees thiab Auhaulinpamas yug tau Ye-uses, Yalas thiab Kaulas. Tagnrho cov no puavleej yog Exaus cov tub uas yug hauv lub tebchaws Kana-as. Ces Exaus coj nws cov pojniam, cov tub, cov ntxhais thiab tagnrho nws tsevneeg, nrog nws tej tsiaj txhu thiab txhua yam uas nws khwv tau hauv tebchaws Kana-as, tsiv mus nyob rau ib lub tebchaws uas nyob deb ntawm nws tus kwv Yakhauj. Nws tsiv mus vim lub tebchaws uas nws thiab Yakhauj ibtxwm nyob nqaim rau nkawd heev, thiab nkawd muaj tsiaj txhu coob thiaj ua rau nkawd nyob tsis tau ua ke. Yog li ntawd, Exaus (uas yog neeg Edoos) thiaj mus nyob rau pem lub laj roob uas nyob pem tebchaws Xe-iles lawm. Ntawm no yog Exaus cov xeebntxwv uas yog cov neeg Edoos cov yawgkoob uas nyob pem lub laj roob pem tebchaws Xe-iles. Ntawm no yog Exaus cov tub tej npe: nws tus pojniam uas hu ua Adahes yug tau Elifas, thiab nws tus pojniam uas hu ua Npasemas yug tau Le-uyees. Elifas cov tub yog: Temas, Aumas, Xefaus, Nkatas thiab Kenaxes. Exaus tus tub Elifas tseem muaj ib tug niamyau hu ua Teenas. Teenas yug tau ib tug tub hu ua Amalej. Cov no puavleej yog Exaus tus pojniam uas hu ua Adahes cov xeebntxwv. Le-uyees cov tub yog: Nahas, Zelas, Samas thiab Mixexas. Cov no puavleej yog Exaus tus pojniam uas hu ua Npasemas cov xeebntxwv. Exaus tus pojniam uas hu ua Auhaulinpamas uas yog Xinpe-oos tus tub Anas tus ntxhais, yug tau peb tug tub rau Exaus: Ye-uses, Yalas thiab Kaulas. Ntawm no yog cov thawjcoj uas yog Exaus cov xeebntxwv. Exaus tus tub hlob Elifas yog yawgkoob ntawm cov thawjcoj nram qab no: Temas, Aumas, Xefaus, Kenaxes, Kaulas, Nkatas thiab Amalej. Cov thawjcoj no puavleej yog cajces los ntawm Elifas uas nyob hauv tebchaws Edoos, thiab yog Exaus tus pojniam uas hu ua Adahes cov xeebntxwv. Exaus tus tub Le-uyees yog yawgkoob ntawm cov thawjcoj nram qab no: Nahas, Zelas, Samas thiab Mixexas. Cov thawjcoj no puavleej yog cajces los ntawm Le-uyees uas nyob hauv tebchaws Edoos, thiab yog Exaus tus pojniam uas hu ua Npasemas cov xeebntxwv. Cov thawjcoj nram qab no, puavleej yog cajces los ntawm Exaus tus pojniam uas hu ua Auhaulinpamas uas yog Anas tus ntxhais: Ye-uses, Yalas thiab Kaulas. Tagnrho cov thawjcoj no puavleej yog Exaus (uas yog neeg Edoos) cov xeebntxwv. Ntawm no yog Xe-iles uas yog neeg Haulis cov tub, lawv yog cov neeg uas nyob hauv lub tebchaws Edoos thiab lawv yeej ibtxwm nyob hauv cheebtsam ntawd. Xe-iles cov tub yog: Lautas, Saunpas, Xinpe-oos, Anas, Disoos, Exeles thiab Disas. Xe-iles cov tub uas nyob hauv tebchaws Edoos puavleej yog cov neeg Haulis cov thawjcoj. Lautas cov tub yog: Haulis thiab Hemas. Teenas yog Lautas tus muam. Saunpas cov tub yog: Alevas, Manahas, Enpales, Sefaus thiab Aunas. Xinpe-oos muaj ob tug tub yog: Ayihas thiab Anas. (Ntawm no yog Anas tus uas mus pom lub qhovdej kub uas nyob tom roob mojsab qhua, thaum nws coj nws txiv cov neesluav mus noj zaub.) Anas cov menyuam yog: Disoos thiab Auhaulinpamas uas yog Anas tus ntxhais. Disoos cov tub yog: Heedas, Esenpas, Ithalas thiab Kelas. Exeles cov tub yog: Npihas, Xavas thiab Akas. Disas cov tub yog: Uxes thiab Alas. Cov ntawm no yog cov Haulis cov thawjcoj: Lautas, Saunpas, Xinpe-oos, Anas, Disoos, Exeles thiab Disas. Lawv cov no puavleej yog cov Haulis cov thawjcoj, raws li lawv muab faib ua tej pab tej pawg, nyob hauv lub tebchaws Xe-iles. Cov no yog cov vajntxwv uas kav lub tebchaws Edoos ua ntej cov Yixalayees muaj vajntxwv. Npe-aules tus tub Npelas ua vajntxwv kav tebchaws Edoos, nws lub nroog hu ua Dihanpas. Thaum Npelas tuag lawm, Zelas tus tub Yaunpaj uas nyob hauv Npauxelas ua vajntxwv hloov nws chaw. Thaum Yaunpaj tuag lawm, Husas uas nyob hauv tebchaws Temas ua vajntxwv hloov nws chaw. Thaum Husas tuag lawm, Npedas tus tub Hadas, (Npedas yog tus mus tua yeej cov neeg Midias hauv lub tebchaws Mau-am,) ua vajntxwv hloov nws chaw. Nws lub nroog hu ua Avithas. Thaum Hadas tuag lawm, Xamelas uas nyob hauv Malekas ua vajntxwv hloov nws chaw. Thaum Xamelas tuag lawm, Sa-ules uas nyob hauv Lehaunpaus, pem lub hauv dej Efalates ua vajntxwv hloov nws chaw. Thaum Sa-ules tuag lawm, Anpaus tus tub Npa-as Hanas ua vajntxwv hloov nws chaw. Thaum Anpaus tus tub Npa-as Hanas tuag lawm, Hadas ua vajntxwv hloov nws chaw. Nws lub nroog hu ua Pa-us, (nws tus pojniam hu ua Mehetanpees uas yog Matales tus ntxhais thiab yog Mexahas tus ntxhais xeebntxwv.) Cov no yog cov thawjcoj uas yog Exaus cov xeebntxwv, raws li lawv cajces tsevneeg, lawv tej chaw nyob thiab lawv tej npe: Teenas, Alevas, Yethes, Auhaulinpamas, Elas, Pinoos, Kenaxes, Temas, Minpaxales, Makediyees thiab Ilames. Cov no puavleej yog cov neeg Edoos cov thawjcoj. Yakhauj tseem nyob hauv tebchaws Kana-as uas nws txiv ibtxwm nyob thaum ub los lawm, zaj no yog hais txog Yakhauj tsevneeg lub neej. Yauxej yog ib tug tub hluas uas hnubnyoog muaj kaum xya xyoo, nws mus yug yaj thiab tshis nrog nws cov tijlaug uas yog Npilehas thiab Xilepas uas yog nws txiv ob tug niamyau cov tub. Yauxej pheej coj tej yam tsis zoo uas nws cov tijlaug ua los piav qhia rau nws txiv mloog. Tagnrho Yakhauj cov tub, mas Yakhauj hlub Yauxej tshaj cov huv tibsi, rau qhov nws muaj Yauxej thaum uas nws laus heev lawm. Nws xaws tau ib lub tsho ntev rau Yauxej hnav. Thaum Yauxej cov tijlaug pom hais tias, lawv txiv hlub Yauxej tshaj li hlub lawv lawm, lawv thiaj ntxub lawv tus kwv kawg nkaus li, thiab ua rau lawv tsis xav hais ib lo lus zoo rau Yauxej. Muaj ib zaug Yauxej txawm ua npau suav, thiab thaum nws qhia zaj npau suav ntawd rau nws cov tijlaug mloog tas, ua rau lawv yimhuab ntxub nws heev. Yauxej hais tias, “Kuv yuav piav kuv zaj npau suav rau nej mloog. Peb sawvdaws puavleej pav peb cov tes nplej hauv teb, thaum pav tau lawm, kuv tes nplej txawm sawv nres nroos. Ces nej cov tes nplej sawv los vij kuv tes thiab cia li nyo zom zaws los pe kuv tes nplej.” Nws cov tijlaug nug hais tias, “Koj xav hais tias, koj yuav tau ua vajntxwv kav peb no los?” Yog li ntawd, lawv thiaj yimhuab ntxub nws heev, vim zaj npau suav thiab tej lus uas nws piav rau lawv mloog ntawd. Ces Yauxej rov ua ib zaj npau suav dua thiab nws qhia rau nws cov tijlaug mloog hais tias, “Kuv ua dua ib zaj npau suav, kuv pom lub hnub, lub hli thiab kaum ib lub hnubqub pe kuv zom zaws.” Nws piav zaj npau suav no rau nws txiv mloog huv tibsi thiab, nws txiv txawm yws nws hais tias, “Ua cas koj yuav txawj ua npau suav ua luaj li? Koj xav hais tias koj niam wb thiab koj cov tijlaug, peb sawvdaws yuav tau los txhos caug pe koj no los?” Yauxej cov tijlaug yimhuab khib heev, tiamsis nws txiv xav ntsoov zaj npau suav ntawd rau nruab siab. Muaj ib hnub Yauxej cov tijlaug mus yug lawv txiv pab tsiaj rau pem Sekhees, Yakhauj hais rau Yauxej hais tias, “Kuv yuav txib koj mus pem Sekhees, qhov chaw uas koj cov tijlaug yug tsiaj.” Yauxej teb hais tias, “Aw! Kuv mam mus!” Nws txiv hais rau nws hais tias, “Koj cia li mus saib, yog koj cov tijlaug noj qab nyob zoo thiab tej tsiaj los nyob txhij txhua, ces koj rov qab los qhia rau kuv paub.” Yog li ntawd, nws txiv thiaj tso nws sawv kev hauv lub Hav Henploos mus lawm. Yauxej mus txog pem Sekhees, thiab nws ncig mus ncig los ntawm roob mojsab, muaj ib tug txivneej pom nws thiab nug nws hais tias, “Koj nrhiav dabtsi?” Yauxej teb hais tias, “Kuv tuaj nrhiav kuv cov tijlaug uas lawv tuaj yug lawv cov tsiaj, koj puas paub lawv nyob qhov twg thov koj qhia rau kuv?” Tus txivneej ntawm teb hais tias, “Lawv tsis nyob ntawm no lawm. Kuv hnov lawv hais tias, lawv yuav mus rau tom lub nroog Dauthas.” Yog li ntawd, Yauxej thiaj raws cov tijlaug qab mus thiab pom lawv nyob tom Dauthas. Thaum Yauxej cov tijlaug pom Yauxej tuaj txog puag tim ub, coj tijlaug txawm tuavhauv tua Yauxej povtseg. Lawv ib leeg hais rau ib leeg hais tias, “Tus uas txawj ua npau suav ntawd tuaj lawm. Zaum no, peb muab nws tua povtseg thiab muab nws coj mus pov rau hauv cov qhovtshij qhuav no ib lub. Peb mam dag hais tias yog tsov tom nws lawm. Saib nws tej npau suav yuav muaj dabtsi tshwm tuaj.” Thaum Lunpees hnov lawv hais li ntawd, nws nrhiav tswvyim pab cawm Yauxej, nws thiaj hais tias, “Cia peb tsis txhob muab Yauxej tua povtseg. Peb cia li muab nws pov rau hauv lub qhovtshij uas nyob ntawm roob mojsab qhua no xwb, tsis txhob ua kom nws nqaij ntuag ntshav nrog.” Lunpees hais li no, rau qhov nws xav pab kom Yauxej dim ntawm lawv thiab tso nws rov mus cuag nws txiv. Thaum Yauxej tuaj txog ntawm cov tijlaug lawm, lawv txawm sau nthwv los ntes nws thiab muab nws lub tsho ntev hle hlo. Ces lawv txawm coj nws mus pov rau hauv lub qhovtshij uas tsis muaj dej. Thaum lawv tseem tabtom noj mov, lawv txawm pom ib pab neeg Yisamayees taug kev pem lub nroog Nkile-as tuaj mus rau nram tebchaws Iziv. Lawv cab ntxhuav thauj tej tshuaj tsw qab thiab txujlom mus muag. Yudas hais rau nws cov kwvtij hais tias, “Yog peb muab peb tus kwv tua povtseg thiab npog txojkev tua neeg no cia, peb yuav tau tus dabtsi? Peb muab nws muag rau cov neeg Yisamayees ntawd ntshai yuav zoo dua. Ces peb tsis txhob ua rau nws nqaij ntuag ntshav nrog, rau qhov nws yeej yog peb tug kwv thiab nrog peb koom roj koom ntshav.” Nws cov kwvtij kuj pom zoo li nws hais, thaum cov tub lag tub luam uas yog neeg Midias tuaj txog, cov tijlaug thiaj li rub Yauxej tawm hauv lub qhovtshij los thiab muab nws muag rau cov Yisamayees ua nees nkaum daim nyiaj. Luag thiaj coj Yauxej mus rau nram tebchaws Iziv lawm. Thaum Lunpees rov qab mus xauj hauv lub qhovtshij tsis pom Yauxej nyob hauv lawm, nws ntxhov siab heev thiab dua rhe nws lub tsho povtseg. Nws rov qab los cuag nws cov kwv thiab hais rau lawv hais tias, “Tsis pom Yauxej nyob hauv lub qhovtshij lawm, xyov kuv yuav ua li cas lauj?” Ces lawv txawm muab ib tug tshis tua thiab muab Yauxej lub tsho ntev mus raus rau hauv cov ntshav tshis. Lawv nqa lub tsho ntev ntawd mus qhia rau lawv txiv thiab hais tias, “Peb khaws tau lub tsho no. Koj sim xyuas saib puas yog koj tus tub lub tsho los tsis yog?” Yakhauj nco tau lub tsho ntawd zoo thiab hais tias, “Yog tiag, lub tsho no yog Yauxej lub! Tej tsiaj nyaum yeej muab kuv tus tub tom lawm tiag. Kuv tus tub Yauxej tau raug dua ua tej daim lawm lauj!” Yakhauj dua rhe nws lub tsho povtseg thiab muab ntaubtsaj los npua, ua kev tu siab quaj ntsuag. Nws quaj nco txog nws tus tub tau ntev loo. Tagnrho nws tej tub tej ntxhais puavleej los nplig nws siab, tiamsis nws yeej tsis mloog leejtwg hais thiab nws hais tias, “Kuv yuav quaj ntsuag kuv tus tub li no mus txog thaum kuv txojsia tu mus nrog nws nyob.” Yog li ntawd, nws pheej quaj nws tus tub Yauxej li. Thaum cov tub lag tub luam uas yog neeg Midias mus txog nram tebchaws Iziv lawm, lawv txawm muab Yauxej muag rau Pautifas uas yog Falaus ib tug thawj tubrog saib cov tubrog uas zov Falaus lub loog. Thaum lub sijhawm ntawd Yudas tso nws cov kwvtij tseg thiab khiav mus nrog ib tug txivneej hu ua Hilas uas yog cov neeg hauv lub nroog Adulas nyob. Nyob qhov ntawd Yudas ntsib cov Kana-as ib tug ntxhais, tus ntxhais ntawd txiv hu ua Suav. Yudas thiaj yuav tus ntxhais ntawd ua pojniam, thiab nws yug tau ib tug tub rau Yudas, Yudas thiaj tis tus tub ntawd npe hu ua Eles. Tus pojniam ntawd rov xeeb tub dua, nws yug tau ib tug tub, thiab nws tis tus tub ntawd npe hu ua Aunas. Nws rov yug tau ib tug tub ntxiv thiab nws tis tus tub ntawd npe hu ua Selas. Thaum yug tus tub ntawd Yudas tseem nyob hauv lub nroog Akhexis. Yudas tus tub hlob Eles yuav tau ib tug pojniam hu ua Tamaj. Eles ua kev phem kev qias tsis haum tus TSWV siab, tus TSWV thiaj muab Eles tua povtseg lawm. Ces Yudas thiaj hais rau Eles tus kwv Aunas hais tias, “Koj cia li yuav koj tus niamtij, sawv koj tus tijlaug chaw, kom koj tus tijlaug thiaj muaj cajces.” Tiamsis Aunas paub hais tias, cov menyuam ntawd yuav tsis yog nws li; ces thaum nws mus nrog nws tus niamtij pw, nws tso cov kua txuas rau hauv av, kom muaj tsis taus menyuam rau nws tus tijlaug. Qhov uas nws ua li ntawd tsis haum tus TSWV siab, vim li ntawd tus TSWV thiaj li muab nws tua povtseg lawm thiab. Ces Yudas thiaj li hais rau Tamaj uas yog nws tus nyab hais tias, “Koj cia li rov qab mus nrog koj niam koj txiv nyob, ua pojntsuam tos mus txog thaum kuv tus tub yau hlob tiav txiv tso.” Nws hais li ntawd rau qhov nws ntshai nyob tsam Selas raug tua ib yam li Selas ob tug tijlaug thiab. Ces Tamaj thiaj rov qab mus nrog nws niam thiab nws txiv nyob lawm. Tau ntev loo los tom qab no Yudas tus pojniam uas yog Suav tus ntxhais txawm tuag lawm. Thaum dhau caij nyuaj siab quaj ntsuag lawm, Yudas thiab nws ib tug phoojywg uas nyob hauv lub nroog Adulas thiaj mus xyuas nws cov neeg txiav plaub yaj uas nyob hauv lub nroog Teenas. Muaj neeg mus hais qhia rau Tamaj hais tias, “Nws tus txiv leej txiv tabtom sawv kev tuaj mus txiav plaub yaj rau hauv lub nroog Teenas.” Ces Tamaj thiaj hloov nws cev ris tsho pojntsuam uas nws niaj hnub hnav ntawd cia, muab ntaub los npog nws lub ntsejmuag, thiab mus zaum ntawm ntug kev uas nyob ntawm ncauj ke mus rau hauv lub zos Enayees, yog lub zos uas nyob ntawm txojkev mus rau hauv lub nroog Teenas. Nws yeej paub hais tias, Yudas tus tub ntxawg Selas twb hlob tiav hluas lawm, tiamsis Yudas tseem pheej tsis muab Tamaj thiab Selas txis ua niamtxiv li. Thaum Yudas pom Tamaj, nws xav hais tias Tamaj yog ib tug niamntiav, rau qhov Tamaj muab ntaub npog nws lub ntsejmuag huv tibsi lawm. Yudas thiaj ncaj nraim mus rau ntawm Tamaj thiab hais tias, “Koj cia li mus, kuv yuav nrog koj pw, koj yuav nqi pestsawg?” (Yudas tsis paub hais tias, Tamaj yog Yudas tus nyab li lawm.) Tamaj thiaj teb hais tias, “Koj txaus siab yuav muab dabtsi rau kuv?” Yudas teb hais tias, “Kuv yuav xa ib tug menyuam tshis tuaj rau koj.” Tamaj hais tias, “Ua li ntawd los tau, tiamsis koj muab ib yam dabtsi rau kuv khaws tseg ua puavpheej mus txog thaum koj coj tus menyuam tshis tuaj rau kuv tso.” Yudas nug hais tias, “Koj xav kom kuv muab dabtsi rau koj khaws ua puavpheej tseg?” Tamaj teb hais tias, “Muab koj lub homthawj uas muaj txoj hlua thiab koj tus pas nrig rau kuv.” Yudas thiaj muab tej ntawd rau Tamaj. Ces nkawd txawm mus pw, ces Tamaj txawm cia li xeeb tub. Tamaj rov qab mus tsev, tshem nws daim ntaub npog ntsejmuag, thiab rov qab muab nws cev ris tsho pojntsuam los hnav dua. Yudas tso nws tus phoojywg Hilas xa tus menyuam tshis mus txhiv tej khoom coglus uas nws muab rau tus pojniam ntawd khaws tseg lawm rov qab los, tiamsis Hilas mus nrhiav tsis tau nws li lawm. Hilas nug cov txivneej uas nyob hauv lub zos Enayees hais tias, “Tus niamntiav uas pheej mus nyob ntawm ntug kev mus dua qhov twg lawm?” Cov txivneej ntawd teb hais tias, “Nyob hauv lub zos no yeej ibtxwm tsis muaj niamntiav.” Hilas rov qab los cuag Yudas thiab hais tias, “Kuv nrhiav tsis tau tus pojniam ntawd li lawm. Cov txivneej uas nyob hauv lub zos ntawd hais rau kuv tias, yeej tsis muaj ib tug niamntiav nyob hauv lub zos no hlo li.” Yudas hais tias, “Cia nws yuav kuv cov khoom ntawd mus li. Peb tsis xav pub kom muaj neeg luag peb plig. Kuv twb muab tus menyuam tshis no rau koj coj mus them nws ntag, tiamsis koj mus nrhiav tsis tau nws lawm xwb.” Tau peb hlis tom qab muaj neeg mus qhia rau Yudas hais tias, “Tamaj uas yog koj tus nyab tau mus ua niamntiav, thiab nimno nws xeeb tub lawm.” Yudas hais tias, “Cia li coj Tamaj tawm mus lawm nraum ntug nroog thiab muab hluavtaws hlawv kom nws tuag.” Thaum lawv tabtom coj Tamaj tawm mus, Tamaj tso neeg nqa cov khoom ntawd thiab mus hais rau nws txiv yawg hais tias, “Kuv muaj menyuam los ntawm tus txivneej uas yog tus tswv cov khoom no. Nej nrog xyuas lub homthawj uas muaj hlua thiab tus pas nrig no tib zoo saib yog leejtwg li.” Yudas nco tau cov khoom ntawd, thiab hais tias, “Tamaj ua yog cai lawm. Kuv tsis ua raws li kuv tau coglus tseg rau nws, tsimnyog kuv yuav tsum muab nws txis rau kuv tus tub Selas.” Ces Yudas tsis mus nrog Tamaj pw ib zaug ntxiv li lawm. Thaum yuav txog caij Tamaj tu tub, nws paub hais tias nws muaj menyuam ntxaib nyob nws hauv plab. Thaum nws tabtom mob plab yuav yug ob tug menyuam, muaj ib tug menyuam txhais tes txawm tawm tuaj ua ntej, tus pojniam uas pab daws cev ntawd tuav nkaus txhais tes ntawd, thiab muab tau ib txoj xov paj liab los khi txhais tes ntawd thiab hais tias, “Tus no yog tus xub yug.” Tiamsis nws nkaum nws txhais tes rov qab lawm, nws tus kwv txawm yug los ua ntej. Ces tus pojniam uas tuaj pab daws cev ntawd hais tias, “Yog ua li cas koj yuav txeeb tau kev los ua ntej!” Yog li ntawd, thiaj muab nws tis npe hu ua Peles. Ces nws tus tijlaug mam yug los txhais tes khi rawv ib txoj xov paj liab, thiab muab nws tis npe hu ua Zelas. Cov neeg Yisamayees coj Yauxej mus txog nram tebchaws Iziv, thiab lawv muab nws muag rau Pautifas uas yog Falaus tus thawj tubrog saib cov tubrog uas zov Falaus lub loog. Tus TSWV nrog nraim Yauxej thiab pub nws tes haujlwm vammeej heev. Nws nyob hauv nws tus tswv Pautifas uas yog neeg Iziv lub tsev, Pautifas pom hais tias tus TSWV nrog nraim Yauxej thiab ua rau txhua tes haujlwm uas Yauxej ua puavleej tiav. Pautifas txaus siab heev rau Yauxej thiab tsa Yauxej ua nws tus tubtxib, thiab tso plhuav nws lub cuabtam rau Yauxej ua tus saib. Txij thaum ntawd los tus TSWV thiaj foom koob hmoov rau tus neeg Iziv ntawd tsevneeg, thiab txhua yam uas nws muaj nyob hauv nws lub vaj lub tsev thiab hauv nws tej teb, vim Yauxej nrog nws nyob. Pautifas muab txhua yam uas nws muaj cob rau Yauxej saib thiab nws tso siab plhuav tsis txhawj txog ib yam dabtsi li, tsuas yog tshwj cov zaub mov uas nws noj nkaus xwb. Yauxej yog ib tug hluas uas cev yiag thiab zoo nraug heev, ces tau tsis ntev Yauxej tus tswv tus pojniam txawm nyiam Yauxej, thiab nws taij Yauxej hais tias, “Koj mus nrog kuv pw.” Yauxej tsis kam mus, thiab nws hais rau Pautifas tus pojniam hais tias, “Koj saib, txij thaum kuv los nyob ntawm no, kuv tus tswv tso siab plhuav rau kuv tsis muaj kev nyuaj siab txhawj txog ib yam dabtsi nyob hauv nws lub tsev hlo li. Nws muab txhua yam uas nws muaj tso plhuav rau kuv ua tus saib. Hauv lub tsev no kuv thiaj yog tus uas muaj peevxwm ib yam li nws muaj xwb. Kuv tus tswv yeej tsis txwv kuv ib yam dabtsi li, tsuas tshwj koj uas yog nws tus pojniam, nws thiaj txwv tsis pub kuv kov, kuv yuav ua li cas muaj pluaj siab deev koj thiab ua txhaum rau Vajtswv?” Txawm yog nws niaj hnub taij kom Yauxej mus nrog nws pw los Yauxej yeej tsis kam mus li. Tiamsis muaj ib hnub Yauxej mus ua haujlwm hauv tsev raws li nws pheej txeev ua, hnub ntawd tej tubtxib tsis muaj ib tug nyob hauv tsev li lawm. Pautifas tus pojniam txawm los tuav nkaus Yauxej lub tsho thiab hais tias, “Koj cia li mus nrog kuv pw xwb.” Tiamsis Yauxej hle hlo Yauxej lub tsho rau nws, thiab Yauxej tawm plaws khiav rau nraum zoov lawm. Thaum Pautifas tus pojniam pom hais tias, Yauxej hle Yauxej lub tsho rau nws thiab khiav tawm rau nraum zoov lawm, nws txawm hu cov tubtxib uas zov nws lub tsev los thiab ntxeev lus hais tias, “Nej sim saib! Tus neeg Henplais uas kuv tus txiv coj los rau hauv tsev no, nws ua saib tsis taus peb kiag li. Nws cia li los hauv kuv txaj thiab mos kuv, tiamsis kuv qw tawg ntho, ces nws cia li khiav dua nraum zoov lawm, thiab tseg nws lub tsho rau ntawm kuv ib sab.” Pautifas tus pojniam thiaj khaws Yauxej lub tsho cia mus txog thaum Yauxej tus tswv rov qab los txog tsev. Ces nws txawm piav zaj no rau nws tus txiv mloog hais tias: “Tus tubtxib Henplais uas koj coj los nrog wb nyob, nws los mov kuv hauv txaj. Tiamsis thaum kuv qw tawg ntho, nws tso plhuav kuv tseg thiab khiav dua nraum zoov lawm, nws tseg nws lub tsho rau ntawm kuv ib sab.” Thaum Yauxej tus tswv hnov dheev tej lus uas nws tus pojniam hais tias, “Koj tus tubtxib tau ua li no rau kuv lawm ntag.” Thiaj ua rau nws chim heev. Yauxej tus tswv thiaj coj Yauxej mus kaw rau hauv qhov chaw uas kaw Falaus cov neeg raug txim, ces Yauxej txawm mus nyob rau hauv lub tsev lojcuj ntawd lawm. Tiamsis tus TSWV yeej nrog nraim Yauxej thiab foom koob hmoov rau Yauxej, ces tus uas saib lub tsev lojcuj thiaj txaus siab heev rau Yauxej. Nws tsa Yauxej ua tus saib tagnrho cov neeg raug txim thiab ua tus saib txhua yam uas nyob hauv lub tsev lojcuj. Tus uas saib lub tsev lojcuj tso siab plhuav, tsis mus saib tej haujlwm uas nws tso rau Yauxej ua li, rau qhov tus TSWV nrog nraim Yauxej thiab pub tswvyim rau Yauxej ua tau txhua yam haujlwm tiav huv tibsi. Tau ib ntus los tom qab no tus uas ce cawv thiab tus thawj uas saib cov neeg ua mov rau tus vajntxwv uas kav tebchaws Iziv noj thiab haus, nkawd tau ua txhaum rau vajntxwv. Nws chim rau ob tug tubtxib ntawd heev, Falaus txawm hais kom coj nkawd mus kaw rau hauv tus thawj uas saib cov fajxwm lub tsev, yog tib lub tsev lojcuj uas kaw Yauxej thiab ntag. Tus thawj uas saib cov neeg raug txim tso Yauxej los ua tus saib nkawd, thiab lawv nyob tau ib ntu ntev loo hauv tsev lojcuj. Muaj ib hmos tus ce cawv thiab tus thawj uas saib cov neeg ua mov rau cov Iziv tus vajntxwv noj uas raug kaw rau hauv tsev lojcuj, nyias txawm ua nyias ib zaj npau suav, thiab nkawd ob zaj npau suav ntawd nyias muaj nyias ntsiab lus. Thaum sawv ntxov Yauxej los rau hauv chav uas nkawd nyob, nws pom nkawd mluas kawg li. Yauxej nug nkawd hais tias, “Vim li cas hnub no neb mluas kawg li?” Nkawd teb hais tias, “Wb nyias ua nyias ib zaj npau suav, tiamsis tsis muaj leejtwg yuav txhais tau wb ob zaj npau suav li.” Yauxej teb hais tias, “Tsuas yog Vajtswv tib leeg xwb thiaj li txhais tau npau suav. Qhia neb ob zaj npau suav rau kuv mloog saib!” Ces tus uas ce cawv thiaj piav nws zaj npau suav rau Yauxej hais tias, “Kuv ua npau suav pom ib tsob txiv hmab nyob ntawm kuv xubntiag ncau ua peb ceg. Thaum hlav nplooj lawm, tamsim ntawd txawm tawg paj thiab txi txiv ua tej tauv, tej txiv txawm siav tagnrho. Kuv tuav rawv Falaus lub khob, ces kuv cev tes mus de cov txiv hmab ntawd thiab tso kua rau hauv lub khob muab cev rau Falaus haus.” Yauxej hais tias, “Koj zaj npau suav lub ntsiab mas yog li no: peb tug ceg txiv hmab ntawd yog peb hnub. Peb hnub tom ntej no Falaus yuav tuaj tso koj tawm mus, zam txim rau koj, thiab nws yuav muab koj txoj haujlwm qub rov rau koj ua. Koj yuav tau rov muab nws lub khob cev rau nws ib yam li yav thaud koj tau ua los lawm. Tiamsis thaum koj tau zoo lawm thov koj nco ntsoov txog kuv, thiab koj ua siab dawb paug piav txog kuv zaj rau Falaus mloog, kom nws thiaj tso kuv tawm hauv tsev lojcuj no mus. Qhov tseeb yog lawv nyiag kuv pem tebchaws Henplais los thiab txawm yog kuv los nyob rau hauv tebchaws Iziv no los kuv yeej tsis tau ua ib qhov txhaum uas txaus lawv coj kuv tuaj kaw rau hauv tsev lojcuj no li.” Thaum tus thawj uas saib cov ua mov pom hais tias, tus ce cawv zaj npau suav yog zaj zoo lawm, nws thiaj hais rau Yauxej hais tias, “Kuv ua ib zaj npau suav thiab, kuv kwv peb choo ncuav sib tshooj saum kuv taubhau. Nyob saum tshooj choo peb, muaj txhua yam ncuav zoo uas coj mus rau Falaus noj, tiamsis noog los muab cov ncuav ntawd noj lawm.” Yauxej teb hais tias, “Koj zaj npau suav lub ntsiab yog li no: peb choo ncuav yog peb hnub. Peb hnub saum no Falaus yuav tuaj coj koj mus, thiab yuav muab koj txiav cajdab! Ces nws yuav muab koj lub cev mus dai rau saum tus ncej, thiab noog yuav los noj koj cev nqaij.” Tau peb hnub tom qab uas txog Falaus hnub yug nws txawm ua tau ib rooj mov rau tagnrho nws cov nomtswv noj ua kev zoo siab, nws thiaj tso tus uas ce cawv thiab tus thawj saib cov ua mov los sawv tabmeeg ntawm nws cov nomtswv. Falaus muab tus uas ce cawv rov mus ua nws lub luag haujlwm ce cawv li qub, tiamsis nws muab tus thawj saib cov ua mov txiav cajdab. Tej no tshwmsim raws li Yauxej tau hais lawm tiag. Tiamsis tus ce cawv nco tsis txog tej lus uas Yauxej hais, ces nws txawm cia li tsis nco qab txog Yauxej li lawm. Tau ob xyoo tom qab ntawd, Falaus ua ib zaj npau suav hais tias, nws sawv ntawm ntug dej Niles, thaum ntawd nws pom xya tus maum nyuj rog rog tawm hauv dej tuaj noj tej zaub ntawm ntug dej. Ces muaj dua xya tus maum nyuj yuag yuag tshuav pobtxha xwb, tawm hauv tus dej Niles tuaj nrog xya tus maum nyuj rog rog ntawd sawv ua ke ntawm ntug dej, ces xya tus maum nyuj yuag yuag, cia li muab xya tus maum nyuj rog rog noj nqos tas huv tibsi lawm. Ces Falaus txawm tsim dheev los. Nws rov qab tsaug zog thiab ua dua ib zaj npau suav hais tias, muaj ib tsob nplej txhawv tau xya hnab, mas puv thiab siav zoo kawg li. Ces muaj dua xya hnab nplej txhawv tuaj yog npluag xwb, rau qhov raug cov cua tom tiaj suabpuam tuaj ntsawj, Xya hnab nplej npluag ntawd cia li muab xya hnab nplej puv puv noj nqos huv tibsi lawm. Falaus txawm tsim dheev los ua ciav yog nws ua npau suav xwb. Tagkis kaj ntug Falaus ntxhov siab heev, nws thiaj txib neeg mus hu cov neeg uas txawj saib yaig thiab tej neeg txawj ntse uas nyob hauv tebchaws Iziv tuaj huv tibsi. Nws txawm piav nws ob zaj npau suav ntawd rau lawv mloog, tiamsis tsis muaj leejtwg txhais tau nws ob zaj npau suav ntawd li. Ces tus ce cawv mam li hais rau Falaus hais tias, “Tsimnyog hnub no kuv yuav tsum tau los lees kuv lub txim uas kuv tau ua txhaum rau koj tas los lawm. Thaum uas Falaus tau chim rau tus thawj uas saib cov ua mov thiab rau kuv, Falaus thiaj muab wb coj mus kaw rau hauv tus thawj uas saib cov fajxwm lub tsev lojcuj. Muaj ib hmos wb nyias txawm ua nyias ib zaj npau suav, thiab wb ob zaj npau suav ntawd nyias muaj nyias ntsiab lus. Tus tub hluas Henplais uas raug kaw nrog wb nyob ua ke rau hauv, nws yog tus thawj uas saib cov fajxwm tus qhev. Wb piav wb ob zaj npau suav rau nws mloog, thiab nws txhais tau wb ob zaj npau suav ntawd rau wb. Mas txhua yam txawm muaj raws li nws hais tiag: koj muab kuv tso rov los ua kuv tej haujlwm qub, tiamsis koj muab tus saib cov ua mov txiav cajdab lawm.” Falaus thiaj txib neeg mus tso Yauxej los thiab tamsim ntawd luag txawm mus coj nws tawm hauv tsev lojcuj los. Tom qab uas nws chais hwjtxwv thiab hloov nws cev ris tsho tas lawm, nws txawm los sawv ntawm Falaus xubntiag. Falaus hais rau Yauxej hais tias, “Kuv ua ib zaj npau suav tiamsis tsis muaj leejtwg txhais tau zaj npau suav ntawd li. Mas kuv hnov hais tias, thaum koj hnov luag tej ua npau suav koj yeej muaj peevxwm txhais tau tej npau suav ntawd.” Yauxej teb hais tias, “Falaus, kuv tsis muaj peevxwm txhais tau koj zaj npau suav, tiamsis Vajtswv yuav pub rau kuv txhais koj zaj npau suav rau koj.” Falaus hais tias, “Kuv ua npau suav mas kuv sawv ntawm ntug dej Niles, Thaum ntawd muaj xya tus maum nyuj rog rog thiab zoo nkauj heev tawm hauv tus dej Niles tuaj noj zaub ntawm ntug dej. Ces muaj dua xya tus maum nyuj yuag yuag tshuav pobtxha xwb. Kuv yeej tsis tau pom dua tej nyuj phem thiab yuag li ntawd nyob hauv tebchaws Iziv no hlo li. Cov maum nyuj yuag yuag ntawd cia li muab cov maum nyuj rog zoo nkauj noj nqos tas, tiamsis tsis muaj leejtwg yuav paub, rau qhov cov maum nyuj ntawd tseem yuag thiab phem ib yam li qub. Ces kuv txawm tsim dheev los lawm. Kuv rov ua dua ib zaj npau suav pom ib tsob nplej txhawv tau xya hnab nplej puv puv thiab siav zoo heev. Ces muaj dua ib tsob nplej txhawv tau xya hnab nplej npluag thiab qhuav taw nrees uas yog raug cov cua tom tiaj suabpuam ntsawj, cov hnab nplej npluag cia li nqos cov hnab nplej puv puv thiab siav zoo ntawd huv tibsi lawm. Kuv twb piav zaj npau suav no rau cov neeg uas txawj saib yaig mloog tas, tiamsis tsis muaj leejtwg yuav txhais tau lub ntsiab rau kuv li.” Yauxej hais rau Falaus hais tias, “Ob zaj npau suav no lub ntsiab yog tib yam xwb, yog Vajtswv qhia rau koj paub txog tej xwmtxheej uas yuav muaj los yav tom ntej no. Xya tus maum nyuj rog rog yog xya xyoo, thiab xya hnab nplej uas puv zoo nkauj los yog xya xyoo ib yam nkaus, ob zaj npau suav no puavleej yog tib lub ntsiab lus xwb. Xya tus maum nyuj yuag yuag uas tawm tuaj tom qab thiab xya hnab nplej npluag uas raug cov cua tom tiaj suabpuam ntsawj ntawd, yog xya xyoo uas yuav muaj kev tshaib nqhis heev. Falaus, koj ob zaj npau suav yeej muaj tseeb ib yam li uas kuv qhia rau koj no ntag, Vajtswv qhia rau koj paub txog tej uas nws yuav ua ntawd. Xya xyoo saum no yuav muaj qoobloo ntau nplua mias thoob plaws tebchaws Iziv. Tom qab ntawd, yuav muaj kev tshaib nqhis heev xya lub xyoo, thiab sawvdaws yuav tsis nco txog xya lub xyoo uas muaj qoobloo lawm, rau qhov txojkev tshaib nqhis yuav ua rau lub tebchaws no raug kev puastsuaj. Thaum ntawd sawvdaws yuav nco tsis txog lub sijhawm uas lub tebchaws no muaj qoobloo nplua mias, rau qhov muaj kev tshaib nqhis loj kawg nkaus li. Tej uas koj tau ua npau suav pom ob zaug ntawd txhais hais tias, Vajtswv twb teem ib lub sijhawm tseg kom tej ntawd muaj tshwmsim los, Vajtswv yuav ua kom tej ntawd muaj los sai sai tom ntej no ntag. “Nimno koj cia li nrhiav ib tug neeg txawj ntse thiab muaj tswvyim zoo, thiab tsa nws ua tus saib lub tebchaws no. Thiab koj yuav tsum tau tsa dua ib pab nomtswv mus ua cov sau sawvdaws tej qoobloo ib feem tsib ntawm xya lub xyoo uas muaj qoobloo ntau heev no los cia. Koj hais kom lawv cia li sau tej qoobloo hauv xya lub xyoo uas muaj qoobloo ntawd tseg cia, thiab tso cai rau lawv mus sau tej nplej los ntim rau hauv tej txhab cia rau hauv txhua lub nroog thiab tso neeg zov huv tibsi. Sau tej qoobloo no los cia, thiaj li tau yug lub tebchaws, thaum muaj kev tshaib nqhis los raug cov neeg Iziv xya lub xyoo ntawd. Yuav tsum ua li no tsoom pejxeem thiaj tsis tuag tshaib.” Falaus thiab nws tsoom nomtswv puavleej pom zoo ua raws li zaj uas Yauxej hais no, thiab Falaus hais rau lawv tias, “Peb yuav nrhiav tsis tau ib tug neeg nyob qhov twg uas muaj Vajtswv tus ntsujplig nrog nws nyob li Yauxej lawm.” Falaus hais rau Yauxej hais tias, “Vajtswv twb qhia tej no rau koj paub lawm, yeej tsis muaj leejtwg yuav totaub thiab muaj tswvyim npaum li koj. Kuv yuav tsa koj ua tus saib tagnrho kuv lub tebchaws, thiab kuv cov pejxeem yuav mloog koj tej lus samhwm. Tsuas yog cia kuv ua tus loj dua koj xwb. Nimno kuv tsa koj ua tus tswj lub tebchaws Iziv.” Falaus hle nws ntiv nplhaib uas yog lub homthawj ntawm nws tus ntivtes los thiab muab looj rau Yauxej tus ntivtes. Falaus muab cev ris tsho ntaubmag uas zoo heev rau Yauxej hnav, thiab muab txoj saw kub los rau Yauxej coj ntawm cajdab. Falaus muab nws lub tsheb nees uas yog lub ob rau Yauxej caij, thiab Falaus cov tub fajxwm mus ua Yauxej ntej qw hais tias, “Zam kev! Zam kev!” Falaus tsa Yauxej ua tus kav tagnrho lub tebchaws Iziv lawm. Falaus hais rau Yauxej hais tias, “Kuv yog Falaus, tiamsis yog koj tsis tau tso cai mas cov neeg uas nyob hauv tebchaws Iziv no tsis muaj cai ua tau ib yam dabtsi li.” Falaus tis dua ib lub npe tshiab rau Yauxej hu ua Xafenas Paneyas thiab nws muab Pautifelas uas yog tus povthawj uas nyob hauv lub nroog Heli-aupulis, tus ntxhais Axenas rau Yauxej yuav ua pojniam. Thiab Yauxej tawm mus ncig thoob plaws lub tebchaws Iziv. Thaum Yauxej pib ua haujlwm rau Falaus uas yog cov Iziv tus vajntxwv, nws hnubnyoog muaj peb caug xyoo. Yauxej tawm hauv Falaus lub loog mus ncig xyuas haujlwm thoob plaws lub tebchaws Iziv. Xya lub xyoo uas qoobloo zoo thiab ntsu heev ntawd, cov neeg hauv tebchaws Iziv ua tau qoobloo ntau kawg nkaus li, thiab Yauxej sau tagnrho tej qoobloo uas cov neeg ua tau ntawm xya lub xyoo nyob hauv tebchaws Iziv los khaws cia huv tibsi rau hauv tej nroog. Nws sau tej qoob uas luag ua hauv tej teb nyob ibncig lub nroog twg muab sau los ntim cia rau hauv lub nroog ntawd. Yauxej sau tau tej qoob los khaws cia ntau cuag li tej suabzeb nram ntug hiavtxwv, sau tau ntau heev nws thiaj tsis suav hais tias muaj pestsawg tawv thiab pestsawg tas. Ua ntej xyoo uas muaj kev tshaib nqhis los txog, Yauxej tus pojniam uas hu ua Axenas uas yog tus povthawj Pautifelas tus ntxhais yug tau ob tug tub rau Yauxej lawm. Yauxej hais tias, “Vajtswv ua rau kuv tsis nco txog kuv tej kev txomnyem thiab ua rau kuv tsis nco kuv tsevneeg li lawm”; yog li ntawd, nws thiaj muab nws tus tub hlob tis npe hu ua Manaxes. Thiab nws tseem hais tias, “Vajtswv pub kuv muaj tubki hauv lub tebchaws uas kuv muaj kev ntxhov siab”; yog li ntawd, nws thiaj muab nws tus tub yau tis npe hu ua Efalayees. Xya lub xyoo uas sawvdaws muaj kev zoo siab rau tej qoobloo uas ntsu heev nyob hauv tebchaws Iziv ntawd xaus lawm, ces xya lub xyoo uas muaj kev tshaib nqhis txawm pib muaj tuaj, raws li Yauxej hais tseg lawm tiag. Txhua lub tebchaws puavleej muaj kev tshaib nqhis, tiamsis tshuav lub tebchaws Iziv thiaj tseem muaj mov noj xwb. Thaum cov Iziv pib muaj kev tshaib plab, lawv tuaj quaj thov mov ntawm Falaus. Falaus kom lawv cia li mus cuag Yauxej thiab ua raws li Yauxej kom lawv ua. Thaum muaj kev tshaib nqhis mus thoob lub tebchaws lawm, Yauxej thiaj qhib txhua lub txhab nplej muag rau cov neeg Iziv. Tej neeg uas nyob txhua lub tebchaws thoob qab ntuj puavleej tuaj yuav mov ntawm Yauxej hauv tebchaws Iziv, rau qhov muaj kev tshaib nqhis thoob plaws txhua qhov chaw. Thaum Yakhauj hnov hais tias, nyob nram tebchaws Iziv muaj nplej ntau, nws thiaj hais rau nws cov tub hais tias, “Vim li cas nej nyob hlwb hluav tsis ua ib yam dabtsi li? Kuv hnov hais tias, nyob nram tebchaws Iziv muaj mov ntau, nej cia li mus yuav mov los rau peb noj, cawm kom peb tsis txhob tuag tshaib.” Yog li ntawd, Yauxej cov tijlaug kaum leej thiaj mus yuav mov nram tebchaws Iziv, tiamsis Yakhauj tsis tso Yauxej tus kwv Npeenyamees nrog cov tijlaug mus, rau qhov Yakhauj ntshai nyob tsam muaj tej xwmtxheej phem los raug Npeenyamees thiab. Yakhauj cov tub nrog luag lwm pab neeg mus yuav mov nram tebchaws Iziv thiab, rau qhov muaj kev tshaib nqhis nyob hauv tebchaws Kana-as. Yauxej uas yog tus tswj lub tebchaws Iziv, nws ua tus muag mov rau txhua haivneeg uas nyob thoob plaws txhua lub tebchaws. Yog li ntawd, Yauxej cov tijlaug thiaj tuaj thiab txhos caug ntua pe ntawm nws xubntiag nyo hau ua ntsejmuag ti nkaus hauv av. Thaum Yauxej pom dheev nws cov tijlaug, nws tseem nco tau lawv, tiamsis nws txhob txwm ua tus tsis paub lawv li. Nws nug lawv tshawv tsawv hais tias, “Nej tuaj qhov twg tuaj?” Lawv teb hais tias, “Peb tuaj pem tebchaws Kana-as tuaj yuav mov noj.” Yauxej tseem nco tau nws cov tijlaug, tiamsis lawv nco tsis tau nws lawm. Yauxej nco txog ob zaj npau suav uas nws ua hais txog lawv ntawd thiab nws hais rau lawv tias, “Nej yog cov neeg uas tuaj soj xyuas peb lub tebchaws saib qhov twg yog qhov tsis muaj zog xwb los sav!” Lawv teb hais tias, “Tus tswv, tsis yog peb tuaj ua li koj hais ko, peb yog koj cov tubqhe, peb tuaj ntawm no, yog peb tuaj thov yuav mov ntawm koj coj mus noj xwb. Tus tswv, peb cov no puavleej yog kwvtij. Peb sawvdaws yog neeg ncaj ncees, peb tsis yog neeg tuaj soj xyuas tebchaws.” Yauxej hais rau lawv tias, “Yeej tsis yog li nej hais, yog nej tuaj soj xyuas peb lub tebchaws saib qhov twg yog qhov tsis muaj zog xwb ntag.” Lawv hais tias, “Tus tswv, peb muaj kaum ob leeg kwvtij, peb puavleej yog tib leeg txiv yug nyob hauv tebchaws Kana-as. Peb ib tug kwv yau tuag lawm, thiab peb tshuav tus kwv ntxawg nrog peb txiv nyob pem tsev.” Yauxej teb hais tias, “Yeej yog li kuv hais tiag lauj, nej tuaj soj xyuas peb lub tebchaws xwb li. Kuv yuav sim nej, kuv thov coglus rau ntawm Falaus lub npe hais tias: yog nej tsis coj nej tus kwv ntxawg tuaj ntawm no, mas kuv yuav tsis tso nej mus tsev li. Nej cov ib tug yuav tsum mus coj nej tus kwv tuaj. Dua li cov mas yuav tsum coj mus kaw, mus txog thaum nej cov lus no muaj tseeb raws li nej hais ntawd tso. Falaus kav rawv peb, yog tsis muaj tseeb li nej hais, ces yog nej tuaj soj xyuas peb lub tebchaws xwb ntag.” Yauxej thiaj coj lawv mus kaw rau hauv tsev lojcuj tau peb hnub. Hnub peb Yauxej thiaj hais rau lawv tias, “Kuv yog ib tug neeg uas hwm Vajtswv, yog nej ua tau yam no, mas nej thiaj li yuav dim txim. Yog hais tias nej yeej yog neeg ncaj ncees tiag, cia nej cov no ib tug nyob hauv lub tsev lojcuj no, dua li cov, nej cia li thauj tej mov uas nej yuav tau lawm mus cawm nej tej pojniam menyuam uas yuav tuag tshaib tso. Ces nej mam li coj nej tus kwv ntxawg tuaj rau kuv. Ua li no thiaj li yog muaj tseeb raws li tej lus uas nej tau hais lawm, thiab kuv thiaj yuav tsis tua nej povtseg.” Lawv pom zoo ua raws li Yauxej hais. Thiab lawv sib tham zom zaws hais tias, “Tseeb lawm lauj, nimno peb raug tej kev txomnyem no los twb yog vim peb tau ua txhaum rau peb tus kwv lawm. Peb twb pom nws raug kev txomnyem loj heev thaum nws thov kom peb pab, tiamsis peb tsis pab nws li. Twb yog vim li no ntag nimno peb thiaj raug kev txomnyem.” Lunpees hais tias, “Kuv twb yeej hais rau nej tias, tsis txhob ua phem rau nws, tiamsis nej tsis mloog kuv hais. Nej paub lawm los tsis paub, nimno lub txim nphau los raug peb lawm lauj.” Yauxej totaub tej lus uas lawv hais huv tibsi, tiamsis lawv tsis paub hais tias Yauxej paub lawv tej lus, rau qhov thaum Yauxej nrog lawv tham, nws kom neeg txhais lus xwb. Yauxej tawm ntawm lawv mus nkaum rau ib qhov thiab quaj; thaum nws tauv taus kua muag lawm, nws rov los muab Xime-oos khi kiag tabmeeg lawv. Yauxej hais kom cov tubqhe muab nplej ntim rau hauv nws cov tijlaug tej hnab kom puv nkaus, muab lawv tej nyiaj ntsaws rov rau hauv lawv tej hnab, thiab ntim su huv tibsi rau lawv tau noj taug kev mus tsev. Cov tubqhe ua tej no tiav log raws li Yauxej hais. Ces cov tijlaug tsaws tej nplej uas lawv yuav ntawd rau saum lawv cov neesluav nraubqaum, thiab lawv txawm sawv kev los tsev lawm. Thaum lawv los so ib hmos ntawm ib tog kev, muaj ib tug txawm qhib nws lub ncauj hnab muab nplej los rau nws tus neesluav noj, ua ciav nws cov nyiaj tseem nyob ntawm nws lub ncauj hnab. Nws thiaj hais rau nws cov kwvtij hais tias, “Ua li cas kuv cov nyiaj tseem nyob hauv kuv lub hnab no!” Lawv poob siab thiab ntshai kawg li, lawv thiaj sib nug zom zaws hais tias, “Vajtswv ua dabtsi li no rau peb?” Thaum lawv rov los txog ntawm lawv txiv Yakhauj uas nyob hauv tebchaws Kana-as lawm, lawv piav txhua yam xwmtxheej uas lawv mus ntsib rau lawv txiv mloog hais tias, “Tus nom uas kav lub tebchaws Iziv hais lus nyaum kawg rau peb thiab liam hais tias peb yog cov neeg uas xav mus soj xyuas nws lub tebchaws xwb. Peb teb hais tias, ‘Peb yog neeg ncaj ncees, peb tsis yog cov neeg mus soj xyuas tebchaws. Peb cov kwvtij muaj kaum ob leeg, peb puavleej yog tib leeg txiv yug xwb. Muaj ib tug tuag lawm, nimno tshuav ib tug kwv ntxawg nrog peb txiv nyob pem tebchaws Kana-as.’ Tus nom ntawd teb hais tias, ‘Yog nej xav kom kuv ntseeg hais tias, nej yog neeg ncaj ncees, mas nej yuav tsum ua li no: Nej cov no ib tug yuav tsum tau nrog kuv nyob, dua li cov cia thauj nplej rov mus rau nej cov pojniam menyuam uas yuav tuag tshaib tau noj. Coj nej tus kwv ntxawg tuaj rau kuv. Kuv thiaj ntseeg hais tias nej yog neeg ncaj ncees, tsis yog neeg tuaj soj xyuas tebchaws, kuv thiaj yuav tso nej tus tijlaug rov rau nej, mas nej thiaj tau nyob hauv lub tebchaws no ua lag ua luam.’ ” Thaum lawv muab lawv cov hnab nplej hliv, lawv pom lawv cov nyiaj, nyias cov nyob hauv nyias lub hnab nplej, mas thaum uas lawv thiab lawv txiv Yakhauj pom cov nyiaj ntawd, ua rau lawv ntshai kawg li. Lawv txiv hais rau lawv tias, “Nej xav ua kom kuv cov tub tsis tshuav ib tug nrog kuv nyob li los? Yauxej los tuag lawm, Xime-oos los raug ntes mus kaw lawm, nimno nej tseem yuav coj Npeenyamees mus thiab. Kuv yog tus uas raug kev nyuaj siab tshaj plaws huv tibsi!” Lunpees hais rau nws txiv hais tias, “Yog kuv tseem tsis coj Npeenyamees rov los rau koj, ces koj cia li muab kuv ob tug tub tua huv tibsi povtseg. Tso nws rau kuv ua tus saib, kuv yeej yuav coj nws rov qab los xwb.” Tiamsis Yakhauj hais tias, “Kuv tsis kam tso kuv tus tub ntxawg nrog koj mus, rau qhov nws tus tijlaug tuag lawm, tshuav nws ib leeg xwb. Nyob tsam ho muaj xwm rau nws tom tej tog kev. Kuv laus heev lawm, yog kuv tseem pheej raug tej kev quaj ntsuag uas nej ua rau kuv ntawd, ntshai kuv yuav cia li txhawm chim tuag li!” Hauv tebchaws Kana-as muaj kev tshaib plab zuj zus ntxiv, thaum uas Yakhauj tsevneeg noj tej mov uas lawv yuav nram tebchaws Iziv los tas lawm, Yakhauj hais rau nws cov tub hais tias, “Nej cia li rov qab mus yuav mentsis mov los rau peb tau noj.” Yudas hais rau Yakhauj hais tias, “Tus nom uas kav lub tebchaws Iziv yeej hais tu lus nrho rau peb hais tias, yog peb tseem tsis coj peb tus kwv mus rau nws, mas kom peb tsis txhob mus tshwm ntsejmuag rau nws pom ib zaug li lawm. Yog koj tso peb tus kwv ntxawg nrog peb mus, mas peb thiaj yuav kam mus yuav mov los rau koj. Tiamsis yog koj tsis kam tso nws mus, peb yuav tsis kam mus, rau qhov tus nom nrad yeej hais rau peb hais tias, ‘Yog nej tsis coj nej tus kwv ntxawg nrog nej tuaj, nej tsis txhob tuaj tshwm ntsejmuag rau kuv pom ib zaug ntxiv li lawm.’ ” Yakhauj hais tias, “Vim li cas nej yuav ua rau kuv tau kev nyuaj siab ua luaj, ua li cas tseem yuav qhia rau tus nom ntawd paub hais tias, nej tshuav ib tug kwv thiab no?” Lawv teb hais tias, “Tus nom nrad, yeej nug txog peb thiab peb tsevneeg huv tibsi hais tias, ‘Nej txiv puas tseem ua neej nyob? Nej puas muaj kwv thiab?’ Peb thiaj teb nws tej lus uas nws nug peb ntawd. Peb twb tsis paub hais tias, nws yuav kom peb coj peb tus kwv ntxawg mus rau nws li.” Yudas hais rau nws txiv hais tias, “Tso tus hluas nrog kuv mus, peb yuav rawm sawv kev mus tamsim no. Peb sawvdaws thiaj yuav tsis tuag tshaib. Kuv yuav zoo siab muab kuv txojsia pauv nws, thov koj tso nws rau kuv ua tus tsomkwm. Yog kuv coj tsis tau nws rov los rau koj, ces cia kuv ua tus ris lub txim no mus ibtxhis li. Yog peb tsis txhob pheej tabkaum li no, ntshai tamsim no peb twb rov mus ob ntsug los lawm.” Lawv txiv hais rau lawv hais tias, “Yog li ntawd, cia peb ua li no, muab tej khoom zoo tshaj plaws uas peb muaj nyob hauv tebchaws no ntim rau hauv nej cov hnab coj mus pub rau tus nom nrad xwsli: tshuaj tsw qab, zib ntab, txujlom, txiv laum huabxeeb thiab tej txiv ntoo. Nej cia li nqa nyiaj ob npaug mus, nej nqa cov nyiaj uas zaum i nyob hauv nej tej hnab rov mus rau luag. Tej zaum yog luag tsis nco qab lawm xwb. Coj nej tus kwv ntxawg nrog nej mus thiab rov mus cuag tus nom nrad. Thov Vajtswv tus uas muaj hwjchim loj kawg nkaus ua kom tus nom nrad muaj lub siab mos muag thiab hlub tshua nej, nws thiaj yuav tso Npeenyamees thiab nej tus tijlaug rov los. Txawm yog kuv ob tug tub tso kuv tseg lawm los xijpeem.” Yog li ntawd, lawv thiaj coj tej khoom pub thiab ob npaug nyiaj, thiab coj lawv tus kwv Npeenyamees nrog lawv rov mus cuag Yauxej rau nram tebchaws Iziv lawm. Thaum Yauxej pom Npeenyamees nrog lawv tuaj txog lawm, nws txawm hais rau tus tubtxib uas saib nws lub tsev hais tias, “Coj cov neeg no mus rau hauv kuv tsev. Cia li mus ntes ib tug tsiaj los tua ua zaub ua mov, thiab lawv yuav nrog kuv noj sus ua ke.” Tus tubtxib ntawd mus ua raws li Yauxej hais thiab coj cov tijlaug ntawd mus so hauv Yauxej tsev. Thaum uas coj lawv mus rau hauv Yauxej tsev, lawv ntshai kawg thiab lawv xav hais tias, “Ntshai yog tim cov nyiaj uas thawj zaug muab tso rov rau hauv peb cov hnab ntag lauj. Nws thiaj xav ntaus peb, txeeb yuav peb tej neesluav, thiab coj peb mus ua nws qhev.” Lawv thiaj mus cuag Yauxej tus tubtxib ntawm lub qhovrooj uas yuav mus rau hauv tsev thiab hais rau nws hais tias, “Tus tswv, yog koj txaus siab, peb twb tau tuaj yuav mov ntawm no ib zaug lawm. Thaum peb rov mus txog ib tog kev, peb qhib peb cov hnab nplej, ua cas cov nyiaj uas peb coj tuaj yuav mov puavleej nyob tas hauv peb cov hnab, thiab tej ncauj hnab tseem khi li qub. Peb thiaj nqa cov nyiaj no huv tibsi rov tuaj rau koj. Peb tsis paub xyov yog leejtwg muab peb cov nyiaj rov mus ntsaws rau hauv peb cov hnab. Zaum no los peb kuj npaj tau mentsis nyiaj coj tuaj thov yuav mov dua thiab.” Tus tubtxib thiaj hais tias, “Nej tsis txhob nyuaj siab thiab tsis txhob ntshai. Nej tus Vajtswv uas yog nej txiv tus Vajtswv, muab tej nyiaj ntawd ntsaws rov rau hauv nej tej hnab xwb. Kuv twb tau txais nej cov nyiaj lawm.” Ces nws txawm mus coj Xime-oos los rau lawv. Ces tus tubtxib thiaj coj cov tijlaug los rau hauv Yauxej tsev, nws mus nqa dej los rau lawv ntxuav taw, thiab muab zaub rau lawv cov neesluav noj. Lawv npaj lawv tej khoom pub tos cia txog thaum tavsu Yauxej los txog lawv yuav muab pub rau nws, rau qhov luag twb qhia rau lawv lawm hais tias, lawv yuav tau nrog Yauxej noj sus ua ke. Thaum Yauxej los txog, lawv thiaj mus nqa lawv cov khoom los rau hauv tsev muab pub rau Yauxej thiab txhos caug ntua ntawm Yauxej xubntiag pe ua ntsejmuag ti nkaus hauv av. Yauxej nug lawv txog kev noj qab nyob zoo thiab hais tias, “Nej twb yeej qhia kuv hais tias nej txiv laus heev, yog li ntawd, nimno nws nyob li cas lawm? Nws puas tseem ua neej nyob thiab puas noj qab nyob zoo?” Lawv teb hais tias, “Peb txiv uas yog koj tus tubtxib, nws noj qab nyob zoo thiab tseem ua neej nyob.” Ces lawv rov txhos caug pe Yauxej dua ib zaug ntxiv. Thaum Yauxej pom dheev nws tus kwv ntxawg Npeenyamees uas yog nrog nws koom ib leeg niam yug, nws thiaj nug hais tias, “Tus no yog nej tus kwv ntxawg uas nej qhia rau kuv lawm ntag los? Yauxej hais tias metub, thov Vajtswv foom koob hmoov rau koj.” Ces Yauxej txawm tawm plaws mus lawm, rau qhov nws pom nws tus kwv ntxawg, nws lub siab quaj dhi puv nkaus kev zoo siab, nws tauv tsis taus nws tej kua muag, nws yuav luag quaj tabmeeg lawv, nws thiaj tawm mus quaj twjywm ib leeg hauv nws chav tsev. Tom qab uas nws ntxuav muag tas, nws mam tawm los thiab ua tiag tauv nws lub kua muag, nws thiaj kom cov tubtxib rau mov los rau lawv noj. Lawv rau ib rooj mov rau Yauxej noj thiab rau dua ib rooj rau Yauxej cov tijlaug noj. Lawv rau dua ib rooj rau lwm qhov rau cov neeg Iziv uas tuaj nrog lawv noj mov ntawd noj, rau qhov cov neeg Iziv tsis kam nrog cov neeg Henplais noj mov ua ke, vim yuav ua rau cov neeg Iziv poob ntsejmuag. Yauxej cov tijlaug mus zaum ncig lub rooj tig xubntiag tuaj rau ntawm Yauxej, raws li lawv tej hnubnyoog pib tus hlob mus txog tus ntxawg. Thaum lawv pom hais tias ua ciav lawv tau los zaum txhij txhua lawm tiag, lawv ib leeg tig ntsia ib leeg ua rau lawv xav tsis thoob li. Cov tubtxib daus zaub daus mov ntawm Yauxej lub rooj los rau lawv noj, thiab lawv txhab rau Npeenyamees noj tsib npaug ntau dua lwm tug huv tibsi. Lawv thiaj nrog Yauxej noj thiab haus mus txog thaum lawv noj tsau haus qaug. Yauxej hais rau nws tus tubtxib uas saib nws lub tsev hais tias, “Koj muab nplej ntim rau hauv cov neeg no tej hnab kom ntau txaus nkaus lawv thauj mus, thiab muab lawv tej nyiaj ntsaws nyias li rov rau hauv nyias lub ncauj hnab. Koj muab kuv lub khob nyiaj ntsaws rau hauv tus kwv ntxawg lub ncauj hnab, ntsaws ua ke nrog nws cov nyiaj uas coj tuaj yuav nplej.” Tus tubtxib mus ua raws nraim li Yauxej hais kom nws ua. Tagkis kaj ntug nws txawm tso cov tijlaug cab lawv tej neesluav sawv kev rov qab mus tsev lawm. Lawv nyuam qhuav sawv kev los tsis deb ntawm ntug nroog, Yauxej hais rau tus tubtxib uas saib nws lub tsev hais tias, “Koj cia li maj nroos mus caum cov neeg ntawd. Thaum koj caum cuag lawv lawm, koj nug lawv hais tias, ‘Vim li cas nej ua qhov phem pauj qhov zoo? Vim li cas nej nyiag kuv tus tswv lub khob nyiaj? Lub khob ntawd yog lub uas nws niaj hnub haus dej, thiab yog lub uas siv saib hmoov. Nej tau ua txhaum loj heev lawm lauj!’ ” Thaum tus tubtxib mus caum cuag lawv, nws txawm hais tej lus no rau lawv. Lawv teb nws hais tias, “Tus tswv, koj hais li ko, yog hais txog dabtsi? Peb yeej tsis tau ua li no ib zaug li. Koj twb paub lawm hais tias, tej nyiaj uas peb tshawb tau hauv peb tej hnab nplej pem tebchaws Kana-as, peb twb nqa rov tuaj rau nej huv tibsi lawm. Yuav ua cas peb thiaj tuaj nyiag tau nyiaj lossis kub hauv koj tus tswv tsev? Tus tswv, yog koj tseem tshawb tau lub khob ntawd, ntawm peb cov no ib tug twg, yuav tsum muab tus ntawd tua povtseg, dua li peb cov yuav zoo siab hlo mus ua koj qhev.” Nws teb hais tias, “Kuv pom zoo ua li nej hais ko ntag, tiamsis tus uas tau muab lub khob lawm thiaj yuav tau mus ua kuv qhev xwb; nej cov uas tsis tau muab, nej cia li mus tsev kaj siab lug.” Yog li ntawd, lawv thiaj maj nroos tsaws lawv tej hnab rau hauv av, thiab lawv nyias daws nyias lub ncauj hnab. Yauxej tus tubtxib ua tib zoo tshawb, pib tshawb ntawm tus tijlaug hlob lub hnab los txog rau ntawm tus kwv ntxawg lub hnab, thiaj tshawb tau lub khob nyob hauv Npeenyamees lub hnab. Cov tijlaug thiaj dua rhe lawv tej tsho povtseg tu siab heev, lawv tsaws nra rau lawv tej neesluav thauj thiab rov los rau hauv nroog. Thaum Yudas thiab nws cov kwvtij rov los txog hauv Yauxej tsev, Yauxej tseem nyob hauv. Lawv txhos caug ntua rau hauv av pe Yauxej, Yauxej hais rau lawv hais tias, “Ua li cas nej lam ua li ko? Nej tsis paub hais tias tus neeg uas zoo li kuv no, muaj peevxwm paub tej xwmtxheej uas yuav muaj los tom hauv ntej no los?” Yudas teb hais tias, “Tus tswv, peb yuav teb li cas rau koj? Peb yuav ua li cas tawv dhau koj? Peb yuav ua li cas hais tau tias peb tsis muaj txim? Vajtswv tsis npog peb lub txim li lawm. Tsis yog tus uas luag nrhiav tau koj lub khob nyob hauv nws lub hnab thiaj ua koj qhev xwb, tiamsis tagnrho peb sawvdaws yuav ua koj qhev.” Yauxej teb hais tias, “Tsis yog li ntawd! Kuv tsis ua li nej hais ko! Tsuas yog tus uas muab kuv lub khob lawm thiaj yuav tau ua kuv tus qhev xwb. Dua li nej cov yuav tau rov mus tsev kaj siab lug thiab mus hais qhia rau nej txiv.” Yudas txawm mus cuag Yauxej thiab thov hais tias, “Tus tswv, thov koj pub kuv nrog koj tham ob peb lo. Thov koj tsis txhob chim rau kuv, koj yeej zoo ib yam li Falaus lawm ntag. Tus tswv, koj nug peb hais tias, ‘Nej txiv puas tseem nyob lossis nej puas tshuav kwv lawm thiab?’ Peb teb koj hais tias, ‘Peb txiv tseem nyob, nws twb laus heev lawm thiab peb tshuav ib tug kwv ntxawg uas yug rau thaum peb txiv twb laus heev lawm. Tus tub no, tus tijlaug tuag lawm, thiab nws niam tshuav tib tug tub ntawd thiaj tseem ua neej nyob xwb, mas nws txiv hlub nws kawg li.’ Tus tswv, koj hais kom peb coj nws tuaj ntawm no, rau qhov koj xav pom nws, thiab peb twb teb rau koj hais tias, tus tub ntawd txiv tso tsis taus nws tseg li, yog nws tso leej txiv tseg, ces nws txiv yeej yuav tuag xwb. Ces koj hais tias, ‘Yog nej tsis coj nej tus kwv ntxawg nrog nej tuaj, ces nej yuav tsis pom kuv ntsejmuag ib zaug ntxiv li lawm.’ “Thaum peb rov qab mus txog peb txiv, peb muab koj tej lus no piav huv tibsi rau nws mloog. Ces nws kom peb rov tuaj yuav mentsis mov mus noj. Peb teb nws hais tias, ‘Peb tsis kam mus lawm, yog peb tsis coj peb tus kwv ntxawg nrog peb mus, peb yuav tsis muaj cuabkav mus tshwm ntsejmuag rau tus nom nrad pom peb ntxiv lawm. Yog peb tus kwv ntxawg nrog peb mus, mas peb thiaj kam rov mus.’ Peb txiv hais rau peb hais tias, ‘Nej twb paub lawm hais tias Laxees uas yog kuv tus pojniam yug tau ob tug tub no rau kuv xwb. Ob tug tub no, muaj ib tug twb ncaim kuv lawm. Kuv xav hais tias, tsov twb tom nws thiab muab dua ntuag ua tej daim tas, rau qhov txij thaum ntawd los kuv yeej tsis pom nws li lawm. Yog nimno nej tseem coj tus no ncaim kuv mus thiab tseem muaj xwm los raug nws, mas ntshai tej kev quaj ntsuag uas nej tau ua rau kuv ntawd yuav txov kuv tus laus no txojsia li lauj.’ ” Yudas hais ntxiv hais tias, “Tus tswv, yog kuv tsis coj tus tub no nrog kuv rov qab, thaum kuv mus txog tsev, kuv txiv tsis pom tus tub no nrog kuv rov qab, ces nws yeej yuav npo pa tuag. Nws muab nws txojsia cog nkaus rau nws tus tub no xwb, thiab nws twb laus heev lawm, ces nyob tsam tej kev quaj ntsuag uas peb ua rau nws no yuav txov nws txojsia. Tsis tas li no xwb, kuv tseem tau coglus muab kuv txojsia pauv tus tub no rau kuv txiv thiab. Kuv coglus rau nws lawm, yog hais tias kuv tseem tsis coj tus tub no rov mus rau nws, ces kuv yog tus ris lub txim no mus tas kuv simneej. Tus tswv, thov koj tso tus tub no nrog cov tijlaug rov mus tsev, cia kuv nrog koj nyob ua koj qhev hloov tus tub no chaw. Yog tsis tau tus tub no nrog kuv rov mus tsev, kuv yuav ua li cas muaj cuabkav rov mus cuag tau kuv txiv? Kuv tsis xav pom txojkev puastsuaj no los raug kuv txiv li.” Yauxej tauv tsis taus nws lub kua muag tabmeeg nws cov tubtxib, nws thiaj hais rau lawv hais tias, “Nej cia li tawm mus.” Tsis muaj cov Iziv nrog lawv nyob ntawd li lawm, Yauxej thiaj qhia rau nws cov tijlaug thiab nws tus kwv hais tias, nws yog leejtwg tiag. Yauxej tsa suab hlo quaj, ua rau cov neeg Iziv puavleej hnov, thiab muaj neeg mus piav zaj no qhia rau hauv Falaus lub loog. Yauxej hais rau nws cov tijlaug hais tias, “Kuv yog Yauxej ntag. Kuv txiv puas tseem muaj txojsia nyob?” Thaum nws cov tijlaug hnov nws hais tej lus no, ua rau lawv ntshai kawg thiab teb tsis taus ib lo li. Yauxej hais rau lawv hais tias, “Nej cia li txav los ze kuv.” Lawv thiaj txav zog los rau ntawm Yauxej. Ces Yauxej hais rau lawv hais tias, “Kuv yog nej tus kwv Yauxej uas nej muab muag mus rau nram tebchaws Iziv ntag. Nimno nej tsis txhob txhawj lossis tu siab qhov uas nej muab kuv muag los rau ntawm no. Yeej yog Vajtswv txib kuv ua nej ntej los thiaj cawm tau neeg txojsia. Tej kev tshaib nqhis no, xyoo no nyuam qhuav yog xyoo ob xwb, tseem tshuav tsib xyoos tom ntej no ntxiv, mas yuav tsis muaj leejtwg cog thiab sau tau qoobloo hlo li. Vajtswv txib kuv ua nej ntej los kom cawm tau nej dim kev puastsuaj, kom nej thiab nej cov xeebntxwv thiaj muaj sia nyob. Tsis yog nej muag kuv los rau ntawm no, tiamsis yog Vajtswv txib kuv los; thiab nws tsa kuv ua Falaus ib tug nomtswv uas loj. Kuv tau ua tus saib tagnrho Falaus tej vajtse; thiab kav tagnrho lub tebchaws Iziv no. “Tamsim no nej cia li maj nroos rov qab mus cuag kuv txiv thiab qhia rau nws hais tias, ‘Yauxej uas yog koj tus tub hais li no: Vajtswv tsa kuv ua tus kav tagnrho lub tebchaws Iziv lawm, kom nws cia li los nrog kuv nyob tsis txhob ua siab hnyav. Coj tagnrho nej cov menyuam, cov xeebntxwv thiab nej tej yaj, tej tshis, tej nyuj thiab txhua yam uas nej muaj los nyob hauv cheebtsam Nkausees, thiaj yog qhov chaw uas nyob ze kuv. Yog koj los nyob hauv Nkausees, mas kuv thiaj yuav pab tau koj. Kev tshaib nqhis tseem tshuav tsib xyoo ntxiv tom ntej no, mas kuv tsis xav kom koj tsevneeg thiab koj tej tsiaj txhu tuag tshaib li.’ ” Yauxej hais ntxiv tias, “Nimno nej txhua tus thiab kwv Npeenyamees, puavleej pom hais tias kuv yog Yauxej tiag. Nej cia li qhia rau kuv txiv paub hais tias, kuv muaj hwjchim loj npaum li cas nyob hauv tebchaws Iziv no, thiab qhia txhua yam uas nej tau pom lawm rau nws mloog. Nej cia li maj nroos coj nws los nyob ntawm no.” Yauxej cev loo tes mus puag nkaus nws tus kwv ntxawg Npeenyamees quaj; Npeenyamees los tsa hlo suab quaj puag nkaus Yauxej ib yam nkaus thiab. Yauxej tseem quaj los nws twb mus puag cov tijlaug thiab nwj lawv ib tug rau ib tug. Tom qab ntawd nws cov tijlaug mam pib nrog nws tham. Thaum muaj neeg mus hais zaj no rau hauv Falaus lub loog hais tias, Yauxej cov tijlaug tuaj xyuas Yauxej, Falaus thiab nws cov nomtswv nrog Yauxej zoo siab kawg li. Falaus hais rau Yauxej hais tias, “Hais rau koj cov tijlaug kom tsaws nra rau lawv tej tsiaj thauj thiab rov qab mus lawm pem tebchaws Kana-as. Kom lawv mus coj lawv txiv thiab tej pojniam menyuam los cuag kuv. Kuv yuav muab thaj av uas zoo kawg nkaus hauv tebchaws Iziv no rau lawv, lawv thiaj yuav muaj noj muaj haus nplua mias. Hais kom lawv coj tsheb nees hauv tebchaws Iziv no mus tos koj txiv thiab lawv tej pojniam, menyuam los nyob hauv tebchaws Iziv no. Kom lawv tsis txhob khuvxim lawv tej khoom uas yog cuabyeej toomtxeem uas yuav muab tso tseg, tej zoo tshaj plaws hauv tebchaws Iziv no kuv yuav muab rau lawv.” Yakhauj cov tub ua raws li tej lus uas hais rau lawv lawm. Yauxej muab tau ntau lub tsheb nees rau lawv, raws li Falaus hais rau Yauxej, thiab muab zaub mov ntau heev rau lawv coj mus tau noj taug kev. Yauxej muab tau ib leeg ib cev ris tsho hloov rau nws cov tijlaug, tiamsis nws muab tau peb puas daim nyiaj thiab tsib cev ris tsho rau Npeenyamees. Nws muab tau kaum tus neesluav thauj tej khoom uas zoo tshaj plaws hauv tebchaws Iziv mus rau nws txiv, thiab muab dua kaum tus thauj nplej, thauj ncuav thiab thauj lwm yam zaub mov rau lawv tau noj taug kev. Nws thiaj xa nws cov tijlaug rov qab. Thiab thaum lawv sawv kev mus, nws hais rau lawv tias, “Nej tsis txhob sib cav sib ceg tom tej tog kev mog.” Lawv tawm hauv tebchaws Iziv rov qab mus tsev, mus cuag lawv txiv Yakhauj nyob rau pem tebchaws Kana-as. Lawv hais rau Yakhauj hais tias, “Yauxej tseem muaj sia nyob! Nws yog tus uas kav lub tebchaws Iziv ntag!” Yakhauj xav tsis thoob thiab nws tsis ntseeg tej lus uas lawv hais ntawd. Tiamsis thaum lawv piav tej lus uas Yauxej hais rau lawv txhua lo rau Yakhauj mloog tas, thiab thaum nws pom cov tsheb uas Yauxej xa tuaj tos nws mus nyob nram tebchaws Iziv, nws thiaj rov zoo siab. Nws hais tias, “Zoo kuv siab lawm lauj! Kuv tus tub Yauxej tseem muaj sia nyob tiag! Kuv yuav tsum mus kom pom nws ua ntej kuv tuag.” Yakhauj sau tagnrho txhua yam uas nws muaj coj huv tibsi mus, thiab thaum nws mus txog nram lub zos Npesenpas, nws muab tsiaj los tua fij pub rau nws txiv Ixaj tus Vajtswv. Hmo ntawm nws ua yogtoog pom Vajtswv los hais nws thiab hu nws hais tias, “Yakhauj, Yakhauj!” Yakhauj teb hais tias, “Vajtswv, kuv nyob ntawm no.” Vajtswv hais tias, “Kuv yog Vajtswv, kuv yog koj txiv tus Vajtswv ntag. Koj tsis txhob ntshai qhov uas koj mus nyob nram tebchaws Iziv, kuv yuav pub kom koj cov xeebntxwv huamvam coob ua tau ib haivneeg tseemceeb nyob rau nrad. Kuv yuav nrog koj mus nram tebchaws Iziv, thiab kuv yuav coj koj cov xeebntxwv rov los nyob rau hauv lub tebchaws no. Yauxej yuav nrog koj nyob thaum koj tuag.” Yakhauj txawm sawv kev tawm hauv lub zos Npesenpas mus. Yakhauj cov tub muab Yakhauj, lawv cov menyuam uas tseem yau, thiab lawv tej pojniam tsaws caij cov tsheb nees uas Falaus tso tuaj tos lawv. Lawv cab lawv tej tsiaj txhu thiab coj lawv tej cuabyeej toomtxeem uas lawv muaj hauv tebchaws Kana-as mus rau nram tebchaws Iziv huv tibsi. Yakhauj coj tagnrho nws cov xeebntxwv nrog nws mus, xwsli: nws cov tub, cov ntxhais, thiab cov ntxhais xeebntxwv. Tagnrho Yakhauj tsevneeg txhua tus uas nrog nws tsiv mus nyob nram tebchaws Iziv, Lunpees yog nws tus tub hlob, thiab Lunpees cov tub yog: Hanauj, Palus, Hexeloos thiab Kalemis. Xime-oos cov tub yog: Yemuyees, Yamees, Auhas, Yakhees, Xauhas thiab Sa-ules uas yog tus pojniam neeg Kana-as tus tub. Levis cov tub yog: Nkesoos, Kauhas thiab Melalis. Yudas cov tub yog: Selas, Peles thiab Zelas. (Yudas muaj dua ob tug tub yog: Eles thiab Aunas, nkawd tuag rau hauv tebchaws Kana-as lawm.) Peles ob tug tub yog: Hexeloos thiab Hamaules. Ixakhas cov tub yog: Taulas, Puahas, Yasus thiab Simeloos. Xenpuloos cov tub yog: Xeles, Eloos thiab Yahelees. Ntawm no yog cov tub uas Le-as yug rau Yakhauj, thaum nyob pem tebchaws Mexuputamias, xam nws tus ntxhais Dinas nrog lawv. Tagnrho nws cov tub thiab cov ntxhais uas Le-as yug muaj peb caug peb leeg. Khas cov tub yog: Xefoos, Hankis, Sunis, Exenpoos, Elis, Alaudis thiab Alelis. Aseles cov tub yog: Enas, Isevas, Isevis, Npeliyas thiab lawv tus muam uas hu ua Xelas. Npeliyas ob tug tub yog Henpeles thiab Makhiyees. Kaum rau leej no puavleej yog Yakhauj cov xeebntxwv uas yog Le-as tus txhais qhev Xilepas uas Lanpas muab rau nws tus ntxhais Le-as yug. Laxees uas yog Yakhauj tus pojniam yug tau ob tug tub rau Yakhauj yog: Yauxej thiab Npeenyamees. Nyob hauv tebchaws Iziv Yauxej muaj ob tug tub, Manaxes thiab Efalayees, nkawd yog Pautifelas uas yog tus povthawj uas nyob hauv lub nroog Aunis tus ntxhais Axenas yug. Npeenyamees cov tub yog: Npelas, Npekhelis, Asenpees, Nkelas, Na-amas, Ehis, Lauses, Mupees, Hupees thiab Alaudis. Kaum plaub leeg no puavleej yog Yakhauj cov xeebntxwv uas yug los ntawm Laxees. Das tus tub yog: Husees. Nathalis cov tub yog: Yahexees, Nkunis, Yexeles thiab Silees. Xya leej no puavleej yog Yakhauj cov xeebntxwv uas yog Laxees tus ntxhais qhev Npilehas uas Lanpas muab rau nws tus ntxhais Laxees yug. Tagnrho Yakhauj cov tub thiab cov xeebntxwv uas nrog nws tsiv mus nyob nram tebchaws Iziv muaj rau caum rau leej, tsis suav Yakhauj cov nyab. Xam Yauxej ob tug tub uas yug nram tebchaws Iziv rau thiab, Yakhauj tsevneeg muaj xya caum leej uas tsiv mus nyob nram tebchaws Iziv. Yakhauj txib Yudas ua ntej mus nug Yauxej kom qhia kev mus rau ntawm Nkausees. Thaum lawv twb los txog rau ntawm cheebtsam Nkausees lawm, Yauxej thiaj caij tsheb nees mus ntsib nws txiv rau ntawm Nkausees. Thaum nkawd sib ntsib, Yauxej puag nkaus nws txiv thiab quaj ntev loo. Yakhauj hais rau Yauxej hais tias, “Txawm yog kuv tuag los kuv yeej zoo siab, rau qhov kuv twb pom koj thiab kuv paub tseeb hais tias koj tseem muaj sia nyob.” Yauxej hais rau nws cov tijlaug thiab nws txiv tsevneeg hais tias, “Kuv yuav mus qhia rau Falaus paub hais tias, kuv cov kwvtij thiab kuv txiv tsevneeg uas nyob pem tebchaws Kana-as twb los txog kuv lawm. Kuv yuav qhia rau Falaus hais tias, nej yog cov neeg yug yaj thiab tu tsiaj txhu, mas nej cab nej tej tsiaj loj, tsiaj me thiab coj tagnrho nej tej cuabyeej toomtxeem uas nej muaj nrog nej los. Thaum Falaus hu nej mus nug saib nej ua haujlwm dabtsi, nej teb nws hais tias, ‘Peb thiab peb cov yawgkoob yeej yog neeg yug tsiaj thaum ub los txog niaj hnub no.’ Nej yuav tsum teb li no, nws thiaj yuav cia nej nyob ntawm cheebtsam Nkausees no.” Yauxej hais li no rau qhov cov neeg Iziv ibtxwm tsis nyiam cov neeg yug yaj. Yauxej mus hais rau Falaus hais tias, “Kuv txiv thiab kuv cov tijlaug, cab lawv tej tsiaj txhu loj me thiab coj txhua yam uas yog lawv tug, nrog lawv tsiv pem tebchaws Kana-as los txog lawm, tamsim no lawv nyob hauv cheebtsam Nkausees.” Yauxej coj nws tsib tug tijlaug mus qhia rau Falaus. Falaus nug lawv hais tias, “Nej ibtxwm ua haujlwm dabtsi?” Lawv teb Falaus hais tias, “Peb yog neeg yug yaj ib yam li peb tej yawgkoob ibtxwm yug los lawm xwb. Peb tau tsiv los nyob hauv lub tebchaws no, rau qhov nyob pem tebchaws Kana-as muaj kev tshaib nqhis heev, tsis muaj zaub rau tej tsiaj txhu noj li lawm. Mas thov koj tso cai pub peb nyob rau hauv cheebtsam Nkausees.” Falaus hais rau Yauxej hais tias, “Nimno koj txiv thiab koj cov tijlaug twb los txog koj lawm, lub tebchaws Iziv no los yeej yog lawv lub thiab. Cia li tso lawv nyob rau hauv cheebtsam Nkausees, yog thaj chaw uas av zoo tshaj plaws hauv lub tebchaws no. Thiab yog lawv tseem tshuav cov neeg uas muaj peevxwm yug taus tsiaj, koj kom lawv ua cov uas yug kuv tej tsiaj txhu thiab.” Ces Yauxej thiaj coj nws txiv Yakhauj mus qhia rau Falaus. Yakhauj foom koob hmoov rau Falaus, thiab Falaus nug Yakhauj hais tias, “Koj hnubnyoog muaj pestsawg xyoo lawm?” Yakhauj teb Falaus hais tias, “Kuv ua lub neej ncig mus ncig los tau ib puas peb caug xyoo. Kuv lub neej luv thiab ntxhov siab kawg li, kuv hnubnyoog tsis ntev li kuv tej yawgkoob thaum ub lawm.” Yakhauj txawm rov foom koob hmoov rau Falaus thiab tawm los lawm. Ces Yauxej tu av rau nws txiv thiab nws cov tijlaug nyob hauv tebchaws Iziv, muab thaj av zoo tshaj plaws uas nyob ze lub nroog Lamexes rau lawv nyob ua lawv tug, raws li Falaus tau hais rau Yauxej lawm. Yauxej muab zaub mov pub rau nws txiv, nws cov tijlaug thiab lawv tej pojniam menyuam noj. Kev tshaib nqhis loj kawg li ua rau txhua qhov chaw tsis muaj mov noj li lawm, ua rau cov neeg Iziv thiab cov neeg Kana-as qaug zog zis vim txojkev tshaib nqhis ntawd. Yauxej muab tej nyiaj uas cov neeg Iziv thiab cov neeg Kana-as coj tuaj yuav mov ntawd, nqa tagnrho mus cia rau hauv Falaus lub loog huv tibsi. Thaum cov neeg Iziv thiab cov neeg Kana-as siv lawv tej nyiaj tas lawm, cov neeg Iziv tuaj cuag Yauxej thiab hais tias, “Thov muab mov rau peb noj, tsis txhob cia peb tuag tshaib. Thov nrhiav kev cawm peb, rau qhov peb tej nyiaj tas lawm.” Yauxej teb hais tias, “Yog nej tej nyiaj tas lawm, nej cia li coj nej tej tsiaj tuaj, kuv yuav muab nplej pauv.” Yog li ntawd, lawv thiaj coj lawv tej tsiaj tuaj rau Yauxej, Yauxej thiaj muab mov pauv lawv tej nees, tej yaj, tej tshis, tej nyuj thiab tej neesluav. Xyoo ntawd cov pejxeem muab tagnrho lawv tej tsiaj txhu tuaj pauv Yauxej tej mov huv tibsi. Xyoo tom qab lawv rov tuaj cuag nws dua thiab hais tias, “Tus tswv, peb hais tseeb rau koj, peb tsis zais ib yam dabtsi cia hlo li, peb tej nyiaj txiag los tas thiab peb tej tsiaj txhu los peb coj tuaj rau koj tas. Peb tsis tshuav ib yam dabtsi yuav coj tuaj rau koj lawm, tsuas yog tshuav peb lub cev thiab peb tej teb lawm xwb. Thov koj tsis txhob cia peb tuag, nrhiav kev cawm peb! Tsis txhob cia peb tej teb ciaj quavpoj. Peb muab peb tej teb los pauv koj tej mov, peb thiaj tau mov noj. Peb zoo siab yuav mus ua Falaus qhev, thiab yuav muab peb tej teb rau nws. Thov pub mov rau peb noj peb thiaj tsis tuag tshaib, thiab muab noob qoob rau peb cog, kom peb tej teb thiaj tsis nyob do dus tseg.” Yauxej yuav tagnrho tej teb hauv tebchaws Iziv rau Falaus. Txhua tus neeg Iziv puavleej muab teb muag huv tibsi, rau qhov muaj kev tshaib nqhis heev, thiab Falaus tau tagnrho sawvdaws tej teb mus ua nws tug. Yauxej muab cov pejxeem uas nyob hauv tebchaws Iziv ua Falaus qhev huv tibsi. Tsuas yog tshuav cov povthawj tej teb, Yauxej thiaj tsis tau yuav. Lawv tsis tau muag lawv tej teb, rau qhov lawv tau noj tau haus tej uas Falaus muab pub rau lawv. Yauxej hais rau cov pejxeem hais tias, “Nimno kuv twb yuav nej thiab nej tej teb ua Falaus tug tas lawm. Ntawm no yog tej noob qoob uas muab rau nej, nej cia li nqa mus tseb rau hauv nej tej teb. Thaum txog caij sau qoob nej yuav tsum muab ib feem tsib coj tuaj rau Falaus. Dua li cov, nej muab khaws tseg cia ua noob thiab tseg rau nej thiab nej cov pojniam menyuam tau noj.” Lawv teb hais tias, “Tus tswv, koj tau ua zoo kawg nkaus rau peb, koj cawm peb txojsia, peb yuav zoo siab hlo mus ua Falaus qhev.” Yog li ntawd, Yauxej thiaj sau ib txoj cai rau lub tebchaws Iziv kom yuav tsum muab tej qoobloo uas sau tau, ib feem tsib tuaj rau Falaus. Txoj cai no cov Iziv tseem coj los txog niaj hnub no. Tsuas yog cov povthawj tej teb, thiaj tsis yog Falaus tug xwb. Cov Yixalayees uas nyob hauv tebchaws Iziv ntawm cheebtsam Nkausees, lawv npluanuj thiab muaj tubki huamvam coob kawg li. Yakhauj nyob hauv tebchaws Iziv tau kaum xya xyoo, nws muaj hnubnyoog nyob ib puas thiab plaub caug xya xyoo. Thaum ze lub caij uas nws yuav tuag, nws txawm hu nws tus tub Yauxej tuaj cuag nws thiab hais tias, “Muab koj ob txhais tes tso rau hauv kuv puabtais thiab coglus tseg hais tias, koj yuav tsis muab kuv faus rau hauv tebchaws Iziv no li. Thaum kuv tuag koj yuav tsum coj kuv lub cev tawm hauv tebchaws Iziv no mus faus nrog kuv cov yawgkoob ua ke.” Yauxej teb hais tias, “Txiv, kuv yuav ua raws li koj hais ntag.” Yakhauj hais tias, “Koj cia li coglus rau kuv hais tias, koj yuav ua li kuv hais.” Yauxej txawm coglus rau nws, ces Yakhauj cia li ua Vajtswv tsaug saum nws lub txaj. Tom qab ntawd muaj neeg mus qhia rau Yauxej hais tias, nws txiv mob hnyav heev. Yauxej thiaj coj nws ob tug tub uas yog Manaxes thiab Efalayees mus xyuas nws txiv Yakhauj. Thaum muaj neeg mus qhia rau Yakhauj paub hais tias, nws tus tub Yauxej tuaj xyuas nws, nws thiaj ua tiag sawv saum txaj los zaum. Yakhauj hais rau Yauxej hais tias, “Vajtswv tus uas muaj hwjchim loj kawg nkaus tau tshwm los rau kuv pom pem lub nroog Luxes uas nyob hauv tebchaws Kana-as thiab foom koob hmoov rau kuv. Vajtswv hais rau kuv hais tias, ‘Kuv yuav pub rau koj muaj tubki coob, koj cov xeebntxwv yuav huamvam mus ua ntau haivneeg, kuv yuav muab lub tebchaws no pub rau koj cov xeebntxwv nyob ua lawv tug mus ibtxhis li.’ ” Yakhauj rov hais rau Yauxej hais tias, “Koj ob tug tub uas yog Efalayees thiab Manaxes uas yug ua ntej kuv los nyob hauv tebchaws Iziv no, nkawd puavleej yog kuv tubki, ib yam li Lunpees thiab Xime-oos nkawd ntag. Yog koj tseem muaj tub ntxiv, lawv yuav tsis yog kuv cov tub lawm; tej qubtxeeg qubteg uas lawv yuav tau txais yog los ntawm Efalayees thiab Manaxes nkawd lawm xwb. Thaum kuv rov pem tebchaws Mexuputamias los koj niam Laxees tau tuag rau hauv tebchaws Kana-as, tsis deb ntawm Efalates. Mas ua rau kuv tau kev quaj ntsuag, kuv thiaj muab nws faus rau ntawm ntug kev uas mus rau hauv lub zos Efalates.” (Uas nimno yog lub nroog Npelehees.) Thaum Yakhauj pom Yauxej ob tug tub, nws nug hais tias, “Ob tug tub no yog leejtwg?” Yauxej teb hais tias, “Ob tug tub no yog kuv ob tug tub uas Vajtswv muab pub rau kuv hauv lub tebchaws Iziv no ntag.” Yakhauj txawm hais tias, “Coj nkawd los rau kuv saib, kuv yuav foom koob hmoov rau nkawd.” Rau qhov Yakhauj hnubnyoog laus heev lawm, nws ob lub qhovmuag plooj thiab pom kev tsis tseeb pestsawg. Yauxej thiaj coj Yauxej ob tug tub los rau Yakhauj saib, Yakhauj thiaj puag nkaus thiab nwj nkawd. Yakhauj hais rau Yauxej hais tias, “Kuv tsis xav hais tias, kuv yuav rov pom koj lub ntsejmuag ib zaug ntxiv li, tiamsis nimno Vajtswv twb pub kuv pom koj cov menyuam lawm thiab.” Ces Yauxej thiaj tsaws nkawd ntawm Yakhauj xubntiag los Yauxej txhos caug ntua nyo ua ntsejmuag ti nkaus rau hauv av pe Yakhauj. Yauxej tuav nws ob tug tub tes mus cuag nws txiv. Yauxej sab tes xis tuav Efalayees tes mus rau Yakhauj sab teslaug, thiab nws sab teslaug tuav Manaxes tes mus rau Yakhauj sab tes xis. Tiamsis Yakhauj muab nws ob txhais tes sib qhaib, nws cev nws sab tes xis mus tuav Efalayees uas yog tus kwv lub taubhau, thiab nws cev sab teslaug mus tuav Manaxes uas yog tus tijlaug lub taubhau. Ces Yakhauj txawm foom koob hmoov rau Yauxej li no: “Thov Vajtswv tus uas kuv yawgkoob Anplahas thiab kuv txiv Ixaj pehawm, foom koob hmoov rau ob tug metub no! Thov Vajtswv, tus uas coj kuv txoj haukev los txog niaj hnub no, foom koob hmoov rau nkawd! Thov tus timtswv ceebtsheej uas nws tau cawm kuv dim ntawm tej kev ntxhov siab, foom koob hmoov rau nkawd! Thov kom kuv lub npe, kuv yawg Anplahas lub npe, thiab kuv txiv Ixaj lub npe nyob nrog ob tug tub no mus! Thov kom nkawd muaj tubki thiab xeebntxwv huamvam ua ib haivneeg coob.” Yauxej ntxhov siab heev thaum nws pom nws txiv muab nws txiv sab tes xis tso rau saum Efalayees taubhau, yog li ntawd, nws thiaj tshem nws txiv txhais tes saum Efalayees taubhau mus tso rau saum Manaxes taubhau. Yauxej hais rau Yakhauj hais tias, “Txiv, ua li ko tsis yog lawm. Tus no yog tus tub hlob, tso koj txhais tes xis rau saum nws taubhau.” Yakhauj tsis kam, nws hais tias, “Tub, kuv paub lawm, kuv paub zoo. Manaxes cov xeebntxwv yuav huamvam coob thiab ua ib haivneeg tseemceeb. Tiamsis nws tus kwv yuav tau ua neeg tseemceeb dua nws tus tijlaug, thiab nws tej xeebntxwv tseem yuav huamvam coob thiab ua ntau haivneeg.” Yog li ntawd, hnub ntawd Yakhauj foom koob hmoov rau nkawd hais tias, “Yog cov Yixalayees foom koob hmoov rau ib tus twg, lawv yuav tsum tuav neb ob lub npe. Lawv yuav hais tias, ‘Thov Vajtswv foom koob hmoov rau koj ib yam li foom rau Efalayees thiab Manaxes nkawd.’ ” Qhov uas Yakhauj ua li no twb yog nws muab Efalayees tso ua Manaxes ntej. Ces Yakhauj hais rau Yauxej hais tias, “Koj twb pom lawm hais tias, kuv twb yuav tuag, tiamsis Vajtswv yuav nrog nraim koj nyob thiab yuav coj koj rov qab mus nyob pem koj tej yawgkoob lub tebchaws. Kuv yuav muab lub nroog Sekhees, cheebtsam uas zoo ua noj ua haus uas kuv nqa ntaj nqa hneev mus txeeb tau ntawm cov neeg Amaules tes los pub rau koj ua koj tug, kuv tsis pub rau koj cov tijlaug.” Yakhauj hu tagnrho nws cov tub los cuag nws thiab hais rau lawv hais tias, “Nej sawvdaws los nyob ua ib pawg rau ntawm no, kuv yuav piav tej xwmtxheej uas yuav tshwm los rau nej lub neej yav tom ntej no rau nej mloog: “Yakhauj cov tub, nej sau zog los ua ib pawg thiab mloog kuv hais. Cia li mloog nej txiv Yixalayees tej lus ntuas. “Kuv tus tub hlob Lunpees, koj yog kuv lub zog Thiab yog kuv thawj cov roj ntshav thaum kuv tseem hluas, Yog tus uas muaj siab tawv thiab muaj zog tshaj plaws kuv cov tub huv tibsi. Koj nyob tsis tswm yam nkaus dej ntas, Thiab koj tsis yog tus uas tseemceeb npaum cov, Rau qhov koj nce txaj mus nrog kuv tug niamyau pw, thiab koj ua tsis huv rau koj txiv lub txaj lawm. “Xime-oos thiab Levis yog ob tug kwvtij. Nkawd siv ntaj siv riam mus txob tau plaub tau ntug. Kuv yuav tsis koom nrog nkawd sablaj, lossis tsis koom nrog nkawd ua pab ua pawg, Rau qhov nkawd tua neeg thaum nkawd chim siab, Thiab nkawd pheej muab tej nyuj txo leeg raws ua si. Nkawd tej kev ua nruj ua tsiv yuav raug lus foom tsis zoo, rau qhov nkawd tsis muaj kev hlub, Thiab nkawd txojkev nruj tsiv thiaj raug foom tsis zoo. Kuv yuav ua kom nkawd tawg khiav mus nyob thoob plaws lub tebchaws Yixalayees. Nkawd yuav tawg khiav mus nrog cov Yixalayees nyob sib xyaws ntxaws. “Yudas, koj cov tijlaug yuav qhuas koj, Koj yuav tuav rawv koj cov yeebncuab cajdab. Koj cov kwvtij yuav qhau cev hlo pe koj ntawm koj xubntiag. Yudas zoo nkaus li tus menyuam tsov ntxhuav, Nws tom tsiaj noj thiab rov qab los rau ntawm nws lub qhov tsua, qhau cev hlo pw xyab luas. Tsis muaj leejtwg muaj cuabkav mus tsa nws. Yudas yuav tuav rawv vajntxwv tus cwj, thiab nws cov xeebntxwv yog cov tswj teb kav chaw mus txog thaum tus muaj hwjchim los kav txhua haivneeg yuav nqa khoom tuaj pub rau nws, lawv hwm nws thiab mloog nws lus. Nws muab nws tus menyuam neesluav khi kiag rau ntawm tsob txiv hmab, Yog tsob txiv hmab uas zoo thiab txi ncw tshaj plaws li, Nws muab tej kua txiv hmab uas liab cuag ntshav los ntxhua nws tej khaubncaws. Nws ob lub qhovmuag nce ntshav liab ploog twb yog vim haus cawv txiv hmab, nws tej hniav dawb paug twb yog nws haus kua mis. “Xenpuloos yuav nyob ntawm ntug hiavtxwv. Nws sab ntug dej yuav ua qhov chaw nres nkoj, Nws ciam dej ciam av yuav dav mus ti nkaus lub nroog Xidoos. “Ixakhas yog tus neesluav uas muaj zog heev, nws qhau cev cug nra. Tiamsis nws pom lub chaw so zoo nkauj kawg nkaus thiab lub tebchaws uas nyob kaj siab lug. Yog li ntawd, nws thiaj cug nraubqaum tos thauj nra thiab zoo siab hlo ua haujlwm hnyav ib yam li tus qhev. “Das yuav tau ua tug thawj kav nws cov pejxeem. Lawv yuav zoo ib yam li lwm xeem Yixalayees thiab. Das yog tus nab uas nyob rawv ntawm ntug kev, tus nab muaj taug uas zov rawv ntawm ntug kev, tos rawv tom nees lujtaws, kom tus neeg uas caij poob dhia dhau plaws rov tom qab. “Tus TSWV, kuv niaj hnub tos koj txojkev cawm dim. “Khas yuav raug tej tubsab muab hlua nplawm, Tiamsis nws yuav tig tau rov qab los caum Tubsab. “Aseles tej teb yuav zoo qoobloo heev, Nws yuav npaj tej zaub mov uas zoo rau vajntxwv noj. “Nathalis yog tus maum muaslwj uas dhia ywj siab ywj ntsws, Nws yug tau tej tus menyuam muaslwj zoo nkauj ntxim hlub heev. “Yauxej yog tsob ntoo uas cog rau ntawm ntug dej, Txi txiv ncw ceg nthuav dauv niab dhau tej ntsa lajkab rau sab nraud. Nws cov yeebncuab sib zog ntsos ntaus thiab nqa lawv tej hneevnti thiab xubvos caum nws qab. Tiamsis nws rab hneevnti tseem nyob ruaj khov kho, Thiab nws ob txhais npab muaj zog heev los ntawm Yakhauj tus Vajtswv lub hwjchim uas loj kawg nkaus los ntawm tus Tswv Yug Yaj thiab tus Tsomkwm cov Yixalayees. Twb yog koj txiv tus Vajtswv ua tus pab koj ntag, Vajtswv tus uas muaj hwjchim loj kawg nkaus, nws foom koob hmoov rau koj, Tso koob hmoov nrog nag los saum ntuj los Thiab muaj dej puv hauv nruab tivtxwv tuaj rau saum npoo av no, Tau koob hmoov los ntawm niam plab thiab niam mis. Koj txiv tej koob hmoov muaj nqis tshaj tej hauv roob uas ibtxwm nyob thaum ub los lawm tej koob hmoov, zoo dua tej kev kaj siab lug uas los ntawm tej hauv roob uas nyob mus ibtxhis. Thov kom tej koob hmoov no nyob rawv saum Yauxej taubhau, Nyob rawv saum tus uas raug cais ntawm nws cov tijlaug mus lawm lub hauvpliaj. “Npeenyamees zoo ib yam li tus hma uas tsiv heev. Nws niaj tagkis thiab niaj hmo tom tau tsiaj los noj.” Cov neeg uas hais tas los saum no, yog kaum ob xeem Yixalayees, thiab yog tej lus uas lawv txiv hais rau lawv thaum nws foom koob hmoov tseg rau lawv, nws foom koob hmoov kom tsimnyog rau nws txhua tus tub. Yakhauj hais rau nws cov tub hais tias, “Nimno kuv yuav tso nej tseg mus nrog kuv cov neeg uas tuag ua ntej lawm nyob. Thaum kuv tuag lawm, nej yuav tsum kwv kuv mus faus nrog kuv cov yawgkoob hauv lub qhov tsua uas nyob hauv Efaloos uas yog tus neeg Hitis thaj teb uas nyob hauv Makhepelas ze rau ntawm Males sab hnubtuaj hauv tebchaws Kana-as. Anplahas yuav lub qhov tsua thiab thaj teb no ntawm Efaloos los ua chaw faus tuag. Qhov chaw no yog qhov uas lawv faus Anplahas thiab Xalas uas yog nws tus pojniam; qhov chaw no yog qhov uas lawv faus Ixaj thiab Lenpekas uas yog nws tus pojniam; thiab yog qhov chaw uas kuv faus Le-as rau hauv lawm. Thaj teb thiab lub qhov tsua no yog yuav ntawm cov neeg Hitis los. Nej coj kuv mus faus rau hauv.” Thaum Yakhauj qhia txhua yam rau nws cov tub tas lawm, nws rov qhau cev pw thiab tu siav nrho lawm. Yauxej puag nkaus nws txiv quaj thiab nwj kiag nws txiv lub ntsejmuag. Ces Yauxej thiaj hais rau cov kws tshuaj los tu thiab muab tshuaj pleev nws txiv lub cev. Lawv thiaj muab tshuaj pleev thiab tu ntshis nws txiv lub cev tau plaub caug hnub kom tsis txhob lwj. Cov neeg Iziv tuaj nrog pam thiab quaj nyiav Yakhauj tau xya caum hnub. Thaum dhau xya caum hnub ntawd lawm, Yauxej hais rau Falaus cov nomtswv hais tias, “Thov nej pab coj kuv cov lus no mus hais rau Falaus hais tias, ‘Thaum uas kuv txiv yuav tuag, nws kom kuv coglus rau nws hais tias, kuv yuav tsum coj nws mus faus rau hauv lub qhov ntxa uas nws twb npaj tseg rau nws nyob pem tebchaws Kana-as lawm. Mas thov Falaus cia kuv coj kuv txiv mus faus tas kuv mam rov qab los.’ ” Falaus teb hais tias, “Koj cia li coj koj txiv mus faus, raws li koj tau coglus tseg rau nws lawm.” Ces Yauxej thiaj coj nws txiv mus faus. Tagnrho Falaus cov nomtswv, cov laus neeg uas tu plaub ntug thiab cov thawjcoj hauv tebchaws Iziv puavleej nrog Yauxej mus. Yauxej tsevneeg, nws cov tijlaug tsevneeg thiab nws txiv tsevneeg puavleej nrog nws coj nws txiv lub cev mus faus. Tsuas tseg lawv tej menyuam, tej yaj, tej tshis thiab tej nyuj nyob hauv cheebtsam Nkausees xwb. Cov neeg uas caij tsheb nees thiab cov tubrog caij nees nrog Yauxej lawv mus coob kawg li. Thaum lawv mus txog ntawm lub tshav ntaus nplej Atas uas nyob sab hnubtuaj ntawm tus Dej Yauladees, lawv sawvdaws quaj nyiav, thiab pam Yauxej txiv raws li kevcai tau xya hnub. Thaum cov neeg Kana-as pom cov neeg no tuaj quaj nyiav ntawm lub tshav ntaus nplej Atas, lawv hais tias, “Cov neeg Iziv lub ntees tuag no, yog lub niam ntees uas loj kawg li!” Twb yog vim li no thiaj tis npe rau thaj chaw ntawd hu ua Anpees Mixalayees. Yakhauj cov tub tau ua raws li uas Yakhauj tau hais tseg rau lawv lawm, lawv thiaj kwv lawv txiv mus pem tebchaws Kana-as, thiab muab faus rau hauv lub qhov tsua uas nyob hauv Makhepelas hauv thaj teb uas nyob ntawm Males sab hnubtuaj uas Anplahas yuav ntawm Efaloos uas yog neeg Hitis los cia ua chaw faus tuag. Tom qab uas Yauxej muab nws txiv faus tas lawm, nws nrog nws cov tijlaug thiab cov neeg uas nrog nws mus ntawd, rov qab los rau nram tebchaws Iziv lawm. Tom qab uas lawv txiv tuag lawm, Yauxej cov tijlaug hais tias, “Peb yuav ua li cas, yog Yauxej tseem ntxub peb thiab ua phem pauj tej kev phem uas peb tau ua rau nws lawm?” Yog li ntawd, lawv thiaj tso neeg mus hais rau Yauxej li no tias, “Ua ntej uas peb txiv tuag, nws hais kom peb tuaj hais rau koj hais tias, ‘Thov koj zam koj cov tijlaug tej kev txhaum uas thaud lawv tau ua rau koj lawm.’ Mas nimno thov koj zam txim rau peb cov uas yog koj txiv tus Vajtswv cov tubtxib thiab tej uas peb tau ua tas los lawm.” Yauxej quaj heev thaum nws hnov dheev tej lus no. Ces Yauxej cov tijlaug txawm ua ke tuaj cuag Yauxej thiab qhau cev hlo ntawm nws xubntiag pe nws. Lawv hais tias, “Peb sawvdaws yog koj cov tubtxib.” Yauxej hais rau lawv hais tias, “Nej tsis txhob ntshai, kuv tsis muaj cuabkav tsav kuv lub hwjchim kom loj dua Vajtswv. Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawm hloov ua qhov zoo, ua li ntawd thiaj cawm tau coob leej txojsia, ib yam li nej pom hnub no ntag. Nej cov ua tij tsis txhob ntshai. Kuv yuav ua tus saib xyuas nej thiab nej tej menyuam.” Yog li ntawd, Yauxej thiaj ntuas lawv ntawm lub siab dawb paug thiab ua rau lawv kaj siab ua neej. Yauxej ua neej nrog nws txiv tsevneeg nyob hauv tebchaws Iziv, Yauxej muaj hnubnyoog ib puas kaum xyoo nws mam li tuag. Nws ua neej nyob txog thaum nws pom Efalayees cov menyuam thiab cov xeebntxwv huv tibsi. Thiab nws tseem nyob mus txog thaum uas nws pom Manaxes tus tub Makhiles cov menyuam lawm thiab. Nws hais rau nws cov kwvtij hais tias, “Tshuav tsis ntev kuv twb yuav tuag, tiamsis Vajtswv yuav ua tus tsomkwm nej thiab coj nej tawm hauv lub tebchaws no mus rau pem lub tebchaws uas nws tau coglus tseg hais tias, nws yuav muab pub rau Anplahas, Ixaj thiab Yakhauj lawv.” Ces Yauxej hais kom cov Yixalayees coglus rau nws hais tias, “Nej coglus tseg rau kuv, yog thaum twg Vajtswv coj nej mus pem tebchaws Kana-as, nej yuav tsum nqa kuv cov pobtxha nrog nej mus thiab.” Yauxej tuag hauv tebchaws Iziv, thaum nws muaj hnubnyoog ib puas kaum xyoo. Lawv muab tshuaj pleev nws lub cev thiab muab tso rau hauv hleb tseg. Yakhauj cov tub uas nyias coj nyias pojniam tubse nrog Yakhauj mus nyob nram tebchaws Iziv npe hu li no: Lunpees, Xime-oos, Levis, Yudas, Ixakhas, Xenpuloos, Npeenyamees, Das, Nathalis, Khas thiab Aseles. Yakhauj tsevneeg uas nws coj mus muaj xya caum leej. Nws tus tub Yauxej twb xub mus nyob nram tebchaws Iziv lawm. Tom qab ntawd Yauxej txawm tuag lawm, ces tagnrho nws cov tijlaug thiab cov neeg uas nyob tiam ntawd puavleej tuag tas huv tibsi. Tiamsis lawv cov tubki uas yog cov Yixalayees muaj menyuam huamvam coob nyob puv nkaus tebchaws Iziv. Tus vajntxwv tshiab uas los kav lub tebchaws Iziv, nws tsis paub Yauxej. Nws hais rau nws cov pejxeem hais tias, “Cov Yixalayees huamvam coob thiab muaj zog heev, nyob tsam lawv ua phem rau peb. Ces thaum muaj tsov muaj rog tuaj tua peb, lawv yuav sau nthwv tuaj yeebncuab tog tua peb, thiab lawv yuav khiav tawm hauv peb lub tebchaws mus. Peb yuav tsum nrhiav kev txov cov neeg no tsis pub kom lawv huamvam ntxiv lawm.” Yog li ntawd, cov Iziv thiaj txib neeg mus yuam cov Yixalayees ua haujlwm hnyav kawg nkaus kom lawv poob siab. Cov Yixalayees ua lub nroog Phithoos thiab lub nroog Lamexes rau Falaus tej cuabyeej. Txawm yog cov Iziv yuav quab yuam cov Yixalayees npaum li cas los lawv hajyam huamvam coob npaum li ntawd, thiab rhawv zej zos dav zuj zus ua rau cov Iziv ntshai lawv heev. Cov Iziv yuam cov Yixalayees ua qhev txomnyem ntsuav, thiab yuam lawv ua cov Iziv tej vajtse, tej liaj teb thiab ua txhua yam haujlwm hnyav, lawv tsis hlub cov Yixalayees hlo li. Muaj ib hnub cov Iziv tus vajntxwv hais rau ob tug pojniam uas yog Sifalas thiab Puahas uas pheej mus pab cov Henplais tej pojniam daws cev. Nws hais rau nkawd hais tias, “Thaum neb mus pab cov Henplais tej pojniam daws cev, tus menyuam twg yog tus tub, neb cia li muab tua povtseg, tiamsis tus twg yog tus ntxhais, neb mam li cia nyob.” Tiamsis ob tug pojniam ntawd paub ntshai Vajtswv, nkawd thiaj tsis ua raws li vajntxwv hais, nkawd tsis tua tej menyuam tub povtseg. Yog li ntawd, vajntxwv thiaj tso neeg mus hu nkawd tuaj cuag nws, thiab nws nug nkawd hais tias, “Vim li cas neb ua li no? Vim li cas neb tseem tseg cov menyuam tub nyob thiab?” Nkawd teb hais tias, “Cov pojniam Henplais tsis zoo li peb cov pojniam Iziv, lawv tau menyuam sai heev, thiab lawv twb tau menyuam ua ntej wb mus txog lawm.” Vim nkawd paub ntshai Vajtswv, Vajtswv thiaj ua zoo rau nkawd thiab pub nkawd muaj tubki coob. Cov Yixalayees pheej huamvam coob zuj zus thiab muaj zog heev. Thaum kawg Falaus samhwm rau nws cov pejxeem sawvdaws hais tias, “Cia li muab cov Henplais tej menyuam tub uas nyuam qhuav yug tau los txhua tus pov rau hauv tus Dej Niles, tiamsis tseg cov menyuam ntxhais cia.” Thaum ntawd muaj ib tug txivneej uas yog xeem Levis, mus yuav nws xeem ib tug ntxhais los ua pojniam, thiab tus pojniam ntawd yug tau ib tug tub rau nws. Thaum tus pojniam ntawd pom hais tias, tus tub no ntxim hlub heev, nws txawm muab zais tau peb lub hlis. Tiamsis thaum uas nws yuav zais tsis tau tus tub ntawd ntxiv lawm, nws thiaj muab ib lub tawb kavtheej los thiab muab roj ntoos leem tsis pub kom dej txheem tau rau sab hauv. Nws muab tus tub ntawd tso pw rau hauv lub tawb thiab nqa mus tso rau hauv cov tauj npaig nram ntug dej. Tus tub ntawd tus muam thiaj mus sawv ib cag deb tsawv saib tuaj, saib puas muaj xwm dabtsi rau tus tub ntawd. Falaus tus ntxhais mus da dej nram hav dej, thaum uas nws cov ntxhais qhe ncig ua si ntawm ntug dej. Tamsim ntawd nws txawm pom ib lub tawb nyob hauv cov tauj npaig, nws thiaj kom ib tug nkauj nqe mus nqa los rau nws xyuas. Thaum tus ntxhais qhev nqa los txog, Falaus tus ntxhais muab qhib plho saib, ua ciav muaj ib tug metub pw hauv. Tus metub ntawd quaj heev, ua rau Falaus tus ntxhais hlub nws kawg li, nws hais tias, “Tus tub no yog cov Henplais menyuam.” Tus tub ntawd tus muam thiaj los nug Falaus tus ntxhais hais tias, “Koj puas xav txib kuv mus nrhiav ib tug pojniam uas yog cov Henplais tu tus tub no rau koj?” Falaus tus ntxhais teb hais tias, “Thov koj cia li mus nrhiav.” Yog li ntawd, tus ntxhais thiaj mus coj tus tub ntawd leej niam tuaj. Falaus tus ntxhais hais rau tus pojniam ntawd hais tias, “Koj coj tus menyuam no mus tu rau kuv, kuv yuav muab nqi zog rau koj.” Yog li ntawd, nws thiaj coj tus metub ntawd los tu. Thaum tus menyuam ntawd loj hlob lawm, leej niam thiaj coj mus cob rau Falaus tus ntxhais uas yuav tus menyuam ntawd ua nws tus tub. Falaus tus ntxhais hais tias, “Kuv muab tus tub no hauv dej los, yog li ntawd, kuv yuav tis tus tub no lub npe hu ua Mauxes.” Thaum Mauxes hlob tiav txiv lawm, Mauxes mus ncig xyuas nws haivneeg, thiab nws pom lawv raug luag quab yuam ua haujlwm hnyav kawg li. Thiab nws tseem pom cov Iziv ib tug txivneej muab ib tug Henplais uas yog Mauxes haivneeg ntaus. Thaum Mauxes pom li ntawd, Mauxes xam ncig lees thaj tsam ntawd tsis muaj leejtwg nyob ze, nws txawm muab tus Iziv ntawd tua kiag. Nws muab luag kiag mus faus rau hauv cov suabzeb. Hnub tom qab, Mauxes rov tawm mus thiab pom ob tug Henplais tabtom sib ntaus. Mauxes hais rau tus uas ua txhaum hais tias, “Ua cas koj lam ntaus tus uas yog koj haivneeg Henplais?” Tus txivneej ntawd teb hais tias, “Leejtwg tsa koj ua nom tuaj txiav txim rau wb li no? Koj yuav muab kuv tua povtseg ib yam li koj tua tus neeg Iziv thiab los?” Ces Mauxes ntshai heev thiab nws xav hais tias, “Muaj neeg paub zaj uas kuv ua tas los lawm lauj.” Thaum Falaus hnov dheev zaj no, nws thiaj nrhiav Mauxes tua povtseg, tiamsis Mauxes twb xub khiav mus rau tim tebchaws Midias lawm. Muaj ib hnub, thaum Mauxes tabtom zaum ntawm ib lub qhovtshij, Yethoos uas yog tus povthawj hauv tebchaws Midias, xya leej ntxhais tuaj daus dej hliv rau hauv dab rau lawv txiv cov yaj thiab cov tshis haus. Tiamsis cov neeg yug yaj muab Yethoos cov ntxhais raws khiav. Ces Mauxes thiaj mus pab lawv thiab daus dej rau lawv cov tsiaj haus. Thaum cov ntxhais rov los txog tsev, lawv txiv nug lawv hais tias, “Ua cas hnub no nej los tsev ntxov dua txhia hnub?” Cov ntxhais teb hais tias, “Muaj ib tug neeg Iziv pab peb tsis pub cov yug yaj ua phem rau peb, thiab nws tseem daus dej rau peb thiab ce rau peb tej tsiaj haus huv tibsi, peb thiaj tau los tsev ntxov.” Yethoos nug nws cov ntxhais hais tias, “Tus txivneej ntawd nyob qhov twg? Ua li cas nej tsis coj nws los tsev? Nej cia li mus hu nws los nrog peb noj mov.” Yog li ntawd, Mauxes thiaj ua ib siab nyob hauv tebchaws Midias, thiab Yethoos muab nws tus ntxhais Xipaulas rau Mauxes yuav, Xipaulas yug tau ib tug tub rau Mauxes. Mauxes hais tias, “Rau qhov kuv yog neeg txawv tebchaws nyob hauv lub tebchaws no, yog li ntawd, kuv tis kuv tus tub no lub npe hu ua Nkesoos.” Tau ntau xyoo tom qab uas cov Iziv tus vajntxwv tuag lawm, tiamsis cov Yixalayees tseem pheej quaj ntsuag rau txojkev ua qhev thiab quaj thov Vajtswv pab. Lawv tej suab quaj mus txog Vajtswv, Vajtswv hnov lawv tej suab quaj thiab nco txog tej lus uas nws tau cog tseg rau Anplahas, Ixaj thiab Yakhauj lawm. Vajtswv pom cov Yixalayees txojkev uas ua luag qhev thiab nws hlub lawv kawg nkaus li. Muaj ib hnub Mauxes tabtom mus yug nws yawmtxiv Yethoos uas yog tus povthawj nyob hauv tebchaws Midias cov yaj thiab cov tshis, nws coj pab tsiaj ntawd hla tiaj suabpuam mus txog tim lub Roob Xinais uas yog lub roob dawbhuv. Nyob rau qhov ntawd, tus TSWV ib tug timtswv tau los txia ua nplaim hluavtaws cig lam lug rau Mauxes pom nyob hauv ib tsob ntoo. Mauxes pom nplaim hluavtaws cig sib ntswg yos hauv tsob ntoo tuaj, tiamsis tsob ntoo tsis kub hnyiab li. Mauxes xav hais tias, “Ua cas qhov no yuav txawv ua luaj, vim li cas tsob ntoo tsis kub hnyiab li, kuv yuav txav mus kom ze thiab xauj saib.” Thaum tus TSWV pom Mauxes txav los ze, nws hu Mauxes hauv tsob ntoo ntawd tuaj hais tias, “Mauxes! Mauxes!” Mauxes teb hais tias, “Kuv nyob ntawm no.” Vajtswv hais tias, “Tsis txhob txav los ze ntawm no. Cia li hle koj nkawm khau, rau qhov koj sawv ntawm thaj chaw uas dawbhuv. Kuv yog koj cov yawgkoob tus Vajtswv, yog Anplahas, Ixaj thiab Yakhauj tus Vajtswv.” Yog li ntawd, Mauxes tsis muaj cuabkav yuav ntsia taus Vajtswv, nws thiaj muab tes pos nws ntsejmuag. Tom qab ntawd tus TSWV hais tias, “Kuv pom kuv haivneeg uas nyob nram tebchaws Iziv raug kev tsimtxom heev, kuv hnov lawv tej suab quaj qw thov kuv pab kom lawv dim ntawm txojkev uas lawv raug yuam ua luag qhev. Kuv paub lawv raug kev txomnyem kawg nkaus li lawm, yog li ntawd, kuv thiaj los pab kom lawv dim ntawm cov neeg Iziv thiab yuav coj lawv tawm hauv tebchaws Iziv mus nyob lub tebchaws vammeej uas av rog thiab zoo qoob uas niaj hnub no cov Kana-as, cov Hitis, cov Amoos, cov Pelixes, cov Hivis thiab cov Yenpus nyob. Kuv twb hnov kuv haivneeg lub suab quaj thov kuv pab lawv lawm, thiab kuv pom cov neeg Iziv tsimtxom lawv kawg nkaus li. Nimno kuv yuav txib koj mus cuag Falaus thiab koj mus tso kuv haivneeg kom lawv tawm tau hauv nws lub tebchaws los.” Tiamsis Mauxes hais rau Vajtswv hais tias, “Kuv tsis yog ib tug nomtswv. Kuv yuav ua li cas muaj cuabkav mus cuag tau Falaus, thiab coj cov Yixalayees tawm hauv tebchaws Iziv los?” Vajtswv teb hais tias, “Kuv yuav nrog nraim koj, thiab thaum koj coj cov Yixalayees tawm hauv tebchaws Iziv los, nej yuav tuaj pehawm kuv saum lub roob no. Koj thiaj yuav paub hais tias kuv yog tus txib koj mus.” Mauxes teb Vajtswv hais tias, “Thaum kuv mus txog ntawm cov Yixalayees thiab qhia rau lawv hais tias, ‘Nej cov yawgkoob tus Vajtswv txib kuv tuaj cuag nej,’ thiab lawv yuav nug kuv hais tias, ‘Tus Vajtswv ntawd nws lub npe hu li cas?’ Yog li ntawd, kuv yuav teb lawv li cas?” Vajtswv hais tias, “Kuv yeej yog Kuv. Koj yuav tsum qhia rau lawv hais tias: ‘Tus uas nws lub npe hu ua Kuv Yeej Yog, tau tso kuv tuaj pab nej.’ Qhia rau cov Yixalayees paub hais tias, kuv yog tus TSWV, lawv cov yawgkoob tus Vajtswv uas yog Anplahas, Ixaj thiab Yakhauj tus Vajtswv txib koj mus pab lawv. Lub npe no yog kuv lub npe mus ibtxhis, txij no mus lawm yav tom ntej txhua tiam neeg yuav tsum hu kuv lub npe li no. Koj cia li mus thiab hu cov Yixalayees tej kev txwjlaus neeg tuaj ua ke thiab qhia rau lawv hais tias, kuv yog tus TSWV, lawv cov yawgkoob tus Vajtswv uas yog Anplahas, Ixaj thiab Yakhauj tus Vajtswv tau los tshwm rau koj pom. Qhia rau lawv hais tias, kuv twb los xyuas lawv thiab kuv pom cov neeg Iziv tsimtxom lawv lawm. Kuv npaj siab hais tias, kuv yuav coj lawv tawm hauv tebchaws Iziv, qhov chaw uas lawv raug luag tsimtxom mus nyob hauv lub tebchaws vammeej uas yog cov Kana-as, cov Hitis, cov Amoos, cov Pelixes, cov Hivis thiab cov Yenpus lub tebchaws vammeej uas av rog thiab zoo qoob. “Kuv haivneeg yuav mloog tej lus uas koj hais. Ces koj yuav tsum nrog cov Yixalayees tej kev txwjlaus neeg mus cuag cov Iziv tus vajntxwv thiab hais rau nws hais tias, ‘Tus TSWV uas yog cov Henplais tus Vajtswv los ua rau peb pom. Nimno thov koj tso peb mus peb hnub ke rau tom tiaj suabpuam, peb yuav mus tua tsiaj fij rau tus TSWV uas yog peb tus Vajtswv.’ Kuv paub hais tias, cov Iziv tus vajntxwv yeej yuav tsis tso nej mus, yog nws tsis raug tus uas muaj hwjchim loj kawg nkaus yuam kom tso. Tiamsis kuv yuav siv kuv lub hwjchim uas txaus ntshai rau txim rau cov Iziv. Ces tom qab ntawd nws mam li yuav tso nej tawm mus. “Kuv yuav tshoov cov Iziv siab kom lawv hwm koj, mas thaum kuv haivneeg tawm mus, lawv yuav tsis tawm mus tes dawb tes npliag. Txhua tus pojniam Yixalayees yuav mus thov tej pojniam Iziv uas nrog nej nyob koom zej koom zos, thiab nrog nws nyob ua ib tse, tej tsoos tsho, saw nyiaj saw kub. Cov Yixalayees yuav muab tej ntawd rau lawv tej tub tej ntxhais coj thiab hnav, thiab nej yuav sau cov Iziv tej qhov txhia chaw huv tibsi mus.” Mauxes teb tus TSWV hais tias, “Tiamsis yog cov Yixalayees tsis ntseeg kuv thiab tsis mloog tej lus uas kuv hais. Kuv yuav ua li cas? Yog lawv hais tias, ‘Tus TSWV twb tsis tau los tshwm rau koj pom li ne.’ ” Tus TSWV thiaj nug Mauxes hais tias, “Koj tuav dabtsi ntawm koj txhais tes?” Mauxes teb hais tias, “Kuv tuav ib tug pas nrig.” Tus TSWV hais ntxiv rau Mauxes hais tias, “Koj cia li muab pov rau hauv av.” Thaum Mauxes muab tus pas nrig pov rhees rau hauv av, tus pas ntawd txawm txia kiag ua ib tug nab, Mauxes ntshai thiab nws cia li tig loo khiav. Ces tus TSWV hais rau Mauxes hais tias, “Koj cia li cev tes tuav nkaus nab tus tw nqa hlo.” Mauxes thiaj cev loo tes tuav nkaus tus nab, ces tus nab rov qab yog tus pas nrig li qub lawm. Tus TSWV hais rau Mauxes hais tias, “Koj ua li no qhia rau cov Yixalayees hais tias, tus TSWV uas yog lawv cov yawgkoob tus Vajtswv uas yog Anplahas, Ixaj thiab Yakhauj tus Vajtswv tau los tshwm rau koj pom tiag.” Tus TSWV hais ntxiv rau Mauxes hais tias, “Koj cia li muab koj txhais tes ntsaws rau hauv koj plab tshos.” Mauxes ua raws li ntawd, thiab thaum nws thau nws txhais tes tawm los, ua ciav nws txhais tes cia li mob ruas ua cos dawb paug ib yam li te. Tus TSWV hais tias, “Koj cia li muab koj txhais tes ntsaws rov qab rau hauv koj plab tshos dua.” Mauxes txawm ua raws li ntawd, thaum nws thau nws txhais tes tawm los, ua ciav nws txhais tes zoo dulug ib yam li qub lawm. Tus TSWV hais tias, “Yog lawv tsis ntseeg koj lossis tsis ntseeg thawj yam txujci uas koj ua, ces lawv yeej yuav tsum ntseeg zaj no xwb. Thaum lawv pom koj ua ob yam txujci no tas, yog lawv tseem tsis ntseeg koj, thiab tsis kam mloog koj tej lus, koj cia li mus daus dej hauv tus dej Niles los hliv rau saum nruab nqhuab. Cov dej ntawd yuav txia ua ntshav.” Tiamsis Mauxes hais rau Vajtswv hais tias, “Tus TSWV, thov koj tsis txhob txib kuv mus. Kuv yeej ibtxwm hais lus txhav, txawm yog thaum koj nrog kuv tham los kuv yeej hais tsis tau lus nrawm li. Kuv yeej ibtxwm hais tsis tau lus zoo thiab nplaig yeej txhav.” Tus TSWV hais rau Mauxes hais tias, “Leejtwg yog tus tsim neeg kom muaj qhovncauj? Leejtwg yog tus uas ua rau neeg lag ntseg lossis ruam? Leejtwg ua rau neeg tsis pom kev lossis digmuag? Kuv yog tus TSWV uas ua tej no. Koj cia li mus! Kuv yuav pab koj hais thiab yuav qhia kom koj txawj hais.” Tiamsis Mauxes teb hais tias, “Thov koj txib lwm tus mus.” Thaum Mauxes hais li no, tus TSWV npautaws heev rau Mauxes thiab hais tias, “Koj tus tijlaug Aloos uas yog xeem Levis ne? Kuv paub nws yeej hais tau lus zoo. Tamsim no nws tabtom tuaj cuag koj, thiab thaum nws pom koj nws yuav zoo siab heev. Koj cia li nrog nws tham thiab qhia rau nws ua tus hais. Kuv yuav pab neb hais lus, thiab kuv yuav qhia kom neb paub tej uas tsimnyog neb ua. Aloos yuav yog tus uas sawv koj cev hais koj cov lus rau cov pejxeem. Ces koj yuav zoo ib yam li Vajtswv, koj yuav ua tus qhia rau Aloos hais lus lawm xwb. Nqa tus pas nrig no nrog koj mus, koj thiaj yuav tau tus pas no siv ua txujci rau lawv.” Ces Mauxes txawm rov qab mus cuag nws yawmtxiv Yethoos, thiab hais rau Yethoos hais tias, “Thov cia kuv rov qab mus xyuas kuv cov kwvtij uas nyob nram tebchaws Iziv, saib lawv puas tseem muaj sia nyob.” Yethoos pom zoo thiab hais tias, “Mus zoo koj.” Thaum Mauxes tseem nyob hauv tebchaws Midias, tus TSWV hais rau Mauxes hais tias, “Koj cia li rov qab mus nram tebchaws Iziv, rau qhov cov neeg uas nrhiav koj tua povtseg twb tuag tas lawm.” Mauxes thiaj tsaws nws tus pojniam thiab ob tug tub caij neesluav, thiab lawv rov mus rau tebchaws Iziv lawm. Mauxes nqa rawv nws tus pas nrig uas Vajtswv kom nws nqa nrog nws mus. Tus TSWV hais rau Mauxes ib zaug ntxiv hais tias, “Thaum koj mus txog nram tebchaws Iziv, koj yuav tsum ua txhua yam txujci tseemceeb uas kuv twb muab hwjchim rau koj lawm, koj ua tim ntsej tim muag rau Falaus saib. Tiamsis kuv yuav ua kom Falaus muaj lub siab tawv, thiab nws yuav tsis kam tso cov neeg ntawd tawm mus. Ces koj yuav tsum qhia rau Falaus hais tias, kuv uas yog tus TSWV hais li no, ‘Cov Yixalayees yog kuv tus tub hlob ntag. Kuv hais rau koj hais tias, koj cia li tso kev rau kuv tus tub tawm mus, kom nws thiaj tau pehawm kuv, tiamsis koj pheej tsis kam tso li. Tamsim no kuv yuav tua koj tej tub hlob kom tuag tas.’ ” Thaum tus TSWV ntsib Mauxes tsuam chaw pw ntawm ib tog kev uas mus rau nram tebchaws Iziv, nws twb xav muab Mauxes tua povtseg rau nrad. Ces Xipaulas uas yog Mauxes tus pojniam thiaj muab tau ib lub pobzeb ntse ntse los hlais nws tus tub daim tawv noov, thiab muab mus so zog Mauxes kotaw, thiab hais tias, “Qhov tseeb tiag koj yog kuv tus txiv uas tso ntshav rau kuv.” Ces tus TSWV thiaj tseg Mauxes txojsia. Qhov uas nws hais tias, “Koj yog tus txiv uas tso ntshav,” twb yog hais txog qhov uas ua kevcai txiav tawv ntag. Tom qab ntawd, tus TSWV hais rau Aloos hais tias, “Koj cia li mus ntsib Mauxes tom tiaj suabpuam.” Yog li ntawd, Aloos thiaj mus ntsib Mauxes rau saum lub roob dawbhuv, thiab thaum uas Aloos pom Mauxes, nws puag nkaus Mauxes nwj. Ces Mauxes qhia Aloos txhua yam uas tus TSWV tau hais rau Mauxes kom nws rov los rau tebchaws Iziv, thiab nws tseem qhia tej txujci uas tus TSWV kom nws ua ntawd huv tibsi rau Aloos. Mauxes thiab Aloos nkawd ua ke los rau nram tebchaws Iziv, thiab hu tagnrho cov Yixalayees tej thawjcoj tuaj txoos ua ke. Aloos hais txhua yam uas tus TSWV hais rau Mauxes rau cov Yixalayees mloog, thiab Mauxes txawm ua txhua yam txujci tseemceeb uas tus TSWV qhia rau Mauxes lawm, rau cov Yixalayees saib. Lawv kuj ntseeg thiab thaum lawv hnov hais tias, tus TSWV tau los xyuas lawv thiab pom lawv tej kev txomnyem uas raug luag tsimtxom ntawd lawm, lawv thiaj qhau cev hlo pehawm tus TSWV. Tom qab ntawd, Mauxes thiab Aloos mus cuag Falaus thiab hais tias, “Tus TSWV uas yog cov Yixalayees tus Vajtswv hais tias, ‘Koj cia li tso kuv haivneeg mus, lawv yuav mus ua ib rooj mov noj puag tom tiaj suabpuam ua kuv tsaug.’ ” Tiamsis Falaus nug hais tias, “Tus TSWV yog leejtwg? Ua cas yuav kom kuv mloog nws lus thiab tso cov Yixalayees tawm mus? Kuv tsis paub tus TSWV; kuv tsis kam tso cov Yixalayees mus qhov twg li.” Mauxes thiab Aloos nkawd teb hais tias, “Cov Henplais tus Vajtswv los ua rau peb pom. Yog li ntawd, thov koj pub peb mus peb hnub ke rau tom tiaj suabpuam, mus tua tsiaj fij rau tus TSWV uas yog peb tus Vajtswv. Yog peb tsis ua li ntawd, nws yuav tua peb los ntawm tso tej kab mob phem lossis los ntawm tej hniav ntaj hniav riam kom peb tuag tas.” Falaus hais rau Mauxes thiab Aloos nkawd hais tias, “Yog li cas neb pheej xav ua kom cov neeg no tso lawv tes haujlwm tseg ua dabtsi? Cia li tso cov qhev no rov mus ua haujlwm tamsim no. Neb saib maj, nej cov neeg uas nyob hauv lub tebchaws no huamvam coob tshaj cov Iziv lawm, nimno neb txawm yuav kom lawv tso haujlwm tseg no los?” Tib hnub ntawd, Falaus hais rau cov Iziv uas ua thawj saib cov qhev thiab hais rau cov Yixalayees uas ua thawjcoj li no: “Txij hnub no mus nej tsis txhob muab quavnyab rau cov neeg no xyaw av puab thwvcib li qub lawm. Nej cia lawv mam mus nrhiav lawv xwb. Tiamsis yuav tsum yuam kom lawv puab tau thwvcib ntau ib yam li thaum uas nej tseem muab quavnyab rau lawv, tsis pub kom tsawg tshaj ntawd. Vim lawv tubnkeeg lawv thiaj tuaj thov kom kuv tso lawv coj khoom mus fij rau lawv tus Vajtswv. Nej muab haujlwm rau lawv ua kom hnyav dua qhov qub, kom lawv khwv heev tsis tau so li, lawv thiaj tsis khoom mloog luag tej lus ntxias dag.” Cov Iziv uas saib cov qhev thiab cov Yixalayees uas ua thawjcoj thiaj mus hais rau cov Yixalayees hais tias, “Falaus yuav tsis muab quavnyab rau nej lawm. Nws hais tias, nej yuav tsum mus nrhiav nej quavnyab thiab mus nrhiav qhov twg los tau, tiamsis yuav tsum puab kom tau thwvcib ntau npaum li qub.” Yog li ntawd, cov Yixalayees thiaj mus nrhiav quavnyab thoob plaws hauv tebchaws Iziv. Cov thawj uas saib cov qhev ntawd, yuam kom txhua hnub lawv yuav tsum puab thwvcib tau ntau ib yam li thaum uas tseem muab quavnyab rau lawv. Cov Iziv uas ua thawj saib cov qhev, ntaus cov Yixalayees uas lawv muab tsa ua cov thawj saib xyuas haujlwm. Lawv nug hais tias, “Vim li cas nej cov neeg puab tsis tau thwvcib ntau npaum li yav tas los lawm?” Cov Yixalayees uas saib haujlwm thiaj mus cuag Falaus thiab yws hais tias, “Vajntxwv, vim li cas koj ua li no rau peb? Koj twb tsis muab quavnyab rau peb li yav tas los, tiamsis koj tseem kom lawv yuam peb puab thwvcib tas zog li! Thiab nimno lawv ntaus peb ua lwj ua liam, mas tsimnyog koj nrog paub zaj no.” Falaus teb hais tias, “Nej tubnkeeg thiab tsis xav ua haujlwm xwb, thiab twb yog vim li no nej thiaj tuaj thov kuv kom kuv pub nej coj khoom mus fij rau tus TSWV. Nej cia li rov qab mus ua haujlwm tamsim no, kuv yuav tsis muab quavnyab rau nej lawm, tiamsis nej yuav tsum puab thwvcib kom tau ntau ib yam li nej ibtxwm puab los lawm.” Cov Yixalayees uas saib xyuas haujlwm, pom hais tias lawv yeej yuav raug teebmeem xwb, rau qhov Falaus hais kom txhua hnub lawv yuav tsum puab thwvcib kom tau ntau ib yam li lawv ibtxwm puab los lawm. Thaum lawv rov qab los, lawv ntsib Mauxes thiab Aloos nkawd tabtom tos lawv. Lawv hais rau Mauxes thiab Aloos nkawd hais tias, “Thov Vajtswv taug tej haujlwm uas neb ua los lawm thiab rau txim rau neb, rau qhov neb ua rau Falaus thiab nws cov nomtswv ntxub peb heev. Neb ua li ntawd ib yam nkaus li yog neb muab ntaj cob rau lawv tua peb povtseg ntag.” Mauxes mus thov tus TSWV dua ib zaug ntxiv hais tias, “Tus TSWV, ua cas koj tsis hlub koj haivneeg? Vim li cas koj txib kuv tuaj? Txij hnub uas koj txib kuv ua tus sawv koj cev mus hais rau Falaus, nws tseem hajyam tsimtxom lawv heev xwb. Thiab koj twb tsis ua ib yam dabtsi pab lawv li!” Ces tus TSWV hais rau Mauxes hais tias, “Nimno koj yuav pom tej uas kuv yuav ua rau Falaus. Kuv yuav yuam kom nws tso kuv haivneeg tawm mus. Qhov tseeb, yog kuv yuam kom nws ntiab kuv haivneeg tawm hauv nws lub tebchaws mus.” Vajtswv nrog Mauxes tham thiab hais rau Mauxes hais tias, “Kuv yog tus TSWV. Kuv yog tus Vajtswv uas muaj hwjchim loj kawg nkaus, kuv tau los tshwm rau Anplahas, Ixaj thiab Yakhauj pom, tiamsis kuv tsis tau qhia kuv lub npe dawbhuv uas yog tus TSWV rau lawv paub. Thiab kuv tseem tau coglus rau lawv, yuav muab lub tebchaws Kana-as pub rau lawv, yog lub tebchaws uas thaum ub lawv los nyob ua neeg txawv tebchaws tau ib ntus. Nimno kuv hnov cov Yixalayees uas raug cov Iziv muab yuam ua qhev lub suab quaj qw lawm, thiab kuv nco txog tej lus uas kuv cog tseg lawm. Koj mus qhia rau cov Yixalayees hais tias, tej lus no yog kuv hais rau lawv ntag, ‘Kuv yog tus TSWV; kuv yuav pab nej thiab tso kom nej dim ntawm txojkev uas ua cov Iziv qhev. Kuv yuav tsa kuv txhais npab uas muaj zog loj zog nchav coj kev rau txim hnyav heev los rau lawv, thiab kuv yuav cawm kom nej dim. Kuv yuav xaiv nej ua kuv haivneeg, thiab kuv yuav yog nej tus Vajtswv. Thaum kuv tso nej dim kev ua qhev hauv tebchaws Iziv los, nej thiaj yuav paub hais tias kuv yog tus TSWV uas yog nej tus Vajtswv. Kuv yuav coj nej mus nyob hauv lub tebchaws uas kuv coglus rau Anplahas, Ixaj thiab Yakhauj lawm; thiab kuv yuav muab pub rau nej nyob ua nej tug. Kuv yog tus TSWV.’ ” Mauxes coj cov lus no mus hais rau cov Yixalayees, tiamsis lawv tsis ntseeg nws li, rau qhov lawv dhuav siab rau txojkev ua luag tauj luag qhev hwv lawm. Ces tus TSWV hais rau Mauxes hais tias, “Koj mus hais rau Falaus uas yog cov Iziv tus vajntxwv kom nws cia li tso cov Yixalayees tawm hauv nws lub tebchaws mus.” Tiamsis Mauxes teb hais tias, “Cov Yixalayees twb tsis mloog kuv lus lawm, Falaus yuav ua li cas mloog kuv lus? Kuv yog ib tug neeg uas ibtxwm hais lus txhav heev.” Tus TSWV hais rau Mauxes thiab Aloos nkawd li no: “Neb cia li qhia rau cov Yixalayees thiab Falaus uas yog cov Iziv tus vajntxwv hais tias, ‘Kuv yog tus tsa neb ua ob tug coj cov Yixalayees tawm hauv tebchaws Iziv no mus.’ ” Yakhauj tus tub hlob Lunpees, muaj plaub tug tub: Hanauj, Palus, Hexeloos thiab Kalemis, lawv puavleej yog cov yawgkoob uas ris lawv cajces npe. Xime-oos muaj rau tug tub: Yemuyees, Yamees, Auhas, Yakhees, Xauhas thiab Sa-ules, lawv yog tus pojniam Kana-as cov tub; lawv puavleej yog cov yawgkoob uas ris lawv cajces npe. Levis muaj peb tug tub: Nkesoos, Kauhas thiab Melalis; lawv puavleej yog cov yawgkoob uas ris lawv cajces npe. Levis ua neej nyob tau ib puas peb caug xya xyoo. Nkesoos muaj ob tug tub: Linpanis thiab Sime-is; nkawd muaj xeebntxwv coob heev. Kauhas muaj plaub tug tub: Amalas, Ixehas, Henploos thiab Uxiyees. Kauhas ua neej nyob tau ib puas peb caug peb xyoo. Melalis muaj ob tug tub: Mahalis thiab Musis. Cov no puavleej yog suav xeem Levis nrog lawv tej xeebntxwv huv tibsi. Amalas yuav nws txiv tus muam Yaukhenpes los ua pojniam, Yaukhenpes thiaj yug tau Aloos thiab Mauxes nkawd. Amalas ua neej nyob tau ib puas peb caug xya xyoo. Ixehas muaj peb tug tub: Kaulahas, Nefenkas thiab Xikhalis. Uxiyees muaj peb tug tub: Misayees, Exafas thiab Sithalis. Aloos yuav Elinpas uas yog Aminadas tus ntxhais thiab yog Nahasoos tus muam ua pojniam; Elinpas yug tau Nadas, Anpihus, Ele-axas thiab Ithamas rau Aloos. Kaulas muaj peb tug tub: Axis, Ekanas thiab Anpe-asafas; lawv puavleej yog Kaulas cajces uas faib ua tej cuab lawm cov yawgkoob. Aloos tus tub Ele-axas, yuav Putiyees ib tug ntxhais ua pojniam; thiab nws yug tau Finehas rau Ele-axas. Cov no yog cov thawjcoj ntawm nws cajces thiab yog tej cuab kwvtij ntawm xeem Levis. Aloos thiab Mauxes nkawd yog ob tug uas Vajtswv hais tias, “Coj cov Yixalayees tawm hauv tebchaws Iziv mus.” Nkawd yog ob tug uas mus cuag Falaus uas yog cov Iziv tus vajntxwv kom tso cov Yixalayees tawm mus nyob ywjpheej. Thaum tus TSWV los hais rau Mauxes hauv tebchaws Iziv, nws hais li no tias: “Kuv yog tus TSWV. Cia li qhia txhua yam uas kuv qhia koj lawm rau Falaus uas yog cov Iziv tus vajntxwv.” Tiamsis Mauxes teb hais tias, “Koj yeej paub kuv yog ib tug neeg uas hais lus txhav heev; yuav ua li cas Falaus thiaj mloog kuv hais?” Tus TSWV hais tias, “Kuv yuav ua kom koj zoo li Vajtswv rau Falaus, thiab koj tus tijlaug Aloos yuav ua tus cev koj tej lus rau nws. Koj yuav tsum piav txhua yam uas kuv qhia koj rau Aloos, thiab nws yuav hais rau Falaus kom tso cov Yixalayees tawm hauv nws lub tebchaws mus. Tiamsis kuv yuav ua kom Falaus muaj lub siab tawv heev, txawm yog nws yuav pom kuv ua tej txujci txaus ntshai heev nyob hauv tebchaws Iziv no npaum twg los nws yuav tsis mloog koj tej lus. Ces kuv yuav tsa kuv txhais tes rau txim hnyav rau cov Iziv thiab yuav coj kuv haivneeg Yixalayees tawm hauv tebchaws Iziv mus. Thaum kuv tsa kuv txhais tes los tawmtsam cov Iziv thiab coj kuv haivneeg tawm hauv lawv lub tebchaws mus, lawv thiaj yuav paub hais tias, kuv yog tus TSWV tiag.” Mauxes thiab Aloos nkawd ua raws li uas tus TSWV hais. Thaum nkawd mus cuag Falaus, Mauxes hnubnyoog muaj yim caum xyoo, Aloos hnubnyoog muaj yim caum peb xyoo. Tus TSWV hais rau Mauxes thiab Aloos nkawd hais tias, “Yog Falaus hais kom neb ua txujci rau nws saib, koj cia li hais kom Aloos muab nws tus pas nrig pov rhees rau ntawm Falaus xubntiag, ces tus pas ntawd yuav txia ua ib tug nab.” Mauxes thiab Aloos mus cuag Falaus thiab ua raws li tej uas tus TSWV hais. Aloos muab tus pas nrig pov rhees rau ntawm Falaus thiab nws cov nomtswv xubntiag, tus pas ntawd txawm txia ua ib tug nab. Falaus hu nws cov neeg txawj ntse thiab cov neeg txawj ua yeessiv tuaj thiab lawv ua tau tej txujci ib yam li Mauxes nkawd ua. Lawv muab lawv tej pas pov rau hauv av, tej pas ntawd txawm txia ua nab tas li thiab, tiamsis Aloos tus pas nrig muab lawv tej pas nrig nqos tas huv tibsi lawm. Txawm yog li ntawd los Falaus tseem muaj lub siab tawv, tsis ntseeg Mauxes thiab Aloos nkawd tej lus raws li tus TSWV tau hais tseg lawm. Ces tus TSWV hais rau Mauxes hais tias, “Falaus lub siab tawv heev, nws tsis kam tso cov Yixalayees tawm mus. Yog li ntawd, thaum sawv ntxov koj cia li mus cuag Falaus thaum nws mus nram tus dej Niles. Koj nqa tus pas nrig uas txia tau ua nab, thiab mus tos nws nram ntug dej. Koj hais rau Falaus hais tias, ‘Tus TSWV uas yog cov Henplais tus Vajtswv txib kuv tuaj hais kom koj cia li tso nws haivneeg tawm mus, lawv thiaj tau mus pehawm nws puag tom tiaj suabpuam. Tiamsis koj tseem tsis mloog Vajtswv lus li thiab. Falaus, nimno tus TSWV hais tias, koj yuav paub nws yog tus TSWV los ntawm tej txujci uas nws yuav ua no. Koj saib, kuv yuav muab tus pas nrig no nplawm tus dej Niles no, mas tus dej no yuav txia ua ntshav tagnrho. Tej ntses yuav tuag tas, thiab dej yuav tsw lwj ntxiag, ua rau cov Iziv yuav haus tsis taus tej dej ntawd.’ ” Tus TSWV hais rau Mauxes hais tias, “Koj kom Aloos muab nws tus pas nrig taw rau txhua tus dej, tej kwjdeg, thiab tej pasdej hauv tebchaws Iziv. Tej dej ntawd yuav txia ua ntshav, thiab yuav muaj ntshav thoob plaws lub tebchaws, txawm yog hauv tej thoob ntoo thiab tej hub pobzeb los yuav muaj ntshav tas huv tibsi.” Ces Mauxes thiab Aloos txawm ua raws li tus TSWV hais. Aloos muab nws tus pas nrig nplawm tus dej Niles tabmeeg Falaus thiab nws cov nomtswv, ces tej dej txawm txia ua ntshav tas huv tibsi lawm. Tej ntses hauv dej tuag tas, tsw lwj ntxiag ua rau cov Iziv haus tsis taus. Thiab ua rau muaj ntshav thoob plaws tebchaws Iziv. Cov Iziv uas txawj ua yeessiv, lawv ua tau ib yam li ntawd thiab, Falaus thiaj tseem muaj lub siab tawv li qub. Nws tsis mloog Mauxes thiab Aloos tej lus raws li tus TSWV tau hais tseg lawm. Falaus rov qab mus tsev, nws tsis quavntsej zaj no li. Cov Iziv mus khawb qhovdej raws tus ntug dej Niles, rau qhov lawv haus tsis taus tus dej Niles. Xya hnub uas tus TSWV muab dej hloov ua ntshav dhau lawm. Tus TSWV hais rau Mauxes hais tias, “Cia li mus cuag Falaus thiab hais rau nws hais tias, ‘Koj cia li tso kuv haivneeg mus, lawv yuav mus pehawm kuv. Yog koj tseem tsis tso lawv mus, kuv yuav rau txim rau koj lub tebchaws uas yog tso qav los nyob puv nkaus koj lub tebchaws. Qav yuav nyob puv nkaus hauv tus dej Niles, tej qav ntawd yuav tawm hauv tus dej Niles los nyob hauv koj tsev, hauv koj chav pw, saum koj lub txaj, hauv koj cov nomtswv thiab koj tej pejxeem tsev, hauv koj lub qhovcub thiab koj tej laujkaub ua noj ua haus. Tej qav ntawd yuav dhia los nce koj, koj cov pejxeem thiab koj cov nomtswv huv tibsi.’ ” Tus TSWV hais rau Mauxes hais tias, “Koj kom Aloos muab nws tus pas nrig taw rau tej dej, tej kwjdeg thiab tej pasdej, ua kom qav tawm tuaj nyob thoob plaws lub tebchaws Iziv.” Yog li ntawd, Aloos thiaj muab nws tus pas taw rau tej dej, ces qav txawm tawm tuaj puv nkaus lub tebchaws Iziv. Tiamsis cov Iziv uas txawj ua yeessiv, kuj ua yeessiv kom qav tawm tuaj puv nkaus lub tebchaws Iziv thiab. Falaus hu Mauxes thiab Aloos nkawd mus cuag nws, nws hais rau nkawd hais tias, “Neb cia li thov kom tus TSWV tshem tej qav no tawm mus, kuv yuav tso nej cov neeg coj tsiaj mus fij rau tus TSWV.” Mauxes hais rau Falaus hais tias, “Kuv zoo siab thov Vajtswv pab koj. Saib koj muab lub sijhawm twg rau kuv thov Vajtswv rau koj, koj cov nomtswv thiab koj cov pejxeem. Kom tej qav ntawd khiav tawm ntawm nej mus, tsuas pub muaj nyob hauv tus dej Niles xwb.” Falaus teb hais tias, “Tagkis koj mam li thov Vajtswv rau kuv.” Mauxes teb hais tias, “Kuv yuav ua raws li koj thov, mas koj thiaj yuav paub hais tias, tsis muaj lwm tus vajtswv zoo npaum li tus TSWV uas yog peb tus Vajtswv no lawm. Tej qav ntawd yuav khiav tawm ntawm koj, koj cov nomtswv thiab koj cov pejxeem mus, tsuas pub muaj nyob hauv tus dej Niles xwb.” Mauxes thiab Aloos tawm hauv Falaus tsev mus, thiab Mauxes thov tus TSWV kom tshem tej qav uas tso los tsimtxom Falaus ntawd mus kom tas. Tus TSWV ua raws li Mauxes thov, tej qav uas nyob hauv tej tsev, hauv tej tshavpuam thiab tom tej teb puavleej tuag tas huv tibsi lawm. Cov Iziv khaws tej qav tuag ntawd los tso ua tej pawg tsw lwj ntxiag mus thoob lub tebchaws. Thaum Falaus pom tej qav ntawd tuag tas lawm, nws rov muaj lub siab tawv ib yam li qub, raws li tus TSWV tau hais lawm, Falaus yeej tsis mloog Mauxes thiab Aloos nkawd tej lus li. Tus TSWV hais rau Mauxes hais tias, “Koj cia li hais kom Aloos muab nws tus pas nrig nplawm av, tej hmoov av uas nyob thoob plaws hauv lub tebchaws Iziv no yuav txia ua yoov qaib tas.” Yog li ntawd, Aloos muab nws tus pas nrig nplawm av, tej hmoov av thoob plaws lub tebchaws Iziv txawm txia ua yoov qaib ntsauv neeg thiab tej tsiaj. Cov Iziv uas txawj yeessiv, lawv ua tas zog kom muaj yoov qaib, tiamsis lawv ua tsis tau li. Yoov qaib ya los puv nkaus txhua qhov txhia chaw, thiab cov neeg uas txawj ua yeessiv hais rau Falaus hais tias, “Vajtswv yog tus uas ua tej xwm no tiag!” Tiamsis Falaus tseem muaj lub siab tawv heev, nws tsis mloog Mauxes thiab Aloos nkawd lus raws li tus TSWV tau hais tseg lawm. Tus TSWV hais rau Mauxes hais tias, “Tagkis sawv ntxov koj cia li mus cuag Falaus, thaum uas nws tabtom mus nram hav dej, thiab koj qhia tus TSWV tej lus rau nws hais tias, ‘Koj cia li tso kuv haivneeg mus, lawv thiaj tau mus pehawm kuv. Kuv ceebtoom rau koj hais tias, yog koj tsis kam, kuv yuav rau txim rau koj uas yog tso yoov los tsaws koj, koj cov nomtswv thiab koj cov pejxeem. Cov Iziv tej tsev los yuav muaj yoov puv nkaus, thiab yuav ya los tsaws puv nkaus saum npoo av. Tiamsis kuv yuav tseg cheebtsam Nkausees, thaj chaw uas kuv haivneeg nyob, yuav tsis pub kom muaj yoov hlo li. Kuv yuav ua li no koj thiaj paub hais tias, kuv yog tus TSWV uas ua tej no nyob hauv lub tebchaws no. Kuv yuav ua ib yam los cais kuv haivneeg thiab koj haivneeg. Tagkis yuav muaj yam txujci no tshwmsim los.’ ” Vajtswv tso yoov ya poog ntws los tsaws puv nkaus rau hauv Falaus lub loog thiab hauv nws cov nomtswv tej tsev. Cov yoov no ua rau cov pejxeem thoob plaws lub tebchaws Iziv tau kev ntxhov siab kawg li. Falaus thiaj txib neeg mus hu Mauxes thiab Aloos nkawd tuaj cuag nws, thiab nws hais rau nkawd hais tias, “Nej cia li mus muab khoom hlawv fij rau nej tus Vajtswv nyob hauv lub tebchaws no.” Mauxes teb hais tias, “Ua li ntawd tsis yog cai, rau qhov tej tsiaj uas peb tua fij rau tus TSWV uas yog peb tus Vajtswv, yog ib yam uas qias heev rau cov Iziv. Yog peb muab tej tsiaj uas cov Iziv tsis nyiam los tua ua khoom fij nyob qhov twg, thaum lawv pom peb lawv yuav muab pobzeb ntaus kom peb tuag. Yog li ntawd, peb yuav tsum tau mus peb hnub ke rau tom tiaj suabpuam, peb mam tua tsiaj fij rau tus TSWV uas yog peb tus Vajtswv, raws li nws tau hais rau peb lawm.” Falaus hais tias, “Yog nej mus tsis deb, kuv yuav tso nej mus tua tsiaj hlawv fij rau tus TSWV uas yog nej tus Vajtswv tom tiaj suabpuam. Nej thov Vajtswv pab kuv thiab.” Mauxes teb hais tias, “Thaum kuv rov mus, kuv yuav thov tus TSWV kom tagkis nws tshem cov yoov no tawm ntawm koj, koj cov nomtswv thiab koj cov pejxeem mus kom tas. Tiamsis koj tsis txhob dag peb ntxiv lawm, thiab pheej txwv tsis pub cov Yixalayees mus tua tsiaj fij rau tus TSWV.” Mauxes tawm ntawm Falaus lub tsev los thiab thov tus TSWV, thiab tus TSWV ua raws li Mauxes tej lus thov. Tej yoov ya tawm ntawm Falaus, ntawm nws cov nomtswv thiab ntawm nws cov pejxeem mus tas tsis tshuav ib tug seem nyob qhov twg li lawm. Tiamsis zaum no los Falaus tseem muaj lub siab tawv ib yam li qub, thiab nws yeej tsis kam tso cov Yixalayees mus li. Tus TSWV hais rau Mauxes hais tias, “Koj cia li rov mus cuag Falaus thiab hais rau nws hais tias, tus TSWV uas yog cov Henplais tus Vajtswv hais tias, ‘Koj cia li tso kuv haivneeg mus, lawv thiaj tau mus pehawm kuv. Yog koj tseem tsis pub lawv mus, kuv yuav rau txim rau koj uas yog tso mob aws los rau nej tej tsiaj uas yog nej tej nees, tej neesluav, tej ntxhuav, tej nyuj, tej yaj thiab tej tshis. Kuv yuav ua kom cov Iziv tej tsiaj txhu tuag tas, tiamsis kuv yuav tsis pub cov Yixalayees tej tsiaj txhu ib tug tuag li. Kuv yog tus TSWV, kuv twb teem sijhawm cia lawm, tagkis kuv yuav ua tej txujci no.’ ” Hnub tom qab, tus TSWV txawm ua raws li nws tau hais ntawd, ces cov Iziv tej tsiaj tuag tas huv tibsi, tiamsis cov Yixalayees tej tsiaj tsis tuag ib tug li. Falaus tso neeg mus tshuaj xyuas tej xwm ntawd, lawv pom hais tias, cov Yixalayees tej tsiaj tsis tuag ib tug li. Tiamsis Falaus tseem muaj lub siab tawv tsis tso cov Yixalayees mus li. Tus TSWV hais rau Mauxes thiab Aloos nkawd hais tias, “Neb cia li tsuab ob peb teg tshauv hauv qhovcub muab rau Mauxes w rau saum nruab ntug tabmeeg Falaus. Cov hmoov tshauv ntawd, yuav ya ri niab mus thoob plaws lub tebchaws Iziv, thiab cov hmoov tshauv ntawd ya mus txog thaj tsam twg, cov neeg thiab tej tsiaj uas nyob thaj tsam ntawd yuav mob rwj ua paug thoob plaws ibce.” Yog li ntawd, nkawd thiaj mus tsuab ib leeg ib teg tshauv, nkawd los sawv ze ntawm Falaus xubntiag, Mauxes muab cov tshauv ntawd w rau saum nruab ntug, cov tshauv ntawd, txawm ua rau tej neeg thiab tej tsiaj mob rwj thoob plaws ibce. Cov neeg uas txawj ua yeessiv, lawv tsis muaj peevxwm los cuag Mauxes, rau qhov lawv mob rwj thoob plaws ibce ib yam lib cov Iziv thiab. Tiamsis tus TSWV ua rau Falaus muaj lub siab tawv, raws li uas tus TSWV tau hais tseg lawm, Falaus thiaj tsis mloog Mauxes thiab Aloos nkawd tej lus. Tus TSWV hais rau Mauxes hais tias, “Tagkis koj cia li sawv ntxov mus cuag Falaus thiab hais rau nws hais tias, tus TSWV uas yog cov Henplais tus Vajtswv hais tias, ‘Cia li tso kuv haivneeg mus, lawv yuav mus pehawm kuv. Zaum no tsis yog kuv yuav rau txim rau koj cov nomtswv thiab koj cov pejxeem xwb, tiamsis kuv yuav rau txim rau koj ntag, koj thiaj yuav paub hais tias, nyob hauv ntiajteb no yeej tsis muaj ib tug uas yuav muaj hwjchim loj npaum li kuv. Yog kuv tau tsa tes los tawmtsam koj thiab tso kab mob los rau koj cov pejxeem, ces nej yeej yuav tuag tas huv tibsi. Tiamsis kuv tsis pub koj tuag rau qhov kuv xav kom koj pom kuv lub hwjchim, kuv lub koob meej thiaj yuav nrov ncha moo lug mus thoob plaws lub ntiajteb. Nimno koj tseem muaj lub siab tawv thiab tsis kam tso kuv haivneeg mus. Tagkis lub sijhawm no kuv yuav tso lawg los hlob heev, txij thaum muaj lub tebchaws Iziv no los, yeej tsis tau muaj dua ib zaug lawg los hlob npaum li zaum no. Koj yuav tsum kom sawvdaws muab tej tsiaj txhu lawv los rau hauv nkuaj thiab muab txhua yam uas koj muaj coj los tso rau hauv tsev, rau qhov lawg yuav los ntaus cov neeg thiab tej tsiaj uas nyob ntawm tej tshavpuam kom tuag tas huv tibsi.’ ” Falaus cov nomtswv qee leej ntshai heev vim tej lus uas tus TSWV hais ntawd, lawv thiaj coj lawv cov qhev los tsev thiab cab lawv tej tsiaj los rau hauv nkuaj. Tiamsis cov neeg uas tsis quavntsej Vajtswv tej lus, lawv tso lawv cov qhev thiab tej tsiaj nws nyob nws rau hauv tej teb. Ces tus TSWV hais rau Mauxes hais tias, “Koj cia li tsa koj txhais tes rau saum ntuj, lawg yuav poob los thoob plaws lub tebchaws Iziv, lawg yuav ntaus neeg, ntaus tej tsiaj txhu thiab tej qoobloo uas nyob hauv tej teb kom puastsuaj tas.” Mauxes txawm muab nws tus pas nrig taw rau saum ntuj, tus TSWV ua xob nroo thiab xob laim los ti nkaus rau hauv av. Tus TSWV tso lawg los hlob heev nchuav nthwv ib tog tuaj, thiab xob laim liab pesvog, cua daj cua dub ntsawj nrov nroo ntws ib tog tuaj. Txij thaum muaj lub tebchaws Iziv los, cov Iziv yeej tsis tau pom muaj dua ib zaug li no. Tej neeg, tej tsiaj txhu thiab txhua yam uas nyob tom tej tiaj nrag thoob plaws lub tebchaws Iziv raug lawg ntaus puastsuaj tas. Lawg tseem ntaus tej qoobloo uas cog rau hauv tej teb thiab txhua tsob ntoo ntsoog tas huv tibsi. Tsuas tshuav cheebtsam Nkausees uas cov Yixalayees nyob thiaj tsis muaj lawg poob los raug xwb. Falaus txib neeg mus hu Mauxes thiab Aloos nkawd tuaj cuag nws, nws hais rau nkawd hais tias, “Zaum no kuv ua txhaum lawm; tus TSWV yeej ua yog, kuv thiab kuv cov pejxeem puavleej ua txhaum. Thov tus TSWV lauj! Peb tiv tsis taus tej suab xob nroo thiab tej lawg no lawm! Kuv thov coglus tso nej mus, tsis pub nej nyob hauv no ntxiv lawm.” Mauxes teb Falaus hais tias, “Thaum kuv tawm hauv lub nroog no mus, kuv yuav tsa tes thov tus TSWV. Xob yuav tsis nroo thiab lawg yuav tu tsis los ntxiv lawm, koj thiaj yuav paub hais tias lub ntiajteb no yog tus TSWV tug. Tiamsis kuv twb paub lawm hais tias, koj thiab koj cov nomtswv yuav tsis ntshai tus TSWV uas yog Vajtswv.” Tej maj thiab nplej raug puastsuaj tas, rau qhov lub caij ntawd nplej tabtom siav, thiab maj tabtom tawg paj. Tiamsis tej mog tsis raug puastsuaj, rau qhov tseem tuaj tsis tau nto npoo av. Mauxes tawm hauv Falaus lub loog mus, nws mus rau nraum ntug nroog, nws tsa tes thov tus TSWV. Xob txawm ntsiag, lawg thiab nag txawm tu. Thaum Falaus pom hais tias, xob tsis nroo, lawg thiab nag tsis los lawm, nws rov ua txhaum dua. Nws thiab nws cov nomtswv rov muaj lub siab tawv li qub, thiab ua raws li uas Vajtswv tau hais rau Mauxes lawm, mas Falaus yeej tsis kam tso cov Yixalayees mus li. Ces tus TSWV hais rau Mauxes hais tias, “Koj cia li mus cuag Falaus. Kuv ua rau Falaus thiab nws cov nomtswv kom muaj lub siab tawv, kuv thiaj tau ua kuv tej txujci tseemceeb rau lawv pom thiab nej thiaj yuav tau piav rau nej tej xeebntxwv mloog hais tias, thaum kuv ua kuv tej txujci ntawd, cov Iziv poob ntsejmuag loj kawg nkaus. Nej thiaj yuav paub hais tias kuv yog tus TSWV.” Mauxes thiab Aloos nkawd mus cuag Falaus thiab hais rau nws hais tias, “Tus TSWV uas yog cov neeg Henplais tus Vajtswv hais tias, ‘Koj yuav tawv mus txog thaum twg koj mam li hwm kuv? Cia li tso kuv haivneeg mus, lawv yuav mus pehawm kuv. Yog koj tseem tawv tsis kam tso kuv haivneeg mus, mas tagkis kuv yuav tso kooj los puv nkaus koj lub tebchaws. Cov kooj ntawd yuav coob heev plooj nkaus saum npoo av. Cov kooj ntawd yuav noj txhua yam uas lawg ntaus tuag tsis tas thiab noj tej ntoo kom tas huv tibsi. Cov kooj ntawd yuav ya los puv nkaus hauv koj lub loog thiab hauv koj cov nomtswv thiab koj cov pejxeem tej tsev. Cov kooj ntawd yuav ua phem tshaj plaws tej uas koj cov yawgkoob ibtxwm pom los lawm.’ ” Ces Mauxes txawm tawm hauv Falaus lub loog los lawm. Falaus cov nomtswv hais rau Falaus hais tias, “Koj tseem yuav cia tus neeg no ua rau peb raug kev txomnyem mus txog thaum twg? Cia li tso cov Yixalayees no mus, lawv thiaj tau mus pe tus TSWV uas yog lawv tus Vajtswv. Koj tsis pom lub tebchaws Iziv twb puastsuaj tas lawm los?” Falaus txib neeg mus hu Mauxes thiab Aloos nkawd tuaj cuag nws, nws hais rau nkawd hais tias, “Cia li mus pehawm tus TSWV uas yog nej tus Vajtswv. Tiamsis cov twg yuav mus?” Mauxes teb hais tias, “Peb sawvdaws yuav mus tagnrho, mus kom tas peb tej menyuam thiab tej laus huv tibsi. Peb yuav coj peb cov tub cov ntxhais, tej yaj tej tshis thiab tej nyuj mus huv tibsi, rau qhov peb yuav mus ua ib rooj mov noj qhuas tus TSWV.” Falaus teb hais tias, “Kuv coglus rau tus TSWV hais tias kuv yuav tsis pub nej coj nej tej pojniam menyuam mus! Kuv paub hais tias, nej tabtom tuavhauv yuav ua phem. Tsis tau, tsis pub mus! Yog hais tias nej xav mus tiag, tsuas pub cov txivneej mus xwb.” Ces Falaus txawm ntiab Mauxes thiab Aloos nkawd tawm hauv nws lub loog mus lawm. Tus TSWV hais rau Mauxes hais tias, “Koj cia li tsa tes rau lub tebchaws Iziv, kom kooj los rau hauv tebchaws Iziv no. Kooj yuav los noj txhua tsav txhua yam qoobloo thiab noj tej uas lawg ntaus puastsuaj tsis tas.” Mauxes txawm muab nws tus pas nrig tsa rau lub tebchaws Iziv, tus TSWV tso cua ntsawj sab hnubtuaj tuaj, hnub ntawd ib hnub thiab ib hmos. Tagkis sawv ntxov cua txawm ntsawj kooj ya ua npoj ntws los. Tej kooj ntawd ya ua tsheej ntshuas los tsaws puv nkaus lub tebchaws Iziv. Zaum no kooj txomfav coob tshaj plaws dua li uas txeev pom los, lossis yuav tsis pom ib zaug ntxiv li lawm. Tej kooj ntawd ya los tsaws plooj nkaus av, tsis pom ib qhov av tshwm li. Tej kooj ntawd noj tej txiv ntoo thiab txhua yam uas lawg ntaus puastsuaj tsis tas huv tibsi, tsis hais tej qoobloo hauv tej teb thiab tej ntoo uas nyob thoob plaws hauv tebchaws Iziv tsis seem ib daim nplooj li. Falaus txib neeg ceev heev mus hu Mauxes thiab Aloos nkawd tuaj thiab hais rau nkawd hais tias, “Kuv tau ua txhaum rau tus TSWV uas yog nej tus Vajtswv thiab ua txhaum rau neb lawm. Nimno thov zam txim rau kuv ib zaug ntxiv thiab thov tus TSWV uas yog nej tus Vajtswv tshem lub txim uas yuav coj kuv mus rau txojkev tuag, tawm ntawm kuv mus.” Mauxes txawm tawm hauv Falaus lub loog mus thov tus TSWV. Thiab tus TSWV muab cov cua uas ntsawj sab hnubtuaj tuaj hloov kom ntsawj sab hnubpoob tuaj, ntsawj tej kooj ntawd kom mus poob tas rau hauv Hiavtxwv Liab. Tsis pub kom seem ib tug kooj nyob qhov twg li. Tiamsis tus TSWV ua rau Falaus muaj lub siab tawv tsis kam tso cov Yixalayees mus li thiab. Vajtswv hais rau Mauxes hais tias, “Koj cia li tsa koj txhais tes rau saum ntuj, yuav tsaus ntuj nti thoob plaws lub tebchaws Iziv.” Mauxes tsa tes rau saum ntuj, txawm tsaus ntuj nti thoob plaws lub tebchaws Iziv tau peb hnub. Cov Iziv ib tug ntsia tsis pom ib tug li, thiab lub sijhawm ntawd ua rau cov Iziv tawm tsis tau hauv lawv tej tsev mus rau qhov twg, tiamsis thaj tsam uas cov Yixalayees nyob pom kev kaj nrig. Falaus txib neeg mus hu Mauxes tuaj cuag nws thiab hais tias, “Nej cia li mus pehawm tus TSWV; txawm yog nej yuav coj nej cov pojniam menyuam nrog nej mus los tau. Tiamsis nej tej yaj, tej tshis thiab tej nyuj cia nyob ntawm no.” Mauxes teb hais tias, “Yog li ntawd, koj yuav tsum muab tsiaj rau peb coj mus tua hlawv fij rau tus TSWV uas yog peb tus Vajtswv. Yeej tsis tau li, peb yuav tsum cab peb tej tsiaj nrog peb mus kom tas xwb; tsis pub seem ib tug rau qhov twg li. Peb yuav tsum xaiv tej tsiaj zoo tua hlawv fij rau tus TSWV uas yog peb tus Vajtswv. Nimno peb tseem tsis tau paub yuav muab tus tsiaj twg, thaum peb mus txog tod lawm, peb mam xaiv, peb thiaj paub muab tus zoo los tua fij rau nws.” Tus TSWV ua rau Falaus muaj lub siab tawv, nws thiaj tsis kam tso cov Yixalayees mus. Falaus hais rau Mauxes hais tias, “Koj cia li khiav tawm mus, tsis txhob tuaj tshwm ntsejmuag rau kuv pom ib zaug ntxiv lawm. Hnub twg yog kuv pom koj, mas koj yeej yuav tuag xwb lauj!” Mauxes teb hais tias, “Ua li koj hais los mas! Kuv yuav tsis tuaj tswm rau koj pom ib zaug ntxiv li lawm!” Ces Vajtswv hais rau Mauxes hais tias, “Kuv yuav rau txim rau Falaus thiab cov Iziv ib zaug ntxiv thiab. Tom qab ntawd Falaus yuav tso nej mus. Nws yuav ntiab nej tawm hauv no mus kom tas. Koj cia li mus hais rau cov Yixalayees txhua tus hais tias, kom lawv mus thov cov neeg zejzog, tej saw nyiaj saw kub.” Tus TSWV ua rau cov Iziv hwm cov Yixalayees, ua rau Falaus cov nomtswv thiab tagnrho cov Iziv suav hais tias, Mauxes yog ib tug neeg tseemceeb heev. Mauxes txawm hais rau Falaus hais tias, “Vajtswv hais li no hais tias, ‘Thaum ib tag hmo kuv yuav los xyuas cov Iziv. Cov Iziv tej tub hlob yuav tuag tagnrho, suav txij li Falaus tus tub hlob mus txog rau tus pojqhev uas zom zeb tus tub hlob. Tej tsiaj txhu thawj tug menyuam los yuav tuag tas huv tibsi thiab. Yuav muaj suab quaj suab nyiav ntshoo nrooj thoob plaws hauv lub tebchaws Iziv uas ibtxwm yeej tsis tau muaj dua lossis yuav tsis muaj ib zaug ntxiv lawm. Tiamsis cov Yixalayees nyob ntsiag to, twb tsis hnov ib lub suab dev tom tej neeg lossis tej tsiaj txhu li. Ces koj thiaj yuav paub hais tias, kuv yog tus TSWV uas tau muab ib yam los cais cov Iziv thiab cov Yixalayees.’ ” Mauxes xaus lus hais tias, “Tagnrho koj cov nomtswv yuav tsum tuaj qhau cev hlo pe kuv thiab lawv yuav tsa tes thov kom kuv coj tagnrho kuv haivneeg mus. Tom qab ntawd kuv mam li tawm mus.” Ces Mauxes npautaws heev ua ntsejmuag dub txig tawm hauv Falaus lub loog mus lawm. Tus TSWV hais rau Mauxes hais tias, “Falaus yuav tsis kam mloog koj lus, kom kuv thiaj tau ua kuv tej txujci rau hauv lub tebchaws Iziv no ntxiv.” Mauxes thiab Aloos ua tej txujci tseemceeb no tabmeeg Falaus, tiamsis tus TSWV ua rau Falaus muaj lub siab tawv, nws thiaj tsis tso cov Yixalayees tawm hauv lub tebchaws Iziv mus li. Tus TSWV hais rau Mauxes thiab Aloos thaum nkawd tseem nyob hauv lub tebchaws Iziv hais tias, “Lub hlis no yog lub ib hlis ntuj ntawm lub xyoo rau nej. Neb cia li hais rau cov Yixalayees kom paub hais tias, lub hlis no, hnub xiab kaug, kom ib tug txiv tsev twg yuav tsum xaiv ib tug menyuam yaj lossis ib tug menyuam tshis npaj rau nws tsevneeg. Yog yim neeg twg tsawg noj tsis tas tus tsiaj ntawd, kom nws thiab yim uas nyob ze nws koom tua ib tug tsiaj, lawv yuav tsum ntsuas saib yuav noj tas tus tsiaj luaj li cas, thiab lawv yuav tsum suav lawv cov neeg uas noj tus tsiaj ntawd huv tibsi. Nej muab tus menyuam yaj lossis tus menyuam tshis ntawd tua noj, tiamsis yuav tsum yog tus uas tsis muaj ib qho phem li; thiab yog tus txiv uas muaj hnubnyoog ib xyoos xwb. Ces lub hlis no hnub kaum plaub thaum tsaus ntuj, tagnrho cov Yixalayees yuav tsum tua cov tsiaj ntawd noj. Kom lawv txhua yim uas tua tsiaj noj, muab tej ntshav tsiaj coj los pleev rau saum hau qhovrooj thiab ob tug ncej qhovrooj. Hmo ntawd yuav tsum muab cov nqaij ci noj ntxuag cov ncuav uas tsis xyaw keeb thiab noj ntxuag tej zaub iab kom tas. Nej yuav tsum tsis txhob noj nqaij nyoos lossis muab hau noj, tiamsis nej yuav tsum muab ci kheej, tsis txhob kaus plab hnyuv thiab siab ntsws hlo li. Nej yuav tsum noj kom tas tsis txhob pub seem ib qho, mus txog rau tagkis kaj ntug li; yog nej noj tsis tas nej cia li muab hlawv huv tibsi povtseg. Nej yuav tsum noj tsawg tsuag kom tas, rau qhov nej yuav tu nra sawv kev mus, rau khau thiab tuav rawv nej tus pas nrig rau ntawm nej txhais tes. Pluas hmo no yog nej noj ua Kevcai Hla Dhau hwm kuv uas yog tus TSWV. “Hmo ntawd kuv yuav mus thoob plaws hauv lub tebchaws Iziv, tua cov Iziv txhua tus tub hlob thiab tej tsiaj thawj tug menyuam uas yog tus txiv kom tuag tas huv tibsi, thiab rau txim kom txhua nrho rau cov Iziv tej vajtswv. Kuv yog tus TSWV. Tej ntshav uas nej pleev ntawm qhovrooj yuav ua lub cim, cim nej tej tsev. Thaum kuv pom cov ntshav ntawd kuv yuav hla nej mus thiab rau txim rau cov Iziv, kom nej thiaj tsis raug kev puastsuaj. Nej nco ntsoov muab hnub no ua hnub tseemceeb rau nej. Nej yuav ua kevcai nco txog tej uas tus TSWV tau ua rau nej pom tas los lawm. Nej ua kevcai li no mus ibtxhis li.” Tus TSWV hais tias, “Nej yuav tsum noj tej ncuav uas tsis xyaw keeb kom puv xya hnub. Thawj hnub, nej yuav tsum muab tej keeb uas nyob hauv tsev povtseg huv tibsi, yog xya hnub ntawd leejtwg tseem noj ncuav xyaw keeb, nej tsis txhob suav hais tias tus ntawd yog kuv haivneeg lawm. Thawj hnub thiab hnub xya, nej yuav tsum kom sawvdaws tuaj sib sau ua ke suav ua hnub dawbhuv. Tsis pub nej ua ib yam haujlwm dabtsi rau ob hnub ntawd, tsuas pub nej ua pluas noj pluas haus xwb. Nej yuav tsum muab hnub uas nej ua kevcai noj ncuav tsis xyaw keeb no teem ua hnub uas tseemceeb, rau qhov hnub no yog hnub uas kuv coj nej txhua xeem tawm hauv tebchaws Iziv mus. Txhua xyoo rov txog hnub no, nej thiab nej cov xeebntxwv yuav tsum nco ntsoov ua txoj kevcai no. Lub ib hlis ntuj, suav txij li hmo kaum plaub mus txog hmo nees nkaum ib, nej yuav tsum noj ncuav tsis xyaw keeb. Xya hnub ntawd, tsis pub muaj ib qho keeb nyob hauv nej tej tsev hlo li. Txawm yog haivneeg Yixalayees lossis lwm haivneeg los xij, yog leejtwg tseem noj ncuav xyaw keeb, nej tsis txhob suav hais tias, tus ntawd yog kuv haivneeg lawm. Txawm yog nej nyob qhov twg los xij. Nej tsis txhob noj tej ncuav uas xyaw keeb li, nej yuav tsum noj tej ncuav uas tsis xyaw keeb xwb.” Mauxes hu cov Yixalayees cov thawjcoj tuaj ua ke thiab hais rau lawv hais tias, “Nej txhua tus nyias cia li mus xaiv nyias ib tug menyuam yaj lossis menyuam tshis, los rau nej tej tsevneeg tua noj ua Kevcai Hla Dhau. Nej muab ib re nplooj hixauv mus raus rau hauv lub phiab uas rau cov ntshav tsiaj, thiab coj cov ntshav ntawd mus pleev rau ob tug ncej qhovrooj thiab saum hau qhovrooj. Hmo ntawd tsis pub nej ib tug twg tawm rau nraum zoov mus txog tagkis kaj ntug. Thaum tus TSWV los tua cov Iziv, nws yuav pom tej ntshav uas nej pleev rau saum hau qhovrooj thiab ob tug ncej qhovrooj, nws yuav tsis pub tus Timtswv uas yog Txojkev tuag nkag los rau hauv nej tej tsev tua nej povtseg. Nej thiab nej cov tubki yuav tsum hwm txoj kevcai no mus ibtxhis tsis kawg li. Thaum nej mus txog hauv lub tebchaws uas tus TSWV coglus muab pub rau nej, nej yuav tsum nco ntsoov ua txoj kevcai no. Thaum nej cov menyuam nug nej hais tias, ‘Txoj kevcai no lub ntsiab yog li cas?’ Nej yuav tsum piav qhia rau lawv hais tias, ‘Yog txoj Kevcai Hla Dhau uas peb ua tus TSWV tsaug, rau qhov tus TSWV hla dhau peb cov Yixalayees tej vajtse mus tua cov Iziv, nws tua cov Iziv tiamsis nws tseg peb cia.’ ” Ib tsoom pejxeem Yixalayees txawm txhos caug ntua rau hauv av thiab pehawm Vajtswv. Ces lawv txawm rov qab los tsev thiab ua li tus TSWV tau samhwm rau Mauxes thiab Aloos nkawd lawm. Thaum ib tag hmo tus TSWV los tua cov Iziv cov tub hlob tuag tagnrho, suav txij li Falaus tus tub hlob, tus uas yuav los zaum saum lub zwmtxwv los txog rau cov neeg raug txim uas nyob hauv qhov tsaus ntuj cov tub hlob; thiab tagnrho tej tsiaj txhu thawj tug menyuam uas yog tus txiv puavleej raug tua tuag tas huv tibsi. Hmo ntawd, Falaus, nws cov nomtswv thiab tagnrho cov Iziv sawv los quaj nyiav ntshoo nrooj, rau qhov lawv tej tub hlob tuag tas huv tibsi lawm. Hmo ntawd, Falaus txib neeg mus hu Mauxes thiab Aloos tuaj cuag nws, nws hais rau nkawd hais tias, “Neb thiab cov Yixalayees cia li khiav tawm hauv peb lub tebchaws no mus pe tus TSWV raws li nej thov kuv. Nej cia li cab nej tej yaj, tej tshis thiab tej nyuj mus kom tas. Neb thov Vajtswv foom koob hmoov rau kuv thiab.” Cov Iziv txhib ceev nrooj kom cov Yixalayees cia li khiav tawm hauv lawv lub tebchaws thiab hais tias, “Yog nej tsis tawm mas peb yuav tuag tas li lauj!.” Cov Yixalayees thiaj li muab tej hmoov nplej tsis xyaw keeb uas lawv twb muab ntse tau lawm qhwv rau hauv tej khaubncaws, thiab kwv saum xubpwg mus. Lawv ua txhua yam raws li Mauxes twb hais rau lawv lawm, lawv thov cov Iziv tej nyiaj tej kub thiab tej tsoos tsho nqa huv tibsi mus. Tus TSWV ua rau cov Iziv hwm cov Yixalayees heev, lawv thiaj muab lawv tej nyiaj tej kub rau cov Yixalayees raws li cov Yixalayees thov. Yog li ntawd, cov Yixalayees thiaj sau tagnrho cov Iziv tej nyiaj txiag coj nrog lawv mus. Cov Yixalayees tawm hauv lub nroog Lamaxes mus rau nram lub nroog Xukaus. Cov txivneej muaj kwvyees li rau pua txhiab leej, tsis xam cov pojniam thiab cov menyuam. Muaj lwm haivneeg coob heev nrog lawv mus thiab, lawv cab yaj, cab tshis thiab cab nyuj coob ua npoj ntws nrog lawv mus. Lawv muab tej hmoov nplej tsis xyaw keeb uas lawv twb muab ntse tau hauv tebchaws Iziv lawm coj los cub ua ncuav noj, rau qhov cov Iziv ntiab lawv khiav tawm sai heev, lawv npaj tsis yeej tej ncuav uas xyaw keeb thiab tej khoom noj li. Cov Yixalayees nyob hauv lub tebchaws Iziv tau plaub puas peb caug xyoo. Thaum txog hnub uas txwm nkaus plaub puas peb caug xyoo, txhua xeem uas yog tus TSWV haivneeg txawm tawm hauv tebchaws Iziv mus. Thaum ib tag hmo tus TSWV coj cov Yixalayees tawm hauv lub tebchaws Iziv mus. Cov Yixalayees thiaj muab hmo ntawd los zov hmo, thiab ua kevcai nco txog tus TSWV ib tiam dhau rau ib tiam. Tus TSWV hais rau Mauxes thiab Aloos hais tias, “Ntawm no yog ua Kevcai Hla Dhau: tsis pub cov neeg txawv tebchaws noj rooj mov ua Kevcai Hla Dhau no, tiamsis txhua tus tubqhe uas nej yuav los, yog nej twb muab ua kevcai txiav tawv lawm tus ntawd noj tau. Tiamsis tus tuaj ua qhua lossis tus tuaj nrhiav zog uas los so hauv nej tsev, nej tsis txhob pub nrog nej noj. Pluas hmo no nyias yuav tsum noj hauv nyias tsev xwb, tsis txhob nqa tej nqaij tawm mus noj nraum zoov. Thiab nej tsis txhob muab tus tsiaj ntawd tej pobtxha lov li. Cov Yixalayees txhua tus yuav tsum tuaj koom ua txoj kevcai no, tiamsis tsis pub cov txivneej uas tsis tau ua kevcai txiav tawv noj rooj mov no li. Yog cov neeg txawv tebchaws uas nrog nej nyob tus twg xav nrog nej koom ua Kevcai Hla Dhau ua tus TSWV tsaug, nej yuav tsum xub muab nws tsevneeg txhua tus txivneej ua kevcai txiav tawv tso, nej mam li pub nws nrog nej noj. Nws yuav tsum ua kevcai txiav tawv ib yam li tus uas yug hauv tsevneeg Yixalayees. Cov Yixalayees thiab cov neeg txawv tebchaws uas los nrog nej nyob, sawvdaws yuav tsum coj txoj kevcai no.” Cov Yixalayees txhua tus puavleej ua raws li tej lus uas tus TSWV hais rau Mauxes thiab Aloos nkawd. Hnub ntawd yog hnub uas tus TSWV coj cov Yixalayees txhua xeem tawm hauv tebchaws Iziv mus. Tus TSWV hais rau Mauxes hais tias, “Nej yuav tsum muab nej cov Yixalayees tej tub hlob fij rau kuv mus ibtxhis, thiab nej yuav tsum muab tej tsiaj thawj tug menyuam uas yog tus txiv fij rau kuv ua kuv tug.” Mauxes hais rau cov Yixalayees hais tias, “Nej yuav tsum nco ntsoov hnub ntawd, rau qhov hnub ntawd tus TSWV uas muaj hwjchim loj kawg nkaus tau coj nej tawm hauv tebchaws Iziv qhov chaw uas nej ua luag qhev los. Hnub ntawd nej tsis txhob noj tej ncuav uas xyaw keeb li. Hnub ntawd yog lub ib hlis ntuj uas yog lub hli Anpis uas nej khiav tawm hauv lub tebchaws Iziv los. Tus TSWV tau coglus tseg rau nej cov yawgkoob hais tias nws yuav muab cov Kana-as, cov Hitis, cov Amoos, cov Hivis thiab cov Yenpus lub tebchaws rau nej nyob. Thaum Vajtswv coj nej mus txog rau hauv lub tebchaws vammeej uas av rog thiab zoo qoob, txhua xyoo thaum lub ib hlis ntuj nej yuav tsum ua kevcai noj ncuav tsis xyaw keeb li no. Xya hnub ntawd nej yuav tsum noj cov ncuav tsis xyaw keeb nkaus xwb, mas hnub xya nej yuav tsum ua rooj mov noj ua tus TSWV tsaug. Nej yuav tsum noj ncuav tsis xyaw keeb kom txwm nkaus xya hnub; tsis pub kom muaj keeb lossis ncuav xyaw keeb nyob hauv nej lub tebchaws li. Hnub uas pib ua kevcai ntawd, koj yuav tsum qhia txhua yam rau koj cov menyuam hais tias, ‘Kuv ua li no, rau qhov tus TSWV tau ua rau kuv thaum kuv khiav tawm hauv tebchaws Iziv los.’ Txoj kevcai no yuav ua rau nej nco ntsoov kawm thiab nco tus TSWV tej lus, ib yam li tej uas nej coj rawv ntawm nej tes lossis coj rawv saum nej hauvpliaj, ua rau nej nco ntsoov tus TSWV tej lus, rau qhov tus TSWV tus uas muaj hwjchim tau coj nej tawm nram tebchaws Iziv los. Nej yuav tsum ua txoj kevcai no txhua xyoo thaum txog lub caij no, tsis txhob tso tseg li. “Tus TSWV yuav coj nej mus nyob hauv cov Kana-as lub tebchaws uas nws twb coglus rau nej thiab nej cov yawgkoob lawm. Thaum nws muab lub tebchaws ntawd pub rau nej, nej yuav tsum muab nej tej tub hlob fij rau tus TSWV. Nej tej tsiaj thawj tus menyuam uas yog tus txiv puavleej yog tus TSWV tug, tiamsis txhua tus menyuam txiv neesluav, nej yuav tsum coj ib tug menyuam yaj mus hloov chaw txhiv ntawm tus TSWV rov qab. Yog nej tsis xav txhiv tus menyuam neesluav rov qab, nej cia li muab lov cajdab kom tuag. Nej yuav tsum txhiv nej tej tub hlob txhua tus rov qab huv tibsi thiab. Lwm hnub, thaum koj tus tub nug koj hais tias, ‘Ua li no, lub ntsiab yog li cas?’ Koj qhia rau nws hais tias, ‘Tus TSWV tau siv nws lub hwjchim uas loj kawg nkaus coj peb tawm nram tebchaws Iziv qhov chaw uas peb ua luag qhev los. Thaum Falaus muaj lub siab tawv tsis kam tso peb tawm, tus TSWV thiaj li tua cov Iziv tej tub hlob hauv lub tebchaws ntawd thiab tej tsiaj thawj tug menyuam uas yog tus txiv tuag tas huv tibsi. Vim li no peb thiaj li muab peb tej tsiaj thawj tus menyuam uas yog tus txiv tua fij rau tus TSWV, thiab txhiv peb tej tub hlob rov qab.’ Txoj kevcai no, yog ua ib qho rau nej nco ntsoov rau nruab siab ib yam li tej uas peb coj ntawm peb txhais tes lossis saum peb hauvpliaj, ua rau peb nco ntsoov hnub uas tus TSWV uas muaj hwjchim loj kawg nkaus tau coj peb tawm hauv lub tebchaws Iziv los.” Thaum Falaus tso cov Yixalayees lawm, Vajtswv tsis coj lawv taug txojkev uas raws ntug hiavtxwv ncaj nraim mus rau pem tebchaws Filitees, txawm yog txojkev ntawd ze los nws tsis coj lawv mus txoj ntawd. Vajtswv xav hais tias, “Kuv tsis xav kom cov Yixalayees hloov siab khiav rov qab mus rau nram lub tebchaws Iziv thaum muaj kev sib ntaus siab tua ntawm kev.” Yog li ntawd, Vajtswv thiaj coj lawv taug kev raws tiaj suabpuam mus rau tom Hiavtxwv Liab. Thaum cov Yixalayees taug kev tawm hauv lub tebchaws Iziv los, lawv yeej npaj cuabyeej ua rog nrog ncig tos sib tua thiab xwb. Mauxes coj Yauxej cov pobtxha nrog nws los, raws li Yauxej kom cov Yixalayees coglus rau Yauxej hais tias, “Thaum Vajtswv los pab nej dim lawm, nej yuav tsum coj kuv tej pobtxha tawm hauv lub tebchaws Iziv no nrog nej mus.” Cov Yixalayees khiav tawm hauv Xukaus mus tsuam chaw so rau ntawm Ethas uas nyob ntawm ntug tiaj suabpuam. Nruab hnub tus TSWV ua ib tauv huab mus ua lawv ntej coj lawv kev, thiab hmo ntuj nws ua ib tug nplaim hluavtaws cig lam lug mus ua lawv ntej kom lawv pom kev, lawv taug kev mus nruab hnub hmo ntuj los tau huv tibsi. Nruab hnub tauv huab coj lawv kev mus tas hnub, thiab hmo ntuj tus nplaim hluavtaws cig lam lug coj lawv kev mus tas hmo. Ces tus TSWV hais rau Mauxes hais tias, “Koj cia li kom cov Yixalayees rov qab mus tsuam chaw so rau ntawm Pis Hahilaus nyob hauv ntu nruab nrab ntawm Minkedaus thiab Hiavtxwv Liab uas nyob ze Npa-as Xefoos. Falaus xav hais tias, cov Yixalayees yuav mus mus los los tom tiaj suabpuam, thiab nrhiav tsis tau kev hla tiaj suabpuam tawm mus. Kuv yuav ua kom Falaus muaj lub siab tawv, thiab nws yuav caum nej qab tuaj, qhov uas kuv yeej Falaus thiab nws tej tubrog yuav ua rau kuv tau koob meej. Cov Iziv yuav paub hais tias, kuv yog tus TSWV.” Cov Yixalayees ua raws li tus tswv tej lus uas hais rau lawv lawm. Thaum muaj neeg mus qhia rau Falaus hais tias, cov Yixalayees khiav tas lawm, nws thiab nws cov nomtswv hloov dua siab thiab hais tias, “Ua cas peb lam ua li no? Peb txawm tso cov Yixalayees khiav tas, thiab peb tsis tau lawv los ua qhev li lawm!” Falaus thiaj txhij tubrog thiab npaj tsheb nees caij ntaus rog mus caum cov Yixalayees qab. Nws kom cov thawj tubrog caij rau pua lub tsheb nees caij ntaus rog uas zoo kawg nkaus, thiab lwm yam tsheb caij ntaus rog nrog nws mus thiab. Tus TSWV ua rau Falaus muaj lub siab tawv, thiab nws txawm mus caum cov Yixalayees uas muaj Vajtswv ua tus tsomkwm lawv. Cov Iziv cov tubrog caij nees thiab cov tubrog tsav tsheb nees tuaj caum cov Yixalayees qab. Lawv tuaj caum cuag cov Yixalayees ntawm ntug Hiavtxwv Liab, qhov chaw uas lawv tsuam chaw so thiab ze rau ntawm Pis Hahilaus thiab Npa-as Xefoos. Thaum cov Yixalayees pom Falaus thiab nws cov tubrog caum tuaj yuav cuag, mas lawv ntshai kawg li, lawv thiaj quaj zom zaws thov tus TSWV pab lawv. Lawv yws Mauxes hais tias, “Nyob tom tebchaws Iziv tsis muaj toj ntxas lawm los? Koj thiaj coj peb los tuag rau hauv tiaj suabpuam no puas yog? Ua cas koj tseem coj peb tawm hauv tebchaws Iziv los ua dabtsi thiab? Peb twb hais rau koj thaum tseem nyob tom tebchaws Iziv lawm hais tias, ‘Cia peb nyob twjywm; peb zoo siab ua cov Iziv qhev no ne’? Peb ua cov Iziv qhev zoo dua peb tuag tas rau hauv tiaj suabpuam no.” Mauxes ua tib zoo hais rau lawv tias, “Nej tsis txhob ntshai! Nej cia li nyob twjywm ntsia saib hnub no tus TSWV yuav pab nej li cas; nej yuav tsis pom cov Iziv no ib zaug ntxiv li lawm. Tus TSWV yuav pab nej tawmtsam, nej cia li ua twjywm.” Tus TSWV hais rau Mauxes hais tias, “Vim li cas nej yuav quaj thov kuv pab? Kom cov neeg cia li txav mus lawm tom ntej. Muab koj tus pas nrig taw rau saum nplaim dej hiavtxwv. Dej yuav faib rau ob sab, cov Yixalayees thiaj yuav tau taug kev av qhuav qhawv mus lawm sab tim ub. Kuv yuav ua rau cov Iziv muaj lub siab tawv kom lawv caum nej qab, thiab kuv yuav tau koob meej los ntawm qhov uas kuv yeej Falaus, nws cov tubrog, nws tej tsheb nees thiab nws cov tubrog tsav tsheb nees. Thaum kuv yeej lawv lawm, cov Iziv thiaj yuav paub hais tias, kuv yog tus TSWV.” Tus TSWV tus timtswv uas mus ua cov tubrog Yixalayees ntej, txav tuaj tom qab lawm. Tauv huab txawm tshem los thaiv nruab nrab ntawm cov tubrog Iziv thiab cov Yixalayees. Tauv huab ua rau cov tubrog Iziv sab tsaus ntuj nti, tiamsis ua rau cov Yixalayees sab pom kev kaj nrig, thiab ua rau ob tog txav tsis tau los sib ze ib hmo. Mauxes tsa tes rau saum dej hiavtxwv, tus TSWV tso cua tuaj sab hnubtuaj tuaj ntsawj hiavtxwv ib hmos kaj ntug ua rau dej hiavtxwv faib hlo rau ob sab ua kev qhuav qhawv, thiab cov Yixalayees taug kev av qhuav qhawv hauv plawv hiavtxwv mus rau sab tim ub, muaj dej nphau nphwv thaiv ob sab. Cov tubrog Iziv, tej nees, tej tsheb nees thiab cov neeg tsav tsheb nees, raws cov Yixalayees qab tuaj rau hauv hiavtxwv. Thaum kaj ntug txoog tus TSWV nyob hauv tus nplaim hluavtaws thiab tauv huab ntsia cov tubrog Iziv thiab ua rau cov tubrog Iziv ntshai ua ibce tshee hnyo. Thiab nws ua rau lawv tej log tsheb nees ntog tsis taus, lawv sib tham zom zaws hais tias, “Peb cia li khiav rov qab tsis txhob caum cov Yixalayees, rau qhov tus TSWV pab lawv tawmtsam peb lawm.” Ces tus TSWV hais rau Mauxes hais tias, “Koj cia li tsa koj txhais tes rau saum dej hiavtxwv, kom dej nphau los npog cov Iziv, lawv tej tsheb nees, thiab cov neeg tsav tsheb nees huv tibsi.” Mauxes txawm tsa tes rau saum dej hiavtxwv, thaum kaj ntug ua ciav dej rov ntom zoo nkaus li qub. Cov Iziv khiav tas zog kom dim, tiamsis tus TSWV muab lawv pov rau hauv hiavtxwv. Dej nphau los npog tej tsheb nees, cov neeg tsav tsheb nees thiab cov tubrog Iziv uas tabtom tuaj caum cov Yixalayees txog hauv plawv hiavtxwv tuag tas tsis seem ib tug li. Tiamsis cov Yixalayees taug kev qhuav qhawv hauv hiavtxwv mus rau sab tim ub, muaj dej nphau nphwv ntawm ob sab ntug kev. Hnub ntawd tus TSWV pab cov Yixalayees dim ntawm cov Iziv txhais tes, cov Yixalayees pom cov Iziv tuag ua sab ua sua raws ntug hiavtxwv. Thaum cov Yixalayees pom tus TSWV lub hwjchim uas nws yeej cov Iziv, cov Yixalayees ntshai kawg, lawv muab siab npuab tus TSWV thiab cia siab rau Mauxes tus uas yog tus TSWV tus tubtxib. Thaum ntawd Mauxes thiab cov Yixalayees hu nkauj ua tus TSWV tsaug hais tias: “Kuv yuav hu nkauj ua tus TSWV tsaug, rau qhov nws tau kovyeej cov yeebncuab; nws tau muab cov nees thiab cov neeg caij nees pov rau hauv hiavtxwv. Tus TSWV yog kuv lub zog thiab yog tus tiv thaiv kuv; nws yog tus uas cawm kuv dim. Nws yog kuv tus Vajtswv, kuv yuav hu nkauj ua nws tsaug, Nws yog kuv cov yawgkoob tus Vajtswv, kuv yuav hu nkauj qhuas nws lub hwjchim uas loj kawg nkaus. Tus TSWV yog tus thawj tubrog; nws lub npe hu ua tus TSWV. “Nws muab cov tubrog Iziv thiab lawv tej tsheb nees pov rau hauv hiavtxwv; lawv tej thawj tubrog uas tseemceeb tau tog thiab tuag tas rau hauv plawv Hiavtxwv Liab. Hiavtxwv tob nphau los npog nkaus lawv; lawv tog rau hauv qab thu ib yam li pobzeb. “Tus TSWV, koj sab tes xis muaj hwjchim heev; koj nyem tej yeebncuab tawg txua lawm. Koj lub hwjchim uas loj kawg nkaus ua rau koj cov yeebncuab tawg ua sab ua sua; koj txojkev chim hlawv lawv kub hnyiab tas ib yam li tej quavnyab. Koj tshuab pa rau saum hiavtxwv ua rau dej faib ua av qhuav qhawv; dej sawv tau li tus ntsa yeej; hauv qab thu hiavtxwv av qhuav qhawv li saum nruab nqhuab. Cov yeebncuab hais tias, ‘Kuv yuav caum lawv qab thiab ntes kom tau lawv; kuv yuav muab lawv tej nyiaj txiag los sib faib thiab huab txhua yam uas kuv xav tau; kuv yuav rho kuv rab ntaj thiab txeeb tagnrho tej uas lawv muaj.’ Tiamsis tus TSWV, koj tshuab ib pas xwb, ua rau cov Iziv tog tagnrho rau hauv qab thu dej ib yam li tej quav txhuas. “Tus TSWV, puas muaj lwm tus tswv uas yuav zoo npaum li koj? Leejtwg thiaj ua tau tej txujci tseemceeb li koj? Koj tsa hlo koj sab tes xis, ces av txawm nqos kiag peb cov yeebncuab. Koj nco ntsoov tej lus uas koj cog tseg, koj coj cov neeg uas koj txhiv lawm, txhua leej khiav tawm los; koj lub hwjchim tsomkwm lawv mus nyob lub tebchaws uas zoo kawg nkaus. Txhua haivneeg uas hnov tej no, lawv ntshai thiab poob siab ua ibce tshee hnyo; cov neeg Filitees ntshai kev puastsuaj ua ibce tshee hnyo. Cov neeg Edoos tej nomtswv los puavleej ntshai; Mau-am cov thawj tubrog ntshai ua ibce tshee hnyo; cov neeg Kana-as tsis muaj kev cia siab. Tej kev poob siab tau ua rau lawv ntshai kawg. Tus TSWV, lawv pom koj lub hwjchim, lawv ibce txhav tas ib yam li phab zeb cia mus txog thaum koj haivneeg mus dhau lawm, yog haivneeg uas koj tau coj tawm hauv txojkev ua luag qhev los. Koj coj lawv los thiab tso lawv nyob rau saum koj lub roob, qhov chaw ntawd yeej yog koj qhov chaw, tus TSWV, koj xaiv qhov chaw ntawd ua koj lub tsev, lub Tuamtsev uas koj tau ua. Tus TSWV, koj yuav ua Vajntxwv mus ibtxhis tsis kawg li.” Cov Yixalayees taug kev qhuav qhawv hauv hiavtxwv mus rau sab tim ub, tiamsis thaum cov tubrog Iziv tej tsheb nees thiab cov neeg tsav tsheb nees mus hauv hiavtxwv, tus TSWV ua kom dej nphau los npog lawv tuag tas huv tibsi. Milias uas yog tus cev Vajtswv lus, nws yog Aloos tus muam, nws nqa ib lub nruas npuaj mus ua ntej, cov pojniam ib leeg nqa ib lub nruas npuaj seevcev raws nws qab. Milias hu nkauj rau lawv mloog hais tias: “Hu nkauj ua Vajtswv tsaug, rau qhov nws tau kovyeej yeebncuab; nws tau muab cov nees thiab cov neeg caij nees pov tas rau hauv qab thu hiavtxwv.” Mauxes txawm coj cov Yixalayees sawv kev tawm ntawm ntug Hiavtxwv Liab mus rau tom tiaj suabpuam Sules. Lawv mus tau peb hnub ke rau tom tiaj suabpuam, tiamsis nrhiav tsis muaj dej haus li. Lawv mus txog ntawm ib qhov chaw npe hu ua Malas, tiamsis lub qhovdej uas nyob ntawd iab heev, lawv haus tsis taus li. Vim li ntawd, thiaj tis npe rau qhov chaw ntawd hu ua Malas. Cov Yixalayees yws Mauxes thiab nug hais tias, “Peb yuav haus dabtsi?” Mauxes thov tus TSWV, thiab tus TSWV qhia ib yav ntoo rau Mauxes, ces Mauxes muab yav ntoo ntawd pov rau hauv lub qhovdej, dej txawm zoo haus tsis iab lawm. Tus TSWV tau muab kevcai rau lawv thiab nws sim lawv siab ntawm qhov chaw ntawd. Tus TSWV hais rau lawv hais tias, “Yog nej mloog kuv lus thiab ua raws li kuv lub siab nyiam, thiab muab siab npuab kuv tej kevcai txhua nqe huv tibsi, kuv yuav tsis rau txim rau nej kom muaj mob muaj nkeeg li uas kuv tso rau cov Iziv. Kuv yog tus TSWV, tus uas kho nej tej mob tej nkeeg.” Tom qab ntawd lawv los txog rau ntawm Elimas, nyob rau qhov ntawd muaj kaum ob lub qhovdej cag, thiab muaj xya caum tsob toovlaj; lawv tsuam chaw so ze rau ntawm cov qhovdej ntawd. Cov Yixalayees sawv kev ntawm Elimas los, yog hnub kaum tsib, lub ob hlis ntuj, tom qab uas lawv tawm nram tebchaws Iziv los, lawv thiaj los txog rau hauv lub tiaj suabpuam Xees uas nyob ntawm Elimas thiab lub roob Xinais ntu nruab nrab. Lawv yws Mauxes thiab Aloos nkawd tom tiaj suabpuam kawg li thiab hais rau nkawd hais tias, “Peb txaus siab cia tus TSWV muab peb tua kom tuag tas rau nram tebchaws Iziv. Peb nyob nrad, peb yeej tau zaub, tau nqaij thiab tau mov noj raws li peb siab xav. Tiamsis neb coj peb los nyob rau ntawm tiaj suabpuam no, kom peb tuag tshaib tas huv tibsi xwb.” Ces tus TSWV hais rau Mauxes hais tias, “Nimno kuv yuav tso mov poob saum ntuj los rau nej noj ib yam li nag los. Cov neeg niaj hnub yuav tau mus khaws, thiab khaws ib zaug kom txaus noj ib hnub xwb. Kuv ua li no, yog kuv sim saib lawv puas ua raws li kuv tej lus. Hnub rau, lawv yuav tsum khaws kom tshaj qhov uas lawv niaj hnub khaws ib npaug ntxiv npaj tseg cia.” Mauxes thiab Aloos nkawd thiaj hais rau cov Yixalayees hais tias, “Hnub no thaum tsaus ntuj, nej yuav paub hais tias, tus TSWV yog tus uas coj nej khiav tawm nram tebchaws Iziv los. Thaum sawv ntxov nej yuav pom tus TSWV lub tshwjchim uas ci ntsa iab, nws twb hnov tej lus uas nej yws nws lawm; qhov tseeb, yeej yog nej yws tus TSWV, rau qhov wb tsuas yog ob tug uas cev nws tej lus xwb.” Mauxes hais ntxiv hais tias, “Tus TSWV yog tus uas yuav muab nqaij los rau nej noj hmo no, thiab thaum sawv ntxov los nej yuav tau mov noj tsis tas li, rau qhov nws hnov tej lus uas nej yws nws lawm. Thaum nej yws wb, twb yog nej yws tus TSWV ntag.” Mauxes hais rau Aloos hais tias, “Koj hais kom sawvdaws cia li tuaj sawv tabmeeg tus TSWV, rau qhov nws twb hnov lawv tej lus yws lawm.” Thaum Aloos tseem tabtom hais rau sawvdaws, lawv txawm tig mus ntsia tom tiaj suabpuam, thiab tamsim ntawd lawv txawm pom tus TSWV lub tshwjchim ci ntsa iab tshwm saum cov huab tuaj. Tus TSWV hais rau Mauxes hais tias, “Kuv hnov cov Yixalayees tej lus yws lawm. Cia li qhia rau lawv hais tias, thaum tsaus ntuj zuag lawv yuav tau nqaij noj, thiab thaum sawv ntxov lawv yuav tau ncuav noj txaus nkaus li lawv lub siab nyiam. Ces lawv yuav paub hais tias kuv yog tus TSWV uas yog lawv tus Vajtswv.” Thaum tsaus ntuj zuag txawm muaj ncuab coob heev ya ua npoj ntws los tsaws puv nkaus rau hauv lawv lub yeej, thiab thaum sawv ntxov muaj lwg ntsu thoob plaws lawv lub yeej. Thaum lwg yaj tas lawm, muaj tej daim zoo li te khov dawb paug rau saum tej suabpuam. Thaum cov Yixalayees pom tej ntawd, lawv tsis paub xyov yog dabtsi thiab lawv sib nug zom zaws hais tias, “Cov no yog dabtsi?” Mauxes teb hais tias, “Cov ntawd yog tej mov uas tus TSWV tso los rau nej noj ntag. Tus TSWV kom nej nyias mus khaws kom txaus nyias tsevneeg noj. Khaws ib leeg ob taig kom txhua nws tsevneeg xwb.” Cov Yixalayees ua raws li Mauxes hais, muaj ibtxhia khaws tau ntau ibtxhia khaws tau tsawg. Thaum lawv muab los luj, cov uas khaws tau ntau kuj tsis muaj tshaj, cov uas khaws tau tsawg kuj muaj txaus. Sawvdaws nyias khaws txaus nyias noj xwb. Mauxes hais rau lawv hais tias, “Tsis txhob khaws los npaj cia rau tagkis.” Tiamsis muaj qee leej tsis mloog Mauxes lus, lawv txawm qee ib nrab cia npaj rau tagkis. Tagkis kaj ntug tej mov ntawd ua kas thiab lwj lawm, Mauxes chim rau lawv heev. Cov Yixalayees niaj tagkis sawv ntxov mus khaws, lawv nyias khaws txaus nyias noj; thaum tshav ntuj tuaj kub lawm, tej mov uas lawv khaws tsis tas yaj huv tibsi lawm. Thaum txog hnub rau lawv khaws ib leeg plaub taig kom txhua tsevneeg. Cov Yixalayees cov thawjcoj tuaj piav zaj no qhia rau Mauxes mloog, Mauxes teb lawv hais tias, “Tej lus no yog tus TSWV samhwm cia: tagkis yog hnub so uas yog tus TSWV hnub. Yog li ntawd, tej uas zoo ci, cia li muab ci thiab tej uas zoo hau cia li muab hau. Tej uas seem cia li muab khaws tseg cia rau tagkis.” Cov Yixalayees ua raws li Mauxes hais, lawv khaws tej mov ntawd cia txog tagkis los cov mov ntawd tsis lwj lossis tsis ua kas li. Mauxes hais rau lawv hais tias, “Hnub no nej yuav tsum noj tej mov ntawd, rau qhov hnub no yog hnub Xanpataus uas yog tus TSWV hnub, thiab nej yuav tsis pom muaj mov nyob tom tshavpuam lawm. Nej tsuas tau khaws rau hnub xwb, tiamsis hnub xya, yog hnub xanpataus, yuav tsis muaj mov rau nej khaws lawm.” Hnub xya muaj qee leej tseem mus nrhiav khaws mov, tiamsis tsis pom muaj ib lub mov nyob qhov twg li. Tus TSWV hais rau Mauxes hais tias, “Nej tseem yuav tawv tsis ua raws li kuv tej lus thiab kuv tej kevcai mus txog thaum twg? Nej yuav tsum nco ntsoov hais tias, tus TSWV pub nej muaj hnub xanpataus, yog li ntawd, hnub rau kuv thiaj pub mov kom txaus nej noj ob hnub. Hnub xya txhua tus nyias yuav tsum nyob twjywm hauv nyias tsev, nws yuav tsum tsis txhob tawm mus nraum zoov hlo li.” Yog li ntawd, hnub xya cov neeg sawvdaws thiaj so, tsis ua ib yam haujlwm dabtsi li. Cov Yixalayees hu cov mov ntawd ua manas. Cov mov ntawd ua tej lub dawb dawb luaj li noob zaub txhwb, qab ib yam li mov xyaw zib ntab. Mauxes hais tias, “Tus TSWV samhwm rau peb, kom peb khaws ib co manas tseg cia rau peb tej xeebntxwv tau saib, lawv thiaj li pom tej mov uas tus TSWV pub rau peb noj tom tiaj suabpuam thaum nws coj peb tawm nram tebchaws Iziv los.” Mauxes hais rau Aloos hais tias, “Muab ib lub hub los yawm ob taig manas ntim rau hauv, thiab nqa mus txawb rau hauv tus TSWV lub Tsevntaub, khaws tseg rau peb tej xeebntxwv tau saib.” Raws li tus TSWV tau samhwm rau Mauxes lawm, Aloos thiaj muab lub hub uas ntim cov manas ntawd coj mus txawb rau ntawm lub Phijxab uas ntim Vajtswv tej lus coglus tseg. Cov Yixalayees noj cov manas ntawd tau plaub caug xyoo, lawv thiaj los txog rau hauv tebchaws Kana-as qhov chaw uas lawv los ua vaj ua tsev nyob. ( Lub thoob uas sawvdaws ibtxwm yeem nplej ntim tau nees nkaum tais.) Cov Yixalayees sawv kev ntawm tiaj suabpuam Xees los, lawv tshais chaw ib qho rau ib qho ua ntu zus raws li tus TSWV hais. Lawv los tsuam chaw rau ntawm Lefidees, tiamsis thaj tsam ntawd tsis muaj dej haus hlo li. Lawv thiaj tuaj yws Mauxes hais tias, “Cia li nrhiav dej rau peb haus!” Mauxes teb lawv hais tias, “Vim li cas nej yuav yws li ko? Ua cas nej yuav sim tus TSWV siab?” Tiamsis cov neeg nqhis dej heev mas lawv thiaj pheej yws Mauxes tsis tseg li. Lawv yws hais tias, “Vim li cas koj thiaj coj peb tawm nram tebchaws Iziv los? Koj puas paub hais tias, peb cov menyuam, peb tej tsiaj txhu thiab peb twb yuav tuag dej?” Mauxes thov tus TSWV hais tias, “Kuv yuav ua li cas rau cov neeg no thiaj li zoo? Lawv twb yuav muab pobzeb ntaus kom kuv tuag.” Tus TSWV hais rau Mauxes hais tias, “Coj cov Yixalayees tej thawjcoj qee leej nrog koj, thiab nej cia li mus ua sawvdaws ntej. Nqa koj tus pas nrig uas koj nplawm tus dej Niles nrog koj mus. Kuv yuav sawv saum lub pobzeb uas nyob saum roob Xinais. Cia li ntaus lub pobzeb ntawd, dej yuav tawm hauv los rau cov neeg haus.” Mauxes ua li ntawd rau cov Yixalayees tej thawjcoj saib ntsoov. Thiaj tis npe rau qhov chaw ntawd hu ua Maxas thiab Melinpas, rau qhov cov Yixalayees tau yws thiab sim tus TSWV siab thaum lawv nug hais tias, “Tus TSWV nrog peb nyob los tsis nrog?” Cov Amalej cov tubrog tuaj tua cov Yixalayees ntawm Lefidees. Mauxes hais rau Yausuas hais tias, “Tagkis koj cia li xaiv peb cov txivneej ibtxhia mus tua cov Amalej. Kuv yuav mus sawv saum ncov roob thiab tsa tus pas nrig uas Vajtswv kom kuv nqa.” Yausuas ua raws li Mauxes tau samhwm rau nws, thiab tawm mus tua cov Amalej. Mauxes, Aloos thiab Hules lawv nce mus saum roob. Thaum Mauxes tsa nws txhais tes, cov Yixalayees tua yeej, tiamsis thaum nws tso tes, cov Amalej tua yeej zuj zus. Thaum Mauxes tsaug npab lawm, Aloos thiab Hules nkawd thiaj mus nqa pobzeb los rau Mauxes zaum, nkawd ib leeg sawv ib sab tuav Mauxes ob txhais npab, thiab tsa mus txog thaum hnub poob qho. Lawv ua li ntawd, Yausuas thiaj tua yeej cov Amalej. Ces tus TSWV hais rau Mauxes hais tias, “Koj cia li sau zaj no tseg cia, sawvdaws thiaj li yuav nco ntsoov mus ibtxhis. Qhia rau Yausuas paub hais tias, kuv yuav ua kom cov Amalej puastsuaj tas huv tibsi mus.” Mauxes ua tau ib lub thaj thiab tis npe rau lub thaj ntawd hu ua “Tus TSWV yog kuv tus Chij.” Mauxes hais tias, “Tsa tus TSWV tus chij kom siab! Tus TSWV yuav tawmtsam cov Amalej ib tiam dhau ib tiam, mus ibtxhis li!” Mauxes yawmtxiv Yethoos uas yog tus povthawj hauv tebchaws Midias, hnov txog tej uas Vajtswv ua pab Mauxes thiab pab cov Yixalayees thaum nws coj lawv tawm nram tebchaws Iziv los. Yethoos coj Mauxes tus pojniam Xipaulas uas thaum Mauxes xa rov qab mus nrog nws nyob, thiab xa Nkesoos, Eli-exes uas yog Xipaulas ob tug tub tuaj rau Mauxes. (Mauxes hais tias, “Kuv yog neeg txawv tebchaws, mus nyob rau hauv lub tebchaws uas kuv ibtxwm tsis tau paub dua”; yog li ntawd, nws thiaj tis nws tus tub hlob npe hu ua Nkesoos.) Mauxes tseem hais ntxiv hais tias, “Kuv txiv tus Vajtswv pab kuv thiab cawm kuv dim ntawm Falaus rab ntaj uas yuav tua kuv povtseg”, nws thiaj tis tus tub yau npe hu ua Eli-exes. Mauxes yawmtxiv Yethoos, coj Mauxes tus pojniam thiab Mauxes ob tug tub tuaj rau Mauxes hauv tiaj suabpuam, ntawm thaj chaw uas Mauxes los tsuam yeej nyob ze rau ntawm Vajtswv lub roob dawbhuv. Yethoos txib neeg mus hais rau Mauxes hais tias, “Kuv uas yog koj yawmtxiv Yethoos, kuv tuaj xyuas koj thiab kuv coj koj pojniam thiab nws ob tug tub tuaj txog lawm.” Mauxes thiaj tawm mus ntsib nws yawmtxiv, hawm thiab nwj nws. Ces lawv txawm sib nug txog kev noj qab nyob zoo, thiab lawv mus rau hauv Mauxes lub tsevntaub lawm. Mauxes piav txhua yam uas tus TSWV tau cawm cov Yixalayees ua ntu zus ntawm Falaus thiab cov Iziv rau nws yawmtxiv Yethoos mloog. Mauxes tseem piav tej kev nyuaj siab uas cov Yixalayees raug thaum lawv taug kev los thiab tej uas tus TSWV cawm lawv dim rau Yethoos mloog huv tibsi. Thaum Yethoos hnov txhua yam no, nws zoo siab kawg li thiab nws hais tias, “Ua tus TSWV tsaug uas nws tau cawm nej dim ntawm Falaus thiab cov Iziv los! Ua tus TSWV tsaug uas nws tau cawm nws haivneeg dim ntawm txojkev ua luag qhev los lawm! Nimno kuv paub hais tias, tus TSWV yog tus uas muaj hwjchim loj tshaj plaws tej vajtswv huv tibsi, rau qhov nws tau ua tej no rau cov Iziv, thaum uas lawv tsimtxom cov Yixalayees hnyav heev.” Yethoos coj tsiaj tuaj tua hlawv kheej thiab coj khoom tuaj fij rau Vajtswv, ces Aloos thiab cov Yixalayees tej thawjcoj thiaj tuaj nrog nws noj rooj mov tseemceeb uas ua Vajtswv tsaug ntawd. Hnub tom qab Mauxes txawm mus nyob tu cov pejxeem tej plaub, thiab nws tu plaub thaum sawv ntxov mus txog thaum tsaus ntuj. Thaum Yethoos pom txhua yam uas Mauxes ua ntawd, nws txawm nug hais tias, “Koj ua dabtsi li no rau cov pejxeem? Vim li cas koj tib leeg yuav tu plaub rau cov pejxeem, thiab nrog cov pejxeem sawv ntawm no thaum sawv ntxov mus txog thaum tsaus ntuj li?” Mauxes teb hais tias, “Kuv yuav tsum tau ua li no rau qhov cov pejxeem tuaj cuag kuv, mas yog lawv xav paub qhov uas ua haum Vajtswv siab nyiam. Thaum muaj ob tug neeg sib cav sib ceg, nkawd tuaj cuag kuv, kuv ua tus taug nkawd tej lus, thiab txiav txim rau nkawd saib leejtwg yog tus muaj cai, thiab kuv muab Vajtswv tej lus samhwm thiab kevcai los qhia rau nkawd.” Yethoos teb hais tias, “Koj ua li no tsis yog lawm. Koj thiab cov pejxeem uas tuaj cuag koj yuav qaug zog heev. Tej haujlwm no hnyav heev rau koj, koj ib leeg xwb yuav tsis muaj peevxwm ua tau. Koj mloog kuv hais, kuv yuav pab tswvyim qee yam rau koj, thiab thov Vajtswv nrog nraim koj. Koj yuav tsum ua tus sawv cev cov neeg rau ntawm Vajtswv thiab coj lawv tej plaub ntug mus cuag nws xwb. Koj yuav tsum qhia Vajtswv txoj kevcai rau lawv, thiab qhia rau lawv ua lawv lub neej kom raws li kevcai. Tiamsis koj yuav tsum xaiv ib co txivneej uas muaj peevxwm hauv cov Yixalayees thiab tsa lawv ua cov thawj kav cov pejxeem: tsa thawjcoj kav ib txhiab leej, kav ib puas leej, kav tsib caug leej thiab kav kaum leej. Lawv cov no yuav tsum yog cov uas hwm Vajtswv, yog cov uas sawvdaws cia siab tau rau thiab yog cov uas tsis yuav luag tej nyiaj xiab. Cia lawv ua cov tu plaub ntug rau cov pejxeem mus li. Tej plaub ntug loj mam kom lawv coj tuaj cuag koj, tiamsis tej plaub ntug me cia rau lawv tu. Ua li no koj lub nra thiaj yuav sib, rau qhov lawv yuav pab koj ris koj lub nra. Yog koj ua raws li Vajtswv hais, koj lub zog yuav tsis ntaug, thiab cov pejxeem yuav rov mus tsev zoo siab hlo.” Mauxes mloog nws yawmtxiv tej lus qhia, thiab xaiv cov neeg uas muaj peevxwm hauv cov Yixalayees. Nws muab lawv tsa ua thawjcoj kav ib txhiab leej, kav ib puas leej, kav tsib caug leej thiab kav kaum leej. Lawv ua cov tu tej plaub ntug me rau cov pejxeem, tiamsis tej plaub ntug loj lawv coj tuaj rau Mauxes tu. Ces Mauxes txawm xa nws yawmtxiv Yethoos sawv kev, thiab Yethoos mus tsev lawm. thiab Mauxes nce mus cuag Vajtswv saum roob. Tus TSWV hu saum roob tuaj rau Mauxes thiab qhia kom nws mus hais rau cov Yixalayees uas yog Yakhauj cov xeebntxwv hais tias, “Nej twb pom kuv uas yog tus TSWV ua rau cov Iziv thiab kuv tau puag rawv nej los ib yam li tus dav puag rawv nws cov menyuam hauv nws ob sab qab tis. Nimno, yog nej mloog kuv lus thiab ua raws li kuv tej lus cog tseg, nej thiaj yuav yog kuv haivneeg. Tagnrho lub ntiajteb no yeej yog kuv li, tiamsis nej yog cov uas raug xaiv los ua kuv haivneeg, nej yog cov uas yuav tau ua povthawj ua kuv tes haujlwm thiab yog ib haivneeg dawbhuv. Ntawm no yog tej lus uas koj coj mus hais rau cov Yixalayees.” Yog li ntawd, Mauxes thiaj nqis los thiab hu tagnrho cov pejxeem thiab cov thawjcoj tuaj ua ke, nws piav tej lus uas tus TSWV hais rau nws rau lawv mloog. Ces lawv txawm thooj txhij teb hais tias, “Peb yuav txaus siab ua txhua yam li tus TSWV hais,” Mauxes thiaj piav tej lus uas lawv lees ntawd rau tus TSWV. Tus TSWV hais rau Mauxes hais tias, “Kuv yuav los cuag koj hauv tauv huab uas dub tsaus nti, kom cov pejxeem thiaj li hnov kuv lub suab nrog koj tham thiab txij no mus yav tom ntej lawv thiaj yuav ntseeg koj tej lus.” Mauxes piav cov pejxeem tej lus rau tus TSWV mloog, thiab tus TSWV hais rau Mauxes hais tias, “Cia li mus cuag cov pejxeem thiab hais rau lawv hais tias, lawv muab hnub no thiab tagkis los tu lawv lub siab kom zoo mus pehawm Vajtswv. Lawv yuav tsum ntxhua lawv tej khaubncaws huv tibsi, thiab nagkis lawv tu cev kom txhij. Hnub ntawd kuv yuav los saum Roob Xinais rau sawvdaws pom kuv. Koj yuav tsum kem ciam ncig lub taw roob, kom cov pejxeem tsis txhob hla tus ciam ntawd, thiab hais rau lawv kom tsis txhob nce mus saum roob lossis mus ze lub taw roob. Yog leejtwg cev taw mus tsuj lub taw roob, tus ntawd yuav raug tua povtseg; yuav tsum muab pobzeb ntaus lossis muab hneevnti tua nws kom tuag, tsis pub leejtwg mus chwv nws li. Txawm yog neeg lossis tsiaj los yuav tsum muab tua kom tuag. Thaum hnov suab raj nrov lawm, mam pub cov pejxeem nce mus saum roob.” Ces Mauxes nqis saum roob los thiab hais rau cov pejxeem kom npaj mus pehawm Vajtswv. Yog li ntawd, lawv thiaj li ntxhua lawv tej ris tsho, thiab Mauxes hais rau lawv hais tias, “Nej sawvdaws tu cev thiab npaj kom txhij rau nagkis, thiab tsis pub leejtwg nrog pojniam pw li.” Hnub peb thaum sawv ntxov txawm muaj xob nroo thiab xob laim cig liab pesvog, pos huab tsaus nti npog nkaus saum roob, thiab hnov ib lub suab raj nrov heev. Ua rau cov neeg uas nyob hauv lawv lub yeej ntshai ibce tshee hnyo. Mauxes coj lawv tawm hauv yeej mus ntsib Vajtswv, lawv mus sawv rau ntawm taw roob. Pa ncho auv niab tsaus nti puv nkaus saum Roob Xinais, rau qhov tus TSWV ua hluavtaws los saum roob. Tej pa ncho auv niab ib yam li ib cub hluavtaws, thiab lub roob co ua zog koog. Lub suab raj txawm nrov heev zuj zus tuaj. Mauxes hais rau Vajtswv, thiab Vajtswv teb Mauxes hauv lub suab xob tuaj. Tus TSWV los rau saum Roob Xinais thiab nws hu Mauxes mus cuag nws rau saum roob. Mauxes thiaj nce mus rau saum roob thiab tus TSWV hais rau Mauxes hais tias, “Rov qab mus nram cov pejxeem thiab ceebtoom rau sawvdaws kom tsis txhob hla tus ciam tuaj cuag kuv, yog lawv tsis mloog, coob leej yuav raug tua tuag. Txawm yog cov povthawj los lawv yuav tsum ua kevcai ntxuav lawv kom huv tso mam li tuaj cuag kuv, yog lawv tsis ua li ntawd kuv yuav rau txim rau lawv.” Mauxes hais rau tus TSWV hais tias, “Cov pejxeem tuaj tsis tau, rau qhov koj twb samhwm rau peb sawvdaws kom kem ciam ncig lub roob, cia ua qhov chaw tseemceeb lawm.” Tus TSWV hais rau Mauxes hais tias, “Koj cia li nqis mus coj Aloos nrog koj tuaj, tiamsis tsis txhob pub cov povthawj thiab cov pejxeem hla dhau tus ciam tuaj cuag kuv, yog lawv tsis mloog kuv lus, kuv yuav rau txim rau lawv.” Ces Mauxes nqis rov qab los rau nram cov pejxeem thiab qhia rau lawv paub tej uas tus TSWV tau hais rau nws lawm. Cov lus no yog Vajtswv lus, thiab Vajtswv yog tus hais: “Kuv yog tus TSWV uas yog nej tus Vajtswv, tus uas coj nej tawm nram tebchaws Iziv uas nej ua luag qhev los.” “Tsis txhob pe lwm tus vajtswv, tiamsis pe kuv tib leeg xwb. “Tsis txhob puab tej mlom uas zoo li tej uas nyob saum nruab ntug lossis hauv ntiajteb no, lossis hauv tivtxwv rau nej pe. Tsis txhob pe ib tug mlom twg li, rau qhov kuv yog tus TSWV uas yog nej tus Vajtswv, kuv khib nej heev, kuv yog tus TSWV uas rau txim rau cov neeg uas ntxub kuv thiab rau lawv tej xeebntxwv mus txog peb thiab plaub tiam neeg. Tiamsis kuv yuav qhia kuv txojkev hlub rau cov uas muab siab npuab kuv thiab coj raws li kuv tej kevcai, ib tiam dhau ib tiam mus txog ntau txhiab tiam neeg. “Tsis txhob muab kuv lub npe mus hais ua dog ua dig, rau qhov kuv yog tus TSWV uas yog nej tus Vajtswv, kuv yuav rau txim rau cov neeg uas muab kuv lub npe mus hais ua dog ua dig. “Nco ntsoov hnub Xanpataus ua hnub tseemceeb. Nej ua nej tej haujlwm rau hnub, tiamsis hnub xya yog hnub so thiab pehawm tus TSWV. Hnub ntawd tsis pub leejtwg ua haujlwm li, tsis hais nej, nej tej tub tej ntxhais, nej tej tubqhe, nej tej tsiaj txhu lossis lwm haivneeg uas nrog nej nyob hauv nej lub tebchaws. Kuv yog tus TSWV, rau hnub ntawd kuv tsim lub ntiajteb, lub ntuj, dej hiavtxwv, txhua yam uas nyob saum nruab ntug, nyob hauv ntiajteb no thiab hauv hiavtxwv, tiamsis hnub xya yog hnub uas kuv so. Yog li ntawd, kuv uas yog tus TSWV, thiaj foom koob hmoov rau hnub Xanpataus thiab muab hnub ntawd ua hnub tseemceeb. “Yuav tsum hwm nej niam nej txiv, nej thiaj yuav muaj sia ua neej nyob ntev rau hauv lub tebchaws uas kuv muab pub rau nej nyob. “Tsis txhob tua neeg. “Tsis txhob deev luag pojniam luag txiv. “Tsis txhob ua tubsab. “Tsis txhob ua timkhawv tsis tseeb ntxo kwvtij zejzog. “Tsis txhob ntshaw luag vaj luag tsev; tsis txhob ntshaw luag pojniam, luag tej tubqhe, luag tej nyuj, luag tej neesluav lossis tej uas yog luag tug.” Thaum sawvdaws hnov xob nroo thiab hnov suab raj nrov, lawv pom xob laim thiab pa ncho auv niab saum roob, lawv ntshai ua ibce tuag tag thiab sawv deb deb saib xwb. Lawv hais rau Mauxes hais tias, “Yog koj qhia peb, peb yuav mloog koj lus; tiamsis peb ntshai heev yog tus TSWV hais rau peb, mas ntshai peb yuav tuag tas.” Mauxes teb hais tias, “Tsis txhob ntshai; Vajtswv los sim nej siab thiab ua kom nej hwm nws, kom nej tsis txhob mus ua txhaum xwb.” Tiamsis cov pejxeem tseem sawv nrug deb heev, tsuas yog Mauxes tib leeg thiaj li mus ze tauv huab dub tsaus nti uas Vajtswv nyob xwb. Vajtswv kom Mauxes hais rau cov Yixalayees hais tias, “Nej twb pom kuv uas yog tus TSWV hais saum ntuj tuaj rau nej lawm. Yog li ntawd, nej tsis txhob nchuav mlom nyiaj mlom kub los rau nej pe. Muab av los puab ib lub thaj ua qhov chaw uas coj nej tej yaj, tej nyuj tuaj tua hlawv kheej theej txhoj thiab ua kev sib raug zoo nrog kuv. Txhua qhov chaw uas kuv kom nej pehawm kuv, kuv yuav nrog nej nyob thiab foom koob hmoov rau nej. Yog nej muab pobzeb teeb ua kuv lub thaj, tsis txhob muab tej pobzeb uas txaug tau lawm ua, rau qhov tsis tsimnyog muab tej pobzeb uas txaug tau lawm los ua kuv lub thaj. Nej tsis txhob ua kuv lub thaj kom muaj qib ntai nce rau saum; yog nej ua li ntawd, thaum nej nce mus rau saud luag yuav pom nej chaw txajmuag. “Muab cov kevcai nram no rau cov pejxeem Yixalayees: Yog nej yuav cov Henplais los ua qhev, nws yuav tsum ua nej qhev kom txwm nkaus rau xyoo. Xyoo xya, nws mam li nyob ywj siab thiab tsis raug them nqi txhiv dabtsi. Yog nws tsis tau yuav pojniam ua ntej uas nws los ua nej qhev, thaum nws rov qab mus nws yuav tsum tsis txhob coj tus pojniam nrog nws mus, tiamsis yog nws muaj pojniam ua ntej nws los ua nej qhev, thaum nws rov qab mus nws yuav tsum coj nws tus pojniam nrog nws mus. Yog hais tias, tus tswv yuav pojniam rau nws thiab nws tus pojniam yug tau tub lossis ntxhais rau nws, mas tus pojniam thiab cov menyuam yog tus tswv li neeg, ces tus qhev nws tsuas tawm mus tib leeg xwb. Tiamsis yog tus qhev hais tias, nws hlub nws tus tswv, nws tus pojniam, thiab nws cov menyuam thiab tsis xav tawm mus nyob ywj siab, ces cia nws tus tswv coj nws mus rau ntawm qhov chaw pehawm Vajtswv. Kom nws sawv ntawm qhovrooj lossis ntawm tus ncej qhovrooj thiab muab nws lub pobntseg tho qhov. Ces nws yuav tsum ua nws tus tswv qhev mus tas nws lub neej li. “Yog leejtwg muag nws tus ntxhais mus ua luag qhev, mas tus ntxhais ntawd yuav tsis tau tawm mus ywj siab li tus txivneej. Yog muab tus ntxhais ntawd muag rau lwm tus uas xav yuav nws mus ua pojniam, tiamsis yog tus txivneej ntawd tsis nyiam, nws yuav tsum muab tus pojniam ntawd muag rov rau nws txiv, tus txivneej ntawd tsis muaj cai muab nws muag rau cov neeg txawv tebchaws, rau qhov nws tau ua tsis ncaj rau tus pojniam ntawd lawm. Yog tus tswv twg yuav ib tug ntxhais los ua qhev thiab muab txis rau nws tus tub, nws yuav tsum saib taus tus txhais ntawd ib yam li yog nws yug. Yog tus txivneej ntawd yuav niamyau, nws yuav tsum pub tus niamhlob kom muaj noj muaj hnav thiab pub rau nws muaj cai ib yam li yav tas los. Yog nws tsis ua li tej uas tau hais los saum no rau nws tus niamhlob, nws yuav tsum xa tus niamhlob ntawd rov qab thiab tsis pub kom them nyiaj rau tus txiv li. “Leejtwg ntaus thiab tua ib tug neeg twg tuag, cia li muab tus ntawd tua kom tuag thiab. Tiamsis yog tua yuam kev raug, tsis yog nws txhob txwm tua tus neeg ntawd, nws yuav tsum khiav mus nyob hauv qhov chaw uas kuv xaiv rau nej lawm, nws thiaj yuav dim. Tiamsis yog tus txivneej ntawd chim thiab txhob txwm tua lwm tus, txawm yog nws khiav mus cawm siav rau ntawm kuv lub thaj los cia li muab nws tua kom tuag. “Yog leejtwg ntaus nws niam lossis nws txiv, yuav tsum muab tus ntawd tua povtseg. “Yog leejtwg mus nyiag ib tug neeg coj mus muag rau luag lwm tus lossis cia nyob ua nws qhev los cia li muab tus uas nyiag ntawd tua povtseg. “Yog leejtwg foom phem rau nws niam lossis nws txiv, cia li muab tus ntawd tua povtseg. “Yog muaj ob tug txivneej sib ceg, thiab muaj ib tug muab pobzeb ntaus ib tug lossis nkaug nrig rau, tiamsis nws tsis tuag, tsuas yog raug mob thiab pw xwb, tus uas ntaus ntawd yuav tsis raug txim, tiamsis tom qab uas tus raug mob sawv taus nrig pas tawm mus rau nraum zoov, tus uas ntaus tus ntawd yuav tsum them nqi rau nws lub sijhawm uas nws raug mob thiab tu mus txog thaum nws zoo. “Yog tus txivneej twg muab pas ntoo ntaus nws tus tubqhe lossis ntxhais qhev tuag tamsim ntawd, tus txivneej ntawd yuav raug txim. Tiamsis yog tus qhev ntawd tseem nyob tau ib hnub lossis ob hnub, mam li tuag, mas tus tswv yuav tsis raug txim; rau qhov tus qhe ntawd, yog nws yuav los. “Yog muaj tej txivneej sib ntaus raug ib tug pojniam uas suab menyuam hauv plab, ua rau nws tus menyuam nchuav, tiamsis nws tsis mob ntxiv, mas yuav tsum muab tus uas ntaus raug tus pojniam ntawd nplua raws li nws tus txiv xav tau thiab raws li cov tu plaub pom zoo. Tiamsis yog tus pojniam ntawd raug mob ib qho twg, mas yuav tsum rau txim siav pauj siav, qhovmuag pauj qhovmuag, hniav pauj hniav, tes pauj tes, kotaw pauj kotaw, qhov kub hnyiab pauj qhov kub hnyiab, qhov txhab pauj qhov txhab, thiab qhov nqaij pauj qhov nqaij xwb. “Yog tus txivneej twg ntaus nws tus tubqhe lossis nws tus ntxhais qhev qhovmuag dig, nws yuav tsum tso tus qhev ntawd mus ywj siab, vim nws muab ntaus digmuag lawm. Yog nws ntaus nws tus tubqhe lossis tus ntxhais qhev lov hniav, nws yuav tsum muab tso mus vim nws muab ntaus lov hniav lawm. “Yog nyuj nrau ib tug neeg twg tuag, yuav tsum muab pobzeb ntaus tus nyuj ntawd kom tuag, thiab tsis txhob noj tus nyuj ntawd tej nqaij, tiamsis tsis txhob rau txim rau tus tswv nyuj. Yog tus nyuj ntawd twb yeej txeev nrau neeg los thiab twb muaj neeg mus hais rau tus tswv nyuj paub lawm, tiamsis nws tsis ceev tus nyuj ntawd rau hauv nkuaj, thiaj mus nrau neeg tuag, yuav tsum muab pobzeb ntaus tus nyuj thiab tus tswv nyuj kom tuag huv tibsi. Tsis tas li ntawd xwb, yog tus tswv txaus siab muab nyiaj txhiv nws txojsia, mas nws yuav tsum them raws li luag kom nws them. Yog tus nyuj ntawd nrau tus tub lossis tus ntxhais twg tuag los yeej ua raws nraim li tib txoj kevcai no thiab. Yog tus nyuj ntawd nrau tus tubqhe lossis tus ntxhais qhev twg tuag, tus tswv nyuj yuav tsum tau them peb caug daim nyiaj nqi taubhau rau tus qhev ntawd tus tswv, thiab yuav tsum muab pobzeb ntaus tus nyuj ntawd kom tuag. “Yog leejtwg qhib qhov lossis khawb qhov cia tsis muab npog, ib tug nyuj lossis ib tug neesluav poob rau hauv lub qhov ntawd, nws yuav tsum tau them tus nqi tsiaj ntawd. Nws them nyiaj rau tus tswv tsiaj thiab nws yuav tus tsiaj ntawd. Yog leejtwg tus nyuj mus nrau lwm tus, tus nyuj tuag, mas muab tus nyuj ntawd muag thiab muab cov nyiaj los faib rau nkawd ob leeg, thiab muab tus nyuj tuag los faib ib leeg ib sab. Tiamsis yog tus tswv nyuj twb paub hais tias, nws tus nyuj txeev nrau lwm tug los lawm, tiamsis nws tsis ceev rau hauv nkuaj, nws yuav tau muab ib tug nyuj pauj tus nyuj uas tuag ntawd, thiab nws yuav tus nyuj uas tuag lawm ntawd. “Yog leejtwg nyiag luag ib tug nyuj lossis ib tug yaj thiab muab tus tsiaj ntawd tua lossis muab muag lawm, nws yuav tsum tau them tsib tug nyuj pauj ib tug nyuj, thiab plaub tug yaj pauj ib tug yaj. “Yog muaj tubsab tuaj tsoo tsev hmo ntuj thiab raug tua tuag, tus uas tua tus tubsab ntawd tsis txhaum. Tiamsis yog nws tua nruab hnub, mas nws txhaum. “Tus tubsab yuav tsum raug them tej uas nws mus nyiag. Yog nws tsis muaj nyiaj them, nws yuav tsum muab nws muag mus ua luag qhev thiab muab cov nyiaj los them tej nqi uas nws nyiag ntawd. “Yog tus tubsab ntawd nyiag tsiaj, tsis hais nyuj, neesluav lossis yaj uas mus nrhiav tau tseem ciaj sia thiab nws cab rawv ntawm nws tes, mas nws yuav tsum tau them ob tug pauj ib tug. “Yog leejtwg tso nws cov tsiaj mus noj zaub hauv teb lossis vaj txiv hmab, thiab cov tsiaj ntawd mus noj luag lwm tus tej qoob hauv luag thaj teb, nws yuav tsum muab tej qoob uas zoo tshaj plaws hauv nws thaj teb lossis hauv nws lub vaj txiv hmab mus them. “Yog leejtwg hlawv nws thaj teb thiab kis mus kub luag tej pawg nplej hauv luag tej teb, thiab kub luag tej nplej uas tsis tau siav lossis twb hlais tas thiab muab sau ua pawg lawm, tus uas ua hluavtaws kub ntawd yuav tsum tau them tej uas nws ua hluavtaws kub ntawd. “Yog leejtwg zoo siab khaws lwm tus tej nyiaj lossis tej khoom muaj nqis cia rau hauv nws tsev thiab muaj tubsab tuaj nyiag tej ntawd hauv nws tsev lawm, yog nws ntes tau, mas tus tubsab ntawd yuav tsum tau them ob npaug. Tiamsis yog ntes tsis tau tus tubsab ntawd, mas yuav tau coj tus uas cia cov nyiaj ntawd mus rau tom qhov chaw uas pehawm Vajtswv, thiab kom nws twv hais tias, nws yeej tsis tau nyiag cov nyiaj ntawd. “Txhua rooj plaub uas yog sib txeeb tej cuabtxhiaj cuabtam xwsli: nyuj, neesluav, yaj, ris tsho lossis lwm yam uas ploj lawm, yuav tsum coj ob tug txivneej uas sib txeeb tej ntawd mus sawv tim ntsej tim muag rau ntawm Vajtswv. Yog Vajtswv txiav txim rau tus twg, tus ntawd yuav tsum tau them ob npaug rau tus uas yeej cai. “Yog leejtwg pom zoo coj lwm tus tej neesluav, nyuj, yaj lossis lwm yam tsiaj los tu, yog tus tsiaj ntawd tuag lossis raug mob lossis muaj lwm tus muab raws khiav lawm, thiab tsis muaj neeg ua timkhawv pom, ces nws yuav tsum mus rau ntawm qhov chaw pehawm Vajtswv thiab tsa tes twv hais tias, nws tsis tau nyiag. Yog tsis muaj neeg nyiag tus tsiaj ntawd, mas tus tswv tsiaj yuav tsum zoo siab cia tus tsiaj ntawd ploj mus, thiab tus uas saib tus tsiaj ntawd thiaj tsis tau them, tiamsis yog muaj neeg nyiag tus tsiaj ntawd lawm, nws yuav tsum tau them rau tus tswv tsiaj. Yog muaj tsiaj qus tom tus tsiaj ntawd lawm, tus uas saib tus tsiaj ntawd tsuas nqa cov nqaij uas seem mus qhia rau tus tswv paub xwb, yog tsiaj tom tuag ces nws tsis tau them. “Yog leejtwg mus qiv lwm tus ib tug tsiaj los ua raug mob lossis ua tuag thaum tus tswv tsis nyob ntawd pom, tus qiv yuav tsum them tus tsiaj ntawd. Tiamsis yog tuag thaum tus tswv pom ntsoov, tus qiv yuav tsis tau them. Yog nws ntiav, ces cov nqi ntawd yeej npog tus tsiaj nqi lawm. “Yog leejtwg mus ntxias ib tug nkaujxwb uas tsis tau muaj neeg qhaib thiab mus nrog nws pw lawm, tus ntawd yuav tsum tau them tus ntxhais ntawd nqi tshoob thiab yuav nws ua pojniam. Tiamsis yog leej txiv tsis kam muab nws tus ntxhais rau tus ntawd yuav uas pojniam los nws yuav tsum them nyiaj kom txaus nkaus tus ntxhais ntawd cov nqi tshoob. “Cov pojniam uas txawj ua khawvkoob thiab saib yaig, yuav tsum muab tua povtseg. “Tus txivneej twg deev tsiaj, yuav tsum muab tus ntawd tua povtseg. “Yog leejtwg fij khoom rau lwm tus vajtswv uas tsis yog tus TSWV, yuav tsum muab tus ntawd tua povtseg. “Nej tsis txhob tsimtxom lossis quab yuam cov neeg txawv tebchaws uas nrog nej nyob, rau qhov thaum nej nyob nram tebchaws Iziv, nej twb yog neeg txawv tebchaws thiab. Nej tsis txhob tsimtxom ib tug pojntsuam lossis ib tug menyuam ntsuag twg. Yog nej tsimtxom lawv, thaum lawv quaj thov kuv, kuv uas yog tus TSWV hnov lawv tej suab quaj, kuv yuav npautaws rau nej thiab kuv yuav tua nej hauv tshavrog. Nej cov pojniam yuav ua pojntsuam thiab nej cov menyuam yuav ua menyuam ntsuag. “Yog nej qiv nyiaj rau kuv cov neeg uas yog cov pluag, tsis txhob tsub paj rau nws them. Yog leejtwg muab nws lub tsho ntev tuaj yuam nqi rau koj thiab nws coglus yuav txhiv rov qab, thaum tsaus ntuj koj yuav tsum xa rau nws, rau qhov nws muaj tib lub tsho ntawd hnav kom sov xwb. Nws yuav ua li cas pw tsaug zog? Thaum nws quaj thov kuv, kuv yuav teb nws tej lus thov, rau qhov kuv yog tus uas muaj lub siab hlub tshua. “Nej tsis txhob hais lus phem rau Vajtswv, thiab tsis txhob foom phem rau tej nomtswv uas tswjhwm nej. “Muab nej tej qoobloo, nej tej txiv hmab thiab nej tej roj txiv ntoo, coj tuaj fij rau kuv thaum uas tej ntawd siav lawm. “Muab nej cov tub hlob pub rau kuv. Muab nej tej nyuj thiab tej yaj thawj tus menyuam uas yog tus txiv, coj tuaj fij rau kuv. Thawj tug menyuam uas yog tus txiv, mas cia nrog tus niam nyob xya hnub xwb, hnub yim yuav tsum coj tuaj fij rau kuv. “Nej yog kuv haivneeg, nej tej tsiaj uas raug tej tsiaj qus tom tuag rau hauv tshav zaub, nej tsis txhob muab tej nqaij los ua noj, cia li muab pov rau dev noj xwb. “Tsis txhob coj tej zaj tsis tseeb mus hais rau nraum toj nraum pes, thiab tsis txhob ua timkhawv tsis tseeb pab tus neeg txhaum. Tsis txhob nrog pab neeg coob mus ua txhaum lossis nrog feem coob ua timkhawv tsis ncaj hauv tsev tu plaub, thiab tsis txhob xaiv cov neeg pluag ntsejmuag hauv tsev tu plaub. “Yog koj mus pom koj tus yeebncuab, tus nyuj lossis tus neesluav uas ploj lawm, koj cia li cab rov qab los rau nws. Yog koj pom nws tus neesluav thauj nra ntog, koj yuav tsum mus pab tsa tus neesluav ntawd sawv; tsis txhob dhau mus. “Tsis txhob txiav txim tsis ncaj rau tus neeg pluag thaum nws tuaj rau hauv tsev tu plaub. Tsis txhob lam nrhiav lus tsis tseeb liam lwm tus, thiab tsis txhob tua cov neeg uas tsis muaj txim dabtsi povtseg. Kuv yuav rau txim rau txhua tus uas ua phem li ntawd. Tsis txhob yuav luag tej nyiaj xiab, rau qhov tej nyiaj ntawd ua rau cov nomtswv qhovmuag fam, txiav txim tsis ncaj thiab ua rau cov neeg ncaj ncees swb cai. “Tsis txhob tsimtxom cov neeg txawv tebchaws; nej yeej paub hais tias ua neeg txawv tebchaws zoo li cas, rau qhov thaum ub nej yeej tau mus ua neeg txawv tebchaws nyob nram tebchaws Iziv lawm thiab. “Nej muab rau xyoo los tseb nplej thiab sau nej tej qoobloo hauv nej tej teb. Tiamsis xyoo xya cia tej teb so, thiab tsis txhob sau ib yam dabtsi uas tuaj hauv nej tej teb ntawd li. Cov neeg pluag yuav noj tej khoom uas tuaj hauv tej teb ntawd, thiab tej tsiaj qus yuav tau noj tej uas seem. Nej tej vaj txiv hmab thiab nej tej txiv ntoo roj los ua ib yam li ntawd. “Nej ua nej tej haujlwm rau hnub, tiamsis hnub xya nej so tsis txhob ua haujlwm, cia nej tej tubqhe thiab cov neeg txawv tebchaws uas ua haujlwm rau nej thiab nej tej tsiaj tau so. “Nco ntsoov txhua yam uas kuv hais rau nej lawm. Tsis txhob thov lwm tus vajtswv; thiab tsis txhob hais txog lawv tej npe hlo li. “Yuav tsum ua kevcai ua kuv tsaug ib xyoos twg peb zaug. Lub hli Anpis, yog lub hli uas nej tawm nram tebchaws Iziv los, nej ua Kevcai Noj Ncuav Tsis Xyaw Keeb raws li kuv twb tau samhwm tseg rau nej lawm. Xya hnub uas nej ua kevcai ntawd nej tsis txhob noj tej ncuav xyaw keeb hlo li. Nej tsis txhob tuaj pehawm kuv tes dawb tes npliag. “Ua Kevcai Sau Qoobloo rau thaum lub caij uas nej pib sau nej tej qoob. “Ua Kevcai Nyob Tsev Pheebsuab rau lub caij nplooj ntoos zeeg thiab thaum nej de nej tej txiv hmab txiv ntoo hauv nej tej vaj. Nej yuav tsum ua kevcai ib xyoos peb zaug thiab tagnrho nej cov txivneej cia li tuaj pehawm kuv uas yog tus TSWV nej tus Vajtswv. “Tsis txhob muab ncuav xyaw keeb fij rau kuv thaum nej muab tsiaj tua hlawv fij rau kuv. Cov roj tsiaj uas tua theej txhoj fij rau kuv thaum nej ua cov kevcai no tsis pub seem mus txog tagkis sawv ntxov li. “Txhua xyoo nej yuav tsum coj tej qoob uas nej xub sau tau los, tuaj fij rau hauv tus TSWV uas yog nej tus Vajtswv lub tsev. “Tsis txhob muab tus menyuam yaj lossis tus menyuam tshis cov nqaij hau xyaw leej niam cov kua mis. “Kuv yuav txib ib tug timtswv mus ua nej ntej, tsomkwm nej thaum nej tabtom taug kev thiab nws yuav coj nej mus kom txog qhov chaw uas kuv twb tau npaj tseg rau nej lawm. Nej yuav tsum mloog nws lus thiab hwm nws. Tsis txhob ntxeev siab tawmtsam nws, rau qhov kuv yog tus tso nws los, thiab nws yuav tsis zam txim rau nej. Tiamsis yog nej hwm nws thiab ua raws li kuv tej lus samhwm, kuv yuav tawmtsam nej tej yeebncuab. Kuv tus timtswv yuav mus ua nej ntej thiab coj nej mus kom txog hauv lub tebchaws uas cov Amaules, cov Hitis, cov Pelixes, cov Kana-as, cov Hivis thiab cov Yenpus nyob, thiab kuv yuav ua kom lawv puastsuaj tas. Nej tsis txhob pe lawv tej mlom thiab tsis txhob mus xyaum coj lawv tej kevcai. Muab lawv tej mlom rhuav povtseg thiab muab lawv tej ncej zeb tseemceeb tsoo povtseg. Yog nej pehawm kuv uas yog tus TSWV nej tus Vajtswv, kuv yuav foom koob hmoov kom nej muaj mov noj thiab dej haus nplua mias thiab yuav tshem nej tej kab mob kev nkeeg mus huv tibsi. Nyob hauv nej lub tebchaws, nej cov pojniam yuav tsis nchuav menyuam lossis txhua tus pojniam yuav muaj tub muaj ki, kuv yuav pub kom nej muaj sia nyob ntev. “Kuv yuav ua rau cov neeg uas thaiv nej kev kom lawv ntshai kuv; kuv yuav coj kev ntxhov siab los rau cov neeg uas nej yuav mus tua ntawd thiab kuv yuav ua kom nej cov yeebncuab khiav tawm ntawm nej mus. Kuv yuav ua kom nej cov yeebncuab ntshai yoob tas; kuv yuav ntiab cov Hivis, cov Kana-as, thiab cov Hitis khiav ua ntej nej mus txog. Kuv yuav tsis ntiab lawv khiav kom tas hauv ib lub xyoo. Yog kuv ua li ntawd, lub tebchaws yuav ciaj nroj tsuag thiab yuav muaj tsiaj qus coob heev. Kuv yuav ntiab lawv tawm ib zaug mentsis, mus txog thaum nej huamvam coob zuj zus, mam li muab hlo lub tebchaws rau nej. Kuv yuav tu ciam rau nej lub tebchaws pib kiag ntawm ces dej Hiavtxwv Liab mus txog ntua ntawm Hiavtxwv Meditelanes, thiab pib kiag ntawm tiaj suabpuam mus txog ntua ntawm tus Dej Efalates. Kuv yuav muab hwjchim rau nej raws cov neeg uas nyob hauv lub tebchaws ntawd kom khiav ua ntej uas nej mus nyob. Nej tsis txhob koom tes nrog lawv lossis teev lawv tej mlom hlo li. Tsis txhob cia cov neeg ntawd nrog nej nyob hauv nej lub tebchaws; yog nej cia lawv nrog nej nyob, lawv yuav coj nej mus ua txhaum tawmtsam kuv. Yog nej pe lawv tej mlom, tej mlom ntawd yuav yog ib rooj ntxiab uas tais nej cajdab.” Tus TSWV hais rau Mauxes hais tias, “Koj cia li tuaj cuag kuv saum roob no, coj Aloos, Nadas, Anpihus thiab cov Yixalayees cov thawjcoj xya caum leej nrog koj tuaj; thiab nej tuaj deb deb pehawm kuv xwb. Tsuas pub koj txav tuaj ze kuv xwb, tsis pub lwm tus txav tuaj ze kuv. Tsis txhob pub cov pejxeem nce tuaj rau saum roob no hlo li.” Mauxes thiaj coj tus TSWV tej lus thiab tej kevcai los piav qhia rau cov pejxeem, thiab tagnrho cov pejxeem thooj txhij teb hais tias, “Peb yuav ua txhua yam raws li tus TSWV hais.” Mauxes sau tus TSWV tej lus huv tibsi cia. Hnub tom qab thaum sawv ntxov, Mauxes mus teeb ib lub thaj rau tim taw roob, thiab muab kaum ob lub pobzeb raws li cov Yixalayees kaum ob xeem los teeb tseg cia ua chaw nco txog. Mauxes txib cov tub hluas Yixalayees kom mus hlawv tej khoom fij, thiab tua nyuj hlawv fij rau tus TSWV ua kev sib raug zoo. Mauxes muab cov ntshav nyuj ib nrab tso rau hauv cov phiab thiab muab ib nrab ntov rau lub thaj. Nws muab phau ntawv uas sau cov lus cog tseg uas tus TSWV samhwm kom sau, los nyeem rau cov pejxeem mloog. Cov pejxeem lees lus rau nws hais tias, “Peb yuav mloog thiab ua txhua yam raws li tus TSWV hais.” Ces Mauxes muab cov ntshav uas nyob hauv cov phiab nchos rau cov pejxeem. Mauxes hais tias, “Ntawm no yog cov ntshav uas tus TSWV muab ua lub cim coglus tseg rau nej raws li cov lus samhwm no.” Mauxes, Aloos, Nadas, Anpihus thiab cov Yixalayees xya caum leej thawjcoj thiaj nce mus rau saum roob thiab lawv pom cov Yixalayees tus Vajtswv. Qhov chaw uas nws tsuj pua cov hlaws ntsuab li ntuj ntsuab. Vajtswv tsis ua li cas rau cov Yixalayees cov thawjcoj kom raug kev puastsuaj; lawv puavleej pom Vajtswv, thiab cov thawjcoj ntawd noj haus ua ke. Tus TSWV hais rau Mauxes hais tias, “Koj cia li nce tuaj cuag kuv saum roob, nyob saum no tos, kuv yuav muab ob daim txiag zeb uas kuv sau kuv tej lus thiab kuv tej kevcai txhua nqe rau koj, kuv sau tej no tseg cia qhia sawvdaws.” Mauxes thiab Yausuas tus uas yog Mauxes tus tubtxib txawm sawv kev mus, thiab Mauxes txawm nce mus saum Vajtswv lub roob lawm. Mauxes hais rau cov thawjcoj hais tias, “Nej nyob ntawm lub yeej no tos txog thaum wb rov qab los. Aloos thiab Hules nkawd nrog nej nyob ntawm no; thiab yog nej leejtwg muaj plaub ntug dabtsi cia li mus cuag nkawd.” Mauxes nce mus saum roob thiab muaj huab pos tsaus nti saud. Tus TSWV lub tshwjchim nyob saum Roob Xinais, thiab huab pos tsaus nti tau rau hnub; thiab hnub xya tus TSWV hu hauv tauv huab tuaj rau Mauxes. Tus TSWV lub tshwjchim ci ntsa iab tshwm los rau cov Yixalayees pom zoo ib yam li nplaim taws cig lam lug saum roob tuaj. Mauxes txawm nce mus saum roob thiab nkag mus rau hauv tauv huab. Nws mus nyob saum roob tau plaub caug hnub plaub caug hmo. Tus TSWV hais rau Mauxes hais tias, “Koj hais rau cov Yixalayees kom coj khoom tuaj fij rau kuv. Koj cia li txais txhua yam uas cov neeg txaus siab coj tuaj fij rau kuv ntawd. Cov khoom uas lawv coj tuaj fij no mas yog: kub, nyiaj, tooj; xov xiav, xov tsamxem, xov liab thiab tej ris tsho uas muab plaub tshis los ntos ua; thiab tej tawv yaj uas muab kob tsamxem zas, tej tawv nyuj uas zoo heev, ntoo kubtwm; thiab roj sam teeb, tej roj txhawb meejthawj, thiab tej hmoov tshuaj tsw qab; tej qe zeb kanelias thiab lwm yam hlaws uas coj mus dai rau ntawm tus Povthawj Hlob lub tsho efaus thiab nws daim ntaub npog hauvsiab. Lawv yuav tsum ua ib lub Tsevntaub rau kuv, kuv thiaj nrog lawv nyob. Ua lub Tsevntaub no thiab npaj ua tej khoom siv rau hauv lub Tsevntaub ntawd raws li uas kuv yuav qhia koj ua ntag. “Muab cov ntoo kubtwm los ua ib lub Phijxab, qhov ntev ob tshim thiab ib dos, qhov dav ib tshim thiab ib dos, thiab qhov siab ib tshim thiab ib dos. Muab cov tseem kub vuam lub Phijxab ntawd sab nraud thiab sab hauv nruab nrog, thiab muab kub los ua tus ntug thoob plaws. Muab kub ua plaub lub khawb ntsia rau ntawm plaub tus ceg, ntsia ib sab ob lub khawb. Muab ntoo kubtwm ua ob tug nqaj uas kwv thiab muab kub vuam ob tug nqaj ntoo ntawd huv tibsi, thiab muab ob tug nqaj ntawd ntxig rau hauv cov khawb ntawm lub Phijxab ib sab ib tug nqaj. Thaum ntxig rau hauv cov khawb lawm tsis txhob rho li. Cia li muab ob daim txiag zeb uas kuv sau kuv cov lus samhwm uas kuv yuav muab rau koj tso rau hauv lub Phijxab ntawd. “Muab cov tseem kub ua daim khwb, qhov ntev ob tshim thiab ib dos, qhov dav ib tshim thiab ib dos. Muab kub ntaus ua ob tug qhelunpees muaj tis txawb ib tug rau ib tog hau Phijxab. Muab ob tug qhelunpees cog keevxeeb rau lub hau Phijxab ib tug rau ib tog. Tso ob tug qhelunpees ntawd tig xubntiag tuaj ua ke, kom cov koojtis nthuav los roos lub Phijxab. Muab ob daim txiag zeb cia rau hauv lub Phijxab thiab muab lub hau khwb lub Phijxab. Kuv yuav ntsib koj qhov ntawd, thiab kuv nyob saum lub hau Phijxab kis nruab nrab ntawm ob sab qab koojtis qhelunpees, kuv yuav muab kuv tej kevcai rau koj coj mus qhia cov Yixalayees. “Muab ntoo kubtwm los ua ib lub rooj ntev ob tshim, dav ib tshim thiab siab ib tshim thiab ib dos. Muab kub vuam lub rooj ntawd, thiab muab kub nchuav ua ib tug ntug ncig thoob plaws lub npoo rooj. Lub npoo rooj ntawd ua tuab nkaus li ib xib, thiab muab kub ua ib tug ntswg thoob plaws lub npoo rooj. Muab kub ntaus ua plaub lub khawb ntsia rau plaub lub kaum rooj ntawm plaub tug ceg. Cov khawb uas ntxig nqaj kwv lub rooj ntawd, muab ntsia kom ze rau ntawm tus npoo. Muab ntoo kubtwm los txua ua ob tug nqaj thiab muab kub vuam rau ob tug nqaj ntawd. Ua phaj, khob, hub thiab tais los tau hliv cawv txiv hmab ua khoom fij. Tej twj taig no yuav tsum muab cov tseem kub ua xwb. Lub rooj ntawd yuav tsum txawb rau ntawm hauv ntej lub Phijxab uas ntim Vajtswv tej lus cog tseg, thiab cov ncuav dawbhuv uas fij rau kuv yuav tsum cia nyob saum lub rooj. “Muab cov tseem kub ntaus ua ib lub teeb. Lub taw thiab tus ncej txawb teeb los muab tej tseem kub ntaus ua ib cov paj, ib cov cos paj thiab ib cov nplai paj kom keevxeeb rau ntawm tus ncej txawb teeb. Thiab ua kom ncau ua rau ces, ib sab peb ceg. Rau ces ntawd, ib ceg ua peb lub paj zoo li paj txiv duaj, nrog cov cos paj thiab cov cos nplooj. Tus ncej txawb teeb mas zaig ua plaub lub paj zoo li paj txiv duaj, nrog cov cos paj thiab cov cos nplooj. Ntawm rau tus ceg teeb ntawd, ua ib lub paj rau hauv qab ntawm cov ceg ncau. Cov cos paj, cov ceg thiab tus ncej txawb teeb yog muab tib thooj kub ntaus ua xwb. Ua xya lub teeb rau ntawm tus ncej txawb teeb, thiab taws kom cig pom kev lam lug rau tom hauv ntej. Muab cov tseem kub ntaus ua rab txiab uas txiav cov teebxeeb thiab ua lub phaj rau txiab. Muab xya caum tsib choj kub los ntaus ua tus ceg teeb, thiab tej twj taig uas siv rau lub teeb. Yuav tsum ua txhua yam no raws li kuv tau qhia rau koj saum roob lawm. “Muab kaum daim ntaubmag xiav uas zoo heev, ntaub tsamxem thiab xov liab los ua lub tsevntaub. Xaws ib co qhelunpees rau ntawm cov ntaub ntawd. Txiav cov ntaub ntawd kom sib luag zos, ib daim ntev nees nkaum yim tshim, dav plaub tshim. Muab tsib daim xaws ua ib daig, muab kaum daim xaws ua ob daig. Xub muab daim ntaub xiav xaws rau txhua daim ntaub cov ntug sab nraud. Ua tsib caug lub ntsej rau thawj daim ntaub thiab tsib caug lub ntsej rau daim ob; yuav tsum ntsuas kom sib ncag zos. Muab kub ntaus ua tsib caug lub khawb khawm ob daim ntaub ua ib daig. “Muab kaum ib daim ntaub plaub tshis xaws ua ib daig vov lub Tsevntaub ntawd. Txiav cov ntaub ntawd kom sib luag zos, ib daig ntev peb caug tshim, thiab dav plaub tshim. Muab tsib daim ntaub plaub tshis xaws ua ib daig, thiab muab rau daim xaws ua ib daig. Daim rau, yog daim uas dauv ua lub momkaum Tsevntaub. Ua tsib caug lub ntsej tis rau tog taw tom no, thiab ua tsib caug lub ntsej tis rau tog taw tom ub. Muab tooj ntaus ua tsib caug lub khawb khawm ob daim ntaub ntawd ua ib daig vov lub tsev. Daim ntaub uas vov lub tsev, tseg ib nrab rub mus thaiv sab pem qaum Tsevntaub. Tseg tw dauv rau ob sab, ib sab twg tseg ntev li ib tshim, dauv los npog lub Tsevntaub. “Vov ob txheej tuaj saud, ib txheej yog muab cov tawv laug yaj uas zas liab, thiab ib txheej yog muab cov tawv uas zoo heev. “Txiav ntoo kubtwm los ua cov tab uas sawv ntsug txheem lub Tsevntaub. Txhua tus tab ntev kaum tshim thiab dav ib tshim thiab ib dos, muab ob sab npoo thais ua qwbdia sib dhos, kom cov tab ntawd sib dhos ua ke. Tagnrho cov tab ntawd puavleej muab thais ua qwbdia huv tibsi. Muab nees nkaum tus tab txhos rau sab nrad, muab plaub caug pluaj nyiaj ua taw tiag rau nees nkaum tus tab, ob pluaj tiag ib tug tab, kom ob tug tab ntawd thiaj sib dhos ruaj. Muab nees nkaum tus tab txheem lub Tsevntaub sab pem thiab muab plaub caug pluaj nyiaj ua taw tiag, ob pluaj tiag ib tug tab. Lub Tsevntaub sab tom qab uas yog sab hnubpoob, txheem rau tus tab, thiab muab ob tug tab txheem lub kaum tsev tom kawg. Cov taw tab puavleej txawb rau saum cov pluaj nyiaj ntawd. Ob tug tab hauv taw los yuav tsum txawb sib dhos ib yam nkaus. Yog li ntawd, muaj yim tus tab thiab kaum rau pluaj nyiaj, ob pluaj tiag ib tug tab. “Txuas kaum tsib tug tab ntoo kubtwm, muab tsib tug ua tab rau sab phabntsa Tsevntaub sab ped, muab tsib tug ua tab rau sab phabntsa sab nrad, thiab muab tsib tug ua tab rau sab momkaum tom qab kawg uas yog sab hnub poob. Tus tab nruab nrab, yog tus uas yuam cov phabntsa ntu nruab nrab, tom no mus ti nkaus rau tom ub. Muab cov tseem kub vuam cov tab thiab muab cov khawb kub khawm cov tab ntawd rau ntawm cov nqaj, cov nqaj ntawd puavleej muab kub vuam huv tibsi thiab. Tsa lub Tsevntaub raws li kuv tau qhia rau koj saum Roob Xinais. “Muab ib daim ntaubmag zoo heev uas txaij xiav, txaij tsamxem liab thiab cov plaub yaj uas zas liab los ua daim ntaub thaiv. Xaws cov duab qhelunpees rau ntawm daim ntaub ntawd. Muab cov nqelauj kub dai rau thiab coj mus khuam rau ntawm plaub tug ncej ntoo kubtwm uas vuam kub, thiab muab txawb rau saum plaub pluaj nyiaj uas tiag taw. Muab daim ntaub ntawd dai rau ntawm cov khawb hauv lub Tsev, thiab muab lub Phijxab uas ntim ob daim txiag zeb uas kuv sau tej lus cog tseg txawb rau sab ntawm daim ntaub sab tod. Daim ntaub ntawd quas chav Dawbhuv thiab chav uas Dawbhuv kawg nkaus. Muab lub hau mus khwb lub Phijxab Coglus tseg. Muab lub rooj mus txawb rau sab nraum daim ntaub sab ped, thiab muab tus ncej txawb teeb txawb rau sab nrad. “Muab ib daim ntaubmag zoo zoo uas txaij xiav, txaij tsamxem thiab txaij liab uas xaws ua paj ntaub txaij nraug zees los ua daim ntaub npog lub qhovrooj Tsevntaub. Koj yuav tsum ua tsib tug ncej ntoo kubtwm thiab muab tej tseem kub vuam rau thiab ua ib co nqelauj kub dai daim ntaub no rau saud; thiab ua tsib tug taw tooj tiag cov ncej ntawd. “Muab ntoo kubtwm los ua ib lub thaj, qhov ntev tsib tshim, qhov dav tsib tshim thiab qhov siab peb tshim. Ua plaub tug kub rau saum plaub ceg kaum thaj. Plaub tug kub ntawd, txua koom hlo nrog lub thaj thiab muab tooj vuam huv tibsi. Ua ib co laujkaub ntim tshauv, ib co duav, ib co tais, ib co diav rawg thiab ib co yias rau hluavncaig. Tej cuabyeej no puavleej yog muab tooj ua. Muab tooj hiab ua daim ntxaij, thiab muab tooj ntaus ua plaub lub khawb ntsia rau ntawm plaub ceg kaum ua tes nqa. Muab daim ntxaij tooj ntawd pua rau hauv lub thaj kom txog ntua ib nrab. Muab ntoo kubtwm ua ob tug nqaj uas kwv lub thaj, thiab muab tooj vuam rau, thiab muab ntxig rau ntawm plaub lub khawb uas ntsia rau ntawm lub thaj ob sab. Muab txiag ntoo ua lub thaj thiab tseg hauv plawv khoob, raws nraim li tus qauv uas kuv tau qhia rau koj saum roob lawm. “Koj yuav tsum xov vaj ncig lub Tsevntaub. Muab daim ntaubmag uas ntev ib puas tshim xov sab nrad, muab nees nkaum tus kav tooj ua ncej, muab nees nkaum tus kav tooj tiag taw, tiamsis cov khawb thiab cov hlua yog muab nyiaj ua. Xov zoo ib yam li ntawd rau sab ntsavaj ped thiab. Muab daim ntaub uas ntev tsib caug tshim xov sab hnubpoob, txhos kaum tus ncej thiab kaum tus tiag taw. Sab hnubtuaj, yog lub roojvag uas nkag mus rau hauv, sab ntawd xov tsib caug tshim dav ib yam nkaus. Ib sab roojvag twg ntev kaum tsib tshim, txhos peb tug ncej thiab peb tug tiag taw. Sab roojvag tod los ntev kaum tsib tshim, txhos peb tug ncej thiab peb tug tiag taw. Daim ntaubmag uas npog lub roojvag ntev nees nkaum tshim thiab txaij xiav, txaij tsamxem thiab txaij liab, thiab muab xaws ua paj ntaub txaij nraug zees rau. Txhos plaub tug ncej thiab plaub tug tiag taw ncej dai daim ntaub ntawd. Tagnrho cov ncej uas xov ncig lub tsev, puavleej muab xov nyiaj pav, tej khawb khawm los yog khawb nyiaj, thiab cov tiag taw puavleej yog tooj. Lub vaj, qhov ntev muaj ib puas tshim, qhov dav muaj tsib caug tshim, thiab qhov siab muaj tsib tshim. Muab cov ntaubmag uas zoo heev xaws ua ntsavaj thiab muab tooj ua cov tiag taw. Tagnrho txhua yam cuabyeej siv hauv lub Tsevntaub, tej tswg uas txhos rub lub Tsevntaub thiab tus ntsavaj puavleej yog muab tooj ua. “Cia li samhwm rau cov Yixalayees kom lawv nqa cov roj txiv ntoo uas zoo tshaj plaws tuaj rau koj sam rau lub teeb, thiaj tau taws txhua hmo. Aloos thiab nws cov tub ua cov uas tu thiab taws lub teeb hauv lub Tsevntaub uas yog kuv qhov chaw sib ntsib uas ncaj lub Phijxab ntawm daim ntaub sab nraum no, kom cig tabmeeg kuv ib hmo kaj ntug. Cov Yixalayees thiab lawv cov xeebntxwv yuav tsum ceev cov lus samhwm no mus ibtxhis li. “Cia li hu koj tus tijlaug Aloos thiab nws cov tub: Nadas, Anpihus, Ele-axas thiab Ithamas tuaj. Muab lawv cais tawm hauv cov Yixalayees, thiab muab lawv tsa ua cov povthawj ua kuv tes haujlwm. Xaws cov tsho povthawj rau koj tus tijlaug Aloos hnav, tsav nws lub meejmom kom sawvdaws hwm. Koj hu tagnrho cov neeg uas kuv pub lawv muaj peevxwm ua txhua yam tuaj, thiab qhia kom lawv xaws cov tsho ntev rau Aloos hnav, muab nws tsa ua tus povthawj ua kuv tes haujlwm. Qhia kom lawv ua daim npog hauvsiab, lub tsho efaus, lub tsho ntev, lub tsho txaij, txoj phuam uas ntoo thiab txoj siv sia. Lawv ua cov tsho povthawj no rau koj tus tijlaug Aloos thiab nws cov tub hnav, kom lawv ua cov povthawj ua kuv tes haujlwm. Cov neeg ntawd muab ntaub xiav, ntaub tsamxem, xov liab, xov kub thiab cov ntaubmag uas zoo heev xaws ua cov tsoos tsho ntawd. “Lawv muab ntaub xiav, ntaub tsamxem, ntaub liab, xov kub thiab muab cov ntaubmag uas zoo heev xaws ua lub tsho efaus, thiab xaws paj ntaub txaij nraug zees rau. Ob txoj hlab uas khuam xubpwg, muab sib rig rau nraum nraubqaum mus khawm rau nram ob sab ntha. Txoj siv sia yog muab cov ntaub uas xaws lub tsho efaus ua, thiab muab xaws rau ntawm lub tsho efaus. Muab ob lub qe zeb kanelias los txaug Yakhauj kaum ob tug tub cov npe rau, txaug kom raws li lawv tej hnubnyoog ib tug zuj zus, txaug rau leej npe rau ib lub qe zeb. Yuav tsum yog tus uas txawj ntaus nplhaib thiaj txaug tau Yakhauj cov tub tej npe rau ntawm ob lub qe zeb, thiab yuav tsum nchuav ib daim phiaj kub cog ob lub qe zeb ntawd. Muab ob lub qe zeb ntawd dai rau ntawm lub tsho efaus ob txoj hlab saum xubpwg, ua lub cim nco txog kaum ob xeem Yixalayees. Ua li ntawd Aloos thiaj tau coj rawv lawv tej npe rau saum nws ob sab xubpwg, kom kuv uas yog tus TSWV nco ntsoov kuv haivneeg. Muab tej tseem kub nchuav ob daim phiaj txaij nraug zees thiab ua ob txoj saw kub ntswj zoo li txoj hlua, thiab muab tis rau ntawm ob daim phiaj ntawd. “Ua daim ntaub npog hauvsiab rau tus Povthawj Hlob tau siv npog hauvsiab li Vajtswv lub siab nyiam. Muab cov ntaub uas xaws lub tsho efaus ua daim npog hauvsiab thiab xaws paj ntaub txaij nraug zees rau thiab. Daim ntaub npog hauvsiab ntawd ua xwmfab xwmmeem thiab muab tais ua ob tsem, ntev ib dos thiab dav ib dos. Cog plaub leej qe zeb muaj nqis rau ntawm daim ntaub npog hauvsiab; thawj leej cog ib lub qe zeb lunpis, ib lub qe zeb taupas thiab ib lub qe zeb nkanes; leej ob, cog ib lub qe zeb emelas, ib lub qe zeb xafiles thiab ib lub qe zeb dawb ci hob; leej peb, cog ib lub qe zeb xiav txho taws, ib lub qe zeb ankates thiab ib lub qe zeb amethis; thiab leej plaub, cog ib lub qe zeb npelis, ib lub qe zeb kanelias thiab ib lub qe zeb yapes. Cov qe zeb no puavleej muab dhos rau ntawm daim phiaj kub. Kaum ob lub qe zeb ntawd puavleej txaug Yakhauj kaum ob leeg tub npe rau, cov qe zeb ntawd zoo ib yam li tej homthawj uas txaug kaum ob xeem ntawd npe rau. Muab cov tseem kub nchuav ua ob txoj saw, thiab muab ntswj zoo li txoj hlua tis rau ntawm daim npog hauvsiab. Ua ob lub khawb kub tis rau daim ntaub npog hauvsiab ob lub ntsej sab saud, thiab muab ob txoj saw kub tis rau ntawm ob lub khawb kub. Muab ob tog qab tis rau ob daim phiaj, ua li no kom ob txoj saw lo rau lub tsho efaus ob daim tiag xubpwg ntawm xubntiag. Ua dua ob lub khawb kub tis rau ntawm daim ntaub npog hauvsiab ob lub kaum hauv qab ntawm tus npoo uas npuab nkaus lub tsho efaus. Ua dua ob lub khawb kub tis ntxiv rau lub tsho khuam ob txoj hlab khuam xubpwg ob tog tw kawg tom xubntiag uas ze kab xaws thiab txuas nkaus txoj siv uas muab ntaub plaub yaj xaws. Muab ob txoj hlab ntaub xiav khi daim ntaub npog hauvsiab ob lub khawb rau ntawm lub tsho efaus ob lub khawb, kom txuas nkaus rau ntawm txoj siv liab, thiab kom daim ntaub npog hauvsiab nyob ncaj rau ntawm lub tsho efaus. “Thaum Aloos mus rau hauv Chav Dawbhuv, nws yuav tsum npua rawv daim ntaub npog hauvsiab uas txaug tagnrho cov Yixalayees kaum ob xeem npe rau lawm, kom kuv uas yog tus TSWV, nco ntsoov kuv haivneeg. Muab lub Ulees thiab lub Thumees ntsaws rau hauv daim ntaub npog hauvsiab, kom thaum Aloos tuaj rau hauv chav dawbhuv uas yog kuv qhov chaw nyob, nws thiaj nqa rawv ob yam ntawd. Txhua zaus nws yuav tsum hnav daim ntaub npog hauvsiab tuaj, nws thiaj yuav paub qhia rau cov Yixalayees ua tej yam uas haum kuv siab. “Muab cov xov xiav xaws ua lub tsho ntev hnav npog tuaj saum lub tsho efaus. Lub tsho ntawd, xaws looj saum taubhau tuaj, thiab foob lub cajdab tshos kom thoob plaws thiaj tsis ntuag. Thiab muab lub tsho ntev ntawd rau Aloos hnav thaum nws mus ua tes haujlwm povthawj, thiaj yuav hnov tej tswb ntawd nrov thaum nws mus rau hauv Chav Dawbhuv tim ntsej tim muag tus TSWV thiab thaum nws tawm rov qab, nws thiaj tsis raug tua tuag. “Thiab koj muab cov tseem kub ntaus ua ib daim phiaj, thiab txaug ib co lus rau ntawm daim phiaj kub hais tias, ‘Dawbhuv rau tus TSWV.’ Muab ib txoj hlab ntaub xiav khi daim phiaj kub ntawd rau saum txoj phuam uas ntoo saum taubhau. Aloos coj rawv daim phiaj kub ntawd rau saum nws hauvpliaj, ces txawm yog cov pejxeem fij tej yam khoom yuam kev mentsis los kuv uas yog tus TSWV thiaj yuav txais cov Yixalayees tej khoom uas lawv coj tuaj fij rau kuv ntawd. “Muab cov xov maj uas zoo heev ntos ua ib lub tsho rau Aloos hnav thiab ntos ua ib txoj phuam rau Aloos ntoo, thiab xaws paj ntaub rau txoj siv kom txaij nraug zees. “Koj cia li ua ib cov tsho, ib cov siv thiab ib cov kausmom rau Aloos cov tub, koj yuav tsum ua kom zoo tsimnyog rau lawv hnav kom sawvdaws hwm lawv. Muab cov tsho no rau koj tus tijlaug Aloos thiab nws cov tub hnav. Cia li muab roj txiv ntoo pleev lawv, thiab tsa lawv ua cov povthawj ua kuv tes haujlwm. Koj muab ntaubmag xaws ib co ris luv rau lawv hnav tuaj hauv qab kom txij ntua ntawm duav rau nram ncejpuab, thiaj tsis pom lawv chaw txajmuag. Aloos thiab nws cov tub yuav tsum hnav cov ris no thaum lawv mus rau hauv lub Tsevntaub uas yog kuv qhov chaw sib ntsib lossis thaum lawv mus sawv ntawm lub thaj ua tes haujlwm povthawj hauv Chav Dawbhuv, lawv thiaj tsis raug tua vim pom lawv tej chaw txajmuag. Qhov no yog txoj kevcai uas Aloos thiab nws cov xeebntxwv yuav tau coj mus ibtxhis li. “Ntawm no yog tej uas koj yuav tsum tau ua rau Aloos thiab nws cov tub, muab lawv tsa ua povthawj ua kuv tes haujlwm. Muab ib tug menyuam heev nyuj thiab ob tug laug yaj uas tsis muaj ib qhov phem li. Muab cov tseem hmoov nplej uas tsis xyaw keeb zuaj ua ib co ncuav, muab ib co hmoov ntse roj txiv ntoo ua dua ib co ncuav, thiab muab ib co puab ua tej lub nyias nyias muab roj txiv ntoo pleev rau saud. Koj cia li muab cov ncuav ntawd ntim rau hauv tawb coj tuaj fij rau kuv thaum uas koj muab tus menyuam heev nyuj thiab ob tug laug yaj tua fij. “Koj cia li coj Aloos thiab nws cov tub mus rau tom lub qhovrooj uas yuav mus rau hauv lub Tsevntaub uas yog kuv qhov chaw sib ntsib, thiab muab dej los ua kevcai ntxuav lawv. Koj muab cov tsoos tsho rau Aloos hnav uas yog: lub tsho ntev, lub tsho efaus, lub tsho uas hnav npog lub tsho efaus, daim ntaub npog hauvsiab thiab txoj siv rau nws sia. Muab txoj phuam rau Aloos ntoo saum taubhau, thiab muab daim phiaj kub dawbhuv uas txaug cov lus hais tias, ‘Dawbhuv rau tus TSWV,’ khi rau saum txoj phuam. Ces koj muab cov roj uas txhawb meejthawj hliv rau saum Aloos taubhau, thiab muab nws tsa ua povthawj. “Koj coj Aloos cov tub tuaj thiab muab cov tsho no rau lawv hnav; muab siv rau lawv sia thiab muab kausmom rau lawv ntoo. Ua li ntawd yog koj tsa Aloos thiab nws cov tub ntag. Ces lawv thiab lawv cov xeebntxwv yuav ua povthawj ua kuv tes haujlwm mus ibtxhis li. “Cab tus heev nyuj mus rau ntawm hauv ntej lub Tsevntaub uas yog kuv qhov chaw sib ntsib, hais rau Aloos thiab nws cov tub kom tsa tes rau saum tus heev nyuj taubhau. Muab tus heev nyuj ntawd tua tabmeeg tus TSWV rau ntawm lub qhovrooj Tsevntaub. Muab koj tus ntivtes tub tus heev nyuj ntawd cov ntshav mus pleev rau lub thaj cov kub. Ces dua li cov ntshav uas seem muab hliv ywg lub taw thaj kom tas. Koj muab cov npluag roj uas npog plab hnyuv, nplooj siab uas zoo tshaj plaws, thiab ob lub raum nrog cov npluag roj uas qhwv ob lub raum, coj mus hlawv rau saum lub thaj fij rau kuv. Tiamsis tus nyuj cov nqaij, daim tawv thiab cov plab hnyuv mas muab coj mus hlawv rau sab nraum ntug yeej. Qhov no yog muab fij tshem cov povthawj lub txim povtseg. “Muab ib tug yaj los thiab hais rau Aloos thiab nws cov tub, kom lawv tsa tes rau saum tus yaj ntawd taubhau, thiab koj cia li muab tus yaj ntawd tua, muab cov ntshav coj mus ywg rau lub thaj. Ces muab tus yaj ntawd txiav ua tej daim; ntxuav tej plab hnyuv thiab cov cesqab kom huv, coj mus tso tshooj rau saum lub taubhau thiab cov nqaij, muab tagnrho tus yaj ntawd coj mus hlawv rau saum lub thaj fij rau tus TSWV, kom tej pa tsw qab ntxiag rau tus TSWV. “Koj muab dua ib tug yaj los thiab hais kom Aloos thiab nws cov tub tsa tes rau saum tus yaj ntawd taubhau, koj muab tus yaj ntawd tua, thiab muab mentsis ntshav coj mus pleev rau Aloos thiab nws cov tub cov tsho ntev lub ntsej sab xis thiab pleev rau lawv cov ntivtaw xoo sab xis. Muab cov ntshav uas seem coj mus ywg rau lub thaj plaub sab ntawd huv tibsi. Koj muab mentsis ntshav saum lub thaj thiab mentsis roj txhawb meejthawj nchos rau Aloos thiab nws lub tsho, nws cov tub thiab lawv cov tsho. Ces nws thiab nws cov tub thiab lawv tej tsoos tsho thiaj dawbhuv txaus kuv siab. “Muab tej roj yaj hlais tseg, tej roj cesqab, tej npluag roj uas npog plab hnyuv, nplooj siab, ob lub raum nrog cov npluag roj uas qhwv ob lub raum, thiab cesqab sab xis. Rho cov ncuav uas twb muab fij rau kuv lawm hauv tawb los, muab ib yam ib lub li no: muab ib lub ncuav xyaw roj txiv ntoo, muab ib lub ncuav tsis xyaw roj, muab ib lub ncuav nyias nyias, thiab koj muab tagnrho cov khoom fij no rau Aloos thiab nws cov tub, kom lawv muab yom fij rau kuv. Ces koj rov txais cov zaub mov ntawm lawv tes los, thiab muab coj mus hlawv rau saum lub thaj, tso tshooj ntxiv rau saum cov zaub mov uas twb muab hlawv fij rau kuv lawm. Tej pa ntawd yuav tsw qab ntxiag txaus kuv siab heev. “Koj muab lub hauvnrob yaj coj los yom fij tshwjxeeb rau kuv. Thooj nqaij hauvnrob no yog koj tug. “Tus yaj uas muab tua yom fij rau kuv, thaum ua kevcai tsa tus povthawj, yuav tsum muab lub hauvnrob thiab cesqab tshwj rau ib cag, tseg rau Aloos thiab nws cov tub. Thaum kuv haivneeg fij lawv tej khoom sib raug zoo, mas muab lub hauvnrob thiab cesqab ua cov povthawj tug, kuv thiaj tsis hloov siab. Qhov no yog cov pejxeem muab rau kuv uas yog tus TSWV. “Thaum Aloos tuag, muab nws cov ris tsho uas yog tus povthawj rau nws cov tub hnav, rau qhov lawv yuav hnav thaum uas tsa lawv ua povthawj. Aloos tus tub uas ua povthawj hloov nws chaw yuav tsum hnav cev ris tsho ntawd xya hnub, thaum uas nws tuaj rau hauv lub Tsevntaub uas yog kuv qhov chaw sib ntsib thiab ua kuv tes haujlwm hauv Chav Dawbhuv. “Coj tus yaj uas tua ua kevcai tsa Aloos thiab nws cov tub ntawd, mus hau rau hauv chav dawbhuv. Lawv yuav noj cov nqaij yaj thiab cov ncuav uas tseg rau hauv lub tawb nyob ntawm kuv lub Tsevntaub sib ntsib lub qhovrooj. Lawv yuav tsum noj tej zaub mov uas ua kevcai ntxuav zam txim thaum tsa lawv ntawd. Tej nqaij lossis tej mov uas seem txog tagkis sawv ntxov tsis txhob noj lawm, cia li muab hlawv povtseg; rau qhov yog tej khoom uas dawbhuv. “Koj ua kevcai tsa Aloos thiab nws cov tub kom txwm nkaus xya hnub, raws li kuv tau samhwm rau koj lawm. Txhua hnub twg koj yuav tsum muab ib tug heev nyuj los tua theej txhoj, ua kev zam lawv lub txim. Thiab qhov no yog koj ua kevcai ntxuav lub thaj. Koj cia li muab roj txiv ntoo hliv rau lub thaj ua kom lub thaj dawbhuv. Ua li no kom txwm nkaus xya hnub. Lub thaj thiaj yuav dawbhuv, thiab txhua tus neeg lossis txhua yam uas mus chwv lub thaj, lub thaj yuav ua rau txhua tus neeg lossis tej khoom ntawd dawbhuv. “Yuav tsum muab ob tug menyuam yaj uas muaj ib xyoo mus tua hlawv rau saum lub thaj, ib hnub dhau ib hnub tsis tu li. Muab ob tug menyuam yaj ntawd ib tug tua hlawv theej txhoj rau thaum sawv ntxov thiab muab ib tug tua hlawv rau thaum yuav tsaus ntuj. Luj ob choj tseem hmoov nplej zuaj xyaw ib lamhwj tseem roj txiv ntoo, thiab ib lamhwj cawv txiv hmab fij nrog thawj tug menyuam yaj. Tus menyuam yaj uas hlawv theej txhoj thaum yuav tsaus ntuj, muab hmoov nplej, roj txiv ntoo thiab cawv txiv hmab coj mus fij nrog ib yam li tus uas fij thaum sawv ntxov. Cov no yog tej zaub mov uas fij rau kuv uas yog tus TSWV, thiab tej pa ntawd yuav tsw qab ntxiag txaus kuv siab. Yuav tsum ua kevcai hlawv cov khoom fij li no tabmeeg kuv, rau ntawm lub Tsevntaub uas yog kuv qhov chaw sib ntsib lub qhovrooj mus ibtxhis. Kuv yuav nrog koj tham thiab ntsib kuv haivneeg ntawm qhov chaw ntawd. Kuv yuav ntsib cov Yixalayees ntawm qhov chaw ntawd, thiab kuv lub tshwjchim uas ci ntsa iab hauv kuv qhov chaw sib ntsib yuav ua rau thaj chaw ntawd dawbhuv. Kuv yuav ua kom lub Tsevntaub uas yog kuv qhov chaw sib ntsib thiab lub thaj dawbhuv, thiab kuv yuav tsa Aloos thiab nws cov tub ua cov povthawj ua kuv tes haujlwm. Kuv yuav nrog cov Yixalayees nyob, thiab kuv yuav ua lawv tus Vajtswv. Lawv yuav paub hais tias, kuv yog tus TSWV lawv tus Vajtswv uas coj lawv tawm nram tebchaws Iziv los, kuv thiaj nrog lawv nyob. Kuv yog tus TSWV uas yog lawv tus Vajtswv ntag. “Muab ntoo kubtwm ua ib lub thaj hlawv tej hmoov tshuaj tsw qab. Lub thaj ntawd txua ua plaub fab, ntev ib tshim thiab dav ib tshim, thiab siab ob tshim. Txua plaub tug kub koom hlo rau plaub ceg kaum thaj. Koj muab tej tseem kub vuam rau plaub sab, thiab plaub tug kub huv tibsi, thiab muab ib pluaj kub ntsia puab tus ntug thoob plaws. Ua plaub lub khawb kub rau lub thaj, thiab muab ntsia rau ob sab hauv qab tus ntug ib sab twg ob lub ua chaw ntxig nqaj kwv lub thaj. Muab ntoo kubtwm txua ua nqaj kwv lub thaj thiab muab kub vuam ob tug nqaj ntawd huv tibsi. Muab lub thaj ntawd txawb rau ntawm daim ntaub uas thaiv lub Phijxab sab nraum no. Qhov chaw ntawd, thiaj yog qhov chaw uas kuv yuav ntsib koj. Txhua tagkis uas Aloos tuaj tu cov teeb, nws yuav tsum hlawv hmoov tshuaj kom tsw qab ntxiag rau saum lub thaj ntawd. Thaum yuav tsaus ntuj uas Aloos tuaj taws cov teeb, nws yuav tsum hlawv tej hmoov tshuaj tsw qab ntawd ib yam nkaus. Tej hmoov tshuaj tsw qab no yuav tsum hlawv fij rau tus TSWV mus ibtxhis li. Tsis txhob muab tej yam hmoov tshuaj tsw qab uas tsis dawbhuv lossis tsiaj lossis qoobloo hlawv rau saum lub thaj ntawd, thiab tsis pub hliv cawv txiv hmab fij rau saum lub thaj ntawd. Aloos yuav tsum muab tej ntshav tsiaj uas tua theej txhoj, pleev lub thaj plaub tug kub ua kevcai ntxuav ib xyoo ib zaug. Yuav tsum ua li no txhua xyoo mus ibtxhis li. Lub thaj no yog lub uas dawbhuv kawg nkaus rau kuv uas yog tus TSWV.” Tus TSWV hais rau Mauxes hais tias, “Thaum koj txheeb cov Yixalayees npe, txhua tus txivneej yuav tsum them nyiaj rau kuv txhiv nws txojsia rov qab, ua li no thaum koj tabtom txheeb npe, lawv thiaj tsis raug kev puastsuaj. Txhua tus uas sau npe yuav tsum them nyiaj kom puv ntoob li uas tau kom tseg, muab luj kom hnyav ntaus nqi raws nraim li nomtswv kevcai. Txhua tus yuav tsum them cov nyiaj no ua khoom fij rau kuv. Txhua tus neeg uas muaj hnubnyoog nees nkaum xyoo rov saud uas twb sau npe tas lawm, yuav tsum tau coj nyiaj tuaj fij rau tus TSWV. Thaum lawv them cov nyiaj no txhiv lawv txojsia, kom tus npluanuj tsis txhob them ntau tshaj, thiab tus pluag tsis txhob them tsawg tshaj. Txais cov nyiaj uas cov pejxeem Yixalayees coj tuaj khaws tseg tau siv rau hauv lub Tsevntaub uas yog kuv qhov chaw sib ntsib. Cov nyiaj no yog coj tuaj txhiv lawv txojsia, kuv yuav nco ntsoov tsomkwm lawv.” Tus TSWV hais rau Mauxes hais tias, “Koj muab tooj ua ib lub phiab thiab lub taw phiab. Coj mus txawb rau ntawm lub Tsevntaub uas yog kuv qhov chaw sib ntsib thiab lub thaj kis nruab nrab, thiab nqa dej los hliv kom puv nkaus lub phiab ntawd. Aloos thiab nws cov tub thiaj tau cov dej ntawd ntxuav tes ntxuav taw ua ntej uas lawv mus hauv lub Tsevntaub uas yog kuv qhov chaw sib ntsib lossis thaum lawv mus sawv fij zaub mov rau ntawm lub thaj. Lawv thiaj yuav tsis raug tua tuag. Lawv yuav tsum nco ntsoov ntxuav tes thiab ntxuav taw, lawv thiaj yuav tsis tuag. Qhov no ua ib txoj kevcai rau lawv thiab lawv tej xeebntxwv coj mus ibtxhis li.” Tus TSWV hais rau Mauxes hais tias, “Muab tej khoom tsw qab no: kaum ob choj hmoov tshuaj tsw qab mules, rau choj nroj tsw qab, rau choj kabtsib tauj tsw qab, thiab kaum ob choj ntoo kubtwm (muab luj kom hnyav ntaus nqi raws li nomtswv kevcai). Hliv ib taub roj txiv ntoo ntxiv rau, thiab muab nyoj ua cov roj txhawb meejthawj, sib tov kom zoo ib yam li cov tshuaj tsw qab. Muab cov roj ntawd pleev lub Tsevntaub uas yog kuv qhov chaw sib ntsib thiab lub Phijxab uas ntim Vajtswv tej lus cog tseg, lub rooj thiab tej cuabyeej uas siv rau lub rooj, lub teeb thiab tej cuabyeej uas siv rau lub teeb, lub thaj hlawv hmoov tshuaj tsw qab, lub thaj uas hlawv tej khoom fij thiab tej cuabyeej uas siv rau lub thaj ntawd, thiab lub phiab tooj uas ntxuav tes ntxuav taw thiab lub taw phiab. Qhov uas koj ua li no yog muab tej ntawd fij kom dawbhuv, ces txhua tus neeg lossis txhua yam uas chwv tej ntawd thiaj li dawbhuv, vim chwv raug yam uas dawbhuv. Koj muab Aloos thiab nws cov tub txhawb meejthawj, thiab muab lawv tsa ua cov povthawj ua kuv tes haujlwm. Koj hais rau cov pejxeem Yixalayees hais tias, ‘Nej yuav tsum siv cov roj txhawb meejthawj uas dawbhuv no ua kuv tes haujlwm mus ibtxhis. Cov roj no, koj tsis txhob muab hliv rau tej tus neeg uas tsis raug tsa, thiab koj tsis txhob muab cov roj no ua qauv mus ua dua ib co kom zoo li cov no ntxiv lawm. Cov roj no dawbhuv, mas koj yuav tsum saib taus cov roj dawbhuv no. Yog leejtwg txhob txwm ua dua ib co roj kom zoo li cov no lossis muab cov roj no mus hliv rau tus neeg uas tsis yog povthawj, tus ntawd yuav raug rho tawm hauv kuv haivneeg Yixalayees mus.’ ” Tus TSWV hais rau Mauxes hais tias, “Koj cia li muab xatates, aunikes, nkanpanoos thiab cov tseem roj ntoo tsw qab uas tsw qab ntxiag no (txhua yam muab luj kom hnyav sib npaug zos), coj mus zom ua ke ua ib co hmoov tshuaj tsw qab, thiab muab ntsev tov ntxiv rau kom sib tov zoo thiaj dawbhuv. Muab zom kom ua hmoov mos heev, thiab nqa mus cia rau hauv lub Tsevntaub uas yog kuv qhov chaw sib ntsib, thiab muab nphoo rau ntawm hauv ntej lub Phijxab uas ntim Vajtswv tej lus cog tseg. Cov hmoov tshuaj tsw qab no ua kom nej dawbhuv rau tus TSWV. Tsis txhob muab tus qauv no mus ua hmoov tshuaj tsw qab rau nej siv ntxiv lawm. Tej hmoov tshuaj tsw qab no ua kom nej dawbhuv rau tus TSWV. Yog leejtwg tseem ua dua ib co hmoov tshuaj tsw qab zoo li cov no los rau nws siv, cia li muab tus ntawd rho ntawm hauv kuv haivneeg mus.” Tus TSWV hais rau Mauxes hais tias, “Kuv xaiv Hules tus xeebntxwv uas yog Aulis tus tub Npexalees uas yog xeem Yudas, thiab kuv pub rau nws puv npo vaj ntsujplig. Kuv pub rau nws muaj kev totaub, kev txawj paub thiab muaj peevxwm ua tau haujlwm txhua yam, kom muaj tswvyim txawj muab qauv txua tau txhua yam, txawj nchuav kub, nchuav nyiaj thiab nchuav tooj; txawj txiav tej saw los sib dhos, txaug ntoo thiab txawj ua tau txhua yam huv tibsi. Thiab kuv tseem xaiv Ahixamas tus tub Auhauli-as uas yog xeem Das los nrog Npexalees ua haujlwm ua ke. Kuv pub tswvyim zoo rau lwm tus, kom lawv muaj peevxwm ua tau txhua yam uas kuv hais kom lawv ua, xwsli: lub Tsevntaub uas yog kuv qhov chaw sib ntsib, lub Phijxab uas ntim Vajtswv tej lus cog tseg thiab lub hau Phijxab, tagnrho tej cuabyeej uas siv hauv lub Tsevntaub, lub rooj thiab tej cuabyeej uas siv rau lub rooj, tus ncej teeb uas tseem kub thiab tej cuabyeej uas siv rau lub teeb, lub thaj hlawv hmoov tshuaj tsw qab, lub thaj uas hlawv khoom fij thiab tej cuabyeej uas siv rau lub thaj, lub phiab ntxuav tes ntxuav taw thiab lub taw phiab, cov tsho ntev uas Aloos thiab nws cov tub hnav thaum lawv ua cov povthawj tes haujlwm, cov roj txhawb meejthawj, thiab cov hmoov tshuaj tsw qab rau hauv Chav Dawbhuv kawg nkaus. Lawv yuav tsum ua txhua yam no, kom tiav raws li uas kuv tau hais rau koj lawm.” Tus TSWV hais rau Mauxes kom qhia rau cov Yixalayees hais tias, “Nej yuav tsum muab kuv hnub Xanpataus ua hnub so, rau qhov hnub ntawd yog lub cim rau nej thiab kuv mus ibtxhis, thiab qhia kom nej paub hais tias kuv yog nej tus TSWV, tus uas xaiv nej los ua kuv haivneeg. Nej yuav tsum hwm hnub xanpataus; rau qhov hnub hnub ntawd yog hnub tseemceeb heev rau nej. Tiamsis yog leejtwg tsis hwm hnub ntawd, nws mus ua haujlwm hnub ntawd, cia li muab tus ntawd tua povtseg. Nej muaj rau hnub ua nej tej haujlwm, tiamsis hnub xya yog hnub so uas dawbhuv rau tus TSWV; yog leejtwg tseem mus ua haujlwm hnub Xanpataus, cia li muab tus ntawd tua povtseg. Cov Yixalayees yuav tsum muab hnub Xanpataus saib kom muaj nqis mus ibtxhis, nco ntsoov hnub ntawd yog lub cim rau cov lus cog tseg. Hnub Xanpataus yog lub cim rau kuv thiab cov Yixalayees mus ibtxhis li, rau hnub ntawd kuv tsim lub ntuj thiab lub ntiajteb, tiamsis hnub xya kuv so, thiab tsis tsim ib yam dabtsi ntxiv lawm.” Thaum Vajtswv hais txhua yam rau Mauxes saum Roob Xinais lawm, Vajtswv thiaj muab ob daim txiag zeb uas Vajtswv muab nws tus ntivtes sau nws cov lus samhwm cob rau Mauxes. Thaum cov neeg pom hais tias Mauxes pheej tsis nqis saum roob los, lawv txawm sib sau tuaj cuag Aloos thiab hais rau nws hais tias, “Peb tsis paub xyov muaj xwm dabtsi rau Mauxes tus uas coj peb nram tebchaws Iziv los lawm; yog li ntawd, koj cia li ncuav ib tug vajtswv los ua tus coj peb.” Aloos teb lawv hais tias, “Cia li mus hle nej tej pojniam menyuam tej qhwsntsej kub nqa tuaj rau kuv.” Yog li ntawd, lawv thiaj hle tagnrho lawv tej qhwsntsej kub nqa tuaj rau Aloos. Aloos muab cov qhwsntsej kub ntawd mus hlawv hauv lub yeejvub kom yaj, thiab muab nchuav ua ib tug mlom nyuj. Lawv hais tias, “Ib tsoom Yixalayees, tus no yog tus vajtswv uas coj peb nram tebchaws Iziv los!” Tom qab ntawd, Aloos ua ib lub thaj rau ntawm tus mlom nyuj ntawd hauv ntej thiab tshaj tawm rau sawvdaws hais tias, “Tagkis peb yuav ua ib pluag noj haus ua tus TSWV tsaug.” Tagkis, thaum kaj ntug txoog lawv thiaj coj tsiaj tuaj tua hlawv fij theej txhoj thiab muab dua ib co tua fij ua kev sib raug zoo. Cov pejxeem thiaj zaum tsaws noj tsau haus qaug, sawv dhia seevcev thiab sib deev. Tus TSWV hais rau Mauxes hais tias, “Koj cia li maj nroos nqis rov qab mus tamsim no, rau qhov cov pejxeem uas koj coj nram tebchaws Iziv los, lawv ua txhaum thiab tso kuv tseg lawm. Lawv tso txojkev uas kuv kom lawv taug tseg lawm; lawv muab kub nchuav ua ib mlom nyuj, lawv pe tus mlom nyuj ntawd, thiab muab khoom fij rau tus mlom nyuj, thiab lawv hais tias, ‘Ib tsoom Yixalayees, tus no yog tus vajtswv uas coj peb nram tebchaws Iziv los ntag!’ Tus TSWV hais rau Mauxes hais tias, ‘Kuv paub cov neeg no zoo lawm, lawv yeej tawv ncauj heev. Nimno, tsis txhob cheem kuv. Kuv chim rau lawv heev, kuv yuav ua kom lawv raug kev puastsuaj. Ces kuv yuav tsa koj thiab koj cov xeebntxwv ua ib haivneeg tseemceeb.’ ” Tiamsis Mauxes thov tus TSWV uas yog nws tus Vajtswv hais tias, “Tus TSWV, koj twb tau siv koj lub zog thiab lub hwjchim coj lawv tawm nram tebchaws Iziv los, vim li cas koj yuav chim rau koj haivneeg ua luaj? Cov Iziv yuav hais tias, koj coj koj haivneeg tawm hauv tebchaws Iziv los, yog koj coj lawv los tua povtseg thiab ua kom lawv puastsuaj tas rau tom roob mojsab qhua xwb? Thov koj ua siab ntev thiab txo koj txojkev chim, tsis txhob tso kev puastsuaj los rau koj haivneeg. Thov koj nco ntsoov Anplahas, Ixaj thiab Yakhauj uas yog koj cov tubtxib. Nco ntsoov tej lus uas koj tau cog tseg lawm hais tias, koj yuav pub rau lawv muaj xeebntxwv coob ib yam li cov hnubqub saum ntuj thiab koj yuav muab lub tebchaws uas koj coglus tseg rau lawv cov xeebntxwv, thiab ua lawv tug mus ibtxhis li.” Yog li ntawd, tus TSWV thiaj hloov siab thiab tsis tso kev puastsuaj los rau nws haivneeg li uas nws tau hais lawm. Mauxes txawm nqis saum roob los, nws nqa ob daim txiag zeb uas sau cov lus samhwm rau ob sab nrog Mauxes los. Vajtswv yog tus txua ob daim txiag zeb thiab sau tej lus samhwm, thiab nws txaug npe ntawv rau saum ob daim txiag zeb ntawd. Thaum Yausuas hnov cov neeg qw ua tsuj ua tsaug, nws hais rau Mauxes hais tias, “Kuv hnov suab sib ntaus sib tua qw ua tsuj ua tsaug nram lub yeej tuaj.” Mauxes teb hais tias, “Tsis yog lub suab qw zoo li thaum ntaus yeej rog lossis lub suab quaj thaum swb rog; lub suab ntawd yog suab hu nkauj.” Thaum Mauxes los ze lub yeej, nws pom tus mlom nyuj thiab pom cov neeg dhia seevcev lomzem xauv npo, nws chim heev. Nws thiaj muab ob daim txiag zeb ntawm nws tes ntsawm tawg ntsoog ntxaws rau ntawm taw roob. Nws coj tus mlom nyuj uas lawv nchuav ntawd mus hlawv, muab zom ua hmoov mos mos, thiab muab tov dej rau cov Yixalayees haus. Mauxes nug Aloos hais tias, “Cov neeg no ua li cas rau koj, koj thiaj coj lawv ua kev txhaum loj npaum li no?” Aloos teb hais tias, “Koj tsis txhob chim rau kuv, koj yeej paub cov neeg no, lawv lub siab yeej nyiam ua txojkev phem. Lawv tuaj thov kuv hais tias, ‘Peb tsis paub xyov muaj xwm dabtsi rau Mauxes tus uas coj peb tawm nram tebchaws Iziv los lawm; yog li ntawd, koj cia li nchuav ib tug mlom los coj peb.’ Kuv thiaj hais kom lawv nqa lawv tej saw kub thiab tej qhwsntsej kub uas lawv muaj tuaj rau kuv. Kuv thiaj coj mus hlawv rau hauv qhovcub, ces txawm ua tau tus mlom nyuj no.” Mauxes pom hais tias, Aloos tsis tswj cov neeg thiab tso lawv ua tej kev txajmuag tabmeeg rau tej yeebncuab saib tsis taus lawv. Yog li ntawd, Mauxes thiaj li mus sawv ntawm roojvag qw hais tias, “Leejtwg tuaj tus TSWV tog cia li los cuag kuv!” Tagnrho xeem Levis txawm sau nthwv los vij Mauxes, Mauxes hais rau lawv hais tias, “Tus TSWV uas yog haivneeg Yixalayees tus Vajtswv samhwm kom nej nyias nqa nyias rab ntaj thiab pib ntawm lub roojvag no mus kom thoob plaws lub yeej no muab nej tej kwvtij, tej phoojywg thiab nej tej neeg zejzog tua povtseg kom tas.” Cov Levis mloog Mauxes lus, hnub ntawd lawv thiaj muab cov txivneej tua tuag kwvyees li peb txhiab leej. Mauxes hais rau cov Levis hais tias, “Hnub no nej rov tsa nej ua povthawj ua tus TSWV tes haujlwm rau qhov nej muab nej tej tub thiab tej kwvtij tua povtseg, yog li ntawd, hnub no tus TSWV thiaj foom koob hmoov rau nej.” Hnub tom qab Mauxes hais rau cov pejxeem hais tias, “Nej ua kev txhaum loj heev. Tiamsis nimno kuv yuav rov mus cuag tus TSWV saum roob dua; tej zaum kuv yuav mus thov tau tus TSWV zam txim rau nej.” Mauxes rov mus cuag tus TSWV thiab thov hais tias, “Cov neeg no ua kev txhaum loj kawg li. Lawv muab kub nchuav ua ib tug vajtswv thiab lawv pe tus vajtswv ntawd. Thov koj zam lawv tej kev txhaum; tiamsis yog koj zam tsis tau, thov koj rho kuv lub npe tawm hauv phau ntawv uas koj sau koj haivneeg tej npe lawm.” Tus TSWV teb hais tias, “Cov twg ua txhaum rau kuv, cov ntawd thiaj yog cov uas yuav raug rho npe tawm hauv kuv phau ntawv mus xwb. Tamsim no koj cia li rov qab mus, coj cov pejxeem mus nyob qhov chaw uas kuv twb qhia rau koj lawm. Nco ntsoov kuv tus timtswv yuav mus ua nej ntej coj nej kev, tiamsis thaum txog lub sijhawm kuv txiav txim, kuv yuav txiav txim rau lawv tej kev txhaum.” Tus TSWV tso kab mob kis los rau cov pejxeem, rau qhov lawv yuam Aloos muab kub nchuav ua ib tug mlom nyuj rau lawv pe. Tus TSWV hais rau Mauxes hais tias, “Koj thiab cov neeg uas koj coj nram tebchaws Iziv los, cia li tawm ntawm qhov chaw no, thiab mus nyob lub tebchaws uas kuv coglus tseg rau Anplahas, Ixaj thiab Yakhauj hais tias kuv yuav muab rau lawv tej xeebntxwv nyob. Kuv yuav tso ib tug timtswv los coj nej kev, kuv yuav ntiab cov Kana-as, cov Amaules, cov Hitis, cov Pelixes, cov Hivis thiab cov Yenpus kom khiav tawm mus. Nej yuav mus nyob hauv lub tebchaws uas av rog thiab zoo qoob. Tiamsis kuv yuav tsis nrog nej mus, rau qhov nej yog cov neeg tawv ncauj heev, nyob tsam kuv ua rau nej puastsuaj tas tom ib tog kev.” Thaum cov pejxeem hnov zaj xov tsis zoo no, lawv txawm pib quaj thiab tsis coj nyiaj tsis coj kub li lawm. Vim tus TSWV tau samhwm rau Mauxes kom hais rau lawv hais tias, “Nej yog cov neeg tawv ncauj. Yog kuv nrog nej mus, nyob tsam kuv ua rau nej puastsuaj tas. Nimno cia li hle nej tej nyiaj tej kub cia, kuv thiaj paub hais tias yuav ua li cas rau nej.” Yog li ntawd, tom qab uas lawv tawm ntawm Roob Xinais mus lawm, cov Yixalayees thiaj tsis coj nyiaj tsis coj kub lawm. Txhua qhov uas cov Yixalayees tsuam chaw so, Mauxes coj lub Tsevntaub mus rub rau tom ntug yeej. Lub tsev ntawd hu ua tus TSWV lub Tsevntaub sib ntsib, thiab yog leejtwg xav mus cuag tus TSWV nws yuav tsum mus rau hauv lub Tsevntaub. Yog thaum twg Mauxes tawm mus rau tom lub tsev ntawd, cov pejxeem tawm tuaj sawv ntawm lawv tej qhovrooj tsevntaub thiab ntsia Mauxes mus kom nkag plaws rau hauv lub tsev ntawd lawm. Thaum Mauxes mus rau hauv lub tsevntaub lawm, tauv huab txawm txav los npog nkaus lub qhovrooj Tsevntaub, thiab tus TSWV nrog Mauxes tham hauv tauv huab tuaj. Thaum cov pejxeem pom tauv huab txav los rau ntawm lub qhovrooj Tsevntaub, lawv sawvdaws tawm hauv lawv tej tsevntaub tuaj sawv ntawm nyias lub qhovrooj pehawm tus TSWV. Tus TSWV nrog Mauxes tham tim ntsej tim muag ib yam li ob tug phoojywg sib tham. Ces thaum sib tham tas, Mauxes mam rov qab los tsev. Tiamsis Noos tus tub Yausuas uas yog tus tub hluas pab Mauxes, nws yeej nyob rawv hauv lub Tsevntaub ntawd li. Mauxes hais rau tus TSWV hais tias, “Koj yeej kom kuv coj cov neeg no mus nyob hauv lub tebchaws ntawd, tiamsis koj twb tsis qhia rau kuv paub tus uas koj yuav tso nrog kuv mus. Koj hais tias koj paub kuv zoo thiab txaus siab rau kuv. Yog koj txaus siab rau kuv, thov qhia tej uas koj npaj siab yuav ua ntawd rau kuv paub, kuv thiaj yuav ua tau tej uas haum koj siab. Nco ntsoov hais tias koj twb xaiv haivneeg no ua koj tug lawm.” Tus TSWV teb hais tias, “Kuv yuav nrog koj mus thiab pub kom koj muaj yeej.” Mauxes teb tus TSWV hais tias, “Yog koj tsis nrog peb mus, thov tsis txhob tso peb tawm qhov chaw no mus. Yog koj tsis nrog peb mus, leejtwg yuav paub hais tias, koj txaus siab rau kuv thiab rau koj haivneeg? Koj nrog peb mus thiaj yuav cais tau peb tawm ntawm luag lwm haivneeg uas nyob hauv lub ntiajteb no.” Tus TSWV hais rau Mauxes hais tias, “Kuv yuav ua raws li koj thov, rau qhov kuv paub koj zoo thiab kuv yeej txaus siab rau koj.” Ces Mauxes txawm thov hais tias, “Thov koj qhia koj lub tshwjchim uas ci ntsa iab rau kuv pom.” Tus TSWV teb hais tias, “Kuv yuav tso kuv tej kev zoo mus ua koj ntej, thiab kuv yuav qhia kuv lub npe uas yog ‘Tus TSWV’ tabmeeg koj; kuv yuav hlub tus uas kuv hlub thiab tshua tus uas kuv tshua. Kuv tsis pub koj pom kuv lub ntsejmuag, rau qhov yeej tsis muaj ib tug neeg twg uas pom kuv es tseem muaj sia nyob, tiamsis muaj ib qhov chaw nyob ntawm kuv ib sab no, koj cia li nce mus sawv saum lub pobzeb ntawd. Thaum kuv lub tshwjchim uas ci ntsa iab hla los, kuv yuav muab koj tso rau hauv kis pobzeb, thiab muab kuv txhais tes thaiv koj mus txog thaum uas kuv hla dhau koj mus lawm. Ces kuv yuav tshem kuv txhais tes tawm, thiab koj yuav pom kuv lub nraubqaum tiamsis tsis pom kuv lub ntsejmuag.” Tus TSWV hais rau Mauxes hais tias, “Koj txiav dua ob daim txiag zeb kom zoo ib yam li thawj ob daim, thiab kuv yuav sau tej lus uas nyob hauv thawj ob daim uas koj muab tsoo tawg lawm rau hauv ob daim tshiab ntawd. Koj yuav tsum ua kom tiav rau tagkis, thiab tagkis sawv ntxov koj cia li nce tuaj rau saum Roob Xinais no, tuaj cuag kuv rau saum ncov roob. Tsis txhob pub leejtwg nrog koj tuaj; tsis pub kom leejtwg tuaj rau kuv pom saum roob no li; thiab tsis txhob pub yaj, tshis thiab nyuj tuaj noj zaub ze ntawm lub taw roob no.” Yog li ntawd, Mauxes thiaj txiav ob daim txiag zeb zoo li thawj ob daim, thiab tagkis sawv ntxov nws thiaj nqa ob daim txiag zeb ntawd nce mus rau saum Roob Xinais raws li tus TSWV hais rau nws lawm. Tus TSWV los nyob hauv tauv huab, nrog Mauxes sawv ua ke, thiab qhia nws lub npe dawbhuv uas yog hu ua tus TSWV rau Mauxes. Tus TSWV hla Mauxes xubntiag mus thiab hu hais tias, “Kuv yog tus TSWV, Vajtswv tus uas muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees. Kuv txojkev hlub yuav nyob nrog ntau txhiab tiam neeg, thiab zam txim rau tej neeg ua phem thiab muaj txim; tiamsis kuv yuav rau txim rau lawv tej xeebntxwv mus txog peb thiab plaub tiam neeg, rau qhov lawv niam lawv txiv tau ua txhaum los lawm.” Mauxes txhos caug ntua thiab nyo ntshis rau hauv av pehawm. Mauxes hais tias, “Tus TSWV, yog koj txaus siab rau kuv tiag, kuv thov koj nrog peb mus. Cov neeg no yeej tawv ncauj heev, tiamsis thov koj zam tej kev phem uas peb ua thiab lub txim uas peb muaj, thiab thov koj lees yuav peb ua koj haivneeg.” Tus TSWV hais rau Mauxes hais tias, “Kuv coglus rau cov Yixalayees. Kuv yuav ua txujci tseemceeb rau sawvdaws pom, yog tej txujci uas kuv yeej tsis tau ua rau ib haivneeg twg pom nyob hauv ntiajteb no li. Txhua tus yuav pom kuv uas yog tus TSWV ua tau txujci tseemceeb, rau qhov kuv yuav ua tej uas txaus ntshai rau nej pom. Nej yuav tsum ua raws li txoj kevcai uas kuv muab rau nej hnub no lawm. Kuv thiaj yuav ntiab cov Amaules, cov Kana-as, cov Hitis, cov Pelixes, cov Hivis thiab cov Yenpus, kom khiav tawm ua ntej nej mus txog. Nej tsis txhob coglus nrog cov neeg uas ibtxwm nyob hauv lub tebchaws uas nej yuav mus nyob ntawd, rau qhov tej ntawd yuav ua rooj hlua caws tos nej kev. Nej cia li muab lawv tej thaj rhuav povtseg, muab lawv tej ncej zeb tsoo kom tawg tas, thiab muab lawv tej ncej mlom pojniam Aselas ntov povtseg huv tibsi. “Nej tsis txhob pe ib tug vajtswv twg, rau qhov kuv uas yog tus TSWV khib nej heev. Tsis txhob cog kev phoojywg nrog cov neeg hauv lub tebchaws ntawd, rau qhov thaum lawv mus pe lawv tej vajtswv thiab tua tsiaj fij rau tej mlom ntawd, lawv yuav caw nej mus koom nrog lawv, thiab lawv yuav ntxias kom nej nrog lawv noj tej nqaij uas muab fij rau lawv tej vajtswv. Thaum nej mus yuav lawv cov ntxhais los rau nej cov tub ua pojniam, cov ntxhais ntawd puavleej ua niamntiav rau lawv tej vajtswv, ces lawv yuav coj nej cov tub mus ua ib yam li lawv ua ntawd thiab. “Nej tsis txhob nchuav mlom tooj rau nej pe. “Nco ntsoov ua kevcai noj ncuav tsis xyaw keeb. Ib yam li kuv tau samhwm rau nej, lub hli Anpis nej cia li ua kevcai noj ncuav tsis xyaw keeb xya hnub, rau qhov lub hli ntawd yog lub uas nej tawm nram tebchaws Iziv los. “Nej tej tub hlob thiab tej tsiaj thawj tug menyuam uas yog tus txiv puavleej yog kuv tug huv tibsi, tiamsis muab tus menyuam yaj mus fij txhiv tus menyuam neesluav. Yog nej tsis txhiv tus menyuam neesluav rov qab, nej cia li muab tus menyuam neesluav ntawd lov cajdab kom tuag. Thiab txhiv nej cov tub hlob huv tibsi rov qab. “Tsis txhob pub ib tug twg tuaj cuag kuv tes dawb tes npliag li. “Nej muaj rau hnub ua haujlwm, hnub xya nej yuav tsum so, txawm yog nej yuav maj cog qoobloo lossis sau qoobloo npaum twg los xij, nej tsis txhob mus ua haujlwm. “Nco ntsoov ua Kevcai rau thaum nej pib hlais nej tej nplej caug, thiab ua Kevcai Nyob Tsev Pheebsuab rau thaum lub caij nplooj ntoos zeeg uas nej sau nej tej txiv hmab. “Nej txhua tus txivneej yuav tsum tuaj pehawm kuv uas yog tus TSWV tus uas yog cov Yixalayees tus Vajtswv ib xyoo twg peb zaug. Tom qab uas kuv ntiab lwm haivneeg khiav tawm ua ntej nej mus nyob thiab nthuav nej ciam dej ciam av dav lawm, tsis muaj leejtwg yuav tuaj txeeb nej lub tebchaws thaum uas nej ua peb zaug kevcai ntawd li. “Nej tsis txhob muab ncuav xyaw keeb nqa tuaj fij thaum nej tua tsiaj fij rau kuv. Nej tsis txhob tseg tej nqaij uas nej tua ua Kevcai Hla Dhau mus txog tagkis kaj ntug. “Txhua xyoo nej yuav tsum muab nej tej qoobloo uas nej xub sau tau los, nqa tuaj tso rau hauv tus TSWV lub tsev. “Nej tsis txhob muab tus menyuam yaj lossis tus menyuam tshis cov nqaij hau xyaw leej niam cov kua mis.” Tus TSWV hais rau Mauxes hais tias, “Cia li sau tej lus no tseg, rau qhov tej lus uas kuv cog tseg rau koj thiab cov Yixalayees puavleej hais raws li tej lus no.” Mauxes nrog tus TSWV nyob saum roob tau plaub caug hnub plaub caug hmo, nws tsis noj mov thiab tsis haus dej li. Thiab Vajtswv sau tej lus cog tseg uas yog Kaum Nqe Kevcai rau saum ob daim txiag zeb. Thaum Mauxes nqis saum Roob Xinais los, nws nqa ob daim txiag zeb uas sau Kaum Nqe Kevcai ntawm nws ob txhais tes, nws lub ntsejmuag ci ntsa iab rau qhov nws nrog tus TSWV tham; tiamsis nws tsis paub hais tias, nws lub ntsejmuag ci li ntawd. Thaum Aloos thiab cov Yixalayees pom Mauxes lub ntsejmuag ci ntsa iab, lawv ntshai heev thiab tsis kam txav mus ze nws li. Tiamsis Mauxes hu kom lawv tuaj cuag nws, ces Aloos thiab cov Yixalayees tej thawjcoj thiaj mus cuag Mauxes, thiab nws nrog lawv tham. Tom qab ntawd, cov pejxeem Yixalayees sib sau los sawv ncig Mauxes, thiab Mauxes qhia tagnrho tej kevcai uas tus TSWV muab rau nws saum Roob Xinais rau lawv mloog. Thaum Mauxes qhia rau lawv tas lawm, nws thiaj muab ib daim ntaub npog nws lub ntsejmuag. Txhua zaus uas Mauxes mus nrog tus TSWV tham hauv lub Tsevntaub, nws muab daim ntaub uas npog nws lub ntsejmuag yaws. Thaum nws tawm los, nws piav tej uas tus TSWV samhwm rau nws, rau cov Yixalayees mloog thiab lawv pom Mauxes lub ntsejmuag ci ntsa iab. Mauxes rov muab ntaub npog nws lub ntsejmuag mus txog thaum nws rov mus cuag tus TSWV. Mauxes hu tagnrho ib tsoom pejxeem Yixalayees tuaj sib sau ua ke thiab nws hais rau lawv hais tias, “Ntawm no yog tus TSWV tej lus uas samhwm kom nej yuav tsum tau ua li no: Nej muaj rau hnub ua nej tej haujlwm, tiamsis hnub xya yog hnub tseemceeb rau nej, hnub Xanpataus yog hnub uas nej so thiab pehawm tus TSWV. Yog leejtwg tseem ua haujlwm hnub ntawd, yuav raug tua tuag. Txawm yog hauv nej tej tsev los hnub Xanpataus tsis txhob rauv taws hlo li.” Mauxes hais rau cov Yixalayees hais tias, “Ntawm no yog tus TSWV tej lus samhwm: Muab txhua yam uas nej muaj coj tuaj fij rau tus TSWV. Txhua tus uas xav nqa khoom tuaj fij rau tus TSWV, mas yog nqa kub, nyiaj thiab tooj; tej tseem ntaubmag, ntaub xiav, ntaub tsamxem thiab xov liab; tej ntaub uas muab plaub tshis ntos; tawv laug yaj uas muab zas liab; tej tseem tawv nyuj; ntoo kubtwm; roj sam teeb; ntoo tsw qab tso rau cov roj txhawb meejthawj thiab tej hmoov tshuaj uas tsw qab; tej qe zeb kanelias thiab lwm yam hlaws uas muab xaws rau ntawm cov Povthawj Hlob lub tsho efaus thiab daim ntaub npog hauvsiab. “Tagnrho nej cov uas muaj tswvyim ua txhua yam yuav tsum tuaj thiab ua tej uas tus TSWV samhwm tseg no: lub Tsevntaub, cov vov lub tsev, cov xov lub tsev, cov khawb, cov nqaj, cov tab, cov puab thiab cov tiag taw; lub Phijxab uas ntim Vajtswv tej lus cog tseg, ob tug nqaj, lub hau Phijxab thiab daim ntaub thaiv lub Phijxab; lub rooj, cov ceg rooj thiab tagnrho tej khoom siv rau lub rooj; cov ncuav uas fij rau tus TSWV; lub teeb uas taws kom cig pom kev thiab tej khoom siv; cov teebxeeb thiab cov roj; lub thaj hlawv hmoov tshuaj tsw qab thiab cov ceg; cov roj txhawb meejthawj, cov hmoov tshuaj tsw qab; daim ntaub thaiv lub qhovrooj uas mus rau hauv lub Tsevntaub; lub thaj hlawv khoom fij thiab daim ntxaij uas pua lub thaj; cov ceg thaj, thiab tej khoom siv rau lub thaj; lub phiab tooj ntxuav tes ntxuav taw thiab lub taw phiab; daim ntaub xov vaj cov ncej vaj, thiab cov tiag taw, daim ntaub roojvag; lub Tsevntaub tej ntsia thiab tej hlua pav lub Tsevntaub thiab lub vaj; thiab tej tsoos tsho rau cov povthawj hnav thaum lawv mus ua haujlwm hauv Chav Dawbhuv, tej tsoos tsho rau Aloos uas yog tus povthawj thiab nws cov tub hnav.” Ces cov Yixalayees txawm sawv kev mus, thiab lawv txhua tus txaus siab hlo coj lawv tej khoom tuaj fij ua tus TSWV lub Tsevntaub sib ntsib. Lawv puavleej nqa txhua yam khoom mus tso rau hauv lub tsev ntawd, kom tau siv thiab ua tej tsoos tsho rau cov povthawj. Tagnrho tej pojniam txivneej uas xav muab khoom fij ntawd, thiaj nqa paj ntaub, qhwsntsej, nplhaib, saw, xauv thiab txhua yam uas yog saw kub tuaj fij rau tus TSWV. Txhua tus uas muaj coj tej tseem ntaubmag, ntaub xiav, ntaub tsamxem, xov liab lossis tej tseem tawv nyuj tuaj. Cov uas txaus siab muab nyiaj lossis tooj tuaj fij, kom lawv cia li nqa tuaj fij rau tus TSWV, thiab txhua tus uas muaj ntoo kubtwm uas zoo siv coj tuaj huv tibsi. Txhua tus pojniam uas txawj ntos ntaub kom lawv nqa tej tseem xov maj, xov xiav, xov tsamxem thiab xov liab lossis tej ntaub uas lawv twb ntos tau lawm huv tibsi tuaj. Thiab kom lawv muab tej plaub tshis xuab ua xov. Kom cov thawjcoj nqa tej qe zeb kanelias thiab lwm yam hlaws uas muaj nqis tuaj dai rau lub tsho efaus thiab daim ntaub npog hauvsiab, thiab nqa tej ntoo tsw qab thiab tej roj uas sam rau cov teeb, cov roj txhawb meejthawj thiab tej hmoov tshuaj uas tsw qab tuaj. Cov Yixalayees tej pojniam thiab txivneej uas txaus siab hlo, puavleej nqa lawv tej khoom tuaj fij pub rau tus TSWV ua tej haujlwm uas tus TSWV tau samhwm rau Mauxes kom lawv ua ntawd. Mauxes hais rau cov Yixalayees hais tias, “Tus TSWV xaiv Npexalees uas yog Ulis tus tub thiab yog Hules tus xeebntxwv hauv xeem Yudas tuaj. Vajtswv pub rau nws puv npo Vajtswv tus ntsujplig, muaj kev txawj, muaj peevxwm thiab totaub ua tau txhua yam, muaj tswvyim paub muab qauv thiab txawj nchuav kub, nchuav nyiaj thiab nchuav tooj; txiav tej qe zeb dai ua tej tsham, txawj txua ntoo; thiab txawj ua tau txhua yam. Thiab Vajtswv pub rau Auhauli-as uas yog Ahixamas tus tub uas yog xeem Das, thiab Npexalees kom muaj peevxwm qhia tau lwm tus. Vajtswv pub tswvyim rau nkawd txawj ua txhua yam uas yog txawj muab qauv, ntos tej tseem ntaubmag; ntaub xiav, ntaub tsamxem thiab ntaub plaub yaj liab thiab lwm yam ntaub. Nkawd muaj peevxwm ua tau txhua yam thiab txawj muab txhua yam qauv. “Npexalees, Auhauli-as, thiab txhua tus uas tus TSWV pub tswvyim kom txawj thiab totaub ua txhua yam uas xav tau los ua lub Tsevntaub, lawv ua txhua yam raws li tus TSWV tau samhwm tseg.” Mauxes hu Npexalees, Auhauli-as, thiab tagnrho cov txivneej txawj ua haujlwm uas tus TSWV pub kom muaj peevxwm thiab cov uas txaus siab pab tuaj, thiab Mauxes kom lawv cia li pib ua lub Tsevntaub. Mauxes muab tej khoom uas cov Yixalayees coj tuaj ua lub Tsevntaub rau lawv, thiab cov Yixalayees tseem niaj tagkis nqa khoom fij tuaj rau Mauxes. Ces cov txivneej uas txawj ua haujlwm thiaj mus cuag Mauxes thiab hais rau nws hais tias, “Cov neeg nqa khoom tuaj ntau tshaj tej uas peb xav tau coj los ua tes haujlwm uas tus TSWV samhwm tseg kom ua lawm.” Ces Mauxes thiaj hais rau cov pejxeem thoob plaws hauv lub yeej, kom tsis txhob nqa khoom tuaj ua lub Tsevntaub ntxiv lawm; yog li ntawd, cov pejxeem thiaj tseg tsis nqa tuaj lawm. Cov khoom uas lawv xub nqa tuaj yeej txaus ua lub tsev tiav lawm. Cov txivneej uas ua tus TSWV lub Tsevntaub puavleej yog cov uas paub thiab txawj. Lawv muab kaum daim ntaubmag uas txaij xiav, txaij tsamxem thiab txaij liab xaws ua duab qhelunpees rau. Cov ntaub ntawd puavleej loj sib luag, ntev nees nkaum yim tshim, thiab dav plaub tshim. Lawv muab tsib daim ntaub xaws ua ib daig thiab muab dua tsib daim los xaws ua ke ib yam nkaus li ntawd. Lawv muab ntaub xiav xaws ua ib co ntsej tis raws tus ntug thoob plaws daim ntaub ob sab ntug nraud. Ces lawv muab tsib caug lub ntsej tis rau thawj daim, thiab muab tsib caug lub tis rau daim ob kom sib ncag zos. Thiab lawv ntaus tsib caug lub khawb kub, los khawm ob daim ntaub ua ke. Ces lawv muab plaub tshis ntos tau kaum ib daim ntaub los vov lub Tsevntaub. Thiab lawv ntos cov ntaub ntawd sib luag zos, ntev peb caug tshim thiab dav plaub tshim. Lawv muab tsib daim los xaws ua ke ua ib daig thiab muab rau daim los xaws ua ke ua ib daig. Lawv muab tsib caug lub ntsej tis rau thawj daig ntaub tus ntug ib sab thiab muab dua tsib caug lub ntsej tis rau daim ob tus ntug sab tod ib yam nkaus. Lawv muab tooj ntaus ua tsib caug lub khawb khawm ob daim ntaub ua ib daig vov lub tsev. Lawv tseem vov ob txheej ntxiv tuaj sab saud, ib txheej yog cov tawv yaj uas zas liab thiab ib txheej yog cov tawv uas zoo. Lawv phua ntoo kubtwm los ua cov tab sawv ntsug rau lub Tsevntaub. Txhua tus tab siab kaum tshim thiab dav ib tshim thiab ib dos, muab ob tug tab thais ua qwbdia, kom ob tug tab ntawd sib dhos ua ke. Lawv ua nees nkaum tus tab rau sab nrad thiab muab plaub caug pluaj nyiaj ua taw tiag cov tab, ob daig tiag taw, tiag ib tug tab kom ob tug tab ruaj. Sab pem qaum Tsevntaub los lawv ua nees nkaum tus tab, thiab muab plaub caug pluaj nyiaj ua cov tiag taw, ob daig ua taw tiag ib tug tab. Lub Tsevntaub tog sab hnubpoob, lawv ua rau tus tab thiab ua ob tug rau ntawm ob lub kaum. Ob tug tab uas nyob ntawm kaum tsev, muab sib dhos hauv taw nto plaws rau saum. Ob tug tab ntawm ob lub kaum tsev puavleej ua zoo ib yam nkaus. Yog li ntawd, thiaj muab yim tug tab thiab kaum rau pluaj nyiaj los ua taw, ob pluaj nyiaj tiag ib tug tab. Lawv muab ntoo kubtwm ua kaum tsib tug las, tsib tug yuam ib sab phabntsa Tsevntaub, muab tsib tug yuam sab phabntsa nrad, thiab muab tsib tug yuam sab uas nyob sab hnubpoob. Tus las ntoo uas yuam lub Tsevntaub sab phabntsa ntu nruab nrab, yuam tog tom no mus ti nkaus tog tom ub. Lawv muab kub los vuam cov phabntsa ntawd thoob plaws thiab lawv muab khawb kub khawm cov tab uas vuam kub huv tibsi rau ntawm cov phabntsa. Daim ntaub thaiv, mas lawv muab cov tseem ntaubmag uas txaij xiav, txaij tsamxem thiab txaij liab xaws ua duab qhelunpees rau ntawm daim ntaub ntawd huv tibsi. Lawv muab ntoo kubtwm ua plaub tug ncej uas dai daim ntaub, muab kub vuam huv tibsi, thiab muab tej khawb kub los khawm rau. Ces lawv muab nyiaj ntaus ua plaub daim taw tiag plaub tug taw ncej ntawd. Lawv muab cov tseem ntaubmag uas txaij xiav, txaij tsamxem thiab txaij liab xaws ua paj ntaub txaij nraug zees rau, los ua daim npog lub qhovrooj Tsevntaub. Lawv ua tsib tug ncej dai daim ntaub ntawd, muab khawb khawm rau, thiab muab kub vuam cov hau ncej thiab tej hlua pav ncej, thiab muab tooj ua tsib daim taw tiag tsib tug ncej ntawd. Npexalees muab ntoo kubtwm los txua ua lub Phijxab uas ntim Vajtswv tej lus cog tseg, qhov ntev ob tshim thiab ib dos, qhov dav ib tshim thiab ib dos, qhov siab ib tshim thiab ib dos. Nws muab cov tseem kub vuam sab hauv, sab nraud thiab ua ib tug ntug thi thoob plaws lub Phijxab. Nws ua plaub lub khawb kub rau lub Phijxab, thiab muab ntsia rau ntawm plaub ceg kaum taw Phijxab ib sab ob lub. Nws muab ntoo kubtwm ua ob tug nqaj kwv lub Phijxab, thiab vuam kub huv tibsi rau, thiab muab ob tug nqaj ntawd ntxig rau cov khawb, ib sab Phijxab ib tug. Nws muab cov tseem kub los ua lub hau Phijxab, qhov ntev ob tshim thiab ib dos, qhov dav ib tshim thiab ib dos. Nws muab kub ntaus ua ob tug qhelunpees, ib tug txawb rau ib tog hau Phijxab. Nws muab ob tug qhelunpees ntawd ham kiag rau lub hau Phijxab. Ob tug qhelunpees ntawd puavleej tig ntsejmuag tuaj ua ke, thiab ob tug qhelunpees ntawd puavleej nthuav tis npog lub Phijxab. Npexalees muab ntoo kubtwm txua ua ib lub rooj ntev ob tshim, dav ib tshim, siab ib tshim thiab ib dos. Nws muab cov tseem kub vuam lub rooj, thiab muab kub ua ib tug ntug thi thoob plaws lub rooj ntawd. Nws ua ib tug npoo siab li ib xib ncig tus ntug thiab muab kub ua tus ntug thoob plaws tus npoo. Nws ua plaub lub khawb kub ntsia rau plaub lub kaum rooj ntawm plaub tug ceg. Cov khawb uas ntxig ob tug nqaj kwv lub rooj, muab ntsia ze rau ntawm tus ntug. Nws muab ntoo kubtwm ua ob tug nqaj uas kwv lub rooj thiab muab kub vuam rau ob tug nqaj ntawd huv tibsi. Nws tseem muab tej tseem kub nchuav ua ib co twj taig tau siv rau lub rooj: phaj, khob, hub thiab tais tau siv rau cawv txiv hmab ua khoom fij. Npexalees muab cov tseem kub ua tus ncej txawb teeb. Nws muab kub ntaus ua tus taw thiab tus ncej txawb teeb; ntaus ua ib cov paj, ib cov cos paj thiab nplai paj keevxeeb nrog tus ncej txawb teeb. Thiab ua kom ncau ua rau ceg, ib sab peb ceg. Rau ceg ntawd, ib ceg ua peb lub paj zoo li paj txiv duaj nrog cov cos paj thiab cov nplai paj. Tus ncej txhawb teeb mas zaig ua plaub lub paj zoo li paj txiv duaj, nrog cov cos paj thiab cov nplai paj. Ntawm rau tus ceg teeb ntawd, ua ib lub paj rau hauv qab ntawm cov ceg ncau. Cov cos paj, cov ceg thiab tus ncej txawb teeb yog muab tib co kub ntaus ua xwb. Ua xya lub teeb rau ntawm tus ncej txawb teeb, thiab nws muab tej tseem kub ntaus ua phaj thiab txiab txiav teebxeeb. Nws muab xya caum tsib choj kub ntaus ua tus ncej txawb teeb thiab tej twj uas siv rau lub teeb. Npexalees muab ntoo kubtwm txua lub thaj hlawv hmoov tshuaj tsw qab. Lub thaj ntawd txua ua plaub fab, ntev ib tshim thiab dav ib tshim, thiab siab ob tshim. Txua plaub tug kub koom hlo rau plaub ceg kaum thaj. Nws muab tej tseem kub vuam rau plaub sab, thiab plaub tug kub huv tibsi, thiab muab ib pluaj kub ntsia puab tus ntug thoob plaws. Ua khawb kub rau lub thaj thiab muab ntsia rau ob sab hauv qab tus ntug, ib sab twg ob lub ua chaw ntxig tus nqaj kwv lub thaj. Nws muab ntoo kubtwm txua ua ob tug nqaj kwv lub thaj thiab muab kub vuam ob tug nqaj ntawd huv tibsi. Npexalees tseem ua cov roj txhawb meejthawj dawbhuv thiab muab cov nroj tsw qab los tov ib yam li tov tej tshuaj tsw qab. Npexalees muab ntoo kubtwm txua ua ib lub thaj, qhov ntev tsib tshim, qhov dav tsib tshim thiab qhov siab peb tshim. Nws ua plaub tug kub rau saum plaub ceg kaum thaj, plaub tug kub ntawd txua koom hlo nrog lub thaj thiab muab tooj vuam huv tibsi. Nws tseem ua tej twj siv rau lub thaj: laujkaub, duav, tais, nqelauj thiab yias rau hluavncaig. Tej cuabyeej no puavleej yog muab tooj ua xwb. Nws muab tooj hiab ib daim ntxaij pua rau hauv lub thaj txog ntua ib nrab. Nws muab tooj ntaus ua plaub lub khawb ntsia rau ntawm plaub ceg kaum thaj ua tes nqa. Nws muab ntoo kubtwm txua ua ob tug nqaj uas kwv lub thaj thiab muab tooj vuam rau, thiab muab ob tug nqaj ntawd ntxig rau ntawm plaub lub khawb uas ntsia rau ntawm lub thaj ob sab. Muab txiag ntoo ua lub thaj thiab tseg hauv plawv khoob. Npexalees ua lub phiab ntxuav tes thiab lub taw phiab, yog muab cov pojniam uas ua haujlwm ntawm tus TSWV lub Tsevntaub sib ntsib lub qhovrooj, tej tsom iav tooj los nchuav ua. Npexalees xov vaj ncig tus TSWV lub Tsevntaub. Nws muab daim ntaubmag uas ntev ib puas tshim xov sab nrad, muab nees nkaum tus kav tooj ua ncej, muab nees nkaum daim tooj tiag taw, tiamsis cov khawb thiab cov hlua yog muab nyiaj ua. Xov zoo ib yam li ntawd rau sab ntsavaj ped thiab. Muab daim ntaub uas ntev tsib caug tshim xov sab hnubpoob, txhos kaum tus ncej, thiab kaum daim tiag taw, cov khawb thiab cov hlua yog muab nyiaj ua. Sab hnubtuaj, yog lub roojvag uas nkag mus rau hauv, sab ntawd xov tsib caug tshim dav ib yam nkaus. Ib sab roojvag twg ntev kaum tsib tshim, txhos peb tug ncej thiab peb daim tiag taw. Sab roojvag tod los ntev kaum tsib tshim, txhos peb tug ncej thiab peb daim tiag taw. Tagnrho cov ntaub uas xov ncig lub Tsevntaub yog muab tej ntaubmag zoo zoo xov xwb. Cov tiag taw ncej yog muab tooj ua, cov khawb, cov hlua pav thiab cov hau khwb ncej yog muab nyiaj ua. Tagnrho cov ncej lajkab uas xov ncig lub tsev yog muab xov nyiaj pav xwb. Muab cov ntaubmag zoo zoo uas txaij xiav, txaij tsamxem thiab txaij liab, xaws ua paj ntaub txaij nraug zees thaiv lub roojvag. Daim ntaub ntawd ntev nees nkaum tshim thiab siab tsib tshim, ib yam li cov ntaub uas xov lub vaj. Plaub tug ncej thiab plaub daim tiag taw. Cov khawb uas khawm tej ncej, cov hau khwb ncej thiab cov hlua pav puavleej yog muab nyiaj ua. Tagnrho cov ntsia uas ntsia lub Tsevntaub thiab cov ncej lajkab uas xov ncig lub Tsevntaub puavleej yog muab tooj ua. Ntawm no mus yog teev tej khoom siv hauv lub Tsevntaub. Mauxes kom cov Levis ua txhua yam haujlwm, thiab lawv nyob qab tswjhwm ntawm Aloos tus tub Ithamas uas yog tus povthawj. Ulis tus tub Npexalees uas yog Hules tus xeebntxwv thiab yog xeem Yudas, ua txhua yam uas tus TSWV tau samhwm kom ua ntawd tiav tas huv tibsi lawm. Tus uas pab Npexalees yog Auhauli-as uas yog Ahixamas tus tub thiab nws yog xeem Das, Auhauli-as yog tus uas txawj txaug ntoo, muab qauv thiab ntos tej ntaubmag txaij xiav, txaij tsamxem thiab txaij liab. Tagnrho tej kub uas coj tuaj fij rau tus TSWV ua lub Tsevntaub ntawd hnyav ob txhiab cuaj caum tsib choj, yog luj raws li nomtswv kom tseg. Cov nyiaj uas tau los ntawm cov pejxeem uas tuaj sau npe hnyav xya txhiab tsib puas tsib caug choj, yog luj raws li nomtswv kom tseg. Tagnrho txhua tus neeg uas tuaj sau npe ntawd puavleej tau them nqi sib npaug zos, thiab txhua tus them tus nqi kom raws li nomtswv kevcai. Cov txivneej uas hnubnyoog muaj nees nkaum xyoo rov saud, tuaj sau npe yog muaj rau pua peb txhiab tsib puas tsib caug leej. Cov nyiaj ntawd, lawv muab xya txhiab tsib puas choj los ua ib puas daim tiag taw, tiag lub Tsevntaub thiab ua taw rau cov ntaub xov, ib tug taw twg hnyav xya caum tsib choj. Muab tsib caug choj nyiaj rau Npexalees ua hlua, ua khawb khawm cov ncej thiab ua hau khwb cov ncej. Cov tooj uas coj tuaj fij rau tus TSWV hnyav tsib txhiab peb puas kaum choj. Npexalees muab cov tooj no ua cov tiag taw qhovrooj rau tus TSWV lub Tsevntaub sib ntsib, ua lub thaj, ua daim ntxaij thiab ua tagnrho tej khoom uas siv rau lub thaj, cov tiag ncej lajkab uas xov ncig lub Tsevntaub thiab cov tiag taw ncej roojvag, thiab tej ntsia lajkab puavleej yog muab cov tooj ntawd ua. Lawv muab tej ntaub uas txaij xiav, txaij tsamxem thiab txaij liab los xaws ua tsoos tsho rau cov povthawj hnav thaum lawv mus ua Vajtswv tes haujlwm hauv Chav Dawbhuv. Thiab lawv tseem xaws ib cev tsoos tsho povthawj rau Aloos, raws li tus TSWV tau samhwm rau Mauxes lawm. Lawv muab tej tseem ntaubmag uas txaij xiav, txaij tsamxem thiab txaij liab; thiab xov kub xaws ua lub tsho efaus. Lawv muab kub ntaus ua tej pluaj nyias nyias thiab muab txiav ua xov coj los ntos nrog cov tseem xov maj xiav, xov tsamxem thiab xov liab. Lawv xaws ob txog hlab khuam rau saum xubpwg lo rau lub tsho efaus, thiab muab ib txog khuam ib sab xubpwg, ua li ntawd thiaj muaj chaw khawm. Muab cov xov thiab cov ntaub uas xaws lub tsho efaus, los ntos ua txoj siv sia uas muab xaws lo rau ntawm lub tsho efaus, raws li tus TSWV tau samhwm rau Mauxes lawm. Lawv muab ob lub qe zeb kanelias uas txaug Yakhauj kaum ob leeg tub cov npe rau; cog rau ntawm daim phiaj kub. Lawv muab ob lub qe zeb ntawd ntsaws rau hauv lub tsho efaus ob daim tiag xubpwg, yog ob lub qe zeb ua kev nco txog kaum ob xeem Yixalayees raws li tus TSWV tau samhwm rau Mauxes lawm. Lawv muab tib yam xov uas xaws ua lub tsho efaus, los xaws daim ntaub npog hauvsiab, thiab xaws paj ntaub rau kom zoo ib yam nkaus. Daim ntaub ntawd ua plaub fab thiab muab tais ua ob tsem, ntev ib dos thiab dav ib dos. Lawv cog plaub leej qe zeb rau daim ntaub npog hauvsiab: thawj leej cog ib lub qe zeb lunpis, ib lub qe zeb taupas thiab ib lub qe zeb nkaunes; leej ob, cog ib lub qe zeb emelas, ib lub qe zeb xafiles thiab ib lub qe zeb dawb ci hob; leej peb, cog ib lub qe zeb xiav txho taws, ib lub qe zeb ankates thiab ib lub qe zeb amethis; thiab leej plaub, cog ib lub qe zeb npelis, ib lub qe zeb kanelias thiab ib lub qe zeb yapes. Tagnrho cov qe zeb no puavleej muab cog rau ntawm daim phiaj kub. Kaum ob lub qe zeb ntawd puavleej txaug Yakhauj kaum ob leeg tub cov npe rau, sawv cev kaum ob xeem Yixalayees. Lawv muab cov tseem kub los ntaus ua ib txoj saw ntswj zoo li txoj hlua tis rau daim ntaub npog hauvsiab. Lawv muab kub ntaus ua ob daim phiaj thiab ob lub khawb kub, muab ob lub khawb kub tis rau ntawm daim ntaub npog hauvsiab ob ceg kaum saud. Lawv muab ob txoj saw kub tis rau ntawm ob lub khawb kub, thiab muab ob tog tw tis rau ob daim phiaj, ua li no kom ob txoj saw lo lub tsho efaus ob daim tiag xubpwg uas dauv rau ntawm xubntiag. Lawv ua ob lub khawb kub tis rau daim ntaub npog hauvsiab ob lub ntsej hauv qab, ntawm tus ntug sab hauv uas puab lub tsho efaus. Lawv ua dua ob lub khawb kub tis rau lub tsho efaus ob daim tiag xubpwg sab hauv qab ntawm xubntiag, ze rau ntawm kab leejleeg nyob rau saum txoj siv uas sia lub tsho efaus. Lawv muab ntaub xiav khi daim npog hauvsiab ob lub khawb rau ntawm lub tsho efaus ob lub khawb uas txuas rau ntawm txoj siv, kom daim ntaub npog hauvsiab thiaj tsis txav ntawm lub tsho efaus, raws li tus TSWV tau samhwm rau Mauxes lawm. Lub tsho ntev uas hnav tshooj saum lub tsho efaus, yog muab ntaub xiav xaws. Lub cajdab tshos, xaws looj saum taubhau tuaj, muab cov ntaub uas ntos sib qhaib los xaws ua lub cajdab tshos kom tsis txhob ntuag. Lawv muab cov ntaub uas txaij xiav, txaij tsamxem thiab txaij liab xaws ua ib co txiv ntsiavkws dai rau ntawm lub tw tsho ntev. Thiab lawv muab cov tseem kub ntaus ua ib cov tswb dai rau ntawm lub tw tsho nruab nrab ntawm cov txiv ntsiavkws, muab cov tswb thiab cov txiv ntsiavkws dai thoob plaws lub tw tsho, dai ib lub txiv ntsiavkws quas ib lub tswb, raws li tus TSWV tau samhwm rau Mauxes lawm. Lawv muab tej ntaubmag uas ntos tau zoo heev, xaws ib cov tsho loj rau Aloos thiab nws cov tub hnav, thiab muab ntaubmag xaws phuam, kausmom, ris luv, thiab muab cov ntaubmag uas txaij xiav, txaij tsamxem thiab txaij liab ua siv sia, thiab xaws paj ntaub rau kom txaij nraug zees raws li tus TSWV tau samhwm rau Mauxes lawm. Lawv muab cov tseem kub ntaus ua ib daim phiaj, thiab txaug npe ntawv rau saum daim phiaj ntawd hais tias, “Dawbhuv rau tus TSWV.” Lawv muab ib txoj hlua ntaub xiav khi daim phiaj kub rau txoj phuam uas ntoo saum taubhau thiab muab tig rau ntawm hauvpliaj. Txhua yam haujlwm uas ua tus TSWV lub Tsevntaub sib ntsib twb tiav tas lawm. Cov Yixalayees ua txhua yam raws li tus TSWV tau samhwm rau Mauxes lawm. Lawv coj lub Tsevntaub, cov khawb, cov ntsa, cov tab, cov ncej thiab tej tiag taw ncej los rau Mauxes; cov tawv yaj uas zas liab thiab cov tawv nyuj yog cov vov; cov ntaub thaiv; lub Phijxab uas ntim ob daim txiag zeb, ob tug nqaj, lub hau Phijxab; lub rooj thiab tagnrho tej khoom siv ntawm lub rooj, thiab cov ncuav uas fij rau Vajtswv; tus ncej txawb teeb uas yog cov tseem kub, cov teeb, tagnrho tej khoom siv ntawm lub teeb thiab cov roj sam teeb; lub thaj kub, cov roj txhawb meejthawj; cov hmoov tshuaj tsw qab; daim ntaub thaiv lub qhovrooj mus rau hauv lub Tsevntaub; lub thaj tooj nrog daim npog lub thaj; cov ncej thaj, thiab tej khoom siv ntawm lub thaj; lub phiab tooj ntxuav tes thiab lub taw phiab; cov ntaub xov vaj ncig lub Tsevntaub thiab cov ncej lajkab thiab tej tiag taw ncej lajkab; daim ntaub thaiv lub roojvag thiab cov hlua khi daim ntaub, cov ntsia; thiab tagnrho tej khoom uas siv rau tus TSWV lub Tsevntaub sib ntsib; thiab tej tsoos tsho uas xaws rau cov povthawj hnav mus ua haujlwm hauv Chav Dawbhuv, cov tsoos tsho povthawj rau Aloos thiab nws cov tub hnav ua tes haujlwm povthawj. Ces cov Yixalayees ua txhua yam uas tus TSWV tau samhwm rau Mauxes tiav tas huv tibsi lawm. Mauxes tshuaj thiab pom hais tias txhua yam uas cov Yixalayees ua tiav tas raws li tus TSWV tau samhwm tseg lawm tiag. Yog li ntawd, Mauxes thiaj foom koob hmoov rau lawv. Tus TSWV hais rau Mauxes hais tias, “Koj cia li tsa tus TSWV lub Tsevntaub sib ntsib rau lub ib hlis ntuj hnub xiab ib. Thiab muab lub Phijxab uas ntim Vajtswv tej lus cog tseg coj mus tso rau hauv lub Tsevntaub thiab muab daim ntaub dai thaiv lub Phijxab. Nqa lub rooj los teeb rau hauv, muab tej cuabyeej tso rau saum lub rooj. Thiab nqa tus ncej teeb los txawb thiab muab cov teebxeeb rau hauv lub teeb. Muab lub thaj kub uas hlawv hmoov tshuaj tsw qab teeb rau ntawm lub Phijxab hauv ntej thiab dai daim ntaub thaiv lub qhovrooj Tsevntaub. Teeb ib lub thaj rau ntawm lub Tsevntaub hauv ntej tau hlawv khoom fij. Thiab muab lub phiab ntxuav tes ntxuav taw teeb rau kis nruab nrab ntawm tus TSWV lub Tsevntaub sib ntsib thiab lub thaj, thiab nqa dej los hliv rau hauv kom puv. Xov vaj ncig thoob plaws thiab muab daim ntaub los dai thaiv lub roojvag. “Ces muab cov roj txhawb meejthawj nchos rau lub Tsevntaub thiab tagnrho tej cuabyeej siv, kom lub Tsevntaub thiab tej cuabyeej thiaj yuav dawbhuv. Dua li ntawd, tseem muab nchos rau lub thaj thiab lub thaj tej cuabyeej, kom lub thaj thiab tej cuabyeej thiaj yuav dawbhuv. Thiab muab nchos rau lub phiab ntxuav tes ntxuav taw thiab lub taw phiab huv tibsi. “Coj Aloos thiab nws cov tub tuaj rau ntawm tus TSWV lub Tsevntaub sib ntsib lub qhovrooj, thiab muab dej los ntxuav lawv. Muab lub tsho loj rau Aloos hnav thiab muab nws txhawb meejthawj, nej ua li no thiaj yog nej muab nws tsa ua povthawj ua kuv tes haujlwm. Coj Aloos cov tub tuaj thiab muab cov tsho loj rau lawv hnav. Muab roj pleev lawv ib yam li pleev rau lawv txiv, lawv thiaj tau ua cov povthawj ua kuv tes haujlwm. Muab lawv txhawb meejthawj li no, lawv thiaj yuav tau ua cov povthawj mus ibtxhis.” Mauxes ua txhua yam raws li tus TSWV hais rau nws. Yog li ntawd, lub ib hlis ntuj hnub xiab ib uas yog xyoo ob, suav txij li thaum lawv khiav tawm nram tebchaws Iziv los, yog hnub uas Mauxes tsa lub Tsevntaub. Mauxes cog cov tiag taw ncej, tsa cov tab, muab cov las los yuam rau, thiab txhos cov ncej. Nthuav ntaub vov lub Tsevntaub thiab nthuav daim tawv uas vov tuaj saum vov lub tsev, raws li tus TSWV tau samhwm lawm. Ces Mauxes thiaj muab ob daim txiag zeb tso rau hauv lub Phijxab. Nws muab ob tug nqaj ntxig rau ntawm lub Phijxab cov khawb thiab muab lub hau khwb lub Phijxab. Nws muab lub Phijxab mus tso rau hauv lub Tsevntaub, thiab dai daim ntaub thaiv. Qhov uas nws ua li no twb yog muab daim ntaub thaiv lub Phijxab raws li tus TSWV tau samhwm tseg lawm. Mauxes teeb rooj rau hauv tus TSWV lub Tsevntaub sib ntsib, ntawm daim ntaub thaiv sab ped, thiab muab cov ncuav uas fij rau tus TSWV tso rau saum lub rooj, raws li tus TSWV tau samhwm tseg rau nws lawm. Nws muab tus ncej teeb mus txawb rau hauv tus TSWV lub Tsevntaub sib ntsib sab nrad uas yog nyob sib ncag zos lub rooj, thiab nws taws cov teeb ntawd rau hauv chav uas nrog tus TSWV sib ntsib, raws li tus TSWV tau samhwm tseg rau nws lawm. Nws muab lub thaj kub coj mus teeb rau hauv tus TSWV lub Tsevntaub sib ntsib ntawm daim ntaub uas kem lub tsev hauv ntej, thiab hlawv tej hmoov tshuaj uas tsw qab, raws li tus TSWV tau samhwm tseg rau nws. Ces nws thiaj dai daim ntaub thaiv lub qhovrooj Tsevntaub, thiab nws muab lub thaj hlawv khoom fij coj mus teeb rau ntawm hauv ntej daim ntaub thaiv lub qhovrooj Tsevntaub sib ntsib. Nws coj tej khoom fij thiab tej qoobloo uas yog khoom fij coj mus hlawv huv tibsi rau saum lub thaj, raws li tus TSWV tau samhwm tseg rau nws. Nws muab lub phiab ntxuav tes ntxuav taw coj mus teeb rau ntawm tus TSWV lub Tsevntaub sib ntsib thiab lub thaj kis nruab nrab thiab nqa dej los hliv rau hauv puv nkaus. Mauxes, Aloos, thiab Aloos cov tub ntxuav lawv tej tes thiab tej taw ntawm lub phiab ntawd, lawv ntxuav tes ntxuav taw ua ntej uas mus hauv tus TSWV lub Tsevntaub sib ntsib lossis mus ntawm lub thaj, raws li tus TSWV tau samhwm tseg rau nws lawm. Mauxes xov vaj ncig lub Tsevntaub thiab lub thaj thiab nws dai ib daim ntaub thaiv lub roojvag. Yog li ntawd, nws thiaj ua txhua yam tiav huv tibsi lawm. Ces pos huab tsaus nti laum nkaus tus TSWV lub Tsevntaub sib ntsib thiab tus TSWV lub tshwjchim ci ntsa iab hauv lub tsev. Yog vim li ntawd, Mauxes thiaj mus tsis tau rau hauv tus TSWV lub Tsevntaub. Thaum tauv huab tshem tawm ntawm lub Tsevntaub lawm, cov Yixalayees thiaj tshais chaw tau mus rau lwm qhov. Tiamsis yog tauv huab ntawd tsis tshem, ces lawv yeej tsis tshais chaw mus txog thaum uas tauv huab tshem. Lub sijhawm uas cov Yixalayees pheej tsiv mus tsiv los, nruab hnub lawv yeej pom tauv huab uas yog tus TSWV qhov chaw nyob pos tsaus nti saum lub Tsevntaub thiab hmo ntuj nplaim taws cig lam lug. Tus TSWV hu Mauxes hauv tus TSWV lub Tsevntaub sib ntsib tuaj thiab hais rau Mauxes kom hais rau cov Yixalayees thiab qhia rau lawv hais tias, Thaum leejtwg coj tsiaj tuaj tua hlawv fij, nws yuav tsum coj ib tug nyuj lossis ib tug yaj lossis ib tug tshis tuaj fij thiab. Yog nws coj ib tug nyuj tuaj tua hlawv fij, nws yuav tsum coj tus nyuj uas tsis muaj ib qho phem hlo li. Nws yuav tsum cab tuaj rau ntawm tus TSWV lub Tsevntaub sib ntsib, tus TSWV thiaj txaus siab txais yuav. Nws yuav tsum tsa tes rau saum tus nyuj lub taubhau, tus nyuj ntawd thiaj yuav ua tau khoom theej txhoj tshem nws lub txim. Ces nws muab tus nyuj ntawd tua tabmeeg tus TSWV, thiab Aloos cov tub uas yog cov povthawj muab cov ntshav coj mus fij rau tus TSWV thiab muab coj mus hliv ywg thoob plaws lub thaj uas nyob ntawm tus TSWV lub Tsevntaub sib ntsib lub qhovrooj. Ces nws muab tus tsiaj ntawd laws tawv thiab muab txiav ua tej thooj, thiab cov povthawj muab taws coj mus teeb rau saum lub thaj thiab zes taws rau. Ces Aloos cov tub uas yog cov povthawj mam li muab cov nqaij uas txiav ua tej thooj, lub taubhau thiab cov roj mus tso rau saum cov taws uas teeb saum lub thaj. Tus neeg ntawd yuav tsum muab dej ntxuav lub plab, cov hnyuv, siab, ntsws thiab ob cegqab, ces tus povthawj mam li muab hlawv huv tibsi rau saum lub thaj ua khoom fij theej txhoj. Tej pa khoom fij no yuav tsw qab ntxiag ua rau tus TSWV txaus siab. Yog leejtwg muab nws ib tug yaj lossis ib tug tshis tuaj ua khoom fij, mas nws yuav tsum muab tus txiv uas tsis muaj ib qho phem hlo li xwb. Nws yuav tsum muab tus tsiaj ntawd tua rau ntawm lub thaj sab ped, thiab cov povthawj muab cov ntshav coj mus hliv ywg thoob plaws lub thaj huv tibsi. Thiab nws muab tus tsiaj ntawd txiav ua tej thooj, ces tus povthawj mam li muab lub taubhau thiab cov roj mus tso rau saum cov taws uas teeb rau saum lub thaj. Tiamsis tus ntawd yuav tsum muab dej ntxuav lub plab, cov hnyuv thiab ob cegqab, thiab tus povthawj muab coj mus fij rau tus TSWV thiab muab hlawv fij tagnrho rau saum lub thaj. Tej khoom uas fij no tej pa yuav tsw qab ntxiag ua rau tus TSWV txaus siab. Yog leejtwg muab noog tuaj tua hlawv ua khoom fij, tus noog ntawd yuav tsum yog ib tug nquab liabrwg lossis nquab nyeg. Tus povthawj yuav coj tus noog ntawd mus rau ntawm lub thaj, muab lub cajdab ntswj kom tu, thiab muab lub taubhau hlawv rau saum lub thaj. Yuav tsum cia cov ntshav ntws los ywg lub thaj. Nws yuav tau muab lub txia dawj povtseg rau ntawm lub thaj sab hnubtuaj uas yog qhov chaw nchuav cov tshauv. Nws tuav ob sab tis dua kom tus noog lub cev ntuag, tiamsis tsis txhob dua ob sab tis kom tu, thiab muab tus noog ntawd hlawv kom tagnrho rau saum lub thaj. Tej pa yuav tsw qab ntxiag ua rau tus TSWV txaus siab. Thaum ib tug twg coj qoobloo tuaj fij rau tus TSWV, nws yuav tsum xub muab cov nplej ntawd zom ua hmoov. Nws yuav tsum muab roj txiv ntoo thiab hmoov tshuaj tsw qab nphoo rau saum cov hmoov nplej ntawd huv tibsi, thiab coj tuaj cob rau Aloos cov tub uas yog cov povthawj. Ces tus povthawj hlob mam li yawm ib phoovtes hmoov nplej, muab cov roj thiab cov hmoov tshuaj tsw qab coj mus hlawv rau saum lub thaj ib yam li ua kevcai nco txog fij rau tus TSWV. Tej pa khoom fij no yuav tsw qab ntxiag ua rau tus TSWV txaus siab. Tej qoobloo uas seem fij tsis tas ntawd puavleej yog cov povthawj tug, txij thaum lawv coj tej qoobloo ntawd tuaj fij rau tus TSWV lawm, tej ntawd yeej dawbhuv lawm. Yog muab tej ncuav uas ncu hauv qhovcub tuaj ua khoom fij, mas cov ncuav ntawd tsis txhob muab keeb xyaw. Yuav tsum yog muab hmoov nplej zuaj xyaw roj txiv ntoo puab ua tej lub ncuav tuab tuab lossis muab roj txiv ntoo zuaj xyaw puab ua tej lub ncuav nyias nyias xwb. Yog muab cov ncuav nthee hauv yias tuaj ua khoom fij, muab tej hmoov nplej ntawd zuaj xyaw roj txiv ntoo xwb, tsis txhob muab keeb xyaw. Cia li muab puab ua tej lub thiab muab roj hliv rau saud, thaum nej coj mus ua khoom fij. Yog nej muab tej ncuav uas ncu hauv laujkaub coj mus fij, cov ncuav ntawd yuav tsum yog muab hmoov nplej thiab roj txiv ntoo ua xwb. Coj lub ncuav ntawd mus fij rau tus TSWV thiab muab cob rau tus povthawj, nws mam li coj mus tso rau saum lub thaj. Tus povthawj yuav muab ntais ib nrab coj mus fij ua kev nco txog rau tus TSWV, thiab nws yuav coj mus hlawv rau saum lub thaj. Tej pa khoom fij no yuav tsw qab ntxiag ua rau tus TSWV txaus siab. Tej khoom fij uas seem puavleej yog cov povthawj tug, txij thaum uas coj tej ncuav ntawd mus fij rau tus TSWV lawm, tej ntawd yeej dawbhuv lawm. Nej tsis txhob muab tej hmoov nplej uas xyaw keeb tuaj fij rau tus TSWV; nej tsis txhob muab tej hmoov nplej uas xyaw keeb lossis xyaw zib ntab hlawv fij rau tus TSWV. Txhua xyoo thaum nej sau qoobloo, nej yuav tsum coj nej thawj phaum qoob tuaj fij rau tus TSWV, tiamsis tsis txhob muab hlawv rau saum lub thaj kom tej pa tsw qab ntxiag. Muab ntsev nphoo rau saum txhua yam qoobloo uas coj tuaj fij ntawd, rau qhov cov ntsev ntawd yog sawv cev cov lus cog tseg ntawm Vajtswv thiab nej ntag. Nej yuav tsum nphoo ntsev tagnrho rau saum nej tej khoom fij huv tibsi. Thaum nej sau qoobloo thiab coj thawj phaum qoob tuaj fij rau tus TSWV, muab tej nplej ntawd kib kom nkig thiab muab tuav kom ua hmoov coj tuaj fij. Muab roj txiv ntoo hliv rau thiab muab hmoov tshuaj tsw qab nphoo rau saum cov hmoov nplej ntawd. Tus povthawj yuav muab cov hmoov nplej, cov roj thiab cov hmoov tshuaj tsw qab coj mus hlawv ua khoom fij ua kev nco txog rau tus TSWV. Yog leejtwg muab nws tus heev nyuj lossis tus maum nyuj tua fij ua kev sib raug zoo, mas tus nyuj ntawd yuav tsum yog tus uas tsis muaj ib qho phem hlo li. Tus txivneej ntawd yuav tsum tsa nws txhais tes rau saum tus nyuj lub taubhau thiab muab tus nyuj ntawd tua rau ntawm tus TSWV lub Tsevntaub sib ntsib lub qhovrooj. Ces Aloos cov tub uas yog cov povthawj muab cov ntshav coj mus hliv ywg thoob plaws lub thaj, thiab muab tus tsiaj ntawd tej nqaij li nram no coj mus ua khoom fij sib raug zoo rau tus TSWV: tagnrho cov npluag roj uas npog lub plab, cov hnyuv, ob lub raum thiab tej roj uas npog ob lub raum, thiab nplooj siab uas zoo tshaj plaws. Cov povthawj yuav tsum muab tagnrho tej ntawd hlawv rau saum lub thaj uas yog hlawv nrog tej khoom fij. Tej pa khoom fij no tsw qab ntxiag ua rau tus TSWV txaus siab. Yog muab yaj lossis tshis los tua ua khoom fij ua kev sib raug zoo, muab tus txiv lossis tus maum los tau, tiamsis yuav tsum muab tus uas tsis muaj ib qho phem hlo li. Yog leejtwg muab ib tug yaj fij, nws yuav tsum tsa nws txhais tes rau saum tus yaj ntawd taubhau thiab muab tus yaj ntawd tua rau ntawm hauv ntej tus TSWV lub Tsevntaub sib ntsib. Ces cov povthawj mam li muab cov ntshav coj mus hliv ywg thoob plaws rau lub thaj, thiab muab tus tsiaj ntawd tej nqaij li nram no coj mus ua khoom fij rau tus TSWV: cov roj, tus tw nrog cov roj uas txiav ti nkaus ntawm tus pobtxha ntsag, tej npluag roj uas npog lub plab, cov hnyuv, ob lub raum thiab tej roj uas npog ob lub raum, thiab nplooj siab uas zoo tshaj plaws. Dua li cov ntawd lawm, tus povthawj mam li muab coj mus hlawv tagnrho rau saum lub thaj ua khoom fij rau tus TSWV. Yog leejtwg muab ib tug tshis fij, nws yuav tsum tsa tes rau saum tus tshis ntawd lub taubhau thiab muab tus tshis ntawd tua rau ntawm hauv ntej tus TSWV lub Tsevntaub sib ntsib. Ces cov povthawj mam li muab cov ntshav coj mus hliv ywg thoob plaws lub thaj, thiab muab tus tsiaj ntawd tej nqaij li nram no coj mus fij rau tus TSWV: cov npluag roj uas npog lub plab thiab cov hnyuv, ob lub raum thiab tej roj uas npog ob lub raum, thiab nplooj siab uas zoo tshaj plaws. Dua li cov ntawd lawm, tus povthawj mam li muab coj mus hlawv tagnrho rau saum lub thaj ua khoom fij tsw qab ntxiag rau tus TSWV. Tagnrho cov roj puavleej yog tus TSWV tug. Tsis pub cov Yixalayees ib tug twg noj tej roj lossis tej ntshav li; qhov no yog ib txoj kevcai rau cov Yixalayees uas nyob rau txhua qhov coj mus ibtxhis li. Tus TSWV hais rau Mauxes kom qhia rau cov Yixalayees paub hais tias, yog leejtwg txhob txwm ua txhaum thiab tsis muab siab npuab tus TSWV tej lus samhwm, yuav tau ua raws li tej kevcai nram qab no. Yog tus Povthawj Hlob twg tau ua txhaum thiab nws tej kev txhaum ntawd los raug rau cov pejxeem, nws yuav tsum tau coj ib tug ntsuag nyuj uas tsis muaj ib qho phem li tuaj tua fij rau tus TSWV daws nws lub txim. Nws yuav tsum cab tus nyuj ntawd mus rau ntawm tus TSWV lub Tsevntaub sib ntsib lub qhovrooj, tsa nws txhais tes rau saum tus nyuj taubhau, thiab muab tua tabmeeg tus TSWV rau ntawd. Ces tus Povthawj Hlob yuav tsum nqa tus ntsuag nyuj ntawd cov ntshav ib qho mus rau hauv tus TSWV lub Tsevntaub sib ntsib. Mas tus Povthawj Hlob yuav tsum muab nws tus ntivtes tub cov ntshav ntawd coj mus nchos rau daim ntaub uas quas chav dawbhuv xya zaus. Thiab tus Povthawj Hlob muab ib co ntshav pleev lub thaj hlawv hmoov tshuaj tsw qab cov kub saum plaub ceg kaum thaj uas nyob hauv tus TSWV lub Tsevntaub sib ntsib. Dua li ntawd, nws muab cov ntshav uas seem coj mus hliv rau lub taw thaj uas hlawv tej khoom theej txhoj ntawm tus TSWV lub Tsevntaub sib ntsib lub qhovrooj. Nws yuav tsum muab tus nyuj ntawd tej roj luas tawm kom tas huv tibsi, nrog cov npluag roj uas npog lub plab, cov hnyuv, ob lub raum thiab cov roj uas npog ob lub raum, thiab nplooj siab uas zoo tshaj plaws. Ces tus povthawj mam li muab cov roj coj mus hlawv rau saum lub thaj uas hlawv tej koom fij, ib yam li nws muab tej tsiaj uas tua fij ua kev sib raug zoo tej roj coj mus hlawv thiab ntag. Tiamsis nws yuav tsum muab daim tawv, cov nqaij, lub taubhau, plaub ceg thiab tej hnyuv mos, cov hnyuv loj huv tibsi, nqa tawm mus rau sab nraum ntug yeej ntawm qhov chaw dawbhuv uas pheej coj cov tshauv mus nchuav rau, nws muab tej nqaij nyuj tso rau saum pawg taws thiab muab hlawv. Yog cov Yixalayees tau yuam kev ua txhaum uas yog txhaum rau tus TSWV tej lus samhwm ib nqe twg uas tsis yog txhob txwm ua, thaum sawvdaws paub hais tias, muaj txojkev txhaum ntawd lawm, cov pejxeem yuav tsum coj ib tug ntsuag nyuj mus tua fij daws kev txhaum rau ntawm tus TSWV lub Tsevntaub sib ntsib; cov thawjcoj ntawm cov pejxeem los tsa lawv tej tes rau saum tus nyuj ntawd taubhau, thiab muab tus nyuj tua rau ntawd. Tus Povthawj Hlob mam li nqa ib co ntshav mus rau hauv tus TSWV lub Tsevntaub sib ntsib, muab nws tus ntivtes tub cov ntshav ntawd, thiab muab nchos rau daim ntaub uas quas chav dawbhuv xya zaus. Thiab tus Povthawj Hlob muab ib co ntshav pleev lub thaj uas hlawv hmoov tshuaj tsw qab cov kub saum plaub ceg kaum thaj uas nyob hauv tus TSWV lub Tsevntaub sib ntsib, thiab muab cov ntshav uas seem hliv rau lub taw thaj uas hlawv tej khoom fij ntawm tus TSWV lub Tsevntaub sib ntsib lub qhovrooj. Ces nws muab tagnrho tej roj coj mus hlawv rau saum lub thaj. Nws fij tus nyuj no ib yam nkaus li nws fij tus uas ntxuav tej kev txhaum ntag, thiab qhov uas nws ua li no twb yog nws fij khoom ntxuav cov pejxeem lub txim, thiaj yuav zam tau lawv lub txim. Ces nws mam coj tus nyuj mus hlawv rau sab ntug yeej nraud, ib yam li nws hlawv tus nyuj uas fij daws nws lub txim. Qhov no yog fij khoom ua kevcai tshem cov pejxeem tej kev txhaum mus povtseg. Yog ib tug nomtswv tau yuam kev ua txhaum uas yog txhaum rau tus TSWV tej lus samhwm ib nqes twg uas tsis yog txhob txwm ua, thaum uas luag qhia nws txojkev txhaum rau nws paub lawm, nws yuav tsum coj ib tug laug tshis uas tsis muaj ib qho phem li mus tua fij theej txhoj. Nws yuav tsum tsa nws txhais tes rau saum tus tshis ntawd taubhau thiab muab tus tshis ntawd tua rau ntawm lub thaj sab ped, ntawm qhov chaw uas tua tsiaj hlawv ua khoom fij. Qhov no yog fij khoom ua kevcai tshem nws tej kev txhaum povtseg. Tus povthawj yuav tsum muab nws tus ntivtes tub cov ntshav tsiaj, coj mus pleev rau lub thaj uas hlawv khoom fij cov kub saum plaub ceg kaum thaj, thiab muab cov ntshav uas seem hliv ywg lub taw thaj. Ces nws muab tagnrho tej roj coj mus hlawv rau saum lub thaj, ib yam li nws hlawv tej roj uas yog tej tsiaj uas tua fij ua kev sib raug zoo. Tus povthawj fij khoom theej txhoj tshem tus nom ntawd lub txim, thiaj yuav zam tau nws lub txim. Yog cov pejxeem ib tus twg tau ua txhaum uas yog ua txhaum rau tus TSWV tej lus samhwm ib nqes twg uas tsis yog txhob txwm ua, ces yog thaum uas luag qhia nws txojkev txhaum rau nws paub lawm, nws yuav tsum coj ib tug maum tshis uas tsis muaj ib qho phem li mus tua fij theej txhoj. Nws yuav tsum tsa nws txhais tes rau saum tus maum tshis ntawd taubhau, thiab muab tus maum tshis ntawd tua rau ntawm lub thaj sab ped, ntawm qhov chaw uas tua tsiaj hlawv ua khoom fij. Ces tus povthawj mam li muab nws tus ntivtes tub cov ntshav tshis coj mus pleev rau lub thaj cov kub saum plaub ceg kaum thaj, thiab muab cov ntshav uas seem hliv ywg lub taw thaj. Ces nws muab tagnrho tej roj luas tawm ib yam li luas tej tsiaj uas tua fij ua kev sib raug zoo tej roj, thiab tus povthawj mam li muab coj mus hlawv rau saum lub thaj kom tsw qab ntxiag ua rau tus TSWV txaus siab. Qhov no yog tus povthawj fij khoom theej txhoj daws tus neeg ntawd lub txim, thiaj yuav zam tau nws lub txim. Yog ib tug twg coj ib tug yaj tuaj tua daws nws lub txim, mas tus yaj ntawd yuav tsum yog tus maum thiab tsis muaj ib qho phem li. Nws yuav tsum tsa nws txhais tes rau saum tus maum yaj ntawd taubhau thiab muab tus maum yaj ntawd tua rau ntawm lub thaj sab ped, ntawm qhov chaw uas tua tsiaj hlawv ua khoom fij. Tus povthawj mam li muab nws tus ntivtes tub cov ntshav tsiaj coj mus pleev rau lub thaj cov kub saum plaub ceg kaum thaj, thiab muab cov ntshav uas seem hliv ywg lub taw thaj. Ces nws muab cov roj luas tawm kom tas, thiab nws muab coj mus hlawv rau saum lub thaj ua khoom fij rau tus TSWV. Qhov no yog tus povthawj fij khoom theej txhoj daws tus neeg ntawd lub txim, thiaj yuav zam tau nws lub txim. Yuav tsum tau fij khoom daws tej kev txhaum li nram no: Yog nomtswv hu ib tug twg mus ua timkhawv rau hauv tsev tu plaub, yog nws npog tsis qhia tej uas nws pom lossis hnov, nws yuav tau ris nws lub txim ntawd. Yog ib tus twg mus tuav tej uas tsis huv uas yog tej tsiaj tuag, ces txij thaum ntawd los nws yog neeg tsis huv thiab muaj txim ib yam li nws tau ua txhaum. Yog ib tus twg mus tuav tej neeg uas tsis huv ib qho twg, txawm yog nws tsis paub los, thaum nws paub lawm, nws muaj txim. Yog ib tus twg lam coglus, tsis hais zoo lossis phem, thaum nws paub lawm, nws muaj txim. Thaum ib tug twg tau ua txhaum lawm, nws yuav tsum lees nws lub txim ntawd, thiab nws yuav tsum raug teem txim vim nws lub txim ntawd, nws yuav tsum coj ib tug maum yaj lossis maum tshis mus tua fij rau tus TSWV. Ces tus povthawj mam li muab coj mus ua khoom fij daws tus neeg ntawd lub txim. Yog tus neeg ntawd tsis muaj yaj lossis tshis txawm peem, nws yuav tsum nqa ob tug nquab liabrwg lossis ob tug nquab nyeg mus fij rau tus TSWV daws nws lub txim, muab ib tug fij daws txim thiab muab ib tug hlawv ua khoom fij. Nws yuav tau nqa ob tug nquab ntawd mus rau tus povthawj, tus povthawj yuav tsum muab tus nquab uas daws txim fij ua ntej. Nws muab tus nquab ntawd nyem cajdab kom tuag, tiamsis tsis txhob ua kom lub taubhau tu thiab muab cov ntshav nchos rau lub thaj ib sab. Muab cov ntshav uas seem coj mus tso rau ntawm lub taw thaj. Qhov no yog fij khoom daws txim povtseg. Ces nws mam li muab tug nquab uas ua khoom fij los hlawv fij, raws li txoj kevcai. Qhov no yog tus povthawj fij khoom theej txhoj daws tus neeg ntawd lub txim, thiaj yuav zam tau nws lub txim. Yog tus neeg ntawd tsis muaj ob tug nquab liabrwg lossis ob tug nquab nyeg li, nws yuav tsum tau nqa ob tais hmoov nplej mus fij daws nws lub txim. Tiamsis nws tsis txhob hliv roj txiv ntoo lossis hmoov tshuaj tsw qab xyaw cov hmoov nplej ntawd li, rau qhov yog coj mus fij daws txim. Nws nqa cov hmoov nplej ntawd mus rau tus povthawj, tus povthawj mam li muab tes yawm ib phoovtes fij ua kev nco txog rau tus TSWV, thiab coj mus tso rau saum tej khoom fij saum lub thaj ua khoom fij hlawv rau tus TSWV. Cov hmoov nplej no yog ua khoom fij daws txim povtseg. Qhov uas tus povthawj ua li no twb yog nws muab tej khoom theej txhoj los fij daws tus neeg ntawd lub txim, thiaj yuav zam tau nws lub txim. Cov hmoov nplej uas seem cia ua tus povthawj tug, ib yam li yog muab tej qoobloo coj tuaj fij rau tus TSWV ntag. Tus TSWV hais rau Mauxes hais tias, yog leejtwg ua txhaum rau tus TSWV tej khoom dawbhuv, tiamsis tsis yog nws txhob txwm ua, nws yuav tsum coj ib tug laug yaj lossis laug tshis uas tsis muaj ib qho phem li mus fij rau tus TSWV daws nws lub txim. Tus tsiaj ntawd yuav tsum ntaus nqi kom raws li nomtswv kevcai. Nws yuav tsum them nees nkaum feem pua ntxiv rau tej uas nws tau ua txhaum tas los lawm rov rau tus TSWV. Nws yuav tsum muab cob rau tus povthawj, thiab tus povthawj muab tus laug yaj lossis tus laug tshis ntawd fij daws tus neeg ntawd tej kev txhaum, thiaj yuav zam tau nws lub txim. Yog ib tus twg ua txhaum rau tus TSWV tej lus samhwm ib nqes twg, nws muaj txim, thiab yuav tau ris lub txim ntawd. Nws yuav tsum coj ib tug laug yaj lossis laug tshis uas tsis muaj ib qho phem li mus rau tus povthawj fij daws nws lub txim. Tus tsiaj ntawd yuav tsum ntaus nqi kom raws li nomtswv kevcai thiaj tau. Mas tus povthawj muab tus tsiaj ntawd fij daws tus neeg ntawd tej kev txhaum, thiaj yuav zam tau nws lub txim. Qhov no yog fij khoom daws nws lub txim uas nws tau ua txhaum rau tus TSWV. Tus TSWV hais rau Mauxes hais tias, yog ib tug twg ua txhaum thiab ua tsis ncaj rau tus TSWV uas yog tsis kam thim tej khoom uas ib tug kwvtij Yixalayees coj tuaj rau nws khaws tseg lossis yuam nqi lossis nyiag luag tug, lossis nws pom luag ib yam khoom uas ploj lawm los nws dag hais tias nws tsis pom, ces yog nws ua txhaum. Nws yuav tsum coj ib tug laug yaj lossis laug tshis uas tsis muaj ib qho phem li mus rau tus povthawj muab fij rau tus TSWV daws nws tej kev txhaum. Tus tsiaj ntawd yuav tsum ntaus nqi kom raws li nomtswv kevcai. Tus povthawj yuav tsum muab tus tsiaj ntawd fij daws tus neeg ntawd txojkev txhaum, thiaj yuav zam tau nws lub txim. Tus TSWV hais rau Mauxes kom muab tej kevcai uas hlawv khoom fij li nram no qhia rau Aloos thiab nws cov tub. Yam khoom uas muab hlawv fij ntawd cia nyob rau saum lub thaj ib hmos kaj ntug plaws, thiab lub cubtawg los yuav tsum cia cig ntsaj thuav tsis pub tuag li. Ces tus povthawj, hnav nws lub tsho ntaubmag ntev thiab lub ris ntaubmag luv, mus muab cov tshauv saum lub thaj yawm thiab muab tso rau ntawm lub thaj ib sab. Ces nws mam hloov nws cev ris tsho thiab coj cov tshauv mus nchuav rau ntawm qhov chaw dawbhuv uas nyob sab nraum ntug yeej. Cov taws saum lub thaj yuav tsum rauv kom cig tsis txhob pub tuag li. Txhua tagkis sawv ntxov tus povthawj yuav tsum tuaj muab taws rauv ntxiv rau, thiab muab tej khoom fij thiab tej roj coj mus hlawv rau saud fij ua kev sib raug zoo. Lub cubtawg saum lub thaj mas yuav tsum cia cig tsis txhob pub tuag li. Ntawm no mus yog tej kevcai uas coj tej qoobloo mus fij. Aloos cov tub uas yog cov povthawj yuav tsum muab tej qoobloo mus fij tabmeeg rau tus TSWV ntawm lub thaj hauv ntej. Tus povthawj muab ib phoovtes hmoov nplej thiab roj, thiab muab hmoov tshuaj tsw qab nphoo rau saum cov hmoov nplej, coj mus hlawv rau saum lub thaj kom tsw qab ntxiag ua rau tus TSWV txaus siab. Aloos thiab nws cov tub yuav tsum noj cov ncuav tsis xyaw keeb uas seem hauv chav dawbhuv, hauv tus TSWV lub Tsevntaub sib ntsib. Tsis txhob muab keeb xyaw cov ncuav ntawd, rau qhov yog lawv feem tug ntawm cov khoom dawbhuv uas hlawv fij rau kuv, ib yam li cov khoom fij daws txim thiab daws kev txhaum. Txhua tus txivneej uas yog Aloos cov xeebntxwv thiaj muaj cai noj tau tej zaub mov uas coj tuaj fij rau tus TSWV ntawd, ib tiam dhau rau ib tiam mus li. Yog leejtwg mus chwv tej khoom ntawd, yuav ua rau tus ntawd dawbhuv. Tus TSWV hais rau Mauxes kom hais rau Aloos thiab nws cov tub yuav tsum nqa khoom mus fij rau tus TSWV, hnub uas ua kevcai tsa nws ua povthawj: nws yuav tsum nqa ob choj hmoov nplej mus ua khoom fij rau tus TSWV, (kom sib npaug zos li tej hmoov nplej uas lawv niaj hnub coj mus fij rau tus TSWV), muab ib nrab fij rau thaum sawv ntxov thiab muab ib nrab fij rau thaum tsaus ntuj. Muab zuaj xyaw roj thiab coj mus kib hauv yias, thaum tawg paj lawm, mam coj mus ua khoom fij, kom tej pa tsw qab ntxiag ua rau tus TSWV txaus siab. Aloos cov xeebntxwv txhua tus uas ua tus Povthawj Hlob yuav tsum muab khoom fij rau tus TSWV li no ib tiam dhau rau ib tiam mus ibtxhis. Tej khoom ntawd muab hlawv tagnrho fij rau tus TSWV. Tej qoobloo uas tus povthawj muab fij ntawd, yuav tsum muab hlawv kom tas; tsis txhob noj hlo li. Tus TSWV hais rau Mauxes kom muab tej kevcai fij khoom daws txim li nram no qhia rau Aloos thiab nws cov tub. Tus tsiaj uas fij daws txim yuav tsum muab tua rau ntawm lub thaj sab ped, ntawm qhov chaw uas tua tsiaj hlawv fij tabmeeg tus TSWV; rau qhov yog yam khoom fij uas dawbhuv. Tus povthawj yuav tsum noj tus tsiaj uas tua fij no hauv chav dawbhuv, hauv tus TSWV lub Tsevntaub sib ntsib. Yog ib tus twg lossis ib yam dabtsi uas mus chwv tus tsiaj ntawd cov nqaij, yuav ua rau nws dawbhuv. Yog tus tsiaj ntawd cov ntshav txaws lo tej ris tsho, yuav tsum muab tej ris tsho ntawd ntxhua rau hauv chav dawbhuv xwb. Lub laujkaub av uas muab hau cov nqaij ntawd, yuav tsum muab tsoo povtseg, thiab yog muab laujkaub tooj hau los yuav tsum muab txhuam thiab ntxuav kom huv. Txhua tus txivneej uas yog cov povthawj tsevneeg yuav tsum noj cov nqaij uas muab ua khoom fij no; cov nqaij ntawd dawbhuv heev. Tiamsis yog tus tsiaj theej txhoj uas muab cov ntshav nqa mus rau hauv tus TSWV lub Tsevntaub sib ntsib fij ua kevcai daws txim, tsis txhob noj, yuav tsum muab hlawv xwb. Ntawm no yog tej kevcai uas fij khoom daws kev txhaum uas yog cov khoom dawbhuv heev. Muab tus tsiaj uas fij daws txhim ntawd, tua rau ntawm lub thaj sab ped, qhov chaw uas tua tej tsiaj hlawv ua khoom fij, thiab muab cov ntshav coj mus hliv ywg thoob plaws lub thaj. Muab cov roj luas kom tas coj mus fij rau saum lub thaj: cov roj ntawm tus kotw, cov npluag roj uas npog lub plab, cov hnyuv, ob lub raum thiab cov roj uas npog ob lub raum, thiab nplooj siab uas zoo tshaj plaws. Ces tus povthawj muab cov roj mus hlawv rau saum lub thaj ua khoom fij rau tus TSWV. Qhov no yog tus tsiaj uas tua fij daws kev txhaum. Txhua tus txivneej uas yog cov povthawj tsevneeg noj tau tus tsiaj ntawd cov nqaij, tiamsis yuav tsum coj mus noj hauv ib chav dawbhuv, rau qhov tus tsiaj ntawd yog yam khoom dawbhuv heev. Muaj ib txoj kevcai fij khoom daws kev txhaum thiab zam txim, tus povthawj twg yog tus fij tej khoom theej txhoj, mas cov nqaij ntawd yog nws tug. Tus tsiaj uas coj tuaj rau tus povthawj tua hlawv ua khoom fij ntawd, daim tawv yuav tsum yog tus povthawj uas hlawv tus tsiaj ua khoom fij ntawd tug. Tej qoobloo uas muab puab ua ncuav cub hauv qhovcub lossis ncu hauv laujkaub lossis kib hauv yias uas coj mus ua khoom fij, tus povthawj twg fij tej ncuav ntawd rau Vajtswv, cov ncuav ntawd puavleej yog nws tug. Tiamsis tagnrho cov hmoov nplej uas tsis tau muab cub coj mus ua khoom fij, txawm yog muab zuaj xyaw roj lossis tseem ua hmoov qhuav los yeej yog Aloos cov tub uas ua cov povthawj tug, thiab muab faib kom sib npaug zos rau lawv. Ntawm no yog tej kevcai uas neeg nqa khoom tuaj fij rau tus TSWV ua kev sib raug zoo. Yog ib tug twg muab cov khoom fij no mus fij ua Vajtswv tsaug, nws yuav tsum muab tej ncuav tsis xyaw keeb li nram no mus fij nrog tus tsiaj ntawd: cov ncuav tuab uas zuaj xyaw roj txiv ntoo, cov ncuav nyias uas muab roj txiv ntoo pleev rau saud thiab cov ncuav hmoov nplej mos uas muab zuaj xyaw roj txiv ntoo. Dua li ntawd, nws yuav tsum muab tej ncuav uas zuaj xyaw keeb lawm los ntxiv rau thiab. Nws yuav tsum muab cov ncuav ntawd ib yam ib lub coj mus fij rau tus TSWV, cov ncuav ntawd yog tus povthawj uas coj cov ntshav tsiaj mus nchos rau lub thaj tug. Tus tsiaj cov nqaij yuav tsum tau noj kom tas rau hnub uas fij tus tsiaj ntawd ntag, tsis pub kom tshuav ib qho nqaij seem mus txog tagkis kaj ntug. Tiamsis yog ib tug twg coj khoom tuaj fij ua kev sib raug zoo raws li nws tau coglus tseg lossis raws li nws txaus siab coj tuaj fij; cia li muab tus tsiaj uas nws coj tuaj tua fij ntawd cov nqaij hau noj hnub ntawd, tiamsis yog noj tsis tas, tagkis yuav tsum muab tej nqaij uas seem los noj dua. Tej nqaij uas seem, hnub peb cia li muab coj mus hlawv povtseg. Yog leejtwg tseem noj tus tsiaj ntawd tej nqaij txog hnub peb, Vajtswv yuav tsis txais yuav tus neeg ntawd tej khoom fij. Tej khoom fij ntawd yuav tsis suav ua tus neeg ntawd tug, tiamsis yuav muab suav ua cov khoom fij uas tsis huv, thiab yog leejtwg noj nws yuav tau ris lub txim ntawd. Yog tej nqaij ntawd chwv raug tej yam uas tsis huv, yuav tsum tsis txhob noj, cia li muab hlawv povtseg. Txhua tus uas yog neeg huv lawm, thiaj noj tau cov nqaij ntawd xwb, tiamsis tus uas tsis huv nws noj tus tsiaj uas fij ua kev sib raug zoo nrog tus TSWV ntawd, cia li muab tus ntawd rho tawm ntawm Vajtswv haivneeg mus. Yog leejtwg noj tej nqaij ua khoom fij tom qab uas nws mus tuav tej yam tsis huv, tsis hais neeg lossis tsiaj, yuav tau muab nws rho tawm ntawm Vajtswv haivneeg mus. Tus TSWV hais rau Mauxes kom qhia rau cov Yixalayees hais tias, tsis pub ib tus twg noj tej roj nyuj, roj yaj lossis roj tshis hlo li. Tsis txhob noj tej roj tsiaj uas mob tuag lossis tsov tom tuag li, tiamsis cia siv ua lwm yam los tau. Yog leejtwg noj tus tsiaj uas tua fij rau tus TSWV lawm tej roj, yuav muab tus ntawd rho tawm tsis pub ua Vajtswv haivneeg lawm. Txawm yog cov Yixalayees nyob qhov twg los xij, txwv tu nrho tsis pub muab ntshav noog lossis ntshav tsiaj los ua zaub noj. Yog leejtwg txhob txwm rhuav txoj kevcai no, nws yuav tsis tau ua Vajtswv haivneeg ntxiv li lawm. Tus TSWV hais rau Mauxes kom qhia rau cov Yixalayees hais tias, yog leejtwg muab khoom mus fij ua kev sib raug zoo rau tus TSWV, nws yuav tsum muab ib feem ntawm tus tsiaj nqa mus fij rau tus TSWV, nws yuav tsum yog tus uas nqa cov khoom ntawd mus. Nws yuav tsum nqa tus tsiaj ntawd cov roj nrog lub hauvnrob mus fij rau tus TSWV. Tus povthawj yuav muab cov roj ntawd hlawv rau saum lub thaj, tiamsis muab lub hauvnrob rau Aloos thiab Aloos cov tub. Thiab tus tsiaj ntawd cesqab sab xis yog muab rau tus povthawj uas yog Aloos tus tub uas muab cov ntshav thiab muab tej roj fij ua kev sib raug zoo ntawd. Tus TSWV kom cov Yixalayees muab tus tsiaj ntawd lub hauvnrob thiab cesqab sab xis rau tus povthawj Aloos thiab nws cov tub. Cov Yixalayees yuav tsum muab li no rau cov povthawj mus ibtxhis li. Qhov no yog muab ib feem ntawm cov khoom uas fij rau tus TSWV, rau Aloos thiab nws cov tub, txij hnub uas tsa lawv ua cov povthawj mus. Txij hnub ntawd los tus TSWV thiaj samhwm kom cov Yixalayees yuav tsum muab ib feem ntawm cov khoom no rau cov povthawj. Txoj kevcai no cov Yixalayees yuav tsum coj mus ibtxhis li. Cov no yog tej kevcai uas hlawv khoom fij, fij tej qoobloo, fij khoom daws txim, fij khoom daws kev txhaum, fij khoom ua kevcai tsa povthawj thiab fij khoom ua kev sib raug zoo, yog cov lus uas tus TSWV samhwm rau Mauxes saum Roob Xinais, hnub uas nws kom cov Yixalayees nqa khoom tuaj fij rau tus TSWV nyob nram tiaj suabpuam Xinais. Tus TSWV hais rau Mauxes hais tias, “Koj cia li coj Aloos thiab nws cov tub mus rau tom tus TSWV lub Tsevntaub sib ntsib lub qhovrooj, thiab nqa cov ris tsho uas cov povthawj hnav, cov roj txhawb meejthawj, ib tug ntsuag nyuj fij daws txim, ob tug laug yaj thiab ib tawb ncuav tsis xyaw keeb. Ces hu tagnrho cov Yixalayees tuaj sib sau rau tod.” Mauxes txawm ua raws li tus TSWV tau hais rau nws, thiab thaum cov Yixalayees tuaj sib sau txhij lawm, nws hais rau lawv tias, “Tus TSWV hais kom kuv cia li ua haujlwm kom tiav tamsim no.” Ces Mauxes thiaj coj Aloos thiab Aloos cov tub mus thiab muab dej ua kevcai ntxuav lawv. Nws muab lub tsho thiab lub tsho ntev rau Aloos hnav thiab muab txoj siv rau Aloos sia. Nws muab lub tsho efaus rau Aloos hnav looj tuaj nraud thiab muab txoj siv ntaubmag zoo zoo los rau nws pav duav. Mauxes muab daim ntaub npog hauvsiab los npog Aloos hauvsiab thiab nws muab lub Ulees thiab Thumees ntsaws rau hauv lub tsho efaus. Mauxes muab txoj phuam rau Aloos ntoo, thiab nws muab daim phiaj kub dawbhuv dai rau txoj phuam ntawm Aloos hauvpliaj, raws li tus TSWV tau hais rau Mauxes lawm. Ces Mauxes txawm muab cov roj txhawb meejthawj nchos rau tus TSWV lub Tsevntaub sib ntsib, thiab txhua yam uas nyob hauv lub Tsevntaub. Qhov uas ua li no twb yog nws muab lub Tsevntaub thiab txhua yam fij rau tus TSWV. Nws tseem muab cov roj ntawd mus nchos xya zaus rau lub thaj thiab tej cuabyeej saum lub thaj thiab nchos rau lub phiab tooj thiab lub taw phiab thiab muab tej ntawd fij rau tus TSWV. Mauxes muab cov roj txhawb meejthawj hliv rau saum Aloos taubhau, tsa nws ua povthawj. Tom qab ntawd, Mauxes mam li coj Aloos cov tub los rau tom hauv ntej, nws muab tsho rau lawv hnav, muab siv rau lawv sia thiab muab phuam rau lawv ntoo, raws li tus TSWV tau hais rau Mauxes lawm. Ces Mauxes txawm muab ib tug ntsuag nyuj tua fij daws txim, nws kom Aloos thiab Aloos cov tub tsa tes rau saum tus nyuj ntawd taubhau. Mauxes muab tus nyuj ntawd tua thiab nws muab ntivtes tub cov ntshav nyuj coj mus pleev rau lub thaj cov kub saum plaub ceg kaum thaj uas yog ua kevcai ntxuav lub thaj. Nws muab cov ntshav uas seem mus hliv ywg thoob plaws lub taw thaj. Qhov uas nws ua li no twb yog nws fij lub thaj thiab ua kevcai ntxuav lub thaj. Mauxes muab cov npluag roj uas npog lub plab thiab cov hnyuv, nplooj siab uas zoo tshaj plaws, thiab ob lub raum nrog cov roj uas npog ob lub raum coj mus hlawv rau saum lub thaj. Tiamsis nws coj tus nyuj lub cev, daim tawv, cov nqaij thiab cov hnyuv mus hlawv rau sab nraum ntug yeej, raws li tus TSWV hais rau Mauxes lawm. Dua li ntawd, Mauxes tseem muab ib tug laug yaj tua hlawv ua khoom fij, ces Aloos thiab Aloos cov tub tsa tes rau saum tus yaj ntawd taubhau. Mauxes muab tus yaj ntawd tua thiab muab cov ntshav nchos thoob plaws lub thaj. Thiab thaum lawv muab tus laug yaj ntawd txiav ua tej thooj lawm, Mauxes muab lub taubhau, cov nqaij thiab cov roj coj mus hlawv. Thiab thaum lawv muab dej ntxuav lub plab, cov hnyuv, siab ntsws thiab plaub ceg lawm, lawv mam li muab rau Mauxes coj mus hlawv. Cov no yog muab hlawv ua khoom fij rau tus TSWV, thiab cov khoom no yuav tsw qab ntxiag ua rau tus TSWV txaus siab, raws li tus TSWV tau hais rau Mauxes lawm. Ces Mauxes rov muab dua ib tug laug yaj tua ua kevcai tsa cov povthawj, Aloos thiab Aloos cov tub tsa tes rau saum tus yaj ntawd taubhau. Mauxes muab tus yaj ntawd tua thiab muab cov ntshav coj mus pleev Aloos lub taubntseg sab xis, tus ntivtes xoo sab xis thiab tus ntivtaw xoo sab xis. Ces Mauxes mam li mus coj Aloos cov tub los thiab muab ntshav pleev lawv cov taubntseg sab xis, cov ntivtes xoo sab xis thiab cov ntivtaw xoo sab xis. Mauxes muab cov ntshav uas seem coj mus nchos thoob plaws lub thaj huv tibsi. Mauxes muab cov roj, cov roj ntawm tus tw, cov npluag roj uas npog lub plab, cov hnyuv, nplooj siab uas zoo tshaj plaws, ob lub raum nrog cov roj uas npog ob lub raum thiab cesqab sab xis. Ces Mauxes muab ib lub ncuav tsis xyaw keeb uas twb muab fij rau tus TSWV lawm hauv lub tawb uas rau cov ncuav tsis xyaw keeb, ib lub ncuav zuaj xyaw roj thiab ib lub ncuav nyias nyias coj mus tso rau saum cov roj thiab cesqab sab xis. Mauxes muab tej khoom ntawd rau Aloos thiab Aloos cov tub, ces lawv muab yom fij rau tus TSWV. Ces Mauxes muab cov khoom ntawd rov los thiab coj mus hlawv rau saum lub thaj yog cov khoom fij ua kevcai tsa povthawj. Cov no yog tej khoom hlawv fij, thiab tsw qab ntxiag ua rau tus TSWV txaus siab. Ces Mauxes muab lub hauvnrob coj mus yom fij rau tus TSWV. Tus yaj uas muab tua ua kevcai tsa povthawj ntawd, yog muab rau Mauxes. Mauxes ua txhua yam raws li tus TSWV tau hais rau nws lawm. Mauxes muab cov roj txhawb meejthawj thiab cov ntshav yaj saum lub thaj los nchos rau Aloos, Aloos cov tub thiab rau lawv tej ris tsho. Qhov uas Mauxes ua li ntawd twb yog nws muab lawv thiab lawv tej ris tsho fij rau tus TSWV. Mauxes hais rau Aloos thiab Aloos cov tub hais tias, “Nej coj cov nqaij no mus hau rau ntawm tus TSWV lub Tsevntaub sib ntsib lub qhovrooj, thiab noj ntxuag cov ncuav tsis xyaw keeb hauv lub tawb uas muab fij ua kevcai tsa povthawj, raws li tus TSWV tau hais rau kuv lawm hais tias, Aloos thiab nws cov tub yuav noj tej ntawd. Muab tej nqaij lossis tej ncuav uas seem hlawv povtseg huv tibsi. Nej tsis txhob tawm ntawm tus TSWV lub Tsevntaub sib ntsib lub qhovrooj mus rau sab nraud kom txwm xya hnub, mus txog hnub uas nej ua kevcai tsa povthawj tiav tas tso, rau qhov kevcai tsa povthawj yuav tsum yog xya hnub thiaj tiav. Tej uas peb ua hnub no twb yog tus TSWV hais kom ua daws nej tej kev txhaum povtseg. Nej yuav tsum nyob twjywm ntawm tus TSWV lub Tsevntaub sib ntsib lub qhovrooj xya hnub xya hmo, raws li tus TSWV tau hais tseg lawm. Yog nej tsis ua li ntawd nej yuav tuag. Ntawm no yog tej lus uas tus TSWV tau samhwm rau kuv lawm.” Yog li ntawd, Aloos thiab Aloos cov tub thiaj ua txhua yam raws li tej lus uas tus TSWV tau hais rau Mauxes lawm. Thaum txog hnub yim, Mauxes txawm hu Aloos, Aloos cov tub thiab cov Yixalayees tej thawjcoj tuaj cuag nws; Mauxes hais rau Aloos hais tias, “Cia li coj ib tug ntsuag nyuj thiab ib tug laug yaj uas tsis muaj ib qho phem li tuaj thiab muab tua fij rau tus TSWV, tus ntsuag nyuj yog muab fij daws txim thiab tus laug yaj yog muab hlawv fij. Thiab koj hais rau cov Yixalayees hais tias, ‘Nej yuav tsum coj ib tug laug tshis mus fij daws txim, ib tug ntsuag nyuj, thiab ib tug thav yaj hnubnyoog ib xyoo uas tsis muaj ib qho phem li mus tua hlawv fij, muab tus ntsuag nyuj thiab tus thav yaj tua fij ua kev sib raug zoo. Nej muab cov tsiaj no fij rau tus TSWV nrog tej ncuav uas zuaj xyaw roj lawm. Nej yuav tsum ua li no, rau qhov hnub no tus TSWV yuav los tshwm rau nej pom.’ ” Lawv coj txhua yam tuaj tso rau ntawm hauv ntej tus TSWV lub Tsevntaub sib ntsib, raws li Mauxes tau hais rau lawv, thiab tagnrho cov pejxeem tuaj sib sau pehawm tus TSWV rau ntawm qhov chaw ntawd. Mauxes hais tias, “Tus TSWV samhwm kom nej cia li ua txhua yam no, yog nej ua li ntawd, nws lub hwjchim uas ci ntsa iab thiaj tshwm los rau nej pom.” Ces Mauxes hais rau Aloos hais tias, “Koj cia li mus rau tom lub thaj muab khoom fij daws txim thiab hlawv khoom fij daws koj thiab cov pejxeem lub txim. Muab tej khoom no mus fij daws cov pejxeem lub txim, raws li tus TSWV tau hais rau kuv lawm.” Aloos thiaj mus rau tom lub thaj thiab muab tus ntsuag nyuj tua fij daws nws lub txim. Nws cov tub nqa cov ntshav los rau nws, nws muab nws tus ntivtes tub cov ntshav nyuj thiab coj mus pleev rau lub thaj plaub tug kub saum plaub ceg kaum thaj, thiab cov uas seem, nws muab hliv ywg thoob plaws lub taw thaj. Ces nws muab cov roj, ob lub raum thiab nplooj siab uas zoo tshaj plaws coj mus hlawv rau saum lub thaj, raws li tus TSWV tau hais rau Mauxes lawm. Tiamsis nws coj cov nqaij thiab daim tawv mus hlawv rau sab nraum ntug yeej. Nws tua tsiaj hlawv fij daws nws lub txim. Nws cov tub nqa cov ntshav tsiaj los rau nws, thiab nws muab hliv ywg thoob plaws lub thaj. Lawv nqa tus tsiaj ntawd lub taubhau thiab cov nqaij los rau nws, nws muab coj mus hlawv rau saum lub thaj. Ces nws muab lub plab, cov hnyuv, lub siab, lub ntsws thiab ob cegqab ntxuav coj mus hlawv rau saum lub thaj, nrog cov khoom fij uas muab hlawv ntawd. Tom qab ntawd, nws mam li muab cov pejxeem tej khoom los fij. Nws muab ib tug tshis fij daws cov pejxeem lub txim, nws muab tua thiab muab tus tshis ntawd fij, nws ua ib yam li nws twb fij daws nws lub txim ua ntej lawm. Nws tseem muab tsiaj tua hlawv ua khoom fij thiab muab tus tsiaj ntawd fij raws li kevcai. Nws muab tej qoobloo coj mus fij thiab yawm ib phoovtes hmoov nplej coj mus hlawv rau saum lub thaj. (Cov no yog fij ntxiv rau cov khoom uas niaj hnub coj mus hlawv fij.) Nws muab tus heev nyuj thiab tus laug yaj fij ua kev sib raug zoo rau cov pejxeem. Nws cov tub nqa cov ntshav tsiaj los rau nws, thiab nws muab coj mus nchos thoob plaws lub thaj. Aloos muab cov roj nyuj thiab cov roj yaj coj mus tso rau saum ob lub hauvnrob thiab muab nqa coj mus tso tagnrho rau saum lub thaj. Nws muab cov roj hlawv rau saum lub thaj thiab muab ob lub hauvnrob thiab cesqab sab xis coj mus yom fij rau tus TSWV ua cov povthawj tug, raws li Mauxes tau hais tseg lawm. Thaum Aloos fij khoom daws txim, hlawv khoom fij thiab fij khoom ua kev sib raug zoo tas lawm, nws txawm tsa nws ob txhais tes rau saum cov pejxeem, nws foom koob hmoov rau lawv thiab nqis los. Mauxes thiab Aloos nkawd mus rau tom tus TSWV lub Tsevntaub sib ntsib, thiab thaum nkawd tawm los, nkawd foom koob hmoov rau cov pejxeem thiab tus TSWV lub tshwjchim txawm ci ntsa iab los rau cov pejxeem sawvdaws pom. Tamsim ntawd, tus TSWV txawm tso hluavtaws los kub cov khoom fij thiab tej roj saum lub thaj huv tibsi lawm. Thaum cov pejxeem pom lub tshwjchim ntawd, lawv qw thiab txhos caug ntua pehawm ua ntsejmuag ti nkaus rau hauv av. Aloos ob tug tub, Nadas thiab Anpihus nkawd ib leeg nqa ib laujkaub ncaig taws uas muaj thee cig ntsaj thuav, muab hmoov tshuaj tsw qab tso rau, thiab coj mus fij rau tus TSWV. Tiamsis cov ncaig ntawd tsis dawbhuv, rau qhov tus TSWV tsis tau kom nkawd coj cov khoom ntawd mus fij. Tamsim ntawd, tus TSWV txawm tso hluavtaws los kub kiag nkawd tuag tabmeeg tus TSWV. Ces Mauxes hais rau Aloos hais tias, “Ntawm no yog tej lus uas tus TSWV tau hais tseg cia lawm hais tias, ‘Cov uas ua kuv tes haujlwm yuav tsum saib taus kuv ua yog tus dawbhuv; thiab kuv yuav qhia kuv lub tshwjchim rau kuv haivneeg.’ ” Tiamsis Aloos ua twjywm tsis hais ib lo lus li. Mauxes hu Aloos tus txiv ntxawm Uxiyees ob tug tub uas yog Misayees thiab Exafas kom tuaj cuag nws thiab nws hais rau nkawd hais tias, “Neb cia li los ntawm no thiab coj neb ob tug kwvtij ob lub cev tawm hauv lub Tsevntaub tseemceeb no mus tso rau sab nraum ntug yeej.” Yog li ntawd, nkawd thiaj los muab khaubncaws qhwv ob lub cev tuag thiab coj mus tso rau sab nraum ntug yeej, raws li Mauxes tau hais rau nkawd. Ces Mauxes hais rau Aloos thiab Aloos ob tug tub uas yog Ele-axas thiab Ithamas hais tias, “Tsis txhob cia nej cov plaubhau ntxhov hnyo lossis dua nej tej ris tsho kom luag paub hais tias nej muaj kev quaj ntsuag. Yog nej ua li ntawd, nej yuav tuag thiab tus TSWV yuav chim rau ib tsoom pejxeem sawvdaws. Tiamsis tso rau nej ib tsoom Yixalayees los ua cov quaj nyiav thiab pam ob tug tuag uas tus TSWV tso hluavtaws los kub tuag ntawd. Tsis txhob tawm dhau ntawm tus TSWV lub Tsevntaub sib ntsib lub qhovrooj mus rau sab nraud, yog nej tawm, nej yuav raug tua tuag, rau qhov twb muab tus TSWV cov roj txhawb meejthawj pleev nej lawm.” Lawv txawm ua raws li Mauxes hais ntawd. Tus TSWV hais rau Aloos hais tias, “Tom qab uas koj thiab koj cov tub haus cawv txiv hmab lossis haus cawv ntsim lawm, nej tsis txhob mus hauv kuv lub Tsevntaub sib ntsib; yog nej mus rau hauv, nej yuav tuag. Ntawm no yog txoj kevcai rau koj thiab koj cov xeebntxwv yuav tsum coj mus ibtxhis li. Koj yuav tsum paub saib qho twg yog Vajtswv tug thiab qhov twg yog nej tug, paub qhov twg huv thiab qhov twg tsis huv. Koj yuav tsum muab tej kevcai uas kuv kom Mauxes muab rau koj no qhia rau ib tsoom Yixalayees sawvdaws.” Mauxes hais rau Aloos thiab Aloos ob tug tub uas yog Ele-axas thiab Ithamas uas tseem ua neej nyob hais tias, “Muab cov hmoov nplej seem uas fij rau tus TSWV ntawd zuaj ua ib co ncuav tsis xyaw keeb thiab coj mus noj tom lub thaj ib sab, rau qhov yog cov khoom fij uas dawbhuv heev. Tej khoom uas fij rau tus TSWV, feem twg yog koj thiab koj cov tub tug, nej cia li coj mus noj hauv qhov chaw dawbhuv. Rau qhov tus TSWV tau samhwm rau kuv li ntawd lawm. Tiamsis lub hauvnrob thiab cesqab uas muab yom fij rau tus TSWV, koj coj mus hau noj hauv qhov chaw dawbhuv, koj thiab koj cov tub cov ntxhais nrog koj noj, rau qhov cov khoom fij ua kev sib raug zoo uas cov Yixalayees coj tuaj fij ntawd yog koj thiab koj cov tub tug. Lawv yuav tsum nqa cesqab thiab lub hauvnrob tuaj thaum lub sijhawm uas lawv nqa cov roj tuaj hlawv fij rau tus TSWV. Cesqab thiab lub hauvnrob yog koj thiab koj cov menyuam tug mus ibtxhis, raws li tus TSWV tau hais tseg lawm.” Mauxes nug txog tus tshis uas muab tua fij daws txim, lawv qhia hais tias lawv twb muab tus tshis ntawd hlawv tas lawm. Qhov no ua rau Mauxes chim heev rau Ele-axas thiab Ithamas nkawd, thiab nws nug hais tias, “Vim li cas nej tsis coj cov khoom fij daws txim no mus noj hauv qhov chaw dawbhuv? Rau qhov yog yam khoom fij dawbhuv, thiab tus TSWV twb muab rau nej coj mus fij daws cov pejxeem lub txim povtseg tabmeeg tus TSWV lawm. Txawm yog cov ntshav los twb tsis pub nqa mus rau hauv chav dawbhuv hauv lub Tsevntaub, nej yuav tsum noj tej khoom fij no rau hauv qhov chaw dawbhuv, raws li kuv twb hais rau nej lawm.” Aloos thiaj teb hais tias, “Hnub no cov pejxeem coj lawv tej khoom fij daws txim mus fij rau tus TSWV, thiab lawv coj lawv tej khoom hlawv tuaj fij huv tibsi, tiamsis tseem muaj tej kev ntshai no tshwmsim los rau kuv thiab. Yog kuv cia li noj cov nqaij uas fij daws txim ntawd hnub no, puas yuav haum tus TSWV siab?” Thaum Mauxes hnov cov lus no, nws kuj pom zoo raws li Aloos hais thiab. Tus TSWV hais rau Mauxes thiab Aloos nkawd kom hais rau cov Yixalayees hais tias, nej noj tau txhua yam tsiaj nruab nrag uas tus rau ncau ua ob sab thiab yog cov tsiaj zom zaub xwb. Txawm yog li cas los xij, cov tsiaj uas zom zaub uas tus rau tsis ncau, muaj tej yam nej tsis txhob noj: nej tsis txhob noj ntxhuav, ntxhuav yog tsiaj zom zaub tiamsis tus rau tsis ncau thiab tsis huv rau nej. Tsis txhob noj zajnpuas, zajnpuas rau ncau, tiamsis tsis zom zaub thiab tsis huv rau nej. Tsis txhob noj luav, luav yog tsiaj zom zaub tiamsis tus rau tsis ncau ua ob sab thiab tsis huv rau nej. Tsis txhob noj npua, npua tej rau ncau ua ob sab tiamsis npua tsis zom zaub thiab tsis huv rau nej. Tsis txhob noj cov tsiaj no lossis kov cov tsiaj no tus uas tuag lawm; cov tsiaj no tsis huv rau nej. Nej noj tau txhua yam ntses nyob hauv dej uas muaj xiab thiab muaj nplai, tiamsis txhua yam tsiaj nyob hauv dej lossis hauv hiavtxwv uas tsis muaj xiab thiab tsis muaj nplai, nej yuav tsum tsis txhob noj. Nej yuav tsum paub hais tias, tej tsiaj no yog hom tsiaj tsis huv. Nej yuav tsum tsis txhob noj lossis kov cov tsiaj no, txawm yog nws tuag lawm los xij. Nej yuav tsum tsis txhob noj txhua yam tsiaj nruab deg uas tsis muaj xiab thiab tsis muaj nplai hlo li. Tej kab muaj tis uas siv plaub txhais tes taw nkag yog tej kab uas tsis huv, tsuas noj tau tej kab muaj tis uas muaj plaub txhais tes taw thiab dhia tau tej plhaw xwb. Tej kab uas nej noj tau mas yog: kooj, kooj txig, kabziam lossis kooj tshuab. Tiamsis tej kab muaj tis ya uas me dua tej no thiab muab plaub txhais tes taw nkag, puavleej yog tej kab uas tsis huv. Tej tsiaj uas nkag saum npoo av, yog tej tsiaj uas tsis huv rau nej: tshwbliag, nas tsuag, nab qa loj, nab qa dej, nab qa nqhuab, nab qa tsiav, nab qa suabzeb thiab nab qa ntoo. Leejtwg kov cov tsiaj no lossis cov tsiaj no lub cev tuag, yuav ua rau nws tsis huv mus txog thaum tsaus ntuj. Thiab yog cov tsiaj no lub cev tuag poob rau saum ib yam khoom twg, yam ntawd yuav tsis huv lawm thiab. Tej khoom ntawd yog: ntoo, khaubncaws, tawv tsiaj lossis hnabtsaj thiab tej uas yog khoom siv huv tibsi. Yuav tsum muab yam khoom ntawd mus tsau dej, yam khoom ntawd yuav tsis huv mus txog thaum tsaus ntuj, tom qab ntawd thiaj rov huv. Yog tej tsiaj ntawd poob rau hauv tej laujkaub, txhua yam uas nyob hauv lub laujkaub ntawd tsis huv lawm. Nej cia li muab lub laujkaub ntawd tsoo povtseg. Yog tej zaub mov uas yus ibtxwm noj, ntub cov dej tsis huv uas hliv hauv lub laujkaub ntawd los, ces tej zaub mov ntawd tsis huv lawm, thiab txhua yam kua uas nyob hauv lub laujkaub los tsis huv ib yam nkaus thiab. Txhua yam uas tej tsiaj tuag poob rau saud, yam ntawd tsis huv lawm, txawm yog qhovtxos lossis qhovcub los yuav tsum muab tsoo povtseg, tiamsis lub qhovdej txhawv lossis lub rhawv dej tseem huv; tiamsis txhua yam uas mus chwv cov tsiaj ntawd ib tug lub cev tuag, yam ntawd thiaj tsis huv lawm xwb. Yog cov tsiaj ntawd ib tug poob rau saum tej noob qoob uas yuav coj mus cog, cov noob qoob ntawd tseem huv. Tiamsis yog twb muab cov noob qoob ntawd tsau dej lawm, cov tsiaj ntawd ib tug mam poob rau saud, ces cov noob qoob ntawd tsis huv lawm. Yog tej tsiaj uas nej noj tau ib tus twg tuag, yog leejtwg mus kov tus tsiaj tuag ntawd lub cev, ces tus ntawd tsis huv mus txog thaum tsaus ntuj. Thiab yog leejtwg hlais tus tsiaj tuag ntawd los ua noj, nws yuav tsum hle nws cev ris tsho mus ntxhua, thiab nws tsis huv mus txog thaum tsaus ntuj; yog leejtwg mus kwv tej tsiaj tuag los nws yuav tsum hle nws cev ris tsho mus ntxhua, thiab nws tsis huv mus txog thaum tsaus ntuj. Nej yuav tsum tsis txhob noj tej tsiaj me uas nkag saum npoo av, tsis hais tej uas nkag lossis siv plaub txhais tes taw mus kev lossis muaj ntau txhais tes taws. Tsis txhob ua rau nej lub cev tsis huv uas yog noj tej tsiaj uas hais los saum no. Kuv yog tus TSWV uas yog nej tus Vajtswv, nej yuav tsum ua neeg dawbhuv, rau qhov kuv yog tus uas dawbhuv. Nej tsis txhob ua rau nej tsis huv vim tej tsiaj me me uas nkag saum npoo av. Kuv yog tus TSWV uas coj nej tawm nram tebchaws Iziv los, kuv thiaj yog nej tus Vajtswv. Nej yuav tsum ua neeg dawbhuv, rau qhov kuv yog tus uas dawbhuv. Ntawm no, yog txoj kevcai uas hais txog tej tsiaj nruab nrag: tej noog, tej tsiaj nruab deg, thiab txhua yam tsiaj uas nkag saum npoo av. Nej yuav tsum ceevfaj, saib cov tsiaj twg yog cov huv thiab cov tsiaj twg yog cov tsis huv, cov tsiaj twg yog cov tsimnyog noj thiab cov twg yog cov tsis tsimnyog noj. Tus TSWV hais rau Mauxes kom hais rau cov Yixalayees hais tias, tus pojniam uas yug tau ib tug tub, ces nws lub cev tsis huv xya hnub ib yam li nws coj khaubncaws ua rau nws lub cev tsis huv. Thiab hnub yim, cia li muab tus metub ntawd ua kevcai txiav tawv. Ces tus pojniam ntawd yuav tsum tau caiv peb caug peb hnub ntxiv mam li ua kevcai ntxuav qhov uas nws nchuav cev ntawd; tiamsis nws yuav tsum tsis txhob kov tej yam uas dawbhuv lossis tsis txhob mus rau hauv lub Tsevntaub uas dawbhuv mus txog thaum uas nws ua kevcai ntxuav tas tso. Tiamsis yog tus pojniam ntawd yug tau ib tug txhais, ces nws lub cev yuav tsis huv kaum plaub hnub, ib yam li nws coj khaubncaws ua rau nws lub cev tsis huv; ces nws yuav tsum tau caiv rau caum rau hnub mam li ua kevcai ntxuav qhov uas nws nchuav cev ntawd. Thaum tus pojniam ntawd yug tau tub lossis tau ntxhais, thiab thaum nws ua kevcai ntxuav tas lawm, nws yuav tsum tau coj ib tug thav yaj hnubnyoog ib xyoos mus rau tus povthawj ntawm tus TSWV lub Tsevntaub sib ntsib lub qhovrooj, muab tua hlawv ua khoom fij thiab coj ib tug nquab liabrwg lossis ib tug nquab nyeg mus fij daws txim. Tus povthawj yuav muab tus pojniam ntawd tej khoom fij rau tus TSWV thiab ua kevcai ntxuav tus pojniam ntawd tej kev tsis huv povtseg, nws lub cev thiaj rov huv. Qhov no, yog ib txoj kevcai rau tus pojniam yuav tsum coj tom qab uas yug menyuam tas, tsis hais tub lossis ntxhais. Yog tus pojniam ntawd txomnyem coj tsis tau ib tug yaj mus, nws coj ob tug nquab liabrwg lossis ob tug nquab nyeg mus xwb los tau, muab ib tug tua hlawv ua khoom fij thiab muab ib tug fij daws txim, thiab kom tus povthawj ua kevcai ntxuav nws tej kev tsis huv povtseg, nws lub cev thiaj rov huv. Tus TSWV hais rau Mauxes thiab Aloos hais tias, yog leejtwg muaj kab mob rau nws tej nqaij lossis mob npuag lossis mob nti tawv txho tshauv taws uas yuav mob ruas, yuav tsum coj nws mus cuag tus povthawj Aloos lossis Aloos tus tub uas yog tus povthawj. Tus povthawj mam tshuaj nws tus mob, yog cov plaub uas nyob ntawm qhov mob ntawd dawb thiab mob tshwm hauv cov nqaij tuaj, ces yog mob ruas ntag, ces tus povthawj qhia rau nws hais tias, nws yog neeg tsis huv lawm. Tiamsis yog qhov mob ntawd dawb thiab tsis mob dhau daim tawv rau hauv cov nqaij, cov plaub uas tuaj ntawd los tsis dawb, tus povthawj muab tus neeg ntawd cais nyob ib leeg xya hnub. Hnub xya tus povthawj rov tshuaj xyuas tus mob ntawd dua ib zaug ntxiv, yog nws pom qhov mob ntawd zoo li qub thiab tsis huam li, ces tus povthawj rov muab tus mob cais dua xya hnub ntxiv. Hnub xya tus povthawj rov tshuaj dua ib zaug ntxiv, thiab yog qhov mob ntawd cia li qhuav thiab tsis huam li, tus povthawj qhia rau nws hais tias, nws yog neeg huv; tsuas yog mob xwb. Nws yuav tsum hle nws cev ris tsho mus ntxhua nws thiaj huv. Tiamsis yog qhov mob ntawd rov huam tom qab uas tus povthawj tshuaj tas thiab hais tias nws yog neeg huv, nws yuav tsum tau rov mus cuag tus povthawj dua. Tus povthawj rov tshuaj saib nws dua, yog qhov mob ntawd huam dhau daim tawv lawm, tus povthawj qhia rau nws hais tias, nws mob ruas; nws yog neeg tsis huv lawm. Yog leejtwg mob ruas, mas yuav tsum tau coj nws mus cuag tus povthawj, tus povthawj yuav tshuaj nws qhov mob. Yog hais tias qhov mob ntawd cia li dawb thiab ua rau cov plaub ntawm qhov mob ntawd dawb tas thiab ua kuayig, ces yeej yog mob ruas ntev los lawm. Ces tus povthawj qhia rau nws hais tias, nws yog neeg tsis huv lawm; ces tsis tas yuav muab nws cais thiab tshuaj nws tus mob ntxiv, vim yeej paub tseeb lawm hais tias, nws yog neeg tsis huv. Yog cov ruas ntawd huam thoob ibce hauv kotaw nto plaws saum taubhau, tus povthawj rov tshuaj tus mob ntawd dua ib zaug ntxiv. Yog tus povthawj pom hais tias, cov mob zoo thoob plaws nws ibce lawm, tus povthawj qhia rau nws hais tias, nws yog neeg huv. Yog daim tawv dawb mos nyoos thoob plaws ibce, ces nws yog neeg huv. Tiamsis yog thaum nws cov nqaij tawg pleb ua rau tej mob tshwm tuaj lawm, ces nws yog tus neeg tsis huv. Tus povthawj rov tshuaj nws dua ntxiv, yog tus povthawj pom qhov mob ntawd tawg pleb lawm tiag, tus povthawj qhia rau nws hais tias, nws yog neeg tsis huv. Qhov tawg pleb ntawd qhia hais tias yog mob ruas lawm, thiab nws yog neeg tsis huv. Tiamsis yog thaum twg qhov mob ntawd zoo thiab tej tawv nqaij dawb mos nyoos tuaj lawm, tus neeg ntawd yuav tsum rov mus cuag tus povthawj, tus povthawj yuav rov tshuaj dua ntxiv. Yog qhov mob zoo dawb mos nyoos lawm, nws thiaj yog neeg huv, thiab tus povthawj qhia rau nws hais tias nws yog neeg huv lawm. Yog leejtwg mob npuag uas twb zoo lawm, thiab yog tom qab ntawd tsis ntev lub qhov txhab ntawd dawb thiab o tuaj lossis liab daj dawb lias rov tuaj, tus neeg mob ntawd yuav tsum mus cuag tus povthawj. Tus povthawj yuav tsum tshuaj nws, thiab yog qhov mob ntawd mob tob dhau daim tawv rau hauv cov nqaij thiab cov plaub uas tuaj ntawm qhov mob ntawd dawb tas lawm, ces tus povthawj qhia rau nws hais tias, nws yog neeg tsis huv. Qhov mob ruas ntawd yog pib ntawm qhov mob npuag tuaj ntag. Tiamsis yog tus povthawj tshuaj tsis pom cov plaub uas tuaj ntawm qhov mob ntawd dawb thiab qhov mob tsis qawj tob dhau daim tawv rau hauv, tiamsis pom qhov mob ntawd txawv lawm, ces tus povthawj muab tus mob ntawd cais nyob ib leeg xya hnub. Yog qhov mob ntawd huam tuaj lawm, tus povthawj qhia rau nws paub hais tias, nws yog neeg tsis huv; yog nws mob ruas tiag. Tiamsis yog tsis txawv thiab tsis huam li, ces yog kiav txhab mob npuag xwb, ces tus povthawj qhia rau nws hais tias, nws yog neeg huv. Yog muaj ib tug twg kub hnyiab, yog qhov kub hnyiab ntawd dawb lossis cia li liab dawb lias, tus povthawj yuav tsum tau tshuaj qhov mob ntawd. Yog cov plaub ntawm qhov kub hnyiab dawb thiab qawj tob dhau daim tawv rau hauv cov nqaij lawm, yog cov kab mob ruas pib huam ntawm qhov kub hnyiab ntawd tuaj ntag, ces tus povthawj qhia rau nws hais tias, nws yog neeg tsis huv. Tiamsis yog tus povthawj tshuaj qhov mob, cov plaub ntawm qhov mob ntawd tsis dawb thiab tsis qawj dhau daim tawv rau hauv cov nqaij, tiamsis pom qhov mob ntawd txawv lawm, ces tus povthawj muab tus mob ntawd cais nyob ib leeg xya hnub. Hnub xya tus povthawj mam rov tshuaj dua ib zaug ntxiv, thiab yog qhov mob huam tuaj, ces qhov mob ntawd yog mob ruas; tus povthawj qhia rau nws hais tias, nws yog neeg tsis huv. Tiamsis yog qhov mob tsis txawv thiab tsis huam li, ces qhov mob ntawd tsis yog mob ruas. Tus povthawj qhia rau nws hais tias, nws yog neeg huv, tsuas yog lub qhov txhab kub hnyiab huam tuaj xwb. Thaum uas ib tug txivneej lossis ib tug pojniam mob o rau saum taubhau lossis rau ntawm puabtsaig, tus povthawj yuav tsum tau tshuaj qhov mob ntawd. Yog pom qhov mob ntawd qawj dhau daim tawv rau hauv cov nqaij lawm, thiab cov plaub ntawm qhov mob daj thiab soob soob lawm, ces qhov mob ntawd yog mob ruas rau saum taubhau lossis ntawm puabtsaig ntag. Tus povthawj qhia rau nws hais tias, nws yog neeg tsis huv lawm. Yog thaum tus povthawj tshuaj tus mob ntawd, qhov mob tsis qawj dhau daim tawv rau hauv cov nqaij, tiamsis yog cov plaub tuaj tsis zoo xwb, ces tus povthawj yuav tsum muab tus mob ntawd cais nyob ib leeg xya hnub. Hnub xya tus povthawj rov tshuaj qhov mob dua ib zaug ntxiv, yog qhov mob tsis huam thiab tej plaub ntawm qhov mob tsis daj thiab tsis qawj dhau daim tawv rau hauv cov nqaij, tus neeg ntawd yuav tsum tau muab tej plaub uas nyob ibncig ntawm qhov mob chais povtseg. Ces tus povthawj rov muab nws cais nyob ib leeg xya hnub ntxiv thiab. Hnub xya tus povthawj rov tshuaj qhov mob dua ib zaug ntxiv, yog hais tias tsis huam thiab tsis qawj dhau daim tawv rau hauv cov nqaij, tus povthawj qhia rau nws hais tias, nws yog neeg huv. Tus neeg ntawd yuav tsum hle nws cev ris tsho mus ntxhua, nws thiaj rov huv. Tiamsis yog qhov mob ntawd rov huam tom qab uas tus povthawj hais tias, nws yog neeg huv, tus povthawj yuav tau rov tshuaj tus mob ntawd dua ib zaug ntxiv. Yog qhov mob huam tuaj, tsis tas yuav saib nws tej plaub daj uas tuaj ntawm qhov mob li; yeej paub tseeb hais tias tus neeg ntawd tsis huv lawm. Tiamsis yog tus povthawj pom hais tias, qhov mob los tsis huam thiab cov plaub ntawm qhov mob los tuaj zoo, qhov mob los zoo lawm, ces tus povthawj qhia rau nws hais tias, nws yog neeg huv. Thaum ib tug txivneej lossis ib tug pojniam mob nti tawv ua plhaws rau ntawm tej tawv nqaij, tus povthawj yuav tsum tau tshuaj tus neeg ntawd. Yog qhov mob ntawd tuag ntxhai dawb muag lias, ces yog daim tawv lam tawg ua hlwv tawm tuaj xwb; tus neeg ntawd yeej huv. Tiamsis yog mob ua npuag liab dawb lias tshwm rau saum tus neeg ntawd qhov do hau, ces qhov mob ntawd yog mob ruas ntag. Tus povthawj yuav tsum tshuaj tus mob ntawd, yog mob ua liab dawb txho tshauv taws rau saum taubhau lossis ntawm hauvpliaj, ces tus povthawj qhia rau nws hais tias, nws yog neeg tsis huv, rau qhov nws mob ruas rau saum taubhau. Tus neeg uas mob ruas rau nws lub cev lawm, nws yuav tsum hnav tej ris tsho ntuag ntuag xwb, tsis txhob ntsis nws tej plaubhau, muab ntaub los npog nws lub ntsejmuag ib nrab rov rau hauv thiab qw hais tias, “Neeg tsis huv, neeg tsis huv!” Tus uas mob ruas, yog mob ntev npaum li cas, nws yuav tsum nyob nws ib leeg ntev npaum li ntawd, thiab nws yuav tsum tawm mus nyob rau sab nraum ntug yeej, tsis txhob nyob xyaw luag lwm tus. Thaum tej ris tsho tuaj pwm, tsis hais tej ris tsho plaub yaj lossis tej ris tsho ntaubmag lossis txhua daim ntaubmag lossis ris tsho ntaub plaub yaj lossis tej tawv tsiaj lossis txhua yam uas muab tawv tsiaj ua, yog cov pwm ntawd ua rau tej ris tsho ntaub plaub yaj lossis tej tawv tsiaj lossis txhua yam uas muab tawv tsiaj ua tuaj pwm ntsuab daj lis lossis liab daj lis, ces yog cov pwm ntawd huam, mas yuav tsum coj mus rau tus povthawj saib. Tus povthawj yuav tsum tshuaj qhov tuaj pwm ntawd thiab muab daim khaubncaws ntawd coj mus tso rau ib qho xya hnub. Hnub xya tus povthawj muab rov los tshuaj dua ib zaug ntxiv, yog tej qhov tuaj pwm huam tuaj, ces daim khaubncaws ntawd tsis huv lawm. Tus povthawj cia li muab daim khaubncaws ntawd mus hlawv, rau qhov cov pwm huam tuaj lawm, yuav tsum muab hlawv povtseg. Tiamsis yog thaum nws tshuaj daim khaubncaws ntawd, tus povthawj tsis pom qhov tuaj pwm uas lo daim khaubncaws huam tuaj li, nws yuav tsum kom luag muab daim khaubncaws ntawd coj mus ntxhua thiab muab tso rau ib qho xya hnub ntxiv. Ces nws rov muab daim khaubncaws ntawd los tshuaj dua, yog tsis pom txawv li, thiab txawm yog cov pwm tsis huam los daim khaubncaws ntawd tsis huv lawm; nej yuav tsum muab daim khaubncaws ntawd hlawv povtseg, tsis hais daim khaubncaws ntawd tuaj pwm rau ntawm xubntiag lossis nraum nraubqaum li. Tiamsis yog thaum tus povthawj rov tshuaj daim khaubncaws ntawd ntxiv, qhov tuaj pwm cia li yaj tas lawm, tsis hais ntaub lossis tawv tsiaj, nws yuav tsum muab qhov ntawd dua povtseg. Thiab yog cov pwm rov tshwm dua tshiab tuaj thiab huam ntxiv, tus tswv khaubncaws cia li muab daim khaubncaws coj mus hlawv povtseg. Yog nws muab daim khaubncaws ntawd ntxhua thiab qhov pwm ntawd cia li ploj lawm, mas nws yuav tsum rov muab ntxhua dua, daim khaubncaws ntawd thiaj yuav huv. Tej uas hais los no, yog txoj kevcai uas hais txog tej pwm uas tuaj rau ntawm tej khaubncaws, tsis hais tej ntaub plaub yaj lossis ntaubmag lossis tej ris tsho ntaubmag lossis tej ris tsho ntaub plaub yaj lossis txhua yam uas muab tawv tsiaj ua, saib huv lossis tsis huv. Tus TSWV hais rau Mauxes hais tias, ntawm no yog tej txoj kevcai rau tus neeg mob ruas, hnub uas nws ua kevcai ntxuav. Yuav tsum coj nws mus cuag tus povthawj, thiab tus povthawj coj nws mus rau nraum ntug yeej, tus povthawj tshuaj nws. Yog nws tej kab mob zoo lawm, ces tus povthawj hais kom nws nqa ob tug noog uas tseem ciaj thiab yog tej noog huv, nrog ib daim ntoo ciab, ib txoj xov paj liab thiab ib rev nplooj hixauv tuaj rau tus povthawj. Ces tus povthawj hais kom muab ib tug noog tua rau saum lub tais av uas ntim cov dej ntshiab uas ce hauv qhovdej los. Nws muab dua ib tug noog, nrog daim ntoo ciab, txoj xov paj liab thiab rev nplooj hixauv coj mus raus rau hauv tus noog uas muab tua lawm cov ntshav hauv lub tais. Tus povthawj yuav tsum muab cov ntshav noog coj mus nchos rau tus neeg uas nws ua kevcai ntxuav nws tej mob ruas xya zaus, ces tus povthawj qhia rau nws hais tias, nws yog neeg huv lawm. Tom qab ntawd tus povthawj mam li muab tus noog uas tseem ciaj tso ya mus rau tom tiaj nrag. Ces tus neeg ntawd yuav tsum muab nws tej khaubncaws coj mus ntxhua, chais nws cov plaub povtseg thiab da dej; ces nws thiaj li yuav huv. Nws thiaj mus tau rau hauv lub yeej, tiamsis nws yuav tsum nyob ntawm nws lub tsevntaub nraum zoov xya hnub. Hnub xya nws yuav tsum rov chais nws cov plaubhau, cov hwjtxwv, cov plaub muag thiab tagnrho tej plaub uas tuaj thoob plaws nws lub cev; nws yuav tsum ntxhua nws tej ris tsho thiab da dej, ces nws thiaj li yuav huv. Hnub yim nws yuav tsum coj ob tug thav yaj thiab ib tug nwmyaj hnubnyoog ib xyoos uas tsis muaj ib qho phem li, tsib choj hmoov nplej uas ntse xyaw roj txiv ntoo thiab ib nrab khob roj txiv ntoo tuaj. Tus povthawj yuav coj tus neeg ntawd thiab cov khoom fij mus rau ntawm tus TSWV lub Tsevntaub sib ntsib lub qhovrooj. Ces tus povthawj muab ib tug thav yaj nrog ib khob roj txiv ntoo coj mus ua khoom fij daws txim. Nws muab cov khoom ntawd coj mus yom fij rau tus TSWV, cov khoom ntawd muab rau tus povthawj. Tus povthawj yuav tsum muab tus thav yaj ntawd tua rau ntawm qhov chaw dawbhuv uas ibtxwm tua tej tsiaj fij daws txim thiab hlawv fij. Tus povthawj yuav tsum ua li no, rau qhov cov khoom fij daws kev txhaum zoo ib yam li cov khoom fij daws txim uas puavleej yog tus povthawj tug thiab yog yam uas dawbhuv heev. Ces tus povthawj yuav tsum muab mentsis ntshav yaj pleev tus neeg uas tuaj ua kevcai ntxuav ntawd lub taubntseg sab xis, pleev rau tus ntivtes xoo sab xis thiab tus ntivtaw xoo sab xis. Tus povthawj muab cov roj txiv ntoo hliv mentsis rau hauv nws lub xibteg sab laug, muab nws tus ntivtes sab xis tub cov roj uas nyob hauv nws lub xibteg sab laug, nchos tabmeeg tus TSWV xya zaus. Tus povthawj muab cov roj hauv nws lub xibteg thiab cov ntshav yaj coj mus pleev rau tus neeg uas tuaj ua kevcai ntxuav ntawd lub taubntseg sab xis, pleev rau tus ntivtes xoo sab xis thiab tus ntivtaw xoo sab xis. Tus povthawj yuav tsum muab cov roj uas seem hauv nws lub xibteg coj mus pleev rau saum tus neeg ntawd lub taubhau. Qhov uas tus povthawj ua li no yog nws ua kevcai ntxuav rau tus neeg ntawd kom huv tabmeeg tus TSWV. Ces tus povthawj yuav tsum muab cov khoom fij daws txim coj mus fij thiab ua kevcai ntxuav tus neeg ntawd tej kev tsis huv povtseg kom nws huv. Tom qab ntawd, tus povthawj yuav tsum muab tus tsiaj los tua hlawv fij thiab muab tus tsiaj ntawd hlawv fij nrog tej hmoov nplej rau saum lub thaj. Tus povthawj yuav tsum ua kevcai ntxuav li no, tus neeg ntawd thiaj li yuav huv. Yog tus neeg ntawd pluag thiab nws coj tsis tau ib tug thav yaj tuaj tua yom fij rau tus TSWV daws nws lub txim uas yog muab rau tus povthawj. Nws tsuas nqa ob choj hmoov nplej uas ntse xyaw roj txiv ntoo thiab ib khob roj txiv ntoo tuaj ua khoom fij xwb. Nws yuav tsum nqa ob tug nquab liabrwg lossis ob tug nquab nyeg tuaj, muab ib tug tua fij daws txim thiab muab ib tug tua hlawv fij. Hnub yim nws yuav tsum coj tej khoom no tuaj cob rau tus povthawj ntawm tus TSWV lub Tsevntaub sib ntsib lub qhovrooj. Ces tus povthawj mam li coj tus thav yaj thiab cov roj txiv ntoo mus yom fij rau tus TSWV, cov khoom ntawd muab rau tus povthawj. Tus povthawj muab tus thav yaj tua thiab muab mentsis ntshav los pleev tus neeg uas ua kevcai ntxuav ntawd lub taubntseg sab xis, pleev rau tus ntivtes xoo sab xis thiab tus ntivtaw xoo sab xis. Ces tus povthawj muab mentsis roj txiv ntoo hliv rau hauv nws lub xibteg sab laug thiab muab nws tus ntivtes sab xis tub cov roj ntawd mus nchos tabmeeg tus TSWV xya zaus. Tus povthawj muab mentsis roj hliv rau tib qhov chaw uas nws tso cov ntshav, thiab muab mentsis coj mus pleev tus neeg uas ua kevcai ntxuav ntawd lub taubntseg sab xis, pleev rau tus ntivtes xoo sab xis thiab tus ntivtaw xoo sab xis. Cov roj uas seem hauv tus povthawj lub xibteg yuav tsum muab pleev tus neeg uas ua kevcai ntxuav ntawd lub taubhau, thiab ua kevcai ntxuav nws lub txim tabmeeg tus TSWV. Ces tus povthawj mam li muab ib tug nquab liabrwg lossis ib tug nquab nyeg fij daws txim raws li nws muaj, muab ib tug tua daws txim thiab muab dua ib tug tua hlawv fij nrog cov hmoov nplej ua ke, thiab tus povthawj ua kevcai ntxuav tus neeg ntawd lub txim kom huv tabmeeg tus TSWV. Qhov no yog txoj kevcai rau tus neeg mob ruas uas txomnyem tsis muaj tej khoom mus fij raws li kevcai. Tus TSWV hais rau Mauxes thiab Aloos hais tias, thaum uas nej mus txog hauv lub tebchaws Kana-as uas kuv muab rau nej ua nej tug, yog kuv tso tej tuaj pwm los rau hauv lub tsev twg uas nyob hauv nej lub tebchaws, ces tus uas yog tus tswv tsev yuav tau mus qhia rau tus povthawj hais tias, kuv pom muaj tej pwm tshwm rau hauv kuv tsev. Ces tus povthawj kom lawv ntsaig tej khoom hauv tsev tawm kom tas ua ntej nws mus tshuaj tej pwm ntawd. Dua li ntawd, tej khoom uas nyob hauv tsev yuav suav hais tias yog khoom tsis huv. Ces tus povthawj yuav tau mus tshuaj lub tsev ntawd, thiab mus tshuaj saib qhov tuaj pwm. Yog cov pwm ntawd cia li ntsuab daj lis lossis liab daj lis thiab tshwm mus noj tej phabntsa lawm, nws yuav tsum tawm hauv lub tsev ntawd mus thiab liaj qhovrooj cia xya hnub. Hnub xya nws mam li rov mus tshuaj lub tsev dua ntxiv. Yog cov pwm huam tuaj rau ntawm phabntsa, nws yuav tsum hais kom muab cov pobzeb uas tuaj pwm ntawd dawj mus povtseg rau tej qhov chaw tsis huv sab nraum ntug nroog. Tom qab ntawd nws yuav tsum muab tagnrho cov pwm ntawm phabntsa sab hauv nruab nrog kes tawm thiab muab tej hmoov sib ntawd coj mus povtseg rau qhov chaw tsis huv sab nraum ntug nroog. Ces muab dua ib co pobzeb los txhaws rau cov qhov uas muab dawj ntawd chaw, thiab muab cov hmoov sib tshiab los pleev rau sab phabntsa ntawd. “Yog tej pwm ntawd rov tshwm tuaj tom qab uas twb tshem cov pobzeb thiab twb muab tej hmoov sib uas pleev lub tsev ntawd kes tas lawm, tus povthawj rov mus tshuaj thiab saib dua. Yog qhov tuaj pwm ntawd huam tuaj dua, lub tsev ntawd yeej tsis huv. Yuav tsum muab lub tsev ntawd tsoo povtseg thiab muab tej pobzeb, tej ntoo thiab tagnrho tej hmoov sib uas xov lub tsev ntawd coj mus povtseg kom tas rau ntawm qhov chaw tsis huv sab nraum ntug nroog. Yog leejtwg mus rau hauv lub tsev ntawd thaum uas liaj qhovrooj lawm, mas tus ntawd yuav tsis huv mus txog thaum tsaus ntuj. Yog leejtwg mus pw lossis mus noj mov hauv lub tsev ntawd yuav tsum kom nws hle nws cev ris tsho coj mus ntxhua. “Yog hais tias, thaum tus povthawj tuaj saib, tom qab uas pleev tej hmoov sib tshiab tas rau lub tsev ntawd tej qhov tuaj pwm tsis rov tuaj pwm lawm, tus povthawj qhia hais tias, lub tsev ntawd huv, rau qhov tej pwm twb ploj tas lawm. Tus tswv tsev yuav tsum coj ob tug noog, ib daim ntoo ciab, ib txoj xov liab thiab ib rev nplooj hixauv mus ua kevcai ntxuav lub tsev ntawd. Tus povthawj yuav tsum muab ib tug noog tua rau saum lub tais av uas ntim cov dej cag ntshiab heev. Ces nws muab daim ntoo ciab, rev nplooj hixauv, txoj xov liab thiab tus noog uas tseem ciaj mus raus rau hauv tus noog uas muab tua lawm cov ntshav thiab cov dej ntshiab. Tus povthawj muab nchos rau lub tsev ntawd xya zaus. Qhov uas nws muab cov ntshav noog, cov dej ntshiab, tus noog uas tseem ciaj, daim ntoo ciab, rev nplooj hixauv thiab txoj xov liab los ua li no, yog nws ua kevcai ntxuav lub tsev ntawd kom huv. Ces nws mam li muab tus noog uas tseem ciaj tso ya hauv lub nroog mus rau tom tiaj nrag. Nws yuav tsum tau ua kevcai ntxuav lub tsev ntawd li no, lub tsev thiaj yuav huv.” Tej no yog kevcai rau tej kab mob uas yog: mob ruas, mob lig, tuaj pwm rau ntawm tej ris tsho lossis tej tsev, thiab o tuaj lossis tawg pleb lossis dawb tej thaj, tej kevcai no tsuas yog siv qhia tej yam uas huv thiab tsis huv xwb. Tus TSWV hais rau Mauxes thiab Aloos nkawd kom hais rau cov Yixalayees hais tias, thaum ib tug txivneej twg mob ua kua paug tawm hauv nws qhov chaw xis los, mas nws yog neeg tsis huv lawm. Txawm yog cov kua paug ntawd, tseem tawm lossis tu lawm los nws lub cev yeej tsis huv. Lub txaj uas tus mob ntawd pw, thiab txhua yam uas nws mus zaum saud los tsis huv lawm. Txhua tus uas mus tuav tus mob ntawd lub txaj, lossis mus zaum saum tej chaw uas tus mob ntawd zaum lawm, nws yuav tsum hle nws cev ris tsho mus ntxhua thiab da dej, mas nws tseem tsis huv mus txog thaum tsaus ntuj. Yog leejtwg kov tus neeg mob ntawd thiab nws tej kua paug, nws yuav tsum hle nws cev ris tsho mus ntxhua thiab da dej, mas nws tseem tsis huv mus txog thaum tsaus ntuj. Yog hais tias tus neeg uas mob ntawd nto qaubncaug mus lo cov neeg uas twb ua kevcai ntxuav lawm ib tug twg, tus ntawd yuav tsum hle nws cev ris tsho mus ntxhua thiab da dej, mas nws tseem tsis huv mus txog thaum tsaus ntuj. Txhua lub eeb nees uas tus neeg mob ntawd caij lawm, lub eeb nees ntawd tsis huv lawm. Txhua tus uas mus tuav tej yam uas tus neeg mob ntawd zaum, nws yuav tsis huv mus txog thaum tsaus ntuj. Yog tus neeg uas mob ntawd xub mus tuav ib leeg tus twg ua ntej, nws tsis tau ntxuav tes, mas tus uas nws tuav ntawd yuav tsum hle nws cev ris tsho mus ntxhua thiab da dej, mas nws tsis huv mus txog thaum tsaus ntuj. Txhua lub laujkaub uas tus neeg mob ntawd kov lawm, yuav tsum muab tsoo povtseg, thiab lub tais ntoo uas tus mob ntawd tuav yuav tsum muab ntxuav kom huv. Tom qab uas tus neeg mob ntawd cov kua paug tu lawm, nws yuav tsum tos xya hnub, nws mam hle nws cev ris tsho ntxhua thiab da cov dej cag uas ntshiab, mas nws lub cev thiaj yuav huv. Hnub yim nws yuav tsum coj ob tug nquab liabrwg lossis ob tug nquab nyeg mus rau tus povthawj ntawm tus TSWV lub Tsevntaub sib ntsib lub qhovrooj. Tus povthawj muab ib tug nquab tua fij daws txim thiab muab ib tug tua hlawv fij. Ua li no yog tus povthawj ua kevcai ntxuav tus mob ntawd kom huv. Yog ib tug txivneej twg cov kua chaw xis tawm los, nws yuav tsum da dej ntxuav nws lub cev, mas nws tsis huv mus txog thaum tsaus ntuj. Yog cov kua ntawd lo tej khaubncaws lossis tej ris tsho tawv tsiaj, yuav tsum muab coj mus ntxhua thiab tej khaubncaws ntawd tsis huv mus txog thaum tsaus ntuj. Tom qab uas tus txivneej thiab tus pojniam pw ua ke tas lawm, nkawd yuav tsum da dej, mas nkawd tsis huv mus txog thaum tsaus ntuj. Thaum ib tug pojniam twg coj khaubncaws, nws tsis huv mus txog xya hnub. Leejtwg kov tus pojniam ntawd, tus ntawd tsis huv mus txog thaum tsaus ntuj. Txhua yam uas tus pojniam ntawd zaum lossis pw rau saud thaum lub sijhawm uas nws tabtom coj khaubncaws, mas yam ntawd tsis huv lawm. Yog ib tug txivneej mus nrog tus pojniam twg pw thaum nws tseem tabtom coj khaubncaws, tus pojniam ntawd cov ntshav lo tus txivneej ntawd lawm, tus txivneej ntawd tsis huv mus txog xya hnub, thiab txhua lub txaj uas tus txivneej ntawd pw los tsis huv lawm thiab. Yog tus pojniam twg nchuav cev ntau hnub uas tsis yog nws lub caij coj khaubncaws lossis nws nchuav cev heev rau thaum txog caij nws coj khaubncaws, nws nchuav cev ntev npaum li cas nws tsis huv ntev npaum li ntawd; ib yam li thaum nws coj khaubncaws, nws lub cev tsis huv ntag. Txhua lub txaj uas nws pw thiab txhua lub chaw uas nws zaum, thaum lub sijhawm uas nws tabtom coj khaubncaws ntawd tsis huv lawm. Yog leejtwg mus tuav tej khoom ntawd nws yuav tsis huv, mas nws yuav tsum hle nws cev ris tsho ntxhua thiab da dej; mas nws tsis huv mus txog thaum tsaus ntuj. Tom qab uas nws coj khaubncaws dua lawm, nws yuav tsum tos xya hnub, ces nws mam li mus ua kevcai ntxuav, nws thiaj yuav huv. Hnub yim, nws cia li nqa ob tug nquab liabrwg lossis ob tug nquab nyeg mus rau tus povthawj ntawm tus TSWV lub Tsevntaub sib ntsib lub qhovrooj. Tus povthawj muab ib tug nquab tua fij daws txim thiab muab ib tug tua hlawv fij. Qhov uas tus povthawj ua li no yog ua kevcai ntxuav tus pojniam ntawd kom huv. Neb qhia rau cov Yixalayees kom txav deb ntawm tej uas tsis huv, lawv thiaj tsis ua txhaum rau tus TSWV lub Tsevntaub sib ntsib uas nyob hauv lub plawv yeej. Yog lawv ua txhaum, ces lawv yuav tuag. Tej uas hais los no yog txoj kevcai hais txog tus txivneej uas mob los kua paug lossis nws qhov chaw xis los kua paug, thiab tus pojniam uas coj khaubncaws lossis tus txivneej uas mus nrog tus pojniam coj khaubncaws pw, nws tsis huv ib yam nkaus thiab. Tus TSWV hais rau Mauxes tom qab uas Aloos ob tug tub raug tua tuag thaum nkawd coj cov ncaig taws tsis dawbhuv mus fij rau tus TSWV. Tus TSWV hais rau Mauxes hais tias, “Koj cia li qhia rau koj tus tijlaug Aloos hais tias, tsuas yog thaum txog lub sijhawm uas teem tseg, nws thiaj mus tau rau tom qab daim ntaub uas quas Chav Dawbhuv kawg nkaus xwb, rau qhov kuv tshwm saum tauv huab los nyob rau saum lub Phijxab uas ntim Vajtswv tej lus cog tseg. Yog nws tsis mloog lus, nws yuav tuag. Nws mus tau rau hauv Chav Dawbhuv kawg nkaus, thaum nws coj tus ntsuag nyuj mus tua fij daws txim thiab tus laug yaj mus tua hlawv fij nkaus xwb.” Ua ntej nws yuav mus rau hauv Chav uas Dawbhuv kawg nkaus, nws yuav tsum da dej thiab hnav cev ris tsho povthawj uas yog: lub tsho ntaubmag ntev, lub ris luv, sia txoj siv ntaubmag thiab ntoo txoj phuam. Cov Yixalayees yuav tsum muab ob tug laug tshis rau Aloos coj mus tua fij daws txim thiab ib tug laug yaj coj mus tua hlawv fij. Nws muab ib tug heev nyuj coj mus fij ua khoom theej txhoj daws nws thiab nws tsevneeg lub txim. Ces nws yuav tsum tau coj ob tug laug tshis ntawd mus rau ntawm tus TSWV lub Tsevntaub sib ntsib lub qhovrooj. Aloos muab ob tug tshis ntawd rho ntawv, ib tug rau tus TSWV, thiab ib tug rau Axaxees. Aloos yuav tsum muab tus tshis uas rho ntawv tau rau tus TSWV tua theej txhoj thiab muab fij daws txim. Thiab muab tus tshis uas rho ntawv tau rau Axaxees fij ciaj rau tus TSWV thiab muab tso mus rau Axaxees tom tiaj suabpuam, kom ris sawvdaws tej kev txhaum mus povtseg. Thaum Aloos muab tus heev nyuj los tua fij daws nws thiab nws tsevneeg lub txim, nws yuav tsum muab lub yias rau ncaig taws mus yawm ib co ncaig uas tseem cig ntsaj thuav ntawm lub thaj, thiab yawm ob phoovtes hmoov tshuaj tsw qab coj mus rau hauv Chav Dawbhuv kawg nkaus. Nws muab cov hmoov tshuaj tsw qab tso rau saum cov ncaig taws tabmeeg tus TSWV, kom cov pa hmoov tshuaj tsw qab ncho tuaj roos lub hau Phijxab uas ntim Vajtswv tej lus cog tseg kom Aloos tsis txhob pom lub hau phijxab, nws thiaj tsis tuag. Aloos yuav tsum nqa cov ntshav nyuj mus thiab muab nws tus ntivtes tub cov ntshav ntawd, nchos rau lub hau Phijxab sab hauv ntej thiab muab mentsis nchos rau lub Phijxab sab ntawm hauv ntej xya zaus. Ces tom qab ntawd, Aloos mam li muab tus laug tshis uas fij daws cov pejxeem lub txim tua, thiab nqa cov ntshav mus rau hauv Chav Dawbhuv kawg nkaus, muab cov ntshav ntawd nchos rau lub hau Phijxab thiab lub Phijxab sab hauv ntej, ib yam li nws nchos cov ntshav nyuj. Qhov uas Aloos ua li no, yog nws ua kevcai ntxuav Chav Dawbhuv kawg nkaus kom huv, vim cov Yixalayees tej kev phem kev qias thiab lawv tej kev txhaum. Aloos yuav tsum ua kevcai ntxuav li no rau tus TSWV lub Tsevntaub sib ntsib, rau qhov lub tsevntaub nyob hauv lub plawv yeej uas yog qhov chaw tsis huv. Thaum Aloos mus rau hauv Chav Dawbhuv kawg nkaus, mus ua kevcai ntxuav nws, nws tsevneeg thiab cov Yixalayees, mas tsis pub ib tug neeg nyob hauv tus TSWV lub Tsevntaub sib ntsib mus txog thaum uas nws tawm rov los; Aloos yuav tsum mus hlawv khoom fij rau ntawm lub thaj thiab ua kevcai ntxuav lub thaj. Nws yuav tsum muab mentsis ntshav nyuj thiab ntshav tshis pleev rau plaub tug kub saum plaub ceg kaum thaj. Thiab nws yuav tsum muab nws tus ntivtes tub cov ntshav ntawd nchos rau lub thaj xya zaus. Qhov uas nws ua li no yog nws ua kevcai ntxuav lub thaj, vim cov Yixalayees tej kev txhaum thiab ua kom lub thaj dawbhuv. Thaum Aloos ua kevcai ntxuav Chav uas Dawbhuv kawg nkaus hauv tus TSWV lub Tsevntaub sib ntsib thiab lub thaj tas lawm, nws mam li muab tus tshis uas rho tau rau Axaxees fij ciaj rau tus TSWV. Aloos tsa nws ob txhais tes rau saum tus tshis ntawd lub taubhau thiab lees tagnrho cov Yixalayees tej kev phem kev qias, tej txim thiab tej kev ntxeev siab, muab tej ntawd foom huv tibsi rau saum tus tshis lub taubhau. Ces kom tus neeg uas twb npaj tau lawm cab tus tshis ntawd mus tso rau tom tiaj suabpuam. Ces tus tshis ntawd yuav ris lawv tej txim saum nws lub taubhau nrog nws mus povtseg, rau thaj chaw uas tsis muaj neeg nyob hlo li. Ces Aloos yuav tsum rov mus rau hauv tus TSWV lub Tsevntaub sib ntsib, muab cev ris tsho povthawj uas nws hnav ua ntej nws mus rau hauv Chav Dawbhuv kawg nkaus hle thiab muab tso rau hauv. Nws yuav tsum mus da dej hauv ib chav dawbhuv thiab hnav nws cev ris tsho. Tom qab ntawd, nws mam li tawm los thiab muab khoom mus hlawv fij daws nws thiab cov Yixalayees lub txim. Nws yuav tsum muab cov roj tsiaj mus hlawv rau saum lub thaj fij daws txim. Tus neeg uas cab tus tshis mus rau Axaxees tom tiaj suabpuam yuav tsum hle nws cev ris tsho ntxhua thiab da dej ua ntej uas nws yuav rov los rau hauv lub yeej. Tus heev nyuj thiab tus laug yaj uas tua fij daws txim uas twb muab cov ntshav nqa mus ua kevcai daws txim rau hauv Chav Dawbhuv kawg nkaus lawm, yuav tsum coj mus rau sab nraum ntug yeej, ob daim tawv, cov nqaij, lub plab thiab cov hnyuv yuav tsum muab hlawv kom tas huv tibsi. Tus uas mus hlawv tej ntawd, nws yuav tsum hle nws cev ris tsho ntxhua thiab da dej ua ntej uas nws yuav rov los rau hauv lub yeej. Yuav tsum coj raws li tej kevcai no mus ibtxhis. Lub xya hli ntuj hnub xiab kaug, cov Yixalayees thiab cov neeg txawv tebchaws uas nrog nej nyob ua ke, yuav tsum ua kevcai yoo mov thiab tsis txhob ua ib yam haujlwm dabtsi hlo li. Hnub ntawd yuav tsum ua kevcai daws tagnrho nej tej kev txhaum, nej thiaj li ua tau neeg huv. Hnub ntawd yog hnub dawbhuv, hnub ntawd nej yuav tsum yoo mov ib hnub thiab tsis txhob ua ib yam haujlwm li. Tej no yog tej kevcai uas nej yuav tsum coj thiab ua mus ibtxhis li. Tus Povthawj Hlob uas tsa los hloov nws txiv chaw, yog tus uas ua kevcai ntxuav rau sawvdaws kom huv. Nws yuav tsum hnav cev ris tsho povthawj thiab ua kevcai ntxuav Chav uas Dawbhuv kawg nkaus, tus TSWV lub Tsevntaub sib ntsib, lub thaj thiab cov Yixalayees sawvdaws. Tej kevcai no yog tej uas nej yuav tsum coj thiab ua raws li no mus ibtxhis. Yuav tsum ua txoj kevcai no rau cov Yixalayees ib xyoo ib zaug ntxuav lawv tej kev txhaum povtseg. Yog li ntawd, Mauxes thiaj ua raws li tej lus uas tus TSWV tau samhwm rau nws lawm. Tus TSWV hais rau Mauxes kom hais rau Aloos, Aloos cov tub thiab cov Yixalayees sawvdaws hais tias, Cov lus samhwm no lub ntsiab yog kom cov Yixalayees yuav tsum coj tej tsiaj uas lawv coj mus tua tom tej tiaj nrag tuaj fij rau tus TSWV. Txij no mus lawv yuav tsum coj tej tsiaj ntawd tuaj rau tus povthawj ntawm tus TSWV lub Tsevntaub sib ntsiab lub qhovrooj, thiab muab tej tsiaj ntawd tua fij rau tus TSWV ua kev sib raug zoo. Tus povthawj muab cov ntshav nchos puagncig lub thaj uas nyob ntawm tus TSWV lub Tsevntaub sib ntsib lub qhovrooj, thiab muab cov roj hlawv kom tsw qab ntxiag ua rau tus TSWV txaus siab. Cov Yixalayees yuav tsum tseg tsis txhob ua tsis ncaj rau tus TSWV, vim qhov uas lawv pheej tua tej tsiaj fij rau tej dab tshis tom tej tiaj nrag. Cov Yixalayees yuav tsum coj txoj kevcai no mus ibtxhis li. Thiab koj hais rau lawv hais tias, cov Yixalayees lossis cov neeg txawv tebchaws txhua tus uas nrog lawv nyob ua ke, yog leejtwg tua tsiaj hlawv fij lossis fij theej txhoj uas yog muab fij rau tus TSWV, tiamsis tsis coj tuaj tua rau ntawm tus TSWV lub Tsevntaub sib ntsib lub qhovrooj, yuav muab tus ntawd rho tawm ntawm Vajtswv haivneeg mus. Yog cov Yixalayees lossis cov neeg txawv tebchaws uas nrog nej nyob ua ke, leejtwg noj tej nqaij uas txham ntshav, tus TSWV yuav tawmtsam tus ntawd thiab yuav muab nws rho tawm ntawm Vajtswv haivneeg mus. Txhua yam uas ciaj sia, txojsia nyob hauv cov ntshav, tus TSWV thiaj samhwm kom muab tagnrho tej ntshav hliv rau saum lub thaj thiaj daws tau neeg tej kev txhaum povtseg. Ntshav yog txojsia, thiaj daws tau kev txhaum. Yog li no, tus TSWV thiaj samhwm rau cov Yixalayees, tsis pub lawv thiab cov neeg txawv tebchaws uas nrog lawv nyob ua ke noj tej nqaij uas txham ntshav li. Yog cov Yixalayees lossis cov neeg txawv tebchaws uas nrog nej nyob ua ke, leejtwg mus tua tsiaj lossis noog uas yog yam tsiaj huv los noj, yuav tsum muab cov ntshav hliv rau hauv av thiab muab av npoog rau. Txhua yam uas ciaj sia, txojsia yog nyob hauv cov ntshav xwb, yog li ntawd, tus TSWV thiaj hais rau cov Yixalayees kom tsis txhob noj tej nqaij uas txham ntshav, yog leejtwg noj, yuav tsum muab tus ntawd rho tawm ntawm Vajtswv haivneeg mus. Txhua tus, tsis hais cov Yixalayees lossis cov neeg txawv tebchaws mus hlais tej tsiaj uas mob tuag lossis tsiaj nyaum tom tuag los ua noj, nws yuav tsum hle nws cev ris tsho ntxhua, da dej thiab nyob tos txog thaum tsaus ntuj kom nws huv tso. Yog nws tsis ntxhua nws tej ris tsho thiab da dej, nws yuav tsum ris nws lub txim ntawd. Tus TSWV hais rau Mauxes kom hais rau cov Yixalayees hais tias, “Kuv yog tus TSWV uas yog nej tus Vajtswv. Nej tsis txhob xyaum ua raws li cov neeg Iziv uas nyob nram qhov chaw uas nej twb mus nyob ib zaug lawm lossis tsis txhob ua li cov neeg uas nyob hauv lub tebchaws Kana-as uas kuv tabtom coj nej mus nyob pheej ibtxwm ua. Nej yuav tsum hwm kuv tej kevcai thiab ua raws li tej lus uas kuv twb samhwm rau nej lawm. Kuv yog tus TSWV uas yog nej tus Vajtswv. Nej yuav tsum xyaum thiab ua raws li tej kevcai thiab tej lus samhwm uas kuv muab cob rau nej lawm; yog leejtwg ua raws li no yuav cawm tau nws txojsia. Kuv yog tus TSWV.” Tsis txhob mus nrog nej tej neeg uas txeeb ze sib dee. Tsis txhob deev koj niam, ua rau koj txiv poob ntsejmuag. Koj tsis txhob ua rau koj niam poob ntsejmuag. Tsis txhob deev koj txiv cov pojniam ib tug twg, ua rau koj txiv poob ntsejmuag hlo li. Tsis txhob deev koj tus muam uas yog ib tug niam yug lossis tus muam uas tsis nrog koj koom niam, tsis hais tus uas yug hauv koj tsev lossis coj lwm qhov los. Tsis txhob deev koj tus ntxhais xeebntxwv; qhov uas koj ua rau nws poob ntsejmuag kuj ua rau koj poob ntsejmuag ib yam nkaus. Tsis txhob deev koj tus muam uas tsis nrog koj koom niam; nws twb yog koj tus muam ib yam nkaus thiab. Tsis txhob deev koj tus txiv hlob lossis koj tus txiv ntxawm tus pojniam, rau qhov nws yog koj tus niamhlob lossis koj tus niamntxawm. Tsis txhob deev koj tus nyab, rau qhov nws yog koj tus tub tus pojniam. Tsis txhob deev koj tus tijlaug lossis koj tus kwv tus pojniam, rau qhov yuav ua rau koj tus tijlaug lossis koj tus kwv poob ntsejmuag. Tsis txhob deev tus pojniam uas koj twb tau deev dua los lawm tus ntxhais lossis nws tus ntxhais xeebntxwv; rau qhov lawv yog koj roj ntshav, yog koj ua li ntawd txhaum kevcai. Tsis txhob mus yuav koj tus pojniam tus niamhluas los ua koj tus niamyau, thaum koj tus pojniam tseem ua neej nyob. Tsis txhob deev tus pojniam uas nws tseem tabtom coj khaubncaws, rau qhov nws lub cev tsis huv lawm. Tsis txhob deev lwm tus txivneej tus pojniam; qhov ntawd yuav ua rau koj lub cev tsis huv. Tsis txhob muab nej tej menyuam tua txi tus vajtswv Maulej, rau qhov yuav ua rau nej tus Vajtswv uas yog tus TSWV lub npe raug luag thuam tsis zoo. Tsis pub tej txivneej deev txivneej. Vajtswv ntxub tej kev phem ntawd kawg li. Nej tsis txhob mus deev tej tsiaj, ua rau nej tsis huv lossis tej pojniam tsis txhob muab nws lub cev mus rau tej tsiaj deev, ua li ntawd yog kev txhaum. Nej tsis txhob ua rau nej tsis huv vim tej kev phem no, cov neeg uas ibtxwm nyob hauv lub tebchaws no pheej ua li ntawd, kuv thiaj muab lawv ntiab tawm, kom nej thiaj tau los nyob rau hauv. Lawv ua rau lub tebchaws no tsis huv, yog li ntawd, tus TSWV thiaj rau txim rau lawv, thiab muab lawv ntiab tawm hauv lub tebchaws mus lawm. yog nej tsis ua li ntawd, ces nej yuav raug ntiab tawm hauv lub tebchaws no mus, ib yam li cov neeg uas nyob ua nej ntej raug ntiab tawm lawm. Yog leejtwg ua kev phem kev qias, yuav muab tus ntawd rho tawm ntawm Vajtswv haivneeg mus. Tus TSWV hais tias, “Nej yuav tsum hwm tej lus samhwm uas kuv muab rau nej thiab nej tsis txhob xyaum ua nej lub neej li cov neeg uas xub nyob hauv lub tebchaws no ua, thiab tsis txhob ua rau nej tsis huv vim tej kev txhaum no. Kuv yog tus TSWV uas yog nej tus Vajtswv.” Tus TSWV hais rau Mauxes kom hais rau cov Yixalayees hais tias, “Nej yuav tsum ua neeg dawbhuv, rau qhov kuv yog tus TSWV uas yog nej tus Vajtswv, kuv yog tus dawbhuv. Nej txhua tus yuav tsum hwm nej niam nej txiv, thiab ceev hnub Xanpataus ua hnub tseemceeb, raws li kuv twb samhwm rau nej lawm. Kuv yog tus TSWV uas yog nej tus Vajtswv. “Tsis txhob tso kuv tseg thiab mus pe mlom; tsis txhob muab tooj muab hlau nchuav ua mlom rau nej pe. Kuv yog tus TSWV uas yog nej tus Vajtswv. “Thaum nej tua tsiaj fij ua kev sib raug zoo rau tus TSWV, nej yuav tsum hwm tej kevcai uas kuv muab rau nej lawm, kuv thiaj txaus siab rau nej tej khoom fij ntawd. Cov nqaij nej yuav tsum muab noj kom tas rau hnub uas nej tua tus tsiaj ntawd lossis hnub tom qab. Hnub peb tej nqaij uas seem yuav tsum muab hlawv povtseg, rau qhov tej nqaij ntawd tsis huv lawm. Yog leejtwg noj mas kuv yuav tsis txaus siab rau tus ntawd tej khoom fij. Txhua tus uas noj cov khoom fij ntawd yuav raug txim, rau qhov nws ua tsis huv rau tej khoom dawbhuv uas fij rau kuv ntawd, thiab yuav muab nws rho tawm ntawm kuv haivneeg mus. “Thaum nej hlais nej tej nplej hauv nej tej teb, nej tsis txhob hlais cov nplej uas nyob tom ntug teb kom tas, thiab tsis txhob rov qab mus hlais tej hnab nplej uas seem. Tsis txhob rov qab mus sau tej txiv hmab uas nej sau tsis tas hauv nej tej vaj txiv hmab lossis mus khaws tej txiv hmab uas poob rau hauv av; tseg tej txiv ntawd rau cov neeg txomnyem thiab cov neeg txawv tebchaws. Kuv yog tus TSWV uas yog nej tus Vajtswv. “Nej tsis txhob ua tubsab, tsis txhob ua tsis ncaj rau lwm tus thiab tsis txhob dag. Tsis txhob tuav kuv lub npe coglus tsis tseeb, yog nej ua li ntawd, yog nej saib tsis taus nej tus Vajtswv lub npe. Kuv yog tus TSWV. “Nej tsis txhob tsimtxom nej tej kwvtij zejzog lossis nyiag nws tug. Tsis txhob sej tej tub zog uas nej ntiav tej nqi zog cia mus txog tagkis sawv ntxov. Tsis txhob foom tus neeg lag ntseg lossis muab tej yam dabtsi mus cuab tus neeg digmuag kev kom nws dawm ntog. Nej yuav tsum paub ntshai nej tus Vajtswv. Kuv yog tus TSWV. “Tsis txhob tu plaub ntug tsis ncaj, thiab tsis txhob saib tsis taus cov pluag lossis tsa cov npluanuj cai. Tiamsis nej yuav tsum txiav txim raws li kev ncaj ncees rau nej cov kwvtij zejzog. Tsis txhob mus taug xaiv rau ib leeg tus twg, thiab thaum muaj leejtwg raug luag iab liam uas yog lub txim tuag, nej yuav tsum tau pab hais raws li qhov tseeb kom daws tau nws dim. Kuv yog tus TSWV. “Tsis txhob ntxub ib leeg tus twg rau nruab siab, tiamsis yuav tsum mus nrog nws sib hais kom haum, nej thiaj yuav tsis ua txhaum vim qhov uas nej ntxub nws. Tsis txhob ua phem pauj rau ib leeg tus twg lossis pheej ntxub nws, tiamsis yuav tsum hlub koj tej kwvtij zejzog ib yam li koj hlub koj lub cev. Kuv yog tus TSWV. “Nej yuav tsum ua raws li kuv tej lus samhwm. Tsis txhob muab ib yam tsiaj los tso taw rau ib yam tsiaj kom txuam tsoov. Tsis txhob muab ob yam noob qoob mus tseb rau hauv ib thaj teb. Tsis txhob hnav tej ris tsho uas muab ob yam ntaub los xaws ua ke. “Yog ib tug ntxhais qhev twg lees mus ua ib tug txivneej twg tus niamyau lawm, tiamsis tus txivneej ntawd tseem tsis tau them nqi thiab coj nws mus, yog muaj lwm tus txivneej tuaj deev nws, mas nkawd yuav tsum raug txim, tiamsis tsis txhob muab tua, rau qhov nws tseem yog ib tug ntxhais qhev. Tus txivneej ntawd yuav tsum coj ib tug laug yaj mus rau ntawm tus TSWV lub Tsevntaub sib ntsib lub qhovrooj, muab tua fij rau tus TSWV daws tus ntawd txojkev txhaum, thiab tus povthawj muab tus laug yaj fij daws tus txivneej ntawd txojkev txhaum, Vajtswv thiaj yuav zam nws lub txim. “Thaum nej mus txog rau hauv lub tebchaws Kana-as thiab cog txhua yam txiv ntoo, nej yuav tsum suav ntsoov thawj peb lub xyoos cov txiv ntoo ntawd tseem tsis tau huv. Thaum lub sijhawm ntawd nej tsis txhob de cov txiv ntoo ntawd los noj. Xyoo plaub txhua yam txiv hmab txiv ntoo yuav tsum tau muab fij rau kuv uas yog tus TSWV. Tiamsis xyoo tsib nej mam li de cov txiv ntoo ntawd los noj. Yog nej ua txhua yam no, nej tej txiv ntoo yuav txi txiv ncw. Kuv yog tus TSWV uas yog nej tus Vajtswv. “Nej tsis txhob noj tej nqaij uas txham ntshav. Nej tsis txhob xyaum ua txhua yam yeessiv lossis ua neeb ua yaig. Nej tsis txhob txiav nej cov plaubhau ntawm ob sab ntsos lossis chais nej cov hwjtxwv. Nej tsis txhob muab koob nkaug ua tej tus duab rau ntawm nej lub cev, thiab tsis txhob muab nej tej nqaij hlais kom to mus quaj nyiav tej neeg tuag. Kuv yog tus TSWV. “Tsis txhob ua rau nej tej ntxhais txajmuag uas yog tso lawv mus ua niamntiav hauv lub tuamtsev niamntiav, yog nej ua li ntawd, nej yuav mus pe lwm tus vajtswv thiab lub tebchaws yuav puv nkaus kev nkauj kev nraug. Nco ntsoov hnub Xanpataus yog hnub so, thiab hwm lub chaw uas nej mus pehawm kuv. Kuv yog tus TSWV. “Nej tsis txhob mus cuag txivneeb lossis saib yaig hlo li. Yog nej mus ua li ntawd, nej yuav ua neeg tsis huv. Kuv yog tus TSWV uas yog nej tus Vajtswv. “Nej yuav tsum hwm thiab ua ncaj rau cov neeg laus. Nej yuav tsum paub ntshai kuv; kuv yog tus TSWV. “Tsis txhob saib tsis taus cov neeg txawv tebchaws uas nrog nej nyob hauv nej lub tebchaws. Ua zoo rau lawv ib yam li nej ua zoo rau nej cov Yixalayees, thiab hlub lawv ib yam li nej hlub nej lub cev. Nco ntsoov hais tias thaum ub nej tau thojnam ib zaug mus nyob rau nram tebchaws Iziv lawm. Kuv yog tus TSWV uas yog nej tus Vajtswv. “Tsis txhob ua neeg tsis ncaj uas muab rab teev ntxo luj rau luag, tsis txhob txav txoj hlua ntsuas noj luag thiab tsis txhob muab lub kawm tsis txwm luj rau luag. Siv rab teev uas tsis ntxo, lub thauj uas haum txiaj thiab lub kawm uas txwm siab. Kuv yog tus TSWV uas yog nej tus Vajtswv, kuv coj nej tawm nram tebchaws Iziv los. Nej yuav tsum hwm kuv tej kevcai thiab tej lus samhwm. Kuv yog tus TSWV.” Tus TSWV hais rau Mauxes kom cia li hais rau cov Yixalayees hais tias, “Nej cov Yixalayees txhua tus lossis cov neeg txawv tebchaws uas nrog nej nyob ua ke, yog leejtwg muab nws cov menyuam rau luag tua txi tus vajtswv Maulej, ces kom tej neeg zejzog muab pobzeb ntaus tus ntawd kom tuag mus. Yog leejtwg muab nws ib tug menyuam txi tus vajtswv Maulej, ua rau kuv lub Tsevntaub uas dawbhuv tsis huv, thiab ua rau kuv lub npe dawbhuv raug thuam, kuv yuav tawmtsam nws thiab muab nws rho tawm ntawm kuv haivneeg mus. Tiamsis yog cov pejxeem tsis quavntsej tus uas muab nws tus menyuam txi tus vajtswv Maulej thiab tsis muab tus ntawd tua kom tuag, kuv yuav tawmtsam tus ntawd thiab nws tsevneeg thiab cov neeg uas tso kuv tseg mus pe tus vajtswv Maulej. Kuv yuav muab lawv rho tawm ntawm kuv haivneeg mus. “Yog leejtwg mus thov tej txivneeb ua neeb saib nws, kuv yuav tawmtsam tus ntawd thiab yuav muab nws rho tawm ntawm kuv haivneeg mus. Nej yuav tsum ua neeg ncaj ncees thiab dawbhuv, rau qhov kuv yog tus TSWV uas yog nej tus Vajtswv. Nej cia li coj raws li kuv tej kevcai, rau qhov kuv yog tus TSWV thiab yog tus ua kom nej dawbhuv. “Yog leejtwg foom tsis zoo rau nws txiv lossis nws niam yuav tsum muab tus ntawd tua kom tuag; vim nws tau foom nws txiv lossis nws niam, lub txim tuag thiaj poob rau saum nws. “Yog tus txivneej twg mus deev tej neeg zejzog pojniam, cia li muab ob tug uas sib dee ntawd tua povtseg. Yog tus txivneej twg deev nws txiv tus pojniam ua rau nws txiv poob ntsejmuag, cia li muab nkawd tua povtseg. Vim nkawd tau ua txhaum, lub txim tuag thiaj poob rau saum nkawd. Yog tus txivneej twg deev nws tus nyab, cia li muab nkawd tua povtseg. Vim nkawd tau ua txhaum, lub txim tuag thiaj poob rau saum nkawd. Yog ob tug txivneej twg sib dee, nkawd ua li ntawd yog nkawd ua kev phem kev qias; yuav tsum muab nkawd tua povtseg. Vim nkawd tau ua txhaum, lub txim tuag thiaj poob rau saum nkawd. Yog leejtwg yuav leej niam thiab tus ntxhais los ua pojniam huv tibsi. Qhov uas ua li ntawd, yog ua kev phem kev qias, yuav tsum muab hluavtaws hlawv lawv kom tuag; thiaj yuav tsis muaj txojkev phem kev qias no nyob hauv nej lub tebchaws ntxiv lawm. Yog tus txivneej twg deev tej tsiaj txhu, yuav tsum muab nws thiab tus tsiaj ntawd tua povtseg. Yog tus pojniam twg deev tsiaj, yuav tsum muab nws thiab tus tsiaj ntawd tua povtseg; vim nkawd tau ua txhaum, lub txim tuag thiaj poob rau saum nkawd. “Yog leejtwg yuav nws tus muam uas koom niam koom txiv lossis txiv tshiab lossis niam tshiab tus ntxhais ua pojniam, nkawd yuav raug kev txajmuag tabmeeg tebchaws; cia li muab nkawd ntiab tawm ntawm sawvdaws mus. Rau qhov nws yuav nws tus muam, nws thiaj yuav tsum tau ris lub txim ntawd. Yog tus txivneej twg nrog ib tug pojniam pw thaum tus pojniam ntawd tabtom coj khaubncaws, cia li muab nkawd ntiab tawm ntawm sawvdaws mus, rau qhov nkawd ua txhaum tej kevcai uas hais txog kev ua tsis huv lawm. “Yog tus txivneej twg deev nws txiv cov muam lossis nws niam cov vivncaus, nkawd yuav tsum ris lub txim uas ua txhaum ntawd, rau qhov yog tej txheeb ze sib dee. Yog tus txivneej twg mus deev nws tus txiv hlob lossis nws tus txiv ntxawm tus pojniam, vim nws ua rau nws tus txiv hlob lossis tus txiv ntxawm poob ntsejmuag, nkawd yuav tsum raug txim; thiab nkawd yuav tsis muaj menyuam mus txog hnub tuag. Yog tus txivneej twg txeeb nws tus tijlaug lossis nws tus kwv tus pojniam yuav, nkawd yuav tsis muaj menyuam mus txog hnub tuag. Vim nws ua tej yam tsis huv thiab rhuav nws tus tijlaug lossis nws tus kwv ntsejmuag.” Tus TSWV hais tias, “Nej yuav tsum coj raws li kuv tej kevcai thiab kuv tej lus samhwm, nej thiaj yuav tsis raug ntiab tawm hauv lub tebchaws Kana-as uas kuv muab rau nej lawm. Nej tsis txhob mus coj cov neeg uas ibtxwm nyob hauv lub tebchaws ntawd tej kevcai; kuv muab cov neeg ntawd ntiab tawm mus, nej thiaj tau mus nyob hauv lub tebchaws ntawd. Lawv pheej ua tej kev phem kev qias kuv thiaj ntxub lawv heev. Tiamsis kuv tau coglus muab lub tebchaws av rog thiab zoo qoob rau nej ua nej tug, thiab rau nej nyob mus li. Kuv yog tus TSWV uas yog nej tus Vajtswv, kuv yog tus uas muab nej cais tawm ntawm lwm haivneeg mus nyob rau ib cag. Yog li ntawd, nej yuav tsum saib tej tsiaj thiab tej noog kom tseeb, saib yam twg huv thiab yam twg tsis huv. Tsis txhob noj tej tsiaj lossis tej noog uas tsis huv. Kuv twb qhia tej tsiaj tsis huv rau nej lawm, yog nej noj tej tsiaj ntawd yuav ua rau nej tsis huv. Nej yog kuv haivneeg thiab yog kuv tug, nej yuav tsum ua neeg dawbhuv, rau qhov kuv yog tus TSWV thiab kuv yog tus dawbhuv. Kuv tau xaiv nej tawm ntawm lwm haivneeg los ua kuv tug. “Tus txivneej lossis tus pojniam twg ua neeb thiab ua khawvkoob, yuav tsum muab pobzeb ntaus nws kom tuag; tus uas ua tej no lub txim tuag yuav poob rau saum nws.” Tus TSWV samhwm rau Mauxes kom hais rau Aloos cov tub uas yog cov povthawj hais tias, “Tsis pub cov povthawj ib tug twg lub cev tsis huv uas yog mus quaj nyiav tej kwvtij neejtsa uas tuag lawm, tsuas pub nws quaj nyiav tus uas yog nws tsevneeg, nws niam, nws txiv, nws tus tub, nws tus ntxhais, nws tus tijlaug, nws tus kwv, lossis nws tus muam uas tsis tau yuav txiv uas tseem nrog nws nyob ua ib tse xwb. Nws tsis txhob ua rau nws tsis huv uas yog mus saib tej neeg txheeb ze tuag. “Tsis pub cov povthawj chais plaubhau lossis chais hwjtxwv lossis hlais lawv tej nqaij qhia rau sawvdaws paub hais tias, lawv raug kev txomnyem quaj ntsuag. Lawv yuav tsum ua neeg dawbhuv rau lawv tus Vajtswv, thiab tsis txhob ua rau lawv tus Vajtswv lub npe raug thuam; vim lawv yog cov uas muab tej khoom hlawv fij rau tus TSWV, thiab muab tej ncuav fij rau lawv tus Vajtswv; lawv yuav tsum ua neeg dawbhuv. Lawv tsis txhob mus yuav tus niamntiav lossis tus pojniam uas nws tsis huv lawm lossis lawv tsis txhob mus yuav tus pojnrauj los ua pojniam; rau qhov tus povthawj yog tus dawbhuv rau nws tus Vajtswv. Sawvdaws yuav tsum suav tus povthawj ua tus dawbhuv, rau qhov nws yog tus uas muab tej khoom fij rau nej tus Vajtswv. Kuv yog tus TSWV; kuv yog tus dawbhuv thiab ua kom nej dawbhuv. Yog tus povthawj twg tus ntxhais mus ua niamntiav, nws yog tus uas rhuav nws txiv ntsejmuag; yuav tsum muab nws hlawv kom tuag. “Tus Povthawj Hlob, yog tus uas luag muab cov roj txhawb meejthawj hliv rau saum nws taubhau thiab tsa nws ua tus Povthawj Hlob uas hnav tus povthawj cev ris tsho lawm, yog li ntawd nws yuav tsum ntsis nws cov plaubhau lossis tsis txhob dua nws cev ris tsho qhia kom luag paub hais tias, nws muaj kev quaj ntsuag. Nws yuav tsum yuav ib tug ntxhais nkaujxwb los ua pojniam xwb, tsis txhob yuav pojntsuam, pojnrauj lossis tus hluas nkauj uas mus ua dua niamntiav lawm. Nws yuav tsum yuav nws cajces ib tug ntxhais uas tseem yog nkaujxwb los ua nws tus pojniam. Yog tsis ua li no, nyob tsam nws cov menyuam uas yog cov dawbhuv, yuav ua neeg tsis huv lawm. Kuv yog tus TSWV thiab kuv tsa nws ua tus Povthawj Hlob.” Tus TSWV hais rau Mauxes kom hais rau Aloos hais tias, “Tsis txhob pub koj tej xeebntxwv uas muaj mob tsis huv coj tej khoom tuaj fij rau kuv hlo li. Qhov no nej yuav tsum coj mus ibtxhis li. Tsis pub tus neeg uas muaj mob li nram no coj khoom mus fij: tsis pub tus neeg uas digmuag, lov ceg, ntsejmuag caws pliav lossis tus uas tes taw tsis ntev ib yam; tsis pub tus neeg qhuav npab lossis qhuav ceg; tsis pub tus neeg khoov duav lossis tus neeg cobpob; tsis pub tus neeg uas mob qhovmuag liab lossis mob lig; thiab tus txivneej uas muab sam lawm. Aloos cov xeebntxwv uas ua povthawj, yog leejtwg muaj mob tsis huv, nws tsis txhob coj khoom tuaj hlawv fij rau kuv. Rau qhov tus txivneej ntawd yuav noj tej zaub mov uas muab fij rau kuv, tsis hais cov khoom fij uas dawbhuv thiab cov khoom fij uas dawbhuv kawg nkaus, tiamsis vim qhov uas nws muaj mob tsis huv, nws tsis txhob mus ze rau ntawm daim ntaub thaiv chav dawbhuv thiab lub thaj. Nws tsis txhob mus ua rau tej khoom dawbhuv tsis huv, vim kuv yog tus TSWV uas ua rau tej khoom ntawd dawbhuv.” Mauxes yeej muab tej no qhia rau Aloos, Aloos cov tub thiab tagnrho cov Yixalayees huv tibsi lawm. Tus TSWV hais rau Mauxes kom hais rau Aloos thiab Aloos cov tub hais tias, “Nej yuav tsum ceev tej khoom fij dawbhuv uas cov Yixalayees coj tuaj fij rau kuv kom zoo, nej txhiaj tsis ua rau kuv lub npe uas dawbhuv raug txob thuam. Kuv yog tus TSWV. Yog nej cov xeebntxwv leejtwg lub cev tsis huv, nws cia li mus ze rau ntawm tej khoom fij dawbhuv uas cov Yixalayees coj tuaj fij rau kuv, nws yuav tsis tau ua kuv tes haujlwm fij khoom ntawm lub thaj mus li lawm. Qhov no nej yuav tsum coj mus ibtxhis li. Kuv yog tus TSWV. “Aloos cov xeebntxwv yog leejtwg mob ruas lossis mob ua kua paug, tsis txhob pub nws noj tej khoom fij dawbhuv mus txog thaum nws lub cev zoo huv lawm. Tus povthawj uas tsis huv mas yog tus uas mus kov tus neeg tuag lub cev lossis nws muaj mob ua kua paug rau nws qhov chaw xis lossis nws mus kov tej tsiaj tsis huv lossis tej neeg tsis huv. Tus povthawj twg uas nws lub cev tsis huv lawm, nws yuav tsis huv mus txog thaum tsaus ntuj, thiab nws tsis txhob noj tej khoom fij uas dawbhuv mus txog thaum nws da dej tas tso. Tom qab hnub poob qho lawm nws thiaj li huv, ces nws mam li noj tau tej khoom fij dawbhuv uas yog nws cov zaub mov. Nws tsis txhob noj tej tsiaj uas nws tuag nws lossis yog tej tsiaj qus tom tuag; cov nqaij ntawd yuav ua rau nws tsis huv. Kuv yog tus TSWV. “Txhua tus povthawj yuav tsum hwm tej kevcai uas kuv tau muab rau lawv lawm. Yog lawv tsis hwm, lawv yuav raug txim thiab yuav tuag, rau qhov lawv tsis hwm kuv tej kevcai uas tseemceeb. Kuv yog tus TSWV thiab yog tus ua kom lawv dawbhuv. “Tsuas yog tus povthawj tsevneeg nkaus xwb, thiaj noj tau tej khoom fij uas dawbhuv; tsis pub tej neeg sab nraud noj tej khoom fij ntawd li, txawm yog tus neeg uas nrog tus povthawj nyob lossis tus tub zog uas nws ntiav ua haujlwm los yeej noj tsis tau li. Tiamsis tus povthawj tus tubqhe uas nws muab nyiaj muas los lossis tus uas yug hauv nws tsev, noj tau tej khoom fij uas yog tus povthawj ntawd tug. Tus povthawj tus ntxhais uas mus yuav txiv lawm, yog nws tus txiv tsis yog ib tug povthawj, nws yuav tsum tsis txhob noj tej khoom fij uas dawbhuv ntawd. Tiamsis tus pojntsuam lossis tus pojnrauj uas tseem tsis tau muaj menyuam uas rov los nrog nws txiv nyob hauv nws txiv tsev noj tau tej khoom uas yog tus povthawj tug. “Yog leejtwg tsis yog tus povthawj tsevneeg, thiab yog nws tsis paub thiab mus muab tau tej khoom fij dawbhuv noj lawm, nws yuav tsum them cov khoom ntawd puv ntoob rov qab thiab ntxiv nees nkaum feem pua rau tus povthawj. Cov povthawj yuav tsum ceev tej khoom dawbhuv uas cov Yixalayees coj tuaj fij rau tus TSWV ntawd kom zoo tsis txhob ua rau tej khoom ntawd tsis huv uas yog cia tus neeg tsis muaj cai noj, noj tej khoom fij ntawd; qhov no yuav ua rau tus neeg ntawd ua txhaum thiab raug txim. Kuv yog tus TSWV thiab yog tus ua rau tej khoom fij ntawd dawbhuv.” Tus TSWV hais rau Mauxes kom muab tej kevcai no qhia rau Aloos, Aloos cov tub thiab tagnrho rau cov Yixalayees. Thaum cov Yixalayees lossis cov neeg txawv tebchaws uas nrog nej nyob, coj khoom tuaj hlawv fij, tsis hais fij ua tsaug rau tej lus cog tseg lossis coj tuaj fij ntawm lub siab dawb paug, tus tsiaj ntawd yuav tsum muab tus uas tsis muaj ib qho phem hlo li xwb. Tus tsiaj ntawd tsis hais nyuj, tshis lossis yaj yuav tsum yog tus txiv thiab tsis muaj ib qho phem hlo li, thiaj haum tus TSWV siab. Yog nej muab tej tsiaj phem tuaj fij, tus TSWV yuav tsis yuav tus tsiaj ntawd. Thaum nej leejtwg muab khoom tuaj fij ua kev sib raug zoo rau tus TSWV lossis fij ua tsaug rau tej lus cog tseg lossis coj tuaj fij ntawm lub siab dawb paug, yuav tsum yog tus tsiaj uas tsis muaj ib qho phem li thiaj haum tus TSWV siab. Tsis txhob muab tej tsiaj digmuag, lov ceg, tu ceg, mob rwj, mob txhab qawj lossis muaj caws pliav, coj mus tua ua khoom fij lossis muab hlawv rau saum lub thaj fij rau tus TSWV hlo li. Tej tsiaj uas nej coj mus tua fij ntawm lub siab dawb paug, txawm yog to mentsis lossis tsis zoo pestsawg los tau, tiamsis tsis txhob muab mus fij ua tsaug rau tej kev coglus. Tsis txhob muab tus tsiaj uas noobqes mob, tawg, to lossis muab sam lawm, coj mus fij rau tus TSWV. Tsis pub nej ua li no nyob hauv nej lub tebchaws. Tsis txhob muab tej tsiaj uas nej muas ntawm lwm haivneeg los mus tua ua khoom fij rau tus TSWV. Tej tsiaj ntawd yog tsiaj tsis zoo thiab tsis huv, kuv tsis yuav tej tsiaj ntawd ua khoom fij. Tsis txhob muab tus maum nyuj thiab tus menyuam lossis tus maum yaj thiab tus menyuam lossis tus maum tshis thiab tus menyuam, ua ib hnub tua ua khoom fij. Thaum nej muab khoom mus fij ua tus TSWV tsaug, nej yuav ua kom raws li kevcai thiaj haum tus TSWV siab; cia li noj tej khoom fij kom tas rau hnub ntawd thiab tsis pub kom seem ib daig nqaij mus txog hnub tom qab li.” Tus TSWV hais tias, “Nej yuav tsum ua raws li kuv tej lus samhwm; kuv yog tus TSWV. Nej tsis txhob ua rau kuv lub npe uas dawbhuv raug txob thuam; tagnrho cov Yixalayees yuav tsum paub hais tias, kuv yog tus dawbhuv thiab yog tus uas ua kom nej dawbhuv; kuv yog tus uas coj nej tawm nram tebchaws Iziv los kom kuv tau ua nej tus Vajtswv. Kuv yog tus TSWV.” Tus TSWV hais rau Mauxes kom hais rau cov Yixalayees paub hais tias, tej rooj noj rooj haus uas tus TSWV teem tseg, yog tus TSWV tej rooj noj rooj haus uas dawbhuv. Nej ua haujlwm rau hnub, tiamsis hnub xya yog hnub Xanpataus uas yog hnub so. Hnub ntawd nej tsis txhob ua ib yam haujlwm dabtsi li, tiamsis nej yuav tsum tuaj sib sau pehawm tus TSWV. Tsis hais nej nyob qhov twg, hnub Xanpataus yog tus TSWV hnub. Ntawm no yog tej rooj noj rooj haus dawbhuv uas tus TSWV teem tseg, nej yuav tsum ua tej rooj noj rooj haus ntawd, thaum txog lub sijhawm uas teem tseg. Nej ua Kevcai Hla Dhau qhuas tus TSWV, yog pib ua rau lub ib hlis ntuj, hnub kaum plaub, thaum hnub poob qho yuav tsaus ntuj. Hnub kaum tsib yog hnub uas pib ua Kevcai noj Ncuav tsis xyaw Keeb, thiab xya hnub ntawd nej yuav tsum tsis txhob noj tej ncuav uas xyaw keeb hlo li. Thawj hnub nej tuaj sib sau pehawm Vajtswv thiab hnub ntawd tsis txhob ua nej tej haujlwm ib yam dabtsi li. Coj nej tej khoom mus hlawv fij rau tus TSWV kom txwm xya hnub ntawd. Hnub xya nej rov tuaj sib sau pehawm Vajtswv, hnub ntawd tsis txhob ua nej tej haujlwm. Nws yuav muab tes nplej ntawd yom fij rau tus TSWV, tus TSWV thiaj li txaus siab rau nej. Hnub tom qab uas dhau hnub Xanpataus lawm tus povthawj mam li coj mus fij rau tus TSWV. Hnub uas nej fij nej tej qoobloo, hnub ntawd nej yuav tsum coj ib tug thav yaj hnubnyoog ib xyoos uas tsis muaj ib qho phem li mus tua hlawv fij rau tus TSWV. Thiab muab plaub choj hmoov nplej zuaj xyaw roj txiv ntoo coj mus hlawv fij. Tej pa khoom fij ntawd yuav tsw qab ntxiag ua rau tus TSWV txaus siab; nej yuav tsum muab ib lamhwj cawv txiv hmab coj mus fij thiab. Nej tsis txhob rawm noj tej qoob tshiab uas nej muab tau los, tsis hais noj nyoos, muab kib noj lossis muab cub ua ncuav noj, mus txog hnub uas nej coj thawj teg nplej mus fij rau Vajtswv lawm tso, tsis hais nej nyob qhov twg. Qhov no yog ib txoj kevcai rau nej tej xeebntxwv coj mus ibtxhis li. Suav kom txwm nkaus xya lub limtiam, pib hnub tom qab uas nej coj nej thawj teg nplej tuaj fij rau tus TSWV. Suav kom txwm tsib caug hnub tom qab lub Xanpataus xya, nej cia li rov coj nej tej qoob tshiab tuaj fij rau tus TSWV. Ib yig twg yuav tsum nqa ob lub ncuav mus yom fij rau tus TSWV. Ib lub ncuav twg yuav tsum yog muab plaub choj hmoov nplej zuaj cub xyaw keeb thiab coj mus fij rau tus TSWV thaum nej pib sau thawj phaum qoob. Cov pejxeem sawvdaws yuav tsum coj xya tus thav yaj uas hnubnyoog ib xyoo, ib tug heev nyuj thiab ob tug laug tshis uas tsis muaj ib qho phem li mus fij nrog cov ncuav ntawd. Lawv yuav tsum muab cov tsiaj ntawd hlawv fij rau tus TSWV nrog cov ncuav thiab cov cawv txiv hmab ua ke. Tej pa khoom fij ntawd yuav tsw qab ntxiag ua rau tus TSWV txaus siab. Thiab muab ib tug laug tshis coj mus fij daws txim thiab ob tug thav yaj uas hnubnyoog ib xyoos mus fij ua kev sib raug zoo. Tus povthawj yuav tsum muab cov ncuav nrog ob tug thav yaj yom fij ua ke rau tus TSWV, cov khoom no yog muab ua cov povthawj tug. Cov khoom fij no yog ib co uas dawbhuv. Hnub ntawd nej tsis txhob tawm mus ua ib yam haujlwm li, tiamsis nej yuav tsum tuaj sib sau pehawm Vajtswv. Nej tej xeebntxwv yuav tsum coj txoj kevcai no mus ibtxhis li, tsis hais nej nyob qhov twg li. Thaum nej hlais nej tej nplej, nej tsis txhob hlais tej hnab nplej uas nyob ntawm tej ces kaum teb, thiab tsis txhob rov mus hlais tej hnab nplej uas seem; cia tej ntawd rau cov neeg txomnyem thiab cov neeg txawv tebchaws. Tus TSWV yog nej tus Vajtswv. Coj tej khoom tuaj hlawv fij rau tus TSWV thiab tsis txhob ua nej tej haujlwm hlo li. Hnub ntawd tsis txhob ua nej tej haujlwm, rau qhov yog hnub uas ua kevcai theej nej lub txhoj. Hnub ntawd yog leejtwg noj ib yam dabtsi, yuav muab tus ntawd rho tawm ntawm Vajtswv haivneeg mus. Thiab yog hnub ntawd leejtwg tseem ua nws tej haujlwm, tus TSWV yuav muab tus ntawd tua povtseg. Txawm yog nej nyob qhov twg los nej thiab nej cov xeebntxwv yuav tsum coj txoj kevcai no mus ibtxhis li. Lub hlis ntawd hnub xiab cuag thaum hnub poob qho mus txog hnub xiab kaug thaum hnub poob qho, nej muab ua hnub so, hnub ntawd nej txhob noj ib yam dabtsi hlo li. Thawj hnub nej cia li tuaj sib sau pehawm Vajtswv thiab tsis txhob ua nej tej haujlwm hlo li. Nej yuav tsum niaj hnub nqa khoom tuaj fij rau tus TSWV kom txwm xya hnub ntawd. Hnub yim nej rov tuaj sib sau pehawm Vajtswv thiab coj tej khoom tuaj fij rau tus TSWV. Hnub ntawd yog hnub pehawm Vajtswv nkaus xwb, nej tsis txhob ua haujlwm hlo li. ( Tej no yog sib sau tuaj ua kevcai pehawm qhuas tus TSWV thiab muab tej khoom tuaj fij, hlawv tej khoom fij, fij tej qoobloo, fij tej khoom theej txhoj thiab fij tej cawv txiv hmab raws li nyias xav coj tuaj fij ib hnub dhau ib hnub. Tej kevcai no yog ua ntxiv rau hnub Xanpataus uas ibtxwm ua los lawm, thiab tej khoom fij no yog ntxiv rau nej tej khoom uas nej ibtxwm coj tuaj fij, yog tej uas nej fij ua tsaug rau tej lus cog tseg, thiab tej khoom fij uas nej fij pub rau tus TSWV ntawm lub siab dawb paug.) Thaum nej sau nej tej qoobloo tom teb los rau hauv tsev tas lawm, nej yuav tsum ua kevcai kom txwm nkaus xya hnub, pib hnub kaum tsib lub xya hli ntuj. Hnub ib thiab hnub yim yog ob hnub uas nej so. Hnub ib, nej xaiv nej tej txiv ntoo uas zoo tshaj plaws, tej nplooj toovlaj thiab tej ceg ntoo uas muaj nplooj coj tuaj ua kevcai qhuas tus TSWV uas yog nej tus Vajtswv. Txhua lub xyoo thaum lub xya hli ntuj, nej ua kevcai rau tus TSWV xya hnub. Muab txoj kevcai no qhia rau nej cov xeebntxwv coj mus ibtxhis li. Cov Yixalayees txhua tus yuav tsum nyob tsev pheebsuab xya hnub, kom nej cov xeebntxwv thiaj yuav paub hais tias, tus TSWV yog tus uas cia cov Yixalayees nyob hauv tej tsev pheebsuab ntawd thaum nws coj lawv tawm nram tebchaws Iziv los. Kuv yog tus TSWV uas yog nej tus Vajtswv. Yog li ntawd, Mauxes thiaj muab tej kevcai uas tus TSWV teem tseg no, qhia rau cov Yixalayees sawvdaws paub. Tus TSWV hais rau Mauxes kom hais rau cov Yixalayees cia li nqa tej tseem roj txiv ntoo uas zoo tshaj plaws tuaj sam rau cov teeb hauv lub Tsevntaub, tej nplaim teeb thiaj yuav cig pom kev lam lug mus li. Txhua hmo Aloos yuav tsum mus taws cov teeb uas nyob sab nraum daim ntaub uas thaiv lub Phijxab hauv Chav Dawbhuv kawg nkaus hauv tus TSWV lub Tsevntaub sib ntsib, kom cov teeb cig lam lug ib hmos kaj ntug. Nej yuav tsum coj txoj kevcai no mus ibtxhis li. Aloos yuav tsum tu ntshis cov teeb saum tus ncej txawb teeb uas muab kub ua, thiab saib kom cov teeb cig lam lug tabmeeg tus TSWV mus li. Muab nees nkaum choj hmoov nplej coj los ntse puab ua kaum ob lub ncuav coj mus cub. Muab cov ncuav ntawd coj mus tso tabmeeg tus TSWV rau saum lub rooj uas muab kub vuam, thiab muab teeb ua ob leej, ib leejtwg rau lub. Muab tej tseem hmoov tshuaj tsw qab los nphoo rau saum ob leej ncuav ntawd, ib yam li muab ua khoom fij hloov cov ncuav ntawd chaw ua kev nco txog rau tus TSWV. Txhua hnub Xanpataus, yuav tsum coj ncuav mus tso rau saum lub rooj tabmeeg tus TSWV. Cov Yixalayees yuav tsum ua li no mus ibtxhis li. Cov ncuav no yog Aloos thiab nws cov xeebntxwv tug, lawv yuav tsum coj mus noj hauv chav uas dawbhuv, rau qhov yog ib feem dawbhuv heev ntawm cov khoom uas coj mus fij rau tus TSWV uas yog cov povthawj tug. thiab tso neeg zov nws, tos saib tus TSWV yuav qhia kom lawv ua li cas rau nws. Tus TSWV hais rau Mauxes hais tias, “Koj cia li coj tus txivneej no tawm hauv lub yeej no mus rau sab nraum ntug yeej. Kom txhua tus uas hnov tus txivneej ntawd cem, yuav tsum tsa nws txhais tes rau saum tus txivneej ntawd taubhau, ua timkhawv hais tias, nws yeej yog neeg txhaum tiag, ces cov pejxeem cia li muab pobzeb ntaus kom nws tuag. Thiab qhia rau cov Yixalayees txhua tus hais tias, yog leejtwg tsawm foom Vajtswv nws yuav tsum ris lub txim ntawd, thiab muab nws tua kom tuag. Cov Yixalayees txhua tus lossis cov neeg txawv tebchaws uas nyob hauv tebchaws Yixalayees, yog leejtwg tsawm foom tus TSWV, ces cov Yixalayees yuav tsum muab pobzeb ntaus kom tus ntawd tuag mus. “Yog leejtwg tua neeg yuav tsum muab tus ntawd tua povtseg, thiab yog leejtwg tua tej neeg zejzog ib tug tsiaj tuag, nws yuav tsum muab ib tug tsiaj mus them pauj. Txoj cai no lub ntsiab lus tseemceeb yog muab siav pauj siav. “Yog leejtwg ua rau nws tej phoojywg zej zos ib tus twg raug mob, nws ua rau luag li cas yuav tsum muab nws ua kom zoo li ntawd. Yog nws lov luag ib tug txha, yuav tsum muab nws ib tug txha lov pauj; yog nws kaus luag ib lub qhovmuag, yuav tsum muab nws ib lub qhovmuag kaus pauj, yog nws tsoo luag ib tug hniav lov, yuav tsum muab nws ib tug hniav tsoo kom lov pauj. Nws ua rau lwm tus raug mob li cas, yuav tsum ua kom nws raug mob ib yam li ntawd thiab. Leejtwg tua ib tug tsiaj tuag, nws yuav tsum muab ib tug tsiaj mus them tus tsiaj ntawd, tiamsis yog leejtwg tua neeg tuag yuav tsum muab nws tua pauj xwb. Txoj kevcai no muab cob rau nej txhua tus uas yog cov Yixalayees thiab cov neeg txawv tebchaws uas nrog nej nyob, rau qhov kuv yog tus TSWV uas yog nej tus Vajtswv.” Thaum Mauxes hais li no rau cov Yixalayees lawm, lawv thiaj coj tus txivneej uas tsawm foom Vajtswv ntawd mus rau nraum ntug yeej thiab sawvdaws muab pobzeb ntaus nws tuag lawm. Qhov no yog cov Yixalayees ua raws li tus TSWV tau samhwm rau Mauxes lawm. Tus TSWV hais rau Mauxes saum Roob Xinais kom hais rau cov Yixalayees hais tias, thaum nej mus nyob hauv lub tebchaws uas tus TSWV muab pub rau nej lawm, nej yuav tsum hwm tus TSWV, xyoo xya nej tsis txhob cog qoob rau hauv tej liaj tej teb. Nej muab rau lub xyoo los cog qoobloo rau hauv nej tej liaj tej teb, tav nej tej txiv hmab hauv nej tej vaj thiab sau nej tej qoobloo los cia. Tiamsis xyoo xya yog xyoo uas cia tej liaj tej teb ntawd so, rau qhov yog xyoo so rau tus TSWV. Tsis txhob cog qoobloo rau hauv nej tej liaj tej teb thiab tsis txhob tav nej tej txiv hmab hauv nej tej vaj li. Nej tsis txhob mus hlais tej nplej uas nws tuaj nws hauv nej tej liaj tej teb uas tsis muaj neeg tseb thiab tsis txhob mus de tej txiv hmab uas nej tsis tau tav; lub xyoo no yuav tsum cia lub tebchaws so tsis txhob ua ib yam dabtsi li. Txawm yog xyoo ntawd, nej cia tej liaj tej teb so tsis cog qoobloo los nej yuav muaj zaub muaj mov txaus rau nej, nej cov tubqhe thiab ntxhais qhev, nej cov tub zog, cov neeg txawv tebchaws uas nrog nej nyob, thiab tej tsiaj nyeg tsiaj qus uas nyob hauv nej lub tebchaws noj. Txhua yam uas tuaj hauv tej liaj tej teb puavleej noj tau huv tibsi. Nej suav xya xyoo xya zaus, tagnrho yog muaj plaub caug cuaj xyoos. Ces thaum lub xya hli ntuj hnub xiab kaug, yog Hnub Theej Txhoj, tso ib tug txivneej mus tshuab raj tshuab xyu ncig thoob plaws hauv nej lub tebchaws. Nej yuav tsum muab xyoo tsib caug ua xyoo tseemceeb rau nej thiab tshaj tawm muab kev ywjpheej rau cov pejxeem sawvdaws hauv nej lub tebchaws. Xyoo no, tej teb uas nej yuav los, yuav tsum thim rov qab rau tus tswv qub lossis nws tej xeebntxwv, thiab txhua tus uas muab muag mus ua luag qhev lawm los yuav tsum xa rov qab mus rau nws tsevneeg. Xyoo tsib caug ntawd, nej tsis txhob cog qoob rau hauv nej tej teb lossis hlais tej nplej uas nws tuaj nws lossis tsis txhob de tej txiv hmab uas nej tsis tau tav hauv tej vaj txiv hmab. Rau qhov xyoo ntawd, yog xyoo dawbhuv rau nej; nej muab tej qoob uas nws tuaj nws hauv nej tej teb los noj xwb. Txhua yam uas nej yuav los, xyoo ntawd yuav tsum tau muab thim rov rau tus tswv qub. Yog nej muag nej tej teb rau nej cov kwvtij Yixalayees lossis nej yuav nws tej teb, nej tsis txhob ua tsis ncaj rau ib leeg tus twg. Yuav tsum them tus nqi raws li tej xyoo uas sau tau qoob hauv daim teb ntawd ua ntej Xyoo uas Thim rov qab. Yog hais tias ntau xyoo yuav tsum them tus nqi ntau, tiamsis yog tsawg xyoo kuj them tus nqi tsawg, rau qhovmuag raws li tej qoob uas sau tau hauv thaj teb ntawd. Nej ib leeg tsis txhob ua tsis ncaj rau ib leeg, tiamsis nej yuav tsum hwm tus TSWV uas yog nej tus Vajtswv. Nej yuav tsum ua raws li tus TSWV tej kevcai thiab tej lus samhwm, nej thiaj yuav tau zoo nyob kaj siab lug hauv nej lub tebchaws. Nej lub tebchaws yuav ntsu qoobloo heev, nej yuav muaj noj muaj haus nplua mias thiab tau zoo nyob kaj siab lug. Tiamsis nej nug hais tias, yog xyoo xya ntawd peb tsis cog thiab tsis sau qoobloo, peb yuav noj dabtsi thiaj li nyob dhau xyoo? Xyoo rau tus TSWV yuav foom koob hmoov rau lub tebchaws kom ntsu qoob heev txaus noj peb xyoos. Xyoo yim thaum nej cog qoob rau hauv nej tej teb los nej tseem tau tej qoob uas thaum xyoo rau nej sau cia ntawd los noj, thiab nej tseem yuav tau noj mus txog thaum nej hlais nej tej qoob tshiab xyoo yim ntawd. Tsis txhob muab koj daim teb muag tuag rau luag, rau qhov koj tsis yog tus tswv; daim teb ntawd yog Vajtswv tug, koj zoo li tus neeg txawv tebchaws uas nrog kuv nyob xwb. Thaum muab daim teb muag rau lwm tus lawm, tus tswv qub muaj cai txhiv daim teb ntawd rov qab los ua nws tug. Yog cov Yixalayees leejtwg txomnyem thiab raug yuam kom muab nws daim teb muag, nws cov kwvtij txheeb ze yuav tsum mus txhiv daim teb ntawd rov qab. Yog leejtwg tsis muaj kwvtij txheeb ze pab txhiv daim teb rov qab, tom qab uas nws muaj nyiaj txaus nws yuav tsum tau txhiv rov qab. Nws yuav tsum suav txij xyoo uas nws muag daim teb mus txog xyoo thim, saib tau pestsawg xyoo, nws yuav tsum them nyiaj ntxiv rau tus uas yuav nws daim teb. Nws thiaj yuav rov tau daim teb los ua nws tug. Tiamsis yog nws tsis muaj nyiaj txaus txhiv daim teb ntawd rov qab, ces daim teb ntawd tseem nyob rau ntawm tus tswv uas nws muab muag rau mus txog Xyoo uas Thim tej teb. Xyoo ntawd mam thim tau daim teb ntawd rov rau tus tswv qub. Yog leejtwg muag nws lub tsev nyob hauv lub nroog uas muaj ntsa yeej, thawj xyoo uas txwm nkaus ib xyoos rau hnub uas muag, nws muaj cai txhiv tau rov qab. Tiamsis yog nws tsis txhiv rov qab xyoo ntawd, ces nws tsis muaj cai txhiv rov qab lawm, lub tsev ntawd yuav yog tus uas nws muab muag rau lawm tug, thiab nws tej xeebntxwv tug mus li; thaum txog Xyoo Thim yuav tsis thim lub tsev lawm. Tiamsis tej tsev uas nyob hauv tej zos tsis muaj ntsa yeej thaiv yuav ua ib yam li tej teb ntag; tus tswv tsev qub muaj cai txhiv tej tsev ntawd rov qab, thaum txog Xyoo Thim tej teb thiab tej tsev ntawd yuav tsum tau thim huv tibsi rov qab. Txawm yog li cas los xij, cov Levis muaj cai txhiv lawv tej vajtse hauv tej nroog uas twb muab tu rau lawv lawm rov qab lub sijhawm twg los tau. Yog cov Levis leejtwg muab nws lub tsev hauv tej nroog uas tu ua lawv tug lawm muag thiab tseem tsis tau txhiv rov qab, thaum txog Xyoo Thim yuav tsum tau thim lub tsev ntawd rov qab, rau qhov tej tsev ntawd nyob hauv cov Levis tej nroog uas yog lawv tug ntawm haivneeg Yixalayees. Tiamsis tej teb uas nyob ibncig cov Levis tej nroog tsis txhob muab muag; tej ntawd yeej yog cov Levis tug mus ibtxhis li. Yog ib tug kwvtij Yixalayees uas nyob ze nej pluag thiab tsis muaj noj tsis muaj haus, nej yuav tsum pub rau nws kom muaj noj muaj haus ib yam li tus neeg uas nej ntiav ua haujlwm, nws thiaj nrog nej nyob taus. Tsis txhob tsub pajlaum rau nws them, tiamsis nej yuav tsum hwm Vajtswv thiab cia nej cov kwvtij Yixalayees nyob ze nej. Tsis txhob tsub pajlaum rau nws them tej nyiaj uas nej qiv rau nws, thiab tsis txhob muab nej tej qoob muag ua nqi kim kim rau nws. Kuv yog tus TSWV uas yog nej tus Vajtswv uas coj nej nram tebchaws Iziv los, kuv muab lub tebchaws Kana-as no rau nej nyob, thiab kuv yog nej tus Vajtswv. Yog ib tug kwvtij Yixalayees uas nyob ze nej pluag heev thiab nws muab nws muag ua nej qhev, nej tsis txhob muab nws ua haujlwm ib yam li yog tus qhev. Nws nrog nej nyob ib yam li tus neeg uas nej ntiav ua nej tej haujlwm thiab ua haujlwm rau nej mus txog Xyoo uas Thim xwb. Lub sijhawm ntawd nws thiab nws cov menyuam mam li tso nej tseg rov mus nrog nws tsevneeg nyob thiab mus tuav nws tej yawgkoob tej qubtxeeg qubteg. Vim haivneeg Yixalayees yog kuv cov tubtxib, thiab kuv tau coj lawv tawm nram tebchaws Iziv los; yuav tsum tsis txhob muab lawv muag mus ua luag qhev. Nej tsis txhob tswjhwm lawv ntawm txojkev nruj tsiv thiab tsimtxom, tiamsis yuav tsum paub ntshai nej tus Vajtswv. Yog nej xav tau tubqhe thiab ntxhais qhev, nej yuav tsum muab nyiaj mus yuav ntawm tej haivneeg uas nyob puagncig nej xwb. Thiab yuav tej neeg txawv tebchaws uas nrog nej nyob tej menyuam los ua nej qhev. Cov menyuam ntawd yog cov yug hauv nej lub tebchaws, lawv thiaj yog nej neeg, thiab lawv yuav ua nej tej tubki tej neeg los tau, lawv yuav ua haujlwm rau nej mus tas lawv simneej. Tiamsis nej tsis txhob ua li ntawd rau nej cov kwvtij Yixalayees. Tus neeg txawv tebchaws uas nrog nej nyob, nws muaj txiag npluanuj, yog nej cov kwvtij Yixalayees leejtwg pluag, thiab nws muab nws muag rau tus neeg txawv tebchaws lossis tus npluanuj ntawd ib tug kwvtij coj mus ua qhev; tom qab uas nws muab nws muag tas lawm, nws cov kwvtij tseem muaj cai txhiv tau nws rov qab: nws cov tijlaug, cov kwv, cov txiv hlob, cov txiv ntxawm, cov kwvtij lossis lwm tus kwvtij uas txheeb ze yuav tsum txhiv nws lossis yog nws muaj nyiaj txaus nws yuav tsum them nyiaj txhiv nws rov qab. Nws yuav tsum mus nrog tus uas yuav nws ntawd sablaj, thiab nkawd suav txij xyoo uas nws muab nws muag los txog Xyoo Thim thiab yuav tsum kom tus nqi uas txhiv nws ntawd kom npaum li tej nqi uas ntiav ib tug tub zog ntag. ib yam li yog tus tswv ntawd ntiav nws ua haujlwm ib ntus xwb. Nws tus tswv yuav tsum tsis txhob ua limhiam rau nws. Yog nws tsis txhiv nws raws li uas hais los no, txog Xyoo Thim tus tswv yuav tsum tau tso nws thiab nws cov menyuam mus. Tsis pub cov Yixalayees ua luag qhev mus li, rau qhov haivneeg Yixalayees yog kuv cov tubtxib. Kuv yog tus coj lawv tawm nram tebchaws Iziv los; kuv yog tus TSWV uas yog nej tus Vajtswv. Tus TSWV hais tias, “Nej tsis txhob puab mlom lossis puab mojzeej, tsa ncej zeb lossis muab pobzeb txaug ua mlom rau nej pe hauv nej lub tebchaws. Kuv yog tus TSWV uas yog nej tus Vajtswv. Nej yuav tsum ceev kuv cov hnub xanpataus thiab hwm qhov chaw pehawm kuv ua qhov chaw dawbhuv. Kuv yog tus TSWV. “Yog nej ua neej raws li kuv tej kevcai thiab hwm kuv tej lus, kuv yuav tso dej tso nag los rau nej raws caij raws nyoog, kom nej lub tebchaws ntsu qoobloo, thiab tej txiv ntoo los yuav txi txiv ncw heev. Nej tej qoob yuav zoo heev ua rau nej muaj nplej hlais mus txog thaum lub caij de txiv hmab, thiab nej yuav de txiv hmab mus txog thaum lub caij uas nej cog qoob. Nej yuav muaj noj muaj haus nplua mias, thiab nej yuav tau zoo nyob kaj siab lug hauv nej lub tebchaws mus li. “Kuv yuav pub kom nej lub tebchaws muaj kev thajyeeb, thiab nej yuav tau zoo pw tsaug zog tsis muaj leejtwg yuav ua rau nej ntshai. Kuv yuav muab tej tsiaj nyaum hauv lub tebchaws ua kom tu noob tas, thiab yuav tsis muaj kev tsov kev rog nyob hauv lub tebchaws li. Nej yuav kovyeej nej cov yeebncuab. Nej rab ntaj yuav ua rau lawv swb; nej tsib leeg yuav tua yeej luag ib puas leej, thiab nej ib puas leej yuav tua yeej luag kaum txhiab leej. Kuv yuav foom koob hmoov rau nej thiab pub kom nej muaj tubki coob heev; kuv yuav ua raws li kuv tej lus cog tseg uas kuv tau nrog nej sib coglus lawm. Nej yuav sau tau qoobloo ntau nplua mias txaus nej noj thawm xyoo, thiab yuav tau muab tej qoob qub uas seem noj tsis tas yawm mus povtseg thiaj muaj chaw rau tej qoob tshiab. Kuv yuav nrog nej nyob hauv kuv lub Tsevntaub uas dawbhuv, thiab kuv yuav tsis tso nej tseg ib zaug li. Kuv yuav nrog nej nyob; kuv yuav yog nej tus Vajtswv, thiab nej yuav yog kuv haivneeg. Kuv yog tus TSWV uas yog nej tus Vajtswv uas coj nej nram tebchaws Iziv los, kom nej thiaj tsis tau ua luag qhev ntxiv lawm. Kuv twb muab lub hwjchim uas tximtxom nej txo povtseg thiab kuv cia nej tsa taus taubhau mus kev.” Tus TSWV hais tias, “Yog nej tsis mloog kuv tej lus, nej yuav raug txim. Yog nej tsis ua raws li kuv tej kevcai thiab kuv tej lus samhwm, thiab tsis coj raws li kuv tau coglus tseg rau nej, kuv yuav rau txim rau nej. Kuv yuav tso sub tawg sub ntsha los rau nej, tej kab mob uas kho tsis zoo thiab tej kab mob npaws yuav ua rau nej digmuag thiab ua rau nej lub neej suajkaum zuj zus. Nej cog qoobloo, tiamsis yuav tsis tau noj, rau qhov nej tej yeebncuab yuav tua yeej nej thiab lawv tau noj tej qoob uas nej cog. Kuv yuav tawmtsam nej, nej yuav swb, thiab cov neeg uas ntxub nej yuav ua cov tswjhwm nej; nej yuav ntshai heev. Txawm yog tsis muaj leejtwg caum nej los nej yuav khiav tsis saib qab. “Tom qab uas nej raug tej xwmtxheej no tas lawm, yog nej tseem tsis hwm kuv, kuv yuav rau txim rau nej kom hnyav tshaj qhov qub xya npaug ntxiv. Kuv yuav rhuav nej txojkev tawv ncauj thiab khavtheeb kom puastsuaj mus. Kuv yuav tsis tso nag los rau nej lub tebchaws, av yuav qhuav tawv cuag hlau. Nej yuav khwv kawg nej lub zog los tsis muaj qabhau rau nej, rau qhov nej lub tebchaws yuav tsis zoo qoob thiab tej txiv ntoo los yuav tsis txi txiv. “Yog nej tseem tawmtsam kuv thiab tsis mloog kuv lus, kuv yuav tsub kev rau txim rau nej kom hnyav tshaj qhov qub xya npaug ntxiv. Kuv yuav tso tej tsiaj qus uas nyaum heev los tawmtsam nej, tej tsiaj ntawd yuav tom nej tej menyuam, tom nej tej tsiaj txhu kom tu noob, thiab ua kom nej tshuav tsawg heev tsis muaj neeg taug kev li lawm. “Yog tom qab tej kev rau txim no dhau lawm, nej tseem tsis tig los mloog kuv lus, tiamsis tseem pheej rau siab ntso tawmtsam kuv ntxiv, ces kuv yuav tawmtsam nej thiab rau txim rau nej kom hnyav tshaj qhov qub uas tas los lawm xya npaug ntxiv. Kuv yuav tso neeg tuaj ua rog rau nej thiab rau txim rau nej, vim nej rhuav kuv tej lus cog tseg thiab txawm yog nej sib sau mus nyob hauv nej tej nroog kom muaj kev kaj siab los kuv yuav tso tej mob phem los raug nej, thiab yuav muab nej cob rau nej cov yeebncuab tes. Kuv yuav ua kom nej tsis muaj mov noj, kaum leej pojniam yuav koom ib lub qhovtxos cub tej mov uas lawv muaj xwb. Lawv yuav muab cov mov ntawd los luj sib faib, thiab thaum nej noj tas los tsis tsau. “Yog tom qab uas dhau tej kev rau txim no tas lawm, nej tseem tawv thiab tsis mloog kuv lus, ces kuv yuav chim rau nej thiab rau txim rau nej hnyav tshaj qhov qub xya npaug ntxiv. Nej yuav muaj kev tshaib nqhis heev thiab nej yuav noj nej tej tub tej ntxhais uas nej yug. Kuv yuav rhuav tshem nej tej chaw pe dab saum tej ncov roob, muab nej tej thaj hlawv hmoov tshuaj tsw qab tsoo povtseg, thiab muab nej tej cev tuag pov rau saum tej mlom uas yog mlom tuag; kuv yuav ntxub nej heev. Kuv yuav muab nej tej nroog ntxeev kom puas tas, kuv yuav rhuav tshem nej tej chaw pe mlom kom puastsuaj, thiab kuv yuav tsis txais nej tej khoom fij uas tsw qab ntxiag ntawd. Kuv yuav rhuav kom nej lub tebchaws puastsuaj qhuav nkig nkuav ua rau nej cov yeebncuab uas tuaj tswjhwm nej xav tsis thoob li. Kuv yuav tso neeg tuaj ua rog rau nej thiab muab nej raws kom tawg ri sua mus nrog tej neeg txawv tebchaws nyob. Nej lub tebchaws yuav ciaj nroj tsuag, thiab cia nej tej nroog raug puastsuaj tas tsis muaj neeg nyob. “Kuv yuav ua kom nej cov uas raug ntiab tawm mus ntawd ntshai heev nyob hauv nej cov yeebncuab lub tebchaws. Cua ntsawj tej nplooj ntoos nrov xwb los nej yuav khiav tsis saib qab. Nej yuav khiav cuag li thaum luag caum nej hauv tshavrog, txawm yog tsis muaj yeebncuab nyob ze los nej yuav ntog pawglug. Nej ib leeg yuav dawm ib leeg ntog, thaum tsis muaj leejtwg caum ntes nej, thiab nej yuav tsis muaj cuabkav tua nej cov yeebncuab hlo li. Nej yuav tuag tas rau hauv luag teb luag chaw, thiab nej cov yeebncuab lub tebchaws yuav muab nej nqos tas huv tibsi. Nej cov uas seem nyob hauv nej cov yeebncuab lub tebchaws tej roj ntsha yuav sem zuj zus, vim nej tej kev txhaum thiab nej cov yawgkoob tej kev txhaum. “Tiamsis yog nej cov xeebntxwv lees lawv tej kev txhaum thiab lawv cov yawgkoob tej kev txhaum uas lawv tau tawmtsam kuv thiab ntxeev siab rau kuv, thiab ua rau kuv muab lawv ntiab mus nyob rau hauv lawv cov yeebncuab lub tebchaws, yog hais tias lawv txo lawv lub siab uas tsis hwm Vajtswv, thiab nyob lawv lub txim tas lawm; kuv yuav nco txog tej lus uas kuv cog tseg rau Yakhauj, Ixaj thiab Anplahas lawv, thiab kuv yuav rov nco txog lub tebchaws uas kuv muab rau kuv haivneeg lawm. Tiamsis yuav tsum xub muab cov neeg hauv lub tebchaws ntawd ntiab tawm ua ntej, kom lub tebchaws thiaj tau so, thiab lawv yuav tsum raug txim vim qhov uas lawv muab kuv tej kevcai thiab kuv tej lus samhwm tso tseg lawm. Tiamsis txawm li ntawd los xij, thaum lawv tseem nyob hauv lawv cov yeebncuab lub tebchaws kuv yuav tsis tso lawv tseg lossis rhuav kom lawv puastsuaj tu noob. Kuv yuav tsis rhuav lo lus uas kuv cog tseg rau lawv lawm, thiab kuv yog tus TSWV uas yog lawv tus Vajtswv. Kuv yuav rov coglus rau lawv ib yam li kuv tau coglus rau lawv cov yawgkoob uas thaud kuv lub hwjchim tau coj kuv haivneeg tawm nram tebchaws Iziv los tabmeeg txhua haivneeg lawm, kuv yog lawv tus Vajtswv. Kuv yog tus TSWV.” Tagnrho tej no puavleej yog tej kevcai thiab tej lus samhwm uas tus TSWV muab rau Mauxes saum Roob Xinais, kom muab qhia rau cov neeg Yixalayees. Tus TSWV hais rau Mauxes kom hais rau cov Yixalayees hais tias, thaum muaj ib tug twg coglus muab nws fij pub rau tus TSWV, tus neeg ntawd yuav tsum tau them nyiaj li nram qab no, Yog tus neeg uas coglus tseg ntawd, txomnyem them tsis taus raws li tus nqi uas kom tseg no los yuav tsum coj tus neeg ntawd mus cuag tus povthawj, thiab tus povthawj yuav muab tus nqi txo kom tsawg, raws li tus neeg ntawd muaj peevxwm them taus rau nws them. Yog tus neeg ntawd coglus muab tus tsiaj uas tsimnyog mus fij rau tus TSWV, mas txhua yam ntawd yuav tsum yog yam dawbhuv, tus neeg uas coglus ntawd yuav tsum tsis txhob muab dua lwm tug tsiaj tuaj hloov tus tsiaj ntawd chaw. Yog nws hloov, ces ob tug tsiaj ntawd puavleej yog tus TSWV tug. Tiamsis yog nws coglus muab tus tsiaj uas tsis tsimnyog fij rau tus TSWV, tus txivneej ntawd yuav tsum coj tus tsiaj ntawd mus rau tus povthawj. Ces tus povthawj mam li muab tus tsiaj ntawd los kom nqi raws li tus tsiaj ntawd zoo lossis phem, thiab tsuas ntaus tus nqi raws li ntawd xwb. Yog tus neeg ntawd xav txhiv tus tsiaj ntawd rov qab, nws yuav tsum them nees nkaum feem pua ntxiv rau tus nqi tsiaj ntawm. Thaum muaj ib tug twg muab nws lub tsev fij rau tus TSWV, tus povthawj yuav tsum muab ntaus nqi raws li lub tsev ntawd zoo lossis phem, tsuas ntaus tus nqi li ntawd xwb. Yog tus uas fij lub tsev ntawd xav txhiv lub tsev rov qab, nws yuav tsum tau them nees nkaum feem pua ntxiv rau tus nqi tsev ntawd. Yog ib tus twg muab nws daim teb ib feem fij rau tus TSWV, tus povthawj yuav tsum muab ntaus nqi kom tsimnyog raws li daim teb ntawd yuav tseb tau noob qoob npaum li cas rau hauv, qhov uas txaus tseb ib kawm noob nplej ntaus nqi kaum daim nyiaj. Yog dhau plaws Xyoo Thim nws txawm muab nws daim teb fij, ces muab ntaus nqi kom puv nkaus rau nws them. Yog twb dhau Xyoo Thim lawm, nws mam muab nws daim teb fij, tus povthawj yuav nrog kom tus nqi raws li tej xyoo ntawd mus txog Xyoo Thim, thiab muab tus nqi txo kom qis. Yog tus uas fij nws daim teb ntawd xav txhiv rov qab, nws yuav tsum them nees nkaum feem pua ntxiv rau tus nqi ntawd. Yog nws tsis xav txhiv nws daim teb rov qab lossis nws twb xub muab muag rau lwm tus lawm, ces nws tsis muaj cai txhiv daim teb ntawd rov qab li lawm. Ces thaum rov txog Xyoo Thim daim teb ntawd yuav ua tus TSWV tug mus li; thiab yuav yog cov povthawj tug. Yog ib tug twg muab nws daim teb uas nws yuav los fij rau tus TSWV, tus nqi yuav tsum kom raws li tej xyoo mus txog rau Xyoo Thim, thiab tus neeg ntawd yuav tsum them tus nqi rau hnub ntawd; cov nyiaj ntawd yog tus TSWV tug. Thaum txog Xyoo Thim yuav tsum muab daim teb ntawd thim rov rau tus tswv qub lossis nws cov xeebntxwv. Txhua yam nqi yuav tsum muab kom, kom raws li nomtswv txoj cai. Thawj tug menyuam tsiaj yeej yog tus TSWV tug li lawm, tsis pub leejtwg muab tus tsiaj ntawd tuaj fij ua kev zoo siab rau nws, tsis hais menyuam nyuj, menyuam yaj lossis menyuam tshis los puavleej yog tus TSWV tug, tiamsis yog cov tsiaj uas tsis huv thawj tus menyuam yuav tsum tau txhiv rov qab raws li tus nqi uas tau kom tseg thiab ntxiv ib feem tsib rau tus nqi ntawd. Yog nws tsis txhiv tus tsiaj ntawd rov qab, ces muab muag rau lwm tus raws li tus nqi uas tau kom tseg lawm los tau. Txhua yam uas tau coglus muab fij rau tus TSWV lawm, txawm yog neeg lossis tsiaj txhu lossis liaj teb, tsis pub muab muag lossis txhiv rov qab li. Rau qhov tej ntawd yog yam dawbhuv heev rau tus TSWV lawm. Yog tau coglus nrog tus TSWV lawm hais tias, yuav muab ib tug twg ua kom puastsuaj mus, mas tsis pub txhiv rov qab li lawm; yuav tsum muab tus ntawd tua kom tuag xwb. Tagnrho tej qoobloo hauv tej teb lossis tej txiv hmab txiv ntoo ib feem kaum, yeej yog tus TSWV tug. Yog leejtwg xav txhiv qee yam rov qab, nws yuav tsum them ib feem tsib ntxiv rau tus nqi uas tau kom tseg. Tagnrho tej tsiaj nyeg los ib feem kaum yeej yog tus TSWV tug. Thaum suav tej tsiaj txhu, kaum tus muab ib tug ua tus TSWV tug. Tus tswv tsiaj tsis txhob xaiv tus tsiaj zoo tawm ntawm tus tsiaj phem, thiab tsis txhob muab tej tsiaj los sib hloov. Yog nws muab tus tsiaj no mus hloov tus tsiaj tod chaw, ces ob tug tsiaj ntawd puavleej yog tus TSWV tug huv tibsi, thiab txhiv tsis tau rov qab li lawm. Ntawm no yog cov lus samhwm uas tus TSWV hais rau Mauxes saum Roob Xinais, kom coj los qhia rau cov Yixalayees. Tau ob xyoos tom qab uas cov Yixalayees khiav nram tebchaws Iziv los, thaum lub ob hlis ntuj hnub xiab ib, tus TSWV hais rau Mauxes hauv tus TSWV lub Tsevntaub sib ntsib nram tiaj suabpuam Xinais hais tias, “Aloos neb cia li sau cov Yixalayees npe raws li tej cuab kwvtij thiab tej tsevneeg. Sau tagnrho txhua tus txivneej uas muaj hnubnyoog nees nkaum xyoo rov saud uas ua taus tubrog lawm tej npe. Kom ib cuab kwvtij twg tsa ib tug los ua tus thawj ntawm txhua xeem los ua tus pab koj.” Mauxes thiab Aloos coj kaum ob leeg txivneej no mus ua cov pab nkawd, hnub xiab ib lub ob hlis ntuj, lawv hu tagnrho txhua xeem thiab txhua tsevneeg tuaj txoos ua ke sau lawv tej npe. Tagnrho cov tub hluas uas hnubnyoog nees nkaum xyoo rov saud puavleej muab sau npe thiab suav tseg, raws li tus TSWV tau samhwm tseg. Yog li ntawd, Mauxes thiaj sau cov pejxeem npe nyob tom tiaj Suabpuam Xinais. Lunpees cajces uas yog Yakhauj tus tub hlob tsevneeg, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Xeem Lunpees, suav tau plaub caug rau txhiab tsib puas leej. Xeem Xime-oos, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Xime-oos, suav tau tsib caug cuaj txhiab peb puas leej. Xeem Khas, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Khas, suav tau plaub caug tsib txhiab rau pua tsib caug leej. Xeem Yudas, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Yudas, suav tau xya caum plaub txhiab rau pua leej. Xeem Ixakhas, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Ixakhas, suav tau tsib caug plaub txhiab plaub puas leej. Xeem Xenpuloos, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Xenpuloos, suav tau tsib caug xya txhiab plaub puas leej. Xeem Yauxej, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Xeem Efalayees, suav tau plaub caug txhiab tsib puas leej. Xeem Manaxes, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Manaxes, suav tau peb caug ob txhiab ob puas leej. Xeem Npeenyamees, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Npeenyamees, suav tau peb caug tsib txhiab plaub puas leej. Xeem Das, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Das, suav tau rau caum ob txhiab xya pua leej. Xeem Aseles, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Aseles, suav tau plaub caug ib txhiab tsib puas leej. Xeem Nathalis, tagnrho cov txivneej uas hnubnyoog nees nkaum xyoo rov saud uas ua taus tubrog, sau npe raws li lawv cajces. Cov Nathalis, suav tau tsib caug peb txhiab plaub puas leej. Tagnrho cov txivneej no puavleej yog cov uas Mauxes, Aloos thiab cov Yixalayees kaum ob tug thawjcoj pab nkawd suav, lawv nyias ua tus sawv cev ntawm nyias xeem. Cov Yixalayees uas hnubnyoog nees nkaum xyoo lossis laus dua ntawd uas ua taus tubrog puavleej tuaj sau npe raws li nws cajces. Lawv suav tagnrho tau rau pua peb txhiab tsib puas tsib caug leej. Tsis tau sau cov Levis npe nrog kaum ob xeem no, rau qhov tus TSWV hais rau Mauxes hais tias, “Thaum koj sau cov txivneej uas ua taus tubrog npe, koj tsis txhob suav cov Levis npe rau hauv. Tiamsis koj tsa cov Levis ua cov kwv lub Tsevntaub sib ntsib uas yog qhov chaw nrog kuv sib ntsib thiab tej khoom uas nyob hauv, lawv yog cov tsa lub Tsevntaub sib ntsib thiab rub lawv tej tsev nyob ncig lub Tsevntaub sib ntsib ntawd. Yog thaum twg nej tshais chaw tawm hauv nej lub yeej mus, cov Levis yog cov uas muab lub Tsevntaub sib ntsib txo thiab thaum nej mus nyob dua lub yeej tshiab, cov Levis yog cov uas tsa lub Tsevntaub sib ntsib ntawd. Lwm tus uas txav los ze lub Tsevntaub sib ntsib yuav raug tua tuag. Dua li cov Yixalayees yuav tsum rub lawv tej tsevntaub raws li lawv tej pab ntawd, txhua tus txivneej yuav tsum nyob hauv nws lub yeej thiab hauv qab lawv tus chij. Tiamsis cov Levis yuav tsum rub lawv tej tsevntaub nyob ncig lub Tsevntaub sib ntsib thiab ua cov zov lub Tsevntaub sib ntsib, kom tsis txhob muaj leejtwg tuaj ze rau ntawm lub Tsevntaub sib ntsib thiab ua rau kuv chim rau cov Yixalayees.” Yog li ntawd, cov Yixalayees thiaj ua txhua yam raws li tus TSWV tau samhwm rau Mauxes lawm. Tus TSWV qhia rau Mauxes thiab Aloos hais tias, “Thaum twg cov Yixalayees rub lawv tej tsevntaub, txhua tus neeg yuav tsum rub nws lub tsevntaub nyob rau hauv qab nws xeem tus chij thiab hauv tsevneeg tus qab chij. Nej tej tsev yuav tsum nyob puagncig tus TSWV lub Tsevntaub sib ntsib.” Tu sab hnubtuaj rau xeem Yudas, lawv mus rub tsevntaub nyob ua lawv ib pawg, cov Yudas tus thawjcoj yog Aminadas tus tub Nasoos, suav tagnrho nws cov neeg muaj xya caum plaub txhiab rau pua leej. Xeem Ixakhas, rub lawv tej tsevntaub nyob txuas nkaus ntawm xeem Yudas, xeem Ixakhas tus thawjcoj yog Zuag tus tub Nethanees, suav tagnrho nws cov neeg muaj tsib caug plaub txhiab plaub puas leej. Txuas ntawd, yog xeem Xenpuloos, xeem Xenpuloos tus thawjcoj yog Heloos tus tub Eli-as, suav tagnrho nws cov neeg muaj tsib caug xya txhiab plaub puas leej. Suav tagnrho cov neeg uas nyob rau sab yeej uas xeem Yudas nyob, muaj ib puas yim caum rau txhiab plaub puas leej. Lawv yog cov uas yuav tawm mus ua ntej. Tu sab nrad rau xeem Lunpees, cov Lunpees tus thawjcoj yog Sede-us tus tub Elixus, suav tagnrho nws cov neeg muaj plaub caug rau txhiab tsib puas leej. Thiab xeem Xime-oos, rub lawv tej tsevntaub nyob txuas nkaus ntawm xeem Lunpees, cov Xime-oos tus thawjcoj yog Xulisadais tus tub Selumiyees, suav tagnrho nws cov neeg muaj tsib caug cuaj txhiab peb puas leej. Txuas ntawd, yog Xeem Khas, cov Khas tus thawjcoj yog Deyees tus tub Eli-axas, suav tagnrho nws cov neeg muaj plaub caug tsib txhiab rau pua tsib caug leej. Suav tagnrho cov neeg uas nyob rau sab yeej uas xeem Lunpees nyob, muaj ib puas tsib caug ib txhiab plaub puas tsib caug leej. Lawv yog cov uas tawm mus ua pab ob. Cov Levis mam li kwv tus TSWV lub Tsevntaub sib ntsib tuaj nruab nrab ob pab uas mus ua ntej thiab ob pab uas mus ua qab. Plaub pab ntawd nyias yuav tsum mus nyob nyias qhov chaw raws li twb faib tseg lawm, txhua pab twg nyias yuav tsum mus nyob hauv qab nyias tus chij xwb. Tu sab hnub poob rau xeem Efalayees, lawv mus rub lawv tej tsevntaub nyob ua lawv ib pawg, cov Efalayees tus thawjcoj yog Amihus tus tub Elisamas, suav tagnrho nws cov neeg muaj plaub caug txhiab tsib puas leej. Thiab xeem Manaxes, rub lawv tej tsevntaub nyob txuas nkaus ntawm cov Efalayees, cov Manaxes tus thawjcoj yog Pedaxes tus tub Nkanaliyees, suav tagnrho nws cov neeg muaj peb caug ob txhiab ob puas leej. Txuas ntawd, yog Xeem Npeenyamees, cov Npeenyamees tus thawjcoj yog Nkede-aunis tus tub Anpidas, suav tagnrho nws cov neeg muaj peb caug tsib txhiab plaub puas leej. Suav tagnrho cov neeg uas nyob rau sab yeej uas xeem Efalayees nyob, muaj ib puas yim txhiab ib puas leej. Lawv yog cov uas tawm mus ua pab peb. Tu sab ped rau xeem Das, lawv mus rub lawv tej tsevntaub nyob ua lawv ib pawg, cov Das tus thawjcoj yog Amisadais tus tub Ahi-exes, suav tagnrho nws cov neeg muaj rau caum ob txhiab xya pua leej. Thiab xeem Aseles rub lawv tej tsevntaub nyob txuas nkaus ntawm xeem Das, cov Aseles tus thawjcoj yog Aukhalas tus tub Pankiyees, suav tagnrho nws cov neeg muaj plaub caug ib txhiab tsib puas leej. Txuas ntawd, yog xeem Nathalis, cov Nathalis tus thawjcoj yog Enas tus tub Ahilas, suav tagnrho nws cov neeg muaj tsib caug peb txhiab plaub puas leej. Suav tagnrho cov neeg uas nyob rau sab yeej uas xeem Das nyob, muaj ib puas tsib caug xya txhiab rau pua leej. Lawv yog cov uas tawm mus ua pab kawg. Xam tagnrho cov Yixalayees uas muab faib ua tej pab tej pawg ntawd, muaj rau pua peb txhiab tsib puas tsib caug leej. Tiamsis tsis tau sau cov Levis npe nrog cov Yixalayees, raws li tus TSWV tau samhwm rau Mauxes lawm. Yog li ntawd, cov Yixalayees thiaj ua raws li tej lus uas tus TSWV tau samhwm rau Mauxes. Lawv nyias rub nyias tej tsevntaub, rau hauv qab raws li nyias xeem tus chij, thiab lawv sawv kev mus ua tej pab raws li nyias xeem. Ntawm no yog Aloos thiab Mauxes nkawd tsevneeg, thaum lub sijhawm uas tus TSWV hais rau Mauxes saum Roob Xinais. Aloos muaj plaub tug tub: Nadas yog tus tub hlob, Anpihus, Ele-axas thiab Ithamas. Puavleej muab lawv txhawb meejthawj ua povthawj, tiamsis Nadas thiab Anpihus nkawd raug tua tuag thaum uas tus TSWV tsis tau hais kom nkawd rauv taws hlawv khoom fij rau tus TSWV tom tiaj suabpuam Xinais. Nkawd tsis tau muaj menyuam; yog li ntawd, Ele-axas thiab Ithamas thiaj tau ua ob tug povthawj rau Aloos pom tas Aloos tiam neej. Tus TSWV hais rau Mauxes hais tias, “Coj xeem Levis txav los rau tom hauv ntej no thiab tsa lawv ua Aloos uas yog tus povthawj cov tubtxib. Lawv yuav ua tej haujlwm hauv tus TSWV lub Tsevntaub sib ntsib, thiab ua cov povthawj lub luag haujlwm thiab ua haujlwm rau cov pejxeem sawvdaws. Lawv ua cov saib tagnrho tej khoom siv hauv tus TSWV lub Tsevntaub sib ntsib, thiab ua haujlwm rau cov Yixalayees. Thiab koj yuav tsum muab cov Levis cob rau Aloos thiab nws cov tub; lawv yog cov uas xaiv ntawm cov Yixalayees los muab rau Aloos tagnrho. Koj yuav tsum tsa Aloos thiab nws cov tub ua cov povthawj tuav lub luag haujlwm; yog leejtwg xav txeeb ua, cia li muab tus ntawd tua kom tuag.” Tus TSWV hais rau Mauxes hais tias, “Kuv xaiv cov Levis tawm ntawm cov Yixalayees los hloov tagnrho cov Yixalayees cov tub hlob chaw. Cov Levis yeej yog kuv tug, rau qhov txhua tus tub hlob puavleej yog kuv tug. Thaum kuv tua cov Iziv tej tub hlob, kuv yeej tshwj tagnrho cov Yixalayees tej tub hlob ua kuv tug, tsis hais neeg lossis tsiaj txhu. Lawv puavleej yog kuv tug. Kuv yog tus TSWV.” Tus TSWV samhwm rau Mauxes tom tiaj suabpuam Xinais kom cia li sau cov Levis npe raws li lawv tej cajces thiab tej tsevneeg. Txhua tus txivneej uas hnubnyoog ib hlis rov saud yuav tsum sau npe huv tibsi, ces Mauxes txawm ua raws li tus TSWV tau hais tseg. Levis muaj peb tug tub hu ua: Nkesoos, Kauhas thiab Melalis, lawv yog cov yawgkoob rau lawv xeem thiab rau lawv cajces. Nkesoos muaj ob tug tub hu ua: Linpenis thiab Sime-is; Kauhas muaj plaub tug tub hu ua: Alamas, Ixehas, Henploos thiab Uxiyees; thiab Melalis muaj ob tug tub hu ua: Mahalis thiab Musis. Lawv cov no yog Levis cajces, raws li lawv cov yawgkoob. Linpenis thiab Seme-is cuab kwvtij no yog cajces ntawm Nkesoos tsevneeg. Suav tagnrho cov txivneej uas hnubnyoog ib hlis rov saud muaj xya txhiab tsib puas leej. Cuab kwvtij no lawv rub tsevntaub nyob rau tom qab lub Tsevntaub sib ntsib sab hnubpoob, Tus thawj uas coj Nkesoos cajces yog Layees tus tub Eli-axas. Lawv lub luag haujlwm yog ua cov tu tus TSWV lub Tsevntaub sib ntsib, cov ntaub vov sab hauv, cov ntaub vov sab nraud, cov ntaub thaiv qhovrooj, cov ntaub xov vaj ncig lub Tsevntaub sib ntsib, lub tshavpuam, lub thaj thiab daim ntaub roojvag uas xov sab nraum lub tshavpuam. Lawv ua cov saib tagnrho tej hlua, thiab txhua yam ntawd huv tibsi. Alamas, Ixehas, Henploos thiab Uxiyees lawv cuab kwvtij no yog Kauhas cajces. Suav tagnrho cov txivneej uas hnubnyoog ib hlis rov saud muaj yim txhiab rau pua leej. Cuab kwvtij no lawv rub tsevntaub nyob txuas nkaus ntawm lub Tsevntaub sib ntsib sab nrad, tus thawj uas coj Kauhas cajces, yog Uxiyees tus tub Elixafas. Lawv lub luag haujlwm yog tu lub Phijxab uas ntim Vajtswv tej lus cog tseg, lub rooj, tus ncej txawb teeb, cov thaj, tej khoom uas cov povthawj siv nyob hauv Chav Dawbhuv, daim ntaub thaiv lub qhovrooj uas mus rau hauv Chav Dawbhuv kawg nkaus, thiab lawv ua cov uas tu txhua yam khoom siv rau tej ntawd. Tus thawj uas coj cov Levis yog tus povthawj Aloos tus tub Ele-axas. Nws ua tus saib cov neeg uas ua haujlwm hauv Chav Dawbhuv. Mahalis thiab Musis nkawd cuab kwvtij yog Melalis cajces. Suav tagnrho cov txivneej uas hnubnyoog ib hlis rov saud muaj rau txhiab ob puas leej. Lawv cuab kwvtij no rub tsevntaub nyob rau ntawm lub Tsevntaub sib ntsib sab ped, cuab kwvtij no tus thawj yog Anpihais tus tub Xuliyees. Lawv lub luag haujlwm yog ua cov saib tus lajkab uas xov ncig lub Tsevntaub sib ntsib, tej nqaj lajkab, tej ncej lajkab, tej tiag taw lajkab, thiab txhua yam khoom uas siv rau tej ntawd. Dua li ntawd, lawv tseem ua cov saib tej ncej, tej fab, tej ntsia, thiab tej hlua uas xov ncig lub tshavpuam huv tibsi. Mauxes, Aloos thiab Aloos cov tub rub lawv tej tsevntaub nyob rau ntawm tus TSWV lub Tsevntaub sib ntsib sab hnubtuaj. Lawv lub luag haujlwm yog ua cov sawv cev ntawm cov pejxeem Yixalayees nyob hauv Chav Dawbhuv. Yog muaj leejtwg lam mus ua tes haujlwm ntawd yuav raug tua tuag. Mauxes suav cov txivneej Levis uas hnubnyoog ib hlis rov saud raws li tus TSWV tau samhwm rau nws lawm, muaj nees nkaum ob txhiab leej. Tus TSWV hais rau Mauxes hais tias, “Suav tagnrho cov Yixalayees tej tub hlob uas hnubnyoog ib hlis rov saud thiab sau lawv tej npe kom tas huv tibsi. Muab tagnrho cov Levis rau kuv hloov cov Yixalayees tej tub hlob chaw, thiab cov Levis tej tsiaj txhu hloov cov Yixalayees tej tsiaj txhu thawj tus menyuam uas yog tus txiv chaw.” Yog li ntawd, Mauxes thiaj sau tagnrho cov Yixalayees tej tub hlob npe, raws li tus TSWV tau samhwm rau nws lawm. Thiab txhua tus tub hlob uas hnubnyoog ib hlis rov saud, sau tau npe tagnrho muaj nees nkaum ob txhiab ob puas xya caum peb leeg. Tus TSWV hais rau Mauxes hais tias, “Nimno cia li muab cov Levis fij rau kuv hloov tagnrho cov Yixalayees tej tub hlob chaw, thiab muab cov Levis tej tsiaj txhu fij rau kuv hloov cov Yixalayees tej tsiaj txhu chaw. Vim cov Yixalayees cov tub hlob coob tshaj cov Levis ob puas xya caum peb leeg lawm, mas nej yuav tsum tau txhiv cov tshaj ntawd rov qab. Ib tug tub twg yuav tsum yog tsib choj nyiaj, raws li nomtswv kevcai, thiab muab cov nyiaj no rau Aloos thiab nws cov tub.” Yog li ntawd, Mauxes thiaj khaws cov nyiaj uas cov Yixalayees coj tuaj txhiv lawv cov tub hlob uas cov Levis hloov tsis tas ntawd cia. Nws khaws cov nyiaj uas cov Yixalayees coj tuaj txhiv lawv cov tub hlob tau ib txhiab peb puas rau caum tsib choj, raws li nomtswv kevcai. Mauxes thiaj muab cov nyiaj no coj mus rau Aloos thiab nws cov tub, raws li tus TSWV tau samhwm rau Mauxes lawm. Tus TSWV hais rau Mauxes thiab Aloos hais tias, “Neb yuav tsum sau cov Levis uas yog cuab Kauhas tej npe raws li tej tsevneeg, cia li sau npe tagnrho cov txivneej uas hnubnyoog peb caug xyoo mus rau tsib caug xyoo, kom lawv tuaj ua haujlwm ntawm tus TSWV lub Tsevntaub sib ntsib. Ntawm no yog cuab Kauhas tes haujlwm uas nyob hauv tus TSWV lub Tsevntaub sib ntsib: lawv yog cov tu txhua yam khoom uas dawbhuv. “Thaum twg txog sijhawm nej rhuav lub yeej mas yuav tsum cia Aloos thiab nws cov tub mus rau hauv lub Tsevntaub sib ntsib, mus txo daim ntaub thaiv lub Phijxab uas ntim Vajtswv tej lus cog tseg, thiab muab daim ntaub ntawd npog lub Phijxab tso. Lawv yuav tsum muab ib daim tawv tsiaj uas zoo heev los npog thoob plaws lub Phijxab, thiab muab ib daim ntaub xiav npog tshooj rau saud, thiab muab ob tug nqaj kwv ntxig rau. “Lawv yuav tsum muab ib daim ntaub xiav nthuav npog lub rooj uas rau ncuav fij rau tus TSWV thiab muab tej twj taig tso rau saud, cov tais phiab rau hmoov tshuaj tsw qab, cov tais phiab rau khoom fij, thiab lub hub ntim cawv txiv hmab ua khoom fij. Cov ncuav yuav tsum tso rau saum lub rooj tas mus li. Kom lawv muab ib daim ntaub liab nthuav npog cov ncuav, thiab muab ib daim tawv tsiaj uas zoo heev nthuav npog tshooj rau saum daim ntaub, thiab muab ob tug nqaj kwv ntxig rau. “Kom lawv muab ib daim ntaub xiav nthuav khwb tus ncej txawb teeb thiab cov teeb, cov txiab txiav teebxeeb thiab cov roj uas sam teeb. Thiab kom lawv muab tej khoom siv rau lub teeb, qhwv ua ib pob thiab muab ib daim tawv tsiaj uas zoo heev qhwv tuaj sab nraud thiab muab tso rau saum ob tug nqaj. “Lawv yuav tsum muab ib daim ntaub xiav nthuav npog lub thaj kub, muab ib daim tawv tsiaj uas zoo heev npog tshooj rau saud thiab, ces muab ob tug nqaj kwv ntxig rau. Lawv yuav tsum muab tagnrho cov cuabyeej siv hauv Chav Dawbhuv qhwv ua ib pob tso rau saum daim ntaub xiav, muab ib daim tawv tsiaj uas zoo heev qhwv tuaj sab nraud, thiab muab tso rau saum ob tug nqaj uas kwv lub thaj kub ntawd. Lawv yuav tsum muab cov tshauv uas ntub roj saum lub thaj hliv tawm thiab muab ib daim ntaub pajyeeb nthuav vov lub thaj. Ces lawv muab tej cuabyeej siv coj mus tso huv tibsi rau saum lub thaj: cov laujkaub rau ncaig taws, cov nqelauj, cov duav thiab cov tais tooj. Ces lawv yuav tsum muab ib daim tawv tsiaj uas zoo heev los npog lub thaj thiab muab ob tug nqaj kwv ntxig rau. Thaum lub sijhawm uas lawv rhuav lub yeej yuav tshais chaw, lawv yuav tsum cia cuab Kauhas los ua cov kwv tej khoom dawbhuv uas Aloos thiab nws cov tub twb muab qhwv tau tas lawm. Cov Kauhas yuav tsum tsis txhob tuav tej khoom dawbhuv ntawd hlo li, yog lawv tuav, lawv yuav raug tua tuag.” Tej uas hais tas no yog cuab Kauhas, lub luag haujlwm uas yog thaum muab tus TSWV lub Tsevntaub sib ntsib tshais chaw coj tawm mus. Ele-axas uas yog Aloos tus tub lub luag haujlwm yog ua tus saib lub Tsevntaub sib ntsib thiab tej roj sam teeb, tej hmoov tshuaj tsw qab, tej hmoov nplej uas coj tuaj fij, tej roj txhawb meejthawj thiab txhua yam khoom dawbhuv hauv lub Tsevntaub sib ntsib uas twb muab fij rau tus TSWV lawm. Tus TSWV hais rau Mauxes thiab Aloos hais tias, “Tsis txhob cia cuab Kauhas raug tua tuag tas hauv xeem Levis mus. Qhov uas lawv yuav tsis raug tua tuag, thaum lawv mus ze tej khoom dawbhuv tshaj plaws, mas ua li no: kom Aloos thiab Aloos cov tub mus qhia saib tus twg yog tus kwv yam twg, ces nws tsuas kwv yam ntawd xwb. Yog cov Kauhas nkag mus hauv lub Tsevntaub sib ntsib thiab saib cov povthawj tu tej khoom dawbhuv uas coj tshais chaw tawm mus ntawd, mas lawv yuav raug tua tuag.” Tus TSWV hais rau Mauxes kom cia li sau cov Levis uas yog cuab Nkesoos tej npe raws li lawv tej tsevneeg, thiab sau txhua tus txivneej uas hnubnyoog peb caug xyoo mus txog tsib caug xyoo tej npe, kom lawv tuaj ua haujlwm ntawm tus TSWV lub Tsevntaub sib ntsib. Lawv lub luag haujlwm yog yuav tsum kwv tej khoom li nram qab no: lub Tsevntaub sib ntsib, daim ntaub vov sab hauv nruab nrog, daim ntaub vov sab nraud, daim tseem tawv tsiaj uas vov tuaj saum, daim ntaub thaiv qhovrooj, cov ntaub xov lub tshavpuam uas ncig lub Tsevntaub sib ntsib thiab lub thaj, daim ntaub roojvag ntawm lub tshavpuam, cov hlua thiab txhua yam khoom uas siv rau lub Tsevntaub sib ntsib. Lawv yuav tsum ua txhua yam haujlwm no kom tiav. Mauxes thiab Aloos nkawd yuav tsum saib cov Nkesoos ua tej haujlwm no thiab kwv txhua yam uas Aloos thiab nws cov tub muab cob rau lawv lawm. Qhov no yog tes haujlwm uas cov Nkesoos yuav tsum tau ua hauv tus TSWV lub Tsevntaub sib ntsib, lawv kwv txhua yam raws li tus povthawj Ithamas uas yog Aloos tus tub qhia rau lawv lawm. Tus TSWV hais kom Mauxes sau cov Levis uas yog cuab Melalis tej npe raws li lawv tej tsevneeg, thiab sau txhua tus txivneej uas hnubnyoog peb caug xyoo mus txog tsib caug xyoo tej npe, kom lawv tuaj ua haujlwm ntawm tus TSWV lub Tsevntaub sib ntsib. Thiab ntawm no yog lub luag haujlwm uas lawv ua ntawm tus TSWV lub Tsevntaub sib ntsib: lawv kwv tej nqaj, tej ncej, tej tiag taw uas xov lub Tsevntaub sib ntsib, tej ncej lajkab, tej nqaj, tej ntsia thiab tej hlua pav lajkab uas xov lub tshavpuam ncig lub Tsevntaub sib ntsib, thiab txhua yam khoom siv rau tej ntawd. Yog faib yam twg rau tus twg kwv, nws yuav tau kwv yam ntawd xwb. Qhov no yog tes haujlwm uas cov Melalis yuav tsum tau ua rau ntawm tus TSWV lub Tsevntaub sib ntsib; lawv yuav kwv tej khoom ntawd tawm mus raws li tus povthawj Ithamas uas yog Aloos tus tub qhia kom lawv kwv. Mauxes, Aloos thiab cov thawjcoj ntawm cov pejxeem suav cuab Kauhas raws li lawv cov yawgkoob tej tsevneeg npe. Suav tagnrho cov txivneej uas hnubnyoog peb caug xyoo mus txog tsib caug xyoo uas lawv tuaj ua haujlwm ntawm tus TSWV lub Tsevntaub sib ntsib, thiab suav tagnrho lawv tej tsevneeg, muaj ob txhiab xya pua tsib caug leej. Tagnrho cov uas sau tau npe ntawd, puavleej yog cuab Kauhas xwb, lawv yog cov ua haujlwm ntawm tus TSWV lub Tsevntaub sib ntsib, Mauxes thiab Aloos sau lawv npe raws li tus TSWV tau samhwm tseg lawm. Suav cuab Nkesoos raws li lawv cov yawgkoob tej tsevneeg npe, tagnrho cov txivneej uas hnubnyoog peb caug xyoo mus txog tsib caug xyoo uas tuaj ua haujlwm ntawm tus TSWV lub Tsevntaub sib ntsib muaj ob txhiab rau pua peb caug leej. Tagnrho cov uas suav tau npe ntawd puavleej yog cuab Nkesoos xwb, lawv yog cov ua haujlwm ntawm tus TSWV lub Tsevntaub sib ntsib, Mauxes thiab Aloos sau lawv npe raws li tus TSWV tau samhwm tseg lawm. Suav cuab Melalis raws li lawv cov yawgkoob tej tsevneeg npe, tagnrho cov txivneej uas hnubnyoog peb caug xyoo mus txog tsib caug xyoo uas tuaj ua haujlwm ntawm tus TSWV lub Tsevntaub sib ntsib muaj peb txhiab ob puas leej. Tagnrho cov uas suav tau npe ntawd puavleej yog cuab Melalis uas yog Mauxes thiab Aloos sau lawv tej npe raws li tus TSWV tau samhwm tseg lawm. Yog li ntawd, Mauxes, Aloos thiab cov Yixalayees tej thawjcoj thiaj sau tagnrho cov Levis txhua cuab thiab txhua yim neeg npe. Txhua tus txivneej uas hnubnyoog peb caug xyoo mus txog tsib caug xyoo, thiaj tau tuaj ua haujlwm thiab ua cov kwv tus TSWV lub Tsevntaub sib ntsib. Cov uas suav tau npe lawm muaj yim txhiab tsib puas yim caum leej. Txhua tus txivneej puavleej tuaj sau npe raws li tus TSWV tau samhwm rau Mauxes lawm; faib haujlwm rau txhua tus, yog leejtwg ua yam twg lossis kwv yam twg, nws tsuas ua yam ntawd lossis kwv yam ntawd xwb. Tus TSWV hais rau Mauxes hais tias, “Koj hais rau cov Yixalayees kom cia li ntiab txhua tus neeg uas mob ruas lossis mob ua kua paug rau hauv lub cev thiab txhua tus neeg uas ua rau nws tsis huv uas yog mus tuav tej neeg tuag, kom tawm hauv lub yeej mus. Muab tagnrho tej neeg tsis huv ntiab tawm mus kom tas, nyob tsam lawv ua rau lub yeej qhov chaw uas yog kuv nrog nej nyob ntawd tsis huv lawm.” Cov Yixalayees txawm ua li ntawd; lawv thiaj muab cov neeg uas tsis huv ntiab tawm hauv lub yeej mus tas lawm. Lawv ua raws li tus TSWV samhwm rau Mauxes ntag. Tus TSWV hais rau Mauxes kom cia li muab tej lus no qhia rau cov Yixalayees. Thaum twg ib tug txivneej lossis ib tug pojniam tau ua txhaum rau ib tug, ces yog nws ua tsis ncaj rau tus TSWV thiab nws yog neeg muaj txim. Nws yuav tsum mus lees lub txim uas nws ua txhaum ntawd, thiab them nyiaj nees nkaum feem pua ntxiv rau tus uas nws ua txhaum rau lawm. Tiamsis yog tus neeg ntawd tuag lawm, thiab tsis muaj ib tug kwvtij txheeb ze yuav them cov nyiaj ntawd rau, ces cov nyiaj ntawd yog tus TSWV tug, mas yuav tsum muab rau tus povthawj thiab muab ib tug laug yaj rau tus povthawj tua fij ua kevcai daws tus neeg ntawd lub txim. Txhua yam khoom uas cov Yixalayees muab pub tshwjxeeb rau tus TSWV puavleej yog tus povthawj uas lawv muab cob rau ntawd tug. Txhua tus povthawj yuav tsum khaws tej khoom uas luag muab pub rau nws lawm cia ua nws tug. Tus TSWV samhwm rau Mauxes kom cia li muab tej lus no qhia rau cov Yixalayees. Yog tus pojniam twg mus ua txhaum thiab ua tsis ncaj rau nws tus txiv uas yog mus deev lwm tus txivneej nraim nkoos uas nws tus txiv tsis pom, thiab nws tau ua tej kev txhaum uas tsis muaj leejtwg paub, tsis muaj leejtwg ua timkhawv thiab ntes tsis tau; yog nws yeej tau ua tsis ncaj, thiaj ua rau nws tus txiv khib thiab tsis ntseeg nws lossis yog tus pojniam tsis tau ua txhaum, tiamsis tus txiv lam khib thiab tsis ntseeg siab xwb, ces nws yuav tsum coj nws tus pojniam mus cuag tus povthawj. Thiab nws yuav tsum nqa ob choj hmoov nplej mus ua khoom fij, tiamsis tsis txhob muab roj hliv rau lossis tsis txhob muab hmoov tshuaj tsw qab nphoo rau, rau qhov yog cov hmoov nplej uas fij vim txojkev khib siab ua kom qhov tseeb tawm tuaj rau sawvdaws paub. Tus povthawj yuav tsum coj tus pojniam ntawd mus sawv ntawm lub thaj hauv ntej. Nws yuav tsum muab cov dej dawbhuv hliv rau hauv lub tais av thiab muab mentsis hmoov av hauv lub plag Tsevntaub sib ntsib uas yog tus TSWV qhov chaw sib ntsib nphoo rau hauv cov dej ntawd. Ces tus povthawj yuav tsum muab tus pojniam ntawd lub yivtws daws thiab muab cov hmoov nplej uas fij ntawd rau nws tuav ntawm tes. Tus povthawj tuav rawv lub tais dej iab dej daw uas raug foom tsis zoo ntawm nws tes. Ces tus povthawj yuav tsum kom tus pojniam ntawd los tsa tes coglus tabmeeg tus povthawj li no: “Yog koj yeej tsis tau ua txhaum kev nkauj kev nraug, cov dej uas foom tsis zoo no yuav tsis ua rau koj raug kev puastsuaj. Tiamsis yog koj saib tsis taus koj tus txiv, koj tau mus ua txhaum uas yog nrog lwm tus txivneej pw uas tsis yog koj tus txiv, thov kom tus TSWV ua rau koj lub npe raug foom tsis zoo tabmeeg koj haivneeg. Thiab thov kom nws ua rau koj chaw xis qhuav thiab ua rau koj lub tsev menyuam o. Thov kom cov dej iab dej daw uas koj haus mus rau hauv koj lub plab lawm, ua rau koj lub tsev menyuam o thiab koj chaw xis qhuav.” Tus pojniam ntawd yuav tsum txaus siab teb hais tias, “Kuv yeej zoo siab; thov kom tus TSWV ua li ntawd ntag.” Ces tus povthawj yuav tsum muab tej lus foom tsis zoo ntawd sau rau hauv ntawv thiab muab coj mus yaug rau hauv cov dej iab dej daw ntawd. Thiab nws yuav tsum muab cov dej iab dej daw uas ris cov lus foom tsis zoo ntawd rau tus pojniam haus, thiab cov dej iab dej daw uas ris cov lus foom tsis zoo yuav nkag mus rau hauv nws lub cev thiab yuav ua mob phem rau nws. Ces tus povthawj yuav tsum muab cov hmoov nplej uas yog khoom fij tshem txojkev khib ntawm tus pojniam tes los, thiab nqa mus rau tom lub thaj muab yom fij rau tus TSWV. Ces tus povthawj yuav tsum yawm ib phoovtes cov hmoov nplej ntawd coj mus hlawv rau saud lub thaj fij ua kev nco txog. Thaum kawg tus povthawj kom tus pojniam ntawd haus cov dej iab dej daw. Yog nws yeej ua txhaum thiab ua tsis ncaj rau nws tus txiv lawm tiag, thaum nws haus cov dej uas ris cov lus foom tsis zoo ntawd mus rau hauv nws lub cev lawm, yuav ua rau nws lub cev mob; nws lub tsev menyuam yuav o thiab nws chaw xis yuav qhuav, thiab nws lub npe los yuav raug foom tsis zoo tabmeeg nws haivneeg. Tiamsis yog tus pojniam ntawd yeej tsis tau ua txhaum thiab nws yog neeg ncaj ncees, nws yuav dim lub txim ntawd thiab tseem muaj taus menyuam. Tej uas hais tas los no yog txoj kevcai tu plaub ntug ntawm txojkev sib khib, thaum tus pojniam uas tseem nyob hauv nws tus txiv kev tswjhwm los nws cia li mus deev hluas nraug thiab ua txhaum lawm, lossis thaum tus txivneej ntawd khib nws tus pojniam, vim tsis ntseeg tus pojniam siab, ces nws yuav tsum coj tus pojniam mus sawv tabmeeg tus TSWV, thiab tus povthawj yuav tsum ua raws li txoj kevcai no txhua nqe. Tus txiv yuav tsis raug txim dabtsi, tiamsis yog tus pojniam muaj txim tiag, nws yuav tau ris lub txim ntawd. Tus TSWV samhwm rau Mauxes kom cia li muab txoj kevcai no qhia rau cov Yixalayees. Txhua tus txivneej lossis pojniam uas nws tau coglus tshwjxeeb ua Naxis thiab muab nws fij rau tus TSWV, mas nws yuav tsum caiv tsis txhob haus cawv txiv hmab thiab cawv ntsim. Nws yuav tsum tsis txhob haus tej cawv uas muab kua txiv hmab ua lossis tsis txhob noj tej txiv hmab qhuav hlo li. Thaum nws tseem ua Naxis, nws tsis txhob noj tej khoom uas yog muab kua txiv hmab ua, txawm yog tej noob lossis tej tawv txiv hmab los tsis txhob saj. Thaum uas nws tseem nyob hauv qhov uas coglus ua Naxis, nws tsis txhob txiav nws cov plaubhau lossis chais nws cov hwjtxwv. Nws yuav tsum ua neeg dawbhuv mus txog thaum lub sijhawm uas nws ua kevcai tiav lawm, thiab nws yuav tsum tseg nws cov plaubhau kom ntev. Thaum lub sijhawm uas nws ua kevcai fij nws rau tus TSWV, nws yuav tsum tsis txhob mus ze tej neeg tuag. Txawm yog nws niam nws txiv, nws kwv nws tij lossis cov muam tuag los nws yuav tsum tsis txhob mus ze, yuav ua rau nws lub cev tsis huv, rau qhov lub cim uas muab nws cais fij rau Vajtswv nyob saum nws taubhau. Thaum uas nws tseem ua Naxis, nws yeej yog tus neeg dawbhuv rau ntawm tus TSWV. Yog cia li muaj ib tug neeg tuaj tuag rau ntawm tus Naxis ib sab, ua rau nws cov plaubhau dawbhuv tsis huv lawm, nws yuav tsum tos xya hnub tom qab, nws chais nws cov plaubhau thiab cov hwjtxwv, nws thiaj rov ua tau tus neeg dawbhuv. Hnub yim, nws yuav tsum nqa ib nkawm nquab liabrwg lossis ib nkawm nquab nyeg tuaj rau tus povthawj ntawm tus TSWV lub Tsevntaub sib ntsib lub qhovrooj. Tus povthawj muab ib tug fij daws txim thiab muab ib tug hlawv ua khoom fij, ua kevcai ntxuav nws, rau qhov nws tau chwv tus neeg tuag lawm. Hnub ntawd nws yuav tsum ua kevcai ntxuav nws cov plaubhau kom huv thiab nws rov muab nws fij rau tus TSWV thaum lub sijhawm uas nws tseem ua Naxis thiab cab ib tug thav yaj hnubnyoog ib xyoos tuaj tua ua khoom fij daws txim. Tsis suav lub sijhawm qub uas thaum nws xub ua, rau qhov nws tau ua rau nws tsis huv lawm. Ntawm no yog txoj kevcai rau tus Naxis, thaum lub sijhawm uas nws ua kevcai txwm hnubnyoog lawm. Nws yuav tsum mus rau tom tus TSWV lub Tsevntaub sib ntsib lub qhovrooj, thiab coj peb tug tsiaj uas tsis muaj ib qho phem li mus fij rau tus TSWV: ib tug thav yaj hnubnyoog ib xyoo mus hlawv fij, ib tug nwmyaj hnubnyoog ib xyoo mus fij daws txim thiab ib tug laug yaj mus fij uas kev sib raug zoo. Nws yuav tsum nqa ib tawb ncuav uas tsis xyaw keeb mus fij thiab: muab ib co puab ua tej lub ncuav tuab tuab xyaw roj txiv ntoo thiab muab ib co puab ua tej lub ncuav nyias nyias pleev roj txiv ntoo, thiab muab ib co hmoov nplej thiab cawv txiv hmab tuaj fij ntxiv. Tus povthawj cia li coj tagnrho tej khoom no mus fij rau tus TSWV, muab ibtxhia fij daws txim thiab muab ibtxhia hlawv ua khoom fij rau tus TSWV. Nws yuav tsum muab tus laug yaj thiab tawb ncuav uas tsis xyaw keeb fij rau tus TSWV ua kev sib raug zoo; thiab nws muab cov hmoov nplej thiab cov cawv txiv hmab fij nrog ua ke. Tus Naxis yuav tsum chais nws cov plaubhau rau ntawm tus TSWV lub Tsevntaub sib ntsib lub qhovrooj, thiab muab nws cov plaubhau coj mus hlawv rau hauv lub cubtawg uas tabtom hlawv cov khoom fij ua kev sib raug zoo. Ces thaum uas muab ces tes yaj hau siav lawm, tus povthawj yuav tsum muab ces tes yaj ntawd coj mus tso nrog lub ncuav tuab thiab lub ncuav nyias uas muab hauv lub tawb los, cob rau tus Naxis txhais tes. Ces tus povthawj yuav tsum muab cov khoom no mus yom fij rau tus TSWV; lub hauvnrob thiab cesqab uas muab yom fij ntawd yog tus povthawj tug raws li txoj kevcai, cov khoom fij no yog cov dawbhuv rau tus povthawj. Tom qab ntawd tus Naxis, mam li haus tau cawv. Ntawm no yog txoj kevcai uas tus Naxis yuav tsum tau coj. Tiamsis yog tus Naxis twg tau coglus tseg yuav muab khoom fij tshaj li cov Naxis txoj kevcai coglus tseg, mas nws yuav tsum ua kom tiav raws li nws tau coglus tseg lawm. Tus TSWV samhwm rau Mauxes kom cia li qhia rau Aloos thiab nws cov tub siv tej lus no foom koob hmoov rau cov Yixalayees: Thov tus TSWV foom hmoov rau nej thiab tsomkwm nej; Thov tus TSWV ua siab dawb siab zoo rau nej thiab hlub nej; Thov tus TSWV tsa qhovmuag saib nej thiab pub rau nej muaj kev kaj siab lug. Thiab tus TSWV hais tias, “Yog lawv tuav kuv lub npe foom koob hmoov rau cov Yixalayees, kuv thiaj yuav foom koob hmoov rau lawv.” Hnub uas Mauxes tsa lub Tsevntaub sib ntsib uas yog qhov chaw nrog tus TSWV sib ntsib tiav lawm, nws muab lub Tsevntaub sib ntsib thiab tej cuabyeej, lub thaj thiab tej cuabyeej ua kevcai fij kom dawbhuv. Ces cov Yixalayees tej thawjcoj, cov thawjcoj ntawm tej tsevneeg, thiab cov thawjcoj ntawm tej xeem yog ua cov uas sau npe, coj lawv tej khoom fij tuaj pub rau tus TSWV li no: rau lub tsheb nyuj thiab kaum ob tug heev nyuj, ob tug thawjcoj koom ib lub tsheb nyuj thiab ib leeg ib tug heev nyuj. Tom qab uas lawv coj tuaj fij rau tus TSWV tas lawm, tus TSWV hais rau Mauxes hais tias, “Cia li txais tej khoom fij no ntawm lawv, thiaj tau coj mus siv ua haujlwm hauv tus TSWV lub Tsevntaub sib ntsib; thiab muab tej khoom no cob rau cov Levis raws li tes haujlwm uas lawv yuav tsum tau ua.” Yog li ntawd, Mauxes thiaj muab cov tsheb nyuj thiab cov heev nyuj cob rau cov Levis. Nws muab ob lub tsheb nyuj thiab plaub tus heev nyuj rau cov Nkesoos, thiab muab plaub lub tsheb nyuj thiab yim tus heev nyuj rau cov Melalis. Tagnrho tej haujlwm uas lawv ua, Aloos tus tub Ithamas qhia li cas lawv yuav tsum ua kom tiav li ntawd. Tiamsis Mauxes tsis muab tsheb nyuj lossis heev nyuj rau cov Kauhas, rau qhov lub luag haujlwm uas lawv ua tsuas yog kwv tej khoom dawbhuv saum xubpwg xwb. Cov thawjcoj tseem nqa khoom fij tuaj ua kevcai fij lub thaj huv tibsi thiab. Thaum lawv npaj tau tej khoom ntawd txhij coj tuaj fij rau ntawm lub thaj, tus TSWV hais rau Mauxes hais tias, “Koj qhia rau lawv hais tias muab kaum ob hnub rau lawv fij lawv tej khoom rau lub thaj, kom ib tug thawjcoj tuaj ib hnub.” Hnub ib yog Aminadas tus tub Nasoos uas yog tus thawjcoj xeem Yudas muab nws cov khoom mus fij; cov khoom uas nws nqa mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim lag, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag, ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos, coj mus tua hlawv fij; cab ib tug laug tshis coj mus tua fij daws txim; thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Aminadas tus tub Nasoos cov. Hnub ob yog Zuag tus tub Nethanees uas yog tus thawjcoj xeem Ixakhas muab nws cov khoom mus fij; cov khoom uas nws nqa mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus tua fij ua kev sib raug zoo. Cov khoom fij no puavleej yog Zuag tus tub Nethanees cov. Hnub peb yog Heloos tus tub Eli-as uas yog tus thawjcoj xeem Xenpuloos muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug tshis coj mus tua fij daws txim; thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos, coj mus tua fij ua kev sib raug zoo. Cov khoom fij no puavleej yog Heloos tus tub Eli-as cov. Hnub plaub yog Sede-us tus tub Elixus uas yog tus thawjcoj xeem Lunpees muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Sede-us tus tub Elixus cov. Hnub tsib yog Xulisadais tus tub Selumiyees uas yog tus thawjcoj xeem Xime-oos muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim, thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Xulisadais tus tub Selumiyees cov. Hnub rau yog Deyees tus tub Eli-axas uas yog tus thawjcoj xeem Khas muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos, coj mus fij ua kev sib raug zoo. Cov khoom fij no puavleej yog Deyees tus tub Eli-axas cov. Hnub xya yog Amihus tus tub Elisamas uas yog tus thawjcoj xeem Efalayees, muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim lag, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tus laug tshis coj mus tua fij daws txim; thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Amihus tus tub Elisamas cov. Hnub yim yog Pedaxes tus tub Nkamaliyees uas yog tus thawjcoj xeem Manaxes muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Pedaxes tus tub Nkamaliyees cov. Hnub cuaj yog Nkide-aunis tus tub Anpidas uas yog tus thawjcoj xeem Npeenyamees muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab cab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Nkide-aunis tus tub Anpidas cov. Hnub kaum yog Amisadais tus tub Ahi-exes uas yog tus thawjcoj xeem Das muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab cab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Amisadais tus tub Ahi-exes cov. Hnub kaum ib yog Aukhalas tus tub Pankiyees uas yog tus thawjcoj xeem Aseles muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab cab ob tug heev nyuj, tsib tug laug yaj, tsib tug laug tshis thiab tsib tug thav yaj hnubnyoog ib xyoos, coj mus fij ua kev sib raug zoo. Cov khoom fij no puavleej yog Aukhalas tus tub Pankiyees cov. Hnub kaum ob yog Enas tus tub Ahilas uas yog tus thawjcoj xeem Nathalis, muab nws cov khoom mus fij; cov khoom uas nws coj mus fij yog ib lub phaj nyiaj hnyav peb choj thiab ob lag, ib lub tais nyiaj hnyav ib choj thiab yim las, raws li nomtswv txoj cai kom tseg, lub phaj thiab lub tais ntawd puavleej ntim tej tseem hmoov nplej uas ntse roj rau lawm puv nkaus coj mus fij; ib lub tais kub hnyav plaub lag uas ntim hmoov tshuaj tsw qab puv nkaus; cab ib tug ntsuag nyuj, ib tug laug yaj thiab ib tug thav yaj hnubnyoog ib xyoos coj mus tua hlawv fij; cab ib tug laug tshis coj mus tua fij daws txim; thiab cab ob tug heev nyuj, tsib tug laug yaj, tsib tus laug tshis thiab tsib tug thav yaj hnubnyoog ib xyoos coj mus fij ua kev sib raug zoo. Cov khoom fij no puavleej yog Enas tus tub Ahilas cov. Ntawm no yog cov khoom fij uas cov Yixalayees cov thawjcoj coj mus fij thaum ua kevcai fij lub thaj, kaum ob lub phaj nyiaj, kaum ob lub tais nyiaj, kaum ob lub tais kub, ib lub phaj nyiaj twg hnyav peb choj thiab ob lag, ib lub tais nyiaj twg hnyav ib choj thiab yim las, tagnrho cov phaj thiab cov tais nyiaj hnyav rau caum choj raws li nomtswv txoj cai kom tseg. Kaum ob lub tais kub uas ntim hmoov tshuaj tsw qab puv nkaus, ib lub twg hnyav plaub lag, raws li nomtswv txoj cai kom tseg, tagnrho cov tais kub ntawd hnyav plaub caug yim las. Xam tagnrho cov tsiaj uas cab mus tua hlawv fij yog kaum ob tug heev nyuj, kaum ob tug laug tshis, kaum ob tug thav yaj hnubnyoog ib xyoos, nrog rau lawv tej hmoov nplej uas coj mus ua khoom fij; thiab tagnrho lawv tej tsiaj uas cab mus fij ua kev sib raug zoo yog nees nkaum plaub tug heev nyuj, rau caum tus laug yaj, rau caum tus laug tshis, rau caum tus thav yaj hnubnyoog ib xyoos. Cov no yog tej khoom fij uas coj mus fij tom qab ua kevcai fij rau lub thaj tas lawm. Thaum Mauxes mus nrog tus TSWV tham hauv tus TSWV lub Tsevntaub sib ntsib, nws hnov tus TSWV hais lus rau nws saum lub hau Phijxab uas ntim Vajtswv tej lus cog tseg, nruab nrab ntawm ob tug qhelunpees ob phab qab tis tuaj. Tus TSWV hais rau Mauxes hais tias, “Koj qhia rau Aloos hais tias, thaum twg nws coj xya lub teeb mus txawb rau ntawm tus ncej txawb teeb, nws yuav tsum txawb kom cov teeb ntawd ci pom kev mus rau tom hauv ntej.” Aloos ua raws li ntawd, nws thiaj muab cov teeb mus txawb rau ntawm tus ncej txawb teeb tig tagnrho rau tom hauv ntej. Tus ncej txawb teeb ntawd saum hau los ti nkaus hauv taw puavleej yog muab cov tseem kub ntaus ua raws li tus qauv uas tus TSWV qhia rau Mauxes lawm. Tus TSWV hais rau Mauxes hais tias, “Muab cov Levis cais tawm ntawm cov Yixalayees lub chaw nyob thiab muab lawv ua kevcai ntxuav kom huv raws li no: muab dej nchos rau lawv ua kevcai ntxuav thiab kom lawv chais lawv tej plaub thoob plaws ibce thiab kom lawv ntxhua lawv tej ris tsho. Ces lawv thiaj yuav huv. Ces kom lawv cab ib tug ntsuag nyuj thiab nqa ib co hmoov nplej uas twb ntse roj txiv ntoo rau lawm tuaj; thiab koj muab dua ib tug ntsuag nyuj tuaj tua fij daws txim. Ces kom cov Yixalayees tuaj txoos ua ke thiab kom cov Levis mus sawv tom hauv ntej tus TSWV lub Tsevntaub sib ntsib. Cov Yixalayees yuav tsum tsa tes rau saum cov Levis taubhau, thiab cia Aloos muab cov Levis uas yog cov Yixalayees yam khoom tshwjxeeb fij pub rau kuv kom lawv tau ua kuv tes haujlwm. Cov Levis yuav tsum tsa tes rau saum ob tug heev nyuj taubhau; muab ib tug tua fij daws txim thiab muab ib tug tua hlawv fij ua kevcai ntxuav kom cov Levis huv. “Muab cov Levis fij pub tshwjxeeb rau tus TSWV thiab tsa Aloos thiab nws cov tub ua cov saib xyuas lawv. Koj cia li muab cov Levis cais tawm ntawm cov Yixalayees mus nyob rau ib qho, cov Levis yog kuv tug lawm. Tom qab uas koj muab cov Levis ua kevcai ntxuav thiab muab lawv fij tas lawm, lawv thiaj tsimnyog ua kuv tes haujlwm hauv lub Tsevntaub sib ntsib. Lawv yog cov dawbhuv uas cov Yixalayees muab pub rau kuv, kuv thiaj yuav lawv ua kuv tug hloov cov Yixalayees thawj tug tub hlob chaw. Cov Yixalayees tej tub hlob thiab lawv tej tsiaj txhu thawj tug menyuam uas yog tus txiv puavleej yog kuv tug, vim thaum ub kuv tua cov Iziv tej tub hlob lawm. Nimno kuv thiaj xaiv cov Levis los hloov cov Yixalayees tej tub hlob chaw, thiab kuv muab cov Levis cob rau Aloos thiab nws cov tub, ib yam li lawv yog cov Yixalayees cov khoom pub uas coj mus ua haujlwm hauv tus TSWV lub Tsevntaub sib ntsib, hloov cov Yixalayees chaw thiab tiv thaiv cov Yixalayees ntawm txojkev puastsuaj, nyob tsam lawv txav mus ze Chav Dawbhuv.” Yog li ntawd, Mauxes, Aloos thiab tagnrho cov Yixalayees thiaj muab cov Levis ua kevcai fij raws li tus TSWV tau samhwm rau Mauxes lawm. Cov Levis puavleej ua kevcai ntxuav lawv thiab ntxhua lawv tej ris tsho, thiab Aloos muab lawv ua kevcai fij pub tshwjxeeb rau tus TSWV. Dua li ntawd, nws tseem ua kevcai daws txim rau lawv kom huv. Tom qab uas cov pejxeem ua txhua yam rau cov Levis raws li tej uas tus TSWV tau hais rau Mauxes lawm. Cov Levis thiaj tau mus ua haujlwm hauv lub Tsevntaub sib ntsib uas yog Aloos thiab nws cov tub ua cov saib. Tus TSWV hais rau Mauxes hais tias, “Txhua tus Levis uas hnubnyoog nees nkaum tsib xyoos yuav tsum tau ua haujlwm hauv tus TSWV lub Tsevntaub sib ntsib, thiab yuav tsum cia tus uas nws hnubnyoog tsib caug xyoo lawm mus so. Tom qab ntawd, nws yuav tsum tau pab nws cov kwvtij Levis ua lawv tej haujlwm hauv tus TSWV lub Tsevntaub sib ntsib, tiamsis nws tsis txhob ua ib yam haujlwm uas yog nws tib leeg ua xwb. Ntawm no yog lub luag haujlwm uas koj muab cob rau cov Levis ua.” Tus TSWV hais rau Mauxes tom tiaj suabpuam Xinais, thaum lub ib hlis xyoo ob tom qab uas cov Yixalayees khiav nram tebchaws Iziv los. Nws hais tias, Yog li ntawd, Mauxes thiaj kom cov pejxeem pib ua kevcai Hla Dhau, thiab lub ib hlis hnub kaum plaub thaum hnub poob qho, lawv thiaj li ua kevcai Hla Dhau nyob rau tom tiaj suabpuam Xinais. Cov pejxeem ua txhua yam raws li tus TSWV tau samhwm rau Mauxes lawm. Tiamsis muaj qee leej txivneej tseem tsis tau ua kevcai ntxuav kom huv, vim lawv mus tuav tej neeg tuag, hnub ntawd lawv thiaj tsis tau los ua kevcai Hla Dhau. Lawv mus cuag Mauxes thiab Aloos thiab hais tias, “Peb yog neeg tsis huv lawm, rau qhov peb tau mus tuav tej neeg tuag, tiamsis vim li cas thiaj txwv tsis pub peb nrog cov Yixalayees coj khoom mus fij rau tus TSWV?” Mauxes teb lawv hais tias, “Nej ua siab ntev tos mus txog thaum tus TSWV qhia rau kuv tso.” Tus TSWV hais rau Mauxes kom qhia rau cov Yixalayees hais tias, “Thaum nej leejtwg lossis nej tej xeebntxwv mus tuav tej neeg tuag ua rau tus ntawd tsis huv, lossis yog ib tug twg tseem tabtom mus kev deb lawm mas nws tseem ua tau kevcai Hla Dhau rau tus TSWV, tiamsis koj cia nws ua kevcai Hla Dhau rau ib lub hlis tom qab uas yog lub ob hlis hnub kaum plaub thaum hnub poob qho. Lawv mam ua kevcai noj tus yaj ntawd nrog cov ncuav tsis xyaw keeb thiab tej zaub uas iab. Tsis txhob tseg tej zaub mov cia txog tagkis sawv ntxov thiab tsis txhob muab tus tsiaj ntawd tej pobtxha ua lov li. Nco ntsoov ua kevcai Hla Dhau raws li tej kevcai. Tiamsis tus uas twb ua kevcai ntxuav huv thiab nws tsis mus kev deb, txhob txwm tsis tuaj ua kevcai Hla Dhau, yuav muab tus ntawd rho tawm hauv kuv haivneeg mus, vim lub sijhawm ntawd nws tsis tau coj khoom tuaj fij rau kuv raws li uas twb npaj tseg lawm. Nws yuav tsum ris nws lub txim. “Yog hais tias muaj tej neeg txawv tebchaws nrog nej nyob, thiab nws xav ua kevcai Hla Dhau rau tus TSWV, nws yuav tsum ua raws li tej kabke thiab tej kevcai. Muab tib txoj kevcai no rau txhua tus, tsis hais cov txawm teb txawm chaw lossis cov neeg txawv tebchaws.” Hnub uas lawv tsa tau lub Tsevntaub uas yog qhov chaw nrog tus TSWV sib ntsib lawm, muaj ib tauv huab los laum nkaus lub Tsevntaub sib ntsib ntawd. Hmo ntuj tauv huab ntawd cig lam lug li nplaim taws. Pheej ua li ntawd mus li; nruab hnub tauv huab roos rawv lub Tsevntaub sib ntsib thiab hmo ntuj tauv huab cig lam lug li nplaim taws. Thaum twg tauv huab ntawd tshem tawm mus nres rau qhov twg lawm, cov Yixalayees txawm tshais chaw mus rub lawv tej tsevntaub nyob rau qhov ntawd. Cov pejxeem txo lawv tej tsevntaub raws li tus TSWV samhwm, thiab lawv rov rub lawv tej tsevntaub raws li tus TSWV samhwm. Yog tauv huab nyob saum lub Tsevntaub sib ntsib ntev npaum li cas lawv nyob hauv lub yeej ntawd ntev npaum li ntawd xwb. Txawm yog tauv huab nyob ntev heev saum lub Tsevntaub sib ntsib los cov Yixalayees yeej mloog tus TSWV lus thiab lawv tsis tshais chaw mus nyob qhov twg li. Muaj tej zaum tauv huab tsuas nyob saum lub Tsevntaub sib ntsib ob peb hnub xwb; txawm li cas los xij, lawv tsuas nyob thiab tshais chaw raws li tus TSWV coj lawv kev xwb. Muaj tej zaum tauv huab nyob saum lub Tsevntaub sib ntsib ib hmos xwb, thaum sawv ntxov lawv tshais chaw thaum tauv huab ntawd tshem kiag lawm. Tsis hais tauv huab nyob ob hnub, ib hlis, ib xyoos lossis nyob ntev tshaj ntawd, tauv huab ntawd nyob ntev npaum li cas lawv yeej nyob ntev npaum li ntawd tsis tsiv tawm li; tiamsis thaum twg tauv huab tshem tawm lawm, lawv mam li tshais chaw thaum ntawd. Tus TSWV samhwm kom lawv txo lawv tej tsevntaub thiab kom lawv rub lawv tej tsevntaub. Lawv mloog tus TSWV tej tus uas nws hais rau Mauxes. Tus TSWV hais rau Mauxes hais tias, “Muab nyiaj ntaus ua ob lub xyu tau tshuab hu cov neeg tuaj txoos ua ke thiab kom sawvdaws rhuav lub yeej. Yog thaum twg tshuab ob lub suab xyu nrov ntev ntev, ces yog hu tagnrho cov pejxeem sib sau tuaj cuag koj rau ntawm tus TSWV lub Tsevntaub sib ntsib lub qhovrooj. Tiamsis yog thaum twg hnov tshuab ib lub suab xyu nrov ntev ntev, ces yog hu txhua xeem cov thawjcoj tuaj cuag koj. Thaum twg tshuab lub suab xyu nrov luv luv, ces yog txhib xeem uas nyob sab hnubtuaj kom cia li sawv kev tawm mus ua ntej. Thaum rov tshuab dua zaum ob, ces yog txhib kom xeem uas nyob sab qabteb sawv kev tawm mus. Yog tshuab lub suab uas nrov tsis ntev, ces yog tshuab txhib kom sawvdaws rhuav lub yeej, tiamsis yog tshuab hu kom cov pejxeem tuaj txoos ua ke, yuav tsum tshuab lub suab nrov ntev ntev. Cov uas tshuab xyu yuav tsum cia rau cov povthawj uas yog Aloos cov tub ua cov tshuab xwb. “Ntawm no yog txoj kabke tswjhwm uas yuav tsum coj mus ibtxhis tsis kawg. Thaum muaj kev tsov kev rog hauv nej lub tebchaws uas yog muaj yeebncuab tuaj tua nej, nej yuav tsum tshuab xyu uas yog lub suab sib tua. Kuv yog tus TSWV uas yog nej tus Vajtswv, kuv yuav pab nej thiab cawm kom nej dim ntawm nej cov yeebncuab. Hnub uas nej muaj kev zoo siab uas yog ua kevcai Hli Xiab thiab ua lwm yam kevcai uas nej teem tseg, nej cia li tshuab ob lub xyu thaum nej tabtom hlawv tej khoom fij thiab fij nej tej khoom ua kev sib raug zoo. Ces kuv yuav pab nej. Kuv yog tus TSWV uas yog nej tus Vajtswv.” Lub ob hlis hnub nees nkaum xyoo ob uas txwm nkaus rau thaum cov Yixalayees khiav nram tebchaws Iziv los, ces tauv huab uas roos rawv saum tus TSWV lub Tsevntaub sib ntsib txawm tshem lawm, thiab cov Yixalayees pib sawv kev tawm nram tiaj suabpuam Xinais los. Ces tauv huab los nres rau ntawm lub tiaj mojsab qhua Palas. Lawv pib sawv kev tawm mus thawj zaug raws li tus TSWV tau samhwm rau Mauxes, thiab txhua zaus uas lawv tshais chaw, yuav tsum cia xeem Yudas mus ua ntej; lawv mus ib pab quas ib pab uas yog Aminadas tus tub Nasoos ua tus thawjcoj. Zuag tus tub Nethanees ua tus coj xeem Ixakhas, thiab Heloos tus tub Eli-as ua tus coj xeem Xenpuloos. Ces mam muab lub Tsevntaub sib ntsib txo rau cov Nkesoos thiab cov Melalis kwv sawv kev tawm mus. Txuas ntawd mus yog cov uas nyob hauv qab xeem Lunpees tus chij sawv kev tawm mus, lawv mus ib pab quas ib pab uas yog Sede-us tus tub Elixus ua tus thawjcoj. Xulisadais tus tub Selumiyees ua tus coj xeem Xime-oos, thiab Deyees tus tub Eli-axas ua tus coj xeem Khas. Ces xeem Levis uas yog cuab Kauhas, mam kwv tej khoom dawbhuv sawv kev tawm mus. Thaum uas lawv mus txog rau ntawm lub yeej tshiab lawm, lawv yuav tsum rov tsa lub Tsevntaub sib ntsib dua. Pab uas sawv kev tuaj tom qab yog cov uas nyob hauv xeem Efalayees tus qab chij, lawv mus ib pab quas ib pab uas yog Anpihus tus tub Elisamas ua tus thawjcoj. Pedaxes tus tub Nkamaliyees ua tus coj xeem Manaxes, thiab Nkide-aunis tus tub Anpidas ua tus coj xeem Npeenyamees. Thaum kawg yog pab uas nyob hauv xeem Das tus qab chij sawv kev tawm mus ua cov thaiv tom qab txhua xeem huv tibsi, lawv mus ib pab quas ib pab uas yog Amisadais tus tub Ahi-exes ua tus thawjcoj. Aunkilas tus tub Pankiyees ua tus coj xeem Aseles, thiab Enas tus tub Ahilas ua tus coj xeem Nathalis. Ntawm no, yog hais txog zaj uas cov Yixalayees rhuav lub Tsevntaub sib ntsib thiab rov tsa dua, thiab lawv sawv kev ib pab quas ib pab tawm mus. Mauxes hais rau nws tus dablaug Haunpas uas yog Yethoos tus tub uas yog neeg Midias hais tias, “Tamsim no peb tabtom sawv kev mus rau thaj chaw uas tus TSWV tau coglus yuav muab pub rau peb. Nws tau coglus tseg lawm yuav pub kom cov Yixalayees muaj kev vammeej, koj cia li nrog peb mus, thiab peb yuav cia koj nrog peb nyob hauv peb lub tebchaws.” Haunpas teb hais tias, “Kuv tsis mus, kuv yuav rov qab mus nrog kuv haivneeg nyob hauv kuv lub tebchaws.” Mauxes hais rau Haunpas hais tias, “Thov koj tsis txhob tso peb tseg, koj twb paub tej chaw uas peb tsuam yeej nyob hauv tiaj suabpuam Xinais no, thiab koj twb yog tus qhia peb ntag. Yog koj nrog peb mus, peb yuav muab tej uas tus TSWV pub rau peb, pub rau koj thiab.” Thaum lawv taug kev tau peb hnub tom Xinais uas yog lub roob dawbhuv los. Cov uas kwv lub Phijxab uas ntim Vajtswv tej lus cog tseg mus ua lawv ntej thiab nrhiav chaw rau lawv tsuam yeej so. Txhua zaus uas lawv tshais chaw, tus TSWV tauv huab yeej roos rawv lawv tas hnub. Yog thaum twg cov neeg uas kwv lub Phijxab uas ntim Vajtswv tej lus cog tseg sawv kev mus, Mauxes hais tias, “Tus TSWV, koj cia li sawv; thov ua kom koj cov yeebncuab tawg ri sua mus thiab muab cov neeg uas ntxub koj ntiab khiav tawm mus!” Thiab yog thaum twg cov neeg uas kwv lub phijxab nres lawm, Mauxes yuav tsum hais tias, “Tus TSWV, thov koj tig los cuag haivneeg Yixalayees uas coob heev suav tsis txheeb no dua.” Nimno cov pejxeem yws lawv tej kev txomnyem rau tus TSWV. Thaum tus TSWV hnov lawv tej lus yws, nws chim rau lawv heev nws thiaj tso hluavtaws los hlawv lawv, thiab lawv tej tsev kub hnyiab tas ib tog yeej. Cov pejxeem thiaj quaj mus thov Mauxes pab; Mauxes thiaj thov tus TSWV ces hluavtaws txawm tuag tas lawm. Yog li ntawd, thiaj muab qhov chaw ntawd tis npe hu uas Tanpelas, rau qhov tus TSWV tso hluavtaws los kub lawv. Muaj cov neeg txawv tebchaws nrog cov Yixalayees taug kev los. Lawv tshaib thiab nqhis nqaij heev, cov Yixalayees txawm yws hais tias, “Kheev lam yog peb muaj nqaij noj xwb lauj! Thaum peb nyob nram tebchaws Iziv peb xav muab tagnrho tej ntses hauv dej los ua zaub noj los yeej tau, peb yeej tsis tau them nyiaj li. Peb puas nco qab hais tias, tej dib ntsuab, dib liab, tej dos raj, dos ntug hauvpaus thiab tej qij peb puavleej muaj huv tibsi? Tiamsis nimno peb tsis muaj zog hlo li lawm, rau qhov peb tsis muaj ib lub mov noj, tsuas yog niaj hnub noj cov manas no xwb!” (Manas zoo li cov noob zaub txhwb uas daj lis. Mauxes pom cov pejxeem tawm tuaj sawv ua tej pab tej pawg yws zom zaws ntawm lawv tej qhovrooj tsevntaub. Nws nyuaj siab kawg li, rau qhov tus TSWV chim heev rau lawv, thiab nws hais rau tus TSWV hais tias, “Vim li cas koj thiaj ua nruj ua tsiv rau kuv? Vim li cas koj tsis txaus siab rau kuv? Vim li cas koj thiaj tsa kuv ua tus saib cov neeg no? Kuv tsis yog tus uas tsim lawv lossis tso lawv los yug ua neeg los sav! Vim li cas koj thiaj kom kuv tu lawv thiab muab lawv puag rau hauv xubntiag ib yam li lawv tseem yog menyuam mos, thiab kom kuv coj lawv mus kom txog lub tebchaws uas koj tau coglus tseg rau lawv cov yawgkoob lawm? Kuv yuav mus nrhiav nqaij qhov twg thiaj yuav txaus cov neeg no noj? Lawv pheej kom kuv muab nqaij rau lawv noj. Cov neeg no ua lub nra hnyav heev rau kuv, kuv nres tsis taus lawv lawm. Yog koj pheej yuav sim kuv li no, thov koj cia li muab kuv tua povtseg tamsim no, kom kuv thiaj tsis tau tiv koj tej kev nruj tsiv no ntxiv lawm.” Tus TSWV hais rau Mauxes hais tias, “Hu cov Yixalayees xya caum leej txivneej tuaj cuag kuv, lawv yog cov uas koj yeej paub hais tias yuav ua taus thawjcoj coj cov pejxeem thiab ibtxwm tswjhwm lawv. Kom lawv tuaj rau ntawd kuv lub Tsevntaub sib ntsib, thiab hais kom lawv nrog koj sawv rau ntawd. Kuv yuav los nrog koj tham, thiab kuv yuav muab tus ntsujplig uas kuv muab rau koj faib rau lawv. Ces lawv thiaj pab tau koj ua haujlwm rau cov neeg no, thiab tsis txhob cia koj ib leeg ua xwb. Koj cia li qhia rau cov pejxeem hais tias, ‘Ua kevcai ntxuav kom nej huv npaj rau tagkis; nej thiaj yuav tau nqaij noj. Tus TSWV hnov nej tej suab yws hais tias xav tau nqaij noj thiab thaum nej nyob nram tebchaws Iziv, nej yeej tau zoo dua li los nyob ntawm no. Nimno tus TSWV yuav muab nqaij rau nej, thiab nej yuav tau nqaij noj. Nej yuav muaj nqaij noj tsis yog muaj noj ib ob hnub lossis tsib rau hnub lossis kaum hnub lossis nees nkaum hnub xwb, tiamsis nej yuav muaj noj tsheej hli, mus txog thaum uas nqaij tawm hauv nej qhovntswg los, thiab mus txog thaum uas nej dhuav tej nqaij ntawd. Tej no yuav tshwmsim tuaj, rau qhov nej tso tus TSWV uas nrog nej nyob tseg thiab tau quaj rau nws hais tias. Vim li cas peb thiaj tawm nram tebchaws Iziv los?’ ” Mauxes hais rau tus TSWV hais tias, “Cov neeg uas kuv coj los no muaj rau pua txhiab leej, koj hais tias yuav muab nqaij rau lawv noj kom txaus tsheej hli no los? Muab nyuj thiab muab yaj qhov twg los tua thiaj txaus lawv noj? Muab tagnrho cov ntses hauv hiavtxwv los tua xyov puas txaus lawv noj?” Tus TSWV teb hais tias, “Puas muaj ciam rau kuv lub hwjchim? Zaum no koj yuav pom hais tias tej lus uas kuv hais no saib muaj tseeb lossis tsis tseeb.” Mauxes thiaj tawm mus qhia rau cov Yixalayees raws li tus TSWV hais. Nws hu tau xya caum leej txivneej tuaj thiab coj lawv mus sawv ncig lub Tsevntaub sib ntsib. Tus TSWV los rau hauv tauv huab thiab hais lus hauv tauv huab tuaj rau Mauxes. Nws thiaj muab tus ntsujplig uas nws pub rau Mauxes, faib rau xya caum tus thawjcoj ntawd. Thaum tus ntsujplig ntawd lub hwjchim nkag rau lawv lawm, lawv txawm qw ib yam li tus cev Vajtswv lus, tiamsis tsis ntev pestsawg. Xya caum leej thawjcoj ntawd, muaj ob tug uas npe hu ua Edas thiab Medas, nkawd nyob hauv yeej xwb, tsis tau mus rau tom lub Tsevntaub sib ntsib. Nkawd nyob hauv yeej xwb los tus ntsujplig lub hwjchim los rau nkawd, thiab nkawd txawm pib qw ib yam li cov cev Vajtswv lus. Muaj ib tug tub hluas thiaj mus piav tej uas Edas thiab Medas ua ntawd rau Mauxes mloog. Noos tus tub Yausuas uas ibtxwm ua tus pab Mauxes thaum tseem yog tub hluas los, thiaj hais rau Mauxes hais tias, “Tus tswv, koj cia li mus cheem kom nkawd tsum!” Mauxes teb hais tias, “Koj pab kuv mob siab thiab los? Kuv yeej xav kom tus TSWV pub nws tus ntsujplig rau nws haivneeg txhua tus huv tibsi, kom lawv hais tau li cov cev Vajtswv lus hais ntag!” Ces Mauxes thiab cov Yixalayees xya caum leej thawjcoj txawm rov mus rau hauv tsev lawm. Tamsim ntawd tus TSWV txawm tso cua ntsawj noog ncuab ya ua npoj ntws nram hiavtxwv siab li ob tshim saum npoo av los. Cov ncuab ntawd ya los tsaws ua npoj ntws rau ntawm ntug yeej, thiab nyob ua poj ntws ib ibncig lub yeej mus tsheej hnub ke. Cov pejxeem sawvdaws tawm mus ntes ncuab, hnub ntawd ib hnub, hmo ntawd ib hmos, thiab hnub tom qab ib hnub; tsis muaj ib tug uas ntes tau tsawg tshaj tsib caug tawb. Ces lawv nqa los tseev thiab coj mus ziab raws ntug yeej cia ua nqaij qhuav. Thaum lawv tseem muaj nqaij noj ua npuav ua npo, tus TSWV chim rau cov pejxeem heev, nws thiaj tso kab mob kis rau lawv. Lawv thiaj tis npe rau qhov chaw ntawd hu ua Kinpalaus Hatavas (lossis “Cov neeg tshaib nqhis tej Ntxa”), rau qhov lawv faus cov neeg nqhis nqaij tuag rau thaj chaw ntawd. Cov pejxeem sawvdaws thiaj khiav ntawm Kinpalus Hata-avas mus rau ntawm Haxelaus thiab lawv mus tsuam yeej nyob rau ntawd. Mauxes mus yuav haivneeg Kuses ib tus ntxhais los ua pojniam, mas Aloos thiab Milias nkawd thuam Mauxes rau qhov nws yuav tus pojniam ntawd. Nkawd hais tias, “Tus TSWV tsuas cevlus rau Mauxes tib leeg xwb los? Nws txawm tsis cevlus rau wb li los?” Nkawd hais li cas los tus TSWV yeej hnov huv tibsi lawm. ( Mauxes yog ib tug neeg txo hwjchim heev, nws txo hwjchim tshaj plaws tej neeg uas nyob hauv qab ntuj no huv tibsi.) Tamsim ntawd tus TSWV txawm hais rau Mauxes, Aloos thiab Milias hais tias, “Kuv xav kom nej peb tug ko cia li tawm hauv lub Tsevntaub sib ntsib uas yog kuv qhov chaw sib ntsib mus.” Lawv txawm tawm los, thiab tus TSWV nyob hauv tauv huab, nws sawv ntawm qhovrooj Tsevntaub sib ntsib hu hais tias, “Aloos! Milias!” Nkawd txawm txav zog mus sawv tom hauv ntej, thiab tus TSWV hais tias, “Nimno, neb cia li mloog tej lus uas kuv hais! Thaum muaj ib tug cev Vajtswv lus nrog nej nyob, kuv qhia kuv rau nws pom hauv yogtoog thiab kuv hais rau nws hauv npau suav. Tiamsis thaum kuv nrog kuv tus tubtxib Mauxes tham, kuv tsis ua li ntawd; kuv tsa nws ua tus kav tagnrho kuv haivneeg Yixalayees. Yog li ntawd, kuv thiaj nrog nws tham tim ntsej tim muag meej nriav, tsis yog ua npau suav xwb; nws yeej pom kuv tus duab lawm! Vim li cas neb yuav hais lus saib tsis taus kuv tus tubtxib Mauxes ua luaj?” Tus TSWV chim heev rau nkawd; thiab nws txawm ncaim nkawd mus lawm, tauv huab txawm tshem ntawm lub Tsevntaub sib ntsib mus lawm thiab. Tamsim ntawd Milias lub cev cia li mob ruas thoob plaws thiab dawb paug ib yam li te. Thaum Aloos tig saib Milias thiab pom nws mob ruas thoob plaws ibce lawm, Aloos hais rau Mauxes hais tias, “Thov lauj, kuv tus tswv, thov tsis txhob rau txim hnyav npaum li no rau wb vim wb tau ua tej yam ruam li no! Thov tsis txhob cia nws zoo li tus menyuam uas yug tau hauv nws niam plab los twb tuag thiab ib nrab nqaij lwj tas lawm.” Yog li ntawd, Mauxes thiaj quaj thov tus TSWV hais tias, “Vajtswv, thov koj kho Milias lauj!” Tus TSWV teb hais tias, “Yog nws txiv nto qaubncaug rau nws lub ntsejmuag, nws yuav ris kev txajmuag xya hnub. Cia li ntiab kom nws tawm hauv lub yeej no mus nyob sab nraud xya hnub, thiab tom qab ntawd mam coj nws rov los rau hauv lub yeej.” Milias raug ntiab tawm mus rau sab nraum ntug yeej xya hnub, cov neeg thiaj tsis tau sawv kev mus txog thaum uas coj Milias rov los rau hauv lub yeej. Ces lawv mam li sawv kev tawm hauv Haxelaus mus tsuam yeej nyob rau ntawm lub tiaj mojsab qhua Palas. Tus TSWV hais rau Mauxes hais tias, “Xaiv kaum ob tug thawjcoj ntawd ib xeem ib tug thiab tso lawv mus soj lub tebchaws Kana-as uas kuv twb muab pub rau cov Yixalayees lawm.” Cov neeg uas muaj npe saum no yog cov uas Mauxes tso mus soj lub tebchaws Kana-as. Nws tis dua ib lub npe rau Noos tus tub Hauseyas hu ua Yausuas. Thaum Mauxes txib lawv mus soj lub tebchaws nws hais rau lawv hais tias, “Nej cia li mus rau tim tebchaws Kana-as yav qabteb, thiab mus soj txhua nrho hauv lub tebchaws thiab saum tej roob. Mus xyuas saib lub tebchaws ntawd zoo li cas, muaj neeg coob npaum li cas nyob rau hauv, thiab lawv muaj zog npaum li cas. Thiab xyuas saib lub tebchaws ntawd zoo lossis phem, thiab cov neeg ntawd nyob ua zej ua zos lossis nyob hauv tej nroog uas xov ntsa yeej thaiv khov kho. Nej xyuas saib av puas zoo qoob lossis tsis zoo thiab puas tshuav havzoov ntau los tsis tshuav. Thiab nco ntsoov de qee yam txiv nqa los rau sawvdaws saib.” (Lub caij ntawd yog lub caij uas txiv hmab tabtom siav.) Yog li ntawd, lawv thiaj mus rau tid thiab soj lub tebchaws txij ntua ntawm tiaj mojsab qhua Xees mus txhua nrho sab qabteb mus rau pem Lehaus uas nyob ze lub Dawm Hamas sab qaumteb. Lawv xub mus rau sab qabteb thiab los txog rau hauv lub nroog Henploos, yog lub nroog uas cov Ahimas, cov Sesais thiab cov Talemais nyob. Cov neeg no yog cov Anakees uas loj siab heev tej xeebntxwv. (Lub nroog Henploos luag twb xub ua xya xyoo ua ntej mam li ua lub nroog Xau-as nram tebchaws Iziv.) Lawv los txog hauv lub Hav Esekaus, lawv txiav tau ib co ceg txiv hmab uas txi txiv ncw heev thiab hnyav kawg li, lawv muab pas ntxig rau txaus ob tug txivneej kwv los. Thiab lawv tseem de tau txiv ntsiavkws thiab txiv ncuavpias nqa los huv tibsi. ( Lawv thiaj tis npe rau qhov chaw ntawd hu ua lub Hav Esekaus, rau qhov cov Yixalayees txiav tau txiv hmab ncw heev qhov ntawd los.) Tom qab uas mus soj lub tebchaws tau plaub caug hnub lawm, cov mus soj tebchaws mam rov los txog. Lawv los cuag Mauxes, Aloos thiab cov pejxeem Yixalayees ntawm Kades hauv lub tiaj mojsab qhua Palas. Lawv piav tej uas lawv tau mus pom, thiab muab tej txiv hmab uas lawv de tau los rau cov pejxeem sawvdaws saib. Lawv hais rau Mauxes hais tias, “Peb tau mus soj lub tebchaws uas koj txib peb mus. Lub tebchaws ntawd av rog thiab zoo qoob heev; thiab tej txiv hmab no yog de hauv lub tebchaws ntawd los ntag. Tiamsis cov neeg uas nyob tid muaj zog heev, lawv tej nroog loj dav thiab muaj ntsa yeej thaiv zoo heev. Thiab peb tseem pom cov neeg uas loj siab cov xeebntxwv nyob tid huv tibsi. Cov Amalej nyob sab qabteb, cov Hitis, cov Yenpus thiab cov Amaules nyob pem tej roob, cov Kana-as nyob raws ntug hiavtxwv Meditelanes, thiab nyob raws tus ntug dej Yauladees.” Kalej txwv cov pejxeem uas pheej yws Mauxes kom lawv ua twjywm, thiab nws hais tias, “Peb cia li mus txeeb kom tau lub tebchaws ntawd; peb yeej muaj zog txaus uas yuav tua yeej lub tebchaws ntawd xwb.” Tiamsis cov neeg uas nrog Kalej mus soj lub tebchaws hais tias, “Peb tseem tsis tau muaj zog txaus yuav mus tua yeej lawv; cov neeg uas nyob tid muaj zog tshaj peb.” Yog li ntawd, lawv thiaj muab tej lus dag nthuav qhia rau cov Yixalayees hais txog lub tebchaws uas lawv mus soj los ntawd. Lawv hais tias, “Lub tebchaws ntawd ua qoob twb tsis txaus cov neeg uas nyob hauv noj. Cov neeg uas peb mus pom puavleej yog cov neeg uas loj siab heev xwb, dua li ntawd, peb tseem pom Anaj cov xeebntxwv uas loj thiab siab tshaj plaws nyob hauv lub tebchaws ntawd thiab. Peb saib peb rau lawv, mas peb me heev zoo li cov nyuag kooj xwb, yuav ua li cas muab peb piv tau rau lawv.” Hmo ntawd cov pejxeem sawvdaws tsa suab hlo quaj nrov heev ib hmos kaj ntug plaws. Tagnrho cov Yixalayees tuaj yws Mauxes thiab Aloos hais tias, “Zoo dua cia peb tuag nram tebchaws Iziv lossis tuag ntawm tiaj mojsab qhua no! Vim li cas tus TSWV thiaj coj peb mus rau hauv lub tebchaws ntawd? Peb yuav mus raug luag tua rau hauv tshavrog, thiab luag yuav ntes peb tej pojniam menyuam mus. Kuj zoo dua cia peb rov qab mus nram tebchaws Iziv!” Vim li no lawv thiaj sib tham hais tias, “Peb cia li xaiv ib tug ua thawj, coj peb rov qab mus nyob nram tebchaws Iziv!” Ces Mauxes thiab Aloos cia li txhos caug ntua khoov ti nkaus rau hauv av tabmeeg cov pejxeem sawvdaws. Noos tus tub Yausuas thiab Yefunes tus tub Kalej yog ob tug uas nrog lawv mus soj lub tebchaws. Nkawd nyuaj siab heev, nkawd thiaj dua rhe nkawd ob lub tsho, thiab hais rau cov pejxeem hais tias, “Lub tebchaws uas peb mus soj los yog ib lub uas zoo kawg nkaus li. Yog tus TSWV txaus siab rau peb, nws yeej yuav coj peb mus nyob hauv lub tebchaws ntawd thiab nws yuav muab lub tebchaws uas av rog thiab zoo qoob pub rau peb. Tsis txhob ntxeev siab rau tus TSWV, thiab tsis txhob ntshai cov neeg uas nyob tid. Peb yuav tua yeej lawv yoojyim kawg li. Tus TSWV tuaj peb tog thiab ua rau tej vajtswv uas tsomkwm lawv swb lawm; mas tsis txhob ntshai hlo li.” Cov pejxeem tuavhauv yuav muab pobzeb ntaus kom nkawd tuag, tiamsis tamsim ntawd tus TSWV lub tshwjchim txawm ci ntsa iab tshwm plaws saum tus TSWV lub Tsevntaub sib ntsib rau cov Yixalayees pom. Tus TSWV hais rau Mauxes hais tias, “Cov neeg no tseem yuav tso kuv tseg ntev npaum li cas thiab? Kuv twb ua tej txujci tseemceeb ntau yam rau lawv pom lawm. Lawv tseem yuav tsis cia siab rau kuv mus txog thaum twg? Kuv yuav tso kab mob phem los rau lawv kom lawv puastsuaj tas, tiamsis kuv yuav tsa koj thiab koj cov xeebntxwv ua haivneeg uas huamvam coob thiab muaj zog tshaj lawv.” Tiamsis Mauxes hais rau tus TSWV hais tias, “Tus TSWV, twb yog koj lub hwjchim coj cov neeg no tawm nram tebchaws Iziv los ntag. Thaum cov neeg Iziv hnov tej uas koj ua rau koj haivneeg, lawv yuav piav tej ntawd rau cov neeg uas nyob ibncig cheebtsam no mloog. Tej neeg yeej hnov ntsoov hais tias, koj uas yog tus TSWV nrog nraim peb nyob, thaum koj tauv huab nres ncaj saum peb, peb pom koj tim ntsej tim muag, thiab koj yog tus coj peb kev, nruab hnub koj nyob hauv tauv huab, hmo ntuj koj nyob hauv tus nplaim hluavtaws. Nimno yog koj tua tagnrho koj haivneeg povtseg, tej tebchaws uas hnov koj lub koob meej yuav thuam hais tias, koj muab koj haivneeg tua tuag tas rau ntawm tiaj mojsab qhua no twb yog vim koj tsis muaj peevxwm coj tau lawv mus txog hauv lub tebchaws uas koj coglus tseg yuav muab rau lawv nyob. Yog li ntawd, tus TSWV, nimno thov koj qhia koj lub hwjchim rau peb thiab ua raws li thaum koj tau coglus tseg hais tias, ‘Kuv yog tus TSWV, tus uas tsis chim sai, kuv muaj lub siab hlub loj kawg nkaus thiab zam txim rau tus uas ua txhaum thiab ntxeev siab rau kuv. Tiamsis kuv yuav rau txim rau lawv tej xeebntxwv mus txog peb plaub tiam neeg, vim lawv niam lawv txiv tej kev txhaum.’ Nimno tus TSWV, raws li koj txojkev hlub loj kawg nkaus uas tsis hloov li, kuv thov koj zam txim rau cov neeg no ib yam li koj ibtxwm zam txim rau lawv txij thaum koj coj lawv tawm nram tebchaws Iziv los txog niaj hnub no.” Tus TSWV teb hais tias, “Kuv yuav zam txim rau lawv raws li koj tej lus thov. Kuv yog tus uas muaj sia nyob, thiab kuv lub hwjchim tseem tswj lub ntiajteb no, yog li ntawd, kuv coglus rau koj hais tias, kuv tsis pub cov neeg no ib tug twg mus nyob hauv lub tebchaws ntawd li. Lawv puavleej pom kuv lub tshwjchim uas ci ntsa iab thiab tej txujci uas kuv ua nram tebchaws Iziv thiab tom tiaj mojsab qhua lawm, tiamsis lawv sim kuv siab txog kaum zaus saib kuv puas ua siab ntev, thiab lawv tseem tsis kam mloog kuv lus qees. Lawv yuav tsis tau mus pom lub tebchaws uas kuv tau coglus rau lawv cov yawgkoob lawm. Cov neeg uas ntxeev siab rau kuv tsis muaj ib tug yuav tau mus nyob hauv lub tebchaws ntawd li. Tiamsis vim kuv tus tubtxib Kalej tsis xav li lwm tus thiab nws muab siab npuab kuv heev, kuv yuav coj nws mus nyob hauv lub tebchaws uas nws mus soj ntawd, thiab nws cov xeebntxwv yuav tau lub tebchaws ntawd ua lawv tug, yog tej hav uas tamsim no cov Amalej thiab cov Kana-as nyob ntag. Tagkis cia li tig rov qab thiab sawv kev mus rau tom tiaj mojsab qhua, taug txojkev uas mus rau tom Hiavtxwv Akanpas.” Tus TSWV hais rau Mauxes thiab Aloos hais tias, “Cov neeg siab phem no, lawv tseem yuav yws kuv mus txog thaum twg thiab? Kuv dhuav cov neeg no tej lus yws heev lawm! Nimno neb cia li muab cov lus no teb rau lawv hais tias, ‘Kuv coglus hais tias, kuv yog tus uas muaj sia nyob, kuv yuav ua rau nej ib yam li nej tau yws ntawd. Kuv yog tus TSWV uas hais tej lus no. Nej yuav tuag pawglug rau hauv lub tiaj mojsab qhua no. Vim nej tau yws kuv heev, mas cov uas hnubnyoog nees nkaum xyoo rov saud yuav tsis muaj ib tug tau mus nyob hauv lub tebchaws ntawd li. Txawm yog kuv twb coglus tseg lawm hais tias, kuv yuav coj nej mus nyob hauv lub tebchaws ntawd los kuv yuav tsis pub nej ib tug twg mus nyob li, kuv tsuas pub Kalej thiab Yausuas nkawd mus nyob xwb. Nej pheej hais tias nyob tsam luag ntes nej tej menyuam, tiamsis kuv yuav coj lawv mus rau hauv lub tebchaws uas nej tsis kam mus, thiab lub tebchaws ntawd yuav yog lawv tej vajtse nyob. Nej yuav tuag tas rau hauv lub tiaj mojsab qhua no. Nej tej menyuam yuav ncig mus ncig los tiv kev txomnyem plaub caug xyoo rau ntawm tiaj mojsab no, mus txog hnub uas nej tuag tas, vim nej tsis muab siab npuab kuv. Nej yuav tau ris nej lub txim tiv kev txomnyem plaub caug xyoo, ib xyoos twg yog ib hnub ntawm plaub caug hnub uas nej mus soj lub tebchaws. Nej thiaj yuav paub hais tias txojkev txomnyem uas kuv cia nej raug zoo li cas tiag. Kuv qhia tseeb rau nej hais tias, kuv yuav ua li no rau nej cov uas yog neeg siab phem uas pheej sib sau tsheej pab tuaj tawmtsam kuv. Ntawm no lauj, yog lub tiaj suabpuam uas nej yuav tuag tas rau hauv. Kuv yog tus TSWV uas hais tej lus no.’ ” Twb yog cov neeg uas Mauxes tau tso mus soj lub tebchaws ntawd, coj tej lus dag los piav qhia rau cov Yixalayees, lawv thiaj yws tus TSWV. Cov neeg no tau ris lub txim uas lawv dag ntawd, tus TSWV thiaj tso tej kab mob uas phem heev los rau lawv, lawv thiaj tuag tas lawm. Kaum ob tug txivneej uas mus soj lub tebchaws ntawd, tsuas tshuav Yausuas thiab Kalej thiaj tsis tuag xwb, dua li cov puavleej tuag tas huv tibsi lawm. Thaum Mauxes qhia tej lus uas tus TSWV hais no rau cov Yixalayees tas lawm, lawv nyuaj siab thiab tu siab kawg li. Tagkis sawv ntxov cov Yixalayees txawm pib mus txeeb saum tej ncov roob, mas lawv hais tias, “Nimno peb txaus siab yuav mus nyob qhov chaw uas tus TSWV qhia peb. Peb lees tej kev txhaum uas peb tau ua.” Tiamsis Mauxes hais tias, “Vim li cas nej thiaj tsis mloog tus TSWV lus? Nej yuav mus tua tsis yeej ib zaug li! Nej tsis txhob mus. Tus TSWV twb tsis nrog nej nyob lawm, nej cov yeebncuab yuav tua yeej nej. Thaum nej mus ntsib cov Amalej thiab cov Kana-as, nej yuav raug tua tuag tas rau hauv tshavrog; vim nej tau tig rov qab tsis kam nrog tus TSWV, nws thiaj tsis nrog nej nyob lawm.” Txawm yog Mauxes thiab cov neeg uas kwv lub Phijxab uas ntim Vajtswv tej lus cog tseg, tsis tawm hauv yeej mus los lawv cia li nce mus rau pem tej roob li lawm. Cov Amalej thiab cov Kana-as uas nyob ped thiaj tua yeej lawv, thiab raws lawv deb heev mus txog ntua nram lub nroog Haulamas. Tus TSWV hais rau Mauxes hais tias, koj qhia tej kevcai no rau cov Yixalayees, thaum nej mus txog hauv lub tebchaws uas kuv muab pub rau nej lawm, nej cab ib tug heev nyuj, ib tug laug yaj, ib tug thav yaj lossis ib tug laug tshis mus tua hlawv fij rau tus TSWV, fij theej txhoj lossis fij raws li nej coglus tseg lawm lossis fij ntawm lub siab dawb paug lossis fij ua rooj noj rooj haus raws li teem tseg; tej pa khoom fij ntawd yuav tsw qab ntxiag ua rau tus TSWV txaus siab. Thaum muab tus laug yaj fij, mas yuav tsum muab plaub choj hmoov nplej uas ntse xyaw peb khob roj txiv ntoo coj mus fij, thiab muab peb khob cawv txiv hmab mus fij nrog. Tej pa khoom fij no yuav tsw qab ntxiag txaus tus TSWV siab heev. Thaum muab tus heev nyuj tua hlawv fij rau tus TSWV lossis fij raws li nej tau coglus tseg lossis fij ua kev sib raug zoo, yuav tsum muab rau choj hmoov nplej ntse xyaw plaub khob roj txiv ntoo, thiab muab plaub khob cawv txiv hmab coj mus fij nrog. Tej pa khoom fij no yuav tsw qab ntxiag ua rau tus TSWV txaus siab. Yuav tsum muab li ntawd mus fij nrog txhua tus heev nyuj, txhua tus laug yaj lossis txhua tus laug tshis. Thaum uas nej coj tsiaj mus fij tshaj ib tug rov rau saud lawm, yuav tsum ntxiv tej khoom uas fij nrog ntawd kom ntau sib npaug zos raws li tej feem ntawd. Txhua xeem Yixalayees yuav tsum tau ua li no thaum nws coj khoom mus fij, kom tej pa tsw qab ntxiag ua rau tus TSWV txaus siab. Thiab cov neeg txawv tebchaws uas nrog nej nyob, tsis hais nyob ib ntus xwb lossis nyob mus li, txhua zaus uas coj tej khoom mus fij kom tsw qab ntxiag rau tus TSWV, nws yuav tsum ua kom raws li txoj kevcai uas nej ua. Tsuas muaj tib txoj kabke no rau nej thiab rau cov neeg txawv tebchaws uas nrog nej nyob ntawd coj mus ibtxhis li xwb. Nej ua li cas kom lawv ua li ntawd pub rau tus TSWV; muab tib txoj kevcai thiab kev tswjhwm rau nej thiab lawv ib yam nkaus. Tus TSWV hais rau Mauxes kom cia li muab tej kevcai no qhia rau cov Yixalayees coj, thaum lawv mus nyob hauv lub tebchaws uas nws muab rau lawv: Thaum lawv ua tau tej qoobloo los noj, lawv yuav tsum muab ibtxhia fij rau tus TSWV. Thaum nej sau tau nplej tshiab, nej muab thawj cov hmoov nplej los puab ua thawj lub ncuav fij tshwjxeeb rau tus TSWV. Qhov no nej coj mus fij tshwjxeeb ib yam li tej nplej tshiab uas nej nyuam qhuav muab tau los. Nej yuav tsum muab tej ncuav uas nej cub siav lawm mus fij rau tus TSWV, thiab fij li no mus ibtxhis. Tiamsis yog nej yuam kev ua txhaum tej kevcai uas tus TSWV muab cob rau Mauxes, yog tej kevcai tswjhwm nej ib tiam dhau ib tiam, txij hnub uas tus TSWV muab cob rau Mauxes kom qhia rau nej, yog qhov txhaum ntawd tsis yog txhob txwm ua, vim tsis paub xwb, ces cov pejxeem yuav tsum cab ib tug heev nyuj mus tua hlawv fij nrog cov hmoov nplej thiab cawv txiv hmab, kom tej pa tsw qab ntxiag ua rau tus TSWV txaus siab, thiab cab ib tus laug tshis mus tua fij theej txhoj. Tus povthawj yuav tsum tau ua kevcai ntxuav rau cov pejxeem sawvdaws, tus TSWV thiaj yuav zam lawv lub txim, vim tsis yog lawv txhob txwm ua, thiab lawv nqa lawv tej khoom fij daws txim mus ua zaub mov fij rau tus TSWV. Tus TSWV yuav zam txim rau cov Yixalayees thiab cov neeg txawv tebchaws uas nrog lawv nyob, vim lawv txhua tus puavleej ua txhaum. Yog muaj leejtwg ua txhaum uas tsis yog txhob txwm ua, nws yuav tsum cab ib tug thav tshis uas hnubnyoog ib xyoos mus tua fij daws txim. Tus povthawj ua kevcai ntxuav tus neeg uas tsis yog txhob txwm ua txhaum ntawd lub txim tabmeeg tus TSWV ntawm lub thaj, tus TSWV thiaj yuav zam nws lub txim. Muab tib txoj kevcai no rau txhua tus uas tsis yog txhob txwm ua txhaum, tsis hais cov Yixalayees lossis cov neeg txawv tebchaws. Yog leejtwg twb paub lawm, tiamsis nws txhob txwm ua txhaum uas yog saib tsis taus tus TSWV; tsis hais cov Yixalayees lossis cov neeg txawv tebchaws, yuav tsum muab nws tua povtseg. Rau qhov nws tsis mloog tus TSWV tej lus thiab txhob txwm rhuav tus TSWV tej lus samhwm. Nws yuav tau ris lub txim tuag ntawd. Thaum cov Yixalayees tseem nyob nram tiaj suabpuam, muaj ib zaug lawv pom ib tug neeg mus khaws taws hnub Xanpataus. Cov neeg uas pom tus mus khaws taws ntawd, lawv coj nws mus cuag Mauxes, Aloos thiab cov Yixalayees sawvdaws, lawv kav nws nruj heev, vim lawv tseem tsis tau paub hais tias yuav ua li cas rau nws. Ces tus TSWV hais rau Mauxes hais tias, “Yuav tsum muab tus neeg no tua povtseg; cov pejxeem cia li coj nws mus rau nraum ntug yeej, thiab muab pobzeb ntaus kom nws tuag.” Yog li ntawd, tagnrho cov pejxeem sawvdaws thiaj coj tus ntawd tawm mus rau sab nraum ntug yeej, thiab muab pobzeb ntaus nws tuag raws li tus TSWV tau samhwm. Tus TSWV hais rau Mauxes kom hais rau cov Yixalayees hais tias: “Nej ntxhoo ib co paj kab lws dai rau ntawm nej cov tsho ntev tej kaum tsho, thiab muab ib txoj xov xiav los xaws rau txhua lub kaum. Nej yuav tsum ua li no mus ibtxhis li. Cov paj kab lws ntawd yuav ua lub cim rau nej nco ntsoov. Thaum nej pom cov paj kab lws ntawd, yuav ua rau nej nco ntsoov kuv tej lus samhwm thiab ua raws li kuv tej lus; nej thiaj tsis khiav ntawm kuv mus thiab tsis mus ua raws li nej lub siab nyiam. Cov paj kab lws ntawd yuav ua ib qho rau nej nco ntsoov ua raws li kuv tej lus samhwm, thiab nej yog kuv tug lawm tiag. Kuv yog tus TSWV uas yog nej tus Vajtswv; kuv coj nej khiav nram tebchaws Iziv los kom kuv tau ua nej tus Vajtswv. Kuv yog tus TSWV.” Lawv tuaj sib sau tim ntsej tim muag rau ntawm Mauxes thiab Aloos, thiab hais rau nkawd hais tias, “Neb tau ua dhau kevcai lawm! Tagnrho cov pejxeem sawvdaws puavleej yog tus TSWV tug, thiab tus TSWV yeej nrog peb sawvdaws nyob huv tibsi. Vim li cas neb tsav neb lub hwjchim siab tshaj tus TSWV haivneeg lawm thiab?” Thaum Mauxes hnov tej lus ntawd, nws txawm tso cev da rau hauv av thiab thov tus TSWV. Mauxes hais rau Kaulas thiab nws cov phoojywg hais tias, “Tagkis sawv ntxov tus TSWV mam qhia saib peb leejtwg yog tus TSWV tug thiab peb leejtwg yog tus uas tus TSWV xaiv; nws yuav cia tus uas yog nws tug, thiab tus uas nws xaiv mus cuag nws rau ntawm lub thaj. Kaulas, koj thiab tagnrho koj cov phoojywg ua li no: tagkis nej cia li mus muab cov laujkaub thiab muab ncaig taws thiab hmoov tshuaj tsw qab tso rau hauv cov laujkaub coj mus tso tabmeeg tus TSWV. Tus neeg uas tus TSWV xaiv nws yuav yog tus dawbhuv. Nej cov Levis ko yog cov uas ua dhau cai ntag!” Mauxes hais rau Kaulas ntxiv hais tias, “Nej cov Levis ko cia li ua tib zoo mloog! Nej xav hais tias, qhov uas cov Yixalayees tus Vajtswv tau tsa nej los ua ib pab uas nyob ib cag ntawm cov pejxeem kom nej mus cuag tau nws, ua nej tes haujlwm nyob rau hauv tus TSWV lub Tsevntaub sib ntsib, thiab saib cov pejxeem sawvdaws thiab ua cov uas ua haujlwm rau lawv, tseem tsis tau txaus nej siab thiab los? Nws tsa nej thiab cov Levis los ua tes haujlwm no, tiamsis nimno nej tseem xav nrhiav kev los ua tus povthawj thiab! Thaum koj yws Aloos twb yog koj thiab koj cov phoojywg ntxeev siab tawmtsam tus TSWV ntag.” Mauxes txawm txib neeg mus hu Dathas thiab Anpilas nkawd, tiamsis nkawd teb hais tias, “Peb yuav tsis tuaj! Qhov uas koj coj peb tawm nram tebchaws Iziv uas av rog thiab zoo qoob los tuag tas rau hauv tiaj suabpuam no tseem tsis tau txaus koj siab thiab los? Ua li cas koj tseem yuav muab koj tsa ua tus tswv kav tagnrho peb thiab? Qhov tseemceeb koj twb tsis tau coj peb mus rau hauv lub tebchaws uas av rog thiab zoo qoob lossis pub liaj teb rau peb thiab pub kom muaj vaj txiv hmab los ua peb tug, thiab nimno koj tabtom nrhiav kev dag ntxias peb. Peb yuav tsis tuaj cuag koj!” Mauxes chim heev, nws hais rau tus TSWV hais tias, “Tsis txhob txais tej khoom uas cov neeg no coj mus fij rau koj. Kuv yeej tsis tau ua phem rau lawv ib leeg tus twg; txawm yog lawv tej neesluav los kuv twb tsis tau txeeb ib tug li.” Mauxes hais rau Kaulas hais tias, “Tagkis koj yuav tsum tau coj koj ob puas tsib caug leej ntawd tuaj rau hauv lub Tsevntaub sib ntsib uas yog tus TSWV qhov chaw sib ntsib; Aloos los nws yuav tsum tuaj nyob rau hauv thiab. Nej txhua tus nyias yuav tsum nqa nyias lub laujkaub hlawv hmoov tshuaj tsw qab tuaj, muab hmoov tshuaj tsw qab tso rau hauv lub laujkaub, thiab coj mus fij rau ntawm lub thaj.” Yog li ntawd txhua tus txivneej nyias thiaj nqa nyias lub laujkaub thee, muab cov thee uas cig ntsaj thuav thiab muab tshuaj tsw qab tso rau hauv, lawv tuaj sawv nrog Mauxes thiab Aloos nkawd ua ke rau ntawm tus TSWV lub Tsevntaub sib ntsib lub qhovrooj. Ces Kaulas txawm coj cov pejxeem sawvdaws mus sawv tim ntsej tim muag Mauxes thiab Aloos rau ntawm tus TSWV lub Tsevntaub sib ntsib lub qhovrooj. Tamsim ntawd tus TSWV lub tshwjchim ci ntsa iab tshwm los rau sawvdaws pom, ces tus TSWV hais rau Mauxes thiab Aloos hais tias, “Neb cia li txav tawm ntawm cov neeg no mus, kuv yuav ua kom lawv puastsuaj tamsim no ntag.” Tiamsis Mauxes thiab Aloos nkawd txhos caug ntua, nyo hau ntshis ua nkawd ob lub ntsejmuag ti nkaus hauv av thiab thov hais tias, “Vajtswv, koj yog tus tswj neeg txojsia. Thaum ib tug ua txhaum, koj txawm chim rau sawvdaws tagnrho los?” Tus TSWV hais rau Mauxes hais tias, “Cia li hais rau cov pejxeem kom lawv txav ntawm Kaulas, Dathas thiab Anpilas lawv cov tsevntaub tamsim no mus.” Ces Mauxes thiab cov Yixalayees tej thawjcoj thiaj mus rau tom Dathas thiab Anpilas nkawd ob lub tsev. Mauxes hais rau cov neeg ntawd hais tias, “Nej cia li txav kom deb ntawm peb tug neeg siab phem no lub tsev mus, thiab tsis txhob cev tes kov ib yam dabtsi uas yog lawv tug li.” Yog li ntawd, lawv thiaj khiav tawm ntawm Kaulas, Dathas thiab Anpilas lawv tsev mus lawm. Dathas thiab Anpilas tseem tabtom tawm tuaj sawv ntawm nkawd ob lub qhovrooj nrog nkawd ob tug pojniam thiab cov menyuam nyob. Mauxes hais rau cov pejxeem hais tias, “Nej yuav tsum paub hais tias tus TSWV yog tus txib kuv tuaj ua txhua yam no, tsis yog kuv lam tuaj ua raws li kuv lub siab nyiam xwb. Yog cov txivneej no tuag raws li neeg ibtxwm mob tuag, ces tsis yog Vajtswv rau txim rau lawv, thiab tsis yog tus TSWV tso kuv tuaj ua nws tes haujlwm li. Tiamsis yog tus TSWV ua tej yam uas tsis tau hnov dua, thiab av cia li qhib plho muab lawv nqos kiag nrog txhua yam uas yog lawv tug, kom lawv cia li nqis ciaj mus rau hauv tubtuag teb, nej thiaj yuav paub hais tias cov neeg no yog cov uas muab tus TSWV tso tseg lawm.” Thaum Mauxes hais cov lus ntawd tagnrho, ces thaj av uas nyob ntawm qhov chaw uas Dathas thiab Anpilas nkawd sawv txawm tu nrho qhib plho thiab nqos kiag nkawd thiab nkawd tsevneeg, nqos tagnrho Kaulas cov phoojywg uas koom siab nrog nws, thiab lawv tej cuabtxhiaj cuabtam nrog lawv huv tibsi lawm. Yog li ntawd, lawv thiaj nqis ciaj sia kais mus rau hauv tubtuag teb, nrog lawv tej cuabtxhiaj cuabtam. Av qhaws nkaus npog lawv, lawv thiaj puastsuaj ploj ntais lawm. Thaum lawv quaj qw zom zaws, cov Yixalayees uas nyob ibncig ntawm lawv puavleej khiav tawm thiab qw hais tias, “Cia li khiav! Nyob tsam av nqos peb lawm thiab!” Ces tus TSWV tso hluavtaws los kub ob puas tsib caug leej uas tabtom hlawv lawv tej hmoov tshuaj tsw qab ntawd tuag tas huv tibsi lawm thiab. Tus TSWV hais rau Mauxes hais tias, “Koj hais rau Aloos tus tub Ele-axas uas yog tus povthawj kom nws mus muab cov laujkaub tooj hlawv hmoov tshuaj tsw qab ntawm cov neeg uas kub hnyiab tuag ntawd tshem, thiab muab cov thee hauv cov laujkaub ntawd hliv rau lwm qhov, rau qhov cov laujkaub ntawd dawbhuv. Cov laujkaub ntawd dawbhuv rau thaum coj mus fij rau ntawm tus TSWV lub thaj. Cia li mus muab cov laujkaub ntawm cov neeg tuag uas vim lawv ua txhaum ntawd los ntaus ua tej daim nyias nyias coj mus npog lub thaj. Daim tooj ntawd yuav ua lub cim rau cov Yixalayees.” Ces tus povthawj Ele-axas thiaj mus muab cov laujkaub ntawd los thiab muab ntaus ua tej daim nyias nyias thiab muab ham ua ib daim loj loj mus npog lub thaj. Qhov no ua lub cim qhia rau cov Yixalayees paub hais tias, yog leejtwg tsis yog Aloos cov xeebntxwv tsis txhob mus hlawv hmoov tshuaj tsw qab rau tus TSWV ntawm lub thaj. Nyob tsam nws yuav raug kev puastsuaj li Kaulas thiab cov neeg uas koom nrog nws ua ib lub siab. Tej lus no ua raws li tus TSWV tau samhwm rau Mauxes kom hais rau Ele-axas ntag. Hnub tom qab cov pejxeem rov yws Mauxes thiab Aloos nkawd dua hais tias, “Neb tau tua tus TSWV cov neeg coob leej lawm.” Tom qab uas lawv yws Mauxes thiab Aloos li ntawd tas, Mauxes thiab Aloos txawm tig mus rau tom tus TSWV lub Tsevntaub sib ntsib, thiab pom ib tauv huab los roos nkaus lub Tsevntaub sib ntsib, tus TSWV lub tshwjchim ci ntsa iab tshwm plaws los. Ces Mauxes thiab Aloos nkawd txawm txav mus sawv ntawm tus TSWV lub Tsevntaub sib ntsib lub qhovrooj, tus TSWV hais rau Mauxes hais tias, “Koj txav kom deb ntawm pawg neeg no, kuv yuav muab lawv ua kom puastsuaj tas rau ntawm qhov chaw uas lawv sawv no!” Nkawd ob leeg puavleej txhos caug ntua nyo hau ntshis ti nkaus hauv av, thiab Mauxes hais rau Aloos hais tias, “Cia li muab koj lub laujkaub thee los, muab cov ncaig saum lub thaj tso rau hauv, thiab muab hmoov tshuaj tsw qab tso rau saum cov ncaig. Koj cia li ceev nrooj coj mus yom ua kevcai ntxuav daws cov pejxeem lub txim. Tus TSWV txojkev chim thiab tej sub tawg sub ntsha twb pib tawm tuaj lawm!” Aloos mloog Mauxes lus, nws thiaj muab hlo lub laujkaub thee thiab nqa ceev nrooj mus rau hauv plawv pawg neeg uas tuaj sib sau ntawd. Thaum Aloos pom tej kev tuag twb pib lawm, nws mam muab hmoov tshuaj tsw qab tso plhuav rau hauv cov ncaig taws, mus ua kevcai ntxuav daws cov neeg ntawd lub txim. Qhov no thiaj tswj tau txojkev tuag, Aloos sawv nres nroos hauv nruab nrab ntawm cov neeg ciaj thiab cov neeg tuag. Cov neeg tuag muaj kaum plaub txhiab xya pua leej, twb tsis tau suav cov neeg ntxeev siab uas tuag nrog Kaulas ua ke. Thaum txojkev tuag dhau lawm, Aloos rov mus cuag Mauxes rau tom tus TSWV lub Tsevntaub sib ntsib lub qhovrooj. Tus TSWV hais rau Mauxes hais tias, “Koj hais rau cov Yixalayees cov thawjcoj ntawm txhua xeem, kom nyias nqa nyias tus pas nrig tuaj, tagnrho yog kaum ob tug. Sau lawv txhua tus npe rau ntawm nyias tus pas, thiab sau Aloos npe rau ntawm cov Levis tus pas. Tsuas pub ib tug pas rau ib xeem tus thawjcoj xwb. Koj muab cov pas nrig ntawd coj mus tso rau hauv tus TSWV lub Tsevntaub sib ntsib, thiab muab coj mus tso rau tom hauv ntej lub Phijxab uas ntim Vajtswv tej lus cog tseg uas yog qhov chaw kuv ntsib koj. Ces tus neeg uas kuv xaiv lawm tus pas nrig yuav hlav ntsuag. Qhov uas kuv ua li no, yog ua kom cov Yixalayees tej suab uas yws koj ntsiag tsis muaj ntxiv lawm.” Yog li ntawd, Mauxes thiaj hais rau cov Yixalayees, thiab lawv txhua tus thawjcoj nyias nqa nyias tus pas nrig tuaj, ib xeem ib tug, tagnrho yog kaum ob tug thiab muab Aloos tus pas nrig coj mus tso nrog cov ntawd thiab. Ces Mauxes muab tagnrho cov pas nrig ntawd, coj mus tso rau hauv lub Tsevntaub sib ntsib ntawm tus TSWV lub Phijxab Coglus tseg hauv ntej. Tagkis tom qab, thaum Mauxes mus hauv lub Tsevntaub sib ntsib, nws pom Aloos tus pas nrig uas yog xeem Levis tus, hlav ntsuag, hlav nplooj, tawg paj thiab txi txiv! Mauxes muab cov pas nrig ntawd nqa mus qhia rau cov Yixalayees. Lawv pom hais tias, yeej muaj tej xwmtxheej no tshwmsim tiag, yog li ntawd, cov thawjcoj nyias thiaj nqa nyias tus pas nrig rov mus lawm. Tus TSWV hais rau Mauxes hais tias, “Koj muab Aloos tus pas rov mus tso rau ntawm lub Phijxab uas ntim Vajtswv tej lus cog tseg hauv ntej. Tus pas ntawd yuav ua lub cim rau cov Yixalayees uas ntxeev siab. Qhov no yuav ua kom lawv tseg tsis txhob yws kuv, lawv thiaj tsis tuag.” Mauxes ua raws li tus TSWV tau hais rau nws. Cov Yixalayees hais rau Mauxes hais tias, “Zaum no peb yuav tuag tas li lauj! Yog hais tias, leejtwg txav mus ze tus TSWV lub Tsevntaub sib ntsib yuav raug tua tuag. Ces peb sawvdaws txawm yuav tuag tas tiag los?” Tus TSWV hais rau Aloos hais tias, “Koj, koj cov tub thiab cov Levis yuav tsum tau ris lub txim uas ua txhaum rau lub Tsevntaub sib ntsib uas yog qhov chaw nrog kuv sib ntsib; tiamsis tsuas yog koj thiab koj cov tub thiaj tau ris lub txim uas ua txhaum rau cov povthawj xwb. Coj koj cov kwvtij uas yog xeem Levis tuaj nrog koj ua haujlwm thiab pab koj thaum koj cov tub tabtom ua haujlwm nyob ntawm lub Tsevntaub sib ntsib. Lawv yuav ua tej haujlwm uas koj muab cob rau lawv ua, thiab lawv yuav ua tej haujlwm hauv lub Tsevntaub sib ntsib, tiamsis tsis pub lawv txav mus ze tej khoom dawbhuv thiab Chav Dawbhuv lossis lub thaj. Yog lawv txav mus ze, mas koj thiab lawv yuav raug tua tuag. Lawv yuav nrog koj ua haujlwm thiab lawv yuav ua tagnrho tej haujlwm hauv lub Tsevntaub sib ntsib, tiamsis tsis pub tus uas tsis tsimnyog tuaj nrog nej ua. Koj thiab koj cov tub xwb, thiaj yog cov uas muaj feem mus ua haujlwm hauv Chav Dawbhuv thiab ntawm lub thaj, kom kuv thiaj tsis chim rau cov Yixalayees ntxiv lawm. Kuv yog tus uas xaiv koj cov kwvtij Levis tawm hauv cov Yixalayees los rau koj. Twb muab lawv fij rau tus TSWV lawm, kom lawv thiaj pab tau koj ua tej haujlwm hauv lub Tsevntaub sib ntsib. Tiamsis tsuas yog koj thiab koj cov tub uas ua povthawj thiaj ua tau txhua yam haujlwm ntawm lub thaj thiab hauv Chav Dawbhuv xwb. Txhua yam no puavleej yog nej lub luag haujlwm, lub meejmom povthawj yog kuv muab rau nej. Txhua tus uas tsis tsimnyog thiab lam txav mus ze tej khoom dawbhuv yuav raug tua tuag.” Tus TSWV hais rau Aloos hais tias, “Koj nco ntsoov txhua yam khoom uas muab fij tshwjxeeb rau kuv uas tsis yog yam muab hlawv theej txhoj, kuv yuav muab huv tibsi rau koj. Kuv muab tej khoom no pub rau koj thiab koj cov xeebntxwv, yog ib feem uas yuav tsum muab faib rau koj mus ibtxhis li. Tej khoom dawbhuv uas tsis coj mus hlawv fij rau saum lub thaj uas yog tej hmoov nplej, tej khoom fij daws txim thiab tej khoom fij ntxuav kev txhaum. Txhua yam khoom dawbhuv uas muab fij rau kuv puavleej yog koj thiab koj cov tub tug. Nej yuav tsum noj tej khoom no hauv chav dawbhuv, thiab tsuas pub cov txivneej noj xwb; rau qhov yog tej khoom dawbhuv rau nej. “Txhua yam uas cov Yixalayees coj tuaj yom fij rau kuv los puavleej muab rau koj huv tibsi. Kuv muab tej khoom ntawd rau koj, koj cov tub thiab koj cov ntxhais mus ibtxhis. Koj tsevneeg txhua tus uas yog neeg huv lawm ces noj tau tej ntawd. “Thawj phaum qoobloo zoo tshaj plaws uas cov Yixalayees coj mus fij rau kuv uas yog tej roj txiv ntoo, tej cawv txiv hmab thiab tej nplej, kuv muab huv tibsi rau koj. Tej no puavleej yog nej tug. Koj tsevneeg txhua tus uas yog neeg huv lawm noj tau tej khoom ntawd. “Txhua yam uas cov Yixalayees coj tuaj fij rau kuv puavleej yog koj tug. “Tsis hais neeg lossis tsiaj txhu, thawj tug menyuam uas cov Yixalayees coj tuaj fij rau kuv puavleej yog nej tug. Tiamsis tej nyiaj uas luag coj tuaj txhiv thawj tug tub hlob thiab tej nyiaj uas luag coj tuaj txhiv tej tsiaj uas tsis huv thawj tug menyuam uas yog tus txiv rov qab, nej yuav tsum khaws tej nyiaj ntawd cia. Yuav tsum txhiv tej menyuam uas hnubnyoog ib hlis rov qab, tus nqi yog tsib daim nyiaj, raws li nomtswv txoj cai kom tseg. Tiamsis thawj tug menyuam nyuj, menyuam yaj thiab menyuam tshis uas yog tus txiv, tsis txhob txhiv rov qab; cov ntawd yeej yog kuv tug thiab yog cov uas muab tua theej txhoj. Muab cov ntshav hliv ywg lub thaj thiab muab cov roj hlawv ua khoom fij, kom tej pa tsw qab ntxiag ua rau kuv txaus siab. Tej nqaij puavleej yog koj tug ib yam li lub hauvnrob thiab cegqab sab xis uas muab yom fij. “Tagnrho tej khoom dawbhuv uas cov Yixalayees coj tuaj fij rau kuv, kuv muab huv tibsi rau koj, koj cov tub thiab koj cov ntxhais mus ibtxhis li. Kuv yuav tsis rhuav tej lus cog tseg rau koj thiab koj cov xeebntxwv li.” Tus TSWV hais rau Aloos hais tias, “Koj yuav tsis tau txais ib qho av ua koj tug, thiab yuav tsis faib lub tebchaws Yixalayees ib qho rau koj li. Kuv yog tus TSWV, txhua yam uas yog kuv tug, puavleej yog koj li.” Tus TSWV hais tias, “Ib feem kaum uas cov Yixalayees coj tuaj fij rau kuv, kuv yuav muab tagnrho rau cov Levis. Tej no yog muab ua nqi zog rau lawv tu kuv lub Tsevntaub sib ntsib. Txij no mus tsis pub cov Yixalayees tuaj ze tus TSWV lub Tsevntaub sib ntsib lawm, nyob tsam ua rau lawv raug lub txim tuag. Txij no mus tsuas cia cov Levis tuaj tu lub Tsevntaub sib ntsib, thiab ua tagnrho tej haujlwm hauv lub Tsevntaub lawm xwb. Qhov no ua ib txoj kevcai rau koj cov xeebntxwv mus li. Cov Levis yuav tsis muaj teej tug nyob hauv lub tebchaws Yixalayees, rau qhov tej ib feem kaum uas cov Yixalayees coj tuaj fij rau kuv ntawd, kuv twb muab rau cov Levis lawm. Vim li no kuv thiaj hais rau lawv hais tias, lawv yuav tsis muaj av nyob hauv lub tebchaws Yixalayees.” Tus TSWV samhwm rau Mauxes kom hais rau cov Levis hais tias: “Thaum nej tau txais cov Yixalayees tej ib feem kaum uas tus TSWV muab rau nej ua nej tug, nej yuav tsum muab ib feem kaum ntawm cov khoom uas yog nej tug coj mus fij tshwjxeeb rau tus TSWV. Nej tej khoom fij tshwjxeeb no yuav zoo ib yam li cov neeg ua teb tej nplej tshiab thiab tej cawv txiv hmab tshiab uas lawv coj tuaj fij ntag. Nej yuav tsum ua li no thiaj yog nej muab tej ib feem kaum uas nej tau ntawm cov Yixalayees los mus fij pub tshwjxeeb ua tus TSWV tug. Cov khoom uas fij tshwjxeeb rau tus TSWV cia li muab rau Aloos uas yog tus povthawj. Nej yuav tsum muab tej uas zoo tshaj plaws xwb. Thaum nej muab tej uas zoo coj mus fij lawm, nej yuav tsum khaws tej uas seem cia ib yam li cov neeg ua teb uas muab ibtxhia coj mus fij thiab khaws tej uas seem tseg. Nej thiab nej tsevneeg cia li nqa tej seem mus noj los tau, rau qhov twb muab tej ntawd ua nqi zog rau nej tu lub Tsevntaub sib ntsib lawm. Nej noj tej ntawd los nej yuav tsis txhaum, yog nej twb tshwj tej uas zoo coj mus fij rau tus TSWV lawm. Tiamsis nej yuav tsum ua tib zoo xyuas tsis txhob noj tej khoom fij dawbhuv uas cov Yixalayees coj mus fij ua ntej uas nej tsis tau tshwj tej uas zoo fij rau kuv; yog nej txhob txwm noj nej yuav raug tua tuag.” Tus TSWV samhwm rau Mauxes thiab Aloos nkawd kom muab tej kevcai no qhia rau cov Yixalayees. Cab ib tug xyuas nyuj liab uas tsis muaj ib qho phem thiab tsis tau luag quab thauj nra ib zaug li mus rau tus povthawj Ele-axas. Cab tus xyuas nyuj ntawd mus rau sab nraum ntug yeej thiab muab tua tabmeeg Ele-axas. Ces Ele-axas yuav tsum muab nws tus ntivtes mus tub cov ntshav coj mus nchos xya zaug rau ntawm hauv ntej tus TSWV lub Tsevntaub sib ntsib. Tagnrho tus tsiaj ntawd lub cev, daim tawv, cov nqaij, cov ntshav thiab cov quav, yuav tsum muab hlawv tabmeeg tus povthawj. Tus povthawj muab ib daim ntoo ciab, ib re nplooj hixauv thiab muab ib ntshuas xov liab coj mus pov rau hauv lub qhovcub uas hlawv tus xyuas nyuj ntawd. Tom qab ntawd, tus povthawj muab nws cev ris tsho hle ntxhua thiab muab dej ntxuav thoob plaws nws ibce, nws mam rov mus rau hauv lub yeej; tiamsis nws tseem tsis huv mus txog thaum tsaus ntuj. Tus neeg uas hlawv tus xyuas nyuj ntawd, nws yuav tsum hle nws cev ris tsho ntxhua thiab muab dej ntxuav thoob plaws nws ibce, thiab nws tseem tsis huv mus txog thaum tsaus ntuj ib yam nkaus. Ces tus neeg uas huv lawm mus yawm cov tshauv uas yog tus xyuas nyuj ntawd coj mus tso rau ntawm qhov chaw huv sab nraum ntug yeej, yog qhov chaw uas cov Yixalayees muab dej ua kevcai ntxuav cov neeg tsis huv lub txim povtseg. Tus neeg uas yawm cov tshauv ntawd, yuav tsum hle nws cev ris tsho ntxhua, tiamsis nws tseem tsis huv mus txog thaum tsaus ntuj. Cov Yixalayees thiab cov neeg txawv tebchaws uas nrog lawv nyob, yuav tau coj txoj kevcai no mus ibtxhis li. Yog leejtwg mus chwv tej neeg tuag, mas nws yog neeg tsis huv xya hnub. Hnub peb thiab hnub xya, nws yuav tsum muab dej los ua kevcai ntxuav nws, nws thiaj li rov ua neeg huv. Tiamsis yog nws tsis ua kevcai ntxuav ob zaug uas yog hnub peb thiab hnub xya, ces nws yuav yog neeg tsis huv mus li lawm. Yog leejtwg mus chwv tej neeg tuag nws tsis ua kevcai ntxuav, ces tus ntawd yog neeg tsis huv, rau qhov tsis tau muab cov dej uas ntxuav kom huv los nchos rau nws. Nyob tsam nws ua rau tus TSWV lub Tsevntaub sib ntsib tsis huv, mas yuav tsum muab nws cais tawm ntawm Vajtswv haivneeg. Yog muaj ib tug neeg twg tuag rau hauv lub tsev twg, txhua tus uas nyob hauv lub tsev ntawd lossis tej neeg uas tuaj ncaj rau lub sijhawm uas tus neeg ntawd tuag, mas lawv yuav yog neeg tsis huv xya hnub. Txhua lub hub thiab txhua lub taub rau dej uas tsis muaj hau khwb uas nyob hauv lub tsev ntawd los puavleej tsis huv ib yam nkaus. Yog leejtwg mus tuav tus neeg uas raug luag tua tuag lossis tuag rau tom tej tshavpuam lossis yog leejtwg lam mus kov tej pobtxha neeg tuag lossis lub ntxa, mas tus ntawd yog neeg tsis huv xya hnub. Ua kevcai ntxuav cov neeg tsis huv, muab tus xyuas nyuj liab uas coj mus hlawv daws txim cov tshauv tso rau hauv lub laujkaub, thiab ce cov dej tshiab los hliv rau. Cia tus neeg uas ua kevcai ntxuav huv lawm muab ib rev nplooj hixauv raus rau hauv cov dej, thiab muab nchos rau lub tsev, txhua yam uas nyob hauv lub tsev, thiab cov neeg uas nyob hauv lub tsev. Dua li ntawd cia nws muab cov dej nchos rau tus neeg uas mus kov tej pobtxha neeg tuag lossis tus neeg tuag lossis lub ntxa thiab. Tus neeg huv yuav muab dej nchos rau tus neeg tsis huv hnub peb thiab hnub xya. Hnub xya nws yuav tsum ua kevcai ntxuav tus neeg tsis huv, tus neeg tsis huv uas ua kevcai ntxuav kom huv ntawd yuav tsum hle nws cev ris tsho ntxhua thiab muab dej ntxuav nws lub cev, thaum hnubpoob qho nws thiaj li yuav huv. Txhua tus neeg uas tsis huv thiab tsis tau ua kevcai ntxuav nws yog neeg tsis huv, rau qhov tsis tau muab cov dej uas ntxuav kom huv nchos rau nws lub cev. Nyob tsam nws ua rau tus TSWV lub Tsevntaub sib ntsib tsis huv, mas yuav tsum muab nws cais tawm ntawm Vajtswv haivneeg. Nej yuav tsum coj txoj kevcai no mus ibtxhis. Tus neeg uas muab dej nchos ua kevcai ntxuav rau lwm tus, yuav tsum hle nws cev ris tsho mus ntxhua; txhua tus uas kov cov dej ntawd, nws tsis huv mus txog thaum tsaus ntuj. Txhua yam uas tus neeg tsis huv mus tuav lawm, yam ntawd yuav tsis huv, thiab txhua tus uas mus tuav tej ntawd yuav tsis huv mus txog thaum tsaus ntuj. Thaum lub ib hlis ntuj cov Yixalayees los txog rau ntawm tiaj suabpuam Xees, lawv thiaj tsuam chaw so rau ntawm Kades. Milias tuag thiab lawv muab nws faus rau ntawm qhov chaw ntawd. Nyob qhov ntawd tsis muaj dej haus, cov pejxeem thiaj li sau nthwv tuaj cuag Mauxes thiab Aloos. Lawv yws nkawd hais tias: “Yog peb ntxov tuag nrog peb tej neeg uas tuag rau ntawm tus TSWV lub Tsevntaub sib ntsib ntshai yuav zoo dua. Vim li cas neb coj peb los nyob ntawm tiaj suabpuam no. Neb xav ua kom peb thiab peb tej tsiaj txhu tuag tas huv tibsi rau ntawm no los? Vim li cas neb coj peb khiav nram tebchaws Iziv los nyob rau qhov chaw phem npaum li no, ib yam nroj tsuag los twb tuaj tsis taus li? Cog tsis tau nplej, cog tsis tau txiv ncuavpias, cog tsis tau txiv hmab thiab cog tsis tau txiv ntsiavkws li. Nyob ntawm no dej haus los twb tsis muaj.” Mauxes thiab Aloos txawm tawm hauv cov pejxeem mus sawv rau ntawm lub qhovrooj Tsevntaub sib ntsib. Nkawd txhos caug nyo ua ntsejmuag ti nkaus hauv av, thiab tus TSWV lub tshwjchim ci ntsa iab los rau nkawd pom. Tus TSWV hais rau Mauxes hais tias, “Muab tus pas nrig uas nyob ntawm lub Phijxab uas ntim Vajtswv tej lus cog tseg hauv ntej los, ces Aloos neb hu cov pejxeem tuaj txoos ua ke. Koj hais rau lub pobzeb tod tabmeeg rau lawv saib ntsoov, ces dej yuav txhawv hauv los. Koj ua li no dej thiaj tawm hauv pobzeb los rau cov pejxeem haus, kom lawv thiab lawv tej tsiaj txhu thiaj tau dej haus.” Mauxes thiaj mus muab tus pas nrig, raws li tus TSWV tau hais rau nws. Ces Mauxes thiab Aloos nkawd thiaj hu tagnrho cov pejxeem tuaj txoos ua ke rau ntawm lub pobzeb hauv ntej, Mauxes hais tias, “Nej cov uas yog neeg ntxeev siab, nej cia li ua tib zoo mloog! Nej tseem cia wb ua kom dej txhawv hauv lub pobzeb no los rau nej haus thiab los?” Mauxes thiaj tsa hlo tus pas nrig ntaus lub pobzeb ob pas, thiab dej txhawv paim yaws hauv los, cov pejxeem thiab tej tsiaj txhu thiaj tau haus. Tiamsis tus TSWV hais rau Mauxes thiab Aloos hais tias, “Vim neb tsis cia siab rau kuv, neb thiaj tsis ua kuv lub hwjchim rau cov Yixalayees pom, yog li ntawd, neb yuav tsis tau coj lawv mus nyob hauv lub tebchaws uas kuv coglus yuav muab rau lawv.” Tej xwm no tshwm muaj rau hauv Melinpas, qhov chaw uas cov Yixalayees yws tus TSWV thiab qhov chaw uas nws qhia rau lawv hais tias, nws yog tus dawbhuv. Mauxes txib neeg tawm hauv Kades mus thov cov Edoos tus vajntxwv. Lawv thov hais tias, “Haivneeg Yixalayees uas yog koj cov kwvtij hais li no rau koj. Koj yeej paub tej kev txomnyem uas peb raug lawm, vim li cas peb cov yawgkoob thiaj tsiv mus nyob nram tebchaws Iziv, peb nyob nrad tau ntau xyoo. Cov neeg Iziv quab yuam peb tej yawgkoob thiab peb, peb tau quaj thov tus TSWV pab peb. Nws hnov peb tej lus thov thiab nws tso ib tug timtswv ceebtsheej coj peb kev tawm nram tebchaws Iziv los. Nimno peb los nyob rau hauv lub nroog Kades uas npuas nkaus koj lub tebchaws. Thov koj pub peb hla koj lub tebchaws mus. Peb yuav cab peb tej tsiaj taug kev ncaj nraim tsis so qhov twg, peb thiab peb tej tsiaj yuav tsis mus tsuj hauv koj tej teb lossis tej vaj txiv hmab, thiab yuav tsis ce dej ntawm koj tej qhovdej haus. Peb yuav taug txojkev loj ncaj nraim tsis tig saib qhov twg li, mus txog thaum uas peb hla dhau koj lub tebchaws.” Tiamsis cov Edoos teb hais tias, “Peb tsis pub nej hla peb lub tebchaws li! Yog nej tseem hla mas peb yuav tuaj tua nej tamsim ntawd ntag.” Cov Yixalayees hais tias, “Peb yuav taug txojkev loj ncaj nraim xwb, yog peb lossis peb tej tsiaj haus nej tej dej, peb yuav them tej nqi dej huv tibsi rau nej, peb tsuas thov taug txojkev dhau mus xwb.” Cov Edoos rov hais dua tias, “Peb txwv tu nrho tsis pub nej los mus li!” Thiab lawv txawm txhij cov tubrog uas siab tawv heev tawm tuaj tua cov Yixalayees. Vim cov Edoos tsis pub cov Yixalayees hla lawv lub tebchaws los mus, cov Yixalayees thiaj ua siab tig rov qab thiab taug dua lwm txojkev mus lawm. Tagnrho cov Yixalayees sawv kev tawm hauv Kades los txog rau ntawm lub Roob Haules uas nyob ntawm ciamteb tebchaws Edoos. Nyob qhov ntawd tus TSWV hais rau Mauxes thiab Aloos hais tias, “Aloos yuav tsis tau mus nyob hauv lub tebchaws uas kuv muab rau cov Yixalayees nyob; nws yuav tuag ua ntej, rau qhov neb ob leeg tau ntxeev siab rau kuv tej lus samhwm thaum nyob nram Melinpas. Koj cia li coj Aloos thiab nws tus tub Ele-axas mus rau saum Roob Haules. Muab Aloos cov tsho ntev hle thiab muab rau Ele-axas hnav, rau qhov Aloos yuav tuag rau saum.” Mauxes txawm ua li tus TSWV hais. Lawv thiaj nce mus rau saum Roob Haules tabmeeg cov pejxeem sawvdaws, Mauxes muab Aloos cov tsho ntev hle rau Ele-axas hnav. Aloos thiaj tuag rau saum lub roob ntawd, ces Mauxes thiab Ele-axas nkawd txawm nqis rov los. Thaum cov pejxeem paub hais tias Aloos tuag lawm, lawv sawvdaws quaj nyiav nws tau peb caug hnub. Thaum cov Kana-as tus vajntxwv uas kav lub nroog Alas hauv tebchaws Kana-as sab qabteb hnov hais tias cov Yixalayees tabtom taug txojkev Athalis los lawm, nws txawm txhij tubrog mus tua lawv thiab ntes tau cov Yixalayees qee leej coj mus ua qhev. Ces cov Yixalayees thiaj coglus rau tus TSWV hais tias, “Yog koj pub peb tua yeej cov neeg no, peb yuav muab lawv thiab lawv tej nroog fij hlo rau koj, thiab peb yuav muab lawv ua kom puastsuaj tas huv tibsi.” Tus TSWV hnov lawv tej lus thov, thiab nws pab lawv tua yeej cov Kana-as. Vim li no cov Yixalayees thiaj muab cov Kana-as thiab lawv tej nroog ua puastsuaj tas, thiab muab qhov chaw ntawd tis npe hu ua Haulemas. Cov Yixalayees sawv kev ntawm lub Roob Haules mus rau nram Hiavtxwv Akanpas, lawv yuav lug kev ncig lub tebchaws Edoos. Tiamsis thaum lawv tseem tabtom taug kev mus ntawd, lawv ua tsis taus siab ntev nyiaj kev txomnyem, lawv txawm cem Vajtswv thiab Mauxes. Lawv yws hais tias, “Vim li cas neb thiaj coj peb tawm nram tebchaws Iziv los kom peb tuag tas rau hauv tiaj suabpuam, qhov chaw uas tsis muaj mov noj thiab tsis muaj dej haus no? Peb noj tsis taus tej zaub mov zoo li no lawm!” Ces tus TSWV thiaj tso cov nab muaj taug los rau hauv cov Yixalayees, cov Yixalayees coob leej thiaj raug nab tom tuag lawm. Cov pejxeem thiaj tuaj cuag Mauxes thiab hais tias, “Thaum peb cem tus TSWV thiab cem koj twb yog peb ua txhaum ntag. Nimno thov koj thov tus TSWV muab cov nab no tshem tawm mus.” Yog li ntawd, Mauxes thiaj thov tus TSWV pab cov pejxeem. Tus TSWV kom Mauxes muab tooj nchuav ua ib tug nab thiab muab mus ntsia rau ntawm ib tug ncej, yog nab tom leejtwg, kom tus ntawd tsa qhovmuag ntsia tus nab tooj ntawd nws thiaj tsis tuag. Mauxes txawm nchuav tau ib tug nab tooj thiab muab ntsia rau saum ib tug ncej. Thaum nab tom leejtwg yog nws tsa qhovmuag ntsia tus nab tooj ntawd nws txawm tsis tuag. Cov Yixalayees mus tsuam yeej rau ntawm Aunpaus. Ces lawv sawv kev ntawm Aunpaus mus tsuam yeej rau ntawm Anpalees uas nyob hauv lub tiaj suabpuam ntawm tebchaws Mau-am sab hnubtuaj. Lawv sawv kev ntawm qhov chaw ntawd mus tsuam yeej rau hauv lub Hav Zeles. Lawv sawv kev qhov ntawd, thiab mus tsuam yeej rau ntawm tus Dej Alenoos sab qaumteb ntawm lub tiaj suabpuam uas mus tshuam rau tebchaws Amaules. (Tus dej Alenoos yog tus ciam rau lub tebchaws Mau-am thiab lub tebchaws Amaules.) Twb yog li no phau Ntawv uas teev tus TSWV tej kev ua Rog thiaj li hais txog: “… lub zos Vahes uas nyob hauv cheebtsam Xufas thiab hauv tej hav ntawm tus Dej Alenoos, thiab tej kwjha uas nqis mus rau nram lub zos Ales, thiab ntws mus tshuam rau nram ciamteb Mau-am.” Lawv sawv kev qhov ntawd mus txog rau ntawm ib qhov chaw hu ua tej Qhovtshij, yog qhov chaw uas tus TSWV hais rau Mauxes hais tias, “Coj cov pejxeem tuaj ua ke, thiab kuv yuav muab dej rau lawv haus.” Lub sijhawm ntawd, cov Yixalayees zoo siab heev thiab hu zaj nkauj no: “Tej qhovtshij, nej cia li txhawv dej laub lug tawm los; Thiab peb yuav zoo siab hu nkauj tos cov dej ntawd. Lub qhovtshij no yog cov nomtswv, Thiab cov pejxeem tej thawjcoj khawb, Yog siv vajntxwv tus cwj thiab lawv tej pas nrig khawb ntag.” Ces lawv thiaj sawv kev ntawm tiaj suabpuam mus rau ntawm Matanas, thiab sawv kev ntawm Matanas mus rau ntawm Nahaliyees, thiab sawv kev ntawm Nahaliyees mus rau ntawm Npamaus, thiab sawv kev ntawm Npamaus mus rau ntawm lub hav uas nyob hauv tebchaws Mau-am. Qhov chaw ntawd nyob saum lub ncov roob Pinkas, xyuam yaj lug saib ntsoov rau tim tiaj suabpuam. Cov Yixalayees tso neeg mus thov cov Amaules tus vajntxwv Xihoos hais tias: “Thov pub peb hla nej lub tebchaws mus. Peb thiab peb tej tsiaj yuav tsis pla mus tsuj hauv nej tej teb lossis nej tej vaj txiv hmab, thiab peb yuav tsis haus tej dej hauv nej tej qhovtshij; peb yuav taug txojkev loj ncaj nraim mus kom dhau plaws nej cheebtsam.” Tiamsis Xihoos tsis pub cov Yixalayees hla nws lub tebchaws mus. Nws thiaj txhij nws cov tubrog mus rau ntawm Yahas uas nyob tom tiaj suabpuam thiab mus puav tua cov Yixalayees. Tiamsis cov Yixalayees tua cov yeebncuab tuag coob heev rau hauv tshavrog thiab txeeb tau lawv lub tebchaws txij kiag ntawm tus Dej Alenoos sab qaumteb mus txog ntua rau tim Yanpaus, thiab dhau plaws mus rau tim tebchaws Amoos, rau qhov cov tubrog Amoos uas zov ntawm ciamteb siab tawv thiab zov nruj heev. Yog li ntawd, cov Yixalayees thiaj txeeb tau tagnrho cov Amaules tej nroog, thiab tseem txeeb tau lub tuamceeb nroog Hesenpoos thiab tej nroog me uas nyob ibncig ntawd huv tibsi. Lawv thiaj mus nyob puv nkaus rau hauv tej nroog ntawd. Hesenpoos yog lub tuamceeb nroog uas yog cov Amaules tus vajntxwv Xihoos nyob ntag, thiab nws yog tus uas ntxeev siab ua rog tawmtsam cov Mau-am tus vajntxwv qub thaum ub thiab txeeb tau tagnrho Mau-am lub tebchaws mus txog ntua ntawm tus Dej Alenoos. Twb yog vim li ntawd, cov hu nkauj thiaj li hu zaj nkauj no: “Cia li los rau hauv lub nroog Hesenpoos uas yog vajntxwv Xihoos lub nroog! Peb xav pom lub nroog ntawd rov txhim kho dua tshiab. Xihoos cov tubrog tawm hauv lub nroog Hesenpoos tuaj mus ib yam li cov nplaim taws; Mas nws rhuav lub nroog Ales hauv lub tebchaws Mau-am thiab nqos tagnrho tej hauv roob pem Alenoos. Cov Mau-am, nej yuav raug kev txomnyem lauj! Nej pe tus mlom Khemaus uas tabtom coj kev puastsuaj los! Nej tus vajtswv yuav coj cov txivneej mus poob kev txomnyem, thiab cov pojniam yuav raug cov Amaules tus vajntxwv Xihoos ntes coj mus. Tiamsis tamsim no peb twb muab lawv cov xeebntxwv tua puastsuaj tag, Txij ntua tom Hesenpoos los txog ntua rau ntawm Dinpoos, Thiab pib kiag tom Nasees mus ti nkaus rau tim Naufas uas ze rau ntawm Medenpas.” Yog li ntawd, cov Yixalayees thiaj li mus nyob puv nkaus rau hauv tebchaws Amaules. Mauxes tso neeg mus soj thiab tua lub nroog Yaxes. Cov Yixalayees txeeb tau lub nroog ntawd nrog tej zos uas nyob ibncig thiab muab cov Amaules uas nyob hauv tej zos ntawd raws tawm khiav huv tibsi lawm. Cov Yixalayees tig rov los thiab taug kev mus rau tom lub zos Npasas. Tus vajntxwv uas kav lub tebchaws Npasas thiaj txhij nws cov tubrog nrog nws mus tua cov Yixalayees rau tom Edele-is. Tus TSWV hais rau Mauxes hais tias, “Nej tsis txhob ntshai Aunkas. Kuv yuav pub kom nej tua yeej nws, yeej tagnrho nws cov neeg thiab nws lub tebchaws huv tibsi. Nej yuav ua rau nws ib yam li ua rau Xihoos uas yog tus vajntxwv kav lub nroog Hesenpoos thiab ntag.” Yog li ntawd, cov Yixalayees thiaj muab Aunkas, nws cov tub thiab tagnrho nws cov neeg tua tuag tas tsis tshuav ib tug seem li, thiab cov Yixalayees tau los nyob nws lub tebchaws. Cov Yixalayees tsuam yeej so rau hauv lub tiaj Mau-am ntawm tug Dej Yauladees sab hnubtuaj ncaj lub nroog Yelikaus. Thaum Xinpaules tus tub Npalaj uas yog cov Mau-am tus vajntxwv, hnov tej uas cov Yixalayees tau ua rau cov Amaules, thiab cov Yixalayees muaj coob npaum li cas, thiaj ua rau nws thiab tagnrho nws cov neeg ntshai heev. Cov Mau-am hais rau cov Midias tej thawjcoj hais tias, “Tsis ntev no pab neeg ntawd yuav ua rau txhua tsav yam uas nyob ibncig peb kom puastsuaj tas ib yam li nyuj noj tej nyom hauv tshav zaub ntag.” Yog li ntawd, Vajntxwv Npalaj thiaj tso neeg mus hais rau Npe-aus tus tub Npala-as hauv lub nroog Npethaus uas nyob ze tus Dej Efalates hauv tebchaws Amavis. Lawv coj Npalaj tej lus mus hais rau nws li no: “Kuv xav kom koj paub haivneeg uas khiav nram tebchaws Iziv los, lawv sib faib mus nyob txhua nrho qhov txhia chaw lawm, nyob tsam lawv cia li los txeeb peb lub tebchaws nyob thiab. Cov neeg ntawd muaj coob tshaj peb lawm, koj cia li tuaj pab kuv foom tsis zoo rau lawv. Tej zaum peb yuav tua yeej lawv thiab raws tau lawv tawm hauv lub tebchaws no mus. Kuv paub hais tias thaum koj foom koob hmoov, cov neeg yeej tau txais koob hmoov thiab thaum koj foom tsis zoo, lawv yeej raug kev txomnyem.” Cov Mau-am thiab cov Midias tej thawjcoj txawm muab nyiaj tuaj them tej lus foom tsis zoo ntawd, thiab mus cuag Npala-as, lawv piav Npalaj tej lus rau Npala-as mloog. Npala-as hais tias, “Nej cia li pw ib hmos ntawm no tso, tagkis kuv mam li qhia rau nej paub tej uas tus TSWV hais rau kuv.” Yog li ntawd cov Mau-am tej thawjcoj thiaj nrog Npala-as nyob tau ib hmos. Vajtswv los nug Npala-as hais tias, “Cov neeg uas tuaj so hauv koj tsev, lawv yog leejtwg?” Npala-as teb hais tias, “Vajntxwv Npalaj uas kav tebchaws Mau-am tso cov neeg no tuaj qhia rau kuv txog cov neeg uas los nram tebchaws Iziv los. Lawv twb mus nyob txhua nrho qhov txhia chaw hauv tebchaws no lawm. Mas nws xav kom kuv pab nws foom tsis zoo rau lawv, nws thiaj muaj peevxwm tua yeej thiab raws tau lawv khiav tawm mus.” Vajtswv hais rau Npala-as hais tias, “Koj tsis txhob nrog cov neeg no mus, thiab tsis txhob foom tsis zoo rau cov Yixalayees ib lo li, rau qhov lawv yog cov uas kuv twb foom koob hmoov rau lawm.” Tagkis sawv ntxov Npala-as thiaj mus cuag cov neeg uas Npalaj txib tuaj thiab hais rau lawv hais tias, “Nej cia li rov qab mus tsev; rau qhov tus TSWV tsis pub kuv nrog nej mus.” Lawv txawm rov los cuag Npalaj thiab piav qhia rau nws hais tias, “Npala-as tsis kam nrog peb tuaj.” Ces Npalaj txib ntau tus thawjcoj uas muaj meejmom tshaj cov uas xub mus lawm rov mus dua. Lawv mus cuag Npala-as thiab muab Npalaj tej lus hais rau Npala-as hais tias: “Koj tsis txhob yig, koj cia li tuaj raws li kuv thov koj! Kuv yuav muab nqi zog rau koj kom koj npluanuj thiab kuv yuav ua txhua yam raws li koj hais. Thov koj cia li tuaj pab kuv foom tsis zoo rau cov neeg ntawd.” Tiamsis Npala-as teb hais tias, “Txawm yog Npalaj muab tagnrho tej nyiaj thiab kub hauv nws lub loog rau kuv los kuv yuav tsis kam hla tus TSWV uas yog kuv tus Vajtswv ib lo lus li. Nej cia li so ntawm no ib hmos ib yam li pab uas tuaj cuag kuv thawj zaug, tos saib tus TSWV puas yuav muaj dua lwm lo lus qhia rau kuv.” Hmo ntawd Vajtswv los hais rau Npala-as hais tias, “Yog cov neeg no thov kom koj nrog lawv mus, koj cia li npaj nrog lawv mus, tiamsis koj nco ntsoov ua raws li tej uas kuv hais rau koj xwb.” Yog li ntawd, tagkis kaj ntug Npala-as thiaj tu nra muab eeb nog rau saum tus neesluav nraubqaum thiab nrog cov Mau-am tej thawjcoj mus lawm. Thaum uas Npala-as sawv kev mus ntawd, Vajtswv chim heev, ces thaum Npala-as tabtom caij nws tus neesluav taug kev mus, thiab coj nws ob tug tubtxib ua nws luag mus, tus TSWV ib tug timtswv txawm los sawv hauv plawv kev thaiv Npala-as kev. Thaum tus neesluav pom dheev tus timtswv ceebtsheej sawv nres nroos hauv plawv kev thiab tuav rawv ib rab ntaj, tus neesluav txawm lem loo khiav mus rau nram nras liaj. Npala-as nplawm tus neesluav kom rov los taug kev. Ces tus timtswv txawm mus sawv hauv txojkev uas nyob ntawm lub vaj txiv hmab uas muaj ob daim txiag zeb thaiv ob sab ntug kev. Thaum tus neesluav pom dheev tus timtswv ntawd, tus neesluav phoom yos mus tsoo tim daim txiag zeb muab Npala-as txhais taw nias kiag rau ntawm daim txiag zeb. Npala-as thiaj rov nplawm tus neesluav ib zaug ntxiv. Tus timtswv rov mus thaiv tom hauv ntej ib zaug ntxiv; nws mus sawv ntawm ntu kev uas ti heev tsis muaj kev lug mus rau sab twg li. Zaum no, thaum tus neesluav pom dheev tus timtswv ceebtsheej, tus neesluav thiaj txhos caug ntua rau hauv av. Npala-as npautaws heev thiab nws muab nws tus pas nrig nplawm tus neesluav. Ces Tus TSWV ua rau tus neesluav txawj hais lus, tus neesluav thiaj hais rau Npala-as hais tias, “Kuv ua txhaum koj dabtsi? Vim li cas koj thiaj ntaus kuv peb zaug li no?” Npala-as teb hais tias, “Rau qhov koj txhob txwm ua limhiam rau kuv! Yog kuv muaj ntaj, ces kuv twb muab koj tua povtseg lawm.” Tus neesluav teb hais tias, “Kuv tsis yog tus neesluav uas koj ibtxwm caij los lawm los? Yav tas los kuv puas tau ua li no rau koj?” Npala-as teb hais tias, “Koj yeej tsis tau ua li no rau kuv ib zaug li!” Tamsim ntawd tus TSWV ua rau Npala-as pom tus timtswv ceebtsheej tuav rawv ib rab ntaj sawv ntawd, Npala-as nyo ntshis pe ua nws lub ntsejmuag ti nkaus hauv av. Tus timtswv ceebtsheej nug hais tias, “Vim li cas koj thiaj ntaus koj tus neesluav peb zaug li no? Kuv los no yog kuv los thaiv koj kev ntag, rau qhov koj tsis tsimnyog taug txojkev no mus. Tiamsis tus neesluav pom kuv thiab nws lem lug kev peb zaug. Yog nws tsis ua li ntawd, kuv twb muab koj tua thiab tso tus neesluav mus lawm.” Npala-as hais tias, “Kuv ua txhaum lawm. Kuv tsis paub hais tias yog koj thaiv kuv kev tsis pub kuv mus; tiamsis yog koj xav hais tias qhov uas kuv mus no txhaum lawm, kuv yuav rov qab mus tsev.” Tus timtswv ceebtsheej teb hais tias, “Koj cia li nrog cov neeg no mus, tiamsis koj yuav tsum hais tej lus uas kuv kom koj hais xwb.” Yog li ntawd, Npala-as thiaj nrog lawv mus lawm. Thaum Npalaj hnov hais tias Npala-as tuaj lawm, Npalaj thiaj mus tos Npala-as pem lub nroog Ales uas nyob ntawm ntug Dej Alenoos uas ze ciamteb Mau-am. Npalaj nug Npala-as hais tias, “Ua cas thawj zaug uas kuv tso neeg tuaj hu koj, koj tsis kam tuaj? Koj xav hais tias, nyob tsam kuv tsis muab nqi zog txaus rau koj no los?” Npala-as teb hais tias, “Kuv twb tuaj txog lawm ne? Tiamsis, tamsim no kuv muaj hwjchim ua tau dabtsi? Kuv tsuas muaj cuabkav hais tau li Vajtswv kom kuv hais xwb.” Npala-as nrog Npalaj mus tom lub nroog Huxaus, Npalaj muab nyuj muab yaj los tua thiab muab nqaij rau Npala-as thiab cov nomtswv uas nrog nws nyob ua ke ntawd noj. Tagkis sawv ntxov Npalaj coj Npala-as mus txog pem Npamaus Npa-as, thaum nkawd mus txog ped, Npala-as pom cov Yixalayees ibtxhia. Npala-as hais tias, “Koj cia li teeb xya lub thaj rau kuv, thiab muab xya tus heev nyuj thiab xya tus laug yaj rau kuv.” Npalaj ua raws li Npala-as hais, ib lub thaj twg tua ib tug heev nyuj thiab ib tug laug yaj hlawv fij rau saum. Ces Npala-as hais rau Npalaj hais tias, “Thaum kuv mus xyuas saib tus TSWV los hais dabtsi rau kuv lossis tsis hais, koj cia li mus sawv ntawm qhov chaw uas hlawv koj tej khoom fij. Txhua yam uas tus TSWV hais rau kuv, kuv yuav qhia rau koj.” Yog li ntawd, Npala-as thiaj nce mus rau saum ib lub ncov roob, thiab Vajtswv los cuag Npala-as. Npala-as hais rau Vajtswv hais tias, “Kuv teeb xya lub thaj thiab tua nyuj, tua yaj fij tso rau saum xya lub thaj ntawd ib lub ib tug nyuj thiab ib tug yaj.” Tus TSWV qhia tej lus uas yuav hais rau Npala-as thiab kom nws coj tej lus ntawd rov los hais rau Npalaj. Npala-as rov los, nws los pom Npalaj thiab cov Mau-am tej thawjcoj sawv ntawm qhov chaw uas hlawv tej khoom fij ntawd. Ces Npala-as cevlus hais tias: “Cov Mau-am tus Vajntxwv Npalaj tos kuv pem tebchaws Xilias uas nyob pem cov roob sab hnubtuaj tuaj. Nws hais tias, ‘Koj tuaj pab kuv foom tsis zoo rau Yakhauj uas yog Yixalayees.’ Kuv yuav ua li cas foom tsis zoo rau cov neeg uas Vajtswv tsis foom phem rau lawv, Lossis kuv yuav ua li cas thuam cov neeg uas tus TSWV tsis thuam! Kuv sawv saum hauv tsua uas siab xyuam yaj lug kuv ntsia mus pom lawv; Kuv nyob saum ncov roob kuv saib ntsoov lawv. Lawv yog ib haivneeg uas nyob ib cag; lawv tsis suav hais tias lawv nrog lwm haivneeg koom ua ib pab. Yixalayees cov xeebntxwv coob heev suav tsis txheeb li tej hmoov av, Coob kawg li tsis muaj leejtwg yuav suav txheeb. Thov kom thaum tag kuv simneej kuv zoo li Vajtswv haivneeg ib tug; Thov cia kuv tuag thajyeeb lug li tej neeg ncaj ncees tuag.” Npalaj hais rau Npala-as hais tias, “Ua cas koj ua li ko rau kuv? Kuv coj koj tuaj, yog kom koj tuaj foom tsis zoo rau kuv cov yeebncuab, tiamsis koj ho foom koob hmoov rau lawv!” Npala-as teb hais tias, “Kuv tsuas muaj cuabkav hais tau tej lus uas tus TSWV qhib kuv lub qhovncauj hais xwb.” Tom qab ntawd Npalaj rov hais dua rau Npala-as hais tias, “Koj cia li nrog kuv mus dua rau lwm qhov chaw, koj yuav pom cov Yixalayees ibtxhia thiab. Koj cia li foom tsis zoo rau lawv.” Npalaj coj Npala-as mus rau pem Xaufimes thaj teb uas nyob saum Roob Pinkas. Thaum mus txog saud, Npalaj teeb tau xya lub thaj thiab ib lub thaj twg tua ib tug heev nyiaj thiab ib tug laug yaj hlawv fij rau saud. Npala-as hais rau Npalaj hais tias, “Koj cia li mus sawv ntawm koj tej khoom fij uas hlawv ntawd, kuv yuav mus cuag Vajtswv lawm tid.” Tus TSWV los cuag Npala-as thiab qhia tej lus uas yuav hais rau Npala-as kom coj rov los hais rau Npalaj. Npala-as rov los pom Npalaj tseem sawv nrog cov Mau-am tej thawjcoj, ntawm qhov chaw uas hlawv nws cov khoom fij ntawd. Npalaj nug saib tus TSWV hais li cas, Npala-as cevlus hais tias: “Xipaules tus tub Npalaj, koj cia li los ntawm no thiab mloog tej lus uas kuv hais, Vajtswv tsis zoo li tej neeg uas pheej hais lus dag; Nws tsis yog tus uas pheej yuav hloov siab. Nws coglus li cas, nws yeej ua li ntawd; nws hais li cas, yeej muaj li nws hais. Vajtswv tsa kuv ua tus foom koob hmoov, thiab thaum Vajtswv foom koob hmoov rau leejtwg lawm, kuv tsis muaj cuabkav thim tej lus ntawd rov qab. Kuv twb pom ua ntej lawm hais tias cov Yixalayees lub neej yav tom ntej yuav tsis raug kev txomnyem ib zaug li. Tus TSWV uas yog lawv tus Vajtswv nrog nraim lawv; Thiab lawv hais nrov nrov hais tias nws yog lawv tus vajntxwv. Vajtswv coj lawv nram tebchaws Iziv los; Nws pab lawv ntaus rog ib yam li tus phaw nyujqus. Tej neeg uas txawj ua yeessiv thiab txawj ua khawvkoob, tsis muaj cuabkav tawmtsam haivneeg Yixalayees. Nimno tej neeg yuav hais txog cov Yixalayees hais tias, ‘Cia li saib tej uas tus TSWV ua rau cov Yixalayees!’ Haivneeg Yixalayees zoo ib yam li tus tsov ntxhuav uas muaj zog heev: Nws yeej tsis so mus txog thaum nws muab tej uas nws tom tau haus ntshav tas, thiab nws yeej tsis pw mus txog thaum uas nws muab noj tas.” Ces Npalaj hais rau Npala-as hais tias, “Yog koj tsis kam foom tsis zoo rau cov Yixalayees, mas koj tsis txhob foom koob hmoov rau lawv thiab.” Npala-as teb hais tias, “Kuv tsis tau qhia rau koj hais tias, kuv tsuas ua tau tej uas tus TSWV kom kuv ua xwb no los?” Npalaj hais tias, “Koj cia li nrog kuv mus, kuv yuav coj koj mus rau lwm qhov chaw. Tej zaum Vajtswv yuav cia koj foom tsis zoo rau lawv.” Npalaj coj Npala-as mus rau saum lub ncov Roob Pe-aus uas ntsia ntsoov pom rau tim tiaj suabpuam. Npala-as hais rau Npalaj hais tias, “Koj cia li teeb xya lub thaj rau kuv thiab muab xya tus heev nyuj thiab xya tus laug yaj rau kuv.” Npalaj ua raws li Npala-as hais, ib lub thaj twg tua ib tug heev nyuj thiab ib tug laug yaj hlawv fij rau saum. Zaum no Npala-as paub hais tias, Vajtswv xav kom nws foom koob hmoov rau cov Yixalayees, yog li ntawd nws thiaj tsis mus tsawv hmoov, ib yam li nws tau ua tas los lawm. Nws tig hlo xubntiag mus rau tim tiaj suabpuam, thiab pom cov Yixalayees rub tsevntaub nyob ib xeem quas ib xeem. Vajtswv tus ntsujplig tshoov Npala-as siab, nws thiaj cevlus hais tias: “Tej lus tseemceeb no yog Npe-aus tus tub Npala-as hais, yog tus txivneej uas pom qhov tseeb tej lus, kuv yog tus hnov Vajtswv tej lus, kuv yog tus uas lub qhovmuag rua pliav pom ntsoov tej uas Vajtswv tus uas muaj hwjchim loj kawg nkaus ua rau kuv pom. Cov Yixalayees tej tsevntaub zoo nkauj kawg li, zoo ib yam li tej leej toovlaj uas nplooj npog luas lossis zoo ib yam li tej vaj zaub uas nyob raws ntug dej, zoo ib yam li tsob ntoo tsw qab uas tus TSWV cog tseg lossis zoo ib yam li tej ntoo ciab uas tuaj ntawm ntug dej. Lawv lub tebchaws yuav muaj dej nag nplua mias thiab lawv yuav cog tej noob qoob rau thaj teb txuas av noo zaw. Lawv tus vajntxwv muaj hwjchim heev dua vajntxwv Ankas, thiab nws yuav kav lub tebchaws nthuav mus deb thiab dav zuj zus. Vajtswv coj lawv nram tebchaws Iziv los, nws pab lawv tawmtsam yeebncuab ib yam li tus phaw nyujqus. Lawv rhuav cov yeebncuab, tsoo lawv cov yeebncuab tej pobtxha thiab muab yeebncuab tej xub hneev lov tas. Haivneeg no zoo ib yam li tus tsov ntxhuav uas muaj zog heev; thaum nws pw tsaug zog lawm, tsis muaj leejtwg tsa tau nws sawv. Tus uas foom koob hmoov rau cov Yixalayees tus ntawd yuav tau koob hmoov, thiab tus uas foom tsis zoo rau cov Yixalayees, tus ntawd yuav raug foom tsis zoo.” Npalaj sawv tsees nyem nrig thiab npautaws vog hais rau Npala-as hais tias, “Kuv coj koj tuaj ntawm no, yog coj tuaj foom tsis zoo rau kuv cov yeebncuab, tiamsis koj tsis foom phem rau lawv, koj cia li foom koob hmoov rau lawv peb zaug rau zaum no lawm. Koj cia li rov mus tsev tamsim no! Kuv yeej coglus muab nqi zog rau koj, tiamsis tus TSWV txwv tsis pub koj yuav tej nqi zog no.” Npala-as teb hais tias, “Kuv twb yeej hais rau cov neeg uas koj txib tuaj hu kuv lawm, txawm yog koj yuav muab tagnrho tej nyiaj tej kub hauv koj lub txhab nyiaj rau kuv los kuv yeej tsis muaj cuabkav ua ib yam dabtsi li, yog tej ntawd yuav ua rau kuv hla tus TSWV tej lus. Kuv tsuas muaj cuabkav hais tej lus uas tus TSWV kom kuv hais xwb.” Npala-as hais rau Npalaj hais tias, “Nimno kuv yuav rov mus cuag kuv haivneeg, tiamsis ua ntej kuv yuav sawv kev mus, kuv qhia rau koj hais txog tej uas yav tom ntej cov Yixalayees yuav ua rau koj haivneeg.” Ces Npala-as thiaj cevlus hais tias: “Tej lus tseemceeb no yog Npe-aus tus tub Npala-as hais, tej lus no yog tus txivneej uas pom qhov tseeb hais, Kuv yog tus hnov Vajtswv tej lus, thiab khaws nkaus Vajtswv tus uas muaj hwjchim loj kawg nkaus lub tswvyim rau nruab siab. Kuv yog tus uas lub qhovmuag rua pliav saib ntsoov tej uas Vajtswv tus muaj hwjchim loj kawg nkaus ua rau kuv pom. Kuv pom nws, tiamsis tsis yog tamsim no, kuv ntsia ntsoov nws, tiamsis tsis nyob ze, yuav muaj ib lub hnubqub tshwm hauv Yakhauj tuaj, yuav muaj ib tug cwj vajntxwv tshwm hauv cov Yixalayees los. Nws Yuav tsoo cov Mau-am hauvpliaj kom ntsoog, thiab yuav ntaus Xej cov neeg kom swb tagnrho. Nws yuav tua yeej cov Edoos thiab txeeb tau nws cov yeebncuab lub tebchaws los ua nws tug; ces cov Yixalayees yuav muaj yeej loj zuj zus. Cov Yixalayees yuav sawv los tswj teb kav chaw thiab yuav tua cov neeg uas seem hauv tej nroog kom tuag tas.” Nyob hauv Npala-as zaj yogtoog, mas nws pom cov Amalej, nws thiaj cevlus hais tias: “Cov Amalej yog haivneeg uas muaj hwjchim loj dua ntais huv tibsi, Tiamsis thaum kawg haivneeg no yuav raug kev puastsuaj tas.” Nyob hauv Npala-as zaj yogtoog, nws pom cov Kenais, nws thiaj cevlus hais tias: “Nej tej chaw nyob ruaj khov kho, tso siab lug ib yam li tej zes noog uas nyob saum tej hauv tsua uas siab tshaj plaws, Tiamsis cov Kenais, nej yuav raug kev puastsuaj thaum cov Axilias tuaj ntes tau nej lawm.” Npala-as cevlus dua hais tias: “Tuag lauj, yog Vajtswv ua tej no leejtwg tseem yuav muaj sia nyob thiab? Cov neeg uas tuaj txeeb yuav tsav nkoj tim Xaipas tuaj; lawv yuav tua yeej cov Axilias thiab cov Enpes, tiamsis thaum kawg, lawv yuav tuag tu noob nrho.” Ces Npala-as txawm tu nra thiab sawv kev rov qab mus tsev lawm, Npalaj los kuj sawv kev rov los tsev lawm thiab. Thaum cov Yixalayees tseem nyob ntawm lub Hav Akaxias, cov txivneej txawm mus deev cov Mau-am uas ibtxwm nyob ntawd tej ntxhais. Cov pojniam ntawd, caw cov txivneej no nrog lawv mus ua kevcai fij khoom, ntawm qhov chaw uas pe cov Mau-am tej vajtswv. Cov Yixalayees mus noj tej zaub mov ntawd thiab pe cov Mau-am tej vajtswv uas yog Pe-aus tus mlom Npa-as. Yog li ntawd, tus TSWV thiaj chim heev rau cov Yixalayees thiab tus TSWV hais rau Mauxes hais tias, “Coj tagnrho cov Yixalayees tej thawjcoj mus khi dai ziab ntshav ntuj tabmeeg tus TSWV, ces kuv thiaj yuav tsis chim rau cov pejxeem.” Mauxes thiaj hais rau cov nomtswv hais tias, “Nej cia li muab txhua tus neeg hauv nej xeem uas mus pe Npa-as saum roob Pe-aus tua povtseg.” Muaj ib tug txivneej Yixalayees coj tau cov Midias ib tug ntxhais los hauv nws tsev tabmeeg Mauxes thiab cov pejxeem, thaum lawv tseem tabtom quaj nyiav ntsoog qees ntawm tus TSWV lub Tsevntaub sib ntsib lub qhovrooj. Thaum Ele-axas tus tub Finehas uas yog Aloos tus xeebntxwv pom li ntawd, nws sawv tsees tso plhuav pawg neeg ntawd tseg. Nws mus nqa tau ib rab hmuv, raws tus txivneej thiab tus pojniam ntawd qab mus rau hauv lub tsevntaub, nws muab hmuv nkaug nkawd tshab plaws tuag kiag rau ntawd. Yog li ntawd, tej vijsub vijsw uas tabtom raug cov Yixalayees thiaj tseg kiag tamsim ntawd. Tiamsis cov neeg uas raug tua tuag, twb muaj nees nkaum plaub txhiab leej lawm. Tus TSWV hais rau Mauxes hais tias, “Vim Ele-axas tus tub Finehas uas yog Aloos tus xeebntxwv, tau ua tej no tiav, kuv thiaj tsis chim rau cov Yixalayees lawm. Vim nws khib li kuv uas yog nws tus Vajtswv khib, kuv txojkev chim thiaj tsis ua rau lawv raug puastsuaj. Koj cia li mus qhia rau nws hais tias, kuv yuav coglus tseg rau nws mus tas nws tiam neej li. Mas nws thiab nws cov xeebntxwv yuav tau ua cov povthawj mus ibtxhis raws li kuv tau coglus tseg lawm, vim nws nrog nws tus Vajtswv khib, thiab nws tau ua kom muaj kev theej txhoj los rau haivneeg Yixalayees.” Tus txivneej Yixalayees uas raug tua tuag nrog tus pojniam Midias ntawd hu ua Ximelis, nws yog Xalus tus tub uas yog xeem Xime-oos tus thawjcoj ntag. Tus pojniam ntawd hu ua Kauxenpis. Nws yog Xules uas yog cov Midias tus thawjcoj tus ntxhais. Ces tus TSWV hais rau Mauxes hais tias, “Cia li mus ua rog rau cov Midias thiab tua kom lawv puastsuaj tas, vim tej kev phem kev qias uas lawv ua rau nej thaum lawv dag ntxias nej ntawm Pe-aus, thiab vim Kauxenpis tus uas raug tua tuag rau lub sijhawm uas tabtom muaj tej vijsub vijsw nyob ntawm Pe-aus.” Tom qab uas tej vijsub vijsw ntawd dhau lawm, tus TSWV hais rau Mauxes thiab Aloos tus tub Ele-axas uas yog tus povthawj hais tias, “Neb cia li sau cov Yixalayees txhua tsevneeg npe, suav tagnrho cov txivneej uas hnubnyoog nees nkaum xyoo rov saud uas ua taus tubrog.” Xeem Lunpees (Lunpees yog Yakhauj tus tub hlob): yog cuab Hanauj, Palus, Heloos thiab Kalemis. Suav tagnrho lawv tej cuab kwvtij no cov txivneej muaj plaub caug peb txhiab xya pua peb caug leej. Palus tus tub yog Ele-as; thiab Ele-as cov tub yog Nemuyees, Dathas thiab Anpilas. (Cov pejxeem xaiv Dathas thiab Anpilas ua lawv ob tug thawjcoj. Nkawd tawv nyom Mauxes thiab Aloos, thiab mus koom nrog Kaulas ntxeev siab tawmtsam tus TSWV. Ces av cia li qhib plho thiab nqos nkawd lawm, mas nkawd thiaj tuag nrog Kaulas thiab nws cov phoojywg thaum uas hluavtaws poob los kub ob pua tsib caug leej txivneej tuag tas ntawd lawm; qhov ntawd thiaj ua ib qho qhia rau cov pejxeem sawvdaws. Tiamsis Kaulas cov tub tsis raug tua tuag ib tug li.) Xeem Xime-oos: yog cuab Nemuyees, cuab Yamees, cuab Yakhees, cuab Zelas thiab cuab Sa-ules. Suav tagnrho lawv tej cuab kwvtij no cov txivneej muaj nees nkaum ob txhiab ob puas leej. Xeem Khas: yog cuab Xefoos, cuab Hankis, cuab Sunis, cuab Auxenis, cuab Elis, Alaudis thiab Alelis. Suav tagnrho lawv tej cuab kwvtij no cov txivneej muaj plaub caug txhiab tsib puas leej. Suav tagnrho lawv tej cuab kwvtij no cov txivneej muaj xya caum rau txhiab tsib puas leej. Xeem Ixakhas: yog cuab Taulas, cuab Puahas, cuab Yasus thiab cuab Simeloos. Suav tagnrho lawv tej cuab kwvtij no cov txivneej muaj rau caum plaub txhiab peb puas leej. Xeem Xenpuloos: yog cuab Xeles, cuab Eloos thiab cuab Yahelees. Suav tagnrho lawv tej cuab kwvtij no cov txivneej muaj rau caum txhiab tsib puas leej. Yauxej muaj ob tug tub, Manaxes thiab Efalayees nkawd ncau mus ua ob xeem. Xeem Manaxes. Manaxes tus tub Makhiles yog Nkile-as txiv thiab Nkile-as yog lawv tej cuab kwvtij nram no tus yawgkoob: cuab Ixes, cuab Heles, cuab Aliyees, cuab Sekees, cuab Semidas thiab cuab Hefeles. Hefeles tus tub Xelaufehas tsis muaj ib tug tub li, nws muaj tsib tug ntxhais xwb; lawv cov npe hu ua Malas, Nau-es, Haunkelas, Milekas thiab Tilexas. Suav tagnrho lawv tej cuab vivncaus no cov txivneej muaj tsib caug ob txhiab xya pua leej. Xeem Efalayees: yog cuab Suthelas, cuab Npekhelis thiab cuab Tahanes. Cuab Elas yog Suthelas cajces. Suav tagnrho lawv tej cuab kwvtij no cov txivneej muaj peb caug ob txhiab tsib puas leej. Tagnrho tej cuab kwvtij uas hais los no puavleej yog Yauxej cajces. Xeem Npeenyamees: yog cuab Npelas, cuab Asenpes, cuab Ahilas, cuab Sefufas thiab cuab Hufas. Cuab Ales thiab Na-amas yog Npelas cajces. Suav tagnrho lawv tej cuab kwvtij no cov txivneej muaj plaub caug tsib txhiab rau pua leej. Xeem Das: yog cuab Husees, suav tagnrho cuab kwvtij no cov txivneej muaj rau caum plaub txhiab plaub puas leej. Xeem Aseles: yog cuab Imenas, cuab Esavis thiab cuab Npeliyas. Cuab Henpeles thiab cuab Makhiyees yog Npeliyas cajces. Aseles muaj ib tug ntxhais xwb, nws npe huv ua Xelas. Suav tagnrho lawv tej cuab kwvtij no cov txivneej muaj tsib caug peb txhiab plaub puas leej. Xeem Nathalis: yog cuab Yaxees, cuab Nkunis, cuab Yexeles thiab cuab Silees. Suav tagnrho lawv tej cuab kwvtij no cov txivneej muaj plaub caug tsib txhiab tsib puas leej. Suav tagnrho haivneeg Yixalayees cov txivneej muaj rau pua ib txhiab xya pua peb caug leej. Tus TSWV hais rau Mauxes hais tias, “Koj cia li muab lub tebchaws no faib rau tej xeem raws li tej xeem ntawd muaj neeg coob thiab tsawg. Xeem Levis sau npe raws li cuab Nkesoos, Kauhas thiab Melalis. Suav tagnrho lawv cov xeebntxwv muaj raws li nram no: cuab Linpenis, cuab Henploos, cuab Mahalis, cuab Musis thiab cuab Kaulas. Kauhas yog Alamas txiv, nws yuav Levis tus ntxhais Yaukhenpes uas yug nram tebchaws Iziv ua pojniam. Yaukhenpes thiaj yug tau ob tug tub rau Alamas: ob tug tub ntawd, yog Aloos thiab Mauxes, thiab yug tau ib tug ntxhais hu ua Milias. Aloos muaj plaub tug tub, Nadas, Anpihus, Ele-axas thiab Ithamas. Nadas thiab Anpihus nkawd tuag thaum nkawd muab cov ncaig taws uas tsis dawbhuv hlawv khoom fij rau tus TSWV lawm. Cov Levis tej txivneej uas hnubnyoog ib hlis rov saud muaj nees nkaum peb txhiab leej. Cov Levis tsis sau npe nrog cov Yixalayees, vim lawv tsis muaj feem tau lub tebchaws Yixalayees los ua lawv tug. Tagnrho tej cuab Yixalayees no puavleej yog Mauxes thiab Ele-axas nkawd ua ob tug uas sau lawv tej npe nyob hauv lub tiaj Mau-am ntawm ntug Dej Yauladees uas nyob ncaj lub nroog Yelikaus sab tid. Cov neeg uas Mauxes thiab Aloos nkawd sau npe thawj zaug nram tiaj Suabpuam Xinais yeej tsis tshuav ib tug seem li lawm. Tus TSWV hais tias, tagnrho lawv cov ntawd yuav tuag tas rau hauv tiaj suabpuam, tsuas tshuav Yefunes tus tub Kalej thiab Noos tus tub Yausuas nkaus xwb, thiaj tsis tuag. Malas, Nau-es, Haunkelas, Milekas thiab Tilexas, puavleej yog Hefeles tus tub Xelaufehas cov ntxhais, (Xelaufehas yog Hefeles tub, Hefeles yog Nkele-as tub, Nkele-as yog Makhiles tub, Makhiles yog Manaxes tub thiab Manaxes yog Yauxej tub.) Lawv mus sawv tabmeeg Mauxes, tus povthawj Ele-axas, cov thawjcoj thiab tagnrho cov pejxeem rau ntawm tus TSWV lub Tsevntaub sib ntsib lub qhovrooj thiab thov hais tias, “Peb txiv tuag rau tom tiaj suabpuam lawm nws tsis muaj tub li, nws tsis koom siab nrog Kaulas cov phoojywg ntxeev siab rau tus TSWV; nws tuag vim nws tej kev txhaum nkaus xwb. Twb yog peb txiv tsis muaj ib leeg tub, yog li ntawd peb txiv lub npe txawm yuav ploj hauv haivneeg Yixalayees mus li los? Thov muab peb txiv tej qubtxeeg qubteg ntawm nws cov kwvtij los faib rau peb thiab.” Mauxes coj lawv tej lus mus hais rau tus TSWV, ces tus TSWV hais rau Mauxes hais tias, “Xelaufehas cov ntxhais tej lus thov yeej yog lawm; koj cia li muab tej qubtxeeg qubteg ntawm lawv txiv cov kwvtij los rau lawv. Cia lawv yuav lawv txiv tej qubtxeeg qubteg ntawd. Qhia rau cov Yixalayees hais tias yog thaum ib tug txivneej twg tuag lawm, nws tsis muaj tub los tuav nws tej qubtxeeg qubteg, nws tus ntxhais yog tus los tuav nws tej qubtxeeg qubteg ntag. Yog nws tsis muaj ntxhais li thiab, mam li cia nws cov kwvtij tuav nws tej qubtxeeg qubteg. Yog nws tsis muaj kwvtij li, nws txiv cov kwvtij yog cov tuav nws tej qubtxeeg qubteg ntawd. Yog nws tsis muaj kwvtij lossis txiv ntxawm lossis txiv hlob li, ces nws tej kwvtij txheeb ze yog cov tuav nws tej qubtxeeg qubteg. Cov Yixalayees yuav tsum tau ceev zaj no ua ib txoj kevcai rau lawv sawvdaws coj, raws li kuv uas yog tus TSWV tau hais rau koj lawm.” Tus TSWV hais rau Mauxes hais tias, “Koj cia li mus rau saum lub Roob Anpalees thiab tuaj saud ntsia lub tebchaws uas kuv yuav muab rau cov Yixalayees nyob. Tom qab uas koj saib tas, koj yuav tuag mus ib yam li koj tus tijlaug Aloos. Rau qhov neb ob kwvtij ntxeev siab rau kuv tej lus samhwm nram tiaj suabpuam Xees. Thaum cov pejxeem yws kuv nram Melinpas, neb tsis kam ua kuv lub hwjchim uas loj kawg nkaus tabmeeg rau lawv pom.” (Melinpas yog lub npe qhovdej txhawv uas nyob hauv lub nroog Kades nram tiaj suabpuam Xees.) Mauxes thov Vajtswv hais tias, “Tus TSWV, Vajtswv uas yog tus tuav sawvdaws txojsia thiab ib puas tsav yam huv tibsi, kuv thov koj tsa ib tug los ua tus coj cov neeg no, thiab coj lawv mus ntaus rog, kom koj haivneeg thiaj yuav tsis zoo li pab yaj uas tsis muaj tus tswv yug.” Tus TSWV hais rau Mauxes hais tias, “Koj cia li mus coj Noos tus tub Yausuas uas yog tus neeg thoob tsib to nrog tuaj, thiab tsa koj txhais tes rau saum nws taubhau. Kom nws tuaj sawv tabmeeg tus povthawj Ele-axas thiab cov pejxeem, thiab tsa nws ua tus hloov koj chaw tabmeeg sawvdaws. Muab koj lub hwjchim faib rau nws kom cov Yixalayees thiaj yuav hwm nws. Yausuas yuav nrog tus povthawj Ele-axas, siv lub Ulees thiab lub Thumees. Ua li no, Ele-axas thiaj qhia tau rau Yausuas thiab cov Yixalayees ua kom haum tus TSWV siab.” Mauxes ua raws li tus TSWV hais rau nws. Nws thiaj coj Yausuas mus sawv tabmeeg tus povthawj Ele-axas thiab cov pejxeem Yixalayees. Mauxes tsa nws ob txhais tes rau saum Yausuas taubhau thiab tsa Yausuas ua tus hloov Mauxes chaw, raws li tus TSWV tau hais rau Mauxes lawm. Tus TSWV hais rau Mauxes kom qhia rau cov Yixalayees yuav tsum muab tej zaub mov uas yog khoom fij, coj tuaj hlawv fij kom tsw qab ntxiag ua rau tus TSWV txaus siab raws li tau teem tseg lawm. Thiab koj hais rau lawv hais tias, ntawm no yog tej khoom uas coj tuaj fij rau tus TSWV: cov uas muab hlawv fij txhua hnub yog ob tug thav yaj hnubnyoog ib xyoos uas tsis muaj ib qho phem li. Muab ib tug fij rau thaum sawv ntxov thiab muab ib tug fij rau thaum yuav tsaus ntuj, ib tug thav yaj twg muab ob choj hmoov nplej ntse xyaw ob khob roj txiv ntoo mus fij nrog. Ntawm no, yog txoj kevcai uas niaj hnub muab khoom hlawv fij, kom tsw qab ntxiag txaus tus TSWV siab raws li txeev ua tom roob Xinais lawm. Cov cawv txiv hmab uas coj mus fij nrog tus menyuam yaj thaum sawv ntxov, mas muab ob khob hliv rau hauv chav pehawm Vajtswv. Tus uas fij thaum yuav tsaus ntuj los muab cawv txiv hmab fij nrog ib yam li tus uas fij thaum sawv ntxov. Tej no yog khoom hlawv fij kom tsw qab ntxiag ua rau tus TSWV txaus siab. Hnub Xanpataus, mas muab ob tug thav yaj hnubnyoog ib xyoos uas tsis muaj ib qho phem li, thiab plaub choj hmoov nplej ntse xyaw roj txiv ntoo coj mus ua zaub mov fij, thiab muab cawv txiv hmab mus fij nrog. Cov khoom uas hlawv fij no yuav tsum coj mus fij txhua Hnub Xanpataus thiab ntxiv rau cov khoom fij uas niaj hnub hlawv fij nrog cov cawv txiv hmab. Txhua lub hlis hnub xiab ib, hlawv khoom fij rau tus TSWV li no: ob tug ntsuag nyuj, ib tug laug yaj, xya tus thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Tej qoobloo uas coj mus ua khoom fij, muab tej hmoov nplej ntse xyaw roj txiv ntoo coj mus fij li no: ib tug nyuj twg rau choj hmoov nplej; ib tug laug yaj twg plaub choj hmoov nplej; thiab ib tug thav yaj muab ob choj hmoov nplej mus fij nrog. Tej khoom no coj mus hlawv fij kom tsw qab ntxiag ua rau tus TSWV txaus siab. Ib tug nyuj twg muab plaub khob cawv txiv hmab fij nrog, ib tug laug yaj muab peb khob cawv txiv hmab fij nrog, thiab ib tug thav yaj muab ob khob cawv txiv hmab mus fij nrog. Tej no yog txoj kevcai uas hlawv khoom fij rau txhua lub hlis hnub xiab ib, mus kom tas xyoo. Thiab muab ib tug laug tshis tua fij daws txim ntxiv rau tej khoom uas niaj hnub coj mus hlawv fij nrog tej cawv txiv hmab uas coj mus fij ntawd. Ua Kevcai Hla Dhau qhuas tus TSWV thaum lub ib hlis ntuj hnub xiab kaum plaub. Hnub kaum tsib yog hnub pib ua kevcai Hla Dhau uas yog ua kom txwm nkaus xya hnub, thaum lub sijhawm ntawd, mas noj cov ncuav tsis xyaw keeb nkaus xwb. Thawj hnub uas pib ua kevcai yog hnub nej sib sau tuaj pehawm, thiab tsis txhob ua ib yam haujlwm dabtsi li. Nej muab khoom hlawv fij rau tus TSWV raws li no: ob tug ntsuag nyuj, ib tug laug yaj thiab xya tus thav yaj uas hnubnyoog ib xyoos, txhua tua tsiaj no yog cov uas tsis muaj ib qho phem li. Muab tej hmoov nplej uas ntse xyaw roj txiv ntoo li no coj mus ua khoom fij: ib tug nyuj muab rau choj hmoov nplej fij nrog, ib tug laug yaj muab plaub choj hmoov nplej fij nrog thiab ib tug thav yaj twg muab ob choj hmoov nplej mus fij nrog. Thiab muab dua ib tug laug tshis mus tua fij daws txim, thiab cia li ua kevcai ntxuav rau cov pejxeem. Tej khoom fij no, yog muab ntxiv rau tej khoom fij uas nej niaj tagkis coj mus hlawv fij rau tus TSWV. Ib yam nkaus li ntawd, xya hnub uas nej fij tej zaub mov ntawd rau tus TSWV, ua kom tsw qab ntxiag rau tus TSWV. Tej khoom no fij ntxiv rau tej khoom uas nej niaj hnub hlawv fij thiab tej cawv txiv hmab uas yog khoom fij. Hnub xya nej yuav tsum rov tuaj sib sau pehawm Vajtswv thiab tsis txhob ua ib yam haujlwm dabtsi li. Thawj hnub uas ua Kevcai Sau Qoobloo, yog thaum nej coj tej qoob tshiab tuaj fij rau tus TSWV, nej tuaj sib sau ua ke pehawm Vajtswv, thiab hnub ntawd tsis txhob ua ib yam haujlwm dabtsi li. Muab khoom mus hlawv fij kom tsw qab ntxiag rau tus TSWV li no: ob tug ntsuag nyuj, ib tug laug yaj thiab xya tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Muab cov hmoov nplej ntse xyaw roj txiv ntoo coj mus fij: ib tug heev nyuj twg muab rau choj hmoov nplej, ib tug laug yaj muab plaub coj hmoov nplej, thiab ib tug thav yaj muab ob choj hmoov nplej mus fij nrog. Thiab muab dua ib tug laug tshis mus tua fij daws txim, thiab ua kevcai ntxuav rau cov pejxeem. Fij tej khoom thiab tej cawv txiv hmab no ntxiv rau tej khoom uas niaj hnub hlawv fij, thiab tej qoobloo uas yog khoom fij. Tej tsiaj uas muab fij ntawd yog cov uas tsis muaj ib qho phem li. Thaum hnub xiab ib lub xya hli ntuj nej cia li tuaj sib sau pehawm Vajtswv, thiab tsis txhob ua ib yam haujlwm dabtsi li. Hnub ntawd yog hnub uas tshuab raj tshuab xyu. Nej muab khoom coj mus hlawv fij rau tus TSWV kom tsw qab ntxiag rau nws: ib tug ntsuag nyuj, ib tug laug yaj thiab xya tus thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Muab hmoov nplej ntse xyaw roj txiv ntoo coj mus fij: ib tug ntsuag nyuj twg muab rau choj hmoov nplej fij nrog, ib tug laug yaj twg muab plaub choj hmoov nplej fij nrog, thiab ib tug thav yaj twg muab ob choj hmoov nplej mus fij nrog. Thiab muab dua ib tug laug tshis mus tua fij daws txim, thiab ua kevcai ntxuav rau cov pejxeem. Cov khoom no coj mus fij ntxiv rau cov khoom uas niaj hnub fij thaum hnub xiab ib nrog lawv tej qoobloo thiab cov cawv txiv hmab uas coj mus hlawv fij. Muab tej khoom no hlawv fij kom tsw qab ntxiag ua rau tus TSWV txaus siab. Lub xya hli ntuj hnub xiab kaug, nej cia li tuaj sib sau pehawm Vajtswv; tsis txhob noj zaub noj mov thiab tsis txhob ua ib yam haujlwm dabtsi hlo li. Nej muab ib tug ntsuag nyuj, ib tug laug yaj thiab xya tus thav yaj hnubnyoog ib xyoos uas tsis muaj ib qho phem li tuaj tua hlawv fij rau tus TSWV kom tsw qab ntxiag ua rau nws txaus siab. Muab hmoov nplej ntse xyaw roj txiv ntoo coj mus fij: ib tug nyuj twg muab rau choj hmoov nplej fij nrog, ib tug laug yaj twg muab plaub choj hmoov nplej fij nrog, thiab ib tug thav yaj twg muab ob choj hmoov nplej mus fij nrog. Thiab muab dua ib tug laug tshis mus tua fij daws txim ntxiv rau tus tshis uas tua fij ua kevcai ntxuav rau cov pejxeem, thiab tej khoom fij uas niaj hnub hlawv nrog tej qoobloo, thiab lawv tej cawv txiv hmab uas coj mus fij. Lub xya hli ntuj hnub kaum tsib nej cia li sib sau tuaj ua ke pehawm Vajtswv. Ua kevcai qhuas tus TSWV kom txwm xya hnub thiab tsis txhob ua ib yam haujlwm dabtsi li. Hnub ib nej muab kaum peb tug ntsuag nyuj, ob tug laug yaj thiab kaum plaub tug thav yaj hnubnyoog ib xyoos uas tsis muaj ib qho phem li tuaj tua hlawv fij rau tus TSWV kom tsw qab ntxiag ua rau nws txaus siab. Muab hmoov nplej ntse xyaw roj txiv ntoo coj mus fij: ib tug nyuj twg muab rau choj hmoov nplej fij nrog, ib tug laug yaj twg muab plaub choj hmoov nplej fij nrog, thiab kaum ob tug thav yaj ntawd ib tug twg muab ob choj hmoov nplej thiab muab cov cawv txiv hmab mus fij nrog. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo thiab tej cawv txiv hmab. Hnub ob fij kaum ob tug ntsuag nyuj, ob tug laug yaj thiab kaum plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Cov nyuj, cov laug yaj thiab cov thav yaj, muab hmoov nplej coj mus fij nrog raws li cov uas fij thawj hnub. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo, thiab lawv tej cawv txiv hmab. Hnub peb fij kaum ib tug ntsuag nyuj, ob tug laug yaj thiab kaum plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Cov nyuj, cov laug yaj thiab cov thav yaj, muab hmoov nplej coj mus fij nrog raws li cov uas fij thawj hnub. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo, thiab lawv tej cawv txiv hmab. Hnub plaub fij kaum tug ntsuag nyuj, ob tug laug yaj thiab kaum plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Cov nyuj, cov laug yaj thiab cov thav yaj, muab hmoov nplej coj mus fij nrog raws li cov uas fij thawj hnub. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo, thiab lawv tej cawv txiv hmab. Hnub tsib fij cuaj tug ntsuag nyuj, ob tug laug yaj thiab kaum plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Cov nyuj, cov laug yaj thiab cov thav yaj, muab hmoov nplej coj mus fij nrog raws li cov uas fij thawj hnub. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo, thiab lawv tej cawv txiv hmab. Hnub rau fij yim tug ntsuag nyuj, ob tug laug yaj thiab kaum plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Cov nyuj, cov laug yaj thiab cov thav yaj, muab hmoov nplej coj mus fij nrog raws li cov uas fij thawj hnub. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo, thiab lawv tej cawv txiv hmab. Hnub xya fij xya tus ntsuag nyuj, ob tug laug yaj thiab kaum plaub tug thav yaj hnubnyoog ib xyoos, txhua tus tsiaj no yog cov uas tsis muaj ib qho phem li. Cov nyuj, cov laug yaj thiab cov thav yaj, muab hmoov nplej coj mus fij nrog raws li cov uas fij thawj hnub. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo, thiab lawv tej cawv txiv hmab. Hnub yim cia li rov tuaj sib sau ua ke pehawm Vajtswv, thiab tsis txhob ua ib yam haujlwm dabtsi li. Muab tej khoom coj mus hlawv fij rau tus TSWV ua kom tsw qab ntxiag txaus nws siab: muab ib tug ntsuag nyuj, ib tug laug yaj thiab xya tus thav yaj hnubnyoog ib xyoos uas tsis muaj ib qho phem li. Tus ntsuag nyuj, tus laug yaj thiab cov thav yaj, muab hmoov nplej coj mus fij nrog raws li cov uas fij thawj hnub. Thiab muab dua ib tug laug tshis mus tua fij daws txim ntxiv rau tej khoom fij uas niaj hnub coj mus hlawv fij nrog tej qoobloo, thiab lawv tej cawv txiv hmab. Ntawm no yog tej kevcai uas hais txog tej khoom uas muab hlawv fij rau tus TSWV, tej qoobloo, tej cawv txiv hmab, thiab fij tej khoom ua kev sib raug zoo rau tus TSWV raws li lub sijhawm uas nej teem tseg rau thaum ua kevcai. Tej khoom no yog muab fij ntxiv rau nej tej khoom fij ua tsaug uas nej tau coglus tseg lawm lossis tej khoom uas nej txaus siab fij. Yog li ntawd, Mauxes thiaj qhia txhua yam uas tus TSWV tau samhwm rau nws lawm rau cov Yixalayees. Mauxes qhia tej lus no rau cov thawjcoj ntawm txhua xeem Yixalayees hais tias: Thaum muaj ib tug neeg twg coglus muab ib yam dabtsi rau tus TSWV lossis coglus rau tej yam dabtsi lawm, nws tsis txhob thim nws tej lus cog tseg ntawd, tiamsis nws yuav tsum tau ua txhua yam raws li nws tau coglus lawm. Ib tug ntxhais twg thaum nws tseem ua hluas nkauj nrog nws niam nws txiv nyob, yog nws tau coglus yuav muab ib yam dabtsi rau tus TSWV lossis coglus yuav ua ib yam dabtsi lawm, yog nws txiv hnov tej lus cog tseg ntawd, nws txiv tsis txwv nws tej lus cog tseg ntawd, ces nws yuav tau ua txhua yam kom tiav raws li nws tau coglus tseg. Tiamsis yog thaum nws txiv hnov tej lus cog tseg ntawd, nws txiv txwv tsis pub ua li ntawd, ces nws muab tej lus cog tseg ntawd tso tseg thiab tsis tas yuav ua. Tus TSWV thiaj yuav zam nws lub txim, rau qhov nws txiv tsis pub nws ua. Yog muaj ib tug ntxhais twg uas tsis tau yuav txiv coglus tseg, vim nws tsis ua tib zoo xav lossis tsis ceevfaj lossis nws coglus yuav ua ib yam dabtsi, ces nws mam yuav txiv, yog nws tus txiv tsis txwv thaum hnov nws cov lus cog tseg ntawd, mas tus pojniam yuav tau ua txhua yam raws li nws tau coglus tseg lawm. Tiamsis thaum tus txiv hnov tej lus cog tseg ntawd, yog tus txiv txwv tsis pub nws ua raws li nws coglus tseg, ces tus pojniam tsis txhob ua raws li tej lus uas nws tau coglus tseg ntawd. Tus TSWV thiaj yuav zam nws lub txim. Ib tug pojntsuam lossis ib tug pojnrauj twg, tau coglus tseg li cas lawm nws yuav tau ua kom tiav raws li tej lus uas nws cog tseg ntawd. Yog tus pojniam uas nws twb yuav txiv lawm, tau coglus tseg yuav ua ib yam dabtsi, yog hais tias nws tus txiv tsis txwv thaum tus txiv hnov nws tej lus cog tseg ntawd, nws yuav tau ua kom tiav txhua yam raws li nws tau coglus tseg lawm. Tiamsis yog nws tus txiv txwv tsis pub nws ua tej ntawd, nws tsis tas yuav ua li nws tau coglus lawm. Ces tus TSWV thiaj yuav zam nws lub txim, rau qhov nws tus txiv txwv tsis pub nws ua. Nws tus txiv muaj cai muab tej lus uas nws tau cog tseg ntawd xuam povtseg. Tiamsis yog tus txiv hnov tus pojniam tej lus cog tseg, ib hnub dhau ib hnub tsis hais dabtsi li, ces tus pojniam yuav tau ua txhua yam li nws tau coglus tseg. Vim nws tus txiv yeej tsis txwv hnub uas nws hnov los lawm. Tiamsis, yog hais tias tom qab ntawd tus txiv mam rhuav nws tus pojniam tej lus cog tseg, nws yuav tau ris nws tus pojniam lub txim, vim nws tus pojniam tsis tau ua kom cov lus cog tseg ntawd tiav. Tej no yog tej kevcai uas tus TSWV muab cob rau Mauxes hais txog tej lus cog tseg ntawm tej ntxhais uas tseem nrog nws niam nws txiv nyob lossis tus ntxhais uas twb yuav txiv lawm. Tus TSWV hais rau Mauxes hais tias, “Koj cia li rau txim rau cov neeg Midias pauj tej uas lawv tau ua rau haivneeg Yixalayees tas los lawm. Ces tom qab uas koj ua tej ntawd tiav lawm koj yuav tuag mus.” Yog li ntawd, Mauxes txawm hais rau cov pejxeem hais tias, “Cia li npaj cuabyeej kom txhij mus ntaus rog, nej muaj cuabkav tua yeej cov Midias thiab rau txim rau lawv pauj tej uas lawv tau ua rau tus TSWV. Tso ib xeem Yixalayees twg ib txhiab leej mus ntaus rog.” Yog li ntawd, ib xeem twg thiaj xaiv tau ib txhiab leej, suav tagnrho kaum ob xeem ntawd xaiv tau kaum ob txhiab tus txivneej mus ntaus rog. Mauxes tso lawv mus ntaus rog, tus povthawj Ele-axas tus tub Finehas ua tus coj, nws yog tus uas coj tej khoom dawbhuv thiab cov raj xyu uas tshuab txhib tua rog. Lawv tua cov Midias raws li tus TSWV samhwm rau Mauxes, lawv muab cov txivneej tua tuag tas huv tibsi, thiab tseem tua cov Midias tsib tug vajntxwv uas yog: Evis, Lekees, Xules, Hules thiab Lenpas tuag huv tibsi. Thiab lawv tseem tua Npe-aus tus tub Npala-as tuag lawm thiab. Cov Yixalayees thiaj ntes tau tagnrho cov Midias cov pojniam thiab menyuam, tej nyuj, tej yaj thiab huab tagnrho lawv tej nyiaj txiag qoobloo los thiab muab lawv tej nroog tej yeej hlawv kub hnyiab tas. Lawv sau tagnrho tej khoom uas lawv huab tau, cov neeg uas lawv ntes tau thiab tsiaj txhu huv tibsi, coj los cob rau Mauxes, Ele-axas thiab cov Yixalayees hauv lub yeej ntawm tiaj Mau-am uas nyob ntawm ntug Dej Yauladees uas ncaj lub nroog Yelikaus. Mauxes, Ele-axas thiab cov thawjcoj ntawm cov pejxeem thiaj tawm mus rau nraum ntug yeej, mus tos cov tubrog rov qab los. Mauxes chim heev rau cov thawj tubrog uas kav pawg txhiab thiab kav pawg pua uas rov tom tshavrog los. Mauxes nug lawv hais tias, “Vim li cas nej tseem yuav tseg cov pojniam no ua dabtsi? Nco ntsoov hais tias, lawv twb yog cov niag pojniam uas coj raws li Npala-as tej lus qhia thaum nyob tom Pe-aus. Thiab lawv twb coj cov neeg mus ua tsis ncaj thiab muab tus TSWV tso tseg, vim li ntawd, tus TSWV haivneeg thiaj raug tej kab mob phem. Tamsim no cia li muab txhua tus menyuam tub tua povtseg kom tas thiab muab cov pojniam uas nej nrog pw lawm tua povtseg huv tibsi, tiamsis tseg cov hluas nkauj thiab cov nkaujxwb uas tsis tau deev dua hluas nraug rau nej xwb. Nimno nej txhua tus uas tau tua ib tus twg tuag lossis tau cev tes tuav tej neeg tuag lawm, yuav tsum nyob sab nraum ntug yeej xya hnub. Hnub peb thiab hnub xya ua kevcai ntxuav nej thiab cov pojniam uas nej ntes tau los ntawd tso. Thiab nej yuav tsum ua kevcai ntxuav rau tej khaubncaws txhua daim thiab txhua yam uas yog muab tawv tsiaj, plaub tshis lossis ntoo ua huv tibsi.” Ele-axas uas yog tus povthawj hais rau cov uas rov tom tshavrog los hais tias, “Ntawm no yog tej kevcai uas tus TSWV tau muab cob rau Mauxes. Kub, nyiaj, tooj, hlau, txhuas, tooj dawb thiab txhua yam uas thev taus hluavtaws, nej yuav tsum coj mus hlawv hauv qhovcub thiab muab dej ntxuav thiaj huv. Thiab yam twg uas thev tsis taus hluavtaws, nej yuav tsum muab dej ntxuav thiaj huv. Hnub xya nej cia li muab nej tej ris tsho ntxhua; nej thiaj huv thiab los tau rau hauv lub yeej.” Tus TSWV hais rau Mauxes hais tias, “Koj thiab Ele-axas mus nrog cov thawjcoj ntawm cov pejxeem suav txhua yam uas nej mus huab tau los suav tej neeg uas nej ntes tau los thiab tej tsiaj txhu huv tibsi. Thiab muab tej khoom uas huab tau los no faib ua ob pawg, muab ib pawg rau cov tubrog, muab ib pawg rau cov pejxeem. Pawg uas yog cov tubrog tug, yuav tsum muab ib leeg ntawm tsib puas leej uas raug ntes los coj mus ua se them rau tus TSWV, thiab tej nyuj, tej neesluav, tej yaj thiab tej tshis los ua ib yam nkaus li ntawd. Muab tej ntawd rau tus povthawj Ele-axas ib yam li muab ua khoom pub tshwjxeeb rau tus TSWV. Pawg uas yog cov pejxeem tug, muab ib leeg ntawm tsib caug leej uas raug ntes los thiab tej nyuj, tej neesluav, tej yaj thiab tej tshis los ua ib yam nkaus li ntawd. Muab rau cov Levis uas yog cov tu tus TSWV lub Tsevntaub sib ntsib.” Mauxes thiab Ele-axas nkawd ua raws li tus TSWV tau samhwm rau nkawd lawm. Tagnrho tej uas cov tubrog mus huab tau los thiab cov uas tseg cia rau lawv, muaj rau pua xya caum tsib txhiab tus yaj thiab tshis, xya caum ob txhiab tus nyuj, rau caum ib txhiab tus neesluav, thiab peb caug ob txhiab tus ntxhais nkaujxwb uas tsis tau deev dua hluas nraug li. Thiab ib nrab uas muab faib rau cov tubrog, suav tau peb puas peb caug xya txhiab tsib puas tus yaj thiab tshis, cov uas muab rho mus rau tus TSWV yog rau pua xya caum tsib tug; peb caug rau txhiab tus nyuj, cov uas muab rho mus rau tus TSWV yog xya caum ob tug; peb caug txhiab tsib puas tus neesluav, cov uas muab rho mus rau tus TSWV yog rau caum ib tug; kaum rau txhiab tus ntxhais nkaujxwb, cov uas muab rho mus rau tus TSWV muaj peb caug ob leeg. Yog li ntawd, Mauxes thiaj coj cov se no mus rau Ele-axas muab pub tshwjxeeb rau tus TSWV, raws li tus TSWV tau hais rau Mauxes lawm. Tej khoom uas cov tubrog mus huab tau los Mauxes muab ib nrab faib rau cov pejxeem, cov uas faib rau cov pejxeem muaj peb puas peb caug xya txhiab tsib puas tus yaj thiab tshis, peb caug rau txhiab tus nyuj, peb caug txhiab tsib puas tus neesluav thiab kaum rau txhiab tus ntxhais nkaujxwb. Pawg no Mauxes rho ib leeg ntawm tsib caug leej uas raug ntes los thiab tej tsiaj txhu los rho ib yam nkaus li ntawd, coj mus rau cov Levis uas tu tus TSWV lub Tsevntaub sib ntsib, raws li tus TSWV tau hais rau Mauxes lawm. Ces cov thawj tubrog thiaj mus cuag Mauxes thiab tshabxo rau nws hais tias, “Peb cov uas yog koj tubtxib, suav cov tubrog uas nyob hauv peb kev tswjhwm, tsis muaj ib tug ploj li. Yog li ntawd, peb thiaj nqa tej saw kub, tej kauj toog, tej saw tes, tej nplhaib thiab tej xauv uas peb huab tau los huv tibsi tuaj. Peb coj tej ntawd tuaj fij rau tus TSWV theej peb lub txhoj.” Mauxes thiab Ele-axas thiaj txais tej kub thiab tej saw ntawd. Tagnrho tej khoom uas cov thawj tubrog coj tuaj ntawd hnyav tshaj plaub puas choj. Cov tubrog, cia lawv yuav tej uas lawv huab tau los. Yog li ntawd, Mauxes thiab Ele-axas coj tej kub ntawd mus tso rau hauv lub Tsevntaub sib ntsib, tus TSWV thiaj tsomkwm cov Yixalayees. Xeem Lunpees thiab xeem Khas muaj tsiaj txhu coob heev. Thaum lawv pom lub tebchaws Yaxes thiab lub tebchaws Nkile-as uas yog qhov chaw zoo ua tshav tsiaj rau lawv tej tsiaj, lawv thiaj mus cuag Mauxes, Ele-axas thiab cov thawjcoj, lawv thov hais tias, Yog neb pom zoo, thov muab lub tebchaws no faib rau peb ua peb tug, thiab thov tsis txhob cia peb hla tus Dej Yauladees mus nyob sab tid.” Mauxes teb Khas thiab Lunpees cov xeebntxwv hais tias, “Nej xav nyob ntawm no thiab cia nej cov kwvtij Yixalayees mus ntaus rog xwb los? Ua li cas nej yuav khuv cia nej cov kwvtij Yixalayees muaj kev tu siab rau qhov uas hla tus Dej Yauladees mus rau tim lub tebchaws uas tus TSWV muab rau lawv? Nej ua ib yam li thaum kuv tso cov uas yog nej txiv tawm hauv lub nroog Kades Npane-as mus soj lub tebchaws los txog thiab lawv ua ntag. Lawv mus txog rau tim lub Hav Esekaus thiab mus pom lub tebchaws ntawd tas lawm, tiamsis thaum lawv rov qab los lawv ua rau cov pejxeem tas kev cia siab thiaj tsis xav mus rau hauv lub tebchaws uas tus TSWV muab rau lawv lawm. Hnub ntawd tus TSWV thiaj chim heev, thiab nws tau coglus tseg li no: ‘Vim lawv tsis muab siab npuab kuv, mas txhua tus txivneej uas hnubnyoog nees nkaum xyoo rov saud uas kuv coj nram tebchaws Iziv los yuav tsis tau mus nyob hauv lub tebchaws uas kuv coglus rau Anplahas, Ixaj thiab Yakhauj lawv lawm.’ Cov lus no yog hais rau txhua tus huv tibsi, tsuas yog tshuav Yefunes tus tub Kalej uas yog cov Kenais thiab Noos tus tub Yausuas nkaus xwb, thiaj yuav tau mus nyob hauv lub tebchaws ntawd; rau qhov nkawd yeej ibtxwm hwm tus TSWV. Tus TSWV chim heev rau cov neeg ntawd, nws thiaj ua rau lawv ncig mus ncig los tau plaub caug xyoo rau tom tiaj suabpuam, ua rau tiam neeg uas tsis txaus siab rau nws ntawd tuag tas huv tibsi lawm. Thiab tamsim no nej sawv los hloov cov uas yog nej txiv chaw, nej cov neeg txhaum uas yog tiam no, tabtom ua rau tus TSWV txojkev chim los raug cov Yixalayees dua. Yog nimno xeem Lunpees thiab xeem Khas tsis kam ua raws li tus TSWV hais, nws yuav rov muab cov neeg no tso tseg ib zaug ntxiv rau ntawm tiaj suabpuam no, thiab nej yuav ua rau cov neeg no raug kev puastsuaj dua.” Lawv txav zog los rau ntawm Mauxes thiab hais tias, “Thov cia peb muab pobzeb los txhim nkuaj kaw peb tej yaj thiab ua nroog rau peb tej pojniam menyuam nyob ntawm no tso. Ces peb yuav nrog peb cov kwvtij Yixalayees mus ntaus rog thiab nias tsam ua ntej mus txog thaum lawv tau mus nyob hauv lub tebchaws uas yog lawv tug. Lub sijhawm ntawd peb tej pojniam menyuam yuav nyob hauv tej nroog uas txhim ntsa zeb, kom lawv thiaj nyob tso siab lug tsis ntshai cov neeg hauv lub tebchaws no. Peb yuav tsis rov qab los tsev mus txog thaum cov Yixalayees tau lub tebchaws uas hom tseg rau lawv los ua lawv tug lawm tso. Peb yuav tsis nrog lawv faib ib qho av uas nyob tim tus Dej Yauladees sab tid rau peb, rau qhov peb twb tau thaj chaw uas nyob ntawm tus Dej Yauladees sab hnubtuaj no ua peb tug lawm.” Mauxes teb hais tias, “Yog nej txaus siab ua raws li uas nej hais tiag, ces nej cia li npaj cuabyeej kom txhij mus ntaus rog tabmeeg tus TSWV. Tagnrho nej cov tubrog cia li hla tus Dej Yauladees mus rau sab tid tabmeeg tus TSWV, mus txog thaum tus TSWV tua yeej nws cov yeebncuab, thiab txeeb tau lub tebchaws los nyob lawm. Tom qab ntawd, nej mam rov qab los rau qhov nej yuav tau ua kom tiav raws li nej tshuav tus TSWV thiab nej cov kwvtij Yixalayees nqi. Tiamsis yog nej tsis ua raws li nej coglus tseg, kuv qhia rau nej hais tias, nej ua txhaum rau tus TSWV ntag. Yog nej tsis ua li ntawd, nej yuav raug txim vim nej tej kev txhaum. Yog li ntawd, cia li txhim nroog rau nej nyob thiab txhim nkuaj kaw nej tej yaj, tiamsis nco ntsoov ua raws li tej lus uas nej tau cog tseg lawm!” Xeem Khas thiab xeem Lunpees teb hais tias, “Peb cov uas yog koj tubtxib, peb yuav ua raws li koj hais ntag. Peb tej pojniam thiab menyuam, tej nyuj thiab tej yaj yuav nyob hauv lub nroog Nkile-as no. Tiamsis tagnrho peb cov txivneej uas yog koj cov tubtxib yuav npaj mus ntaus rog tabmeeg tus TSWV. Peb yuav hla tus Dej Yauladees mus rau sab tid thiab ntaus rog raws li koj hais.” Yog li ntawd, Mauxes thiaj muab tej lus samhwm no rau Ele-axas, Yausuas thiab cov Yixalayees lwm tug thawjcoj hais tias: “Yog xeem Khas thiab xeem Lunpees hla tus Dej Yauladees mus ntaus rog raws li tus TSWV tej lus samhwm thiab yog lawv pab nej tua kom yeej lub tebchaws ntawd, ces nej cia li tu lub tebchaws Nkile-as rau lawv nyob ua lawv tug. Tiamsis yog lawv tsis hla tus Dej Yauladees thiab tsis nrog nej mus ntaus rog, ces lawv yuav tau nrog nej nyob lub tebchaws Kana-as, ib yam li nej tau thiab.” Xeem Khas thiab xeem Lunpees teb hais tias, “Raws li tus TSWV tau samhwm rau koj cov tubtxib no lawm, peb yuav ua li ntawd ntag. Peb yuav hla tus Dej Yauladees mus rau tim lub tebchaws Kana-as tabmeeg tus TSWV thiab mus ntaus rog, kom peb thiaj tau tus Dej Yauladees sab hnubtuaj no ua peb tug.” Yog li ntawd, Mauxes thiaj muab cov Amaules tus Vajntxwv Xihoos lub nroog thiab cov Npasas tus Vajntxwv Aunkas lub nroog, tagnrho lub tebchaws nrog tej nroog thiab ib cheebtsam uas nyob puagncig tej nroog ntawd tu rau xeem Khas, xeem Lunpees thiab xeem Manaxes ib nrab rau lawv nyob ua lawv tug. Xeem Khas thiaj rov txhim kho dua lawv tej nroog rau hauv Dinpoos, Atalaus, Alu-es, Etelas Saufas, Yaxes, Yaunpehas, Npethes Nilas thiab Npethes Halas. Xeem Lunpees thiaj rov txhim kho dua lawv tej nroog rau hauv Hesenpoos, Ele-ales, Kili-athayees, Nenpaus, Npa-as Me-oos (lub npe no twb hloov lawm) thiab Xinpemas. Lawv tis dua npe tshiab tagnrho rau tej nroog uas lawv txhim kho dua tshiab no huv tibsi. Makhiles cuab kwvtij uas yog xeem Manaxes, mus txeeb tau lub tebchaws Nkile-as, lawv kav hlo lub tebchaws ntawd, thiab muab cov Amaules uas ibtxwm nyob hauv lub tebchaws ntawd raws khiav tawm huv tibsi lawm. Yog li ntawd, Mauxes thiaj muab lub tebchaws Nkeli-as rau Makhiles cuab kwvtij, ces lawv thiaj nyob hauv lub tebchaws ntawd lawm. Yailes uas yog xeem Manaxes mus tua thiab txeeb tau lub puav zos thiab nws tis npe rau cov zos ntawd hu ua, “Yailes cov zos.” Naunpas mus tua thiab txeeb tau lub nroog Kenas thiab tej zos me uas nyob ibncig ntawd, thiab nws muab lub nroog ntawd tis npe hu ua Naunpas, raws li nws lub npe ntag. Txij ntawm no mus yog qhia txog tej thaj chaw uas cov Yixalayees tsuam yeej ua ntu zus taug kev nram tebchaws Iziv los uas yog Mauxes thiab Aloos nkawd ua ob tug coj tagnrho lawv txhua xeem huv tibsi. Mauxes teev tej thaj chaw uas cov Yixalayees tsuam yeej ua ntu zus los raws li tus TSWV tau samhwm rau Mauxes lawm. Cov Yixalayees sawv kev tawm nram Iziv los yog lub ib hlis ntuj hnub kaum tsib uas yog tom qab hnub uas lawv ua kevcai Hla Dhau. Tus TSWV tsomkwm lawv tawm hauv lub nroog Lamaxes los tabmeeg cov Iziv, thaum cov Iziv tabtom faus lawv tej tub hlob uas tus TSWV muab tua tuag tas lawm. Twb yog li no, tus TSWV thiaj qhia hais tias, nws yog tus muaj hwjchim loj dua cov Iziv tej vajtswv huv tibsi. Thaum cov Yixalayees sawv kev hauv lub nroog Lamaxes los thiab tsuam yeej so rau ntawm Xukaus. Lawv sawv kev ntawm Xukaus los tsuam yeej rau ntawm Ethas uas nyob ntawm ntug tiaj suabpuam. Lawv tawm hauv Ethas rov mus rau ntawm Pis Hahilaus uas nyob ntawm Npa-as Xefoos sab hnubtuaj, thiab lawv tsuam yeej ze rau ntawm Minkedaus. Lawv sawv kev ntawm Pis Hahilaus thiab los hla dej Hiavtxwv Liab mus rau tom tiaj suabpuam Ethas; tom qab uas lawv los tau peb hnub ke lawm, lawv thiaj li los tsuam yeej rau ntawm Malahas. Thaum lawv sawv kev ntawm Malahas los rau ntawm Elees, lawv thiaj tsuam yeej rau qhov ntawd, rau qhov nyob ntawd muaj kaum ob lub qhovdej thiab xya caum tsob toovlaj. Lawv sawv kev ntawm Elees los tsuam yeej ze rau ntawm ceg dej Hiavtxwv Liab. Lawv sawv kev ntawm Elees los tsuam yeej rau ntawm tiaj suabpuam Xees. Ces lawv sawv kev ntawm tiaj suabpuam Xees los tsuam yeej rau ntawm Daufekas, thiab tom qab ntawd lawv los tsuam yeej rau ntawm Aluses, dhau qhov ntawd los lawv thiaj los tsuam yeej rau ntawm Lefidees, qhov chaw uas tsis muaj dej rau cov neeg haus. Cov Alas tus vajntxwv uas kav lub tebchaws Kana-as sab qabteb hnov hais tias, cov Yixalayees tabtom sawv kev los lawm. Thaum nyob hauv lub tiaj Mau-am ntawm ntug Dej Yauladees uas nyob ncaj lub nroog Yelikaus, tus TSWV hais rau Mauxes kom qhia tej lus no rau cov neeg Yixalayees hais tias, “Thaum nej hla tus Dej Yauladees mus rau tim tebchaws Kana-as, nej yuav tsum muab tagnrho cov neeg uas ibtxwm nyob hauv lub tebchaws ntawd raws khiav mus kom tas. Muab lawv tej mlom pobzeb, mlom hlau, thiab lawv tej chaw teev dab tsoo kom puastsuaj tas huv tibsi. Txeeb lub tebchaws ntawd los rau nej thiab muab nej cov neeg faib mus nyob kom thoob plaws hauv lub tebchaws ntawd, rau qhov kuv muab lub tebchaws ntawd rau nej lawm. Muab lub tebchaws rho ntawv faib rau nej tej xeem thiab tej cuab kwvtij, tej thaj av uas dav muab rau tej cuab kwvtij coob thiab tej thaj av uas nqaim muab rau tej cuab kwvtij tsawg. Tiamsis yog nej tsis muab cov neeg uas ibtxwm nyob hauv lub tebchaws ntawd raws tawm, cov neeg uas nej tseg cia yuav ua kev nyuaj siab rau nej ib yam li tus saus uas nyob hauv nej qhovmuag thiab tej hmab pos uas nyob ntawm nej ib sab, thiab lawv yuav tawmtsam nej. Yog nej tsis raws lawv tawm, kuv yuav ua kom nej puastsuaj, raws li kuv twb npaj yuav ua rau lawv kom lawv raug kev puastsuaj.” Tus TSWV hais rau Mauxes kom qhia tej lus no rau cov Yixalayees hais tias: “Thaum nej mus rau hauv lub tebchaws Kana-as uas kuv muab rau nej lawm, nej tej ciamteb uas yog nej lub tebchaws yuav muaj raws li no: Sab qabteb, tus ciam txij ntua ntawm tiaj suabpuam Xees raws cov Edoos tus ciamteb. Pib kiag ntawm sab hnubtuaj qabteb los xaus rau ntawm hiavtxwv tuag. Ces nej tus ciamteb yuav tig mus rau sab qabteb ncaj nraim mus rau ntawm lub Dawm Alanpees thiab hla mus rau ntawm tiaj suabpuam Xees thiab mus txog ntawm Kades Npane-as sab qabteb. Ces tus ciamteb nkhaus rov nce toj mus rau sab qaumteb hnubpoob mus rau ntawm Haxas Adales thiab mus txog ntua rau ntawm Axemoos, tus ciamteb yuav nkhaus raws lub hav ntawm Iziv tus ciamteb mus xaus rau pem Hiavtxwv Meditelanes. “Sab hnubpoob tus ciamteb raws ntug dej Hiavtxwv Meditelanes nce toj. “Sab qaumteb tus ciamteb yuav raws ntug dej Hiavtxwv Meditelanes mus rau pem lub Roob Haules thiab pib ntawm lub Roob Haules, nej hom ncaj nraim mus txog ntua rau ntawm txojkev uas mus rau ntawm lub Dawm Hamas, thiab tus ciamteb dhau qhov ntawd mus txog ntua ntawm Xedas, thiab mus txog rau ntawm Xifaloos, mus xaus rau ntawm Haxas Enas. “Sab hnubtuaj, nej hom tus ciamteb pib kiag ntawm Haxas Enas mus rau ntawm Sefas. Ces tus ciamteb yuav lem mus rau sab qabteb, mus txog rau ntawm Linpelas sab hnubtuaj ntawm lub nroog Ayees, thiab mus txog ntawm cov laj roob tim ntug Hiavtxwv Kalilais sab hnubtuaj. Tus ciamteb mus rau sab qabteb, yog raws tus Dej Yauladees nqis hav mus xaus rau ntawm Hiavtxwv tuag. “Qhov no yuav yog nej lub tebchaws plaub sab ciamteb.” Yog li ntawd, Mauxes thiaj hais rau cov Yixalayees hais tias, “Ntawm no yog lub tebchaws uas nej yuav tau mus nyob thiab rho ntawv faib, yog lub tebchaws uas tus TSWV muab rau nej cuaj xeem thiab ib nrab xeem nyob. Xeem Lunpees, xeem Khas thiab ib nrab ntawm xeem Manaxes uas nyob sab hnubtuaj twb tau tebchaws nyob ua lawv tug, thiab muab faib raws li lawv tej tsevneeg lawm, yog nyob ntawm tus Dej Yauladees sab hnubtuaj, ncaj lub nroog Yelikaus sab tid.” Tus TSWV hais rau Mauxes hais tias, “Koj cia li kom tus povthawj Ele-axas thiab Noos tus tub Yausuas cia li muab lub tebchaws no faib rau cov neeg nyob. Muab ib xeem ib tug thawjcoj mus pab nkawd.” Cov neeg no yog cov uas tus TSWV tsa ua cov faib lub tebchaws Kana-as rau cov Yixalayees nyob ua lawv tug. Thaum tseem nyob hauv lub tiaj ntawm tus Dej Yauladees uas ncaj lub nroog Yelikaus, tus TSWV hais rau Mauxes hais tias, “Koj cia li hais rau cov Yixalayees kom lawv muab tej av uas lawv tau los ua lawv tug lawm, qee lub nroog thiab tej tshav zaub uas nyob ibncig ntawm tej nroog ntawd rau cov Levis nyob. Tej nroog ntawd yuav ua cov Levis tug, thiab lawv yuav nyob qhov ntawd mus li. Tej tshav zaub los yuav ua tshav rau lawv tej nyuj thiab lwm yam tsiaj huv tibsi. Lub tshav zaub pib ntawm tus ntsa yeej mus kom ib sab twg muaj ob puas tsib caug daj, yog li ntawd, nej ntsuas kom dav xwmfab xwmmeem, ib meem twg kom muaj tsib puas daj, thiaj txaus ua lub nroog rau hauv plawv. Nej yuav tsum muab rau lub nroog rau cov Levis, cia rau cov neeg tua neeg tau khiav mus cawm siav. Nej yuav tsum muab plaub caug ob lub nroog ntxiv rau lawv thiab, tagnrho kom muaj plaub caug yim lub nroog, nrog rau lawv tej tshav tsiaj huv tibsi. Cov nroog uas cov Yixalayees muab ua cov Levis tug, tej xeem coob muab ntau lub nroog rau, tej xeem tsawg muab tsawg lub nroog rau.” Tus TSWV hais rau Mauxes kom qhia rau cov Yixalayees hais tias, “Thaum lawv hla tus Dej Yauladees mus txog rau hauv lub tebchaws Kana-as lawm, nej xaiv ib cov nroog cia rau cov neeg uas tua neeg tau khiav mus cawm siav. Qhov ntawd yuav ua ib qho chaw rau tus neeg uas tua neeg tau khiav mus nraim tus tuag tej kwvtij uas nrhiav nws tua povtseg pauj tus tuag lawm. Kom tus uas yuam kev tua neeg ntawd tsis raug tua tuag ua ntej luag coj nws mus cuag cov tu plaub ntug txiav txim rau nws. Xaiv rau lub nroog, peb lub rau tim tus Dej Yauladees sab hnubtuaj thiab peb lub rau hauv lub tebchaws Kana-as. Cov nroog no yuav cia ua ib cov nroog cawm siav lossis nraim cev rau cov Yixalayees thiab cov neeg txawv tebchaws uas nrog nej nyob ib ntus lossis nyob mus li. Yog leejtwg tua ib tug twg tuag, tus ntawd cia li khiav mus nkaum rau hauv cov nroog ntawd ib lub. Tus tuag ntawd cov kwvtij txheeb ze muab tus txivneej uas tua neeg ntawd tua kom tuag. Thaum nws nrhiav tau tus neeg ntawd, ces nws cia li muab tua kom tuag. “Yog tus txivneej twg ntxub luag thiab muab tus ntawd tua uas yog muab nws thawb ntog lossis muab ib yam dabtsi ntaus tus ntawd tuag, lossis yog muab nrig ntaus, nws yog tus muaj txim tua neeg thiab cia li muab nws ntaus kom tuag. Tus tuag ntawd tus kwvtij txheeb ze muab tus txivneej uas tua neeg ntawd tua kom tuag. Thaum nws nrhiav tau tus uas tua neeg ntawd, nws cia li muab ntaus kom tuag. “Tiamsis yog tus txivneej twg tua ib tug neeg twg tuag uas tsis yog nws tus yeebncuab, tsis hais muab thawb ntog lossis txawb tej yam dabtsi mus raug tuag. Lossis yog tus txivneej ntawd tsis ua tib zoo saib, nws txawb pobzeb mus raug ib tug neeg twg tuag uas tsis yog nws tus yeebncuab, thiab tsis yog nws txhob txwm ntaus. Yog muaj tej plaub ntug zoo li hais no, cia cov pejxeem ua cov txiav txim rau tus uas tua neeg tuag ntawd kom raws li lawv pom zoo, mas tsis pub ua raws li tus neeg tuag ntawd cov kwvtij xav ua pauj. Cov pejxeem uas tuaj tu plaub, yuav tsum tau pab tus neeg uas tua neeg ntawd kom dim ntawm tus tuag cov kwvtij uas yuav muab nws tua pauj, thiab lawv muab nws tso rov qab mus rau hauv lub nroog cawm siav uas nws khiav mus nkaum. Nws yuav tsum mus nyob hauv, tos txog thaum tus Povthawj Hlob uas muab roj pleev thiab txhawb meejthawj tuag lawm tso, nws mam rov qab los. Yog tus txivneej uas tua neeg ntawd cia li txhob txwm tawm hauv lub nroog cawm siav uas nws khiav mus nkaum ntawd, thiab yog tus tuag ntawd cov kwvtij pom nws thiab muab nws tua tuag lawm, ces qhov ua pauj li ntawd tsis yog txim tua neeg. Tus txivneej uas tua neeg ntawd yuav tsum nyob twjywm hauv lub nroog cawm siav mus txog thaum tus Povthawj Hlob tuag lawm, tom qab ntawd nws mam rov los tsev tau. Txoj kevcai tswjhwm no muab cob rau koj thiab koj cov xeebntxwv uas yuav faib mus nyob txhua txhia qhov chaw. “Yog leejtwg lam tau lam tua neeg, yuav tsum muab tus ntawd tua povtseg, yog hais tias muaj ob leeg lossis coob tshaj ntawd ua timkhawv; yog muaj ib tug ua timkhawv xwb, tej lus timkhawv tsis tau txaus muab tus neeg ntawd tua povtseg. Leejtwg tua neeg, yuav tsum muab nws tua pauj. Muab nyiaj txhiv nws lub txim tua neeg ntawd tsis tau. Yog tus neeg ntawd khiav mus nkaum rau hauv lub nroog cawm siav lawm, tsis txhob cia nws them nyiaj kom muab nws tso rov los tsev ua ntej uas tus Povthawj Hlob tuag. Yog nej ua li no ces yog nej txhob txwm ua kom lub tebchaws uas nej nyob ntawd tsis huv. Tua neeg tuag ua rau lub tebchaws tsis huv, thiab tsis muaj ib yam dabtsi yuav ntxuav tau kom lub tebchaws no huv, tsuas yog muab tus neeg tua neeg ntawd tua povtseg nkaus xwb. Nej tsis txhob ua rau lub tebchaws tsis huv, rau qhov kuv yog nej tus TSWV thiab kuv nrog nraim haivneeg Yixalayees nyob.” Cov thawjcoj ntawm Nkile-as cuab kwvtij uas yog Makhiles tus tub thiab yog Yauxej tus tub Manaxes tus xeebntxwv, thiaj mus cuag Mauxes thiab lwm tus thawjcoj. Lawv mus thov hais tias, “Tus TSWV hais rau nej lawm, nws muab lub tebchaws no rho ntawv faib rau cov Yixalayees nyob. Thiab nws hais rau nej kom muab peb tus kwvtij Xelaufehas tej qubtxeeg qubteg rau nws cov ntxhais. Tiamsis nej yuav tsum nco ntsoov, yog lawv mus yuav txiv rau lwm xeem lawm, ces lawv tej qubtxeeg qubteg yuav yog xeem ntawd tug, thiab tej uas yog peb ntiag tug yuav tsawg heev lawm. Thaum txog Xyoo Thim uas thim tej qubtxeeg qubteg uas muab muag lawm rov qab los rau tus qub tswv, yuav tau muab Xelaufehas tej qubtxeeg qubteg ntxiv rau xeem uas nws cov ntxhais mus yuav ntawd, thiab peb xeem yuav tsis tau tej ntawd li lawm.” Yog li ntawd, Mauxes thiaj hais rau cov Yixalayees raws li tus TSWV tej lus uas hais tias, “Tej lus uas xeem Manaxes hais ntawd yeej yog lawm, thiab tus TSWV hais tseg cia hais tias, Xelaufehas cov ntxhais muaj cai yuav tau txiv raws li lawv siab nyiam, tiamsis yuav tsum yuav cov uas yog nws xeem xwb. Ua li ntawd kom txhua xeem Yixalayees tej qubtxeeg qubteg thiaj yog nws xeem ntawd tug mus li. Txhua tus pojniam uas muaj qubtxeeg qubteg nyob hauv haivneeg Yixalayees xeem twg lawm, nws yuav tsum yuav tus txiv ua yog xeem ntawd xwb. Ua li no txhua tus Yixalayees thiaj li yuav tau lawv cov yawgkoob tej qubtxeeg qubteg cia thiab tej qubtxeeg qubteg ntawd thiaj tsis poob ntawm xeem no mus ua xeem tod tug. Txhua xeem Yixalayees nyias yuav tsum muaj nyias teej tug.” Lawv mus yuav Yauxej cov xeebntxwv uas yog xeem Manaxes cuab kwvtij, thiab lawv tej qubtxeeg qubteg thiaj tseem yog lawv txiv tug. Tej lus no yog kev tswjhwm thiab kevcai uas tus TSWV samhwm rau Mauxes kom qhia rau cov Yixalayees, thaum lawv tseem nyob hauv lub tiaj nrag Mau-am ntawm tus Dej Yauladees uas ncaj lub nroog Yelikaus. Phau ntawv no yog tej lus uas Mauxes hais tseg rau cov Yixalayees thaum lawv tseem nyob hauv lub tiaj suabpuam ntawm ntug Dej Yauladees sab hnubtuaj. Lawv nyob hauv lub Hav Yauladees uas ze rau ntawm Xufes uas nyob ntu nruab nrab ntawm lub nroog Palas, Taufees, Lanpas, Haxelaus thiab Dixahas. ( Yog sawv kev ntawm lub Roob Xinais taug kev hla cov pov roob hauv tebchaws Edoos mus rau Kades Npane-as, mas yog kaum ib hnub thiaj txog.) Hnub xiab ib lub kaum ib hlis ntuj, xyoo plaub caug tom qab uas cov Yixalayees tawm nram tebchaws Iziv los. Mauxes muab Vajtswv tej lus txhua nqe qhia rau cov Yixalayees. Tej no yog tom qab uas tus TSWV tau pab cov Yixalayees tua yeej tus Vajntxwv Xihoos uas kav cov Amaules hauv lub nroog Hesenpoos thiab Vajntxwv Aunkas uas kav lub nroog Asetalaus thiab Edeles hauv tebchaws Npasas. Thaum cov Yixalayees los nyob hauv tebchaws Mau-am ntawm tus Dej Yauladees sab hnubtuaj, Mauxes muab Vajtswv tej kevcai los qhia thiab ntuas lawv. Mauxes hais tias, “Thaum peb tseem nyob nram Roob Xinais, tus TSWV uas yog peb tus Vajtswv hais rau peb tias, ‘Nej los nyob ntawm lub roob no ntev heev lawm; cia li rhuav nej tej tsevntaub thiab khiav tawm qhov chaw no mus. Nej mus rau ntawm lub laj roob hauv tebchaws Amaules thiab tej cheebtsam uas nyob ibncig ntawd, mus rau hauv lub hav Yauladees, mus rau saum lub laj roob thiab hauv tej tiaj nrag, mus rau cheebtsam uas nyob sab qabteb, thiab mus rau tom ntug Hiavtxwv Meditelanes. Mus kom txog rau tebchaws Kana-as thiab dhau mus rau pem tej roob hauv tebchaws Lenpanoos thiab mus kom txog rau ntawm tus Dej Efalates. Tagnrho tej no yog lub tebchaws uas kuv uas yog tus TSWV, tau coglus yuav muab rau nej yawgkoob, Anplahas, Ixaj, Yakhauj thiab lawv tej xeebntxwv. Nej cia li mus nyob hauv lub tebchaws ntawd.’ ” Mauxes hais rau cov pejxeem hais tias, “Thaum peb tseem nyob ntawm Roob Xinais, kuv hais rau nej hais tias, ‘Kuv tes haujlwm ntau dhau heev lawm; kuv ib leej xwb ua tsis tag. Tus TSWV uas yog nej tus Vajtswv pub rau nej huamvam coob npaum li tej hnubqub saum nruab ntug. Thov tus TSWV uas yog nej cov yawgkoob tus Vajtswv, pub kom nej huamvam ib txhiab npaug ntxiv, thiab kom nej lub neej vammeej raws li Vajtswv tau coglus tseg lawm. Tiamsis kuv ib leeg yuav ua li cas txiav txim tau rau nej, thaum nej muaj kev sib cav sib ceg? Nej cia li xaiv ib cov neeg txawj ntse uas paub qabhau, cov txivneej uas muaj tswvyim thiab paub ua haujlwm ntawm txhua xeem tuaj rau kuv, kuv yuav tsa lawv ua cov thawj saib nej.’ Nej teb kuv hais tias, nej pom zoo li kuv hais ntawd. Yog li ntawd, kuv thiaj tsa cov neeg txawj ntse, cov thawjcoj uas paub ua haujlwm uas nej xaiv hauv nej tej xeem tuaj ua cov coj nej. Ibtxhia saib ib txhiab leej, ibtxhia saib ib puas leej, ibtxhia saib tsib caug leej thiab ibtxhia saib kaum leej. Thiab kuv tseem tsa ntau tus nomtswv ua cov kav nej txhua xeem. “Thaum ntawd, kuv qhia rau lawv hais tias, ‘Nej mloog tej lus sib cav sib ceg ntawm cov pejxeem. Nej yuav tsum txiav txim kom ncaj thaum lawv muaj kev sib cav sib ceg, tsis hais nej haivneeg lossis lwm haivneeg uas nrog nej nyob. Thaum nej txiav txim, nej tsis txhob xaiv ntsejmuag, nej yuav tsum txiav txim ncaj ncees rau txhua tus, txawm yog nws yuav yog leejtwg los xij. Nej tsis txhob ntshai leejtwg li, rau qhov tej uas nej txiav txim siab yog los ntawm Vajtswv. Yog hais tias muaj tej rooj plaub uas nej hais tsis tau lawm, nej coj tuaj cuag kuv, kuv mam li hais rooj plaub ntawd.’ Tib lub sijhawm ntawd, kuv qhia txhua yam uas nej yuav tau ua rau nej. “Peb ua txhua yam raws li tus TSWV uas yog peb tus Vajtswv hais kom peb ua. Peb tawm ntawm Roob Xinais mus hla lub tiaj suabpuam uas dav thiab txaus ntshai, mus rau lub laj roob hauv tebchaws Amaules. Thaum peb los txog rau hauv Kades Npane-as, “Tiamsis nej tuaj cuag kuv thiab hais tias, ‘Cia peb tso ib pab txivneej mus soj lub tebchaws thiab rov qab los qhia rau peb, peb thiaj li paub kev mus thiab saib lawv tej nroog zoo li cas.’ “Peb pom hais tias, qhov ntawd yog qhov uas zoo thiab tsimnyog ua, kuv thiaj li xaiv tau kaum ob leeg txivneej, ib xeem ib leeg. Lawv taug lub laj roob mus txog rau ntawm lub Hav Esekaus, thiab soj thoob plaws lub hav ntawd. Lawv de tau tej txiv hmab txiv ntoo hauv lub tebchaws ntawd coj los qhia rau peb, thiab hais rau peb tias lub tebchaws uas tus TSWV uas yog peb tus Vajtswv muab rau peb ntawd, av rog thiab zoo qoobloo kawg li. “Tiamsis nej ntxeev siab thiab tsis mloog tus TSWV uas yog nej tus Vajtswv tej lus, thiab tsis kam mus rau hauv lub tebchaws ntawd. Nej ib leeg yws rau ib leeg hauv nej tej tsevntaub hais tias: ‘Yog tus TSWV ntxub peb, nws thiaj coj peb khiav tawm nram tebchaws Iziv los thiab muab peb cob rau cov neeg Amaules, kom lawv muab peb tua tuag tas xwb. Peb yuav mus rau hauv lub tebchaws ntawd ua dabtsi? Peb ntshai kawg li. Thaum peb hnov cov neeg uas peb tso mus ntawd rov los qhia rau peb hais tias, cov neeg uas nyob hauv lub tebchaws ntawd, lawv loj, siab thiab muaj zog tshaj peb, lawv tej nroog muaj ntsa yeej xov siab rau saum nruab ntug, thiab lawv pom cov neeg ntawd loj kawg li!’ “Tiamsis kuv hais rau nej hais tias, ‘Tsis txhob ntshai cov neeg ntawd, tus TSWV uas yog nej tus Vajtswv yuav coj nej kev mus, thiab nws yuav pab kom nej tua cov yeebncuab ntawd ib yam li nej pom nws ua nyob nram tebchaws Iziv, thiab nram tiaj suabpuam. Nej twb pom hais tias, nws coj nej taug kev kaj siab lug los txog rau ntawm no, ib yam li leej txiv puag rawv nws tus menyuam.’ Tiamsis nej tsis mloog tej lus uas kuv hais, thiab tsis cia siab rau tus TSWV, txawm li ntawd los tus TSWV tseem mus ua nej ntej, nrhiav chaw rau nej so. Nws mus ua nej ntej coj nej txoj haukev, nws ua tus nplaim hluavtaws rau nej pom kev thaum tsaus ntuj thiab ua tauv huab roos nej thaum nruab hnub. “Tus TSWV hnov tej lus uas nej yws lawm, nws chim heev, nws thiaj li coglus hais tias, ‘Nej tiam neeg siab phem no yuav tsis muaj ib tug tau mus nyob hauv lub tebchaws av rog thiab zoo qoob uas kuv coglus tseg yuav muab rau nej cov yawgkoob li. Tsuas yog Yefunes tus tub Kalej thiaj yuav tau mus nyob hauv lub tebchaws ntawd xwb. Nws muab siab npuab kuv, thiab kuv yuav muab lub tebchaws uas nws mus soj ntawd rau nws thiab nws cov xeebntxwv.’ Twb yog vim nej, tus TSWV thiaj li chim rau kuv thiab hais tias, ‘Mauxes, koj yuav tsis tau mus nyob hauv lub tebchaws ntawd. Tiamsis koj yuav tau txhawb Noos tus tub Yausuas zog, nws yog tus pab koj. Nws yuav coj cov Yixalayees mus nyob hauv lub tebchaws ntawd.’ “Ces tus TSWV hais rau peb sawvdaws hais tias, ‘Nej cov menyuam tseem yau uas tsis tau paub qhov phem qhov zoo, yog cov menyuam uas nej hais tias yuav raug nej cov yeebncuab ntes, lawv thiaj yog cov uas yuav tau mus nyob hauv lub tebchaws ntawd. Kuv yuav muab lub tebchaws ntawd rau lawv, thiab lawv yuav tau mus nyob hauv. Tiamsis nej cov ko, nej cia li tig rov qab mus rau tom tiaj suabpuam uas yog txojkev mus rau Hiavtxwv Liab.’ “Nej teb hais tias, ‘Mauxes, peb tau ua txhaum rau tus TSWV lawm tiag. Tiamsis nimno peb yuav mus tua lub tebchaws ntawd, raws li tus TSWV uas yog peb tus Vajtswv tau hais rau peb lawm.’ Ces nej txhua tus txawm cia li npaj mus ua rog, rau qhov nej xav hais tias nce mus puav lub laj roob ntawd yuav yoojyim heev. “Tiamsis tus TSWV hais rau kuv hais tias, ‘Koj yuav tsum txwv tsis txhob pub lawv mus tua cov yeebncuab, rau qhov kuv tsis nrog lawv, nyob tsam lawv cov yeebncuab tua yeej lawv.’ Kuv hais rau nej raws li uas tus TSWV kom kuv hais, tiamsis nej tsis tig pobntseg mloog li. Nej ntxeev siab rau tus TSWV, thiab vim nej khavtheeb, nej thiaj nce mus rau saum lub laj roob lawm. Cov Amaules uas nyob saum tej laj roob tuaj tawmtsam nej ib yam li xub ntab ya tuaj. Lawv caum nej tua los ti nkaus rau ntawm Haumas, thiab lawv tua yeej nej saum lub laj roob hauv tebchaws Edoos. Nej thiaj li quaj thov tus TSWV pab, tiamsis nws tsis mloog thiab tsis quavntsej nej li. “Tom qab uas nej nyob hauv Kades Npane-as tau ib ntus ntev loo, peb txawm rov qab mus rau tiaj suabpuam, taug kev mus rau Hiavtxwv Liab raws li tus TSWV tau hais lawm, peb tau ncig mus ncig los ntev loo ntawm lub laj roob hauv tebchaws Edoos. “Tus TSWV hais rau kuv hais tias, nej twb ncig mus ncig los ntawm tej laj roob no tau ntev loo lawm, nej cia li mus rau sab qaumteb. Nws kom kuv qhia rau nej hais tias, ‘Nej tabtom yuav mus rau ntawm lub laj roob hauv tebchaws Edoos, yog nej cov kwvtij uas yog Exaus cov xeebntxwv lub tebchaws. Lawv yuav ntshai nej heev, tiamsis nej tsis txhob mus ua rog rau lawv, kuv yuav tsis muab lawv lub tebchaws ib thaj av luaj xibteg rau nej li. Kuv twb muab lub tebchaws Edoos ntawd rau Exaus cov xeebntxwv lawm. Nej tsuas yuav tau mov noj thiab dej haus ntawm lawv xwb.’ “Nej nco ntsoov hais tias, tus TSWV uas yog nej tus Vajtswv tau foom koob hmoov rau txhua yam uas nej ua tas los lawm. Nws tau tsomkwm nej thaum nej taug kev los hla lub tiaj suabpuam uas dav heev. Nws nrog nraim nej tau plaub caug xyoo thiab pub txhua yam rau nej kom muaj txaus. “Peb txawm ncaim peb cov kwvtij uas yog Exaus cov xeebntxwv, hauv tebchaws Edoos, ntawm lub nroog Elas thiab Exi-oonkenpes, taug txojkev Alanpas mus rau pem tiaj suabpuam Mau-am lawm. Tus TSWV hais rau kuv hais tias, ‘Nej tsis txhob mus thab plaub nrog cov neeg Mau-am lossis ua rog rau lawv, rau qhov lawv yog Lauj cov xeebntxwv. Kuv twb muab lub nroog Ales rau lawv lawm, kuv yuav tsis muab lub tebchaws ntawd ib qhov rau nej li.’ ” ( Muaj ib haivneeg hu ua Emis, yog cov neeg ua loj thiab siab heev, lawv ibtxwm nyob hauv lub nroog Ales ntawd. Cov neeg Emis loj thiab siab ib yam li cov neeg Anakees uas yog ib haivneeg loj thiab siab heev. Cov neeg Emis muaj dua ib lub npe hu ua Lefayees ib yam li cov neeg Anakees; tiamsis cov neeg Mau-am hu cov neeg ntawd ua Emis. Thaum xub thawj cov neeg Haulis nyob hauv lub tebchaws Edoos, tiamsis Exaus cov xeebntxwv muab lawv raws tawm, rhuav tshem lawv haivneeg, thiab los nyob hauv lawv lub tebchaws, ib yam li cov Yixalayees muab lawv cov yeebncuab raws tawm hauv lawv lub tebchaws uas tus TSWV muab rau lawv lawm.) “Peb thiaj hla tus Dej Zeles mus rau sab tim ub raws li tus TSWV tau hais rau peb lawm. Thaum peb tsiv hauv Kades Npane-as los txog thaum peb hla tus Dej Zeles, tau peb caug yim xyoo. Cov txivneej uas ua taus tubrog tiam ntawd tuag tas, raws li tus TSWV tau hais tseg lawm tias lawv yuav tuag tas li ntawd. Tus TSWV tau tawmtsam lawv hauv lub yeej uas lawv nyob, ua rau lawv puastsuaj tas huv tibsi. “Tom qab uas cov txivneej ntawd tuag tas lawm, tus TSWV hais rau kuv hais tias, ‘Hnub no nej hla kom dhau cheebtsam Ales hauv tebchaws Mau-am. Nej twb mus yuav txog cov neeg Amoos uas yog Lauj cov xeebntxwv lub tebchaws. Nej tsis txhob thab plaub lossis ua rog rau lawv, rau qhov kuv yuav tsis muab lub tebchaws uas kuv muab rau lawv lawm ib qhov rau nej li.’ ” ( Cheebtsam no, raws li sawvdaws paub mas yog cov neeg Lefayees lub tebchaws, yog haivneeg uas ibtxwm nyob hauv lub tebchaws ntawd lub npe; cov neeg Amoos hu cov neeg uas nyob hauv lub tebchaws ntawd ua Xaxumis. Lawv yog cov neeg uas loj thiab siab ib yam li cov neeg Anakees. Lawv yog haivneeg uas muaj zog thiab coob heev. Tiamsis tus TSWV muab lawv rhuav puastsuaj tas, yog li ntawd, cov Amoos thiaj mus txeeb tau lawv lub tebchaws nyob. Tus TSWV ua ib yam li ntawd rau Exaus cov xeebntxwv uas yog neeg Edoos uas nyob saum lub laj roob hauv tebchaws Edoos. Tus TSWV rhuav cov neeg Haulis puastsuaj tas, yog li ntawd, cov Edoos thiaj mus txeeb tau lub tebchaws ntawd ua lawv tug thiab mus nyob rau hauv. Lawv tseem nyob hauv lub tebchaws ntawd los txog niaj hnub no. Tiamsis cov neeg uas nyob hauv koog povtxwv Keletes los nyob sab tebchaws uas raws ntug Hiavtxwv Meditelanes. Lawv los tua cov neeg Avimes uas ibtxwm nyob hauv lub tebchaws ntawd tuag tas, thiab txeeb tau tagnrho lawv lub tebchaws ntawd mus ti nkaus rau lub nroog Nkaxas ua lawv tug.) “Thaum peb los dhau tebchaws Mau-am lawm, tus TSWV hais rau peb hais tias, ‘Nej cia li hla tus dej Alenoos mus rau sab tim ub. Kuv twb muab cov Amaules tus Vajntxwv Xihoos uas kav lub nroog Hesenpoos, thiab nws lub tebchaws cob rau nej lawm. Nej cia li mus tua thiab nyob hauv nws lub tebchaws. Txij hnub no mus, kuv yuav ua kom tej neeg uas nyob txhua qhov ntshai nej. Txhua tus yuav ntshai tshee hnyo thaum lawv hnov nej lub npe.’ “Kuv thiaj tso neeg ntawm tiaj suabpuam Kedemaus mus cuag Vajntxwv Xihoos uas nyob hauv Hesenpoos, thiab nrog nws cog phoojywg li no: ‘Thov cia peb hla nej lub tebchaws mus. Peb yuav taug kev ncaj nraim xwb, tsis mus rau sab xis lossis sab laug li. Peb yuav them nqi rau cov dej uas peb haus thiab tej zaub mov uas peb noj. Peb tsuas thov koj tso kev rau peb hla koj lub tebchaws, mus txog thaum peb hla dhau tus dej Yauladees rau tim lub tebchaws uas tus TSWV uas yog peb tus Vajtswv muab rau peb lawm. Ib yam li Exaus cov xeebntxwv uas nyob hauv tebchaws Edoos, thiab cov Mau-am uas nyob hauv lub nroog Ales, tau tso kev rau peb hla lawv lub tebchaws los lawm.’ “Tiamsis Vajntxwv Xihoos tsis pub peb hla hauv nws lub tebchaws mus li. Rau qhov tus TSWV uas yog peb tus Vajtswv ua rau nws muaj lub siab tawv heev, kom peb thiaj tua yeej nws thiab txeeb tau nws lub tebchaws uas peb tseem nyob niaj hnub no. “Tus TSWV hais rau kuv hais tias, ‘Nej saib, kuv twb muab Xihoos thiab nws lub tebchaws cob rau nej lawm; cia li mus txeeb nws lub tebchaws rau nej nyob.’ Vajntxwv Xihoos thiab nws pab tubrog tuaj tua peb ze rau ntawm lub nroog Yahas, tiamsis tus TSWV uas yog peb tus Vajtswv twb muab nws cob rau peb lawm, peb thiaj tua tau nws, nws cov tub thiab tagnrho nws cov tubrog. Thaum ntawd, peb txeeb tau nws lub tebchaws, rhuav txhua lub nroog thiab tua txhua tus neeg, tsis hais pojniam, txivneej thiab menyuam, peb tsis tseg ib tug muaj sia nyob li. Peb coj lawv tej tsiaj txhu thiab huab lawv tej khoom hauv tej nroog mus tas. Tus TSWV uas yog peb tus Vajtswv cia peb mus txeeb tau tagnrho cov nroog uas txij ntua ntawm Alu-es uas nyob npuab lub Hav Alenoos, thiab lub nroog uas nyob hauv plawv lub hav ntawd, mus txog ntawm Nkeli-as. Tsis muaj ib lub nroog twg muaj ntsa yeej khov uas peb yuav tsoo tsis tau li. Tiamsis peb yeej tsis mus ze rau ntawm cheebtsam uas cov Amoos nyob lossis mus ze rau ntawm tus ntug Dej Yanpaus lossis tej nroog uas nyob rau saum laj roob lossis txhua qhov chaw uas tus TSWV uas yog peb tus Vajtswv tsis pub peb mus. “Dhau ntawd, peb mus rau pem tebchaws Npasas, Vajntxwv Aunkas txawm coj nws pab tubrog tuaj tua peb ze rau ntawm lub nroog Ediles. Tiamsis tus TSWV hais rau kuv hais tias, ‘Koj tsis txhob ntshai nws. Kuv yuav muab nws, nws cov tubrog thiab nws lub tebchaws cob rau nej. Koj cia li ua rau Aunkas ib yam li koj ua rau Xihoos uas yog cov Amaules tus vajntxwv uas kav lub nroog Hesenpoos.’ “Yog li ntawd, tus TSWV thiaj muab Vajntxwv Aunkas thiab nws cov pejxeem cob rau peb, thiab peb muab lawv tua tuag tas huv tibsi. Thaum ntawd peb mus txeeb tau nws tej nroog tagnrho tsis tseg ib lub li. Tagnrho cov nroog uas peb txeeb tau hauv cheebtsam Alenkaus uas Vajntxwv Aunkas uas nyob hauv tebchaws Npasas kav muaj rau caum lub. Tagnrho cov nroog ntawd puavleej muaj ntsa yeej siab heev, tej roojvag los muaj nqaj hlau liaj, thiab ntau lub zos tsis muaj ntsa yeej. Peb rhuav txhua lub nroog puastsuaj tas, thiab tua cov pojniam, txivneej thiab menyuam tuag tas huv tibsi, ib yam li peb ua rau Vajntxwv Xihoos hauv lub nroog Hesenpoos lawm. Peb coj lawv tej tsiaj txhu thiab huab lawv tej khoom hauv lawv tej nroog mus tas. “Thaum ntawd peb mus txeeb tau lub tebchaws uas cov Amaules ob tug vajntxwv kav ntawm tus dej Yauladees sab hnubtuaj, txij ntua ntawm tus dej Alenoos mus txog rau pem lub roob Helemoos. ( Lub roob Helemoos, cov neeg Xidoos hu ua roob Xili-oos, thiab cov neeg Amaules hu ua roob Xenis.) Peb txeeb tau tagnrho cheebtsam uas Vajntxwv Aunkas kav hauv tebchaws Npasas: cov nroog uas nyob hauv tiaj nrag, cheebtsam Nkile-as thiab Npasas, thiab dhau mus rau lub nroog Xalekas thiab Ediles uas nyob sab hnubtuaj.” ( Aunkas yog tus vajntxwv kawg ntawm haivneeg Lefayees. Nws lub txaj, yog muab hlau ua, dav plaub tshim thiab ntev cuaj tshim raws li luag ibtxwm ntsuas. Niaj hnub no lub txaj ntawd tseem nyob hauv cov neeg Amoos lub nroog Lanpas.) “Thaum peb txeeb tau lub tebchaws ntawd los ua peb tug lawm, kuv muab cheebtsam ntawm lub nroog Alu-es sab qaumteb uas nyob ze tus dej Alenoos lub laj roob hauv Nkile-as nrog tej nroog ib nrab faib rau xeem Lunpees thiab xeem Khas. Kuv muab cheebtsam Nkile-as uas seem thiab lub nroog Npasas uas Aunkas kav nrog rau cheebtsam Alenkaus tagnrho faib rau xeem Manaxes ib nrab.” (Raws li sawvdaws paub, Npasas yog cov Lefayees lub tebchaws. Yailes uas yog xeem Manaxes tau tagnrho cheebtsam Alenkaus uas yog Npasas, mus txog ntua ntawm cov Nkesus thiab cov Ma-akas tus ciamteb. Yailes muab nws tej zos tis npe raws li nws lub npe, niaj hnub no luag tseem hu ua Yailes tej zos.) “Kuv muab cheebtsam Nkile-as faib rau Makhiles cuab kwvtij uas yog xeem Manaxes. Kuv muab cheebtsam ntawm Nkile-as mus ti nkaus rau ntawm tus Dej Alehoos faib rau xeem Lunpees thiab xeem Khas. Ob xeem ntawd tus ciamteb sab qabteb phua plawv tus dej Alenoos, thiab sab qaumteb tus ciam txij ntua ntawm tus Dej Yanpaus uas yog cov Amoos tus ciamteb. Sab hnub poob tus ciam mus txog ntua tus dej Yauladees, txij ntua ntawm Hiavtxwv Kalilais uas nyob sab qaumteb mus txog rau nram Hiavtxwv Tuag uas nyob sab qabteb thiab mus txog rau ntawm lub taw roob Pinkas uas nyob sab hnubtuaj. “Thaum ntawd kuv hais li no rau lawv tias: ‘Tus TSWV uas yog peb tus Vajtswv twb muab lub tebchaws uas nyob ntawm tus Dej Yauladees sab hnubtuaj rau nej lawm. Nej cia li txhij nej cov tubrog thiab kom lawv hla tus Dej Yauladees mus rau sab tim ub, mus ua nej cov kwvtij Yixalayees ntej, thiab pab lawv tua lub tebchaws. Kuv paub hais tias nej muaj pojniam, menyuam thiab tsiaj txhu coob. Yog li ntawd, tsuas tseg nej cov pojniam, menyuam thiab tej tsiaj txhu nyob hauv cov nroog uas kuv twb muab faib rau nej lawm xwb. Nej yuav tau mus pab nej cov kwvtij Yixalayees tua lub tebchaws uas tus TSWV muab rau lawv uas nyob ntawm tus Dej Yauladees sab hnubpoob, mus txog thaum tus TSWV pub rau lawv nyob kaj siab lug hauv lub tebchaws ntawd ib yam li tus TSWV twb pub rau nej lawm. Tom qab ntawd nej mam li rov qab los nyob hauv lub tebchaws uas kuv muab rau nej.’ “Ces kuv hais rau Yausuas hais tias: ‘Koj twb pom tej uas tus TSWV uas yog koj tus Vajtswv ua rau Vajntxwv Xihoos thiab Vajntxwv Aunkas lawm; nws yuav ua ib yam li ntawd rau txhua lub tebchaws uas koj mus tua. Koj tsis txhob ntshai lawv, rau qhov tus TSWV uas yog koj tus Vajtswv yuav pab kom koj tua yeej.’ “Thaum ntawd kuv thov Vajtswv hais tias, ‘Tus TSWV uas kav ib puas tsav yam, koj twb qhia tej txujci tseemceeb uas koj yuav ua rau kuv paub thaum chivkeeb los lawm. Yeej tsis muaj dua lwm tus vajtswv ua nyob saum ntuj lossis hauv ntiajteb no yuav muaj cuabkav ua tej txujci tseemceeb npaum li koj tau ua tas los lawm! Tus TSWV, thov pub kuv hla tus Dej Yauladees mus rau sab tim ub, kom kuv tau pom lub tebchaws av rog thiab zoo qoob, tej laj roob uas zoo nkauj thiab tej roob siab hauv tebchaws Lenpanoos.’ “Tiamsis twb yog vim nej ntag, tus TSWV thiaj li chim rau kuv thiab tsis mloog kuv tej lus thov. Nws hais rau kuv hais tias, ‘Koj los txog ntawm no xwb, ces tau lawm! Tsis txhob hais qhov uas koj yuav mus rau tebchaws Kana-as li! Koj cia li nce mus rau saum lub ncov Roob Pinkas thiab tsa muag saib sab qaumteb, sab qabteb, sab hnubtuaj thiab sab hnubpoob. Koj ua tib zoo saib tej uas koj qhovmuag pom, rau qhov koj yuav tsis tau hla tus Dej Yauladees. Koj yuav tsum qhia Yausuas thiab txhawb nws lub zog, kom nws muaj lub siab tawv, rau qhov nws yog tus uas yuav coj kuv haivneeg hla tus Dej Yauladees mus nyob lub tebchaws uas koj pom ntawd.’ “Yog li ntawd, peb tseem nyob hauv lub hav uas saib ntsoov lub nroog Npepe-aus.” Ces Mauxes hais rau cov Yixalayees hais tias, “Nej yuav tsum coj raws li tej lus uas kuv qhia rau nej, nej thiaj muaj sia nyob ntev, thiab kav lub tebchaws uas tus TSWV uas yog nej cov yawgkoob tus Vajtswv muab pub rau nej. Nej tsis txhob ntxiv ib lo lus rau tej lus uas kuv hais tseg rau nej lossis rho ib lo lus tseg li. Nej yuav tsum ua raws li tus TSWV uas yog nej tus Vajtswv tej lus uas kuv hais rau nej txhua lo huv tibsi. Nej puavleej pom tej uas tus TSWV ua saum Roob Pe-aus lawm. Tus TSWV tua cov neeg uas pe tus mlom Npa-as txhua tus povtseg huv tibsi, tiamsis nej cov uas muab siab npuab tus TSWV uas yog nej tus Vajtswv, nej sawvdaws puavleej tseem ua neej nyob los txog niaj hnub no. “Kuv twb qhia tus TSWV uas yog nej tus Vajtswv tej kevcai uas nws kom kuv qhia rau nej tas lawm. Thaum nej mus nyob hauv lub tebchaws uas nej tabtom yuav mus tua, nej yuav tsum ua raws li tej kevcai ntawd. Nej yuav tsum muab siab npuab thiab ua raws li tej kevcai no, luag lwm haivneeg thiaj pom hais tias nej muaj tswvyim. Thaum luag hnov txog tej kevcai no, luag yuav hais ncha ntws hais tias, ‘Haivneeg no muaj tswvyim thiab txawj ntse kawg li!’ “Tsis muaj ib haivneeg twg uas muaj tus tswv nrog lawv nyob thiab pab lawv ib yam li tus TSWV uas yog peb tus Vajtswv nrog peb thiab pab peb, txawm yog haivneeg ntawd muaj hwjchim loj npaum twg los xij, yeej tsis muaj ib tug uas yuav pab lawv li. Tiamsis thaum twg peb tsa ncauj thov tus TSWV, nws yeej pab peb. Tsis muaj ib haivneeg tseemceeb twg uas muaj tej kevcai ncaj ncees li tej uas hnub no kuv qhia rau nej. Nej yuav tsum ceevfaj thiab nco ntsoov tej uas nej qhovmuag pom no mus tas nej simneej. Nej yuav tsum muab piav qhia rau nej tej tubki thiab tej xeebntxwv mloog txog tej xwm uas hnub nej mus cuag tus TSWV uas yog nej tus Vajtswv saum lub Roob Xinais. Hnub ntawd nws hais rau kuv hais tias, ‘Koj cia li hu cov pejxeem tuaj ua ke, kuv xav qhia kuv tej lus rau lawv mloog, kom lawv thiaj paub hwm thiab mloog kuv lus tas lawv tiam neej thiab lawv thiaj paub qhia lawv tej tubki kom mloog kuv tej lus.’ “Nej yuav tsum piav qhia rau nej tej menyuam mloog hais tias, hnub ntawd nej mus sawv ntawm taw roob, muaj huab tsaus nti li pa taws thiab muaj nplaim taws cig nto ntuj. Nej qhia rau lawv hais tias, tus TSWV hais lus hauv cov nplaim taws tuaj rau nej, nws hais li cas rau nej los nej yeej hnov txhua lo, tiamsis nej tsis pom nws. Nws qhia tej uas nej yuav tsum tau ua rau nej, nej thiaj yuav coj tau raws li tej lus uas nws cog tseg rau nej lawm. Nws hais kom nej ua raws li Kaum Nqe Kevcai uas nws tau sau rau ntawm ob daim txiag zeb. Tus TSWV kom kuv qhia nws tej kevcai rau nej paub thiab nej yuav tsum coj, thaum nej mus nyob hauv lub tebchaws uas nej tabtom mus tua ntawd. “Thaum tus TSWV hais lus hauv cov nplaim taws uas nyob saum Roob Xinais tuaj rau nej, nej tsis pom nws. Yog nej xav tau zoo, nej yuav tsum ceevfaj tsis txhob puab ib tus mlom dabtsi hlo li, tsis hais zoo li pojniam lossis zoo li txivneej, tsis hais zoo li tus tsiaj lossis zoo li tus noog, tsis hais zoo li tus nab lossis zoo li tus ntses. Yog nej puab tej ntawd, ces nej ua txhaum ntag. Nej tsis txhob teev lossis pe tej uas nej pom nyob saum nruab ntug, tsis hais lub hnub lossis lub hli thiab tej hnubqub. Tus TSWV uas yog nej tus Vajtswv cia lwm haivneeg pe tej ntawd. Tiamsis Vajtswv coj nej tawm nram tebchaws Iziv uas zoo li lub cubtawg los ua nws haivneeg, ib yam li niaj hnub no nej yog nws haivneeg. Tus TSWV uas yog nej tus Vajtswv chim rau kuv twb yog vim nej ntag, tus TSWV thiaj hais tias, nws tsis pub kuv hla tus Dej Yauladees mus nyob tim lub tebchaws av rog thiab zoo qoob uas nws tabtom muab pub rau nej. Kuv yuav tuag rau hauv lub tebchaws no, kuv yuav tsis tau hla tus Dej Yauladees mus rau sab tid, tiamsis nej yuav tau hla mus nyob hauv lub tebchaws uas av rog thiab zoo qoob ntawd. Nej yuav tsum nco ntsoov tus TSWV uas yog nej tus Vajtswv tej lus uas nws cog tseg rau nej lawm. Nej yuav tsum mloog tus TSWV tej lus uas qhia rau nej hais tias, nej tsis txhob puab ib yam mlom dabtsi rau nej pe hlo li, rau qhov tus TSWV uas yog nej tus Vajtswv khib nej heev, nws zoo ib yam li tej nplaim taws uas cig laim lias. “Txawm yog nej mus nyob hauv lub tebchaws ntawd tau ntev, thiab muaj tub muaj ki, muaj xeebntxwv lawm los nej tsis txhob puab ib yam mlom dabtsi li, yog nej puab mlom, ces nej ua txhaum lawm ntag. Qhov uas neeg puab mlom yog kev txhaum uas ua rau tus TSWV chim. Hnub no kuv thov lub ntuj thiab lub teb nrog kuv ua timkhawv, yog nej tsis mloog kuv lus, tsis ntev nej yuav puastsuaj tas rau hauv lub tebchaws ntawd. Nej yuav tsis tau nyob ntev hauv lub tebchaws uas nej tabtom yuav hla tus Dej Yauladees mus nyob ntawd. Nej yuav puastsuaj tas huv tibsi. Tus TSWV yuav ua rau nej tawg ua sab ua sua mus nrog lwm haivneeg nyob, nej cov neeg tsuas tshuav cov tsawg thiaj dim kev puastsuaj thiab muaj sia ua neej nyob xwb. Nej yuav tau teev luag tej mlom hauv tej tebchaws uas nej mus nyob ntawd, tsis hais tej mlom uas yog ntoo lossis pobzeb, tej mlom ntawd yeej tsis hnov lus thiab tsis pom kev, tsis txawj noj thiab tsis hnov ntxhiab dabtsi hlo li. Thaum nej mus nyob hauv luag tej tebchaws, yog nej muab siab rau nrhiav tus TSWV uas yog nej tus Vajtswv tiag, nej yeej yuav ntsib nws. Thaum tej xwm no los raug nej thiab nej raug kev txomnyem ntxhov siab, thaum ntawd nej yuav tig rov los cuag tus TSWV thiab mloog nws lus. Nws yog tus Vajtswv uas muaj kev hlub. Nws yuav tsis tso nej tseg lossis ua rau nej puastsuaj, nws yuav nco ntsoov tej lus uas thaum ub nws tau cog tseg rau nej cov yawgkoob lawm. “Nej sim mus nug saib tiam thaum ub uas tseem tsis tau yug nej, suav txij thaum Vajtswv tsim muaj neeg nyob rau lub ntiajteb no los, puas muaj tej xwm loj npaum li tej uas nej pom no los tsis muaj? Nej sim mus nug thoob ntiajteb saib, puas muaj leejtwg hnov tej xwm zoo li no los tsis hnov? Puas muaj leejtwg hnov Vajtswv hais lus hauv cov nplaim taws tuaj, thiab nws tseem ciaj sia nyob ib yam li thaum nej hnov Vajtswv hais, es nej tseem muaj sia nyob? Puas muaj ib tug vajtswv twg muaj cuabkav coj tau ib haivneeg tawm hauv lwm haivneeg lub tebchaws los ua nws haivneeg, li tus TSWV uas yog nej tus Vajtswv tau coj nej tawm nram tebchaws Iziv los? Twb yog Vajtswv lub hwjchim thiab nws lub zog, ua siv ua npog, ua tsov ua rog, ua tej txujci tseemceeb uas loj kawg nkaus, thiab ua tej xwmtxheej uas neeg ntshai tabmeeg rau nej qhovmuag pom ntag. Tus TSWV ua tej no qhia rau nej paub hais tias, nws tib leeg xwb thiaj yog Vajtswv, tsis muaj dua lwm tus Vajtswv. Tus TSWV ua rau nej hnov nws lub suab hais saum ntuj tuaj, nws thiaj qhia tau nej; thiab cia nej pom nws tej nplaim taws uas tseemceeb hauv ntiajteb no, nej hnov nws lub suab hais lus hauv tej nplaim taws ntawd tuaj. Nws hlub nej cov yawgkoob, nws thiaj xaiv nej thiab nws lub hwjchim uas loj kawg nkaus coj nej tawm nram tebchaws Iziv los. Thaum nej txav zuj zus mus rau tom hauv ntej, tus TSWV ntiab tej haivneeg uas loj thiab muaj zog dua nej khiav tawm ua ntej nej mus txog, nws ua li ntawd twb yog nws coj nej mus nyob hauv lawv lub tebchaws uas nws muab pub rau nej nyob ua nej tug lawm. Yog li ntawd, hnub no nej yuav tsum nco ntsoov rau nruab siab hais tias, tus TSWV uas yog Vajtswv, nws kav saum ntuj thiab hauv ntiajteb. Tsis muaj dua lwm tus vajtswv nyob qhov twg li, tsuas yog muaj nws tib leeg xwb thiaj yog Vajtswv. Nej yuav tsum ua raws li tus TSWV tej kevcai uas hnub no kuv qhia rau nej txhua nqe, nej thiab nej tej tubki thiaj yuav noj qab nyob zoo. Nej yuav muaj sia ua neej nyob ntev hauv lub tebchaws uas tus TSWV uas yog nej tus Vajtswv yuav muab rau nej ua nej tug mus ibtxhis.” Mauxes xaiv tau peb lub nroog uas nyob sab hnubtuaj ntawm tus Dej Yauladees tseg rau tus uas yuam kev tua tus neeg uas tsis yog nws tus yeebncuab tau khiav mus cawm siav. Nws khiav mus nyob hauv cov nroog ntawd ib lub kom luag tsis txhob muab nws tua. Xeem Lunpees tau lub nroog Npexeles uas nyob ntawm tiaj suabpuam; xeem Khas tau lub nroog Lamaus uas nyob hauv cheebtsam Nkile-as; thiab xeem Manaxes tau lub nroog Nkaulas uas nyob hauv cheebtsam Npasas. Mauxes qhia Vajtswv tej kevcai rau cov Yixalayees. Lawv kav tagnrho Vajntxwv Xihoos lub tebchaws, thiab Vajntxwv Aunkas lub tebchaws uas yog cheebtsam Npasas, Aunkas yog cov Amaules tus vajntxwv uas nyob ntawm tus Dej Yauladees sab hnubtuaj. Lub tebchaws no tus ciam txij ntua ntawm lub nroog Alu-es uas nyob ntawm ntug Dej Alenoos mus rau sab qaumteb ti nkaus lub Roob Xili-oos uas yog lub roob Helemoos. Thiab tagnrho cheebtsam uas nyob ntawm tus Dej Yauladees sab hnubtuaj, thiab mus ti nkaus rau nram Hiavtxwv Tuag uas nyob sab qabteb, thiab mus txog ntua ntawm taw Roob Pinkas uas nyob sab hnubtuaj. Mauxes hu tagnrho cov Yixalayees tuaj ua ke thiab hais rau lawv tias, “Cov Yixalayees, nej cia li mloog tej kevcai uas hnub no kuv qhia rau nej. Kom nej paub coj thiab ua raws li tej kevcai ntawd. Thaum peb tseem nyob ntawm Roob Xinais, tus TSWV uas yog peb tus Vajtswv tau coglus tseg rau peb, tsis yog rau peb cov yawgkoob xwb, tiamsis yog rau peb cov uas tseem muaj sia nyob niaj hnub no ntag. Thaum nyob saum Roob Xinais, tus TSWV hais rau nej tim ntsej tim muag hauv cov nplaim taws tuaj. Thaum ntawd, kuv sawv nruab nrab ntawm nej thiab tus TSWV, thiab qhia tej lus uas nws kom kuv qhia rau nej, vim nej ntshai tej nplaim taws ntawd heev, nej thiaj tsis kam nce mus rau saum roob. “Tus TSWV hais tias, ‘Kuv yog tus TSWV uas yog nej tus Vajtswv, tus uas coj nej tawm nram tebchaws Iziv uas nej ua luag qhev los. “ ‘Tsis txhob pe lwm tus vajtswv, tiamsis pe kuv tib leeg xwb. “ ‘Tsis txhob puab tej mlom ua zoo li tej uas nyob saum nruab ntug lossis tej uas nyob hauv ntiajteb no lossis hauv tivtxwv rau nej pe. Tsis txhob pe ib tug mlom twg li, rau qhov kuv yog tus TSWV uas yog nej tus Vajtswv, kuv khib nej heev. Kuv yog tus TSWV uas rau txim rau cov uas ntxub kuv thiab lawv cov xeebntxwv mus txog peb thiab plaub tiam neeg. Tiamsis kuv hlub cov uas muab siab npuab kuv thiab coj raws li kuv tej kevcai, ib tiam dhau ib tiam mus txog ntau txhiab tiam neeg. “ ‘Tsis txhob muab kuv lub npe mus hais ua dog ua dig, rau qhov kuv yog tus TSWV uas yog nej tus Vajtswv, kuv yuav rau txim rau cov neeg uas muab kuv lub npe mus hais ua dog ua dig. “ ‘Nco ntsoov hnub Xanpataus ua hnub tseemceeb raws li tus TSWV uas yog nej tus Vajtswv hais rau nej lawm. Nej ua nej tej haujlwm rau hnub, tiamsis hnub xya yog hnub so thiab pehawm Vajtswv. Hnub ntawd tsis pub leejtwg ua haujlwm li, tsis hais nej, nej tej tub tej ntxhais, tej tubqhe, tej tsiaj txhu lossis lwm haivneeg uas nrog nej nyob hauv nej lub tebchaws, sawvdaws yuav tsum so huv tibsi. Kom nej cov tubqhe tau so ib yam li nej. Nco ntsoov thaum nej ua luag qhev nyob nram tebchaws Iziv, tus TSWV uas yog nej tus Vajtswv lub hwjchim pab nej dim. Twb yog li ntawd, kuv thiaj kom nej hwm hnub Xanpataus. “ ‘Yuav tsum hwm nej niam nej txiv, raws li tus TSWV uas yog nej tus Vajtswv hais rau nej lawm, nej thiaj yuav noj qab nyob zoo thiab muaj sia ua neej nyob ntev hauv lub tebchaws uas kuv muab rau nej. “ ‘Tsis txhob tua neeg. “ ‘Tsis txhob deev luag poj luag txiv. “ ‘Tsis txhob ua tubsab. “ ‘Tsis txhob ua timkhawv tsis tseeb ntxo kwvtij zejzog. “ ‘Tsis txhob ntshaw luag pojniam; tsis txhob ntshaw luag tej vajtse, luag tej liaj tej teb, luag tej tubqhe, luag tej nyuj, luag tej neesluav lossis tej uas yog luag tug.’ “Tej no yog tus TSWV tej kevcai uas nws muab rau nej thaum nej tuaj txoos ua ke rau ntawm Roob Xinais. Thaum uas tus TSWV hais lus ua suab nrov ntxhe ntws hauv cov nplaim taws thiab hauv tauv huab uas tsaus nti tuaj, nws tsis muab lwm yam rau nej, tsuas yog tej kevcai no xwb. Nws sau rau ntawm ob daim txiag zeb thiab muab rau kuv. “Thaum cov nplaim taws cig thoob plaws saum lub roob ntawd, nej hnov ib lub suab hais hauv qhov uas tsaus nti tuaj, ces nej cov thawjcoj thiab cov thawj ntawm tej xeem los cuag kuv thiab hais rau kuv hais tias, ‘Tus TSWV uas yog peb tus Vajtswv qhia nws lub hwjchim thiab nws tus hwvxyeej rau peb, thaum peb hnov nws lub suab hais lus hauv cov nplaim taws tuaj. Hnub no peb pom Vajtswv hais lus rau ib tug neeg, txawm li ntawd los nws tseem muaj sia nyob. Yog peb tseem hnov tus TSWV uas yog peb tus Vajtswv lub suab hais lus ntxiv, mas peb yeej yuav tuag; thiab cov nplaim taws yeej yuav kub peb xwb. Peb tsis tau xav tuag li. Puas muaj leejtwg hnov Vajtswv tus uas muaj sia nyob lub suab hais lus hauv cov nplaim taws tuaj thiab tus ntawd tseem muaj sia nyob? Mauxes, thov koj rov qab mus saum roob, thiab mloog tus TSWV uas yog peb tus Vajtswv tej lus saib nws hais li cas rau koj. Koj mam rov los qhia tej lus ntawd rau peb. Peb yuav mloog thiab ua raws li tej lus ntawd.’ “Thaum tus TSWV hnov nej tej lus, nws hais rau kuv hais tias, ‘Kuv twb hnov tej lus uas cov neeg ntawd hais, lawv hais yog lawm. Yog lawv txawj xav li ntawd thiab mloog kuv tej lus mus li, mas lawv thiab lawv tej xeebntxwv yuav tau lub neej zoo mus tas simneej. Koj cia li rov qab mus hais kom lawv rov mus rau hauv lawv tej tsevntaub. Tiamsis Mauxes, koj rov tuaj cuag kuv ntawm no, kuv yuav qhia kuv tej kevcai huv tibsi rau koj. Koj coj mus qhia rau lawv, kom lawv coj raws li ntawd, thaum lawv mus nyob hauv lub tebchaws uas kuv muab rau lawv.’ “Cov Yixalayees, nej yuav tsum ua raws li tus TSWV uas yog nej tus Vajtswv tej kevcai uas nws qhia rau nej lawm. Nej yuav tsum coj raws li Vajtswv tej Kevcai txhua nqe. Mloog thiab ua raws li tus TSWV uas yog nej tus Vajtswv tej kevcai txhua nqe, nej thiaj yuav noj qab nyob zoo thiab ua neej nyob ntev rau hauv lub tebchaws uas nej yuav mus tua ntawd. “Tej lus no yog tus TSWV uas yog nej tus Vajtswv tej kevcai uas nws kom kuv muab qhia rau nej. Thaum nej mus nyob hauv lub tebchaws uas nej tabtom yuav mus tua thiab nyob ntawd, nej yuav tsum coj raws li tej kevcai no. Nej thiab nej tej xeebntxwv yuav tsum hwm tus TSWV uas yog nej tus Vajtswv mus txog hnub uas tas nej simneej. Nej yuav tsum ua raws li tus TSWV tej kevcai uas kuv qhia rau nej txhua nqe, nej thiaj yuav muaj sia ua neej nyob ntev hauv lub tebchaws ntawd. Ib tsoom Yixalayees, nej cia li mloog thiab khaws coj, nej thiaj yuav tau nyob kaj siab lug, thiab ciaj ua ib haivneeg uas muaj hwjchim loj nyob hauv lub tebchaws uas av rog thiab zoo qoob, raws li tus TSWV uas yog peb cov yawgkoob tus Vajtswv tau coglus tseg lawm. “Ib tsoom Yixalayees, nej ua tib zoo mloog, tsuas yog tus TSWV tib leeg xwb, thiaj yog peb tus Vajtswv. Nej yuav tsum hlub tus TSWV uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog. Nej yuav tsum nco ntsoov tej lus uas hnub no kuv qhia rau nej. Nej yuav tsum muab qhia rau nej tej menyuam, thiab niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua haujlwm. Muab pav rau ntawm nej cajnpab, thiab rau ntawm nej hauvpliaj ua chaw nco. Muab sau rau ntawm nej tej ncej qhovrooj thiab ntawm nej tej roojvag. “Tus TSWV uas yog nej tus Vajtswv yuav muab lub tebchaws vammeej, muaj zej muaj zos uas tsis yog nej txhais tes ua rau nej nyob ua nej tug raws li nws tau coglus tseg rau Anplahas, Ixaj thiab Yakhauj uas yog nej cov yawgkoob lawm. Tej vajtse ntawd muaj txhua yam zoo puv nkaus uas tsis yog nej npaj cia rau hauv, thiab muaj tej qhovtshij uas tsis yog nej khawb, muaj tej vaj txiv hmab, thiab tej vaj txiv ntoo roj uas tsis yog nej cog. Thaum uas tus TSWV coj nej mus nyob hauv lub tebchaws ntawd, nej muaj txhua yam noj nplua mias, nej yuav tsum nco ntsoov hais tias tus TSWV tau coj nej tawm nram tebchaws Iziv uas nej ua luag qhev los. Nej yuav tsum hwm tus TSWV uas yog nej tus Vajtswv, pehawm nws tib leeg thiab tuav nws lub npe coglus xwb. Nej tsis txhob pe lwm tus vajtswv lossis teev cov neeg uas nyob ibncig nej tej vajtswv li. Yog nej tseem mus pe lwm tus vajtswv, tus TSWV yuav chim rau nej thiab ua kom nej puastsuaj ib yam li hluavtaws kub, rau qhov tus TSWV uas yog nej tus Vajtswv, nws nrog nej nyob thiab khib nej heev. “Nej tsis txhob sim tus TSWV uas yog nej tus Vajtswv siab ib yam li nej sim nws siab nyob nram tebchaws Maxas. Nej yuav tsum nco ntsoov ua raws li tej kevcai uas tus TSWV twb qhia rau nej lawm. Nej yuav tsum ua tej uas tus TSWV hais tias zoo thiab ncaj ncees, nej thiaj yuav tau nyob kaj siab lug. Nej thiaj yuav tau mus nyob hauv lub tebchaws av rog thiab zoo qoob uas tus TSWV tau coglus tseg yuav muab rau nej cov yawgkoob, thiab nej thiaj yuav raws tau nej cov yeebncuab khiav tawm mus, raws li tus TSWV tau coglus tseg rau nej lawm. “Lwm hnub nej tej tubki yuav nug nej hais tias, ‘Vim li cas tus TSWV uas yog peb tus Vajtswv hais kom peb ua raws li tej kevcai no?’ Ces nej qhia rau lawv hais tias, ‘Peb ua Falaus qhev nyob hauv tebchaws Iziv, mas tus TSWV uas muaj hwjchim loj kawg nkaus pab peb dim. Peb qhovmuag pom nws tej txujci tseemceeb thiab tej xwm uas nws ua rau cov Iziv, ua rau Falaus, Falaus tsevneeg thiab Falaus cov nomtswv ntshai kawg nkaus. Tus TSWV cawm peb dim ntawm cov Iziv txhais tes, nws thiaj coj peb los nyob rau hauv lub tebchaws uas nws muab pub rau peb raws li nws tau coglus tseg rau peb cov yawgkoob lawm. Tus TSWV uas yog peb tus Vajtswv hais kom peb ua raws li tej kevcai no txhua nqe thiab kom peb hwm nws. Yog peb ua raws li nws hais, nws yuav tsomkwm peb haivneeg thiab pub kom peb vammeej. Yog peb ua raws li Vajtswv tej lus txhua lo, nws yuav txaus siab rau peb.’ “Tus TSWV uas yog nej tus Vajtswv yuav coj nej mus nyob hauv lub tebchaws uas nej tabtom yuav mus tua, thiab nws yuav ntiab ntau haivneeg khiav tawm mus. Thaum nej mus tua, nws yuav ntiab xya haivneeg uas loj thiab muaj zog tshaj nej khiav tawm mus. Cov neeg ntawd yog cov Hitis, cov Nkinkasis, cov Amaules, cov Kana-as, cov Pelixes, cov Hivis thiab cov Yenpus. Thaum tus TSWV uas yog nej tus Vajtswv muab tej haivneeg ntawd cob rau nej tes thiab nej tua yeej lawv lawm, nej yuav tsum tua lawv kom tu noob nrho. Nej tsis txhob nrog lawv sib raug zoo lossis hlub lawv hlo li. Nej tsis txhob mus yuav lawv tej ntxhais los rau nej tej tub, thiab tsis txhob cia nej tej ntxhais mus yuav lawv tej tub, rau qhov lawv yuav ua rau nej tej tub tej ntxhais tso tus TSWV tseg thiab mus pe luag tej vajtswv. Yog nej ua li ntawd, tus TSWV yuav chim rau nej thiab ua kom nej puastsuaj tamsim ntawd. Nej cia li rhuav lawv tej thaj, tsoo lawv tej ncej zeb dab, ntov lawv tej ncej Aselas thiab hlawv lawv tej mlom huv tibsi povtseg. Nej yuav tsum ua li no, rau qhov nej yog tus TSWV uas yog nej tus Vajtswv haivneeg. Nws tau xaiv nej tawm ntawm txhua haivneeg hauv ntiajteb no los ua nws haivneeg uas nws hlub heev. “Tus TSWV hlub nej thiab xaiv nej, tsis yog vim nej yog ib haivneeg uas coob tshaj luag lwm haivneeg; qhov tseeb, nej yog ib haivneeg uas tsawg kawg nkaus hauv ntiajteb no. Tiamsis tus TSWV hlub nej thiab nws ua raws li tej lus uas nws tau cog tseg rau nej cov yawgkoob lawm. Twb yog vim li no, nws thiaj siv nws lub hwjchim uas loj kawg nkaus cawm nej thiab tso nej dim, nej thiaj tsis tau ua Falaus uas yog cov Iziv tus vajntxwv qhev lawm. Nej yuav tsum nco ntsoov hais tias, tus TSWV uas yog nej tus Vajtswv tib leeg xwb thiaj yog Vajtswv thiab nws yog tus ncaj ncees. Nws yuav ua raws li tej lus uas nws tau cog tseg, nws hlub tus uas mloog nws lus thiab muab siab npuab nws, mus txog ib txhiab tiam neeg, tiamsis nws yuav rau txim rau cov neeg uas ntxub nws. Yog li ntawd, nej yuav tsum ua raws li tej uas kuv qhia rau nej; thiab coj raws li tej kevcai txhua nqe uas hnub no kuv muab cob rau nej. “Yog nej mloog thiab ua raws li tej kevcai no, tus TSWV uas yog nej tus Vajtswv yuav ua raws li tej lus uas nws tau cog tseg rau nej, nws yuav hlub nej mus ibtxhis raws li nws tau coglus tseg rau nej cov yawgkoob lawm. Nws yuav hlub thiab foom koob hmoov rau nej, nej yuav huamvam muaj tubki coob. Nws yuav foom koob hmoov rau nej tej liaj teb, nej yuav muaj qoobloo ntau, muaj cawv txiv hmab thiab roj txiv ntoo; nws yuav foom koob hmoov rau nej, kom muaj nyuj, muaj yaj thiab muaj tshis coob. Nws yuav foom tej koob hmoov no rau nej, thaum nej mus nyob hauv lub tebchaws uas nws tau coglus tseg rau nej cov yawgkoob lawm hais tias nws yuav muab rau nej. Tej neeg uas nyob hauv ntiajteb no tsis muaj ib haivneeg uas yuav tau koob hmoov npaum li nej. Nej tej pojniam thiab tej tsiaj txhu tsis muaj ib tug tshob uas tsis muaj menyuam li. Tus TSWV yuav tsomkwm tsis pub kom nej muaj mob muaj nkeeg, thiab nws yuav tsis tso tej mob phem uas nej pom nram tebchaws Iziv los raug nej li, tiamsis nws yuav tso tej ntawd los raug nej tej yeebncuab txhua tus. Nej yuav tsum tua txhua haivneeg uas tus TSWV uas yog nej tus Vajtswv muab cob rau nej tes kom puastsuaj tas, nej tsis txhob hlub lawv hlo li. Nej tsis txhob pe lawv tej vajtswv, yog nej pe nej yuav raug kev puastsuaj. “Nej tsis txhob xav hais tias cov neeg no coob dua nej, nej yuav raws tsis tau lawv khiav tawm. Nej tsis txhob ntshai lawv; nej yuav tsum nco ntsoov tej xwm uas tus TSWV uas yog nej tus Vajtswv ua rau Falaus thiab cov Iziv. Nej yuav tsum nco ntsoov tej sub tawg sub ntsha uas nej qhovmuag pom, tej txujci tseemceeb, thiab tus TSWV uas yog nej tus Vajtswv lub hwjchim thiab lub zog loj zog nchav uas tso nej dim, nej thiaj tsis tau ua luag qhev. Tus TSWV yuav ua rau cov neeg uas nimno nej ntshai heev ntawd kom puastsuaj tas ib yam li nws ua rau cov Iziv raug puastsuaj lawm. Tus TSWV yuav tso sub tawg sub ntsha los rau tej haivneeg ntawd, txawm yog cov uas khiav mus nkaum los yuav raug puastsuaj tas huv tibsi. Yog li ntawd, nej tsis txhob ntshai tej neeg ntawd. Tus TSWV uas yog nej tus Vajtswv yuav nrog nraim nej; nws yog Vajtswv tus uas muaj hwjchim loj kawg nkaus, tsimnyog sawvdaws hwm thiab ntshai nws. Thaum nej mus tua lawv, tus TSWV uas yog nej tus Vajtswv yuav ntiab lawv tawm zuj zus mus. Nej tsis txhob ua ib zaug tua kom lawv puastsuaj tas huv tibsi; yog nej ua li ntawd, yuav muaj tsiaj nruab nrag coob heev tuaj txov nej. Tus TSWV yuav muab nej tej yeebncuab cob rau nej, nws yuav ua kom lawv ceeb thiab tawg khiav mus txog hnub uas lawv raug kev puastsuaj tas. Tus TSWV yuav muab lawv tej vajntxwv cob rau nej tes. Nej yuav tua tej vajntxwv ntawd tuag tas, thiab lawv tej koob meej yuav ploj mus. Yeej tsis muaj leejtwg yuav tiv taus nej; nej yuav tua lawv tuag tas huv tibsi. Nej yuav tsum muab lawv tej mlom hlawv povtseg. Nej tsis txhob ntshaw tej nyiaj tej kub uas luag muab vuam rau tej mlom ntawd, thiab nej tsis txhob coj tej ntawd los ua nej tug. Yog nej coj los, nej yuav raug puastsuaj, rau qhov tus TSWV uas yog nej tus Vajtswv ntxub tej mlom ntawd heev. Nej tsis txhob coj tej mlom ntawd ib tug los tso rau hauv nej tej tsev, nyob tsam nej yuav raug foom tsis zoo ib yam li tej mlom ntawd. Nej yuav tsum ntxub thiab saib tej mlom ntawd tsis muaj nqis, rau qhov tus TSWV twb foom tsis zoo rau tej mlom ntawd lawm. “Nej yuav tsum ua raws li tej kevcai uas hnub no kuv qhia rau nej txhua nqe, nej thiaj muaj sia nyob ntev, muaj tubki coob, thiab tau mus nyob hauv lub tebchaws uas tus TSWV coglus tseg rau nej cov yawgkoob lawm. Nej yuav tsum nco ntsoov hais tias, tus TSWV uas yog nej tus Vajtswv coj nej kev hla tiaj suabpuam tau plaub caug xyoo los li cas, nws cia nej raug kev txomnyem ntau yam sim nej siab, saib nej ua puas taus siab ntev thiab saib nej puas yuav ua raws li nws tej lus. Nws cia nej tshaib, nws mam li muab cov manas uas nej thiab nej cov yawgkoob tsis tau noj dua rau nej noj. Nws ua li ntawd, twb yog nws qhia kom nej paub hais tias, tsis yog mov xwb thiaj cawm tau neeg txojsia, tiamsis tus TSWV tej lus txhua lo thiaj cawm tau neeg txojsia. Lub sijhawm plaub caug xyoo ntawd nej tej tsoos tsho yeej tsis ntuag, thiab nej tej kotaw yeej tsis mob tsis o li. Nej yuav tsum nco ntsoov hais tias, tus TSWV uas yog nej tus Vajtswv qhuab ntuas thiab rau txim rau nej ib yam li leej txiv qhuab ntuas nws tej menyuam. Yog li ntawd, nej yuav tsum ua raws li tus TSWV tej lus uas qhia rau nej hais tias: nej yuav tsum ua lub neej raws li tus TSWV tej kevcai thiab hwm tus TSWV. Tus TSWV uas yog nej tus Vajtswv tabtom coj nej mus nyob hauv lub tebchaws av rog thiab zoo qoob, yog lub tebchaws uas muaj dej, muaj qhovdej txhawv, muaj dej cag ntws laub lug hauv tej kwjha thiab saum tej roob; lub tebchaws ntawd luag cog nplej thiab mog, cog txiv hmab, txiv ncuavpias, txiv ntsiavkws, txiv ntoo roj thiab muaj zib ntab ntau heev. Thaum nej mus nyob hauv lub tebchaws ntawd, nej yuav tsis tshaib tsis nqhis thiab tsis pluag li. Lub tebchaws ntawd tej roob zeb roob tsua muaj qhov tooj qhov hlau. Nej yuav muaj txaus noj txaus haus, nej yuav ua tus TSWV uas yog nej tus Vajtswv tsaug, vim nws muab lub tebchaws uas av rog thiab zoo qoob rau nej. “Nej yuav tsum nco ntsoov tus TSWV uas yog nej tus Vajtswv; nej yuav tsum ua raws li nws tej kevcai uas hnub no kuv muab cob rau nej. Thaum nej muaj noj muaj haus txaus, thiab ua tau vaj tau tse rau nej nyob, muaj nyuj, muaj yaj, muaj nyiaj, muaj kub thiab ib puas tsav yam ntau zuj zus tuaj, nej yuav tsum tsis txhob khavtheeb thiab tso tus TSWV uas yog nej tus Vajtswv uas coj nej tawm nram tebchaws Iziv qhov chaw uas nej ua luag qhev los tseg. Nws coj nej los hla tiaj suabpuam uas yog tiaj tuag tshaib tuag nqhis, muaj tej nab muaj taug thiab raubris teb. Thaum nej tseem nyob nram tiaj suabpuam uas qhuav nkig nkuav thiab tsis muaj dej haus, nws ua dej tawm hauv pobzeb los rau nej haus. Tus TSWV muab cov manas uas nej cov yawgkoob tsis tau noj dua rau nej noj nram tiaj suabpuam. Tus TSWV tso ntau yam kev txomnyem los sim nej siab, thaum kawg nws thiaj pub yam uas zoo rau nej. Nej tsis txhob xav hais tias, yog nej lub dag lub zog thiab nej lub tswvyim khwv nej thiaj muaj txiag npluanuj. Nej yuav tsum nco ntsoov hais tias, tus TSWV uas yog nej tus Vajtswv, yog tus pub rau nej npluanuj. Nws ua li ntawd, yog nws ua raws li tej lus uas nws cog tseg rau nej cov yawgkoob, thiab nws tseem ua zoo rau nej li ntawd los txog niaj hnub no. Nej yuav tsum nco ntsoov tus TSWV uas yog nej tus Vajtswv, nej tsis txhob tso nws tseg thiab mus pe luag tej vajtswv. Hnub no kuv ntuas nej hais tias, yog nej tsis mloog lus nej yuav raug puastsuaj xwb. Yog nej tsis mloog tus TSWV lus, nej yuav raug puastsuaj ib yam li txhua haivneeg uas tus TSWV yuav ua kom lawv raug puastsuaj, thaum nej mus txeeb lawv lub tebchaws. “Ib tsoom Yixalayees, nej ua tib zoo mloog! Hnub no nej tabtom yuav hla tus Dej Yauladees mus tua lub tebchaws uas muaj cov neeg loj thiab muaj zog dua nej. Lawv tej nroog loj thiab muaj ntsa yeej xov siab rau saum ntuj. Cov neeg ntawd siab thiab muaj zog heev; lawv loj tshaj lwm haivneeg huv tibsi, thiab nej twb hnov moo lawm hais tias, tsis muaj leejtwg tawmtsam yeej lawv li. Tiamsis nimno nej yuav pom hais tias, tus TSWV uas yog nej tus Vajtswv yuav mus ua nej ntej ib yam li cov nplaim taws cig lam lug. Thaum nej mus nias tsam, tus TSWV yuav ua kom lawv swb; nej yuav raws tau lawv khiav thiab ua kom lawv puastsuaj tas sai, raws li tus TSWV tau coglus tseg rau nej lawm. “Thaum tus TSWV uas yog nej tus Vajtswv ntiab lawv khiav tas lawm, nej tsis txhob xav hais tias, qhov uas tus TSWV coj nej los nyob hauv lub tebchaws no, vim nej yeej tsimnyog los nyob. Tsis yog li ntawd, tus TSWV ntiab cov neeg ntawd khiav twb yog vim lawv ua kev phem kev qias. Tsis yog vim nej coj ncaj thiab ua zoo tus TSWV thiaj coj nej los nyob hauv lawv lub tebchaws. Tus TSWV ntiab lawv khiav, vim lawv ua kev phem kev qias, thiab tus TSWV yeej ua raws li nws coglus tseg rau nej cov yawgkoob, Anplahas, Ixaj thiab Yakhauj lawm. Nej yuav tsum paub hais tias, qhov uas tus TSWV muab lub tebchaws av rog thiab zoo qoob rau nej, tsis yog vim nej tsimnyog nyob. Tsis yog li ntawd, nej yeej yog cov neeg uas tawv ncauj. “Nej yuav tsum nco ntsoov hais tias, thaum nej tseem nyob nram tiaj suabpuam, nej tau ua rau tus TSWV uas yog nej tus Vajtswv chim heev npaum li cas. Suav txij hnub uas nej tawm nram tebchaws Iziv los txog ntawm no nej tseem pheej ntxeev siab rau tus TSWV. Thaum nej tseem nyob ntawm Roob Xinais, nej ua rau tus TSWV chim heev, nws twb yuav ua kom nej puastsuaj. Kuv nce mus nqa ob daim txiag zeb uas tus TSWV sau nws tej lus cog tseg saum roob, yog tej lus uas nws muab cob rau nej. Kuv mus nyob saud tau plaub caug hnub plaub caug hmo, tsis noj tsis haus ib yam dabtsi li. Tus TSWV muab ob daim txiag zeb rau kuv, nws muab nws txhais tes sau tej lus uas nws hais hauv cov nplaim taws tuaj rau nej, yog hnub uas nej sawvdaws tuaj ua ke rau ntawm Roob Xinais. Thaum dhau plaub caug hnub plaub caug hmo lawm, tus TSWV muab ob daim txiag zeb uas nws sau nws tej lus cog tseg rau kuv. “Tom qab ntawd tus TSWV hais rau kuv hais tias, ‘Koj cia li nqis saum Roob Xinais no mus, rau qhov cov neeg uas koj coj khiav nram tebchaws Iziv los twb ntxeev siab ua phem ua qias lawm. Lawv tso tej kevcai uas kuv qhia kom lawv ua tseg, thiab lawv nchuav tau ib tug mlom rau lawv pe.’ “Tus TSWV hais ntxiv rau kuv hais tias, ‘Kuv paub cov neeg no tawv ncauj heev. Tsis txhob cheem kuv, kuv yuav ua kom lawv puastsuaj mus, kom tsis muaj leejtwg hnov lawv moo ntxiv li lawm. Tom qab ntawd kuv yuav tsa koj cajces ua ib haivneeg uas muaj hwjchim thiab coob dua lawv.’ “Yog li ntawd, kuv thiaj nqa ob daim txiag zeb uas sau Vajtswv tej lus cog tseg nqis saum roob los, thaum ntawd nplaim taws cig liab ploog saum roob. Kuv pom nej tso tus TSWV uas yog nej tus Vajtswv tej lus uas nws qhia rau nej tseg sai kawg li, thiab nej ua txhaum rau tus TSWV, rau qhov nej muab kub nchuav ua ib tug mlom nyuj rau nej pe. Kuv thiaj muab ob daim txiag zeb ntawd ntsawm tawg mos nyoos tabmeeg nej. Kuv txawm rov txhos caug ntua, khoov ua ntsejmuag ti nkaus av, thiab thov tus TSWV tau plaub caug hnub plaub caug hmo, kuv tsis noj tsis haus ib yam dabtsi li. Kuv ua li no, twb yog vim nej ua txhaum rau tus TSWV thiab ua rau nws chim. Kuv ntshai tus TSWV txojkev chim, rau qhov nws chim heev; nws twb yuav ua kom nej puastsuaj, tiamsis tus TSWV tseem mloog kuv tej lus thov dua ib zaug thiab. Thaum ntawd tus TSWV chim rau Aloos heev, nws twb yuav luag muab Aloos tua povtseg, kuv thiaj thov tus TSWV zam txim rau Aloos. Kuv muab nej txojkev txhaum uas yog tus mlom nyuj uas nej nchuav pov rau hauv cubtawg, kuv muab tsoo ua hmoov nphoo rau hauv tus dej uas ntws saum roob los. “Thaum nej tseem nyob nram Tanpelas, Maxas thiab Kinpalaus Hatavas, nej tau ua rau tus TSWV uas yog nej tus Vajtswv chim heev. Thiab thaum uas tus TSWV txib nej tawm hauv Kades Npane-as mus tua lub tebchaws uas tus TSWV yuav muab rau nej, nej ntxeev siab rau nws; nej tsis cia siab thiab tsis mloog nws lus. Kuv paub nej txij thaum ntawd los, nej pheej ntxeev siab rau tus TSWV tsis tseg li. “Kuv khoov ti nkaus rau hauv av, thov tus TSWV tau plaub caug hnub plaub caug hmo, rau qhov tus TSWV twb ua ib siab lawm hais tias, nws yuav ua kom nej puastsuaj tas. Kuv thov tus TSWV hais tias, ‘Tus TSWV uas kav ib puas tsav yam, thov koj tsis txhob ua rau koj haivneeg puastsuaj, lawv yog haivneeg uas koj lub zog thiab lub hwjchim uas loj kawg nkaus cawm thiab coj nram tebchaws Iziv los. Thov koj nco ntsoov Anplahas, Ixaj thiab Yakhauj uas yog koj cov tubtxib, thov koj tsis txhob xav txog cov neeg no tej kev tawv ncauj, kev phem thiab kev txhaum. Nyob tsam cov Iziv yuav hais tias, koj coj tsis tau koj haivneeg mus nyob hauv lub tebchaws uas koj coglus tseg yuav muab rau lawv nyob. Cov Iziv yuav hais tias, koj ntxub koj haivneeg, koj thiaj coj lawv los tua rau ntawm tiaj suabpuam no xwb. Lawv cov no yeej yog cov uas koj tau xaiv tseg ua koj haivneeg, thiab twb yog koj lub hwjchim uas loj kawg nkaus coj lawv tawm nram tebchaws Iziv los.’ “Tom qab ntawd tus TSWV hais rau kuv hais tias, ‘Koj cia li txaug ob daim txiag zeb zoo ib yam li thawj ob daim, thiab ua ib lub Phijxab ntoo ntim ob daim txiag zeb ntawd. Thaum ua tau tiav lawm, koj cia li nqa tuaj cuag kuv saum roob, kuv yuav rov sau tej lus uas kuv twb xub sau rau ob daim txiag zeb uas koj muab ntsawm tawg tas lawm rau hauv ob daim txiag zeb ntawd. Koj mam li coj mus ntim cia rau hauv lub Phijxab ntoo.’ “Yog li ntawd, kuv thiaj muab ntoo kubtwm ua tau ib lub Phijxab thiab txaug tau ob daim txiag zeb zoo ib yam li ob daim qub, thiab nqa mus saum roob. Tus TSWV rov sau cov lus uas nws xub sau rau hauv thawj ob daim txiag zeb rau hauv ob daim tshiab ntawd. Tej lus ntawd yog Kaum Nqe Kevcai uas thaum nej mus ua ke ntawm lub roob thiab tus TSWV hais lus hauv cov nplaim taws tuaj rau nej. Tus TSWV muab ob daim txiag zeb ntawd rau kuv, kuv thiaj nqis saum roob los, thiab muab ob daim txiag zeb ntawd ntim rau hauv lub Phijxab uas kuv ua raws li tus TSWV hais rau kuv. Ob daim txiag zeb ntawm tseem nyob hauv lub Phijxab los txog nimno.” ( Cov Yixalayees tsiv tawm ntawm cov Ya-akas tej qhovtshij los nyob rau ntawm Mauxelas. Aloos tuag thiab lawv muab nws faus rau qhov ntawd, Aloos tus tub Ele-axas thiaj ua povthawj hloov Aloos chaw. Tom qab ntawd, lawv tsiv los txog rau ntawm Nkunkaudas, lawv mam li los nyob rau hauv Yaunpathas uas yog lub tebchaws muaj dej ntau heev. Thaum lawv tseem nyob ntawm taw roob, tus TSWV tau tsa xeem Levis ua cov kwv lub Phijxab uas ntim Vajtswv tej lus cog tseg uas yog Kaum Nqe Kevcai thiab tsa lawv ua cov povthawj uas ua tus TSWV tes haujlwm, thiab ua cov tuav tus TSWV lub npe foom koob hmoov rau sawvdaws. Lawv tseem ua li ntawd los txog niaj hnub no. Yog li ntawd, xeem Levis thiaj tsis muaj feem nrog lwm xeem tau av; tiamsis lawv tau ua tus TSWV tes haujlwm raws li tus TSWV uas yog nej tus Vajtswv tau coglus tseg lawm.) “Kuv nyob saum roob tau plaub caug hnub plaub caug hmo ib yam li thawj zaug. Tus TSWV mloog kuv tej lus thov dua ib zaug, nws thiaj tsis ua rau nej puastsuaj. Nws hais kom kuv cia li mus thiab coj nej mus, nej thiaj tau mus nyob hauv lub tebchaws uas nws tau coglus tseg hais tias yuav muab rau nej cov yawgkoob nyob. “Ib tsoom Yixalayees, nej cia li ua tib zoo mloog saib tus TSWV uas yog nej tus Vajtswv hais kom nej ua dabtsi: nws xav kom nej hwm thiab ua raws li nws tej lus txhua lo. Nws kom nej muab siab npuab thiab ua nws tes haujlwm kawg siab kawg ntsws, thiab coj raws li nws tej kevcai txhua nqe. Tej kevcai uas hnub no kuv muab cob rau nej yuav muaj nqis rau nej. Lub ntuj uas nyob saud yog tus TSWV tug; lub ntiajteb thiab ib puas tsav yam uas nyob hauv los puavleej yog tus TSWV tug huv tibsi. Tus TSWV hlub nej cov yawgkoob heev, nws thiaj xaiv nej los ua nws haivneeg uas tseemceeb dua lwm haivneeg huv tibsi, thiab nimno nej yog haivneeg uas tus TSWV xaiv lawm. Yog li ntawd, txij no mus nej yuav tsum mloog tus TSWV lus thiab tsis txhob tawv ncauj lawm. Tus TSWV uas yog nej tus Vajtswv yog tus loj dua tej vajtswv thiab ib puas tsav yam uas muaj hwjchim huv tibsi. Nws muaj hwjchim loj thiab tseemceeb kawg nkaus, sawvdaws yuav tsum hwm thiab paub ntshai nws. Nws tsis xaiv leejtwg ntsejmuag, thiab tsis yuav leejtwg tej nyiaj xiab. Nws tsomkwm cov menyuam ntsuag thiab tej pojntsuam tsis pub leejtwg ua phem rau lawv; nws hlub txhua haivneeg uas nrog peb nyob, nws pub lawv muaj ris tsho hnav thiab muaj zaub mov noj. Yog li ntawd, nej yuav tsum hlub lwm haivneeg, rau qhov yav tas los uas nej nyob nram tebchaws Iziv, luag hu nej ua neeg txawv tebchaws. Nej yuav tsum hwm tus TSWV uas yog nej tus Vajtswv thiab pehawm nws tib leeg xwb; nej yuav tsum muab siab npuab nws thiab tuav nws lub npe coglus xwb. Nej yuav tsum ua nws tsaug rau qhov nws yog nej tus Vajtswv, nej lub qhovmuag twb pom tej txujci tseemceeb uas nws ua pab nej lawm. Thaum ub nej cov yawgkoob mus nyob nram tebchaws Iziv, lawv tsuas muaj xya caum leej xwb. Tiamsis nimno tus TSWV uas yog nej tus Vajtswv pub rau nej huamvam coob ib yam li tej hnubqub saum nruab ntug lawm. “Nej yuav tsum hlub tus TSWV uas yog nej tus Vajtswv thiab niaj hnub ua raws li nws tej kevcai. Nej yuav tsum nco ntsoov tej uas tus TSWV qhuab ntuas nej. Twb yog nej lub qhovmuag pom tej txujci tseemceeb uas tus TSWV ua, tsis yog nej tej menyuam pom. Nej pom tus TSWV lub hwvxyeej, nws lub hwjchim uas loj kawg nkaus, nws lub zog loj zog nchav, thiab nws tej txujci tseemceeb. Nej pom tej uas tus TSWV rau txim rau Falaus uas yog cov Iziv tus vajntxwv thiab tagnrho nws lub tebchaws. Nej pom tus TSWV ua rau cov Iziv tej tubrog tuag tas rau hauv Hiavtxwv Liab, thaum lawv caum nej qab tuaj, tsis hais lawv cov nees, thiab lawv tej tsheb nees los puastsuaj tas huv tibsi. Nej paub hais tias, thaum nej tseem nyob ntawm tiaj suabpuam, ua ntej uas nej los nyob ntawm no, tus TSWV tau pab nej npaum li cas. Nyaj nej tseem nco tau tej uas tus TSWV rau txim rau Eli-as uas yog xeem Lunpees ob tug tub Dathas thiab Anpilas nkawd. Tus TSWV ua rau av qhib plho nqos kiag nkawd, nkawd pojniam menyuam, vajtse, tej tubqhe thiab tej tsiaj txhu huv tibsi tabmeeg nej. Nej lub qhovmuag twb pom tej txujci tseemceeb uas tus TSWV tau ua lawm. “Nej yuav tsum ua raws li tej lus uas hnub no kuv hais rau nej txhua lo huv tibsi, nej thiaj yuav tau hla dej mus tua lub tebchaws uas nej tabtom yuav mus nyob ntawd. Nej thiaj muaj sia nyob ntev hauv lub tebchaws uas av rog thiab zoo qoob uas tus TSWV tau coglus tseg yuav muab rau nej cov yawgkoob thiab lawv cov xeebntxwv. Lub tebchaws uas nej tabtom yuav mus nyob ntawd zoo tsis thooj li lub tebchaws Iziv uas nej nyob los lawm. Thaum nej nyob nram tebchaws Iziv, nej yuav tau khawb kwj tso dej los rau hauv nej tej liaj tej teb khwv kawg li, nej thiaj cog tau qoobloo, tiamsis lub tebchaws uas nej yuav mus nyob ntawd, muaj roob muaj hav, muaj dej muaj nag thiab av noo zaw. Tus TSWV uas yog nej tus Vajtswv, tu thiab saib lub tebchaws ntawd tas niaj tas xyoo. “Nej yuav tsum ua raws li tej lus uas hnub no kuv qhia rau nej lawm; hlub tus TSWV uas yog nej tus Vajtswv, thiab ua nws tes haujlwm kom kawg siab kawg ntsws. Yog nej ua li ntawd, nws yuav tso nag los rau nej lub tebchaws, tsis hais lub caij nplooj ntoos zeeg, thiab lub caij nplooj ntoos hlav, nej yuav muaj qoobloo, muaj cawv txiv hmab, muaj roj txiv ntoo thiab muaj tshav zaub rau nej tej tsiaj noj. Nej yuav muaj zaub mov noj txaus siab txaus ntsws. Nej tsis txhob cia leejtwg ntxias tau nej tso tus TSWV tseg mus pe luag tej vajtswv. Yog nej ua li ntawd, tus TSWV yuav chim rau nej. Nws yuav tsis tso nag los rau nej lub tebchaws, av yuav qhuav, qoobloo yuav tuaj tsis taus. Txawm yog lub tebchaws uas tus TSWV muab rau nej nyob ntawd ibtxwm zoo qoob los yuav tsis zoo lawm. Nej mus nyob tsis ntev, ces nej yuav tuag tas. “Nej yuav tsum nco ntsoov tej lus no cia rau nruab siab; muab pav rau ntawm nej cajnpab thiab dai rau ntawm nej hauvpliaj, nej thiaj yuav nco ntsoov. Nej yuav tsum muab piav qhia rau nej tej menyuam, thiab niaj hnub hais txog tej lus no, tsis hais thaum nej nyob hauv tsev thiab thaum nej taug kev, thaum nej so thiab thaum nej ua haujlwm. Nej cia li muab tej lus no sau rau ntawm nej tej ncej qhovrooj thiab ntawm tej roojvag. Nej thiab nej tej tubki thiaj yuav muaj sia ua neej nyob ntev rau hauv lub tebchaws uas tus TSWV uas yog nej tus Vajtswv tau coglus yuav muab rau nej cov yawgkoob. Yog tseem muaj lub ntuj lub teb, ces nej yuav nyob hauv lub tebchaws no mus ibtxhis. “Nej yuav tsum muab siab rau ua raws li tej lus uas kuv qhia rau nej: hlub tus TSWV uas yog nej tus Vajtswv, ua raws li nws tej lus txhua lo huv tibsi thiab muab siab npuab nws. Tus TSWV thiaj li ntiab txhua haivneeg khiav tawm ua ntej nej mus tua, nej yuav tau kav lwm haivneeg uas loj thiab muaj zog dua nej lub tebchaws. Txhua thaj av uas nej txhais taw mus tsuj puavleej yog nej tug. Nej tus ciamteb sab qabteb txij ntua ntawm tiaj suabpuam mus ti nkaus pem Roob Lenpanoos uas nyob sab qaumteb, thiab sab hnubtuaj txij ntua ntawm tus Dej Efalates mus ti nkaus ntawm Hiavtxwv Meditelanes uas nyob sab hnubpoob. Lub tebchaws ntawd txhua qhov uas nej mus, tus TSWV uas yog nej tus Vajtswv yuav ua kom cov neeg uas nyob hauv ntshai nej, raws li tus TSWV twb coglus tseg lawm, yuav tsis muaj leejtwg txwv tau nej li. “Hnub no kuv yuav cia nej xaiv saib nej yuav tej lus foom koob hmoov lossis yuav tej lus foom tsis zoo, yog nej ua raws li tus TSWV uas yog nej tus Vajtswv tej lus uas hnub no kuv qhia rau nej, nej yuav tau koob hmoov; tiamsis yog nej tsis ua raws li tej lus ntawd, nej tseem mus pe lwm haivneeg tej vajtswv uas nej tsis tau pe dua li, ces nej yuav raug foom tsis zoo. Thaum tus TSWV coj nej mus nyob hauv lub tebchaws uas nej tabtom yuav mus nyob ntawd, nej yuav tsum qhia tej lus foom koob hmoov saum lub Roob Nkelixees thiab qhia tej lus foom tsis zoo saum lub Roob Enpales. ( Ob lub roob no nyob ntawm tus Dej Yauladees sab hnubpoob hauv lub tebchaws Kana-as. Cov neeg ntawd nyob hauv lub tiaj nrag Yauladees sab hnubpoob, tsis deb ntawm tsob ntoo xeeb Maules uas nyob ze lub nroog Nkilenkas.) Nej tabtom yuav hla tus Dej Yauladees mus tua thiab nyob lub tebchaws uas tus TSWV uas yog nej tus Vajtswv yuav muab rau nej. Thaum nej mus tua yeej thiab nyob hauv lawm, nej yuav tsum ua raws li tej kevcai uas hnub no kuv qhia rau nej. “Tej no yog tej kevcai uas nej yuav tau coj mus tas nej simneej nyob hauv lub tebchaws uas tus TSWV uas yog nej cov yawgkoob tus Vajtswv muab rau nej. Nej yuav tsum ua raws li ntawd! Thaum nej mus nyob hauv lub tebchaws ntawd, nej yuav tsum muab lwm haivneeg tej chaw uas lawv teev lawv tej vajtswv saum tej roob siab, tej pov roob thiab hauv tej qab ntoos uas muaj nplooj ntxoov nyos rhuav kom puastsuaj tas huv tibsi. Cia li rhuav lawv tej thaj thiab tsoo lawv tej ncej zeb tseemceeb kom tawg tas huv tibsi. Hlawv lawv tej mlom Aselas kom kub hnyiab, thiab tsoo lawv tej mlom kom tawg ntsoog ntxaws. Lawv thiaj tsis tau chaw teev lawv tej vajtswv lawm. “Nej tsis txhob pehawm tus TSWV uas yog nej tus Vajtswv ib yam li cov neeg ntawd pe lawv tej vajtswv xwb. Tus TSWV xaiv ib thaj chaw hauv nej lub tebchaws los ua qhov chaw rau sawvdaws tuaj cuag nws thiab pehawm nws. Nej yuav tsum coj nej tej khoom tuaj fij rau ntawm qhov chaw ntawd, tsis hais nej tej khoom uas hlawv fij theej txhoj thiab lwm yam khoom fij, tej khoom fij sib raug zoo, tej ib feem kaum, tej khoom fij uas nej coglus rau tus TSWV, tej khoom fij uas nej txaus siab muab thiab thawj tug menyuam nyuj thiab menyuam yaj. Nyob hauv lub tebchaws ntawd, nej thiab nej tsevneeg yuav tau noj thiab haus txaus siab rau tej qoobloo uas tus TSWV foom koob hmoov rau nej khwv tau los, tabmeeg tus TSWV uas yog nej tus Vajtswv. “Thaum txog lub sijhawm ntawd, nej yuav tsis tau ua ywj siab ib yam li nej tau ua yav tas los. Txhij puag thaum ub los txog niaj hnub no, nej tsuas pehawm raws li nej lub siab nyiam xwb, rau qhov nej tseem tsis tau mus nyob hauv lub tebchaws uas tus TSWV uas yog nej tus Vajtswv muab rau nej, qhov ntawd nej yuav tau nyob kaj siab lug. Thaum nej hla dhau tus Dej Yauladees mus rau sab tid lawm, tus TSWV yuav muab lub tebchaws ntawd rau nej nyob ua nej tug. Nws yuav pab kom nej dim ntawm nej cov yeebncuab, thiab nej yuav tau nyob kaj siab lug. Tus TSWV yuav xaiv ib thaj chaw cia ua qhov chaw rau nej mus pehawm nws, thiab nej yuav tsum coj txhua yam uas kuv qhia rau nej lawm tuaj fij rau tus TSWV: nej tej khoom uas hlawv fij theej txhoj thiab lwm yam khoom fij, tej ib feem kaum, tej khoom fij sib raug zoo thiab tej khoom uas nej coglus fij tshwjxeeb rau tus TSWV. Nej, nej tej pojniam menyuam, nej tej tubqhe thiab cov Levis uas nrog nej nyob hauv nej tej nroog, cia li zoo siab tabmeeg tus TSWV; nej yuav tsum nco ntsoov hais tias cov Levis yuav tsis muaj av ua lawv tug. Nej tsis txhob coj nej tej khoom mus fij rau ntawm qhov chaw uas nej nyiam; nej yuav tsum coj nej tej khoom mus fij rau ntawm tib qhov chaw uas tus TSWV xaiv ntawm nej ib xeem li av, thiab nej mus hlawv khoom fij rau ntawm qhov chaw uas tus TSWV qhia rau nej lawm xwb. “Tiamsis tej tsiaj uas nej tua noj, nej nyob qhov twg, nej tua rau qhov ntawd los tau. Nej noj tau raws li tus TSWV pub rau nej muaj. Cov neeg uas huv thiab tsis huv los puavleej noj tau tej tsiaj ntawd, ib yam li nej noj tej nqaij kauv thiab nqaij muaslwj. Tiamsis nej tsis txhob noj tej tsiaj ntawd cov ntshav; nej yuav tsum muab hliv povtseg ib yam li hliv dej. Tsis pub nej nqa tej khoom uas nej muab fij rau tus TSWV lawm los noj hauv nej tej tsev, tsis hais tej ib feem kaum uas yog nej tej qoobloo, tej cawv txiv hmab, tej roj txiv ntoo lossis thawj tus menyuam nyuj thiab menyuam yaj, tej khoom uas nej coglus muab fij rau tus TSWV, tej khoom uas nej txaus siab muab fij lossis lwm yam khoom fij. Nej thiab nej tej pojniam menyuam, nej tej tubqhe thiab cov Levis uas nrog nej nyob hauv nej tej nroog, nej tsuas noj tau tej khoom fij no tabmeeg tus TSWV uas yog nej tus Vajtswv rau ntawm qhov chaw uas tus TSWV uas yog nej tus Vajtswv xaiv tseg ua qhov chaw pehawm nws xwb. Nej cia li txaus siab rau tej uas Vajtswv foom koob hmoov rau nej mus khwv tau los. Tiam twg uas nej tseem nyob hauv lub tebchaws ntawd, nej tsis txhob tso cov Levis tseg li. “Thaum tus TSWV uas yog nej tus Vajtswv pub nej tau lub tebchaws dav ntxiv, raws li nws twb coglus tseg rau nej lawm, nej yuav tua nej tej tsiaj noj thaum twg los tau raws li nej siab nyiam. Yog hais tias, qhov chaw uas nej mus pehawm tus TSWV nyob deb nej heev lawm, nej xav tua tej nyuj thiab tej yaj uas tus TSWV pub rau nej noj, nej cia li tua thiab noj tau hauv nej tej tsev raws li kuv qhia rau nej lawm. Nej txhua tus, tsis hais cov neeg huv thiab tsis huv los puavleej noj tau cov nqaij ntawd, ib yam li nej noj tej nqaij kauv thiab nqaij muaslwj. Tiamsis tsis txhob noj tej nqaij uas txheem ntshav, rau qhov ntshav yog txojsia, nej tsis txhob noj txojsia nrog cov nqaij. Nej tsis txhob muab ntshav ua zaub noj; tiamsis nej cia li muab hliv povtseg ib yam li hliv dej. Yog nej ua raws li kuv tej lus qhia no, tus TSWV yuav txaus siab rau nej, nej thiab nej tej xeebntxwv yuav noj qab nyob zoo. Cia li coj nej tej khoom fij thiab nej tej khoom pub uas nej coglus mus fij rau tus TSWV ntawm qhov chaw uas nej pehawm nws. Cia li coj nej tej khoom fij uas muab hlawv tagnrho, tej nqaij, thiab tej ntshav mus hlawv rau saum tus TSWV lub thaj. Thiab tej khoom fij uas nej noj tej nqaij, nej muab cov ntshav hliv rau saum lub thaj. Nej yuav tsum muab siab rau ua raws li tej lus uas kuv qhia rau nej, nej thiab nej tej xeebntxwv thiaj yuav noj qab nyob zoo mus ibtxhis, rau qhov nej ua raws li tus TSWV uas yog nej tus Vajtswv lub siab nyiam. “Tus TSWV uas yog nej tus Vajtswv yuav ua kom tej haivneeg uas nej tabtom yuav mus tua lawv thiab lawv lub tebchaws kom puastsuaj tas, nej yuav tau lub tebchaws ntawd nyob ua nej tug. Tom qab uas tus TSWV ua rau tej haivneeg ntawd puastsuaj tas lawm, nej nco ntsoov tsis txhob pe mlom li lawv, nyob tsam nej raug puastsuaj. Tsis txhob lam mus xauj, saib lawv pe lawv tej vajtswv li cas, ces nej txawm yuav pe nej tus Vajtswv li ntawd. Nej tsis txhob pehawm tus TSWV uas yog nej tus Vajtswv ib yam li lawv pe lawv tej vajtswv, rau qhov thaum lawv pe lawv tej vajtswv, lawv ua tej kev phem kev qias uas tus TSWV ntxub heev. Lawv muab lawv tej menyuam tua hlawv fij rau saum lawv tej thaj. “Nej yuav tsum ua txhua yam raws li tej lus uas kuv qhia rau nej lawm; nej tsis txhob ntxiv lossis rho ib los li. “Yog muaj ib tug cevlus lossis ib tug txawj txhais npau suav hais tias, yuav muaj tej txujci tseemceeb lossis tej xwmtxheej uas ua rau sawvdaws xav tsis thoob, coj nej mus pe lawv tej vajtswv uas nej tsis tau pe dua. Txawm yog tej uas nws hais ntawd muaj tseeb, los nej tsis txhob ntseeg tej lus uas nws hais ntawd li. Rau qhov tus TSWV uas yog nej tus Vajtswv siv nws sim nej siab, saib nej puas hlub tus TSWV kawg siab kawg ntsws tiag. Nej yuav tsum ua raws li tus TSWV tej lus thiab hwm nws; ua raws li nws tej kevcai thiab mloog nws lus; muab siab npuab thiab pehawm nws. Nej cia li muab tus uas txawj txhais npau suav lossis tus cevlus uas qhia kom nej ntxeev siab rau tus TSWV uas tso nej dim kev ua qhev nram tebchaws Iziv los tua povtseg. Tus ntawd yog neeg phem, nws ntxias kom nej muab txojkev uas tus TSWV qhia rau nej coj tso povtseg. Nej yuav tsum muab tus ntawd tua, nej thiaj dim txojkev phem no. “Txawm yog koj tus kwvtij uas koom niam koom txiv lossis koj tej tub tej ntxhais, koj tus pojniam uas koj hlub lossis koj tus phoojywg zoo, yaum koj twjywm hais tias, “Peb cia li mus pe lwm tus vajtswv uas koj thiab koj cov yawgkoob tsis tau pe dua li.” Lawv cov no ib tug yuav ntxias koj thiab yaum kom koj cia li mus nrog cov neeg uas nyob deb lossis nyob ze koj pe lawv tej vajtswv, los koj tsis txhob cia nws ntxias tau koj; tsis txhob mloog nws hais. Tsis txhob hmov tshua lossis hlub nws, thiab tsis txhob npog nws. Cia li muab nws tua! Koj yog thawj tug uas muab pobzeb ntaus nws, ces sawvdaws mam li ntaus tom qab. Cia li muab pobzeb ntaus kom nws tuag! Rau qhov nws txhob txwm coj nej tawm ntawm tus TSWV uas yog nej tus Vajtswv uas coj nej tawm nram tebchaws Iziv uas nej ua luag qhev los. Thaum cov Yixalayees hnov txog zaj no; lawv thiaj ntshai thiab tsis muaj leejtwg mus ua txojkev phem no lawm. “Thaum nej nyob hauv tej nroog uas tus TSWV uas yog nej tus Vajtswv muab rau nej, nej yuav hnov cov neeg phem hauv nej lub tebchaws qee leej tau coj nej cov neeg uas nyob hauv lawv tej nroog mus pe tej vajtswv uas nej tsis tau pe dua li. Yog nej hnov tej zaj tsis zoo li ntawd, nej yuav tsum maj nroos mus tshuaj saib puas muaj tseeb; yog muaj tus tau mus ua phem ua qias li ntawd tiag, ces cia li muab cov neeg hauv lub nroog thiab lawv tej tsiaj txhu tua kom tuag tas, thiab rhuav lawv lub nroog kom puastsuaj tas huv tibsi. Cia li mus sau cov neeg ntawd tej khoom los tso ua ib pawg rau ntawm tshavpuam hauv lub nroog, ces muab lub nroog thiab txhua yam hlawv ua khoom fij rau tus TSWV uas yog nej tus Vajtswv. Cia lub nroog ntawd piamsij mus ibtxhis tsis txhob tsim dua ntxiv lawm. Nej tsis txhob yuav tej khoom uas yuav muab hlawv fij rau tus TSWV ib yam li, tus TSWV thiaj yuav hlub nej thiab tsis chim rau nej. Nws yuav hlub nej thiab pub kom nej huamvam coob raws li nws tau coglus tseg rau nej cov yawgkoob lawm, yog nej ua raws li tus TSWV uas yog nej tus Vajtswv tej lus uas hnub no kuv qhia rau nej. “Nej yog tus TSWV uas yog nej tus Vajtswv haivneeg. Thaum nej mus nyiav tus tuag, nej tsis txhob hlais nej lub cev lossis chais nej cov plaubhau ntawm hauvpliaj ib yam li lwm haivneeg ua. Nej yog haivneeg tseemceeb rau tus TSWV uas yog nej tus Vajtswv; nws tau xaiv nej tawm ntawm ntau haivneeg hauv ntiajteb no los ua nws haivneeg. “Nej tsis txhob noj tej tsiaj uas tus TSWV hais tias, yog tsiaj tsis huv. Nej noj tau tej tsiaj no: nyuj, yaj, tshis, muaslwj, nyujkau, sai lossis kauv thiab txhua yam tsiaj uas rau taw ncau thiab zom zaub. Tiamsis tej tsiaj uas rau taw tsis ncau thiab tsis zom zaub, mas nej tsis txhob noj li. Nej tsis txhob noj ntxhuav, luav lossis zajnpuas. Cov tsiaj no yog tsiaj tsis huv; cov tsiaj no rau ncau, tiamsis tsis zom zaub. Nej tsis txhob noj nqaij npuas. Npua yog tsiaj tsis huv; npua rau taw ncau tiamsis tsis zom zaub. Nej tsis txhob noj cov tsiaj no lossis kov cov tsiaj ntawd lub cev tuag. “Nej noj tau tej ntses uas muaj xiab thiab muaj nplai, tiamsis tej tsiaj nyob hauv dej uas tsis muaj xiab thiab tsis muaj nplai, nej tsis txhob noj; cov ntawd yog tsiaj tsis huv. “Nej noj tau tej noog uas huv. “Txhua yam kab uas muaj tis uas tsis huv; nej tsis txhob noj. Tiamsis txhua yam kab muaj tis uas huv nej noj tau. “Nej tsis txhob noj tej tsiaj uas mob tuag, cia cov neeg txawv tebchaws uas nrog nej nyob noj xwb lossis muab muag rau cov neeg txawv tebchaws; rau qhov nej yog tus TSWV uas yog nej tus Vajtswv haivneeg; nej yog nws tug. “Nej tsis txhob muab tus menyuam yaj lossis tus menyuam tshis cov nqaij hau xyaw leej niam cov kua mis. “Nej yuav tsum tshwj ib feem kaum ntawm tej qoobloo uas nej ua thiab sau tau hauv ib lub xyoo, coj mus rau ntawm qhov chaw uas tus TSWV uas yog nej tus Vajtswv xaiv tseg cia ua qhov chaw pehawm nws; thiab nej noj tej ib feem kaum uas yog nplej, cawv txiv hmab, roj txiv ntoo, thawj tug menyuam nyuj thiab menyuam yaj, tabmeeg tus TSWV. Nej ua li no thiaj yog nej hwm tus TSWV uas yog nej tus Vajtswv mus ibtxhis li. Yog lub chaw uas pehawm tus TSWV nyob deb heev, nej coj tsis tau nej tej ib feem kaum ntawm nej tej qoobloo uas nej tus TSWV foom koob hmoov rau nej ua thiab sau tau los mus fij rau nws, ces nej ua li no: Nej muab tej qoobloo ib feem kaum ntawd muag thiab coj cov nyiaj mus fij rau tus TSWV ntawm qhov chaw pehawm tus TSWV. Nej muab cov nyiaj ntawd yuav nqaij nyuj, nqaij yaj, cawv txiv hmab, cawv ntxwg thiab lwm yam uas nej xav yuav. Ces nej thiab nej tsevneeg noj haus thiab zoo siab tabmeeg tus TSWV uas yog nej tus Vajtswv. “Nej tsis txhob tso cov Levis uas nrog nej nyob hauv tej nroog tseg; rau qhov lawv tsis muaj av ua lawv tug. Txhua peb lub xyoo twg, coj ib feem kaum ntawm tej qoobloo uas nej ua thiab sau tau los tso rau hauv nej tej nroog. Tej qoobloo ntawd yog muab rau cov Levis, rau qhov lawv tsis muaj av ua lawv tug, thiab muab rau cov neeg txawv tebchaws, cov menyuam ntsuag thiab cov pojntsuam uas nrog nej nyob hauv nej tej nroog. Kom lawv thiaj tau tej ntawd noj. Nej ua li no tus TSWV uas yog nej tus Vajtswv thiaj foom koob hmoov rau txhua yam uas nej ua. “Txhua xya lub xyoo twg, nej yuav tsum xuam tej nyiaj uas luag tshuav nej nqi. Tej uas nej yuav tau xuam yog li no: tej nyiaj uas nej qiv rau nej ib tug kwvtij Yixalayees yuav tsum xuam rau nws; nej tsis txhob tsib cov nyiaj ntawd rov qab; rau qhov tus TSWV kom nej xuam tej nujnqis ntawd. Nej tsib tau tej nyiaj uas nej qiv rau cov neeg txawv tebchaws, tiamsis nej tsis txhob tsib cov nyiaj uas nej cov kwvtij tshuav nej nqi. “Tus TSWV uas yog nej tus Vajtswv yuav foom koob hmoov rau nej thaum nej mus nyob hauv lub tebchaws uas nws coglus muab rau nej. Nws yuav tsis pub nej ib tug twg pluag li, yog nej hwm tus TSWV thiab ua raws li tej lus uas hnub no kuv qhia rau nej, tus TSWV yuav foom koob hmoov rau nej, raws li nws tau coglus tseg lawm. Nej yuav muaj nyiaj qiv rau ntau haivneeg, nej yuav tsis mus txais nyiaj ntawm ib haivneeg twg li; nej yuav kav ntau haivneeg, tiamsis yuav tsis muaj ib haivneeg twg kav nej. “Thaum nej mus nyob hauv lub tebchaws uas tus TSWV uas yog nej tus Vajtswv muab rau nej, yog nej cov kwvtij Yixalayees uas nyob hauv nej tej nroog ib tug twg txomnyem, nej tsis txhob ua neeg qia dub thiab tsis kam pab tus ntawd. Tiamsis, nej yuav tsum ua neeg siab dawb siab zoo thiab qiv nyiaj rau nws kom txaus li nws xav yuav. Txawm yog twb ze rau xyoo uas xuam nujnqis lawm los nej yuav tsum qiv rau nws. Nej tsis txhob muaj lub siab xav phem. Yog nej tsis kam qiv, nws yuav quaj thov tus TSWV foom tsis zoo rau nej, ces nej yuav raug txim. Nej yuav tsum zoo siab hlo muab rau nws ntawm lus siab dawb paug, tus TSWV thiaj yuav foom koob hmoov rau txhua yam uas nej ua. Nej muaj cov kwvtij Yixalayees txomnyem uas nrog nej nyob, yog li ntawd kuv hais rau nej hais tias, nej yuav tsum ua siab dawb siab zoo rau lawv. “Yog cov Yixalayees muaj ib tug twg, tsis hais pojniam lossis txivneej, muab nws muag rau nej ua nej tus qhev, thaum uas nws ua haujlwm rau nej puv rau lub xyoos lawm, xyoo xya, nej yuav tsum tso nws mus. Thaum nej tso nws mus, tsis txhob cia nws mus tes dawb tes npliag. Nej yuav tsum ua siab dawb siab zoo, muab tej uas tus TSWV foom koob hmoov rau nej muaj uas yog: yaj, nplej thiab cawv txiv hmab pub rau nws coj mus. Nco ntsoov hais tias, thaum nej nyob nram tebchaws Iziv, nej ua luag qhev, tus TSWV uas yog nej tus Vajtswv tau tso nej dim; twb yog vim li ntawd, hnub no kuv thiaj qhia tej no rau nej. “Tiamsis yog hais tias nej tus qhev tsis kam mus; vim nws ncawg nej tsevneeg thiab nws yuav thov nrog nej nyob, nej coj nws mus rau ntawm qhovrooj thiab muab nws pobntseg tho; ces nws yuav ua nej qhev mus tas nws simneej. Nej ua ib yam li ntawd rau nej tus ntxhais qhev thiab. Tsis txhob nyuaj siab thaum uas nej yuav tso ib tug qhev tawm mus, rau qhov nws ua haujlwm rau nej rau lub xyoos, nws tsuas tau nqi zog npaum li ib nrab ntawm tus uas nej ntiav ua haujlwm xwb. Nej yuav tsum ua li no, tus TSWV uas yog nej tus Vajtswv thiaj foom koob hmoov rau tej uas nej ua. “Nej yuav tsum tau xaiv thawj tug menyuam nyuj thiaj menyuam yaj uas yog tus txiv tshwj rau ib cag cia fij rau tus TSWV uas yog nej tus Vajtswv; tsis txhob siv cov menyuam nyuj ntawd ua haujlwm, thiab tsis txhob muab cov menyuam yaj ntawd txiav plaub. Txhua xyoo nej thiab nej tej pojniam menyuam yuav tsum noj tej nqaij ntawd tabmeeg tus TSWV ntawm qhov chaw uas nej pehawm nws. Tiamsis yog hais tias, tej tsiaj ntawd, cegtawv, digmuag lossis muaj mob, nej tsis txhob muab tus tsiaj ntawd mus fij rau tus TSWV uas yog nej tus Vajtswv. Nej tua cov tsiaj ntawd noj tau hauv nej tej tsev, tsis hais cov neeg huv thiab tsis huv, puavleej noj tau ib yam li noj tej nqaij kauv lossis nqaij muaslwj. Tiamsis nej yuav tsum tsis txhob noj cov ntshav; nej yuav tsum muab hliv povtseg ib yam li hliv dej. “Nej yuav tsum ua Kevcai Hla Dhau rau thaum lub hlis Anpis, qhuas tus TSWV uas yog nej tus Vajtswv; rau qhov lub hli ntawd, muaj ib hmos yog hmo uas tus TSWV coj nej tawm nram tebchaws Iziv los. Nej cia li coj ib tug nyuj lossis ib tug yaj mus rau ntawm qhov chaw pehawm tus TSWV, thiab muab tua ua Kevcai Hla Dhau qhuas tus TSWV uas yog nej tus Vajtswv. Thaum nej noj cov nqaij ntawd, nej tsis txhob noj cov ncuav uas xyaw keeb. Xya hnub ntawd nej yuav tsum noj cov ncuav uas tsis xyaw keeb ib yam li thaum nej khiav tawm nram tebchaws Iziv los, nej maj heev, nej noj tej ncuav uas tsis xyaw keeb; cov ncuav ntawd hu ua ncuav txomnyem siab, nej ua li no nej thiaj yuav nco ntsoov hnub uas nej tawm nram tebchaws Iziv qhov chaw uas nej raug kev txomnyem. Xya hnub ntawd, tsis pub ib tug twg uas nyob hauv nej lub tebchaws muaj tej keeb ncuav nyob hauv tsev li; tus tsiaj uas nej tua thawj hmo, nej yuav tsum noj kom tas dulug rau hmo ntawd. Nej hau cov nqaij ntawd noj rau ntawm qhov chaw uas nej pehawm tus TSWV; thiab hnub tom qab sawv ntxov nej mam li rov mus tsev. Rau qhov rau hnub tom ntej nej yuav noj ncuav tsis xyaw keeb, thiab hnub xya nej yuav tsum tuaj ua ke pehawm tus TSWV uas yog nej tus Vajtswv thiab hnub ntawd nej tsis txhob ua haujlwm. “Nej suav xya lub limtiam, txij hnub uas nej pib sau qoobloo mus, nej mam li ua Kevcai Sau Qoobloo qhuas tus TSWV uas yog nej tus Vajtswv, thiab coj tej khoom fij uas nej txaus siab muab rau tus TSWV raws li nws tau foom koob hmoov rau nej mus fij rau nws. Nej thiab nej tej pojniam menyuam, nej cov tubtxib, cov Levis, cov neeg txawv tebchaws, cov menyuam ntsuag thiab cov pojntsuam uas nyob hauv nej tej nroog, nej cia li zoo siab thiab ua li no tabmeeg tus TSWV ntawm qhov chaw uas nej pehawm nws. Nej yuav tsum nco ntsoov ua raws li tej lus qhia no; thiab nco ntsoov qhov uas nej ua luag qhev nram tebchaws Iziv. “Tom qab uas nej ntaus nplej thiab tso kua txiv hmab tas lawm, nej cia li ua Kevcai nyob Tsev Pheebsuab xya hnub. Nej thiab nej tej pojniam menyuam, tej tubtxib, cov Levis, cov neeg txawv tebchaws, cov menyuam ntsuag thiab cov pojntsuam uas nrog nej nyob hauv nej tej nroog cia li zoo siab. Nej ua kevcai nyob tsev pheebsuab xya hnub qhuas tus TSWV uas yog nej tus Vajtswv, ntawm qhov chaw uas nej pehawm nws; nej cia li zoo siab rau qhov tus TSWV foom koob hmoov rau nej tej qoobloo thiab tej haujlwm uas nej ua. “Nej haivneeg txhua tus txivneej yuav tsum tuaj pehawm tus TSWV ntawm qhov chaw uas nws xaiv cia ib xyoos peb zaug: ua Kevcai Hla Dhau, ua Kevcai Sau Qoobloo thiab ua Kevcai nyob Tsev Pheebsuab. Txhua tus tsis txhob tuaj tes dawb tes npliag, nyias yuav tsum nqa nyias ib yam khoom tuaj fij rau tus TSWV, raws li tus TSWV uas yog nej tus Vajtswv tau foom koob hmoov rau nej lawm. “Nej yuav tsum tsa ib pab neeg ua cov txiav txim thiab tsa ib co nomtswv ua cov tswjhwm nyob rau hauv txhua lub nroog uas tus TSWV uas yog nej tus Vajtswv muab rau nej lawm. Cov uas nej tsa ntawd yuav txiav txim ncaj ncees rau nej haivneeg. Lawv yuav tsum coj txojkev ncaj ncees tsis txhob tso tseg, tsis txhob txiav txim tsis ncaj, thiab tsis txhob yuav luag tej nyiaj xiab, rau qhov tej nyiaj xiab ntawd yuav ua rau cov neeg ncaj thiab txawj ntse qhovmuag fam txiav txim tsis ncaj. Nej yuav tsum ua ncaj thiab ua zoo nyob hauv lub tebchaws uas tus TSWV uas yog nej tus Vajtswv yuav muab rau nej, nej thiaj yuav muaj sia ua neej nyob ntev rau hauv lub tebchaws ntawd. “Thaum nej ua ib lub thaj rau tus TSWV uas yog nej tus Vajtswv, nej tsis txhob txhos tus mlom ntoo Aselas rau ntawm lub thaj ib sab; thiab nej tsis txhob txhos ncej zeb ua mlom rau nej pe; rau qhov tus TSWV ntxub tej mlom ntawd. “Nej tsis txhob coj tus nyuj lossis tus yaj uas digmuag lossis cegtawv tuaj fij rau tus TSWV uas yog nej tus Vajtswv; tus TSWV ntxub qhov uas nej ua li no. “Yog hais tias hauv nej tej nroog muaj ib tug pojniam lossis ib tug txivneej ua txhaum rau tus TSWV thiab rhuav nws tej lus cog tseg, mus pe lwm tus vajtswv, pe lub hnub, lub hli lossis pe tej hnubqub uas tus TSWV txwv tsis pub pe. Yog muaj neeg qhia tej ntawd rau nej, nej yuav tsum ua tib zoo tshuaj saib, yog muaj tus ua phem li ntawd, nyob rau hauv cov Yixalayees tiag, nej cia li coj tus neeg ntawd mus rau sab nraum ntug nroog thiab muab pobzeb ntaus nws kom tuag. Yog muaj ob lossis peb leeg ua timkhawv hais tias, tus ntawd ua txhaum, nej thiaj muaj cai muab nws tua; yog muaj ib leeg ua timkhawv xwb, nej tsis txhob muab nws tua. Cov uas ua timkhawv yuav tsum xub muab pobzeb ntaus tus uas ua txhaum, sawvdaws mam li muab pobzeb ntaus tom qab; nej yuav tsum ua li ntawd thiaj tshem tau txojkev phem hauv nej mus. “Yog hais tias nyob hauv nej lub nroog, muaj tej rooj plaub nyuaj uas nej tsis pom qab txiav txim uas yog plaub sib txeeb teb, plaub sib ntaus nqaij ntuag ntshav nrog lossis plaub tua neeg. Thaum muaj li ntawd nej cia li coj mus rau ntawm qhov chaw uas tus TSWV uas yog nej tus Vajtswv tau xaiv cia ua lub chaw pehawm nws, nej cia li peev lus rau cov povthawj thiab cov txiav txim uas yog cov tu plaub mloog, lawv yuav taug thiab tu rooj plaub ntawd. Lawv yog cov uas yuav txiav txim siab, nej yuav tsum ua raws li lawv kom nej ua. Nej cia li yuav raws li lawv tu thiab ua raws li lawv hais rau nej txhua yam huv tibsi. Yog leejtwg tsis mloog tus povthawj lossis tus tu plaub lub sijhawm ntawd hais, cia li muab tus ntawd tua; nej ua li no thiaj tshem tau txojkev phem tawm hauv cov Yixalayees mus. Thaum sawvdaws hnov zaj no, lawv yuav ntshai thiab tsis ua phem li ntawd lawm. “Thaum nej mus nyob hauv lub tebchaws uas tus TSWV uas yog nej tus Vajtswv muab rau nej, nej yuav hais tias, ‘Peb yuav tsa kom muaj vajntxwv los kav peb ib yam li luag lwm haivneeg uas nyob puagncig peb.’ Nej cia li tsa tus uas tus TSWV uas yog nej tus Vajtswv xaiv cia ua vajntxwv kav nej. Yog tsa nej cov kwvtij ib tug ua vajntxwv; tsis yog tsa lwm haivneeg. Tus vajntxwv tsis txhob muaj nees coob dhau rau nws cov tubrog, thiab tsis txhob txib nws cov neeg mus yuav nees nram tebchaws Iziv, rau qhov tus TSWV txwv tsis pub nej rov mus nram tebchaws Iziv li lawm. Tus vajntxwv tsis txhob yuav ntau tus pojniam, nyob tsam nws tso tus TSWV tseg; thiab nws tsis txhob ua kom nws npluanuj, muaj nyiaj muaj kub ntau dhau. Thaum nws ua vajntxwv kav lub tebchaws, nws kom neeg mus muab phau ntawv uas sau Vajtswv tej lus thiab tej kevcai ntawm cov Levis uas ua povthawj los theej dua ib phau raws nraim li thawj phau rau nws. Nws yuav tsum khaws phau ntawv no thiab niaj hnub nyeem mus tas nws simneej, nws thiaj li paub hwm tus TSWV thiab ua raws li txhua yam uas qhia tseg rau hauv phau ntawv ntawd. Yog nws ua li ntawd, nws yuav tsis khav hais tias nws yog tus zoo tshaj nws cov kwvtij Yixalayees, thiab nws thiaj tsis tso tus TSWV txoj kevcai tseg. Nws yuav tau ua vajntxwv kav ntev, thiab nws cajces thiaj yuav tau ua vajntxwv kav cov Yixalayees mus ntau tiam. “Cov Levis uas ua povthawj thiab tagnrho xeem Levis tsis muaj feem nrog cov Yixalayees faib av; lawv tsuas tau noj tej uas luag coj tuaj fij thiab tej uas luag zoo siab coj tuaj pub rau tus TSWV xwb. Lawv tsis nrog lawv cov kwvtij muaj liaj muaj teb los ua lawv tug; lawv feem yog ua tus TSWV cov povthawj raws li tus TSWV coglus tseg lawm. “Thaum luag coj nyuj lossis yaj tuaj tua fij, mas ib ceg tes, lub puabtsaig thiab lub plab yog cov povthawj feem. Thaum cov Yixalayees muab thawj phaum qoob ibtxhia uas yog nplej, cawv txiv hmab, roj txiv ntoo thiab cov plaub yaj uas lawv txiav thawj zaug coj tuaj fij, tej ntawd yog cov Levis tug. Tus TSWV xaiv xeem Levis tawm ntawm nej txhua xeem los ua cov povthawj ua nws tes haujlwm mus ibtxhis li. “Yog cov Levis uas nyob hauv nej tej nroog xav mus rau lwm lub nroog uas muaj chaw pehawm tus TSWV los nws yeej mus tau, nws yuav mus ua povthawj ua haujlwm rau tus TSWV uas yog nws tus Vajtswv, ib yam li nws cov kwvtij Levis uas tabtom ua rau tus TSWV ntawd. Nws muaj feem tau noj sib npaug zos ib yam li lwm tus povthawj, tsis xam tej uas nws cov kwvtij coj tuaj rau nws. “Thaum nej mus nyob hauv lub tebchaws uas tus TSWV uas yog nej tus Vajtswv muab rau nej, nej tsis txhob mus xyaum coj thiab ua tej kev phem kev qias li cov neeg uas nyob hauv lub tebchaws ntawd ua. Nej tsis txhob muab nej tej menyuam tua hlawv fij, tsis txhob saib yaig, tsis txhob xam hnubnyoog, tsis txhob khov kuam, tsis txhob ua khawvkoob thiab tsis txhob mus cuag txivneeb txivyaig. Tus TSWV uas yog nej tus Vajtswv ntxub cov neeg uas ua tej kev phem kev qias li ntawd, twb yog li ntawd, nws thiaj muab cov neeg uas nyob hauv lub tebchaws ntawd ntiab tawm ua ntej nej mus nyob. Nej yuav tsum muab siab npuab tus TSWV uas yog nej tus Vajtswv kom kawg siab kawg ntsws.” Mauxes hais rau lawv hais tias, “Cov neeg uas nyob hauv lub tebchaws uas nej tabtom yuav mus tua thiab nyob ntawd, lawv saib yaig thiab xam hnubnyoog, tiamsis tus TSWV uas yog nej tus Vajtswv tsis pub nej ua li lawv ua. Tus TSWV yuav xaiv ib tug hauv nej haivneeg los ua tus cevlus ib yam li kuv, nej yuav tsum mloog nws lus. “Hnub uas nej mus rau ntawm Roob Xinais, nej thov kom tus TSWV tsis txhob hais lus rau nej thiab tsis txhob pub nej pom tej nplaim taws uas tus TSWV nyob hauv ntxiv lawm, rau qhov nej ntshai nyob tsam nej tuag. Tus TSWV hais rau kuv hais tias, ‘Yeej yog li lawv tej lus thov. Kuv yuav xaiv lawv haivneeg ib tug los ua tus cevlus ib yam li koj; kuv yuav qhia kom tus cevlus ntawd piav kuv tej lus txhua lo rau sawvdaws. Tus cevlus tuav kuv lub npe qhia rau sawvdaws, yog leejtwg tsis ua raws li tej lus uas nws hais, ces kuv yuav rau txim rau tus ntawd. Tiamsis yog ib tug cevlus twg lam tuav kuv lub npe qhia ib yam dabtsi uas kuv tsis tau kom nws hais, thiab tus cevlus uas lam tuav lwm tus vajtswv lub npe qhia yuav tuag.’ “Nej yuav paub hais tias tej lus uas tus cevlus hais tsis yog tus TSWV tej lus. Yog tus cevlus uas tuav tus TSWV lub npe hais tias yuav muaj ib yam dabtsi tshwm los, tiamsis tsis muaj dabtsi tshwm raws li nws hais ntawd, tej lus ntawd tsis yog tus TSWV lus. Tus cevlus ntawd nws hais nws xwb, nej tsis txhob ntshai nws. “Thaum tus TSWV uas yog nej tus Vajtswv muab cov neeg uas nyob hauv lub tebchaws uas nws yuav muab rau nej ua kom puastsuaj, thiab thaum nej mus nyob hauv lawv tej nroog thiab lawv tej tsev, Yog ib tug twg tua yuam kev raug lwm tus tuag uas tsis yog nws tus yeebncuab, nws khiav mus cawm siav hauv cov nroog ntawd ib lub, kom luag tsis txhob muab nws tua. Yog hais tias muaj ob tug neeg ua ke mus txiav ntoo hauv havzoov, thaum ib tug tabtom ntov ntoo, nws rab taus hle mus raug ib tug tuag lawm, nws cia li khiav mus cawm siav hauv cov nroog ntawd ib lub, kom luag tsis txhob muab nws tua. Yog muaj ib lub nroog cawm siav xwb, nyob tsam txojkev mus rau lub nroog ntawd deb heev, yog hais tias tus tuag cov kwvtij chim, lawv yuav raws qab mus ntes tau nws, ces lawv yuav cia li muab tus uas tsis muaj txim ntawd tua. Qhov uas tus ntawd tuag yog nws yuam kev xwb, tsis yog txhob txwm tua, rau qhov nkawd tsis yog yeebncuab. Yog li ntawd, kuv thiaj kom nej tshwj peb lub nroog cawm siav tseg. “Thaum tus TSWV uas yog nej tus Vajtswv pub kom nej tau lub tebchaws dav zuj zus ntxiv raws li nws coglus rau nej cov yawgkoob lawm hais tias, nws yuav muab rau nej, nej rov xaiv dua peb lub nroog cia ua nroog cawm siav. (Yog nej ua raws li tej lus uas hnub no kuv qhia rau nej, hlub tus TSWV uas yog nej tus Vajtswv, thiab ua raws li nws tej kevcai txhua nqe, nws yuav muab tagnrho lub tebchaws rau nej.) Nej yuav tsum ua li no, tus neeg uas tsis muaj txim thiaj tsis raug tua tuag, rau hauv lub tebchaws uas tus TSWV muab rau nej, nej thiaj tsis tau ris nws lub txim. “Tiamsis yog leejtwg mus tos kev muab nws tus yeebncuab tua tuag, ces txawm yog nws khiav mus nkaum rau hauv cov nroog cawm siav ntawd lub twg los xij, cov kev txwjlaug uas nyob hauv lub nroog ntawd, yuav tso neeg mus ntes nws rov los cob rau tus tuag cov kwvtij, lawv yuav muab nws tua povtseg pauj qhov uas nws tua neeg. Nej tsis txhob hlub nws. Cia li muab nws tshem tawm hauv cov Yixalayees mus, nej thiaj tau nyob kaj siab lug. “Thaum nej mus nyob hauv lub tebchaws uas tus TSWV uas yog nej tus Vajtswv yuav muab rau nej, nej tsis txhob nam nej cov kwvtij tus ciamteb uas tej laus tu tseg. “Yog ib tug ua timkhawv ntxo lwm tus uas ua txhaum xwb tsis txaus; yuav tsum yog muaj ob lossis peb leeg ua timkhawv thiaj li ntseeg tau. Yog muaj leejtwg ua timkhawv cuav ntxo ib tug twg hais tias, tus ntawd tau ua txhaum, kom nkawd mus rau ntawm lub chaw pehawm tus TSWV, cia cov povthawj thiab cov txiav txim tu plaub rau nkawd. Cov txiav txim yuav tsum ua tib zoo taug rooj plaub ntawd; yog tus ntawd lam ua timkhawv cuav ntxo nws tus kwvtij Yixalayees xwb, nej yuav tsum tau rau txim rau tus uas ua timkhawv cuav ntawd ib yam li lub txim uas nws ntxo lwm tus. Nej ua li ntawd, nej thiaj tshem tau tej kev phem kev qias no mus. Thaum uas txhua tus hnov, lawv thiaj yuav ntshai thiab tsis ua txhaum li ntawd ntxiv lawm. Nej tsis txhob hlub nws li; yuav tsum cia siav pauj siav, qhovmuag pauj qhovmuag, hniav pauj hniav, tes pauj tes thiab taw pauj taw. “Thaum nej mus tua nej cov yeebncuab, yog nej pom lawv muaj tsheb nees, nees thiab tubrog coob tshaj nej los nej tsis txhob ntshai lawv. Tus TSWV uas yog nej tus Vajtswv, tus uas cawm nej dim nram tebchaws Iziv los yuav nrog nraim nej. Ua ntej nej yuav mus ntaus rog, ib tug povthawj yuav tuaj hais rau cov tubrog hais tias, ‘Ib tsoom tubrog Yixalayees, nej mloog kuv hais! Hnub no nej yuav sawv kev mus tua rog. Tiamsis nej tsis txhob ntshai nej cov yeebncuab, tsis txhob ntaus siab yau lossis txhawj. Tus TSWV uas yog nej tus Vajtswv yuav nrog nej mus thiab pab kom nej tua yeej.’ “Ces cov nomtswv yuav hais rau nej hais tias, ‘Puas muaj leejtwg ua tau tsev, tiamsis tsis tau muab fij rau tus TSWV? Yog muaj, nws cia li rov mus tsev. Nyob tsam nws mus raug tua tuag rau hauv tshavrog, ces lwm tus yuav tau muab nws lub tsev fij rau tus TSWV. Puas muaj leejtwg nyuam qhuav mus cog tau txiv hmab, tiamsis tsis tau mus de? Yog muaj, nws cia li rov mus tsev. Nyob tsam nws mus raug tua tuag rau hauv tshavrog, ces lwm tus yuav zoo siab uas tau noj nws tej txiv hmab ntawd. Puas muaj leejtwg qhaib tau ib tug hluas nkauj, tiamsis tsis tau yuav? Yog muaj, nws cia li rov mus tsev. Nyob tsam nws mus raug tua tuag rau hauv tshavrog, ces lwm tus yuav tau yuav tus hluas nkauj ntawd.’ “Cov nomtswv rov hais rau cov tubrog hais tias, ‘Puas muaj leejtwg ntshai ua rau nws ibce tuag tas? Yog muaj, nws cia li rov mus tsev. Nyob tsam nws ua rau lwm tus tubrog qaug zog.’ Tom qab uas cov nomtswv tuaj hais rau cov tubrog tas lawm, lawv mam xaiv cov thawjcoj uas saib tej pab tubrog ntawd. “Thaum nej mus tua nej cov yeebncuab tej nroog, nej yuav tsum cia sijhawm rau cov neeg hauv lub nroog tsa tes thov nej. Yog lawv qhib roojvag thiab tsa tes thov nej, lawv yuav tau ua nej qhev thiab ua haujlwm rau nej. Tiamsis yog lawv tsis tsa tes thov nej, lawv yuav nrog nej sib tua, nej cov tubrog cia li vij lawv lub nroog. Thaum tus TSWV uas yog nej tus Vajtswv, cia nej txeeb tau lawv lub nroog lawm, nej cia li muab txhua tus txivneej uas nyob hauv lub nroog ntawd tua huv tibsi. Txawm li ntawd los pub nej coj lawv tej pojniam menyuam, tej tsiaj txhu thiab tej khoom uas nyob hauv lub nroog los. Nej siv tau txhua yam uas yog nej cov yeebncuab li. Tej ntawd yog tus TSWV uas yog nej tus Vajtswv muab rau nej. Nej yuav tsum ua li ntawd rau cov nroog uas nyob deb lub tebchaws uas nej tabtom yuav mus nyob ntawd. “Thaum nej mus txeeb tau tej nroog hauv lub tebchaws uas tus TSWV uas yog nej tus Vajtswv muab rau nej, nej yuav tsum muab cov neeg uas nyob hauv tua huv tibsi. Nej yuav tsum tua cov Hitis, cov Amaules, cov Kana-as, cov Pelixes, cov Hivis thiab cov Yenpus kom tuag tas raws li tus TSWV hais rau nej lawm. Nej ua li ntawd lawv thiaj tsis coj nej mus pe lawv tej vajtswv, kom nej ua txhaum tawmtsam tus TSWV. “Thaum nej mus tua ib lub nroog twg, txawm yog yuav siv sijhawm mus vij ntev los nej tsis txhob ntov tej txiv hmab txiv ntoo povtseg. Nej noj tej txiv, tiamsis nej tsis txhob muab tsob ntoo ntov; rau qhov tsob ntoo tsis yog nej cov yeebncuab. Nej ntov tau lwm yam ntoo los thaiv ua chaw tiv sib tua mus txog thaum nej txeeb tau lub nroog. “Yog nej pom ib tug neeg tuag rau tom tej tiaj nrag hauv nej lub tebchaws uas tus TSWV uas yog nej tus Vajtswv muab rau nej, tiamsis tsis paub hais tias leejtwg tua. Nej cov thawjcoj thiab cov txiav txim yuav tau mus ntsuas saib thaj chaw uas tus tuag nyob ze lub nroog twg tshaj. Ces cov thawjcoj uas nyob hauv lub nroog uas ze tus tuag tshaj, yuav tsum xaiv ib tus xyuas nyuj uas tsis tau thauj dua nra thiab tsis tau laij dua teb li; kom lawv cab tus nyuj ntawd mus rau ntawm ib lub hav uas muaj dej tsis nqhuab li, thiab yog ib thaj chaw uas tsis tau muaj leejtwg khawb cog ib yam qoob dabtsi li, ces lawv muab tus nyuj lov cajdab rau qhov ntawd. Cov povthawj yuav tsum mus rau ntawm thaj chaw ntawd, rau qhov tus TSWV uas yog nej tus Vajtswv xaiv lawv los ua nws tes haujlwm ntawd, thiab tuav tus TSWV lub npe foom koob hmoov. Lawv yog cov uas txiav txim siab rau tej plaub ntug uas tuag li ntawd kom tas. Ces cov thawjcoj uas nyob hauv lub nroog uas ze rau tus tuag ntawd, lawv yuav ntxuav tes rau saum tus nyuj thiab hais tias, ‘Peb tsis tau tua tus neeg no, thiab peb tsis paub hais tias yog leejtwg tua. Tus TSWV, thov koj zam txim rau koj haivneeg Yixalayees uas koj tau cawm lawv dim nram tebchaws Iziv los; thiab thov tsis txhob pub tus neeg uas tsis muaj txim no cov ntshav los raug koj haivneeg Yixalayees.’ Yog nej ua raws li tej lus uas tus TSWV kom nej ua, nej thiaj yuav tsis tau ris tus uas tua tus neeg ntawd lub txim. “Thaum tus TSWV uas yog nej tus Vajtswv pub nej tua yeej nej cov yeebncuab lawm, yog nej ntes tau tej neeg los, cov neeg uas nej ntes tau los ntawd, yog muaj ib tug hluas nkauj zoo nkauj uas nej nyiam thiab xav yuav ua pojniam. Nej cia li coj tus hluas nkauj ntawd mus hauv nej tsev, kom nws chais nws cov plaubhau, txiav nws cov rau tes, thiab hloov khaubncaws. Cia nws nyob hauv tsev quaj ntsuag nws niam thiab nws txiv ib lub hlis; koj mam li yuav nws ua pojniam. Tom qab ntawd, yog koj tsis xav yuav nws lawm, koj yuav tsum tso nws mus dawb mus do. Tsis txhob muab nws muag lossis saib nws zoo li tus ntxhais qhev, rau qhov koj tsis yuav nws lawm. “Yog hais tias, ib tug txivneej muaj ob tug pojniam, thiab ob tug pojniam ntawd puavleej yug tau tub rau nws, tiamsis tug tub hlob tsis yog tus pojniam uas nws nyiam dua yug. Thaum leej txiv faib nws tej qubtxeeg qubteg rau nws cov tub, nws tsis txhob muab tus tub hlob ntawd feem rau tus tub uas yog tus pojniam uas nws nyiam dua yug yuav. Tiamsis leej txiv yuav tsum muab nws tej qubtxeeg qubteg faib ob npaug rau tus tub hlob, txawm yog tus tub ntawd tsis yog tus pojniam uas nws nyiam dua yug los xij. Leej txiv yuav tsum tau lees paub nws tus tub hlob thiab faib nws tug rau nws raws li txoj cai uas nws yog tus tub hlob. “Yog leejtwg muaj ib tug tub uas tawv ncauj, ntxeev siab thiab tsis hwm niamtxiv, txawm yog nws niam thiab nws txiv qhuab ntuas nws los nws tsis mloog li. Nws niam thiab nws txiv cia li coj nws mus cuag cov thawjcoj hauv lawv lub nroog, thiab kom nws mus sawv ntawm qhov chaw txiav txim; ces nkawd hais rau cov thawjcoj hais tias, ‘Wb tus tub no tawv ncauj, ntxeev siab thiab tsis mloog wb tej lus qhuab ntuas li; nws muab tej nyiaj coj mus siv ua phuam lam tas, thiab ua neeg quav cawv.’ Ces cov txivneej hauv lub nroog ntawd cia li muab pobzeb ntaus tus tub ntawd kom tuag, nej thiaj tshem tau txojkev phem kev qhia ntawd mus. Cov Yixalayees txhua tus uas hnov zaj no yuav ntshai heev. “Yog muaj ib tug txivneej twg ua txhaum loj, nws raug muab dai cajdab tuag, tsis txhob cia dai ib hmos rau ntawd. Nej yuav tsum muab nws lub cev txo mus faus hnub ntawd, rau qhov lub cev tuag uas dai li ntawd, yuav ua rau Vajtswv foom tsis zoo rau nej lub tebchaws. Nej cia li muab tus tuag lub cev faus, thiaj tsis ua rau lub tebchaws uas tus TSWV uas yog nej tus Vajtswv muab rau nej tsis huv. “Yog nej pom nej ib tug kwvtij Yixalayees twg tus nyuj lossis tus yajyuam kev tuaj rau ntawm nej, nej tsis txhob ua tus tsis pom; nej cia li coj tus tsiaj ntawd mus rau tus tswv. Yog hais tias tus tswv nyob deb lossis nej tsis paub hais tias tus tswv yog leejtwg, nej cia li coj tus tsiaj ntawd los rau ntawm nej tsev, thiab pab ceev tseg mus txog thaum tus tswv tsiaj tuaj nrhiav, nej mam li muab rau tus tswv coj rov mus tsev. Yog nej pom nej cov kwvtij Yixalayees ib tug twg tus neesluav, nws tej tsoos tsho lossis ib yam dabtsi uas ploj lawm, los nej ua ib yam li ntawd. “Yog nej mus pom nej ib tug kwvtij Yixalayees twg ib tug neesluav lossis ib tug nyuj ntog rau ntawm kev, nej tsis txhob ua tus tsis pom; nej cia li pab muab tus tsiaj ntawd tsa sawv. “Tej pojniam tsis txhob hnav txivneej tej tsoos tsho thiab tej txivneej los tsis txhob hnav pojniam tej tsoos tsho; tus TSWV uas yog nej tus Vajtswv ntxub cov neeg uas hnav li ntawd. “Yog nej pom zes noog nyob saum ntoo lossis hauv av uas tus maum noog tseem puag qe lossis puag menyuam, nej tsis txhob tua tus maum. Nej muab tau cov menyuam, tiamsis nej yuav tsum tso tus maum mus, yog nej ua li ntawd nej thiaj noj qab nyob zoo thiab muaj sia nyob ntev. “Thaum nej ua tsev tshiab, nej yuav tsum xov puagncig lub rutsev tus npoo. Neeg thiaj tsis poob thiab tuag, nej thiaj tsis tau ris lub txim ntawd. “Tsis txhob cog lwm yam qoob rau hauv nej daim teb txiv hmab; yog nej cog ob yam sib xyaws, tus TSWV yuav txwv tsis pub nej de tej txiv hmab lossis sau tej qoob uas nej cog xyaw ntawd. “Nej tsis txhob muab nyuj thiab neesluav los ua ib nkawg cab tib rab khais laij teb. “Nej tsis txhob hnav tej tsoos tsho uas muab xov plaub yaj thiab xov maj los ntos ua ke. “Nej yuav tsum ntxhoo ntxhuav rau ntawm daim ntaub uas nej npua plaub ceg nkaum. “Yog leejtwg yuav tau pojniam thiab tom qab uas nws nrog tus pojniam ntawd pw tas, nws tsis nyiam tus pojniam ntawd; thiab nws liam hais tias, tus pojniam tsis yog nkaujxwb, nws twb deev hluas nraug ua ntej nkawd sib yuav lawm. “Yog muaj li ntawd, tus ntxhais niam thiab txiv yuav tsum nqa daim ntaub pua chaw uas lo ntshav mus ua povthawj rau cov txwjlaug hauv tsev tu plaub hauv lub nroog hais tias, nkawd tus ntxhais tseem yog nkaujxwb. Tus ntxhais leej txiv hais rau cov txwjlaug hais tias, ‘Kuv muab kuv tus ntxhais qua rau tus txivneej no, tiamsis nws tsis nyiam kuv tus ntxhais. Nws liam hais tias, thaum nws yuav kuv tus ntxhais, kuv tus ntxhais twb xub deev hluas nraug lawm. Tiamsis nej saib daim ntaub pua chaw uas lo tshav no; yog daim uas qhia hais tias, kuv tus ntxhais tsis tau deev dua hluas nraug.’ Ces cov txwjlaug hauv lub nroog cia li muab tus txivneej ntawd nplawm; thiab lawv muab nws nplua ib puas daim nyiaj los kho tus ntxhais niam thiab txiv, rau qhov tus txivneej ntawd ua rau cov Yixalayees tej ntxhais poob ntsejmuag heev. Tus txivneej ntawd yuav tsum yuav tus pojniam, thiab tsis pub nws nrauj mus tas simneej. “Tiamsis yog hais tias, qhov uas tus txivneej hais ntawd yeej muaj tseeb tiag, thiab yog tsis muaj povthawj hais tias tus ntxhais tseem yog nkaujxwb, ces lawv cia li coj tus ntxhais tawm hauv niamtxiv tsev mus rau sab nraud qhovrooj, cia cov txivneej uas nyob hauv lub nroog muab pobzeb ntaus tus ntxhais ntawd kom tuag. Rau qhov thaum nws tseem nrog nws niam nws txiv nyob, nws tau deev hluas nraug ua ntej yuav txiv, ua rau haivneeg Yixalayees poob ntsejmuag. Nej ua li ntawd thiaj tshem tau tej kev phem kev qias tawm hauv nej mus. “Yog ntes tau ib tug txivneej, thaum nws nrog lwm tus txivneej tus pojniam pw, yuav tsum muab tus hluas nraug thiab tus pojniam ntawd tua povtseg huv tibsi. Nej ua li ntawd thiaj tshem tau tej kev phem kev qias tawm hauv nej mus. “Yog muaj ib tug txivneej raug ntes tau hauv nroog, vim mus nrog tus hluas nkauj uas luag twb qhaib lawm pw. Nej cia li coj nkawd tawm mus rau sab nraud ntug nroog thiab muab pobzeb ntaus kom nkawd tuag huv tibsi. Tus ntxhais tuag, vim nws nyob hauv nroog thiab nws tsis qw thov luag pab. Tus hluas nraug tuag, vim nws mus deev tus ntxhais uas luag twb qhaib lawm. Nej ua li ntawd, thiaj tshem tau tej kev phem kev qias tawm hauv nej mus. “Yog hais tias, muaj ib tug txivneej mus ntsib ib tug ntxhais uas luag twb qhaib lawm, nws cia li muab mos tom xubtsuag, ces tsuas muab tus txivneej tua povtseg xwb; tsis txhob ua li cas rau tus ntxhais, rau qhov nws tsis tau ua txhaum uas tsimnyog muab nws tua. Rooj plaub no txiav txim ib yam li ob tug txivneej sib ntaus uas ib tug muab ib tug ntaus tuag lawm. Rau qhov tus txivneej ntawd mus mos tus ntxhais uas luag qhaib lawm nyob deb nroog, txawm yog tus ntxhais ntawd qw thov neeg pab los tsis muaj leejtwg hnov thiab pab nws. “Yog muaj ib tug txivneej mus mos tus ntxhais uas luag tsis tau qhaib. Tus txivneej ntawd yuav tsum tau them tsib caug daim nyiaj rau tus ntxhais ntawd niam thiab txiv, thiab nws yuav tus ntxhais ntawd ua pojniam, rau qhov nws txhob txwm yuam tus ntxhais ntawd. Tsis pub nws nrauj tus pojniam ntawd mus tas simneej li. “Tsis pub leejtwg nrog nws txiv tus pojniam pw, rau qhov ua li ntawd rhuav leej txiv ntsejmuag heev. “Tus txivneej uas luag muab sam lossis txiav chaw xis lawm, tsis muaj feem nrog tus TSWV haivneeg. “Tsis pub tus menyuam tsaub lossis nws cajces muaj feem koom nrog tus TSWV haivneeg, txawm yog tom qab kaum tiam neeg los tsis pub li. “Tsis pub cov Amoos thiab cov Mau-am lossis ib tug ntawm ob haivneeg no cajces muaj feem koom nrog tus TSWV haivneeg, txawm yog tom qab kaum tiam neeg los tsis pub li. Rau qhov thaum nej tsiv nram tebchaws Iziv los hla lawv lub tebchaws, lawv tsis kam muab zaub mov rau nej noj thiab muab dej rau nej haus, lawv tseem ntiav Npe-aus tus tub Npala-as uas nyob hauv lub nroog Pethaus pem tebchaws Mexuputamias tuaj foom tsis zoo rau nej thiab. Tiamsis tus TSWV uas yog nej tus Vajtswv tsis mloog Npala-as tej lus; nws thiaj muab tej lus uas foom tsis zoo hloov ua koob hmoov rau nej, vim nws hlub nej. Tiam twg nej tseem ua ib haivneeg nyob, nej tsis txhob pab cov neeg ntawd lossis txhawb kom lawv vammeej li. “Tiamsis nej tsis txhob tso cov Edoos tseg, rau qhov lawv yog nej cov kwvtij. Nej tsis txhob tso cov Iziv tseg, rau qhov nej twb tau nyob hauv lawv lub tebchaws ib zaug lawm. Tom qab uas dhau peb tiam neeg lawm, ob haivneeg no cajces muaj feem koom nrog tus TSWV haivneeg. “Thaum nej tabtom sib tua nyob hauv lub yeej, nej yuav tsum txuag tsis pub kom muaj ib yam dabtsi ua rau nej tsis huv. Yog muaj ib tug txivneej nyob hauv yeej ua npau suav nrog pojniam pw, ua rau nws lub ris ntub thiab tsis huv, nws yuav tsum tawm mus nyob sab nraum ntug yeej. Thaum yuav tsaus ntuj, nws yuav tsum ntxuav nws lub cev kom huv, ces thaum hnub poob qho lawm nws mam li rov los rau hauv lub yeej. “Nej yuav tsum tshwj ib thaj chaw rau sab nraum ntug yeej, nej thiaj tau chaw mus tawm rooj. Nej cov tubrog txhua tus nyias yuav tsum muaj nyias ib rab tuam txhob lossis ib rab hlau nrog nraim, thaum nej mus tawm rooj, nej thiaj tau siv khawb qhov faus. Nej yuav tsum tu nej lub yeej kom huv si, rau qhov tus TSWV uas yog nej tus Vajtswv nrog nraim nej nyob, tsomkwm nej thiab pab kom nej tua yeej nej cov yeebncuab. Tsis txhob ua ib yam dabtsi tsis huv uas ua rau tus TSWV tso nej tseg. “Yog muaj ib tug qhev khiav nws tus tswv tuaj cuag nej kom nej pab nws, nej tsis txhob muab nws xa rov qab mus rau tus tswv. Cia nws nrog nej nyob hauv nej tej nroog lub uas nws nyiam nyob, thiab nej tsis txhob tsimtxom nws. “Tsis pub cov Yixalayees ib tug pojniam lossis txivneej mus ua niamntiav txivntiav nyob rau hauv tsev teev mlom, thiab tsis pub kom coj cov nyiaj uas nws mus ua niamntiav lossis txivntiav tau los tuaj tso rau hauv tus TSWV uas yog nej tus Vajtswv lub Tuamtsev raws li nws coglus lawm. Tus TSWV ntxub txojkev ua niamntiav txivntiav li ntawd. “Thaum nej qiv nyiaj lossis txais zaub mov thiab lwm yam rau nej ib tug kwvtij Yixalayees, nej tsis txhob tsub paj rau nws them. Yog nej qiv nyiaj rau tus neeg txawv tebchaws, nej tsub paj rau nws them los tau, tiamsis nej tsis txhob tsub paj rau nej cov kwvtij Yixalayees them. Nej yuav tsum ua raws li txoj kevcai no, tus TSWV uas yog nej tus Vajtswv thiaj foom koob hmoov rau txhua yam uas nej ua hauv lub tebchaws uas nws muab rau nej. “Thaum nej coglus rau tus TSWV uas yog nej tus Vajtswv, nej tsis txhob rhuav tej lus cog tseg ntawd; tus TSWV yeej tsis tseev li, yog nej rhuav ces nej yuav txhaum. Yog nej tsis tau coglus rau tus TSWV, nej yeej tsis muaj txim, tiamsis yog nej zoo siab coglus rau tus TSWV lawm, nej yuav tsum ua kom tiav. “Thaum nej mus txog ntawm luag tej vaj txiv hmab txiv ntoo, nej de tau noj, tiamsis tsis txhob de ris los tsev. Thaum nej mus txog ntawm luag tej teb npleg, nej de tau tej hnab nplej noj, tiamsis tsis txhob muab liag hlais. “Yog ib tug txivneej twg yuav pojniam lawm, tiamsis tom qab ntawd nws tsis xav yuav nws tus pojniam, rau qhov nws pom tus pojniam ntawd ua tej yam tsis haum nws siab. Ces nws cia li sau ib daim ntawv nrauj rau tus pojniam, thiab kom tus pojniam tawm hauv nws tsev mus. Tus pojniam ntawd mus yuav dua lwm tus txiv, yog tus txiv tshiab los tsis xav yuav nws thiab, tus txiv tshiab cia li ua ntawv nrauj rau nws, thiab kom nws tawm mus. Lossis yog hais tias, tus txiv tshiab ntawd tuag lawm. Txawm li ntawd los, thawj tus txiv tsis txhob rov mus yuav tus pojniam ntawd ib zaug ntxiv li lawm; nws yuav tsum suav hais tias tus pojniam ntawd yog neeg tsis huv. Yog nws rov yuav tus pojniam ntawd dua, yuav ua rau tus TSWV ntxub nws heev. Nej tsis txhob ua txhaum li no nyob hauv lub tebchaws uas tus TSWV uas yog nej tus Vajtswv muab rau nej. “Thaum muaj ib tug txivneej twg nyuam qhuav yuav tau pojniam, tsis txhob coj tus ntawd mus tua rog lossis tsis txhob cia nws ua ib yam dabtsi rau nomtswv; tiamsis cia nws nyob hauv tsev ib xyoos, kom nws tus pojniam muaj kev zoo siab. “Thaum nej qiv nyiaj rau luag, nej tsis txhob kom luag muab luag lub zeb lossis txhib zeb sab saum los yuam nqi, rau qhov lub zeb ntawd yog lub uas luag niaj hnub siv ua noj ua haus yug luag tsevneeg. “Yog leejtwg mus nyiag nws cov kwvtij Yixalayees ib tug los ua nws qhev lossis muab muag mus ua luag qhev, yuav tsum muab tus uas nyiag ntawd tua povtseg. Nej ua li ntawd thiaj tshem tau tej kev phem kev qias tawm hauv nej mus. “Yog nej cov muaj ib tug mob ruas, tus ntawd yuav tsum ua raws li cov povthawj kom nws ua, thiab ua raws li tej lus uas kuv qhia rau lawv lawm. Nej nco ntsoov qhov uas tus TSWV uas yog nej tus Vajtswv tau ua rau Milias, thaum nej tsiv nram tebchaws Iziv los. “Thaum nej qiv ib yam dabtsi rau ib tug twg, nej tsis txhob mus rau hauv nws tsev, thiab muab lub tsho uas nws muab yuam nqi rau nej; nej nyob nraum zoov tos, cia nws mam nqa tuaj rau nej xwb. Yog tus ntawd txomnyem, nej tsis txhob coj nws lub tsho mus khaws cia ib hmos; tiamsis txhua hnub thaum yuav tsaus ntuj, nej cia li xa rov qab rau nws, nws thiaj tau hnav pw. Yog nej ua li no, nws thiaj yuav nco nej txiaj ntsig, thiab tus TSWV uas yog nej tus Vajtswv yuav txaus siab rau nej. “Tsis txhob sej tej nqi zog uas cov neeg txomnyem tuaj ua zog ntawm nej, tsis hais nej tus kwvtij Yixalayees lossis tus neeg txawv tebchaws uas nyob hauv nej tej nroog. Nej cia li muab nqi zog rau tus ntawd txhua hnub ua ntej lub hnub poob qho, rau qhov nws tos rawv tej nqi zog uas nws ua hnub ntawd. Yog nej tsis muab rau nws, nws yuav thov tus TSWV foom tsis zoo rau nej, ces nej yuav muaj txim. “Yog menyuam ua txhaum, tsis txhob muab niamtxiv tua theej menyuam; yog niamtxiv ua txhaum, tsis txhob muab menyuam tua theej niamtxiv; tus twg ua txhaum tsuas cia tus ntawd tuag xwb. “Nej tsis txhob txwv cov neeg txawv tebchaws thiab cov menyuam ntsuag txoj cai; thiab tsis txhob muab tus pojntsuam lub tsho los yuam tej nqi uas nws txais. Nej nco ntsoov qhov uas nej tau ua luag qhev nram tebchaws Iziv, tus TSWV uas yog nej tus Vajtswv tau tso nej dim; twb yog li ntawd, kuv thiaj qhia kom nej ua li no. “Thaum nej sau qoobloo, yog nej sau tsis txhua qee teg nplej uas nej hlais, nej tsis txhob rov mus sau dua lawm; tseg tej ntawd rau cov neeg txawv tebchaws, cov menyuam ntsuag thiab tej pojntsuam, tus TSWV uas yog nej tus Vajtswv thiaj yuav foom koob hmoov rau tej uas nej ua. Thaum nej mus de tej txiv ntoo roj thawj lwm tas, nej tsis txhob rov mus de tej ntxaib ntxiv lawm; tseg tej ntawd rau cov menyuam ntsuag, cov pojntsuam thiab tej neeg txawv tebchaws de. Thaum nej mus de tej txiv hmab thawj lwm tas, nej tsis txhob rov mus de tej ntxaib ntxiv lawm; tseg tej ntawd rau cov menyuam ntsuag, cov pojntsuam thiab tej neeg txawv tebchaws de. Nej nco ntsoov hais tias nej tau ua luag qhev nyob nram tebchaws Iziv; twb yog vim li ntawd kuv thiaj qhia kom nej ua li no. “Yog muaj ob tug Yixalayees muaj lus sib kom mus rau hauv tsev tu plaub, tus txiav txim phua hais tias ib tug txhaum thiab ib tug tsis txhaum. Yog yuav nplawm tus uas tau ua txhaum, tus txiav txim yuav tsum hais kom tus ntawd pw khwb rwg tso mam li nplawm; thiab tsuas pub nplawm raws li nws txojkev txhaum xwb. Nplawm heev kawg, tsuas pub nplawm plaub caug nplawm xwb, tsis pub nplawm tshaj ntawd. Yog nej nplawm tshaj ntawd, yuav rhuav nws ntsejmuag heev. “Thaum nej tabtom muab nyuj mus tsuj nplej hauv tshav nplej, nej tsis txhob muab hnab looj nyuj qhovncauj. “Yog muaj ob kwvtij nyob ua ib tse, ib tug mus yuav tau pojniam, tiamsis tus ntawd tuag thaum nws tus pojniam tseem tsis tau muaj tub, tus pojniam ntawd tsis txhob mus yuav lwm tus sab nraud; cia li muab nws txis rau nws tus txiv uas tuag lawm tus kwv xwb. Thawj tug tub uas tus pojniam ntawd yug yuav tsum suav hais tias yog tus txiv uas tuag lawm tus tub, kom tus tuag lawm thiaj muaj cajces nyob hauv haivneeg Yixalayees mus lawm yav tom ntej. Tiamsis yog hais tias tus txiv uas tuag lawm, tus kwv tsis kam yuav tus pojniam ntawd, ces tus pojniam cia li mus hais rau cov txwjlaug hauv lub nroog ntawd hais tias, ‘Kuv tus txiv tus kwv tsis kam yuav kuv kom kuv tus txiv uas tuag lawm muaj cajces tseg rau hauv haivneeg Yixalayees.’ Cov txwjlaug hauv lub nroog ntawd hu tus kwv tuaj nug saib nws puas yuav los tsis yuav. Yog hais tias nws tsis kam yuav tus niamtij ntawd, ces kom tus pojniam ntawd mus muab tus kwv ib sab khau hle, nti qaubncaug rau tus kwv lub ntsejmuag tabmeeg cov txwjlaug thiab hais tias, ‘Tus uas tsis cia nws tus tijlaug muaj cajces, yeej tsimnyog raug li no.’ Cov Yixalayees yuav hu tus txivneej ntawd tsevneeg hais tias, ‘Tsevneeg ntawm tus txivneej uas luag muab khau hle.’ “Yog muaj ob tug txivneej sib ntaus, thiab ib tug ntawm ob tug ntawd, tus pojniam los pab nws tus txiv, yog tus pojniam ntawd xyab tes mus chua lwm tus txivneej chaw xis, nej cia li muab tus pojniam ntawd txhais tes txiav povtseg; tsis txhob hlub nws li. Nej yuav tsum siv rab teev uas tsis ntxo thiab lub kawm uas txwm los luj xwb, nej thiaj yuav muaj sia ua neej nyob ntev hauv lub tebchaws uas tus TSWV uas yog nej tus Vajtswv muab rau nej. Rau qhov tus TSWV ntxub cov neeg uas ua tsis ncaj li ntawd. “Nej nco ntsoov tej uas thaum nej tsiv nram tebchaws Iziv los, cov Amalej tau ua rau nej lawm. Lawv tsis paub ntshai Vajtswv, lawv thiaj nyas tuaj tom qab tua nej, thaum uas nej qaug zog thiab tsaug muag heev, thiab lawv tua nej cov neeg uas nyob tom qab tuag tas. Yog li ntawd, thaum tus TSWV uas yog nej tus Vajtswv muab lub tebchaws rau nej, thiab ua rau nej nyob tso siab lug tsis ntshai nej tej yeebncuab uas nyob ibncig nej, nej nco ntsoov muab cov Amalej tua kom tuag tas thiaj tsis muaj leejtwg nco txog lawv ntxiv lawm. Nej yuav tsum nco ntsoov tej no! “Thaum nej mus tua tau lub tebchaws uas tus TSWV uas yog nej tus Vajtswv muab rau nej thiab nej ua zej ua zos nyob rau hauv lawm, nej sawvdaws nyias muab nyias thawj cov qoob ib yam mentsis ntim rau hauv kawm coj mus rau ntawm qhov chaw pehawm tus TSWV uas yog nej tus Vajtswv. Nej mus cuag tus povthawj uas ua haujlwm lub sijhawm ntawd; nej txhua tus nyias hais nyias rau nws hais tias, ‘Kuv thov hais rau tus TSWV uas yog kuv tus Vajtswv hais tias, kuv twb los nyob hauv lub tebchaws uas nws coglus muab rau peb cov yawgkoob lawm.’ “Tus povthawj yuav txais nej tej tawb qoob coj mus tso rau ntawm tus TSWV uas yog nej tus Vajtswv lub thaj. Tom qab ntawd, nej nyias yuav piav nyias tej lus rau tus TSWV hais tias: ‘Kuv yawgkoob yog neeg Alames, nws tsiv ncig teb ncig chaw, nws thiaj coj nws tsevneeg mus nyob nram tebchaws Iziv. Thaum lawv mus nyob nrad lawv muaj tsawg, tiamsis lawv huamvam coob thiab yog ib haivneeg uas muaj zog heev. Cov neeg Iziv tsimtxom peb ua lwj ua liam thiab yuam peb ua lawv qhev. Peb thiaj li tsa ncauj thov tus TSWV uas yog peb cov yawgkoob tus Vajtswv pab peb. Nws hnov peb tej lus thov, pom peb tej kev txomnyem, tej kev khwv thiab raug luag tsimtxom. Nws lub hwjchim thiab lub zog loj zog nchav tso peb dim nram tebchaws Iziv los. Nws ua tej txujci loj thiab tseemceeb uas xav tsis thoob rau peb pom. Nws coj peb los nyob ntawm no thiab muab lub tebchaws uas av rog thiab zoo qoob rau peb. Yog li ntawd, nimno kuv thiaj coj thawj cov qoob uas tus TSWV pub rau kuv ua tau ibtxhia tuaj fij rau nws.’ “Tom qab ntawd muab cov qoobloo tso rau ntawm lub thaj thiab pehawm tus TSWV qhov ntawd. Nej cia li zoo siab, rau qhov tus TSWV uas yog nej tus Vajtswv twb muab txhua yam uas zoo pub rau nej thiab nej tsevneeg lawm; cia cov Levis thiab cov neeg txawv tebchaws uas nrog nej nyob koom nrog nej zoo siab. “Peb lub xyoo twg nej yuav tsum muab tej qoobloo uas yog ib feem kaum pub rau cov Levis, cov neeg txawv tebchaws, cov menyuam ntsuag thiab tej pojntsuam ib zaug; txawm yog lawv yuav nrog pab twg pawg twg nyob los lawv thiaj muaj noj muaj haus. Thaum nej ua tej no lawm, nej hais rau tus TSWV hais tias, ‘Kuv tej qoobloo tsis tshuav ib feem kaum uas yog koj tug nyob hauv kuv tsev lawm; kuv twb muab tagnrho rau cov Levis, cov neeg txawv tebchaws, cov menyuam ntsuag thiab tej pojntsuam raws li tej lus uas koj hais kom kuv ua lawm. Kuv nco ntsoov ua raws li koj tej kevcai uas qhia txog ib feem kaum txhua nqe huv tibsi tsis tso ib nqes tseg li. Thaum kuv muaj kev quaj ntsuag, kuv tsis noj tej qoobloo uas yog koj feem ib qho li; thaum kuv tsis tau ua kevcai ntxuav, kuv yeej tsis coj tej qoobloo tawm hauv kuv tsev mus; thiab kuv tsis muab tej ntawd coj mus fij rau tej tuag. Tus TSWV, kuv mloog koj lus thiab ua txhua yam raws li uas koj qhia txog ib feem kaum lawm. Thov koj tus uas nyob qhov chaw dawbhuv saum ntuj, tsa muag saib peb thiab foom koob hmoov rau koj haivneeg Yixalayees, thiab lub tebchaws av rog thiab zoo qoob uas koj muab rau peb raws li koj tau coglus rau peb cov yawgkoob lawm.’ “Hnub no tus TSWV uas yog nej tus Vajtswv hais kom nej ua raws li nws tej kevcai txhua nqe huv tibsi; nej cia li muab siab npuab thiab ua raws li ntawd kom kawg siab kawg ntsws. Hnub no nej twb lees yuav tus TSWV ua nej tus Vajtswv lawm; nej coglus hais tias nej yuav mloog nws lus, coj raws li nws tej kevcai txhua nqe, thiab ua raws li tej uas nws hais txhua lo huv tibsi. Hnub no tus TSWV yuav nej ua nws haivneeg raws li tej lus uas nws tau cog tseg rau nej lawm; thiab nws hais kom nej coj raws li tej kevcai ntawd txhua nqe. Nws yuav ua kom nej ciaj ua ib haivneeg tseemceeb tshaj lwm haivneeg uas nws tsim huv tibsi; nej yuav ua rau sawvdaws qhuas thiab hwm nws lub npe. Nej yuav tau ua nws haivneeg raws li nws tau coglus tseg rau nej lawm.” Mauxes thiab cov txwjlaug hais rau cov Yixalayees hais tias, “Nej yuav tsum ua raws li tus TSWV txoj kevcai uas hnub no kuv qhia rau nej lawm. Hnub uas nej yuav hla tus Dej Yauladees mus rau hauv lub tebchaws uas tus TSWV uas yog nej tus Vajtswv muab rau nej; nej muab ob peb lub pobzeb loj los teeb, thiab muab hmoov sib leem rau txhua lub, thiab nej muab tej kevcai no sau rau ntawm cov pobzeb ntawd. Thaum nej mus rau hauv lub tebchaws av rog thiab zoo qoob uas tus TSWV uas yog nej cov yawgkoob tus Vajtswv tau coglus muab rau nej, thiab thaum nej hla tus Dej Yauladees mus rau sab tid lawm, nej muab cov pobzeb ntawd teeb rau saum lub Roob Enpales raws li hnub no kuv hais rau nej thiab muab hmoov sib leem rau. Nej muab pobzeb teeb ua ib lub thaj fij khoom rau tus TSWV, tsis txhob muab cuabyeej hlau txaug cov pobzeb ntawd, rau qhov cov pobzeb uas nej muab ua lub thaj rau tus TSWV uas yog nej tus Vajtswv yuav tsum tsis pub muab cuabyeej hlau txaug li. Tom qab ntawd nej mam hlawv tau khoom fij rau saum lub thaj, thiab nej muab tej khoom uas fij ua kev sib raug zoo thiab noj zoo siab tabmeeg tus TSWV uas yog nej tus Vajtswv nyob qhov ntawd. Nej sau Vajtswv txoj kevcai txhua nqe kom meej rau ntawm cov pobzeb ntawd.” Mauxes thiab cov povthawj hais rau cov Yixalayees hais tias, “Nej cia li nyob twjywm thiab mloog kuv hais. Hnub no nej tau ua tus TSWV uas yog nej tus Vajtswv haivneeg lawm; yog li ntawd, nej yuav tsum mloog tus TSWV lus, thiab ua raws li Vajtswv tej kevcai uas hnub no kuv qhia rau nej lawm.” Hnub ntawd Mauxes hais rau cov Yixalayees hais tias, “Thaum nej sawvdaws hla tus Dej Yauladees mus rau sab tid lawm, kom xeem Xime-oos, Levis, Yudas, Ixakhas, Yauxej thiab Npeenyamees mus sawv saum lub Roob Kelixees foom koob hmoov rau cov pejxeem. Thiab kom xeem Lunpees, Khas, Aseles, Xenpuloos, Das thiab Nathalis mus sawv saum lub Roob Enpales foom tsis zoo rau cov pejxeem. Cov Levis yuav hais nrov nrov rau cov Yixalayees hais tias: “ ‘Yog leejtwg txua mlom, tsis hais mlom pobzeb, mlom ntoo lossis mlom tooj thiab mus pe tej mlom ntawd nraim nkoos, Vajtswv yuav foom tsis zoo rau tus ntawd, rau qhov tus TSWV ntxub cov neeg pe mlom li ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg saib tsis taus nws niam nws txiv, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg nam dhau nws cov kwvtij tus ciamteb, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg dag cov neeg digmuag mus yuam kev, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg txwv cov neeg txawv tebchaws, cov menyuam ntsuag thiab tej pojntsuam txoj cai, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg deev nws txiv tus pojniam, rhuav nws txiv ntsejmuag, Vajtswv yuav foom tsis rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg deev tej tsiaj, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg deev nws tus muam, tsis hais koom niam tsis koom txiv, lossis koom txiv tsis koom niam, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg deev nws niamtais, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg nyiag tua neeg tsis muaj leejtwg paub, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg cia luag ntiav nws mus tua tus neeg uas tsis muaj txim tuag, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “ ‘Yog leejtwg tsis ua raws li Vajtswv tej kevcai no, Vajtswv yuav foom tsis zoo rau tus ntawd.’ “Tagnrho cov Yixalayees yuav thooj txhij teb hais tias, ‘Amees!’ “Yog nej mloog tus TSWV uas yog nej tus Vajtswv lus thiab ua raws li nws tej kevcai uas hnub no kuv qhia rau nej, tus TSWV yuav tsa nej ua haivneeg uas muaj hwjchim loj dua lwm haivneeg hauv ntiajteb no. Yog nej mloog tus TSWV uas yog nej tus Vajtswv lus, nej yuav tau tej koob hmoov no: “Tus TSWV yuav foom koob hmoov rau nej tej nroog thiab tej liaj tej teb. “Tus TSWV yuav foom koob hmoov kom nej muaj tubki, muaj nyuj muaj yaj coob, thiab muaj qoobloo ntau. “Tus TSWV yuav foom koob hmoov rau nej tej qoobloo thiab tej zaub mov uas nej khwv tau los. “Tus TSWV yuav foom koob hmoov rau txhua yam uas nej ua. “Tus TSWV yuav ua rau nej cov yeebncuab swb thaum lawv tuaj tua nej. Lawv ua ke tuaj tua nej, tiamsis lawv yuav tawg ua sab ua sua rov qab. “Tus TSWV uas yog nej tus Vajtswv yuav foom koob hmoov rau tej uas nej ua thiab pub kom nej tau nplej ntau puv txhab. Nws yuav foom koob hmoov rau lub tebchaws uas nws muab rau nej lawm. “Yog nej mloog tus TSWV uas yog nej tus Vajtswv lus thiab ua raws li nws tej kevcai, tus TSWV yuav cia nej ua nws haivneeg raws li nws tau coglus tseg lawm. Txhua haivneeg uas nyob thoob ntiajteb yuav pom hais tias, tus TSWV twb xaiv nej los ua nws haivneeg lawm, lawv sawvdaws yuav ntshai nej. Tus TSWV yuav pub kom nej muaj tubki, muaj nyuj thiab muaj qoobloo ntau nyob hauv lub tebchaws uas tus TSWV tau coglus rau nej cov yawgkoob hais tias, nws yuav muab rau nej. Tus TSWV yuav qhib rooj ntug tso nag los raws caij raws nyoog thiab foom koob hmoov rau tej uas nej ua, nej yuav muaj qiv rau ntau lub tebchaws, tiamsis nej yuav tsis tau mus txais luag. Yog nej ua raws li tus TSWV uas yog nej tus Vajtswv tej kevcai txhua nqe uas kuv qhia rau nej, tus TSWV yuav tsa nej ua ntau haivneeg tus thawj, tsis yog ua tus uas raws luag qab; yog nej ua raws li tus TSWV tej lus uas hnub no kuv qhia rau nej, tej uas nej ua yuav vammeej. Tiamsis nej tsis txhob tso tej uas hnub no kuv qhia rau nej tseg, lossis tsis mus pe lwm tus vajtswv. “Yog nej tsis mloog tus TSWV uas yog nej tus Vajtswv lus, tsis muab siab npuab nws, thiab tsis ua raws li nws tej kevcai uas hnub no kuv qhia rau nej, ces nej yuav raug tej kev phem no: “Tus TSWV yuav foom tsis zoo rau nej tej nroog thiab tej liaj tej teb. “Tus TSWV yuav foom tsis zoo rau nej tej nplej thiab tej zaub mov uas nej khwv tau los. “Tus TSWV yuav foom kom nej tsis muaj tubki coob, tej qoobloo tsis zoo, thiab tej nyuj tej yaj tsis huamvam. “Tus TSWV yuav foom tsis zoo rau txhua yam uas nej ua. “Yog nej ua kev phem kev qias thiab tso tus TSWV tseg, nws yuav tso kev puastsuaj, kev covnyom thiab kev ntxhov siab los rau txhua yam uas nej ua mus txog hnub uas nej raug puastsuaj tas. Nws yuav tso kab mob ib yam tas ib yam tuaj rau nej, mus txog hnub uas nej puastsuaj tas rau hauv lub tebchaws uas nej yuav mus nyob ntawd. Tus TSWV yuav tso mob phem, mob rwj, thiab mob npaws los rau nej; nws yuav ua kom muaj ntuj qhua teb nkig thiab tso cua nplawm nej tej qoobloo kom qhuav tas. Tej siv tej npog no yuav los raug nej mus txog hnub uas nej tuag tas. Yuav tsis muaj nag los rau nej lub tebchaws, nej lub tebchaws yuav qhuav thiab tawv cuag hlau. Tus TSWV yuav tsis tso nag los, tiamsis nws yuav tso hmoov av thiab suabzeb saum ntuj los rau nej, mus txog thaum nej tuag tas. “Tus TSWV yuav cia nej cov yeebncuab tuaj tua yeej nej. Nej yuav ua ib pab mus tua cov yeebncuab, tiamsis nej yuav swb thiab khiav ua sab ua sua, thaum txhua haivneeg thoob ntiajteb pom nej raug tej xwm no lawv yuav ntshai tshee hnyo. Thaum nej tuag, tej noog thiab tej tsiaj nruab nrag yuav noj nej lub cev, thiab yuav tsis muaj leejtwg lawv tej tsiaj ntawd kom khiav. Tus TSWV yuav ua rau nej mob rwj, ib yam li nws ua rau cov Iziv lawm. Nws yuav ua kom nej lub cev tawg pleb, mob txhab qawj ua paug viag, thiab khaus thoob ibce kho tsis zoo li. Tus TSWV yuav ua kom nej lub tswvyim ploj xav tsis tawm dabtsi li; nws yuav ua kom nej qhovmuag fam thiab tsis pom qab ua dabtsi. Txawm yog nruab hnub nrig los nej yuav mus kev ib yam li tej neeg digmuag, nej yuav nrhiav tsis tau txoj haukev mus. Tej uas nej ua yuav tsis vammeej. Luag yuav huab nej tej khoom, thiab tsimtxom nej tas mus li, yuav tsis muaj leejtwg tuaj pab nej. “Nej qhaib tau luag ib tug ntxhais los lwm tus yuav tuaj txeeb yuav. Nej ua tau tsev los nej yuav tsis tau nyob. Nej cog tau txiv hmab los nej yuav tsis tau noj. Luag yuav muab nej tej nyuj tua tabmeeg nej los nej yuav tsis tau noj. Luag yuav tuaj cab nej tus neesluav tabmeeg nej, thiab tsis xa rov qab rau nej. Luag yuav tuaj muab nej tej yaj tej tshis coj mus pub nej cov yeebncuab, yuav tsis muaj leejtwg tuaj pab nej. Luag yuav tabmeeg coj nej tej tub tej ntxhais mus ua cov neeg txawv tebchaws qhev. Nej yuav niaj hnub tos ntsia kev ntsoov, tiamsis tsis pom luag xa nej tej menyuam rov los li. Lwm haivneeg yuav tuaj txeeb nej tej qoobloo uas nej ua khwv khwv, kom nej tsis tau noj, nej tseem yuav raug luag tsimtxom thiab quab yuam tas mus li. Nej raug luag tsimtxom li ntawd, yuav ua rau nej siab ntsws puas tas. Tus TSWV yuav ua kom nej mob rwj ntawm hauvcaug, ntawm txhais ceg, thiab thoob plaws saum taubhau ti hauv kotaw ua paug viag kho tsis zoo li. “Tus TSWV yuav coj nej thiab nej tus vajntxwv mus nyob lwm lub tebchaws uas nej thiab nej cov yawgkoob tsis tau mus nyob dua li; nyob hauv lub tebchaws ntawd, nej yuav pe luag tej vajtswv uas muab ntoo thiab pobzeb ua. Cov neeg uas nyob hauv tej tebchaws uas tus TSWV uas yog nej tus Vajtswv muab nej ntiab mus nyob, yuav xav tsis thoob tej uas tus TSWV ua rau nej; lawv yuav luag nej plig thiab txob thuam nej. “Nej cog qoobloo ntau, tiamsis sau tau tsawg, rau qhov yuav muaj kooj txomfav noj nej tej qoob. Nej cog txiv hmab thiab tu zoo heev, tiamsis nej yuav tsis tau de tej txiv thiab tsis tau haus tej cawv txiv hmab, rau qhov kab muab tej hmab noj tas lawm. Nej cog txiv ntoo roj thoob nej lub tebchaws, tiamsis nej tsis tau roj, rau qhov tej txiv zeeg tas lawm. Nej muaj tub muaj ntxhais, tiamsis lawv yuav tsis nrog nej nyob, rau qhov luag yuav ntes lawv mus. Kab yuav noj nej tej ntoo thiab nej tej qoobloo uas nyob hauv nej lub tebchaws tas. “Lwm haivneeg uas nrog nej nyob hauv nej lub tebchaws yuav muaj hwjchim loj zuj zus, tiamsis nej yuav poob hwjchim zuj zus. Lawv yuav muaj nyiaj qiv rau nej, tiamsis nej yuav tsis muaj nyiaj qiv rau lawv. Thaum kawg lawv yuav tswjhwm nej. “Tej kev siv kev npog no yuav los raug nej, mus txog thaum nej puastsuaj tas, rau qhov nej tsis mloog tus TSWV uas yog nej tus Vajtswv lus, thiab tsis ua raws li tej kevcai uas tus TSWV qhia rau nej. Tej xwmtxheej no yog lub cim uas qhia txog Vajtswv txojkev txiav txim rau nej thiab nej tej xeebntxwv mus tas ibtxhis li. Tus TSWV twb foom koob hmoov rau tej uas nej ua lawm, tiamsis nej tsis muab siab npuab thiab nej tsis muaj lub siab dawb paug pehawm nws. Tus TSWV yuav tso nej cov yeebncuab tuaj yuam nej ua lawv qhev. Nej yuav tshaib plab, nqhis dej, liabqab thiab nej yuav ntshaw ib puas tsav yam. Tus TSWV yuav muab tus quab hlau uas hnyav heev los khuam rau nej cajdab, mus txog thaum nws ua rau nej puastsuaj tas. Tus TSWV yuav cia lwm haivneeg uas nyob tim qab ntuj kawg tuaj tawmtsam nej, yog haivneeg uas nej tsis paub lawv tej lus. Lawv yuav ya ib yam li dav tuaj tawmtsam nej. Haivneeg ntawd yuav tsis hlub thiab tsis txuag leejtwg, tsis hais tus laus lossis tus hluas li. Lawv yuav noj nej tej tsiaj txhu thiab nej tej qoob tas; nej yuav tuag tshaib. Lawv yuav tsis tseg nej tej nplej, cawv txiv hmab, roj txiv ntoo, nyuj lossis yaj rau nej li, ces nej yuav tuag tas. Lawv yuav tuaj tua txhua lub nroog hauv lub tebchaws uas tus TSWV uas yog nej tus Vajtswv muab rau nej, tej chaw tsomfaj uas siab, thiab tej ntsa yeej uas nej tso siab rau los yuav pob puas tas. “Thaum nej cov yeebncuab tuaj vij nej tej nroog, nej yuav tshaib plab heev, nej yuav noj nej tej menyuam uas tus TSWV uas yog nej tus Vajtswv muab rau nej. “Yog nej tsis mloog thiab tsis ua raws li Vajtswv tej lus qhia uas sau rau hauv phau ntawv no, thiab yog nej tsis hwm tus TSWV uas yog nej tus Vajtswv lub npe uas dawbhuv, ces nws yuav tso tej kab mob uas kho tsis zoo thiab tej sub tawg sub ntsha los rau nej thiab nej tej tubki. Nws yuav tso tej kab mob phem kawg nkaus uas nej pom thaum nej nyob nram tebchaws Iziv los raug nej; nej yuav kho tsis zoo li. Tus TSWV tseem yuav tso ntau yam kab mob thiab sub tawg sub ntsha uas tsis tau teev tseg rau hauv phau ntawv uas sau Vajtswv tej kevcai no los raug nej kom nej puastsuaj tas. Txawm yog nej yuav huamvam coob li cov hnubqub saum nruab ntug los tsuav qee leej seem xwb, rau qhov nej tsis mloog tus TSWV uas yog nej tus Vajtswv lus. Tus TSWV txaus siab pub rau nej vammeej thiab huamvam coob li cas, nws pom zoo yuav rhuav kom nej puastsuaj li ntawd. Nws yuav ntiab nej tawm hauv lub tebchaws uas nws muab rau nej. “Tus TSWV yuav ntiab nej mus nyob ua sab ua sua rau ntau lub tebchaws thoob qab ntuj, nej yuav mus pe luag tej vajtswv uas muab ntoo thiab pobzeb ua uas nej thiab nej cov yawgkoob tsis tau pe dua li. Hauv tej tebchaws uas nej mus nyob ntawd, nej yuav tsis muaj kev kaj siab, thiab tsis muaj av ua nej tug li; tus TSWV yuav ua rau nej ntshai tshee hnyo, qaug zog thiab tas kev cia siab. Nej lub neej yuav niaj hnub muaj kev ntxhov siab. Nruab hnub hmo ntuj los nej ntshai, thiab tsis paub xyov nej lub neej yuav xaus thaum twg. Tej uas nej pom yuav ua rau nej lub siab ntshai tshee hnyo. Thaum sawv ntxov nej xav kom yog tsaus ntuj; thaum tsaus ntuj los nej xav kom yog kaj ntug. Txawm yog tus TSWV hais tias nej yuav tsis rov mus nram tebchaws Iziv ntxiv lawm los tus TSWV yuav muab nkoj xa nej mus. Thaum nej mus nyob nrad, nej yuav muab nej muag rau nej cov yeebncuab ua lawv qhev los tsis muaj leejtwg yuav nej li.” Ntawm no yog tej lus cog tseg uas tus TSWV kom Mauxes hais rau cov Yixalayees thaum lawv tseem nyob hauv tebchaws Mau-am; cov lus cog tseg no yog hais ntxiv rau cov uas tus TSWV hais rau lawv ntawm Roob Xinais. Mauxes hu cov Yixalayees tuaj thiab hais rau lawv hais tias, “Nej twb pom txhua yam uas tus TSWV ua rau Falaus, nws cov nomtswv thiab nws lub tebchaws. Nej twb pom tej kev siv kev npog thiab tej txujci tseemceeb uas tus TSWV ua lawm. Tiamsis los txog rau niaj hnub no, tus TSWV tseem tsis tau pub nej totaub txog tej uas nej pom tas los lawm. Thaum tus TSWV coj nej los hla tiaj suabpuam tau plaub caug xyoo ntawd, nej tej ris tsho thiab tej khau twb tsis ntuag li. Nej tsis muaj mov noj, tsis muaj cawv txiv hmab lossis cawv ntxwg haus los tus TSWV tseem pub rau nej tau noj tau haus, nej thiaj paub hais tias nws yog nej tus Vajtswv. Thaum peb los txog ntawm no, Vajntxwv Xihoos uas kav lub nroog Hesenpoos thiab Vajntxwv Aunkas uas kav lub tebchaws Npasas tau tuaj tua peb. Tiamsis peb tua lawv swb, txeeb tau lawv lub tebchaws, thiab muab faib rau xeem Lunpees, xeem Khas thiab ib nrab xeem Manaxes. Yog li ntawd, nej yuav tsum muab siab npuab thiab ua raws li tus TSWV tej lus cog tseg no txhua lo huv tibsi, tej uas nej ua thiaj yuav vammeej. “Hnub no tagnrho nej sawvdaws sawv tabmeeg tus TSWV uas yog nej tus Vajtswv, cov txwjlaug, cov nomtswv, cov txivneej, cov pojniam menyuam thiab lwm haivneeg uas nrog nej nyob, cov kwv dej thiab txiav taws rau nej. Hnub no nej tuaj sawv ntawm no yog nrog tus TSWV uas yog nej tus Vajtswv sib coglus, thiab lees hais tias nej yuav ua raws li tej lus no, tus TSWV thiaj txais yuav nej ua nws haivneeg, thiab nws yuav ua nej tus Vajtswv, raws li nws coglus tseg rau nej yawgkoob, Anplahas, Ixaj thiab Yakhauj lawm. Tus TSWV tsis yog coglus rau nej cov uas nyob ntawm xwb, tiamsis nws coglus rau cov uas tsis nyob ntawm no, thiab nej tej xeebntxwv uas tseem tsis tau yug los huv tibsi. “Nej paub hais tias peb nyob li cas nram tebchaws Iziv, thiab peb hla dhau ntau lub tebchaws los li cas. Nej twb pom lawv tej mlom phem qias uas lawv muab ntoo, pobzeb, nyiaj thiab kub ua lawm. Nej ceevfaj nyob tsam muaj tej tus txivneej, tej tus pojniam, tej tsevneeg, lossis ib xeem twg uas hnub no tuaj sawv ntawm no tso tus TSWV uas yog nej tus Vajtswv tseg mus pe lwm haivneeg tej vajtswv. Yog nej ua li ntawd, nej yuav zoo li tus cag tshuaj iab uas tuaj hauv nej haivneeg. Nej ceevfaj tsis txhob pub nej cov ntawm no ib tug twg uas tau hnov Vajtswv tej lus cog tseg lawm, xav hais tias ua li nws lub siab phem xav los nws tseem yuav tau lub neej zoo, tiamsis yog nws ua li ntawd, yuav ua rau nej tus zoo tus phem puastsuaj huv tibsi. Tus TSWV yuav tsis zam txim rau tus ntawd. Tus TSWV txojkev chim uas kub cuag nplaim taws yuav tawmtsam tus ntawd, thiab tej lus foom tsis zoo uas sau rau hauv phau ntawv no yuav raug tus ntawd mus txog hnub uas tus TSWV muab tus ntawd rhuav puastsuaj tas. Tus TSWV yuav rau txim rau tus ntawd qhia rau cov Yixalayees txhua xeem; thiab tus ntawd yuav raug tej lus foom tsis zoo uas teev rau hauv phau ntawv uas yog tus TSWV tej lus. “Nej tej tubki yav tom ntej thiab lwm haivneeg uas nyob deb yuav hnov tej kev txomnyem thiab kev siv kev npog uas tus TSWV tso los rau nej lub tebchaws. Nej lub tebchaws yuav qhuav ua leejfaj thiab ua ntsev; cog tsis tau ib yam dabtsi, thiab nroj tsuag los tuaj tsis taus li. Nej lub tebchaws yuav zoo ib yam li lub nroog Xaudoos, lub nroog Kaumaulas, lub nroog Amas thiab lub nroog Xenpauyees uas tus TSWV chim thiab muab rhuav puastsuaj tas lawm. Tej neeg thoob ntiajteb yuav nug hais tias, ‘Vim li cas tus TSWV ua li no rau lawv lub tebchaws? Yog vim li cas tus TSWV thiaj chim ua luaj?’ Luag yuav teb hais tias, ‘Rau qhov tus TSWV haivneeg rhuav tej lus uas lawv cog tseg nrog tus TSWV uas yog lawv cov yawgkoob tus Vajtswv uas coj lawv tsiv nram tebchaws Iziv los lawm. Lawv pe tej vajtswv uas lawv tsis tau pe dua li, yog tej vajtswv uas tus TSWV txwv tsis pub lawv pe. Vim li no tus TSWV thiaj chim heev rau nws haivneeg thiab tso tej kev siv kev npog uas teev tseg rau hauv phau ntawv no los rau lawv lub tebchaws. Tus TSWV npautaws heev, nws thiaj muab lawv ntiab tawm hauv lawv lub tebchaws mus nyob rau luag tej tebchaws uas nimno lawv tseem nyob ntawd.’ “Muaj tej yam uas tus TSWV uas yog peb tus Vajtswv tsis qhia rau leejtwg paub; tiamsis nws twb qhia nws tej kevcai rau sawvdaws kom peb thiab peb tej xeebntxwv ua raws li tej kevcai ntawd mus ibtxhis. “Kuv cia nej xaiv saib, nej yuav tej lus foom koob hmoov lossis tej lus foom tsis zoo. Thaum muaj tej xwm no los raug nej, thiab thaum tus TSWV uas yog nej tus Vajtswv ntiab nej mus nrog lwm haivneeg nyob, nej yuav nco txog tej uas kuv kom nej xaiv no. Yog nej thiab nej tej tubki rov los cuag tus TSWV thiab ua raws li nws tej kevcai uas hnub no kuv qhia rau nej kawg siab kawg ntsws, tus TSWV uas yog nej tus Vajtswv yuav hlub nej. Nws yuav coj nej tawm hauv txhua lub tebchaws uas nws ntiab nej mus nyob rov los, thiab nws yuav pub kom nej lub neej rov vammeej dua. Txawm yog nej tsiv mus nyob rau txhua ceg kaum ntuj lawm los tus TSWV uas yog nej tus Vajtswv yuav coj nej rov los; nej yuav tau kav lub tebchaws uas thaum ub nej cov yawgkoob nyob los lawm. Tus TSWV yuav pub kom nej huamvam thiab vammeej tshaj nej cov yawgkoob. Tus TSWV uas yog nej tus Vajtswv yuav pub lub siab uas paub mloog lus rau nej thiab nej tej xeebntxwv, nej thiaj muab siab npuab tus TSWV thiab hlub nws kawg siab kawg ntsws, thiab nej yuav nyob hauv lub tebchaws ntawd mus li. Nws yuav muab tej lus foom tsis zoo no rau nej tej yeebncuab uas ntxub thiab tsimtxom nej, nej thiaj yuav mloog nws lus thiab ua raws li nws tej kevcai txhua nqe uas hnub no kuv qhia rau nej. Tus TSWV yuav pub kom tej uas nej ua vammeej; nej yuav muaj tubki thiab muaj tsiaj txhu coob ua npoj ntws, thiab nej tej teb yuav ntsu qoob. Tus TSWV yuav txaus siab ua kom nej vammeej ib yam li nws ua rau nej cov yawgkoob vammeej, tiamsis nej yuav tsum mloog nws lus thiab coj raws li nws tej kevcai uas sau rau hauv phau ntawv no txhua nqe huv tibsi. Nej yuav tsum tig rov los muab siab npuab tus TSWV kom kawg siab kawg ntsws. “Tej kevcai uas hnub no kuv qhia rau nej, nej tsis txhob xav hais tias nyuaj thiab coj tsis tau. Tej kevcai no tsis yog nyob saum ntuj. Tsis tas nej yuav nug hais tias, ‘Leejtwg yuav nce mus muab los rau peb, kom peb thiaj hnov thiab coj raws li ntawd?’ Tej kevcai ntawd tsis yog nyob sab ntug hiavtxwv tim ub. Tsis tas nej yuav nug hais tias, ‘Leejtwg yuav hla hiavtxwv mus muab los rau peb, kom peb thiaj hnov thiab coj raws li ntawd?’ Tej kevcai ntawd nyob ntawm nej no ntag. Nej yeej paub thiab nyob hauv nej lub siab, nej cia li ua raws li ntawd. “Hnub no kuv cia nej xaiv, saib nej yuav qhov phem lossis qhov zoo, nej yuav txojsia lossis kev tuag. Yog hais tias nej mloog thiab ua raws li tus TSWV uas yog nej tus Vajtswv tej lus uas hnub no kuv qhia rau nej, yog nej hlub nws, mloog nws lus thiab coj raws li nws tej kevcai, nej yuav vammeej thiab ua ib haivneeg coob heev. Tus TSWV uas yog nej tus Vajtswv yuav foom koob hmoov rau lub tebchaws uas nej yuav mus nyob. Tiamsis yog nej tsis mloog nws lus, tsis ua raws li nws tej lus qhia, thiab cia luag coj nej mus pe luag tej vajtswv, hnub no kuv hais rau nej hais tias nej yuav raug kev puastsuaj. Nej yuav tsis tau nyob ntev hauv lub tebchaws uas nej yuav hla tus Dej Yauladees mus tua thiab nyob. Nimno kuv cia nej xaiv saib nej yuav txojsia lossis yuav kev tuag, nej yuav tej lus foom koob hmoov lossis tej lus foom tsis zoo; kuv thov lub ntuj lub teb nrog ua timkhawv rau tej uas hnub no nej xaiv. Nej cia li xaiv txojsia. Hlub tus TSWV uas yog nej tus Vajtswv, ua raws li nws tej lus qhia, thiab muab siab npuab nws, nej thiab nej tej xeebntxwv thiaj muaj sia nyob ntev hauv lub tebchaws uas tus TSWV tau coglus tseg rau nej yawgkoob Anplahas, Ixaj thiab Yakhauj lawm.” Mauxes hais rau cov Yixalayees hais tias, “Nimno kuv hnubnyoog muaj ib puas nees nkaum xyoo, kuv ua tsis taus nej tus thawj mus ntxiv lawm. Dua li ntawd, tus TSWV hais rau kuv hais tias, kuv yuav tsis tau hla tus Dej Yauladees mus rau sab tid ub. Tus TSWV uas yog nej tus Vajtswv yuav mus ua nej ntej thiab nws yuav tua txhua haivneeg uas nyob tid, nej thiaj yuav ntaus tau lawv lub tebchaws rau nej nyob; txij no mus Yausuas yuav ua nej tus thawjcoj raws li tus TSWV tau hais tseg lawm. Tus TSWV yuav ua rau cov neeg uas nyob tid puastsuaj, ib yam li nws tau ua rau Xihoos thiab Aunkas uas ua vajntxwv kav cov Amaules lub tebchaws puastsuaj tas. Tus TSWV yuav pub kom nej mus tua yeej cov neeg ntawd, thiab nej yuav tsum muab lawv tua kom tuag tas raws li tej lus uas kuv hais rau nej lawm. Nej yuav tsum ua siab tawv thiab nyob khov kho tsis txhob ntshai cov neeg ntawd. Tus TSWV uas yog nej tus Vajtswv yuav nrog nraim nej, nws yuav tsis ncaim nej lossis tso nej tseg li.” Tom qab ntawd, Mauxes hu Yausuas los cuag nws, thiab nws hais rau Yausuas tabmeeg cov Yixalayees hais tias, “Koj cia li ua siab tawv tsis txhob ntshai; koj yog tus yuav coj cov neeg no mus tua lub tebchaws uas tus TSWV tau coglus tseg rau lawv cov yawgkoob lawm. Tus TSWV yuav mus ua koj ntej thiab nrog nraim koj. Nws yuav tsis ncaim koj lossis tso koj tseg; koj tsis txhob poob siab lossis ntshai.” Mauxes sau Vajtswv tej Kevcai tseg thiab muab rau cov povthawj uas saib lub Phijxab uas ntim Vajtswv tej lus cog tseg, thiab cov Yixalayees tej thawjcoj. Mauxes hais rau lawv hais tias, “Xya lub xyoo twg uas yog txwm rau xyoo xuam nujnqis, nej cia li nyeem phau ntawv no rau cov Yixalayees sawvdaws mloog, thaum nej ua Kevcai nyob Tsev Pheebsuab. Thaum cov Yixalayees tuaj ua ke rau ntawm qhov chaw pehawm tus TSWV uas yog nej tus Vajtswv, nej cia li nyeem rau sawvdaws mloog. Nej cia li hu sawvdaws, tsis hais pojniam txivneej, tus hlob tus yau thiab lwm haivneeg uas nrog nej nyob tuaj huv tibsi; sawvdaws thiaj hnov thiab hwm tus TSWV uas yog nej tus Vajtswv thiab muab siab npuab ua raws li nws tej lus. Yog nej ua li ntawd, nej tej xeebntxwv uas tsis tau hnov dua tus TSWV uas yog nej tus Vajtswv tej Kevcai thiaj tau hnov thiab paub mloog tus TSWV lus mus tas lawv simneej uas nyob hauv lub tebchaws uas nej yuav hla tus Dej Yauladees mus tua thiab txeeb nyob ntawd.” Tom qab ntawd tus TSWV hais rau Mauxes hais tias, “Koj yuav ua neej nyob tsis ntev lawm. Koj cia li hu Yausuas tuaj cuag koj, thiab coj nws mus rau hauv kuv lub Tsevntaub sib ntsib, kuv yuav qhia nws.” Ces Mauxes thiab Yausuas txawm mus rau hauv tus TSWV lub Tsevntaub sib ntsib, thiab tus TSWV los rau nkawd pom nyob hauv tauv huab ntawm lub qhovrooj Tsevntaub. Tus TSWV hais rau Mauxes hais tias, “Tshuav tsis ntev koj yuav tuag, thaum koj tuag lawm cov Yixalayees yuav tsis muab siab npuab kuv; lawv yuav tsis ua raws li tej lus uas kuv hais rau lawv. Lawv yuav tso kuv tseg thiab mus pe lwm haivneeg tej vajtswv hauv lub tebchaws uas kuv yuav muab rau nej nyob. Thaum muaj tej no tshwm lawm, kuv yuav chim rau lawv; kuv yuav muab lawv tso tseg, thiab lawv yuav raug kev puastsuaj. Yuav muaj ntau yam kev siv kev npog los raug lawv, thaum ntawd lawv yuav paub hais tias qhov uas lawv raug tej ntawd, vim kuv uas yog lawv tus Vajtswv tsis nrog lawv nyob lawm. Thaum ntawd, kuv yuav tsis pab lawv, rau qhov lawv mus ua kev phem kev qias thiab mus pe luag tej vajtswv lawm. “Koj cia li sau zaj nkauj no tseg thiab qhia rau cov Yixalayees thiaj muaj lus kom lawv tej kev txhaum. Kuv yuav coj lawv mus rau hauv lub tebchaws uas av rog thiab zoo qoob uas kuv tau coglus tseg rau lawv cov yawgkoob lawm. Lawv yuav muaj noj muaj haus txaus thiab nyob tso siab lug hauv lub tebchaws ntawd. Tiamsis lawv yuav ntxeev siab rau kuv thiab mus pe luag tej vajtswv. Lawv yuav tso kuv tseg thiab tsis ua raws li kuv tej lus; yuav muaj ntau yam kev siv kev npog los raug lawv, tiamsis lawv tej xeebntxwv tseem yuav hu zaj nkauj no tawmtsam lawv. Txawm yog kuv tsis tau coj lawv mus nyob hauv lub tebchaws uas kuv coglus yuav muab rau lawv los kuv twb paub lawv lub siab lawm.” Hnub ntawd Mauxes txawm sau ib zaj nkauj thiab qhia rau cov Yixalayees. Tom qab ntawd tus TSWV hais rau Noos tus tub Yausuas hais tias, “Koj cia li ua siab tawv qhawv tsis txhob ntshai. Koj yuav ua tus coj cov Yixalayees mus nyob hauv lub tebchaws uas kuv tau coglus tseg yuav muab rau lawv, thiab kuv yuav nrog nraim koj.” Mauxes sau Vajtswv tej kevcai rau hauv ntawv tseg, nws sau txhua nqe tsis tseg ib nqe li. Thaum nws sau tiav lawm, nws hais rau cov povthawj saib lub Phijxab uas ntim Vajtswv tej lus cog tseg hais tias, “Nej cia li coj phau ntawv uas yog Vajtswv tej Kevcai no mus tso rau ib sab ntawm lub Phijxab uas ntim tus TSWV uas yog nej tus Vajtswv tej lus cog tseg, cia nyob ntawd ua timkhawv kom nws haivneeg. Kuv paub hais tias, lawv yog neeg tawv ncauj thiab ntxeev siab. Thaum kuv tseem ua neej nyob lawv twb ntxeev siab thiab tawmtsam tus TSWV ntau zaus lawm, tom qab kuv tuag lawm ntshai lawv hajyam yuav ntxeev siab ntxiv. Nej cia li hu cov thawjcoj ntawm txhua xeem thiab cov nomtswv tuaj cuag kuv, kuv yuav qhia tej lus no rau lawv; kuv yuav thov lub ntuj lub teb ua timkhawv tawmtsam lawv tej kev txhaum. Kuv paub hais tias thaum kuv tuag lawm, cov Yixalayees yuav ua kev phem kev qias thiab tsis kam ua raws li tej uas kuv twb qhia rau lawv lawm. Muaj ib hnub lawv yuav raug kev siv kev npog, rau qhov lawv txhob txwm ua tej uas tus TSWV txwv tsis pub lawv ua, lawv ua rau tus TSWV chim heev.” Tom qab ntawd Mauxes nyeem tagnrho zaj nkauj rau cov Yixalayees mloog: “Lub ntuj mloog kuv tej lus, lub ntiajteb hnov kuv hais. Kuv tej lus qhia yuav poob los ib yam li nag thiab teev ib yam li lub lwg dej rau hauv ntiajteb. Kuv tej lus yuav poob ib yam li los nag tshauv rau tej qoobloo, thiab ib yam li kob nag los rau saum tej nroj tsuag. Kuv yuav qhuas tus TSWV lub npe, thiab nws haivneeg yuav qhuas nws lub hwjchim uas loj kawg nkaus. “Tus TSWV yog lub pobzeb uas tiv thaiv nej, nws yog tus uas zoo kawg nkaus, tej uas nws ua yeej ncaj ncees; Nej tus Vajtswv yog tus ncaj thiab tseeb; nws ua qhov yog thiab qhov tseeb xwb. Tiamsis nej ua tsis ncaj, tsis tsimnyog nej ua nws haivneeg, nej yog haivneeg txhaum thiab dag. Cov neeg ruam thiab tsis txawj xav, puas tsimnyog nej ua li no rau tus TSWV? Nws tsis yog nej Txiv, nws tsis yog tus tsim nej, thiab nws tsis yog tus uas ua rau nej ciaj ua ib haivneeg los? “Nco ntsoov tej xwmtxheej yav tas los, thiab xav txog tej neeg ntau tiam thaum ub; cia li nug nej txiv kom qhia nej, saib muaj dabtsi tshwmsim, cia li nug tej laus lawv yuav piav yav tas los rau nej mloog. Tus TSWV uas muaj hwjchim loj kawg nkaus faib tebchaws rau txhua haivneeg, nws kom nyias nyob muaj nyias ciam raws li tej haivneeg uas muaj coob lossis muaj tsawg, tiamsis nws xaiv Yakhauj cov xeebntxwv ua nws haivneeg. “Nws pom lawv mus mus los los tom tiaj suabpuam uas qhuav qhawv thiab cua ntsawj nrov vwg; Tus TSWV hlub thiab tsomkwm lawv ib yam li nws txuag nws lub qhovmuag. Tus TSWV tsomkwm tsis pub cov Yixalayees poob, ib yam li tus dav qhia nws tej menyuam ya, nws muab nws ob phab tis txais tsis pub cov menyuam poob, Tus TSWV tib leej coj nws haivneeg, nws tsis yuav lwm haivneeg tus vajtswv pab. “Nws cia lawv kav tej qhov chaw siab, lawv yuav tau noj tej qoobloo hauv lawv tej liaj tej teb. Lawv yuav tau haus tej zib ntab ntawm tej pobtsuas; thiab lawv tej txiv ntoo roj yuav txi ncw ntawm thaj av uas muaj pobzeb. Lawv tej nyuj tej tshis yuav muaj kua mis ntau; lawv muaj tej yaj, tej tshis thiab tej nyuj, tej qib thiab tej cawv txiv hmab uas zoo kawg nkaus. “Tus TSWV haivneeg npluanuj, tiamsis lawv yog neeg ntxeev siab; lawv rog vim lawv tau noj tau haus tsau npo. Lawv tsis lees paub Vajtswv tus uas tsim lawv, thiab lawv tso lawv tus cawmseej uas muaj hwjchim tseg. Lawv pe mlom ua rau tus TSWV khib lawv heev, lawv ua kev phem kev qias ua rau tus TSWV npautaws rau lawv. Lawv tua tsiaj fij rau tej vajtswv uas tsis yog Vajtswv, yog tej vajtswv uas lawv cov yawgkoob tsis tau pe dua, tej dab ntawd cov Yixalayees tsis coj thiab tsis tau pehawm dua li. Lawv tsis nco qab lawv tus Vajtswv, tus cawmseej uas muaj hwjchim, thiab tus uas pub txojsia rau lawv lawm. “Thaum tus TSWV pom tej no, nws npautaws kawg li, nws thiaj tso nws tej tub tej ntxhais tseg. Tus TSWV hais tias, ‘Kuv yuav tsis pab lawv lawm,’ ‘kuv yuav saib puas muaj xwm dabtsi los raug lawv, lawv yog neeg tawv ncauj, tsis muab siab npuab kuv. Kuv chim rau lawv vim lawv tej mlom, lawv pe tej vajtswv uas tsis yog Vajtswv ua rau kuv khib. Kuv yuav tso ib pab neeg uas tsis muaj tebchaws tuaj zes kom lawv chim; thiab kuv yuav tso ib haivneeg ruam tuaj ua kom lawv khib. Kuv txojkev chim yuav cig ib yam li nplaim taws thiab yuav kub txhua yam uas nyob hauv ntiajteb. Cov nplaim taws yuav kub mus kom txog hauv tubtuag teb thiab yuav kub mus ti rau hauv qab tivtxwv roob.’ “‘Kuv yuav tso kev siv kev pog los rau lawv ib yam tas ib yam tuaj, thiab tua kuv tej xubvos tawmtsam lawv. Lawv yuav tuag tshaib thiab tuag mob tuag ntsaj; lawv yuav tuag tas rau tej kab mob phem. Kuv yuav tso tej tsiaj qus los tawmtsam lawv, thiab tso tej nab muaj taug los tom lawv. Yuav muaj neeg raug hniav ntaj tuag pawglug ntawm tej kev; tej neeg uas nyob hauv tsev yuav ntshai ua plhu thimxem tas. Tej tub hluas ntxhais hluas yuav tuag tas; thiab tej menyuam mos lossis tej laus uas dawbhau paug los yuav tuag tas. Kuv yuav ua kom lawv puastsuaj huv tibsi, yuav tsis muaj leejtwg nco txog lawv lawm. Kuv yuav tsis pub lawv cov yeebncuab khav hais tias, lawv tua yeej kuv haivneeg, tiamsis yog kuv ua rau kuv haivneeg puastsuaj xwb.’ “Cov Yixalayees yog ib haivneeg uas tsis txawj xav, lawv tsis muaj tswvyim li. Lawv tsis paub hais tias yog li cas lawv thiaj swb; lawv tsis totaub hais tias vim li cas lawv raug tej ntawd. Vim li cas luag ib leeg tua yeej nej ib txhiab leej, thiab vim li cas luag ob leeg tua yeej nej kaum txhiab leej? Twb yog tus TSWV uas yog lawv tus Vajtswv tso lawv tseg lawm; lawv tus Vajtswv uas muaj hwjchim loj muab lawv cob rau lawv cov yeebncuab. Lawv cov yeebncuab yeej paub hais tias lawv tej vajtswv tsis muaj hwjchim npaum li cov Yixalayees tus Vajtswv. Lawv cov yeebncuab ua kev phem kev qias ib yam li cov neeg hauv lub nroog Xaudoos thiab lub nroog Kaumaulas, ib yam li tsob txiv hmab uas txi txiv iab lom neeg tuag, ib yam li cov cawv uas muab taug nab ua. “Tus TSWV nco ntsoov tej uas lawv cov yeebncuab tau ua tas los; nws tos txog sijhawm, ces nws yuav rau txim rau lawv. Tus TSWV yuav pauj thiab rau txim rau lawv; hnub uas lawv raug kev puastsuaj twb los yuav txog, lub sijhawm ntawd twb los ze lawm. Tus TSWV yuav pab nws haivneeg, thaum nws pom lawv qaug zog. Nws yuav hlub cov uas ua nws tes haujlwm, thaum nws pom lawv coogtxuj lawm. Thaum ntawd tus TSWV yuav nug nws haivneeg hais tias, ‘Tej vajtswv uas nej cia siab rau nyob qhov twg lawm? Nej muab tej tsiaj uas nej tua fij tej roj coj mus pub rau tej vajtswv ntawd noj, thiab muab cawv txiv hmab fij rau tej vajtswv ntawd. Cia li hais kom tej vajtswv ntawd pab nej, thiab kom lawv cia li los cawm nej. “ ‘Kuv tib leeg xwb thiaj yog Vajtswv, tsis muaj dua lwm tus vajtswv lawm. Kuv ua kom neeg tuag thiab kuv pub tau txojsia, kuv ua kom nqaij to thiab kho tau kom zoo. Tsis muaj leejtwg txwv tau tej uas kuv ua ntawd li. Kuv yog Vajtswv tus uas muaj sia nyob, kuv tsa tes coglus tseg hais tias, kuv yuav hov kuv rab ntaj kom ci nplas, thiab txiav txim kom ncaj ncees. Kuv yuav ua pauj rau kuv cov yeebncuab thiab rau txim rau cov uas ntxub kuv. Kuv cov xubvos yuav lo lawv tej ntshav, thiab kuv yuav muab ntaj tua txhua tus uas tawmtsam kuv. Kuv yuav tsis tseg cov uas tuaj tawmtsam kuv ib tug li; txawm yog cov uas raug mob thiab cov uas nyob hauv tsev lojcuj los yuav tuag tas.’ “Txhua haivneeg thoob qab ntuj, nej cia li qhuas tus TSWV haivneeg, tus TSWV yuav rau txim rau txhua haivneeg uas tuaj tua nws haivneeg. Nws yuav ua pauj rau nws cov yeebncuab thiab zam txim rau nws haivneeg.” Mauxes thiab Noos tus tub Yausuas nyeem zaj nkauj no, cov Yixalayees txhua tus thiaj hnov. Thaum Mauxes qhia Vajtswv tej lus rau sawvdaws mloog tas lawm, Mauxes hais tias, “Nej yuav tsum ua raws li tej lus uas hnub no kuv qhia rau nej lawm. Nej yuav tsum qhia tej lus no rau nej tej menyuam, lawv thiaj muab siab npuab thiab ua raws li Vajtswv tej lus qhia no txhua lo huv tibsi. Tej lus ntawd tsis yog tej uas tsis muaj hauvpaus hauvntsis, tiamsis yog tej uas cawm tau nej txojsia. Nej yuav tsum coj raws li ntawd, nej thiaj muaj sia nyob ntev hauv lub tebchaws uas nej tabtom yuav hla tus Dej Yauladees mus tua thiab nyob ntawd.” Hnub ntawd tus TSWV hais rau Mauxes hais tias, “Koj cia li nce mus rau saum tej Roob Anpalees hauv tebchaws Mau-am uas saib ntsoov rau tim lub nroog Yelikaus, thiab nce mus rau saum lub ncov Roob Nenpaus, saib mus rau tim tebchaws Kana-as uas kuv yuav muab rau cov Yixalayees nyob. Koj yuav tuag rau saum lub roob ntawd ib yam li koj tus tijlaug Aloos tuag rau saum lub Roob Haules, rau qhov neb tsis mloog kuv lus tabmeeg cov Yixalayees, thiab thaum nej nyob ntawm cov Qhovdej Melinpas uas ze lub nroog Kades hauv lub tiaj suabpuam Xees, neb ua saib tsis taus kuv tabmeeg cov Yixalayees. Koj yuav tuaj deb pom lub tebchaws Kana-as xwb, tiamsis koj yuav tsis tau mus nyob lub tebchaws uas kuv yuav muab rau cov Yixalayees.” Mauxes uas yog Vajtswv tus neeg tej lus foom koob hmoov rau cov Yixalayees ua ntej nws tuag. Tus TSWV nqis saum Roob Xinais los; nws sawv ib yam li lub hnub ci tuaj rau lub tebchaws Edoos, nws tus duab ci saum lub Roob Palas tuaj rau nws haivneeg. Muaj kaum txhiab tus timtswv nrog nws, muaj nplaim taws cig lam lug ntawm nws sab tes xis. Tus TSWV hlub nws haivneeg thiab nws tsomkwm nws cov neeg. Peb thiaj txhos caug ntua ntawm nws kotaw, thiab ua raws li nws tej lus. Peb ua raws li tej Kevcai uas Mauxes qhia rau peb, tej no yog tej uas tseemceeb heev rau peb haivneeg. Tus TSWV yuav ua Vajntxwv kav nws haivneeg Yixalayees thaum lawv txhua xeem thiab cov thawjcoj tuaj sib sau ua ke. Mauxes hais txog xeem Lunpees hais tias: “Txawm yog xeem Lunpees muaj neeg tsawg los thov tsis txhob pub kom tu noob.” Mauxes hais txog xeem Yudas hais tias: “Tus TSWV, thov koj mloog lawv tej lus thov; thov koj sau lawv rov los koom nrog lwm xeem ua ke. Tus TSWV, thov koj tuaj lawv tog thiab pab lawv tawmtsam lawv cov yeebncuab.” Mauxes hais txog xeem Levis hais tias: “Tus TSWV, thov koj qhia xeem Levis uas yog koj cov tubtxib ncaj ncees kom paub txhais lub Ulees thiab lub Thumees. Koj twb sim lawv siab ntawm Maxas thiab koj paub lawv lub siab ntawm lub qhovdej Melinpas lawm.” Lawv muab siab npuab koj heev dua lawv muab siab npuab lawv niam lawv txiv, lawv tej kwvtij, lossis lawv tej menyuam. Lawv mloog koj lus thiab ua raws li koj tej lus cog tseg. Lawv yuav qhia koj haivneeg ua raws li koj tej Kevcai; Lawv yuav tua tsiaj fij rau saum koj lub thaj. Tus TSWV, thov pab kom lawv xeem muaj zog heev; Thov koj txaus siab rau tej haujlwm uas lawv ua. Thov rhuav lawv tej yeebncuab mus dulug; Thov tsis txhob pub cov yeebncuab ntawd sawv taus los tawmtsam lawv. Mauxes hais txog xeem Npeenyamees hais tias: “Xeem no, yog xeem uas tus TSWV hlub thiab tsomkwm; Tus TSWV zov lawv tas hnub tas hmo thiab nrog nraim lawv nyob.” Mauxes hais txog xeem Yauxej hais tias: “Thov tus TSWV foom koob hmoov kom muaj nag los rau lawv lub tebchaws; Thiab muaj dej txheem hauv av tuaj ua rau av noo. Thov tus TSWV foom koob hmoov rau lawv lub tebchaws, kom muaj tshav ntuj ua rau lawv tej txiv hmab txiv ntoo txi ua nrw niab thiab siav raws caij raws nyoog. Thov kom lawv tej toj roob hauv pes uas nyob ibtxhis thaum ub los lawm, muaj txiv hmab txiv ntoo txi puv toj puv pes. Thov kom lawv lub tebchaws muaj ib puas tsav yam zoo, thiab tau tus TSWV uas muaj siab zoo tej koob hmoov; Tus TSWV yog tus hais lus hauv tsob ntoo uas muaj nplaim taws cig. Thov kom xeem Yauxej tau tej koob hmoov no, rau qhov Yauxej yog nws cov kwvtij tus thawjcoj. Yauxej muaj zog ib yam li tus heev nyuj, nws txwm kub yog kub nyujqus. Ib tug kub yog Manaxes uas yog ntau txhiab leej lub zog, ib tug kub yog Efalayees uas yog kaum txhiab leej lub zog. Yauxej siv ob tug kub ntawd nrau lwm haivneeg kom khiav tawm mus, nws raws lawv khiav mus ti qab ntuj kawg.” Mauxes hais txog xeem Xenpuloos thiab xeem Ixakhas hais tias: “Thov kom xeem Xenpuloos kev ua lag ua luam hauv hiavtxwv kom lawv muaj txiag npluanuj; Thiab thov kom xeem Ixakhas muaj txiag npluanuj nyob hauv vaj hauv tsev. Lawv caw lwm haivneeg tuaj rau saum lawv tej roob tua tsiaj fij raws li lawv tej kabke. Lawv muaj txiag npluanuj vim txojkev ua lag ua luam hauv hiavtxwv, thiab raws ntug hiavtxwv.” Mauxes hais txog xeem Khas hais tias: “Ua Vajtswv tsaug uas nws ua rau xeem Khas lub tebchaws nthuav dav. Khas tos luag kev ib yam li tus tsov ntxhuav chua luag npab kom tu, lossis tev luag tawv taubhau yaws hlo. Lawv xaiv lub tebchaws uas zoo tshaj ua lawv tug; Lawv tau tej uas yog cov thawjcoj feem. Thaum cov Yixalayees cov thawjcoj tuaj ua ke, xeem Khas mloog tus TSWV tej lus thiab uas raws li nws tej kevcai.” Mauxes hais txog xeem Das hais tias: “Das yog tus thav tsov ntxhuav uas dhia tej caws qia hauv tebchaws Npasas tuaj.” Mauxes hais txog xeem Nathalis hais tias: “Tus TSWV foom koob hmoov rau Nathalis ntau kawg nkaus; Lawv lub tebchaws txij ntua ntawm hiavtxwv Kalilais mus ti nkaus sab qabteb.” Mauxes hais txog xeem Aseles hais tias: “Aseles tau koob hmoov ntau dua lwm xeem huv tibsi. Thov kom nws cov kwvtij hlub nws tshaj lwm xeem, thiab thov kom nws lub tebchaws muaj txiv ntoo roj nplua mias. Thov kom nws tej nroog muaj roojvag hlau thaiv khov kho, thiab thov kom nws nyob tso siab lug mus ibtxhis.” Cov Yixalayees, tsis muaj lwm tus vajtswv zoo npaum li nej tus Vajtswv, Nws mus saum nruab ntug, nws lub hwjchim ci ntsa iab, nws nqis nroos saum cov huab los cawm kom nej dim. Vajtswv yog tus uas ibtxwm tsomkwm nej; nws ob txhais npab puag rawv nej mus ibtxhis. Nws ntiab nej tej yeebncuab khiav tawm ntawm nej mus, thiab nws kom nej ua rau yeebncuab puastsuaj tu noob nrho. Yakhauj cov xeebntxwv thiaj tau nyob kaj siab lug, lawv yuav nyob tso siab plhuav hauv lub tebchaws uas zoo nplej thiab muaj cawv txiv hmab, lub tebchaws ntawd av noo thiab ntsu lwg. Cov Yixalayees, ua cas nej yuav tau zoo ua luaj! Nej yog haivneeg uas tus TSWV cawm dim lawm; tsis muaj ib haivneeg twg uas tau zoo li nej. Tus TSWV yog nej daim thaiv hniav ntaj thiab yog nej nrab ntaj uas pab kom nej kovyeej; Nej tej yeebncuab yuav tsa suab thov kom nej hlub, thiab nej yuav muab lawv tsuj nthi rau hauv av. Mauxes tawm hauv lub tiaj nrag Mau-am mus rau saum Roob Nenpaus, thiab nws nce mus txog rau saum lub ncov Roob Pinkas uas nyob sab hnubtuaj ntawm lub nroog Yelikaus; thaum Mauxes nce mus txog saud lawm, tus TSWV kom nws tsa qhovmuag saib thoob plaws lub tebchaws. Nws pom lub tebchaws Nkile-as thoob plaws mus ti nkaus lub nroog Das; nws ntsia pom tagnrho tej cheebtsam uas Nathalis, Efalayees, Manaxes thiab Yudas nyob mus rau sab hnubpoob ti nkaus rau hiavtxwv Meditelanes; nws pom tagnrho tebchaws Yudas sab qabteb, thiab lub tiaj nrag txij ntua ntawm lub nroog Xau-as mus ti nkaus lub nroog Yelikaus uas muaj toovlaj ntau heev. Tus TSWV hais rau Mauxes hais tias, “Lub tebchaws no yog lub uas kuv tau coglus tseg rau Anplahas, Ixaj thiab Yakhauj hais tias kuv yuav muab rau lawv cov xeebntxwv. Kuv pub rau koj pom, tiamsis tsis pub koj mus nyob.” Tus TSWV tus tubtxib Mauxes, thiaj tuag rau hauv tebchaws Mau-am, raws li tus TSWV tau hais tseg lawm. Tus TSWV muab Mauxes faus rau hauv ib lub hav hauv tebchaws Mau-am uas nyob ncaj lub nroog Npepe-aus, tiamsis txij thaum ntawd los txog niaj hnub no yeej tsis muaj leejtwg paub hais tias tus TSWV muab Mauxes lub cev coj mus faus rau qhov twg lawm. Thaum Mauxes tuag, nws hnubnyoog muaj ib puas nees nkaum xyoo; txawm yog nws laus heev los nws tseem muaj zog thiab qhovmuag pom kev zoo. Cov Yixalayees quaj nyiav Mauxes tau peb caug hnub hauv lub tiaj nrag Mau-am. Noos tus tub Yausuas muaj tswvyim, Mauxes thiaj tsa nws ua tus hloov Mauxes chaw. Cov Yixalayees mloog Yausuas lus raws li tej lus uas tus TSWV kom Mauxes qhia rau lawv. Txij thaum ntawd los cov Yixalayees tsis muaj ib tug cev Vajtswv lus zoo npaum li Mauxes uas tus TSWV nrog nws tham tim ntsej tim muag li lawm. Tsis muaj ib tug cev Vajtswv lus twg uas ua tau tej txujci tseemceeb thiab xav tsis thoob ib yam li tej uas tus TSWV kom Mauxes ua rau Falaus, nws cov nomtswv thiab nws cov pejxeem hauv lub tebchaws Iziv pom. Tsis muaj ib tug cev Vajtswv lus twg uas ua tau tej txujci tseemceeb thiab txaus ntshai ib yam li tej uas Mauxes ua rau cov Yixalayees pom li lawm. Thaum Mauxes uas yog tus TSWV tus tubtxib tuag lawm, tus TSWV hais rau Noos tus tub Yausuas uas yog tus pab Mauxes hais tias: “Kuv tus tubtxib Mauxes tuag lawm. Nimno koj thiab cov Yixalayees cia li sawbsim hla tus Dej Yauladees mus rau lub tebchaws uas kuv yuav muab rau lawv. Raws li kuv tau coglus rau Mauxes lawm hais tias, txhua thaj av uas nej txhais kotaw mus tsuj, kuv yuav muab rau nej. Nej tus ciamteb sab qabteb txij ntua ntawm tiaj suabpuam, sab qaumteb txij ntua ntawm Roob Lenpanoos; sab hnubtuaj txij ntua ntawm tus dej Efalates, thiab sab hnubpoob tagnrho tebchaws Hitis mus ti nkaus rau Hiavtxwv Meditelanes. Yausuas, thaum koj tseem ua neej nyob yuav tsis muaj leejtwg tawmtsam yeej koj. Kuv yuav nrog nraim koj ib yam li kuv nrog Mauxes. Kuv yuav nrog nraim koj tsis tso koj tseg. Koj ua siab tawv qhawv tsis txhob ntshai, rau qhov koj yog tus yuav coj cov neeg no mus nyob lub tebchaws uas kuv coglus yuav muab rau lawv cov yawgkoob. Koj yuav tsum ua siab tawv qhawv tsis txhob ntshai leejtwg thiab coj raws li tej kevcai uas kuv tus tubtxib Mauxes muab rau koj lawm. Koj tsis txhob tso ib nqe tseg li, koj thiaj yuav kovyeej txhua qhov chaw uas koj mus. Thaum sawvdaws tuaj ua ke pehawm kuv, yuav tsum muaj neeg nyeem kuv phau Kevcai rau sawvdaws mloog. Koj yuav tsum niaj hnub niaj hmo kawm thiab ua raws li tej lus ntawd, koj tes haujlwm thiaj yuav tiav thiab vammeej. Koj yuav tsum nco ntsoov tej uas kuv hais rau koj lawm, koj ua siab tawv qhawv tsis txhob ntshai, tsis txhob txhawj, thiab tsis txhob poob siab, rau qhov kuv yog tus TSWV uas yog koj tus Vajtswv, kuv yuav nrog nraim koj txhua qhov uas koj mus.” Yausuas hais rau cov thawjcoj hais tias, “Nej cia li mus thoob plaws hauv lub yeej thiab hais kom cov pejxeem npaj zaub mov kom txaus, tshuav peb hnub saum no nej yuav hla tus Dej Yauladees mus rau hauv lub tebchaws uas tus TSWV uas yog nej tus Vajtswv yuav muab rau nej.” Yausuas hais rau xeem Lunpees, xeem Khas thiab ib nrab xeem Manaxes hais tias, “Nej yuav tsum nco ntsoov tej lus uas tus TSWV tus tubtxib Mauxes qhia rau nej lawm hais tias, tus TSWV uas yog nej tus Vajtswv yuav muab lub tebchaws ntawm tus Dej Yauladees sab hnubtuaj ua nej tug. Cia nej pojniam, menyuam thiab tej tsiaj txhu nyob ntawm no, tiamsis nej cov tubrog cia li coj tej cuabyeej ua rog hla dej ua nej cov kwvtij Yixalayees ntej mus pab lawv ntaus tebchaws mus txog thaum lawv tua yeej thiab txeeb tau lub tebchaws ntawm tus Dej Yauladees sab hnubpoob uas tus TSWV uas yog nej tus Vajtswv muab pub rau lawv tso. Thaum tus TSWV pub rau cov Yixalayees txhua xeem tau nyob kaj siab lug lawm, nej mam li rov qab los rau hauv nej lub tebchaws uas nyob ntawm tus Dej Yauladees sab hnubtuaj uas tus TSWV tus tubtxib Mauxes faib rau nej lawm.” Lawv teb Yausuas hais tias, “Peb yuav ua txhua yam raws li koj hais thiab yuav mus txhua qhov uas koj txib peb mus. Peb yuav mloog koj lus ib yam li peb mloog Mauxes lus, thiab peb thov tus TSWV uas yog koj tus Vajtswv nrog nraim koj ib yam li nws nrog Mauxes. Yog leejtwg tawv nyom tsis ua raws li koj hais, peb yuav muab tus ntawd tua povtseg. Txawm li cas los xij, koj yuav tsum ua siab tawv qhawv tsis txhob ntshai li!” Tom qab ntawd, Yausuas tso ob tug neeg tawm hauv lawv lub yeej uas nyob ntawm tiaj ntoo Akaxias mus soj lub nroog Yelikaus hauv tebchaws Kana-as twjywm. Thaum nkawd mus txog hauv lub nroog Yelikaus lawm, nkawd mus so hauv ib tug niamntiav uas npe hu ua Lahaj lub tsev. Tus vajntxwv uas kav lub nroog Yelikaus hnov hais tias, hmo ntawd muaj ob tug neeg Yixalayees tuaj rau hauv lawv lub nroog lawm, yog tuaj soj tebchaws, vajntxwv txawm tso neeg mus hais rau Lahaj hais tias: “Koj cia li coj ob tus txivneej uas tuaj so hauv koj tsev tawm los rau peb, rau qhov nkawd tuaj soj peb lub tebchaws.” Thaum vajntxwv cov neeg ntawd tawm mus dhau lawm, luag txawm kaw roojvag. Lawv nrhiav mus ti nkaus nram ntug Dej Yauladees ntu uas neeg pheej hla mus los, los tsis pom li. Thaum nkawd tsis tau pw, Lahaj nce mus hais rau nkawd hais tias, “Kuv paub hais tias, tus TSWV twb muab lub tebchaws no rau nej lawm. Tej neeg uas nyob hauv lub tebchaws no poob siab thiab ntshai nej kawg li. Peb hnov hais tias thaum nej los nram tebchaws Iziv los, tus TSWV ua rau Hiavtxwv Liab qhuav qhawv ua kev rau nej mus, thiab peb tseem hnov hais tias, thaum nej los txog ntawm tus Dej Yauladees sab hnubtuaj, nej ntes tau Xihoos thiab Aunkas uas yog cov Amaules ob tug vajntxwv tua povtseg lawm. Thaum peb hnov tej xwm no, peb txhawj thiab ntshai kawg li; peb txhua tus qaug zog tas vim tej uas nej ua ntawd. Tus TSWV uas yog nej tus Vajtswv yog tus uas kav saum ntuj thiab hauv ntiajteb no. Muaj Vajtswv saib ntsoov peb, yog li ntawd neb yuav tsum coglus rau kuv hais tias, nej yuav ua zoo rau kuv thiab kuv tej kwvtij neejtsa ib yam li kuv twb tau ua zoo rau neb lawm, thov neb muab ib yam khoom ua timkhawv rau kuv, kuv thiaj yuav ntseeg neb. Thov neb coglus rau kuv hais tias, nej yuav pab kuv niam kuv txiv, kuv cov nus, kuv tej vivncaus thiab lawv tsevneeg kom dim, tsis txhob cia luag tua peb!” Ob tug txivneej ntawd hais rau Lahaj hais tias, “Yog wb tsis ua raws li wb hais, thov kom Vajtswv rho wb txojsia! Yog koj tsis qhia qhov uas wb tuaj no rau leejtwg paub li, thaum tus TSWV muab lub tebchaws no rau peb lawm, wb yuav ua raws li tej lus uas wb tau cog tseg rau koj.” Lahaj lub tsev nyob npuab tus ntsa yeej uas thaiv lub nroog, nws tso hlua dauv ntawm qhovrai raws tus ntsa yeej rau sab nraud rau nkawd nqis khiav lawm. Nws hais rau nkawd hais tias, “Neb cia li khiav mus nkaum peb hnub rau pem tej roob, kom vajntxwv cov neeg uas nrhiav neb rov los tas tso. Neb yuav mus qhov twg los neb mam li mus, lawv thiaj tsis pom neb.” Ob tug txivneej ntawd hais rau Lahaj hais tias, “Wb yuav ua raws li koj kom wb coglus rau koj. Koj yuav tsum tau ua li no. Thaum peb tuaj tua nej lub tebchaws, koj yuav tsum muab ib pluaj ntaub liab khi rau ntawm lub qhovrai uas koj tso hlua rau wb nqis khiav. Koj cia li coj koj niam koj txiv, koj cov nus, cov vivncaus thiab lawv tsevneeg tuaj nyob hauv koj tsev. Yog leejtwg tawm hauv koj tsev mus rau sab nraud, nws raug tua tuag los nws tsuas ris nws lub txim xwb, wb yuav tsis nrog paub; tiamsis yog cov neeg uas nyob hauv koj tsev raug tua tuag, wb yuav ris lub txim ntawd. Yog hais tias koj qhia tej uas wb tuaj no rau luag paub lawm, wb yuav tsis ua raws li tej lus uas koj kom wb coglus rau koj.” Lahaj pom zoo ua raws li nkawd hais, nws thiaj kom nkawd tawm mus. Thaum nkawd mus lawm, nws txawm muab ib pluaj ntaub liab khi rau ntawm qhovrai. Nkawd txawm khiav mus nkaum pem roob; mas vajntxwv cov neeg mus nrhiav nkawd rau txhua qhov tau peb hnub los nrhiav tsis tau li. Lawv thiaj rov los rau hauv Yelikaus lawm. Tom qab ntawd, nkawd mam li nqis saum roob los hla tus Dej Yauladees mus cuag Yausuas. Nkawd piav tej xwm ntawd huv tibsi rau Yausuas mloog, thiab nkawd hais ntxiv hais tias, “Wb paub tseeb hais tias tus TSWV twb muab lub tebchaws no rau peb lawm. Cov neeg uas nyob hauv lub nroog ntawd ntshai peb kawg li.” Hnub tom qab thaum sawv ntxov Yausuas thiab cov Yixalayees txawm tawm hauv lawv lub yeej ntawm tiaj ntoo Akaxias mus rau nram ntug Dej Yauladees, lawv tsuam yeej rau ntawd npaj yuav hla dej. Tom qab ntawd peb hnub, cov thawjcoj ncig mus thoob plaws hauv lub yeej, thiab hais rau cov pejxeem hais tias, “Thaum nej pom cov povthawj kwv lub Phijxab uas tim tus TSWV uas yog nej tus Vajtswv Tej Lus Cog Tseg mus lawm, nej cia li thiaj cuabtam raws lawv qab, nej thiaj paub kev mus, rau qhov nej tsis tau mus dua txojkev ntawd ib zaug li. Tiamsis nej tsis txhob mus ze lub Phijxab; nej yuav tsum mus kom nrug deb kwvyees li ob txhiab tshim.” Yausuas hais rau cov neeg hais tias, “Nej cia li tu nej lub siab, rau qhov tagkis tus TSWV yuav ua tej txujci tseemceeb rau nej pom.” Tom qab ntawd, Yausuas hais kom cov povthawj kwv lub Phijxab uas tim Vajtswv Tej Lus Cog Tseg mus ua sawvdaws ntej, thiab lawv ua raws li nws hais. Tus TSWV hais rau Yausuas hais tias, “Tej txujci uas hnub no kuv ua yuav ua rau cov Yixalayees hwm hais tias koj yog ib tug neeg tseemceeb, thiab lawv yuav paub hais tias, kuv nrog nraim koj ib yam li kuv nrog Mauxes. Koj cia li hais rau cov povthawj uas kwv lub Phijxab hais tias, thaum lawv mus txog nram ntug Dej Yauladees lawm, lawv yuav tsum mus nres hauv dej tos.” Yausuas hais rau cov neeg hais tias, “Nej cia li txav los ze ntawm no thiab mloog tej lus uas tus TSWV uas yog nej tus Vajtswv hais rau nej. Thaum nej tabtom mus rau hauv lub tebchaws ntawd, tus TSWV yuav ntiab cov Kana-as, cov Hitis, cov Hivis, cov Pelixes, cov Nkinkasis, cov Amaules thiab cov Yenpus tawm ntawm nej hauv ntej mus. Nej thiaj yuav paub hais tias tus Vajtswv uas muaj sia nyob nrog nraim nej thaum lawv kwv tus TSWV uas kav lub ntiajteb no lub Phijxab hla tus Dej Yauladees ua nej ntej. Nimno nej cia li xaiv cov Yixalayees kaum ob leeg txivneej, ib xeem ib leeg tuaj. Thaum cov povthawj uas kwv tus TSWV uas kav lub ntiajteb no lub Phijxab nqis kiag rau hauv dej lawm, tus Dej Yaudalees yuav faib hlo ua kev rau lawv mus.” dej txawm teev tsis ntws. Tus dej ntawd yav hauv dej, puv mus txog ntua pem lub nroog Adas uas nyob ntawm Xalethas ib sab, thiab tus dej ntawd yav qabdeg nqhuab mus ti nkaus nram Hiavtxwv Tuag. Cov neeg thiaj hla tau mus rau tim lub nroog Yelikaus. Cov povthawj kwv tus TSWV lub Phijxab mus sawv hauv plawv tus Dej Yauladees uas nqhuab lawm, tos txog thaum cov neeg mus dhau rau sab tid tas huv tibsi lawm. Thaum cov neeg mus dhau tus Dej Yauladees rau sab tim ub lawm, tus TSWV hais rau Yausuas hais tias, “Koj cia li xaiv cov Yixalayees kaum ob leeg, ib xeem ib leeg, thiab kom lawv ib leeg khaws ib lub pobzeb hauv plawv Dej Yauladees, ntawm thaj chaw uas cov povthawj sawv los tso rau ntawm thaj chaw uas hmo no nej yuav mus tsuam chaw so.” Yausuas hu kaum ob leeg uas nws twb xaiv tau ntawd los cuag nws, thiab nws hais rau lawv hais tias, “Nej cia li mus rau hauv tus Dej Yaudalees, ntawm tus TSWV uas yog nej tus Vajtswv lub Phijxab hauv ntej. Nej ib leeg khaws ib lub pobzeb kwv saum xubpwg los rau cov Yixalayees ib xeem ib lub. Cov pobzeb ntawd yuav ua lub cim rau cov neeg nco txog tej uas tus TSWV tau ua los lawm. Yav tom ntej yog nej cov menyuam nug nej hais tias, ‘Pawg pobzeb no piv txog dabtsi?’ ces nej yuav tsum qhia rau lawv hais tias, thaum ub cov povthawj kwv tus TSWV lub Phijxab los hla tus Dej Yaudalees, tus dej txawm teev tsis ntws. Cov pobzeb no yuav ua cim rau cov Yixalayees nco ntsoov txog tej xwm uas muaj rau ntawm thaj chaw no mus tas lawv simneej li.” Lawv txawm mus ua raws li Yausuas hais rau lawv. Lawv kwv kaum ob lub pobzeb hauv plawv Dej Yaudalees los, ib lub rau ib xeem, coj los tso rau ntawm qhov chaw uas lawv tsuam yeej, raws li tus TSWV qhia rau Yausuas lawm. Yausuas muab dua kaum ob lub pobzeb teeb rau hauv plawv Dej Yaudalees ntawm qhov chaw uas cov povthawj kwv lub Phijxab los sawv. (Niaj hnub nimno cov pobzeb tseem nyob hauv plawv dej.) Cov povthawj sawv hauv plawv tus Dej Yaudalees mus txog thaum lawv ua txhua yam tiav tas raws li tus TSWV kom Yausuas hais rau sawvdaws lawm. Tej no muaj raws li Mauxes hais tseg. Cov neeg mus ceev nrooj tas rau sab ntug dej tim ub. Thaum sawvdaws mus dhau tas rau sab tim ub lawm, cov povthawj uas kwv tus TSWV lub Phijxab mam los mus ua lawv ntej. Cov txivneej uas yog xeem Lunpees, xeem Khas thiab ib nrab ntawm xeem Manaxes, nqa lawv tej cuabyeej ua rog hla mus ua sawvdaws ntej raws li Mauxes twb hais tseg rau lawv lawm. Suav tagnrho cov tubrog ntawd muaj kwvyees li plaub caug txhiab leej uas npaj rawv mus ua rog, tus TSWV saib ntsoov lawv hla dej mus rau hauv lub tiaj uas nyob ze lub nroog Yelikaus. Qhov uas hnub ntawd tus TSWV ua, ua rau cov Yixalayees sawvdaws hwm hais tias, Yausuas yog ib tug neeg uas tseemceeb. Lawv hwm Yausuas mus tas nws simneej ib yam li lawv hwm Mauxes. Tus TSWV hais rau Yausuas hais tias, “Koj hais kom cov povthawj uas kwv lub Phijxab, cia li tawm hauv tus Dej Yauladees los.” Yausuas ua raws li ntawd, thaum cov povthawj los txog tim ntug dej lawm, dej txawm nphau nphwv los puv nkaus kwj ib yam li qub. Hnub uas lawv hla tus Dej Yauladees, yog lub kaum ib hlis ntuj, hnub xiab kaug thiab lawv los tsuam yeej rau ntawm Nkilenkas uas nyob ntawm lub nroog Yelikaus sab hnubtuaj. Yausuas muab kaum ob lub pobzeb uas lawv khaws hauv tus Dej Yaudalees los teeb ua ib pawg rau ntawm thaj chaw uas lawv so ntawd. Yausuas hais rau cov Yixalayees hais tias, “Yav tom ntej, yog nej tej menyuam nug nej hais tias, ‘Pawg pobzeb no piv txog dabtsi?’ Nej yuav tsum qhia rau nej cov menyuam kom paub txog lub sijhawm uas cov Yixalayees taug kev qhuav qhawv hauv tus Dej Yaudalees los; rau qhov tus TSWV uas yog nej tus Vajtswv ua rau tus Dej Yauladees qhuav ua kev rau nej mus ib yam li thaum ub nws ua rau Hiavtxwv Liab faib hlo ua kev qhuav qhawv rau peb los. Vim muaj tej xwm no, tej neeg uas nyob thoob ntiajteb thiaj paub hais tias tus TSWV yog tus uas muaj hwjchim loj kawg nkaus, thiab nej yuav tsum hwm tus TSWV uas yog nej tus Vajtswv mus ibtxhis.” Thaum cov vajntxwv uas kav cov Amaules uas nyob ntawm tus Dej Yaudalees sab hnubpoob thiab cov vajntxwv uas kav cov Kana-as uas nyob raws ntug Hiavtxwv Meditelanes hnov hais tias, tus TSWV ua rau tus Dej Yauladees faib hlo ua kev qhuav qhawv rau cov Yixalayees mus, lawv ntshai cov Yixalayees thiab poob siab kawg li. Tus TSWV hais rau Yausuas hais tias, “Koj cia li muab zebntais tsoo kom ntse li hniav riam thiab muab cov Yixalayees ua kevcai txiav.” Yausuas thiaj muab cov Yixalayees ua kevcai txiav saum lub Pov Roob uas hu ua lub Pov Roob Kevcai Txiav raws li tus TSWV hais. Yausuas muab lawv cov tub ua kevcai txiav, rau qhov cov menyuam tiam ntawd tseem tsis tau ua kevcai txiav li. Tom qab lawv ua kevcai txiav tas lawm, lawv so mus txog thaum uas lawv tej qhov txhab zoo tas. Tus TSWV hais rau Yausuas hais tias, “Txawm yog nej ua luag qhev thiab poob ntsejmuag thaum nej nyob nram tebchaws Iziv los hnub no kuv pub kom nej rov tau ntsejmuag.” Yog li ntawd, lawv thiaj li tis npe rau thaj chaw ntawd hu ua Nkilenkas, niaj hnub no luag tseem hu lub npe ntawd. Thaum cov Yixalayees tseem nyob hauv Nkilenkas ntawm lub tiaj nrag uas ze lub nroog Yelikaus, lub hlis ntawd hmo kaum plaub thaum yuav tsaus ntuj lawv ua kevcai Hla Dhau. Hnub tom qab yog thawj hnub uas lawv tau noj tej qoobloo uas lawv ua tau hauv tebchaws Kana-as: yog cov ncuav tsis xyaw keeb thiab tej mov kib. Txij hnub ntawd manas tsis poob saum ntuj los, thiab cov Yixalayees tsis tau manas noj li lawm. Xyoo ntawd lawv noj tej qoobloo uas lawv ua tau hauv tebchaws Kana-as lawm xwb. Thaum Yausuas lawv mus ze lub nroog Yelikaus, nws pom ib tug txivneej tuav rawv ib rab ntaj sawv ntawm nws hauv ntej. Yausuas txav zog mus ze thiab nug nws hais tias, “Koj yog peb ib tug tubrog lossis koj yog yeebncuab?” Tus txivneej ntawd teb hais tias, “Kuv tsis yog tog twg tubrog li. Kuv los no yog los ua tus TSWV pab tubrog tus thawj.” Yausuas txhos caug ntua pe thiab hais tias, “Tus tswv, kuv yog koj tus tubtxib, koj xav kom kuv ua dabtsi?” Tus TSWV pab tubrog tus thawj hais rau Yausuas hais tias, “Cia li hle koj nkawm khau, vim thaj chaw uas koj sawv ko yog qhov chaw dawbhuv.” Yausuas txawm ua li nws hais. Vim cov Yixalayees mus ze lub nroog Yelikaus, cov neeg hauv lub nroog thiaj kaw tej roojvag, tsis pub leejtwg tawm lossis mus tau rau hauv lub nroog li. Tus TSWV hais rau Yausuas hais tias, “Kuv yuav muab lub nroog Yelikaus, tus vajntxwv uas kav lub nroog, thiab tej tubrog uas siab tawv cob rau koj tes. Koj thiab koj cov tubrog cia li ncig lub nroog no rau hnub, ib hnub ncig ib lwm. Koj kom xya tus povthawj, ib leeg nqa ib lub xyu mus ua cov povthawj uas kwv lub Phijxab ntej. Hnub xya koj thiab koj cov tubrog mus ncig lub nroog xya lwm, thiab kom cov povthawj tshuab raj tshuab xyu mus ua ntej, thiab koj hais kom lawv tshuab raj tshuab xyu ib zaj ua lub suab nrov ntev loo. Thaum nej hnov lub suab xyu ntawd, nej sawvdaws cia li qw nrov nrov, ces tej ntsa yeej yuav pob zuav pes zog, thaum ntawd nej sawvdaws cia li mus kiag rau hauv lub nroog.” Yausuas thiaj hu cov povthawj los cuag nws, nws hais rau lawv hais tias, “Nej cia li kwv lub Phijxab mus thiab kom xya tus povthawj uas nqa xyu mus ua ntej.” Yausuas hais rau cov tubrog hais tias, “Peb cia li mus ncig lub nroog, cia ib pab tubrog mus ua tus TSWV lub Phijxab ntej.” Yausuas hais rau nws cov tubrog kom tsis txhob qw thiab tsis txhob hais lus mus txog thaum Yausuas kom lawv hais, lawv mam li hais thiab qw. Yausuas kom cov povthawj kwv tus TSWV lub Phijxab mus ncig lub nroog ib lwm rov los so hauv yeej ib hmos. Hnub ob los lawv rov mus ncig lub nroog ib lwm, lawv mam li rov los rau hauv lub yeej. Lawv ua li ntawd tau rau hnub. Hnub xya lawv sawv ntxov mus ncig lub nroog ib yam li txhua hnub, tib hnub ntawd lawv ncig xya lwm. Thaum lawv ncig lwm xya tas, cov povthawj txawm tshuab raj tshuab xyu, thiab Yausuas hais kom nws cov tubrog cia li qw nrov nrov, thiab nws hais tias, “Tus TSWV twb muab lub nroog no rau nej lawm! Nej yuav tsum ua kom txhua yam uas nyob hauv lub nroog no puastsuaj tas, thiaj suav tau hais tias yog muab tej ntawd fij rau tus TSWV. Nej tsuas tseg tus niamntiav uas hu ua Lahaj thiab nws tsevneeg xwb, rau qhov nws tau zais peb ob tug neeg soj tebchaws. Nej tsis txhob yuav ib yam dabtsi uas tus TSWV hais kom muab rhuav kom puastsuaj huv tibsi; yog nej muab tej ntawd los yuav, nej yuav ua rau cov Yixalayees raug kev txomnyem thiab lub yeej yuav puastsuaj. Tej cuabyeej uas yog muab nyiaj, muab kub, muab tooj lossis muab hlau ua, yog tej uas tshwj tseg rau tus TSWV. Nej yuav tsum coj tej ntawd los tso rau hauv tus TSWV lub txhab.” Cov povthawj tshuab raj tshuab xyu. Thaum cov tubrog hnov tej suab xyu, lawv txawm qw nrov nrov, ces lub nroog Yelikaus tej ntsa yeej txawm pob zuav pes zog tas. Cov tubrog txawm nce pes hlo mus rau hauv lub nroog thiab txeeb kiag tau tamsim ntawd. Lawv muab ntaj tua txhua tus neeg hauv lub nroog, tsis hais pojniam txivneej, tus hlob tus yau thiab tua tej nyuj tej yaj, tej neesluav tuag tas huv tibsi. Yausuas hais rau ob tug uas mus soj tebchaws hais tias, “Neb cia li mus rau hauv Lahaj uas yog tus niamntiav lub tsev, coj nws thiab nws tsevneeg txhua tus tawm los, raws li neb tau coglus rau nws lawm.” Yog li ntawd, nkawd thiaj mus coj Lahaj, nws niam nws txiv, nws cov kwvtij thiab cov tubqhe uas nyob hauv nws tsev tawm los, thiab coj lawv los nyob ze cov Yixalayees lub yeej. Ces cov Yixalayees txawm hlawv lub nroog thiab txhua yam uas nyob hauv kub hnyiab tas, tsuas tseg tej cuabyeej uas yog muab nyiaj, muab kub, muab tooj lossis muab hlau ua uas lawv yuav coj los tso rau hauv tus TSWV lub txhab xwb. Vim tus niamntiav Lahaj tau zais ob tug uas Yausuas tso mus soj lub nroog Yelikaus, Yausuas thiaj tsis tua nws, nws niam nws txiv, thiab nws cov kwvtij. (Lahaj cov xeebntxwv tseem nyob hauv tebchaws Yixalayees los txog niaj hnub no.) Thaum ntawd Yausuas coglus samhwm hais tias: “Yog leejtwg tseem rov txhim kho lub nroog Yelikaus no dua, tus ntawd yuav raug tus TSWV foom tsis zoo. Yog leejtwg kho lub nroog no, nws tus tub hlob yuav tuag; Yog leejtwg kho tej roojvag, nws tus tub ntxawg yuav tuag.” Tus TSWV nrog nraim Yausuas, ua rau nws lub koob lub npe nrov ncha moo lug mus thoob lub tebchaws. Tus TSWV txwv tsis pub cov Yixalayees muab ib yam khoom dabtsi uas tus TSWV hais kom muab rhuav kom puastsuaj huv tibsi hauv lub nroog los yuav; tiamsis muaj ib tug txivneej hu ua Akhas tsis mloog tus TSWV lus, yog li ntawd, tus TSWV thiaj chim rau cov Yixalayees. (Akhas yog Kalemis tus tub thiab yog Xanpedis tus xeebntxwv uas yog Zelas cuab kwvtij thiab yog xeem Yudas.) Yausuas tso neeg tawm hauv lub nroog Yelikaus mus soj lub nroog A-is uas nyob ntawm Npethees sab hnubtuaj ze Npethavees, thiab kom lawv mus soj thoob plaws lub tebchaws ntawd. Thaum lawv mus soj thoob lawm, lawv rov los qhia rau Yausuas hais tias, “Lub nroog A-is tsis yog lub nroog loj, tsis txhob cia tagnrho peb cov tubrog mus tua lub nroog ntawd, tsuas tso ob txhiab lossis peb txhiab leej tubrog mus tua xwb.” Yog li ntawd, lawv thiaj tso kwvyees li peb txhiab leej tubrog Yixalayees mus tua, tiamsis lawv swb thiab thim rov los. Cov tubrog hauv lub nroog A-is caum lawv tua ntawm lub roojvag nroog tuaj ti nkaus ntawm thaj chaw uas khawb pobzeb, lawv raug caum tua nqis hav ua rau cov Yixalayees tuag kwvyees li peb caug rau leej. Lawv qaug zog thiab ntshai kawg li. Yausuas thiab cov Yixalayees cov thawjcoj dua lawv tej tsho thiab nyuaj siab kawg, lawv txhos caug khoov ti nkaus hauv av tabmeeg tus TSWV lub Phijxab ib hnub tsaus ntuj, lawv tsuab hmoov av rau saum lawv taubhau qhia hais tias lawv nyuaj siab kawg li. Yausuas hais tias, “Tus TSWV uas kav ib puas tsav yam! Vim li cas koj coj peb hla tus Dej Yauladees los? Puas yog koj coj peb los cob rau cov Amaules txhais tes kom peb raug puastsuaj tas? Ua cas tsis cia peb nyob twjywm sab ntug Dej Yauladees tim ub? Tus TSWV, nimno cov tubrog Yixalayees raug yeebncuab tua swb thim rov los lawm, kuv yuav hais li cas rau lawv? Cov Kana-as thiab tej neeg uas nyob hauv lub tebchaws no yuav hnov tej xwm no. Lawv yuav tuaj vij thiab muab peb txhua tus tua huv tibsi. Yuav ua li cas koj lub npe thiaj tsis raug luag txob thuam?” Tus TSWV hais rau Yausuas hais tias, “Cia li sawv! Ua li cas koj yuav da hauv av li no? Cov Yixalayees ua txhaum! Lawv tsis mloog kuv lus, lawv tsis ua raws li tej lus cog tseg uas kuv kom lawv ua. Lawv tau muab tej khoom uas kuv hais kom muab rhuav kom puastsuaj. Lawv ua tubsab, lawv dag thiab lawv nqa tej khoom ntawd los zais xyaw lawv cov lawm. Twb yog vim li no cov tubrog Yixalayees thiaj tua tsis yeej lawv cov yeebncuab. Lawv swb thiab thim rov qab los, rau qhov lawv raug foom kom puastsuaj lawm. Yog nej tsis muab tej khoom uas kuv hais kom nej tsis txhob muab ntawd povtseg, kuv yuav tsis nrog nej nyob lawm! Koj cia li sawv! Muab cov neeg ua kevcai ntxuav kom huv thiab coj lawv tuaj cuag kuv. Koj hais kom lawv cia li npaj, tagkis tus TSWV uas yog cov Yixalayees tus Vajtswv muaj lus yuav hais rau lawv: ‘Cov Yixalayees, nej muab tej khoom uas kuv kom muab rhuav puastsuaj huv tibsi qee yam lawm! Nej yuav tua tsis yeej nej cov yeebncuab mus txog thaum uas nej muab tej khoom ntawd tshem tawm ntawm nej mus!’ Koj hais rau lawv hais tias, tagkis sawv ntxov lawv txhua xeem yuav tau tuaj sawv rau ntawm hauv ntej ib xeem zuj zus. Kuv hu xeem twg, xeem ntawd sawv los ib cuab zuj zus, kuv hu cuab twg, cuab ntawd sawv los ib tse zuj zus, thiab kuv hu tsev twg, tsev ntawd sawv los ib tug zuj zus. Yog xaiv tau tus twg thiab tej khoom uas nws muab nyob ntawm nws, mas yuav muab tej uas nws nyiag los, nws tej qhov txhia chaw, thiab nws tsevneeg hlawv huv tibsi povtseg, rau qhov nws tsis mloog kuv lus thiab nws ua rau cov Yixalayees poob ntsejmuag.” Hnub tom qab thaum sawv ntxov, Yausuas thiaj coj cov Yixalayees txhua xeem tuaj thiab kom ib xeem zuj zus sawv los rau tom hauv ntej, ces lawv txawm rho ntawv tau xeem Yudas npe. Nws thiaj coj xeem Yudas ib cuab zuj zus los, lawv rho tau cuab Xelas npe. Ces nws coj cuab Zelas ib tse zuj zus los, ces lawv rho tau Xanpedis tsevneeg npe. Nws coj Xanpedis tsevneeg ib tug zuj zus los, lawv rho tau Akhas uas yog Kalemis tus tub lub npe, Akhas yog Xelas tus tub Xanpedis tus xeebntxwv thiab yog xeem Yudas. Yausuas hais rau Akhas hais tias, “Kuv tus tub, koj cia li qhia tseeb rau tus TSWV uas yog cov Yixalayees tus Vajtswv thiab lees koj tej kev txhaum. Nimno koj cia li qhia rau kuv saib koj tau ua dabtsi. Koj tsis txhob zais li.” Akhas teb hais tias, “Muaj tseeb tiag, kuv tau ua txhaum rau tus TSWV uas yog cov Yixalayees tus Vajtswv lawm, kuv tau ua li no: Tej khoom uas peb mus txeeb tau ntawd, kuv pom ib lub tsho Npanpiloos uas zoo nkauj heev, thiab pom tsib choj nyiaj thiab ib daim kub hnyav ib choj tawm. Kuv ntshaw heev, kuv thiaj muab los cia lawm. Kuv muab faus rau hauv kuv lub tsevntaub thiab muab cov nyiaj tso rau hauv qab.” Yog li ntawd, Yausuas thiaj txib ob peb leeg txivneej mus rau hauv Akhas lub tsevntaub thiab pom cov khoom ntawd faus rau hauv, thiab cov nyiaj nyob hauv qab tiag. Lawv nqa cov khoom ntawd hauv Akhas lub tsevntaub los rau Yausuas thiab cov Yixalayees saib thiab muab tso tabmeeg tus TSWV. Yausuas thiab cov Yixalayees txawm coj Akhas, coj cov nyiaj, coj lub tsho, coj daim kub thiab coj nws pojniam menyuam, nws cov nyuj, nws cov neesluav, nws cov yaj, nws cov tshis, nws lub tsevntaub thiab nws tej khoom txhua yam mus rau hauv lub Hav Covnyom. Yausuas hais rau Akhas hais tias, “Ua cas koj yuav coj tej kev ntxhov siab li no los rau peb? Hnub no tus TSWV yuav coj kev covnyom los rau koj!” Ces tagnrho cov Yixalayees txawm muab pobzeb ntaus Akhas, ntaus nws pojniam menyuam tuag tas huv tibsi, thiab muab lawv hlawv nrog nws tej khoom txhua yam kub hnyiab tas dulug. Lawv muab pobzeb pov rau saum Akhas teeb ua ib pawg loj heev, pawg pobzeb ntawd tseem nyob los txog niaj hnub no. Yog li ntawd, thiaj muab thaj chaw ntawd hu ua lub Hav Covnyom. Tus TSWV thiaj tsis chim rau lawv lawm. Tus TSWV hais rau Yausuas hais tias, “Cia li coj tagnrho koj cov tubrog mus tua lub nroog A-is; tsis txhob ntshai lossis qaug zog. Kuv yuav pab kom koj mus tua yeej tus vajntxwv uas kav lub nroog ntawd; kuv twb muab nws lub tebchaws, lub nroog thiab nws cov pejxeem cob rau koj tes lawm. Koj cia li mus tua lub nroog A-is thiab nws tus vajntxwv ib yam li koj ua rau lub nroog Yelikaus thiab tus vajntxwv, tiamsis zaum no koj tseg tej khoom tseemceeb thiab tej tsiaj uas nej txeeb tau los ua koj tug. Nej cia li txhij tubrog thiab nyas twjywm mus tuaj tom lawv qab tua lub nroog.” Yog li ntawd, Yausuas thiaj txhij tubrog mus tua lub nroog A-is. Nws xaiv nws cov tubrog tau peb caug txhiab leej uas khov kho thiab kom lawv mus thaum ib tag hmo, Yausuas hais rau lawv hais tias, “Nej mus nkaum ze rau ntawm ntug nroog, npaj rawv tos sib tua. Kuv thiab cov tubrog uas nrog kuv, peb yuav txeem mus rau hauv lub nroog ua ntej. Thaum cov tubrog hauv lub nroog A-is tawm tuaj tua peb, peb yuav ua txuj thim khiav rov qab ib yam li peb ua thawj zaug. Lawv yeej yuav caum peb tua tuaj dhau ntug nroog. Lawv yuav xav hais tias peb swb lawv ib yam li thawj zaug. Thaum ntawd nej cia li tawm hauv nej tej chaw nkaum mus txeeb kiag lub nroog. Tus TSWV uas yog nej tus Vajtswv twb muab lub nroog ntawd rau nej lawm. Thaum nej txeeb tau lub nroog lawm, nej cia li zes taws hlawv lub nroog raws li tus TSWV tau hais lawm. Tej no yog lus samhwm rau nej.” Yausuas kom lawv mus nrhiav chaw nkaum ntawm lub nroog A-is sab hnubpoob nruab nrab ntawm lub nroog A-is thiab Npethees zov tos. Hmo ntawd Yausuas tseem nyob hauv lub yeej. Tagkis sawv ntxov, Yausuas hu nws cov tubrog tuaj ua ke. Ces Yausuas thiab Yixalayees cov thawjcoj txawm coj cov tubrog mus rau pem lub nroog A-is. Yausuas thiab cov tubrog uas nrog nws txawm mus rau ntawm ncauj ke uas mus rau hauv lub nroog, thiab lawv tsuam yeej rau ntawm ntug nroog sab qaumteb uas muaj ib lub voshav quas lawv thiab lub nroog A-is. Yausuas coj kwvyees li tsib txhiab leej tubrog nrog nws mus nkaum ntawm lub nroog A-is sab hnubpoob nruab nrab ntawm lub nroog A-is thiab Npethees. Cov tubrog uas yuav xub mus tua, lawv tsuam yeej rau ntawm lub nroog sab qaumteb, thiab dua li lwm cov, lawv mus zov kev rau sab hnubpoob. Hmo ntawd, Yausuas nyob ib hmos hauv lub voshav. Thaum tus vajntxwv uas kav lub nroog A-is pom Yausuas cov tubrog, nws txawm txhij nws cov tubrog ceev nrooj tuaj. Nws thiab nws cov tubrog taug lub Hav Yauladees tuaj tua cov Yixalayees ntawm qhov chaw uas lawv sib tua thawj zaug, tiamsis vajntxwv tsis paub hais tias cov tubrog Yixalayees yuav puav tom qab tuaj. Yausuas thiab cov tubrog uas nrog nws ua txuj swb thiab khiav mus rau tom tiaj suabpuam. Luag hu tagnrho cov txivneej hauv nroog tuaj caum Yausuas lawv tua, thiab thaum lawv caum Yausuas cov tubrog mus deb nroog lawm. Cov txivneej hauv lub nroog A-is txhua tus mus caum cov Yixalayees tua tsis tseg ib tug cia zov lub nroog li, thiab tseg lub roojvag qhib lug cia. Ces tus TSWV hais rau Yausuas hais tias, “Cia li tsa koj rab hmuv rau lub nroog A-is; kuv twb muab lub nroog ntawd cob rau koj tes lawm.” Yausuas txawm ua raws li tus TSWV hais, thiab thaum cov tubrog uas nkaum ntawm ntug nroog pom Yausuas tsa nws rab hmuv, lawv txawm sawv dhia mus rau hauv lub nroog thiab txeeb kiag tau lub nroog, lawv txawm zes hluavtaws hlawv tamsim ntawd. Thaum cov tubrog A-is tig saib tom qab, lawv pom pa taws ncho auv niab rau saum ntuj ua rau lawv tau kev tws, rau qhov cov tubrog Yixalayees uas khiav rau tom tiaj suabpuam tig rov los tua lawv. Thaum Yausuas thiab cov tubrog uas nrog nws, pom nws lwm pab tubrog txeeb tau lub nroog A-is thiab zes hluavtaws hlawv lawm, lawv txawm tig rov los tua cov tubrog A-is. Cov tubrog Yixalayees uas mus txeeb thiab hlawv lub nroog tawm los pab tua thiab. Cov tubrog A-is pom hais tias cov tubrog Yixalayees vij lawv tas lawm, cov tubrog Yixalayees muab cov tubrog A-is tua tuag tas tsis muaj ib tug dim li, tsuas tseg tus vajntxwv uas kav lub nroog A-is xwb. Lawv ntes tau nws thiab coj mus cuag Yausuas. Cov tubrog Yixalayees tua cov tubrog A-is uas tuaj caum lawv tuag tas rau tom tiaj suabpuam, ces lawv rov los rau hauv lub nroog thiab muab cov neeg uas nyob hauv nroog tua tuag tas huv tibsi. Cov Yixalayees tseg tej khoom tseemceeb thiab tej tsiaj uas lawv txeeb tau hauv lub nroog cia raws li tus TSWV tau hais rau Yausuas lawm. Yausuas hlawv lub nroog A-is kub hnyiab ua hmoov tshauv tas thiab nws tseem zoo li ntawd los txog niaj hnub no. Yausuas muab tus vajntxwv uas kav lub nroog A-is dai rau ntawm ib tug ntoo mus txog thaum yuav tsaus ntuj. Thaum lub hnub yuav poob qho, Yausuas hais kom nws cov tubrog mus muab vajntxwv lub cev txo los, thiab coj mus pov rau tim ncauj ke roojvag nroog. Lawv khaws pobzeb los teeb rau saum nws ua ib pawg loj loj, pawg pobzeb ntawd tseem nyob los txog niaj hnub no. Yausuas teeb ib lub thaj rau saum lub Roob Enpales rau tus TSWV uas yog cov Yixalayees tus Vajtswv. Yausuas ua lub thaj ntawd zoo ib yam li tus qauv uas tus TSWV tus tubtxib Mauxes qhia tseg rau cov Yixalayees thiab raws li Mauxes txoj kevcai uas hais tseg hais tias: “Lub thaj uas muab pobzeb ua, tsis txhob muab txaug hlau txaug.” Lawv hlawv khoom theej txhoj rau saum lub thaj thiab muab khoom hlawv fij ua kev sib raug zoo rau tus TSWV. Thaum ntawd, Yausuas sau Vajtswv txoj kevcai uas Mauxes twb xub sau tseg lawm rau saum cov pobzeb tabmeeg cov Yixalayees. Cov Yixalayees, lawv cov thawjcoj, cov nomtswv, cov txiav txim thiab lwm haivneeg uas nrog lawv nyob, puavleej tuaj sawv ntawm tus TSWV lub Phijxab ob sab, tig xubntiag rau cov povthawj uas kwv lub phijxab. Cov neeg ib nrab tig nraubqaum rau lub Roob Khelixemes, thiab ib nrab tig nraubqaum rau lub Roob Enpales. Tus TSWV tus tubtxib Mauxes hais kom cov Yixalayees ua li ntawd, lub sijhawm uas lawv tuaj txais koob hmoov. Yausuas nyeem tus TSWV txoj Kevcai thiab nyeem tej lus foom koob hmoov thiab tej lus foom tsis zoo, raws li twb sau cia rau hauv phau ntawv uas teev txoj Kevcai lawm. Txhua nqe kevcai uas Mauxes sau tseg, Yausuas muab los nyeem rau sawvdaws mloog, tsis hais pojniam, menyuam thiab lwm haivneeg uas nrog lawv nyob. Qhov uas cov Yixalayees muaj yeej ntawd, nrov ncha mus txog cov vajntxwv uas nyob ntawm tus Dej Yaudalees sab hnubpoob, tsis hais saum tej laj roob, tej taw roob, tej tiaj nrag thiab raws tus ntug Hiavtxwv Meditelanes mus rau pem Lenpanoos; cov vajntxwv no yog cov uas kav cov Hitis, cov Amaules, cov Kana-as, cov Pelixes, cov Hivis thiab cov Yenpus. Cov vajntxwv no koom ua ke tuaj tua Yausuas thiab cov Yixalayees. Tiamsis cov Nkinpe-oos uas yog cov Hivis, hnov tej uas Yausuas tua yeej lub nroog Yelikaus thiab lub nroog A-is, ces cov Nkinpe-oos txawm tuav tswvyim tuaj dag Yausuas. Lawv muab tej khoom noj ntim rau hauv tej hnab qub qub uas twb to qhov lawm, thiab muab tej cawv txiv hmab ntim rau hauv tej hnab tawv qub qub nog rau lawv tej neesluav thauj tuaj. Lawv hnav tej ris tsho thiab rau tej khau ntuag ntuag uas twb zoo muab povtseg lawm xwb; thiab tej ncuav uas lawv coj tuaj twb qhuav thiab tuaj pwm tas lawm. Lawv tuaj rau hauv lub yeej uas nyob ntawm Nkilenkas, lawv hais rau Yausuas thiab cov Yixalayees hais tias, “Peb taug kev deb heev tuaj, peb xav tuaj nrog nej sib coglus.” Tiamsis cov Yixalayees teb hais tias, “Vim li cas peb thiaj yuav nrog nej sib coglus? Tej zaum nej nyob ibncig ze ntawm no xwb?” Lawv hais rau Yausuas hais tias, “Peb txaus siab ua koj cov tubqhe.” Yausuas nug lawv hais tias, “Nej yog leejtwg thiab nej tuaj qhov twg tuaj?” Lawv hais rau Yausuas hais tias: “Peb tuaj lub tebchaws uas deb heev tuaj, rau qhov peb tau hnov txog tus TSWV uas yog nej tus Vajtswv thiab txhua yam txujci uas nws tau ua nram tebchaws Iziv, thiab tej uas nws tau ua rau ob tug vajntxwv uas kav cov Amaules uas nyob tim ntug Dej Yauladees sab hnubtuaj uas yog: Vajntxwv Xihoos uas kav lub nroog Hesenpoos thiab Vajntxwv Aunkas uas nyob hauv lub nroog Asetalus uas kav lub tebchaws Npasas. Peb cov thawjcoj thiab cov pejxeem uas nyob hauv peb lub tebchaws kom peb npaj mentsis khoom noj khoom haus taug kev tuaj cuag koj ua koj qhev, thiab thov nrog koj sib coglus. Thaum peb sawv kev tuaj, peb tej ncuav tseem sov, tiamsis koj siab! Twb qhuav thiab tuaj pwm tas lawm. Thaum peb ntim kua txiv hmab rau hauv cov hnab tawv no, cov hnab tseem tshiab, tiamsis koj saib! Tej hnab to tas. Peb tej ris tsho thiab khau los ntuag tas, vim peb taug kev deb heev tuaj.” Cov Yixalayees txawm txais cov neeg ntawd tej khoom noj uas lawv coj tuaj qee yam, tiamsis lawv tsis nug tus TSWV li. Yausuas pom zoo nrog cov Nkinpe-oos cog phoojywg thiab cia lawv nrog cov Yixalayees nyob. Cov Yixalayees tej thawjcoj txawm coglus rau lawv hais tias yuav ceev tej lus cog tseg ntawd. Tom qab uas coglus tas tau peb hnub, cov Yixalayees mam li paub hais tias cov neeg ntawd nyob ibncig ze ntawm lawv xwb. Cov Yixalayees mus peb hnub xwb, lawv txawm mus txog tej nroog uas cov neeg ntawd nyob. Cov nroog ntawd yog: lub nroog Nkinpe-oos, lub nroog Khefilas, lub nroog Npeluthas thiab lub nroog Kili-as Ye-alees. Tiamsis cov Yixalayees tsis tua lawv, rau qhov lawv cov thawjcoj twb tuav tus TSWV uas yog cov Yixalayees tus Vajtswv lub npe nrog cov neeg ntawd coglus lawm. Cov Yixalayees thiaj li yws lawv cov thawjcoj, tiamsis cov thawjcoj teb hais tias, “Peb twb tuav tus TSWV uas yog cov Yixalayees tus Vajtswv lub npe nrog lawv coglus lawm. Nimno peb tua tsis tau lawv cov ntawd. Peb yuav tsum cia lawv nrog peb nyob, vim tej lus uas peb cog tseg rau lawv; yog peb tsis cia lawv nyob, Vajtswv yuav rau txim rau peb. Peb tseg lawv nyob, tiamsis cia lawv mus txiav taws thiab nqa dej rau peb.” Cov Yixalayees tej thawjcoj pom zoo ua li ntawd. Yausuas tso neeg mus coj cov Nkinpe-oos tuaj cuag nws. Yausuas nug lawv hais tias, “Vim li cas nej tuaj dag peb hais tias, nej yog neeg nyob deb heev tuaj, tiamsis nej nyob ibncig ntawm no xwb? Vim nej dag li ntawd, Vajtswv thiaj rau txim rau nej. Nej cov neeg yuav ua qhev txiav taws thiab nqa dej rau hauv kuv tus Vajtswv lub tuamtsev mus li.” Lawv teb hais tias, “Qhov uas peb ua li no vim peb paub hais tias, tus TSWV uas yog nej tus Vajtswv tau hais rau nws tus tubtxib Mauxes tias nws yuav muab tagnrho lub tebchaws Kana-as no rau nej, thiab nej yuav tua cov neeg uas nyob hauv lub tebchaws no kom tuag tas huv tibsi ib yam li nej tau ua tas los lawm. Peb dag nej li ntawd vim peb ntshai nej heev; peb ua neej nyob ntshai rwg xwb. Nimno peb nyob hauv nej xibteg lawm; nej yuav ua li cas rau peb los nyob ntawm nej pom zoo.” Yog li ntawd, Yausuas thiaj tsis pub kom cov Yixalayees tua lawv. Tiamsis txij hnub ntawd mus cov Nkinpe-oos ua qhev txiav taws thiab nqa dej rau cov Yixalayees thiab rau tus TSWV lub thaj. Lawv tseem ua qhev li ntawd rau hauv tus TSWV lub tuamtsev los txog niaj hnub nimno. Adaunixedes uas ua vajntxwv kav lub nroog Yeluxalees, hnov hais tias Yausuas mus tua tau lub nroog A-is thiab muab rhuav puastsuaj tas, ntes tau tus vajntxwv uas kav lub nroog ntawd, thiab muab tua povtseg ib yam li tua tus vajntxwv uas kav lub nroog Yelikaus thiab ua rau lub nroog puastsuaj; thiab nws tseem hnov hais tias cov Nkinpe-oos nrog cov Yixalayees cog phoojywg thiab nrog lawv nyob lawm. Cov neeg uas nyob hauv lub nroog Yeluxalees ntshai heev, rau qhov lub nroog Nkinpe-oos tseem loj tshaj tej nroog uas muaj vajntxwv kav thiab loj dua lub nroog A-is; thiab muaj tej tubrog uas txawj tua rog nyob hauv. Vajntxwv Adaunixedes thiaj li tso neeg mus hais rau Vajntxwv Hauhas uas kav lub nroog Henploos, Vajntxwv Pilas uas kav lub nroog Yamus, Vajntxwv Yafias uas kav lub nroog Lakhis thiab Vajntxwv Denpis uas kav lub nroog Ekiloos hais tias: “Nej cia li tuaj pab kuv tua lub nroog Nkinpe-oos, rau qhov cov neeg uas nyob hauv lub nroog ntawd mus nrog Yausuas thiab cov Yixalayees cog phoojywg lawm.” Cov Amaules tsib tug vajntxwv uas kav lub nroog Yeluxalees, lub nroog Henploos, lub nroog Yamus, lub nroog Lakhis thiab lub nroog Ekiloos thiaj koom tuaj tua lub nroog Nkinpe-oos. Cov Nkinpe-oos thiaj tso neeg tuaj cuag Yausuas hauv lub yeej uas nyob ntawm Nkilenkas hais tias: “Koj cia li tuaj pab peb, rau qhov cov Amaules cov vajntxwv uas nyob saum tej laj roob hauv tebchaws no koom ua ke tuaj tua peb lawm; thov koj tsis txhob tso peb tseg, cia li tuaj cawm peb!” Yog li ntawd, Yausuas thiab tagnrho nws cov tubrog thiab cov tubrog uas ua tau tshaj plaws txawm sawv kev hauv Nkilenkas mus lawm. Tus TSWV hais rau Yausuas hais tias, “Koj tsis txhob ntshai lawv. Kuv twb muab lawv cob rau koj txhais tes lawm; yuav tsis muaj leejtwg tawmtsam yeej koj.” Yausuas txawm coj nws pab tubrog tawm hauv Nkilenkas maub ib hmos kaj ntug mus txog ntua lub nroog Nkinpe-oos, thiab lawv cia li tua thaum cov Amaules tsis nco ceevfaj li. Thaum cov Amaules pom cov Yixalayees, tus TSWV ua rau cov Amaules ceeb thiab tawg khiav ua sab ua sua tas. Cov Yixalayees tua cov Amaules tuag coob heev rau hauv lub nroog Nkinpe-oos, thiab caum lawv khiav hla lub dawm Npethes Hauloos mus txog ntua nram lub nroog Axekas thiab lub nroog Makedas. Thaum cov Amaules khiav hla lub dawm ntawd mus ua cov Yixalayees ntej, tus TSWV tso tej lawg uas loj heev los ntaus cov Amaules tuag pawglug mus ti nkaus lub nroog Axekas. Cov uas lawg ntaus tuag tseem coob tshaj cov uas raug cov Yixalayees tua. Hnub uas tus TSWV pab cov Yixalayees tua yeej cov Amaules, Yausuas hais rau tus TSWV tabmeeg cov Yixalayees hais tias: “Lub hnub, cia li nres rau saum lub nroog Nkinpe-oos; Lub hli, cia li nres rau saum lub Hav Aiyaloos.” Lub hnub thiab lub hli txawm nres raws li Yausuas hais mus txog thaum cov Yixalayees tua yeej lawv cov yeebncuab. Zaj xwmtxheej no lawv muab sau tseg rau hauv Yasas Phau Ntawv. Lub hnub nres rau saum nruab ntug ntev li ib hnub nkaus. Txij thaum ub los txog niaj hnub no yeej tsis tau muaj ib zaug uas tus TSWV mloog neeg lus li hnub ntawd. Tus TSWV tuaj cov Yixalayees tog. Tom qab ntawd Yausuas thiab nws cov tubrog thiaj rov los rau hauv lub yeej uas nyob hauv Nkilenkas lawm. Cov Amaules tsib tug vajntxwv khiav mus nkaum rau hauv lub qhov tsua Makedas. Tiamsis muaj neeg pom thiab los qhia rau Yausuas hais tias tsib tug vajntxwv ntawd khiav mus nkaum hauv lub qhov tsua Makedas. Yausuas hais tias, “Cia li dov ib co pobzeb loj los txhaws lub qhov tsua, thiab tso neeg zov ntawm rooj qho, tiamsis nej tsis txhob tso tseg. Nej yuav tsum caum cov yeebncuab mus thiab tuaj tom qab tua lawv; tsis txhob pub kom lawv khiav dim rov mus rau hauv lawv tej nroog li! Tus TSWV uas yog nej tus Vajtswv twb pub nej tua yeej lawv lawm.” Yausuas thiab cov Yixalayees tua cov yeebncuab tuag coob heev, tiamsis muaj ibtxhia khiav mus nkaum rau ntawm tej ntsa yeej uas thaiv lub nroog lawm, lawv thiaj tsis raug tua. Yausuas cov tubrog rov los cuag nws hauv lub yeej ntawm Makedas, txhua tus puavleej nyob txhij. Tsis muaj leejtwg yuav muaj cuabkav cem lossis tawmtsam cov Yixalayees li. Yausuas hais rau nws cov tubrog hais tias, “Nej cia li qhib lub qhov tsua thiab coj tsib tug vajntxwv ntawd los cuag kuv.” Cov tubrog thiaj mus qhib lub qhov tsua thiab coj tsib tug vajntxwv uas kav lub nroog Yeluxalees, lub nroog Henploos, lub nroog Yamus, lub nroog Lakhis thiab lub nroog Ekiloos tawm hauv qhov tsua los cuag Yausuas. Yausuas thiaj hu tagnrho cov tubrog Yixalayees los cuag nws, thiab nws kom cov thawj tubrog uas nrog nws mus tsuj cov vajntxwv ntawd cajdab. Ces lawv ua raws li Yausuas hais. Yausuas hais rau cov thawj tubrog hais tias, “Nej tsis txhob ntshai lossis qaug zog. Nej cia li ua siab tawv qhawv thiab tso siab rau tus TSWV, rau qhov nws yeej pom zoo kom nej ua li no rau peb cov yeebncuab.” Yausuas muab tsib tug vajntxwv ntawd tua thiab coj mus dai rau ntawm tsib tug ntoo ib hnub tsaus ntuj. Thaum lub hnub poob qho lawm, Yausuas hais kom cov tubrog mus muab cov vajntxwv ntawd txo thiab coj mus pov rau hauv lub qhov tsua uas lawv khiav mus nkaum, thiab lawv muab ib co pobzeb loj los txhaws lub qhov tsua. Niaj hnub no tej pobzeb ntawd tseem nyob. Hnub uas Yausuas mus tua thiab txeeb tau lub nroog Makedas, nws ntes tau tus vajntxwv uas kav lub nroog ntawd. Nws muab tus vajntxwv thiab cov pejxeem tua tuag tas tsis tseg ib tug seem li. Yausuas ua rau tus vajntxwv uas kav lub nroog Makedas ib yam li nws ua rau tus vajntxwv uas kav lub nroog Yelikaus. Tom qab ntawd, Yausuas thiab nws cov tubrog tawm hauv lub nroog Makedas mus tua lub nroog Linas. Tus TSWV pub cov Yixalayees tua yeej tus vajntxwv thiab txeeb tau lub nroog ntawd. Lawv tua txhua tus tsis tseg ib tug seem li. Lawv ua rau tus vajntxwv ntawd ib yam li lawv ua rau tus vajntxwv uas kav lub nroog Yelikaus. Tom qab ntawd, Yausuas thiab nws cov tubrog tawm hauv lub nroog Linas mus vij thiab tua lub nroog Lakhis. Hnub ob, tus TSWV pub cov Yixalayees tua yeej lub nroog Lakhis, lawv tua txhua tus tsis tseg ib tug seem li. Lawv ua rau lub nroog Lakhis ib yam li lawv ua rau lub nroog Linas. Vajntxwv Haulas uas kav lub nroog Nkexes txawm tuaj pab lub nroog Lakhis, tiamsis Yausuas lawv tua nws thiab nws cov tubrog tuag tas tsis tshuav ib tug seem li. Tom qab ntawd, Yausuas thiab nws cov tubrog tawm hauv lub nroog Lakhis mus vij thiab tua lub nroog Enkiloos. Hnub uas lawv txeeb tau lub nroog ntawd, lawv tua cov neeg hauv tuag tas tsis tseg ib tug seem ib yam li lawv ua rau lub nroog Lakhis. Tom qab ntawd, Yausuas thiab nws cov tubrog tawm hauv lub nroog Enkiloos nce tej laj roob mus tua lub nroog Henploos thiab txeeb tau lub nroog ntawd. Lawv tua tus vajntxwv thiab cov pejxeem tuag tas ib yam li lawv ua rau cov nroog uas nyob ibncig lub nroog ntawd. Yausuas lawv ua rau lub nroog thiab cov neeg puastsuaj tas ib yam li lawv ua rau lub nroog Ekiloos tsis tseg ib tug seem li. Ces Yausuas thiab nws cov tubrog rov los tua lub nroog Denpis. Yausuas txeeb tau lub nroog Denpis, tua tus vajntxwv thiab cov nroog uas nyob ibncig ntawd. Yausuas ua rau lub nroog Denpis tus vajntxwv ib yam li nws ua rau lub nroog Henploos thiab lub nroog Linas thiab ob tug vajntxwv. Yausuas tua yeej thoob plaws lub tebchaws, tsis hais tus vajntxwv uas nyob saum laj roob, nyob zaj tav zag sab hnubtuaj, nyob zaj taw roob sab hnubpoob thiab zaj mojsab sab qabteb. Lawv tua txhua tus tsis tseg ib tug seem raws li tus TSWV hais rau Yausuas lawm. Yausuas tua yeej txij ntua ntawm Kades Npane-as uas nyob sab qabteb mus rau Nkaxas uas nyob ze ntug hiavtxwv, thiab tau tagnrho cheebtsam Nkausees mus txog Nkinpe-oos uas nyob sab qaumteb. Yausuas tua yeej cov vajntxwv no thiab lawv tej nroog, rau qhov tus TSWV uas yog cov Yixalayees tus Vajtswv tuaj cov Yixalayees tog. Tom qab ntawd, Yausuas thiab nws cov tubrog rov los rau hauv lub yeej uas nyob ntawm Nkilenkas. Thaum Vajntxwv Yanpees uas kav lub nroog Haxaules hnov hais tias, Yausuas thiab nws cov tubrog tua yeej ntau lub nroog lawm, nws xa xov mus rau Vajntxwv Yaunpaj uas kav lub nroog Madoos, tus vajntxwv uas kav lub nroog Simeloos thiab tus vajntxwv uas kav lub nroog Akisas, tus vajntxwv uas nyob saum lub laj roob sab qaumteb, tus vajntxwv uas nyob hauv lub Hav Yauladees ntawm Hiavtxwv Kalilais sab qabteb, tus vajntxwv uas nyob ntawm taw roob thiab tus vajntxwv uas nyob ntawm ntug hiavtxwv ze lub nroog Daules, thiab Vajntxwv Yanpees hais mus rau cov Kana-as uas nyob raws ob sab ntug Dej Yaudalees, cov Amaules, cov Hitis, cov Pelixes, cov Yenpus uas nyob saum lub laj roob thiab cov Hivis uas nyob ntawm taw roob Helemoos hauv tebchaws Mixepas huv tibsi. Lawv coj lawv cov tubrog coob heev tuaj npaum li tej suabzeb ntawm ntug hiavtxwv. Lawv muaj nees thiab tsheb nees ntau kawg li. Tagnrho cov vajntxwv no sib sau ua ke tuaj tsuam yeej rau ntawm ntug dej Meloos tua cov Yixalayees. Tus TSWV hais rau Yausuas hais tias, “Koj tsis txhob ntshai lawv. Tagkis tav lub caij no, kuv yuav pab cov Yixalayees tua kom lawv tuag tas huv tibsi. Tom qab ntawd koj cia li muab lawv tej nees txiav leeg raws thiab hlawv lawv tej tsheb nees.” Yausuas thiab nws cov tubrog mus tua lawv cov yeebncuab ntawm tus dej Meloos thaum lawv tsis nco ceevfaj. Tus TSWV twb muab cov yeebncuab cob rau cov Yixalayees tes lawm; lawv thiaj caum cov yeebncuab tua mus txog ntawm Milefus Mees thiab Xidoos uas nyob sab qaumteb, thiab mus txog rau ntawm lub hav Mixepas uas nyob sab hnubtuaj. Lawv sib tua mus txog thaum cov yeebncuab tuag tas. Yausuas ua rau cov yeebncuab raws li tus TSWV hais rau nws lawm. Yausuas thiaj muab cov yeebncuab tej nees txiav leeg raws thiab hlawv lawv tej tsheb nees. Yausuas rov los txeeb tau lub nroog Haxaules thiab muab tus vajntxwv uas kav lub nroog ntawd tua. (Thaum ntawd lub nroog Haxaules muaj zog dua lwm lub nroog hauv lub tebchaws ntawd.) Lawv muab txhua tus uas nyob hauv lub nroog ntawd tua tuag tas tsis tseg ib tug seem li thiab muab lub nroog hlawv. Yausuas tua yeej cov vajntxwv, txeeb tau lawv tej nroog, thiab muab txhua tus neeg tua tuag tas huv tibsi raws li tus TSWV tus tubtxib Mauxes tau hais tseg lawm. Tiamsis cov Yixalayees tsis hlawv tej nroog uas nyob saum tej pov roob li, tsuas yog lub nroog Haxaules uas Yausuas muab hlawv lawm xwb. Cov Yixalayees nqa tej khoom muaj nqis thiab coj tej tsiaj txhu hauv lub nroog ntawd mus ua lawv tug. Tiamsis lawv muab cov neeg tua tuag tas tsis tseg ib tug seem li. Tus TSWV hais rau nws tus tubtxib Mauxes, kom Mauxes hais rau Yausuas thiab Yausuas ua raws li tej lus ntawd. Yausuas thiaj ua txhua yam raws li tej lus uas tus TSWV tau hais rau Mauxes lawm. Yausuas txeeb tau tagnrho lub tebchaws: cheebtsam uas ua laj roob thiab taw roob, tsis hais qabteb thiab qaumteb tagnrho cheebtsam Nkausees, cheebtsam mojsab qhua uas nyob sab qabteb, thiab tagnrho lub Hav Yauladees. Tsuas yog tshuav lub nroog Nkinpe-oos uas cov Hivis ibtxhia uas nrog cov Yixalayees cog phoojywg thiaj tsis raug tua xwb. Dua li lwm lub nroog raug tua thiab raug rhuav puastsuaj tas. Tus TSWV ua kom lawv muaj lub siab tawv tuaj tua cov Yixalayees, yog li ntawd, cov Yixalayees thiaj tsis hlub tshua lawv thiab muab lawv tua puastsuaj tas. Tej no muaj raws li tus TSWV hais rau Mauxes lawm. Thaum ntawd Yausuas mus tua thiab rhuav cov neeg Anakees uas loj thiab siab heev uas nyob saum tej laj roob, hauv lub nroog Henploos, lub nroog Denpis, lub nroog Anas thiab tagnrho saum tej laj roob uas cov Yudas thiab cov Yixalayees nyob. Yausuas tua cov neeg thiab rhuav lawv tej nroog puastsuaj tas huv tibsi. Tsis tshuav cov Anakees ib tug seem nyob hauv cov Yixalayees lub tebchaws li; tsuas tshuav leej puav nyob hauv Nkaxas, Nkathas thiab Asedaus xwb. Yausuas txeeb tau tagnrho lub tebchaws raws li tus TSWV hais tseg rau Mauxes lawm. Yausuas muab lub tebchaws faib rau cov Yixalayees txhua xeem, nyias nyob muaj nyias cheebtsam av. Cov Yixalayees thiaj tau nyob thajyeeb lug tsis ua rog li lawm. Cov Yixalayees tua yeej thiab txeeb tau tagnrho lub tebchaws ntawm tus Dej Yaudalees sab hnubtuaj, txij ntua ntawm lub Hav Alenoos mus rau lub Hav Yauladees, thiab mus rau pem lub Roob Helemoos uas nyob sab qaumteb. Lawv tua yeej ob tug vajntxwv, ib tug yog Xihoos uas ua vajntxwv kav cov Amaules nyob hauv lub nroog Hesenpoos. Nws kav ib nrab tebchaws Nkile-as: txij ntua ntawm Alu-es (uas nyob ntawm lub Hav Alenoos), thiab txij ntua ntawm lub nroog uas nyob hauv plawv lub hav ntawd mus txog rau ntawm tus Dej Yanpaus uas yog cov Amoos tus ciamteb; thiab tagnrho lub Hav Yauladees txij ntua ntawm Hiavtxwv Kalilais sab qabteb mus txog rau ntawm Npethes Yesimaus (uas nyob ntawm Hiavtxwv Tuag sab hnubtuaj) thiab mus rau ntawm lub taw Roob Pinkas. Thiab lawv tseem tua yeej Vajntxwv Aunkas uas nyob hauv lub tebchaws Npasas, nws yog tus vajntxwv kawg ntawm haivneeg Lefayees; nws kav lub nroog Asethas thiab Edeles. Vajntxwv Aunkas kav tagnrho lub Roob Helemoos, Xalekas thiab tagnrho tebchaws Npasas mus txog ntua ntawm cov Nkesus thiab cov Ma-akas tus ciamteb, thiab ib nrab tebchaws Nkile-as mus txog rau ntawm lub nroog Hesenpoos uas Vajtswv Xihoos kav. Ob tug vajntxwv no, yog ob tug uas yav tas los Mauxes thiab cov Yixalayees tua yeej. Tus TSWV tus tubtxib Mauxes muab lub tebchaws no faib rau xeem Lunpees, xeem Khas thiab ib nrab xeem Manaxes ua lawv tug mus li. Yausuas thiab cov Yixalayees tua yeej tagnrho cov vajntxwv uas nyob lub tebchaws ntawm tus Dej Yauladees sab hnubpoob, txij ntua ntawm Npankas uas nyob hauv lub Hav Lenpanoos mus txog rau ntawm lub Roob Halaj uas nyob ze Edoos sab qabteb. Yausuas muab lub tebchaws faib rau cov Yixalayees txhua xeem ua lawv tug raws li no: tej laj roob, tej taw roob sab hnubpoob, lub Hav Yauladees thiab tej taw roob, tej ntav zag sab hnubtuaj, thiab sab qabteb uas ua suabpuam. Lub tebchaws no yav tas los yog cov Hitis, cov Amaules, cov Kana-as, cov Pelixes, cov Hivis thiab cov Yenpus lub tebchaws. Cov Yixalayees tua yeej cov vajntxwv uas kav cov nroog no: Yelikaus, A-is (uas nyob ze lub nroog Npethees,) Yeluxalees, Henploos, Yamus, Lakhis, Ekiloos, Nkexes, Denpis, Nkedes, Haumas, Alas, Linas, Adulas, Makedas, Npethees, Tapuas, Hefeles, Afes, Lasaloos, Madoos, Haxaules, Simeloos, Meloos, Akhesas, Tanas, Menkidaus, Kedes, Yaune-as, (uas nyob hauv Kalemees), Dules (uas nyob ntawm ntug hiavtxwv), Nku-ees (uas nyob hauv Kalilais ), thiab Tilexas, tagnrho huv tibsi muaj peb caug ib tug vajntxwv. Thaum Yausuas laus heev lawm, tus TSWV hais rau nws hais tias, “Koj twb laus heev lawm, tiamsis lub tebchaws tseem tshuav ntau qhov uas nej tsis tau mus txeeb: yog tagnrho cheebtsam uas cov Filitees thiab cov Nkesus nyob, mus rau cheebtsam Avimes uas nyob sab qabteb. (Lub tebchaws txij ntua ntawm tus Dej Sihus uas yog ntawm cov Iziv tus ciamteb sab qaumteb mus txog ntua ntawm cov Ekiloos tus ciamteb uas ibtxwm paub hais tias yog cov Kana-as li; cov Filitees cov vajntxwv nyob hauv lub nroog Nkaxas, Asedaus, Asekeloos, Nkathas thiab Ekiloos.) Tshuav tagnrho lub tebchaws Kana-as thiab Melas (uas yog cov Xidoos tug) mus rau ntawm Afes uas nyob ntawm cov Amaules tus ciamteb; tebchaws Nkenpas; thiab tagnrho tebchaws Lenpanoos mus rau sab hnubtuaj, txij ntua ntawm Npankas uas nyob ntawm lub Roob Helemoos sab qabteb mus rau ntawm lub Dawm Hamas. Ntawm no yog xam tagnrho cov Xidoos lub tebchaws uas nyob saum tej laj roob ntu nruab nrab ntawm tej Roob Lenpanoos thiab Milefus Mees. Kuv yuav ntiab cov neeg hauv lub tebchaws ntawd tawm ua ntej uas cov Yixalayees mus nyob. Koj yuav tsum muab lub tebchaws faib rau cov Yixalayees raws li kuv hais rau koj lawm. Nimno koj cia li muab lub tebchaws faib rau cov Yixalayees cuaj xeem thiab ib nrab xeem Manaxes ua lawv tug mus li.” Xeem Lunpees, xeem Khas thiab ib nrab xeem Manaxes twb tau feem av uas tus TSWV tus tubtxib Mauxes faib rau lawv lawm; yog cheebtsam ntawm tus Dej Yauladees sab hnubtuaj. Lawv ciam av txij ntua ntawm Alu-es (uas nyob ntawm lub Hav Alenoos) thiab lub nroog uas nyob hauv plawv lub voshav ntawd, thiab tagnrho lub tiaj nrag ntawm Medenpas mus txog rau ntawm Dinpoos; thiab mus txog rau ntawm cov Amoos tus ciamteb thiab tagnrho cov nroog uas cov Amaules tus vajntxwv Xihoos uas nyob hauv lub nroog Hesenpoos kav; thiab cheebtsam Nkile-as, cheebtsam Nkesus, cheebtsam Ma-akas, lub Roob Helemoos thiab tagnrho tebchaws Npasas mus txog rau ntawm lub nroog Xalekas; thiab lub nroog Asetalus thiab lub nroog Edeles uas Vajntxwv Aunkas kav, Aunkas yog tus vajntxwv kawg ntawm cov Lefayees. Mauxes tua yeej cov neeg no thiab muab lawv ntiab tawm khiav mus. Tiamsis cov Yixalayees tsis ntiab cov Nkesus thiab cov Ma-akas; lawv tseem nrog cov Yixalayees nyob hauv lub tebchaws. Mauxes tsis faib av rau xeem Levis raws li tus TSWV tau hais rau Mauxes hais tias, lawv feem tug yog tej uas cov Yixalayees coj tuaj fij rau saum tus TSWV uas yog cov Yixalayees tus Vajtswv lub thaj. Mauxes faib av rau xeem Lunpees ua lawv tug raws li lawv tej tsevneeg. Lawv ciam av txij ntua ntawm Alu-es (uas nyob ntawm lub Hav Alenoos) thiab lub nroog uas nyob hauv plawv lub voshav ntawd, thiab tagnrho lub tiaj nrag uas nyob puagncig lub nroog Medenpas; thiab lub nroog Hesenpoos, thiab cov nroog uas nyob hauv lub tiaj nrag yog: Denpoos, Npamaus Npa-as, Npethes, Npa-ame-oos, Yahas, Kedemaus, Mefas, Kiliyathas, Xinpemas, Xeles Sahas uas nyob saum lub laj roob hauv lub Hav, Npepe-aus, thiab tej ntav zag ntawm lub Roob Pinkas thiab Npethes Yesimaus; thiab tagnrho cov nroog uas nyob hauv tej tiaj nrag thiab cheebtsam uas cov Amaules tus vajntxwv Xihoos uas nyob hauv lub nroog Hesenpoos kav. Mauxes tua yeej Xihoos ib yam li nws tua yeej cov nomtswv uas nyob hauv tebchaws Midias: Evis, Lekees, Xules, Hules thiab Lenpas. Tagnrho cov nomtswv no puavleej nrog vajntxwv Xihoos kav tebchaws. Npe-aus tus tub Npala-as uas txawj saib hmoov yog ib tug ntawm cov neeg uas cov Yixalayees muab tua lawm. Xeem Lunpees tus ciamteb sab hnubpoob yog raws tus Dej Yauladees. Tej nroog thiab tej zos uas hais tas los no yog muab rau xeem Lunpees ua lawv tug raws li lawv tej tsevneeg. Mauxes faib av rau xeem Khas ua lawv tug raws li lawv tej tsevneeg. Lawv ciam av yog tagnrho lub nroog Yaxes thiab cov nroog uas nyob hauv Nkile-as, thiab ib nrab tebchaws Amoos mus txog rau ntawm Alu-es uas nyob ntawm Lanpas sab hnubtuaj; thiab txij ntua ntawm Hesenpoos mus txog rau ntawm Lamas Mipes, Npetunis, thiab txij ntua ntawm Mahana-ees mus txog rau ntawm cov Ludenpas tus ciamteb. Nyob hauv lub Hav Yauladees tagnrho tej nroog thiab tej zos yog: Npethes Halas, Npenilas, Xukaus thiab Xafoos, feem av seem uas Vajntxwv Xihoos uas nyob hauv lub nroog Hesenpoos kav. Lawv tus ciam av sab hnubpoob raws tus Dej Yauladees mus txog rau pem Hiavtxwv Kalilais. Cov nroog thiab cov zos uas hais los no yog cov uas muab faib rau xeem Khas ua lawv tug raws li lawv tej tsevneeg. Mauxes faib av rau ib nrab xeem Manaxes ua lawv tug raws li lawv tej tsevneeg. Lawv ciam av yog txij ntua ntawm Mahana-ees thiab tagnrho lub tebchaws Npasas uas Vajntxwv Aunkas kav, thiab tagnrho Yailes rau caum lub zos uas nyob hauv tebchaws Npasas; thiab tagnrho lub tebchaws Nkile-as ib nrab mus txog rau ntawm lub nroog Asetalus thiab lub nroog Edeles uas yog cov tuamceeb nroog hauv lub tebchaws Npasas uas Aunkas kav. Tagnrho cov nroog thiab cov zos no muab faib rau Manaxes tus tub Makhiles cov xeebntxwv ib nrab, ua lawv tug raws li lawv tej tsevneeg. Thaum Mauxes nyob hauv lub tiaj nrag Mau-am, nws faib lub tebchaws ntawm lub nroog Yelikaus thiab tus Dej Yauladees sab hnubtuaj rau cov Yixalayees; tiamsis Mauxes tsis faib av rau xeem Levis. Nws hais rau lawv hais tias, lawv feem tug yog tej uas sawvdaws coj tuaj fij rau tus TSWV uas yog cov Yixalayees tus Vajtswv xwb. Ntawm no yog hais txog muab lub tebchaws Kana-as uas nyob ntawm tus Dej Yauladees sab hnubpoob faib rau cov Yixalayees. Tus povthawj Ele-axas, Noos tus tub Yausuas thiab cov Yixalayees txhua xeem tej thawjcoj yog cov faib rau lawv. Lawv rho ntawv faib cheebtsam av ntawm tus Dej Yauladees sab hnubpoob rau cuaj xeem thiab ib nrab xeem Manaxes raws li tus TSWV hais rau Mauxes lawm. Cov Yixalayees muab lub tebchaws faib raws li tus TSWV hais rau Mauxes lawm. Muaj ib hnub xeem Yudas ibtxhia tuaj cuag Yausuas ntawm Nkilenkas. Yefunes tus tub Kalej uas yog cuab Kenais hais rau Yausuas hais tias, “Koj yeej paub qhov uas tus TSWV hais rau nws tus tubtxib Mauxes txog koj thiab kuv, thaum peb tseem nyob ntawm Kades Npane-as lawm. Thaum tus TSWV tus tubtxib Mauxes txib kuv hauv Kades Npane-as tuaj soj lub tebchaws no, kuv hnubnyoog muaj plaub caug xyoo. Kuv coj tej lus tseeb rov los qhia rau nws. Cov neeg uas nrog kuv mus soj tebchaws ua rau peb cov neeg ntshai heev, tiamsis kuv muab siab npuab tus TSWV uas yog kuv tus Vajtswv. Vim kuv ua li ntawd, Mauxes thiaj coglus hais tias, kuv thiab kuv cov xeebntxwv yuav tau feem av hauv lub tebchaws uas kuv tau mus tsuj ua kuv tug. Tiamsis txij thaum tus TSWV hais rau Mauxes los txog nimno twb tau plaub caug tsib xyoos lawm. Thaum ntawd cov Yixalayees tseem taug kev los hla tiaj suabpuam, thiab tus TSWV tseem pub kuv muaj sia nyob los txog niaj hnub no raws li nws tau coglus tseg lawm. Koj sim saib saib! Nimno kuv twb muaj yim caum tsib xyoos lawm, tiamsis hnub no kuv tseem muaj zog khov kho ua taus rog thiab ua taus haujlwm ib yam li thaum Mauxes txib kuv mus soj tebchaws. Nimno, thov koj muab cheebtsam uas ua laj roob rau kuv raws li tus TSWV tau coglus tseg rau kuv, hnub uas kuv thiab cov neeg uas nrog kuv mus soj tebchaws los qhia rau Mauxes. Peb qhia rau nej sawvdaws hais tias, cov neeg Anakees uas loj thiab siab nyob hauv tej nroog loj uas muaj ntsa yeej thaiv khov heev. Tej zaum tus TSWV yuav nrog nraim kuv, thiab kuv yuav raws tau lawv tawm ib yam li tus TSWV tau coglus tseg lawm.” Yausuas foom koob hmoov rau Yefunes tus tub Kalej thiab muab lub nroog Henploos rau nws ua nws tug. Lub nroog Henploos tseem yog Yefunes tus tub Kalej uas yog cuab Kenais cov xeebntxwv li, rau qhov Kalej muab siab npuab tus TSWV uas yog cov Yixalayees tus Vajtswv. Yav tas los lub nroog Henploos no hu ua Alenpas. (Alenpas yog cov Anakees ib tug neeg uas muaj zog heev.) Lub tebchaws thiaj nyob thajyeeb tsis ua rog. Xeem Yudas tej tsevneeg tau av ua lawv tug raws li no: Lawv cheebtsam av sab qabteb mus cob rau ntawm tiaj suabpuam Xees uas npuab tebchaws Edoos tus ciamteb. Tus ciamteb sab qabteb txij ntua ntawm qab Hiavtxwv Tuag mus rau sab qabteb, pib kiag ntawm lub Dawm Alanpees mus rau tiaj suabpuam Xees, nqis mus rau sab qabteb ntawm Kades Npane-as, hla Hexeloos nce mus rau Adales lem mus rau Kalikas, thiab mus rau ntawm lub nroog Aximoos raws tus dej uas npuab Iziv tus ciamteb mus xaus rau ntawm Hiavtxwv Meditelanes. Tej uas hais los no yog xeem Yudas tus ciamteb sab qabteb. Xeem Yudas tus ciamteb sab hnubtuaj, yog pib ntawm qab Hiavtxwv Tuag, nce mus rau qaum Hiavtxwv Tuag uas tus Dej Yauladees los xaus. Tus ciamteb sab qaumteb yog pib qhov ntawd mus rau Npethes Haunkelas thiab nce mus rau sab qaumteb ntawm lub dawm uas saib ntsoov rau lub Hav Yauladees; thiab tus ciamteb nce mus rau ntawm lub Pobzeb Npuhas (Npuhas yog Lunpees tus tub lub npe), pib ntawm lub Hav Covnyom nce mus rau Denpis thiab lem rau sab qaumteb mus rau ntawm Nkilenkas uas tig mus rau lub dawm Adumees ntawm lub hav sab qabteb. Tus ciamteb nce mus rau ntawm lub qhovdej Esemes, tawm mus rau Elaunkees, thiab mus hla lub Hav Hinoos sab qabteb ntawm lub roob uas yog cov Yenpus lub nroog Yeluxalees. Tus ciamteb tseem nce mus rau saum lub ncov roob uas nyob ntawm lub Hav Hinoos sab hnubpoob, thiab mus xaus rau ntawm lub Hav Lefayees sab qaumteb. Pib ntawd mus rau ntawm lub qhovdej Netu-as thiab mus rau ntawm cov nroog uas nyob ze lub Roob Efaloos. Tus ciamteb pib ntawd nkhaus mus rau Npa-alas (lossis Kili-as Ye-alees), tus ciamteb nkhaus puav ntawm Npa-alas sab hnubpoob mus rau tebchaws Edoos uas ua laj roob, nce mus rau lub Roob Ye-alees (lossis Khexaloos) sab qaumteb, nqis mus rau Npethes Semes thiab hla mus rau ntawm lub nroog Teenas. Tus ciamteb mus rau ntawm lub roob uas nyob ntawm lub nroog Ekiloos sab qaumteb, thiab lem mus rau ntawm Sikeloos hla lub Roob Npa-alas mus rau Yanias, thiab mus xaus rau ntawm Hiavtxwv Meditelanes, thiab tus ciamteb sab hnubpoob yog pib qhov ntawd mus. Xeem Yudas tej tsevneeg ciam av yog raws li cov ciamteb uas hais los no. Yausuas faib xeem Yudas av rau Yefunes tus tub Kalej raws li tus TSWV hais tau nws lawm. Kalej tau lub nroog Henploos uas yog Anaj txiv Alenpas lub nroog. Kalej raws cov Sesais, cov Ahimas thiab cov Talemais uas yog Anaj cov xeebntxwv tawm hauv lub nroog ntawd mus. Kalej tawm hauv Henploos mus tua cov neeg hauv lub nroog Denpis. (Lub nroog no thaum ub hu ua Kili-as Xefes.) Kalej hais tias, “Yog leejtwg mus tua thiab txeeb tau lub nroog Kili-as Xefes kuv yuav muab kuv tus ntxhais Akhexas rau tus ntawd yuav ua pojniam.” Kalej tus kwv Kenas tus tub Authaniyees mus tua thiab txeeb tau lub nroog Denpis, Kalej thiaj muab nws tus ntxhais Akhexas rau Auniyees yuav ua pojniam. Hnub uas noj tshoob Authaniyees txawm taij nws tus pojniam kom thov nws txiv muab ib thaj teb rau nws. Akhexas nqis saum nws tus neesluav los, thiab Kalej nug hais tias, “Koj xav yuav dabtsi?” Akhexas teb hais tias, “Kuv xav yuav ib cov qhovdej, rau qhov thaj av uas koj muab rau kuv lawm yog av qhuav xwb.” Kalej thiaj muab thaj av uas muaj ib lub qhovdej nyob sab ped thiab ib lub qhovdej nyob sab nrad rau nws tus ntxhais. Ntawm no yog cheebtsam av uas faib rau xeem Yudas ua lawv tug raws li lawv tej tsevneeg. Lawv cov nroog sab qabteb uas nyob ze Edoos tus ciamteb yog: Kaxees, Edes, Yankus, Kinas, Dimunas, Adadas, Kedes, Haxaules, Inas, Xifes, Telees, Npelaus, Haxaules, Hadatas, Keli-aus Hexeloos (lossis Haxaules), Amas, Semas, Mauladas, Haxas Nkadas, Hesemoos, Npethepelej, Haxas Sualis, Npesenpas, Npisithiyas, Npa-alas, Iyees, Exees, Etaulas, Khesis, Haumas, Xilas, Mamanas, Xaxanas, Lenpaus, Sihees, Ayees thiab Limoos, tagnrho muaj nees nkaum cuaj lub nroog thiab tej zos uas nyob ibncig. Cov nroog uas nyob raws tej taw roob yog: Esetaus, Xaulas, Asenas, Xanau-as, Enkanees, Tapuas, Enas, Yamus, Adulas, Xukaus, Axekas, Sa-alayees, Adithais, Nkedelas thiab Nkedelauthais, tagnrho muaj kaum plaub lub nroog thiab tej zos uas nyob ibncig. Thiab Xenas, Hadasas, Midankas, Dilees, Mixepas, Yauthees, Lakhis, Npauxekas, Enkiloos, Kanpoos, Lamas, Kilis, Nkedelaus, Npedankoos, Namas thiab Makedas, tagnrho muaj kaum rau lub nroog thiab tej zos uas nyob ibncig. Thiab Linas, Ethes, Asas, Itas, Asenas, Nexis, Kelas, Akhexis thiab Malesas, tagnrho muaj cuaj lub nroog thiab tej zos uas nyob ibncig. Lub nroog Ekiloos thiab tej zos uas nyob ibncig, tagnrho tej nroog thiab tej zos uas nyob ze lub nroog Asedaus uas txij ntua ntawm lub nroog Ekiloos mus txog rau Hiavtxwv Meditelanes. Lub nroog Asedaus thiab lub nroog Nkaxas, thiab tej zos loj zos me mus ti nkaus rau tus dej uas nyob npuab cov Iziv tus ciamteb thiab ntug Hiavtxwv Meditelanes. Tej nroog uas nyob saum roob yog: Samiles, Yatis, Xukaus, Danas, Kili-as Xefes (lossis Denpis), Anas, Etemaus, Anees, Nkausees, Hauloos thiab Nkilaus, tagnrho muaj kaum ib lub nroog thiab tej zos uas nyob ibncig. Thiab Alav, Dumas, Esas, Yanimes, Npes Tapuas, Apekas, Hutas, Henploos thiab Xi-aus, tagnrho muaj cuaj lub nroog thiaj tej zos uas nyob ibncig. Thiab Ma-oos, Kalamees, Xifes, Yutas, Yexelees, Yaudees, Xanau-as, Kais, Nkinpe-as thiab Tinas, tagnrho muaj kaum lub nroog thiab tej zos uas nyob ibncig. Thiab Halehus, Npexules, Nkedaus, Malas, Npethanaus thiab Etekoos, tagnrho muaj rau lub nroog thiab tej zos uas nyob ibncig. Thiab Kili-as Npa-as (lossis Kili-as Ye-alees) thiab Lanpas, tagnrho muaj ob lub nroog thiab tej zos uas nyob ibncig. Cov nroog uas nyob hauv tiaj suabpuam: Npethes Alanpas, Midees, Xekakas, Nisas, Nroog Ntsev thiab Enkedis, tagnrho muaj rau lub nroog thiab tej zos uas nyob ibncig. Tiamsis cov neeg Yudas tsis ntiab cov neeg Yenpus uas nyob hauv Yeluxalees tawm. Cov Yenpus tseem nrog cov Yudas nyob. Yauxej cov xeebntxwv tus ciamteb sab qabteb yog txij ntua ntawm tus Dej Yauladees uas ze lub nroog Yelikaus ntawm lub qhovdej uas nyob ntawm Yelikaus sab hnubtuaj mus rau tom tiaj suabpuam. Tus ciamteb pib ntawm Yelikaus nce mus rau saum lub laj roob mus rau pem lub nroog Npethees. Pib ntawm Npethees mus rau Lus thiab hla mus rau ntawm Atalaus Adales uas yog cov Alekhis nyob. Tus ciamteb nkhaus mus rau sab hnubpoob ntawm cheebtsam uas cov Yafeles nyob, thiab dhau mus rau ntawm Npethes Hauloos Theem Qis. Tus ciamteb pib qhov ntawd mus rau Nkexes thiab mus xaus rau tom Hiavtxwv Meditelanes. Yauxej cov xeebntxwv uas yog xeem Efalayees thiab xeem Manaxes sab Hnubpoob tau tej av no ua lawv tug. Ntawm no yog cheebtsam av uas faib rau xeem Efalayees raws li lawv tej tsevneeg. Lawv tus ciamteb txij ntua ntawm Atalaus Adales sab hnubtuaj mus rau Npethes Hauloos Theem Siab, thiab pib ntawd mus rau Hiavtxwv Meditelanes. Lub nroog Mimethas nyob rau sab qaumteb ntawm lawv lub tebchaws. Lawv tus ciamteb sab hnubtuaj nkhaus mus rau Tanas Silaus thiab mus hla ntawm Yanau-as sab hnubtuaj. Tus ciamteb pib ntawm Yanau-as nqis mus rau Atalaus thiab Nalas, dhau mus rau ntawm Yelikaus thiab mus xaus rau ntawm tus Dej Yauladees. Tus ciamteb uas mus rau sab hnubpoob, pib ntawm Tapuas mus rau ntawm tus Dej Kanas thiab mus xaus rau ntawm Hiavtxwv Meditelanes. Tej uas hais los no yog cheebtsam av uas muab faib rau xeem Efalayees ua lawv tug raws li lawv tej tsevneeg, thiab tej zos loj zos me uas nyob hauv xeem Manaxes tus ciamteb, tiamsis muab tu rau xeem Efalayees lawm. Xeem Efalayees tsis ntiab cov Kana-as uas nyob hauv lub nroog Nkexes tawm, yog li ntawd, cov Kana-as thiaj tseem nrog cov Efalayees nyob los txog niaj hnub no, tiamsis cov Efalayees yuam cov Kana-as ua lawv qhev. Muab feem av ntawm tus Dej Yauladees sab hnubpoob faib rau Yauxej tus tub hlob Manaxes cov xeebntxwv ua lawv tug raws li lawv tej tsevneeg. Manaxes tus tub hlob Makhiles uas yog Nkile-as txiv, nws yog ib tug tubrog uas ua tau heev, yog li ntawd, lawv thiaj muab cheebtsam Nkile-as thiab Npasas ntawm tus Dej Yauladees sab hnubtuaj rau Makhis. Muab feem av ntawm tus Dej Yauladees sab hnubpoob faib rau xeem Manaxes uas tseem tsis tau av raws li lawv tej tsevneeg: Anpixes, Heles, Aliyees, Sekhees, Hefeles thiab Semidas. Lawv yog Yauxej tus tub hlob Manaxes cov xeebntxwv uas ua thawjcoj rau lawv tej tsevneeg. Manaxes tus tub yog Makhis, Makhiles tus tub yog Nkile-as, Nkile-as tus tub yog Xelaufehas, Xelaufehas tsis muaj tub, tiamsis nws muaj tsib tug ntxhais; nws cov ntxhais yog Malas, Nau-es, Haunkelas, Milekas thiab Tilexas. Lawv tsib leeg mus thov tus povthawj Ele-axas, Noos tus tub Yausuas thiab cov thawjcoj hais tias, “Tus TSWV tau hais rau Mauxes kom faib av rau peb ua peb tug ib yam li faib rau peb tej nus kwvtij.” Yog li ntawd, cov thawjcoj thiaj faib av rau lawv tsib leeg ntawd ib yam li faib rau lawv tej nus kwvtij. Yog li ntawd, xeem Manaxes thiaj tau av kaum feem ntxiv rau cheebtsam Nkile-as thiab Npasas uas nyob sab hnubtuaj ntawm tus Dej Yauladees, rau qhov Manaxes cov xeebntxwv, tsis hais cov ntxhais lossis cov tub puavleej muaj feem tau av ua lawv tug. Yog li ntawd, thiaj muab hlo cheebtsam Nkile-as faib rau Manaxes cov xeebntxwv. Manaxes cheebtsam av tus ciamteb pib ntawm Aseles mus rau ntawm lub nroog Mimethas uas nyob ntawm Sekhees sab hnubtuaj. Tus ciamteb nqis mus rau sab qabteb, mus txog rau ntawm cov Etapuas tus ciamteb. Feem av uas nyob ibncig lub nroog Tapuas puavleej yog xeem Manaxes li, tiamsis lub nroog Tapuas uas nyob ntawm tus ciamteb yog Efalayees cov xeebntxwv li. Tus ciamteb nqis mus rau ntawm tus Dej Kanas. Txawm yog cov nroog uas nyob sab qabteb ntawm tus Dej Kanas hauv xeem Manaxes tus ciamteb los cov nroog ntawd puavleej yog xeem Efalayees li. Xeem Manaxes tus ciamteb raws tus Dej Kanas sab qaumteb mus xaus rau ntawm Hiavtxwv Meditelanes. Xeem Efalayees nyob sab qabteb thiab xeem Manaxes nyob sab qaumteb uas yog Hiavtxwv Meditelanes ua lawv tus ciamteb sab hnubpoob. Xeem Aseles nyob sab qaumteb hnubpoob thiab xeem Ixakhas nyob sab qaumteb hnubtuaj. Xeem Manaxes tau lub nroog Npethes Sas thiab lub nroog Inpelas, thiab tej zos uas nyob ibncig thiab lub nroog Daules (lub nroog uas nyob ntawm ntug hiavtxwv), lub nroog Edaules, Tanas, Menkidaus thiab tej zos uas nyob ibncig hauv xeem Ixakhas thiab xeem Aseles cheebtsam av. Tiamsis cov Manaxes tsis ntiab cov neeg uas nyob hauv cov nroog no khiav, cov Kana-as thiaj tseem nrog lawv nyob rau hauv cov nroog ntawd. Txawm yog cov Yixalayees huamvam coob thiab muaj zog txaus los lawv tsis ntiab cov Kana-as khiav, tiamsis lawv yuam kom cov Kana-as ua lawv qhev. Yauxej cov xeebntxwv tuaj hais rau Yausuas hais tias, “Tus TSWV twb foom koob hmoov rau peb, peb huamvam coob heev lawm, ua li cas koj faib tib thaj av rau peb xwb?” Yausuas teb lawv hais tias, “Yog nej muaj neeg coob heev lawm, feem av ua laj roob uas faib rau xeem Efalayees tsis txaus nej nyob, nej cia li mus luaj thiab ntov thaj havzoov hauv cov Pelixes thiab Lefayees lub tebchaws ua nroog rau nej nyob.” Lawv teb hais tias, “Feem av uas ua laj roob dav tsis txaus peb nyob; tsis yog li ntawd xwb, cov Kana-as uas nyob hauv tiaj nrag, tsis hais cov uas nyob hauv Npethes Sas thiab nyob hauv tej zos ibncig thiab cov uas nyob hauv lub Hav Yexelees puavleej muaj tsheb nees hlau.” Yausuas hais rau xeem Efalayees thiab xeem Manaxes sab hnubpoob hais tias, “Nej cov neeg coob thiab muaj zog heev lawm. Yeej tsimnyog nej tau dua ib feem av ntxiv. Feem av uas ua laj roob yuav yog nej li. Txawm yog feem av ntawd tseem ua havzoov los nej cia li mus luaj thiab ntov ua nej tug, tagnrho sab no mus rau sab tim ub. Txawm yog cov Kana-as muaj tsheb nees hlau thiab muaj zog heev los nej cia li muab lawv ntiab khiav mus.” Thaum cov Yixalayees tua thiab txeeb tau tebchaws tas lawm, tagnrho cov Yixalayees tuaj sib sau rau hauv Silaus thiab tsa tus TSWV lub Tsevntaub. Ces lub tebchaws nyob thajyeeb lug lawm. Tiamsis tseem tshuav xya xeem Yixalayees uas tsis tau faib av rau lawv. Yausuas hais rau cov Yixalayees hais tias, “Nej tseem yuav tos txog thaum twg nej mam li mus tua thiab txeeb lub tebchaws uas tus TSWV uas yog nej cov yawgkoob tus Vajtswv twb muab rau nej lawm? Nej cia li xaiv ib xeem peb leeg txivneej tuaj rau kuv. Kuv yuav txib lawv mus kom thoob lub tebchaws ntsuas tej cheebtsam av uas lawv nyiam nyob ua lawv tug. Tom qab ntawd lawv mam rov los qhia rau kuv. Yuav muab lub tebchaws uas lawv mus ntsuas ntawd faib ua xya cheebtsam rau lawv; xeem Yudas yuav nyob cheebtsam sab qabteb, thiab xeem Yauxej yuav nyob cheebtsam sab qaumteb. Nej muab xya cheebtsam av ntawd sau kom meej rau hauv ntawv thiab coj los rau kuv. Kuv yuav rho ntawv thiab nug tus TSWV uas yog peb tus Vajtswv thiab faib av rau nej. Tiamsis kuv yuav tsis faib av rau xeem Levis, rau qhov lawv feem tug yog ua cov povthawj uas ua tus TSWV tes haujlwm. Tiamsis xeem Khas, xeem Lunpees thiab ib nrab xeem Manaxes, ces peb twb paub hais tias tus TSWV tus tubtxib Mauxes twb faib cheebtsam av ntawm tus Dej Yauladees sab hnubtuaj rau lawv lawm.” Yausuas hais tias, “Nej cia li mus ntsuas kom thoob lub tebchaws thiab muab sau rau hauv ntawv coj los rau kuv. Kuv yuav nyob hauv lub nroog Silaus no rho ntawv rau nej tabmeeg tus TSWV.” Thaum Yausuas hais li ntawd tas, lawv txawm mus ntsuas lub tebchaws lawm. Cov txivneej ntawd txawm mus thoob plaws lub tebchaws thiab los zaum tsaws sau saib yuav muab faib li cas thiaj tau xya cheebtsam, thiab sau tej nroog txhua lub. Ces lawv rov los cuag Yausuas hauv Silaus. Yausuas thiaj li rho ntawv tabmeeg tus TSWV thiab muab tej cheebtsam av ntawd faib rau xya xeem Yixalayees ib xeem ib cheebtsam. Xeem Npeenyamees yog thawj pab uas Yausuas xub faib av rau. Lawv cheebtsam av nyob ntu nruab nrab ntawm xeem Yudas thiab xeem Yauxej. Lawv tus ciamteb sab qaumteb yog txij ntua ntawm tus Dej Yauladees nce mus rau zaj ntav zag ntawm Yelikaus sab qaumteb, nkhaus mus rau sab hnubpoob mus hla cheebtsam uas ua laj roob thiab mus rau tiaj suabpuam Npethavees. Tus ciamteb mus rau zaj ntav zag uas nyob sab qabteb ntawm lub nroog Lus (uas hu ua Npethees), nqis mus rau Atalaus Adales mus rau saum lub roob uas nyob sab qabteb ntawm Npethes Hauloos Theem Qis. Tus ciamteb puav lub roob no sab hnubpoob mus rau sab qabteb thiab mus rau ntawm Kili-as Npa-as (lossis Kili-as Ye-alees) uas yog xeem Yudas av. Tej uas hais los no yog tus ciamteb sab hnubpoob. Tus ciamteb sab qabteb txij ntua ntawm ces kaum nroog Kili-as Ye-alees thiab mus rau ntawm cov Qhovdej Netau-as. Tus ciamteb nqis mus rau ntawm lub taw roob uas saib ntsoov lub Hav Hinoos ntawm sab qaumteb uas lub Hav Lefayees mus xaus. Tus ciamteb hla lub Hav Hinoos nqis mus rau zaj ntav zag sab qabteb ntawm Yenpus thiab nqis mus rau Elaunkees. Tus ciamteb lem mus rau sab qaumteb mus rau Esemes, mus rau Nkelilaus uas nyob ncaj lub Dawm Adumees, thiab tus ciamteb nqis mus rau ntawm lub Pobzeb Npuhas (Npuhas yog Lunpees tus tub), thiab hla sab qaumteb ntawm zaj ntav zag uas saib ntsoov rau hauv lub Hav Yauladees. Tus ciamteb nqis mus rau hauv lub hav ntawd, thiab hla mus rau zaj ntav zag ntawm Npethes Haunkelas sab qaumteb, mus xaus rau ntawm Hiavtxwv Tuag uas tus Dej Yauladees los tshuam sab qaumteb. Tej uas hais los no yog tus ciamteb kawg sab qabteb. Tus ciamteb sab hnubtuaj yog raws tus Dej Yauladees. Tej uas hais los no yog cheebtsam av uas tu rau xeem Npeenyamees ua lawv tug raws li lawv tej tsevneeg. Cov nroog uas faib rau xeem Npeenyamees ua lawv tug raws li lawv tej tsevneeg yog: Yelikaus, Npethes Haunkelas, Emes Kexis, Npethes Alanpas, Xemalais, Npethees, Avimes, Palas, Aupalas, Khefalamaunis, Aufanis thiab Nkenpas, tagnrho muaj kaum ob lub nroog thiab tej zos uas nyob ibncig. Thiab Nkinpe-oos, Lamas, Npelaus, Mixepas, Khefilas, Mauxas Lekees, Ipees, Talalaj, Xelas, Halefas, Yenpus (lossis Yeluxalees), Nkinpe-as thiab Kili-as Ye-alees, tagnrho muaj kaum plaub lub nroog thiab tej zos uas nyob ibncig. Tej uas hais los no yog cheebtsam av uas faib rau xeem Npeenyamees ua lawv tug raws li lawv tej tsevneeg. Xeem Xime-oos yog pab ob uas Yausuas faib av rau lawv raws li lawv tej tsevneeg. Lawv cheebtsam av nthuav mus txog ntua ntawm xeem Yudas tus ciamteb uas yog lub nroog Npesenpas, Senpas, Mauladas, Haxas Sualis, Npalas, Exees, Etaulas, Npethus, Haumas, Xikelas, Npethes Mankanpaus, Haxas Xuxas, Npethes Lenpaus thiab Saluhees, tagnrho muaj kaum peb lub nroog thiab tej zos uas nyob ibncig. Thiab lub nroog Ayees, Limoos, Ethes thiab Asas, tagnrho yog muab plaub lub nroog thiab tej zos uas nyob ibncig. Tagnrho tej zos uas nyob ibncig tej nroog ntawd, mus rau ntawm Npalas Npelis (lossis Lamas) uas nyob sab qabteb. Tej uas hais los no yog feem av uas faib rau xeem Xime-oos ua lawv tug raws li lawv tej tsevneeg. Vim xeem Yudas tau av dav lawv nyob tsis tas thiaj muab ib feem faib rau xeem Xime-oos. Xeem Xenpuloos yog pab peb uas Yausuas faib av rau lawv raws li lawv tej tsevneeg. Lawv cheebtsam av nthuav mus txog ntua lub nroog Xalis. Lawv tus ciamteb txij ntua ntawd mus rau sab hnubpoob, mus txog rau ntawm Male-as uas npuab lub nroog Danpeses thiab raws tus dej ntawm Yaune-as sab hnubtuaj. Tus ciamteb pib ntawm Xalis mus rau sab hnubtuaj mus txog rau Khilaus Tanpaus, mus rau Danpelas thiab nce mus rau pem Yafias. Tus ciamteb sab hnubtuaj tseem mus ntxiv rau Nkas Hefeles thiab Ekaxees, nkhaus raws lub nroog Ne-as tus ciamteb mus txog ntua ntawm Limoos. Sab qaumteb, tus ciamteb nkhaus mus rau Hanathoos thiab mus xaus rau ntawm lub Hav Itahees; thiab lub nroog Katas, Nahalas, Simeloos, Idalas thiab Npelehees, tagnrho muaj kaum ob lub nroog thiab tej zos uas nyob ibncig. Tej uas hais los no yog tej nroog thiab tej zos hauv cheebtsam uas faib rau xeem Xenpuloos ua lawv tug raws li lawv tej tsevneeg. Xeem Ixakhas yog pab plaub uas Yausuas faib av rau lawv raws li lawv tej tsevneeg. Lawv cheebtsam av tagnrho yog lub nroog Yexelees, Khexulaus, Sunees, Hafalais, Si-oos, Anahalas, Lanpis, Kisi-oos, Enpes, Lemes, Enkanees, Ehadas thiab Npepaxes. Lawv tus ciamteb npuab Tanpaus, Sahaxumas thiab Npethes Semes, thiab mus xaus rau ntawm tus Dej Yauladees, tagnrho muaj kaum rau lub nroog thiab tej zos uas nyob ibncig. Tej uas hais los no yog tej nroog thiab tej zos hauv cheebtsam av uas faib rau xeem Ixakhas ua lawv tug raws li lawv tej tsevneeg. Xeem Aseles yog pab tsib uas Yausuas faib av rau lawv raws li lawv tej tsevneeg. Lawv cheebtsam av tagnrho yog lub nroog Helekas, Halis, Npetees, Akesas, Alas Melej, Amas thiab Misales. Lawv tus ciamteb sab hnubpoob yog npuab lub Roob Kalemees thiab Sihaus Linas. Tus ciamteb nkhaus mus rau sab hnubtuaj mus txog rau Npedankoos, npuab Xenpuloos thiab lub Hav Itahees uas mus rau sab qaumteb txog pem lub nroog Npethemes thiab Neyees. Tus ciamteb mus ntxiv rau sab qaumteb mus txog ntawm lub nroog Kanpus, Enpeloos, Lehaus, Hamoos thiab Kanas, mus rau ntawm lub nroog Xidoos. Ces tus ciamteb lem mus rau ntawm Lamas thiab mus tshuam rau ntawm lub nroog Tiles uas muaj ntsa yeej thaiv; thiab lem mus rau ntawm Hauxas thiab mus xaus rau ntawm Hiavtxwv Meditelanes. Xam lub nroog Mahelas, Akhexis, Umas, Afes thiab Lehaus, tagnrho muaj nees nkaum ob lub nroog thiab tej zos uas nyob ibncig. Tej uas hais los no yog tej nroog thiab tej zos hauv cheebtsam av uas faib rau xeem Aseles ua lawv tug raws li lawv tej tsevneeg. Xeem Nathalis yog pab rau uas Yausuas faib av rau lawv raws li lawv tej tsevneeg. Lawv tus ciamteb txij ntua ntawm Heles mus rau ntawm tsob ntoo qhib hauv Xananees mus rau Adaminekes thiab mus rau Yanias, dhau mus rau ntawm Lakus thiab mus xaus rau ntawm tus Dej Yauladees. Tus ciamteb pib ntawd lem mus rau sab hnubpoob mus txog rau Anaus Tanpaus, thiab pib ntawd mus rau Hukaus, npuab Xenpuloos sab qabteb, Aseles nyob sab hnubpoob thiab tus Dej Yauladees nyob sab hnubtuaj. Tej nroog uas muaj ntsa yeej thaiv yog: Xidis, Xeles, Hamas, Lakas, Khineles, Adamas, Lamas, Haxaules, Kedes, Edeles, Ehaxaus, Yiloos, Midales, Haulees, Npethanas thiab Npethes Semes. Tagnrho muaj kaum cuaj lub nroog thiab tej zos uas nyob ibncig. Tej uas hais los no yog tej nroog thiab tej zos hauv cheebtsam av uas faib rau xeem Nathalis ua lawv tug raws li lawv tej tsevneeg. Xeem Das yog pab xya uas Yausuas faib av rau lawv raws li lawv tej tsevneeg. Lawv cheebtsam av tagnrho yog lub nroog Xaulas, Esetaus, Isemes, Sa-anpimes, Aiyaloos, Ithelas, Eloos, Tinas, Ekiloos, Etekes, Nkinpethoos, Npalas, Yehus, Npenenpelas, Nkalimoos, Meyakoos thiab Lakoos mus rau cheebtsam uas nyob ibncig lub nroog Yaupas. Thaum xeem Das lub tebchaws poob lawm, lawv mus tua thiab txeeb lub nroog Laises. Lawv txeeb tau lub nroog ntawd los ua lawv tug, thiab lawv muab cov neeg uas nyob hauv lub nroog tua povtseg huv tibsi. Lawv mus nyob hauv thiab muab lub nroog ntawd hloov dua npe hu ua Das raws li lawv yawgkoob Das lub npe. Tej uas hais los no yog tej nroog thiab tej zos hauv cheebtsam av uas faib rau xeem Das ua lawv tug raws li lawv tej tsevneeg. Thaum cov Yixalayees faib av rau txhua xeem tas lawm. Lawv muab ib feem av rau Noos tus tub Yausuas ua nws tug raws li tus TSWV tau hais tseg lawm, lawv muab lub nroog Tinas Xelas uas nyob hauv xeem Efalayees cheebtsam av uas ua laj roob rau Yausuas raws li nws thov. Yausuas ua nroog thiab nyob hauv. Tus povthawj Ele-axas, Noos tus tub Yausuas thiab cov thawjcoj ntawm txhua xeem Yixalayees tej tsevneeg tuaj rho ntawv nug tus TSWV hauv lub nroog Silaus ntawm tus TSWV lub Tsevntaub. Lawv muab lub tebchaws faib tiav tas li ntawd. Tus TSWV hais rau Yausuas hais tias, “Koj hais rau cov Yixalayees kom lawv cia li xaiv ib co nroog cawm siav raws li kuv hais rau Mauxes qhia rau koj lawm. Yog leejtwg tua yuam kev raug ib tug neeg tuag, tus ntawd cia li khiav mus nkaum hauv cov nroog ntawd kom dim ntawm tus uas nrhiav nws tua pauj. Nws yuav tsum khiav mus nkaum hauv cov nroog ntawd ib lub, mus rau ntawm qhov chaw txiav txim uas nyob ntawm roojvag nroog, thiab piav tej xwm ntawd qhia rau cov thawjcoj. Ces lawv thiaj yuav pub nws mus rau hauv lub nroog thiab muab chaw rau nws nyob. Yog hais tias tus uas nrhiav nws tua tuaj txog ntawm roojvag los lawv yuav tsis muab nws cob rau tus ntawd. Lawv yuav tsomkwm nws, rau qhov yog nws tua yuam kev raug tuag xwb, tsis yog nws chim thiab txhob txwm tua. Nws yuav tau nyob hauv lub nroog ntawd mus txog hnub uas luag coj nws mus txiav txim lossis mus txog hnub uas tus ua Povthawj Hlob lub sijhawm ntawd tuag tso, nws mam li dim lub txim tua neeg thiab tau rov mus rau hauv nws lub nroog.” Yog li ntawd, sab tebchaws ntawm tus Dej Yauladees sab hnubpoob, lawv thiaj tshwj lub nroog Kedes hauv Kalilais hauv xeem Nathalis cheebtsam av uas ua laj roob; lub nroog Sekhees hauv xeem Efalayees cheebtsam av uas ua laj roob; thiab lub nroog Henploos hauv xeem Yudas cheebtsam av uas ua laj roob. Ntawm tus Dej Yauladees sab hnubtuaj, hauv lub tiaj suabpuam uas nyob ntawm lub nroog Yelikaus sab hnubtuaj, lawv xaiv lub nroog Npexeles hauv xeem Lunpees cheebtsam av; lub nroog Lamaus hauv Nkile-as uas yog xeem Khas cheebtsam av thiab lub nroog Nkaulas hauv Npasas uas yog xeem Manaxes cheebtsam av. Cov nroog cawm siav no, yog cov Yixalayees xaiv rau lawv thiab cov neeg txawv tebchaws uas nrog lawv nyob. Yog leejtwg tua yuam kev raug ib tug neeg tuag, nws thiaj tau chaw mus nkaum hauv cov nroog ntawd ib lub kom dim tus uas nrhiav nws tua; nws thiaj tsis raug tua ua ntej luag txiav txim rau nws. Xeem Levis cov thawjcoj mus cuag tus povthawj Ele-axas, Noos tus tub Yausuas, thiab txhua xeem Yixalayees cov thawjcoj ntawm tej tsevneeg, ntawm lub nroog Silaus hauv tebchaws Kana-as thiab hais tias, “Tus TSWV hais rau Mauxes kom muab ib co nroog uas muaj tshav zaub nyob ibncig rau peb tej tsiaj noj rau peb nyob.” Yog li ntawd, cov thawjcoj thiaj faib tej nroog uas muaj tshav zaub hauv lawv tej cheebtsam rau xeem Levis raws li tus TSWV tau hais rau cov Yixalayees lawm. Xeem Levis uas yog cuab Kauhas yog thawj pab uas cov thawjcoj faib nroog rau. Tus povthawj Aloos cov xeebntxwv tej tsevneeg tau kaum peb lub nroog hauv xeem Yudas, xeem Sime-oos thiab xeem Npeenyamees cheebtsam av. Dua li lwm tsevneeg ntawm cuab Kauhas tau kaum lub nroog hauv xeem Efalayees, xeem Das thiab xeem Manaxes sab Hnubpoob cheebtsam av. Cuab Nkesoos tau kaum peb lub nroog hauv xeem Ixakhas, xeem Aseles, xeem Nathalis thiab xeem Manaxes sab Hnubtuaj cheebtsam av. Cuab Melalis tej tsevneeg tau kaum ob lub nroog hauv xeem Lunpees, xeem Khas thiab xeem Xenpuloos cheebtsam av. Cov Yixalayees rho ntawv, faib tej nroog uas muaj tshav zaub rau xeem Levis raws li tus TSWV tau hais rau Mauxes lawm. Tej uas hais los no yog tej npe nroog hauv xeem Yudas thiab xeem Xime-oos cheebtsam av uas muab faib rau Aloos cov xeebntxwv uas yog cuab Kauhas thiab yog Levis cov xeebntxwv. Lawv yog thawj pab uas xub los rho ntawv. Lawv rho tau lub nroog Alanpas (Alanpas yog Anas txiv) uas nimno yog lub nroog Henploos hauv xeem Yudas cheebtsam av ua laj roob uas muaj tshav zaub nyob ibncig. Tiamsis tej teb thiab tej zos uas nyob ibncig lub nroog ntawd twb xub muab rau Yefunes tus tub Kalej ua nws tug lawm. Cov nroog uas muab ntxiv rau lub nroog Henploos (yog ib lub nroog cawm siav) uas muab faib rau tus povthawj Aloos cov xeebntxwv yog: Linas, Yatis, Etemaus, Hauloos, Denpis, Ayees, Yutas thiab Npethes Semes uas muaj tej tshav zaub, tagnrho muaj cuaj lub nroog nyob hauv xeem Yudas thiab xeem Xime-oos cheebtsam av. Hauv xeem Npeenyamees cheebtsam av yog muaj plaub lub nroog: Nkinpe-oos, Nkenpas, Anathaus thiab Alimoos uas muaj tshav zaub. Tagnrho kaum peb lub nroog uas muab faib rau Aloos cov xeebntxwv uas ua povthawj puavleej muaj tshav zaub. Xeem Levis lwm tsevneeg uas yog cuab Kauhas tau cov nroog hauv xeem Efalayees cheebtsam av. Lawv tau plaub lub nroog: Sekhees (yog lub nroog cawm siav) uas muaj tshav zaub nyob hauv xeem Efalayees cheebtsam av uas ua laj roob, Nkexes, Kixais thiab Npethes Hauloos uas muaj tshav zaub. Hauv xeem Das cheebtsam av, lawv tau plaub lub nroog: Etekes, Nkinpethoos, Aiyaloos thiab Nkalimoos uas muaj tshav zaub. Hauv xeem Manaxes sab Hnubpoob cheebtsam av, lawv tau ob lub nroog: Tanas thiab Nkalimoos uas muaj tshav zaub. Tagnrho kaum lub nroog uas muab rau cuab Kauhas tej tsevneeg puavleej muaj tshav zaub. Xeem Levis uas yog cuab Nkesoos tau ob lub nroog hauv xeem Manaxes sab Hnubtuaj cheebtsam av: Nkaulas (yog lub nroog cawm siav) uas nyob hauv Npasas thiab Npetelas uas muaj tshav zaub. Hauv xeem Ixakhas cheebtsam av, lawv tau plaub lub nroog: Kisi-oos, Danpelas, Yamus thiab Enkanees uas muaj tshav zaub. Hauv xeem Aseles cheebtsam av, lawv tau plaub lub nroog: Misales, Adoos, Hekas thiab Lehaus uas muaj tshav zaub. Hauv xeem Nathalis cheebtsam av, lawv tau peb lub nroog: Kedes (yog lub nroog cawm siav) uas nyob hauv Kalilais, Hamaus Daules thiab Kaletas uas muaj tshav zaub. Tagnrho kaum peb lub nroog uas muab rau cuab Nkesoos tej tsevneeg puavleej muaj tshav zaub. Xeem Levis lwm pab uas yog cuab Melalis tau plaub lub nroog hauv xeem Xenpuloos cheebtsam av: Yaune-as, Kaletas, Dinas thiab Nahalas uas muaj tshav zaub. Hauv xeem Lunpees cheebtsam av, lawv tau plaub lub nroog: Npexeles, Yahas, Kedemaus thiab Mefas uas muaj tshav zaub. Hauv xeem Khas cheebtsam av, lawv tau plaub lub nroog: Lamaus (yog lub nroog cawm siav) uas nyob hauv Nkile-as, Mahana-ees, Hesenpoos thiab Yaxes uas muaj tshav zaub. Yog li ntawd, cov nroog uas muab rau cuab Melalis tagnrho muaj kaum ob lub nroog. Thaum lawv mus tua thiab txeeb tau tagnrho lub tebchaws uas tus TSWV tau coglus tseg rau lawv cov yawgkoob hais tias yuav muab rau lawv lawm. Lawv txawm los nyob hauv lub tebchaws ntawd. Tus TSWV pub lawv tau nyob thajyeeb lug hauv lub tebchaws ntawd, raws li nws tau coglus tseg rau lawv cov yawgkoob lawm. Lawv cov yeebncuab tsis muaj cuabkav tuaj tawmtsam lawv li, rau qhov tus TSWV cia cov Yixalayees kovyeej lawv tej yeebncuab. Tus TSWV ua raws li nws tau coglus tseg rau cov Yixalayees lawm. Yausuas hu tagnrho xeem Lunpees, xeem Khas thiab xeem Manaxes sab Hnubtuaj los cuag nws. Yausuas hais rau lawv hais tias, “Nej tau ua txhua yam uas tus TSWV tus tubtxib Mauxes hais rau nej ua, thiab nej twb ua raws li kuv hais lawm. Txij thaum pib los txog nimno, nej tsis tso nej cov kwvtij Yixalayees tseg li. Nej ua tib zoo mloog thiab ua raws li tus TSWV uas yog nej tus Vajtswv tej lus samhwm. Nimno nej cov kwvtij Yixalayees twb nyob thajyeeb lug raws li tus TSWV uas yog nej tus Vajtswv tau coglus tseg lawm. Nej cia li rov mus tsev, mus rau nej lub tebchaws ntawm tus Dej Yauladees sab hnubtuaj uas tus TSWV tus tubtxib Mauxes twb muab rau nej lawm. Nej yuav tsum nco ntsoov ua raws li tej kevcai uas Mauxes twb qhia rau nej lawm hais tias, hlub tus TSWV uas yog nej tus Vajtswv, ua raws li nws siab nyiam, mloog nws lus, muab siab npuab nws thiab ua nws tes haujlwm kawg nej lub siab lub ntsws.” Yog li ntawd, xeem Lunpees, xeem Khas thiab xeem Manaxes sab Hnubtuaj thiaj rov mus tsev, lawv tso lawv cov kwvtij Yixalayees rau ntawm lub nroog Silaus hauv tebchaws Kana-as, thiab lawv rov mus rau tebchaws Nkile-as uas lawv txeeb tau los raws li tus TSWV tau hais rau Mauxes kom hais rau lawv lawm. Thaum xeem Lunpees, xeem Khas thiab xeem Manaxes sab Hnubtuaj rov los txog hauv Nkelilaus uas nyob ntawm ntug Dej Yauladees sab hnubpoob, lawv teeb tau ib lub thaj loj thiab zoo heev rau ntawm ntug dej. Muaj neeg mus qhia rau cov kwvtij Yixalayees hais tias, “Nej mloog kuv hais! Xeem Lunpees, xeem Khas thiab xeem Manaxes sab Hnubtuaj teeb tau ib lub thaj rau ntawm Nkelilaus uas nyob ntawm ntug Dej Yauladees uas yog peb sab!” Thaum cov kwvtij Yixalayees hnov zaj no, lawv txawm tuaj sib sau rau hauv Silaus thiab npaj mus tua cov xeem uas nyob sab hnubtuaj. Cov kwvtij Yixalayees thiaj tso tus povthawj Finehas uas yog Ele-axas tus tub mus cuag xeem Lunpees, xeem Khas thiab xeem Manaxes sab Hnubtuaj uas nyob hauv tebchaws Nkile-as. Muaj kaum leej thawjcoj, ib xeem ib leeg ntawm cov xeem uas nyob sab hnubpoob nrog Finehas mus, lawv puavleej yog tus thawj ntawm tej tsevneeg thiab tej cuab. Lawv mus cuag xeem Lunpees, xeem Khas thiab xeem Manaxes sab Hnubtuaj hauv tebchaws Nkile-as, thiab hais rau tus TSWV haivneeg hais tias, “Vim li cas nej ua tej kev phem no tawmtsam cov Yixalayees tus Vajtswv? Qhov uas nej teeb lub thaj no rau nej, yog nej ntxeev siab rau tus TSWV! Tsis yog nej ua los pehawm nws! Nej puas tseem nco tau tej kev txhaum uas peb ua nyob ntawm Pe-aus uas tus TSWV tso sub tawg sub ntsha rau txim rau peb? Nimno peb raug txomnyem twb vim tej ntawd ntag. Peb ua txhaum loj li ntawd tseem tsis tau txaus thiab los? Nej yuav tso tus TSWV tseg los? Yog hnub no nej ntxeev siab rau tus TSWV, tagkis nws yuav chim rau peb cov Yixalayees txhua tus. Yog nej lub tebchaws no tsis huv, nej cia li tuaj rau tim tus TSWV lub tebchaws uas teeb tus TSWV lub Tsevntaub. Tuaj thov peb muab av rau nej. Tiamsis nej tsis txhob ntxeev siab rau tus TSWV lossis ntxeev siab rau peb thiab mus teeb dua lwm lub thaj ntxiv rau tus TSWV uas yog peb tus Vajtswv lub. Nej nco ntsoov hais tias, Zelas tus tub Akhas tsis ua raws li tus TSWV tej lus, nws tsis muab tej khoom hlawv kom tas huv tibsi; cov Yixalayees thiaj raug txim vim tej ntawd. Muaj ntau leej tuag nrog Akhas vim nws tej kev txhaum.” Xeem Lunpees, xeem Khas thiab xeem Manaxes sab Hnubtuaj teb rau cov thawjcoj ntawm tej tsevneeg ntawm cov xeem uas nyob sab hnubpoob hais tias, “Tus muaj Hwjchim Loj yog Vajtswv! Nws yog tus TSWV! Tus muaj Hwjchim Loj yog Vajtswv! Nws yog tus TSWV! Nws paub tej uas peb ua no, thiab peb xav kom nej paub! Yog hais tias peb ntxeev siab thiab tsis muab siab npuab tus TSWV, thov tsis txhob pub kom peb muaj sia nyob! Yog hais tias peb tsis mloog tus TSWV lus, peb teeb lub thaj no hlawv peb tej khoom theej txhoj, tej nplej lossis tej khoom fij ua kev sib raug zoo, ces cia tus TSWV rau txim rau peb. Tsis yog peb ntxeev siab! Qhov uas peb teeb lub thaj no yog peb ntshai nyob tsam yav tom ntej nej cov xeebntxwv yuav hais rau peb cov xeebntxwv hais tias, ‘Nej tau ua dabtsi rau tus TSWV uas yog cov Yixalayees tus Vajtswv? Tus TSWV muab tus Dej Yauladees ua tus ciamteb quas nruab nrab ntawm peb thiab nej, nej cov uas yog xeem Lunpees thiab xeem Khas, tsis tau ua dabtsi rau tus TSWV li.’ Ces nej cov xeebntxwv yuav ua rau peb cov xeebntxwv tso txojkev pehawm tus TSWV tseg. Peb teeb lub thaj no, tsis yog teeb los hlawv tsiaj fij lossis hlawv khoom fij, tiamsis yog peb teeb los ua lub cim qhia rau peb thiab rau nej thiab rau peb tej xeebntxwv ntau tiam tom qab paub hais tias, peb yeej pehawm tus TSWV, hlawv khoom theej txhoj thiab fij khoom ua kev sib raug zoo tabmeeg tus TSWV lub Tsevntaub. Tej no yog peb ua tseg kom nej cov xeebntxwv tsis txhob hais tias, ‘Nej tsis tau ua dabtsi rau tus TSWV li.’ Tej no yog tej uas peb txhawj txog. Yog muaj tseeb li peb xav ntawd tiag, peb cov xeebntxwv thiaj muaj lus hais tias, ‘Nej sim saib saib! Peb cov yawgkoob muaj lub thaj zoo ib yam li tus TSWV lub thiab. Tsis yog peb teeb los hlawv tsiaj lossis hlawv khoom fij, tiamsis yog teeb los ua lub cim tseg rau nej thiab rau peb xwb.’ Tsis yog peb ntxeev siab lossis tso tus TSWV tseg, peb yuav cia li teeb dua ib lub thaj hlawv tsiaj, hlawv nplej lossis lwm yam khoom fij. Peb yeej tsis teeb dua lwm lub thaj kom zoo li tus TSWV uas yog peb tus Vajtswv lub uas nyob ntawm tus TSWV lub Tsevntaub hauv ntej.” Tus povthawj Finehas thiab kaum leej thawjcoj uas sawv cev tsoom pejxeem uas yog cov thawj ntawm tej tsevneeg ntawm cov xeem nyob sab hnubpoob uas nrog Finehas mus ntawd hnov tej lus uas xeem Lunpees, xeem Khas thiab xeem Manaxes sab Hnubtuaj hais, lawv thiaj txaus siab. Tus povthawj Finehas uas yog Ele-axas tus tub hais rau lawv peb xeem ntawd hais tias, “Nimno peb paub hais tias tus TSWV nrog peb nyob. Tsis yog nej ntxeev siab rau tus TSWV, tiamsis yog nej ua kom cov Yixalayees dim tus TSWV txojkev rau txim xwb.” Finehas thiab cov thawjcoj uas nrog nws mus tso xeem Lunpees, xeem Khas thiab xeem Manaxes sab Hnubtuaj rau hauv tebchaws Nkile-as thiab rov los cuag cov Yixalayees rau hauv tebchaws Kana-as, thiab piav txhua yam rau lawv. Cov kwvtij Yixalayees txaus siab thiab ua Vajtswv tsaug. Lawv tsis hais txog qhov uas yuav tua thiab rhuav lub tebchaws uas xeem Lunpees thiab xeem Khas nyob lawm. Xeem Lunpees thiab xeem Khas hais tias, “Lub thaj no ua timkhawv rau peb sawvdaws hais tias tus TSWV yog Vajtswv!” Yog li ntawd, lawv thiaj tis npe rau lub thaj ntawd hu ua “Timkhawv.” Tau ib ntus ntev loo los rau tom qab no, tus TSWV pub cov Yixalayees nyob tso siab lug tsis ntshai lawv tej yeebncuab uas nyob ibncig lawv. Thaum ntawd Yausuas laus heev lawm, nws thiaj hu tagnrho cov Yixalayees, cov txwjlaug, cov thawjcoj, cov txiav txim thiab cov nomtswv tuaj cuag nws, nws hais rau lawv hais tias, “Nimno kuv laus heev lawm. Nej twb pom txhua yam uas tus TSWV uas yog nej tus Vajtswv ua rau txhua haivneeg lawm. Nws ua li ntawd yog nws ua pab nej. Tus TSWV uas yog nej tus Vajtswv tuaj nej tog pab nej tua thiab txeeb tau lub tebchaws. Kuv twb muab txhua haivneeg uas nyob hauv lub tebchaws no tej av, tsis hais tej uas peb txeeb tau lawm lossis tej uas peb tseem tsis tau mus txeeb, faib rau nej txhua xeem lawm. Tej av no yog txij ntua ntawm tus Dej Yauladees uas nyob sab hnubtuaj mus ti nkaus rau ntawm Hiavtxwv Meditelanes uas nyob sab hnubpoob. Tus TSWV uas yog nej tus Vajtswv yuav ntiab lawv tawm ua ntej nej los rau hauv lub tebchaws no, thiab nws yuav ntiab kom lawv khiav tabmeeg nej. Nej yuav tau lawv lub tebchaws raws li tus TSWV uas yog nej tus Vajtswv tau coglus tseg rau nej lawm. Yog li ntawd, nej yuav tsum mloog lus thiab ua raws li txhua yam uas Mauxes sau rau hauv Phau Ntawv Kevcai lawm. Nej tsis txhob muab ib nqes tso tseg li, nej thiaj tsis mus nrog lwm haivneeg uas nrog nej nyob koom ua ib nqag, tsis txhob pe lossis teev lawv tej vajtswv thiab tuav lawv tej vajtswv npe coglus. Nej yuav tsum muab siab npuab tus TSWV ib yam li nej ibtxwm muab siab npuab los txog rau niaj hnub no. Thaum nej los nyob hauv lub tebchaws no, tus TSWV muab lwm haivneeg uas muaj zog thiab muaj hwjchim ntiab tawm tabmeeg nej, tsis muaj leejtwg muaj cuabkav tiv nej li. Nej cov neeg, ib leeg yeej muaj peevxwm ua tau kom ib txhiab leej ntshai thiab khiav mus, rau qhov tus TSWV uas yog nej tus Vajtswv pab nej tua lawv, raws li nws tau coglus tseg rau nej lawm. Nej yuav tsum hlub tus TSWV uas yog nej tus Vajtswv. Yog nej tsis muab siab npuab tus TSWV, nej mus nrog lwm haivneeg uas nrog nej nyob ua tshoob ua kos, kom nej paub hais tias tus TSWV yuav tsis ntiab cov neeg ntawd tawm mus. Tiamsis cov neeg ntawd yuav ua teebmeem rau nej ib yam li lub vojhlua lossis lub qhov uas cuab hmuv tos nej, thiab ib yam li tus nplawm uas nplawm nej nraubqaum lossis ib yam li tus saus uas nyob hauv nej qhovmuag. Nej yuav raug txomnyem li ntawd mus txog hnub uas nej tsis tshuav ib tug seem nyob hauv lub tebchaws uas tus TSWV uas yog nej tus Vajtswv muab rau nej. “Nimno kuv tsis muaj pestsawg xyoo nrog nej nyob lawm. Nej yeej paub hais tias, tus TSWV uas yog nej tus Vajtswv twb pub ib puas tsav yam zoo rau nej raws li nws tau coglus tseg rau nej tsis poob ib los li. Tiamsis nej yuav tsum ua raws li nws tej lus ib yam li nws ua raws li nws tej lus cog tseg rau nej thiab. Yog nej tsis coj raws li tus TSWV uas yog nej tus Vajtswv tej lus uas cog tseg rau nej, nej mus pe lwm haivneeg tej vajtswv, nws yuav chim thiab rau txim rau nej, ces tsis ntev nej yuav tsis tshuav ib tug nyob hauv lub tebchaws zoo uas nws muab rau nej.” Tom qab ntawd, Yausuas hu tagnrho cov Yixalayees txhua xeem tuaj txoos ua ke rau ntawm Sekhees. Nws kom cov txwjlaug, cov thawjcoj, cov txiav txim thiab cov Yixalayees cov nomtswv tuaj nyob tabmeeg Vajtswv. Yausuas hais rau sawvdaws hais tias, “Tus TSWV uas yog cov Yixalayees tus Vajtswv hais li no: ‘Thaum ub nej cov yawgkoob tseem nyob ntawm ntug Dej Efalates sab tid, lawv pe lwm haivneeg tej vajtswv. Cov yawgkoob ntawd ib tug yog Telas uas yog Anplahas thiab Nahaus txiv ntag. Kuv coj nej yawgkoob Anplahas tawm hauv lub tebchaws ntawd hla tus Dej Efalates thiab coj nws mus thoob plaws tebchaws Kana-as. Kuv pub nws muaj nws tus tub Ixaj, thiab muaj xeebntxwv coob, kuv pub Ixaj muaj Yakhauj thiab Exaus. Kuv muab lub tebchaws Edoos uas ua laj roob rau Exaus ua nws tug, tiamsis nej yawgkoob Yakhauj thiab nws cov menyuam tsiv mus nyob nram tebchaws Iziv. Tom qab ntawd kuv txib Mauxes thiab Aloos mus, thiab kuv tso tej kev siv kev npog los rau tebchaws Iziv. Tiamsis kuv coj nej tawm los; thaum kuv coj nej cov yawgkoob tawm nram tebchaws Iziv los, cov Iziv caij nees thiab tsheb nees, tso tubrog caum lawv tua. Tiamsis thaum nej cov yawgkoob los txog ntawm Hiavtxwv Liab, lawv quaj thov kuv pab, kuv thiaj tso huab dub los quas hlo lawv thiab cov Iziv. Kuv ua kom hiavtxwv nphau los npog nkaus cov Iziv rau hauv qab thu. Nej paub hais tias kuv tau ua li cas rau cov Iziv. “ ‘Nej nyob ntawm tiaj suabpuam tau ntev heev. Kuv mam coj nej los rau hauv cov Amaules lub tebchaws uas nyob ntawm tus Dej Yauladees sab hnubtuaj. Cov Amaules tua nej, tiamsis kuv cia nej tua yeej lawv. Kuv ua rau lawv puastsuaj tabmeeg nej thiab cia nej txeeb tau lawv lub tebchaws. Xipaules tus tub Npalaj uas ua vajntxwv kav tebchaws Mau-am tuaj tua nej. Nws txib neeg mus hais rau Npe-aus tus tub Npala-as kom tuaj foom tsis zoo rau nej. Tiamsis kuv tsis mloog Npala-as tej lus, Npala-as thiaj foom koob hmoov rau nej. Kuv ua li ntawd, yog kuv cawm nej dim ntawm Npalaj tes. Nej hla tus Dej Yauladees mus rau hauv lub nroog Yelikaus. Cov neeg hauv Yelikaus tawmtsam nej ib yam li cov Amaules, cov Pelixes, cov Kana-as, cov Hitis, cov Nkinkasis, cov Hivis thiab cov Yenpus tua nej, tiamsis kuv cia nej tua yeej lawv. Thaum nej tabtom los txeem lawv lub tebchaws, kuv ua rau lawv ntshai heev, nej thiaj raws tau cov Amaules ob tug vajntxwv tawm. Nej tsis tau muab nej tej hneevnti thiab tej ntaj tua li. Kuv muab lub tebchaws uas nej lub zog tsis tau khwv thiab tej nroog uas nej txhais tes tsis tau ua pub rau nej nyob. Nimno nej los nyob hauv tej nroog no, nej tau noj tej txiv hmab thiab tej txiv ntoo roj uas tsis yog nej cog.’ ” Yausuas hais ntxiv hais tias, “Txij no mus, nej yuav tsum hwm tus TSWV, muab siab npuab nws thiab muaj lub siab dawb pehawm nws. Tsis txhob pe tej vajtswv uas nej cov yawgkoob pe tim tebchaws Mexuputamias thiab nram tebchaws Iziv, nej pehawm tus TSWV tib leeg xwb. Yog nej tsis txaus siab pehawm tus TSWV, hnub no nej cia li txiav txim siab saib nej yuav pehawm tus twg, nej yuav pe tej vajtswv uas nej cov yawgkoob pe tim tebchaws Mexuputamias lossis pe tej vajtswv uas cov Amaules pe hauv lub tebchaws uas nej nyob no. Txawm yog nej yuav pe tus twg los xij, kuv thiab kuv tsevneeg, peb yuav pehawm tus TSWV tib leeg xwb.” Cov neeg teb hais tias, “Peb yuav tsis tso tus TSWV tseg thiab mus pe lwm haivneeg tej vajtswv! Tus TSWV uas yog peb tus Vajtswv tau coj peb cov yawgkoob thiab peb tawm ntawm kev ua luag qhev nram tebchaws Iziv los, thiab peb twb pom tej txujci tseemceeb uas nws ua lawm. Tus TSWV tsomkwm thiab nrog nraim peb hauv tej tebchaws uas peb los dhau lawm txhua qhov. Tus TSWV ntiab cov Amaules uas nyob hauv lub tebchaws no tawm mus ua ntej peb los nyob. Yog li ntawd, peb yuav pehawm tus TSWV uas yog peb tus Vajtswv xwb.” Yausuas hais rau lawv hais tias, “Ntshai nej yuav ua tsis tau tus TSWV tes haujlwm. Rau qhov nws yog Vajtswv tus dawbhuv, nws khib nej heev, nws yuav tsis zam txim li. Yog nej tso tus TSWV tseg mus pe lwm haivneeg tej vajtswv, nws yuav tawmtsam thiab rau txim rau nej. Txawm yog yav tas los nws ua tau zoo rau nej lawm los nws yuav ua kom nej puastsuaj mus.” Cov neeg hais rau Yausuas hais tias, “Peb yuav tsis ua li ntawd! Peb yuav pehawm tus TSWV xwb.” Yausuas hais rau lawv hais tias, “Nej nco nej tej lus tseg, nej yeej lees hais tias nej yuav pehawm tus TSWV xwb.” Lawv teb hais tias, “Peb yuav ua li ntawd.” Yausuas hais rau lawv hais tias, “Nej yuav tsum tso lwm haivneeg tej vajtswv tseg, muab siab npuab tus TSWV uas yog cov Yixalayees tus Vajtswv.” Lawv hais rau Yausuas hais tias, “Peb yuav pehawm tus TSWV uas yog peb tus Vajtswv thiab mloog nws tej lus.” Hnub ntawd Yausuas thiaj kom lawv coglus, Yausuas muab tej kevcai thiab tej lus samhwm los qhia rau lawv ntawm Sekhees, kom lawv coj raws li ntawd. Yausuas sau tej lus samhwm ntawd rau hauv phau ntawv uas teev Vajtswv Txoj Kevcai. Yausuas muab ib lub pobzeb loj los teeb rau hauv qab tsob ntoo qhib uas ze tus TSWV lub tsevntaub. Yausuas hais rau lawv hais tias, “Lub pobzeb no yuav ua timkhawv rau peb. Lub pobzeb no hnov txhua lo lus uas tus TSWV hais rau peb, nws yuav ua timkhawv tawmtsam nej, kom nej tsis txhob ntxeev siab rau nej tus Vajtswv.” Yausuas txawm kom lawv rov qab mus tsev, thiab lawv nyias rov mus rau nyias lub tebchaws lawm. Tom qab ntawd, Noos tus tub Yausuas uas yog tus TSWV tus tubtxib tuag thaum nws hnubnyoog muaj ib puas kaum xyoo. Lawv muab nws faus rau hauv nws thaj av ntawm lub nroog Tinas Xelas uas ua laj roob hauv tebchaws Efalayees uas nyob ntawm lub Roob Nkasas sab qaumteb. Tiam uas Yausuas tseem ua neej nyob thiab tom qab uas nws tuag lawm, lossis ntu uas cov povthawj tiam ntawd tseem ua neej nyob, cov Yixalayees pehawm tus TSWV xwb, thiab lawv pom txhua yam uas tus TSWV tau ua pab cov Yixalayees. Yauxej lub cev uas cov Yixalayees coj nram tebchaws Iziv los, lawv muab faus rau ntawm Sekhees, hauv thaj av uas Yakhauj muab ib puas daim nyiaj yuav ntawm Hamaules uas yog Sekhees txiv los. Thaj av ntawd yog Yauxej cov xeebntxwv tug. Aloos tus tub Ele-axas tuag thiab lawv muab nws faus rau ntawm lub nroog Nkinpe-as uas muab tu rau nws tus tub Finehas hauv tebchaws Efalayees uas ua laj roob. Tom qab uas Yausuas tuag lawm cov Yixalayees nug tus TSWV hais tias, “Pab twg yuav ntaus thawj ua ntej mus pab peb tua cov Kana-as?” Tus TSWV teb hais tias, “Xeem Yudas yuav ntaus thawj mus ua ntej. Kuv muab lub tebchaws tso rau lawv kav lawm.” Cov Yudas hais rau cov Xime-oos hais tias, “Nej nrog peb mus kom txog ntawm tus ciamteb uas faib rau peb, thiab pab tua cov Kana-as. Ces peb ho nrog nej mus rau ntawm cheebtsam uas faib rau nej.” Yog li ntawd, xeem Xime-oos thiaj nrog xeem Yudas mus ntaus rog. Tus TSWV muab cov Kana-as thiab cov Pelixes cob rau lawv tes, thiab lawv tua yeej kaum txhiab leej neeg uas nyob hauv lub nroog Npexeles. Lawv ntsib Adauninpexes hauv lub nroog Npexeles thiab lawv nrog nws sib tua. Nws khiav tawm, tiamsis lawv raws nws qab, ntes tau nws thiab muab nws ob tug ntivtes xoo thiab ob tug ntivtaw xoo txiav povtseg. Adauninpexes hais tias, “Kuv tau muab xya caum tus vajntxwv cov ntivtes xoo thiab ntivtaw xoo txiav povtseg thiab cia khaws tej mov uas poob hauv kuv qab rooj noj. Nimno Vajtswv tau ua pauj rau kuv ib yam li kuv tau ua rau lawv lawm.” Lawv coj nws los rau hauv lub nroog Yeluxalees, nws thiaj tuag rau hauv lawm. Cov Yudas ntaus yeej thiab txeeb tau lub nroog Yeluxalees. Lawv tua cov neeg hauv nroog tuag tas thiab muab lub nroog ntawd hlawv kub hnyiab tas huv tibsi lawm. Tom qab ntawd, lawv mus tua cov Kana-as uas nyob saum tej ncov roob, ntawm tej taw roob, thiab hauv tej tiaj mojsab qhua mus rau sab qabteb. Lawv tawm mus tua cov Kana-as hauv lub nroog Henploos uas ibtxwm hu ua Kili-as Alenpas. Nyob qhov ntawd, lawv tua yeej Sesais cuab kwvtij, Ahimas cuab kwvtij thiab Talemais cuab kwvtij. Cov Yudas sawv kev qhov ntawd mus ntaus lub nroog Denpis (lub nroog ntawd, ibtxwm hu ua Kili-as Sefeles). Lawv cov ntawd muaj ib tug hu ua Kalej, nws hais tias, “Yog leejtwg mus tua yeej lub nroog Kili-as Sefeles, mas kuv yuav muab kuv tus ntxhais Akhexas rau nws yuav ua pojniam.” Authaniyees uas yog Kalej tus kwv Kenaxes tus tub thiaj mus txeeb tau lub nroog ntawd, yog li ntawd, Kalej thiaj muab nws tus ntxhais Akhexas rau Authaniyees yuav. Hnub uas txis tshoob Authaniyees taij Akhexas kom thov nws txiv muab ib thaj teb rau nkawd. Akhexas thiaj nqis saum nws tus neesluav nraubqaum los, thiab Kalej nug hais tias, “Mentxhais koj xav tau dabtsi?” Nws teb hais tias, “Kuv xav tau ob peb lub qhovdej. Rau qhov thaj av uas koj muab rau kuv ntawd yog av qhua xwb.” Yog li ntawd, Kalej thiaj muab thaj av uas muaj ib lub qhovdej nyob sab ped thiab ib lub nyob sab nrad rau nws tus ntxhais. Mauxes yawmtxiv cov xeebntxwv uas yog cov neeg Kenais, nrog cov Yudas tawm hauv Yelikaus uas yog lub nroog toovlaj mus rau hauv tiaj suabpuam qhuav ntawm Alas sab qabteb hauv xeev Yudas. Lawv mus nyob xyaw cov neeg Amalej rau ntawm thaj chaw ntawd. Cov Yudas nrog cov Xime-oos mus thiab lawv tua yeej cov Kana-as hauv lub nroog Xefas. Lawv rhuav lub nroog ntawd puastsuaj tas. Yog li ntawd, lawv thiaj tis npe rau lub nroog ntawd hu ua Haulemas. Muab lub nroog Henploos faib rau Kalej raws li Mauxes tau coglus tseg, Kalej thiaj muab peb cuab kwvtij uas yog Anas cov xeebntxwv raws khiav tawm hauv lub nroog ntawd. Tiamsis xeem Npeenyamees tsis tau raws cov Yenpus uas nyob hauv lub nroog Yeluxalees tawm, thiab cov Yenpus tseem nrog cov Npeenyamees nyob ua ke txij thaum ntawd los li. Lawv mus ntsib ib tug txivneej nyob hauv lub nroog ntawd, thiab lawv hais rau nws hais tias, “Koj qhia kev rau peb mus hauv nroog, peb thiaj tsis ntaus koj.” Nws thiaj qhia kev rau lawv, ces cov Efalayees thiab cov Manaxes thiaj muab cov neeg hauv lub nroog ntawd tua tuag tas, tsuas tseg tus txivneej ntawd thiab nws tsevneeg nkaus xwb. Tom qab ntawd, nws thiaj tsiv mus rau hauv tebchaws Hitis; nws mus rhawv tau ib lub nroog rau hauv thiab tis npe hu ua Luxes. Lub npe ntawd tseem nyob los txog niaj hnub no. Cov Manaxes tsis tau raws cov neeg uas nyob hauv lub nroog Npethes Se-as, Ta-anas, Daules, Ile-as, Menkidaus thiab tej zos uas nyob ibncig cov nroog ntawd tawm; cov Kana-as tseem nyob hauv cov nroog ntawd. Thaum cov Yixalayees huamvam coob thiab muaj zog zuj zus lawm, lawv thiaj yuam cov Kana-as ua haujlwm rau lawv, tiamsis lawv tseem tsis tau raws cov neeg ntawd tawm kom tas. Cov Efalayees tsis tau raws cov Kana-as uas nyob hauv lub nroog Nkexes tawm, yog li ntawd, cov Kana-as thiaj tseem nrog lawv nyob hauv lub nroog ntawd. Cov Xenpuloos tsis tau raws cov neeg uas nyob hauv lub nroog Kiloos thiab Nahalas tawm, yog li ntawd, cov Kana-as thiaj tseem nrog lawv nyob hauv ob lub nroog ntawd thiab lawv yuam cov Kana-as ua haujlwm rau lawv. Cov Aseles tsis tau raws cov neeg uas nyob hauv lub nroog Akaus, Xidoos, Alas, Akhixis, Henpas, Afekas thiab Lehaus tawm. Cov Aseles tseem nyob hauv cov Kana-as cheebtsam av, rau qhov lawv tsis tau raws cov neeg ntawd tawm. Cov Nathalis tsis tau raws cov neeg uas nyob hauv lub nroog Npethes Semes thiab Npethanas tawm. Cov Nathalis cia li nrog cov Kana-as nyob hauv lawv cheebtsam av, tiamsis lawv yuam cov Kana-as ua haujlwm rau lawv. Cov Amaules yuam cov Das rov mus nyob pem laj roob thiab tsis pub lawv nqis los nyob hauv tiaj nrag li. Cov Amaules tseem nyob hauv Aiyaloos, Sa-anpimes thiab ntawm lub Roob Heles, tiamsis cov Efalayees thiab cov Manaxes ua cov tswjhwm cov Kana-as thiab yuam cov Kana-as ua haujlwm rau lawv. Cov Edoos tus ciamteb pib kiag ntawm txojkev saum lub laj roob Alanpees ntawm lub nroog Xelas sab qaumteb mus rau ped lawm. Tus TSWV tus timtswv tawm hauv lub nroog Nkilenkas mus rau hauv lub nroog Npaukhees thiab hais rau cov Yixalayees hais tias, “Kuv coj nej tawm nram tebchaws Iziv thiab coj nej los nyob hauv lub tebchaws uas kuv coglus tseg rau nej cov yawgkoob lawm. Kuv qhia rau nej hais tias, ‘Kuv yuav tsis rhuav tej lus uas kuv tau cog tseg rau nej lawm ib zaug li. Nej yuav tsum tsis txhob nrog cov neeg uas nyob hauv lub tebchaws no coglus. Nej yuav tsum muab lawv tej thaj teev dab tsoo povtseg.’ Tiamsis nej tsis ua raws li kuv kom nej ua. Nej cia li mus ua lwm yam lawm xwb! Yog li ntawd, nimno kuv qhia rau nej hais tias, kuv yuav tsis ntiab cov neeg no tawm ua ntej uas nej mus. Lawv yuav ua yeebncuab rau nej thiab lawv tej vajtswv yuav ua rooj ntxiab caws tos nej kev.” Thaum tus timtswv hais li ntawd, cov Yixalayees txawm quaj zom zaws, thiab twb yog vim li no thiaj muab thaj chaw ntawd tis npe hu ua Npaukhees. Lawv thiaj tua tsiaj fij rau tus TSWV ntawm qhov chaw ntawd. Yausuas tso cov Yixalayees rov qab mus, thiab lawv nyias rov mus nyob rau hauv nyias cheebtsam av uas twb faib rau lawv lawm. Cov Yixalayees ua tus TSWV tes haujlwm mus txog hnub uas tas Yausuas tiam neej. Thaum Yausuas tuag, lawv tseem ua tus TSWV tes haujlwm mus txog hnub uas cov thawjcoj uas pom txhua yam haujlwm tseemceeb uas tus TSWV ua pab cov Yixalayees tuag tas huv tibsi lawm thiab. Tus TSWV tus tubtxib Yausuas uas yog Noos tus tub tuag thaum nws hnubnyoog muaj ib puas kaum xyoo. Lawv thiaj muab nws faus rau hauv nws thaj av hauv lub nroog Tinas Xelas, pem lub laj roob Efalayees uas nyob ntawm lub Roob Nkasas sab qaumteb. Cov laus uas nyob tiam ntawd puavleej tuag tas huv tibsi lawm, ces tiam tom qab no tsis nco qab txog tus TSWV tej txiaj ntsig uas nws tau ua rau haivneeg Yixalayees li lawm. Cov Yixalayees txawm ua txhaum tawmtsam tus TSWV thiab pib mus teev tej mlom Npa-as. Lawv tseg tsis pehawm tus TSWV uas yog lawv cov yawgkoob tus Vajtswv, yog tus Vajtswv uas coj lawv tawm nram tebchaws Iziv los, thiab lawv pib mus pehawm lwm haivneeg uas nyob ibncig lawv tej vajtswv. Lawv pe tej vajtswv ntawd thiab ua rau tus TSWV chim heev rau lawv. Lawv tso tseg tsis pehawm tus TSWV thiab mus teev tej mlom Npa-as thiab teev tej mlom Atates. Tus TSWV thiaj chim heev rau cov Yixalayees thiab tso tej tubsab tuaj tua thiab huab lawv. Nws tso lawv rau cov yeebncuab uas nyob ibncig lawv ua cov tswjhwm lawv. Cov Yixalayees tsis muaj peevxwm tawmtsam cov yeebncuab ntawd li lawm. Txhua zaus uas lawv mus ntaus rog, tus TSWV tso kev phem los raug lawv raws li nws tau ceebtoom thiab coglus rau lawv lawm. Lawv thiaj raug kev txomnyem heev. Tus TSWV pub cov Yixalayees muaj tej thawjcoj los cawm kom lawv dim ntawm tej tubsab. Tiamsis cov Yixalayees tseem tsis mloog lawv cov thawjcoj lus thiab. Lawv tsis muab siab npuab tus TSWV thiab mus pehawm lwm haivneeg tej vajtswv. Lawv cov yawgkoob yeej ibtxwm mloog tus TSWV tej lus samhwm, tiamsis tiam nimno tsis ua raws li ntawd lawm. Thaum twg uas tus TSWV pub rau cov Yixalayees muaj ib tug thawjcoj, tus TSWV yeej pab nws thiab cawm kom lawv dim ntawm lawv cov yeebncuab tes mus txog thaum uas tus thawjcoj ntawd tas simneej. Tus TSWV hlub lawv rau qhov lawv quaj ntsuag rau lawv tej kev txomnyem thiab kev tsimtxom. Tiamsis thaum tus thawjcoj tuag lawm, cov pejxeem tig rov mus ua li lawv txoj qub kev thiab tseem ua phem tshaj tiam thaum ub lawm thiab. Lawv tseem teev thiab pe luag tej vajtswv, thiab muaj lub siab tawv ua phem ua qias tsis tso tseg li. Tus TSWV chim heev rau cov Yixalayees thiab hais tias, “Haivneeg no muab tej lus uas thaum ub kuv cog tseg rau lawv cov yawgkoob tso tseg lawm, rau qhov lawv tsis mloog kuv lus. Kuv yuav tsis ntiab tej haivneeg uas thaum Yausuas tuag tseem tsis tau muab ntiab tawm ntawd, tawm hauv lub tebchaws no mus. Kuv yuav siv cov neeg ntawd sim cov Yixalayees siab saib lawv puas yuav taug kuv txojkev ib yam li lawv cov yawgkoob ibtxwm ua los lawm.” Yog li ntawd, tus TSWV thiaj tseg cov neeg ntawd nyob; nws tsis pub kom Yausuas tua yeej lawv, txawm yog thaum Yausuas twb tuag lawm los tus TSWV tseem tsis tau ntiab lawv tawm mus sai thiab. Yog li ntawd, tus TSWV thiaj tseg qee haivneeg nyob hauv lub tebchaws ntawd sim cov Yixalayees uas tsis tau nrog cov Kana-as ua rog dua. Nws ua li no twb yog ua qhia cov Yixalayees txhua tiam kom paub txog kev ua rog, tshwjxeeb yog rau cov uas ibtxwm tsis tau ua rog dua li xwb. Cov neeg uas tseg nyob rau hauv cov Filitees tsib lub nroog uas nyob hauv lub tebchaws ntawd, yog cov Kana-as, cov Xidoos thiab cov Hivis uas nyob pem cov Roob Lenpanoos, txij ntua ntawm lub Roob Npa-as Helemoos mus rau ntawm lub Dawm Hamas. Lawv yog cov uas yuav sim cov Yixalayees siab, saib lawv puas mloog tus TSWV tej lus samhwm uas Mauxes tau qhia rau lawv cov yawgkoob lawm. Yog li ntawd, cov Yixalayees thiaj tau nyob xyaw cov Kana-as, cov Hitis, cov Amaules, cov Pelixes, cov Hivis thiab cov Yenpus. Cov Yixalayees tso lawv tej tub tej ntxhais mus yuav cov neeg ntawd tej tub tej ntxhais thiab mus pe lawv tej vajtswv. Cov Yixalayees tsis nco qab tus TSWV uas yog lawv tus Vajtswv lawm; lawv ua txhaum tus TSWV thiab mus pe tej mlom Npa-as thiab Aselas. Yog li ntawd, tus TSWV chim heev rau cov Yixalayees nws thiaj tso lawv rau Vajntxwv Kusas Lisathayees uas kav lub tebchaws Mexuputamias tuaj tua yeej lawv. Lawv thiaj raug ntes mus ua nws qhev tau yim xyoo. Ces cov Yixalayees quaj thov tus TSWV, nws thiaj txib ib tug txivneej mus tso lawv dim. Tus ntawd yog Kalej tus kwv Kenas tus tub Authaniyees. Tus TSWV tus ntsujplig los rau Authaniyees, thiab nws tau ua cov Yixalayees tus thawjcoj. Authaniyees mus ntaus rog thiab tus TSWV pub nws tua yeej tus vajntxwv uas kav tebchaws Mexuputamias. Thaum ntawd, lub tebchaws muaj kev thajyeeb tau plaub caug xyoo, ces Authaniyees txawm tuag lawm. Cov Yixalayees rov ua txhaum rau tus TSWV dua. Vim txojkev txhaum no tus TSWV thiaj ua rau Vajntxwv Enkiloos uas kav tebchaws Mau-am muaj zog tshaj cov Yixalayees. Enkiloos koom tes nrog cov Amaules thiab cov Amalej; lawv thiaj tuaj tua yeej cov Yixalayees thiab txeeb tau lub nroog Yelikaus uas yog lub nroog toovlaj. Cov Yixalayees thiaj raug Enkiloos yuam ua qhev tau kaum yim xyoo. Ces cov Yixalayees quaj thov tus TSWV, nws thiaj txib ib tug txivneej mus tso lawv dim. Tus ntawd yog Ehus, nws yog tus uas xis sab teslaug thiab yog Nkelas tus tub uas yog xeem Npeenyamees. Cov Yixalayees txib Ehus mus cuag cov Mau-am tus Vajntxwv Enkiloos thiab nqa ib co khoom mus pub nws. Ehus ntaus tau ib rab ntaj ob sab ntse ntev li ib tshim. Nws muab rab ntaj ntawd pav rau ntawm nws sab ncejpuab xis rau sab hauv qab nws lub ris. Ces nws txawm muab cov khoom ntawd pub rau Enkiloos, Enkiloos yog ib tug txivneej uas rog heev. Thaum Ehus muab cov khoom pub rau Enkiloos, Ehus txawm kom cov neeg uas kwv cov khoom ntawd cia li rov mus tsev. Tiamsis Ehus txawm tig mus ntsia pawg pobzeb uas txaug ua duab nyob ze ntawm Nkilenkas, thiab tig hlo los hais rau Enkiloos hais tias, “Vajntxwv, kuv muaj tej lus tseemceeb yuav hais rau koj.” Yog li ntawd, vajntxwv thiaj hais rau nws cov tubtxib hais tias, “Nej cia li tawm mus, cia wb ob leeg nyob xwb.” Ces lawv txawm tawm mus tas lawm. Thaum vajntxwv zaum hauv nws chav uas txias laj ntxiag theem tsev saud, Ehus txawm txav zog mus hais rau vajntxwv hais tias, “Vajtswv muaj lus rau kuv tuaj hais rau koj.” Ces vajntxwv txawm sawv tsees. Ehus muab nws sab teslaug rho hlo rab ntaj ntawm nws sab ncejpuab xis los tib nkaug rau vajntxwv plab. Nws muab rab ntaj thiab tus ko tsij yos tagnrho rau hauv vajntxwv plab, ces cov roj npog nkaus lub qhov nqaij rov rau lawm. Ehus yeej tsis rho rab ntaj tawm hauv vajntxwv plab los li, ces tej zaub mov hauv vajntxwv plab tawm tshau lug tuaj. Ces Ehus txawm tawm plaws rau nraum zoov, kaw nkaus qhovrooj thiab muab xauv kiag cia, thiab nws khiav lawm. Cov tubtxib los pom lub qhovrooj tseem xauv kaw nti, tiamsis lawv xav hais tias yog vajntxwv tseem mus plhob hauv tsev dej lawm xwb. Lawv tos ntev loo tiamsis vajntxwv pheej tsis los qhib qhovrooj li, lawv thiaj muab yuamsij mus qhib plho qhovrooj. Ua cas lawv tus vajntxwv tuag xyab luas rau hauv plag tsev lawm xwb. Thaum lawv tos tau ntev loo ntawd, Ehus twb khiav mus deb heev lawm. Nws khiav mus hla pawg pobzeb uas luag txaug mus rau ntawm lub roob Xe-ilas. Thaum nws mus txog pem roob Efalayees, nws thiaj tshuab raj tshuab xyu hu cov txivneej Yixalayees tuaj mus ntaus rog; ces nws coj lawv nqis saum roob los. Nws hais rau lawv hais tias, “Nej raws kuv qab! Tus TSWV twb pub nej tua yeej nej cov yeebncuab uas yog cov Mau-am lawm.” Yog li ntawd, lawv thiaj raws Ehus qab mus thiab txeeb tau thaj chaw uas cov Mau-am pheej mus hla tus dej Yauladees; lawv tsis pub ib tug txivneej twg hla mus los li. Hnub ntawd lawv tua cov Mau-am tej tubrog uas siab tawv heev tuag kwvyees li kaum txhiab leej; tsis muaj ib tug khiav dim li. Txij hnub ntawd los cov Yixalayees yeej cov Mau-am, thiab lub tebchaws muaj kev thajyeeb tau yim caum xyoo. Tom qab uas Ehus tuag lawm, Anas tus tub Sankas sawv ua thawjcoj. Nws kuj yog ib tug uas tso cov Yixalayees dim, thiab nws muab ib tug pas lawv nyuj nkaug cov Filitees tuag rau pua leej. Tom qab uas Ehus tuag lawm, cov Yixalayees rov ua txhaum rau tus TSWV dua. Yog li ntawd, tus TSWV thiaj cia cov Kana-as tus Vajntxwv Yanpees uas kav hauv lub nroog Haxaules tuaj tua yeej lawv. Yanpees tus thawj tubrog yog Xixelas, nws nyob hauv Halauses uas yog cov neeg txawv tebchaws lub nroog. Yanpees muaj cuaj pua lub tsheb nees hlau, thiab nws muaj lub siab phem tswjhwm cov Yixalayees thiab tsimtxom lawv tau nees nkaum xyoo. Cov Yixalayees thiaj quaj thov tus TSWV pab lawv. Thaum lub sijhawm ntawd, Denpaulas uas yog Lapidaus tus pojniam, yog ib tug cev Vajtswv lus thiab nws ua cov Yixalayees tus thawjtswj. Nws zaum hauv qab ib tsob toovlaj uas nyob ntawm lub nroog Lamas thiab Npethees ntu nruab nrab ntawm lub roob Efalayees, thiab cov Yixalayees pheej tuaj cuag nws qhov ntawd kom nrog tu lawv tej plaub ntug. Muaj ib hnub nws thiaj tso neeg mus hais rau Anpinau-as tus tub Npalaj uas nyob hauv lub nroog Kedes hauv xeev Nathalis thiab hais rau nws hais tias, “Tus TSWV uas yog cov Yixalayees tus Vajtswv hais li no rau koj: ‘Koj cia li coj kaum txhiab leej tubrog hauv xeem Nathalis thiab xeem Xenpuloos mus rau ntawm lub Roob Tanpaus. Kuv yuav coj Xixelas uas yog Yanpees tus thawj tubrog tuaj tua nej ntawm tus Dej Kisoos. Nws yuav coj nws cov tsheb nees thiab cov tubrog tuaj nrog nej sib tua, tiamsis kuv yuav pub kom nej tua yeej nws.’ ” Ces Npalaj hais rau Denpaulas hais tias, “Yog koj nrog kuv mus, kuv thiaj yuav mus, tiamsis yog koj tsis mus, kuv yuav tsis mus.” Denpaulas teb hais tias, “Kuv yeej txaus siab yuav nrog koj mus, tiamsis koj yuav tsis tau ntsejmuag qhov uas koj tua yeej, rau qhov tus TSWV yuav muab Xixelas cob rau tus pojniam tes.” Yog li ntawd, Denpaulas thiaj nrog Npalaj mus rau hauv lub nroog Kedes. Npalaj hu xeem Xenpuloos thiab xeem Nathalis mus rau hauv Kedes, thiab kaum txhiab leej txivneej raws nws qab mus rau hauv. Denpaulas kuj nrog nws mus thiab. Thaum lub sijhawm ntawd, Henpeles uas yog cov neeg Kenais tau mus tsa nws lub tsevntaub nyob ze rau ntawm Kedes ntawm tsob ntoo qhib hauv Xananees. Nws tau khiav tawm ntawm cov neeg Kenais uas yog Mauxes dablaug Haunpas cov xeebntxwv lawm. Thaum Xixelas paub hais tias, Npalaj nce mus txog rau saum Roob Tanpaus lawm, nws thiaj txhij tagnrho nws cov tubrog tsav cuaj puas lub tsheb nees hlau nrog nws tawm hauv lub nroog Halauses uas yog cov neeg txawv tebchaws lub nroog mus tos kev rau ntawm tus dej Kisoos. Ces Denpaulas hais rau Npalaj hais tias, “Cia li mus los mas! Tus TSWV twb ua koj ntej mus lawm! Hnub no nws twb muab Xixelas cob rau koj tes lawm.” Yog li ntawd, Npalaj thiaj coj nws kaum txhiab leej tubrog nqis saum Roob Tanpaus los. Thaum Npalaj tabtom nrog Xixelas cov tubrog sib tua, tus TSWV ua rau Xixelas thiab tagnrho nws cov tsheb nees thiab cov tubrog tawg khiav ri rws. Xixelas thiaj nqis saum nws lub tsheb nees los thiab khiav mus lawm xwb. Npalaj thiaj caum cov tsheb nees thiab cov tubrog mus txog hauv lub nroog Halauses uas yog cov neeg txawv tebchaws lub nroog, thiab Xixelas cov tubrog raug tua tuag tas huv tibsi. Tsis tshuav ib tug seem li. Xixelas khiav mus txog ntawm Ya-ees uas yog Henpeles tus pojniam lub tsevntaub, Henpeles yog neeg Kenais, rau qhov Vajntxwv Yanpees uas kav lub nroog Haxaules nrog Henpeles tsevneeg sib raug zoo heev. Ya-ees tawm tuaj tos Xixelas thiab hais rau nws hais tias, “Los tsev; koj cia li los hauv kuv lub tsevntaub. Tsis txhob ntshai.” Yog li ntawd, Xixelas thiaj mus hauv Ya-ees tsev, Ya-ees muab Xixelas zais rau nraum daim ntaub thaiv qhovrai. Xixelas hais rau Ya-ees hais tias, “Kuv nqhis dej heev, thov koj muab mentsis dej rau kuv haus.” Ya-ees thiaj qhib lub hnab tawv ntim mis nyuj, muab rau Xixelas haus, thiab rov muab Xixelas zais dua lawm. Ces Xixelas hais rau Ya-ees hais tias, “Thov koj sawv twjywm ntawm qhovrooj tsevntaub ko, yog muaj leejtwg tuaj thiab nug koj hais tias puas muaj neeg khiav los ntawm no, koj teb hais tias tsis muaj.” Xixelas lim heev, nws txawm tsaug zog looj hlias lawm. Ces Ya-ees muab rauj thiab ib tug tswg tsevntaub, maj mam nyas mus xauj Xixelas, thiab nws muab tus tswg twb nkaus ntawm Xixelas ib sab ntsos, muab rauj npuj ntxhias tshab plaws rau hauv av ua rau Xixelas tuag kiag rau ntawd. Thaum Npalaj caum Xixelas tuaj txog, Ya-ees tawm mus tos Npalaj thiab hais rau nws hais tias, “Koj cia li los tsev! Kuv yuav qhia tus txivneej uas koj nrhiav rau koj.” Yog li ntawd, Npalaj thiaj nrog Ya-ees mus rau hauv nws lub tsevntaub, thiab pom Xixelas tuag xyab luas hauv av, ib tug tswg tsevntaub ntsia ntsees nws taubhau tshab plaws rau hauv av. Hnub ntawd tus TSWV thiaj pub cov Yixalayees tua yeej Yanpees uas yog cov Kana-as tus vajntxwv. Cov Yixalayees pheej nias tsam hnyav zuj zus mus txog thaum uas lawv ua rau Yanpees puastsuaj lawm. Hnub ntawd Denpaulas thiab Npalaj uas yog Anpinau-as tus tub thiaj hu zaj nkauj no: Ua tus TSWV tsaug lauj! Cov Yixalayees ua siab tawv qhawv sib tua; cov pejxeem txaus siab hlo mus ntaus rog. Tej vajntxwv, nej cia li ua tib zoo mloog! Tej nomtswv, nej cia li tig pobntseg mloog! Kuv yuav hu nkauj thiab ntaus nkauj nogncas qhuas cov Yixalayees tus Vajtswv uas yog tus TSWV. Tus TSWV, thaum koj tawm saum roob Xe-iles los, thaum koj tawm tom tiaj nrag Edoos los, lub ntiajteb ua zog koog, thiab nag laub lug saum nruab ntug los. Tseeb tiag, dej yeej nchuav laub lug saum cov huab los. Tej ncov roob ua zog koog tabmeeg tus TSWV saum roob Xinais, tabmeeg tus TSWV uas yog cov Yixalayees tus Vajtswv. Anaj tus tub Sankas tiam thiab Ya-ees tiam, tsis muaj tsheb nees khiav thoob tebchaws lawm, tej neeg taug kev me lawm xwb. Denpaulas, cov Yixalayees tej nroog muab tso tseg nphob xuav cia; tej nroog ntawd nyob khoob lug mus txog hnub uas koj los kav, koj zoo ib yam li cov Yixalayees leej niam ntag. Thaum cov Yixalayees mus teev luag tej vajtswv, ces txawm muaj kev tsov kev rog tuaj ntaus lawv lub tebchaws. Nej plaub caug txhiab leej Yixalayees no puas muaj ib tug nqa daim thaiv hniav ntaj lossis nqa hmuv? Kuv lub siab yeej nyob rawv nrog cov Yixalayees tej thawj tubrog, nrog cov neeg uas txaus siab mus ntaus rog. Ua tus TSWV tsaug lauj! Nej cov uas caij tej neesluav dawb uas caij rawv saum lub eeb, thiab nej cov uas mus kotaw nej nco ntsoov qhia zaj no rau sawvdaws. Ua tib zoo mloog! Tej suab uas cov neeg coob coob qw nrov ntshoo nrooj ncig tej qhovtshij sib qhia txog qhov uas tus TSWV thiab cov Yixalayees muaj yeej. Ces tus TSWV haivneeg tawm hauv lawv tej nroog tuaj. Ntaus thawj los mas, Denpaulas, cia li ntaus thawj los mas! Hu nkauj los mas! Ntaus thawj ntxhias los mas! Anpinau-as tus tub Npalaj, cia li sawv mus tuaj tom hauv ntej, coj cov neeg uas koj ntes tau khiav mus los mas! Ces txhua tus neeg uas ncaj ncees tuaj cuag lawv tej thawjcoj; tus TSWV haivneeg uas tuaj cuag nws, npaj nroos mus sib tua xwb. Lawv nqis pem xeev Efalayees tuaj rau hauv hav, raws xeem Npeenyamees thiab cov pejxeem qab. Cov thawj tubrog tuaj pem Makhiles tuaj, cov nomtswv tuaj pem xeev Xenpuloos tuaj. Xeem Ixakhas tej thawjcoj nrog Denpaulas tuaj; yog lawm, xeem Ixakhas thiab Npalaj lawv sawvdaws tuaj huv tibsi, thiab lawv puavleej raws nws qab mus rau nram lub hav lawm. Tiamsis xeem Lunpees hais tsis sib haum; lawv thiaj tsis tuaj. Vim li cas lawv thiaj nrog pab yaj nyob tuaj tom qab? Yuav nkaum nkoos mloog cov tswv yaj lub suab cuab cov yaj xwb los? Yog lawm, xeem Lunpees hais tsis sib haum, lawv thiaj tsis tuaj. Xeem Khas nyob tim tus dej Yauladees sab hnubtuaj, thiab xeem Das nyob hauv tej nkoj. Xeem Aseles nyob raws ntug hiavtxwv; lawv nyob ntawm ntug xwb. Tiamsis xeem Xenpuloos thiab xeem Nathalis txaus siab muab lawv txojsia mus ntaus rog. Tej vajntxwv sau nthwv tuaj sib tua, rau hauv lub nroog Tanas ntawm tus dej Menkidaus; cov Kana-as tej vajntxwv tuaj sib tua, tiamsis lawv nqa tsis tau tej nyiaj mus li. Tej hnubqub tua saum nruab ntug tuaj; tej hnubqub ya saum nruab ntug tuaj tua Xixelas. Tus dej Kisoos huam los tshoob lawv mus povtseg lawm, tus dej Kisoos yog tus dej uas ntsawj ceev heev. Kuv yuav tawm mus, kuv lub siab cia li xyivfab hlo! Ces cov nees yuav dhia rag ntws los, muab lawv tej rau txauj av nplawg ntia. Tus TSWV tus timtswv hais tias, “Cia li foom tsis zoo rau lub nroog Melauzes, lo lus foom uas yog kev iab kev daw yuav raug cov neeg hauv lub nroog ntawd. Vim lawv tsis tawm mus ua tubrog pab tus TSWV tua cov yeebncuab.” Ya-ees yog tus uas muaj hmoo tshaj plaws tej pojniam, nws yog Henpeles uas yog neeg Kenais tus pojniam, nws muaj hmoo tshaj tej pojniam uas nyob hauv tej tsevntaub huv tibsi. Xixelas thov dej haus, tiamsis nws muab mis nyuj rau Xixelas haus; nws hliv mis nyuj rau hauv lub tais uas zoo nkauj heev rau Xixelas haus. Ya-ees ib sab tes nqa tus tswg tsevntaub, thiab ib sab tes nqa rab rauj; nws ntaus thiab tsoo Xixelas txha taubhau tawg kiag; nws npuj ntxhias Xixelas taubhau tshab plaws. Xixelas cia li zuav zog txhos caug ntua vau hlo rau ntawm Ya-ees kotaw tuag xyab luas cia. Xixelas niam tuaj tom qab daim ntxaij ntawm qhovrai saib ntsoov rau tim ncauj ke. Nws thiaj nug hais tias, “Vim li cas twb lig heev lawm, tsis pom Xixelas lub tsheb nees los li ne? Vim li cas nws tus nees rov los qeeb ua luaj li?” Nws ib tsoom pojniam uas ntse heev teb nws, thiab nws pheej hais tujtaws hais tias, “Lawv tseem tsis tau pom tej uas mus huab tau los thiab muab sib faib, lawv muab tej hluas nkauj faib rau cov tubrog ib leeg ib tug lossis ob tug, lawv muab tej ntaub uas kim kim faib rau Xixelas, thiab muab tej ntaub uas txaij nraug zees los rau poj vajntxwv khiab cajdab.” Tus TSWV, thov kom cov yeebncuab tuag tas ib yam li ntawd ntag, tiamsis thov kom koj cov phoojywg ci ntsa iab ib yam li thaum lub hnub nyuam qhuav tawm tuaj! Ces lub tebchaws txawm muaj kev thajyeeb tau zoo nyob kaj siab lug tau plaub caug xyoo. Cov Yixalayees rov ua txhaum rau tus TSWV dua, yog li ntawd, tus TSWV thiaj muab lawv cob rau cov Midias kav tau xya xyoo. Cov Midias muaj zog tshaj cov Yixalayees. Cov Yixalayees thiaj khiav mus nkaum cov Midias rau hauv tej qhov tsua thiab khawb qhov av nkaum saum tej roob. Txhua zaus uas cov Yixalayees cog lawv tej qoobloo, cov Midias nrog cov Amalej thiab tej haivneeg uas nyob tom tiaj suabpuam tuaj tua lawv. Lawv tuaj tsuam yeej nyob rau hauv lub tebchaws thiab muab cov Yixalayees tej qoobloo ua puastsuaj tas mus txog ntua nram sab qabteb uas nyob ibncig lub nroog Nkaxas. Lawv cab tagnrho cov Yixalayees tej yaj, tej nyuj thiab tej neesluav huv tibsi lawm, tsis tseg ib yam dabtsi rau cov Yixalayees li. Cov Midias cab lawv tej tsiaj txhu thiab kwv lawv tej tsevntaub ua kev zawv tuaj coob npaum nkaus li kooj txomfav. Lawv thiab lawv tej ntxhuav coob heev suav tsis txheeb li. Lawv tuaj ua rau lub tebchaws liamsim tas. Cov Yixalayees tsis muaj zog tawmtsam tau cov Midias hlo li. Ces cov Yixalayees thiaj quaj thov tus TSWV pab lawv tawmtsam cov Midias, tus TSWV thiaj txib ib tug cevlus coj tus TSWV uas yog cov Yixalayees tus Vajtswv tej lus los hais rau cov Yixalayees hais tias: “Kuv tau coj nej tawm ntawm txojkev ua qhev nram tebchaws Iziv los. Kuv cawm nej dim ntawd cov neeg Iziv thiab cov neeg uas pheej tuaj tua nej hauv lub tebchaws no. Kuv muab lawv ntiab ntawm tabmeeg nej, thiab kuv muab lawv lub tebchaws pub rau nej nyob. Kuv twb qhia rau nej hais tias, kuv yog tus TSWV uas yog nej tus Vajtswv, kom nej tsis txhob mus pe cov Amaules uas nrog nej nyob hauv lub tebchaws no tej vajtswv. Tiamsis nej yeej tsis mloog kuv tej lus hlo li.” Ces tus TSWV tus timtswv txawm los rau hauv lub zos Aufelas thiab los zaum ntawm Yau-ases tsob qab ntoo qhib, Yau-as yog Anpi-exes cuab kwvtij. Nws tus tub Nkide-oos tabtom ntaus nplej hauv lub chaw tsuam txiv hmab, kom cov Midias tsis txhob pom nws. Tus TSWV tus timtswv los rau Nkide-oos pom ntawm qhov chaw ntawd thiab hais tias, “Tus txivneej siab tawv thiab muaj zog, tus TSWV nrog nraim koj nyob.” Nkide-oos hais rau tus timtswv hais tias, “Kuv thov nug koj, yog hais tias tus TSWV nrog nraim peb nyob tiag, ua li cas peb pheej raug kev txomnyem ua luaj? Tus TSWV tej txujci tseemceeb uas thaud peb cov yawgkoob ibtxwm piav qhia rau peb hais tias, ‘Tsis yog tus TSWV coj peb tawm nram tebchaws Iziv los lov? Tej ntawd nyob qhov twg lawm?’ Tiamsis nimno tus TSWV muab peb tso povtseg thiab muab peb cob rau cov Midias tes lawm.” Ces tus TSWV thiaj hais rau Nkide-oos hais tias, “Koj cia li muab koj lub zog loj zog nchav mus tso cov Yixalayees kom dim ntawm cov Midias txhais tes. Kuv yog tus uas txib koj mus ntag.” Nkide-oos teb hais tias, “Tus TSWV, kuv yuav ua li cas mus tso tau cov Yixalayees? Kuv cuab kwvtij yog ib cuab uas tsawg heev nyob hauv xeem Manaxes, thiab kuv yog tus uas tsis tseemceeb nyob hauv kuv tsevneeg.” Tus TSWV teb hais tias, “Koj yeej muaj peevxwm ua tau xwb, rau qhov kuv yuav pab koj. Koj yuav ntaus tau cov Midias yoojyim ib yam li lawv yog ib leeg xwb.” Nkide-oos teb hais tias, “yog koj txaus siab rau kuv, koj cia li ua tej yam qhia rau kuv hais tias, koj yog tus TSWV tiag. Thov koj tsis txhob maj mus, cia kuv coj zaub mov tuaj fij rau koj tso.” Tus timtswv teb hais tias, “Kuv yuav nyob ntawm no tos txog thaum koj rov qab tuaj.” Yog li ntawd, Nkide-oos thiaj mus rau hauv nws tsev; nws muab ib tug thav tshis tua ua zaub thiab muab cov hmoov nplej hauv lub tawb zuaj ua ib co ncuav tsis xyaw keeb. Nws muab cov nqaij tso rau hauv tawb thiab muab cov kua nqaij tso rau hauv laujkaub, nqa tej zaub mov ntawd mus rau tus TSWV tus timtswv hauv tsob qab ntoo qhib, thiab muab tej zaub mov ntawd rau nws. Tus timtswv hais rau Nkide-oos hais tias, “Muab cov nqaij thiab cov ncuav tso rau saum lub pobzeb no, thiab muab cov kua hliv ywg cov nqaij thiab cov ncuav ntawd.” Nkide-oos txawm ua li ntawd. Ces tus TSWV tus timtswv txawm muab tus pas nrig uas nws tuav rawv ntawm tes mus twb nkaus cov nqaij thiab cov ncuav. Ces hluavtaws txawm cig plaws hauv lub pobzeb tuaj kub cov nqaij thiab cov ncuav ntawd. Ces tus timtswv txawm ploj ntais lawm. Nkide-oos thiaj paub tseeb hais tias, nws tau pom tus TSWV tus timtswv lawm tiag, nws thiaj hais lus ntshai tshee hnyo hais tias, “Tus TSWV uas kav txhua tsav yam, kuv tau pom koj tus timtswv tim ntsej tim muag lawm tiag!” Tiamsis tus TSWV hais rau nws hais tias, “Koj cia li kaj siab. Tsis txhob ntshai. Koj yuav tsis tuag.” Nkide-oos txawm ua tau ib lub thaj rau tus TSWV ntawm thaj chaw ntawd thiab tis npe hu ua “Tus TSWV yog tus muaj kev kaj siab.” (Lub thaj ntawm yog Anpi-exes cuab kwvtij tug, thiab tseem nyob hauv lub zos Aufelas los txog niaj hnub no.) Hmo ntawd tus TSWV los hais rau Nkide-oos hais tias, “Cia li mus cab koj txiv tus heev nyuj thiab cab dua ib tug heev nyuj uas hnubnyoog muaj xya xyoo tuaj, muab koj txiv lub thaj teev Npa-as tsoo, thiab muab tus ncej dab Aselas uas txhos rau ntawm lub thaj ib sab ntov povtseg. Ua ib lub thaj kom ruaj khov rau tus TSWV uas yog koj tus Vajtswv rau saum lub ncov roob no. Ces cab tus heev nyuj uas yog tus ob los tua thiab muab hlawv tagnrho rau saud ua khoom fij, muab tus ncej dab Aselas uas koj ntov ntawd ua taws rauv ntag.” Yog li ntawd, Nkide-oos thiaj coj nws cov tubtxib kaum leej nrog nws mus thiab ua raws li tus TSWV hais kom nws ua. Nws ntshai nyob tsam nws tsevneeg thiab cov neeg uas nyob hauv nroog pom nws rhuav lub thaj thaum nruab hnub, nws thiaj mus rhuav thaum tsaus ntuj. Thaum kaj ntug tej neeg zejzog sawv ntxov tuaj, lawv pom neeg twb muab lub thaj uas teev Npa-as thiab tus ncej dab Aselas tsoo tawg tas lawm, thiab twb muab tus heev nyuj uas yog tus ob tua hlawv rau saum lub thaj uas ua tshiab lawm. Lawv sib nug zom zaws hais tias, “Leejtwg yog tus ua li no?” Lawv nug thiab taug, ua ciav yog Yau-ases tus tub Nkide-oos rhuav tej ntawd ntag. Ces lawv txawm mus hais rau Yau-ases hais tias, “Coj koj tus tub tawm tuaj nraum no, peb muab nws tua povtseg saib! Rau qhov nws muab lub thaj uas teev Npa-as rhuav thiab muab tus ncej dab Aselas uas txhos rau ntawm lub thaj ib sab ntov povtseg lawm.” Tiamsis Yau-ases hais rau lawv txhua tus uas sawv ntawm nws xubntiag hais tias, “Nej tuaj Npa-as tog cem kuv los? Nej pab Npa-as los? Txhua tus uas tuaj Npa-as tog yuav raug tua tuag ua ntej kaj ntug. Yog hais tias Npa-as yog vajtswv tiag, cia nws pab nws xwb. Lub thaj uas muab rhuav ntawd twb yog nws lub los sav.” Ces txij thaum ntawd los sawvdaws txawm muab Nkide-oos hu ua Yelunpa-as, rau qhov Yau-as hais tias, “Cia Npa-as pab Npa-as xwb; lub thaj uas muab rhuav lawm twb yog nws lub.” Ces tagnrho cov Midias, cov Amalej thiab tej haivneeg uas nyob sab hnubtuaj sau hlo ua ke hla tus dej Yauladees tuaj tsuam yeej rau hauv lub Hav Yexelees. Tus TSWV tus ntsujplig los kav hlo Nkide-oos, ces nws txawm tshuab raj tshuab xyu hu cov txivneej uas yog Anpi-exes cuab kwvtij tuaj nrog nws mus. Nws txib neeg mus hu xeem Manaxes sab Hnubtuaj thiab Hnubpoob tuaj nrog nws mus. Nws txib neeg mus hu xeem Aseles, xeem Xenpuloos thiab xeem Nathalis, lawv puavleej tuaj nrog nws mus huv tibsi. Ces Nkide-oos hais rau tus TSWV hais tias, “Koj tau hais tias, koj yeej pom zoo txib kuv mus cawm cov Yixalayees. Yog li ntawd, kuv yuav muab mentsis plaub yaj coj mus tso rau hauv av ntawm lub chaw uas peb ntaus nplej. Yog thaum sawv ntxov lwg ntsu rau cov plaub yaj, tiamsis tsis ntub rau cov av, ces kuv thiaj yuav paub hais tias koj siv kuv mus cawm cov Yixalayees tiag.” Ces txawm muaj raws nraim li ntawd tiag. Thaum kaj ntug Nkide-oos mus nqa cov plaub yaj los, thiab muab tso ua ciav dej si laim los puv nkaus tais. Nkide-oos hais rau Vajtswv hais tias, “Thov koj tsis txhob chim rau kuv; cia kuv hais ib lo ntxiv thiab tso. Thov cia kuv rov qab muab cov plaub yaj sim dua ib zaug ntxiv thiab. Zaum no cia cov plaub yaj qhuav thiab cia cov av ntub lwg.” Hmo ntawd Vajtswv ua txhua yam li ntawd tiag. Tagkis kaj ntug cov plaub yaj yeej qhuav qhawv, tiamsis cov av ntub lwg tas. Muaj ib hnub Nkide-oos thiab nws cov tubrog sawv ntxov mus tsuam yeej rau ntawm lub Qhovdej Halaus. Tiamsis cov Midias twb tuaj tsuam yeej nyob rau ntawm lub hav uas nyob ze ntawm lub Ncov Roob Maules sab ped lawm. Tus TSWV hais rau Nkide-oos hais tias, “Koj cov neeg coob dhau heev lawm. Yog kuv cia lawv tua yeej cov Midias, nyob tsam lawv yuav khav hais tias yog lawv mus tua yeej xwb. Lawv yuav tsis nco txog hais tias yog kuv pab lawv. Koj tshaj tawm rau sawvdaws hais tias, ‘Yog leejtwg ntshai, tus ntawd cia li rov mus tsev thiab peb yuav nyob ntawm lub Roob Nkile-as no.’ ” Yog li ntawd, muaj nees nkaum ob txhiab leej thiaj rov qab mus tsev lawm, tshuav kaum txhiab leej nyob lawm xwb. Ces tus TSWV hais rau Nkide-oos hais tias, “Koj tseem tshuav neeg coob heev thiab. Coj lawv nqis mus lawm nram hav dej, nyob nrad kuv yuav xaiv lawv rau koj. Yog kuv kom tus twg nrog koj mus, nws yeej yuav mus. Yog kuv kom tus twg tsis txhob mus, nws yeej yuav tsis mus.” Nkide-oos thiaj coj cov neeg ntawd nqis mus rau nram hav dej, thiab tus TSWV hais rau nws hais tias, “Muaj cov uas hlev nplaig mus yaim dej li dev cais tawm ntawm cov uas txhos caug khoov mus haus dej.” Cov uas khoov thiab muab phoovtes ce dej los haus muaj peb puas leej; dua li cov puavleej txhos caug khoov mus haus dej xwb. Tus TSWV hais rau Nkide-oos hais tias, “Kuv yuav pab koj thiab pub kom koj coj peb puas leej uas muab tes ce dej los haus ntawd mus tua yeej cov Midias. Dua li cov, ces kom lawv rov qab mus tsev huv tibsi.” Yog li ntawd, Nkide-oos thiaj tso cov Yixalayees rov qab mus tsev, tsuas tseg peb puas leej ntawd nrog nws xwb, thiab lawv khaws tagnrho tej zaub mov thiab tej raj tej xyu cia. Cov Midias lub yeej nyob hauv hav. Hmo ntawd tus TSWV hais rau Nkide-oos hais tias, “Cia li sawv thiab mus tua cov Midias lub yeej; kuv yuav pub kom koj tua yeej lawv. Tiamsis yog koj ntshai mus tua, cia li coj koj tus tubtxib Pulas nrog koj nqis mus rau hauv lawv lub yeej. Koj yuav hnov tej uas lawv sib tham, ces yuav txhawb koj lub zog mus tua lub yeej ntawd.” Yog li ntawd, Nkide-oos thiab nws tus tubtxib Pulas thiaj nqis mus rau hauv cov yeebncuab lub ntug yeej. Cov Midias, cov Amalej thiab tej haivneeg uas nyob sab hnubtuaj, tuaj nyob rau hauv lub hav coob ua npoj ntws ib yam li cov kooj txomfav; lawv muaj ntxhuav coob cuag li tej suabzeb ntawm ntug hiavtxwv. Thaum Nkide-oos mus txog, nws hnov ib tug txivneej piav ib zaj npau suav rau nws tus phoojywg mloog. Nws hais tias, “Kuv ua npau suav pom ib lub ncuavpias ntog los rau hauv peb lub yeej thiab lub ncuav ntawd tsoo ib lub tsevntaub. Lub tsevntaub vau hlo thiab pua lua rau saum npoo av.” Nws tus phoojywg teb hais tias, “Zaj npau suav no mas yog Yau-ases tus tub Nkide-oos uas yog haivneeg Yixalayees rab ntaj xwb! Muab txhais los mas yuav tsis yog lwm yam li lauj! Vajtswv yeej yuav pub rau nws tua yeej cov Midias thiab peb cov tubrog huv tibsi ntag!” Thaum Nkide-oos hnov tus txivneej ntawd zaj npau suav thiab paub lub ntsiab lus lawm, nws txawm txhos caug ntua pe tus TSWV. Ces nws txawm rov los rau saum cov Yixalayees lub yeej thiab hais tias, “Cia li sawv! Tus TSWV twb pub nej tua yeej cov tubrog Midias lawm!” Nkide-oos muab nws peb puas leej tubrog faib ua peb pab thiab muab ib tug tubrog twg ib lub xyu thiab ib leeg ib lub hub nrog ib teg tsau. Nws hais rau lawv tias, “Thaum kuv mus txog ntua ntawm ntug yeej, nej saib kuv ua li cas, nej cia li ua raws li kuv ua ntawd. Thaum kuv thiab cov neeg uas nrog kuv, peb tshuab peb tej xyu, ces nej cia li tshuab nej tej xyu thiab qw txhua qhov ncig lub yeej hais tias, ‘Peb ua rau tus TSWV thiab ua rau Nkide-oos!’ ” Nkide-oos thiab nws cov tubrog ib puas leej mus txog rau ntawm ntug yeej ua ntej thaum ib tag hmo, tom qab lub sijhawm uas cov fajxwm nyuam qhuav hloov neeg. Ces lawv txawm tshuab raj tshuab xyu thiab tsoo tej hub uas lawv tuav ntawm tes, ob pab tom qab los kuj ua ib yam li ntawd. Lawv txhua tus ib leeg tuav rawv ib teg tsau ntawm sab teslaug, thiab sab tes xis tuav rawv xyu tshuab, lawv qw nrov heev hais tias, “Tus TSWV thiab Nkide-oos rab ntaj tuaj lawm lauj!” Txhua tus nyias sawv twjywm ntawm nyias qhov chaw ncig lub yeej. Yeebncuab cov tubrog ntshai heev thiab quaj qw sib huas kev khiav rov qab. Thaum Nkide-oos cov tubrog tseem tabtom tshuab lawv tej xyu, tus TSWV ua rau cov yeebncuab rho lawv tej ntaj los, ib leeg rov tua ib leeg. Lawv khiav mus txog ntawm Npethes Sitas thiab taug txojkev ntawm Xalethas mus txog ntua ntawm lub nroog Anpees Mehaulas uas nyob ze Tanpas. Ces lawv mus hu xeem Nathalis, Aseles thiab tagnrho xeem Manaxes kom tuaj, thiab lawv mus caum cov Midias tua. Nkide-oos txib neeg mus hais thoob plaws cov neeg uas nyob pem tej ncov roob Efalayees hais tias, “Nej cia li nqis tuaj thiab mus tos kev tua cov Midias. Nej mus zov raws tus ntug dej Yauladees thiab raws tej ntug dej ua ntu zus kom mus txog rau ntawm Npenpalas, tsis txhob pub cov Midias khiav los hla li.” Yog li ntawd, thiaj muaj neeg mus hu cov Efalayees tuaj txoos ua ke, thiab lawv mus zov raws tus ntug Dej Yauladees thiab raws tej ntug dej ua ntu zus mus txog ntua rau ntawm Npenpalas. Lawv ntes tau Aules thiab Xees, nkawd yog cov Midias ob tug thawj; lawv muab Aules tua rau ntawm lub pobzeb Aules, thiab muab Xees tua rau hauv lub chaw tsuam txiv hmab Xees. Lawv rau siab ntso caum cov Midias tua thiab nqa Aules thiab Xees nkawd ob lub taubhau los rau Nkide-oos, Nkide-oos nyob ntawm tus dej Yauladees sab hnubtuaj. Ces cov Efalayees hais rau Nkide-oos hais tias, “Vim li cas koj tsis hu peb thaum koj mus tua cov Midias? Vim li cas koj ua saib tsis taus peb li?” Lawv yws Nkide-oos txog zaj no phem kawg li. Tiamsis Nkide-oos hais rau lawv hais tias, “Muab tej uas kuv ua tas los piv rau tej uas nej ua mas tsis muaj nqis dabtsi. Tej txiv hmab uas nej cov Efalayees mus khaws tau los tseem zoo dua tej uas kuv cov Anpi-exes mus de los thiab. Vajtswv muab Aules thiab Xees uas yog cov Midias ob tug thawjcoj cob rau nej tes. Yuav ua li cas muab tej uas kuv ua piv tau rau qhov ntawd?” Thaum Nkide-oos hais li no tas, lawv thiaj zoo siab tsis chim lawm. Thaum lub sijhawm ntawd, Nkide-oos thiab nws peb puas leej tubrog twb los txog rau ntawm tus dej Yauladees thiab hla dej rau sab tid lawm. Thaum lawv los txog rau hauv lub nroog Xukaus, Nkide-oos hais rau cov neeg uas nyob hauv lub nroog ntawd hais tias, “Thov nej muab ib co ncuav rau kuv cov tubrog noj. Lawv qaug zog heev lawm, thiab kuv tseem tabtom caum Xenpas thiab Xamunas uas yog cov Midias ob tug vajntxwv.” Tiamsis cov thawjcoj uas nyob hauv Xukaus hais tias, “Yog vim li cas koj thiaj kom peb muab mov rau koj cov tubrog noj? Nej tseem caum ntes tsis tau Xenpas thiab Xamunas nkawd los sav?” Nkide-oos teb hais tias, “Tau lawm! Thaum tus TSWV muab Xenpas thiab Xamunas nkawd cob rau kuv, kuv mam muab nplawm hmab pos thiab nplawm pos kaus ntsaj tom tiaj suabpuam los nplawm nej.” Nkide-oos mus rau hauv lub nroog Penuyees, thiab thov cov neeg hauv lub nroog ntawd mov noj ib yam nkaus, tiamsis cov neeg hauv lub nroog Penuyees, los kuj teb nws ib yam li cov neeg hauv lub nroog Xukaus thiab. Yog li ntawd, nws thiaj hais rau lawv hais tias, “Thaum kuv mus ntaus rog yeej rov qab los, kuv yuav rhuav lub chaw tsomfaj no povtseg!” Xenpas thiab Xamunas coj nkawd tej tubrog nrog nkawd mus nyob hauv lub nroog Kakaus. Tagnrho cov neeg uas nyob sab hnubtuaj, cov tubrog tsuas tshuav kwvyees li kaum tsib txhiab leej lawm xwb; cov tubrog uas raug tua tuag lawm muaj ib puas nees nkaum txhiab leej. Nkide-oos taug txojkev raws ntug tiaj suabpuam uas nyob sab hnubtuaj, ntawm lub nroog Naunpas thiab Yaunpehas, nyas mus tua yeebncuab cov tubrog thaum lawv tsis nco ceevfaj hlo li. Cov Midias ob tug vajntxwv uas yog Xenpas thiab Xamunas dhia tawm khiav, tiamsis Nkide-oos caum nkawd thiab ntes tau nkawd rov qab los, ua rau nkawd cov tubrog ceeb thiab khiav tawg ri sua. Thaum Nkide-oos rov qab hauv tshavrog los, nws taug txojkev uas hla ntawm Heles los. Nws ntes tau ib tug tub hluas nyob hauv lub nroog Xukaus tuaj, nws ua tib zoo nug tus tub hluas ntawd. Ces tus tub hluas txawm sau xya caum xya leej thawjcoj uas nyob hauv lub nroog Xukaus cov npe rau Nkide-oos. Nkide-oos rov qab los ntsib cov neeg hauv Xukaus thiab hais rau lawv hais tias, “Nej puas nco txog qhov uas nej tsis kam pab kuv lawm? Nej hais tias, nej tsis pub zaub mov rau kuv cov tubrog noj, rau qhov kuv ntes tsis tau Xenpas thiab Xamunas nkawd. Nimno kuv ntes tau nkawd los ntawm no lawm!” Ces Nkide-oos muab cov nplawm hmab pos thiab cov nplawm pos kaus ntsaj uas txiav tom tiaj suabpuam los nplawm cov thawjcoj hauv lub nroog Xukaus ntawd. Thiab nws muab lub chaw tsomfaj hauv lub nroog Penuyees rhuav vau tas thiab muab cov txivneej hauv lub nroog ntawd tua povtseg huv tibsi. Nkide-oos nug Xenpas thiab Xamunas nkawd hais tias, “Cov neeg uas neb muab tua saum roob Tanpaus zoo li cas?” Nkawd teb hais tias, “Lawv zoo ib yam li koj, lawv txhua tus puavleej zoo ib yam li vajntxwv tej tub thiab ntag.” Nkide-oos hais tias, “Lawv yog kuv cov kwvtij, thiab yog kuv niam cov tub kiag ntag. Tus TSWV uas muaj sia nyob, paub hais tias yog neb tsis tua lawv povtseg, kuv yuav tsis tua neb ib yam nkaus thiab.” Nkide-oos hais rau nws tus tub hlob Yethes hais tias, “Koj cia li muab nkawd tua los mas!” Tiamsis tus tub tsa tsis taus nws rab ntaj tua nkawd li. Nws ntshai heev, rau qhov nws tseem yog tub hluas xwb. Xenpas thiab Xamunas nkawd hais rau Nkide-oos hais tias, “Yog koj yog txivneej yawg tiag, koj cia li tua wb xwb.” Yog li ntawd, Nkide-oos thiaj muab nkawd tua thiab daws tej saw tooj ntawm nkawd cov ntxhuav nqa huv tibsi lawm. Tom qab ntawd, cov Yixalayees hais rau Nkide-oos hais tias, “Koj cia li ua tus tswjhwm peb, thiab tom qab uas dua koj lawm, los koj tus tub thiab koj cov xeebntxwv yuav ua ib yam nkaus li ntawd. Rau qhov koj cawm peb dim ntawm cov Midias txhais tes los lawm.” Nkide-oos teb hais tias, “Kuv thiab kuv tus tub yuav tsis ua tus tswjhwm nej. Tus TSWV yuav tswjhwm nej.” Tiamsis nws txav zog mus thiab hais tias, “Cia kuv thov yuav ib yam ntawm nej. Thov nej txhua tus muab tej qhwsntsej uas nej mus huab tau los nqa huv tibsi tuaj rau kuv.” (Cov Midias coj qhwsntsej kub, ib yam li cov neeg uas nyob tom tiaj suabpuam thiab.) Cov pejxeem teb hais tias, “Peb txaus siab yuav nqa tej qhwsntsej ntawd tuaj rau koj.” Lawv nthuav hlo ib daim ntaub los pua, thiab txhua tus nqa tej qhwsntsej kub uas lawv huab tau los ntawd tuaj tso rau ntawm daim ntaub. Cov qhwsntsej kub uas Nkide-oos tau ntawd hnyav tshaj plaub caug choj, thiab cov no twb tsis tau xam tej saw, tej xauv thiab tej ris tsho ntaub pajyeeb uas cov Midias ob tug vajntxwv hnav lossis tej saw tooj uas lawv dai rau ntawm lawv cov ntxhuav cajdab. Nkide-oos muab cov kub ntawd nchuav ua ib tug efaus nqa mus txawb rau hauv Aufelas uas yog nws lub nroog. Tagnrho cov Yixalayees puavleej muab Vajtswv tso tseg thiab mus pe tus efaus ntawd rau hauv lub nroog Aufelas. Tus efaus ntawd yog rooj ntxiab uas cuab tos Nkide-oos thiab nws tsevneeg kev ntag. Txij thaum ntawd los, cov Midias thiaj swb cov Yixalayees thiab lawv tsa tsis taus taubhau ntxiv li lawm. Lub tebchaws muaj kev thajyeeb tau plaub caug xyoo mus txog thaum Nkide-oos tuag lawm. Nkide-oos rov mus nyob rau hauv nws lub tsev. Nkide-oos muaj xya caum leej tub, rau qhov nws muaj ntau tus pojniam. Nws tseem muaj ib tug niamyau nyob hauv lub nroog Sekhees; tus niamyau ntawd yug tau ib tug tub rau Nkide-oos, nws tis tus tub ntawd npe hu ua Anpimelej. Yau-ases tus tub Nkide-oos tuag thaum nws hnubnyoog laus heev, thiab luag coj nws mus faus rau hauv nws txiv Yau-as lub qhov ntxa, hauv lub nroog Aufelas uas yog Anpi-exes cuab kwvtij lub nroog. Tom qab uas Nkide-oos tuag lawm, cov Yixalayees rov tsis muab siab npuab Vajtswv thiab mus teev Npa-as dua. Lawv teev Npa-as-npelis ua lawv tus vajtswv, thiab tseg tsis pehawm tus TSWV uas yog lawv tus Vajtswv tus uas cawm lawv dim ntawd lawv cov yeebncuab uas nyob ibncig lawv lawm. Lawv yeej tsis ris Nkide-oos tsevneeg tej txiaj ntsig thiab txhua yam zoo uas nws tau ua pab cov Yixalayees tas los lawm. Nkide-oos tus tub Anpimelej mus xyuas nws niam cov neejtsa hauv lub nroog Sekhees, thiab nws hais rau nws niam cov neejtsa kom nug cov neeg hauv Sekhees hais tias, “Saib nej yuav tagnrho Nkide-oos xya caum leej tub ua nom kav nej lossis nej xav yuav ib tug kav nej xwb? Nco ntsoov hais tias Anpimelej thiaj yog nej nqaij nej tawv thiab yog nej roj nej ntshav xwb.” Nws niam cov neejtsa thiaj mus pab nws hais zaj no rau cov neeg uas nyob hauv lub nroog Sekhees, thiab cov neeg hauv lub nroog Sekhees pom zoo yuav Anpimelej, rau qhov nws txheeb ze lawv. Lawv muab tau xya caum daim nyiaj hauv lub tsev uas lawv teev Npa-as-npelis los rau nws, thiab nws muab cov nyiaj no mus ntiav tau ib pab neeg lojleeb uas tsis tsimtxiaj los tuaj nws tog. Nws thiaj rov mus tom nws txiv lub tsev uas nyob hauv lub nroog Aufelas, thiab mus ntes nws xya caum leej kwvtij uas puavleej yog Nkide-oos cov tub coj mus tua huv tibsi rau saum ib daim lag zeb. Tiamsis Yauthas uas yog Nkide-oos tus tub ntxawg, khiav nkaum lawm nws thiaj tsis raug tua xwb. Ces tagnrho cov neeg hauv lub nroog Sekhees thiab hauv lub nroog Npemilaus tuaj txoos ua ke rau ntawm tsob qab ntoo xeeb hauv lub nroog Sekhees. Lawv muab Anpimelej tsa ua vajntxwv. Thaum Yauthas hnov dheev txog zaj no, nws thiaj mus sawv saum lub ncov Roob Nkelixees thiab qw tuaj rau lawv hais tias, “Cov neeg Sekhees, yog nej mloog kuv hais, Vajtswv thiaj yuav mloog nej hais! Muaj ib zaug tej ntoo txawm tawm mus xaiv ib tug vajntxwv kav lawv. Lawv hais rau tus ntoo roj hais tias, ‘Koj cia li ua vajntxwv kav peb.’ Tus ntoo roj teb hais tias, ‘Yog muab kuv tsa ua vajntxwv kav nej, kuv yuav tsis tau txi kuv tej txiv los ua roj siv rau tej dab thiab tej neeg tau ntsejmuag lawm.’ Ces tej ntoo ntawd hais rau tus ntoo txiv ncuavpias hais tias, ‘Koj cia li ua vajntxwv kav peb.’ Tus ntoo txiv ncuavpias teb hais tias, ‘Yog muab kuv tsa ua vajntxwv kav nej, kuv yuav tsis tau txi kuv tej txiv uas qab zib heev lawm.’ Yog li ntawd, tej ntoo thiaj hais rau tsob txiv hmab hais tias, ‘Koj cia li ua vajntxwv kav peb.’ Tiamsis tsob txiv hmab teb hais tias, ‘Yog muab kuv tsa ua vajntxwv kav nej, kuv yuav tsis tau txi kuv tej txiv los ua cawv rau tej dab thiab tej neeg muaj kev zoo siab lawm.’ Ces tagnrho tej ntoo ntawd txawm hais rau tsob hmab pos hais tias, ‘Koj cia li ua vajntxwv kav peb.’ Tsob hmab pos teb hais tias, ‘Yog nej xav muab kuv tsa ua nej tus vajntxwv tiag, nej cia li los nkaum hauv kuv tus duab ntxoov ntxoo. Yog nej tsis kam los, hluavtaws yuav tawm hauv kuv tej ceg tuaj kub tej ntoo ciab pem Lenpanoos kom tas huv tibsi.’ ” Yauthas hais ntxiv hais tias, “Nej yeej muaj nplooj siab ncaj ncees thiab dawb paug thaum nej tsa Anpimelej ua nej tus vajntxwv tiag los? Nej ua li no puas yog nej pauj txiaj ntsig rau Nkide-oos thiab nws tsevneeg? Nej yuav tsum nco ntsoov hais tias, kuv txiv yog tus uas tuaj pab nej tua nej cov yeebncuab. Nws muab nws txojsia cawm nej dim ntawm cov Midias txhais tes los. Tiamsis hnub no nej ntxeev siab tig rov qab tawmtsam kuv txiv tsevneeg. Nej muab kuv txiv xya caum leej tub tua rau saum ib daim lag zeb, thiab nej muab Anpimelej uas yog kuv txiv tus nkauj qhe tus tub tsa ua vajntxwv kav nej hauv lub nroog Sekhees, rau qhov nws txheeb ze nej. Tej uas hnub no nej ua, yog ua rau Nkide-oos thiab nws tsevneeg, thiab yog ua los ntawm lub siab ncaj ncees tiag, ces nej cia li txaus siab rau Anpimelej thiab nws cia li txaus siab rau nej. Yog hais tias tsis yog li ntawd, thov kom nplaim taws cia li tawm hauv Anpimelej tuaj kub cov neeg uas nyob hauv lub nroog Sekhees thiab Npemilaus. Thov kom nplaim taws tawm hauv cov neeg uas nyob hauv lub nroog Sekhees thiab Npemilaus tuaj kub Anpimelej kom tas.” Vim Yauthas ntshai nws tus tijlaug Anpimelej, nws thiaj khiav mus nyob hauv lub nroog Npelis lawm. Anpimelej kav cov Yixalayees tau peb xyoos. Ces Vajtswv ua rau Anpimelej thiab cov neeg hauv lub nroog Sekhees tsis sib haumxeeb, lawv tau ntxeev siab tawmtsam Anpimelej. Tej xwm no tshwmsim twb yog vim Anpimelej tua Nkide-oos xya caum leej tub tuag liab ntsha tsuas, nimno tej ntshav ntawd thiaj ua siv ua npog poob los rau saum lawv tus kwvtij Anpimelej thiab cov neeg hauv Sekhees uas pab Anpimelej tua nws cov kwvtij. Cov neeg hauv lub nroog Sekhees txhij ib pab neeg mus nkaum hauv tej koog ntoo saum tej ncov roob tos kev tua Anpimelej, thiab lawv huab txhua tus neeg uas taug txojkev ntawd. Ces txawm muaj neeg mus hais zaj no rau Anpimelej paub. Enpes tus tub Nka-as nrog nws cov kwvtij tuaj txog hauv lub nroog Sekhees, mas cov neeg hauv lub nroog ntawd cia siab heev rau nws. Lawv txawm tawm mus de tej txiv hmab hauv lawv tej vaj coj los tsuam ua cawv thiab npaj ua ib rooj noj haus. Lawv mus rau hauv lawv tus vajtswv lub tuamtsev, lawv noj haus ua kev lomzem thiab luag Anpimelej plig heev. Nka-as hais tias, “Peb cov neeg uas nyob hauv lub nroog Sekhees no yog neeg dabtsi? Vim li cas peb cia nyuag Anpimelej ntawd kav peb? Nws yog leejtwg tiag? Nws tsuas yog Nkide-oos tus tub xwb los sav! Thiab Xenpules yog tus sawv cev ntawm nws, vim li cas peb pheej ua haujlwm rau nws? Cia li hwm nej yawgkoob Hamaules, tus uas yog cov neeg Sekhees leej txiv. Kheev lam yog kuv tau ua cov pejxeem no tus thawj xwb lauj! Kuv yuav raws Anpimelej tawm khiav mus ntag! Kuv yuav hais rau nws tias, ‘Cia li txhij koj cov tubrog tawm tuaj nrog peb sib tua!’ ” Thaum Xenpules uas kav lub nroog hnov tej lus uas Nka-as hais ntawd, ua rau nws chim heev. Nws thiaj xa xov mus rau Anpimelej hauv lub nroog Alumas hais tias, “Enpes tus tub Nka-as thiab nws cov kwvtij tau tuaj txog hauv lub nroog Sekhees, thiab lawv tau txwv tsis pub koj rov los rau hauv lub nroog Sekhees no ntxiv lawm. Hmo no koj thiab koj cov tubrog cia li maub mus nkaum rau hauv tej teb. Tagkis sawv ntxov nej cia li sawv thiab nyas tuaj tua lub nroog. Ces thaum uas Nka-as thiab nws cov tubrog tawm tuaj tua nej, txhua tus uas nej ntes tau, nej cia li muab ntaus kom txaus siab ntag!” Yog li ntawd, Anpimelej thiaj muab nws cov tubrog faib ua plaub pab, hmo ntawd lawv maub los nkaum rau ntawm ntug nroog Sekhees. Thaum Anpimelej thiab nws cov tubrog pom Nka-as tawm tuaj sawv ntawm roojvag nroog, lawv txawm sawv pes tsees ntawm tej chaw uas lawv nkaum los. Nka-as pom dheev lawv thiab hais rau Xenpules hais tias, “Saib maj! Muaj neeg coob heev dhia nplawg ntia saum ncov roob los lawm lauj!” Xenpules teb hais tias, “Cov ntawd tsis yog neeg, lawv yog tej duab ntxoov ntxoo los saum roob los xwb.” Nka-as rov hais ntxiv hais tias, “Saib maj! Cov tid dhia nplawg ntia nqis taug laj roob los thiab muaj ib pab taug txojkev ntawm cov neeg saib hmoov tsob ntoo xeeb los.” Ces Xenpules hais rau Nka-as hais tias, “Nimno tej lus uas koj pheej khavtheeb dua twg lawm? Koj yog tus uas pheej nug hais tias, vim li cas peb pheej cia nyuag Anpimelej ntawd kav peb. Cov neeg ntawd yog cov uas koj pheej luag lawv plig ntag. Cia li tawm mus nrog lawv sib tua los mas.” Nka-as thiab cov neeg hauv lub nroog Sekhees tawm mus nrog Anpimelej sib tua. Anpimelej mus caum ntes Nka-as, thiab Nka-as khiav nkaum rau ub rau no. Muaj neeg raug mob ua ntu zus los txog ntua rau ntawm roojvag nroog. Anpimelej rov mus nyob hauv lub nroog Alumas, ces Xenpules thiaj muab Nka-as thiab nws cov kwvtij raws khiav tawm hauv lub nroog Sekhees lawm, yog li ntawd, lawv thiaj nyob tsis taus hauv lub nroog Sekhees. Hnub tom qab muaj neeg mus qhia rau Anpimelej hais tias, cov neeg hauv lub nroog Sekhees tabtom tuav tswvyim nrhiav kev khiav mus rau tom tej teb. Yog li ntawd, Anpimelej thiaj txhij nws cov tubrog, muab lawv faib ua peb pab, mus nkaum tom teb tos. Thaum nws pom cov pejxeem tawm hauv nroog tuaj, nws thiaj tawm hauv qhov chaw uas nws nkaum los tua lawv. Thaum Anpimelej thiab pab tubrog uas nrog nws tabtom dhia ceev nrooj los zov ntawm roojvag nroog, ob pab uas mus zov tom teb twb muab cov yeebncuab uas nyob tom teb tua tuag tas. Lawv sib tua ib hnub nkaus. Anpimelej thiaj txeeb tau lub nroog, muab cov neeg hauv tua tuag tas, muab lub nroog tsoo vau tas, thiab muab ntsev nphoo plooj nkaus rau saum npoo av. Thaum cov thawjcoj uas nyob ntawm lub chaw fajxwm hauv lub nroog Sekhees hnov txog zaj no, lawv thiaj khiav mus nkaum rau ib chav hauv lub tuamtsev uas pe Npa-as. Muaj neeg mus qhia rau Anpimelej hais tias, lawv khiav mus nkaum rau hauv lawm, nws thiaj coj nws cov tubrog nce mus rau saum Roob Zalemoos. Anpimelej muab taus mus txiav tau ib kheev ceg ntoo kwv los. Anpimelej hais kom nws cov tubrog ua ib yam nkaus li nws ua. Ces txhua tus tubrog, ib leeg mus txiav tau ib kheev ceg ntoo kwv los; lawv ua raws li Anpimelej ua, thiab muab cov ceg ntoo ntsaws rau lub cauj qho ntawd. Lawv zes taws hlawv, ces cov neeg uas nkaum hauv chav ntawd, thiab cov neeg uas nyob hauv lub chaw fajxwm hauv lub nroog Sekhees tuag tagnrho, pojniam thiab txivneej huv tibsi muaj kwvyees ib txhiab leej. Ces Anpimelej txawm mus rau hauv lub nroog Thenpej, mus vij lub nroog ntawd thiab ntes cov neeg hauv. Nyob hauv lub nroog ntawd muaj ib lub chaw tsomfaj zoo heev, ces txhua tus txivneej thiab pojniam uas nyob hauv lub nroog ntawd, thiab tagnrho tej thawjcoj nkag mus nkaum rau hauv lub chaw tsomfaj ntawd. Lawv muab qhovrooj xauv thiab nce mus nkaum rau saum ruv lawm. Anpimelej tuaj tua lawv ntawm lub chaw tsomfaj, nws mus rau ntawm lub qhovrooj thiab zes taws hlawv lub chaw tsomfaj. Tiamsis muaj ib tug pojniam muab ib txhib zeb pov los raug Anpimelej taubhau thiab ua rau nws txha taubhau tawg. Ces Anpimelej txawm hu tus tub hluas uas nqa nws tej cuabyeej ua rog, kom cia li ceev nrooj los cuag nws thiab nws hais rau tus tub hluas ntawd hais tias, “Cia li rho koj rab ntaj tua kuv kom tuag. Kuv tsis xav kom luag xyav hais tias tus pojniam ntawd tua kuv tuag.” Tus tub hluas ntawd thiaj rho ntaj nkaug Anpimelej tshab plaws. Anpimelej thiaj tuag lawm. Thaum cov Yixalayees pom Anpimelej tuag lawm, lawv nyias txawm rov mus nyias tsev tas. Twb yog Vajtswv muab Anpimelej tua pauj txojkev phem uas nws tau ua tawmtsam nws txiv, thiab muab nws cov kwvtij xya caum leej tua tuag tas ntawd. Vajtswv tseem ua rau cov neeg uas nyob hauv lub nroog Sekhees raug kev txomnyem vim lawv txojkev ua phem, Nkide-oos tus tub Yauthas tej lus uas thaum nws foom ntawd thiaj poob los raug lawv. Tom qab uas Anpimelej tuag lawm, Puahas tus tub Taulas uas yog Daudaus tus xeebntxwv los ua tus pab cov Yixalayees. Nws yog xeem Ixakhas thiab nws nyob hauv lub nroog Samiles pem lub laj roob Efalayees. Nws ua cov Yixalayees tus thawjcoj tau nees nkaum peb xyoos. Nws mam tuag, thiab luag muab nws faus rau hauv lub nroog Samiles. Tom qab uas Taulas tuag lawm, Yailes uas nyob hauv cheebtsam Nkile-as thiaj ua tus coj cov Yixalayees tau nees nkaum ob xyoos. Nws muaj peb caug leej tub; lawv caij peb caug tus neesluav. Lawv muaj peb caug lub nroog nyob hauv xeev Nkile-as uas nimno tseem hu ua Yailes tej zos. Yailes tuag thiab luag muab nws coj mus faus rau ntawm lub nroog Kamoos. Cov Yixalayees rov ua txhaum rau tus TSWV uas yog lawv mus pe Npa-as thiab tej mlom Atates, thiab mus pe cov Xilias, cov Xidoos, cov Mau-am, cov Amoos thiab cov Filitees tej vajtswv. Lawv tso tus TSWV tseg tsis pehawm nws lawm. Yog li ntawd, tus TSWV chim heev rau cov Yixalayees, nws thiaj tso cov Filitees thiab cov Amoos tuaj tua cov Yixalayees. Lawv quab yuam thiab tsimtxom cov Yixalayees uas nyob hauv tebchaws Amaules ntawm tus dej Yauladees sab hnubtuaj, hauv cheebtsam Nkile-as tau kaum yim xyoo. Cov Amoos tseem hla tus dej Yauladees mus tua xeem Yudas, xeem Npeenyamees thiab xeem Efalayees huv tibsi. Cov Yixalayees tau kev nyuaj siab loj kawg nkaus. Cov Yixalayees thiaj quaj thov tus TSWV hais tias, “Peb tau ua txhaum tawmtsam koj, peb tso koj uas yog peb tus Vajtswv tseg thiab mus pe Npa-as lawm.” Tus TSWV teb lawv hais tias: “Thaum cov Iziv, cov Amaules, cov Amoos, cov Filitees, cov Xidoos, cov Amalej thiab cov Ma-oos tau quab yuam nej yav tas los, thiab nej tau quaj thov kuv. Kuv yeej ibtxwm tsis tau cawm nej dim ntawm lawv tes hlo li los? Tiamsis nej tseem tso kuv tseg thiab mus pe luag tej vajtswv, yog li ntawd, kuv yuav tsis pab nej ib zaug ntxiv li lawm. Nej cia li rov qab mus thiab quaj thov tej vajtswv uas nej twb xaiv lawm. Cia tej vajtswv ntawd pab nej thaum nej raug kev txomnyem.” Tiamsis cov Yixalayees hais rau tus TSWV hais tias, “Peb tau ua txhaum lawm tiag. Koj yuav rau txim li cas rau peb los nyob ntawm koj pom zoo, tiamsis hnub no thov koj cawm peb lauj.” Yog li ntawd, lawv thiaj muab lwm haivneeg tej vajtswv uas lawv tau coj los pe ntawd tsoo povtseg huv tibsi thiab rov los pehawm tus TSWV dua; thiab tus TSWV tsis xav cia cov Yixalayees raug kev txomnyem ntxiv lawm. Ces cov Amoos txawm txhij tubrog thiab tuaj tsuam yeej rau ntawm cheebtsam Nkile-as. Cov Yixalayees tuaj sib sau ua ke thiab tsuam yeej rau ntawm Mixepas hauv cheebtsam Nkile-as. Cov Nkile-as tej thawj tubrog thiaj sib tham hais tias, “Leejtwg yog tus coj peb mus tua cov Amoos, tus ntawd cia li ua tus thawjcoj, coj peb cov uas nyob hauv cheebtsam Nkile-as no.” Yefethas yog ib tug tubrog uas siab tawv heev nyob hauv xeev Nkile-as, nws yog ib tug niamntiav tus tub. Nws txiv yog Nkile-as; Nkile-as tus pojniam yug tau tub coob, thiab thaum lawv loj hlob tuaj lawm, lawv muab Yefethas ntiab tawm tsev. Lawv hais rau nws hais tias, “Koj yuav tsis muaj feem nrog peb faib peb txiv tej qubtxeeg qubteg; rau qhov koj yog dua ib tug niam yug.” Yog li ntawd, Yefethas thiaj khiav nws cov kwvtij mus nyob rau hauv tebchaws Taunpes. Nws mus yaum tau ib pab neeg lojleeb thiab lawv mus nrog nws nyob ua ke. Tom qab ntawd, muaj ib zaug cov Amoos txawm mus ua rog rau cov Yixalayees. Thaum muaj tej xwm no tshwmsim tuaj, cov Nkile-as tej thawjcoj thiaj mus coj Yefethas hauv tebchaws Taunpes rov qab los. Lawv hais rau Yefethas hais tias, “Koj cia li rov los ua peb tus thawjcoj, peb thiaj yuav tua yeej cov Amoos.” Tiamsis Yefethas teb hais tias, “Nej ntxub kuv heev, nej thiaj muab kuv ntiab tawm hauv kuv txiv tsev mus lawm. Ua cas nimno nej raug kev nyuaj siab, nej ho paub tuaj cuag kuv?” Lawv teb Yefethas hais tias, “Nimno peb tig rov los cuag koj, rau qhov peb xav tau koj nrog peb mus tua cov Amoos thiab ua cov Nkile-as tus thawjcoj.” Yefethas hais rau lawv hais tias, “Yog nej coj kuv rov qab mus tsev, mus tua cov Amoos thiab tus TSWV pab kuv tua yeej, mas kuv yuav ua tus kav nej xwb.” Lawv teb hais tias, “Peb pom zoo li ntawd ntag. Thov tus TSWV ua timkhawv rau peb.” Yog li ntawd, Yefethas thiaj nrog cov Nkile-as tej thawjcoj rov los, thiab cov pejxeem muab nws tsa ua tus saib lawv thiab ua lawv tus thawjcoj. Yefethas qhia tej kev uas nws yuav tswjhwm sawvdaws tabmeeg tus TSWV hauv lub nroog Mixepas. Yefethas txawm txib neeg mus hais rau cov Amoos tus vajntxwv hais tias, “Vim li cas koj yuav tsiv siab ua luaj rau peb? Vim li cas koj thiaj tuaj tua kuv lub tebchaws?” Cov Amoos tus vajntxwv teb Yefethas hais tias, “Thaum cov Yixalayees khiav nram tebchaws Iziv los, lawv txeeb tagnrho kuv tej av uas nyob ntawm tus dej Alenoos mus txog ntua ntawm tus dej Yanpaus thiab ntawm tus dej Yauladees lawm. Nimno koj cia li thim twjywm rov qab rau kuv xwb.” Yefethas rov txib neeg mus hais rau cov Amoos tus vajntxwv hais tias, “Cov Yixalayees tsis tau los txeeb lub tebchaws Mau-am lossis lub tebchaws Amoos, qhov ntawd tsis muaj tseeb li koj hais. Tej xwm uas tshwmsim ntawd yog li no: thaum cov Yixalayees khiav nram tebchaws Iziv los, lawv hla tiaj suabpuam los txog rau ntawm Hiavtxwv Akhanpas thiab los txog rau hauv Kades. Ces lawv thiaj txib neeg mus thov cov Edoos tus vajntxwv kom pub lawv taug kev hauv nws lub tebchaws los. Tiamsis cov Edoos tus vajntxwv tsis kam lawv los. Dua li ntawd lawv tseem thov cov Mau-am tus vajntxwv ib yam nkaus, tiamsis nws kuj tsis kam li thiab. Yog li ntawd, cov Yixalayees thiaj los nyob rau hauv Kades. Ces lawv thiaj los hla tiaj suabpuam, lug kev ncig lub tebchaws Edoos thiab lub tebchaws Mau-am, mus txog thaum lawv los txog rau ntawm tebchaws Mau-am sab hnubtuaj uas nyob ntawm tus dej Alenoos sab tid. Lawv thiaj tsuam yeej nyob rau qhov ntawd, tiamsis lawv tsis tau hla tus dej Alenoos rau qhov yog cov Mau-am tus ciamteb. Cov Yixalayees tso xov rau Xihoos uas yog cov Amaules tus vajntxwv uas kav lub nroog Hesenpoos hais tias, ‘Thov koj tso cai rau peb taug kev hauv koj lub tebchaws mus rau hauv peb lub tebchaws.’ Tiamsis Xihoos tsis kam cov Yixalayees taug kev hauv nws lub tebchaws mus. Nws thiaj txhij tagnrho nws cov tubrog mus tsuam yeej rau hauv Yahaxes thiab tua cov Yixalayees. Tiamsis tus TSWV uas yog cov Yixalayees tus Vajtswv tau pab cov Yixalayees tua yeej Xihoos thiab nws cov tubrog. Ces cov Yixalayees thiaj txeeb tau tagnrho lub tebchaws uas cov Amaules nyob ntawd. Lawv kav tagnrho cov Amaules lub tebchaws txij ntua ntawm tus dej Alenoos sab qabteb mus txog ntua ntawm tus dej Yanpaus sab qaumteb thiab txij ntua ntawm tiaj suabpuam sab hnubtuaj mus txog ntua ntawm tus dej Yauladees sab hnubpoob. Twb yog tus TSWV uas yog cov Yixalayees tus Vajtswv muab cov Amaules ntiab tawm thiab cia rau nws haivneeg Yixalayees los nyob. Koj tseem xav txeeb lub tebchaws no rov qab thiab los? Koj cia li kav tej uas koj tus vajtswv Khemaus muab rau koj lawm xwb. Tiamsis peb yuav kav tej uas tus TSWV uas yog peb tus Vajtswv muab pub rau peb lawm. Koj xav hais tias koj tseem txawj ntaus rog tshaj cov Mau-am tus vajntxwv Xipaules tus tub Npalaj thiab no los? Nws yeej ibtxwm tsis tau nrog cov Yixalayees sib cav dua li los? Nws yeej ibtxwm tsis tau nrog peb ua rog li los? Cov Yixalayees twb kav lub nroog Hesenpoos thiab Alu-es, thiab tej zos me uas nyob ibncig ob lub nroog no, thiab tagnrho tej nroog uas nyob raws tus ntug dej Alenoos tau peb puas xyoo lawm. Yog li cas koj tsis txeeb rov qab thaum lub sijhawm ntawd? Kuv tsis tau ua txhaum rau koj qhov twg li, tsuas yog koj thiaj ua txhaum rau kuv uas yog tuaj tua kuv lub tebchaws. Tus TSWV yog tus txiav txim. Hnub no nws yuav txiav txim rau cov Yixalayees thiab rau cov Amoos.” Tiamsis cov Amoos tus vajntxwv tsis quavntsej Yefethas tej lus ntawd li. Ces tus TSWV tus ntsujplig txawm los kav hlo Yefethas. Nws thiaj mus ncig thoob plaws Nkile-as thiab Manaxes rov los rau hauv Mixepas hauv cheebtsam Nkile-as thiab mus rau ntawm cov Amoos. Yefethas coglus rau tus TSWV li no hais tias: “Yog koj pub kuv tua yeej cov Amoos, thaum kuv ntaus yeej rog rov qab los, yog leejtwg xub tawm hauv kuv lub tsev tuaj tos kuv, mas kuv yuav muab tus ntawd tua hlawv fij rau koj.” Yog li ntawd, Yefethas thiaj hla dej mus tua cov Amoos, thiab tus TSWV tau pab nws tua yeej lawm tiag. Nws pib tua cov Amoos ntawm Alu-es mus txog ntua ntawm cheebtsam uas nyob ibncig lub nroog Meenithas, tagnrho muaj nees nkaum lub nroog, thiab mus txog ntua ntawm Anpees Kelamees. Cov Amoos raug tua tuag coob kawg nkaus li, thiab ua rau cov Amoos swb cov Yixalayees lawm. Thaum Yefethas rov qab los txog tsev hauv Mixepas, nws tus ntxhais txawm npuaj nruas dhia seevcev tawm tuaj tos nws. Yefethas muaj tib tug ntxhais ntawd xwb. Thaum Yefethas pom dheev nws tus ntxhais, Yefethas dua rhe Yefethas lub tsho thiab hais tias, “Kuv tus Mentxhais! Koj ua rau kuv nyuaj siab kawg nkaus li! Vim li cas koj ua rau kuv mob siab tas npaum li no? Kuv tau coglus ruaj heev rau tus TSWV lawm, kuv yuav thim tsis tau kuv tej lus ntawd li!” Yefethas tus ntxhais hais rau Yefethas hais tias, “Yog koj tau coglus rau tus TSWV lawm tiag, koj cia li ua rau kuv raws li koj tau coglus tseg, rau qhov tus TSWV twb ua pauj rau koj cov yeebncuab uas yog cov Amoos lawm.” Tiamsis nws thov nws txiv hais tias, “Thov koj cia kuv ua li no. Thov cia kuv nyob ywj siab ob lub hlis, kom kuv tau nrog kuv tej phoojywg mus ncig ua si saum tej roob thiab quaj nyiav qhov uas kuv yuav tuag thaum kuv tseem yog nkaujxwb.” Yefethas thiaj cia nws mus ua si tau ob lub hlis. Nws thiab nws tej phoojywg nce mus rau pem tej ncov roob thiab mus quaj nyiav qhov uas nws yuav tuag thaum nws tsis tau yuav txiv thiab tsis tau muaj menyuam. Tom qab ob lub hlis lawm, nws rov los cuag nws txiv. Ces Yefethas txawm ua raws li nws tau coglus rau tus TSWV lawm, nws tus ntxhais thiaj tuag thaum tseem yog nkaujxwb. Qhov no thiaj chiv ua ib txojkev quaj rau cov Yixalayees, mas txhua lub xyoos, cov Yixalayees tej pojniam thiaj muab plaub hnub mus quaj nyiav Yefethas tus ntxhais uas yog neeg Nkile-as. Cov Efalayees npaj mus ntaus rog; lawv hla tus dej Yauladees mus rau hauv lub nroog Xafoos thiab hais rau Yefethas hais tias, “Vim li cas koj hla ciamteb mus tua cov Amoos koj tsis hu peb nrog koj mus? Peb yuav hlawv lub tsev no kom vau los tsuam koj!” Tiamsis Yefethas hais rau lawv hais tias, “Kuv cov pejxeem thiab kuv tau nrog cov Amoos sib cav sib ceg txaus nkaus lawm. Kuv twb thov nej, tiamsis nej tsis pab kom kuv dim ntawm lawv tes. Thaum kuv pom nej tsis cev tes tuaj pab kuv, kuv thiaj muab kuv txojsia pua kev hla ciamteb mus tua cov Amoos, tus TSWV thiaj pub kuv tua yeej lawv. Vim li cas nimno nej tseem yuav tuaj tua kuv thiab?” Ces Yefethas txhij tagnrho cov txivneej hauv xeev Nkile-as tuaj ua ke, tua cov Efalayees ua rau lawv swb kiag lawm. (Cov Efalayees hais tias, “Nej cov Nkile-as uas nyob hauv Efalayees thiab Manaxes, nej nyiag kev khiav ntawm cov Efalayees lawm xwb los sav!”) Vim tsis xav pub kom cov Efalayees khiav dim tau, cov Nkile-as thiaj mus txeeb tau tej qhov chaw uas hla tus dej Yauladees. Thaum txhua tus Efalayees khiav los hla qhov ntawd yuav tsum tau thov kev tso cai, mas cov neeg Nkile-as nug hais tias, “Koj puas yog neeg Efalayees?” Yog nws teb hais tias, “Tsis yog,” ces lawv yuam kom nws hais tias, “Sinpaules.” Tiamsis nws hais “Xinpaules,” rau qhov nws hais lo lus ntawd tsis meej. Ces lawv yuav ntes nws thiab muab nws tua rau ntawm qhov chaw uas hla tus dej Yauladees. Lub sijhawm ntawd cov neeg Efalayees uas raug tua tuag muaj plaub caug ob txhiab leej. Yefethas ua tus coj cov Yixalayees tau rau xyoo. Ces nws txawm tuag lawm, thiab luag muab nws faus rau hauv nws lub zos ntawm Nkile-as. Tom qab uas Yefethas tuag lawm, Ixas uas nyob hauv lub nroog Npelehees ua tus coj cov Yixalayees. Ixas muaj peb caug leej tub thiab peb caug leej ntxhais. Ixas muab nws cov ntxhais qua rau cov neeg sab nraud uas tsis yog nws cajces yuav ua pojniam, thiab nws mus yuav cov neeg sab nraud uas tsis yog nws cajces peb caug tus ntxhais los rau nws cov tub ua pojniam. Ixas coj cov Yixalayees tau xya xyoo, ces nws txawm tuag lawm, thiab luag muab nws faus rau hauv lub nroog Npelehees. Tom qab uas Ixas tuag lawm, Eloos uas yog xeem Xenpuloos ua tus coj cov Yixalayees tau kaum xyoo. Ces nws txawm tuag lawm, thiab luag muab nws faus rau hauv lub nroog Aiyaloos hauv cov Xenpuloos cheebtsam av. Tom qab uas Eloos tuag lawm, Adoos uas yog Hilees tus tub uas nyob hauv lub nroog Pilathoos ua tus coj cov Yixalayees. Nws muaj plaub caug leej tub thiab peb caug leej xeebntxwv, lawv caij xya caum tus neesluav. Adoos coj cov Yixalayees tau yim xyoo, ces nws txawm tuag lawm, thiab luag muab nws faus rau hauv lub nroog Pilathoos hauv cov Efalayees cheebtsam av uas nyob pem cov Amalej tej ncov roob. Cov Yixalayees rov ua txhaum rau tus TSWV dua, tus TSWV thiaj muab lawv cob rau cov Filitees kav tau plaub caug xyoo. Lub sijhawm ntawd, muaj ib tug txivneej npe hu ua Manau-as nyob hauv lub nroog Xaulas. Nws yog xeem Das. Nws tus pojniam yeej ibtxwm xeeb tsis taus tub li. Tus TSWV ib tug timtswv los rau Manau-as tus pojniam pom thiab hais rau nws tus pojniam hais tias, “Koj yeej ibtxwm xeeb tsis taus tub, tiamsis tsis ntev koj yuav xeeb menyuam thiab yuav yug tau ib tug metub. Koj nco ntsoov tsis txhob haus cawv txiv hmab lossis cawv ntsim lossis noj tej zaub mov uas txwv tsis pub noj; thiab tom qab uas yug tau koj tus tub lawm, koj yuav tsum tsis txhob txiav nws cov plaubhau hlo li, rau qhov yuav muab nws fij ua ib tug Naxis rau Vajtswv txij hnub uas yug tau nws los. Nws yuav pib ua tes haujlwm uas pab tso cov Yixalayees kom dim ntawm cov Filitees txhais tes.” Tus pojniam ntawd txawm mus qhia rau nws tus txiv hais tias, “Vajtswv ib tug neeg tau los cuag kuv, nws lub ntsejmuag muaj hwvxyeej ib yam li Vajtswv tus timtswv ntag. Kuv tsis tau nug saib nws tuaj qhov twg tuaj, thiab nws tsis qhia nws lub npe rau kuv paub li. Tiamsis nws qhia rau kuv hais tias, kuv yuav xeeb menyuam thiab yuav yug tau ib tug tub. Nws hais kom kuv tsis txhob haus cawv txiv hmab lossis cawv ntsim lossis tsis txhob noj tej zaub mov uas txwv tsis pub noj, rau qhov tus metub no yuav muab fij ua ib tug Naxis rau Vajtswv mus tas nws simneej.” Ces Manau-as txawm thov tus TSWV hais tias, “Tus TSWV, thov tso Vajtswv tus neeg rov qab los cuag wb thiab qhia saib wb yuav ua li cas rau tus metub no thaum yug tau nws lawm.” Vajtswv ua raws li Manau-as thov, thiab nws tus timtswv rov los rau Manau-as tus pojniam pom thaum nws nyob tom teb. Tiamsis Manau-as uas yog nws tus txiv tsis nrog nws nyob ntawd, yog li ntawd, nws thiaj khiav rov los qhia rau nws tus txiv dua hais tias, “Koj saib! Tus txivneej uas ob hnub ntawd los cuag kuv, rov los rau kuv pom dua lawm tiag.” Manau-as sawv tsees thiab caum nws tus pojniam qab mus. Manau-as thiaj mus cuag tus txivneej ntawd thiab nug hais tias, “Koj yog tus txivneej uas qhia rau kuv tus pojniam ntag los?” Nws teb hais tias, “Kuv yog tus ntawd ntag.” Ces Manau-as nug hais tias, “Yog muaj tseeb li koj hais tiag, tus metub ntawd yuav ua dabtsi? Nws yuav coj lub neej zoo li cas?” Tus TSWV tus timtswv teb hais tias, “Koj tus pojniam yuav tsum ua txhua yam raws li kuv twb qhia rau nws lawm. Nws yuav tsum tsis txhob noj tej yam uas yog muab cawv txiv hmab ua; nws yuav tsum tsis txhob haus cawv txiv hmab lossis cawv ntsim lossis tsis txhob noj tej zaub mov uas txwv tsis pub noj. Nws yuav tsum ua txhua yam li kuv twb qhia rau nws lawm xwb.” Manau-as hais rau tus TSWV tus timtswv hais tias, “Wb xav kom koj nyob tos, wb mus muab ib tug menyuam tshis los tua ua zaub mov rau koj noj tso.” Tus TSWV tus timtswv teb hais tias, “Txawm yog neb cheem kuv nyob los, kuv yuav tsis noj neb rooj mov ntawd. Tiamsis yog neb xav npaj rooj mov ntawd los cia li muab rooj mov ntawd hlawv fij rau tus TSWV.” Manau-as teb hais tias, “Thov qhia koj lub npe rau wb, kom wb thiaj paub qhuas koj thaum tshwm muaj tseeb raws li tej lus uas koj hais ntawd lawm.” Tus timtswv nug hais tias, “Vim li cas neb thiaj xav paub kuv lub npe? Kuv lub npe yog lub uas xav tsis thoob.” Yog li ntawd, Manau-as thiaj mus ntes ib tug menyuam tshis los tua thiab muab mentsis hmoov nplej coj mus hlawv rau saum lub thaj pobzeb fij rau tus TSWV uas ua tej txujci uas xav tsis thoob. Thaum cov nplaim taws cig lam lug saum lub thaj, Manau-as nkawd pom tus timtswv ntawd nyob hauv cov nplaim taws nce mus rau saum ntuj lawm. Thaum Manau-as nkawd pom li ntawd, ces nkawd cia li qhau cev hlo ua ntsejmuag ti nkaus rau hauv av. Txij thaum ntawd los, tus TSWV tus timtswv tsis los tshwm rau Manau-as thiab nws tus pojniam pom ntxiv li lawm, Manau-as thiaj paub hais tias tus txivneej ntawd yog Vajtswv tus timtswv. Manau-as hais rau nws tus pojniam hais tias, “Wb yeej yuav tuag xwb lauj, rau qhov wb pom Vajtswv lawm!” Tiamsis nws tus pojniam teb hais tias, “Yog tus TSWV xav tua wb povtseg tiag, nws yuav tsis txais wb cov khoom fij ntawm wb tes; thiab nws yuav tsis kam ua txhua yam no rau wb pom, lossis nws yuav tsis qhia txhua yam no rau wb paub li.” Tus pojniam ntawd thiaj yug tau ib tug tub thiab tis nws lub npe hu ua Xaxoos. Tus metub no loj hlob zoo thiab tus TSWV foom koob hmoov rau nws. Thiab tus TSWV lub hwjchim txawm ua rau nws muaj zog heev zuj zus thaum nws nyob hauv xeem Das lub yeej ntu nruab nrab ntawm lub nroog Xaulas thiab Eseta-aus. Muaj ib hnub Xaxoos txawm nqis mus rau nram lub nroog Teenas, nws pom cov Filitees ib tug ntxhais zoo nkauj heev nyob nrad. Nws rov qab los tsev, nws txawm piav rau nws niam nws txiv mloog hais tias, “Kuv mus pom cov Filitees ib tug ntxhais nyob nram lub nroog Teenas, mas kuv nyiam nws heev. Neb mus yuav nws los rau kuv.” Tiamsis nws niam nws txiv nug nws hais tias, “Metub, vim li cas koj thiaj xav mus yuav cov Filitees uas tsis ua kevcai txiav tej ntxhais los ua pojniam? Koj twb nrhiav thoob plaws peb haivneeg uas yog koj cajces txawm tsis muaj hluas nkauj li lawm los?” Tiamsis Xaxoos hais rau nws txiv hais tias, “Koj cia li mus yuav tus ntxhais nrad los rau kuv. Kuv nyiam nws tib leeg xwb.” Nws niam nws txiv tsis paub xyov puas yog tus TSWV coj Xaxoos mus ua li ntawd, vim tus TSWV twb nrhiav sijhawm yuav mus tua cov Filitees lawm. Lub sijhawm ntawd cov Filitees kav cov Yixalayees. Yog li ntawd, Xaxoos txawm nrog nws niam nws txiv mus nram lub nroog Teenas. Thaum lawv tabtom mus txog rau ntawm lub vaj txiv hmab hauv lub nroog Teenas, txawm muaj ib tug menyuam tsov ntxhuav nyooj laws dhia los rau ntawm nws. Tamsim ntawd tus TSWV tus ntsujplig los rau Xaxoos thiab ua rau nws muaj zog heev, nws thiaj muab tes dua tus menyuam tsov ntxhuav ntawd ntuag ua tej daim, ib yam li dua tus menyuam tshis uas mos mos ntag. Tiamsis nws yeej tsis piav tej uas nws ua ntawd qhia rau nws niam nws txiv paub li. Ces nws txawm mus tham tus hluas nkauj ntawd, thiab nws nyiam tus hluas nkauj ntawd heev. Tau ob peb hnub tom qab Xaxoos txawm rov qab mus yuav tus hluas nkauj ntawd ua pojniam. Thaum nws taug kev mus, nws txawm rov mus xauj tus tsov ntxhuav uas nws muab tua tuag ntawd, nws pom muaj ib xub muv muaj zib heev nyob hauv tus tsov ntxhuav tuag ntawd lub cev, ua rau nws xav tsis thoob li. Nws txawm muab cov zib thiab noj taug kev los. Thaum nws los txog ntawm nws niam nws txiv, nws txawm muab mentsis rau nkawd noj. Nkawd noj cov zib mu ntawd, tiamsis Xaxoos tsis qhia rau nkawd paub hais tias nws muab cov zib muv ntawd hauv tus tsov ntxhuav lub cev los. Xaxoos txiv thiaj mus saib tus hluas nkauj ntawd hauv nws lub tsev, Xaxoos txawm ua tau ib rooj mov noj. Qhov no yog kevcai ntawm cov tub hluas. Thaum cov Filitees pom Xaxoos, lawv tso tau peb caug leej tub hluas tuaj nrog nws nyob. Xaxoos hais rau lawv hais tias, “Kuv yuav txhiaj ib zaj rau nej txhais, yog nej txhais tau lub ntsiab lus rau kuv ua ntej hnub xya uas peb xaus tshoob, kuv yuav muab peb caug cev ris tsho ntaubmag, thiab peb caug daim ntaub pua chaw rau nej. Tiamsis yog nej txhais tsis tau zaj lus no, nej yuav tsum muab peb caug cev ris tsho ntaubmag, thiab peb caug daim ntaub pua chaw rau kuv.” Lawv teb Xaxoos hais tias, “Koj cia li txhiaj los, peb rawm hnov zaj ntawd kawg li.” Xaxoos hais tias, “Muaj tej yam uas noj tawm ntawm tus noj los; Muaj tej yam qab zib tawm ntawm tus uas muaj zog los.” Twb tau peb hnub tom qab, lawv tseem txhais tsis tau zaj lus uas Xaxoos txhiaj rau lawv txhais ntawd lub ntsiab li. Hnub plaub lawv thiaj mus hais rau Xaxoos tus pojniam hais tias, “Koj taij koj tus txiv kom qhia rau peb saib zaj lus uas nws txhiaj rau peb txhais ntawd lub ntsiab yog li cas. Yog koj tsis nug, peb yuav zes taws hlawv koj txiv lub tsev thiab muab koj hlawv nrog lub tsev ntawd. Tsis yog neb ob tug nyuag ko caw peb tuaj, kom neb tau txeeb peb tej khoom xwb los?” Yog li ntawd, Xaxoos tus pojniam thiaj quaj los cuag nws thiab hais tias, “Koj tsis hlub kuv hlo li! Koj ntxub kuv kawg nkaus! Koj txhiaj rau kuv cov phoojywg txhais, tiamsis koj tsis qhia lub ntsiab rau kuv paub li!” Xaxoos teb hais tias, “Txawm yog kuv niam thiab kuv txiv los kuv twb tsis qhia. Kuv yuav ua li cas qhia rau koj?” Xaxoos tus pojniam quaj ntsig txog zaj ntawd tau xya hnub uas noj tshoob ntawd li. Tiamsis thaum txwm nkaus hnub xya, Xaxoos txawm qhia zaj lus uas nws txhiaj ntawd lub ntsiab rau nws tus pojniam, vim nws txob Xaxoos txog zaj ntawd heev. Ces tus pojniam txawm qhia rau cov Filitees. Yog li ntawd, hnub xya, ua ntej uas Xaxoos mus hauv txaj, cov txivneej hauv lub nroog ntawd hais rau nws hais tias, “Yam dabtsi qab zib tshaj zib mu? Yam dabtsi muaj zog tshaj tsov ntxhuav?” Xaxoos teb hais tias, “Yog nej tsis cab kuv tus maum nyuj mus laij liag, Nej yeej txhais tsis tau kuv zaj lus no li.” Tamsim ntawd, tus TSWV tus ntsujplig ua rau Xaxoos muaj zog heev, thiab nws txawm cia li nqis mus rau nram lub nroog Akeloos, nws mus tua tuag peb caug leej txivneej rau nrad, nws huab lawv, thiab nqa lawv tej ris tsho ntaubmag uas zoo heev los rau cov neeg uas txhais tau zaj lus uas nws txhiaj ntawd. Tom qab ntawd, nws chim txog zaj no heev, nws thiaj rov qab los tsev lawm. Thaum txog hnub txis tshoob, luag txawm muab Xaxoos tus pojniam rau nws tus phijlaj yuav lawm. Tom qab ntawd, Xaxoos rov mus xyuas nws tus pojniam thaum lub caij uas tabtom hlais nplej, nws cab ib tug thav tshis thiab mus saib nws tus pojniam. Nws taij nws yawmtxiv hais tias, “Kuv xav mus hauv kuv tus pojniam lub txaj.” Tiamsis yawmtxiv tsis pub Xaxoos mus hauv li. Nws hais rau Xaxoos hais tias, “Kuv saib zoo li koj ntxub nws heev, yog li ntawd, kuv thiaj muab nws txis rau koj tus phijlaj yuav lawm. Tiamsis nws tus niamhluas tseem zoo nkauj tshaj nws thiab. Koj cia li yuav nws tus niamhluas.” Xaxoos teb hais tias, “Zaum no kuv ua phem rau cov Filitees los kuv yuav tsis txhaum dabtsi li lawm!” Yog li ntawd, nws thiaj mus ntes tau peb puas tus hma cab los, thiab muab cov hma ntawd cov kotw khi ob tug ua ibke thiab ib nkawm hma twg nws muab ib teg tsau khi rau. Ces nws zes taws rau cov tsau thiab tso cov hma ntawd khiav mus rau hauv cov Filitees tej teb npleg. Nws ua li no tsis yog hluavtaws kub tej nplej uas twb hlais tau lawm xwb, tiamsis tseem kub tej nplej uas tsis tau hlais hauv tej teb, thiab tej vaj txiv ntoo roj tas huv tibsi lawm thiab. Cov Filitees sib nug zom zaws hais tias, “Leejtwg yog tus ua li no?” Txawm muaj neeg qhia rau lawv hais tias, “Xaxoos yog tus ua, rau qhov nws yawmtxiv uas nyob hauv lub nroog Teenas muab Xaxoos tus pojniam qua rau Xaxoos tus phijlaj yuav lawm.” Yog li ntawd, cov Filitees thiaj mus muab tus pojniam ntawd thiab nws txiv hlawv kub hnyiab tas huv tibsi. Xaxoos hais rau lawv hais tias, “Twb yog vim nej ua li no ntag! Kuv coglus tseg hais tias, kuv yuav tsis tso nej tseg mus txog thaum kuv ua pauj rau nej tas lawm tso!” Xaxoos ntaus thiab tua lawv tuag coob kawg li. Ces nws txawm khiav mus nkaum rau hauv lub qhov tsua nram lub pobtsuas Etas lawm. Cov Filitees tuaj tsuam yeej nyob hauv xeev Yudas thiab tuaj tua lub nroog Lehis. Cov Yudas nug lawv hais tias, “Vim li cas nej thiaj tuaj tua peb?” Lawv teb hais tias, “Peb tuaj ntes Xaxoos mus kaw, peb yuav ua rau nws ib yam li nws tau ua rau peb lawm.” Yog li ntawd, cov Yudas peb txhiab leej thiaj mus rau hauv lub qhov tsua nram lub pobtsuas Etas thiab hais rau Xaxoos hais tias, “Koj tsis paub hais tias, cov Filitees yog cov uas ua nom ua tswv kav peb no los? Ua cas koj tseem ua li no rau peb thiab?” Nws teb hais tias, “Kuv ua rau lawv ib yam li lawv tau ua rau kuv lawm xwb.” Lawv hais rau Xaxoos hais tias, “Peb tuaj ntawm no yog tuaj ntes koj khi coj mus cob rau cov Filitees.” Xaxoos teb lawv hais tias, “Nej puas coglus rau kuv hais tias, nej yuav tsis tua kuv povtseg li?” Lawv teb hais tias, “Peb tsuas tuaj khi koj thiab coj koj mus cob rau lawv xwb. Peb tsis tua koj li.” Yog li ntawd, lawv thiaj muab tau ob txog hluas tshiab los khi Xaxoos thiab coj nws tawm hauv qhov tsua los. Thaum nws los txog hauv lub nroog Lehis, cov Filitees khiav nroo ntws tuaj ntsauv nws thiab qw ntshoo nrooj rau nws. Tamsim ntawd tus TSWV tus ntsujplig ua rau nws muaj zog heev, thiab nws nriaj ua rau ob txoj hlua uas khi nws ob txais cajnpab thiab ob txhais tes tu tas ib yam li hlawv tej xov. Nws txawm pom ib lub pobtxha puabtsaig neesluav uas tseem tshiab khiv, nws khaws nkaus los ntaus cov txivneej ntawd tuag lawm ib txhiab leej. Yog li ntawd, Xaxoos thiaj hu ib zaj nkauj hais tias, “Kuv muab lub pobtxha puabtsaig neesluav no ntaus tuag ib txhiab leej txivneej; Vim lub pobtxha puabtsaig neesluav no, kuv thiaj muab lawv pov ua tsheej pawg.” Dhau ntawd, nws txawm muab lub pobtxha puabtsaig povtseg lawm. Twb yog muaj tej no tshwmsim lawv thiaj tis npe rau qhov chaw ntawd hu ua Lamas Lehis. Xaxoos nqhis dej heev, nws thiaj thov tus TSWV hais tias, “Koj tau pub rau kuv muaj yeej loj kawg nkaus; kuv nqhis dej heev kuv yuav tuag thiab koj yuav cia cov Filitees uas tsis ntseeg koj ntes tau kuv los?” Vajtswv thiaj qhib plho ib lub qhov av khoob lug hauv lub nroog Lehis, thiab dej txhawv hauv lub qhov ntawd tuaj. Xaxoos haus cov dej ntawd ua rau nws rov muaj zog tuaj. Luag thiaj tis npe rau lub qhovdej ntawd hu ua Hakaules; niaj hnub no lub qhovdej ntawd tseem nyob hauv lub nroog Lehis. Lub sijhawm uas cov Filitees kav lub tebchaws ntawd, Xaxoos ua tus coj cov Yixalayees tau nees nkaum xyoo nkaus. Muaj ib hnub Xaxoos mus txog rau hauv cov Filitees lub nroog Nkaxas, nws ntsib ib tug niamntiav nyob hauv, ces nws mus nrog tus niamntiav ntawd pw. Muaj neeg mus qhia rau cov neeg hauv lub nroog Nkaxas hais tias, “Xaxoos tuaj rau hauv no lawm,” lawv thiaj mus vij qhov chaw ntawd thiab pw ntawm roojvag nroog zov ib hmos kaj ntug plaws. Lawv zov ib hmos ntsiag to, lawv xav hais tias, “Peb yuav tos txog thaum kaj ntug tso, peb mam ntes nws tua povtseg.” Tiamsis Xaxoos mus pw hauv txaj txog thaum ib tag hmo xwb. Ces nws sawv mus dawj lub roojvag nroog, ob tug ncej thiab tus ntsia liaj rooj, nws muab kwv loo rau saum xubpwg coj mus povtseg saum lub ncov roob uas saib ntsoov rau hauv lub nroog Henploos. Tom qab no muaj ib hnub, Xaxoos txawm nyiam ib tug hluas nkauj hu ua Delilas nyob hauv lub Hav Xaules. Cov Filitees cov thawjcoj mus cuag Delilas thiab hais rau nws hais tias, “Koj sim nug Xaxoos kom nws qhia rau koj saib yog vim li cas nws muaj zog ua luaj, thiab yuav ua li cas peb thiaj kovyeej nws, khi tau nws thiab ua kom nws tsis muaj zog. Yog koj nug tau, peb tuaj yeem muab ib leeg ib txhiab ib puas daim nyiaj rau koj.” Yog li ntawd, Delilas thiaj hais rau Xaxoos hais tias, “Thov koj qhia rau kuv saib yog ua li cas koj muaj zog ua luaj. Yog leejtwg xav khi koj thiab ua kom koj tsis muaj zog no, nws yuav ua li cas thiaj kovyeej koj?” Xaxoos teb hais tias, “Yog lawv muab xya txoj hlua hneevnti tshiab uas tseem tsis tau qhuav li coj los khi kuv, ces kuv tsuas muaj zog ib yam li sawvdaws lawm xwb.” Yog li ntawd, cov Filitees cov thawjcoj thiaj nqa tau xya txoj hlua hneevnti tshiab uas tseem tsis tau qhuav tuaj rau Delilas muab Xaxoos khi cia. Delilas twb kom ib co txivneej mus nyob ib chav tsev tos lawm, nws mam qw hais tias, “Xaxoos! Cov Filitees tuaj lawm!” Tiamsis Xaxoos nti ua rau cov hlua ntawd tu zom zaws ib yam li nplaim taws kub tej xov. Yog li ntawd, lawv tseem tsis tau paub hais tias yog vim li cas Xaxoos thiaj muaj zog npaum li ntawd. Delilas hais rau Xaxoos hais tias, “Saib maj, koj dag kuv thiab tsis qhia qhov tseeb rau kuv. Thov qhia tseeb rau kuv saib, luag yuav ua li cas thiaj khi tau koj.” Nws qhia rau Delilas hais tias, “Yog lawv muab tej hlua tshiab uas tsis tau siv los khi kuv, ces kuv tsuas muaj zog ib yam li lwm tus lawm xwb.” Delilas txawm muab ib co hlua tshiab los khi Xaxoos thiab qw hais tias, “Xaxoos! Cov Filitees tuaj lawm!” Cov txivneej yeej nyob rawv hauv ib chav tsev tos. Tiamsis Xaxoos nriaj tej hlua uas khi nws ob sab cajnpab tu ib yam li tej xov. Delilas hais rau Xaxoos hais tias, “Koj tseem dag kuv thiab tsis qhia qhov tseeb rau kuv txog tav no li. Qhia kuv saib, yuav ua li cas thiaj khi tau koj.” Nws hais rau Delilas hais tias, “Yog koj muab kuv xya qais plaubhau ntos thiab muab lub zuag npuaj kom ruaj ruaj rau ntawm lub nqos, ces kuv tsuas muaj zog ib yam li lwm tus lawm xwb.” Delilas txawm ntxias Xaxoos pw tsaug zaug, ces nws muab Xaxoos xya qais plaubhau ntos. Delilas muab lub zuag npuaj ruaj ruaj thiab qw hais tias, “Xaxoos! Cov Filitees tuaj lawm!” Tiamsis Xaxoos sawv tsees rub ua rau nws cov plaubhau plam plaws ntawm lub nqos los. Yog li ntawd, Delilas thiaj hais rau Xaxoos hais tias, “Vim li cas koj hais tias, ‘kuv hlub koj,’ tiamsis koj twb tsis muab siab npuab kuv li? Koj dag kuv peb zaug lawm, thiab koj tseem tsis tau qhia rau kuv paub hais tias yog dabtsi ua rau koj muaj zog ua luaj li ntawd.” Delilas niaj hnub nug Xaxoos li ntawd. Xaxoos dhuav thiab nkees mloog txog tej uas Delilas pheej txob nws, thaum kawg nws thiaj ua ib siab qhia qhov tseeb rau Delilas. Xaxoos hais tias, “Kuv cov plaubhau yeej ibtxwm tsis txiav, rau qhov kuv yog ib tug Naxis rau Vajtswv txij thaum yug tau kuv los lawm. Yog muab kuv cov plaubhau txiav, kuv lub zog yuav ntaug thiab kuv tsuas muaj zog ib yam li lwm tus lawm xwb.” Thaum Delilas paub hais tias, Xaxoos qhia qhov tseeb rau nws lawm, nws thiaj txib neeg mus hais rau cov Filitees cov thawjcoj tias, “Nej cia li rov tuaj. Nws twb qhia qhov tseeb rau kuv lawm.” Ces lawv txawm tuaj thiab nqa nyiaj tuaj. Delilas muab Xaxoos ntxias pw tsaug zog rau hauv nws xubntiag thiab hu ib tug txivneej los muab Xaxoos xya qais plaubhau txiav. Ces Delilas txawm tsimtxom Xaxoos, rau qhov Xaxoos tsis muaj zog lawm. Delilas qw hais tias, “Xaxoos! Cov Filitees tuaj lawm!” Xaxoos sawv tsees los, nws xav hais tias, “Ua li cas los kuv tseem yuav muaj zog thiab khiav dim.” Nws tsis paub hais tias tus TSWV twb tawm ntawm nws mus lawm. Cov Filitees thiaj ntes tau nws thiab muab nws ob lub qhovmuag kaus povtseg. Lawv cab nws mus rau hauv lub nroog Nkaxas, muab saw hlau khi nws, thiab yuam nws zom zeb hauv tsev lojcuj. Tiamsis nws cov plaubhau uas lawv muab txiav lawm ntev zuj zus rov tuaj. Cov neeg Filitees cov thawjcoj tuaj sib sau ua ke coj khoom tuaj fij ua kev zoo siab txi lawv tus vajtswv Dankoos. Lawv hu nkauj hais tias, “Peb tus vajtswv tau coj Xaxoos uas yog peb tus yeebncuab los cob rau peb tes lawm tiag lauj!” Thaum cov neeg sawvdaws pom Xaxoos, lawv hu nkauj qhuas lawv tus vajtswv hais tias, “Peb tus vajtswv coj peb tus yeebncuab los cob rau peb tes lawm, nws yog tus rhuav tshem peb lub tebchaws thiab tua peb cov neeg tuag ua tsheej pawg ntag.” Thaum lawv tuaj ua ke zoo siab, lawv hais tias, “Coj Xaxoos tawm los rau peb saib.” Ces lawv thiaj coj Xaxoos tawm hauv tsev lojcuj los rau sawvdaws saib. Xaxoos hais rau tus menyuam tub ua tuav nws tes los ntawd hais tias, “Koj coj kuv mus tuav cov ncej tse no. Rau qhov kuv xav pheeb cov ncej ntawd.” Lub tsev ntawd muaj pojniam thiab txivneej coob heev tuaj nyob puv nkaus. Cov Filitees cov thawjcoj puavleej tuaj nyob ntawd. Xam tagnrho pojniam thiab txivneej muaj kwvyees peb txhiab leej tuaj sawv txheej tsev saud saib Xaxoos. Ces Xaxoos thov hais tias, “Tus TSWV uas kav ib puas tsav yam, thov nco txog kuv lauj! Vajtswv, zaum no thov koj pub rau kuv rov muaj zog li qub ib zaug ntxiv, kom kuv pauj tau cov Filitees no. Kuv chim heev vim lawv muab kuv ob lub qhovmuag kaus povtseg lawm.” Yog li ntawd, Xaxoos thiaj tuav ob tug ncej hauv plawv uas txheem lub tsev ntawd. Nws muab ib sab tes tuav ib tug ncej, ces nws thawb ob tug ncej ntawd, thiab qw hais tias, “Cia kuv tuag nrog cov Filitees ua ke lauj!” Nws sib zog thawb tagnrho nws lub zog, lub tsev ntawd thiaj vau los ntaus cov thawjcoj thiab txhua tus uas nyob hauv lub tsev ntawd tuag tas huv tibsi. Thaum Xaxoos tuag nws tua cov Filitees tuag coob tshaj thaum nws tseem ua neej nyob. Nws cov kwvtij thiab nws tsevneeg tuaj kwv nws mus faus rau hauv nws txiv Manau-as lub qhov ntxa uas nyob ntawm lub nroog Xaulas thiab lub nroog Eta-aus ntu nruab nrab. Nws ua cov Yixalayees tus thawjcoj tau nees nkaum xyoo. Muaj ib tug txivneej npe hu ua Mikhas nyob pem laj roob Efalayees. Nws hais rau nws niam tias, “Koj ib txhiab ib puas daim nyiaj uas luag nyiag lawm, koj tau tsawm foom tsis zoo rau tus tubsab ntawd, nimno cov nyiaj nyob ntawm kuv. Kuv yog tus nyiag cov nyiaj ntawd ntag.” Nws niam hais tias, “Kuv tus metub, thov tus TSWV foom koob hmoov rau koj!” Nws muab cov nyiaj ntawd rov qab rau nws niam, nws niam hais tias, “Thov kom tej lus uas kuv foom tsis zoo poob ntawm kuv tus tub mus, kuv thov coglus muab cov nyiaj no fij rau tus TSWV. Yuav muab cov nyiaj no mus ua ob tug mlom, ib tug yog txaug thiab ib tug yog nchuav. Yog li ntawd, kuv yuav muab cov nyiaj no rov qab rau koj.” Yog li ntawd, nws thiaj muab cov nyiaj ntawd rov rau nws niam. Nws niam thiaj nqa ob puas daim nyiaj ntawd mus rau ib tug kws nchuav nyiaj; nws muab ua ob tug mlom, ib tug yog txaug thiab ib tug yog nchuav. Nqa mus txawb rau hauv Mikhas tsev. Tus Mikhas no muaj ib lub tsev teev mlom. Nws muaj ntau tus mlom thiab muaj ib tug efaus, nws tsa nws cov tub ib tug ua povthawj. Lub sijhawm ntawd cov Yixalayees tsis muaj vajntxwv kav lawv; txhua tus neeg nyias ua raws li nyias lub siab nyiam xwb. Lub sijhawm ntawd muaj ib tug tub hluas Levis nyob hauv lub nroog Npelehees hauv xeev Yudas. Nws tsiv tawm hauv lub nroog Npelehees mus nrhiav chaw nyob rau lwm qhov. Thaum nws tabtom taug kev mus, nws mus txog hauv Mikhas lub tsev uas nyob pem laj roob Efalayees. Mikhas nug tus tub hluas ntawd hais tias, “Koj tuaj qhov twg tuaj?” Nws teb hais tias, “Kuv yog ib tug tub hluas Levis, kuv nyob hauv lub nroog Npelehees xeev Yudas tuaj. Kuv tuaj nrhiav chaw nyob.” Mikhas teb hais tias, “Koj cia li nrog kuv nyob ua kuv txiv thiab ua kuv tus povthawj. Ib xyoo twg kuv muab kaum daim nyiaj, muab ris tsho thiab zaub mov rau koj.” Tus tub hluas Levis txaus siab nrog Mikhas nyob thiab ua zoo li nws yog Mikhas tus tub lawm ntag. Mikhas tsa nws ua Mikhas tus povthawj thiab nws nyob hauv Mikhas tsev. Mikhas hais tias, “Nimno kuv muaj ib tug Levis los ua kuv tus povthawj lawm, kuv paub hais tias tus TSWV yuav ua txhua yam zoo rau kuv.” Thaum lub sijhawm ntawd, cov Yixalayees tsis tau muaj vajntxwv. Thaum ntawd xeem Das tseem pheej mus nrhiav chaw rau lawv nyob, rau qhov lawv tsis tau muaj ib thaj av twg hauv haivneeg Yixalayees rau lawv nyob ua lawv tug li. Yog li ntawd, cov Das thiaj xaiv tau tsib tug txivneej uas siab tawv heev sawv cev ntawm txhua tsevneeg hauv xeem Das thiab tso lawv tawm hauv lub nroog Xaulas thiab Eta-aus mus ncig thiab soj lub tebchaws. Thaum lawv tuaj txog rau ntawm lub laj roob Efalayees, lawv mus so hauv Mikhas tsev. Thaum lawv mus so tau ntev loo rau hauv lawm, lawv nco tau tus tub hluas Levis lub suab hais lus, ces lawv txawm mus cuag nws thiab nug hais tias, “Koj tuaj ua dabtsi ntawm no? Leejtwg coj koj tuaj?” Nws teb hais tias, “Mikhas txib kuv ua ntau yam, nws ntiav kuv ua nws ib tug povthawj.” Lawv hais rau nws hais tias, “Thov koj pab thov Vajtswv saib txojkev uas peb mus ntawd puas yuav muaj kev vammeej rau peb.” Tus povthawj teb hais tias, “Nej tsis txhob nyuaj siab txog ib yam dabtsi li. Tus TSWV yuav tsomkwm nej thaum nej tabtom taug kev mus.” Yog li ntawd, tsib tug txivneej ntawd thiaj sawv kev mus rau hauv lub nroog La-isas lawm. Lawv mus pom cov neeg hauv muaj zoo vaj zoo tsev nyob kaj siab lug ib yam li cov neeg Xidaunias. Lawv nyob thajyeeb lug, lawv cov neeg nyob ntsiag to, tsis muaj kev sib cav sib ceg nrog leejtwg; lawv muaj txhua yam uas lawv xav tau. Lawv nyob deb heev ntawm lub nroog Xidaunias thiab lawv yeej tsis cog phoojywg nrog leejtwg li. Thaum tsib tug txivneej ntawd rov los txog rau hauv lub nroog Xaulas thiab Eta-aus, lawv cov kwvtij tuaj nug lawv zom zaws hais tias, “Nej puas pom dabtsi coj los piav qhia rau peb?” Lawv teb hais tias, “Nej cia li tuaj, peb yuav mus tua lub nroog La-isas. Peb mus pom tej av thiab lub nroog ntawd zoo kawg nkaus li. Tsis txhob ua ib yam dabtsi nyob ntawm no li lawm; maj ceev nrooj! Cia li mus thiab txeeb kom tau tagnrho lub nroog ntawd. Thaum nej mus txog ntawd lawm, nej yuav ntsib cov neeg uas nyob tsis ntshai dabtsi. Lub tebchaws ntawd loj heev; nyob hauv lub tebchaws ntawd muaj txhua yam uas neeg xav yuav xav tau. Vajtswv twb muab lub tebchaws ntawd cob rau nej lawm.” Yog li ntawd, xeem Das thiaj txhij tau rau puas leej tubrog thiab npaj cuabyeej ua rog tawm hauv lub nroog Xaulas thiab Eta-aus mus txeeb lub tebchaws ntawd. Lawv mus tsuam yeej rau ntawm lub nroog Kili-as Ye-alees sab hnubpoob hauv xeev Yudas. Twb yog vim li ntawd thiaj tseem muab qhov chaw ntawd hu ua Das lub Yeej los txog niaj hnub no. Lawv thiaj sawv kev qhov ntawd mus txog rau ntawm Mikhas lub tsev pem lub laj roob Efalayees. Ces tsib tug txivneej uas lawv twb xub mus soj lub tebchaws thiab ncig saib lub nroog La-isas lawm, thiaj hais rau lawv cov kwvtij hais tias, “Nej puas paub hauv lub tsev no muaj ob tug mlom nyiaj, ib tug yog txaug thiab ib tug yog nchuav? Nyob rau hauv tseem muaj lwm yam mlom thiab muaj ib tug mlom efaus. Nej sim xav saib peb yuav ua li cas?” Yog li ntawd, lawv thiaj mus rau hauv Mikhas tsev, yog lub tsev uas tus tub hluas Levis nyob, thiab nug tus tub hluas Levis saib nws puas noj qab nyob zoo. Thaum lub sijhawm ntawd, cov Das rau puas leej tubrog uas npaj rawv cuabyeej sib tua twb sawv nres nroos ntawm roojvag tos lawm. Ces tsib tug uas mus soj lub tebchaws ntawd, cia li ncaj nraim mus rau hauv tsev thiab muab kiag tus mlom ntoo uas vuam nyiaj, tej mlom hauv tsev thiab tus mlom efaus nqa tawm los, thaum uas tus povthawj tseem nrog rau puas leej txivneej uas nqa rawv cuabyeej ua rog sawv ntawm roojvag. Thaum cov txivneej ntawd mus hauv Mikhas tsev, lawv muab tus mlom ntoo, tus mlom efaus, thiab muab Mikhas tsevneeg tej mlom thiab tus mlom tooj nqa los. Ces tus povthawj nug lawv hais tias, “Nej ua dabtsi li ko?” Lawv hais rau nws hais tias, “Ua twjywm, tsis txhob hais lus! Koj cia li nrog peb mus ua peb tus povthawj thiab ua peb txiv. Koj ua povthawj rau ib tsev nyuag neeg tseem zoo dua li koj ua rau cov Yixalayees ib xeem thiab los?” Qhov no ua rau tus povthawj ntawd zoo siab heev, yog li ntawd, nws thiaj nqa tagnrho cov mlom nrog lawv mus lawm. Lawv tso lawv tej menyuam, tej tsiaj txhu thiab txhua yam mus ua lawv ntej. Lawv taug kev ntawm Mikhas tsev mus tau ntev loo, Mikhas mam li hu nws tej kwvtij zejzog mus caum lawv qab. Lawv mus caum cuag cov Das, thiab lawv qw ntsoog qees rau cov Das. Cov Das tig hlo los nug Mikhas hais tias, “Peb ua txhaum koj dabtsi? Koj yuav coj neeg coob ua luaj tuaj caum peb?” Mikhas teb hais tias, “Nej twb coj kuv tus povthawj thiab nyiag tej mlom uas kuv ua tas lawm los sav! Tshuav dabtsi thiaj tseem yog kuv li? Ua li cas nej tseem muaj cai nug kuv hais tias, peb ua txhaum koj dabtsi, koj yuav coj neeg coob ua luaj tuaj caum peb?” Cov Das hais rau Mikhas hais tias, “Zoo dua li koj tsis txhob hais ib lo lus ua rau peb chim, nyob tsam cov neeg no tig los tua koj. Ces koj thiab koj tsevneeg yuav tuag tas.” Ces cov Das txawm mus lawm. Mikhas pom lawv yeej muaj zog tshaj nws, nws thiaj ua ib siab rov los tsev lawm. Lawv coj txhua yam uas Mikhas ua, thiab nws tus povthawj nrog lawv mus tua cov neeg uas nyob thajyeeb lug thiab tsis ntshai dabtsi hauv lub nroog La-isas. Lawv muab ntaj tua cov neeg tuag tas thiab muab tej vajtse hlawv huv tibsi povtseg. Tsis muaj leejtwg tuaj pab lawv, vim lawv nyob nrug deb ntawm lub nroog Xidoos, thiab lawv tsis nrog leejtwg cog phoojywg li. Lub nroog La-isas nyob hauv lub hav uas ze lub nroog Npelehaus. Lawv thiaj muab lub nroog La-isas hloov dua npe hu ua Das, raws li lawv yawgkoob Das uas yog Yakhauj tus tub lub npe. Cov Das muab cov mlom ntawd mus teeb rau lawv pe, lawv tsa Nkesoos tus tub Yaunathas uas yog Mauxes tus xeebntxwv ua lawv tus povthawj, thiab Yaunathas cov xeebntxwv puavleej tau ua lawv cov povthawj mus txog thaum uas lawv raug luag ntes coj mus lawm. Cov Das pe cov mlom uas Mikhas ua ntawd, txij thaum lub Tsevntaub uas yog qhov chaw pehawm Vajtswv tseem nyob hauv lub nroog Silaus. Ua ntej cov Yixalayees muaj vajntxwv, muaj ib tug neeg Levis nyob pem lub laj roob Efalayees uas nyob nrug deb rau ib qho. Nws tuaj yuav tau ib tug hluas nkauj hauv lub nroog Npelehees xeev Yudas ua nws tus niamyau. Tiamsis tus niamyau ntawd tsis txaus siab rau nws tus txiv, nws thiaj khiav rov qab mus rau nram nws txiv tsev hauv lub nroog Npelehees, thiab nyob nrad tau plaub hlis. Ces tus txiv raws qab mus thiab thov kom nws rov los nrog tus txiv nyob. Tus txiv coj nws tus qhev thiab cab ob tug neesluav nrog nws mus. Nws tus niamyau txawm coj nws mus hauv leej txiv tsev, thaum leej txiv pom tus Levis, nws los puag nkaus thiab zoo siab heev. Ces nws yawmtxiv cheem kom nws nyob, nws thiaj nrog yawmtxiv nyob tau peb hnub, noj haus thiab pw hauv yawmtxiv tsev. Hnub plaub lawv txawm sawv ntxov los npaj thiab yuav rov los tsev. Tiamsis yawmtxiv cheem nws tus vauv hais tias, “Ua tshais siav rau nej noj tso nej mam li mus.” Yog li ntawd, yawmtxiv thiab tus vauv rov zaum noj haus ua ke dua. Ces yawmtxiv hais rau tus vauv hais tias, “Rov pw ib hmos ntxiv kom peb zoo siab tso.” Tus Levis yuav sawv kev mus, tiamsis yawmtxiv cheem nws heev kom nyob xwb, yog li ntawd, nws thiaj pw ib hmos ntxiv. Hnub tsib thaum sawv ntxov nws txawm sawv kev mus, tiamsis yawmtxiv hais tias, “Tos noj tshais tas tso mam li mus.” Nkawd thiaj tos txog thaum hnub qaij. Yawmtxiv thiab tus vauv rov mus noj mov ua ke. Thaum tus txivneej ntawd, nws tus niamyau thiab tus qhev rov sawv kev dua, yawmtxiv txawm hais tias, “Nej saib, hnub twb yuav poob qho; nej yuav tsum tau rov nyob ib hmos ntxiv thiab tso. Twb yuav tsaus ntuj tamsim no ntag; nyob kom zoo siab. Tagkis nej mam li sawv ntxov mus.” Tiamsis tus Levis tsis kam nyob lawm, nws thiaj sawv kev coj nws tus niamyau, ob tug neesluav thiab tus qhev mus rau tom lub zos Yenpus (uas yog lub nroog Yeluxalees). Thaum lawv los txog ze rau ntawm Yenpus, lub hnub twb yuav luag poob qho, tus qhev hais rau nws tus tswv hais tias, “Yuav ua li cas, twb yuav tsaus ntuj ces peb so ib hmos hauv cov Yenpus lub nroog tagkis peb mam mus.” Tus tswv teb hais tias, “Cov neeg ntawd tsis yog Yixalayees, peb tsis pw hauv lawv lub nroog. Peb mus kom txog tom lub nroog Nkinpe-as tso, peb mam li so tod.” Nws hais ntxiv hais tias, “Peb mus ceev nrooj kom txog lub nroog Nkinpe-as lossis Lamas tso, peb mam li pw ib hmos tom ob lub nroog ntawd ib lub.” Yog li ntawd, lawv thiaj dhau lub nroog Yenpus los txog rau hauv lub nroog Nkinpe-as uas yog xeem Npeenyamees cheebtsam av, hnub tabtom poob qho kiag. Lawv thiaj ncaim kev mus nrhiav chaw pw rau hauv lub nroog ntawd. Lawv mus zaum ntawm ib qhov chaw hauv plawv nroog, tiamsis tsis muaj leejtwg tuaj coj lawv mus tsev li. Lawv nyob qhov ntawd tau ntev loo, muaj ib tug txivneej laus mus ua teb los, thaum ntawd lub hnub twb poob qho lawm. Nws yeej ibtxwm yog neeg nyob pem lub laj roob Efalayees, tiamsis nimno nws los nyob nram lub nroog Nkinpe-as lawm. (Cov neeg uas nyob hauv lub nroog ntawd yog xeem Npeenyamees.) Tus yawg laus ntawd pom cov neeg taug kev uas los so ntawm plawv nroog thiab nws nug hais tias, “Nej tuaj qhov twg tuaj? Nej yuav mus qhov twg?” Tus Levis teb hais tias, “Peb mus nram lub nroog Npelehees hauv xeev Yudas los, thiab peb yuav rov los mus tsev rau pem lub laj roob Efalayees, txawm yog peb muaj quavnyab rau peb cov neesluav noj, thiab muaj ncuav, muaj cawv txiv hmab rau kuv, kuv tus niamyau thiab kuv tus qhev noj. Txhua yam peb puavleej muaj txhij los yeej tsis muaj leejtwg coj peb mus nrhiav chaw so li.” Tus yawg laus ntawd hais tias, “Nej cia li mus so hauv kuv tsev! Kuv yuav nrhiav chaw rau nej; nej tsis txhob pw ntawm tshavpuam no.” Yog li ntawd, nws thiaj coj lawv mus hauv nws tsev thiab muab zaub rau lawv cov neesluav noj. Nws muab dej rau lawv ntxuav kotaw thiab rau hmo rau lawv noj. Thaum lawv so los siav lawm, muaj ib pab neeg phem ua nkauj ua nraug hauv lub nroog ntawd txawm tuaj vij lub tsev thiab tsoo qhovrooj. Lawv hais rau tus yawg laus hais tias, “Cia li coj tus txivneej uas koj coj los tsev lawm tuaj rau peb! Peb xav deev nws heev!” Tiamsis tus yawg laus tawm mus sab nraud thiab hais tias, “Kuv cov phoojywg! Thov lauj! Nej tsis txhob ua tej kev phem kev qias, kev tsis ncaj tsis ncees li no! Tus txivneej no yog kuv tus qhua. Nej saib, tus no yog nws tus niamyau thiab kuv tus ntxhais nkaujxwb. Kuv yuav coj nkawd tuaj tamsim no, nej cia li coj nkawd mus thiab ua rau nkawd raws li nej siab nyiam. Tiamsis thov tsis txhob ua phem rau tus txivneej no!” Tiamsis cov txivneej ntawd tsis mloog tus yawg laus hais li. Yog li ntawd, tus Levis thiaj thawb ntiag nws tus niamyau rau sab nraud rau lawv. Lawv mos ntho nws thiab muab nws yuam ib hmos kaj ntug plaws mam li tso nws los. Thaum kaj ntug txoog tus pojniam thiaj los ntog rau ntawm tus yawg laus lub qhovrooj, lub tsev uas nws tus txiv so. Nws pw nraum qhovrooj mus txog thaum hnubtuaj. Nws tus txiv sawv ntxov los, thiab thaum nws qhib qhovrooj yuav mus tsev, nws pom nws tus niamyau pw xyab luas ntawm qhovrooj, ob txhais tes ncav mus rau ntawm lub qhovrooj. Nws thiaj hais tias, “Cia li sawv, peb yuav mus tsev.” Tiamsis tsis hnov teb li. Yog li ntawd, nws thiaj puag hlo tus pojniam rau saum tus neesluav nraubqaum thiab mus tsev lawm. Thaum nws los txog tsev, nws muab riam txiav nws tus niamyau lub cev ua kaum ob thooj, thiab muab xa mus rau kaum ob xeem Yixalayees ib xeem ib thooj. Txhua tus uas pom thooj nqaij ntawd puavleej hais tias, “Peb ibtxwm tsis tau pom dua ib zaug li no. Txij thaum peb tsiv nram tebchaws Iziv los, tsis tau muaj tej xwmtxheej phem li no tshwmsim rau peb haivneeg li. Peb yuav tsum tau mob siab txog zaj no! Thiab sablaj saib peb yuav ua li cas.” Tagnrho cov Yixalayees uas nyob pem lub nroog Das sab qaumteb thoob plaws mus txog nram lub nroog Npesenpas sab qabteb, thoob plaws los rau hauv cheebtsam Nkile-as uas nyob sab hnubtuaj, puavleej teb lo lus nqua hu ntawd. Lawv tuaj txoos ua ke koom ua ib lub siab tabmeeg tus TSWV hauv qhov chaw sib ntsib ntawm lub nroog Mixepas. Txhua xeem Yixalayees cov thawjcoj puavleej tuaj koom nrog Vajtswv haivneeg. Muaj plaub puas txhiab tus tubrog uas nqa rawv cuabyeej ua rog tuaj nyob qhov ntawd. Thaum uas cov Npeenyamees hnov hais tias, tagnrho cov Yixalayees tuaj sib sau rau hauv lub nroog Mixepas lawm. Ces cov Yixalayees nug hais tias, “Qhia rau peb saib yog ua li cas thiaj muaj txojkev phem kev qias li no?” Tus Levis uas tus niamyau raug tua ntawd teb hais tias, “Thaum kuv tus niamyau thiab kuv los txog nram lub nroog Nkinpe-as hauv cov Npeenyamees cheebtsam av, wb los pw ib hmos nrad. Hmo ntawd cov txivneej uas nyob hauv lub nroog Nkinpe-as txawm tuaj vij tsev ntes kuv. Lawv npaj siab xav tua kuv povtseg; tiamsis lawv txawm mos ntho kuv tus niamyau coj mus yuam thiab ua rau nws tuag li lawm. Kuv thiaj coj nws lub cev los txiav ua tej thooj li no, thiab muab xa mus thoob plaws cov Yixalayees kaum ob xeem, ib xeem ib thooj. Cov neeg no tau ua phem ua qias thiab ua tsis ncaj rhuav peb ntsejmuag kawg li. Tagnrho nej cov uas nyob ntawm no puavleej yog neeg Yixalayees. Saib peb yuav ua li cas rau zaj no?” Tagnrho cov pejxeem thiaj sawv tsees thiab hais tias, “Tsis pub peb ib tug twg uas nyob hauv tsevntaub lossis nyob hauv tsev, mus tsev li. Peb yuav tsum ua li no: peb cia li rho ntawv thiab xaiv ib pab neeg mus tua lub nroog Nkinpe-as. Muab cov Yixalayees rho kaum leej tawm ntawm ib puas leej, ib puas leej tawm ntawm ib txhiab leej, ib txhiab leej tawm ntawm kaum txhiab leej ua cov muab zaub mov rau cov tubrog noj, thiab dua li lwm cov cia mus rau txim rau cov neeg hauv lub nroog Nkinpe-as txojkev ua tsis ncaj uas lawv tau ua txhaum rau haivneeg Yixalayees no.” Yog li ntawd, tagnrho cov Yixalayees cov txivneej thiaj tuaj sib sau koom ua ib lub siab mus tua lub nroog Nkinpe-as. Txhua xeem Yixalayees puavleej txib neeg xa xov mus thoob plaws xeem Npeenyamees hais tias, “Vim li cas nej yuav ua phem ua qias li no? Nimno nej cia li muab cov niag neeg phem uas nyob hauv lub nroog Nkinpe-as cob rau peb tes, peb yuav muab lawv tua povtseg kom tas thiaj li tshem tau txojkev phem kev qias no tawm hauv haivneeg Yixalayees mus.” Tiamsis cov Npeenyamees tsis quavntsej mloog cov Yixalayees hais li. Tagnrho cov Npeenyamees uas nyob txhua lub nroog txawm tuaj sib sau rau hauv Nkinpe-as tua cov Yixalayees. Hnub ntawd cov Npeenyamees txawm txhij tau nees nkaum rau txhiab tus tubrog uas txawj tua ntaj hauv lawv tej nroog tuaj, ntxiv rau xya pua tus tubrog uas lawv xaiv tshwjxeeb hauv lub nroog Nkinpe-as. Tagnrho cov tubrog xya puas leej uas lawv xaiv tshwjxeeb ntawd, xis sab laug xwb, thiab txhua tus puavleej txawj ntaus zes hlua ncaj kawg li, txawm yog tsom ntsoov rau ib txog plaubhau xwb los yeej raug li. Cov Yixalayees tej tubrog uas txeev tua rog los lawm muaj plaub puas txhiab leej; tsis suav cov Npeenyamees. Cov Yixalayees mus rau hauv lub chaw pehawm Vajtswv hauv lub nroog Npethees, thiab nug Vajtswv hais tias, “Peb yuav cia xeem twg ua ntej mus tua cov Npeenyamees?” Tus TSWV teb hais tias, “Cia xeem Yudas mus ua ntej.” Yog li ntawd, tagkis sawv ntxov cov Yixalayees txawm mus tsuam yeej ze rau ntawm lub nroog Nkinpe-as. Cov Yixalayees thiaj mus tua cov Npeenyamees, thiab coj cov tubrog mus nyob tagnrho rau tej chaw uas yuav sib tua ntawm lub nroog Nkinpe-as. Thaum hnub tseem tsis tau poob qho, cov tubrog Npeenyamees tawm hauv nroog tuaj tua cov tubrog Yixalayees tuag lawm nees nkaum ob txhiab leej. Hnub ob cov Yixalayees rov mus tua cov Npeenyamees dua. Hnub ob cov tubrog Npeenyamees rov tawm hauv lub nroog Nkinpe-as tuaj tua cov Yixalayees, zaum no lawv tua cov tubrog Yixalayees uas txeev tua rog los lawm tuag kaum yim txhiab leej. Ces cov tubrog Yixalayees rov mus rau pem lub nroog Npethees, thiab quaj rau tus TSWV dua. Lawv mus zaum hauv qhov chaw uas nrog tus TSWV sib ntsib thiab yoo mov mus txog thaum tsaus ntuj. Lawv muab tsiaj tua hlawv fij thiab fij khoom ua kev sib raug zoo rau tus TSWV. Yog li ntawd, cov Yixalayees thiaj tso ib cov tubrog mus nkaum puagncig lub nroog Nkinpe-as. Ces hnub peb cov Yixalayees rov mus tua cov Npeenyamees thiab lawv cov tubrog mus nyob rau ntawm lawv tej chaw sib tua hauv lub nroog Nkinpe-as ib yam li ob zaug tas los lawm. Cov Npeenyamees txawm tawm tuaj tua thiab raug ntxias coj mus deb ntawm lub nroog. Lawv txawm pib tua cov Yixalayees ib yam li lawv tua thawj ob zaug. Nyob tom tiaj nrag thiab ntawm ob txojkev tshuam; ib txoj mus rau hauv lub nroog Npethees thiab ib txoj mus rau hauv lub nroog Nkinpe-as. Lawv tua cov Yixalayees tuag peb caug leej. Cov Npeenyamees hais tias, “Peb yuav tua yeej lawv ib yam li thawj ob zaug tas los lawm thiab.” Tiamsis cov Yixalayees tuav tswvyim ntxias thiab coj cov Npeenyamees mus kom nrug deb lub nroog tso. Yog li ntawd, thaum cov tubrog Yixalayees ua txuj khiav rov qab thiab mus sib sau rau pem Npa-atamas, ces tamsim ntawd cov tubrog dhia tawm hauv lawv tej chaw nkaum ntawm lub nroog Nkinpe-as sab hnubpoob los. Ces kaum txhiab leej txivneej uas xaiv tshwjxeeb ntawm cov Yixalayees, thiaj mus tua lub nroog Nkinpe-as, thiab lawv sib tua hnyav kawg li. Cov Npeenyamees tsis paub hais tias, lawv yuav raug kev puastsuaj loj npaum li ntawd. Tus TSWV pub cov Yixalayees tua yeej cov Npeenyamees. Hnub ntawd cov Yixalayees tua lawv cov yeebncuab tuag nees nkaum tsib txhiab ib puas leej, cov Npeenyamees thiaj paub hais tias, lawv swb cov Yixalayees lawm. Cov tubrog Yixalayees uas ua txuj swb cov Npeenyamees rov qab ntawd, twb yog lawv cia siab rau cov uas lawv tso mus nkaum ibncig lub nroog Nkinpe-as. Cov txivneej ntawd dhia ceev nrooj mus rau hauv lub nroog Nkinpe-as; lawv sib faib mus thoob plaws lub nroog thiab tua txhua tus uas nyob hauv tuag tas huv tibsi. Pab tubrog Yixalayees thiab cov txivneej uas nkaum ntawm ntug nroog sib tham kom muab tej yam dabtsi hlawv kom muaj pa ncho rau saum nruab ntug. Thiab thaum cov Yixalayees uas ua txuj khiav tawm hauv tshavrog los pom cov pa ncho nto ntuj plaws hauv lub nroog tuaj, ces lawv tig rov qab tiv tua. Thaum ntawd cov Npeenyamees twb tua cov Yixalayees tuag peb caug leej lawm. Lawv rov sib tham hais tias, “Yog tiag, cov Yixalayees swb peb ib yam li thawj ob zaug tas lawm.” Tiamsis thaum pa taws pib ncho loj zuj zus tshwm tom nroog tuaj, cov Npeenyamees tig saib pom pa taws ncho auv niab nto ntuj plaws, ua rau lawv xav tsis thoob li. Ces cov Yixalayees tig tua cov Npeenyamees, thiab cov Npeenyamees poob siab loj heev rau qhov lawv paub hais tias, zaum no lawv raug kev puastsuaj lawm. Lawv thiaj tig khiav cov Yixalayees taug kev mus rau tom tiaj suabpuam, tiamsis lawv khiav tsis dim li. Lawv tabtom mus raug pab tubrog uas coob tshaj thiab cov txivneej uas rov hauv lub nroog los ntes thiab muab tua tuag tas xwb. Cov Yixalayees mus tos cov yeebncuab kev, thiab caum cov yeebncuab tsis so li mus txog ntua ntawm lub nroog Nkinpe-as sab hnubtuaj. Kaum yim txhiab leej tubrog Npeenyamees uas siab tawv heev raug tua tuag tas huv tibsi. Dua li lwm pab, khiav mus rau tom tiaj nrag mus txog ntawm lub Pobzeb Lee-moos. Muaj tsib txhiab leej raug tua tuag tas rau ntawm tej tog kev. Cov Yixalayees tseem caum cov Npeenyamees uas seem mus txog rau hauv lub nroog Nkidoos, thiab tua cov Npeenyamees tuag ob txhiab leej. Tagnrho cov Npeenyamees uas raug tua tuag hnub ntawd muaj nees nkaum tsib txhiab leej. Lawv cov ntawd puavleej yog cov tubrog uas siab tawv heev xwb. Tiamsis cov txivneej rau pua leej uas khiav mus rau ntawm lub tiaj nrag tom lub Pobzeb Lee-moos thiaj li dim, thiab lawv nkaum tau plaub hlis tod. Cov Yixalayees rov qab mus muab cov Npeenyamees uas seem tua tuag tas huv tibsi, tsis hais txivneej, pojniam menyuam thiab tsiaj txhu. Cov Yixalayees muab txhua lub zos uas nyob cheebtsam ntawd hlawv kub hnyiab tas dulug. Thaum cov Yixalayees mus sib sau ua ke rau hauv lub nroog Mixepas, lawv tau coglus rau tus TSWV hais tias: “Peb cov Yixalayees yuav tsis muab peb tej ntxhais qua rau cov Npeenyamees ua pojniam li.” Yog li ntawd, cov Yixalayees thiaj mus rau hauv lub nroog Npethees thiab mus zaum ntawm qhov chaw uas nrog Vajtswv sib ntsib mus txog thaum tsaus ntuj. Lawv quaj nyiav iab siab heev hais tias: “Tus TSWV uas yog cov Yixalayees tus Vajtswv, vim li cas yuav muaj tej xwmtxheej no? Vim li cas xeem Npeenyamees cia li tu noob hauv haivneeg Yixalayees mus lawm?” Tagkis kaj ntug txoog cov pejxeem sawv ntxov mus teeb tau ib lub thaj rau hauv lub nroog ntawd. Lawv muab tsiaj tua hlawv fij thiab fij khoom ua kev sib raug zoo rau tus TSWV. Lawv txawm nug hais tias, “Yog li ntawd, peb cov Yixalayees puas muaj xeem twg uas tsis tau mus nrog sawvdaws koom ua ke rau ntawm qhov chaw uas nrog tus TSWV sib ntsib hauv lub nroog Mixepas?” (Lawv twb tau coglus tseg lawm hais tias, yog leejtwg tseem tsis mus koom ua ke rau hauv lub nroog Mixepas, yuav tsum muab tus ntawd tua povtseg.) Cov Yixalayees tu siab heev vim tej uas lawv tau ua rau lawv cov kwvtij Npeenyamees. Lawv thiaj hais tias, “Hnub no cov Yixalayees ib xeem tu noob lawm. Peb yuav ua li cas thiaj nrhiav tau pojniam rau cov txivneej Npeenyamees uas seem ntawd? Rau qhov peb tau coglus rau tus TSWV lawm hais tias, peb yuav tsis muab peb tej ntxhais qua rau lawv ua pojniam.” Ces lawv sib nug hais tias, cov Yixalayees xeem twg thiaj tsis tau mus pehawm tus TSWV hauv lub nroog Mixepas? Sawvdaws pom cov uas nyob hauv lub nroog Yanpes hauv Nkinpe-as yeej tsis muaj ib pab twg tuaj rau hauv lub yeej ntawd li; thaum lawv hu cov tubrog los txheeb saib pab twg tuaj qhov twg tuaj, mas tsis pom cov uas nyob hauv lub nroog Yanpes tuaj ntawd li. Yog li ntawd, cov pejxeem uas tuaj sib sau, thiaj tso tau kaum txhiab tus txivneej uas siab tawv heev thiab samhwm rau lawv hais tias, “Nej cia li mus muab txhua tus neeg uas nyob hauv lub nroog Yanpes tua kom tuag tas, lojxov tej pojniam thiab menyuam tsis pub seem ib tug li. Txhua tus txivneej, thiab txhua tus pojniam uas tsis yog ntxhais nkaujxwb muab tua povtseg huv tibsi.” Lawv thiaj coj tau plaub puas tus ntxhais nkaujxwb hauv lub nroog Yanpes los, thiab coj cov ntxhais ntawd los nyob hauv lub yeej ntawm lub nroog Silaus uas nyob hauv tebchaws Kana-as. Ces cov Yixalayees uas tuaj txoos ua ke ntawd thiaj tso neeg mus hais rau cov Npeenyamees uas nkaum ntawm lub Pobzeb Lee-moos hais tias tsis muaj kev sib tua lawm. Cov Npeenyamees ntawd thiaj rov los, thiab cov Yixalayees thiaj muab cov ntxhais uas lawv coj hauv lub nroog Yanpes los rau cov Npeenyamees yuav ua pojniam. Tiamsis cov ntxhais ntawd tsis txhua lawv thiab. Cov Yixalayees nyuaj siab heev rau cov Npeenyamees, vim tus TSWV muab lawv cais tawm ntawm txhua xeem Yixalayees lawm. Yog li ntawd, cov thawjcoj uas tuaj sib sau ua ke ntawd thiaj hais tias, “Xeem Npeenyamees yeej tsis tshuav ib tug pojniam seem li lawm. Peb yuav ua li cas thiaj nrhiav tau pojniam rau cov txivneej uas seem ntawd yuav? Peb yuav tau nrhiav kev rau xeem Npeenyamees uas seem ntawd, kom cov Yixalayees kaum ob xeem thiaj tsis muaj ib xeem twg tu cajces. Peb tsis muab peb tej ntxhais qua rau lawv yuav, vim peb tau foom tsis zoo rau txhua tus uas muab ntxhais qua rau cov Npeenyamees yuav lawm.” Ces lawv txawm sib tham hais tias, “Twb yuav txog caij uas peb ua kevcai txwm xyoo ua tus TSWV tsaug nyob hauv lub nroog Silaus.” (Lub nroog Silaus nyob ntawm lub nroog Npethees sab qaumteb, thiab ntawm lub nroog Lenpaunas sab qabteb, thiab nyob sab hnubtuaj ntawm txojkev uas mus rau hauv lub nroog Npethees thiab lub nroog Sekhees.) Lawv thiaj hais rau cov Npeenyamees hais tias, “Nej cia li mus nkaum rau tom tej vaj txiv hmab thiab saib ntsoov, thaum twg cov hluas nkauj hauv lub nroog Silaus tawm tuaj seevcev ua kevcai, nej cia li tawm hauv vaj txiv hmab los. Ib leeg ntes ib tug hluas nkauj thiab coj nrog nej mus rau hauv xeem Npeenyamees cheebtsam av. Thaum lawv txiv lossis lawv tej nus tuaj yws rau peb, peb mam hais rau lawv hais tias, ‘Thov nej cia rau lawv yuav, rau qhov thaum uas tabtom sib tua peb tsis tau ntes pojniam rau lawv. Nej yeej tsis txhaum, rau qhov tsis yog nej txhob txwm qua nej tej ntxhais rau lawv.’ ” Ces cov Npeenyamees txawm ua li ntawd; lawv ib leeg thiaj xaiv ib tug pojniam ntawm cov hluas nkauj uas tuaj seevcev hauv lub nroog Silaus thiab coj khiav lawm. Ces lawv rov qab mus rau hauv lawv cheebtsam av, thiab rov mus txhim kho lawv tej qub nroog rau lawv nyob. Lub sijhawm ntawd, cov Yixalayees txawm ncaim qhov chaw ntawd, nyias rov mus nrog nyias xeem, nyias tsevneeg nyob thiab rov mus rau hauv nyias cheebtsam av lawm. Lub sijhawm ntawd, cov Yixalayees tseem tsis tau muaj vajntxwv. Lawv txhua tus nyias ua raws li nyias lub siab nyiam xwb. Elimelej txawm tuag lawm, tseg Na-aumis nrog nws ob tug tub nyob, nkawd thiaj mus yuav tau cov neeg Mau-am ob tug ntxhais uas yog Aulepas thiab Luv los ua pojniam. Thiab lawv nyob hauv lub tebchaws ntawd kwvlam li kaum xyoo tom qab. Maloos thiab Khili-oos nkawd txawm tuag huv tibsi lawm, tseg Na-aumis nyob ib leeg tsis muaj txiv thiab tsis muaj tub li. Tau tsis ntev los tom qab no, Na-aumis hnov hais tias tus TSWV tau foom koob hmoov rau nws haivneeg, lawv rov ua tau qoobloo; yog li ntawd nws thiaj coj nws ob tug nyab sawv kev tawm hauv tebchaws Mau-am rov qab los. Lawv pib sawv kev ua ke rov qab los rau pem tebchaws Yudas, tiamsis thaum lawv los txog ib tog kev Na-aumis hais rau nws ob tug nyab hais tias, “Neb cia li rov qab mus nrog neb niam nyob. Thov tus TSWV ua zoo rau neb ib yam li neb tau ua zoo rau kuv thiab kuv ob tug tub uas tuag lawm. Thiab thov tus TSWV pub kom neb rov tau txiv yuav thiab nyob muaj vaj muaj tsev dua ntxiv.” Yog li ntawd, Na-aumis thiaj nwj nws ob tug nyab thiab yuav ncaim mus. Tiamsis nkawd txawm tsa suab hlo quaj thiab hais rau nws hais tias, “Wb tsis mus! Wb yuav nrog koj mus rau pem koj cov kwvtij!” Na-aumis teb hais tias, “Kuv ob tug nyab, neb yuav tsum rov qab mus tsev xwb. Vim li cas neb thiaj xav nrog kuv mus? Neb xav hais tias kuv tseem yuav muaj dua tub los yuav neb thiab no los? Neb cia li rov qab mus tsev, rau qhov kuv laus thiab yuav tsis taus txiv ntxiv lawm. Txawm yog kuv tseem muaj kev cia siab thiab mus yuav txiv hmo no thiab muaj kiag ob tug tub los neb puas yuav tos taus txog thaum nkawd hlob? Saib qhov no puas ua rau neb nyob taus tsis mus yuav lwm tus? Kuv ob tug nyab, neb tsis txhob ua li ntawd, neb yeej paub hais tias yuav ua tsis tau li ntawd ib zaug li. Tus TSWV tau tso kuv tseg lawm, thiab kuv hlub neb heev, kuv tsis xav hais tias neb lub neej yuav zoo li no.” Nkawd rov quaj dua ib zaug ntxiv. Ces Aulepas txawm nwj nws niampog thiab ncaim rov qab mus tsev lawm, tiamsis Luv tseem tuav rawv nws niampog tsis tso li. Yog li ntawd, Na-aumis thiaj hais rau Luv hais tias, “Luv, Aulepas twb rov qab mus nrog nws haivneeg thiab nws tus vajtswv nyob lawm. Koj cia li nrog nws rov qab mus thiab.” Tiamsis Luv teb hais tias, “Tsis txhob txwv kuv! Cia kuv nrog koj mus. Koj mus qhov twg, kuv yeej yuav nrog koj mus qhov ntawd; koj nyob qhov twg, kuv yuav nrog koj nyob qhov ntawd. Koj haivneeg yuav yog kuv haivneeg thiab koj tus Vajtswv yuav yog kuv tus Vajtswv. Koj tuag rau qhov twg, kuv yuav tuag qhov ntawd, thiab cia luag muab kuv faus nrog koj rau qhov ntawd. Tsuas yog txojkev tuag thiaj yuav ua rau kuv ncaim ntawm koj xwb, yog kuv cia ib yam dabtsi ua rau kuv ncaim koj mus, thov kom tus TSWV rau txim rau kuv!” Thaum Na-aumis pom hais tias, Luv muaj pluaj siab nrog nws mus tiag, nws txawm tsis hais dabtsi ntxiv li lawm. Nkawd txawm ua ke los txog rau hauv lub nroog Npelehees. Thaum nkawd los txog hauv lub nroog, tej neeg zoo siab kawg, thiab tej pojniam sib nug zom zaws hais tias, “Tus no puas yog Na-aumis?” Nws teb hais tias, “Nej tsis txhob hu kuv ua Na-aumis lawm, nej hu kuv ua Malas xwb, rau qhov Vajtswv tus uas muaj Hwjchim loj kawg nkaus tau ua rau kuv lub neej raug kev txomnyem lwj siab kawg li. Thaum kuv tawm hauv no mus, kuv muaj txhua yam nplua mias, tiamsis tus TSWV coj kuv rov los tes dawb tes npliag. Vim li cas nej tseem hu kuv ua Na-aumis, thaum tus TSWV uas muaj Hwjchim loj kawg nkaus rau txim thiab tso kev txomnyem los rau kuv?” Zaj no yog hais txog Na-aumis thiab Luv uas yog nws tus nyab uas yog neeg Mau-am, rov nram tebchaws Mau-am los. Thaum nkawd los txog hauv lub nroog Npelehees tabtom yog lub caij uas pib hlais nplej. Na-aumis muaj ib tug kwvtij npe hu ua Npau-am uas yog ib tug neeg npluanuj thiab sawvdaws hwm, nws yog Na-aumis tus txiv Elimelej tsevneeg. Muaj ib hnub Luv hais rau Na-aumis hais tias, “Thov koj cia kuv mus nram luag tej teb thiab mus khaws tej nplej uas cov neeg hlais nplej ua poob. Kuv cia siab hais tias kuv yuav mus ntsib tus uas kam cia kuv khaws nws tej nplej.” Na-aumis teb hais tias, “Me nyab, koj mus los tau.” Yog li ntawd, Luv thiaj mus nram teb thiab raws cov neeg hlais nplej qab, khaws tej hnab nplej uas cov hlais ua poob. Nws txawm mus ncaj rau hauv Npau-am uas yog Elimelej tus kwvtij thaj teb. Tom qab ntawd Npau-am txawm tuaj hauv Npelehees tuaj txog thiab hais rau cov neeg hlais nplej hais tias, “Thov tus TSWV nrog nraim nej nyob.” Lawv teb hais tias, “Thov tus TSWV foom koob hmoov rau koj.” Npau-am nug tus uas saib cov neeg hlais nplej ntawd hais tias, “Tus pojniam hluas ntawd yog leejtwg?” Tus txivneej ntawd teb hais tias, “Tus pojniam ntawd yog neeg txawv tebchaws, nws nrog Na-aumis los nram tebchaws Mau-am los. Nws tuaj thov kuv cia nws raws cov neeg hlais nplej qab thiab khaws tej hnab nplej uas poob. Nws twb tuaj ua haujlwm puag tagkis no sawv ntxov los lawm, nws nyuam quav los so ib pliag hauv tsev pheebsuab no xwb.” Npau-am hais rau Luv hais tias, “Tus ntxhais koj mloog kuv hais, koj tsis txhob mus khaws nplej hauv lwm tus thaj teb, koj cia li khaws raws kuv cov ntxhais qhev qab nyob hauv kuv thaj teb no xwb; koj saib lawv hlais nplej qhov twg koj cia li khaws qhov ntawd. Kuv twb hais rau cov txivneej lawm, kom lawv tsis txhob los zes koj. Thiab thaum twg koj nqhis dej, cia li mus haus hauv tej hub uas lawv ntim dej puv nkaus rau lawm.” Luv txhos caug ntua nyo ua ntsejmuag ti nkaus hauv av, thiab hais rau Npau-am hais tias, “Vim li cas koj yuav hmov tshua kuv ua luaj? Vim li cas koj yuav ua siab dawb rau tus neeg txawv tebchaws tas npaum li?” Npau-am teb hais tias, “Kuv tau hnov txhua yam uas koj tau ua zoo rau koj niampog txij thaum koj tus txiv tuag los lawm. Kuv paub hais tias koj tau tso koj niam koj txiv thiab koj lub tebchaws tseg thiab los nrog cov neeg uas koj ibtxwm tsis tau paub dua li nyob. Thov kom tus TSWV pauj txiaj ntsig rau tej uas koj tau ua zoo tas los lawm. Thov kom koj tau txais koob hmoov nplua mias los ntawm tus TSWV uas yog cov Yixalayees tus Vajtswv uas koj los vamkhom.” Luv teb hais tias, “Koj ua siab dawb kawg li rau kuv. Txawm yog kuv twb tsis muaj nqis npaum li koj ib tug ntxhais qhev los koj tseem ua rau kuv zoo siab heev vim koj hais tej lus mos lus muag rau kuv.” Thaum lub sijhawm noj mov Npau-am hais rau Luv hais tias, “Koj cia li los muab mov thiab zaub noj.” Yog li ntawd, Luv thiaj nrog cov neeg ua haujlwm noj mov ua ke thiab Npau-am faib tej ncuav nplej rau Luv noj. Nws noj tsau thiab tseem tshuav tej zaub mov seem. Yog li ntawd, Luv thiaj khaws tej hnab nplej hauv thaj teb ntawd mus txog thaum tsaus ntuj thiab nws coj los ntaus tau ib kawg. Nws thiaj ris cov nplej ntawd los rau hauv nroog thiab coj los qhia rau nws niampog hais tias, hnub no kuv mus khaws tau nplej npaum li no. Thiab nws muab tej zaub mov uas nws noj sus tsis tas rau nws niampog noj. Na-aumis nug Luv hais tias, “Hnub no koj mus khaws tej nplej no qhov twg los? Koj mus ua haujlwm hauv leejtwg thaj teb? Thov Vajtswv foom koob hmoov rau tus txivneej uas ua siab dawb rau koj!” Yog li ntawd, Luv thiaj qhia rau Na-aumis paub qhov uas nws mus khaws tej nplej ntawd hauv ib tug txivneej uas hu ua Npau-am thaj teb. Na-aumis thiaj hais tias, “Thov tus TSWV foom koob hmoov rau Npau-am, tus TSWV yeej ua raws li nws tej lus cog tseg rau cov neeg uas tseem ua neej nyob thiab cov uas tuag lawm.” Thiab nws hais ntxiv hais tias, “Tus txivneej ntawd yog ib tug uas txheeb ze wb heev, nws yog ib tus uas muaj cuabkav pab tau wb.” Ces Luv hais tias, “Zoo kawg li, nws tseem hais rau kuv kom kuv rau siab ntso mus khaws tej hnab nplej hauv nws thaj teb mus txog thaum nws cov neeg sau nplej tas.” Na-aumis hais rau Luv hais tias, “Me nyab, yog koj mus khaws nplej nrog Npau-am cov ntxhais qhev hauv nws thaj teb ntshai yuav zoo dua. Yog koj mus khaws hauv lwm tus thaj teb, ntshai luag yuav saib tsis taus koj.” Yog li ntawd, Luv thiaj nrog lawv mus khaws tej hnab nplej mus txog thaum hlais nplej tas thiab sau tej qoob tas lawm. Thiab Luv tseem nrog nws niampog nyob. Tau tsis ntev tom qab ntawd, Na-aumis hais rau Luv hais tias, “Tsimnyog kuv yuav tsum nrhiav ib tug txiv rau koj, koj thiaj yuav nrog luag muaj cuab muaj yig. Koj nco ntsoov tus txivneej uas hu ua Npau-am uas koj mus nrog nws cov ntxhais qhev khaws nplej, nws yog wb tus kwvtij. Koj mloog kuv hais, hmo no nws yuav mus ntaus nplej. Yog li ntawd, koj cia li ntxuav cev, muab roj tsw qab los pleev, thiab muab cev khaubncaws uas zoo tshaj plaws los hnav. Ces koj mus lawm nram nws qhov chaw ntaus nplej, tiamsis tsis txhob pub nws paub hais tias koj nyob nrad mus txog thaum nws noj thiab haus tas lawm. Koj ua tib zoo saib, saib nws pw qhov twg, thiab thaum uas nws tsaug zog lawm, koj cia li mus yaws nws daim pam thiab mus pw twjywm ntawm nws kotaw. Nws yuav qhia rau koj hais tias, koj yuav tsum ua li cas.” Luv teb hais tias, “Kuv yuav ua txhua yam raws li koj hais.” Yog li ntawd, Luv thiaj mus rau nram lub tshav nplej thiab ua raws li nws niampog hais rau nws. Thaum uas Npau-am noj thiab haus tas lawm, nws zoo siab heev. Nws txawm mus rau ntawm pawg nplej thiab pw tsaug zog lawm. Luv maj mam nkag mus muab Npau-am daim pam yaws thiab pw twjywm ntawm nws kotaw. Thaum ib tag hmo Npau-am tsim los thiab tig cev, nws pom ib tug pojniam pw ntawm nws kotaw ua rau nws ceeb loj heev. Npau-am nug hais tias, “Koj yog leejtwg?” Luv teb hais tias, “Kuv yog Luv. Rau qhov koj thiaj yog kuv tus kwvtij uas txheeb ze, thiab tsimnyog koj yuav pab tau kuv. Yog li ntawd, thov koj cia li yuav kuv ua koj tus pojniam.” Npau-am teb hais tias, “Thov tus TSWV foom koob hmoov rau koj, tej uas nimno koj ua no tseem zoo tshaj li tej uas koj tau ua rau koj niampog yav tas los lawm. Tsimnyog koj mus nrhiav tej tus tub hluas, tsis hais tus muaj lossis tus pluag yuav lawm, tiamsis koj tsis ua li ntawd. Luv, nimno koj tsis txhob nyuaj siab. Kuv yuav ua txhua yam uas koj thov kom kuv ua; rau qhov txhua tus neeg uas nyob hauv lub nroog no yeej paub hais tias koj yog ib tug pojniam uas tsimtxiaj heev. Muaj tseeb tiag, kuv yeej yog koj ib tug kwvtij uas txheeb ze thiab yeej tsimnyog kuv ua tus sau koj, tiamsis tseem muaj dua ib tug txivneej uas txheeb ze koj tshaj kuv lawm thiab. Hmo no koj cia li pw ntawm no, tagkis kaj ntug peb mam nug saib nws puas kam yuav koj los tsis kam. Yog nws kam mas yuav zoo heev; yog nws tsis kam, kuv thov coglus rau Vajtswv tus uas muaj sia nyob hais tias kuv yuav yuav koj. Hmo no koj cia li pw ntawm no kom kaj ntug tso.” Yog li ntawd, Luv thiaj pw ntawm Npau-am kotaw, tiamsis Luv twb sawv mus tsev thaum tsis tau kaj ntug kom tsis txhob muaj neeg pom nws, rau qhov Npau-am tsis xav kom muaj neeg paub hais tias Luv tuaj pw ntawd li. Npau-am hais rau Luv hais tias, “Muab koj lub tsho loj los nthuav pua ntawm no.” Luv txawm ua li ntawd, thiab Npau-am yawm tau yuav luag rau siab nplej rau Luv thiab pab tsaws rau saum nws xubpwg. Ces Luv txawm ris cov nplej ntawd los tsev lawm. Thaum Luv los txog tsev, nws niampog nug hais tias, “Me nyab, koj mus puas tau lus li cas?” Luv thiaj qhia txhua yam uas Npau-am tau hais rau nws lawm rau nws niampog mloog. Luv hais ntxiv hais tias, “Nws kom kuv tsis txhob rov tes dawb tes npliag los cuag koj, yog li ntawd, nws thiaj muab cov nplej no rau kuv ris los.” Na-aumis hais tias, “Luv, koj ua siab ntev tos mus txog thaum uas koj paub zaj no lawm tso. Hnub no Npau-am yuav kub siab lug hais zaj no kom tiav.” Npau-am mus zaum ntawm roojvag nroog qhov chaw uas sawvdaws yeej ibtxwm mus sablaj. Ces tus kwvtij uas txheeb Elimelej tshaj plaws uas Npau-am tau hais qhia rau Luv lawm, txawm taug kev tuaj txog ntawd. Npau-am hais rau nws hais tias, “Los ntawm no thiab zaum wb sib tham.” Ces tus txivneej ntawd txawm los thiab nrog nws zaum. Ces Npau-am txawm mus coj tau kaum leej thawjcoj hauv lub nroog ntawd tuaj thiab caw lawv los nrog nkawd zaum. Thaum lawv los zaum txhij lawm, Npau-am hais rau nws tus kwvtij ntawd hais tias, “Nimno Na-aumis rov nram tebchaws Mau-am los lawm, nws xav muab peb tus kwvtij Elimelej thaj teb muag, kuv xav hais tias tsimnyog koj paub txog zaj no. Nimno yog koj xav yuav thaj teb no, koj cia li yuav tabmeeg cov kev txwjlaus neeg uas tuaj zaum ntawm no. Tiamsis yog koj tsis xav yuav thaj teb ntawd, koj cia li tu lus, rau qhov koj yog tus uas muaj cai xub yuav, yog koj tsis yuav, ces kuv mam li yuav.” Ces tus txivneej ntawd teb hais tias, “Kuv yuav yuav thaj teb ntawd.” Npau-am hais tias, “Zoo lawm lauj, yog koj yuav thaj teb ntawd ntawm Na-aumis, mas koj yuav tsum yuav Luv, tus pojntsuam uas yog neeg Mau-am los ua koj pojniam thiab, thaj teb ntawd thiaj yuav yog tus txivneej uas tuag lawm tsevneeg tug.” Tus txivneej ntawd teb hais tias, “Yog li ntawd, kuv yuav tso tseg tsis yuav thaj teb ntawd, rau qhov thaum dua kuv lawm, thaj teb ntawd yuav tsis yog kuv cov menyuam qubtxeeg qubteg. Koj cia li yuav; kuv tsis yuav lawm.” Txoj kevcai uas cov Yixalayees ibtxwm coj, mas yog leejtwg tau tso ncauj muag lossis pauv tej teb, tus muag yuav tsum hle nws txhais khau thiab muab cob rau tus yuav. Qhov uas ua li no twb yog ua timkhawv rau cov Yixalayees paub hais tias, nkawd hais haum lawm. Yog li ntawd, thaum tus txivneej hais rau Npau-am hais tias, “Koj cia li yuav,” nws thiaj hle hlo nws txhais khau thiab muab cob kiag rau Npau-am. Ces Npau-am hais rau cov thawjcoj thiab cov neeg uas tuaj ntawd hais tias, “Hnub no kuv thov nej nrog ua timkhawv hais tias, kuv tau yuav txhua yam uas yog Elimelej thiab nws ob tug tub uas yog Khili-oos thiab Maloos li tug ntawm Na-aumis lawm. Tsis yog li ntawd xwb, kuv tseem yuav Luv tus uas yog neeg Mau-am thiab yog Maloos tus pojniam los ua kuv pojniam thiab. Ua li no thiaj yuav muaj tus los tuav tus uas tuag lawm lub cuabtam, thiab nws cajces tsevneeg thiaj yuav huamvam ntawm nws cuab kwvtij thiab hauv nws lub nroog. Hnub no thov nej ua timkhawv nrog kuv paub txog zaj no.” Cov thawjcoj thiab cov neeg sawvdaws uas tuaj ntawd teb hais tias, “Peb sawvdaws nrog ua timkhawv ntag. Thov tus TSWV foom koob hmoov rua koj tus pojniam kom zoo ib yam li Laxees thiab Le-as nkawd, uas yug tau menyuam coob heev rau Yakhauj. Thov kom koj ua neej muaj txiag npluanuj rau hauv Efalas cuab kwvtij thiab muaj koob meej nyob nto moo lug hauv lub nroog Npelehees. Thov kom tej menyuam uas tus TSWV yuav pub rau koj los ntawm tus pojniam no ua rau koj tsevneeg zoo ib yam li Peles uas yog Yudas thiab Tamaj nkawd tus tub tsevneeg.” Yog li ntawd, Npau-am thiaj mus coj Luv los tsev thiab yuav Luv ua nws tus pojniam, tus TSWV foom koob hmoov rau Luv, thiab nws txawm xeeb tub thiab nws yug tau ib tug tub. Tej pojniam tuaj hais rau Na-aumis hais tias, “Ua tus TSWV tsaug uas hnub no nws tau pub ib tug xeebntxwv los tuav koj lub neej thiab saib xyuas koj lawm. Thov kom tus metub no muaj koob meej nto moo lug nyob rau hauv haivneeg Yixalayees lauj! Koj tus nyab hlub koj heev, thiab ua tus saib xyuas koj zoo tshaj xya leej tub lawm thiab. Nimno nws yug tau ib tug xeebntxwv rau koj, nws yuav ua rau koj muaj lub neej tshiab thiab koj yuav tau lub neej sov siab so thaum koj laus lawm.” Na-aumis thiaj coj tus metub ntawd los puag rawv rau hauv nws lub xubntiag, thiab tu tus metub ntawd zoo kawg li. Cov pojniam nruab ze tuaj tis tus metub ntawd npe hu ua Aunpes. Lawv qhia rau sawvdaws hais tias, “Na-aumis muaj ib tug tub xeebntxwv lawm lauj!” Aunpes muaj ib tug tub npe hu ua Yexais, Yexais yog Daviv txiv ntag. Muaj ib tug txivneej hu ua Ekanas uas yog xeem Efalayees, nws nyob hauv lub nroog Lamas saum lub laj roob Efalayees. Ekanas txiv hu ua Yelauhas thiab nws yawg hu ua Elihus, Ekanas yog Tauhus tsevneeg thiab yog cuab Xufes. Ekanas muaj ob tug pojniam, Hanas thiab Peninas. Peninas muaj menyuam, tiamsis Hanas tsis muaj. Ekanas niaj xyoo cab tsiaj hauv lub nroog Lamas mus fij thiab pehawm tus TSWV uas muaj hwjchim loj kawg nkaus hauv lub nroog Silaus, Haufenis thiab Finehas uas yog Elis ob tug tub yog povthawj ua tus TSWV haujlwm nyob hauv. Txhua zaus uas Ekanas tua tsiaj fij, nws muab tej nqaij faib rau Peninas thiab Peninas cov menyuam ib leeg ib co. Txawm yog Ekanas nyiam Hanas heev dua los nws tsuas faib ib qho rau Hanas xwb, rau qhov tus TSWV tsis pub Hanas muaj menyuam. Peninas uas nrog Hanas sib tw ua neej, nws pheej txob thuam thiab rhuav Hanas ntsejmuag, rau qhov tus TSWV tsis pub Hanas muaj menyuam. Peninas pheej ua li no ib xyoos dhau ib xyoos; thaum nkawd nrog sawvdaws mus pehawm tus TSWV hauv lub tuamtsev los Peninas pheej ua rau Hanas nyuaj siab thiab quaj tsis xav noj mov. Ekanas uas yog tus txiv nug Hanas hais tias, “Hanas, vim li cas koj pheej quaj? Vim li cas koj tsis noj mov li? Vim li cas koj nyuaj siab ua luaj? Koj tau kuv zoo tsis cuag li koj muaj kaum leej tub los?” Hanas coglus hais tias, “Tus TSWV uas muaj hwjchim loj kawg nkaus, thov koj tsa qhovmuag saib kuv uas yog koj tus ntxhais qhev! Thov koj pom kuv tej kev lwj siab thiab hlub kuv! Thov koj nco txog kuv thiab pub kuv muaj ib tug tub! Kuv coglus rau koj hais tias kuv yuav muab tus tub ntawd fij rau koj, ua koj tes haujlwm mus tas nws simneej thiab yuav tsis chais nws cov plaubhau li.” Hanas thov tus TSWV ntev loo, Elis saib ntsoov Hanas lub qhovncauj. Hanas thov Vajtswv qhovncauj ua zog kais, tiamsis tsis hnov suab li. Yog li ntawd, Elis xav hais tias yog Hanas qaug cawv, Elis thiaj hais rau Hanas hais tias, “Koj tseem yuav qaug cawv li ko mus txog thaum twg? Koj cia li tseg tsis txhob haus cawv lawm!” Hanas teb hais tias, “Kuv tus tswv, tsis yog kuv qaug cawv, kuv tsis tau haus cawv. Kuv nyuaj siab heev, kuv tabtom thov Vajtswv, thiab muab kuv tej kev nyuaj siab tso rau tus TSWV. Koj tsis txhob xav hais tias, kuv yog ib tug pojniam uas tsis tsimtxiaj. Kuv thov Vajtswv li no, twb yog vim kuv muaj kev nyuaj siab heev.” Elis hais tias, “Koj cia li mus tsev kaj siab lug, thiab thov tus TSWV uas yog cov Yixalayees tus Vajtswv pub rau koj raws koj tau thov nws lawm.” Hanas teb hais tias, “Thov koj hlub kuv,” ces Hanas txawm mus noj mov thiab tsis nyuaj siab lawm. Thaum kaj ntug Ekanas thiab nws tsevneeg sawv ntxov los pehawm tus TSWV tas, ces lawv txawm rov qab los tsev rau hauv lub nroog Lamas lawm. Ekanas nrog Hanas pw, thiab tus TSWV ua raws li Hanas tej lus thov. Ces Hanas txawm xeeb tub thiab yug tau ib tug tub. Nws muab tus metub ntawd tis npe hu ua Xamuyees, rau qhov Hanas hais tias, “Kuv thov tus TSWV pub tus tub no rau kuv.” Xyoo tom qab rov txog lub caij uas Ekanas coj tsiaj mus tua fij rau tus TSWV raws li nws tau coglus tseg, nws thiab nws pojniam menyuam thiaj rov qab mus rau hauv lub nroog Silaus. Tiamsis zaum no Hanas tsis mus lawm. Hanas hais rau nws tus txiv hais tias, “Kuv yuav tos kom kuv tus metub tseg taus mis tso, kuv mam li coj nws mus rau hauv tus TSWV lub tsev thiab cia nws nyob hauv mus tas nws simneej li.” Ekanas teb hais tias, “Koj cia li ua raws li koj pom zoo; koj nyob hauv tsev mus txog thaum uas tus metub tseg taus mis tso. Thov tus TSWV ua kom koj tej lus cog tseg tiav.” Yog li ntawd, Hanas thiaj nyob hauv tsev thiab tu nws tus metub xwb. Thaum tus metub tseg taus mis lawm, Hanas txawm cab ib tug heev nyuj hnubnyoog peb xyoos, ris ib tawb hmoov qib, ib hnab cawv txiv hmab, thiab coj nws tus metub mus rau pem lub nroog Silaus. Txawm yog Xamuyees tseem yau heev los nws cia li coj mus rau hauv tus TSWV lub tsev uas nyob pem lub nroog Silaus. Thaum lawv muab tus heev nyuj ntawd tua fij tas lawm, lawv txawm coj tus metub mus cob rau Elis. Hanas hais rau Elis hais tias, “Tus tswv, koj puas tseem nco tau kuv lawm? Kuv yog tus pojniam uas thaum koj pom tuaj sawv ntawm no thov tus TSWV ntag. Kuv thov tus TSWV pub tus metub no rau kuv, mas tus TSWV pub rau kuv raws li kuv tej lus thov. Yog li ntawd, kuv thiaj muab kuv tus metub fij rau tus TSWV, cia nws ua tus TSWV neeg mus tas nws simneej li.” Ces lawv txawm pehawm tus TSWV qhov ntawd. Hanas hu nkauj hais tias: “Tus TSWV ua rau kuv zoo siab kawg nkaus li; kuv zoo siab kawg uas tus TSWV pub rau kuv tau ntsejmuag! Kuv khav tau rau kuv tej yeebncuab; kuv zoo siab heev rau qhov Vajtswv pab kuv! “Tsis muaj leejtwg dawbhuv li tus TSWV; tsis muaj leejtwg siab zoo npaum li nws, tsis muaj leejtwg tsomkwm peb li peb tus Vajtswv. Cia li tseg nej tej lus khavtheeb; thiab tseg nej tej lus khav txiv. Rau qhov tus TSWV yog tus Vajtswv uas paub, thiab tshuaj txhua yam uas neeg ua. Cov tubrog uas muaj zog heev tej hneevnti twb lov tas lawm, tiamsis cov neeg uas qaug zog rov muaj zog tuaj. Tus neeg uas txeev muaj noj muaj haus, nimno nws yuav tau mus ua zog noj, tiamsis tus uas ibtxwm tsis muaj noj, muaj noj lawm. Tus pojniam uas ibtxwm tsis muaj tub, yug tau xya leej tub; tiamsis tus pojniam uas muaj menyuam coob, tsis tshuav ib tug li lawm. Tus TSWV ua kom tuag thiab ua kom rov ciaj sia, nws xa neeg mus rau hauv tubtuag teb thiab coj lawv rov qab los. Nws ua rau ibtxhia pluag thiab ua rau ibtxhia npluanuj; nws muab ibtxhia txo ua cov yau thiab tsa ibtxhia ua cov loj. Nws tsa cov neeg pluag sawv hauv tej hmoov av los thiab nws tsa cov neeg txomnyem sawv hauv qhov tshauv los; nws tsa lawv nrog tej nomtswv nyob sib txig thiab pub lawv tau koob meej. Tej ncej uas txheem lub ntiajteb yog nws li; nws tsim lub ntiajteb rau saum tej hau ncej. “Nws tsomkwm nws haivneeg uas ncaj ncees, tiamsis cov neeg siab phem yuav ploj mus rau hauv qhov tsaus ntuj nti; neeg lub zog yeej pab tsis tau kom neeg dim. Tus TSWV cov yeebncuab yuav raug puastsuaj; nws ua rau xob nroo nrov nroo ntws saum ntuj tuaj tawmtsam lawv. Tus TSWV yuav txiav txim rau txhua haivneeg hauv ntiajteb no; nws yuav pub hwjchim rau tus vajntxwv uas nws tsa; nws yuav pub kom tus vajntxwv uas nws tsa kovyeej tej yeebncuab.” Ces Ekanas txawm rov qab mus tsev rau nram lub nroog Lamas lawm, tiamsis tseg tus metub Xamuyees nrog tus povthawj Elis nyob pem lub nroog Silaus ua tus TSWV tes haujlwm. Elis ob tug tub tsis xyaum ua neeg tsimtxiaj. Nkawd tsis mloog tus TSWV tej lus lossis tsis coj raws li tej kevcai uas cov povthawj sawvdaws coj. Thaum cov pejxeem ib tug twg coj tsiaj tuaj tua fij, tus povthawj ib tug tubtxib nqa ib rab hmuv ncau peb ceg tuaj. Thaum tseem hau cov nqaij rau hauv yias, nws txawm muab rab hmuv hno cov nqaij hauv yias, yog rab hmuv chob tau npaum li cas, ces cov nqaij ntawd yog tus povthawj tug. Lawv ua li ntawd rau cov Yixalayees txhua tus uas cab tsiaj tuaj tua fij rau hauv lub nroog Silaus. Tsis tas li ntawd xwb, thaum tseem tsis tau muab tej roj luas coj mus hlawv fij, tus povthawj tus tubtxib tuaj hais rau tus uas muab tej tsiaj fij hais tias, “Kuv tuaj nqa ib thooj nqaij mus rau tus povthawj ci noj; nws tsis yuav cov nqaij uas koj twb haus siav lawm, nws yuav nqaij nyoos xwb.” Yog tus uas muab cov nqaij ntawd mus fij teb hais tias, “Cia peb muab tej roj coj mus hlawv raws li kevcai tas tso, koj mam li nqa tej nqaij uas koj xav yuav mus,” ces tus povthawj tus tubtxib teb hais tias, “Tsis tau, koj cia li muab rau kuv tamsim no! Txawm yog koj tsis kam los kuv yeej yuav nqa mus!” Tus TSWV pom hais tias, Elis ob tug tub ua txhaum loj kawg li, rau qhov nkawd ua saib tsis taus tej khoom uas lawv coj tuaj fij rau tus TSWV. Thaum tus metub Xamuyees ua tus TSWV tes haujlwm, nws hnav lub tsho ntaubmag efaus. Txhua xyoo uas nws niam thiab nws txiv coj tsiaj tuaj tua fij rau tus TSWV, nws niam yeej xaws ib lub tsho ntev nqa tuaj rau nws. Elis foom koob hmoov rau Ekanas thiab Ekanas tus pojniam hais tias, “Thov tus TSWV pub kom koj tus pojniam no rov muaj dua menyuam los hloov tus tub uas koj twb muab fij rau tus TSWV lawm chaw.” Ces lawv txawm rov qab mus tsev lawm. Tus TSWV foom koob hmoov rau Hanas muaj peb tug tub thiab ob tug ntxhais ntxiv. Tus metub Xamuyees loj hlob zuj zus thiab ua tus TSWV tes haujlwm. Elis laus heev lawm. Nws hnov tej uas nws ob tug tub ua txhaum rau cov Yixalayees thiab paub tej uas nws ob tug tub mus deev cov pojniam uas ua haujlwm ntawm tus TSWV lub Tsevntaub sib ntsib tej roojvag. Yog li ntawd, nws thiaj hais rau nkawd hais tias, “Vim li cas neb ua tej no? Txhua tus qhia tej kev phem uas neb tau ua rau kuv mloog. Kuv ob tug tub, neb tseg tsis txhob ua tej kev phem no lawm. Tej kev phem uas neb ua ntawd, tus TSWV haivneeg hais ntshoo nrooj rau luag ntiajtog qaumpes hnov tas lawm. Yog neeg ua txhaum rau neeg, ces Vajtswv phua tau plaub ntug rau ob tog; tiamsis yog neeg ua txhaum rau tus TSWV, leejtwg yuav ua tus phua plaub ntug?” Tiamsis nkawd tsis mloog nkawd txiv tej lus li, rau qhov tus TSWV twb npaj siab lawm hais tias, yuav muab nkawd tua povtseg. Tus metub Xamuyees loj hlob ua lub neej haum tus TSWV saib thiab haum tej neeg sawvdaws siab. Muaj ib tug cevlus coj tus TSWV tej lus tuaj hais rau Elis hais tias, “Thaum koj yawgkoob Aloos thiab nws tsevneeg tseem ua Falaus uas kav tebchaws Iziv qhev, kuv tau los tshwm rau Aloos pom. Kuv tau xaiv nws tsevneeg ntawm txhua xeem Yixalayees los ua kuv cov povthawj, ua haujlwm ntawm lub thaj fij, hlawv tej hmoov tshuaj tsw qab, thiab hnav lub tsho efaus tuaj cuag kuv. Kuv pub lawv muaj feem yuav tau tej uas luag coj tuaj hlawv fij rau kuv saum lub thaj ibtxhia. Yog vim li cas koj ua neeg siab hlob thiab xav tau tej uas kuv kom kuv haivneeg coj tuaj fij? Elis, vim li cas koj muab koj ob tug tub saib hlob dua saib kuv? Koj cia nkawd muab tej nqaij zoo heev uas kuv haivneeg coj tuaj fij rau kuv txav kom koj ob tug tub rog? Kuv yog tus TSWV uas yog cov Yixalayees tus Vajtswv, yav tas los kuv coglus hais tias, koj tsevneeg thiab koj cov xeebntxwv yuav tau ua povthawj ua kuv tes haujlwm mus ibtxhis li. Tiamsis nimno kuv hais rau koj hais tias, kuv tsis pub nej ua ntxiv lawm! Tus uas hwm kuv, kuv yuav pub rau nws tau ntsejmuag; tus uas saib tsis tau kuv, kuv yuav cia nws poob ntsejmuag. Twb txog lub sijhawm lawm, kuv yuav tua cov tub hluas hauv koj tsevneeg thiab hauv koj cuab kwvtij; yog li ntawd, koj tsevneeg yuav tsis muaj ib tug txivneej nyob laus nkoos li. Koj yuav mob siab thiab khib siab rau tej koob hmoov uas kuv foom rau lwm tus hauv haivneeg Yixalayees, tiamsis koj tsevneeg yuav tsis muaj ib tug nyob laus li. Kuv yuav cia koj cov xeebntxwv ib tug ua neej nyob, nws yuav ua ib tug povthawj ua kuv tes haujlwm. Tiamsis nws yuav digmuag thiab tas kev cia siab, dua li koj cov xeebntxwv yuav raug luag tua tuag tas. Haufenis thiab Finehas uas yog koj ob tug tub los yuav tuag rau tib hnub, thaum ntawd koj yuav paub hais tias tej lus uas kuv hais no muaj tseeb tiag. Kuv yuav xaiv ib tus povthawj uas ncaj ncees ua kuv tes haujlwm thiab ua txhua yam raws li kuv kom nws ua. Kuv yuav pub nws muaj xeebntxwv los ua haujlwm ntawm tus vajntxwv uas kuv xaiv lawm lub xubntiag. Koj cov xeebntxwv tseem yuav mus thov nyiaj thiab mov noj ntawm tus povthawj ntawd thiab tsa ncauj thov kom nws cia lawv pab cov povthawj ua haujlwm, lawv thiaj tau noj.” Elis qhia tus metub Xamuyees ua tus TSWV tes haujlwm. Ntu ntawd tus TSWV tsis tshua los hais rau neeg, thiab nws tsis ua rau neeg ua yogtoog pom lawm. Elis laus heev, nws qhovmuag tsis tshua pom kev lawm, muaj ib hmos nws pw hauv nws lub txaj; Xamuyees pw hauv tus TSWV lub tuamtsev, ze ntawm lub Phijxab uas ntim Vajtswv tej lus cog tseg. Thaum tsis tau kaj ntug uas lub teeb tseem cig lam lug, tus TSWV hu Xamuyees. Xamuyees teb hais tias, “Kuv nyob ntawm no!” Ces nws txawm khiav mus nug Elis hais tias, “Koj hu kuv los, kuv nyob ntawm no.” Tiamsis Elis teb hais tias, “Kuv tsis tau hu koj; cia li rov qab mus pw.” Yog li ntawd, Xamuyees txawm rov mus pw. Tus TSWV hu Xamuyees zaum peb; Xamuyees sawv rov mus cuag Elis thiab nug hais tias, “Koj hu kuv los, kuv nyob ntawm no.” Thaum ntawd, Elis paub hais tias yog tus TSWV hu Xamuyees, Elis thiaj hais rau Xamuyees hais tias, “Cia li rov mus pw; yog koj hnov nws rov hu koj dua, ces koj teb hais tias, ‘Tus TSWV, thov koj cia li hais, koj tus tubtxib tabtom mloog.’ ” Ces Xamuyees txawm rov mus pw lawm. Tus TSWV los sawv ntawd, thiab rov hu dua ib yam li nws hu tas los hais tias, “Xamuyees! Xamuyees!” Xamuyees teb hais tias, “Tus TSWV koj cia li hais; koj tus tubtxib tabtom mloog.” Tus TSWV hais rau Xamuyees hais tias, “Muaj ib hnub kuv yuav ua ib yam rau cov Yixalayees, txhua tus uas hnov yuav ntshai heev. Hnub ntawd kuv yuav tso kev puastsuaj los rau Elis tsevneeg, raws li tej lus uas kuv hais thaum pib mus txog thaum xaus. Kuv twb hais rau Elis lawm hais tias, kuv yuav rau txim rau nws tsevneeg mus ibtxhis, rau qhov nws ob tug tub hais tej lus phem saib tsis taus kuv. Elis paub tej uas nws ob tug tub ua, tiamsis nws tsis txwv nkawd. Yog li ntawd, kuv coglus hais tias tsis muaj ib yam khoom fij lossis theej txhoj uas yuav theej tau Elis tsevneeg lub txim loj ntawd li.” Xamuyees pw twjywm mus txog thaum kaj ntug; nws mam li sawv mus qhib tus TSWV lub tsev tej qhovrooj. Nws ntshai qhia zaj yogtoog ntawd rau Elis paub. Elis hu hais tias, “Kuv tus metub Xamuyees!” Xamuyees teb hais tias, “Kuv nyob ntawm no!” Elis nug hais tias, “Tus TSWV hais li cas rau koj? Koj cia li piav rau kuv mloog tsis txhob zais ib los li. Yog koj npog tsis qhia rau kuv paub, Vajtswv yuav rau txim hnyav rau koj.” Yog li ntawd, Xamuyees thiaj piav txhua yam rau Elis mloog tsis zais ib los li. Elis hais tias, “Nws yog tus TSWV; nws yeej yuav ua raws li nws pom zoo.” Thaum Xamuyees loj hlob lawm, tus TSWV nrog nraim Xamuyees thiab ua kom txhua yam tiav raws li Xamuyees hais ntawd. Ces tagnrho cov Yixalayees thoob tebchaws paub hais tias, Xamuyees yog tus TSWV ib tug cevlus tseeb. Tus TSWV los tshwm tsis tseg rau Xamuyees pom hauv lub nroog Silaus thiab nrog Xamuyees tham. Thaum Xamuyees hais los cov Yixalayees mloog nws hais. Lub sijhawm ntawd, cov Filitees txhij tubrog tuaj tua cov Yixalayees, yog li ntawd, cov Yixalayees thiaj mus tua cov Filitees. Cov Yixalayees mus tsuam yeej rau ntawm Enpenexes, thiab cov Filitees tsuam yeej rau ntawm Afes. Cov Filitees txawm tuaj tua cov Yixalayees, ces ob tog sib tua hnyav heev; cov Filitees tua ua rau cov Yixalayees swb thiab tuag plaub txhiab leej rau hauv tshavrog. Thaum cov Yixalayees uas seem rov los txog rau hauv lawv lub yeej, cov Yixalayees cov thawjcoj hais tias, “Vim li cas hnub no tus TSWV cia cov Filitees tua yeej peb? Peb cia li mus kwv lub Phijxab uas ntim Vajtswv tej lus cog tseg hauv lub nroog Silaus tuaj kom nws thiaj nrog peb mus thiab cawm kom peb dim ntawm peb cov yeebncuab tes.” Yog li ntawd, lawv thiaj txib neeg mus rau hauv lub nroog Silaus, kwv lub Phijxab uas ntim Vajtswv tej lus cog tseg uas yog tus TSWV uas muaj hwjchim loj kawg nkaus lub zwmtxwv uas nyob hauv qab ob tug qhelunpees ob sab qab tis, Haufenis thiab Finehas uas yog Elis ob tug tub thiaj nrog cov uas kwv lub Phijxab ntawd mus thiab. Thaum lawv kwv lub Phijxab mus txog, cov Yixalayees zoo siab thiab qw nrov heev ua rau av ntseeg nkaws. Thaum cov Filitees hnov tej suab qw ntawd, lawv hais tias, “Peb cia li mloog tej suab uas qw hauv cov neeg Henplais lub yeej! Saib lawv qw ua dabtsi?” Thaum cov Filitees paub hais tias, yog cov Yixalayees kwv lub Phijxab uas ntim Vajtswv tej lus cog tseg tuaj rau hauv cov Henplais lub yeej lawm, cov Filitees ntshai heev thiab sib tham hais tias, “Vajtswv tuaj rau hauv lawv lub yeej lawm! Peb yuav swb lawv! Peb tsis tau pom muaj dua li no ib zaug li. Leejtwg yuav cawm tau ped dim ntawm tej vajtswv uas muaj hwjchim li ntawd? Tej vajtswv ntawd yog cov uas tua cov Iziv nram tiaj suabpuam ntag! Cov Filitees, cia li ua siab tawv qhawv! Cia li tiv tua tiag tiag, lossis yuav cia peb ua cov Henplais qhev, ib yam li lawv tau ua peb qhev lawm. Yog li ntawd, cia li tiv tua tiag tsis txhob thim!” Cov Filitees thiaj tua heev ua rau cov Yixalayees swb kiag, thiab cov Yixalayees nyias taus nyias khiav rov qab mus tsev lawm. Cov tubrog Yixalayees raug luag tua tuag peb caug txhiab leej. Cov Filitees txeeb tau lub Phijxab uas ntim Vajtswv tej lus cog tseg, thiab Elis ob tug tub uas yog Haufenis thiab Finehas los raug luag tua tuag rau huv tshavrog lawm. Tib hnub ntawd, muaj ib tug txivneej uas yog xeem Npeenyamees khiav hauv tshavrog los txog hauv lub nroog Silaus. Nws tu siab heev, nws thiaj dua rhe nws lub tsho thiab tsuab hmoov av rau saum nws taubhau. Elis zaum saum ib lub rooj ntawm ntug kev, ntsia ntsoov ncauj ke. Nws txhawj txog lub Phijxab uas ntim Vajtswv tej lus cog tseg heev. Tus txivneej ntawd los qhia rau cov neeg uas nyob thoob plaws hauv lub nroog paub tej xwm ntawd, ces sawvdaws ntshai heev thiab quaj zom zaws. Thaum Elis hnov sawvdaws quaj zom zaws, nws nug hais tias, “Tej suab ntawd, yog suab dabtsi?” Tus txivneej ntawd khiav ceev nrooj los qhia rau Elis. ( Thaum ntawd, Elis hnubnyoog muaj cuaj caum yim xyoo, nws qhovmuag pom kev tsis tseeb lawm.) Tus txivneej ntawd hais rau Elis hais tias, “Hnub no kuv khiav hauv tshavrog los.” Elis nug hais tias, “Metub, muaj xwm dabtsi?” Nws teb hais tias, “Cov Filitees tua cov Yixalayees swb thiab tawg khiav tas. Koj ob tug tub uas yog Haufenis thiab Finehas los raug tua tuag, thiab luag tseem txeeb tau lub Phijxab uas ntim Vajtswv tej lus cog tseg huv tibsi lawm!” Thaum tus txivneej ntawd, hais txog lub Phijxab, Elis txawm ntxeev hlo saum lub rooj rau sab tom qab ntawm ib sab roojvag, nws cajdab lov ntho thiab tuag lawm, vim nws laus thiab rog heev. Nws ua cov Yixalayees tus thawjcoj tau plaub caug xyoo. Elis tus nyab uas yog Finehas tus pojniam tabtom suab menyuam thiab yuav txog caij yug. Thaum nws hnov hais tias luag txeeb tau lub Phijxab uas ntim Vajtswv tej lus cog tseg, nws txiv yawg thiab nws tus txiv los tuag lawm, tamsim ntawd nws mob plab heev thiab cia li yug kiag menyuam. Thaum nws yuav tu siav, cov pojniam uas tuaj pab nws hais rau nws tais, “Ua tiag tswj koj txojsia! Koj twb tau ib tug metub lawm!” Tiamsis nws tsis mloog thiab tsis teb li. Nws tis tus metub ntawd npe hu ua Ikhanpaus, txhais hais tias, “Vajtswv lub tshwjchim tso cov Yixalayees tseg lawm.” Nws hais li ntawd, yog hais txog qhov uas luag txeeb tau lub Phijxab uas ntim Vajtswv tej lus cog tseg, nws txiv yawg thiab nws tus txiv tuag. Nws hais tias, “Vajtswv lub tshwjchim tso cov Yixalayees tseg, rau qhov luag txeeb tau lub Phijxab uas ntim Vajtswv tej lus cog tseg lawm.” Thaum cov Filitees txeeb tau lub Phijxab uas ntim Vajtswv tej lus cog tseg lawm, lawv kwv ntawm Enpenexes mus rau hauv lub nroog Asedaus, thiab coj mus tso rau hauv lub tuamtsev uas lawv teev lawv tus vajtswv Dankoos, thiab muab txawb rau ntawm tus mlom Dankoos ib sab. Hnub tom qab thaum sawv ntxov, cov neeg hauv lub nroog Asedaus pom tus mlom Dankoos vau rau hauv av ntawm hauv ntej lub Phijxab uas tim Vajtswv tej lus cog tseg. Yog li ntawd, lawv txawm muab tsa thiab muab txawb rau ntawm qhov qub chaw dua. Tagkis tom qab, lawv tuaj pom tus mlom Dankoos rov vau khwb rwg ntxis rau ntawm hauv ntej lub Phijxab uas ntim Vajtswv tej lus cog tseg. Zaum no tus mlom ntawd lub taubhau thiab ob sab npab tu rau ntawm taw rooj tshuav lub cev xwb. ( Twb yog vim li ntawd, cov povthawj thiab cov neeg uas teev tus mlom Dankoos hauv lub nroog Asedaus thiaj tsis tsuj thiab tsis hla ntawm lub taw rooj ntawd los txog niaj hnub no.) Tus TSWV rau txim hnyav heev rau cov neeg uas nyob hauv lub nroog Asedaus thiab ua rau lawv ntshai kawg li. Tus TSWV rau txim rau lawv thiab ua rau cov neeg uas nyob cheebtsam ntawd mob faj tas huv tibsi. Thaum cov neeg ntawd, pom tej xwm no, lawv hais tias, “Cov Yixalayees tus Vajtswv rau txim rau peb thiab peb tus vajtswv Dankoos lawm. Peb cia li muab lub Phijxab tshem mus, tsis txhob cia nyob ntawm no lawm.” Yog li ntawd, cov Filitees txawm tso neeg mus hu lawv tsib tug vajntxwv tuaj thiab hais rau lawv hais tias, “Peb yuav ua li cas rau lub Phijxab uas ntim cov Yixalayees tus Vajtswv tej lus cog tseg no?” Lawv teb hais tias, “Cia li kwv mus tso rau hauv lub nroog Nkas;” yog li ntawd, lawv thiaj kwv lub phijxab mus tso rau hauv lub nroog Nkas uas yog cov Filitees ib lub nroog. Tiamsis thaum lawv coj lub phijxab mus tso rau hauv lub nroog ntawd lawm, tus TSWV txawm rau txim rau cov neeg hauv lub nroog ntawd, thiab ua rau lawv ntxhov siab kawg li. Tus TSWV rau txim hnyav heev rau cov neeg hauv lub nroog ntawd, tsis hais tus laus tus hluas mob faj tas huv tibsi. Ces lawv thiaj kwv lub Phijxab uas ntim Vajtswv tej lus cog tseg mus tso rau hauv Ekiloos uas yog cov Filitees ib lub nroog; thaum coj lub phijxab mus txog rau hauv lub nroog Ekiloos, cov neeg uas nyob hauv qw zom zaws hais tias, “Lawv kwv lub Phijxab uas ntim cov Yixalayees tus Vajtswv tej lus cog tseg tuaj ua kom peb tuag tas xwb!” Yog li ntawd, lawv rov tso neeg mus hu tagnrho cov neeg Filitees cov vajntxwv tuaj thiab hais rau lawv hais tias, “Peb cia li xa lub Phijxab uas ntim cov Yixalayees tus Vajtswv tej lus cog tseg rov qab mus tso rau qhov chaw qub kom lub phijxab ntawd thiaj tsis tua peb thiab peb tej tsevneeg lawm.” Muaj kev ntxhov siab thoob plaws txhua lub nroog, rau qhov Vajtswv rau txim hnyav heev rau lawv. Cov uas tsis tuag los mob faj tas huv tibsi, lawv thiaj quaj thov lawv tej vajtswv pab lawv. Thaum lub Phijxab uas ntim Vajtswv tej lus cog tseg nyob hauv tebchaws Filitees tau xya lub hlis, cov Filitees txawm hu lawv cov povthawj thiab cov neeg uas txawj saib yaig tuaj thiab nug hais tias, “Peb yuav ua li cas rau lub Phijxab uas ntim Vajtswv tej lus cog tseg no? Yog peb xa rov qab, peb yuav muab dabtsi xa nrog mus?” Lawv teb hais tias, “Yog nej yuav xav lub Phijxab uas ntim cov Yixalayees tus Vajtswv tej lus cog tseg rov qab, nej yuav tsum muab ib co khoom xa nrog mus daws nej tej kev txhaum. Tsis txhob xa lub Phijxab rov mus dawb mus do. Nej ua li no, nej tej mob thiaj yuav zoo, thiab nej thiaj yuav paub hais tias, vim li cas tus TSWV thiaj rau txhim rau nej.” Cov pejxeem nug hais tias, “Peb yuav muab dabtsi mus rau nws?” Lawv teb hais tias, “Muab tsib thooj kub ua kom zoo li tsib lub faj thiab tsib tug nas tsuag, ib tug nas tsuag kub thiab ib lub faj kub rau cov Filitees ib tug vajntxwv. Rau qhov tib yam mob no kis rau nej thiab nej tsib tug vajntxwv ntawd. Nej yuav tsum muab kub nchuav ua kom zoo li cov faj thiab zoo li cov nas tsuag uas tsimtxom nej lub tebchaws, thiab nej yuav tsum hwm cov Yixalayees tus Vajtswv. Tej zaum nws yuav tsis rau txim rau nej, nej tej vajtswv thiab nej lub tebchaws. Vim li cas nej lub siab tawv ib yam li Falaus uas kav tebchaws Iziv thiab cov Iziv? Nej tsis nco hais tias tom qab uas Vajtswv rau txim hnyav rau lawv, lawv thiaj tso cov Yixalayees tawm hauv tebchaws Iziv mus los? Yog li ntawd, nej txua ib lub tsheb nyuj tshiab thiab muab ib nkawm maum nyuj uas tsis tau luag dua tsheb li; muab ob tug maum nyuj ntawd luag lub tsheb thiab muab ob tug menyuam cais rau hauv nkuaj. Muab lub Phijxab uas ntim Vajtswv tej lus cog tseg tsaws rau saum lub tsheb nyuj, muab cov nas tsuag kub thiab cov faj kub uas nej npaj mus daws nej tej kev txhaum tso rau ntawm lub phijxab ib sab, thiab tso ob tug maum nyuj luag lub tsheb ntawd mus. Nej saib, yog ob tug nyuj ntawd luag lub tsheb mus rau hauv lub nroog Npethes Semes; ces yog cov Yixalayees tus Vajtswv tso kev puastsuaj loj kawg nkaus los rau peb. Tiamsis yog ob tug nyuj tsis luag lub tsheb mus rau hauv, ces paub hais tias tsis yog nws tso kab mob los rau peb; tsuas yog peb raug mob tom thawj xwb.” Ces lawv txawm ua li ntawd; lawv thiaj muab ib nkawm maum nyuj los thiab tis lub tsheb rau, thiab muab ob tug menyuam kaw rau hauv nkuaj. Lawv muab lub Phijxab uas ntim Vajtswv tej lus cog tseg thiab lub thawv uas ntim cov nas tsuag kub thiab cov faj kub tsaws rau saum lub tsheb nyuj. Ces ob tug maum nyuj txawm taug txoj niam kev ncaj nraim mus rau hauv lub nroog Npethes Semes, too hau ntsoov tsis lem mus rau sab laug lossis sab xis li. Cov Filitees tsib tug vajntxwv raws ob tug maum nyuj ntawd qab mus txog ntua ntawm lub nroog Npethes Semes tus ciamteb. Thaum ntawd, cov neeg hauv lub nroog Npethes Semes tabtom hlais nplej hauv lub zeeg tiaj teb, tos nco lawv pom dheev lub Phijxab uas ntim Vajtswv tej lus cog tseg, lawv zoo siab heev. Lub tsheb nyuj los txog rau ntawm ib tug txivneej uas hu ua Yausuas uas nyob hauv lub nroog Npethes Semes thaj teb thiab los nres ze rau ntawm ib lub pobzeb loj. Ces lawv txawm muab lub tsheb nyuj phua ua taws thiab muab ob tug maum nyuj tua hlawv fij rau tus TSWV. Cov Levis tsaws lub Phijxab uas ntim Vajtswv tej lus cog tseg thiab lub thawv uas ntim cov nas tsuag kub thiab cov faj kub los txawb rau saum lub pobzeb loj ntawd. Ces cov neeg hauv lub nroog Npethes Semes thiaj tua tsiaj hlawv fij thiab muab lwm yam fij rau tus TSWV. Cov Filitees tsib tug vajntxwv saib ntsoov cov Yixalayees ua li ntawd, ces hnub ntawd, cov Filitees tsib tug vajntxwv txawm rov qab los rau lub nroog Ekiloos lawm. Cov Filitees xa tau tsib lub faj kub mus fij rau tus TSWV daws lawv tej kev txhaum, ib lub rau lub nroog Asedaus, ib lub rau lub nroog Nkaxas, ib lub rau lub nroog Asekeloos, ib lub rau lub nroog Nkas, thiab ib lub rau lub nroog Ekiloos; thiab tsis tug nas tsuag kub, rau cov Filitees tsib tug vajntxwv uas kav cov nroog uas muaj ntsa yeej thaiv thiab tej zos uas tsis muaj ntsa yeej thaiv. Lub pobzeb loj uas luag txawb lub Phijxab uas ntim Vajtswv tej lus cog tseg rau saud, tseem nyob hauv Yausuas uas nyob hauv lub nroog Npethes Semes thaj teb los txog niaj hnub no, ua timkhawv qhia hais tias muaj tej xwm no tiag. Tus TSWV tua cov txivneej uas nyob hauv lub nroog Npethes Semes tuag xya caum leej, rau qhov lawv mus xauj lub Phijxab uas ntim Vajtswv tej lus cog tseg. Tej neeg quaj ntsuag, rau qhov tus TSWV tua lawv cov neeg tuag ntau leej. Yog li ntawd, cov neeg hauv lub nroog Npethes Semes hais tias, “Leejtwg thiaj muaj cuabkav sawv tabmeeg tus TSWV uas yog tus Vajtswv dawbhuv? Peb yuav muab nws xa mus tso rau qhov twg, kom nws nyob nrug deb ntawm peb?” Lawv thiaj tso neeg mus hais rau cov neeg hauv lub nroog Kili-as Ye-alees hais tias, “Cov Filitees twb xa lub Phijxab uas ntim Vajtswv tej lus cog tseg rov tuaj lawm. Nej cia li tuaj kwv mus.” Yog li ntawd, cov neeg hauv lub nroog Kili-as Ye-alees thiaj tuaj kwv lub Phijxab uas ntim Vajtswv tej lus cog tseg mus tso rau hauv Anpinadas lub tsev saum laj roob. Lawv muab Anpinadas tus tub Ele-axas ua kevcai ntxuav thiab tsa nws ua tus saib lub phijxab. Lub Phijxab uas ntim Vajtswv tej lus cog tseg nyob hauv lub nroog Kili-as Ye-alees tau ntev loo, kwvlam li nees nkaum xyoo. Lub sijhawm ntawd cov Yixalayees quaj thov tus TSWV pab lawv. Xamuyees hais rau cov Yixalayees hais tias, “Yog nej rov muab siab npuab tus TSWV tiag, nej yuav tsum tso lwm haivneeg tej vajtswv thiab tus mlom pojniam Atates tseg. Muab nej fij rau tus TSWV thiab pehawm nws tib leeg xwb, nws thiaj yuav cawm nej dim ntawm cov Filitees txhais tes.” Yog li ntawd, cov Yixalayees thiaj muab lawv tus mlom Npa-as thiab tus mlom pojniam Atates tso tseg thiab pehawm tus TSWV tib leeg lawm xwb. Xamuyees hu tagnrho cov Yixalayees tuaj txoos ua ke rau hauv lub nroog Mixepas thiab hais rau lawv hais tias, “Kuv yuav thov tus TSWV pab nej.” Yog li ntawd, cov Yixalayees thiaj tuaj sib sau rau hauv lub nroog Mixepas. Lawv mus ce dej los hliv fij rau tus TSWV thiab ua kevcai yoo mov ib hnub tsaus ntuj ntais. Lawv lees hais tias, “Peb tau ua txhaum rau tus TSWV lawm tiag.” (Xamuyees pib tu plaub rau cov Yixalayees hauv lub nroog Mixepas.) Thaum cov Filitees hnov hais tias, cov Yixalayees tuaj sib sau rau hauv lub nroog Mixepas, cov Filitees tsib tus vajntxwv txawm txhij tubrog tuaj tua cov Yixalayees. Thaum cov Yixalayees hnov li ntawd, lawv ntshai heev, thiab lawv hais rau Xamuyees hais tias, “Koj cia li thov tus TSWV uas yog peb tus Vajtswv pab peb, peb thiaj tsis poob rau cov Filitees tes.” Xamuyees muab ib tug menyuam yaj tua hlawv tagnrho fij rau tus TSWV. Nws thov tus TSWV pab cov Yixalayees, thiab tus TSWV teb nws tej lus thov. Thaum Xamuyees tabtom hlawv tsiaj fij rau tus TSWV, cov Filitees twb tuaj ze thiab yuav tua cov Yixalayees lawm; tiamsis tamsim ntawd tus TSWV ua rau xob nroo nrov nroo ntws saum ntuj tuaj rau cov Filitees. Ua rau lawv xav tsis thoob thiab khiav tas rov qab mus tsev lawm. Cov Yixalayees txhij tubrog hauv lub nroog Mixepas caum tua cov Filitees taug kev mus yuav luag txog lub nroog Npethekas. Xamuyees muab ib lub pobzeb los teeb rau ntu nruab nrab ntawm lub nroog Mixepas thiab lub nroog Sees thiab hais tias, “Tus TSWV pab peb los txog ntawm no,” nws thiaj tis lub pobzeb ntawd npe hu ua “Pobzeb Cawm Siav.” Yog li ntawd, cov Filitees thiaj swb cov Yixalayees, thiab tus TSWV tsis pub cov Filitees hla cov Yixalayees tus ciamteb tuaj tua lawv mus tas Xamuyees simneej. Cov Yixalayees txeeb tau tagnrho tej nroog uas cov Filitees txeeb tau lawm, txij ntua lub nroog Ekiloos mus rau lub nroog Nkas rov los; yog li ntawd, cov Yixalayees thiaj tau tagnrho lawv cheebtsam av rov los ua lawv tug. Cov Yixalayees thiab cov Kana-as thiaj nyob sib haumxeeb tsis ua tsov tsis ua rog lawm. Xamuyees kav cov Yixalayees mus tas nws simneej li. Nws niaj xyoo mus tu sawvdaws tej plaub ntug uas tsis sib haum hauv lub nroog Npethees, lub nroog Nkilenkas thiab lub nroog Mixepas. Tom qab ntawd, nws mam li rov los tsev rau hauv lub nroog Lamas, nws ua tus tu plaub ntug hauv lub nroog ntawd thiab. Xamuyees ua tau ib lub thaj rau hauv lub nroog Lamas rau tus TSWV. Thaum Xamuyees laus heev lawm, nws tsa nws ob tug tub tu plaub ntug rau cov Yixalayees. Tus tub hlob hu ua Yau-ees thiab tug tub yau hu ua Anpiyas; nkawd tu plaub ntug hauv lub nroog Npesenpas. Tiamsis nkawd tsis ua lub neej zoo li nkawd txiv; nkawd tsuas ntshaw txojkev nrhiav nyiaj xwb, nkawd thiaj yuav tej nyiaj uas luag coj tuaj xiab, thiab nkawd tsis tu plaub kom ncaj rau sawvdaws. Cov Yixalayees cov thawjcoj tuaj sib sau, thiab mus cuag Xamuyees hauv lub nroog Lamas, thiab hais rau nws hais tias, “Nimno koj laus heev lawm, koj ob tug tub tsis coj thiab ua raws li koj ua. Yog li ntawd, thov koj tsa ib tug vajntxwv kav peb, kom peb muaj vajntxwv ib yam li luag lwm haivneeg muaj thiab.” Xamuyees tsis pom zoo qhov uas cov Yixalayees thov nws tsa ib tug vajntxwv kav lawv; yog li ntawd, Xamuyees thiaj thov tus TSWV, thiab tus TSWV teb hais tias, “Koj ua tib zoo mloog tej lus uas cov pejxeem hais rau koj. Lawv tsis yog tso koj tseg xwb; tiamsis lawv tso kuv uas yog lawv tus vajntxwv tseg lawm. Txij thaum kuv coj lawv tawm nram tebchaws Iziv los, lawv yeej tsis muab siab npuab kuv thiab pheej mus pe lwm haivneeg tej vajtswv; nimno lawv tabtom ua rau koj ib yam li lawv ua rau kuv ntag. Koj cia li uas raws li lawv thov, tiamsis koj yuav tsum ntuas lawv tawv qhawv thiab qhia kom lawv paub hais tias, cov vajntxwv ntawd yuav kav lawv li cas.” Xamuyees thiaj qhia txhua yam rau cov pejxeem uas tuaj thov nws tsa ib tug vajntxwv kav lawv, raws li tej lus uas tus TSWV hais rau Xamuyees lawm. Xamuyees hais rau lawv hais tias, “Nej tus vajntxwv yuav kav nej li no: nws yuav coj nej tej tub mus ua tubrog; ibtxhia yuav ua tubrog tsav tsheb nees, ibtxhia yuav ua tubrog caij nees thiab ibtxhia yuav khiav ua vajntxwv tej tsheb nees ntej. Nws yuav tsa ibtxhia saib ib txhiab leej thiab ibtxhia saib tsib caug leej. Nej cov tub yuav mus laij nws tej liaj tej teb thiab sau nws tej qoobloo, lawv yuav ntaus ntaj ntau riam thiab ntaus cuabyeej ua rog tiv thaiv nws tej tsheb nees. Nej tej ntxhais yuav mus tov tshuaj tsw qab rau nws, ua zaub mov thiab ci ncuav rau nws noj. Nws yuav txeeb nej tej liaj tej teb uas zoo, tej vaj txiv hmab thiab txiv ntoo roj rau nws cov nomtswv yuav. Nws yuav sau nej tej qoobloo thiab tej txiv hmab ib feem kaum rau nws cov thawj tubrog thiab cov nomtswv. Nws yuav txeeb nej tej tubtxib, tej nyuj thiab tej neesluav uas zoo mus ua nws tej haujlwm. Nws yuav sau nej tej tsiaj txhu ib feem kaum rau nws yuav, thiab nej yuav tau ua nws qhev. Thaum ntawd, nej yuav cem thiab yws nej tus vajntxwv uas nej xaiv, tiamsis tus TSWV yuav tsis mloog nej tej lus yws li.” Cov pejxeem tsis mloog Xamuyees hais li, lawv hais tias, “Peb tsis mloog koj hais! Peb xav tau ib tug vajntxwv kom peb thiaj yuav zoo ib yam li luag lwm haivneeg, peb tus vajntxwv yuav kav peb, coj peb mus tua rog thiab tawmtsam peb cov yeebncuab.” Xamuyees mloog tej lus uas lawv hais ntawd, nws coj zaj no mus piav qhia rau tus TSWV. Tus TSWV teb hais tias, “Koj cia li ua raws li lawv thov thiab tsa ib tug vajntxwv rau lawv.” Ces Xamuyees thiaj kom cov Yixalayees rov qab mus tsev. Muaj ib tug txivneej uas yog xeem Npeenyamees hu ua Kises; nws yog Anpiyees tus tub thiab yog Xelaus tus xeebntxwv. Kises yog Npekaulas tsevneeg thiab yog Afiyas cuab, Kises yog ib tug neeg npluanuj thiab muaj koob meej nto moo lug. Nws muaj ib tug tub hu ua Xa-ules uas zoo nraug ntxiag thiab muaj zog khov kho. Xa-ules siab thiab zoo nraug tshaj cov Yixalayees txhua tus huv tibsi. Muaj ib hnub Kises cov neesluav ibtxhia ploj lawm, nws txawm hais rau Xa-ules hais tias, “Koj coj ib tug tubtxib nrog koj mus nrhiav cov neesluav.” Nkawd mus nrhiav thoob plaws saum lub laj roob Efalayees thiab hauv cheebtsam Salisas, tiamsis tsis pom cov neesluav li; yog li ntawd, nkawd thiaj mus nrhiav hauv cheebtsam Sa-alees los tsis pom cov neesluav li. Ces nkawd thiaj mus nrhiav thoob plaws hauv cheebtsam Npeenyamees, tiamsis tsis pom li thiab. Thaum nkawd los txog hauv cheebtsam Xufes, Xa-ules hais rau nws tus tubtxib hais tias, “Wb cia li rov mus tsev, tej zaum kuv txiv yuav txhawj wb tshaj txhawj cov neesluav lawm.” Tus tubtxib teb hais tias, “Tos mentsis tso, nyob hauv lub nroog no muaj ib tug txivneej yog Vajtswv tug neeg uas sawvdaws hwm heev, nws hais li cas txawm muaj raws li ntawd. Wb cia li mus cuag nws, tej zaum nws yuav qhia kev rau wb mus nrhiav tau cov neesluav.” Xa-ules nug hais tias, “Yog wb mus cuag nws, wb yuav coj dabtsi mus rau nws? Wb cov ncuav hauv hnab los tas lawm, wb twb tsis muaj dabtsi coj mus rau nws li ne?” Tus tubtxib teb hais tias, “Kuv muaj ib npib nyiaj. Kuv mam muab npib nyiaj no rau nws, ces nws yuav qhia kev rau wb mus nrhiav tau cov neesluav ntawd.” Yog li ntawd, Xa-ules thiab nws tus tubtxib thiaj mus rau hauv lub nroog, thaum nkawd tabtom mus, nkawd pom Xamuyees taug kev ncaj nraim tuaj rau ntawm nkawd, yuav mus rau ntawm qhov chaw uas pehawm tus TSWV. Ua ntej hnub uas Xamuyees tsis tau mus rau hauv lub nroog, tus TSWV twb xub hais rau Xamuyees lawm hais tias, “Tagkis thaum tav lub caij no, kuv yuav txib ib tug neeg uas yog xeem Npeenyamees tuaj cuag koj; koj cia li muab roj hliv rau nws taubhau tsa nws ua vajntxwv kav kuv haivneeg Yixalayees, thiab nws yuav cawm kom lawv dim ntawm cov Filitees txhais tes. Kuv twb pom kuv haivneeg tej kev txomnyem thiab hnov lawv tej lus thov lawm.” Thaum Xamuyees pom dheev Xa-ules, tus TSWV txawm hais rau Xamuyees hais tias, “Tus txivneej no yog tus uas kuv qhia rau koj ntag. Nws yog tus yuav kav kuv haivneeg.” Xa-ules mus rau ntawm Xamuyees thaum nws nyob ze lub roojvag thiab nug hais tias, “Koj puas paub tus uas paub saib yav tom ntej nyob qhov twg? Thov koj qhia rau kuv.” Xamuyees teb hais tias, “Tus uas paub saib yav tom ntej yog kuv ntag. Neb cia li ua kuv ntej mus rau pem lub chaw pehawm Vajtswv. Hnub no neb mus nrog kuv noj mov ped. Tagkis sawv ntxov kuv mam teb neb tej lus nug, thiab neb mam rov mus tsev. Neb tsis txhob txhawj txog cov neesluav uas twb ploj tau peb hnub lawm; rau qhov luag twb nrhiav tau lawm. Tiamsis tus twg yog tus uas cov Yixalayees xav yuav heev dua? Lawv xav yuav koj thiab koj txiv tsevneeg ntag.” Xa-ules teb hais tias, “Kuv yog xeem Npeenyamees, yog xeem uas tsawg tshaj plaws ntawm haivneeg Yixalayees, thiab kuv tsevneeg yog tsev uas tsis tseemceeb li luag lwm tsev uas yog peb xeem Npeenyamees, ua li cas koj hais li ko rau kuv?” Xamuyees coj Xa-ules thiab Xa-ules tus tubtxib mus rau hauv chav tsev loj, thiab kom nkawd mus zaum pem hau rooj uas yog tshwj rau cov qhua, tagnrho cov neeg uas tuaj ntawd muaj kwvlam li peb caug leej. Xamuyees hais rau tus ua zaub ua mov hais tias, “Koj mus nqa cov nqaij uas kuv kom koj muab khaws tshwj tseg rau ib qho ntawd los.” Yog li ntawd, tus uas ua zaub ua mov txawm mus nqa cegqab uas muab tshwj tseg ntawd los tso rau ntawm Xa-ules xubntiag. Xamuyees hais tias, “Cov nqaij no yog kuv tseg rau koj. Koj cia li noj. Cov nqaij no tseg rau koj noj thaum lub sijhawm no nrog cov qhua uas kuv caw tuaj.” Yog li hnub ntawd, Xa-ules thiaj nrog Xamuyees noj mov ua ke. Thaum lawv rov ntawm qhov chaw pehawm Vajtswv los txog rau hauv lub nroog, lawv kho chaw rau Xa-ules pw txheej tsev saud, thiab nws txawm mus pw saud. Thaum kaj ntug, Xamuyees hu Xa-ules uas pw txheej saud hais tias, “Cia li sawv, kuv yuav xa koj rov mus tsev.” Xa-ules sawv thiab nrog Xamuyees tawm mus rau tom kev. Thaum lawv mus txog ntawm ntug nroog, Xamuyees hais rau Xa-ules hais tias, “Koj kom tus tubtxib mus ua wb ntej.” Thaum tus tubtxib mus lawm, Xamuyees hais tias, “Wb nyob ntawm no ib pliag tso, kuv yuav qhia rau koj hais tias, Vajtswv hais li cas rau kuv.” Xamuyees txawm muab hwj roj hliv rau Xa-ules taubhau, nwj nws thiab hais tias, “Tus TSWV tsa koj ua tus kav nws haivneeg Yixalayees. Koj yuav kav nws haivneeg thiab cawm kom lawv dim ntawm lawv cov yeebncuab txhais tes. Zaj uas kuv hais qhia rau koj no yuav ua rau koj paub hais tias, tus TSWV tau xaiv koj ua tus kav nws haivneeg. Hnub no thaum koj ncaim kuv mus lawm, koj yuav ntsib ob tug txivneej ze Laxees lub ntxa ntawm Xelexas hauv xeem Npeenyamees cheebtsam av. Nkawd yuav qhia rau koj hais tias, luag twb nrhiav tau cov neesluav uas koj tuaj nrhiav lawm. Koj txiv tsis txhawj txog cov neesluav, tiamsis nws txhawj koj heev, nws nroo hais tias, ‘Xyov kuv tus tub mus dua qhov twg lawm, kuv yuav ua li cas thiaj zoo?’ Thaum koj dhau ntawd mus txog ntawm tsob ntoo xeeb pem Tanpaules, koj yuav ntsib peb tug txivneej tabtom coj khoom tuaj fij rau Vajtswv pem lub nroog Npethees. Peb tug txivneej ntawd, ib tug cab ib tug thav tshis, ib tug nqa peb lub ncuav thiab ib tug nqa ib hnab tawv cawv txiv hmab. Lawv yuav hawm koj thiab muab ob lub ncuav rau koj, koj cia li txais ob lub ncuav ntawd. Dhau ntawd mus, thaum koj mus txog saum Vajtswv lub Roob ntawm lub nroog Nkinpe-as, qhov chaw uas cov Filitees tsuam yeej. Koj yuav ntsib ib pab cevlus ntawm lub roojvag nroog, lawv tabtom ntaus nkauj nogncas loj, ntaus nruas npuaj, tshuab raj thiab ntaus nkauj nogncas me, nqis saum roob uas teeb lub thaj fij los. Lawv seevcev thiab qw zoo siab heev. Thaum ntawd, tus TSWV tus ntsujplig yuav los kav hlo koj lub siab, koj yuav nrog lawv seevcev, qw zoo siab thiab koj lub siab yuav hloov hlo tsis thooj li qub lawm. Thaum muaj tej xwmtxheej no tshwm, koj yuav ua txhua yam raws li Vajtswv qhia rau koj ua. Koj yuav ua kuv ntej mus rau hauv lub nroog Nkilenkas, kuv yuav tuaj ntsib koj nrad thiab muab tsiaj tua hlawv fij thiab fij khoom ua kev sib raug zoo rau tus TSWV. Koj nyob xya hnub tos kom kuv tuaj txog, kuv mam qhia rau koj paub hais tias koj yuav tsum ua dabtsi.” Thaum Xa-ules yuav ncaim Xamuyees mus, Vajtswv twb hloov Xa-ules lub siab dua tshiab lawm. Hnub ntawd txawm muaj txhua yam tshwm raws li Xamuyees tau hais rau Xa-ules lawm. Thaum Xa-ules thiab nws tus tubtxib los txog hauv lub nroog Nkinpe-as, muaj ib pab cevlus txawm tuaj ntsib Xa-ules. Tamsim ntawd Vajtswv tus ntsujplig los kav hlo Xa-ules lub siab, nws thiaj nrog lawv dhia seevcev thiab qw zoo siab. Thaum cov neeg uas ibtxwm paub Xa-ules pom nws ua li ntawd, lawv txawm sib nug hais tias, “Dabtsi ua rau Kises tus tub ua li ntawd? Xa-ules txawm cia li ua ib tug cevlus lawm thiab los?” Muaj ib tug txivneej nyob hauv lub nroog ntawd nug hais tias, “Cov cevlus ntawd ne, lawv txiv ho yog leejtwg?” Twb yog vim li no, sawvdaws thiaj hais tias, “Xa-ules txawm ua ib tug cevlus lawm thiab los?” Thaum Xa-ules seevcev thiab qw zoo siab li ntawd tas, nws txawm mus rau pem lub thaj uas nyob saum lub laj roob lawm. Xa-ules tus txiv hlob pom Xa-ules thiab Xa-ules tus tubtxib, nws nug nkawd hais tias, “Neb mus qhov twg los?” Xa-ules teb hais tias, “Wb mus nrhiav neesluav los, wb nrhiav tsis tau, ces wb txawm mus cuag Xamuyees lawm.” Xa-ules tus txiv hlob nug hais tias, “Nws hais li cas rau neb?” Xa-ules teb hais tias, “Nws hais rau wb hais tias, luag twb nrhiav tau cov neesluav lawm.” Tiamsis Xa-ules tsis qhia rau nws txiv hlob paub txog qhov uas Xamuyees hais tias, Xa-ules yuav tau ua vajntxwv li. Xamuyees hu cov pejxeem tuaj sib sau pehawm tus TSWV hauv lub nroog Mixepas, nws hais rau lawv hais tias, “Tus TSWV uas yog cov Yixalayees tus Vajtswv hais tias, ‘Kuv coj nej tawm nram tebchaws Iziv los thiab cawm nej dim ntawm cov neeg Iziv thiab lwm haivneeg uas tsimtxom nej. Kuv yog nej tus Vajtswv uas cawm nej dim ntawm nej txojkev txomnyem nyuaj siab, tiamsis hnub no nej tso kuv tseg thiab thov kom kuv tsa ib tug vajntxwv kav nej. Yog li ntawd, nej txhua xeem thiab txhua cuab cia li tuaj sib sau tabmeeg tus TSWV.’ ” Xamuyees hu ib xeem zuj zus los, ces tus TSWV xaiv xeem Npeenyamees. Xamuyees hu xeem Npeenyamees ib tsev zuj zus los, ces tus TSWV xaiv Matis tsevneeg. Thaum Matis tsevneeg cov txivneej los, ces tus TSWV xaiv Kises tus tub Xa-ules. Sawvdaws nrhiav nws, tiamsis tsis pom nws nyob qhov twg, lawv nug tus TSWV hais tias, “Nws tuaj ntawm no los tsis tuaj?” Tus TSWV teb hais tias, “Xa-ules khiav nkaum tom qab cov hnab rau khoom.” Yog li ntawd, lawv thiaj mus coj Xa-ules los cuag sawvdaws, thiab lawv pom hais tias Xa-ules siab tshaj sawvdaws huv tibsi. Xamuyees hais rau sawvdaws hais tias, “Tus txivneej no yog tus uas tus TSWV xaiv! Peb cov no tsis muaj ib tug zoo li nws li.” Thiab sawvdaws qw hais tias, “Thov kom vajntxwv muaj sia nyob ntev!” Xamuyees qhia vajntxwv tes haujlwm tej uas vajntxwv muaj cai ua rau cov pejxeem sawvdaws paub, thiab nws muab tej ntawd sau cia rau hauv ntawv coj mus khaws tseg rau hauv chav uas pehawm Vajtswv. Ces Xamuyees txawm kom sawvdaws rov mus tsev. Xa-ules los rov mus tsev rau pem lub nroog Nkinpe-as lawm. Cov nomtswv uas muaj hwjchim uas Vajtswv tshoov siab lawm los kuj nrog Xa-ules mus thiab. Tiamsis muaj qee leej uas tsis thoob tsib to nrog hais tias, “Tus txivneej no yuav pab tau peb li cas?” Lawv hais lus saib tsis taus Xa-ules thiab tsis muab ib yam dabtsi rau nws li. Tau ib hlis tom qab, Vajntxwv Nahas uas kav tebchaws Amoos coj nws cov tubrog tuaj vij thiab tua lub nroog Yanpes hauv cheebtsam Nkile-as. Cov neeg hauv lub nroog Yanpes hais rau Nahas hais tias, “Thov koj coglus rau peb, peb yuav cia koj kav peb.” Nahas teb hais tias, “Kuv coglus rau nej los tau, tiamsis cia kuv muab nej txhua tus lub qhovmuag sab xis kaus povtseg tso, kuv mam coglus kom cov Yixalayees poob ntsejmuag huv tibsi.” Cov thawjcoj hauv lub nroog Yanpes teb hais tias, “Thov ncua sijhawm xya hnub rau peb, peb txib neeg mus hais thoob plaws tebchaws Yixalayees. Yog tsis muaj leejtwg pab peb, peb mam swb koj.” Thaum cov neeg xa xov mus txog hauv lub nroog Nkinpe-as uas Xa-ules nyob, thiab lawv qhia tej xwm no rau sawvdaws, ua rau sawvdaws ntshai thiab tsa suab hlo quaj. Thaum ntawd Xa-ules tabtom cab nws tus heev nyuj nram teb los, nws nug hais tias, “Muaj xwm dabtsi? Vim li cas sawvdaws yuav quaj zom zaws li no?” Lawv thiaj piav qhov uas cov neeg xa xov pem lub nroog Yanpes tuaj ntawd rau Xa-ules mloog. Thaum Xa-ules hnov tej xwm ntawd, Vajtswv tus ntsujplig los kav hlo Xa-ules siab, nws thiaj npautaws heev. Nws muab ob tug heev nyuj tua kiag, txiav ua tej thooj, thiab muab rau ib co neeg xa mus thoob plaws lub tebchaws Yixalayees, thiab hais rau sawvdaws hais tias, “Yog leejtwg tsis nrog Xa-ules thiab Xamuyees mus tua rog, yuav muab tus ntawd cov heev nyuj tua thiab txiav ua tej thooj li no!” Cov Yixalayees ntshai nyob tsam tus TSWV ua li cas rau lawv, lawv thiaj koom ua ib lub siab tuaj ua ke. Xa-ules kom sawvdaws tuaj sib sau rau hauv Npexes; cov Yixalayees muaj peb puas txhiab leej thiab cov Yudas muaj peb caug txhiab leej. Lawv hais rau cov neeg uas xa xov pem lub nroog Yanpes tuaj hais tias, “Nej cia li rov mus hais rau nej cov neeg paub hais tias, tagkis peb yuav tuaj pab kom tau nej ua ntej tavsu.” Thaum cov neeg hauv Yanpes hnov li ntawd, lawv zoo siab heev thiab hais rau Nahas hais tias, “Tagkis peb mam li ua ib siab swb koj, koj yuav ua li cas rau peb los tau.” Tagkis kaj ntug txoog Xa-ules muab cov tubrog faib ua peb pab, lawv txawm mos tsaus tsi mus tua cov Amoos hauv lawv lub yeej thiab lawv sib tua ib tavsu, Xa-ules cov tubrog tua cov Amoos tuag coob heev. Cov uas seem tuag, nyias taus nyias huas kev khiav lawm. Cov Yixalayees hais rau Xamuyees hais tias, “Cov neeg uas hais tias, puas tsimnyog cia Xa-ules ua vajntxwv kav peb, cov neeg ntawd nyob qhov twg lawm? Cia li ntes lawv los rau peb, peb yuav muab tua povtseg!” Tiamsis Xa-ules teb hais tias, “Hnub no tsis txhob muab ib tug twg tua povtseg, rau qhov hnub no yog hnub uas tus TSWV cawm cov Yixalayees dim.” Ces Xamuyees hais rau lawv hais tias, “Peb cia li mus rau hauv lub nroog Nkilenkas thiab qhia rau sawvdaws paub ib zaug ntxiv hais tias, Xa-ules yog peb tus vajntxwv.” Yog li ntawd, lawv sawvdaws thiaj mus rau ntawm qhov chaw pehawm Vajtswv hauv lub nroog Nkilenkas, thiab qhia rau cov pejxeem sawvdaws paub hais tias Xa-ules yog vajntxwv. Lawv muab tsiaj tua hlawv fij rau tus TSWV ua kev sib raug zoo, Xa-ules thiab cov Yixalayees noj haus zoo siab kawg li. Xamuyees hais rau cov Yixalayees hais tias, “Kuv twb ua tiav raws li nej thov thiab tsa tau ib tug vajntxwv kav nej, thiab nimno nws yuav ua tus coj nej. Kuv laus plaubhau dawb tas lawm, kuv tej menyuam puavleej nrog nej nyob. Kuv coj nej thaum kuv tseem hluas los txog niaj hnub no. Cheem kuv tseem nyob ntawm no. Yog yav tas los kuv tau ua txhaum qhov twg, ces nej cia li nkaug kuv rau tus TSWV thiab tus vajntxwv uas tus TSWV xaiv. Kuv puas tau nyiag nej leejtwg tus nyuj lossis tus neesluav? Kuv puas tau ua tsis ncaj lossis tsimtxom nej leejtwg? Kuv puas tau yuav nej leejtwg tej nyiaj xiab? Yog kuv tau ua tej no lawm, kuv yuav them tej ntawd huv tibsi rov qab.” Cov pejxeem teb hais tias, “Koj yeej tsis tau ua tsis ncaj lossis tsimtxom peb li; koj tsis tau muab leejtwg ib yam dabtsi li.” Xamuyees teb hais tias, “Hnub no muaj tus TSWV thiab tus vajntxwv uas tus TSWV xaiv nrog ua timkhawv hais tias, nej yeej tsis pom kuv ua ib qho txhaum li.” Lawv teb hais tias, “Muaj tus TSWV ua peb sawvdaws tus timkhawv.” Xamuyees hais ntxiv hais tias, “Tus TSWV yog tus uas xaiv Mauxes thiab Aloos, thiab nws coj nej cov yawgkoob tawm nram tebchaws Iziv los. Nimno nej nyias cia li sawv ntawm nyias qhov chaw, kuv yuav nkaug nej rau tus TSWV, kom nej nco txog tej txujci tseemceeb uas tus TSWV tau ua pab nej thiab nej cov yawgkoob lawm. Thaum ub Yakhauj tau coj nws tsevneeg mus nyob nram tebchaws Iziv thiab cov Iziv tau tsimtxom lawv, nej cov yawgkoob tau tsa ncauj thov tus TSWV pab lawv. Tus TSWV thiaj txib Mauxes thiab Aloos coj lawv tawm nram tebchaws Iziv los nyob hauv lub tebchaws no. Tiamsis lawv tsis nco txog tus TSWV uas yog lawv tus Vajtswv lawm, tus TSWV thiaj muab lawv cob rau cov Filitees txhais tes, thiab cob rau tus vajntxwv uas kav tebchaws Mau-am txhais tes, thiab cob rau Xixelas uas yog Vajntxwv Yanpees tus thawj tubrog hauv lub nroog Haxaules txhais tes, lawv thiaj tuaj ua rog rau nej cov yawgkoob. Lawv thiaj tsa ncauj thov tus TSWV hais tias, ‘Tus TSWV, peb ua txhaum lawm, rau qhov peb tau tso koj tseg thiab mus pe tus mlom Npa-as thiab tus mlom pojniam Atates. Thov koj pab kom peb dim ntawm peb cov yeebncuab txhais tes, peb yuav pehawm koj tib leeg xwb!’ Tus TSWV thiaj tsa Nkide-oos thiab tsa Npalaj, thiab tsa Yefethas, thiab tsa kuv ua tus kawg. Peb tau pab nej dim ntawm nej cov yeebncuab txhais tes, nej thiaj tau nyob kaj siab lug. Tiamsis thaum nej pom Vajntxwv Nahas uas kav tebchaws Amoos tabtom tuaj tua nej, nej txawm tso tus TSWV uas yog nej tus vajntxwv tseg thiab hais rau kuv hais tias, ‘Peb xav tau ib tug vajntxwv los kav peb.’ “Tus vajntxwv uas nej xaiv, nws nrog nej nyob ntawm no; nej thov tus TSWV kom tsa ib tug vajntxwv rau nej, nimno tus TSWV twb pub rau nej muaj lawm. Yog nej hwm tus TSWV uas yog nej tus Vajtswv, ua nws tes haujlwm, mloog nws lus thiab ua raws li nws tej lus samhwm, nej thiab nej tus vajntxwv thiaj li yuav vammeej. Tiamsis yog nej tsis mloog tus TSWV lus thiab tsis ua raws li nws tej lus samhwm, nws yuav tawmtsam nej thiab nej tus vajntxwv. Yog li ntawd, nej sawvdaws nyias sawv ntawm nyias qhov chaw, nej yuav pom ib yam txujci tseemceeb uas tus TSWV ua. Nimno yog lub caij ntuj qhua los tsis yog? Tiamsis kuv yuav thov tus TSWV ua kom xob nroo thiab tso nag los. Thaum nej pom tej no lawm, nej yuav paub hais tias qhov uas nej thov tus TSWV tsa ib tug vajntxwv kav nej, yog nej ua txhaum rau tus TSWV lawm.” Yog li ntawd, Xamuyees thiaj thov tus TSWV thiab hnub ntawd tus TSWV ua rau xob nroo thiab tso nag los. Sawvdaws ntshai tus TSWV thiab Xamuyees kawg li, thiab lawv hais rau Xamuyees hais tias, “Thov koj thov tus TSWV uas yog koj tus Vajtswv pab peb, peb thiaj yuav tsis tuag. Nimno peb paub hais tias tsis yog peb ua lwm yam kev txhaum xwb, tiamsis peb tseem thov kom Vajtswv tsa ib tug vajntxwv kav peb thiab, qhov ntawd yeej yog peb ua txhaum lawm tiag.” Xamuyees teb hais tias, “Nej tsis txhob ntshai, txawm yog nej tau ua txhaum li ntawd lawm los nej tsis txhob tso tus TSWV tseg, tiamsis nej yuav tsum ua nws tej haujlwm kom kawg siab kawg ntws. Tsis txhob mus pe tej vajtswv cuav; tej ntawd yeej pab tsis tau lossis cawm tsis tau nej li, rau qhov tej ntawd yog vajtswv cuav xwb. Tus TSWV coglus tseg hais tias, nws yuav tsis tso nej tseg ib zaug li, rau qhov nws pom zoo xaiv nej ua nws haivneeg lawm. Tus TSWV kom kuv nco ntsoov thov nws tsis tseg pab nej, yog kuv tsis thov nws pab nej, ces yog kuv ua txhaum rau nws lawm. Kuv yuav qhia kom nej paub qhov zoo thiab qhov uas tsimnyog nej ua. Nej yuav tsum mloog tus TSWV lus thiab ua nws tes haujlwm kom kawg siab kawg ntsws. Nej yuav tsum nco ntsoov tej txujci tseemceeb uas tus TSWV tau ua pab nej lawm. Tiamsis yog nej tseem rov ua txhaum dua, nej thiab nej tus vajntxwv yuav raug kev puastsuaj.” Thaum Xa-ules ua vajntxwv nws hnubnyoog… xyoo thiab nws kav tebchaws Yixalayees tau ob xyoo. Xa-ules xaiv tau cov Yixalayees peb txhiab leej ua nws cov tubrog, nws tseg ob txhiab leej nrog nws nyob hauv lub nroog Mikemas thiab saum lub laj roob ntawm lub nroog Npethees, thiab tso ib txhiab leej nrog nws tus tub Yaunathas mus rau nram lub nroog Nkinpe-as, hauv xeem Npeenyamees cheebtsam av. Dua li cov, nws kom lawv rov mus tsev lawm. Yaunathas tua cov Filitees tus thawj tubrog tuag rau hauv Nkenpas, thiab cov Filitees puavleej hnov hais tias lawv tus thawj tubrog tuag lawm. Xa-ules txib neeg mus hu thiab tshuab raj tshuab xyu thoob tebchaws kom cov Henplais tuaj mus ua rog. Thaum cov Yixalayees hnov hais tias, Xa-ules tua cov Filitees tus thawj tubrog tuag thiab hnov hais tias cov Filitees ntxub cov Yixalayees heev. Yog li ntawd, cov Yixalayees thiaj tuaj ua tubrog ntxiv rau Xa-ules cov tubrog hauv lub nroog Nkilenkas. Cov Filitees txhij tubrog tuaj tua cov Yixalayees; cov Filitees muaj peb caug txhiab lub tsheb nees ua rog, rau txhiab leej tubrog caij nees, thiab muaj tubrog coob ib yam li tej suabzeb ntawm ntug hiavtxwv. Lawv tuaj tsuam yeej rau ntawm Mikemas uas nyob ntawm Npethavees sab hnubtuaj. Cov Filitees tua cov Yixalayees hnyav heev ua rau cov Yixalayees yuav luag swb. Cov Yixalayees ibtxhia twb khiav mus nkaum rau hauv tej qhov zeb qhov tsua, tej kis zeb kis tsua, lossis hauv tej qhov av thiab hauv tej qhovtshij; muaj ibtxhia twb khiav hla tus Dej Yauladees mus rau tim tebchaws Nkile-as thiab Khas cheebtsam av lawm. Xa-ules tseem nyob hauv lub nroog Nkilenkas, thiab cov tubrog uas nrog nws ntshai tshee hnyo. Nws tos Xamuyees tau xya hnub, raws li Xamuyees hais rau nws, tiamsis Xamuyees tseem tuaj tsis tau txog hauv lub nroog Nkilenkas. Sawvdaws txawm khiav zom zaws tso Xa-ules tseg, yog li ntawd, Xa-ules thiaj hais rau lawv hais tias, “Nej cia li cab tej tsiaj uas nej coj tuaj tua hlawv fij thiab tej uas fij rau tus TSWV ua kev sib raug zoo los rau kuv.” Ces Xa-ules txawm muab tsiaj tua hlawv fij rau tus TSWV, thaum Xa-ules muab tsiaj tua hlawv fij tas, Xamuyees txawm tuaj txog ntua. Xa-ules tawm mus cuag Xamuyees thiab tos txais nws, tiamsis Xamuyees nug hais tias, “Koj ua dabtsi tod?” Xa-ules teb hais tias, “Sawvdaws khiav zom zaws tso kuv tseg, thiab koj tsis tuaj raws li koj teem tseg; dua li ntawd, cov Filitees twb tuaj sib sau rau hauv lub nroog Mikemas lawm. Kuv thiaj xav hais tias, ‘Cov Filitees yeej yuav tuaj tua kuv hauv lub nroog Nkilenkas no, thiab kuv tseem tsis tau ua ib yam dabtsi kom tus TSWV pab kuv.’ Yog li ntawd, kuv thiaj xav hais tias cia kuv muab tsiaj tua fij rau tus TSWV.” Xamuyees teb hais tias, “Koj ruam kawg li koj thiaj ua tej no, koj yeej tsis mloog tus TSWV uas yog koj tus Vajtswv tej lus samhwm rau koj. Yog koj mloog tus TSWV lus, nws yuav cia koj thiab koj cov xeebntxwv ua vajntxwv kav cov Yixalayees mus li. Tiamsis, vim koj tsis mloog tus TSWV lus, nimno koj yuav tsis tau kav cov Yixalayees lawm. Tus TSWV yuav tsa dua ib tug uas ua haum nws siab los kav nws haivneeg.” Xamuyees txawm tawm hauv lub nroog Nkilenkas mus lawm. Cov neeg uas tseem nrog Xa-ules nyob thiaj nrog nws mus rau ntawm nws cov tubrog. Lawv tawm hauv lub nroog Nkilankas mus txog rau ntawm lub nroog Nkinpe-as hauv xeem Npeenyamees cheebtsam av. Xa-ules txheeb nws cov tubrog, tseem tshuav kwvlam li rau pua leej. Xa-ules thiab nws tus tub Yaunathas, thiab nkawd cov tubrog tsuam yeej rau ntawm lub nroog Nkenpas hauv xeem Npeenyamees cheebtsam av; cov Filitees tsuam yeej rau ntawm lub nroog Mikemas. Cov Filitees faib ua peb pab tawm hauv lawv lub yeej tuaj: ib pab mus rau ntawm Aufelas hauv Sualis cheebtsam av, ib pab mus rau ntawm Npethes Hauloos, thiab ib pab mus rau ntawm ciamteb uas ntsia pom lub Hav Xenpauyees thiab lub roob mojsab qhua. Lub sijhawm ntawd, nyob hauv tebchaws Yixalayees tsis muaj ib tug txawj ntaus hlau li, rau qhov cov Filitees tsis pub cov Henplais ntaus ntaj ntaus hmuv li. ( Cov Yixalayees thiaj coj lawv tej khais, tej taumtxhob, tej taus thiab tej liag mus rau cov Filitees kho thiab hov xwb; hov ib rab taus thiab tawm tus ko yog ib npib, hov rab khais thiab rab taumtxhob yog ob npib.) Yog li ntawd, thaum lawv sib tua, cov tubrog Yixalayees thiaj tsis muaj ntaj lossis hmuv li, tsuas yog Xa-ules thiab nws tus tub Yaunathas thiaj li muaj xwb. Cov tubrog Filitees ib pab tuaj zov ntawm lub Dawm Mikemas. Muaj ib hnub Yaunathas hais rau tus tub hluas uas nqa nws rab ntaj thiab rab hmuv hais tias, “Wb mus hauv cov Filitees lub yeej.” Tiamsis Yaunathas tsis qhia rau Xa-ules tus uas yog nws txiv paub ntawm tsob qab ntoo txiv ntsiavkws ntawm lub nroog Minkeloos uas nyob tsis deb ntawm lub nroog Nkinpe-as; Xa-ules cov tubrog muaj kwvlam li rau pua leej. ( Tus povthawj uas hnav lub tsho efaus yog Ahiyas uas yog Ahitus tus tijlaug Ikhanpaus tus tub, Ikhanpaus thiab Ahitus yog Finehas tub thiab yog Elis xeebntxwv, Elis yog tus povthawj uas ua tus TSWV tes haujlwm nyob hauv lub nroog Silaus.) Cov tubrog tsis paub hais tias, Yaunathas twb mus lawm. Ntawm lub Dawm Mikemas uas Yaunathas nkawd hla mus rau ntawm cov Filitees lub yeej muaj ob tug ncej zeb loj ntse zuag plias, ib tug nyob ib sab kev: ib tug hu ua Npauxes thiab ib tug hu ua Xenes. Tus uas nyob sab ped tig mus rau lub nroog Mikemas thiab tus uas nyob sab nrad tig mus rau nram lub nroog Nkenpas. Yaunathas hais rau tus tub hluas hais tias, “Wb cia li hla mus rau tom cov Filitees uas tsis ua kevcai txiav lub yeej. Tej zaum tus TSWV yuav pab wb; yog nws pab wb, yeej tsis muaj dabtsi yuav txwv tau nws kom tsis pub wb yeej li. Txawm yog wb ob leeg xwb los wb yuav kovyeej.” Tus tub hluas teb hais tias, “Koj ua dabtsi kuv nrog koj ua, koj mus qhov twg kuv nrog koj mus.” Yaunathas teb hais tias, “Zoo heev, wb cia li mus kom cov Filitees pom wb. Yog lawv hu kom wb tos lawv tuaj cuag wb, wb cia li nyob twjywm tos. Tiamsis yog lawv kom wb mus cuag lawv, wb cia li mus, rau qhov tej ntawd yuav yog lub cim qhia rau wb paub hais tias, tus TSWV twb muab lawv cob rau wb tes lawm.” Yog li ntawd, Yaunathas thiab tus hluas txawm tawm mus rau cov Filitees pom, thiab cov Filitees hais tias, “Nej ntsia tid saib! Cov Henplais muaj qee leej tawm hauv tej qhov av uas lawv nkaum los lawm tiag!” Cov Filitees txawm hu Yaunathas thiab tus tub hluas hais tias, “Neb cia li los ntawm no! Peb yuav qhia dabtsi rau neb!” Yaunathas hais rau tus tub hluas tias, “Koj cia li raws kuv qab. Tus TSWV twb pub peb cov Yixalayees kovyeej lawv lawm.” Yaunathas txawm nkag ua ntej thiab tus tub hluas nkag raws nws qab. Yaunathas ntaus cov Filitees ntog rau hauv av, ces tus tub hluas cia li khaws tua xwb. Thawj zaug no Yaunathas thiab tus tub hluas tua cov Filitees tuag kwvlam li nees nkaum leej. Thaj chaw uas lawv sib ntaus sib tua lwj ntsuav ntawd dav li ob zeg liaj, Cov Filitees, tsis hais cov uas nyob hauv tiaj, cov tubrog uas nyob hauv yeej, thiab cov tubrog uas pheej nyas tuaj tua cov Yixalayees, puavleej ntshai kawg li; av txawm qeeg ua zog koog ua rau cov Filitees ntshai thiab yoob tas. Xa-ules cov tubrog uas zov lub nroog Nkinpe-as hauv xeem Npeenyamees cheebtsam av pom cov Filitees khiav zom zaws rau txhua qhov. Yog li ntawd, Xa-ules hais rau nws cov tubrog hais tias, “Nej cia li txheeb peb cov tubrog saib leejtwg tsis nyob hauv yeej lawm.” Thaum lawv txheeb, lawv tsis pom Yaunathas thiab tus tub hluas uas nqa Yaunathas rab ntaj thiab rab hmuv lawm. Xa-ules hais rau tus povthawj Ahiyas hais tias, “Koj cia li nqa lub efaus los ntawm no.” (Hnub ntawd Ahiyas yog tus nqa lub efaus ua cov Yixalayees ntej.) Thaum Xa-ules tseem hais rau tus povthawj, cov tubrog Filitees uas nyob hauv yeej yimhuab ua ntxhov quav niab. Yog li ntawd, Xa-ules thiaj hais rau tus povthawj Ahiyas hais tias, “Tsis muaj sijhawm nug tus TSWV lawm!” Xa-ules thiab nws cov tubrog thiaj dhia mus tua cov Filitees uas lawv tabtom rov sib ntaus sib tua ntxhov hnyo ntawd. Cov Henplais qee leej uas tuaj cov Filitees tog thiab nrog cov Filitees nyob hauv lub yeej ntawd, lawv txawm hloov siab rov los tuaj Xa-ules thiab Yaunathas tog tua cov Filitees. Cov Henplais uas khiav mus nkaum pem tej roob hauv tebchaws Efalayees hnov hais tias cov Filitees tabtom swb thiab khiav zom zaws lawm, lawv txawm sau nthwv tuaj pab Xa-ules tua cov Filitees mus dhau plaws lub nroog Npethavees. Hnub ntawd tus TSWV pab cov Yixalayees dim. Hnub ntawd, cov Yixalayees tshaib plab thiab qaug zog heev, rau qhov Xa-ules coglus hais tias, “Hnub no, yog leejtwg noj mov ua ntej uas kuv ua pauj rau kuv cov yeebncuab, tus ntawd yuav raug foom tsis zoo.” Yog li ntawd, hnub ntawd ib hnub thiaj tsis muaj leejtwg noj mov li. Tagnrho cov tubrog los txog rau hauv ib thaj havzoov uas muaj zib ntab ntau heev. Zib ntab nyob puv nrees txhua qhov, tiamsis tsis muaj leejtwg muaj cuabkav muab noj li, rau qhov lawv ntshai Xa-ules tej lus foom tsis zoo. Tiamsis Yaunathas tsis hnov qhov uas nws txiv yuav foom tsis zoo rau tus uas tsis mloog lus; nws thiaj muab nws tus pa nrig tshum lub qia nas ntab los noj. Thaum Yaunathas noj tas, nws thiaj muaj zog mentsis tuaj. Tiamsis muaj ib tug tubrog hais rau Yaunathas hais tias, “Peb sawvdaws tshaib plab thiab qaug zog heev, tiamsis koj txiv yuam kom peb coglus hais tias, ‘Tus uas noj mov hnub no, tus ntawd yuav raug foom tsis zoo.’ ” Yaunathas teb hais tias, “Ua li cas kuv txiv yuav ua nruj ua luaj rau peb cov neeg! Nej saib kuv muaj zog mentsis tuaj, rau qhov kuv noj cov zib ntab ntawd! Yog hnub no cov tubrog tseem tau noj tej mov uas txeeb tau ntawm cov yeebncuab los, mas sawvdaws hajyam muaj zog tua cov Filitees tuag coob dua thiab.” Hnub ntawd, cov Yixalayees tua yeej cov Filitees ntawm lub nroog Mikemas mus ti nkaus lub nroog Aiyaloos. Thaum ntawd cov Yixalayees tshaib plab thiab qaug zog heev, lawv thiaj dhia mus muab tej yaj thiab tej nyuj uas lawv txeeb tau ntawm cov yeebncuab los tua thiab muab hlais noj nyoos ua ntshav liab vog. Muaj neeg mus qhia rau Xa-ules hais tias, “Koj saib, muaj neeg noj tej nqaij nyoos uas tseem muaj ntshav. Lawv ua li ntawd, yog lawv ua txhaum rau tus TSWV lawm.” Xa-ules nthe tawg ntho hais tias, “Cov nyuag neeg ntxeev siab ko, cia li mus dov ib lub pobzeb loj los rau kuv ntawm no.” Tom qab ntawd, Xa-ules hais rau lawv hais tias, “Nej cia li mus hais kom lawv cab lawv tej nyuj thiab tej yaj tuaj tua noj rau ntawm no. Lawv tsis txhob noj tej nqaij nyoos uas muaj ntshav, yuav ua txhaum rau tus TXWV.” Yog li hmo ntawd, lawv thiaj cab lawv tej nyuj los tua qhov ntawd. Xa-ules teeb tau ib lub thaj fij khoom rau tus TSWV, lub thaj ntawd yog thawj lub uas Xa-ules teeb. Xa-ules hais rau nws cov tubrog hais tias, “Hmo no peb yuav mus tua cov Filitees ib hmo kaj ntug kom lawv tuag tas thiab huab lawv tej khoom huv tibsi.” Cov tubrog teb hais tias, “Cia li ua raws li koj pom zoo.” Tiamsis tus povthawj teb hais tias, “Cia peb nug Vajtswv tso.” Yog li ntawd, Xa-ules nug Vajtswv hais tias, “Kuv yuav mus tua cov Filitees los tsis mus?” Koj puas pub kom peb tua yeej lawv? Tiamsis hnub ntawd Vajtswv tsis teb li. Xa-ules hais rau cov Yixalayees cov thawjcoj hais tias, “Nej los ntawm no, peb ua tib zoo xav saib hnub no peb tau ua txhaum dabtsi lawm. Kuv coglus rau tus TSWV uas muaj sia nyob thiab yog tus uas pub rau cov Yixalayees muaj yeej hais tias, txawm yog kuv tus tub Yaunathas ua txhaum los yuav tsum muab nws tua povtseg.” Tiamsis tsis muaj leejtwg hais ib los li. Ces Xa-ules hais rau lawv hais tias, “Nej cia li mus sawv lawm tod, kuv thiab Yaunathas yuav sawv ntawm no.” Lawv teb hais tias, “Ua raws li koj pom zoo.” Xa-ules thov tus TSWV uas yog cov Yixalayees tus Vajtswv hais tias, “Tus TSWV, ua li cas hnub no koj tsis teb kuv? Tus TSWV uas yog cov Yixalayees tus Vajtswv, yog kuv tus tub Yaunathas lossis kuv ua txhaum, thov koj qhia rau kuv ntawm lub Ulees; tiamsis yog koj haivneeg Yixalayees ua txhaum, thov koj qhia rau kuv ntawm lub Thumees.” Thaum nws saib, ua ciav yog Yaunathas thiab Xa-ules ua txhaum; tsis yog cov pejxeem ua txhaum. Xa-ules hais tias, “Tus TSWV thov koj qhia siab, yog kuv tus tub Yaunathas lossis kuv ua txhaum.” Thaum nws saib, ua ciav yog Yaunathas ua txhaum. Xa-ules nug Yaunathas hais tias, “Koj ua txhaum dabtsi?” Yaunathas teb hais tias, “Kuv noj mentsis zib ntab xwb. Kuv nyob ntawm no, kuv yeej zoo siab tuag.” Xa-ules hais tias, “Yog kuv tsis tua koj, thov kom Vajtswv tua kuv povtseg!” Tiamsis cov neeg hais rau Xa-ules hais tias, “Koj yuav muab Yaunathas, tus uas pab tau cov Yixalayees kovyeej loj npaum li no tua povtseg los? Yog koj tua nws, peb yeej tsis zoo siab rau koj li! Peb thov coglus rau tus TSWV uas muaj sia nyob hais tias, txawm yog Yaunathas ib txoj nyuag plaubhau los tsis pub kom poob li. Tej uas hnub no nws ua yeej yog Vajtswv pab xwb.” Yog li ntawd, sawvdaws thiaj pab tau Yaunathas dim tsis raug tua tuag. Ces Xa-ules txawm tso tseg tsis caum cov Filitees tua, thiab cov Filitees rov qab mus rau lawv lub tebchaws lawm. Lub sijhawm uas Xa-ules ua vajntxwv kav tebchaws Yixalayees, nws ntaus tsov ntau rog tawmtsam nws cov yeebncuab rau txhua qhov: nws tua cov Mau-am, cov Amoos thiab cov Edoos, cov vajntxwv uas kav tebchaws Xaunpas thiab cov Filitees. Txhua qhov uas nws tua, nws puavleej tua yeej. Nws siab tawv thiab tua rog ua tau heev tsis ntshai leejtwg li, txawm yog cov Amalej los nws tua yeej huv tibsi. Txhua zaus uas yeebncuab tuaj tua cov Yixalayees los nws cawm tau lawv dim. Xa-ules cov tub yog: Yaunathas, Isevis thiab Makhisuas. Xa-ules tus ntxhais hlob hu ua Melas thiab tus ntxhais yau hu ua Mikhas. Xa-ules tus pojniam hu ua Ahinaus uas yog Ahimas tus ntxhais; Xa-ules tus thawj tubrog hu Aneles uas yog Xa-ules txiv hlob Neles tus tub. Kises uas yog Xa-ules txiv thiab Neles uas yog Aneles txiv, yog Anpiyees tub. Thaum Xa-ules ua neej nyob, nws nrog cov Filitees sib tua hnyav heev. Yog nws pom ib tug txivneej khov kho thiab siab tawv, ces nws txawm coj tus ntawd mus ua nws tubrog. Xamuyees hais rau Xa-ules hais tias, “Kuv yog tus uas tus TSWV kom muab roj hliv rau koj taubhau, tsa koj ua vajntxwv kav nws haivneeg Yixalayees. Nimno koj cia li mloog tus TSWV uas muaj hwjchim loj kawg nkaus tej lus saib hais li cas. Nws yuav rau txim rau cov Amalej, rau qhov lawv cov yawgkoob tawmtsam cov Yixalayees thaum lawv khiav nram tebchaws Iziv los. Koj cia li mus tua cov Amalej thiab rhuav txhua yam uas lawv muaj kom puastsuaj tas tsis tseg ib yam li. Koj lojxov tua tej pojniam txivneej, tej menyuam thiab tej nyuj, tej yaj, tej ntxhuav thiab tej neesluav huv tibsi povtseg.” Xa-ules txhij tagnrho nws cov tubrog tuaj sib sau rau hauv lub nroog Telees rau nws txheeb, cov tubrog Yixalayees muaj ob puas txhiab leej thiab cov tubrog Yudas muaj kaum txhiab leej. Ces Xa-ules thiab nws cov tubrog txawm mus rau nram cov Amalej lub nroog thiab zov kev tua hauv lub hav qhuav. Xa-ules xa xov mus rau cov Kenais uas lawv cov yawgkoob tau ua zoo rau cov Yixalayees, thaum lawv tsiv nram tebchaws Iziv los hais tias, “Nej cia li tsiv tawm tsis txhob nrog cov Amalej nyob, nej thiaj yuav tsis raug tua tuag.” Yog li ntawd, cov Kenais thiaj tsiv lawm. Xa-ules tua yeej cov Amalej txij ntua ntawm lub nroog Havilas mus ti nkaus rau Sus uas nyob ntawm tebchaws Iziv sab hnubtuaj; Xa-ules ntes tau cov Amalej tus Vajntxwv Ankas, thiab muab cov pejxeem tua tuag tas huv tibsi. Tiamsis Xa-ules thiab nws cov tubrog tsis tua Ankas thiab tsis tua tej yaj, tej nyuj, tej menyuam nyuj thiab tej menyuam yaj uas zoo nkauj tshaj plaws lossis tseg txhua yam uas zoo cia; lawv tsuas tua thiab rhuav tej uas tsis zoo siv lossis tsis muaj nqis xwb. Tus TSWV hais rau Xamuyees hais tias, “Kuv tu siab uas kuv tsa Xa-ules ua vajntxwv; rau qhov nws tso kuv tseg thiab tsis mloog kuv lus.” Xamuyees npautaws heev, nws thiaj thov tus TSWV ib hmos kaj ntug. Thaum kaj ntuj txoog, nws txawm mus cuag Xa-ules, tiamsis nws hnov hais tias Xa-ules twb mus rau pem lub nroog Kalemees, Xa-ules mus puab ib tug pejthuam ua chaw nco txog nws, thiab tom qab ntawd, nws mus rau hauv lub nroog Nkilenkas lawm. Xamuyees mus cuag Xa-ules, Xa-ules hais rau Xamuyees hais tias, “Thov tus TSWV foom koob hmoov rau koj! Kuv twb mus ua raws li tus TSWV hais tas lawm.” Xamuyees nug Xa-ules hais tias, “Ua li cas kuv tseem hnov suab nyuj nqov thiab suab yaj quaj?” Xa-ules teb hais tias, “Kuv cov tubrog cab cov Amalej tej yaj tej nyuj los. Lawv tseg tej yaj tej nyuj uas zoo nkauj los tua fij rau tus TSWV uas yog koj tus Vajtswv, dua li cov uas tsis zoo peb twb muab tua povtseg tas lawm.” Xamuyees hais tias, “Tos mentsis tso, kuv yuav qhia rau koj paub, tej uas nag hmo tus TSWV los hais rau kuv lawm.” Xa-ules teb hais tias, “Qhia rau kuv.” Xamuyees teb hais tias, “Txawm yog koj xav hais tias, koj tsis tseemceeb dabtsi li los koj yog cov Yixalayees tus thawjcoj. Tus TSWV twb muaj roj hliv rau koj taubhau thiab tsa koj ua vajntxwv kav cov Yixalayees, thiab nws kom koj mus tua cov Amalej uas ua phem ua qias povtseg. Nws kom koj tua lawv mus txog thaum lawv tuag tu noob tas. Vim li cas koj tsis mloog tus TSWV lus? Vim li cas koj tseem mus huab tej no, thiab ua tej uas tsis haum tus TSWV siab li?” Xa-ules teb hais tias, “Kuv yeej mloog tus TSWV lus, kuv twb mus ua raws li nws hais lawm, kuv ntes Vajntxwv Ankas los thiab muab cov Amalej tua tuag tas huv tibsi lawm. Tiamsis kuv cov tubrog tsis tau tua tej yaj thiab tej nyuj zoo nkauj uas lawv ntes tau; lawv thiaj cab tej tsiaj ntawd los rau hauv lub nroog Nkilenkas thiab tua fij rau tus TSWV uas yog koj tus Vajtswv.” Xamuyees hais tias, “Koj ua tib zoo xav saib, tus TSWV txaus siab rau yam twg: tus TSWV xav kom neeg mloog nws lus lossis muab tsiaj tua fij rau nws? Mloog tus TSWV lus zoo dua qhov uas muab tej yaj zoo nkauj tua fij rau nws. Tus neeg uas ntxeev siab rau tus TSWV ua txhaum loj ib yam li tus uas txawj tso dab, thiab tus neeg uas tawv ncauj ua txhaum loj ib yam li tus uas pe mlom. Vim koj tsis mloog tus TSWV lus, nws thiaj tsis pub koj ua vajntxwv lawm.” Xa-ules teb hais tias, “Kuv tau ua txhaum lawm tiag, kuv tsis ua raws li tus TSWV tej lus samhwm thiab koj tej lus ntuas. Kuv ntshai kuv cov tubrog kuv thiaj ua raws li lawv xav yuav xav tau. Nimno thov koj zam txim rau kuv thiab nrog kuv rov mus hauv lub nroog Nkilenkas, kuv thiaj yuav tau pehawm tus TSWV.” Xamuyees teb hais tias, “Kuv tsis nrog koj mus, koj tsis mloog tus TSWV tej lus samhwm, tus TSWV thiaj tsis pub koj ua cov Yixalayees tus vajntxwv lawm.” Xamuyees tig hlo yuav mus, Xa-ules txawm ntsiab nkaus Xamuyees lub tw tsho rub ntuag rhe. Xamuyees hais rau Xa-ules hais tias, “Hnub no tus TSWV twb muab cov Yixalayees lub tebchaws tshem tawm ntawm koj mus rau tus uas ua zoo dua koj kav lawm. Cov Yixalayees tus Vajtswv uas muaj tshwjchim ci ntsa iab yeej tsis dag lossis tsis hloov siab li. Nws tsis yog noobneej, nws tsis hloov siab li.” Xa-ules teb hais tias, “Kuv yeej ua txhaum lawm tiag, tiamsis thov koj cia kuv tau ntsejmuag tabmeeg kuv cov thawjcoj thiab cov pejxeem Yixalayees. Thov koj nrog kuv rov mus, kuv thiaj tau pehawm tus TSWV uas yog koj tus Vajtswv.” Yog li ntawd, Xamuyees thiaj nrog Xa-ules rov mus rau hauv lub nroog Nkilenkas, thiab Xa-ules pehawm tus TSWV. Xamuyees hais tias, “Nej cia li mus coj Vajntxwv Ankas los rau kuv ntawm no,” Ankas los cuag Xamuyees, Ankas ntshai ua ibce tshee hnyo thiab xav hais tias, “Zaum no kuv yuav raug txojkev tuag uas iab siab kawg nkaus!” Xamuyees hais tias, “Koj rab ntaj ua rau ntau leej niam tej menyuam tuag tas, yog li ntawd, nimno koj niam yuav tsis muaj tub ib yam li luag thiab.” Xamuyees txawm rho hlo ntaj los txiav Ankas ua tej thooj rau ntawm hauv ntej lub thaj hauv lub nroog Nkilankas. Ces Xamuyees txawm mus rau hauv lub nroog Lamas, thiab Vajntxwv Xa-ules rov mus rau hauv lub nroog Nkinpe-as lawm. Xamuyees tsis pom Xa-ules mus txog hnub uas Xamuyees tuag li; tiamsis nws tu siab rau Xa-ules kawg nkaus. Tus TSWV tu siab uas nws tsa Xa-ules ua vajntxwv kav cov Yixalayees. Tus TSWV hais rau Xamuyees hais tias, “Koj tseem yuav nyuaj siab rau Xa-ules mus txog thaum twg thiab? Kuv twb tsis pub nws ua vajntxwv kav cov Yixalayees lawm. Koj cia li nqa ib hwj roj mus rau nram lub nroog Npelehees, thiab mus cuag ib tug txivneej uas hu ua Yexais, rau qhov kuv twb xaiv nws cov tub ib tug ua vajntxwv kav cov Yixalayees lawm.” Xamuyees nug hais tias, “Kuv yuav ua li cas mus ua tau li ntawd? Yog Xa-ules paub ces nws yeej yuav muab kuv yuav tua xwb!” Tus TSWV hais tias, “Koj cia li cab ib tug menyuam nyuj mus, thiab hais tias koj yuav coj mus tua hlawv fij rau tus TSWV. Koj caw Yexais nrog koj mus tua tsiaj hlawv fij, kuv mam li qhia rau koj hais tias koj yuav ua li cas. Koj muab roj hliv rau tus uas kuv qhia koj ntawd taubhau thiab tsa nws ua vajntxwv.” Xamuyees ua raws li tus TSWV hais, nws mus rau nram lub nroog Npelehees, cov thawjcoj hauv lub nroog ntshai ua ibce tshee hnyo tuaj nug Xamuyees hais tias, “Tus uas pom yav tom ntej, koj tuaj ntawm no yog tuaj zoo lossis tuaj phem?” Xamuyees teb hais tias, “Yog kuv coj tsiaj tuaj tua hlawv fij rau tus TSWV xwb. Nej cia li ua kevcai ntxuav thiab tuaj cuag kuv.” Xamuyees hais kom Yexais thiab nws cov tub ua kevcai ntxuav ib yam nkaus, thiab kom lawv nrog nws mus tua tsiaj hlawv fij rau tus TSWV. Thaum lawv tuaj txog, Xamuyees pom Yexais tus tub Eli-as, nws txawm xav hais tias, “Tus uas tuaj sawv tabmeeg tus TSWV no, yog tus uas nws xaiv ntag.” Tiamsis tus TSWV hais rau Xamuyees hais tias, “Koj tsis txhob saib qhov uas nws siab thiab zoo nraug xwb. Kuv tsis yuav tus ko, rau qhov kuv tsis saib neeg li noobneej saib. Neeg saib lub cev ntaj ntsug, tiamsis kuv saib neeg lub siab.” Yexais txawm hu nws tus tub Anpinadas los cuag Xamuyees. Tiamsis Xamuyees hais tias, “Tsis yog, tus TSWV tsis xaiv tus no thiab.” Yexais coj Samas los. Xamuyees hais tias, “Tsis yog, tus TSWV tsis xaiv tus no thiab.” Yexais coj nws xya tug tub los cuag Xamuyees. Xamuyees hais rau Yexais hais tias, “Tsis yog, tus TSWV tsis xaiv cov no ib tug li.” Xamuyees nug Yexais hais tias, “Koj cov tub muaj npaum li no leej xwb los?” Yexais teb hais tias, “Tshuav tus tub ntxawg, tiamsis nws tseem mus yug yaj lawm.” Xamuyees hais tias, “Nej cia li mus hu nws los, peb tos nws los txog tso, peb mam li tua tsiaj hlawv fij rau tus TSWV.” Yog li ntawd, Yexais thiaj txib neeg mus hu Daviv. Daviv zoo nraug ntxiag, cev khov kho thiab muaj sais muag zees. Tus TSWV hais rau Xamuyees hais tias, “Yog tus no ntag, koj cia li muab roj hliv rau nws taubhau!” Xamuyees txawm muab roj txiv hliv rau Daviv taubhau tabmeeg nws cov tijlaug. Tamsim ntawm tus TSWV tus ntsujplig txawm kav hlo Daviv lub siab thiab nrog nws nyob txij hnub ntawd los. Xamuyees thiaj rov los rau hauv lub nroog Lamas lawm. Tus TSWV tus ntsujplig tsis nrog Xa-ules lawm, tiamsis tus TSWV cia ib tug ntsujplig phem los tsimtxom Xa-ules. Xa-ules cov tubtxib hais rau nws hais tias, “Peb paub hais tias Vajtswv cia ib tug ntsujplig phem los tsimtxom koj lawm. Thov koj tso ncauj rau peb, peb yuav mus nrhiav ib tug txivneej uas txawj ntaus nkauj nogncas los nrog koj nyob. Thaum twg tus ntsujplig ntawd los tshoov koj siab, nws yuav ntaus nkauj nogncas rau koj mloog, kom koj lub siab tus.” Xa-ules hais rau lawv hais tias, “Nej cia li mus nrhiav ib tug txivneej uas txawj ntaus nkauj nogncas zoo heev coj tuaj cuag kuv.” Xa-ules cov tubtxib ib tug hais rau Xa-ules hais tias, “Yexais uas nyob hauv lub nroog Npelehees muaj ib tug tub txawj ntaus nkauj nogncas heev. Nws yog ib tug neeg siab tawv thiab zoo nraug ntxiag, nws yog ib tug tubrog zoo, zoo ncauj zoo lus thiab tus TSWV nrog nraim nws.” Yog li ntawd, Xa-ules txawm tso neeg mus hais rau Yexais hais tias, “Cia li tso koj tus tub Daviv uas yog ib tug tub yug yaj tuaj nrog kuv nyob.” Yexais coj Daviv mus cuag Xa-ules, cab ib tug neesluav thauj ib nras ncuav, ib hnab tawv cawv txiv hmab thiab cab ib tug thav tshis mus rau Xa-ules. Daviv nrog Xa-ules nyob thiab ua haujlwm rau nws. Xa-ules nyiam Daviv heev thiab tsa Daviv ua tus nqa nws rab ntaj thiab rab hmuv. Xa-ules hais mus rau Yexais hais tias, “Kuv nyiam Daviv heev. Thov cia nws nrog kuv nyob thiab ua haujlwm rau kuv.” Txij hnub ntawd los, thaum twg Vajtswv cia tus ntsujplig phem ntawd los tshoov Xa-ules siab, Daviv txawm muab nws lub nkauj nogncas los ntaus. Ces tus ntsujplig phem ntawd txawm tawm ntawm Xa-ules mus, thiab Xa-ules lub siab rov tus thiab nyob li qub. Cov Filitees txhij tubrog tuaj tua lub nroog Xukaus hauv tebchaws Yudas; lawv tuaj tsuam yeej rau ntawm qhov chaw uas hu ua Efes Damees, ntu nruab nrab ntawm lub nroog Xukaus thiab Axekas. Xa-ules thiab cov tubrog Yixalayees mus tsuam yeej rau ntawm lub Hav Elas, lawv npaj tos yuav nrog cov Filitees sib tua. Cov Filitees tuaj sawv saum ib lub laj roob, cov Yixalayees los mus sawv saum ib lub laj roob thiab, muaj ib lub hav quas. Muaj ib tug txivneej hu Nkauli-am, nws nyob hauv lub nroog Nkas tuaj, nws tawm hauv cov Filitees lub yeej tuaj twv cov Yixalayees. Nws siab rau tshim, nws ntoo ib lub kausmom tooj thiab hnav ib lub tsho tooj hnyav ib puas nees nkaum tsib choj, thiab muab tooj looj nws ob txhais ceg huv tibsi, nws kwv rawv ib rab hmuv tooj saum xubpwg. Nws rab hmuv tuab ib yam li lub nqos ntos ntaub, thiab lub vos hlau hnyav kwvlam li kaum tsib choj. Muaj ib tug tubrog nqa Nkauli-am daim thaiv hniav ntaj mus ua Nkauli-am ntej. Nkauli-am sawv nres nroos hu nrov nrov rau cov Yixalayees hais tias, “Nej tuaj ua dabtsi ntawm ko, tuaj tua rog los? Xa-ules cov nyuag qhev, kuv yog neeg Filitees! Cia li xaiv nej cov neeg ib tug tuaj tua kuv. Yog nws tua yeej kuv, peb yuav ua nej qhev; tiamsis yog kuv tua yeej nws, nej yuav tsum ua peb qhev. Kuv sawv ntawm no twv ntxhias cov tubrog Yixalayees ntag. Cia li xaiv nej cov ib tug tuaj tua kuv.” Thaum Xa-ules thiab nws cov tubrog hnov li ntawd, lawv ntshai kawg li. Daviv yog Yexais tus tub, Yexais yog neeg Efalathas uas nyob hauv lub nroog Npelehees hauv tebchaws Yudas. Yexais muaj yim leej tub, lub sijhawm uas Xa-ules ua vajntxwv, Yexais laus heev lawm. Nws peb tug tub hlob nrog Xa-ules mus ua tubrog. Tus hlob hu ua Eli-as, tus ob hu ua Anpinadas thiab tus peb hu ua Samas. Daviv yog tus tub ntxawg, thaum Daviv peb tug tijlaug nrog Xa-ules mus ua rog ntawd, Daviv pheej ib sij rov qab mus pab nws txiv yug tsiaj hauv lub nroog Npelehees. Nkauli-am niaj tagkis thiab niaj hmo tuaj twv cov Yixalayees tau plaub caug hnub. Muaj ib hnub Yexais hais rau Daviv hais tias, “Koj cia li xa ib nta tawb mov kib thiab kaum lub ncuav mus rau koj cov tijlaug uas nyob tom tshavrog. Koj coj kaum thooj mis nyuj qhuav no mus rau tus thawj tubrog. Mus nug saib koj peb tug tijlaug nyob li cas lawm. Koj kom lawv muab ib yam dabtsi rau koj nqa los rau kuv saib, kuv thiaj paub hais tias, koj mus pom lawv tiag thiab lawv puavleej noj qab nyob zoo. Vajntxwv Xa-ules, koj cov tijlaug thiab cov tubrog Yixalayees puavleej nyob nram lub Hav Elas tawmtsam cov Filitees.” Thaum kaj ntug txoog Daviv txawm muab nws pab yaj tso rau lwm tus saib, ces nws xa mov mus rau nws coj tijlaug raws li nws txiv hais rau nws. Daviv mus txog hauv lub yeej tubrog, thaum cov Yixalayees tabtom tawm mus rau tom tshavrog thiab qw ntshoo rooj. Cov Filitees thiab cov Yixalayees nyias txhij nyias cov tubrog tuaj sawv ua phiaj yiav, thiab sib ntsia tos ntsoov yuav sib tua. Daviv muab tej zaub mov tso plhuav rau tus uas saib kev noj haus, Daviv khiav ceev nrooj mus cuag nws cov tijlaug, thiab nug saib nws cov tijlaug noj nyob li cas. Thaum Daviv tabtom nrog nws cov tijlaug tham, Nkauli-am txawm tawm tuaj twv cov Yixalayees raws li nws niaj hnub ua. Thiab Daviv kuj hnov tej lus uas Nkauli-am khav. Thaum cov Yixalayees pom dheev Nkauli-am, lawv ntshai heev, lawv nyias txawm khiav nyias zom zaws mus lawm. Lawv sib tham hais tias, “Nej sim ntsia saib! Nej cia li mloog tej lus uas nws khav! Vajntxwv Xa-ules hais tias, yog leejtwg mus tua tau nws, vajntxwv yuav muab nqi zog ntau thiab muab nws tus ntxhais rau tus ntawd yuav, thiab nws txiv tsevneeg yuav tsis tau them se.” Daviv nug cov neeg uas nyob ze ntawd hais tias, “Tus uas tua tau tus neeg Filitees ntawd thiab pab tau cov Yixalayees tsis poob ntsejmuag yuav tau dabtsi no? Tus neeg Filitees uas tsis ua kevcai txiav ntawd yog leejtwg, ua li cas nws yuav muaj cuabkav khav thiab hais lus saib tsis taus Vajtswv tus uas muaj sia nyob cov tubrog?” Lawv qhia rau Daviv hais tias, tus uas tua tau Nkauli-am tuag yuav tau nqi zog dabtsi. Eli-as uas yog Daviv tus tijlaug hlob hnov Daviv nrog cov neeg sib tham. Nws npautaws rau Daviv thiab cem hais tias, “Koj tuaj ua dabtsi ntawm no? Leejtwg zov koj pab yaj tom tiaj mojsab qhua? Ua li cas koj yuav tawv ua luaj? Kuv paub koj lub nyuag siab ko, koj xav tuaj xauj luag sib tua xwb los mas!” Daviv teb hais tias, “Kuv ua txhaum dabtsi? Kuv txawm nug tsis tau ib los li los?” Daviv txawm tig hlo mus nug dua lwm tus tib lo lus qub, thiab txhua zaus uas nws nug, luag teb nws ib yam nkaus. Cov neeg uas hnov Daviv hais, lawv txawm mus piav qhia rau Xa-ules, Xa-ules thiaj hu Daviv los cuag nws. Daviv hais rau Xa-ules hais tias, “Vajntxwv, tsis tsimnyog leejtwg yuav ntshai tus neeg Filitees ntawd li! Kuv yuav mus nrog nws sib tua ntag.” Xa-ules teb hais tias, “Tsis tau, koj yuav ua li cas tua tau nws? Koj tseem yog menyuam yaus xwb, Nkauli-am yeej ibtxwm ua rog los laus li ntawd!” Daviv teb hais tias, “Vajntxwv, kuv ibtxwm yug kuv txiv pab yaj. Thaum muaj tsov ntxhuav lossis dais los tom ib tug menyuam yaj kwv mus lawm, kuv cia li raws qab mus ntaus thiab cawm tau tus yaj ntawd rov los. Yog hais tias tsov ntxhuav lossis dais tig los tom kuv, kuv cia li khawm nkaus cajdab qhau thiab muab ntaus tuag kiag. Kuv twb tua tau tsov ntxhuav thiab dais lawm, kuv yuav ua ib yam li ntawd rau tus neeg Filitees uas tsis ua kevcai txiav no, vim nws txob thuam Vajtswv tus uas muaj sia nyob cov tubrog. Tus TSWV cawm kuv dim ntawm tsov ntxhuav thiab dais li cas; nws yeej yuav cawm kuv dim ntawm tus neeg Filitees li ntawd thiab.” Xa-ules teb hais tias, “Tau lawm, koj cia li mus thiab tus TSWV yuav nrog nraim koj.” Xa-ules muab nws cev ris tsho tooj rau Daviv hnav thiab muab nws lub kausmom tooj rau Daviv ntoo. Daviv muab Xa-ules rab ntaj ris rau ntawm duav thiab sim mus kev, tiamsis Daviv mus tsis taus kev li, rau qhov nws hnav tsis kam tej ntawd. Daviv hais rau Xa-ules hais tias, “Yog kuv hnav tej no, kuv mus sib tua tsis tau, rau qhov kuv tsis tau hnav dua tej no li.” Yog li ntawd, Daviv txawm muab hle tseg. Daviv nqa tus pas nrig uas nws nrig zov nws pab yaj, thiab nws khaws tau tsib lub pobzeb kheej kheej nram ntug dej ntim rau hauv nws lub hnab. Nws nqa ib txoj zes hlua, ces nws txawm mus tua Nkauli-am. Tus neeg Filitees ncaj nraim tuaj rau ntawm Daviv, tus uas nqa Nkauli-am daim thaiv hniav ntaj ua ntej loo tuaj. Nkauli-am tuaj ze zuj zus rau ntawm Daviv, thaum nws pom Daviv tseeb lawm, nws saib tsis taus Daviv, rau qhov Daviv tseem yog ib tug tub hluas uas zoo nraug ntxiag xwb. Nkauli-am hais rau Daviv hais tias, “Koj nqa tus pas nrig ko tuaj ua dabtsi? Koj xav hais tias kuv yog dev no los?” Nws txawm tuav nws tus vajtswv lub npe foom phem rau Daviv. Nws thuam Daviv hais tias, “Tuaj ntawm no, kuv yuav muab koj lub cev rau tej noog thiab tej tsiaj noj.” Daviv teb hais tias, “Koj nqa ntaj, nqa hmuv thiab xubvos tuaj tua kuv, tiamsis kuv tuav tus TSWV uas muaj hwjchim loj kawg nkaus uas yog cov tubrog Yixalayees tus Vajtswv uas koj saib tsis tau lub npe tuaj tua koj. Hnub no tus TSWV yuav muab koj cob rau kuv tes; kuv yuav tua tau koj thiab txiav koj lub taubhau povtseg. Kuv yuav muab cov tubrog Filitees lub cev rau tej noog thiab tej tsiaj noj. Kom neeg thoob ntiajteb thiaj paub hais tias cov Yixalayees muaj Vajtswv tiag, thiab txhua tus uas nyob ntawm no yuav pom hais tias tus TSWV tsis siv ntaj lossis hmuv cawm nws haivneeg. Tus TSWV yuav tua yeej nej, thiab nws yuav muab nej txhua tus cob rau peb tes.” Nkauli-am txawm tuaj ze zuj zus rau ntawm Daviv, thiab Daviv kuj khiav ceev nrooj mus ti nkaus rau ntawm cov Filitees tus ciam tua Nkauli-am. Daviv rho hlo ib lub pobzeb hauv hnab los tso rau ntawm txoj zes hlua thiab fiav mus ntaub nkaus Nkauli-am hauvpliaj tawg rhe, ua rau nws vau hlo khwb nkaus rau hauv av. Daviv tua Nkauli-am tuag, tsis yog muab ntaj tua, tiamsis yog muab txoj zes hlua thiab ib lub pobzeb xwb! Daviv khiav loo mus sawv saum Nkauli-am thiab rho hlo Nkauli-am rab ntaj hauv hnab los tua Nkauli-am tuag kiag thiab txiav Nkauli-am cajdab tu nrho. Thaum cov Filitees pom hais tias, lawv tus tubrog uas ua tau heev tuag lawm, ces lawv txawm tig loo khiav. Cov tubrog Yixalayees thiab cov tubrog Yudas thiaj qw ntshoo rooj caum cov Filitees tua mus ti nkaus lub nroog Nkas thiab lub nroog Ekiloos tej roojvag. Cov Filitees raug mob pw pawglug taug txojkev uas mus rau hauv lub nroog Sa-alayees mus ti nkaus lub nroog Nkas thiab lub nroog Ekiloos. Thaum cov Yixalayees uas caum tua cov Filitees rov los, lawv tshawb cov tubrog Filitees tej khoom txhua yam hauv yeej nqa los. Daviv nqa Nkauli-am lub taubhau los rau hauv lub nroog Yeluxalees, tiamsis Daviv nqa Nkauli-am tej cuabyeej ua rog mus tso rau hauv Daviv lub tsevntaub. Thaum Xa-ules pom Daviv mus tua Nkauli-am lawm, Xa-ules nug Aneles uas yog nws tus thawj tubrog hais tias, “Aneles, tus hluas ntawd yog leejtwg tus tub?” Aneles teb hais tias, “Vajntxwv, kuv tsis paub.” Xa-ules hais tias, “Koj cia li mus nug saib.” Yog li ntawd, thaum Daviv mus tua tau Nkauli-am, thiab nws rov los txog rau hauv yeej, Aneles txawm coj Daviv mus cuag Xa-ules. Daviv tseem nqa rawv Nkauli-am lub taubhau. Xa-ules nug Daviv hais tias, “Tub hluas, koj yog leejtwg tub?” Daviv teb hais tias, “Kuv yog koj tus tubtxib Yexais uas nyob hauv lub nroog Npelehees tus tub.” Thaum Xa-ules nrog Daviv tham tas, Xa-ules tus tub Yaunathas txaus siab rau Daviv thiab hlub Daviv ib yam li nws hlub nws lub cev. Txij hnub ntawd los Xa-ules txawm kom Daviv nrog nws nyob thiab tsis pub Daviv rov mus tsev li lawm. Yaunathas coglus rau Daviv ua phoojywg ruaj khov mus tas simneej, rau qhov nws hlub Daviv ib yam li nws hlub nws lub cev. Yaunathas hle nws lub tsho ntev rau Daviv, muab nws lub tsho tooj, rab ntaj, rab hneevnti thiab txoj siv tawv rau Daviv. Xa-ules txib kom Daviv ua dabtsi los Daviv ua tau tiav tas huv tibsi, Xa-ules thiaj tsa Daviv ua nws ib tug thawj tubrog. Xa-ules cov thawj tubrog thiab cov tubrog puavleej pom zoo. Tom qab uas Daviv mus tua tau Nkauli-am thiab cov tubrog Yixalayees tabtom rov los tsev, cov pojniam hauv tej nroog hauv tebchaws Yixalayees txawm tuaj tos Vajntxwv Xa-ules. Lawv seevcev, hu nkauj zoo siab, npuaj nruas thiab ntaus nkauj nogncas. Thaum cov pojniam seevcev, lawv hu nkauj hais tias, “Xa-ules tua tuag qas txhiab leej, tiamsis Daviv tua tuag qas vam leej.” Xa-ules hnov tej lus ntawd, nws tsis txaus siab thiab chim heev. Nws thiaj hais tias, “Lawv hu nkauj qhuas Daviv hais tias Daviv tua tuag qas vam leej, tiamsis kuv tua tuag qas txhiab leej xwb. Nimno tsuas yog tshuav qhov uas lawv tsis tau tsa Daviv ua vajntxwv xwb!” Txij hnub ntawd los, Xa-ules txawm khib thiab dub muag rau Daviv li lawm. Hnub tom qab Vajtswv cia tus ntsujplig phem los tshoov Xa-ules siab, Xa-ules txawm hais lus ua dog ua dig hauv nws tsev li tus neeg vwm. Daviv txawm los ntaus nkauj nogncas rau Xa-ules mloog raws li nws niaj zaus ntaus, Xa-ules tuav rawv ib rab hmuv ntawm tes. Xa-ules xav hais tias, “Kuv yuav muab hmuv nkaug nws kom teem nkaus rau ntim phabntsa,” Xa-ules thiaj muab hmuv nkaus Daviv ob zaug; tiamsis Daviv maim dhau huv tibsi lawm. Xa-ules ntshai Daviv heev, rau qhov tus TSWV nrog nraim Daviv, tiamsis tus TSWV tso Xa-ules tseg lawm. Yog li ntawd, Xa-ules thiaj tsis pub Daviv nrog nws nyob, thiab tsa Daviv ua ib tug thawj tubrog saib pawg txhiab. Daviv coj nws cov tubrog mus tua rog thiab Daviv ua txhua yam tiav huv tibsi, rau qhov tus TSWV nrog nraim nws. Thaum Xa-ules pom Daviv ua tau txhua yam tiav, Xa-ules yimhuab ntshai Daviv heev. Tiamsis cov Yixalayees thiab cov Yudas nyiam Daviv heev, rau qhov Daviv yog ib tug thawjcoj uas ua tau txhua yam tiav. Tom qab no, Xa-ules hais rau Daviv hais tias, “Tus no yog kuv tus ntxhais hlob Melas. Kuv muab rau koj yuav ua pojniam; tiamsis koj yuav tsum ua kuv ib tug tubrog uas siab tawv thiab muab siab npuab kuv, thiab ntaus tsov ntaus nrog tawmtsam tus TSWV cov yeebncuab.” (Xa-ules xav hais tias yog ua li no cov Filitees yuav tua tau Daviv, tsis yog nws tua.) Daviv teb hais tias, “Kuv yog leejtwg, kuv txiv tsevneeg yog leejtwg uas thiaj tsimnyog ua vajntxwv vauv?” Tiamsis thaum txog hnub uas yuav muab Melas txis rau Daviv, Xa-ules txawm hloov siab thiab muab Melas txis rau Aliyees uas nyob hauv lub nroog Mehaulas yuav lawm. Tiamsis Xa-ules tus ntxhais Mikhas nyiam Daviv heev, thaum Xa-ules paub li ntawd Xa-ules zoo siab kawg li. Xa-ules xav hais tias, “Kuv yuav muab Mikhas rau Daviv yuav thiaj yuav ntxias tau Daviv mus tuag rau cov Filitees tes.” Yog li ntawd, Xa-ules thiaj rov hais rau Daviv hais tias, “Koj yuav tau ua kuv tus vauv.” Xa-ules kom nws cov nomtswv mus hais twjywm rau Daviv hais tias, “Vajntxwv nyiam koj, thiab nws cov nomtswv los puavleej hwm koj; nimno yog sijhawm zoo uas koj yuav tau ua vajntxwv tus vauv.” Yog li ntawd, lawv thiaj mus hais rau Daviv, thiab Daviv teb hais tias, “Tus uas tau ua vajntxwv vauv, tus ntawd tau ntsejmuag heev, tus neeg pluag thiab tsis tseemceeb li kuv no tsis tsimnyog ua vajntxwv vauv.” Cov nomtswv piav Daviv tej lus rau Xa-ules, Xa-ules thiaj kom lawv rov mus hais rau Daviv hais tias, “Tus nqi tshoob uas vajntxwv xav kom koj them tsuas yog cov Filitees ib puas daim tawv noov xwb, nws thiaj pauj tau nws cov yeebncuab.” (Qhov uas Xa-ules ua li no, yog nws xav ntxias Daviv mus kom cov Filitees tua tau Daviv.) Xa-ules cov nomtswv mus hais rau Daviv raws li Xa-ules hais rau lawv, thiab Daviv zoo siab uas yuav tau ua vajntxwv vauv. Thaum yuav txog hnub ua tshoob, Daviv thiab nws cov tubrog mus tua cov Filitees tuag ob puas leej. Daviv thiaj hlais cov Filitees ib puas daim tawv noov coj los suav ib daig zuj zus rau vajntxwv saib, kom Daviv tau ua Xa-ules vauv. Yog li ntawd, Xa-ules thiaj muab Mikhas rau Daviv yuav. Xa-ules paub hais tias tus TSWV nrog nraim Daviv thiab nws tus ntxhais Mikhas los nyiam Daviv heev. Yog li ntawd, Xa-ules yimhuab ntshai Daviv, thiab nws ua yeebncuab rau Daviv mus tas nws simneej. Txhua zaus uas cov Filitees tuaj tua cov Yixalayees, Daviv yog tus tua yeej ntau tshaj Xa-ules cov thawj tubrog. Ces Daviv lub koob meej thiaj nrov ncha moo lug. Xa-ules qhia qhov uas nws yuav tua Daviv rau nws tus tub Yaunathas thiab nws cov nomtswv. Tiamsis Yaunathas hlub Daviv heev, Yaunathas thiaj mus qhia rau Daviv hais tias, “Kuv txiv nrhiav kev yuav muab koj tua povtseg. Tagkis sawv ntxov koj yuav tsum ceevfaj; thiab koj khiav mus nkaum tsis txhob tawm mus qhov twg li. Kuv yuav mus sawv ntawm kuv txiv ib sab ntawm qhov chaw uas koj nkaum nram liaj, kuv yuav nug kuv txiv txog koj. Yog kuv paub li cas kuv mam li qhia rau koj.” Yaunathas qhuas Daviv rau Xa-ules mloog hais tias, “Txiv koj tsis txhob ua phem rau Daviv uas yog koj tus tubtxib. Nws tsis tau ua txhaum rau koj dabtsi li; tej uas nws tau ua lawm, puavleej yog tej uas muaj nqi rau koj xwb. Nws phav siav mus tua Nkauli-am, thiab tus TSWV pub cov Yixalayees muaj yeej loj kawg li. Thaum koj pom tej no, koj twb zoo siab heev. Nws tsis tau ua txhaum dabtsi, vim li cas koj pheej xav muab nws tua povtseg? Tsis muaj qabhau uas koj yuav muab nws tua povtseg.” Xa-ules mloog Yaunathas hais, thiab Xa-ules coglus rau tus TSWV hais tias, “Kuv yuav tsis tua Daviv povtseg.” Yog li ntawd, Yaunathas thiaj hu Daviv tawm los, nws piav txhua yam rau Daviv mloog thiab coj Daviv mus cuag Xa-ules, Daviv thiaj rov mus ua haujlwm rau vajntxwv li qub. Tom qab no, cov Filitees rov tuaj ua rog rau cov Yixalayees dua. Daviv thiaj coj tubrog mus tua cov Filitees swb thiab khiav rov mus tas lawm. Muaj ib hnub tus TSWV cia tus ntsujplig phem rov los tshoov Xa-ules siab dua. Xa-ules nyob hauv tsev, nws tuav rawv nws rab hmuv, thiab Daviv tabtom ntaus nkauj nogncas rau Xa-ules mloog. Xa-ules txawm muab hmuv nkaug Daviv kom teem nkaus rau tim phabntsa, tiamsis Daviv maim dhau, thiab rab hmuv ntsia nkaus rau tim phabntsa. Daviv tawm plaws khiav lawm. Hmo ntawd Xa-ules tso neeg mus soj Daviv hauv Daviv tsev, thiab tagkis kaj ntug yuav muab Daviv tua povtseg. Mikhas uas yog Daviv tus pojniam hais rau Daviv hais tias, “Yog hmo no koj tsis khiav, tagkis kaj ntug luag yuav muab koj tua povtseg.” Yog li ntawd, Mikhas muab hlua khi Daviv tso dauv ntawm qhovrai rau sab nraud thiab Daviv khiav mus lawm. Mikhas muab ib tug mlom los tso pw saum txaj, muab lub tog hauv ncoo plaub tshis los rau tus mlom ncoo thiab muab pam los vov rau. Thaum Xa-ules cov tubrog tuaj ntes Daviv, Mikhas hais rau lawv hais tias, “Daviv mob lawm.” Tiamsis Xa-ules kom lawv rov mus xyuas Daviv. Nws hais rau lawv hais tias, “Nej cia li kwv nws thiab nws lub txaj tuaj rau kuv, kuv yuav muab nws tua povtseg.” Lawv thiaj mus hauv tsev, thiab pom tus mlom pw saum txaj, thiab lub tog rau ncoo plaub tshis tiag rawv tus mlom taubhau. Xa-ules nug Mikhas hais tias, “Ua li cas koj thiaj dag kuv li no, thiab tso kuv tus yeebncuab dim lawm?” Mikhas teb hais tias, “Nws hais rau kuv hais tias, yog kuv tsis pab kom nws dim, nws yuav muab kuv tua povtseg.” Daviv khiav mus cuag Xamuyees pem lub nroog Lamas thiab Daviv piav txhua yam uas Xa-ules ua phem rau nws huv tibsi rau Xamuyees mloog. Ces Daviv thiab Xamuyees txawm mus nyob rau hauv lub zos Nayaus lawm. Muaj neeg mus qhia rau Xa-ules hais tias, Daviv nyob hauv lub zos Nayaus hauv lub nroog Lamas, yog li ntawd, Xa-ules thiaj txib neeg mus ntes Daviv. Lawv tuaj pom Xamuyees coj ib pab cevlus tabtom seevcev thiab cevlus. Ces Vajtswv tus ntsujplig txawm los kav hlo Xa-ules cov neeg siab, lawv txawm cia li nrog cov cevlus ntawd seevcev thiab cevlus. Thaum Xa-ules hnov li ntawd, nws tso ib pab neeg coob dua qub mus los lawv cia li mus seevcev thiab cevlus ib yam li ntawd lawm. Xa-ules tso dua pab peb mus los lawv cia li mus ua ib yam nkaus li ntawd thiab. Xa-ules thiaj mus rau pem lub nroog Lamas. Thaum nws mus txog ntawm lub qhovtshij loj hauv Xekus, Xa-ules nug hais tias, “Xamuyees thiab Daviv nyob qhov twg?” Lawv qhia hais tias, “Nkawd nyob hauv lub zos Nayaus.” Thaum Xa-ules tabtom mus rau hauv, Vajtswv tus ntsujplig txawm los kav hlo Xa-ules siab, nws thiaj seevcev thiab cevlus taug kev mus txog ntua hauv lub zos Nayaus. Xa-ules muab nws cev ris tsho hle, seevcev thiab cevlus tabmeeg Xamuyees, thiab pw liabqab ib hnub ib hmo. (Vim qhov no thiaj muaj lus hais tias, “Xa-ules yog ib tug cevlus lawm thiab los?”) Tom qab ntawd, Daviv txawm khiav tawm ntawm lub zos Nayaus hauv lub nroog Lamas mus cuag Yaunathas. Nws nug Yaunathas hais tias, “Kuv tau ua dabtsi? Kuv muaj txim dabtsi? Kuv tau ua txhaum koj txiv qhov twg, nws thiaj pheej xav muab kuv povtseg?” Yaunathas teb hais tias, “Vajtswv yuav tsis pub kom koj tuag! Txhua zaus uas kuv txiv yuav ua dabtsi, nws yeej qhia rau kuv ua ntej, tsis hais yam uas tseemceeb lossis tsis tseemceeb, nws tsis npog ib yam tseg li. Nyaj yuav tsis muaj li koj xav!” Tiamsis Daviv teb hais tias, “Koj txiv paub hais tias koj hlub kuv heev, tej uas koj txiv yuav ua nws tsis qhia rau koj, nyob tsam koj yuav ntxhov siab heev. Kuv tuav tus TSWV uas muaj sia nyob lub npe qhia rau koj hais tias, kuv nyob tsis deb ntawm txojkev tuag lawm!” Yaunathas hais tias, “Koj xav kom kuv pab koj dabtsi, kuv yeej txaus siab pab.” Daviv teb hais tias, “Tagkis yog hnub ua rooj noj rooj haus Hli Xiab, kuv yuav tau nrog vajntxwv noj mov ua ke. Tiamsis thov cia kuv khiav mus nkaum nram liaj, mus txog nagkis yuav tsaus ntuj, kuv mam li rov los. Yog koj txiv tsis pom kuv los nyob ntawm rooj mov, ces koj hais rau nws hais tias, kuv twb thov koj cia kuv rov mus rau nram lub nroog Npelehees lawm, rau qhov kuv txiv lawv yuav tua tsiaj hlawv fij rau tus TSWV raws li niaj xyoo ua. Yog koj txiv hais tias, ‘Tau lawm,’ ces kuv thiaj li yuav tso siab; tiamsis yog nws npautaws, ces koj paub hais tias nws yeej yuav muab kuv tua povtseg. Thov koj ua raws li kuv hais no thiab nco ntsoov tej lus uas koj cog tseg rau kuv lawm. Yog kuv ua txhaum, koj cia li muab kuv tua povtseg xwb! Ua li cas koj yuav coj kuv mus rau koj txiv tua?” Yaunathas teb hais tias, “Koj tsis txhob xav li ko! Yog kuv paub hais tias kuv txiv yuav muab koj tua povtseg tiag, kuv puas khuv muab npog cia tsis qhia rau koj paub?” Daviv nug hais tias, “Yog koj txiv teb koj ua npautaws vog, leejtwg yuav tuaj qhia rau kuv paub?” Yaunathas teb hais tias, “Wb mus nram liaj,” ces nkawd txawm mus, thiab Yaunathas hais rau Daviv hais tias, “Thov tus TSWV uas yog cov Yixalayees tus Vajtswv ua timkhawv rau wb! Tagkis thiab nagkis lub caij no kuv yuav nug kuv txiv, yog nws ua zoo rau koj, kuv yuav qhia rau koj paub. Yog nws yuav ua phem rau koj, kuv tseem tsis qhia rau koj paub thiab pab kom koj dim, ces thov tus TSWV muab kuv tua povtseg. Thov tus TSWV nrog nraim koj ib yam li yav tas los nws nrog kuv txiv! Yog kuv tseem ua neej nyob, thov koj nco ntsoov koj tej lus cog tseg thiab ua zoo rau kuv; tiamsis yog kuv tuag lawm los thov koj ua siab dawb siab zoo rau kuv tsevneeg mus ib yam li koj ua rau kuv. Thaum tus TSWV ua rau koj tej yeebncuab puastsuaj tas lawm los thov kom wb tej lus cog tseg no tseem nyob ruaj khov kho. Yog koj rhuav wb tej lus cog tseg no, tus TSWV yuav rau txim rau koj.” Yaunathas kom Daviv rov coglus tseg ib zaug ntxiv hais tias, nws yuav hlub Yaunathas. Rau qhov Yaunathas hlub Daviv ib yam li nws hlub nws lub cev. Yaunathas hais rau Daviv hais tias, “Tagkis yog hnub ua rooj noj rooj haus Hli Xiab, yog tsis pom koj mus, kuv txiv yeej yuav nug xwb. Yog nagkis tseem tsis tau pom koj tshwm thiab, ntshai kuv txiv yimhuab yuav nug heev; yog li ntawd, koj cia li khiav mus nkaum ntawm qhov qub chaw, thiab koj mus nkaum ntawm pawg pobzeb sab tod. Ces kuv yuav muab hneevnti tua peb hnee mus rau ntawm pawg pobzeb ib yam li kuv tua daim phiaj. Kuv yuav kom kuv tus tubtxib mus khaws cov xub los. Yog kuv qhia rau nws hais tias, ‘Cov xub poob rau ntawm koj sab tom no, koj cia li mus khaws los,’ qhov ntawd txhais hais tias, koj cia li tawm los, tsis muaj xwm dabtsi. Kuv coglus rau tus TSWV uas muaj sia nyob hais tias, koj yuav tsis raug kev txhawj ntshai dabtsi. Tiamsis yog kuv qhia rau kuv tus tubtxib hais tias, ‘Cov xub poob rau ntawm koj sab tom ub lawm,’ ces koj kavtsij khiav, rau qhov tus TSWV twb pom zoo cia koj mus lawm. Tej lus uas wb cog tseg no muaj tus TSWV ua timkhawv hais tias wb ib tug yuav tsis rhuav ib tug tej lus mus ibtxhis li.” Hnub uas ua rooj noj rooj haus Hli Xiab ntawd, Daviv txawm mus nkaum rau nram liaj lawm. Vajntxwv Xa-ules tuaj rau ntawm rooj noj rooj haus, thiab zaum ntawm lub chaw uas nws ibtxwm zaum npuab ntawm phabntsa. Aneles zaum npuab nkaus vajntxwv thiab Yaunathas zaum ncaj vajntxwv xubntiag sab nrooj tod. Daviv lub chaw tsis muaj neeg zaum li, tiamsis hnub ntawd, Xa-ules tsis hais ib los li, rau qhov nws xav hais tias, “Tej zaum yog muaj dabtsi ua rau Daviv lub cev tsis huv lawm, nws thiaj tsis tuaj.” Hnub tom qab los tsis pom Daviv tuaj zaum nws lub chaw li, Xa-ules thiaj nug Yaunathas hais tias, “Ua li cas nag hmo thiab hnub no tsis pom Daviv tuaj noj mov?” Yaunathas teb hais tias “Nws thov kuv kom cia nws rov mus rau nram Npelehees lawm. Nws hais tias, ‘Thov cia kuv mus, rau qhov peb tsevneeg tua tsiaj fij ua rooj noj rooj haus hauv lub nroog Npelehees, thiab kuv tus tijlaug kom kuv yuav tsum mus xwb. Yog koj yog kuv tus phoojywg tiag, thov koj tso kuv mus xyuas kuv cov kwvtij.’ Vim li ntawd, nws thiaj tsis tuaj zaum ntawm nws lub chaw noj mov.” Xa-ules chim heev rau Yaunathas thiab cem Yaunathas hais tias, “Niag tub tsis tsimtxiaj no, nimno kuv paub hais tias koj nrog Daviv ua ib nqag, koj rhuav koj thiab koj niam ntsejmuag nkaus xwb! Koj puas paub hais tias yog Daviv tseem ua neej nyob, koj yuav tsis tau ua vajntxwv kav lub tebchaws no li? Koj cia li mus coj Daviv los ntawm no, kuv yuav muab nws tua povtseg.” Yaunathas teb hais tias, “Vim li cas koj thiaj yuav muab nws tua povtseg, nws tau ua txhaum koj dabtsi?” Thaum Yaunathas hais li ntawd, Xa-ules tsa hlo hmuv nkaug Yaunathas. Yaunathas thiaj paub hais tias nws txiv yeej xav muab Daviv tua povtseg tiag. Yaunathas txawm sawv tsees ntawm rooj mov tawm npautaws vog mus lawm, thiab hnub ntawd nws tsis noj ib yam dabtsi li, hnub ntawd yog hnub xiab ob. Yaunathas ntxhov siab kawg li, rau qhov nws txiv ua phem heev rau Daviv. Tagkis sawv ntxov Yaunathas txawm mus cuag Daviv nram liaj, raws li nkawd tau teem tseg lawm. Nws coj ib tug tub hluas nrog nws mus, thiab hais rau tus tub hluas ntawd hais tias, “Koj khiav mus khaws cov xub uas kuv yuav tua mus.” Thaum tus tub hluas tabtom khiav mus, Yaunathas txawm rub hneevnti tua cov xub mus ua ntej. Thaum tus tub hluas mus txog ntawm qhov chaw uas cov xub poob, Yaunathas hu hais tias, “Cov xub poob rau tom ub lawm! Koj tsis txhob nres ntawm ko, koj kavtsij khiav tiag mus!” Tus tub hluas ntawd khaws cov xub coj los rau Yaunathas, nws tsis paub hais tias xyov Yaunathas hais li ntawd, yog nws hais dabtsi; tsuas yog Yaunathas thiab Daviv thiaj paub xwb. Yaunathas muab nws rab hneevnti rau tus tub hluas thiab kom nws nqa mus tsev. Thaum tus tub hluas rov mus tsev lawm, Daviv mam tawm ntawm pawg pobzeb sab tod los, nws los txhos caug pe Yaunathas peb zaug, nkawd sib qawg quaj thiab sib nwj; Daviv mluas tshaj Yaunathas. Yaunathas hais rau Daviv hais tias, “Thov Vajtswv nrog nraim koj. Thov tus TSWV ua timkhawv rau wb thiab wb cov xeebntxwv hais tias wb thiab lawv yuav tsis rhuav tej lus uas wb cog tseg no mus ibtxhis li.” Ces Daviv txawm ncaim mus lawm, thiab Yaunathas rov los rau hauv nroog. Daviv mus cuag tus povthawj Ahimelej uas nyob hauv lub nroog Naus. Ahimelej tawm tshee hnyo tuaj ntsib Daviv thiab nug hais tias, “Ua li cas koj tib leeg tuaj xwb, tsis muaj leejtwg nrog koj tuaj li?” Daviv teb hais tias, “Vajntxwv kom kuv tuaj ua ib qho haujlwm, thiab nws kom kuv tsis txhob qhia tej uas nws txib kuv tuaj ua no rau leejtwg paub li. Kuv twb teem kuv cov neeg rau ib qho chaw kom lawv tuaj ntsib kuv lawm. Koj puas muaj dabtsi noj? Thov muab tsib lub ncuav rau kuv, lossis koj muab dabtsi los tau.” Tus povthawj teb hais tias, “Kuv tsis muaj tej ncuav uas noj tau li, tsuas muaj cov ncuav uas muab fij rau tus TSWV lawm xwb; yog koj cov neeg tsis tau nrog pojniam pw, mas kuv thiaj muab rau koj.” Daviv teb hais tias, “Qhov tseeb, lawv yeej tsis nrog pojniam pw li, thaum kuv cov neeg tawm mus ua haujlwm lawm, peb yeej caiv kom peb yog neeg huv; hnub no peb tuaj ua haujlwm, mas peb hajyam caiv zoo.” Yog li ntawd, tus povthawj thiaj muab cov ncuav uas twb muab fij rau tus TSWV lawm rau Daviv, rau qhov nws tsuas muaj cov ncuav uas twb muab fij rau Vajtswv, thiab tshem tawm saum lub rooj uas yuav muab cov ncuav tshiab hloov lawm xwb. ( Hnub ntawd Dau-es uas yog Xa-ules tus thawj tubtxib yug tsiaj uas yog neeg Edoos tuaj nyob ntawd thiab, rau qhov nws tuaj cuag tus TSWV.) Daviv nug Ahimelej hais tias, “Koj puas muaj ib rab hmuv lossis ib rab ntaj rau kuv? Kuv tsis coj hmuv lossis ntaj tuaj li, rau qhov vajntxwv txhib kom kuv cia li tuaj tamsim, kuv thiaj nqa tsis tau tuaj.” Ahimelej teb hais tias, “Kuv muaj Nkauli-am uas yog neeg Filitees, tus uas koj tua tuag hauv lub Hav Elas rab ntaj uas muab ntaub qhwv tso rau tom qab lub efaus. Yog koj xav tau rab ntawd los coj rab ntawd mus, rau qhov tsis muaj dua lwm rab lawm.” Daviv teb hais tias, “Tsis muaj dua lwm rab ntaj zoo tshaj rab ntawd lawm, thov muab rab ntawd rau kuv!” Yog li hnub ntawd Daviv txawm khiav Xa-ules mus cuag Vajntxwv Akhises uas kav lub nroog Nkas lawm. Vajntxwv Akhises cov nomtswv hais rau nws hais tias, “Tus no puas yog Daviv uas ua vajntxwv kav nws lub tebchaws? Tus txivneej no yog tus uas cov pojniam hu nkauj thiab seevcev qhua hais tias, ‘Xa-ules tua tuag qas txhiab leej, tiamsis Daviv tua tuag qas vam leej.’ ” Daviv khaws tej lus ntawd rau nruab siab thiab ntshai Vajntxwv Akhises uas kav lub nroog Nkas kawg li. Daviv ua txuj ua li tus neeg vwm, thaum luag cheem nws, nws lam tau lam kes ntawm tej roojvag nroog, thiab ua qaubncaug nrog zig ntawm nws tej hwjtxwv. Yog li ntawd, Akhises hais rau nws cov tubtxib hais tias, “Nej saib, nws vwm lawm! Ua li cas nej tseem coj nws tuaj cuag kuv thiab? Kuv tsis muaj neeg vwm los cas? Ua li cas nej tseem coj dua ib tug neeg vwm li no tuaj hauv kuv tsev thiab tabkaum kuv?” Daviv khiav hauv lub nroog Nkas mus rau hauv ib lub qhov tsua uas nyob ze ntawm lub nroog Adulas. Thaum nws cov tijlaug thiab nws tsevneeg hnov hais tias nws nyob qhov ntawd, lawv txawm tuaj nrog nws nyob. Cov neeg uas raug luag tsimtxom, cov uas tshuav luag nqi, thiab cov uas tsis txaus siab puavleej tuaj cuag nws, tagnrho cov neeg uas tuaj ntawd, muaj plaub puas leej thiab Daviv ua lawv tus thawj. Daviv tawm qhov ntawd mus rau hauv lub nroog Mixepas nram tebchaws Mau-am thiab nws hais rau tus vajntxwv uas kav tebchaws Mau-am hais tias, “Thov cia kuv niam kuv txiv los nyob hauv koj lub tebchaws mus txog hnub uas kuv paub hais tias Vajtswv yuav ua dabtsi rau kuv tso.” Yog li ntawd, Daviv thiaj tso nws niam nws txiv rau tus vajntxwv uas kav tebchaws Mau-am, thiab nkawd nrog vajntxwv nyob mus txog hnub uas Daviv tawm hauv qhov tsua los. Nkas uas yog tus cev Vajtswv lus, tuaj cuag Daviv thiab hais tias, “Koj tsis txhob nyob ntawm no lawm; tamsim no koj cia li tawm rov mus rau pem tebchaws Yudas.” Yog li ntawd, Daviv thiaj tawm thiab mus rau hauv thaj havzoov Heles lawm. Thaum Xa-ules nyob hauv lub nroog Nkinpe-as, muaj ib hnub nws mus zaum hauv qab tsob ntoo tamalis saum ib lub ncov roob, nws tuav rawv nws rab hmuv ntawm tes, thiab tagnrho nws cov nomtswv sawv puagncig nws. Txawm muaj neeg los qhia rau Xa-ules hais tias, lawv pom Daviv thiab Daviv cov neeg. Xa-ules txawm hais rau nws cov nomtswv hais tias, “Cov neeg Npeenyamees, nej cia li mloog kuv hais! Nej xav hais tias Daviv yuav faib tej liaj teb thiab tej vaj txiv hmab rau nej, thiab tsa nej ua nws cov thawj tubrog no los? Twb yog vim li ntawd, nej thiaj ntxeev siab rau kuv los? Nej cov ko tsis muaj ib tug qhia rau kuv paub hais tias, kuv tus tub mus koom nrog Daviv lawm. Nej cov ko tsis muaj ib tug txhawj txog kuv lossis qhia rau kuv hais tias, Daviv uas yog kuv ib tug tubrog nrhiav kev tua kuv, thiab kuv tus tub los tseem cuab nws zog kawg li!” Dau-es uas yog tus thawj saib Xa-ules cov tubtxib uas yog neeg Edoos teb hais tias, “Kuv pom Daviv thaum nws mus cuag Ahitus tus tub Ahimelej hauv lub nroog Naus. Ahimelej nug tus TSWV saib Daviv yuav ua li cas, nws tseem ntim zaub mov thiab muab Nkauli-am uas yog neeg Filitees rab ntaj rau Daviv lawm.” Yog li ntawd, Vajntxwv Xa-ules thiaj tso neeg mus hu tus povthawj Ahimelej thiab nws cov kwvtij uas ua povthawj hauv lub nroog Naus, lawv thiaj tuaj cuag Xa-ules. Xa-ules hais rau Ahimelej hais tias, “Ahimelej, koj cia li mloog kuv hais!” Ahimelej teb hais tias, “Vajntxwv, kuv nyob ntawm no.” Xa-ules nug Ahimelej hais tias, “Vim li cas koj thiab Daviv tuavhauv ntxeev siab rau kuv? Vim li cas koj muab zaub mov, muab ntaj thiab nug Vajtswv rau nws? Nimno nws tig tawmtsam kuv thiab nrhiav kev yuav muab kuv tua!” Ahimelej teb hais tias, “Daviv yog koj ib tug thawj tubrog uas siab ncaj tshaj li! Nws yog koj tus vauv thiab yog tus thawj tubrog uas nrog nraim koj thiab txhua tus hauv koj lub loog hwm nws heev. Yog tiag, kuv yeej tau nug Vajtswv rau nws, tiamsis zaum no tsis yog thawj zaug Vajntxwv, qhov uas koj hais tias kuv tuavhauv nrog Daviv ntxeev siab rau koj ntawd, koj tsis txhob liam rau kuv lossis kuv tsevneeg ib tug twg. Kuv yeej tsis paub txog tej xwm no li!” Vajntxwv hais tias, “Ahimelej, koj thiab koj cov kwvtij yeej yuav raug tua tuag tas li.” Ces Xa-ules hais rau cov tubrog uas sawv ze ntawm nws hais tias, “Cia li tua tus TSWV cov povthawj no! Lawv tau koom siab nrog Daviv thiab tsis qhia rau kuv paub hais tias Daviv khiav lawm, txawm yog lawv twb paub los lawv tseem tsis qhia.” Tiamsis cov tubrog tsis kam tua tus TSWV cov povthawj li. Yog li ntawd, Xa-ules thiaj hais rau Dau-es hais tias, “Koj cia li muab cov povthawj ntawd tua!” Dau-es thiaj muab cov povthawj tua tuag tas. Hnub ntawd nws tua cov povthawj uas hnav tsho efaus tuag yim caum tsib leej. Xa-ules tseem muab cov neeg hauv lub nroog Naus uas yog cov povthawj lub nroog tua tuag tas, tsis hais pojniam txivneej, tej menyuam tus hlob tus yau, tej nyuj, tej neesluav thiab tej yaj huv tibsi. Tiamsis Ahimelej cov tub ib tug uas hu ua Anpiyathas khiav dim thiab mus koom nrog Daviv lawm. Anpiyathas mus qhia txhua yam uas Xa-ules tua tus TSWV cov povthawj rau Daviv. Daviv hais rau Anpiyathas hais tias, “Hnub uas kuv pom Dau-es, kuv yeej paub lawm hais tias, nws yuav mus qhia rau Xa-ules. Yog vim kuv koj txiv tsevneeg thiaj raug tua tuag tas. Koj nrog kuv nyob thiab tsis txhob ntshai. Xa-ules yeej xav muab koj thiab kuv tua povtseg, tiamsis koj cia li tso siab thiab nrog kuv nyob ntawm no.” Daviv hnov hais tias cov Filitees tuaj tua lub nroog Kelas thiab huab cov pejxeem tej nplej tshiab coj mus tas. Yog li ntawd, Daviv thiaj nug tus TSWV hais tias, “Puas tsimnyog kuv mus tua cov neeg Filitees?” Tus TSWV teb hais tias, “Koj cia li mus tua cov Filitees thiab cawm lub nroog Kelas.” Tiamsis Daviv cov neeg hais rau Daviv hais tias, “Peb nyob hauv tebchaws Yudas no, peb twb ntshai txaus lawm; yog peb mus tua cov Filitees hauv lub nroog Kelas, peb hajyam yuav ntshai heev!” Yog li ntawd, Daviv thiaj rov nug tus TSWV dua, thiab tus TSWV hais rau Daviv tias “Koj cia li mus tua lub nroog Kelas, kuv yuav pub kom koj tua yeej cov Filitees.” Yog li ntawd, Daviv thiab nws cov neeg thiaj mus rau hauv lub nroog Kelas thiab tua cov Filitees tuag coob heev thiab txeeb tau lawv tej tsiaj txhu huv tibsi. Yog li ntawd, Daviv thiaj cawm tau lub nroog Kelas. Thaum Ahimelej tus tub Anpiyathas khiav mus cuag Daviv hauv lub nroog Kelas ntawd, nws coj tau ib lub efaus mus thiab. Muaj neeg qhia rau Xa-ules hais tias, Daviv mus rau hauv lub nroog Kelas lawm, Xa-ules txawm hais tias, “Vajtswv twb muab Daviv cob rau kuv tes lawm. Daviv tau kev tws, rau qhov nws mus rau hauv lub nroog uas muaj ntsa yeej thiab muaj roojvag thaiv lawm.” Yog li ntawd, Xa-ules txawm txhij nws cov tubrog mus tua lub nroog Kelas, puav Daviv thiab nws cov neeg. Thaum Daviv hnov hais tias Xa-ules npaj yuav tuaj tua nws, nws hais rau tus povthawj Anpiyathas hais tias, “Coj lub efaus los ntawm no.” Daviv hais tias, “Tus TSWV uas yog cov Yixalayees tus Vajtswv, kuv hnov hais tias Xa-ules npaj yuav tuaj rau hauv lub nroog Kelas no, thiab rhuav kom lub nroog puastsuaj tas vim kuv uas yog koj tus tubtxib. Cov pejxeem hauv lub nroog Kelas no puas yuav muab kuv cob rau Xa-ules tes? Xa-ules puas yuav tuaj raws li kuv hnov ntawd tiag? Tus TSWV uas yog cov Yixalayees tus Vajtswv, thov koj teb kuv!” Tus TSWV teb hais tias, “Xa-ules yeej yuav tuaj xwb.” Daviv rov nug dua hais tias, “Cov pejxeem hauv lub nroog Kelas no puas yuav muab kuv thiab kuv cov neeg cob rau Xa-ules tes?” Tus TSWV teb hais tias, “Lawv yuav ua li ntawd ntag.” Yog li ntawd, Daviv thiab nws cov neeg rau puas leej thiaj khiav tawm hauv lub nroog Kelas tamsim ntawd lawm. Thaum Xa-ules hnov hais tias, Daviv khiav tawm hauv lub nroog Kelas mus lawm, Xa-ules txawm tsis ua raws li nws tau npaj siab tseg. Daviv khiav mus nkaum saum lub laj roob mojsab qhua uas ze lub tiaj mojsab qhua Xifes. Xa-ules niaj hnub nrhiav Daviv, tiamsis Vajtswv tsis muab Daviv cob rau Xa-ules tes. Daviv pom Xa-ules tuaj nrhiav tua Daviv. Thaum Daviv tseem nyob ntawm Haules uas ze lub tiaj mojsab qhua Xifes. Yaunathas tuaj cuag Daviv qhov ntawd thiab txhawb Daviv zog hais tias Vajtswv yuav tsomkwm Daviv, thiab hais rau Daviv hais tias, “Koj tsis txhob ntshai. Kuv txiv Xa-ules yeej tsis muaj cuabkav ua tau li cas rau koj. Nws paub hais tias, koj yuav tau ua vajntxwv kav tebchaws Yixalayees thiab kuv yuav tau ua tus yau ntawm koj.” Nkawd coglus ua phoojywg tabmeeg tus TSWV; Daviv tseem nyob hauv Haules, tiamsis Yaunathas rov qab mus tsev lawm. Cov neeg hauv Xifes qee leej mus qhia rau Xa-ules hauv lub nroog Nkinpe-as hais tias, “Daviv khiav mus nkaum hauv Haules uas nyob saum lub Roob Hakhilas, hauv tebchaws Yudas sab qabteb uas ua suabpuam lawm. Vajntxwv, yog koj xav ntes nws, koj cia li tuaj rau hauv peb lub tebchaws, thiab peb yuav muab nws cob rau koj tes.” Xa-ules teb hais tias, “Thov tus TSWV foom koob hmoov rau nej qhov uas nej ua zoo rau kuv. Nej rov qab mus saib ib zaug ntxiv kom paub tseeb hais tias nws nyob qhov twg tiag, thiab leejtwg yog tus pom nws. Kuv hnov hais tias nws ntse heev. Nej mus nrhiav saib nws nkaum qhov twg tiag thiab maj ceev rooj rov tuaj qhia rau kuv paub. Yog nws tseem nyob qhov ntawd, kuv yuav nrog nej mus nrhiav kom tau nws tua, txawm yog nrhiav thoob tebchaws Yudas los kuv yuav mus.” Yog li ntawd, lawv thiaj ua Xa-ules ntej mus rau hauv Xifes lawm. Daviv thiab nws cov neeg nyob saum lub roob mojsab qhua Ma-oos ntawm lub hav qhuav hauv tebchaws Yudas sab qabteb uas ua suabpuam. Xa-ules thiab nws cov neeg txawm mus nrhiav Daviv, tiamsis Daviv hnov li ntawd, nws thiaj mus rau saum lub roob zeb uas nyob ntawm roob mojsab qhua Ma-oos thiab nyob saud. Thaum Xa-ules hnov li ntawd, nws txawm caum Daviv qab mus. Xa-ules thiab nws cov neeg nyob ib sab roob, Daviv thiab nws cov neeg nyob ib sab roob. Daviv thiab nws cov neeg npaj khiav kom dim Xa-ules thiab nws cov neeg uas tuaj ze yuav ntes lawv. Lub sijhawm ntawd, txawm muaj ib tug txivneej tuaj hais rau Xa-ules hais tias, “Koj cia li rov qab tamsim no! Cov Filitees twb tuaj vij peb lub tebchaws tas lawm!” Yog li ntawd, Xa-ules thiaj tseg tsis caum Daviv, thiab tig rov mus tua cov Filitees lawm. Vim li ntawd, thiaj muab qhov chaw ntawd hu ua lub Laj Roob Sib Quas. Daviv txawm tawm qhov ntawd thiab mus nkaum rau hauv cheebtsam Enkedis lawm. Thaum Xa-ules mus tua cov Filitees rov qab los, muaj neeg qhia rau nws hais tias Daviv nyob tom roob mojsab qhua uas ze ntawm Enkedis. Xa-ules txawm xaiv cov tubrog Yixalayees uas txawj tua rog, peb txhiab leej mus nrhiav Daviv thiab Daviv cov neeg ntawm lub Roob Tsuas Sai sab hnubtuaj. Xa-ules tuaj txog ntawm lub qhov tsua uas nyob ze cov nkuaj yaj ntawm ntug kev, nws txawm mus tawm rooj hauv lub qhov tsua ntawd. Lub qhov tsua ntawd twb yog lub uas Daviv thiab nws cov neeg nkaum hauv ntag. Daviv cov neeg hais rau Daviv hais tias, “Zaum no yog sijhawm zoo rau koj lawm, raws li tus TSWV hais rau koj hais tias, nws yuav muab koj tus yeebncuab cob rau koj tes, koj xav ua li cas rau nws los ua tau.” Daviv txawm nyas mus txiav Xa-ules lub tw tsho ntev ib qho nqa mus lawm los Xa-ules twb tsis hnov li. Tom qab ntawd Daviv nyuaj siab heev, rau qhov uas nws txiav Xa-ules lub twg tsho, Daviv hais rau nws cov neeg hais tias, “Thov tus TSWV tsis txhob pub kuv ua tej yam tsis zoo rau kuv tus vajntxwv uas tus TSWV xaiv! Tsis tsimnyog kuv ua ib qho phem rau nws li, rau qhov yog tus TSWV tsa nws ua vajntxwv.” Yog li ntawd, Daviv thiaj tsis pub nws cov neeg muab Xa-ules tua povtseg. Xa-ules txawm sawv tsees tawm hauv qhov tsua mus lawm. Daviv raws loo qab mus hu Xa-ules hais tias, “Vajntxwv!” Xa-ules tig hlo saib tuaj, Daviv txhos caug ntua khoov ntshis ua ntsejmuag ti kaus hauv av hawm, thiab hais tias, “Ua li cas koj mloog luag tej lus uas hais tias kuv soj nraim yuav tua koj? Qhia rau koj paub hais tias hnub no tus TSWV twb muab koj cob rau kuv hauv lub qhov tsua no lawm. Kuv cov neeg kom kuv muab koj tua povtseg, tiamsis vim kuv hwm koj, kuv thiaj tsis ua phem rau koj, rau qhov koj yog tus uas tus TSWV tsa ua vajntxwv. Txiv, koj saib, kuv twb txiav tau koj lub tw tsho nyob ntawm kuv tes no! Yog kuv xav tua koj, ces kuv twb tua tau koj lawm, tiamsis kuv tsuas txiav koj lub tw tsho xwb. Qhov no qhia rau koj paub hais tias, kuv tsis tau ntxeev siab lossis ua phem rau koj li. Txawm yog kuv tsis tau ua txhaum rau koj los koj pheej caum kuv tua. Thov tus TSWV txiav txim rau wb saib leejtwg yog tus ua txhaum! Thov tus TSWV rau txim rau koj, vim koj ua phem rau kuv, rau qhov kuv tsis tau ua phem rau koj li. Nyaj koj paub tej lus uas cov laus ibtxwm hais tias, ‘Tsuas yog tus neeg siab phem thiaj ua phem xwb.’ Yog li ntawd, kuv yuav tsis ua phem rau koj. Cov Yixalayees tus vajntxwv, koj mus tawmtsam leejtwg? Koj mus caum leejtwg? Koj caum tus dev uas tuag lawm los? Koj caum devmub los? Thov tus TSWV tshuaj saib yog koj lossis yog kuv ua txhaum. Thov tus TSWV tsa muag saib zaj no thiab tuaj kuv tog pab kom kuv dim ntawm koj txhais tes.” Thaum uas Daviv hais li ntawd tas, Xa-ules teb hais tias, “Kuv tus tub, koj yog Daviv ntag los?” Ces Xa-ules txawm quaj. Xa-ules hais rau Daviv hais tias, “Koj hais yog lawm! Kuv tau ua txhaum tiag. Txawm yog kuv tau ua phem rau koj los koj tseem ua zoo rau kuv. Hnub no koj ua rau sawvdaws pom hais tias koj ua zoo kawg nkaus rau kuv. Txawm yog tus TSWV muab kuv cob rau koj tes lawm los koj tseem tsis tua kuv povtseg. Puas muaj leejtwg ntes tau nws tus yeebncuab thiab cia li muab tso mus tsis muab tua povtseg? Thov tus TSWV foom koob hmoov rau koj, pauj tej uas koj tau ua zoo rau kuv hnub no. Nimno kuv paub hais tias, koj yuav tau ua cov Yixalayees tus vajntxwv thiab kav lub tebchaws kom vammeej mus lawm yav tom ntej. Thov koj tuav tus TSWV lub npe coglus rau kuv hais tias, koj yuav tsis tua kuv cov xeebntxwv povtseg, kom kuv lub npe thiab kuv tsevneeg lub npe thiaj yuav tsis ploj mus.” Daviv coglus hais tias nws yuav ua li ntawd. Ces Xa-ules txawm rov qab mus tsev, Daviv thiab nws cov neeg thiaj rov los rau ntawm qhov chaw uas lawv nkaum lawm. Xamuyees tuag, cov Yixalayees tuaj pam nws thiab muab nws faus rau hauv nws lub tsev hauv lub nroog Lamas. Tom qab ntawd, Daviv txawm mus rau nram tiaj mojsab qhua Palas. Daviv nyob nram tiaj mojsab qhua, nws hnov hais tias Nanpas tabtom txiav plaub yaj, yog li ntawd, Daviv thiaj txib kaum leej tub hluas mus rau hauv lub nroog Kalemees, kom mus nrhiav Nanpas thiab hais lus noj qab nyob zoo rau nws. Daviv kom lawv mus hais rau Nanpas hais tias, “Kuv tus phoojywg thov kom koj ntsib kev kaj siab lug! Thov kom koj thiab koj tsevneeg tau txais kev noj qab nyob zoo, thiab txhua yam uas koj ua kom vammeej! Kuv hnov hais tias koj tabtom txiav plaub yaj, kuv qhia rau koj hais tias thaum koj cov tub yug yaj tuaj nrog peb nyob, peb tsis tau ua phem li cas rau lawv. Thaum uas lawv nyob hauv lub nroog Kalemees los tsis muaj leejtwg nyiag lawv ib yam dabtsi li. Koj cia li nug koj cov neeg, lawv yeej yuav qhia rau koj paub. Kuv thov koj ua zoo rau kuv cov neeg, rau qhov peb tuaj rau hnub uas sawvdaws tabtom ua rooj noj rooj haus. Thov koj muab tej yam uas koj yuav muab tau rau peb cov uas yog koj tubtxib thiab Daviv uas yog koj tus phoojywg zoo.” Thaum Daviv cov neeg coj Daviv cov lus tuaj hais rau Nanpas tas, lawv txawm nyob tos, Nanpas teb hais tias, “Daviv yog leejtwg? Yexais tus tub yog leejtwg? Kuv tsis paub nws. Ntu no cov tubtxib coob leej tau khiav tawm ntawm lawv tus tswv mus lawm. Puas tsimnyog kuv muab kuv tej ncuav, tej dej thiab tej nqaij uas kuv npaj rau kuv cov neeg txiav plaub yaj noj pub rau cov neeg uas kuv tsis paub hais tias yog leejtwg thiab nyob qhov twg tuaj?” Daviv cov neeg txawm rov los thiab piav txhua yam uas Nanpas hais ntawd rau Daviv mloog. Daviv txawm hais rau nws cov neeg hais tias, “Nej txhua tus cia li muab ntaj los ris ntawm duav,” lawv txhua tus txawm ua li Daviv hais. Daviv los kuj muab ntaj ris ntawm duav thiab nws coj kwvlam li plaub puas leej nrog nws mus, tseg ob puas leej nyob zov lawv tej khoom xwb. Nanpas cov tubtxib ib tug mus qhia rau Anpinkayis uas yog Nanpas tus pojniam hais tias, “Daviv tso neeg nram tiaj mojsab qhua tuaj cuag Nanpas uas yog peb tus tswv, tiamsis nws hais lus saib tsis taus lawv li. Lawv cov ntawd ibtxwm nrog peb sib raug zoo; lawv yeej tsis tau ua phem rau peb, thiab thaum peb nrog lawv nyob tom tshav yug tsiaj los peb tej khoom yeej tsis ploj ib yam li. Lawv tiv thaiv peb tas hnub tas hmo, lub sijhawm uas peb saib peb tej tsiaj ntawd. Koj sim xav saib yuav ua li cas; rau qhov tej no yuav ua kev puastsuaj rau peb tus tswv thiab nws tsevneeg. Peb tus tswv yog ib tug neeg uas tsis zoo hais lus, nws tsis mloog leejtwg hais li.” Anpinkayis txawm ua tsawg tsuag tau ob puas lub ncuav, ntim tau ob hnab cawv txiv hmab, muab tsib tug yaj tua ci, muab ob thoob txhuv kib, ib puas pob txiv hmab qhuav thiab ob puas lub txiv ncuavpias qhuav nog rau neesluav thauj. Anpinkayis hais rau cov tubtxib hais tias, “Nej cia li ua ntej mus, kuv yuav lawv nej qab tuaj.” Tiamsis nws tsis qhia rau nws tus txiv li. Thaum Anpinkayis tabtom caij neesluav mus raws zaj ntav zag uas puag lub laj roob, nws txawm ntsib Daviv thiab Daviv cov neeg tuaj txog ntawd. Daviv tabtom xav hais tias, “Kuv twb pab tiv thaiv tej uas yog tus neeg no tug tom tiaj mojsab qhua thiaj tsis muaj ib yam dabtsi ploj li, ua li cas nws tseem tsis nco kuv txiaj ntsig li? Nws txawm muab kev phem pauj kuv txojkev ua zoo xwb! Yog kuv tseem tseg cov neeg ntawd ib tug cia txog tagkis kaj ntug, thov tus TSWV tua kuv povtseg.” Thaum Anpinkayis pom dheev Daviv, nws txawm nqis kiag saum tus neesluav los txhos ncaug ntua pe Daviv ua ntsejmuag ti nkaus hauv av rau ntawm Daviv kotaw thov hais tias, “Kuv tus tswv, thov koj mloog kuv hais thiab thov cia kuv tib leeg ris qhov kev txhaum ntawd xwb! Tus tswv, thov koj tsis txhob quavntsej Nanpas uas yog tus neeg tsis zoo hais lus ntawd! Nws lub npe Nanpas txhais hais tias ruam! Mas nws yeej ruam li ntawd tiag; tiamsis tus tswv, thaum koj txib koj cov tubtxib tuaj, yog kuv tsis nyob ntawd. Tus TSWV twb tsis pub koj ua pauj thiab tua koj cov yeebncuab, kuv thiaj tuav tus TSWV uas muaj sia nyob lub npe coglus rau koj hais tias, koj cov yeebncuab thiab txhua tus uas xav ua phem rau koj yuav raug txim ib yam li Nanpas. Tus tswv, thov koj txais tej uas kuv coj tuaj rau koj thiab muab rau koj cov neeg. Tus tswv, thov koj zam txim rau tej uas kuv tau ua txhaum lawm. Tus TSWV yuav tsa koj ua vajntxwv, thiab koj cov xeebntxwv los yuav tau ua vajntxwv; qhov uas koj ua rog yog koj ua tus TSWV tes haujlwm, thaum koj tseem ua neej nyob no, koj yuav tsis ua ib qho phem li. Txawm yog muaj neeg pheej caum tua koj povtseg los tus TSWV uas yog koj tus Vajtswv yuav tsomkwm koj ib yam li tus neeg uas zov nws cov nyiaj. Tiamsis tus TSWV yuav muab koj cov yeebncuab laim povtseg ib yam li luag muab lub pobzeb tso rau ntawm txoj zes hlua laim ntag. Thaum tus TSWV ua txhua yam zoo rau koj raws li nws tau coglus tseg rau koj thiab tsa koj ua vajntxwv kav tebchaws Yixalayees lawm, mas kuv tus tswv yuav tsis ntxhov siab, rau qhov koj tsis tau ua phem pauj phem lossis tsis tau ua rau luag nqaij ntuag ntshav nrog. Thaum tus TSWV ua zoo rau koj uas yog kuv tus tswv lawm, thov koj nco txog kuv thiab.” Daviv hais rau Anpinkayis hais tias, “Ua tus TSWV uas yog cov Yixalayees tus Vajtswv tsaug uas hnub no nws txib koj tuaj ntsib kuv! Ua Vajtswv tsaug uas koj yog ib tug txawj xav, thiab tej uas koj cheem kom hnub no kuv tsis txhob ua phem pauj phem thiab tua neeg. Tus TSWV tsis pub kuv ua phem rau koj. Kuv twb tuav cov Yixalayees tus Vajtswv uas muaj sia nyob lub npe coglus lawm, yog hnub no koj tsis tuaj ntsib kuv, ces tagkis kaj ntuj Nanpas tsevneeg yuav tsis muaj ib tug seem li!” Daviv txais yuav tej uas Anpinkayis coj tuaj rau nws ntawd thiab hais rau Anpinkayis hais tias, “Koj cia li rov mus tsev thiab tsis txhob txhawj, kuv yuav ua raws li koj tej lus thov.” Thaum Anpinkayis rov los rau ntawm Nanpas; Nanpas tabtom noj ib rooj mov loj hauv tsev cuag li npaj rau vajntxwv noj. Nanpas tabtom qaug cawv thiab zoo siab heev, yog li ntawd, Anpinkayis thiaj tsis qhia ib yam dabtsi rau nws mus txog thaum tagkis kaj ntug. Tagkis sawv ntxov, thaum Nanpas zoo cawv lawm, Anpinkayis txawm piav txhua yam qhia rau Nanpas mloog. Ces Nanpas tej leeg ntshav saum taubhau txhaws ua rau nws lub cev tuag tas. Tau kwvlam li kaum hnub tom qab, tus TSWV muab Nanpas tua tuag lawm. Thaum Daviv hnov hais tias Nanpas tuag lawm, nws hais tias, “Ua tus TSWV tsaug uas nws tau ua pauj qhov uas Nanpas ua saib tsis taus kuv thiab qhov uas tus TSWV tsis pub kuv uas yog nws tus tubtxib ua phem. Tus TSWV rau txim rau Nanpas vim tej kev phem uas nws ua.” Ces Daviv txawm tso neeg mus coj Anpinkayis los ua Daviv pojniam. Thaum Daviv cov tubtxib mus txog rau hauv Anpinkayis tsev, hauv lub nroog Kalemees, lawv hais rau Anpinkayis hais tias, “Daviv kom peb tuaj coj koj mus ua nws pojniam.” Anpinkayis txhos caug ntua pe ua ntsejmuag ti nkaus hauv av thiab hais tias, “Kuv yog nws tus qhev, kuv yuav ntxuav nws cov tubtxib tej kotaw.” Anpinkayis txawm sawv tsees mus caij nws tus neesluav nrog Daviv cov tubtxib mus ua Daviv pojniam, thiab coj nws tsib tug ntxhais qhev nrog nws mus. Daviv twb yuav Ahinau-as hauv lub nroog Yexalees ua pojniam lawm, nimno Daviv mam yuav Anpinkayis thiab. Thaum ntawd, Xa-ules muab nws tus ntxhais Mikhas uas yog Daviv pojniam rau Laises tus tub Patis uas nyob hauv lub nroog Nkalimes yuav lawm. Muaj neeg hauv lub nroog Xifes tuaj cuag Xa-ules hauv lub nroog Nkinpe-as thiab qhia rau Xa-ules hais tias, “Daviv nkaum saum lub Roob Hakhilas ntawm ntug tiaj mojsab qhua hauv tebchaws Yudas.” Tamsim ntawd, Xa-ules txawm coj peb txhiab leej tubrog Yixalayees uas nws xaiv tseg lawm, mus nrhiav Daviv ntawm tiaj mojsab qhua Xifes, Xa-ules mus tsuam chaw so rau ntawm ntug kev saum lub Roob Hakhilas. Thaum Daviv tseem nyob hauv tiaj mojsab qhua, nws twb paub lawm hais tias Xa-ules tuaj nrhiav nws, Daviv thiaj tso neeg mus soj thiab pom Xa-ules tuaj nyob saud lawm tiag. Tamsim ntawd, Daviv txawm mus pom Xa-ules thiab Neles tus tub Aneles uas yog Xa-ules tus thawj tubrog lub chaw pw ntawm qhov ntawd tiag. Xa-ules lub chaw pw nyob hauv plawv, thiab Xa-ules cov tubrog tej chaw pw nyob puagncig nws. Daviv nug Ahimelej uas yog neeg Hitis, thiab Anpisais uas yog Yau-as tus kwv hais tias, “Neb leejtwg kam nrog kuv mus rau hauv Xa-ules lub chaw?” Anpisais teb hais tias, “Kuv nrog koj mus.” (Yau-as thiab Anpisais nkawd niam hu ua Xeluyas), Yog li hmo ntawd, Daviv thiab Anpisais txawm mus rau hauv Xa-ules lub chaw thiab pom Xa-ules pw tsaug zog hauv plawv, nws muab nws rab hmuv txhos rau hauv av ze ntawm nws taubhau. Aneles thiab cov tubrog pw tsaug zog puagncig Xa-ules. Anpisais hais rau Daviv hais tias, “Hmo no Vajtswv twb muab koj tus yeebncuab cob rau koj tes lawm. Thov cia kuv muab nws rab hmuv rov nkaug nws kom tshab plaws rau hauv av, tsis tas yuav loos ntxiv li lawm!” Tiamsis Daviv hais tias, “Koj tsis txhob tua nws! Tus TSWV yuav rau txim rau tus neeg uas tua tus vajntxwv uas tus TSWV tsa.” Daviv hais ntxiv hais tias, “Kuv paub hais tias, tus TSWV uas muaj sia nyob, nws yeej yuav muab Xa-ules tua povtseg, tsis hais nws yuav tuag rau hauv tshavrog lossis tuag li cas los yeej yog tus TSWV tua. Thov tus TSWV pab kom kuv tsis txhob ua phem rau tus uas tus TSWV tsa ua vajntxwv lawm! Cia li muab nws rab hmuv thiab nws lub taub dej nqa mus xwb.” Yog li ntawd, Daviv txawm muab rab hmuv thiab lub taub dej uas nyob ze ntawm Xa-ules taubhau ib sab, ces Daviv thiab Anpisais txawm coj khiav mus lawm. Tsis muaj leejtwg pom lossis paub tej xwm no lossis tsis muaj leejtwg tsim li, lawv puavleej tsaug zog ntsiag to, rau qhov tus TSWV ua rau lawv tsaug zog heev. Daviv hla hav mus rau sab tim ub, mus sawv saum lub pov roob uas nyob nrug deb tsawv, thiab qw rau Xa-ules cov tubrog thiab Aneles hais tias, “Aneles, koj puas hnov?” Aneles teb hais tias, “Koj yog leejtwg? Koj tsa vajntxwv ua dabtsi?” Daviv teb hais tias, “Aneles, koj tsis yog ib tug neeg tseemceeb hauv cov Yixalayees los? Ua li cas koj tsis zov koj tus vajntxwv zoo? Nyuam qhuav muaj ob tug neeg nkag los rau hauv nej lub chaw pw yuav tua nej tus vajntxwv. Aneles, yog ua haujlwm li ko xwb, tsis tas ua los tau! Kuv coglus rau tus TSWV uas muaj sia nyob hais tias, tsimnyog muab koj thiab koj cov neeg tua povtseg huv tibsi, rau qhov nej tsis zov nej tus vajntxwv uas tus TSWV tsa. Nej saib! Vajntxwv rab hmuv thiab lub taub dej uas nyob ntawm nws taubhau ib sab dua qhov twg lawm?” Xa-ules paub Daviv lub suab, nws thiab nug hais tias, “Tub Daviv, yog koj los?” Daviv teb hais tias, “Vajntxwv, yog kuv los mas.” Daviv hais ntxiv hais tias, “Kuv tus tswv, ua li cas koj pheej caum koj tus tubtxib tua? Kuv tau ua li cas? Kuv tau ua txhaum dabtsi?” Vajntxwv, thov koj mloog kuv hais. Yog tus TSWV kom koj tawmtsam kuv, thov tus TSWV hloov siab txais yuav tej uas kuv muab fij rau nws; tiamsis yog neeg kom koj ua yeebncuab rau kuv, thov tus TSWV foom tsis zoo rau lawv. Rau qhov lawv tau ntiab kuv tawm hauv tus TSWV haivneeg lub tebchaws mus nyob rau lwm lub tebchaws uas kuv yuav tau pe luag tej vajtswv. Thov tsis txhob cia luag tua kuv rau hauv lwm haivneeg lub tebchaws uas nyob deb ntawm tus TSWV. Vim li cas cov Yixalayees tus vajntxwv tuaj caum tua kuv uas zoo li tus devmub xwb? Ua li cas nws caum kuv tua ib yam li caum noog tua? Xa-ules teb hais tias, “Tub Daviv, kuv tau ua txhaum lawm! Koj cia li rov qab los, kuv yuav tsis ua phem rau koj lawm, rau qhov hmo no koj tau tseg kuv txojsia. Kuv ruam heev thiab ua phem kawg li!” Daviv teb hais tias, “Vajntxwv, koj rab hmuv nyob ntawm no, kom koj cov neeg ib tug tuaj nqa mus. Tus TSWV yeej muab nqi zog rau tus uas muab siab npuab nws thiab ua ncaj ncees. Hnub no tus TSWV twb muab koj cob rau kuv tes lawm, tiamsis kuv tsis ua phem rau koj, tus uas yog tus TSWV tsa ua vajntxwv. Hnub no kuv tseg koj txojsia li cas, thov tus TSWV ua ib yam li ntawd rau kuv thiab pab kom kuv dim ntawm tej kev txomnyem ntxhov siab no.” Xa-ules hais rau Daviv hais tias, “Metub, thov Vajtswv foom koob hmoov rau koj kom txhua yam uas koj ua yuav vammeej!” Yog li ntawd, Daviv txawm ncaim mus, thiab Xa-ules rov qab los tsev lawm. Daviv xav hais tias, “Muaj ib hnub twg Xa-ules yuav muab kuv tua povtseg xwb. Qhov zoo ces kuv yuav tau khiav mus nyob hauv tebchaws Filitees. Kom Xa-ules tso tseg tsis nrhiav kuv tua hauv lub tebchaws Yixalayees no lawm, kuv thiaj yuav tau nyob tso siab lug.” Yog li ntawd, Daviv thiab nws cov neeg rau puas leej thiaj mus cuag Ma-aus tus tub Akhises uas ua vajntxwv kav lub nroog Nkas. Daviv cov neeg thiab lawv cov pojniam menyuam nyob hauv lub nroog Nkas. Daviv coj nws ob tug pojniam uas yog Ahinau-as uas nyob hauv lub nroog Yexelees thiab Anpinkayis uas yog Nanpas tus pojniam uas nyob hauv lub nroog Kalemees nrog nws mus thiab. Thaum Xa-ules hnov hais tias Daviv khiav mus nyob hauv lub nroog Nkas, nws txawm tso tseg tsis mus caum Daviv tua lawm. Daviv hais rau Akhises hais tias, “Yog koj txaus siab rau kuv, thov koj pub ib thaj av rau kuv ua nroog nyob. Tsis txhob cia kuv nrog koj nyob hauv lub tuamceeb nroog no.” Yog li ntawd, Akhises thiaj muab lub nroog Xikelas rau Daviv, twb yog vim li ntawd, lub nroog Xikelas thiaj yog tus vajntxwv uas kav tebchaws Yudas tug los txog niaj hnub no. Daviv nyob hauv tebchaws Filitees tau ib xyoos thiab plaub hlis. Lub sijhawm ntawd, Daviv thiab nws cov neeg tau mus tua cov neeg Nkesus, cov Nkixis thiab cov Amalej uas ibtxwm nyob hauv cheebtsam ntawd tau ntau tiam los lawm. Daviv pheej tua thiab huab lawv tej tebchaws li ntawd mus txog rau Sus thiab mus ti nkaus nram cov Iziv tus ciamteb, Daviv muab tej pojniam txivneej tua tuag tas thiab ntes tej yaj, tej nyuj, tej neesluav, tej ntxhuav cab thiab nqa lawv tej tsoos tsho huv tibsi los. Daviv rov los cuag Akhises, Akhises nug Daviv hais tias, “Hnub no koj mus huab tej no qhov twg los?” Daviv qhia rau Akhises hais tias, “Kuv mus rau tebchaws Yudas sab qabteb, mus rau hauv xeem Yelamees cheebtsam av thiab mus rau hauv cheebtsam uas cov Kenais nyob.” Daviv muab tej pojniam thiab txivneej tua tuag tas kom tsis muaj leejtwg mus qhia tej uas Daviv ua ntawd rau hauv lub nroog Nkas. Tej no yog tej uas Daviv ua thaum uas nws nyob hauv tebchaws Filitees. Akhises ntseeg Daviv siab thiab hais tias, “Nws haivneeg Yixalayees ntxub nws heev, mas nws yeej yuav ua haujlwm rau kuv mus tas nws tiam neej li.” Tom qab ntawd, cov Filitees txawm txhij lawv cov tubrog tuaj tua cov Yixalayees. Akhises hais rau Daviv hais tias, “Koj yeej paub hais tias, koj thiab koj cov neeg yuav tsum mus pab kuv tua rog.” Daviv teb hais tias, “Kuv yog koj tus tubtxib, kuv yuav mus pab koj, nyaj koj yuav pom hais tias kuv mus ua tau haujlwm npaum li cas.” Akhises teb hais tias, “Zoo lawm, kuv yuav tsa koj ua tus zov kuv mus ib simneej li.” Xamuyees twb tuag, thiab cov Yixalayees twb tuaj pam nws thiab muab nws faus rau hauv nws lub nroog Lamas lawm. Xa-ules twb muab cov neeg uas txawj saib yaig thiab txawj txheev dab ntiab hauv tebchaws Yixalayees mus tas lawm. Cov tubrog Filitees tuaj tsuam yeej ze ntawm lub nroog Sunees, thiab Xa-ules txhij cov tubrog Yixalayees mus tsuam yeej rau saum lub Roob Nkinpau-as. Thaum Xa-ules pom cov tubrog Filitees, nws ntshai heev, yog li ntawd, nws thiaj nug tus TSWV saib yuav ua li cas. Tiamsis tus TSWV tsis teb Xa-ules li, tsis hais ua yogtoog pom lossis saib lub Ulees thiab lub Thumees lossis kom cov cevlus los qhia li. Xa-ules hais rau nws cov nomtswv hais tias, “Nej cia li mus nrhiav ib tus pojniam uas txawj txheev dab rau kuv, kuv yuav mus cuag nws.” Lawv teb hais tias, “Muaj ib tug nyob hauv lub nroog Edaules.” Yog li ntawd, Xa-ules txawm hnav dua lwm yam ris tsho ua cuav mus kom luag tsis paub hais tias yog nws; thaum tsaus ntuj Xa-ules thiab ob tug txivneej mus rau hauv tus pojniam ntawd lub tsev. Xa-ules hais rau tus pojniam ntawd hais tias, “Thov koj txheev dab tuaj qhia rau kuv saib yuav muaj xwm dabtsi tshwm los rau kuv yav tom ntej, thiab thov koj txheev tus txivneej uas kuv tuav npe no tus xyw los.” Tus pojniam ntawd teb hais tias, “Koj yeej paub tej uas Vajntxwv Xa-ules tau ua tas lawm, nws twb muab cov neeg uas txawj saib yaig thiab txawj txheev dab ntiab tawm hauv cov Yixalayees lub tebchaws mus tas lawm. Vim li cas koj tseem tuaj ntxias kom kuv raug luag tua povtseg thiab?” Xa-ules hais tias, “Kuv tuav tus TSWV uas muaj sia nyob lub npe coglus rau koj hais tias, qhov uas kuv kom koj txheev dab no, koj yuav tsis raug txim li.” Tus pojniam ntawd nug hais tias, “Koj xav kom kuv txheev leejtwg?” Xa-ules teb hais tias, “Xamuyees.” Thaum tus pojniam ntawd pom dheev Xamuyees, nws txawm qw nrov nrov thiab hais rau Xa-ules hais tias, “Koj twb yog Vajntxwv Xa-ules ntag! Ua li cas koj tseem tuaj dag kuv thiab?” Vajntxwv hais rau tus pojniam ntawd hais tias, “Koj tsis txhob ntshai, koj pom dabtsi?” Tus pojniam ntawd teb hais tias, “Kuv pom ib tug xyw tawm hauv av los.” Xa-ules nug hais tias, “Nws zoo li cas?” Tus pojniam ntawd teb hais tias, “Nws yog ib tug yawg laus uas hnav ib lub tsho ntev.” Ces Xa-ules paub hais tias yog Xamuyees ntag, Xa-ules thiaj txhos caug ntua rau hauv av hawm. Xamuyees hais rau Xa-ules hais tias, “Koj tuaj txob kuv uas dabtsi? Vim li cas koj thiaj hu kuv tawm los?” Xa-ules teb hais tias, “Kuv tabtom muaj kev ntxhov siab heev! Cov Filitees txhij tubrog tuaj tua kuv, thiab Vajtswv tso kuv tseg lawm. Nws tsis teb kuv, tsis hais ua yogtoog pom lossis tso cov cevlus los qhia. Yog li ntawd, kuv thiaj tuaj hu koj saib koj yuav qhia kuv ua li cas thiaj zoo.” Xamuyees hais tias, “Vim li cas koj tuaj hu kuv thaum tus TSWV twb muab koj tso tseg thiab ua yeebncuab rau koj lawm? Tus TSWV ua rau koj raws li tej lus uas nws kom kuv hais rau koj lawm; nws twb muab lub tebchaws tshem tawm ntawm koj thiab muab rau Daviv kav lawm. Tus TSWV kom koj tua cov Amalej thiab rhuav txhua yam uas lawv muaj huv tibsi povtseg, tiamsis koj tsis ua raws li tus TSWV hais, nws thiaj ua li no rau koj. Tus TSWV yuav muab koj thiab cov Yixalayees cob rau cov Filitees tes. Tagkis koj thiab koj cov tub yuav mus nrog kuv nyob, thiab tus TSWV yuav muab cov tubrog Yixalayees cob rau cov Filitees tes.” Thaum Xa-ules hnov Xamuyees hais li ntawd, nws ntshai heev thiab vau hlo rau hauv av tamsim ntawd. Xa-ules tsaug heev, rau qhov nws tsis noj ib yam dabtsi li tau ib hnub thiab ib hmos lawm. Tus pojniam uas txheev dab ntawd mus xauj, nws pom Xa-ules ntshai kawg nkaus li, tus pojniam ntawd hais rau Xa-ules hais tias, “Kuv pheej hmoo muab kuv txojsia pab koj raws li koj thov kom kuv ua. Thov koj ua raws li kuv hais. Cia kuv ua mentsis mov rau koj noj. Koj yuav tsum noj mov, koj thiaj muaj zog taug kev mus.” Xa-ules tsis kam noj thiab hais tias, “Kuv yuav tsis noj ib yam dabtsi li.” Tiamsis nws cov tubtxib txhob kom nws yuav tsum noj xwb. Thaum kawg Xa-ules thiaj sawv hauv av los zaum saum txaj. Tus pojniam ntawd, txawm mus ntes tus menyuam nyuj uas nws muab hwv cia los tua ua nqaij ua hno. Nws muab hmoov nplej zuaj ua ib co ncuav tsis xyaw keeb muab ci kiag siav. Nws coj cov zaub mov ntawd mus rau Xa-ules thiab nws ob tug tubtxib noj. Hmo ntawd thaum lawv noj hmo tas lawv txawm rov los tsev lawm. Cov Filitees sau tagnrho lawv cov tubrog tuaj txoos rau ntawm Afes, thiab cov tubrog Yixalayees tsuam yeej rau ntawm lub qhovdej txhawv uas nyob hauv lub Hav Yexelees. Cov Filitees tsib tug vajntxwv nrog lawv cov tubrog ua ke tuaj tsheej pab, tej pab ib puas leej thiab tej pab ib txhiab leej; Daviv thiab nws cov neeg nrog Vajntxwv Akhises ua qab. Thaum cov thawj tubrog Filitees pom Daviv thiab nws cov neeg, lawv nug hais tias, “Cov neeg Henplais tuaj ua dabtsi ntawm no?” Akhises teb hais tias, “Tus no yog Daviv uas yog Vajntxwv Xa-ules uas kav tebchaws Yixalayees ib tug thawj tubrog. Nws twb los nrog kuv nyob tau ib ntu lawm. Txij thaum nws los nrog kuv nyob, kuv tsis pom nws ua txhaum dabtsi li.” Tiamsis cov thawj tubrog Filitees npautaws heev rau Akhises thiab hais tias, “Cia li kom nws rov mus nyob rau hauv lub nroog uas koj muab rau nws. Tsis pub nws nrog peb mus ntaus rog, nyob tsam nws ntxeev siab rov tawmtsam peb thaum peb tseem tabtom sib tua. Rau qhov thaum ntawd, yog lub sijhawm zoo rau nws tua thiab txiav peb cov tubrog tej taubhau coj mus rau nws tus tswv kom nyiam nws. Tus no twb yog tus Daviv uas cov pojniam seevcev hu nkauj qhuas hais tias, ‘Xa-ules tua tuag qas txhiab leej xwb, tiamsis Daviv tua taug qas vam leej.’ ” Akhises hu Daviv los thiab hais tias, “Kuv tuav cov Yixalayees tus Vajtswv uas muaj sia nyob lub npe coglus rau koj hais tias, koj yeej tau ua zoo rau kuv; kuv yeej txaus siab cia koj nrog kuv mus tua rog. Txij hnub uas koj los nrog kuv nyob, kuv tsis pom koj ua ib qho txhaum li. Tiamsis lwm tus vajntxwv tsis pom zoo koj nrog peb mus. Yog li ntawd, thov koj cia li rov mus tsev zoo siab hlo thiab tsis txhob ua tej yam uas tsiv lawv siab li.” Daviv teb hais tias, “Vajntxwv, kuv tau ua txhaum dabtsi? Koj twb hais tias, txij thaum kuv los nrog koj nyob ua haujlwm rau koj, koj tsis pom kuv ua ib qho txhaum li, vim li cas thiaj tsis pub kuv nrog koj uas yog kuv tus tswv thiab kuv tus vajntxwv mus tua koj cov yeebncuab?” Akhises teb hais tias, “Kuv yeej pom zoo, kuv pom hais tias koj yog neeg ncaj ncees ib yam li Vajtswv ib tug timtswv. Tiamsis lwm tus vajntxwv hais tias tsis pub koj nrog peb mus tua rog. Yog li ntawd, tagkis koj thiab koj cov neeg uas khiav Xa-ules tuaj nrog kuv nyob, cia li rov mus thaum pom kev txoog.” Yog li ntawd, Daviv thiab nws cov neeg thiaj sawv ntxov rov los rau hauv tebchaws Filitees, thiab cov tubrog Filitees mus rau Yexelees lawm. Ua ntej ob hnub uas Daviv thiab nws cov neeg rov los txog hauv lub nroog Xikelas. Cov Amalej twb tuaj tua thiab huab tebchaws Yudas sab qabteb thiab lub nroog Xikelas lawm. Lawv muab hluavtaws hlawv lub nroog, thiab ntes tagnrho cov pojniam; lawv tsis tua ib tug li, tiamsis lawv coj txhua tus, tsis hais tus laus tus hluas nrog lawv mus lawm. Thaum Daviv thiab nws cov neeg los txog, lawv pom lub nroog Xikelas kub hnyiab tas, thiab luag coj lawv tej pojniam, tej tub thiab tej ntxhais mus tas lawm. Daviv thiab nws cov neeg tsa suab hlo quaj tsis ntsiag mus txog thaum lawv zog ntaug tas. Txawm yog Daviv ob tug pojniam uas yog Ahinau-as thiab Anpinkayis los luag coj mus huv tibsi lawm. Daviv nyuaj siab kawg li, rau qhov nws cov neeg tej tub tej ntxhais raug luag ntes lawm; lawv ntxhov siab heev, lawv hais tias lawv yuav muab pobzeb ntaus Daviv; tiamsis tus TSWV uas yog Daviv tus Vajtswv txhawb Daviv lub zog. Daviv hais rau tus povthawj Anpiyathas uas yog Ahimelej tus tub hais tias, “Coj lub efaus los rau kuv,” ces Anpiyathas thiaj coj lub efaus los rau Daviv. Daviv nug tus TSWV hais tias, “Puas tsimnyog kuv mus caum cov neeg tubsab ntawd? Thiab kuv puas yuav caum cuag lawv?” Tus TSWV teb hais tias, “Koj cia li mus; koj yeej yuav caum cuag lawv thiab cawm tau cov neeg uas raug luag ntes lawm.” Yog li ntawd, Daviv thiab nws cov neeg rau pua leej thiaj sawv kev mus. Thaum lawv mus txog ntawm tus Dej Npexaus, lawv tseg ibtxhia nyob rau ntawd. Daviv thiab nws cov neeg plaub puas leej caum mus ntxiv; ob puas leej uas muab tso tseg ntawd qaug zog heev, hla tsis taus dej mus rau sab tid. Daviv cov neeg mus ntsib ib tug tub hluas Iziv tom tiaj nrag, thiab lawv coj nws los cuag Daviv. Lawv muab ncuav rau nws noj, muab dej rau nws haus, muab ob peb lub txiv ncuavpias qhuav, thiab ob pob txiv hmab qhuav rau nws. Thaum nws noj tas, nws thiaj rov muaj zog tuaj; rau qhov nws tsis muaj dabtsi noj lossis haus tau peb hnub lawm. Daviv nug nws hais tias, “Koj tus tswv yog leejtwg, thiab koj tuaj qhov twg tuaj?” Nws teb hais tias, “Kuv yog neeg Iziv, thiab kuv yog ib tug neeg Amalej tus qhev. Kuv tus tswv muab kuv tso tseg tau peb hnub rau ntawm no rau qhov kuv mob. Peb mus huab cov Kheletis uas nyob rau cheebtsam hauv tebchaws Yudas sab qabteb, peb huab cheebtsam uas Kalej cuab kwvtij nyob thiab peb muab hluavtaws hlawv lub nroog Xikelas kub hnyiab tas.” Daviv nug nws hais tias, “Koj puas kam coj kuv mus caum cov neeg tubsab ntawd?” Nws teb hais tias, “Tau kawg, yog koj tuav Vajtswv lub npe coglus hais tias, koj yuav tsis tua kuv povtseg lossis tsis muab kuv cob rau kuv tus tswv.” Nws thiaj coj Daviv mus caum lawv. Cov tubsab ntawd mus zaum pawglug ntawm ib thaj chaw, lawv noj haus thiab zoo siab, rau qhov lawv mus huab tau khoom ntau heev hauv tebchaws Filitees thiab tebchaws Yudas los. Tagkis sawv ntxov Daviv txawm tua cov neeg tubsab ntawd mus txog thaum tsaus ntuj tuag tas. Tsuas tshuav plaub puas leej tub hluas uas caij ntxhuav khiav dim lawm xwb. Daviv txeeb tau nws cov neeg txhua tus thiab txhua yam uas cov Amalej huab mus lawm, thiab Daviv ob tug pojniam rov los huv tibsi; tsis muaj ib yam dabtsi ploj li. Daviv coj tau nws cov neeg tej tub tej ntxhais thiab txhua yam uas cov Amalej huab mus lawm huv tibsi rov qab los. Daviv coj tau tagnrho lawv tej nyuj, tej yaj thiab tej tshis rov qab los; Daviv cov neeg cab tej tsiaj ntawd mus ua lawv ntej thiab hais tias, “Tej tsiaj no yog Daviv tug!” Daviv rov los txog ntawm ob puas leej uas qaug zog thiab tsis nrog nws mus uas nws muab tso tseg rau ntawm tus Dej Npexaus. Cov ntawd tuaj tos Daviv thiab cov uas nrog nws mus, Daviv los rau ntawm lawv thiab hais lus noj qab nyob zoo rau lawv. Tiamsis cov neeg uas nrog Daviv mus, muaj qee leej uas tsis txawj xav thiab tsis paub qabhau hais tias, “Lawv tsis nrog peb mus, peb yuav tsis faib tej khoom uas peb mus txeeb tau los rau lawv. Lawv tsuas coj tau lawv tej pojniam menyuam mus xwb.” Tiamsis Daviv teb hais tias, “Kuv cov kwvtij, nej tsis txhob uas li ntawd, tej khoom no yog tej uas tus TSWV muab pub rau peb! Tus TSWV yog tus tsomkwm thiab pub peb mus tua yeej cov tubsab ntawd. Yeej tsis muaj leejtwg pom zoo li tej uas nej hais ko! Yuav tsum faib kom txhua tus tau sib npaug, tsis hais cov uas nyob tom qab saib peb tej khoom thiab cov uas tau mus tua rog.” Daviv muab qhov no ua ib txoj cai rau haivneeg Yixalayees coj, txij thaum ntawd los txog niaj hnub no. Thaum Daviv rov los txog hauv lub nroog Xikelas, nws muab tej khoom uas nws txeeb tau los ntawd ibtxhia xa mus rau nws cov phoojywg uas yog cov Yudas tej thawjcoj thiab hais tias, “Tej no yog tej uas kuv mus txeeb tau ntawm tus TSWV cov yeebncuab los xa tuaj pub rau nej.” Daviv xa ib co mus pub rau cov neeg hauv lub nroog Npethees, xa ib co mus rau cov neeg hauv lub nroog Lamas uas nyob hauv tebchaws Yudas sab qabteb, thiab nws tseem xa ib co mus rau cov neeg hauv lub nroog Yatis, lub nroog Alu-es, lub nroog Xifemaus, lub nroog Ethemaus, thiab lub nroog Lakas; xa ib co mus rau cuab Yelamees, cuab Kenais, thiab xa ib co mus rau cov neeg hauv lub nroog Haumas, lub nroog Npaulasas, lub nroog Athas, thiab lub nroog Henploos. Daviv xa tej khoom ntawd mus rau txhua qhov uas nws thiab nws cov neeg tau mus ntoj mus thuv luag lawm. Cov Filitees thiab cov Yixalayees sib tua saum lub roob Nkinpau-as. Cov Yixalayees raug tua tuag coob heev rau saud, cov uas seem tuag nyias khiav nyias mus lawm, Vajntxwv Xa-ules thiab nws peb tug tub los khiav tas lawm thiab. Tiamsis cov Filitees mus caum ntes tau lawv thiab muab Xa-ules peb tug tub uas yog Yaunathas, Anpinadas thiab Makhisuas tua tuag tas. Sawvdaws sib tua hnyav heev li ncig Xa-ules, yeebncuab tua xub hneevnti tuaj raug Xa-ules sab kawg li. Xa-ules hais rau tus tub hluas uas nqa nws rab ntaj thiab rab hmuv hais tias, “Cia li rho koj rab ntaj los tua kuv kom tuag, cov Filitees uas tsis ua kevcai txiav thiaj tsis khav hais tias yog lawv tua kuv.” Tiamsis tus tub hluas ntawd ntshai heev, nws tsis muaj cuabkav ua li Xa-ules hais. Yog li ntawd, Xa-ules thiaj rho Xa-ules rab ntaj los cuab thiab qhau cev mus npuj rab ntaj. Thaum tus tub hluas ntawd pom hais tias Xa-ules tuag lawm, nws txawm rho nws rab ntaj los cuab thiab qhau cev mus npuj rab ntaj chob nws tuag nrog Xa-ules lawm thiab. Yog li ntawd, Xa-ules, nws peb tug tub, tus tub hluas uas nqa Xa-ules rab ntaj thiab rab hmuv thiab Xa-ules cov neeg thiaj tuag tas rau hnub ntawd. Thaum cov Yixalayees uas nyob ntawm lub Hav Yexelees sab tid thiab cov uas nyob ntawm tus dej Yauladees sab hnubtuaj hnov hais tias cov tubrog Yixalayees swb, Xa-ules thiab nws peb tug tub los raug luag tua tuag tas lawm, lawv txawm khiav tso lawv tej vajtse tseg. Cov Filitees thiaj tuaj nyob hauv lawv tej nroog. Hnub tom qab cov Filitees txawm mus daws cov tubrog Yixalayees uas tuag tej khoom, lawv pom Xa-ules thiab nws peb tug tub tuag rau saum lub Roob Nkinpau-as. Lawv txiav Xa-ules lub taubhau, hle nws cev ris tsho tooj, nws tej cuabyeej ua rog nqa mus thiab xa xov mus thoob plaws tebchaws Filitees thiab qhia txoj xov zoo rau lawv tej mlom thiab lawv cov neeg. Lawv nqa Xa-ules tej cuabyeej ua rog mus tso rau hauv lub tsev uas lawv teev tus mlom pojniam Atates, thiab lawv muab Xa-ules lub cev dai rau ntawm lub nroog Npethes Sas tus ntsa yeej. Thaum cov neeg uas nyob hauv lub nroog Yanpes hauv tebchaws Nkile-as hnov tej uas cov Filitees ua rau Xa-ules ntawd, cov neeg uas siab tawv txawm maub ib hmo mus rau hauv lub nroog Npethes Sas. Lawv muab Xa-ules thiab nws peb tug tub lub cev saum tus ntsa yeej txo los thiab kwv mus hlawv rau hauv lub nroog Yanpes. Lawv muab Xa-ules thiab nws peb tug tub cov pobtxha coj mus faus rau ntawm tsob qab ntoo tamalis hauv lub nroog Yanpes, thiab lawv ua kevcai yoo mov tau xya hnub. Tom qab uas Xa-ules tuag lawm, Daviv mus tua yeej cov Amalej thiab nws rov los nyob tau ob hnub hauv lub nroog Xikelas. Hnub tom qab muaj ib tug tub hluas khiav hauv Xa-ules lub yeej los. Nws muab nws tej ris tsho dua ntuag tas thiab tsuab hmoov av rau saum nws taubhau, rau qhov nws tu siab heev. Nws los cuag Daviv thiab nyo hau hawm Daviv. Daviv nug nws hais tias, “Koj los qhov twg los?” Nws teb hais tias, “Kuv khiav hauv cov Yixalayees lub yeej los.” Daviv hais tias, “Muaj xwm dabtsi cia li qhia rau kuv.” Nws teb hais tias, “Peb cov tubrog tawg khiav hauv tshavrog tas, thiab peb cov neeg raug tua tuag coob kawg li. Xa-ules thiab nws tus tub Yaunathas los raug luag tua tuag lawm thiab.” Daviv nug nws hais tias, “Ua li cas koj thiaj paub hais tias, Xa-ules thiab Yaunathas nkawd raug luag tua tuag lawm?” Nws teb hais tias, “Thaum ntawd kuv nyob saum lub Roob Nkinpau-as, kuv pom Xa-ules puag rawv nws rab hmuv, cov yeebncuab tej tsheb nees thiab cov tubrog caij nees tuaj ze zuj zus lawm. Ces Xa-ules txawm tig los pom dheev kuv thiab nws hu kuv. Kuv thiaj nug hais tias ‘Koj hais dabtsi?’ Nws nug kuv hais tias kuv yog leejtwg. Kuv teb nws hais tias, kuv yog ib tug tub hluas Amalej. Nws hais tias, ‘Kuv raug mob sab heev, ua li cas los kuv yeej yuav tuag, koj cia li los ntawm no thiab loos kom kuv tuag!’ Yog li ntawd, kuv thiaj muab nws loos tuag lawm, rau qhov kuv paub hais tias thaum nws ntog lawm nws yeej yuav tuag xwb. Ces kuv thiaj hle lub kausmom saum nws taubhau thiab daws txoj saw ntawm nws cajnpab nqa los rau koj uas yog kuv tus tswv.” Daviv dua rhe Daviv lub tsho quaj tu siab kawg li, thiab tagnrho nws cov tubrog los puavleej ua ib yam nkaus. Lawv tu siab, quaj thiab yoo mov mus txog thaum yuav tsaus ntuj vim Xa-ules, Yaunathas thiab cov tubrog Yixalayees uas yog tus TSWV cov neeg raug tua tuag coob heev rau hauv tshavrog lawm. Daviv nug tus tub hluas uas los fi xov rau Daviv ntawd hais tias, “Koj nyob qhov twg tuaj?” Nws teb hais tias, “Kuv yog neeg Amalej, tiamsis kuv nyob hauv koj lub tebchaws.” Daviv nug nws ntxiv hais tias, “Vim li cas koj thiaj khuv muab tus vajntxwv uas tus TSWV xaiv ntawd tua povtseg?” Ces Daviv thiaj hu nws cov tubrog ib tug los thiab hais tias, “Cia li muab tus hluas no tua povtseg!” Tus tubrog ntawd thiaj muab tus hluas Amalej ntawd ntaus thiab tua tuag kiag lawm, Daviv hais rau tus tub hluas Amalej ntawd hais tias, “Koj coj lub txim no los rau koj nkaus xwb. Koj rov rau txim rau koj, thaum koj lees hais tias, koj tau tua tus vajntxwv uas tus TSWV xaiv tseg lawm.” Daviv hu ib zaj nkauj quaj ntsuag rau Xa-ules thiab Yaunathas, thiab nws kom muab zaj nkauj ntawd qhia rau cov pejxeem Yudas kawm huv tibsi. (Zaj nkauj ntawd muab sau tseg rau hauv Yasas Phau Ntawv.) “Peb cov thawjcoj tuag tas rau saum cov Yixalayees tej ncov roob! Peb cov tubrog uas siab tawv ntog tas huv tibsi lawm! Tsis txhob qhia zaj no rau hauv lub nroog Nkas, lossis ntawm tej kev hauv lub nroog Asekeloos. Tsis txhob ua rau cov pojniam Filitees zoo siab; tsis txhob ua rau tej ntxhais uas yog cov neeg tsis ua kevcai txiav zoo siab. “Thov kom tsis txhob muaj nag lossis lwg poob los rau saum Nkinpau-as tej ncov roob; thov kom Nkinpau-as tej liaj teb qhuav nkig nkuav mus li! Vim cov tubrog uas siab tawv muab lawv tej thaiv hniav ntaj tso povtseg ua rau peb poob ntsejmuag kawg li; xeb yuav noj Xa-ules daim thaiv hniav ntaj vim tsis muaj roj pleev lawm. Yaunathas rab hneevnti tsis rov qhuav nquas ntawm tus neeg uas raug luag tua cov ntshav los, thiab Xa-ules rab ntaj tsis rov qhuav nquas ntawm tus neeg muaj zog tej roj los li. “Xa-ules thiab Yaunathas zoo heev thiab ntxim nyiam kawg li; ua neej nyob ua ke, tuag mus ua ke; nkawd khiav ceev tshaj dav ya, muaj zog tshaj tsov ntxhuav. “Cov pojniam Yixalayees, quaj nyiav Xa-ules! Nws muab tej tiab ntaub tsuj los rau nej hnav thiab muab saw nyiaj saw kub los rau nej coj. “Cov tubrog uas siab tawv ntog tas lawm, lawv raug tua tuag rau hauv tshavrog. Yaunathas tuag pw xyab luas saum ncov roob. “Kuv quaj ntsuag rau koj, kuv tus kwvluag Yaunathas; koj ua zoo rau kuv kawg koj nplooj siab! Koj hlub kuv kawg nkaus li, tseem hlub tshaj tej pojniam hlub lawm thiab. “Cov tubrog uas siab tawv ntog tas huv tibsi, lawv tej cuabyeej ua rog muab tso tseg tagnrho thiab tsis zoo siv lawm.” Tom qab ntawd, Daviv nug tus TSWV hais tias, “Puas tsimnyog kuv mus kav cov Yudas tej nroog ib lub?” Tus TSWV teb hais tias, “Koj cia li mus.” Daviv rov nug hais tias, “Lub nroog twg?” Tus TSWV teb hais tias, “Lub nroog Henploos.” Yog li ntawd, Daviv thiaj mus rau nram lub nroog Henploos, nws coj nws ob tug pojniam uas yog: Ahinau-as uas nws yuav hauv lub nroog Yexelees los thiab Anpinkayis, Nanpas tus pojniam uas nws yuav hauv lub nroog Kalemees los nrog nws mus thiab. Nws tseem coj nws cov neeg thiab lawv tej pojniam menyuam nrog nws mus thiab nyob thoob plaws tej zos uas nyob ibncig lub nroog Henploos. Ces cov neeg Yudas thiaj tuaj rau hauv lub nroog Henploos thiab muab Daviv txhawb meejthawj ua vajntxwv kav cov Yudas. Thaum Daviv hnov hais tias, cov neeg hauv lub nroog Yanpes hauv cheebtsam Nkile-as tau muab Xa-ules coj mus faus lawm, nws thiaj txib neeg mus fi xov rau lawv hais tias, “Thov tus TSWV foom koob hmoov rau nej, rau qhov nej hwm nej tus vajntxwv thiab coj nws mus faus lawm. Txij hnub no mus thov tus TSWV ua siab dawb siab zoo thiab ua ncaj rau nej. Kuv los yuav ua zoo rau nej, vim tej uas nej tau ua tas los lawm. Cia li cuab zog thiab ua siab tawv qhawv! Nej tus vajntxwv Xa-ules tuag lawm los cov Yudas twb muab kuv txhawb meejthawj thiab tsa kuv ua lawv tus vajntxwv lawm.” Xa-ules ib tug thawj tubrog uas yog Neles tus tub Aneles tau khiav nrog Xa-ules tus tub Isenpauses hla tus dej Yauladees mus rau tim Mahana-ees. Ces Aneles txawm muab Isenpauses tsa ua vajntxwv kav cheebtsam Nkile-as thiab kav cov Aseles, cov Yexelees, cov Efalayees thiab cov Npeenyamees, thiab kav tagnrho cov Yixalayees. Nws muaj plaub caug xyoo rau thaum uas nws ua cov Yixalayees tus vajntxwv, thiab nws kav tau ob xyoo. Tiamsis xeem Yudas yeej ibtxwm hwm Daviv xwb, Daviv nyob hauv lub nroog Henploos kav cov Yudas tau xya xyoo thiab rau hlis. Aneles thiab Isenpauses cov nomtswv rov qab hauv lub nroog Mahana-ees los rau hauv lub nroog Nkinpe-oos. Xeluyas uas yog Yau-am niam thiab Daviv cov nomtswv mus ntsib lawv ntawm lub pasdej. Tagnrho lawv puavleej mus zaum ntawm lub pasdej ntawd, ib pab nyob sab pasdej tim no thiab ib pab nyob sab pasdej tim ub. Aneles txawm hais rau Yau-am hais tias, “Cia peb cov tub hluas uas nyob ob sab no sib ntaus rau peb saib.” Yau-am teb hais tias, “Tau kawg los mas.” Yog li ntawd, kaum ob leeg txivneej thiaj ua cov sawv cev ntawm Isenpauses thiab xeem Npeenyamees tuaj tua Daviv cov neeg kaum ob leeg. Lawv txhua tus nyias tuav nyias tus yeebncuab lub taubhau thiab nyias rho nyias rab ntaj los nkaug nyias tus yeebncuab sab tav. Yog li ntawd, tagnrho lawv nees nkaum plaub leeg ntawd thiaj tuag ua ib pawg rau qhov ntawd. Vim li ntawd, thiaj muab thaj chaw hauv lub nroog Nkinpe-oos ntawd tis npe hu ua “Lub Tiaj Nrag Ntaj.” Thaum ntawd txawm muaj kev sib tua hnyav, ces Aneles thiab cov Yixalayees thiaj li swb Daviv cov neeg. Xeluyas peb tug tub: Yau-am, Anpisais thiab Axahees los puavleej nyob ntawd huv tibsi. Axahees khiav ceev npaum nkaus li muaslwj, nws thiaj khiav mus caum ntes Aneles, nws khiav ncaj nraim mus rau ntawm Aneles. Aneles tig saib rov tom qab thiab hais rau Axahees hais tias, “Yog koj los Axahees?” Axahees teb hais tias, “Yog los mas.” Aneles hais tias, “Tsis txhob caum ntes kuv! Cia li mus caum cov tubrog no ib tug qab thiab txeeb kom tas tej uas nws muaj.” Tiamsis Axahees rau siab ntso caum ntes Aneles xwb. Aneles rov hais rau Axahees hais tias, “Thov tsis txhob caum ntes kuv! Vim li cas koj pheej ua kom kuv tua koj povtseg? Kuv yuav ua li cas tsa qhovmuag saib koj tus tijlaug Yau-am?” Tiamsis nws pheej tsis tso tseg li, Aneles thiaj tig loo rov los rho hlo nws rab hmuv nkaug kiag Axahees plab ua rau rab hmuv tshab plaws rau tom nraubqaum. Axahees thiaj li vau hlo rau hauv av tuag lawm, ces txhua tus uas los txog ntawm qhov chaw uas Axahees tuag ntawd lawv puavleej los sawv rau ntawd. Tiamsis Yau-am thiab Anpisais tseem khiav caum Aneles qab. Ces thaum hnub poob qho nkawd los txog rau ntawm lub ncov roob Amas uas nyob ntawm Nkiyas sab hnubtuaj ntawm txojkev uas mus rau tom tiaj mojsab qhua Nkinpe-oos. Cov neeg uas yog xeem Npeenyamees thiaj tuaj sib sau sawv ncig Aneles dua thiab lawv mus sawv rau saum ib lub ncov roob. Aneles nug Yau-am hais tias, “Peb pheej yuav sib tua li no mus ibtxhis li los? Koj tsis pom hais tias, thaum kawg yuav muaj kev iab kev daw nkaus xwb no los? Thaum twg koj mam li cheem koj cov neeg kom tseg tsis txhob caum ntes peb uas yog nej cov kwvtij?” Yau-am teb hais tias, “Kuv thov coglus rau Vajtswv tus uas muaj sia nyob hais tias, yog koj tsis hais mas kuv cov neeg tseem yuav caum ntes koj mus txog tagkis sawv ntxov thiab.” Ces Yau-am thiaj tshuab xyu kom nws cov neeg tseg tsis txhob caum cov Yixalayees ntxiv thiab tseg tsis txhob sib tua lawm. Aneles thiab nws cov neeg thiaj maub mus hla lub hav Yauladees ib hmos; lawv hla dhau tus dej Yauladees thiab tagkis sawv ntxov lawv thiaj rov los txog rau hauv lub nroog Mahana-ees. Thaum Yau-am tseg tsis caum cov Yixalayees lawm, nws thiaj hu tagnrho nws cov neeg los sib sau ua ke thiab suav ua cas ploj lawm kaum cuaj leeg ntxiv rau Axahees. Daviv cov neeg tua Aneles cov tubrog uas yog xeem Npeenyamees tuag peb puas rau caum leej. Yau-am thiab nws cov neeg thiaj kwv Axahees lub cev coj los faus rau ntawm nws tsevneeg lub toj ntxa hauv lub nroog Npelehees. Ces lawv thiaj maub ib hmos kaj ntug plaws rov mus txog ntua rau nram lub nroog Henploos. Cov uas tuaj Xa-ules tsevneeg tog thiab cov uas tuaj Daviv tsevneeg tog ua rog sib tua tau ntev loo. Txawm li ntawd los Daviv pheej muaj zog zuj zus ntxiv xwb, tiamsis Xa-ules tsevneeg qaug zog zuj zus lawm. Cov no yog Daviv rau tug tub uas yug hauv lub nroog Henploos: Anoos, nws niam hu ua Ahinau-as, uas nyob hauv Yexelees; Khile-as, nws niam hu ua Anpinkayis uas yog Nanpas tus pojniam uas Daviv yuav hauv Kalemees los; Axaloos niam hu ua Ma-akas uas yog Vajntxwv Talemais tus uas kav lub nroog Nkesus tus ntxhais; Adauniyas, nws niam hu ua Hankis; Sefatiyas, nws niam hu ua Anpitas; Ile-as, nws niam hu ua Elas. Tagnrho cov tub no puavleej yug hauv lub nroog Henploos. Ntu uas cov neeg tuaj Daviv tog thiab cov uas tuaj Xa-ules tsevneeg tog pheej ua rog tsis tseg ntawd, Aneles yog tus uas muaj hwjchim loj zuj zus ntawm cov neeg uas tuaj Xa-ules tog. Muaj ib hnub Xa-ules tus tub Isenpauses tau liam hais tias, Aneles mus nrog Xa-ules tus niamyau Lixepas uas yog Ayas tus ntxhais pw. Qhov no ua rau Aneles chim heev. Nws thiaj hais tias, “Koj xav hais tias kuv yuav ntxeev siab rau Xa-ules no los? Koj xav hais tias kuv yog tus txhawb cov Yudas no los? Thaum xub thawj kuv yeej ibtxwm lees tej teebmeem uas koj txiv Xa-ules thiab nws cov kwvtij, nws cov phoojywg tau ua los lawm, thiab kuv twb tsis pub koj swb Daviv ib zaug li; ua li cas hnub no koj tseem lam liam hais tias kuv ua txhaum rau tus pojniam ntawd thiab! Isenpauses ntshai Aneles heev hais tsis taus ib lo lus li. Aneles thiaj tso neeg mus hais rau Daviv, thaum uas Daviv tseem nyob hauv lub nroog Henploos hais tias, “Leejtwg yuav kav lub tebchaws no? Koj cia li nrog kuv sib coglus, kuv thiaj yuav pab hais kom cov Yixalayees los tuaj koj tog.” Daviv teb hais tias, “Zoo lawm lauj, kuv yuav nrog koj sib coglus, tiamsis kuv xav tau ib yam ntawm koj tso: thaum koj tuaj cuag kuv, koj yuav tsum coj Xa-ules tus ntxhais Mikhas tuaj rau kuv, yog koj tsis ua li ntawd, koj yuav tsis pom kuv ib zaug li.” Thiab Daviv tso neeg mus hais rau Xa-ules tus tub Isenpauses hais tias, “Cia li xa Mikhas uas yog kuv tus pojniam tuaj rau kuv. Kuv twb muab cov Filitees ib puas daim tawv noov them nws nqi tshoob yuav nws ua kuv pojniam lawm.” Yog li ntawd, Isenpauses thiaj mus coj Mikhas ntawm nws tus txiv Patiyees uas yog Laises tus tub los. Patiyees quaj raws nws qab tuaj txog rau hauv lub nroog Npahulees. Tiamsis thaum Aneles hais tias, “Koj cia li rov qab mus tsev.” Nws thiaj rov qab mus tsev lawm. Aneles thiaj mus cuag cov Yixalayees cov thawjcoj thiab hais rau lawv hais tias, “Nej yeej xav tau Daviv ua nej tus vajntxwv los ntev lawm. Nimno yog sijhawm rau nej lawm lauj. Nej yuav tsum nco ntsoov qhov uas tus TSWV twb tau hais lawm hais tias, ‘Kuv yuav siv kuv tus tubtxib Daviv los pab kuv haivneeg Yixalayees kom dim ntawm cov Filitees thiab dim ntawm lawv cov yeebncuab.’ ” Aneles hais ib yam li ntawd rau xeem Npeenyamees, thiab nws tuaj cuag Daviv hauv lub nroog Henploos, nws piav tej uas xeem Npeenyamees thiab cov Yixalayees txaus siab coglus ntawd rau Daviv mloog. Thaum Aneles tuaj, nws coj tau nees nkaum leej txivneej tuaj cuag Daviv hauv lub nroog Henploos, Daviv ua ib rooj mov rau lawv noj. Aneles hais rau Daviv hais tias, “Kuv yuav rov mus tamsim no thiab coj tagnrho cov Yixalayees los cuag kuv tus vajntxwv. Lawv yuav zoo siab txais koj ua lawv tus vajntxwv, thiab koj yuav tau txais tej uas koj xav tau thiab yuav tau kav tagnrho lub tebchaws no.” Daviv thiaj tso Aneles rov qab mus tsev. Tom qab uas Yau-am thiab Daviv cov nomtswv mus huab luag tej khoom rov los, lawv nqa tau tej khoom ntau heev nrog lawv los. Thaum ntawd, Aneles tsis nrog Daviv nyob lub hauv nroog Henploos lawm, rau qhov Daviv tso nws rov qab mus tsev kaj siab lug lawm. Thaum Yau-am thiab nws cov neeg los txog tsev, muaj neeg mus qhia rau Yau-am hais tias, “Aneles tuaj cuag Vajntxwv Daviv thiab nws tso Aneles rov qab mus tsev kaj siab lug lawm.” Yog li ntawd, Yau-am thiaj mus cuag vajntxwv thiab hais rau nws hais tias, “Koj ua dabtsi li no? Aneles tuaj cuag koj, vim li cas koj tseem tso nws rov mus tsev lawm thiab? Nws tuaj ntawm no, yog tuaj dag koj thiab tuaj xyuas txhua yam uas koj ua thiab txhua txojkev uas koj mus xwb. Tsimnyog koj paub txog zaj no!” Tom qab uas Yau-am ncaim Daviv lawm, nws thiaj tso neeg mus nrhiav Aneles, thiab lawv mus coj tau Aneles ntawm lub Qhovdej Xilas los; tiamsis Daviv tsis paub txog zaj no hlo li. Thaum Aneles los txog rau hauv lub nroog Henploos, Yau-am thiaj rub zog Aneles mus rau ntawm lub roojvag ib sab, Aneles xav hais tias ntshai Yau-am yuav nrog nws tham twjywm, tiamsis Yau-am txawm muab riam nkaug kiag Aneles plab. Qhov uas Aneles raug tua tuag twb yog vim nws tua Yau-am tus kwv Axahees lawm. Thaum Daviv hnov xov li ntawd, nws thiaj hais tias, “Tus TSWV yeej paub kuv thiab kuv cov pejxeem tsis raug lub txim uas tua Aneles ntawd. Thov kom lub txim ntawd poob rau saum Yau-am thiab nws tsevneeg xwb! Thov kom Yau-am cajces txhua tiam muaj ib tug raug tej kab mob ua paug lossis kab mob ruas lossis qaug zog zis tsuas ua tau haujlwm pojniam lossis raug tua tuag rau hauv tshavrog lossis tsis muaj noj txaus.” Qhov uas Yau-am thiab nws tus kwv Anpisais tuavhauv tua Aneles, vim Aneles tua nkawd tus kwv Axahees thaum sib tua hauv tshavrog ntawm Nkinpe-oos. Ces Daviv hais kom Yau-am thiab nws cov neeg dua lawv tej ris tsho povtseg, muab tej ris tsho ntaubtsaj los hnav thiab pam Aneles. Thaum tawm hauv lub tsev pam tuag mus Vajntxwv Daviv thiaj raws lub hleb qab. Muab Aneles faus rau hauv lub nroog Henploos, vajntxwv tsa hlo suab quaj nrov heev ntawm qhov ntxa, thiab tagnrho cov pejxeem sawvdaws puavleej quaj ib yam nkaus. Daviv hu ib zaj nkauj quaj ntsuag rau Aneles li no: “Vim li cas Aneles raug tua tuag zoo li tej neeg ruam? Nws ob txhais tes twb tsis raug luag khi, Thiab nws ob txhais taw tsis raug luag xauv; Nws tuag ib yam li tej neeg muaj txim uas tua neeg tuag ntag!” Thiab cov pejxeem sawvdaws rov quaj nyiav Aneles dua ib zaug ntxiv. Cov pejxeem thiaj tuaj nplig Daviv siab ib hnub kom nws cia li noj mov, tiamsis nws tau coglus hais tias, “Thov Vajtswv tua kom kuv tuag, yog kuv tseem noj ib yam dabtsi ua ntej lub hnub poob qho.” Lawv pom hais tias zaj no zoo thiab txaus siab. Txhua yam uas vajntxwv ua puavleej txaus cov pejxeem siab kawg li. Tagnrho Daviv cov pejxeem thiab cov pejxeem Yixalayees puavleej paub hais tias, vajntxwv tsis nrog koom tes tua Aneles. Vajntxwv thiaj hais rau nws cov nomtswv hais tias, “Nej puas paub hais tias hnub no cov Yixalayees tus thawjcoj uas tseemceeb heev raug tua tuag lawm? Txawm yog Vajtswv twb xaiv kuv los ua vajntxwv ntag los hnub no kuv yeej qaug zog kawg li. Xeluyas cov tub no ua nruj ua tsiv rau kuv kawg li. Mas thov tus TSWV rau txim rau cov neeg no raws li tej kev phem uas lawv tau ua ntawd.” Thaum Xa-ules tus tub Isenpauses hnov hais tias Aneles raug tua tuag rau hauv lub nroog Henploos lawm, nws ntshai heev, thiab cov pejxeem Yixalayees ntxhov siab kawg li. Isenpauses muaj ob tug nomtswv, nkawd yog ob tug thawjcoj ntawm pab uas pheej mus huab luag tej khoom, Npa-anas thiab Lekhas yog Limoos ob tug tub. Nkawd yog xeem Npeenyamees uas nyob hauv lub nroog Npelaus. (Lub nroog Npelaus yeej muab tu ua xeem Npeenyamees tug lawm. Cov neeg uas ibtxwm nyob hauv lub nroog ntawd thiaj khiav mus rau hauv lub nroog Nkita-ees, thiab nyob qhov ntawd los txog niaj hnub no li.) Xa-ules tus xeebntxwv uas yog Yaunathas tus tub Mefinpauses hnubnyoog muaj tsib xyoo nkaus rau thaum Xa-ules thiab Yaunathas raug tua tuag. Ces thaum uas hnov xov pem lub nroog Yexelees tuaj hais tias, Xa-ules thiab Yaunathas raug tua tuag lawm, tus pojniam uas tu nws thiaj tsaws hlo nws khiav tawm mus; tiamsis tus pojniam ntawd maj heev thiaj plam tes ua nws poob, ces nws thiaj sav ceg lawm. Lekhas thiab Npa-anas tuavhauv mus tom Isenpauses tsev thiab mus kom txog tod thaum hnub ntseg uas nws tabtom mus pw tsaug zog. Thaum ntawd tus pojniam uas tsoov nplej ntawm qhovrooj txawm tsaug zog lawm thiab, ces Lekhas thiab Npa-anas nkawd txawm nkag mus rau hauv tsev. Thaum nkawd mus rau hauv tsev, nkawd txawm mus rau hauv Isenpauses lub txaj. Nws tabtom pw tsaug zog. Ces nkawd cia li muab nws tua kiag tuag lawm. Nkawd txiav nws lub taubhau nqa los, thiab maub ib hmos los txog rau hauv lub Hav Yauladees. Nkawd nqa nws lub taubhau los qhia rau Daviv hauv lub nroog Henploos thiab hais rau Daviv hais tias, “Ntawm no yog koj tus yeebncuab Xa-ules tus tub Isenpauses uas niaj hnub nrhiav koj tua povtseg lub taubhau. Hnub no tus TSWV pub rau vajntxwv uas yog kuv tus tswv ua pauj Xa-ules thiab nws cov xeebntxwv lawm.” Daviv teb nkawd hais tias, “Kuv thov coglus rau tus TSWV uas muaj sia nyob, tus uas cawm kuv dim ntawm tej xwmtxheej phem. Tus neeg uas los cuag kuv hauv lub nroog Xikelas thiab qhia kuv txog qhov Xa-ules tuag, nws xav hais tias yog nws coj xov zoo los qhia kuv. Kuv twb ntes nws thiab muab nws tua povtseg lawm. Qhov ntawd yog nqi zog uas kuv muab rau nws, qhov uas nws coj xov los qhia rau kuv ntawd ntag. Yeej tsimnyog rau txim hnyav tshaj ntawd rau cov neeg siab phem uas mus tua tus neeg tsis muaj txim dabtsi thaum nws pw tsaug zog hauv nws lub tsev. Nimno kuv yuav tua neb pauj qhov uas neb tua nws thiab yuav muab neb cajces tua kom tu noob nrho hauv ntiajteb no mus.” Daviv thiaj hais kom nws cov tubrog muab Lekhas thiab Npa-anas nkawd tua thiab muab nkawd tes taw txiav huv tibsi povtseg. Lawv coj nkawd mus dai ze rau ntawm lub pasdej hauv lub nroog Henploos, thiab lawv coj Isenpauses lub taubhau mus faus rau ntawm Aneles lub qhov ntxa hauv lub nroog Henploos. Txhua xeem Yixalayees tuaj cuag Daviv hauv lub nroog Henploos thiab hais rau nws hais tias, “Peb sawvdaws puavleej yog koj roj ntshav thiab nqaij tawv. Yav tas los, txawm yog Xa-ules yog peb tus vajntxwv los koj yeej yog tus uas coj cov Yixalayees mus ntaus rog xwb, thiab tus TSWV yeej coglus rau koj kom koj yuav tsum ua tus coj nws haivneeg thiab ua tus kav lawv.” Yog li ntawd, cov Yixalayees cov thawjcoj tuaj cuag Vajntxwv Daviv hauv lub nroog Henploos. Daviv tau coglus rau lawv, lawv muab roj hliv rau Daviv taubhau thiab tsa nws ua vajntxwv kav lub tebchaws Yixalayees. Thaum Daviv ua vajntxwv nws hnubnyoog muaj peb caug xyoo, thiab nws kav tau plaub caug xyoo. Nws kav cov Yudas nyob hauv lub nroog Henploos tau xya xyoo thiab rau hli, nws kav cov Yixalayees thiab cov Yudas nyob hauv lub nroog Yeluxalees tau peb caug peb xyoos. Thaum uas Daviv coj nws cov neeg mus tua lub nroog Yeluxalees, cov neeg Yenpus uas nyob hauv xav hais tias, Daviv yuav tsis muaj peevxwm tua yeej lub nroog ntawd ib zaug li, yog li ntawd, lawv thiaj hais rau Daviv hais tias, “Koj yuav nkag los tsis tau hauv no; txawm yog cov neeg digmuag thiab sav ceg los yeej muaj cuabkav raws koj tawm rov qab.” ( Tiamsis Daviv twb txeeb tau lawv lub chaw fajxwm saum Xi-oos lawm, thiaj muab qhov chaw ntawd hu ua “Daviv lub nroog.”) Hnub ntawd Daviv hais rau nws cov neeg hais tias, “Nej cov yog leejtwg yuav tua cov Yenpus, nws cia li nkag mus rau hauv tus kwjdeg thiab mus tua cov neeg digmuag thiab sav ceg uas kuv ntxub ntawd povtseg.” (Twb yog vim li no thiaj muaj lus sau tseg hais tias, “Tsis txhob pub cov neeg digmuag thiab qhuav ceg mus rau hauv tus TSWV lub tsev.”) Tom qab uas txeeb tau lub chaw fajxwm lawm, Daviv thiaj mus nyob rau hauv thiab muab qhov chaw ntawd tis npe hu ua “Daviv lub nroog.” Nws tsim lub nroog ncig lub Milus, pib kiag ntawm lub ncov roob sab hnubtuaj, qhov chaw uas luag twb muab av txhub lawm. Daviv muaj hwjchim loj heev zuj zus, rau qhov tus TSWV uas yog Vajtswv tus muaj hwjchim loj kawg nkaus nrog nraim nws. Vajntxwv Hilas uas kav lub nroog Tiles txib neeg tuaj cuag Daviv; nws muab ntoo ciab tuaj pub rau Daviv thiab txib cov neeg txua ntoo thiab cov neeg txaug pobzeb tuaj ua ib lub loog rau Daviv nyob. Thiab Daviv paub hais tias tus TSWV tsa nws ua haivneeg Yixalayees tus vajntxwv, tsa nws lub tebchaws kom vammeej thiab txhawb nws haivneeg lub neej. Tom qab uas Daviv tsiv hauv lub nroog Henploos los nyob hauv lub nroog Yeluxalees lawm, nws yuav ntau tus pojniam ntxiv, nws thiaj muaj tub muaj ntxhais coob heev. Cov menyuam uas yug hauv lub nroog Yeluxalees muaj npe raws li no: Samuas, Saunpaj, Nathas, Xalumoos, Inpehas, Elisuas, Nefes, Yafias, Elisamas, Eli-adas thiab Elifeles. Muaj neeg mus qhia rau cov Filitees hais tias, Daviv ua vajntxwv kav cov Yixalayees lawm, yog li ntawd, lawv cov tubrog thiaj li tuaj puav ntes Daviv. Thaum Daviv hnov li ntawd, nws thiaj li nqis mus rau hauv lub yeej. Cov Filitees tuaj txog hauv lub Hav Lefayees thiab tsuam yeej rau hauv. Daviv thiaj nug tus TSWV hais tias, “Puas tsimnyog kuv mus tua cov Filitees ntawd? Koj puas pab kuv tua kom yeej lawv thiab?” Tus TSWV teb hais tias, “Koj cia li mus tua lawv. Kuv yuav pub kom koj tua yeej.” Yog li ntawd, Daviv thiaj mus rau hauv Npa-as Pelaxees thiab nws tua yeej cov Filitees. Daviv hais tias, “Tus TSWV tsoo ua rau kuv cov yeebncuab tawg khiav ri sua ib yam li dej nyab.” Yog li ntawd, luag thiaj muab thaj chaw ntawd hu ua Npa-as Pelaxees. Thaum cov Filitees tawg khiav tas lawm, lawv tso lawv tej mlom tseg, ces Daviv thiab nws cov neeg thiaj nqa cov mlom ntawd los. Tom qab ntawd, cov Filitees rov qab tuaj rau hauv lub Hav Lefayees thiab rov tuaj tsuam chaw nyob qhov ntawd dua. Daviv rov nug tus TSWV ib zaug ntxiv, tus TSWV teb hais tias, “Tsis txhob tua lawv sab tom no mus, tiamsis koj cia li tshuv kev mus tuaj tom qab uas ze cov ntoo zaub kab tua lawv. Thaum koj hnov lub suab neeg mus kev saum cov ntsis ntoo zaub kab, ces koj cia li nqis tes tua, rau qhov kuv yuav mus ua koj ntej tua kom cov tubrog Filitees swb.” Daviv ua raws li tus TSWV hais, nws thiaj muaj peevxwm raws cov Filitees khiav tawm hauv Nkenpas taug kev rov qab mus txog ntua ntawm Nkexes. Daviv hu cov tubrog Yixalayees uas txawj tua rog tshaj plaws tuaj sib sau ua ke dua ib zaug ntxiv, suav tagnrho muaj peb caug txhiab leej, thiab Daviv coj lawv mus rau ntawm lub nroog Npa-alas hauv lub xeev Yudas, kom kwv lub Phijxab uas ntim Vajtswv tej lus cog tseg uas muaj tus TSWV uas muaj hwjchim loj kawg nkaus lub npe, tus TSWV lub zwmtxwv nyob saum ob tug qhelunpees ob phab qab tis. Lawv tsaws lub phijxab hauv Anpinadas lub tsev uas nyob saum pov roob los rau saum lub tsheb nyuj tshiab. Anpinadas tus tub Uxahas thiab Ahi-aus ua ob tug coj kev, Ahi-aus yog tus mus ua ntej. Daviv thiab cov Yixalayees dhia seevcev hu nkauj kawg lawv lub zog qhuas tus TSWV. Lawv ntaus nkauj nogncas loj, nkauj nogncas me, ntaus nruas, tshuab raj thiab ntaus nruas npuaj ua ke. Thaum uas lawv los txog rau ntawm Nakoos lub tshav ntaus nplej, tus heev nyuj dawm ua rau lub tsheb qaij hlo, Uxahas thiaj cev loo tes mus tuav nkaus lub Phijxab. Tamsim ntawd, tus TSWV uas yog Vajtswv chim heev rau Uxahas, nws thiaj tua Uxahas tuag kiag rau ntawm lub Phijxab ib sab, rau qhov Uxahas saib tsis taus lub phijxab. Yog li ntawd, thiaj muab qhov chaw ntawd hu ua Peles Uxahas los txog niaj hnub no. Daviv npautaws, vim tus TSWV chim thiab rau txim rau Uxahas, Daviv ntshai tus TSWV heev, nws hais tias, “Nimno kuv yuav ua li cas coj tau lub Phijxab no nrog kuv mus?” Yog li ntawd, Daviv thiaj txiav txim siab tsis coj lub Phijxab nrog nws mus rau hauv lub nroog Yeluxalees, tiamsis nws coj lub Phijxab ncaim kev mus tso rau hauv Aunpes Edoos lub tsev, Aunpes Edoos yeej ibtxwm nyob hauv lub nroog Nkas. Lub Phijxab nyob hauv Aunpes Edoos tsev tau peb hlis, tus TSWV thiaj foom koob hmoov rau Aunpes Edoos thiab nws tsevneeg. Vajntxwv Daviv hnov hais tias twb yog vim lub Phijxab, tus TSWV thiaj foom koob hmoov rau Aunpes Edoos tsevneeg thiab txhua yam uas nws muaj. Yog li ntawd, Daviv thiaj tuaj kwv lub Phijxab hauv Aunpes Edoos tsev mus tso rau hauv lub nroog Yeluxalees thiab muaj kev zoo siab kawg li. Thaum cov txivneej uas kwv lub Phijxab mus rau kauj ruam lawm, Daviv kom lawv nres tos nws muab ib tug heev nyuj thiab ib tug menyuam nyuj rog rog tua fij rau tus TSWV tso. Daviv sia ib daim thav ntxwv ntaubmag ntawm nws lub duav, Daviv dhia seevcev kawg nkaus nws lub zog qhuas tus TSWV. Daviv thiab cov pejxeem Yixalayees kwv lub Phijxab los tso rau hauv lub nroog Yeluxalees, lawv zoo siab qw ntshoo nrooj thiab tshuab raj tshuab xyu nrov doog diaj los. Thaum lawv tabtom kwv lub Phijxab los rau hauv nroog, Mikhas uas yog Xa-ules tus ntxhais, saib ntawm qhovrai mus pom Daviv seevcev thiab dhia ncig cov seevcev ntawd, nws txawm ntxub Daviv twjywm rau nruab siab. Lawv kwv lub Phijxab los tso rau hauv lub Tsevntaub uas Daviv npaj tseg rau lub phijxab ntawd. Ces Daviv muab tsiaj tua hlawv fij rau tus TSWV ua kev sib raug zoo. Thaum Daviv muab tsiaj tua hlawv fij rau tus TSWV tas lawm, nws thiaj tuav tus TSWV uas muaj hwjchim loj kawg nkaus lub npe foom koob hmoov rau cov pejxeem, thiab muab zaub mov faib rau lawv txhua tus. Daviv muab zaub mov faib rau cov Yixalayees txhua tus pojniam thiab txivneej, ib leeg ib lub ncuav, ib daim nqaij thiab mentsis txiv hmab qhuav. Ces lawv nyias txawm rov mus nyias tsev lawm. Tom qab ntawd thaum Daviv rov los tsev, nws yuav los foom koob hmoov rau nws tsevneeg, Mikhas txawm tawm tuaj tos Daviv. Mikhas hais tias, “Hnub no cov Yixalayees tus vajntxwv ua rau nws tau ntsejmuag loj kawg li. Nws ua tus niag vwm ntsuav liabqab tabmeeg nws cov nomtswv tej ntxhais qhev.” Daviv teb hais tias, “Kuv seevcev qhuas tus TSWV, tus uas xaiv kuv thiab tsa kuv ua tus thawjcoj nws haivneeg Yixalayees hloov koj txiv thiab nws cov xeebntxwv chaw. Kuv tseem yuav seevcev qhuas tus TSWV, thiab kuv yuav ua kom kuv poob ntsejmuag tshaj no ntxiv, kuv yuav txo hwjchim kawg nkaus li. Txawm yog koj saib kuv tsis muaj nqis dabtsi los cov ntxhais qhev ntawd yuav muab kuv saib muaj nqis heev!” Mikhas uas yog Xa-ules tus ntxhais yeej ibtxwm tsis muaj menyuam li. Vajntxwv Daviv nyob ruaj khov hauv nws lub loog, thiab tus TSWV tsomkwm tsis pub yeebncuab ua phem rau nws. Vajntxwv hais rau Nathas tus uas cev Vajtswv lus hais tias, “Koj saib, kuv nyob hauv lub tsev uas muab ntoo ciab ua, tiamsis Vajtswv lub Phijxab nyob hauv lub tsevntaub xwb!” Nathas teb hais tias, “Koj yuav ua dabtsi koj cia li ua, rau qhov tus TSWV nrog nraim koj.” Tiamsis hmo ntawd tus TSWV hais rau Nathas hais tias, “Koj cia li coj kuv tej lus no mus hais rau kuv tus tubtxib Daviv hais tias, ‘Koj tsis yog tus yuav ua lub tuamtsev rau kuv. Txij thaum kuv tso cov Yixalayees tawm nram tebchaws Iziv los txog niaj hnub no, kuv yeej tsis nyob hauv lub tuamtsev; kuv nyob hauv lub tsevntaub uas muab kwv tshais chaw tas mus li xwb. Thaum kuv nrog cov Yixalayees taug kev ntawd, kuv yeej tsis tau nug cov thawjcoj uas kuv tsa ntawd hais tias, vim li cas nej tsis muab ntoo ciab los ua lub tuamtsev rau kuv?’ “Koj cia li mus hais rau kuv tus tubtxib Daviv hais tias, tus TSWV uas muaj hwjchim loj kawg nkaus hais rau nws hais tias, ‘Koj yeej yog tus tub yug yaj uas nyob tom tej tiaj nrag xwb. Kuv coj koj los thiab tsa koj ua tus kav kuv haivneeg Yixalayees. Txhua qhov uas koj mus kuv yeej nrog nraim koj, thiab kuv twb ua rau koj tej yeebncuab swb koj tas lawm. Kuv yuav tsa koj ua ib tug thawjcoj uas muaj meejmom tshaj plaws nyob hauv lub ntiajteb no. Kuv xaiv ib thaj chaw rau kuv haivneeg Yixalayees nyob, kom lawv thiaj muaj ib thaj chaw nyob ua lawv tug, thiaj yuav tsis muaj leejtwg tuaj tsimtxom lawv; cov neeg siab phem thiaj yuav tsis tsimtxom lawv ntxiv li thaum ub lawm, txij thaum lawv los nyob hauv lub tebchaws no, kuv tsa cov thawjcoj los kav kuv haivneeg Yixalayees; kuv yuav pab kom koj dim ntawm koj cov yeebncuab thiab kuv yuav pub kom koj muaj xeebntxwv huamvam coob heev. Thaum koj tuag, luag yuav coj koj mus faus nrog koj cov yawgkoob, kuv yuav tsa koj cov tub ib tug los ua vajntxwv hloov koj, thiab nws yuav tuav lub tebchaws nyob ruaj khov. Nws yuav ua lub tuamtsev rau kuv, thiab kuv yuav pub nws cajces tau ua vajntxwv mus ibtxhis li. Kuv yuav ua nws txiv thiab nws yuav ua kuv tus tub. Thaum nws ua txhaum, kuv yuav rau txim rau nws ib yam li leej txiv rau txim rau nws tus tub. Tiamsis kuv yuav tsis tshem kuv txojkev pab tawm ntawm nws ib yam li kuv tshem tawm ntawm Xa-ules, tus uas kuv muab txo kom koj thiaj tau ua vajntxwv. Koj yuav muaj xeebntxwv huamvam coob, thiab kuv yuav pub koj lub tebchaws nyob ruaj khov mus ibtxhis. Koj tus nom yuav tsis poob mus ib simneej li.’ ” Nathas qhia txhua yam no rau Daviv raws li Vajtswv hais rau Nathas lawm. Vajntxwv Daviv mus rau hauv tus TSWV lub Tsevntaub sib ntsib, nws zaum tsaws thov Vajtswv hais tias, “Tus TSWV uas kav txhua tsav yam, kuv thiab kuv tsevneeg twb tsis tsimnyog tau tej uas koj ua rau kuv no li. Txawm yog kuv tau tej ntawd los tus TSWV uas kav txhua tsav yam, koj tseem pub kuv ntau tshaj tej ntawd thiab; koj tau coglus tseg hais tias koj yuav pub kuv cov xeebntxwv ua vajntxwv mus lawm yav tom ntej. Tus TSWV uas kav txhua tsav yam, koj tseem cia ib tug neeg pom tej no thiab! Kuv tsis paub yuav hais li cas rau koj ntxiv lawm. Koj yeej paub hais tias kuv yog koj tus tubtxib. Txhua yam tseemceeb uas koj tau qhia rau kuv tas los no twb yog koj ua raws li koj pom zoo thiab koj npaj tseg lawm. Tus TSWV uas kav txhua tsav yam, koj yog tus uas muaj hwjchim loj kawg nkaus! Yeej tsis muaj leejtwg yuav zoo npaum li koj; peb tsuas paub koj tib leeg thiaj yog Vajtswv xwb. Tsis muaj ib haivneeg twg uas nyob hauv lub ntiajteb no yuav zoo li haivneeg Yixalayees uas koj tau cawm dim ntawm txojkev ua luag qhev los ua koj haivneeg. Tej txujci loj thiab tseemceeb uas koj ua pab lawv, tau ua rau koj lub koob meej nrov ncha moo lug thoob plaws lub ntiajteb no. Koj raws txhua haivneeg tawm thiab tshem lawv tej mlom ua ntu zus mus ua koj haivneeg ntej, cov neeg uas koj coj nram tebchaws Iziv los yeej yog koj tug. Tus TSWV, koj yeej xaiv haivneeg Yixalayees ua koj tug mus ibtxhis, thiab koj yeej yog lawv tus Vajtswv. “Tus TSWV uas yog Vajtswv, nimno thov koj cia li ua kom tiav raws li koj tau coglus tseg rau kuv thiab kuv cov xeebntxwv, thiab cia li ua raws li koj hais tias koj yuav ua ntawd ntag. Koj lub koob meej thiaj yuav nrov ncha moo lug mus ibtxhis, thiab tej neeg sawvdaws yuav hais tias, ‘Tus TSWV uas muaj hwjchim loj kawg nkaus yog tus Vajtswv uas kav haivneeg Yixalayees.’ Thiab koj yuav tsa kuv cajces ua vajntxwv mus ibtxhis li. Tus TSWV uas muaj hwjchim loj kawg nkaus yog haivneeg Yixalayees tus Vajtswv! Kuv muaj cuabkav tsa ncauj thov koj li no, rau qhov koj tau qhia txhua yam rau kuv uas yog koj tus tubtxib, thiab koj tau hais rau kuv hais tias koj yuav tsa kuv cov xeebntxwv ua vajntxwv. “Tus TSWV uas kav txhua tsav yam, koj yog Vajtswv tiag; koj yeej ibtxwm ua raws li koj tej lus cog tseg, thiab koj tau coglus zoo kawg nkaus rau kuv. Kuv thov koj foom koob hmoov rau kuv cov xeebntxwv kom lawv muab siab npuab koj. Koj yog tus TSWV uas kav txhua tsav yam, koj tau coglus li no mas kuv cov xeebntxwv yuav tau koj tej koob hmoov mus ibtxhis.” Tom qab no, muaj ib hnub Daviv mus tua cov Filitees dua ib zaug, nws tua yeej cov Filitees thiab txeeb tau lub nroog Methe-amas ntawm cov Filitees rov los. Daviv tua yeej hlo lub tebchaws Mau-am. Nws muab cov neeg uas nws ntes tau pw rau hauv av thiab peb leeg twg nws coj ob leeg mus tua povtseg, tseg ib tus cia xwb. Yog li ntawd, cov neeg Mau-am thiaj tau los ua nws qhev thiab them se rau nws. Daviv mus tua yeej cov Xaunpas tus Vajntxwv Hadadexes uas yog Lehaus tus tub, thaum uas Hadadexes tabtom taug kev rov tuaj tsuam yeej rau hauv cheebtsam ntawm tus dej Efalates sab ped. Daviv ntes tau Hadadexes cov tubrog caij nees ib txhiab xya pua leej thiab nees nkaum txhiab leej tubrog mus taw. Daviv tseg ib puas tus nees kom txaus nkaus luag cov tsheb nees xwb, dua li cov seem nws muab txo leeg raws tas huv tibsi. Thaum cov Xilias uas nyob hauv lub nroog Damaxes tso tubrog mus pab Vajntxwv Hadadexes, Daviv tua cov Xilias tuag lawm nees nkaum ob txhiab leej. Daviv thiaj tsuam ntau lub yeej tubrog rau hauv lawv cheebtsam av, thiab lawv tau los ua Daviv qhev thiab them se rau nws. Tus TSWV ua rau Daviv tua yeej txhua qhov txhia chaw. Daviv txeeb tau Hadadexes cov nomtswv tej thaiv hniav ntaj kub huv tibsi los cia rau hauv lub nroog Yeluxalees. Daviv tseem muab tau tej tooj dag uas zoo heev hauv lub nroog Npetas thiab lub nroog Npelauthais uas Hadadexes kav nqa huv tibsi los lawm thiab. Vajntxwv Tau-is uas kav lub nroog Hamas hnov hais tias Daviv tua yeej Hadadexes cov tubrog lawm. Yog li ntawd, Tau-is thiaj tso nws tus tub Yaulas tuaj hawm Vajntxwv Daviv thiab qhuas qhov uas Daviv tua yeej Hadadexes, tus uas tau ua rog tawmtsam Tau-is ntau zaus los lawm. Yaulas coj kub, nyiaj thiab tooj tuaj pub rau Daviv. Vajntxwv Daviv muab tej ntawd fij rau tus TSWV kom tau siv hauv lub tuamtsev, nrog tej nyiaj tej kub uas nws txeeb tau ntawm tej lub tebchaws uas nws mus tua yeej: Edoos, Mau-am, Amoos, Filitees, Amalej thiab tej uas nws huab ntawm cov Xaunpas tus vajntxwv Hadadexes uas yog Lehaus tus tub los. Daviv lub koob meej nrov ncha moo lug txij thaum uas nws mus tua cov Edoos tuag kaum yim txhiab leej hauv lub Hav Ntsev los. Nws tsuam ntau lub yeej tubrog nyob thoob plaws hauv tebchaws Edoos, thiab cov Edoos tau los ua Daviv qhev. Tus TSWV pub Daviv tua yeej txhua qhov txhia chaw. Daviv kav tagnrho haivneeg Yixalayees thiab ua rau nws haivneeg muaj kev sib haumxeeb thiab muaj kev ncaj ncees. Xeluyas tus tub Yau-am yog tus thawj tubrog; Yehausafas uas yog Ahilus tus tub, ua tus tuav tej ntaub ntawv; Xadaus uas yog Ahitus tus tub thiab Anpiyathas uas yog Ahimelej tus tub yog ob tug povthawj; Xelayas ua tus teev ntawv. Yehauyadas tus tub Npenayas ua tus saib cov tubrog uas zov Daviv, thiab Daviv cov tub ua cov nomtswv loj. Muaj ib hnub Daviv nug hais tias, “Xa-ules tsevneeg puas tshuav ib tug seem nyob qhov twg thiab? Yog muaj, kuv yuav pab nws, vim kuv tau coglus rau Yaunathas lawm.” Muaj ib tug txivneej npe hu ua Xinpas, nws yog Xa-ules tsevneeg ib tug tubtxib, lawv thiaj txib neeg mus coj Xinpas tuaj cuag Daviv. Vajntxwv nug nws hais tias, “Koj puas yog Xinpas?” Nws teb hais tias, “Vajntxwv, kuv yog koj tus tubtxib ntag.” Vajntxwv thiaj nug Xinpas ntxiv hais tias, “Xa-ules tsevneeg puas tshuav ib tug nyob qhov twg, kuv yuav mus ua ncaj thiab ua siab dawb siab zoo rau nws raws li kuv tau coglus rau Vajtswv lawm hais tias kuv yuav ua li ntawd?” Xinpas teb hais tias, “Yaunathas tshuav ib tug tub. Tiamsis nws sav ceg lawm.” Vajntxwv nug hais tias, “Nws nyob qhov twg?” Xinpas teb hais tias, “Nws nyob hauv Amiyees tus tub Makhiles tsev uas nyob hauv lub nroog Laudenpas.” Yog li ntawd, Vajntxwv Daviv thiaj txib neeg mus tos nws tuaj. Thaum Yaunathas tus tub Mefinpauses uas yog Xa-ules tus xeebntxwv ntawd tuaj txog, nws thiaj khoov ntshis hawm Daviv. Ces Daviv hais tias, “Mefinpauses,” Mefinpauses teb hais tias, “Vajntxwv, kuv yog koj tus tubtxib ntag.” Daviv hais tias, “Koj tsis txhob ntshai, kuv yuav ua zoo rau koj vim tej lus uas kuv cog tseg rau koj txiv Yaunathas lawm. Kuv yuav muab tej av uas yog koj yawg Xa-ules tug rov rau koj huv tibsi, thiab kuv yuav zoo siab cia koj nrog kuv koom noj koom haus saum kuv lub rooj mov mus li.” Mefinpauses rov khoov ntshis dua ib zaug thiab hais tias, “Vajntxwv, kuv twb tsis muaj nqis npaum li ib tug dev tuag. Vim li cas koj yuav ua zoo tas npaum li no rau kuv?” Vajntxwv hu Xinpas uas yog Xa-ules tus tubtxib los thiab hais rau nws hais tias, “Txhua yam uas yog Xa-ules thiab nws tsevneeg tug, kuv yuav muab rov qab rau koj tus tswv tus xeebntxwv Mefinpauses huv tibsi. Koj, koj cov tub, thiab koj cov tubtxib yuav mus ua tej teb ntawd rau koj tus tswv Xa-ules tsevneeg thiab sau tej qoobloo los cia kom lawv muaj noj muaj haus. Tiamsis Mefinpauses yuav nrog kuv koom noj koom haus saum kuv lub rooj mov mus li.” (Xinpas muaj kaum tsib tug tub thiab nees nkaum tus tubtxib.) Xinpas teb hais tias, “Kuv zoo siab ua txhua yam raws li vajntxwv tau hais rau kuv lawm.” Yog li ntawd, Mefinpauses thiaj tau nrog vajntxwv noj mov saum vajntxwv lub rooj mov ib yam li nws yog vajntxwv ib tug tub ntag. Mefinpauses muaj ib tug tub ntxawg hu ua Mikas. Tagnrho Xinpas tsevneeg puavleej ua Mefinpauses qhev. Yog li ntawd, Mefinpauses uas sav ob sab ceg huv tibsi thiaj tau nyob hauv lub nroog Yeluxalees, thiab nws nrog vajntxwv noj txhua pluag mov saum vajntxwv lub rooj mov. Tau tsis ntev los tom qab no cov Amoos tus Vajntxwv Nahases tuag lawm, nws tus tub Hanoos ua vajntxwv hloov nws chaw. Vajntxwv Daviv hais tias, “Kuv yuav mus cog phoojywg nrog Hanoos ib yam li nws txiv Nahases tau ua rau kuv lawm.” Yog li ntawd, Daviv thiaj tso nws cov tubtxib mus nplig Hanoos siab vim nws txiv tuag lawm. Thaum lawv mus txog hauv tebchaws Amoos, cov Amoos tej thawjcoj tuaj hais rau vajntxwv hais tias, “Koj xav hais tias Daviv tso cov neeg no tuaj nplig koj siab vim qhov nws hwm koj txiv no los? Tsis yog li ntawd, yog nws tso lawv tuaj tshuaj xyuas lub nroog no, kom nws thiaj tuaj tua yeej peb xwb los sav.” Hanoos thiaj ntes Daviv cov neeg, muab lawv tej hwjtxwv chais ib sab, muab lawv tej ris tsho txiav ntshi ua kaj niab ti nkaus pem duav, thiab tso lawv rov qab los tsev. Ua rau lawv txajmuag rov los tsev. Thaum Daviv hnov hais tias muaj tej xwmtxheej no, Daviv thiaj txib neeg mus hais kom lawv nyob twjywm hauv lub nroog Yelikaus mus txog thaum lawv tej hwjtxwv rov ntev tuaj tso. Cov Amoos paub hais tias lawv ua rau Daviv ua yeebncuab rau lawv lawm, yog li ntawd, lawv thiaj ntiav cov Xilias nees nkaum txhiab leej tubrog uas nyob hauv lub nroog Npelehaus thiab Xaunpas, kaum ob txhiab leej txivneej hauv lub nroog Taunpes, thiab cov Ma-akas tus vajntxwv nrog nws ib txhiab leej txivneej tuaj pab cov Amoos. Daviv hnov li ntawd, nws thiaj hais kom Yau-am coj tagnrho cov tubrog mus tua lawv. Cov Amoos tuaj nyob tagnrho rau ntawm lawv tej chaw tos sib tua ntawm txoj ncauj ke mus rau hauv lub nroog Lanpas uas yog lawv lub tuamceeb nroog ua ntej cov Xilias thiab cov neeg uas nyob hauv Taunpes thiab Ma-akas mus nyob rau ntawm lawv tej chaw tom roob mojsab. Yau-am pom yeebncuab cov tubrog uas tuaj tos tua nws nyob puv nkaus tom ntej tom qab huv tibsi lawm, yog li ntawd, nws thiaj xaiv kiag cov tubrog Yixalayees uas khov thiab siab tawv mus sawv tim ntsej tim muag cov Xilias. Nws muab cov tubrog uas seem tso rau nws tus kwv Anpisais ua tus saib, Anpisais coj lawv mus sawv tim ntsej tim muag cov Amoos. Yau-am hais rau Anpisais hais tias, “Yog koj pom cov Xilias tua yeej kuv, koj cia li los pab kuv, thiab yog kuv pom cov Amoos tua yeej koj, ces kuv los pab koj. Ua siab tawv qhawv thiab cuab zog khov kho. Cia li tua tiag pub rau peb cov pejxeem thiab pub rau Vajtswv tej nroog. Thiab thov kom ua raws li tus TSWV pom zoo.” Yau-am thiab nws cov tubrog nam zog mus sib tua, cov Xilias cia li swb thiab tig khiav rov qab. Thaum cov Amoos pom cov Xilias swb thiab khiav lawm, lawv cia li tsis tiv Anpisais thiab khiav mus nkaum rau hauv nroog. Ces Yau-am thiaj tseg tsis tua cov Amoos thiab rov qab los rau hauv lub nroog Yeluxalees lawm. Cov Xilias paub hais tias lawv swb cov Yixalayees lawm, yog li ntawd, lawv thiaj hu tagnrho lawv cov tubrog tuaj txoos ua ke. Vajntxwv Hadadexes txib neeg mus hu cov Xilias uas nyob ntawm tus dej Efalates sab hnubtuaj, thiab lawv tuaj rau hauv lub nroog Helas uas yog Hadadexes tus thawj tubrog Saunpakhis ua tus kav. Thaum Daviv hnov li ntawd, nws thiaj hu tagnrho cov tubrog Yixalayees tuaj ua ke, lawv hla tus dej Yauladees mus rau sab tid thiab mus rau ntawm Halas, qhov chaw uas cov Xilias tuaj tsuam yeej tabmeeg nws. Ces lawv txawm pib sib tua, cov tubrog Yixalayees muab cov tubrog Xilias raws khiav tsis yeej rov qab. Daviv thiab nws cov tubrog tua cov tubrog Xilias tsav tsheb nees tuag xya pua leej thiab cov tubrog caij nees tuag plaub caug txhiab leej, thiab lawv tua raug Saunpakhis uas yog cov yeebncuab tus thawj tubrog, nws thiaj tuag rau hauv tshavrog lawm. Thaum cov vajntxwv uas ua Hadadexes qhev paub hais tias lawv swb cov Yixalayees lawm, lawv thiaj tuaj ua phoojywg rau cov Yixalayees thiab lees ua cov Yixalayees qhev. Cov Xilias ntshai mus pab cov Amoos ntxiv lawm. Xyoo tom qab, thaum lub caij nplooj ntoos hlav, yog lub caij uas cov vajntxwv ibtxwm tawm mus tua rog, Daviv thiaj txib Yau-am nrog nws cov nomtswv thiab cov tubrog Yixalayees mus tua rog; lawv thiaj mus tua yeej cov Amoos thiab mus vij lub nroog Lanpas. Tiamsis Daviv nyob hauv lub nroog Yeluxalees. Muaj ib hnub thaum tavsu dua, Daviv sawv saum nws lub txaj nce mus rau saum rutsev qhov uas tiaj tiaj. Daviv ncig mus ncig los saud, nws pom ib tug pojniam tabtom da dej hauv tus pojniam ntawd lub tsev. Tus pojniam ntawd zoo nkauj heev. Yog li ntawd, Daviv thiaj txib neeg mus nug saib tus pojniam ntawd yog leejtwg. Thaum paub hais tias tus pojniam ntawd yog Eli-as tus ntxhais Npasenpas thiab yog Uliyas uas yog neeg Hitis tus pojniam. Daviv txib neeg mus hu Npasenpas tuaj; lawv thiaj mus coj Npasenpas tuaj cuag Daviv, ces Daviv cia li coj nws mus nrog Daviv pw. (Npasenpas nyuam qhuav coj khaubncaws dua thiab ua kevcai ntxuav tas xwb.) Ces Npasenpas txawm rov mus tsev lawm. Tom qab ntawd Npasenpas paub hais tias nws cev xeeb tub lawm, nws thiaj tso xov mus rau Daviv paub. Ces Daviv txawm txib neeg mus hais rau Yau-am hais tias, “Koj tso Uliyas tus uas yog neeg Hitis los cuag kuv.” Yog li ntawd, Yau-am thiaj tso Uliyas los cuag Daviv. Thaum Uliyas los txog, Daviv nug nws txog Yau-am thiab cov tubrog saib puas noj qab nyob zoo, thiab kev sib ntaus sib tua ua li cas lawm. Ces Daviv rov hais rau Uliyas hais tias, “Koj cia li mus so tom tsev ib ntu tso.” Uliyas txawm tawm lawm, thiab Daviv xa mentsis khoom mus pub rau Uliyas tom tsev. Tiamsis Uliyas tsis mus tsev li; nws cia li mus nrog cov tubrog uas zov vajntxwv pw ntawm roojloog xwb. Thaum Daviv hnov hais tias Uliyas tsis mus tsev, Daviv txawm nug Uliyas hais tias, “Koj twb ncaim vajtse mus tau ntev lawm nyuam qhuav rov los txog no; vim li cas koj tsis mus xyuas tsev?” Uliyas teb hais tias, “Cov tubrog Yixalayees thiab cov Yudas puavleej nyob hauv tshavrog, thiab lub Phijxab uas ntim Vajtswv tej lus cog tseg los tseem nrog lawv nyob; kuv tus thawj tubrog Yau-am thiab nws cov thawj tubrog puavleej nyob tom tshavrog. Kuv yuav ua li cas mus tsev, mus noj mus haus, thiab nrog kuv tus pojniam pw? Koj tseem muaj sia nyob, kuv thov coglus hais tias kuv tsis ua li ntawd ib zaug li.” Yog li ntawd, Daviv thiaj hais tias, “Hnub no koj cia li so twjywm ntawm no, tagkis kuv yuav muab koj xa rov qab mus.” Hnub ntawd Uliyas thiaj so hauv lub nroog Yeluxalees ib hnub thiab hnub tom qab ib hnub. Daviv caw Uliyas los noj mov thiab muab cawv rau nws haus qaug heev. Tiamsis hmo ntawd Uliyas kuj tsis mus tsev li thiab; Uliyas cia li muab nws daim pam pua pw hauv chav tsev uas cov tubrog zov vajntxwv nyob. Ces tagkis sawv ntxov Daviv sau ib tsab ntawv rau Uliyas nqa mus rau Yau-am. Daviv sau hais tias, “Yog qhov twg sib tua hnyav, koj tso Uliyas tuaj tom hauv ntej, ces nej cia li thim rov qab thiab tso nws tseg kom nws raug tua tuag.” Yog li ntawd, thaum Yau-am tabtom mus vij ib lub nroog, nws thiaj kom Uliyas mus rau ntawm qhov chaw uas Yau-am paub hais tias cov yeebncuab nyob coob tshaj plaws. Yeebncuab tawm hauv nroog tuaj tua Yau-am cov tubrog; Daviv cov tubrog ibtxhia thiaj raug tua tuag thiab Uliyas los raug tua tuag lawm. Ces Yau-am xa xov los qhia rau Daviv paub txog tej kev sib tua, thiab Yau-am hais rau tus xa xov hais tias, “Tom qab uas koj qhia tej kev sib tua rau vajntxwv tas lawm, tej zaum nws yuav chim heev thiab nug koj hais tias, ‘Vim li cas nej yuav mus ti nkaus hauv nroog, nej mam li tua lawv? Nej tsis paub hais tias lawv yuav tua hneevnti hauv ntsa yeej tuaj rau nej no los? Nej tsis nco qab qhov uas Nkide-oos tus tub Anpimelej raug tua tuag los? Anpimelej tuag twb yog ib tug pojniam hauv lub nroog Thenpej tso ib txhib zeb saum ntsa yeej los ntaus nws tuag. Vim li cas, nej yuav mus ti nkaus rau ntawm ntsa yeej li?’ Yog vajntxwv nug koj li no, koj cia li qhia nws hais tias, ‘Dua li ntawd koj tus thawj tubrog Uliyas los raug tua tuag lawm thiab.’ ” Yog li ntawd, tus xa xov thiaj mus cuag Daviv thiab qhia txhua yam uas Yau-am hais rau nws lawm. Nws hais tias, “Peb cov yeebncuab coob tshaj peb thiab lawv tawm tuaj tua peb rau nraum ntug nroog, tiamsis peb muab lawv raws tua thim khiav rov qab mus tas rau hauv roojvag nroog lawm. Ces lawv thiaj tua hneevnti sab ntsa yeej hauv tuaj rau peb, Vajntxwv cov thawj tubrog thiaj raug xub hneevnti tuag ibtxhia lawm; thiab koj tus thawj tubrog Uliyas los raug tua tuag lawm thiab.” Daviv hais rau tus xa xov hais tias, “Cia li txhawb Yau-am zog thiab hais kom nws tsis txhob tu siab, rau qhov tsis paub hais tias xyov leejtwg yuav raug tua tuag rau hauv tshavrog. Koj hais rau nws kom kavtsij nqis tes tua thiab txeeb kom tau lub nroog ntawd.” Thaum Npasenpas hnov hais tias nws tus txiv raug tua tuag lawm, nws quaj nws tus txiv heev. Lub sijhawm uas Npasenpas quaj nws tus txiv dhau lawm, Daviv thiaj mus coj nws los rau hauv loog; Daviv yuav Npasenpas ua Daviv tus pojniam thiab Npasenpas yug tau ib tug tub rau Daviv. Tiamsis tus TSWV tsis txaus siab rau tej uas Daviv tau ua tas los ntawd. Tus TSWV txib Nathas tus uas cev Vajtswv lus mus cuag Daviv. Nathas thiaj mus cuag Daviv thiab hais rau Daviv hais tias, “Muaj ob tug txivneej nyob hauv ib lub nroog; ib tug yog neeg npluanuj, ib tug yog neeg pluag. Tus neeg npluanuj, nws muaj nyuj muaj yaj coob heev, tiamsis tus neeg pluag muaj ib tug menyuam yaj uas nws nyuam qhuav mus yuav los xwb. Nws tu tus menyuam yaj ntawd zoo heev, thiab tus menyuam yaj ntawd hlob mos nyoos nyob hauv nws tsev nrog nws cov menyuam. Nws muab nws tej zaub mov pub tus menyuam yaj noj, cia tus menyuam yaj nrog nws haus ib lub khob thiab nws puag rawv tus menyuam yaj rau hauv nws lub xubntiag. Tus menyuam yaj ntawd zoo nkaus li nws tus ntxhais nkauj ntxawm ntag. Muaj ib hnub, ib tug qhua txawm tuaj txog hauv tus npluanuj lub tsev. Tus npluanuj tsis xav muab nws cov tsiaj ib tug tua ua zaub rau tus qhua ntawd noj; nws txawm mus ntes tus neeg pluag tus menyuam yaj los tua ua ib rooj mov noj tiam nws tus qhua ntawd lawm.” Daviv chim heev rau tus neeg npluanuj ntawd, Daviv hais tias, “Kuv thov coglus rau tus TSWV uas muaj sia nyob hais tias, tsimnyog muab tus neeg uas ua li ntawd tua povtseg lawm! Yog nws txhav tus neeg pluag npaum li cas, cia li kom nws them plaub npaug rov qab, rau qhov nws ua phem li ntawd thiab tsis muaj lub siab hlub li.” Nathas teb hais tias, “Koj yog tus txivneej ntawd ntag. Tus TSWV uas yog cov Yixalayees tus Vajtswv hais li no: ‘Kuv tsa koj ua cov Yixalayees tus vajntxwv thiab kuv cawm koj dim ntawm Xa-ules txhais tes. Kuv muab nws lub tebchaws thiab nws cov pojniam rau koj; kuv tsa koj ua vajntxwv kav cov Yixalayees thiab cov Yudas. Yog tej no tsis txaus koj siab, kuv tseem yuav muab ob npaug ntxiv rau koj. Vim li cas koj tsis mloog kuv tej lus samhwm? Vim li cas koj yuav ua phem li no? Koj muab Uliyas coj mus rau luag tua hauv tshavrog; koj cia cov Amoos muab nws tua kom koj thiaj tau yuav nws tus pojniam! Txij no mus, koj tej xeebntxwv qee leej yuav raug luag muab tua povtseg ib tiam dhau ib tiam, vim koj tsis mloog kuv lus thiab koj yuav Uliyas tus pojniam lawm. Kuv coglus rau koj hais tias, kuv yuav tshoov koj tsevneeg ib tug siab kom nws tsim teebmeem rau koj. Koj yuav pom thaum kuv muab koj cov pojniam cais tawm ntawm koj mus thiab muab cob rau lwm tus txivneej thiab nws yuav tabmeeg nrog koj cov pojniam pw nruab hnub nrig. Koj ua txhaum nraim nkoos tsis pub leejtwg paub, tiamsis kuv yuav ua kom tej no tshwm nruab hnub nrig tabmeeg ib tsoom Yixalayees sawvdaws lub qhovmuag pom ntsoov.’ ” Daviv hais tias, “Kuv tau ua txhaum rau tus TSWV lawm tiag.” Nathas teb hais tias, “Tus TSWV yuav zam txim rau koj, koj yuav tsis tuag. Tiamsis vim koj tau ua tej kev txhaum no saib tsis taus tus TSWV, koj tus menyuam yuav tuag.” Ces Nathas txawm rov mus tsev lawm. Tus TSWV ua rau tus menyuam uas Uliyas tus pojniam yug rau Daviv ntawd mob hnyav heev. Daviv rau siab ntso thov Vajtswv kom tus tub ntawd zoo. Daviv tsis noj ib yam dabtsi li, thiab txhua hmo Daviv mus hauv nws chav pw, nws qhau cev pw hauv av ib hmos kaj ntug li xwb. Daviv cov nomtswv tu plaub ntug tuaj nplig Daviv siab kom nws sawv, tiamsis nws tsis kam sawv thiab tsis kam nrog lawv noj ib yam dabtsi li. Xya hnub tom qab ntawd, tus tub ntawd txawm tuag lawm, Daviv cov nomtswv ntshai thiab tsis muaj cuabkav mus qhia rau Daviv paub. Lawv thiaj sib tham hais tias, “Thaum tus tub ntawd tseem muaj sia, peb mus nrog Daviv tham, nws twb tsis teb peb li. Yuav ua li cas peb thiaj mus qhia rau Daviv hais tias tus metub ntawd tuag lawm no? Nyob tsam Daviv rov ua tej yam phem rau Daviv ne?” Thaum Daviv hnov lawv ib leeg ntxhi rau ib leeg, Daviv paub hais tias tus tub ntawd tuag lawm. Yog li ntawd, nws thiaj nug lawv hais tias, “Tus metub tuag lawm los?” Lawv teb hais tias, “Yog, nws tuag lawm.” Daviv sawv tsees hauv av los, da dej, ntsis plaubhau thiab hloov ris tsho. Ces Daviv txawm mus pehawm Vajtswv rau tom tus TSWV lub tsev lawm. Thaum nws rov qab los rau hauv lub loog, nws thiaj taij kom ua zaub ua mov rau nws noj thiab thaum rau tau mov, nws txawm noj mov lawm. Daviv cov nomtswv hais rau Daviv hais tias, “Peb tsis totaub txog zaj no li, thaum tus tub tseem muaj sia, koj quaj nws heev thiab tsis kam noj mov li, tiamsis thaum nws tuag lawm, koj sawv tsees los thiab noj mov.” Daviv teb lawv hais tias, “Yog tiag, kuv tau yoo mov thiab quaj thaum nws tseem muaj sia nyob. Rau qhov kuv xav hais tias tus TSWV yuav hlub kuv thiab tsis pub kuv tus tub tuag. Tiamsis nimno nws twb tuag lawm, kuv tseem yoo mov ua dabtsi? Kuv puas yuav muaj peevxwm tsa tau tus tub ntawd sawv rov qab los? Muaj ib hnub twg kuv yeej yuav mus rau txojkev uas nws mus thiab, tiamsis nws yuav tsis rov los cuag kuv ib zaug li lawm.” Tom qab ntawd, Daviv nplig Npasenpas uas yog nws tus pojniam siab. Daviv mus nrog Npasenpas pw, ces nws thiaj xeeb tub thiab yug tau ib tug tub, Daviv tis tus tub ntawd npe hu ua Xalumoos. Tus TSWV hlub tus tub no thiab hais rau Nathas tus uas cev Vajtswv lus kom mus tis tus tub ntawd npe hu ua Yedidiyas, rau qhov tus TSWV hlub nws heev. Thaum Yau-am mus tua lub nroog Lanpas uas yog cov Amoos lub tuamceeb nroog thiab tabtom txeeb yuav tau lub nroog ntawd. Yau-am tso neeg mus qhia rau Daviv hais tias, “Kuv tabtom tua lub nroog Lanpas, thiab kuv twb txeeb tau lub nroog ntawd lub qhovdej lawm. Tamsim no koj cia li txhij koj cov tubrog uas seem tuaj tua lub nroog ntawd thiab txeeb kom tau rau koj. Kuv tsis xav tau ntsejmuag qhov uas kuv txeeb tau lub nroog ntawd.” Yog li ntawd, Daviv thiaj txhij nws cov tubrog mus tua lub nroog Lanpas, nws tua yeej thiab txeeb tau lub nroog ntawd. Daviv muab lub kausmom kub uas hnyav xya caum tsib choj saum cov Amoos tus vajtswv lub taubhau hle los, luag muab tej hlaws muaj nqis dhos tawg paj paug rau lub kausmom ntawd. Daviv muab lub kausmom kub ntawd looj rau Daviv taubhau, thiab nws huab tau khoom ntau heev hauv lub nroog ntawd nqa los, Daviv muab kaw, muab hlau thiab muab taus rau cov neeg hauv lub nroog ntawd thiab yuam kom lawv ua haujlwm thiab puab thwvcib. Daviv kom cov neeg uas nyob hauv cov Amoos txhua lub nroog ua haujlwm ib yam li ntawd. Ces Daviv thiab nws cov tubrog rov los rau hauv lub nroog Yeluxalees lawm. Daviv tus tub Axaloos muaj ib tug muam tsis tau yuav txiv, nws hu ua Tamaj, thiab nws zoo nkauj heev. Anoos uas yog Daviv ib tug tub nyiam Tamaj heev. Anoos nyiam Tamaj heev, ua rau Anoos cia li mob li lawm, rau qhov Tamaj tseem yog ib tug nkaujxwb uas tsis tau tham dua hluas nraug, Anoos paub hais tias nws yuav mus cuag tsis tau Tamaj. Tiamsis Anoos muaj ib tug phoojywg yog neeg ntse heev hu ua Yaunadas, nws yog Daviv tus tijlaug Samas tus tub. Yaunadas nug Anoos hais tias, “Koj twb yog vajntxwv tus tub ntag, ua li cas kuv pom koj pheej ntsoos ib hnub dhau ib hnub li, yog ua li cas tiag?” Anoos teb hais tias, “Kuv nyiam Tamaj uas yog kuv tus kwv nrab Axaloos tus muam heev.” Yaunadas hais rau Anoos hais tias, “Koj ua txuj tsab mob thiab mus pw twjywm saum txaj, kom koj txiv los xyuas koj, ces koj hais rau koj txiv hais tias, ‘Thov koj mus hais Tamaj los pub mov rau kuv noj. Kuv xav pom nws los ua zaub ua mov thiab muab zaub mov rau kuv noj.’ ” Yog li ntawd, Anoos ua txuj tsab mob thiab mus pw lawm. Vajntxwv Daviv thiaj mus xyuas Anoos, thiab Anoos hais rau Daviv hais tias, “Thov koj cia Tamaj los ua ob lub ncuav ci ntawm no rau kuv pom, thiab cia nws muab cov ncuav ntawd rau kuv noj.” Yog li ntawd, Daviv thiaj tso neeg mus hu Tamaj hauv lub loog los thiab hais tias: “Koj cia li mus hauv Anoos tsev thiab ua mov rau nws noj.” Tamaj thiaj mus rau hauv thiab pom Anoos pw saum txaj. Tamaj thiaj muab ib co hmoov nplej ntse dej zuaj ua ib co ncuav rau Anoos saib ntsoov. Ces Tamaj txawm muab cov ncuav ntawd cub thiab nws muab rau Anoos noj, tiamsis Anoos tsis kam noj li. Anoos hais tias, “Ntiab cov neeg ntawd tawm mus,” ces lawv txawm tawm lawm. Anoos thiaj hais rau Tamaj hais tias, “Nqa cov ncuav los rau ntawm kuv lub txaj no thiab koj muab rau kuv noj.” Tamaj thiaj nqa ncuav mus rau Anoos. Thaum Tamaj cev ncuav rau Anoos, Anoos cia li qawm nkaus Tamaj thiab hais tias, “Koj cia li nrog kuv pw!” Tamaj hais tias, “Tsis txhob muab kuv mos ua phem ua qias. Tej no peb cov Yixalayees yeej ibtxwm tsis ua li. Kuv yuav coj kuv txojkev txajmuag mus zais rau qhov twg? Thiab koj los yuav txajmuag nyob hauv haivneeg Yixalayees mus li. Koj cia li mus thov vajntxwv, kuv paub hais tias, nws yuav muab kuv rau koj.” Tiamsis Anoos tsis mloog Tamaj hais li, Anoos muaj zog dua Tamaj, Anoos thiaj khawm nkaus Tamaj thiab muab nws yuam kiag. Ces Anoos cia li ntxub Tamaj heev; Anoos ntxub Tamaj heev dua thaum uas nws pib nyiam Tamaj lawm. Anoos thiaj ntiab Tamaj hais tias, “Koj cia li khiav mus!” Tamaj hais tias, “Tsis tau, yog koj cia li ntiab kuv tawm mus zoo li no tseem txhaum loj tshaj qhov uas koj nyuam qhuav ua tas rau kuv no thiab!” Tiamsis Anoos tsis mloog Tamaj hais li; Anoos hu nws ib tug tubtxib los thiab hais tias, “Cia li cab tus pojniam no tawm mus. Muab nws thawb rau sab nraud thiab liaj qhovrooj rau.” Ces tus tubtxib ntawd thiaj muab Tamaj thawb ntiag tawm rau sab nraud thiab liaj kiag qhovrooj rau lawm. Tamaj hnav ib daim tiab ntev thiab lub tsho tes ntev, yog tej tiab rau vajntxwv cov ntxhais uas tseem yog nkaujxwb hnav rau tiam ntawd. Tamaj tsuab tshauv rau saum nws taubhau, muab nws daim tiab dua, thiab muab nws ob txhais tes npog nws lub ntsejmuag tsa suab hlo quaj tawm khiav lawm. Thaum Tamaj tus nus Axaloos pom dheev nws, Axaloos nug hais tias, “Anoos mos koj los? Tus muam, tsis txhob muab qhov ntawd los ua rau koj nyuaj siab. Anoos twb yog koj ib tug nus nrab thiab, cia li ua twjywm tsis txhob qhia rau leejtwg paub li.” Yog li ntawd, Tamaj thiaj mus nyob hauv Axaloos tsev, Tamaj nyuaj siab thiab tu siab kawg li. Thaum Vajntxwv Daviv hnov tej xwm no ua rau nws chim heev. Ces Axaloos ntxub Anoos heev, rau qhov Anoos muab nws tus muam mos, thiab Axaloos tsis nrog Anoos tham li lawm. Tau ob xyoo tom qab no Axaloos muab Axaloos cov yaj los txiav plaub rau ntawm lub nroog Npa-as Haxaules uas nyob ze lub nroog Efalayees, thiab nws caw tagnrho vajntxwv cov tub tuaj koom huv tibsi. Axaloos mus cuag Vajntxwv Daviv thiab hais rau vajntxwv hais tias, “Vajntxwv, kuv muab kuv cov yaj los txiav plaub, mas thov caw koj thiab koj cov nomtswv mus koom.” Vajntxwv teb hais tias, “Metub, kuv tsis mus, yog peb sawvdaws mus, mas yuav ua haujlwm hnyav rau koj heev.” Axaloos taij heev, tiamsis vajntxwv tsis kam mus li, nws foom hmoov rau Axaloos thiab cia Axaloos rov mus lawm. Tiamsis Axaloos hais tias, “Yog koj tsis kam mus li, thov koj tso kuv tus tijlaug Anoos nrog peb mus.” Vajntxwv nug hais tias, “Vim li cas koj yuav kom Anoos mus?” Tiamsis Axaloos taij heev, thaum kawg Daviv thiaj tso Anoos thiab tagnrho Daviv cov tub nrog Axaloos mus. Axaloos npaj tau ib rooj mov loj, phim rau vajntxwv noj xwb, Axaloos hais rau nws cov tubtxib hais tias, “Nej saib, thaum twg Anoos haus cawv qaug heev lawm, ces thaum kuv kom nej tua, nej cia li tua nws kom tuag. Tsis txhob ntshai. Kuv yuav ris lub txim no tsis pub raug nej. Cia li ua khov kho thiab ua siab tawv qhawv xwb!” Yog li ntawd, cov tubtxib thiaj ua raws li Axaloos hais thiab muab Anoos tua tuag lawm. Ces tagnrho Daviv cov tub uas seem thiaj sawv ceev nrooj mus caij lawv cov nees zag thiab khiav mus lawm. Thaum lawv tabtom taug kev rov los tsev, muaj neeg los hais rau Daviv hais tias, “Axaloos muab koj cov tub tua tuag tas, tsis muaj ib tug seem li!” Vajntxwv cia li sawv tsees dua rhe nws lub tsho quaj tu siab heev, thiab nws qhau cev hlo quaj da luam rau hauv av. Cov tubtxib uas nrog nws nyob ua ke ntawd los lawv dua lawv tej tsho povtseg nrog nws nyuaj siab ib yam nkaus. Tiamsis Daviv tus tijlaug Samas tus tub Yaunadas hais tias, “Vajntxwv, koj tsis txhob xav hais tias lawv tua tagnrho koj cov tub. Anoos tib leeg thiaj raug tua tuag xwb. Koj saib Axaloos yeej muaj lub siab xav ua li no txij thaum uas Anoos muab Axaloos tus muam Tamaj mos los lawm. Yog li ntawd, koj tsis txhob ntseeg tej lus fi xov uas hais tias koj cov tub tuag tas lawm; tsuas yog Anoos tib leeg thiaj raug tua tuag xwb.” Thaum lub sijhawm ntawd Axaloos los kuj khiav lawm thiab. Ces tamsim ntawd, tus tub fajxwm txawm pom ib pab neeg taug kev nqis saum roob Haulauna-ees los. Nws thiaj mus tshabxo tej uas nws pom ntawd rau vajntxwv. Yaunadas hais rau Daviv hais tias, “Cov ntawd yog koj cov tub rov qab los, raws li puagta kuv hais rau koj lawm.” Ces thaum hais cov lus ntawd xaus, Daviv cov tub los txog ntua; lawv sawvdaws txawm tsa hlo suab quaj, Daviv thiab nws cov nomtswv los kuj quaj tu siab kawg. tiamsis thaum uas nws txojkev nco Anoos dhau lawm, nws nco txog nws tus tub Axaloos uas ncaim nws mus lawm. Yau-am paub hais tias Vajntxwv Daviv nco Axaloos heev, yog li ntawd, Yau-am thiaj txib neeg mus hu ib tug pojniam ntse heev hauv lub nroog Tekau-as tuaj cuag nws. Thaum tus pojniam ntawd tuaj txog lawm, Yau-am hais rau tus pojniam ntawd hais tias, “Koj ua txuj ua li tus neeg uas raug kev txomnyem quaj ntsuag, muab koj tej tsoos tsho quaj ntsuag los hnav thiab tsis txhob ntsis plaubhau li. Koj ua ib yam li tus pojniam uas twb muaj kev quaj ntsuag los ntev lawm. Ces koj cia li mus cuag vajntxwv thiab hais tej lus uas kuv qhia koj hais rau nws.” Yau-am txawm qhia tej lus ntawd rau tus pojniam ntawd. Tus pojniam ntawd thiaj mus cuag vajntxwv, nws txhos caug ntua pe vajntxwv thiab hais tias, “Vajntxwv, thov pab kuv lauj!” Vajntxwv nug tus pojniam ntawd hais tias, “Koj xav kom kuv pab koj dabtsi?” Tus pojniam ntawd teb hais tias, “Vajntxwv, kuv tus txiv tuag lawm, mas kuv ua ib tug pojntsuam uas txomnyem heev. Vajntxwv, kuv muaj ob tug tub xwb, muaj ib hnub nkawd txawm sib ceg tom teb, tsis muaj leejtwg cheem nkawd li, ces tus kwv txawm muab tus tijlaug tua tuag lawm. Nimno, tagnrho kuv cov kwvtij tawmtsam kuv heev, thiab lawv kom kuv cia li muab kuv tus tub cob rau lawv, lawv yuav muab nws tua povtseg vim qhov uas nws tua nws tus tijlaug lawm. Yog lawv ua li ntawd tiag, mas kuv yuav tsis muaj tub li lawm. Lawv txawm yuav rhuav tshem kuv txojkev cia siab thiab yuav cia kuv tus txiv tsis muaj ib tug tub los ris nws lub npe li.” Vajntxwv teb hais tias, “Koj cia li rov qab mus tsev, kuv mam li saib xyuas zaj no.” Tus pojniam ntawd hais tias, “Vajntxwv, txawm yog koj ua li cas los thov cia kuv thiab kuv tsevneeg ris lub txim no; thov cia koj thiab koj tsevneeg uas luag hwm tsis txhob tau ris lub txim no.” Vajntxwv teb hais tias, “Yog leejtwg tseem ua rau koj ntxhov siab thiab, cia li coj nws tuaj cuag kuv, tus ntawd yuav tsis ua rau koj ntxhov siab ntxiv lawm.” Tus pojniam ntawd hais tias, “Vajntxwv, koj cia li thov tus TSWV uas yog koj tus Vajtswv pab kuv cov kwvtij uas yuav ua pauj rau kuv tus tub uas tuag lawm, kom tsis txhob ua txhaum uas yuav muab kuv tus tub uas tseem nyob no tua povtseg.” Daviv teb hais tias, “Kuv coglus rau koj ntawm tus TSWV uas muaj sia nyob hais tias, kuv yuav tsis pub koj tus tub ib txog plaubhau poob rau hauv av li.” Tus pojniam ntawd hais tias, “Vajntxwv, thov cia kuv hais ib los ntxiv thiab.” Vajntxwv teb hais tias, “Cia li hais.” Tus pojniam ntawd hais rau vajntxwv hais tias, “Vim li cas koj tseem ua tej yam tsis yog rau Vajtswv haivneeg thiab? Koj tau txiav txim rov rau koj tus tub uas mus nyob rau lwm lub tebchaws lawm tsis pub rov qab los. Peb yuav tuag tas, peb zoo nkaus li cov dej uas muab hliv rau hauv av lawm, yeej muab tsis tau rov qab los li lawm. Vajtswv tsis txov leejtwg txojsia li, tiamsis nws nrhiav kev pab kom coj tau tus neeg uas raug ntiab tawm lawm rov qab los. Vajntxwv, kuv tuaj hais cov lus no rau koj mas yog tej neeg sawvdaws ua rau kuv ntshai, kuv thiaj xav hais tias yog kuv tuaj hais tej lus no rau koj, mas koj yuav ua raws li kuv tej lus thov. Kuv xav hais tias koj yuav mloog kuv tej lus thov thiab yuav pab kom kuv dim ntawd tus uas muaj lub siab pheej nrhiav kuv tus tub thiab kuv tua povtseg, thiab muab wb ntiab tawm hauv lub tebchaws uas Vajtswv muab rau nws haivneeg nyob no lawm. Kuv xav hais tias koj yuav coglus pab kuv kom muaj kev kaj siab, rau qhov vajntxwv yeej zoo ib yam li Vajtswv tus timtswv thiab muaj peevxwm muab qhov zoo cais tawm ntawm qhov phem. Thov tus TSWV uas yog koj tus Vajtswv nrog nraim koj!” Vajntxwv teb hais tias, “Kuv yuav nug koj, mas koj yuav tsum teb txhua yam uas yog qhov tseeb xwb.” Tus pojniam ntawd teb hais tias, “Vajntxwv, koj nug kuv los tau.” Daviv nug nws hais tias, “Puas yog Yau-am txib koj tuaj hais tej lus no rau kuv?” Tus pojniam ntawd teb hais tias, “Vajntxwv, yeej tsis muaj leejtwg yuav zam dhau koj tej lus nug li, kuv nyob ntawm no teb koj tej lus nug ntag. Twb yog koj tus thawj tubrog Yau-am kom kuv tuaj thiab qhia kom kuv hais tej lus no. Tiamsis qhov uas nws ua no twb yog ua kom daws tau koj tej teebmeem ntag. Kuv tus vajntxwv yeej yog tus txawj ntse ib yam li Vajtswv tus timtswv thiab paub txhua yam uas yuav tshwm los.” Tom qab ntawd vajntxwv hais rau Yau-am hais tias, “Kuv pom zoo ua li koj hais. Koj cia li mus thiab coj tus tub hluas Axaloos rov qab los.” Yau-am thiaj txhos caug ntua hawm Daviv thiab hais tias, “Vajntxwv uas yog kuv tus tswv, thov Vajtswv foom koob hmoov rau koj! Nimno kuv paub hais tias koj pom zoo nrog kuv, vim koj ua raws li kuv tau thov koj lawm.” Ces Yau-am thiaj mus rau pem Nkesus thiab coj Axaloos rov qab los rau hauv lub nroog Yeluxalees. Tiamsis vajntxwv samhwm tsis pub Axaloos mus nyob hauv lub loog li. Vajntxwv hais tias, “Kuv tsis xav ntsib nws tim ntsej tim muag.” Yog li ntawd, Axaloos thiaj nyob hauv nws lub tsev xwb, tsis mus tshwm rau vajntxwv pom li. Nyob hauv tebchaws Yixalayees tsis muaj leejtwg uas luag yuav qhuas npaum li qhuas Axaloos; saum Axaloos taubhau mus ti nkaus hauv nws kotaw tsis muaj ib qho phem li. Vim ib xyoos nws txiav plaubhau ib zaug xwb, thaum nws cov plaubhau ntev tuaj lawm hnyav kawg li. Muab nws cov plaubhau luj hnyav tsib choj raws li nomtswv tej teev uas haum txiaj. Axaloos muaj peb tug tub thiab ib tug ntxhais hu ua Tamaj, Tamaj yog ib tug ntxhais uas zoo nkauj heev. Axaloos nyob hauv lub nroog Yeluxalees tau ob xyoos tsis tau pom vajntxwv hlo li. Axaloos thiaj tso neeg mus hais rau Yau-am kom pab nws mus thov vajntxwv; tiamsis Yau-am tsis tuaj cuag Axaloos li. Axaloos rov tso neeg mus hu Yau-am dua los Yau-am tsis kam tuaj cuag nws li. Yog li ntawd, Axaloos thiaj hais rau nws cov tubtxib hais tias, “Nej saib, Yau-am thaj liaj nyob npuab kuv thaj thiab nplej tseem puv nkaus hauv thaj liaj. Nej cia li mus tis taws hlawv.” Yog li ntawd, lawv thiaj mus zes taws hlawv Yau-am thaj liaj. Yau-am thiaj mus rau tom Axaloos tsev thiab nug nws hais tias, “Vim li cas koj cov tubtxib zes taws hlawv kuv thaj liaj?” Axaloos teb hais tias, “Rau qhov thaum kuv tso neeg tuaj hu koj, koj tsis tuaj li. Kuv xav kom koj mus pab kuv nug vajntxwv hais tias, ‘Vim li cas kuv thiaj rov pem Nkesus los nyob rau hauv no? Yog kuv nyob twjywm ped, yuav zoo dua kuv nyob ntawm no.’ ” Thiab Axaloos hais ntxiv hais tias, “Kuv xav teem sijhawm mus cuag vajntxwv, yog hais tias kuv txhaum tiag, thov nws cia li muab kuv tua povtseg.” Yog li ntawd, Yau-am thiaj mus cuag Vajntxwv Daviv thiab muab Axaloos tej lus txhua lo hais rau Daviv mloog. Vajntxwv tso neeg mus hu Axaloos, Axaloos thiaj mus cuag vajntxwv thiab nws txhos caug ntua hawm vajntxwv. Vajntxwv zoo siab thiab puag nkaus Axaloos nwj. Tom qab no, Axaloos npaj tau ib lub tsheb nees thiab ob tug txiv nees thiab tsib caug leej txivneej mus ua nws ntej. Axaloos pheej sawv ntxov mus sawv ntawm ntug kev ze lub roojvag nroog. Thaum muaj neeg tuaj xav kom vajntxwv nrog tu plaub ntug, Axaloos txawm hu nws los thiab nug saib nws tuaj qhov twg tuaj. Thaum uas tus neeg ntawd qhia rau Axaloos hais tias nws yog xeem twg lawm, Axaloos hais rau nws hais tias, “Koj yog tus yeej cai lawm, tiamsis vajntxwv tsis tau tsa leejtwg los ua tus sawv nws cev tu koj rooj plaub no.” Thiab Axaloos hais ntxiv hais tias, “Kheev lam yog kuv tau ua tus tu plaub ntug! Yog muaj leejtwg muaj plaub ntug tuaj cuag kuv, kuv yuav tu nws tej plaub ntug kom ncaj ncees.” Thaum tus neeg ntawd txav zog los hawm Axaloos, Axaloos puag nkaus tus ntawd thiab nwj kiag. Axaloos ua li ntawd rau cov Yixalayees txhua tus uas tuaj thov vajntxwv pab tu lawv tej plaub ntug. Yog li ntawd, lawv thiaj hwm Axaloos heev. Tom qab ntawd plaub xyoos, Axaloos thov Vajntxwv Daviv hais tias, “Vajntxwv, thov cia kuv mus nram Henploos thiab muab khoom fij rau tus TSWV raws li kuv tau coglus tseg. Thaum kuv tseem nyob hauv lub nroog Nkesus pem tebchaws Xilias, kuv tau coglus rau tus TSWV hais tias, yog nws coj kuv rov los rau hauv lub nroog Yeluxalees, kuv yuav mus pehawm nws hauv Henploos.” Vajntxwv tso lus hais tias, “Koj cia li mus kaj siab lug.” Yog li ntawd, Axaloos thiaj mus rau nram Henploos lawm. Tiamsis Axaloos txib neeg mus hais rau txhua xeem Yixalayees hais tias, “Thaum twg nej hnov suab raj suab xyu nrov, nej cia li qw hais tias, ‘Axaloos ua vajntxwv kav lub nroog Henploos lawm!’ ” Axaloos caw tau ob puas leej txivneej hauv lub nroog Yeluxalees nrog nws mus; lawv tsis paub dabtsi li. Lawv thiaj zoo siab ua ntsejmuag luag ntxhi nrog Axaloos mus. Ces thaum Axaloos tabtom hlawv tsiaj ua khoom fij, Axaloos txib neeg mus hu Ahithaufees uas yog Vajntxwv Daviv tus tuavxam hauv lub nroog Nkilaus tuaj cuag Axaloos. Txojkev ntxeev siab tawmtsam Vajntxwv Daviv muaj zog heev zuj zus tuaj, thiab cov neeg uas tuaj Axaloos tog coob zuj zus ntxiv. Muaj neeg mus qhia rau Daviv hais tias, “Cov pejxeem Yixalayees twb coglus tuaj Axaloos tog lawm.” Yog li ntawd, Daviv thiaj hais rau nws cov nomtswv uas nrog nws nyob hauv lub nroog Yeluxalees hais tias, “Peb yuav tsum khiav tamsim no, tej zaum ib pliag saum no Axaloos yuav tuaj txog, nws yuav tua yeej peb thiab yuav muab txhua tus uas nyob hauv lub nroog no tua huv tibsi. Yog peb xav kom peb dim ntawm Axaloos txhais tes, peb cia li khiav tamsim no ntag!” Lawv teb hais tias, “Vajntxwv, peb yeej tos nrhw yuav ua txhua yam li koj hais.” Yog li ntawd, vajntxwv thiaj nrog nws tsevneeg thiab nws cov nomtswv tawm khiav, tsuas tseg nws kaum tus niamyau nyob tu lub loog xwb. Thaum vajntxwv thiab nws cov tubrog tawm hauv lub nroog mus, lawv mus txoos ua ke rau ntawm lub tsev tom kawg. Tagnrho nws cov nomtswv puavleej sawv ntawm vajntxwv hauv ntej, cia cov tubrog fajxwm mus ua nws ntej. Thiab rau pua leej tubrog hauv lub nroog Nkas uas tuaj nws tog los puavleej mus ua nws ntej huv tibsi thiab. Vajntxwv hais rau Ithais uas yog lawv tus thawjcoj hais tias, “Vim li cas koj thiaj nrog peb mus? Koj yog neeg txawv tebchaws uas khiav hauv koj lub tebchaws tuaj nkaum hauv lub tebchaws no xwb. Koj cia li rov qab mus nrog tus vajntxwv tshiab nyob. Koj nyuam qhuav tuaj nyob hauv no tau ib ntu xwb, kuv yuav ua li cas coj koj nrog kuv mus? Kuv twb tsis paub xyov kuv yuav mus qhov twg. Koj cia li coj koj cov neeg nrog koj rov qab, thov tus TSWV ua zoo thiab ua ncaj rau koj.” Tiamsis Ithais teb hais tias, “Vajntxwv, kuv thov tuav tus TSWV lub npe coglus rau koj hais tias, koj mus qhov twg kuv yuav nrog koj mus qhov ntawd, txawm yog yuav ciaj thiab tuag los xijpeem.” Daviv teb hais tias, “Zoo lawm! Cia li mus!” Yog li ntawd, Ithais thiaj nrog Daviv cov neeg thiab lawv tej pojniam menyuam mus lawm. Thaum Daviv cov neeg sawv kev mus tu qab lawm, cov pejxeem tsa hlo suab quaj. Vajntxwv thiaj hla lub Hav Kiloos mus raws nws cov neeg qab, thiab lawv mus rau tom tiaj suabpuam lawm. Tus povthawj Xadaus thiab cov Levis uas kwv lub Phijxab uas ntim Vajtswv tej lus cog tseg nrog nraim Daviv. Lawv muab lub phijxab txo tsis kwv mus txog thaum uas cov neeg khiav tawm hauv lub nroog tas lawm. Tus povthawj Anpiyathas los nrog lawv nyob ntawd thiab. Vajntxwv hais rau Xadaus hais tias, “Nej cia li kwv lub Phijxab rov qab mus cia rau hauv nroog. Yog tus TSWV txaus siab rau kuv tiag, muaj ib hnub nws yuav coj kuv rov qab los pom lub Phijxab thiab qhov chaw uas cia lub Phijxab no dua. Tiamsis yog nws tsis pom zoo rau kuv rov los, ces nws yuav ua li cas rau kuv los nyob ntawm nws pom zoo.” Thiab Daviv hais rau Xadaus hais tias, “Koj puas yog tus uas pom yav tom ntej? Cia li coj koj tus tub Ahima-as thiab Anpiyathas tus tub Yaunathas rov qab mus nyob hauv nroog kaj siab lug. Lub sijhawm no, kuv yuav mus nyob ntawm tus dej uas hla mus rau tom tiaj suabpuam tos mus txog thaum kuv tau txais koj tej xov tso.” Yog li ntawd, Xadaus thiab Anpiyathas thiaj kwv lub Phijxab uas ntim Vajtswv tej lus cog tseg rov los cia rau hauv lub nroog Yeluxalees thiab nkawd los nyob rau hauv lawm. Daviv nce mus quaj saum roob txiv ntoo roj; Daviv hle khau thiab muab ntaub kauv nws taubhau rau qhov nws tu siab heev. Txhua tus uas nrog Daviv mus puavleej muab ntaub kauv taubhau thiab quaj ib yam nkaus. Thaum muaj neeg mus qhia rau Daviv hais tias, Ahithaufees koom tes nrog Axaloos ntxeev siab lawm, Daviv thiaj thov Vajtswv hais tias, “Tus TSWV, thov koj cia li muab Ahithaufees tej tswvyim hloov kom tsis muaj qabhau!” Thaum Daviv nce nto plaws saum lub ncov roob uas yog qhov chaw pehawm Vajtswv, Daviv tus phoojywg Husais uas yog cov neeg Alekhis, tus uas Daviv ntseeg siab tshaj plaws thiaj tuaj ntsib Daviv, Husais muab nws cev ris tsho dua ntuag ua kaj niab thiab tsuab av rau saum taubhau. Daviv hais rau Husais hais tias, “Yog koj nrog kuv mus los koj yuav pab tsis tau kuv dabtsi, tiamsis yog koj rov mus rau hauv lub nroog thiab hais rau Axaloos hais tias txij no mus koj yuav ua tus tu Axaloos ntawm lub siab ncaj ncees ib yam li koj tu nws txiv. Koj thiaj yog tus uas muaj cuabkav tav tau tej lus uas Ahithaufees hais. Xadaus thiab Anpiyathas uas yog ob tug povthawj los tseem nyob hauv, txhua yam uas koj mus hnov hauv vajntxwv lub loog cia li piav qhia rau nkawd mloog. Ahima-as thiab Yaunathas uas yog nkawd ob tug tub puavleej nrog nkawd nyob hauv thiab, koj cia li kom nkawd xa txhua lo lus uas koj hnov tuaj qhia rau kuv paub huv tibsi.” Yog li ntawd, Husais uas yog Daviv tus phoojywg thiaj rov qab mus txog rau hauv lub nroog tom thawj thaum Axaloos los txog ntua thiab. Thaum Daviv mus dhau saum lub ncov roob lawm, nws txawm ntsib Xinpas uas yog Mefinpauses tus tubtxib, nws cab ob tug neesluav thauj ob puas lub ncuav, ib puas pob txiv hmab qhuav thiab ib hnab tawv cawv txiv hmab puv nkaus. Vajntxwv Daviv nug Xinpas hais tias, “Koj coj tej no tuaj mus ua dabtsi ntau ua luaj?” Xinpas teb hais tias, “Ob tug neesluav no yog muab pub rau vajntxwv tsevneeg caij, cov ncuav thiab cov txiv hmab qhuav no muab rau koj cov neeg tau noj, thiab cov cawv txiv hmab no yog muab rau lawv tau haus thaum lawv nqhis tom roob mojsab qhua.” Vajntxwv nug Xinpas hais tias, “Koj tus tswv Xa-ules tus xeebntxwv Mefinpauses nyob qhov twg?” Xinpas teb hais tias, “Nws tseem nyob hauv lub nroog Yeluxalees, rau qhov nws cia siab hais tias tamsim no cov Yixalayees tabtom yuav muab nws yawg Xa-ules lub tebchaws tso rov rau nws tuav.” Vajntxwv hais rau Xinpas hais tias, “Txhua yam uas yog Mefinpauses tug puavleej yog koj li huv tibsi.” Xinpas teb hais tias, “Vajntxwv, kuv yog koj tus tubtxib, thov kom kuv ua raws li koj lub siab nyiam mus li.” Thaum Daviv mus txog hauv lub nroog Npahulees, Nkelas tus tub Sime-is uas yog Xa-ules cov kwvtij tuaj tos Daviv kev, thiab nws tsawm foom Daviv taug kev tuaj. Txawm yog Daviv nyob hauv plawv nws cov neeg thiab nws cov tubrog fajxwm los Sime-is tseem khaws pobzeb txawb tuaj rau Daviv thiab nws cov nomtswv. Sime-is cem Daviv hais tias, “Niag neeg tua neeg! Cia li khiav tawm mus! Koj cia li khiav mus! Niag neeg siab phem limhiam! Koj txeeb Xa-ules lub tebchaws kav, tamsim no tus TSWV thiaj rau txim rau koj, rau qhov koj tua Xa-ules tsevneeg. Tus TSWV thiaj muab koj lub tebchaws tso rau koj tus tub Axaloos kav, koj raug kev puastsuaj vim koj yog niag neeg tua neeg.” Xeluyas uas yog Anpisais niam hais rau vajntxwv hais tias, “Vajntxwv, vim li cas koj cia nyuag dev ntawd cem koj mob ua luaj? Thov cia kuv mus muab nws lub nyuag cajdab txiav kiag kom tu nrho rau tod saib!” Vajntxwv hais rau Anpisais thiab nws tus tijlaug Yau-am hais tias, “Tej no tsis yog neb haujlwm. Qhov uas nws cem kuv ntawd, yog tus TSWV kom nws cem, leejtwg yuav muaj peevxwm nug tau hais tias, vim li cas nws thiaj li cem kuv?” Daviv hais rau Anpisais thiab Daviv cov nomtswv hais tias, “Txawm yog kuv tus tub kiag los nws twb nyas nrhw tua kuv povtseg, vim li cas nej yuav quavntsej tus nyuag neeg Npeenyamees ntawd ua dabtsi? Tus TSWV yeej kom nws cem kuv lawm, cia nws nyob nws thiab cia nws cem nws. Tej zaum tus TSWV yuav pom kuv tej kev nyuaj siab thiab nws yuav muab tej lus cem ntawd hloov mus ua lus foom koob hmoov rau kuv.” Yog li ntawd, Daviv thiab nws cov neeg txawm taug kev mus lawm. Sime-is tuaj pem qaum kev nrog lawv mus thiab muab lawv cem dua toj ntais; nws cem thiab xuas pobzeb txawb thiab tseem tsuab av w rau lawv. Thaum vajntxwv thiab nws cov neeg mus txog ntawm tus dej Yauladees, lawv sab heev, lawv thiaj mus so rau qhov ntawd. Axaloos thiab cov Yixalayees uas tuaj nws tog puavleej nrog nws los rau hauv lub nroog Yeluxalees, thiab Ahithaufees nrog lawv los ua ke. Thaum Husais uas yog Daviv tus phoojywg uas Daviv ntseeg siab heev, ntsib Axaloos, nws qw hais tias, “Thov kom vajntxwv muaj sia nyob ntev! Thov kom vajntxwv muaj sia nyob ntev!” Axaloos nug hais tias, “Koj ua li ko, yog koj hwm koj tus phoojywg Daviv no los? Vim li cas koj tsis nrog nws mus?” Husais teb hais tias, “Kuv yuav ua li cas mus tau? Kuv yuav nyob nrog tus uas tus TSWV thiab cov Yixalayees tau xaiv lawm. Kuv yuav nrog koj nyob xwb. Kuv tseem yuav mus tu leejtwg thiab, yog hais tias kuv tsis tu kuv tus tswv tus tub? Thaum ub kuv tu koj txiv li cas lawm, nimno kuv yuav tu koj ib yam li ntawd.” Axaloos tig hlo mus hais rau Ahithaufees hais tias, “Tamsim no peb los nyob hauv no lawm, koj sim pab peb tuav tswvyim saib peb yuav ua li cas thiaj zoo?” Ahithaufees teb hais tias, “Koj cia li mus nrog koj txiv cov niamyau uas nws muab tso tseg tu lub loog pw. Kom txhua tus neeg Yixalayees thiaj paub hais tias, koj txiv saib koj zoo li nws tus yeebncuab, thiab koj cov phoojywg thiaj muab siab npuab koj.” Yog li ntawd, lawv thiaj rub tau ib lub tsevntaub rau ntawm lub loog rau Axaloos, ces Axaloos txawm mus deev nws txiv cov niamyau tabmeeg sawvdaws ntsia ntsoov. Lub sijhawm ntawd, txhua lo lus uas Ahithaufees hais ntawd zoo ib yam li yog Vajtswv tej lus ntag; Daviv thiab Axaloos nkawd lub neej tshwmsim raws li Vajtswv tej lus. Tau tsis ntev los tom qab no, Ahithaufees hais rau Axaloos hais tias, “Thov cia kuv mus xaiv kaum ob txhiab leej txivneej nrog kuv thiab hmo no kuv yuav mus caum Daviv qab. Kuv yuav tua nws thaum nws lim thiab qaug zog heev. Nws yuav ntshai thiab tagnrho nws cov neeg yuav khiav tsis saib qab. Kuv yuav tua vajntxwv tib leeg xwb, thiab kuv yuav coj tagnrho nws cov neeg rov qab los thawj koj ib yam li tus nkauj nyab rov los thawj nws tus txiv. Koj los tsuas nrhiav tua nws tib leeg thiab xwb; dua li cov yuav tsum tseg cia.” Cov lus no raug Axaloos thiab cov Yixalayees tej thawjcoj siab kawg li. Axaloos hais tias, “Nej cia li mus hu Husais los tamsim no, saib nws yuav hais li cas rau peb.” Thaum Husais los txog ntua, Axaloos nug Husais hais tias, “Tej lus no yog Ahithaufees hais qhia rau peb; koj puas pom zoo rau peb ua raws li ntawd? Yog koj tsis pom zoo, thov qhia saib peb yuav ua li cas.” Husais teb hais tias, “Cov lus uas Ahithaufees qhia rau koj no tsis yog lus zoo. Koj yeej paub hais tias, koj txiv Daviv thiab nws cov neeg tua rog ua tau heev thiab nyaum cuag tus maum dais uas neeg mus muab nws cov menyuam ntag. Koj txiv yog ib tug tubrog uas yeej ibtxwm txawj tua rog heev thiab hmo ntuj nws yeej tsis nrog nws cov neeg nyob ua ke li. Tamsim no nws yeej mus nkaum hauv tej qhov tsua lossis lwm qhov chaw lawm. Ces thaum Daviv tawm los tua koj cov neeg, ces txhua tus uas hnov txog zaj no yuav hais tias koj cov neeg swb lawm. Thaum ntawd cov tubrog uas siab tawv, tsis paub ntshai ib yam li tej tsov ntxhuav, yuav cia li ntshai rau qhov txhua tus Yixalayees yeej paub hais tias, koj txiv yog ib tug uas ntaus rog ua tau thiab nws cov neeg yog cov uas muaj siab tawv tua rog heev. Kuv pom zoo mas koj cia li sau tagnrho cov Yixalayees nyob thoob plaws sab tebchaws tom no mus txog ntua sab tom ub tuaj ua ke, kom coob npaum li tej suabzeb ntawm ntug hiavtxwv, thiab koj cia li ua tus ntaus thawj loo mus rau hauv tshavrog. Txawm yog Daviv nyob qhov twg los peb yeej yuav nrhiav tau nws xwb, peb cia li tua nws thaum nws tsis tau ceevfaj hais tias yuav muaj tej xwm no. Ces nws thiab nws cov neeg thiaj yuav tsis muaj ib tug dim li. Yog lawv khiav los rau hauv nroog, peb cov neeg yuav nqa hlua mus khi lub nroog ntawd tus ntsa yeej cab kom vau tas mus rau nram kwjha. Tsis pub kom tshuav ib lub nyuag pobzeb seem nyob saum ncov roob li.” Axaloos thiab cov Yixalayees hais tias, “Husais, zaj tswvyim zoo dua Ahithaufees zaj tswvyim.” Tus TSWV ua rau Ahithaufees tej tswvyim uas zoo tsis muaj kuab lawm, thiaj tsis muaj leejtwg ua raws li ntawd. Yog li ntawd, tej kev puastsuaj thiaj los raug Axaloos. Husais txawm mus piav tej lus uas nws tau hais rau Axaloos thiab cov Yixalayees tej thawjcoj mloog, thiab coj Ahithaufees tej lus mus piav huv tibsi rau Xadaus thiab Anpiyathas uas yog ob tug povthawj mloog. Husais hais ntxiv hais tias, “Tamsim no cia li tso neeg mus hais rau Daviv paub, kom nws tsis txhob pw nram tus dej uas hla mus rau tom tiaj suabpuam, tiamsis kom lawv cia li hla tus dej Yauladees mus kom dhau plaws rau sab tim ub, nws thiab nws cov neeg thiaj tsis raug ntes thiab tsis raug tua.” Anpiyathas tus tub Yaunathas thiab Xadaus tus tub Ahima-as nyob rawv ntawm lub qhovdej txhawv Elaunkees uas nyob sab nraum ntug nroog Yeluxalees tos, rau qhov ntshai nyob tsam muaj neeg pom nkawd mus hauv lub nroog. Muaj ib tug ntxhais qhev niaj zaus coj tej xov tuaj qhia rau nkawd. Nkawd mam li mus qhia rau Vajntxwv Daviv paub. Tiamsis muaj ib hnub ib tug menyuam tub pom nkawd, nws txawm los qhia rau Axaloos; yog li ntawd, nkawd thiaj maj nroos khiav mus nkaum rau hauv ib tug txivneej lub tsev hauv Npahulees. Tus txivneej ntawd muaj ib lub qhovtshij nyob ze nws lub tsev, nkawd thiaj nqis mus nkaum hauv lub qhovtshij ntawd. Tus txivneej ntawd tus pojniam muab ib daim ntaub los nthuav npog thoob plaws lub qhovtshij, thiab muab nplej w thoob plaws rau saud, kom tsis muaj leejtwg paub hais tias muaj neeg nyob hauv. Axaloos cov nomtswv tuaj rau hauv tsev thiab nug tus pojniam ntawd hais tias, “Ahima-as thiab Yaunathas nkawd nyob qhov twg?” Tus pojniam ntawd teb hais tias, “Nkawd hla dej mus rau sab tim ub lawm.” Cov txivneej ntawd nrhiav nkawd, tiamsis tsis pom nkawd li, lawv thiaj rov qab mus rau tom lub nroog Yeluxalees lawm. Tom qab uas lawv los dhau lawm, Ahima-as thiab Yaunathas nkawd tawm hauv qhovtshij los thiab mus qhia rau Vajntxwv Daviv paub. Nkawd mus qhia rau Daviv paub txog tej uas Ahithaufees tau nrhiav tswvyim tawmtsam Daviv thiab hais tias, “Nej cia li hla dej mus sab tim ub.” Yog li ntawd, Daviv thiab nws cov neeg thiaj hla tus Dej Yauladees, ces thaum kaj ntug txoog lawv twb hla dhau dej tas rau sab tim ub lawm. Thaum Ahithaufees paub hais tias tsis muaj neeg pom zoo ua raws li nws hais, nws thiaj li muab eeb nog rau saum nws tus neesluav thiab caij khiav rov mus rau tim nws lub qub zog lawm. Tom qab uas nws tu nws tej khoom tiav tas, nws txawm mus dai tuag. Luag coj nws mus faus rau hauv nws tsevneeg lub qhov ntxa. Thaum Axaloos thiab cov Yixalayees hla dhau tus dej Yauladees tuaj, Daviv twb mus txog rau hauv lub nroog Mahana-ees lawm. ( Axaloos tsa Amaxas ua tus thawj tubrog hloov Yau-am chaw. Amaxas yog Yethes uas yog cov neeg Yisamayees tus tub, nws niam hu ua Anpinkayis uas yog Nahases tus ntxhais, thiab yog Xeluyas uas Yau-am niam tus niamhluas.) Axaloos thiab nws cov neeg tuaj tsuam yeej rau hauv cheebtsam Nkile-as. Thaum Daviv mus txog hauv lub nroog Mahana-ees, nws txawm ntsib Nahases tus tub Saunpis uas nyob tim lub nroog Lanpas hauv tebchaws Amoos, thiab ntsib Amiyees tus tub Makhiles uas nyob hauv lub nroog Laudenpas, thiab ntsib Npaxilais uas nyob hauv lub nroog Launkelees hauv cheebtsam Nkile-as. Vajntxwv Daviv sau zog nws cov neeg los ua ke, muab faib ua tej pab ib txhiab leej thiab tej pab ib puas leej, thiab tsa cov thawj los saib lawv. Daviv thiaj xa lawv tawm mus ua peb pab nrog Yau-am thiab nws tus kwv Anpisais thiab Ithais uas tuaj hauv lub nroog Nkas tuaj, lawv ib leeg coj ib pab. Thiab vajntxwv hais rau nws cov neeg hais tias, “Kuv yuav nrog nej mus.” Tiamsis lawv teb hais tias, “Koj tsis txhob mus, txawm yog peb cov seem thim khiav ntawm cov yeebncuab rov los, lossis peb raug tua tuag ib nrab lawm los yeej tsis tseemceeb dabtsi; rau qhov koj yog tus tseemceeb tshaj peb kaum txhiab leej. Yog li ntawd, koj nyob hauv nroog no txhij neeg tuaj pab peb zoo dua.” Vajntxwv teb hais tias, “Kuv yuav ua txhua yam raws li nej xav kom kuv ua.” Ces nws txawm mus sawv ntawm roojvag saib nws cov neeg tawm mus ua tej pab ib txhiab leej thiab tej pab ib puas leej. Daviv hais rau Yau-am, Anpisais thiab Ithais hais tias: “Yog nej hlub kuv, thov nej tsis txhob ua phem rau tus tub hluas Axaloos.” Cov tubrog puavleej hnov Daviv hais li ntawd rau nws cov thawj tubrog. Daviv cov tubrog tawm mus rau tom roob mojsab thiab tua cov Yixalayees hauv thaj Havzoov uas yog cov Efalayees cheebtsam av. Cov Yixalayees swb Daviv cov tubrog yog ib qho poob tsam txaus ntshai kawg li, hnub ntawd xwb muaj nees nkaum txhiab leej raug tua tuag. Lawv sib tua tawg ri sua mus thoob plaws rau pem tej roob mojsab, thiab cov neeg uas tuag rau hauv havzoov tseem coob tshaj cov uas raug tua tuag rau hauv tshavrog. Ces thaum ntawd Axaloos txawm ntsib dheev Daviv cov neeg. Axaloos caij ib tug zag, tus zag khiav mus nkag rau hauv ib tsob qab ntoo qhib, Axaloos lub cajdab thiaj daig nkaus rau saum nkhib ntoo. Tus zag khiav dhau plaws lawm cia Axaloos dai ncuv rau saud. Daviv cov neeg ib tug los pom Axaloos, nws thiaj mus qhia rau Yau-am hais tias, “Kuv pom Axaloos khuam dai ncuv saum tus nkhib ntoo qhib!” Yau-am teb hais tias, “Yog koj pom nws tiag, ua li cas koj tsis muab nws tua kiag? Kuv yuav muab kaum daim nyiaj thiab ib txoj siv rau koj.” Tiamsis tus txivneej ntawd teb hais tias, “Txawm yog koj yuav muab ib txhiab daim nyiaj rau kuv los, kuv yuav tsis muab kuv tus ntivtes mus tawmtsam vajntxwv tus tub lub cev li. Peb sawvdaws puavleej hnov vajntxwv tej lus hais rau koj, Anpisais thiab Ithais hais tias, ‘Yog nej hlub kuv, thov tsis txhob ua phem rau tus tub hluas Axaloos.’ Yog hais tias kuv tsis mloog vajntxwv lus, kuv muab Axaloos tua lawm, (vajntxwv yeej yuav paub xwb; rau qhov thaum nws hnov), koj yuav tsis pab kuv daws zaj no.” Yau-am teb hais tias, “Kuv tsis xav nkim sijhawm nrog koj hais ntxiv lawm.” Nws thiaj rho hlo nws peb rab hmuv nkaug kiag Axaloos hauvsiab thaum uas Axaloos tseem tsis tau tuag thiab khuam ncuv saum tus nkhib ntoo qhib. Ces Yau-am cov tubrog kaum leej thiaj hla hlo mus rau ntawm Axaloos thiab muab nws loos tuag kiag lawm. Yau-am tshuab raj tshuab xyu kom tseg tsis txhob sib tua, cov tubrog thiaj tig rov qab los tsis caum cov Yixalayees ntxiv lawm. Lawv muab Axaloos lub cev txo los thiab kwv mus pov rau hauv ib lub qhov tob heev hauv havzoov thiab muab pobzeb txhub lub qhov ntawd ua ib pawg cia. Tagnrho cov Yixalayees nyias thiaj khiav rov mus nyias tsev tas lawm. Thaum uas Axaloos tseem ua neej nyob, nws puab tau ib tug pejthuam rau hauv lub Hav Vajntxwv, cia ua chaw nco txog nws rau qhov nws tsis muaj tub los ris nws lub npe. Yog li ntawd, nws thiaj muab tus pejthuam ntawd hu raws li nws lub npe, thiab niaj hnub no tseem paub hais tias yog Axaloos tus pejthuam. Ces Xadaus tus tub Ahima-as thiaj thov Yau-am hais tias, “Cia kuv coj tej xov no mus qhia rau vajntxwv paub hais tias tus TSWV twb cawm nws dim ntawm nws cov yeebncuab lawm.” Yau-am teb hais tias, “Tsis txhob mus, hnub no koj tsis txhob coj ib yam xov dabtsi mus qhia rau vajntxwv paub li. Lwm hnub tso koj mam li mus, rau qhov hnub no yog hnub uas vajntxwv tus tub tuag.” Yau-am hais rau nws tus tubqhe uas yog neeg Sudas hais tias, “Koj cia li mus qhia tej uas koj pom ntawd rau vajntxwv paub.” Tus tubqhe thiaj li nyo ntshis hawm thiab mus lawm. Ahima-as pheej thov hais tias, “Txawm yog li cas los xij, thov cia kuv coj tej xov no mus qhia rau vajntxwv thiab.” Yau-am nug hais tias, “Metub, vim li cas koj xav mus? Koj yeej yuav tsis tau nqi zog dabtsi li los sav!” Ahima-as rov hais dua hais tias, “Txawm yog li cas los xij, kuv xav mus xwb.” Yau-am teb hais tias, “Koj cia li mus.” Yog li ntawd, Ahima-as thiaj khiav taug txojkev uas mus rau nram lub Hav Yauladees thiab mus huas kiag tus qhev ntawd ntej lawm. Daviv tabtom zaum ntawm lub roojvag nroog sab hauv thiab sab nraud kis nruab nrab. Tus tub fajxwm nce mus rau saum tus ntsa yeej thiab sawv saum roojvag saib mus rau tim ncauj ke, nws pom ib tug txivneej khiav taug kev los. Nws hu qhia rau vajntxwv, vajntxwv teb hais tias, “Yog nws tib leeg los xwb, ces yog nws coj xov zoo los ntag.” Tus txivneej ntawd khiav los ze zuj zus. Tus tub fajxwm rov pom dua ib tug khiav los thiab, nws thiaj hu rau tus zov lub roojvag hais tias, “Ntsia tid saib, muaj dua ib tug txivneej khiav los thiab!” Vajntxwv teb hais tias, “Tus ntawd los yog coj xov zoo los thiab.” Tus fajxwm hais tias, “Kuv saib mas tus txivneej uas khiav ua ntej zoo li yog Ahima-as ntag.” Vajntxwv hais tias, “Nws yog ib tug neeg zoo, nws thiaj coj xov zoo los.” Ahima-as los txhos caug ntua rau ntawm vajntxwv xubntiag hawm thiab hais tias, “Vajntxwv, ua tus TSWV uas yog koj tus Vajtswv tsaug, nws twb pab koj yeej cov neeg uas ntxeev siab rau koj lawm.” Vajntxwv nug hais tias, “Tus tub hluas Axaloos puas noj qab nyob zoo?” Ahima-as teb hais tias, “Vajntxwv, thaum koj tus thawj tubrog Yau-am tso kuv los, kuv pom sawvdaws ntxhov siab kawg li, tiamsis kuv tsis muaj cuabkav qhia rau koj paub hais tias yog muaj xwm dabtsi.” Vajntxwv hais tias, “Koj los ntawm no,” ces nws txawm txav zog mus sawv ntawd. Tus tubqhe uas yog neeg Sudas los txog thiab hais rau vajntxwv hais tias, “Vajntxwv, kuv muaj xov zoo yuav qhia rau koj! Hnub no tus TSWV twb pab koj yeej cov neeg uas ntxeev siab rau koj lawm!” Vajntxwv nug hais tias, “Tus tub hluas Axaloos puas noj qab nyob zoo thiab?” Tus tubqhe teb hais tias, “Kuv thov kom tej xwmtxheej uas raug nws ntawd poob mus raug koj cov yeebncuab ib yam nkaus, thiab raug txhua tus uas ntxeev siab rau koj.” Vajntxwv tu siab kawg li. Nws thiaj nce mus rau hauv chav uas nyob saum lub roojvag thiab mus quaj saud. Thaum nws tabtom nce mus nws quaj hais tias, “Kuv tus metub! Kuv tus tub Axaloos! Axaloos, kuv tus metub! Yog hloov tau cia kuv tuag hloov koj chaw, Axaloos! Kuv tus metub! Kuv tus tub!” Muaj neeg mus qhia rau Yau-am hais tias, Vajntxwv Daviv quaj nyiav thiab nyuaj siab heev rau Axaloos. Yog li hnub ntawd, Daviv cov tubrog txojkev zoo siab uas tua yeej rog thiaj hloov los ua txojkev nyuaj siab, rau qhov lawv hnov hais tias vajntxwv quaj nyiav nws tus tub heev. Lawv thiaj li rov mluas mlob los rau hauv nroog ib yam li tej tubrog uas swb rog txajmuag ntsuav khiav hauv tshavrog rov qab los. Vajntxwv muab ntaub los npog nws lub ntsejmuag thiab tsa suab hlo quaj hais tias, “Kuv tus metub! Kuv tus tub Axaloos! Axaloos, kuv tus metub!” Yau-am thiaj mus rau tom vajntxwv tsev thiab hais rau vajntxwv hais tias, “Hnub no koj rhuav koj cov neeg ntsejmuag. Cov neeg ntawd twb yog cov uas cawm koj thiab koj cov tub, cov ntxhais, cov pojniam thiab koj cov niamyau txojsia dim ntawm txojkev puastsuaj. Koj ntxub cov uas hlub koj thiab nyiam cov uas ntxub koj! Ua li koj ua no qhia tau hais tias koj tej nomtswv thiab koj cov neeg tsis muaj txiaj ntsig dabtsi rau koj li. Kuv paub hais tias hnub no yog Axaloos muaj sia nyob thiab peb tuag tas, mas koj yuav zoo siab heev. Nimno koj cia li mus hais ib lo lus nplig koj cov neeg siab. Kuv thov tuav tus TSWV lub npe coglus hais tias yog koj tsis mus, tagkis sawv ntxov lawv yuav tsis muaj ib tug nrog koj nyob li lawm. Qhov ntawd yuav ua rau koj tau kev txomnyem nyuaj siab hnyav dua tej uas koj muaj thaum koj hluas los txog niaj hnub no.” Ces vajntxwv thiaj sawv tsees thiab mus zaum ze rau ntawm lub roojvag nroog. Nws cov neeg hnov hais tias nws tuaj nyob ntawd, lawv thiaj los sawv ibncig nws. Dhau ntawd cov Yixalayees nyias txawm rov mus nyias tsev tas lawm. Cov pejxeem nyob thoob plaws tebchaws sib cav ntsoog qees, ib leeg hais rau ib leeg hais tias, “Twb yog Vajntxwv Daviv cawm peb dim ntawd peb cov yeebncuab, nws pab kom peb dim ntawm cov Filitees, tiamsis nimno nws khiav Axaloos thiab tawm hauv lub tebchaws no mus lawm. Peb tau muab roj hliv rau Axaloos taubhau tsa nws ua peb tus vajntxwv, tiamsis nws raug tua tuag rau hauv tshavrog lawm. Txawm yuav tsis muaj leejtwg mus coj Vajntxwv Daviv rov qab los li los?” Tej lus uas cov Yixalayees hais no nrov ncha mus txog rau Vajntxwv Daviv. Nws thiaj txib Xadaus thiab Anpiyathas uas yog ob tug povthawj mus nug cov Yudas tej thawjcoj hais tias, “Vim li cas nej thiaj yog cov uas tuaj tos vajntxwv rov qab los rau hauv nws lub loog lig dua lwm pab huv tibsi? Nej twb yog kuv cov kwvtij, yog kuv roj kuv ntshav ntag; vim li cas nej yog cov uas tuaj tos kuv lig dua luag tej huv tibsi?” Thiab Daviv tseem kom nkawd mus hais rau Amaxas hais tias, “Koj yog kuv ib tug kwvtij. Txij hnub no mus kuv yuav tsa koj ua tus thawj saib cov tubrog hloov Yau-am chaw. Yog kuv tsis ua raws li kuv hais, thov Vajtswv tua kuv povtseg!” Daviv tej lus thiaj ua rau cov Yudas muab siab npuab Daviv. Lawv thiaj tso neeg mus hais rau Daviv thiab nws cov nomtswv kom rov qab los. Thaum Vajntxwv Daviv rov los, nws ntsib ib co Yudas tabtom tuaj txog ntawm tus dej Yauladees, lawv yog cov uas nyob hauv lub nroog Nkilenkas tuaj coj nws hla dej. Tib lub sijhawm ntawd Nkelas tus tub Sime-is uas yog xeem Npeenyamees maj nroos hauv lub nroog Npahulees tuaj cuag Vajntxwv Daviv nram tus dej Yauladees. Nws coj cov Npeenyamees ib txhiab leej txivneej nrog nws tuaj. Thiab Xinpas uas yog Xa-ules tsevneeg tus tubtxib coj nws kaum tsib tug tub thiab nees nkaum leej tubtxib tuaj thiab, lawv tuaj txog rau ntawm tus dej Yauladees ua ntej Vajntxwv los txog ntawd. Lawv hla dej mus rau sab tid tos coj vajntxwv tsevneeg hla dej thiab ua txhua yam uas vajntxwv kom lawv ua. Thaum vajntxwv tabtom sawv kev yuav hla dej, Sime-is txawm txhos caug ntua hawm vajntxwv thiab hais tias, “Vajntxwv, thov koj zam txim rau tej uas kuv tau ua txhaum rau koj, thaum koj tawm hauv lub nroog Yeluxalees tuaj. Thov tsis txhob muab zaj ntawd los tawmtsam kuv lossis thov koj tsis txhob xav txog zaj ntawd li. Vajntxwv, kuv yeej paub hais tias kuv tau ua txhaum lawm tiag, vim li no cov xeem uas nyob pem qaumteb, kuv thiaj yog thawj tug uas xub tuaj ntsib koj hnub no ntag.” Xeluyas tus tub Anpisais teb hais tias, “Yeej tsimnyog muab Sime-is tua povtseg rau qhov nws tsawm foom tus uas tus TSWV xaiv cia ua vajntxwv lawm.” Tiamsis Daviv hais rau Anpisais thiab Anpisais tus tijlaug Yau-am hais tias, “Leejtwg thov tswvyim ntawm neb? Neb tsim teebmeem rau kuv los? Nimno kuv yeej yog cov Yixalayees tus vajntxwv, thiab hnub no kuv yuav tsis muab cov Yixalayees ib tug twg tua povtseg li.” Thiab Daviv hais rau Sime-is hais tias, “Kuv coglus rau koj, koj yuav tsis raug tua povtseg li.” Mefinpauses uas yog Xa-ules tus xeebntxwv tuaj cuag vajntxwv. Nws yeej tsis ntxuav nws ob txhais taw, tsis chais nws cov hwjtxwv lossis ntxhua nws tej ris tsho, txij thaum vajntxwv khiav hauv Yeluxalees mus txog hnub uas vajntxwv rov yeej lub tebchaws li. Thaum Mefinpauses tuaj pem Yeluxalees tuaj cuag vajntxwv, vajntxwv hais rau Mefinpauses hais tias, “Mefinpauses, vim li cas koj thiaj tsis nrog kuv mus?” Mefinpauses teb hais tias, “Vajntxwv, koj yeej paub hais tias kuv yog ib tug neeg sav ceg. Kuv twb hais rau kuv tus tubtxib kom nws muab eeb nog rau kuv tus neesluav rau kuv caij nrog koj mus, tiamsis nws ntxeev siab rau kuv lawm thiab. Nws tuaj hais kuv tsis zoo rau koj, tiamsis koj zoo nkaus li Vajtswv tus timtswv, koj thiaj ua raws li koj pom zoo xwb. Tagnrho kuv txiv tsevneeg yeej tsimnyog koj muab tua povtseg huv tibsi lawm, tiamsis koj pub kuv nrog koj noj koom tsum saum koj lub rooj mov. Vajntxwv, kuv yeej tsis muaj cuabkav yuav thov kom koj hlub kuv ntxiv lawm.” Vajntxwv teb hais tias, “Koj tsis txhob hais dabtsi ntxiv lawm. Kuv hais rau koj hais tias, Xinpas neb cia li mus muab Xa-ules tej qubtxeeg qubteg coj los faib rau neb.” Mefinpauses teb hais tias, “Cia li muab rau Xinpas tib leeg yuav xwb, qhov uas koj rov los tsev thajyeeb lug twb ua rau kuv zoo siab kawg li lawm.” Npaxilais tus uas yog neeg Nkile-as uas nyob hauv lub nroog Launkelees, nws tuaj pab coj vajntxwv hla tus Dej Yauladees. Npaxilais yog ib tug neeg laus heev, nws twb muaj yim caum xyoo lawm. Npaxilais yog ib tug neeg npluanuj thiab tau xa zaub mov tuaj pub rau vajntxwv, thaum uas vajntxwv tseem nyob hauv Mahana-ees. Vajntxwv hais rau Npaxilais hais tias, “Koj cia li nrog kuv mus nyob hauv lub nroog Yeluxalees, kuv yuav ua tus saib xyuas koj mus li.” Tiamsis Npaxilais teb hais tias, “Kuv yuav nyob tsis ntev lawm, kuv yuav ua li cas nrog koj mus nyob tau hauv lub nroog Yeluxalees? Kuv twb muaj yim caum xyoo lawm, thiab tsis muaj ib yam dabtsi yuav ua rau kuv zoo ntxiv lawm. Kuv noj mov thiab haus dej los twb tsis hnov qab, txawm yog luag tej suab hu nkauj los kuv twb tsis hnov. Ntshai kuv tsuas muaj yuav ua kev nyuaj siab rau vajntxwv uas yog kuv tus tswv lawm xwb. Tsis tsimnyog kuv mus txais yuav tej nqi zog uas tseemceeb ntawd li. Cia kuv nrog koj mus kom dhau tus Dej Yauladees rau sab tid xwb. Cia kuv rov qab mus tsev thiab mus tuag ze kuv niam kuv txiv tej toj ntxa. Vajntxwv, ntawm no yog kuv tus tub Khihas, nws yuav yog tus tu koj; cia li coj nws nrog koj mus thiab koj xav pab nws li cas, los koj cia li pab nws raws li koj pom zoo.” Vajntxwv teb hais tias, “Kuv yuav coj nws nrog kuv mus thiab kuv yuav pab nws txhua yam raws li koj xav kom kuv pab. Thiab kuv yuav pab koj txhua yam uas koj thov kuv pab.” Daviv thiab nws cov neeg txawm hla tus Dej Yauladees los lawm. Daviv thiaj nwj Npaxilais thiab foom koob hmoov rau Npaxilais, ces nws txawm rov mus tsev lawm. Thaum vajntxwv hla dej, mas yog cov Yudas thiab cov Yixalayees ib nrab tuaj pab coj nws hla, vajntxwv mus rau hauv lub nroog Nkilenkas thiab lub nroog Khihas los lawv puavleej nrog nws mus thiab. Ces cov Yixalayees txawm mus cuag vajntxwv thiab hais rau nws hais tias, “Vajntxwv, vim li cas peb cov kwvtij uas yog cov Yudas, lawv xav hais tias lawv thiaj yog cov uas tsimnyog tuaj tos koj thiab pab xa koj, koj tsevneeg thiab koj cov neeg hla tus Dej Yauladees xwb?” Cov Yudas teb hais tias, “Peb ua li ntawd rau qhov vajntxwv yog peb tib xeem. Vim li cas qhov nyuag no tseem yuav ua rau nej chim thiab? Nws yeej tsis muab zaub mov los them peb lossis nws yeej tsis tau muab ib yam dabtsi rau peb li los sav.” Cov Yixalayees teb hais tias, “Txawm yog Vajntxwv Daviv yog nej tib xeem los peb yeej muaj tug nyob hauv nws ntau tshaj nej kaum npaug. Vim li cas nej yuav saib peb tsis muaj nqis li? Nej puas nco hais tias, peb yog thawj cov uas xub hais kom mus tos vajntxwv rov qab los.” Tiamsis cov Yudas tseem hajyam ntxeev lus loj tshaj cov Yixalayees thiab. Muaj ib tug txivneej hu ua Senpas nyob hauv lub nroog Nkilenkas, nws yog Npikelis tus tub uas yog xeem Npeenyamees, nws yog ib tug neeg siab phem heev. Nws tshuab raj tshuab xyu thiab hu hais tias, “Cov Yixalayees, peb twb tsis muaj feem nrog Daviv, peb tsis txhob nrog nws mus!” Yog li ntawd, cov Yixalayees thiaj tso Daviv tseg thiab nrog Senpas mus lawm, tiamsis cov Yudas tseem muab siab npuab Daviv thiab raws nws qab tom tus dej Yauladees los txog rau hauv lub nroog Yeluxalees. Thaum Daviv los txog hauv lub nroog Yeluxalees, nws muab nws kaum tus niamyau uas nws tso tseg tu lub loog cais hlo rau ib lub tsev thiab tso cov fajxwm zov. Nws muab txhua yam uas lawv xav tau xa mus rau lawv, tiamsis nws tsis mus nrog lawv pw li lawm. Nws tu ib qhov chaw rau lawv nyob ib yam li tej pojntsuam mus tas lawv simneej li. Vajntxwv hais rau Amaxas hais tias, “Koj cia li mus hu cov Yudas tuaj ua ke thiab nagkis koj yuav tsum nrog lawv tuaj rau ntawm no.” Amaxas mus hu lawv, tiamsis nws tsis rov tuaj raws li lub sijhawm uas vajntxwv teem kom nws tuaj. Yog li ntawd, vajntxwv thiaj hais rau Anpisais hais tias, “Npikelis tus tub Senpas tseem yuav ua phem rau peb heev tshaj Axaloos ua thiab. Koj cia li coj kuv cov neeg mus raws nws qab, tej zaum nws yuav nyob hauv tej nroog uas txhim ntsa yeej khov kho kom nws tau chaw khiav nkaum peb.” Yog li ntawd, Yau-am cov neeg, cov tubrog uas zov vajntxwv thiab tagnrho cov tubrog uas seem hauv Yeluxalees thiaj nrog Anpisais mus caum Npikelis tus tub Senpas. Thaum lawv mus txog ntawm lub pobzeb loj hauv Nkinpe-oos, Amaxas mus ntsib lawv ntawd thiab. Yau-am hnav rawv cev ris tsho sib tua nrog ib rab ntaj ntxig rau hauv hnab thiab muab siv pav khov kho rau ntawm duav. Ces thaum Yau-am nam zog mus rab ntaj txawm hlauv hlo. Yau-am hais rau Amaxas hais tias, “Kuv tus phoojywg, koj puas noj qab nyob zoo?” Ces nws cev loo nws sab tes xis mus tuav nkaus Amaxas cov hwjtxwv li yuav nwj Amaxas. Amaxas tsis ceevfaj uas yuav muab ib yam dabtsi los thaiv kom tau rab ntaj, ces Yau-am thiaj tib nkaug Amaxas plab tshab plaws ua hnyuv tshau lug rau hauv av. Amaxas tuag kiag tamsim ntawd thiab Yau-am yeej tsis tau loos ntxiv li lawm. Yau-am thiab nws tus kwv Anpisais rau siab ntso mus caum Senpas qab. Yau-am cov neeg ib tug sawv ib sab ntawm Amaxas lub cev tuag hu hais tias, “Txhua tus uas tuaj Yau-am thiab Daviv tog cia li raws Yau-am qab!” Amaxas tuag xyab luas thiab tsau ntshav tsawv hauv plawv kev. Yau-am ib tug tubrog pom hais tias, txhua tus puavleej los sawv tas ua ib pawg rau ntawd lawm, nws thiaj muab lub cev tuag luag tawm hauv plawv kev mus tso rau tom hav puamkhab thiab muab ib daim pam npog rau. Ces tom qab uas muab tus tuag ntawd tshem tawm hauv plawv kev lawm, lawv txhua tus thiaj raws Yau-am qab mus caum Senpas. Senpas mus dhau plaws cov Yixalayees tus ciamteb mus rau hauv lub nroog Anpees Npethes Ma-akas, thiab tagnrho Npikelis cov kwvtij puavleej sau nthwv tuaj nrog nws mus rau hauv lub nroog. Yau-am cov neeg hnov hais tias Senpas nyob hauv nroog, yog li ntawd, lawv thiaj mus vij lub nroog ntawd. Lawv muab av los meem sab ntsa yeej nraud thiab khawb hauv taw ntsa yeej kom tus ntsa yeej vau. Muaj ib tug pojniam ntse heev nyob hauv lub nroog ntawd, nws qw hauv lub nroog tuaj hais tias, “Nej cia li mloog! Nej cia li mloog kuv hais! Hais rau Yau-am kom cia li los ntawm no; kuv xav nrog nws tham.” Yau-am txawm txav zog mus ze tus pojniam ntawd, tus pojniam ntawd nug hais tias, “Koj yog Yau-am los?” Yau-am teb hais tias, “Kuv yog Yau-am ntag.” Tus pojniam ntawd hais tias, “Koj cia li mloog kuv hais.” Yau-am teb hais tias, “Kuv yeej mloog koj hais.” Tus pojniam ntawd txawm hais tias, “Luag ibtxwm hais tias, ‘Cia li mus nrhiav tej lus teb ntawm Anpees,’ lawv ua li ntawd thiaj sib hais haum lawm. Peb muaj kev thajyeeb thiab kev ncaj ncees nyob hauv lub tebchaws Yixalayees no. Vim li cas koj pheej nrhiav kev muab lub nroog uas yog leej niam hauv lub tebchaws Yixalayees no rhuav povtseg? Puas yog koj xav nqos tej uas yog tus TSWV tug?” Yau-am teb hais tias, “Kuv tsis ua kom puastsuaj ib zaug li. Kuv tsis lam rhuav tshem lossis ua kom peb lub nroog no puastsuaj! Tsis yog peb txhob txwm ua li ntawd. Tiamsis muaj ib tug txivneej hu ua Senpas uas yog Npikelis tus tub, nws ntxeev siab rau Vajntxwv Daviv thiab khiav pem lub roob Efalayees tuaj rau hauv no lawm. Yog nej muab tau tus neeg no cob rau peb, kuv yuav tso lub nroog no tseg.” Tus pojniam ntawd hais tias, “Peb yuav muab nws lub taubhau pov tuaj rau nej.” Tus pojniam ntawd thiaj mus cuag cov neeg hauv lub nroog raws li nws npaj siab lawm, lawv thiaj muab Senpas lub taubhau txiav pov tuaj rau Yau-am sab ntsa yeej nraud. Yau-am thiaj tshuab raj tshuab xyu hu kom nws cov neeg tso lub nroog ntawd ntseg, lawv thiaj rov los tsev lawm. Yau-am rov los cuag vajntxwv rau hauv lub nroog Yeluxalees. Yau-am yog cov Yixalayees tus thawj tubrog; Yehauyadas tus tub Npenayas yog tus saib cov tubrog uas zov Daviv; Adaunilas yog tus saib cov ua haujlwm; Ahilus tus tub Yehausafas yog tus saib cov tuav ntaub ntawv; Sevas yog tus teev ntawv; Xadaus thiab Anpiyathas yog ob tug povthawj, thiab Ilas uas nyob hauv lub nroog Yailes yog Daviv ib tug povthawj thiab. Lub sijhawm uas Daviv ua vajntxwv kav lub tebchaws muaj kev tshaib plab tau peb xyoo txwm nkaus. Yog li ntawd, Daviv thiaj mus nug tus TSWV txog zaj ntawd, tus TSWV hais tias, “Twb yog Xa-ules thiab nws tsevneeg ua txhaum vim lawv tua neeg; nws muab cov neeg hauv Nkinpe-oos tua tuag tas.” ( Cov neeg uas nyob hauv Nkinpe-oos tsis yog neeg Yixalayees; lawv yog cov neeg Amaules ib pab nyuag tsawg heev uas cov Yixalayees tau coglus rau lawv hais tias yuav tsomkwm lawv, tiamsis Xa-ules mus muab lawv tua tuag tas lawm, rau qhov Xa-ules mob siab heev rau cov Yixalayees thiab cov Yudas.) Yog li ntawd, Daviv caw cov Nkinpe-oos tuaj cuag nws thiab hais rau lawv hais tias, “Nej xav kom kuv ua dabtsi pab nej? Kuv yuav ua li cas thiaj pauj tau tej uas luag ua rau nej tas los lawm, nej thiaj yuav foom koob hmoov rau tus TSWV haivneeg.” Lawv teb hais tias, “Peb tau nrog Xa-ules thiab nws tsevneeg sib ceg txaus lawm, txawm yog yuav muab nyiaj muab kub los kho peb thiab muab cov Yixalayees ib tug twg tua pauj los peb yeej tsis txaus siab li.” Daviv thiaj nug hais tias, “Yog li ntawd, nej xav kom kuv ua dabtsi pab nej?” Lawv teb hais tias, “Xa-ules yeej xav muab peb tua kom tu noob nrho, tsis xav kom peb ib tug seem nyob rau hauv lub tebchaws Yixalayees no li. Yog li ntawd, yuav tsum muab nws xya tus tub xeebntxwv cob rau peb, thiab peb yuav muab lawv dai tabmeeg tus TSWV rau hauv lub nroog Nkinpe-as uas yog Xa-ules lub nroog uas tus TSWV tau xaiv nws ua vajntxwv.” Vajntxwv teb hais tias, “Kuv yuav muab lawv cob rau nej tes.” Tiamsis vim Daviv thiab Yaunathas tau coglus khov heev rau tus TSWV lawm, Daviv thiaj tseg Yaunathas tus tub Mefinpauses uas yog Xa-ules tus tub xeebntxwv cia. Txawm li ntawd, los Daviv tseem mus ntes Amaunis thiab Mefinpauses uas yog A-iyas tus ntxhais Lixepas ob tug tub uas nws yug rau Xa-ules; thiab Daviv mus ntes Xa-ules tus ntxhais Melas tsib tug tub uas Melas yug rau Npaxilais tus tub Aliyees hauv Mehaulas coj los rau lawv huv tibsi. Thiab Daviv muab lawv cob rau cov Nkinpe-oos. Cov Nkinpe-oos thiaj coj lawv mus dai tabmeeg tus TSWV, ces xya leej ntawd thiaj tuag ua ke huv tibsi lawm. Lawv raug tua tuag rau thaum lub caij ntuj nag tu uas tabtom pib hlais nplej. Xa-ules tus niamyau Lixepas uas yog A-iyas tus ntxhais thiaj muab ntaubtsaj coj mus rub ua ib lub tsev pheebsuab rau nws nyob saum lub pobzeb uas lawv tso cov tuag, thiab nws nyob hauv lub tsev ntawd thaum pib hlais nplej mus txog rau thaum lub caij ntuj nag nqis. Nruab hnub nws zov tsis pub noog los ze cov tuag, thiab hmo ntuj nws zov tsis pub tej tsiaj los ze cov tuag ntawd. Thaum Daviv hnov tej uas Lixepas ua ntawd, Daviv thiaj mus muab Xa-ules thiab Xa-ules tus tub Yaunathas cov pobtxha ntawm cov Yanpes hauv Nkile-as los. (Lawv mus nyiag tej pobtxha ntawd hauv lub plawv nroog Npethes Sas, ntawm qhov chaw uas cov Filitees muab Xa-ules thiab Yaunathas dai, hnub uas lawv tua Xa-ules tuag rau saum lub Roob Nkinpau-as ntag.) Daviv khaws Xa-ules, Yaunathas thiab xya tus txivneej uas luag muab dai nrog nkawd ua ke ntawd cov pobtxha nqa huv tibsi los. Ces lawv thiaj muab Xa-ules thiab Yaunathas nkawd cov pobtxha coj mus faus rau hauv Xa-ules txiv Kises lub qhov ntxa ntawm lub nroog Xelas hauv lub xeev Npeenyamees, lawv ua txhua yam raws li vajntxwv hais kom lawv ua. Tom qab ntawd Vajtswv thiaj teb tej lus uas lawv thov pab lawv lub tebchaws. Cov Filitees thiab cov Yixalayees rov ua rog dua, ces Daviv thiab nws cov neeg thiaj mus tua cov Filitees. Thaum lawv tabtom sib tua ntawd Daviv tsaug muag heev. Muaj ib tug txivneej loj heev hu ua Inpinpenaus nqa ib rab hmuv tooj hnyav xya choj thiab rau las, thiab nws ris ib rab ntaj tshiab, nws xav hais tias nws yuav tua kom tau Daviv povtseg. Tiamsis Xeluyas tus tub Anpisais thiaj txav zog los pab Daviv ntaus tus neeg loj heev ntawd, thiab muab tua tuag kiag lawm. Daviv cov tubrog coglus rau Daviv kom nws tsis txhob nrog lawv mus tua rog ntxiv lawm. Lawv hais tias, “Peb cov Yixalayees cia siab rau koj xwb, peb tsis xav cia cov Yixalayees lub teeb tuag.” Tom qab no rov muaj kev sib tua nrog cov Filitees hauv lub nroog Nkaunpes dua, thaum ntawd Xinpekais uas nyob hauv Husas thiaj tua ib tug neeg loj heev uas hu ua Xelas tuag lawm thiab. Rov muaj kev sib tua nrog cov Filitees ntxiv hauv lub nroog Nkaunpes. Yailes tus tub Ehanas uas nyob hauv lub nroog Npelehees thiaj tua Nkauli-am uas nyob hauv lub nroog Nkas tuag, Nkauli-am muaj ib rab hmuv tus vos tuab ib yam li lub nqos ntos ntaub. Tseem rov muaj kev sib tua nyob hauv lub nroog Nkas, nyob hauv muaj ib tug txivneej loj siab nyiam sib tua heev. Nws ib sab tes muaj rau tus ntivtes thiab ib sab taw muaj rau tus ntivtaw. Nws tsawm foom cov Yixalayees, ces Yaunathas uas yog Daviv tijlaug tus tub Samas muab tus txivneej ntawd tua tuag kiag lawm. Plaub tug txivneej no yog cov neeg loj siab heev, lawv yeej yog cov neeg uas yug nyob hauv lub nroog Nkas, lawv raug Daviv thiab nws cov neeg muab tua tuag tas huv tibsi lawm. Thaum tus TSWV cawm Daviv dim ntawm Xa-ules thiab Daviv cov yeebncuab los, Daviv hu zaj nkauj no ua tus TSWV tsaug: Tus TSWV yog tus tsomkwm saib xyuas kuv; nws yog kuv lub chaw nkaum uas ruaj khov. Kuv tus Vajtswv yog tus tsomkwm saib xyuas kuv, thiab twb yog muaj nws kuv thiaj tau nyob kaj siab lug. Nws tiv thaiv kuv ib yam li daim thaiv hniav ntaj; nws tiv thaiv kuv thiab muab kuv tso rau qhov chaw thajyeeb lug. Nws yog kuv tus cawmseej, nws tsomkwm kuv thiab pab kuv dim txojkev puastsuaj. Tsimnyog kuv qhuas tus TSWV, kuv tsa suab hlo thov tus TSWV thiab nws cawm kuv dim ntawm kuv cov yeebncuab. Kev tuag nphau npog nyob ibncig kuv; txojkev puastsuaj nphau phwj yaws tuaj qhwv nkaus kuv. Txojkev tuag uas txaus ntshai nyob ibncig kuv, thiab lub qhov ntxa cuab lug thaiv kuv kev tsis pub kuv dhau. Thaum kuv ntsib kev nyuaj siab ntxhov plawv kuv hu tus TSWV xwb; kuv hu kuv tus Vajtswv pab kuv. Hauv nws lub Tuamtsev nws hnov kuv tej lus thov; nws mloog kuv lub suab quaj thov nws pab. Ces lub ntiajteb txawm qeeg thiab ua zog koog; ncej ntug quaj qeeg nkaws nyob tsis tswm rau qhov Vajtswv chim heev! Pa ncho auv niab hauv nws lub qhovntswg tuaj, nplaim taws thiab hluavncaig cig lam lug hauv nws lub qhovncauj. Nws muab lub ntuj dua qhib plho thiab nqis plhuav, nrog cov huab tsaus dub nciab hauv nws qab xibtaws los. Nws caij tus qhelus, thiab ya ceev heev, pom nws nyob rawv saum ob phab tis cua. Nws ua qhov tsaus ntuj thaiv nws; tauv huab tuab uas muaj nag nyob ibncig nws; muaj xob laim ua txim taws cig liab vog ntawm nws xubntiag. Tus TSWV ua xob nroo qeeg nkaws saum ntuj tuaj, thiab hnov Vajtswv tus muaj hwjchim loj kawg nkaus lub suab. Nws tua nws xibxub hneevnti tuaj, thiab nws cov yeebncuab khiav ri sua nws ua kom xob laim liab vog muab lawv raws tawm khiav. Qab thu dej hiavtxwv pom kev lam lug, thiab tsis muaj ib yam dabtsi thaiv tau tej cag ntiajteb, thaum tus TSWV npautaws, nws cem nws cov yeebncuab nyooj laws. Tus TSWV cev tes saud tuaj tuav kuv; nws npo kuv tawm hauv dej qhov uas tob tshaj plaws los. Nws cawm kuv dim ntawm kuv cov yeebncuab lub hwjchim dim ntawm cov uas ntxub kuv thiab cov uas muaj zog dua kuv. Luag tuaj tawmtsam kuv, thaum kuv raug kev txomnyem, tiamsis tus TSWV tsomkwm kuv. Nws coj kuv los nyob rau ntawm qhov chaw dav; nws cawm kuv, rau qhov nws txaus siab rau kuv. Tus TSWV muab nqi zog rau kuv rau qhov kuv ua ncaj ncees; nws foom koob hmoov rau kuv, rau qhov kuv tsis tau ua txhaum. Kuv ua raws li tus TSWV txoj kevcai; kuv tsis tso kuv tus Vajtswv tseg li. Kuv ua raws li nws tej kevcai qhia; kuv tsis tawv ncauj, kuv mloog nws tej lus samhwm. Nws paub hais tias kuv tsis tau ua txhaum, rau qhov kuv yeej ceevfaj nraim tsis ua yuam kev. Yog li ntawd, nws thiaj muab nqi zog rau kuv rau qhov kuv ua ncaj ncees, vim nws paub hais tias kuv tsis tau ua txhaum. Tus TSWV, koj yeej ua ncaj ncees rau cov neeg uas muab siab npuab koj, thiab ua zoo rau cov neeg uas ua zoo rau koj. Koj ua siab dawb paug rau cov neeg dawbhuv, tiamsis koj ntxub ntxaug cov neeg siab phem siab nkhaus. Koj cawm cov neeg uas txo hwjchim, tiamsis koj txo cov neeg uas khavtheeb lub hwjchim. Tus TSWV, koj yog kuv lub teeb; koj ua rau kuv txojkev tsaus ntuj pom kev kaj nrig. Koj pub kuv muaj zog ntaus yeej kuv cov yeebncuab thiab muaj peevxwm kovyeej lawv tej kev tawmtsam. Tej uas Vajtswv ua puavleej zoo, tus TSWV tej lus yog lus tseeb. Nws zoo li daim thaiv hniav ntaj rau txhua tus uas vamkhom nws. Tus TSWV tib leeg thiaj yog Vajtswv; Vajtswv tib leeg thiaj yog tus tsomkwm peb. Tus Vajtswv no yog kuv qhov chaw nraim cev uas ruaj khov, nws ua rau kuv txoj haukev kaj nrig. Nws ua rau kuv ob txhais taw tsuj khov ib yam li tej rau muaslwj; nws tsomkwm kuv nyob kaj siab lug saum tej roob. Nws qhia kuv ntaus rog, kuv thiaj muaj peevxwm tua tau rab hneevnti uas muaj zog kawg nkaus. Tus TSWV, koj tsomkwm kuv thiab cawm kuv dim; koj txojkev pab ua rau kuv muaj hwjchim loj. Koj tsomkwm tsis pub luag ntes tau kuv, thiab kuv tsis ntog ib zaug li. Kuv caum kuv cov yeebncuab thiab tua yeej lawv; kuv tsis tso tseg mus txog thaum kuv ua rau lawv puastsuaj tas. Kuv muab lawv ntaus ntog tas thiab lawv yeej sawv tsis taus li; lawv pw nrom siav nrag ntawm kuv kotaw. Koj txhawb kuv lub zog, kuv thiaj muaj zog sib tua hauv tshavrog, thiab pub kuv yeej kuv cov yeebncuab. Koj ua rau kuv cov yeebncuab khiav tawm ntawm kuv hauv ntej mus; kuv ua rau txhua tus uas ntxub kuv raug puastsuaj tas huv tibsi. Lawv nrhiav kev pab, tiamsis tsis muaj leejtwg pab lawv; lawv thov tus TSWV, tiamsis nws tsis teb lawv. Kuv muab lawv tsoo tawg mos nyoos ib yam li tej hmoov av; kuv tsuj lawv ib yam li tsuj tej av nkos hauv plawv kev. Koj cawm kuv dim ntawm cov neeg uas ntxeev siab rau kuv, thiab koj cia kuv ua tus kav ntau haivneeg; tej haivneeg uas kuv tsis tau paub dua los nimno twb los zwm rau kuv lawm. Tej neeg txawv tebchaws los tuaj qhau hau hawm kuv huv tibsi; thaum lawv hnov kuv hais, lawv yeej hwm thiab mloog kuv tej lus. Lawv qaug zog thiab tawm tej tus tshee na hauv lawv tej chaw nyob tuaj. Tus TSWV uas muaj sia nyob, ua tsaug uas koj yog tus tsomkwm kuv. Cia li piav Vajtswv tus uas cawm kuv lub koob kom nrov ncha moo lug! Nws pab kuv tua yeej kuv cov yeebncuab; nws muab ntau haivneeg rau kuv kav thiab cawm kuv dim ntawm kuv cov yeebncuab. Tus TSWV, koj pab kuv tua yeej kuv cov yeebncuab lawm tiag, thiab pab kuv dim ntawm cov neeg limhiam uas tuaj txov kuv. Yog li ntawd, kuv ua koj tsaug tabmeeg txhua haivneeg; kuv hu nkauj qhua koj tib leeg xwb. Vajtswv pab nws tus vajntxwv muaj yeej loj kawg nkaus li; nws yeej hlub tus uas nws xaiv tseg lawm; nws hlub Daviv thiab Daviv cov xeebntxwv, mus ibtxhis li. Yexais tus tub Daviv yog tus uas Vajtswv tsa ua tus muaj hwjchim loj kawg nkaus, nws yog tus uas Yakhauj tus Vajtswv xaiv los ua vajntxwv, thiab nws yog tus uas sau cov nkauj uas zoo tshaj plaws rau cov Yixalayees hu. Tej lus no yog Daviv cov lus hais thaum kawg: Tus TSWV tus ntsujplig hais rau kuv; nws tej lus nyob ntawm kuv tus nplaig. Cov Yixalayees tus Vajtswv tau hais tseg lawm; tus uas tsomkwm cov Yixalayees hais li no rau kuv: “Tus vajntxwv uas kav ncaj ncees thiab kav los ntawm txojkev hwm Vajtswv, nws zoo ib yam li lub hnub ci thaum sawv ntxov uas tsis muaj huab li, yog lub hnub uas ua rau tej nroj tsuag ci ntsais tsias thaum los nag tas.” Vajtswv yuav foom koob hmoov ntau npaug rau kuv cov xeebntxwv, rau qhov nws tau coglus ruaj khov rau kuv mus ibtxhis, thiab lo lus cog tseg ntawd yuav tsis muab rhuav ib zaug li, yog lo lus cog tseg uas tsis txawj hloov. Tej ntawd yog tej uas kuv xav tau, qhov ntawd yuav yog kuv txojkev muaj yeej; thiab Vajtswv yuav muab tej ntawd rau kuv raws li nws coglus tseg. Tiamsis cov neeg tsis hwm Vajtswv, lawv zoo ib yam li tej pos uas muab sua povtseg; tsis muaj neeg xav muab tes kov li lawm. Nej yuav tsum muab cuabyeej hlau lossis hmuv hlau mus sua lawm xwb; lawv yuav raug hlawv kub hnyiab kom tas dulug. Cov neeg no yog Daviv cov tubrog uas nto moo tej npe: tus ib yog Yauses Npasenpes uas nyob hauv lub nroog Takhemoos ua tus thawjcoj ntawm “Peb Leeg”; nws muab nws tus hmuv nrog yim pua leej txivneej sib nkaug thiab nws muab lawv nkaug tuag tas rau hauv tshavrog. Tus ob uas nto moo ntawm peb leeg ntawd, yog Daudaus tus tub Ele-axas uas yog cuab Ahaus. Muaj ib hnub nws thiab Daviv twv nrog cov Filitees uas tabtom tuaj sib txoos ua ke rau ntawm tshavrog. Cov Yixalayees swb thim rov qab, tiamsis Ele-axas sawv nres nroos tua cov Filitees mus txog thaum nws tsaug npab thiab tsa tsis tau nws rab ntaj lawm. Hnub ntawd tus TSWV muaj yeej loj kawg li. Tom qab uas tej ntawd dhau lawm, cov Yixalayees mam li rov los rau hauv qhov chaw uas Ele-axas nyob, thiab los hle cov neeg uas Ele-axas tua tuag tej ris tsho hlau. Tus peb uas nto moo ntawm peb leeg ntawd yog Akhees tus tub Samas uas nyob hauv lub nroog Halales. Cov Filitees tuaj txoos ua ke rau ntawm Lehis uas yog ib thaj teb taum mog. Cov Yixalayees khiav cov Filitees, tiamsis Samas sawv nres nroos ntawm nws lub chaw hauv thaj teb ntawd tiv thiab tua cov Filitees. Hnub ntawd tus TSWV muaj yeej loj kawg li. Thaum yuav txog lub caij sau qoobloo peb leeg ntawm “Peb Caug Leej” ntawd, txawm nqis mus rau nram lub qhov tsua Adulas, qhov chaw uas Daviv nyob, thaum ntawd cov Filitees tabtom tuaj tsuam yeej nyob rau hauv lub Hav Lefayees. Lub sijhawm ntawd, Daviv mus nyob saum roob thiab muaj ib pab tubrog Filitees kav hlo lub nroog Npelehees. Daviv nco tsev heev, nws thiaj seev hais tias, “Yuav ua li cas kuv thiaj txib tau ib tug mus ce cov dej hauv lub qhovtshij uas nyob ntawm roojvag nroog Npelehees los rau kuv haus!” Ces peb tug tubrog uas nto moo ntawd, thiaj li khiav ceev heev mus phua plhawv cov Filitees lub yeej, mus ce cov dej hauv lub qhovtshij uas nyob ntawm lub roojvag nroog Npelehees thiab nqa los rau Daviv. Tiamsis Daviv tsis kam haus cov dej ntawd; nws muab hliv fij rau tus TSWV, Daviv hais tias, “Thov kuv tus Vajtswv txwv tsis txhob pub kuv haus cov dej no! Puas tsimnyog kuv haus cov ntshav uas yog cov neeg no txojsia? Vim lawv muab lawv txojsia mus pauv thiaj nqa tau cov dej no los.” Nws thiaj tsis kam haus cov dej ntawd. Tej no yog peb tug tubrog uas muaj siab tawv ntawd mus nqa tau los. Anpisais uas yog Yau-am tus kwv (nkawd niam hu ua Xeluyas), ua tus thawj ntawm “Peb Caug Leej uas nto moo ntawd.” Nws siv nws rab ntaj tua peb puas leej txivneej thiab muab lawv tua tuag tas huv tibsi, nws thiaj yog tus uas nto moo ntawm “Peb Caug Leej” ntawd. Nws yog tus uas nto moo tshaj ntawm “Peb Caug Leej” ntawd, thiab nws tau ua lawv tus thawjcoj, tiamsis nws tseem nto moo tsis npaum li “Peb Leeg” ntawd thiab. Yehauyadas tus tub Npenayas uas nyob hauv lub nroog Kaxees tuaj, nws yog ib tug uas nto moo heev thiab; nws muaj siab tawv ua tau ntau yam zoo, nws tua ob tug tubrog Mau-am uas ua tau kawg nkaus tuag huv tibsi lawm. Muaj ib hnub uas los daus hlob heev, nws tseem nqis mus tua tau ib tug tsov ntxhuav hauv qhov av los thiab. Thiab nws tseem tua ib tug tubrog Iziv uas loj heev tuag. Tus neeg Iziv ntawd nqa ib rab hmuv, tiamsis Npenayas muab qws ntaus tus neeg Iziv ntawd, thiab txeeb taus nws rab hmuv ntawm nws tes los, thiab muab tus tubrog Iziv ntawd nkaug tuag lawm. Tej ntawd twb yog tes haujlwm uas Npenayas ua, nws yog ib tug ntawm “Peb Caug Leeg” ntawd. Nws yog ib tu uas nto moo heev ntawm “Peb Caug leej,” tiamsis nws tseem tsis nto moo npaum li “Peb Leeg” ntawd thiab. Daviv thiaj tsa nws ua tus saib cov tubrog uas zov Daviv. Muaj ib zaug tus TSWV chim heev rau cov Yixalayees, tus TSWV thiaj tshoov Daviv siab kom nws ua rau lawv tau kev txomnyem. Tus TSWV hais rau Daviv hais tias, “Koj cia li mus suav kom tagnrho cov Yixalayees thiab cov Yudas saib muaj npaum li cas.” Yog li ntawd, Daviv thiaj hais rau Yau-am uas yog nws tus thawj tubrog hais tias, “Koj cia li coj koj cov nomtswv nrog koj mus txheeb cov Yixalayees txhua xeem npe thoob plaws hauv lub tebchaws sab tom no mus ti nkaus sab tom ub. Kuv xav paub saib peb muaj pejxeem coob npaum li cas.” Tiamsis Yau-am teb vajntxwv hais tias, “Vajntxwv, thov kom tus TSWV uas yog koj tus Vajtswv pub cov pejxeem Yixalayees huamvam coob dua qub ib puas npaug ntxiv rau cov uas tamsim no muaj lawm, thiab thov kom koj muaj sia nyob ntev pom nws ua tej no. Tiamsis vajntxwv, vim li cas koj thiaj xav kom ua tej no?” Vajntxwv hais tawv qhawv kom Yau-am thiab nws cov nomtswv ua raws li vajntxwv tej lus xwb, lawv thiaj tawm mus suav cov pejxeem Yixalayees lawm. Lawv mus hla tus dej Yauladees thiab mus so rau ntawm lub nroog Alu-es sab nrad, lub nroog ntawd nyob hauv plawv lub hav uas yog xeem Khas cheebtsam av. Lawv thiaj tawm ntawm qhov chaw ntawd nce toj mus rau sab qaumteb pem Yaxeles, thiab mus rau hauv lub nroog Nkile-as, mus rau hauv lub nroog Kades uas nyob hauv cov Hitis cheebtsam av. Dhau ntawd, lawv mus rau hauv lub nroog Das, thiab lawv tawm hauv Das lub nroog mus rau sab hnub poob mus txog rau hauv lub nroog Xidoos. Ces lawv mus rau sab qabteb, mus txog rau hauv lub nroog Tiles uas muaj ntsa yeej thaiv, thiab lawv ncig mus txhua nrho cov Hivis thiab cov Kana-as tej nroog, thaum kawg lawv los txog rau hauv lub nroog Npesenpas uas nyob hauv lub xeev Yudas sab qabteb. Yog li ntawd, lawv thiaj mus ncig thoob plaws lub tebchaws tau cuaj lub hlis thiab nees nkaum hnub, lawv mam li rov los txog rau hauv lub nroog Yeluxalees. Lawv los qhia rau vajntxwv hais tias, cov Yixalayees tej txivneej uas ua taus tubrog muaj yim puas txhiab leej thiab cov Yudas muaj tsib puas txhiab leej. Tiamsis tom qab uas Daviv txheeb npe tas lawm, nws nyuaj siab kawg li, nws hais rau tus TSWV hais tias, “Kuv ua li no mas yog kuv ua txhaum loj heev lawm. Thov koj zam txim rau kuv rau qhov kuv tau ua tej yam uas ruam kawg li.” Nkas thiaj mus ntsib Daviv thiab piav tus TSWV tej lus rau Daviv mloog raws li tus TSWV hais, thiab nug hais tias, “Saib koj yuav xaiv yam twg? Koj yuav cia koj lub tebchaws raug kev tshaib nqis peb xyoos lossis yuav cia koj khiav nkaum koj cov yeebncuab peb lub hlis lossis yuav cia kab mob aws mob ntsha los raug koj lub tebchaws peb hnub? Koj cia li ua tib zoo xav thiab qhia rau kuv paub, kuv yuav coj koj tej lus mus qhia rau tus TSWV.” Daviv teb hais tias, “Nyuaj kuv siab kawg li! Tiamsis kuv tsis xav cia neeg rau txim rau peb. Thov cia tus TSWV tib leeg rau txim rau peb xwb, rau qhov nws muaj lub siab hlub.” Yog li ntawd, tus TSWV thiaj tso kab mob aws los rau cov Yixalayees, pib kiag thaum sawv ntxov mus txog rau thaum lub sijhawm uas nws teem tseg. Txij ntua sab tebchaws tom no mus tis nkaus rau sab tebchaws tom ub, cov Yixalayees tuag xya caum txhiab leej. Thaum Vajtswv tus timtswv tabtom yuav rhuav lub nroog Yeluxalees, tus TSWV hloov siab qhov uas nws rau txim rau cov neeg uas nyob hauv thiab hais rau tus timtswv uas tua lawv ntawd hais tias, “Tso tseg, txaus lawm!” Thaum ntawd tus timtswv tabtom los ncaj rau saum Alaunas uas yog cov neeg Yenpus lub tshav ntaus nplej. Daviv pom tus timtswv uas los tua cov neeg ntawd, nws thiaj hais rau tus TSWV hais tias, “Kuv yog tus ua txhaum. Kuv tib leeg thiaj yog tus ua txhaum xwb. Cov neeg txomnyem no tau ua txhaum dabtsi thiab? Koj cia li rau txim rau kuv thiab kuv tsevneeg nkaus xwb.” Hnub ntawd Nkas mus cuag Daviv thiab hais rau Daviv hais tias, “Koj cia li mus pem Alaunas lub tshav ntaus nplej thiab ua ib lub thaj rau tus TSWV.” Daviv mloog tus TSWV lus thiab mus ua raws li Nkas hais rau nws lawm. Thaum Alaunas pom dheev vajntxwv thiab cov nomtswv tuaj cuag Alaunas. Alaunas txhos caug ntua rau hauv av ntawm Daviv xubntiag thiab nug hais tias, “Vajntxwv, vim li cas koj tuaj ntawm no?” Daviv teb hais tias, “Kuv tuaj thov muas koj lub tshav ntaus nplej ua chaw teeb ib lub thaj rau tus TSWV, thov kom nws tsis txhob tso tej kab mob aws los rau peb ntxiv lawm.” Alaunas hais tias, “Vajntxwv, kuv muab pub rau koj, kom koj thiaj tau chaw fij khoom rau tus TSWV raws li koj pom zoo. Koj cia li muab cov heev nyuj no tua hlawv rau saum lub thaj fij rau tus TSWV; koj muab cov nyuj no tej quab thiab tej txiag ntaus nplej los ua taws rauv.” Alaunas muab tagnrho tej ntawd rau vajntxwv thiab hais rau vajntxwv hais tias, “Thov kom tus TSWV uas yog koj tus Vajtswv lees yuav koj tej khoom fij.” Tiamsis vajntxwv teb hais tias, “Tsis ua li ntawd, kuv yuav them nqi kom txaus rau koj. Kuv yuav tsis muab yam uas kuv tsis tau tshwm nqi fij rau tus TSWV uas yog kuv tus Vajtswv li.” Ces vajntxwv thiaj muab tau tsib caug daim nyiaj yuav Alaunas lub tshav ntaus nplej thiab cov heev nyuj ntawd. Ces Daviv ua lub thaj rau tus TSWV thiab tua tsiaj hlawv fij theej txhoj thiab fij ua kev sib raug zoo. Tus TSWV teb Daviv tej lus thov, ces tej kab mob aws mob ntsha uas raug cov Yixalayees thiaj tseg kiag lawm. Thaum Vajntxwv Daviv laus heev lawm, txawm yog muab pam rau nws vov tuab npaum li cas los yeej tsis sov nws li. Yog li ntawd, Daviv cov nomtswv thiaj hais rau Daviv hais tias, “Vajntxwv, thov koj tso lus rau peb mus nrhiav ib tug ntxhais nkaujxwb los nrog koj nyob tu koj thiab pw hauv koj xubntiag kom sov koj.” Lawv thiaj mus xyuas tej hluas nkauj uas zoo nkauj tshaj plaws hauv tebchaws Yixalayees, lawv pom ib tug hluas nkauj nyob hauv Sunees. Nws npe hu ua Anpisas thiab yog ib tug uas zoo nkauj heev, lawv txawm coj nws los rau vajntxwv. Txawm yog Anpisas zoo nkauj heev thiab nws zov rawv tu vajntxwv xwb los vajntxwv yeej tsis nrog nws pw ua niamtxiv li lawm. Nws mus sablaj rau Yau-am (tus uas nws niam hu ua Xeluyas) thiab sablaj rau Anpiyathas uas yog tus povthawj, mas nkawd pom zoo pab nws ntag. Tiamsis tus povthawj Xadaus, Npenayas uas yog Yehauyadas tus tub, Nathas uas yog tus cev Vajtswv lus, Sime-is, Le-is thiab cov tubrog uas zov Daviv tsis kam tuaj Adauniyas tog. Muaj ib hnub Adauniyas mus tua yaj, tua nyuj, thiab tua tej menyuam nyuj uas rog rog fij rau saum lub Pobzeb Nab, ze rau ntawm lub qhovdej Elaunkees. Nws caw Vajntxwv Daviv cov tub ibtxhia thiab vajntxwv cov nomtswv uas nyob hauv lub xeev Yudas tuaj nrog nws koom rooj mov ntawd, tiamsis nws tsis caw nws tus kwv nrab Xalumoos lossis Nathas uas yog tus cev Vajtswv lus lossis Npenayas lossis cov tubrog uas zov vajntxwv ib tug li. Nathas mus cuag Npasenpas uas yog Xalumoos niam, thiab nug hais tias, “Koj tsis hnov hais tias Hankis tus tub Adauniyas, nws twb tsa nws ua vajntxwv lawm los? Thiab Vajntxwv Daviv yeej tsis paub dabtsi txog zaj no li. Yog koj xav tseg koj thiab koj tus tub Xalumoos txojsia, mas kuv yuav pab koj tuav tswvyim, koj cia li mus cuag Vajntxwv Daviv tamsim no thiab nug hais tias, ‘Vajntxwv, koj twb yog tus coglus tseg ruaj khov rau kuv lawm hais tias, koj yuav cia kuv tus tub Xalumoos ua vajntxwv hloov koj chaw no ne? Yog li cas nimno Adauniyas twb ua vajntxwv lawm?’ ” Nathas hais ntxiv hais tias, “Ces thaum koj tseem tabtom nrog Vajntxwv Daviv sib tham, kuv yuav lawv koj qab tuaj thiab pab ua timkhawv rau koj txog zaj no.” Yog li ntawd, Npasenpas thiaj mus cuag vajntxwv rau hauv nws lub txaj. Vajntxwv laus heev lawm, mas Anpisas uas yog tus hluas nkauj nyob hauv Sunees tuaj nyob rawv hauv tu vajntxwv. Npasenpas mus txhos caug ntua nyo hau ntshis hawm vajntxwv, vajntxwv nug hais tias, “Koj xav tau dabtsi?” Npasenpas teb hais tias, “Vajntxwv, koj twb tuav tus TSWV uas yog koj tus Vajtswv lub npe coglus ruaj khov tseg rau kuv lawm hais tias, koj yuav cia kuv tus tub Xalumoos ua vajntxwv hloov koj chaw tom qab koj. Tiamsis nimno Adauniyas twb sawv ua vajntxwv lawm, thiab koj twb tsis paub txog zaj no hlo li. Nws muab ntau tus nyuj, ntau tus yaj thiab tej menyuam nyuj uas rog rog tua hlawv ua khoom fij thiab nws caw koj cov tub ibtxhia, tus povthawj Anpiyathas, thiab Yau-am uas yog koj tus thawj tubrog mus koom nws rooj mov ntawd, tiamsis nws tsis caw koj tus tub Xalumoos li. Vajntxwv, tagnrho tsoom pejxeem Yixalayees puavleej tos ntsoov koj, saib koj yuav qhia lawv hais tias koj tsa leejtwg los ua vajntxwv hloov koj chaw. Yog koj tsis mob siab rau zaj no, ntshai thaum dua koj lawm, luag yuav ntxeev siab ua phem rau kuv tus tub Xalumoos thiab kuv.” Thaum Npasenpas tseem tabtom hais tej lus no, Nathas txawm tuaj txog ntua hauv loog. Ces muaj neeg mus hais rau vajntxwv hais tias, Nathas uas yog tus cev Vajtswv lus tuaj cuag koj, Nathas txawm mus rau hauv thiab txhos caug ntua ntawm vajntxwv xubntiag. Ces Nathas hais tias, “Vajntxwv, koj puas tau hais kom tsa Adauniyas ua vajntxwv hloov koj? Hnub no nws twb mus muab ntau tus nyuj, ntau tus yaj thiab tej menyuam nyuj uas rog rog tua hlawv ua khoom fij. Nws caw tagnrho koj cov tub, Yau-am uas yog koj tus thawj tubrog, thiab tus povthawj Anpiyathas, tamsim no lawv tabtom nrog nws noj haus thiab qw ntshoo nrooj hais tias, ‘Thov kom Vajntxwv Adauniyas muaj sia nyob txhiab niaj mus pua xyoo!’ Tiamsis nws tsis caw kuv lossis tus povthawj Xadaus lossis Npenayas lossis Xalumoos li. Vajntxwv, koj twb tso cai rau lawv ua tej no, ua cas koj tsis qhia rau koj tej nomtswv paub hais tias tus twg yog tus los ua vajntxwv hloov koj chaw?” Vajntxwv Daviv teb hais tias, “Cia li mus hu Npasenpas rov los hauv no.” Vajntxwv hais rau Npasenpas hais tias, “Kuv coglus rau koj ntawm tus TSWV uas muaj sia nyob thiab yog tus uas cawm kuv dim ntawm kuv tej kev txomnyem, mas hnub no kuv yuav tsa koj tus tub Xalumoos ua vajntxwv hloov kuv chaw raws li tej lus uas kuv tuav tus TSWV uas yog cov Yixalayees tus Vajtswv lub npe coglus tseg rau koj lawm.” Npasenpas nyo hau ntshis hawm thiab hais tias, “Thov kom vajntxwv uas yog kuv tus tswv muaj txojsia nyob mus ibtxhis tsis kawg lauj!” Vajntxwv Daviv tso neeg mus hu Xadaus, Nathas thiab Npenayas kom tuaj cuag nws. Thaum lawv tuaj txog hauv lub loog lawm, vajntxwv hais rau lawv hais tias, “Nej coj kuv cov nomtswv uas saib xyuas kuv tej haujlwm nrog nej mus thiab muab kuv tus neesluav rau kuv tus tub Xalumoos caij, thiab coj nws nqis mus lawm nram lub qhovdej Nkihoos, kom Xadaus thiab Nathas nkawd muab roj hliv rau saum nws taubhau tsa nws ua cov Yixalayees tus vajntxwv. Nej cia li tshuab raj tshuab xyu thiab qw hais tias, ‘Thov kom vajntxwv Xalumoos muaj sia nyob txhiab niaj mus pua xyoo!’ Thiab nej cia li nrog nws los, nws yuav los zaum saum kuv lub zwmtxwv hloov kuv chaw. Kuv yuav tsa nws ua tus kav tagnrho cov Yixalayees thiab cov Yudas.” Npenayas teb hais tias, “Kuv yuav ua kom tiav raws li koj hais ko. Thov tus TSWV uas yog koj tus Vajtswv pab kom muaj raws li ntawd. Tus TSWV nrog nraim vajntxwv nyob li cas thov kom nws nrog nraim Xalumoos nyob ib yam li ntawd, thiab thov kom nws kev tswjhwm tseem vammeej tshaj ntu uas koj tswjhwm.” Yog li ntawd, Xadaus, Nathas, Npenayas thiab cov tubrog uas zov vajntxwv thiaj li muab Xalumoos tsaws caij Vajntxwv Daviv tus neesluav thiab coj nws nqis mus rau nram lub qhovdej Nkihoos. Tus cevlus Xadaus muab hwj roj txiv ntoo uas nws nqa hauv tus TSWV lub Tsevntaub los hliv rau saum Xalumoos taubhau. Ces lawv txawm tshuab raj tshuab xyu, thiab tagnrho cov pejxeem sawvdaws qw ntshoo nrooj hais tias, “Thov kom Vajntxwv Xalumoos muaj sia nyob txhiab niaj mus pua xyoo lauj!” Ces lawv sawvdaws raws Xalumoos qab los, qw lomzem zoo siab thiab tshuab raj tshuab xyu nrov doog diaj ua av ntseeg nkaws los tsev. Thaum Adauniyas thiab nws cov qhua uas tseem tabtom noj mov yuav tas, lawv puavleej hnov suab raj suab xyu nrov. Adauniyas txawm nug hais tias, “Tej suab uas nrov doog diaj tom nroog tuaj yog dabtsi?” Thaum uas nws tseem hais lus tsis tau xaus, tus povthawj Anpiyathas tus tub Yaunathas tuaj txog ntua. Ces Adauniyas txawm hu hais tias, “Koj cia li los ntawm no, koj yeej yog neeg zoo, mas koj yuav coj tej xov zoo tuaj qhia rau kuv paub.” Yaunathas teb hais tias, “Tsis yog li koj hais ko. Vajntxwv Daviv twb tsa Xalumoos ua vajntxwv lawm. Nws tso Xadaus, Nathas, Npenayas thiab cov tubrog uas zov vajntxwv coj Xalumoos mus. Lawv muab nws tsaws caij vajntxwv tus neesluav, ces Xadaus thiab Nathas twb muab roj hliv rau nws taubhau tsa nws ua vajntxwv nram lub qhovdej Nkihoos lawm. Lawv sawvdaws thiaj rov los rau hauv nroog, lawv qw ntshoo nrooj zoo siab kawg, thiab tamsim no cov pejxeem tabtom qw muaj kev lomzem heev. Mas yog cov suab uas puagta koj hnov ntawd ntag. Nimno Xalumoos twb ua vajntxwv lawm. Tsis yog li ntawd xwb, cov nomtswv puavleej mus hawm Vajntxwv Daviv thiab hais rau nws hais tias, ‘Thov koj tus Vajtswv ua rau Xalumoos lub npe nyob muaj koob muaj meej tshaj koj, thiab thov kom Xalumoos kev tswjhwm vammeej tshaj ntu uas koj tswjhwm.’ Ces Vajntxwv Daviv txawm nyo ntshis rau saum nws lub txaj pehawm thiab thov hais tias, ‘Peb cia li ua tus TSWV uas yog cov Yixalayees tus Vajtswv tsaug, hnub no nws pub kuv cajces ib tug los ua vajntxwv hloov kuv chaw, thiab tseem cia kuv muaj sia nyob tau pom kiag ntag!’ ” Ces Adauniyas cov qhua ntshai heev, lawv txawm cia li sawv khiav nyias mus nyias tsev tas lawm. Adauniyas ntshai Xalumoos heev, nws thiaj khiav mus rau tom tus TSWV lub Tsevntaub thiab tuav ob tug kub saum lub thaj. Muaj neeg mus hais rau Xalumoos hais tias Adauniyas ntshai koj kawg li, nws tabtom mus tuav ob tug kub saum lub thaj thiab hais tias, “Hnub no thov kom Vajntxwv Xalumoos coglus rau kuv hais tias nws yuav tsis tua nws tus tubtxib povtseg.” Xalumoos teb hais tias, “Yog nws ua neeg ncaj ncees, txawm yog nws ib txoj nyuag plaubhau los yeej yuav tsis tu li; tiamsis yog nws ua neeg ntxeev siab rau kuv, ces nws yeej yuav raug tua tuag xwb.” Vajntxwv Xalumoos tso neeg mus coj Adauniyas nqis saum lub thaj los. Adauniyas thiaj los cuag vajntxwv thiab nyo ntshis hawm nws, thiab vajntxwv hais rau nws hais tias, “Koj cia li mus tsev.” Thaum Daviv yuav tuag, nws hu nws tus tub Xalumoos los ntuas thiab cob haujlwm rau Xalumoos zaum kawg hais tias, “Twb txog lub sijhawm uas kuv yuav tso lub ntiajteb no tseg lawm. Koj cia li ua siab tawv qhawv, ua raws li tus TSWV uas yog koj tus Vajtswv kom koj ua. Thiab coj raws li nws tej kevcai thiab tej lus samhwm uas muab sau tseg rau hauv Mauxes phau Kevcai, koj thiaj yuav vammeej, tsis hais koj ua dabtsi lossis koj yuav mus qhov twg. Tus TSWV yuav ua raws li tej lus uas nws cog tseg rau kuv hais tias, ‘Yog koj cov tubki ua neeg ncaj ncees thiab coj raws li kuv tej lus qhia kawg siab kawg ntsws kawg plab kawg plawv, mas koj cajces yuav tsis tu tus neeg uas zaum saum cov Yixalayees lub zwmtxwv ib zaug li.’ “Dua li ntawd ntxiv, koj twb yeej paub lawm hais tias Yau-am tau ua li cas rau kuv. Nws tau tua cov Yixalayees ob tug thawj tubrog, Neles tus tub Aneles thiab Yethes tus tub Amaxas. Koj nco ntsoov hais tias nws tua nkawd povtseg thaum lub tebchaws muaj kev thajyeeb pauj tej neeg uas nkawd tua thaum lub tebchaws tseem ua tsov ua rog. Nws tua cov neeg uas tsis muaj txim, mas nimno kuv thiaj tau ris lub txim uas nws ua ntawd thiab raug kev txomnyem ntsuav li no. Koj yeej paub hais tias, koj yuav tsum ua li cas rau nws lawm; koj tsis txhob pub nws tuag sov siab so li. “Koj yuav tsum ua siab dawb siab zoo rau Npaxilais tus uas yog neeg Nkile-as cov tub thiab saib xyuas lawv, rau qhov lawv tau ua zoo heev rau kuv thaum uas kuv khiav mus nkaum koj tus tijlaug Axaloos. “Hnub uas kuv mus rau hauv lub nroog Mahana-ees, Nkelas tus tub Sime-is uas yog xeem Npeenyamees uas nyob hauv lub nroog Npahulees tau tsawm foom kuv phem kawg li, tiamsis thaum nws tuaj tos kuv tom tus dej Yauladees, kuv tau tuav tus TSWV lub npe coglus rau nws hais tias, kuv yuav tsis tua nws povtseg. Tiamsis nimno, koj tsis txhob cia nws dim dawb dim do. Koj yog neeg txawj ntse, koj yeej paub hais tias tsimnyog koj yuav ua li cas rau nws lawm, koj cia li muab nws tua povtseg.” Daviv txawm tuag thiab luag coj nws mus faus rau hauv Daviv lub nroog. Daviv ua vajntxwv kav lub tebchaws Yixalayees tau plaub caug xyoo, nws nyob hauv lub nroog Henploos kav tau xya xyoo thiab nyob hauv lub nroog Yeluxalees kav tau peb caug peb xyoo. Xalumoos ua vajntxwv hloov nws txiv Daviv chaw, thiab nws muaj hwjchim loj kav lub tebchaws nyob ruaj khov. Adauniyas uas yog Hankis tus tub mus cuag Npasenpas uas yog Xalumoos niam. Npasenpas nug hais tias, “Puas yog koj tuaj ncaj tuaj ncees?” Adauniyas teb hais tias, “Kuv yeej tuaj ncaj tuaj ncees,” thiab nws hais ntxiv hais tias, “Kuv muaj lo puav lus xav nug koj.” Npasenpas teb hais tias, “Koj xav nug dabtsi?” Adauniyas teb hais tias, “Koj yeej paub hais tias kuv yuav tsum tau ua vajntxwv thiab txhua tus neeg Yixalayees yeej pom zoo cia kuv ua. Tiamsis muaj tej yam txawv heev tshwm tuaj hais tias kuv tus kwv tau ua vajntxwv lawm, rau qhov yog tus TSWV pom zoo. Mas nimno kuv xav yuav ib yam ntawm koj, thov koj muab rau kuv.” Npasenpas nug hais tias, “Yog dabtsi?” Adauniyas teb hais tias, “Koj cia li mus thov Xalumoos kom nws muab Anpisas uas yog tus hluas nkauj Sunees rau kuv yuav ua pojniam, rau qhov kuv paub hais tias Xalumoos yuav ua li koj hais.” Npasenpas teb hais tias, “Ua li ntawd, kuv mam mus pab koj thov vajntxwv.” Yog li ntawd, Npasenpas thiaj mus cuag vajntxwv thiab coj Adauniyas cov lus mus hais rau Xalumoos. Vajntxwv sawv los hais lus zoo siab tos txais nws niam thiab nyo ntshis hawm nws niam. Xalumoos txawm mus zaum saum nws lub zwmtxwv thiab nws muab ib lub rooj los rau nws niam zaum ntawm nws sab xis. Npasenpas hais tias, “Kuv muaj mentsis lus tseemceeb xav hais rau koj, thov koj teb rau kuv.” Xalumoos teb hais tias, “Niam koj yuav hais dabtsi? Kuv yeej yuav mloog koj hais.” Npasenpas hais tias, “Koj cia li muab Anpisas rau koj tus tijlaug Adauniyas yuav ua pojniam.” Vajntxwv nug hais tias, “Vim li cas koj tuaj thov kom kuv muab Anpisas rau Adauniyas yuav? Koj cia li thov kom kuv muab hlo kuv lub meejmom vajntxwv rau nws huv tibsi! Rau qhov nws yog kuv tus tijlaug thiab tus povthawj Anpiyathas thiab Yau-am los twb tuaj nws tog lawm!” Ces Xalumoos thiaj tuav tus TSWV lub npe coglus hais tias, “Yog kuv tsis muab Adauniyas tua povtseg pauj qhov uas nws thov no, ces thov Vajtswv muab kuv tua povtseg! Tus TSWV yog tus tsa kuv muaj meejmom los zaum saum kuv txiv lub zwmtxwv; Vajtswv tau ua raws li nws tej lus cog tseg thiab muab lub tebchaws no rau kuv thiab kuv cov xeebntxwv kav. Kuv thov coglus rau tus TSWV uas muaj sia nyob hais tias Adauniyas yuav tsum tuag hnub no.” Yog li ntawd, Vajntxwv Xalumoos thiaj kom Npenayas mus muab Adauniyas tua tuag lawm. Vajntxwv Xalumoos hais rau tus povthawj Anpiyathas hais tias, “Koj cia li rov qab mus nyob hauv koj lub nroog Anathaus uas yog koj lub zos. Koj yeej tsimnyog tuag lawm, tiamsis kuv yuav tsis tua kom koj tuag tamsim no, vim thaum koj nrog kuv txiv Daviv nyob, koj tau ua tus saib lub Phijxab uas ntim Vajtswv tej lus cog tseg, thiab koj tau nrog kuv txiv tiv tej kev nyuaj siab ntxhov plawv los lawm.” Ces Xalumoos muab Anpiyathas rho tawm tsis pub ua povthawj ua tus TSWV tes haujlwm ntxiv lawm, thiab yeej muaj tseeb raws li tej lus uas tus TSWV tau hais txog Elis thiab nws cov xeebntxwv hauv lub nroog Silaus lawm. Thaum Yau-am hnov dheev hais tias muaj tej xwm no lawm. (Nws yog tus uas tuaj Adauniyas tog, tiamsis nws tsis tuaj Axaloos tog.) Nws txawm khiav mus rau tom tus TSWV lub Tsevntaub thiab mus tuav ob tug kub saum lub thaj. Muaj neeg mus qhia rau Vajntxwv Xalumoos hais tias, “Yau-am khiav mus rau tom tus TSWV lub Tsevntaub thiab mus sawv ntawm lub thaj lawm.” Xalumoos thiaj hais rau Yehauyadas tus tub Npenayas hais tias, “Koj cia li mus muab Yau-am tua povtseg.” Npenayas thiaj mus rau ntawm tus TSWV lub Tsevntaub thiab hais rau Yau-am hais tias, “Vajntxwv hais kom koj cia li tawm los.” Yau-am teb hais tias, “Kuv tsis los, kuv yuav tuag rau ntawm no xwb.” Npenayas thiaj rov los piav Yau-am tej lus rau vajntxwv mloog. Xalumoos hais tias, “Kavtsij mus ua li nws hais ntag, muab nws tua thiab muab faus kiag xwb, kom kuv lossis Daviv cov xeebntxwv thiaj tsis tau ris lub txim uas Yau-am tua cov neeg tsis muaj txim ntawd ntxiv lawm. Tus TSWV yuav rau txim rau Yau-am, vim tej kev tua neeg uas nws txhob txwm tua tsis pub kuv txiv Daviv paub. Yau-am tau muab Neles tus tub Aneles uas yog cov Yixalayees tus thawj tubrog thiab Yetheles tus tub Amaxas uas yog cov Yudas tus thawj tubrog uas ncaj ncees thiab tsimtxiaj tshaj nws tua povtseg lawm. Lub txim tua neeg ntawd thiaj poob los rau Yau-am thiab nws cov xeebntxwv mus ibtxhis li. Tiamsis tus TSWV yuav tsa Daviv cov xeebntxwv los zaum saum Daviv lub zwmtxwv mus li.” Yog li ntawd, Npenayas thiaj mus rau tom tus TSWV lub Tsevntaub thiab muab Yau-am tua tuag lawm, thiab muab nws faus rau hauv nws lub tsev uas nyob tom ntug nroog. Vajntxwv thiaj tsa Npenayas uas yog cov Yudas tus thawj tubrog hloov Yau-am chaw thiab muab tus povthawj Xadaus hloov Anpiyathas chaw. Vajntxwv hais mus rau Sime-is hais tias, “Koj cia li ua ib lub tsev rau hauv lub nroog Yeluxalees no rau koj nyob. Koj nyob hauv tsev thiab tsis txhob tawm hauv lub nroog mus qhov twg li. Yog koj tseem tawm thiab hla tus Dej Kiloos mus rau sab tid, mas koj yeej yuav raug tua tuag xwb, thiab koj cov ntshav yuav rov los ywg koj taubhau.” Sime-is teb hais tias, “Ua li ntawd los mas vajntxwv, kuv yuav ua raws li koj hais ntag.” Yog li ntawd, nws thiaj nyob hauv lub nroog Yeluxalees tau ntev heev. Tau peb xyoo tom qab no, Sime-is ob tug tubqhe khiav mus cuag Ma-akas tus tub Akhises uas ua vajntxwv kav lub nroog Nkas. Thaum Sime-is hnov hais tias nkawd nyob hauv lub nroog Nkas, nws txawm muab eeb nog rau nws tus neesluav thiab caij mus cuag Vajntxwv Akhises hauv lub nroog Nkas, mus nrhiav nws ob tug tubqhe. Nws nrhiav tau nkawd thiab coj nkawd rov los tsev. Thaum Xalumoos hnov txog tej uas Sime-is tau ua ntawd, nws thiaj hais mus rau Sime-is hais tias, “Kuv puas tau tuav tus TSWV lub npe coglus rau koj hais tias tsis pub koj tawm hauv lub nroog Yeluxalees no mus rau sab nraud li. Thiab kuv twb ceebtoom rau koj hais tias yog koj tawm hauv no mus, koj yuav raug tua tuag. Koj twb yeej los zoo siab li ntawd thiab koj hais tias, koj yuav mloog kuv lus no ne? Yog li cas koj yuav rhuav koj tej lus cog tseg thiab tsis mloog kuv tej lus samhwm li? Koj yeej paub txhua yam uas koj tau ua txhaum rau kuv txiv lawm. Tus TSWV yuav rau txim rau koj vim lub txim ntawd. Tiamsis nws yuav foom koom hmoov rau kuv thiab nws yuav ua kom Daviv lub tebchaws nyob ruaj khov mus ibtxhis li.” Ces vajntxwv thiaj kom Npenayas mus muab Sime-is tua povtseg lawm. Txij thaum ntawd los Xalumoos kev tswjhwm thiaj nyob thajyeeb lug li lawm. Xalumoos mus yuav Falaus uas yog cov Iziv tus vajntxwv tus ntxhais los ua pojniam kom cog tau kev phoojywg. Nws coj tus pojniam ntawd los nyob rau hauv Daviv lub nroog mus txog thaum nws ua tau nws lub loog, ua tau lub Tuamtsev thiab ua tau tus ntsa yeej uas thaiv lub nroog Yeluxalees tiav lawm. Thaum ntawd tseem tsis tau ua lub Tuamtsev rau tus TSWV, mas cov Yixalayees sawvdaws thiaj pheej mus tua tsiaj hlawv fij nyob saum tej ncov roob xwb. Xalumoos muab siab npuab tus TSWV thiab ua raws li nws txiv Daviv tej lus qhuab ntuas, tsuas yog nws tseem pheej mus tua tsiaj thiab hlawv hmoov tshuaj tsw qab fij saum tej ncov roob xwb. Muaj ib hnub Xalumoos mus tua tsiaj fij nyob pem Nkinpe-oos rau qhov lub thaj tseemceeb tshaj plaws nyob qhov ntawd. Nws twb yeej mus tua txog li ib txhiab tus tsiaj hlawv fij rau saum lub thaj ntawd lawm. Hmo ntawd tus TSWV los tshwm rau nws pom hauv nruab npau suav hauv Nkinpe-oos thiab hais rau nws hais tias, “Koj xav kom kuv muab dabtsi rau koj?” Xalumoos teb hais tias, “Koj yeej ibtxwm hlub kuv txiv Daviv uas yog koj tus tubtxib, thiab nws yeej ibtxwm ua zoo, muab siab npuab koj thiab muaj kev ncaj ncees nrog koj sib raug zoo. Koj tseem hlub nws los txog niaj hnub no tsis tso nws tseg, hnub no koj thiaj tsa nws tus tub los hloov nws chaw. Tus TSWV uas yog Vajtswv, koj tsa kuv ua vajntxwv hloov kuv txiv chaw, txawm yog kuv tseem hluas thiab tsis muaj tswvyim tswj lub tebchaws no los xijpeem. Nimno kuv nrog cov neeg uas koj tau xaiv tseg ua koj tug lawm nyob, cov neeg no coob heev tsis muaj leejtwg suav txheeb li. Yog li ntawd, thov koj pub kom kuv muaj tswvyim tswjhwm koj haivneeg ncaj ncees thiab paub qhov phem qhov zoo. Yog kuv tsis muaj tswvyim, kuv yuav ua li cas tswjhwm tau koj haivneeg uas coob heev no?” Tus TSWV txaus siab heev rau tej uas Xalumoos thov no, yog li ntawd, nws thiaj hais rau Xalumoos hais tias, “Vim koj thov kom kuv pub tswvyim rau koj tswjhwm lub tebchaws mus rau qhov ncaj ncees, tiamsis koj tsis tau thov kom koj muaj sia nyob ntev lossis muaj nyiaj muaj txiaj lossis kom koj tej yeebncuab tuag, mas kuv yuav muab tej uas koj thov ntawd rau koj. Kuv yuav pub kom koj muaj tswvyim thiab txawj ntse tshaj tej neeg uas nyob ua ntej koj lossis cov uas nyob tom qab koj. Kuv tseem yuav muab tej uas koj tsis thov pub huv tibsi rau koj thiab: koj yuav muaj txiag npluanuj thiab muaj meejmom mus tas koj tiam neej, tshaj luag lwm tus vajntxwv huv tibsi. Yog koj mloog kuv lus, ceev kuv tej kevcai thiab tej lus samhwm ib yam li koj txiv Daviv tau ua los lawm, kuv yuav pub kom koj muaj sia ua neej nyob ntev.” Xalumoos tsim dheev los, nws paub hais tias yog Vajtswv los hais rau nws hauv nruab npau suav. Ces nws txawm rov los rau hauv lub nroog Yeluxalees thiab mus sawv ntawm lub Phijxab uas ntim Vajtswv tej lus cog tseg thiab muab tsiaj tua hlawv fij thiab fij khoom ua kev sib raug zoo rau tus TSWV, thiab tom qab ntawd nws ua ib rooj mov rau nws cov nomtswv sawvdaws noj. Muaj ib hnub ob tug niamntiav tuaj cuag Vajntxwv Xalumoos tim ntsej tim muag. Muaj ib tug hais tias, “Vajntxwv, tus pojniam no thiab kuv koom nyob ua ke hauv ib lub tsev, thaum nws los nrog kuv nyob tsis ntev, kuv txawm yug tau kuv tus tub hauv lub tsev ntawd. Tau ob hnub tom qab uas kuv yug tau kuv tus tub, nws txawm yug tau ib tug tub thiab. Hauv lub tsev ntawd tsuas muaj wb ob leeg nyob xwb, tsis muaj leejtwg nrog wb nyob li. Ces muaj ib hmos nws txawm pw tsuam nws tus menyuam tuag lawm. Hmo ntawd thaum kuv tseem tsaug zog, nws txawm sawv los tsaws kuv tus menyuam ntawm kuv ib sab coj mus rau ntawm nws lub txaj lawm, ces nws txawm muab nws tus menyuam uas tuag lawm los tso rau ntawm kuv lub txaj. Tagkis sawv ntxov, thaum kuv tsim los thiab muab mis rau kuv tus menyuam noj, ua ciav nws twb tuag lawm. Kuv mam ua tib zoo saib tseeb tseeb no ua cas tsis yog kuv tus menyuam.” Tiamsis tus pojniam i hais tias, “Twb tsis yog los sav! Tus menyuam uas tuag lawm yeej yog koj tus, tus uas tseem ciaj yog kuv tus!” Thawj tus pojniam txawm teb ntua hais tias, “Tsis yog li ntawd! Tus menyuam uas tuag yeej yog koj tus, tus uas tseem ciaj yeej yog kuv tus tiag!” Nkawd txawm sib cav ntawg ntiag tabmeeg vajntxwv. Ces Vajntxwv Xalumoos txawm hais tias, “Neb nyias taus nyias txeeb hais tias, tus ciaj yog kuv tus thiab tsis muaj leejtwg lees hais tias tus tuag ntawd yog nws tus li.” Vajntxwv thiaj kom muab ib rab ntaj los rau nws, thaum lawv nqa rab ntaj los cev rau vajntxwv lawm, nws hais tias, “Muab tus menyuam uas tseem ciaj phua ua ob sab thiab muab faib rau ob tug pojniam no ib leeg ib sab.” Ces tus uas yog leej niam tiag, nws mob siab thiab hlub nws tus tub heev, nws thiaj li hais rau vajntxwv hais tias, “Vajntxwv, thov koj tsis txhob tua tus metub no! Cia li muab rau nws yuav xwb!” Tiamsis tus pojniam i teb hais tias, “Tsis txhob muab nws rau wb ib leeg tus twg li; cia li muab nws phua kiag ua ob sab xwb.” Ces Xalumoos hais tias, “Tsis txhob muab tus menyuam no tua! Cia li muab rau thawj tug pojniam, nws yeej yog leej niam tiag.” Thaum cov Yixalayees hnov Xalumoos txiav rooj plaub ntawd, lawv sawvdaws ntshai thiab hwm nws heev, rau qhov lawv paub hais tias yog Vajtswv pub tswvyim rau nws txiav plaub ntug ncaj ncees tiag. Xalumoos ua vajntxwv kav lub tebchaws Yixalayees, thiab cov no yog nws cov nomtswv: Tus povthawj yog Xadaus uas yog Axaliyas tus tub; Ob tug teev ntawv yog Sisas ob tug tub Elihaules thiab Ahiyas; Tus saib tej ntaub ntawv yog Ahilus tus tub Yehausafas; Tus thawj tubrog yog Yehauyadas tus tub Npenayas; Ob tug povthawj yog Xadaus thiab Anpiyathas; Tus thawj ntawm cov tswvxeev yog Nathas tus tub Axaliyas; Vajntxwv tus tuavxam yog Nathas tus tub Xanpus uas yog tus povthawj; Tus uas saib cov tubtxib hauv lub loog yog Ahisas; Tus uas saib cov ua haujlwm yog Anpidas tus tub Adaunilas. Xalumoos tsa kaum ob leeg txivneej los ua tswvxeev kav cov Yixalayees txhua lub xeev. Lawv yog cov coj zaub mov hauv tej cheebtsam tuaj rau vajntxwv thiab nws tsevneeg noj. Ib tug tswvxeev coj zaub mov tuaj rau vajntxwv tsevneeg ib xyoos twb ib hlis. Ntawm no mus yog kaum ob tug tswvxeev ntawd cov npe thiab tej cheebtsam uas lawv saib: Npehus: saib sablaj roob Efalayees Npedekes: saib lub nroog Makaxes, Sa-anpimes Npethes Semes, Eloos thiab Npethes Hanas Npehexes saib lub nroog Alunpus, Xukaus thiab tagnrho cheebtsam Hefeles; Npenanpinadas (tus uas yuav Xalumoos tus ntxhais Tafas) saib tagnrho cheebtsam Dules; Ahilus tus tub Npa-anas yog tus saib lub nroog Ta-anas, Menkidaus thiab tagnrho cheebtsam uas nyob ze Npethes Se-as, thiab ze rau ntawm lub nroog Xalethas sab qabteb ntawm lub nroog Yexelees, mus txog ntua rau tim lub nroog Anpees Mehaulas thiab tim lub nroog Yaumees; Npenkenpes saib lub nroog Lamaus-nkile-as thiab cov zos uas nyob hauv cheebtsam Nkile-as uas yog Manaxes tus tub Yailes tus xeebntxwv tug, thiab cheebtsam Ankaunpes hauv lub xeev Npasas, tagnrho rau caum lub nroog loj uas muaj ntsa yeej thaiv khov kho thiab muaj tej nqaj roojvag tooj; Idaus tus tub Ahinadas saib cheebtsam Mahana-ees; Ahima-as (tus uas yuav Xalumoos tus txhais Npasemas) saib cheebtsam Nafetalis; Husais tus tub Npa-anas saib cheebtsam Aseles thiab lub nroog Npe-alaus; Palu-as tus tub Yehausafas saib cheebtsam uas cov Ixakhas nyob; Elas tus tub Sime-is saib cheebtsam uas cov Npeenyamees nyob; Ulis tus tub Nkenpeles saib cheebtsam Nkili-as uas cov Amaules tus Vajntxwv Xihoos kav thiab cheebtsam Npasas uas Vajntxwv Aunkas kav. Dua li kaum ob tug tswvxeev no lawm, tseem muaj ib tug thawj uas saib tagnrho lub tebchaws thiab. Cov Yudas thiab cov Yixalayees huamvam coob ib yam li tej suabzeb nram ntug hiavtxwv; lawv muaj noj muaj haus thiab muaj kev zoo siab kawg li. Xalumoos kav tagnrho cov tebchaws uas nyob ibncig ze ntawd, txij ntua ntawm tus dej Efalates mus txog rau tim tebchaws Filitees thiab mus txog rau nram Iziv tus ciamteb. Lawv puavleej them se rau Xalumoos thiab ua nws qhev mus tas nws tiam neej ntawd li. Tej zaub mov uas Xalumoos xav tau txhua hnub yog ib puas tsib caug tawb hmoov nplej thiab peb puas tawb zaub; kaum tus nyuj rog rog uas hwv hauv nkuaj, nees nkaum tus nyuj uas tso rau hauv tshav zaub thiab ib puas tus yaj. Dua li ntawd, tseem muaj maum muaslwj, kauv, phaw muaslwj thiab qaibsis. Xalumoos kav tagnrho cov tebchaws uas nyob sab hnubpoob txij ntua ntawm tus dej Efalates mus txog rau ntawm lub nroog Nkaxas. Tagnrho cov vajntxwv uas nyob sab hnubpoob ntawm tus dej Efalates puavleej coj khoom tuaj rau Xalumoos, thiab nws mus cog kev phoojywg nrog tej tebchaws nruab ze tagnrho. Txij li Xalumoos tiam, cov Yudas thiab cov Yixalayees ua neej nyob kaj siab lug, txhua yim nyias thiaj cog muaj nyias txiv hmab thiab txiv ncuavpias. Xalumoos muaj plaub caug txhiab lub nkuaj nees kaw nws cov nees luag tsheb thiab muaj kaum ob txhiab tus tubrog caij nees. Xalumoos kaum ob tug tswvxeev, ib tug twg raug ua haujlwm rau nws ib lub hlis, yog muab tej zaub mov uas Vajntxwv Xalumoos xav tau coj tuaj rau nws, kom cov neeg uas nyob hauv lub loog tau noj; lawv muab txhua yam uas Xalumoos xav tau tuaj rau nws. Thiab txhua tus tswvxeev puavleej coj lawv tej nplej thiab quavnyab npleg pub nees tuaj rau ntawm qhov chaw uas cia tej ntawd rau cov nees luag tsheb thiab cov nees uas siv ua lwm yam haujlwm tau noj. Vajtswv pub rau Xalumoos muaj tswvyim thiab kev txawj ntse tob heev ntsuas tsis tau thiab ntau ib yam li tej suabzeb nram ntug hiavtxwv. Xalumoos ntse tshaj cov tub txawg tub ntse uas nyob sab hnubtuaj lossis tej tub txawg tub ntse uas nyob nram tebchaws Iziv lawm thiab. Nws ntse tshaj lwm tus txivneej huv tibsi: ntse tshaj Ethas uas yog neeg Exelas, Hemas, Kakaus thiab Dadas uas yog Mahaules cov tub, thiab Xalumoos lub koob meej nrov ncha moo lug mus thoob plaws tej tebchaws uas nyob ibncig ntawd. Nws sau tau peb txhiab zaj pajlug thiab ib txhiab tsib zaj nkauj. Nws hais txog tej ntoo thiab tej nroj tsuag, tej ntoo ciab pem roob Lenpanoos mus rau tej nroj hixauv uas tuaj ntawm tej ntsa yeej; nws hais txog tej tsiaj, tej noog, tej kab thiab tej ntses huv tibsi. Tagnrho tej vajntxwv uas nyob hauv ntiajteb no puavleej hnov Xalumoos tej tswvyim thiab xa lawv cov neeg tuaj mloog Xalumoos piav nws tej kev txawj ntse. Vajntxwv Hilas uas kav lub nroog Tiles yeej ibtxwm nrog Daviv ua phoojywg, thaum nws hnov hais tias Xalumoos tau ua vajntxwv hloov nws txiv Daviv chaw lawm, Hilas thiaj tso ib co nomtswv tuaj cuag Xalumoos. Xalumoos thiaj xa xov rov mus rau Hilas hais tias, “Koj yeej paub kuv txiv Daviv ibtxwm ua rog rau nws cov yeebncuab uas nyob hauv tej tebchaws ibncig nws, mas nws thiaj tsis muaj cuabkav ua lub Tuamtsev ua qhov chaw pehawm tus TSWV uas yog nws tus Vajtswv mus txog thaum tus TSWV pub nws ntaus yeej tagnrho nws cov yeebncuab lawm. Tiamsis nimno, tus TSWV uas yog kuv tus Vajtswv pub rau kuv lub tebchaws nyob thajyeeb thoob plaws txhua phab huv tibsi. Kuv tsis muaj yeebncuab thiab tsis muaj kev sib ntaus sib tua uas txaus ntshai lawm. Tus TSWV coglus tseg rau kuv txiv Daviv hais tias, ‘Koj tus tub uas kuv yuav tsa ua vajntxwv hloov koj chaw, nws yog tus uas yuav ua lub Tuamtsev rau kuv.’ Yog li ntawd, nimno kuv thiaj npaj ua lub tuamtsev, kom tau qhov chaw pehawm tus TSWV uas yog kuv tus Vajtswv. Yog li ntawd, thov koj cov neeg mus txiav cov ntoo ciab pem roob Lenpanoos xa tuaj rau kuv. Kuv cov neeg yuav nrog lawv ua haujlwm ua ke, thiab kuv yuav them nqi rau koj cov neeg raws li koj pom zoo. Koj yeej paub hais tias kuv cov neeg yeej ibtxwm tsis txawj ntov ntoo li koj cov.” Thaum Hilas tau hnov Xalumoos cov lus no lawm, nws txaus siab heev, Hilas hais tias, “Hnub no ua tus TSWV tsaug rau qhov nws pub Daviv muaj ib tug tub ntse heev los ua vajntxwv hloov nws chaw kav haivneeg uas coob tshaj plaws lawm.” Ces Hilas txawm xa xov rov mus rau Xalumoos hais tias, “Kuv tau txais koj cov lus lawm, kuv zoo siab ua raws li koj tej lus thov. Kuv yuav muab cov ntoo ciab thiab ntoo thuv tuaj pub rau koj. Kuv cov neeg yuav luag cov ntoo saum roob Lenpanoos mus rau nram hiavtxwv thiab yuav muab pav nquam raws ntug dej tuaj kom txog qhov chaw uas koj tau teem tseg. Kuv cov neeg mam muab daws, muab teeb ua ke, thiab muab cob rau koj cov neeg. Ces thov koj xa zaub mov tuaj pub kuv cov neeg noj xwb tau lawm.” Hilas thiaj li xa ntoo ciab thiab ntoo thuv tuaj rau Xalumoos raws li nws xav tau, thiab ib xyoo twg Xalumoos xa ib puas txhiab tawb nplej thiab xa cov roj txiv ntoo uas tsis xyaw lwm yam li ib puas kaum txhiab thoob mus rau Hilas cov neeg tau noj. Tus TSWV pub tswvyim rau Xalumoos raws li tus TSWV tau coglus tseg lawm. Hilas thiab Xalumoos muaj kev sib raug zoo heev, nkawd thiaj li coglus ua phoojywg. Vajntxwv Xalumoos sau tau peb caug txhiab leej txivneej nyob thoob plaws hauv tebchaws Yixalayees tuaj ua tub zog, thiab nws tsa Adaunilas ua tus saib cov tub zog ntawd. Nws muab lawv faib ua peb pab, ib pab kaum txhiab leej, thiab muab lawv sib hloov ua haujlwm, ib pab mus ua haujlwm pem roob Lenpanoos ib hlis thiab rov los tsev ob hlis. Xalumoos tseem muaj dua yim caum txhiab leej txivneej ua haujlwm txaug pobzeb pem laj roob, thiab xya caum txhiab leej txivneej ua cov nqa pobzeb, thiab nws tsa peb txhiab peb puas leej ua cov saib thiab qhia lawv ua haujlwm. Vajntxwv Xalumoos samhwm kom lawv yuav tsum txiav tej daim txiag zeb loj thiab zoo nkauj los pua lub plag Tuamtsev. Xalumoos thiab Hilas cov tub zog thiab cov neeg uas nyob hauv lub nroog Npinpelaus sib pab nroos txaug pobzeb thiab txiav ntoo los ua lub Tuamtsev. Thaum Xalumoos ua vajntxwv kav tebchaws Yixalayees tau plaub xyoos, xyoo plaub thaum lub ob hlis ntuj uas hu ua hli Xiv, Xalumoos txawm pib ua lub Tuamtsev. Suav txij thaum cov Yixalayees khiav nram tebchaws Iziv los txog lub sijhawm uas Xalumoos ua lub Tuamtsev ntawd tau plaub puas yim caum xyoo. Lub Tuamtsev sab hauv nruab nrog ntev rau caum tshim, dav peb caug tshim thiab siab peb caug tshim. Chav ntawm lub qhovrooj mus rau hauv, tob kaum tshim, ntev nees nkaum tshim, thiab dav ib yam li chav dawbhuv. Lub Tuamtsev muaj qhovrai thoob plaws txhua sab phabntsa. Tej qhovrai ntawd sab nraud nqaim dua sab hauv. Lub Tuamtsev sab nraud tseem muaj dua peb txheej uas yog sab qaum tsev thiab ob tog, ib txheej twg siab tsib tshim. Txheej hauv qab kawg, ib chav twg dav tsib tshim, txheej nruab nrab, ib chav twg dav rau tshim, thiab txheej kawg saum ub, ib chav twg dav xya tshim. Lub Tuamtsev tej phabntsa ob txheej saud xov nyias dua txheej hauv qab, tej chav ntawd ib txheej txawb rau ib txheej tsis muaj nqaj ntoo ntsia tuav tej phabntsa ntawd li. Tej pobzeb uas ua lub Tuamtsev ntawd, yeej txaug tau zoo zoo ntawm qhov chaw txaug los lawm. Yog li ntawd, thaum coj los ua thiaj tsis muaj suab rauj, suab taus lossis lwm yam suab cuabyeej nrov li. Lub qhovrooj txheej hauv qab uas nyob ntawm lub Tuamtsev sab nrad, muaj ntaiv nce mus rau saum txheej ob thiab txheej peb. Xalumoos muab tej txiag ntoo thuv los ntsia vov thoob plaws sab hauv. Yog li ntawd, Vajntxwv Xalumoos thiaj ua lub Tuamtsev tiav lawm. Peb txheej uas nws ua ncig lub Tuamtsev sab nraud, ib txheej twg siab tsib tshim, thiab muab tej txiag ntoo thuv los ntsia npuab khov kho rau. Tus TSWV hais rau Xalumoos hais tias, “Hais txog lub Tuamtsev uas koj tabtom ua ntawd, yog koj ua raws li kuv tej kevcai thiab mloog kuv tej lus samhwm, kuv yuav pab koj raws li tej lus uas kuv tau cog tseg rau koj txiv Daviv lawm. Kuv yuav nrog nraim kuv haivneeg Yixalayees nyob hauv lub Tuamtsev uas koj ua no, thiab kuv yuav tsis tso lawv tseg ib zaug li.” Xalumoos ua lub Tuamtsev tiav lawm. Sab phabntsa hauv lub Tuamtsev puavleej muab tej txiag ntoo thuv xov hauv taw mus nto plaws rau saum qab nthab, thiab muab tej txiag ntoo ciab los pua thoob plaws lub plag tse. Chav hauv nruab nrog uas hu ua Chav Dawbhuv kawg nkaus, yog chav uas nyob tom qab hauv lub Tuamtsev, chav ntawd qhov ntev muaj nees nkaum tshim thiab puavleej muab txiag ntoo thuv xov hauv taw mus nto plaws rau saum qab nthab. Chav uas nyob ntawm hauv ntej chav Dawbhuv kawg nkaus ntev plaub caug tshim. Tej txiag ntoo thuv uas xov lub Tuamtsev mas puavleej muab txaug txaij nraug zees ua duab plhuaj taub thiab ua duab paj ntoos huv tibsi; sab hauv nruab nrog xov txiag ntoo thuv thoob plaws tsis pom ib qhov ntsa pobzeb tshwm li. Chav uas ua rau hauv lub Tuamtsev tom qab kawg nkaus, yog chav uas muab lub Phijxab uas ntim Vajtswv tej lus cog tseg coj mus tso rau hauv. Chav no ntev nees nkaum tshim, dav nees nkaum tshim thiab siab nees nkaum tshim, yog muab kub vuam thoob plaws. Xalumoos muab txiag ntoo thuv ntsia npuab thoob plaws lub thaj. Muab kub vuam thoob plaws lub Tuamtsev sab hauv thiab muab tej saw kub cab hla txojkev uas mus rau hauv chav dawbhuv uas muab kub vuam thoob plaws ntawd. Xalumoos muab kub vuam lub Tuamtsev sab hauv thoob plaws, ib yam li lub thaj uas nyob hauv Chav Dawbhuv kawg nkaus. Muab ntoo roj txaug ua ob tug qhelunpees uas muaj tis txawb rau hauv Chav Dawbhuv kawg nkaus, ib tug twg siab kaum tshim. Lawv muab ob tug qhelunpees ntawd coj mus txawb sib ncag zos rau hauv chav Dawbhuv kawg nkaus kom ob tug qhelunpees ntawd nthuav tis tuaj sib cob rau hauv nruab nrab, thiab dua li ob sab tis nthuav mus ti nkaus rau tim phabntsa. Ob tug qhelunpees ntawd puavleej muab kub vuam thoob plaws huv tibsi. Cov phabntsa hauv chav loj thiab hauv chav Dawbhuv, mas luag muab txaug ua duab qhelunpees, ua tej tsob toovlaj thiab ua paj ntoos txaij nraug zees zoo nkauj kawg li. Txawm yog lub plag tse los yeej vuam kub thoob plaws thiab. Muab ntoo roj ua ob daim txiag qhovrooj rau lub qhovrooj uas mus hauv chav Dawbhuv kawg nkaus; lub qhovrooj ntawd saum kawg luag muab txaug ua tsib ceg. Ob daim txiag qhovrooj ntawd los yeej muab txaug ua duab qhelunpees, ua duab toovlaj thiab ua paj ntoos txaij raug zees zoo nkauj kawg li. Luag muab kub vuam rau cov duab qhelunpees thiab cov duab toovlaj uas txaug rau ntawm ob daim txiag qhovrooj ntawd huv tibsi. Luag muab ntoo roj ua ob tug ncej qhovrooj rau lub qhovrooj uas mus rau hauv chav loj, lub qhovrooj ntawd ua plaub fab. Luag muab ntoo ciab ua ob daim txiag qhovrooj kaw tuaj sib twb thiab muab txaug ua duab qhelunpees, ua duab toovlaj thiab ua paj ntoos txaij nraug zees zoo nkauj kawg li, thiab muab kub vuam rau huv tibsi. Chav loj uas nyob ntawm lub Tuamtsev hauv ntej, mas luag xov peb txheej pobzeb, ib txheej pobzeb twg, xov ib txheej txiag ntoo thuv quas. Xalumoos ua vajntxwv tau plaub xyoo, ces xyoo plaub thaum lub ob hlis ntuj uas hu ua hli Xiv, nws txawm pib ua lub Tuamtsev. Xalumoos ua vajntxwv kav tau kaum ib xyoos rau thaum lub yim hli ntuj uas hu ua hli Npules, ces nws ua lub Tuamtsev tiav rau thaum ntawd raws li nws tau npaj tseg lawm. Xalumoos ua lub Tuamtsev ntawd tau xya xyoo thiaj li tiav. Xalumoos tseem ua tau ib lub loog rau nws, thiab nws siv sijhawm kaum peb xyoos ua lub loog ntawd thiaj li tiav. Ib sab phabntsa twg muaj peb leej qhovrai. Cov ncej qhovrooj thiab cov qhovrai, puavleej ua plaub fab, thiab peb leej qhovrai ntawm txhua sab phabntsa puavleej nyob sib ncag zos. Chav uas txhos cov ncej zeb ntev tsib caug tshim thiab dav peb caug tshim. Chav ntawd muaj ib lub momkaum thiab muaj cov ncej zeb txheem pab. Chav ntawm lub zwmtxwv hu ua chav txiav txim. Yog chav uas Xalumoos txiav plaub ntug. Chav ntawd muab cov txiag ntoo thuv xov hauv taw ntsa mus nto plaws rau saum qab nthab. Muaj dua ib ceg tsev nyob rau sab tom qab chav txiav plaub ntug, yog chav uas Xalumoos nyob. Chav ntawd ua zoo ib yam li lwm chav thiab. Xalumoos tseem ua dua ib lub tsev zoo ib yam li lub ntawd rau nws tus pojniam uas yog cov Iziv tus vajntxwv tus ntxhais nyob thiab. Tagnrho tej chav tsev ntawd, thiab chav loj uas tu plaub ntug puavleej muab tej txiag zeb xov hauv taw ntsa mus nto plaws rau saum qhovmuag tsev. Cov pobzeb ntawd, luag yeej ntsuas haum tom chaw khawb pobzeb lawm; luag muab kaw, kaw sab hauv thiab sab nraud huv tibsi. Tej plag tse los yog muab tej daim txiag zeb dav heev uas txaug tom chaw khawb pobzeb los pua, muaj tej daim ntev yim tshim thiab muaj tej daim ntev kaum tshim. Luag tseem muab dua ib co txiag zeb uas ntsuas txiav tau haum lawm, thiab ib co txiag ntoo thuv uas zoo heev los pua tshooj rau saum cov plag tse ntawd. Chav hauv lub loog, chav hauv plawv lub Tuamtsev, thiab chav uas ua kev mus rau hauv lub Tuamtsev cov phabntsa ib txheej yog txiag ntoo thuv thiab peb txheej yog txiag zeb. Vajntxwv Xalumoos tso neeg mus hu ib tug txivneej npe hu ua Hulas hauv lub nroog Tiles tuaj cuag nws. Hulas yog ib tug kws nchuav tooj. Hulas txiv yog neeg Tiles, nws txiv tuag ntxov ntxov lawm; Hulas niam yog neeg Nafetalis, Hulas yog ib tug neeg muaj tswvyim thiab txawj nchuav tooj heev. Nws tau lees Vajntxwv Xalumoos tej lus caw thiab tuaj ua tes haujlwm nchuav tooj. Hulas nchuav tau ob tug ncej tooj zoo ib yam nkaus, ib tug twg siab kaum yim tshim thiab qhov loj yog kaum ob tshim. Thiab nws tseem nchuav tau ob lub hau dhos rau saum ob tug hau ncej, ib lub hau twg siab tsib tshim. Nws nchuav ob txoj saw tooj dai rau saum ob tug hau ncej thiab muab tooj nchuav tau ob tsham tswb zoo li txiv ntsiavkws dai rau saum thiab. Ob lub hau ntawd zoo ib yam li tej paj lilis, siab plaub tshim, thiab muab dhos rau saum ob tug hau ncej nrog ob txoj saw tooj. Ib tsham tswb twg muaj ob puas lub dai ibncig rau lub hau, thiab ib tug ncej twg dai ob tsham tswb. Hulas muab ob tug ncej tooj ntawd txhos rau ntawm hauv ntej uas yuav mus rau hauv lub Tuamtsev: tus ncej sab nrad hu ua Yakhees thiab tus ncej sab pem hu ua Npau-as. Cov paj tooj lilis ntawd muab dai rau saum ob lub hau ncej tooj. Ces tes haujlwm uas Hulas nchuav ob tug ncej tooj tiav li ntawd. Hulas muab tooj nchuav tau ib lub rhawv kheej kheej, siab tsib tshim, sab npoo no rau sab npoo tid lub nrog dav kaum tshim, thiab lub cheeb muaj peb caug tshim. Nws muab tooj nchuav ua ob lub thi los thi puagncig lub ncauj rhawv sab nraud; ob lub thi ntawd nchuav nrog lub rhawv. Hulas muab lub rhawv ntawd txawb rau saum kaum ob tug nyuj tooj nraubqaum uas tig taubhau rau sab nraud, peb tug nyuj twg tig taubhau ua ke mus rau ib sab. Lub rhawv ntawd tus npoo tuab li peb nti thoob plaws, tus ntug zoo li tej npoo khob, Hulas muab zaj ntug nraud zaig txaij nraug zees nthuav zoo li lub paj lilis. Lub rhawv ntawd ntim tau kwvyees li ob txhiab thoob dej. Hulas tseem nchuav tau kaum lub tsheb tooj; ib lub twg ntev plaub tshim, dav plaub tshim thiab siab peb tshim. Lawv txua ib co tab ua plaub fab ntsia rau uas yog muab txaug ua tej duab tsov ntxhuav, tej duab nyuj thiab ua duab qhelunpees rau saum cov txiag; thiab hauv qab cov tab. Cov txiag uas muaj tej duab tsov ntxhuav thiab tej duab nyuj, mas muab txaug ua qabqwj txaij nraug zees rau. Ib lub tsheb twg muaj plaub lub log tooj thiab ob tug nqaj, thiab muaj ncej txheem plaub ceg kaum; cov ncej ntawd muab txaug ua qabqwj txaij nraug zees thoob plaws. Lub ncauj rhawv ua lub kheej kheej, txij ntua ntawm lub npoo tsheb rau saum, siab ib tshim thiab tog uas dhos rau hauv lub tsheb ntev ib dos. Thiab muab lub ncauj zaig thoob plaws. Cov log siab ib tshim thiab ib dos; thiab cov log ntawd puavleej nyob hauv qab cov txiag, thiab cov nqaj yeej muab ntsia rau cov tsheb ua ke li lawm. Cov log zoo ib yam li tej log tsheb nees; cov nqaj, cov thi, cov kauj thiab cov khwb log puavleej yog muab tooj nchuav ua. Ib lub tsheb twg muaj plaub tug ncej txheem hauv qab plaub ceg kaum tuaj uas yog muab ntsia rau ntawm lub tsheb. Txhua lub tsheb muaj ib tug ntug nkhaus vos ncig thoob plaws siab ib dos; cov ntug thiab cov txiag puavleej muab ntsia rau ntawm lub tsheb. Cov ncej thiab cov txiag muab txaug ua duab qhelunpees, duab tsov ntxhuav, duab toovlaj rau txhua qhov uas seem chaw, thiab muab txaug txaij nraug zees thoob plaws. Tej uas hais tas no, yog hais txog qhov ua cov tsheb ntawd zoo li cas; cov tsheb no nchuav zoo ib yam, loj sib luag thiab siab sib txig. Hulas tseem nchuav dua kaum lub rhawv tooj, ib lub rhawv rau ib lub tsheb. Ib lub rhawv twg lub nrog muaj plaub tshim thiab ntim tau tsib caug thoob dej. Nws muab tsib lub coj mus teeb rau ntawm lub Tuamtsev sab qabteb thiab muab tsib lub coj mus teeb rau ntawm lub Tuamtsev sab qaumteb; lub rhawv tooj loj muab teeb rau tom ces kaum sab hnubtuaj qabteb. Vajntxwv ua tej no hauv lub Hav Yauladees uas nyob ntu nruab nrab ntawm Xukaus thiab Xalethas. Xalumoos tsis tau muab tej cuabyeej no luj saib hnyav pestsawg, rau qhov ntau dhau lawm. Yog li ntawd, cov tooj uas muab ua tej cuabyeej ntawd hnyav npaum li cas los tsis muaj leejtwg paub li. Xalumoos tseem muaj ib co rooj tog kub rau hauv lub Tuamtsev li nram qab no: lub thaj, lub rooj rau ncuav fij rau tus TSWV, kaum tus ncej teeb uas txawb rau hauv chav Dawbhuv kawg nkaus hauv ntej, tsib lub txawb rau sab ped thiab tsib lub txawb rau sab nrad, tej paj, tej teeb thiab tej ciaj, tej khob, tej txiab txiav teebxeeb, tej ntim, tej tais rau tshuaj tsw qab thiab cov laujkaub rau ncaig taws thiab cov ntsia liaj rooj rau chav Dawbhuv thiab rau chav sab nraum lub Tuamtsev no. Tagnrho tej khoom siv no puavleej yog muab kub nchuav xwb. Thaum Vajntxwv Xalumoos ua lub Tuamtsev txhua yam tiav tas lawm, nws muab tagnrho tej nyiaj, tej kub thiab tej khoom uas nws txiv Daviv muab fij rau Vajtswv lawm coj mus cia rau hauv tej chav rau khoom hauv lub Tuamtsev. Tom qab ntawd, Vajntxwv Xalumoos hu tagnrho cov Yixalayees txhua tus thawjcoj ntawm txhua xeem thiab txhua cuab kwvtij tuaj cuag nws rau hauv lub nroog Yeluxalees kom lawv mus kwv lub Phijxab uas ntim Vajtswv tej lus cog tseg hauv lub nroog Xi-oos uas yog Daviv lub nroog los tso rau hauv lub Tuamtsev. Lawv tuaj sib sau rau thaum ua kevcai nyob Tsev Pheebsuab uas yog lub hli Ethanees. Thaum cov thawjcoj tuaj txoos ua ke txhij lawm, cov povthawj txawm tsaws lub Phijxab uas ntim Vajtswv tej lus cog tseg thiab kwv los rau hauv lub Tuamtsev. Cov Levis thiab cov povthawj muab tus TSWV lub Tsevntaub thiab tej khoom siv kwv huv tibsi los cia rau hauv lub Tuamtsev. Vajntxwv Xalumoos thiab cov pejxeem tuaj sib sau ua ke rau ntawm lub Phijxab uas ntim Vajtswv tej lus cog tseg thiab muab yaj muab nyuj ntau kawg nkaus suav tsis txheeb los tua fij rau tus TSWV. Ces cov povthawj thiaj kwv lub Phijxab uas ntim Vajtswv tej lus cog tseg mus rau hauv lub Tuamtsev thiab muab tso rau hauv chav Dawbhuv kawg nkaus, hauv qab ob tug qhelunpees ob phab tis. Ob tug qhelunpees ntawd nthuav tis npog lub phijxab thiab ob tug nqaj ntoos uas kwv lub phijxab. Yog leejtwg sawv ncaj sab nram chav Dawbhuv kawg nkaus ntsia mus rau hauv, nws yeej pom ob tug tw nqaj, tiamsis yog tuaj lwm qhov ntsia mus yeej tsis pom li. (Niaj hnub no ob tug nqaj ntoos ntawd tseem nyob.) Yeej tsis muaj lwm yam nyob hauv lub Phijxab ntawd, tsuas yog muaj ob daim txiag zeb uas Mauxes muab ntim rau hauv thaum nyob tom Roob Xinais; ob daim txiag zeb ntawd yog sau Vajtswv tej lus cog tseg uas nws sau rau cov Yixalayees thaum lawv taug kev nram tebchaws Iziv los. Thaum cov povthawj tawm hauv lub Tuamtsev los, ces tamsim ntawd txawm cia li muaj ib tauv huab los roos tsaus nti saum lub Tuamtsev cov povthawj tsis muaj cuabkav rov mus rau hauv lub Tuamtsev li, rau qhov tus TSWV lub tshwjchim ci ntsa iab rau hauv Vajtswv qhov chaw nyob. Vajntxwv Xalumoos thov Vajtswv li no: “Tus TSWV, koj yog tus uas tsim lub hnub rau saum nruab ntug, txawm li ntawd los koj yeej pom zoo nyob hauv tauv huab uas tuab thiab tsaus nti. Nimno kuv twb ua tau lub Tuamtsev uas zoo heev rau koj lawm, Yog qhov chaw rau koj nyob mus ibtxhis tsis kawg li.” Thaum cov pejxeem tseem sawv qhov ntawd, Vajntxwv Xalumoos tig xubntiag los rau ntawm lawv, thiab nws thov Vajtswv foom koob hmoov rau lawv. Nws hais tias, “Cia li qhuas tus TSWV uas yog cov Yixalayees tus Vajtswv! Nws yeej ua raws li tej uas nws tau cog tseg rau kuv txiv Daviv hais tias, ‘Suav txij thaum kuv coj kuv haivneeg tawm nram tebchaws Iziv los, kuv tsis tau xaiv ib lub nroog twg hauv haivneeg Yixalayees txhua xeem los ua lub Tuamtsev ua qhov chaw pehawm kuv li. Tiamsis Daviv, kuv tau xaiv koj los ua tus kav kuv haivneeg.’ ” Xalumoos hais ntxiv hais tias, “Kuv txiv Daviv yeej npaj yuav ua lub tuamtsev kom tau qhov chaw pehawm tus TSWV uas yog cov Yixalayees tus Vajtswv, tiamsis tus TSWV hais rau Daviv hais tias, ‘Qhov uas koj xav ua ib lub tuamtsev rau kuv ntawd yeej yog ib qho zoo heev, tiamsis koj tsis yog tus uas yuav ua lub tuamtsev rau kuv. Koj tus tub uas koj yug yog tus uas yuav ua lub tuamtsev rau kuv.’ “Nimno tus TSWV twb ua raws li tej lus uas nws cog tseg lawm. Kuv thiaj tau los ua cov Yixalayees tus vajntxwv hloov kuv txiv chaw, thiab kuv tau los ua lub Tuamtsev ua qhov chaw pehawm tus TSWV uas yog cov Yixalayees tus Vajtswv. Kuv tseem tau ua ib qho chaw rau hauv lub Tuamtsev los rau lub Phijxab uas ntim ob daim txiag zeb uas nws sau nws tej lus cog tseg rau peb cov yawgkoob thaum nws coj lawv nram tebchaws Iziv los.” Xalumoos mus sawv tabmeeg cov pejxeem sawvdaws rau ntawm lub thaj hauv ntej, nws tsa nws ob txhais tes thiab thov hais tias, “Tus TSWV uas yog cov Yixalayees tus Vajtswv, yeej tsis muaj dua lwm tus vajtswv nyob saum ntuj lossis hauv ntiajteb no zoo li koj! Koj yeej ua raws li koj tej lus cog tseg rau koj haivneeg thiab hlub lawv thaum lawv mloog koj lus kawg siab kawg ntsws. Koj tau ua raws li tej lus uas koj cog tseg rau kuv txiv Daviv, mas hnub no muaj tiav tas raws li koj txhua lo lus lawm tiag. Tus TSWV uas yog cov Yixalayees tus Vajtswv, nimno kuv thov kom koj ua raws li lwm lo lus uas koj tau cog tseg rau kuv txiv hais tias, koj yuav cia nws cov xeebntxwv ua vajntxwv kav cov Yixalayees mus li, yog hais tias lawv ua tib zoo mloog koj tej lus ib yam li nws mloog koj tej lus. Yog li ntawd, cov Yixalayees tus Vajtswv, thov kom txhua yam muaj tseeb raws li tej lus uas koj tau cog tseg rau kuv txiv Daviv uas yog koj tus tubtxib lawm! “Tiamsis Vajtswv, koj yuav ua li cas nyob hauv ntiajteb no? Lub ntuj loj thiab dav tas npaum li ntawd twb tsis txaus koj nyob. Yog li ntawd, lub Tuamtsev uas kuv ua no yuav ua li cas txaus koj nyob? Tus TSWV uas yog kuv tus Vajtswv, kuv yog koj tus tubtxib. Thov koj mloog thiab teb kuv tej lus uas hnub no kuv thov koj. Thov koj tsa qhovmuag saib lub Tuamtsev no nruab hnub hmo ntuj. Qhov no yog qhov chaw uas koj xaiv los rau sawvdaws tuaj pehawm koj. Thaum kuv tig xubntiag tuaj rau lub Tuamtsev no thov koj, thov koj mloog kuv tej lus thov. Thov koj mloog thaum kuv thiab koj haivneeg tig xubntiag tuaj rau ntawm qhov chaw no thov koj, koj nyob hauv koj lub tsev saum ntuj mloog peb tej lus thov thiab zam txim rau peb. “Thaum muaj ib tug neeg twg luag raug liam hais tias, nws ua txhaum rau tej kwvtij zejzog thiab coj nws tuaj tsa tes twv ntawm koj lub thaj hauv lub Tuamtsev no hais tias nws yeej yog neeg ncaj ncees tiag, tus TSWV, koj yog tus nyob saum ntuj, thov koj mloog thiab txiav txim rau koj ob tug tubtxib. Cia li rau txim rau tus uas ua txhaum raws li nws tau ua, thiab thov koj tso tus uas tsis muaj txim. “Thaum koj haivneeg Yixalayees swb lawv tej yeebncuab, vim lawv tau ua txhaum rau koj; tiamsis yog lawv tig rov los cuag koj thiab lawv tuaj rau hauv lub Tuamtsev no lees lawv tej kev txhaum thov koj zam txim, koj nyob saum ntuj, thov koj mloog lawv tej lus thov. Thov zam txim rau koj haivneeg tej kev txhaum thiab coj lawv rov los rau hauv lub tebchaws uas koj twb muab pub rau lawv cov yawgkoob lawm. “Thaum koj tsis tso nag los, vim koj haivneeg tau ua txhaum rau koj, tiamsis yog lawv lees txim thiab tig xubntiag tuaj rau ntawm lub Tuamtsev no thov koj, thaum ntawd thov koj tus uas nyob saum ntuj mloog lawv tej lus thov. Thov koj zam txim rau vajntxwv thiab cov pejxeem Yixalayees thiab qhia lawv kom paub ua lub neej ncaj ncees. Ces tus TSWV thov koj tso nag los rau lub tebchaws uas koj muab pub rau koj haivneeg ua lawv tug mus li lawm. “Yog lub tebchaws muaj kev tshaib kev nqhis lossis muaj kab mob kis lossis tej qoobloo raug puastsuaj vim muaj cua daj cua dub nplawm lossis muaj kooj txomfav noj, lossis thaum koj haivneeg raug lawv cov yeebncuab tawmtsam lossis thaum lawv raug mob lossis muaj mob muaj nkeeg, thov koj mloog lawv tej lus thov. Yog koj haivneeg Yixalayees leejtwg muaj kev nyuaj siab ntxhov plawv thiab tsa tes tuaj rau ntawm lub Tuamtsev no thov koj, thov koj mloog lawv tej lus thov. Thov koj teb lawv tej lus thov ntawm koj lub chaw nyob saum ntuj tuaj, thov koj zam txim rau lawv thiab pab lawv. Tsuas yog koj tib leeg xwb thiaj paub txog neeg lub siab xav. Thov koj ua rau txhua tus raws li nws tes haujlwm, mas koj haivneeg thiaj li yuav hwm koj mus tas lawv tiam neej nyob hauv lub tebchaws uas koj muab pub rau peb cov yawgkoob lawm. thov koj mloog nws tej lus thov. Koj nyob saum ntuj uas yog koj qhov chaw nyob, thov koj mloog nws thiab ua raws li nws tej lus thov, kom txhua haivneeg uas nyob hauv ntiajteb no thiaj yuav paub koj thiab mloog koj lus ib yam li koj haivneeg Yixalayees mloog koj lus. Ces lawv thiaj yuav paub hais tias, kuv ua lub Tuamtsev no los ua qhov chaw pehawm koj. “Thaum koj hais kom koj haivneeg mus tua lawv cov yeebncuab, txawm yog lawv nyob qhov twg thov koj los tsuav yog lawv tig xubntiag tuaj rau hauv lub nroog uas koj xaiv tseg thiab lub Tuamtsev uas kuv ua rau koj no lawm, koj nyob saum ntuj, thov koj mloog lawv tej lus thov thiab pab kom lawv muaj yeej. “Tsis muaj ib tug neeg twg uas tsis tau ua txhaum li, yog thaum twg koj haivneeg ua txhaum rau koj, koj chim rau lawv thiab cia lawv cov yeebncuab tua yeej lawv thiab ntes lawv coj mus rau lwm lub tebchaws. Txawm yog lub tebchaws ntawd nyob deb thiab ze los thov koj mloog koj haivneeg tej lus thov. Yog lawv nyob hauv lub tebchaws ntawd lees lawv tej kev txhaum thiab thov koj hais tias, peb yog neeg muaj txhim, peb tau ua txhaum thiab ua phem ua qias lawm tiag, tus TSWV, thov koj mloog lawv tej lus thov. Nyob hauv lub tebchaws ntawd, yog lawv rov los muab siab npuab koj tiag tiag, lees lawv tej kev thaum thiab tig xubntiag tuaj rau hauv lub tebchaws uas koj muab pub rau peb cov yawgkoob, lub nroog uas koj tau xaiv tseg, thiab lub Tuamtsev uas kuv ua rau koj lawm, thov koj mloog lawv tej lus thov. Koj nyob ntawm koj lub chaw saum ntuj mloog lawv thov thiab hlub lawv, zam lawv tej kev txhaum uas lawv ntxeev siab rau koj, thiab tshoov lawv cov yeebncuab siab kom ua lub siab zoo rau lawv. Lawv yog koj haivneeg uas koj coj tawm nram tebchaws Iziv qhov uas zoo ib yam li lub cubtawg uas cig tsis paub tuag li los. “Tus TSWV uas kav txhua tsav yam, thov koj niaj hnub tsa qhovmuag ntsia thiab hlub koj haivneeg Yixalayees thiab lawv tus vajntxwv. Thaum twg lawv tsa ncauj thov koj pab lawv, thov koj mloog lawv tej lus thov. Rau qhov koj yeej xaiv lawv tawm ntawm txhua haivneeg hauv qab ntuj no los ua koj haivneeg ib yam li koj tau hais rau koj tus tubtxib Mauxes, thaum koj coj peb cov yawgkoob tawm nram tebchaws Iziv los.” Tom qab uas Xalumoos thov tus TSWV tas lawm, nws txawm sawv ntawm lub thaj hauv ntej, qhov chaw uas nws txhos caug thiab tsa tes rau saum ntuj. Nws tsa ncauj thov Vajtswv nrov nrov foom koob hmoov rau cov pejxeem uas tuaj sib sau rau ntawd hais tias, “Ua tus TSWV tsaug, nws yog tus uas pub nws haivneeg tau nyob kaj siab lug, ib yam li nws tau coglus tseg lawm. Nws yeej ua raws li txhua yam lus cog tseg uas nws kom nws tus tubtxib Mauxes qhia rau peb lawm. Thov tus TSWV uas yog peb tus Vajtswv nrog peb nyob ib yam li nws nrog peb cov yawgkoob nyob; thov nws tsis txhob tso peb tseg; thov tus TSWV tshoov peb siab kom peb mloog nws lus, peb thiaj yuav ua tau peb lub neej haum nws siab thiab coj tau raws li nws tej kevcai, thiab nws tej lus samhwm uas nws tau qhia tseg rau peb cov yawgkoob lawm. Thov tus TSWV uas yog peb tus Vajtswv nco ntsoov tej lus uas kuv thov txhua zaus. Thov nws hlub tshua nws haivneeg Yixalayees thiab lawv tus vajntxwv raws li tej uas lawv niaj hnub xav yuav xav tau. Kom txhua haivneeg uas nyob hauv ntiajteb no paub hais tias, tus TSWV tib leeg xwb thiaj yog Vajtswv, yeej tsis muaj dua lwm tus nyob qhov twg li lawm. Thov nej cov uas yog nws haivneeg cia li muab siab npuab tus TSWV uas yog peb tus Vajtswv thiab coj raws li nws tej kevcai thiab nws tej lus samhwm ib yam li nej ua niaj hnub no.” Ces Vajntxwv Xalumoos thiab cov pejxeem txawm muab tsiaj tua fij rau tus TSWV. Nws muab nees nkaum ob txhiab tus nyuj thiab ib puas nees nkaum txhiab tus yaj tua fij ua kev sib raug zoo. Yog li ntawd, vajntxwv thiab cov pejxeem thiaj li muab lub Tuamtsev fij rau Vajtswv. Hnub ntawd vajntxwv muab thaj av hauv plawv lub tshavpuam uas nyob ntawm hauv ntej lub Tuamtsev ua kevcai ntxuav kom huv, thiab muab tej tsiaj tua hlawv fij tagnrho, muab tej qoobloo fij, thiab muab tej roj tsiaj hlawv fij rau Vajtswv ua kev sib raug zoo. Nws ua li ntawd, rau qhov lub thaj tooj me heev tsis txaus hlawv tej khoom fij ntawd. Vajntxwv Xalumoos thiab cov pejxeem Yixalayees ua kevcai nyob Tsev Pheebsuab thiab noj haus rau ntawm lub Tuamtsev tau xya hnub. Tej neeg tuaj coob kawg li, tuaj puag pem lub Dawm Hamas thiab nram ciamteb Iziv tuaj huv tibsi. Hnub yim Xalumoos mam tso lawv rov mus vaj mus tsev. Lawv txhua tus puavleej ua nws tsaug thiab zoo siab hlo mus tsev, vim tej koob hmoov uas tus TSWV pub rau nws tus tubtxib Daviv thiab rau nws haivneeg Yixalayees. Tom qab uas Vajntxwv Xalumoos ua tau lub Tuamtsev, ua tau lub loog thiab ua txhua yam uas nws npaj siab ua tiav tas lawm, tus TSWV rov los rau Xalumoos pom dua ib zaug ib yam li nws tau los rau Xalumoos pom nyob hauv lub nroog Nkinpe-oos thiab. Tus TSWV hais rau Xalumoos hais tias, “Kuv hnov koj tej lus thov lawm. Kuv muab lub Tuamtsev uas koj ua tau lawm, ua qhov chaw tseemceeb rau sawvdaws tuaj pehawm kuv mus ibtxhis. Yog koj pehawm kuv ntawm lub siab ncaj ncees thiab ua siab dawb siab zoo ib yam li koj txiv Daviv ua, thiab yog koj mloog kuv tej lus thiab ua txhua yam raws li kuv twb samhwm rau koj lawm, kuv yuav ua raws li tej lus uas kuv tau cog tseg rau koj txiv Daviv thaum uas kuv hais rau nws hais tias, nws cov xeebntxwv yuav tau ua cov tswjhwm cov Yixalayees mus ibtxhis li. Tiamsis yog koj lossis koj cov xeebntxwv tso kuv tseg, tsis ua raws li kuv tej kevcai thiab tej lus samhwm uas kuv muab rau koj no thiab mus pe luag tej vajtswv, kuv yuav muab kuv haivneeg Yixalayees ntiab tawm hauv lub tebchaws uas kuv muab rau lawv lawm. Kuv yuav muab lub Tuamtsev uas kuv lees yuav ua qhov chaw tseemceeb rau sawvdaws tuaj pehawm kuv ntawd tso povtseg. Tej neeg nyob txhua qhov yuav luag cov Yixalayees plig thiab saib lub Tuamtsev tsis muaj nqis. Lub Tuamtsev no yuav raug puastsuaj ua ib pawg, thiab ua rau txhua tus uas dua kev pom yuav poob siab thiab xav tsis thoob. Lawv yuav nug hais tias, ‘Vim li cas tus TSWV thiaj ua li ntawd rau lub tebchaws thiab lub Tuamtsev no?’ Luag tej yuav teb hais tias, ‘Twb yog vim lawv muab tus TSWV uas yog lawv tus Vajtswv, tus uas coj lawv cov yawgkoob tawm nram tebchaws Iziv los tso povtseg lawm. Lawv muab siab npuab luag tej vajtswv thiab mus pe tej vajtswv ntawd. Twb yog vim li no tus TSWV thiaj tso tej kev puastsuaj no los raug lawv.’ ” Xalumoos siv sijhawm nees nkaum xyoo ua lub Tuamtsev thiab nws lub loog. Vajntxwv Hilas uas kav lub nroog Tiles tau muab ntoo thuv, ntoo ciab thiab kub tuaj pub rau Xalumoos raws li nws xav tau los ua nws tej haujlwm. Tom qab uas tej haujlwm tiav tas lawm, Vajntxwv Xalumoos thiaj li muab tau nees nkaum lub nroog uas nyob hauv lub xeev Kalilais rau Hilas. Tiamsis thaum Hilas tuaj hauv lub nroog Tiles tuaj xyuas, nws tsis nyiam cov nroog ntawd. Yog li ntawd, nws thiaj hais rau Xalumoos hais tias, “Tus kwv, tej nroog uas koj muab rau kuv zoo li no xwb!” Twb yog vim li no, thiaj muab thaj chaw ntawd tis npe hu ua Kanpus los txog niaj hnub no. Cov kub uas Hilas xa tuaj pub rau Xalumoos ntawd yuav luag muaj tsib tas. Vajntxwv Xalumoos tsa ib co tub zog los ua lub Tuamtsev thiab nws lub loog, ua lub tsev Milus thiab ua lub nroog Yeluxalees tus ntsa yeej. Dua li ntawd, nws tseem siv cov tub zog ntawd mus kho lub nroog Haxaules, Menkidaus thiab Nkexes. ( Falaus uas yog cov Iziv tus vajntxwv tau tuaj tua thiab txeeb tau lub nroog Nkexes, nws thiaj muab cov neeg uas ibtxwm nyob hauv tua tuag tas thiab muab lub nroog hlawv kub hnyiab tas huv tibsi lawm. Ces nws txawm muab lub nroog ntawd pub rau nws tus ntxhais uas yuav Xalumoos, thiab Xalumoos rov muab lub nroog ntawd kho dua tshiab.) Xalumoos tseem siv nws pab tub zog ntawd rov mus ua lub nroog Npethes Hauloos Theem Qis, lub nroog Npa-alas thiab lub nroog Tamaj uas nyob tom nras mojsab qhua hauv lub xeev Yudas, tej nroog uas nws tso nws tej cuabyeej, tej nroog uas nws kaw nws tej nees thiab cia tej tsheb nees, txhua yam uas nws ua hauv lub nroog Yeluxalees, pem roob Lenpanoos thiab lwm qhov chaw uas nyob hauv nws lub tebchaws. Xalumoos tsis muab cov Yixalayees ua qhev; lawv tsuas ua nws cov tubrog, cov nomtswv, cov thawj tubrog, cov tubrog tsav tsheb nees thiab cov tubrog caij nees xwb. Xalumoos tsa tsib puas tsib caug leej ua cov thawjcoj saib cov neeg uas ua nws tej vajtse. Xalumoos coj nws tus pojniam uas yog cov Iziv tus vajntxwv tus ntxhais hauv Daviv lub Nroog los nyob rau hauv lub tsev uas Xalumoos ua rau nws tus pojniam ntawd nyob lawm. Tom qab ntawd Xalumoos mam ua lub tsev Milus ntxiv. Xalumoos muab khoom hlawv fij thiab muab tej khoom fij ua kev sib raug zoo rau tus TSWV saum lub thaj uas nws ua rau tus TSWV ib xyoo twg peb zaug. Nws tseem muab tej hmoov tshuaj tsw qab coj mus hlawv fij rau tus TSWV thiab. Ces qhov uas nws ua lub Tuamtsev tiav li ntawd. Vajntxwv Xalumoos tseem ua tau ib co nkoj rau hauv Exi-oonkenpes uas nyob ntawm ntug Hiavtxwv Liab ze rau ntawm Elathas hauv tebchaws Edoos. Vajntxwv Hilas tau xa nws ib co neeg uas txawj tsav nkoj tuaj ua haujlwm nrog Xalumoos cov neeg tsav cov nkoj ntawd. Lawv thiaj tsav cov nkoj ntawd mus rau tim tebchaws Aufiles thiab thauj tau yuav luag kaum rau tas kub los rau Xalumoos. Xalumoos lub koob meej nrov ncha moo lug mus txog rau cov Senpas tus poj vajntxwv, nws thiaj li tuaj rau hauv lub nroog Yeluxalees, nws nug ntau zaj uas tsis yoojyim totaub, sim saib Xalumoos puas teb tau. Nws coj neeg coob heev nrog nws tuaj; nws muab ntxhuav thauj tej txujlom tsw qab, tej hlaws muaj nqis thiab kub ntau kawg li tuaj. Thaum nws thiab Xalumoos sib ntsib lawm, nws nug Xalumoos ntau tsav ntau yam, tagnrho tej tswvyim uas nws npaj tuaj nug. Xalumoos teb tau nws tej lus nug ntawd huv tibsi, tsis muaj ib los twg nyuaj uas Xalumoos teb tsis tau li. Thaum cov Senpas tus poj vajntxwv hnov Xalumoos tej tswvyim thiab pom lub loog uas Xalumoos ua. Nws pom tej zaub mov uas luag rau, rau saum Xalumoos lub rooj, tej tsev uas nws cov nomtswv nyob, tej tub kavxwm los yeej nyob muaj chaw thiab tej tsoos tsho uas lawv hnav los zoo ib yam nkaus, tej tub ce dej ce cawv, thiab tej tsiaj uas tua fij hauv lub Tuamtsev ua rau poj vajntxwv yoob thiab xav tsis thoob li. Nws thiaj hais rau Vajntxwv Xalumoos hais tias, “Txhua yam uas kuv hnov hais txog koj thiab koj tej tswvyim yeej muaj tseeb raws li tej uas kuv tau hnov thaum kuv tseem nyob nram kuv lub tebchaws. Tiamsis kuv tsis ntseeg tej ntawd txog thaum uas kuv tuaj pom koj kiag lawm. Koj tej tswvyim thiab kev npluanuj tseem ntau tshaj tej uas luag piav qhia kuv; muaj ib nrab kuv yeej tsis tau hnov hlo li. Ua li cas koj cov pojniam yuav muaj hmoo ua luaj! Thiab koj cov tubqhe los muaj hmoo kawg li, lawv niaj hnub nrog koj nyob thiab hnov tej lus txawj ntse uas koj hais. Cia li qhuas tus TSWV uas yog koj tus Vajtswv! Nws ua rau sawvdaws pom hais tias nws txaus siab heev rau koj, nws thiaj tsa koj ua vajntxwv kav lub tebchaws Yixalayees. Vim nws txojkev hlub cov Yixalayees nyob mus ibtxhis li, nws thiaj tsa koj ua lawv tus vajntxwv coj lawv ua raws li nws txoj kevcai thiab txojkev ncaj ncees.” Poj Vajntxwv thiaj muab tej khoom uas nws thauj tuaj pub rau Vajntxwv Xalumoos: kub yuav luag muaj tsib tas, txujlom thiab hlaws ntau kawg li. Vajntxwv Xalumoos tsis tau pom dua leejtwg muab txujlom tuaj pub rau nws ntau npaum li tej uas cov Senpas tus poj vajntxwv coj tuaj pub rau nws ntawd li. ( Dua li ntawd, Hilas tseem muab nws lub nkoj thauj kub, thauj ntoo thwjsuab, thiab thauj hlaws ntau heev nram tebchaws Aufiles tuaj pub rau Xalumoos thiab. Xalumoos muab cov ntoo no ua ncej rau lub Tuamtsev, ua ncej rau vajntxwv lub loog thiab muab txua ua raj thiab nkauj nogncas rau cov ntaus suab nkauj siv. Yeej tsis tau muaj dua lwm lub tebchaws xa tej tseem ntoo li cov no tuaj rau hauv tebchaws Yixalayees hlo li; hom ntoo no yeej tsis pom muaj ntxiv li lawm.) Vajntxwv Xalumoos muab txhua yam uas cov Senpas tus poj vajntxwv thov pub rau nws. Dua li ntawd Xalumoos tseem muab ntau yam pub rau poj vajntxwv thiab. Ces poj vajntxwv thiab nws cov neeg txawm rov mus rau nram tebchaws Senpas lawm. Txhua lub xyoo twg Vajntxwv Xalumoos yeej tau txais kub txog li nees nkaum tsib tas ntxiv rau tej se uas cov tub lag tub luam them tuaj, tej pajlaum uas tau los ntawm kev sib pauv lag luag, thiab tej uas cov Alanpias cov vajntxwv thiab cov Yixalayees tej tswvxeev coj tuaj rau nws. Xalumoos muab cov kub ntawd ntaus tau ob puas daim thaiv hniav ntaj, ib daim twg hnyav kwvlam li kaum tsib choj. Thiab nws ntaus tau peb puas daim thaiv hniav ntaj, ib daim twg hnyav yuav luag plaub choj. Nws muab tagnrho cov thaiv hniav ntaj ntawd mus cia rau hauv chav tsev havzoov Lenpanoos. Vajntxwv tseem ua tau ib lub zwmtxwv loj. Lub zwmtxwv ntawd yog muab kaus ntxhw ua thiab muab kub vuam thoob plaws rau. Tagnrho Xalumoos tej khob haus dej puavleej yog muab kub ua, thiab tej twj taig siv hauv chav tsev havzoov Lenpanoos puavleej yog muab kub nchuav ua. Tej nyiaj yeej tsis muab los siv li, rau qhov tiam uas Xalumoos nyob ntawd, luag suav hais tias nyiaj tsis muaj nqis. Xalumoos tseem muaj ntau lub nkoj uas yog tej nkoj thauj khoom hauv hiavtxwv nrog Hilas cov nkoj. Txhua peb lub xyoos twg luag siv cov nkoj ntawd mus thauj kub, nyiaj, kaus ntxhw, liab thiab yajyuam los rau nws. Vajntxwv Xalumoos yog tus uas npluanuj thiab ntse tshaj tej vajntxwv huv tibsi, tej neeg uas nyob thoob ntiajteb no xav tuaj mloog nws piav nws tej tswvyim thiab kev txawj ntse uas Vajtswv pub rau nws. Txhua tus uas tuaj puavleej coj nyiaj, kub, tsho ntev, cuabyeej ua rog, txujlom, nees thiab nees zag tuaj pub rau Xalumoos. Pheej muaj li no ib xyoos dhau rau ib xyoos. Xalumoos tseem ua tau ib txhiab plaub puas lub tsheb nees ua rog thiab muaj kaum ob txhiab leej tubrog caij nees. Muaj ibtxhia nws cia nyob hauv lub nroog Yeluxalees thiab dua li cov, nws coj mus rau lwm lub nroog lawm. Lub sijhawm uas Xalumoos ua tus kav tebchaws ntawd, nws saib nws tej nyiaj tsuas zoo li tej pobzeb hauv lub nroog Yeluxalees, thiab tej ntoo ciab los zoo li tej ntoo xikamaus uas tuaj ntawm tej taw roob hauv tebchaws Yudas xwb. Vajntxwv tseem muaj cov sawv cev txais tej nees uas luag cab hauv tebchaws Muxilis thiab Kilikias tuaj, thiab cov tsheb nees yog coj nram tebchaws Iziv los. Lawv xa tej nees thiab cov tsheb nees ntawd mus muag rau cov Hitis thiab cov Xilias ob tug vajntxwv; cov tsheb nees muag ib lub rau pua daim nyiaj thiab cov nees muag ib tug ib puas tsib caug daim nyiaj. Xalumoos nyiam ntau tus pojniam uas yog neeg txawv tebchaws. Dua li cov Iziv tus vajntxwv tus ntxhais lawm, nws tseem yuav cov Hitis, cov Mau-am, cov Edoos thiab cov Xidoos tej ntxhais los ua pojniam thiab. Xalumoos tseem mus yuav cov neeg uas tus TSWV txwv kom cov Yixalayees tsis txhob yuav lawv tej ntxhais los ua pojniam, rau qhov lawv yuav coj cov Yixalayees mus pe lawv tej vajtswv. Xalumoos yuav xya pua tus pojniam uas yog ntxhais vajntxwv thiab peb puas tus pojniam uas tsis yog ntxhais vajntxwv. Cov pojniam ntawd thiaj ua rau nws tso Vajtswv tseg, thiab thaum uas nws laus lawm, nws cov pojniam ntawd thiaj coj nws mus pe cov neeg txawv tebchaws tej vajtswv. Nws tsis muab lub siab npuab tus TSWV uas yog nws tus Vajtswv li nws txiv Daviv lawm. Nws mus pe cov Xidoos tus vajtswv Atates thiab mus pe cov Amoos tus vajtswv Maulej uas phem qias kawg li. Nws tau ua txhaum rau tus TSWV thiab tsis ua raws li tus TSWV lub siab nyiam li nws txiv Daviv ua. Nyob rau saum lub roob hauv lub nroog Yeluxalees sab hnubtuaj, Xalumoos ua tau ib lub chaw pe cov Mau-am tus vajtswv Khemaus, thiab ib lub chaw pe cov Amoos tus vajtswv Maulej. Thiab nws tseem ua ntau lub chaw rau nws cov pojniam uas yog neeg txawv tebchaws tau hlawv xyab thiab hlawv khoom fij rau lawv tej vajtswv. thiab hais rau nws hais tias, “Vim koj rhuav tej lus uas koj cog tseg nrog kuv lawm thiab koj tsis mloog kuv tej lus, kuv hais rau koj hais tias kuv yuav muab lub tebchaws tshem tawm ntawm koj mus thiab muab cob rau koj cov nomtswv ib tug kav. Tiamsis vim kuv tej lus uas kuv tau cog tseg rau koj txiv Daviv lawm, kuv yuav tsis muab tshem tawm thaum koj tseem ua neej nyob. Yuav yog tiam uas koj tus tub ua tus kav, kuv mam li tshem. Thiab kuv yuav tsis tshem lub tebchaws kom tas ntawm nws mus, vim kuv tau coglus tseg rau kuv tus tubtxib Daviv thiab lub nroog Yeluxalees uas yog lub nroog kuv xaiv cia ua kuv tug, kuv yuav tseg ib xeem rau nws kav xwb.” Yog li ntawd, tus TSWV thiaj tshoov Hadas uas yog ib tug ntawm cov Edoos tus vajntxwv tsevneeg siab kom ntxeev siab tawmtsam Xalumoos. tsuas tshuav Hadas thiab nws txiv cov tubtxib uas yog neeg Edoos leej puav uas khiav mus rau nram tebchaws Iziv thiaj dim xwb. (Thaum ntawd Hadas tseem yog menyuam yaus.) Lawv khiav tawm hauv Midias mus rau hauv Palas, txawm muaj qee leej txivneej nyob hauv koom nrog lawv. Ces lawv txawm khiav mus rau nram tebchaws Iziv thiab mus cuag Falaus uas yog cov Iziv tus vajntxwv, nws thiaj tu lub tebchaws thiab muab ib lub tsev rau Hadas nyob thiab pub zaub mov rau Hadas noj. Hadas yog Falaus ib tug phoojywg zoo heev, Falaus thiaj muab nws tus pojniam uas npe hu ua Tapenes tus niamhluas rau Hadas yuav ua pojniam. Hadas tus pojniam yug tau ib tug tub rau Hadas, nws tis npe hu ua Nkenunpas, niam vajntxwv Falaus coj tus tub ntawd mus tu hauv lub loog, thiab nws yeej nrog Falaus cov tub loj hlob ua ke. Thaum Hadas tseem nyob nram tebchaws Iziv, nws hnov xov hais tias Daviv tuag lawm thiab Yau-am uas yog tus thawj tubrog los tuag lawm, Hadas thiaj hais rau Falaus hais tias, “Thov cia kuv rov qab mus pem kuv lub tebchaws.” Falaus teb hais tias, “Puas yog tseem tshuav tej yam uas kuv muab tsis txaus rau koj, koj thiaj xav rov mus rau pem koj lub tebchaws?” Hadas teb hais tias, “Tsis yog, thov cia li tso kuv rov mus xwb.” Ces nws txawm rov los rau pem nws lub tebchaws lawm. Cov Edoos tus Vajntxwv Hadas yog cov Yixalayees ib tug yeebncuab uas phem thiab nruj tsiv heev. Vajtswv tseem tshoov Eli-adas tus tub Lexoos siab kom ntxeev siab tawmtsam Xalumoos thiab. Lexoos yog tus uas khiav tawm ntawm nws tus tswv uas yog cov Xaunpas tus Vajntxwv Hadadexes, thiab mus ua ib tug thawj tubsab uas ua txhaum kevcai loj kawg li. (Qhov no tshwmsim tom qab uas Daviv mus tua yeej Hadadexes thiab muab cov Xilias uas koom tes nrog nws tua tuag tas lawm.) Ces Lexoos thiab nws cov neeg thiaj khiav mus nyob pem Damaxes, Lexoos cov neeg thiaj muab Lexoos tsa ua vajntxwv kav tebchaws Xilias. Lexoos yog cov Yixalayees ib tug yeebncuab nyob rau Xalumoos tiam. Muaj dua ib tug txivneej uas tig rov tawmtsam Vajntxwv Xalumoos, tus ntawd yog Xalumoos ib tug nomtswv ntag, nws yog Nenpas tus tub Yelaunpau-as uas nyob hauv lub nroog Xeledas pem lub xeev Efalayees. Yelaunpau-as niam hu ua Xeluas thiab yog ib tug pojntsuam. Qhov uas Yelaunpau-as ntxeev siab rau Vajntxwv Xalumoos, vim Xalumoos ua lub tsev Milus thiab kho tus ntsa yeej uas thaiv nws txiv Daviv lub nroog. Yelaunpau-as yog ib tug tub hluas uas muaj zog khov kho, thaum Xalumoos pom hais tias Yelaunpau-as yog ib tug uas mob siab ua haujlwm heev, Xalumoos thiaj tsa nws ua tus saib tagnrho cov tub zog uas nyob hauv lub xeev Manaxes thiab lub xeev Efalayees. Muaj ib hnub, thaum Yelaunpau-as tabtom taug kev nram Yeluxalees los, Ahiyas uas yog tus cev Vajtswv lus hauv lub nroog Silaus tuaj ntsib Yelaunpau-as tom ib tog kev ntawm roob mojsab. Ahiyas hle hlo nws lub tsho tshiab loj los dua rhe ua kaum ob daim, thiab hais rau Yelaunpau-as hais tias, “Koj cia li nqa kaum daim mus rau koj, vim tus TSWV uas yog cov Yixalayees tus Vajtswv hais rau koj hais tias, ‘Kuv yuav muab lub tebchaws tshem tawm ntawm Xalumoos mus, thiab kuv yuav muab kaum xeem rau koj kav. Tsuas pub Xalumoos kav ib xeem lawm xwb, rau qhov kuv tseem hlub kuv tus tubtxib Daviv thiab lub nroog Yeluxalees, lub nroog no kuv tau xaiv hauv lub tebchaws Yixalayees los ua kuv tug lawm. Kuv ua li no twb yog vim Xalumoos tso kuv tseg thiab mus pe tej neeg txawv tebchaws tej vajtswv: cov Xidoos tus vajtswv uas yog tus mlom pojniam Atates; cov Mau-am tus vajtswv Khemaus; thiab cov Amoos tus vajtswv Maulej. Xalumoos tsis mloog kuv lus; Xalumoos tau ua txhaum tsis ua raws li kuv tej kevcai thiab kuv tej lus samhwm li nws txiv Daviv mloog kuv lus thiab coj raws li kuv tej kevcai. Tiamsis kuv yuav tsis muab lub tebchaws tshem tagnrho ntawm Xalumoos mus, rau qhov kuv tseem yuav cia nws muaj hwjchim kav mus kom tas nws tiam. Kuv ua li no twb yog kuv hlub kuv tus tubtxib Daviv, nws yog tus uas kuv xaiv thiab yog tus uas ua raws li kuv tej kevcai thiab tej lus samhwm. Kuv yuav tshem lub tebchaws ntawm Xalumoos tus tub mus, thiab kuv yuav muab kaum xeem rau koj, tiamsis kuv yuav tseg ib xeem rau Xalumoos tus tub kav, kuv yuav cia kuv tus tubtxib Daviv cov xeebntxwv kav hauv lub nroog Yeluxalees uas yog lub nroog kuv xaiv los ua qhov chaw rau sawvdaws pehawm kuv. Yelaunpau-as, kuv yuav tsa koj ua vajntxwv kav cov Yixalayees; koj yuav tau kav tagnrho tej cheebtsam av uas koj xav kav. Yog koj mloog kuv tej lus txhua lo, coj koj lub neej raws li kuv tej kevcai, thiab ua raws li kuv tej lus samhwm uas kuv muab rau koj ib yam li kuv tus tubtxib Daviv tau ua los lawm, kuv yuav nrog nraim koj mus ibtxhis. Kuv yuav tsa koj ua vajntxwv kav cov Yixalayees thiab yuav cia koj cov xeebntxwv ua vajntxwv hloov koj chaw ib yam li kuv pub rau Daviv ntag. Vim Xalumoos tej kev txhaum kuv thiaj yuav rau txim rau Daviv cov xeebntxwv, tiamsis tsis yog rau txim mus ibtxhis.’ ” Yog li ntawd, Xalumoos thiaj pheej nrhiav Yelaunpau-as tua povtseg, tiamsis nws khiav mus cuag cov Iziv tus Vajntxwv Sisaj thiab mus nyob nrad txog hnub uas Xalumoos tuag. Dua li lwm yam uas Xalumoos ua, tsis hais nws tej haujlwm lossis nws lub tswvyim kev txawj ntse, puavleej muab sau cia rau hauv Phau Ntawv Keebkwm uas teev Xalumoos lub neej lawm. Xalumoos ua vajntxwv nyob hauv Yeluxalees thiab kav lub tebchaws Yixalayees tau plaub caug xyoo. Xalumoos tuag thiab luag coj nws mus faus rau hauv Daviv lub Nroog. Thiab nws tus tub Lehaunpau-as ua vajntxwv hloov nws chaw. Lehaunpau-as mus rau hauv Sekhees, qhov chaw uas cov Yixalayees nyob sab qaumteb tuaj txoos ua ke tsa nws ua vajntxwv. Thaum Nenpas tus tub Yelaunpau-as uas khiav Vajntxwv Xalumoos mus nkaum rau nram tebchaws Iziv lawm, hnov xov txog zaj no, nws thiaj li rov nram tebchaws Iziv los. Tagnrho cov xeem uas nyob sab qaumteb tso neeg mus hu Yelaunpau-as tuaj, ces lawv sawvdaws txawm ua ke mus cuag Lehaunpau-as thiab hais rau nws hais tias, “Koj txiv Xalumoos ua nruj ua tsiv thiab muab tej haujlwm hnyav heev rau peb ua. Yog koj txo kom peb tau ua haujlwm sib thiab pub peb muaj kev kaj siab, peb yuav txaus siab ua koj pejxeem mus li.” Lehaunpau-as teb hais tias, “Peb hnub saum no nej rov tuaj cuag kuv, kuv mam li teb nej.” Yog li ntawd, lawv txawm rov qab mus tsev lawm. Vajntxwv Lehaunpau-as mus nrog cov laus uas ibtxwm yog nws txiv Xalumoos cov tuavxam sablaj. Nws nug lawv hais tias, “Nej yuav pab tswvyim rau kuv rov mus teb cov pejxeem li cas?” Lawv teb hais tias, “Yog koj xav kom cov pejxeem poog koj, mas koj yuav tau teb kom raws li lawv siab nyiam, lawv thiaj yuav ua koj cov pejxeem thiab muab siab npuab koj mus li.” Tiamsis Lehaunpau-as tsis yuav tej lus uas cov laus ntawd qhia, nws txawm mus nrog cov tuavxam hluas uas nrog nws ib phaum sablaj. Nws nug lawv hais tias, “Nej pab kuv tuav tswvyim saib yuav teb li cas rau cov pejxeem uas tuaj thov kuv hais tias, ‘Thov koj muab tej haujlwm hnyav uas koj txiv muab rau peb ua txo kom sib mentsis?’ ” Lawv teb hais tias, “Koj teb rau cov pejxeem li no hais tias, ‘Kuv tus ntivtes rwgqab tseem loj dua kuv txiv lub duav!’ Hais rau lawv hais tias, ‘Kuv txiv muab tej haujlwm hnyav heev rau nej ua; kuv tseem yuav muab tej haujlwm uas hnyav tshaj ntawd rau nej ua thiab. Kuv txiv muab hlua tsaj nplawm nej xwb; tiamsis kuv yuav muab hlua tawv nplawm nej.’ ” Peb hnub tom qab Yelaunpau-as thiab cov pejxeem rov tuaj cuag Vajntxwv Lehaunpau-as raws li nws hais rau lawv lawm. Vajntxwv tsis yuav tej lus uas cov laus qhia, nws thiaj hais lus hnyav rau cov pejxeem, raws li cov tuavxam hluas qhia. Nws hais rau cov pejxeem hais tias, “Kuv txiv muab tej haujlwm hnyav heev rau nej ua; kuv tseem yuav muab tej haujlwm uas hnyav tshaj ntawd rau nej ua thiab. Kuv txiv muab hlua tsaj nplawm nej xwb; tiamsis kuv yuav muab hlua tawv nplawm nej!” Qhov uas vajntxwv tsis mloog cov pejxeem lus ntawd twb yog ua kom tiav raws li tej lus uas tus TSWV kom tus cev Vajtswv lus Ahiyas uas nyob hauv lub nroog Silaus mus hais rau Nenpas tus tub Yehaunpau-as ntag. Thaum cov pejxeem pom hais tias vajntxwv tsis mloog lawv tej lus lawm, lawv thiaj qw hais tias, “Muaj qabhau dabtsi mus nrog Daviv thiab nws tsev nyuag neeg ntawd ua ke! Lawv twb tsis tau ua ib yam dabtsi pab peb li los sav? Cov Yixalayees, cia li rov qab mus tsev los mas! Cia Lehaunpau-as rov kav nws xwb thiaj zoo!” Yog li ntawd, cov Yixalayees thiaj ntxeev siab cia Lehaunpau-as ua vajntxwv kav cov neeg uas nyob hauv lub xeev Yudas xwb. Ces Vajntxwv Lehaunpau-as thiaj tso Adaunilas, tus uas saib cov tub zog mus cuag cov Yixalayees, tiamsis lawv muab pobzeb ntaus nws tuag lawm. Thaum muaj tej no lawm, Lehaunpau-as thiaj khiav ceev nrooj mus nce nws lub tsheb nees thiab rov qab mus rau nram lub nroog Yeluxalees lawm. Txij hnub ntawd los, cov Yixalayees uas nyob sab qaumteb thiaj ntxeev siab rau Daviv cov xeebntxwv los li lawm. Thaum cov Yixalayees hnov hais tias, Yelaunpau-as rov nram tebchaws Iziv los lawm, lawv thiaj caw nws tuaj nrog lawv sablaj, thiab lawv muab nws tsa ua cov Yixalayees tus vajntxwv. Tsuas yog tshuav cov Yudas tib xeem thiaj tseem muab siab npuab Daviv cov xeebntxwv xwb. Thaum Lehaunpau-as los txog rau hauv lub nroog Yeluxalees, nws thiaj txhij tau ib puas yim caum txhiab leej tubrog uas siab tawv heev hauv xeem Yudas thiab xeem Npeenyamees. Nws yuam kom lawv mus tua cov Yixalayees sab qaumteb thiab txeeb kom tau lub tebchaws rov los rau nws kav. Tiamsis Vajtswv hais rau Semayas uas yog tus cev Vajtswv lus kom coj tej lus no mus hais rau Lehaunpau-as thiab tagnrho cov neeg uas yog xeem Yudas thiab xeem Npeenyamees hais tias: “Nej tsis txhob mus tua nej cov kwvtij uas yog cov Yixalayees hlo li. Nej sawvdaws cia li rov qab mus tsev. Yeej yog kuv pom zoo thiaj muaj tej xwm no tshwmsim tuaj.” Lawv mloog tus TSWV tej lus thiab lawv nyias txawm rov mus nyias tsev lawm. Cov Yixalayees tus Vajntxwv Yelaunpau-as mus txhim ntsa yeej thaiv lub nroog Sekhees uas nyob pem laj roob Efalayees, thiab nws nyob ped tau ib ntu. Ces nws muab lub nroog ntawd tso tseg thiab mus kho tau lub nroog Penuyees. Tom qab uas nws xav tau li ntawd lawm, nws txawm muab kub nchuav tau ob tug mlom nyuj thiab hais rau cov pejxeem hais tias, “Nej pheej mus pehawm Vajtswv nram lub nroog Yeluxalees tau ntev los lawm. Cov Yixalayees, nej ntsia saib ob tug mlom no yog nej ob tug vajtswv uas coj nej khiav nram tebchaws Iziv los ntag!” Nws coj ob tug mlom nyuj ntawd ib tug mus teeb rau hauv lub nroog Npethees ib tug mus teeb rau hauv lub nroog Das. Yog li ntawd, cov pejxeem thiaj ua txhaum tas, lawv mus pe ob tug mlom ntawd hauv lub nroog Npethees thiab hauv lub nroog Das. Yelaunpau-as tseem mus ua tej tsev teev mlom rau saum tej ncov roob thiab tsa tej neeg uas tsis yog xeem Levis ua povthawj. Yelaunpau-as teem sijhawm rau lub yim hli hnub kaum tsib, cia ua hnub ua kevcai ua rooj noj rooj haus ib yam li ua nram tebchaws Yudas. Nws muab tsiaj tua hlawv rau saum lub thaj txi tus mlom nyuj uas nws teeb rau hauv lub nroog Npethees, thiab nws tsa ib co povthawj tu lub chaw teev mlom uas nws ua rau hauv lub nroog Npethees ntawd. Thaum txog lub yim hli hnub kaum tsib, hnub uas nws teem tseg, nws txawm mus pem lub nroog Npethees thiab tua tsiaj txi tus mlom ntawd saum lub thaj ua kevcai raws li nws tau teem tseg rau cov Yixalayees lawm. Tus TSWV samhwm kom ib tug cev Vajtswv lus uas nyob hauv lub xeev Yudas mus rau pem lub nroog Npethees thaum Yelaunpau-as tseem tabtom hlawv khoom fij ntawm lub thaj. Raws li tus TSWV tej lus qhia, tus cev Vajtswv lus txawm hais li no: “Lub thaj, lub thaj, ib tug menyuam tub npe hu ua Yauxiyas yuav yug los rau hauv Daviv tsevneeg. Nws yuav muab cov cev Vajtswv lus uas pheej mus hlawv khoom fij rau saum tej chaw siab tua rau saud, thiab nws yuav muab tej pobtxha neeg los hlawv rau saum koj.” Tus cev Vajtswv lus thiaj hais ntxiv hais tias, “Lub thaj no yuav vau tawg ntsoog ntxaws, thiab tej hmoov tshauv uas nyob saum lub thaj yuav nchuav tas. Ces koj yuav paub hais tias tej uas tus TSWV tau hais rau kuv lawm yeej muaj tseeb tiag.” Thaum Vajntxwv Yelaunpau-as hnov tej lus no, nws txawm taw tes nki rau tus cev Vajtswv lus thiab hais tias, “Cia li ntes tus neeg no mus!” Tamsim ntawd vajntxwv txhais npab cia li qhuav kiag nkaum tsis tau rov qab li lawm. Tamsim ntawd lub thaj cia li vau hlo tawg ntsoog ntxaws thiab tej hmoov tshauv nchuav tas rau hauv av raws li tus cev Vajtswv lus tau tuav tus TSWV lub npe hais lawm. Vajntxwv Yelaunpau-as thiaj hais rau tus cev Vajtswv lus hais tias, “Thov tus TSWV uas yog koj tus Vajtswv pab kuv, thiab thov nws kho kuv txhais npab lauj!” Tus cev Vajtswv lus thiaj thov tus TSWV, ces vajntxwv txhais npab txawm zoo lawm. Vajntxwv hais rau tus cev Vajtswv lus hais tias, “Koj cia li nrog kuv mus tom kuv tsev thiab kuv nrhiav mov rau koj noj tso. Thiab kuv yuav pauj txiaj ntsig rau koj tej uas koj twb ua pub rau kuv lawm.” Tus cev Vajtswv lus teb hais tias, “Txawm yog koj muab koj tej nyiaj ib nrab faib rau kuv los kuv yuav tsis nrog koj mus lossis nrog koj noj haus ib yam dabtsi hlo li. Tus TSWV yeej samhwm rau kuv kom kuv tsis txhob noj lossis haus ib yam dabtsi li thiab tsis txhob taug txojkev uas kuv tuaj rov qab mus tsev.” Yog li ntawd, nws thiaj tsis taug txoj qub kev rov qab, nws thiaj mus dua lwm txojkev lawm. Lub sijhawm ntawd muaj ib tug laus uas cev Vajtswv lus nyob hauv lub nroog Npethees. Nws cov tub txawm los piav tej uas hnub ntawd tus hluas uas cev Vajtswv lus tuaj nram lub xeev Yudas tuaj ua hauv lub nroog Npethees, thiab tej lus uas nws hais rau Vajntxwv Yelaunpau-as rau lawv txiv mloog. Tus laus uas cev Vajtswv lus nug lawv hais tas, “Thaum nws sawv kev mus tsev, nws taug txojkev twg lawm?” Lawv thiaj qhia kev rau nws, nws txawm hais rau lawv hais tias, “Muab kuv tus neesluav los nog eeb rau kuv.” Lawv txawm ua li nws hais, thiab nws caij tus neesluav taug txojkev uas lawv qhia mus caum tus cev Vajtswv lus uas tuaj nram lub xeev Yudas tuaj thiab mus caum cuag thaum nws tseem so hauv qab tsob ntoo qhib. Tus laus uas cev Vajtswv lus nug hais tias, “Koj puas yog tus cev Vajtswv lus uas tuaj nram lub xeev Yudas tuaj?” Tus txivneej ntawd teb hais tias, “Kuv yog los mas.” Tus laus uas cev Vajtswv lus hais tias, “Koj cia li nrog kuv rov qab mus tom kuv tsev thiab mus nrog kuv noj mov tso.” Tiamsis tus cev Vajtswv lus uas tuaj nram lub xeev Yudas tuaj teb hais tias, “Kuv yuav nrog koj mus tsis tau. Thiab kuv yuav nrog koj noj haus ua ke nyob qhov no tsis tau, rau qhov tus TSWV yeej samhwm rau kuv kom tsis txhob noj lossis haus ib yam dabtsi li, thiab tsis txhob taug txojkev uas kuv tuaj rov qab mus tsev.” Ces tus laus uas cev Vajtswv lus uas tuaj hauv Npethees tuaj hais rau nws hais tias, “Kuv yog ib tug cev Vajtswv lus ib yam li koj thiab; tus TSWV tus timtswv los hais rau kuv kom kuv tuaj coj koj nrog kuv mus tsev thiab muab zaub mov rau koj noj.” Tiamsis tus laus uas cev Vajtswv lus dag xwb. Yog li ntawd, tus cev Vajtswv lus uas tuaj nram lub xeev Yudas tuaj thiaj nrog tus laus uas cev Vajtswv lus rov mus rau tom nws tsev thiab nrog nws noj mov ua ke. Thaum uas nkawd tseem tabtom zaum ntawm rooj mov, tus TSWV los hais rau tus laus uas cev Vajtswv lus, ces nws thiaj qw rau tus cev Vajtswv lus uas tuaj nram lub xeev Yudas tuaj hais tias, “Tus TSWV hais tias koj tsis mloog nws lus thiab tsis ua raws li nws tej lus samhwm. Koj tseem rov qab los noj mov rau hauv qhov chaw uas nws tsis pub koj noj. Vim li ntawd koj yuav raug tua tuag, thiab yuav tsis coj koj lub cev mus faus rau hauv koj tsevneeg lub qhov ntxa.” Ces thaum uas nkawd noj mov tas lawm, tus laus uas cev Vajtswv lus thiaj muab eeb mus nog rau saum tus neesluav rau tus cev Vajtswv lus uas tuaj nram lub xeev Yudas tuaj caij rov qab. Muaj ib tug tsov ntxhuav los ntsib nws tom kev thiab muab nws tom tuag lawm. Nws lub cev pw xyab luas rau hauv plawv kev, hos tus neesluav thiab tus tsov ntxhuav sawv ib sab. Muaj ib co neeg dua kev tuaj pom lub cev tuag nyob hauv plawv kev thiab tus tsov ntxhuav sawv ze ntawd. Lawv txawm mus rau pem lub nroog Npethees thiab mus qhia tej uas lawv pom ntawd rau sawvdaws mloog. Thaum tus laus uas cev Vajtswv lus hnov dheev li ntawd, nws txawm hais tias, “Tus ntawd twb yog tus cev Vajtswv lus uas tsis mloog tus TSWV tej lus samhwm ntag! Yog li ntawd, tus TSWV thiaj tso tus tsov ntxuav ntawd los tom thiab dua kom nws tuag, raws li tus TSWV twb hais lawm hais tias nws yuav tuag li ntawd.” Ces nws txawm hais rau nws cov tub hais tias, “Muab eeb mus nog rau saum kuv tus neesluav rau kuv.” Lawv txawm ua li nws hais, ces nws thiaj caij neesluav mus pom tus cev Vajtswv lus ntawd tuag xyab luas rau hauv plawv kev; tus neesluav thiab tus tsov ntxhuav tseem sawv nres nroos rau ib sab. Tus tsov ntxhuav yeej tsis noj tus cev Vajtswv lus ntawd lub cev ib qho thiab tsis tom tus neesluav li. Tus laus uas cev Vajtswv lus muab tus cev Vajtswv lus uas tuaj nram lub xeev Yudas tuaj tsaws rau saum tus neesluav thiab coj rov los pam rau hauv Npethees thiab muab faus lawm. Tus laus uas cev Vajtswv lus coj tus tuag ntawd mus faus rau hauv nws tsevneeg lub qhov ntxa; nws thiab nws cov tub quaj hais tias, “Kuv tus kwv, kuv tus kwv!” Tom qab uas lawv muab tus tuag faus tas lawm, tus laus uas cev Vajtswv lus hais rau nws cov tub hais tias, “Yog thaum twg kuv tuag ces nej muab kuv faus rau hauv lub qhov ntxa no thiab muab kuv lub cev tso rau ntawm nws ib sab. Tus TSWV tej lus samhwm uas tus cev Vajtswv lus mus hais tawmtsam lub thaj hauv lub nroog Npethees thiab tej chaw teev dab hauv Xamalis yeej muaj tseeb li ntawd tiag.” Cov Yixalayees tus Vajntxwv Yelaunpau-as tsis tso txojkev ua phem ua qias tseg li, nws pheej xaiv tej cajces uas yog neeg dog dig tsa ua povthawj tu tej thaj uas nws ua. Leejtwg xav ua povthawj ces nws pheej lam muab tus ntawd tsa los ua li. Txojkev txhaum uas nws ua no thiaj li coj kev puastsuaj los raug nws, nws tsevneeg thiab nws cajces huv tibsi. Thaum lub sijhawm uas Vajntxwv Yelaunpau-as tus tub Anpiyas mob hnyav heev lawm. Yelaunpau-as hais rau nws tus pojniam hais tias, “Koj cia li tu cev kom tsis txhob muaj leejtwg paub koj thiab mus rau pem lub nroog Silaus uas yog tus cev Vajtswv lus Ahiyas nyob; nws yog tus uas thaum ub hais tias, kuv yuav tau ua vajntxwv kav tebchaws Yixalayees. Koj nqa kaum lub ncuav ib co ncuav phom thiab ib lamhwj zib ntab mus rau nws. Nug nws saib yuav muaj dabtsi tshwmsim rau wb tus tub, ces nws yuav qhia rau koj.” Yog li ntawd, nws thiaj mus cuag Ahiyas rau pem lub nroog Silaus, thaum uas Ahiyas twb laus heev thiab qhovmuag tsis pom kev lawm. Tus TSWV hais rau Ahiyas hais tias, “Yelaunpau-as tus pojniam tabtom sawv kev tuaj cuag koj, nug txog nws tus tub, vim nws tus tub mob hnyav heev. Koj teb li no rau nws.” Thaum Yelaunpau-as tus pojniam tuaj txog ntua, nws ua txuj ua li nws tsis yog Yelaunpau-as tus pojniam. Tiamsis thaum Ahiyas hnov nws tuaj txog ntawm taw rooj, Ahiyas txawm hu hais tias, “Los tsev, kuv twb paub koj lawm, koj yog Yelaunpau-as tus pojniam. Vim li cas koj ua txuj ua li uas koj yog lwm tus? Kuv muaj xov tsis zoo yuav qhia rau koj paub. Cia li rov qab mus qhia rau Yelaunpau-as hais tias tus TSWV uas yog cov Yixalayees tus Vajtswv hais li no: ‘Nyob hauv haivneeg Yixalayees mas kuv yeej xaiv koj thiab tsa koj los ua tus kav kuv haivneeg Yixalayees. Kuv twb tshem lub tebchaws ntawm Daviv cov xeebntxwv los thiab muab cob rau koj lawm. Tiamsis koj tsis ua koj lub neej zoo li kuv tus tubtxib Daviv, tus uas hwm kuv, mloog kuv lus thiab ua raws li tej uas kuv kom nws ua. Koj tseem ua txhaum loj tshaj cov neeg uas ua nom kav ua ntej koj lawm thiab. Koj tso kuv tseg mus puab mlom thiab nchuav tej mlom tooj los pe ua rau kuv chim. Vim li no, kuv yuav tso sub tawg sub ntsha los rau koj tsevneeg, thiab kuv yuav muab cov txivneej uas yog koj cajces tua kom tuag tas, kuv yuav ua rau cov laus thiab cov hluas ib yam nkaus. Kuv yuav muab koj tsevneeg ua kom tu noob nrho; luag yuav tuaj muab lawv cheb mus povtseg ib yam li cheb tej plua tshauv. Koj tsevneeg txhua tus uas tuag rau hauv nroog, dev yuav tuaj muab noj kom tas huv tibsi, thiab txhua tus uas tuag rau tom tej nras los dav npoj yuav los muab noj kom tas. Kuv uas yog tus TSWV yog tus uas hais tej lus no ntag.’ ” Ahiyas hais rau Yelaunpau-as tus pojniam hais tias, “Koj cia li rov qab mus tsev tamsim no. Thaum koj mus txog ntua hauv lub nroog, koj tus tub yuav tu siav nrho. Cov Yixalayees yuav tuaj quaj nyiav nws thiab muab nws coj mus faus. Yelaunpau-as tsevneeg tsuas yog nws tus tub tib leeg thiaj li muab faus muaj ntxa, rau qhov tus TSWV uas yog cov Yixalayees tus Vajtswv txaus siab rau nws nkaus xwb. Tus TSWV yuav tsa dua ib tug vajntxwv los kav haivneeg Yixalayees, nws yuav muab Yelaunpau-as tsevneeg tua kom tuag tu noob nrho. Tus TSWV yuav rau txim rau cov Yixalayees, thiab lawv yuav tshee ua zog koog ib yam li tej tauj uas nyob hauv hav dej. Nws yuav muab cov Yixalayees ntiab tawm hauv lub tebchaws zoo tshaj plaws uas nws muab rau lawv cov yawgkoob mus, thiab nws yuav muab lawv raws kom khiav dhau plaws tus dej Efalates mus rau sab tim ub, vim lawv tau puab tej mlom pojniam Aselas los pe ua rau tus TSWV chim heev. Vim Yelaunpau-as tau ua txhaum thiab nws coj cov Yixalayees mus ua kev txhaum, tus TSWV thiaj muab cov Yixalayees tso povtseg lawm.” Ces Yelaunpau-as tus pojniam txawm rov qab los rau hauv lub nroog Tilexas. Thaum nws los txog ntua hauv tsev, nws tus tub tu siav nrho. Cov Yixalayees thiaj tuaj quaj nyiav thiab muab nws coj mus faus raws li tus TSWV tau hais rau nws tus tubtxib Ahiyas uas yog tus cev Vajtswv lus lawm. Dua li lwm yam uas Vajntxwv Yelaunpau-as ua tas los, nws tej kev ntaus rog thiab tej kev tswjhwm puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Yelaunpau-as ua vajntxwv kav tebchaws Yixalayees tau nees nkaum xyoo. Nws tuag thiab luag coj nws mus faus, thiab nws tus tub Nadas ua vajntxwv hloov nws chaw. Thaum Xalumoos tus tub Lehaunpau-as ua vajntxwv kav tebchaws Yudas, nws hnubnyoog muaj plaub caug ib xyoos. Nws ua vajntxwv tau kaum xya xyoo nyob hauv lub nroog Yeluxalees uas tus TSWV xaiv hauv tebchaws Yixalayees los ua qhov chaw rau sawvdaws tuaj pehawm tus TSWV. Lehaunpau-as niam hu ua Na-amas thiab yog neeg Amoos. Cov Yudas tau ua txhaum ntau yam rau tus TSWV thiab ua rau nws chim heev tshaj li thaum ub lawv cov yawgkoob tau ua los lawm. Lawv ua tej chaw teev dab, txhos ncej zeb thiab puab mlom Aselas rau lawv pe saum tej ncov roob thiab hauv tej qab ntoo. Tsis tas li ntawd xwb, tseem muaj cov txivneej thiab cov pojniam uas pheej mus ua niamntiav thiab txivntiav hauv tej tsev teev dab ntawd. Cov Yudas tau ua tej kev phem kev qias li cov neeg thaum ub uas tus TSWV muab ntiab tawm hauv lub tebchaws mus ua ntej cov Yixalayees los nyob. Thaum Lehaunpau-as ua vajntxwv tau tsib xyoos lawm, Vajntxwv Sisaj uas kav tebchaws Iziv txawm tuaj tua lub nroog Yeluxalees. Nws coj tagnrho tej nyiaj uas muab tso rau hauv lub Tuamtsev thiab hauv lub loog thiab tej thaiv hniav ntaj uas Xalumoos muab kub nchuav ua huv tibsi mus lawm. Vajntxwv Lehaunpau-as mam li nchuav dua ib co thaiv hniav ntaj tooj los hloov cov ntawd chaw, thiab muab rau cov tub fajxwm uas zov tej roojvag tau siv. Txhua zaus uas vajntxwv mus hauv lub Tuamtsev, cov tub fajxwm yeej nqa rawv cov thaiv hniav ntaj tooj ntawd nrog nws mus thiab coj rov los cia rau hauv cov tub fajxwm tej chaw. Dua li lwm yam uas Vajntxwv Lehaunpau-as ua tas los, puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Txij thaum ntawd los Lehaunpau-as thiab Yelaunpau-as nkawd ib tug pheej ua rog rau ib tug tas nkawd tiam neej li. Lehaunpau-as tuag thiab luag muab nws coj mus faus rau ntawm cov vajntxwv lub toj ntxas hauv Daviv lub nroog (nws niam hu ua Na-amas thiab yog neeg Amoos), thiab nws tus tub Anpiyas ua vajntxwv hloov nws chaw. Thaum Nenpas tus tub Yelaunpau-as ua vajntxwv kav lub tebchaws Yixalayees tau kaum yim xyoo lawm, Anpiyas mam li ua vajntxwv kav lub tebchaws Yudas, thiab nws nyob hauv lub nroog Yeluxalees kav tau peb xyoos. Anpiyas niam hu ua Ma-akas thiab yog Axaloos tus ntxhais. Anpiyas ua txhaum ib yam li nws txiv ua; nws yeej tsis hwm tus TSWV uas yog nws tus Vajtswv li nws yawgkoob Daviv lawm. Tiamsis vim muaj Daviv, tus TSWV uas yog Daviv tus Vajtswv thiaj li pub Daviv tus xeebntxwv Anpiyas ua vajntxwv hloov nws chaw kav lub nroog Yeluxalees thiab tswj lub nroog ntawd nyob ruaj khov. Tus TSWV ua li ntawd, vim Daviv yeej ua haum tus TSWV lub siab thiab nws yeej tsis tau ua ib yam dabtsi hla dhau tus TSWV tej lus samhwm li, tsuas yog qhov uas nws tau ua rau Uliyas uas yog neeg Hitis xwb. Yelaunpau-as thiab Anpiyas nkawd rov pib ua rog sib tua mus txog thaum tas Anpiyas tiam neej li thiab. Dua li lwm yam uas Anpiyas ua tas los, puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Anpiyas tuag thiab luag coj nws mus faus rau ntawm Daviv lub nroog, thiab nws tus tub Axas ua vajntxwv hloov nws chaw. Thaum Vajntxwv Yelaunpau-as ua vajntxwv kav lub tebchaws Yixalayees tau nees nkaum xyoo lawm, Axas mam li ua vajntxwv kav lub tebchaws Yudas, thiab nws nyob hauv lub nroog Yeluxalees kav tau plaub caug ib xyoos. Nws pog yog Axaloos tus ntxhais Ma-akas. Axas ua lub neej ncaj ncees haum tus TSWV lub siab, ib yam li thaum ub nws yawgkoob Daviv tau ua los lawm. Nws muab cov txivneej thiab cov pojniam uas pheej ua niamntiav thiab txivntiav ntiab tawm hauv tej tsev teev dab hauv nws lub tebchaws mus, thiab nws muab tej mlom tooj uas nws cov yawgkoob ua coj mus povtseg huv tibsi. Axas muab nws pog Ma-akas lub meejmom uas yog poj vajntxwv txo tsis pub ua ntxiv lawm, vim nws yog tus uas hais kom txua tus mlom pojniam Aselas. Axas thiaj muab tus mlom ntawd txiav thiab coj mus hlawv rau hauv lub Hav Kiloos. Txawm yog Axas tsis tau muab tej tsev teev dab rhuav kom puastsuaj tas los nws yeej ua neeg ncaj ncees thiab muab siab npuab tus TSWV tas nws simneej. Nws muab tej khoom uas nws txiv muab fij rau Vajtswv lawm, coj mus tso rau hauv lub Tuamtsev nrog tej nyiaj tej kub uas nws muab fij rau tus TSWV lawm. Cov Yudas tus Vajntxwv Axas thiab cov Yixalayees tus Vajntxwv Npasas rov ua rog mus txog thaum tas nkawd tiam neej. Cov Yixalayees tus Vajntxwv Npasas mus tua cov Yudas thiab tsim lub nroog Lamas ua chaw txiav kev tsis pub cov Yudas mus los. Yog li ntawd, Vajntxwv Axas thiaj muab tej kub uas seem hauv lub Tuamtsev thiab hauv lub loog rau nws cov nomtswv nqa mus rau pem lub nroog Damaxes thiab muab pub rau cov Xilias tus Vajntxwv Npeehadas uas yog Talee-moos tus tub thiab yog Hexi-oos tus xeebntxwv nrog cov lus uas hais li no: “Cia wb tuav tes ua phoojywg ib yam li thaud koj txiv thiab kuv txiv ua phoojywg los lawm. Cov nyiaj thiab cov kub no yog coj tuaj pub rau koj ua kev sib raug zoo. Nimno thov koj cia li txiav kev ua phoojywg nrog cov Yixalayees tus Vajntxwv Npasas kom nws thiaj thim nws cov tubrog tawm hauv kuv cheebtsam av mus.” Vajntxwv Npeehadas pom zoo ua li Axas hais thiab tso nws cov thawj tubrog coj lawv cov tubrog mus tua cov Yixalayees tej nroog. Lawv mus txeeb tau lub nroog Iyoos, lub nroog Das, lub nroog Anpees Npethes Ma-akas, cheebtsam uas ze lub Pasdej Kalilais thiab mus rau tagnrho cheebtsam Nathalis. Thaum Vajntxwv Npasas hnov tej xwmtxheej no tshwm tuaj lawm, nws txawm tso tseg tsis tsim lub nroog Lamas ntxiv, thiab rov qab mus rau hauv lub nroog Tilexas lawm. Vajntxwv Axas thiaj li tso xov mus rau cov pejxeem txhua tus thoob plaws tebchaws Yudas, kom cia li tuaj pab tshem tej pobzeb thiab tej ntoo uas Npasas coj tuaj kho lub nroog Lamas ntawd povtseg. Axas muab tej khoom ntawd mus ua lub nroog Nkenpas uas nyob hauv cheebtsam Npeenyamees thiab lub nroog Mixepas. Dua li lwm yam uas Vajntxwv Axas ua tas los, nws lub peevxwm thiab tej nroog uas nws ua, puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Tiamsis thaum nws laus lawm txawm muaj mob rau nws ob txhais kotaw. Axas tuag thiab luag coj nws mus faus rau ntawm cov vajntxwv lub toj ntxas hauv Daviv lub nroog, thiab nws tus tub Yehausafas ua vajntxwv hloov nws chaw. Thaum Axas ua vajntxwv kav lub tebchaws Yudas tau ob xyoos lawm, Yelaunpau-as tus tub Nadas mam li ua vajntxwv kav lub tebchaws Yixalayees, thiab nws kav tau ob xyoos. Nws coj cov Yixalayees mus ua txhaum rau tus TSWV ib yam li nws txiv. Ahiyas tus tub Npasas uas yog xeem Ixakhas tau ntxeev siab rau Nadas thiab muab Nadas tua thaum Nadas thiab nws cov tubrog tseem tabtom mus vij lub nroog Nkinpethoos hauv tebchaws Filitees. Ces Npasas thiaj ua vajntxwv hloov Nadas chaw. Thaum ntawd Axas twb ua vajntxwv kav lub tebchaws Yudas tau peb xyoos lawm. Txij thaum ntawd los Npasas muab Yelaunpau-as tsevneeg tua tuag tas raws li tus TSWV tej lus uas nws hais rau nws tus tubtxib Ahiyas uas yog tus cev Vajtswv lus hauv lub nroog Silaus, ces Yelaunpau-as tsevneeg raug tua tuag tu noob nrho tsis tshuav ib tug li. Qhov uas muaj tej xwmtxheej no twb yog vim Yelaunpau-as ua rau tus TSWV uas yog cov Yixalayees tus Vajtswv chim heev, vim tej kev txhaum uas nws ua thiaj coj cov Yixalayees mus ua txhaum. Dua li lwm yam uas Nadas ua tas los puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Cov Yudas tus Vajntxwv Axas thiab cov Yixalayees tus Vajntxwv Npasas rov ua rog mus txog thaum tas nkawd tiam neej li thiab. Thaum Vajntxwv Axas ua vajntxwv kav lub tebchaws Yudas tau peb xyoos lawm, Ahiyas tus tub Npasas mam li ua vajntxwv kav lub tebchaws Yixalayees, thiab nws nyob hauv lub nroog Tilexas kav tau nees nkaum plaub xyoos. Nws coj cov Yixalayees mus ua txhaum rau tus TSWV ib yam li Yelaunpau-as. Tus TSWV hais rau tus cev Vajtswv lus Yehus uas yog Hananis tus tub kom mus hais rau Npasas li no: “Koj yeej tsis tseemceeb dabtsi, tiamsis kuv tsa koj ua tus thawjcoj coj kuv haivneeg Yixalayees. Koj ua txhaum ib yam li Yelaunpau-as ua, thiab koj coj kuv haivneeg mus ua txhaum, ua rau kuv chim heev. Yog li ntawd, kuv yuav ua rau koj tsevneeg kom puastsuaj ib yam li kuv ua rau Yelaunpau-as tsevneeg thiab. Koj tsevneeg txhua tus uas tuag rau hauv nroog, dev yuav tuaj muab noj kom tas huv tibsi, thiab txhua tus uas tuag rau tom tej nras los dav npoj yuav los muab noj kom tas.” Dua li lwm yam uas Npasas ua tas los, thiab nws lub peevxwm puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Npasas tuag thiab luag coj nws mus faus rau hauv lub nroog Tilexas, thiab nws tus tub Elas ua vajntxwv hloov nws chaw. Tus TSWV muab tej lus foom tsis zoo no rau Yehus uas yog tus cev Vajtswv lus coj mus hais rau Npasas thiab nws tsevneeg twb yog vim tej uas nws tau ua txhaum rau tus TSWV. Qhov uas nws ua rau tus TSWV chim tsis yog vim tej kev phem kev qias uas nws ua raws li Vajntxwv Yelaunpau-as ua tas los xwb, tiamsis yog qhov uas nws muab Yelaunpau-as tsevneeg tua tuag tu noob nrho lawm. Thaum Vajntxwv Axas ua vajntxwv kav lub tebchaws Yudas tau nees nkaum rau xyoo lawm, Npasas tus tub Elas mam li ua vajntxwv kav lub tebchaws Yixalayees, thiab nws nyob hauv lub nroog Tilexas kav tau ob xyoos. Ximelis uas yog Elas ib tug thawj saib ib nrab ntawm vajntxwv cov tsheb nees, tau ntxeev siab rau vajntxwv. Muaj ib hnub Elas mus haus cawv hauv Alexas tsev hauv lub nroog Tilexas. Alexas yog tus uas saib lub loog. Ximelis txawm nkag mus muab Elas ntaus tuag rau hauv lub tsev ntawd, thiab nws ua vajntxwv hloov Elas chaw. Thaum ntawd Axas twb ua vajntxwv kav lub tebchaws Yudas tau nees nkaum xya xyoo lawm. Tom qab uas Ximelis los ua vajntxwv tau tsis ntev, nws muab Npasas tsevneeg tua tuag tu noob nrho. Txhua tus txivneej uas yog Npasas kwvtij thiab phoojywg, Ximelis muab tua tas huv tibsi. Qhov uas Ximelis muab Npasas tsevneeg tua tuag tagnrho yog raws li tej lus uas tus TSWV kom Yehus uas yog tus cev Vajtswv lus mus hais rau Npasas ntag. Qhov uas Npasas thiab nws tus tub Elas tau ua rau tus TSWV uas yog cov Yixalayees tus Vajtswv chim, mas yog nkawd pheej mus pe dab pe mlom thiab coj cov Yixalayees mus ua txhaum. Dua li lwm yam uas Elas ua tas los puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Thaum Axas ua vajntxwv kav lub tebchaws Yudas tau nees nkaum xya xyoo lawm, Ximelis mam li ua vajntxwv kav lub tebchaws Yixalayees; nws nyob hauv lub nroog Tilexas kav tau xya hnub. Thaum ntawd cov tubrog Yixalayees tseem tabtom mus puav tua cov Filitees lub nroog Nkinpethoos, ces thaum lawv hnov dheev hais tias Ximelis ntxeev siab rau vajntxwv thiab muab vajntxwv ntaus tuag lawm, tamsim ntawd lawv cia li muab Aumelis uas yog lawv tus thawj tubrog tsa ua cov Yixalayees tus vajntxwv. Aumelis thiab nws cov tubrog cia li tso lub nroog Nkinpethoos tseg thiab mus puav tua lub nroog Tilexas. Thaum Ximelis pom hais tias lub nroog Tilexas poob lawm, nws txawm mus rau hauv chav tsev hauv plawv lub loog thiab zes hluavtaws hlawv lub loog, ces nws thiaj tuag rau hauv lawm. Tej xwm no tshwmsim twb yog vim nws ua txhaum rau tus TSWV thiab coj cov Yixalayees mus ua txhaum ib yam li nws yawgkoob Yelaunpau-as ua. Dua li lwm yam uas Ximelis ua tas los puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Thaum ntawd cov Yixalayees faib ua ob pab lawm: ib pab xav tsa Nkinas tus tub Tinpenis ua vajntxwv, tiamsis ib pab txaus siab rau Aumelis xwb. Ces thaum kawg, pab uas txaus siab tuaj Aumelis tog yeej, lawv thiaj muab Tinpenis tua tuag. Aumelis thiaj tau ua vajntxwv. Yog li ntawd, thaum Axas ua vajntxwv kav lub tebchaws Yudas tau peb caug ib xyoo lawm, Aumelis mam li ua vajntxwv kav lub tebchaws Yixalayees, thiab nws kav tau kaum ob xyoos. Thawj rau lub xyoo nws nyob hauv lub nroog Tilexas kav. Nws muab rau txhiab daim nyiaj mus yuav tau lub laj roob Xamalis ntawm ib tug txivneej hu ua Semelis. Ces Aumelis txawm mus txhim kho lub laj roob ntawd, ua tau ib lub nroog rau saum, thiab tis npe rau lub nroog ntawd hu ua Xamalis, raws li Semelis lub npe uas yog tus qub tswv lub laj roob ntawd. Aumelis tseem ua txhaum rau tus TSWV loj tshaj cov vajntxwv uas xub nyob ua ntej nws lawm thiab. Nws ua rau tus TSWV uas yog cov Yixalayees tus Vajtswv chim heev, vim nws tau coj cov Yixalayees mus ua txhaum thiab mus pe dab pe mlom, ib yam li thaum ub Yelaunpau-as tau ua lawm. Dua li lwm yam uas Aumelis ua tas los, puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Aumelis tuag thiab luag coj nws mus faus rau hauv lub nroog Xamalis, thiab nws tus tub Ahaj ua vajntxwv hloov nws chaw. Thaum uas Axas ua vajntxwv kav lub tebchaws Yudas tau peb caug yim xyoo lawm, Aumelis tus tub Ahaj mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau nees nkaum ob xyoos. Nws ua txhaum rau tus TSWV heev tshaj cov vajntxwv thaum ub ua lawm thiab. Tej kev txhaum uas nws ua li Vajntxwv Yelaunpau-as ua tseem tsis txaus nws siab thiab; tsis tas li ntawd xwb, nws mus yuav Vajntxwv Enpa-as tus ntxhais Yexenpees los ua pojniam thiab mus pe tus mlom Npa-as. Nws ua tau ib lub tsev teev Npa-as rau hauv lub nroog Xamalis thiab ua tau ib lub thaj rau nws, thiab muab teeb rau hauv lub tsev uas nws ua teev tus mlom Npa-as ntawd. Nws tseem puab tau ib tug mlom pojniam Aselas los rau sawvdaws pe. Nws ua rau tus TSWV uas yog cov Yixalayees tus Vajtswv chim rau nws tshaj cov Yixalayees cov vajntxwv txhua tus uas tau ua tas los lawm thiab. Thaum nws tseem ua vajntxwv, Hiyees uas nyob hauv Npethees thiaj tuaj kho lub nroog Yelikaus. Ces Hiyees tus tub hlob uas hu ua Anpilas tuag thaum nws pib kho lub nroog Yelikaus, thiab nws tus tub ntxawg uas hu ua Xenkus tuag rau thaum uas nws ua cov roojvag, raws li tus TSWV tau hais tseg rau Noos tus tub Yausuas lawm. Muaj ib tug cev Vajtswv lus hu ua Eliyas, nyob hauv lub nroog Tisenpes hauv cheebtsam Nkile-as, hais rau Vajntxwv Ahaj hais tias, “Kuv tuav tus TSWV uas yog cov Yixalayees tus Vajtswv uas muaj sia nyob, tus uas kuv niaj hnub ua nws tes haujlwm lub npe hais rau koj hais tias ob lossis peb xyoo tom ntej no yuav tsis muaj ib ncos lwg lossis ib kob nag los mus txog thaum kuv hais kom muaj thiaj li yuav rov muaj.” Ces tus TSWV hais rau Eliyas hais tias, “Koj cia li tawm ntawm qhov chaw no mus rau sab hnubtuaj, mus nkaum ze rau ntawm tus dej Khelis uas nyob ntawm tus dej Yauladees sab hnubtuaj. Koj yuav tau tus dej ntawd haus, thiab kuv twb hais kom uablag nqa mov los rau koj noj nyob qhov ntawd lawm.” Eliyas thiaj ua raws li tus TSWV hais. Nws txawm mus nyob ntawm tus dej Khelis. Nws haus tus dej ntawd thiab uablag pheej nqa mov thiab nqaij los rau nws noj txhua tagkis thiab txhua hmo. Tiamsis tsis ntev tom qab ntawd, tus dej kuj qhuav tas vim tsis muaj nag los. Ces tus TSWV hais rau Eliyas hais tias, “Koj cia li sawv kev mus rau pem lub nroog Xalefas uas nyob ze lub nroog Xidoos thiab mus nyob qhov ntawd. Kuv twb hais rau ib tug pojntsuam uas nyob hauv lub nroog ntawd kom nws pub zaub pub mov rau koj noj lawm.” Yog li ntawd, Eliyas thiaj mus rau pem lub nroog Xalefas. Thaum nws mus txog ntawm lub roojvag nroog, nws pom ib tug pojntsuam tabtom tuaj khaws taws. Eliyas txawm hais rau tus pojntsuam ntawd hais tias, “Thov koj nqa mentsis dej tuaj pub rau kuv haus.” Thaum tus pojntsuam tabtom rov mus nqa dej, Eliyas txawm hu hais tias, “Thov nqa mentsis mov tuaj pub kuv noj thiab.” Nws teb hais tias, “Kuv thov coglus rau tus TSWV, koj tus Vajtswv uas muaj sia nyob hais tias, kuv tsis muaj mov lawm. Kuv tsuas tshuav ib nyuag taus hmoov nplej nyob hauv tais thiab ib qho nyuag roj txiv ntoo nyob hauv qab hub lawm xwb. Kuv tuaj khaws taws coj mus rauv ua qhov nyuag hmoov nplej ntawd rau kuv thiab kuv tus tub noj. Pluas mov no yog pluas mov kawg, ces wb tos tuag lawm xwb.” Eliyas txawm hais rau tus pojntsuam ntawd hais tias, “Koj tsis txhob txhawj, cia li mus ua koj pluas hmo. Tiamsis xub ua ib qho me me nqa tuaj rau kuv noj tso, koj mam li rov mus muab qhov seem ua rau koj thiab koj tus tub noj. Vim tus TSWV uas yog cov Yixalayees tus Vajtswv hais li no: ‘Cov hmoov nplej hauv lub tais yuav tsis paub tas thiab cov roj hauv lub hub yuav tsis paub qhuav ua ntej uas tus TSWV tso nag los.’ ” Tus pojntsuam ntawd thiaj mus ua raws li Eliyas hais rau nws, lawv thiaj muaj mov txaus noj ntau hnub. Raws li tus TSWV tau coglus tseg rau Eliyas lawm hais tias cov hmoov nplej hauv lub tais yuav tsis paub tas thiab cov roj hauv lub hub yuav tsis paub qhuav. Tsis ntev tom qab no, muaj ib hnub tus pojntsuam ntawd tus tub txawm mob; nws mob hnyav heev zuj zus, thaum kawg nws txawm tuag lawm. Tus pojntsuam ntawd hais rau Eliyas hais tias, “Koj twb yog Vajtswv tus neeg, ua li cas koj thiaj ua li no rau kuv? Koj tuaj ntawm no, yog koj tuaj ua kom Vajtswv nco txog kuv tej kev txhaum uas kuv tau ua tas los lawm kom kuv tus tub tuag xwb los?” Eliyas hais tias, “Cia li puag koj tus tub los rau kuv.” Eliyas tsaws hlo tus metub ntawm leej niam xubntiag, puag mus rau saum chav uas Eliyas nyob, thiab muab tus tub ntawd tso pw rau saum Eliyas lub txaj. Ces Eliyas tsa ncauj thov Vajtswv hais tias, “Tus TSWV uas yog kuv tus Vajtswv, vim li cas koj ua rau tus pojntsuam no tau kev txomnyem ua luaj no? Nws yog tus uas muaj lub siab dawb pub zaub pub mov rau kuv noj, vim li cas koj ua rau nws tus tub tuag lawm!” Ces Eliyas txawm qhau cev hlo pw tsuam tus tub ntawd lub cev peb zaug thiab thov Vajtswv hais tias, “Tus TSWV uas yog kuv tus Vajtswv, thov koj rau siav rau pa rau tus tub no kom rov muaj sia lauj!” Tus TSWV teb Eliyas tej lus thov, ces tus tub ntawd txawm ua pa thiab rov muaj sia lawm. Eliyas thiaj puag tus tub ntawd nqis los rau txheej tsev hauv qab no, muab rau leej niam thiab hais rau nws hais tias, “Koj saib, koj tus tub rov muaj sia lawm!” Tus pojntsuam ntawd teb hais tias, “Nimno kuv paub lawm hais tias koj yog Vajtswv tus neeg thiab yog tus cev Vajtswv lus tiag.” Tau ib ntu tom qab no, yog xyoo peb uas ntuj qhuav teb nkig ntawd, tus TSWV hais rau Eliyas hais tias, “Koj cia li mus cuag Vajntxwv Ahaj kuv yuav tso nag los.” Yog li ntawd, Eliyas thiaj mus lawm. Thaum ntawd muaj kev tshaib nqhis nyob hauv lub xeev Xamalis, Vajntxwv Ahaj thiaj hu kom Aunpadiyas, tus uas saib lub loog mus cuag nws. (Aunpadiyas yog ib tug uas hwm tus TSWV heev. Thaum Yexenpees ntes tus TSWV cov cevlus tua povtseg, Aunpadiyas tau coj cov cev Vajtswv lus ntawd ib puas leej mus zais rau hauv ob lub qhov tsua, ib pab tsib caug leej, nws xa zaub mov thiab dej mus rau lawv noj thiab haus.) Ahaj hais rau Aunpadiyas hais tias, “Wb cia li tawm mus xyuas txhua lub qhovdej txhawv thiab txhua lub hav thoob plaws hauv lub tebchaws no saib puas pom muaj zaub nyob qhov twg txaus peb tej nees thiab neesluav noj thiaj cawm tau tej tsiaj ntawd. Peb tej tsiaj thiaj yuav tsis tuag tshaib.” Ces nkawd txawm pom zoo muab lub tebchaws faib raws li nkawd nyiam, ces nkawd nyias mus nyias rau ib txojkev lawm. Thaum Aunpadiyas tabtom taug kev mus, nws txawm ntsib Eliyas. Nws tseem nco tau Eliyas, nws thiaj nyo hau ntshis hawm thiab nug hais tias, “Koj puas yog Eliyas?” Eliyas teb hais tias, “Kuv yog Eliyas. Koj cia li rov qab mus thiab qhia rau koj tus tswv uas yog vajntxwv hais tias, kuv nyob ntawm no.” Aunpadiyas teb hais tias, “Kuv tau ua txhaum dabtsi, koj thiaj yuav muab kuv cob rau Ahaj txhais tes? Kuv ntshai nyob tsam nws muab kuv tua povtseg. Kuv thov coglus rau ntawm tus TSWV uas yog koj tus Vajtswv uas muaj sia nyob hais tias, vajntxwv twb txib neeg mus nrhiav koj rau txhua lub tebchaws thoob plaws hauv ntiajteb no lawm. Yog tus nom uas kav lub tebchaws twg hais tias tsis pom koj nyob hauv nws lub tebchaws, ces Ahaj yeej kom tus uas kav lub tebchaws ntawd tsa tes twv hais tias nws yeej tsis pom koj nyob qhov twg li. Nimno koj ho xav li cas, koj thiaj kom kuv mus qhia rau nws hais tias koj nyob ntawm no? Nyob tsam thaum kuv tabtom mus lawm, tus TSWV tus ntsujplig los coj koj mus rau qhov chaw uas tsis muaj neeg paub lawm ne? Ces thaum kuv mus qhia rau Ahaj hais tias koj nyob ntawm no, tiamsis nws ho tuaj nrhiav tsis pom koj, ces thaum ntawd nws yuav muab kuv tua povtseg xwb. Koj nco ntsoov hais tias kuv yeej yog tus uas ibtxwm pehawm tus TSWV thaum kuv tseem yog menyuam yaus los lawm. Koj puas hnov zaj uas Yexenpees ntes tus TSWV cov cevlus tua povtseg, kuv coj tau ib puas leej mus zais rau hauv ob lub qhov tsua, ib pab twg tsib caug leej, kuv xa zaub mov thiab dej mus rau lawv noj thiab haus? Yog li ntawd, koj yuav ua li cas txib kuv mus qhia rau vajntxwv hais tias koj nyob ntawm no? Nws yeej yuav muab kuv tua povtseg xwb!” Eliyas teb hais tias, “Kuv thov coglus rau tus TSWV uas muaj hwjchim loj kawg nkaus, tus uas kuv niaj hnub ua nws tes haujlwm hais tias, hnub no kuv yuav mus kom tshwm ntsej tshwm muag rau Vajntxwv Ahaj pom ntag!” Yog li ntawd, Aunpadiyas thiaj mus cuag Vajntxwv Ahaj thiab qhia zaj no rau nws, ces Ahaj txawm mus cuag Eliyas. Thaum Ahaj pom dheev Eliyas, Ahaj hais tias, “Twb yog koj ntag, koj yog tus uas ua rau cov Yixalayees tau kev nyuaj siab ntxov plawv kawg li.” Eliyas teb hais tias, “Kuv tsis yog tus uas ua kom cov Yixalayees tau kev nyuaj siab ntxov plawv. Twb yog koj thiab koj txiv ntag, rau qhov neb tsis mloog tus TSWV tej lus samhwm, thiab neb pheej mus pe tej mlom Npa-as ntag. Nimno koj cia li mus hu cov Yixalayees tuaj cuag kuv rau saum lub Roob Kalemees no. Coj plaub puas tsib caug leej uas cev Npa-as lus thiab plaub puas leej uas cev tus mlom pojniam Aselas lus uas yog niam Vajntxwv Yexenpees ua tus pub kev noj haus rau lawv tuaj rau ntawm no huv tibsi.” Yog li ntawd, Ahaj thiaj hu cov Yixalayees thiab cov cev Npa-as lus tuaj sib sau ua ke rau saum lub Roob Kalemees. Eliyas txav zog mus sawv rau ntawm cov pejxeem thiab hais tias, “Nej tseem yuav ua neeg muaj ob lub siab mus txog thaum twg? Yog hais tias tus TSWV yog Vajtswv tiag, sawvdaws cia li pehawm nws; tiamsis yog hais tias Npa-as yog Vajtswv, ces sawvdaws cia li pe Npa-as los mas!” Tiamsis cov pejxeem tsis teb ib los li. Eliyas txawm hais tias, “Cov uas cev tus TSWV lus tsuas tshuav kuv tib leej lawm xwb, tiamsis cov uas cev Npa-as lus muaj plaub puas tsib caug leej diam. Cia li cab ob tug heev nyuj los; muab ib tug rau cov cev Npa-as lus, muab tus nyuj ntawd tua, txiav ua tej thooj, thiab coj mus tso rau saum pawg taws, tiamsis tsis txhob zes taws rau li. Kuv mam muab dua ib tug heev nyuj tua thiab ua ib yam li lawv ua ntawd. Ces kom cov cev Npa-as lus thov lawv tus vajtswv, thiab kuv yuav thov kuv tus TSWV. Yog leejtwg tso hluavtaws los kub, tus ntawd thiaj yog Vajtswv tiag.” Cov pejxeem thiaj qw hais tias, “Peb pom zoo ua li koj hais ko ntag!” Ces Eliyas hais rau cov cev Npa-as lus hais tias, “Nej yog cov coob, cia nej xub mus xaiv tus heev nyuj thiab coj mus tua ua ntej. Tiamsis tsis txhob zes hluavtaws rau cov taws li, thov nej tus vajtswv kom nws tso hluavtaws los kub nkaus xwb.” Lawv txawm muab tus heev nyuj uas lawv cab tuaj ntawd tua thiab thov lawv tus Npa-as mus txog thaum tavsu. Lawv qw hais tias, “Npa-as, thov teb peb lauj!” Thiab lawv dhia mus dhia los ncig lub thaj uas lawv ua ntawd. Tiamsis tsis muaj ib lub suab dabtsi teb lawv li. Ces thaum tavsu Eliyas hais lus twm lawv hais tias, “Thov kom nrov mentsis thiab maj! Nws yog vajtswv! Tej zaum nws tseem xav lwm yam lossis nws tseem tab nkaum lossis nws tseem taug kev mus rau lwm qhov lossis nws tseem tsaug zog lawm, mas nej yuav tsum tsa kom nws sawv!” Yog li ntawd, cov cev Npa-as lus thiaj qw nrov tshaj qhov qub, lawv muab ntaj muab riam hlais lawv lub cev ua ntshav nrog liab vog raws li kevcai uas lawv ibtxwm ua los lawm. Lawv qw ua nqaj ua nqug mus txog thaum hnub qaij, tiamsis tsis muaj leejtwg teb thiab tsis hnov suab dabtsi li. Ces Eliyas txawm hais rau cov pejxeem hais tias, “Nej txav los ze kuv.” Lawv txawm txav los sawv vij Eliyas. Eliyas txawm muab tus TSWV lub thaj uas twb vau tas lawm kho rov rau. Nws muab kaum ob lub pobzeb los, ib lub rau ib xeem raws li Yakhauj kaum ob leeg tub ntawd tej npe, Yakhauj yog tus uas tus TSWV tis dua ib lub npe hu ua Yixalayees. Eliyas muab cov pobzeb ntawd txhim ua ib lub thaj ua qhov chaw pehawm tus TSWV. Nws khawb ib tug kwj ncig lub thaj ntawd kom ntim tau li ob thoob dej. Ces nws muab taws mus tso rau saum lub thaj, muab tus heev nyuj tua txiav ua tej thooj, thiab coj mus tso rau saum cov taws. Nws txawm hais tias, “Cia li coj plaub lub hub mus ntim dej kom puv nkaus rau thiab nqa los hliv rau saum cov khoom fij thiab cov taws no.” Lawv txawm ua raws li nws hais ntawd, Eliyas hais tias, “Rov mus nqa dej los ntxiv thiab,” lawv rov ua dua li nws hais. Nws rov hais tias, “Rov mus nqa dej los ntxiv rau thiab,” ces lawv rov qab ua dua ib zaug thiab. Cov dej ntws saum lub thaj los puv nkaus tus kwj uas khawb ncig lub thaj. Ces thaum hnub qaij uas txog lub caij fij khoom, Eliyas thiaj txav zog los rau ntawm lub thaj thiab thov Vajtswv hais tias, “Tus TSWV uas yog Anplahas, Ixaj thiab Yakhauj tus Vajtswv, hnub no thov koj cia li ua kom sawvdaws pom hais tias, koj yog cov Yixalayees tus Vajtswv thiab kuv yog koj tus tubtxib thiab tej uas kuv ua no yog koj kom kuv ua. Thov teb kuv lauj tus TSWV, thov teb kuv kom cov neeg no thiaj paub hais tias koj yog tus TSWV, tus Vajtswv uas tabtom coj lawv rov los cuag koj.” Tus TSWV txawm tso hluavtaws los kub cov khoom fij, cov taws, cov pobzeb, cov av thiab cov dej hauv tus kwj tas huv tibsi lawm. Thaum cov pejxeem pom li ntawd, lawv txawm qhau cev hlo rau hauv av thiab qw nrov nrov hais tias, “Tus TSWV thiaj yog Vajtswv; tus TSWV tib leeg xwb thiaj yog Vajtswv tiag.” Eliyas hais tias, “Nej cia li ntes cov xibhwb cev Npa-as lus no; tsis txhob pub ib tug dim li!” Cov pejxeem ntes tau lawv txhua tus, thiab Eliyas coj lawv mus tua povtseg tas rau nram tus Dej Kisoos lawm. Eliyas hais rau Vajntxwv Ahaj hais tias, “Koj cia li mus thiab noj mov tamsim no. Kuv hnov suab nag twb los yuav txog.” Thaum Ahaj mus noj mov lawm, Eliyas txawm nce mus rau saum ncov roob Kalemees, nws txhos caug ntua rau hauv av thiab khoov ua ntsejmuag ti nkaus ntawm nws ob lub hauvcaug. Eliyas hais rau nws tus tubtxib hais tias, “Tamsim no koj cia li mus ntsia puag tom hiavtxwv saib.” Tus tubtxib txawm mus ntsia thiab rov los hais tias, “Kuv tsis pom dabtsi li.” Eliyas kom nws mus ntsia xya zaus. Zaum xya nws rov los thiab hais tias, “Kuv pom ib tauv huab me me luaj lub xibteg sawv hauv hiavtxwv tuaj xwb.” Eliyas hais rau nws tus tubtxib hais tias, “Koj cia li mus hais rau Vajntxwv Ahaj, kom nws kavtsij nce rau hauv nws lub tsheb nees thiab mus tsev ua ntej nag los tav nws kev.” Ces tib plig ntshis xwb huab tsaus nti ib tog tuaj puv nkaus saum nruab ntug, cua txawm pib ntsawj thiab tuamtsam nag nrov nroos ntws saum ntuj los. Ahaj thiaj nce rau hauv nws lub tsheb nees thiab rov qab mus rau hauv lub nroog Yexelees lawm. Tus TSWV lub hwjchim los kav nkaus Eliyas; nws qaws hlo tsho khi nkaus rau saum duav thiab khiav ceev heev huas kiag Ahaj ntej mus txog ntua hauv Yexelees. Vajntxwv Ahaj piav txhua yam uas Eliyas ua thiab zaj uas Eliyas tua cov xibhwb cev Npa-as lus ntawd rau Yexenpees uas yog niam vajntxwv mloog. Yexenpees txawm tso neeg mus hais rau Eliyas hais tias: “Tagkis thaum txog lub caij no yog kuv tsis tau ua rau koj ib yam li koj ua rau cov xibhwb cev Npa-as lus, thov tej vajtswv cia li muab kuv tua kom tuag.” Eliyas ntshai heev, nws thiaj nrhiav kev khiav nkaum; nws coj nws tus tubtxib mus rau nram lub nroog Npesenpas uas nyob hauv lub xeev Yudas. Eliyas muab nws tus tubtxib tso tseg rau nrad, Eliyas mus ib hnub ke rau tom roob mojsab qhua. Nws mus nkaum tshav rau hauv ib tsob qab ntoos thiab nws xav tuag lawm xwb. Nws thiaj thov Vajtswv hais tias, “Tus TSWV, txaus kuv lawm lauj. Cia li rho kuv txojsia mus; kuv tuag yuav zoo dua!” Nws txawm qhau cev hlo pw hauv qab ntoos thiab tsaug zog hlias lawm. Ces tamsim ntawd txawm muaj ib tug timtswv ceebtsheej los tuav nkaus nws thiab hais tias, “Eliyas, koj cia li sawv los noj mov.” Eliyas tsim dheev los xam ncig lees, nws pom ib lub ncuav thiab ib hub dej nyob ze ntawm nws taubhau. Nws txawm muab los noj thiab haus tas, nws rov qhau cev pw dua lawm thiab. Ces tus TSWV tus timtswv rov los tsa Eliyas dua zaum ob hais tias, “Eliyas, koj cia li sawv los thiab noj mov, nyob tsam koj tsis muaj zog taug kev.” Eliyas sawv los noj mov thiab haus dej, cov mov ntawd ua rau nws muaj zog taug kev tau plaub caug hnub mus txog rau tom Roob Xinais uas yog Vajtswv lub roob dawbhuv. Eliyas nkag mus pw ib hmos hauv qhov tsua. Ces tus TSWV txawm los hais rau Eliyas hais tias, “Eliyas, koj tuaj ua dabtsi ntawm no?” Eliyas teb hais tias, “Tus TSWV uas yog Vajtswv tus muaj hwjchim loj kawg nkaus, kuv ibtxwm ua koj tes haujlwm. Tiamsis cov Yixalayees tsis coj raws li tej lus uas lawv tau cog tseg rau koj, lawv muab koj tej thaj rhuav thiab muab koj cov cevlus tua povtseg tas lawm. Tsuas tshuav kuv tib leeg xwb los lawv tseem nrhiav kuv tua povtseg thiab!” Tus TSWV teb Eliyas hais tias, “Koj cia li tawm mus sawv saum ncov roob tabmeeg kuv.” Tus TSWV txawm hla los mus thiab ua cua daj cua dub ntsawj tej pov roob tawg pleb zom zaws thiab tej pobzeb tawg dawb vog, tiamsis tus TSWV tsis nyob hauv cov cua ntawd. Tom qab cua tu lawm, txawm muaj av qeeg, tiamsis tus TSWV tsis nyob hauv qhov av qeeg ntawd thiab. Tom qab av qeeg tas txawm muaj hluavtaws, tiamsis tus TSWV tsis nyob hauv cov hluavtaws ntawd li thiab. Ces thaum cov hluavtaws dhau lawm, txawm muaj ib lub suab hais yau yau tuaj. Thaum Eliyas hnov lub suab ntawd, nws txawm muab nws lub tsho los npog nws ntsejmuag thiab tawm mus sawv ntawm rooj tsuas. Muaj ib lub suab hais rau Eliyas hais tias, “Eliyas, koj tuaj ua dabtsi ntawm no?” Eliyas teb hais tias, “Tus TSWV uas yog Vajtswv tus muaj hwjchim loj kawg nkaus, kuv yeej ibtxwm ua koj tes haujlwm. Tiamsis cov Yixalayees tsis coj raws li tej lus uas lawv tau cog tseg rau koj, lawv muab koj tej thaj rhuav thiab muab koj cov cevlus tua povtseg tas lawm. Tsuas tshuav kuv tib leeg xwb los lawv tseem nrhiav kuv tua povtseg thiab!” Tus TSWV hais tias, “Koj cia li rov qab mus rau pem tebchaws mojsab qhua uas ze lub nroog Damaxes, mus rau hauv lub nroog thiab muab roj hliv rau Haxayees taubhau tsa nws ua cov Xilias tus vajntxwv; muab roj hliv rau saum Nimesis tus tub Yehus taubhau, tsa nws ua vajntxwv kav lub tebchaws Yixalayees, thiab muab roj hliv rau saum Safas uas yog neeg Anpees Mehaulas tus tub Elisas taubhau tsa nws ua tus cev kuv lus hloov koj chaw. Yog leejtwg khiav dim tsis raug Haxayees tua tuag, tus ntawd yuav raug Yehus tua tuag, thiab yog leejtwg khiav dim tsis raug Yehus tua tuag, tus ntawd yuav raug Elisas tua tuag. Tiamsis kuv tseem tseg xya txhiab leej nyob hauv lub tebchaws Yixalayees no. Lawv yog cov uas muaj lub siab npuab kuv, lawv tsis tau txhos caug pe Npa-as thiab nwj nws cov mlom li.” Eliyas mus ntsib Elisas thaum nws tseem tabtom tsav khais laij teb; muaj kaum ib nkawm laij ua nws ntej, nws yog tus uas tsav khais rau nkawm heev nyuj kawg tom qab. Eliyas hle hlo nws lub tsho loj thiab muab rau Elisas hnav. Elisas txawm tso plhuav nws ob tug nyuj tseg, mus caum Eliyas qab thiab hais tias, “Thov cia kuv mus nwj kuv niam kuv txiv ncaim nkawd tso kuv mam li nrog koj mus.” Eliyas teb hais tias, “Tau los mas, koj cia li mus, kuv tsis txwv koj li!” Elisas txawm muab nws ob tug heev nyuj tua thiab muab tus quab los ua taws rauv hau cov nqaij. Elisas muab cov nqaij nyuj faib rau sawvdaws noj. Ces Elisas txawm nrog Eliyas mus thiab ua tus pab Eliyas lawm. Cov Xilias tus Vajntxwv Npeehadas hu tagnrho nws cov tubrog tuaj ua ke, thiab tseem muaj peb caug ob tug vajntxwv muab lawv tej nees thiab tej tsheb nees tuaj pab nws, nws thiaj sawv kev tuaj mus vij lub nroog Xamalis thiab tua lub nroog ntawd. Nws tso neeg mus hais rau cov Yixalayees tus Vajntxwv Ahaj hauv lub nroog hais tias, “Vajntxwv Npeehadas hais li no hais tias, ‘Koj tej nyiaj tej kub yog kuv li, koj cov pojniam thiab cov menyuam uas zoo nkauj zoo nraug los puavleej yog kuv li thiab.’ ” Ahaj teb hais tias, “Nej mus hais rau kuv tus tswv uas yog Vajntxwv Npeehadas hais tias kuv yeej zoo siab muab rau nws; kuv thiab txhua yam uas kuv muaj puavleej yog nws tug huv tibsi.” Npeehadas rov tso cov neeg coj nws tej lus mus hais rau Ahaj dua ntxiv li no: “Kuv rov tso xov tuaj rau koj, koj cia li xa koj tej nyiaj tej kub, koj cov pojniam thiab koj cov menyuam tuaj rau kuv. Tiamsis tagkis lub sijhawm no, kuv yuav tso kuv cov nomtswv tuaj tshawb hauv koj lub loog thiab hauv koj cov nomtswv tej tsev, thiab txhua yam uas zoo lawv yuav nqa mus kom tas.” Vajntxwv Ahaj hu tagnrho nws cov thawjcoj hauv nws lub tebchaws tuaj thiab hais rau lawv hais tias, “Thov nej nrog hnov, tus neeg no nws xav tuaj nrhiav kev kub ntxhov rau peb xwb. Nws tso xov tuaj rau kuv hais tias nws yuav yuav kuv cov pojniam, kuv cov menyuam thiab kuv tej nyiaj tej kub. Txawm li ntawd los kuv yeej txaus siab muab rau nws.” Cov thawjcoj ntawd teb hais tias, “Tsis txhob mloog nws hais thiab tsis txhob muab rau nws hlo li.” Yog li ntawd, Ahaj thiaj teb rau Npeehadas cov neeg xa xov hais tias, “Nej mus hais rau vajntxwv uas yog kuv tus tswv hais tias nws thawj tsab xov mas kuv txaus siab muab ntag, tiamsis tsab ob no kuv tsis txaus siab muab li nws hais ntawd.” Cov xa xov coj tej lus ntawd rov mus hais rau Npeehadas thiab lawv rov coj dua lwm tsab xov ntawm Npeehadas tuaj hais tias, “Kuv yuav coj tubrog coob tuaj rhuav koj lub nroog no, thiab koj tej nyuag thwvcib uas tawg ua hmoov twb tsis txhua kuv cov neeg ib leeg nqa ib taus mus. Yog tsis muaj li kuv hais no, ces thov kom tej vajtswv muab kuv tua kom tuag!” Vajntxwv Ahaj teb hais tias, “Nej rov mus hais rau Vajntxwv Npeehadas hais tias tus uas yog tubrog tiag nws yeej tsis tso cuabyeej ua rog tseg ua ntej nws tua yeej rog, tiamsis thaum yeej rog lawm, nws mam tso tseg.” Thaum Npeehadas tau txais Ahaj tej lus teb no, nws tseem tabtom nrog cov nomtswv uas tuaj nws tog haus cawv hauv lawv tej tsevntaub. Nws thiaj hais kom nws cov tubrog cia li npaj mus sib tua. Yog li ntawd, lawv thiaj npaj mus tua lub nroog. Tamsim ntawd, txawm muaj ib tug cev Vajtswv lus tuaj cuag Vajntxwv Ahaj thiab hais rau nws hais tias, “Tus TSWV hais tias koj puas pom pab tubrog coob coob ntawd? Hnub no kuv yuav pub kom koj tua yeej lawv, koj thiaj yuav paub hais tias kuv yog tus TSWV tiag.” Ahaj nug hais tias, “Leejtwg yuav ua tus thawjcoj peb mus tua?” Tus cev Vajtswv lus teb hais tias, “Tus TSWV hais tias, yog cov tswvxeev tej tubrog hluas yuav ua tej no ntag.” Vajntxwv rov nug hais tias, “Leejtwg yuav ua tus thawjcoj peb tiag?” Tus cev Vajtswv lus teb hais tias, “Koj yog tus coj ntag.” Yog li ntawd, vajntxwv thiaj txhij tau ob puas peb caug ob leej tubrog hluas ntawm cov thawj tubrog uas saib tej cheebtsam tuaj txoos ua ke. Nws txhij tau xya txhiab leej tubrog Yixalayees tuaj ntxiv. Lawv txawm tawm mus sib tua thaum tavsu, ces Npeehadas thiab peb caug ob tug vajntxwv uas tuaj nws tog tseem tabtom haus cawv hauv tej tsevntaub. Cov tubrog hluas tawm mus ua ntej. Ces cov tubrog uas Npeehadas tso mus tshuajxwm khiav rov los qhia rau nws hais tias, muaj ib pab tubrog tabtom tawm hauv lub nroog Xamalis tuaj lawm. Npeehadas hais tias, “Txawm yog lawv tuaj nrog peb sib tua lossis tuaj nrog peb cog kev phoojywg los xij, nej cia li muab ntes kiag cab los.” Cov tubrog hluas txawm ua cov ntaus thawjcoj lawv kev mus, ces cov tubrog Yixalayees mam li lawv qab, thiab txhua tus yeebncuab uas lawv pom, lawv muab tua tuag tas huv tibsi. Cov Xilias swb thiab khiav tawm, cov tubrog Yixalayees caum qab tua, tiamsis Npeehadas caij nees nrog cov tubrog uas caij nees khiav dim lawm. Vajntxwv Ahaj mus rau tom tiaj nrag, mus puav ntes cov nees, cov tsheb nees thiab muab cov tubrog Xilias tua tuag tas rau tod. Ces tus cev Vajtswv lus rov mus hais rau Vajntxwv Ahaj hais tias, “Koj cia li rov qab mus txhij tubrog kom coob ntxiv thiab yuav tsum ceevfaj npaj kom zoo, rau qhov lwm xyoo txog lub caij ntuj nag, cov Xilias tus vajntxwv yuav rov tuaj tua nej dua.” Vajntxwv Npeehadas cov nomtswv hais rau nws hais tias, “Cov Yixalayees tej vajtswv yog tej vajtswv uas nyob saum roob xwb, twb yog vim li ntawd cov Yixalayees thiaj tua yeej peb. Tiamsis yog peb mus tua lawv nram tiaj nrag, peb yuav tua yeej lawv xwb. Nimno cia li tshem peb caug ob tug vajntxwv ntawd tawm ntawm lawv lub luag haujlwm thiab coj lawv mus nrog cov thawj tubrog tom tiaj nrag nyob. Txhij tubrog ntxiv kom coob npaum li cov uas thaum ub koj coj mus tuag tas lawm, npaj nees thiab tsheb nees kom ntau ib yam li cov qub. Peb yuav mus tua cov Yixalayees nyob tom tiaj nrag, mas zaum no peb yuav tua yeej lawv xwb.” Vajntxwv Npeehadas txawm pom zoo ua raws li lawv hais ntawd. Ces thaum uas txog ntua lub caij ntuj nag, Npeehadas txawm txhij nws cov tubrog thiab nws nrog lawv tuaj tua cov Yixalayees tom lub nroog Afekas. Cov Yixalayees txhij tubrog thiab npaj cuabyeej; lawv faib ua ob pab mus tsuam yeej nyob sib ncag zos cov Xilias. Cov Xilias nyob puv nkaus rau tom tiaj nrag, tiamsis cov Yixalayees tsuas zoo li ob pab nyuag tshis uas tsawg tsawg xwb. Ces tus cev Vajtswv lus txawm mus cuag Vajntxwv Ahaj thiab hais rau nws hais tias, “Tus TSWV hais rau koj hais tias, ‘Vim cov Xilias hais tias kuv yog tus vajtswv uas nyob saum tej roob xwb, kuv tsis yog tus vajtswv uas nyob nram tiaj nrag. Yog li ntawd, kuv yuav pub kom koj tua yeej lawv cov tubrog uas coob heev ntawd, koj thiab koj cov neeg thiaj yuav paub hais tias kuv yog tus TSWV tiag!’ ” Cov Xilias thiab cov Yixalayees tsuam yeej nyob sib ncag, ib pab nyob ib sab tau xya hnub. Ces hnub xya lawv txawm pib sib tua, hnub ntawd cov Yixalayees tua cov Xilias tuag ib puas txhiab leej. Cov seem tuag uas khiav mus cawm siav rau hauv lub nroog Afekas los tus ntsa yeej uas thaiv lub nroog tseem vau los ntaus lawv tuag lawm nees nkaum xya txhiab leej thiab. Npeehadas khiav mus rau hauv lub nroog, thiab nws mus nkaum rau hauv ib chav tsev. Npeehadas cov nomtswv tuaj cuag nws thiab hais rau nws hais tias, “Peb hnov hais tias, cov Yixalayees cov vajntxwv muaj lub siab hlub tshua heev. Thov tso cai rau peb, muab tej ris tsho ntaubtsaj rau peb pav duav thiab muab hlua rig peb taubhau mus cuag cov Yixalayees tus vajntxwv, tej zaum nws yuav tseg koj txojsia.” Yog li ntawd, lawv thiaj muab tej ntaubtsaj los pav duav thiab muab hlua rig taubhau, ces lawv txawm mus cuag Ahaj thiab hais tias, “Koj tus tubtxib Npeehadas thov kom koj tseg nws txojsia nyob.” Ahaj teb hais tias, “Nws tseem muaj sia nyob thiab los? Zoo lawm lauj! Nws zoo li kuv ib tug kwvtij thiab ntag.” Npeehadas cov nomtswv tos ntsoov saib Ahaj puas hais tej lus zoo, thiab thaum Ahaj hais tias, “Tug kwvtij,” lawv txawm khaws nkaus lo lus ntawd thiab hais tias, “Yog li koj hais, Npeehadas yeej yog koj ib tug kwvtij tiag!” Ahaj hais tias, “Nej cia li mus coj Npeehadas tuaj cuag kuv.” Thaum Npeehadas tuaj txog, Ahaj txawm caw nws mus nrog Ahaj caij tsheb nees ua ke. Npeehadas hais rau Ahaj hais tias, “Kuv yuav muab lub nroog uas thaum ub kuv txiv txeeb tau ntawm koj txiv los rov qab rau koj, thiab yuav muab rau koj ua ib qhov chaw rau koj ua lag ua luam nyob hauv lub nroog Damaxes ib yam li kuv txiv tuaj ua nyob hauv lub nroog Xamalis.” Ahaj teb hais tias, “Vim tej lus cog tseg no, kuv yuav tso koj mus.” Ces Ahaj nkawd thiaj coglus, thiab Ahaj txawm tso Npeehadas mus lawm. Tus TSWV hais rau ib tug cevlus uas nyob hauv pab cev Vajtswv lus, kom mus hais rau ib tug cev Vajtswv lus muab nws ntaus. Tiamsis tus cev Vajtswv lus ntawd tsis kam ntaus, yog li ntawd, nws thiaj hais rau tus cev Vajtswv lus ntawd hais tias, “Vim koj tsis mloog tus TSWV lus, mas thaum koj ncaim kuv mus, tsov ntxhuav yuav tom koj.” Ces thaum nws ncaim mus lawm, ib tug tsov ntxhuav txawm cia li tom nws lawm tiag. Ces tus cev Vajtswv lus no thiaj mus cuag dua lwm tus txivneej thiab hais rau nws hais tias, “Koj cia li ntaus kuv!” Tus txivneej ntawd thiaj ntaus nws; mas tus txivneej ntawd sib zog ntaus tus cev Vajtswv lus ntawd heev, ua rau nws raug mob sab kawg. Tus cev Vajtswv lus ntawd thiaj muab ntaub los qhwv nws lub ntsejmuag, ua txuj ua cuav mus sawv tom kev tos cov Yixalayees tus vajntxwv taug kev tuaj. Thaum vajntxwv taug kev tuaj ncaj, tus cev Vajtswv lus ntawd hu hais tias, “Vajntxwv, thaum kuv tabtom sib tua hauv tshavrog muaj ib tug tubrog ntes tau ib tug yeebncuab los rau kuv tuav thiab nws hais rau kuv hais tias, ‘Koj zov tus neeg no kom zoo; yog koj cia nws dim, mas yuav muab koj txojsia pauj nws txoj lossis koj yuav tau them peb txhiab daim nyiaj.’ Tiamsis kuv muaj haujlwm ntau heev, mas tus neeg ntawd txawm cia li khiav lawm.” Vajntxwv teb hais tias, “Koj yuav raug txim xwb, rau qhov koj yeej lees koj li ntawd lawm.” Tus cev Vajtswv lus muab cov khaubncaws uas qhwv nws ntsejmuag dua rhe povtseg, ces tamsim ntawd vajntxwv paub hais tias, nws yog ib tug hauv pab uas cev Vajtswv lus ntag. Tus cev Vajtswv lus ntawd hais rau vajntxwv hais tias, “Tus TSWV hais tias, ‘Vim koj muab tus neeg uas kuv muab cob rau koj tua povtseg tso lawm, mas yuav muab koj txojsia pauj nws txoj, thiab koj cov tubrog yuav raug nws cov tubrog uas khiav dim lawm tua kom tuag tas huv tibsi.’ ” Ces vajntxwv txawm rov mus tsev rau hauv lub nroog Xamalis lawm, mas nws txhawj thiab nyuaj siab kawg li. Muaj ib tug txivneej npe hu ua Nanpaus, nws muaj ib lub vaj txiv hmab nyob hauv lub nroog Yexelees ze rau ntawm Vajntxwv Ahaj lub loog. Muaj ib hnub Ahaj hais rau Nanpaus hais tias, “Muab koj lub vaj txiv hmab rau kuv, rau qhov nyob ze ntawm kuv lub loog, kuv xav tau thaj av ntawd los ua vaj zaub. Kuv mam muab dua ib lub vaj txiv hmab zoo dua lub no rau koj lossis yog koj tsis nyiam li kuv hais no kuv yuav them nyiaj kom txaus tus nqi rau koj.” Nanpaus teb hais tias, “Lub vaj no yog kuv cov yawgkoob tej qubtxeeg qubteg uas lawv tseg rau kuv. Tus TSWV yeej tsis pub kom kuv muab lub vaj no muag rau koj li!” Ahaj rov mus tsev lawm, nws nyuaj siab thiab chim heev rau Nanpaus tej lus uas nws hais ntawd. Nws txawm mus pw rau saum nws lub txaj, tig xubntiag rau tim phabntsa, thiab tsis kam sawv los noj mov li. Yexenpees uas yog Ahaj tus pojniam txawm mus cuag Ahaj thiab nug hais tias, “Vim li cas koj yuav nyuaj siab ua luaj, tsis noj mov li?” Ahaj teb hais tias, “Vim kuv mus thov yuav Nanpaus lub vaj txiv hmab lossis yog nws kam no kuv muab dua ib lub vaj pauv nws lub ntawd.” Tiamsis nws hais rau kuv hais tias, “Koj yuav tsis tau lub vaj no.” Yexenpees nug hais tias, “Koj yog vajntxwv los tsis yog maj? Cia li sawv los noj mov thiab tsis txhob nyuaj siab. Kuv mam li mus ua kom tau Nanpaus lub vaj txiv hmab los ua koj tug!” Ces Yexenpees thiaj sau tau ib tsab ntawv, suam Ahaj lub npe rau tsab ntawv ntawd thiab muab Ahaj lub homthawj nias rau. Nws muab tsab ntawv ntawd xa mus rau Ahaj cov nomtswv thiab cov thawjcoj hauv lub nroog Yexelees. Tsab ntawv ntawd hais li no: “Cia li tshaj tawm teem ib hnub ua kevcai yoo mov, hu cov pejxeem tuaj sib sau ua ke, thiab kom Nanpaus tuaj zaum ntawm lub chaw tseemceeb. Nej mus coj ob tug neeg dag tuaj iab liam Nanpaus hais tias, nws foom Vajtswv thiab vajntxwv. Ces nej cia li coj nws tawm mus rau nraum ntug nroog thiab muab pobzeb ntaus kom nws tuag rau nraud.” Cov nomtswv thiab cov thawjcoj hauv lub nroog Yexelees txawm ua raws li Yexenpees tej lus samhwm ntawd. Lawv thiaj tshaj tawm muab ib hnub los ua kevcai yoo mov, hu tagnrho cov pejxeem tuaj txoos ua ke thiab caw Nanpaus mus zaum ntawm lub chaw tseemceeb. Ces ob tug neeg dag ntawd, los sawv ntawm Nanpaus xubntiag iab liam nws tabmeeg cov pejxeem hais tias Nanpaus tau foom Vajtswv thiab vajntxwv. Yog li ntawd, lawv thiaj coj Nanpaus mus rau nraum ntug nroog thiab muab pobzeb ntaus nws tuag lawm. Ces lawv tso neeg mus hais rau Yexenpees li no: “Peb twb muab pobzeb ntaus Nanpaus tuag lawm.” Thaum Yexenpees hnov xov hais tias Nanpaus tuag lawm, nws txawm mus hais rau Ahaj hais tias, “Nanpaus tuag lawm lauj. Nimno koj cia li mus txeeb lub vaj txiv hmab uas nws tsis kam muag rau koj ntawd.” Tamsim ntawd Ahaj txawm mus txeeb kiag lub vaj txiv hmab los ua nws tug. Tus TSWV hais rau Eliyas uas yog tus cev Vajtswv lus hauv lub nroog Tisenpes hais tias, “Koj cia li mus cuag Vajntxwv Ahaj hauv lub nroog Xamalis. Koj yuav mus ntsib nws hauv Nanpaus lub vaj txiv hmab, nws tabtom mus txeeb lub vaj ntawd los ua nws tug. Koj mus qhia rau nws hais tias kuv uas yog tus TSWV hais li no rau nws: ‘Koj twb muab tus tswv vaj tua povtseg lawm, koj tseem yuav txeeb nws lub vaj ua koj tug thiab los?’ Koj qhia rau nws hais tias tej lus no yog kuv hais: ‘Ntawm qhov chaw uas dev yaim Nanpaus cov ntshav, mas dev yuav yaim koj cov ntshav qhov ntawd thiab.’ ” Thaum Ahaj pom dheev Eliyas, Ahaj hu hais tias, “Kuv tus yeebncuab, koj tuaj ntsib kuv los?” Eliyas teb hais tias, “Yog, kuv tuaj ntsib koj. Koj tau muab tagnrho koj lub cev muag mus ua txhaum tabmeeg tus TSWV. Yog li ntawd, tus TSWV hais rau koj hais tias, ‘Kuv yuav tso sub tawg sub ntsha los rau koj. Kuv yuav sau zog koj thiab koj tsevneeg txhua tus txivneej laus thiab hluas kom tas dulug. Koj tsevneeg yuav zoo ib yam li Vajntxwv Yelaunpau-as uas yog Nenpas tus tub tsevneeg thiab ntag, koj ua rau kuv chim vim koj coj cov Yixalayees mus ua txhaum.’ Thiab tus TSWV hais txog Yexenpees li no: dev yuav noj nws lub cev hauv lub nroog Yexelees. Koj tej kwvtij uas tuag rau hauv nroog, dev yuav muab dua noj, thiab yog leejtwg tuag rau tom tej nras dav npoj yuav los muab noj kom tas.” ( Yeej tsis tau muaj leejtwg yuav zoo siab hlo muab nws lub cev muag mus ua txhaum tabmeeg tus TSWV li Ahaj qaug Yexenpees uas yog nws tus pojniam tej lus haub ntxias li. Nws tau ua tej kev txhaum uas txajmuag kawg vim nws mus pe mlom ib yam li cov Amoos. Cov neeg Amoos twb raug tus TSWV muab ntiab tawm hauv lub tebchaws thaum cov Yixalayees tabtom los txeeb nyob lawm.) Thaum Ahaj hnov tej lus uas Eliyas hais no, Ahaj txawm dua rhe nws lub tsho ua ntia tseg thiab muab kiag ntaubtsaj los npua. Nws yoo mov, hnav rawv cev ris tsho ntaubtsaj ntawd pw, thiab mus mus los los ua ntsejmuag mluas mlob thiab nyuaj siab kawg li. Tus TSWV hais rau Eliyas uas yog tus cev Vajtswv lus hais tias, “Koj puas pom Ahaj txo hwjchim tabmeeg kuv? Vim nws txo hwjchim li no lawm, kuv yuav tsis tso sub tawg sub ntsha los rau nws tiam; tiamsis thaum txog nws tus tub tiam, kuv yuav tso sub tawg sub ntsha los rau Ahaj tsevneeg.” Cov Yixalayees thiab cov Xilias tseg tsis ua rog, lawv nyob muaj kev thajyeeb lug tau ob xyoos, tiamsis xyoo peb cov Yudas tus Vajntxwv Yehausafas tuaj xyuas cov Yixalayees tus Vajntxwv Ahaj. Ahaj nug nws cov nomtswv hais tias, “Vim li cas peb yuav nyob dawb xwb tsis npaj mus txeeb kom tau lub nroog Lamaus hauv cheebtsam Nkile-as ntawm cov Xilias tus vajntxwv los? Lub nroog ntawd yog peb li los sav!” Thiab Ahaj nug Yehausafas hais tias, “Koj puas kam nrog kuv mus tua lub nroog Lamaus?” Yehausafas teb hais tias, “Thaum twg koj mus, ces kuv yeej nrog koj mus xwb, kuv cov tubrog mus taw thiab cov tubrog caij nees los yeej zoo siab mus huv tibsi. Tiamsis peb yuav tsum xub nug tus TSWV tso.” Yog li ntawd, Ahaj thiaj hu cov cevlus kwvyees li plaub puas leej tuaj thiab nug lawv hais tias, “Puas tsimnyog kuv mus tua lub nroog Lamaus los tsis tsimnyog mus?” Lawv teb hais tias, “Koj cia li mus tua lub nroog ntawd, tus TSWV yuav pub kom koj tua yeej xwb.” Tiamsis Yehausafas nug hais tias, “Puas tshuav dua lwm tus cev Vajtswv lus uas tseem yuav pab tau peb mus nug tus TSWV thiab?” Ahaj teb hais tias, “Tseem tshuav dua ib tug, nws yog Imelas tus tub Mikayas. Tiamsis kuv ntxub nws heev, vim nws yeej ibtxwm tsis cev tej lus zoo rau kuv ib zaug li; tsuas yog pheej cev tej zaj lus phem rau kuv xwb.” Yehausafas teb hais tias, “Koj tseg tsis txhob hais li ko.” Ces Ahaj thiaj hu nws ib tug nomtswv los thiab hais rau nws hais tias, “Koj mus coj Mikayas tuaj tamsim no.” Ob tug vajntxwv ntawd yeej hnav rawv tej ris tsho vajntxwv zaum saum nkawd ob lub zwmtxwv uas nyob ntawm lub tshav nplej sab nraum lub roojvag Xamalis, cov cevlus txhua tus puavleej tuaj nyob cev Vajtswv lus ntawm nkawd xubntiag. Cov cevlus ntawd muaj ib tug hu ua Xedekiyas, nws yog Khena-anas tus tub. Nws muab hlau los ua tau ibtxwm kub thiab nws hais rau Ahaj hais tias, “Tus TSWV hais tias, ‘Koj yuav siv txwm kub no mus tawmtsam cov Xilias thiab tua yeej lawv tagnrho huv tibsi.’ ” Cov cevlus txhua tus puavleej hais ib yam nkaus, lawv hais tias, “Koj cia li mus tua lub nroog Lamaus, koj yuav mus tua yeej xwb. Tus TSWV yuav pab kom koj yeej.” Thaum lub sijhawm ntawd, tus nom uas mus tos Mikayas tuaj ntawd hais rau Mikayas hais tias, “Tagnrho cov cevlus puavleej hais tias, vajntxwv yuav mus tua yeej, yog li ntawd, koj yuav tsum hais tej lus zoo ib yam li lawv hais thiab.” Tiamsis Mikayas teb hais tias, “Tus TSWV yog tus muaj sia nyob, kuv thov coglus hais tias kuv yuav hais raws li tej lus uas nws qhia rau kuv hais xwb.” Thaum Mikayas mus nyob tabmeeg Vajntxwv Ahaj lawm, vajntxwv nug nws hais tias, “Mikayas, puas tsimnyog Vajntxwv Yehausafas thiab kuv mus tua lub nroog Lamaus los tsis tsimnyog mus?” Mikayas teb hais tias, “Neb cia li mus tua los mas! Neb yeej yuav tua yeej xwb. Tus TSWV yuav pab kom neb yeej.” Tiamsis Ahaj teb hais tias, “Kuv twb yeej hais rau koj ntau zaus lawm hais tias thaum twg koj tuav tus TSWV lub npe qhia ib zaj dabtsi rau kuv, koj yuav tsum qhia kom tseeb xwb no ne, kuv tseem yuav hais pestsawg zaus rau koj thiab?” Mikayas teb hais tias, “Kuv twb pom cov tubrog Yixalayees tawg khiav ri sua saum tej ncov roob ib yam li pab yaj uas tsis muaj tus tswv yug lawm. Thiab tus TSWV hais tias, ‘Cov neeg no tsis muaj tus thawjcoj lawm, cia li tso lawv rov mus tsev ywj siab los mas.’ ” Ahaj hais rau Yehausafas hais tias, “Kuv twb qhia rau koj lawm hais tias nws yeej tsis cev ib zaj lus zoo rau kuv li puas yog? Nws yeej ibtxwm cev tej lus phem rau kuv nkaus xwb!” Mikayas hais ntxiv hais tias, “Koj cia li mloog tus TSWV lus! Kuv pom tus TSWV zaum saum nws lub zwmtxwv uas nyob saum ntuj, thiab nws cov timtswv sawv ntawm nws ob sab. Tus TSWV nug hais tias, ‘Leejtwg thiaj yuav ntxias tau Ahaj kom nws mus raug tua tuag rau hauv lub nroog Lamaus?’ Muaj ib cov timtswv hais ib yam, thiab muaj dua lwm cov hais dua lwm yam lawm, ces muaj ib tug ntsujplig txav zog los rau ntawm tus TSWV xubntiag thiab hais rau tus TSWV hais tias, ‘Kuv yog tus uas yuav mus ntxias Ahaj ntag.’ Tus TSWV nug hais tias, ‘Koj yuav ntxias li cas tau?’ Tus ntsujplig ntawd teb hais tias, ‘Kuv yuav mus tshoov Ahaj cov cevlus siab kom lawv qhia tej lus dag rau nws.’ Tus TSWV thiaj hais rau nws hais tias, ‘Koj cia li mus ntxias nws. Nws yeej yuav ntseeg koj zaj xwb.’ ” Mikayas txawm xaus lus hais tias, “Yeej muaj li no tiag. Tus TSWV ua kom koj cov cevlus tuaj dag koj. Tiamsis Mikayas yog tus qhia tseeb hais tias, koj yuav raug kev puastsuaj xwb thiaj tas!” Ces tus cevlus Xedekiyas txawm sawv tsees mus xuas tawg ncuav rau Mikayas sab plhu thiab nug hais tias, “Thaum twg tus TSWV tus ntsujplig twb tso kuv tseg thiab mus hais rau koj li ko lawm?” Mikayas teb hais tias, “Koj yeej paub thaum koj khiav mus nkaum hauv ib chav tsev.” Vajntxwv Ahaj hais rau nws cov nomtswv ib tug hais tias, “Cia li ntes Mikayas coj mus rau tus tswv nroog Amoos thiab vajntxwv tus tub Yau-ases. Hais kom nkawd coj nws mus kaw rau hauv tsev lojcuj, muab mov qhuav thiab dej rau nws noj nws haus mus txog thaum kuv rov qab los kaj siab lug tsis muaj dabtsi mam li tso nws.” Mikayas thiaj twv hais tias, “Yog koj tseem tau rov qab los kaj siab lug, ces tej lus uas kuv hais rau koj ntawd yeej tsis yog tus TSWV hais rau kuv li!” Thiab nws hais ntxiv tias, “Thov nej txhua tus nrog hnov tej lus uas kuv hais no!” Ces cov Yixalayees tus Vajntxwv Ahaj thiab cov Yudas tus Vajntxwv Yehausafas txawm txhij tubrog mus tua lub nroog Lamaus hauv cheebtsam Nkile-as. Ahaj hais rau Yehausafas hais tias, “Thaum peb mus rau hauv tshavrog, kuv yuav hnav dua lwm cev ris tsho lawm, tiamsis koj hnav koj cev ris tsho vajntxwv los tau.” Yog li ntawd, cov Yixalayees tus vajntxwv thiaj hnav dua lwm cev ris tsho mus rau hauv tshavrog, tsis pub kom leejtwg paub nws li. Cov Xilias tus Vajntxwv thiaj hais rau nws peb caug ob tug thawj tubrog tsav tsheb nees kom tsis txhob tua ib tug twg li, tua cov Yixalayees tus vajntxwv tib leeg nkaus xwb. Yog li ntawd, thaum lawv pom Vajntxwv Yehausafas, lawv thiaj xav hais tias nws yog cov Yixalayees tus vajntxwv, ces lawv thiaj mus caum nws tua. Tiamsis thaum nws qw, lawv thiaj paub hais tias nws tsis yog cov Yixalayees tus vajntxwv, lawv thiaj tso tseg tsis caum nws tua ntxiv lawm. Tiamsis muaj ib tug tubrog Xilias, lam rub nws rab hneevnti tua mus ua ciav xibxub cia li ya mus raug kiag Vajntxwv Ahaj lub tsho hlau kis nruab nrab tshab plaws rau hauv nws lub cev lawm. Nws txawm quaj qw rau nws tus tsav tsheb nees hais tias, “Kuv raug mob lawm lauj! Cia li lem tsheb nees rov qab thiab coj kuv tawm hauv tshavrog no mus!” Thaum ntawd muaj kev sib tua hnyav heev, Vajntxwv Ahaj tseem txheem taus sawv hauv nws lub tsheb nees ntsia cov Xilias nrog lawv sib tua. Nws cov ntshav tawm los meem mias rau hauv nws lub tsheb nees, ces thaum hnub qaij nws txawm tu siav nrho tuag lawm. Thaum hnub yuav luag poob qho txawm muaj ib lub suab los hais rau cov tubrog Yixalayees hais tias, “Nej txhua tus cia li rov qab mus rau hauv nej lub tebchaws thiab nej lub nroog!” Vajntxwv Ahaj raug luag tua tuag, thiab lawv coj nws lub cev rov los pam thiab muab nws faus rau hauv lub nroog Xamalis. Lawv txawm coj nws lub tsheb nees mus ntxuav rau ntawm lub pasdej hauv lub nroog Xamalis, dev tuaj yaim nws tej ntshav thiab cov niamntiav tuaj da dej qhov ntawd, raws li tus TSWV tau hais tseg lawm tias yuav muaj li ntawd. Dua li lwm yam uas Vajntxwv Ahaj ua tas los, nws lub loog uas nws muab kaus ntxhw xov thiab tej nroog uas nws tsim tseg, puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Thaum nws tuag lawm, nws tus tub Ahaxiyas thiaj ua vajntxwv hloov nws chaw. Thaum Ahaj ua vajntxwv kav lub tebchaws Yixalayees tau plaub xyoos lawm, Axas tus tub Yehausafas mam li ua vajntxwv kav lub tebchaws Yudas, thaum nws hnubnyoog muaj peb caug tsib xyoos, thiab nws nyob hauv lub nroog Yeluxalees kav tau nees nkaum tsib xyoos. Nws niam hu ua Axunpas thiab yog Silehis tus ntxhais. Yehausafas ua zoo ib yam li nws txiv Axas, nws coj ncaj coj ncees tabmeeg tus TSWV; tiamsis nws tsis muab tej chaw teev dab rhuav povtseg li thiab, cov pejxeem tseem pheej mus fij khoom thiab mus hlawv hmoov tshuaj tsw qab rau saum tej chaw ntawd tsis tseg li. Yehausafas nrog cov Yixalayees tus vajntxwv ua phoojywg zoo kawg li. Dua li lwm yam uas Yehausafas ua tas los, nws lub peevxwm, tej txujci thiab nws tej kev ntaus rog, puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Yehausafas muab cov txivntiav uas tu tej thaj pe dab uas seem nyob thaum nws txiv Axas tiam ntiab tawm mus huv tibsi lawm. Thaum ntawd lub tebchaws Edoos tsis muaj vajntxwv kav, cov Yudas tus vajntxwv thiaj tsa ib tug sawv cev cov pejxeem los ua tus saib lawv xwb. Yehausafas txua tau ib co nkoj rau hauv hiavtxwv, siv mus thauj kub tim tebchaws Aufiles; tiamsis cov nkoj ntawd tawg tas rau hauv Exi-oonkenpes lawm, mas lawv yeej tsis tau tsav cov nkoj ntawd li. Cov Yixalayees tus Vajntxwv Ahaxiyas tso nws cov neeg tuaj nrog Yehausafas cov neeg nquam nkoj, tiamsis Yehausafas tsis kam lees yuav cov neeg ntawd. Yehausafas tuag thiab luag coj nws mus faus rau ntawm cov vajntxwv lub toj ntxas hauv Vajntxwv Daviv lub nroog, thiab nws tus tub Yehaulas ua vajntxwv hloov nws chaw. Thaum Vajntxwv Yehausafas ua vajntxwv kav lub tebchaws Yudas tau kaum xya xyoo lawm, Ahaj tus tub Ahaxiyas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau ob xyoos. Nws ua txhaum rau tus TSWV ib yam li nws txiv Ahaj thiab nws niam Yexenpees, thiab nws coj raws li Vajntxwv Yelaunpau-as tus yam ntxwv, nws yog tus uas coj cov Yixalayees mus ua txhaum ntag. Ahaxiyas pe Npa-as ib yam li nws txiv tau pe los lawm. Nws ua rau tus TSWV uas yog cov Yixalayees tus Vajtswv chim kawg nkaus li. Thaum Vajntxwv Ahaj tus uas kav lub tebchaws Yixalayees tuag lawm, cov Mau-am txawm ntxeev siab tawmtsam cov Yixalayees. Vajntxwv Ahaxiyas uas kav lub tebchaws Yixalayees txawm poob saum theem tsev ob los rau hauv plag tsev uas yog nws lub loog hauv lub nroog Xamalis, ua rau nws raug mob sab kawg li. Yog li ntawd, nws thiaj txib ib co tubtxib mus nug cov Filitees tus vajtswv Npa-axenpus uas nyob hauv lub nroog Ekiloos saib qhov uas nws raug mob ntawd yuav zoo los tsis zoo. Tiamsis tus TSWV ib tug timtswv los hais rau Eliyas uas yog tus cev Vajtswv lus uas nyob hauv Tinpes kom cia li mus cuag Vajntxwv Ahaxiyas cov tubtxib thiab nug hais tias, “Vim li cas nej thiaj mus cuag tus vajtswv Npa-axenpus uas nyob hauv lub nroog Ekiloos? Puas yog nej xav hais tias nyob hauv tebchaws Yixalayees tsis muaj vajtswv? Nej mus hais rau vajntxwv hais tias, ‘Tus TSWV hais tias, qhov uas koj raug mob yuav tsis zoo; koj yuav tuag xwb!’ ” Eliyas txawm mus hais raws li tus TSWV hais, thiab cov tubtxib ntawd thiaj rov qab mus cuag vajntxwv. Vajntxwv nug lawv hais tias, “Vim li cas nej rov qab los?” Lawv teb hais tias, “Peb mus ntsib ib tug txivneej, nws kom peb los hais rau koj hais tias, tus TSWV hais tias, ‘Vim li cas koj thiaj txib neeg mus nug tus vajtswv Npa-axenpus uas nyob hauv lub nroog Ekiloos? Puas yog koj xav hais tias nyob hauv tebchaws Yixalayees tsis muaj vajtswv? Qhov uas koj raug mob yuav tsis zoo; koj yuav tuag xwb!’ ” Vajntxwv nug lawv hais tias, “Tus txivneej ntawd zoo li cas?” Lawv teb hais tias, “Nws hnav ib lub tsho loj uas yog muab tawv tsiaj xaws, thiab sia ib txoj siv tawv.” Vajntxwv teb hais tias, “Tus ntawd yog Eliyas ntag.” Ces vajntxwv txawm txib ib tug thawj tubrog coj tsib caug leej tubrog mus ntes Eliyas. Tus thawj tubrog mus pom Eliyas zaum saum ib lub pov roob, nws txawm hais rau Eliyas hais tias, “Vajtswv tus neeg, vajntxwv kom koj cia li nqis los.” Eliyas teb hais tias, “Yog hais tias kuv yog Vajtswv tus neeg tiag, thov kom hluavtaws poob saum ntuj los kub koj thiab koj cov tubrog!” Tamsim ntawd hluavtaws txawm poob saum ntuj los kub tus thawj tubrog thiab nws cov tubrog tuag tas. Vajntxwv txib dua ib tug thawj tubrog coj tsib caug leej tubrog mus ntes Eliyas, nws hais rau Eliyas hais tias, “Vajtswv tus neeg, vajntxwv kom koj cia li nqis los tamsim no.” Eliyas teb hais tias, “Yog hais tias kuv yog Vajtswv tus neeg tiag, thov kom hluavtaws poob saum ntuj los kub koj thiab koj cov tubrog!” Tamsim ntawd hluavtaws txawm poob saum ntuj los kub tus thawj tubrog thiab nws cov tubrog tuag tas. Vajntxwv rov txib dua ib tug thawj tubrog coj tsib caug leej tubrog mus. Tus thawj tubrog ntawd nce mus rau saum lub pov roob thiab txhos caug ntua ntawm Eliyas xubntiag thov hais tias, “Vajtswv tus neeg, thov koj hlub kuv thiab kuv cov tubrog. Thov koj tseg peb txojsia! Hluavtaws twb poob saum ntuj los kub ob tug thawj tubrog thiab nkawd cov tubrog uas tuaj ua ntej tuag tas lawm, tiamsis thov koj tseg kuv txojsia!” Tus TSWV ib tug timtswv hais rau Eliyas hais tias, “Koj tsis txhob ntshai, cia li nrog nws mus.” Yog li ntawd, Eliyas thiaj nrog tus thawj tubrog ntawd mus cuag vajntxwv, Eliyas hais rau vajntxwv hais tias, “Tus TSWV hais li no: ‘Vim koj txib neeg mus cuag tus vajtswv Npa-axenpus uas nyob hauv lub nroog Ekiloos, cuag li tsis muaj Vajtswv nyob hauv tebchaws Yixalayees rau koj nug, koj yuav tsis zoo; koj yuav tuag!’ ” Ahaxiyas txawm tuag raws li tus TSWV tau hais rau Eliyas. Ahaxiyas tsis muaj tub, yog li ntawd nws tus kwv Yaulas thiaj ua vajntxwv hloov Ahaxiyas chaw, thaum ntawd Yehausafas tus tub Yehaulas tabtom ua vajntxwv kav lub tebchaws Yudas tau ob xyoo. Dua li lwm yam uas vajntxwv Ahaxiyas ua puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Thaum lub sijhawm uas tus TSWV tso khaub zeeg cua los tos Eliyas mus saum ntuj, Eliyas thiab Elisas tabtom taug kev tawm hauv lub nroog Nkilenkas mus rau lwm qhov; thiab thaum nkawd taug kev mus, Eliyas hais rau Elisas hais tias, “Koj nyob twjywm ntawm no tos, kuv yuav mus rau hauv lub nroog Npethees raws li TSWV hais.” Tiamsis Elisas teb hais tias, “Kuv coglus rau tus TSWV uas muaj sia nyob hais tseeb rau koj hais tias, kuv yuav tsis ncaim koj mus qhov twg li.” Ces nkawd txawm ua ke mus rau hauv lub nroog Npethees lawm. Thaum nkawd mus txog, cov cev Vajtswv lus uas nyob hauv lub nroog tuaj cuag Elisas thiab hais rau nws hais tias, “Koj puas paub hais tias hnub no tus TSWV twb yuav coj koj tus xibhwb mus?” Elisas teb hais tias, “Ua twjywm tsis txhob hais lus, kuv twb paub lawm.” Eliyas hais rau Elisas hais tias, “Koj nyob twjywm ntawm no tos, kuv yuav mus rau hauv lub nroog Yelikaus raws li tus TSWV hais.” Tiamsis Elisas teb hais tias, “Kuv coglus rau tus TSWV uas muaj sia nyob hais tseeb rau koj hais tias, kuv yuav tsis ncaim koj mus qhov twg li.” Ces nkawd txawm ua ke mus rau hauv lub nroog Yelikaus lawm. Thaum nkawd mus txog, cov cev Vajtswv lus uas nyob hauv lub nroog tuaj cuag Elisas thiab hais rau nws hais tias, “Koj puas paub hais tias hnub no tus TSWV twb yuav coj koj tus xibhwb mus?” Elisas teb hais tias, “Ua twjywm tsis txhob hais lus, kuv twb paub lawm.” Eliyas hais rau Elisas hais tias, “Koj nyob twjywm ntawd no tos, kuv yuav mus rau nram tus Dej Yauladees raws li tus TSWV hais.” Tiamsis Elisas teb hais tias, “Kuv coglus rau tus TSWV uas muaj sia nyob hais tseeb rau koj hais tias, kuv yuav tsis ncaim koj mus qhov twg li.” Ces nkawd txawm ua ke mus, thiab muaj tsib caug leej cev Vajtswv lus raws nkawd mus txog nram tus Dej Yauladees. Eliyas thiab Elisas mus sawv ntawm ntug dej, thiab tsib caug leej cev Vajtswv lus ntawd txawm mus sawv ib cag saib. Eliyas hle hlo nws lub tsho ntev thiab muab kauv ua ib caj nplawm dej, dej txawm faib hlo rau ob sab ua kev qhuav qhawv rau Eliyas thiab Elisas mus rau sab tim ub. Thaum nkawd mus txog sab tid lawm, Eliyas hais rau Elisas hais tias, “Cheem Vajtswv tsis tau coj kuv mus, yog koj xav tau ua dabtsi koj cia li thov.” Elisas teb hais tias, “Thov faib koj lub hwjchim rau kuv, cia kuv ua tus hloov koj chaw.” Eliyas teb hais tias, “Koj thov yam uas muab nyuaj kawg li. Txawm li cas los xij, yog koj pom Vajtswv coj kuv mus, ces koj yuav tau raws li koj thov; tiamsis yog koj tsis pom kuv mus, koj yuav tsis tau ib yam dabtsi li.” Thaum nkawd tseem sib tham tujtaws taug kev txawm muaj ib co nees huab cua luag ib lub tsheb nees hluavtaws cig nplaim liab ploog los phua plhawv nkawd mus, ces khaub zeeg cua txawm nqa hlo Eliyas mus rau saum ntuj lawm. Elisas saib dheev pom Eliyas thiab hu hais tias, “Kuv txiv, kuv txiv! Tus muaj hwjchim loj kawg nkaus uas pab cov Yixalayees! Koj txawm mus lawm tiag los!” Ces Elisas txawm tsis pom Eliyas li lawm. Elisas tu siab heev, nws txawm muab nws lub tsho ntev dua rhe ua ob daim. Nws thiaj mus khaws nkaus Eliyas lub tsho ntev uas poob los thiab rov mus sawv ntawm ntug Dej Yauladees. Nws muab Eliyas lub tsho nplawm dej thiab hu hais tias, “Tus TSWV uas yog Eliyas tus Vajtswv, koj nyob qhov twg?” Nws rov muab lub tsho nplawm dej, dej txawm faib hlo rau ob sab, Elisas thiaj rov los lawm. Thaum tsib caug leej cev Vajtswv lus uas tuaj hauv lub nroog Yelikaus tuaj pom li ntawd, lawv thiaj hais tias, “Elisas tau Eliyas lub hwjchim lawm!” Lawv sawvdaws khiav mus tos Elisas thiab txhos caug ntua pe nws thiab hais tias, “Peb tsib caug leej no puavleej yog cov uas khov kho xwb. Thov cia peb mus nrhiav koj tus xibhwb. Tej zaum tus TSWV tus ntsujplig coj nws mus rau saum tej roob lossis tom tej hav lawm.” Elisas teb hais tias, “Nej tsis txhob mus nrhiav.” Tiamsis lawv pheej thov tas zog li, Elisas ua tsis tau li cas, nws thiaj cia lawv mus nrhiav. Lawv tsib caug leej ntawd thiaj mus nrhiav Eliyas rau pem tej roob thiab tej hav tau peb hnub tiamsis tsis pom li. Lawv rov los cuag Elisas hauv lub nroog Yelikaus. Nws tseem nyob hauv tos lawv, thiab nws hais rau lawv hais tias, “Kuv twb hais rau nej tias tsis txhob mus nrhiav nws no ne!” Cov neeg uas nyob hauv lub nroog Yelikaus muaj qee leej mus hais rau Elisas hais tias, “Koj paub hais tias lub nroog no xis nyob kawg li, tiamsis tej dej tsis zoo thiab ua rau cov pojniam pheej nchuav cev.” Elisas hais rau lawv hais tias, “Nej mus muab ib co ntsev ntim rau hauv ib lub tais tshiab nqa tuaj rau kuv.” Lawv txawm ua li Elisas hais. Elisas mus rau tom lub qhovdej, nws muab cov ntsev ntawd hliv rau hauv lub qhovdej thiab hais tias, “Tus TSWV hais li no: ‘Kuv ua rau lub qhovdej no zoo lawm, txij no mus cov dej yuav tsis ua rau leejtwg tuag lossis nchuav menyuam lawm.’ ” Txij thaum ntawd los txog niaj hnub no lub qhovdej ntawd txawm zoo raws li Elisas hais. Elisas tawm hauv lub nroog Yelikaus mus rau pem lub nroog Npethees. Thaum nws tabtom taug kev mus, txawm muaj ib co tub hluas tawm hauv nroog tuaj qw thuam Elisas hais tias, “Yawg laus do hau, koj cia li khiav mus!” Elisas tig hlo los ntsia lawv thiab tuav tus TSWV lub npe foom lawv. Ces txawm muaj ob tug maum dais tawm hauv hav ntoo los muab plaub caug ob leeg tub hluas ntawd tom tuag tas huv tibsi. Ces Elisas txawm mus rau saum lub Roob Kalemees, thiab tom qab ntawd nws rov los rau hauv lub nroog Xamalis. Thaum Yehausafas ua vajntxwv kav lub tebchaws Yudas tau kaum yim xyoo lawm, Ahaj tus tub Yaulas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau kaum ob xyoos. Yaulas ua txhaum rau tus TSWV, tiamsis nws tsis ua txhaum loj npaum li nws txiv lossis nws niam Yexenpees; nws muab tus ncej mlom Npa-as uas nws txiv ua los teev rhuav povtseg. Txawm li ntawd los nws pheej coj cov Yixalayees mus ua txhaum tsis tseg ib yam li Nenpas tus tub uas yog Vajntxwv Yelaunpau-as uas nyob ua ntej nws lawm ua. Vajntxwv Mesas uas kav lub tebchaws Mau-am muaj yaj coob heev, txhua lub xyoo twg nws coj ib puas txhiab tus menyuam yaj thiab txiav ib puas txhiab tus yaj tej plaub coj tuaj pub rau cov Yixalayees tus vajntxwv. Tiamsis thaum Vajntxwv Ahaj uas kav lub tebchaws Yixalayees tuag lawm, Mesas txawm ntxeev siab rau cov Yixalayees. Thaum ntawd Vajntxwv Yaulas txawm tawm hauv lub nroog Xamalis mus txhij tagnrho nws cov tubrog tuaj ua ke. Nws hais mus rau Vajntxwv Yehausafas uas kav lub tebchaws Yudas hais tias, “Tus vajntxwv uas kav lub tebchaws Mau-am tau ntxeev siab rau kuv lawm; koj puas pab kuv mus tua nws?” Vajntxwv Yehausafas teb hais tias, “Kuv txaus siab yuav pab koj. Kuv cov tubrog thiab kuv cov nees los kuj ib yam li yog koj tug li. Peb yuav mus txojkev twg mus tua lawv?” Yaulas teb hais tias, “Peb yuav tshuv kev mus rau tom tiaj suabpuam Edoos tuaj.” Yog li ntawd, cov Yudas tus vajntxwv thiab cov Edoos tus vajntxwv thiaj nrog Vajntxwv Yaulas mus. Thaum lawv mus tau xya hnub ke tej dej uas lawv npaj mus tas lawm, lawv tsis tshuav dej rau lawv cov tubrog lossis lawv cov tsiaj haus li lawm. Vajntxwv Yaulas hais tias, “Peb tuag lauj! Tus TSWV muab peb, peb leeg no cob rau tus vajntxwv uas kav lub tebchaws Mau-am tes lawm!” Vajntxwv Yehausafas nug hais tias, “Txawm tsis muaj ib tug cev Vajtswv lus nyob ntawm no pab peb nug tus TSWV li los?” Vajntxwv Yaulas ib tug thawj tubrog teb hais tias, “Elisas uas yog Safas tus tub nyob ntawm no. Nws yog tus uas pab Eliyas.” Vajntxwv Yehausafas hais tias, “Elisas yog ib tug cev Vajtswv lus tseeb.” Yog li ntawd, peb tug vajntxwv ntawd thiaj mus cuag Elisas. Elisas hais rau tus vajntxwv uas kav lub tebchaws Yixalayees hais tias, “Vim li cas koj thiaj kom kuv pab koj? Koj cia li mus nug cov cevlus uas koj niam thiab koj txiv nkawd ibtxwm nug.” Yaulas teb hais tias, “Tsis tau, rau qhov tus TSWV muab peb peb tug vajntxwv no cob rau tus vajntxwv uas kav lub tebchaws Mau-am tes lawm.” Elisas teb hais tias, “Kuv coglus rau tus TSWV uas muaj sia nyob uas kuv pehawm hais tias, yog kuv tsis hwm Vajntxwv Yehausafas uas kav lub tebchaws Yudas uas tuaj pab koj, ces kuv yeej tsis quavntsej koj li. Cia li mus hu ib tug uas txawj ntaus nkauj nogncas tuaj cuag kuv tamsim no.” Thaum tus ntawd tuaj txog, nws ntaus nws lub nkauj nogncas, ces tus TSWV lub hwjchim txawm los kav hlo Elisas, thiab Elisas hais tias, “Tus TSWV hais li no: ‘Nej cia li khawb lub hav qhuav no kom ua tej lub qhov. Txawm yog nimno nej tsis tau pom los nag thiab tsis hnov cua ntsawj los cov qhov uas nej khawb yuav muaj dej puv nkaus rau nej, nej tej nyuj tej nees thauj nra, thiab lwm yam tsiaj txhu yuav tau dej haus nplua mias.’ ” Elisas hais ntxiv hais tias, “Tej no yoojyim heev rau tus TSWV ua. Tsis tas li ntawd xwb, nws tseem yuav pub kom nej tua yeej cov Mau-am thiab. Nej yuav mus tua thiab txeeb tau cov Mau-am tej nroog zoo uas muaj ntsa yeej thaiv khov kho; nej yuav muab lawv tej txiv ntoo ntov, txhub lawv tej qhovdej, thiab muab pobzeb pov kom puv nkaus lawv tej teb uas zoo qoob kom puastsuaj tas huv tibsi.” Hnub tom qab thaum sawv ntxov uas yog lub caij hlawv khoom fij txawm muaj dej ntws pem Edoos los rau hauv lub tebchaws txhua qhov. Thaum cov Mau-am hnov hais tias muaj peb tug vajntxwv tuaj tua lawv, ces txhua tus txivneej uas ua taus rog, tsis hais cov laus cov hluas, puavleej raug hu kom mus zov ntawm tus ciamteb. Hnub tom qab thaum sawv ntxov, cov Mau-am pom lub hnub ci rau cov dej ua rau dej liab ploog ib yam li ntshav. Cov Mau-am hais tias, “Yog ntshav los sav! Yeej yog peb tug vajntxwv uas yog peb cov yeebncuab cov tubrog rov sib tua tuag ntag! Peb cia li mus huab tej khoom hauv lawv lub yeej!” Tiamsis thaum lawv mus txog ntawm lub yeej, cov Yixalayees txawm sawv pes tsees los tua lawv, ua rau lawv thim hlo rov qab. Cov tubrog Yixalayees caum qab mus tua cov Mau-am thiab rhuav lawv tej nroog puastsuaj tas. Thaum cov Yixalayees los txog ntawm cov Mau-am tej teb uas zoo qoob, ces cov tubrog Yixalayees txhua tus txawm khaws pobzeb pov puv nkaus tej teb ntawd; txhub lawv tej qhovdej thiab ntov lawv tej txiv ntoo tas dulug. Thaum kawg tsuas tshuav lub tuamceeb nroog Kiles Heles xwb los tseem muaj dua ib pab tubrog uas txawj ntaus zes hlua tuaj vij thiab tua lub nroog ntawd. Thaum cov Mau-am tus vajntxwv pom hais tias nws swb lawm, nws txawm coj xya pua leej tubrog uas txawj tua ntaj nrog nws pluav ntxhias khiav kom dhau cov yeebncuab mus cuag tus vajntxwv uas kav lub tebchaws Xilias, tiamsis nws mus tsis dhau. Nws thiaj muab nws tus tub hlob uas yuav ua vajntxwv hloov nws chaw tua fij rau cov Mau-am tus mlom saum tus ntsa yeej uas thaiv lub nroog. Txawm muaj xwm ua rau cov Yixalayees ntshai, lawv thiaj tso lub nroog ntawd tseg rov qab los rau hauv lawv lub tebchaws lawm. Muaj ib tug pojntsuam uas nws tug txiv yog ib tug cev Vajtswv lus tuaj cuag Elisas thiab hais tias, “Tus tswv, kuv tus txiv tuag lawm. Koj yeej paub hais tias nws hwm Vajtswv heev, tiamsis tus uas peb tshuav nqi yuav tuaj coj kuv ob tug tub mus ua nws qhev.” Elisas nug hais tias, “Koj xav kom kuv pab dabtsi? Qhia rau kuv saib, koj muaj dabtsi nyob hauv tsev?” Tus pojntsuam ntawd teb hais tias, “Kuv tsis muaj dabtsi li, tsuas muaj ib hub roj me me xwb.” Elisas hais tias, “Koj mus qiv tej neeg zejzog tej hub uas khoom ntau lub los, tsis txhob qiv lub puav xwb, ces koj thiab koj ob tug tub cia li mus rau hauv tsev, kaw qhovrooj rau thiab hliv roj rau hauv cov hub ntawd txhua lub. Thaum lub hub twg puv lawm muab txawb rau ib cag.” Tus pojniam ntawd txawm rov mus tsev, nws thiab nws ob tug tub kaw qhovrooj rau thiab muab lub hub roj me me los hliv rau hauv cov hub uas ob tug tub mus qiv los rau nws ntawd. Thaum cov hub puv tas txhua lub lawm, leej niam hais tias, “Muab dua ib lub los thiab.” Nkawd teb hais tias, “Tas rau lub ko lawm.” Ces roj txawm tu nrho tsis los lawm. Tus pojniam ntawd thiaj rov mus cuag Elisas uas yog tus cev Vajtswv lus, Elisas hais rau nws hais tias, “Koj rov mus tsev, muab cov roj ntawd muag, muab cov nyiaj ntawd them nej tej nuj nqi, thiab cov uas seem yeej yuav txaus nej cov niamtub siv mus yav tom ntej.” Muaj ib hnub Elisas mus rau hauv lub nroog Sunees. Muaj ib tug pojniam npluanuj nyob hauv lub nroog ntawd. Nws txawm hu Elisas mus noj mov hauv nws tsev. Txij thaum ntawd los, txhua zaus uas Elisas dua kev tuaj hauv lub nroog ntawd, nws pheej mus so hauv tus pojniam ntawd lub tsev. Tus pojniam ntawd hais rau nws tus txiv hais tias, “Kuv paub hais tias tus txivneej uas niaj zaus tuaj hauv wb tsev no yog Vajtswv ib tug neeg uas ncaj ncees. Wb cia li txuas ib chav rau txheej tsev saum, muab txaj, rooj, tog thiab teeb mus tso rau hauv chav ntawd. Thaum nws tuaj saib wb, nws thiaj tau chaw pw.” Muaj ib hnub Elisas txawm rov mus rau hauv lub nroog Sunees thiab mus pw rau saum nws chav tsev ntawd. Elisas hais kom nws tus tubtxib Nkehaxis mus hu tus pojniam ntawd los. Thaum tus pojniam ntawd los txog, Elisas hais rau Nkehaxis hais tias, “Koj nug tus pojniam ntawd saib nws xav kom kuv ua dabtsi rau nws, rau qhov wb pheej tuaj tabkaum nws, thiab nws tau ua ntau yam rau wb lawm. Tej zaum nws xav kom kuv mus thov vajntxwv lossis tus thawj tubrog pab nws ib yam dabtsi.” Tus pojniam ntawd teb hais tias, “Kuv nyob ntawm no los kuv kuj nrog luag muaj noj muaj haus thiab.” Elisas nug Nkehaxis hais tias, “Yog li ntawd, kuv yuav pab nws dabtsi thiaj zoo?” Nkehaxis teb hais tias, “Qhov tseemceeb mas nws tsis muaj ib tug menyuam li, thiab nws tus txiv los laus lawm.” Elisas hais tias, “Koj mus hais kom nws los ntawm no.” Tus pojniam ntawd thiaj los sawv ntawm qhovrooj, Elisas hais rau nws hais tias, “Lwm xyoo lub caij no koj yuav tau ib tug metub los puag.” Nws teb Elisas hais tias, “Kuv tus tswv uas yog Vajtswv tus neeg, koj tsis txhob dag kuv li ko!” Ces tus pojniam ntawd txawm xeeb tub, thiab xyoo tom qab nws txawm yug tau ib tug metub raws li lub caij uas Elisas tau teem cia ntawd tiag. Tau ob peb xyoo tom qab thaum lub caij sau qoob, muaj ib tagkis tus metub ntawd txawm mus cuag nws txiv rau qhov nws txiv mus saib cov tubqhe hlais nplej nram teb lawm. Thaum tus metub ntawd mus txog, nws quaj rau nws txiv hais tias, “Txiv, mob mob kuv taubhau! Mob mob kuv taubhau!” Leej txiv hais rau ib tug tubqhe hais tias, “Cia li puag tus metub no mus rau nws niam.” Tus tubqhe thiaj li puag tus metub mus rau leej niam, thiab leej niam puag tus metub rau ntawm nws xubntiag mus txog thaum tavsu, ces tus metub txawm tu sia lawm. Leej niam puag tus metub mus tso rau saum Elisas chav tsev thiab muab tso rau saum txaj. Nws tawm los thiab kaw qhovrooj rau. Nws hu nws tus txiv hais tias, “Koj kom ib tug tubtxib cab ib tug neesluav los rau kuv, kuv maj yuav mus cuag Elisas uas yog tus cev Vajtswv lus thiab kuv mam rov los tsev.” Nws tus txiv nug hais tias, “Vim li cas koj thiaj yuav mus hnub no? Hnub no twb tsis yog Hnub Xanpataus lossis Hnub Hlis Xiab ne?” Tiamsis tus pojniam teb hais tias, “Txawm li ntawd los kuv yuav mus.” Nws hais kom tus tubtxib muab eeb nog rau saum tus neesluav rau nws caij, thiab nws hais rau tus tubtxib hais tias, “Koj cia li cab tus neesluav no mus ceev rooj, thaum twg kuv kom so mam li so.” Yog li ntawd, nws thiaj mus rau pem lub Roob Kalemees uas Elisas nyob. Thaum Elisas pom tus pojniam ntawd tuaj txog tim ub, nws txawm hais rau nws tubtxib Nkehaxis hais tias, “Koj ntsia tid saib, tus pojniam uas nyob hauv Sunees tabtom taug kev tuaj txog tid! Koj tsawg tsuag cia li mus tos nws thiab nug nws saib nws tus txiv thiab nws tus metub puas noj qab nyob zoo.” Nws hais rau Nkehaxis hais tias, “Peb puavleej noj qab nyob zoo.” Thaum nws los txog ntawm Elisas, nws txawm txhos caug ntua rau ntawm Elisas xubntiag thiab qawm lias Elisas ob txhais kotaw. Nkehaxis txav zog mus yuav muab nws rub tawm, tiamsis Elisas hais tias, “Koj tsis txhob rub nws, koj tsis pom hais tias nws nyuaj siab kawg li los? Tiamsis tus TSWV tsis tau qhia zaj no rau kuv paub li.” Tus pojniam ntawd hais rau Elisas hais tias, “Kuv tus tswv, kuv tsis tau taij koj thov Vajtswv kom kuv muaj tub, thaum ntawd kuv twb hais rau koj hais tias koj tsis txhob lam hais kom kuv cia siab no ne?” Elisas hais rau Nkehaxis hais tias, “Koj cia li nqa kuv tus pas nrig no ceev rooj mus, koj mus ntsib leejtwg los koj tsis txhob hu nws, thiab leejtwg hu koj los tsis txhob teb. Koj nqa kuv tus pas nrig ncaj nraim mus rau hauv tsev thiab muab tso rau saum tus metub lub ntsejmuag.” Tiamsis tus pojniam ntawd hais rau Elisas hais tias, “Kuv coglus rau tus TSWV uas muaj sia nyob thiab rau koj hais tias, kuv yuav tsis ncaim koj mus qhov twg li!” Ces Elisas thiab tus pojniam ntawd thiaj ua ke raws Nkehaxis qab mus. Nkehaxis khiav ua ntej mus txog thiab muab Elisas tus pas nrig tso rau saum tus metub lub ntsejmuag, tiamsis tsis hnov tus metub nroo lossis xeev li. Nkehaxis thiaj rov los qhia rau Elisas hais tias, “Tus metub tseem tsis tau xeev li.” Thaum Elisas mus txog lawm, nws tib leeg nce mus rau saum chav tsev ntawd thiab nws pom tus metub tuag xyab rau saum txaj. Nws txawm kaw nkaus qhovrooj thiab thov tus TSWV. Nws qhau cev hlo rau saum tus metub, qhovncauj npuab qhovncauj, qhovmuag npuab qhovmuag thiab tes npuab tes. Thaum nws qhau ces hlo rau saum tus metub li ntawd, tus metub lub cev txawm sov tuaj. Elisas sawv ncig mus ncig los hauv chav tsev ntawd thiab rov qhau cev hlo rau saum tub metub dua ib zaug ntxiv. Tus metub txawm txham xya zaus thiab qhib hlo qhovmuag. Elisas hais kom Nkehaxis hu leej niam los. Thaum leej niam los txog, Elisas hais rau nws hais tias, “Cia li coj koj tus metub mus.” Leej niam txawm txhos caug ntua ntawm Elisas kotaw, ua ntsejmuag ti nkaus av, thiab puag nws tus metub mus lawm. Thaum muaj kev tshaib nqhis thoob lub tebchaws, Elisas rov los txog hauv Nkilenkas. Thaum Elisas tabtom qhia ib pab cev Vajtswv lus, nws txawm hais rau nws tus tubtxib Nkehaxis hais tias, “Muab lub laujkaub txawb rau hauv qhovcub thiab ua zaub rau cov cev Vajtswv lus noj.” Lawv cov ntawd muaj ib tug txawm mus de txujlom tom teb. Nws pom ib tsob taub iab qus, ces nws txawm de tau ib tsuag los thiab muab txhoov hau rau hauv laujkaub, lawv twb tsis paub hais tias yog zaub dabtsi. Lawv txawm muab daus los rau sawvdaws noj, thaum lawv noj cov zaub ntawd, lawv hais rau Elisas hais tias, “Xibhwb, muaj taug tshuaj nyob hauv laujkaub zaub no!” Ces lawv tsis noj. Elisas hais kom lawv muab ib co hmoov nplej los rau nws, nws txawm muab npoo rau hauv lub laujkaub thiab hais tias, “Muab daus mus rau sawvdaws noj.” Ces cov zaub txawm tsis muaj taug tshuaj lawm. Muaj ib zaug, ib tug txivneej nyob hauv lub zos Npa-as Salisas tuaj, nws coj nees nkaum lub ncuav uas yog muab thawj phaum qib ua thiab ib co hnab nplej tuaj rau Elisas. Elisas kom nws tus tubtxib muab faib rau cov cev Vajtswv lus noj, tiamsis tus tubtxib teb hais tias, “Koj xav hais tias npaum li no ncuav xwb txaus ib puas leej noj no los?” Elisas teb hais tias, “Cia li muab faib rau sawvdaws noj, rau qhov tus TSWV hais tias, lawv txhua tus yuav noj tsau thiab tseem tshuav.” Ces nws txawm muab faib rau sawvdaws noj, lawv puavleej tau noj tsau thiab tseem seem raws nraim li tus TSWV hais. Na-amas uas yog cov Xilias tus thawj tubrog uas muaj meejmom siab thiab vajntxwv hwm heev. Tus TSWV pub cov Xilias ntaus yeej rog, vim muaj Na-amas. Nws yog ib tug thawj tubrog uas txawj tua rog thiab siab tawv heev, tiamsis nws mob ruas. Muaj ib zaug thaum cov Xilias tuaj tua cov Yixalayees, lawv ntes tau cov Yixalayees ib tug ntxhais coj los tu Na-amas tus pojniam. Muaj ib hnub tus ntxhais ntawd hais rau Na-amas tus pojniam hais tias, “Kuv xav kom kuv tus tswv mus cuag tus cev Vajtswv lus uas nyob nram tebchaws Xamalis! Tus cev Vajtswv lus ntawd yuav kho tau Na-amas tus mob ruas zoo.” Thaum Na-amas hnov li ntawd, nws txawm mus cuag vajntxwv thiab hais rau vajntxwv raws li tus ntxhais ntawd qhia. Vajntxwv hais rau Na-amas hais tias, “Koj mus cuag cov Yixalayees tus vajntxwv thiab muab tsab ntawv no rau nws.” Na-amas thiaj mus thiab thauj peb caug txhiab daim nyiaj, rau txhiab daim kub thiab kaum cev ris tsho nrog nws mus. Tsab ntawv uas nws nqa mus hais li no: “Tus no yog Na-amas uas yog kuv tus thawj tubrog. Kuv xav thov koj pab kho nws tus mob kom zoo.” Thaum cov Yixalayees tus vajntxwv nyeem tsab ntawv ntawd tas, nws txawm dua rhe nws lub tsho thiab hais tias, “Kuv yog Vajtswv tus uas muaj hwjchim ua tau kom neeg tuag thiab neeg ciaj los? Ua li cas tus vajntxwv uas kav lub tebchaws Xilias thiaj kom kuv kho tus mob ruas no? Yog nws xav tuaj nrhiav plaub rau kuv xwb!” Thaum Elisas uas yog tus cev Vajtswv lus hnov tej xwm no, nws hais mus rau vajntxwv hais tias, “Vim li cas koj nyuaj siab ua luaj? Cia li kom tus txivneej ntawd los cuag kuv, kuv yuav qhia rau nws paub hais tias nyob hauv tebchaws Yixalayees no muaj ib tug cev Vajtswv lus!” Yog li ntawd, Na-amas, nws cov nees thiab tej tsheb nees thiaj los nres rau ntawm Elisas lub qhovrooj. Elisas kom nws tus tubtxib mus hais rau Na-amas hais tias, “Koj cia li mus raus xya zaus hauv tus dej Yauladees, ces koj tej ruas yuav zoo.” Tiamsis Na-amas npautaws heev, nws tig hlo rov qab thiab yws hais tias, “Kuv xav hais tias nws yuav tawm tuaj cuag kuv, tsa tes rau saum kuv tej mob thiab thov tus TSWV uas yog nws tus Vajtswv kho kuv.” Tus dej Anpanas thiab Fapas uas nyob pem Damaxes tseem huv dua tej dej uas nyob hauv tebchaws Yixalayees no, yog kuv rov mus raus tej dej uas nyob ped los kuv yeej yuav zoo! Nws cov tubtxib mus hais rau nws hais tias, “Tus tswv, txawm yog tus cev Vajtswv lus kom koj ua tej yam nyuaj los koj yuav tau ua raws li nws hais. Vim li cas nimno koj tsis mus raus dej raws li nws hais kom koj tej ruas zoo?” Yog li ntawd, Na-amas thiaj li nqis mus raus hauv tus dej Yauladees xya zaus raws li Elisas hais, Na-amas tej ruas txawm zoo dulug thiab nws lub cev mos nyoos ib yam li tus menyuam mos. Na-amas thiab nws cov tubtxib rov los cuag Elisas thiab hais tias, “Nimno kuv paub hais tias tsis muaj dua lwm tus vajtswv, tsuas yog cov Yixalayees tus Vajtswv xwb; yog li ntawd, thov koj cia li txais tej khoom uas kuv coj tuaj pub koj no.” Elisas teb hais tias, “Kuv coglus rau tus TSWV uas muaj sia nyob, tus uas kuv ua nws tes haujlwm hais tias kuv yuav tsis yuav tej khoom ko.” Na-amas txhob Elisas heev, tiamsis nws tsis kam yuav li. Na-amas hais tias, “Yog koj tsis kam yuav kuv tej khoom pub no li, thov cia kuv khawb av kom txaus ob tug nees zag thauj mus tsev, txij hnub no mus kuv yuav tsis muab khoom lossis tua tsiaj hlawv fij rau lwm tus vajtswv li, tsuas fij rau tus TSWV tib leej xwb. Yog li ntawd, kuv cia siab hais tias tus TSWV yuav zam txim rau kuv, thaum kuv tus vajntxwv coj kuv nrog nws mus pe tus mlom Limoos uas yog cov Xilias tus vajtswv tom lub tsev teev mlom. Kuv cia siab hais tias, tus TSWV yeej yuav zam kuv lub txim.” Elisas hais tias, “Koj cia li mus kaj siab lug.” Ces Na-amas txawm mus lawm. Na-amas nyuam qhuav mus dhau lawm xwb, Elisas tus tubtxib Nkehaxis txawm xav hais tias, “Ua li cas kuv tus tswv cia li tso Na-amas mus tsis kom nws them ib yam dabtsi li. Twb tsimnyog nws yuav tej khoom uas tus neeg Xilias muab rau nws ntawd. Muaj tus TSWV uas muaj sia nyob pom, kuv yuav caum Na-amas qab mus thov nws muab ib ob yam rau kuv.” Ces Nkehaxis txawm caum Na-amas qab mus. Thaum Na-amas pom Nkehaxis khiav caum nws qab tuaj, nws nqis saum nws lub tsheb nees los thiab nug hais tias, “Puas yog muaj xwm dabtsi?” Nkehaxis teb hais tias, “Tsis muaj dabtsi. Tsuas yog kuv tus tswv kom kuv caum koj qab tuaj hais rau koj hais tias muaj ob tug cev Vajtswv lus nyob pem laj roob Efalayees nyuam qhuav tuaj txog, kuv tus tswv xav kom koj muab peb txhiab daim nyiaj thiab ob ce ris tsho mus rau nkawd.” Na-amas teb hais tias, “Kuv yuav muab rau txhiab daim nyiaj rau koj nqa mus rau nws.” Na-amas txhob kom yuav thiab muab cov nyiaj ntawd ntim rau hauv ob lub hnab thiab muab ob cev ris tsho rau nws ob tug tubtxib kwv ua Nkehaxis ntej. Thaum lawv los txog rau saum lub laj roob uas Elisas nyob, Nkehaxis txawm muab ob hnab nyiaj mus cia rau hauv tsev. Ces nws txawm kom Na-amas ob tug tubtxib rov mus lawm. Thaum Nkehaxis mus rau hauv tsev, Elisas nug hais tias, “Nkehaxis, puagta koj mus dabtsi los?” Nkehaxis teb hais tias, “Tus tswv, kuv tsis tau mus qhov twg li.” Tiamsis Elisas hais rau Nkehaxis hais tias, “Thaum uas Na-amas nqis saum lub tseeb nees los cuag koj, kuv lub siab tsis nrog koj nyob tod los? Nimno tsis tau yog sijhawm yuav luag tej nyiaj, tej ris tsho, tej vaj txiv hmab, tej txiv ntoo roj, tej yaj tej tshis, tej nyuj lossis luag tej tubtxib. Nimno Na-amas tej ruas yuav los lo koj, thiab koj tej xeebntxwv mus ibtxhis li!” Thaum Nkehaxis tawm mus lawm, nws txawm mob ruas thoob plaws ibce dawb paug ib yam li te. Muaj ib hnub cov cev Vajtswv lus uas Elisas saib ntawd txawm yws rau nws hais tias, “Lub chaw uas peb nyob no nqaim heev tsis txaus peb nyob! Thov cia peb mus txiav ntoo nram ntug Dej Yauladees los ua dua ib lub chaw rau peb nyob.” Elisas teb hais tias, “Nej cia li mus.” Lawv cov ntawd muaj ib tug yaum kom Elisas nrog lawv mus, ces Elisas thiaj nrog lawv mus thiab lawv txawm ua ke mus. Thaum lawv mus txog ntawm ntug Dej Yauladees, lawv sawvdaws txawm pib ntov ntoo. Thaum lawv cov ntawd tabtom ntov ntoo, muaj ib tug rab taus txawm hle hlo poob rau hauv dej lawm. Nws hu Elisas hais tias, “Tus tswv, kuv yuav ua li cas? Rau qhov rab taus ntawd yog kuv qiv tuaj xwb!” Elisas nug hais tias, “Rab ntaus poob rau qhov twg lawm?” Nws txawm qhia qhov chaw uas rab taus poob rau Elisas. Elisas txiav tau ib yav ntoo thiab muab pov rau ntawm qhov chaw uas rab taus poob, ces rab taus txawm ntab tuaj. Elisas hais tias, “Koj cia li mus muab rab taus los.” Ces tus ntawd thiaj cev tes mus muab rab taus los. Thaum tus vajntxwv uas kav lub tebchaws Xilias tuaj tua cov Yixalayees. Nws nrog nws cov thawj tubrog sablaj thiab xaiv ib thaj chaw rau nws tsuam yeej. Tiamsis Elisas twb tso neeg mus qhia rau cov Yixalayees tus vajntxwv kom ceevfaj tsis txhob mus ze qhov chaw ntawd, rau qhov cov Xilias twb tuaj zov kev lawm. Yog li ntawd, cov Yixalayees tus vajntxwv thiaj ceebtoom kom nws cov tubrog uas nyob thaj tsam ntawd ceevfaj. Elisas ceebtoom rau vajntxwv li ntawd ob peb zaug ntxiv. Qhov no ua rau cov Xilias tus vajntxwv ntxhov siab heev; nws thiaj nug nws cov thawj tubrog hais tias, “Nej cov ko, leejtwg tuaj cov Yixalayees tus vajntxwv tog?” Cov thawj tubrog muaj ib tug teb hais tias, “Vajntxwv, peb cov no yeej tsis muaj leejtwg tuaj cov Yixalayees tus vajntxwv tog li. Tej no, yog Elisas uas yog tus cev Vajtswv lus qhia rau cov Yixalayees tus vajntxwv paub xwb, txawm yog koj hais twjywm hauv txaj xwb los nws yeej paub thiab muab qhia rau nws tus vajntxwv huv tibsi.” Cov Xilias tus vajntxwv thiaj hais tias, “Nej cia li mus nrhiav saib nws nyob qhov twg, kuv yuav txib neeg mus ntes nws los.” Muaj neeg qhia rau vajntxwv paub hais tias, Elisas nyob hauv Dauthas, nws thiaj txhij ib pab tubrog coob heev nrog nees thiab tsheb nees. Lawv mus txog nrad thaum ib tag hmo thiab vij kiag lub nroog. Thaum kaj ntug, Elisas tus tubtxib tawm mus ncig nraum zoov, nws pom cov tubrog Xilias thiab lawv tej nees thiab tsheb nees vij tagnrho lub nroog. Nws thiaj khiav rov los cuag Elisas thiab hais tias, “Tus tswv, zaum no ces peb yuav tsis dim li lauj! Rau qhov luag tuaj vij peb tas lawm. Peb yuav ua li cas?” Elisas teb hais tias, “Tsis txhob ntshai. Peb tog muaj coob dua lawv tog.” Elisas thov Vajtswv hais tias, “Tus TSWV thov koj qhib nws lub qhovmuag kom nws pom!” Tus TSWV teb Elisas tej lus thov, ces Elisas tus tubtxib thiaj pom tej nees huab cua thiab tsheb nees nplaim taws nyob puv toj roob hauv pes ibncig Elisas. Thaum cov tubrog Xilias tabtom dhia los puav ntes Elisas, Elisas thov Vajtswv hais tias, “Tus TSWV, thov koj ua kom cov neeg no qhovmuag fam!” Tus TSWV txawm ua raws li Elisas tej lus thov. Elisas mus rau ntawm lawv thiab hais tias, “Nej tuaj yuam kev lawm; lub nroog no tsis yog lub uas nej tuaj nrhiav. Cia li caum kuv qab, kuv yuav coj nej mus rau ntawm tus txivneej uas nej tuaj nrhiav.” Elisas txawm coj lawv mus rau hauv lub nroog Xamalis. Thaum lawv mus txog hauv lub nroog Xamalis, Elisas thov Vajtswv hais tias, “Tus TSWV, thov koj qhib lawv qhovmuag kom lawv rov pom kev.” Tus TSWV teb Elisas tej lus thov; thaum tus TSWV ua rau lawv rov pom kev ua ciav lawv nyob hauv plawv nroog Xamalis lawm. Thaum cov Yixalayees tus vajntxwv pom lawv, nws hais rau Elisas hais tias, “Tus tswv, cia kuv muab lawv tua, cia kuv muab lawv tua los?” Elisas teb hais tias, “Koj tsis txhob tua lawv, txawm yog tej tubrog uas koj ntes tau los koj tsis txhob muab lawv tua. Koj cia li muab mov rau lawv noj, muab dej rau lawv haus, thiab tso lawv rov qab mus rau lawv tus vajntxwv.” Yog li ntawd, cov Yixalayees tus vajntxwv thiaj ua ib rooj noj haus loj rau lawv noj; thaum lawv noj tas lawm, vajntxwv txawm tso lawv rov qab mus rau cov Xilias tus vajntxwv. Txij thaum ntawd los cov Xilias thiaj tsis tuaj txeeb cov Yixalayees lub tebchaws li lawm. Tau ib ntus tom qab no, Vajntxwv Npeehadas uas kav lub tebchaws Xilias txhij tagnrho nws cov tubrog tuaj vij lub nroog Xamalis tua cov Yixalayees. Vim luag puav lub nroog li ntawd, cov neeg uas nyob hauv lub nroog Xamalis thiaj tshaib nqhis heev, luag muag ib lub taubhau neesluav twg yog yim caum daim nyiaj, thiab luag muab ob lag quav nquab twg yog tsib daim nyiaj. Thaum cov Yixalayees tus vajntxwv taug saum tus ntsa loog, txawm muaj ib tug pojniam quaj rau vajntxwv hais tias, “Vajntxwv, thov koj pab kuv lauj!” Vajntxwv teb hais tias, “Yog tus TSWV tsis pab koj, kuv yuav muab dabtsi rau koj? Kuv muaj hmoov nplej thiab cawv txiv hmab los? Koj muaj kev nyuaj siab dabtsi?” Tus pojniam ntawd teb hais tias, “Tau ob peb hnub los lawm, tus pojniam no hais rau kuv hais tias kom muab kuv tus tub tua rau wb noj, hnub tom qab mam li muab nws tus tub tua rau wb noj. Yog li ntawd, kuv txawm muab kuv tus tub tua rau wb noj lawm. Hnub tom qab kuv hais rau nws hais tias muab koj tus tub tua rau wb noj, tiamsis nws muab nws tus tub zais lawm!” Thaum vajntxwv hnov li ntawd, nws dua rhe nws ub tsho ntev, cov neeg uas nyob ze ntawm tus ntsa loog pom vajntxwv txheej ris tsho ntaubtsaj uas hnav tuaj hauv qab. Vajntxwv hais tias, “Yog hnub no Elisas tsis raug txiav cajdab, thov Vajtswv muab kuv tua kom tuag!” Vajntxwv txawm txib ib tug neeg mus ntes Elisas. Thaum ntawd Elisas tseem nrog cov txwjlaug uas tuaj xyuas nws nyob hauv tsev. Tiamsis thaum tus neeg uas ua vajntxwv ntej tuaj tsis tau txog, Elisas txawm hais rau cov txwjlaug hais tias, “Tus neeg tua neeg txib ib tug neeg tuaj tua kuv lawm! Thaum nws tuaj txog, cia li kaw qhovrooj tsis txhob pub nws los tsev, rau qhov vajntxwv lawv nws qab tuaj thiab.” Thaum Elisas tseem tabtom hais li ntawd, vajntxwv txawm tuaj txog ntua thiab hais tias, “Tej kev txomnyem uas los raug peb no, yog tus TSWV tso los! Kuv tseem tos tus TSWV dabtsi thiab?” Elisas teb hais tias, “Cia li mloog tus TSWV tej lus! Tus TSWV hais li no: Tagkis tav lub caij no, luag yuav muag ob siab hmoov nplej lossis plaub siab hmoov qib twg yog ib daim nyiaj nyob ntawm roojvag nroog Xamalis.” Tus thawj tubrog uas nrog nraim vajntxwv teb Elisas hais tias, “Tej uas koj hais ko yeej tsis muaj li, txawm yog tus TSWV qhib rooj ntug los yeej tsis muaj li ntawd!” Elisas teb hais tias, “Koj lub qhovmuag yuav pom, tiamsis koj yuav tsis tau noj.” Muaj plaub tug neeg mob ruas nyob ntawm lub roojvag nroog Xamalis sab nraud, lawv sib tham hais tias, “Peb yuav ua li cas nyob ntawm no tos mus txog hnub tuag? Yog peb mus hauv lub nroog los peb yuav tuag tshaib; txawm yog peb yuav nyob ntawm no mus li los peb yeej yuav tuag ib yam nkaus. Yog li ntawd, peb cia li mus rau hauv cov Xilias lub yeej, yog lawv tseg los peb dim, yog lawv tua los peb tuag.” Thaum tsaus ntuj zuag, lawv txawm mus rau hauv cov Xilias lub yeej, tiamsis thaum lawv mus txog, tsis muaj ib tug neeg nyob hauv li. Rau qhov tus TSWV twb ua rau cov tubrog Xilias hnov suab nees thiab tsheb nees khiav nrov nroo ntws tuaj ib yam li pab tubrog uas coob heev. Cov Xilias xav hais tias yog cov Yixalayees tus vajntxwv mus ntiav cov Hitis cov tubrog thiab cov Iziv tus vajntxwv cov tubrog tuaj tua lawv. Thaum tsaus ntuj zuag cov Xilias thiaj khiav tas lawm, tso lawv tej tsevntaub, tej nees thiab tej neesluav tseg rau hauv lub yeej tsuav lawv dim xwb. Thaum cov neeg mob ruas mus txog ntawm ntug yeej, lawv txawm mus rau hauv ib lub tsevntaub, lawv muab tej zaub tej mov hauv noj, thiab lawv muab tej nyiaj, tej kub thiab ris tsho nqa mus zais; lawv ho mus rau lwm lub tsevntaub thiab ua ib yam li ntawd. Ces lawv txawm sib tham hais tias, “Peb tsis txhob ua li no. Peb muaj xov zoo, tsis tsimnyog muab npog cia, yog peb tos txog tagkis kaj ntug peb mam li qhia, peb yuav raug txim. Tamsim no, peb cia li mus qhia rau vajntxwv cov nomtswv paub.” Lawv thiaj rov ntawm cov Xilias lub yeej los rau hauv lub nroog Xamalis thiab hu cov uas zov roojvag hais tias, “Peb twb mus hauv cov Xilias lub yeej los lawm, tiamsis tsis pom muaj ib tug tubrog lossis tsis hnov leejtwg hais lus li; tsuas pom tej nees thiab tej neesluav khi pawglug cia xwb. Tej tsevntaub thiab tej khoom los nyob huv tibsi.” Cov zov roojvag txawm qw thiab muaj neeg mus qhia zaj no rau hauv vajntxwv lub loog. Vajntxwv txawm sawv tsaus ntuj nti los hais rau nws cov nomtswv hais tias, “Kuv qhia cov Xilias lub tswvyim rau nej! Lawv paub hais tias peb tshaib plab, lawv thiaj khiav mus nkaum rau sab nraum ntug yeej. Lawv xav hais tias peb yuav tawm mus nrhiav noj sab nraud, thiab lawv yuav rov los ntes peb thiab txeeb peb lub nroog.” Tiamsis nws cov nomtswv ib tug hais tias, “Cov neeg uas nyob hauv lub nroog no yeej yuav tuag tas ib yam li cov uas twb tuag lawm thiab. Yog li ntawd, cia li tso neeg caij tsib tus nees uas seem ntawd mus xyuas saib puas muaj li ntawd tiag.” Lawv txawm muab ob lub tsheb nees thiab cov nees los, vajntxwv kom lawv mus saib muaj xwm dabtsi rau cov tubrog Xilias tiag. Lawv cov ntawd caum cov tubrog Xilias mus ti nkaus ntawm ntug Dej Yauladees, lawv pom tej ris tsho thiab tej cuabyeej uas cov Xilias muab tso povtseg pawglug taug kev xwb, ces lawv txawm rov los qhia rau vajntxwv. Cov neeg hauv lub nroog Xamalis thiaj pluav mus nqa txhua yam hauv cov Xilias lub yeej. Lawv thiaj muab ob siab hmoov nplej lossis plaub siab hmoov qib muag ib daim nyiaj raws li tus TSWV tau hais lawm. Cov neeg txawm muab tus tubrog uas vajntxwv tsa zov roojvag tsuj tuag rau ntawm roojvag raws li Elisas hais rau vajntxwv, hnub uas vajntxwv tuaj ntes Elisas ntag. Elisas xub hais rau vajntxwv lawm hais tias hnub tom qab thaum tav lub caij no, luag yuav muag ob siab hmoov nplej lossis plaub siab hmoov qib twg yog ib daim nyiaj ntawm lub roojvag nroog Xamalis no, ces tus tubrog uas nrog nraim vajntxwv hais tias, “Tej uas koj hais ko yeej tsis muaj li. Txawm yog tus TSWV qhib rooj ntug los yeej tsis muaj li ntawd.” Elisas teb hais tias, “Koj lub qhovmuag yuav pom, tiamsis koj yuav tsis tau noj.” Ces txawm muaj raws li ntawd tiag, rau qhov cov neeg muab nws tsuj tuag rau ntawm lub roojvag nroog lawm. Elisas hais rau tus pojniam uas nyob hauv lub nroog Sunees uas Elisas tsa nws tus tub uas tuag lawm rov muaj sia hais tias, “Koj cia li coj koj tsevneeg mus nyob rau lwm qhov; tus TSWV yuav ua kom lub tebchaws muaj kev tshaib nqhis thiab yuav tsis muaj nag los xya lub xyoos.” Tus pojniam ntawd ua raws li Elisas hais, nws thiaj coj nws tsevneeg tsiv mus nyob rau tebchaws Filitees tau xya xyoo. Thaum dhau xya lub xyoo lawm, nws rov los rau hauv tebchaws Yixalayees thiab nws mus thov vajntxwv kom muab nws lub tsev thiab daim teb rov qab rau nws. Nws mus pom vajntxwv tabtom nrog Nkehaxis uas yog Elisas tus tubtxib tham, rau qhov vajntxwv xav paub tej txujci tseemceeb uas Elisas ua. Thaum uas Nkehaxis tabtom qhia zaj uas Elisas tsa tau tus neeg tuag rov ciaj sia rau vajntxwv mloog, tus pojniam ntawd txawm los thov kom vajntxwv muab nws lub tsev thiab daim teb rov rau nws. Ces Nkehaxis hais rau vajntxwv hais tias, “Vajntxwv, tus pojniam no yog tus uas Elisas tsa nws tus tub uas tuag lawm rov ciaj sia ntag!” Vajntxwv nug tus pojniam ntawd, thiab nws qhia rau vajntxwv raws li Nkehaxis hais, ces vajntxwv txawm hu ib tug nomtswv los thiab hais kom nws mus muab tus pojniam ntawd lub tsev, daim teb thiab tagnrho tej nyiaj uas lawv muag tej qoob hauv nws daim teb ntawm xya lub xyoo uas nws mus nyob rau lwm qhov lawm rov rau nws. Elisas mus rau hauv lub nroog Damaxes thaum Vajntxwv Npeehadas uas kav lub tebchaws Xilias tabtom mob. Thaum vajntxwv hnov hais tias, Elisas tuaj txog rau hauv lub nroog, vajntxwv hais rau Haxayees uas yog nws cov nomtswv ib tug hais tias, “Koj coj ib co khoom mus pub rau Elisas uas yog tus cev Vajtswv lus thiab thov nws nug tus TSWV saib kuv tus mob yuav zoo los tsis zoo.” Yog li ntawd, Haxayees thiaj muab txhua yam uas zoo tshaj plaws uas lawv ua tau hauv lub nroog Damaxes nog rau plaub caug tus ntxhuav thauj mus pub rau Elisas. Thaum Haxayees mus ntsib Elisas, nws hais rau Elisas hais tias, “Koj tus tubtxib uas yog Vajntxwv Npeehadas tau txib kuv tuaj nug koj saib nws tus mob yuav zoo los tsis zoo.” Elisas teb hais tias, “Tus TSWV twb qhia rau kuv lawm hais tias nws yuav tuag, tiamsis koj rov mus hais rau nws tias nws tus mob yuav zoo.” Elisas ntsejmuag ntshaus ntsho saib ntsoov Haxayees ua rau Haxayees ntsejmuag liab tag. Tamsim ntawd, Elisas txawm quaj ua kua muag poob dawb vog. Haxayees nug Elisas hais tias, “Tus tswv, ua li cas koj thiaj quaj?” Elisas teb hais tias, “Rau qhov kuv twb paub tej kev phem uas koj yuav ua rau cov neeg Yixalayees lawm. Koj yuav hlawv lawv tej chaw fajxwm, muab ntaj tua lawv tej tub hluas, muab lawv tej menyuam ntsawm rau hauv av kom tuag thiab muab lawv tej pojniam uas suab menyuam phais plab.” Haxayees hais tias, “Kuv yog koj tus tubtxib uas tsis tseemceeb dabtsi, kuv tsuas zoo li tus dev xwb, kuv puas yuav ua tau li ntawd?” Elisas teb hais tias, “Tus TSWV twb qhia rau kuv lawm hais tias, koj yuav tau ua vajntxwv kav lub tebchaws Xilias.” Haxayees rov los cuag Npeehadas, vajntxwv nug Haxayees hais tias, “Elisas hais li cas?” Haxayees teb hais tias, “Nws hais rau kuv hais tias koj tus mob yuav zoo xwb.” Tiamsis hnub tom qab, Haxayees txawm muab ib daim pam mus raus dej los npog vajntxwv ntsejmuag, vajntxwv txawm tuag lawm. Ces Haxayees txawm ua vajntxwv hloov Npeehadas chaw kav lub tebchaws Xilias. Thaum Ahaj tus tub Yaulas ua vajntxwv kav lub tebchaws Yixalayees tau tsib xyoo lawm, Yehausafas tus tub Yehaulas mam li ua vajntxwv kav lub tebchaws Yudas thaum nws hnubnyoog muaj peb caug ob xyoos, thiab nws nyob hauv lub nroog Yeluxalees kav tau yim xyoo. Yehaulas tus pojniam yog Ahaj tus ntxhais. Yehaulas ua lub neej raws li Ahaj tsevneeg; nws ua kev phem kev qias ib yam li cov Yixalayees tej vajntxwv. Nws ua txhaum rau tus TSWV, tiamsis tus TSWV tsis xav rhuav kom cov Yudas puastsuaj, rau qhov tus TSWV tau coglus rau nws tus tubtxib Daviv lawm hais tias, Daviv cov xeebntxwv yuav tau ua vajntxwv mus ibtxhis li. Ntu uas Yehaulas kav lub tebchaws, cov Edoos tau ntxeev siab rau cov Yudas thiab ua ib lub tebchaws uas tsis zwm rau leejtwg. Yog li ntawd, Yehaulas thiaj coj tagnrho nws tej tsheb nees ua rog mus rau hauv Xailes, ces cov tubrog Edoos txawm tuaj vij lawv qhov ntawd. Thaum ib tag hmo nws thiab nws cov thawj tubrog uas caij tsheb nees txawm faib ua tej pab thiab nrhiav kev khiav, ces nws cov tubrog thiaj khiav ua sab ua sua mus tsev tas lawm. Txij thaum ntawd los, cov Edoos thiaj ua ib lub tebchaws uas tsis zwm rau cov Yudas lawm. Thaum ntawd lub nroog Linas los ntxeev siab rau cov Yudas thiab. Dua li lwm yam uas Yehaulas ua puavleej muab sau tseg rau hauv Phau Ntawv Keebkwm uas teev cov Yudas cov Vajntxwv lub neej lawm. Yehaulas tuag thiab luag coj nws mus faus rau ntawm cov vajntxwv lub toj ntxas hauv Daviv lub nroog, thiab nws tus tub Ahaxiyas ua vajntxwv hloov nws chaw. Thaum Ahaj tus tub Yaulas ua vajntxwv kav lub tebchaws Yixalayees tau kaum ob xyoos lawm, Yehaulas tus tub Ahaxiyas mam li ua vajntxwv kav lub tebchaws Yudas thaum nws hnubnyoog muaj nees nkaum ob xyoos, thiab nws nyob hauv lub nroog Yeluxalees kav tau ib xyoo. Nws niam hu ua Athaliyas, yog Ahaj tus ntxhais thiab yog cov Yixalayees tus Vajntxwv Aumelis tus ntxhais xeebntxwv. Ahaxiyas ua txhaum rau tus TSWV ib yam li Ahaj tsevneeg ua, rau qhov nws yog Vajntxwv Ahaj cajces. Vajntxwv Ahaxiyas thiab cov Yixalayees tus Vajntxwv Yaulas sib koom mus tua Vajntxwv Haxayees uas kav lub tebchaws Xilias. Thaum cov tubrog sib tua ntawm lub nroog Lamaus hauv cheebtsam Nkile-as, Yaulas thiaj raug mob. Yaulas thiaj los kho mob hauv lub nroog Yexelees thiab Ahaxiyas thiaj mus xyuas Yaulas. Elisas uas yog tus cev Vajtswv lus hu ib tug hluas uas cev Vajtswv lus los thiab hais rau nws hais tias, “Koj cia li tu cev thiab nqa hwj roj no mus rau hauv lub nroog Lamaus hauv cheebtsam Nkile-as. Thaum koj mus txog, koj nrhiav kom tau Yehausafas tus tub Yehus uas yog Nimesis tus xeebntxwv. Koj coj nws mus rau ib chav tsev uas deb ntawm nws cov phoojywg thiab muab roj hliv rau saum nws taubhau thiab hais li no: ‘Tus TSWV hais tias kuv tsa koj ua vajntxwv kav lub tebchaws Yixalayees.’ Thaum koj hais li ntawd tas, ces koj cia li tawm ceev nrooj khiav.” Tus hluas uas cev Vajtswv lus txawm mus rau hauv nroog Lamaus. Thaum nws mus txog, cov thawj tubrog tabtom tuaj sablaj ua ke, ces nws hais tias, “Tus tswv, kuv muaj lus yuav hais rau koj.” Yehus teb hais tias, “Koj hais peb cov no leejtwg?” Nws teb hais tias, “Tus tswv, kuv hais koj ntag.” Ces nkawd txawm mus rau hauv ib chav tsev, tus hluas uas cev Vajtswv lus thiaj muab roj hliv rau Yehus taubhau thiab hais tias, “Tus TSWV uas yog cov Yixalayees tus Vajtswv hais li no: ‘Kuv tsa koj ua vajntxwv kav lub tebchaws Yixalayees. Koj cia li mus muab Ahaj tus tub Yaulas uas yog koj tus vajntxwv tua povtseg, kuv thiaj pauj tau qhov uas Yexenpees tua kuv cov cevlus thiab cov tubtxib. Yuav tsum muab Ahaj tsevneeg thiab nws tej xeebntxwv tua kom tuag tas; kuv yuav muab txhua tus txivneej hauv nws tsevneeg, tsis hais tus laus tus hluas, tua kom tu noob nrho huv tibsi. Kuv yuav ua rau Ahaj tsevneeg ib yam li kuv ua rau cov Yixalayees tus Vajntxwv Yelaunpau-as tsevneeg thiab ib yam li kuv ua rau cov Yixalayees tus Vajntxwv Npa-asas tsevneeg. Yuav tsis muaj leejtwg muab Yexenpees faus; tej dev hauv cheebtsam Yexelees yuav tuaj noj nws lub cev.’ ” Thaum tus hluas uas cev Vajtswv lus hais li ntawd tas, nws txawm tawm ceev nrooj hauv chav tsev ntawd mus lawm. Yehus rov los rau ntawm nws cov phoojywg. Muaj ib tug nug nws hais tias, “Puas muaj xwm dabtsi? Tus neeg vwm ntawd tuaj hais dabtsi rau koj?” Yehus teb hais tias, “Nej sawvdaws yeej paub hais tais nws tuaj hais dabtsi lawm!” Lawv teb hais tias, “Peb tsis paub li! Koj cia li qhia rau peb saib nws hais li cas.” Nws qhia kuv hais tias, “Tus TSWV hais li no: ‘Kuv yuav tsa koj ua vajntxwv kav lub tebchaws Yixalayees.’ ” Tamsim ntawd, lawv txawm hle hlo lawv cov tsho ntev los pua rau ntawm theem ntaiv rau Yehus sawv saud, lawv tshuab raj tshuab xyu thiab qw hais tias, “Yehus yog vajntxwv lawm!” Yehus txawm caij tsheb nees mus rau hauv lub nroog Yexelees, rau qhov Yaulas tseem kho mob nyob hauv. Cov Yudas tus Vajntxwv Ahaxiyas los tuaj xyuas Yaulas rau hauv lub nroog ntawd thiab. Tus tubrog fajxwm saum lub chaw tsomfaj hauv lub nroog Yexelees pom Yehus thiab nws cov neeg tuaj. Nws thiaj qw hais tias, “Kuv pom ib pab tubrog tuaj!” Yaulas teb hais tias, “Cia li txib ib tug tubrog caij neeg mus xyuas saib lawv tuaj ua zoo lossis ua phem.” Tus tubrog ntawd caij neeg mus nug Yehus hais tias, “Vajntxwv xav paub hais tias saib koj tuaj ua zoo lossis ua phem.” Yehus teb hais tias, “Tsis yog koj feem xyuam! Cia li raws kuv qab mus.” Tus fajxwm saum lub chaw tsomfaj hais tias, tus tubrog twb mus txog ntawm lawv lawm, tiamsis nws tsis rov qab los li. Vajntxwv txib dua ib tug tubrog mus, nws mus nug Yehus ib yam li qub. Yehus rov teb hais tias, “Tsis yog koj feem xyuam! Cia li raws kuv qab mus.” Tus fajxwm saum lub chaw tsomfaj rov hais dua tias nws mus txog ntawm lawv, tiamsis nws tsis rov los li thiab. Tus uas tsav tsheb nees, tsav vwm ntsuav li Yehus uas yog Nimesis tus xeebntxwv ntag. Vajntxwv Yaulas hais tias, “Cia li npaj kuv lub tsheb nees rau kuv.” Lawv thiaj coj vajntxwv lub tsheb nees los, ces cov Yixalayees tus Vajntxwv Yaulas thiab cov Yudas tus Vajntxwv Ahaxiyas, nyias txawm caij nyias lub tsheb nees mus ntsib Yehus ntawm Nanpaus thaj teb. Thaum Yaulas pom Yehus, nws nug Yehus hais tias, “Yehus, koj tuaj ua zoo lossis ua phem?” Yehus teb hais tias, “Yog thaum twg peb tseem muaj kev teev tej dab thiab pe tej mlom uas koj niam Yexenpees coj los, peb yuav ua li cas ua tau zoo?” Ces Yaulas txawm rub nws lub tsheb nees tig hlo rov qab thiab qw hais tias, “Ahaxiyas! Lawv ntxeev siab lawm!” Yehus siv tagnrho nws lub zog rub rab hneevnti tua xibxub vog mus raug Yaulas nraubqaum to ntshua mus raug nws lub plawv, ces Yaulas vau hlo tuag kiag rau hauv nws lub tsheb nees, Yehus hais rau tus tubrog Npidekas uas nrog nraim nws hais tias, “Cia li coj Yaulas mus pov rau hauv Nanpaus thaj teb. Nyaj koj tseem nco tau thaum koj thiab kuv caij nees ua Ahaj uas yog Vajntxwv Yaulas txiv qab, tus TSWV tau hais txog Ahaj tej kev txhaum li no: ‘Nag hmo, kuv pom tus uas tua Nanpaus thiab nws cov tub hauv thaj teb no. Kuv coglus hais tias kuv yuav rau txim rau koj hauv thaj teb no thiab.’ Yehus thiaj kom nws tus tubrog muab Yaulas pov rau hauv Nanpaus thaj teb raws li tus TSWV tau hais tseg lawm.” Vajntxwv Ahaxiyas pom ntsoov tej xwm ntawd, nws thiaj tsav nws lub tsheb nees khiav mus rau hauv lub nroog Npethes Hankas, rau qhov Yehus caum nws tua. Yehus hais rau nws cov tubrog hais tias, “Tua tus ntawd thiab!” Ces cov tubrog txawm muab hmuv nkaug Ahaxiyas thaum nws tabtom tsav nws lub tsheb nees khiav mus rau hauv lub nroog Nkules uas nyob ze rau ntawm lub nroog Inpelas. Tiamsis nws mus txog rau hauv lub nroog Menkidaus, nws mam li tuag. Nws cov nomtswv muab tsheb nees thauj nws rov los rau hauv lub nroog Yeluxalees thiab muab nws faus rau ntawm cov vajntxwv lub toj ntxas hauv Daviv lub nroog. Ahaxiyas ua vajntxwv kav lub tebchaws Yudas thaum uas Ahaj tus tub Yaulas ua vajntxwv kav lub tebchaws Yixalayees tau kaum ib xyoo lawm. Thaum Yehus tuaj txog hauv lub nroog Yexelees. Yexenpees twb paub tej xwm ntawd lawm, ces nws txawm muab tshuaj foo nws tawv muag, ntsis nws cov plaubhau, thiab tuaj ntawm qhovrai xauj rau sab nraud. Thaum Yehus tuaj txog ntawm roojvag, Yexenpees txawm qw hais tias, “Ximelis! Koj twb tua koj tus vajntxwv lawm! Koj tseem tuaj dabtsi ntawm no?” Yehus txawm tsa qhovmuag saib pom ob peb tug nomtswv xauj ntawm qhovrai tuaj rau nws, Yehus hais tias, “Leejtwg tuaj kuv tog?” thiab Yehus hais rau lawv hais tias, “Nej cia li muab Yexenpees pov los!” Lawv txawm muab Yexenpees pov los ntsawm hauv av ua rau ntshav txaws mus lo tej phabntsa thiab tej nees tas. Yehus txawm tsav tsheb nees los luam kiag Yexenpees lub cev mus rau haus hauv lub loog thiab nws mus noj mus haus nyob rau hauv. Yehus hais tias, “Nej cia li coj niag pojniam ntawd mus faus; rau qhov nws yog vajntxwv ib tug ntxhais thiab.” Tiamsis thaum cov neeg ntawd tawm mus muab Yexenpees faus, lawv tsuas pom tshuav lub txha taubhau thiab tej txha tes taw lawm xwb. Thaum lawv rov los qhia rau Yehus, Yehus hais tis, “Qhov no yeej muaj raws li tus TSWV tau hais tseg rau nws tus tubtxib Eliyas hais tias, ‘Cov dev uas nyob hauv thaj tsam Yexelees yuav tuaj noj Yexenpees lub cev. Yexenpees tej pobtxha uas seem nyob ri sua ib yam li tej quav tsiaj, thiab tsis muaj leejtwg paub hais tias yog Yexenpees tej pobtxha li.’ ” Vajntxwv Ahaj muaj xya caum leej tub xeebntxwv nyob hauv lub nroog Xamalis. Yehus sau ib tsab ntawv thiab muab theej xa mus rau cov nomtswv, cov thawj uas coj cov pejxeem thiab cov uas saib Ahaj cov tub xeebntxwv hauv lub nroog. Cov lus hauv tsab ntawv hais li no: “Nej cov uas saib vajntxwv cov tub xeebntxwv, nej muaj tej tsheb nees, tej nees, tej cuabyeej ua rog thiab tej nroog uas muaj ntsa yeej thaiv khov kho. Thaum nej taus txais tsab ntawv no lawm, nej cia li xaiv vajntxwv cov tub xeebntxwv ib tug uas tsimnyog tshaj plaws thiab tsa nws ua vajntxwv tiv thaiv nws yawgkoob tsevneeg.” Cov nomtswv hauv lub nroog Xamalis ntshai kawg li. Lawv hais tias, “Peb yuav ua li cas tua yeej Yehus? Txawm yog Vajntxwv Yaulas thiab Vajntxwv Ahaxiyas los twb tua tsis yeej Yehus.” Yog li ntawd, tus nom uas saib lub loog thiab tus nom uas saib lub nroog, cov thawjcoj thiab cov uas saib cov pejxeem thiaj xa xov mus hais rau Yehus li no: “Peb yog koj cov tubtxib, peb ua raws li koj hais. Tiamsis peb yuav tsis tsa leejtwg ua vajntxwv, thov koj ua raws li koj pom zoo.” Yehus sau dua ib tsab ntawv mus hais rau lawv hais tias, “Yog nej tuaj kuv tog thiab txaus siab ua raws li kuv hais, tagkis tav lub sijhawm no, nej nqa kom tau Vajntxwv Ahaj cov tub xeebntxwv cov taubhau tuaj rau kuv hauv lub nroog Yexelees no.” Cov nomtswv uas saib cov pejxeem hauv lub nroog Xamalis, yog cov uas tu thiab cob qhia Vajntxwv Ahaj xya caum leej tub xeebntxwv ntawd. Thaum cov nomtswv hauv lub nroog Xamalis tau txais Yehus tsab ntawv lawm, lawv txawm muab Ahaj xya caum leej tub xeebntxwv txiav cajdab thiab muab cov taubhau ntim rau hauv ib co tawb xa mus rau Yehus hauv lub nroog Yexelees. Thaum muaj neeg mus qhia rau Yehus paub hais tias, lawv coj Ahaj cov tub xeebntxwv cov taubhau tuaj txog lawm, Yehus txawm hais kom lawv coj mus tso ua ob pawg rau ntawm roojvag nroog, cia nyob ntawd mus txog hnub tom qab thaum sawv ntxov. Thaum sawv ntxov Yehus mus txog ntawm roojvag, nws hais rau cov neeg uas nyob ntawd hais tias, “Kuv yog tus uas ntxeev siab rau Vajntxwv Yaulas thiab muab nws tua; nej tsis yog cov uas ris lub txim ntawd. Tiamsis leejtwg yog tus uas tua cov neeg no? Qhov no ua qhia rau peb paub hais tias txhua yam uas tus TSWV hais txog Ahaj cov tub xeebntxwv yeej muaj tseeb tiag. Tus TSWV ua raws li nws tau hais tseg rau Eliyas uas yog nws tus cev Vajtswv lus lawm.” Yehus lojxov tua Ahaj cov kwvtij, cov nomtswv, cov phoojywg thiab cov povthawj uas nyob hauv lub nroog Yexelees tuag tas tsis seem ib tug li. Yehus tawm hauv lub nroog Yexelees mus rau hauv lub nroog Xamalis. Thaum nws mus txog ntawm qhov chaw uas hu ua “Cov Yug Yaj Lub Yeej,” nws ntsib cov Yudas tus Vajntxwv Ahaxiyas cov kwvtij, nws nug lawv hais tias, “Nej yog leejtwg cov neeg?” Lawv teb hais tias, “Peb yog Ahaxiyas cov kwvtij, peb yuav mus hawm vajntxwv cov tub xeebntxwv thiab niam Vajntxwv Yexenpees uas nyob hauv lub nroog Yexelees.” Ces Yehus hais rau nws cov tubrog hais tias, “Cia li ntes lawv!” Cov tubrog txawm vij kiag lawv thiab muab lawv tua tuag tas ze rau ntawm lub qhovtshij Npethes Ekes. Lawv cov ntawd muaj plaub caug ob leeg, lawv puavleej raug tua tuag tas tsis seem ib tug li. Thaum Yehus sawv kev qhov ntawd mus, nws txawm mus ntsib Yaunadas uas yog Lekhas tus tub. Yehus hais rau Yaunadas hais tias, “Koj thiab kuv puas ua tau ib lub siab tiag?” Yaunadas teb hais tias, “Kuv ua tau.” Yehus hais tias, “Wb tuav tes.” Nkawd txawm sib tuav tes, thiab Yehus rub Yaunadas rau saum tsheb nees thiab hais tias, “Nrog kuv mus, koj thiaj li pom hais tias, kuv yeej muab siab npuab tus TSWV tiag.” Ces nkawd txawm caij tsheb nees mus rau hauv lub nroog Xamalis. Thaum nkawd mus txog hauv lub nroog, Yehus txawm muab Ahaj cov kwvtij tua tuag tas tsis tseg ib tug li. Tej xwm no muaj raws li tus TSWV tau hais tseg rau Eliyas lawm. Yehus hu tagnrho cov neeg uas nyob hauv lub nroog Xamalis tuaj ua ke thiab hais rau lawv hais tias, “Vajntxwv Ahaj tsuas pe Npa-as mentsis xwb, tiamsis kuv yuav pe Npa-as heev dua ntawd thiab. Yehus hu cov cev Npa-as lus, cov coj Npa-as kevcai thiab cov povthawj uas teev Npa-as tagnrho tuaj sib sau ua ke. Txhua tus yuav tsum tuaj tsis zam rau leejtwg li, rau qhov kuv yuav fij khoom ntau heev rau Npa-as. Yog leejtwg tsis tuaj, kuv yuav muab tus ntawd tua povtseg.” (Qhov uas Yehus ua li ntawd, yog nws ntxias kom cov neeg uas pe Npa-as tuaj thiab muab lawv tua povtseg huv tibsi.) Yehus hais tias, “Cia li teem ib hnub rau sawvdaws tuaj pe Npa-as!” Ces lawv txawm tshaj tawm rau sawvdaws, thiab Yehus xa xov mus thoob plaws lub tebchaws Yixalayees. Txhua tus uas pe Npa-as puavleej tuaj tagnrho tsis seem ib tug li. Lawv sawvdaws mus rau hauv lub tsev teev Npa-as puv nkaus sab tim no rau sab tim ub. Yehus hais rau tus povthawj uas saib cov tsho ntev, kom muab cov tsho los rau cov neeg uas pe Npa-as hnav. Tom qab ntawd, Yehus nrog Lekhas tus tub Yaunadas mus rau hauv lub tsev teev Npa-as, thiab hais rau cov neeg uas tuaj nyob hauv hais tias, “Tsuas yog pub cov neeg uas pe Npa-as tuaj rau hauv no xwb, tsis pub cov uas pehawm tus TSWV tuaj rau hauv no li.” Yehus thiab Yaunadas txawm mus hlawv khoom fij rau Npa-as. Yehus twb npaj tau yim caum leej tubrog nyob sab nraum zoov lub tsev teev Npa-as tos thiab hais rau lawv hais tias, “Nej yuav tsum muab cov neeg no tua kom tuag tas huv tibsi. Yog nej leejtwg cia lawv cov ntawd ib tug dim, mas yuav muab nws tua theej tus uas dim lawm chaw!” Thaum Yehus muab khoom hlawv fij tagnrho, nws txawm hais rau cov fajxwm thiab cov tubrog hais tias, “Nej cia li mus rau hauv thiab muab lawv tua huv tibsi; tsis pub ib tug dim li!” Ces cov tubrog txawm rho ntaj thiab mus muab cov neeg ntawd tua tuag tas rau hauv tsev thiab muab luag pov rau sab nraud. Ces lawv txawm mus rau chav hauv plawv lub tsev teev Npa-as, muab tej ncej zeb Npa-as nqa tawm rau sab nraud thiab muab hlawv. Lawv muab tej ncej zeb Npa-as thiab lub tsev teev Npa-as rhuav puastsuaj tas, ua chaw rau neeg mus tawm rooj los txog niaj hnub no. Yehus ua li ntawd thiaj tshem tau cov neeg uas pe Npa-as hauv lub tebchaws Yixalayees tawm mus. Tiamsis Yehus tseem ua txhaum ib yam li Vajntxwv Yelaunpau-as uas yog Nenpas tus tub ua thiab. Nws coj cov Yixalayees mus pe ob tus mlom menyuam nyuj uas Yelaunpau-as muab kub nchuav rau hauv lub nroog Npethees thiab hauv lub nroog Das. Tus TSWV hais rau Yehus hais tias, “Koj tau ua rau Ahaj cov tub xeebntxwv raws li kuv kom koj ua lawm. Yog li ntawd, kuv coglus rau koj hais tias koj cov xeebntxwv yuav tau ua vajntxwv kav cov Yixalayees mus txog plaub tiam.” Tiamsis Yehus tsis ua raws li tus TSWV uas yog cov Yixalayees tus Vajtswv txoj kevcai kom kawg siab kawg ntsws; nws ua ib yam li Yelaunpau-as ua, nws thiaj coj cov Yixalayees mus ua txhaum. Txij thaum ntawd los tus TSWV txawm ua rau cov Yixalayees lub tebchaws nqaim zuj zus. Vajntxwv Haxayees uas kav lub tebchaws Xilias tuaj txeeb tau cov Yixalayees lub tebchaws tagnrho, txij ntua ntawm tus Dej Yauladees sab hnubtuaj mus rau sab qabteb, ti nkaus rau ntawm lub nroog Alu-es ntawm tus Dej Alenoos, tagnrho cheebtsam Nkile-as thiab Npasas uas yog xeem Khas, xeem Lunpees thiab xeem Manaxes sab hnubtuaj nyob huv tibsi. Dua li lwm yam uas Yehus ua thiab tej uas nws muaj peevxwm ua tau, puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neeg lawm. Yehus tuag thiab luag muab nws faus rau hauv lub nroog Xamalis, thiab nws tus tub Yehau-ahas ua vajntxwv hloov nws chaw. Yehus ua vajntxwv kav lub tebchaws Yixalayees, thiab nws nyob hauv lub nroog Xamalis kav tau nees nkaum yim xyoo. Thaum Athaliyas hnov hais tias nws tus tub uas yog Vajntxwv Ahaxiyas raug tua tuag lawm, nws txawm samhwm kom luag muab Vajntxwv Ahaxiyas tsevneeg tua kom tuag tas huv tibsi. Tsuas yog Ahaxiyas tus tub Yau-ases thiaj khiav dim xwb. Yau-ases los twb yuav luag raug tua tuag nrog lwm tus, tiamsis muaj nws tus phauj Yehausenpas uas yog Vajntxwv Yehaulas tus ntxhais thiab yog Ahaxiyas tus muam coj Yau-as thiab tus ntxhais qhev uas tu Yau-as mus zais rau ib chav hauv lub Tuamtsev kom Athaliyas tsis txhob pom nws. Yog li ntawd, Yau-as thiaj tsis raug tua. Yehausenpas tu thiab zais Yau-as hauv lub tuamtsev tau rau lub xyoos rau thaum uas Athaliyas ua poj vajntxwv kav tebchaws ntawd. Tiamsis xyoo xya tus povthawj Yehauyadas thiaj xa xov mus rau tus thawj tubrog uas saib cov tubrog uas nrog nraim vajntxwv thiab cov zov lub loog tuaj rau hauv lub Tuamtsev, nws kom lawv coglus thiab ua raws li nws hais. Nws qhia Vajntxwv Ahaxiyas tus tub Yau-as rau lawv thiab kom lawv ua li no: “Hnub Xanpataus nej tuaj ua haujlwm, nej cov neeg ib feem peb zov lub loog; ib feem peb zov ntawm lub Roojvag Xules, thiab dua ib feem peb zov ntawm lub roojvag uas nyob tom qab pab ntawd. Ob pab uas tsis ua haujlwm hnub Xanpataus yuav tsum tauj nyob hauv lub Tuamtsev zov vajntxwv. Nej yuav tsum tuav rawv ntaj ntawm tes zov Vajntxwv Yau-as thiab nrog nraim nws txhua qhov uas nws mus. Yog leejtwg txav los ze, nej cia li muab tus ntawd tua povtseg.” Tus thawj tubrog ua raws li Yehauyadas hais thiab hu cov tubrog los cuag nws, tsis hais cov uas ua haujlwm hnub Xanpataus thiab cov uas tsis ua. Yehauyadas muab Vajntxwv Daviv cov hmuv, thiab cov thaiv hniav ntaj uas muab khaws cia rau hauv lub Tuamtsev rau tus thawj tubrog, thiab Yehauyadas kom cov tubrog tuav rawv ntaj mus sawv thoob plaws ntawm hauv ntej lub Tuamtsev tiv thaiv vajntxwv. Ces Yehauyadas txawm coj Yau-as tawm los, muab lub kausmom kub rau nws ntoo thiab muab Vajtswv phau kevcai cob rau Yau-as; lawv muab roj hliv rau Yau-as taubhau tsa nws ua vajntxwv; lawv sawvdaws npuaj teg thiab qw hais tias, “Thov kom vajntxwv muaj sia nyob ntev!” Poj Vajntxwv Athaliyas hnov cov tubrog thiab cov pejxeem qw, ces nws txawm khiav ceev nrooj tuaj rau ntawm lub Tuamtsev uas sawvdaws tuaj sib sau. Poj Vajntxwv pom tus vajntxwv uas lawv tsa sawv ntawm lub Tuamtsev tus ncej qhovrooj raws li kevcai tsa vajntxwv. Cov nomtswv, cov tshuab raj tshuab xyu thiab cov pejxeem sawv ncig vajntxwv, lawv qw thiab tshuab raj tshuab xyu zoo siab kawg li. Athaliyas nyuaj siab heev, nws dua rhe nws cev khaubncaws thiab qw hais tias, “Ntxeev siab! Ntxeev siab!” Yehauyadas tsis xav kom luag tua Athaliyas rau ntawm lub Tuamtsev, nws thiaj hais rau cov thawj tubrog hais tias, “Coj Athaliyas tawm raws kis nruab nrab ntawm ob pab tubrog no mus. Yog leejtwg los pab nws, ces nej cia li muab tus ntawd tua.” Cov tubrog txawm ntes Athaliyas thiab coj nws mus rau ntawm lub Roojvag Nees uas yuav mus rau hauv lub loog thiab lawv muab nws tua rau ntawd. Tus povthawj Yehauyadas kom Vajntxwv Yau-as thiab cov pejxeem sawvdaws coglus rau tus TSWV hais tias lawv yuav ua tus TSWV haivneeg, thiab nws kom vajntxwv thiab cov pejxeem sib coglus ib yam nkaus. Ces cov neeg txawm mus rau tom lub tsev teev Npa-as thiab muab lub tsev rhuav puastsuaj tas; lawv muab tej thaj thiab tej mlom tsoo tawg tas, thiab muab tus povthawj Matas uas teev Npa-as tua rau ntawm hauv ntej cov thaj. Yehauyadas tso ib pab tubrog zov ntawm lub Tuamtsev, ces Yehauyadas, cov nomtswv, cov tubrog uas nrog nraim vajntxwv thiab cov tubrog uas zov lub loog, txawm coj vajntxwv tawm hauv lub Tuamtsev mus rau hauv lub loog, thiab cov pejxeem sawvdaws raws nws qab. Yau-as mus ntawm lub Roojvag Fajxwm mus rau hauv lub loog thiab mus zaum saum lub zwmtxwv. Cov pejxeem sawvdaws zoo siab kawg nkaus, thiab lub nroog nyob ntsiag to, rau qhov lawv twb muab Athaliyas tua tuag rau ntawm lub loog lawm. Yau-ases ua vajntxwv kav lub tebchaws Yudas thaum nws hnubnyoog muaj xya xyoo. Thaum Yehus ua vajntxwv kav lub tebchaws Yixalayees tau xya xyoo lawm, Yau-ases mam li ua vajntxwv kav lub tebchaws Yudas, thiab nws nyob hauv lub nroog Yeluxalees kav tau plaub caug xyoo. Nws niam hu ua Xinpiyas uas nyob hauv lub nroog Npesenpas. Yau-ases ua raws li tus TSWV lub siab nyiam mus tas nws lub neej, rau qhov yog tus povthawj Yehauyadas cob qhia nws. Txawm li ntawd los nws tsis muab tej chaw teev dab rhuav povtseg, cov neeg thiaj pheej mus tua tsiaj fij thiab hlawv hmoov tshuaj tsw qab rau ntawm tej chaw ntawd. Yau-ases hais rau cov povthawj hais tias, “Nej cia li khaws tej nyiaj uas cov pejxeem coj tuaj fij rau hauv lub Tuamtsev, tsis hais cov nyiaj uas lawv coj tuaj fij theej txhoj raws li kevcai thiab cov nyiaj uas lawv muaj lub siab dawb paug coj tuaj fij. Txhua tus povthawj yuav tau khaws tej nyiaj uas cov neeg uas nws ua haujlwm rau coj tuaj fij, thiab muab tej nyiaj ntawd siv kho lub Tuamtsev tej qhov uas puas lawm.” Yau-ases twb ua vajntxwv kav tebchaws tau nees nkaum peb xyoos lawm, tiamsis cov povthawj tseem tsis tau kho lub Tuamtsev li. Yog li ntawd, Vajntxwv Yau-ases thiaj hu tus povthawj Yehauyadas thiab cov povthawj tuaj cuag nws, nws hais rau lawv hais tias, “Vim li cas nej tseem tsis tau kho lub Tuamtsev li? Txij hnub no mus nej tsis txhob muab tej nyiaj uas cov neeg coj tuaj fij khaws cia lawm, tiamsis cia li muab cov nyiaj ntawd rau lwm tus coj mus kho lub Tuamtsev kom tiav.” Cov povthawj thiaj pom zoo ua raws li Yau-as hais thiab pom zoo hais tias cia lawv tsis txhob ua cov kho lub Tuamtsev. Tus povthawj Yehauyadas muab ib lub thawv tho qhov saum lub hau thiab coj mus txawb rau ntawm lub thaj sab xis, ntawm lub qhovrooj uas mus rau hauv lub Tuamtsev. Cov povthawj uas ua haujlwm ntawm qhovrooj muab tej nyiaj uas cov neeg tuaj pehawm Vajtswv coj tuaj fij tso rau huv lub thawv ntawd. Thaum cov nyiaj puv lub thawv lawm, vajntxwv tus teev ntawv thiab tus Povthawj Hlob tuaj muab cov nyiaj ntawd suav thiab muab ntim rau hauv hnab. Thaum nkawd suav tej nyiaj ntawd tas, nkawd muab teev tseg thiab muab cob rau tus thawj uas saib cov kho lub Tuamtsev coj mus them rau cov txua ntoo, cov ua tsev, cov txhim phabntsa, cov txaug pobzeb, coj mus yuav ntoo, yuav pobzeb thiab muab yuav tej yam uas yuav tsum siv. Txawm li ntawd los lawv tsis muab tej nyiaj ntawd them rau cov uas nchuav khob, tais, raj xyu, tej cuabyeej siv rau tej teeb lossis lwm yam uas muab nyiaj muab kub ua. Cov nyiaj ntawd muab them rau cov uas kho lub Tuamtsev thiab yuav tej khoom uas kho lub Tuamtsev xwb. Cov uas Yehauyadas thiab vajntxwv tus teev ntawv muab nyiaj rau coj mus them cov neeg ua haujlwm, lawv ua ncaj ncees heev. Yog li ntawd, nkawd thiaj tsis kom lawv muab tej ntawv teev nyiaj los. Tej nyiaj uas cov neeg coj tuaj fij theej txhoj thiab coj tuaj fij daws txim, tsis txhob muab tso rau hauv lub thawv, rau qhov cov nyiaj ntawd yog cov povthawj tug. Thaum lub sijhawm ntawd Vajntxwv Haxayees uas kav lub tebchaws Xilias tuaj tua thiab txeeb tau lub nroog Nkathas, thiab nws mus tua lub nroog Yeluxalees. Vajntxwv Yau-ases uas kav lub tebchaws Yudas muab tagnrho tej khoom fij uas nws yawgkoob Yehausafas, Yehaulas thiab nws txiv Ahaxiyas muab fij rau tus TSWV lawm, ntxiv rau nws tej khoom thiab tej nyiaj tej kub hauv lub Tuamtsev thiab hauv lub loog, coj mus pub rau Vajntxwv Haxayees, Haxayees thiaj thim nws cov tubrog rov qab tsis tua lub nroog Yeluxalees lawm. Dua li lwm yam uas Vajntxwv Yau-ases ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Thaum Ahaxiyas tus tub Yau-ases ua vajntxwv kav lub tebchaws Yudas tau nees nkaum peb xyoos lawm, Yehus tus tub Yehau-ahas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau kaum xya xyoo. Yehau-ahas ua txhaum rau tus TSWV ib yam li Vajntxwv Yelaunpau-as uas yog Nenpas tus tub ua, nws tau coj cov Yixalayees mus txhaum. Yog li ntawd, tus TSWV thiaj chim heev rau cov Yixalayees thiab cia Vajntxwv Haxayees uas kav lub tebchaws Xilias thiab nws tus tub Npeehadas tuaj tua yeej cov Yixalayees thiab tswjhwm cov Yixalayees tau ntev loo. Ces Yehau-ahas thiaj thov tus TSWV, tus TSWV txaus siab thiab teb nws tej lus thov, vim tus TSWV pom hais tias tus vajntxwv uas kav lub tebchaws Xilias tau tsimtxom cov Yixalayees heev. Tus TSWV pub cov Yixalayees muaj ib tug thawjcoj los tso kom lawv dim ntawm cov Xilias, yog li ntawd cov Yixalayees thiaj tau rov mus nyob hauv lawv tej vajtse kaj siab lug ib yam li yav tas los. Tiamsis lawv tseem pheej ua tej kev txhaum uas Vajntxwv Yelaunpau-as tsevneeg coj cov Yixalayees mus ua tsis tso tseg li, thiab tus mlom Aselas tseem nyob hauv lub nroog Xamalis. Yehau-ahas cov tubrog tsuas tshuav tsib caug leej tubrog caij nees, kaum lub tsheb nees, thiab kaum txhiab leej tubrog mus taw lawm xwb, rau qhov tus vajntxwv uas kav lub tebchaws Xilias tuaj muab ibtxhia tua tuag tas, thiab lawv muab tsuj ib yam li tsuj tej hmoov av. Dua li lwm yam uas Yehau-ahas ua thiab tej uas nws muaj peevxwm ua tau puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Yehau-ahas tuag thiab luag coj nws mus faus rau hauv lub nroog Xamalis, thiab nws tus tub Yehau-as ua vajntxwv hloov nws chaw. Thaum Yau-ases ua vajntxwv kav lub tebchaws Yudas tau peb caug xya xyoo lawm, Yehau-ahas tus tub Yehau-as mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau kaum rau xyoo. Yehau-as los ua txhaum rau tus TSWV ib yam li Yelaunpau-as uas yog Nenpas tus tub ua, nws tau coj cov Yixalayees mus ua txhaum. Dua li lwm yam uas Yehau-as ua, thiab tagnrho tej uas nws muaj peevxwm ua rog rau Vajntxwv Amaxiyas uas kav lub tebchaws Yudas puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Yehau-as tuag thiab luag coj nws mus faus rau ntawm cov vajntxwv lub toj ntxas hauv lub nroog Xamalis, thiab nws tus tub Yelaunpau-as ua vajntxwv hloov nws chaw. Thaum Elisas uas yog tus cev Vajtswv lus mob yuav tuag, Vajntxwv Yehau-as uas kav lub tebchaws Yixalayees tuaj xyuas Elisas. Yehau-as quaj hais tias, “Kuv txiv! Kuv txiv! Koj yog cov Yixalayees tus cawmseej uas loj kawg nkaus.” Elisas hais rau Yehau-as hais tias, “Koj cia li mus nqa ib rab hneevnti thiab ib co xub tuaj.” Yehau-as txawm mus nqa tuaj, thiab Elisas hais rau Yehau-as kom muab xub nruab rau rab hneevnti thiab rub tua. Vajntxwv txawm ua li ntawd, thiab Elisas muab nws txhais tes tso rau saum vajntxwv txhais tes. Elisas kom vajntxwv qhib lub qhovrai uas tig mus rau pem tebchaws Xilias, thiab Elisas hais tias, “Cia li tua koj rab hneevnti mus rau pem tebchaws Xilias!” Thaum uas vajntxwv tua rab hneevnti lawm, Elisas hais rau vajntxwv hais tias, “Koj yog xibxub uas tus TSWV yuav siv mus tua kom yeej lub tebchaws Xilias. Koj yuav mus tua cov Xilias pem lub nroog Afes mus txog hnub uas koj yeej lawv lawm.” Elisas hais kom vajntxwv muab dua ib co xub los nplawm hauv av. Vajntxwv txawm muab cov xub nplawm peb nplawg rau hauv av thiab tso plhuav tseg. Elisas npautaws heev, nws thiaj hais rau vajntxwv hais tias, “Tsimnyog koj nplawm tsib raus nplawm rau hauv av, koj thiaj yuav yeej hlo cov Xilias, tiamsis koj tsuas nplawm peb nplawg xwb, yog li ntawd, koj yuav mus tua yeej cov Xilias peb zaug xwb.” Elisas tuag thiab luag coj nws mus faus. Txij thaum ntawd los cov Mau-am ib pab rog tubsab pheej niaj xyoo tuaj tua lub tebchaws Yixalayees. Muaj ib zaug cov Yixalayees tabtom kwv ib tug tuag mus faus. Thaum lawv pom cov Mau-am pab rog tubsab ntawd tuaj, lawv txawm muab tus tuag pov rhees rau hauv Elisas lub qhov ntxa thiab lawv nyias taus nyias khiav lawm. Thaum tus tuag poob mus raug Elisas cov pobtxha, ces tus tuag txawm rov ciaj sia tuaj thiab sawv tsees nres nroos. Ntu uas Vajntxwv Yehau-as kav lub tebchaws Yixalayees, tus Vajntxwv Haxayees uas kav lub tebchaws Xilias tsimtxom cov Yixalayees kawg li, tiamsis tus TSWV hlub thiab tshua cov Yixalayees heev. Nws tsis xav kom lawv raug kev puastsuaj, nws thiaj pab lawv, rau qhov nws tau coglus tseg rau Anplahas, Ixaj thiab Yakhauj lawm. Tus TSWV tseem nco ntsoov nws haivneeg tsis tso lawv tseg li. Thaum Vajntxwv Haxayees uas kav lub tebchaws Xilias tuag lawm, nws tus tub Npeehadas ua vajntxwv hloov nws chaw. Vajntxwv Yehau-as uas kav lub tebchaws Yixalayees thiaj mus tua yeej Npeehadas peb zaug thiab rov mus txeeb tau tej nroog uas Npeehadas txeeb tau thaum uas Yehau-as txiv Yehau-ahas tseem ua vajntxwv kav lub tebchaws Yixalayees ntawd rov qab los huv tibsi lawm. Thaum Yehau-ahas tus tub Yehau-as ua vajntxwv kav lub tebchaws Yixalayees tau ob xyoo lawm, Yau-ases tus tub Amaxiyas mam li ua vajntxwv kav lub tebchaws Yudas thaum nws hnubnyoog muaj nees nkaum tsib xyoo, thiab nws nyob hauv lub nroog Yeluxalees kav tau nees nkaum cuaj xyoos. Nws niam hu ua Yehau-adees uas nyob hauv lub nroog Yeluxalees. Amaxiyas ua lub neej raws li tus TSWV siab nyiam, nws tsis ua li nws yawgkoob uas yog Vajntxwv Daviv ua, tiamsis nws ua li nws txiv Yau-ases ua. Nws tsis muab tej chaw teev dab rhuav povtseg, cov neeg thiaj pheej mus tua tsiaj fij thiab hlawv hmoov tshuaj tsw qab rau ntawm tej chaw teev dab ntawd. Thaum Amaxiyas kav lub tebchaws nyob ruaj, nws muab ob tug nom uas tua nws txiv uas yog Vajntxwv Yau-as tua povtseg. Txawm li ntawd los nws tsis tua nkawd cov menyuam, nws ua li ntawd thiaj raws li tus TSWV tej lus samhwm rau hauv Phau Ntawv Kevcai uas Mauxes sau tseg hais tias, “Tsis txhob muab niamtxiv tua, vim menyuam tej kev txhaum, thiab tsis txhob muab tej menyuam tua, vim niamtxiv tej kev txhaum; tus twg ua txhaum tsuas tua tus ntawd xwb.” Amaxiyas tua cov tubrog Edoos tuag kaum txhiab leej rau hauv lub Hav Ntsev; nws mus tua thiab txeeb tau lub nroog Xelas thiab muab lub nroog ntawd tis dua npe hu ua Yauthees, luag tseem hu lub npe ntawd los txog niaj hnub no. Amaxiyas txawm tso neeg mus hais kom Vajntxwv Yehau-as uas kav lub tebchaws Yixalayees tuaj nrog nws sib tua. Tiamsis Vajntxwv Yehau-as tso neeg mus hais rau Amaxiyas hais tias, “Muaj ib zaug ib tsob ntoo pos uas nyob pem roob Lenpanoos tso xov tuaj rau tsob ntoo ciab hais tias, ‘Muab koj tus ntxhais rau kuv tus tub yuav ua pojniam.’ Tiamsis txawm muaj ib tug tsiaj qus los muab tsob ntoo pos ntawd tsuj kiag rau hauv av lawm. Amaxiyas, nimno koj khavtheeb qhov uas koj tua yeej cov Edoos uas ua rau koj nto npe. Koj cia li txaus siab thiab nyob twjywm hauv tsev. Vim li cas koj yuav nrhiav teebmeem rau koj thiab koj cov pejxeem kom puastsuaj?” Tiamsis Amaxiyas tsis mloog Vajntxwv Yehau-as tej lus li, Yehau-as thiaj coj nws cov tubrog tuaj tua Amaxiyas ntawm lub nroog Npethes Semes hauv tebchaws Yudas. Amaxiyas cov tubrog swb thiab khiav tas rov qab mus tsev lawm. Yehau-as ntes tau Amaxiyas, thiab Yehau-as ncaj nraim mus tua lub nroog Yeluxalees, lawv tsoo lub nroog tus ntsa yeej ntawm lub Roojvag Efalayees mus ti nkaus rau lub Roojvag Ces kaum ntev li ib puas daj pob tas. Yehau-as coj tej nyiaj thiab tej kub, tej cuabyeej hauv lub tuamtsev thiab txhua yam muaj nqis hauv lub loog uas nws tshawb tau nrog cov neeg uas nws ntes tau mus rau pem lub nroog Xamalis lawm. Dua li lwm yam uas Yehau-as ua thiab tagnrho tej uas nws muaj peevxwm tua yeej Vajntxwv Amaxiyas uas kav lub tebchaws Yudas puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Yehau-as tuag thiab luag coj nws mus faus rau ntawm cov vajntxwv lub toj ntxas hauv lub nroog Xamalis, thiab nws tus tub Yelaunpau-as ua vajntxwv hloov nws chaw. Thaum Vajntxwv Yehau-as uas kav lub tebchaws Yixalayees tuag lawm, Vajntxwv Amaxiyas uas kav lub tebchaws Yudas tseem ua neej nyob tau kaum tsib xyoo ntxiv nws mam li tuag. Dua li lwm yam uas Amaxiyas ua puavleej muab sau cia rau hauv Phau Ntawv Keebkwm uas teev cov Yudas cov vajntxwv lub neej lawm. Muaj ib pab neeg nyob hauv lub nroog Yeluxalees ntxeev siab yuav muab Amaxiyas tua povtseg, nws thiaj khiav mus rau hauv lub nroog Lakhis, tiamsis nws cov yeebncuab raws qab mus muab nws tua tuag rau hauv lub nroog ntawd lawm. Luag thiaj muab nees thauj nws rov los rau hauv lub nroog Yeluxalees thiab muab nws faus rau ntawm cov vajntxwv lub toj ntxas hauv Daviv lub nroog. Ces cov Yudas thiaj muab lub kausmom kub rau Amaxiyas tus tub Uxiyas uas hnubnyoog muaj kaum rau xyoo ntoo thiab tsa nws ua vajntxwv hloov nws txiv chaw. Uxiyas mus txeeb tau lub nroog Elas thiab rov txhim khov lub nroog ntawd dua tshiab, tom qab uas nws txiv Amaxiyas tuag lawm. Thaum Yau-ases tus tub Amaxiyas ua vajntxwv kav lub tebchaws Yudas tau kaum tsib xyoo lawm, Yehau-as tus tub Yelaunpau-as mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau plaub caug ib xyoos. Yelaunpau-as ua txhaum rau tus TSWV thiab ua phem ua qias ib yam li nws yawgkoob Yelaunpau-as uas yog Nenpas tus tub uas coj cov Yixalayees mus ua txhaum. Yelaunpau-as rov mus txeeb tau cov Yixalayees cheebtsam av, txij ntua ntawm lub Dawm Hamas uas nyob sab qaumteb mus txog ntua nram Hiavtxwv Tuag uas nyob sab qabteb, raws li tus TSWV uas yog cov Yixalayees tus Vajtswv tau hais rau nws tus tubtxib Yaunas uas yog tus cev Vajtswv lus thiab yog Amitais tus tub uas nyob hauv lub nroog Nkathas Hefeles lawm. Tus TSWV pom cov Yixalayees raug kev txomnyem heev; tsis muaj tus pab lawv li. Tus TSWV tsis xav kom cov Yixalayees puastsuaj hauv lub qab ntuj no mus, yog li ntawd nws thiaj txib Vajntxwv Yelaunpau-as ua tus cawm cov Yixalayees kom dim. Dua li lwm yam uas Yelaunpau-as ua, tej uas nws muaj peevxwm tua rog, thiab txeeb tau lub nroog Damaxes thiab lub nroog Hamas rov rau cov Yixalayees, puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Yelaunpau-as tuag thiab luag coj nws mus faus rau ntawm cov vajntxwv lub toj ntxas, thiab nws tus tub Xakhaliyas ua vajntxwv hloov nws chaw. Thaum Yelaunpau-as uas vajntxwv kav lub tebchaws Yixalayees tau nees nkaum xya xyoo lawm, Amaxiyas tus tub Uxiyas mam li ua vajtswv kav lub tebchaws Yudas thaum nws hnubnyoog muaj kaum rau xyoo, thiab nws nyob hauv lub nroog Yeluxalees kav tau tsib caug ob xyoo. Nws niam hu ua Yekauliyas uas nyob hauv lub nroog Yeluxalees. Uxiyas ua lub neeg raws li tus TSWV siab nyiam ib yam li nws txiv Amaxiyas. Tiamsis nws tsis tau muab tej chaw teev dab rhuav povtseg, tej neeg thiaj pheej mus tua tsiaj fij thiab hlawv hmoov tshuaj tsw qab rau ntawm tej chaw teev dab ntawd. Tus TSWV ua rau Uxiyas mob ruas mus tas nws simneej li. Nws nyob nws ib lub tsev rau ib qho, nws tso txhua yam haujlwm tseg, thiab nws tus tub Yauthas ua tus tswjhwm lub tebchaws. Dua li lwm yam uas Uxiyas ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Uxiyas tuag thiab luag coj nws mus faus rau ntawm cov vajntxwv lub toj ntxas hauv Daviv lub Nroog, thiab nws tus tub Yauthas ua vajntxwv hloov nws chaw. Thaum Uxiyas ua vajntxwv kav lub tebchaws Yudas tau peb caug yim xyoo lawm, Yelaunpau-as tus tub Xakhaliyas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau rau hli. Xakhaliyas ua txhaum rau tus TSWV ib yam li nws cov yawgkoob. Nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum. Yanpes tus tub Salumes thiaj ntxeev siab rau Vajntxwv Xakhaliyas thiab muab nws tua tuag rau hauv lub nroog Inpele-as, thiab Salumes txawm ua vajntxwv hloov Xakhaliyas chaw. Dua li lwm yam uas Xakhaliyas ua puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Ua li ntawd thiaj tiav raws li tus TSWV tau hais rau Vajntxwv Yehus lawm hais tias, “Koj cov xeebntxwv yuav tau ua vajntxwv kav cov Yixalayees mus txog plaub tiam.” Thaum Uxiyas ua vajntxwv kav lub tebchaws Yudas tau peb caug cuaj xyoo lawm, Yanpes tus tub Salumes mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau ib hlis. Nkadis tus tub Menahees tuaj nram lub nroog Tilexas tuaj rau hauv lub nroog Xamalis thiab muab Salumes tua, thiab nws ua vajntxwv hloov Salumes chaw. Dua li lwm yam uas Salumes ua thiab qhov uas nws ntxeev siab ua phem puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Thaum Menahees tuaj hauv lub nroog Tilexas tuaj, nws tua cov neeg hauv lub nroog Tapuas, thiab cov neeg uas nyob cheebtsam ibncig lub nroog ntawd puastsuaj tas, rau qhov cov neeg hauv lub nroog tsis kam zwm rau nws. Nws tseem muab cov pojniam uas tabtom suab menyuam phais plab huv tibsi. Thaum Uxiyas ua vajntxwv kav lub tebchaws Yudas tau peb caug cuaj xyoo lawm, Nkadis tus tub Menahees mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau kaum xyoo. Menahees ua txhaum rau tus TSWV, nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum tas nws simneej. Tilas Pilexes uas yog tus vajntxwv kav lub tebchaws Axilias tau tuaj tua cov Yixalayees, Menahees muab tau peb caug yim tas nyiaj los thov Tinkelas Pilexes pab Menahees kom muaj cuabkav tswj tau lub tebchaws nyob ruaj khov. Menahees tau tej nyiaj ntawd los ntawm cov Yixalayees uas npluanuj, nws yuam kom lawv ib tug muab tsib caug daim nyiaj rau nws coj mus rau Tinkelas Pilexes; yog li ntawd, Tilas Pilexes thiaj rov qab mus rau pem nws lub tebchaws lawm. Dua li lwm yam uas Menahees ua puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Menahees tuag thiab luag coj nws mus faus, thiab nws tus tub Pekahiyas ua vajntxwv hloov nws chaw. Thaum Uxiyas ua vajntxwv kav lub tebchaws Yudas tau tsib caug xyoo lawm, Menahees tus tub Pekahiyas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau ob xyoos. Pekahiyas ua txhaum rau tus TSWV, nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum. Pekahiyas tus thawj tubrog Pekas uas yog Lemaliyas tus tub txawm ntxeev siab rau nws thiab coj tau tsib caug leej tubrog hauv lub nroog Nkile-as tuaj muab Pekahiyas tua tuag rau hauv chav fajxwm ntawm lub loog hauv lub nroog Xamalis, ces Pekas txawm ua vajntxwv hloov Pekahiyas chaw. Dua li lwm yam uas Pekahiyas ua, puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Thaum Uxiyas ua vajntxwv kav lub tebchaws Yudas tau tsib caug ob xyoos lawm, Lemaliyas tus tub Pekas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau nees nkaum xyoo. Pekas ua txhaum rau tus TSWV, nws ua phem ua qias ib yam li Vajntxwv Yelaunpau-as uas yog Nenpas tus tub uas coj cov Yixalayees mus ua txhaum. Ntu uas Pekas ua vajntxwv kav lub tebchaws, Vajntxwv Tinkelas Pilexes uas kav lub tebchaws Axilias tuaj txeeb tau lub nroog Iyoos, Anpees Npethes Ma-akas, Yanau-as, Kedes, Haxaules thiab cheebtsam Nkile-as, Kalilais, thiab Nathalis thiab ntes cov neeg coj mus rau pem tebchaws Axilias lawm. Thaum Uxiyas tus tub Yauthas ua vajntxwv kav lub tebchaws Yudas tau nees nkaum xyoo, Elas tus tub Hauseyas ntxeev siab muab Vajntxwv Pekas tua tuag, thiab nws ua vajntxwv hloov Pekas chaw. Dua li lwm yam uas Pekas ua puavleej muab sau cia rau hauv Phau Ntawv Keebkwm uas teev cov Yixalayees cov Vajntxwv lub neej lawm. Thaum Lemaliyas tus tub Pekas ua vajntxwv kav lub tebchaws Yixalayees tau ob xyoo lawm, Uxiyas tus tub Yauthas mam li ua vajntxwv kav lub tebchaws Yudas thaum nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau kaum rau xyoo. Nws niam hu ua Yelusas uas yog Xadaus tus ntxhais. Yauthas ua lub neej raws li tus TSWV siab nyiam ib yam li nws txiv Uxiyas ua. Tiamsis nws tsis muab tej chaw teev dab rhuav povtseg, tej neeg thiaj pheej mus tua tsiaj fij thiab hlawv hmoov tshuaj tsw qab rau ntawm tej chaw teev dab ntawd. Yauthas yog tus uas ua lub Roojvag Qaumteb ntawm lub Tuamtsev. Dua li lwm yam uas Yauthas ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Ntu uas Yauthas ua vajntxwv kav tebchaws, yog thawj zaug uas tus TSWV cia Vajntxwv Lexees uas kav lub tebchaws Xilias thiab Vajntxwv Pekas uas kav lub tebchaws Yixalayees tuaj tua cov Yudas. Yauthas tuag thiab luag coj nws mus faus rau ntawm cov vajntxwv lub toj ntxas hauv Daviv lub nroog, thiab nws tus tub Ahas ua vajntxwv hloov nws chaw. Thaum Lemaliyas tus tub Pekas ua vajntxwv kav lub tebchaws Yixalayees tau kaum xya xyoo lawm, Yauthas tus tub Ahas mam li ua vajntxwv kav lub tebchaws Yudas thaum nws hnubnyoog muaj nees nkaum xyoo, thiab nws nyob hauv lub nroog Yeluxalees kav tau kaum rau xyoo. Nws tsis ua lub neej zoo ib yam li nws yawgkoob uas yog Vajntxwv Daviv ua, thiab nws tsis ua raws li tus TSWV uas yog nws tus Vajtswv siab nyiam, nws ua lub neej raws li cov Yixalayees tej vajntxwv ua. Nws muab nws tus tub tua hlawv fij rau tej mlom, nws ua phem ua qias ib yam li cov neeg uas tus TSWV muab ntiab tawm hauv lub tebchaws ua ntej uas cov Yixalayees los nyob. Ahas tua tsiaj fij thiab hlawv hmoov tshuaj tsw qab rau ntawm tej chaw teev dab saum tej pov roob thiab hauv tej qab ntoo. Vajntxwv Lexees uas kav lub tebchaws Xilias thiab Vajntxwv Pekas uas kav lub tebchaws Yixalayees txawm tuaj vij tua lub nroog Yeluxalees, tiamsis nkawd tua tsis yeej Ahas. ( Thaum lub sijhawm ntawd, tus vajntxwv uas kav lub tebchaws Edoos rov tuaj tua yeej thiab kav lub nroog Elas, nws thiaj muab cov Yudas ntiab tawm hauv lub nroog ntawd mus. Cov Edoos txawm los nyob hauv lub nroog Elas txog niaj hnub no.) Ahas txib neeg mus hais rau Vajntxwv Tinkelas Pilexes uas kav lub tebchaws Axilias hais tias, “Kuv uas yog koj tus tubtxib, thov koj tuaj pab kuv kom dim ntawm cov Xilias tus vajntxwv thiab cov Yixalayees tus vajntxwv uas tuaj tua kuv.” Ahas muab tej nyiaj tej kub hauv lub Tuamtsev thiab hauv lub loog coj mus pub rau Vajntxwv Tinkelas Pilexes. Tinkelas Pilexes txaus siab pab Ahas, nws thiaj coj nws cov tubrog tuaj tua thiab txeeb lub nroog Damaxes, ntes cov neeg coj mus rau hauv Kiles thiab muab Vajntxwv Lexees tua. Thaum Vajntxwv Ahas mus cuag Vajntxwv Tinkelas Pilexes hauv lub nroog Damaxes, nws pom ib lub thaj fij, nws txawm xa xov rov los qhia rau tus povthawj Uliyas hais txog qhov uas luag ua lub thaj ntawd txhua yam rau Uliyas. Yog li ntawd, Uliyas thiaj ua ib lub thaj zoo ib yam li lub uas Ahas pom ntawd. Uliyas twb txua tau lub thaj ntawd lawm, Ahas mam los txog. Thaum Ahas rov pem lub nroog Damaxes los txog, nws pom lub thaj twb tiav lawm, yog li ntawd, nws thiaj tua tsiaj thiab muab nplej rau saum lub thaj hlawv fij, muab cawv txiv hmab thiab ntshav hliv rau lub thaj fij ua kev sib raug zoo. Ahas muab lub thaj tooj uas nyob ntawm lub thaj uas ua tshiab thiab lub Tuamtsev kis nruab nrab tshem mus tso rau ntawm nws lub thaj uas ua tshiab sab ped. Lub thaj tooj ntawd twb muab fij rau tus TSWV lawm. Vajntxwv Ahas hais rau Uliyas hais tias, “Koj siv kuv lub thaj loj no hlawv tej khoom uas vajntxwv thiab cov pejxeem coj tuaj fij thaum sawv ntxov thiab thaum yuav tsaus ntuj, tsis hais tej tsiaj lossis tej nplej thiab tej cawv txiv hmab uas cov pejxeem coj tuaj fij. Muab cov tsiaj tua hlawv fij, muab cov ntshav hliv rau saum lub thaj, tiamsis tseg lub thaj tooj rau kuv tau nug tus TSWV.” Uliyas ua raws li vajntxwv samhwm rau nws lawm. Vajntxwv Ahas muab cov yias tooj uas siv hauv lub Tuamtsev txawb rau saum cov tsheb tooj txiav thiab muab tshem tawm. Thiab nws tseem muab lub rhawv tooj uas txawb rau saum kaum ob tug nyuj tooj tsaws mus txawb rau ntawm qhov chaw uas luag muab txiag zeb pua. Ahas xav ua kom haum Vajntxwv Tilas Pilexes uas kav lub tebchaws Axilias siab xwb, nws thiaj muab chav uas luag ua txuas rau ntawm lub loog rhuav povtseg, thiab nws thaiv txojkev uas vajntxwv mus rau hauv lub Tuamtsev. Dua li lwm yam uas Vajntxwv Ahas ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Ahas tuag thiab luag coj nws mus faus rau ntawm cov vajntxwv lub toj ntxas hauv Daviv lub nroog, thiab nws tus tub Hexekiyas ua vajntxwv hloov nws chaw. Thaum Ahas ua vajntxwv kav lub tebchaws Yudas tau kaum ob xyoo lawm, Elas tus tub Hauseyas mam li ua vajntxwv kav lub tebchaws Yixalayees, thiab nws nyob hauv lub nroog Xamalis kav tau cuaj xyoo. Hauseyas ua txhaum rau tus TSWV, tiamsis nws tsis ua txhaum loj npaum li cov vajntxwv uas kav lub tebchaws Yixalayees ua ntej nws. Thaum Vajntxwv Samanexes uas kav lub tebchaws Axilias tuaj tua Hauseyas; Hauseyas thiaj zwm rau Samanexes thiab niaj xyoo them se rau nws. Tiamsis tau tsis ntev tom qab no, Hauseyas txib neeg mus thov Vajntxwv Xaus uas kav lub tebchaws Iziv tuaj pab nws kom nws tsis tau niaj xyoo them se rau Vajntxwv Samanexes uas kav lub tebchaws Axilias. Thaum Samanexes paub li ntawd, nws thiaj ntes Hauseyas mus kaw rau hauv tsev lojcuj. Samanexes tuaj tua cov Yixalayees thiab vij lub nroog Xamalis tau peb xyoos txwm nkaus rau xyoo cuaj uas Hauseyas ua vajntxwv kav lub tebchaws Yixalayees, ces cov Axilias tus vajntxwv thiaj txeeb tau lub nroog Xamalis, thiab ntes cov Yixalayees mus rau pem tebchaws Axilias lawm. Nws coj cov Yixalayees ntawd ibtxhia mus nyob rau hauv lub nroog Halas, ibtxhia mus nyob ze rau ntawm tus Dej Hanpules hauv cheebtsam Nkauxas thiab ibtxhia mus nyob rau hauv cov Medias tej nroog. Luag txeeb tau lub nroog Xamalis, vim cov Yixalayees ua txhaum rau tus TSWV uas yog lawv tus Vajtswv uas tso lawv dim ntawm Falaus uas yog cov Iziv tus vajntxwv thiab coj lawv tawm nram tebchaws Iziv los. Cov Yixalayees pheej mus pe lwm haivneeg tej vajtswv, thiab ua raws li cov neeg uas tus TSWV muab ntiab tawm ntawm nws haivneeg mus lawm tej kevcai, thiab coj tej kevcai uas cov Yixalayees tej vajntxwv tau rhawv tseg. Cov Yixalayees ua tej uas tus TSWV uas yog lawv tus Vajtswv tsis nyiam. Lawv ua tej chaw teev dab thiab teev mlom txhua nrho rau hauv lawv tej nroog, tsis hais nroog loj nroog me, thiab hauv lawv tej zos huv tibsi. Lawv txhos tej ncej zeb thiab puab tus mlom pojniam Aselas rau saum tej pov roob thiab hauv tej qab ntoos uas muaj plooj ntxoov nyos, thiab lawv hlawv hmoov tshuaj tsw qab rau saum tej thaj teev dab ib yam li cov neeg uas tus TSWV muab ntiab tawm hauv lub tebchaws mus lawm. Lawv ua rau tus TSWV chim, vim lawv ua kev phem kev qias thiab tsis mloog tus TSWV tej lus samhwm kom tsib txhob pe mlom. Yav tas los, Tus TSWV txib nws cov tubtxib thiab cov cev Vajtswv lus mus ntuas cov Yixalayees thiab cov Yudas hais tias, “Nej cia li tso plhuav nej tej kev phem kev qias tseg, los coj thiab ua raws li kuv tej lus samhwm thiab tej kevcai uas kuv muab rau nej cov yawgkoob uas kuv kom kuv cov cevlus muab qhia rau nej.” Tiamsis lawv tsis mloog lus; lawv tawv ncauj ib yam li lawv cov yawgkoob uas tsis cia siab rau tus TSWV uas yog lawv tus Vajtswv. Lawv tsis ua raws li tus TSWV tej lus qhia, thiab lawv tsis quavntsej tus TSWV tej lus cog tseg rau lawv cov yawgkoob thiab tsis khaws nws tej lus uas nws qhuab ntuas lawv li. Lawv mus pe tej mlom uas tsis muaj qabhau, thiab lawv cia li mus ua dog ua dig tsis muaj qabhau li lawm. Lawv ua raws li lwm haivneeg uas nyob ibncig lawv tej kevcai uas tus TSWV txwv tsis pub lawv ua. Lawv ua txhaum rau tus TSWV uas yog lawv tus Vajtswv tej kevcai, lawv muab kub nchuav ua ob tug mlom nyuj thiab ib tug mlom pojniam Aselas rau lawv pe; lawv tseem pe tej hnubqub saum nruab ntug thiab pe tus mlom Npa-as huv tibsi. Lawv muab lawv tej tub thiab tej ntxhais tua hlawv txi dab; lawv mus saib tes, saib yaig thiab lawv txhob txwm mus ua kev phem kev qias tabmeeg tus TSWV, thiaj ua rau tus TSWV chim rau lawv. Yog li ntawd, tus TSWV thiaj chim heev rau cov Yixalayees thiab muab lawv ntiab tawm ntawm nws mus, tus TSWV tsuas tseg cov Yudas xwb. Txawm yog cov Yudas los lawv tsis uas raws li tus TSWV uas yog lawv tus Vajtswv tej kevcai li thiab; lawv ua raws li tej kevcai uas cov Yixalayees xyaum ntawm lwm haivneeg los. Tus TSWV muab tagnrho Yixalayees cov xeebntxwv tso povtseg huv tibsi; nws rau txim rau lawv thiab muab lawv cob rau cov yeebncuab uas ua nruj ua tsiv txhais tes mus txog thaum tus TSWV ntiab lawv tawm ntawm nws mus. Thaum tus TSWV muab cov Yixalayees cais tawm ntawm cov Yudas mus lawm, cov Yixalayees txawm mus tsa Nenpas tus tub Yelaunpau-as ua vajntxwv kav lawv. Yelaunpau-as thiaj ua rau cov Yixalayees tso tus TSWV tseg thiab coj lawv mus ua kev txhaum loj kawg nkaus. Lawv txawm ua txhaum ib yam li Yelaunpau-as thiab lawv pheej ua tej kev txhaum uas nws ua ntawd mus txog thaum tus TSWV muab lawv ntiab tawm ntawm nws mus, raws li cov cev Vajtswv lus uas yog nws cov tubtxib tau qhia tseg lawm. Yog li ntawd, luag thiaj tuaj ntes cov Yixalayees coj mus rau pem tebchaws Axilias, thiab lawv tseem nyob ped los txog niaj hnub no. Tus vajntxwv uas kav lub tebchaws Axilias coj cov neeg uas nyob hauv lub nroog Kus, Ivas, Hamas thiab Xefavais uas nyob hauv tebchaws Npanpiloos tuaj nyob hauv cov Yixalayees tej zejzog thiab tej nroog hauv Xamalis, hloov cov Yixalayees uas luag ntes coj mus rau lwm tebchaws lawm. Thaum lawv nyuam qhuav tuaj nyob, lawv tsis pehawm tus TSWV, tus TSWV thiaj tso tsov ntxhuav los tom lawv tuag ibtxhia lawm. Tus vajntxwv uas kav lub tebchaws Axilias hnov hais tias cov neeg uas nws tso mus nyob nram lub nroog Xamalis tsis paub tus vajtswv uas kav lub tebchaws ntawd txoj kevcai, tus vajtswv ntawd thiaj tso tsov ntxhuav los tom lawv. Vajntxwv thiaj hais tias, “Cia li xa cov povthawj uas peb ntes los no ib tug rov qab mus nyob nrad, thiab tsa nws ua tus qhia tus vajtswv uas kav lub tebchaws ntawd tej kevcai rau lawv.” Yog li ntawd, cov povthawj uas cov Axilias ntes tau hauv lub nroog Xamalis los ib tug thiaj tau rov mus nyob hauv lub nroog Npethees thiab qhia tus TSWV txoj kevcai rau lawv kom lawv paub pehawm tus TSWV. Tiamsis cov neeg uas nyob hauv lub nroog Xamalis tseem pheej puab mlom rau lawv pe raws li lawv ibtxwm ua, thiab lawv coj tej mlom ntawd mus tso rau ntawm tej chaw uas cov Yixalayees ua tseg lawm. Lawv cov ntawd nyias puab nyias mlom rau hauv tej nroog uas lawv nyob; cov Npanpiloos puab tus mlom Xukaus Npenaus; cov Kus puab tus mlom Nenkas; cov Hamas puab tus mlom Asimas, cov Ivas puab tus mlom Nihas thiab tus mlom Tatas; thiab cov Xefavais muab lawv cov menyuam tua hlawv txi rau tus mlom Alameles thiab tus mlom Anameles. Tiamsis lawv tseem pehawm tus TSWV thiab tsa lawv cov neeg ua povthawj mus nyob rau hauv tej tsev teev dab thiab muab sawvdaws tej khoom fij rau dab. Yog li ntawd, lawv thiaj pehawm tus TSWV thiab teev lawv tej vajtswv raws li txoj kevcai uas lawv coj pem lawv lub tebchaws. Niaj hnub no lawv tseem coj lawv txoj qub kevcai. Lawv tsis pehawm tus TSWV lossis tsis ua raws li tej kevcai uas tus TSWV muab rau Yakhauj tus uas muaj dua ib lub npe hu ua Yixalayees cov xeebntxwv lawm. Tus TSWV coglus thiab samhwm rau lawv hais tias, “Nej tsis txhob pe luag tej vajtswv, tsis txhob hawm lossis tu lossis tua tsiaj fij rau tej vajtswv ntawd. Nej cia li mloog kuv lus, rau qhov kuv yog tus TSWV uas muaj zog thiab muaj hwjchim coj nej tawm nram tebchaws Iziv los; nej yuav tsum pehawm thiab tua tsiaj fij rau kuv xwb. Nej yuav tsum ua raws li kuv tej kevcai thiab tej lus uas kuv sau tseg rau nej lawm. Nej tsis txhob pe lwm haivneeg tej vajtswv, nej yuav tsum nco ntsoov tej lus uas kuv cog tseg rau nej thiab tsis txhob pe lwm haivneeg tej vajtswv. Kuv yog tus TSWV uas yog nej tus Vajtswv nej yuav tsum mloog kuv lus, kuv thiaj yuav cawm nej kom dim ntawm nej cov yeebncuab txhais tes.” Tiamsis cov neeg ntawd tsis mloog tus TSWV lus, lawv tseem pheej ua raws li lawv tej qub kevcai xwb. Yog li ntawd, lawv thiaj pehawm tus TSWV thiab pe lawv tej mlom huv tibsi, niaj hnub no los lawv tej xeebntxwv tseem pheej ua ib yam li ntawd. Thaum Elas tus tub Hauseyas ua vajntxwv kav lub tebchaws Yixalayees tau peb xyoo lawm, Ahas tus tub Hexekiyas mam li ua vajntxwv kav lub tebchaws Yudas thaum nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau nees nkaum cuaj xyoos. Nws niam yog Xakhaliyas tus ntxhais Anpiyas. Hexekiyas ua lub neej raws li tus TSWV lub siab nyiam ib yam li nws yawgkoob uas yog Vajntxwv Daviv ua. Hexekiyas rhuav tej chaw teev dab, tsoo tej ncej zeb thiab tus mlom pojniam Aselas povtseg. Nws tseem muab tus nab tooj Nehutas uas Mauxes nchuav tsoo tawg tas povtseg huv tibsi lawm thiab. Cov Yixalayees pheej hlawv hmoov tshuaj tsw qab fij rau tus nab tooj ntawd los txog thaum lub sijhawm ntawd li. Hexekiyas cia siab rau tus TSWV uas yog cov Yixalayees tus Vajtswv heev; cov vajntxwv uas kav lub tebchaws Yudas, tsis hais cov uas kav ua ntej nws lossis tom qab nws, tsis muaj ib tug cia siab rau tus TSWV npaum li Hexekiyas, Hexekiyas muab siab npuab tus TSWV, mloog nws lus thiab coj raws li tej kevcai uas nws muab cob rau Mauxes lawm. Tus TSWV nrog nraim Hexekiyas thiab txhua yam uas nws ua puavleej ua tau tiav. Nws ntxeev siab thiab tsis kam zwm rau tus vajntxwv uas kav lub tebchaws Axilias. Nws tua yeej cov Filitees uas nyob txhua qhov, tsis hais tej zos loj zos me lossis tej nroog loj nroog me thiab lub nroog Nkaxas thiab tagnrho cheebtsam uas nyob ibncig ntawd huv tibsi. Thaum Hexekiyas ua vajntxwv kav lub tebchaws Yudas tau plaub xyoos, thiab Hauseyas ua vajntxwv kav lub tebchaws Yixalayees tau xya xyoo, ces Vajntxwv Samanexes uas kav lub tebchaws Axilias txawm tuaj rau hauv tebchaws Yixalayees thiab vij lub nroog Xamalis. Samanexes vij lub nroog Xamalis tau peb xyoos nws mam li txeeb tau; thaum uas Hexekiyas kav lub tebchaws Yudas tau rau xyoo thiab Hauseyas kav lub tebchaws Yixalayees tau cuaj xyoos. Tus vajntxwv uas kav lub tebchaws Axilias txawm ntes cov Yixalayees coj mus rau pem tebchaws Axilias lawm. Nws coj cov Yixalayees ibtxhia mus nyob hauv lub nroog Halas, ibtxhia mus nyob ze rau ntawm tus dej Hanpules hauv cheebtsam Nkauxas thiab ibtxhia mus nyob hauv cov Medias tej nroog. Luag txeeb tau lub nroog Xamalis rau qhov cov Yixalayees tsis mloog tus TSWV uas yog lawv tus Vajtswv lus, lawv tsis ua raws li tej lus cog tseg thiab tej kevcai uas tus TSWV muab cob rau nws tus tubtxib Mauxes kom muab qhia rau lawv lawm. Thaum Hexekiyas ua vajntxwv kav lub tebchaws Yudas tau kaum plaub xyoo, Vajntxwv Xenakhelis uas kav lub tebchaws Axilias txawm tuaj tua cov Yudas tej nroog uas muaj ntsa yeej thaiv khov kho. Hexekiyas thiaj xa xov mus rau Xenakhelis hauv lub nroog Lakhis hais tias, “Kuv tau ua txhaum lawm, thov koj cia li thim tubrog rov qab; koj xav kom kuv them nyiaj npaum li cas rau koj, kuv yuav them npaum ntawd.” Vajntxwv thiaj teb hais tias, kom Hexekiyas xa kaum tas nyiaj thiab ib tas kub tuaj. Yog li ntawd, Hexekiyas thiaj muab tagnrho tej nyiaj hauv Vajtswv lub Tuamtsev thiab hauv vajntxwv lub loog, thiab nws tev cov kub uas vuam rau lub tuamtsev tej qhovrooj, thiab tej ncej qhovrooj huv tibsi nqa mus rau Xenakhelis. Tus vajntxwv uas kav lub tebchaws Axilias thiaj tso nws peb tug thawj tubrog coj ib pab tubrog coob heev hauv lub nroog Lakhis tuaj tua Hexekiyas hauv lub nroog Yeluxalees. Thaum lawv tuaj txog ntawm lub nroog Yeluxalees, lawv tsuam yeej rau hauv txojkev ntawm qhov chaw ntos ntaub uas npuab tus kwjdeg uas ntws ntawm lub pasdej sab pem los. Ces lawv txib neeg mus hais rau Vajntxwv Hexekiyas thiab Hexekiyas tso peb tus nomtswv mus cuag lawv; peb tug nomtswv ntawd yog: Hilekiyas tus tub Eliyakees uas yog tus saib lub loog; Senpenas uas yog tus teev tawv; thiab Axafes tus tub Yau-as uas yog tus ceev tej ntaub ntawv. Cov thawj tubrog Axilias muaj ib tug hais rau peb tug nomtswv ntawd hais tias, vajntxwv xav paub saib dabtsi ua rau Vajntxwv Hexekiyas pheej cia siab. Nws hais tias, “Nej xav hais tias lub ncauj hais, ces txawm yuav kovyeej ib yam li ib pab tubrog tuaj tua no los? Leejtwg yuav pab nej tawmtsam cov Axilias? Nej xav hais tias cov Iziv yuav pab nej, tiamsis cov Iziv tsuas zoo ib yam li tug tauj iab uas muab ua pas nrig xwb, nws yuav lov thiab chob nej tes. Falaus uas yog cov Iziv tus vajntxwv yuav zoo ib yam li ntawd rau txhua tus neeg uas cia siab rau nws.” Cov Axilias tus thawj tubrog hais ntxiv hais tias, “Tej zaum nej yuav hais rau kuv hais tias nej cia siab rau tus TSWV uas yog nej tus Vajtswv? Twb yog Hexekiyas muab tej chaw thiab tej thaj rhuav, thaum nws hais kom cov Yudas thiab cov pejxeem uas nyob hauv lub nroog Yeluxalees mus pehawm tus TSWV ntawm lub thaj hauv lub nroog Yeluxalees xwb. Kuv tuav kuv tus vajntxwv lub npe hais rau nej hais tias yog nej nrhiav tau neeg, kuv yuav muab ob txhiab tus nees rau nej caij! Nej twb kov tsis yeej kuv tus vajntxwv uas kav lub tebchaws Axilias tus thawj tubrog uas coj pab nyuag tubrog tsawg tsawg no, ua cas nej tseem yuav kom cov Iziv coj tsheb neeg thiab tubrog caij nees tuaj pab nej! Nej xav hais tias, kuv tuaj tua thiab rhuav nej lub tebchaws, tus TSWV tsis pab kuv no los? Twb yog tus TSWV kom kuv tuaj tua thiab rhuav nej lub tebchaws ntag.” Ces Eliyakees, Senpenas thiab Yau-as thiaj teb tus thawj tubrog ntawd hais tias, “Koj tsis txhob hais lus Henplais, koj hais lus Alamais los peb yeej paub thiab, rau qhov cov pejxeem uas nyob saum tej ntsa yeej puavleej hnov tej lus uas koj hais.” Tus thawj tubrog ntawd teb li no, “Nej xav hais tias, kuv tus vajntxwv txib kuv tuaj hais tej lus no rau nej thiab nej tus vajntxwv xwb no los? Kuv hais rau cov pejxeem uas nyob saum tus ntsa yeej huv tibsi, rau qhov lawv yuav noj lawv tej quav thiab haus lawv tej zis ib yam li nej thiab ntag.” Ces cov Axilias tus thawj tubrog sawv tsees qw ua lus Henplais hais tias, “Nej sawvdaws cia li mloog tus vajntxwv uas kav lub tebchaws Axilias tej lus! Nws hais tias nej tsis txhob cia Hexekiyas ntxias tau nej, nws yeej yuav pab tsis tau nej li. Tsis txhob cia Hexekiyas ntxias tau nej kom cia siab rau tus TSWV. Tsis txhob xav hais tias tus TSWV yuav cawm kom nej dim thiab tsis pub lub nroog no poob rau cov Axilias tus vajntxwv txhais tes, tsis txhob mloog Hexekiyas lus. Cov Axilias tus vajntxwv kom nej cia li zwm rau nws. Nws yuav pub rau nej tau noj tej txiv hmab thiab txiv ncuavpias hauv nej tej vaj thiab tau haus tej dej hauv nej tej qhovtshij mus txog hnub uas vajntxwv coj nej mus nyob hauv lub tebchaws uas zoo ib yam li nej lub. Lub tebchaws ntawd muaj txiv hmab ua cawv thiab muaj nplej ua ncuav; muaj txiv ntoo roj ua roj thiab muaj zib ntab. Yog nej uas raws li nws hais, nej yuav tau ua neej nyob tsis tuag. Nej tsis txhob cia Hexekiyas ntxias kom nej ntseeg hais tias, tus TSWV yuav cawm kom nej dim. Puas muaj ib haivneeg twg uas lawv tus vajtswv cawm tau lawv dim ntawm cov Axilias tus vajntxwv lub hwjchim? Cov Hamas, cov Alenpas, cov Xefavais, cov Henas thiab cov Ivas tej vajtswv nyob qhov twg lawm? Tej vajtswv ntawd puas cawm tau lub nroog Xamalis? Nej cia li qhia rau kuv saib, tej tebchaws ntawd tej vajtswv puas cawm tau lawv dim ntawm cov Axilias tus vajntxwv txhais tes? Ua li cas nej yuav xav hais tias, tus TSWV yuav cawm tau lub nroog Yeluxalees no dim ntawm kuv txhais tes?” Cov pejxeem nyob ntsiag to tsis hais ib lo lus li, rau qhov Vajntxwv Hexekiyas tsis pub lawv teb. Eliyakees, Senpenas thiab Yau-as nyuaj siab heev, lawv txawm muab lawv tej tsho dua thiab mus piav tej lus uas cov Axilias tus thawj tubrog hais ntawd rau Vajntxwv Hexekiyas mloog. Thaum Vajntxwv Hexekiyas hnov tej lus ntawd, nws nyuaj siab heev, nws dua rhe nws lub tsho thiab muab ntaubtsaj los hnav thiab mus rau hauv tus TSWV lub Tuamtsev. Nws txib Eliyakees uas yog tus saib lub loog, Senpenas uas yog tus teev ntawv thiab cov povthawj ob peb leeg kom mus cuag tus cev Vajtswv lus Yaxayas uas yog Amauxes tus tub. Lawv puavleej hnav ntaubtsaj huv tibsi. Vajntxwv kom lawv mus hais rau Yaxayas hais tias, “Hnub no yog hnub uas peb raug kev txomnyem; peb tabtom raug txim thiab poob ntsejmuag. Peb zoo ib yam li tus pojniam uas nws tsis muaj zog yug nws tus menyuam. Tus vajntxwv uas kav lub tebchaws Axilias txib nws ib tug thawj tubrog tuaj thuam Vajtswv tus uas muaj sia nyob. Thov tus TSWV uas yog koj tus Vajtswv lees paub thiab rau txim rau cov neeg uas tuaj thuam nws ntawd. Yog li ntawd, koj cia li thov Vajtswv pab peb cov uas tseem seem nyob no.” Thaum Yaxayas hnov tej lus uas Vajntxwv Hexekiyas hais no lawm, nws thiaj kom lawv rov mus hais rau vajntxwv hais tias, “Tus TSWV kom koj tsis txhob nyuaj siab rau tus vajntxwv uas kav lub tebchaws Axilias tej lus thuam uas hais tais, tus TSWV pab tsis tau koj. Tus TSWV yuav ua kom tus vajntxwv uas kav lub tebchaws Axilias hnov lus foob lus cua, ces nws yuav rov mus rau pem nws lub tebchaws, thiab tus TSWV yuav ua kom luag muab nws tua rau pem nws lub tebchaws.” Cov Axilias tus thawj tubrog paub hais tias, vajntxwv tawm hauv lub nroog Lakhis mus tua lub nroog Linas uas nyob tsis deb ntawd; nws txawm mus nrog vajntxwv sablaj. Cov Axilias tus vajntxwv hnov hais tias, Vajntxwv Tihakas uas kav lub tebchaws Sudas coj ib pab tubrog Iziv tuaj tua nws lawm, nws txawm txib neeg mus hais rau Vajntxwv Hexekiyas uas kav lub tebchaws Yudas hais tias, “Tsis txhob cia tus vajtswv uas koj cia siab rau ntxias tau koj hais tias, koj yuav tsis poob rau kuv txhais tes li. Nyaj koj hnov tej uas cov Axilias tus vajntxwv tau ua rau tej tebchaws uas nws xav muab ua kom puastsuaj ntawd lawm. Koj xav hais tias koj yuav dim no los? Kuv cov yawgkoob twb ua rau lub nroog Nkauxas, Halas, Lexes puastsuaj tas thiab tua cov neeg Npethedees uas nyob hauv lub nroog Telaxas tuag tas, thiab yeej tsis muaj ib tug vajtswv nyob qhov twg los pab cov neeg ntawd dim li. Cov vajntxwv uas kav lub nroog Hamas, lub nroog Alenpas, lub nroog Xefavais, lub nroog Henas thiab lub nroog Ivas dua twg tas lawm?” Vajntxwv Hexekiyas txais tsab ntawv ntawm cov xa ntawv tuaj los nyeem. Nws coj tsab ntawv mus rau hauv lub Tuamtsev thiab muab nthuav rau ntawm tus TSWV xubntiag thiab thov hais tias, “Tus TSWV uas yog cov Yixalayees tus Vajtswv, koj zaum saum koj lub zwmtxwv ntawm ob tug qhelunpees kis nruab nrab, koj tib leeg xwb thiaj yog tus Vajtswv uas kav tagnrho tej tebchaws hauv ntiajteb no. Koj yog tus uas tsim lub ntuj thiab lub ntiajteb. Tus TSWV, thov koj tsa qhovmuag saib tej xwm uas los raug peb. Thov lees paub tej lus uas Xenakhelis thuam koj uas yog Vajtswv tus muaj sia nyob. Tus TSWV, peb paub hais tias cov Axilias cov vajntxwv tau tua ntau haivneeg thiab rhuav lawv tej tebchaws puastsuaj tas nyob qhuav nquas cia, thiab muab lawv tej mlom uas tsis yog vajtswv hlawv povtseg tas, tej vajtswv ntawd yog luag muab pobzeb thiab muab ntoo txua xwb. Tus TSWV uas yog peb tus Vajtswv, nimno thov koj pab peb kom dim ntawm cov Axilias txhais tes, txhua haivneeg uas nyob hauv ntiajteb thiaj yuav paub hais tias tsuas yog koj tib leeg xwb thiaj yog tus TSWV uas yog Vajtswv.” Tom qab ntawd, Yaxayas xa xov mus hais rau Vajntxwv Hexekiyas paub hais tias, tus TSWV twb hnov vajntxwv tej lus thov lawm, tus TSWV hais tias, “Xenakhelis, lub nroog Yeluxalees yuav luag koj plig thiab hnyos koj. Koj puas paub hais tias, koj saib tsis taus thiab thuam leejtwg? Twb yog koj saib tsis taus thiab tsis hwm kuv uas yog cov Yixalayees tus Vajtswv uas dawbhuv ntag. Koj txib koj cov neeg xa xov tuaj hais khav ntxhias rau kuv hais tias koj cov tubrog caij tsheb nees mus txeeb tau tej roob siab hauv tebchaws Lenpanoos. Koj khav hais tias koj muab cov ntoo ciab uas siab tshaj thiab cov ntoo thuv uas zoo nkauj saud ntov huv tibsi povtseg, thiab koj mus txog hauv lub plawv zoov nujtxeeg uas deb heev. Koj khav hais tias koj tau mus khawb qhovtshij thiab haus tej dej hauv luag tej tebchaws thiab coj koj cov tubrog mus tsuj tus dej Niles nram tebchaws Iziv nqhuab hlo. “Koj tsis tau hnov hais tias kuv twb npaj tej no ntev los lawm no los? Nimno kuv ua raws li kuv tau hais tseg. Kuv pub koj muaj hwjchim rhuav tej nroog uas luag txhim ntsa yeej khov kho ntawd vau tas. Cov neeg uas nyob hauv tej nroog ntawd tsis muaj zog li; lawv ntshai heev ua ibce tshee hnyo. Lawv zoo ib yam li tej nroj tsuag uas tuaj hauv tej teb lossis ib yam li tej yub nroj uas tuaj saum tej rutsev uas raug cov cua kub sab hnubtuaj tuaj ntsawj ua rau tej nplooj qhuav nkig nkuav. “Tiamsis kuv paub koj lub siab tas lawm, txawm yog koj yuav ua ib yam dabtsi thiab yuav mus qhov twg los kuv yeej paub huv tibsi. Kuv paub hais tias koj chim heev. Kuv hnov hais tias koj chim rau kuv thiab khavtheeb heev, yog li ntawd, kuv yuav muab nqelauj los nqe koj qhovntswg thiab muab saw hlau sam koj qhovncauj, thiab cab koj taug txojkev uas koj tuaj rov qab.” Ces Yaxayas hais rau Vajntxwv Hexekiyas hais tias, “Tej xwm uas yuav muaj tshwm los yog li no: Xyoo no thiab lwm xyoo, koj thiab koj cov pejxeem yuav tau noj tej qoobloo uas tsis yog nej cog, tiamsis xab xyoo nej yuav cog thiab yuav tau sau. Nej yuav tau cog txiv hmab thiab tau noj tej txiv hmab ntawd. Cov Yudas uas seem nyob hauv lub tebchaws yuav zoo ib yam li tsob ntoo uas tej cag ntsia av tob tob thiab yuav tawg paj txi txiv, rau qhov tus TSWV npaj siab cia cov neeg uas nyob hauv lub nroog Yeluxalees thiab saum lub Roob Xi-oos ua cov uas seem ntawd. “Tus TSWV hais txog tus vajntxwv uas kav lub tebchaws Axilias li no: ‘Nws yuav tsis tau tuaj rau hauv lub nroog no lossis tua tsis tau ib hnee tuaj li. Cov tubrog uas muaj daim thaiv hniav ntaj yuav tuaj tsis tau ze lub nroog no thiab yuav khawb tsis tau av meem kom nce tau rau hauv lub nroog. Nws yuav taug txojkev uas nws tuaj rov mus tsev, nws yuav tsis tau los rau hauv lub nroog no. Kuv yog tus TSWV uas hais tej lus no. Kuv yuav tiv thaiv thiab tsomkwm lub nroog no kom kuv thiaj tau ntsejmuag thiab kom muaj raws li tej lus uas kuv tau cog tseg rau kuv tus tubtxib Daviv lawm.’ ” Hmo ntawd tus TSWV ib tug timtswv los tua cov tubrog Axilias hauv lawv lub yeej tuag ib puas yim caum tsib txhiab leej. Thaum kaj ntug lawv cov tubrog tuag pawglug cia xwb! Xenakhelis uas yog tus vajntxwv kav lub tebchaws Axilias thiaj li thim nws cov tubrog rov mus rau pem lub nroog Nineves lawm. Muaj ib hnub, thaum nws tabtom mus pe nws tus mlom Nilaus hauv lub tsev teev mlom, ces nws ob tug tub uas yog Alameles thiab Salexes, txawm nqa ntaj mus muab nws tua tuag, thiab nkawd khiav mus nyob rau tebchaws Alalaj lawm. Nws tus tub uas hu ua Exahadoos thiaj ua vajntxwv hloov nws chaw. Thaum ntawd Vajntxwv Hexekiyas mob hnyav heev thiab yuav tuag, ces tus cev Vajtswv lus Yaxayas uas yog Amauxes tus tub, txawm tuaj xyuas Hexekiyas thiab hais rau nws hais tias, “Tus TSWV hais tias koj cia li npaj txhua yam kom txhij rau lub tebchaws, rau qhov koj yuav tsis zoo. Koj yeej yuav tuag xwb.” Ces Hexekiyas txawm tig xubntiag rau tim phabntsa thiab thov hais tias, “Tus TSWV, thov koj nco hais tias kuv ua koj tes haujlwm ntawm lub siab ncaj ncees, muab siab npuab koj thiab ua txhua yam raws li koj xav kom kuv ua.” Ces Hexekiyas txawm quaj tu siab heev. Thaum Yaxayas tseem mus tsis tau dhau lub tshavpuam ntawm vajntxwv lub loog, tus TSWV txawm hais kom Yaxayas rov mus hais rau Hexekiyas tus uas kav tus TSWV haivneeg hais tias, “Kuv yog tus TSWV uas yog koj yawgkoob Daviv tus Vajtswv, kuv hnov koj tej lus thov thiab pom koj tej kua muag lawm. Kuv yuav kho koj kom zoo, peb hnub saum no koj yuav tau mus rau hauv kuv lub Tuamtsev. Kuv yuav ntxiv hnubnyoog kaum tsib xyoo rau koj. Kuv yuav pab koj thiab lub nroog Yeluxalees no kom dim ntawm cov Axilias tus vajntxwv txhais tes. Kuv yuav tsomkwm lub nroog no, kom kuv thiaj tau ntsejmuag thiab kom muaj raws li tej lus uas kuv tau cog tseg rau kuv tus tubtxib Daviv lawm.” Yaxayas kom vajntxwv cov tubtxib muab txiv ncuavpias tsoo qhwv vajntxwv lub rwj, ces nws yuav zoo. Vajntxwv Hexekiyas nug hais tias, “Puas yuav muaj dabtsi ua cim qhia rau kuv paub hais tias, tus TSWV yuav kho kuv thiab peb hnub saum no kuv yuav tau mus rau hauv tus TSWV lub Tuamtsev?” Yaxayas teb hais tias, “Tus TSWV yuav ua ib qhov cim qhia rau koj paub hais tias, nws yuav ua raws li nws tau coglus tseg lawm. Koj xav kom tus TSWV ua rau tus duab ntawm tus ntaiv nce mus kaum qib lossis nqe los kaum qib?” Hexekiyas teb hais tias, “Kuj yoojyim cia tus duab nce mus kaum qib, tiamsis kuv thov tus TSWV ua kom tus duab nqis rov los kaum qib!” Yaxayas thov tus TSWV, thiab tus TSWV ua rau tus duab ntawm tus ntaiv uas Vajntxwv Ahas ua nqis rov los kaum qib. Thaum ntawd, Npaladas tus tub Melaudas Npaladas uas ua vajntxwv kav lub tebchaws Npanpiloos hnov hais tias Vajntxwv Hexekiyas mob, nws thiaj sau ib tsab ntawv thiab xa ib co khoom tuaj pub rau Hexekiyas. Hexekiyas tos txais lawv thiab coj lawv mus ncig saib nws tej txhab nyiaj txhab kub, tej txujlom, tej roj tsw qab thiab nws tej cuabyeej ua rog. Tsis tshuav ib yam dabtsi hauv nws tej txhab lossis hauv nws lub tebchaws uas nws tsis tau coj lawv mus saib li. Ces Yaxayas uas yog tus cev Vajtswv lus tuaj cuag Vajntxwv Hexekiyas thiab nug nws hais tias, “Cov neeg ntawd tuaj qhov twg tuaj thiab lawv hais dabtsi rau koj?” Hexekiyas teb hais tias, “Lawv tuaj tim tebchaws Npanpiloos uas deb heev tuaj.” Yaxayas nug hais tias, “Lawv pom dabtsi hauv koj lub loog?” Hexekiyas teb hais tias, “Lawv pom txhua yam huv tibsi, tsis tshuav ib yam nyob hauv tej txhab uas kuv tsis tau qhia rau lawv li.” Yaxayas hais rau vajntxwv hais tias, “Tus TSWV uas muaj hwjchim loj kawg nkaus hais tias, muaj ib hnub txhua yam uas nyob hauv koj lub loog thiab txhua yam uas koj cov yawgkoob khwv tseg thaum ub los txog rau niaj hnub no, yuav raug luag coj mus rau tim tebchaws Npanpiloos, yuav tsis tshuav ib yam dabtsi li. Koj cov tub xeebntxwv ibtxhia yuav raug luag ntes coj mus thiab muab sam cia ua haujlwm hauv tus vajntxwv uas kav lub tebchaws Npanpiloos lub loog.” Vajntxwv Hexekiyas txawm xav hais tias thaum uas nws tseem ua neej nyob, lub tebchaws yuav muaj kev thajyeeb thiab nyob tso siab lug, nws thiaj teb hais tias, “Cov lus uas tus TSWV kom koj hais rau kuv yog lus zoo.” Dua li lwm yam uas Vajntxwv Hexekiyas ua, tej uas nws muaj peevxwm ua, tauv tau lub pasdej thiab khawb tus kwjdeg tso dej los rau hauv lub nroog, puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Hexekiyas tuag thiab nws tus tub Manaxes ua vajntxwv hloov nws chaw. Manaxes ua vajntxwv kav lub tebchaws Yudas thaum nws hnubnyoog muaj kaum ob xyoos, thiab nws nyob hauv lub nroog Yeluxalees kav tau tsib caug tsib xyoos. Nws niam hu ua Hexinpas. Manaxes ua txhaum rau tus TSWV, nws ua kev phem kev qias ib yam li cov neeg uas tus TSWV muab ntiab tawm hauv lub tebchaws mus ua ntej nws haivneeg los nyob. Manaxes rov txhim kho tej chaw teev dab uas nws txiv Hexekiyas muab rhuav tas lawm; nws ua ntau lub thaj teev tus mlom Npa-as thiab puab tus mlom pojniam Aselas ib yam li Vajntxwv Ahaj uas kav lub tebchaws Yixalayees ua. Manaxes tseem pe tej hnubqub thiab. Manaxes ua tau ntau lub thaj teev dab rau hauv lub Tuamtsev, muab teeb rau ntawm qhov chaw uas tus TSWV hais tias tsimnyog cia ua qhov chaw rau sawvdaws pehawm nws. Manaxes ua tau ntau lub thaj rau ntawm ob lub tshavpuam ntawm lub Tuamtsev ua chaw pe tej hnubqub. Manaxes muab nws tus tub tua hlawv fij. Nws ua khawvkoob, ua yeessiv, saib tes thiab saib yaig. Manaxes ua txhaum loj heev rau tus TSWV, tus TSWV thiaj chim rau nws. Nws muab tus mlom pojniam Aselas los teeb rau hauv lub Tuamtsev, ntawm qhov chaw uas tus TSWV hais rau Daviv thiab Daviv tus tub Xalumoos hais tias, “Lub Tuamtsev hauv lub nroog Yeluxalees no, yog qhov chaw uas kuv xaiv tawm ntawm kaum ob xeem Yixalayees los ua qhov chaw rau sawvdaws tuaj pehawm kuv. Yog cov Yixalayees mloog kuv lus thiab ua raws li kuv txoj kevcai uas kuv tus tubtxib Mauxes muab rau lawv lawm, kuv yuav tsis pub kom lawv raug ntiab tawm hauv lub tebchaws uas kuv muab rau lawv cov yawgkoob lawm.” Tiamsis cov Yudas tsis mloog tus TSWV lus, Manaxes thiaj coj lawv mus ua txhaum loj tshaj cov neeg uas tus TSWV muab ntiab tawm hauv lub tebchaws mus ua ntej nws haivneeg los nyob. Tus TSWV hais rau cov tubtxib uas yog cov cev Vajtswv lus hais tias, “Vajntxwv Manaxes ua kev phem kev qias loj tshaj cov neeg Kana-as ua; qhov uas nws puab tej mlom ntawd ua rau nws coj cov Yudas mus ua txhaum. Yog li ntawd, tus TSWV uas yog cov Yixalayees tus Vajtswv hais tias, kuv yuav tso kev puastsuaj los raug lub nroog Yeluxalees thiab cov Yudas kom txhua tus uas hnov tej xwm no yuav xav tsis thoob li. Kuv yuav rau txim rau lub nroog Yeluxalees ib yam li kuv ua rau lub nroog Xamalis, thiab ib yam li kuv ua rau Vajntxwv Ahaj uas kav lub tebchaws Yixalayees thiab nws cov xeebntxwv. Kuv yuav cheb lub nroog Yeluxalees thiab cov neeg uas nyob hauv kom dulug mus ib yam li lub phaj uas muab ntxuav tas thiab muab so khwb cia. Kuv yuav tso cov neeg uas seem ntawd tseg, muab lawv cob rau lawv tej yeebncuab kom tua yeej lawv thiab txeeb tau lawv lub tebchaws. Kuv yuav ua li no rau kuv haivneeg, rau qhov lawv ua txhaum rau kuv thiab ua rau kuv chim, txij thaum kuv coj lawv cov yawgkoob tawm nram tebchaws Iziv los txog niaj hnub no.” Manaxes tua cov neeg uas tsis muaj txim coob leej, ua rau ntshav ntws puv nkaus tej kev hauv lub nroog Yeluxalees; nws ua tej kev txhaum no ntxiv rau tej uas nws coj cov Yudas mus pe mlom thiab ua txhaum rau tus TSWV. Dua li lwm yam uas Manaxes ua thiab tej kev txhaum uas nws ua puavleej muab sau cia rau hauv Phau Ntawv Keebkwm ua teev cov Yudas cov Vajntxwv lub neej lawm. Manaxes tuag thiab luag coj nws mus faus rau hauv nws lub loog uas yog lub vaj Uxas, thiab nws tus tub Amoos ua vajntxwv hloov nws chaw. Thaum Amoos ua vajntxwv kav lub tebchaws Yudas, nws hnubnyoog muaj nees nkaum ob xyoos, thiab nws nyob hauv lub nroog Yeluxalees kav tau ob xyoos. Nws niam hu ua Mesulemes thiab yog Halus uas nyob hauv lub nroog Yaunpas tus ntxhais. Amoos ua txhaum rau tus TSWV ib yam li nws txiv Manaxes ua ntag; nws xyaum ua raws li nws txiv tus yam ntxwv, thiab nws pe tej mlom uas nws txiv pe. Amoos tso tus TSWV uas yog nws cov yawgkoob tus Vajtswv tseg thiab tsis ua raws li tus TSWV tej lus samhwm. Amoos cov nomtswv ntxeev siab rau nws thiab muab nws tua tuag rau hauv nws lub loog. Tiamsis cov Yudas muab cov neeg uas tua Amoos tua tuag tas thiab tsa Amoos tus tub Yauxiyas ua vajntxwv hloov nws chaw. Dua li lwm yam uas Amoos ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Luag coj Amoos mus faus rau ntawm lub toj ntxas hauv lub vaj Uxas, thiab nws tus tub Yauxiyas ua vajntxwv hloov nws chaw. Yauxiyas ua vajntxwv kav lub tebchaws Yudas thaum nws hnubnyoog muaj yim xyoo, thiab nws nyob hauv lub nroog Yeluxalees kav tau peb caug ib xyoos. Nws niam hu ua Yedidas thiab yog Adayas uas nyob hauv lub nroog Npauxekas tus ntxhais. Yauxiyas ua lub neej raws li tus TSWV lub siab nyiam; nws ua raws li Vajtswv tej kevcai ib yam li nws yawgkoob uas yog Vajntxwv Daviv ua. Thaum Yauxiyas ua vajntxwv tau kaum yim xyoo, nws txib nws tus teev ntawv Safas uas yog Axaliyas tus tub thiab yog Mesulas tus xeebntxwv mus rau hauv lub Tuamtsev, nws hais rau Axaliyas hais tias, “Koj mus cuag tus Povthawj Hlob Hilekiyas thiab kom nws qhia tej nyiaj uas cov povthawj sau tau thaum cov pejxeem coj tuaj tso rau hauv lub Tuamtsev saib tau pestsawg. Koj kom nws muab cov nyiaj ntawd coj mus rau cov uas saib cov neeg uas kho lub Tuamtsev. Lawv thiaj tau nyiaj them rau cov neeg txua ntoo, cov ua tsev, cov txhim phabntsa, yuav ntoo thiab yuav pobzeb los kho lub Tuamtsev. Cov uas saib cov ua haujlwm, lawv yog neeg ncaj thiaj tsis kom lawv muab tej ntawv teev tej nyiaj uas lawv siv los.” Safas coj vajntxwv cov lus mus hais rau Hilekiyas, ces Hilekiyas qhia rau Safas hais tias, “Kuv pom phau ntawv Kevcai no nyob hauv tus TSWV lub Tuamtsev.” Hilekiyas txawm muab phau ntawv rau Safas nyeem. Safas rov los qhia rau vajntxwv hais tias, “Koj cov tubtxib twb muab cov nyiaj hauv lub Tuamtsev cob rau cov uas saib cov neeg kho lub tuamtsev lawm.” Safas hais ntxiv tias, “Phau ntawv no yog Hilekiyas muab rau kuv.” Ces Safas txawm muab nyeem rau vajntxwv mloog. Thaum vajntxwv hnov tej lus hauv phau ntawv Kevcai ntawd, vajntxwv nyuaj siab heev thiab dua rhe nws lub tsho, thiab hais rau tus povthawj Hilekiyas, Safas tus tub Ahikas, Mikayas tus tub Anpaus, tus teev ntawv Safas thiab Axayas uas yog tus tu vajntxwv li no: “Nej cia li pab kuv thiab pab cov Yudas mus nug tus TSWV txog tej lus hauv phau ntawv no saib qhia li cas, tos tus TSWV chim heev rau peb los twb yog peb cov yawgkoob tsis ua raws li tej lus uas sau rau hauv phau ntawv no.” Hilekiyas, Ahikas, Anpaus, Safas thiab Axayas txawm mus cuag ib tug pojniam hu ua Hulidas uas yog ib tug cev Vajtswv lus nyob hauv lub nroog Yeluxalees ntawm ces kaum uas luag ua tshiab. (Hulidas tus txiv hu ua Salumes uas yog Tivas tus tub thiab yog Hahas tus xeebntxwv, nws yog tus saib cov tsho ntev hauv lub Tuamtsev.) Lawv piav tej lus ntawd rau Hulidas mloog. Nws kom lawv rov mus cuag vajntxwv thiab hais rau vajntxwv hais tias tus TSWV hais li no, “Kuv yuav rau txim rau lub nroog Yeluxalees thiab cov neeg uas nyob hauv lub nroog raws li tej lus uas sau tseg rau hauv phau ntawv uas vajntxwv nyeem ntawd. Lawv tau tso kuv tseg thiab mus tua tsiaj fij rau lwm haivneeg tej vajtswv, kuv thiaj chim rau tej uas lawv ua, thiab kuv chim rau lub nroog Yeluxalees; kuv tej kev chim yuav tsis xam mus sai. Kuv yog tus TSWV uas yog cov Yixalayees tus Vajtswv, kuv hais li no rau vajntxwv: Thaum koj hnov tej lus hauv phau ntawv no tas lawm, koj lees koj tej kev txhaum thiab txo hwjchim tabmeeg kuv, koj quaj tu siab nrho thiab dua rhe koj lub tsho, thaum koj paub hais tias kuv yuav rau txim rau lub nroog Yeluxalees thiab cov neeg huv tibsi. Kuv yuav ua kom lub nroog puastsuaj tas, thaum luag pom luag yuav ntshai heev, thiab luag yuav tuav lub nroog no lub npe foom tsis zoo. Tiamsis vim kuv twb hnov koj tej lus thov lawm, kuv yuav tos kom koj tuag tso, kuv mam li rau txim rau lub nroog Yeluxalees. Kuv yuav cia koj tuag kaj siab lug.” Lawv coj tej lus ntawd mus piav rau Vajntxwv Yauxiyas mloog. Vajntxwv Yauxiyas kom cov Yudas tej thawjcoj thiab cov neeg uas nyob hauv lub nroog Yeluxalees tuaj cuag nws, thiab lawv ua ke mus rau hauv lub Tuamtsev, tsis hais cov povthawj, cov cev Vajtswv lus, thiab tagnrho cov pejxeem tus muaj tus pluag los mus huv tibsi. Vajntxwv nyeem tagnrho phau ntawv coglus uas nrhiav tau hauv lub Tuamtsev rau sawvdaws mloog. Vajntxwv sawv ib sab ntawm tus ncej uas cov vajntxwv ibtxwm sawv coglus rau tus TSWV hais tias yuav hwm nws, ua raws li nws tej kevcai thiab tej lus samhwm kom kawg siab kawg ntsws, thiab ua kom tau raws li tej lus cog tseg uas sau rau hauv phau ntawv no. Cov pejxeem puavleej lees lus hais tias, lawv yuav coj raws li tej lus cog tseg ntawd. Tom qab ntawd, Yauxiyas kom tus Povthawj Hlob Hilekiyas, cov povthawj yau, thiab cov uas zov lub roojvag uas mus rau hauv lub Tuamtsev mus nqa txhua yam uas luag siv teev Npa-as, tus mlom pojniam Aselas, thiab teev tej hnubqub tawm hauv lub Tuamtsev mus povtseg. Vajntxwv muab tej ntawd coj mus hlawv rau nraum ntug nroog uas ze lub Hav Kiloos, thiab nws kom lawv yawm tej tshauv ntawd coj mus pov rau pem lub nroog Npethees. Nws muab cov povthawj uas cov Yudas tej vajntxwv tsa los tua tsiaj hlawv txi dab rau saum tej thaj hauv cov Yudas tej nroog thiab tej chaw uas ze lub nroog Yeluxalees, thiab tagnrho cov povthawj uas tua tsiaj fij rau Npa-as, fij rau lub hnub lub hli thiab fij rau tej hnubqub saum nruab ntug ntiab tawm huv tibsi mus lawm. Nws tshem tus mlom pojniam Aselas tawm hauv lub Tuamtsev mus rau sab nraum ntug nroog, muab hlawv rau hauv lub Hav Kiloos, thiab muab tsoo ua hmoov mos mos nphoo rau cov neeg txomnyem tej ntxa. Nws rhuav cov niamntiav txivntiav tej chaw hauv lub Tuamtsev. (Yog qhov chaw uas cov pojniam tuaj ntos tsho rau cov neeg hnav mus pe tus mlom pojniam Aselas.) Nws coj cov povthawj uas nyob hauv cov Yudas tej nroog los nyob hauv lub nroog Yeluxalees, thiab nws mus thoob plaws txhua qhov, muab tej thaj uas cov povthawj tua tsiaj hlawv txi dab rhuav povtseg huv tibsi. Nws rhuav tej thaj uas luag teev tej dab tshis uas nyob ze ntawm lub roojvag uas yog tus tswv nroog Yausuas ua rau ntawm txojkev uas mus rau hauv lub nroog. Cov povthawj no noj tau tej ncuav tsis xyaw keeb uas luag nqa tuaj rau lwm cov povthawj, tiamsis lawv tsis muaj feem mus ua haujlwm hauv lub Tuamtsev. Vajntxwv Yauxiyas tseem rhuav lub chaw teev dab uas hu ua Taufes hauv lub Hav Hinoos kom sawvdaws thiaj tsis tau chaw coj lawv tej tub tej ntxhais tuaj tua hlawv fij rau tus mlom Maulej lawm. Nws muab cov nees uas cov Yudas tej vajntxwv muab fij rau lub hnub lawm tso mus, thiab muab tej tsheb nees uas lawv caij tuaj pe lub hnub hlawv povtseg. (Lawv tso tej nees thiab tej tsheb nees ntawd rau hauv lub tshavpuam ntawm lub Tuamtsev ze lub roojvag uas nyob tsis deb ntawm tus nom Nathas Melej lub tsev.) Vajntxwv Yauxiyas rhuav tej thaj uas cov Yudas tej vajntxwv ua rau saum Vajntxwv Ahas lub loog, thiab nws tseem muab tej thaj uas Vajntxwv Manaxes ua rau hauv ob lub tshavpuam ntawm lub Tuamtsev tsoo tawg ntsoog ntxaws thiab coj mus pov rau ntawm lub Hav Kiloos. Yauxiyas rhuav tej thaj uas Vajntxwv Xalumoos ua rau ntawm lub nroog Yeluxalees sab hnubtuaj thiab ua rau ntawm lub Roob Txiv Ntoo Roj sab qabteb uas yog tej chaw pe cov Xidoos tus mlom pojniam Atates, cov Mau-am tus mlom Khemaus thiab cov Amoos tus mlom Maulej. Vajntxwv Yauxiyas muab tej ncej zeb tsoo tawg tas, ntov tus mlom pojniam Aselas povtseg, thiab nws muab tej pobtxha neeg coj mus pov rau tej chaw ntawd. Yauxiyas muab lub chaw teev dab uas Nenpas tus tub uas yog Vajntxwv Yelaunpau-as ua rau hauv lub nroog Npethees rhuav povtseg huv tibsi; Yelaunpau-as yog tus uas coj cov Yixalayees mus ua txhaum. Yauxiyas muab lub thaj tsoo tawg tas; thiab nws tseem muab tus mlom pojniam Aselas hlawv kub hnyiab tas. Tom qab ntawd, Yauxiyas ntsia pom ib co ntxa nyob saum lub pov roob; nws txawm kom luag mus khawb cov pobtxha neeg ntawd los hlawv rau saum lub thaj. Nws ua li no kom lub thaj tsis huv raws li tus cev Vajtswv lus hais tseg puag thaum Vajntxwv Yelaunpau-as sawv ntawm lub thaj ib sab, hnub uas lawv ua rooj noj rooj haus. Vajntxwv Yauxiyas tig mus ntsia tus cev Vajtswv lus uas qhia tej xwm no lub ntxa. Yauxiyas nug hais tias, “Lub ntxa ntawd yog leejtwg lub?” Cov neeg hauv Npethees teb hais tias, “Yog ib tug cev Vajtswv lus uas tuaj nram tebchaws Yudas tuaj lub ntxa, nws yog tus uas tuaj qhia ua ntej hais txog tej uas koj tau ua rau lub thaj no.” Yauxiyas hais tias, “Cia nws nyob nws, tsis txhob khawb tus cev Vajtswv lus ntawd cov pobtxha tawm.” Yog li ntawd, luag thiaj tsis khawb tus cev Vajtswv lus ntawd cov pobtxha thiab tus cev Vajtswv lus uas nyob pem lub nroog Xamalis cov pobtxha. Vajntxwv Yauxiyas rhuav tagnrho tej chaw teev dab uas cov Yixalayees tej vajntxwv ua tseg rau hauv txhua lub nroog thoob plaws lub tebchaws Yixalayees. Tej uas cov Yixalayees tej vajntxwv ua ntawd ua rau tus TSWV chim heev rau lawv. Yauxiyas rhuav tej thaj ntawd ib yam li nws rhuav tej uas nyob hauv lub nroog Npethees. Nws tua cov povthawj uas teev dab rau saum tej thaj uas lawv teev dab, thiab muab tej pobtxha neeg mus hlawv rau saum txhua lub thaj. Ces nws txawm rov los rau nram lub nroog Yeluxalees lawm. Vajntxwv Yauxiyas hais rau cov pejxeem hais tias, “Nej cia li ua Kevcai Hla Dhau raws li tej lus uas sau cia rau hauv phau ntawv coglus, tus TSWV uas yog nej tus Vajtswv thiaj tau koob meej.” Txij thaum muaj cov thawjtswj ua cov kav haivneeg Yixalayees los txog thaum cov Yixalayees thiab cov Yudas muaj vajntxwv, yeej tsis tau muaj leejtwg ua Kevcai Hla Dhau zoo npaum li zaum no. Yauxiyas twb ua vajntxwv tau kaum yim xyoo lawm mam li rov muaj ua Kevcai Hla Dhau hauv lub nroog Yeluxalees. Vajntxwv Yauxiyas ntiab cov Yudas uas txawj saib yaig thiab saib tes tawm mus thiab tshem tej thaj xwmkab, tej mlom, thiab txhua yam cuabyeej uas siv teev dab tawm hauv lub nroog Yeluxalees thiab thoob plaws lub tebchaws Yudas mus povtseg; thiaj raws li tej kevcai uas sau rau hauv phau ntawv uas tus Povthawj Hlob Hilekiyas pom nyob hauv lub Tuamtsev. Tej vajntxwv uas xub kav ua ntej Yauxiyas, tsis muaj ib tug uas ua zoo npaum li Yauxiyas, nws ua tus TSWV tej haujlwm kawg siab kawg ntsws, kawg dag kawg zog thiab ua raws li Mauxes tej kevcai; txij thaum ntawd los tsis muaj ib tug vajntxwv ua zoo npaum nws lawm. Txawm li ntawd los tus TSWV tseem chim rau cov Yudas, vim tej uas Vajntxwv Manaxes ua, thiab niaj hnub no los tus TSWV txojkev chim tseem tsis tau xam mus tas. Tus TSWV hais tias, “Kuv yuav ua rau cov Yudas ib yam li kuv tau ua rau cov Yixalayees lawm. Kuv yuav ntiab kom cov Yudas tawm ntawm kuv mus ib yam li kuv tau ntiab cov Yixalayees, thiab kuv yuav muab lub nroog Yeluxalees uas kuv xaiv cia thiab lub Tuamtsev uas kuv hais tias yog lub chaw rau sawvdaws tuaj pehawm kuv tso povtseg.” Dua li lwm yam uas Vajntxwv Yauxiyas ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Tiam uas Yauxiyas ua vajntxwv kav lub tebchaws Yudas, Falaus Nekaus uas yog cov Iziv tus vajntxwv, coj tubrog tuaj pab tus vajntxwv uas kav lub tebchaws Axilias tua rog pem tus dej Efalates. Vajntxwv Yauxiyas txawm tuaj tos kev tua Falaus Nekaus ntawm Menkidaus, Yauxiyas thiaj raug tua tuag rau hauv tshavrog lawm. Nws cov tubrog thiaj muab nws tsaws rau saum tsheb nees thauj rov los rau hauv lub nroog Yeluxalees thiab coj nws mus faus rau ntawm cov vajntxwv lub toj ntxas. Cov Yudas thiaj li tsa Yauxiyas tus tub Yehau-ahas ua vajntxwv hloov nws chaw. Thaum Yehau-ahas ua vajntxwv kav lub tebchaws Yudas nws hnubnyoog muaj nees nkaum peb xyoos, thiab nws nyob hauv lub nroog Yeluxalees kav tau peb hlis. Nws niam hu ua Hamutas thiab yog Yelemis uas nyob hauv lub nroog Linas tus ntxhais. Yehau-ahas ua txhaum rau tus TSWV, thiab nws ua phem ua qias ib yam li nws cov yawgkoob ua. Nws kev tswjhwm tebchaws xaus rau thaum Falaus Nekaus uas yog cov Iziv tus vajntxwv ntes nws mus kaw rau hauv lub nroog Lilas hauv tebchaws Hamas thiab kom cov Yudas them xya txhiab tsib puas choj nyiaj thiab xya caum tsib choj kub rau nws. Falaus Nekaus tsa Yauxiyas tus tub Eliyakees ua vajntxwv kav lub tebchaws Yudas hloov nws txiv Yauxiyas chaw, thiab muab Eliyakees hloov npe hu ua Yehauyakees. Falaus Nekaus coj Yehau-ahas mus rau nram tebchaws Iziv, thiab nws tuag rau nram lawm. Vajntxwv Yehauyakees sau se ntawm cov pejxeem kom tau nyiaj thiab kub los txwm nkaus li Falaus Nekaus uas yog cov Iziv tus vajntxwv kom lawv them. Thaum Yehauyakees ua vajntxwv kav lub tebchaws Yudas nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau kaum ib xyoos. Nws niam hu ua Xenpidas thiab yog Pedayas uas nyob hauv lub nroog Lumas tus ntxhais. Yehauyakees ua txhaum rau tus TSWV thiab ua phem ua qias ib yam li nws cov yawgkoob ua. Thaum uas Yehauyakees ua vajntxwv, Vajntxwv Nenpukajnexales uas kav lub tebchaws Npanpiloos tuaj tua lub tebchaws Yudas, thiab Yehauyakees zwm rau Nenpukajnexales tau peb xyoos, tiamsis tom qab ntawd Yehauyakees tau ntxeev siab rau Nenpukajnexales. Tus TSWV tso cov Npanpiloos, cov Xilias, cov Mau-am thiab cov Amoos tuaj tua Yehauyakees thiab rhuav lub tebchaws Yudas puastsuaj tas raws li tus TSWV tau hais rau nws cov tubtxib uas yog cov cev Vajtswv lus hais tias nws yuav ua li ntawd. Tej no muaj raws li tus TSWV tej lus uas hais tias, nws yuav muab cov Yudas ntiab tawm ntawm nws mus, vim tej kev txhaum uas Vajntxwv Manaxes ua thiab tua cov neeg ua tsis muaj txim. Tus TSWV yeej zam tsis tau lub txim uas Manaxes tua neeg ntawd li. Txhua yam uas Yehauyakees ua puavleej muab sau cia rau hauv Phau Ntawv Keebkwm uas teev cov Yudas cov Vajntxwv lub neej lawm. Yehauyakees tuag, thiab nws tus tub Yehauyakhees ua vajntxwv hloov nws chaw. Tus vajntxwv uas kav lub tebchaws Iziv thiab nws cov tubrog tawm tsis tau hauv tebchaws Iziv mus rau qhov twg li, rau qhov tus vajntxwv uas kav lub tebchaws Npanpiloos tuaj txeeb tau thiab kav tagnrho cheebtsam uas yog cov Iziv tug, txij ntua ntawm tus dej Efalates mus ti nkaus rau ntawm cov Iziv tus ciamteb sab qaumteb. Thaum Yehauyakhees ua vajntxwv kav lub tebchaws Yudas nws hnubnyoog muaj kaum yim xyoo, thiab nws nyob hauv lub nroog Yeluxalees kav tau peb hlis. Nws niam hu ua Nehusetas thiab yog Enathas uas nyob hauv lub nroog Yeluxalees tus ntxhais. Nws ua txhaum rau tus TSWV thiab ua phem ua qias ib yam li nws txiv ua. Lub sijhawm ntawd, Vajntxwv Nenpukajnexales uas kav lub tebchaws Npanpiloos cov thawj tubrog tau coj tubrog tuaj vij lub nroog Yeluxalees. Thaum uas cov tubrog tabtom vij lub nroog, Vajntxwv Nenpukajnexales uas kav lub tebchaws Npanpiloos txawm tuaj txog hauv lub nroog Yeluxalees, ces Vajntxwv Yehauyakhees thiab nws niam, nws cov tub, nws cov nomtswv thiab cov uas ua haujlwm hauv lub loog thiaj zwm rau cov Npanpiloos. Nenpukajnexales ua vajntxwv kav lub tebchaws Npanpiloos tau yim xyoo rau thaum uas nws ntes Yehauyakhees, thiab nws nqa tej khoom tseemceeb hauv lub Tuamtsev thiab hauv lub loog mus rau tebchaws Npanpiloos raws li tus TSWV tau hais tseg lawm hais tias, Nenpukajnexales yuav tuaj tsoo thiab nqa tagnrho tej khoom tseemceeb uas Vajntxwv Xalumoos muab kub ua rau hauv lub Tuamtsev mus. Nws coj cov neeg hauv lub nroog Yeluxalees, vajntxwv tsevneeg thiab cov thawjcoj mus huv tibsi, xam tagnrho muaj kaum txhiab leej. Dua li ntawd nws tseem coj cov neeg uas muaj tswvyim ua txhua yam haujlwm thiab cov kws tooj kws hlau mus huv tibsi. Nws tsuas tseg cov neeg pluag nyob hauv lub tebchaws Yudas xwb. Nenpukajnexales coj Vajntxwv Yehauyakhees, nws niam, nws cov pojniam, nws cov nomtswv thiab cov Yudas tej thawjcoj mus rau tim tebchaws Npanpiloos lawm. Cov neeg tseemceeb uas Nenpukajnexales coj mus rau tebchaws Npanpiloos muaj xya txhiab leej, thiab ib txhiab leej cov uas muaj tswvyim ua txhua yam haujlwm, tagnrho cov kws tooj kws hlau huv tibsi; cov no puavleej yog cov uas khov kho thiab ua taus tubrog xwb. Nenpukajnexales tsa Yehauyakhees tus txiv ntxawm Mataniyas ua vajntxwv kav lub tebchaws Yudas, thiab muab Mataniyas hloov npe hu ua Xedekiyas. Thaum Xedekiyas ua vajntxwv kav lub tebchaws Yudas nws hnubnyoog muaj nees nkaum ib xyoos, thiab nws nyob hauv lub nroog Yeluxalees kav tau kaum ib xyoos. Nws niam hu ua Hamutas thiab yog Yelemis uas nyob hauv lub nroog Linas tus ntxhais. Vajntxwv Xedekiyas ua txhaum rau tus TSWV ib yam li Vajntxwv Yehauyakhees ua. Tus TSWV chim heev rau cov neeg uas nyob hauv lub nroog Yeluxalees thiab hauv tebchaws Yudas, nws thiaj muab lawv ntiab tawm ntawm nws mus lawm. Xedekiyas ntxeev siab rau Vajntxwv Nenpukajnexales uas kav lub tebchaws Npanpiloos. Yog li ntawd, Nenpukajnexales thiaj txhij tubrog tuaj tua lub nroog Yeluxalees, thaum lub nkaum hli ntuj hnub xiab kaug uas Xedekiyas ua vajntxwv kav lub tebchaws Yudas tau cuaj xyoos. Lawv tuaj tsuam yeej rau ntawm ntug nroog thiab xov ib txheej ntsa yeej thaiv ncig lub nroog Yeluxalees, thiab vij lub nroog mus txog thaum Xedekiyas ua vajntxwv tau kaum ib xyoos. Xyoo ntawd thaum lub plaub hlis ntuj hnub xiab cuag, cov pejxeem tsis muaj zaub mov noj thiab sawvdaws tshaib plab heev, thiab tus ntsa yeej uas thaiv lub nroog raug luag tsoo qee ntu pob tas. Txawm yog cov tubrog Npanpiloos twb vij lub nroog tas lawm los, thaum ib tag hmo vajntxwv thiab nws cov tubrog tseem khiav tawm mus hla vajntxwv lub vaj mus rau ntawm lub roojvag uas nyob kem nruab nrab ntawm ob tug ntsa yeej mus rau tom lub Hav Yauladees lawm. Tiamsis cov tubrog Npanpiloos caum lawv qab mus ntes tau Vajntxwv Xedekiyas ntawm lub tiaj nrag uas ze lub nroog Yelikaus, thiab nws cov tubrog khiav tas tso nws tseg. Thaum lawv ntes tau Xedekiyas lawm, lawv coj nws los cob rau Vajntxwv Nenpukajnexales ntawm lub nroog Lilas hauv cheebtsam Hamas, thiab Nenpukajnexales txiav txim rau Xedekiyas qhov ntawd. Nenpukajnexales muab Xedekiyas cov tub tua tabmeeg Xedekiyas, thiab Nenpukajnexales kom luag muab Xedekiyas ob lub qhovmuag kaus povtseg, lawv muab saw hlau khi nws coj mus rau tim tebchaws Npanpiloos lawm. Thaum Nenpukajnexales ua vajntxwv kav lub tebchaws Npanpiloos tau kaum cuaj xyoos, xyoo ntawd lub tsib hlis ntuj hnub xiab xya, Nenpuxaladas uas yog vajntxwv tus tuavxam thiab yog tus thawj tubrog txawm coj vajntxwv cov tubrog tuaj rau hauv lub nroog Yeluxalees. Nws hlawv tus TSWV lub Tuamtsev, lub loog, cov nomtswv tej vajtse thiab tagnrho tej tsev hauv lub nroog Yeluxalees kub hnyiab tas huv tibsi, thiab nws cov tubrog muab tej ntsa yeej tsoo pob tas. Nenpuxaladas ntes cov neeg uas tseem tshuav nyob hauv lub nroog Yeluxalees, cov uas muaj tswvyim ua txhua yam haujlwm, thiab coj tagnrho cov uas los thawj cov Npanpiloos mus rau tim tebchaws Npanpiloos lawm. Tiamsis nws tseg cov neeg pluag uas tsis muaj liaj tsis muaj teb nyob rau hauv tebchaws Yudas, thiab nws kom lawv cia li mus ua luag tej liaj tej teb thiab tu luag tej vaj txiv hmab txiv ntoo. Cov tubrog Npanpiloos tsoo ob tug ncej tooj, tej tsheb thiab lub yias tooj uas nyob ntawm lub Tuamtsev, coj mus rau tim tebchaws Npanpiloos lawm. Thiab lawv sau tagnrho tej duav yawm tshauv, tej thoob rau tshauv thaum lawv tu lub thaj, tej txiab txiav teebxeeb, cov phiab uas rau ntshav tsiaj, tej tais uas hlawv hmoov tshuaj tsw qab thiab tej tais tooj uas siv hauv lub tuamtsev nqa mus huv tibsi lawm. Lawv coj txhua yam uas muab nyiaj muab kub ua, tsis hais tej tais, tej yias uas rau ncaig taws, thiab txhua yam uas Vajntxwv Xalumoos muab tooj ua tseg rau hauv lub Tuamtsev, tsis hais ob tug ncej tooj, cov tsheb thiab lub rhawv tooj loj, tej ntawd hnyav heev tsis muaj ib rab teev uas yuav luj tau li. Ob tug ncej tooj ntawd sib luag zos: ib tug twg siab kaum yim tshim, thiab saum ob lub hau ncej luag ua ob lub paj siab peb tshim txawb rau. Luag muab xovtooj qhaib ua saw rig puagncig ob lub hau thiab nchuav ua ob tsham txiv ntsiavkws dai rau saum. Nenpuxaladas uas yog tus thawj tubrog ntes Xelayas uas yog tus Povthawj Hlob, Xefaniyas uas yog tus povthawj yau thiab peb leeg uas tuav haujlwm tseemceeb hauv lub Tuamtsev, nws ntes tus thawj tubrog uas saib tagnrho cov tubrog, vajntxwv tsib tug tuavxam uas tseem nyob hauv lub nroog, tus lwm thawj tubrog uas txheeb cov tubrog tej ntaub ntawv, thiab rau caum leej neeg tseemceeb uas nyob hauv lub nroog. Nenpuxaladas coj lawv mus cob rau tus vajntxwv uas kav lub tebchaws Npanpiloos ntawm lub nroog Lilas, hauv cheebtsam Hamas. Vajntxwv kom luag muab lawv ntaus thiab tua rau ntawd. Yog li ntawd, luag thiaj coj cov Yudas mus rau tebchaws Npanpiloos lawm. Vajntxwv Nenpukajnexales uas kav lub tebchaws Npanpiloos tsa Nkedaliyas uas yog Ahikas tus tub thiab yog Safas tus xeebntxwv ua nom kav lub tebchaws Yudas thiab saib cov Yudas uas tsis raug luag ntes mus rau tim tebchaws Npanpiloos. Thaum cov Yudas cov nomtswv thiab cov tubrog uas tsis kam mus thawj thiab zwm rau cov Npanpiloos hnov hais tias tus vajntxwv uas kav lub tebchaws Npanpiloos tsa Nkedaliyas ua nom saib cov Yudas lawm, lawv txawm tuaj cuag nws hauv lub nroog Mixepas; cov nomtswv ntawd yog Nethaniyas tus tub Yisamayees, Kale-as tus tub Yauhanas, Xelayas tus tub Tahumes uas nyob hauv lub nroog Netaufas thiab Yexaniyas uas nyob hauv lub nroog Ma-akas. Nkedaliyas hais rau lawv hais tias, “Kuv hais rau nej hais tias, nej tsis txhob ntshai cov Npanpiloos tej nomtswv. Nej cia li nyob twjywm hauv lub tebchaws no thiab ua haujlwm rau tus vajntxwv uas kav lub tebchaws Npanpiloos, nej thiaj yuav tau nyob kaj siab lug.” Xyoo ntawd, thaum lub xya hli ntuj, Yisamayees uas yog Nethaniyas tus tub thiab yog Elisamas tus xeebntxwv uas yog cajces vajntxwv txawm coj kaum leej tubrog tuaj tua Nkedaliyas, thiab nws tseem muab cov Yixalayees thiab cov Npanpiloos uas nrog Nkedaliyas nyob hauv lub nroog Mixepas tua tuag tas huv tibsi. Cov Yixalayees, tsis hais cov muaj cov pluag thiab cov thawj tubrog, thiaj tsiv mus tas rau nram tebchaws Iziv lawm, vim lawv ntshai cov Npanpiloos. Xyoo uas Evimeludas pib ua vajntxwv kav lub tebchaws Npanpiloos, nws hlub Vajntxwv Yehauyakhees uas kav lub tebchaws Yudas, nws thiaj tso Yehauyakhees tawm hauv tsev lojcuj. Suav txij hnub uas luag ntes Yehauyakhees hauv tebchaws Yudas mus txog hnub uas luag tso nws tawm hauv tsev lojcuj los, yog tau peb caug xya xyoo rau lub kaum ob hlis ntuj hnub nees nkaum xya. Vajntxwv Evimeludas ua zoo rau Yehauyakhees thiab muab nws saib hlob dua lwm tus vajntxwv uas luag ntes mus rau hauv tebchaws Npanpiloos. Yog li ntawd, luag thiaj muab dua ib cev ris tsho rau Yehauyakhees hnav hloov cev uas nws hnav nyob hauv tsev lojcuj, thiab nws niaj hnub tau nrog vajntxwv noj mov saum vajntxwv lub rooj mus tas nws simneej. Thaum uas Yehauyakhees tseem ua neej nyob, Vajntxwv Evimeludas uas kav lub tebchaws Npanpiloos niaj hnub muab nyiaj rau Yehauyakhees yuav noj yuav hnav kom txaus mus txog hnub uas tas nws simneej. Adas yog Xej txiv, Xej yog Enaus txiv, Enauses yog Kenas txiv, Kenas yog Mahalalees txiv, Mahalalees yog Yales txiv. Yales yog Enauj txiv, Enauj yog Methuxelas txiv; Methuxelas yog Lamej txiv, Lamej yog Nau-es txiv. Nau-es muaj peb tug tub; Xees, Has thiab Yafej. Yafej cov tub yog Nkaumes, Mankaus, Madais, Yavas, Tunpas, Mesej thiab Tilas, lawv puavleej yog yawgkoob ntawm cov neeg uas ris lawv tej npe. Nkaumes cov tub yog Akenas, Lifathas thiab Taunkamas. Yavas cov tub yog Elisas, Xapees, Xaipas thiab Laudes. Has cov tub yog Kuses, Iziv, Lenpeyas thiab Kana-as, lawv puavleej yog yawgkoob ntawm cov neeg uas ris lawv tej npe. Kuses cov xeebntxwv yog cov neeg Xenpas, Havilas, Xanpetas, La-amas thiab Xatekas. La-amas cov xeebntxwv yog cov neeg Senpas thiab Dedas. ( Kuses muaj ib tug tub hu ua Nimilus, nws yog thawj tug uas muaj lub hwjchim loj tshaj plaws hauv ntiajteb no.) Iziv cov tub yog Lidias, Anas, Lehaj, Nafetus Pathelus, Kaselus thiab Keletes (lawv cov xeebntxwv yog cov neeg Filitees.) Kana-as ob tus tub, Xidoos yog tus tub hlob thiab Hethas yog tus tub yau, nkawd yog yawgkoob ntawm cov neeg uas ris nkawd tej npe. Kana-as tseem yog yawgkoob ntawm cov Yenpus, cov Amoos, cov Nkinkasis, cov Hivis, cov Alekis, cov Xinais, cov Alevas, cov Xemalis thiab cov Hasas. Xees cov tub yog Elas, Asules, Apasas, Lus, Alas, Uxes, Hules, Nkethes thiab Mesekis, lawv puavleej yog cov yawgkoob ntawm cov neeg uas ris lawv tej npe. Apasas yog Selas txiv; thiab Selas yog Enpes txiv. Enpes muaj ob tug tub: ib tug hu ua Pelej, (vim thaum lub sijhawm ntawd cov neeg hauv lub ntiajteb no tau sib faib), thiab tus tub yau hu ua Yauketas, Yauketas cov xeebntxwv yog cov neeg Amaudas, Selefas, Haxamaves, Yelas, Hadaulas, Uxas, Dikelas, Enpales, Anpima-ees, Senpas, Afiles, Havilas thiab Yaunpaj, tagnrho cov no puavleej yog Yauketas cov tub. Cajces uas pib ntawm Xees los txog rau Anplas muaj raws li nram no: Xees, Apakesas, Selas, Enpes, Pelej, Le-us, Xelunkas, Nahaus, Telas thiab Anplas (tus uas hu ua Anplahas). Anplahas muaj ob tug tub: Ixaj thiab Yisamayees. Yisamayees cov tub dhau los ua cov thawjcoj ntawm kaum ob xeem xwsli: Nenpai-authes (los ntawm Yisamayees tus tub hlob lub npe), Kedas, Anpees, Mixames, Misemas, Dumas, Maxas, Hadas, Temas, Yetus, Nafises thiab Kedemas. Anplahas muaj ib tug niamyau hu ua Ketulas, nws muaj rau leej tub: Xeelas, Yausas, Medas, Midias, Isanpas thiab Suas. Yausas ob tug tub yog Senpas thiab Dedas. Midias cov tub yog Efas, Efelas, Hanauj, Anpidas thiab Eladas. Tagnrho cov no puavleej yog Ketulas cov xeebntxwv. Anplahas tus tub Ixaj muaj ob tug tub: Exaus thiab Yakhauj. Exaus cov tub yog Elifas, Le-uyees, Ye-uses, Yalas thiab Kaulas. Elifas yog yawgkoob ntawm xeem Temas, Aumas, Xefis, Nkatas, Kenas, Tinas thiab Amalej. Thiab Le-uyees yog yawgkoob ntawm xeem Nahas, Zelas, Samas thiab Mixexas. Ntawm no yog cov vajntxwv uas kav lub tebchaws Edoos ib tug dhau ib tug ua ntej lub sijhawm uas tsis tau muaj vajntxwv kav lub tebchaws Yixalayees hlo li: Npe-aules tus tub Npelas uas nyob hauv lub nroog Dihanpas. Thaum Npelas tuag lawm, Zelas tus tub Yaunpaj uas nyob hauv lub nroog Npauxelas los ua tus kav tebchaws hloov nws chaw. Thaum Yaunpaj tuag lawm, Husas uas nyob hauv tebchaws Temas los ua tus kav tebchaws hloov nws chaw. Thaum Husas tuag lawm, Npedas tus tub Hadas uas nyob hauv lub nroog Avithas los ua tus kav tebchaws hloov nws chaw; Hadas yog tus uas mus tua yeej cov Midias hauv tebchaws Mau-am. Thaum Hadas tuag lawm, Xamelas uas nyob hauv lub nroog Malekas los ua tus kav tebchaws hloov nws chaw. Thaum Xamelas tuag lawm, Sa-ules uas nyob hauv lub nroog Lehaunpaus ntawm ntug dej Efalates los ua tus kav tebchaws hloov nws chaw. Thaum Sa-ules tuag lawm, Anpaus tus tub Npa-as Hanas los ua tus kav tebchaws hloov nws chaw. Thiab thaum Npa-as Hanas tuag lawm, Hadas los ua tus kav tebchaws hloov nws chaw; Hadas lub nroog hu ua Pa-us thiab nws tus pojniam hu ua Mehetanpees uas yog Metales tus ntxhais thiab yog Mexahas tus ntxhais xeebntxwv. Thiab Hadas txawm tuag lawm. Muab cov neeg Edoos faib ua tej xeem raws li nram no: xeem Tinas, xeem Alevas, xeem Yethes, xeem Auhaulinpamas, xeem Elas, xeem Pinoos, xeem Kenaxes, xeem Temas, xeem Minpexas, xeem Mankediyees thiab xeem Ilames; cov no puavleej yog cov Edoos. Yakhauj muaj kaum ob tug tub: Lunpees, Xime-oos, Levis, Yudas, Ixakhas, Xenpuloos, Das, Yauxej, Npeenyamees, Nathalis, Khas thiab Aseles. Yudas cov tub yog Eles, Aunas thiab Selas; peb tug tub no yog Yudas tus pojniam uas hu ua Npasuas uas yog neeg Kana-as yug rau nws. Eles uas yog Yudas tus tub hlob, nws tau ua phem ua qias tabmeeg tus TSWV, tus TSWV thiaj muab nws tua povtseg lawm. Yudas tus nyab uas hu ua Tamaj yug tau Peles thiab Zelas rau Yudas thiab. Yudas cov tub tagnrho muaj tsib leeg. Peles muaj ob tug tub: Hexeloos thiab Hamules. Nws tus kwv Zelas muaj tsib tug tub: Ximelis, Ethas, Hemas, Kakaus thiab Dadas. Kalemis tus tub Akhas uas yog ib tug ntawm Zelas cov xeebntxwv, nws yog tus ua rau cov Yixalayees raug kev puastsuaj, vim nws nyiag tej khoom uas twb muab fij rau Vajtswv lawm. Ethas muaj ib tug tub hu ua Axaliyas. Hexeloos cov tub uas nws yug yog Yelamees, Las thiab Kalej. Cajces uas los ntawm Las los txog rau ntawm Yexais muaj raws li nram no: Las yog Aminadas txiv, Aminadas yog Nasoos txiv, (Nasoos yog xeem Yudas tus thawjcoj). Nasoos yog Xalemoos txiv, Xalemoos yog Npau-am txiv, Npau-am yog Aunpes txiv, Aunpes yog Yexais txiv. Yexais muaj xya tus tub: tus tub hlob hu ua Eli-as, tus ob hu ua Anpinadas, tus peb hu ua Samas, tus plaub hu ua Nethayees, tus tsib hu ua Ladais, tus rau hu ua Auxes, tus xya hu ua Daviv; thiab lawv ob tug muam hu ua Xeluyas thiab Anpinkais. Xeluyas muaj peb tug tub: Anpisais, Yau-am thiab Axahees. Nws tus ntxhais Anpinkais yuav Yethes uas yog Yisamayees tus tub thiab nkawd yug tau ib tug tub hu ua Amaxas. Hexeloos tus tub Kalej yuav Axunpas ua pojniam thiab nws tus pojniam yug tau ib tug ntxhais hu ua Yeli-aus; thiab yug tau peb tug tub: Yeseles, Saunpaj thiab Aledoos. Thaum Axunpas tuag lawm, Kalej thiaj mus yuav Efelas los ua pojniam, Efelas thiaj yug tau Hules rau Kalej. Hules yog Ulis txiv, thiab Ulis yog Npexalees txiv. Tom qab ntawd, Hexeloos mus yuav Makhiles tus ntxhais uas yog Nkile-as tus muam los ua pojniam, thaum nws hnubnyoog muaj rau caum xyoo lawm; nws tus pojniam mam yug tau ib tug tub hu ua Xenkunpas rau nws; Xenkunpas yog Yailes txiv thiab Yailes yog tus uas kav nees nkaum peb lub nroog hauv cheebtsam Nkile-as. Tiamsis cov neeg Nkesus thiab cov Alas tuaj txeeb tau rau caum lub nroog nyob hauv lub tebchaws ntawd uas yog xam Yailes thiab Kenas nkawd tej zos thiab tej zos uas nyob ibncig ze ntawd huv tibsi. Tagnrho cov neeg uas nyob hauv lub tebchaws no puavleej yog Makhiles uas yog Nkile-as txiv cov xeebntxwv. Tom qab uas Hexeloos tuag lawm, Kalej thiaj yuav nws txiv Hexeloos tus pojniam uas hu ua Efelas los ua pojniam, Efelas thiaj yug tau ib tug tub hu ua Asehus rau Kalej, Asehus yog tus rhawv lub zos Tekau-as. Hexeloos tus tub hlob Yelamees muaj tsib tug tub: Las yog nws tus tub hlob, Npunas, Aules, Auxes thiab Ahiyas. Aunas muaj ob tug tub: Samais thiab Yadas. Samais ob tug tub yog Nadas thiab Anpisus. Anpisus thiaj yuav tau ib tug pojniam hu ua Anpihais, thiab nws yug tau ob tug tub hu ua Anpas thiab Maulis. Nadas ob tug tub yog Xeles thiab Apayees; thiab Xeles tuag thaum nws tseem tsis tau muaj tub lawm. Apayees yog Isis txiv, Isis yog Sesas txiv, Sesas yog Ahelais txiv. Samais tus kwv Yadas muaj ob tug tub: Yethes thiab Yaunathas; Yethes tuag thaum nws tseem tsis tau muaj tub lawm. Yaunathas muaj ob tug tub: Pelethes thiab Xaxas. Tagnrho cov no puavleej yog Yelamees cov xeebntxwv. Sesas tsis muaj ib tug tub li, nws muaj ntxhais nkaus xwb; tiamsis Sesas muaj ib tug tubqhe yog neeg Iziv, nws hu ua Yalehas. Yog li ntawd, Sesas thiaj muab nws ib tug ntxhais txis rau nws tus tubqhe Yalehas yuav ua pojniam; thiab nws tus ntxhais thiaj yug tau ib tug tub rau nws hu ua Atais. Atais yog Nathas txiv thiab Nathas yog Xanpas txiv. Xanpas yog Efalas txiv, thiab Efalas yog Aunpes txiv. Aunpes yog Yehus txiv, thiab Yehus yog Axaliyas txiv. Axaliyas yog Helexes txiv, thiab Helexes yog Ele-axas txiv. Ele-axas yog Ximais txiv, thiab Ximais yog Salumes txiv. Saloos yog Yekamiyas txiv, thiab Yekamiyas yog Elisamas txiv. Kalej tus kwv Yelamees tus tub hlob hu uas Mesas. Mesas yog Xifes txiv, Xifes yog Malesas txiv, thiab Malesas yog Henploos txiv. Henploos cov tub yog Kaulas, Tapuas, Lekees thiab Semas. Semas yog Laham txiv, thiab yog Yauke-as yawg; thiab Lekees yog Samais txiv. Samais tus tub yog Ma-oos; thiab Ma-oos yog Npexules txiv. Kalej muaj ib tug niamyau hu ua Efas, nws yug tau Halas, Mauxas thiab Nkaxes; thiab Halas yog Nkaxes txiv. ( Muaj ib tug txivneej hu ua Yahadais muaj rau tus tub: Lenkees, Yauthas, Nkesas, Peletes, Efas thiab Sa-afas.) Kalej muaj dua ib tug niamyau hu uas Ma-akas, nws yug tau ob tug tub hu ua Senpes thiab Tilehanas. Tom qab no nws tseem muaj dua ib co tub ntxiv: Sa-afas yog tus uas rhawv lub zos Mamanas; thiab Sevas yog tus uas rhawv lub zos Makhanpenas thiab Nkinpe-as. Dua li ntawd, Kalej tseem muaj ib tug ntxhais hu ua Akhesas thiab. Cov ntawm no mus puavleej yog Kalej cov xeebntxwv: Hules yog Kalej tus tub hlob thiab nws tus pojniam hu ua Efalas. Hules tus tub Saunpas yog tus uas rhawv lub zos Kili-as Ye-alees, nws tus tub ob uas hu ua Xalemas yog tus rhawv lub zos Npelehees, thiab nws tus tub peb uas hu ua Hales yog tus rhawv lub zos Npenkades. Saunpas uas rhawv lub zos Kili-as Ye-alees, nws yog yawgkoob ntawm cov Halau-es thiab ib nrab ntawm cov neeg Menuhaus, thiab tej cuab kwvtij uas nyob hauv lub zos Kili-as Ye-alees muaj raws li no: cov Ithes, cov Puthes, cov Sumas thiab cov Miselais; (thiab cov neeg uas nyob hauv lub nroog Xaulas thiab Eseta-aus puavleej yog lawv cuab kwvtij no.) Xalemas tus uas rhawv lub zos Npelehees, nws yog yawgkoob ntawm cov Netaufas, cov Ataus Npetes Yau-am, thiab cov Xaules uas yog ib nrab ntawm cov Manahas. ( Ntawm no mus yog tej xeem uas nyob hauv lub nroog Yanpexes, lawv yog cov txawj sau ntawv thiab theej tej ntawv cia: cov Tilathas, cov Sime-as thiab cov Xukas. Lawv yog cov Kenais uas tau mus yuav cov Lekhas los ua pojniam.) Ntawm no mus yog Daviv cov tub uas yug nyob hauv lub nroog Henploos raws li lawv tej hnubnyoog: Daviv tus tub hlob hu ua Anoos, nws niam hu ua Ahinau-as, thiab yog cov neeg Yexelees; tus ob hu ua Daniyees, nws niam hu ua Anpinkayis thiab yog cov neeg Kalemees, tus peb hu ua Axaloos, nws niam hu ua Ma-akas uas yog Vajntxwv Talemais uas kav lub nroog Nkesus tus ntxhais. Tus plaub hu ua Adauniyas, nws niam hu ua Hankis; tus tsib hu ua Sefatiyas, nws niam hu ua Anpitas thiab tus rau yog Ithale-as, nws niam hu ua Elas. Tagnrho rau leej tub no puavleej yog Daviv cov tub uas yug nyob hauv lub nroog Henploos, thaum nws ua vajntxwv nyob hauv lub nroog ntawd, nws kav tau xya xyoo thiab rau hli. Daviv ua vajntxwv nyob hauv lub nroog Yeluxalees kav tau peb caug peb xyoos, thiab nws cov pojniam yug tau tus tub coob leej rau nws nyob hauv. Nws tus pojniam uas yog Amiyees tus ntxhais Npasenpas yug tau plaub tug tub rau nws: Sime-as, Saunpaj, Nathas thiab Xalumoos. Nws muaj dua cuaj tug tub: Inpehas, Elisuas, Epeles, Naunkas, Nefes, Yafias, Elisamas, Eli-adas thiab Elifeles. Cov no puavleej yog Daviv cov tub. Daviv cov niamyau tseem muaj tub coob leej ntxiv rau ib cag. Nws tseem muaj ib tub txhais hu ua Tamaj thiab. Ntawm no mus yog Vajntxwv Xalumoos cov tub thiab cov xeebntxwv: Lehaunpau-as, Anpiyas, Axas, Yehausafas, Yehaulas, Ahaxiyas, Yau-ases, Amaxiyas, Uxiyas, Yauthas, Ahas, Hexekiyas, Manaxes, Amoos thiab Yauxiyas. Yauxiyas muaj plaub tug tub: Yauhanas yog tus tub hlob, Yehauyakees yog tus ob, Xedekiyas yog tus peb thiab Yau-as yog tus plaub. Yehauyakees ob tug tub yog Yehauyakhees thiab Xedekiyas. Ntawm no yog Vajntxwv Yehauyakhees, tus uas raug cov neeg Npanpiloos ntes mus lawm, cov tub: Se-atiyees, Makhilas, Pedayas, Senaxas, Yekamiyas, Hausamas thiab Nedanpiyas. Pedayas ob tug tub yog Xelunpanpees thiab Sime-is; Xelunpanpees ob tug tub yog Mesulas thiab Hananiyas thiab nkawd muaj ib tug muam hu ua Selaumis. Dua li ntawd nws tseem muaj tsib tug tub ntxiv uas yog Hasunpas, Auhees, Npelekhiyas, Haxadiyas thiab Yusas Hexes. Hananiyas muaj ob tug tub, Pelatiyas thiab Yesaiyas. Yesaiyas yog Lefayas txiv, Lefayas yog Alenas txiv, Alenas yog Aunpadiyas txiv, Aunpadiyas yog Sekaniyas txiv. Sekaniyas muaj ib tug tub hu ua Semayas thiab tsib tug xeebntxwv: Hatus, Inkas, Npaliyas, Ne-aliyas thiab Safas. Ne-aliyas muaj peb tug tub: Eli-aunais, Hexekiyas thiab Alikas. Eli-aunais muaj xya tus tub: Haudaviyas, Eli-asis, Pelayas, Akus, Yauhanas, Delayas thiab Ananis. Ntawm no mus yog Yudas cov xeebntxwv ibtxhia: Peles, Hexeloos, Kalemis, Hules thiab Saunpas. Saunpas tus tub Le-ayas yog Yahaj txiv, thiab Yahaj yog Ahumais thiab Lahas nkawd txiv, lawv yog yawgkoob ntawm cov neeg uas nyob hauv lub nroog Xaulas. Asehus yog tus uas rhawv lub zos Tekau-as, nws muaj ob tug pojniam hu ua Helas thiab Na-alas; Na-alas yug tau plaub tug tub rau Asehus: Ahuxas, Hefeles, Temenis thiab Hahatalis. Helas yug tau peb tug tub rau Asehus: Xeles, Ixehas thiab Ethanas. Kauxes yog Anus thiab Xaunpenpas nkawd txiv, thiab nws yog yawgkoob ntawm cuab kwvtij uas yog Haloos tus tub Ahahees xeebntxwv. Muaj ib tug txivneej hu uas Yanpexes, nws yog tus uas nws tsevneeg hwm tshaj nws cov kwvtij huv tibsi; nws niam thiaj tis nws lub npe hu ua Yanpexes, txhais hais tias, “Rau qhov thaum kuv yug nws mas mob kuv plab heev.” Yanpexes thiaj thov cov Yixalayees tus Vajtswv hais tias, “Vajtswv, thov koj foom koob hmoov rau kuv thiab nthuav kom lub tebchaws dav, thov koj txhais tes nrog nraim kuv, thiab thov koj tsomkwm tsis txhob pub kuv raug kev txomnyem kom kuv thiaj tsis muaj kev mob kev nkeeg.” Ces Vajtswv thiaj teb tej lus uas nws thov ntawd. Kalej tus tijlaug Suhas muaj ib tug tub hu ua Mehiles. Mehiles yog Esetoos txiv. Esetoos muaj peb tug tub: Npethelafas, Paxe-as thiab Tehinas. Tehinas yog Ilenahas txiv. Tehinas yog tus uas rhawv lub nroog Nahas. Cov neeg no lawv cov xeebntxwv puavleej nyob hauv lub nroog Lekas. Kenas ob tug tub yog Authaniyees thiab Xelayas, Authaniyees ob tug tub yog Hathas thiab Me-aunauthais. Me-aunauthais yog Aufalas txiv. Xelayas yog Yau-am txiv, nws yog tus uas rhawv tau lub zos uas hu ua cov Neeg Txawj lub Hav, qhov uas hu li ntawd, rau qhov cov neeg uas nyob hauv puavleej yog cov uas txawj ua txhua yam. Yefunes tus tub Kalej cov tub yog Ilus, Elas thiab Na-as; thiab Elas tus tub yog Kenas. Yehalelees cov tub yog Xifes, Xifas, Tilias thiab Axalees. Haudiyas yuav Nahas tus muam. Nkawd cov xeebntxwv yog Nkalemes cajces uas nyob hauv lub nroog Ke-ilas thiab yog Ma-akas cajces uas nyob hauv lub nroog Ese-temaus. Simoos cov tub yog Anoos, Linas, Npehanas thiab Tiloos. Isis ob tug tub yog Xauhes thiab Npexauhes. Selas yog Yudas cov tub ib tug. Nws cov xeebntxwv yog Eles tus uas rhawv lub zos Lekas; La-adas yog tus uas rhawv lub zos Malesas, thiab cuab kwvtij uas nyob hauv lub nroog Npethes Asenpe-as txawj ntos ntaubmag heev; Yaukees thiab cov neeg uas nyob hauv lub zos Kauxenpas; Yau-ases thiab Xalafes mus yuav cov Mau-am ob tug ntxhais los ua pojniam thiab nkawd nyob hauv lub nroog Npelehees, (tej no yog tej qub kevcai thaum ub los lawm xwb.) Lawv yog cov neeg puab laujkaub av, mas lawv thiaj mus nyob hauv lub nroog Neta-ees thiab Nkedelas puab laujkaub av rau vajntxwv. Xime-oos cov tub yog Nemuyees, Yamees, Yalis, Zelas thiab Sa-ules; Salumes yog Sa-ules tub, Mixames yog Saloos tub thiab Misamas yog Mixames tub. Misamas cov xeebntxwv: Hamuyees yog Misamas tub, Xakulas yog Hamuyees tub thiab Sime-is yog Xakulas tub. Sime-is muaj kaum rau tus tub thiab rau leej ntxhais, tiamsis nws cov kwvtij tsis muaj menyuam coob li nws lossis xeem Xime-oos tsis muaj menyuam coob thiab tsis huamvam zoo npaum li xeem Yudas. Lawv cov no yog cov nyob hauv lub nroog Npesenpas, Mauladas, Haxasuas, Npihas, Exes, Taulas, Npethuyees, Haumas, Xikelas, Npethes Makanpaus, Haxaxuxis, Npethenpilis thiab Sa-alayees. Lawv yeej nyob hauv cov nroog no los txog thaum Vajntxwv Daviv kav li. Thiab lawv tseem nyob dua tsib lub nroog uas yog Etas, Ayees, Limoos, Taukhees thiab Asas, thiab tej zos uas nyob ibncig ntawd mus txog ntua nram lub nroog Npa-alas. Ntawm no mus yog teev lawv tej tsevneeg cajces thiab lawv tej chaw nyob. Mesaunpas, Yamelej, Yausas uas yog Amaxiyas tus tub, Yau-ees, Yehus yog Yasinpiyas tub, Yasinpiyas yog Xelayas tub, Xelaiyas yog Axiyees tub. Eli-aunais, Yakaunpas, Yesauhayas, Axaiyas, Adiyees, Yeximiyees, Npinayas, Xixas yog Sifis tub, Sifis yog Aloos tub, Aloos yog Yedayas tub, Yedayas yog Simelis tub, Simelis yog Semayas tub, cov neeg uas muaj npe no puavleej yog cov thawjcoj ntawm lawv tej tsevneeg, thiab lawv tej cuab kwvtij tabtom huamvam coob zuj zus ntxiv. Lawv thiaj taug kev mus nrhiav tshav zaub rau lawv tej tsiaj, lawv mus txog rau ntawm txoj ncauj ke uas mus rau hauv lub nroog Nkelales uas nyob ntawm ib lub voshav sab hnubtuaj. Lawv mus nrhiav tau cheebtsam uas muaj tshav zaub ntau heev. Lub tebchaws ntawd nthuav dav fo rau tom tej tiaj nrag, nyob ntsiag to thiab thajyeeb lug; cov Hames yog cov neeg uas ibtxwm nyob hauv lub tebchaws ntawd. Thaum cov Yudas tus Vajntxwv Hexekiyas tiam, cov txivneej uas muaj npe saum no thiaj mus rau hauv lub nroog Nkelales mus muab cov neeg uas nyob hauv tej tsevntaub thiab tej tsev pheebsuab rhuav puastsuaj tas los txog rau niaj hnub no, thiab lawv mus nyob ntawm cov neeg ntawd tej chaw, rau qhov lub tebchaws ntawd muaj tshav zaub dav rau lawv tej tsiaj noj. Xeem Xime-oos tsib puas leej mus rau sab hnubpoob thiab mus txog rau hauv lub tebchaws Edoos. Cov coj lawv kev yog Isis cov tub: Pelatiyas, Ne-aliyas, Lefayas thiab Uxiyees. Thiab lawv mus muab cov neeg Amalej uas khiav mus nkaum rau pem tej ncov roob tua tuag tas huv tibsi, thiab lawv nyob hauv lub tebchaws ntawd los txog niaj hnub no li. Ntawm no yog Yakhauj tus tub hlob Lunpees cov xeebntxwv. (Vim nws tau deev nws txiv tus niamyau, nws thiaj poob lub meejmom uas yog tus tub hlob lawm thiab muab lub meejmom ntawd rau nws tus kwv Yauxej cov tub uas yog Yakhauj cov xeebntxwv, txawm li ntawd los Yauxej yeej tsis muaj npe nyob hauv Lunpees cajces li. Xeem Yudas dhau mus ua cov uas muaj hwjchim tshaj thiab muaj ib tug mus ua tau tus thawjcoj kav tagnrho txhua xeem huv tibsi.) Yakhauj tus tub hlob Lunpees muaj plaub tug tub: Hanauj yog tus tub hlob, Palus, Hexeloos thiab Kalemis. Yau-ees cov xeebntxwv: Semayas yog Yau-ees tub, Nkaus yog Semayas tub, Sime-is yog Nkaus tub, Mikhas yog Sime-is tub, Le-ayas yog Mikhas tub, Npa-as yog Le-ayas tub, Npelahes yog Npa-as tub thiab yog xeem Lunpees tus thawjcoj; Vajntxwv Tinkales Pilexes uas kav tebchaws Xilias tuaj ntes Npelahes thiab coj nws mus lawm. Luag teev Xeem Lunpees tej tsevneeg raws li cov thawjcoj ntawm tej cuab kwvtij li nram no: Ye-iyees, Xakhaliyas thiab Npelas uas yog Axaxes tub, thiab yog Semas tus xeebntxwv uas yog Yau-ees cajces. Lawv cov no puavleej nyob hauv cheebtsam Alu-es mus rau pem Nenpaus thiab Npa-as Me-oos lawm. Sab hnubtuaj lawv nyob mus txog ntua ntawm ntug tiaj suabpuam ntawm tus dej Efalates sab tim no, vim lawv muaj tsiaj txhu coob heev nyob hauv tebchaws Nkile-as. Thiab lub sijhawm uas Vajntxwv Xa-ules kav tebchaws, xeem Lunpees mus tua cov Hankelis thiab muab lawv tua tuag tas rau hauv tshavrog thiab kav tagnrho lawv lub tebchaws txij ntua ntawm Nkile-as sab hnubtuaj mus lawm. Xeem Khas nyob ntawm lub xeev Npasas txuas nkaus ntawm xeem Lunpees hauv ntej mus txog ntua rau ntawm lub nroog Xalekas. Yau-ees yog tus thawj, Safas yog tus ob, Yanais thiab Safas yog ob tug uas nyob hauv Npasas. Thiab teev lawv tej cuab kwvtij raws li lawv tej yawgkoob tsevneeg muaj li nram no: Mikhayees, Mesulas, Senpas, Yaulais, Yakas, Xias thiab Enpes, tagnrho huv tibsi yog xya cuab kwvtij. Lawv puavleej yog Hulis tus tub Anpihais cov xeebntxwv, yog taug ntawm lawv yawgkoob los mas muaj raws li nram no: Anpihais, Hulis, Yalau-as, Nkile-as, Mikhayees, Yesisais, Yadaus, Npuxes, Ahis uas yog Adiyees tub thiab yog Nkunis tus xeebntxwv, nws yog tus thawjcoj ntawm lawv tej cuab kwvtij. Lawv nyob hauv cheebtsam Nkile-as thiab Npasas, hauv tej zos ntawd thiab nyob thoob plaws tej chaw uas muaj tshav zaub hauv lub tebchaws Saloos. ( Lub sijhawm uas teev tej no cia yog thaum Vajntxwv Yauthas kav tebchaws Yudas thiab Vajntxwv Yelaunpau-as kav tebchaws Yixalayees.) Xeem Lunpees, xeem Khas thiab xeem Manaxes sab hnubtuaj muaj plaub caug plaub txhiab xya pua rau caum leej tubrog uas txawj siv daim thaiv hniav ntaj, txawj tua ntaj thiab tua hneevnti. Lawv thiaj mus ua rog rau cov neeg Hankelis, cov Yetus, cov Nafis thiab cov Naudas; Lawv tso siab plhuav rau Vajtswv thiab thov nws pab lawv, Vajtswv thiaj teb lawv tej lus thov thiab pab lawv tua yeej cov Hankelis thiab cov uas tuaj cov Hankelis tog. Lawv ntes tau yeebncuab cov ntxhuav tsib caug txhiab tus, cov yaj ob puas tsib caug txhiab tus, thiab cov neesluav ob txhiab tus thiab ntes tau yeebncuab ib puas txhiab leej hauv tshavrog coj los kaw. Lawv tua cov yeebncuab tuag coob kawg li, rau qhov kev ua rog zaum no haum Vajtswv siab. Thiab lawv nyob hauv lub tebchaws ntawd mus txog thaum uas lawv raug luag ntes mus lawm. Cov Manaxes uas nyob sab Hnubtuaj huamvam coob kawg li, lawv nyob puv nkaus hauv Npasas mus txog ntua sab qaumteb pem Npa-as Helemoos, Senis thiab ntawm lub Roob Helemoos. Ntawm no mus yog hais txog cov thawjcoj ntawm tej cuab: Efes, Isis, Eliyees, Axeliyees, Yelemis, Haudaviyas thiab Yadiyees. Lawv puavleej yog cov thawj tubrog uas muaj koob muaj meej nto moo lug thiab txawj ntse ua taus thawjcoj ntawm lawv tej cuab kwvtij. Tiamsis lawv ua tsis ncaj rau lawv cov yawgkoob tus Vajtswv thiab muab nws tso tseg, lawv mus pehawm tej haivneeg uas Vajtswv muab ntiab tawm hauv lawv lub tebchaws mus lawm tej vajtswv. Yog li ntawd, Vajtswv thiaj tshoov cov Axilias tus Vajntxwv Pules (uas muaj dua ib lub npe hu ua Tinkelas Pilexes) siab kom tuaj tua lawv lub tebchaws. Nws thiaj tuaj ntes xeem Lunpees, xeem Khas thiab xeem Manaxes sab hnubtuaj thiab coj lawv mus nyob rau ntawm Halahes, Hanpaus, Halas thiab nyob ntawm tus dej Nkaxas los txog niaj hnub no. Levis muaj peb tug tub: Nkesoos, Kauhas thiab Melalis, Kauhas muaj plaub tug tub: Alas, Ixehas, Henploos thiab Uxiyees. Alas muaj ob tug tub: Aloos, Mauxes thiab muaj ib tug ntxhais npe hu ua Milias. Aloos muaj plaub tug tub: Nadas, Anpihus, Ele-axas thiab Ithamas. Ele-axas cov xeebntxwv ib tiam dhau ib tiam muaj raws li no: Ele-axas yog Finehas txiv, Finehas yog Anpisuas txiv, Anpisuas yog Npukis txiv, Npukis yog Uxis txiv, Uxis yog Xelahiyas txiv, Xelahiyas yog Melayaus txiv, Malayaus yog Amaliyas txiv, Amaliyas yog Ahitus txiv, Ahitus yog Xadaus txiv, Xadaus yog Ahima-as txiv, Ahima-as yog Axaliyas txiv, Axaliyas yog Yauhanas txiv, Yahanas yog Axaliyas txiv, Axaliyas (yog tus povthawj uas ua tus TSWV tes haujlwm nyob hauv lub Tuamtsev uas Vajntxwv Xalumoos ua hauv lub nroog Yeluxalees) Axaliyas yog Amaliyas txiv, Amaliyas yog Ahitus txiv, Ahitus yog Xadaus txiv, Xadaus yog Salumes txiv, Salus yog Hilekiyas txiv, Hilekiyas yog Axaliyas txiv, Axaliyas yog Xelaiyas txiv, Xelayas yog Yehauxadas txiv. Yehauxadas raug ntes thaum tus TSWV muab cov Yudas thiab cov neeg hauv lub nroog Yeluxalees cob rau Vajntxwv Nenpukajnexales coj mus lawm. Levis muaj peb tug tub: Nkesoos, Kauhas thiab Melalis. Lawv nyias puavleej muaj nyias tub thiab. Nkesoos yog Linpenis thiab Sime-is txiv; Kauhas yog Amelas, Ixehas, Henploos thiab Uxiyees txiv; thiab Melalis yog Mahelis thiab Musis txiv. Tagnrho cov no puavleej yog Levis cov xeebntxwv raws li lawv tej yawgkoob. Nkesoos cov xeebntxwv ib tiam dhau tiam muaj raws li no: Linpenis, Yahas, Ximas, Yau-as, Idaus, Zelas, Ye-athelais. Kauhas cov xeebntxwv ib tiam dhau ib tiam muaj raws li no: Aminadas, Kaulas, Axis, Ekanas, Enpi-axas, Axis, Tahas, Uliyees, Uxiyas, Sa-ules. Ekanas muaj ob tug tub: Amaxais thiab Ahimaus. Ahimaus cov xeebntxwv ib tiam dhau ib tiam muaj raws li no: Ekanas, Xaufais, Nahas, Eli-as, Yelauhas, Ekanas. Xamuyees muaj ob tug tub: Yau-ees yog tus tub hlob, Anpiyas yog tus tub yau. Melalis cov xeebntxwv ib tiam dhau ib tiam muaj raws li no: Mahelis, Linis, Sime-is, Uxahas, Sime-as, Hankiyas thiab Axaiyas. Ntawm no yog cov neeg uas Vajntxwv Daviv tsa los ua cov hu nkauj hauv tus TSWV lub Tuamtsev, tom qab uas coj lub Phijxab uas ntim Vajtswv tej lus cog tseg mus tso rau hauv lawm. Lawv ua cov hu nkauj nyob ntawm hauv ntej tus TSWV lub Tsevntaub sib ntsib mus txog thaum uas Vajntxwv Xalumoos ua tus TSWV lub Tuamtsev hauv lub nroog Yeluxalees tiav lawm; thiab lawv ua lawv tes haujlwm raws li tej kevcai uas twb muab cob rau lawv lawm. Ntawm no yog cov neeg uas ua haujlwm ntawd thiab lawv cov tub. Pib ntawm Kauhas mus: Yau-ees tus tub Hemas yog tus coj thawj pab hu nkauj. Suav nws cajces rov qab mus txog rau ntawm Yakhauj mas muaj raws li no: Hemas, Yau-ees, Xamuyees, Ekanas, Yelauhas, Eliyees, Tau-as, Xufas, Ekanas, Mahas, Amaxais, Ekanas, Yau-ees, Axaliyas, Xefaniyas, Tahas, Axis, Enpi-axas, Kaulas, Ixehas, Kauhas, Levis thiab Yakhauj. Axas yog tus coj pab ob hu nkauj. Suav nws cajces rov qab mus txog rau ntawm Levis mas muaj raws li no: Axas, Npelekhiyas, Sime-as, Mikhayees, Npa-axeyas, Makhiyas, Ethenis, Zelas, Adayas, Ethas, Xemas, Sime-is, Yahaj, Nkesoos thiab Levis. Ethas uas yog Melalis cuab kwvtij yog tus coj pab peb hu nkauj. Suav nws cajces rov mus txog rau ntawm Levis mas muaj raws li no: Ethas, Kisis, Anpedis, Malukhes, Hasanpiyas, Amaxiyas, Hilekiyas, Amexis, Npanis, Semes, Mahelis, Musis, Melalis thiab Levis. Tsa cov Levis ua haujlwm hauv lub tsevntaub uas yog Vajtswv lub tsev. Tiamsis Aloos thiab nws cov tub yog cov uas fij khoom rau saum lub thaj thiab muab tej hmoov tshuaj tsw qab coj mus hlawv fij rau saum lub thaj, vim lawv yog cov ua txhua yam haujlwm hauv Chav Dawbhuv kawg nkaus raws li tej lus uas Vajtswv tus tubtxib Mauxes tau samhwm tseg lawm. Cov no yog Aloos cov xeebntxwv: Ele-axas, Finehas, Anpisuas, Npukis, Uxis, Xelahiyas, Melayaus, Melaliyas, Ahitus, Xadaus thiab Ahima-as. Ntawm no yog cheebtsam av uas tu rau Aloos cov xeebntxwv uas yog Kauhas cajces. Lawv yog cov uas xub tau txais thawj cheebtsam av uas tu rau cov Levis. Lawv tau lub nroog Henploos uas nyob hauv xeev Yudas thiab tej cheebtsam uas muaj tshav tsiaj nyob ibncig lub nroog ntawd, tiamsis cov teb thiab tej zos uas nyob ibncig lub nroog ntawd twb yeej muab tu rau Yefunes tus tub Kalej lawm. nyob hauv cov Npeenyamees cheebtsam av lawv tu tau cov nroog no: Nkenpas nrog tej tshav tsiaj, Alemes nrog tej tshav tsiaj thiab Anathaus nrog tej tshav tsiaj. Tagnrho huv tibsi yog muaj kaum peb lub nroog rau lawv cov xeebntxwv nyob. Tu kaum lub nroog hauv cov Manaxes sab Hnubtuaj cheebtsam av rau Kauhas cov xeebntxwv nyob. Tu tau kaum peb lub nroog rau hauv xeem Ixakhas, Aseles, Nathalis thiab Manaxes cheebtsam av uas nyob hauv lub xeev Npasas rau Nkesoos cov xeebntxwv nyob raws li lawv tej cajces. Dua li ntawd, tseem tu tau kaum ob lub nroog hauv xeem Lunpees, xeem Khas thiab xeem Xenpuloos cheebtsam av pub rau Melalis cov xeebntxwv nyob raws li lawv tej cajces. Cov Yixalayees tu tej nroog nrog tej tshav tsiaj uas nyob ibncig tej nroog ntawd rau cov Levis nyob raws li uas hais los saum no lawm. ( Cov nroog uas nyob hauv xeem Yudas, Xime-oos thiab Npeenyamees cheebtsam av uas hais los saum no puavleej muab rho ntawv faib huv tibsi thiab.) Dua li ntawd, lawv tseem tu tau ib cov nroog hauv xeem Efalayees cheebtsam av rau Kauhas cov xeebntxwv ibtxhia tau nyob. Cov nroog cawm siav uas lawv tu ntawd yog lub nroog Sekhees uas nyob pem roob Efalayees, Nkexes, Yaumees, Npethes Hauloos, Aiyaloos thiab Nkaleemoos thiab tagnrho tej tshav tsiaj uas nyob ibncig tej nroog ntawd huv tibsi. Nyob hauv cov Manaxes sab Hnubpoob cheebtsam av, mas lawv tu lub nroog Anes thiab lub nroog Npile-as nrog tej tshav tsiaj uas nyob ibncig ntawd rau Kauhas cov xeebntxwv uas seem tau nyob. Tu cov nroog nrog tej tshav tsiaj uas nyob ibncig cov nroog ntawd li nram no rau Nkesoos cov xeebntxwv nyob. Nyob hauv cov Manaxes sab Hnubtuaj cheebtsam av, mas tu lub zos Nkaulas uas nyob hauv Npasas thiab Asetalus. Nyob hauv xeem Ixakhas cheebtsam av, mas tu lub nroog Kedes, Danpelas, Lamaus thiab Anes nrog tej tshav tsiaj uas nyob ibncig ntawd. Nyob hauv xeem Aseles cheebtsam av, mas tu lub nroog Masales, Adoos, Hukaus thiab Lehaus nrog tej tshav tsiaj uas nyob ibncig ntawd. Thiab nyob hauv xeem Nathalis cheebtsam av hauv lub xeev Kalilais, mas tu lub nroog Kedes, Hamoos thiab Kili-athayees nrog tej tshav tsiaj uas nyob ibncig ntawd. Dua li ntawd, tseem tu tau ib cov nroog uas muaj tej tshav tsiaj nyob ibncig tej nroog ntawd rau cov Melalis ibtxhia nyob raws li no: Nyob hauv xeem Xenpuloos cheebtsam av, mas tu lub nroog Limaunaus thiab Tanpaus. Nyob hauv xeem Lunpees cheebtsam av ntawm tus dej Yauladees sab hnubtuaj uas ncaj lub nroog Yelikaus sab tid, mas tu lub nroog Npexeles uas nyob hauv tiaj suabpuam, Yahexas, Kedemaus thiab Mefa-as nrog tej tshav tsiaj uas nyob ibncig ntawd. Nyob hauv xeem Khas cheebtsam av hauv cheebtsam Nkile-as, mas tu lub nroog Lamaus, Mahana-ees, Hesenpoos thiab Yaxes nrog tej tshav tsiaj uas nyob ibncig ntawd. Ixakhas muaj plaub tug tub: Taulas, Puahas, Yasus thiab Simeloos. Taulas muaj rau tus tub: Uxis, Lefayas, Yeliyees, Yamais, Yisas thiab Semuyees. Lawv puavleej yog cov thawjcoj ntawm Taulas tsevneeg, thiab lawv yog cov tubrog uas nto moo tshaj plaws. Thaum Vajntxwv Daviv tiam, lawv tej xeebntxwv huamvam coob heev muaj txog nees nkaum ob txhiab rau pua leej. Uxis muaj ib tug tub hu ua Ilahiyas. Ilahiyas muaj plaub tug tub: Mikhayees Aunpadiyas, Yau-ees thiab Isesiyas. Lawv puavleej yog cov thawjcoj ntawm lawv tej tsevneeg. Lawv muaj ntau tus pojniam thiab muaj menyuam coob heev, vim li ntawd lawv tej xeebntxwv thiaj muaj peb caug rau txhiab leej txivneej mus ua tubrog. Raws li tej ntaub ntawv uas luag teev tseg cia ntawd, xeem Ixakhas cov txivneej uas ua taus tubrog yog muaj yim caum xya txhiab leej. Npeenyamees muaj peb tug tub: Npelas, Npekhelis thiab Yedi-ales. Npelas muaj tsib tug tub: Exenpoos, Uxis, Uxiyees, Yelimaus thiab Ilis, lawv puavleej yog cov thawjcoj ntawm lawv tsevneeg thiab yog cov tubrog uas nto moo tshaj plaws. Suav tagnrho lawv cov txivneej uas ua taus tubrog muaj nees nkaum ob txhiab peb caug plaub leeg. Npekhelis muaj cuaj tug tub: Xemilas, Yau-ases, Eli-exes, Ele-aunais, Aumelis, Yelemaus, Anpiyas, Anathaus thiab Alimes. Tagnrho Npekhelis cov tub; raws li tej ntaub ntawv uas luag teev tseg cia ntawd, lawv tej tsevneeg cov txivneej uas ua taus tubrog muaj nees nkaum txhiab ob puas leej. Yedi-ales muaj ib tug tub hu ua Npilehas; Npilehas muaj xya tug tub: Ye-uses, Npeenyamees, Ehus, Khena-anas, Xethas, Talesis thiab Ahisahas. Lawv puavleej yog cov thawjcoj ntawm lawv cajces thiab yog cov tubrog uas nto moo tshaj plaws. Suav tagnrho lawv cov xeebntxwv, tej txivneej uas ua taus tubrog muaj kaum xya txhiab ob puas leej. Supees thiab Hupees yog Iles tub, hos Husees yog Ahelas tub. Nathalis muaj plaub tug tub: Yaxiyees, Nkunis, Yexeles thiab Salumes. (Lawv yog Npilehas cov xeebntxwv.) Manaxes ob tug tub yog Aliyees thiab Makhiles, nkawd yog nws tus niamyau uas yog neeg Alame-as yug; Makhiles yog Nkile-as txiv. Thiab Makhiles mus yuav tau ib tug pojniam los rau Hupees thiab ib tug los rau Supees. Nws tus muam hu ua Ma-akas. Makhiles tus tub uas yog tus ob hu ua Xelaufehas, nws muaj ib tug ntxhais xwb. Makhiles tus pojniam uas hu ua Ma-akas yug tau ob tug tub, tus tub hlob nws tis npe hu ua Peleses thiab tus tub yau nws tis npe hu ua Seleses. Peleses muaj ob tug tub hu ua Ulames thiab Lakees. Ulames tus tub hu ua Npedas. Lawv cov no puavleej yog Makhiles tus tub Nkile-as uas yog Manaxes tus tub cov xeebntxwv. Nkile-as tus muam uas hu ua Hamaulekhes muaj peb tug tub: Isaus, Anpi-exes thiab Mahelas. ( Semidas muaj plaub tug tub: Ahiyas, Sekhees, Likhis thiab Aniyas.) Efalayees cov xeebntxwv ib tiam dhau ib tiam muaj raws li no: Suthelas, Npeledis, Tahas, Ele-adas, Tahas, Xanpas, Suthelas. Efalayees muaj ob tug tub uas yau Suthelas hu ua Exeles thiab Ele-as, nkawd raug tua tuag rau thaum nkawd mus nyiag cov neeg hauv lub nroog Nkathas tej tsiaj lawm. Ces Efalayees uas yog nkawd txiv quaj nkawd tau ntau hnub, thiab nws cov kwvtij thiaj tuaj nplig nws siab. Ces Efalayees tus pojniam rov xeeb tub thiab yug tau ib tug tub; Efalayees tis tus tub ntawd lub npe hu ua Npeliyas, rau qhov kev puastsuaj tau los raug nws tsevneeg. Efalayees muaj ib tug ntxhais hu ua Se-elas, nws yog tug rhawv lub nroog Npethes Hauloos uas nyob Theem Siab, thiab lub nroog Uxes Selas uas nyob Theem Qis. Efalayees muaj dua ib tug tub hu ua Lefas, nws cov xeebntxwv muaj raws li no: Lesefas, Telas, Tahanes, Ladas, Amihus, Elisamas, Noos thiab Yausuas. Cheebtsam av uas yog lawv tug thiab lawv nyob yog xam lub nroog Npethees thiab tej nroog uas nyob ibncig lub nroog ntawd; sab hnubtuaj mus txog ntawm Na-alas, sab hnubpoob mus txog ntawm Nkexes, thiab tej nroog uas nyob ibncig ntawd. Dua li ntawd, tseem xam lub nroog Sekhees, lub nroog Aiyas thiab tej nroog uas nyob ibncig ob lub nroog ntawd. Manaxes cov xeebntxwv tus ciamteb txij ntua ntawm lub nroog Npethes Se-as, Ta-anas, Menkidaus, Daules thiab tej nroog uas nyob ibncig cov nroog no. Yakhauj tus tub Yauxej cov xeebntxwv puavleej yog cov uas nyob hauv cov nroog no thiab. Cov no yog Aseles cov xeebntxwv. Nws muaj plaub tug tub: Imenas, Isevas, Isevis, Npeliyas thiab ib tug ntxhais hu ua Xelas. Npeliyas muaj ob tug tub: Henpeles thiab Makhiyees. (Makhiyees yog tus uas mus rhawv lub nroog Npixa-is.) Henpeles muaj peb tug tub: Yafeles, Saumes thiab Hauthas; thiab muaj ib tug ntxhais hu ua Sua. Yafeles muaj peb tug tub: Paxas, Npihas thiab Asevas. Nws tus kwv Saumes peb tug tub yog Launkas, Yahunpas thiab Alas. Nws tus kwv Hauthas muaj plaub tug tub: Xaufas, Emenas, Seleses thiab Amas. Xaufas cov tub yog Xu-as, Hanefes, Sualis Npelis, Emelas, Npexeles, Haudas, Samas, Silesas, Ithelas thiab Npelaj. Yethes cov tub yog Yefunes, Pisepas, Alas, thiab Ulas cov tub yog Alas, Haniyees thiab Lizias. Tagnrho cov uas hais los saum no puavleej yog Aseles cov xeebntxwv xwb. Lawv yog cov thawjcoj ntawm lawv tsevneeg, yog cov tubrog uas nto moo, yog cov thawjcoj uas coj zoo thiab coj ncaj tshaj plaws. Suav tagnrho Aseles cov xeebntxwv uas ua taus tubrog muaj nees nkaum rau txhiab leej txivneej. Npeenyamees muaj tsib tug tub: Npelas yog tus tub hlob, Asenpees yog tus ob, Ahalas yog tus peb, Nauhas yog tus plaub thiab Lafas yog tus tsib. Npelas cov tub yog Adales, Nkelas, Anpihus, Anpisuas, Na-amas, Ahau-as, Nkelas, Sefufas thiab Hulas. Ye-uxes, Xakhias thiab Milemas. Nws cov tub puavleej yog cov thawjcoj ntawm lawv cajces. Thiab nws tseem muaj ob tug tub uas yog Husees yug hu ua Anpitus thiab Epa-as. Epa-as muaj peb tug tub: Enpes, Misas thiab Semes. Semes yog tus uas rhawv ob lub nroog Aunaus, Laudes thiab tej zos uas nyob ibncig ob lub nroog ntawd. Npeliyas thiab Semas yog ob tug thawjcoj ntawm cuab kwvtij uas nyob hauv lub nroog Aiyaloos thiab lawv muab cov neeg uas ibtxwm nyob hauv lub nroog Nkas ntiab khiav tas. Npeliyas cov xeebntxwv yog Ahi-aus, Sasas, Yelemaus, Xenpadiyas, Alades, Edeles, Mikhayees, Isepas thiab Yauhas. Epa-as cov xeebntxwv suav tagnrho Xenpadiyas, Mesulas, Hixekis, Henpeles, Isemelais, Ixeliyas thiab Yaunpaj. Sime-is cov xeebntxwv suav tagnrho Yakees, Xikhalis, Xanpedis, Eli-enais, Xilethais, Eliyees, Adayas, Npelayas thiab Simelas. Sasas cov xeebntxwv yog Isepas, Enpes, Eliyees, Adoos, Xikhalis, Hanas, Hananiyas, Elas, Athauthiyas, Ideyas thiab Penuyees. Yelauhas cov xeebntxwv suav tagnrho Saselais, Sehaliyas, Athaliyas, Yalisiyas, Eliyas thiab Xikhalis. Tagnrho lawv cov no puavleej yog cov thawjcoj ntawm lawv cajces raws li lawv tej yawgkoob uas ibtxwm nyob hauv lub nroog Yeluxalees. Ye-iyees yog tus rhawv lub nroog Nkinpe-oos thiab nyob rau hauv lub nroog ntawd. Nws tus pojniam hu ua Ma-akas, thiab nws tus tub hlob hu ua Adoos. Nws cov tub yau yog Xules, Kises, Npa-as, Neles, Nadas, Nkedaus, Ahi-aus, Xekales, thiab Mikelaus uas yog Sime-as txiv. Lawv cov xeebntxwv nyob hauv lub nroog Yeluxalees ze rau ntawm lawv cov kwvtij uas yog lawv xeem ntag. Neles yog Kises txiv, thiab Kises yog Vajntxwv Xa-ules txiv. Xa-ules muaj plaub tug tub: Yaunathas, Makhisuas, Anpinadas thiab Esenpa-as. Yaunathas yog Melinpa-as txiv, Melinpa-as yog Mikhas txiv. Mikhas cov tub yog Pithoos, Melej, Tale-as thiab Ahas. Ahas yog Yehauyadas txiv; thiab Yehauyadas yog Alemes, Axemaves thiab Ximelis lawv txiv. Ximelis yog Mauxas txiv. Mauxas yog Npine-as txiv, Npine-as tus tub yog Lafas, Lafas tus tub yog Ele-asas, Ele-asas tus tub yog Axees. Axees muaj rau tug tub: Alikas, Npaukhelus, Yisamayees, Se-aliyas, Aunpadiyas thiab Hanas. Axees tus kwv Esekis muaj peb tug tub: Ulames yog tus tub hlob, Ye-uses yog tus ob thiab Elifeles yog tus peb. Ulames cov tub yog cov tubrog uas muaj zog, siab tawv thiab tua hneevnti ncaj heev. Tagnrho nws cov tub thiab cov xeebntxwv muaj ib puas tsib caug leej. Cov uas hais tas los no puavleej yog xeem Npeenyamees nkaus xwb. Tagnrho cov Yixalayees puavleej sau npe raws li lawv tej tsevneeg, thiab tej no puavleej muab sau tseg rau hauv cov Yixalayees cov Vajntxwv Phau Ntawv uas teev lawm. Cov Yudas raug ntes coj mus rau tim tebchaws Npanpiloos twb yog vim lawv tej kev txhaum ntag. Thawj pab uas xub tau rov los nyob rau hauv lawv lub tebchaws thiab lawv tej nroog yog cov Yixalayees cov txwjlaug, cov povthawj, cov Levis thiab cov uas tu lub Tuamtsev. Cov Yudas, Npeenyamees, Efalayees thiab Manaxes, muaj ibtxhia tau rov los nyob rau hauv lub nroog Yeluxalees. Lawv cuab kwvtij uas yog tiam ntawd muaj cuaj pua tsib caug rau yim. Tagnrho cov txivneej no puavleej yog cov thawjcoj ntawm lawv tej tsevneeg. Cov povthawj uas yog thawjcoj ntawm lawv cajces yog muaj ib txhiab xya pua rau caum leej, lawv puavleej yog cov neeg uas txawj ua txhua yam haujlwm nyob rau hauv Vajtswv lub Tuamtsev. Cov zov lub Tuamtsev uas nyob hauv lub nroog Yeluxalees muaj raws li no: Salumes, Akus, Talemoos thiab Ahimas. Lawv tus thawjcoj yog Salumes. Lub sijhawm ntawd lawv ua vaj ua tsev nyob rau ntawm Vajntxwv lub Roojvag uas nyob sab hnubtuaj. Cov no yog cov uas zov roojvag ntawm cov Levis lub yeej. Kaules tus tub Salumes uas yog Enpi-axas tus xeebntxwv nrog nws cov kwvtij uas yog Kaulas cov xeebntxwv ua cov zov ntawm lub qhovrooj uas mus rau hauv lub Tsevntaub ib yam li thaud lawv tej yawgkoob ua cov saib tus TSWV lub yeej los lawm. Tus TSWV nrog nraim Ele-axas tus tub Fine-as, thiab yav tas los nws tau ua tus kav lawv ib zaug. Xakhaliyas uas yog Meselemiyas tus tub los kuj tau ua tus zov lub roojvag uas mus rau hauv tus TSWV lub Tsevntaub sib ntsib thiab. Tagnrho cov txivneej uas xaiv los zov cov qhovrooj thiab roojvag no muaj ob puas kaum ob leeg. Lawv mus sau npe rau hauv tej zos uas lawv nyob. Vajntxwv Daviv thiab tus Povthawj Xamuyees twb yeej tsa lawv cov yawgkoob ua cov tuav lub luag haujlwm no los lawm. Yog li ntawd, lawv thiab lawv tej xeebntxwv thiaj tau ua cov zov tus TSWV lub Tuamtsev tej roojvag. Tej roojvag ntawd muaj nyob sab qaumteb, sab qabteb, sab hnubtuaj thiab sab hnubpoob, thiab puavleej muaj neeg zov plaub lub roojvag ntawd huv tibsi. Cov zov roojvag no cov kwvtij uas nyob hauv lawv tej zos tuaj nrog lawv sib hloo zov kom xya hnub ib leeg zov ib zaug. Plaub tus thawj uas saib cov roojvag ntawd yog cov Levis thiab tseem tsa lawv ua cov saib tej chav tsev hauv Vajtswv lub Tuamtsev thiab saib tej khoom uas coj tuaj cia rau hauv huv tibsi. Lawv nyob ze Vajtswv lub Tuamtsev, rau qhov lawv tes haujlwm yog cov zov lub tuamtsev thiab qhib lub qhovrooj txhua tagkis sawv ntxov li. Tsa cov Levis ibtxhia ua cov saib tej khoom uas siv rau kev pehawm Vajtswv, vim lawv yuav tau suav tej khoom ntawd thaum muab rau luag coj mus siv thiab nqa rov qab los cia. Dua li ntawd, lwm pab yog tsa los ua cov saib tej khoom siv, tej khoom dawbhuv, tej tseem hmoov nplej, tej cawv txiv hmab, tej roj txiv ntoo, tej hmoov tshuaj tsw qab thiab tej ntoo tsw qab. Tiamsis cov uas tov tej tshuaj tsw qab, mas puavleej yog cov povthawj nkaus xwb. Muaj ib tug Levis npe hu ua Matithiyas, nws yog Salumes tus tub hlob thiab yog Kaulas cajces ua tus saib cov ncuav uas puab cub coj mus fij rau Vajtswv. Lawv cov kwvtij uas yog Kauhas cajces ua cov saib tej ncuav dawbhuv uas npaj coj mus fij rau hauv lub Tuamtsev txhua hnub Xanpataus. Cov no yog cov hu nkauj, lawv puavleej yog cov thawjcoj ntawm lawv tej tsevneeg, muab tej chav tsev hauv lub Tuamtsev rau lawv nyob, thiab lawv tsis ua lwm yam haujlwm dabtsi li, rau qhov lawv yeej ua lawv lub luag haujlwm nruab hnub thiab hmos ntuj tas mus li. Cov txivneej uas muaj npe hais los saum no puavleej yog cov thawjcoj ntawm cov Levis tsevneeg raws li lawv tej yawgkoob ntau tiam los lawm. Thiab lawv yog cov thawjcoj uas nyob hauv lub nroog Yeluxalees. Ye-iyees yog tus rhawv lub nroog Nkinpe-oos thiab mus nyob rau hauv lub nroog ntawd. Nws tus pojniam hu ua Ma-akas. Nws tus tub hlob hu ua Adoos thiab nws cov tub yau hu ua Xules, Kises, Npa-as, Neles, Nadas, Nkedaules, Ahi-aus, Xakhaliyas thiab Mikalaus, Mikalaus yog Sime-as txiv. Lawv tej xeebntxwv puavleej nyob hauv lub nroog Yeluxalees thiab nyob ze ntawm lawv cov kwvtij. Neles yog Kises txiv, Kises yog Xa-ules txiv, Xa-ules yog Yaunathas, Makhisuas, Anpinadas thiab Esenpa-as txiv; Yaunathas yog Melinpa-as txiv thiab Melinpa-as yog Mikhas txiv. Mikhas cov tub yog Pithoos, Melej, Tale-as thiab Ahas. Ahas yog Yalas txiv, Yalas yog Alemes, Axemaves thiab Ximelis txiv. Ximelis yog Mauxas txiv, Mauxas yog Npine-as txiv, Npine-as yog Lefayas txiv, Lefayas yog Ele-asas txiv thiab Ele-asas yog Axees txiv. Axees muaj rau tug tub: Alikas, Npaukhelus, Yisamayees, Se-aliyas, Aunpadiyas thiab Hanas. Cov Filitees tuaj tua cov Yixalayees saum lub roob Nkinpau-as. Cov Yixalayees tuag coob heev rau saud, cov uas seem tuag nyias khiav nyias mus lawm, Xa-ules thiab nws cov tub los khiav tas lawm thiab. Tiamsis cov Filitees mus caum ntes tau lawv thiab muab Xa-ules peb tug tub uas yog Yaunathas, Anpinadas thiab Makhisuas tua tuag tas. Muaj kev sib tua hnyav heev ibncig Xa-ules thiab yeebncuab thiaj tua xub hneevnti tuaj raug Xa-ules sab kawg li. Xa-ules hais rau tus tub hluas uas nqa nws cov cuabyeej ua rog hais tias, “Cia li rho koj rab ntaj los tua kuv kom tuag, xwv cov Filitees uas tsis ua kevcai txiav thiaj tsis khav hais tias yog lawv tua kuv tuag.” Tiamsis tus tub hluas ntawd ntshai heev, tsis muaj cuabkav ua li Xa-ules hais. Xa-ules thiaj rho hlo Xa-ules rab ntaj los cuab thiab qhau hlo nws lub cev mus npuj rab ntaj. Thaum tus tub hluas ntawd pom hais tias Xa-ules tuag lawm, nws txawm rho nws rab ntaj los cuab thiab qhau cev mus npuj rab ntaj chob nws tuag nrog Xa-ules lawm thiab. Yog li ntawd, Xa-ules thiab nws peb tug tub thiaj tuag ua ke, txij thaum ntawd los Xa-ules cov xeebntxwv tsis muaj ib tug tau los kav tebchaws li lawm. Thaum cov Yixalayees uas nyob hauv lub Hav Yexelees hnov hais tias cov tubrog khiav tas, Xa-ules thiab nws peb tug tub los raug luag tua tuag tas lawm, sawvdaws txawm khiav tso lawv tej nroog tseg; cov Filitees thiaj tuaj nyob hauv lawv tej nroog. Ces hnub tom qab cov Filitees txawm mus tshawb cov tubrog Yixalayees uas tuag tej khoom, lawv pom Xa-ules thiab nws peb tug tub tuag rau saum lub roob Nkinpau-as. Lawv txiav Xa-ules lub taubhau, hle nws cev ris tsho tooj thiab nws tej cuabyeej ua rog nqa mus, thiab txib neeg xa xov mus thoob plaws tebchaws Filitees, xa xov zoo mus rau lawv tej mlom thiab lawv tej neeg paub txhij txhua. Lawv nqa Xa-ules cov cuabyeej ua rog mus tso rau hauv lawv ib lub tuamtsev thiab muab Xa-ules lub taubhau mus dai rau hauv lub tuamtsev uas lawv teev lawv tus vajtswv Dankoos. Thaum cov neeg uas nyob ntawm lub nroog Yanpes hauv Nkile-as hnov tej uas cov Filitees ua rau Xa-ules ntawd, cov neeg uas siab tawv thiaj mus kwv Xa-ules thiab nws peb tug tub los rau hauv lub nroog Yanpes. Lawv coj Xa-ules thiab nws peb tug tub mus faus rau ntawm tsob qab ntoo qhib thiab lawv ua kevcai yoo mov tau xya hnub. Xa-ules tuag vim nws tsis muab siab npuab tus TSWV. Nws tsis coj raws li tus TSWV tej lus samhwm; nws mus cuag tej txivneeb txivyaig txheev kom cov neeg tuag lawm tej plig los qhia nws, nws tsis mus cuag tus TSWV li. Yog li ntawd, tus TSWV thiaj muab nws tua povtseg thiab muab lub tebchaws cob rau Yexais tus tub Daviv lawm. Tagnrho cov neeg Yixalayees thiaj tuaj cuag Daviv rau hauv lub nroog Henploos thiab hais rau nws hais tias, “Peb sawvdaws puavleej yog koj roj ntsha thiab nqaij tawv. Yav tas los, txawm yog Xa-ules yog peb tus vajntxwv los koj yeej yog tus uas coj cov Yixalayees mus ntaus rog xwb, thiab tus TSWV uas yog koj tus Vajtswv coglus rau koj kom koj yuav tsum ua tus coj nws haivneeg thiab ua tus kav lawv.” Yog li ntawd, cov Yixalayees cov thawjcoj tuaj cuag Vajntxwv Daviv hauv lub nroog Henploos. Daviv tau coglus nrog lawv, lawv muab roj hliv rau nws taubhau thiab tsa nws ua vajntxwv kav tebchaws Yixalayees raws li tus TSWV tau coglus rau Xamuyees lawm. Vajntxwv Daviv thiab tagnrho cov Yixalayees thiaj mus tua lub nroog Yeluxalees. Lawv yeej paub hais tias cov Yenpus yog cov uas nyob hauv, thiab cov Yenpus yog cov uas yeej ibtxwm nyob hauv lub nroog ntawd. Cov Yenpus hais rau Daviv hais tias, “Koj yuav txeem tsis tau los rau hauv no ib zaug li.” Tiamsis Daviv twb mus txeeb tau lub chaw fajxwm saum roob Xi-oos lawm, thiab muab qhov chaw ntawd hu ua “Daviv lub nroog.” Daviv hais tias, “Tus neeg twg yog tus xub tua yeej cov neeg Yenpus, tus ntawd yuav tau ua tus thawj tubrog.” Ces Xeluyas tus tub Yau-am txawm ua tus coj lawv mus ntaus yeej npluav rog ntawd thiab nws tau ua tus thawj tubrog. Vim Daviv tau mus nyob saum qhov chaw fajxwm ntawd thiaj muab qhov chaw ntawd tis npe hu ua “Daviv lub nroog.” Nws txhim kho lub nroog ntawd dua tshiab pib kiag ntawm Milus uas nyob sab hnub tuaj mus txog ntua ntawm taw roob, thiab Yau-am muab tej qhov uas puas lawm kho dua tshiab. Daviv muaj hwjchim heev zuj zus tuaj, rau qhov tus TSWV uas muaj hwjchim loj kawg nkaus nrog nraim nws. Ntawm no yog Daviv cov tubrog uas nto moo tej npe. Thiab tagnrho cov Yixalayees uas tuaj pab Daviv kom tau ua vajntxwv raws li tus TSWV tau coglus tseg thiab txhawb kom nws lub tebchaws ruaj khov. Thawj tug yog Yasaunpe-as uas yog cuab Hakhemoos ua tus thawj ntawm “Peb Leeg” nws muab nws rab hmuv nrog peb puas leej tubrog sib nkaug thiab nws muab lawv tua tuag tas rau hauv tshavrog. Tus ntxiv mus uas nto moo tshaj ntawm “Peb Leeg” no yog Daudaus tus tub Ele-axas uas yog cuab Ahaus. Nws tuaj Daviv tog nyob hauv lub tshavrog Pas Damees tua cov Filitees. Thaum uas cov Yixalayees tabtom khiav cov Filitees, nws nyob hauv ib thaj teb npleg. Yog li ntawd, nws thiab nws cov neeg thiaj sawv nres nroos hauv thaj teb tua cov Filitees. Tus TSWV pub rau nws muaj yeej loj kawg nkaus li. Muaj ib hnub peb leeg thawjcoj ntawm peb caug leej thiaj coj cov tubrog mus cuag Daviv rau nram lub roob zeb uas Daviv nkaum ze rau ntawm lub Qhov tsua Adulas, thaum uas cov Filitees tuaj tsuam yeej rau hauv lub Hav Lefayees. Lub sijhawm ntawd Daviv nyob saum lub ncov roob uas muaj ntsa yeej thaiv khov kho, thiab cov Filitees kav hlo hauv nroog Npelehees. Daviv nco tsev heev nws thiaj seev hais tias, “Yuav ua li cas kuv thiaj txib tau ib tug neeg mus ce cov dej hauv lub qhovtshij ntawm lub roojvag nroog Npelehees los rau kuv haus ne!” Ces peb tug tubrog uas nto moo tshaj ntawd thiaj khiav ceev heev mus phua plhawv cov Filitees lub yeej, mus ce cov dej hauv lub qhovtshij uas nyob ntawm lub roojvag nroog Npelehees, thiab nqa los rau Daviv. Tiamsis Daviv tsis kam haus cov dej ntawd; nws muab hliv fij rau tus TSWV, Daviv hais tias, “Thov kuv tus Vajtswv txwv tsis txhob pub kuv haus cov dej no! Puas tsimnyog kuv haus cov tshav uas yog cov neeg no txojsia? Vim lawv muab lawv txojsia mus pauv thiaj nqa tau cov dej no los.” Nws thiaj tsis kam haus cov dej ntawd. Tej no twb yog peb tus tubrog uas muaj cuabkav ntawd mus nqa tau los. Yau-am tus kwv Anpisais yog tus thawjcoj ntawm “Peb Caug Leej uas nto moo.” Nws tuav rawv nws rab hmuv nrog peb puas leej tubrog sib tua thiab nws muab lawv tua tuag tas huv tibsi. Ces nws thiaj yog tus uas nto moo tshaj ntawm “Peb Leeg” ntawd. Nws yog tus nto moo tshaj ntawm “Peb Caug Leej” thiab nws tau ua lawv tus thawjcoj, tiamsis nws tseem nto moo tsis npaum li “Peb Leeg” ntawd thiab. Yehauyadas tus tub Npenayas uas nyob hauv lub nroog Kaxees, nws yog ib tug tubrog uas nto moo heev; nws muaj siab tawv ua tau ntau yam zoo, nws tua ob tug tubrog Mau-am uas ua tau kawg nkaus ntawd tuag huv tibsi lawm. Muaj ib hnub uas los daus hlob heev los nws tseem nqis mus tua tau ib tug tsov ntxhuav hauv qhov av los thiab. Nws tseem tua ib tug neeg Iziv uas yog ib tug txivneej loj thiab siab tsib tshim, nws yog ib tug tubrog uas nqa rawv ib rab hmuv loj heev. Tiamsis Npenayas nqa rab qws ntoo mus ntaus nws thiab txeeb hlo tau nws rab hmuv ntawm nws tes los nkaug kiag nws tuag lawm. Npenayas yog ib tug uas muaj lub siab tawv heev ua tau tej no, nws yog ib tug ntawm “Peb Caug Leej.” Nws yog ib tug uas nto moo heev ntawm “Peb Caug Leej,” tiamsis nws tseem tsis nto moo npaum li “Peb Leeg” ntawd thiab. Daviv thiaj tsa nws ua tus thawj saib cov tubrog uas nrog nraim Daviv. Thaum Daviv tseem nyob hauv Xikelas, ntawm qhov chaw uas nws khiav mus nkaum Vajntxwv Xa-ules, muaj ntau tus tubrog uas txawj tua rog heev thiaj tuaj koom tes nrog nws nyob qhov ntawd. Lawv puavleej yog xeem Npeenyamees uas yog Xa-ules cov kwvtij. Lawv txawj tua hneevnti thiab txawj ntaus zes hlua kawg li, tsis hais sab tes xis lossis sab teslaug txawj ib yam nkaus. Cov no yog cov npe tubrog uas txawj tua rog thiab nto moo heev; lawv tuaj cuag Daviv thiab ua nws cov tubrog rau hauv tiaj suabpuam ntawm qhov chaw uas Daviv mus nkaum; lawv nqa rawv daim thaiv hniav ntaj thiab nqa rawv hmuv. Lawv tej ntsejmuag zoo li tsov ntxhuav, thiab khiav ceev npaum nkaus li sai khiav saum tej ncov roob. Exelas yog tus thawjcoj, Aunpadiyas yog tus ob, Eli-as yog tus peb, Misemanas yog tus plaub, Yelemis yog tus tsib, Atais yog tus rau, Eliyees yog tus xya, Yauhanas yog tus yim, Elexanpas yog tus cuaj, Yelemis yog tus kaum, Manpanais yog tus kaum ib. Tagnrho xeem Khas no muaj ibtxhia yog thawj tubrog qib siab saib ib txhiab leej, muaj ibtxhia yog cov thawj tubrog qib qis saib ib puas leej. Muaj ib xyoos thaum lub ib hlis ntuj uas tus dej Yauladees tabtom huam puv ntug nkaus, cov tubrog no thiaj hla mus rau sab tid thiab muab tej neeg faib mus nyob thoob plaws hauv tej hav ntawd, tsis hais nyob sab hnubtuaj thiab hnubpoob. Muaj ib pab txivneej uas yog xeem Npeenyamees thiab Yudas tuaj cuag Daviv rau ntawm lub chaw uas nws nkaum. Daviv tawm mus ntsib lawv thiab hais rau lawv hais tias, “Yog nej tuaj ua phoojywg rau kuv thiab pab kuv, kuv txaus siab tos txais nej. Tiamsis yog nej ntxeev siab thiab ua yeebncuab rau kuv, txawm yog kuv tsis ua rau nej raug mob dabtsi los thov kom peb cov yawgkoob tus Vajtswv pom thiab rau txim rau nej.” Ces Vajtswv tus ntsujplig txawm tswj kiag lawv cov ntawd ib tug lub siab, tus ntawd yog Amaxais uas tom qab no nws tau los ua tus thawj tubrog ntawm “Peb Caug Leej,” thiab nws tsa hlo suab hu hais tias: “Daviv uas yog Yexais tus tub, peb yog cov tuaj koj tog ntag! Vajtswv tuaj koj tog, thov kom koj thiab cov uas pab koj muaj yeej lauj!” Daviv Zoo siab hlo tos txais lawv thiab muab lawv tsa ua cov thawj ntawm nws cov tubrog. Xeem Manaxes muaj ibtxhia tubrog mus tuaj Daviv tog thaum Daviv nrog cov Filitees mus tua Vajntxwv Xa-ules. Tiamsis tsis yog nws mus pab cov Filitees, vim li ntawd lawv cov vajntxwv thiaj ntshai nyob tsam Daviv ntxeev siab rau lawv, coj lawv tej taubhau mus cob rau Xa-ules uas yog nws tus vajntxwv. Yog li ntawd, lawv thiaj xa Daviv rov qab mus rau tom Xikelas lawm. Cov no yog cov tubrog Manaxes uas mus cuag Daviv thiab tuaj nws tog, thaum nws rov qab los lawm: Adinas, Yauxanpas, Yedi-ales, Mikhayees, Yauxanpas, Elihus thiab Xilethais. Tagnrho cov Manaxes cov thawj tubrog no mas nyias muaj nyias pawg txhiab tubrog. Lawv tuaj ua Daviv cov tubrog pab nws tua cov rog tubsab, vim lawv yog cov tubrog uas muaj siab tawv heev, thiab lawv puavleej yog cov thawj tubrog. Txhua hnub yeej muaj neeg tshiab tuaj ua tubrog pab Daviv mus txog thaum uas muaj tubrog coob heev ib yam li Vajtswv cov tubrog lawm. Cov no yog tej pab tubrog coob heev uas tuaj cuag Daviv rau hauv lub nroog Henploos, thiab muab Xa-ules lub tebchaws los cob rau Daviv raws li tus TSWV tau coglus tseg lawm. Cov tubrog Yudas uas muaj daim thaiv hniav ntaj thiab hmuv muaj rau txhiab yim puas leej. Cov tubrog Xime-oos uas siab tawv heev muaj xya txhiab ib puas leej. Cov Levis muaj plaub txhiab rau puas leej. Yehauyadas uas yog tus thawj ntawm Aloos tsevneeg coj peb txhiab xya pua leej tubrog nrog nws. Xadaus yog ib tug tub hluas uas siab tawv heev; nws coj nees nkaum ob tug thawj tubrog uas yog nws cov kwvtij nrog nws. Cov Npeenyamees uas yog Xa-ules cov kwvtij muaj peb txhiab leej tubrog; cov no feem coob puavleej yog cov uas ibtxwm zov Xa-ules tsevneeg los lawm xwb. Cov Efalayees muaj nees nkaum txhiab yim pua leej; lawv puavleej yog cov tubrog uas siab tawv thiab yog cov txivneej uas nto moo heev ntawm lawv cov yawgkoob tsevneeg los lawm xwb. Ib nrab xeem Manaxes muaj kaum yim txhiab leej, lawv puavleej yog cov uas muaj npe tuaj tsa Daviv ua vajntxwv. Cov Ixakhas uas paub saib caij saib nyoog, paub txog tej yam uas cov Yixalayees yuav tsum tau ua, muaj ob puas leej thawjcoj, thiab tagnrho lawv cov kwvtij puavleej nyob qab tswjhwm ntawm lawv. Cov Xenpuloos muaj tsib caug txhiab leej tubrog puavleej yog cov uas txawj tua rog thiab paub siv tej cuabyeej ua rog tuaj pab Daviv ntawm lub siab ncaj ncees. Cov Nathalis muaj ib txhiab leej yog cov thawj tubrog thiab muaj peb caug xya txhiab leej tubrog uas muaj daim thaiv hniav ntaj thiab hmuv huv tibsi. Cov Das muaj nees nkaum yim txhiab rau puas leej tubrog uas yog cov kawm tiav kev tua rog los lawm. Cov Aseles muaj plaub caug txhiab leej tubrog uas npaj nroos mus sib tua. Cov Lunpees, cov Khas thiab ib nrab xeem Manaxes uas nyob ntawm tus dej Yauladees sab hnubtuaj muaj ib puas nees nkaum txhiab leej tubrog thiab kawm siv tej cuabyeej tua rog tiav huv tibsi lawm. Tagnrho cov tubrog uas muaj siab tawv no tau mus rau hauv lub nroog Henploos thiab tsa Daviv ua vajntxwv kav tebchaws Yixalayees. Thiab tagnrho cov Yixalayees los puavleej koom siab nrog huv tibsi. Lawv thiaj nrog Daviv nyob hauv lub nroog Henploos tau peb hnub, lawv noj tej zaub mov thiab haus tej dej uas yog lawv cov phoojywg pem tej roob mojsab nqa tuaj rau lawv noj. Xeem Ixakhas, Xenpuloos thiab xeem Nathalis uas tuaj pem qaumteb tuaj, lawv yeej npaj zaub mov uas yog tej hmoov nplej, txiv ncuavpias, txiv hmab qhuav, cawv txiv hmab thiab roj txiv ntoo, npaj tiav log rau lawv tej neesluav, ntxhuav thiab nyuj thauj tuaj. Thiab lawv tseem cab nyuj thiab yaj tuaj tua ua zaub noj huv tibsi. Tagnrho tej no puavleej yog cov neeg uas nyob hauv lub tebchaws Yixalayees txaus siab muab xwb. Vajntxwv Daviv tau sablaj nrog cov thawj tubrog uas saib pawg txhiab, pawg pua thiab tsoom thawjcoj. Ces nws txawm tshaj tawm rau cov Yixalayees hais tias, “Yog nej pom zoo thiab yog tus TSWV uas yog peb tus Vajtswv pom zoo, peb cia li tso neeg mus hu peb cov neeg uas nyob thoob plaws hauv tebchaws Yixalayees no, cov povthawj thiab cov Levis uas nyob hauv lawv tej nroog kom tuaj koom nrog peb ntawm no. Thiab peb yuav tsum tau mus kwv Vajtswv lub Phijxab rov los rau peb, vim thaum uas Xa-ules tseem ua vajntxwv peb muab tso tseg lawm.” Cov pejxeem sawvdaws pom zoo ua raws li tej lus uas Daviv hais ntawd thiab txaus siab kawg li. Yog li ntawd, Daviv thiaj sau tagnrho cov Yixalayees pib kiag nram Sihaules uas yog Iziv tus ciamteb mus txog ntua pem lub Dawm Hamas, kom mus kwv lub Phijxab uas ntim Vajtswv tej lus cog tseg hauv Kili-as Ye-alees los tso rau hauv lub nroog Yeluxalees. Ces Daviv thiab cov Yixalayees thiaj mus rau hauv lub nroog Npa-alas, mus rau ntawm lub nroog Kili-as Ye-alees hauv xeev Yudas thiab kwv Vajtswv lub Phijxab uas muaj tus TSWV lub npe nyob ntawm lub zwmtxwv hauv qab ob tug qhelunpees ob sab qab tis los. Lawv thiaj tsaws lub Phijxab uas ntim Vajtswv tej lus cog tseg hauv Anpinadas lub tsev los tso rau hauv ib lub tsheb nyuj tshiab, ces Uxahas thiab Ahi-aus nkawd ua ob tug tsav lub tsheb ntawd. Daviv thiab cov pejxeem dhia zoo siab kawg lawv lub zog qhuas Vajtswv. Lawv thiaj li hu nkauj, tshuab raj, ntaus nkauj nogncas, npuaj nruas thiab tshuab xyu ua Vajtswv tsaug taug kev los. Thaum lawv los txog rau ntawm lub tshav ntaus nplej ntawm Khidoos, nkawm heev nyuj txawm dawm ntog, Uxahas thiaj cev loo tes mus tuav nkaus lub phijxab uas ntim Vajtswv tej lus cog tseg. Tus TSWV chim thiab npautaws rau Uxahas thiab muab nws tua tuag, vim qhov uas nws cev tes mus tuav lub phijxab ntawd. Thiaj muab qhov chaw ntawd tis npe hu ua Peles Uxahas, txij thaum ntawd los txog niaj hnub no. Daviv chim heev, rau qhov tus TSWV chim thiab rau txim rau Uxas. Hnub ntawd Daviv ntshai Vajtswv heev nws thiaj nug hais tias, “Kuv yuav ua li cas kwv tau Vajtswv lub Phijxab no nrog kuv mus?” Yog li ntawd, Daviv thiaj tsis coj lub Phijxab ntawd nrog Daviv los rau hauv lub nroog Yeluxalees. Tiamsis nws muab tso tseg rau hauv ib tug txivneej hu ua Aunpes Edoos lub tsev, nws yog cov neeg uas nyob hauv lub nroog Nkas. Vajtswv lub Phijxab thiaj nyob tau peb hlis rau hauv Aunpes Edoos tsev, tus TSWV foom koob hmoov rau nws tsevneeg thiab txhua yam uas nws muaj. Vajntxwv Hilas uas kav lub nroog Tiles tau tso ib tug neeg uas saib phab kev lag luam tuaj cuag Daviv; nws thiaj muab tej ntoo ciab pub rau Daviv thiab tso nws tej neeg txawj txua ntoo mus ua Daviv lub loog huv tibsi. Daviv paub hais tias yog tus TSWV tsa nws ua vajntxwv kav tebchaws Yixalayees thiab ua kom nws lub tebchaws muaj kev vammeej, vim tus TSWV tshua txog nws haivneeg Yixalayees. Nyob hauv lub nroog Yeluxalees, Daviv kuj yuav tau ntau tus pojniam ntxiv nws thiaj muaj tub thiab muaj ntxhais coob. Daviv cov menyuam uas yug hauv lub nroog Yeluxalees muaj raws li no: Samuas, Saunpaj, Nathas, Xalumoos, Yihas, Elisuas, Epeles, Naunkas, Nefes, Yafias, Elisamas, Npeeli-adas, thiab Elifeles. Thaum cov Filitees hnov hais tias Daviv ua vajntxwv kav tebchaws Yixalayees lawm, ces lawv cov tubrog txawm tuaj puav ntes Daviv; thaum Daviv hnov li ntawd nws thiaj tawm mus nrog cov Filitees sib tua. Thaum cov Filitees tuaj txog rau hauv lub Hav Lefayees, lawv txawm pib huab noj huab haus hauv. Daviv nug Vajtswv hais tias, “Koj puas pom zoo cia kuv mus tua cov Filitees? Koj puas muab lawv cob rau kuv tes?” Tus TSWV teb Daviv hais tias, “Koj cia li mus tua! Kuv yuav muab lawv cob rau koj tes.” Ces Daviv mus rau hauv lub nroog Npa-as Pelaxees thiab tua yeej cov Filitees lawm; Daviv hais tias, “Vajtswv tau siv kuv ob txhais tes tsoo cov yeebncuab tawg ri sua mus ib yam li dej kuav.” Yog li ntawd, thiaj muab qhov chaw ntawd tis npe hu ua Npa-as Pelaxees. Thaum cov Filitees khiav lawm thiab tso lawv tej mlom tseg, Daviv thiaj txib nws cov tubrog mus sau los hlawv povtseg. Thaum cov Filitees rov mus txog hauv lub Hav Lefayees, lawv rov mus huab noj huab haus dua ntxiv. Daviv rov nug Vajtswv dua, Vajtswv teb hais tias, “Tsis txhob mus tua lawv nrad, tiamsis cia li mus puav thiab npaj tua lawv rau lwm qhov chaw uas nyob ze rau ntawm cov ntoo zaub kab. Thaum koj hnov tej suab neeg mus kev saum cov ntsis ntoo zaub kab, koj kavtsij nqis tes tua thaum ntawd ntag, vim Vajtswv twb ua koj ntej mus tua cov tubrog Filitees lawm.” Daviv ua raws li Vajtswv tau samhwm rau nws, ces lawv thiaj muab cov tubrog Filitees raws hauv Nkinpe-oos mus txog ntua hauv Nkexes. Daviv lub koob meej nrov ncha moo lug mus thoob plaws txhua lub tebchaws, thiab tus TSWV ua rau txhua haivneeg ntshai thiab hwm Daviv heev. Daviv ua tau ib co tsev rau hauv Daviv lub nroog rau nws nyob. Nws npaj tau ib qho chaw rau lub Phijxab uas ntim Vajtswv tej lus cog tseg thiab tsa ib lub tsevntaub vov rau. Ces Daviv hais tias, “Tsuas yog cov Levis xwb thiaj kwv tau lub Phijxab uas ntim Vajtswv tej lus cog tseg, rau qhov tus TSWV yeej xaiv lawv los kwv lub phijxab ntawd thiab ua nws tes haujlwm mus ibtxhis li.” Yog li ntawd, Daviv thiaj sau tagnrho cov neeg Yixalayees tuaj rau hauv Yeluxalees kom sib pab mus kwv tus TSWV lub Phijxab los tso rau ntawm qhov chaw uas nws npaj tseg cia rau lub phijxab. Thiab Daviv hais mus rau Aloos cov xeebntxwv thiab cov Levis li no: cuab Kauhas, Uliyees yog tus thawj, nws coj nws cov kwvtij ib puas nees nkaum leej tuaj; cuab Melalis, Axayas yog tus thawj, nws coj nws cov kwvtij ob puas nees nkaum leej tuaj; cuab Nkesoos, Yau-ees yog tus thawj, nws coj nws cov kwvtij ib puas peb caug leej tuaj; cuab Elixafas, Semayas yog tus thawj, nws coj nws cov kwvtij ob puas leej tuaj; cuab Henploos, Eliyees yog tus thawj, nws coj nws cov kwvtij yim caum leej tuaj; thiab cuab Uxiyees, Aminadas yog tus thawj, nws coj nws cov kwvtij ib puas kaum ob leeg tuaj. Daviv hu Xadaus thiab Anpiyathas uas yog ob tug povthawj thiab Uliyees, Axayas, Yau-ees, Semayas, Eliyees thiab Aminadas uas yog cov Levis rau tus thawjcoj los cuag nws. Daviv hais rau cov Levis hais tias, “Nej cov uas yog thawjcoj ntawm xeem Levis. Nej cia li ua kevcai ntxuav nej thiab nej cov kwvtij Levis kom huv, nej thiaj yuav mus kwv tau tus TSWV uas yog cov Yixalayees tus Vajtswv lub Phijxab los tso rau hauv qhov chaw uas kuv twb npaj tseg rau lub Phijxab lawm. Rau qhov thawj zaug nej tsis tuaj pab kwv, tus TSWV uas yog peb tus Vajtswv thiaj li rau txim rau peb, vim qhov peb tsis pehawm nws kom tsimnyog li peb yuav tsum tau ua.” Yog li ntawd, cov povthawj thiab cov Levis thiaj ua kevcai ntxuav kom lawv huv thiab mus kwv tus TSWV uas yog cov Yixalayees tus Vajtswv lub Phijxab los. Cov Levis thiaj tsaws hlo Vajtswv lub Phijxab ob tug nqaj kwv saum lawv xubpwg raws li tus TSWV tau samhwm tseg rau Mauxes lawm. Daviv hais rau cov thawj uas saib cov Levis kom xaiv lawv cov kwvtij ua cov hu nkauj thiab tshuab raj, ntaus nkauj nogncas thiab ntaus nruas npuaj, kom muaj suab nrov doog diaj lomzem zoo siab. Cov Levis thiaj xaiv tau Yau-ees tus tub Hemas, thiab nws cov kwvtij Axafes uas yog Npekhiyas tus tub, thiab Kusayas tus tub Ethas uas yog Melalis tus xeebntxwv. Thiab pab ob uas yog lawv cov kwvtij, Xakhaliyas, Yaziyees, Semilamaus Yehiyees, Unis, Eli-as, Npenayas, Ma-axeyas, Matithiyas, Elifelehus thiab Mineyas. Cov zov qhovrooj yog Aunpes Edoos thiab Ye-iyees. Cov coj hu nkauj yog Hemas, Axafes thiab Ethas, lawv puavleej npuaj nruas; Xakhaliyas, Axiyees, Semilamaus, Yehiyees, Unis, Eli-as, Ma-axeyas thiab Npenayas yog cov ntaus nkauj nogncas raws Alamaus ntag; tiamsis Matithiyas, Elifelehus, Mineyas, Aunpes Edoos, Ye-iyees thiab Axaxiyas ntaus tej nkauj nogncas yau thiab tej nkauj nogncas uas muaj kaum txoj hlua raws Seminis. Vim Khenaniyas txawj tshuab raj thiab ntaus nkauj nogncas heev, thiaj xaiv nws ua tus coj cov Levis tshuab raj thiab ntaus nkauj nogncas. Npelekhiyas thiab Ekanas ua ob tug zov qhovrooj ntawm lub tsevntaub uas tso lub Phijxab. Senpaniyas, Yausafas, Nethanees, Amaxais, Xakhaliyas, Npenayas thiab Eli-exes uas yog cov povthawj tshuab tej xyu ntawm Vajtswv lub Phijxab hauv ntej. Aunpes Edoos thiab Yehiyas yog ob tug zov qhovrooj ntawm lub Phijxab thiab. Vajntxwv Daviv thiab cov Yixalayees cov thawj thiab cov thawj tubrog uas saib pawg txhiab thiaj mus kwv tus TSWV lub Phijxab hauv Aunpes Edoos lub tsev los muaj kev lomzem zoo siab heev. Rau qhov Vajtswv pab cov Levis uas kwv tus TSWV lub Phijxab uas ntim Vajtswv tej lus cog tseg ntawd, lawv thiaj tua xya tus heev nyuj thiab xya tus laug yaj los ua khoom fij. Daviv hnav lub tsho ntev uas yog tseem ntaubmag ib yam li cov Levis uas kwv lub Phijxab, cov hu nkauj, thiab Khenaniyas uas yog tus thawj qhia lawv hu nkauj thiab tshuab raj ntaus nruas. Yog li ntawd, cov Yixalayees thiaj nrog lub Phijxab ua ke los rau hauv lub nroog Yeluxalees, muaj suab qw zoo siab, suab raj suab xyu thiab suab nruas npuaj nrov doog diaj los. Thaum lawv kwv lub Phijxab uas ntim Vajtswv tej lus cog tseg los txog rau hauv Daviv lub nroog lawm, Mikhas uas yog Xa-ules tus ntxhais saib ntawm qhovrai mus, nws pom Vajntxwv Daviv dhia seevcev thiab zoo siab heev; ces nws txawm luag Daviv thiab thuam Daviv hauv nws lub siab. Lawv mus kwv Vajtswv lub Phijxab los tso rau hauv lub tsevntaub uas Daviv npaj tseg rau lub Phijxab; lawv thiaj muab tsiaj tua hlawv fij thiab fij khoom ua kev sib raug zoo rau Vajtswv. Thaum uas Daviv hlawv khoom fij thiab fij khoom ua kev sib raug zoo tas lawm, nws thiaj tuav tus TSWV lub npe foom koob hmoov rau cov pejxeem, thiab nws muab tej zaub mov ntawd faib tagnrho rau lawv. Nws faib rau cov Yixalayees txhua tus, tsis hais pojniam lossis txivneej ib leeg ib lub ncuav, ib daim nqaij thiab mentsis txiv hmab qhuav. Daviv tsa cov Levis qee leej ua cov coj kev pehawm tus TSWV uas yog cov Yixalayees tus Vajtswv. Lawv nyob rau ntawm lub Phijxab hauv ntej ua tus TSWV tsaug thiab hu nkauj qhuas nws. Tsa Axafes ua tus thawjcoj, Xakhaliyas ua tus pab Axafes. Ye-iyees, Semilamaus, Yehiyees, Matithiyas, Eli-as, Npenayas, Aunpes Edoos, thiab Ye-iyees yog cov ntaus nkauj nogncas. Axafes yog tus npuaj lub nruas, Npenayas thiab Yahaxiyees yog ob tug povthawj uas tshuab raj tshuab xyu ntawm Vajtswv lub Phijxab hauv ntej txhua zaus. Ces hnub ntawd yog thawj hnub uas Daviv tsa Axafes thiab cov Levis los ua cov huv nkauj thiab ua tus TSWV tsaug ntag. Cia li txhawb nqa ua tus TSWV tsaug, cia li qhia nws tej haujlwm uas loj kawg nkaus; Qhia tej uas nws twb ua tiav tas los lawm rau txhua lub tebchaws paub. Hu nkauj txhawb nqa qhuas tus TSWV; qhia tej txujci tseemceeb uas nws ua tas los lawm rau sawvdaws. Cia li zoo siab uas peb yog nws tug; txhua tus cia li zoo siab pehawm nws. Cia li mus nrhiav tus TSWV uas muaj zog loj zog nchav; thiab pehawm nws tsis tseg tsis tu li. Nco ntsoov tej txujci tseemceeb uas nws tau ua tas los lawm, tej kev txiav txim uas nws muab cob rau nej, Yakhauj cov xeebntxwv yog Vajtswv cov tubtxib, Yixalayees cov xeebntxwv uas Vajtswv xaiv tseg lawm. Tus TSWV yog peb tus Vajtswv; nws cov lus samhwm muaj nyob thoob plaws hauv ntiajteb no. Yuav tsum nco ntsoov Vajtswv tej lus cog tseg mus ibtxhis, tej lus ntawd nws samhwm rau ntau txhiab ntau vam tiam neeg. Yog cov lus uas Vajtswv cog tseg rau Anplahas, thiab nws cog tseg rau Ixaj lawm, Tus TSWV tau coglus tseg rau Yakhauj, yog cov lus cog tseg uas nyob mus ibtxhis hais tias, “Kuv yuav muab lub tebchaws Kana-as pub rau koj, ua koj tug mus ibtxhis li.” Thaum lawv tseem tsis tau muaj coob, lawv yuav mus ua qhua nyob hauv lub tebchaws ntawd, mus ib lub tebchaws rau ib lub tebchaws, mus ib lub nroog rau ib lub nroog, tiamsis Vajtswv tsis pub leejtwg tsimtxom lawv, nws tiv thaiv lawv, nws thiaj tau txwv ntau tus vajntxwv hais tias, “Tsis txhob kov cov neeg uas kuv xaiv, tsis txhob ua rau kuv cov cevlus raug mob.” Tagnrho lub qab ntuj no cia li hu nkauj ua tus TSWV tsaug! Qhia nws txojkev cawm dim ib hnub dhau rau ib hnub. Tshaj tawm nws lub hwjchim uas ci ntsa iab rau txhua haivneeg, thiab nws tes haujlwm uas zoo kawg nkaus rau txhua tus neeg. Tus TSWV yog tus loj tshaj plaws, tsimnyog txhawb nqa nws rau qhov siab, thiab nws yog tus txaus ntshai tshaj tej timtswv huv tibsi. Txhua haivneeg tej vajtswv puavleej yog mlom xwb; tiamsis tus TSWV yog tus uas tsim lub ntuj. Muaj hwvxyeej thiab tshwjchim ci ntsa iab ibncig nws, lub hwjchim thiab kev zoo siab puv nkaus hauv nws qhov chaw nyob. Txhua tus neeg hauv ntiajteb no, cia li qhuas tus TSWV, qhuas nws lub tshwjchim thiab lub zog uas loj kawg nkaus. Qhuas tus TSWV uas muaj tshwjchim loj kawg nkaus lub npe; nqa tej khoom fij thiab tuaj cuag nws hauv nws lub Tuamtsev. Hnav tej ris tsho dawbhuv mus pehawm tus TSWV xwb. Tagnrho lub ntiajteb, cia li ntshai ua ibce tshee hnyo, lub ntiajteb nyob ruaj khov kho, thiab tsis txav li. Lub ntiajteb thiab lub ntuj, cia li zoo siab! Cia lawv hais rau txhua haivneeg hais tias, “Tus TSWV yog Vajntxwv.” Cia hiavtxwv thiab txhua tsav yam hauv hiavtxwv nyooj zoo siab; Cia tiaj nrag thiab txhua tsav yam hauv tej tiaj nrag zoo siab! Tej ntoo uas nyob hauv havzoov yuav hu nkauj zoo siab ntawm tus TSWV xubntiag, thaum nws nqis los txiav txim rau lub ntiajteb. Cia li ua tus TSWV tsaug, vim nws yog tus zoo tshaj plaws; Nws txojkev hlub nyob ruaj khov mus ibtxhis tsis kawg. Cia li hais rau Vajtswv hais tias, “Vajtswv, peb tus cawmseej, thov pab kom peb dim, thiab thov qaws peb los ua ke, cawm kom peb dim ntawm txhua haivneeg, peb thiaj tau ua koj tsaug thiab qhuas koj lub npe dawbhuv. Thov qhuas tus TSWV uas yog cov Yixalayees tus Vajtswv! Thov qhuas nws tamsim no thiab mus ibtxhis tsis kawg.” Ces tagnrho cov pejxeem hais tias, “Amees” thiab ua tus TSWV tsaug. Yog li ntawd, Vajntxwv Daviv thiaj tsa Axafes thiab Axafes cov kwvtij Levis nyob ntawm lub Phijxab uas ntim Vajtswv tej lus cog tseg. Lawv thiaj ua cov coj kev pehawm Vajtswv ntawm lub Phijxab hauv ntej txhua hnub. Dua li ntawd, Daviv tseem tsa Yeduthoos tus tub Aunpes Edoos thiab nws cov kwvtij rau caum yim leej ua cov pab lawv thiab. Aunpes Edoos thiab Yaxas ua ob tug zov qhovrooj. Daviv muab tus povthawj Xadaus thiab Xadaus cov kwvtij uas yog povthawj ua cov saib kev pehawm tus TSWV ntawm qhov chaw uas pehawm Vajtswv hauv lub nroog Nkinpe-oos, thiab lawv muab khoom fij mus hlawv rau saum lub thaj fij rau tus TSWV txhua tagkis sawv ntxov thiab thaum yuav tsaus ntuj, raws li txoj kevcai uas tus TSWV sau tseg cia rau cov Yixalayees lawm. Cov uas nrog lawv nyob yog Hemas, Yeduthoos thiab muaj ibtxhia yog cov uas xaiv cia hu nkauj qhuas tus TSWV uas muaj txojkev hlub mus ibtxhis. Hemas thiab Yeduthoos yog ob tug saib cov raj xyu, cov nruas npuaj thiab lwm yam nkauj nogncas uas ntaus nrog suab hu nkauj qhuas tus TSWV. Tsa Yeduthoos tsevneeg txhua tus ua cov zov tej roojvag. Ces cov pejxeem nyias txawm rov mus nyias tsev lawm. Daviv rov qab los tsev thiab los foom koob hmoov rau nws tsevneeg. Thaum Vajntxwv Daviv los nyob hauv nws lub loog lawm. Muaj ib hnub nws txawm xa xov mus rau Nathas tus uas cev Vajtswv lus hais tias, “Nimno kuv nyob hauv lub tsev uas muab ntoo ciab ua lawm, tiamsis lub Phijxab uas ntim Vajtswv tej lus cog tseg tseem nyob hauv lub tsevntaub xwb!” Nathas thiaj hais rau Daviv hais tias, “Koj cia li ua txhua yam raws li koj lub siab xav, vim Vajtswv yeej nrog nraim koj.” Tiamsis hmo ntawd Vajtswv los hais rau Nathas hais tias, “Koj cia li mus hais rau kuv tus tubtxib Daviv hais tias tej lus no yog kuv hais rau nws, ‘Koj tsis yog tus uas yuav ua lub Tuamtsev rau kuv nyob. Txij thaum kuv coj cov Yixalayees tawm nram tebchaws Iziv los txog tamsim no, kuv yeej ibtxwm tsis tau nyob hauv lub tuamtsev li; kuv tsuas nyob hauv lub tsevntaub uas tshais ib qho mus rau ib qho xwb. Thaum kuv tseem nrog cov Yixalayees taug kev tsiv mus rau ub rau no, kuv tsis tau taij cov thawjcoj uas kuv tsa ntawd hais tias, vim li cas nej tsis muab ntoo ciab los ua lub tuamtsev rau kuv nyob?’ “Yog li ntawd, koj cia li mus hais rau kuv tus tubtxib Daviv hais tias kuv yog tus TSWV, tus uas muaj hwjchim loj kawg nkaus, kuv hais tej lus no rau nws ntag, ‘Kuv tau coj koj tawm hauv pab yaj uas nyob tom tshav zaub los thiab tsa koj ua tus kav kuv haivneeg Yixalayees; Kuv tsomkwm koj txhua txoj haukev uas koj mus, kuv tau txov koj cov yeebncuab tabmeeg koj; thiab kuv yuav tsa koj ua ib tug thawjcoj uas muaj koob meej tshaj plaws nyob hauv qab ntuj no. Kuv yuav xaiv ib thaj chaw rau kuv haivneeg Yixalayees nyob thiab yuav coj lawv mus nyob hauv qhov chaw ntawd kom lawv thiaj tsis raug kev txomnyem, thiab cov neeg limhiam thiaj yuav tsis tuaj tsimtxom lawv ntxiv li yav tas los, thiab txij li thaum uas kuv pib tsa muaj cov thawjtswj los kav kuv haivneeg Yixalayees; thiab kuv txov koj cov yeebncuab puastsuaj tas. Dua li ntawd, kuv qhia rau koj paub hais tias tus TSWV yuav pub kom koj cajces huamvam coob heev. Thaum koj tuag yuav coj koj mus faus nrog koj cov yawgkoob, kuv yuav tsa koj cov tub ib tug los ua vajntxwv, thiab kuv yuav txhim kho kom nws lub tebchaws ruaj khov. Nws yuav ua lub tuamtsev rau kuv, thiab kuv yuav txhawb kom nws lub zwmtxwv nyob mus ibtxhis. Kuv yuav ua nws txiv thiab nws yuav tau ua kuv tus tub; kuv yuav tsis tshem kuv txojkev hlub tawm ntawm nws li uas kuv tau tshem tawm ntawm Xa-ules lawm kom koj thiaj tau ua vajntxwv. Tiamsis kuv yuav tsa nws ua tus saib kuv haivneeg thiab kuv lub tebchaws mus ibtxhis, thiab nws lub zwmtxwv yuav nyob mus ibtxhis tsis paub kawg li.’ ” Nathas thiaj hais txhua yam raws li Vajtswv tau qhia ntawd rau Vajntxwv Daviv mloog. Ces Vajntxwv Daviv thiaj mus rau hauv lub Tsevntaub thiab zaum tabmeeg tus TSWV thov hais tias, “Tus TSWV uas yog Vajtswv, kuv yog leejtwg thiab kuv tsevneeg tseemceeb npaum li cas, koj thiaj coj peb los txog niaj hnub no? Txawm yog koj twb ua ntau yam pub rau kuv lawm los koj tseem coglus tseg rau kuv tej xeebntxwv yav tom ntej ntev mus tsis kawg li; thiab tus TSWV uas yog Vajtswv, koj tseem txhawb kuv zoo li kuv yog tus neeg uas muaj meejmom siab. Tseem tshuav dabtsi uas kuv yuav thov ntxiv thiab? Koj yeej paub kuv zoo, thiab koj muab kuv uas yog koj tus tubtxib saib rau nqi kawg li. Tus TSWV, vim kuv yog koj tus tubtxib, koj thiaj li ua ntau yam rau kuv raws li koj siab nyiam, thiab ua rau kuv paub ntau yam tseemceeb txog yav tom ntej. Tus TSWV, yeej tsis muaj lwm tus zoo npaum li koj; peb tsuas paub koj tib leeg xwb thiaj yog Vajtswv. Tsis muaj ib haivneeg twg nyob hauv ntiajteb no zoo npaum li koj haivneeg Yixalayees, cov uas koj tau cawm dim ntawm txojkev ua luag qhev los ua koj haivneeg. Yam tseemceeb thiab zoo tshaj plaws uas koj tau ua rau lawv no nrov ncha mus thoob plaws hauv lub ntiajteb no lawm. Koj tau cawm koj haivneeg dim nram tebchaws Iziv los thiab muab lwm haivneeg ntiab tawm tabmeeg koj haivneeg. Koj tau xaiv haivneeg Yixalayees los ua koj haivneeg mus ibtxhis, thiab koj yog tus TSWV, koj yeej yog lawv tus Vajtswv tiag. “Tus TSWV, nimno thov kom tej lus uas koj cog tseg rau koj tus tubtxib thiab nws cov xeebntxwv nyob mus ibtxhis thiab thov ua kom tiav raws li koj tau hais tseg lawm. Koj lub koob lub npe yuav nrov ncha moo lug, thiab noobneej yuav qhuas koj mus ibtxhis hais tias, ‘Tus TSWV uas muaj hwjchim loj kawg nkaus yog tus Vajtswv uas kav cov Yixalayees.’ Thiab koj yuav pub kom koj tus tubtxib Daviv cajces nyob ruaj khov ntawm koj xubntiag mus ibtxhis. Kuv tus Vajtswv, vim koj tau qhia txhua yam no rau kuv uas yog koj tus tubtxib, thiab koj tau hais tias koj yuav tsa kuv cov xeebntxwv los ua vajntxwv, kuv thiaj muaj lub siab kub lug thov koj. Tus TSWV, koj yeej yog Vajtswv tiag, thiab koj tau coglus zoo kawg nkaus rau kuv uas yog koj tus tubtxib. Kuv thov koj foom koob hmoov rau kuv cov xeebntxwv kom lawv muaj lub siab npuab koj mus ibtxhis. Tus TSWV, tej koob hmoov uas koj foom rau lawv thiab koj tej koob hmoov ntawd yuav nrog lawv nyob mus ibtxhis tsis kawg li.” Tau ib ntus tom qab no Vajntxwv Daviv mus ua rog rau cov Filitees dua ib zaug ntxiv thiab nws tua yeej lawv. Nws thiaj txeeb tau lub nroog Nkas thiab tej zos uas nyob ibncig lub nroog loj ntawm cov Filitees tes los. Thiab nws tseem mus tua yeej cov Mau-am huv tibsi, cov neeg Mau-am thiaj tau ua nws qhev thiab them se rau nws. Daviv tseem mus tua yeej cov Xilias tus Vajntxwv Hadadexes uas kav lub xeev Xaunpas uas nyob ze rau ntawm cheebtsam Hamas, rau qhov Hadadexes xav ua tus kav tagnrho cheebtsam ntawm tus dej Efalates sab ped. Daviv ntes tau Hadadexes ib txhiab lub tsheb nees ua rog, xya txhiab leej tubrog caij nees thiab nees nkaum txhiab leej tubrog mus taw. Nws muab cov nees ntawd ibtxhia txo leeg raws, nws tsuas tseg kom txaus nkaus luag ib puas lub tsheb xwb. Thaum cov Xilias uas nyob hauv lub nroog Damaxes xa ib co tubrog tuaj pab Vajntxwv Hadadexes hauv lub nroog Xaunpas, tiamsis pab tubrog ntawd raug Daviv lawv muab tua tuag lawm nees nkaum ob txhiab leej. Ces Daviv thiaj mus tsuam yeej rau hauv cov Xilias lub nroog Damaxes, cov Xilias thiaj ua Daviv qhev thiab them se rau nws. Tus TSWV pub rau Daviv tua yeej rog txhua qhov uas nws mus huv tibsi. Daviv tseem txeeb tau Hadadexes cov tubrog tej thaiv hniav ntaj uas muab kub ua thiab muab nqa huv tibsi los rau hauv lub nroog Yeluxalees lawm. Daviv tseem coj tau tej tooj dag ntau heev hauv lub nroog Tinpehas thiab lub nroog Kunes uas Hadadexes kav los thiab. (Tom qab no Xalumoos thiaj muab cov tooj dag ntawd los ua lub rhawv dej, ob tug ncej thiab tej twj taig uas siv hauv lub Tuamtsev.) Thaum Vajntxwv Tau-is uas kav lub nroog Hamas hnov hais tias Daviv mus tua yeej tagnrho Hadadexes cov tubrog lawm, nws thiaj tso nws tus tub Yaulas mus hawm Vajntxwv Daviv thiab qhuas tej uas Daviv tua yeej Vajntxwv Hadadexes, tus uas kav lub xeev Xaunpas uas tau ua rog ntau zaus rau Tau-is los lawm. Yaulas thiaj coj kub, nyiaj thiab tooj dag ntau heev tuaj pub rau Daviv. Vajntxwv Daviv muab tej nyiaj, tej kub uas nws mus tua yeej cov Edoos, cov Mau-am, cov Filitees thiab cov Amalej uas nws nqa los ntawd coj tuaj fij rau Vajtswv. Anpisais uas nws niam hu ua Xeluyas tau mus tua yeej cov Edoos uas nyob hauv lub Hav Ntsev thiab muab lawv tua tuag tas lawm kaum yim txhiab leej. Nws thiaj ua tau ib lub yeej rau nws cov tubrog nyob hauv tebchaws Edoos; thiab tagnrho cov neeg Edoos puavleej tau ua Daviv qhev. Tus TSWV pub rau Daviv tua yeej rog txhua qhov uas Daviv mus huv tibsi. Daviv kav tagnrho cov Yixalayees; thiab nws muaj kev tswjhwm ncaj ncees rau nws haivneeg. Xeluyas tus tub Yau-am uas yog Anpisais tus tijlaug ua tus thawj tubrog; Ahilus tus tub Yehausafas ua tus teev ntawv; Ahitus tub tus Xadaus thiab Ahimelej tus tub Anpiyathas ua ob tug povthawj; thiab Xelayas ua tus teev ntawv; Yehauyadas tus tub Npenayas ua tus thawj saib cov tubrog uas zov Daviv; thiab Vajntxwv Daviv cov tub puavleej yog cov nomtswv qib siab ntawm Daviv xubntiag. Tom qab uas Vajntxwv Nahases uas kav cov Amoos tuag lawm, nws tus tub Hanoos ua vajntxwv hloov nws chaw. Vajntxwv Daviv hais tias, “Kuv yuav tau muab siab npuab thiab ua phoojywg zoo rau Nahases tus tub Hanoos, vim nws txiv Nahases tau ua phoojywg zoo heev rau kuv los lawm.” Yog li ntawd, Daviv thiaj tso ib cov neeg mus nplig nws siab vim hlub tshua txog nws txiv. Thaum Daviv cov neeg mus txog hauv tebchaws Amoos, lawv txawm mus cuag Vajntxwv Hanoos thiab nplig nws siab, tiamsis cov neeg Amoos tej thawjcoj txawm hais rau Vajntxwv Hanoos hais tias, “Koj xav hais tias Daviv tso cov neeg no tuaj nplig koj siab, vim nws hwm koj txiv no los? Tsis yog li ntawd! Nws tso lawv tuaj soj xyuas thoob plaws lub tebchaws no kom nws thiaj tuaj tua yeej lub tebchaws no xwb!” Hanoos muab Daviv cov neeg chais hwjtxwv, muab lawv tej tsho ntev txiav txog ntua ntawm pobtw, thiab nws muab lawv ntiab rov los. Lawv txajmuag heev rov qab los tsev. Thaum Daviv hnov tej xwmtxheej no, nws thiaj txib neeg mus hais rau lawv hais tias, “Nej los nyob twjywm hauv lub nroog Yelikaus mus txog thaum nej tej hwjtxwv rov ntev li qub, nej mam los tsev.” Ces Vajntxwv Hanoos thiab cov Amoos paub hais tias, lawv ua rau Daviv chim lawm mas Daviv yuav ua yeebncuab rau lawv. Yog li ntawd, lawv thiaj muab yuav luag plaub tas nyiaj mus ntiav tau ib cov tsheb nees thiab tubrog tsav tsheb nees pem tebchaws Mexuputamias thiab cov Xilias uas nyob hauv lub xeev Ma-akas thiab Xaunpas tuaj. Mas peb caug ob txhiab lub tsheb nees uas lawv ntiav, thiab cov Ma-akas tus vajntxwv nrog nws cov tubrog tuaj tsuam yeej ze rau ntawm Medenpas. Thiab cov Amoos mus tsuam yeej thoob plaws rau hauv lawv tej nroog npaj nroos tos sib tua lawm xwb. Thaum Daviv hnov tej xwmtxheej no, nws txawm tso Yau-am thiab tagnrho cov tubrog uas muaj zog heev tawm mus. Cov Amoos tawm tuaj nyob puv nkaus rau ntawm lawv tej chaw sib tua uas yuav mus rau hauv lub nroog Lanpas uas yog lawv lub tuamceeb nroog, thiab cov vajntxwv uas tuaj pab lawv los tuaj nyob tagnrho rau ntawm tej roob mojsab. Yau-am pom cov yeebncuab tej tubrog uas tuaj tua nws sawv nplawg ntia tom hauv ntej thiab tom qab. Yog li ntawd, nws thiaj xaiv cov tubrog Yixalayees uas txawj tua rog heev thiab tso lawv mus nyob txum chaw tim ntsej tim muag cov Xilias. Nws muab nws cov tubrog uas seem rau nws tus kwv Anpisais ua tus coj, Anpisais coj lawv mus nyob txum chaw tim ntsej tim muag cov Amoos. Yau-am hais rau nws tus kwv hais tias, “Yog thaum twg koj pom cov Xilias tua yeej kuv, ces koj cia li los pab kuv, thiab yog cov Amoos tua yeej koj, ces kuv los pab koj. Cuab zog khov kho thiab ua siab tawv qhawv xwb! Cia li nqis tes tua tiag tiag pub rau peb cov neeg thiab peb tus Vajtswv lub nroog. Thiab thov kom tus TSWV ua raws li nws pom zoo.” Yog li ntawd, Yau-am thiab nws cov neeg thiaj nam zog mus tua cov Xilias, ces cov Xilias cia li tawg khiav ri sua lawm. Thaum cov Amoos pom cov Xilias tawg khiav ri sua, ces lawv txawm khiav tsis tiv tua Anpisais lawv thiab khiav rov qab mus rau hauv nroog tas li lawm. Ces Yau-am lawv txawm rov los rau hauv lub nroog Yeluxalees. Tiamsis thaum cov Xilias pom hais tias lawv tua tsis yeej cov Yixalayees lawm, lawv thiaj tso neeg mus coj cov tubrog Xilias uas nyob hauv lub xeev ntawm tus dej Efalates sab hnub tuaj, thiab coj lawv tuaj cob rau Saunpakhis uas yog Vajntxwv Hadadexes uas kav lub xeev Xaunpas tus thawj tubrog saib. Thaum Daviv hnov tej no nws txawm txhij cov tubrog Yixalayees mus sib sau ua ke thiab hla tus dej Yauladees rau sab tim ub, thiab lawv mus nyob txum chaw tim ntsej tim muag cov Xilias. Ces lawv txawm nqis tes sib tua, thiab cov Yixalayees muab cov Xilias tej tubrog caum tawg ri rws rov qab lawm. Daviv thiab nws cov neeg tua cov tubrog Xilias tsav tsheb nees tuag lawm xya txhiab leej thiab cov tubrog mus taw tuag lawm plaub caug txhiab leej. Thiab lawv tseem tua tau cov Xilias tus thawj tubrog Saunpakhis lawm thiab. Thaum cov vajntxwv uas tuaj Hadadexes tog paub hais tias lawv swb cov Yixalayees lawm, lawv txawm cog phoojywg nrog Daviv thiab zoo siab cia Daviv ua tus tswjhwm lawv. Yog li ntawd, cov Xilias thiaj tu siab nrho tsis kam pab cov Amoos ib zaug ntxiv li lawm. Thaum txog lub caij nplooj ntoos hlav uas yog lub sijhawm cov vajntxwv pheej tawm mus tua rog, Yau-am txawm coj cov tubrog tawm mus tua cov Amoos lub tebchaws thiab los puav lub nroog Lanpas. Tiamsis Vajntxwv Daviv tseem nyob hauv lub nroog Yeluxalees. Lawv mus puav lub nroog Lanpas thiab muab lub nroog ntawd tua puastsuaj tas huv tibsi lawm. Cov Amoos tus mlom Maulej muaj ib lub kausmom kub hnyav kwvyees li xya caum tsib choj. Muaj ib lub hlaws dai rau saum lub kausmom ntawd, Daviv thiaj daws lub hlaws ntawd los dai rau saum nws lub kausmom kub. Thiab nws tseem nqa tej khoom uas lawv huab tau hauv lub nroog ntawd ntau heev los thiab. Daviv coj cov neeg uas nyob hauv lub nroog ntawd los, thiab nws muab kaw, muab hlau thiab muab taus rau lawv, yuam kom lawv mus ua haujlwm. Daviv ua li no rau cov Amoos txhua lub nroog. Ces Daviv thiab nws cov tubrog txawm rov los tsev rau hauv lub nroog Yeluxalees lawm. Tau tsis ntev los tom qab no, rov muaj kev ua rog nrog cov Filitees ib zaug ntxiv ntawm lub nroog Nkexes; ces Xinpekais uas nyob hauv lub nroog Husas thiaj tua tau Xipais uas yog cajces ntawm cov neeg loj heev ntawd; thiaj ua rau cov neeg Filitees swb hlo lawm. Tom qab no rov qab ua rog nrog cov Filitees dua ib zaug ntxiv, ces Yailes tus tub Ehanas thiaj tua tau Lamis uas yog Nkauli-am tus kwv uas tuaj hauv lub nroog Nkas tuaj tuag kiag. Lamis muaj ib tug hmuv lub vos dav ib yam li lub nqos tos ntaub. Dhau ntawd los rov ua rog dua ib zaug ntxiv nyob ntawm lub nroog Nkas, nyob rau hauv muaj ib tug neeg loj heev, nws ib sab tes twg muaj rau tus ntivtes thiab ib sab taw twg muaj rau tus ntivtaw. Thiab nws yog cajces ntawm cov neeg uas loj heev. Nws tau tuam mom cov Yixalayees, ces Daviv tus tijlaug Samas tus tub Yaunathas thiaj muab nws tua tuag lawm. Peb tug neeg uas raug Daviv thiab nws cov neeg tua tuag ntawd puavleej yog xeebntxwv ntawm cov neeg loj heev uas ibtxwm nyob hauv lub nroog Nkas. Ntxwgnyoog nrhiav kev tawmtsam cov Yixalayees, yog li ntawd, nws thiaj tshoov Daviv siab kom suav cov Yixalayees. Daviv thiaj hais rau Yau-am thiab cov thawj tubrog hais tias, “Nej mus suav cov Yixalayees uas nyob thoob plaws hauv lub tebchaws, pib kiag ntawm lub nroog Npesenpas mus txog ntua pem lub nroog Das, thiab rov los qhia rau kuv paub saib muaj npaum li cas tiag.” Yau-am thiaj teb hais tias, “Thov kom nimno tus TSWV ua rau cov Yixalayees muaj coob tshaj li ib puas npaug ntxiv! Kuv tus Vajntxwv, cov pejxeem no puavleej yog koj cov tubtxib xwb! Vim li cas koj xav kom ua tej no thiab ua rau sawvdaws muaj txim?” Tiamsis vajntxwv yuam kom Yau-am cia li ua raws li vajntxwv tej lus samhwm xwb. Yog li ntawd, Yau-am thiaj li mus ncig thoob plaws lub tebchaws Yixalayees, nws rov los rau hauv lub nroog Yeluxalees. Yau-am los tshabxo rau Vajntxwv Daviv hais tias, cov Yixalayees muaj ib plhom ib puas txhiab leej yog cov txivneej uas muaj zog khov kho thiab ua taus tubrog; cov Yudas muaj plaub puas xya caum txhiab leej. Vim Yau-am tsis pom zoo ua raws li vajntxwv tej lus samhwm, nws thiaj tsis tau mus suav xeem Levis thiab xeem Npeenyamees. Vajtswv tsis txaus siab rau tej haujlwm uas lawv ua tas los ntawd, nws thiaj rau txim rau cov Yixalayees. Daviv thiaj thov Vajtswv hais tias, “Kuv yeej tau ua txhaum loj heev lawm tiag lauj! Thov zam txim rau kuv uas yog koj tus tubtxib. Kuv tau ua tej haujlwm uas ruam kawg nkaus li.” Ces tus TSWV hais rau Nkas uas yog Daviv tus cevlus hais tias, “Koj cia li mus qhia rau Daviv hais tias, ‘Kuv yuav muab peb yam rau nws xaiv. Nws xaiv yam twg kuv yuav muab yam ntawd rau nws.’ ” Yog li ntawd, Nkas thiaj mus cuag Daviv thiab piav tej uas tus TSWV hais rau nws lawm rau Daviv mloog thiab nug Daviv hais tias, “Xaiv saib koj yuav yam twg? Raug kev tshaib plab peb xyoos? Lossis khiav koj cov yeebncuab tej tubrog peb hlis? Lossis cia tus TSWV muab nws rab ntaj los tua koj peb hnub thiab tso sub tawg sub ntsha los rau koj lub tebchaws uas yog cia nws tus timtswv coj kev tuag los raug thoob plaws lub tebchaws Yixalayees? Koj yuav teb li cas rau kuv coj mus hais rau tus TSWV?” Daviv teb Nkas hais tias, “Kuv nyob rau lub tsamthawj uas tas kev cia siab lawm; kuv tsis xav cia neeg txhais tes rau txim rau kuv; tiamsis kuv thov cia tus TSWV txhais tes rau txim rau kuv xwb, vim Vajtswv yog tus uas muaj kev hlub loj heev.” Yog li ntawd, tus TSWV thiaj tso tej kab mob uas yog sub tawg sub ntsha los raug rau cov Yixalayees, lawv thiaj tuag lawm xya caum txhiab leej. Thiab Vajtswv tso nws tus timtswv los rhuav lub nroog Yeluxalees, tiamsis thaum nws tabtom yuav pib rhuav lub nroog Yeluxalees kom puastsuaj, tus TSWV txawm hloov siab thiab hais rau tus timtswv hais tias, “Tsum! Yuav li ko xwb txaus lawm!” Tus timtswv tabtom los sawv ncaj ntawm Alaunas uas yog ib tug neeg Yenpus lub tshav ntaus nplej. Daviv tsa qhovmuag saib saum nruab ntug thiab pom tus TSWV tus timtswv ntawd nyob saud nws txhais tes tuav raws ib rab ntaj taw tuaj rau hauv lub nroog Yeluxalees. Ces Daviv thiab cov thawjcoj thiaj muab tej ris tsho ntaubtsaj los hnav thiab txhos caug ntua pe ua ntsejmuag ti nkaus rau hauv av. Daviv thov Vajtswv hais tias, “Vajtswv, kuv tib leeg yog tus uas ua txhaum xwb. Kuv tib leeg yog tus uas kom suav neeg. Cov neeg txomnyem no tau ua txhaum dabtsi? Tus TSWV uas yog kuv tus Vajtswv, koj cia li rau txim rau kuv thiab kuv tsevneeg xwb, thov tsis txhob rau txim rau koj haivneeg!” Tus TSWV tus timtswv hais rau Nkas kom samhwm rau Daviv, cia li mus ua ib lub thaj rau tus TSWV rau ntawm Alaunas lub tshav ntaus nplej. Yog li ntawd, Daviv mloog tus TSWV lus, thiab nws mus ua raws li uas Nkas hais kom nws ua ntawd. Alaunas thiab nws plaub tug tub tseem tabtom ntaus nplej hauv lub tshav nplej; thaum lawv pom dheev tus timtswv, nws cov tub thiaj khiav mus nkaum lawm. Tamsim ntawd Alaunas txawm pom dheev Vajntxwv Daviv tuaj txog ntua, nws thiaj tso plhuav tsis ntaus nplej thiab mus khoov ntshis pe ua ntsejmuag ti nkaus rau hauv av. Daviv hais rau Alaunas hais tias, “Thov muab koj lub tshav ntaus nplej muag rau kuv, kuv yuav muab qhov chaw no ua ib lub thaj rau tus TSWV kom tej sub tawg sub ntsha thiaj tsis los raug cov pejxeem ntxiv lawm. Kuv yuav muab nqi kom txaus nkaus rau koj.” Alaunas teb hais tias, “Kuv tus Vajntxwv, koj cia li yuav thiab ua txhua yam raws li koj pom zoo ntag. Cov no yog cov heev nyuj uas koj yuav tua hlawv fij rau saum lub thaj, thiab tej no yog cov txiag ntaus nplej uas koj siv ua taws rauv, cia li muab kuv tej nplej fij rau tus TSWV. Kuv muab tagnrho tej no pub rau koj.” Tiamsis Vajntxwv Daviv teb Alaunas hais tias, “Tsis txhob ua li ntawd, kuv yuav them nqi kom txaus rau koj. Kuv tsis muab ib yam uas tseem yog koj tug fij rau tus TSWV, yog hais tias kuv tsis tau them nqi rau yam ntawd.” Ces Daviv muab tau rau pua lub txiaj kub them Alaunas lub tshav ntaus nplej. Daviv ua tau ib lub thaj rau tus TSWV nyob qhov ntawd, nws muab tsiaj tua hlawv fij thiab fij khoom ua kev sib raug zoo rau tus TSWV. Daviv thov thiab tus TSWV teb Daviv tej lus thov, nws thiaj tso hluavtaws poob saum ntuj los kub tej khoom fij saum lub thaj huv tibsi lawm. Tus TSWV hais rau tus timtswv kom muab nws rab ntaj ntsaws rau hauv hnab, tus timtswv mloog tus TSWV lus thiab ua raws li tus TSWV hais. Thaum lub sijhawm ntawd, Daviv pom hais tias tus TSWV teb nws tej lus thov, Daviv thiaj fij khoom nyob ntawm Alaunas lub tshav ntaus nplej. Vim thaum ntawd, tus TSWV lub Tsevntaub sib ntsib uas Mauxes ua tom tiaj suabpuam thiab lub thaj uas hlawv tej khoom theej txhoj ntawd nyob rau hauv qhov chaw pehawm Vajtswv hauv lub nroog Nkinpe-oos lawm; tiamsis Daviv tsis muaj peevxwm yuav mus pehawm Vajtswv tod li, vim nws ntshai tus timtswv ntawd rab ntaj heev. Ces Daviv hais tias, “Ntawm no yog qhov chaw uas yuav ua tus TSWV uas yog Vajtswv lub Tuamtsev rau. Ntawm no yog lub thaj uas cov Yixalayees tuaj hlawv tej khoom fij rau saud ntag.” Vajntxwv Daviv hais rau cov neeg txawv tebchaws uas nyob hauv tebchaws Yixalayees kom tuaj sib sau ua ke, nws yuav faib haujlwm rau lawv ua. Ibtxhia mus txaug pobzeb los ua lub Tuamtsev. Daviv npaj hlau ntau heev tseg rau lawv ntaus ua ntsia hlau thiab ntaus ua tej pluaj hlau yuam cov txiag ntoo ua daim kaw roojvag, thiab muab tooj ntau heev tsis muaj leejtwg luj tau li. Tseem muaj cov Tiles thiab cov Xidoos txiav ntoo ciab tuaj rau Daviv ntau kawg li thiab. Daviv xav hais tias, “Lub Tuamtsev uas kuv tus tub Xalumoos yuav ua rau tus TSWV ntawd yuav zoo nkauj heev thiab nto moo heev nyob hauv lub ntiajteb no. Tiamsis kuv tus tub tseem hluas heev thiab tsis tau paub hlo li, yog li ntawd kuv yuav tsum npaj tej khoom uas ua lub Tuamtsev no kom txhij rau nws.” Daviv hais rau nws tus tub Xalumoos thiab samhwm kom nws yuav tsum ua lub tuamtsev rau tus TSWV uas yog cov Yixalayees tus Vajtswv. Daviv hais rau Xalumoos hais tias, “Metub, kuv xav ua ib lub tuamtsev los ua chaw qhuas tus TSWV uas yog kuv tus Vajtswv. Tiamsis tus TSWV hais rau kuv hais tias, ‘Koj tau ua rog ntaus zaus los lawm, thiab tau tua neeg coob tus tuag lawm; koj yuav tsis tau ua lub tuamtsev rau kuv, vim koj tau tua neeg coob tus tuag tabmeeg kuv. Koj yuav muaj ib tug tub; nws yuav kav lub tebchaws nyob thajyeeb lug. Kuv yuav pub nws muaj kev thajyeeb, nws cov yeebncuab yuav tsis tuaj tua nws, nws lub npe yuav hu ua Xalumoos, thiab kuv yuav pub rau nws tiam kom lub tebchaws Yixalayees muaj kev thajyeeb thiab nyob ntsiag to. Nws yuav ua lub Tuamtsev pub rau kuv lub npe. Nws yuav ua kuv tus tub thiab kuv yuav ua nws txiv. Nws cajces yuav ua vajntxwv kav haivneeg Yixalayees mus ibtxhis.’ ” Daviv rov hais dua ib zaug ntxiv hais tias, “Metub, nimno thov tus TSWV uas yog koj tus Vajtswv nrog nraim koj thiab thov nws ua raws li nws tej lus cog tseg kom koj muaj peevxwm ua tau lub tuamtsev rau nws. Thiab thov tus TSWV uas yog koj tus Vajtswv pub kev txawj ntse thiab tswvyim rau koj kom koj thiaj txawj tswjhwm haivneeg Yixalayees raws li nws txoj kevcai. Yog koj coj raws li tej kevcai uas tus TSWV muab cob rau Mauxes kom qhia rau cov Yixalayees, koj lub neej thiaj yuav muaj kev vammeej. Cia li npaj khov kho thiab ua siab tawv qhawv thiab tsis txhob ntshai ib yam dabtsi li. Kuv muaj lub siab kub lug yuav ua lub Tuamtsev, kuv twb muab tau li plaub tas kub thiab plaub caug tas nyiaj coj los cia ua lub Tuamtsev ntawd lawm; tej tooj thiab hlau uas kuv npaj los kuj ntau heev suav tsis txheeb li. Dua li ntawd, kuv twb npaj ntoo thiab pobzeb tiav log tseg lawm, tiamsis koj yuav tsum npaj ntxiv thiab. Koj muaj cov neeg uas txawj ua haujlwm coob heev: cov uas txawj txaug pobzeb, ntaus hlau, txua ntoo thiab cov uas txawj ua txhua yam coob heev suav tsis txheeb; lawv puavleej txawj nchuav kub, nchuav nyiaj, nchuav tooj thiab ntaus hlau. Cia li nqis tes ua. Thov tus TSWV nrog nraim koj.” Daviv samhwm rau cov Yixalayees cov thawjcoj kom tuaj pab nws tus tub Xalumoos. Nws hais tias, “Tus TSWV uas yog nej tus Vajtswv yuav nrog nej thiab nws pub kom muaj kev thajyeeb nyob ibncig nej. Nws twb pub rau kuv tua yeej cov neeg uas ibtxwm nyob hauv lub tebchaws no, thiab lawv twb tau los ua nej qhev thiab ua tus TSWV qhev lawm. Nimno nej cia li txhawb nqa tus TSWV uas yog nej tus Vajtswv kom kawg nej lub siab lub ntsws. Kavtsij pib ua lub Tuamtsev, nej thiaj yuav muaj qhov chaw los rau lub Phijxab uas ntim Vajtswv tej lus cog tseg thiab coj Vajtswv tej khoom tseemceeb mus tso rau hauv lub Tuamtsev uas ua pub rau tus TSWV lub npe.” Thaum Daviv laus heev lawm, nws thiaj tsa nws tus tub Xalumoos ua vajntxwv kav lub tebchaws Yixalayees. Vajntxwv Daviv coj cov Yixalayees cov thawjcoj, cov povthawj thiab cov Levis tuaj sib sau ua ke. Suav tagnrho cov Levis uas hnubnyoog muaj peb caug xyoo rov saud, cov txivneej muaj peb caug yim txhiab leej. Daviv hais tias, “Tsa nees nkaum plaub txhiab leej ua haujlwm hauv tus TSWV lub Tuamtsev thiab tsa rau txhiab leej ua cov nomtswv tu plaub ntug; tsa plaub txhiab leej ua cov zov roojvag, plaub txhiab leej ua cov tshuab raj thiab ntaus nkauj cov nogncas uas kuv npaj cia rau lawv lawm ua tus TSWV tsaug.” Daviv muab lawv faib ua tej pab raws li Levis cov tub: Nkesoos, Kauhas thiab Melalis. Nkesoos muaj ob tug tub: Ladas thiab Sime-is. Ladas muaj peb tug tub: Yehiyees, Xethamas thiab Yau-ees, Sime-is muaj peb tug tub: Selaumaus, Haxiyees thiab Halas. Lawv puavleej yog cov thawjcoj ntawm Ladas cajces. Thiab Sime-is muaj plaub tug tub: Yahaj, Xinas, Ye-uses thiab Npeliyas. Plaub leeg no puavleej yog Sime-is tub. Yahaj yog tus thawjcoj, thiab Xixas yog tus lwm thawj; tiamsis Ye-uses thiab Npeliyas tsis muaj tub coob pestsawg, vim li ntawd thiaj muab nkawd suav ua ib cuab kwvtij lawm xwb. Kauhas muaj plaub tug tub: Amalas, Ixehas, Henploos thiab Uxiyees. Kauhas tus tub hlob Amalas yog Aloos thiab Mauxes nkawd txiv. (Muab Aloos thiab nws cov xeebntxwv ua cov saib tej khoom tseemceeb, hlawv tej tshuaj tsw qab hauv chav pehawm tus TSWV, ua tus TSWV tes haujlwm thiab tuav tus TSWV lub npe foom koob hmoov rau sawvdaws. Tiamsis Mauxes uas yog Vajtswv tus neeg cov tub puavleej muab suav nrog cov Levis lawm.) Mauxes muaj ob tug tub: Nkesoos thiab Eli-exes. Senpuyees ua Nkesoos cov tub tus thawjcoj. Eli-exes tsuas muaj tib tug tub uas hu ua Lehanpiyas xwb, tiamsis Lehanpiyas muaj tub coob kawg li. Ixehas uas yog Kauhas tus tub ob muaj ib tug tub hu ua Selaumis, nws yog tus thawjcoj ntawm nws cuab kwvtij. Henploos uas yog Kauhas tus tub peb muaj plaub tug tub Yeliyas, Amaliyas, Yehaxiyees thiab Yekamees. Uxiyees cov tub: Minkas yog tus thawjcoj thiab Isiyas yog tus lwm thawj. Melalis muaj ob tug tub: Mahalis thiab Musis. Mahalis los muaj ob tug tub thiab xwb: Ele-axas thiab Kises, tiamsis Ele-axas tuag thaum nws tsis tau muaj tub lawm, nws muaj ib pab ntxhais xwb. Nws cov ntxhais thiaj mus yuav lawv cov nus kwvtij uas yog Kises cov tub. Melalis tus tub ob uas hu ua Musis muaj peb tug tub: Mahalis, Edeles thiab Yelemaus. Cov no puavleej yog Levis cov xeebntxwv los ntawm lawv tej cuab kwvtij thiab tej tsevneeg; lawv txhua tus puavleej tuaj sau npe raws li lawv tej cajces. Levis cov xeebntxwv txhua tus uas hnubnyoog muaj nees nkaum xyoo rov saud puavleej muab tsa ua haujlwm nyob hauv tus TSWV lub Tuamtsev. Daviv hais tias, “Tus TSWV uas yog cov Yixalayees tus Vajtswv tau muab txojkev thajyeeb pub rau nws haivneeg, thiab nws yuav nyob hauv lub nroog Yeluxalees mus ibtxhis. Cov Levis yuav tsis tau kwv tus TSWV lub Tsevntaub thiab tej khoom siv pehawm Vajtswv ntxiv lawm.” Vim Daviv tej lus samhwm thaum kawg, lawv thiaj sau cov Levis uas hnubnyoog muaj nees nkaum xyoo rov saud npe ua cov uas ua Vajtswv tes haujlwm; thiab tsa lawv ua tej haujlwm no: pab cov povthawj uas yog Aloos cov xeebntxwv ua haujlwm nyob hauv tus TSWV lub Tuamtsev ua cov saib xyuas cov tshavpuam, cov chav hauv lub Tuamtsev thiab ceev txhua yam khoom tseemceeb hauv Vajtswv lub Tuamtsev; ua cov pab saib tej ncuav uas coj tuaj tso rau saum rooj fij rau Vajtswv, tej hmoov nplej uas coj tuaj ua khoom fij, tej ncuav tsis xyaw keeb, tej mov uas cub ua khoom fij, tej hmoov nplej uas zuaj xyaw roj txiv ntoo, tej khoom uas muab luj thiab yeem tuaj fij hauv lub Tuamtsev; thiab txhua tagkis lawv yuav tsum tau sawv ntxov mus qhuas thiab ua Vajtswv tsaug, thaum yav tsaus ntuj los lawv ua ib yam nkaus, thiab txhua zaus uas hlawv khoom fij rau tus TSWV, tsis hais hnub Xanpataus, thaum hli xiab thiab lwm yam kevcai; lawv yuav tsum ua kom raws nraim li tej kevcai uas twb teev tseg lawm pub rau tus TSWV mus ibtxhis li. Lawv lub luag haujlwm yog ua cov saib thiab tu tus TSWV lub Tsevntaub sib ntsib thiab lub Tuamtsev, thiab pab lawv cov kwvtij uas yog Aloos cov xeebntxwv uas ua povthawj hauv lub Tuamtsev qhov chaw pehawm Vajtswv. Aloos cov xeebntxwv yog muaj raws li nram no. Aloos muaj plaub tug tub: Nadas, Anpihus, Ele-axas thiab Ithamas. Nadas thiab Anpihus xub tuag ua ntej dua nkawd txiv, thiab nkawd tsis tau muaj menyuam li. Yog li ntawd, nkawd ob tug kwv uas yog Ele-axas thiab Ithamas thiaj tau los ua povthawj. Vim muaj Xadaus uas yog Ele-axas tus xeebntxwv thiab muaj Ahimelej uas yog Ithamas tus xeebntxwv pab Daviv, nws thiaj sau tau Aloos cov xeebntxwv los ua tej pab raws li lawv tej luag haujlwm. Vim cov txivneej uas yog Eli-axas cov xeebntxwv ua thawjcoj coob dua Ithamas cov xeebntxwv, lawv thiaj muab Ele-axas cov xeebntxwv faib ua kaum rau pab, thiab muab Ithamas cov xeebntxwv faib ua yim pab. Ele-axas thiab Ithamas cov xeebntxwv uas ua thawjcoj hauv lub Tuamtsev thiab coj sab ntsujplig, lawv rho ntawv saib tau tes haujlwm twg ua. Ele-axas thiab Ithamas cov xeebntxwv tuaj rho ntawv ib tug dhau rau ib tug. Lawv tuaj sau npe rau ntawm tus teev ntawv uas yog Nethanees tus tub Semayas uas yog ib tug Levis. Muaj vajntxwv thiab nws cov nomtswv, tus povthawj Xadaus, Ahimelej tus tub Anpiyathas, cov thawjcoj ntawm cov povthawj thiab cov Levis cajces ua timkhawv. Rho ntawv thawj zaug tau rau Yehauyalis, rho zaum ob tau rau Yedayas, zaum peb tau rau Halees, zaum plaub tau rau Xe-aulimes, zaum tsib tau rau Makhiyas, zaum rau tau rau Miyamees, zaum xya tau rau Hakauxes, zaum yim tau rau Anpiyas, zaum cuaj tau rau Yesuas, zaum kaum tau rau Sekaniyas, zaum kaum ib tau rau Eli-asis, zaum kaum ob tau rau Yakees, zaum kaum peb tau rau Hupas, zaum kaum plaub tau rau Yesenpe-as, zaum kaum tsib tau rau Npilenkas, zaum kaum rau tau rau Imeles, zaum kaum xya tau rau Hexiles, zaum kaum yim tau rau Hapixes, zaum kaum cuaj tau rau Pethahiyas, zaum nees nkaum tau rau Yehekees, zaum nees nkaum ib tau rau Yakhees, zaum nees nkaum ob tau rau Nkamules, zaum nees nkaum peb tau rau Delayas thiab zaum nees nkaum plaub tau rau Ma-axias. Cov neeg no nyias muaj nyias tes haujlwm ua hauv tus TSWV lub Tuamtsev raws li lawv yawgkoob Aloos twb muab cob rau lawv thiab raws li tus TSWV uas yog cov Yixalayees tus Vajtswv tau samhwm tseg rau nws lawm. Levis cov xeebntxwv lwm pab muaj raws li no: Yedeyas, yog Amelas ib tug xeebntxwv uas yog Senpuyees cajces; Isiyas yog tus thawjcoj, nws yog Lehanpiyas tus xeebntxwv; Yahaj yog Ixehas ib tug xeebntxwv uas yog Selaumis cajces; Yeliyas, Amaliyas, Yehaxiyees thiab Yekamees yog Henploos cov tub raws li lawv tej hnubnyoog; Samiles yog Uxiyees ib tug xeebntxwv uas yog Mikhas cajces; Xakhaliyas yog Uxiyees ib tug xeebntxwv uas yog Mikhas tus kwv Isiyas cajces; Mahelis, Musis thiab Yaxiyas yog Melalis cov xeebntxwv. Yaxiyas muaj peb tug tub: Sauhas, Xakules thiab Inpelis. Mahelis tus tub Ele-axas tsis muaj tub li; tiamsis Mahelis tus tub Kises muaj ib tug tub hu ua Yelamees. Musis muaj peb tug tub: Mahelis, Edeles thiab Yelemaus. Cov no puavleej yog Levis cajces raws li lawv cov yawgkoob. Txhua tus thawj ntawm txhua tsevneeg thiab ntawm nws tus kwv ntxawg puavleej tau rho ntawv ib yam nkaus li lawv cov kwvtij uas yog Aloos cov xeebntxwv tabmeeg Vajntxwv Daviv, Xadaus, Ahimelej thiab txhua tus thawjcoj ntawm cov povthawj thiab cov Levis. Vajntxwv Daviv thiab cov thawjcoj ntawm cov Levis xaiv xeem Levis ib co los coj kev pehawm Vajtswv: Axafes, Hemas thiab Yeduthoos. Lawv puavleej qhia Vajtswv txojlus nrog tej suab nkauj nogncas thiab tej suab nruas npuaj. Cov uas xaiv los ua cov coj kev pehawm Vajtswv raws li tes haujlwm ntawm tej pab muaj npe raws li no: Axafes plaub tug tub yog Xakules, Yauxej, Nethaniyas thiab Asalelas. Lawv puavleej ua haujlwm raws li Axafes uas yog tus qhia Vajtswv txojlus kom lawv ua thiab raws li vajntxwv samhwm. Yeduthoos rau tug tub yog Nkedaliyas, Xelis, Yesaiyas, Sime-is, Hasanpiyas thiab Matithiyas. Lawv puavleej ua haujlwm nyob qab tswjhwm ntawm lawv txiv, lawv qhia Vajtswv txojlus nrog tej suab raj thiab nkauj nogncas, hu nkauj qhuas thiab ua tus TSWV tsaug. Hemas kaum plaub tug tub yog Npukiyas, Mataniyas, Uxiyees, Senpuyees, Yelimaus, Hananiyas, Hananis, Eli-athas, Nkidatis, Laumatis Exeles, Yaunpekasas, Malauthis, Hauthiles thiab Mahaxi-aus. Vajtswv pub rau Hemas uas yog vajntxwv tus cevlus muaj kaum plaub tug tub thiab peb tug ntxhais raws li Vajtswv coglus tseg rau Hemas hais tias yuav pub kom Hemas yog ib tug uas muaj hwjchim heev. Tagnrho nws cov tub no puavleej yog cov npuaj nruas thiab ntaus nkauj nogncas raws li lawv txiv ua tus coj lawv hu nkauj rau hauv lub Tuamtsev pehawm Vajtswv. Axafes, Yeduthoos thiab Hemas, puavleej ua raws li vajntxwv kom lawv ua. Lawv nees nkaum plaub leeg no thiab lawv cov kwvtij Levis puavleej yog cov txawj ntse, thiab yog cov kawm los hu nkauj qhuas tus TSWV nkaus xwb. Tagnrho yog muaj ob puas yim caum yim leej txivneej. Lawv puavleej rho ntawv thiaj tau ua lawv tej haujlwm, tsis hais tus laus tus hluas lossis cov twb txawj lawm lossis cov uas tseem xyaum xwb. Thawj zaug uas rho rau Axafes tsevneeg yog tau rau Yauxej, nws cov tub thiab cov kwvtij; zaum ob rho tau rau Nkedaliyas, nws cov kwvtij thiab lawv cov tub kaum ob leeg; rho zaum peb tau rau Xakules, nws cov tub thiab nws cov kwvtij kaum ob leeg; rho zaum plaub tau rau Xelis, nws cov tub thiab nws cov kwvtij kaum ob leeg; rho zaum tsib tau rau Nethaniyas, nws cov tub thiab nws cov kwvtij kaum ob leeg; rho zaum rau tau rau Npukiyas, nws cov tub thiab nws cov kwvtij kaum ob leeg; rho zaum xya tau rau Yexalelas, nws cov tub thiab nws cov kwvtij kaum ob leeg; rho zaum yim tau rau Yesaiyas, nws cov tub thiab nws cov kwvtij kaum ob leeg; rho zaum cuaj tau rau Matithiyas, nws cov tub thiab nws cov kwvtij kaum ob leeg; rho zaum kaum tau rau Sime-is, nws cov tub thiab nws cov kwvtij kaum ob leeg; rho zaum kaum ib tau rau Uxiyees, nws cov tub thiab nws cov kwvtij kaum ob leeg; rho zaum kaum ob tau rau Hasanpiyas, nws cov tub thiab nws cov kwvtij kaum ob leeg; rho zaum kaum peb tau rau Senpuyees, nws cov tub thiab nws cov kwvtij kaum ob leeg; rho zaum kaum plaub tau rau Matithiyas, nws cov tub thiab nws cov kwvtij kaum ob leeg; rho zaum kaum tsib tau rau Yelimaus, nws cov tub thiab nws cov kwvtij kaum ob leeg; rho zaum kaum rau tau rau Hananiyas, nws cov tub thiab nws cov kwvtij kaum ob leeg; rho zaum kaum xya tau rau Yaunpekasas, nws cov tub thiab nws cov kwvtij kaum ob leeg; rho zaum kaum yim tau rau Hananis, nws cov tub thiab nws cov kwvtij kaum ob leeg; rho zaum kaum cuaj tau rau Malauthis, nws cov tub thiab nws cov kwvtij kaum ob leeg; rho zaum nees nkaum tau rau Eli-athas, nws cov tub thiab nws cov kwvtij kaum ob leeg; rho zaum nees nkaum ib tau rau Hauthiles, nws cov tub thiab nws cov kwvtij kaum ob leeg; rho zaum nees nkaum ob tau rau Nkidatis, nws cov tub thiab nws cov kwvtij kaum ob leeg; rho zam nees nkaum peb tau rau Mahaxi-aus, nws cov tub thiab nws cov kwvtij kaum ob leeg; thiab rho zaum nees nkaum plaub tau rau Laumatis Exeles, nws cov tub thiab nws cov kwvtij kaum ob leeg. Ntawm no yog tes haujlwm zov lub Tuamtsev uas muab cob rau cov Levis: Kauhas cajces yog Kaules tus tub Meselemiyas uas yog Axafes tus xeebntxwv. Meselemiyas muaj xya tug tub: Xakhaliyas yog tus tub hlob, Yedi-ales yog tus ob, Xenpadiyas yog tus peb, Yathaniyees yog tus plaub, Elas yog tus tsib, Yehauhanas yog tus rau thiab Elihaunais yog tus xya. Vim Vajtswv foom koob hmoov rau Aunpes Edoos nws thiaj muaj yim tug tub: Semayas yog tus tub hlob, Yehauxanpas yog tug ob, Yau-as yog tus peb, Xakhas yog tus plaub, Nethanees yog tus tsib, Amiyees yog tus rau, Ixakhas yog tus xya thiab Pe-ulethais yog tus yim. Thiab Aunpes Edoos tus tub hlob Semayas kuj muaj ntau tus tub thiab lawv puavleej ua cov tswjhwm lawv txiv tsevneeg, vim lawv yog cov uas muaj peevxwm tshaj plaws li. Semayas muaj rau tug tub: Authanis, Lefayees, Aunpes, Elexanpas, Elihus thiab Xemakhiyas. Pab kwvtij no Elihus thiab Xemakhiyas siab tawv tshaj cov huv tibsi. Rau caum ob leeg txivneej uas muaj zog khov kho thiab muaj peevxwm ua tau tes haujlwm no mas puavleej yog Aunpes Edoos cov tub thiab cov xeebntxwv xwb. Meselemiyas cov tub thiab nws cov kwvtij uas muaj peevxwm heev yog kaum yim leej. Hauxas uas yog Melalis cajces, nws muaj plaub tug tub: Simelis yog tus thawjcoj, (txawm yog nws tsis yog tus tub hlob los nws txiv cia li tsa nws ua tus thawjcoj), Hilekiyas yog tus ob, Tenpaliyas yog tus peb thiab Xakhaliyas yog tus plaub; tagnrho Hauxas cov tub thiab cov kwvtij muaj kaum peb leeg puavleej mus ua cov zov lub Tuamtsev. Muab cov uas zov tej roojvag faib ua tej pab raws li lawv tej tsevneeg thiab muab lub luag haujlwm hauv lub Tuamtsev cob rau lawv ua ib yam li lawv cov kwvtij uas twb ua haujlwm hauv tus TSWV lub Tuamtsev lawm. Txhua yim neeg, tsis hais coob los tsawg, puavleej tau mus rho ntawv saib tau zov lub roojvag twg. Selemiyas rho ntawv tau lub roojvag uas nyob sab hnub tuaj, thiab nws tus tub Xakhaliyas uas yog ib tug tuavxam uas muaj tswvyim zoo, rho ntawv tau lub roojvag uas nyob sab qaumteb. Aunpes Edoos rho ntawv tau lub roojvag sab qabteb, thiab nws cov tub rho ntawv tau ua cov saib tej txhab rau khoom. Supees thiab Hauxas nkawd rho ntawv tau lub roojvag sab hnubpoob thiab lub Roojvag Salekhes uas nyob sab qaum kev. Lawv sib faib zov, nyias zov raws nyias lub sijhawm. Sab hnubtuaj ib hnub twg yog rau leej zov, sab qaumteb ib hnub twg yog plaub leeg zov, sab qabteb ib hnub twg yog plaub leeg zov, thiab ib hnub twg plaub leeg zov cov txhab rau khoom, ib lub txhab twg ob leeg zov, thiab tog qabkhav sab hnubpoob muaj plaub leeg zov ntawm txojkev thiab ob leeg zov ntawm qabkhav. Tej no yog lub luag haujlwm uas zov cov roojvag thiab muab cob rau Kauhas thiab Melalis cov xeebntxwv. Lawv lwm pab kwvtij Levis uas yog cov saib tej txhab nyiaj hauv Vajtswv lub Tuamtsev thiab tej txhab rau tej khoom uas luag coj tuaj fij rau Vajtswv. Ladas uas yog Nkesoos ib tug tub, nws yog yawgkoob ntawm ob peb tsevneeg uas muab faib ua tej pab lawm thiab suav nws tus tub Yehiyees tsevneeg huv tibsi nrog. Yehiyees ob tug tub Xethas thiab Yau-ees ua ob tug uas saib lub txhab nyiaj thiab tej txhab rau khoom hauv tus TSWV lub Tuamtsev. Faib haujlwm txhua nrho rau Amelas, Ixehas, Henploos thiab Uxiyees cov xeebntxwv ua. Senpuyees uas yog Mauxes tus tub Nkesoos tus xeebntxwv ua tus thawj saib cov nomtswv uas zov lub txhab nyiaj. Nkesoos tus kwv Eli-exes nws txheeb Selaumis. Eli-exes yog Lehanpiyas txiv, Lehanpiyas yog Yesiyas txiv, Yesiyas yog Yaulas txiv, Yaulas yog Xikhalis txiv, Xikhalis yog Selaumis txiv. Selaumis thiab nws cov kwvtij ua cov saib tagnrho tej txhab rau khoom uas Vajntxwv Daviv cov thawjcoj ntawm tej cuab kwvtij, cov nomtswv uas saib pawg txhiab thiab saib pawg pua, thiab cov thawj tubrog tau coj tuaj fij pub rau Vajtswv. Lawv muab tej khoom uas lawv mus tua rog yeej thiab txeeb tau hauv tshavrog los coj mus fij rau hauv tus TSWV lub Tuamtsev cia tau siv. Selaumis thiab nws tsevneeg ua cov saib tej khoom uas muab fij tau siv rau hauv tus TSWV lub Tuamtsev, thiab tej uas thaum tus povthawj Xamuyees, Kises tus tub Xa-ules, Neles tus tub Aneles thiab Xeluyas tus tub Yau-am twb muab fij lawm. Ixehas cov xeebntxwv: Khenaniyas thiab nws cov tub puavleej muab tsa ua cov nomtswv tuav ntaub ntawv thiab tu plaub ntug rau cov pejxeem Yixalayees. Henploos cov xeebntxwv: Haxanpiyas thiab nws cov kwvtij muaj ib txhiab xya pua leej puavleej yog cov txivneej uas muaj peevxwm, thiab tsa lawv ua cov tswjhwm cov Yixalayees uas nyob ntawm tus dej Yauladees sab hnubpoob thiab ua haujlwm rau tus TSWV thiab vajntxwv. Yeliyas yog tus thawjcoj ntawm Henploos cov xeebntxwv. (Thaum Daviv ua vajntxwv tau plaub caug xyoo ntawd thiaj tau tshawb nrhiav Henploos cov xeebntxwv thiab pom tsevneeg no tseem muaj cov ua tubrog uas siab tawv heev nyob hauv lub nroog Yaxes hauv xeev Nkile-as.) Vajntxwv Daviv xaiv tau nees nkaum xya txhiab leej uas muaj siab tawv heev ntawm Yeliyas tsevneeg los thiab tsa lawv ua cov saib tagnrho phab kev ua ntaub ntawv ntawm sab kev ntseeg thiab kev tswjhwm ntawm cov pejxeem Yixalayees uas nyob ntawm tus dej Yauladees sab hnubtuaj uas yog cov Lunpees, cov Khas thiab ib nrab xeem Manaxes. Ntawm no mus yog sau cov Yixalayees cov thawjcoj ntawm tej cuab kwvtij thiab tej xeem thiab lawv cov thawjcoj uas ua haujlwm saib phab ntaub ntawv rau lub tebchaws. Lawv tau faib ua tej pab mus ua haujlwm; ib pab twg muaj nees nkaum plaub txhiab leej, thiab ib pab twg ua haujlwm ib xyoos twg ib hlis. Xadiyees tus tub Yasaunpe-as ua tus saib pab ib ntawm lub ib hlis; nws pab muaj nees nkaum plaub txhiab leej. Yasaunpe-as yog Peles tus xeebntxwv, nws ua tus saib cov thawj tubrog ntawm lub ib hlis. Daudais uas yog Ahaus tus xeebntxwv ua tus saib pab ob ntawm lub ob hlis (Mikelaus yog tus lwm thawj); nws pab muaj nees nkaum plaub txhiab leej. Npenayas ua tus saib pab peb ntawm lub peb hlis, nws yog tus povthawj Yehauyadas tus tub; nws pab muaj nees nkaum plaub txhiab leej. Npenayas yog ib tug uas ua tau heev ntawm peb caug leej thiab yog tus thawj ntawm peb caug leej ntawd; Npenayas tus tub Amixanpas ua tus uas hloov nws. Yau-am tus kwv Axahees ua tus saib pab plaub ntawm lub plaub hlis, thiab nws tus tub Xenpadiyas ua tus hloov nws; nws pab muaj nees nkaum plaub txhiab leej. Samehus uas yog Ixehas tus tub xeebntxwv ua tus saib pab tsib ntawm lub tsib hlis; nws pab muaj nees nkaum plaub txhiab leej. Ilas ua tus saib pab rau ntawm lub rau hli, nws yog Ikes uas yog cov neeg Tekau-as tus tub; nws pab muaj nees nkaum plaub txhiab leej. Helej ua tus saib pab xya ntawm lub xya hli, nws yog cov neeg hauv Peloos uas yog Efalayees cov xeebntxwv; nws pab muaj nees nkaum plaub txhiab leej. Xinpekais ua tus saib pab yim ntawm lub yim hli, nws yog cov neeg hauv Husas thiab yog Xalas cuab kwvtij; nws pab muaj nees nkaum plaub txhiab leej. Anpi-exes ua tus saib pab cuaj ntawm lub cuaj hlis, nws yog cov neeg hauv Anathaus thiab yog xeem Npeenyamees; nws pab muaj nees nkaum plaub txhiab leej. Mahalais ua tus saib pab kaum ntawm lub kaum hli, nws yog cov neeg hauv Netaufas thiab yog Xelas cuab kwvtij; nws pab muaj nees nkaum plaub txhiab leej. Npenayas ua tus saib pab kaum ib ntawm lub kaum ib hlis, nws yog cov neeg hauv Pilathoos thiab nws yog xeem Efalayees; nws pab muaj nees nkaum plaub txhiab leej. Heledais ua tus saib pab kaum ob ntawm lub kaum ob hlis, nws yog neeg hauv Netaufas (Heedais yog Authaniyees cuab kwvtij); nws pab muaj nees nkaum plaub txhiab leej. Vajntxwv Daviv tsis suav tej neeg uas hnubnyoog qis dua nees nkaum xyoo rov hauv, rau qhov tus TSWV twb coglus tseg hais tias, nws yuav pub cov Yixalayees huamvam coob ib yam li tej hnubqub saum nruab ntug. Yau-am uas yog Xeluyas tus tub, pib sau cov Yixalayees tej npe, tiamsis nws sau tsis tau tiav. Vajtswv twb rau txim rau cov Yixalayees lawm, vim qhov uas sau npe no xwb. Yog li ntawd, thaum kawg thiaj tsis muaj sawvdaws tej npe txhij nyob rau hauv Vajntxwv Daviv cov nomtswv tej ntaub ntawv khaws tseg. Adiyees tus tub Axemaves ua tus saib vajntxwv tej txhab rau khoom; Uxiyas tus tub Yaunathas ua tus saib tej txhab rau khoom pem tej zos, hauv tej nroog thiab hauv tej chaw tsomfaj; Khelus tus tub Exelis uas tus saib cov neeg ua teb; Seme-is uas nyob hauv Lamas ua tus saib tej vaj txiv hmab; Xanpedis uas yog neeg Sefas ua tus saib tej chaw tsuam cawv txiv hmab; Npa-ahanas uas nyob hauv Nkedes ua tus saib cov ntoo roj thiab tej ntoo xikamaus hauv Sefelas; Yau-ases ua tus saib tagnrho tej txhab rau roj txiv ntoo; Sitalais uas nyob hauv Saloos ua tus saib tej tsiaj uas tso rau hauv lub tiaj Saloos; Adelais tus tub Safas ua tus saib tej tsiaj uas tso rau hauv tej voshav; Aunpis uas yog xeem Yisamayees ua tus saib cov ntxhuav; Yedeyas uas yog neeg Melaunaus ua tus saib cov neesluav; thiab Yaxis uas yog neeg Hankas ua tus saib tej yaj thiab tej tshis; tagnrho cov nomtswv no puavleej yog cov uas saib Vajntxwv Daviv tej nyiaj txiag, tsiaj txhu thiab txhua yam huv tibsi. Yaunathas uas yog Daviv tus txiv ntxawm yog ib tug tuavxam uas muaj tswvyim thiab txawj ntse heev. Yaunathas thiab Hasaunis tus tub Yehiyees ua xibhwb qhia ntawv rau vajntxwv cov tub. Ahithaufees yog vajntxwv tus tuavxam, thiab Husais uas yog cov Akhis yog vajntxwv tus phoojywg thiab yog tus tuavxam. Tom qab uas Ahithaufees tuag lawm, Anpiyathas thiab Yehauyadas uas yog Npenayas tus tub los ua tus tuavxam hloov nws chaw. Yau-am yog tus thawj tubrog. Vajntxwv Daviv hais rau cov Yixalayees cov nomtswv kom mus sib sau rau hauv lub nroog Yeluxalees. Yog li ntawd, cov nomtswv ntawm txhua xeem, cov nomtswv uas tuav ntaub ntawv uas ua haujlwm rau lub tebchaws, cov thawjcoj ntawm txhua xeem, cov thawj saib tej khoom thiab tej tsiaj txhu uas yog vajntxwv thiab nws cov tub tug, nrog cov nomtswv hauv lub loog, cov thawj tubrog thiab cov neeg tseemceeb tuaj sib sau rau hauv lub nroog Yeluxalees. Daviv sawv tabmeeg lawv thiab hais tias, “Cov kwvtij, nej cia li mloog kuv hais. Kuv xav ua ib lub tsev kom nyob mus li rau lub Phijxab uas ntim Vajtswv tej lus cog tseg, thiab ua tus TSWV uas yog peb tus Vajtswv qhov chaw tiag taw. Kuv tau npaj txhua yam tiav tas, yuav ua ib lub tuamtsev los txhawb nqa Vajtswv, tiamsis Vajtswv tsis pub kuv ua lub tuamtsev ntawd, vim kuv yog ib tug tubrog thiab kuv tau tua neeg coob leej ntau tus tuag lawm. Tus TSWV uas yog cov Yixalayees tus Vajtswv xaiv kuv thiab kuv cov xeebntxwv ua vajntxwv kav tebchaws Yixalayees mus ibtxhis li. Vajtswv yeej xaiv xeem Yudas los ua cov thawjcoj thiab xaiv kuv txiv tsevneeg. Kuv txiv cov tub, Vajtswv txaus siab rau kuv thiab tsa kuv ua vajntxwv kav tebchaws Yixalayees. Vajtswv pub rau kuv muaj tub coob; tagnrho kuv cov tub Vajtswv tau xaiv Xalumoos los ua tus kav tebchaws Yixalayees hauv tus TSWV lub nroog. “Tus TSWV hais rau kuv hais tias, ‘Koj tus tub Xalumoos yog tug uas yuav ua kuv lub Tuamtsev. Kuv twb xaiv nws los ua kuv tus tub lawm, thiab kuv yuav yog nws txiv. Kuv yuav pub kom nws lub tebchaws nyob ruaj khov mus ibtxhis, yog nws hwm thiab coj lub neej raws li kuv tej lus samhwm thiab tej kevcai uas nws coj niaj hnub no.’ “Yog li ntawd, cov Yixalayees uas yog tus TSWV haivneeg, kuv qhia ntxiv rau nej tabmeeg tus TSWV thiab nej sawvdaws kom nej yuav tsum hwm thiab ceev tus TSWV uas yog peb tus Vajtswv tej lus uas nws tau samhwm rau peb lawm, kom nej thiaj yuav tau lub tebchaws av zoo tshaj plaws no los ua nej tug, nej thiaj yuav tuav tau lub tebchaws no cia ua nej cov menyuam tug mus ibtxhis.” Thiab nws hais rau Xalumoos hais tias, “Kuv tus tub, kuv qhia ntxiv rau koj; koj yuav tsum paub koj txiv tus Vajtswv thiab ua nws tes haujlwm kom kawg koj lub siab thiab tsis txhob ua ob lub siab. Nws paub txhua yam uas peb xav thiab txhua yam uas peb npaj siab ua lawm. Yog koj mus cuag nws, nws yuav zoo siab txais yuav koj; tiamsis yog koj khiav tawm ntawm nws, nws yuav tso koj tseg mus ibtxhis li. Koj yuav tsum paub hais tias, tus TSWV tau xaiv koj kom ua nws lub Tuamtsev uas yog qhov chaw dawbhuv. Nimno koj cia li nqis tes ua thiab muab lub siab xyivfab hlo ua.” Ces Daviv muab tus qauv uas yuav ua lub Tuamtsev, tej chav rau khoom, tej chav tsev txheej saud, Chav Dawbhuv Kawg Nkaus uas yog qhov chaw zam txim, cob huv tibsi rau nws tus tub Xalumoos, thiab nws muab tus qauv uas nws xav tseg yuav ua lub tshavpuam thiab tej chav uas nyob ibncig tus TSWV lub tsev, tej txhab uas rau Vajtswv lub Tuamtsev tej cuabyeej thiab tej txhab uas rau tej khoom uas luag coj tuaj fij pub rau tus TSWV rau Xalumoos; Daviv tseem muab nws tus qauv uas tsa cov povthawj thiab cov Levis los tuav lawv lub luag haujlwm, ua tej haujlwm hauv tus TSWV lub Tuamtsev, thiab saib txhua yam khoom hauv tus TSWV lub Tuamtsev los cob rau Xalumoos. Nws qhia kom yuav tsum muab kub npaum li cas coj mus nchuav thiaj txaus ua tej khoom siv uas yog muab kub ua, thiab muab nyiaj npaum li cas coj mus nchuav thiaj txaus ua tej khoom siv uas yog muab nyiaj ua, cov kub yog coj mus nchuav ua cov ncej txawb teeb thiab cov teeb kub, cov nyiaj coj mus ua cov ncej txawb teeb thiab cov teeb nyiaj, raws li tej teeb uas ua los siv ntawd, ua tej rooj nyiaj thiab tej rooj kub uas rau tej ncuav uas luag coj tuaj fij rau Vajtswv, thiab Daviv qhia kom muab kub npaum li cas nchuav ua diav rawg, tais phiab thiab khob; muab nyiaj thiab kub npaum li cas los ua tej twj taig, thiab muab tej kub npaum li cas ua lub thaj uas hlawv hmoov tshuaj tsw qab thiab ua lub tsheb rau ob tug qhelunpees uas nthuav tis npog saum tus TSWV lub Phijxab. Vajntxwv Daviv hais tias, “Txhua yam uas nyob hauv daim qauv no yeej sau raws li tej lus uas tus TSWV muab cob rau kuv lawm ntag.” Vajntxwv Daviv hais rau nws tus tub Xalumoos hais tias, “Koj cia li ua siab tawv qhawv tsis txhob ntshai thiab xyivfab hlo. Pib ua haujlwm thiab tsis txhob pub ib yam dabtsi tabkaum koj li. Tus TSWV uas yog Vajtswv tus kuv pehawm, nws yuav pab koj. Nws yuav tsis tso koj tseg, tiamsis nws yuav nrog koj mus txog thaum uas koj ua nws lub Tuamtsev tiav lawm. Cia li muab cov povthawj thiab cov Levis faib ua tej pab ua txhua tes haujlwm hauv lub Tuamtsev. Cov txivneej uas txawj txhua yam yuav zoo siab tuaj pab koj, cov pejxeem thiab lawv tej thawjcoj yuav mloog koj lus.” Vajntxwv Daviv hais rau cov pejxeem uas tuaj sib sau ua ke ntawd hais tias, “Kuv tus tub Xalumoos yog ib tug uas Vajtswv tau xaiv lawm, tiamsis nws tseem hluas thiab tsis tau paub txhij txhua. Qhov uas yuav ua no yog tes haujlwm uas tseemceeb heev, rau qhov tsis yog ua lub loog rau neeg nyob, tiamsis yog ua lub tuamtsev rau tus TSWV uas yog Vajtswv nyob. Kuv muab siab sib zog npaj txhua yam khoom ua lub Tuamtsev: kub, nyiaj, tooj, hlau, ntoo ciab, hlaws, pobzeb muaj nqis, pobzeb xobhnia, pobzeb tawv thiab ntau yam pobzeb tseemceeb los ua tus TSWV lub Tuamtsev. Dua li ntawd, kuv tseem muab ntau tshaj ntawd los ua lub Tuamtsev uas dawbhuv; kuv tau muab tej nyiaj tej kub uas yog kuv tug coj los ntxiv rau, vim kuv hlub Vajtswv lub Tuamtsev heev. Kuv muab cov tseem kub yog ib puas kaum tsib tas thiab cov tseem nyiaj yog ob puas rau caum tsib tas coj los ua tej saw dai rau hauv lub Tuamtsev tej phabntsa thiab txhua yam khoom siv yog cov neeg nchuav nyiaj nchuav kub ua, muab kub nchuav ua tej khoom siv uas yog kub thiab muaj nyiaj nchuav ua tej khoom siv uas yog nyiaj. Yog li ntawd, hnub no puas muaj leejtwg muaj lub siab dawb siab zoo xav coj khoom tuaj fij rau tus TSWV lawm thiab?” Cov thawjcoj ntawm tej cuab kwvtij, cov nomtswv ntawm tej xeem, cov thawj tubrog thiab cov tuav ntaub ntawv saib vajntxwv tej khoom thiaj txaus siab hlo coj tej khoom no tuaj ua lub Tuamtsev: ib puas cuaj caum tas kub, peb puas yim caum tas nyiaj, rau pua xya caum tsib tas tooj thiab peb txhiab xya puas tsib caug tas hlau. Yog leejtwg muaj tej hlaws pobzeb muaj nqis cia li coj tej ntawd tuaj tso rau hauv lub txhab nyiaj hauv lub Tuamtsev, muab cob rau Nkesoos tus xeebntxwv Yehiyees uas yog xeem Levis ua tus saib. Cov pejxeem txaus siab coj lawv tej khoom tuaj pub rau tus TSWV ntawm lub siab dawb paug, thiab lawv zoo siab qhov uas lawv tau coj khoom ntau heev tuaj pub rau Vajtswv. Vajntxwv Daviv los kuj zoo siab kawg li. Vajntxwv Daviv qhuas tus TSWV tabmeeg cov pejxeem sawvdaws uas tuaj sib sau ua ke ntawd. Nws hais tias, “Tus TSWV uas yog peb yawgkoob Yakhauj tus Vajtswv, thov txhawb nqa koj lub npe mus ibtxhis tsis kawg! Tus TSWV, koj yog tus uas muaj zog nchav, muaj hwjchim, muaj tshwjchim ci ntsa iab, yog tus uas zoo kawg nkaus thiab yog tus nyob mus ibtxhis. Txhua yam uas nyob saum nruab ntuj thiab hauv ntiajteb no puavleej yog koj li, thiab koj yog tus vajntxwv uas kav txhua tus huv tibsi. Kev muaj txiag npluanuj thiab lub koob meej puavleej yog koj pub; koj yog tus kav txhua tsav yam los ntawm koj lub hwjchim; thiab koj yog tus muaj peevxwm muab koob meej thiab hwjchim tau rau txhua tus. Peb tus Vajtswv, nimno peb thov ua koj tsaug, peb thov txhawb nqa thiab qhuas koj lub npe uas muaj tshwjchim loj kawg nkaus. “Kuv haivneeg thiab kuv yeej muab tsis tau ib yam dabtsi pub rau koj li, rau qhov tej ntawd puavleej yog koj li, peb tsuas muab tej uas yog koj li rov rau koj xwb. Tus TSWV, koj twb paub lawm hais tias peb yog neeg thojnam uas tsiv ib qho rau ib qho zoo li tej neeg uas ua luag qhev thiab zoo li tej neeg txawv tebchaws, ib yam li thaud peb cov yawgkoob tau ua los lawm. Peb txojsia zoo li tus duab ntxoov ntxoo uas dua mus zuj zus, thiab peb dhia tsis dhau txojkev tuag li. Tus TSWV uas yog peb tus Vajtswv, tagnrho tej nyiaj uas peb nqa tuaj ua lub Tuamtsev uas yog qhov chaw pehawm koj lub npe uas dawbhuv; tej nyiaj no puavleej yog koj li xwb. Kuv paub hais tias koj sim peb txhua tus lub siab thiab koj txaus siab rau cov pejxeem uas muaj lub siab npuab koj. Kuv muaj lub siab dawb siab zoo thiab muab lub siab npuab koj, kuv thiaj zoo siab muab tej khoom no fij rau koj, kuv pom koj haivneeg uas tuaj sib sau rau ntawm no puavleej zoo siab coj lawv tej khoom tuaj rau koj huv tibsi. Tus TSWV uas yog peb yawgkoob Anplahas, Ixaj thiab Yakhauj tus Vajtswv, thov koj ceev tej lus no rau hauv koj haivneeg lub siab mus ibtxhis, thiab thov tswj kom lawv ua lub siab ncaj rau koj. Thov pub rau kuv tus tub Xalumoos muaj lub siab puv npo koj tej lus samhwm, ua raws li koj tej kevcai thiab rau siab ntso muab tej uas kuv twb npaj txhij no lawm ua kom tau lub Tuamtsev.” Daviv samhwm rau cov pejxeem hais tias, “Cia li qhuas tus TSWV uas yog nej tus Vajtswv los mas!” Ces tagnrho cov pejxeem uas tuaj sib sau ua ke ntawd thiaj ua tus TSWV uas yog lawv cov yawgkoob tus Vajtswv tsaug, thiab txhua tus nyo hau pehawm qhuas tus TSWV thiab vajntxwv. Ces hnub tom qab ntawd, lawv txawm tua tsiaj fij rau tus TSWV thiab muab tej tsiaj ntawd faib rau cov pejxeem coj mus noj. Dua li ntawd, lawv tseem muab tau ib txhiab tus heev nyuj, ib txhiab tus laug yaj thiab ib txhiab tus menyuam yaj los tua fij ntxiv uas yog muab coj mus hlawv rau saum lub thaj. Thiab lawv tseem coj tej cawv txiv hmab tuaj fij rau Vajtswv huv tibsi. Yog li ntawd, hnub ntawd lawv thiaj noj thiab haus muaj kev zoo siab heev tabmeeg tus TSWV. Zaum no yog zaum ob uas lawv tsa Xalumoos ua Vajntxwv uas yog muaj tus povthawj Xadaus ua lawv tus thawjcoj tuav tus TSWV lub npe txhawb meejthawj rau Xalumoos. Ces Xalumoos tau ua vajntxwv zaum saum lub zwmtxwv hloov nws txiv Daviv chaw raws li tus TSWV tau hais tseg rau nws lawm. Xalumoos tau ua vajntxwv thiab tagnrho lub tebchaws Yixalayees hwm nws heev. Tagnrho cov nomtswv, cov tubrog thiab Vajntxwv Daviv cov tub puavleej coglus yuav ua ncaj ncees rau Vajntxwv Xalumoos. Ces tus TSWV ua kom haivneeg Yixalayees paub hwm Xalumoos, thiab Vajtswv pub rau nws muaj hwjchim loj dua lwm tus Vajntxwv uas tau kav tebchaws Yixalayees yav tas los lawm. Yexais tus tub Daviv ua vajntxwv kav tebchaws Yixalayees tau plaub caug xyoo. Nws kav nyob hauv Henploos tau xya xyoo thiab kav nyob hauv lub nroog Yeluxalees tau peb caug peb xyoos. Daviv tuag thaum nws laus heev lawm, nws npluanuj, luag hwm nws thiab nws tus tub Xalumoos ua Vajntxwv hloov nws chaw. Zaj uas hais txog Vajntxwv Daviv lub neej thaum pib los txog thaum xaus puavleej muab sau cia rau hauv Xamuyees tus uas cev Vajtswv lus phau ntawv thiab sau rau hauv tus povthawj Nathas phau ntawv Xwmtxheej thiab muab sau rau hauv Nkas tus uas cev Vajtswv lus phau ntawv, Tej ntaub ntawv ntawd qhia txog Daviv kev tswjhwm zoo li cas, nws muaj hwjchim npaum li cas, thiab tagnrho tej xwmtxheej uas tshwm rau nws, rau lub tebchaws Yixalayees thiab rau cov tebchaws uas nyob ibncig nws lub tebchaws. Xalumoos uas yog Vajntxwv Daviv tus tub tswj lub tebchaws Yixalayees nyob ruaj khov, thiab tus TSWV uas yog nws tus Vajtswv tau foom koob hmoov rau nws muaj hwjchim loj heev. Vajntxwv Xalumoos hais rau cov thawj tubrog, tsis hais tus uas saib ib txhiab leej, tus uas saib ib puas leej, tagnrho cov nomtswv, tagnrho cov thawjcoj ntawm tej tsevneeg thiab tagnrho cov pejxeem, kom lawv nrog nws mus rau ntawm qhov chaw pehawm tug TSWV uas nyob hauv Nkinpe-oos. Lawv mus rau hauv Nkinpe-oos rau qhov tus TSWV lub Tsevntaub sib ntsib uas tus TSWV tus tubtxib Mauxes ua nram tiaj suabpuam nyob rau hauv. ( Tiamsis Vajntxwv Daviv twb coj tus TSWV lub Phijxab nram Kili-as Ye-alees los tso rau hauv nroog Yeluxalees, qhov chaw uas nws npaj tseg lawm.) Lawv muab lub thaj tooj uas Ulis tus tub Npexalees uas yog Hules tus xeebntxwv ua tso rau ntawm hauv ntej tus TSWV lub Tsevntaub sib ntsib uas nyob hauv lub nroog Nkinpe-oos. Vajntxwv Xalumoos thiab cov pejxeem mus pehawm tus TSWV qhov ntawd. Vajntxwv pehawm tus TSWV thiab tua tsiaj hlawv fij rau saum lub thaj tooj ntawm hauv ntej lub Tsevntaub. Nws tua ib txhiab tus tsiaj hlawv rau saum lub thaj ntawd. Hmo ntawd Vajtswv los tshwm rua Xalumoos pom thiab hais tias, “Koj xav kom kuv muab dabtsi rau koj?” Xalumoos teb hais tias, “Koj ibtxwm qhia koj txojkev hlub uas loj kawg nkaus rau kuv txiv Daviv, thiab nimno koj twb pub kuv tau ua vajntxwv hloov nws chaw lawm. Tus TSWV uas yog Vajtswv, koj twb ua tiav raws li tej lus uas koj tau cog tseg rau kuv txiv lawm. Koj tsa kuv ua vajntxwv kav haivneeg uas coob heev suav tsis txheeb no. Yog li ntawd, thov koj pub tswvyim thiab kev txawj ntse rau kuv tswjhwm lawv. Yog kuv tsis muaj tswvyim, kuv yuav ua li cas tswjhwm tau koj haivneeg uas coob heev no?” Vajtswv teb Xalumoos hais tias, “Koj xaiv tau qhov yog lawm! Koj tsis tau thov kom koj muaj txiag npluanuj, muaj koob muaj meej lossis kom koj cov yeebncuab tuag lossis kom koj muaj txojsia ntev, tiamsis koj thov yuav tswvyim thiab kev txawj ntse kom koj tswjhwm tau kuv haivneeg uas kuv tau tsa koj ua vajntxwv kav ntawd. Kuv yuav pub kom koj muaj tswvyim thiab kev txawj ntse. Kuv yuav pub kev muaj txiag npluanuj, thiab kom koj lub koob meej nrov ncha tshaj cov vajntxwv uas nyob ua ntej koj lossis nyob tom qab koj.” Yog li ntawd, Xalumoos thiaj li tawm hauv tus TSWV lub Tsevntaub sib ntsib uas yog qhov chaw pehawm hauv lub nroog Nkinpe-oos rov los rau hauv lub nroog Yeluxalees, thiab nws nyob hauv tswjhwm cov Yixalayees. Xalumoos ua tau ib txhiab plaub puas lub tsheb nees ua rog thiab muaj kaum ob txhiab leej tubrog caij nees. Muaj ibtxhia nws cia nyob rau hauv lub nroog Yeluxalees, thiab dua li cov nws coj mus nyob rau lwm lub nroog lawm. Lub sijhawm uas Xalumoos kav tebchaws ntawd, nws saib tej nyiaj thiab tej kub tsuas zoo li tej pobzeb hauv lub nroog Yeluxalees, thiab tej ntoo ciab los zoo li tej ntoo xikamaus uas tuaj ntawm tej taw roob hauv tebchaws Yudas xwb. Vajntxwv tseem muaj cov sawv cev txais tej nees uas luag cab hauv tebchaws Muxilis thiab Kilikias, tuaj thiab cov tsheb nees yog coj nram tebchaws Iziv tuaj. Lawv xa tej nees thiab tsheb nees ntawd mus muag rau cov Hitis thiab cov Xilias ob tug vajntxwv ib lub twg rau puas daim nyiaj thiab cov nees muag ib tug ib puas tsib caug daim nyiaj. Vajntxwv Xalumoos ua lub Tuamtsev ua qhov chaw rau sawvdaws tuaj pehawm tus TSWV thiab ua ib lub loog rua nws. Nws muaj xya caum txhiab leej txivneej ua cov nqa pobzeb, yim caum txhiab leej txivneej ua cov txaug pobzeb thiab peb txhiab rau puas leej ua cov saib thiab qhia lawv ua haujlwm. Xalumoos xa xov mus rau Vajntxwv Hilas uas kav lub nroog Tiles hais tias, “Thov koj xa ntoo ciab tuaj rau kuv ib yam li thaum koj tau xa tuaj rau kuv txiv uas yog Vajntxwv Daviv ua nws lub loog. Kuv tabtom ua lub Tuamtsev rau tus TSWV uas yog kuv tug Vajtswv thiab muab fij rau nws ua qhov chaw rau kuv thiab cov pejxeem pehawm nws, hlawv tshuaj tsw qab, niaj hnub fij tej ncuav tsis xyaw keeb, thiab tua tsiaj hlawv fij thaum sawv ntxov thiab thaum yuav tsaus ntuj uas yog Hnub Xanpataus, ua rooj noj rooj haus thaum Hli Xiab thiab tej hnub uas ua kevcai qhuas tus TSWV uas yog peb tus Vajtswv. Tus TSWV samhwm kom cov Yixalayees yuav tsum ua li no mus ibtxhis li. Kuv yuav ua ib lub Tuamtsev uas zoo heev, rau qhov peb tus Vajtswv yog tus uas muaj hwjchim loj dua tej vajtswv huv tibsi. Puas muaj leejtwg ua tau lub Tuamtsev rau Vajtswv nyob? Txawm yog lub ntuj lub teb los twb tsis txaus rau nws nyob. Yog li ntawd lub Tuamtsev uas kuv ua no, tsuas yog ua qhov chaw hlawv hmoov tshuaj tsw qab fij rau Vajtswv xwb. Thov koj xa ib tug neeg uas txawj nchuav kub, nchuav nyiaj, nchuav tooj thiab nchuav hlau, thiab txawj ntos ntaub xiav, ntaub tsamxem thiab ntaub liab tuaj rau kuv. Nws yuav nrog cov kws txua ntoo uas kuv txiv Daviv xaiv tseg hauv tebchaws Yudas thiab hauv lub nroog Yeluxalees ua haujlwm ua ke. Kuv paub hais tias koj cov neeg txawj txua ntoo heev, yog li ntawd, thov koj xa ntoo ciab, ntoo thuv thiab ntoo thwjsuab pem roob Lenpanoos tuaj rau kuv. Kuv twb npaj yuav xa kuv cov neeg tuaj pab koj cov neeg txiav kom tau ntoo ntau heev tuaj rau kuv, rau qhov lub Tuamtsev uas kuv yuav ua ntawd loj thiab zoo nkauj heev. Kuv yuav xa ib puas txhiab kawm hmoov qib, ib puas txhiab kawm hmoov nplej, nees nkaum ob txhiab thoob cawv txiv hmab thiab nees nkaum ob txhiab thoob roj txiv ntoo tuaj rau koj cov neeg ua haujlwm tau noj.” Vajntxwv Hilas sau ntawv tuaj teb Vajntxwv Xalumoos hais tias, “Tus TSWV hlub nws haivneeg, nws thiaj tsa koj los ua vajntxwv. Cia li qhuas tus TSWV uas yog cov Yixalayees tus Vajtswv uas Tsim lub ntuj thiab lub ntiajteb! Nws pub kom Daviv muaj ib tug tub txawj ntse, muaj lajlim tswvyim, thiab thoob tsib to nrog uas nimno tabtom ua lub Tuamtsev rau tus TSWV thiab ib lub loog rau nws. Kuv yuav xa ib tug neeg txawj ntse thiab yog kws txua ntoo tuaj rau koj, nws lub npe hu ua Hulas. Nws niam yog xeem Das thiab nwg txiv yog neeg uas ibtxwm nyob hauv lub nroog Tiles. Hulas txawj nchuav nyiaj, nchuav kub, nchuav tooj, nchuav hlau, txawj txaug pobzeb thiab txawj txua ntoo. Nws txawj ntos ntaub pajyeeb ntsha, ntaub liab thiab ntaubmag. Nws txawj txaug txhua yam raws li tej qauv uas luag kom nws ua. Cia nws ua haujlwm nrog koj cov neeg txua ntoo uas ua haujlwm rau koj txiv uas yog Vajntxwv Daviv. Nimno koj cia li xa tej hmoov qib, hmoov nplej, roj txiv ntoo thiab cawv txiv hmab tuaj rau kuv raws li koj tau coglus tseg lawm. Peb yuav mus txiav tej ntoo ciab saum tej roob Lenpanoos uas koj xav tau thiab muab pav ua phuaj nquam raws ntug dej hiavtxwv tuaj rau ntawm lub nroog Yaupas; koj mam tuaj coj mus rau hauv Yeluxalees.” Vajntxwv Xalumoos txheeb cov neeg txawv tebchaws uas nyob hauv tebchaws Yixalayees tej npe. Qhov uas Xalumoos txheeb npe no, nws ua ib yam li nws txiv Daviv tau ua los lawm. Lawv txheeb tau ib puas tsib caug peb txhiab rau pua leej neeg txawv tebchaws nyob hauv lawv lub tebchaws. Xalumoos thiaj muab xya caum txhiab leej ua cov nqa pobzeb, yim caum txhiab leej ua cov txaug pobzeb saum tej roob, thiab peb txhiab rau puas leej ua cov saib thiab qhia cov neeg ua haujlwm kom tiav. Vajntxwv Daviv uas yog Xalumoos txiv twb npaj qhov chaw uas yuav tsa lub Tuamtsev tseg lawm. Qhov chaw ntawd nyob saum lub Roob Mauliyas, hauv lub nroog Yeluxalees, ntawm Alaunas uas yog neeg Yenpus lub tshav ntaus nplej. Vajntxwv Xalumoos pib tsa lub Tuamtsev rau thaum lub ob hlis ntuj, xyoo plaub uas nws ua vajntxwv. Lub Tuamtsev uas Vajntxwv Xalumoos ua, qhov ntev muaj rau caum tshim thiab qhov dav muaj nees nkaum tshim, chav ntawm lub qhovrooj uas mus rau hauv lub Tuamtsev, qhov dav muaj nees nkaum tshim thiab qhov siab muaj ib puas nees nkaum tshim. Chav no sab hauv muab kub vuam thoob plaws. Luag muab txiag ntoo ciab pua chav loj thiab muab kub vuam, muab suam ua duab toovlaj thiab ua duab saw rau huv tibsi. Vajntxwv tseem muab cov pobzeb muaj nqis uas zoo nkauj heev lo rau lub Tuamtsev thiab muab cov kub uas coj hauv tebchaws Pavais tuaj vuam rau. Nws muab kub vuam lub Tuamtsev tej phabntsa, qab nthab, thiab cov kev huv tibsi; thiab luag suam tej duab qhelunpees rau ntawm tej phabntsa. Chav hauv plawv uas yog Chav Dawbhuv kawg nkaus, qhov dav muaj nees nkaum tshim thiab qhov ntev muaj nees nkaum tshim ib yam li lub Tuamtsev qhov dav. Cov kub uas vuam rau Chav Dawbhuv kawg nkaus tej phabntsa muaj nees nkaum tsib tas; muab ib choj thiab plaub lag kub los ua cov ntsia, thiab cov chav uas nyob txheej saud los puavleej muab kub vuam rau. Vajntxwv kom nws cov neeg ua tsev muab tooj nchuav ua tau ob tug qhelunpees, muab kub vuam rau thiab coj mus txawb rau hauv Chav uas Dawbhuv kawg nkaus, Muab daim ntaub uas luag ntos txaij xiav, txaij tsamxem thiab txaij liab uas luag nraj ua tej duab qhelunpees ntawd los thaiv Chav Dawbhuv kawg nkaus. Vajntxwv ua tau ob tug ncej tooj, ib tug twg siab peb caug tsib tshim thiab muab txhos rau ntawm hauv ntej lub Tuamtsev. Ib tug ncej twg muaj ib lub hau siab tsib tshim dhos rau saum. Nws nchuav ob txoj saw tooj thiab ib puas lub tswb tooj uas zoo li txiv ntsiavkws dai rau saum ob lub hau ncej. Ob tug ncej ntawd txhos rau ntawm ob sab qhovrooj uas mus rau hauv lub Tuamtsev: tus ncej uas txhos rau sab nrad hu ua Yakhees, thiab tus ncej uas txhos rau sab ped hu ua Npau-am. Vajntxwv Xalumoos ua tau ib lub thaj tooj, qhov ntev muaj nees nkaum tshim, qhov dav muaj nees nkaum tshim thiab qhov siab muaj kaum tshim. Thiab nws muab tooj nchuav tau ib lub rhawv kheej kheej siab tsib tshim, sab npoo no rau sab npoo tid muaj kaum tshim, thiab lub cheeb muaj peb caug tshim. Nws muab tooj nchuav ua ob lub thi los thi puagncig lub rhawv sab nraud, ib lub nyob saum toj thiab ib lub nyob hauv qab thiab ib co duab heev nyuj uas yeej nchuav lo nrog rau ntawm lub rhawv. Luag muab lub rhawv ntawd txawb rau saum kaum ob tug nyuj tooj nraubqaum uas tig taubhau rau sab nraud, peb tug nyuj twg tig rau ib sab. Lub rhawv ntawd tus npoo tuab peb nti, tus npoo zoo li tej npoo khob, thiab muab zaj ntug nraud zaig txaij nraug zees nthuav zoo li lub paj lilis. Lub rhawv ntawd ntim tau kwvyees li peb txhiab thoob dej. Nws tseem ua tau kaum lub rhawv dej; nws muab tsib lub txawb rau ntawm lub Tuamtsev sab nrad thiab muab tsib lub txawb rau sab pem. Cov rhawv dej ntawd yog ua cia tau ntxuav tej nqaij uas yuav coj mus hlawv fij. Cov dej hauv lub rhawv loj yog cia rau cov povthawj ntxuav cev. Nws ua tau ib chav rau hauv nruab nrog rau cov povthawj thiab ua tau ib chav loj rau sab nraud. Nws muab tooj vuam cov qhovrooj ntawm cov roojvag uas mus rau hauv ob chav ntawd. Nws muab lub rhawv tooj txawb rau ntawm lub Tuamtsev ces kaum sab hnubtuaj qabteb. Vajntxwv kom ua tej ntawd nyob hauv lub tiaj av nplaum uas nyob nruab nrab ntawm Xukaus thiab Xeledas hauv lub Hav Yauladees. Tej tooj uas Xalumoos muab los ua tej ntawd ntau heev, thiaj tsis muaj leejtwg muab luj tau hais tias hnyav npaum li cas. Vajntxwv Xalumoos tseem muab kub ua tej rooj tog rau hauv lub Tuamtsev li no: lub thaj fij thiab cov rooj rau ncuav fij rau tug TSWV; Cov ncej txawb teeb thiab cov teeb uas muab kub ua thiab taws rau ntawm hauv ntej hauv Chav Dawbhuv kawg nkaus raws li npaj tseg lawm; tej paj, tej teeb, thiab tej ciaj, tej txiab txiav teebxeeb, tej phiab, tej tais rau hmoov tshuaj tsw qab thiab cov yias rauv ncaig taws. Txhua yam uas hais los no puavleej muab kub ua xwb. Lub Tuamtsev tej qhovrooj sab nraud thiab tej qhovrooj uas mus rau hauv Chav Dawbhuv kawg nkaus puavleej yog muab kub vuam rau. Thaum Vajntxwv Xalumoos ua lub Tuamtsev txhua yam tiav lawm, nws muab tej cuabyeej uas nws txiv Daviv muab fij rau tus TSWV lawm, coj mus cia rau hauv tej chav rau khoom hauv lub Tuamtsev, tsis hais nyiaj, kub thiab lwm yam. Vajntxwv Xalumoos kom cov Yixalayees tej thawjcoj ntawm tej xeem thiab tej cuab tuaj rau hauv Yeluxalees thiab mus coj tus TSWV lub Phijxab hauv Xi-oos uas yog Daviv lub nroog los tso rau hauv lub Tuamtsev. Lawv tuaj rau thaum lub caij uas ua Kevcai Nyob Tsev Pheebsuab. Thaum cov thawjcoj tuaj txoos ua ke tas lawm, cov Levis txawm tsaws lub Phijxab thiab kwv los tso rau hauv lub Tuamtsev. Cov povthawj thiab cov Levis muab tus TSWV lub Tsevntaub sib ntsib txo thiab nqa nrog tej cuabyeej txhua yam los tso rau hauv lub Tuamtsev. Vajntxwv Xalumoos thiab cov Yixalayees tuaj sawv ua ke rau ntawm hauv ntej tus TSWV lub Phijxab; lawv tua yaj thiab tua nyuj fij ntau heev suav tsis txheeb li. Ces tom qab ntawd, cov povthawj mam li kwv tus TSWV lub Phijxab los tso rau hauv Chav Dawbhuv kawg nkaus thiab hauv qab ob tug qhelunpees ob phab tis. Ob tug qhelunpees ob phab tis nthuav los roos lub Phijxab thiab ob tug nqaj ntoos huv tibsi. Yog leejtwg sawv ntawm hauv ntej Chav Dawbhuv kawg nkaus ntsia mus thiaj li pom cov tw nqaj, tiamsis yog nyob lwm qhov ntsia tuaj tsis pom li. (Cov nqaj ntoos ntawd tseem nyob los txog niaj hnub no.) Hauv tus TSWV lub Phijxab tsuas muaj ob daim txiag zeb uas Mauxes muab tso rau hauv thaum lawv tseem nyob ntawm Roob Xinais. Ob daim txiag zeb ntawd yog tus TSWV sau nws tej lus Cog Tseg rau cov Yixalayees thaum lawv tsiv nram tebchaws Iziv los. Vajntxwv Xalumoos thov hais tias, “Tug TSWV, koj xaiv nyob hauv tauv huab thiab qhov uas tsaus nti. Nimno kuv ua tau lub Tuamtsev uas zoo heev rau koj, Yog qhov chaw rau koj nyob mus ibtxhis.” Cov Yixalayees puavleej tuaj sawv ntawd, ces vajntxwv tig xubntiag rau ntawm cov pejxeem thiab thov Vajtswv foom koob hmoov rau lawv. Nws hais tias, “Cia li qhuas tus TSWV uas yog cov Yixalayees tus Vajtswv! Tus TSWV yeej ua raws li tej lus uas nws cog tseg rau kuv txiv Daviv hais tias, ‘Suav txij thaum kuv coj kuv haivneeg tawm nram tebchaws Iziv los, kuv tsis tau xaiv ib lub nroog hauv haivneeg Yixalayees txhua xeem los ua lub Tuamtsev ua qhov chaw pehawm kuv, thiab kuv tsis tau xaiv leejtwg los kav kuv haivneeg Yixalayees. Tiamsis nimno kuv xaiv lub nroog Yeluxalees ua qhov chaw rau sawvdaws pehawm kuv thiab xaiv koj uas yog Daviv kav kuv haivneeg.’ ” Thiab Xalumoos hais ntxiv tias, “Kuv txiv Daviv twb npaj tseg lawm hais tias yuav ua lub Tuamtsev ua qhov chaw pehawm tus TSWV uas yog cov Yixalayees tus Vajtswv, tiamsis tus TSWV hais rau nws tias, ‘Koj yeej npaj siab xav ua lub tuamtsev rau kuv, tiamsis koj yuav tsis yog tus ua lub tuamtsev ntawd. Koj tus tub uas yog koj roj ntsha thiaj yog tus uas yuav ua kuv lub tuamtsev.’ “Nimno tus TSWV twb ua raws li tej lus cog tseg ntawd lawm; kuv tau ua vajntxwv kav cov Yixalayees hloov kuv txiv chaw, thiab kuv tau ua lub Tuamtsev los ua lub chaw pehawm tug TSWV uas yog cov Yixalayees tus Vajtswv. Kuv muab tus TSWV lub Phijxab uas ntim ob daim txiag zeb uas nws sau nws tej lus cog tseg rau cov Yixalayees tso rau hauv lub Tuamtsev.” Xalumoos mus sawv tabmeeg cov pejxeem sawvdaws ntawm hauv ntej lub thaj, nws tsa nws ob txhais tes thiab thov Vajtswv. ( Xalumoos muab tooj ua tau ib lub samthiaj thiab muab teeb rau hauv plawv lub tshavpuam. Lub samthiaj ntawd qhov ntev muaj tsib tshim, qhov dav muaj tsib tshim, thiab qhov siab muaj peb tshim; nws mus rau saum lub samthiaj, txhos caug, thiab tsa nws ob txhais tes rau saum nruab ntug tabmeeg sawvdaws.) Nws thov hais tias, “Tus TSWV uas yog cov Yixalayees tus Vajtswv, yeej tsis muaj dua lwm tus vajtswv nyob saum ntuj lossis hauv ntiajteb no zoo li koj lawm. Koj yeej ua raws li koj tej lus cog tseg rau koj haivneeg thiab hlub lawv thaum lawv mloog koj lus kawg siab kawg ntsws. Koj ua raws li tej lus uas koj tau cog tseg rau kuv txiv Daviv uas yog koj tus tubtxib, mas hnub no muaj tiav raws li koj txhua lo lus lawm tiag. Tus TSWV uas yog cov Yixalayees tus Vajtswv, nimno thov kom koj ua raws li lo lus uas thaud koj tau cog tseg rau kuv txiv Daviv uas yog koj tus tubtxib hais tias, ‘Koj yuav cia nws cov xeebntxwv ua vajntxwv kav cov Yixalayees mus li, yog lawv ua tib zoo mloog koj tej lus ib yam li nws mloog koj tej lus.’ Yog li ntawd, tus TSWV uas yog cov Yixalayees tug Vajtswv, nimno thov kom txhua yam muaj tseeb raws li koj tau coglus tseg rau koj tus tubtxib Daviv lawm. “Tiamsis Vajtswv, koj yuav ua li cas nrog neeg ntiajteb nyob? Txawm yog lub ntuj los twb dav tsis txaus koj nyob; yog li ntawd, lub Tuamtsev uas kuv ua no yuav ua li cas txaus koj nyob? Tus TSWV uas yog kuv tus Vajtswv, kuv yog koj tus tubtxib, thov koj mloog thiab teb kuv tej lus uas hnub no kuv thov koj. Thov koj tsa qhovmuag saib lub Tuamtsev no nruab hnub hmo ntuj. Koj coglus hais tias qhov chaw no yog qhov chaw pehawm koj; yog li ntawd, thaum kuv tig xubntiag tuaj rau ntawm lub Tuamtsev no thov koj, thov koj mloog kuv tej lus thov. Thov koj mloog kuv tej lus thov thiab koj haivneeg Yixalayees tej lus thov thaum lawv tig xubntiag tuaj rau ntawm qhov chaw no thov koj, koj nyob hauv koj lub Tsev saum ntuj mloog peb tej lus thov thiab zam txim rau peb. “Thaum muaj ib tug neeg twg raug luag liam hais tias nws ua txhaum rau tej kwvtij zejzog, thiab luag coj nws tuaj tsa tes twv ntawm koj lub thaj hauv lub Tuamtsev no hais tias nws yeej yog neeg ncaj ncees tiag, tug TSWV, koj nyob saum ntuj, thov koj mloog thiab txiav txim rau koj tus tubtxib. Thov koj rau txim rau tus ua txhaum raws li uas nws tau ua, thiab thov koj tso tus uas tsis muaj txim. “Thaum koj haivneeg Yixalayees swb lawv tej yeebncuab, vim lawv tau ua txhaum rau koj, tiamsis yog lawv tig rov los cuag koj thiab lawv tuaj rau hauv lub Tuamtsev no lees lawv tej kev txhaum thiab thov koj zam txhim, koj nyob saum ntuj thov mloog lawv tej lus thov. Thov zam txim rau koj haivneeg tej kev txhaum thiab coj lawv rov los rau hauv lub tebchaws uas koj muab pub rau lawv thiab lawv cov yawgkoob lawm. “Thaum koj tsis tso nag los vim koj haivneeg tau ua txhaum rau koj, tiamsis yog lawv txo hwjchim, lees txhim thiab tig xubntiag tuaj rau ntawm lub Tuamtsev no thov koj, tus TSWV, koj nyob saum ntuj, thov koj mloog lawv tej lus thov thiab zam txim rau koj cov tubtxib, koj haivneeg Yixalayees, thiab qhia lawv kom paub ua lub neej ncaj ncees. Ces thov koj tso nag los rau lub tebchaws uas koj muab pub rau koj haivneeg ua lawv tug mus li lawm. “Thaum lub tebchaws muaj kev tshaib nqhis lossis muaj kab mob kis lossis tej qoobloo raug puastsuaj, vim muaj cua daj cua dub nplawm lossis muaj kooj txomfav noj lossis thaum koj haivneeg raug lawv tej yeebncuab tawmtsam lossis thaum raug mob lossis muaj mob muaj nkeeg, thov koj mloog lawv tej lus thov. Yog koj haivneeg Yixalayees leejtwg muaj kev nyuaj siab ntxhov plawv, lawv tsa tes tuaj rau ntawm lub Tuamtsev no thiab thov koj, thov koj mloog lawv tej lus thov. Thov koj teb lawv tej lus thov ntawm koj lub chaw nyob saum ntuj tuaj; thov koj zam txim rau lawv thiab pab lawv. Tsuas yog koj tib leeg xwb thiaj paub txog neeg lub siab xav. Thov koj ua rau txhua tus raws li nws tej haujlwm, mas koj haivneeg thiaj yuav hwm koj mus tas lawv tiam neej nyob hauv lub tebchaws uas koj muab pub rau lawv cov yawgkoob lawm. “Thaum cov neeg txawv tebchaws uas nyob deb, ib tug twg hnov txog koj lub hwjchim, koj lub koob lub npe thiab tej txujci tseemceeb uas koj tau ua pab koj haivneeg dhau los lawm, tuaj thov koj hauv lub Tuamtsev no, thov koj mloog nws tej lus thov. Koj nyob saum ntuj qhov uas yog koj lub chaw nyob, thov koj ua raws li nws tej lus thov. Yog koj ua li ntawd, txhua haivneeg uas nyob hauv ntiajteb no thiaj yuav paub koj thiab mloog koj lus ib yam li koj haivneeg Yixalayees mloog koj lus. Ces lawv thiaj yuav paub hais tias kuv ua lub Tuamtsev no ua qhov chaw pehawm koj. “Thaum koj hais kom koj haivneeg mus tua lawv cov yeebncuab, txawm yog lawv nyob qhov twg thov koj los tsuav yog lawv tig xubntiag tuaj rau ntawm lub nroog uas koj xaiv tseg thiab lub Tuamtsev uas kuv ua rau koj no lawm, thov koj mloog lawv tej lus thov. Koj nyob saum ntuj mloog lawv tej lus thov thiab pab kom lawv muaj yeej. “Tsis muaj ib tug neeg twg uas tsis tau ua txhaum li, yog thaum twg koj haivneeg ua txhaum rau koj, koj chim rau lawv thiab cia lawv cov yeebncuab ntaus yeej lawv, thiab ntes lawv coj mus rau lwm lub tebchaws, txawm yog lub tebchaws ntawd nyob deb thiab ze los thov koj mloog koj haivneeg tej lus thov. Thaum lawv nyob hauv lub tebchaws ntawd, yog lawv hloov siab, lees lawv tej kev txhaum, kev phem kev qias thiab thov koj, tus TSWV, thov koj mloog lawv tej lus thov. Nyob hauv lub tebchaws ntawd, yog lawv muab siab npuab koj, lees lawv tej kev txhaum rau koj, thov koj thiab tig xubntiag tuaj rau ntawm lub tebchaws uas koj muab pub rau peb cov yawgkoob, lub nroog uas koj xaiv tseg, thiab lub Tuamtsev uas kuv ua rau koj lawm, thov koj mloog lawv tej lus thov. Koj nyob saum ntuj uas yog koj qhov chaw nyob, thov koj mloog lawv tej lus thov, hlub lawv thiab zam txim rau koj haivneeg. “Kuv tus Vajtswv, nimno thov koj tsa qhovmuag saib peb thiab mloog peb tej lus uas peb nyob ntawm qhov chaw no thov koj. Tus TSWV uas yog Vajtswv, nimno koj cia li mus nyob hauv lub Tuamtsev uas muaj koj lub Phijxab thiab koj lub hwjchim. Thov koj foom koob hmoov rau txhua yam uas koj cov povthawj ua, thiab thov kom koj haivneeg muaj kev zoo siab, rau qhov koj ua siab dawb siab zoo rau lawv. Tus TSWV uas yog Vajtswv, thov koj tsis txhob tso tus vajntxwv uas koj xaiv lawm tseg. Thov koj nco ntsoov koj txojkev hlub uas koj muab rau koj tug tubtxib Daviv lawm.” Thaum Vajntxwv Xalumoos thov Vajtswv tas, hluavtaws txawm poob saum ntuj los kub tej khoom uas lawv coj tuaj fij, thiab tus TSWV lub tshwjchim ci ntsa iab puv nkaus hauv lub Tuamtsev. Rau qhov tus TSWV lub tshwjchim ci ntsa iab puv nkaus hauv lub Tuamtsev, cov povthawj thiaj mus tsis tau rau hauv. Thaum cov Yixalayees pom hluavtaws poob saum ntuj los thiab pom tus TSWV lub tshwjchim ci puv nkaus hauv lub tuamtsev, lawv txhos caug ntua ua lawv ntsejmuag ti nkaus hauv av pehawm Vajtswv thiab qhuas nws txojkev ua siab dawb siab zoo thiab txojkev hlub uas nyob mus ibtxhis. Ces Xalumoos thiab cov pejxeem txawm muab tsiaj tua fij rau tus TSWV. Nws muab nees nkaum ob txhiab tus nyuj thiab ib puas nees nkaum txhiab tus yaj tua fij ua kev sib raug zoo. Yog li ntawd, vajntxwv thiab cov pejxeem thiaj muab lub Tuamtsev fij rau Vajtswv. Cov povthawj mus sawv rau ntawm qhov chaw uas npaj tseg rau lawv; thiab cov Levis sawv tig xubntiag rau ntawm cov povthawj, tshuab tej raj tej xyu uas Vajntxwv Daviv npaj tseg thiab hu nkauj qhuas tus TSWV hais tias, “Thov kom nws txojkev hlub nyob mus ibtxhis!” raws li Daviv tau hais tseg rau lawv lawm. Cov povthawj tshuab raj tshuab xyu thiab cov pejxeem sawvdaws sawv ntsug. Xalumoos muab thaj av hauv plawv lub tshavpuam uas nyob ntawm hauv ntej lub Tuamtsev ua kevcai ntxuav kom huv, nws muab tej tsiaj tua thiab muab hlawv fij tagnrho, muab tej qoobloo fij, thiab muab tej roj fij ua kev sib raug zoo. Nws ua li ntawd, rau qhov lub thaj tooj uas nws ua me heev, tsis txaus hlawv tej khoom fij ntawd. Xalumoos thiab cov Yixalayees ua Kevcai Nyob Tsev Pheebsuab thiab noj haus tau xya hnub. Tej neeg tuaj coob kawg li, tuaj pem lub Dawm Hamas thiab nram ciamteb Iziv tuaj huv tibsi. Lawv ua kevcai fij lub thaj tau xya hnub, thiab lawv tseem ua rooj noj rooj haus tau xya hnub ntxiv. Lawv xaus rooj noj rooj haus rau hnub kawg, thiab hnub tom qab uas yog lub xya hli ntuj, hnub nees nkaum peb, Xalumoos mam tso cov pejxeem rov mus tsev. Lawv zoo siab heev rau tej koob hmoov uas TSWV pub rau Daviv, Xalumoos thiab nws haivneeg Yixalayees. Tom qab uas Vajntxwv Xalumoos ua lub Tuamtsev, lub loog thiab txhua yam uas nws npaj siab ua tiav tas lawm, muaj ib hmos tus TSWV rov los tshwm rau Xalumoos pom. Tus TSWV hais rau Xalumoos hais tias, “Kuv twb hnov koj tej lus thov thiab kuv lees yuav lub Tuamtsev no ua qhov chaw fij khoom rau kuv. Thaum twg uas kuv tsis tso nag los, lossis tso kooj txomfav los noj tej qoobloo lossis tso tej kab mob kis los rau kuv haivneeg, yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua. Kuv yuav saib ntsoov lub tuamtsev thiab mloog lawv tej lus thov ntawm qhov chaw no, rau qhov kuv xaiv qhov chaw no thiab tshwj ua qhov chaw rau sawvdaws tuaj pehawm kuv mus ibtxhis. Kuv yuav saib thiab tiv thaiv qhov chaw no txhua lub sijhawm. Yog koj pehawm kuv ntawm lub siab ncaj ncees ib yam li koj txiv Daviv, coj raws li kuv tej kevcai thiab ua txhua yam raws li kuv twb samhwm rau koj lawm, kuv yuav ua raws li tej lus uas kuv tau cog tseg rau koj txiv Daviv thaum uas kuv hais rau nws tias, Nws cov xeebntxwv yuav tau ua cov tswj cov Yixalayees mus ibtxhis li. Tiamsis yog koj thiab koj cov pejxeem tsis ua raws li kuv tej Kevcai thiab tej lus samhwm uas kuv tau muab rau nej, thiab mus pe luag tej vajtswv, ces kuv yuav muab nej ntiab tawm hauv lub tebchaws uas kuv muab rau nej lawm, thiab kuv yuav muab lub Tuamtsev uas kuv lees yuav ua qhov chaw tseemceeb rau sawvdaws tuaj pehawm kuv tso povtseg. Tej neeg nyob txhua qhov yuav luag cov Yixalayees plig thiab saib lub Tuamtsev tsis muaj nqis. “Nimno luag qhuas lub Tuamtsev no heev, tiamsis muaj ib hnub tej neeg dua kev mus los yuav xav tsis thoob thiab yuav nug hais tias, ‘Vim li cas tus TSWV thiaj ua li no rau lub tebchaws thiab lub Tuamtsev no?’ Tej neeg yuav teb hais tias, ‘Vim lawv tso tus TSWV uas yog lawv tus Vajtswv uas coj lawv cov yawgkoob tsiv nram tebchaws Iziv los tseg lawm. Lawv mus pe luag tej vajtswv. Yog li ntawd, tus TSWV thiaj tso kev puastsuaj los raug lawv.’ ” Xalumoos siv sijhawm nees nkaum xyoo ua lub Tuamtsev thiab nws lub loog. Nws txhim kho dua cov nroog uas Vajntxwv Hilas muab rau nws thiab tso cov Yixalayees mus nyob hauv cov nroog ntawd. Nws mus txeeb tau cheebtsam Hamas thiab Xaunpas, thiab nws txhim ntsa yeej thaiv lub nroog Palimas uas nyob hauv tiaj suabpuam, thiab nws rov txhim kho cov nroog hauv Hamas ua chaw rau khoom. Thiab Xalumoos txhim kho cov nroog no: lub nroog Npethes Hauloos theem siab thiab lub nroog Npethes Hauloos theem qis (uas yog ob lub nroog uas muaj ntsa yeej thiab roojvag thaiv khov kho), lub nroog Npa-alas, cov nroog uas nws rau khoom, thiab cov nroog uas nws tso nws tej tsheb nees. Xalumoos siv tus qauv no mus ua rau hauv lub nroog Yeluxalees, hauv lub tebchaws Lenpanoos thiab thoob plaws txhua cheebtsam uas nws kav. Cov Yixalayees tsis raug yuam ua qhev, tiamsis lawv ua tubrog, ua nomtswv, ua thawj tubrog, ua tubrog tsav tsheb nees thiab ua tubrog caij nees. Xalumoos tsa ob puas tsib caug leej ua cov thawj saib cov neeg uas ua vaj ua tsev. Xalumoos coj nws tus pojniam uas yog cov Iziv tus vajntxwv tus ntxhais hauv Daviv lub nroog los nyob rau hauv lub tsev uas Xalumoos ua rau nws tus pojniam ntawd nyob. Xalumoos hais tias, “Nws yuav tsum tsis txhob nyob hauv cov Yixalayees tus Vajntxwv Daviv lub loog, vim txhua qhov uas tso tus TSWV lub Phijxab rau, puavleej yog tej chaw dawbhuv.” Xalumoos muab khoom hlawv rau saum lub thaj uas nws ua rau ntawm hauv ntej lub Tuamtsev fij rau tus TSWV. Nws muab khoom hlawv fij raws li Txoj Kevcai uas Mauxes sau tseg hais txog tej hnub so li no: Hnub Xanpataus, Hnub ua Kevcai Hli Xiab, Hnub ua Kevcai Noj Ncuav Tsis Xyaw Keeb, Hnub ua Kevcai Sau Qoobloo thiab Hnub Kevcai Nyob Tsev Pheebsuab uas yuav tsum tau niaj xyoo ua. Nws ua raws li txojkev tswjhwm uas nws txiv Daviv tau hais tseg lawm, nws faib haujlwm rau cov povthawj, thiab cov Levis uas yog cov hu nkauj thiab pab cov povthawj ua haujlwm txhua hnub. Nws muab cov uas zov lub Tuamtsev faib ua tej pab ua lawv tej haujlwm ntawm roojvag txhua hnub raws li Daviv uas yog Vajtswv tus neeg tau hais tseg lawm. Thiab lawv ua txhua yam raws li Daviv tej lus uas nws hais rau cov povthawj thiab cov Levis txog tej tsev rau khoom thiab lwm yam huv tibsi. Txhua yam uas Xalumoos ua puavleej tiav tas rau lub sijhawm no, tsis hais thaum pib ua tus TSWV lub Tuamtsev thiab tej khoom siv hauv lub Tuamtsev. Ces Xalumoos txawm mus rau hauv lub nroog Exi-oonkenpes thiab Elas uas nyob ntawm ntug hiavtxwv hauv tebchaws Edoos. Vajntxwv Hilas tso nws cov nomtswv saib cov neeg uas txawj tsav nkoj, tsav nws cov nkoj nrog Xalumoos cov nomtswv mus rau nram tebchaws Aufiles thiab thauj tau kaum rau tas kub los rau Xalumoos. Vajntxwv Xalumoos lub koob meej nrov ncha moo lug mus txog cov Senpas tus Poj Vajntxwv, nws thiaj tuaj rau hauv lub nroog Yeluxalees, nws nug ntau zaj uas tsis yoojyim totaub sim saib Xalumoos puas teb tau. Nws coj neeg coob heev nrog nwg tuaj, nws muab ntxhuav thauj tej txujlom, hlaws thiab kub ntau heev tuaj. Thaum nws thiab Xalumoos sib ntsib lawm, nws nug Xalumoos ntau tsav ntau yam, tagnrho tej tswvyim uas nws npaj tuaj nug. Xalumoos teb tau nws tej lus nug ntawd huv tibsi; tsis muaj ib los twg nyuaj uas Xalumoos teb tsis tau li. Thaum cov Senpas tus poj vajntxwv hnov Xalumoos tej tswvyim thiab pom lub loog uas Xalumoos ua, thiab pom tej zaub mov uas luag rau rau saum Xalumoos lub rooj, tej tsev uas nws cov nomtswv nyob, tej tub kavxwm los yeej nyob muaj chaw, thiab tej tsoos tsho uas lawv hnav los zoo ib yam nkaus, tej tub ce dej ce cawv, thiab tej tsiaj uas nws tua fij rau hauv lub Tuamtsev ua rau poj vajntxwv yoob thiab xav tsis thoob li. Nws hais rau Vajntxwv Xalumoos hais tias, “Txhua yam uas kuv hnov hais txog koj thiab koj tej tswvyim yeej muaj tseeb tiag! Tiamsis kuv tsis ntseeg tej uas luag qhia kuv ntawd txog thaum uas kuv tuaj pom koj kiag lawm; koj tej tswvyim uas kuv hnov tsuas yog ib nrab xwb. Koj ntse tshaj qhov uas luag hais rau kuv. Ua cas koj cov neeg uas ua koj tej haujlwm yuav muaj hmoo ua luaj, lawv nyob ntawm koj xubntiag thiab niaj hnub hnov koj tej lus txawj ntse! Cia li qhuas tus TSWV uas yog koj tus Vajtswv! Nws ua rau sawvdaws paub hais tias nws txaus siab heev rau koj, nws thiaj tsa koj ua vajntxwv kav cov Yixalayees. Rau qhov nws hlub nws haivneeg Yixalayees heev thiab xav tseg lawv nyob mus ibtxhis, nws thiaj tsa koj ua lawv tus vajntxwv coj raws li nws txoj kevcai thiab txojkev ncaj ncees.” Poj vajntxwv thiaj muab tej khoom uas nws thauj tuaj pub rau Vajntxwv Xalumoos: kub yuav luag muaj tsib tas, txujlom thiab hlaws ntau kawg li. Vajntxwv tsis tau pom dua luag muab tej txujlom pub rau nws ntau npaum li cov uas poj vajntxwv uas kav tebchaws Senpas coj tuaj rau nws no li. ( Vajntxwv Hilas thiab Vajntxwv Xalumoos cov neeg mus thauj kub, ntoo thwjsuab thiab hlaws ntau heev nram tebchaws Aufiles los rau Xalumoos thiab. Xalumoos muab cov ntoo ntawd ua qib ntai rau lub Tuamtsev thiab nws lub loog thiab muab txua nkauj nogncas thiab raj rau cov ntaus suab nkauj. Ibtxwm tsis tau pom muaj tej ntoo zoo li ntawd nyob hauv tebchaws Yudas li.) Vajntxwv Xalumoos muab txhua yam uas cov Senpas tus poj vajntxwv thov pub rau nws. Tej no yog nws muab rau cov Senpas tus poj vajntxwv pauj rau tej uas poj vajntxwv coj tuaj pub rau nws lawm. Ces poj vajntxwv thiab nws cov neeg txawm rov qab mus rau nram tebchaws Senpas lawm. Txhua lub xyoo twg Vajntxwv Xalumoos tau txais kub txog li nees nkaum tsib tas, ntxiv rau tej se uas cov tub lag tub luam them tuaj. Cov vajntxwv uas kav tebchaws Alanpias thiab cov tswvxeev uas kav cov Yixalayees coj nyiaj coj kub ntau heev tuaj rau Vajntxwv Xalumoos thiab. Xalumoos muab cov kub ntawd ntaus tau ob puas daim thaiv hniav ntaj, ib daim twg hnyav kwvlam li kaum tsib choj, thiab ntaus dua peb puas daim, ib daim twg hnyav yim choj. Nws muab cov thaiv hniav ntaj ntawd, coj mus cia rau hauv lub chav tsev havzoov Lenpanoos. Vajntxwv ua tau ib lub zwmtxwv loj. Lub zwmtxwv ntawd yog muab kaus ntxhw ua, thiab muab kub vuam thoob plaws sab nraud. Muaj rau theem qib ntai nce mus rau saum lub zwmtxwv, thiab muab kub vuam daim tiag taw. Luag txua ob tug tsov ntxhuav sawv rau ob sab ntawm lub zwmtxwv ua ob tug tiag npab. Rau theem qib ntai ntawd ib theem twg luag txua ob tug tsov ntxhuav txawb rau ob tog, tagnrho yog muaj kaum ob tug tsov ntxhuav me txawb rau ntawm cov qib ntai ntawd. Nyob rau lwm lub tebchaws yeej tsis muaj ib lub zwmtxwv zoo npaum li lub no li. Tagnrho Vajntxwv Xalumoos tej khob haus dej puavleej yog muab kub ua thiab tej twj taig hauv chav tsev havzoov Lenpanoos los puavleej yog muab kub ua; tiam uas Xalumoos tseem ua neej nyob ntawd, luag suav hais tias nyiaj tsis muaj nqis li. Xalumoos tseem muaj ntau lub nkoj uas yog tej nkoj thauj khoom hauv hiavtxwv nrog Hilas cov nkoj. Txhua peb lub xyoos twg nws cov nkoj yuav tsum mus thauj kub, nyiaj, kaus ntxhw, liab, thiab yajyuam los rau nws. Vajntxwv Xalumoos yog tus npluanuj thiab ntse tshaj tej vajntxwv uas nyob hauv lub qab ntuj no. Tej vajntxwv thoob qab ntuj puavleej tuaj cuag Xalumoos thiab mloog nws piav nws tej kev txawj tse uas Vajtswv pub rau nws. Txhua tus uas tuaj puavleej coj nyiaj, kub, tsho ntev, cuabyeej ua rog, txujlom, nees, thiab nees zag tuaj pub Xalumoos. Pheej muaj li no ib xyoos dhau rau ib xyoos. Vajntxwv Xalumoos muaj plaub txhiab lub nkuaj nees kaw nws cov nees thiab cia nws tej tsheb nees, thiab muaj kaum ob txhiab leej tubrog caij nees; muaj ibtxhia nws cia nyob hauv lub nroog Yeluxalees, thiab dua li cov nws coj mus nyob rau lwm lub nroog lawm. Vajntxwv Xalumoos yog tus uas kav tagnrho cov vajntxwv, txij ntua ntawm tus dej Efalates mus rau ntawm tebchaws Filitees thiab mus rau ntawm cov Iziv tus ciam tebchaws. Lub sijhawm uas Xalumoos ua tus kav tebchaws ntawd, nws saib nws tej nyiaj tsuas zoo li tej pobzeb nyob hauv lub nroog Yeluxalees, thiab tej ntoo ciab los tsuas zoo li tej ntoo xikamaus uas nyob ntawm tej taw roob hauv tebchaws Yudas xwb. Vajntxwv tseem muaj cov sawv cev txais tej nees uas luag cab hauv tebchaws Muxilis thiab hauv txhua lub tebchaws tuaj. Xalumoos lub neej thaum pib mus txog thaum xaus puavleej muab sau cia rau hauv Nathas uas yog tus cev Vajtswv lus Phau Ntawv Keebkwm, raws li Ahiyas uas yog tus cev Vajtswv lus uas nyob hauv Silaus tej lus qhia tshwm thiab tej lus uas Idaus uas yog tus cev Vajtswv lus ua yogtoog pom, thiab hais txog Nenpas tus tub uas yog Vajntxwv Yelaunpau-as uas kav cov Yixalayees. Xalumoos nyob hauv lub nroog Yeluxalees kav cov Yixalayees tau plaub caug xyoo. Nws tuag thiab luag muab nws coj mus faus rau hauv Daviv lub nroog, thiab nws tus tub Lehaunpau-as ua vajntxwv hloov nws chaw. Lehaunpau-as mus rau tom lub nroog Sekhees, qhov chaw uas cov Yixalayees nyob sab qaumteb tuaj txoos ua ke tsa nws ua vajntxwv. Thaum Nenpas tus tub Yelaunpau-as uas khiav Vajntxwv Xalumoos mus nkaum rau nram tebchaws Iziv lawm, hnov xov zoo txog zaj no, nws thiaj li rov nram tebchaws Iziv los. Tagnrho cov xeem uas nyob sab qaumteb tso neeg mus hu Yelaunpau-as tuaj, ces lawv sawvdaws txawm ua ke mus cuag Lehaunpau-as thiab hais rau nws tias, “Koj txiv muab tej haujlwm hnyav heev rau peb ua. Yog koj txo kom peb tau ua haujlwm sib thiab peb muaj kev kaj siab, peb yuav txaus siab ua koj pejxeem mus li.” Lehaunpau-as teb hais tias, “Peb hnub saum no nej rov tuaj cuag kuv, kuv mam li teb nej.” Yog li ntawd, lawv txawm rov qab mus tsev lawm. Vajntxwv Lehaunpau-as mus nrog cov laus neeg uas ibtxwm yog nws txiv Xalumoos cov tuavxam sablaj. Nws nug lawv hais tias, “Nej yuav pab tswvyim li cas rau kuv rov mus teb cov pejxeem?” Lawv teb hais tias, “Yog koj xav ua koj tes haujlwm kom cov pejxeem poog koj, mas koj yuav tau teb kom raws li lawv siab nyiam, lawv thiaj yuav ua koj cov pejxeem thiab muab siab npuab koj mus li.” Tiamsis Lehaunpau-as tsis yuav tej lus uas cov laus neeg ntawd qhia, nws txawm mus nrog cov tuavxam hluas ua nrog nws ib phaum sablaj. Nws nug lawv hais tias, “Nej pab kuv tawm tswvyim saib yuav teb li cas rau cov pejxeem? Lawv tuaj thov kuv hais tias, ‘Thov koj muab tej haujlwm hnyav uas koj txiv muab rau peb ua txo kom sib mentsis.’ ” Lawv teb hais tias, “Koj teb rau cov pejxeem li no hais tias, ‘Kuv tus ntivtes rwgqab tseem loj dua kuv txiv lub duav!’ Hais rau lawv hais tias, ‘Kuv txiv muab tej haujlwm hnyav heev rau nej ua; kuv tseem yuav muab tej haujlwm uas hnyav tshaj ntawd rau nej ua thiab. Kuv txiv muab hlua tsaj nplawm nej xwb; tiamsis kuv yuav muab hlua tawv nplawm nej!’ ” Peb hnub tom qab Yelaunpau-as thiab cov pejxeem rov mus cuag Vajntxwv Lehaunpau-as, raws li nws hais rau lawv lawm. Vajntxwv tsis yuav tej lus uas cov laus neeg qhia, nws thiaj li hais lus hnyav rau cov pejxeem raws li cov tuavxam hluas qhia. Nws hais rau cov pejxeem hais tias, “Kuv txiv muab tej haujlwm hnyav heev rau nej; kuv tseem yuav muab tej haujlwm uas hnyav tshaj ntawd rau nej ua thiab. Kuv txiv muab hlua tsaj nplawm nej xwb, tiamsis kuv yuav muab hlua tawv nplawm nej!” Qhov uas vajntxwv tsis mloog cov pejxeem lus twb yog ua kom tiav raws li tej lus uas tus TSWV uas yog Vajtswv kom Ahiyas tus uas cev Vajtswv lus uas nyob hauv lub nroog Silaus mus hais rau Nenpas tus tub Yelaunpau-as ntag. Thaum cov pejxeem pom hais tias vajntxwv tsis mloog lawv tej lus lawm, lawv thiaj qw hais tias, “Peb muaj qabhau dabtsi mus nrog Daviv thiab nws tsev nyuag neeg ntawd ua ke? Lawv twb tsis tau ua ib yam dabtsi pab peb li los sav? Cov Yixalayees, cia li rov qab mus tsev los mas! Cia Lehaunpau-as, nws rov kav nws nkaus xwb thiaj zoo!” Yog li ntawd, cov Yixalayees thiaj ntxeev siab, tseg Lehaunpau-as ua vajntxwv kav cov neeg uas nyob hauv xeev Yudas nkaus xwb. Ces Vajntxwv Lehaunpau-as thiaj tso Adaunilas uas yog tus thawj saib cov tubrog mus cuag cov Yixalayees, tiamsis lawv muab pobzeb ntaus nws tuag lawm. Thaum muaj tej no lawm, Lehaunpau-as thiaj khiav ceev nrooj mus nce nws lub tsheb nees thiab rov los rau nram lub nroog Yeluxalees lawm. Txij hnub ntawd los, cov Yixalayees uas nyob pem sab qaumteb thiaj ntxeev siab rau Daviv cov xeebntxwv los li lawm. Thaum Lehaunpau-as los txog rau hauv lub nroog Yeluxalees, nws thiaj txhij tau ib puas yim caum txhiab leej tubrog uas siab tawv heev hauv xeem Yudas thiab Npeenyamees. Nws yuam kom lawv mus tua cov Yixalayees pem sab qaumteb thiab txeeb kom tau lub tebchaws rov qab los rau nws kav. Tiamsis Vajtswv hais rau Semayas tus uas cev Vajtswv lus kom coj tej lus no mus hais rau Lehaunpau-as thiab tagnrho cov neeg uas yog xeem Yudas thiab xeem Npeenyamees hais tias, “Nej tsis txhob mus tua nej cov kwvtij uas yog cov Yixalayees hlo li. Nej sawvdaws cia li rov qab mus tsev. Yeej yog kuv pom zoo thiaj muaj tej xwm no tshwmsim tuaj.” Lawv mloog tus TSWV lus thiab nyias rov mus nyias tsev tsis mus tua Yelaunpau-as. Lehaunpau-as nyob hauv lub nroog Yeluxalees, thiab xov ntsa yeej thaiv cov nroog uas nyob hauv tebchaws Yudas thiab Npeenyamees li nram no: Npelehees, Etas, Tekau-as, Npethes Xus, Xukaus, Adulas, Nkathas, Malesas, Xifes, Adaula-ees, Lakhis, Axekas, Xaulas, Aiyaloos, thiab Henploos. Nws xov ntsa yeej khov heev thaiv cov nroog ntawd, thiab nws tsa ib tug thawj tubrog saib ib lub nroog, nws muab zaub mov, roj txiv ntoo thiab cawv txiv hmab coj mus cia rau hauv txhua lub nroog, thiab nws muab tej thaiv hniav ntaj thiab tej hmuv cia rau hauv ib yam nkaus. Lehaunpau-as ua li no nws thiaj tswj tau cov Yudas thiab cov Npeenyamees. Cov povthawj thiab cov Levis uas nyob hauv cov Yixalayees cheebtsam los tas rau nram tebchaws Yudas lawm. Cov Levis tso lawv tej tshav tsiaj thiab lawv tej teb tseg thiab khiav los nyob nram tebchaws Yudas thiab hauv lub nroog Yeluxalees, rau qhov Vajntxwv Yelaunpau-as uas kav cov Yixalayees thiab nws cov tub tsis pub lawv ua povthawj ua tus TSWV tes haujlwm lawm. Yelaunpau-as tsa dua ib cov povthawj teev dab ntawm tej chaw teev dab saum tej ncov roob, teev tej mlom tshis thiab mlom nyuj uas nws puab. Cov Yixalayees txhua tus uas muab siab npuab tus TSWV uas yog cov Yixalayees tus Vajtswv puavleej nrog cov Levis los nyob rau hauv Yeluxalees kom lawv thiaj tau tua tsiaj hlawv fij rau tus TSWV uas yog lawv cov yawgkoob tus Vajtswv. Qhov no ua rau lub tebchaws Yudas nyob ruaj khov, thiab lawv txhawb Lehaunpau-as uas yog Xalumoos tus tub tau peb xyoos, thiab lawv ua raws li Vajntxwv Daviv thiab Vajntxwv Xalumoos txojkev tswjhwm. Lehaunpau-as yuav Mahelas uas yog Daviv tus tub Yelimaus tus ntxhais ua pojniam, Yelimaus niam hu ua Anpihais uas yog Eli-as tus ntxhais thiab yog Yexais tus xeebntxwv. Lehaunpau-as thiab Mahelas muaj peb tug tub: Ye-uses, Semaliyas thiab Xahas. Tom qab no nws yuav Ma-akas uas yog Axaloos tus ntxhais ua niamyau. Lehaunpau-as thiab Ma-akas muaj plaub tug tub: Anpiyas, Athais, Xixas, thiab Selaumis. Lehaunpau-as muaj kaum yim tus niamhlob thiab rau caum tus niamyau, nws cov tub muaj nees nkaum yim leej thiab cov ntxhais muaj rau caum leej. Tagnrho cov niamhlob thiab niamyau, mas nws nyiam Ma-akas dua, thiab tagnrho nws cov tub, mas nws hlub Anpiyas uas yog Ma-akas tus tub dua, nws thiaj xaiv Anpiyas ua vajntxwv hloov nws chaw. Lehaunpau-as ua tib zoo faib haujlwm rau nws cov tub thiab tso lawv mus nyob rau txhua lub nroog uas muaj ntsa yeej hauv tebchaws Yudas thiab Npeenyamees; nws pub rau lawv muaj noj muaj haus nplua mias, thiab yuav ntau tus pojniam rau lawv. Thaum Lehaunpau-as ua vajntxwv thiab tswj tau lub tebchaws nyob tus lawm, nws thiab nws cov pejxeem txawm tso tus TSWV txoj kevcai tseg. Lehaunpau-as ua vajntxwv tau tsib xyoos, ces lawv txawm tsis muab siab npuab tus TSWV lawm, tus TSWV thiaj li rau txim rau lawv. Cov Iziv tus Vajntxwv Sisaj txawm tuaj tua lub nroog Yeluxalees, nws coj ib txhiab ob puas lub tsheb nees ua rog, rau caum txhiab leej tubrog caij nees thiab ib co tubrog coob heev suav tsis txheeb li, cov tubrog ntawd yog cov Linpias, cov Xukis thiab cov Sudas. Sisas xub txeeb tau cov nroog uas muaj ntsa yeej hauv tebchaws Yudas, nws mam li mus tua lub nroog Yeluxalees. Semayas tus uas cev Vajtswv lus thiaj mus cuag Vajntxwv Lehaunpau-as thiab cov Yudas tej thawjcoj uas tuaj rau hauv lub nroog Yeluxalees, vim lawv ntshai Sisaj. Semayas hais rau lawv tias, “Tus TSWV hais rau nej li no: ‘Vim nej tso kuv tseg lawm, nimno kuv yuav muab nej tso rau Sisaj.’ ” Vajntxwv thiab cov thawjcoj lees hais tias lawv tau ua txhaum lawm, thiab hais tias, “Qhov uas tus TSWV ua li ntawd, nws yeej ua ncaj lawm.” Thaum tus TSWV pom li no, nws hais rau Semayas hais tias, “Vim lawv lees lawv tej kev txhaum lawm, kuv yuav tsis ua kom lawv puastsuaj, tiamsis kuv yuav cawm kom lawv ibtxhia dim thaum Sisaj tuaj tua lawv, thiab kuv yuav tsis pub Sisas ua rau lub nroog Yeluxalees puastsuaj, vim kuv txojkev chim. Txawm li ntawd los Sisaj yuav tua yeej lawv, lawv thiaj paub hais tias qhov uas lawv ua kuv tes haujlwm thiab ua tej nomtswv hauv ntiajteb no tes haujlwm txawv npaum li cas.” Vajntxwv Sisaj tuaj tua tau lub nroog Yeluxalees, nws txawm coj tej nyiaj tej kub uas nyob hauv lub Tuamtsev, hauv vajntxwv lub loog, tej thaiv hniav ntaj uas Vajntxwv Xalumoos muab kub nchuav ua, thiab txhua yam huv tibsi mus lawm. Vajntxwv Lehaunpau-as thiaj muab tooj ua dua ib cov thaiv hniav ntaj, thiab muab rau cov uas zov vajntxwv lub loog tej roojvag ua cov saib. Txhua zaus uas vajntxwv mus rau hauv lub Tuamtsev, cov tubrog uas nrog nraim vajntxwv nqa cov thaiv hniav ntaj nrog nws mus thiab coj rov los cia rau hauv chav uas cov tubrog zov vajntxwv nyob. Vim qhov uas Lehaunpau-as txo hwjchim thiab lees txim, tus TSWV txojkev chim thiaj tsis ua rau nws puastsuaj, lub tebchaws Yudas thiaj tau nyob kaj siab lug. Lehaunpau-as nyob hauv lub nroog Yeluxalees ua vajntxwv kav lub tebchaws. Thaum nws ua vajntxwv, nws hnubnyoog muaj plaub caug ib xyoos, thiab nws nyob hauv lub nroog Yeluxalees kav tau kaum xya xyoo. Yeluxalees yog lub nroog uas tus TSWV tau xaiv hauv lub tebchaws Yixalayees los ua qhov chaw rau sawvdaws pehawm nws. Lehaunpau-as niam hu ua Na-amas uas yog neeg Amoos. Lehaunpau-as ua kev phem kev qias, rau qhov nws tsis muab siab rau nrhiav tus TSWV. Lehaunpau-as lub neej thaum pib mus txog thaum xaus, thiab nws tsevneeg puavleej muab sau rau hauv Semayas tus uas cev Vajtswv lus Phau Ntawv Keebkwm thiab Idaus tus uas cev Vajtswv lus Phau Ntawv Keebkwm lawm. Lehaunpau-as thiab Yelaunpau-as, nkawd ib leeg pheej ua rog rau ib leeg ua ntu zus li. Lehaunpau-as tuag thiab luag muab nws coj mus faus rau ntawm cov vajntxwv lub toj ntxas hauv Daviv lub nroog, thiab nws tus tub Anpiyas ua vajntxwv hloov nws chaw. Thaum Yelaunpau-as ua vajntxwv kav tebchaws Yixalayees tau kaum yim xyoo, Anpiyas mam ua vajntxwv kav tebchaws Yudas, thiab nwg nyob hauv lub nroog Yeluxalees kav tau peb xyoos. Nws niam hu ua Mikayas thiab yog Uliyas uas nyob hauv lub nroog Nkinpe-as tus ntxhais. Anpiyas thiab Yelaunpau-as ib leeg ua rog rau ib leeg. Anpiyas txhij tau plaub puas txhiab leej tubrog, thiab Yelaunpau-as txhij tau yim puas txhiab leej tubrog tuaj sib tua. Anpiyas cov tubrog thiab Yelaunpau-as cov tubrog tuaj sib ntsib ntawm lub laj roob Efalayees. Vajntxwv Anpiyas txawm mus tuaj saum Roob Xemalais qw nrov nrov rau Yelaunpau-as hais tias, “Nej cia li mloog kuv hais mog! Nej puas paub hais tias tus TSWV uas yog cov Yixalayees tus Vajtswv tau coglus ruaj khov rau Daviv lawm hais tias Daviv thiab nws cajces yuav tau ua vajntxwv kav cov Yixalayees mus ibtxhis yeej tsis muaj leejtwg rhuav li no los? Txawm li ntawd los Nenpas tus tub Yelaunpau-as tseem ntxeev siab rau Xalumoos uas yog nws tus vajntxwv. Tom qab ntawd Yelaunpau-as yaum tau ib pab neeg tsis tseemceeb tuaj yuam Xalumoos tus tub Lehaunpau-as uas tseem tsis tau paub qabhau nws thiaj tawmtsam tsis yeej lawv. Nimno koj xav hais tias, koj muaj peevxwm tuaj tua tus TSWV lub tebchaws uas nws muab rau Daviv cov xeebntxwv; rau qhov koj muaj tubrog coob thiab muaj tej mlom nyuj uas Yelaunpau-as muab kub nchuav ua nej tej vajtswv. Nej tau muab tus TSWV cov povthawj ua yog Aloos cov xeebntxwv, thiab cov Levis ntiab tawm khiav, nej xaiv dua ib co los ua povthawj hloov lawv chaw, nej ua raws li luag lwm haivneeg ua. Yog leejtwg cab ib tug nyuj lossis xya tug yaj tuaj rau nej, nej txawm tsa nws ua povthawj rau nej cov vajtswv. “Tiamsis peb tseem pehawm tus TSWV uas yog peb tus Vajtswv thiab tsis tso nws tseg li. Cov povthawj uas yog Aloos cov xeebntxwv tseem ua lawv lub luag haujlwm, thiab cov Levis yog cov uas pab lawv. Lawv niaj tagkis thiab niaj hmo hlawv khoom thiab tua tsiaj hlawv tagnrho fij rau tus TSWV. Lawv muab ncuav tso rau saum lub rooj uas twb ua kevcai ntxhua huv lawm, thiab txhua hmo lawv taws cov teeb uas muab kub ua cov ncej. Vajtswv yog peb tus thawjcoj, thiab nws cov povthawj tuav rawv xyu nyob ntawm no npaj yuav tshuab txhib peb cov tubrog tuaj tua nej. Cov Yixalayees, nej tsis txhob ua rog rau tus TSWV uas yog nej cov yawgkoob tus Vajtswv. Nej yeej yuav tsis yeej nws li!” Thaum Yelaunpau-as thiab nws cov tubrog tseem nyob ntawm cov Yudas hauv ntej, nws twb tso ibtxhia nyas tom qab tuaj tua cov Yudas lawm. Cov Yudas tig saib, ua cas luag twb tuaj vij lawv tas lawm. Lawv quaj thov tus TSWV pab, thiab cov povthawj txawm tshuab xyu. Cov Yudas qw nrov nrov thiab dhia mus tua cov Yixalayees; thaum lawv qw ntawd, tus TSWV pab Anpiyas thiab cov Yudas tua yeej Yelaunpau-as thiab cov Yixalayees. Cov Yixalayees khiav cov Yudas, tiamsis Vajtswv muab lawv cob rau cov Yudas tes. Anpiyas thiab nws cov tubrog tua cov Yixalayees tej tubrog uas ua tau heev tuag lawm tsib puas txhiab leej. Cov Yudas tua yeej cov Yixalayees, rau qhov lawv muab siab npuab tus TSWV uas yog lawv cov yawgkoob tus Vajtswv. Anpiyas caum Yelaunpau-as cov tubrog tua thiab txeeb tau Yelaunpau-as cov nroog no: Npethees, Yesanas, Efeloos thiab tej zos uas nyob ibncig cov nroog ntawd. Yelaunpau-as tsis muaj hnub kovyeej Anpiyas mus txog thaum uas Vajtswv muab Yelaunpau-as tua tuag lawm. Anpiyas muaj hwjchim heev zuj zus, nws muaj kaum plaub tug pojniam, nees nkaum ob tug tub thiab kaum rau tug ntxhais. Anpiyas lub neej, tej lus uas nws hais thiab tej uas nws ua, puavleej muab sau rau hauv Idaus tus uas cev Vajtswv lus Phau Ntawv Keebkwm lawm. Vajntxwv Anpiyas tuag thiab luag muab nws faus rau ntawm cov vajntxwv lub toj ntxas hauv Daviv lub nroog, thiab nws tus tub Axas ua vajntxwv hloov nws chaw. Tiam uas Axas kav, lub tebchaws muaj kev thajyeeb tau kaum xyoo. Axas ua zoo thiab ua ncaj ncees haum tus TSWV uas yog nws tus Vajtswv siab nyiam. Nws rhuav cov neeg txawv tebchaws tej thaj thiab tej chaw teev dab, tsoo tej ncej zeb thiab ntov tus mlom Aselas povtseg huv tibsi. Axas hais kom cov Yudas mloog tus TSWV uas yog lawv cov yawgkoob tus Vajtswv lus, thiab ua raws li tus TSWV tej lus qhia thiab tej lus samhwm. Qhov uas nws rhuav tej chaw teev dab thiab tej thaj uas hlawv hmoov tshuaj tsw qab hauv cov Yudas tej nroog, nws thiaj tswj tau lub tebchaws nyob thajyeeb. Thaum Axas ua vajntxwv kav tebchaws nws xov ntsa yeej thaiv tej nroog hauv tebchaws Yudas, lub tebchaws thiaj tsis muaj tsov tsis muaj rog tau ntau xyoo, rau qhov tus TSWV pub nws muaj kev thajyeeb. Nws hais rau cov Yudas hais tias, “Peb cia li xov ntsa yeej thiab ua roojvag thaiv tej nroog thiab ua chaw tsomfaj rau tej nroog, cheem nimno peb tau kav thiab lub tebchaws yog peb tug, rau qhov peb tau ua raws li tus TSWV uas yog peb tus Vajtswv lub siab nyiam. Nws tiv thaiv peb txhua phab thiab pub peb nyob kaj siab lug.” Yog li ntawd, lawv thiaj txhim kho tej nroog thiab lub tebchaws rov muaj kev vammeej. Vajntxwv Axas muaj peb puas txhiab tus tubrog uas yog xeem Yudas, lawv puavleej muaj daim thaiv hniav ntaj, thiab hmuv, thiab ob puas yim caum txhiab tus tubrog uas yog xeem Npeenyamees, lawv puavleej muaj daim thaiv hniav ntaj thiab hneevnti. Cov tubrog no yog cov uas muaj siab tawv thiab tau kawm kev tua rog lawm. Zelas uas yog cov Sudas tug thawj tubrog coj ib plhom tus tubrog thiab peb puas lub tsheb nees tuaj tua tebchaws Yudas, thaum lawv tuaj txog rau ntawm Malesas lawm. Axas thiaj coj nws cov tubrog mus tua Zelas, thiab ob tog tubrog tuaj txum chaw sib tua rau hauv lub Hav Xefathas uas ze ntawm Malesas. Axas thov tus TSWV uas yog nws tus Vajtswv hais tias, “Tus TSWV, koj yog tus pab tau cov tubrog uas qaug zog tawmtsam yeej cov tubrog uas muaj zog. Tus TSWV uas yog peb tus Vajtswv, nimno thov koj cia li pab peb, peb tso siab rau koj, peb tuav koj lub npe tuaj tua cov tubrog uas coob heev no. Tus TSWV, koj yog peb tus Vajtswv; thov tsis txhob cia neeg kovyeej koj.” Tus TSWV ua rau cov tubrog Sudas swb, thaum Axas thiab cov Yudas tua lawv. Cov Sudas khiav, Axas thiab nws cov tubrog caum cov Sudas tua mus ti nkaus lub nroog Nkelales. Cov tubrog Sudas tuag tas tsis seem ib tug li; tus TSWV thiab nws cov tubrog ua rau cov Sudas swb, cov tubrog Yudas thiaj huab tau khoom ntaus heev nqa los tsev. Axas lawv tseem mus tua tej nroog uas nyob ibncig lub nroog Nkelales, thiab lawv huab tau khoom ntau heev nqa los, rau qhov tus TSWV ua rau cov neeg uas nyob hauv tej nroog ntawd ntshai heev. Dua li ntawd lawv tseem mus tua cov neeg yug tsiaj ntawm lawv tej tsevntaub, ntes tej yaj, tej tshis thiab tej ntxhuav tau coob heev. Ces lawv txawm rov los rau hauv Yeluxalees lawm. Vajtswv tus ntsujplig los kav Audes tus tub Axaliyas, ces nws txawm tuaj cuag Vajntxwv Axas. Nws hais rau Axas hais tias, “Vajntxwv Axas, koj thiab cov Yudas thiab cov Npeenyamees cia li mloog kuv hais! Tus TSWV yuav nrog nraim nej, yog nej tsis tso nws tseg. Yog nej nrhiav nws, nws yuav cia nej ntsib nws, tiamsis yog nej tsis muab siab npuab nws, nws yuav tso nej tseg. Cov Yixalayees ua neej nyob tsis muaj tus Vajtswv tseeb, tsis muaj cov povthawj qhia lawv thiab tsis muaj kevcai tswjhwm lawv los ntev lawm. Tiamsis thaum lawv raug kev nyuaj siab, lawv tig los cuag tus TSWV uas yog cov Yixalayees tus Vajtswv. Thaum lawv nrhiav nws, lawv yeej ntsib nws. Lub sijhawm ntawd tsis yoojyim rau tej neeg mus mus los los, rau qhov muaj kev kub ntxhov nyob txhua qhov hauv lub tebchaws. Ib haivneeg tsimtxom ib haivneeg, thiab ib lub nroog tsimtxom ib lub nroog, rau qhov Vajtswv tso txojkev kub ntxhov no los rau lawv ntag. Tiamsis nej yuav tsum ua siab loj, tsis txhob qaug zog. Tej haujlwm uas nej ua, nej yuav tau txais nqi zog.” Thaum Axas hnov Audes tus tub Axaliyas tej lus qhia tshwm, nws thiaj ua siab loj. Nws rhuav tej mlom hauv tebchaws Yudas thiab Npeenyamees, thiab hauv tej nroog uas nws txeeb tau saum tej laj roob Efalayees povtseg, thiab nws rov kho tus TSWV lub thaj uas nyob ntawm lub tshavpuam hauv tus TSWV lub Tuamtsev. Xeem Efalayees, xeem Manaxes thiab xeem Xime-oos khiav coob heev los tuaj Axas tog, thiab nyob hauv nws lub tebchaws, rau qhov lawv paub hais tias tus TSWV nrog Axas. Axas thiaj txheeb tagnrho lawv cov ntawd, cov Yudas thiab cov Npeenyamees tej npe. Thaum Axas ua vajntxwv tau kaum tsib xyoos, lub peb hlis ntuj, lawv thiaj sib sau rau hauv lub nroog Yeluxalees. Hnub ntawd lawv muab tej tsiaj uas lawv huab tau los tua fij rau tus TSWV: xya pua tus nyuj thiab xya txhiab tus yaj. Lawv coglus hais tias lawv yuav pehawm tus TSWV uas yog lawv cov yawgkoob tus Vajtswv kom kawg siab kawg ntsws, thiab txhua tus, tsis hais tus laus lossis tus hluas, yog leejtwg tsis pehawm tus TSWV, yuav muab tus ntawd tua povtseg. Lawv txhua tus qw nrov nrov thiab tuav tus TSWV lub npe coglus hais tias lawv yuav ua raws li tej lus uas lawv cog tseg ntawd. Lawv qw nrov nrov thiab tshuab raj tshuab xyu. Tagnrho cov Yudas zoo siab kawg li, rau qhov lawv tau coglus nrhiav tus TSWV kawg siab kawg ntsws, lawv thiaj ntsib tus TSWV, thiab tus TSWV pub lawv noj qab nyob zoo. Vajntxwv Axas muab nws pog Ma-akas txo lub meejmom niam vajntxwv, rau qhov nws puab tug mlom pojniam Aselas. Axas muab tus mlom ntawd tsoo tawg ntsoog ntxaws thiab coj mus hlawv hauv lub Hav Kiloos. Txawm yog Axas tsis muab tej chaw teev dab saum tej ncov roob hauv lub tebchaws Yixalayees rhuav povtseg los nws yeej muab siab npuab tus TSWV tas nws simneej li. Nws muab txhua yam uas nws txiv Anpiyas muab nyiaj muab kub ua thiab muab fij rau tus TSWV lawm, coj mus tso rau hauv lub Tuamtsev. Ntu uas Axas ua vajntxwv tau peb caug tsib xyoos ntawd, lub tebchaws tsis ua tsov ua rog li. Thaum Vajntxwv Axas kav tebchaws Yudas tau peb caug rau xyoo, Vajntxwv Npa-asas uas kav tebchaws Yixalayees tau tuaj tua cov Yudas thiab tsim lub nroog Lamas ua chaw txiav kev tsis pub cov Yudas mus los. Yog li ntawd, Vajntxwv Axas thiaj muab tej kub uas seem hauv lub Tuamtsev thiab hauv lub loog rau nws cov nomtswv nqa mus rau pem lub nroog Damaxes thiab muab pub rau cov Xilias tus Vajntxwv Npeehadas uas yog Talee-moos tus tub, thiab yog Hexi-oos tus xeebntxwv, nrog cov lus uas hais li no: “Cia wb tuav tes ua phoojywg ib yam li thaud koj txiv thiab kuv txiv ua phoojywg los lawm. Cov nyiaj thiab cov kub no, yog coj tuaj pub rau koj ua kev sib raug zoo. Nimno thov koj cia li txiav kev ua phoojywg nrog cov Yixalayees tus Vajntxwv Npa-asas kom nws thiaj thim nws cov tubrog tawm hauv kuv cheebtsam mus.” Vajntxwv Npeehadas pom zoo ua li Axas hais, thiab tso nws cov thawj tubrog coj lawv cov tubrog mus tua cov Yixalayees tej nroog. Lawv mus txeeb tau lub nroog Iyoos, lub nroog Das, lub nroog Anpees Npethes Ma-akas, mus rau cheebtsam uas ze lub Pasdej Kalilais thiab tagnrho cov Nathalis tej nroog. Thaum Vajntxwv Npa-asas hnov tej xwm no lawm, nws txawm tso tseg tsis tsim lub nroog Lamas ntxiv, thiab rov qab mus rau hauv lub nroog Tilexas lawm. Ces Vajntxwv Axas txawm hu cov pejxeem thoob plaws tebchaws Yudas tuaj nqa tej pobzeb thiab tej ntoo uas Npa-asas coj tuaj tsim lub nroog Lamas, mus tsim lub nroog Nkenpas thiab lub nroog Mixepas. Lub sijhawm ntawd Hananis tus uas cev Vajtswv lus mus cuag Vajntxwv Axas thiab hais tias, “Twb tsimnyog koj cia siab rau tus TSWV uas yog koj tus Vajtswv, tiamsis koj ho cia siab rau tus vajntxwv uas kav tebchaws Xilias, vim li ntawd, tus vajntxwv uas kav tebchaws Xilias cov tubrog thiaj khiav dim ntawm koj mus lawm. Puas yog cov Sudas thiab cov Linpias muaj tubrog, muaj tsheb nees ua rog thiab muaj tubrog caij nees coob heev? Tiamsis thaum ntawd koj cia siab rau tus TSWV, nws thiaj pab koj tua yeej lawv lawm. Tus TSWV yeej saib ntsoov lub ntiajteb no thiab yuav txhawb cov uas muab siab npuab nws. Vim koj tau ua tej yam uas ruam kawg nkaus, yog li ntawd, txij no mus koj lub tebchaws yuav ua tsov ua rog mus li.” Qhov no ua rau Vajntxwv Axas npautaws heev, nws thiaj muab saw hlau khi tus cev Vajtswv lus ntawd. Tib lub sijhawm ntawd Axas tseem ua nruj ua tsiv rau cov pejxeem ibtxhia thiab. Txhua yam uas Vajntxwv Axas ua, nws lub peevxwm thiab tej nroog uas nws ua puavleej muab sau tseg rau hauv Phau Ntawv Keebkwm uas teev cov Yudas thiab cov Yixalayees cov Vajntxwv lub neej lawm. Axas ua vajntxwv tau peb caug cuaj xyoos. Nws muaj mob rau nws ob txhais kotaw; txawm li ntawd los nws tsis thov tus TSWV pab nws, nws tsuas mus cuag tej kws tshuaj xwb. Axas ua vajntxwv tau plaub caug ib xyoos, ces nws txawm tuag lawm. Thiab luag muab nws coj mus faus rau hauv lub qhov ntxa uas nws txaug cia rau nws hauv Daviv lub nroog. Lawv muab ntau yam hmoov tshuaj thiab roj tsw qab pleev Axas lub cev, mam coj nws mus faus, lawv rauv ib cubtawg hlob heev thiab lawv hawm nws. Yehausafas ua vajntxwv hloov nwg txiv Axas chaw, thiab nws hajyam ua rog hnyav rau cov Yixalayees. Nws tso tubrog mus nyob rau hauv cov Yudas tej nroog uas muaj ntsa yeej thaiv, tej nroog hauv tebchaws Yudas, thiab tej nroog hauv xeev Efalayees uas nws txiv Axas txeeb tau los. Vim Yehausafas ua raws li nws txiv lub neej thaum xub thawj, nws tsis pe Npa-as, tus TSWV thiaj foom koob hmoov rau nws. Nws pehawm nws txiv tus Vajtswv, thiab nws ua raws li Vajtswv tej lus samhwm, nws tsis ua li cov Yixalayees tej vajntxwv ua. Tus TSWV thiaj pub Yehausafas tswj tau lub tebchaws Yudas nyob ruaj khov, thiab cov pejxeem coj khoom tuaj pub rau nws. Yog li ntawd, nws thiaj muaj txiag npluanuj thiab muaj koob meej nto moo lug. Nws kub siab lug ua raws li tus TSWV txoj kevcai, thiab nws rhuav tej chaw teev dab thiab tus mlom pojniam Aselas hauv tebchaws Yudas povtseg. Thaum Yehausafas kav tebchaws tau peb xyoos, nws tsa Npeehais, Aunpadiyas, Xakhaliyas, Nethanees thiab Mikayas uas yog nws cov nomtswv mus cob qhia cov Yudas nyob txhua lub nroog. Muaj cuaj tug Levis thiab ob tug povthawj nrog cov nomtswv ntawd mus. Cov Levis yog Semayas, Nethaniyas, Xenpadiyas, Axahees, Semilamaus, Yehaunathas, Adauniyas, Taunpiyas thiab Taunpadauniyas; thiab ob tug povthawj yog Elisamas thiab Yehaulas. Lawv coj tus TSWV phau ntawv Kevcai mus cob qhia cov pejxeem sawvdaws uas nyob txhua lub nroog hauv tebchaws Yudas. Tus TSWV ua rau tej tebchaws uas nyob ibncig ntshai thiab tsis tuaj tua Vajntxwv Yehausafas lawm. Cov Filitees qee leej coj nyiaj thiab khoom ntau heev tuaj pub rau Yehausafas, thiab cov Alav coj xya txhiab xya pua tus yaj thiab xya txhiab xya pua tus tshis tuaj pub rau nws. Yog li ntawd, Yehausafas thiaj muaj hwjchim heev zuj zus. Nws ua ntau lub chaw fajxwm thiab ntau lub tsev rau hauv tej nroog thoob tebchaws Yudas, thiab nws coj khoom ntau heev mus cia rau hauv. Yehausafas tso cov tubrog uas txawj tua rog heev nyob hauv lub nroog Yeluxalees, raws li lawv tej cuab kwvtij. Adinas yog tus thawj saib cov tubrog uas yog xeem Yudas thiab nws muaj peb puas txhiab leej. Yehauhanas yog ob, nws saib ob puas yim caum txhiab leej tubrog, thiab tus peb yog Xikhalis uas yog Amaxiyas tus tub, nws saib ob puas txhiab leej tubrog, (Amaxiyas yog ib tug uas txaus siab ua tus TSWV tes haujlwm heev.) Eli-adas yog tus thawj saib cov tubrog uas yog xeem Npeenyamees, nws yog ib tug tubrog uas ua tau heev, nws saib ob puas txhiab leej tubrog uas muaj daim thaiv hniav ntaj thiab muaj hneevnti. Yehauxanpas yog tus ob, nws saib ib puas yim caum txhiab leej tubrog thiab nws muaj tej cuabyeej ua rog zoo heev. Cov tubrog no ua haujlwm rau vajntxwv nyob hauv lub nroog Yeluxalees, thiab vajntxwv tseem tso dua lwm pab tubrog mus nyob rau hauv cov Yudas tej nroog uas muaj ntsa yeej thaiv. Thaum cov Yudas tus Vajntxwv Yehausafas muaj txiag npluanuj thiab koob meej nrov ncha heev lawm, nws txawm coj nws tsevneeg ib tug mus yuav cov Yixalayees tus Vajntxwv Ahaj tsevneeg ib tug. Ntau xyoo tom qab no Yehausafas mus xyuas Ahaj hauv lub nroog Xamalis, Ahaj tua nyuj thiab tua yaj ntau tus ua ib rooj mov loj tos txais Yehausafas thiab cov neeg uas nrog nws mus. Ahaj txawm yaum Yehausafas kom nrog nws mus tua lub nroog Lamaus hauv cheebtsam Nkile-as. Ahaj hais rau Yehausafas hais tias, “Koj puas kam nrog kuv mus tua lub nroog Lamaus?” Yehausafas teb hais tias, “Thaum twg koj mus, kuv thiab kuv cov tubrog yuav nrog koj mus. Peb yuav koom tes nrog koj.” Yehausafas hais ntxiv tias, “Tiamsis peb yuav tsum xub nug tus TSWV tso.” Yog li ntawd, Ahaj thiaj hu cov cevlus kwvyees li plaub puas leej tuaj, thiab nws nug lawv hais tias, “Puas tsimnyog kuv mus tua lub nroog Lamaus los tsis tsimnyog mus?” Lawv teb hais tias, “Koj cia li mus tua lub nroog ntawd, Vajtswv yuav pub kom koj tua yeej xwb.” Tiamsis Yehausafas nug hais tias, “Puas tshuav dua lwm tus cev Vajtswv lus tseem yuav pab tau peb mus nug tus TSWV thiab?” Ahaj teb hais tias, “Tseem tshuav dua ib tug, nws yog Imelas tus tub Mikayas. Tiamsis kuv ntxub nws heev, vim nws yeej ibtxwm tsis cev tej lus zoo rau kuv li; nws tsuas yog pheej cev tej lus phem rau kuv xwb.” Yehausafas teb hais tias, “Koj tseg tsis txhob hais li ko.” Ces Ahaj thiaj hu nws ib tug nomtswv los thiab hais rau nws tias, “Koj mus coj Mikayas tuaj tamsim no.” Ob tug vajntxwv ntawd yeej hnav rawv tej ris tsho vajntxwv, zaum saum nkawd ob lub zwmtxwv uas nyob ntawm lub tshav ntaus nplej sab nraum lub roojvag Xamalis, cov cevlus txhua tus puavleej tuaj nyob cev Vajtswv lus ntawm nkawd xubntiag. Ces cov cev Vajtswv lus ntawd muaj ib tug hu ua Xedekiyas, nws yog Kena-anas tus tub. Nws muab hlau ua tau ibtxwm kub thiab hais rau Ahaj hais tias, “Tus TSWV hais tias, ‘Koj yuav siv txwm kub no mus tawmtsam cov Xilias thiab tua yeej lawv tagnrho huv tibsi.’ ” Cov cev Vajtswv lus txhua tus puavleej hais ib yam tias, “Koj cia li mus tua lub nroog Lamaus, koj yuav tua yeej xwb. Tus TSWV yuav pab kom koj yeej.” Thaum lub sijhawm ntawd, tus nom uas mus tos Mikayas, nws hais rau Mikayas hais tias, “Tagnrho cov cevlus puavleej hais tias vajntxwv yuav tua yeej, yog li ntawd, koj yuav tsum hais tej lus zoo ib yam li lawv thiab.” Tiamsis Mikayas teb hais tias, “Tus TSWV yog tus muaj sia nyob, kuv thov coglus hais tias kuv yuav hais raws li tej lus uas nws qhia kuv hais xwb!” Thaum Mikayas mus sawv tabmeeg Vajntxwv Ahaj lawm, vajntxwv nug nws hais tias, “Mikayas, puas tsimnyog Vajntxwv Yehausafas thiab kuv mus tua lub nroog Lamaus los tsis tsimnyog mus?” Mikayas teb hais tias, “Neb cia li mus tua los mas! Neb yeej yuav tua yeej xwb. Tus TSWV yuav pab kom neb yeej.” Tiamsis Ahaj teb hais tias, “Kuv twb yeej hais rau koj ntau zaus lawm tias thaum twg koj tuav tus TSWV lub npe qhia ib zaj dabtsi rau kuv, koj yuav tsum qhia qhov tseeb xwb no ne! Kuv tseem yuav hais pestsawg zaus rau koj thiab?” Mikayas teb hais tias, “Kuv twb pom cov tubrog Yixalayees tawg khiav ri sua saum tej ncov roob ib yam li pab yaj uas tsis muaj tus tswv yug lawm. Thiab tus TSWV hais tias, ‘Cov neeg no tsis muaj thawjcoj lawm; cia li tso lawv rov mus tsev ywj siab.’ ” Ahaj hais rau Yehausafas hais tias, “Kuv twb qhia rau koj lawm hais tias nws yeej tsis cev ib zaj lus zoo rau kuv li puas yog? Nws yeej ibtxwm cev tej lus phem rau kuv nkaus xwb!” Mikayas hais ntxiv tias, “Koj cia li mloog tus TSWV lus! Kuv pom tus TSWV zaum saum nws lub zwmtxwv uas nyob saum ntuj ceebtsheej, thiab nws cov timtswv sawv ntawm nws ob sab. Tus TSWV nug hais tias, ‘Leejtwg thiaj yuav ntxias tau Ahaj kom nws mus raug tua tuag rau hauv lub nroog Lamaus?’ Muaj ib co timtswv hais ib yam, thiab muaj dua lwm cov hais dua lwm yam lawm, ces muaj ib tug ntsujplig txav los rau ntawm tus TSWV xubntiag thiab hais rau tus TSWV hais tias, ‘Kuv yog tus uas yuav mus ntxias Ahaj ntag.’ Tus TSWV nug hais tias, ‘Koj yuav ntxias li cas?’ Tus ntsujplig ntawd teb hais tias, ‘Kuv yuav mus tshoov Ahaj cov cevlus siab, kom lawv qhia tej lus dag rau nws.’ Tus TSWV thiaj hais rau nws tias, ‘Cia li mus thiab ntxias nws. Nws yeej yuav ntseeg koj zaj xwb.’ ” Mikayas txawm xaus lus hais tias, “Yeej muaj li no tiag. Tus TSWV ua kom koj cov cevlus tuaj dag koj. Tiamsis tus TSWV qhia tseeb hais tias koj yuav tsum raug kev puastsuaj xwb thiaj tas.” Ces tus cevlus Xedekiyas txawm sawv tsees mus xuas tawg ncuav rau Mikayas sab plhu, thiab nug hais tias, “Thaum twg tus TSWV tus ntsujplig twb tso kuv tseg thiab mus hais rau koj li ko lawm?” Mikayas teb hais tias, “Koj yeej yuav paub thaum uas koj khiav mus nkaum nyob rau chav tsev hauv plawv.” Vajntxwv Ahaj hais rau nws cov nomtswv ib tug tias, “Cia li ntes Mikayas coj mus rau Amoos uas yog tus tswv nroog thiab rau vajntxwv tus tub Yau-ases; hais kom nkawd coj nws mus kaw rau hauv tsev lojcuj, tsuas muab mov thiab dej rau nws noj nws haus mus txog thaum kuv rov qab los kaj siab lug tsis muaj dabtsi mam li tso nws.” Mikayas thiaj twv hais tias, “Yog koj tseem tau rov qab los kaj siab lug, ces tej lus uas kuv hais rau koj ntawd, yeej tsis yog tus TSWV hais rau kuv li!” Thiab nws hais ntxiv tias, “Thov nej txhua tus nrog hnov tej lus uas kuv hais no.” Ces cov Yixalayees tus Vajntxwv Ahaj thiab cov Yudas tus Vajntxwv Yehausafas txawm txhij tubrog mus tua lub nroog Lamaus hauv cheebtsam Nkile-as. Ahaj hais rau Yehausafas hais tias, “Thaum peb mus rau hauv tshavrog, kuv yuav hnav dua lwm cev ris tsho lawm, tiamsis koj hnav koj cev ris tsho vajntxwv los tau.” Yog li ntawd, cov Yixalayees tus vajntxwv thiaj hnav dua lwm cev ris tsho mus rau hauv tshavrog, tsis pub kom leejtwg paub nws. Cov Xilias tus vajntxwv thiaj hais rau nws peb caug ob tug thawj tubrog tsav tsheb nees kom tsis txhob tua ib tug twg li, tua cov Yixalayees tus vajntxwv nkaus xwb. Yog li ntawd, thaum lawv pom Vajntxwv Yehausafas, lawv thiaj xav hais tias nws yog cov Yixalayees tus vajntxwv, ces lawv thiaj mus caum nws tua. Tiamsis Yehausafas qw, thiab tus TSWV uas yog Vajtswv thiaj cawm nws thiab cov uas caum nws tua txawm tso nws tseg. Cov thawj tubrog tsav tsheb nees pom hais tias nws tsis yog cov Yixalayees tus vajntxwv, lawv thiaj tso tseg tsis caum nws tua ntxiv lawm. Tiamsis muaj ib tug tubrog Xilias lam rub nws rab hneevnti tua mus, ua ciav xibxub cia li ya mus raug kiag Vajntxwv Ahaj lub tsho hlau kis nruab nrab tshab plaws rau hauv nws lub cev lawm. Nws txawm quaj qw rau nws tus tsav tsheb nees hais tias, “Kuv raug mob lawm lauj! Cia li lem tsheb nees rov qab thiab coj kuv tawm hauv tshavrog no mus!” Thaum ntawd, muaj kev sib ntaus sib tua hnyav zuj zus, Vajntxwv Ahaj tseem txheem taus los sawv hauv nws lub tsheb nees nrog cov Xilias sib tua, tiamsis thaum hnubpoob qho nws txawm tuag lawm. Thaum cov Yudas tus Vajntxwv Yehausafas rov los txog hauv nws lub loog hauv lub nroog Yeluxalees, nws tseem noj qab nyob zoo. Muaj ib tug cev Vajtswv lus hu ua Yehus uas yog Hananis tus tub tuaj cuag Vajntxwv Yehausafas thiab hais rau nws tias, “Puas tsimnyog koj pab cov neeg ua phem ua qias thiab hlub cov neeg uas ntxub tus TSWV? Qhov uas koj ua ntawd, ua rau tus TSWV chim heev rau koj. Txawm li ntawd los koj tseem ua tau qee yam zoo thiab. Koj tau rhuav tej mlom pojniam Aselas uas tej neeg sawvdaws pheej mus pe, thiab koj ua raws li Vajtswv lub siab nyiam.” Txawm yog Vajntxwv Yehausafas nyob hauv lub nroog Yeluxalees los nws mus mus los los rau nram Npesenpas thiab pem lub laj roob Efalayees nqua hu kom cov pejxeem sawvdaws rov los cuag tus TSWV uas yog lawv cov yawgkoob tus Vajtswv. Vajntxwv tsa ib co txiav txim nyob rau hauv txhua lub nroog uas muaj ntsa yeej thaiv hauv tebchaws Yudas thiab hais rau lawv tias, “Nej yuav tsum ua tib zoo saib thaum nej txiav txim, rau qhov tsis yog nej txiav txim raws li neeg lub siab nyiam, tiamsis yog raws li tus TSWV lub siab nyiam, nws yuav nrog nraim nej thaum nej txiav txim. Nej yuav tsum hwm tus TSWV thiab txiav txim ncaj ncees, rau qhov tus TSWV uas yog peb tus Vajtswv yog tus ncaj ncees, nws tsis xaiv leejtwg ntsejmuag thiab yuav luag tej nyiaj xiab.” Yehausafas tsa cov Levis, cov povthawj thiab cov thawjcoj qee leej ntawm tej cuab hauv lub nroog Yeluxalees ua cov txiav txim rau tus uas ua txhaum rau tus TSWV txoj kevcai lossis cov pejxeem uas nyob hauv lub nroog Yeluxalees tej plaub ntug. Yehausafas hais rau lawv tias, “Nej yuav tsum hwm tus TSWV, muab siab npuab nws thiab ua nej tej haujlwm kom ncaj ncees. Thaum nej cov neeg uas nyob hauv tej nroog, coj lawv tej plaub ntug tuaj rau nej hais, tsis hais kev sib ntaus sib tua, ua txhaum kevcai lossis tus TSWV tej lus, nej yuav tsum ua tib zoo ntuas thiab qhia kom lawv tsis txhob ua txhaum rau tus TSWV. Yog nej tsis ua li ntawd, tus TSWV txojkev chim yuav los raug nej thiab cov neeg. Tiamsis yog nej ua nej tes haujlwm ncaj, nej yuav tsis muaj txim. Amaliyas uas yog tus Povthawj Hlob, yog tus txiav txim thaum kawg rau tus uas ua txhaum tus TSWV txoj kevcai, thiab Yisamayees tus tub Xenpadiyas uas yog cov Yudas tus tswvxeev, yog tus txiav txim thaum kawg rau tus uas ua txhaum nomtswv kevcai. Cov Levis tes haujlwm yog saib cov txiav txim. Nej tsis txhob qaug zog ua tej haujlwm no, thov tus TSWV nrog nraim tus uas ua ncaj.” Tau tsis ntev tom qab no, cov tubrog Mau-am thiab cov tubrog Amoos, koom nrog cov Me-unis tuaj tua Yehausafas. Muaj ib co neeg los qhia rau Vajntxwv Yehausafas hais tias, “Cov tubrog Edoos coob heev tuaj txog ntawm Hiavtxwv Tuag sab tid, yuav tuaj tua koj. Lawv twb txeeb tau lub nroog Haxaxoos Tamaj lawm.” (Haxaxoos muaj dua ib lub npe hu ua Ekedis). Yehausafas ntshai heev, nws thiaj thov tus TSWV pab. Yog li ntawd, vajntxwv thiaj samhwm kom cov pejxeem sawvdaws ua kevcai yoo mov thoob lub tebchaws Yudas. Cov Yudas uas nyob txhua lub nroog puavleej tuaj rau hauv lub nroog Yeluxalees thiab thov tus TSWV pab, lawv thiab cov neeg uas nyob hauv lub nroog Yeluxalees mus sib sau rau hauv lub tshavpuam tshiab ntawm lub Tuamtsev. Vajntxwv Yehausafas thiaj mus sawv ntawm cov pejxeem hauv ntej thiab thov tus TSWV nrov nrov hais tias, “Tus TSWV uas yog peb cov yawgkoob tus Vajtswv, koj nyob saum ntuj kav tagnrho txhua haivneeg hauv ntiajteb no. Koj yog tus muaj hwjchim, muaj zog loj zog nchav, thiab tsis muaj leejtwg yuav tawmtsam yeej koj. Koj yog peb tus Vajtswv. Thaum koj haivneeg Yixalayees los nyob hauv lub tebchaws no, koj muab cov neeg uas ibtxwm nyob hauv no ntiab tawm, thiab muab lub tebchaws pub rau koj tus phoojywg Anplahas cov xeebntxwv ua lawv tug mus ibtxhis li. Lawv los nyob hauv lub tebchaws no thiab ua tau lub Tuamtsev rau sawvdaws pehawm koj, kom lawv paub hais tias yog muaj kev txomnyem nyuaj siab los raug lawv, rau txim rau lawv, tsis hais kev tsov kev rog, kev mob kev nkeeg, lossis kev tshaib kev nqhis, yog lawv tuaj sawv ntawm lub Tuamtsev uas yog qhov chaw pehawm koj no, thiab qhia lawv tej kev ntxhov siab rau koj, koj yeej yuav teb lawv tej lus thov thiab cawm lawv. “Nimno cov Amoos, cov Mau-am, thiab cov Edoos tuaj tua peb. Thaum peb cov yawgkoob tsiv nram tebchaws Iziv los, koj twb tsis pub peb cov yawgkoob los hla lawv lub tebchaws, yog li ntawd, peb cov yawgkoob thiaj tshuv kev mus thiab tsis tua lawv. Qhov uas lawv ua ntawd yog ua pauj rau peb, lawv tuaj muab peb raws tawm hauv lub tebchaws uas koj muab rau peb lawm. Koj yog peb tus Vajtswv! Thov koj rau txim rau lawv, rau qhov tsis muaj leejtwg pab peb kom dim ntawm cov tubrog coob heev uas tuaj tua peb. Peb tsis paub yuav ua li cas, tiamsis peb thov koj pab peb.” Tagnrho cov Yudas, tsis hais cov txivneej, cov pojniam thiab menyuam puavleej tuaj sawv ntawm lub Tuamtsev. Ces tus TSWV tus ntsujplig txawm los kav hlo Xakhaliyas tus tub Yahaxiyees uas yog ib tug Levis uas nrog cov neeg coob coob ntawd; nws yog cuab Axafes thiab yog Mataniyas, Ye-iyees, thiab Npenayas xeebntxwv. Yahaxiyees hais tias, “Vajntxwv, cov Yudas thiab cov neeg uas nyob hauv lub nroog Yeluxalees, tus TSWV hais rau kuv tias, nej tsis txhob qaug zog lossis ntshai cov tubrog coob coob ntawd; rau qhov Vajtswv yog tus tua lawv, tsis yog nej tua. Tagkis nej cia li mus tua lawv thaum lawv tabtom nce nram lub dawm Xixes tuaj. Nej yuav ntsib lawv ntawm lub hau hav uas cob rau ntawm roob mojsab qhua Yelu-ees. Nej yuav tsis tau tua lawv. Nej tsuas yog mus txum chaw tos xwb; nej yuav pom hais tias tus TSWV yuav ua kom nej kovyeej. Cov Yudas thiab cov neeg uas nyob hauv lub nroog Yeluxalees, nej tsis txhob poob siab lossis tsis txhob ntshai. Nej cia li mus, tus TSWV yuav nrog nraim nej.” Ces Vajntxwv Yehausafas txhos caug ntua nyo ntshis ua ntsejmuag ti nkaus hauv av, thiab cov pejxeem sawvdaws nrog nws txhos caug pehawm tus TSWV. Cov Levis uas yog cuab Kauhas thiab cuab Kaulas, txawm sawv ntsug qw nrov nrov qhuas tus TSWV uas yog cov Yixalayees tus Vajtswv. Hnub tom qab sawv ntxov lawm txawm mus rau tom roob mojsab qhua uas ze lub nroog Tekau-as; thaum lawv sawv kev mus, Yehausafas txawm hais rau lawv tias, “Cov Yudas thiab cov neeg uas nyob hauv lub nroog Yeluxalees! Nej yuav tsum cia siab rau tus TSWV uas yog nej tus Vajtswv, thiab sawv khov kho. Nej cia li ntseeg tus TSWV tej lus uas cov cev Vajtswv lus qhia rau nej, nej thiaj yuav kovyeej.” Thaum vajntxwv hais rau lawv tas lawm, nws hais rau cov ntaus suab nkauj kom hnav cov tsho ntev uas lawv hnav rau tej lub sijhawm tseemceeb, mus ua cov tubrog ntej thiab hu nkauj hais tias, “Cia li qhuas tus TSWV! Nws txojkev hlub nyob mus ibtxhis!” Thaum lawv pib hu nkauj, tus TSWV txawm ua rau yeebncuab cov tubrog yoob tas. Cov tubrog Amoos thiab cov tubrog Mau-am tua cov tubrog Edoos tuag tas, ces cov tubrog Amoos thiab cov tubrog Mau-am txawm tig rov sib tua tuag tas huv tibsi thiab. Thaum cov tubrog Yudas mus txog saum lub ncov roob ntawm tiaj suabpuam, lawv tsa qhovmuag ntsia pom cov yeebncuab tuag pawglug rau hauv av tsis seem ib tug li. Yehausafas thiab nws cov tubrog thiaj mus khaws cov yeebncuab tej zaub mov, tej cuabyeej, tej ris tsho thiab txhua yam khoom muaj nqis. Tej khoom ntawd ntau heev, lawv khaws peb hnub thiaj tas. Hnub plaub lawv thiaj mus sib sau rau hauv lub Hav Npelakas thiab ua tus TSWV tsaug rau tej uas nws ua ntawd. Yog li ntawd, lawv thiaj muab lub voshav ntawd hu ua “Npelakas.” Yehausafas coj nws cov tubrog rov los rau hauv lub nroog Yeluxalees zoo siab heev, rau qhov tus TSWV ua rau lawv cov yeebncuab swb lawm. Thaum lawv los txog hauv nroog, lawv tshuab raj tshuab xyu thiab ntaus nruas npuaj mus rau hauv lub Tuamtsev. Txhua haivneeg uas hnov hais tias tus TSWV tau pab cov Yixalayees tua yeej lawv cov yeebncuab, mas ua rau lawv ntshai kawg li. Yog li ntawd, Yehausafas thiaj kav lub tebchaws nyob thajyeeb, thiab Vajtswv pub rau nws nyob kaj siab lug. Yehausafas ua vajntxwv kav tebchaws Yudas thaum nws hnubnyoog muaj peb caug tsib xyoos, thiab nws nyob hauv lub nroog Yeluxalees kav tau nees nkaum tsib xyoos. Nws niam hu ua Axunpas uas yog Silehis tus ntxhais. Yehausafas coj lub neej zoo ib yam li nws txiv Axas coj los lawm, nws ua lub neej ncaj ncees tabmeeg tus TSWV; tiamsis nws tsis muab tej chaw teev dab rhuav povtseg li. Cov pejxeem thiaj tseem tsis tau muab lub siab tig los pehawm tus TSWV uas yog lawv cov yawgkoob tus Vajtswv. Txhua yam uas Vajntxwv Yehausafas ua thaum nws pib kav tebchaws mus txog thaum xaus, Hananis tus tub Yehus puavleej muab sau rau hauv Phau Ntawv Keebkwm uas teev cov Yixalayees cov Vajntxwv lub neej lawm. Tom qab ntawd cov Yudas tus Vajntxwv Yehausafas tau koom tes nrog cov Yixalayees tus Vajntxwv Ahaxiyas uas ua ntau yam kev phem kev qias. Nws nrog Ahaxiyas txua tau ib co nkoj rau ntawm Exi-oonkenpes yuav mus thauj tej khoom tim tebchaws Xapees hla hiavtxwv mus los. Tiamsis Daudavahus tus tub Eli-exes uas nyob hauv lub nroog Malesas tuaj hais rau Yehausafas hais tias, “Vim koj tau mus koom nrog Ahaxiyas, mas tus TSWV yuav rhuav tej uas koj tau ua ntawd.” Ces cov nkoj cia li tawg tas tsis tau siv mus thauj khoom tim tebchaws Xapees li. Yehausafas tuag thiab luag coj nws mus faus rau ntawm cov vajntxwv lub toj ntxas hauv Daviv lub nroog; thiab nws tus tub Yehaulas ua vajntxwv hloov nws chaw. Yehaulas uas yog Vajntxwv Yehausafas tus tub muaj rau leej kwvtij: Axaliyas, Yehiyees, Xakhaliyas, Axalihus, Mikhayees thiab Sefatiyas. Lawv txiv Yehausafas muab kub, muab nyiaj thiab lwm yam khoom muaj nqis ntau heev rau lawv, thiab nws tsa nws cov tub ib tug kav ib lub nroog uas muaj ntsa yeej thaiv hauv tebchaws Yudas. Tiamsis nws tsa Yehaulas ua vajntxwv hloov nws chaw, rau qhov Yehaulas yog tus tub hlob. Thaum Yehaulas ua vajntxwv kav lub tebchaws lawm, nws txawm muab nws cov kwv tua tas, thiab nws tseem tua cov Yixalayees tej nom ibtxhia thiab. Thaum Yehaulas ua vajntxwv nws hnubnyoog muaj peb caug ob xyoos, thiab nws nyob hauv lub nroog Yeluxalees kav tau yim xyoo. Yehaulas ua phem ua qias ib yam li Vajntxwv Ahaj thiab lwm tus vajntxwv uas kav tebchaws Yixalayees, rau qhov nws yuav Ahaj tug ntxhais los ua pojniam. Nws ua txhaum rau tus TSWV, tiamsis tus TSWV tsis xav rhuav kom Daviv cajces puastsuaj, rau qhov nws tau coglus tseg rau Daviv hais tias Daviv cajces yuav tau ua vajntxwv mus li. Ntu uas Yehaulas ua vajntxwv kav tebchaws Yudas, cov Edoos tau ntxeev siab rau cov Yudas thiab sawv ua dua ib lub tebchaws tsis zwm rau leejtwg. Yog li ntawd, Yehaulas thiab nws cov nomtswv thiaj caij tsheb nees mus tua cov Edoos, tiamsis cov tubrog Edoos tuaj vij lawv, ces thaum ib tag hmo Yehaulas thiab nws cov tubrog txawm sib faib kev khiav. Txij thaum ntawd los cov Edoos tsis zwm rau cov Yudas li lawm. Tib lub sijhawm ntawd, cov neeg uas nyob hauv lub nroog Linas los ntxeev siab thiab, rau qhov Yehaulas tau tso tus TSWV uas yog nws cov yawgkoob tus Vajtswv tseg lawm. Tsis tas li ntawd xwb, Yehaulas tseem ua ib co chaw teev dab rau saum tej roob siab hauv tebchaws Yudas, nws coj cov Yudas thiab cov neeg uas nyob hauv lub nroog Yeluxalees mus ua txhaum rau tus TSWV. Eliyas tus uas cev Vajtswv lus sau ib tsab ntawv rau Vajntxwv Yehaulas hais tias, “Tus TSWV uas yog koj yawgkoob Daviv tus Vajtswv hais tias nws yuav rau txim rau koj, rau qhov koj tsis ua lub neej li koj txiv uas yog Vajntxwv Yehausafas lossis raws li koj yawg uas yog Vajntxwv Axas. Tiamsis koj ua raws li cov Yixalayees tej vajntxwv ua, koj ua rau cov Yudas thiab cov neeg uas nyob hauv lub nroog Yeluxalees tsis muab siab npuab Vajtswv ib yam li Ahaj thiab nws cov tub tau ua rau cov Yixalayees tsis muab siab npuab Vajtswv ntag. Koj tseem muab koj cov kwv uas yog neeg zoo dua koj tua povtseg lawm thiab. Twb yog vim li ntawd, tus TSWV yuav rau txim rau koj cov neeg, koj cov menyuam, koj cov pojniam thiab rhuav koj tej liaj tej teb kom puastsuaj tas huv tibsi. Koj lub plab yuav mob thiab yuav tawg, koj cov hnyuv yuav tawm tuaj.” Muaj cov Filitees thiab cov Alav uas nyob ze cov Sudas ntawm ntug hiavtxwv, tus TSWV thiaj tshoov lawv siab kom tuaj ua rog rau Yehaulas; lawv tuaj tua cov Yudas, huab tej khoom hauv vajntxwv lub loog, ntes nws cov pojniam thiab nws cov tub huv tibsi mus, tsuas tseg Ahaxiyas uas yog Yehaulas tus tub ntxawg xwb. Tom qab uas tej ntawd dhau lawm, tus TSWV txawm ua rau vajntxwv mob plab heev. Vajntxwv mob plab yuav luag tau ob lub xyoos; nws tus mob pheej huam loj zuj zus mus txog hnub uas vajntxwv tuag. Nws cov pejxeem tsis rauv taws ua kevcai hwm nws ib yam li luag ua rau nws cov yawgkoob lawm. Thaum Yehaulas ua vajntxwv nws hnubnyoog muaj peb caug ob xyoos, thiab nws nyob hauv lub nroog Yeluxalees kav tau yim xyoo. Thaum Yehaulas tuag tsis muaj leejtwg quaj thiab hlub tshua li. Luag coj nws mus faus rau hauv Daviv lub nroog, tiamsis tsis yog faus rau ntawm cov vajntxwv lub toj ntxas. Cov Alav ibtxhia tuaj muab Vajntxwv Yehaulas cov tub tua tuag tas, tsuas tshuav Ahaxiyas uas yog tus tub ntxawg xwb. Yog li ntawd, cov neeg uas nyob hauv lub nroog Yeluxalees thiaj muab Ahaxiyas tsa ua vajntxwv hloov nwg txiv chaw. Tom qab uas Ahaxiyas txiv tuag lawm, Ahaxiyas ua txhaum rau tus TSWV; rau qhov nws muab Vajntxwv Ahaj tsevneeg ua nws cov tuavxam xwb, lawv thiaj coj nws mus ua txhaum. Nws ua raws li lawv tej lus qhia, nws thiaj koom tes nrog Vajntxwv Yaulas uas kav tebchaws Yixalayees mus ua rog rau Vajntxwv Haxayees uas kav tebchaws Xilias ntawm Lamaus hauv cheebtsam Nkile-as thiaj ua rau Yaulas raug mob thiab los kho mob hauv lub nroog Yexelees, ces Vajntxwv Ahaxiyas thiaj tuaj xyuas nws. Thaum Ahaxiyas mus xyuas Yaulas, Vajtswv siv lub sijhawm ntawd txov Ahaxiyas. Thaum Ahaxiyas mus txog, nws thiab Yaulas txawm mus tawmtsam Yehus uas yog Nimesis tug tub uas tus TSWV tau xaiv mus tua Ahaj tsevneeg. Thaum uas Yehus mus muab Ahaj tsevneeg tua tuag tas raws li tus TSWV rau txim rau Ahaj tsevneeg lawm, nws rov los ntsib cov Yudas cov thawjcoj thiab Ahaxiyas cov xeebntxwv uas nrog Ahaxiyas mus xyuas Yaulas, Yehus txawm muab lawv tua tuag tas huv tibsi thiab. Yehus tso neeg mus nrhiav Ahaxiyas thiab ntes tau Ahaxiyas hauv lub nroog Xamalis, lawv coj nws los rau Yehus, thiab Yehus muab nws tua. Luag coj nws mus faus, rau qhov nws yog Vajntxwv Yehausafas tus uas hwm Vajtswv kawg siab kawg ntsws, tus xeebntxwv. Ahaxiyas tsevneeg tsis tshuav ib tug ua vajntxwv kav tebchaws li lawm. Thaum Athaliyas hnov hais tias nws tus tub uas yog Vajntxwv Ahaxiyas raug tua tuag lawm, nws txawm samhwm kom luag muab Vajntxwv Ahaxiyas cov tub tua tuag tas huv tibsi. Tiamsis Ahaxiyas tus muam hu ua Yehausenpas uas yuav tus povthawj Yehauyadas, nws coj Ahaxiyas cov tub uas yuav raug luag tua ib tug uas hu ua Yau-ases mus zais thiab tu hauv lub Tuamtsev ib chav. Qhov uas nws muab Yau-as zais li ntawd cawm tau Yau-as dim ntawm Athaliyas txhais tes. Lub sijhawm uas Athaliyas kav tebchaws ntawd, Yau-as nkaum hauv lub Tuamtsev tau rau xyoo. Xyoo xya, tus povthawj Yehauyadas pom hais tias txog sijhawm uas nws yuav tsum nqis tes ua haujlwm raws li nws tau npaj siab lawm. Nws thiaj hais rau tsib tug thawj tubrog uas yog Yehaulas tus tub Axaliyas, Yehauhanas tus tub Yisamayees, Aunpes tus tub Axaliyas, Adayas tus tub Ma-axeyas thiab Xikhalis tus tub Elisafas. Lawv txawm mus thoob plaws txhua lub nroog hauv tebchaws Yudas coj cov Levis thiab cov thawjcoj ntawm txhua cuab tuaj rau hauv lub nroog Yeluxalees. Lawv sawvdaws tuaj sib sau rau hauv lub Tuamtsev, thiab lawv coglus rau Yau-as uas yog vajntxwv tus tub. Yehauyadas hais rau lawv tias, “Ntawm no yog vajntxwv tus tub ntxawg! Nimno nws yog tus yuav ua vajntxwv raws li tus TSWV tau coglus rau Vajntxwv Daviv hais tias nws cov xeebntxwv yuav tau ua vajntxwv mus li. Qhov uas peb yuav ua yog li no: hnub Xanpataus cov povthawj thiab cov Levis tuaj ua haujlwm, lawv cov ntawd ib feem peb zov lub Tuamtsev tej roojvag, ib feem peb mus zov vajntxwv lub loog, thiab ib feem peb zov lub Roojvag Xules. Tagnrho cov pejxeem yuav tuaj sib sau rau ntawm lub tshavpuam sab nraum lub Tuamtsev. Tsis pub leejtwg mus rau hauv lub Tuamtsev, tsuas yog cov povthawj thiab cov Levis thiaj mus tau xwb. Lawv mus tau, rau qhov lawv dawbhuv lawm, tiamsis cov pejxeem yuav tsum mloog tus TSWV lus thiab nyob sab nraud xwb. Cov Levis tuav rawv ntaj sawv puagncig vajntxwv, thiab lawv nrog nraim vajntxwv txhua qhov uas nws mus. Yog leejtwg mus hauv lub Tuamtsev, cia li muab tus ntawd tua povtseg.” Cov Levis thiab cov Yudas ua raws li Yehauyadas hais. Cov uas ua haujlwm hnub Xanpataus tas los lawv tsis mus tsev li. Yog li ntawd, cov thawj tubrog thiaj tau lawv cov ntawd thiab cov uas tuaj hloov lawv ua haujlwm ua ke. Yehauyadas muab Vajntxwv Daviv cov hmuv thiab cov thaiv hniav ntaj, tsis hais cov loj cov me uas muab khaws cia rau hauv lub Tuamtsev, los rau cov thawj tubrog. Yehauyadas kom cov tubrog tuav rawv ntaj mus sawv thoob plaws ntawm hauv ntej lub Tuamtsev tiv thaiv vajntxwv. Ces Yehauyadas txawm coj Yau-as tawm los, muab lub kausmom kub rau nws ntoo, thiab muab vajntxwv phau kevcai cob rau Yau-as. Tus povthawj Yehauyadas thiab nws cov tub muab roj hliv rau Yau-as taubhau, tsa nws ua vajntxwv, thiab cov pejxeem qw hais tias, “Thov kom vajntxwv muaj txojsia nyob ntev!” Athaliyas hnov cov pejxeem qw qhuas vajntxwv, yog li ntawd, nws thiaj khiav ceev nrooj tuaj rau ntawm lub Tuamtsev uas cov pejxeem tuaj sib sau ua ke. Athaliyas pom tus vajntxwv tshiab sawv ntawm lub qhovrooj Tuamtsev tus ncej qhovrooj, qhov chaw uas npaj rau cov vajntxwv, cov tubrog thiab cov tshuab raj tshuab xyu sawv puagncig vajntxwv. Tagnrho cov pejxeem puavleej qw thiab tshuab raj tshuab xyu zoo siab, thiab cov ntaus suab nkauj hauv lub Tuamtsev ntaus lawv tej nkauj nogncas coj sawvdaws ua kevcai tsa vajntxwv. Athaliyas chim heev, nws dua rhe nws lub tsho thiab qw hais tias, “Ntxeev siab! Ntxeev siab!” Yehauyadas tsis xav kom luag tua Athaliyas rau ntawm lub Tuamtsev, nws thiaj hu cov thawj tubrog los thiab hais rau lawv tias, “Cia li coj Athaliyas tawm raws kis nruab nrab ntawm ob kab tubrog no mus. Yog leejtwg pab nws cia li muab tus ntawd tua povtseg.” Cov tubrog txawm ntes Athaliyas, thiab coj nws mus rau ntawm lub Roojvag Nees uas yuav mus rau hauv lub loog, thiab lawv muab nws tua rau ntawd. Tus povthawj Yehauyadas kom Vajntxwv Yau-as thiab cov pejxeem sawvdaws nrog nws coglus hais tias lawv yuav ua tus TSWV haivneeg mus li. Ces lawv txawm mus rau tom lub tsev teev Npa-as thiab muab lub tsev rhuav puastsuaj tas. Lawv muab tej thaj thiab tej mlom tsoo tawg tas thiab muab tus povthawj Matas uas teev Npa-as tua rau ntawm cov thaj hauv ntej. Yehauyadas tsa cov povthawj thiab cov Levis ua cov saib haujlwm hauv lub Tuamtsev. Lawv ua tes haujlwm uas Vajntxwv Daviv muab cob rau lawv, thiab lawv tua tsiaj hlawv fij rau tus TSWV raws li txoj Kevcai uas Mauxes sau tseg. Dua li ntawd, lawv yog cov ntaus suab nkauj thiab hu nkauj. Yehauyadas tseem tso tubrog zov lub Tuamtsev tej roojvag thiab tsis pub tus neeg uas tsis huv mus rau hauv li. Cov thawj tubrog, cov nomtswv, cov tswvxeev thiab cov pejxeem nrog Yehauyadas coj vajntxwv tawm hauv lub Tuamtsev mus rau hauv lub loog. Lawv coj vajntxwv ntawm lub Roojvag Theem Siab los rau hauv lub loog thiab nws mus zaum saum lub zwmtxwv. Cov pejxeem sawvdaws zoo siab kawg nkaus, thiab lub nroog nyob ntsiag to, rau qhov twb muab Athaliyas tua povtseg lawm. Thaum Yau-ases ua vajntxwv kav tebchaws Yudas nws hnubnyoog muaj xya xyoo, thiab nws nyob hauv lub nroog Yeluxalees kav tau plaub caug xyoo. Nws niam hu ua Xinpiyas uas nyob hauv lub nroog Npesenpas. Yau-ases ua raws li tus TSWV lub siab nyiam mus tas tus povthawj Yehauyadas tiam. Yehauyadas yuav tau ob tug pojniam rau Vajntxwv Yau-as, nkawd yug tau ntau tus tub thiab ntau leej ntxhais rau Yau-ases. Thaum Yau-ases ua vajntxwv tau tsis ntev, nws txawm rov txhim kho lub Tuamtsev. Yau-ases hais kom cov povthawj thiab cov Levis mus thoob plaws txhua lub nroog hauv tebchaws Yudas thiab sau cov pejxeem tej nyiaj los kho lub Tuamtsev raws li niaj xyoo kho. Yau-ases kom lawv cia li nqis tes ua, tiamsis cov Levis tseem pheej ncua tseg tsis ua. Yog li ntawd, vajntxwv thiaj hu Yehauyadas uas yog lawv tus thawjcoj los cuag nws thiab nug hais tias, “Vim li cas nej tseem tsis tau kom cov Levis mus sau se ntawm cov Yudas thiab cov neeg uas nyob hauv lub nroog Yeluxalees raws li tus TSWV tus tubtxib Mauxes tau hais kom cov pejxeem yuav tsum them tuaj kho tus TSWV lub Tsevntaub ntawd?” ( Athaliyas uas yog tus neeg ua phem ua qias cov neeg tuaj muab lub Tuamtsev rhuav pob puas tas thiab coj tej khoom tseemceeb hauv mus siv rau Npa-as lawm.) Vajntxwv hais kom cov Levis txua ib lub thawv thiab muab tso rau ntawm lub roojvag uas mus rau hauv lub Tuamtsev rau sawvdaws coj nyiaj tuaj tso rau hauv. Lawv tshaj tawm rau hauv lub nroog Yeluxalees thiab thoob plaws tebchaws Yudas kom txhua tus coj se tuaj them rau tus TSWV raws li Vajtswv tus tubtxib Mauxes tau hais rau sawvdaws thaum lawv nyob nram tiaj suabpuam. Cov nomtswv thiab cov pejxeem sawvdaws txaus siab coj lawv tej nyiaj se tuaj tso puv nkaus rau hauv lub thawv ntawd. Txhua hnub, cov Levis coj lub thawv nyiaj ntawd mus rau vajntxwv cov nomtswv uas saib cov nyiaj ntawd. Thaum twg lawv pom hais tias cov nyiaj puv thawv lawm, ces vajntxwv tus teev ntawv thiab tus Povthawj Hlob tuaj muab cov nyiaj rho tawm thiab coj lub thawv rov mus tso rau ntawm qhov qub chaw. Lawv ua li no thiaj tau nyiaj ntau heev. Vajntxwv thiab Yehauyadas coj cov nyiaj ntawd mus rau cov uas saib cov kho lub Tuamtsev, ces lawv coj mus ntiav cov uas txawj txaug pobzeb, txawj kaw ntoo thiab txawj nchuav tooj nchuav hlau tuaj kho lub Tuamtsev. Txhua tus puavleej rau siab ua haujlwm, thiab lawv kho lub Tuamtsev khov thiab zoo ib yam li lub qub. Thaum lawv kho tau tiav lawm, lawv coj tej nyiaj tej kub uas siv tsis tas los cob rau vajntxwv thiab Yehauyadas. Nkawd muab tej nyiaj tej kub ntawd coj mus nchuav ua tais thiab ua tej cuabyeej siv rau hauv lub Tuamtsev. Thaum uas Yehauyadas ua neej nyob, sawvdaws tseem tua tsiaj hlawv fij rau TSWV ntawm lub Tuamtsev tsis tu li. Yehauyadas hnubnyoog muaj ib puas peb caug xyoo, nws laus heev, ces nws txawm tuag lawm. Vim Yehauyadas muaj txiaj ntsig zoo rau cov Yixalayees, rau Vajtswv thiab rau lub Tuamtsev, luag thiaj coj nws mus faus rau ntawm cov vajntxwv lub toj ntxas hauv Daviv lub nroog. Tiamsis tom qab uas Yehauyadas tuag lawm, cov Yudas cov nomtswv tuaj thov Vajntxwv Yau-as, ces vajntxwv txawm ua raws li lawv hais. Yog li ntawd, cov Yudas txawm tso tseg tsis pehawm tus TSWV uas yog lawv cov yawgkoob tus Vajtswv hauv lub Tuamtsev, tiamsis lawv mus pe tej mlom thiab tus mlom pojniam Aselas lawm. Lawv ua txhaum li ntawd ua rau tus TSWV chim heev rau cov Yudas thiab cov neeg uas nyob hauv lub nroog Yeluxalees. Tus TSWV tso cov cev Vajtswv lus mus coj lawv rov los cuag nws, tiamsis lawv tsis mloog cov cev Vajtswv lus hais li. Vajtswv tus ntsujplig los kav hlo Xakhaliyas uas yog tus povthawj Yehauyadas tus tub. Xakhaliyas thiaj mus sawv tabmeeg cov pejxeem thiab hais rau lawv tias, “Tus TSWV uas yog Vajtswv nug hais tias vim li cas nej tsis mloog nws tej lus samhwm? Nej yuav tsis vammeej, rau qhov nej tso tus TSWV tseg lawm, nws thiaj tso nej tseg thiab!” Vajntxwv Yau-ases nrog cov pejxeem ntxeev siab rau Xakhaliyas, vajntxwv hais kom cov pejxeem muab pobzeb ntaus Xakhaliyas tuag rau hauv lub tshavpuam ntawm lub Tuamtsev. Vajntxwv tsis nco txog tej txiaj ntsig zoo uas Xakhaliyas txiv uas yog Yehauyadas tau ua rau nws lawm, nws thiaj muab Xakhaliyas tua. Thaum Xakhaliyas yuav tuag, nws hais tias, “Thov kom tus TSWV pom tej uas koj ua no thiab rau txim rau koj!” Xyoo ntawd, thaum lub caij nplooj ntoos zeeg, cov tubrog Xilias txawm tuaj tua lub tebchaws Yudas thiab lub nroog Yeluxalees. Lawv muab cov thawjcoj tua tuag tas thiab huab tau khoom ntau heev coj mus rau pem lub nroog Damaxes lawm. Txawm yog cov tubrog Xilias tsis coob los tus TSWV cia lawv tua yeej cov tubrog Yudas uas coob heev, rau qhov cov Yudas tso tus TSWV uas yog lawv cov yawgkoob tus Vajtswv tseg lawm. Qhov no yog Vajtswv rau txim rau Vajntxwv Yau-ases. Yau-ases raug mob sab kawg li; thaum cov yeebncuab thim rov qab lawm, nws ob tug thawj tubrog txawm ntxeev siab rau nws thiab muab nws tua tuag rau saum txaj pauj qhov uas nws tua tus povthawj Yehauyadas tus tub. Luag coj nws mus faus rau hauv Daviv lub nroog, tiamsis tsis yog faus rau ntawm cov vajntxwv lub toj ntxas. ( Ob tug uas ntxeev siab rau Yau-as yog Xanpas uas nws niam hu ua Sime-as uas yog neeg Amoos, thiab yog Yehauxadas uas nws niam hu ua Simelis uas yog neeg Mau-am.) Nws cov tub, tej lus qhia tshwm uas hais txog nws, thiab qhov uas nws txhim kho tus TSWV lub Tuamtsev puavleej muab sau cia rau hauv phau ntawv uas teev cov vajntxwv lub neej lawm. Thiab nws tus tub Amaxiyas ua vajntxwv hloov nws chaw. Thaum Amaxiyas ua vajntxwv nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau nees nkaum cuaj xyoos. Nws niam hu ua Yehauyadees uas nyob hauv lub nroog Yeluxalees. Nws ua lub neej raws li tus TSWV lub siab nyiam, tiamsis nws tsis ua kawg siab kawg ntsws. Thaum nws kav lub tebchaws nyob ruaj lawm, nws txawm muab ob tug nom uas tua nws txiv tua povtseg. Txawm li ntawd los nws tsis tua nkawd cov menyuam, nws uas li ntawd thiaj raws li tus TSWV tej lus samhwm rau hauv Phau Ntawv Kevcai uas Mauxes sau tseg hais tias, “Tsis txhob muab niamtxiv tua vim menyuam tej kev txhaum, thiab tsis txhob muab menyuam tua vim niamtxiv tej kev txhaum; tus twg ua txhaum tsuas tua tus ntawd xwb.” Vajntxwv Amaxiyas sau tagnrho xeem Yudas thiab xeem Npeenyamees cov txivneej tuaj ua tubrog raws li tej cuab, thiab nws tsa ib cov thawj saib ib txhiab leej, thiab ib co saib ib puas leej. Nws sau cov uas hnubnyoog muaj nees nkaum xyoo rov saud, tagnrho yog muaj peb puas txhiab leej. Lawv puavleej tau kawm tua rog, lawv txawj nkaug hmuv thiab txawj siv daim thaiv hniav ntaj. Amaxiyas muab plaub tas nyiaj ntiav tau ib puas txhiab leej tubrog Yixalayees tuaj pab lawv. Tiamsis muaj ib tug cev Vajtswv lus tuaj hais rau vajntxwv hais tias, “Koj tsis txhob coj cov tubrog Yixalayees no nrog koj mus, rau qhov tus TSWV tsis nrog cov Yixalayees uas yog cov Efalayees. Koj xav hais tias lawv yuav tuaj kom koj lub zog loj thiab tua yeej rog, tiamsis Vajtswv yog tus ua kom yeej lossis muaj zog xwb, nws yuav cia yeebncuab tua yeej koj.” Amaxiyas nug tus cev Vajtswv lus hais tias, “Tiamsis yuav ua li cas rau cov nyiaj uas twb them rau cov tubrog Yixalayees lawm?” Tus cev Vajtswv lus teb hais tias, “Tus TSWV yuav muab ntau tshaj tej ntawd rau koj!” Yog li ntawd, Amaxiyas thiaj tso cov tubrog Yixalayees uas nws ntiav tuaj rov mus tsev. Lawv chim heev rau cov Yudas thiab rov mus tsev lawm. Amaxiyas ua siab tawv qhawv coj nws cov tubrog mus txog hauv lub Hav Ntsev. Lawv tua cov tubrog Edoos tuag kaum txhiab leej thiab ntes tau kaum txhiab leej. Lawv coj cov uas lawv ntes tau ntawd mus rau saum lub hauv tsua ntawm lub nroog Xelas, thiab muab lawv pov rau hauv qab tsuas tsoo pobzeb ua rau lawv tuag tas. Thaum ntawd, cov tubrog Yixalayees uas Amaxiyas tsis pub nrog nws mus tua rog txawm mus tua cov Yudas tej nroog uas nyob ntawm lub nroog Xamalis thiab lub nroog Npethes Hauloos ntu nruab nrab; lawv tua cov Yudas tuag peb txhiab leej thiab huab tau khoom ntau heev coj mus lawm. Thaum Amaxiyas mus tua yeej cov Edoos, nws coj cov Edoos tej mlom los teev thiab hlawv hmoov tshuaj tsw qab fij rau tej mlom ntawd. Qhov uas nws ua li no, ua rau tus TSWV chim heev. Tus TSWV thiaj tso ib tug cev Vajtswv lus mus hais rau Amaxiyas hais tias, “Vim li cas koj pe lwm haivneeg tej vajtswv uas twb pab tsis tau lawv dim ntawm koj txhais tes?” Thaum tus cev Vajtswv lus tseem tabtom hais, vajntxwv txawm teb ntua hais tias, “Leejtwg tsa koj ua vajntxwv tus tuavxam? Koj cia li tsum tsis txhob hais lus lossis yuav cia kuv muab koj tua povtseg!” Ua ntej uas tus cev Vajtswv lus tso tseg, nws txawm hais tias, “Kuv paub hais tias Vajtswv twb txiav txim siab yuav ua kom koj puastsuaj, rau qhov koj ua tej no thiab tsis mloog kuv lus.” Vajntxwv Amaxiyas uas kav tebchaws Yudas thiab nws cov tuavxam ntxeev siab rau cov Yixalayees. Nws thiaj tso xov mus rau Vajntxwv Yehau-as uas kav tebchaws Yixalayees uas yog Yehau-ahas tus tub thiab yog Yehus tus xeebntxwv kom tuaj nrog nws sib tua. Tiamsis Vajntxwv Yehau-as tso neeg mus hais rau Vajntxwv Amaxiyas hais tias, “Muaj ib zaug, ib tsob ntoo pos uas nyob pem roob Lenpanoos tso xov tuaj rau tsob ntoo ciab hais tias, ‘Muab koj tus ntxhais rau kuv tus tub yuav ua pojniam.’ Tiamsis txawm muaj ib tug tsiaj qus los muab tsob ntoo pos tsuj kiag rau hauv av lawm. Amaxiyas, nimno koj khavtheeb qhov uas koj tua yeej cov Edoos uas ua rau koj nto npe. Koj cia li txaus siab thiab nyob twjywm hauv tsev. Vim li cas koj nrhiav teebmeem rau koj thiab koj cov pejxeem kom puastsuaj?” Tiamsis Amaxiyas tsis mloog Yehau-as tej lus. Vim Vajtswv pom zoo cia kom Amaxiyas ua tus swb, rau qhov nws pe cov Edoos tej mlom. Yog li ntawd, Vajntxwv Yehau-as uas kav tebchaws Yixalayees thiaj tuaj tua Vajntxwv Amaxiyas uas kav tebchaws Yudas. Lawv tuaj sib tua ntawm lub nroog Npethes Semes hauv tebchaws Yudas, cov tubrog Yudas thiaj swb thiab khiav tas rov mus tsev lawm. Yehau-as ntes tau Yau-ases tus tub Amaxiyas thiab coj nws mus rau hauv lub nroog Yeluxalees. Yehau-as tsoo tus ntsa yeej uas thaiv lub nroog, txij ntua ntawm lub Roojvag Efalayees mus ti nkaus rau ntawm lub Roojvag Ces kaum tawg pob tas ntev li ib puas daj. Yehau-as coj tej nyiaj tej kub hauv lub Tuamtsev, tej cuabyeej hauv lub Tuamtsev uas cia Aunpes Edoos cov xeebntxwv zov, thiab txhua yam muaj nqis hauv loog uas nws tshawb tau nrog cov neeg uas nws ntes tau mus rau pem lub nroog Xamalis lawm. Tom qab uas Vajntxwv Yehau-as uas kav tebchaws Yixalayees tuag lawm, Vajntxwv Amaxiyas uas kav tebchaws Yudas tseem ua neej nyob tau kaum tsib xyoos ntxiv. Dua li lwm yam uas Amaxiyas ua, thaum pib mus rau thaum xaus, thiab nws kev tswjhwm puavleej muab sau cia rau hauv Phau Ntawv Keebkwm uas teev cov Yudas thiab cov Yixalayees tej vajntxwv lub neej lawm. Txij thaum Amaxiyas tso tus TSWV tseg, cov neeg uas nyob hauv lub nroog Yeluxalees pheej ntxeev siab rau nws. Thaum kawg nws khiav mus rau hauv lub nroog Lakhis, tiamsis nws cov yeebncuab caum qab mus muab nws tua tuag rau hauv lub nroog ntawd. Luag thiaj muab nees thauj nws rov los rau hauv lub nroog Yeluxalees thiab muab nws faus rau ntawm cov vajntxwv lub toj ntxas hauv Daviv lub nroog. Cov Yudas txawm muab Amaxiyas tus tub Uxiyas uas hnubnyoog muaj kaum rau xyoo tsa ua vajntxwv hloov nws txiv chaw. ( Tom qab uas Amaxiyas tuag lawm, Uxiyas rov mus txeeb tau lub nroog Elas thiab muab txhim kho dua tshiab.) Thaum Uxiyas ua vajntxwv nws hnubnyoog muaj kaum rau xyoo, thiab nws nyob hauv lub nroog Yeluxalees kav tau plaub caug ob xyoos. Nws niam hu ua Yehauliyas uas nyob hauv lub nroog Yeluxalees. Uxiyas coj raws li nws txiv tus yam ntxwv, nws ua haum tus TSWV lub siab nyiam. Nws ua lub neej hwm tus TSWV raws li Xakhaliyas qhia nws, Vajtswv thiaj foom koob hmoov rau nws lub neej vammeej mus tas Xakhaliyas tiam. Uxiyas mus ua rog rau cov Filitees. Nws tsoo lub nroog Nkas, lub nroog Yanias thiab lub nroog Asedaus tej ntsa yeej tawg pob tas, thiab nws txhim ntsa yeej thaiv tej nroog uas nyob ze lub nroog Asedaus thiab tej nroog hauv tebchaws Filitees. Vajtswv pab Uxiyas tua yeej cov Filitees, cov Alav uas nyob hauv Nkunpa-as thiab cov Munis. Cov Amoos them nyiaj thiab kub ntau heev rau Vajntxwv Uxiyas, nws muaj hwjchim heev, thiab nws lub koob meej nrov ncha mus txog tebchaws Iziv. Uxiyas ua tej chaw tsomfaj rau ntawm lub Roojvag Ces kaum, rau ntawm lub Roojvag Hav thiab rau ntawm tus ntsa yeej uas nkhaus hlo hauv lub nroog Yeluxalees. Nws tseem ua tau ntau lub chaw tsomfaj rau tom ntug nroog, thiab khawb tau ntau lub qhovdej, rau qhov nws muaj tsiaj txhu coob heev nyob rau zaj taw roob thiab hauv tej tiaj nrag sab hnubpoob. Uxiyas nyiam ua liaj ua teb, nws thiaj kom cov pejxeem cog txiv hmab txiv ntoo ntau heev rau saum tej laj roob thiab hauv tej teb uas av zoo. Uxiyas muaj cov tubrog uas kawm tiav kev tua rog coob heev. Vajntxwv tus thawj tubrog Hananiyas thiab ob tug teev ntawv uas yog Ye-iyees thiab Ma-axeyas sau cov tubrog ntawd tej npe huv tibsi cia rau hauv ntawv. Tagnrho cov thawj tubrog muaj ob txhiab rau puas leej. Lawv muaj peb puas xya txhiab tsib puas leej tubrog uas txawj tua rog heev, pab vajntxwv tua nws cov yeebncuab. Uxiyas muab tej cuabyeej ua rog, tsis hais daim thaiv hniav ntaj, hmuv, kausmom hlau, tsho hlau, hneevnti thiab xub, thiab qe zeb ntaus zes hlua rau cov tubrog. Nyob rau hauv lub nroog Yeluxalees, Uxiyas kom luag ua tau ib co cuabyeej tua xubvos thiab ib co tua pobzeb tso rau saum tej chaw tsomfaj thiab ntawm tej kaum ntsa yeej uas thaiv lub nroog. Uxiyas lub koob meej nrov ncha moo lug mus rau txhua qhov, thiab nws muaj hwjchim heev rau qhov Vajtswv yog tus pab nws. Thaum uas Uxiyas muaj hwjchim lawm, nws txawm khavtheeb heev thiaj ua rau nws raug kev puastsuaj. Nws ua txhaum rau tus TSWV uas yog nws tus Vajtswv, vim nws mus rau hauv lub Tuamtsev thiab hlawv hmoov tshuaj tsw qab rau saum lub thaj. Tus povthawj Axaliyas thiab yim caum leej povthawj uas muaj zog thiab siab tawv heev txawm raws vajntxwv qab mus rau hauv. Lawv cheem vajntxwv hais tias, “Uxiyas! Koj tsis muaj cai hlawv hmoov tshuaj tsw qab fij rau tus TSWV. Tsuas yog cov povthawj uas yog Aloos cov xeebntxwv uas twb ua kevcai ntxuav lawm thiaj ua tau xwb. Koj cia li tawm hauv qhov chaw dawbhuv no mus. Koj tau ua txhaum tawmtsam tus TSWV uas yog Vajtswv, mas koj yuav tsis tau koob hmoov ntawm Vajtswv lawm.” Uxiyas tseem tabtom sawv ntawm lub thaj ib sab hauv lub Tuamtsev thiab tuav rawv lub tais hlawv hmoov tshuaj tsw qab. Uxiyas chim heev rau cov povthawj, ces tamsim ntawd nws lub hauvpliaj mob ruas tawg pleb nrees. Ces Axaliyas uas yog tus povthawj hlob thiab cov povthawj saib ntsoov Uxiyas lub hauvpliaj ua rau lawv ntshai kawg. Lawv thiaj ntiab Uxiyas kom cia li tawm hauv tus TSWV lub Tuamtsev mus. Uxiyas txawm tawm ceev nrooj mus, rau qhov tus TSWV twb rau txim rau nws lawm. Vajntxwv Uxiyas mob ruas mus txog hnub uas nws tuag, vim nws mob ruas, nws thiaj nyob nws ib lub tsev; nws mus tsis tau rau hauv tus TSWV lub Tuamtsev li lawm. Nws tus tub Yauthas thiaj ua tus saib lub loog thiab tswjhwm lub tebchaws. Txhua yam uas Vajntxwv Uxiyas ua thiab nws tej kev tswjhwm, Yaxayas tus uas cev Vajtswv lus uas yog Amauxes tus tub muab sau tseg cia lawm. Uxiyas tuag thiab luag coj nws mus faus ze rau ntawm cov vajntxwv lub toj ntxas, tiamsis vim nws mob ruas, luag thiaj tsis muab nws faus rau hauv cov vajntxwv lub toj ntxas. Thiab nws tus tub Yauthas ua vajntxwv hloov nws chaw. Thaum Yauthas ua vajntxwv nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau kaum rau xyoo. Nws niam hu ua Yelusas uas yog Xadaus tus ntxhais. Yauthas ua lub neej raws li tus TSWV lub siab nyiam ib yam li nws txiv ua; tiamsis nws tsis ua txhaum li nws txiv uas yog mus hlawv hmoov tshuaj tsw qab hauv lub Tuamtsev. Txawm li ntawd los cov pejxeem tseem pheej mus ua kev txhaum. Yauthas yog tus ua lub Roojvag Qaumteb ntawm lub Tuamtsev, thiab nws ua ntau yam rau saum tus ntsa yeej Aufeles. Yauthas ua ntau lub nroog rau saum tej roob hauv tebchaws Yudas, thiab nws ua tau ntau lub chaw fajxwm thiab chaw tsomfaj rau hauv tej havzoov. Yauthas tua yeej tus vajntxwv uas kav tebchaws Amoos thiab nws cov tubrog. Yauthas kom cov Amoos them ib xyoos twg plaub tas nyiaj, tsib caug txhiab kawm hmoov qib, thiab tsib caug txhiab kawm hmoov nplej rau nws mus txog peb xyoos. Yauthas muaj hwjchim, rau qhov nws muab lub siab npuab tus TSWV uas yog nws tus Vajtswv. Txhua yam uas Yauthas ua, nws kev tswjhwm tebchaws, kev ua rog, thiab lwm yam puavleej muab sau cia rau hauv Phau Ntawv Keebkwm uas teev cov Yixalayees thiab cov Yudas cov vajntxwv lub neej lawm. Thaum Yauthas ua vajntxwv nws muaj hnubnyoog nees nkaum tsib xyoos, thiab nws nyob hauv lub nroog Yeluxalees kav tau kaum rau xyoo. Nws tuag thiab luag coj nws mus faus rau hauv Daviv lub nroog, thiab nws tus tub Ahas ua vajntxwv hloov nws chaw. Thaum Ahas ua vajntxwv nws hnubnyoog muaj nees nkaum xyoo, thiab nws nyob hauv lub nroog Yeluxalees kav tau kaum rau xyoo. Ahas tsis ua lub neej zoo raws li nws yawgkoob uas yog Vajntxwv Daviv; tiamsis nws ua tej uas tsis haum tus TSWV lub siab nyiam, thiab nws ua raws li cov vajntxwv uas kav lub tebchaws Yixalayees ua. Nws nchuav tau ib tug mlom tooj Npa-as, nws mus hlawv hmoov tshuaj tsw qab hauv lub Hav Hinoos, thiab nws muab nws cov tub tua hlawv fij rau tej mlom, raws li cov neeg uas tus TSWV ntiab tawm hauv lub tebchaws mus ua ntej uas cov Yixalayees los nyob. Ahas tua tsiaj hlawv fij thiab hlawv hmoov tshuaj tsw qab rau ntawm tej chaw teev dab uas ua rau saum tej pov roob thiab hauv qab tej tsob ntoo uas muaj nplooj ntxoov nyos. Ib tug tubrog Yixalayees hu ua Xikhalis yog tus tua Vajntxwv Ahas tus tub Ma-axeyas, Axelikas uas yog tus nomtswv saib lub loog, thiab Ekanas uas yog tus thawj tubrog ntawm vajntxwv. Txawm yog cov Yudas yog cov Yixalayees kwvtij los cov Yixalayees tseem ntes cov Yudas ob puas txhiab leej pojniam thiab menyuam, thiab huab khoom ntau yam coj mus rau pem lub nroog Xamalis lawm. Audes uas yog tus TSWV tus cevlus uas nyob hauv lub nroog Xamalis, nws tuaj ntsib cov tubrog Yixalayees uas coj cov Yudas uas lawv ntes los, thaum lawv los txog ntawm ntug nroog Xamalis. Nws hais rau lawv tias, “Tus TSWV uas yog nej cov yawgkoob tus Vajtswv chim heev rau cov Yudas, nws thiaj cia nej tua yeej lawv, tiamsis qhov uas nej ua limhiam thiab tua lawv tuag, Vajtswv twb hnov lawm. Qhov uas nej coj cov Yudas tej pojniam thiab txivneej nram Yeluxalees los ua nej qhev. Nej puas paub hais tias yog nej ua txhaum rau tus TSWV uas yog nej tus Vajtswv? Nej cia li mloog kuv hais! Cov uas nej ntes los no yog nej cov kwvtij thiab cov muam xwb. Nej yuav tso lawv mus lossis cia tus TSWV chim thiab rau txim rau nej?” Cov Efalayees plaub tug thawjcoj uas yog Yehauhanas tus tub Axaliyas, Mesilemaus tus tub Npelekhiyas, Salumes tus tub Yehekiyas thiab Halais tus tub Amaxas los tsis pom zoo qhov uas cov tubrog ua li ntawd, lawv thiaj hais tias, “Nej tsis txhob coj cov neeg uas nej ntes ko los rau hauv lub nroog no! Peb twb ua txhaum rau tus TSWV thiab ua rau nws chim heev, tsimnyog nws rau txim rau peb lawm. Nimno nej tseem yuav tsub kev txhaum ntxiv rau peb thiab los?” Yog li ntawd, cov tubrog thiaj muab cov Yudas uas lawv ntes thiab tej khoom uas lawv huab los cob rau cov nomtswv thiab cov pejxeem, ces lawv txawm tsa plaub leeg ntawd ua cov saib thiab muab tej khoom uas lawv huab tau los ntawd, faib rov rau cov neeg uas lawv ntes los thiab muab ris tsho rau lawv hnav, muab khau khiab rau lawv rau, muab mov rau lawv noj, muab dej rau lawv haus, thiab muab roj txiv ntoo pleev lawv tej qhov txhab. Muab cov uas mus tsis taus kev caij neesluav, thiab coj cov neeg uas lawv ntes los ntawd rov mus rau nram tebchaws Yudas ntawm Yelikaus uas yog lub nroog toovlaj. Ces cov Yixalayees thiaj rov los rau pem lub nroog Xamalis lawm. Tib lub sijhawm ntawd, cov Filitees txawm tuaj tua cov nroog uas nyob sab hnubpoob ntawm tej taw roob thiab sab qabteb hauv lub tebchaws Yudas. Lawv txeeb tau lub nroog Npethes Semes, lub nroog Aiyaloos, lub nroog Nkedelaus, thiab lub nroog Xukaus, lub nroog Tinas thiab lub nroog Nkixaus nrog tej zos uas nyob ibncig, thiab lawv cia li nyob hauv tej nroog ntawd li lawm. Vim Vajntxwv Ahas uas kav lub tebchaws Yudas ua tsis ncaj rau cov pejxeem thiab ua txhaum rau tus TSWV, tus TSWV thiaj tso kev txomnyem los rau cov Yudas. Tus vajntxwv uas kav lub tebchaws Axilias tsis tuaj pab Ahas, tiamsis nws tuaj tua Ahas thiab ua rau Ahas raug kev kub ntxhov ntau yam. Yog li ntawd, Ahas thiaj muab tej kub hauv lub Tuamtsev, hauv lub loog thiab sau tagnrho cov nomtswv tej kub hauv lawv tej tsev coj mus rau tus vajntxwv uas kav lub tebchaws Axilias. Txawm li ntawd los qhov uas Ahas ua no pab tsis tau nws li. Thaum uas Ahas raug teebmeem, nws tseem hajyam ua txhaum rau tus TSWV heev dua yav tas los. Nws tua tsiaj hlawv fij rau cov Xilias tej vajtswv uas ua rau nws swb. Nws hais tias, “Cov Xilias tej vajtswv twb pab cov vajntxwv uas kav lub tebchaws Xilias lawm, yog kuv tua tsiaj fij rau tej vajtswv ntawd, tej vajtswv ntawd, yuav pab kuv ib yam nkaus thiab.” Qhov uas Ahas ua no, ua rau nws thiab nws lub tebchaws raug puastsuaj xwb. Ahas tseem muab tej khoom siv hauv lub Tuamtsev sau los thiab muab tsoo tawg tas. Nws muab tus TSWV lub Tuamtsev tej qhovrooj kaw thiab teeb tej thaj txi dab rau txhua qhov hauv lub nroog Yeluxalees. Ahas ua tej chaw teev dab rau txhua lub nroog hauv lub tebchaws Yudas thiab hlawv hmoov tshuaj tsw qab fij rau lwm haivneeg tej vajtswv. Qhov nws ua li no, ua rau tus TSWV uas yog nws cov yawgkoob tus Vajtswv chim heev rau nws. Txhua yam uas Ahas ua thiab nws tej kev tswjhwm tebchaws, thaum pib mus txog thaum xaus, puavleej muab sau cia rau hauv Phau Ntawv Keebkwm uas teev cov Yudas thiab cov Yixalayees tej vajntxwv lub neej lawm. Vajntxwv Ahas tuag thiab luag coj nws mus faus rau hauv lub nroog Yeluxalees, tiamsis tsis yog faus rau ntawm cov vajntxwv lub toj ntxas. Thiab nws tus tub Hexekiyas ua vajntxwv hloov nws chaw. Thaum Hexekiyas ua vajntxwv kav lub tebchaws Yudas nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau nees nkaum cuaj xyoos. Nws niam hu ua Anpiyas thiab yog Xakhaliyas tus ntxhais. Hexekiyas ua lub neej raws li tus TSWV lub siab nyiam, ib yam li nws yawgkoob uas yog Vajntxwv Daviv. Thawj xyoo uas Hexekiyas ua vajntxwv, thaum lub ib hlis ntuj, nws mus qhib lub Tuamtsev tej roojvag thiab rov kho dua tshiab. Nws hu cov povthawj thiab cov Levis tuaj sib sau rau hauv lub tshavpuam ntawm lub Tuamtsev sab hnub tuaj, thiab nws hais rau lawv tias, “Nej cov Levis cia li ua kevcai ntxuav kom nej huv thiab ua kevcai ntxuav tus TSWV uas yog nej cov yawgkoob tus Vajtswv lub Tuamtsev kom dawbhuv, thiab nej cia li muab txhua yam uas ua rau lub Tuamtsev tsis huv tshem mus povtseg huv tibsi. Peb cov yawgkoob tsis muab siab npuab tus TSWV uas yog peb tus Vajtswv thiab lawv ua phem ua qias tabmeeg nws. Lawv tso nws tseg thiab tig nraubqaum rau nws. Lawv muab lub Tuamtsev tej qhovrooj kaw, cia tej teeb tuag tas, thiab lawv tsis hlawv hmoov tshuaj tsw qab fij rau hauv cov Yixalayees tus Vajtswv lub Tuamtsev lawm. Twb yog vim li ntawd, tus TSWV thiaj chim heev rau cov Yudas thiab cov neeg uas nyob hauv lub nroog Yeluxalees, tej uas nws ua rau lawv thiaj ua rau txhua tus ceeb thiab ntshai kawg li. Nej yeej paub tej no zoo. Cov uas yog peb txiv raug tua tuag tas rau hauv tshavrog, thiab peb tej pojniam menyuam raug luag ntes coj mus tas. “Nimno kuv txiav txim siab hais tias kuv yuav coglus rau tus TSWV uas yog cov Yixalayees tus Vajtswv kom nws thiaj tsis chim rau peb lawm. Kuv cov menyuam, nej tsis txhob cia sijhawm dhau mus. Nej yog cov uas tus TSWV xaiv los ua cov hlawv hmoov tshuaj tsw qab fij rau nws thiab coj sawvdaws pehawm nws.” Cov Levis no hu lawv cov kwvtij tuaj ua ke ua kevcai ntxuav kom lawv huv. Ces vajntxwv kom lawv ua kevcai ntxuav lub Tuamtsev kom huv raws li tus TSWV hais. Cov povthawj mus rau hauv lub Tuamtsev thiab ua kevcai ntxuav lub Tuamtsev kom dawbhuv thiab muab txhua yam uas ua rau lub Tuamtsev tsis huv tshem tawm los rau hauv lub tshavpuam ntawm lub Tuamtsev; thiab cov Levis mam li nqa mus povtseg rau hauv lub Hav Kiloos uas nyob sab nraum ntug nroog. Lawv pib ua kevcai ntxuav rau thaum lub ib hlis ntuj hnub xiab ib mus txog hnub xiab yig, thiab lawv kho lub Tuamtsev tej qhovrooj tau yim hnub ntxiv; lub ib hlis hnub kaum rau ntawd, lawv ua txhua yam tiav tas thiaj tau lub Tuamtsev ua qhov chaw pehawm tus TSWV. Cov Levis mus tshabxo rau Vajntxwv Hexekiyas hais tias, “Peb twb ua kevcai ntxuav lub Tuamtsev kom huv tiav tas lawm, tsis hais lub thaj hlawv tej khoom fij los yog lub rooj uas rau cov ncuav dawbhuv, thiab txhua yam cuabyeej huv tibsi. Ntu uas Vajntxwv Ahas tsis muab siab npuab Vajtswv, nws rho txhua yam hauv lub Tuamtsev mus lawm, nimno peb rov muab tej ntawd fij rau tus TSWV thiab muab tso rau ntawm hauv ntej tus TSWV lub thaj.” Vajntxwv Hexekiyas sawv ntxov hu tagnrho cov thawjcoj hauv lub nroog tuaj sib sau thiab lawv ua ke mus rau hauv lub Tuamtsev. Lawv tua xya tus heev nyuj, xya tus laug yaj, xya tus thav yaj thiab xya tus tshis fij daws Vajntxwv tsevneeg thiab cov Yudas tej kev txhaum thiab ua kevcai ntxuav lub Tuamtsev kom huv. Vajntxwv hais kom cov povthawj uas yog Aloos cov xeebntxwv muab cov tsiaj tua hlawv fij rau saum lub thaj. Cov povthawj tua cov heev nyuj ua ntej mam li tua cov laug yaj, cov thav yaj thiab muab txhua tus tsiaj uas tua fij ntawd cov ntshav nchos rau lub thaj. Tom qab ntawd, lawv mam muab cov tshis uas tua daws txim los rau vajntxwv thiab rau cov pejxeem tsa tes rau saum cov tshis. Ces cov povthawj muab cov tshis tua thiab muab cov ntshav nchos rau lub thaj daws cov pejxeem lub txim. Rau qhov vajntxwv samhwm kom muab tsiaj tua hlawv fij daws cov Yixalayees tej kev txhaum. Vajntxwv uas raws li tej lus uas tus TSWV hais rau Nkas uas yog Vajntxwv Daviv tus cev Vajtswv lus thiab Nathas tus uas cev Vajtswv lus. Vajntxwv kom cov Levis nqa nkauj nogncas thiab nruas npuaj sawv ua ke rau ntawm lub Tuamtsev, cov ntawd zoo ib yam li tej uas thaum ub Vajntxwv Daviv siv, thiab cov povthawj los tuav rawv lawv tej raj xyu sawv ntawd thiab. Hexekiyas kom muab cov khoom fij hlawv; thaum pib hlawv cov khoom, cov pejxeem txawm hu nkauj qhuas tus TSWV, thiab cov ntaus suab nkauj txawm ntaus nkauj nogncas thiab tshuab raj tshuab xyu. Txhua tus uas tuaj pehawm tus TSWV hnub ntawd puavleej zoo siab, lawv hu nkauj thiab tshuab raj tshua xyu mus txog thaum hlawv tej khoom fij tas. Ces Vajntxwv Hexekiyas thiab cov pejxeem txawm txhos caug ntua pehawm Vajtswv. Vajntxwv thiab cov thawjcoj kom cov Levis hu tej nkauj uas Daviv thiab Axafes tus uas cev Vajtswv lus sau qhuas tus TSWV. Yog li ntawd, lawv txhua tus thiaj hu nkauj zoo siab thiab txhos caug pehawm Vajtswv. Hexekiyas hais rau cov pejxeem sawvdaws tias, “Nimno nej sawvdaws yog neeg huv lawm, nej cia li coj tsiaj mus tua fij ua tus TSWV tsaug.” Lawv sawvdaws mloog vajntxwv lus, thiab muaj ibtxhia txaus siab hlo coj lawv tej tsiaj mus tua hlawv fij rau tus TSWV. Lawv coj xya caum tus heev nyuj, ib puas tus laug yaj thiab ob puas tus thav yaj mus tua hlawv fij rau tus TSWV; lawv tseem coj rau pua tus heev nyuj thiab peb txhiab tus yaj mus tua fij thiab faib rau cov pejxeem sawvdaws noj. Vim cov povthawj tsis coob, lawv thiaj kom cov Levis los pab lawv tua cov tsiaj mus txog thaum tes haujlwm ntawd tiav, thiab cov povthawj ua kevcai ntxuav kom lawv huv. (Rau qhov cov Levis muaj lub siab ua kevcai ntxuav kom huv dua cov povthawj.) Dua li tej khoom fij uas ntau heev ntawd, cov povthawj tseem muab tej roj luas tawm ntawm tej nqaij uas muab faib rau cov pejxeem noj, muab cawv txiv hmab hliv rau thiab coj mus hlawv fij. Yog li ntawd, thiaj rov pib muaj kev pehawm Vajtswv nyob hauv lub Tuamtsev dua. Vajntxwv Hexekiyas thiab cov pejxeem sawvdaws zoo siab kawg, rau qhov Vajtswv tau pab lawv ua tes haujlwm ntawd tiav sai heev. Vajntxwv thiab cov pejxeem sawvdaws txaus siab rau qhov uas lawv npaj ntawd, yog li ntawd, lawv thiaj caw tagnrho cov Yixalayees, txij ntua pem lub nroog Das mus txog ntua nram lub nroog Npesenpas kom tuaj rau hauv lub nroog Yeluxalees thiab ua Kevcai Hla Dhau raws li txoj kevcai, neeg tuaj coob tshaj txhua zaus huv tibsi. Cov neeg xa xov txawm mus thoob plaws cov Yixalayees thiab cov Yudas raws li vajntxwv thiab cov nomtswv kom lawv mus caw sawvdaws hais tias, “Cov Yixalayees, nej twb khiav dim ntawm cov Axilias lawm. Yog li ntawd, nej cia li los cuag tus TSWV uas yog Anplahas, Ixaj thiab Yakhauj tus Vajtswv, nws thiaj yuav los cuag nej. Nej tsis txhob ua ib yam li nej cov yawgkoob thiab nej cov kwvtij Yixalayees uas tsis muab siab npuab tus TSWV uas yog lawv tus Vajtswv. Nej twb pom ntsoov nws rau txim rau lawv hnyav kawg li. Nej tsis txhob ua neeg tawv ncauj li lawv, tiamsis nej yuav tsum mloog tus TSWV lus. Nej cia li tuaj rau ntawm lub Tuamtsev hauv lub nroog Yeluxalees, qhov chaw uas tus TSWV uas yog nej tus Vajtswv muab ua qhov chaw dawbhuv, thiab pehawm nws mus ibtxhis. Yog li ntawd, nws thiaj yuav tsis chim rau nej lawm. Yog nej rov los cuag tus TSWV, cov neeg uas ntes nej tej kwvtij mus lawm, yuav hlub lawv thiab yuav tso lawv rov los tsev. Tus TSWV uas yog nej tus Vajtswv, nws muaj siab dawb siab zoo thiab hlub tshua; yog nej los cuag nws, nws yuav lees yuav nej.” Cov neeg xa xov mus thoob plaws txhua lub nroog hauv xeem Manaxes thiab xeem Efalayees cheebtsam av thiab mus txog pem xeem Xenpuloos uas nyob sab qaumteb, tiamsis tej neeg luag cov xa xov plig thiab muab lawv tso dag tso luag. Txawm li ntawd los xeem Aseles, xeem Manaxes thiab xeem Xenpuloos tseem muaj qee leej txaus siab tuaj rau hauv lub nroog Yeluxalees. Vajtswv nyob nrog cov Yudas kom lawv ua tau ib lub siab mloog nws lus thiab ua raws li vajntxwv thiab nws cov nomtswv tej lus samhwm. Thaum lub ob hlis ntuj, neeg coob heev tuaj rau hauv lub nroog Yeluxalees thiab ua Kevcai noj Ncuav tsis xyaw Keeb. Lawv muab tej thaj uas hlawv khoom fij thiab tej thaj uas hlawv hmoov tshuaj tsw qab hauv lub nroog Yeluxalees coj mus povtseg rau hauv lub Hav Kidoos. Lub ob hlis hnub kaum plaub, lawv muab tej menyuam yaj tua fij ua Kevcai Hla Dhau. Cov povthawj thiab cov Levis uas tsis tau ua kevcai ntxuav kom huv, lawv txajmuag kawg li, lawv thiaj ua kevcai ntxuav thiab tua tsiaj hlawv fij rau hauv lub Tuamtsev. Lawv rov mus ua lawv tes haujlwm hauv lub Tuamtsev raws li Mauxes uas yog Vajntxwv tus neeg txoj Kevcai. Cov Levis muab cov ntshav rau cov povthawj coj mus hliv rau lub thaj. Rau qhov tseem tshuav neeg coob heev tsis tau ua kevcai ntxuav kom huv, cov Levis thiaj los tua cov menyuam yaj fij rau tus TSWV ua Kevcai Hla Dhau rau cov uas tsis tau ua kevcai ntxuav ntawd. Dua li ntawd, xeem Efalayees, xeem Manaxes, xeem Ixakhas thiab xeem Xenpuloos, tseem muaj cov uas tsis tau ua kevcai ntxuav kom huv coob heev. Yog li ntawd, qhov uas lawv tuaj ua Kevcai Hla Dhau ntawd, lawv ua tsis raws li txoj kevcai. Vajntxwv Hexekiyas thiaj thov Vajtswv rau lawv hais tias, “Tus TSWV uas yog peb cov yawgkoob tus Vajtswv, koj yog tus uas muaj siab dawb siab zoo, thov koj zam txim rau cov neeg uas tuaj pehawm koj kawg siab kawg ntsws uas tsis tau ua kevcai ntxuav kom huv no.” Tus TSWV teb Hexekiyas tej lus thov thiab zam txim rau lawv. Sawvdaws tuaj ua Kevcai noj Ncuav tsis xyaw Keeb hauv lub nroog Yeluxalees tau xya hnub, lawv zoo siab kawg li, cov povthawj thiab cov Levis niaj hnub qhuas tus TSWV kawg lawv lub dag lub zog. Hexekiyas qhuas cov Levis qhov uas lawv txawj coj sawvdaws hu nkauj pehawm tus TSWV tau zoo heev. Lawv noj tej zaub mov uas ua kevcai thiab tua tsiaj fij rau tus TSWV uas yog lawv cov yawgkoob tus Vajtswv thiab ua nws tsaug tau xya hnub. Ces lawv pom zoo rov ua dua rooj noj rooj haus xya hnub ntxiv. Yog li ntawd, lawv thiaj ua rooj noj rooj haus lomzem thiab zoo siab heev. Vajntxwv Hexekiyas muab ib txhiab tus heev nyuj, xya txhiab tus yaj, thiab cov nomtswv muab ib txhiab tus heev nyuj thiab kaum txhiab tus yaj rau cov pejxeem tua noj. Cov povthawj uas ua kevcai ntxuav kom huv muaj coob heev. Yog li ntawd, lawv txhua tus zoo siab heev, tsis hais cov Yudas, cov povthawj, cov Levis, cov Yixalayees uas tuaj pem qaumteb tuaj, thiab cov neeg txawv tebchaws uas nyob hauv tebchaws Yixalayees thiab tebchaws Yudas. Sawvdaws muaj kev lomzem zoo siab thoob plaws hauv lub nroog Yeluxalees, rau qhov txij thaum Vajntxwv Xalumoos uas yog Daviv tus tub los, tsis tau muaj dua rooj noj rooj haus loj li no. Cov povthawj thiab cov Levis thov tus TSWV foom koob hmoov rau cov pejxeem sawvdaws. Vajtswv nyob saum ntuj uas yog nws qhov chaw dawbhuv hnov lawv tej lus thov thiab foom koob hmoov rau lawv. Tom qab uas lawv ua rooj noj haus dhau lawm, cov Yixalayees mus thoob plaws txhua lub nroog hauv lub tebchaws Yudas thiab tsoo tej ncej zeb, ntov tus mlom pojniam Aselas, rhuav tej thaj thiab tej chaw teev dab povtseg. Lawv ua li ntawd mus thoob plaws hauv lub tebchaws Yudas, thiab thoob plaws hauv xeem Npeenyamees, xeem Efalayees thiab xeem Manaxes cheebtsam av, ces lawv mam li rov los tsev. Vajntxwv Hexekiyas faib haujlwm rau cov povthawj thiab cov Levis kom nyias ua nyias tes haujlwm uas muab cob rau lawv lawm. Lawv tes haujlwm yog hlawv khoom fij, fij khoom ua kev sib raug zoo, ua Vajtswv tes haujlwm hauv lub Tuamtsev, qhuas thiab ua Vajtswv tsaug hauv lub Tuamtsev. Tej tsiaj uas tua hlawv fij thaum sawv ntxov thiab tsaus ntuj, cov tua fij hnub Xanpataus, Hnub Hli Xiab thiab lwm yam kevcai raws li tus TSWV txoj Kevcai hais tseg puavleej yog vajntxwv muab. Dua li ntawd, vajntxwv hais kom cov neeg uas nyob hauv lub nroog Yeluxalees coj tej khoom fij uas yeej yog cov povthawj thiab cov Levis tug tuaj rau lawv; lawv thiaj muaj sijhawm ua haujlwm raws li tus TSWV txoj kevcai qhia tseg. Thaum cov Yixalayees hnov vajntxwv tej lus samhwm lawm, lawv coj tej qoobloo uas zoo heev, tsis hais nplej, txiv hmab, roj txiv ntoo, zib ntab, thiab lwm yam uas lawv sau tau los ntawm lawv thawj phaum qoobloo, thiab lawv coj ib feem kaum ntawm txhua yam uas lawv muaj tuaj. Tagnrho tej neeg uas nyob txhua lub nroog hauv lub tebchaws Yudas coj lawv tej nyuj, tej yaj uas yog ib feem kaum, thiab lawv tseem coj ntau yam tuaj fij rau tus TSWV uas yog lawv tus Vajtswv. Thaum lub peb hlis, lawv pib coj tej khoom pub ntawd tuaj teeb mus txog lub xya hli mam tas. Thaum Vajntxwv Hexekiyas thiab nws cov nomtswv pom sawvdaws coj khoom tuaj ntau heev lawm, lawv txawm ua tus TSWV tsaug thiab foom koob hmoov rau cov pejxeem. Vajntxwv qhia tej khoom no rau cov povthawj thiab cov Levis, ces tus Povthawj Hlob Axaliyas uas yog Xadaus tus xeebntxwv hais rau vajntxwv tias, “Txij thaum cov pejxeem pib nqa lawv tej khoom tuaj rau hauv lub Tuamtsev, peb muaj noj muaj haus nplua mias. Peb tau txais txhua yam no twb yog tus TSWV foom koob hmoov rau nws haivneeg.” Vajntxwv hais kom lawv ua ib co chav rau khoom rau hauv lub Tuamtsev, thiab lawv muab tej khoom pub thiab tej ib feem kaum coj mus cia rau hauv cov chav ntawd. Lawv tsa ib tug Levis npe hu ua Kaunaniyas ua tus saib tej khoom ntawd thiab tsa nws tus kwv Sime-is ua tus pab nws; Vajntxwv Hexekiyas thiab tus Povthawj Hlob Axaliyas tsa cov Levis kaum leej uas yog Yehiyees, Axaxiyas, Nahas, Axahees, Yelimaus, Yauxanpas, Eliyees, Imakhiyas, Mahas thiab Npenayas ua cov pab Kaunaniyas thiab Sime-is. Imenas uas yog xeem Levis tus tub Kaules yog tus thawj uas saib lub Roojvag Hnubtuaj ntawm lub Tuamtsev, ua tus saib tej khoom pub uas sawvdaws coj tuaj fij rau tus TSWV thiab muab tej khoom ntawd faib. Edees, Miniyamees, Yesuas, Semayas, Amaliyas thiab Sekaniyas uas yog cov povthawj nyob rau tej lub nroog, lawv muaj lub siab ncaj ncees faib tej zaub mov rau lawv cov Levis sib npaug zos raws li lawv tes haujlwm, tiamsis tsis yog faib raws li tej cuab kwvtij. Lawv faib rau cov txivneej txhua tus uas hnubnyoog peb caug xyoo lossis laus dua ntawd uas niaj hnub tuaj ua haujlwm hauv lub Tuamtsev raws li lawv tes haujlwm xwb. Lawv faib haujlwm rau cov povthawj raws li tej cuab thiab faib haujlwm rau cov Levis uas muaj hnubnyoog nees nkaum xyoo rov saud raws li lawv tej pab. Lawv coj lawv tej pojniam menyuam mus sau npe, rau qhov lawv yog cov uas muaj lub siab ncaj ncees thiab tswj lawv kom ua tau neeg dawbhuv tiag. Cov povthawj uas yog Aloos cov xeebntxwv uas nyob hauv tej nroog lossis tom lawv tej teb thiab hauv tej zos ibncig lub nroog, lawv yog cov uas faib zaub mov rau cov txivneej uas yog cov povthawj tsevneeg thiab txhua tus uas sau npe zwm rau cov Levis txhua cuab. Vajntxwv Hexekiyas ua nws tes haujlwm ncaj ncees, thoob plaws lub tebchaws Yudas thiaj ua haum tus TSWV uas yog nws tus Vajtswv siab. Txhua yam uas Vajntxwv Hexekiyas ua, tsis hais ua lub Tuamtsev lossis ua raws li tus TSWV tej kevcai, nws muab siab rau nrhiav Vajtswv, thiab muab siab npuab Vajtswv kawg siab kawg ntsws, nws tes haujlwm thiaj vammeej. Vajntxwv Hexekiyas muaj lub siab ncaj ncees ua tus TSWV tes haujlwm txhua yam tiav. Tom qab ntawd, Xenakhelis uas yog tus vajntxwv kav lub tebchaws Axilias txawm tuaj tua lub tebchaws Yudas. Nws xub tuaj vij cov nroog uas muaj ntsa yeej thaiv thiab kom nws cov tubrog tsoo tej ntsa yeej mus rau hauv nroog. Thaum Hexekiyas pom hais tias Xenakhelis yuav tua lub nroog Yeluxalees, Vajntxwv kho tus ntsa yeej uas thaiv lub nroog tej ntu uas puas lawm, thiab ua tej chaw tsomfaj rau saum tus ntsa yeej, thiab ua ib txheej ntsa yeej rau sab nraum. Dua li ntawd, nws kho tus ntsa yeej uas thaiv Daviv lub nroog, thiab nws ua tau ib co hmuv thiab ib co thaiv hniav ntaj ntau heev. Thiab vajntxwv tsa ib cov thawj tubrog ua cov saib, thiab lawv tuaj sib sau rau ntawm lub roojvag nroog lub chaw las tshav. Vajntxwv hais rau lawv tias, “Nej cia li ua siab tawv qhawv thiab tsis txhob ntshai tus vajntxwv uas kav lub tebchaws Axilias thiab nws cov tubrog. Tus uas tuaj peb tog muaj zog dua tus uas tuaj lawv tog. Nws lub zog tsuas yog zog neeg xwb, tiamsis peb muaj tus TSWV uas yog peb tus Vajtswv pab peb tua rog.” Vajntxwv tej lus txhawb cov pejxeem lub zog heev. Tom qab ntawd, thaum Xenakhelis thiab nws cov tubrog tseem nyob hauv lub nroog Lakhis, nws tso xov tuaj rau Hexekiyas thiab cov Yudas uas nyob hauv lub nroog Yeluxalees hais tias, “Kuv yog Xenakhelis uas yog tus vajntxwv kav lub tebchaws Axilias. Kuv nug hais tias dabtsi ua rau nej tso siab nyob hauv lub nroog Yeluxalees uas luag twb vij tas lawm? Hexekiyas hais rau nej tias tus TSWV uas yog nej tus Vajtswv yuav pab nej kom dim ntawm peb lub hwjchim, tiamsis yog Hexekiyas dag nej thiab yuav cia nej tshaib plab thiab nqhis dej tuag xwb. Nws yog tus uas rhuav tej chaw pehawm tus TSWV thiab tej thaj, thiab tseem hais rau cov Yudas thiab cov neeg uas nyob hauv lub nroog Yeluxalees tias, nej tsuas mus pe thiab hlawv hmoov tshuaj tsw qab rau saum tib lub thaj xwb. Nej puas tau paub tej uas kuv cov yawgkoob thiab kuv tau ua rau lwm haivneeg lawm? Cov neeg ntawd, tej vajtswv puas pab tau lawv dim ntawm tus vajntxwv uas kav lub tebchaws Axilias? Thaum twg cov tebchaws ntawd tej vajtswv pab tau lawv dim ntawm peb tes? Yog li ntawd, dabtsi ua rau nej xav hais tias nej tus Vajtswv yuav pab tau nej dim? Nimno nej tsis txhob cia Hexekiyas dag nej thiab coj nej yuam kev li ntawd. Nej tsis txhob ntseeg nws tej lus! Tsis muaj ib haivneeg twg tus vajtswv yuav pab cawm tau nws haivneeg dim ntawm cov Axilias tus vajntxwv txhais tes li. Yog li ntawd, nej tus Vajtswv los yeej yuav cawm tsis tau nej li thiab!” Cov Axilias cov nomtswv hais lus phem rau tus TSWV uas yog Vajtswv thiab rau Vajntxwv Hexekiyas uas yog tus TSWV tus tubtxib. Xenakhelis sau ib tsab ntawv tuaj thuam tus TSWV uas yog cov Yixalayees tus Vajtswv hais tias, “Lwm haivneeg tej vajtswv twb cawm tsis tau lawv dim ntawm kuv txhais tes, txawm yog Hexekiyas tus Vajtswv los yeej cawm tsis tau nws haivneeg dim ntawm kuv txhais tes li thiab.” Cov Axilias cov nomtswv cem ua lus Henplais nrov nrov kom cov neeg hauv Yeluxalees uas tuaj nyob saum tus ntsaj yeej ntshai thiab poob siab thiab kom lawv thiaj txeeb tau lub nroog yoojyim. Lawv hais txog lub nroog Yeluxalees tus Vajtswv ib yam li hais txog lwm haivneeg tej vajtswv uas yog neeg txhais tes puab. Ces Vajntxwv Hexekiyas thiab Yaxayas tus uas cev Vajtswv lus uas yog Amauxes tus tub txawm quaj thov Vajtswv pab. Tus TSWV thiaj tso ib tug timtswv los tua cov Axilias cov nomtswv thiab cov tubrog tuag tas. Ces cov Axilias tus vajntxwv thiaj txajmuag ntsuav rov qab mus rau pem tebchaws Axilias lawm. Muaj ib hnub thaum nws nyob hauv nws lub tsev teev nws tus vajtswv, nws ob tug tub txawm muab ntaj tua nws tuag rau hauv. Yog li ntawd, tus TSWV thiaj cawm Vajntxwv Hexekiyas thiab cov neeg uas nyob hauv lub nroog Yeluxalees dim ntawm Xenakhelis uas kav lub tebchaws Axilias thiab ntawm lwm pab yeebncuab txhais tes. Tus TSWV cia cov Yudas tau nyob thajyeeb lug tsis pub lwm haivneeg tuaj tua lawv. Muaj neeg coob nqa khoom tuaj fij rau tus TSWV thiab pub rau Hexekiyas hauv lub nroog Yeluxalees. Yog li ntawd, txij thaum ntawd los txhua haivneeg thiaj hwm Hexekiyas heev. Thaum ntawd, Vajntxwv Hexekiyas mob hnyav thiab yuav tuag. Nws thov thiab tus TSWV ua ib qhov cim qhia rau nws hais tias nws tus mob yuav zoo. Tiamsis Hexekiyas khavtheeb heev, nws tsis nco tus TSWV tej txiaj ntsig uas kho nws zoo, tus TSWV thiaj chim rau nws, rau cov Yudas thiab rau cov neeg hauv lub nroog Yeluxalees. Ces Hexekiyas lees txim qhov uas nws khavtheeb thiab cov neeg hauv lub nroog Yeluxalees los lees txim ib yam nkaus. Yog li ntawd, tus TSWV thiaj tsis rau txim rau lawv mus txog thaum Hexekiyas tuag. Vajntxwv Hexekiyas npluanuj thiab txhua tus hwm nws heev; nws ua tau ntau chav tsev rau nws tej nyiaj tej kub, tej qe zeb muaj nqis, tej tshuaj tsw qab, tej thaiv hniav ntaj thiab lwm yam uas muaj nqis. Nws ua ntau lub txhab rau nplej, rau txiv hmab thiab roj txiv ntoo; ua ntau lub nkuaj kaw nws tej nyuj thiab ua ntau lub nkuaj kaw nws cov yaj. Vajtswv foom koob hmoov rau Hexekiyas muaj yaj, muaj nyuj coob thiab muaj lwm yam ntau heev, nws thiaj rhawv tau ntau lub nroog. Vajntxwv Hexekiyas tauv tus Dej Kihoos thiab khawb kwj tso dej ntws rau sab hnubpoob ntawm Daviv lub nroog. Txhua yam uas Hexekiyas ua puavleej vammeej. Cov Npanpiloos tso ib cov nomtswv tuaj nug Hexekiyas txog tej txujci uas tus TSWV ua hauv nws lub tebchaws, Vajtswv cia Hexekiyas ua raws li nws lub siab nyiam, rau qhov Vajtswv xav sim Hexekiyas siab. Dua li lwm yam uas Vajntxwv Hexekiyas ua, thiab nws muab siab npuab tus TSWV, puavleej muab sau cia rau hauv Amauxes tus tub Yaxayas uas yog tus cev Vajtswv lus zaj yogtoog, thiab hauv Phau Ntawv keebkwm uas teev cov Yixalayees thiab cov Yudas tej vajntxwv lub neej lawm. Hexekiyas tuag thiab luag coj nws mus faus rau ntawm cov vajntxwv lub toj ntxas theem siab. Tagnrho cov Yudas thiab cov neeg hauv lub nroog Yeluxalees puavleej tuaj ua kevcai hwm thaum nws tuag. Thiab nws tus tub Manaxes ua vajntxwv hloov nws chaw. Thaum Manaxes ua vajntxwv kav lub tebchaws Yudas nws hnubnyoog muaj kaum ob xyoos, thiab nws nyob hauv lub nroog Yeluxalees kav tau tsib caug tsib xyoos. Nws ua txhaum rau tus TSWV, nws ua kev phem kev qias ib yam li cov neeg uas tus TSWV muab ntiab tawm hauv lub tebchaws mus ua ntej nws haivneeg los nyob. Nws rov tsim dua tej chaw teev dab uas nws txiv Hexekiyas muab rhuav tas lawm. Nws ua ntau lub thaj teev tus mlom Npa-as, nws puab tej mlom pojniam Aselas thiab nws pe tej hnubqub. Nws ua tau ntau lub thaj teev dab rau hauv lub Tuamtsev, thiab muab teeb rau ntawm qhov chaw uas tus TSWV hais tias tsimnyog cia ua qhov chaw rau sawvdaws pehawm nws mus ibtxhis. Nws ua tau ntau lub thaj rau ntawm lub tshavpuam ntawm lub Tuamtsev ua chaw pe tej hnubqub. Nws muab nws cov tub tua hlawv fij rau hauv lub Hav Hinoos. Nws ua khawvkoob, ua yeessiv thiab saib yaig. Nws ua txhaum loj heev rau tus TSWV, tus TSWV thiaj chim heev rau nws. Nws muab tus mlom tooj los txawb rau hauv lub Tuamtsev, ntawm qhov chaw uas tus TSWV hais rau Daviv thiab Daviv tus tub Xalumoos hais tias, “Lub Tuamtsev hauv lub nroog Yeluxalees no, yog qhov chaw uas kuv xaiv tawm ntawm kaum ob xeem Yixalayees los ua qhov chaw rau sawvdaws tuaj pehawm kuv. Yog cov neeg Yixalayees mloog kuv lus, thiab ua raws li kuv txoj Kevcai uas kuv tus tubtxib Mauxes muab rau lawv lawm, kuv yuav tsis pub kom lawv raug ntiab tawm hauv lub tebchaws uas kuv muab rau lawv cov yawgkoob lawm.” Manaxes coj cov Yudas mus ua txhaum loj tshaj tej kev txhaum uas lwm haivneeg uas tus TSWV muab ntiab tawm hauv lub tebchaws ua ntej nws haivneeg los nyob lawm thiab. Txawm yog tus TSWV ntuas Manaxes thiab nws cov pejxeem los lawv tsis mloog tus TSWV lus li. Yog li ntawd, tus TSWV thiaj cia cov tubrog Axilias tuaj tua lub tebchaws Yudas. Lawv ntes tau Manaxes, muab khawb hlau chaws nws qhovntswg, thiab muab saw hlau khi nws cab mus rau tim lub tebchaws Npanpiloos lawm. Thaum Manaxes raug kev txomnyem li ntawd, nws thiaj txo hwjchim thiab tig rov los cuag tus TSWV uas yog nws tus Vajtswv, thiab nws thov tus TSWV pab nws. Vajtswv hnov nws tej lus thov thiab teb nws, tus TSWV thiaj tso nws rov los rau hauv lub nroog Yeluxalees thiab kav lub tebchaws dua. Qhov no ua qhia rau Manaxes paub hais tias tus TSWV yeej yog Vajtswv tiag. Dhau ntawd los, Manaxes txhim tus ntsa yeej uas thaiv sab nraum Daviv lub nroog ntawm sab hnubtuaj kom siab ntxiv, pib kiag ntawm lub kaum hauv lub hav uas ze lub Qhovdej Nkihoos uas nyob sab qaumteb mus rau ntawm lub Roojvag Ntses, thiab mus rau ntawm lub nroog qhov chaw uas hu ua Aufes. Nws tseem tso ib co thawj tubrog coj tej pab tubrog mus nyob hauv txhua lub nroog uas muaj ntsa yeej thaiv hauv lub tebchaws Yudas. Nws muab lwm haivneeg tej vajtswv, tej mlom uas muab tso rau hauv lub Tuamtsev, tej thaj teev dab uas luag ua rau saum lub pov roob ntawm lub Tuamtsev, thiab hauv lub nroog Yeluxalees tshem coj mus povtseg rau sab nraum ntug nroog huv tibsi. Nws rov kho lub thaj ntawm qhov chaw pehawm tus TSWV, tua tsiaj hlawv fij ua kev sib raug zoo thiab ua Vajtswv tsaug rau saum lub thaj ntawd. Nws samhwm rau cov Yudas txhua tus kom pehawm tus TSWV uas yog cov Yixalayees tus Vajtswv nkaus xwb. Txawm li ntawd los cov neeg tseem pheej mus tua tsiaj hlawv fij rau lwm qhov chaw, tiamsis yog lawv fij rau tus TSWV uas yog lawv tus Vajtswv xwb. Dua li lwm yam uas Manaxes ua, nws tej lus thov Vajtswv, thiab tej lus uas cov cev Vajtswv lus tuav tus TSWV uas yog cov Yixalayees tus Vajtswv lub npe hais rau nws, puavleej muab sau cia rau hauv Phau Ntawv Keebkwm uas teev cov Yixalayees cov vajntxwv lub neej lawm. Vajntxwv tej lus thov Vajtswv, Vajtswv teb nws, nws tej kev txhaum uas nws ua, tej kev phem kev qias thiab tej thaj teev dab uas nws ua, tej mlom pojniam Aselas uas nws nchuav, thiab tej mlom uas nws pe ua ntej nws lees txim, puavleej muab sau cia rau hauv cov cev Vajtswv lus Phau Ntawv Keebkwm lawm. Manaxes tuag thiab luag muab nws faus rau hauv nws lub loog, thiab nws tus tub Amoos ua vajntxwv hloov nws chaw. Thaum Amoos ua vajntxwv kav lub tebchaws Yudas nws hnubnyoog muaj nees nkaum ob xyoos, thiab nws nyob hauv lub nroog Yeluxalees kav tau ob xyoos. Amoos ua txhaum rau tus TSWV ib yam li nws txiv Manaxes ua ntag, thiab nws pe tej mlom uas nws txiv pe. Tiamsis nws tsis txo hwjchim thiab tsis tig los cuag tus TSWV ib yam li nws txiv; nws hajyam ua txhaum loj tshaj nws txiv. Amoos cov nomtswv ntxeev siab rau nws, thiab muab nws tua tuag rau hauv lub loog. Cov Yudas muab cov neeg uas tua Amoos tua povtseg, thiab tsa Amoos tus tub Yauxiyas ua vajntxwv hloov nws chaw. Thaum Yauxiyas ua vajntxwv kav cov Yudas nws hnubnyoog muaj yim xyoo thiab nws nyob hauv lub nroog Yeluxalees kav tau peb caug ib xyoos. Nws ua lub neej raws li tus TSWV lub siab nyiam thiab raws li Vajtswv txoj kevcai ib yam li nws yawgkoob uas yog Vajntxwv Daviv ua. Thaum Yauxiyas ua vajntxwv tau yim xyoo, nws tseem hluas heev, nws pib pehawm nws yawgkoob uas yog Vajntxwv Daviv tus Vajtswv. Tau plaub xyoos tom qab no, nws txawm muab tej chaw teev dab, tej mlom pojniam Aselas thiab lwm yam rhuav povtseg huv tibsi. Nws hais kom nws cov neeg muab tej thaj uas teev Npa-as thiab tej thaj uas hlawv hmoov tshuaj tsw qab uas nyob ze lawv tsoo povtseg. Lawv muab tej mlom pojniam Aselas thiab lwm yam zom ua hmoov coj mus nphoo rau cov neeg uas pe tej mlom ntawd tej ntxa. Nws muab cov povthawj uas teev dab tej pobtxha coj mus hlawv rau saum tej thaj uas lawv teev dab. Nws ua li ntawd, kom cov Yudas thiab cov neeg uas nyob hauv lub nroog Yeluxalees rov ua tau neeg huv. Nws ua li ntawd rau xeem Manaxes, xeem Efalayees thiab xeem Xime-oos txhua lub nroog mus txog ntua pem xeem Nathalis. Nws mus thoob plaws lub tebchaws Yixalayees sab qaumteb thiab tsoo tej thaj, tej mlom pojniam Aselas, muab tej mlom ntawd zom ua hmoov thiab tsoo tej thaj uas hlawv hmoov tshuaj tsw qab tawg tas. Ces nws mam rov los rau hauv lub nroog Yeluxalees. Thaum Yauxiyas ua vajntxwv tau kaum yim xyoo, tom qab uas nws ua kevcai ntxuav lub tebchaws thiab lub Tuamtsev kom huv thiab tsis muaj kev pe dab lawm, Vajntxwv Yauxiyas tso Axaliyas tus tub Safas, Ma-axeyas uas yog tus tswv nroog Yeluxalees, thiab Yau-ahas tus tub Yau-as uas yog ib tug nomtswv mus kho tus TSWV uas yog Vajtswv lub Tuamtsev. Cov Levis uas zov qhovrooj sau tej nyiaj uas luag coj tuaj tso rau hauv lub Tuamtsev coj mus rau Hilekiyas uas yog tus Povthawj Hlob. (Cov nyiaj ntawd yog lawv sau ntawm cov Efalayees, cov Manaxes thiab cov Yixalayees uas nyob sab qaumteb, cov Yudas, cov Npeenyamees thiab cov neeg uas nyob hauv lub nroog Yeluxalees.) Luag muab cov nyiaj ntawd rau peb tug uas saib cov kho lub Tuamtsev, thiab lawv muab rau cov uas txua ntoo thiab cov ua tsev coj mus yuav pobzeb thiab ntoo los kho tej tsev uas cov Yudas tej vajntxwv muab tso tseg puastsuaj tas lawm. Cov neeg uas kho lub Tuamtsev ncaj ncees heev. Plaub tug Levis uas saib cov neeg ua haujlwm ntawd yog Yahaj thiab Aunpadiyas uas yog cuab Melalis, Xakhaliyas thiab Mesulas uas yog cuab Kauhas. (Cov Levis no, lawv puavleej txawj ntaus suab nkauj.) Muaj dua ib pab Levis ua cov saib tej khoom uas luag coj tuaj thiab saib tej pab neeg uas ua haujlwm, thiab ibtxhia ua cov ceev tej ntaub ntawv lossis ua cov zov roojvag. Thaum luag muab cov nyiaj nqa tawm hauv chav uas rau nyiaj los tas lawm, Hilekiyas pom tus TSWV Phau Ntawv Kevcai, yog Phau Kevcai uas Vajtswv muab cob rau Mauxes. Nws hais rau Safas hais tias, “Kuv pom Phau Ntawv Kevcai no nyob hauv lub Tuamtsev.” Nws txawm muab phau ntawv rau Safas, thiab Safas coj mus rau vajntxwv. Nws hais rau vajntxwv hais tias, “Peb twb mus ua txhua yam uas koj hais rau peb ntawd tiav tas lawm. Peb muab cov nyiaj hauv lub Tuamtsev coj mus rau cov neeg uas kho lub Tuamtsev thiab cov thawj uas saib lawv lawm.” Safas hais ntxiv hais tias, “Phau ntawv no Hilekiyas muab rau kuv.” Ces Safas txawm muab nyeem rau vajntxwv mloog. Thaum vajntxwv hnov tej lus hauv Phau Ntawv Kevcai ntawd nws thiaj dua rhe nws lub tsho thiab nyuaj siab heev thiab hais rau Hilekiyas, Ahikas uas yog Safas tus tub, Anpedoos uas yog Mikhas tus tub, Safas uas yog tus teev ntawv thiab Axayas uas yog tus uas nrog nraim vajntxwv hais tias, “Nej cia li pab kuv thiab cov neeg uas tseem nyob hauv tebchaws Yixalayees thiab tebchaws Yudas nug tus TSWV txog tej lus hauv phau ntawv saib qhia li cas? Tos tus TSWV chim heev rau peb los twb yog peb cov yawgkoob tsis mloog tus TSWV tej lus thiab tsis ua raws li tej lus uas sau rau hauv phau ntawv no kom yuav tsum tau ua.” Ces Hilekiyas lawv txawm mus cuag ib tug cev Vajtswv lus uas yog pojniam hu ua Hulidas uas nyob hauv lub nroog Yeluxalees, ntawm ces kaum uas luag ua tshiab raws li vajntxwv hais. (Hulidas tus txiv hu ua Salumes uas yog Tivas tus tub thiab yog Hahas tus xeebntxwv, nws yog tus saib cov tsho ntev hauv lub Tuamtsev.) Lawv piav tej lus ntawd rau Hulidas mloog, nws kom lawv rov mus cuag vajntxwv thiab hais rau vajntxwv hais tias tus TSWV hais li no: “Kuv yuav rau txim rau lub nroog Yeluxalees thiab cov neeg uas nyob rau hauv lub nroog raws li tej lus uas sau tseg rau hauv phau ntawv uas vajntxwv nyeem ntawd. Lawv tau tso kuv tseg thiab mus tua tsiaj fij rau lwm haivneeg tej vajtswv, kuv thiaj chim rau tej uas lawv ua, thiab kuv chim rau lub nroog Yeluxalees, kuv tej kev chim yuav tsis xam mus sai. Kuv yog tus TSWV uas yog cov Yixalayees tus Vajtswv, kuv hais li no rau vajntxwv: Thaum koj hnov tej lus hauv phau ntawv no tas lawm, koj lees koj tej kev txhaum thiab txo hwjchim tabmeeg kuv, koj quaj tu siab nrho thiab dua rhe koj lub tsho, thaum koj paub hais tias kuv yuav rau txim rau lub nroog Yeluxalees thiab cov neeg huv tibsi. Kuv twb hnov koj tej lus thov lawm, kuv yuav tos koj tuag tso, kuv mam rau txim rau lub nroog Yeluxalees. Kuv yuav cia koj tuag kaj sab lug.” Lawv coj tej lus ntawd mus piav rau Vajntxwv Yauxiyas mloog. Vajntxwv Yauxiyas kom tej thawjcoj thiab cov uas nyob hauv lub nroog Yeluxalees tuaj cuag nws, thiab lawv ua ke mus rau hauv lub Tuamtsev, tsis hais cov povthawj, cov Levis thiab tagnrho cov pejxeem tus muaj tus pluag los mus huv tibsi; vajntxwv nyeem tagnrho phau ntawv coglus uas nrhiav tau hauv lub Tuamtsev rau sawvdaws mloog. Vajntxwv sawv ib sab ntawm tus ncej uas cov vajntxwv ibtxwm sawv, coglus rua tus TSWV hais tias yuav hwm nws, ua raws li nws tej kevcai thiab tej lus samhwm kom kawg siab kawg ntsws, thiab ua kom tau raws li tej lus cog tseg uas sau rau hauv phau ntawv no. Vajntxwv kom cov Npeenyamees thiab txhua tus uas tuaj rau hauv lub nroog Yeluxalees coglus hais tias yuav ua raws li tej lus cog tseg ntawd. Yog li ntawd, cov neeg uas nyob hauv lub nroog Yeluxalees thiaj ua raws li tej lus uas lawv tau cog tseg rau lawv cov yawgkoob tus Vajtswv. Vajntxwv Yauxiyas muab tej mlom phem qias uas nyob hauv cov Yixalayees lub tebchaws tsoo povtseg tas, thiab nws kom sawvdaws yuav tsum pehawm tus TSWV uas yog lawv cov yawgkoob tus Vajtswv mus tas nws simneej. Lub ib hlis ntuj hnub kaum plaub, Vajntxwv Yauxiyas ua Kevcai Hla Dhau hauv lub nroog Yeluxalees qhuas tus TSWV; lawv tua ntau tus tsiaj ua rooj noj rooj haus. Vajntxwv faib haujlwm rau cov povthawj ua hauv lub Tuamtsev, thiab txhawb lawv lub zog kom lawv ua tau haujlwm zoo. Nws hais rau cov Levis uas qhia cov Yixalayees thiab lawv muab lawv fij rau tus TSWV lawm hais tias, “Nej cia li muab tus TSWV lub Phijxab coj mus tso rau hauv lub Tuamtsev uas Daviv tus tub uas yog Vajntxwv Xalumoos ua. Nej yuav tsis tau kwv lub Phijxab no ib qho rau ib qho lawm, tiamsis nej tsuas ua tus TSWV uas yog nej tus Vajtswv tes haujlwm thiab pab nws haivneeg Yixalayees lawm xwb. Nej tej cuab nyias mus ua nyias tes haujlwm hauv lub Tuamtsev raws li Vajntxwv Daviv thiab nws tus tub uas yog Vajntxwv Xalumoos tau faib tseg rau nej lawm, thiab npaj rawv tos pab cov Yixalayees txhua tsevneeg. Nej yog cov uas tua tej yaj thiab tej tshis ua Kevcai Hla Dhau. Nimno, nej cia li ua kevcai ntxuav kom nej huv, nej thiaj fij tau nej cov kwvtij Yixalayees tej tsiaj raws li txoj kevcai uas tus TSWV qhia rau Mauxes lawm.” Vajntxwv Yauxiyas muab peb caug txhiab tus tsiaj uas yog yaj, menyuam yaj, thiab menyuam tshis, thiab peb txhiab tus heev nyuj rau cov pejxeem tua ua Kevcai Hla Dhau. Vajntxwv cov nomtswv los muab ntau yam pab cov pejxeem, cov povthawj thiab cov Levis tau siv. Tus Povthawj Hlob Hilekiyas, Xakhaliyas thiab Yehiyees uas yog cov nomtswv saib lub Tuamtsev muab ob txhiab rau pua tus menyuam yaj thiab menyuam tshis, thiab peb txhiab tus heev nyuj rau cov povthawj tua fij rau thaum ua rooj noj rooj haus ntawd. Kaunaniyas, Semayas thiab nws tus kwv Nethanees, Hesanpiyas, Ye-iyees thiab Yauxanpas uas yog cov Levis cov thawjcoj tseem muab tsib txhiab tus thav yaj thiab menyuam tshis thiab tsib puas tus heev nyuj rau cov Levis tua hlawv fij. Thaum lawv npaj txhua yam ua Kevcai Hla Dhau txhij lawm, cov povthawj thiab cov Levis txawm mus sawv rau ntawm lawv qhov chaw raws li vajntxwv hais. Tom qab uas muab cov menyuam yaj thiab menyuam tshis tua lawm, cov Levis muab laws tawv thiab cov povthawj muab cov ntshav nchos rau lub thaj. Lawv muab cov tsiaj uas hlawv fij faib rau tej pab ntawm tej tsevneeg coj mus fij rau tus TSWV raws li Mauxes txoj Kevcai qhia tseg. Cov nyuj los lawv ua ib yam nkaus li ntawd. Cov Levis muab cov menyuam yaj uas tua ua Kevcai Hla Dhau ci thiab muab cov ua kevcai fij dawbhuv lawm hau rau hauv laujkaub, hauv hwj thiab hauv yias thiab muab tej nqaij ntawd faib rau cov pejxeem. Tom qab uas ua li ntawd tas lawm, cov Levis mam faib nqaij rau lawv thiab cov povthawj uas yog Aloos cov xeebntxwv. Rau qhov cov povthawj tseem hlawv tej tsiaj uas muab hlawv tagnrho thiab hlawv tej roj fij mus txog thaum tsaus ntuj. Cov hu nkauj uas yog Axafes cov xeebntxwv mus sawv ntawm lawv qhov chaw raws li Vajntxwv Daviv, Axafes, Hemas thiab Yeduthoos uas yog vajntxwv cov cev Vajtswv lus tau hais tseg lawm. Cov Levis uas zov lub Tuamtsev tej roojvag tsis tas yuav tso lawv tes haujlwm tseg mus ua lwm yam, rau qhov cov Levis twb npaj Kevcai Hla Dhau rau lawv lawm. Yog li hnub ntawd, lawv ua txhua yam tiav tas, tsis hais kev pehawm tus TSWV, ua Kevcai Hla Dhau thiab tua tsiaj hlawv fij rau saum lub thaj raws li Vajntxwv Yauxiyas hais rau lawv lawm. Cov Yixalayees ua Kevcai Hla Dhau, thiab noj Ncuav tsis xyaw Keeb tau xya hnub. Txij thaum Xamuyees tus uas cev Vajtswv lus tiam los, tsis tau ua Kevcai Hla Dhau loj npaum li zaum no. Cov vajntxwv uas kav tas los lawm, tsis muaj ib tug ua Kevcai Hla Dhau loj npaum li Vajntxwv Yauxiyas, cov povthawj, cov Levis, cov Yudas, cov Yixalayees thiab cov neeg uas nyob hauv lub nroog Yeluxalees ua zaum no uas yog thaum Yauxiyas kav lub tebchaws tau kaum yim xyoo ntawd. Tom qab uas Vajntxwv Yauxiyas ua tej no tiav tas rau lub Tuamtsev lawm, Vajntxwv Nekaus uas kav lub tebchaws Iziv coj tubrog tuaj tua rog rau ntawm Kakhemis uas nyob ntawm ntug Dej Efalates, Yauxiyas txawm mus cheem Nekaus, tiamsis Nekaus tso xov tuaj rau Yauxiyas hais tias, “Cov Yudas tus vajntxwv, kuv tuaj ua rog zaum no tsis txuam yuaj txog koj dabtsi. Kuv tuaj no tsis yog tuaj tua koj, tiamsis tuaj tua kuv cov yeebncuab, thiab Vajtswv hais kom kuv cia li kavtsij mus. Vajtswv tuaj kuv tog, yog li ntawd, koj tsis txhob tuaj tabkaum kuv nyob tsam Vajtswv ua rau koj puastsuaj.” Tiamsis Yauxiyas tsis mloog Vajtswv tej lus uas hais rau Vajntxwv Nekaus, rau qhov nws yeej npaj siab tuaj sib tua ntag. Yog li ntawd, Yauxiyas txawm hloov ua cuav mus sib tua hauv lub tiaj Menkidaus. Thaum lawv tabtom sib tua, cov Iziv thiaj tua xub hneevnti tuaj raug Vajntxwv Yauxiyas. Nws txawm hais rau nws cov tubtxib tias, “Kuv raug mob sab heev lawm, nej cia li coj kuv mus!” Lawv tsaws nws rau hauv nws lub tsheb nees los rau lwm lub tsheb nees uas nyob ntawd thiab coj nws los rau hauv lub nroog Yeluxalees. Yauxiyas tuag rau hauv lub nroog Yeluxalees thiab luag coj nws mus faus rau ntawm cov vajntxwv lub toj ntxas. Thaum Yauxiyas tuag, tagnrho cov Yudas thiab cov neeg hauv lub nroog Yeluxalees puavleej quaj ntsuag. Yelemis tus uas cev Vajtswv lus sau tau ib zaj nkauj quaj ntsuag hu rau Vajntxwv Yauxiyas. Zaj nkauj ntawd cia li ua ib zaj nkauj rau cov Yixalayees hu thaum tej txivneej lossis tej pojniam ib tug twg tuag. Zaj nkauj no muab sau tseg rau hauv phau nkauj quaj ntsuag. Txhua yam uas Yauxiyas ua, qhov uas nws muab siab npuab tus TSWV, ua raws li txoj Kevcai, thiab nws lub neej thaum pib mus txog thaum xaus puavleej muab sau cia rau hauv Phau Ntawv Keebkwm uas teev cov Yixalayees thiab cov Yudas cov vajntxwv lub neej lawm. Cov Yudas xaiv Yauxiyas tus tub Yehau-ahas thiab muab nws tsa ua vajntxwv nyob rau hauv lub nroog Yeluxalees. Thaum Yehau-ahas ua vajntxwv kav lub tebchaws Yudas nws hnubnyoog muaj nees nkaum peb xyoos, thiab nws nyob hauv lub nroog Yeluxalees kav tau peb hlis. Vajntxwv Nekaus uas kav lub tebchaws Iziv tuaj ntes Vajntxwv Yehau-ahas coj mus thiab yuam cov Yudas them xya txhiab tsib puas choj nyiaj thiab xya caum tsib choj kub rau nws. Nekaus tsa Yehau-ahas tus tijlaug Eliyakees ua vajntxwv kav lub tebchaws Yudas thiab muab nws hloov npe hu ua Yehauyakees. Nekaus coj Yehau-ahas mus rau nram tebchaws Iziv lawm. Thaum Yehauyakees ua vajntxwv kav lub tebchaws Yudas nws hnubnyoog muaj nees nkaum tsib xyoos, thiab nws nyob hauv lub nroog Yeluxalees kav tau kaum ib xyoos. Yehauyakees ua txhaum rau tus TSWV uas yog nws tus Vajtswv. Vajntxwv Nenpukajnexales uas kav lub tebchaws Npanpiloos thiaj tuaj tua lub tebchaws Yudas thiab ntes tau Yehauyakees, muab saw hlau khi coj mus rau tim tebchaws Npanpiloos lawm. Nenpukajnexales coj tej nyiaj tej kub hauv lub Tuamtsev ibtxhia mus tso rau hauv nws lub loog uas nyob tim tebchaws Npanpiloos. Txhua yam uas Yehauyakees ua, tsis hais nws tej kev phem kev qias thiab tej kev txhaum uas nws ua, puavleej muab sau cia rau hauv phau ntawv keebkwm uas teev cov Yixalayees thiab cov Yudas cov vajntxwv lub neej lawm. Thiab nws tus tub Yehauyakhees ua vajntxwv hloov nws chaw. Thaum Yehauyakhees ua vajntxwv kav lub tebchaws Yudas nws hnubnyoog muaj kaum yim xyoo, thiab nws nyob hauv lub nroog Yeluxalees kav tau peb hlis thiab kaum hnub. Nws tau ua txhaum rau tus TSWV. Thaum lub caij nplooj ntoos hlav, Vajntxwv Nenpukajnexales txawm tuaj ntes Yehauyakhees mus rau tim tebchaws Npanpiloos thiab coj tagnrho tej nyiaj tej kub hauv lub Tuamtsev mus lawm. Nenpukajnexales thiaj tsa Yehauyakhees tus txiv ntxawm Xedekiyas ua vajntxwv kav lub tebchaws Yudas thiab cov neeg hauv lub nroog Yeluxalees. Thaum Xedekiyas ua vajntxwv kav lub tebchaws Yudas, nws hnubnyoog muaj nees nkaum ib xyoos, thiab nws nyob hauv lub nroog Yeluxalees kav tau kaum ib xyoos. Nws ua txhaum rau tus TSWV, nws tsis txo hwjchim thiab tsis mloog Yelemis tus uas cev tus TSWV tej lus li. Xedekiyas ntxeev siab rau Vajntxwv Nenpukajnexales tus uas yuam kom Xedekiyas tuav Vajtswv lub npe coglus hais tias nws yuav muab siab npuab Nenpukajnexales. Nws muaj lub siab tawv tsis kam lees txim thiab tig los cuag tus TSWV uas yog cov Yixalayees tus Vajtswv. Tsis yog li ntawd xwb, cov Yudas cov thawjcoj, cov povthawj thiab cov neeg cia li mus nrog cov neeg txhaum uas nyob ibncig lawv, pe lawv tej mlom thiab ua rau tus TSWV lub Tuamtsev uas dawbhuv tsis huv lawm. Tus TSWV uas yog lawv cov yawgkoob tus Vajtswv txib cov cev Vajtswv lus ntuas lawv ua ntu zus, rau qhov nws hlub nws haivneeg thiab lub Tuamtsev. Tiamsis lawv saib tsis tau Vajtswv cov cevlus, tsis quavntsej nws tej lus thiab luag cov cev Vajtswv lus plig mus txog thaum tus TSWV chim rau nws haivneeg, lawv thiaj khiav tsis dim tus TSWV txojkev rau txim li. Yog li ntawd, tus TSWV thiaj coj tus vajntxwv uas kav lub tebchaws Npanpiloos tuaj tua lawv. Tus vajntxwv ntawd tua cov Yudas tej tub hluas tuag pawglug rau hauv lub Tuamtsev. Nws tsis hlub leejtwg li, tsis hais tus laus tus hluas, pojniam txivneej, tus muaj mob lossis noj qab nyob zoo. Vajtswv muab lawv cob huv tibsi rau Nenpukajnexales tes. Tus vajntxwv uas kav lub tebchaws Npanpiloos muab tej nyiaj tej kub hauv lub Tuamtsev thiab muab vajntxwv thiab nws cov nomtswv tej nyiaj tej kub txhua yam coj mus rau tim tebchaws Npanpiloos lawm. Nws muab hluavtaws hlawv lub Tuamtsev thiab lub nroog Yeluxalees, tej loog thiab txhua yam muaj nqis uas nyob hauv tej loog kub hnyiab tas, thiab tsoo tus ntsa yeej uas thaiv lub nroog pob puas tas. Nws coj cov neeg uas seem mus huv tibsi rau tim tebchaws Npanpiloos, lawv ua nws thiab ua nws cov xeebntxwv qhev mus txog thaum tebchaws Pawxias muaj vajntxwv kav. Yog li ntawd, thiaj muaj raws li tus TSWV tej lus uas hais rau Yelemis tus uas cev Vajtswv lus hais tias, “Lub tebchaws yuav nyob qhuav nquas xya caum xyoo kom lub tebchaws muaj xyoo Xanpataus rau qhov lawv tsis cia lub tebchaws so li.” Thawj xyoo uas Xailas ua huabtais kav lub tebchaws Pawxias, tus TSWV thiaj ua kom muaj raws li nws tau hais rau Yelemis tus uas cev Vajtswv lus lawm. Tus TSWV tshoov Xailas siab kom tshabxo raws li tej lus samhwm nram no thiab sau xa mus nyeem nrov nrov rau cov pejxeem thoob plaws txhua qhov hauv lub tebchaws uas Xailas kav mloog hais tias, “Ntawm no yog Xailas uas yog tus huabtais kav lub tebchaws Pawxias tej lus samhwm. Tus TSWV uas yog Vajtswv, tus uas nyob saum ntuj tsa kuv los kav tagnrho lub qab ntuj no thiab kom kuv txhim kho lub Tuamtsev rau nws nyob hauv lub nroog Yeluxalees hauv lub tebchaws Yudas. Nimno nej cov uas yog Vajtswv haivneeg, nej cia li rov qab mus rau nej lub tebchaws thiab thov tus TSWV uas yog nej tus Vajtswv nrog nraim nej.” Thawj xyoo uas Xailas ua huabtais kav tebchaws Pawxias, tus TSWV thiaj ua kom muaj raws li nws tau hais rau Yelemis uas yog tus cev Vajtswv lus lawm. Tus Tswv tshoov Xailas siab kom ua raws li tej lus samhwm nram qab no, thiab muab sau xa mus nyeem nrov nrov rau cov pejxeem thoob plaws hauv lub tebchaws uas Xailas kav mloog. “Ntawm no yog Xailas tus uas yog tus huabtais kav tebchaws Pawxias tej lus samhwm. Tus TSWV uas yog Vajtswv, tus nyob saum ntuj, tau tso kuv los kav tagnrho lub qab ntuj no thiab kom kuv txhim kho lub Tuamtsev rau nws nyob hauv lub nroog Yeluxalees hauv xeev Yudas. Thov Vajtswv nrog nraim nej txhua tus uas yog nws haivneeg nyob. Nej cia li rov qab mus rau tim lub nroog Yeluxalees thiab rov mus txhim kho tus TSWV uas yog cov Yixalayees tus Vajtswv lub Tuamtsev dua tshiab. Nws yog tus Vajtswv tus uas nej pehawm nyob hauv lub nroog Yeluxalees. Yog nws haivneeg ib leeg tus twg uas raug luag ntes coj mus lawm, xav rov qab los mas nws cov neeg zejzog nruab ze yuav pab tau nws. Lawv yuav tau muab nyiaj muab kub, zaub mov noj thiab nees rau nws thauj nws tej nra coj los fij rau Vajtswv hauv lub Tuamtsev uas nyob hauv lub nroog Yeluxalees.” Ces cov thawjcoj ntawm tej cuab kwvtij ntawm xeem Yudas thiab xeem Npeenyamees, cov povthawj thiab cov Levis, thiab txhua tus uas Vajtswv tau tshoov kom muaj lub siab kub lug npaj nroos rov qab mus txhim kho tus TSWV lub Tuamtsev hauv lub nroog Yeluxalees dua tshiab. Tagnrho lawv cov neeg zejzog txawm nqis tes nroos pab ntau yam khoom rau lawv raws li nram qab no: tej tais nyiaj, tais kub, zaub mov noj, nyuj thiab nees thauj nra, lwm yam khoom siv uas muaj nqis thiab tej khoom fij hauv lub Tuamtsev. Huabtais Xailas muab tej tais thiab khob uas Vajntxwv Nenpukajnexales tau coj hauv lub Tuamtsev hauv lub nroog Yeluxalees los tso rau hauv lub tsev uas nws teev nws tej mlom rau lawv nqa huv tibsi rov qab. Huabtais muab tej ntawd cob rau Miledas uas yog vajntxwv tus tub ceev nyiaj txiag, Miledas muab tshuaj saib tag thiab muab teev tseg cia rau hauv ntaub ntawv thiab nws muab cob rau Senpaxas uas yog ib tug tswvxeev kav lub xeev Yudas, Xam tagnrho huv tibsi muaj tsib txhiab plaub puas lub tais kub, tais nyiaj thiab lwm yam twj taig uas muab cob rau Senpaxas coj nrog nws thiab nrog lwm tus uas raug ntes mus rau tim Npanpiloos nqa rov qab los rau hauv lub nroog Yeluxalees. Coob leej ntau tus uas raug ntes mus tau rov qab hauv lub xeev Npanpiloos los rau hauv lub nroog Yeluxalees thiab hauv tebchaws Yudas; lawv nyias thiaj rov los nyob rau hauv nyias tej qub zej qub zog. Lawv tej tsevneeg puavleej raug ntes mus ua neeg poob tebchaws nyob rau tim tebchaws Npanpiloos txij li thaum uas Vajntxwv Nenpukajnexales tuaj ntes lawv mus rau txim lawm. Lawv cov thawjcoj yog Xelunpanpees, Yesuas, Nehemis, Xelayas, Leelayas, Maudekhais, Npilesas, Mixepales, Npinkavais, Lehumes thiab Npa-anas. Ntawm no mus yog teev cov Yixalayees tej cuab kwvtij uas raug luag ntes coj mus thiab tau rov los: Xam tagnrho cov neeg uas ua haujlwm hauv lub Tuamtsev thiab Xalumoos cov tubtxib cov xeebntxwv uas raug luag ntes coj mus thiab tau rov qab los muaj peb puas cuaj caum ob leeg. Cov Yudas tus tswvxeev hais rau lawv kom tsis txhob noj tej zaub mov uas muab fij rau Vajtswv mus txog thaum lawv muaj ib tug los ua povthawj uas siv tau lub Ulees thiab Thumees tso. 1 Thaum cov neeg uas raug luag ntes mus ntawd rov qab los txog rau ntawm tus TSWV lub Tuamtsev hauv lub nroog Yeluxalees, muaj qee leej thawjcoj ntawm tej cuab kwvtij tau muab khoom tuaj fij ntawm lub siab dawb paug coj mus pab txhim kho lub Tuamtsev dua tshiab kom zoo li lub qub thaum ub. Lawv muab ntau npaum li uas lawv muaj coj mus ua tes haujlwm no, thiab xam tagnrho tej uas lawv muab tuaj ntawd tau ib txhiab peb caug choj kub, tsib txhiab xya pua plaub caug choj nyiaj thiab ib puas lub tsho ntev rau cov povthawj. Cov povthawj, cov Levis thiab cov pejxeem qee leej tau mus nyob rau hauv lossis nyob ze lub nroog Yeluxalees; cov ntaus suab nkauj, cov zov lub Tuamtsev thiab cov uas ua haujlwm hauv lub Tuamtsev mus nyob rau hauv lawv tej nroog; thiab dua li cov Yixalayees uas seem puavleej mus nyob tagnrho rau hauv tej nroog uas yav thaum ub lawv cov yawgkoob nyob los lawm. Thaum txog lub xya hli ntuj cov neeg Yixalayees rov los nyob tagnrho rau hauv lawv tej nroog. Ces lawv txawm tuaj sib sau rau hauv lub nroog Yeluxalees, Yauxadas tus tub Yesuas thiab nws cov phoojywg povthawj thiab Se-atees tus tub Xelunpanpees nrog nws cov kwvtij thiaj tau los txhim kho cov Yixalayees tus Vajtswv lub thaj dua tshiab kom lawv thiaj tau lub chaw hlawv tej khoom fij rau saud raws li tej kevcai uas Mauxes tus uas yog Vajtswv tus neeg tau sau tseg cia lawm. Txawm yog cov uas rov qab los ntawd ntshai cov neeg uas ibtxwm nyob hauv lub tebchaws ntawd los lawv cia li ua dua ib lub thaj tshiab rau ntawm qhov qub chaw thaum ub. Ces lawv txawm niaj tagkis thiab niaj hmo pib muab khoom mus hlawv fij pub rau tus TSWV saum lub thaj ntawd. Lawv ua kevcai nyob tsev pheebsuab raws li txoj kevcai uas twb muaj los lawm. Txhua hnub lawv yeej muab khoom fij raws li uas tau teev muaj tseg rau hnub ntawd, thiab dua li ntawd ntxiv, lawv tseem tua tsiaj coj mus hlawv kheej ua khoom fij li ibtxwm muaj los thiab tej tsiaj uas coj mus fij ua rooj noj rooj haus rau hnub xiab ib thiab rau thaum uas tagnrho sawvdaws tuaj sib sau pehawm tus TSWV uas yog zoo siab hlo muab khoom fij pub rau tus TSWV. Txawm yog lawv tseem tsis tau pib txhim kho lub Tuamtsev dua tshiab los lawv cia li coj khoom tuaj fij rau tus TSWV thaum lub xya hli ntuj hnub xiab ib li lawm. Cov neeg muab nyiaj tuaj them rau cov neeg txaug pobzeb, txua ntoo, thiab muab zaub mov, dej haus, thiab roj txiv ntoo xa mus rau pem lub nroog Tiles thiab Xidoos, coj mus pauv tej ntoo ciab pem tebchaws Lenpanoos, thiab muab nquam taug ntug dej hiavtxwv tuaj rau ntawm lub nroog Yaupas. Tagnrho tej no lawv tau ua raws li Huabtais Xailas uas kav tebchaws Pawxias hais kom tso kev rau lawv ua. Xyoo ob thaum lub ob hlis ntuj, tom qab uas lawv rov los txog rau hauv Vajtswv lub Tuamtsev hauv lub nroog Yeluxalees, Xelunpanpees uas yog Se-atiyees tus tub thiab Yesuas uas yog Yauxadas tus tub nrog nkawd cov kwvtij, cov povthawj, cov Levis thiab txhua tus uas raug luag ntes mus thiab tau rov qab los rau hauv lub nroog Yeluxalees thiaj sib pab nqis tes nroos pib ua haujlwm. Tagnrho cov Levis uas muaj hnubnyoog nees nkaum xyoo lossis tshaj ntawd puavleej raug tsa los ua cov saib tes haujlwm uas txhim kho lub Tuamtsev. Cov Levis ntawd yog Yesuas thiab nws cov tub thiab nws cov kwvtij, Kamiyees thiab nws cov tub (uas yog Haudaviyas cajces tsevneeg) tau koom tes sib pab txhim kho lub Tuamtsev. (Cov Levis uas yog cuab Henadas tuaj pab huv tibsi thiab.) Thaum cov neeg pib pua tus TSWV lub Tuamtsev lub plag tse, cov povthawj hnav lawv tej tsho ntev tuaj sawv ntawm lawv tej chaw tuav rawv xyu ntawm tes, thiab cov Levis uas yog cuab Axas los nqa rawv nruas npuaj tuaj sawv ntawd thiab. Lawv ua tus TSWV tsaug raws li tej uas Vajntxwv Daviv tau qhia tseg lawm. Lawv hu zaj nkauj qhuas tus TSWV thiab rov hu ntxiv nqes tshooj hais li no: “Tus TSWV yog tus zoo thiab nws txojkev hlub rau cov Yixalayees muaj nyob mus ibtxhis li.” Txhua leej txhua tus nyias qw kawg nyias lub zog ua tus TSWV tsaug, rau qhov twb pib pua tus TSWV lub Tuamtsev lub plag tse lawm. Thaum cov laus coob leej uas yog povthawj, cov Levis thiab cov thawjcoj ntawm txhua cuab kwvtij uas puavleej tau pom thawj lub Tuamtsev saib luag pua tus TSWV lub Tuamtsev lub plag tse, lawv quaj tu siab kawg. Tiamsis lwm tus uas nyob ntawd kuj luag thiab zoo siab heev. Tsis muaj leejtwg yuav mloog tau tseeb, xyov yog suab qw zoo siab los yog suab quaj tu siab, rau qhov tej suab uas lawv qw ntawd nrov ntxhe mus deb heev. Cov Yudas thiab cov Npeenyamees cov yeebncuab hnov hais tias cov neeg uas raug luag ntes coj mus lawm, tau rov qab los thiab txhim kho tus TSWV uas yog cov Yixalayees tus Vajtswv lub Tuamtsev dua tshiab. Lawv txawm tuaj cuag Xelunpanpees thiab cov thawjcoj ntawm tej cuab kwvtij thiab hais rau lawv tias, “Thov cia peb nrog nej koom ua tus TSWV lub Tuamtsev thiab. Peb yeej pe tib tug Vajtswv uas nej pe thiab peb yeej ibtxwm muab khoom fij rau nws txij thaum cov Axilias tus Vajntxwv Exahadoos tso peb los nyob rau ntawm no lawm.” Xelunpanpees, Yesuas thiab cov thawjcoj ntawm tej cuab kwvtij hais rau lawv tias, “Peb tsis yuav nej pab peb ua lub Tuamtsev rau tus TSWV uas yog peb tus Vajtswv. Peb yuav ua peb xwb; peb ua raws li Huabtais Xailas uas kav tebchaws Pawxias tau samhwm rau peb lawm.” Ces cov neeg uas nyob hauv lub tebchaws ntawd pheej nrhiav kev hem thiab ua kom cov neeg Yixalayees qaug zog tsis txhob txhim kho lub Tuamtsev. Thiab lawv tseem ntiav cov nomtswv Pawxias kom ua tej yam tawmtsam cov Yixalayees. Lawv pheej ua li ntawd mus tas ntu uas Huabtais Xailas kav tebchaws thiab mus txog ntu uas Huabtais Dali-us los kav tebchaws. Thaum Xawxes pib ua huabtais kav tebchaws, cov neeg uas nyob hauv lub xeev Yudas thiab hauv lub nroog Yeluxalees thiab tej yeebncuab tau sau ntawv tuaj nkaug cov Yixalayees. Thiab thaum uas Huabtais Ataxawxes kav tebchaws Pawxias, Npeselas, Miledas, Tanpees thiab lawv cov phoojywg tau sau ib tsab ntawv mus rau huabtais. Tsab ntawv ntawd sau ua lus Alamais thiab mam li txhais thaum uas nyeem. Yog li ntawd, Lehumes uas yog tus tswvxeev thiab Simesais uas yog tus teev ntawv hauv lub xeev ntawd, thiaj li sau ib tsab ntawv ntsig txog lub nroog Yeluxalees mus rau Vajntxwv Ataxawxes hais li no: “Tuaj ntawm Lehumes uas yog tus tswvxeev thiab Simesais uas yog tus teev ntawv hauv lub xeev, nrog rau cov uas thooj siab koom ntsws, cov txiav txim thiab txhua tus nomtswv uas puavleej yog cov neeg uas ibtxwm nyob hauv lub nroog Elej, nyob hauv lub nroog Npanpiloos thiab nyob hauv lub nroog Xuxas uas nyob hauv tebchaws Elames, thiab nrog Asunpanis tus uas muaj zog thiab muaj hwjchim heev uas yog lwm haivneeg uas tau tsiv los nyob rau hauv lub nroog Xamalis thiab nyob thoob plaws hauv lub xeev uas nyob ntawm tus dej Efalates sab Hnubpoob.” Lawv xa ib tsab ntawv tuaj hais li no: “Hawm txog Huabtais Ataxawxes, tuaj ntawm nws cov tubtxib uas nyob hauv lub xeev ntawm tus dej Efalates sab Hnubpoob. “Peb xav kom koj uas yog huabtais paub hais tias cov Yudas uas tau rov hauv koj lub tebchaws los nyob hauv Yeluxalees tabtom txhim kho lub nroog phem thiab ntxeev siab ntawd. Lawv twb pib puab cov ntsa yeej lawm, mas tsis ntev yeej yuav tiav ntag. Huabtais, yog lawv rov txhim kho tau lub nroog ntawd thiab ua tej ntsa yeej tiav, ntshai cov neeg ntawd yuav tsis kam them se lawm, ces huabtais tej nyiaj txiag yuav tsawg zuj zus. Rau qhov nimno peb yog cov uas nyob qab tswjhwm ntawm huabtais, peb tsis xav cia huabtais poob ntsejmuag. Yog li ntawd, peb thiaj sau tsab ntawv no tuaj qhia rau huabtais. Koj cia li kom luag tshawb tej ntaub ntawv uas koj cov yawgkoob tau muab khaws cia lawm. Yog koj ua li ntawd, koj yuav paub hais tias lub nroog ntawd yog lub nroog uas ibtxwm ntxeev siab, thiab yav thaum ub los lub nroog ntawd pheej tsim kev kub ntxhov rau tej vajntxwv thiab rau tej tswvxeev. Cov neeg uas nyob hauv yeej ibtxwm tswjhwm nyuaj kawg. Vim li ntawd lub nroog thiaj raug puastsuaj tas lawm. Peb thov qhia rau huabtais paub hais tias yog cia lawv rov txhim kho tau lub nroog thiab tej ntsa yeej tiav tas lawm, tsis ntev huabtais yuav tsis tau ua tus kav lub xeev uas nyob ntawm tus dej Efalates sab Hnubpoob lawm.” Huabtais sau ntawv xa mus teb lawv li no: “Hawm txog Lehumes uas yog tus tswvxeev, Simesais uas yog tus teev ntawv hauv lub xeev, cov uas nrog lawv thooj siab koom ntsws uas nyob rau hauv lub xeev Xamalis thiab cov uas nyob tim tus dej Efalates sab Hnubpoob. “Tsab ntawv uas nej xa tuaj twb muab txhais thiab nyeem rau kuv mloog tas lawm. Kuv tau tso neeg mus tshuaj thiab tshawb tas lawm. Kuv pom hais tias txij puag thaum ub los lub nroog Yeluxalees yeej ibtxwm tawmtsam cov vajntxwv thiab yog li lub nroog uas pheej ntxeev siab tsim kev kub ntxhov tsis tseg li. Cov vajntxwv muaj hwjchim uas tau kav lub nroog ntawd thiab kav tagnrho mus rau tim lub xeev uas nyob ntawm tus dej Efalates sab Hnubpoob, mas cov neeg ntawd puavleej them se thiab coj khoom tuaj pub rau lawv. Yog li ntawd, nej cia li txwv kom cov neeg ntawd tso tseg, tsis txhob txhim kho lub nroog ntawd ntxiv mus txog thaum kuv tso lus, lawv mam rov ua. Nej cia li maj nroos mus ua qhov no, tsis txhob ua siab hnyav rau zaj no ntshai nyob tsam kev puastsuaj yuav nthuav loj tuaj ua rau kuv raug kev txajmuag.” Thaum Lehumes, Simesais thiab cov uas nrog nkawd thooj siab koom ntsws tau nyeem Huabtais Ataxawxes tsab ntawv tas lawm, lawv thiaj ceev nrooj mus rau hauv lub nroog Yeluxalees thiab mus txwv kom cov Yudas cia li tso tseg, tsis txhob txhim kho lub nroog ntxiv lawm. Ces lawv txawm tso tseg tsis ua lub Tuamtsev thiab nyob tos mus txog thaum Vajntxwv Dali-us ua vajntxwv kav tebchaws Pawxias tau ob xyoos. Thaum lub sijhawm ntawd, muaj ob tug cev Vajtswv lus uas yog Hakais thiab Xakhaliyas. Xakhaliyas yog Idaus tus xeebntxwv, nws txawm pib tuav cov Yixalayees tus Vajtswv lub npe hais rau cov Yudas uas nyob hauv lub xeev Yudas thiab cov uas nyob hauv lub nroog Yeluxalees. Thaum uas Se-atiyees tus tub Xelunpanpees thiab Yauxadas tus tub Yesuas hnov dheev tej lus ntawd, nkawd txawm sawv tsees rov mus pib ua lub Tuamtsev hauv lub nroog Yeluxalees, thiab ob tug cev Vajtswv lus los kuj nqis tes pab lawv ua. Tib lub sijhawm ntawd Tatenais uas yog tus tswvxeev kav sab tim tus dej Efalates sab Hnubpoob, Sethas Npauxenais thiab nkawd cov nomtswv txawm tuaj rau hauv lub nroog Yeluxalees thiab hais rau cov Yudas hais tias, “Leejtwg yog tus tso cai rau nej txhim kho lub Tuamtsev no thiab tej cuabyeej siv ntawd?” Lawv tseem nug tagnrho cov neeg uas tuaj pab ua lub Tuamtsev ntawd tej npe huv tibsi thiab. Tiamsis Vajtswv yeej saib ntsoov cov Yudas tej thawjcoj, ces cov Pawxias thiaj txiav txim siab tsis ua ib yam dabtsi mus txog thaum lawv sau ntawv mus rau Huabtais Dali-us thiab tau txais tej lus teb lawm. Ntawm no yog tsab ntawv uas lawv sau xa mus rau huabtais: “Hawm txog Vajntxwv Dali-us, thov kom koj kav lub tebchaws nyob thajyeeb lug. “Huabtais, peb xav kom koj paub hais tias peb tau mus rau hauv lub xeev Yudas thiab pom lawv tabtom muab tej lag zeb los txhim kho Vajtswv tus uas loj kawg nkaus lub Tuamtsev dua tshiab thiab muab tej nqaj ntoo coj los ntsia tuav tej phabntsa. Lawv rau siab ntso ua thiab yeej yuav ua kom tiav tsis ntev no ntag. “Thiab peb tau nug cov neeg ntawd cov thawjcoj kom qhia rau peb paub saib leejtwg yog tus tso cai rau lawv txhim kho lub Tuamtsev ntawd. Peb tseem nug lawv tej npe huv tibsi kom peb paub qhia rau koj hais tias leejtwg yog tus thawjcoj txhim kho lub Tuamtsev. “Lawv teb hais tias, ‘Peb yog Vajtswv tus uas nyob saum ntuj thiab hauv ntiajteb no cov tubtxib, thiab peb tabtom txhim kho thiab tsa lub Tuamtsev no dua tshiab uas ntau xyoo tas los lawm cov Yixalayees ib tug vajntxwv uas muaj hwjchim loj dua ntais twb ua tseg lawm. Tiamsis vim peb cov yawgkoob tau ua rau Vajtswv tus uas nyob saum ntuj chim, nws thiaj li muab lawv cob rau Nenpukajnexales uas yog neeg Nkade-as uas ua vajntxwv kav lub nroog Npanpiloos txhais tes, nws thiaj tuaj muab lub Tuamtsev rhuav puastsuaj tas, mas cov neeg Yudas thiaj raug ntes coj mus rau tim tebchaws Npanpiloos lawm. Ces thawj xyoos uas Xailas ua vajntxwv kav lub nroog Npanpiloos, Xailas thiaj li sau ntawv tso cai rau peb kom cia li rov txhim kho Vajtswv lub Tuamtsev. Nws thim tej tais kub thiab tais nyiaj uas Nenpukajnexales tau nqa hauv lub Tuamtsev hauv lub nroog Yeluxalees mus tso rau hauv lub tsev teev mlom hauv lub nroog Npanpiloos huv tibsi rov qab. Huabtais Xailas muab tej tais ntawd cob rau tus txivneej uas npe hu ua Senpaxas, tus uas nws tsa ua tus tswvxeev kav cov Yudas. Huabtais hais rau nws hais tias, coj tej twj taig no rov qab mus cia rau hauv lub Tuamtsev uas nyob hauv lub nroog Yeluxalees thiab cia li rov ua Vajtswv lub Tuamtsev rau ntawm qhov qub chaw. Yog li ntawd, Senpaxas thiaj tuaj pib pua Vajtswv lub tuamtsev lub plag tse hauv lub nroog Yeluxalees; peb tau pib ua thaum ntawd los txog tamsim no, tiamsis tseem ua tsis tau tiav.’ “Huabtais, yog koj pom zoo, nimno thov koj cia li tshawb nrhiav huabtais tej ntaub ntawv hauv lub nroog Npanpiloos saib puas yog Huabtais Xailas tso cai kom rov txhim kho Vajtswv lub Tuamtsev hauv lub nroog Yeluxalees, thiab thov qhia tuaj rau peb paub saib koj pom zoo li cas.” Huabtais Dali-us samhwm kom mus tshawb huabtais tej ntaub ntawv uas khaws tseg rau hauv lub nroog Npanpiloos. Yog li ntawd, nyob hauv lub nroog Enpatanas hauv lub xeev Medias, lawv nrhiav tau thooj ntawv ntawd uas muaj lus sau tseg cia hais li nram no: “Thawj xyoo uas Huabtais Xailas kav tebchaws, nws tau samhwm kom cia li rov txhim kho Vajtswv lub Tuamtsev hauv lub nroog Yeluxalees thiaj tau qhov chaw fij khoom thiab nqa tej khoom tuaj hlawv fij; lub Tuamtsev qhov siab yuav tsum yog rau caum tshim thiab qhov dav yuav tsum yog rau caum tshim, cov phabntsa peb txheej pobzeb twg yuav tsum muab ib txheej ntoo kem. Txhua yam nqi yog muab nyiaj hauv vajntxwv lub txhab nyiaj mus them. Tagnrho tej tais kub thiab tej tais nyiaj uas Huabtais Nenpukajnexales coj hauv lub Tuamtsev hauv lub nroog Yeluxalees mus rau tim lub nroog Npanpiloos lawm, nqa huv tibsi rov los tso rau ntawm tej qub chaw hauv lub Tuamtsev hauv lub nroog Yeluxalees.” Huabtais Dali-us xa cov lus teb hais li no: “Txog Tatenais uas yog tus tswvxeev uas kav ntawm tus dej Efalates sab hnubpoob, Sethas Npauxenais, thiab nej cov nomtswv uas nyob ntawm tus dej Efalates sab hnubpoob. “Nej tsis txhob mus ze lub Tuamtsev thiab tsis txhob mus thab cov neeg uas ua tsev ntawd. Cia cov Yudas tus tswvxeev thiab cov Yudas tej thawjcoj rov txhim kho Vajtswv lub Tuamtsev rau ntawm qhov qub chaw thaum ub. Dua li ntawd, kuv samhwm kom nej cia li pab cov Yudas tej thawjcoj ua Vajtswv lub Tuamtsev; muab tej nyiaj se uas cov neeg hauv lub xeev uas nyob ntawm tus dej Efalates sab hnubpoob them tuaj coj mus them cov neeg uas ua lub Tuamtsev kom tes haujlwm ntawd thiaj tsis tu ncua. Yam twg uas cov povthawj hauv lub nroog Yeluxalees xav tau, tsis hais ntsuag nyuj, laug yaj lossis tej menyuam yaj uas coj mus tua hlawv fij rau Vajtswv tus uas nyob saum ntuj, tsis hais nplej, ntsev, cawv txiv hmab lossis roj txiv ntoo, pub rau lawv ib hnub dhau ib hnub tsis pub tu li. Nej yuav tsum tau ua li no, lawv thiaj muaj tej khoom fij rau Vajtswv tus uas nyob saum ntuj, thiab thov nws foom koob hmoov rau kuv thiab kuv cov tub. Kuv hais ntxiv hais tias yog ib tug twg tsis mloog tej lus samhwm no, mas yuav muab nws lub tsev ib tug qhab lauj los hliav ua hmuv nkaug nws lub cev kom tshab. Thiab muab nws lub tsev rhuav kom vau ua ib pawg. Thov Vajtswv tus uas xaiv lub nroog Yeluxalees no cia ua lub chaw pehawm nws txo tej vajntxwv lossis tej haivneeg uas xav tsa tes rhuav Vajtswv lub Tuamtsev uas nyob hauv lub nroog Yeluxalees ntawd. Kuv uas yog Dali-us, tau tawm lus samhwm li cas lawm, yuav tsum tau ua kom raws li kuv tej lus samhwm txhua lo.” Tus tswvxeev Tatenais, Sethas Npauxenais, thiab cov nomtswv tau ua raws nraim li huabtais tej lus samhwm ntawd ntag. Idaus tus xeebntxwv Xakhaliyas thiab Hakais uas yog ob tug cev Vajtswv lus txhawb lawv zog kawg li. Cov Yudas tej thawjcoj thiaj ua tau lub Tuamtsev sai heev. Lawv ua lub Tuamtsev tiav raws li cov Yixalayees tus Vajtswv tej lus samhwm thiab raws li Xailas, Dali-us, thiab Ataxawxes uas yog cov huabtais kav tebchaws Pawxias tau samhwm kom lawv ua. Lawv ua tau lub Tuamtsev tiav tagnrho rau thaum lub hli Adas hnub xiab peb uas Dali-us ua huabtais kav tebchaws tau rau xyoo. Ces tagnrho cov Yixalayees, cov povthawj, cov Levis thiab cov neeg uas raug ntes mus thiab tau rov los muaj kev zoo siab heev thiab muab lub Tuamtsev fij rau Vajtswv. Thaum ua kevcai fij lub Tuamtsev ntawd, lawv muab ib puas tus heev nyuj, ob puas tus yaj thiab plaub puas tus thav yaj coj los tua fij thiab muab kaum ob tug tshis los tua daws txim, ib tug rau ib xeem Yixalayees. Lawv muab cov povthawj thiab cov Levis faib raws li tes haujlwm hauv lub Tuamtsev hauv lub nroog Yeluxalees raws li tej lus uas sau tseg rau hauv Mauxes phau ntawv lawm. Thaum cov neeg uas raug luag ntes mus tau rov los rau hauv lawv lub tebchaws lawm, xyoo tom qab ntawd lawv ua kevcai Hla Dhau rau hmo kaum plaub lub ib hlis ntuj. Tagnrho cov povthawj thiab cov Levis puavleej ua kevcai ntxuav lawv kom huv raws li kevcai. Cov Levis tua tsiaj fij ua kevcai Hla Dhau rau cov neeg uas tau rov los rau cov povthawj thiab rau lawv txhua tus huv tibsi. Muab cov tsiaj uas tua ua khoom fij ntawd faib rau cov neeg uas tau rov los nyob hauv lawv lub qub teb qub chaw, cov neeg uas ibtxwm nyob hauv lub tebchaws ntawd, cov neeg uas tso kev pe mlom tseg thiab cov neeg uas tuaj koom kev pehawm tus TSWV uas yog cov Yixalayees tus Vajtswv tau noj. Lawv ua kevcai noj ncuav tsis xyaw keeb zoo siab lomzem tau xya hnub. Lawv zoo siab heev, rau qhov tus TSWV ua rau cov Axilias tus vajntxwv txaus siab rau lawv, nws thiaj pab lawv txhim kho cov Yixalayees tus Vajtswv lub Tuamtsev dua tshiab. Tau ntau xyoo tom qab ntawd, thaum uas Ataxawxes tseem ua huabtais kav tebchaws Pawxias, muaj ib tug txivneej npe hu ua Exalas. Nws taug nws tej yawgkoob cajces rov qab mus txog rau Aloos uas yog tus Povthawj Hlob raws li nram qab no: Exalas yog Xelayas tub, Xelayas yog Axaliyas tub, Axaliyas yog Hilekiyas tub, Hilekiyas yog Salumes tub, Salumes yog Xadaus tub, Xadaus yog Ahitus tub, Ahitus yog Amaliyas tub, Amaliyas yog Axaliyas tub, Axaliyas yog Melai-us tub, Melai-us yog Xelahiyas tub, Xelahiyas yog Uxis tub, Uxis yog Npukis tub, Npukis yog Anpisuas tub, Anpisuas yog Finehas tub, Finehas yog Ele-axas tub, Ele-axas yog Aloos tub. Aloos yog tus povthawj hlob. Exalas muab nws lub neej fij rau tus TSWV kawm tus TSWV txoj kevcai thiab xyaum ua nws lub neej kom raws li txoj kevcai ntawd, thiab nws muab tej kevcai thiab tej kabke ntawd qhia huv tibsi rau cov pejxeem Yixalayees. Huabtais Ataxawxes muab tsab ntawv no cob rau tus povthawj Exalas uas yog ib tug tub txawg tub ntse. Nws kawm paub thoob plaws tej kevcai thiab tej lus samhwm uas tus TSWV muab cob rau cov Yixalayees: “Tuaj ntawm Vajntxwv Ataxawxes tuaj, txog tus povthawj Exalas, tus paub Vajtswv uas yog tus nyob saum ntuj tej Kevcai. “Kuv samhwm kom cov Yixalayees uas nyob thoob plaws hauv kuv lub tebchaws, cov povthawj thiab cov Levis uas raug tso nrog koj mus nyob rau tim lub nroog Yeluxalees. Kuv thiab kuv cov tuavxam xya leej tso koj mus tshuaj xyuas cov neeg uas nyob hauv lub nroog Yeluxalees hauv xeev Yudas, saib lawv puas coj raws li Vajtswv txoj Kevcai uas twb muab cob rau koj lawm. Koj cia li nqa tej nyiaj tej kub uas kuv thiab kuv cov tuavxam txaus siab muab fij rau cov Yixalayees tus Vajtswv mus ua nws lub Tuamtsev uas nyob hauv lub nroog Yeluxalees. Thiab koj cia li nqa tagnrho tej nyiaj tej kub uas koj mus sau tau thoob plaws hauv xeev Npanpiloos, thiab nqa tej nyiaj uas cov Yixalayees thiab cov povthawj coj tuaj fij rau lawv tus Vajtswv lub Tuamtsev uas nyob hauv lub nroog Yeluxalees huv tibsi nrog koj mus. “Koj yuav tsum ua tib zoo siv tej nyiaj txiag no; koj muab yuav tej heev nyuj, tej laug yaj, tej menyuam yaj, nplej, cawv txiv hmab thiab koj coj tej ntawd mus fij rau saum lub thaj ntawm Vajtswv lub Tuamtsev hauv nroog Yeluxalees. Koj muab tej nyiaj thiab tej kub uas seem coj mus yuav tej uas koj thiab cov neeg zejzog nruab ze xav siv ua yam dabtsi los tau raws li nej tus Vajtswv pom zoo rau nej siv. Koj cia li nqa tej tais uas peb twb muab cob rau koj lawm, coj mus rau Vajtswv hauv lub nroog Yeluxalees thiaj tau siv hauv Vajtswv lub Tuamtsev. Thiab txhua yam uas koj xav yuav coj los siv rau hauv lub Tuamtsev, koj cia li mus rho nyiaj hauv huabtais lub txhab nyiaj los siv xwb. “Kuv samhwm rau cov nomtswv tuav nyiaj txiag uas nyob hauv lub xeev uas nyob ntawm tus dej Efalates sab hnubpoob hais tias yog tus povthawj Exalas uas kawm paub Vajtswv tus nyob saum ntuj txoj kevcai tuaj thov yam twg ntawm nej, nej cia li muab rau nws raws li nws thov, tsuas pub muab xya txhiab tsib puas choj nyiaj, tsib puas kawm nplej, ib txhiab ib puas lamhwj cawv txiv hmab, ib txhiab ib puas lamhwj roj txiv ntoo thiab ntsev muab ntau npaum li uas nws xav tau. Yam twg uas Vajtswv tus uas nyob saum ntuj xav tau, nej cia li muab kom tau coj mus siv rau hauv nws lub Tuamtsev kom nws thiaj tsis chim rau kuv thiab kuv cov tub. Txwv tsis pub nej mus sau se ntawm cov povthawj, cov Levis, cov ntaus suab nkauj, cov zov lub Tuamtsev, cov uas tu lub Tuamtsev lossis txhua tus uas ua haujlwm hauv lub Tuamtsev. “Exalas, koj cia li siv lub tswvyim uas koj tus Vajtswv muab pub rau koj los tsa kom muaj ib cov neeg los ua thawjcoj saib xyuas cov pejxeem thiab ib pab los tu plaub ntug saib cov neeg uas nyob ntawm tus dej Efalates sab hnubpoob kom lawv thiaj ua lub neej raws li koj tus Vajtswv txoj Kevcai. Koj yuav tsum qhia txoj kevcai ntawd rau txhua tus uas tsis tau paub kom lawv paub. Yog leejtwg tsis coj raws li koj tus Vajtswv txoj kevcai lossis tus huabtais uas kav lub tebchaws tej kevcai, nws yuav tsum raug txim tamsim ntawd. Yuav tsum muab nws tua povtseg lossis muab nws ntiab khiav tawm hauv lub tebchaws mus lossis muab txhua yam uas yog nws tug txeeb kom tas lossis muab nws coj mus kaw rau hauv tsev lojcuj.” Exalas hais tias, “Ua tus TSWV uas yog peb cov yawgkoob tus Vajtswv tsaug! Tus Tswv tshoov huabtais siab kom hwm tus TSWV lub Tuamtsev uas nyob hauv lub nroog Yeluxalees. Vim Vajtswv txojkev hlub, nws thiaj pub kuv ua tau haum huabtais, nws cov tuavxam thiab nws tsoom nomtswv uas muaj hwjchim loj siab nyiam; tus TSWV uas yog kuv tus Vajtswv txhawb kuv zog kawg nkaus li, kuv thiaj muaj cuabkav hais tau cov Yixalayees txhua tus thawjcoj ntawm txhua xeem nrog kuv rov qab los.” Ntawm no mus yog cov thawjcoj ntawm tej cuab kwvtij ntawm cov xeem uas raug luag ntes mus rau tim tebchaws Npanpiloos thiab cov tau nrog Exalas rov los rau hauv Yeluxalees thaum uas Ataxawxes ua huabtais kav tebchaws: Kuv hu tagnrho txhua pab tuaj sib sau rau ntawm tus kwjdeg uas ntws mus rau hauv lub nroog Ahavas, thiab peb tsuam chaw so rau ntawd tau peb hnub. Kuv nrhiav saib puas muaj cov povthawj nyob rau hauv tej pab ntawd, tiamsis tsis pom muaj ib tug twg yog Levis li. Kuv thiaj txib neeg mus hu cuaj tug thawjcoj uas muaj npe li no: Eli-exes, Aliyees, Semayas, Enathas, Yalis, Enathas, Nathas, Xakhaliyas thiab Mesulas, thiab hu ob tug xibhwb uas yog Yauyalis thiab Enathas nrog lawv tuaj. Kuv thiaj txib lawv mus cuag Idaus uas yog tus thawjcoj pawg neeg uas nyob ntawm thaj chaw Kaxifi-as. Kuv muab lus rau lawv mus hais rau nws, nws cov phoojywg thiab cov tu lub Tuamtsev kom tso neeg tuaj nrog peb mus tu peb tus Vajtswv lub Tuamtsev. Vim Vajtswv txojkev hlub, lawv thiaj tso Selenpiyas uas yog ib tug muaj peevxwm heev tuaj rau peb; nws yog xeem Levis uas yog Malis cuab kwvtij, thiab nws coj kaum yim leej uas yog nws cov tub thiab nws cov kwvtij nrog nws tuaj thiab. Lawv tseem tso Hasanpiyas thiab Yesaiyas uas yog Melalis xeebntxwv nrog rau nkawd cov kwvtij nees nkaum leej tuaj. Dua li ntawd, tseem tso ob puas nees nkaum leej uas yeej ua haujlwm hauv lub tuamtsev, yog cov uas thaum Vajntxwv Daviv thiab nws cov nomtswv tau tsa lawv cov yawgkoob los pab cov Levis lawm. Puavleej teev lawv cov no tej npe huv tibsi cia. Thaum peb tseem nyob hauv tus Kwjdeg Ahavas kuv tau hais kom peb sawvdaws ua kevcai yoo mov thiab txo hwjchim tabmeeg peb tus Vajtswv thiab thov kom nws coj peb taug kev thiab tsomkwm peb thiab peb tej menyuam, thiab tagnrho peb tej khoom. Kuv txajmuag mus tsa ncauj thov huabtais kom tso nws cov tubrog caij nees nrog peb mus ua cov tiv thaiv tej yeebncuab thaum peb taug kev, rau qhov kuv twb hais rau nws lawm hais tias peb tus Vajtswv yeej foom koob hmoov rau txhua tus uas cia siab rau nws, tiamsis nws tsis txaus siab thiab rau txim rau cov neeg uas tso nws tseg lawm. Yog li ntawd, peb thiaj li yoo mov thiab thov Vajtswv ua tus tsomkwm peb, thiab nws tau teb peb tej lus thov. Kuv thiaj xaiv cov povthawj kaum ob leeg ua cov thawjcoj: Selenpiyas, Hasanpiyas thiab kaum leej. Ces kuv thiaj muab tej nyiaj tej kub thiab tej tais uas huabtais thiab nws cov tuavxam, cov nomtswv, thiab cov Yixalayees muab coj los siv rau hauv lub Tuamtsev ntawd los luj, thiab kuv muab cob rau cov povthawj. Kuv hais rau lawv hais tias, “Nej yog cov neeg dawbhuv rau tus TSWV uas yog nej cov yawgkoob tus Vajtswv; yog li ntawd, nej cia li txaus siab hlo muab tej nyiaj thiab cov tais kub coj mus fij rau tus TSWV. Nej yuav tsum saib tej khoom no kom zoo mus txog thaum uas nej coj mus rau hauv lub Tuamtsev lawm. Ces thaum nej nqa mus rau hauv tej chav uas cov povthawj nyob, nej rov muab luj dua ib zaug rau lawv saib thiab muab cob rau cov thawjcoj ntawm cov povthawj, cov Levis thiab cov thawjcoj ntawm cov Yixalayees hauv lub nroog Yeluxalees.” Yog li ntawd, cov povthawj thiab cov Levis thiaj li ua cov saib tej nyiaj tej kub thiab tej tais ntawd, thiab coj mus rau hauv lub Tuamtsev hauv lub nroog Yeluxalees lawm. Lub ib hlis, hnub kaum ob, peb sawv kev ntawm tus Kwjdeg Ahavas rov los rau hauv lub nroog Yeluxalees. Peb tus Vajtswv nrog nraim peb thiab tsomkwm peb tsis pub peb raug tej yeebncuab tua, thiab peb tsis raug tej xwmtxheej phem thaum peb taug kev. Thaum peb los txog rau hauv lub nroog Yeluxalees lawm, peb thiaj so tau peb hnub. Ces hnub plaub peb mam li mus hauv lub Tuamtsev thiab muab tej nyiaj tej kub thiab tej tais luj cob rau Uliyas tus tub Melemaus uas yog tus povthawj, muaj Ele-axas uas yog Finehas tus tub thiab ob tug Levis, Yauxanpas tus tub Yesuas thiab Nu-adiyas tus tub Npeenu-is nrog nws nyob ntawd. Lub sijhawm ntawd, lawv thiaj muab txhua yam los suav thiab luj, thiab muab sau rau hauv ntawv khaws cia. Cov neeg uas raug ntes mus rau lwm tebchaws thiab tau rov los ntawd coj tsiaj tuaj tua hlawv fij rau cov Yixalayees tus Vajtswv. Lawv fij kaum ob tug heev nyuj rau tagnrho cov Yixalayees, cuaj caum rau tus menyuam yaj, xya caum xya tus laug yaj, thiab muab kaum ob tug laug tshis los tua daws txim. Tagnrho cov tsiaj no puavleej muab hlawv ua khoom fij rau tus TSWV. Lawv thiaj muab daim ntawv tso cai uas huabtais muab rau lawv coj mus cob rau tus tswvxeev thiab cov nomtswv uas nyob hauv lub xeev ntawm tus dej Efalates sab hnubpoob. Lawv cov ntawd thiaj pab peb cov Yixalayees thiab pab lub Tuamtsev uas pehawm tus TSWV. Tom qab uas ua tej ntawd tiav tas lawm, cov Yixalayees cov thawjcoj qee leej tuaj hais qhia rau kuv hais tias cov Yixalayees, cov povthawj, thiab cov Levis tsis cais lawv tawm ntawm tej neeg zejzog uas yog cov Amoos, cov Mau-am, thiab cov Iziv lossis cov Kana-as, cov Hitis, cov Pelixes, cov Yenpus thiab cov Amaules. Lawv pheej ua tej kev phem ib yam li cov neeg ntawd ua thiab. Vim cov Yudas tau mus yuav lwm haivneeg cov ntxhais los ua pojniam; yog li ntawd, lawv thiaj ua rau haivneeg dawbhuv nrog cov neeg uas nyob hauv lub tebchaws ntawd sib xyaw. Tej kev uas ua tsis ncaj tsis ncees no twb yog cov thawjcoj thiab cov nomtswv ntaus thawj ua ntag. Thaum kuv hnov txog tej ntawd, kuv thiaj li dua rhe kuv lub tsho, dob kuv cov plaubhau, kuv cov hwjtxwv thiab kuv zaum ua ntsejmuag mluas mlob tu siab kawg li. Kuv zaum qhov ntawd tu siab kawg mus txog lub caij fij khoom thaum yav tsaus ntuj, thiab cov pejxeem txawm pib tuaj sawv vij kuv. Tagnrho sawvdaws puavleej txhawj thiab ntshai kawg, rau qhov cov Yixalayees tus Vajtswv hais txog cov neeg uas raug ntes mus rau lwm lub tebchaws thiab tau rov los ntawd tej kev txhaum. Thaum yuav tsaus ntuj uas txog lub caij fij tej khoom, kuv thiaj sawv ntawm qhov chaw uas kuv zaum ntawd mus, tiamsis kuv tseem hnav rawv kuv lub tsho uas kuv muab dua ntuag tas ntawd, kuv thiaj txhos caug ntua tsa kuv ob txhais tes thov tus TSWV uas yog kuv tus Vajtswv. Kuv thov hais tias, “Vajtswv, kuv txajmuag kawg nkaus, kuv tsis tsa taubhau saib tuaj rau ntawm koj qhov chaw nyob. Peb tej kev txhaum siab tshaj peb taubhau lawm thiab; tej kev txhaum ntawd siab nto ntuj lawm. Txij thaum peb cov yawgkoob los txog niaj hnub no, peb cov uas yog koj haivneeg tau ua kev txhaum loj kawg li. Vim peb tej kev txhaum thiaj ua rau peb, peb cov vajntxwv thiab cov povthawj poob mus rau tej vajntxwv txawv tebchaws tes, peb thiaj raug luag tua, raug luag huab thiab raug luag ntes coj mus lawm. Tus TSWV uas yog peb tus Vajtswv, tau ib nyuag ntu tas los koj tau hlub peb, cia peb kovyeej thiab khiav dim ntawm txojkev ua luag qhev thiab tau los nyob thajyeeb lug hauv lub chaw dawbhuv no. Koj tau coj peb khiav tawm ntawm qhov chaw uas ua luag qhev los thiab pub peb muaj lub neej tshiab. Peb twb poob mus ua luag qhev lawm, tiamsis koj tsis cia peb ua luag qhev mus li. Koj thiaj tau tshoov Pawxias cov huabtais siab kom lawv hlub peb, nyiam peb, thiab ua ntawv tso cai rau peb rov los nyob hauv no thiab txhim kho koj lub Tuamtsev uas puastsuaj tas lawm dua tshiab, thiab pub peb tau nyob thajyeeb lug hauv lub xeev Yudas thiab hauv lub nroog Yeluxalees. “Vajtswv, nimno peb yuav hais tau dabtsi tom qab uas tej xwm no twb tshwmsim muaj lawm? Vim peb rov tsis mloog koj tej lus samhwm, uas koj tau muab cob rau peb los ntawm koj cov tubtxib uas yog cov cev Vajtswv lus. Lawv qhia rau peb hais tias lub tebchaws uas peb yuav mus txeeb nyob, yog lub tebchaws uas muaj kev tsis ncaj ncees, rau qhov cov neeg uas nyob hauv lub tebchaws ntawd ua tej kev phem kev qias puv nkaus sab tebchaws no mus ti nkaus sab tebchaws kawg tom ub. Lawv qhia hais tias, yog peb xav ntsib kev tau zoo thiab nyob kaj siab lug hauv lub tebchaws ntawd, thiab xav tau lub tebchaws ntawd rau peb tej xeebntxwv nyob mus ibtxhis, kom peb tsis txhob pub peb tej tub tej ntxhais mus yuav cov neeg ntawd tej tub tej ntxhais, thiab tsis txhob txhawb lawv tej kev vammeej lossis txojkev tau zoo hlo li. Txawm yog hais tias peb twb raug txim vim tej kev phem kev qias uas peb tau ua thiab tej uas peb tau yuam kev ua txhaum loj heev ntawd los peb paub tseeb hais tias koj uas yog peb tus Vajtswv twb tsis tau rau txim kom tsimnyog tej kev txhaum uas peb ua ntawd, thiab koj tseem cia peb muaj txojsia nyob. Xyov yog vim li cas peb cia li tsis quavntsej koj tej lus samhwm thiab cia li mus yuav cov neeg ua phem ntawd tej ntxhais los ua pojniam lawm thiab? Yog peb tau ua lawm tiag, koj yuav chim heev rau peb thiab rhuav kom peb puastsuaj tas tsis pub ib tug seem li. Tus TSWV uas yog cov Yixalayees tus Vajtswv, koj yog tus uas ncaj ncees, tiamsis koj tseem cia peb muaj sia nyob. Peb lees peb tej kev txhaum rau koj; yeej tsis tsimnyog peb tuaj rau ntawm koj lub xubntiag.” Thaum Exalas tseem nyo taubhau thov Vajtswv ntawm lub Tuamtsev hauv ntej, quaj thiab lees tej kev txhaum no, ib pab Yixalayees coob heev, pojniam, txivneej thiab menyuam sib sau tuaj sawv vij nws, quaj tu siab kawg li thiab. Ces Yehiyees tus tub Sekhaniyas uas yog Elas cuab kwvtij thiaj hais rau Exalas hais tias, “Peb tau tso txojkev ntseeg Vajtswv tseg thiab tau mus yuav cov neeg txawv tebchaws tej ntxhais los ua pojniam, txawm li ntawd los cov Yixalayees tseem tshuav kev cia siab. Nimno peb thov coglus rau peb tus Vajtswv hais tias peb yuav xa cov pojniam thiab lawv tej menyuam rov qab kom tas. Peb yuav ua raws li koj thiab cov uas hwm Vajtswv tej lus samhwm kom peb ua. Peb yuav ua raws li Vajtswv txoj kevcai uas tau hais tseg ntag. Koj cia li ua tej haujlwm no. Peb yuav tuaj tom koj qab, koj cia li ntaus thawj ua ntej thiab ua kom tiav.” Yog li ntawd, Exalas thiaj kom cov Yixalayees cov thawjcoj, cov povthawj, cov Levis thiab cov pejxeem coglus ua raws li tej lus uas Sekhaniyas tau hais ntawd. Ces nws thiaj li tawm ntawm lub Tuamtsev hauv ntej mus rau hauv chav tsev uas Eli-asis tus tub Yehauhanas nyob thiab pw ib hmos hauv, nws tu siab heev rau cov neeg uas raug ntes mus thiab tau rov los tej kev ua tsis ncaj ncees ntawd. Nws thiaj tsis noj tsis haus ib yam dabtsi li. Thiab nws xa xov mus thoob plaws hauv lub nroog Yeluxalees thiab lub xeev Yudas kom txhua tus uas raug luag ntes mus thiab tau rov los ntawd, cia li tuaj sablaj ua ke hauv lub nroog Yeluxalees raws li cov nomtswv thiab cov thawjcoj tej lus samhwm. Yog leejtwg tsis tuaj, dhau peb hnub saum no lawm, yuav muab txhua yam uas yog nws tug txeeb huv tibsi mus, thiab nws yuav tsis tau ua tswvcuab rau hauv pawg neeg ntawd mus ntxiv li lawm. Peb hnub ntawd, yog lub cuaj hli ntuj hnub nees nkaum, txhua tus txivneej uas nyob hauv cheebtsam Yudas thiab Npeenyamees thiaj tuaj rau hauv lub nroog Yeluxalees thiab mus sib sau ua ke rau ntawm lub tiaj tshavpuam ntawm lub Tuamtsev. Sawvdaws tshee kawg li, rau qhov los nag hlob heev thiab huab cua tsis zoo. Tus povthawj Exalas sawv tsees los hais rau lawv hais tias, “Nej yog cov uas tsis muaj kev ncaj ncees, nej thiaj coj kev txhaum los rau cov Yixalayees vim qhov uas nej mus yuav lwm haivneeg tej ntxhais los ua pojniam. Nimno nej cia li lees nej tej kev txhaum rau tus TSWV uas yog nej cov yawgkoob tus Vajtswv thiab ua kom haum nws siab nyiam. Cia li cais nej tawm ntawm lwm haivneeg uas nyob hauv peb lub tebchaws thiab muab nej cov pojniam uas yog lwm haivneeg tso tseg.” Cov pejxeem teb nrov nrov hais hais tias, “Peb yuav ua li koj hais ntag.” Tiamsis lawv hais ntxiv hais tias, “Peb cov neeg coob heev, thiab nag los hlob kawg li. Peb yuav sawv tsis tau ntawm tshavpuam li no. Tej no tsis yog yuav ua kom tiav rau ib hnub lossis ob hnub tom ntej no, rau qhov peb cov uas tau ua txhaum muaj coob heev. Cia peb cov thawjcoj uas nyob hauv lub nroog Yeluxalees ua cov tu tej plaub ntug no. Cia cov uas yuav lwm haivneeg los ua pojniam, lawv mam teem sijhawm mus ntsib cov thawjcoj thiab cov tu plaub hauv nws lub nroog. Peb ua li no thiaj yuav tshem tau Vajtswv txojkev chim tawm ntawm peb mus.” Tsis muaj leejtwg tawv nyom zaj ntawd li, tsuas yog Axahees tus tub Yaunathas thiab Tivas tus tub Yaxeyas thiaj nyom tsis yuav zaj ntawd xwb. Muaj Mesulas thiab Sanpethais uas yog cov Levis tuaj nkawd tog thiab. Cov neeg uas raug luag ntes mus rau lwm tebchaws thiab tau rov los ntawd zoo siab ua raws li cov lus uas tau hais ntawd. Yog li ntawd, tus povthawj Exalas thiaj tsa cov txivneej uas yog thawjcoj ntawm txhua cuab kwvtij thiab sau lawv tej npe. Ces lub kaum hli ntuj hnub xiab ib, lawv thiaj pib tshuaj saib sawvdaws tej npe, thiab lub ib hlis ntuj hnub xiab ib, lawv mam tu tej plaub ntug uas cov txivneej mus yuav lwm haivneeg cov ntxhais los ua pojniam ntawd tiav. Ntawm no mus yog teev cov txivneej uas yuav lwm haivneeg tej ntxhais los ua pojniam tej npe. Cov povthawj cajces muaj npe raws li nram no: Yesuas thiab nws cov kwvtij uas yog Yauxadas tsevneeg: Ma-axeyas, Eli-exes, Yalis thiab Nkedaliyas. Lawv tau coglus xa lawv cov pojniam rov qab, thiab lawv muab ib tug laug yaj los tua daws lawv tej kev txhaum. Ele-mes cuab kwvtij yog Hananis thiab Xenpadiyas. Halees cuab kwvtij yog Ma-axeyas, Eliyas, Semayas, Yehiyees thiab Uxiyas. Pahules cuab kwvtij yog Eli-aunais, Ma-axeyas, Yisamayees, Nethanees, Yauxanpas thiab Elaxas. Cov Levis yog: Yauxanpas, Sime-is, Kelayas (uas muaj dua ib lub npe hu ua Kelitas), Pethahiyas, Yudas thiab Eli-exes. Cov ntaus suab nkauj yog Eli-asis Cov zov lub Tuamtsev yog Salumes, Telees thiab Ulis. Dua li lwm pab: Palauses cuab kwvtij yog Lamiyas, Ixiyas, Makhiyas, Miyamees, Ele-axas, Makhiyas thiab Npenayas. Elas cuab kwvtij yog Mataniyas, Xakhaliyas, Yehiyees, Adis, Yelemaus thiab Eliyas. Xatus cuab kwvtij yog Eli-aunais, Eli-asis, Mataniyas, Yelemaus, Xanpas thiab Axixas. Npenpais cuab kwvtij yog Yehauhanas, Hananiyas, Xanpais thiab Athalais. Npanis cuab kwvtij yog Mesulas, Malukhes, Adayas, Yasus, Se-as thiab Yelemaus. Pahas Mau-am cuab kwvtij yog Adenas, Khelas, Npenayas Ma-axeyas, Mataniyas, Npexalees, Npeenu-is thiab Manaxes. Hasus cuab kwvtij yog Matenais, Mathatas, Xanpas, Elifeles, Yelemais, Manaxes thiab Sime-is. Nenpaus cuab kwvtij yog Ye-iyees, Matithiyas, Xanpas, Xenpinas, Yadais, Yau-ees thiab Npenayas. Tagnrho cov txivneej uas hais los no puavleej yuav lwm haivneeg cov ntxhais los ua pojniam. Lawv muab lawv cov pojniam thiab lawv cov menyuam xa huv tibsi rov qab mus lawm. Zaj no yog Hakhaliyas tus tub Nehemis tej lus. Thaum Ataxawxes ua huabtais kav tebchaws Pawxias tau nees nkaum xyoo tim nkaus rau lub hli Kislev, kuv uas yog Nehemis tseem nyob hauv lub tuamceeb nroog Susas. Hananis uas yog kuv ib tug tijlaug nrog ib pab neeg tuaj tim tebchaws Yudas tuaj txog, thiab kuv nug lawv txog lub nroog Yeluxalees thiab peb cov kwvtij Yudas uas luag tso tawm hauv lub nroog Npanpiloos rov mus lawm. Lawv qhia rau kuv hais tias cov neeg uas seem thiab tau rov los nyob rau hauv lawv tej qub teb qub chaw, mas txomnyem kawg li, thiab cov neeg txawv tebchaws uas nyob ze lawv ua saib tsis taus lawv kiag li. Thiab lawv tseem qhia rau kuv hais tias, tus ntsa yeej thaiv lub nroog Yeluxalees los puastsuaj tas, thiab tej roojloog los yeej tsis tau kho ib lub, txij thaum luag muab hlawv los txog niaj hnub no. Thaum kuv hnov dheev txog txhua yam uas hais no kuv cia li zaum ntua quaj. Kuv nyuaj siab thiab quaj tau ob peb hnub tsis noj ib qho mov li. Kuv thiaj thov Vajtswv hais tias, “Tus TSWV uas yog Vajtswv tus nyob saum Ntuj! Koj yog tus uas muaj hwjchim loj thiab peb sawvdaws hwm koj nkaus xwb. Koj yog tus uas ncaj ncees thiab ua raws li koj tej lus cog tseg rau cov neeg uas muab siab npuab koj, hlub koj thiab ua raws li koj tej lus samhwm. Tus TSWV, thov koj tsa qhovmuag saib kuv thiab tig pobntseg mloog kuv tej lus uas kuv niaj hnub niaj hmo thov koj pab cov tubtxib uas yog haivneeg Yixalayees. Kuv thov lees tej kev txhaum uas peb cov neeg Yixalayees tau ua rau koj lawm. Kuv cov yawgkoob thiab kuv los tau ua txhaum rau koj lawm thiab. Peb tau ua txhaum rau koj loj kawg nkaus thiab tsis tau ua raws li koj tej lus samhwm ib nyuag qhov li. Peb tsis coj raws li koj tej kevcai uas koj muab cob rau peb los ntawm koj tus tubtxib Mauxes hlo li. Nimno thov koj nco ntsoov tej lus uas koj tau cog tseg rau Mauxes hais tias, ‘Yog nej cov neeg ua tsis ncaj tsis ncees rau kuv, kuv yuav muab nej ntiab mus nyob xyaw luag lwm haivneeg. Tiamsis yog hais tias nej tig rov los cuag kuv thiab ua raws li tej lus uas kuv samhwm rau nej lawm, ces txawm yog nej mus nyob rau qab ntuj kawg lawm los kuv yuav coj nej rov los nyob qhov chaw uas kuv twb xaiv tseg cia rau nej tau pehawm kuv lawm.’ Tus TSWV, lawv yog koj cov tubtxib thiab yog koj haivneeg ntag. Koj twb tau cawm lawv dim los ntawm koj lub hwjchim thiab koj lub zog uas loj kawg nkaus. Nimno thov koj mloog kuv tej lus thov thiab lwm tus uas yog koj cov tubtxib uas hwm koj tej lus thov. Hnub no thov koj pub kom kuv tau txais kev vammeej, thiab thov koj tshoov huabtais siab kom nws muaj lub siab hlub tshua kuv.” Lub sijhawm ntawd kuv yog tus ce cawv txiv hmab rau huabtais haus. Tau plaub lub hlis tom qab no muaj ib hnub thaum Huabtais Ataxawxes tseem tabtom noj mov, kuv ce cawv txiv hmab mus rua nws haus. Yav tas los nws tsis tau pom dua kuv ua ntsejmuag mluas mlob li no, huabtais thiaj li nug kuv hais tias, “Vim li cas koj yuav mluas ua luaj? Koj twb tsis mob qhov twg ne, ua li cas zoo li koj yuav nyuaj siab ua luaj?” Kuv poob siab nthav, kuv thiaj teb nws hais tias, “Thov kom Huabtais muaj txojsia nyob mus ibtxhis! Kuv yuav ua li cas zais tau kuv lub ntsejmuag uas muaj kev nyuaj siab rau lub tsamthawj uas lub nroog uas yog thaj chaw thaum ub muab kuv cov yawgkoob faus rau, raug puastsuaj tas thiab tej roojvag nroog los raug luag muab hlawv kub hnyiab tas huv tibsi lawm?” Huabtais thiaj li nug kuv hais tias, “Yog li ntawd koj xav tau dabtsi?” Kuv thov Vajtswv tus uas nyob saum Ntuj, thiab kuv hais rau huabtais tias, “Yog koj txaus siab rau kuv thiab yuav pub raws li kuv tej lus thov, thov koj tso kuv rov mus rau tim tebchaws Yudas, mus rau hauv lub nroog uas yog thaj chaw faus kuv cov yawgkoob, kuv yuav mus txhim kho lub nroog ntawd dua tshiab.” Huabtais pom zoo li uas kuv tau thov (niam huabtais zaum ntawm huabtais ib sab). Huabtais thiaj nug kuv hais tias, “Koj yuav mus ntev li cas, koj mam li rov qab los?” Kuv thiaj qhia lub sijhawm rau nws paub. Ces kuv thiaj thov huabtais sau ib tsab ntawv rau kuv nqa mus rau tus tswvxeev uas kav lub xeev ntawm tus Dej Efalates sab Hnubpoob, kom kuv thiaj mus tau rau nram tebchaws Yudas. Thiab kuv tseem thov huabtais sau ib tsab ntawv rau Axas, tus uas zov huabtais tej havzoov, kom txiav ntoo pub rau kuv coj mus ua cov roojvag ntawm cov chaw fajxwm rau cov neeg uas nyob zov lub Tuamtsev, ua tej ntsa yeej thaiv lub nroog thiab ua ib lub tsev rau kuv nyob. Huabtais ua txhua yam rau kuv raws li kuv tau thov, rau qhov Vajtswv nrog nraim kuv nyob. Huabtais tau tso ib co tubrog mus taw thiab ib co tubrog caij nees nrog kuv mus, ces kuv thiaj li sawv kev mus rau ntawm tus dej Efalates sab Hnubpoob. Thaum kuv mus txog lawm, kuv thiaj li muab huabtais cov ntawv rau tus tswvxeev. Tiamsis Xanpalas uas yog neeg nyob hauv lub nroog Npethes Hauloos thiab Taunpias uas yog ib tug nom nyob hauv lub xeev Amoos hnov hais tias muaj ib cov neeg tau los pab ua haujlwm kom cov Yixalayees tau zoo, mas nkawd chim kawg li. Kuv thiaj li mus kiag rau hauv lub nroog Yeluxalees tau peb hnub nkaus, kuv yeej tsis qhia rau leejtwg paub txog qhov uas Vajtswv tshoov kuv siab kom kuv los kho lub nroog Yeluxalees li. Ces thaum ib tag hmo kuv thiaj li sawv thiab coj kuv cov phoojywg qee leej nrog kuv tawm mus, tiamsis tsis tau nees txhua rau peb caij, tsuas tau ib tug neesluav rau kuv caij xwb. Thaum tsaus ntuj kuv thiaj tawm hauv lub nroog mus rau ntawm lub Roojvag Hav uas nyob rau sab hnubpoob thiab kuv ncig mus rau sab qabteb mus hla lub Qhovdej Zaj thiab mus rau ntawm lub Roojvag Quavhlawv. Kuv mus tshuaj xyuas lub nroog Yeluxalees tus ntsa yeej uas pob tas thiab tej roojvag uas kub hnyiab tas lawm. Ces kuv thiaj mus ntawm lub nroog sab hnubtuaj nce mus rau sab qaumteb, mus txog ntawm lub Roojvag Qhovdej thiab ntawm Vajntxwv lub Pasdej; tiamsis tus neesluav uas kuv caij nrhiav tsis tau kev mus li lawm. Yog li ntawd, kuv thiaj caij tus neesluav nqis mus rau hauv lub Hav Kiloos thiab mus saib tus ntsa yeej. Ces kuv thiaj taug kuv txoj qub kev rov qab chaws lub Roojvag Hav los rau hauv lub nroog lawm. Cov nomtswv uas nyob hauv lub nroog yeej tsis paub hais tias kuv mus qhov twg rau qhov twg lossis tsis paub txog tej uas kuv ua tas ntawd li. Kuv yeej tsis tau qhia ib yam dabtsi rau kuv cov phoojywg Yudas, cov povthawj, cov thawjcoj, cov nomtswv lossis lwm tus uas muaj feem yuav tau los nrog koom tuav lub luag haujlwm no hlo li thiab. Tiamsis nimno kuv hais rau lawv tias, “Nej twb pom tej teebmeem kev ntxhov siab uas muaj nyob hauv peb no lawm, vim hais tias lub nroog Yeluxalees puastsuaj tas nphob xuav cia thiab tej roojvag los twb puas tas lawm! Peb cia li pib txhim kho tus ntsa yeej uas thaiv lub nroog no dua tshiab, peb thiaj tsis txajmuag rau luag ntiajtog qaumpes.” Kuv qhia tej uas Vajtswv nrog nraim kuv, pab kuv thiab tej lus uas huabtais hais rau kuv ntawd rau lawv mloog. Lawv thiaj li lees hais tias, “Cia li pib kho tamsim no ntag!” Ces lawv txawm nqis tes pib ua haujlwm. Thaum Xanpalas, Tunpias thiab ib tug neeg Alav uas hu ua Nkesees hnov hais tias peb npaj ua haujlwm lawm, lawv txawm luag peb thiab hais tias, “Nej xav li cas nej thiaj yuav ua? Nej tawmtsam huabtais los?” Kuv teb lawv hais tias, “Vajtswv tus uas nyob saum Ntuj ceebtsheej yuav pab peb ua kom tiav. Peb yog nws cov tubtxib thiab peb tabtom pib txhim kho lawm ntag. Nej tsis muaj feem nyob hauv lub nroog Yeluxalees no, thiab nej tsis muaj feem koom ib yam dabtsi uas nyob hauv lub nroog no hlo li.” Ntawm no yog kev rov txhim kho tus ntsa yeej uas thaiv lub nroog. Tus Povthawj Hlob Eli-asis thiab nws tsoom kwvtij uas yog cov povthawj kho lub Roojvag Yaj fij rau Vajtswv thiab coj lub roojvag mus dhos rau. Lawv tseem muab tus ntsa yeej txij ntua ntawm lub chaw Tsomfaj Ib Puas mus txog ntawm lub chaw Tsomfaj Hananees fij rau Vajtswv huv tibsi. Ntu uas txuas nkaus ntawm cov povthawj ntu, mas yog cov neeg Yelikaus ua cov txhim kho. Thiab ntu uas txuas nkaus ntawd mus yog Imelis tus tub Xakules ua tus txhim kho. Haxena-as cuab kwvtij, ua cov txhim kho lub Roojvag Ntses. Lawv muab ob tug ncej roojvag thiab ob daim txiag roojvag coj mus dhos rau, muab cov ntsia mus ntsia, thiab muab ob tug nqaj mus liaj lub roojvag. Ntu uas txuas nkaus lawv pab ntawd yog Uliyas tus tub Melemaus uas yog Hakauxes tus xeebntxwv ua tus txhim kho. Ntu uas txuas nkaus ntawd mus yog Npelekhiyas tus tub Mesulas uas yog Mesexanpees tus xeebntxwv ua tus txhim kho. Ntu uas txuas nkaus ntawd mus yog Npa-anas tus tub Xadaus ua tus txhim kho. Ntu uas txuas nkaus ntawd mus yog cov txivneej Tekau-as ua cov txhim kho. Tiamsis tus thawjcoj cov neeg uas nyob hauv lub nroog ntawd tsis kam ua raws li tus qauv uas cov thawj saib haujlwm ntawd muab cob rau lawv ua. Paxe-as tus tub Yauyadas thiab Npexaudeyas tus tub Mesulas ua ob tug txhim kho lub Roojvag Yesanas. Nkawd muab ob tug ncej mus txhos thiab muab ob daim txiag roojvag coj mus dhos rau, muab cov ntsia coj mus ntsia thiab muab ob tug nqaj coj mus liaj lub roojvag. Ntu uas txuas nkaus ntawd mus txog ntua rau tim tus tswvxeev uas kav lub xeev nyob ntawm tus dej Efalates sab Hnubpoob tej vajtse yog Melatas uas yog neeg nyob hauv Nkinpe-oos, Yadoos uas yog neeg nyob hauv Melunaus, thiab cov neeg uas nyob hauv Nkinpe-oos ua cov txhim kho. Ntu uas txuas nkaus ntawd mus yog Halehayas tus tub Uxiyees uas yog ib tug txawj nchuav kub ua tus txhim kho. Ntu uas txuas nkaus ntawd mus yog Hananiyas uas yog ib tug ua tej tshuaj tsw qab uas tus txhim kho mus txog ntua ntawm tus Ntsa yeej Dav. Ntu uas txuas nkaus ntawd mus yog Hules tus tub Lefayas uas kav ib nrab Cheebtsam hauv lub nroog Yeluxalees ua tus txhim kho. Ntu uas txuas ntawd mus yog Halumas tus tub Yedayas ua tus txhim kho, thiab ntu ntawd nyob ze rau ntawm nws lub tsev ntag. Ntu uas txuas nkaus ntawd mus yog Hasaneyas tus tub Hatus ua tus txhim kho. Ob ntus uas txuas nkaus ntawd mus thiab lub chaw Tsomfaj Qhovtxos yog Halees tus tub Makhiyas thiab Pahas Mau-am tus tub Hasus ua ob tug txhim kho. Ntu uas txuas nkaus ntawd mus yog Haluhes tus tub Salumes uas kav ib nrab Cheebtsam lub nroog Yeluxalees ua tus txhim kho. (Thiab nws cov ntxhais pab nws ua.) Hanoos thiab cov neeg uas nyob hauv lub nroog Xanau-as txhim kho lub Roojvag Hav. Lawv muab ob tug ncej roojvag mus txhos, muab ob daim txiag mus dhos rau, muab cov ntsia mus ntsia thiab muab ob tug nqaj mus liaj lub roojvag. Thiab lawv kho tus ntsa yeej ntev ib txhiab tshim ntxiv mus txog ntua ntawm lub Roojvag Quavhlawv. Lekhas tus tub Makhiyas uas kav Cheebtsam Npethes Hakhelees ua tus txhim kho lub Roojvag Quavhlawv. Nws muab ob tug ncej roojvag mus txhos, muab ob daim txiag mus dhos rau, muab cov ntsia coj mus ntsia thiab muab ob tug nqaj mus liaj lub roojvag. Kauhauxes tus tub Salumes uas kav Cheebtsam Mixepas ua tus txhim kho lub Roojvag Qhovdej. Nws muab ob tug ncej roojvag mus txhos rau, muab ob daim txiag mus dhos, muab cov ntsia mus ntsia thiab muab ob tug nqaj coj mus liaj lub roojvag. Nyob ntawm lub Pasdej Xilau-as, nws kho tus ntsa yeej uas txuas nkaus rau ntawm Huabtais lub vaj mus txog ntua rau tom tus ntaiv uas nqis saum Daviv lub nroog los. Ntu uas txuas nkaus ntawd mus yog Anpukes tus tub Nehemis uas kav ib nrab Cheebtsam Npethexus ua tus txhim kho mus txog ntua ntawm Daviv lub ntxa, lub pasdej thiab lub tsev uas cov neeg siab tawv nyob. Ob peb ntus uas txuas ntu ntawd mus yog muab rau cov Levis txhim kho raws li nram no: Ntu uas txuas nkaus ntawd mus yog Lehumes tus tub Npanis ua tus txhim kho. Ntu uas txuas nkaus ntawd mus yog Hasanpiyas, tus uas kav ib nrab Cheebtsam Ke-ilas, ua tus txhim kho; nws kho cheebtsam uas nws kav ntawd ntag. Ntu uas txuas nkaus ntawd mus yog Npavais, tus uas kav dua ib nrab Cheebtsam Ke-ilas, ua tug txhim kho. Ntu uas txuas nkaus ntawd mus uas yog ntu nyob ntawm hauv ntej lub txhab rau tej cuabyeej ua rog, yog Yesuas tus tub Exeles, tus uas kav lub nroog Mixepas, ua tus txhim kho mus txog ntua rau ntawm lub kaum ntsa yeej uas nkhaus hlo. Ntu uas txuas nkaus ntawd mus txog ntua rau tom txojkev uas mus rau ntawm tus Povthawj Hlob Eli-asis lub tsev yog Xanpais tus tub Npalus ua tus txhim kho. Ntu uas txuas nkaus ntawd mus yog Uliyas tus tub Melemaus uas yog Hakus tus xeebntxwv ua tus txhim kho mus txuas nkaus rau ntawm Eli-asis lub tsev. Ob peb ntus uas txuas nkaus ntawd mus yog muab tu rau cov povthawj ua cov txhim kho raws li nram no: Ntu uas txuas nkaus ntawd mus yog cov povthawj uas nyob ibncig lub nroog Yeluxalees ua cov txhim kho. Ntu uas txuas nkaus ntawd mus yog Npeenyamees thiab Hasus, ua ob tug txhim kho. Nkawd kho ntu uas nyob ncaj ntawm nkawd tsev ntag. Ntu uas txuas nkaus ntawd mus yog Ma-axeyas tus tub Axaliyas uas yog Ananiyas tus xeebntxwv ua tus txhim kho. Nws kho ntu uas nyob ncaj ntawm nws lub tsev. Ntu uas txuas nkaus ntawm Axaliyas lub tsev mus cob nkaus rau ntawm tus ntsa yeej nkhaus yog Hanadas tus tub Npeenu-is ua tus txhim kho. Ntu uas txuas nkaus ntawd mus yog ntu ob uas cov neeg Tekau-as ua cov txhim kho; lawv pib kiag ntawm ntu uas nyob ncaj lub chaw tsomfaj loj uas zov lub Tuamtsev mus ti nkaus rau ntawm sab ntsa yeej Aufees. Ntu uas txuas nkaus ntawd mus yog cov povthawj ua cov txhim kho; lawv pib kho ntawm lub Roojvag Nees nce toj mus, thiab lawv nyias kho ntu uas nyob ncaj ntawm nyias lub tsev. Ntu uas txuas nkaus ntawd mus yog Imeles tus tub Xadaus ua tus txhim kho; nws kho ntu uas nyob ncaj ntawm nws lub tsev. Ntu uas txuas nkaus ntawd mus yog Sekaniyas tus tub Semayas uas zov lub Roojvag Hnubtuaj ua tus txhim kho. Ntu uas txuas nkaus ntawd mus yog ntu ob uas Selemiyas tus tub Hananiyas thiab Xalas tus tub Hanus uas yog tus rau ua ob tug txhim kho. Ntu uas txuas nkaus ntawd mus uas ncaj Npelekhiyas tus tub Mesulas, yog Mesulas ua tus txhim kho. Ntu uas txuas nkaus ntawd mus yog Makhiyas uas yog tus nchuav kub ua tus txhim kho; nws kho mus txog ntua rau tom cov neeg uas tu lub Tuamtsev thiab cov neeg uas ua lag ua luam nyob uas yog ncaj rau ntawm lub Roojvag Mifekas, uas yog kev mus rau hauv lub Tuamtsev, ze rau chav uas nyob ntawm ces kaum ntsa yeej sab hnubtuaj qaumteb. Ntu uas txuas nkaus ntawd mus yog ntu kawg uas nyob nruab nrab ntawm chav ces kaum ntsa yeej thiab lub Roojvag Yaj; ntu no yog cov neeg nchuav kub thiab cov neeg ua lag ua luam ua cov txhim kho. Thaum Xanpalas hnov hais tias peb cov neeg Yudas tabtom pib txhim kho tej ntsa yeej dua tshiab, nws chim heev thiab txob thuam peb kawg li. Nws tabmeeg hais rau nws cov neeg thiab cov tubrog Xamalis hais tias, “Cov neeg Yudas uas txomnyem ntsuav ntawd lawv xav li cas lawv thiaj ua li ntawd? Lawv xav hais tias, lawv yuav txhim kho lub nroog no dua tshiab no los? Lawv xav hais tias qhov uas lawv muab khoom fij yuav pab lawv ua tej haujlwm ntawd tiav kiag rau ib hnub no los? Lawv puas yuav muab tau tej tog ntoo thiab tej txhais zeb uas kub hnyiab tas lawm coj los ua thwvcib kho tus ntsa yeej no?” Taunpias uas yog neeg Amoos sawv ntawm nws ib sab, thiab nws hais ntxiv tias, “Tus ntsa yeej uas lawv tabtom kho ntawd yuav khov npaum twg? Twb tsis txaus ib nyuag hma nce rau saud ntshai twb pob lawm!” Kuv thov Vajtswv hais tias, “Vajtswv thov koj nrog hnov tej lus uas lawv thuam peb ntawd lauj! Thov kom lawv tej lus uas thuam peb ntawd poob rov los raug lawv. Thov cia tubsab tuaj nyiag txhua yam uas lawv muaj, thiab thov cia cov neeg txawv tebchaws tuaj ntes lawv coj mus rau txim rau hauv luag lub tebchaws. Thov tsis txhob zam tej kev phem kev qias uas lawv ua ntawd thiab tsis txhob zam lawv tej kev txhaum uas lawv thuam thiab saib tsis taus peb cov uas tabtom txhim kho tus ntsa yeej no.” Yog li ntawd, peb thiaj li koom tes txhim kho tus ntsa yeej tuaj sib cob, thiab qhov siab twb ua txog nrab lawm, rau qhov cov neeg sawvdaws rau siab ua haujlwm kawg li. Thaum Xanpalas, Taunpias, cov Alav, cov Amoos thiab cov Asedaus hnov hais tias peb tabtom puab tus ntsa yeej uas thaiv lub nroog Yeluxalees tiav zuj zus, thiab tej qhov tawg pleb ntawm tus ntsa yeej los peb twb muab txhaws yuav tas, mas ua rau lawv chim kawg nkaus rau peb. Yog li ntawd, lawv thiaj tuavhauv sib sau tuaj ntaus lub nroog Yeluxalees thiab ua kom muaj kev kub ntxhov, tiamsis peb thov peb tus Vajtswv thiab tso neeg zov nruab hnub hmo ntuj, tawmtsam lawv tsis pub kom tuaj tau ti peb hlo li. Cov neeg Yudas muaj ib zaj nkauj uas lawv hu hais tias: Peb qaug zog heev thiab peb ris nra hnyav kawg; thiab muaj tej txhais zeb ntau ua luaj rau peb khaws mus povtseg. Hnub no peb yuav ua li cas ua tau tug ntsa yeej? Peb cov yeebncuab xav hais tias peb yuav tsis pom lawv lossis tsis paub lawv tej kev tuavhauv ua tsis zoo rau peb mus txog thaum lawv tuaj txov peb, tua peb thiab rhuav peb tej haujlwm kom ua tsis tiav. Tiamsis cov Yudas uas nrog peb cov yeebncuab nyob sib xyaw ua ke ntawd pheej tuaj qhia rau peb tsis tseg txog tej uas peb cov yeebncuab tuavhauv yuav tuaj tawmtsam peb ntawd. Yog li ntawd, kuv thiaj li muab tej cuabyeej ua rog uas yog ntaj, hmuv thiab hneevnti cob rau cov pejxeem, thiab muab lawv faib raws li tej xeem mus zov ntawm tus ntsa yeej tej ntu uas tseem kho tsis tau tiav. Kuv pom hais tias cov pejxeem sawvdaws txhawj kawg. Yog li ntawd, kuv thiaj hais rau lawv thiab lawv cov thawjcoj thiab cov nomtswv tias, “Nej tsis txhob ntshai peb cov yeebncuab. Nej yuav tsum nco ntsoov hais tias tus TSWV uas yog tus muaj hwjchim loj thiab txaus ntshai yuav ua tus tawmtsam nej cov yeebncuab, pab nej cov kwvtij neejtsa, nej cov pojniam menyuam thiab nej tej vajtse.” Peb cov yeebncuab hnov hais tias peb twb paub tej uas lawv tuav tswvyim ua phem ntawd, thiab lawv paub hais tias Vajtswv twb kovyeej lawv lub tswvyim ua phem ntawd lawm. Ces peb sawvdaws txawm rov mus koom tes txhim kho tus ntsa yeej dua. Txij thaum ntawd los kuv thiaj muab kuv cov neeg faib ib nrab mus ua haujlwm thiab ib nrab mus ua tubrog zov; kuv muab tej ris tsho hlau rau lawv hnav, muab hmuv, muab daim thaiv hniav ntaj thiab hneevnti cob rau lawv. Peb cov thawjcoj puavleej tuaj tom qab txhawb cov Yudas uas tabtom txhim kho tus ntsa yeej ntawd lub zog. Lawv ua haujlwm hnyav kawg li; ib sab tes nqa pobzeb mus puab tus ntsa yeej thiab ib sab tes nqa rawv tej cuabyeej ua rog, thiab txhua tus uas txhim kho tus ntsa yeej lawv puavleej ris ntaj rawv rau ntawm duav. Tus txivneej uas tshuab xyu ceebtoom rau sawvdaws yeej nrog nraim kuv nyob ua ke. Kuv hais rau cov pejxeem, cov nomtswv thiab cov thawjcoj hais tias, “Peb lub luag haujlwm no nthuav mus deb thiab ua rau peb cov neeg uas nyob saum tus ntsa yeej ib leeg nyob nrug deb ib leeg heev lawm. Yog thaum twg nej hnov tshuab xyu, nej cia li sau zog los nyob ua ib pawg ibncig kuv. Peb tus Vajtswv yuav pab peb tua peb cov yeebncuab.” Txhua hnub thaum kaj ntug txoog mus txog thaum tsaus ntuj uas hnubqub tawm dawb vog, peb cov neeg muaj ib nrab ua haujlwm nyob rawv saum tus ntsa yeej thiab muaj ib nrab tuav rawv hmuv sawv nres nroos fajxwm. Lub sijhawm ntawd, kuv hais rau cov neeg hais tias, “Kom txhua tus neeg thiab nws tus tubtxib cia li pw hauv lub nroog Yeluxalees; hmo ntuj lawv pab peb zov lub nroog thiab nruab hnub pab ua haujlwm.” Txawm yog hmo ntuj los kuv thiab kuv cov phoojywg, kuv cov tubtxib thiab cov tub fajxwm peb yeej tsis hle peb tej ris tsho li. Peb tuav rawv peb tej cuabyeej ua rog ntawm tes tsis tso tseg li. Tau ib ntus los tom qab no cov pejxeem coob leej ntau tus, tsis hais pojniam lossis txivneej txawm pib yws lawv cov kwvtij Yudas. Muaj qee leej yws hais tias, “Peb cov uas tsevneeg coob, peb xav tau qoobloo kom ntau txaus noj.” Muaj dua ib pab yws hais tias, “Peb yuav tsum tau muag peb tej teb, tej vaj txiv hmab thiab tej tsev nyob, mas peb thiaj li yuav muaj nyiaj los yuav zaub mov noj peb thiaj tsis tuag tshaib.” Tseem muaj dua ib pab yws hais tias, “Peb tau mus txais nyiaj los them peb tej se teb thiab se vaj txiv hmab rau huabtais. Peb yog neeg ib yam li cov Yudas, thiab peb tej menyuam twb zoo ib yam li lawv tej thiab; tiamsis peb ho tau muab peb tej menyuam muag mus ua luag qhev. Peb cov ntxhais qee leej raug muag mus ua luag qhev lawm.” Thaum kuv hnov lawv tej lus yws ntawd ua rau kuv chim heev, kuv thiaj li cem cov thawjcoj thiab cov nomtswv uas saib cov pejxeem thiab hais rau lawv tias, “Nej tsimtxom nej cov kwvtij heev dhau lawm!” Kuv thiaj hu kom sawvdaws tuaj sib txoos ua ke thiab hais rau lawv hais tias, “Peb tseem yuav mus txhiv kom tau peb tej kwvtij Yudas uas raug muab muag rau cov neeg txawv tebchaws coj mus ua qhev lawm rov los. Nimno nej tseem kom nej cov kwvtij muab lawv tej neeg muag rau nej thiab los? Lawv twb yog nej cov kwvtij Yudas ntag los sav!” Cov thawjcoj ntawd yoob tas thiab tsis muaj lus teb li. Ces kuv thiaj hais tias, “Yog vim li cas nej ua tej yam tsis zoo li no? Tsimnyog nej yuav tsum hwm Vajtswv thiab ua nej lub neej kom ncaj ncees. Nej tsis txhob ua kom peb cov yeebncuab uas yog lwm haivneeg tau chaw txob thuam peb ib qho li. Kuv thiaj cia sawvdaws tuaj txais nyiaj thiab mov noj ntawm kuv, kuv cov kwvtij thiab cov neeg uas ua haujlwm rau kuv. Txij no mus peb cia li tseg kiag qhov uas pheej kom luag them nujnqis rov rau peb ntawd. Tso plhuav tseg qhov uas suav nujnqis rau luag them ntawd, tsis hais nyiaj, qoobloo, cawv txiv hmab lossis roj txiv ntoo. Thiab cia li thim lawv tej liaj tej teb, tej vaj txiv hmab, tej txiv ntoo roj thiab lawv tej vajtse rov qab rau lawv tamsim no!” Cov thawjcoj teb hais tias, “Peb yuav ua raws li koj hais. Peb yuav thim lawv tej teb, tej vajtse rov rau lawv thiab tsis pub kom lawv tshuav peb nqi dabtsi hlo li.” Kuv thiaj li hu cov povthawj tuaj thiab kom cov thawjcoj los coglus tabmeeg lawv, thiab cov thawjcoj yuav tsum ua raws li tej lus uas lawv tau cog tseg ntawd. Ces kuv thiaj hle hlo kuv txoj hlab tshos thiab muab kuv lub tsho loj nchos. Thiab kuv hais tias, “Vajtswv yuav muab txhua tus uas tsis ua raws li nws tej lus cog tseg nchos li no ntag. Vajtswv yuav muab nej tej tsev thiab txhua yam uas yog nej tug rho tawm ntawm nej mus povtseg thiab tsis tseg ib yam dabtsi rau nej hlo li.” Ces txhua tus neeg uas tuaj nyob ntawd puavleej hais tias, “Amees!” thiab ua tus TSWV tsaug. Thiab cov thawjcoj tau ua raws li lawv tej lus cog tseg lawm. Kuv ua tus tswvxeev kav cov Yudas yog xyoo nees nkaum los txog rau xyoo peb caug ob uas Ataxawxes ua huabtais; kaum ob xyoos uas kuv tau ua tswvxeev ntawd los txog tamsim no, tsis hais kuv cov kwvtij lossis kuv, yeej tsis tau noj tej zaub mov uas cov pejxeem coj tuaj rau tus tswvxeev hlo li. Cov tswvxeev qub uas xub kav ua ntej kuv lawm tau quab yuam cov pejxeem ua haujlwm hnyav kawg li thiab kom lawv muab ib hnub twg plaub caug npib nyiaj rau cov tswvxeev coj mus yuav zaub mov thiab cawv txiv hmab. Txawm yog lawv cov tubtxib los yeej tsimtxom cov pejxeem kawg li thiab, tiamsis kuv tsis ua li lawv cov ntawd, rau qhov kuv hwm Vajtswv. Kuv siv tagnrho kuv lub zog los txhim kho tus ntsa yeej, kuv yeej tsis tau ib yam dabtsi hlo li. Txhua tus neeg uas ua haujlwm rau kuv puavleej koom tes nrog kuv txhim kho tus ntsa yeej no. Cov Yudas thiab lawv cov thawjcoj ib puas tsib caug leej tau nrog kuv koom tsum noj mov txhua pluag, dua li ntawd tseem muaj cov neeg txawv tebchaws uas nyob ibncig peb lub tebchaws uas pheej tuaj xyuas kuv kuj tau koom nrog kuv noj mov thiab. Ib hnub twg kuv tua ib tug nyuj, rau tus yaj uas zoo nkauj heev, thiab ntau tus qaib los ua zaub noj. Thiab kaum hnub twg kuv muab cawv txiv hmab rau sawvdaws haus ib zaug. Kuv yeej paub hais tias yog lub nra hnyav rau cov pejxeem sawvdaws lawm. Yog li ntawd, kuv thiaj tsis hais kom lawv muab zaub mov tuaj rau kuv. Kuv thov Vajtswv hais tias, “Vajtswv, kuv thov koj nco ntsoov txhua yam haujlwm uas kuv tau ua rau cov neeg no lawm.” Xanpalas, Taunpias, Nkesees thiab lwm pab uas yog peb cov yeebncuab hnov hais tias peb kho tau tus ntsa yeej tiav ntom nti tsis muaj ib qhov twg khoob li lawm, tsuas yog peb tseem tsis tau coj cov txiag roojvag mus dhos rau ntawm cov roojvag xwb. Vim li ntawd, Xanpalas thiab Nkesees thiaj tso neeg tuaj hais rau kuv kom kuv mus ntsib nkawd rau hauv ib lub zos ntawm cov zos uas nyob hauv lub tiaj nrag Aunaus. Qhov no twb yog nkawd tuavhauv xav ua phem rau kuv nkaus xwb. Kuv thiaj tso neeg mus hais rau nkawd tias, “Kuv tseem muaj haujlwm tseemceeb heev, kuv tuaj ntsib tsis tau neb. Kuv yuav tsis tso kuv tej haujlwm tseg, thiab cia li tuaj ntsib neb nkaus xwb.” Nkawd tso neeg tuaj hais rau kuv txog plaub zaug puavleej hais ib yam nkaus li ntawd, thiab txhua zaus uas kuv teb rau nkawd los teb ib yam nkaus li ntawd thiab. Ces zaum tsib Xanpalas txawm tso kiag nws tus tubtxib tuaj hais rau kuv; zaum no nws nqa ib tsab ntawv tsis nias homthawj rau li. Tsab ntawv ntawd hais li no: “Nkesees hais rau kuv tias, muaj ib cov nyuag lus xaiv tsis zoo uas pheej hais nyob rau hauv cov pejxeem, thiab Nkesees hais tias cov lus ntawd yeej muaj tseeb tiag, koj thiab cov Yudas xav ntxeev siab. Yog li ntawd, nej thiaj li txhim kho tus ntsa yeej. Thiab Nkesees tseem hais ntxiv tias yog koj npaj siab xav kom tsa koj ua huabtais. Thiab koj tseem tau hais kom cov cev Vajtswv lus qee leej tshaj tawm rau hauv lub nroog Yeluxalees tias koj yog cov Yudas tus vajntxwv; zaj no twb nrov mus txog huabtais lawm. Yog li ntawd, kuv hais rau koj paub tias koj thiab kuv yuav tsum tau tuaj sib ntsib thiab tham txog zaj no.” Kuv thiaj txib neeg mus hais rau Nkesees li no: “Tej lus uas koj hais tas los ntawd yeej tsis muaj ib los tseeb li, koj lam ntxeev lus xwb.” Lawv nrhiav kev ua kom peb ntshai thiab tso tes haujlwm no tseg. Kuv thiaj thov Vajtswv hais tias, “Vajtswv, tamsim no thov koj txhawb kuv lub zog lauj!” Thaum ntawd kuv thiaj mus xyuas Delayas tus tub Semayas uas yog Mehetanpees tus xeebntxwv uas nws yeej tsis muaj cuabkav yuav tawm tau hauv nws lub tsev hlo li. Nws hais rau kuv tias, “Koj thiab kuv yuav tsum tau khiav mus nkaum rau hauv chav dawbhuv hauv lub Tuamtsev thiab muab tej qhovrooj liaj huv tibsi, rau qhov lawv npaj siab yuav tuaj muab koj tua. Txij no mus txhua hmo lawv yuav tuaj nyas nrhiav koj tua povtseg.” Kuv teb nws hais tias, “Kuv tsis yog hom neeg uas yuav nrhiav kev khiav mus nkaum. Koj xav hais tias kuv yuav mus nrhiav chaw nkaum hauv lub Tuamtsev kom cawm tau kuv txojsia no los? Kuv tsis ua li ntawd ib zaug li.” Thaum kuv muab zaj no ua tib zoo xav lawm, kuv paub hais tias Vajtswv tsis tau los hais rau Semayas, tiamsis yog Xanpalas thiab Taunpias nkawd ntiav kom Semayas tuaj ceebtoom li ntawd rau kuv xwb. Nkawd ntiav nws tuaj tso hemthawj rau kuv kom kuv mus ua txhaum, nkawd thiaj li yuav ua tau rau kom kuv lub koob lub npe puas thiab muab kuv txo kom poob ntsejmuag. Kuv thov Vajtswv hais tias, “Vajtswv, thov koj nco ntsoov tej uas Taunpias thiab Xanpalas nkawd ua thiab rau txim rau nkawd. Thiab thov nco ntsoov tus pojniam Naudiyas uas yog tus cevlus thiab lwm tus cevlus uas pheej nrhiav kev ua kom kuv ntshai ntawd.” Tau tsib caug ob hnub tom qab, tes haujlwm uas ua tus ntsa yeej mam li tiav rau hnub nees nkaum ntsib lub hli Elus. Thaum peb cov yeebncuab uas yog cov tebchaws nyob ibncig peb hnov hais txog tej ntawd, lawv poob ntsejmuag kawg li. Rau qhov txhua tus puavleej paub hais tias tej haujlwm ntawd tiav tas vim yog muaj Vajtswv ua tus pab. Lub sijhawm ntawd, cov Yudas tej thawjcoj puavleej tau koom tes nrog Taunpias. Muaj cov Yudas coob leej tuaj Taunpias tog, rau qhov nws yawmtxiv yog Alas tus tub Sekaniyas uas yog neeg Yudas. Dua li ntawd, nws tus tub Yehauhanas tseem yuav Npelekhiyas tus tub Mesulas tus ntxhais ua pojniam thiab. Cov neeg pheej hais zom zaws tabmeeg rau ntawm kuv xubntiag txog Taunpias tej haujlwm zoo thiab pheej coj txhua yam uas kuv tau hais mus piav qhia huv tibsi rau Taunpias mloog. Thiab nws tseem pheej xa ntawv tuaj hem kom kuv ntshai. Nimno tus ntsa yeej twb ua tiav tas lawm, tej roojvag los kuj dhos tas txhua lub, thiab yeej cob haujlwm tas rau cov neeg uas zov Tuamtsev, cov hu nkauj thiab cov Levis huv tibsi lawm. Kuv tsa kuv tus tijlaug Hananis thiab Hananiyas uas yog tus thawj tubrog loj uas saib tej chaw fajxwm, ua ob tug uas saib lub nroog Yeluxalees. Hananiyas yog ib tug uas ncaj ncees thiab hwm Vajtswv dua lwm tus huv tibsi. Kuv hais kom nkawd tsis txhob qhib tej roojvag nroog Yeluxalees mus txog thaum hnub tuaj, thiab kaw rau thaum uas tseem muaj neeg zov thiab ua ntej lub hnub tsis tau poob, thiab muab tej ntsia liaj roojvag los liaj rau. Thiab kuv hais rau lawv kom tsa cov neeg uas nyob hauv lub nroog Yeluxalees los ua cov zov roojvag thiab faib haujlwm rau lawv cov ntawd qee leej ua cov tshuajxwm ncig mus los saib lawv tej vajtse. Yeluxalees yog ib lub nroog uas loj heev, tiamsis tsis muaj neeg nyob coob thiab tsis muaj neeg ua tsev ntau rau hauv. Vajtswv thiaj tshoov kuv siab kom kuv hu tagnrho cov pejxeem thiab lawv cov thawjcoj thiab cov nomtswv tuaj txoos ua ke thiab tshawb nrhiav lawv txhua yim neeg tej ntaub ntawv. Kuv thiaj nrhiav tau phau ntawv uas teev cov neeg uas xub raug tso rov los tej npe thiab muaj raws li nram no: Coob leej uas raug luag ntes mus thiaj tau rov hauv lub xeev Npanpiloos los rau hauv lub nroog Yeluxalees thiab lub xeev Yudas, nyias thiaj rov mus rau hauv nyias tej qub zej qub zos. Lawv tej tsevneeg tau mus nyob hauv lub xeev Npanpiloos txij thaum uas Vajntxwv Nenpukajnexales tau ntes lawv coj mus lawm. Lawv cov thawjcoj yog Xelunpanpees, Yesuas, Nehemis, Axaliyas, La-amiyas, Nahamanis, Maudekhais, Npilesas, Mipeles, Npivais, Nehoos thiab Npa-anas. Tagnrho cov neeg uas ua haujlwm hauv lub Tuamtsev thiab Xalumoos cov tubtxib cov xeebntxwv uas tau rov los muaj peb puas cuaj caum ob leeg. Cov Yudas tus tswvxeev hais rau lawv pab ntawd tias lawv yuav noj tsis tau tej zaub mov uas twb muab fij rau Vajtswv lawm, mus txog thaum uas lawv muaj ib tug los ua povthawj uas siv tau lub Ulees thiab lub Thumees tso. Muaj qee leej thawjcoj ntawm tej cuab kwvtij tau muab khoom tuaj pab txhim kho lub Tuamtsev. Tus tswvxeev muab tau ib txhiab choj kub, tsib caug lub rhawv nyiaj, tsib puas peb caug lub tsho ntev rau cov povthawj coj tuaj tso rau hauv lub txhab nyiaj. Muaj qee leej thawjcoj ntawm tej cuab kwvtij tau muab nees nkaum txhiab choj kub thiab ob txhiab ob puas choj nyiaj coj tuaj tso rau hauv lub txhab nyiaj. Thiab cov pejxeem muab tau nees nkaum txhiab choj kub, ob txhiab choj nyiaj, thiab rau caum xya lub tsho ntev rau cov povthawj, coj tuaj tso rau hauv lub txhab nyiaj. Cov povthawj, cov Levis thiab cov uas zov lub Tuamtsev, cov hu nkauj, cov pejxeem, cov neeg ua haujlwm hauv lub Tuamtsev thiab tagnrho cov Yixalayees, lawv nyias mus nyob rau hauv nyias tej zos thiab tej nroog hauv xeev Yudas. Thaum lub xya hli ntuj, cov pejxeem Yixalayees txawm mus nyob tas rau hauv lawv tej nroog lawm. Lub hlis ntawd hnub xiab ib, tagnrho sawvdaws thiaj tuaj sib sau ua ke rau hauv lub nroog Yeluxalees, ntawm lub tshavpuam uas nyob ntawm lub Roojvag Dej sab hauv. Lawv thiaj thov kom tus povthawj Exalas uas yog tus kawm paub txoj Kevcai uas tus TSWV tau muab cob rau Mauxes, mus nqa phau Kevcai ntawd tuaj. Yog li ntawd, Exalas thiaj nqa phau kevcai tuaj rau ntawm qhov chaw uas cov pejxeem tuaj sib sau, tsis hais cov pojniam, cov txivneej thiab cov menyuam uas loj thiab paub qabhau uas tuaj ntawd. Exalas txawm nyeem Phau Kevcai rau lawv mloog, ntawm lub tshavpuam uas nyob ntawm lub roojvag sab hauv, thaum kaj ntug txoog mus txog thaum tavsu, thiab lawv puavleej ua tib zoo mloog. Exalas sawv saum lub samthiaj uas yeej ua los npaj rau tej lub sijhawm uas muaj li ntawd. Matithiyas, Semas, Anayas, Uliyas, Hilekiyas thiab Ma-axeyas yog cov txivneej uas sawv ntawm nws sab xis; thiab Pedayas, Misayees, Makhiyas, Hasoos, Hasenpadanas, Xakhaliyas thiab Mesulas yog cov txivneej uas sawv ntawm nws sab laug. Exalas sawv saum lub samthiaj uas siab tshaj cov neeg sawvdaws, thiab cov pejxeem puavleej tig mus saib nws. Thaum nws nthuav hlo phau ntawv, lawv sawvdaws puavleej sawv ntsug tagnrho. Exalas hais tias, “Ua tus TSWV uas yog Vajtswv tus muaj hwjchim loj kawg nkaus tsaug!” Tagnrho cov neeg sawvdaws puavleej tsa tes rau saum ntuj thiab teb hais tias, “Amees! Amees!” Thiab lawv txawm txhos caug ntua nyo hau ua ntsejmuag ti nkaus rau hauv av pehawm Vajtswv. Ces lawv rov sawv ntsug thiab nyias sawv ntawm nyias qhov chaw, thiab cov Levis uas muaj npe li nram no thiaj los piav txoj kevcai rau lawv mloog: Yesuas, Npanis, Selenpiyas, Yamees, Akus, Sanpethais, Haudiyas, Ma-axeyas, Kelitas, Axaliyas, Yauxanpas, Hanas thiab Pelayas. Lawv txhais Vajtswv txoj Kevcai thiab piav txoj Kevcai ntawd kom cov pejxeem paub tseeb. Thaum cov neeg hnov tej uas txoj Kevcai ntawd qhia kom sawvdaws ua, lawv tu siab thiab quaj kawg li. Nehemis uas yog tus tswvxeev, thiab Exalas uas yog tus povthawj thiab yog tus uas kawm paub txoj Kevcai no zoo, thiab cov Levis uas qhia Vajtswv txoj Kevcai thiaj hais rau cov pejxeem tias, “Hnub no yog ib hnub uas dawbhuv rau tus TSWV uas yog nej tus Vajtswv. Yog li ntawd, nej tsis txhob tu siab thiab tsis txhob quaj.” Ces nws txawm hais rau lawv tias, “Nej cia li rov mus tsev, noj tej nqaij rog thiab haus tej cawv qab zib thiab muab ibtxhia pub rau cov neeg uas tsis tau npaj dabtsi noj; rau qhov hnub no yog hnub uas dawbhuv rau peb tus TSWV; thiab tsis txhob nyuaj siab, vim txojkev zoo siab uas los ntawm tus TSWV twb txhawb tau nej lub zog lawm.” Cov Levis ncig mus thoob plaws cov neeg hais kom sawvdaws nyob twjywm thiab tsis txhob nyuaj siab rau hnub dawbhuv ntawd. Yog li ntawd, cov pejxeem thiaj li rov mus tsev thiab noj haus tsau npo muaj kev zoo siab thiab faib tej uas lawv muaj pub rau lwm tus, rau qhov lawv totaub zoo txog txoj Kevcai uas nyeem rau lawv mloog ntawd lawm. Hnub tom qab, txhua tus thawjcoj ntawm txhua cuab kwvtij, nrog cov povthawj thiab cov Levis, txawm sib sau ua ke tuaj kawm Vajtswv txoj Kevcai ntawm Exalas. Lawv pom hais tias txoj Kevcai uas tus TSWV muab cob rau Mauxes yeej qhia rau cov Yixalayees kom yuav tsum nyob hauv cov Tsev Pheebsuab mus txog hnub uas lawv ua kevcai tas lawm. Yog li ntawd, lawv thiaj li tshaj tawm tej lus uas hais li nram no, xa mus thoob plaws hauv lub nroog Yeluxalees, lwm lub nroog thiab lwm cov zos hais tias, “Sawvdaws cia li nce mus rau pem tej roob, mus lov tej ceg thuv, ceg txiv ntoo roj, ceg ntoo tsw qab, nplooj toovlaj thiab lwm yam ntoo los ua Tsev Pheebsuab raws li tej lus uas tau sau tseg rau hauv phau Kevcai lawm.” Yog li ntawd, cov neeg thiaj mus lov tej ceg ntoo coj los ua Tsev Pheebsuab rau saum lawv tej tsev txheej saud, rau ntawm lawv tej tog vaj tog tsev, rau ntawm lub tshavpuam ntawm lub Tuamtsev, thiab ua rau ntawm lub tshavpuam uas nyob ntawm lub Roojvag Dej thiab lub Roojvag Efalayees. Tagnrho cov neeg uas raug luag ntes mus thiab tau rov los puavleej ua Tsev Pheebsuab thiab mus nyob hauv tej tsev ntawd. Suav txij thaum Noos tus tub Yausuas tiam los txog rau lub sijhawm no, zaum no yog thawj zaug uas lawv ua, txhua tus txaus siab thiab zoo siab kawg nkaus li. Thawj hnub uas lawv pib ua kevcai los txog rau hnub uas ua kevcai xaus, Exalas muab Vajtswv phau kevcai nyeem rau cov pejxeem mloog txhua hnub. Lawv ua kevcai tau xya hnub, hnub yim yog hnub uas lawv xaus raws li txoj kevcai tau qhia tseg lawm. Muab tus TSWV uas yog lawv tus Vajtswv txoj Kevcai los nyeem rau lawv mloog tau peb txoos teev txwm nkaus, thiab peb txoos teev tom qab yog lawv lees lawv tej kev txhaum thiab pehawm tus TSWV uas yog lawv tus Vajtswv. Qhov ntawd muaj ib lub samthiaj rau cov Levis; cov uas mus sawv saud yog Yesuas, Npanis, Kamiyees, Senpaniyas, Npunis, Selenpiyas, Npanis, Hasaneyas, Selenpiyas, Haudiyas, Senpaniyas thiab Pethahiyas. Lawv tsa ncauj thov tus TSWV uas yog Vajtswv. Cov Levis nram qab no yog cov uas hu sawvdaws pehawm Vajtswv: Yesuas, Kamiyees, Npanis, Hasaneyas, Selenpiyas, Haudiyas, Senpaniyas thiab Pethahiyas. Lawv hais tias: “Cia li sawv thiab qhuas tus TSWV uas yog nej tus Vajtswv; qhuas nws mus ibtxhis li! Txawm yog tsis muaj ib tug twg pehawm nws mus rau qhov tsimnyog, los peb sawvdaws cia li qhuas nws lub npe uas zoo kawg nkaus.” Cov Yixalayees thov Vajtswv li nram no: “Tus TSWV, koj tib leeg xwb thiaj yog tus TSWV; koj yog tus uas tsim lub ntuj thiab tej hnubqub saum nruab ntug. Koj tsim dej, av thiab txhua tsav yam uas nyob hauv dej thiab saum daim av; Thiab koj rau siav rau pa rau txhua yam ntawd. Txhua yam uas muaj hwjchim saum nruab ntug qhau taubhau pehawm koj. Tus TSWV uas yog Vajtswv, koj tau xaiv Anplas cia thiab coj nws kev tawm hauv lub nroog Ules uas nyob hauv lub xeev Npanpiloos los; Koj thiaj muab nws tis dua npe tshiab hu ua Anplahas. Koj pom nws ua ncaj ncees rau koj, thiab koj tau coglus rau nws hais tias, koj yuav muab lub tebchaws Kana-as rau nws; yog cov Hitis thiab cov Amoos lub tebchaws, cov Pelixes, cov Yenpus thiab cov Nkinkasis lub tebchaws, mas yuav yog lub tebchaws uas koj muab rau nws cov xeebntxwv nyob. “Koj twb pom peb cov yawgkoob tau tiv kev txomnyem nyob nram tebchaws Iziv; Koj tau hnov lawv tej suab hu thov pab nyob nram ntug dej Hiavtxwv Liab. Koj tau ua tej txujci tseemceeb tawmtsam Falaus, nws cov nomtswv thiab cov neeg uas nyob hauv nws lub tebchaws, rau qhov koj yeej paub tej uas lawv tsimtxom koj haivneeg. Koj tau kovyeej lawv thiaj ua rau koj lub koob meej nrov ncha moo lug los txog niaj hnub no. Koj muab dej hiavtxwv faib hlo ua kev qhuav qhawv rau koj haivneeg taug thiab koj coj lawv hla dhau mus rau sab av qhuav tim ub. Cov neeg uas caum lawv qab ntawd tog tas rau hauv qab thu dej ib yam li lub pobzeb uas tog rau hauv qab thu hiavtxwv. Thaum nruab hnub, koj ua kom muaj ib tauv huab los coj lawv kev, thiab hmo ntuj, koj ua kom muaj nplaim taws mus ua lawv ntej. Koj nqis saum ntuj los rau saum lub Roob Xinais; koj hais lus rau koj haivneeg, koj muab txoj kevcai tseeb, kev tswjhwm, tej kabke thiab tej lus samhwm cob rau lawv. Koj qhia kom lawv ceev hnub Xanpataus ua hnub tseemceeb, thiab koj muab koj txoj Kevcai cob rau koj haivneeg los ntawm koj tus tubtxib Mauxes. “Thaum lawv tshaib plab, koj pub mov saum ntuj los rau lawv noj thiab thaum lawv nqhis dej, koj ua dej txhawv hauv pobzeb los rau lawv haus. Koj hais kom lawv mus txeeb lub tebchaws uas koj coglus yuav muab pub rau lawv nyob. Tiamsis peb cov yawgkoob tau ua neeg khavtheeb, neeg siab tawv thiab tsis kam ua raws li koj tej lus samhwm. Lawv tsis mloog koj lus, lawv tsis nco qab txhua yam uas koj ua tas los lawm; lawv tsis nco qab tej txujci uas koj tau ua los lawm. Thaum lawv muaj lub siab khavtheeb li ntawd, lawv txawm xaiv qhov uas cia lawv muaj ib tug thawjcoj uas yuav coj lawv rov mus ua qhev nyob nram tebchaws Iziv. Tiamsis koj yog tus Vajtswv uas muaj kev zam txim; koj muaj koob hmoov thiab kev hlub, koj tsis chim sai. Koj txojkev hlub loj heev; koj yeej tsis tso lawv povtseg hlo li. Lawv tau puab ib tug mlom uas tus duab zoo li tus menyuam nyuj, thiab lawv hais tias tus ntawd yog tus vajtswv uas coj lawv tawm nram tebchaws Iziv los! Tus TSWV, ua li cas lawv yuav ua rhuav koj loj ua luaj li! Tiamsis koj tsis tau muab lawv tso povtseg rau nram tiaj zeb suabpuam, vim koj txojkev hlub loj heev. Koj tseem tsis tau muab tauv huab thiab tus nplaim taws uas qhia kev rau lawv mus nruab hnub thiab hmo ntuj tshem tseg. Koj muab koj lub siab zoo qhia rau lawv, koj muab manas rau lawv noj thiab muab dej rau lawv haus. Koj pub rau lawv muaj noj tau plaub caug xyoo nram tiaj suabpuam, lawv tsis tu ncua ib yam dabtsi li, lawv tej tsoos tsho los yeej tsis ntuag thiab lawv tej kotaw los yeej tsis mob tsis o li. “Koj coj lawv los ntaus yeej ntau haivneeg thiab ntau lub tebchaws uas nyob ibncig lawv lub tebchaws. Lawv tseem mus ntaus yeej lub tebchaws Hesenpoos uas yog Xihoos ua tus kav, thiab txeeb tau lub tebchaws Npasas uas yog Aunkas ua vajntxwv kav. Koj pub rau lawv muaj tub muaj ki coob ib yam li tej hnubqub saum nruab ntug, thiab koj pub kom lawv muaj yeej thiab los nyob hauv lub tebchaws uas koj tau coglus rau lawv cov yawgkoob hais tias koj yuav muab rau lawv nyob. Lawv thiaj mus txeeb tau lub tebchaws Kana-as; koj tau ntaus yeej cov neeg uas ibtxwm nyob hauv tej tebchaws ntawd. Koj pub rau koj haivneeg muaj hwjchim thiab ua tau raws li lawv siab nyiam rau cov neeg thiab cov vajntxwv uas nyob hauv tebchaws Kana-as. Koj haivneeg txeeb tau tej nroog uas muaj ntsa yeej thaiv khov kho, lub tebchaws uas av rog thiab zoo qoob, tej vajtse uas muaj txhua yam zoo nyob hauv, muaj tej qhovdej uas luag twb khawb tau cia lawm, muaj txiv ntoo roj, txiv ntoo thiab tej vaj txiv hmab. Lawv tau noj txhua yam uas lawv xav noj, ua rau lawv loj thiab rog; lawv txaus siab rau txhua yam zoo uas koj muab pub rau lawv lawm. Tiamsis koj haivneeg tau ntxeev siab thiab tsis mloog koj lus; lawv tig nraubqaum rau koj txoj Kevcai. Lawv muab koj cov cevlus uas ntuas lawv tua povtseg tas, yog koj cov cevlus uas hais kom lawv rov qab los cuag koj. Lawv tau ua rhuav koj ntsejmuag ib zaug dhau ib zaug yog li ntawd, koj thiaj cia lawv cov yeebncuab tua yeej lawv thiab tswjhwm lawv. Thaum lawv raug kev txomnyem, lawv thov koj pab, thiab koj nyob saum ntuj teb lawv. Vim koj muaj txojkev hlub loj heev, koj thiaj txib ib cov thawjcoj los pab lawv kom dim ntawm lawv cov yeebncuab. Thaum lawv muaj kev thajyeeb lawm, lawv rov qab ua txhaum rau koj dua, koj thiaj li tso lawv cov yeebncuab tuaj tua yeej lawv. Ces thaum lawv lees txim thiab thov koj pab cawm lawv, Koj nyob saum ntuj, koj hnov thiab koj tau cawm lawv ib zaug dhau ib zaug ntawm koj txojkev hlub. Koj ntuas kom lawv mloog koj tej lus qhuab qhia, tiamsis vim lawv khavtheeb lawv thiaj tsis ua raws li koj tej kevcai, lawv yeej paub hais tias yog ua raws li koj txoj Kevcai yog txojkev uas coj mus tau txojsia. Lawv lub siab tawv kawg nkaus, lawv tig nraubqaum rau koj thiab lawv tsis mloog koj tej lus. Koj ua siab ntev kawg nkaus thiab ntuas lawv ib xyoos dhau ib xyoos. Koj muab lus rau koj cov cevlus kom hais rau lawv, tiamsis koj haivneeg lag ntseg lawm; yog li ntawd, koj thiaj cia lwm haivneeg tuaj tua yeej lawv. Txawm li ntawd los vim koj txojkev hlub uas loj kawg nkaus, koj thiaj tsis tso lawv povtseg lossis cia lawv raug kev puastsuaj. Koj yog Vajtswv tus uas muaj koob hmoov nplua mias thiab muaj txojkev hlub loj kawg nkaus! “Vajtswv uas yog peb tus Vajtswv, koj yog tus zoo tshaj plaws! Muaj hwjchim loj thiab txaus ntshai kawg nkaus! Koj yeej ua ncaj ncees raws li tej lus uas koj tau cog tseg lawm. Txij thaum uas Axilias cov vajntxwv tuaj tsimtxom peb, txawm ua rau peb raug kev txomnyem los txog nimno! Thov koj nco ntsoov hais tias peb cov vajntxwv, peb cov thawjcoj, peb cov povthawj thiab cov cev koj lus, peb cov yawgkoob thiab peb haivneeg puavleej raug kev txomnyem. Qhov uas koj rau txim rau peb ntawd, koj yeej ua yog lawm; txawm yog peb ua txhaum npaum twg los koj yeej ua ncaj ncees xwb. Peb cov yawgkoob, cov vajntxwv cov thawjcoj thiab cov povthawj, tsis ua raws li koj tej Kevcai hlo li. Lawv tsis mloog koj tej lus samhwm thiab tej lus ntuas. Koj tau foom koob hmoov rau lawv, pub muaj vajntxwv kav koj haivneeg thaum lawv nyob hauv lub tebchaws uas av rog thiab zoo qoob uas koj muab pub rau lawv; tiamsis lawv tsis kam tso lawv tej kev txhaum tseg thiab lawv tsis tig rov los cuag koj. Nimno peb ua luag qhev nyob hauv lub tebchaws uas koj muab pub peb nyob, lub tebchaws no av rog thiab zoo qoob heev peb thiaj muaj noj muaj haus. Tej uas peb khwv tau hauv lub tebchaws no puavleej muab rau cov vajntxwv uas koj tso tuaj kav peb vim peb tau ua kev txhaum. Lawv ua rau peb thiab peb tej tsiaj txhu raws li lawv siab nyiam, thiab peb muaj kev nyuaj siab kawg nkaus li!” Vim muaj tej xwmtxheej uas tshwmsim no mas peb cov pejxeem Yixalayees thiaj tuaj nyob ua ke ntawm no sau ib daim ntawv coglus pom zoo, thiab peb cov thawjcoj, cov Levis thiab cov povthawj muab lawv tej homthawj nias rau daim ntawv ntawd. Thawj tug uas suam npe rau daim ntawv ntawd yog tus tswvxeev uas yog Hakaniyas tus tub Nehemis ntag. Thiab cov neeg uas muaj npe li nram no yog cov uas tau nrog suam npe rau daim ntawv ntawd: Peb cov uas yog cov pejxeem Yixalayees, cov povthawj, cov Levis, cov zov lub Tuamtsev, cov hu nkauj hauv lub Tuamtsev, cov ua haujlwm hauv lub Tuamtsev thiab cov uas coj Vajtswv txoj Kevcai tau muab lawv cais tawm ntawm lwm haivneeg uas nyob hauv peb lub tebchaws. Peb nrog peb cov pojniam thiab menyuam uas loj paub qabhau lawm tuaj sib sau ua ke, koom nrog peb cov thawjcoj coglus, yog peb tsis coj raws li tej lus cog tseg ntawd, thov kom peb raug lo lus foom tsis zoo. Peb yuav tsum ua peb lub neej raws li Vajtswv txoj Kevcai uas nws tau muab cob rau nws tus tubtxib Mauxes. Peb yuav tsum mloog tug TSWV uas yog peb tus Tswv tej lus samhwm; thiab peb yuav tsum ua raws li nws tej kevcai thiab tej kabke. Peb yuav tsis mus yuav lwm haivneeg cov ntxhais los rau peb cov tub thiab peb yuav tsis muab peb cov ntxhais qua rau lawv tej tub lawm. Yog cov neeg txawv tebchaws coj qoobloo lossis lwm yam tuaj muag rau peb hnub Xanpataus lossis tej hnub tseemceeb, peb yuav tsis yuav lawv tej khoom ntawd. Xya lub xyoo twg peb tseg ib xyoos tsis cog qoob rau hauv peb tej teb, thiab peb yuav zam tej nujnqis rau cov neeg uas tshuav peb nqi. Txhua xyoo twg peb yuav tau muab nyiaj ib feem peb ntawm ib lag nyiaj coj mus siv rau hauv lub Tuamtsev. Peb yuav muab khoom mus siv rau hauv lub Tuamtsev pehawm Vajtswv raws li nram no: cov ncuav dawbhuv, tej qoobloo uas niaj hnub coj mus fij, tej tsiaj uas niaj hnub coj mus tua hlawv ua khoom fij, tej khoom fij dawbhuv rau hnub Xanpataus, kevcai noj haus hnub Xiab Ib, thiab lwm yam kevcai noj haus, lwm yam khoom fij uas dawbhuv, tej khoom fij uas daws cov Yixalayees tej kev txhaum thiab lwm yam uas yuav tsum siv rau hauv lub Tuamtsev. Txhua xyoo twg cov pejxeem, cov povthawj thiab cov Levis yuav rho ntawv, kom paub tseeb hais tias saib cuab kwvtij twg yog cuab uas yuav tau npaj taws los hlawv tej khoom fij theej txhoj rau tus TSWV uas yog Vajtswv raws li txoj Kevcai uas muaj tseg lawm. Txhua xyoo twg peb yuav coj tej qoobloo thawj phaum uas peb sau tau thiab thawj phaum txiv uas peb de los coj mus tso rau hauv lub Tuamtsev. Peb yuav coj peb txhua tus tub hlob mus rau cov povthawj uas nyob hauv lub Tuamtsev muab fij rau Vajtswv raws li txoj Kevcai. Peb tseem yuav coj peb thawj tug menyuam nyuj, thawj tug menyuam nyaj thiab thawj tug menyuam tshis mus rau cov povthawj. Txhua xyoo twg peb coj peb thawj phaum hmoov nplej uas zom tau thaum sau qoobloo thiab lwm yam khoom fij uas yog peb tej cawv txiv hmab, tej txiv ntoo roj thiab txhua yam txiv ntoo coj mus rau cov povthawj uas nyob hauv lub Tuamtsev. Peb yuav coj tej qoobloo uas peb ua tau hauv peb tej teb ib feem kaum mus rau cov Levis, vim lawv muaj cai sau ib feem kaum ntawm peb cov neeg ua teb txhua lub zos. Cov povthawj uas yog Aloos cov xeebntxwv nrog nraim cov Levis thaum uas lawv sau ib feem kaum ntawd, thiab cov Levis muab ib feem kaum ntawm cov ib feem kaum uas sau tau los ntawd coj mus ntim rau hauv txhab kom tau siv hauv lub Tuamtsev. Cov pejxeem Yixalayees thiab cov Levis coj tej qoobloo, cawv txiv hmab thiab txiv ntoo roj uas sawvdaws muab tuaj coj mus cia rau hauv cov chav uas rau tej khoom siv hauv lub Tuamtsev uas yog cov povthawj, cov zov roojvag thiab cov hu nkauj hauv lub Tuamtsev qhov chaw nyob ua haujlwm. Peb yuav tsis lam muab peb tus Vajtswv lub tsev saib tsis muaj nqis ib zaug li. Cov thawjcoj mus nyob tagnrho rau hauv nroog Yeluxalees thiab cov pejxeem kuj tuaj rho ntawv; kaum yim twg xaiv ib yig mus nyob rau hauv lub nroog dawbhuv uas yog lub nroog Yeluxalees, dua li cov cia nyob rau tej nroog thiab tej zos sab nraud. Cov pejxeem sawvdaws qhuas txhua tus uas txaus siab hlo mus nyob hauv lub nroog Yeluxalees. Cov pejxeem Yixalayees, cov povthawj, cov Levis, cov ua haujlwm hauv lub Tuamtsev mus nyob lwm lub nroog thiab lwm lub zos, thiab Vajntxwv Xalumoos cov tubtxib tej xeebntxwv mus nyob rau hauv tej zos uas yog lawv cheebtsam av. Ntawm no yog teev cov pejxeem uas yog thawjcoj nyob hauv lub xeev Yudas uas tau mus nyob rau hauv lub nroog Yeluxalees tej npe: Xeem Yudas: Athayas uas yog Uxiyas tus tub thiab yog Xakhaliyas tus xeebntxwv. Nws lwm cov yawgkoob uas yog xam Amaliyas, Sefatiyas thiab Mahalalees uas yog Yudas tus tub Peles cov xeebntxwv. Ma-axeyas uas yog Npalus tus tub thiab yog Kauhauxes tus xeebntxwv. Nws lwm cov yawgkoob uas yog Haxayas, Adayas, Yauyalis thiab Xakhaliyas uas yog Yudas tus tub Selas cov xeebntxwv. Peles cov xeebntxwv muaj plaub puas rau caum yim leej uas nto moo lug nyob hauv lub nroog Yeluxalees. Xeem Npeenyamees: Xalus uas yog Mesulas tus tub thiab yog Yau-es tus xeebntxwv. Nws lwm cov yawgkoob uas yog Pedayas, Kaulayas, Ma-axeyas, Ithiyees thiab Yesaiyas. Nkanpais thiab Xalais uas yog Xalus cov kwvtij txheeb. Cov Npeenyamees uas nyob hauv lub nroog Yeluxalees muaj cuaj pua nees nkaum yim leej. Yau-ees uas yog Xikhalis tus tub ua lawv tus thawjcoj thiab Yudas uas yog Haxenu-as tus tub yog tus lwm thawj uas nyob hauv lub nroog ntawd. Cov povthawj: Yauyalis tus tub Yedayas thiab Yakhees. Xelayas uas yog Hilekiyas tus tub thiab yog Mesulas tus xeebntxwv. Nws lwm cov yawgkoob uas yog Xadaus, Melayaus thiab Ahitus uas yog tus Povthawj Hlob. Tagnrho cuab kwvtij uas ua haujlwm hauv lub Tuamtsev no muaj yim pua nees nkaum ob leeg. Adayas uas yog Yelauhas tus tub thiab yog Pelaliyas tus xeebntxwv. Nws lwm cov yawgkoob uas yog Amexis, Xakhaliyas, Pasehus thiab Makhiyas. Tagnrho muaj ob puas plaub caug ob leeg uas yog thawjcoj ntawm lawv txhua yim neeg. Amaxais uas yog Axalees tus tub thiab yog Axais tus xeebntxwv. Nws lwm cov yawgkoob yog Mesilemaus thiab Imeles. Tagnrho lawv cuab kwvtij no muaj ib puas nees nkaum yim leej uas yog cov tubrog nto moo heev. Lawv tus thawjcoj yog Xadiyees uas yog Hankedulees tus tub. Cov Levis: Semayas uas yog Hasus tus tub thiab yog Axelikas tus xeebntxwv. Nws lwm cov yawgkoob uas yog Hasanpiyas thiab Npunis. Sanpethais thiab Yauxanpas yog ob tug thawjcoj ntawm cov Levis uas saib tej haujlwm nyob sab nraum lub Tuamtsev. Mikas tus tub Mataniyas, yog Xanpedis tus xeebntxwv thiab yog Axafes cajces. Nws ua tus coj cov hu nkauj qhuas Vajtswv hauv lub Tuamtsev. Npanpukiyas yog tus uas pab Mataniyas. Samuas tus tub Anpedas uas yog Nkalas tus xeebntxwv, nws yog Yeduthoos cajces. Tagnrho cov Levis uas nyob hauv lub nroog dawbhuv uas yog lub nroog Yeluxalees muaj ob puas yim caum plaub leeg. Cov zov lub Tuamtsev: Akus, Talemoos thiab nkawd cov kwvtij huv tibsi muaj ib puas xya caum ob leeg. Dua li cov pejxeem Yixalayees, cov povthawj thiab cov Levis, lawv nyob rau hauv lawv cheebtsam av uas yog lawv tej nroog thiab tej zos hauv xeev Yudas lawm. Cov uas ua haujlwm rau hauv lub Tuamtsev nyob rau ib ceg kaum hauv lub nroog Yeluxalees uas hu ua Aufees uas yog muaj Xihas thiab Nkisepas nkawd ua ob tug coj lawv ua haujlwm. Tus thawjcoj ntawm cov Levis uas nyob hauv lub nroog Yeluxalees yog Npanis tus tub Uxis uas yog Hasanpiyas tus xeebntxwv. Nws cov yawgkoob yog Mataniyas thiab Mikas, thiab nws yog Axafes xeebntxwv uas yog cov hu nkauj qhuas Vajtswv hauv lub Tuamtsev. Vajntxwv yeej muaj txoj kevcai kom tej cuab kwvtij ntawd tuaj sib hloov coj hu nkauj hauv lub Tuamtsev txhua hnub. Mesexanpees tus tub Petahiyas uas yog Xelas cuab kwvtij thiab nws yog xeem Yudas, nws ua haujlwm sawv cev vajntxwv rau cov pejxeem Yixalayees. Muaj neeg nyob coob heev hauv tej zos uas ze ntawm lawv tej teb. Xeem Yudas nyob hauv lub nroog Kiliyas Alenpas, lub nroog Dinpoos, lub nroog Yekaxees thiab hauv tej zos uas ze ntawm cov nroog ntawd. Thiab lawv tseem mus nyob hauv lub nroog Yesuas, lub nroog Mauladas, lub nroog Npethepelej, lub nroog Haxasuas, lub nroog Npesenpas, thiab hauv cov zos uas nyob ibncig cov nroog ntawd. Lawv nyob hauv lub nroog Xikelas, lub nroog Mekaunas, thiab cov zos uas nyob ibncig cov nroog ntawd, nyob hauv lub nroog Elimoos, lub nroog Xaulas, lub nroog Yamus, lub nroog Xanau-as, lub nroog Adulas thiab hauv cov zos uas ze cov nroog ntawd. Lawv nyob hauv Lakhis, thiab hauv tej teb uas nyob ze ibncig ntawd, thiab hauv lub nroog Axekas thiab tej zos uas nyob ibncig ntawd. Cov Yudas mus nyob hauv cheebtsam uas nyob nruab nrab ntawm Npesenpas sab qabteb, thiab lub Hav Hinoos sab qaumteb. Cov pejxeem uas yog xeem Npeenyamees nyob txij ntua ntawm Nkenpas sab qaumteb mus txog rau ntawm lub nroog Mikhemas, lub nroog A-is, lub nroog Npethees thiab cov zos uas nyob ibncig ntawd yog, Anathaus, Naunpas, Ananiyas, Haxaules, Lamas, Nkithas, Hadis, Xenpauyees, Nenpalas, Laudis thiab Aunaus nyob hauv cov uas Txawj Txua txhua yam lub Hav. Muab cov Levis qee pab uas ibtxwm nyob hauv cov Yudas cheebtsam av faib mus nrog cov Npeenyamees nyob lawm. Cov povthawj thiab cov Levis uas nrog Se-atiyees tus tub Xelunpanpees thiab nrog tus Povthawj Hlob Yesuas rov los muaj npe li nram no: Cov Levis: Ntawm no mus yog hais txog cov Levis uas xaiv ua cov hu nkauj qhuas Vajtswv: Yesuas, Npeenu-is, Kamiyees, Selenpiyas, Yudas thiab Mataniyas. Npanpukiyas, Unaus thiab nkawd cov phoojywg Levis ua cov hu nkauj uas sawv ncaj ntawm nkawd thaum pehawm Vajtswv. Yesuas yog Yauyakees txiv, Yauyakees yog Eli-asis txiv, Eli-asis yog Yauyadas txiv; Yauyadas yog Yaunathas txiv thiab Yaunathas yog Yaduas txiv. Phau ntawv no yog teev cov Levis cov thawjcoj thiab cov povthawj tej tsevneeg tiam uas cov Povthawj Hlob tseem ua neej nyob: Eli-asis, Yehauyadas, Yaunathas thiab Yaduas. Phau ntawv no sau tiav rau thaum Dali-us ua huabtais kav lub tebchaws Pawxias. Txawm li ntawd los, cov Levis cov thawjcoj tej tsevneeg uas muab teev tseg rau hauv cov nomtswv tej ntaub ntawv, mas tsuas muaj los txog rau ntu uas Eli-asis tus xeebntxwv Yaunathas tiam xwb. Cov Levis cov thawjcoj yog: Hasanpiyas, Selenpiyas, Yesuas, Npeenu-is, Kamiyees, thiab lawv cov phoojywg sawv nrog lawv sib ncag zos, qhuas Vajtswv thiab hais lus sib raws ua nws tsaug, raws li Vajntxwv Daviv uas yog Vajtswv tus neeg tau samhwm tseg lawm. Cov zov lub Tuamtsev tej chav rau khoom ntawm cov roojvag muaj npe raws li nram no: Mataniyas, Npanpukiyas, Aunpadiyas, Mesulas, Talemoos thiab Akus. Cov neeg no yog cov uas ua neej nyob thaum Yesuas tus tub Yauyakees uas yog Yauxadas tus xeebntxwv tiam, thiab yog lub sijhawm uas Nehemis ua tswvxeev, thiab Exalas uas yog ib tug povthawj txawj ntse paub txog Vajtswv txoj Kevcai. Thaum muab tus ntsa yeej uas thaiv lub nroog Yeluxalees fij rau Vajtswv, cov Levis uas nyob txhua qhov tuaj huv tibsi; lawv tuaj koom ua kevcai ua Vajtswv tsaug nrog tej suab hu nkauj, tej suab nkauj nogncas thiab nruas npuaj. Cov Levis uas yog tsevneeg hu nkauj puavleej tuaj ntawm cheebtsam uas nyob ibncig lub nroog Yeluxalees thiab tuaj hauv tej zos uas nyob ibncig lub nroog Netaufas, thiab tuaj hauv Npethes Nkilenkas, Nkenkas thiab hauv lub nroog Axemaves tuaj. Cov povthawj thiab cov Levis ua kevcai ntxuav lawv kom huv; thiab lawv ua kevcai ntxuav cov pejxeem, cov roojvag thiab tus ntsa yeej uas thaiv lub nroog huv tibsi. Kuv kom cov Yudas cov thawjcoj tuaj sib sau rau saum tus ntsa yeej thiab muab lawv faib ua ob pab ncig mus kom thoob plaws lub nroog ua Vajtswv tsaug. Pab ib pib ntawm sab xis saum tus npoo ntsa yeej mus rau ntawm lub Roojvag Quavhlawv. Thaum cov hu nkauj mus lawm, Hausayas thiab cov Yudas ib nrab thawjcoj mam lawv qab. Nws tawm mus raws Semayas, Axalees, Milalais, Nkilalais, Ma-ais, Nethanees, Yudas thiab Hananis uas yog nws cov kwvtij qab. Lawv nqa tej nkauj nogncas thiab nruas npuaj uas Vajntxwv Daviv uas yog Vajtswv tus neeg nyiam ntaus nrog lawv mus. Exalas uas yog tus txawj ntse ua tus coj pab no ntag. Lawv pib ntawm lub Roojvag Qhovdej nce ntaiv ntawd mus rau pem Daviv lub nroog, mus dhau plaws Daviv lub loog, thiab rov los rau ntawm tus ntsa yeej ntawm lub Roojvag Qhovdej uas nyob ntawm lub nroog sab hnubtuaj. Dua li lwm pab ntawm cov uas ua Vajtswv tsaug txawm taug tus ntsa yeej mus rau sab laug, thiab kuv txawm raws cov pejxeem ib nrab ntawd qab. Peb taug kev mus rau ntawm lub chaw tsomfaj Qhovtxos, dhau mus rau ntawm tus Ntsa Yeej Dav, thiab peb pib qhov ntawd mus hla lub Roojvag Efalayees, lub Roojvag Yesanas, Roojvag Ntses, lub chaws tsomfaj Hananees thiab lub chaw tsomfaj Ib Puas mus txog rau ntawm lub Roojvag Yaj. Peb taug mus xaus rau ntawm lub roojvag uas mus rau hauv lub Tuamtsev. Yog li ntawd, ob pab neeg uas ua Vajtswv tsaug ntawd puavleej mus txog rau ntawm lub Tuamtsev huv tibsi lawm. Kuv thiab ib nrab thawjcoj uas nrog kuv, kuv pab yog xam cov povthawj, thiab cov tshuab xyu muaj raws li nram no: Eli-akees, Ma-axeyas, Miniyamees, Mikayas, Eli-aunais, Xakhaliyas thiab Hananiyas; thiab pab uas raws lawv qab yog: Ma-axeyas, Semayas, Ele-axas, Uxis, Yehauhanas, Makhiyas, Elas thiab Exeles. Yelahiyas yog tus coj hu nkauj uas suab nrov tshaj cov huv tibsi. Hnub ntawd, lawv coj khoom tuaj fij ntau kawg nkaus li, thiab cov pejxeem muaj kev zoo siab lomzem heev, rau qhov Vajtswv ua rau lawv muaj kev zoo siab. Cov pojniam thiab menyuam los tuaj koom ua kevcai, thiab tej suab uas lawv tuaj ua ntawd nrov ntxhe mus deb heev. Lub sijhawm ntawd, lawv tsa ib pab txivneej ua cov saib chav rau khoom uas ntim tej khoom uas cov neeg coj tuaj khaws cia rau hauv lub Tuamtsev uas yog ib feem kaum ntawm thawj phaum qoobloo thiab txiv hmab txiv ntoo uas siav txhua xyoo. Cov txivneej ntawd tes haujlwm yog mus sau tej qoobloo hauv luag tej teb uas nyob ze ntawm tej nroog coj tuaj ua khoom fij rau cov povthawj thiab cov Levis raws li txoj Kevcai uas teev tseg lawm. Tagnrho cov Yudas txaus siab rau cov povthawj thiab cov Levis, rau qhov lawv yog cov uas ua kevcai ntxuav dawbhuv thiab kevcai pehawm Vajtswv raws li Vajtswv tau samhwm tseg. Cov hu nkauj thiab cov zov lub Tuamtsev ua lawv lub luag haujlwm raws li txoj kevcai uas Vajntxwv Daviv thiab nws tus tub Xalumoos tau rhawv tseg lawm. Txij thaum Vajntxwv Daviv thiab Axafes uas yog tus hu nkauj tiam, yeej muaj cov coj hu nkauj qhuas Vajtswv thiab ua Vajtswv tsaug los lawm. Tiam uas Xelunpanpees thiab Nehemis ua thawjcoj, mas cov pejxeem niaj hnub coj lawv tej khoom tuaj rau cov hu nkauj thiab cov zov lub Tuamtsev. Cov pejxeem coj tej khoom fij tuaj rau cov Levis, thiab cov Levis mam muab feem uas yog cov povthawj li rau cov povthawj. Thaum muab Mauxes txoj Kevcai nyeem rau cov pejxeem mloog, lawv nyeem txog qhov uas hais tias tsis tso cai rau cov Amoos thiab cov Mau-am tuaj koom nrog Vajtswv haivneeg ua ke. Lawv ua li no, rau qhov cov Amoos thiab cov Mau-am tsis pub zaub mov thiab dej rau cov Yixalayees thaum uas lawv tsiv nram tebchaws Iziv los thiab lawv tseem muab nyiaj mus ntiav Npala-as kom foom tsis zoo rau cov Yixalayees. Tiamsis peb tus Vajtswv muab tej lus foom tsis zoo ntawd hloov ua lus koob hmoov. Thaum cov Yixalayees hnov li ntawd, ces lawv txawm muab cov neeg txawv tebchaws cais tagnrho tawm ntawm cov Yixalayees lawm. Tus povthawj Eli-asis uas yog tus saib cov chav rau khoom hauv lub Tuamtsev nws yeej ua phoojywg zoo nrog Taunpias los tau ntev lawm. Nws tso cai rau Taunpias siv ib chav loj uas yog cia rau tej khoom fij uas yog qoobloo, tej tshuaj tsw qab, tej khoom siv rau lub Tuamtsev, tej khoom fij rau cov povthawj thiab tej khoom fij uas yog ib feem kaum ntawm tej qoobloo, cawv txiv hmab thiab roj txiv ntoo uas muab rau cov Levis, cov hu nkauj thiab cov zov lub Tuamtsev. Thaum uas muaj tej xwm no tshwmsim, kuv tsis nyob hauv lub nroog Yeluxalees lawm, rau qhov txog xyoo peb caug ob uas Ataxawxes ua vajntxwv nyob hauv nroog Npanpiloos, mas kuv yuav tsum tau rov qab mus qhia kuv tej haujlwm rau nws. Tom qab ntawd, kuv thiaj mus thov lus tso cai ncaim vajntxwv rov los rau hauv nroog Yeluxalees. Kuv thiaj hnov tej kev txhaum uas Eli-asis ua, nws tau tso cai rau Taunpias siv ib chav tsev rau khoom hauv Vajtswv lub Tuamtsev. Ua rau kuv chim heev, kuv thiaj muab txhua yam uas yog Taunpias li coj mus povtseg huv tibsi. Kuv thiaj samhwm kom cia li muab chav ntawd ua kevcai ntxuav kom huv thiab rov mus muab tej khoom siv hauv lub Tuamtsev, tej qoobloo uas coj tuaj fij, thiab tej tshuaj tsw qab rov los tso rau hauv chav ntawd. Thiab kuv tseem hnov xov hais tias cov hu nkauj hauv lub Tuamtsev thiab cov Levis ibtxhia tau tawm hauv nroog Yeluxalees thiab rov qab mus nyob rau hauv lawv tej teb lawm, rau qhov cov pejxeem coj khoom noj haus tuaj pub tsis txaus rau lawv. Yog li ntawd, kuv thiaj cem cov nomtswv hais tias, “Vim li cas yuav muab Vajtswv lub Tuamtsev tso tseg?” Thiab kuv thiaj hais kom cov hu nkauj thiab cov Levis rov los nyob hauv lub Tuamtsev ua lawv tes haujlwm dua. Ces cov Yixalayees thiaj rov pib coj lawv tej qoobloo, cawv txiv hmab thiab txiv ntoo roj ib feem kaum tuaj tso rau hauv lub Tuamtsev. Kuv thiaj tsa cov neeg uas muaj npe li nram no ua cov saib tej chav rau khoom ntawd: Selemiyas uas yog ib tug povthawj; Xadaus uas yog ib tug paub txoj Kevcai zoo; thiab Pedayas uas yog ib tug Levis. Hanas uas yog Xakus tus tub thiab yog Mataniyas tus xeebntxwv ua tus pab lawv. Kuv paub thiab ntseeg cov txivneej no siab hais tias lawv yuav ua haujlwm ncaj ncees faib tej khoom ntawd rau sawvdaws. Kuv tus Vajtswv, thov koj nco ntsoov tej uas kuv tau ua rau koj lub Tuamtsev ua yog qhov chaw pehawm koj. Lub sijhawm ntawd, kuv tseem pom cov pejxeem hauv lub xeev Yudas mus tso kua txiv hmab hnub Xanpataus. Dua li lwm cov tseem cab lawv tej neesluav mus thauj nplej, thauj cawv txiv hmab, thauj txiv ncuavpias thiab lwm yam khoom los rau hauv lub nroog Yeluxalees; kuv thiaj ntuas lawv kom tsis txhob muag ib yam khoom dabtsi rau hnub Xanpataus hlo li. Muaj ib cov neeg uas nyob pem lub nroog Tiles tuaj nyob hauv lub nroog Yeluxalees, lawv coj ntses thiab txhua yam khoom zoo tuaj rau hauv lub nroog, ces hnub Xanpataus lawv muab tej ntawd muag rau peb cov neeg. Kuv thiaj cem cov Yudas tej thawjcoj thiab hais rau lawv tias, “Nej sim saib tej kev phem vuabtsuab uas nej ua ntawd saib! Nej ua rau hnub Xanpataus tsis dawbhuv lawm ntag. Nej cov yawgkoob tsis tau ua dua li no, thiab Vajtswv tsis tau tso tej kev puastsuaj los raug peb thiab lub nroog no dua li los? Qhov no yog nej coj kev puastsuaj los rau cov Yixalayees, vim nej tau ua tsis huv rau hnub Xanpataus.” Kuv thiaj samhwm kom muab tej roojvag nroog Yeluxalees kaw ua ntej thaum yuav tsaus ntuj, hmo uas ua ntej hnub Xanpataus, kuv samhwm kom yuav tsum kaw tej roojvag tagnrho thiab tsis txhob qhib mus txog thaum uas dhau hnub Xanpataus lawm. Thiab kuv tseem tso kuv cov neeg mus soj tej roojvag saib puas pom muaj neeg coj khoom los rau hauv lub nroog hnub Xanpataus. Tiamsis tseem muaj cov neeg uas muag txhua yam khoom tuaj nyob sab nraum ntug nroog Yeluxalees zov tos ib ob zaug ua ntej hmo uas yuav txog hnub Xanpataus thiab. Kuv ceebtoom rau lawv hais tias, “Tsis muaj qabhau dabtsi rau nej tuaj nyob sab nraum ko zov tos txog tagkis kaj ntug. Yog hais tias nej tseem pheej ua li no ntxiv, kuv yuav rho nplawm rau nej ntag.” Txij kiag thaum ntawd los hnub Xanpataus lawv txawm tsis tuaj li lawm. Kuv tau samhwm kom cov Levis mus ua kevcai ntxuav kom lawv huv, mus zov tej roojvag kom zoo thiaj ua rau Hnub Xanpataus dawbhuv. Vajtswv, thov koj nco ntsoov kuv, thiab thov koj tseg kuv txojsia, rau qhov koj yog tus uas muaj txojkev hlub loj kawg nkaus. Lub sijhawm ntawd kuv tseem hnov hais tias muaj cov Yudas coob leej tau mus yuav cov Asedaus, cov Amoos thiab cov Mau-am tej ntxhais los ua pojniam thiab. Lawv cov menyuam ib nrab yeej hais lus Asedaus thiab hais lwm yam lus lawm xwb, yeej tsis txawj hais peb tej lus li lawm. Kuv thiaj cem lawv thiab foom tsis zoo rau lawv; kuv muab qee leej ntaus thiab tsawv lawv tej plaubhau cab; kuv hais kom lawv coglus ntawm Vajtswv lub npe thiab hais tias. Nej tseg tsis txhob qua nej tej ntxhais rau lawv tej tub, thiab tsis txhob mus yuav lawv tej ntxhais los rau nej tej tub lossis rau nej yuav ua pojniam ntxiv lawm. Kuv hais rau lawv tias, “Tsis yog cov pojniam uas yog neeg txawv tebchaws no ua rau Vajntxwv Xalumoos poob rau txojkev txhaum los? Ntau haivneeg yeej tsis muaj ib tug vajntxwv zoo li nws, nws yog tus uas Vajtswv hlub, Vajtswv tsa nws ua vajntxwv kav cov Yixalayees; txawm li ntawd los, cov pojniam uas yog neeg txawv tebchaws tseem ntxias tau nws mus ua kev txhaum thiab. Puas tsimnyog cia peb mloog nej lus thiab xyaum ua txhaum loj npaum li nej tau tawmtsam peb tus Vajtswv uas yog mus yuav cov neeg txawv tebchaws tej ntxhais los ua pojniam?” Yauyadas twb yog Eli-asis uas yog tus Povthawj Hlob tus tub ntag, tiamsis Yauyadas ib tug tub tseem mus yuav kiag Xanpalas uas nyob hauv lub nroog Npethes Hauloos tus ntxhais los ua pojniam thiab. Yog li ntawd, kuv thiaj li muab Yauyadas ntiab tawm hauv lub nroog Yeluxalees mus lawm. Kuv tus Vajtswv, thov koj nco ntsoov lawv cov ntawd, rau qhov lawv tau ua tsis huv rau txoj kevcai ua povthawj thiab tej uas cov povthawj thiab cov Levis tau coglus tseg lawm. Kuv tau ua kevcai ntxuav lawv ntawm txhua yam uas yog cov neeg txawv tebchaws li; kuv npaj tau ib txoj kevcai rau cov povthawj thiab cov Levis coj kom lawv txhua tus nyias thiaj paub nyias lub luag haujlwm zoo. Kuv samhwm kom npaj tej taws cia tau hlawv tej khoom fij rau tej lub sijhawm uas tsimnyog thiab lub sijhawm uas cov neeg sawvdaws coj lawv tej qoobloo thiab tej txiv ntoo thawj phaum uas sau tau tuaj ua khoom fij. Vajtswv, thov koj ncov ntsoov kuv thiab foom koob hmoov rau kuv! Xyoo peb uas vajntxwv kav tebchaws, nws txawm npaj muaj ib rooj noj haus loj los rau nws cov nomtswv thiab cov thawjtswj. Cov Pawxias thiab cov Medias tej thawj tubrog, cov neeg uas muaj meejmom thiab cov tswvxeev kuj tuaj nyob ntawd huv tibsi thiab. Ces vajntxwv txawm muab nws tej cuabyeej ua rog uas zoo kawg nkaus thiab tej khoom uas zoo ci nplas thau tawm rau sawvdaws saib tau rau lub hlis. Thaum uas dhau rau lub hlis ntawd lawm, vajntxwv tseem npaj dua ib rooj noj haus rau cov txivneej uas nyob hauv lub tuamceeb nroog Susas ntawd noj thiab. Cov neeg npluanuj thiab cov neeg pluag puavleej tuaj nyob ua ke. Lawv tuaj noj haus tau xya hnub hauv vajntxwv lub loog. Muaj ib co ntaubpag dawb thiab xiav uas yog muab ib txoj hlua ntaub zam kob tsamxem txuas rau ntawm cov khawb nyiaj dai rau ntawm cov ncej zeb. Thiab muaj tej rooj zaum uas yog muab nyiaj muab kub ua zoo nkauj heev, txawb rau ntawm lub tiaj tshavpuam uas muab tej txiag pobzeb dawb, txiag pobzeb liab txho, thiab cov piagdeg uas ci zoo nkauj heev pua. Muab tej khob kub ce cawv rau sawvdaws haus, tej khob ntawd ib lub zoo nkauj tsis thooj ib lub, thiab vajntxwv ua siab dawb paug muab cawv txiv hmab ntau kawg nkaus coj los rau lawv haus. Vajntxwv tso plhuav rau lawv haus npaum li lawv yuav haus taus tsis muaj leejtwg txwv; vajntxwv hais rau nws cov tubtxib hauv nws lub loog kom cia lawv txhua tus haus kom txaus raws li lawv siab nyiam. Vasetis uas yog vajntxwv tus pojniam kuj npaj muaj ib rooj noj haus loj rau ib tsoom pojniam nyob rau hauv Vajntxwv Xawxes lub loog tau noj thiab. Thaum lawv noj haus mus txog hnub xya, vajntxwv haus cawv txiv hmab txaus thiab zoo siab lawm, nws thiaj hu nws cov tubtxib Mehumas, Npixethas, Hanpaunas, Npithas, Anpathas, Xethalis thiab Kalakas uas yog xya tus nraug sam kom los cuag nws. Nws samhwm rau lawv mus coj niam Vajntxwv Vasetis kom nws ntoo lub kausmom kub los. Niam vajntxwv yog ib tug pojniam uas zoo nkauj heev, thiab vajntxwv xav qhia niam vajntxwv cev txiajzam uas zoo nkauj heev ntawd rau cov nomtswv thiab nws cov qhua sawvdaws saib. Tiamsis thaum cov tubtxib coj vajntxwv tej lus samhwm mus hais rau niam Vajntxwv Vasetis, nws tsis kam los. Qhov no ua rau vajntxwv chim heev. Muaj ib txoj kevcai uas vajntxwv yuav tsum tau nug cov tub txawg tub ntse saib txoj cai thiab tej kevcai hais tseg li cas. Yog li ntawd, nws thiaj hu nws cov tuavxam uas paub tej kevcai ntawd tuaj saib yuav ua li cas. Cov tuavxam uas vajntxwv pheej txeev hu kom tuaj nrog nws sablaj yog Kasenas, Sethas, Amathas, Talesis, Meles, Maxenas thiab Memukas, lawv yog xya tus nom uas kav tebchaws Pawxias thiab tebchaws Medias thiab yog cov nomtswv uas loj tshaj cov huv tibsi. Nws thiaj hais rau cov tuavxam hais tias, “Kuv uas yog Vajntxwv Xawxes tau muab lus samhwm rau kuv cov tubtxib kom mus hais rau niam Vajntxwv Vasetis, tiamsis nws tsis ua raws li kuv tej lus samhwm! Mas raws li txoj kevcai hais tseg ne, tsimnyog peb ua li cas rau nws?” Ces Memukas thiaj hais rau vajntxwv thiab nws cov nomtswv hais tias, “Niam Vajntxwv Vasetis tsis yog ua saib tsis taus vajntxwv tib leeg xwb, tiamsis nws ua saib tsis taus vajntxwv cov nomtswv, thiab txhua tus txivneej uas nyob hauv lub tebchaws uas vajntxwv kav huv tibsi. Vim qhov uas niam vajntxwv ua ntawd, yuav nrov ncha mus thoob rau txhua tus pojniam tau hnov, ces yuav ua rau lawv saib tsis taus lawv tej txiv, thiab lawv yuav hais tias, ‘Vajntxwv Xawxes tau samhwm kom niam Vajntxwv Vasetis los sawv ntawm nws xubntiag, tiamsis niam vajntxwv tsis kam los.’ Thaum cov nomtswv hauv tebchaws Pawxias thiab Medias tej pojniam hnov txog zaj uas niam vajntxwv ua no, ces lawv yuav coj mus piav qhia lawv tej txiv ua ntej tsaus ntuj. Ces txhua tus pojniam uas nyob rau txhua qhov yuav tsis hwm lawv cov txiv, thiab lawv cov txiv yuav chim heev rau lawv cov pojniam. Yog Vajntxwv txaus siab, thov kom vajntxwv tawm ntawv thiab muab sau tseg rau hauv cov Pawxias thiab cov Medias txoj kevcai tsis pub hloov li, kom Vasetis tsis txhob tau los cuag Vajntxwv Xawxes ib zaug ntxiv li lawm; thiab thov vajntxwv nrhiav dua ib tug niam vajntxwv uas zoo tshaj Vasetis los nyob Vasetis chaw xwb. Yog ua li no mas thaum tej pejxeem uas nyob thoob plaws koj lub tebchaws uas loj thiab dav kawg nkaus tau hnov txog zaj no, cov pojniam thiaj saib taus lawv tej txiv. Txawm yog tus txiv yuav muaj txiag npluanuj thiab pluag los lawv thiaj li saib taus.” Vajntxwv thiab nws cov nomtswv nyiam zaj tswvyim no heev, thiab vajntxwv txawm ua raws li Memukas hais ntawd. Vajntxwv thiaj sau ntawv xa mus thoob plaws txhua lub xeev, thiab sau raws li lawv haivneeg ntawd tej lus uas hais tias, txhua tus txiv tsev yuav tsum ua tus tswj nws lub cuab lub yig thiab ua tus txiav txim siab ua txhua yam. Tom qab ntawd vajntxwv txojkev chim txias lawm, tiamsis nws pheej xav txog tej uas Vasetis tau ua tas los thiab tsab ntawv uas nws tau sau mus tawmtsam Vasetis ntawd. Vajntxwv cov tuavxam qee leej uas nws tso siab tau rau txawm hais vajntxwv hais tias, “Vim li cas koj tsis mus nrhiav tej tug nkaujxwb uas zoo nkauj heev? Koj cia li tsa ib co nomtswv uas nyob rau txhua lub xeev uas koj kav kom coj cov hluas nkauj uas zoo nkauj heev tuaj rau hauv lub chaw txoos cov hluas nkauj hauv lub tuamceeb nroog Susas. Thiab koj tso lawv rau Henkais uas yog tus nraug sam uas saib cov pojniam ua tus saib xyuas, thiab kom lawv muab tshuaj pleev lawv kom lawv zoo nkauj. Tus ntxhais twg yog tus koj nyiam tshaj, koj cia li coj tus ntawd los ua niam vajntxwv hloov Vasetis chaw.” Vajntxwv xav hais tias zaj no yog ib zaj tswvyim zoo, nws thiaj ua raws li ntawd. Muaj ib tug neeg Yudais npe hu ua Maudekhais uas yog Yailes tus tub thiab yog Kises thiab Sime-is tus xeebntxwv uas yog xeem Npeenyamees nyob hauv lub nroog Susas. Maudekhais yog ib tug uas raug ntes tib lub sijhawm thaum Nenpukajnexales uas ua vajntxwv kav tebchaws Npanpiloos tau ntes Yehauyakhees uas ua vajntxwv kav cov Yudais thiab cov pejxeem hauv lub nroog Yeluxalees mus. Exethaws yog Maudekhais ib tug kwvtij tus ntxhais, thaum Exethaws niam thiab txiv tuag lawm, Maudekhais sau Exethaws los ua nws tus ntxhais, Exethaws lub npe Henplais hu ua Hadaxas; nws yog ib tug ntxhais uas zoo nkauj thiab ntxim nyiam kawg li. Thaum vajntxwv samhwm thiab tshaj tawm mus lawm, ces lawv txawm coj tau cov hluas nkauj coob heev tuaj rau hauv lub tuamceeb nroog Susas, thiab Exethaws yog ib tug uas lawv coj tuaj rau hauv vajntxwv lub loog uas yog Henkais ua tus zov cov hluas nkauj ntawd. Henkais nyiam Exethaws thiab hlub nws kawg li; Henkais thiaj maj nroos muab tshuaj los rau Exethaws pleev thiab muab tej zaub mov zoo los rau nws noj. Henkais muab qhov chaw zoo tshaj plaws rau Exethaws nyob thiab muab xya tus hluas nkauj uas xaiv tshwjxeeb hauv vajntxwv lub loog los ua cov tu Exethaws. Exethaws yeej tsis qhia rau leejtwg paub hais tias nws yog neeg Yudais, rau qhov Maudekhais yeej txwv tsis pub nws qhia rau leejtwg paub li. Maudekhais niaj hnub tuaj ncig mus ncig los ntawm lub tsev halees uas vajntxwv cov hluas nkauj nyob, mloog xov saib Exethaws puas ua tau zoo thiab saib puas muaj xwm dabtsi rau Exethaws. Raws li kevcai, mas txhua tus hluas nkauj yuav tsum xub tu nws lub cev ib lub xyoos ua ntej uas coj mus cuag Vajntxwv Xawxes, thawj rau lub hlis yog pleev tshuaj tsw qab mules thiab rau lub hlis tom qab yog pleev cov roj ntoo tsw qab. Tom qab ntawd mam li coj cov hluas nkauj ib tug zuj zus mus cuag Vajntxwv Xawxes. Thaum uas tus hluas nkauj tawm ntawm lub tsev halees mus rau hauv vajntxwv lub loog, nws xav coj saw thiab hnav tsoos zoo li cas los yeej tau li. Thaum yuav tsaus ntuj nws mus cuag vajntxwv, thiab tagkis thaum sawv ntxov luag coj nws mus rau lwm lub halees thiab tso rau Sasakas uas yog tus nraug sam saib vajntxwv cov niamyau ua tus saib; nws tsis tau rov mus cuag vajntxwv ntxiv li lawm, yuav tsum yog vajntxwv nyiam nws txaus thiab hu txog nws npe lawm xwb. Thaum lub sijhawm uas los txog rau Maudekhais tus txiv hlob Anpihais tus ntxhais Exethaws uas Maudekhais sau los ua nws tus ntxhais mus cuag vajntxwv lawm, Exethaws tsis thov ib yam dabtsi li, nws tsuas hnav tej uas Henkais uas yog vajntxwv tus nraug sam uas zov cov hluas nkauj ntawd muab rau nws hnav nkaus xwb. Exethaws yog ib tug ntxhais uas leejtwg pom los yeej nyiam nws heev. Thaum coj Exethaws mus cuag Vajntxwv Xawxes hauv nws lub loog, yog lub kaum hli ntuj uas yog lub hli Tenpes uas Xawxes ua vajntxwv kav tebchaws tau xya xyoo lawm. Vajntxwv nyiam Exethaws tshaj cov hluas nkauj uas twb tau mus cuag vajntxwv lawm, vajntxwv nyiam thiab hlub nws tshaj lwm tus ntxhais nkaujxwb huv tibsi. Vajntxwv thiaj muab lub kausmom kub los rau Exethaws ntoo thiab muab nws tsa ua niam vajntxwv hloov Vasetis chaw. Ces vajntxwv thiaj npaj ib rooj noj haus loj heev los qhuas Exethaws, thiab caw tagnrho nws cov nomtswv thiab cov nomtswv uas tuav ntaub ntawv tuaj noj. Thiab vajntxwv tshaj tawm mus rau txhua lub xeev kom sawvdaws so ib hnub thiab vajntxwv muab khoom faib pub rau sawvdaws. Tau tsis ntev vajntxwv txawm tsa Maudekhais ua ib tug uas saib phab ntaub ntawv. Exethaws yeej tsis tau qhia rau leejtwg paub hais tias nws yog neeg Yudais li. Maudekhais txwv tsis pub nws qhia rau leejtwg, thiab Exethaws yeej mloog Maudekhais lus ib yam li thaum uas nws tseem yog menyuam ntxhais uas Maudekhais coj nws los tu ntag. Lub sijhawm uas Maudekhais tau ua ib tug nomtswv nyob ntawm vajntxwv lub loog, mas muaj Npithanas thiab Teles uas yog ob tug nraug sam zov nyob ntawm ob sab lub roojloog uas mus rau hauv chav uas vajntxwv nyob. Nkawd txawm ntxeev siab rau Vajntxwv Xawxes thiab tuavhauv yuav muab vajntxwv tua povtseg. Maudekhais hnov zaj ntawd, nws thiaj mus hais qhia rau niam Vajntxwv Exethaws, ces Exethaws thiaj coj Maudekhais cov lus mus piav qhia rau vajntxwv paub. Thaum uas luag tshuaj tau tej xwmtxheej no, thiab paub hais tias muaj tseeb lawm, luag thiaj muab ob tug txivneej uas siab phem ntawd coj mus dai cajdab rau saum tus ncej dai neeg lawm. Thiab vajntxwv samhwm kom muab zaj no sau tseg rau hauv phau ntawv uas teev tej xwmtxheej hauv nws lub tebchaws khaws cia. Tom qab uas tej xwm no dhau lawm, vajntxwv thiaj muab Hamedathas tus tub Hamas uas yog Ankas tus xeebntxwv tsa ua tus nom uas loj dua lwm tus ntawm vajntxwv. Tagnrho vajntxwv cov nomtswv uas nyob ntawm vajntxwv lub roojvag puavleej txhos caug pe thiab hawm Hamas; rau qhov vajntxwv tau samhwm kom txhua tus yuav tsum pe Hamas. Tiamsis Maudekhais tsis kam txhos caug pehawm nws li. Ces vajntxwv cov nomtswv uas nyob ntawm vajntxwv lub roojvag thiaj nug Maudekhais hais tias, “Vim li cas koj tsis kam ua raws li vajntxwv tej lus samhwm?” Lawv pheej niaj hnub hais los nws yeej tsis mloog lawv hais li. Maudekhais thiaj qhia rau lawv hais tias, “Kuv yog neeg Yudais, kuv tsis pehawm Hamas.” Yog li ntawd, lawv thiaj mus piav qhia rau Hamas saib nws puas pub rau Maudekhais muaj cai ua tau li ntawd. Thaum Hamas paub hais tias Maudekhais tsis hawm nws thiab tsis kam txhos caug pe nws lawm, nws chim heev, thiab thaum nws paub hais tias, Maudekhais yog neeg Yudais lawm, nws tsis yog xav muab Maudekhais tib leeg rau txim xwb. Nws tuav tswvyim yuav muab tagnrho cov neeg Yudais uas nyob thoob plaws hauv tebchaws Pawxias uas Vajntxwv Xawxes kav ntawd tua povtseg huv tibsi thiab. Vajntxwv Xawxes kav tebchaws tau kaum ob xyoos, rau thaum lub ib hlis ntuj uas yog lub hli Nixam, Hamas txawm samhwm kom rho ntawv xam hnubnyoog (uas lawv hu ua “Pulees,”) saib hnub twg thiab lub hli twg thiaj li zoo caij zoo nyoog rau nws mus tua cov Yixalayees; lawv thiaj rho tau rau lub kaum ob hlis ntuj, hnub kaum peb uas yog lub hli Adas. Hamas hais rau Vajntxwv Xawxes hais tias, “Muaj ib haivneeg nyob xyaw peb cov pejxeem thoob plaws txhua qhov hauv koj lub tebchaws no. Lawv tej kevcai txawv tsis zoo li lwm haivneeg tej. Thiab lawv tsis ua raws li koj tej kevcai. Yog li ntawd, qhov uas koj cia lawv ua neej nyob tsis muaj nqis dabtsi rau koj li. Yog hais tias vajntxwv txaus siab, thov cia li tawm ntawv tso cai muab cov neeg ntawd tua kom tuag tas huv tibsi, thiab kuv tuaj yeem muab peb puas xya caum tsib tas nyiaj mus tso rau hauv vajntxwv lub txhab nyiaj them rau vajntxwv cov neeg uas ua haujlwm hauv lub tebchaws.” Vajntxwv txawm hle nws ntiv nplhaib uas siv ua lub homthawj nias tej ntaub ntawv cob rau Hamedathas tus tub Hamas uas yog Ankas tus xeebntxwv uas yog cov Yudais tus yeebncuab ntawd. Vajntxwv hais rau Hamas hais tias, “Kuv muab cov neeg ntawd thiab lawv tej nyiaj txiag cob rau koj; koj cia li ua rau lawv raws li koj pom zoo.” Lub ib hlis ntuj hnub kaum peb, Hamas hu vajntxwv cov teev ntawv tuaj thiab kom lawv sau raws li nws cov lus samhwm, muab txhais ua txhua yam lus li vajntxwv ibtxwm ua thiab muab xa rau txhua tus tswvxeev, txhua tus thawjcoj thiab txhua tus nomtswv. Tsab ntawv no sau ua vajntxwv npe thiab muab vajntxwv lub nplhaib nias homthawj rau. Cov neeg xa ntawv, xa tsab ntawv ntawd ceev heev mus rau txhua lub xeev uas vajntxwv kav. Tsab ntawv no hais kom muab cov Yudais, tsis hais laus thiab hluas, pojniam thiab menyuam, tua povtseg huv tibsi rau lub kaum ob hlis hnub kaum peb uas yog lub hlis Adas. Tsis txhob hlub leejtwg li, lojxov tua kom lawv tuag tas thiab huab lawv tej khoom txhua yam kom dulug huv tibsi. Luag xa tsab ntawv no mus rau txhua lub xeev ua ib txoj kevcai thiab qhia rau tsoom pejxeem sawvdaws kom paub npaj txhij rau tib hnub ntawd. Thaum muab vajntxwv cov lus samhwm tshaj tawm rau sawvdaws paub nyob hauv lub tuamceeb nroog Susas lawm, cov neeg xa ntawv thiaj muab xa ceev heev mus rau txhua lub xeev. Ces vajntxwv thiab Hamas los zaum haus cawv, tiamsis lub nroog Susas muaj kev tsis sib haumxeeb ntxhov hnyo. Thaum Maudekhais hnov tej xov tsis zoo ntawd, nws txhawj kawg li, nws thiaj muab nws cev ris tsho dua kiag thiab muab ntaubtsaj los npua thiab tsuab tshauv rau saum nws taubhau, thiab nws quaj qw nrov heev mus rau hauv plawv nroog; thaum nws mus txog rau ntawm txojkev uas mus rau hauv lub loog. Nws tsis nkag mus rau hauv, rau qhov luag txwv tsis pub ib tug neeg twg uas npua ntaubtsaj mus rau hauv lub loog hlo li. Nyob rau hauv txhua lub xeev uas vajntxwv tsab ntawv tshaj tawm mus txog rau cov Yudais lawm, lawv muaj kev txhawjxeeb quaj ntsuag loj kawg li. Lawv thiaj li yoo mov, quaj, nyuaj siab, thiab lawv txhua tus puavleej muab ntaubtsaj los npua thiab da hauv qhov tshauv. Thaum uas Exethaws cov nkauj qhe thiab cov nraug sam los hais qhia tej uas Maudekhais tabtom quaj thiab ua ntawd rau nws paub, Exethaws mob siab heev. Nws thiaj nqa ris tsho mus rau Maudekhais hnav thiab muab cov ntaubtsaj hle povtseg, tiamsis Maudekhais tsis kam txais cov ris tsho ntawd li. Ces Exethaws thiaj li hu Hathas, tus nraug sam uas vajntxwv tsa los ua Exethaws tus tubtxib kom los cuag nws thiab hais kom Hathas mus nug Maudekhais saib yog nws muaj kev nyuaj siab dabtsi thiab yog vim li cas. Hathas thiaj tawm mus cuag Maudekhais hauv plawv nroog ntawm txojkev uas mus rau hauv vajntxwv lub loog. Maudekhais piav txhua yam uas tshwmsim rau nws ntawd rau Hathas mloog thiab hais txog cov nyiaj uas Hamas coglus yuav muab npaum twg coj mus tso rau hauv vajntxwv lub txhab nyiaj yog yuav muab cov Yudais tua kom tuag tas huv tibsi. Thiab Maudekhais muab tsab ntawv samhwm uas vajntxwv sau tawm hauv lub tuamceeb nroog Susas, kom muab cov Yudais tua povtseg huv tibsi ntawd rau Hathas nqa mus qhia rau Exethaws, thiab kom Exethaws kavtsij mus cuag vajntxwv thiab thov vajntxwv hlub niam vajntxwv haivneeg. Hathas thiaj rov los thiab piav txhua yam uas Maudekhais tau hais ntawd qhia rau Exethaws mloog. Ces Exethaws thiaj muab lus rau Hathas rov qab mus hais rau Maudekhais hais tias, “Tagnrho vajntxwv cov tubtxib thiab cov pejxeem uas nyob hauv txhua lub xeev uas vajntxwv kav, puavleej paub zoo txog txoj kevcai no, tsis hais vajntxwv cov tuavxam thiab tej pejxeem; yog ib tug txivneej lossis ib tug pojniam twg, lam mus cuag vajntxwv uas vajntxwv tsis tau hu nws mus, tus ntawd yuav tsum raug tua povtseg, vim muaj txoj kevcai sau tseg li ntawd lawm; tsuas yog tshwj tus uas vajntxwv muab nws tus cwj kub cev rau, tus ntawd thiaj tsis raug tua tuag xwb. Vajntxwv twb tsis hu kuv mus cuag nws tau peb caug hnub no lawm.” Thaum uas Maudekhais hnov tej lus uas Exethaws hais ntawd lawm, Maudekhais kom lawv rov qab mus teb rau Exethaws hais tias, “Tsis txhob xav hais tias, koj nyob hauv vajntxwv lub loog ces koj yuav dim tsis raug tua tuag li lwm tus neeg Yudais. Yog hais tias koj pheej nyob twjywm tsis quavntsej li no, mas yuav muaj txojkev pab los saum ntuj los thiab yuav cawm cov Yudais kom dim. Tiamsis koj thiab koj txiv tsevneeg yuav tuag tu noob nrho. Leejtwg thiaj paub? Tej zaum qhov uas koj tau los ua niam vajntxwv rau tej lub sijhawm zoo li no, twb yog los pab cawm peb haivneeg kom dim kev puastsuaj los kuj tsis paub!” Exethaws teb rov mus rau Maudekhais hais tias, “Mus hais tagnrho cov Yudais uas nyob hauv lub nroog Susas tuaj sib sau ua ke, thiab ua kevcai yoo mos thov Vajtswv pab kuv. Tsis txhob noj tsis txhob haus ib yam dabtsi peb hnub peb hmos. Kuv thiab kuv cov nkauj qhe los yuav yoo mov ib yam nkaus li nej thiab. Ces tom qab ntawd, kuv yuav mus cuag vajntxwv. Yog hais tias, kuv ua txhaum kevcai, kuv tuag los xijpeem, kuv yeej yuav zoo siab tuag.” Ces Maudekhais thiaj mus ua txhua yam raws li Exethaws hais rau nws ntawd. Exethaws yoo mov los txog hnub peb, nws txawm muab nws cev tsoos tsho niam vajntxwv los hnav mus sawv hauv chav uas nyob hauv vajntxwv lub loog, thiab nws tig xubntiag mus rau ntawm vajntxwv lub zwmtxwv. Vajntxwv zaum saum nws lub zwmtxwv tig xubntiag tuaj rau ntawm txojkev uas tuaj rau hauv lub loog. Thaum vajntxwv pom niam Vajntxwv Exethaws sawv hauv chav ntawd, vajntxwv txaus siab rau nws heev, ces vajntxwv txawm cev hlo nws tus cwj kub mus rau Exethaws. Ces Exethaws thiaj txav zog los tuav nkaus tus cwj kub ntawd. Vajntxwv nug hais tias, “Niam Vajntxwv Exethaws, koj muaj dabtsi? Qhia kuv saib koj xav yuav dabtsi, txawm yog koj xav yuav lub tebchaws uas kuv kav no ib nrab los kuv yeej yuav muab kom tau rau koj.” Exethaws teb hais tias, “Yog txaus vajntxwv siab, hmo no kuv xav kom koj thiab Hamas tuaj koom kuv rooj mov uas kuv npaj rau neb tuaj noj.” Vajntxwv thiaj hais kom Hamas kavtsij tsawg tsuag tuaj, nkawd yuav mus noj Exethaws rooj mov. Yog li ntawd, vajntxwv thiab Hamas thiaj mus noj Exethaws rooj mov ntawd. Thaum uas nkawd tseem tabtom haus cawv txiv hmab, vajntxwv nug Exethaws hais tias, “Qhia kuv saib koj xav yuav dabtsi, kuv yuav muab kom tau rau koj. Txawm yog koj thov yuav lub tebchaws uas kuv kav no ib nrab los kuv yeej yuav txaus siab muab rau koj.” Exethaws teb hais tias, “Tej uas kuv xav tau thiab kuv thov, mas yog li no: Yog vajntxwv txaus siab, thiab yog tej uas kuv thov ntawd haum vajntxwv siab thiab ua kom kuv tej lus thov ntawd tiav, thov kom tagkis koj thiab Hamas rov qab tuaj noj dua kuv ib rooj mov uas kuv npaj rau koj. Thaum lub sijhawm ntawd kuv mam qhia tej uas kuv xav tau rau koj.” Thaum Hamas noj mov tas thiab sawv tawm mus lawm, nws zoo siab kawg li. Tiamsis thaum uas Hamas pom Maudekhais nyob ntawm vajntxwv lub roojloog, Maudekhais tsis sawv hawm thiab txhos caug pe nws, ces nws txawm chim heev rau Maudekhais. Txawm li ntawd los Hamas ua tiag tswj kom tau nws lub siab thiab taug kev mus tsev lawm. Hamas thiaj li caw nws cov phoojywg tuaj rau hauv nws tsev, thiab kom Xeles uas yog nws tus pojniam los koom nrog lawv. Hamas txawm khav nws lub neej uas npluanuj, muaj tub coob, thiab qhov uas vajntxwv muab nws tsa ua tus nom loj, thiab tseemceeb tshaj vajntxwv tej nomtswv huv tibsi. Thiab Hamas hais ntxiv hais tias, “Niam Vajntxwv Exethaws yeej tsis caw leejtwg nrog vajntxwv mus noj nws rooj mov li, tsuas yog caw kuv tib leeg nrog vajntxwv mus noj xwb, thiab nws tseem caw kom tagkis kuv rov qab nrog vajntxwv mus noj mov dua thiab. Tiamsis tej no tsis muaj qabhau dabtsi rau kuv hlo li, yog thaum uas kuv tseem pom Maudekhais uas yog tus neeg Yudais tuaj zaum ntawm vajntxwv lub loog.” Ces Hamas tus pojniam thiab nws cov phoojywg txawm hais rau nws hais tias, “Cia li mus txhos ib tus ncej dai neeg kom siab tsib caug tshim, thiab tagkis sawv ntxov koj kavtsij mus thov vajntxwv muab Maudekhais dai cajdab rau saum tso, koj mam li nrog vajntxwv mus noj haus zoo siab xwb.” Hamas txaus siab rau cov lus uas lawv hais ntawd kawg li. Hamas thiaj li mus txhos tau ib tug ncej dai neeg. Hmo ntawd vajntxwv pw tsis tsaug zog li, thiab nws hais kom nqa phau ntawv uas teev tej xwmtxheej hauv lub tebchaws uas nws kav ntawd los, thiab lawv muab nyeem rau nws mloog. Lawv txawm nyeem tau zaj uas sau hais txog Maudekhais qhia txog qhov uas Npithanas thiab Teles uas yog vajntxwv ob tug nraug sam uas zov chav tsev vajntxwv nyob, tau ntxeev siab yuav muab Vajntxwv Xawxes tua povtseg ntawd. Vajntxwv nug hais tias, “Peb twb muab yeebkoob thiab nqi zog rau Maudekhais, qhov uas nws ua no lawm los tsis tau?” Vajntxwv cov nomtswv teb hais tias, “Yeej tsis tau muab ib yam dabtsi rau nws hlo li.” Vajntxwv nug ntxiv hais tias, “Kuv cov nomtswv puas muaj leejtwg tuaj nyob hauv lub loog no.” Thaum ntawd Hamas tabtom tuaj txog ntawm lub tshavpuam hauv vajntxwv lub loog; nws tuaj thov vajntxwv kom muab Maudekhais coj mus dai cajdab rau saum tus ncej uas nws npaj tau lawm. Vajntxwv cov tubtxib teb nws hais tias, “Hamas nyob ntawm no, nws sawv ntawm tshavpuam tos xav ntsib koj.” Vajntxwv hais tias, “Mus coj nws los hauv no.” Yog li ntawd, Hamas thiaj los thiab vajntxwv nug nws hais tias, “Muaj ib tug neeg uas kuv xav muab yeebkoob rau heev. Kuv yuav ua li cas thiaj tsimnyog rau tus txivneej no?” Hamas txawm xav twjywm hais tias, “Tseem yuav muaj leejtwg uas vajntxwv xav muab yeebkoob rau tshaj kuv lawm thiab? Tsuas yog kuv tib leeg lawm xwb.” Ces kom koj ib tug nomtswv uas loj dua cov muab koj cev tsoos tsho ntev kho rau tus uas koj yuav muab yeebkoob rau ntawd hnav, thiab muab koj tus nees rau nws caij, coj nws taug kev mus rau hauv plawv nroog, qw hais tias, ‘Tus txivneej no yog tus uas vajntxwv txaus siab muab yeebkoob rau nws!’ ” Ces vajntxwv hais rau Hamas hais tias, “Koj cia li mus muab cev tsoos tsho ntev thiab kuv tus nees los ua raws li uas koj hais ntawd ntag, thiab muab yeebkoob rau Maudekhais tus uas yog neeg Yudais, uas zaum ntawm lub roojloog. Yuav tsum ua txhua yam uas koj hais ntawd rau nws tsis txhob tseg ib yam li.” Yog li ntawd, Hamas thiaj mus muab cev tsoos tsho ntev thiab cab vajntxwv tus nees los, muab cev tsoos tsho ntev kho rau Maudekhais hnav thiab muab tus txiv nees rau Maudekhais caij taug kev mus rau hauv plawv nroog, thiab qw tshaj tawm hais tias, “Tus txivneej uas vajntxwv txaus siab muab yeebkoob rau yog tus no ntag.” Ces Maudekhais rov qab los rau ntawm vajntxwv lub roojloog. Tiamsis Hamas cia li muab ntaub npog nws ntsejmuag maj ceev nrooj rov qab mus tsev, tu siab thiab txajmuag kawg li. Hamas piav txhua yam uas tshwmsim los rau nws ntawd rau Xeles uas yog nws tus pojniam thiab nws cov phoojywg mloog. Ces nws tus pojniam thiab nws cov phoojywg uas ntse hais rau nws hais tias, “Yog thaum pib no koj twb tsis yeej Maudekhais uas yog neeg Yudais lawm, ces koj yuav swb nws xwb, nws yeej yuav kovyeej koj.” Thaum uas lawv tseem tabtom sib tham li ntawd, ces vajntxwv cov nraug sam txawm tuaj txog ntua thiab coj Hamas ceev nrooj mus noj Exethaws rooj mov. Ces vajntxwv thiab Hamas nkawd thiaj rov ua ke mus nrog niam Vajntxwv Exethaws noj mov zaum ob. Thaum nkawd tabtom haus cawv txiv hmab, vajntxwv rov nug Exethaws dua ntxiv hais tias, “Niam Vajntxwv Exethaws, koj xav yuav dabtsi? Qhia rau kuv, kuv yuav muab pub rau koj. Txawm yog koj xav yuav lub tebchaws uas kuv kav no ib nrab los kuv yeej yuav muab rau koj.” Niam Vajntxwv Exethaws teb hais tias, “Vajntxwv, yog koj txaus siab rau kuv thiab txaus siab yuav pub rau kuv tiag, mas thov tseg kuv txojsia thiab tseg kuv haivneeg txojsia. Vim kuv thiab kuv haivneeg twb raug muab muag coj mus tua povtseg kom puastsuaj tu noob nrho li lawm. Yog hais tias peb raug muag mus ua tubqhe thiab ntxhais qhev xwb, ces kuv yeej ua twjywm thiab tsis tuaj tabkaum koj txog tej ntawd hlo li, tiamsis twb yog peb yuav raug tua kom puastsuaj tas, kuv thiaj li muab hais qhia rau koj paub!” Ces Vajntxwv Xawxes nug niam Vajntxwv Exethaws hais tias, “Leejtwg yog tus yuav ua li ntawd? Thiab tus ntawd nyob qhov twg?” Exethaws teb hais tias, “Peb tus yeebncuab thiab tus neeg uas tsimtxom peb, yog tus nyuag Hamas uas siab phem no ntag!” Ces Hamas ntshai vajntxwv thiab niam vajntxwv kawg nkaus li. Ces vajntxwv txawm sawv tsees ntawm rooj mov npautaws vog tawm plaws mus rau nraum vajntxwv lub vaj lawm; tiamsis Hamas tseem nyob ntawd thov kom niam Vajntxwv Exethaws tseg nws txojsia, vim Hamas paub hais tias vajntxwv yeej yuav rau txim rau nws txog zaj no xwb. Thaum uas vajntxwv rov qab nram lub vaj los rau hauv chav tsev uas lawv haus cawv, nws pom Hamas tseem pe khwb rwg ntxis rau saum lub rooj uas Exethaws nyob thov kev hlub. Thaum vajntxwv pom Hamas ua li ntawd, vajntxwv thiaj li qw hais tias, “Tus nyuag neeg no tseem yuav muab niam vajntxwv yuam tabmeeg rau kuv pom hauv kuv lub loog no thiab los?” Thaum vajntxwv hais li ntawd tagnrho xwb, vajntxwv cov nraug sam twb muab ntaub qhwv nkaus Hamas taubhau. Ces lawv cov ntawd, tus uas npe hu ua Hanpaunas txawm hais tias, “Hamas txhos tau ib tug ncej dai neeg siab tsib caug tshim rau ntawm nws tog tsev yuav cia dai Maudekhais tus uas tau cawm vajntxwv txojsia.” Vajntxwv thiaj hais tias, “Cia li coj Hamas mus dai rau ntawm tus ncej ntawd ntag.” Yog li ntawd, Hamas thiaj raug coj mus dai rau saum tus ncej uas nws txhos cia dai Maudekhais. Ces vajntxwv txojkev chim thiaj nqig lawm. Hnub ntawd, Vajntxwv Xawxes muab Hamas uas yog cov Yudais tus yeebncuab lub tsev thiab tej cuabtxhiaj cuabtam pub huv tibsi rau niam Vajntxwv Exethaws. Exethaws thiaj hais qhia rau vajntxwv hais tias Maudekhais yog nws neejtsa uas txheeb heev. Txij thaum ntawd los vajntxwv thiaj pub Maudekhais mus cuag tau vajntxwv. Vajntxwv thiaj hle nws ntiv nplhaib uas yog nws lub homthawj (uas nws muab ntawm Hamas rov los) thiab muab rau Maudekhais. Exethaws muab Maudekhais tsa ua tus saib tagnrho Hamas tej qubtxeeg qubteg. Ces Exethaws rov qab mus thov vajntxwv dua ib zaug ntxiv; nws qhau cev hlo ntawm vajntxwv kotaw thov thiab quaj ua kua muag poob dawb vog. Nws thov kom vajntxwv muab Hamas uas yog Ankas, tus xeebntxwv tej kev npaj siab uas yuav muab cov Yudais tua kom puastsuaj tu noob ntawd txwv tseg. Ces vajntxwv thiaj cev nws tus cwj kub rau Exethaws, ces Exethaws txawm sawv tsees thiab hais tias, “Yog vajntxwv hlub kuv thiab tej lus uas kuv thov ntawd haum vajntxwv siab, thov vajntxwv hais kom muab tsab ntawv uas Hamedathas tus tub Hamas uas yog Ankas tus xeebntxwv sau xa tawm mus hais kom muab cov neeg Yudais uas nyob rau hauv lub tebchaws uas vajntxwv kav tua povtseg huv tibsi ntawd rhuav povtseg. Kuv yuav ua li cas nyiaj taus saib kuv haivneeg raug kev puastsuaj thiab cia kuv cov neejtsa raug tua tuag tas?” Vajntxwv Xawxes thiaj hais rau niam Vajntxwv Exethaws thiab Maudekhais uas yog neeg Yudais hais tias, “Kuv twb muab Hamas lub tsev thiab tej cuabtxhiaj cuabtam cob rau Exethaws, thiab kuv twb hais kom lawv muab Hamas dai cajdab tuag lawm, vim nws tuav tswvyim muab cov Yudais tua povtseg ntawd. Neb cia li sau ib tsab ntawv raws li neb siab nyiam, ua vajntxwv npe thiab muab kuv lub nplhaib homthawj nias rau tsab ntawv ntawd, xa mus thoob plaws rau cov Yudais. Rau qhov tsab ntawv uas Hamas sau kuv lub npe thiab muab kuv lub homthawj nias rau ntawd lawm, mas yeej thim tsis tau rov qab li lawm.” Ces thaum uas txog lub peb hlis ntuj uas yog hli Xivas hnub nees nkaum peb, Maudekhais thiaj hu cov nomtswv uas ua ntaub ntawv tuaj cuag nws, thiab nws hais kom lawv cov tub sau ntawv sau raws li uas nws hais rau cov Yudais, thiab coj cov nomtswv loj uas nyob hauv txhua lub xeev thiab txhua tus nomtswv hauv ib puas nees nkaum xya lub xeev uas vajntxwv ua tus kav. Yog suav txij ntua ntawm tebchaws Eedias mus txog ntua tebchaws Sudas. Lawv sau ua txhua yam lus raws li yam lus uas luag siv nyob hauv lub tebchaws ntawd. Thiab lawv sau ua cov Yudais tej lus rau cov neeg Yudais. Maudekhais thiaj sau tsab ntawv ntawd ua Vajntxwv Xawxes npe, muab vajntxwv lub nplhaib homthawj nias rau, thiab muab cov ntawv ntawd rau cov tub xa ntawv uas caij nees khiav ceev heev, caij vajntxwv cov nees xa tsab ntawv ntawd mus. Cov lus uas sau rau hauv tsab ntawv no vajntxwv tso ncauj rau cov Yudais uas nyob rau txhua lub nroog kom cia li sib sau ua ke, thiab tiv thaiv lawv txojsia. Yog txhua haivneeg uas nyob hauv txhua lub xeev tso tubrog tuaj tua cov Yudais thiab lawv tej pojniam lossis menyuam; kom cov Yudais cia li tig tua thiab rhuav tshem cov yeebncuab ntawd kom tuag tu noob nrho tsis pub seem ib tug li, thiab txeeb lawv tej cuabtxhiaj cuabtam mus huv tibsi. Hnub uas cov Yudais yuav tawmtsam lawv cov yeebncuab nyob thoob plaws rau hauv tebchaws Pawxias, yog lub kaum ob hlis uas yog lub hli Adas hnub kaum peb. Hnub ntawd yog hnub uas Hamas teem cia tua cov neeg Yudais kom tuag tu noob. Thiaj muab tsab ntawv ntawd ua ib txoj kevcai tshaj tawm mus thoob plaws rau txhua tus pejxeem uas nyob rau hauv txhua lub xeev kom hnub ntawd cov Yudais thiaj npaj tau txhij tig rov tawmtsam lawv cov yeebncuab. Vajntxwv thiaj samhwm kom cov xa ntawv caij vajntxwv cov nees khiav ceev heev xa tsab ntawv ntawd mus rau txhua qhov txhia chaw. Thiab kavtsij muab tsab ntawv ntawd nyeem rau cov pejxeem sawvdaws uas nyob hauv lub tuamceeb nroog Susas paub. Thaum uas Maudekhais tawm hauv vajntxwv lub loog mus, nws hnav cev tsoos tsho vajntxwv txaij xiav thiab txaij dawb, ntoo lub kausmom kub thiab hnav lub tsho ntev uas yog ntaubmag xiav. Ces cov neeg uas nyob hauv lub nroog Susas qw zoo siab heev. Ces cov Yudais thiaj tau nyob kaj siab lug, tso siab plhuav thiab xyivfab hlo, vim lawv yeej lawm tiag. Txhua lub xeev thiab txhua lub nroog uas muab vajntxwv tsab ntawv mus nyeem rau hnov, mas cov Yudais zoo siab heev. Thiab lawv npaj muaj rooj noj rooj haus loj rau hnub uas muaj kev zoo siab ntawd. Thiab muaj neeg coob heev cia li kiav xeem los ua neeg Yudais, rau qhov lawv ntshai cov neeg Yudais heev. Thaum txog hnub kaum peb lub kaum ob hli uas yog lub hli Adas, yog hnub uas yuav ua raws li vajntxwv tau samhwm tseg rau hauv nws tsab ntawv, thiab yog hnub uas cov Yudais cov yeebncuab cia siab hais tias lawv yuav yeej cov Yudais, tiamsis hnub ntawd cia li hloov mus ua hnub uas cov Yudais yeej lawv cov yeebncuab lawm. Cov Yudais thiaj tuaj sib sau ua ke tagnrho rau hauv lawv tej nroog thiab hauv txhua lub xeev uas vajntxwv kav, npaj tawmtsam cov yeebncuab uas tuaj tua lawv, thiab tsis muaj leejtwg yuav tiv tau cov Yudais li, rau qhov cov neeg uas nyob txhua txhia qhov chaw puavleej ntshai cov Yudais heev. Tagnrho cov nomtswv ntawm txhua lub xeev, tsis hais txhua tus tswvxeev, txhua tus tub tsavxwm, thiab tagnrho vajntxwv cov nomtswv txhua tus puavleej pab cov Yudais, vim lawv ntshai nyob tsam Maudekhais muab lawv tua povtseg. Maudekhais tau ua tus loj nyob hauv vajntxwv lub loog, thiab nws lub koob lub npe nrov ncha moo lug mus thoob plaws txhua lub xeev thiab Maudekhais muaj hwjchim loj zuj zus tuaj. Cov Yudais thiaj muab ntaj tua thiab lawv cov yeebncuab tuag tagnrho, thiab lawv ua txaus nkaus raws li lawv siab nyiam rau cov neeg uas ntxub lawv. Nyob hauv lub tuamceeb nroog Susas nkaus xwb cov Yudais tua lawv cov yeebncuab tuag lawm tsib puas leej txivneej. Tib hnub ntawd muaj neeg mus qhia rau vajntxwv paub txog cov neeg uas raug tua tuag tas hauv lub tuamceeb nroog Susas saib coob npaum twg. Ces vajntxwv hais rau niam Vajntxwv Exethaws hais tias, “Nyob hauv lub tuamceeb nroog Susas nkaus xwb cov Yudais tua cov yeebncuab tuag lawm tsib puas leej txivneej uas yog xam Hamas kaum leej tub nrog thiab. Dua li lwm lub xeev, xyov lawv tua tuag lawm npaum twg tseem tsis tau paub! Nimno koj xav yuav dabtsi? Koj yeej yuav tau yam ntawd. Qhia rau kuv saib koj xav yuav dabtsi, kuv yuav muab kom tau rau koj.” Exethaws teb hais tias, “Yog haum Vajntxwv siab, tagkis, thov cia cov Yudais uas nyob hauv lub nroog Susas rov ua dua ib zaug ntxiv li uas hnub no koj tau tso cai rau lawv ua tas lawm. Thov muab Hamas kaum leej tub ntawd cov cev tuag coj mus dai rau ntawm cov ncej dai cajdab thiab.” Yog li ntawd, Vajntxwv thiaj samhwm kom cia li ua raws li ntawd, thiab ua ib tsab ntawv xa mus rau hauv lub nroog Susas tshaj tawm kom muab Hamas kaum leej tub ntawd coj mus dai rau ntawm cov ncej dai cajdab. Hnub kaum plaub uas yog lub hli Adas cov Yudais hauv lub nroog Susas thiaj sib sau ua ke thiab rov mus tua cov neeg hauv lub nroog Susas tuag peb puas leej ntxiv. Tiamsis lawv tsis huab ib yam khoom dabtsi hlo li. Cov Yudais uas nyob rau hauv txhua lub xeev kuj sib sau mus ua ke thiab tiv thaiv lawv cov neeg txojsia kom dim ntawm cov yeebncuab. Thiab lawv tua cov yeebncuab uas ntxub lawv tuag lawm xya caum tsib txhiab leej. Tiamsis lawv tsis huab tej khoom noj thiab lwm yam khoom hlo li. Tej no yog tshwm muaj rau hnub kaum peb uas yog lub hlis Adas, thiab hnub kaum plaub, lawv so thiab muab hnub ntawd ua hnub uas lawv noj haus thiab muaj kev zoo siab. Tiamsis cov Yudais uas nyob hauv lub nroog Susas los sib sau ua ke hnub kaum peb thiab kaum plaub tua lawv cov yeebncuab, thiab lawv so rau hnub kaum tsib, muab hnub ntawd ua hnub uas lawv noj haus thiab muaj kev zoo siab. Yog li ntawd, cov Yudais uas nyob hauv tej zos thiab tej nroog thiaj li so rau hnub kaum plaub uas yog lub hlis Adas ntawd. Thiab lawv thiaj li noj haus thiab ua kev lomzem zoo siab rau hnub ntawd. Lawv ib leeg coj zaub mov mus pub rau ib leeg noj. Maudekhais muab tej xwm no sau rau hauv ntawv thiab xa mus txhua nrho rau cov Yudais uas nyob rau txhua lub xeev uas Vajntxwv Xawxes kav, tsis hais nyob deb lossis nyob ze kom lawv muab hnub kaum plaub thiab kaum tsib uas yog lub hlis Adas ntawm txhua lub xyoo los ua hnub so. Ob hnub no yog ob hnub uas cov Yudais dim ntawm lawv cov yeebncuab, thiab yog lub hli uas muab kev tu siab hloov los ua kev kaj siab thiab muab kev quaj ntsuag hloov los ua kev luag zoo siab; kom lawv nco ntsoov muab hnub ntawd ua ib hnub noj haus zoo siab, hnub ntawd lawv ib leeg coj zaub mov mus pub rau ib leeg thiab pub rau cov pluag. Cov pejxeem Yudais txaus siab ua raws li tsab ntawv uas Maudekhais sau xa tuaj rau lawv. Cov Yudais thiaj li niaj xyoo ua kevcai nco txog qhov uas lawv twb pib ua muaj los ntawd lawm. Hamedathas tus tub Hamas uas yog Ankas tus xeebntxwv uas yog cov Yudais tus yeebncuab tau tuav tswvyim yuav muab cov Yudais tua povtseg, nws thiaj rho ntawv xam hnubnyoog (uas lawv hu ua “Pulees,”) yuav muab cov Yudais tua kom tu noob. Tiamsis Exethaws mus thov vajntxwv, vajntxwv thiaj sau ntawv samhwm kom muab Hamas tej tswvyim uas tuavhauv ua phem rau cov Yudais ntawd tig rov los raug nws. Yog li ntawd, nws thiab nws cov tub thiaj li raug muab dai cajdab tas. Twb yog vim li no lawv thiaj muab ob hnub so ntawd hu ua Pulees, txhais hais tias, “rho ntawv.” Rau qhov yog Maudekhais tsab ntawv thiab txhua yam uas muaj tshwmsim rau cov Yudais, Cov Yudais thiaj muab zaj no los ua ib txoj kevcai rau lawv, lawv tej xeebntxwv thiab txhua tus neeg uas tau los kiav xeem ua neeg Yudais lawm coj kom yuav tsum tau niaj xyoo muab ob hnub no los ua ob hnub so raws li uas Maudekhais tau hais tseg cia lawm. Qhov no yuav ua rau cov Yudais nco ntsoov ob hnub uas ua koobtsheej Pulees no mus txhua tiam, txhua yim neeg, txhua lub xeev thiab txhua lub nroog, yuav nco ntsoov thiab coj txoj kevcai no mus ibtxhis li. Ces niam Vajntxwv Exethaws uas yog Anpihais tus ntxhais, thiab Maudekhais thiaj sau dua ib tsab ntawv lees paub tsab ntawv uas Maudekhais xub sau lawm, kom nco ntsoov ua kevcai Pulees. Maudekhais thiaj muab tsab ntawv no xa mus rau cov Yudais txhua tus, xa mus thoob plaws ib puas nees nkaum xya lub xeev hauv tebchaws Pawxias uas Vajntxwv Xawxes kav thiab foom koob hmoov rau cov Yudais kom muaj kev thajyeeb thiab tau zoo nyob kaj siab lug, thiab kom coj txoj kevcai ua koobtsheej Pulees raws li lub caij lub nyoog uas lawv twb tau teem tseg raws li uas Maudekhais uas yog neeg Yudais thiab niam Vajntxwv Exethaws tau samhwm rau cov Yudais; thiab coj raws li txoj kevcai yoo mov thiab txoj kevcai quaj ntsuag uas nkawd tau teem tseg rau nkawd thiab nkawd tej xeebntxwv lawm. Txoj kevcai koobtsheej Pulees uas Exethaws tau samhwm kom muaj ntawd, tau muab teev tseg cia rau hauv thooj ntawv lawm. Vajntxwv Xawxes samhwm kom hu cov pejxeem uas nyob thoob plaws hauv lub tebchaws uas nws kav thiab cov uas nyob raws ntug hiavtxwv kom tuaj ua haujlwm rau nws. Txhua yam haujlwm tseemceeb uas yog nws lub hwjchim thiab nws lub zog loj zog nchav ua, thiab qhov uas nws tsa Maudekhais ua ib tug nom loj puavleej muab sau tseg cia rau hauv Phau Ntawv Xwmtxheej vajntxwv uas teev cov Pawxias thiab Medias tej vajntxwv lub neej lawm. Maudekhais uas yog neeg Yudais tau los ua Vajntxwv Xawxes ib tug nomtswv loj, tsuas yog vajntxwv tib leeg thiaj li ua tus loj tshaj Maudekhais xwb. Nws cov kwvtij Yudais puavleej txaus siab thiab hwm nws, vim nws pab kom nws haivneeg thiab lawv tej xeebntxwv tau nyob ruaj khov thiab muaj kev thajyeeb. Muaj ib tug txivneej npe hu ua Yauj nyob hauv lub tebchaws Uxes, nws hwm thiab muab siab npuab Vajtswv. Nws yog neeg zoo thiab tsis ua kev phem kev qias. Nws muaj xya tus tub thiab peb tug ntxhais, muaj xya txhiab tus yaj, peb txhiab tus ntxhuav, ib txhiab tus nyuj, tsib puas tus neesluav thiab muaj tubtxib coob heev. Nws yog tug uas npluanuj tshaj plaws nyob sab Hnubtuaj. Yauj cov tub sib hloo nto ua rooj noj rooj haus; ib tug ua ces sawvdaws tuaj koom thiab caw lawv cov muam tuaj nrog lawv noj lawv haus. Txhua zaus uas lawv noj haus tas, tagkis tom qab Yauj sawv ntxov muab tsiaj mus tua hlawv fij ua kevcai daws nws cov menyuam tej kev txhaum. Nws niaj zaus ua kevcai daws kev txhaum li ntawd rau nws cov menyuam, rau qhov nws ntshai nyob tsam nws cov menyuam ua txhaum rau Vajtswv. Muaj ib hnub cov timtswv ceebtsheej tuaj cuag tus TSWV, Ntxwgnyoog los kuj tuaj nrog lawv nyob ntawd thiab. Tus TSWV nug Ntxwgnyoog hais tias, “Koj mus dabtsi los?” Ntxwgnyoog teb hais tias, “Kuv mus ncig ntuj ncig teb los xwb.” Tus TSWV nug hais tias, “Koj puas pom Yauj uas yog kuv tus tubtxib? Tej neeg uas nyob hauv ntiajteb tsis muaj ib tug ua zoo thiab muab siab npuab kuv li nws. Nws hwm kuv thiab tsis ua kev phem kev qias li.” Ntxwgnyoog teb hais tias, “Yog koj tsis pub nws muaj ib yam dabtsi li, nws puas tseem yuav hwm koj?” Koj yeej ibtxwm tsomkwm nws, nws tsevneeg thiab txhua yam uas nws muaj. Koj foom koob hmoov rau txhua yam uas nws ua thiab pub rau nws muaj tsiaj txhu coob ua npoj ntws puv toj puv pes. Tiamsis nimno yog koj muab txhua yam uas nws muaj tshem huv tibsi mus, nws yuav cem nkaug tes nkuav rau koj ntag! Tus TSWV hais rau Ntxwgnyoog hais tias, “Koj yuav ua li cas rau txhua yam uas nws muaj los tau, tiamsis koj tsis txhob kov nws li.” Ces Ntxwgnyoog txawm mus lawm. Muaj ib hnub thaum Yauj cov menyuam tabtom noj haus nyob hauv tus tijlaug hlob lub tsev, txawm muaj ib tug tubtxib khiav los qhia rau Yauj hais tias, “Thaum peb tabtom muab nyuj laij teb, thiab tej neesluav tseem noj zaub zom zaws ibncig ntawm peb, ces tamsim ntawd cov neeg Xanpees txawm tuaj tua thiab txeeb tagnrho tej nyuj thiab tej neesluav huv tibsi cab mus lawm. Lawv muab koj cov tubtxib tua tuag tas, tsuas tshuav kuv tib leeg khiav dim los qhia koj xwb.” Thaum tus ntawd tseem hais tsis tau tas, txawm siv muaj dua ib tug tubtxib khiav los qhia hais tias, “Xob tua koj tej yaj thiab cov tub yug yaj tuag tas, tsuas tshuav kuv tib leeg dim los qhia koj xwb.” Thaum tus ntawd tseem hais tsis tau tas, ho muaj dua ib tug tubtxib khiav los qhia hais tias, “Muaj peb pab neeg Khadees tuaj tua peb, lawv txeeb tagnrho tej ntxhuav thiab tua koj cov tubtxib tuag tas, tsuas tshuav kuv tib leeg dim los qhia koj paub xwb.” Thaum tus ntawd tseem hais tsis tau tas, rov muaj dua ib tug tubtxib khiav los qhia hais tias, “Koj cov menyuam tseem tabtom noj haus hauv koj tus tub hlob lub tsev, muaj cua daj cua dub ntsawj tom tiaj suabpuam tuaj ua rau lub tsev vau los ntaus koj cov menyuam tuag tas, tsuas tshuav kuv tib leeg dim los qhia koj paub xwb.” Thaum Yauj hnov li ntawd, nws sawv tsees dua rhe nws lub tsho thiab tu siab heev. Yauj muab nws cov plaubhau chais thiab pw nthi rau hauv av. Yauj hais tias, “Kuv niam yug kuv los liabqab li cas, ces kuv yuav rov mus liabqab ib yam li ntawd. Tus TSWV muab txhua yam rau kuv, nimno tus TSWV coj rov qab. Thov kom sawvdaws qhuas nws lub npe.” Txawm yog muaj tej xwm no los raug Yauj los nws tsis tau ua txhaum lossis liam txim rau Vajtswv li. Muaj ib hnub cov timtswv ceebtsheej tuaj cuag tus TSWV dua, Ntxwgnyoog kuj tuaj nrog lawv nyob ntawd thiab. Tus TSWV nug Ntxwgnyoog hais tias, “Koj mus dabtsi los?” Ntxwgnyoog teb hais tias, “Kuv mus ncig ntuj ncig teb los xwb.” Tus TSWV nug hais tias, “Koj puas pom Yauj uas yog kuv tus tubtxib? Tej neeg uas nyob hauv ntiajteb tsis muaj ib tug ua zoo thiab muab siab npuab kuv npaum li nws. Nws hwm kuv thiab tsis ua kev phem kev qias li. Twb tsis muaj qabhau dabtsi los koj thov kuv cia koj mus tawmtsam Yauj, tiamsis nws tseem muab siab npuab kuv ib yam li nws ibtxwm ua.” Ntxwgnyoog teb hais tias, “Neeg yeem tso txhua tsav yam tseg kom nws tau txojsia xwb. Tiamsis nimno yog koj ua rau nws lub cev muaj mob, nws yeej yuav cem nkaug tes nkuav rau koj ntag!” Yog li ntawd, tus TSWV thiaj hais rau Ntxwgnyoog hais tias, “Koj yuav ua li cas rau nws los tau, tiamsis koj tsis txhob txov nws txojsia.” Ntxwgnyoog txawm ncaim ntawm tus TSWV mus thiab ua rau Yauj mob ua paug viag thoob plaws ibce. Yauj mus zaum ntawm cub tshau thiab muab ib daim txhais laujkaub av los kuam nws tej qhov txhab. Yauj tus pojniam hais rau Yauj hais tias, “Koj tseem muab siab npuab koj tus Vajtswv li uas koj ibtxwm ua thiab los? Ua li cas koj tsis cem koj tus Vajtswv thiab tuag mus?” Yauj teb hais tias, “Ua cas koj hais lus li tus pojniam uas tsis paub qabhau! Thaum Vajtswv pub tej uas zoo rau peb, peb twb zoo siab hlo yuav, tiamsis thaum Vajtswv cia peb raug kev txomnyem, peb txawm ho yuav yws no los?” Txawm yog Yauj raug kev txomnyem npaum li ntawd los nws tsis tawmtsam Vajtswv li. Thaum Yauj peb tug phoojywg uas yog Elifas uas yog neeg Temas, Npiledas uas yog neeg Suas, thiab Xaufes uas yog neeg Namas hnov hais tias Yauj mob txomnyem kawg li, lawv txawm tuaj nplig Yauj siab. Thaum lawv tuaj deb pom Yauj, lawv tsis paub nws lawm. Thaum lawv paub hais tias yog Yauj tiag, lawv txawm tsa suab hlo quaj, dua lawv tej tsho, tsuab hmoov av rau saum lawv taubhau thiab w rau saum nruab ntug. Lawv tuaj nrog Yauj zaum hauv av li ntawd tau xya hnub xya hmo tsis hais ib lo lus li, rau qhov lawv pom Yauj txomnyem heev. Thaum kawg Yauj tsa suab foom hnub uas yug nws. Vajtswv, thov koj cia hnub ntawd tsaus ntuj nti. Thov tsis txhob nco txog hnub ntawd thiab tsis txhob pub muaj duab ci rau hnub ntawd. Thov kom hnub ntawd tsaus ntuj ntom nti; Thov tso huab laum hnub ntawd ua kom lub hnub tsaus dub nciab. Thov muab hmo ntawd tshem tawm ntawm lub xyoo mus; tsis txhob suav hmo ntawd li lawm; thov kom hmo ntawd tsis txhob xeeb taus menyuam thiab tsis txhob muaj kev zoo siab. Hais kom tej txivneeb txivyaig thiab tej neeg uas txawj ua rau Levi-athas tawm tuaj foom tsis zoo rau hnub ntawd. Thov kom lub hnubqub uas ci thaum sawv ntxov qauj mus; thov kom hmo ntawd tsis txhob kaj ntug; thov foom tsis zoo rau hmo uas kuv yug los, rau qhov hmo ntawm cia kuv niam xeeb kuv, kuv thiaj raug kev txomnyem. “Kheev lam kuv tuag thaum kuv tseem nyob hauv kuv niam plab lossis tuag thaum yug poob nthav los. Ua li cas kuv niam tseem tau puag kuv rau ntawm nws lub xubntiag? Ua cas nws tseem tau pub mis rau kuv noj? Yog kuv ntxov tuag, ces nimno kuv twb tau so thiab tau mus pw tsaug zog ib yam li tej vajntxwv thiab tej nomtswv uas txhim kho tej loog uas nyob tiam thaum ub. Ces kuv twb tau pw tsaug zog ib yam li tej nomtswv uas muaj nyiaj muaj kub puv nkaus lawv tej tsev, lossis tau pw tsaug zog ib yam li tus menyuam uas tuag thaum tseem nyob nruab thiab. Thaum nyob hauv qhov ntxa tej neeg siab phem yuav tsis ua kev phem kev qias lawm, thiab tej neeg uas tsaug leeg vim ua haujlwm sab yuav tau so. Tej neeg raug txim yuav tau zoo nyob tsis ntxhov siab, lawv tsis hnov tus uas saib lawv lub suab nthe lawm. Tej neeg uas muaj koob meej thiab tej uas tsis muaj koob meej puavleej nyob qhov ntawd, thiab tej tubtxib yuav dim plaws txojkev ua luag qhev. “Ua li cas cia tus neeg txomnyem ua neej nyob lwj siab ntsuav? Ua li cas cia tus neeg quaj ntsuag pom qhov kaj? Lawv tos ntsoov txojkev tuag, tiamsis kev tuag tsis los li; lawv ntshaw lub qhov ntxa heev dua ntshaw nyiaj thiab kub. Lawv tsis muaj kev zoo siab mus txog hnub uas lawv tuag thiab coj lawv mus faus; Vajtswv thaiv lawv txoj hauv kev, thiab xov puagncig tsis pub lawv tawm. Kuv tej kua muag yog zaub mov rau kuv noj, thiab kuv lub suab ntsaj tsis tu li. Tej uas kuv txhawj thiab ntshai txawm los raug kuv. Kuv tsis muaj kev kaj siab, tsis tau so, thiab niaj hnub raug kev txomnyem tsis paub tas li.” Koj twb ntuas tej neeg ntau leej los lawm, thiab txhawb cov neeg uas qaug zog kom muaj zog tuaj. Thaum muaj neeg qaug zog thiab dawm ntog lawm, koj tej lus txhawb tau lawv lub zog. Nimno kev txomnyem los raug koj lawm, koj yuav tsis muaj zog tiv taus tej kev txomnyem ntawd. Koj hwm Vajtswv thiab ua koj lub neej zoo tsis muaj leejtwg thuam tau; tsimnyog koj muab siab npuab thiab cia siab rau tus TSWV. Koj ua tib zoo xav saib tej neeg ncaj ncees yeej tsis muaj ib tug raug kev puastsuaj li. Raws li kuv pom mas tej neeg uas ua kev txhaum, thiab ua kev phem kev qias yeej yuav tau sau tej uas lawv ua ntawd. Vajtswv txojkev chim ua rau lawv raug kev puastsuaj ib yam li nthwv cua daj cua dub los nplawm lawv tej vajtse vau tas. Cov neeg siab phem nthe nrov ib yam li tsov ntxhuav nyooj, tiamsis Vajtswv kaw lawv qhovncauj thiab tsoo lawv tej hniav lov. Lawv yuav tuag ib yam li tej tsov ntxhuav tuag tshaib uas tom tsis tau tsiaj noj, thiab lawv tej menyuam yuav khiav ua sab ua sua tas. “Muaj ib lub suab hais rau kuv; lub suab ntawd hais yau heev kuv twb yuav luag tsis hnov. Lub suab ntawd zoo li yam li zaj npau suav phem uas ua rau kuv tsim dheev nruab dab ntub los. Kuv ntshai ua ibce tshee hnyo; thiab ua rau kuv lub cev tshee laim dais. Muaj ib nthwv cua ntsawj ntxias zias rau kuv lub plhu, ua rau kuv poob siab nthav ibce xob tagnrho. Kuv pom ib yam sawv ntawm kuv hauv ntej; kuv tsa qhovmuag ntsia, tiamsis kuv tsis paub hais tias yog dabtsi. Kuv txawm hnov ib lub suab hais ntawm qhov chaw uas ntsiag to tuaj hais tias, ‘Puas muaj ib tug neeg ncaj ncees tshaj Vajtswv? Lossis puas muaj ib tug neeg dawbhuv tshaj tus TSWV uas Tsim nws? Vajtswv tsis ntseeg nws cov timtswv saum ntuj siab; txawm yog nws cov timtswv los ua txhaum thiab. Koj puas xav hais tias Vajtswv yuav cia siab rau tus uas nws muab av nplaum puab? Tej uas nws muab av puab ntawd tsis ruaj tsis khov ib yam li tus kab npauj uas luag muab zuaj ces yuav mos tas? Thaum sawv ntxov tej neeg tseem ua neej nyob, tiamsis thaum tsis tau tsaus ntuj lawv twb tuag lawm, tsis muaj leejtwg paub. Luag yuav txeeb txhua tsav yam uas lawv muaj mus tas; thaum lawv tseem tsis tau muaj kev txawj ntse lawv twb tuag lawm.’ “Yauj, koj cia li tsa suab hu saib puas muaj leejtwg teb koj? Puas muaj ib tug timtswv nyob qhov twg uas koj yuav mus cuag tau? Tus neeg ruam tuag vim nws txojkev chim, tus neeg tsis paub qabhau tuag vim nws txojkev khib. Kuv pom cov neeg ruam nyob tso siab lug, tiamsis tos nco kuv txawm foom tsis zoo rau lawv tej vajtse lawm. Lawv tej menyuam yuav khiav tsis dim kev txomnyem li; tsis muaj leejtwg yuav pab txheem lawv hauv tsev tu plaub. Cov neeg tshaib plab yuav tau noj cov neeg ruam tej qoobloo, txawm yog tej qoobloo uas tuaj xyaw hmab pos los lawv yuav sau kom tas mus. thiab cov neeg ntshaw nyiaj yuav txeeb lawv tej nyiaj tej kub kom tas. Kev phem kev qias yeej tsis tawm hauv av tuaj, lossis teebmeem yeej tsis tshwm hauv nruab av tuaj li. Tiamsis neeg lob teebmeem los rau ib yam li txim taws ya hauv qhovcub tuaj. “Kheev kuv lam yog koj, kuv twb mus cuag Vajtswv thiab piav kuv tej kev txomnyem rau nws lawm. Peb tsis totaub tej haujlwm tseemceeb uas Vajtswv ua, thiab nws tej txujci tseemceeb muaj ntau heev suav tsis txheeb li. Nws tso nag los rau lub ntiajteb thiab nws ua kom muaj dej yug tej qoobloo hauv tej liaj tej teb. Vajtswv tsa cov neeg uas txo hwjchim lub neej rau qhov siab, thiab pab cov neeg uas muaj kev txhawjxeeb quaj ntsuag kom muaj kev zoo siab. txawm yog nruab hnub nrig los lawv maub ib yam li tsaus ntuj nti. Tiamsis Vajtswv pab cov neeg pluag dim kev ploj kev tuag; thiab nws pab cov neeg txomnyem dim kev tsimtxom. Vajtswv pub cov neeg txomnyem muaj chaw cia siab, tiamsis nws kaw cov neeg ua phem ua qias lub qhovncauj. “Tus uas Vajtswv qhuab qhia, tus ntawd tau koob hmoov; thaum Vajtswv qhuab ntuas koj, koj tsis txhob tu siab. Vajtswv ua rau koj nqaij to, tiamsis nws yuav qhwv koj lub qhov txhab; nws txhais tes nplawm koj, tiamsis nws txhais tes yuav kho koj. Nws niaj hnub yuav cawm kom koj dim kev puastsuaj. Thaum muaj kev tshaib nqhis, nws yuav cawm tsis pub koj tuag, thiab thaum muaj kev tsov kev rog, nws yuav tsomkwm tsis pub koj tuag. Vajtswv yuav pab kom koj tsis txhob raug xaiv raug lus; thiab thaum muaj kev puastsuaj tuaj nws yuav cawm koj. Thaum muaj kev puastsuaj thiab muaj kev tshaib nqhis koj yuav luag, thiab koj yuav tsis ntshai tej tsiaj qus. Tej liaj tej teb uas koj laij yuav tsis muaj pobzeb, thiab tej tsiaj qus yuav tsis tom koj. Koj yuav nyob kaj siab lug hauv koj lub tsevntaub; thaum koj tsa qhovmuag saib koj tej yaj, koj yuav pom txhua tus nyob txhij. Koj yuav muaj xeebntxwv coob ib yam li tej nroj tsuag hauv tiaj nrag. Koj yuav ua neej nyob laus nkoos ib yam li hnab nplej uas siav kus rau lub caij sau qoobloo. Yauj, peb twb pom thiab paub hais tias tej no yog lus tseeb tiag, yog li ntawd, koj cia li khaws nkaus tej no rau nruab siab.” tseem hnyav dua tej suabzeb ntawm ntug hiavtxwv, yog li ntawd, kuv tej lus yuav tsis hnyav rau koj ua luaj twg. Vajtswv tus uas muaj hwjchim loj kawg nkaus muab xubvos tua kuv, mas tej taug huam thoob plaws kuv lub cev. Vajtswv tso nws tej kev nruj tsiv tuaj tawmtsam kuv. “Tus neesluav qus txaus siab heev thaum nws tau zaub noj, thiab thaum nyuj tau zaub noj, nyuj nyob ntsiag to. Leejtwg thiaj noj taus tej nqaij uas tsis rau ntsev? Lub qe txheej dawb puas qab dabtsi? Kuv tsis nqhis tej zaub mov uas zoo li ntawd, thiab txhua yam uas kuv noj ua rau kuv mob. “Vim li cas Vajtswv tsis muab tej uas kuv thov rau kuv? Vim li cas nws tsis teb kuv tej lus thov? Kheev lam Vajtswv muab kuv tua kom tuag! Yog kuv paub hais tias Vajtswv yuav muab kuv tua, txawm yog mob npaum li cas los kuv yeej zoo siab. Kuv paub hais tias Vajtswv yog tus dawbhuv; kuv tsis tau tawmtsam nws tej lus samhwm li. Kuv yuav ua li cas cuab tau zog ua kuv lub neej mus ntxiv? Thaum kuv tsis muaj kev cia siab lawm, yuav ua li cas xav ua neej nyob? Kuv lub cev puas yog pobzeb? Kuv tej txha puas yog tooj? Kuv lub zog ntaug tas pab tsis tau kuv lawm; tsis muaj ib qhov chaw uas kuv yuav vamkhom li. “Thaum raug kev txomnyem nyuaj siab li no, kuv xav tau kev pab ntawm tej phoojywg uas siab dawb siab zoo, tsis hais thaum kuv tso Vajtswv tseg lossis tsis tso. Tiamsis nej cov uas yog kuv phoojywg, nej dag kuv ib yam li lub hav qhuav uas tsis muaj dej thaum lub caij tsis los nag. Yog los daus thiab dej nkoog yuav ua rau dej ntws tsis taus, tiamsis thaum tshav ntuj tuaj ziab, tej dej nkoog yuav yaj tas, thiab tshuav lub kwjha qhuav qhawv cia lawm xwb. Tej neeg uas taug kev mus nrhiav dej haus yuam kev tas; lawv mus mus los los thiab tuag tas rau tom tiaj suabpuam. Tej neeg taug kev hauv lub nroog Senpas thiab lub nroog Temas tuaj nrhiav dej haus, tiamsis lawv tej kev cia siab yuav ploj tas rau ntawm lub kwjha qhuav ntawd. Nej zoo ib yam li tej kwjha qhuav rau kuv xwb, nej tuaj pom kuv raug txomnyem li no, ua rau nej ntshai thiab khiav rov qab. Kuv puas tau thov kom nej muab ib yam dabtsi pub rau kuv, lossis muab xiab lwm tus kom tuaj tso kuv, lossis cawm kom kuv dim ntawm kuv cov yeebncuab, lossis dim ntawm cov neeg uas tsimtxom kuv? “Nej cia li qhia kuv, kuv yuav nyob twjywm mloog; qhia saib kuv ua txhaum dabtsi. Tej lus tseeb hloov tau lwm tus lub siab, tiamsis nej tej lus tsis muaj qabhau li. Nej xav hais tias tej lus uas kuv hais tsis muaj qabhau ib yam li cua ntsawj xwb; tiamsis ua li cas nej ho teb kuv tej lus uas tas kev cia siab thiab? Txawm yog tej menyuam ntsuag los nej muab rho ntawv coj mus ua qhev, thiab ua tsis ncaj rau tej phoojywg zoo kom nej npluanuj. “Nej saib kuv lub ntsejmuag, kuv yeej tsis dag. Nej hais ntau dhau heev lawm, cia li tseg tej uas nej hais tsis tseeb. Tsis txhob liam hais tias kuv ua txhaum, rau qhov kuv yeej ua yog lawm. Tiamsis nej xav hais tias kuv yog neeg dag. Nej xav hais tias kuv tsis paub qhov yog thiab qhov tsis yog. “Neeg lub neej nyob hauv ntiajteb no zoo ib yam li tus tubrog thiab tus tub zog uas luag ntiav ua haujlwm hnyav, thiab zoo ib yam li tus tubqhe uas ntshaw tus duab ntxoov ntxoo uas laj ntxiag; thiab zoo ib yam li tus tub zog uas tos ntsoov nws tej nqi zog, kuv tos ib hlis dhau ib hlis los tsis muaj ib yam zoo rau kuv lub neej; tos ib hmos dhau ib hmos los kuv tsuas muaj kev nyuaj siab xwb. Thaum kuv mus pw los hmo ntev heev; kuv nti khuj khuav laj tos txog kaj ntug. Muaj kas thoob plaws kuv lub cev; kuv daim tawv tu pleb qhuav nkig nkuav; thiab ua paug viag tawm tuaj. Kuv lub caij nyoog dhau mus zuj zus tsis muaj kev cia siab, thiab dhau mus ceev dua lub nqos ntos ntaub. “Vajtswv, thov koj nco ntsoov kuv, kuv txojsia ntev li ua ib pas xwb; kuv tej kev zoo siab tsis muaj tas lawm. Nimno koj tseem pom kuv, tiamsis koj yuav tsis pom ntxiv lawm. Txawm yog koj nrhiav kuv los yuav tsis pom kuv. Yog li ntawd, kuv yuav nyob twjywm tsis tau! Kuv chim siab thiab npautaws heev, kuv yuav tsum tau hais xwb. “Vim li cas koj zov rawv kuv li? Koj xav hais tias kuv yog tus zaj uas nyob hauv hiavtxwv no los? Kuv xav pw thiab so kom los siav; kuv qhau cev pw saib kuv tej mob puas ntaug. Tiamsis koj ua rau kuv ua npau suav ntshai heev; koj ua rau kuv ua yogtoog thiab ua npau suav phem, ua rau kuv xav npo pa tuag ntshai zoo dua ua neej nyob lub cev muaj mob lwj ntsuav li no. Kuv dhuav heev; kuv tsis xav ua neej nyob lawm. Tsis txhob quavntsej kuv, kuv lub neej tsis muaj qabhau lawm. “Vim li cas koj thiaj muab neeg saib tseemceeb? Vim li cas koj thiaj mob saib nws? Koj tshuaj nws txhua tagkis sawv ntxov thiab sim nws siab txhua lub sijhawm. Thaum twg koj mam li tso tseg tsis saib kuv, kuv thiaj tau hloov pa nqos qaubncaug? Tus uas saib neeg, yog hais tias kuv muaj txim, kuv ua txhaum dabtsi rau koj? Vim li cas koj muab kuv ua daim phiaj rau koj sim? Kuv ua ib lub nra hnyav rau koj los? Koj txawm zam tsis tau kuv lub txim li? Koj txawm zam tsis tau tej uas kuv ua txhaum li? Tsis ntev kuv twb yuav mus rau hauv kuv lub qhov ntxa, thaum koj nrhiav kuv yuav tsis pom kuv lawm.” Vajtswv yeej tsis rhuav kev ncaj ncees; nws yeej ua qhov tseeb xwb. Yeej yog koj tej menyuam tau ua txhaum rau Vajtswv lawm, yog li ntawd, Vajtswv thiaj rau txim rau lawv raws li lawv tsimnyog raug. Tiamsis nimno koj cia li tig rov los cuag Vajtswv tus uas muaj hwjchim loj kawg nkaus thiab ua kom haum nws siab; Yog koj yeej ua ncaj thiab tsis muaj txhaum, Vajtswv yeej yuav pab koj thiab rov pub kom koj lub cuab lub yig vammeej dua. Koj tej kev npluanuj uas ploj tas lawm, piv tsis tau tej uas Vajtswv yuav muab rau koj yav tom ntej. “Koj tig mus saib tej kev txawj ntse tiam thaum ub; ua tib zoo xav txog tej kev tseeb uas peb cov yawgkoob muaj los lawm. Peb txojsia luv kawg li, peb tsis paub xyov yuav zoo li cas; peb lub neej dhau mus yam li tus duab ntxoov ntxoo uas los nroos lub ntiajteb ib vuag. Tiamsis cia cov neeg txawj ntse tiam thaum ub qhia koj; cia li mloog tej lus uas lawv qhia hais tias: “Tauj npaig yeej tsis tuaj ntawm qhov chaw uas tsis muaj dej; thiab yeej tsis muaj tauj npaig nyob saum nruab qhuab li. Yog dej qhuav, ces tauj npaig yog cov uas xub tuag thaum tseem mos uas tsis tau zoo txiav los siv. Tej neeg uas tsis paub Vajtswv zoo ib yam li tej tauj npaig ntawd; thaum twg lawv tso Vajtswv tseg, ces lawv kev cia siab ploj mus tas. Lawv cia siab rau kab laugsab tej nyuag xov ua zes. Yog lawv tso cev rau kab laugsab lub zes puas yuav khov lawv? Yog lawv tuav tej xov kab laugsab ntawd, puas yuav pab tau lawv sawv ntsug?” Cov neeg siab phem hlob mos nyoos ib yam li tej nroj uas tau tshav ntuj, thiab zoo ib yam li tej nroj uas huam puv vaj. Tej cag nrhau mus qhwv tej pobzeb thiab zawm txhua lub pobzeb ruaj heev. Tiamsis yog muab lawv rho tawm ntawm lawv qhov chaw tsis muaj leejtwg paub hais tias lawv nyob ntawd li. Tej ntawd yog cov neeg siab phem tej kev zoo siab; nimno yuav muaj lwm yam los hloov lawv chaw. Tiamsis Vajtswv yeej tsis tso tus uas muab siab npuab nws tseg lossis pab tus neeg siab phem li. Vajtswv yuav rov pub koj qw thiab luag zoo siab dua, tiamsis nws yuav ua rau cov uas ntxub koj poob ntsejmuag, thiab cov neeg siab phem tej vajtse yuav puastsuaj tas. Leejtwg yuav ua li cas cav yeej Vajtswv? Vajtswv ib txhiab lo lus nug tsis muaj leejtwg teb tau ib los li. Vajtswv muaj hwjchim thiab ntse heev; tsis muaj leejtwg tawmtsam yeej nws. Nws tshem tej roob los tej roob yeej tsis paub li, thiab nws txojkev chim rhuav tej roob puastsuaj tas. Vajtswv ua kom av qeeg thiab co kom ntiajteb ua zog koog; nws diaj tej ncej zeb uas txheem lub ntiajteb. Nws txwv tau tsis pub kom lub hnub tawm tuaj, thiab txwv tau tsis pub kom tej hnubqub ci hmo ntuj. Yeej tsis muaj leejtwg pab Vajtswv nthuav lub ntuj lossis muab tus zaj hauv hiavtxwv tsuj nthi tseg. Vajtswv muab tej hnubqub uas yog: cov hnubqub Ntsauv, cov hnubqub Pojsua Kwv Ntas, cov hnubqub Txhiaj Txivmim thiab cov hnubqub sab qabteb, teeb rau saum nruab ntug. Peb tsis totaub tej txujci tseemceeb uas nws ua thiab tej txujci uas nws ua yeej suav tsis txheeb li. “Vajtswv hla ntawm kuv hauv ntej, tiamsis kuv tsis pom nws. Nws los ntawm kuv ib sab, tiamsis kuv tsis hnov. Nws muab tej uas nws xav yuav, tsis muaj leejtwg txwv tau; tsis muaj leejtwg muaj cuabkav nug hais tias, ‘Koj ua dabtsi?’ Vajtswv yuav tsis tshem nws txojkev chim. Nws yuav tsuj nws cov yeebncuab uas pab Lahaj uas yog tus zaj hauv hiavtxwv uas tawmtsam Vajtswv. Yog li ntawd, kuv yuav ua li cas nrhiav tau lus teb Vajtswv? Txawm yog kuv tsis tau ua txhaum li los, kuv yeej tsis muaj cuabkav teb nws, kuv tsuas thov kom Vajtswv uas yog tus txiav txim hlub kuv xwb. Txawm yog nws pub kuv hais los xyov nws puas yuav mloog kuv tej lus. Txawm yog kuv tsis tau ua txhaum los nws tso nagxob nagcua los ntsawj thiab ntaus kuv nqaij doog tas. Nws tsis pub kuv hloov pa li; nws ua rau kuv lub neej iab siab kawg li. Yog hais txog qhov muaj zog, Vajtswv yog tus muaj zog dua! Yog hais txog kev ncaj ncees, leejtwg thiaj yuav piv tau nws? Txawm yog kuv tsis tau ua txhaum los tej lus uas kuv hais rov rau txim rau kuv, txawm yog kuv ua zoo los Vajtswv hais tias kuv ua txhaum. Thaum ib tug neeg tsis muaj txim cia li tuag, Vajtswv khaws luag xwb. Vajtswv muab lub ntiajteb no cob rau cov neeg siab phem. Vajtswv ua rau cov txiav txim digmuag tas. Yog tsis yog Vajtswv ua leejtwg yog tus ua? “Kuv lub caij lub nyoog dhau mus ceev tshaj tej neeg sib tw khiav, tiamsis tsis muaj ib hnub zoo li. Kuv lub neej dhau mus ceev ib yam li lub nkoj uas khiav hauv dej, thiab ceev ib yam li tus dav uas rwg los muab qaib. Yog kuv muaj txim, tseem yuav nkim kuv lub zog ua dabtsi? Tsis muaj ib yam tshuaj uas ntxuav tau kuv tej kev txhaum li. Vajtswv muab kuv pov rau hauv pas av nkos, txawm yog kuv tej ris tsho los twb tsis nyiam kuv. Kheev lam Vajtswv yog neeg, kuv yuav muaj cuabkav teb nws; wb yuav mus hauv tsev tu plaub kom luag txiav txim rau wb tej lus sib cav. Tiamsis tsis muaj leejtwg nyob nruab nrab txiav txim rau kuv thiab Vajtswv. Vajtswv, thov koj tsis txhob rau txim rau rau kuv! Thov tshem koj tej kev nruj kev tsiv mus! Kuv yeej tsis ntshai li. Kuv yuav tsum hais xwb, rau qhov kuv yeej paub kuv lub siab. “Kuv dhuav ua neej nyob heev lawm. Thov mloog kuv yws kuv tej kev lwj siab! Vajtswv, thov tsis txhob rau txim rau kuv. Thov qhia rau kuv saib! Yog li cas koj thiaj rau txim rau kuv? Puas tsimnyog koj ua nruj ua tsiv rau kuv, saib tsis taus tej uas koj tsim, thiab luag ntxhi rau tej neeg siab phem tej haujlwm? Koj puas muaj qhovmuag li neej muaj? Koj puas pom li neeg pom? Koj hnubnyoog puas luv li neeg lossis koj txojsia puas luv li neeg txoj? Vim li cas koj pheej nrhiav kuv tej kev txhaum thiab tshawb tej uas kuv ua tsis yog? Koj yeej paub hais tias kuv tsis muaj txim thiab tsis muaj leejtwg cawm kom kuv dim ntawm koj. “Koj txhais tes tsim thiab puab kuv, nimno los yog koj ob txhais tes rhuav kuv. Nco ntsoov hais tias koj muab av nplaum puab kuv; koj yuav muab kuv tsoo kom rov ua hmoov av los? Koj pub kuv txiv tsim muaj kuv; koj cia kuv loj hlob hauv kuv niam plab. Koj tsim kuv lub cev muaj pobtxha thiab muaj leeg thiab kom muaj nqaij muaj tawv qhwv tej pobtxha. Koj pub kuv muaj sia thiab muaj kev hlub tsis tu, thiab koj tsomkwm kom kuv muaj sia nyob. Tiamsis nimno kuv paub hais tias, koj nyas nrhw ua rau kuv raug mob txhua lub sijhawm. Koj tos ntsoov saib kuv puas ua txhaum, ces koj yuav tsis zam txim rau kuv. Thaum twg kuv ua txhaum, ces txawm tsis haum koj siab ntag, tiamsis yog kuv ua ncaj, koj yeej tsis qhuas kuv li. Kuv txajmuag kawg, tsa tsis tau taubhau li. Kuv lub neej nyuam qhuav pib zoo xwb, koj txawm siv txo kuv lub neej ib yam li tsov ntxhuav caum tsiaj tom; thiaj koj tseem ua tej txujci tawmtsam kuv. Koj ibtxwm muaj timkhawv nkaug kuv; koj txojkev chim huam loj zuj zus tuaj tawmtsam kuv; koj ibtxwm nrhiav lub tswvyim tshiab tawmtsam kuv. “Vajtswv, vim li cas koj thiaj li cia kuv yug los? Tsimnyog koj cia kuv tuag ua ntej thaum tsis tau muaj leejtwg pom kuv. Yog kuv ncaj nraim hauv kuv niam plab mus rau hauv qhov ntxa, mas yuav zoo ib yam li uas kuv tsis tau yug los. Puas yog kuv lub neej twb yuav dua? Tsis txhob thab kuv! Cia kuv muaj kev zoo siab thaum kuv tseem tshuav sijhawm. Kuv twb yuav mus sai sai no thiab yuav tsis rov qab los li lawm, yuav mus rau hauv lub tebchaws uas tsaus ntuj dub nciab, yog lub tebchaws uas muaj duab tsaus ntuj, txawm yog qhov kaj los zoo li qhov tsaus ntuj.” Yauj, koj xav hais tias peb teb tsis tau koj tej lus no los? Koj tej lus txob thuam yuav ua rau peb nyob twjywm no los? Koj khav hais tias koj hais lus tseeb; koj khav hais tias koj dawbhuv tabmeeg Vajtswv. Kuv xav kom Vajtswv teb koj tej lus! Nws yuav qhia ntau lub tswvyim rau koj; muaj ntau yam kev txawj ntse uas neeg tsis paub. Vajtswv rau txim rau koj sib tshaj qhov uas koj tsimnyog raug. “Koj puas paub txog Vajtswv lub peevxwm, koj puas paub Vajtswv lub hwjchim uas loj kawg nkaus? Saum nruab ntug yeej tsis muaj ciam tiamsis koj qhovmuag pom tsis tas. Vajtswv paub tubtuag teb huv tibsi, tiamsis koj tsis paub. Vajtswv lub hwjchim loj tshaj lub ntiajteb thiab dav dua hiavtxwv. Yog Vajtswv kom koj thiab coj koj mus rau rau hauv tsev tu plaub leejtwg yuav cheem tau nws? Vajtswv paub tej neeg uas tsis muaj nqis; Vajtswv pom neeg tej kev phem kev qias. Thaum twg tus neesluav qus yug tau los ua neeg, mas tus neeg ruam thiaj yuav txawj ntse. “Yauj, koj cia li ua siab ncaj, koj thiaj mus cuag tau Vajtswv. Tshem tej kev phem kev qias thiab kev txhaum tawm hauv koj tsev mus. Koj thiaj muaj ntsejmuag fim neeg ntiajteb thiab nyob tso siab lug tsis ntshai leejtwg. Koj yuav tsis nco qab txog koj tej kev nyuaj siab, koj tej kev nyuaj siab yuav dhau mus ib yam li dej ntws, koj yuav nco tsis txog li lawm. Koj lub neej yuav ci tshaj lub hnub ci thaum tavsu, thiab koj lub neej uas tsaus ntuj nti yuav kaj nrig ib yam li thaum sawv ntxov. Koj yuav ua lub neej nyob kaj siab lug, thiab muaj kev cia siab; Vajtswv yuav tsomkwm koj thiab pub kom koj tau so. Koj yuav tsis ntshai koj tej yeebncuab; neeg coob leej yuav tuaj thov koj pab. Tiamsis cov neeg siab phem yuav saib ncig lees tsis muaj chaw cia siab thiab lawv yuav nrhiav tsis tau kev khiav dim li. Lawv txojkev cia siab tsuas yog txojkev tuag xwb.” Tiamsis kuv kuj muaj kev txawj ntse ib yam li koj thiab; kuv yeej tsis ntshai thiab tsis swb koj li; txhua tus puavleej paub tej uas koj hais ntawd. Txawm yog kuv tej phoojywg los niaj hnub luag kuv plig; txawm yog kuv yeej ncaj ncees thiab tsis tau ua txhaum los lawv tseem luag kuv; tiamsis kuv paub hais tias muaj ib hnub Vajtswv yuav teb kuv tej lus thov. Koj tsis muaj kev nyuaj siab dabtsi, ces koj txawm tuaj muab kuv tso daj tso luag; koj ua li ntawd, yog koj ntaus ib tug txivneej twb yuav ntog. Tiamsis cov neeg tubsab thiab tsis hwm Vajtswv nyob kaj siab lug, lawv tus vajtswv ces yog lawv lub zog xwb. “Tiamsis koj cia li mus nug tej tsiaj lossis tej noog, lawv yuav qhia koj; cia li mus thov tej tsiaj nruab nqhuab thiab tej tsiaj nruab deg qhia kev txawj ntse rau koj. Txawm yog tej tsiaj los twb paub hais tias Vajtswv yog tus tsim lawv. Vajtswv yog tus tswj neeg thiab tej tsiaj txojsia; Vajtswv lub hwjchim tuav txhua tus tibneeg txojsia. Ib yam li koj lub qhovntsej nyiam mloog luag tej lus, thiab koj tus nplaig nyiam saj tej zaub mov. Yog Vajtswv muab rhuav lawm, leejtwg yuav txhim kho dua; thiab leejtwg muaj cuabkav tso tau tus neeg uas Vajtswv muab kaw lawm? Yog Vajtswv tsis tso nag los, ces yuav muaj ntuj qhua teb nkig; yog Vajtswv tso nag los, ces yuav muaj dej nyab. “Vajtswv yog tus muaj zog thiab nws ibtxwm muaj yeej; tus neeg dag ntxias thiab tus uas raug luag dag ntxias puavleej yog Vajtswv kav. Nws rhuav cov nomtswv tej kev txawj ntse thiab ua rau cov thawjcoj kom lawv ua ib yam li tej neeg ruam. Nws txo tau tej vajntxwv thiab coj lawv mus kaw rau hauv tsev lojcuj; nws txo cov povthawj thiab tej neeg muaj hwjchim kom poob hwjchim. Nws kaw cov tuavxam uas luag cia siab rau lub qhovncauj, thiab muab cov neeg laus tej kev txawj ntse tshem mus. Nws rhuav cov neeg muaj hwjchim kom poob ntsejmuag thiab ua rau tej nomtswv lub zog ntaug. Nws ua qhov kaj ci pom kev rau hauv tubtuag teb. Nws ua rau ntau haivneeg muaj zog thiab muaj hwjchim, tiamsis nws ua rau lawv swb thiab puastsuaj. Nws ua rau lawv cov thawjcoj ua neeg ruam thiab ua rau lawv yuam kev mus mus los los tsis paub mus qhov twg; lawv maub tsaus ntuj nti ntog pujpoog ib yam li tej neeg qaug cawv. Tiamsis yog kuv nrog Vajtswv sib hais, tsis yog nrog koj sib cav; kuv xav nrog Vajtswv sib hais txog kuv zaj. Koj muab tej lus dag los npog koj txojkev ruam; koj zoo li tej kws tshuaj uas kho tsis tau luag tej mob zoo. Koj tsis txhob hais lus, luag thiaj xav hais tias koj yog neeg ntse! “Koj cia li mloog kuv hais kuv zaj. Vim li cas koj hais lus dag? Koj xav hais tias koj tej lus dag muaj nqis rau Vajtswv no los? Koj yuav tuaj Vajtswv tog txheem los? Koj yuav nrog Vajtswv hais nws zaj hauv tsev tu plaub los? Yog Vajtswv ua tib zoo saib koj, nws puas pom koj muaj ib qhov zoo? Koj xav hais tias koj dag tau Vajtswv li koj dag neeg no los? Yog hais tias koj ua tsis ncaj rau ib tog, Vajtswv yuav rau txim hnyav rau koj, thiab nws lub hwjchim yuav ua rau koj ntshai kawg nkaus li. Koj tej pajlug tsis muaj nqis ib yam li tej hmoov tshauv; koj tej lus sib cav muag ib yam li tej av nplaum. Koj cia li nyob twjywm kuv thiaj li muaj sijhawm hais lus, cia saib thaum kawg tej ntawd yuav zoo li cas. “Kuv pheej hmoo ua kuv lub neej. Kuv tas kev cia siab lawm, Vajtswv yuav muab kuv tua povtseg los xijpeem. Kuv yeej yuav mus nrog nws hais kuv zaj xwb. Tej zaum qhov uas kuv muaj lub siab tawv li no yuav pab tau kuv, rau qhov cov neeg siab phem tsis muaj ib tug mus cuag tau Vajtswv li. Nimno koj cia li ua tib zoo mloog tej lus uas kuv qhia koj. Kuv yeej npaj rawv yuav mus hais kuv zaj, rau qhov kuv paub hais tias kuv tsis tau ua txhaum. “Vajtswv, koj yuav kom kuv ntag los? Yog koj kom kuv, ces kuv yeej hais tsis taus thiab tuag xwb! Cia kuv thov ob yam; thov kom koj pom li no, kuv yuav tsis khiav nkaum koj; tsis txhob rau txim rau kuv thiab tsis txhob ua rau kuv ntshai dhau. “Vajtswv, koj hais ua ntej kuv mam li teb. Lossis cia kuv hais ua ntej, koj mam li teb. Kuv tej kev txhaum yog dabtsi? Kuv tau ua txhaum dabtsi? Thov koj cia li phua kuv tej kev txhaum rau kuv. “Vim li cas koj tso kuv tseg? Vim li cas koj saib kuv zoo li tus yeebncuab? Puas yog koj ua kom kuv ntshai? Kuv tsis tseemceeb dabtsi li, kuv zoo li daim nplooj xwb; koj lam tawmtsam tej nyuag quavnyab qhuav los? “Koj muab kev iab siab los tawmtsam kuv, koj sau tej kev txhaum uas kuv ua thaum kuv tseem hluas los rau kuv ris. Koj muab saw hlau khi kuv kotaw; koj saib ntsoov kuv tshais txhua kauj ruam, thiab koj tu ciam rau kuv tsuj. Thaum kawg kuv zoo ib yam li yav cav ntoo lwj, thiab zoo ib yam li lub tsho uas ntsaum kabrwg noj. “Txhua tus neeg uas yug los ntawm pojniam ua neej nyob tsis ntev thiab niaj hnub muaj kev ntxhov siab. Peb loj hlob thiab ntsws sai ib yam li tej paj ntoos; peb dhau mus zuj zus ib yam li tus duab ntxoov ntxoo. Vajtswv, koj puas yuav tsa laj muag saib kuv, lossis taug kuv zaj thiab txiav txim rau kuv? Yeej tsis muaj ib yam huv yuav tawm ntawm qhov uas tsis huv li neeg los. Neeg lub hnubnyoog ua neej nyob koj twb teem tseg, thiab koj paub hais tias lawv yuav nyob pestsawg hli. Lub sijhawm uas koj teem tseg yeej tsis muaj leejtwg hloov tau li. Koj cia li tig rau ib qhov thiab tso nws tseg; cia nws tau so thiab zoo siab ib yam li tus tub zog uas ua haujlwm hnyav. “Tseem muaj kev cia siab rau tus ntoo uas luag muab ntov lawm; nws lub hauvpaus tseem ciaj thiab hlav taus kaus tuaj. Txawm yog nws tej cag laus thiab lub hauvpaus qhuav rau saum npoo av lawm los thaum muaj dej ntub nws yuav hlav kaus tuaj ib yam li tsob ntoo mos. Tiamsis thaum neeg tuag lawm, ces nws txojsia kawg rau hnub ntawd; thaum neeg tuag, nws mus nyob qhov twg lawm? “Dej tu tsis ntws thiab pasdej qhuav zoo li cas, ces neeg tuag tsis sawv rov los ib yam li ntawd. Thaum lub ntuj tseem muaj nyob lawv yuav tsis sawv rov qab los; lawv yuav tsis tsim ntawm qhov chaw uas lawv pw. “Kuv xav kom koj muab kuv coj mus zais rau hauv tubtuag teb; cia kuv nraim hauv mus txog thaum koj txojkev chim dhau tso, thiab thov koj teem ib lub caij nco txog kuv. Yog neeg tuag lawm, nws puas yuav rov muaj sia? Tiamsis kuv yuav niaj hnub tos txog lub sijhawm uas koj tso kuv dim tej kev nyuaj siab. Thaum ntawd koj yuav hu kuv, thiab kuv yuav teb koj, thiab koj yuav txaus siab rau tus uas koj tsim. Koj yuav saib ntsoov kuv tshais txhua kauj ruam, tiamsis koj yuav tsis suav kuv tej kev txhaum lawm. Koj yuav zam kuv tej kev txhaum thiab muab tshem mus povtseg; txhua yam kev txhaum uas kuv tau ua, koj yuav muab ntxuav huv tibsi mus. “Yuav muaj ib lub sijhawm uas tej hauv roob yuav nphau tas, thiab tej roob tsuas los yuav raug tshem ntawm nws qhov chaw mus. Dej yuav tshoob tej pobzeb thiab tuamtsam nag yuav kuav tej av mus tas; yog li ntawd koj thiaj rhuav neeg txojkev cia siab uas ua neej nyob. Koj muaj zog tshaj neeg thiab muab lawv tshem tawm mus ibtxhis; lawv tuag lawv lub ntsejmuag txawv hlo. Txawm yog nws tej tub tau ntsej tau muag los nws tsis paub, thiab yog lawv poob ntsej poob muag los lawv qhia tsis tau rau nws. Nws tsuas hnov nws ibce mob lwj ntsuav, thiab nws quaj ntsuag rau nws tej kev nyuaj siab.” Yeej tsis muaj ib tug neeg ntse hais lus li koj hais lossis hais tej lus tsis muaj lub ntsiab tseemceeb uas txaus luag yuav. Yog ua li uas koj hais yuav tsis muaj leejtwg hwm Vajtswv thiab tsis muaj leejtwg thov Vajtswv li. Koj tej kev phem kev qias ua rau koj hais tej lus ko ntag; koj khaws luag tej lus txawj ntse hais xwb. Tsis tas kuv yuav rau txim rau koj li; tej lus uas koj hais rov ua timkhawv tawmtsam koj. “Koj yog thawj tus neeg uas yug los rau hauv lub ntiajteb no los? Koj nyob ua ntej Vajtswv tsim tej hauv roob los? Koj puas tau hnov tej uas Vajtswv npaj yuav ua? Puas yog neeg txojkev txawj ntse yog koj li? Puas muaj ib yam dabtsi uas koj paub uas peb tsis paub. Peb kawm kev txawj ntse los ntawm tej laus plaubhau dawb paug uas lawv yug ua ntej koj txiv. “Vajtswv twb nplig koj siab, ua cas koj tsis yuav? Tej uas peb hais rau koj, twb yog lus mos lus muag ntag. Ua cas koj yuav ua ywj koj lub siab thiab hais lus npautaws vog rau peb xwb. Koj chim rau Vajtswv, koj thiaj hais tej lus ko tawmtsam nws. “Yuav ua li cas neeg thiaj ua tau zoo? Yuav ua li cas neeg thiaj ua tau neeg ncaj ncees tabmeeg Vajtswv? Txawm yog Vajtswv cov timtswv los nws yeej tsis ntseeg siab; rau qhov cov timtswv los twb tsis ncaj tabmeeg Vajtswv. Neeg haus kev phem kev qias ib yam li haus dej; qhov tseeb neeg yeej tsis ncaj; neeg yeej tsis muaj nqis li. “Yauj, nimno koj cia li mloog kuv hais tej uas kuv paub. Tej neeg txawj ntse yeej qhia tej lus tseeb rau kuv, lawv kawm tej kev txawj ntse ntawd ntawm lawv txiv, lawv qhia txhua yam rau kuv tsis zais li. Lawv lub tebchaws yeej yog lawv tug; lwm haivneeg yuav tsis tuaj tsuj lawv lub tebchaws. “Tus neeg siab phem uas tsimtxom lwm tus nws yuav raug luag tsimtxom mus tas simneej. Nws lub qhovntsej yuav hnov tej suab quaj suab qw tsis tu, thiab tubsab yuav tuaj huab nws thaum nws xav hais tias nws tau zoo nyob tso siab lug. Nws tsis muaj kev cia siab uas yuav khiav dim ntawm qhov tsaus ntuj, rau qhov muaj ib rab ntaj tos rawv yuav tua nws povtseg, thiab dav npoj tos rawv yuav noj nws lub cev. Nws yeej paub nws lub neej tom hauv ntej tsaus ntuj nti. Kev puastsuaj muaj hwjchim ib yam li tug vajntxwv uas tos rawv yuav tawmtsam nws. “Tus neeg uas tsa tes tawmtsam Vajtswv thiab twv tus uas muaj hwjchim loj kawg nkaus, “Tus neeg ntawd mus txeeb tej nroog thiab huab tej tsev uas cov tswv khiav lawm, tiamsis yuav muaj tsov muaj rog tuaj txeeb tej nroog thiab huab tej vajtse ntawd. Nws txojkev npluanuj yuav nyob tsis ntev; thiab tej uas nws khwv tau yuav tsis nyob mus ibtxhis. Txawm yog nws tus duab los yuav dua mus, thiab nws yuav khiav tsis dim tej kev tsaus ntuj li. Nws yuav zoo ib yam li tsob ntoo uas hluavtaws kub tej ceg tas, thiab cua ntsawj tej paj ya tas lawm. Yog nws txojkev ruam ua rau nws cia siab rau txojkev ua phem ua qias, ces nws yuav tau kev phem kev qias ua nqi zog. Nws yuav ntsws ua ntej uas tsis tau txog nws lub sijhawm thiab nws yuav qhuav ib yam li tus ceg ntoo uas hlav tsis taus nplooj. Nws zoo ib yam li tsob hmab uas cov txiv zeeg thaum tsis tau siav; thiab zoo ib yam li tsob txiv ntoo roj uas tej paj zeeg tas lawm. Cov neeg uas tsis hwm Vajtswv yuav tsis muaj xeebntxwv, thiab hluavtaws yuav kub lawv tej vajtse uas muab tej nyiaj xiab los ua. Lawv yog cov neeg uas tsim kev kub ntxhov thiab ua phem; lawv lub siab npaj rawv dag ntxias lwm tus.” Nej tej lus uas tsis muaj qabhau ko hais tsis paub tas li los? Nej yuav hais mus kom txog haum kawg los? Yog hais tias nej yog kuv, thiab kuv yog nej, kuv yeej hais tau txhua yam li nej hais thiab. Kuv yuav co taubhau thiab hais tau tej lus tuam mom nej ib yam nkaus. Kuv muaj cuabkav pab tau nej, txhawb nej lub zog thiab nplig tau nej siab. “Txawm yog kuv hais lus los tsis pab dabtsi, thiab yog kuv ua twjywm los kuv tus mob tsis ntaug. Vajtswv, koj ua rau kuv lub cev mob lwj ntsuav; koj cia kuv tsevneeg raug tua tuag tas. Koj muab kuv khi, thiab koj yog kuv tus yeebncuab. Kuv tshuav tawv thiab pobtxha lawm xwb, thiab luag muab tej ntawd ua timtseeb hais tias kuv ua txhaum. “Vajtswv chim nws thiaj muab kuv dua ua tej daim; nws ntxub kuv thiab ntsia qhovmuag qaujles rau kuv. Tej neeg tuaj nyob puagncig kuv, lawv hais lus saib tsis tau kuv, thiab xuas tawg ncuav rau kuv lub plhu. Vajtswv muab kuv cob rau cov neeg ua phem ua qias. Kuv yeej ua neej nyob kaj siab lug, tiamsis Vajtswv tsawv nkaus kuv cajdab cab, nws nplawm kuv thiab tsuj kuv ntsoog tas. Vajtswv muab kuv ua daim phiaj rau nws sim thiab tua xub hneevnti txhua phab tuaj rau kuv, tej xub ntawd tuaj raug kuv ua rau kuv nqaij to; txawm li ntawd los nws tsis hlub kuv li. Nws ua rau kuv raug mob ua ntu zus; nws tawmtsam kuv ib yam li tus tubrog. “Kuv quaj ntsuag thiab muab ntaubtsaj los xaws ua ris tsho hnav, kuv txo hwjchim thiab zaum hauv av. Kuv quaj cebmuag tas, kuv ob lub qhovmuag o liab ploog, tiamsis kuv tsis tau ua txhaum dabtsi, thiab kuv muaj lub siab dawb paug thov Vajtswv. “Lub ntiajteb, tsis txhob muab kuv tej kev txhaum npog cia! Tsis txhob cia kuv lub suab thov kev ncaj ncees ntsiag. Muaj ib tug nyob saum ntuj ceebtsheej npaj rawv tuaj kuv tog pab kuv. Kuv tej phoojywg txob thuam kuv; kuv quaj kua muag ntws laws rau Vajtswv. Kuv xav kom muaj ib tug pab kuv mus thov Vajtswv, ib yam li tus neeg uas mus thov nws tus phoojywg. Tshuav tsis muaj pestsawg xyoo lawm, kuv yuav tau taug txojkev uas mus tsis muaj hnub rov los. “Kuv txojsia twb yuav tu. Kuv ua tsis taus pa lawm; tsis tshuav ib yam dabtsi rau kuv li, tsuas tshuav lub qhov ntxa qhib lug tos kuv xwb. Kuv saib ntsoov luag txob thuam kuv mob kawg li. Vajtswv, kuv yeej ua ncaj. Thov koj mloog kuv tej lus. Yeej tsis muaj leejtwg mloog kuv tej lus li. Koj kaw lawv lub siab kom lawv tsis totaub; thov tsis txhob pub lawv kovyeej kuv. Tus neeg uas dag nws tus phoojywg nyiaj yuav, nws tej menyuam yuav raug kev txomnyem vim tej uas nws ua ntawd. Vajtswv ua rau kuv raug luag hais tsis zoo; thiab luag nti qaubncaug rau kuv ntsejmuag. Kuv tej kev quaj ntsuag ua rau kuv lub qhovmuag tsis pom kev; kuv ob txhais npab thiab ob sab ceg qhuav qhawv ib yam li tej mojzeej. Cov neeg uas khav hais tias lawv ncaj ncees yuav xav tsis thoob tej no, thiab lawv thuam hais tias kuv tsis hwm Vajtswv. Cov neeg uas muaj meejmom khav hais tias lawv yog cov ncaj ncees tshaj. Tiamsis yog lawv cov ntawd tuaj sawv tabmeeg kuv, kuv pom hais tias lawv tsis muaj ib tug ntse li. “Kuv lub sijhawm twb dhau lawm, tej uas kuv npaj siab ua tsis tau tiav; kuv tas kev cia siab lawm. Tiamsis kuv tej phoojywg hais tias hmo ntuj yuav hloov ua nruab hnub, lawv hais tias qhov kaj twb los ze lawm, tiamsis kuv pom hais tias kuv tseem nyob hauv qhov uas tsaus ntuj nti. Kuv txojkev cia siab tsuas yog tubtuag teb xwb, yog qhov chaw tsaus ntuj nti uas kuv yuav mus pw. Kuv yuav hu lub qhov ntxa ua kuv txiv, thiab hu tej kas uas noj kuv ua kuv niam thiab kuv cov muam. Kuv tseem tshuav kev cia siab thiab los? Leejtwg pom hais tias tseem muaj kev cia siab? Thaum kuv mus rau hauv tubtuag teb, kuv tsis muaj kev cia siab li lawm.” Yog li cas koj xav hais tias peb ruam ib yam li tej nyuj? Qhov uas koj chim hajyam ua rau koj mob heev xwb. Koj txojkev chim puas yuav ua rau lub ntiajteb no hloov ua suabpuam? Vajtswv puas yuav muab tej hauv roob tshem kom koj zoo siab? “Tus neeg siab phem lub teeb twb tuag thiab nws lub cubtawg yuav tsis cig lawm. Lub teeb uas nyob hauv nws lub tsevntaub yuav tsaus mus. Thaum ub nws tshais ruam khov kho, tiamsis nimno nws ntog lawm; qhov uas nws ntog twb yog vim nws ua ywj nws lub siab. Nws taug kev mus rau ntawm luag lub vojhlua, thiab lub vojhlua yuav soo nws kotaw, rab cuamkoob yuav tais nws lujtaws ruaj nrees cia. Luag faus vojhlua rau hauv av thiab cuab hmuv tos nws kev. “Muaj kev txhawj ntshai nyob ibncig nws, thiab caum nws mus txhua kauj ruam. Nws ibtxwm npluanuj, tiamsis nimno nws tshaib nqhis; kev puastsuaj sawv ntawm nws ib sab tos nws. Muaj mob ua pawg viag thoob plaws nws lub cev, ua rau nws ob txhais npab thiab ob txhais ceg qawj tob zuj zus. Nws raug muab rho ntawm hauv lub tsevntaub uas nws nyob kaj siab lug, thiab muab cab mus cuag tus Vajntxwv uas yog txojkev Tuag. Hluavtaws leejfaj yuav kub txhua yam hauv nws lub tsevntaub kom tas dulug, tsis tshuav ib yam dabtsi nyob hauv li lawm! Nws tej cag yuav qhuav thiab tej nplooj yuav ntsws. Nws lub koob lub npe yuav ploj hauv ntiajteb no mus; thiab yuav tsis muaj leejtwg nco nws li lawm. Luag yuav muab nws tshem tawm ntawm cov uas tseem muaj sia nyob lub tebchaws mus, thiab muab nws ntiab tawm ntawm qhov kaj mus rau hauv qhov uas tsaus ntuj nti. Nws tsis muaj xeebntxwv seem ua neej nyob li lawm. Tej neeg uas nyob sab hnubtuaj thiab sab hnubpoob, hnov txog tej kev puastsuaj uas los raug nws, lawv ntshai ua ibce tshee hnyo. Cov neeg uas ua phem ua qias yuav tau tej no, thiab cov neeg uas tsis quavntsej Vajtswv los yuav tau tej no ib yam nkaus.” Nej niaj hnub hais lus saib tsis taus kuv, nej pheej cem kuv, nej tsis txajmuag li. Txawm yog kuv tau ua txhaum tiag los tej kev txhaum ntawd tsuas raug kuv xwb. Nej xav hais tias nej yog neeg zoo dua kuv, thiab nej suav hais tias qhov uas kuv raug kev txomnyem yog kuv ua txhaum. Nej tsis paub hais tias Vajtswv yog tus ua tej no los? Vajtswv cuab hlua kom mag kuv. Kuv cam qhov uas nws quab yuam kuv, tiamsis tsis muaj leejtwg mloog kuv hais; tsis muaj leejtwg hnov kuv lub suab quaj thov kev ncaj ncees. Vajtswv tav kuv txoj haukev, kuv thiaj mus tsis dhau; nws ua rau kuv txoj haukev tsaus ntuj nti. Nws sau kuv tej nyiaj tej kub lawm tas thiab txo kuv lub koob lub npe. Nws puav kuv ntaus txhua ces kaum. Nws rho kuv txojkev cia siab ib yam li dob nroj kom kuv qhuav thiab tuag mus. Vajtswv chim thiab ua nruj ua tsiv tawmtsam kuv; nws ua rau kuv ib yam li kuv yog nws tus yeebncuab. Nws tso nws tej tubrog tuaj tawmtsam kuv; lawv khawb qhov thiab tsuam yeej ibncig kuv lub tsevntaub. “Vajtswv ua rau kuv tej kwvtij tso kuv tseg; cov neeg uas ibtxwm swm kuv tsis paub kuv lawm. Kuv tej kwvtij kwvnpawg khiav tas tso kuv tseg. Tej neeg uas ibtxwm tuaj ua qhua hauv kuv tsev tsis xam muaj kuv lawm; txawm yog kuv tej txhais qhev los saib kuv zoo li tus qhua thiab yog neeg txawv tebchaws lawm xwb. Thaum kuv hu kuv tus tubtxib, nws tsis teb kuv, txawm yog kuv thov nws los nws tsis pab. Kuv tus pojniam hnia tsis tau kuv tus ntxhiab, thiab kuv tej kwvtij tsis muaj ib tug txav los ze kuv. Thaum tej menyuam yaus pom kuv, lawv saib tsis taus kuv thiab luag kuv. Kuv tej phoojywg uas zoo los lawv qias kuv; cov neeg uas ibtxwm hlub kuv tig rov tawmtsam kuv. Kuv yuag heev tshuav tawv qhwv txha lawm xwb; kuv twb yuav luag tsis ciaj los ua neej nyob. Nej yog kuv cov phoojywg, nej cia li hlub kuv! Vim Vajtswv tsa nws txhais tes ntaus kuv ntog lawm. Ua li cas nej thiaj tsimtxom kuv ib yam li Vajtswv ua rau kuv? Nej tseem tsimtxom kuv tsis tau txaus los? “Kuv xav kom muaj ib tug nco kuv tej lus thiab muab sau tseg rau hauv ntawv! Lossis muab kuv tej lus txaug rau ntawm tej pobzeb kom nyob mus ibtxhis. “Tiamsis kuv paub hais tias muaj ib tug nyob saum ntuj ceebtsheej, thaum kawg nws yuav los pab kuv daws kuv zaj. Txawm yog tej kab mob noj kuv cev nqaij daim tawv tas lawm los tiam neej no kuv tseem yuav pom Vajtswv. Kuv lub qhovmuag yuav pom ntsoov nws, nws yuav tsis zoo li tus neeg uas kuv tsis paub. “Kuv qaug zog rau qhov nej hais tias, ‘Peb yuav tsimtxom nws li cas?’ Nej nrhiav tswvyim ntau yam tawmtsam kuv. Tiamsis nimno nej cia li ntshai hniav ntaj hniav riam, Vajtswv txojkev chim yog rab ntaj uas yuav los hlais tus neeg uas ua txhaum, kom nej paub hais tias muaj ib tug yuav txiav txim.” Tej uas koj hais ntawd yog lus txob thuam saib tsis taus kuv, tiamsis kuv paub hais tias kuv yuav teb koj li cas. “Koj yeej paub hais tias tiam thaum ub zoo li cas, txij thaum muaj neeg nyob hauv lub ntiajteb no yeej tsis muaj ib tug neeg siab phem yuav ua neej nyob ntev li. Txawm yog nws txojkev khavtheeb yuav siab mus nto ntuj, thiab nws lub taubhau yuav siab mus txog saum cov huab los nws yuav raug tshuab ya mus ib yam li tej hmoov av. Cov neeg uas ibtxwm paub nws yuav xav tsis thoob hais tias xyov nws mus dua qhov twg lawm. Nws yuav yaj ntshis mus ib yam li zaj npau suav lossis zaj yogtoog uas ploj mus tsis pom ntxiv li lawm. Nws yuav ploj ntais ntawm qhov chaw uas nws ibtxwm nyob; nws tej tub yuav xa tej uas nws nyiag ntawm cov neeg pluag los rov qab. Nws lub cev tseem hluas, tiamsis tsis ntev yuav mus ua av. Tiamsis tej zaub mov hauv nws plab iab heev, iab ib yam li tej tshuaj muaj taug. Tus neeg siab phem yuav ntuav tej kev npluanuj uas nws nyiag luag tug los tawm; Vajtswv yuav muab tej uas nws ntuav tawm los xa rov qab huv tibsi. Tej uas cov neeg siab phem nqos, zoo ib yam li tej tshuaj muaj taug; tej ntawd yuav tom nws tuag ib yam li tus nab muaj taug tom. Nws yuav tsis tau pom tus dej cag uas muaj kua mis thiab zib ntab lossis muaj roj txiv ntoo. Nws yuav tso txhua yam uas nws khwv tau los tseg; nws yuav tsis muaj kev zoo siab rau tej pajlaum uas nws tau, rau qhov nws tsimtxom thiab tsis quavntsej cov neeg txomnyem; thiab txhav luag tej tsev uas ua tau lawm yuav. Nws txojkev ua neeg siab hlob tsis paub txaus li. Thaum nws noj, nws tsis tseg ib yam dabtsi seem li, tiamsis nimno nws txojkev npluanuj twb xaus lawm. Thaum nws muaj txaus lawm, kev piamsij yuav los raug nws. Cia nws noj kom txaus raws li nws lub siab! Vajtswv txojkev chim uas nruj tsiv yuav rau txim rau nws. Txawm yog nws khiav dim rab ntaj hlau los xibxub tooj yuav chob nws. Xibxub yuav chob nws lub cev tshab plaws; lub hauxub uas ntse yuav ua rau nws ntshav nrog, thiab kev txhawj ntshai yuav los raug nws ua rau nws lub siab tshee hnyo. Txhua yam uas nws khaws tseg raug puastsuaj tas; cov nplaim taws uas tsis yog neeg txhais tes hlawv yuav kub nws thiab nws tsevneeg huv tibsi. Lub ntuj qhia tus neeg no tej kev txhaum, thiab lub ntiajteb ua timkhawv tawmtsam nws. Vajtswv txojkev chim yuav phwj tuaj ua rau tus neeg ntawd txojkev npluanuj puastsuaj tas. “Tej no yog tej uas cov neeg siab phem tau, thiab yog tej uas Vajtswv npaj tseg rau lawv.” Cia sijhawm rau kuv hais kuv tej lus, thaum kuv hais tas lawm, nej xav txob thuam li cas los tau. “Kuv tsis yog nrog neeg sib cav; yog li ntawd, kuv thiaj ua tsis taus siab ntev. Nej cia li ntsia kuv. Nej yuav xav tsis thoob thiab tsis paub hais li cas. Thaum kuv xav txog tej xwmtxheej uas los raug kuv, kuv ibce tuag tas, kuv ntshai thiab tshee kawg li. “Ua li cas Vajtswv cia cov neeg siab phem muaj sia nyob, pub lawv vammeej thiab ua neej nyob laus nkoos? Lawv muaj tubki, muaj xeebntxwv, thiab tseem pom lawv tej tubki loj hlob. Vajtswv tsis tso kev puastsuaj los raug lawv tej vajtse; lawv lub neej tsis tau raug kev txhawj ntshai ib zaug li. Lawv tej nyuj muaj menyuam zoo thiab tsis muaj ib tug tshob li. Lawv tej menyuam dhia ua si ib yam li tej menyuam yaj thiab seevcev nrog tej suab raj suab xyu. Thaum lawv ua neej nyob, lawv nyob kaj siab lug, thiab thaum lawv tuag, lawv tsis tuag txomnyem ntsuav. “Cov neeg siab phem kom Vajtswv tsis txhob thab lawv; lawv tsis nyiam ua lawv lub neej raws li Vajtswv lub siab nyiam. Lawv xav hais tias txawm yuav pehawm Vajtswv lossis thov Vajtswv los yeej tsis muaj qabhau dabtsi. Lawv khav hais tias qhov uas lawv ua tau yog lawv lub zog, tiamsis kuv tsis yuav tej lus uas lawv hais ntawd. “Tus neeg siab phem lub teeb puas txawj tuag? Cov neeg ntawd puas muaj ib tug tsis raug kev puastsuaj li? Vajtswv puas tau chim thiab rau txim rau cov neeg siab phem, thiab muab lawv tshuab ya ib yam li cua ntsawj tej quavnyab, lossis ib yam li cua daj cua dub ntsawj tej hmoov av ya? “Nej xav hais tias Vajtswv rau txim rau tej menyuam vim leej txiv tej kev txhaum. Tsis yog li ntawd! Vajtswv tsuas rau txim rau cov uas ua txhaum xwb; qhov uas Vajtswv ua li ntawd yog nws qhia hais tias vim lawv tej kev txhaum. Cia cov neeg txhaum ris lawv lub txim vim lawv tej kev txhaum; cia lawv haus Vajtswv tus uas muaj hwjchim loj kawg nkaus txojkev chim. Thaum ib tug neeg twg tuag lawm, nws puas txhawj txog nws tej menyuam saib puas nrog luag ua neej zoo? Neeg puas muaj peevxwm qhia Vajtswv; leejtwg yog tus uas txiav txim rau cov uas nyob siab tshaj plaws? Muaj ibtxhia neeg tsis muaj kev tau zoo hlo li; lawv ua neej lwj siab thiab tuag txomnyem ntsuav. Tiamsis txhua tus puavleej tuag, luag yuav muab faus, thiab kas yuav noj lawv txhua tus ib yam nkaus. “Kuv paub tej uas nej xav, thiab lub tswvyim uas nej xav ua phem rau kuv. Nej nug hais tias, ‘Nimno tus nomtswv loj uas yog neeg ua phem ua qias lub tsev nyob qhov twg lawm?’ “Nej puas tau nrog cov neeg uas mus tsham tebchaws tham? Nej puas paub tej uas lawv coj rov los piav rau sawvdaws? Hnub uas Vajtswv chim thiab rau txim, tsuas yog cov neeg siab phem thiaj seem xwb. Tsis muaj leejtwg yuav nkaug tus neeg siab phem, lossis ua pauj rau nws tej uas nws tau ua los lawm. Thaum luag kwv nws mus rau tom qhov ntxa, muaj neeg zov nws lub ntxa, muaj neeg qas txhiab qas vam leej tuaj hlub tshua nws; thiab tej av los npog nws lub cev zoo kawg li. “Tej lus uas nej tuaj nplig kuv tsis muaj qabhau li! Tej lus uas nej teb kuv yog lus dag xwb!” Qhov uas koj ua neeg ncaj puas haum Vajtswv siab, lossis yog koj ua neeg zoo puas pab tau Vajtswv? Tsis yog vim koj hwm Vajtswv, Vajtswv thiaj nplawm thiab rau txim rau koj los? Tsis yog li ntawd, twb yog vim koj ua kev txhaum thiab ua kev phem kev qias ntau heev. Koj yuam kom koj tus kwvtij them tej nqi uas nws tshuav koj rov qab, koj cia li mus sau nws tej tsoos tsho los thiab cia nws nyob liabqab. Koj tsis pub dej rau cov uas nqhis dej haus, thiab tsis pub mov rau cov uas tshaib plab noj. Koj siv koj lub hwjchim thiab lub meejmom hom tagnrho lub tebchaws ua koj tug. Tsis yog koj tsis pab cov pojntsuam xwb, tiamsis koj tseem mus huab tej menyuam ntsuag tug thiab tsimtxom lawv. Yog li ntawd, luag thiaj cuab hlua puagncig koj, thiab tos nco kev txhawj ntshai tuaj voob nkaus koj, lossis tsaus ntuj nti ua rau koj tsis pom kev, thiab dej nyab tuaj npog nkaus koj. “Puas yog Vajtswv nyob siab heev puag saum ntuj ceebtsheej? Txawm yog tej hnubqub nyob siab heev los Vajtswv tseem tuaj saud saib tej hnubqub ntawd. Yog li cas koj nug hais tias, ‘Vajtswv tsis paub dabtsi? Muaj huab thaiv Vajtswv lawm, nws yuav ua li cas txiav txim tau rau peb?’ Koj xav hais tias thaum Vajtswv mus kev saum nruab ntug, nws pom tshab tej tauv huab tuab tuab tuaj rau peb. “Koj txiav txim siab taug txoj qub kev uas tej neeg siab phem ibtxwm taug lawm los? Txawm yog tsis tau txog lawv lub sijhawm los dej twb muab lawv kuav mus tas lawm. Cov neeg ntawd yog cov uas tso Vajtswv tseg, thiab ntseeg hais tias Vajtswv ua tsis tau li cas rau lawv. Tiamsis twb yog Vajtswv ua rau lawv vammeej ntag, kuv tsis totaub cov neeg siab phem tej kev xav li. Cov neeg ua zoo thiab cov neeg ncaj ncees yuav zoo siab luag thaum lawv pom cov neeg siab phem raug txim. Tej uas cov neeg siab phem tau yog kev puastsuaj xwb, thiab hluavtaws yuav kub tej uas seem kom tas dulug. “Yauj, nimno koj cia li nrog Vajtswv sib raug zoo thiab tsis txhob ua rau nws ib yam li nws yog yeebncuab; yog koj ua li kuv hais, nws yuav foom koob hmoov rau koj. Cia li lees yuav nws tej lus qhuab ntuas; koj cia li khaws nws tej lus rau nruab siab. Qhov tseemceeb, koj yuav tsum txo hwjchim tig los cuag Vajtswv thiab tshem tej kev phem kev qias hauv koj lub tsev mus kom deb. Cia li muab koj tej kub coj mus povtseg thiab muab koj tej tseem kub coj mus pov rau hauv kwjha qhuav. Cia Vajtswv tus uas muaj hwjchim loj kawg nkaus hloov koj tej kub chaw, thiab cia nws yog koj tej nyiaj uas teeb tej pawg. Ces koj thiaj cia siab ntsoov rau Vajtswv, thiab koj yuav paub hais tias nws yog koj txojkev zoo siab. Thaum koj thov Vajtswv, nws yuav mloog koj tej lus thov, thiab koj yuav ua tau tiav raws li koj tej lus cog tseg. Txhua yam uas koj ua thiaj yuav tiav thiab koj txoj haukev yuav tshav ntuj nrig. Vajtswv yuav txo tus uas khavtheeb thiab pab tus uas txo hwjchim. Yog koj yeej yog neeg ncaj ncees thiab ua koj tes haujlwm ncaj nws yuav cawm koj.” Kuv xav paub saib nws nyob qhov twg, kom kuv thiaj paub mus txog ntawm nws qhov chaw nyob. Kuv yuav piav kuv zaj tabmeeg nws thiab hais txhua yam daws kuv zaj. Kuv xav paub saib nws yuav hais li cas, thiab nws yuav teb kuv tej lus li cas. Vajtswv yuav siv tagnrho nws lub zog tawmtsam kuv los? Tsis yog li ntawd, nws yeej yuav mloog kuv tej lus. Kuv yog neeg ncaj; kuv yeej muaj cuabkav hais kuv zaj tabmeeg Vajtswv; tus uas txiav txim rau kuv nws yuav tso kuv dim mus ibtxhis. “Kuv mus nrhiav sab hnubtuaj, tiamsis Vajtswv tsis nyob ntawd; kuv mus nrhiav rau sab hnubpoob, tiamsis tsis pom nws. Vajtswv yeej ua haujlwm rau sab qaumteb thiab sab qabteb, tiamsis kuv nrhiav tsis pom nws li. Vajtswv yeej paub txhua kauj ruam uas kuv mus; yog nws sim kuv, nws yuav pom hais tias kuv tsis muaj txhaum. Kuv taug ncaj nraim txojkev uas nws xaiv rau kuv, kuv tsis ncaim mus sab twg li. Kuv ibtxwm ua raws li Vajtswv tej lus samhwm; kuv ua raws li nws siab nyiam, kuv tsis ua raws li kuv lub siab xav. Vajtswv yeej tsis hloov siab li. Tsis muaj leejtwg yuav tawmtsam tau nws, lossis txwv tau nws kom tsis txhob ua tej uas nws yuav ua. Tej uas nws npaj rau kuv lawm, nws yuav ua kom tiav; qhov no tsuas yog ib yam ntawm tej uas nws npaj xwb. Kuv ntshai ua ibce tshee hnyo tabmeeg nws. “Vim li cas Vajtswv tsis teem ib lub sijhawm tseg txiav txim, thiab ua li cas cov uas ua nws tes haujlwm tsis pom hnub uas txiav txim ncaj ncees li? Tej neeg uas nam luag ciamteb kom tau av dav; lawv mus nyiag luag tej yaj los ua lawv tug. Lawv mus txhav cov menyuam ntsuag tej neesluav, thiab cab cov pojntsuam tej nyuj los yuam nqi mus txog thaum uas lawv them nqi tas. Lawv yuam cov neeg txomnyem txoj cai thiab ntiab cov neeg pluag khiav tawm mus. “Yog li ntawd, cov neeg txomnyem thiaj mus nrhiav noj tom tiaj suabpuam ib yam li tej neesluav qus; tsis muaj ib thaj chaw twg uas lawv yuav mus nrhiav zaub mov los rau lawv tej menyuam noj li. Lawv yuav tau mus sau qoobloo tom tej teb uas tsis yog lawv li, thiab yuav tau mus de txiv hmab hauv cov neeg siab phem tej vaj. Hmo ntuj lawv pw liabqab tsis muaj ris tsho hnav, thiab tsis muaj ib yam dabtsi rau lawv vov tiv no li. Tej kob tuamtsam nag uas los lawv roob ua rau lawv ntub tas, thiab lawv mus nraim ntawm tej qab pobzeb xwb. “Cov neeg siab phem yuam tej menyuam uas tsis muaj niam tsis muaj txiv ua lawv qhev, thiab lawv mus coj cov neeg pluag tej menyuam los yuam tej nqi uas cov neeg pluag them tsis taus. Tiamsis cov neeg pluag yuav tau tawm liabqab mus tiv thaiv lawv tej menyuam; thiab lawv yuav tau yoo tshaib mus sau qoob. Lawv yuav tau yoo nqhis mus tsuam txiv ntoo roj los ua roj thiab mus tsuam txiv hmab los ua cawv. Tej neeg uas raug mob thiab yuav tuag quaj ntsoog qees hauv tej nroog, tiamsis Vajtswv tsis quavntsej lawv tej lus thov li. “Muaj ib cov neeg tsis kam txais yuav txojkev kaj; lawv tsis totaub thiab tsis paub mus raws li txojkev kaj coj lawv. Thaum sawv ntxov cov neeg tua neeg sawv mus tua cov neeg pluag thiab txomnyem, thiab thaum tsaus ntuj lawv mus ua tubsab. Tus neeg uas ua kev nkauj kev nraug tos tsis taus tsaus ntuj; nws muab ntaub npog nws lub ntsejmuag kom tsis muaj leejtwg paub nws. Hmo ntuj tubsab tsoo los hauv tsev, tiamsis nruab hnub tubsab khiav nkaum kom luag tsis pom. Nruab hnub lawv ntshai qhov kaj, tiamsis hmo ntuj lawv tsis ntshai dabtsi li.” “Tus neeg siab phem yuav raug dej kuav mus, thiab nws tej liaj tej teb yuav raug Vajtswv foom tsis zoo; nws yuav tsis tau mus tu nws tej vaj txiv hmab lawm. Tshav ntuj ziab tej daus yaj thiab qhuav li cas, ces tubtuag teb yuav coj tus neeg txhaum mus li ntawd ntag. Txawm yog nws niam los twb tsis nco txog nws li lawm; kas yuav noj nws lub cev thiab nws cev nqaij yuav puastsuaj ib yam li tus cav ntoo lwj. Tej ntawd los raug nws rau qhov nws tsis ua zoo rau tej pojntsuam thiab tsis ua siab dawb siab zoo rau cov pojniam uas tsis muaj menyuam. Vajtswv lub hwjchim yuav rhuav tshem tus neeg uas muaj zog; tus neeg siab phem ua neej nyob tsis muaj kev cia siab. Vajtswv cia nws nyob tso siab lug, tiamsis Vajtswv saib ntsoov nws txhua lub sijhawm. Cov neeg siab phem tsuas vammeej ib ntu xwb, tiamsis tom qab ntawd nws yuav ntsws thiab qhuav ib yam li tej nroj tsuag, nws zoo li tej kav nplej uas luag muab txiav lawm. Puas muaj leejtwg ua timkhawv hais tias tsis muaj li ntawd? Puas muaj leejtwg ua timkhawv hais tias kuv tej lus tsis tseeb?” Puas muaj leejtwg suav txheeb cov timtswv uas ua haujlwm rau Vajtswv? Puas muaj ib qhov chaw twg uas Vajtswv qhov kaj ci mus tsis txog li? Puas muaj ib tug neeg twg ncaj ncees lossis dawbhuv tabmeeg Vajtswv? Vajtswv saib mas txawm yog lub hli los tsis ci thiab tej hnubqub los tsis huv. Neeg yog dabtsi, yog kas thiab yog kab xwb los? Vajtswv saib neeg tseemceeb li cas?” Koj pab tuav tswvyim zoo kawg, thiab qhia koj tej kev txawj ntse rau tus neeg ruam li kuv no! Koj xav hais tias leejtwg thiaj yuav mloog koj tej lus? Leejtwg tshoov koj siab kom hais tej lus no?” “Cov neeg tuag tej ntsujplig tshee laim dais hauv cov dej uas nyob hauv nruab tivtxwv. Tubtuag teb qhib lug tabmeeg Vajtswv; tsis muaj dabtsi thaiv tau tsis pub Vajtswv pom li. Vajtswv nthuav lub ntuj mus rau sab qaumteb thiab muab lub ntiajteb tso rau ntawm qhov chaw uas tsis muaj dabtsi. Vajtswv ua kom muaj dej nyob hauv cov huab, thiab tsis pub kom cov dej ntawd xau hauv cov huab los. Vajtswv cia tej tauv huab los roos thaum lub hli nra. Nws kom ciam rau saum nplaim hiavtxwv, ua ciam cais qhov kaj tawm ntawm qhov tsaus. Thaum Vajtswv diaj tej ncej uas txheem lub ntuj, lub ntuj ua zog kais txaus ntshai kawg. Vajtswv lub hwjchim tswj hiavtxwv nyob tus yees; thiab nws txojkev txawj ntse rhuav tau Lahaj uas yog tus zaj. Vajtswv ua pa lub ntuj thiaj kaj nrig, thiab nws txhais tes tua tau tus zaj uas khiav dim lawm. Tiamsis tej ntawd tsuas yog Vajtswv lub hwjchim thiab yog tej uas peb hnov zoo li lub suab ntxhi xwb. Puas muaj leejtwg paub hais tias Vajtswv muaj hwjchim npaum li cas?” yog thaum twg Vajtswv tseem pub kuv muaj txojsia nyob, kuv lub qhovncauj yuav tsis hais ib lo lus phem thiab kuv tus nplaig yuav tsis hais ib lo lus dag li. Kuv yuav tsis lees hais tias nej hais yog; kuv yuav cam hais tias kuv tsis muaj txhaum mus txog hnub kuv tuag. Kuv yuav tuav rawv txojkev ncaj ncees tsis tso tseg li; kuv lub siab yeej paub meej li ntawd. “Thov kom txhua tus uas tsis tuaj kuv tog thiab tawmtsam kuv raug txiav txim ib yam li tus neeg siab phem thiab siab tsis ncaj. Cov neeg uas tsis hwm Vajtswv puas muaj kev cia siab thaum Vajtswv txiav txim rau lawv? Thaum lawv muaj kev nyuaj siab Vajtswv puas yuav hnov lawv tej lus thov? Tsimnyog lawv txaus siab rau Vajtswv thiab thov Vajtswv txhua lub sijhawm. “Cia kuv qhia Vajtswv lub hwjchim thiab piav Vajtswv tus muaj hwjchim loj kawg nkaus tes haujlwm rau nej paub. Tiamsis tsis tas kuv yuav qhia nej, rau qhov nej twb pom lawm; yog li cas nej pheej hais tej lus uas tsis muaj qabhau?” “Tej no yog Vajtswv tus uas muaj hwjchim loj kawg nkaus, rau txim rau cov neeg siab phem thiab ua nruj ua tsiv. Txawm yog lawv tej tubki coob los yuav raug hniav ntaj hniav riam tuag tas rau hauv tshavrog; lawv tej menyuam yuav tsis muaj noj tsis muaj haus txaus. Cov uas seem yuav raug kab mob kev nkeeg tuag tas, thiab lawv cov pojntsuam yuav tsis quaj nyiav lawv tej neeg tuag. Cov neeg siab phem muaj nyiaj ntau suav tsis txheeb, thiab muaj tsoo tsho ntau hnav tsis tas; tiamsis qee leej neeg siab zoo yuav tau tej tsoo tsho ntawd hnav, thiab qee leej neeg ncaj ncees yuav tau tej nyiaj ntawd siv. Cov neeg siab phem ua tsev zoo li kab laugsab tej zes, lossis zoo ib yam li tus tubqhe lub tsev uas nws nyob zov teb. Thaum lawv pw, lawv tej nyiaj txiag nyob txhij, tiamsis thaum lawv sawv los, lawv tej nyiaj txiag ploj tas lawm. Kev txhawj kev ntshai yuav los raug lawv ib yam li dej nyab; hmo ntuj cua daj cua dub yuav ntsawj lawv mus tas; cov cua sab hnubtuaj yuav ntsawj lawv tawm hauv lawv tej tsev mus; thaum lawv nrhiav kev khiav kom dim, tej cua ntawd yuav ntsawj lawv, tsis hlub lawv li, Thaum lawv khiav cua ntsawj nrov nroo ntws, lub hwjchim uas yog kev puastsuaj ua rau lawv ntshai heev.” Muaj ntau thaj chaw uas luag khawb nyiaj; thiab muaj ntau lub chaw uas luag nchuav kub. Neeg khawb tau hlau hauv av los, thiab muab pobzeb hlawv kom nchuav tau tooj liab. Neeg mus nrhiav nyiaj thiab kub hauv qhov tob tob uas tsaus ntuj nti. Lawv nrhiav hauv lub ntiajteb no qhov uas tob kawg nkaus, thiab lawv mus khawb tej pobzeb uas nyob hauv qhov uas tsaus ntuj nti. Neeg mus nrhiav khawb nyiaj khawb kub deb ntawm tej chaw uas neeg nyob, lossis qhov chaw uas neeg tsis tau mus txog dua li. lawv ua haujlwm kho siab khuav, dauv hlua nqis mus los hauv tej qhov av. Qoobloo tuaj hauv av tuaj, Tiamsis muaj hluavtaws kub nyob hauv nruab tivtxwv av. Tej pobzeb uas nyob hauv av puavleej muaj tej hlaws xafiles, thiab muaj kub nyob hauv tej hmoov av. Tsis muaj ib tug dav twg pom txojkev uas mus rau ntawm tej chaw khawb nyiaj, thiab tej dav npoj los tsis tau ya los hla tej chaw ntawd li. Tsis muaj tsov ntxhuav lossis tsiaj nyaum taug tej kev uas ntsiag to ntawd li. Neeg khawb tej pobzeb uas tawv tshaj plaws, lawv khawb tas tej roob saum ncov los ti hauv taw. Thaum lawv tho tej roob tsuas tshab lawm, lawv nrhiav tau tej pobzeb uas muaj nqis. Lawv khawb mus tshwm rau hauv cov dej, lawv muab tej yam uas nyob nraim nkoos rho tawm los rau ntawm qhov pom kev. Tiamsis yuav nrhiav tswvyim qhov twg thiab tau? Thiab yuav kawm kev totaub qhov twg? Lub tswvyim tsis nyob ntawm tej neeg; Thiab tsis muaj leejtwg paub lub tswvyim tus nqi. Qhov uas tob tshaj plaws thiab hiavtxwv hais tias lub tswvyim tsis nyob hauv no. Txawm yog muab nyiaj muab kub yuav los yeej tsis tau lub tswvyim ntawd. Tej tseem kub thiab tej saw nyiaj saw kub ntaus tsis tau lub tswvyim tus nqi. Lub tswvyim muaj nqis tshaj kub, tej khob kub lossis khob iav pauv tsis tau lub tswvyim. Lub tswvyim muaj nqis dua tej qe zeb kaulas, qe zeb iav thiab hlaws. Tej tseem kub thiab tseem qe zeb khixaulais los yeej ntaus tsis tau lub tswvyim tus nqis li. Lub tswvyim los qhov twg los? Thiab kev totaub nyob qhov twg? Txhua yam uas muaj sia yeej tsis pom lub tswvyim li, txawm yog tej noog uas ya saum nruab ntug los yeej tsis pom. Txawm yog kev puastsuaj thiab kev tuag los tsuas hnov luag cav txog lub tswvyim xwb. Vajtswv tib leeg thiaj paub txojkev uas mus nrhiav lub tswvyim, thiab paub hais tias lub tswvyim nyob qhov twg. Rau qhov Vajtswv pom ti nkaus qab ntuj kawg thiab pom txhua yam uas nyob saum nruab ntug. Thaum Vajtswv pub rau tej cua muaj hwjchim thiab cais kom hiavtxwv nyob muaj ciam; Thaum Vajtswv txiav txim siab tso nag los, ua huab tsaus thiab xob laim rau qhov twg; Vajtswv pom lub tswvyim, nws saib lub tswvyim yog qhov zoo, thiab nws qhuas hais tias zoo kawg nkaus. Vajtswv hais rau neeg tias, “Yog nej xav txawj ntse, nej yuav tsum hwm tus TSWV. Yog nej xav totaub, nej yuav tsum tso kev phem kev qias tseg.” Vajtswv ibtxwm nrog kuv thiab nws ua qhov kaj rau kuv thaum kuv taug txojkev tsaus ntuj. Tej ntawd yog hais txog thaum kuv lub neej tseem vammeej uas kuv nrog Vajtswv sib raug zoo thiab Vajtswv tseem tsomkwm kuv lub tsev. Thaum ntawd Vajtswv tus uas muaj hwjchim loj kawg nkaus, tseem nrog nraim kuv thiab kuv tej menyuam tseem nyob puagncig kuv. Kuv tej nyuj tej tshis muaj kua mis ntau heev, thiab kuv tej ntoo roj los loj hlob mos nyoos ntawm tej av uas muaj pobzeb. Txhua zaus uas cov txwjlaug hauv lub nroog sablaj, kuv kuj mus koom nrog lawv, thaum tej tub hluas pom kuv, lawv zam kev rau ob sab, thiab tej neeg laus sawv ntsug hwm kuv. Cov thawjcoj nyob ntsiag to tsis sib tham; txawm yog tej nomtswv los tsis hais lus li. “Txhua tus uas pom kuv lossis hnov kuv hais lus, lawv puavleej qhuas tej uas kuv tau ua tas los lawm. Thaum tej neeg txomnyem quaj thov, kuv kuj pab lawv; kuv pab tej menyuam ntsuag uas tsis pom qab vamkhom leejtwg. Tej neeg txomnyem los qhuas kuv, thiab kuv pab cov pojntsuam kom nyob tso siab lug. Kuv yeej ua ncaj thiab ua siab dawb siab zoo. Yav tas los kuv ua qhovmuag rau cov digmuag thiab ua kotaw rau cov sav ceg. Kuv zoo ib yam li leej txiv rau cov neeg pluag thiab tuaj lwm haivneeg tog thaum lawv raug kev txomnyem. Kuv rhuav cov neeg nruj tsiv lub hwjchim thiab cawm cov neeg uas raug luag tsimtxom. “Kuv xav ua neej kom muaj txojsia nyob ntev thiab tuag kaj siab lug hauv kuv lub tsev. Yav tas los kuv zoo li tsob ntoo uas muaj dej yug nws tej cag thiab muaj lwg ntsu saum nws tej ceg. Txhua tus puavleej qhuas kuv, thiab kuv lub zog yeej tsis ntaug li. Thaum kuv ntuas sawvdaws, txhua tus nyob ntsiag to thiab ua tib zoo mloog kuv tej lus; thaum kuv hais tas, tsis muaj leejtwg hais ntxiv li lawm. Kuv tej lus nkag rau hauv lawv lub siab ib yam li tej lwg dej; txhua tus txaus siab yuav kuv tej lus ib yam li tej tub qoob tub loo txaus siab rau tej nag tshiab. Thaum lawv muaj kev nyuaj siab, kuv ua ntsejmuag luag ntxhi rau lawv, kuv lub ntsejmuag uas luag ntxhi txhawb lawv zog kawg li. Kuv ua tus txiav txim thiab leg tagnrho lub luag haujlwm; kuv coj lawv ib yam li tus vajntxwv coj nws pab tubrog; thiab nplig lawv thaum lawv tas kev cia siab. “Tiamsis nimno cov neeg uas hluas dua kuv muab kuv tso daj tso luag! Thaum lawv txiv yeej ibtxwm tsis muaj nqis rau kuv, kuv twb tsis pub lawv pab kuv cov dev zov yaj. Lawv tsis muaj nqis, rau qhov lawv lub zog ntaug tas ua tsis tau haujlwm rau kuv. Lawv pluag thiab tshaib nqhis heev, hmo ntuj lawv thiaj mus khaws tej cag ntoo qhuav tim tej nras mojsab qhua. Lawv mus de tej nroj tom tiaj suabpuam, thiab dawj tej cag ntoo uas tsis qab los noj! Tej neeg qw ua tsuj ua tsaug raws lawv tawm ib yam li luag qw tubsab. Lawv mus nyob hauv tej qhov tsua thiab qhov av uas luag khawb rau ntawm tej kis zeb. Lawv quaj ib yam li tej tsiaj qus quaj tim tej havzoov tuaj, thiab mus khooj rau hauv tej koog ntoo. Lawv yog ib pab neeg uas tsis muaj koob tsis muaj npe thiab tsis muaj nqis dabtsi! Lawv raug luag ntiab tawm hauv lub tebchaws mus. “Tiamsis nimno lawv tuaj luag kuv plig; thiab muab kuv tso daj tso luag. Lawv ua phem ua qias rau kuv; lawv xav hais tias lawv zoo dua kuv, kuv tsis phim lawv, thiab lawv tseem tuaj nti qaubncaug rau kuv ntsejmuag. Rau qhov Vajtswv ua rau kuv qaug zog thiab tas kev cia siab, lawv thiaj ua nruj ua tsiv tawmtsam kuv. Cov neeg siab phem too hau lis tuaj tawmtsam kuv, lawv raws kuv tawm thiab npaj rawv tua kuv povtseg. Lawv xav ua kom kuv puastsuaj, lawv thiaj tav kuv txoj haukev tsis pub kom kuv khiav dim; thiab tsis muaj leejtwg cheem tau lawv li. Lawv sau nthwv nkag qhov lajkab tuaj tawmtsam kuv, thiab lawv ntog tsheej pawg tsuam kuv; Tej kev txhawj ntshai npog kuv tas, kuv lub koob meej ploj mus ib yam li nthwv cua, thiab kuv txojkev vammeej ploj tas ib yam li tauv huab. “Nimno kuv twb yuav tuag; tsis muaj ib yam dabtsi pab tau kom kuv dim kev txomnyem li. Thaum tsaus ntuj kuv tej pobtxha mob lwj ntsuav; tus mob noj rawv kuv tsis tso tseg li. Vajtswv tsawv nkaus kuv cajdab tshos thiab muab ntswj kiag ua ib caj. Nws muab kuv pov rau hauv pas av; kuv twb zoo tsis cuag tej plua tshauv. “Vajtswv, kuv hu koj tiamsis koj tsis teb kuv li; thiab thaum kuv thov koj, koj yeej tsis quavntsej kuv. Koj ua nruj ua tsiv rau kuv; koj siv koj lub hwjchim tsimtxom kuv. Koj tso cua los muab kuv ntsawj ya mus tas; koj muab kuv pov rau hauv nthwv cua daj cua dub uas ntswj pesyos. Kuv paub hais tias koj muab kuv pov rau hauv txojkev tuag, thiab rau hauv lub tsev uas koj npaj rau txhua tus uas muaj sia mus nyob. “Vim li cas koj tawmtsam tus neeg uas puastsuaj, yog tus neeg uas ua tsis tau dabtsi, tiamsis thov kom koj hlub xwb? Puas yog kuv twb nrog tej neeg nyuaj siab quaj, thiab nrog cov neeg txomnyem nyuaj siab? Kuv xav tau lub neej zoo thiab kaj siab lug; tiamsis kuv ua neej nyuaj siab thiab tsaus ntuj nti xwb. Kev nyuaj siab thiab ntxhov siab ua rau kuv lwj siab ntsuav; kuv ua neej txomnyem ntsuav ib hnub dhau ib hnub. Kuv ua neej tsaus ntuj nti tsis muaj hnub tshav ntuj li, kuv mus sawv ntawm tej chaw sablaj thov luag pab kuv. Kuv tu siab thiab quaj ib yam li tej hma thiab tej noog ntxhuav quaj. Kuv daim tawv dub, thiab kuv ua npaws kub heev. Qhov chaw uas kuv ibtxwm hnov tej suab nkauj nogncas lomzem xyivfab, nimno kuv tsuas hnov suab quaj thiab suab nyiav lawm xwb. “Kuv twv taus rau lub ntuj hais tias, kuv tsis tau ntsia ib tug hluas nkauj twg rau zaj phem li. “Vajtswv tus uas muaj hwjchim loj kawg nkaus ua dabtsi rau peb, thiab muab dabtsi pauj tej haujlwm uas peb tibneeg ua? Vajtswv tso sub tawg sub ntsha thiab kev puastsuaj rau cov uas ua txhaum. Vajtswv paub txhua yam uas kuv ua; nws saib ntsoov kuv rho txhua kauj ruam mus kev. “Kuv twv taus rau lub ntuj hais tias kuv tsis tau ua phem thiab tsis tau dag ntxias leejtwg li. Cia Vajtswv muab rab teev uas haum txiaj los luj kuv, nws thiaj pom hais tias kuv yog neeg zoo npaum li cas. Yog hais tias kuv tsis taug txojkev ncaj lossis cia txojkev phem coj kuv mus ua txhaum, yog kuv txhais tes tsis ncaj tsis huv vim muaj txhim, ces cia kom kuv tej qoobloo puastsuaj mus, lossis thov kom lwm tus tau noj tej qoobloo uas kuv cog. “Yog hais tias kuv ntshaw luag pojniam, lossis mus nkaum xauj nws qhov tsev, ces cia kom kuv tus pojniam mus ua zaub mov rau luag noj thiab luag nrog nws pw. Cov uas ua kev phem kev qias li ntawd, tsimnyog raug txim tuag. Qhov ntawd yuav zoo ib yam cov hluavtaws leejfaj uas kub txhua tsav yam uas nws muaj tas dulug. “Thaum kuv cov tubtxib ib tug yws kuv, kuv mloog nws hais thiab ua zoo rau nws. Yog kuv tsis ua li ntawd, kuv yuav ua li cas fim taus Vajtswv? Thaum uas Vajtswv los txiav txim rau kuv, kuv yuav hais li cas rau nws? Tus Vajtswv uas tsim kuv thiab tsim kuv cov tubtxib yog tib tug. “Kuv yeej ibtxwm pab cov neeg pluag, tsis muaj ib zaug uas kuv tsis kam pab li, kuv yeej ibtxwm pab cov pojntsuam thiab tsis tau ua rau lawv tu siab, lossis cia tej menyuam ntsuag tshaib nqhis thaum kuv muaj noj muaj haus. Kuv yeej ibtxwm pab luag los laus li no. “Thaum kuv pom ib tug twg txomnyem uas tsis taus ris tsho hnav, kuv muab tej ris tsho uas kuv muab tej plaub yaj ntos rau tus ntawd hnav. Ces nws thiaj ua kuv tsaug thiab nco kuv txiaj ntsig. Yog kuv tau txhav ib tug menyuam ntsuag twg tug yuav, vim kuv paub hais tias kuv yuav yeej nws hauv tsev tu plaub, ces cia kom kuv ob txhais npab lov; cia kom kuv ob txhais npab pluam ntawm kuv xubpwg mus. Rau qhov kuv ntshai Vajtswv rau txim rau kuv, kuv thiaj tsis ua txhaum li ntawd. “Kuv yeej ibtxwm tsis cia siab rau tej nyiaj txiag lossis tso siab rau kev npluanuj. Kuv yeej tsis tau pe lub hnub uas ci ntsa iab lossis pe lub hli thaum tabtom nra. Kuv tsis tau nwj kuv txhais tes hawm tej ntawd kom ua rau kuv yuam kev ib zaug li. Tus uas ua txhaum li ntawd tsimnyog raug txim tuag, rau qhov nws saib tsis taus Vajtswv tus uas muaj hwjchim loj kawg nkaus. “Thaum kuv cov yeebncuab raug kev txomnyem kuv tsis hnyos lawv, lossis zoo siab thaum lawv raug kev puastsuaj; kuv tsis tau ua txhaum uas yog thov Vajtswv kom kuv cov yeebncuab tuag. Txhua tus tub zog uas ua haujlwm rau kuv hais tias kuv yeej ibtxwm nyiam tiam qhua. Kuv zoo siab hlo caw tej neeg taug kev los so hauv kuv tsev, thiab tsis cia lawv pw ntawm tej kev. “Luag lwm tus pheej npog luag tej kev txhaum, tiamsis kuv yeej tsis npog kuv tej kev txhaum li. Kuv yeej ibtxwm tsis ntshai tej uas luag hais kuv; kuv ibtxwm tsis nyob ntsiag to lossis nkaum nkoos hauv tsev, vim ntshai nyob tsam luag txob thuam kuv. “Tsis muaj leejtwg yuav mloog kuv tej lus li los? Kuv twv taus rau lub ntuj hais tias txhua lo lus uas kuv hais yog lus tseeb. Cia Vajtswv tus muaj hwjchim loj kawg nkaus teb kuv. “Kheev lam kuv pom tej uas yeebncuab kom kuv ntawd sau rau hauv nruab ntaw, kuv yuav muab dai rau ntawm xubpwg, thiab muab ntoo rau saum taubhau ib yam li ntoo kausmom yeebkoob; kuv yuav piav txhua yam uas kuv ua qhia rau Vajtswv mloog, thiab kuv yuav muaj plhus ntxiag thaum kuv mus cuag nws. “Yog kuv tau txeeb daim teb uas kuv ua no ntawm lwm tus los, lossis yog kuv tau mus txhav luag tej qoobloo loj noj, thiab cia tus tswv qoob tshaib plab; ces cia tej pos thiab nroj tuaj hloov kuv tej qoobloo chaw.” Yauj cov lus xaus li no. Rau qhov Yauj hais tias nws tsis muaj txim txhaum dabtsi, peb tug txivneej ntawd thiaj tseg tsis teb Yauj lawm. Tiamsis muaj ib tug txivneej npe hu ua Elihus chim heev, nws tswj tsis tau nws txojkev chim rau qhov Yauj hais tias Yauj ua ncaj, tiamsis Vajtswv ua tsis ncaj. (Elihus yog Npalakees tus tub uas yog Npuxes tus xeebntxwv thiab yog xeem Las). Elihus chim heev rau Yauj peb tug phoojywg. Vim lawv tsis muaj lus teb Yauj li, qhov ntawd suav hais tias Vajtswv yog tus ua tsis ncaj. Vim Elihus hluas dua lawv, nws thiaj tos kom lawv hais tas tso. Thaum Elihus pom hais tias lawv peb leeg ntawd, teb tsis tau Yauj tej lus li, mas nws chim heev. Npalakees tus tub Elihus uas yog Npuxes tus xeebntxwv thiaj cuab hais nws zaj tuaj; nws teb hais tias: “Kuv yog tus hluas thiab nej yog cov laus lawm, yog li ntawd, kuv thiaj ntshai qhia tej uas kuv xav rau nej mloog. Kuv xav hais tias, ‘Tsimnyog cia nej hais, nej cov laus tsimnyog sib pab tawm tswvyim. Tiamsis yog Vajtswv tus uas muaj hwjchim loj kawg nkaus tus ntsujplig los kav neeg lub siab thiab pub tswvyim rau neeg xwb. Tsis yog hais tias leejtwg laus ces txawm yuav muaj kev txawj ntse, lossis kev laus yuav ua kom lawv paub qhov yog thiab qhov tsis yog. Yog li ntawd, kuv xav kom nej mloog kuv hais; cia kuv hais tej uas kuv xav rau nej mloog.’ “Kuv ua siab ntev mloog nej hais ntev loo los lawm, thiab tos nej nthuav nej tej kev txawj ntse los hais tso. Kuv ua tib zoo mloog lawm, nej tsis muaj lus hais; nej tsis muaj ib tug teb tau Yauj tej lus li. Nej yuav ua li cas hais tau tias nej muaj tswvyim, Vajtswv yuav teb rau Yauj tej uas nej teb tsis tau. Yauj hais rau nej xwb, tsis yog hais rau kuv, tiamsis kuv yuav tsis teb li nej. “Yauj, lawv swb lus lawm, lawv tsis muaj lus teb koj li. Thaum lawv tsis muaj lus hais, txawm yuav cia kuv nyob twjywm thiab los? Lawv sawv ntawd los tsis muaj lus hais li. Tsis tau, nimno kuv yuav tsum teb thiab hais tej uas kuv xav rau koj mloog. Kuv yuav rawm hais kuv tej lus; kuv ua tsis taus siab ntev lawm. Yog tsis muaj sijhawm rau kuv hais lus, kuv tej lus yuav phwj ib yam li cov cawv txiv hmab tshiab uas phwj tawm hauv lub hnab tuaj. Kuv yuav tsum hais kuv lub siab thiaj nqig. Qhov uas kuv cav no tsis yog kuv yuav xav tuaj leejtwg tog lossis tsis yog kuv qhuas ib tug twg. Kuv tsis lam ua txuj qhuas ib tug twg, yog kuv ua li ntawd Vajtswv yuav rau txim rau kuv.” Yauj, koj ua tib zoo mloog tej lus uas kuv yuav hais rau koj. Kuv yuav hais tej uas kuv twb xav tseg lawm rau koj mloog. Tej lus uas kuv hais yog los ntawm lub siab pheejxeeb, thiab kuv hais tej lus tseeb xwb. Vajtswv tus ntsujplig tsim kuv thiab pub txojsia rau kuv. Yog koj teb tau, cia li teb kuv tej lus thiab npaj nrog kuv sib cav. Koj thiab kuv zoo ib yam nkaus tabmeeg Vajtswv, wb ob leeg puavleej yog muab av puab. Yog li ntawd, tsis tas koj yuav ntshai kuv; kuv yuav tsis hais hnyav rau koj. Tej no yog tej lus uas kuv hnov koj hais: “Kuv tsis muaj txim; kuv tsis tau ua txhaum dabtsi. Kuv ncaj ncees thiab tsis muaj txim. Tiamsis yog Vajtswv nrhiav lus tawmtsam kuv, thiab ua rau kuv ib yam li ua rau tus yeebncuab. Vajtswv muab saw hlau khi kuv kotaw; nws saib ntsoov kuv tshais txhua kauj ruam.” Yauj, cia kuv qhia koj, koj yeej ua tsis yog lawm. Vajtswv muaj hwjchim loj dua neeg. Ua li cas koj liam hais tias Vajtswv tsis teb koj tej lus yws? Txawm yog Vajtswv hais tas hais thiab los tsis muaj leejtwg quavntsej nws tej lus li. Thaum tsaus ntuj uas neeg pw tsaug zog, Vajtswv hais rau neeg hauv nruab npau suav thiab ua rau neeg ua yogtoog pom. Vajtswv ua kom neeg mloog Vajtswv tej lus, thiab kom lawv hwm Vajtswv tej lus ntuas. Vajtswv hais kom neeg tso lawv tej kev txhaum tseg thiab cawm lawv dim ntawm txojkev uas ua neeg khavtheeb. Vajtswv tsis xav kom neeg raug kev puastsuaj; Vajtswv cawm kom neeg dim ntawm txojkev tuag. Vajtswv ntuas neeg los ntawm tej kab mob kev nkeeg uas ua rau nws lub cev mob lwj ntsuav. Tus neeg muaj mob, nws yeej tsis qab los, txawm yog zaub mov qab npaum twg los nws dhuav kawg li. Nws lub cev yuag zuj zus tsis tshuav dabtsi li; ua rau koj pom nws tej pobtxha nyob zoj; nws twb yuav mus rau hauv tubtuag teb. Tej zaum kuj muaj ib tug timtswv los pab nws, yog ib tug ntawm Vajtswv ib txhiab tus timtswv uas los qhia kom neeg paub txojkev ncaj ncees. Vim txojkev hlub, tus timtswv ntawd hais tias, “Cia li tso nws! Nws tsis yog tus uas yuav mus rau hauv tubtuag teb. Ntawm no yog qhov uas txhiv nws.” Nws lub cev yuav rov puv mos nyoos thiab muaj zog tuaj; thaum nws thov, Vajtswv yuav teb nws tej lus; nws yuav pehawm Vajtswv ntawm lub siab xyivfab hlo; Vajtswv yuav pauj tej uas nws ua ncaj ua ncees rov rau nws. Nws yuav hais tabmeeg rau sawvdaws tias, “Kuv tau ua txhaum lawm tiag. Kuv yeej ua tsis ncaj tiamsis yog Vajtswv tshwj kuv xwb. Vajtswv tsis cia kuv mus rau hauv tubtuag teb, kuv thiaj tseem muaj sia nyob.” Vajtswv ua txua yam no, nws ua tas los ua thiab; Vajtswv cawm neeg txojsia thiab pub kom neeg muaj kev kaj siab. Yauj, nimno koj cia li mloog kuv tej lus thiab nyob twjywm cia kuv hais. Tiamsis yog koj muaj dabtsi cia li hais rau kuv; yog koj hais yog lawm, kuv txaus siab yuav li koj hais. Tiamsis yog koj hais tsis yog, ces koj nyob twjywm mloog kuv hais, thiab kuv yuav qhia kom koj ua tau neeg ntse. Thaum nej noj, nej thiaj paub hais tias zaub mov qab, tiamsis thaum nej hnov luag tej lus, nej ho tsis ntse. Cia peb xaiv saib qhov twg yog qhov zoo; cia peb txiav txim siab saib qhov twg yog qhov yog. Yauj khav hais tias nws tsis muaj txim txhaum dabtsi, tsuas yog Vajtswv thiaj tsis lees hais tias, Yauj yog neeg ncaj ncees xwb; Yauj nug hais tias, ‘Kuv yuav ua li cas dag hais tias kuv ua txhaum? Kuv muaj mob kho tsis tau, tiamsis tsis yog vim kuv ua txhaum.’ “Nej puas tau pom dua ib tug neeg zoo li Yauj? Nws yeej tsis hwm Vajtswv li. Nws nyiam ua phoojywg nrog cov neeg ua phem ua qias thiab mus koom nrog cov neeg txhaum xwb. Nws hais tias qhov uas ua raws li Vajtswv siab nyiam tsis muaj qabhau dabtsi li. “Nej cov uas yog neeg paub tab, nej cia li mloog kuv hais! Vajtswv tus uas muaj hwjchim loj kawg nkaus puas ua txhaum? Nws yuav muab nqi zog rau neeg raws li tes haujlwm uas lawv ua, thiab ua zoo rau lawv kom tsimnyog qhov uas lawv tau. Vajtswv tus uas muaj hwjchim loj kawg nkaus yeej tsis ua txhaum li; nws ibtxwm ua ncaj rau sawvdaws. Puas muaj leejtwg muab hwjchim rau Vajtswv? Puas muaj leejtwg tsa Vajtswv kav lub ntiajteb? Yog Vajtswv rho neeg txojsia lawm, ces txhua tus uas muaj sia yuav tuag rov mus ua av dua. “Yog hais tias nej yog neeg ntse, nimno nej cia li mloog kuv hais. Nej tseem yuav rau txim rau Vajtswv tus uas ncaj ncees thiab los? Nej xav hais tias Vajtswv ntxub kev ncaj ncees no los? Vajtswv rau txim rau cov vajntxwv thiab cov nomtswv thaum lawv ua phem ua qias lossis ua tsis ncaj. Vajtswv tsis tuaj cov nomtswv tog lossis tsis saib cov npluanuj tseemceeb dua cov pluag. Rau qhov txhua tus puavleej yog Vajtswv tsim. Hmo ntuj tej neeg cia li tuag twjywm lawm. Vajtswv ua tau kom neeg tuag thiab puastsuaj mus; tej neeg uas muaj zog los Vajtswv ua kom tuag yoojyim heev. Vajtswv saib ntsoov txhua tus neeg tshais ruam mus kev. Tsis muaj ib qhov tsaus ntuj uas thaiv tau kom Vajtswv tsis pom tus neeg txhaum li. Vajtswv tsis tau teem ib lub sijhawm rau neeg mus rau Vajtswv txiav txim. Vajtswv muab ib co thawjcoj rho thiab muab ib co los hloov tsis tas yuav taug lawv lub neej li. Rau qhov Vajtswv yeej paub tej uas lawv ua huv tibsi lawm; thaum tsaus ntuj nws muab lawv ntsawm thiab tsuj ntiag tseg. Vajtswv rau txim rau cov neeg txhaum rau sawvdaws saib ntsoov, rau qhov lawv tso nws tseg thiab tsis quavntsej nws tej lus samhwm. Lawv quab yuam tej neeg pluag, ua rau cov neeg pluag lub suab quaj mus txog Vajtswv, thiab Vajtswv hnov lawv lub suab quaj thov pab. “Yog Vajtswv txiav txim siab tsis ua ib yam dabtsi los yeej tsis muaj leejtwg thuam tau nws li. Yog Vajtswv khiav nkaum lawm, yeej tsis muaj leejtwg nrhiav tau tsis hais ib tug twg lossis ib haivneeg twg li. Ntau haivneeg ua tsis tau ib yam dabtsi rau cov neeg ua phem ua qias kom tsis txhob tswjhwm lawv. “Yauj, koj puas lees koj tej kev txhaum rau Vajtswv, thiab coglus hais tias koj yuav tsis ua ntxiv lawm? Koj puas tau thov Vajtswv qhia koj tej kev txhaum rau koj, thiab koj puas txaus siab tso koj tej kev phem kev qias tseg? Rau qhov koj tsis lees paub tej uas Vajtswv ua, koj yuav ua li cas kom Vajtswv ua raws li koj xav tau? Koj yog tus txiav txim siab tsis yog kuv; cia li qhia tej uas koj xav rau kuv. “Tus neeg uas thoob tsib to nrog yeej mloog kuv hais, tus neeg muaj tswvyim uas hnov kuv hais yuav hais tias tej lus uas Yauj hais tsis yog lus txawj ntse, thiab tej uas nws hais tsis muaj qabhau dabtsi. Nej ua tib zoo mloog tej uas Yauj hais; nej yuav pom hais tias nws hais li tus neeg siab phem hais. Yauj ntxeev siab tsub ntxiv rau nws tej kev txhaum; nws ua saib tsis taus Vajtswv tabmeeg peb.” lossis koj nug Vajtswv hais tias, ‘Kuv tej kev txhaum ua li cas rau koj? Yog kuv tsis ua txhaum, kuv ho tau dabtsi?’ Kuv yuav teb koj thiab koj cov phoojywg tej lus huv tibsi. “Cia li saib saum nruab ntug! Saib tej huab nyob siab npaum li cas! Txawm yog koj ua txhaum los yeej tsis mob Vajtswv li. Yog koj ua txhaum ntau zaus puas ua li cas rau Vajtswv? Yog koj ua ncaj ncees puas pab tau Vajtswv dabtsi? Tsis muaj ib yam dabtsi uas Vajtswv xav tau ntawm koj li. Koj tej kev txhaum yuav raug lwm tus uas zoo li koj, thiab koj txojkev ua zoo yuav pab tau lwm tus. “Thaum neeg raug tsimtxom, lawv quaj ntsuag; lawv quaj thov kom lwm tus cawm lawv. Tiamsis lawv tsis mus cuag Vajtswv tus uas tsim lawv; tus uas pub lawv muaj kev cia siab thaum lawv raug kev tsaus ntuj. Lawv tsis mus cuag Vajtswv tus uas pub kev txawj ntse rau peb, kom ntse tshaj tej tsiaj thiab tej noog. Lawv quaj thov kev pab, tiamsis Vajtswv tsis teb, rau qhov lawv siab phem thiab khavtheeb heev. Qhov uas lawv quaj tsis muaj qabhau, Vajtswv tus uas muaj hwjchim loj kawg nkaus tsis pom lossis tsis hnov li. Yauj, koj hais tias koj tsis pom Vajtswv, tiamsis koj ua siab ntev tos, koj zaj yeej nyob ntawm Vajtswv lawm. Koj xav hais tias Vajtswv yuav tsis rau txim rau neeg, thiab nws tsis quavntsej neeg tej kev txhaum no los? Txawm yog koj hais lus ntau los tsis muaj qabhau, rau qhov koj tsis paub hais tias koj hais dabtsi.” Kuv muaj kev txawj ntse heev; kuv yuav qhia rau koj raws li kuv paub hais tias Vajtswv tus uas tsim kuv, nws yog tus ncaj ncees. Tej lus uas kuv hais rau koj tsis yog lus cuav; tus uas nyob ntawm koj hauv ntej no yog ib tug neeg ncaj thiab ntse heev. “Vajtswv yog tus muaj zog loj zog nchav! Nws tsis xaiv leejtwg ntsejmuag; tsis muaj ib yam uas Vajtswv tsis paub li. Vajtswv tsis pub tus neeg txhaum ua neej nyob, tiamsis nws ua ncaj rau tus neeg txomnyem. Vajtswv tsomkwm cov neeg ncaj ncees; nws cia lawv kav lwm tus ib yam li tej vajntxwv, thiab cia luag hwm lawv mus ibtxhis. Tiamsis qhov uas lawv raug luag cuab luag khi thiab raug txomnyem yog vim tej uas lawv ua, Vajtswv thiaj qhia lawv tej kev txhaum thiab lawv tej kev khavtheeb rau lawv. Vajtswv ua rau lawv mloog Vajtswv tej lus ntuas, thiab tso lawv tej kev phem kev qias tseg. Yog lawv mloog Vajtswv lus thiab pehawm nws, lawv lub neej yuav vammeej thiab nyob kaj siab lug. Tiamsis yog lawv tsis mloog Vajtswv lus, lawv yuav tuag rau hniav ntaj hniav riam vim lawv tsis quavntsej Vajtswv. “Cov neeg uas tsis hwm Vajtswv, lawv tsuas npautaws tas mus li xwb, txawm yog thaum lawv raug txim los lawv tsis thov Vajtswv li. Lawv tuag tas rau thaum lawv tseem hluas, lawv lub neej puastsuaj tas txajmuag ntsuav. Tiamsis Vajtswv cia kev txomnyem los qhia neeg ua neej, thiab siv txojkev ntxhov siab los qhib neeg lub qhovmuag. “Vajtswv tso koj dim kev nyuaj siab, thiab pub kom koj nyob tso siab lug; saum koj lub rooj muaj zaub mov nplua mias. Tiamsis nimno tsimnyog koj raug txim raws li tej uas koj ua. Ceevfaj tsis txhob cia luag tej nyiaj xiab ntxias tau koj, lossis tsis txhob cia kev npluanuj coj koj mus yuam kev. Tej nyiaj xiab ntawd yuav tsis pab koj thaum koj thov kev pab; txawm yog koj siv tagnrho koj lub zog los pab tsis tau koj dim. Tsis txhob tos hais tias muaj ib hmos txhua haivneeg yuav raug kev puastsuaj. Ceevfaj tsis txhob raus tes rau kev ua phem ua qias; qhov uas koj raug txomnyem yog ua kom koj tso kev txhaum tseg. “Nco ntsoov hais tias Vajtswv yog tus muaj hwjchim loj kawg nkaus; nws yog tus xibhwb uas zoo tshaj tej xibhwb huv tibsi. Tsis muaj leejtwg hais kom Vajtswv ua li ub li no lossis liam hais tias Vajtswv ua txhaum. Luag ibtxwm qhuas tej uas Vajtswv ua; koj los yuav tsum qhuas nws thiab. Txhua tus puavleej pom tej uas Vajtswv tau ua lawm, tiamsis peb tsuas tuaj deb saib xwb. Peb tsis paub Vajtswv lub hwjchim lossis tsis paub hais tias Vajtswv nyob thaum twg los lawm. “Vajtswv yog tus nqa tej dej hauv ntiajteb no mus thiab tso ua nag los rau lub ntiajteb. Vajtswv tso nag hauv tej tauv huab los rau neeg ntiajteb. Tsis muaj leejtwg paub hais tias yog li cas huab thiaj txawj txav lossis yog li cas xob thiaj nroo thoob saum ntuj qhov chaw uas Vajtswv nyob tuaj. Vajtswv ua kom muaj xob laim thoob ntuj, tiamsis hauv qab thu hiavtxwv tseem tsaus ntuj nti. Qhov ntawd qhia hais tias Vajtswv pub txhua haivneeg muaj noj muaj haus nplua mias. Vajtswv sau zog tej xob laim rau hauv nws xibteg thiab tso tej xob laim ntawd mus raug qhov chaw uas nws hom tseg. Xob nroo yog ceebtoom hais tias yuav los nagxob nagcua, txawm yog tej tsiaj los twb paub hais tias nagxob nagcua yuav los. “Nagxob nagcua ua rau kuv lub siab tshee hnyo. Nej txhua tus cia li mloog Vajtswv lub suab, yog lub suab xob nroo uas tawm ntawm nws lub qhovncauj tuaj. Vajtswv ua kom muaj xob laim ci thoob plaws saum nruab ntug, sab ntuj tim no mus ti nkaus sab ntuj tim ub. Ces hnov nws lub suab nrov nroo ntws tuaj, yog lub suab xob nroo uas txaus ntshai thaum uas muaj xob laim tuaj. Vajtswv ua kom muaj tej txujci tseemceeb tshwm thiab muaj ntau yam uas peb xav tsis thoob li. Vajtswv tso daus, tso nag tshauv thiab tuamtsam nag los rau lub ntiajteb. Txhua tus uas Vajtswv tsim yuav paub Vajtswv tes haujlwm; Vajtswv tsis pub neeg ua tau tes haujlwm uas Vajtswv ua. Tej tsiaj qus nkag mus nkaum rau hauv lawv tej qhov. Cua daj cua dub ntsawj sab qabteb tuaj, thiab cov cua uas txias heev ntsawj sab qaumteb tuaj. Vajtswv tshuab pa ua rau dej nkoog tas, thiab muab dej ua kom khov ua tej thooj. Xob laim ci nplas hauv tej tauv huab tuaj, tej huab ntawd txav mus raws li Vajtswv siab nyiam. Tej huab ntawd ua raws li Vajtswv tej lus samhwm thoob plaws qab ntuj. Vajtswv tso nag los ywg lub ntiajteb; tej zaum yog Vajtswv tso los rau txim lossis tso los qhia kom neeg paub nws txojkev hlub. “Yauj, koj so ib pliag thiab ua tib zoo mloog; ua tib zoo saib tej txujci tseemceeb uas Vajtswv ua. Koj puas paub hais tias Vajtswv yog tus samhwm thiab ua kom muaj xob laim hauv tej tauv huab tuaj? Koj puas paub hais tias ua li cas tej huab thiaj nyob tau nta yees saum nruab ntug, tsis yog Vajtswv tej txujci tseemceeb uas xav tsis thoob los? Koj tsuas paub tiv cua kub txomnyem ntsuav thaum cua ntsawj sab qabteb tuaj rau thaj av. Koj puas pab tau Vajtswv nthuav lub ntuj, thiab ua kom lub ntuj tawv li tooj thiab du li iav? Koj qhia rau peb saib yuav hais li cas rau Vajtswv; peb tsis muaj tswvyim thiab tsis paub hais. Kuv yuav tsis nrog Vajtswv hais; vim li cas kuv yuav cia nws rhuav kuv? “Thaum cua ntsawj lub ntuj kaj huv si, lub hnub uas nyob saum nruab ntug ci heev tsis muaj leejtwg ntsia taus. Muaj ib qho ci ntsa iab sab qaumteb tuaj, thiab Vajtswv lub tshwjchim ci ntsa iab tuaj ua rau peb ntshai kawg li. Vajtswv lub hwjchim loj heev ua rau peb txav tsis tau ze nws; Vajtswv yeej ua ncaj ua ncees thaum nws txiav txim rau neeg. Twb yog vim li ntawd neeg thiaj hwm nws, thiab nws tsis quavntsej cov neeg uas khav hais tias lawv ntse.” Tus TSWV teb Yauj hauv nthwv cua daj cua dub tuaj hais tias: “Koj yog leejtwg, koj thiaj tuaj nug kuv lub tswvyim, koj tej lus tsis muaj hauvpaus hauvntsis li los sav? Nimno koj cia li sawv khov kho ib yam li tus txivneej yawg thiab cia li teb tej lus uas kuv yuav nug koj. Thaum kuv tsim lub ntiajteb koj puas nyob ntawd? Yog koj paub txhij paub txhua, koj cia li qhia rau kuv saib; leejtwg yog tus uas hais tias yuav tsim lub ntiajteb loj li cas? Leejtwg yog tus muab hlua ntsuas lub ntiajteb? Koj paub tej no huv tibsi los? Yam dabtsi tuav tej ncej uas txheem lub ntiajteb no kom khov? Leejtwg yog tus txhos tus ncej zeb uas txheem lub ntiajteb? Hnub ntawd thaum kaj ntug txoog, tej hnubqub hu nkauj ua ke thiab tej timtswv saum ntuj qw zoo siab. “Leejtwg yog tus uas kaw rooj qho dej hiavtxwv thaum hiavtxwv phwj yaws hauv nruab tivtxwv tuaj? Kuv yog tus uas ua kom huab laum nkaus hiavtxwv thiab ua kom qhov tsaus ntuj qhwv nkaus dej hiavtxwv. Kuv tu kom muab ciam dej ciam av rau hiavtxwv nyob, thiab muab ntsia liaj lub rooj qho tsis pub dej tawm. Kuv hais rau dej hais tias, ‘Kuv tsuas pub koj puv txij no xwb, tsis pub puv dhau! Koj lub zog uas ntas tuaj tsuas pub ntas tuaj txog txij no xwb.’ “Yauj, txij thaum koj xeevxwm ua neej los txog nimno, koj puas tau hais kom lub hnub tawm tuaj? Thaum sawv ntxov koj puas tau kom tshav ntuj ci tuaj ziab ntiajteb thiab co kom cov neeg siab phem tawm hauv tej chaw uas lawv nkaum los? Tej duab tshav ntuj ntawd ua rau sawvdaws pom tej toj roob hauv pes sawv ntshais ntsho ib yam li tej ntaub uas luag muab nthuav pom tej nre tais meej nriav, thiab pom tseeb li lub yeem homthawj uas luag nias rau av nplaum. Nruab hnub pom kev rau cov neeg siab phem ua tsis tau phem thiab txwv tsis pub lawv ua nruj ua tsiv. “Koj twb mus txog hauv qhov uas hiavtxwv txhawv lawm los? Koj twb mus hauv qab thu dej hiavtxwv los lawm los? Twb muaj neeg coj koj mus saib lub roojvag uas quas tubtuag teb uas tsaus ntuj nti lawm los? Koj puas paub hais tias lub ntiajteb no loj li cas? Yog koj paub, koj cia li qhia kuv saib! “Koj puas paub hais tias tus duab ci yog ci qhov twg tuaj? Lossis qhov tsaus ntuj yog los qhov twg los? Koj puas qhia tau kom tej duab ci thiab duab tsaus, ci thiab tsaus mus txog txij twg lossis hais kom rov los nyob qhov qub? Kuv xav hais tias koj ua tau, rau qhov koj twb laus heev lawm, thiab thaum tsim ntiajteb koj twb nyob ntawd ntag! “Koj puas tau mus pom tej txhab uas kuv cia ntim daus thiab lawg? Kuv npaj tej ntawd cia rau lub sijhawm uas muaj kev txomnyem thiab hnub uas muaj kev tsov kev rog. Koj twb mus txog ntawm qhov chaw uas lub hnub tawm tuaj lossis ntawm qhov chaw uas cov cua sab hnubtuaj ntsawj tuaj lawm los? “Leejtwg yog tus khawb kwj rau nag los thiab qhib kev rau xob nroo? Leejtwg yog tus tso nag los rau tej toj roob hau pes uas tsis muaj neeg nyob? Leejtwg yog tus ywg dej rau thaj av uas qhuav nkig nkuav kom tej nroj tsuag hlob taus? Leejtwg yog tej nag thiab tej lwg txiv? Leejtwg yog tej dej nkoog thiab tej te niam? Tej ntawd ua rau dej khov tawv cuag pobzeb thiab ua rau nplaim hiavtxwv nkoog khov kho. “Koj puas yog tus uas muab cov hnubqub Txhiaj Txivmim los teeb ua ib ntsau lossis muab cov hnubqub Pojsua Kwv ntas cais nyias nyob nyias? Puas yog koj ua rau tej hnubqub tig tau mus los haum lub caij lub nyoog lossis qhia kev rau tej hnubqub Ntsau loj thiab Ntsau me? Koj paub tej kevcai uas luag tswjhwm saum nruab ntug, thiab koj muab tau tej kevcai ntawd los siv rau hauv lub ntiajteb no los? “Koj puas hais tau kom tej huab tso nag los rau koj? Yog koj hais kom xob laim, nws puas tawm tuaj hais rau koj tias, ‘Kuv nyob ntawm no?’ Leejtwg qhia rau tus qaibdeg hais tias tus dej Niles yuav huam tuaj lossis leejtwg qhia rau tus lau qaib hais tias nag yuav los? Leejtwg muaj kev txawj ntse suav txheeb tej huab thiab hais kom tej huab ntawd tso nag los rau tej plua av kom nplaum ua tej thooj? “Koj puas nrhiav tau nqaij rau tej tsov ntxhuav noj, thiab ua kom tej menyuam tsov ntxhuav tsau plab, thaum lawv nkaum hauv qhov tsua lossis pw hauv lawv tej qhov? Thaum uablag tshaib plab thiab ya rau ub rau no, leejtwg yog tug pub rau uablag noj, thiab pub rau uablag tej menyuam uas quaj thov kuv? “Koj puas paub thaum twg sai yug menyuam? Koj saib ntsoov muaslwj yug menyuam los? Koj puas paub tej tsiaj ntawd suab menyuam pestsawg hli? Thiab thaum twg lawv yug menyuam? Koj puas paub thaum twg tej tsiaj qus zaum ntua yug menyuam? Tej menyuam tsiaj ntawd loj hlob muaj zog nyob nruab zoo nruab tsuag; lawv mus thiab tsis rov los li lawm. “Leejtwg cia tej neesluav qus nyob ywj siab? Leejtwg daws hlua thiab tso lawv mus? Kuv cia tiaj suabpuam ua tej neesluav lub chaw nyob thiab cia lawv nyob hauv lub tiaj ntsev. Tej neesluav ntawd nyiam mus nyob deb tej nroog kom tsis muaj suab ntshoo, thiab tsis muaj leejtwg muab lawv cob thauj nra. Toj roob hauv pes yog lawv tej tshav zaub thiab yog lawv tej chaw ncig nrhiav noj. “Nyujqus puas luag ntoo rau koj? Nws puas los nyob hauv koj lub nkuaj ib hmos? Koj puas muab hlua khi tau nws cab mus laij teb? Lossis koj puas muab tau nws los cab khais haiv koj thaj teb? Koj cia siab rau nws lub zog loj zog nchav, thiab xav hais tias nws yuav ua koj tej haujlwm hnyav no los? Koj xav hais tias nws yuav thauj tej qoobloo uas koj sau thiab tej nplej hauv koj lub tshav nplej los tsev no los? “Noog ntxhuav ntxuaj tis thawv zoo li yuav ya taus! Tiamsis nws ya tsis taus li tus os dej ya. Noog ntxhuav nteg qe rau hauv av thiab cia av ncu kom daug. Nws tsis txhawj hais tias nyob tsam luag tsuj lossis nyob tsam tej tsiaj nruab nrag los muab ua tawg. Nws ua ib yam li tej qe ntawd tsis yog nws li, nws tsis mob siab hais tias nyob tsam nkim nws lub zog. Twb yog kuv tsim kom nws ruam li ntawd thiab tsis pub nws muaj tswvyim. Tiamsis thaum twg nws khiav, nws luag tus nees thiab tus neeg uas caij nees plig. “Yauj, koj puas yog tus uas ua kom nees muaj zog thiab cog txoob rau nees? Puas yog koj ua kom nees txawj tuam tau li kooj thiab hee ua rau neeg ceeb pes nkaus? Tej nees txauj av xyivfab hlo nram tiaj; lawv dhia tsaus nti kawg lawv lub zog mus rau hauv tshavrog. Lawv tsis paub ntshai dabtsi li, thiab tsis muaj ib rab ntaj uas ua rau lawv thim rov qab. Cov neeg caij nees tej cuabyeej ua rog nrov zom zaws thiab tej hniav ntaj ci nplas. Lawv phoom pesyos dhia mus rau tom hauv ntej; thaum lawv hnov suab raj suab xyu nrov lawv nyob tsis tswm li. Thaum lawv hnov suab raj suab xyu nrov, lawv hee laws; thaum tseem mus tsis tau txog tshavrog lawv twb hnov ntxhiab lawm, thiab lawv mloog ntsoov cov thawj tubrog lub suab nthe. “Thaum liaj nthuav ti ya rau nram qabteb, puas yog koj qhia nws ya? Puas yog dav tos koj hais nws, nws mam mus ua zes rau saum tej roob siab? Nws ua zes rau saum tej roob tsuas siab thiab ua chaw nkaum saum tej nkiav zeb. Nws nyob rawv zov ntsia deb thiab ze saib puas pom ib tug tsiaj nyob qhov twg uas nws yuav muab tau los noj. Cov dav ntawd ya poog ntws vij tej tsiaj tuag, thiab tej menyuam dav zov rawv haus tej tsiaj tuag cov ntshav.” Kuv twb hais tshaj qhov uas tsimnyog kuv hais lawm.” Tom qab ntawd, tus TSWV rov hais hauv nthwv cua daj cua dub tuaj rau Yauj ib zaug ntxiv. Tus TSWV hais rau Yauj hais tias, “Koj cia li sawv khov kho ib yam li tus txivneej yawg thiab teb kuv tej lus. Koj hais rau kuv tias kuv ua tsis ncaj, thiab hais tias kuv yog tus txhaum, koj yog tus tsis txhaum no los? Koj muaj zog npaum li kuv los? Koj ua tau koj lub suab nrov qeeg nkaws ib yam li kuv lub los? Yog koj ua tau, koj cia li sawv khav txiv ntxhias ib yam li tus muaj hwjchim, muab koj lub meejmom thiab lub tshwjchim los hnav kiag saib. Koj cia li saib tej neeg khavtheeb; cia li nthe tawg ntho kom lawv txo hwjchim. Koj cia li saib cov neeg khavtheeb thiab txo lawv lub hwjchim kom qis; muab cov neeg siab phem tsuj nthi rau ntawm lawv qhov chaw. Muab lawv faus kiag rau hauv nruab av; muab lawv khi kiag rau hauv tubtuag teb. Yog koj ua tau, kuv yog thawj tug uas yuav qhuas koj, thiab lees hais tias koj yog tus uas kovyeej lawm. “Koj cia li saib tus tsiaj Npehemaus; kuv tsim nws thiab tsim koj huv tibsi. Nws noj zaub li tus nyuj, tiamsis yog dabtsi ua rau tus tsiaj ntawd lub cev muaj zog heev, thiab yog lub hwjchim dabtsi ua rau nws tej nqaij puv nruj nreem! Nws tus kotw tsa ntshuas ib yam li tsob ntoo ciab, thiab nws ncejpuab ntug ntoob muaj zog heev. Nws tej pobtxha khov cuag tooj, thiab nws tej tes taw tawv cuag hlau. “Tus tsiaj uas muaj hwvxyeej tshaj tej tsiaj uas kuv tsim; tsuas yog tus tswv uas tsim nws thiaj kovyeej nws xwb. Nws noj zaub saum tej roob uas yog tej tsiaj nruab nrag tej chaw ncig. Nws pw hauv qab tej xyuv pos, thiab pw tsau hawv tsawv hauv qab tej tauj iab. Tej ntoo pos thiab tej lwgzaj uas tuaj ntawm ntug dej ua duab ntxoov ntxoo rau nws nkaum. Nws tsis ntshai tus dej uas ntws ceev; thaum tus dej Yauladees ntsawj nws taubhau los nws tseem nres khov kho. Leejtwg muaj cuabkav ua rau nws digmuag thiab ntes tau nws? Lossis leejtwg muaj cuabkav muab hlua chaws tau nws qhovntswg? “Koj muaj cuabkav muab nuv ntses nuv tau Levi-athas lossis muab hlua khi tau nws tus nplaig los? Koj puas muab hlua chaws tau nws qhovntswg? Lossis muab nuv ntses nqe tau nws lub puabtsaig? Nws puas yuav thov kom koj tso nws mus? Nws puas yuav ua tib zoo thov kom koj hlub nws? Nws puas kam lees thiab coglus rau koj hais tias nws yuav ua koj qhev mus ibtxhis? Koj puas yuav khi tau nws ib yam li khi noog rau koj tej ntxhais ua si? Cov neeg ntaus ntses puas tuaj kheev nqi yuav nws? Tej tub lag tub luam puas yuav muab nws coj mus txhoov muag? Koj puas yuav muab hmuv nkaug tau nws daim tawv lossis muab hmuv hlau nkaug tau nws taubhau tshab? Yog koj nrog nws sib ntsuas zog ib zaug, koj yuav zeem kiag tsis kov ntxiv li lawm. “Yog leejtwg pom Levi-athas, nws yuav ntshai ua ibce tuag tas thiab ntog rau hau av. Thaum muaj neeg mus thab nws, nws yuav ua tsiv kawg nkaus, tsis muaj leejtwg yuav tiv taus li. Leejtwg tawmtsam nws tas thiab tseem muaj sia nyob? Nyob hauv ntiajteb no yeej tsis muaj leejtwg ua tau li ntawd. “Cia kuv qhia Zaj tej tes taw rau koj paub, thiab qhia rau koj saib nws loj thiab muaj zog npaum li cas. Tsis muaj leejtwg laws tau nws daim tawv lossis nkaug tshab nws tej nplai. Leejtwg muaj cuabkav rua tau nws lub qhovncauj uas hniav zuag plias thiab txaus ntshai ntawd? Nws lub nraubqaum ua nplai rees ua tej nreej tawv cuag pobzeb. Nws tej nplai sib dhos ntom nti, txawm yog cua los twb txeem tsis tau. Tej nplai ntawd sib dhos ua nreej rees, tsis muaj ib yam dabtsi ua tau rau cov nplai ntawd nti li. Thaum nws txham muaj duab ci laim liab vog, thiab nws ob lub qhovmuag ci li thaum lub hnub tawm tuaj. Muaj nplaim taws cig laim lias hauv nws qhovncauj thiab ya liab vog tuaj. Muaj pa ncho tawm hauv nws qhovntswg tuaj ib yam li tej pa quavnyab ncho hauv qab laujkaub. Nws tej pa ua tau hluavtaws; muaj hluavtaws tawm liab vog hauv nws qhovncauj tuaj. Nws lub cajdab muaj zog heev, txhua tus uas pom nws ntshai kawg li. Nws daim tawv, tawv cuag hlau txias, tsis muaj ib qho zooj li. Nws siab tawv ib yam li pobzeb, thiab tawv ib yam li txhib zeb tsis ntshai dabtsi li. Thaum nws tawm plaws tuaj, txawm yog tej neeg uas muaj zog heev los yeej ntshai ua ibce tuag tas tsis paub ua zaj twg. Tsis muaj ib rab ntaj uas yuav txiav tau nws li; txawm yog muab ntaj, muab hmuv lossis muab xubvos tua los yeej tsis to li. Muab hmuv hlau nkaug nws, ces ib yam lib muab quavnyab nkaug, thiab muab hmuv tooj nkaug, ces ib yam li muab ntoo lwj nkaug xwb. Tsis muaj ib xibxub vos uas yuav ua tau rau nws khiav li; muab pobzeb ntaus nws, ces ib yam li muab quavnyab ntaus xwb. Muab qws ntaus nws, ces ib yam li muab ib tug quavnyab npleg ntaus; thiab thaum neeg muab hmuv nkaug nws, nws tseem luag thiab. Nws tej nplai hauv qab plab ntse cuag li tej txhais lamhwj; thaum nws mus, nws tshiav av tawg pes rhe ib yam li khais laij liag. Nws ua rau dej hiavtxwv npau ib yam li dej kub npau, thiab ua rau dej hiavtxwv ua npuas ib yam li laujkaub roj. Nws mus kev mas ua rau dej txaws dawb vog rov tom qab; thiab nws ua rau dej hiavtxwv ua npuas dawb paug. Tsis muaj ib yam dabtsi hauv ntiajteb no yuav piv tau nws; nws yog tus tsiaj uas tsis paub ntshai dabtsi li. Txawm yog tej tsiaj ua tau heev los nws tsis ntshai; nws yog tus vajntxwv uas kav tagnrho txhua yam tsiaj nruab nrag.” Yauj teb tus TSWV hais tias: “Tus TSWV, kuv paub hais tias koj yog tus uas muaj hwjchim loj kawg nkaus; koj xav ua dabtsi, koj yeej ua tau huv tibsi. Koj nug hais tias ua li cas kuv thiaj muaj siab tawv nrog koj sib cav; kuv yog neeg ruam, kuv hais txog tej uas kuv tsis totaub, thiab tej yam xav tsis thoob uas kuv tsis tau paub dua li xwb. Koj kom kuv mloog koj hais thiab teb koj tej lus. Yav tas los kuv tsuas paub raws li luag qhia kuv xwb, tiamsis nimno kuv qhovmuag pom koj lawm tiag. Yog li ntawd kuv txajmuag kawg nkaus rau tej lus uas kuv hais, kuv thiaj mus zaum ntawm cub tshau thiab hauv av ris siab hlo tsis ua ntxiv li lawm.” Tom qab uas tus TSWV hais rau Yauj tas lawm, tus TSWV hais rau Elifas hais tias, “Kuv chim heev rau koj thiab koj ob tug phoojywg, rau qhov thaum nej piav txog kuv zaj, nej hais tsis tseeb raws li Yauj uas yog kuv tus tubtxib hais. Nimno nej cia li mus ntes xya tus heev nyuj thiab xya tus laug yaj tuaj rau Yauj tua hlawv fij daws nej lub txim. Yauj yuav thov kuv zam txim rau nej, kuv yuav teb Yauj tej lus thov, thiab kuv yuav tsis rau txim rau nej raws li nej tau ua txhaum lawm. Thaum nej piav txog kuv zaj, nej tsis hais lus tseeb raws li Yauj hais.” Ces Elifas, Npiledas thiab Xaufas txawm ua raws li tus TSWV hais, thiab tus TSWV teb Yauj tej lus thov. Tom qab Yauj thov Vajtswv rau nws peb tug phoojywg tas, tus TSWV tau foom koob hmoov rau Yauj rov tau zoo neej dua thiab pub Yauj muaj txhua yam li qub thiab ib npaug ntxiv. Yauj cov kwvtij, cov nkauj muam thiab tej phoojywg thaum ub tuaj xyuas Yauj thiab nrog Yauj noj haus hauv nws tsev. Lawv nplig Yauj siab thiab txhawb nws zog txog tej kev txomnyem uas tus TSWV tso los rau Yauj. Lawv sawvdaws muab nyiaj thiab ib leeg muab ib nti nplhaib kub rau Yauj. Tus TSWV foom koob hmoov rau Yauj lub neej zoo heev dua thaum chivthawj. Yauj muaj kaum plaub txhiab tus yaj, rau txhiab tus ntxhuav, ob txhiab tus nyuj thiab ib txhiab tus neesluav. Yauj muaj xya leej tub thiab peb leeg ntxhais. Yauj muab tus ntxhais hlob tis npe hu ua Yemimas, tus ntxhais nrab hu ua Kexiyas thiab tus ntxhais ntxawm hu ua Keles Hapus. Tej pojniam uas nyob hauv ntiajteb no tsis muaj ib tug zoo nkauj npaum li Yauj cov ntxhais. Yauj faib nws tej qubtxeeg qubteg rau nws cov ntxhais ib yam li faib rau nws cov tub. Tom qab ntawd Yauj ua neej nyob tau ib puas plaub caug xyoo ntxiv, nws pom nws cov tub cov ntxhais tej xeebntxwv huv tibsi. Ces thaum Yauj laus heev lawm nws mam li tuag. Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab. Tiamsis cov uas tau kev kaj siab yog cov uas hwm tus TSWV txoj Kevcai thiab kawm txoj kevcai ntawd nruab hnub hmo ntuj. Lawv zoo ib yam li tej ntoo uas cog ze rau ntawm ntug dej uas txi txiv raws caij raws nyoog tej nplooj los tsis qhuav li. Thiab txhua yam uas lawv ua puavleej tiav. Tiamsis cov neeg siab phem tsis zoo li ntawd, lawv zoo ib yam li cov npluag nplej uas cua ntsawj ya ri niab. Vajtswv yuav rau txim rau cov neeg ua phem thiab muab lawv cais tawm ntawm Vajtswv haivneeg. Tus TSWV saib xyuas cov neeg ncaj ncees thiab coj lawv txoj haukev, tiamsis cov neeg ua phem tabtom taug txojkev puastsuaj. Vim li cas txhua haivneeg tuavhauv ntxeev siab? Vim li cas cov pejxeem tuav tswvyim ua tej uas tsis muaj qabhau? Lawv cov vajntxwv los ntxeev siab, thiab lawv tej nomtswv tuaj txoos ua ke tuav tswvyim tawmtsam tus TSWV thiab tawmtsam tus vajntxwv uas tus TSWV xaiv. Lawv hais tias, “Cia peb nyob ywj siab tsis txhob cia nkawd kav peb, thiab cia peb khiav tawm ntawm nkawd kev tswjhwm.” Tus TSWV nyob saum nws lub zwmtxwv saum ntuj luag lawv plig, thiab thuam lawv tej tswvyim uas tsis muaj qabhau. Nws ntuas lawv npautaws vog thiab nws txojkev chim ua rau lawv ceeb ras pes dheev. Nws hais tias, “Kuv tsa kuv tus vajntxwv rau saum lub Roob Xi-oos uas yog kuv lub roob dawbhuv lawm.” Tus vajntxwv hais tias, “Kuv yuav qhia tej lus uas tus TSWV hais tseg cia. Nws hais rau kuv li no: ‘Koj yog kuv tus tub, hnub no mus kuv yog koj txiv lawm. Cia li thov, kuv yuav muab txhua haivneeg cob rau koj, tagnrho lub ntiajteb no yuav yog koj tug. Koj yuav muab ib tug qws hlau los kav lawv, koj yuav ntaus lawv tawg ntsoog ntxaws ib yam li tej laujkaub av.’ ” Nej cov uas yog vajntxwv, nej cia li mloog tej lus qhuab ntuas no, nej cov uas kav lub ntiajteb, nej cia li kawm zaj no. Nej cia li muab lub siab dawb paug ua tus TSWV tes haujlwm thiab paub ntshai nws, cia li txo hwjchim thiab txhos caug ntua pehawm nws, lossis yuav cia nws chim sai rau nej, thiab ua kom nej tuag tamsim. Txhua tus uas mus thov nws ua tus tsomkwm thiaj yuav tau kev kaj siab lug. Tus TSWV, kuv muaj yeebncuab coob heev, thiab muaj coob leej tawmtsam kuv! Lawv sib tham txog kuv, lawv hais tias, “Vajtswv yuav tsis pab nws li.” Tiamsis tus TSWV, koj yog kuv daim thaiv hniav ntaj; koj yuav pub kom kuv yeej thiab koj yuav txhawb kuv lub zog. Kuv hu tus TSWV pab kuv, thiab nws nyob saum nws lub roob dawbhuv teb kuv tej lus thov. Kuv qhau cev pw tsaug zog, thiab tus TSWV saib xyuas kuv ib hmos kaj ntug. Kuv tsis ntshai kuv cov yeebncuab ntau txhiab leej uas vij puagncig kuv ntawd li. Tus TSWV, cia li los, cawm kuv lauj! Kuv tus Vajtswv! Koj cia li rau txim rau kuv cov yeebncuab thiab tsis txhob pub lawv muaj hwjchim ua phem rau kuv. Kev muaj yeej yog los ntawm tus TSWV, thov nws foom koob hmoov rau nws haivneeg. Vajtswv tus uas tiv thaiv kuv, thov teb kuv thaum kuv thov koj! Thaum kuv raug kev nyuaj siab, koj yeej pab kuv. Thov ua lub siab dawb paug rau kuv thiab mloog kuv tej lus thov tamsim no. Cov pejxeem, nej tseem pheej yuav saib tsis taus kuv mus txog thaum twg? Nej tseem yuav nyiam txojkev uas tsis muaj nqis thiab kev dag mus txog thaum twg? Nco ntsoov hais tias tus TSWV yeej xaiv cov neeg ncaj ncees los ua nws tug, thiab nws yeej hnov kuv thaum kuv hu nws. Cia li ntshai ua siab tshee hnyo thiab tseg tsis txhob ua txhaum; thaum nej pw ntsiag to saum txaj, nej ua tib zoo muab zaj no xav kom thoob thoob. Muab tej khoom mus fij rau tus TSWV kom raws li kevcai, thiab nej yuav tsum cia siab rau nws. Muaj coob leej thov tus TSWV li no: “Tus TSWV, thov koj foom koob hmoov ntxiv rau peb. Thov ua siab dawb siab zoo tig los ntsia peb!” Tiamsis tej kev zoo siab uas koj muab rau kuv tseem ntau tshaj tej qoobloo thiab tej cawv uas lawv ibtxwm muaj. Thaum kuv qhau cev pw, kuv tau zoo tsaug zog tso siab lug, tus TSWV, tsuas yog koj tib leeg xwb, thiaj pub kuv muaj kev kaj siab. Tus TSWV, thov koj mloog kuv tej lus, thiab hnov kuv lub suab hu. Kuv tus Vajtswv thiab vajntxwv, thov mloog kuv lub suab quaj hu thov koj pab kuv! Tus TSWV, kuv thov koj; Koj yeej hnov kuv lub suab thov thaum sawv ntxov; thaum lub hnub tawm tuaj kuv thov koj thiab tos rawv koj teb kuv. Koj tsis yog tus Vajtswv uas txaus siab rau txojkev ua phem ua qias; koj yeej tsis pub muaj tej kev phem nyob tabmeeg koj li. Cov neeg khavtheeb tsis muaj peevxwm sawv tabmeeg ntawm koj lub xubntiag; koj yeej ntxub cov neeg siab phem. Koj rhuav tshem cov neeg dag, ntxub cov neeg limhiam, thiab cov neeg ntxeev ntxias. Tiamsis vim koj muaj kev hlub kuv thiaj muaj peevxwm los tau rau hauv koj tsev. Kuv thiaj muaj peevxwm mus pehawm koj hauv koj lub Tuamtsev dawbhuv thiab txhos caug pe koj ntawm kuv lub siab uas hwm koj. Tus TSWV, kuv muaj yeebncuab coob heev. Thov coj kuv ua raws li koj lub siab nyiam; thov ua koj txojkev kom tiaj rau kuv taug. Tej lus uas kuv cov yeebncuab hais yeej tsis muaj ib los tseeb li, lawv tsuas yog xav ua kom muaj kev puastsuaj xwb. Lawv hais lus mos lus muag thiab ncauj lus zoo, tiamsis lawv lub siab puv nkaus kev dag ntxias uas yog kev tuag. Vajtswv, thov koj txiav txim thiab rau txim rau lawv, thov kom lawv tej kev ntxeev siab ua rau lawv raug kev puastsuaj. Cia li muab lawv ntiab tawm ntawm koj mus rau qhov lawv ua txhaum ntau heev thiab lawv ntxeev siab rau koj. Tiamsis cia txhua tus uas los cuag koj tau kev kaj siab lug, cia lawv hu nkauj zoo siab txhua lub sijhawm. Thov koj tsomkwm cov uas hlub koj; vim muaj koj lawv thiaj muaj kev zoo siab. Tus TSWV, koj yeej foom koob hmoov rau cov neeg uas hwm koj, Koj txojkev hlub tiv thaiv lawv ib yam li daim thaiv hniav ntaj. Tus TSWV, thov koj tsis txhob chim thiab cem kuv! Tsis txhob chim thiab rau txim rau kuv! Tus TSWV, thov koj hlub kuv, rau qhov kuv tabtom raug kev puastsuaj. Thov txhawb kuv lub zog; vim kuv lub zog ntaug tas lawm, tagnrho kuv lub cev raug txomnyem ua rau kuv lwj siab kawg li. Tus TSWV, koj yuav tos ntev li cas koj mam li pab kuv? Tus TSWV, koj cia li los thiab cawm kom kuv dim; koj txojkev hlub uas nyob mus ibtxhis thiaj yuav cawm tau kuv dim ntawm txojkev tuag xwb. Nyob hauv tubtuag teb tsis muaj leejtwg ua koj tsaug; thiab lawv tsis nco qab koj lawm. Kuv qaug zog vim kuv txojkev tu siab; kuv quaj txhua hmo ua rau kuv lub txaj ntub kua muag tas, thiab kuv lub hauv ncoo tsau tsawv kuv tej kua muag. Kuv rua tsis taus qhovmuag vim kuv txojkev tu siab, kuv quaj qhovmuag o tas vim kuv cov yeebncuab. Nej cov uas yog neeg ua phem, cia li txav kom deb ntawm kuv mus. Rau qhov tus TSWV twb hnov kuv tej lus thov lawm; Nws mloog kuv lub suab quaj thov nws pab, thiab nws yuav teb kuv tej lus thov. Kuv cov yeebncuab yuav paub txog txojkev swb uas txajmuag ntsuav; ces tib pliag ntshis xwb lawv yuav raug raws khiav rov qab. Tus TSWV uas yog kuv tus Vajtswv, kuv tuaj thov koj tiv thaiv kuv; thov cawm kom kuv dim ntawm cov neeg uas caum ntes kuv, lossis lawv yuav dua kom kuv ntuag tas ib yam li tsov ntxhuav dua, lawv yuav cab kuv mus kom tsis muaj leejtwg cawm tau. thov cia kuv cov yeebncuab caum thiab ntes kom tau kuv, cia lawv muab kuv tua thiab txiav ua tej thooj povtseg, tsis txhob pub kom kuv muaj sia nyob hauv ntiajteb no li. Tus TSWV, koj cia li sawv tsees nrog koj txojkev npautaws los. Thov sawv nres nroos tawmtsam kuv cov yeebncuab tej kev chim, koj cia li sawv los pab kuv! Kev ncaj ncees yog yam uas koj samhwm kom muaj, cia li sau txhua haivneeg los nyob puagncig koj, thiab zaum saum koj lub zwmtxwv uas nyob saum ntuj tswjhwm lawv. Tus TSWV, koj yog tus uas txiav txim rau noobneej. Thov koj cia li txiav txim ncaj ncees rau kuv, rau qhov koj paub hais tias kuv tsis tau ua txhaum dabtsi. Koj yog Vajtswv tus uas ncaj ncees, koj txiav txim rau peb tej kev xav thiab tej uas peb lub siab ntshaw. Thov muab cov neeg siab phem tej kev ua phem tshem mus, thiab muab nqi zog rau cov neeg uas ua zoo. Vajtswv yog tus tiv thaiv kuv; nws cawm cov neeg uas hwm nws. Vajtswv yog tus txiav txim ncaj ncees thiab rau txim tsis tseg rau cov neeg uas ua phem ua qias. Yog lawv pheej tsis tso lawv tej kev phem tseg, Vajtswv yuav hov nws rab ntaj kom ntse. Nws yuav nta nws rab hneev thiab npaj tos tua xwb; Nws yuav nqa nws cov cuabyeej uas tua neeg tuag thiab taw nws tej xubvos nplaim taws rau lawv. Saib maj, cov neeg siab phem tsim kev phem kev qias lawm, lawv nrhiav kev ua phem thiab xyaum ua tej uas tsis ncaj xwb. Tiamsis lawv yuav poob tas rau hauv lub qhov uas lawv khawb cuab lwm tus kev. Yog li ntawd, lawv thiaj raug txim vim lawv tej kev phem kev qias thiab raug mob vim qhov uas lawv hla txoj kevcai. Kuv ua tus TSWV tsaug rau nws txojkev ncaj ncees, kuv hu nkauj qhuas tus TSWV, tus uas nyob saum qhov Chaw Siab Tshaj plaws. Tus TSWV uas yog peb tus Tswv, koj lub npe uas muaj hwjchim hnov thoob ntiajteb. Tej lus uas peb qhuas koj yeej nrov nto saum ntuj lawm, tej menyuam yaus thiab menyuam mos puavleej hu nkauj qhuas koj. Koj nyob tso siab lug tsis ntshai koj tej yeebncuab, koj tav tau txhua tus uas ua phem rau koj txoj haukev. Thaum kuv tsa qhovmuag ntsia saum lub ntuj uas koj tsim cia, kuv pom lub hli thiab tej hnubqub uas koj muab teeb nyias nyob muaj nyias chaw, neeg ntiajteb tsimtxiaj npaum li cas, koj thiaj nco txog lawv? Noobneej zoo npaum twg, koj thiaj hlub lawv ua luaj? Koj tsim lawv los ua tus yau ntawm koj; koj thiaj pub lawv muaj hwjchim thiab meejmom. Koj tsa lawv los kav txhua yam uas koj tsim tseg, thiab tsa lawv saib tagnrho txhua yam tsiaj uas koj tsim tseg: tej yaj thiab tej nyuj, tej tsiaj qus; tej noog, tej ntses thiab txhua yam tsiaj uas nyob hauv hiavtxwv huv tibsi. Tus TSWV uas yog peb tus Tswv, koj lub npe uas muaj hwjchim nyob thoob hauv ntiajteb no! Tus TSWV, kuv yuav ua koj tsaug kawg kuv lub siab; kuv yuav qhia txog tej txujci tseemceeb uas koj ua pab kuv lawm. Kuv yuav hu nkauj zoo siab vim muaj koj, kuv yuav hu nkauj qhuas koj uas yog Vajtswv tus muaj hwjchim loj kawg nkaus. Thaum koj tshwm plaws, kuv cov yeebncuab thim loo rov qab, lawv ntog pawglug thiab tuag tas lawm. Koj tuaj kuv tog thiab tsa kuv cai, koj zaum ntawm koj lub zwmtxwv txiav txim ncaj ncees. Koj rau txim rau cov neeg uas tsis hwm koj thiab rhuav tshem cov neeg ua phem ua qias, thiab yuav tsis muaj leejtwg nco txog lawv mus ibtxhis li lawm. Peb cov yeebncuab yuav ploj tas mus ibtxhis, koj muab lawv tej nroog rhuav puastsuaj tas, tsis tshuav ib qho ua chaw nco txog lawv li lawm. Tiamsis tus TSWV ua vajntxwv mus ibtxhis, nws twb teeb nws lub zwmtxwv ua qhov chaw txiav txim. Nws kav lub ntiajteb ntawm txojkev ncaj ncees; nws txiav txim ncaj rau txhua haivneeg Tus TSWV yog lub chaw rau cov neeg uas raug luag tsimtxom nkaum, thiab yog lub chaw kaj siab thaum raug kev nyuaj siab. Tus TSWV, txhua tus uas paub koj, lawv yeej cia siab rau koj; koj yeej tsis muab ib tug twg uas los cuag koj tso tseg li. Cia li hu nkauj qhuas tus TSWV uas kav saum lub roob Xi-oos! Cia li qhia tej txujci uas nws ua rau txhua haivneeg paub! Vajtswv yeej nco ntsoov txhua tus uas tiv kev txomnyem; nws nco ntsoov lawv tej suab quaj, thiab nws rau txim rau cov neeg uas tsimtxom lawv. Tus TSWV, thov hlub kuv lauj! Thov tsa muag ntsia tej kev txomnyem uas kuv cov yeebncuab ua rau kuv. Tus TSWV, thov cawm kom kuv dim ntawm txojkev tuag, kuv thiaj muaj peevxwm mus sawv tabmeeg ntawm cov neeg hauv lub nroog Yeluxalees thiab qhia txhua yam uas kuv qhuas koj rau lawv mloog. Kuv yuav zoo siab heev vim koj cawm kuv dim. Cov neeg tsis ntseeg Vajtswv poob rau hauv lub qhov uas lawv khawb tseg lawm, lawv rov mag rooj nta npuj uas lawv cuab tseg. Tus TSWV qhia nws rau lawv paub ntawm txojkev txiav txim ncaj ncees, thiab cov neeg ua phem rov mag rooj nta npuj uas lawv cuab. Cov neeg siab phem yuav nkag tagnrho mus rau hauv tubtuag teb, cov ntawd yog cov uas tsis lees txais yuav Vajtswv. Cov neeg txomnyem yuav tsis raug luag saib tsis taus mus ntxiv lawm; cov neeg pluag uas tas kev cia siab yuav tsis raug kev tsimtxom mus ntxiv lawm. Tus TSWV, thov koj cia li los! Tsis txhob pub neeg kovyeej koj! Coj cov neeg uas tsis ntseeg los sawv tabmeeg koj thiab koj txiav txim rau lawv. Tus TSWV, thov koj cia li ua kom lawv ntshai, thiab ua kom lawv paub hais tias lawv yog noobneej xwb. Tus TSWV, vim li cas koj yuav nyob deb ua luaj li? Vim li cas koj khiav nkaum thaum peb raug kev txomnyem? Cov neeg siab phem khavtheeb thiab tsimtxom cov neeg pluag; lawv ntes tau cov pluag thaum cov neeg pluag poob qhov. Cov neeg siab phem khavtheeb rau txojkev uas lawv ntshaw ua phem ua qias; Cov neeg siab hlob tsawm foom tus TSWV thiab tsis txais yuav nws. Cov neeg siab phem yeej tsis quavntsej txog tus TSWV, vim lawv txojkev khavtheeb lawv thiaj xav hais tias, “Tsis muaj Vajtswv.” Cov neeg siab phem yeej vammeej txhua yam. Tiamsis lawv tsis paub txog Vajtswv txojkev txiav txim, lawv tsuas tabhaj luag lawv cov yeebncuab plig xwb. Lawv rov hais rau lawv tias, “Peb yuav tsis ntog ib zaug li, thiab peb yuav tsis raug kev txomnyem hlo li.” Lawv hais lus tsawm luag, dag luag, thiab hais lus chob luag siab, lawv hais tej lus uas txaus ntxub thiab lus phem lus qias xwb. Lawv mus nkaum hauv tej zos, thiab tos tua tej neeg tsis muaj txim. Lawv nyas nrhw tua cov neeg txomnyem uas tsis muaj leejtwg pab, lawv nkaum zov tos luag ib yam li tus tsov ntxhuav. Lawv zov ntes cov neeg pluag; lawv ntes tau cov neeg pluag thaum mag lawv tej vojhlua thiab muab luag mus povtseg. Cov neeg tsis muaj tus pab raug luag caij tsuj, cov neeg txomnyem ntog vim cov neeg siab phem lub zog. Cov neeg siab phem xav hais tias, “Vajtswv yeej tsis quavntsej peb. Nws twb qi qhovmuag lawm, nws yeej tsis pom peb li!” Tus TSWV, cia li rau txim rau tus neeg siab phem! Thov nco ntsoov cov neeg uas raug kev txomnyem! Yog li cas tus neeg siab phem thiaj thuam Vajtswv thiab xav hais tias, “Vajtswv yeej tsis rau txim rau kuv li”? Tiamsis koj yeej muaj qhovmuag pom, koj yeej mob siab txog tej teebmeem thiab kev txomnyem ntawd, koj yeej npaj nroos yuav pab. Cov neeg uas tsis muaj leejtwg pab yuav los cuag koj, koj yeej ibtxwm pab cov neeg uas raug txomnyem. Cia li rhuav cov neeg siab phem thiab ua phem ua qias lub hwjchim; rau txim rau lawv vim tej kev txhaum uas lawv ua mus txog thaum lawv tso tseg. Tus TSWV yog tus vajntxwv uas nyob mus ibtxhis. Txhua tus uas pe lwm haivneeg tej vajtswv, tus TSWV yuav muab ntiab tawm hauv nws lub tebchaws mus. Tus TSWV, koj yeej mloog cov neeg uas tsis muab hlob tej lus thov, koj yuav txhawb lawv lub zog kom lawv ua tau lub siab ntev. Koj hnov cov neeg uas raug luag tsimtxom thiab cov menyuam ntsuag tej suab quaj; koj yuav txiav txim ncaj rau lawv kom neeg ntiajteb tsis txhob ua phem ntxiv lawm. Kuv cia siab rau tus TSWV uas yog kuv qhov chaw tso siab. Yog li cas nej hais rau kuv tias, “Koj cia li ya ib yam li tus noog mus rau saum tej roob, rau qhov cov neeg siab phem nta hneevnti thiab tua hauv qhov uas tsaus ntuj nti tuaj raug cov neeg ncaj ncees. Thaum uas txhua tsav yam vau tas lawm, cov neeg ncaj ncees ua tsis tau li cas.” Tus TSWV nyob hauv nws lub Tuamtsev uas dawbhuv; tus TSWV lub zwmtxwv nyob saum ntuj. Nws pom neeg nyob txhua qhov thiab paub txhua yam uas lawv ua. Tus TSWV sim cov neeg zoo thiab cov neeg siab phem ib yam nkaus; nws ntxub cov neeg uas nyiam ua nruj ua tsiv kawg li. Nws tso cov hluavncaig uas cig ntsaj thuav ib yam li nag los rau saum cov neeg siab phem; thiab nws tso khaub zeeg cua rau txim rau lawv. Tus TSWV yog tus ncaj ncees thiab hlub cov neeg uas ua zoo, cov neeg uas ua zoo yuav mus nyob ntawm nws lub xubntiag. Tus TSWV, thov koj pab peb lauj! Tsis tshuav ib tug neeg uas ua zoo seem nyob qhov twg li; neeg ntiajteb cov uas ncaj ncees twb ploj tas lawm. Lawv ib leeg dag ib leeg; lawv ib leeg ntxias ib leeg ntawm tej lus mos lus muag. Tus TSWV! Thov koj muab tus nplaig uas txawj dag ntxias txiav thiab ntsaws lub qhovncauj uas khavtheeb hais tias, “Peb xav yuav yam twg, peb yeej tau yam ntawd. Peb yuav hais raws li peb lub siab nyiam los yeej tau, tsis muaj leejtwg txwv peb li.” Tus TSWV hais tias, “Kuv yuav los tamsim no ntag, rau qhov cov neeg txomnyem raug tsimtxom hnyav heev thiab cov neeg nyuaj siab quaj tu siab kawg li. Kuv yuav muab txojkev uas nyob tso siab lug uas lawv twb tos los tau ntev lawm rau lawv.” Tus TSWV tej lus cog tseg yog tej uas cia siab tau, tej lus ntawd muaj nqis ib yam li tej nyiaj uas nchuav tawm hauv lub yeejvub xya zaus los lawm. Tus TSWV, koj yuav tsis nco qab kuv mus txog hnub twg? Mus ibtxhis li los? Koj tseem yuav khiav kuv mus txog thaum twg? Kuv tseem yuav tiv kev tsimtxom mus txog hnub twg? Kuv lub siab yuav quaj ntsuag nruab hnub hmo ntuj mus txog hnub twg? Kuv cov yeebncuab tseem yuav kovyeej kuv mus txog hnub twg thiab? Tus TSWV uas yog kuv tus Vajtswv, thov koj tsa qhovmuag saib kuv thiab teb kuv tej lus thov. Thov pab txhawb kuv lub zog thiab tsis txhob cia kuv tuag. Kuv cov yeebncuab thiaj tsis hais tias, “Peb yeej nws lawm.” Tsis txhob cia lawv zoo siab thaum lawv hnov kuv poob tsam. Kuv cia siab rau koj txojkev hlub uas ruaj khov; kuv zoo siab heev, rau qhov koj yuav cawm kom kuv dim. Tus TSWV, kuv yuav hu nkauj qhuas koj, rau qhov koj yeej ua zoo rau kuv. Cov neeg ruam pheej xav hais tias, “Yeej tsis muaj Vajtswv li!” Lawv txhua tus puavleej yog neeg txhaum, lawv ua phem ua qias tsis muaj ib tug ua zoo li. Tus TSWV nyob saum ntuj ntsia ntsoov tuaj rau neeg ntiajteb saib puas pom leejtwg ua neeg ntse, thiab pehawm nws. Tiamsis lawv puavleej ua txhaum; lawv txhua tus yog neeg ua phem. Lawv cov ntawd tsis muaj ib tug ua zoo hlo li, yeej tsis muaj ib tug li. Tus TSWV hais tias, “Lawv puas paub thiab? Cov neeg uas ua phem li no yog cov neeg uas tsis quavntsej dabtsi li. Lawv ua neej nyob nyiag nrhw kuv haivneeg tug noj thiab tsis ua kuv tsaug li.” Tiamsis lawv yuav ntshai heev, rau qhov Vajtswv yeej nyob nrog nraim cov neeg uas mloog nws lus. Cov neeg ua phem ua qias rhuav cov neeg uas txo hwjchim tej homphiaj, tiamsis tus TSWV yog tus uas tsomkwm cov txo hwjchim. Kuv thov Vajtswv kom muaj kev yeej tuaj hauv lub nroog Xi-oos tuaj rau cov Yixalayees. Thaum tus TSWV pub rau cov Yixalayees rov vammeej, thaum ntawd lawv yuav zoo siab heev. Tus TSWV, leejtwg thiaj li tsimnyog mus nyob hauv koj lub Tuamtsev? Leejtwg thiaj yuav mus pehawm koj saum lub roob Xi-oos uas yog koj lub roob dawbhuv? Cov neeg uas mloog Vajtswv txhua lo lus, yog cov ua ncaj ua ncees thiab hais tej lus tseeb, tsis hais lus nkaug lwm tus, tsis ua txhaum rau lawv tej phoojywg, lossis tsis xyav lawv tej kwvtij zejzog moo; lawv saib cov neeg uas Vajtswv muab tso tseg lawm tsis muaj nqis, tiamsis lawv hwm cov neeg uas mloog tus TSWV lus. Lawv ua raws nraim li lawv tej lus cog tseg, txawm nyuaj npaum li cas los xij, lawv yeej tsis hloov siab li. Lawv qiv nyiaj rau luag tsis yuav pajlaum, thiab lawv tsis yuav tej nyiaj uas luag coj tuaj xiab kom tau chaw ntxo tus neeg tsis txhaum. Yog leejtwg ua zoo li no nws yuav muaj chaw nyob tso siab plhuav mus li. Vajtswv, thov koj tsomkwm kuv; kuv tso siab plhuav rau koj, vim koj yog kuv lub chaw cawm siav. Kuv hais rau tus TSWV tias, “Koj thiaj yog kuv tus TSWV; txhua yam zoo uas kuv muaj puavleej yog koj pub.” Cov neeg uas muaj lub siab npuab tus TSWV yog cov uas muaj koob meej. Qhov uas kuv zoo siab tshaj plaws yog kuv tau nrog lawv nyob ua ke. Cov neeg uas pe lwm tus vajtswv, mas yog lawv lob kev txomnyem los rau lawv xwb. Kuv yuav tsis nrog lawv koom hlawv khoom fij; kuv yuav tsis pe lawv tej vajtswv. Tus TSWV, koj yog txhua yam uas kuv muaj, thiab koj pub txhua yam uas kuv xav tau rau kuv; kuv lub neej yav tom ntej nyob hauv koj lub xibteg. Kuv xav tsis thoob rau tej uas tus TSWV pub rau kuv; tej ntawd zoo kawg li! Kuv ua tus TSWV tsaug, rau qhov nws coj kuv txoj haukev, thiab hmo ntuj los kuv lub siab pheej ntuas kuv tsis tseg. Kuv yeej nco ntsoov hais tias tus TSWV nrog nraim kuv nyob, yeej tsis muaj ib yam dabtsi ua rau kuv ntshai, rau qhov nws nyob ze kuv. Yog li ntawd, kuv thiaj zoo siab thiab ua nws tsaug, kuv tau nyob tso siab pluav, rau qhov koj tiv thaiv tsis pub kuv raug kev ploj kev tuag, lossis tsis cia tus uas muaj lub siab npuab koj mus rau hauv tubtuag teb. Koj yuav qhia txojkev uas mus tau txojsia rau kuv, koj nrog nraim kuv ua rau kuv txaus siab thiab zoo siab mus ibtxhis. Tus TSWV, thov koj mloog tej lus uas kuv thov yuav kev ncaj ncees, thov koj tig pobntseg mloog kuv lub suab quaj uas thov koj pab! thov koj mloog kuv tej lus thov uas yog lus tseeb. Koj yuav txiav txim ncaj rau kuv, rau qhov koj yog tus paub qhov tseeb. Koj yog tus paub kuv lub siab. Thaum tsaus ntuj koj los cuag kuv, koj tshuaj kuv thiab tsis pom ib qho phem uas kuv ua nyob hauv kuv lub siab li. Kuv tsis hais lus phem li luag tej; kuv hwm koj tej lus samhwm thiab tsis tau taug txojkev uas cov neeg yuam cai taug. Kuv ibtxwm taug koj txojkev xwb, thiab kuv yeej tsis yuam kev li. Vajtswv, kuv thov koj rau qhov koj yeej yuav teb kuv tej lus thov; yog li ntawd, thov koj tig los saib kuv thiab mloog kuv tej lus thov. Thov qhia koj txojkev hlub uas loj kawg rau kuv thiab cawm kuv, koj sab tes xis cawm cov neeg uas khiav lawv cov yeebncuab. Thov tiv thaiv kuv ib yam li koj txuag koj lub qhovmuag, thov muab kuv zais rau hauv qab koj phab tis tus duab ntxoov ntxoo kom kuv tsis txhob raug cov neeg siab phem tua. Kuv cov yeebncuab uas xav muab kuv tua kom tuag nyob ibncig kuv. Lawv hais tej lus khavtheeb thiab tsis hlub leejtwg li. Tamsim no lawv nyob ncig kuv tas li lawm, lawv ntsia ntsoov kuv thiab yuav muab kuv thawb kom ntog. Lawv zoo li cov tsov ntxhuav uas zov rawv tos kev tom kuv, lawv xav dua kom kuv ntuag ua tej daim. Tus TSWV, thov koj cia li los tawmtsam kuv cov yeebncuab thiab ua kom lawv swb! Thov siv koj rab ntaj cawm kuv ntawm cov neeg siab phem txhais tes, cawm kom kuv dim ntawm cov neeg uas ntshaw khoom ntiajteb. Thov siv tej kev txomnyem uas koj npaj tseg lawm rau txim rau lawv; thov tseg kom txaus rau lawv tej menyuam thiab tseg ibtxhia rau lawv cov xeebntxwv. Tiamsis kuv yuav pom koj, rau qhov kuv tsis tau ua txhaum; thaum kuv tsim los kuv yuav txaus siab heev, rau qhov kuv pom koj tim ntsej tim muag. Tus TSWV, kuv hlub koj kawg li! Koj yog tus tiv thaiv kuv. Tus TSWV yog tus tiv thaiv kuv; nws yog kuv lub chaw fajxwm uas ruaj khov. Kuv tus Vajtswv yog tus tiv thaiv kuv, kuv nrog nws nyob tso siab plhuav. Nws tiv thaiv kuv ib yam li daim thaiv hniav ntaj, nws tiv thaiv kuv thiab pab kuv dim. Kuv hu txog tus TSWV, nws pab kuv dim ntawm kuv cov yeebncuab. Cia li ua tus TSWV tsaug! Kev tuag nyob puagncig kuv, kev puastsuaj nphau nphwv tuaj tsuam kuv. Kev tuag nyob puagncig kuv, thiab lub qhov ntxa twb cuab lug tos kuv lawm. Thaum kuv raug kev txomnyem, kuv hu tus TSWV; kuv thov kuv tus Vajtswv pab kuv. Nws nyob hauv nws lub Tuamtsev hnov kuv lub suab, nws mloog kuv lub suab quaj uas thov nws pab. Lub ntiajteb txawm qeeg nkaws thiab ua zog koog; tej taw roob co ua zog koog, rau qhov Vajtswv chim heev. Pa taws ncho auv niab hauv nws lub qhovntswg tuaj, nplaim taws thiab ncaig taws cig lam lug hauv nws lub qhovncauj tuaj. Tus TSWV qhib plho lub ntuj thiab nqis nrog tauv huab dub tsaus nti ntawm nws kotaw los. Nws caij rawv saum tus qhelunpees phab tis thiab ya, nws nyob saum tus qhelunpees phab tis ya nrog cua ceev heev. Nws muab kev tsaus ntuj thaiv nws lub cev, muaj huab ntom nti thiab muaj dej puagncig nws. Lawg thiab nplaim taws tawm hauv cov xob laim los tsoo tej huab dub tshab plaws mus ua tus TSWV ntej. Ces tus TSWV thiaj ua kom xob nroo saum ntuj tuaj, thiab hnov tus uas muaj hwjchim loj kawg nkaus lub suab. Nws tua nws xibxub tuaj thiab ua rau nws cov yeebncuab tawg ri sua, nws ua kom xob laim ci ntsa iab raws lawv khiav. Tus TSWV, thaum koj cem koj cov yeebncuab thiab nyooj rau lawv ntawm koj txojkev chim, ua rau qab thu dej hiavtxwv khoob lug thiab lub ntiajteb nyob do dus tsis muaj dabtsi thaiv. Tus TSWV thiaj cev tes puag saum nruab ntug tuaj tuav kuv hauv qab thu no, nws thiaj rub kuv tawm hauv qab thu dej qhov tob tshaj plaws los. Nws cawm kuv dim ntawm kuv cov yeebncuab lub hwjchim, thiab dim ntawm cov neeg uas ntxub kuv, rau qhov lawv muaj zog dua kuv. Thaum kuv raug kev nyuaj siab, lawv txawm tuaj ntaus kuv ntag, tiamsis tus TSWV tsomkwm kuv. Nws pab kuv tawm hauv txojkev puastsuaj, nws cawm kuv rau qhov nws txaus siab rau kuv. Tus TSWV muab nqi zog rau kuv rau qhov kuv yeej ua ncaj ua ncees xwb, nws foom koob hmoov rau kuv rau qhov kuv tsis tau ua txhaum dabtsi. Kuv yeej hwm tus TSWV txoj kevcai, kuv tsis khiav tawm ntawm kuv tus Vajtswv hlo li. Kuv yeej ua raws li nws tej kevcai qhia tsis muaj ib zaug uas kuv yuav tsis mloog nws tej lus samhwm li. Nws yeej paub kuv tsis tau ua txhaum, kuv tswj nrees kuv tsis ua ib qho txhaum li. Yog li ntawd, nws thiaj muab nqi zog rau kuv, rau qhov kuv ua dabtsi los yeej ua ncaj ua ncees xwb. Tus TSWV, koj yeej ua ncaj rau cov neeg uas ua ncaj rau koj, koj ua zoo kawg nkaus rau cov neeg uas tsis tau ua txhaum. Koj ua zoo rau cov neeg uas ua zoo, tiamsis koj ua yeebncuab rau cov neeg uas ua phem. Koj cawm cov neeg uas txo hwjchim, tiamsis koj txo cov neeg khavtheeb lub hwjchim. Tus TSWV, koj ua lub teeb rau kuv pom kev, koj tshem qhov uas ua rau kuv tsaus ntuj nti. Koj ua rau kuv muaj zog ntaus yeej kuv cov yeebncuab thiab koj lub hwjchim muaj peevxwm ntaus yeej cov uas tiv thaiv lawv. Tus Vajtswv no nws tes haujlwm yeej zoo tshaj plaws li. Nws tej lus thiaj yog lus tseeb. Nws yog daim thaiv hniav ntaj rau txhua tus uas mus cuag nws. Tus TSWV tib leeg xwb thiaj yog Vajtswv, Vajtswv tib leeg xwb thiaj yog tus tsomkwm peb. Nws yog tus Vajtswv uas ua kom kuv muaj zog, nws yog tus ua kom txojkev uas kuv taug muaj kev kaj siab lug. Nws ua rau kuv ob txhais taw tsuj av ntsia nkaus ib yam li tus muaslwj, nws tso kuv nyob kaj siab lug saum tej roob. Nws qhia kom kuv txawj ntaus rog; yog li ntawd, kuv thiaj muaj peevxwm tua taus rab hneevnti uas muaj zog tshaj plaws. Tus TSWV, koj tau muab koj daim thaiv hniav ntaj uas yog txojkev cawm dim rau kuv, thiab koj sab tes xis cawm kuv dim, thiab koj pab kuv, kuv thiaj vammeej. Koj rhawv kev dav rau kuv taug luag thiaj ntes tsis tau kuv; thiab kuv tsis ntog ib teeg li. Kuv caum kuv cov yeebncuab thiab ntes tau lawv, kuv yeej tsis tso lawv tseg mus txog thaum kuv muab lawv tua puastsuaj tas. Kuv ntaus lawv ntog tas huv tibsi, thiab lawv tsis muaj peevxwm sawv tau li, lawv swb thiab ntog pawglug ntawm kuv xubntiag. Koj ua rau kuv muaj zog sib tua hauv tshavrog, pub kuv yeej tagnrho kuv cov yeebncuab. Koj ua rau kuv cov yeebncuab tawg khiav ri sua ntawm kuv mus, cov uas ntxub kuv, kuv yuav ua kom lawv puastsuaj tas. Lawv quaj qw thov pab, tiamsis tsis muaj leejtwg cawm lawv li, lawv thov tus TSWV, tiamsis nws tsis teb lawv tej lus thov. Kuv muab lawv tswm ntsoog mos nyoos ib yam li tej hmoov av rau cua ntsawj mus povtseg, kuv tsuj lawv ib yam li tsuj av nkos hauv plawv kev. Koj cawm kuv dim ntawm tus neeg uas ntxeev siab rau kuv thiab tsa kuv ua tus kav txhua haivneeg, tej neeg uas kuv yeej ibtxwm tsis tau paub dua li, nimno tau los ua kuv qhev. Cov neeg txawv tebchaws los puavleej tau tuaj qhau hau hawm kuv, thaum lawv hnov kuv lub moo, lawv puavleej hwm kuv. Lawv tas kev cia siab, thiab tawm ua ibce tshee hnyo hauv lawv tej chaw fajxwm los. Tus TSWV yog tus muaj sia nyob! Ua tsaug uas nws yog tus tiv thaiv kuv! Thov kom Vajtswv uas yog kuv tus cawmseej tau koob meej loj tshaj plaws. Nws pab kuv yeej tagnrho kuv cov yeebncuab, nws ua kom txhua haivneeg hwm kuv thiab nws cawm kuv dim ntawm kuv cov yeebncuab. Tus TSWV, koj pab kuv yeej tagnrho kuv cov yeebncuab, koj cawm kuv dim ntawm cov neeg limhiam. Yog li ntawd, kuv thiaj ua koj tsaug tim ntsej tim muag ntawm txhua haivneeg, kuv zoo siab hlo hu nkauj ua koj tsaug. Vajtswv pub rau nws tus vajntxwv tau txais kev muaj yeej loj kawg nkaus, nws ua zoo rau Daviv, tus uas nws xaiv tseg lawm, thiab nws cov xeebntxwv mus ibtxhis yeej tsis hloov li. Saum nruab ntug twb ua rau peb pom Vajtswv lub hwjchim tseeb, thiab qhia tes haujlwm uas nws ua tiav lawm rau peb paub. Niaj hnub qhia zaj no ib hnub dhau ib hnub, niaj hmo piav zaj no ib hmos dhau ib hmos. Tsis hais zaj twg lossis lo twg yeej tsis hnov muaj suab dabtsi nrov li; tiamsis lawv tej suab tseem nrov ncha mus thoob plaws lub ntiajteb thiab hnov mus txog qab ntuj kawg. Saum nruab ntug yog lub tsev uas Vajtswv ua rau lub hnub nyob, thaum sawv ntxov lub hnub tawm tuaj ib yam li tus nraug vauv uas tawm hauv nws lub txaj los, thiab ib yam li tus neeg muaj zog mus sib tw khiav. Lub hnub tawm ib sab ntuj tuaj thiab mus xaus rau ib sab ntuj. Tsis muaj ib yam dabtsi yuav khiav nkaum tau kom tsis raug lub hnub ziab li. Tus TSWV txoj kevcai yog txoj zoo tshaj plaws, thiab muaj peevxwm txhawb kom muaj zog nchav rov tuaj. Tus TSWV tej lus qhia yog tej uas cia siab tau, thiab ua rau tus uas muaj tswvyim tsawg txawj ntse tuaj. Tus TSWV tej kevcai yeej yog tej uas ncaj ncees, thiab cov neeg uas hwm tej kevcai ntawd yuav tau txais kev kaj siab lug. Tus TSWV tej lus qhia puavleej yog lus tseeb thiab ua rau neeg paub qabhau. Hwm tus TSWV yog qhov uas zoo tshaj plaws, thiab nyob ruaj khov mus ibtxhis. Tus TSWV yeej txiav txim ncaj ncees thiab ua raws li qhov tseeb. Tej lus ntawd muaj nqis tshaj tej tseem kub, thiab tej lus ntawd qab zib tshaj tej tseem zib ntab. Tej lus ntawd ua rau kuv uas yog koj tus tubtxib muaj kev txawj ntse tuaj, kuv tau txais nqi zog vim yog kuv hwm tej kevcai ntawd ntag. Yeej tsis muaj leejtwg rov pom nws txojkev txhaum; tus TSWV, thov pab kom kuv zam dhau tej kev txhaum uas pom tsis txog. Thiab dua li ntawd, thov coj kuv tawm ntawm txojkev uas lom txwm mus txhaum, thiab thov tsis txhob pub tej kev txhaum ntawd kav tau kuv. Kuv thiaj ua tau neeg zoo thiab dim ntawm txojkev ua phem ua qias uas yog kev txhaum. Tus TSWV, koj yog kuv qhov chaw nkaum thiab yog kuv tus cawmseej, thov kom tej lus kuv hais thiab tej uas kuv xav haum koj siab. Thov tus TSWV teb koj tej lus thov thaum koj muaj kev ntxov siab. Thov Yakhauj tus Vajtswv tsomkwm koj. Thov nws tso kev pab hauv nws lub Tuamtsev tuaj pab koj, thiab nws yuav muab lub zog saum roob Xi-oos los rau koj. Thov nws nco txog tej khoom uas koj muab fij rau nws, thiab thov nws txaus siab rau tej khoom theej txhoj uas koj muab hlawv fij rau nws. Thov nws muab txhua yam rau koj raws li koj xav tseg lawm thiab ua kom txhua yam uas koj npaj siab lawm tiav. Ces peb yuav qw zoo siab vim koj yeej lawm, thiab yuav ua kev zoo siab qhuas peb tus Vajtswv qhov uas koj muaj yeej. Thov tus TSWV teb tej lus uas koj thov raws li koj xav tau. Nimno kuv paub hais tias, tus TSWV pab kom tus vajntxwv uas nws xaiv tseg lawm yeej, tus Tswv teb nws tej lus thov saum ntuj uas yog nws qhov chaw dawbhuv tuaj, nws thiaj tau txais kev yeej loj kawg nkaus ntawm tus Tswv lub hwjchim. Muaj qee leej cia siab rau lawv tej tsheb nees thiab ibtxhia cia sia rau lawv tej nees, tiamsis peb cia siab rau tus TSWV uas yog peb tus Vajtswv lub hwjchim. Cov neeg uas hais los no yuav dawm thiab ntog, tiamsis peb yuav sawv nres nroos khov kho. Tus TSWV, thov pab kom vajntxwv muaj yeej. Thov koj teb peb tej lus thaum peb tsa ncauj thov koj. Tus TSWV, vajntxwv zoo siab kawg li, rau qhov koj pub rau nws muaj lub zog loj zog nchav, nws zoo siab kawg rau qhov koj ua rau nws yeej lawm tiag. Koj pub rau nws raws li nws lub siab xav tseg, thiab koj tau teb nws tej lus thov. Koj tau foom koob hmoov nplua mias rau nws thiab muab lub kausmom yeebkoob kub los rau nws ntoo. Nws thov yuav txojsia los koj muab txojsia nyob ntev rau nws. Nws muaj hwjchim loj kawg, rau qhov koj yog tus pab nws, koj tau pub rau nws muaj koob meej thiab tsa nws ua vajntxwv. Koj foom koob hmoov rau nws mus ibtxhis, thiab ua rau nws zoo siab tim ntsej tim muag ntawm koj. Vajntxwv cia siab rau tus TSWV uas muaj hwjchim loj kawg nkaus; vim tus TSWV muaj kev hlub ruaj khov, nws yuav tsis hloov li. Vajntxwv yuav puav ntes kom tau tagnrho nws cov yeebncuab, nws yuav ntes txhua tus uas pheej ntxub nws. Thaum koj tshwm los koj yuav ua rau lawv kub ib yam li nplaim taws. Tus TSWV yuav nqos lawv thaum nws chim, thiab hluavtaws yuav kub lawv puastsuaj tas. Lawv tej xeebntxwv los yuav tsis muaj ib tug seem nyob qhov twg li, vajntxwv yuav muab lawv tua povtseg kom tas. Lawv npaj siab thiab tuavhauv nrhiav kev ua phem rau nws, tiamsis lawv yuav ua tsis tiav. Nws yuav tua nws cov xubvos rau lawv thiab ua rau lawv khiav tsis yeej rov qab. Tus TSWV, peb ua koj tsaug, rau qhov koj yog tus muaj zog loj zog nchav. Peb yuav hu nkauj thiab ua tsaug rau koj lub hwjchim. Kuv tus Vajtswv, kuv tus Vajtswv, vim li cas koj tso kuv tseg lawm? Kuv tsa suab quaj thov koj pab, tiamsis koj tsis teb kuv tej lus thov. Kuv tus Vajtswv, kuv thov koj tas hnub los koj tsis teb, thaum tsaus ntuj kuv thov koj ib hmos tsis so li. Txawm yog li ntawd los koj tseem yog tus dawbhuv uas zaum saum koj lub zwmtxwv, thiab yog tus uas cov Yixalayees sawvdaws qhuas. Peb cov yawgkoob puavleej cia siab rau koj tib leeg xwb, lawv yeej ibtxwm cia siab rau koj thiab koj yeej ibtxwm pab lawv dim. Lawv thov koj pab, thiab koj cawm lawv dim ntawm tej kev puastsuaj, lawv cia siab rau koj thiab tsis raug txajmuag. Tiamsis kuv tsis yog neeg lawm, kuv yog kas xwb, txhua leej txhua tus yeej ntxub thiab nto kuv. Txhua tus uas pom kuv puavleej luag kuv plig, lawv hlev nplaig thiab co hau nto rau kuv. Lawv hais tias, “Koj twb cia siab rau tus TSWV lawm ne. Ua li cas nws tseem tsis pab koj thiab? Yog tus TSWV yeej nyiam koj tiag, vim li cas nws tsis pab koj?” Koj yog tus coj kuv tawm hauv kuv niam plab los tsis raug xwm dabtsi, thaum kuv tseem mos liab, koj tsomkwm kuv ntawm kuv niam lub xubntiag. Kuv yeej ibtxwm cia siab rau koj txij hnub uas yug tau kuv los, thiab koj yeej ibtxwm yog kuv tus Vajtswv. Thov koj tsis txhob nyob nrug deb ntawm kuv! Tej kev txomnyem twb los ze kuv lawm, thiab tsis muaj leejtwg pab kuv li. Yeebncuab nyob ibncig kuv ib yam li pab heev nyuj, tagnrho lawv puavleej nyob vij vog kuv ib yam li pab heev nyuj tom tebchaws Npasas. Lawv rua lawv tej qhovncauj loj heev rau kuv ib yam li tej tsov ntxhuav nyooj yuav tom thiab dua kuv. Kuv lub zog ntaug tas ib yam li cov dej uas nchuav ntxaum rau hauv av lawm. Kuv tej pob qij txha pluam tas huv tibsi lawm, kuv lub siab yaj ua kua tas ib yam li ciab ntab. Kuv lub qa qhuav qhawv ib yam li tej hmoov av, thiab kuv tus nplaig lo nkaus rau hauv kuv lub qhovncauj sab saud lawm. Koj tso kuv tuag xyab luas rau hauv cov hmoov av. Muaj ib pab neeg ua phem nyob ibncig kuv; zoo ib yam li pab dev uas dhia cuag tus tsi tuaj rau kuv, lawv tuaj dua kuv ob txhais tes thiab ob txhais taw. Kuv yeej pom tagnrho kuv tej pobtxha huv tibsi. Kuv cov yeebncuab saib ntsoov thiab ua qhovmuag nruj qoom rau kuv. Lawv muab kuv tej ris tsho coj mus twv thiab coj mus sib faib. Tus TSWV, thov tsis txhob nyob nrug deb kuv! Cia li maj nroos los pab kom kuv dim! Cawm kom kuv dim ntawm rab hniav ntaj, cawm kom kuv txojsia dim ntawm cov dev no. Pab kom kuv dim ntawm cov tsov ntxhuav no, cawm kom kuv dim ntawm cov nyujqus tej kub. Kuv yuav qhia tej txujci uas koj tau ua lawm rau kuv cov pejxeem paub, thaum lawv tuaj sib sau ua ke kuv yuav ua koj tsaug li no: “Nej cov uas yog tus TSWV cov tubtxib cia li ua nws tsaug! Nej cov uas yog neeg Yixalayees tej xeebntxwv cia li hwm nws! Nej cov uas yog neeg Yixalayees, nej cia li pehawm nws! Nws tsis tau muab cov neeg pluag tso tseg lossis tsis quavntsej tej kev txomnyem uas lawv raug, nws tsis tau khiav tso lawv tseg, tiamsis nws yeej teb lawv tej lus thov thaum lawv thov nws.” Thaum sawvdaws tuaj txoos ua ke txhij lawm kuv yuav ua koj tsaug rau tej txujci uas koj tau ua tas los. Kuv yuav muab tej khoom theej txhoj uas kuv coglus tseg lawm los fij rau koj tabmeeg rau ib tsoom sawvdaws uas tuaj pehawm koj. Cov neeg pluag yuav tau noj tsau npo raws li lawv xav noj, txhua tus uas los cuag tus TSWV yuav ua nws tsaug. Thov kom lawv muaj kev vammeej mus ibtxhis. Txhua haivneeg yuav nco ntsoov tus TSWV. Tej neeg uas nyob txhua qhov hauv qab ntuj no yuav los cuag nws, mas txhua haivneeg yuav pehawm nws. Tus TSWV yog vajntxwv, nws kav txhua haivneeg. Txhua tus neeg uas khavtheeb yuav qhau cev hlo pe nws, txhua tus neeg uas txawj tuag yuav qhau cev hlo ntawm nws xubntiag pe nws. Yav tom ntej no txhua tiam neeg yuav txhawb nqa nws, tej neeg sawvdaws yuav qhia tus TSWV zaj rau tiam neeg uas yuav los tom ntej. Yuav tsum tau qhia rau cov uas tseem tsis tau yug los kom paub hais tias: “Tus TSWV yog tus cawm nws haivneeg.” Tus TSWV yog tus tsomkwm kuv, kuv muaj txhua yam txaus. Nws cia kuv so hauv lub tshav uas muaj zaub mos nyoos ntsuab xiab thiab coj kuv mus rau ntawm lub pasdej ntshiab uas nyob ntsiag to. Nws txhawb kuv lub zog. Nws coj kuv taug txojkev ncaj ncees raws li nws tau coglus tseg. Tus TSWV, txawm yog kuv taug txojkev uas tsaus ntuj nti los kuv tsis ntshai dabtsi, rau qhov koj nrog nraim kuv. Koj tus pas thiab tus cwj nrig tsomkwm kuv. Koj npaj rooj noj rooj hau rau kuv, tabmeeg kuv cov yeebncuab; koj tos txais kuv ib yam li tus qhua uas koj muab saib hlob, thiab hliv rau kuv lub khob puv nplua mias. Kuv paub hais tias koj yog tus zoo tshaj plaws thiab hlub kuv mus tas kuv tiam neej, thiab kuv yuav nyob hauv tus TSWV lub tsev mus tas kuv lub neej. Lub ntiajteb thiab txhua tsav yam uas nyob hauv lub qab ntuj no puavleej yog tus TSWV li, lub ntiajteb thiab txhua tus uas nyob hauv lub ntiajteb puavleej yog nws tug huv tibsi. Nws tsim lub ntiajteb rau saum cov dej hiavtxwv thiab muab lub ntiajteb teeb rau hauv qab thu hiavtxwv. Leejtwg thiaj mus tau rau saum tus TSWV lub roob? Leejtwg thiaj mus tau rau hauv nws lub Tuamtsev uas dawbhuv? Cov neeg uas tau mus rau hauv, yog cov ua ncaj thiab ua zoo, yog cov uas tsis pe dab tsis peb mlom lossis tsis hais tej lus tsis tseeb. Tus TSWV yuav foom koob hmoov rau lawv cov ntawd thiab yuav cawm kom lawv dim, Vajtswv yuav hais tias lawv yog cov neeg tsis muaj txim. Cov neeg no yog cov uas los cuag Vajtswv lawm, lawv yog cov uas los sawv tabmeeg ntawm Yakhauj tus Vajtswv. Muab tej roojvag qhib kom dav fo, muab tej qhovrooj qub thaum ub qhib cia, tus vajntxwv uas muaj hwjchim yuav tuaj rau hauv. Leejtwg yog tus vajntxwv uas muaj hwjchim? Nws yog tus TSWV uas muaj zog thiab muaj hwjchim, yog tus TSWV uas ntaus yeej rog. Muab tej roojvag qhib kom dav fo, muab tej qub qhovrooj thaum ub qhib cia, tus vajntxwv uas muaj hwjchim yuav tuaj rau hauv. Leejtwg yog tus vajntxwv uas muaj hwjchim? Tus TSWV uas muaj hwjchim loj kawg nkaus, nws yog tus vajntxwv uas muaj hwjchim ntawd. Tus TSWV, kuv tsa ncauj thov koj, kuv tus Vajtswv, kuv cia siab ntsoov rau koj. Thov cawm kom kuv dim tsis txhob pub kuv raug kev txajmuag rau cov neeg uas yeej kuv, thov tsis txhob cia kuv cov yeebncuab saib tsis taus kuv. Cov uas cia siab rau koj yeej tsis muaj ib tug swb hlo li, tiamsis cov uas tawmtsam koj, yog cov yuav swb ntag. Tus TSWV, thov qhia kom kuv paub koj txojkev, qhia kom kuv paub tej kev no tseeb. Qhia kom kuv ua neej raws li koj txojkev tseeb, rau qhov koj yog kuv tus Vajtswv uas cawm kuv dim. Kuv yeej ibtxwm cia siab rau koj. Tus TSWV, thov nco ntsoov koj txojkev siab dawb siab zoo thiab txojkev hlub ruaj khov uas koj tau qhia rau peb thaum ub los lawm. Thov zam txim rau tej kev txhaum thiab tej uas kuv ua yuam kev thaum kuv tseem hluas. Tus TSWV, koj yog tus muaj kev hlub thiab siab dawb uas tsis hloov li, thov koj nco ntsoov kuv. Rau qhov tus neeg ncaj ncees thiaj yog tus muaj lub siab zoo, nws qhia cov neeg txhaum kom lawv taug txojkev uas tsimnyog lawv taug. Nws coj cov neeg txo hwjchim taug txojkev tseeb, thiab qhia kom lawv ua haum nws siab. Vim tus TSWV txojkev ncaj ncees thiab kev hlub nws thiaj coj txhua tus uas ua raws li nws txojlus cog tseg thiab mloog nws tej lus samhwm. Tus TSWV, thov koj nco ntsoov tej lus cog tseg no, thiab thov koj zam kuv tej kev txhaum, rau qhov tej kev txhaum ntawd ntau kawg li. Cov neeg uas hwm tus TSWV, nws yuav qhia kom lawv paub taug txojkev tseeb uas tsimnyog lawv taug. Lawv yuav vammeej thiab lawv tej menyuam yuav tau lub tebchaws no nyob ua lawv tug mus li. Tus TSWV nrog cov neeg uas hwm nws ua phoojywg, thiab nws qhia kom lawv paub nws tej lus cog tseg. Txhua lub sijhawm uas kuv tsa qhovmuag saib tus TSWV, nws yeej cawm kuv dim ntawm txojkev puastsuaj. Tus TSWV, thov tig los rau ntawm kuv thiab hlub kuv, rau qhov kuv nyuaj siab thiab qaug zog kawg li. Thov tshem kuv tej kev nyuaj siab thiab cawm kom kuv dim ntawm kuv tej kev ntxhov siab. Thov nrog saib kuv tej kev ntxhov siab thiab kev txomnyem, thiab thov zam kuv tej kev txhaum huv tibsi. Thov koj tsa qhovmuag ntsia kuv cov yeebncuab saib coob npaum twg, thiab saib lawv ntxub kuv npaum li cas. Thov koj tsomkwm kuv thiab cawm kom kuv dim, thiab pab kom kuv tsis txhob swb hlo li. Kuv los cuag koj thiab vamkhom koj pab. Thov kom kuv tej haujlwm zoo thiab tej kev ncaj ncees tsomkwm kuv, rau qhov kuv cia siab rau koj xwb. Vajtswv, thov cawm koj haivneeg Yixalayees kom dim ntawm tej kev txomnyem uas lawv raug! Tus TSWV, thov qhia rau sawvdaws hais tias kuv tsis tau ua txhaum, rau qhov kuv ibtxwm ua lub neej ncaj ncees thiab cia siab rau koj xwb. Tus TSWV, thov koj sim thiab ntsuas kuv; thov tshuaj kuv lub siab thiab kuv tej kev xav. Kuv niaj hnub pom koj txojkev hlub thiab koj txojkev ncaj ncees yeej coj kuv txoj haukev. Kuv tsis nrog cov neeg uas tsis tsim txiaj koom ua ib lub siab, kuv tsis tau nrog cov neeg ntsejmuag ncaj siab nkhaus ua ib yam dabtsi. Kuv ntxub cov neeg uas sib sau ua kev phem kev qias, thiab kuv tsis koom nrog cov neeg siab phem. Tus TSWV, kuv ntxuav kuv ob txhais tes qhia hais tias kuv tsis tau ua txhaum, thiab kuv mus pehawm koj ibncig ntawm koj lub thaj. Kuv hu ib zaj nkauj ua koj tsaug thiab yuav piav koj tej txujci tseemceeb huv tibsi rau sawvdaws mloog. Tus TSWV, kuv nyiam lub tsev uas yog koj qhov chaw nyob, thiab qhov chaw uas koj lub hwjchim nyob kawg li. Thov tsis txhob ua rau kuv raug kev puastsuaj nrog cov neeg muaj txim, thov tshem kuv tawm ntawm cov neeg tua neeg, cov neeg uas ua kev phem kev qias txhua lub sijhawm, thiab pheej yuav luag tej nyiaj xiab. Tiamsis kuv yuav ua ncaj ua ncees xwb, thov hlub kuv thiab cawm kom kuv dim! Kuv dim ntawm txhua yam kev puastsuaj, kuv yuav ua tus TSWV tsaug tabmeeg cov neeg coob coob uas tuaj txoos ua ke no. Tus TSWV yog lub teeb rau kuv pom kev thiab yog kuv tus cawmseej, kuv yuav tsis ntshai leejtwg hlo li. Tus TSWV tsomkwm kuv, kuv thiaj tsis raug kev puastsuaj kuv yuav tsis ntshai dabtsi li. Thaum cov neeg siab phem tuaj ntaus kuv thiab soj tua kuv povtseg, lawv yuav dawm thiab ntog. Txawm yog ib pab tubrog tuaj vij hlo kuv los kuv yuav tsis ntshai, txawm yog yeebncuab tuaj tawmtsam kuv los kuv tseem cia siab rau Vajtswv. Kuv tsuas thov tus TSWV pub ib yam rau kuv xwb, yam uas kuv xav yuav, yog kuv xav nyob hauv tus TSWV lub tsev mus tas kuv simneej, kuv xav tsis thoob rau tej uas nws ua zoo, thiab kuv yuav thov nws ua tus coj kuv txoj haukev. Thaum kuv raug kev ntxhov siab nws yog kuv qhov chaw vamkhom, nws yuav tsomkwm kuv hauv nws lub Tuamtsev, thiab nws ua lub chaw khov kho saum lub roob tsuas siab rau kuv nyob. Yog li ntawd, kuv yuav yeej tagnrho kuv cov yeebncuab uas nyob ibncig kuv. Kuv yuav fij tej khoom theej txhoj hauv lub Tuamtsev nrog tej suab qw zoo siab, kuv yuav hu nkauj, thiab kuv yuav ua tus TSWV tsaug. Tus TSWV, thov koj mloog kuv lub suab thaum kuv tsa ncauj thov koj! Thov koj hlub kuv thiab teb kuv tej lus thov. Thaum koj hais tias, “Cia li los pehawm kuv,” kuv teb hais tias, “Tus TSWV, kuv yuav los cuag koj.” Thov koj tsis txhob khiav nkaum kuv! Thov koj tsis txhob chim rau kuv thiab tsis txhob ntiab koj tus tubtxib tawm. Koj yeej ibtxwm pab kuv los lawm, thov tsis txhob khiav tawm ntawm kuv mus thiab tsis txhob tso kuv povtseg, Vajtswv, koj yog kuv tus cawmseej. Kuv niam thiab kuv txiv yeej tso taus kuv tseg, tiamsis tus TSWV yuav saib xyuas kuv. Tus TSWV, thov qhia kuv ua raws li tej uas koj xav kom kuv ua, thiab coj kuv taug txojkev uas kaj siab, rau qhov kuv muaj yeebncuab coob heev. Thov tsis txhob muab kuv tso rau kuv cov yeebncuab, nyob tsam lawv muab tej lus dag thiab tej lus hem los tawmtsam kuv. Kuv paub tseeb hais tias kuv tau ua neej nyob saib ntsoov tus TSWV tes haujlwm zoo thaum tsis tau tas kuv simneej. Cia siab rau tus TSWV! Cia li ntseeg, tsis txhob poob siab. Cia siab rau tus TSWV nkaus xwb. Tus TSWV, koj yog tus uas tiv thaiv kuv, kuv hu koj pab kuv. Thov mloog kuv lub suab thov! Yog koj tsis teb kuv, ces kuv yuav zoo ib yam li cov neeg uas taug kev mus rau hauv tubtuag teb. Thov tig pobntseg mloog kuv lub suab thaum kuv quaj thov koj pab thiab thaum kuv tsa tes thov tuaj rau ntawm koj lub Tuamtsev uas dawbhuv. Thov tsis txhob coj kuv mus rau txim nrog cov neeg muaj txhaum, cov neeg ua phem ua qias, thiab cov neeg uas hais lus zoo, tiamsis kev ntxub ntxaug puv nkaus hauv lawv lub siab. Rau txim rau lawv raws li tej uas lawv twb ua tas los lawm, rau txim rau lawv tej kev txhaum uas lawv ua. Rau txim rau txhua tes haujlwm uas lawv ua tas los, muab rau lawv kom tsimnyog qhov lawv ua. Rau qhov lawv txhob txwm tsis lees tej uas tus TSWV twb ua tas los lawm lossis tej uas nws tau tsim, yog li ntawd, nws thiaj yuav rau txim rau lawv thiab ua kom lawv puastsuaj mus ibtxhis. Cia li qhuas tus TSWV, nws yeej hnov kuv lub suab quaj qw thov nws pab. Tus TSWV tsomkwm thiab tiv thaiv kuv, kuv cia siab rau nws xwb. Nws pab kuv thiab ua rau kuv zoo siab kawg nkaus li, kuv thiaj zoo siab hu nkauj qhuas nws. Tus TSWV tsomkwm nws haivneeg, nws tiv thaiv thiab cawm tus vajntxwv uas nws xaiv tseg lawm, Tus TSWV, thov cawm koj haivneeg kom dim, thiab foom koob hmoov rau cov neeg uas yog koj tug. Ua lawv tus tswv thiab tsomkwm lawv mus ibtxhis li. Qhuas tus TSWV, nej cov uas yog neeg qaum ntuj cia li qhuas tus TSWV lub tshwjchim thiab lub hwjchim. Qhuas tus TSWV lub npe uas muaj tshwjchim, qhau cev hlo rau ntawm Tus Dawbhuv lub xubntiag thaum nws tshwm los. Tus TSWV lub suab nrov qeeg nkaws saum tej nplaim dej hiavtxwv, Vajtswv lub tshwjchim ua kom xob nroo, thiab nws lub suab nrov qeeg nkaws thoob plaws saum nplaim dej hiavtxwv. Tus TSWV lub suab muaj hwjchim loj kawg nkaus, tus TSWV lub suab yog suab muaj hwvxyeej heev. Tus TSWV lub suab tsoo tej ntoo ciab lov tas, txawm yog tej ntoo ciab pem roob Lenpanoos los yeej lov huv tibsi. Nws ua rau tej roob pem Lenpanoos dhia cuag li tej menyuam nyuj, thiab ua rau lub Roob Helemoos dhia cuag li tus nyujqus. Tus TSWV lub suab ua rau muaj nplaim taws cig lam lug. Nws lub suab ua rau tiaj suabpuam qeeg ua zog koog, nws muab lub tiaj suabpuam Kades co ua zog thoob plaws. Tus TSWV lub suab ua rau tej ntoo qhib co ua zog tas, thiab nplawm tej nplooj ntoos zeeg tas. Thaum ntawd sawvdaws mus nyob hauv nws lub Tuamtsev qw hais tias, “Thov kom tus TSWV tau koob meej!” Tus TSWV yog tus kav tagnrho tej dej tob huv tibsi, nws yog tus vajntxwv uas kav mus ibtxhis. Tus TSWV muab lub zog loj zog nchav rau nws haivneeg thiab foom koob hmoov rau lawv kom muaj kev thajyeeb lug. Tus TSWV, kuv ua koj tsaug rau qhov koj yog tus cawm kuv dim, thiab koj tsis pub kuv cov yeebncuab hnyos tau kuv. Tus TSWV, kuv tus Vajtswv, kuv quaj thov koj pab kuv, thiab koj tau kho kuv zoo hlo, koj tau coj kuv tawm hauv txojkev tuag los. Kuv twb taug txojkev mus rau hauv lub qhov uas tob kawg nkaus lawm, tiamsis koj rov pub txojsia tshiab rau kuv. Tagnrho nws haivneeg uas ncaj ncees cia li hu nkauj qhuas tus TSWV! Nej nco ntsoov nws lub npe uas yog tus Dawbhuv thiab ua nws tsaug mus li. Nws txojkev chim tsuas nyob ib pliag xwb, nws txojkev ua zoo nyob mus tsis paub kawg li. Thaum tsaus ntuj muaj kev quaj ntsuag, tiamsis thaum kaj ntug muaj kev zoo siab. Thaum kuv tau zoo nyob kaj siab kuv xav hais tias, “Kuv yuav tsis swb luag ib zaug li.” Tus TSWV, koj ua zoo kawg nkaus rau kuv, koj tsomkwm kuv ib yam li lub roob ruaj khov. Tiamsis thaum koj khiav nkaum kuv lawm ua rau kuv ntshai kawg li. Tus TSWV, kuv tsa ncauj hu koj, kuv thov koj pab kuv li no: “Yog kuv tuag lawm yuav muaj nqis dabtsi rau koj? Yog kuv mus rau hauv qhov tuag lawm muaj nqi rau koj los? Cov neeg tuag puas qhuas tau koj lawm? Lawv puas mus qhia tau koj txojkev zoo uas tsis txawj puastsuaj li? Tus TSWV, thov mloog kuv lub suab hu thiab hlub kuv! Tus TSWV, thov pab kuv!” Koj muab kuv txojkev nyuaj siab hloov ua kev zoo siab dhia seevcev, koj muab kuv tej kev tu siab tshem mus povtseg huv tibsi lawm thiab pub kev zoo siab nyob puagncig kuv. Yog li ntawd, kuv thiaj tsis nyob ntsiag to; kuv yuav hu nkauj qhuas koj. Tus TSWV, koj yog kuv tus Vajtswv, kuv yuav ua koj tsaug mus ibtxhis. Tus TSWV, kuv los cuag koj thov koj tsomkwm kuv, thov tsis txhob cia kuv swb luag hlo li. Kuv tsa ncauj thov koj, koj yog tus Vajtswv uas ncaj ncees, thov koj pab kom kuv dim! Thov mloog kuv lub suab thov! Pab kom kuv dim tamsim no! Thov koj ua kuv lub chaw cawm siav thiab tsomkwm kuv, koj yog tus tiv thaiv kuv thiab pab kuv dim. Koj yog kuv qhov chaw cawm siav thiab yog tus tiv thaiv kuv, thov qhia kuv thiab coj kuv txoj haukev raws li koj tau coglus tseg lawm. Thov pab kom kuv tsis txhob mus poob lub qhov uas luag khawb tos kuv kev, thov koj tsomkwm kuv tsis txhob pub kuv raug tej kev puastsuaj. Kuv thov muab kuv lub cev rau koj ua tus saib xyuas, Tus TSWV, koj yeej yuav pab kom kuv dim, koj yog tus Vajtswv uas ncaj ncees. Koj ntxub cov neeg uas pe tej vajtswv cuav, tiamsis kuv cia siab rau koj xwb. Kuv yuav txaus siab thiab zoo siab rau koj txojkev hlub uas ruaj kho. Koj pom kuv tej kev txomnyem, koj paub kuv tej kev ntxhov siab huv tibsi. Koj tsis pub kuv cov yeebncuab ntes tau kuv, koj pub kuv mus tau txhua qhov raws li kuv xav mus. Tus TSWV, thov koj hlub kuv, rau qhov kuv muaj kev ntxhov siab; kuv qhovmuag qhib tsis taus vim kuv quaj heev, kuv qaug zog zis tsis muaj ib lub zog li. Tej kev tu siab ua rau kuv tws kev tas li, thiab kev quaj ntsuag ua rau kuv txojsia luv kawg nkaus. Muaj tej kev nyuaj siab ntawd thiaj ua rau kuv tsaug muag ua luaj, txawm yog kuv tej pobtxha los tsis muaj zog tas li lawm. Kuv tej yeebncuab txhua tus saib tsis taus kuv thiab kuv tej phoojywg zejzog, hajyam thuam thiab luag kuv plig, cov neeg uas yeej ibtxwm paub kuv los ntshai kuv, thaum lawv pom kuv nyob ntawm tej kev lawv lug kev khiav. Sawvdaws xam tsis muaj kuv, ib yam li kuv twb tuag lawm, kuv zoo ib yam li tej khoom uas luag muab povtseg lawm. Kuv hnov tej yeebncuab sib ntxhis zom zaws, tej kev txhawj ntshai nyob puagncig kuv. Lawv tuav tswvyim tawmtsam kuv, thiab ntxeev siab yuav muab kuv tua. Tus TSWV, koj yog kuv tus Vajtswv, kuv yeej cia siab ntsoov rau koj xwb, Koj niaj hnub tsomkwm kuv, thov cawm kom kuv dim ntawm kuv cov yeebncuab, thiab dim ntawm cov neeg uas tsimtxom kuv. Kuv yog koj tus tubtxib, thov koj ua zoo rau kuv, thov koj txojkev hlub uas tsis hloov li cawm kom kuv dim. Tus TSWV, kuv tsa ncauj hu koj, thov tsis txhob cia kuv poob ntsejmuag. Thov kom cov neeg siab phem poob ntsejmuag, thov kom lawv cia li mus ntsiag to rau hauv tubtuag teb. Thov koj muab cov neeg khavtheeb uas pheej thuam thiab tsis quavntsej tej neeg ncaj ncees lub qhovncauj pos kom nyob ntsiag to. Tej uas koj npaj tseg rau cov neeg hwm koj, mas zoo kawg nkaus li! Txhua leej txhua tus paub hais tias koj yog tus zoo kawg nkaus, koj tsomkwm cov neeg uas cia siab rau koj tsis pub ib tug ploj li. Koj muab lawv zais rau ntawm koj lub xubntiag uas yog qhov chaw kaj siab lug, kom lawv dim ntawm cov neeg tuav hauv ua phem; koj muab lawv zais rau ntawm qhov chaw uas nyob tso siab plhuav tsis raug lawv cov yeebncuab txob thuam. Ua tus TSWV tsaug! Nws ua rau kuv pom txojkev hlub uas loj kawg nkaus, thaum uas cov yeebncuab tuaj vij kuv thiab puav ntes kuv. Kuv ntshai thiab xav hais tias nws ntiab kuv tawm ntawm nws lub xubntiag mus lawm. Tiamsis nws tseem hnov kuv lub suab quaj, thaum kuv thov nws pab. Txhua tus uas muab siab npuab tus TSWV cia li hwm nws. Tus TSWV tsomkwm cov neeg uas muab siab npuab nws, tiamsis nws rau txim rau cov neeg uas khavtheeb raws li lawv tsimnyog raug. Nej cov uas cia siab rau tus TSWV, nej cia li cuab zog khov kho thiab ua siab tawv qhawv. Cov neeg uas tau zoo nyob kaj siab lug yog cov uas tus TSWV tsis suav hais tias muaj txim rau qhov nws zam lawv lub txim lawm. Tus neeg uas tau zoo nyob kaj siab lug yog tus uas tus TSWV tsis suav hais tias nws tau ua txhaum thiab nws tsis ua neeg dag ntxias. Thaum kuv tsis lees kuv tej kev txhaum, kuv tsis muaj zog, rau qhov kuv quaj tas hnub. Tus TSWV, koj rau txim rau kuv nruab hnub hmo ntuj, kuv lub zog yaj ntshis ib yam li tej hws uas lub caij ntuj qhua tshav ntuj ziab qhuav lawm. Thaum ntawd kuv lees kuv tej kev txhaum rau koj, kuv tsis zais tej uas kuv ua txhaum ib qho li, kuv lees kuv tej kev txhaum huv tibsi rau koj, thiab koj zam tagnrho kuv tej kev txhaum huv tibsi mus. Yog li ntawd, thov cia cov neeg uas hwm koj thov koj thaum lawv xav kom koj pab lawv, thaum muaj kev txomnyem huam tuaj, tej ntawd yuav los tsis txog lawv. Koj yog kuv lub chaw nkaum, koj yuav cawm kuv kom dim ntawm txojkev puastsuaj. Kuv yuav hu nkauj nrov nrov qhuas koj txojkev cawm dim, rau qhov koj yog tus tsomkwm kuv. Tus TSWV hais tias, “Kuv yuav qhia txojkev uas koj yuav taug rau koj, kuv yuav qhia koj thiab ua koj tus tuavxam. Tsis txhob ruam ib yam li tus nees lossis tus nees zag uas yuav tsum muab hwm txee los looj thiab muab xauv sam nws qhovncauj thiaj cob tau.” Cov neeg siab phem yuav raug kev txomnyem, tiamsis tus TSWV txojkev hlub yuav tsomkwm cov neeg uas cia siab rau nws mus li. Nej cov uas yog neeg ncaj ncees, cia li txaus siab thiab zoo siab, rau qhov tus TSWV tau pab nej lawm. Nej cov uas mloog nws lus, cia li qw zoo siab. Nej txhua tus uas yog neeg ncaj ncees, nej cia li hu nkauj zoo siab rau tej uas tus TSWV twb ua rau nej los lawm. Nej cov uas hwm nws, cia li qhuas nws. Nej cia li ua tus TSWV tsaug nrog tej suab nkauj nogncas, nej cia li hu nkauj nrog tej suab nkauj nogncas uas muaj kaum txoj hlua ua nws tsaug. Hu nkauj tshiab qhuas nws, ntaus nkauj nogncas kom zoo thiab hu nkauj suab nkoov zim zoo siab. Tus TSWV tej lus yeej yog lus tseeb, thiab nws tej haujlwm puavleej yog tej uas sawvdaws cia siab tau. Tus TSWV nyiam kev ncaj ncees thiab qhov tseeb xwb, nws txojkev hlub nyob thoob plaws hauv ntiajteb no mus li. Thaum tus TSWV tsim nruab ntug, lub hnub, tsim lub hli thiab tej hnubqub, nws hais kom muaj ces txawm cia li muaj tuaj. Nws hais kom dej hiavtxwv sau los nyob ua ke, nws cais tej hiavtxwv tob nyob muaj chaw. Txhua yam hauv lub ntiajteb no, cia li paub ntshai tus TSWV! Txhua haivneeg uas nyob hauv qab ntuj no cia li hwm nws! Thaum nws hais, txawm cia li muaj lub ntiajteb no, nws hais xwb, txhua yam txawm cia li tshwmsim tuaj. Tus TSWV muab txhua haivneeg tej kev npaj siab rhuav huv tibsi lawm, nws ua rau lawv tso lawv tej kev npaj siab povtseg. Tiamsis nws tes haujlwm nyob ruaj khov mus ibtxhis li, nws tej kev npaj siab yuav nyob mus tsis paub kawg. Haivneeg uas muaj Vajtswv ua lawv tus TSWV muaj kev kaj siab, cov neeg uas nws xaiv ua nws tug lawm, lawv tau zoo nyob kaj siab lug. Tus TSWV nyob saum ntuj saib tuaj, nws yeej pom neeg txhua tus huv tibsi. Nws nyob saum ntuj kav rawv, thiab saib ntsoov txhua tus uas nyob hauv ntiajteb no. Nws ua rau neeg muaj tswvyim xav, thiab nws paub txhua yam uas lawv ua. Tus vajntxwv uas yeej luag tsis yog vim nws muaj tubrog coob; tus tubrog uas yeej luag tsis yog vim nws lub zog nchav. Tej txiv nees uas caij mus ntaus rog pab tsis tau kom yeej luag, tej nees ntawd lub zog yeej cawm tsis tau kom dim. Tus TSWV yeej saib ntsoov txhua tus uas hwm nws, thiab cov uas cia siab rau nws txojkev hlub uas tsis hloov li, nws cawm lawv dim ntawm txojkev tuag. Nws cawm lawv txojsia thaum muaj kev tshaib plab. Peb cia siab ntsoov rau tus TSWV, nws yog tus tsomkwm thiab yog tus pab peb. Peb zoo siab kawg rau qhov muaj nws, peb cia siab rau nws lub npe uas dawbhuv. Tus TSWV, thov koj txojkev hlub nrog nraim peb mus li, ib yam li peb muab peb txojkev cia siab cog nkaus rau koj. Kuv yuav niaj hnub ua tus TSWV tsaug, kuv yuav qhuas nws tsis tseg tsis tu. Kuv yuav qhuas nws rau tej haujlwm uas nws tau ua tas los lawm, thov kom txhua tus uas raug kev tsimtxom cia li mloog thiab zoo siab! Cia li nrog kuv piav tus TSWV lub hwjchim uas loj kawg nkaus, peb sawvdaws cia li tib txhij qhuas nws lub npe. Kuv thov tus TSWV, thiab nws teb kuv tej lus thov, nws cawm kuv dim ntawm tej kev txhawj ntshai huv tibsi lawm. Cov neeg uas raug tsimtxom tsa qhovmuag ntsia nws thiab lawv zoo siab kawg li, lawv yuav tsis plam tej uas lawv cia siab rau. Thaum cov neeg txomnyem thov nws pab, nws teb lawv tej lus thov; nws cawm lawv dim ntawm lawv tej kev ntxhov siab uas lawv raug. Tus TSWV tus timtswv zov rawv cov neeg uas hwm tus TSWV, thiab nws cawm lawv dim ntawm tej kev puastsuaj. Nej sim xav saib tus TSWV ua zoo npaum li cas rau nej lawm. Cov neeg uas los nrhiav chaw nkaum ntawm tus Tswv, lawv tau zoo nyob kaj siab lug. Tus TSWV haivneeg txhua tus cia li hwm nws; cov neeg uas mloog tus TSWV lus yeej tsis tu ncua ib yam dabtsi li. Txawm yog tsov ntxhuav los tseem tshaib plab thiab tu pluas tsis muaj noj, tiamsis cov neeg uas hwm tus TSWV yuav muaj txhua yam zoo uas lawv xav tau. Kuv tej tubki, nej cia li los ntawm no thiab mloog kuv hais, kuv yuav qhia kom nej paub ua lub neej hwm tus TSWV. Nej puas xav tau lub neej lomzem kaj siab lug? Nej puas ntshaw txojsia ntev thiab lub neej kaj siab lug? Nej cia li tseg tsis txhob hais tej lus phem thiab tsis txhob hais lus dag li. Tso pluav tej kev ua phem tseg thiab tig los ua txoj zoo, cia li nrhiav kev nrog luag sib haumxeeb kom kawg nej lub siab. Tus TSWV saib ntsoov cov neeg ncaj ncees thiab mloog lawv tej suab quaj, tiamsis nws tawmtsam cov neeg ua phem, thaum lawv tuag thiaj tsis muaj neeg nco txog lawv li. Thaum cov neeg ncaj ncees thov tus TSWV, nws mloog lawv tej lus thov, nws cawm lawv dim ntawm lawv tej kev ntxhov siab. Tus TSWV nyob ze cov neeg uas tas kev cia siab, nws cawm cov neeg uas tsis muaj chaw vamkhom. Tus neeg ncaj ncees tiv ntau yam kev nyuaj siab, tiamsis tus TSWV cawm nws dim tej kev ntxhov siab ntawd huv tibsi. Tus TSWV tsomkwm nws nraim tsis tso nws tseg, nws tej txha yeej tsis muaj ib yag yuav lov li. Tej kev phem yuav ua rau cov neeg siab phem tuag mus, cov uas ntxub cov neeg ncaj ncees yuav raug txim. Tus TSWV yuav cawm nws haivneeg, cov uas los cuag tus TSWV thiab thov nws tsomkwm lawv yuav tsis raug kev puastsuaj. Tus TSWV, thov koj tawmtsam tus uas tawmtsam kuv, thiab ua rog rau cov neeg uas ua rog rau kuv! Nqa koj daim thaiv hniav ntaj thiab koj cev ris tsho hlau los cawm kom kuv dim. Tsa koj rab hmuv thiab rab taus ua rog tawmtsam cov neeg uas caum kuv. Thov coglus hais tias, “Koj yuav cawm kuv.” Thov kom cov neeg uas nrhiav kuv tua povtseg cia li swb thiab poob ntsejmuag. Thov kom cov neeg tuav tswvyim ntxeev siab ua phem rau kuv tig khiav rov qab thiab tsis txhob sib haum. Thov kom lawv zoo ib yam li tej quavnyab uas cua muab tshuab ya tas thiab thov tus TSWV cov timtswv muab lawv raws kom tawg khiav ri rws mus. Thov kom lawv txoj haukev tsaus ntuj nti thiab nplua heev thaum uas tus TSWV tus timtswv caum lawv. Yeej tsis muaj ib qho txhaum uas tsimnyog lawv cuab hlua tos kuv kev, khawb qhov tos kom kuv poob thiab ntes kuv. Tiamsis kev puastsuaj yuav ntes tau lawv ua ntej lawv paub, lawv yuav rov mag lawv lub vojhlua thiab poob rau hauv txojkev puastsuaj. Ces kuv yuav zoo siab rau qhov muaj tus TSWV ua tus pab kuv, kuv yuav kaj siab lug rau qhov nws cawm kuv dim. Tagnrho kuv lub siab yuav hais rau tus TSWV hais tias, “Yeej tsis muaj leejtwg zoo npaum li koj lawm. Koj tiv thaiv tus neeg tsis muaj zog kom dim ntawm tus uas muaj zog, thiab pab tus pluag kom dim ntawm tus neeg limhiam.” Cov neeg siab phem ua timkhawv tsis tseeb tawmtsam kuv, kuv tsis paub los lawv liam hais tias kuv ua txhaum. Lawv ua tej kev phem pauj kuv tej kev ua zoo, thiab ua rau kuv siab ntsws puas tas. Tiamsis thaum lawv muaj mob, kuv hnav cev ris tsho quaj ntsuag, kuv yoo mov thiab nyo hau thov Vajtswv, ib yam li kuv thov Vajtswv rau kuv tus phoojywg lossis kuv tus kwvtij. Kuv quaj ncig mus ncig los ib yam li tus uas quaj nyiav nws niam ntag. Tiamsis thaum kuv dawm ntog lawv txhua tus puavleej zoo siab thiab tuaj nyob vij vog luag kuv plig, tej neeg dog dig los cia li tuaj ntaus kuv thiab nplawm kuv. Lawv txob thuam kuv ib yam li tej neeg siab phem, lawv tom hniav thiab zij ncaug rau kuv. Tus TSWV, tseem tshuav ntev li cas, koj mam li tsa qhovmuag saib zaj no? Thov cawm kom kuv dim ntawm lawv tej nplawm, thov cawm kuv txojsia ntawm cov tsov ntxhuav no! Kuv yuav ua koj tsaug tabmeeg ntawm koj haivneeg uas tuaj sib sau ua ke, thiab kuv yuav qhuas koj tabmeeg lawv. Thov tsis txhob pub kuv cov yeebncuab uas yog neeg dag muaj kev zoo siab rau thaum kuv swb luag lawm. Tsis txhob cia tej neeg uas lam tau lam ntxub kuv ntawd, zij ncaug ntxi muag rau kuv thaum kuv tau kev nyuaj siab. Lawv tsis hais tej lus zoo haum kuv siab hlo li, tiamsis lawv pheej hais tej lus ntxias tej neeg uas muaj kev hlub thiab kev thajyeeb hauv lub tebchaws. Lawv luag kuv thiab qw hais tias, “Peb twb pom tej uas koj ua lawm!” Tiamsis tus TSWV, koj twb pom tej no tas lawm. Yog li ntawd, tus TSWV, thov koj tsis txhob nyob ntsiag to, thiab thov tsis txhob nyob nrug deb kuv. Tus TSWV, koj cia li sawv tsees los thiab tiv thaiv kuv, kuv tus Vajtswv, koj cia li sawv los thiab pab kuv hais plaub. Tus TSWV, koj yog tus ncaj ncees, thov koj cia li txiav txim rau kuv raws li kuv yog tus neeg uas tsis muaj txim; thov tsis txhob pub kuv cov yeebncuab tau zoo luag kuv plig. Thov tsis txhob pub kom lawv muaj lub siab xav hais tias, “Peb twb muab nws nqos lawm! Peb xav ua raws li peb lub siab nyiam los yeej tau!” Cov neeg uas thaum kuv raug kev txomnyem, pheej rau siab ntso luag kuv plig thiab zoo siab, thov kom lawv tsis txhob sib haum, thiab cov neeg uas lawv qhuas hais tias, lawv zoo dua kuv, thov kom lawv raug kev txajmuag thiab poob ntsejmuag. Cov neeg uas txaus siab rau kuv txojkev ua zoo thiab ncaj ncees, cia li qw zoo siab thiab hais tsis tseg hais tias, “Tus TSWV yog tus muaj hwjchim loj kawg nkaus! Nws txaus siab rau nws tus tubtxib kawg nkaus li!” Ces kuv yuav qhia koj txojkev ncaj ncees rau sawvdaws, thiab kuv yuav qhuas koj ib hnub tsaus ntuj ntais. Kev txhaum hais rau tus neeg ua phem ua qias lub siab, nws thiaj tsis lees yuav Vajtswv thiab tsis paub ntshais Vajtswv hlo li. Rau qhov nws xav li nws lub qhovmuag pom xwb, nws xav hais tias Vajtswv yuav tsis pom nws tej kev txhaum thiab tsis txiav txim rau nws li. Nws hais tej lus phem lus qias thiab lus dag xwb, nws tsis nyiam ua raws li kev txawj ntse thiab kev ua zoo. Thaum nws pw saum txaj nws xav rau txojkev ua phem ua qias xwb, nws tsis ua ib yam zoo thiab tsis tso tej kev phem kev qias tseg li. Tus TSWV, koj txojkev hlub siab mus nto saum ntuj, koj txojkev ncaj ncees siab mus nto saum nruab ntug. Koj txojkev ncaj ncees loj ib yam li lub hauv roob, koj txojkev txiav txim tob ib yam li dej hiavtxwv. Koj yog tus cawm tej neeg thiab tsiaj txhu. Vajtswv, koj txojkev hlub zoo kawg nkaus! Peb nrhiav tau koj ob phab tis tus duab ntxoov ntxoo los tsomkwm peb thiab ua peb qhov chaw nkaum xwb. Peb tau noj tej zaub mov uas koj pub rau peb tsau npo, koj pub peb haus tus dej uas yog koj txojkev tau zoo nyob kaj siab lug. Koj yog lub qhovdej cawm txojsia, vim koj yog qhov kaj peb thiaj pom kev. Thov koj tsis txhob tso cov uas hlub koj tseg, thiab ua zoo rau cov neeg uas muaj lub siab ncaj ncees. Thov tsis txhob pub cov neeg khavtheeb tawmtsam kuv, lossis cov neeg siab phem tuaj raws kuv tawm. Cov neeg uas ua phem ua qias ntog rau qhov twg, lawv pw qhov ntawd sawv tsis taus li. Tsis txhob nyuaj siab rau tej uas cov neeg siab phem ua, tsis txhob khib rau cov neeg uas ua kev txhaum. Lawv yuav ntsws sai ib yam li tej nyom, lawv yuav tuag sai ib yam li tej nroj tsuag. Cia siab rau tus TSWV thiab ua zoo, yog nej ua li ntawd, nej yuav nyob hauv lub tebchaws tso siab lug. Nrhiav kev kaj siab ntawm tus TSWV, thiab nws yuav muab rau nej raws li nej lub siab xav yuav. Muab nej lub cev thiab lub siab lub ntsws rau tus TSWV kav, thiab cia siab rau nws, nws thiaj yuav pab nej; nws ua kom nej txojkev ncaj ncees ci ib yam li lub hnub ci thaum tavsu. Ua siab ntev thiab tos tus TSWV ua nws tes haujlwm, tsis txhob nyuaj siab rau tej neeg uas vammeej, lossis cov neeg uas ua lawv tej kev phem tiav raws li lawv xav tseg lawm. Tsis txhob nyuaj siab lossis chim, tej ntawd tsuas ua rau muaj kev ntxhov siab xwb. Cov neeg uas cia siab rau tus TSWV yuav muaj teb muaj chaw nyob, tiamsis cov neeg siab phem yuav raug muab ntiab tawm mus. Cov neeg siab phem nyob ib ntu xwb lawv yuav puastsuaj mus, nej xav nrhiav lawv, tiamsis yuav tsis pom lawv, tiamsis cov neeg txo hwjchim yuav muaj teb muaj chaw, muaj kev thajyeeb thiab kev tau zoo nyob kaj siab lug. Tus neeg siab phem tuavhauv tawmtsam tus neeg ncaj ncees, zim hniav zaig rau nws thiab ntxub nws. Tiamsis tus TSWV luag cov neeg siab phem plig, rau qhov nws paub hais tias tshuav tsis ntev lawv yuav raug kev puastsuaj. Cov neeg siab phem rho lawv tej ntaj thiab nta lawv tej hneevnti tua cov neeg pluag thiab cov txomnyem, hlais cov neeg ncaj ncees, tiamsis lawv tej ntaj yuav rov tua lawv tuag, thiab lawv tej qhaub hneevnti yuav dam tas. Tej yam me me uas tus neeg siab zoo muaj, tseem muaj nqis dua cov neeg siab phem tej nyiaj txiag qhov txhia chaw, rau qhov tus TSWV yuav ua rau cov neeg siab phem lub zog kom ploj mus, tiamsis nws yuav tsomkwm cov neeg ncaj ncees. Tus TSWV saib xyuas cov neeg uas hwm nws, thiab lub tebchaws yuav yog lawv tug mus ibtxhis li. Lawv yuav tsis tau tiv kev txomnyem thaum uas muaj kev phem tuaj, lawv yuav muaj txaus noj lub sijhawm uas muaj kev tshaib plab. Tiamsis cov neeg siab phem yuav tuag mus, tus TSWV cov yeebncuab yuav qhuav tas ib yam li tej paj nroj, lawv yuav yaj ntshis mus ib yam li tej pa taws. Tus neeg siab phem qiv txais thiab tsis them rov qab li, tiamsis tus neeg siab zoo yeej muaj lub siab dawb paug pub taus rau luag. Cov neeg uas tus TSWV foom koob hmoov rau yuav tau lub tebchaws los ua lawv tug, tiamsis cov neeg uas tus TSWV foom tsis zoo yuav raug ntiab tawm mus. Tus TSWV yeej yog tus uas coj neeg txoj haukev, thiab yog tus tsomkwm cov neeg uas ua haum nws siab. Txawm yog lawv ntog los lawv yeej tsis pw twjywm, rau qhov tus TSWV yuav tsa lawv sawv. Nimno kuv yog ib tug neeg laus, kuv ua neej nyob los tau ntev lawm, tiamsis kuv tsis pom tus TSWV muab ib tug neeg zoo tso povtseg rau qhov twg, lossis cia nws tej menyuam mus thov khawv noj. Nws yeej muaj pub thiab qiv tau rau luag txhua lub sijhawm, thiab nws tej menyuam puavleej yog koob hmoov. Tso plhuav txojkev phem tseg thiab tig los ua txoj zoo, nej tej xeebntxwv thiaj yuav tau nyob hauv lub tebchaws no mus li, tus TSWV yeej nyiam txojkev ncaj ncees thiab tsis tau muab nws haivneeg uas muaj kev ncaj ncees tso tseg li. Nws tsomkwm lawv mus ibtxhis tsis kawg, tiamsis cov neeg siab phem tej xeebntxwv yuav raug ntiab tawm mus. Cov neeg ncaj ncees yuav ua cov kav lub tebchaws, thiab nyob hauv lub tebchaws ntawd mus ibtxhis li. Tus neeg ncaj ncees yeej hais lus txawj lus ntse, thiab nws yeej hais tej lus tseeb xwb. Nws khaws nkaus nws tus Vajtswv txoj kevcai rau nruab siab, thiab tsis lam muab tso povtseg. Tus neeg siab phem soj nraim tus neeg ncaj ncees, thiab nrhiav kev yuav muab nws tua povtseg; tiamsis tus TSWV yuav tsis muab nws tso rau nws tus yeebncuab lub hwjchim lossis cia nws raug txim thaum luag txiav txim rau nws. Nej cia siab rau tus TSWV thiab ua raws li nws tej lus samhwm; nws yuav muab lub tebchaws rau nej nyob ua nej tug kom nej tau ntsejmuag, thiab nej yuav ntsia ntsoov nws muab cov neeg siab phem ntiab tawm. Kuv paub hais tias muaj ib tug neeg siab phem uas pheej ua limhiam kawg li, nws tsav nws lub hwjchim loj tshaj sawvdaws huv tibsi ib yam li tus ntoo thuv pem roob Lenpanoos, tiamsis tom qab no kuv dhau kev tuaj, kuv tsis pom nws nyob qhov chaw ntawd lawm, kuv nrhiav nws, tiamsis tsis pom nws li. Ua tib zoo saib tus neeg siab zoo, thiab tshuaj tus neeg ncaj ncees, tus neeg uas tsis nyiam ua plaub ua ntug yuav muaj xeebntxwv coob, tiamsis cov neeg txhaum lawv raug kev puastsuaj tas, thiab lawv tej xeebntxwv los tu noob tas tsis seem ib tug li. Tus TSWV cawm cov neeg ncaj ncees thiab nws tsomkwm lawv thaum lawv raug kev txomnyem. Nws pab lawv thiab cawm lawv dim, nws cawm lawv dim ntawm cov neeg siab phem, rau qhov lawv vamkhom nws. Tus TSWV, thov tsis txhob chim thiab rau txim rau kuv! Koj tej xubvos raug kuv ibce to tas, koj ntaus kuv ntog rau hauv av. Vim koj txojkev chim, kuv thiaj raug mob hnyav li no, muaj kab mob nyob thoob plaws kuv lub cev vim kuv tej kev txhaum xwb. Kuv tej kev txhaum nphau los tsuam kuv; tej kev txhaum ntawd ua lub nra hnyav rau kuv ris tsis taus li lawm. Rau qhov kuv tau ua tej yam uas ruam kawg li, kuv tej qhov txhab tsw lwj ntxiag thiab qawj zuj zus lawm. Kuv cia li khoov duav, thiab zuav ua ib pag lawm, kuv tu siab quaj ntsuag tas hnub li. Kuv ua npaws ibce kub lug thiab twb ze rau qhov uas kuv yuav tuag. Kuv ibce tsaug zis thiab zuav ua ib pag, kuv tau kev txomnyem siab thiab lub siab quaj ntsuag. Tus TSWV, koj yeej paub kuv tos koj ntev los lawm, thiab koj yeej hnov kuv lub suab quaj. Kuv lub plawv tseem dhia, kuv lub zog twb ntaug tas lawm, thiab kuv lub qhovmuag tsis pom kev li. Kuv tej phoojywg thiab tej neeg zej zog tsis kam tuaj ze kuv, vim kuv tej mob xwb, txawm yog kuv tsevneeg los lawv txav deb ntawm kuv kawg li. Cov neeg uas xav tua kuv povtseg cuab hlua tos kuv kev, thiab cov neeg uas xav ua kom kuv raug mob, pheej hem kom kuv raug kev puastsuaj, lawv tuavhauv tawmtsam kuv tsis tseg li xwb. Kuv zoo ib yam li tus neeg lag ntseg uas tsis hnov lus, thiab zoo ib yam li tus neeg ruam uas tsis txawj hais lus. Kuv zoo ib yam li tus neeg uas tsis paub teb leejtwg li, rau qhov kuv yeej tsis hnov lus. Tiamsis tus TSWV, kuv cia siab rau koj nkaus xwb, thiab tus TSWV uas yog kuv tus Vajtswv, koj yeej yuav teb kuv tej lus thov. Thov tsis txhob pub kuv cov yeebncuab saib tsis taus kuv thaum kuv raug kev txomnyem, thov tsis txhob pub lawv ua limhiam rau kuv thaum kuv ntog lawm. Kuv twb yuav ntog, thiab kuv npua mob rawv xwb. Kuv lees kuv tej kev txhaum; kuv tu siab rau tej uas kuv ua txhaum. Kuv cov yeebncuab khov kho thiab muaj zog kawg li, muaj coob tus cia li lam ntxub kuv tsis muaj qabhau dabtsi. Cov neeg uas ua phem pauj zoo twb yog lawv txhob txwm ua tawmtsam kuv rau qhov kuv yeej ua ncaj ua zoo xwb. Tus TSWV, thov koj tsis txhob tso kuv tseg, kuv tus Vajtswv, thov koj tsis txhob txav deb ntawm kuv mus. Tus TSWV, kuv tus cawmseej, thov koj cia li pab kuv tamsim no! Kuv hais tias, “Kuv yuav ceevfaj rau tej uas kuv ua thiab tsis pub kuv tus nplaig hais tej lus uas txhaum, kuv yuav tsis hais ib yam dabtsi thaum cov neeg siab phem nyob ze kuv.” Kuv nyob twjywm xwb, tsis hais ib lo lus li, txawm yog tej lus zoo los kuv tsis hais. Tiamsis kuv tej kev txomnyem nthuav loj heev tuaj li lawm, thiab ua rau kuv ntxhov siab kawg li. Kuv yimhuab xav ntau, mas kuv yimhuab ntxhov siab. Kuv thiaj nug hais tias: “Tus TSWV, kuv yuav ua neej nyob ntev li cas? Thaum twg kuv mam li tuag? Thov qhia rau kuv paub saib tshuav ntev li cas kuv txojsia mam li tu.” Koj pub txojsia rau kuv ua neej nyob luv kawg li. Kuv txojsia tsis muaj nqis dabtsi rau koj. Txhua tus neeg txojsia zoo ib yam li nthwv cua ntsawj ib vuag xwb, thiab zoo ib li tus duab ntxoov ntxoo uas nyob ib pliag xwb, txhua yam uas nws ua tsis tseemceeb dabtsi li, nws khaws tej nyiaj txiag tseg, tiamsis tsis paub hais tias leejtwg yog tus yuav tau. Tus TSWV, nimno kuv yuav cia siab rau dabtsi? Kuv cia siab rau koj nkaus xwb. Thov cawm kom kuv dim ntawm kuv tej kev txhaum, thov tsis txhob cia cov neeg ruam luag kuv plig thiab ua saib tsis taus kuv. Kuv yuav nyob twjywm, thiab tsis hais lus li, rau qhov koj yog tus uas ua rau kuv raug tej kev txomnyem no. Thov txhob nplawm kuv ntxiv lawm, thaum koj nplawm kuv, kuv twb yuav luag tuag. Qhov uas koj nplawm thiab qhuab ntuas neeg, twb yog koj rau txim rau lawv tej kev txhaum, thiab koj rhuav lawv tej nyiaj txiag ib yam li ntsaum kabrwg noj. Txhua tus neeg yeej zoo ib yam li nthwv cua uas ntsawj ib vuag xwb. Tus TSWV, thov koj mloog kuv tej lus thov, thiab hnov kuv lub suab quaj hu koj, thov los cawm kuv thaum kuv tabtom quaj los kua muag no. Kuv tsuas zoo ib li yam tus qhua uas nrog koj nyob ib pliag li thaum kuv tej yawgkoob thiab xwb. Thov koj tso kuv tseg kom kuv muaj kev kaj siab mentsis, ua ntej kuv tuag mus thiab tsis muaj kuv lawm tso. Kuv ua siab ntev tos tus TSWV los pab kuv, nws mloog kuv tej lus thov thiab hnov kuv lub suab quaj. Nws rub kuv tawm hauv lub qhov uas yog txojkev puastsuaj, thiab rub kuv tawm hauv lub qhov tuag uas yog cov suabzeb. Nws tsaws kuv mus tso rau saum lub pobzeb uas nyob kaj siab lug, thiab ua rau kuv muaj chaw nyob ruaj khov. Nws qhia kuv hu ib zaj nkauj tshiab, yog zaj nkauj uas hu qhuas peb tus Vajtswv. Txhua tus uas pom yuav ntshai thiab yuav cia siab rau tus TSWV. Txhua tus uas cia siab rau tus TSWV muaj kev kaj siab, lawv yog cov uas tsis mus pe mlom lossis yog cov uas tsis koom nrog cov uas pehawm tej vajtswv cuav. Tus TSWV, peb tus Vajtswv, koj tau ua ntau yam txujci pab peb los lawm; yeej tsis muaj ib tug zoo li koj! Koj npaj ntau yam zoo rau peb. Kuv yeej piav tsis tau tej ntawd, rau qhov tej ntawd muaj ntau heev. Koj tsis xav tau tej tsiaj uas tua theej txhoj thiab tej khoom fij, koj tsis tau hais kom muab tsiaj tua hlawv tagnrho rau saum lub thaj lossis kom muab tsiaj tua hlawv fij daws kev txhaum. Tiamsis koj qhib kuv lub qhovntsej mloog koj tej lus, yog li ntawd, kuv thiaj teb hais tias, “Kuv nyob ntawm no, koj tej lus qhia kuv nyob rau hauv phau ntawv Kevcai. Kuv tus Vajtswv, kuv yeej txaus siab ua zoo kom haum koj siab. Kuv yuav khaws koj tej lus qhia rau hauv kuv lub siab mus li.” Tus TSWV, thaum koj haivneeg tuaj sib sau ua ke, kuv yuav qhia txojmoo zoo uas yog koj txojkev cawm peb rau lawv mloog. Koj paub hais tias kuv qhia zaj no tsis tseg li. Kuv tsis tau muab txojmoo zoo uas yog txojkev cawm dim npog cia thiab cia kuv ib leeg paub xwb, kuv qhia koj txojkev ncaj ncees thiab kev cawm dim tsis tseg li. Kuv tsis tau muab koj tej lus zoo thiab kev hlub uas nyob mus ibtxhis npog cia tsis qhia rau koj haivneeg uas tuaj txoos ua ke no li. Tus TSWV, kuv paub hais tias koj yeej hlub kuv tsis tso kuv tseg li. Koj txojkev hlub thiab kev ncaj ncees yuav cawm kom kuv dim. Muaj kev txomnyem nyob ibncig kuv suav tsis txheeb li! Kuv tej kev txhaum rov raug kuv thiab ua rau kuv qhovmuag tsis pom kev lawm, tej kev txhaum ntawd tseem ntau tshaj cov plaubhau saum kuv taubhau, thiab ua rau kuv tas kev cia siab li lawm. Tus TSWV, thov cawm kuv, cia li pab kuv tamsim no. Thov kom cov neeg uas nrhiav kuv tua, cia li swb thiab tsis sib haum. Thov kom cov neeg uas zoo siab thaum kuv raug kev txomnyem, raug txajmuag thiab tig khiav rov qab. Thov kom cov neeg uas luag kuv plig cia li swb thiab ntshai tshee hnyo. Thov kom txhua tus uas los cuag koj tau kev zoo siab thiab kaj siab lug. Thov kom txhua tus uas tabtom ua tsaug rau koj txojkev cawm dim cia li hais tias, “Tus TSWV yog tus uas muaj hwjchim loj kawg nkaus.” Tus TSWV, kuv qaug zog thiab txomnyem kawg li, tiamsis koj tseem nco ntsoov kuv thiab. Koj yog kuv tus cawmseej thiab yog kuv tus Vajtswv thov koj maj nroos los pab kuv! Cov uas mob siab cov neeg pluag yog cov uas tau kev kaj siab lug, tus TSWV yuav pab lawv thaum lawv raug kev txomnyem. Tus TSWV yuav tiv thaiv lawv thiab tsomkwm kom lawv muaj sia nyob, nws yuav pub kom lawv tau zoo nyob kaj siab hauv lawv lub tebchaws, nws yuav tsis muab lawv tso rau lawv cov yeebncuab. Tus TSWV yuav pab lawv thaum lawv raug mob raug nkeeg thiab yuav kho lawv tej mob kom zoo, lawv thiaj rov muaj zog tuaj. Kuv hais tias, “Tus TSWV, kuv ua txhaum loj kawg nkaus rau koj, thov koj hlub kuv thiab pab kho kom kuv zoo!” Kuv cov yeebncuab hais tej lus phem kawg li rau kuv. Lawv xav kom kuv tuag thiab xav kom kuv ploj ntais mus. Cov neeg uas tuaj pom kuv yog cov uas siab tsis ncaj, thaum lawv tawm mus lawv coj kuv lub moo mus xyav tsis zoo, lawv coj kuv lub moo mus xyav rau txhua txhia qhov. Tagnrho cov neeg uas ntxub kuv, ib leeg ntxhi rau ib leeg hais txog kuv, lawv xav ua tej yam phem rau kuv. Lawv hais tias, “Nws tabtom raug mob hnyav kawg nkaus, nws yuav tsis sawv saum nws lub txaj los ib zaug ntxiv li lawm.” Txawm yog kuv tus phoojywg zoo uas kuv ntseeg siab tshaj plaws, thiab tus uas nrog kuv noj mov ua ke los tseem ntxeev siab rau kuv lawm thiab. Tus TSWV, thov hlub kuv thiab txhawb kom kuv muaj zog tuaj, thiab kuv yuav rov ua pauj rau kuv cov yeebncuab. Lawv yuav tsis yeej kuv ib zaug li lawm, thiab kuv yuav paub hais tias koj yeej txaus siab rau kuv tiag. Koj yuav pab kuv, rau qhov kuv yeej ua ncaj ua ncees, thiab koj yuav puag rawv kuv rau hauv koj lub xubntiag mus ibtxhis li. Cia li qhuas tus TSWV uas yog cov Yixalayees tus Vajtswv! Nimno cia li qhuas nws thiab qhuas mus ibtxhis tsis kawg li! Amees! Amees! Vajtswv, kuv kub siab lug nrhiav koj ib yam li tus muaslwj nrhiav tus dej ntws txias zias vim nws nqhis dej heev. Vajtswv tus uas muaj sia nyob, kuv lub siab xav nyob ze koj. Thaum twg kuv thiaj li tau mus pehawm koj nyob tim ntsej tim muag? Kuv quaj tas hnub tas hmo, kuv tej kua muag yog kuv cov mov noj, kuv cov yeebncuab niaj hnub nug kuv hais tias, “Koj tus Vajtswv nyob qhov twg?” Thaum uas kuv xav txog lub neej yav dhau los, kuv tu siab kawg; thaum kuv nrog cov neeg coob coob mus rau hauv Vajtswv lub tsev, thiab kuv coj lawv mus tsheej pab hu nkauj zoo siab thiab qw qhuas Vajtswv. Vim li cas kuv muaj kev nyuaj siab ua luaj? Vim li cas kuv yuav raug kev txomnyem ua luaj li? Kuv yuav muab kuv txojkev cia siab tso plhuav rau Vajtswv, thiab kuv yuav rov qhuas nws dua ib zaug ntxiv, nws yog kuv tus cawmseej thiab yog kuv tus Vajtswv. Thaum nruab hnub thov tus TSWV qhia nws txojkev hlub uas nyob mus li rau kuv; thaum tsaus ntuj kuv thiaj tau hu nkauj ua nws tsaug, kuv thov Vajtswv uas yog tus tuav kuv txojsia. Kuv hais rau Vajtswv uas yog tus tiv thaiv kuv tias, “Vim li cas koj tsis nco qab kuv lawm? Vim li cas kuv yuav tau tiv kuv cov yeebncuab txojkev tsimtxom?” Lawv thuam kuv, ua rau kuv siab ntsws lwj tas, vim lawv nug kuv tsis tseg hais tias, “Koj tus Vajtswv nyob qhov twg?” Vim li cas kuv nyuaj siab ua luaj? Vim li cas kuv yuav raug kev txomnyem ua luaj li? Kuv yuav tso siab pluav rau Vajtswv, thiab kuv yuav rov qhuas nws dua, nws yog kuv tus cawmseej thiab yog kuv tus Vajtswv. Vajtswv, thov pab tiv thaiv kuv, thiab pab kuv tawmtsam cov neeg uas tsis paub koj, thov cawm kom kuv dim ntawm tej kev dag ntxias thiab cov neeg ua phem! Koj yeej yog tus tsomkwm kuv, vim li cas koj thiaj muab kuv tso povtseg? Vim li cas kuv pheej yuav tau tiv kev txomnyem ntawm kuv cov yeebncuab tej kev ua phem no? Thov koj ua koj tus duab ci thiab muab koj tej lus tseeb coj kuv kev thiab coj kuv rov mus rau saum lub roob Xi-oos uas yog koj lub roob dawbhuv, thiab mus rau hauv koj lub Tuamtsev uas yog koj qhov chaw nyob. Vajtswv, kuv yuav mus rau ntawm koj lub thaj, cia kuv mus cuag koj, kuv thiaj muaj kev kaj siab thiab zoo siab. Vajtswv tus uas yog kuv tus Vajtswv, kuv yuav ntaus nkauj nogncas thiab hu nkauj qhuas koj. Vim li cas kuv muaj kev nyuaj siab ua luaj? Vim li cas kuv yuav raug kev txomnyem ua luaj li? Kuv yuav muab kuv txojkev cia siab tso plhuav rau Vajtswv, thiab kuv yuav qhuas nws dua ib zaug ntxiv, nws yog kuv tus cawmseej thiab yog kuv tus Vajtswv. Vajtswv, peb tej qhovntsej yeej hnov ntsoov zaj no, peb cov yawgkoob yeej los ibtxwm piav zaj no qhia rau peb hais txog tej txujci tseemceeb uas koj tau ua rau lawv tiam ntawd, ntau xyoo los lawm li no: koj muab cov neeg nruj tsiv ntiab khiav tawm, thiab cia koj haivneeg los nyob hauv lawv lub tebchaws, koj rau txim rau luag lwm haivneeg thiab cia koj haivneeg nyob kaj siab lug. Koj haivneeg ntaus yeej lub tebchaws ntawd tsis yog vim lawv tej ntaj thiab lawv lub hwjchim; tiamsis yog koj lub hwjchim thiab koj lub zog ua rau lawv yeej, thiab koj txaus siab rau lawv, vim koj hlub lawv. Koj yog kuv tus vajntxwv thiab yog kuv tus Vajtswv, koj pub rau koj haivneeg muaj yeej, twb yog muaj koj lub hwjchim peb thiaj yeej peb cov yeebncuab. Kuv tsis cia siab rau kuv rab hneevnti lossis kuv rab ntaj hais tias nws yuav cawm tau kuv dim, tiamsis twb yog koj cawm peb dim ntawm peb cov yeebncuab peb thiaj yeej cov neeg uas pheej ntxub peb. Peb yuav niaj hnub qhuas koj, thiab ua koj tsaug mus ibtxhis li. Tiamsis nimno koj tso peb tseg thiab cia peb swb luag, koj tsis nrog peb cov tubrog mus ntaus rog li lawm. Koj ua rau peb khiav ntawm peb cov yeebncuab rov qab, thiab txhua yam uas yog peb tug luag muab huab mus lawm dulug. Koj cia luag muab peb hlais ib yam li hlais tej yaj, koj muab peb faib mus nyob thoob plaws rau txhua lub tebchaws. Koj muab koj haivneeg muag ua nqi pheej yig heev, zoo li lawv tsis muaj nqis li. Peb tej neeg zejzog pom tej uas koj ua rau peb ntawd, lawv saib tsis taus peb thiab luag peb plig. Koj muab peb ua ib zaj kwv huam rau luag pejkum tebchaws hais, lawv thiaj co hau nto thiab saib tsis taus peb li. Kuv poob ntsejmuag kawg nkaus, kuv txajmuag kawg li, thaum kuv hnov kuv cov yeebncuab thiab cov neeg uas ntxub kuv tej lus cem thiab thuam kuv. Thaum tej ntawd los raug peb los peb tseem nco ntsoov koj, lossis tsis tso koj tej lus cog tseg uas koj muab cob rau peb lawm. Peb tsis tau ua saib tsis tau koj, peb tsis tau tawv nyom koj tej lus samhwm. Koj tsis pab peb thiab muab peb tso rau pab tsiaj qus, koj muab peb tso povtseg rau hauv lub qhov uas tob tsaus ntuj nti. Yog peb tso tseg tsis pehawm peb tus Vajtswv; thiab mus pe lwm haivneeg tej vajtswv los Vajtswv yeej yuav paub tej no, rau qhov Vajtswv paub tej uas peb lub siab xav huv tibsi. Tiamsis vim peb ntseeg koj luag thiaj pheej tua peb, luag ua rau peb ib yam li tus yaj uas luag coj mus tua. Tus TSWV, thov koj cia li sawv! Vim li cas koj tsaug zog? Koj cia li sawv! Thov tsis txhob tso peb tseg mus ibtxhis! Vim li cas koj khiav nkaum peb? Thiab koj txawm tsis nco txog peb tej kev txomnyem thiab kev nyuaj siab li! Peb ntog puastsuaj tas rau hauv av, peb pw txajmuag ntsuav rau saum cov hmoov av, Thov koj cia li los pab peb! Rau qhov koj txojkev hlub uas nyob mus ibtxhis yog qhov cawm tau peb dim! Kuv lub siab puv npo tej lus zoo, thaum kuv sau zaj nkauj no rau vajntxwv. Kuv tus nplaig npaj rawv hais tej lus sib dhos, ib yam li tus uas txawj txawj sau ntawv tus cwjmem. Koj yog tus uas zoo nraug tshaj plaws tej txivneej huv tibsi, thiab koj hais lus npliag lias xwb. Vajtswv yeej foom koob hmoov rau koj mus ibtxhis li. Tus vajntxwv uas muaj hwjchim, cia li ris koj rab ntaj rau ntawm duav; koj yog tus muaj hwjchim thiab muaj koob meej. Cia li caij nees mus li tus uas muaj hwjchim thiab muaj yeej thiaj yuav tiv tau txojkev tseeb thiab kev ncaj ncees, koj lub zog nchav yuav ua rau koj muaj yeej loj kawg nkaus. Koj tej xubvos ntse zuag plias, tej xubvos ntawd yuav chob koj cov yeebncuab lub plawv; ntau haivneeg yuav ntog pawglug ntawm koj kotaw. Lub zwmtxwv uas Vajtswv muab rau koj, yuav nyob mus ibtxhis li. Koj yuav kav koj haivneeg mus rau txojkev ncaj ncees. Koj nyiam kev ncaj ncees thiab ntxub kev ua phem ua qias. Vim li no tus TSWV uas yog koj tus Vajtswv, thiaj xaiv koj thiab pub kev zoo siab rau koj ntau tshaj lwm tus vajntxwv huv tibsi. Muab tej tshuaj tsw qab mules thiab alau-es pleev koj tej ris tsho tsw qab ntxiag hauv koj lub loog uas muaj kaus ntxhw teeb kom zoo nkauj, muaj cov ntaus nkauj nogncas rau koj zoo siab. Cov pojniam uas nyob hauv koj lub tsev, muaj ibtxhia yog tej vajntxwv cov ntxhais, thiab niam vajntxwv coj tej saw kub uas zoo kawg nkaus sawv ntawm koj lub zwmtxwv sab xis. Vajntxwv tus nkauj nyab, cia li mloog tej lus uas kuv hais, tso plhuav koj haivneeg thiab koj cov neejtsa tseg tsis txhob nco. Qhov uas koj zoo nkauj yuav ua rau vajntxwv txaus siab heev, nws yog koj tus tswv, koj yuav tsum hwm nws. Cov neeg uas nyob pem lub nroog Tiles yuav nqa khoom tuaj pub rau koj, cov neeg npluanuj yuav tuaj nrog koj sib raug zoo. Vajntxwv tus ntxhais uas nyob hauv lub loog zoo nkauj kawg nkaus li! Muab tej xov kub uas tawg paj nraug zees los xaws nws lub tsho. Nws hnav lub tsho txaij nraug zees ua ntej loo mus cuag vajntxwv, cov niam txais ntsuab ua ke kaj niab raws nws qab, thiab lawv puavleej yog cov uas mus cuag vajntxwv. Lawv muaj kev lomzem zoo siab kawg mus rau hauv vajntxwv lub loog. Kuv tus vajntxwv, koj yuav muaj tub coob, los ua vajntxwv hloov koj cov yawgkoob, thiab koj yuav tsa lawv los kav tagnrho lub ntiajteb no. Kuv zaj nkauj yuav ua rau koj lub koob meej nto moo lug mus ibtxhis, thiab txhua tus yuav qhuas koj mus tas tiam neej. Vajtswv yog peb lub chaw nkaum thiab yog peb lub dag lub zog, thaum twg peb muaj kev txomnyem nws npaj txhij pab peb. Txawm yog lub ntiajteb no qeeg ua zog koog thiab tej roob saus tas rau hauv qab thu hiavtxwv; thiab txawm yog tej dej hiavtxwv ntas ua suab nrov qeeg nkaws, ua rau tej roob qeeg ua zog koog los peb tsis ntshai li. Muaj ib tug dej nyob hauv Vajtswv lub nroog ua rau neeg muaj kev zoo siab luag ntxhi, lub nroog ntawd yog lub nroog dawbhuv uas Vajtswv tus uas muaj hwjchim loj kawg nkaus nyob. Vajtswv yuav nyob hauv lub nroog ntawd, thiab lub nroog ntawd yuav tsis raug puastsuaj ib zaug li, thaum kaj ntug txoog nws yuav los pab lub nroog ntawd. Txhua haivneeg yuav ntshai heev, tej tebchaws yuav qeeg ua zog koog, Vajtswv nthe nyooj laws, lub ntiajteb yaj ntshis tas. Tus TSWV uas muaj hwjchim loj kawg nkaus nrog nraim peb nyob, Yakhauj tus Vajtswv yog peb qhov chaw cawm siav. Cia li los thiab saib tej uas tus TSWV twb ua tas los lawm. Cia li los saib tej txujci tseemceeb uas nws ua nyob hauv ntiajteb no. Nws ua rau tej kev tsov kev rog hauv ntiajteb no tiaj tus, nws lov ntho tej qhaub hneevnti, nws muab tej hmuv dam pes daws, thiab muab tej thaiv hniav ntaj coj mus pov hlawv huv tibsi. Nws hais tias, “Nej cia li tseg kiag tsis txhob sib tua, nej yuav tsum paub hais tias kuv yog Vajtswv, tus uas kav txhua haivneeg thiab kav lub ntiajteb no huv tibsi.” Tus TSWV uas muaj hwjchim loj nrog nraim peb nyob, Yakhauj tus Vajtswv yog peb qhov chaw cawm siav. Ib tsoom pejxeem sawvdaws, nej cia li npuaj tes zoo siab! Hu nkauj nrov nrov qhuas Vajtswv. Tus TSWV tus uas muaj hwjchim loj tshaj plaws, yog tus txaus ntshais heev, nws yog tus vajntxwv uas muaj hwjchim loj kawg nkaus, nws kav tagnrho lub ntiajteb no. Nws pub peb kovyeej txhua haivneeg, nws cia peb kav txhua lub tebchaws. Nws xaiv lub tebchaws uas peb nyob no rau peb, cov neeg uas muaj teb muaj chaw nyob qhuas ntxhias yog nws haivneeg, lawv yog cov uas nws hlub ntag. Vajtswv mus zaum saum nws lub zwmtxwv. Thaum Vajtswv tabtom nce mus muaj suab qw, suab raj thiab suab xyu zoo siab heev. Cia li hu nkauj qhuas Vajtswv, hu nkauj qhuas peb tus vajntxwv! Vajtswv yog tus vajntxwv uas kav tagnrho lub ntiajteb no, cia li hu nkauj qhuas nws! Vajtswv zaum saum nws lub zwmtxwv dawbhuv, nws kav tagnrho txhua haivneeg. Txhua haivneeg tej nomtswv puavleej tuaj txoos ua ke nrog Anplahas tus Vajtswv haivneeg. Nws yog tus muaj hwjchim loj tshaj tej tubrog huv tibsi, nws yog tus tswjhwm uas muaj hwjchim tshaj plaws. Tus TSWV yog tus muaj hwjchim thiab tsimnyog qhuas nyob hauv peb tus Vajtswv lub nroog, saum nws lub roob dawbhuv. Xi-oos yog Vajtswv lub roob uas siab thiab zoo nkauj kawg nkaus li, tus vajntxwv uas muaj hwjchim loj, lub nroog yog qhov chaw zoo siab rau lub ntiajteb no. Vajtswv qhia hais tias muaj kev cawm dim nyob hauv lub nroog ntawd, nws yog lub chaw fajxwm uas ruaj khov. Tej vajntxwv thiaj sib sau ua ke tuaj ntaus lub Roob Xi-oos. Tiamsis thaum lawv pom lub nroog ntawd lawv xav tsis thoob li, lawv ntshai thiab khiav tsis yeej rov qab. Lawv ntshai ua ibce tshee hnyo, ib yam li tus pojniam uas mob plab yug menyuam, thiab ib yam li khaub zeeg cua ntsawj tej nkoj ntxeev. Peb twb hnov tej txujci tseemceeb uas Vajtswv tau ua tas los lawm, thiab tamsim no peb qhovmuag twb pom tej txujci ntawd nyob hauv peb tus Vajtswv uas muaj hwjchim loj kawg lub nroog; nws yuav tsomkwm lub nroog ntawd kom nyob kaj siab lug mus ibtxhis. Vajtswv, peb lub siab xav ntsoov txog koj txojkev hlub uas nrog nraim peb hauv koj lub Tuamtsev xwb. Tej neeg uas nyob txhua txhia thaj chaw puavleej qhuas koj nkaus xwb, thiab koj lub koob meej nrov ncha moo lug mus thoob plaws hauv qab ntuj no. Koj tswjhwm ncaj ncees, thov pub rau cov neeg saum roob Xi-oos muaj kev zoo siab. Koj yeej txiav txim ncaj ncees, thov kom cov Yudas tej nroog tau nyob kaj siab lug. Vajtswv haivneeg mus ncig lub roob Xi-oos thiab suav tej chaw tsomfaj, mus saib tus ntsa yeej thiab tshuaj xyuas tej chaw fajxwm kom tseeb, nej thiaj yuav piav tau qhia rau tiam tom ntej paub hais tias: “Tus Vajtswv no yog peb tus Vajtswv mus ibtxhis tsis kawg li, nws yuav coj peb ib tiam dhau ib tiam mus ibtxhis li.” Nej sawvdaws cia li mloog zaj no. Tagnrho tej neeg uas nyob txhua qhov chaw cia li tig pobntseg mloog zaj no, tsis hais tus hlob tus yau zoo ib yam nkaus, thiab tus npluanuj tus pluag nyob ua ke. Tej uas kuv lub siab xav yeej tseeb, kuv yuav hais tej lus uas txawj ntse xwb. Kuv yuav tig pobntseg ua tib zoo mloog tej pajlug thiab txhais kom tau tej ntsiab lus ib yam lib thaum kuv ntaus nkauj nogncas ntag. Kuv tsis ntshai thaum muaj kev txomnyem thiab muaj yeebncuab tuaj vij ibncig kuv, cov neeg phem ntawd lawv cia siab rau lawv tej kev npluanuj thiab khav ntxhias rau lawv tej nyiaj txiag xwb. Tsis muaj leejtwg yuav rov cawm tau nws dim, nws tsis muaj peevxwm muas tau nws txojsia ntawm Vajtswv los, rau qhov tus nqi uas them neeg txojsia kim heev. Tej uas nws coj mus them yeej tsis txaus tus nqi uas tso nws dim hauv lub qhov ntxa kom nws tau txojsia nyob mus ibtxhis. Sawvdaws yeej paub hais tias txawm yog cov neeg txawj ntse los puavleej tuag ib yam li cov neeg uas tsis muaj kev txawj ntse thiab cov neeg ruam. Lawv tso lawv tej nyiaj txiag thiab txhua yam rau lawv tej xeebntxwv. Lawv lub ntxa yog lawv lub tsev uas lawv nyob mus ibtxhis, txawm yog lawv muaj liaj muaj teb ntau los lawv qhov chaw nyob tsuas yog hauv lub qhov ntxa tas mus li. Neeg lub koob meej thiab kev muaj txiag npluanuj yeej pab tsis tau nws dim txojkev tuag, nws yeej yuav tuag ib yam li tej tsiaj. Saib yuav muaj dabtsi tshwmsim rau cov neeg uas lawv rov cia siab rau lawv nkaus xwb, thiab cov uas txaus siab rau lawv tej nyiaj txiag, lawv raug kev puastsuaj tuag ib yam li tej yaj, thiab Kev Tuag yog lawv tus tswv. Cov neeg ncaj ncees yuav yeej lawv tagnrho, rau qhov lawv tej cev yuav lwj sai rau hauv tubtuag teb qhov uas nyob deb lawv tej tsev. Tiamsis Vajtswv yuav cawm kuv, nws yuav cawm kom kuv dim ntawm txojkev tuag lub hwjchim. Tsis txhob nyuaj siab thaum ib tug neeg twg npluanuj, txawm yog nws muaj nyiaj txiag ntau npaum li cas los thaum nws tuag lawm nws yeej coj tsis tau dabtsi nrog nws mus li, nws tej nyiaj txiag yuav tsis nrog nws mus rau hauv qhov ntxa. Txawm yog tus neeg uas nws txaus siab rau nws lub neej thiab luag qhuas nws vim nws lub neej zoo los nws yeej yuav tau mus nrog nws cov yawgkoob nyob hauv tubtuag teb qhov uas tsaus ntuj nti mus ibtxhis. Neeg lub koob meej thiab kev muaj txiag npluanuj yeej pab tsis tau nws dim txojkev tuag, thiab nws yeej yuav tuag ib yam li tej tsiaj. Tus TSWV, Vajtswv tus muaj hwjchim loj kawg nkaus yog tus hais; nws hu thoob plaws hauv ntiajteb no hnubtuaj ti nkaus hnubpoob. Vajtswv ci ntsa iab hauv lub nroog Xi-oos uas yog lub nroog zoo nkauj kawg nkaus. Peb tus Vajtswv yuav los, tiamsis nws yuav tsis los ntsiag to, muaj nplaim taws cig sib ntswg yos ntawm nws hauv ntej, thiab muaj khaub zeeg cua ntsawj ibncig nws. Nws hu ntuj thiab ntiajteb ua timkhawv saib nws txiav txim rau nws haivneeg. Nws hais tias, “Sau kuv haivneeg uas ncaj ncees los cuag kuv, lawv yog cov neeg uas muab tsiaj tua fij thiab nrog kuv coglus tseg lawm.” Lub ntuj qhia hais tias Vajtswv yog tus ncaj ncees, thiab nws yog tus txiav txim. “Kuv haivneeg, cia li mloog, kuv yuav qhia nej, Cov Yixalayees, kuv yuav ua timkhawv tawmtsam nej ntag. Kuv yog Vajtswv tus uas yog nej tus Vajtswv. Kuv cem nej tsis yog vim tej tsiaj uas nej coj tuaj tua theej txhoj thiab tej tsiaj uas nej pheej coj tuaj tua hlawv fij rau kuv. Kuv yeej tsis yuav tej heev nyuj uas nej yug tom tshav zaub lossis tsis yuav nej tej tshis, txhua yam tsiaj uas nyob tom havzoov thiab tej nyuj uas nyob puv nkaus saum ntau txhiab lub roob puavleej yog kuv tug. Tagnrho tej noog thiab txhua yam uas muaj sia nyob tom tej nras puavleej yog kuv li. “Yog kuv tshaib plab, kuv yuav tsis thov ntawm nej noj, rau qhov lub ntiajteb thiab txhua tsav yam puavleej yog kuv li. Kuv noj nqaij nyuj lossis haus ntshav tshis thiab los? Cia li muab nej tej khoom uas nej ua Vajtswv tsaug fij rau Vajtswv, thiab muab rau Vajtswv tus uas muaj hwjchim loj kawg nkaus raws li nej tau coglus tseg lawm. Thaum nej raug kev txomnyem nej cia li thov kuv, kuv yuav pab kom nej dim thiab nej yuav qhuas kuv.” Tiamsis Vajtswv hais rau cov neeg siab phem tias, “Vim li cas nej lam muab kuv tej lus samhwm coj mus hais? Vim li cas nej lam piav txog kuv tej lus cog tseg? Nej twb tsis kam cia kuv ntuas nej, nej tsis lees yuav kuv tej lus samhwm. Thaum nej pom cov neeg ua tubsab nej txawm nrog lawv sib raug zoo, thiab mus koom nrog cov neeg deev luag poj luag txiv ua ib pab. “Nej pheej niaj hnub hais lus phem lus qias, nej pheej tsis tswj nej lub qhovncauj uas hais lus dag. Nej yeej npaj rawv nrhiav lus iab liam nej tej kwvtij thiab nrhiav txim rau lawv. Nej twb ua tej no tas los lawm, kuv yeej tsis hais nej ib lo li, yog li ntawd, nej thiaj xav hais tias, kuv zoo ib yam li nej xwb. Tiamsis nimno kuv cem nej thiab muab tej no nthuav qhia rau nej. “Nej cov uas tsis quavntsej kuv, nej cia li mloog kuv hais, lossis yuav cia kuv ua kom nej puastsuaj thiab tsis muaj leejtwg cawm tau kom nej dim li. Tus uas muab nws tej khoom fij ua kuv tsaug thiaj yog tus hwm kuv, thiab kuv yuav cawm txhua tus uas mloog kuv lus kom dim.” Vajtswv, thov koj hlub kuv, rau qhov koj muaj kev hlub tsis paub kawg. Vim koj txojkev hlub tshua uas loj kawg nkaus twb tshem kuv tej kev txhaum huv tibsi lawm. Thov ntxuav kuv tej kev phem kev qias huv tibsi mus, thiab ua kom kuv dawbhuv tsis muaj ib qho txhaum li. Kuv lees kuv tej kev txhaum, kuv paub hais tias kuv yeej tau ua txhaum lawm. Kuv tau ua txhaum rau koj, rau koj tib leeg xwb, thiab ua tej uas koj pom hais tias yog kev phem kev qias. Yog li ntawd, qhov uas koj txiav txim rau kuv yeej yog kev yog cai, thiab koj yeej muaj cai rau txim rau kuv lawm. Txij thaum kuv niam yug kuv los, kuv yeej ua txhaum lawm, thaum kuv niam suab kuv rau hauv plab, kuv yeej muaj txhaum lawm. Tus uas muaj lub siab dawb siab zoo thiab hais lus tseeb yog tus uas ua muaj kev kaj siab, thov koj pub koj lub tswvyim rau kuv. Thov koj muab hixauv ntxuav kuv tej kev txhaum mus, kuv thiaj yuav tsis muaj ib qho txhaum li; thov koj ntxuav kuv tej kev txhaum, kuv thiaj yuav dawb dua tej daus. Thov koj pub kuv tau hnov tej suab lomzem zoo siab, txawm yog koj ua rau kuv mob thiab ua rau kuv lub siab ntais rhe lawm los kuv yuav rov zoo siab dua ib zaug ntxiv. Thov koj tsis txhob saib kuv tej kev txhaum, thiab thov koj tshem kuv tej kev phem kev qias huv tibsi mus. Vajtswv, thov koj pub kom kuv muaj lub siab dawb, thiab thov koj muab lub siab tshiab rau kuv kom kuv mloog koj lus. Thov koj tsis txhob ntiab kuv tawm ntawm koj lub xubntiag mus, thov tsis txhob rho koj tus ntsujplig dawbhuv tawm ntawm kuv mus. Thov koj cawm kuv kom kuv rov muaj kev zoo siab, thiab thov koj pab kom kuv txawj mloog koj lus. Yog koj ua li ntawd, kuv yuav qhia koj tej lus rau cov neeg uas ua txhaum, ces lawv yuav rov los cuag koj. Vajtswv, thov koj tseg kuv txojsia thiab cawm kom kuv dim, ces kuv yuav zoo siab hlo mus qhia koj txojkev ncaj ncees. Tus TSWV, thov koj qhib kuv lub qhovncauj kom kuv txawj qhuas koj. Koj yeej tsis yuav tej khoom uas luag coj tuaj fij; yog koj yuav tej ntawd, kuv yeej yuav coj tuaj. koj tsis txaus siab rau tej khoom uas luag coj tuaj hlawv fij rau koj. Vajtswv, tej uas kuv coj tuaj fij rau koj ces yog kuv lub siab mos siab muag xwb, koj yuav tsis fee plhu rau tus uas txo hwjchim thiab lees nws tej kev txhaum ib zaug li. Vajtswv, thov koj ua siab dawb siab zoo rau lub nroog Xi-oos thiab pab nws, thov koj kho tus ntsa yeej uas thaiv lub nroog Yeluxalees dua tshiab. Koj thiaj yuav txaus siab rau tej uas peb coj tuaj fij rau koj, thiab tej heev nyuj uas peb coj tuaj tua hlawv tagnrho rau saum lub thaj fij rau koj. Tus neeg muaj hwjchim, vim li cas koj khav ntxhias rau koj txojkev ua phem ua qias? Vajtswv txojkev ncaj ncees yog txoj uas nyob mus ibtxhis. Koj npaj tswvyim ua kom lwm tus raug kev puastsuaj, koj tus nplaig ntse ib yam li hniav chais, koj yeej ibtxwm hais lus dag xwb. Koj nyiam kev phem tshaj kev zoo thiab nyiam kev dag tshaj kev ncaj ncees. Koj yog neeg dag, koj thiaj nyiam hais tej lus uas chob luag siab xwb. Yog li ntawd, Vajtswv yuav ua kom koj raug kev puastsuaj mus ibtxhis, nws yuav tuav koj cia thiab muab koj ntiab tawm hauv koj lub tsev mus; nws yuav muab koj tshem tawm hauv lub ntiajteb uas cov neeg muaj sia nyob no mus. Cov neeg ncaj ncees yuav pom zaj no thiab lawv ntshai kawg li, ces lawv yuav luag koj plig thiab hais tias, “Nej saib, tus neeg uas tsis cia Vajtswv ua tus pab nws, tiamsis nws pheej cia siab rau nws tej nyiaj txiag, thiab pheej rau siab ntso nrhiav kev ua phem nkaus xwb.” Tiamsis kuv zoo ib yam li tsob txiv ntoo roj uas hlob mos nyoos hauv Vajtswv lub tsev, kuv cia siab hlo rau nws txojkev hlub uas tsis paub kawg mus ibtxhis. Vajtswv, kuv yuav ua koj tsaug tsis paub kawg, rau tej uas koj twb ua pub rau kuv tas los lawm, kuv yuav qhia koj txojkev ua zoo tabmeeg koj haivneeg. Cov neeg ruam xav hais tias, “Tsis muaj Vajtswv.” Lawv txhua tus puavleej yog neeg siab phem, thiab lawv ua tej uas phem thiab qias kawg nkaus, lawv cov ntawd tsis muaj ib tug ua zoo li. Vajtswv nyob saum ntuj ntsia ntsoov tuaj rau neeg txhua tus saib puas pom muaj ib tug txawj ntse thiab pehawm nws. Tiamsis lawv puavleej tig nraubqaum rau Vajtswv, lawv txhua tus puavleej ua phem ib yam nkaus. Lawv cov ntawd tsis muaj ib tug ua zoo, txawm yog ib tug los tsis muaj li. Vajtswv nug hais tias, “Lawv puas paub? Cov neeg txhaum ntawd tsis quavntsej li los? Lawv nyiag kuv haivneeg tug, thiab lawv tsis pehawm kuv li.” Tiamsis lawv yuav raug tej kev txhawj kev ntshai uas lawv yeej tsis tau raug dua li, rau qhov Vajtswv yuav muab nws haivneeg cov yeebncuab tej pobtxha povtseg. Vajtswv tsis lees yuav lawv thiab cov Yixalayees yuav yeej lawv. Kuv thov txojkev cawm dim hauv lub nroog Xi-oos kom tuaj rau haivneeg Yixalayees! Haivneeg Yixalayees yuav zoo siab kawg nkaus thaum Vajtswv ua kom lawv rov muaj kev vammeej dua ntxiv. Vajtswv, thov koj lub hwjchim cawm kom kuv dim; thov koj lub zog loj zog nchav tso kom kuv dim! Vajtswv, thov koj hnov kuv tej lus thiab mloog kuv tej lus thov. Cov neeg khavtheeb tabtom tuaj tawmtsam kuv, cov neeg limhiam tabtom nrhiav kuv tua, lawv yog cov neeg uas tsis quavntsej txog Vajtswv. Tiamsis Vajtswv yog tus pab kuv. Tus TSWV yog tus tiv thaiv kuv. Thov Vajtswv siv kuv cov yeebncuab tej kev ua phem rau txim rov rau lawv. Nws yuav ua kom lawv raug puastsuaj, rau qhov nws yog tus uas ncaj ncees. Tus TSWV, kuv yuav zoo siab hlo muab khoom fij rau koj, kuv yuav ua koj tsaug, rau qhov koj yog tus muaj lub siab zoo. Koj tau cawm kuv dim ntawm kuv tej kev ntxhov siab, thiab kuv pom ntsoov kuv cov yeebncuab swb lawm. Vajtswv, thov koj hnov kuv tej lus, thov tsis txhob tsis quavntsej kuv tej lus thov. Thov mloog kuv tej lus thiab teb tej uas kuv thov koj, kuv nyuaj siab heev, ua rau kuv ibce tuag tas. Kuv cov yeebncuab hem kuv, ua rau kuv ntshai kawg li, cov neeg siab phem tsimtxom kuv, ua rau kuv raug kev puastsuaj. Lawv ua rau kuv raug kev ntxhov siab; lawv chim rau kuv thiab ntxub kuv kawg li. Kuv ntshai kawg nkaus, thiab txojkev tuag tsuam rawv kuv. Kuv ntshai ibce tshee hnyo thiab txhav tas, txojkev txhawj ntshai ua rau kuv tas kev cia siab lawm. Kuv xav kom kuv muaj tis ib yam li tus nquab. Kuv yuav ya mus nrhiav chaw so. Kuv yuav ya mus deb deb thiab mus nyob tom roob mojsab qhua. Kuv yuav maj nroos mus nrhiav tsev rau kuv nyob nkaum tej khaub zeeg cua thiab tuamtsam nag. Tus TSWV, thov koj ua kom kuv cov yeebncuab hais lus tsis sib haum! Kuv pom tej kev limhiam thiab tsis sib haumxeeb nyob puv nkaus hauv nroog, tej ntawd nyob puagncig lub nroog nruab hnub thiab hmo ntuj, kev ua phem thiab kev kub ntxhov nyob puv nkaus hauv nroog. Muaj kev puastsuaj nyob txhua txhia thaj chaw, kev tsimtxom thiab kev limhiam nyob puv nkaus tom tej kev. Yog ib tug yeebncuab luag kuv plig, kuv yeej ua taus siab ntev, yog ib tug yeebncuab saib tsis taus kuv, kuv yuav khiav nkaum nws. Tiamsis twb yog koj uas yog kuv tus phoojywg, kuv tus kwvluag, thiab tus uas txheeb ze kuv. Peb ib leeg yeej qhia siab hlo rau ib leeg, thiab ua ke pehawm Vajtswv hauv lub Tuamtsev. Thov kom kuv cov yeebncuab tuag ua ntej lawv lub hnubnyoog uas teem tseg, thov kom lawv cia li mus ciaj rau hauv tubtuag teb! Kev phem nyob puv nkaus hauv lawv tej tsev thiab lawv lub siab. Tiamsis kuv thov tus TSWV uas yog Vajtswv pab kuv, thiab nws yuav cawm kom kuv dim. Tej lus uas kuv yws thiab qw thaum sawv ntxov, thaum tavsu thiab tsaus ntuj yuav nrov mus txog nws, thiab nws yuav hnov kuv lub suab. Nws yuav coj kuv hauv lub tshavrog uas kuv tawmtsam yeebncuab rov qab los tsis raug mob li cas. Vajtswv tus uas kav mus ibtxhis, yuav hnov kuv tej lus thov thiab ua rau tej yeebncuab xwb, rau qhov lawv tsis kam hloov siab thiab lawv tsis paub ntshai Vajtswv. Kuv tus qub phoojywg thaum ub ntxeev siab tawmtsam nws cov phoojywg; nws rhuav nws tej lus cog tseg. Nws hais tej lus mos lus muag kawg li, tiamsis nws lub siab puv nkaus tej kev ntxub ntxaug, nws tej lus nplua ib yam li roj, tiamsis tej lus ntawd ntse ib yam li hniav ntaj. Cia li muab nej tej kev nyuaj siab tso rau tus TSWV, nws yuav tsomkwm nej, nws yeej ibtxwm tsis tso cov neeg ncaj ncees tseg. Tiamsis Vajtswv, koj yuav coj cov neeg tua neeg thiab cov neeg dag mus rau hauv lawv tej qhov ntxa thaum lawv tseem yog ib nrab neej. Tiamsis kuv yuav tso siab plhuav rau koj. Vajtswv, thov koj hlub kuv, vim kuv raug luag tawmtsam, kuv cov yeebncuab tsimtxom kuv txhua lub sijhawm. Tus TSWV uas muaj hwjchim, kuv cov yeebncuab tawmtsam kuv ib hnub tsaus ntuj ntais. Cov uas tuaj tawmtsam kuv ntawd coob kawg li. Thaum kuv muaj kev txhawj ntshai, kuv cia siab rau koj xwb. Kuv cia siab rau Vajtswv, kuv tsis ntshai li; kuv qhuas nws vim nws tej lus cog tseg. Noobneej puas muaj peevxwm ua tau li cas rau kuv? Kuv cov yeebncuab tsimtxom kuv ib hnub tsaus ntuj, lawv tuavhauv nrhiav kev ua kom kuv raug mob. Lawv sib sau tuaj nkaum rau hauv tej chaw uas nraim nkoos, soj txhua yam uas kuv ua, thiab nrhiav kev tua kuv povtseg. Vajtswv, thov koj cia li rau txim rau lawv tej kev ua phem no, thiab cia koj txojkev chim ua kom lawv raug kev puastsuaj! Koj yeej paub kuv raug kev txomnyem npaum li cas, koj yeej teev kuv tej kua muag tseg huv tibsi lawm. Kuv tej kua muag koj puas tau muab sau tseg rau hauv koj phau ntawv? Hnub uas kuv hu koj pab kuv, kuv cov yeebncuab yuav thim rov qab; Kuv paub hais tias Vajtswv tuaj kuv tog, kuv qhuas tus TSWV vim nws tej lus cog tseg. Kuv cia siab rau nws, thiab kuv yuav tsis ntshai. Tej neeg ntiajteb puas muaj peevxwm ua tau li cas rau kuv? Vajtswv, kuv yuav muab khoom tuaj fij rau koj raws li kuv tau coglus tseg lawm, kuv yuav muab tej khoom uas kuv ua koj tsaug pub rau koj, rau qhov koj tau cawm kuv dim ntawm txojkev tuag, thiab tsis cia kuv ntog. Yog li ntawd, kuv thiaj mus tau rau ntawm Vajtswv xubntiag uas yog tus duab teeb ci rau cov neeg uas muaj sia nyob. Vajtswv, thov koj hlub kuv, thov koj hlub kuv lauj, rau qhov kuv los cuag koj ua tus pab cawm kom kuv dim. Kuv nrhiav tau koj ob sab qab tis ua chaw roos kuv mus txog thaum tej khaub zeeg cua dhau lawm. Kuv tsa ncauj thov Vajtswv, tus uas muaj hwjchim loj tshaj plaws, tus Vajtswv tus uas pub kuv muaj txhua yam tsis tu. Nws yuav teb kuv tej lus thov saum ntuj tuaj thiab cawm kom kuv dim; Nws yuav yeej cov neeg uas tsimtxom kuv. Vajtswv yuav qhia nws txojkev hlub uas tsis paub kawg thiab nws txojkev ncaj ncees rau kuv. Kuv cov yeebncuab nyob puagncig kuv, lawv zoo ib yam li tej tsov ntxhuav tos tom neeg noj. Lawv tej hniav ntse ib yam li hmuv thiab tej xubvos, lawv tej nplaig ntse zuag plias ib yam li hniav ntaj. Vajtswv, thov qhia koj lub hwjchim uas loj kawg nkaus rau saum nruab ntug, thiab qhia koj tej txujci kom puv nkaus rau hauv ntiajteb no. Kuv cov yeebncuab cuab vas tos yuav khwb kom tau kuv, kuv muaj kev nyuaj siab kawg li. Lawv khawb qhov tos kuv kev, tiamsis lawv rov poob tas rau hauv lub qhov ntawd lawm. Vajtswv, kuv tso siab plhuav lawm lauj! Kuv yuav hu nkauj thiab qhuas koj mus li. Kuv lub siab, cia li tsim dheev! Kuv tej nkauj nogncas thiab tej raj, cia li ras dheev! Kuv yuav tsa kom lub hnub sawv. Tus TSWV, kuv yuav ua koj tsaug tabmeeg txhua lub tebchaws. Kuv yuav qhuas koj tabmeeg txhua haivneeg. Koj txojkev hlub uas tsis paub kawg siab mus nto ntuj, koj txojkev ncaj ncees siab mus txog nruab ntug. Vajtswv, thov qhia koj lub hwjchim uas loj kawg nkaus rau saum nruab ntug, thiab qhia koj tej txujci kom puv nkaus rau hauv ntiajteb no. Puas yog nej cov nomtswv yeej ibtxwm txiav txim ncaj ncees? Nej puas txiav txim ncaj ncees rau txhua tus? Tsis yog li ntawd! Nej tsuas xav ntsoov rau txojkev ua phem xwb, thiab ua limhiam kawg nkaus rau lub tebchaws. Cov neeg ua phem yeej ua kev txhaum mus tas lawv simneej, lawv yeej ibtxwm dag txij thaum yug tau lawv los. Lawv muaj taug ib yam li nab; lawv ntsaws qhovntsej kom tsis hnov lus ib yam li tus nab raj kubsai uas lag ntseg uas yeej tsis hnov tus dib nab lub suab lossis hnov tus uas txawj ua khawvkoob tej lus ntxias hlo li. Vajtswv, thov koj cia li muab cov tsov ntxhuav no tej kaus tsoo kom lov. Thov kom lawv ploj mus ib yam li tej dej uas muab nqus povtseg, thov kom lawv raug luag tsuj ib yam li tej nroj tsuag hauv plawv kev. Thov kom lawv zoo li cov qwj uas yaj tas rau hauv lub plhaub lawm, thov kom lawv zoo ib yam li tus menyuam mos uas yug tau los xwb twb tuag lawm tsis tau pom lub hnub. Thaum lawv tsis tau paub tej no, lawv twb raug muab txiav tu tas ib yam li tej nroj tsuag lawm, thaum Vajtswv chim heev, nws yuav muab lawv tshuab povtseg thaum lawv tseem muaj sia nyob. Cov neeg ncaj ncees yuav zoo siab heev thaum lawv pom cov neeg txhaum raug txim, lawv yuav kwm cov neeg siab phem tej ntshav mus. Tej neeg yuav hais zom zaws tias, “Cov neeg ncaj ncees yeej tau txais nqi zog; tseeb tiag, Vajtswv txiav txim rau neeg ntiajteb.” Kuv tus Vajtswv, thov cawm kom kuv dim ntawm kuv cov yeebncuab, thov tsomkwm kuv kom kuv dim ntawm cov neeg uas tawmtsam kuv lauj! Thov cawm kom kuv dim ntawm cov neeg siab phem, thov pab kom kuv dim ntawm cov neeg tua neeg! Tamsim no lawv yeej zov rawv tos tua kuv povtseg, cov neeg limhiam sib sau tuaj tawmtsam kuv. Tus TSWV, tsis yog vim kuv lub txim lossis tej kev txhaum uas kuv ua. Kuv yeej tsis tau ua txhaum, lawv cia li maj ceev nrooj tuaj tawmtsam kuv xwb. Thov koj tsa qhovmuag saib kuv thiab los pab kuv. Tus TSWV uas yog Vajtswv tus muaj hwjchim loj kawg nkaus, cia li sawv tsees thiab los pab kuv, cov Yixalayees tus Vajtswv, thov koj tsa qhovmuag saib zaj no! Thov koj cia li sawv tsees los thiab rau txim rau cov neeg nruj tsiv, thov tsis txhob hlub tshua txog cov neeg ntxeev siab ntawd li. Thaum tsaus ntuj lawv rov qab los thiab qw zom zaws ib yam li cov dev tom ncig lub nroog. Cia li mloog lawv tej lus thuam thiab tej lus cem. Lawv tej nplaig ntse zuag plias li hniav ntaj hauv lawv qhovncauj, lawv tseem xav hais tias yeej tsis muaj neeg hnov lawv tej lus li. Tiamsis tus TSWV, koj luag lawv plig kawg li, koj txob thuam cov neeg nruj tsiv. Vajtswv, kuv cia siab ntsoov rau koj lub zog loj zog nchav, koj yog kuv qhov chaw cawm siav. Kuv tus Vajtswv yeej hlub kuv thiab yuav los pab kuv, nws yuav cia kuv saib ntsoov kuv cov yeebncuab ua cov swb. Vajtswv, thov koj tsis txhob tua lawv povtseg, nyob tsam kuv haivneeg tsis nco qab lawv lawm. Tus TSWV uas yog tus tsomkwm peb, thov koj lub zog loj zog nchav ua kom lawv swb thiab tawg khiav mus. Kev txhaum nyob ntawm lawv daim dincauj, lawv tej lus puavleej yog kev txhaum xwb, thov kom lawv raug ntes vim lawv txojkev khavtheeb! Rau qhov lawv tej lus yog lus foom phem thiab lus dag xwb, koj cia li ua kom lawv puastsuaj vim koj txojkev chim, thov ua kom lawv puastsuaj tu noob nrho mus. Sawvdaws thiaj paub hais tias, Vajtswv yog tus uas kav haivneeg Yixalayees, thiab nws kav thoob plaws hauv lub ntiajteb no. Thaum tsaus ntuj uas kuv cov yeebncuab rov los, lawv qw zom zaws ib yam li cov dev tom ncig lub nroog, lawv zoo ib yam li cov dev uas nrhiav noj thiab nyooj sib txeeb noj. Tiamsis kuv yuav hu nkauj qhuas koj lub zog loj zog nchav, txhua tagkis kuv hu nkauj qhuas koj txojkev hlub uas tsis paub kawg. Koj yeej yog kuv lub chaw cawm siav, yog lub tsev rau kuv nkaum thaum kuv raug kev txomnyem. Kuv yuav qhuas koj, koj yog tus tsomkwm kuv. Vajtswv yog kuv lub chaw cawm siav, Vajtswv thiaj yog tus hlub kuv. Vajtswv, koj muab peb tso tseg thiab koj ua rau peb swb lawm, koj chim heev rau peb, tiamsis nimno thov koj tig rov los pab peb. Koj muab lub tebchaws co ua zog koog, thiab koj muab phua tawg rhe lawm, thov koj cia li kho nws tej qhov txhab tamsim no, rau qhov nws tawg ua ntau daim lawm. Koj ua rau koj haivneeg raug kev txomnyem loj kawg li, peb da ntxeev tiaj khwb rwg ib yam li peb qaug cawv. Koj tsa ib tug chij rau cov uas hwm koj kom lawv khiav dim ntawm txojkev puastsuaj. Thov koj lub hwjchim cawm kom peb dim, thov koj teb peb tej lus thov kom cov neeg uas koj hlub thiaj tau txais kev cawm dim. Vajtswv hais lus ntawm chav pehawm nws tuaj hais tias, “Ntawm txojkev muaj yeej, kuv yuav muab lub nroog Sekhees faib thiab muab lub Hav Xukaus pub rau kuv haivneeg. Nkile-as yog kuv tug, thiab Manaxes los yog kuv tug ib yam nkaus, Efalayees yog kuv lub kausmom hlau thiab Yudas yog kuv tus cwj. Cov Mau-am yog kuv lub tais ntxuav taw; thiab kuv yuav hle kuv txhais khau pov mus rau saum Edoos; kuv yuav qw hais tias kuv yeej cov Filitees lawm!” Vajtswv, leejtwg yuav coj kuv mus rau hauv lub nroog uas muaj ntsa yeej khov kho? Leejtwg yuav coj kuv mus rau hauv Edoos? Tsis yog koj twb muab peb tso povtseg lawm los? Tsis yog koj tsis kam tawm nrog peb cov tubrog mus lawm los? Thov pab peb tawmtsam peb cov yeebncuab, yog neeg pab xwb tsis qabhau li. Yog hais tias Vajtswv tuaj peb tog peb thiaj yuav yeej, nws yuav kovyeej peb cov yeebncuab. Vajtswv, thov koj hnov kuv lub suab quaj, thov mloog kuv tej lus thov lauj! Thaum kuv tas kev cia siab thiab nyob nrug deb kuv lub tsev lawm, kuv thov koj pab kuv. Thov koj coj kuv mus rau ntawm qhov chaw cawm siav, rau qhov koj yog tus tiv thaiv kuv, koj yog kuv lub chaw fajxwm uas tawmtsam kuv cov yeebncuab ntag. Thov cia kuv nyob hauv koj lub tuamtsev mus tas kuv simneej, thov cia kuv nkaum kaj siab lug hauv koj ob sab qab tis. Vajtswv, koj twb hnov kuv tej lus cog tseg lawm, thiab koj twb muab tej uas yog cov neeg hwm koj li tug rau kuv lawm. Thov koj ntxiv hnubnyoog rau vajntxwv kom muaj sia nyob ntau xyoo, thov cia nws ua vajntxwv mus li. Vajtswv, thov cia nws ua tus kav mus ibtxhis ntawm koj lub xubntiag, thov tsomkwm nws ntawm koj txojkev hlub uas tsis paub kawg thiab kev ncaj ncees. Yog li ntawd, kuv yuav niaj hnub hu nkauj qhuas koj mus li, ib yam li kuv tau coglus fij khoom pub rau koj txhua txhia hnub. Kuv ua siab ntev tos Vajtswv ua tus cawm kuv, kuv muab siab npuab nws tib leeg xwb. Nws tib leeg thiaj yog tus tsomkwm kuv thiab cawm kuv dim xwb, nws yog tus tiv thaiv kuv, thiab kuv yuav tsis swb ib zaug li. Tagnrho nej tseem yuav tawmtsam tus neeg ntawd mus txog thaum twg? Nws twb tsis muaj zog npaum li tus ntsa lajkab uas twb vau tas lawm los sav. Nej tsuas xav txo tus neeg uas muaj koob meej, thiab nej nyiam hais tej lus dag xwb. Nej lub ncauj foom koob hmoov tiamsis nej lub siab foom tsis zoo. Kuv muab siab npuab Vajtswv tib leeg xwb, nws thiaj yog tus uas kuv cia siab. Nws tib leeg thiaj yog tus tsomkwm thiab cawm kuv dim, nws yog tus tiv thaiv kuv, thiab kuv yuav tsis swb ib zaug li. Vajtswv yog tus cawm kuv dim thiab pub kuv muaj koob meej, nws yog tus tsomkwm zoo heev, thiab nws yog kuv lub chaw nkaum. Kuv haivneeg, nej yuav tsum cia siab rau Vajtswv txhua lub sijhawm. Qhia nej lub siab rau nws, rau qhov nws yog peb lub chaw cawm siav. Tej neeg zoo ib yam li ua pa xwb, tus hlob tus yau los tsis muaj nqis dabtsi li. Muab lawv tso rau saum teev luj los lawv tsis tsuam teev li, lawv tseem sib tshaj tej pa cua thiab. Nej tsis txhob xav hais tias ua nruj ua tsiv, ces yuav tau luag tug yuav; tsis txhob cia siab hais tias mus nyiag luag tug, ces yuav tau dawb tau do. Txawm yog nej yuav muaj nyiaj ntau zuj zus los tsis txhob qaug rau tej ntawd. Kuv hnov Vajtswv hais ntau zaus tias lub hwjchim yog nws li, thiab nws txojkev hlub yeej tsis paub kawg. Tus TSWV, koj yog tus uas yuav muab nqi zog rau txhua tus raws li nyias tes haujlwm. Vajtswv, koj yog kuv tus Vajtswv, kuv tos ntsoov koj. Kuv lub siab xav tau koj ib yam li thaj av qhuav uas tsis muaj dej. Kuv tus ntsujplig nqhis koj qhuav siab qhawv. Thov kom kuv pom koj hauv chav uas neeg tuaj pehawm koj, thov cia kuv pom koj lub hwjchim thiab koj tus tshwjchim uas loj kawg nkaus. Koj txojkev hlub uas tsis paub kawg zoo dua txojsia, vim li ntawd kuv yuav qhuas koj. Kuv yuav ua koj tsaug mus tas kuv simneej, kuv yuav tsa tes thov koj. Kuv tus ntsujplig yuav tau noj thiab txaus siab kawg li, thiab kuv yuav zoo siab luag ntxhi hu nkauj qhuas koj. Thaum kuv pw saum txaj, kuv yeej nco ntsoov txog koj, kuv lub siab xav ntsoov rau koj ib hmos kaj ntug plaws, rau qhov koj ibtxwm pab kuv los lawm. Kuv zoo siab hu nkauj hauv koj ob sab qab tis uas ua duab ntxoo roos kuv. Kuv nyob ze rawv koj, thiab koj txhais tes xis thaiv tsis pub kuv raug kev nyuaj siab. Cov neeg uas nrhiav kuv tua povtseg yuav mus tas rau hauv tubtuag teb. Lawv yuav raug tua tuag tas rau hauv tshavrog thiab hma yuav noj lawv. Rau qhov Vajtswv pub rau vajntxwv kovyeej, vajntxwv yuav zoo siab kawg li. Cov neeg uas tuav Vajtswv lub npe coglus yuav qhuas nws, tiamsis yuav muab cov neeg dag tej qhovncauj kaw. Vajtswv, kuv tabtom raug kev nyuaj siab, thov koj mloog kuv tej lus thov! Kuv ntshai kuv cov yeebncuab kawg li, thov cawm kuv txojsia! Thov tsomkwm kom kuv dim ntawm cov neeg siab phem tej tswvyim tuavhauv ua phem, thiab ntawm cov neeg siab phem uas yuam cai. Lawv tej nplaig ntse ib yam tej ntaj thiab lawv tej lus iab lus daw zuag ib yam li tej xubvos. Lawv maj nroos hais tej lus dag, lawv tsis txajmuag li, lawv txob thuam cov neeg zoo, lawv tsis ntshai leejtwg li. Lawv ib leeg txhawb ib leeg rau kev tuavhauv ua phem, lawv sib tham saib lawv yuav mus cuab hlua rau qhov chaw twg. Lawv hais tias, “Yeej tsis muaj leejtwg pom peb li.” Lawv tuav tswvyim ua phem thiab hais tias, “Peb npaj tau tswvyim zoo kawg nkaus.” Neeg lub siab thiab lub hlwb xav txog tej uas phem kawg li. Tiamsis Vajtswv tua nws tej xubvos tuaj rau lawv, thiab tib pliag ntshis xwb lawv raug mob tas. Nws yuav ua kom lawv puastsuaj tas vim lawv tej kev xav ntawd, txhua tus uas pom lawv yuav co hau nto. Ces lawv yuav ntshai heev, lawv thiaj xav txog tej uas Vajtswv ua tas los thiab qhia rau sawvdaws paub txog Vajtswv tes haujlwm. Cov neeg ncaj ncees txhua tus yuav zoo siab kawg li vim tej uas tus TSWV tau ua tas los. Lawv yuav tau txojkev cawm dim ntawm nws, cov neeg siab zoo txhua tus yuav qhuas nws. Vajtswv, yeej tsimnyog peb qhuas koj nyob hauv lub nroog Xi-oos thiab ua raws li peb twb tau coglus tseg rau koj, rau qhov koj teb peb tej lus thov lawm. Tej neeg nyob txhua qhov yuav los cuag koj vim lawv nco txog lawv tej kev txhaum. Peb kov tsis yeej peb tej kev txhaum, tiamsis koj twb zam peb tej kev txhaum lawm. Cov neeg uas koj xaiv tseg yuav zoo siab heev, lawv yog cov uas koj coj los nyob hauv lub tsev uas neeg tuaj pehawm koj, Peb yuav txaus siab rau txhua yam zoo uas nyob hauv koj lub tsev, tej koob hmoov no twb yog koj lub Tuamtsev uas dawbhuv ntag. Qhov uas koj pab peb kovyeej twb yog koj teb peb tej lus thov, thiab koj tej txujci uas zoo kawg nkaus tau cawm peb dim. Tej neeg uas nyob thoob ntiajteb thiab nyob sab dej hiavtxwv tim ub puavleej cia siab rau koj xwb. Koj lub zog tsa tej roob nyob muaj chaw kom sawvdaws pom koj lub hwjchim uas loj kawg nkaus. Koj ua rau dej hiavtxwv lub suab uas nrov nroo ntws nyob ntsiag to; thiab ua rau tej dej uas ntas tuaj nrov qeeg nkaws nyob tus yees, koj ua rau neeg lub suab qw ntshoo nrooj nyob ntsiag mus. Tej neeg uas nyob thoob qab ntuj no puavleej ntshai thiab hwm koj thaum lawv pom koj tej txujci tseemceeb uas koj ua tas los lawm. Koj tej haujlwm ua rau sawvdaws zoo siab qw sab ntuj tim no mus rau sab ntuj kawg tim ub. Koj tso nag los ywg thaj av uas koj tsomkwm saib xyuas, koj ua rau thaj av ntawd rog thiab muaj chiv. Koj ua rau dej ntws puv nkaus tej kwjdeg, koj pub muaj qoobloo puv nkaus hauv lub ntiajteb no. Tej no twb yog koj ua ntag. Koj tso tuamtsam nag los ywg tej nras liaj uas luag laij cia, thiab ua rau tej nras liaj txhawv dej thoob plaws, koj ua rau tej av phom nphoob vim muaj nag ywg thiab ua rau tej yub qoob hlob mos nyoos. Koj txoj koob hmoov ua rau tej qoobloo ntsu. Koj mus txog qhov twg qhov ntawd muaj nplua mias. Tej tshav zaub muaj tsiaj txhu nyob ua npoj ntws, tej toj roob puv nkaus kev zoo siab. Tom tej nras muaj yaj nyob ua npoj ntws, muaj nplej puv nkaus hauv tej hav. Txhua yam puavleej qw thiab hu nkauj zoo siab. Txhua haivneeg, cia li qw zoo siab thiab ua Vajtswv tsaug! Hu nkauj qhuas nws lub npe thiab nws lub tshwjchim; thov kom tej lus qhuas ua rau nws tau koob meej. Hais rau Vajtswv hais tias, “Tej haujlwm uas koj ua, peb xav tsis thoob li! Koj lub hwjchim loj kawg nkaus ua rau koj cov yeebncuab ntshai thiab qhau cev hlo pehawm koj ntawm koj xubntiag. Txhua tus uas nyob hauv ntiajteb puavleej pehawm koj, lawv hu nkauj qhuas koj, lawv hu nkauj qhuas koj lub npe.” Nej cia li saib tej uas Vajtswv twb ua tas los lawm, nws ua tej haujlwm uas zoo kawg nkaus rau sawvdaws pom. Nws muab dej hiavtxwv hloov ua av qhuav; peb tej pogkoob yawgkoob thiaj li mus kotaw hla dhau dej. Peb thiaj zoo siab vim tej uas nws tau ua. Nws lub hwjchim kav mus ibtxhis thiab nws tsa qhovmuag saib ntsoov txhua haivneeg. Tsis pub leejtwg ntxeev siab tawmtsam nws. Txhua haivneeg cia li qhuas peb tus Vajtswv, cia peb hnov nej tej suab qhuas Vajtswv. Nws yog tus tuav peb txojsia thiab nws tsis pub peb ntog li. Vajtswv, koj tau sim peb siab; yog li ntawd, koj thiaj sim peb ib yam li nchuav nyiaj hauv qhovcub. Koj cia peb mus mag luag lub vojhlua thiab koj muab lub nra hnyav tso rau nraum peb nraubqaum. Koj cia peb cov yeebncuab tsuj peb, peb thiaj raug hluavtaws kub thiab dej nyab, tiamsis nimno koj coj peb rov los nyob rau qhov chaw kaj siab. Kuv yuav coj khoom tuaj hlawv fij rau hauv koj lub tsev, kuv yuav muab khoom fij rau koj raws li kuv tau coglus tseg lawm. Kuv yuav muab rau koj raws li kuv tau hais thaum kuv raug kev txomnyem. Kuv yuav muab yaj tuaj tua hlawv fij rau saum lub thaj, kuv yuav muab nyuj thiab tshis tuaj tua hlawv fij, thiab tej pa yuav ncho mus rau saum nruab ntug. Cov neeg uas hwm Vajtswv, nej cia li los ntawm no, kuv yuav piav tej uas tus TSWV hais rau kuv lawm rau nej mloog. Kuv quaj thov nws pab, kuv qhuas nws ntawm lub suab hu nkauj. Yog kuv tsis lees kuv tej kev txhaum, tus TSWV yuav tsis mloog kuv tej lus thov. Tiamsis Vajtswv yeej tig pobntseg mloog kuv tej lus; nws yeej hnov kuv tej lus thov. Kuv qhuas Vajtswv, rau qhov nws tsis tau muab kuv tej lus thov tso tseg, thiab tsis tau rho nws txojkev hlub uas tsis paub kawg ntawm kuv mus. Vajtswv, thov koj hlub peb thiab foom koob hmoov rau peb, tsa qhovmuag saib peb thiab ua siab dawb saib zoo rau peb kom tej neeg nyob thoob ntiajteb thiaj paub koj, thiab txhua haivneeg thiaj yuav paub koj txojkev cawm dim. Vajtswv, thov kom tsoom pejxeem qhuas koj, thov kom txhua haivneeg qhuas koj! Thov cia txhua haivneeg zoo siab thiab hu nkauj luag ntxhi, rau qhov koj txiav txim ncaj ncees rau sawvdaws, thiab koj coj txhua haivneeg hauv qab ntuj no. Vajtswv, thov kom sawvdaws qhuas koj, thov kom txhua haivneeg qhuas koj! Lub tebchaws muaj qoobloo sau Vajtswv uas yog peb tus Vajtswv, foom koob hmoov rau peb lawm. Vajtswv tau foom koob hmoov rau peb; thov kom tej neeg nyob txhua qhov cia li hwm nws. Vajtswv sawv tsees ua rau nws cov yeebncuab khiav ri sua. Cov neeg uas ntxub Vajtswv yuav swb thiab khiav tsis yeej ua nws ntej. Vajtswv ntiab lawv tawm ib yam li cua ntsawj tej pa taws, thiab ib yam li hluavtaws txhiab ciab ntab yaj; yog li ntawd, cov neeg siab phem yuav ploj ntawm Vajtswv lub xubntiag mus. Tiamsis cov neeg ncaj ncees txaus siab thiab zoo siab ntawm Vajtswv xubntiag, lawv xyivfab thiab zoo siab. Hu nkauj qhuas Vajtswv, hu nkauj qhuas nws lub npe, kho kev tos tus uas caij rawv tauv huab los. Nws lub npe yog tus TSWV, cia li zoo siab hlo nyob ntawm nws lub xubntiag. Vajtswv tus uas nyob hauv lub Tuamtsev dawbhuv, nws tu cov menyuam ntsuag thiab tsomkwm cov pojntsuam. Nws pub cov neeg txomnyem muaj vaj muaj tsev nyob, thiab nws tso cov neeg raug txim tawm mus nyob ywj siab, tiamsis cov neeg ntxeev siab yuav tau nyob hauv lub tebchaws uas qhuav nkig nkuav. Vajtswv, thaum koj coj koj haivneeg, thiab thaum koj tawm mus hla tiaj suabpuam lub ntiajteb ua zog koog thiab lub ntuj tso nag laub lug los, rau qhov Vajtswv los rau saum lub roob Xinais, cov Yixalayees tus Vajtswv tabtom nqis los lawm. Vajtswv, koj tso tuamtsam nag los thiab ua rau koj lub tebchaws uas tsuag tas lawm kom rov ua tau noj, Koj haivneeg los nyob hauv lub tebchaws ntawd, koj ua zoo koj thiaj npaj pub rau cov pluag. Tus TSWV yog tus hais tej lus no thiab muaj coob leej coj mus qhia: “Cov vajntxwv thiab lawv tej tubrog khiav mus lawm!” Cov pojniam uas nyob hauv tsev muab tej khoom uas txeeb tau los sib faib: tej tis nquab puavleej vuam nyiaj thoob plaws, thiab tej plaub tis puavleej vuam tej tseem kub. (Vim li cas hnub uas tabtom ntaus rog nej qee leej mus nkaum hauv tej nkuaj yaj?) Thaum Vajtswv tus uas muaj hwjchim loj kawg nkaus raws cov vajntxwv tawg ri sua, nws ua kom muaj daus los rau saum Roob Zalemoos. Lub roob hauv lub nroog Npasas yog lub roob uas loj siab, lub roob ntawd muaj ntau lub ncov. Tej ncov roob loj siab, vim li cas koj khib siab thiab saib tsis taus lub roob uas Vajtswv xaiv ua nws qhov chaw nyob? Tus TSWV yeej yuav nyob saud mus ibtxhis li. Nws cov tsheb nees ntau txhiab ntau vam lub, nrog tus TSWV nqis saum roob Xinais los rau hauv nws qhov chaw dawbhuv. Thaum koj mus rau saum ntuj uas yog qhov chaw siab, koj coj cov neeg uas raug luag ntes coob leej nrog koj mus, koj tau txais tej khoom pub ntawm tej neeg, thiab txawm yog cov neeg ntxeev siab rau koj los muab khoom pub rau koj. Tus TSWV uas yog Vajtswv yuav nyob saud. Cia li qhuas tus TSWV, nws yog tus uas ris peb lub nra ib hnub dhau ib hnub, nws yog Vajtswv tus uas cawm peb dim ntag. Peb tus Vajtswv yog tus Vajtswv uas cawm peb dim, nws yog tus Vajtswv, peb tus TSWV uas cawm peb dim ntawm txojkev tuag. Vajtswv yeej yuav muab nws cov yeebncuab taubhau tsoo kom tawg, lawv yog cov neeg uas tsis kam thau hau tawm ntawm lawv tej kev txhaum li. Tus TSWV hais tias, “Kuv yuav coj nej cov yeebncuab tawm hauv Npasas rov qab los, kuv yuav coj lawv tawm hauv qab thu hiavtxwv qhov uas tob tshaj plaws los; yog li ntawd, nej thiaj raus kotaw rau hauv yeebncuab cov ntshav, thiab nej tej dev thiaj tau yaim tej ntshav ntawd.” Vajtswv, sawvdaws puavleej pom koj cov neeg mus ua tsheej pab, Vajtswv uas yog kuv tus vajntxwv, koj cov neeg mus ua tsheej kev rau hauv koj lub tuamtsev. Cov hu nkauj mus ua ntej, cov ntaus nkauj nogncas mus ua qab, thiab cov hluas nkauj uas ntaus nruas tuaj nruab nrab. “Nws haivneeg uas tuaj sablaj ua ke cia li qhuas Vajtswv; tagnrho Yakhauj cov xeebntxwv cia li qhuas tus TSWV!” Npeenyamees yog cov uas xub los, lawv yog xeem tsawg tshaj plaws, ces cov Yudas tej thawjcoj thiaj los nrog lawv pab ntawd, cov Xenpuloos thiab cov Nathalis tej thawjcoj thiaj tawm raws qab. Vajtswv, qhia koj lub hwjchim rau peb, lub hwjchim uas koj tau siv tuaj peb tog. Rau qhov koj lub Tuamtsev nyob hauv lub nroog Yeluxalees, cov vajntxwv thiaj nqa khoom tuaj pub rau koj. Cia li cem cov tsiaj qus uas nkaum tom tej hav tauj npaig, cia li cem cov heev nyuj uas nyob nrog cov menyuam nyuj uas yog txhua haivneeg, mus txog thaum lawv qhau cev pe thiab muab nyiaj fij rau koj. Thov muab cov neeg uas nyiam ua tsov ua rog ntiab tawm mus! Cov xeebcom yuav tuaj nram tebchaws Iziv tuaj, cov neeg Ethi-aupias yuav tsa lawv tej tes thov Vajtswv. Txhua lub tebchaws hauv ntiajteb no, cia li hu nkauj qhuas Vajtswv, hu nkauj txhawb nqa tus TSWV, qhuas tus uas nyob saum nruab ntug uas yog lub ntuj uas ibtxwm nyob thaum ub los. Cia li mloog nws lub suab nthe nyooj laws uas muaj hwjchim. Tshaj tawm Vajtswv lub hwjchim, nws lub koob meej nrov ncha thoob plaws haivneeg Yixalayees, nws lub hwjchim puv nkaus saum nruab ntug. Vajtswv tus uas txaus ntshai nyob hauv nws lub tuamtsev uas yog cov Yixalayees tus Vajtswv! Nws muab lub zog loj zog nchav thiab lub hwjchim pub rau nws haivneeg. Cia li qhuas Vajtswv! Vajtswv, thov koj pab cawm kuv! Dej nyab nto plaws saum kuv cajdab lawm, Kuv zom rau hauv lub pas hav iav tob heev uas tsis muaj chaw tiag taw li, kuv poob rau hauv lub pasdej uas tob heev, thiab dej nphau los nyab kuv tas. Kuv hu koj pab, kuv qaug zog, thiab kuv lub qa qhuav tas. Kuv tos koj ntev heev ua rau kuv ob lub qhovmuag li tas. Cov neeg uas lam ntxub kuv mas ntau tshaj kuv cov plaubhau lawm thiab. Kuv cov yeebncuab ua timkhawv tsis tseeb nkaug kuv, lawv muaj zog heev thiab xav tua kuv povtseg. Lawv yuam kom kuv xa tej khoom uas tsis yog kuv nyiag rov qab huv tibsi. Vajtswv, kuv tsis tau muab kuv tej kev txhaum zais tsis pub koj pom, koj yeej paub kuv yog ib tug neeg ruam kawg nkaus li. Tus TSWV uas muaj hwjchim loj kawg nkaus, thov tsis txhob cia kuv coj kev txajmuag los rau cov neeg uas cia siab rau koj! Kuv lub siab kub cuag hluavtaws, vim kuv mob siab rau koj lub Tuamtsev. Twb yog vim koj kuv thiaj raug luag thuam thiab raug kev txajmuag. Kuv zoo ib yam li tus qhua rau kuv cov kwvtij, thiab zoo ib yam li tus neeg txawv tebchaws rau kuv tsevneeg. Kuv mob siab rau koj lub Tuamtsev ib yam li hluavtaws kub hauv kuv lub siab, tej lus uas luag thuam koj poob rau kuv huv tibsi. Thaum kuv txo hwjchim ua kevcai yoo mov, mas tej neeg thuam kuv kawg li. Thaum kuv hnav tej ris tsho uas tau kev quaj ntsuag mas lawv luag kuv plig kawg. Lawv xyav kuv moo tom tej kev, thiab lawv lom txwm haus cawv kom qaug hu nkauj luag kuv plig. Tiamsis tus TSWV, kuv yuav thov koj xwb; Vajtswv, thov koj teb kuv tej lus thov, thaum lub sijhawm uas koj teem tseg. Vim koj txojkev hlub uas loj kawg nkaus thov koj teb kuv, rau qhov koj coglus tseg lawm hais tias koj yuav cawm kom kuv dim. Thov cawm kuv kom tsis txhob zom rau hauv pas hav iav, thov pab kom kuv dim ntawm kuv cov yeebncuab, thiab dim ntawm lub pasdej uas tob heev. Thov tsis txhob pub dej los nyab kuv, thov tsis txhob pub kuv tog rau hauv qab thu dej tob lossis poob rau hauv lub qhov ntxa. Tus TSWV, koj yog tus muaj txojkev hlub uas tsis paub kawg, thov koj hlub kuv; koj yog tus muaj txojkev hlub uas loj kawg nkaus, thov koj tig los rau ntawm kuv. Thov koj tsis txhob khiav nkaum koj tus tubtxib! Kuv ntxhov siab kawg nkaus, thov koj teb kuv tamsim no! Thov koj los cuag kuv thiab cawm kom kuv dim; tso kuv dim ntawm kuv cov yeebncuab. Koj yeej paub kuv raug luag txob thuam, raug txajmuag thiab raug luag saib tsis taus kiag li, koj pom tagnrho kuv cov yeebncuab. Kev txob thuam ua rau kuv siab ntsws puas tas thiab tas kev cia siab. kuv cia siab tos txojkev hlub, tiamsis tsis muaj li; nrhiav tus uas nplig kuv siab, tiamsis nrhiav tsis tau li. Thaum kuv tshaib plab lawv muab tej tshuaj muaj taug rau kuv noj; thaum kuv nqhis dej, lawv muab kua txiv hmab qaub rau kuv haus. Thov kom lawv rooj mov ua rau lawv raug kev puastsuaj, thov kom lawv rooj mov tseemceeb ua rau lawv ntog tas. Thov ua rau lawv digmuag tsis pom kev! Thov ua rau lawv lub nraubqaum tsis muaj zog! Thov hliv koj txojkev chim los rau lawv, thov cia koj tej kev nruj tsiv kav tagnrho lawv. Thov kom lawv tej yeej ua suabpuam tas, thov tsis txhob cia ib tug seem nyob hauv lawv tej tsevntaub li. Lawv tsimtxom cov neeg uas koj twb rau txim rau lawm, lawv hais cov neeg raug mob uas tiv kev txomnyem plig. Thov muab lawv tej kev txhaum teev huv tibsi rau hauv koj phau ntawv, tsis txhob pub kom lawv muaj feem rau koj txojkev cawm dim. Thov muab lawv tej npe tshem tawm hauv phau ntawv uas teev cov neeg muaj txojsia tej npe, thov kom lawv tsis txhob muaj npe nyob nrog koj haivneeg. Tiamsis Vajtswv, kuv mob hnyav heev thiab tas kev cia siab lawm, thov koj tsa kuv thiab cawm kuv! Kuv yuav hu nkauj qhuas Vajtswv, kuv yuav qhia nws lub hwjchim uas loj kawg nkaus thiab ua nws tsaug. Ua li no yuav txaus tus TSWV siab dua muab nyuj tua fij rau nws, thiab txaus nws siab dua li muab ib tug heev nyuj los tua hlawv tagnrho fij. Thaum cov neeg uas raug tsimtxom pom tej no, lawv yuav zoo siab heev; thiab yuav txhawb cov neeg uas muab siab rau pehawm Vajtswv lub zog. Tus TSWV yeej mloog cov neeg txomnyem tej lus thov, thiab nws nco ntsoov nws haivneeg uas nyob hauv tsev lojcuj. Lub ntuj thiab lub ntiajteb, hiavtxwv thiab txhua yam tsiaj hauv hiavtxwv, cia li qhuas Vajtswv! Nws yuav cawm lub nroog Yeluxalees thiab txhim kho Yudas tej nroog dua tshiab. Nws haivneeg yuav nyob hauv lub nroog thiab yuav kav lub tebchaws ntawd; lub tebchaws ntawd yuav yog nws cov tubtxib tej xeebntxwv tug, thiab cov uas hlub nws yuav tau nyob hauv lub tebchaws ntawd mus li. Vajtswv, thov cawm kuv lauj! Tus TSWV, thov pab kuv tamsim no! Thov kom cov neeg uas pheej nrhiav kuv tua cia li swb thiab tsis sib haumxeeb. Thov kom cov neeg uas zoo siab vim kuv raug tej kev txomnyem, thim rov qab thiab poob ntsejmuag. Thov kom cov uas pheej luag kuv plig swb thiab txajmuag. Thov kom txhua tus uas los cuag koj zoo siab thiab xyivfab hlo. Thov kom txhua tus uas koj tau cawm dim ua koj tsaug tsis tseg hais tias, “Vajtswv yog tus muaj hwjchim loj kawg nkaus!” Kuv qaug zog thiab txomnyem kawg Vajtswv, thov koj cia li los cuag kuv. Koj yog kuv tus cawmseej thiab yog kuv tus TSWV. Thov koj cia li maj nroos los pab kuv! Tus TSWV, kuv los cuag koj, thov koj ua tus tsomkwm kuv, thov tsis txhob pub kuv swb luag ib zaug li! Rau qhov koj yog tus ncaj ncees, thov pab kuv thiab cawm kom kuv dim. Thov mloog kuv tej lus thov thiab cawm kuv lauj! Thov kom koj yog kuv lub chaw nkaum thiab ua lub chaw fajxwm uas tiv thaiv kuv, koj yog kuv qhov chaw cawm siav thiab tiv thaiv kuv. Kuv tus Vajtswv, thov cawm kuv dim ntawm cov neeg siab phem, dim ntawm cov neeg limhiam thiab cov neeg ua phem ua qias. Vajtswv tus kav txhua tsav yam, kuv muab kuv txojkev cia siab tso plhuav rau koj, kuv yeej ibtxwm cia siab rau koj thaum kuv tseem hluas los lawm. Kuv cia siab rau koj tas kuv simneej, koj yeej tsomkwm kuv txij thaum yug kuv poob nthav los lawm. Kuv yuav niaj hnub qhuas koj. Kuv lub neej twb ua yam ntxwv rau coob leej xyaum, rau qhov koj yog kuv lub chaw nkaum uas ruaj khov. Kuv qhuas koj ib hnub tsaus ntuj thiab piav txog koj lub tshwjchim. Txawm yog tamsim no kuv laus lawm los thov koj tsis txhob tso kuv tseg, tamsim no kuv qaug zog heev los thov koj nco ntsoov kuv. Kuv cov yeebncuab xav nrhiav kuv tua povtseg, lawv sib tham thiab tuav tswvyim tawmtsam kuv. Lawv hais tias, “Vajtswv twb tso nws tseg lawm, cia li mus soj nws qab thiab ntes kom tau nws, yeej tsis muaj leejtwg cawm nws hlo li.” Vajtswv, thov tsis txhob nyob nrug deb ntawm kuv; kuv tus Vajtswv, koj cia li maj nroos los pab kuv lauj! Thov kom cov neeg uas tuaj tua kuv cia li swb thiab raug kev puastsuaj. Thov kom cov neeg uas pheej nrhiav kev ua kom kuv raug mob cia li txajmuag thiab poob ntsejmuag. Kuv yuav niaj hnub cia siab rau koj, kuv yuav qhuas koj mus tsis tso tseg li. Kuv qhia koj lub siab dawb siab zoo rau luag paub, kuv yuav niaj hnub qhia koj txojkev cawm dim, txawm yog kuv paub tsis txhua los kuv tseem yuav qhia. Tus TSWV uas kav ib puas tsav yam, kuv yuav qhuas koj lub hwjchim, kuv yuav piav koj txojkev ua siab dawb siab zoo nkaus xwb. Koj yeej ibtxwm qhia kuv thaum kuv tseem hluas los, thiab kuv tseem piav koj tej haujlwm uas zoo kawg nkaus los txog niaj hnub no. Vajtswv, nimno kuv laus thiab kuv tej plaubhau twb dawb tag lawm, thov koj tsis txhob tso kuv tseg. Vajtswv, koj txojkev ncaj ncees siab nto ntuj plaws. Koj tau ua ntau yam txujci tseemceeb los lawm, yeej tsis muaj ib tug zoo cuag koj li lawm. Koj tso kev nyuaj siab ntxhov plawv thiab kev txomnyem los rau kuv, tiamsis koj yuav txhawb kuv lub zog dua ntxiv, koj yuav pab kom kuv dim ntawm txojkev tuag rov qab los. Koj yuav tsa kuv ua tus muaj hwjchim loj dua qhov qub, koj yuav nplig kuv siab dua ib zaug ntxiv. Kuv yuav ntaus nkauj nogncas qhuas koj; kuv tus Vajtswv, kuv yuav qhuas koj txojkev ncaj ncees. Cov Yixalayees tus Vajtswv uas Dawbhuv, kuv yuav ntaus nkauj nogncas hu nkauj qhuas koj. Thaum kuv ntaus nkauj nogncas, kuv yuav hu nkauj zoo siab, kuv yuav hu nkauj kawg kuv lub siab lub ntsws, rau qhov koj tau cawm kuv dim. Kuv yuav piav koj txojkev ncaj ncees tas hnub, rau qhov cov neeg uas pheej nrhiav kev ua kom kuv raug kev txomnyem twb swb thiab txajmuag kawg li lawm. Vajtswv, thov koj qhia rau vajntxwv kom txiav txim raws li koj txojkev ncaj ncees; thov muab koj txojkev txiav txim ncaj ncees pub rau nws, nws thiaj yuav muab txojkev txiav txim ncaj ncees los kav koj haivneeg thiab muab kev ncaj ncees los tswj cov uas raug kev tsimtxom. Thov kom lub tebchaws muaj kev vammeej, thiab cia lub tebchaws tau txais kev ncaj ncees. Thov kom vajntxwv txiav txim ncaj ncees rau cov pluag, thov kom nws pab cov txomnyem, thiab muab cov neeg uas tsimtxom lawv tsuj ntiag rau hauv av. Thov kom koj haivneeg pehawm koj tsis paub kawg ib yam li lub hnub ci, thiab ib yam li lub hli pom kev, ib tiam dhau ib tiam mus li. Thov kom vajntxwv zoo li cov nag uas los ywg tej liaj tej teb, thiab zoo li kob nag tshauv los ywg lub tebchaws. Thov kom tej kev ncaj ncees muaj nyob rau nws tiam, thiab thov kom muaj kev vammeej mus tsis tu ib yam li lub hli ci pom kev. Nws yuav kav sab hiavtxwv tim no mus txog ntua sab hiavtxwv tim ub, txij ntua ntawm tus dej Efalates mus txog ntua tim qab ntuj kawg. Cov neeg uas nyob tom tiaj suabpuam yuav qhau cev hlo pehawm nws, nws cov yeebncuab yuav qhau hlo cev da rau hauv av. Cov vajntxwv uas nyob tim tebchaws Xapees thiab hauv tej koog povtxwv yuav coj khoom tuaj rau nws; cov vajntxwv uas nyob nram tebchaws Senpas thiab tim tebchaws Xenpas yuav coj khoom tuaj pub rau nws. Txhua tus vajntxwv yuav txhos caug pe nws; thiab txhua haivneeg yuav ua haujlwm rau nws. Nws cawm cov neeg pluag uas thov txog nws, thiab cov neeg txomnyem uas tsis muaj leejtwg pab. Nws hlub tshua cov uas qaug zog thiab cov pluag, nws cawm cov neeg txomnyem txojsia. Nws cawm lawv dim ntawm cov neeg tsimtxom thiab cov neeg limhiam; nws saib lawv txojsia tseemceeb. Thov kom vajntxwv muaj sia nyob txhiab niaj mus puas xyoo! Thov kom luag coj kub hauv tebchaws Senpas tuaj pub rau nws, thov kom luag thov Vajtswv pab nws tsis tseg tsis tu, thov Vajtswv foom koob hmoov rau nws mus li! Thov kom lub tebchaws ntawd muaj nplej ntsu nplua mias, thov kom muaj qoobloo puv nkaus saum tej pov roob, thov kom muaj txiv ntoo ntau ib yam li pem tebchaws Lenpanoos. Thov kom muaj neeg nyob puv nkaus hauv tej nroog ib yam li nyom tuaj puv nkaus hauv tej nras liaj. Vajntxwv lub npe yuav nyob mus ibtxhis, nws lub koob meej yuav nyob ntev ib yam li lub hnub. Cia txhua haivneeg thov Vajtswv foom koob hmoov rau lawv ib yam li nws tau foom koob hmoov rau vajntxwv. Cia li qhuas tus TSWV uas yog cov Yixalayees tus Vajtswv! Nws tib leeg xwb thiaj ua tau tej txujci tseemceeb no. Qhuas nws lub npe uas muaj tshwjchim mus ibtxhis li! Thov kom nws lub tshwjchim nyob puv nkaus hauv lub ntiajteb no. Yexais tus tub Daviv tej lus thov Vajtswv xaus li no. Vajtswv ua zoo kawg nkaus rau cov Yixalayees uas muaj lub siab ncaj ncees. Tiamsis kuv twb tsis tshua muaj siab vam lawm; kuv kev ntseeg twb ploj yuav tas rau qhov kuv khib cov neeg khavtheeb thaum kuv pom hais tias cov neeg siab phem lub neej zoo dua. Lawv tsis tau tiv kev mob kev nkees, lawv noj qab nyob zoo thiab lawv muaj zog npho lawv tsis tau tiv kev txomnyem li luag tej; thiab lawv tsis muaj kev ntxhov siab li luag lwm tus. Yog li ntawd, lawv thiaj li muab kev khavtheeb los coj ib yam li coj xauv, thiab muab kev nruj tsiv los hnav ib yam li hnav lub tsho ntev; lawv lub siab nthuav tej kev phem tawm tuaj, thiab lawv lub tswvyim npaj rawv ua kev phem kev qias. Lawv luag lwm tus plig thiab hais tej lus phem lus qias; lawv khavtheeb thiab tuavhauv tsimtxom luag. Lawv thuam Vajtswv tus uas nyob saum ntuj ceebtsheej thiab hais lus khavtheeb ntxhias yuam tej neeg ntiajteb no. Txawm yog Vajtswv haivneeg los cia li yuam kev nrog cov neeg ntawd lawm, thiab nyiam ntseeg lawv tej lus heev. Lawv hais tias, “Vajtswv yeej tsis paub li, tus uas muaj hwjchim loj kawg nkaus los yeej tsis paub zaj no li.” Cov neeg siab phem yeej los zoo li ntawd, lawv muaj txhua yam nplua mias lawm los lawv yimhuab xav muaj ntau ntxiv. Qhov uas kuv tswj kuv lub siab kom ua tau neeg zoo thiab tsis ua txhaum ntawd txawm tsis muaj nqis li los? Vajtswv, koj tau ua rau kuv tiv kev txomnyem tas hnub; thiab koj rau txim rau kuv txhua tagkis sawv ntxov. Yog kuv lam tau lam hais tej ntawd, ntshai kuv tsis coj lub neej zoo li koj haivneeg. Zaj no nyuaj kawg li, tiamsis kuv muab los xav txhij xav txhua saib zoo li cas, txawm yog li ntawd los kuv yeej tsis totaub mus txog thaum uas kuv mus rau hauv koj lub Tuamtsev. Thaum ntawd kuv mam paub tseeb txog tej uas yuav los raug cov neeg siab phem ntawd. Qhov tseemceeb, koj yuav cia lawv taug txojkev uas nplua nplua kom lawv ntog thiab puastsuaj mus. Tib ntsais muag xwb lawv cia li raug kev puastsuaj tas; thaum kawg lawv yuav poob mus rau txojkev txomnyem heev! Lawv lub neej zoo ib yam li neeg ua npau suav, thaum nws tsim los nws tsis nco qab txhua yam tas lawm; Tus TSWV, thaum koj sawv tsees los, cov neeg ntawd yuav ploj ntais mus. Thaum kuv chim thiab tu siab heev, kuv ruam ib yam li tus tsiaj, kuv yeej tsis totaub tej uas koj ua hlo li. Txawm yog li ntawd los kuv yeej nrog nraim koj nyob ua ke, thiab koj yeej tuav rawv kuv txhais tes. Koj tej lus qhuab ntuas niaj hnub coj kuv txoj haukev, thiab txog thaum kawg koj yuav los tos kuv mus thiab pub rau kuv tau ntsejmuag. Dhau koj lawm, tsis muaj lwm yam uas kuv xav tau nyob saum ntuj. Yog muaj koj lawm, kuv tsis ntshaw ib yam dabtsi hauv ntiajteb no li. Kuv lub zog thiab kuv lub siab qaug zog zuj zus lawm, tiamsis Vajtswv yog kuv lub zog, nws yog tus uas kuv ntshaw mus ibtxhis. Cov neeg uas tso koj tseg, yuav ploj mus tas; koj yuav ua kom cov neeg uas tsis muab siab npuab koj raug puastsuaj tas. Tiamsis kuv mas zoo siab kawg, vim kuv nyob ze Vajtswv; kuv muaj tus TSWV uas yog Vajtswv ua tus tsomkwm kuv, thiab kuv yuav qhia txhua yam uas nws ua rau sawvdaws paub! Vajtswv, yog vim li cas koj muab peb tso tseg li no? Koj yuav chim rau koj haivneeg mus ibtxhis li los? Thov koj nco ntsoov haivneeg uas koj xaiv los ua koj tug ntau xyoo los lawm, yog haivneeg uas koj tau tso dim kev ua luag qhev los ua koj haivneeg. Thov nco ntsoov lub Roob Xi-oos uas koj tau los nyob ib zaug lawm. Koj sim mus ncig kom thoob plaws tej tsev uas puastsuaj tas ntawd saib; peb cov yeebncuab tuaj muab txhua yam uas nyob hauv lub Tuamtsev rhuav puastsuaj tas dulug. Koj cov yeebncuab tuaj qw ua tsuj ua tsaug hauv koj lub Tuamtsev; lawv tuaj txhos lawv tej chij ua cim qhia hais tias lawv kovyeej lawm. Lawv zoo ib yam li cov neeg txawj ntov ntoo, lawv muab taus ntov ntoo vau zom zaws povtseg. Lawv nqa taus thiab rauj tuaj tsoo tej txiag ntoo tawg tas povtseg. Lawv tuaj rhuav koj lub Tuamtsev thiab zes taws hlawv kub hnyiab tas; lawv ua rau thaj chaw uas peb pehawm koj tsis huv lawm. Lawv yeej xav tuaj tsoo kom peb tawg mos nyoos; Lawv zes taws hlawv txhua thaj chaw uas pehawm Vajtswv hauv lub tebchaws no. Peb tej cim tseemceeb ploj tas lawm; tsis tshuav ib tug cevlus seem nyob li, thiab yeej tsis muaj leejtwg paub hais tias qhov no tseem tshuav ntev li cas. Vajtswv, yuav cia peb cov yeebncuab luag koj ntev npaum li cas thiab? Yuav cia lawv txob thuam koj lub npe mus ibtxhis li los? Vim li cas koj thiaj tsis kam pab peb li? Vim li cas koj muab koj ob txhais tes zais rau nraum koj nraubqaum? Vajtswv, koj yeej yog peb tus vajntxwv thaum chivkeeb los; koj yeej tau cawm peb dim ntau zaus los lawm. Koj siv koj lub zog nchav muab hiavtxwv faib ua ob sab, thiab koj muab tej zaj hauv uas nyob hauv hiavtxwv taubhau tsoo ntsoog tas; thiab koj muab Levi-athas lub taubhau tsoo, thiab muab nws lub cev coj mus rau tej tsiaj tom tiaj suabpuam. Koj tsim muaj tej qhovdej txhawv thiab dej cag ntws laub lug; thiab koj ua rau tej dej uas ntws qhuav tas huv tibsi. Koj yog tus uas tsim kom muaj nruab hnub thiab hmo ntuj; koj muab lub hnub thiab lub hli tso nyias nyob muaj nyias chaw; koj tau cais kom muaj ciam rau lub ntiajteb no; koj teem kom muaj caij ntuj kub thiab muaj caij ntuj no. Tiamsis tus TSWV, nco ntsoov hais tias koj cov yeebncuab luag koj plig kawg, lawv yog cov neeg uas tsis hwm koj thiab txob thuam koj heev. Thov tsis txhob cia koj haivneeg uas tas kev cia siab poob mus rau lawv cov yeebncuab uas siab phem tes; thiab txhob muab koj haivneeg uas pheej raug luag tsimtxom tso tseg! Nco ntsoov tej uas koj tau nrog peb coglus ua ke lawm, rau qhov niaj hnub muaj kev yuam cai nyob txhua ces kaum uas tsaus ntuj nti hauv lub tebchaws no. Thov tsis txhob cia cov neeg uas raug luag tsimtxom poob ntsejmuag; thov cia cov neeg pluag thiab cov neeg txomnyem tau qhuas koj. Vajtswv, cia li sawv los hais koj rooj plaub; nco ntsoov hais tias cov neeg uas tsis hwm koj luag koj plig tas hnub li. Nco ntsoov koj cov yeebncuab tej suab qw uas npautaws vog, koj cov yeebncuab tej suab qw yeej nrov tas hnub tsis ntsiag li. Vajtswv, peb ua koj tsaug, peb ua koj tsaug! Peb qhia hais tias koj muaj hwjchim loj kawg nkaus, thiab qhia txog ntau yam txujci tseemceeb uas koj tau ua lawm. Vajtswv hais tias, “Kuv teem kom muaj ib lub sijhawm cia txiav txim, thiab kuv yuav txiav txim kom ncaj ncees. Thaum txhua yam uas muaj sia tshee hnyo thiab lub ntiajteb ua zog kais lawm, kuv yuav tuav lub ntiajteb kom nyob ruaj khov kho. Kuv hais rau cov neeg uas tsav hwjchim kom tsis txhob khavtheeb; kuv txwv kom lawv tsis txhob hais lus khavtheeb.” Kev txiav txim tsis yog yuav tuaj sab hnubtuaj lossis sab hnubpoob tuaj, thiab tsis yog tuaj sab qaumteb lossis sab qabteb tuaj; tiamsis Vajtswv yog tus uas yuav txiav txim ntag, nws txiav txim rau qee leej thiab zam txim rau qee leej. Vajtswv tuav rawv ib lub khob ntawm nws txhais tes, lub khob ntawd puv nkaus cov cawv qab heev uas yog Vajtswv txojkev chim. Vajtswv muab hliv los, thiab cov neeg siab phem haus zom zaws; lawv haus khee hlo hauv qab khob. Tiamsis kuv yuav tsis tseg qhov uas hais txog Yakhauj tus Vajtswv, lossis hu nkauj qhuas nws. Vajtswv yuav txo cov neeg siab phem lub hwjchim kom poob mus, tiamsis nws yuav tsa cov neeg ncaj ncees lub hwjchim kom siab. Cov Yudas yeej ibtxwm paub Vajtswv zoo; thiab cov Yixalayees yeej ibtxwm qhuas nws lub npe. Vajtswv lub tsev nyob hauv lub nroog Yeluxalees; nws nyob saum lub Roob Xi-oos. Nyob qhov ntawd, Vajtswv lov yeebncuab tej xub hneevnti, tej thaiv hniav ntaj, tej ntaj thiab tej cuabyeej ua rog. Vajtswv, koj lub tshwjchim ci ntsa iab! Thaum koj nqis saum tej roob uas koj tua yeej koj cov yeebncuab los koj muaj hwvxyeej kawg li. Cov yeebncuab tej tubrog uas siab tawv tshaj plaws tau tuaj huab luag tej khoom los yeej tuag huv tibsi lawm; lawv lub zog thiab tej peevxwm pab tsis tau lawv li. Yakhauj tus Vajtswv, thaum koj tawmtsam cov yeebncuab, ua rau lawv cov tubrog caij nees thiab lawv tej nees tuag tas. Tiamsis tus TSWV, txhia leej txhia tus yeej ntshai koj. Thaum koj chim tsis muaj leejtwg yuav muaj cuabkav sawv tabmeeg koj. Koj qhia koj txojkev txiav txim saum ntuj los rau sawvdaws paub; neeg ntiajteb ntshai koj thiab nyob ntsiag to; thaum koj sawv tsees txiav txim, koj cawm tagnrho cov neeg uas raug luag tsimtxom hauv ntiajteb no. Neeg txojkev chim yuav hloov ua kev qhuas Vajtswv; cov neeg uas seem tuag hauv tshavrog los yuav npaj kom muaj rooj noj rooj haus zoo siab ua koj tsaug. Cia li muab yam uas koj tau coglus rau tus TSWV uas yog koj tus Vajtswv lawm rau nws; txhua haivneeg uas nyob ze, cia li nqa nej tej khoom tuaj pub rau nws. Vajtswv ua rau neeg hwm nws; Vajtswv muab tej vajntxwv cov tub uas khavtheeb txo hwjchim, thiab ua kom cov vajntxwv uas muaj hwjchim ntshai kawg li. Kuv tsa suab hlo quaj rau Vajtswv; kuv tsa suab hlo quaj rau Vajtswv, thiab nws hnov kuv lub suab quaj. Thaum kuv muaj kev ntxov siab kuv thov tus TSWV; kuv tsa tes thov Vajtswv ib hmos kaj ntug plaws, tiamsis kuv tseem tsis muaj kev kaj siab li. Thaum kuv xav txog Vajtswv, kuv ntxov siab kawg li; thaum kuv lub siab xav txog Vajtswv, kuv qaug zog heev. Nws tsis pub kuv tsaug zog ib hmos kaj ntug plaws; kuv ntxhov siab heev kuv hais tsis taus lus li. Kuv xav txog lub caij lub nyoog uas dhau mus zuj zus, thiab nco txog ntau xyoo uas twb dhau los tau ntev lawm. Kuv xav tsheej tag hmo; kuv lub siab hais tujtaws li no rau kuv: “Tus TSWV txawm tsis lees yuav peb li los? Nws txawm yuav tsis txaus siab rau peb ntxiv li lawm los? Vajtswv tso tseg tsis hlub peb lawm los? Nws tej lus cog tseg txawm yuav tsis tiav li los? Puas yog Vajtswv tsis nco qab hlub peb lawm? Puas yog nws txojkev chim hloov txojkev hlub chaw lawm?” Kuv hais tias, “Yam uas mob kuv siab tshaj plaws zoo li Vajtswv txawm tsis muaj hwjchim li lawm.” Tus TSWV, kuv yuav nco ntsoov koj tej haujlwm uas tseemceeb; kuv yuav rov nco txog tej txujci tseemceeb uas koj ua yav tas los lawm. Kuv yuav xav txog txhua yam uas koj tau ua tas los lawm; kuv yuav ua tib zoo xav txog koj tej haujlwm uas tseemceeb. Vajtswv, txhua yam uas koj ua, yeej yog yam dawbhuv; tsis muaj ib tug vajtswv twg uas muaj hwjchim cuag koj. Koj yog tus Vajtswv uas ua tau tej txujci tseemceeb; koj qhia rau ntau haivneeg pom koj lub hwjchim. Koj tau siv koj lub hwjchim cawm koj haivneeg uas yog Yakhauj thiab Yauxej nkawd cov xeebntxwv. Vajtswv, thaum tej dej pom dheev koj, lawv ntshai koj, thiab hiavtxwv qhov tob tob los yeej ntshai koj tshee hnyo. Tej huab ua kom muaj nag los; thiab xob nroo nrov nroo ntws saum nruab ntug tuaj; thiab xob laim cig liab vog rau txhua qhov. Koj ua rau xob nroo nrov nroo ntws tuaj, thiab xob laim cig liab vog thoob lub ntiajteb, ua rau lub ntiajteb ua zog koog. Koj mus kev saum tej nthwv dej uas ntas nphau nphwv; koj tshais ruam hla pes hlo tej dej hiavtxwv tob, tiamsis tsis pom koj tus neevtaw tsuj qhov twg li. Koj coj koj haivneeg kev ib yam li tus tswv yug yaj coj pab yaj uas yog Aloos thiab Mauxes nkawd ua ob tug coj. Kuv haivneeg, nej cia li mloog kuv tej lus qhia, thiab ua tib zoo mloog tej lus uas kuv hais. Kuv yuav siv tej lus txawj lus ntse hais, thiab ua tib zoo qhia tej uas yav tas los tsis muaj neeg paub, tej ntawd yog yam uas peb tau hnov thiab paub, yog tej uas peb cov yawgkoob tau qhia peb lawm. Peb yuav tsis muab tej ntawd zais tsis qhia rau peb tej menyuam; peb yuav qhia tus TSWV lub hwjchim thiab nws tes haujlwm uas tseemceeb ib tiam dhau ib tiam thiab tej txujci uas nws tau ua tas los lawm. Vajtswv muab kevcai cob rau cov Yixalayees; thiab muab kaum nqe kevcai cob rau Yakhauj cov xeebntxwv. Nws samhwm kom peb cov yawgkoob muab nws tej kevcai qhia lawv cov menyuam, kom tej xeebntxwv yav tom ntej thiaj tau tej ntawd los rau lawv kawm, thiab muab qhia rau lawv cov menyuam mus ntxiv. Ua li no lawv thiaj yuav cia siab rau Vajtswv thiab nco ntsoov tej haujlwm uas nws tau ua los lawm, thiab niaj hnub coj raws li Vajtswv tej lus samhwm. Lawv yuav tsum tsis txhob coj li lawv cov yawgkoob uas yog neeg ntxeev siab thiab tsis mloog lus, lawv txojkev cia siab rau Vajtswv tsis ruaj tsis khov thiab lawv tsis muab siab npuab Vajtswv. Cov Efalayees twb muaj hneevnti thiab xubvos, los tseem cia li khiav hauv tshavrog mus lawm thiab. Lawv tsis ceev Vajtswv tej lus cog tseg; lawv tsis hwm thiab ua raws li Vajtswv txoj kevcai. Lawv tsis nco qab txhua yam uas Vajtswv tau ua, thiab tej txujci tseemceeb uas nws ua rau lawv pom lawm. Vajtswv ua tej txujci ntawd rau lawv cov yawgkoob pom, thaum lawv taug kev los txog ntawm lub tiaj Xau-as hauv tebchaws Iziv. Vajtswv ua rau dej hiavtxwv faib hlo rau ob sab thiab coj lawv mus dhau plaws rau sab tim ub; Vajtswv ua rau dej sawv ntseg zoo li tej phabntsa. Thaum nruab hnub nws ua ib tauv huab roos lawv, thiab hmo ntuj nws ua ib tug nplaim hluavtaws cig rau lawv pom kev. Nyob ntawm tiaj suabpuam nws ua rau phab pobzeb tawg txua, thiab muaj dej txhawv hauv qhov uas tob heev los rau lawv haus. Nws ua rau dej txhawv hauv qhov pobzeb tuaj, thiab ntws ib yam li tus dej. Tiamsis lawv pheej ua txhaum rau Vajtswv tsis tseg li, thiab thaum nyob ntawm tiaj suabpuam, lawv tau ntxeev siab rau tus uas muaj hwjchim loj kawg nkaus. Lawv txhob txwm sim Vajtswv siab thiab thov kom Vajtswv tso mov los rau lawv. Lawv hais lus twm Vajtswv tias, “Vajtswv puas muaj cuabkav muab tau mov rau peb noj nyob ntawm tiaj suabpuam no? Yeej muaj tseeb, Vajtswv ntaus pobzeb tawg txua dej txhawv ntws laub lug los; tiamsis nws puas muaj cuabkav muab tau mov thiab nqaij rau peb noj?” Thaum tus TSWV hnov lawv hais li ntawd, nws chim heev rau lawv; nws thiaj ua kom muaj nplaim hluavtaws tuaj kub nws haivneeg, thiab nws txojkev chim tau tawmtsam lawv, rau qhov lawv tsis ntseeg Vajtswv, thiab tsis ntseeg hais tias nws muaj peevxwm cawm tau lawv dim li. Tiamsis nws hais rau lub ntuj uas nyob saud, thiab samhwm kom rooj ntug qhib; nws tso mov saum ntuj los rau lawv, yog tso manas saum ntuj los rau lawv noj. Yog li ntawd, lawv thiaj tau noj cov timtswv ceebtsheej tej mov, thiab Vajtswv muab txhua yam uas lawv xav tau rau lawv. Vajtswv tseem ua kom cov cua sab hnubtuaj ntsawj tuaj, thiab nws siv nws lub hwjchim ua kom cov cua sab qabteb ntsawj tuaj; thiab nws tso noog los rau nws haivneeg noj, cov noog ntawd ntau ib yam li tej suabzeb ntawm ntug hiavtxwv; cov noog ntawd los puv rau hauv lub plawv yeej thiab ibncig tej tsevntaub uas lawv nyob. Yog li ntawd, cov Yixalayees thiaj muaj nqaij noj txaus lawv siab; Vajtswv tau muab txhua yam uas lawv xav tau rau lawv. Txawm yog lawv twb npuav rawv mov hauv qhovncauj, los lawv tseem pheej tsis txaus siab li, thaum ntawd Vajtswv chim kawg rau lawv, Vajtswv thiaj tua lawv cov neeg uas muaj zog heev, thiab cov Yixalayees tej tub hluas uas zoo heev povtseg. Txawm yog twb muaj tej no los lawv tseem ua txhaum qees; txawm yog nws ua ntau yam txujci rau lawv pom los lawv yeej tsis ntseeg nws li. Yog li ntawd, Vajtswv thiaj ua rau lawv txojsia yaj ntshis mus ib yam li ua pa, thiab tib ntsais muag xwb lawv lub neej raug puastsuaj tas. Thaum Vajtswv tua lawv ibtxhia lawm, cov uas seem thiaj rov los cuag nws; lawv thiaj thov Vajtswv thiab hloov dua siab tshiab. Lawv rov nco txog hais tias Vajtswv thiaj yog tus uas tiv thaiv lawv, thiab tus muaj Hwjchim Loj kawg nkaus yog tus uas tau los pab lawv. Tiamsis tej lus lawv hais ntawd, yog lus dag xwb; tsis muaj ib los uas yog lus tseeb li. Lawv tsis muab siab npuab Vajtswv; lawv tsis ua siab ncaj rau Vajtswv tej lus uas cog tseg rau lawv. Tiamsis Vajtswv tseem hlub thiab tshua nws haivneeg. Nws zam lawv tej kev txhaum thiab tsis ua kom lawv puastsuaj. Muaj ntau zaus Vajtswv tau thim nws txojkev chim thiab cheem nws txojkev npautaws. Vajtswv yeej nco ntsoov hais tias lawv tsuas yog neeg xwb, lawv zoo ib yam li nthwv cua uas ntsawj los thiab twb dhau mus lawm. Nyob ntawm tiaj suabpuam lawv pheej ntxeev siab rau Vajtswv thiab lawv tau ua rau Vajtswv tu siab heev. Lawv pheej sim Vajtswv siab ib zaug tas ib zaug tuaj; thiab ua rau cov Yixalayees tus Vajtswv uas Dawbhuv chim kawg li. Lawv tsis nco qab Vajtswv lub hwjchim loj, thiab hnub uas nws cawm lawv dim ntawm lawv cov yeebncuab txhais tes, thiab siv nws lub hwjchim loj ua tej txujci tseemceeb rau lawv pom ntawm lub tiaj nrag Xau-as hauv tebchaws Iziv. Vajtswv muab tej dej hloov ua ntshav, thiab ua rau cov neeg Iziv tsis tau dej haus li. Nws tso yoov ya los puv nkaus txhua qhov tsimtxom cov Iziv, thiab tso qav los ua rau lawv lub tebchaws puastsuaj. Thiab tso kooj txomfav los noj lawv tej qoobloo hauv lawv tej liaj tej teb puastsuaj tas. Nws tseem tso lawg los ntaus lawv tej txiv hmab, thiab tso te los tua lawv tej txiv ncuavpias tuag tas. Nws tso lawg los ntaus lawv tej nyuj, thiab tso xob laim tua lawv tej yaj tej tshis tuag tas huv tibsi. Nws tso nws txojkev chim uas nruj tsiv los rau lawv, ua rau lawv ntxhov siab kawg; qhov ntawd yog tso ib pab timtswv ceebtsheej coj txojkev tuag los rau lawv. Vajtswv yeej tsis cheem nws txojkev chim lossis tsis txuag lawv siav li, tiamsis nws tso kab mob aws los rau lawv tuag tas. Nws tua cov Iziv txhua yim tus tub hlob tuag coob heev. Ces nws coj nws haivneeg tawm los ib yam li tus tswv yug yaj, thiab coj lawv kev los hla tiaj suabpuam. Nws coj lawv los kaj siab lug, thiab tsis ntshai dabtsi li; tiamsis dej hiavtxwv nphau nphwv los npog lawv cov yeebncuab. Nws coj lawv los rau hauv nws lub tebchaws dawbhuv, thiab los nyob saum tej roob uas nws ntaus yeej lawm. Nws muab lwm haivneeg ntiab tawm khiav thaum nws coj nws haivneeg los nyob; nws muab lub tebchaws faib rau txhua xeem Yixalayees thiab muab lawv tej vaj tej tsev rau nws haivneeg nyob. Tiamsis lawv tseem ntxeev siab rau Vajtswv tus uas muaj hwjchim loj kawg nkaus, thiab lawv pheej sim nws siab tsis tseg. Lawv tsis mloog Vajtswv tej lus samhwm li; lawv ntxeev siab thiab tsis muab siab npuab Vajtswv, ib yam li lawv cov yawgkoob, lawv zoo li xibxub nkhaus uas siv tsis tau lawm. Lawv ua rau Vajtswv chim kawg, vim lawv tej chaw teev dab, thiab lawv ua rau Vajtswv npautaws heev vim lawv pe mlom. Vajtswv chim heev thaum nws pom tus mlom ntawd, yog li ntawd, nws thiaj tso nws haivneeg tseg tsis quavntsej lawv lawm. Vajtswv muab nws lub tsevntaub hauv Silaus uas nws nrog peb nyob ntawd tso tseg lawm. Nws cia peb cov yeebncuab tuaj txeeb tau lub Phijxab uas ntim Vajtswv tej uas cog tseg, yog lub cim ntawm Vajtswv lub hwjchim thiab lub tshwjchim uas ci ntsa iab. Nws chim heev rau nws haivneeg, nws thiaj cia lawv cov yeebncuab tuaj tua lawv. Lawv cov tub hluas tuag tas rau hauv tshavrog, tsis muaj leejtwg yuav lawv tej txhais li. Cov povthawj raug luag tua tuag tas, thiab luag tsis pub lawv cov pojniam quaj nyiav li. Thaum kawg tus TSWV thiaj sawv tsees ib yam li tus uas tsim nruab dab ntub, nws zoo ib yam li tug txivneej uas haus cawv ua rau nws muaj zog. Nws ua rau nws cov yeebncuab swb kiag, thiab thim plhawv rov qab poob ntsejmuag mus ibtxhis li lawm. Tiamsis nws tsis lees paub Yauxej cov xeebntxwv, Vajtswv tsis xaiv xeem Efalayees; tiamsis Vajtswv xaiv xeem Yudas, thiab lub Roob Xi-oos uas nws hlub tshaj plaws. Nws tsim nws lub Tuamtsev zoo li nws lub tsev uas nyob saum ntuj; nws ua lub tsev ntawd ruaj ib yam li lub ntiajteb uas nyob ruaj khov mus ibtxhis. Nws xaiv Daviv uas yog nws tus tubtxib; nws coj Daviv tawm hauv tshav zaub qhov chaw uas Daviv zov Daviv pab yaj los, thiab muab Daviv tsa ua vajntxwv kav cov Yixalayees, Daviv yog tus tub yug yaj uas saib Vajtswv haivneeg. Daviv muaj lub siab dawb paug saib xyuas lawv, thiab nws muaj tswvyim zoo coj tau lawv. Vajtswv, lwm haivneeg twb tuaj vij koj lub tebchaws lawm; lawv tuaj ua tsis huv rau koj lub Tuamtsev uas dawbhuv, thiab cia lub nroog Yeluxalees pob puas tas. Lawv cia koj haivneeg tej cev tuag rau dav npoj noj, thiab cia koj cov tubtxib tej cev tuag rau tej tsiaj qus noj. Lawv tua koj haivneeg tej ntshav tawm ntws cuag dej; ntshav ntws mus thoob plaws lub nroog Yeluxalees, thiab tsis muaj leejtwg faus cov neeg tuag ntawd li. Twb yog cov neeg uas nyob ibncig peb tuaj tsimtxom peb ntag; lawv luag peb plig thiab thuam peb lub npe kawg li. Tus TSWV, koj yuav chim rau peb mus ibtxhis li los? Koj txojkev chim yuav kub li hluavtaws mus tsis paub tuag li los? Cia koj txojkev chim mus rau haivneeg uas tsis pehawm koj, mus rau cov neeg uas tsis tsa ncauj thov koj. Vim lawv tau tuaj tua koj haivneeg tuag tas, thiab tau ua rau koj lub tebchaws puastsuaj tas lawm. Thov koj tsis txhob rau txim rau peb vim peb cov yawgkoob tej kev txhaum. Thov koj tshua peb; peb twb tas kev cia siab lawm. Vajtswv, thov pab peb thiab cawm peb; thov tso peb dim thiab zam peb tej kev txhaum kom koj tau koob meej. Vim li cas yuav cia lwm haivneeg nug peb hais tias, “Nej tus Vajtswv dua twg lawm?” Thov cia peb pom koj rau txim rau lwm haivneeg, vim lawv tuaj ua rau koj cov tubtxib nqaij ntuag ntshav nrog. Thov koj mloog cov neeg uas raug luag kaw tej suab quaj, thiab siv koj lub hwjchim tso cov neeg uas luag teem txim tuag rau lawv kom dim. Tus Tswv, thov koj ua xya npaug pauj rau cov neeg siab phem ntawd. Vim tej uas lawv tau ua txob thuam koj lub koob lub npe lawm. Ces peb cov uas yog koj haivneeg, pab yaj uas yog koj tug, yuav ua koj tsaug thiab qhuas koj lub npe mus ibtxhis li. Cov Yixalayees tus Tswv yug yaj, thov koj mloog peb tej lus thov, tus thawj uas coj koj pab yaj, thov mloog peb lub suab hu lauj! Koj cia li mus zaum saum lub zwmtxwv saum ob tug qhelunpees. Thov qhia koj rau xeem Efalayees, xeem Npeenyamees thiab xeem Manaxes. Thov qhia koj lub hwjchim rau peb thiab los cawm peb! Vajtswv, thov coj peb rov qab los! Thov qhia koj txojkev hlub rau peb, peb thiaj li yuav dim. Tus TSWV uas yog Vajtswv tus muaj hwjchim loj kawg nkaus, koj tseem yuav chim rau koj haivneeg tej lus thov ntev npaum li cas thiab? Koj muab cov mov uas yog kev quaj ntsuag rau peb noj, thiab muab lub khob uas yog cov kua muag rau peb haus. Koj cia cov neeg uas nyob ibncig peb tuaj tua peb lub tebchaws; peb cov yeebncuab tuaj txob thuam peb kawg li. Vajtswv tus muaj hwjchim loj kawg nkaus, thov coj peb rov qab los! Thov qhia koj txojkev hlub rau peb, peb thiaj yuav dim! Koj muab lwm haivneeg ntiab khiav mus; thiab koj coj txiv hmab nram tebchaws Iziv los cog rau hauv lub tebchaws no. Koj tu thaj chaw du dais rau cov txiv hmab loj hlob, nrhau cag mus tob thiab hlav mus puv nkaus lub tebchaws. Nws ua duab ntxoo tuaj roos tej hauv roob; nws tej ceg ua duab ntxoo roos tagnrho tej ntoo ciab uas loj. Nws tej ceg nthuav mus ti nkaus ntawm ntug Hiavtxwv Meditelanes, thiab nthuav mus ti nkaus rau pem tus Dej Efalates. Vim li cas koj muab tus ntsa lajkab uas xov lub vaj ntawd rhuav lawm? Nimno txhua tus neeg uas dhau kev mus los thiaj nyiag tau tej txiv hmab ntawd; npuateb nkag los rau hauv lub vaj thiab tsuj tej txiv hmab tas, thiab tej tsiaj qus los muab noj tas dulug lawm. Vajtswv tus uas muaj hwjchim loj kawg nkaus, cia li rov qab los cuag peb! Thov koj tsa qhovmuag saum ntuj ceebtsheej tuaj saib peb; thov koj cia li los thiab cawm koj haivneeg! Thov koj cia li los thiab cawm tsob txiv hmab uas koj cog cia, tsob txiv hmab uas koj tu hlob mos nyoos. Peb cov yeebncuab muab tsob txiv hmab ntawd ntov thiab zes taws hlawv; thov koj cia li ntsia lawv thiab muab lawv ua kom puastsuaj tas! Thov koj tsomkwm thiab tiv thaiv haivneeg uas koj xaiv tseg, yog haivneeg uas koj tau pub kom muaj zog heev. Peb yuav tsis khiav tawm ntawm koj mus lawm; thov koj pab kom peb muaj sia nyob, peb yuav qhuas koj xwb. Tus TSWV uas yog Vajtswv tus muaj hwjchim loj kawg nkaus, thov coj peb rov qab los. Thov qhia koj txojkev hlub rau peb, peb thiaj yuav dim! Cia li qw zoo siab rau Vajtswv tus uas tiv thaiv peb; cia li hu nkauj qhuas Yakhauj tus Vajtswv! Cia li pib ntaus nkauj nogncas thiab nruas npuaj; cia li tshuab raj thiab ntaus nkauj nogncas. Cia li tshuab xyu rau rooj noj rooj haus thaum hli xiab thiab thaum hli nra. Qhov no yog cov Yixalayees txoj kevcai, thiab yog cov lus uas Yakhauj tus Vajtswv tau samhwm kom ua li ntawd. Nws muab txoj kevcai no cob rau cov Yixalayees thaum uas nws tawmtsam lub tebchaws Iziv. Kuv hnov ib lub suab uas kuv tsis paub, lub suab ntawd hais tias, “Kuv tsaws lub nra hnyav uas nyob saum nej nraubqaum; kuv tso nej dim ntawm txojkev uas nqa tej thwvcib hnyav heev. Thaum nej raug kev txomnyem, nej hu txog kuv, kuv cawm nej dim. Kuv teb nej tej lus thov hauv cov nag xob nagcua uas kuv nyob tuaj. Kuv tau sim nej siab thaum nej tseem nyob ntawm lub qhovdej Melinpas. Kuv haivneeg, nej cia li mloog kuv tej lus ntuas; cov Yixalayees, kuv xav kom nej mloog kuv tej lus! Nej tsis txhob mus pe lwm tus vajtswv. Kuv yog tus TSWV uas yog nej tus Vajtswv, kuv coj nej khiav nram tebchaws Iziv los. Cia li rua ncauj kuv yuav pub mov rau nej noj. “Tiamsis kuv haivneeg tsis mloog kuv tej lus; cov Yixalayees tsis hwm kuv li. Yog li ntawd, kuv thiaj cia lawv ua raws li lawv lub siab tawv, thiab ua raws li lawv lub siab xav. Kuv xav kom kuv haivneeg mloog kuv lus thiab xav kom lawv hwm kuv kawg li! Kuv yuav ceev nrooj mus ua kom lawv cov yeebncuab swb, thiab ua kom yeej tagnrho lawv cov yeebncuab. Cov neeg uas ntxub kuv yuav ntshai thiab txhos cuag ntua ntawm kuv xubntiag; thiab lawv yuav raug txim mus ibtxhis li. Tiamsis kuv yuav muab cov mov uas zoo tshaj plaws rau nej noj, thiab muab tej zib ntab uas nej txaus siab heev rau nej noj.” Vajtswv nyob ntawm lub rooj txiav txim saum ntuj; nws yuav txiav txim rau tej vajtswv hais tias: “Nej yuav tsum tseg txojkev txiav txim tsis ncaj; nej tsis txhob tuaj cov neeg tsis ncaj tog! Nej cia li tsa cov neeg pluag thiab cov menyuam ntsuag txoj cai; nej cia li ua ncaj rau cov neeg txomnyem thiab cov neeg uas tsis muaj leejtwg pab. Cia li cawm kom cov neeg txomnyem dim ntawm cov neeg siab phem txhais tes. “Ua li cas nej tsis totaub li! Ua li cas nej ruam ua luaj! Nej yeej ua tsis ncaj, kev ncaj ncees thiaj ploj hauv lub ntiajteb no mus lawm. Kuv hais tias, ‘Nej yog tej vajtswv, nej puavleej yog tus uas muaj Hwjchim Loj kawg nkaus cov menyuam.’ Tiamsis nej yuav tuag ib yam li tej neeg, thiab nej lub neej yuav xaus mus ib yam li tej nomtswv txhua tus.” Vajtswv, cia li nqis los tswj lub ntiajteb no; txhua haivneeg uas nyob hauv ntiajteb no puavleej yog koj tug. Vajtswv, thov koj tsis txhob nyob ntsiag to; tsis txhob ua tus tsis paub thiab tsis txhob nyob twjywm. Cia li saib! Koj cov yeebncuab twb ntxeev siab, thiab cov neeg uas ntxub koj twb sawv tawmtsam koj lawm. Lawv lub siab xav nraim nkoos ua phem rau koj haivneeg; lawv ntxeev siab rau haivneeg uas koj niaj hnub tsomkwm. Lawv hais tias, “Cia li tuaj, peb mus tua lawv lub tebchaws kom puastsuaj; kom luag thiaj tsis nco txog haivneeg Yixalayees mus ibtxhis li lawm.” Cov yeebncuab uas pom zoo ua raws li lawv hais thiab koom siab ua ke tawmtsam koj yog: cov Edoos, cov Yisamayees; cov Mau-am thiab cov Hakis; cov Nkenpas, cov Amoos thiab cov Amalej; cov Filitees thiab cov Tiles. Cov Axilias los kuj koom tes nrog lawv, thiab ua phoojywg nrog cov Amoos thiab cov Mau-am uas yog Lauj cov xeebntxwv. Thov koj cia li ua rau lawv ib yam li koj ua rau cov Midias, cov Xixelas thiab cov Yanpees uas nyob ntawm tus Dej Kisoos. Koj tau tua lawv swb nyob ntawm Edaules, lawv tuag thiab lwj tas rau hauv av. Thov koj tua lawv cov thawjcoj ib yam li koj tua Aules thiab Xees; thov koj tua kom lawv cov nomtswv swb ib yam li koj tua Xenpas thiab Xamunas, vim lawv khav hais tias, “Peb yuav mus txeeb lub tebchaws uas yog Vajtswv tug los ua peb tug.” Vajtswv, thov koj muab lawv ntiab khiav kom tas ib yam li tej hmoov av, thiab ib yam li tej quavnyab uas cua muab ntsawj ya tas, thiab ib yam li hluavtaws kub havzoov, ib yam li tej nplaim taws uas cig laim lias saum tej ncov roob, thov koj tso nagxob nagcua raws lawv khiav tawm mus, thiab tso cua daj cua dub los ntsawj ua kom lawv ntshai heev. Tus TSWV, thov koj ua kom lawv raug kev txajmuag, thiab ua kom lawv pom koj lub hwjchim! Thov kom lawv swb thiab ntshai mus tas ibtxhis li; thov kom lawv tuag ua rhuav plhu ntsuav. Kom lawv paub hais tias koj tib leeg thiaj yog tus TSWV, thiab yog tus muaj hwjchim loj kawg nkaus uas kav lub ntiajteb no. Tus TSWV uas muaj hwjchim loj kawg nkaus, kuv nyiam koj lub Tuamtsev heev! Kuv xav mus nyob hauv kawg li! Kuv kub siab lug xav mus nyob hauv tus TSWV lub Tuamtsev; kuv yuav hu nkauj xyivfab kawg siab kawg ntsws qhuas Vajtswv tus muaj sia nyob. Tus TSWV uas muaj hwjchim loj kawg nkaus, yog kuv tus vajntxwv thiab kuv tus Vajtswv; txawm yog tej noog tsev los twb txawj ua zes nyob, thiab tej noog luv los yeej muaj chaw rau lawv nyob; cov noog ntawd coj lawv tej menyuam los nyob ze ntawm koj lub thaj, Cov neeg uas muaj lub siab tus yog cov uas nyob rawv hauv koj lub Tuamtsev, lawv hu nkauj qhuas koj tsis tseg tsis tu li. Cov neeg uas tau lub siab tus yog cov uas koj pub kom lawv muaj dag muaj zog, thiab mus pehawm koj tsis tseg saum lub Roob Xi-oos. Thaum lawv taug kev los hla lub hav qhuav Npakas, lub hav ntawd cia li txhawv dej ntau qhov; thaum txog caij ntuj nag tej chaw ntawd muaj pasdej teev mias. Thaum lawv taug kev mus lawv pheej muaj zog dua qub; lawv yuav pom Vajtswv nyob saum Roob Xi-oos, nws yog tej vajtswv tus Vajtswv. Tus TSWV uas yog Vajtswv tus muaj hwjchim loj kawg nkaus, thov mloog kuv tej lus thov; Yakhauj tus Vajtswv, thov mloog kuv lub suab! Vajtswv, thov koj foom koob hmoov rau peb tus vajntxwv, nws yog tus uas koj tau xaiv lawm. Nyob ib hnub hauv koj lub Tuamtsev zoo dua li nyob lwm qhov ib txhiab hnub; kuv ua tus zov kuv tus Vajtswv lub qhovrooj zoo dua mus nyob rau hauv cov neeg siab phem tej tsev. Tus TSWV yog tus tiv thaiv peb thiab yog tus vajntxwv uas muaj koob meej, nws foom koob hmoov rau peb thiab ua zoo kom peb tau ntsejmuag. Nws zoo siab pub txhua yam rau cov neeg uas ua ncaj ua ncees. Tus TSWV uas muaj hwjchim loj kawg nkaus, cov neeg uas cia siab rau koj tau nyob kaj siab lug. Tus TSWV, koj yeej hlub koj lub tebchaws; koj ua rau haivneeg Yixalayees rov vammeej dua. Koj zam koj haivneeg tej kev txhaum thiab tsis suav tej uas lawv ua tsis yog li. Koj twb tseg tsis chim rau koj haivneeg thiab tswj qhov uas koj npautaws rau lawv lawm. Vajtswv tus uas yog peb tus Cawmseej, thov coj peb rov los cuag koj, thiab thov koj tsis txhob chim rau peb lawm. Koj yuav chim rau peb mus ibtxhis li los? Koj txojkev chim yuav tsis xam ib zaug li los? Thov koj pub kom peb rov muaj zog dua, mas peb cov uas yog koj haivneeg yuav qhuas koj. Tus TSWV, thov koj hlub peb niaj hnub txhua hmo thiab pab kom peb dim. Kuv tabtom mloog tus TSWV uas yog Vajtswv tej lus hais rau kuv; nws coglus hais tias yog peb tsis tig rov mus ua txhaum li tej neeg ruam, ces nws yuav pub peb cov uas yog nws haivneeg tau nyob kaj siab lug. Qhov tseemceeb, nws yeej npaj txhij cawm cov neeg uas hwm nws lawm, thiab nws yuav nyob hauv peb lub tebchaws pab kom peb dim. Kev sib hlub thiab kev ua siab dawb siab zoo yuav los ua ke; kev ncaj ncees thiab kev sib haumxeeb yuav los sib puag. Neeg txojkev ua siab mos siab muag yuav tsa tes hauv ntiajteb no rau saud, thiab Vajtswv txojkev ncaj ncees yuav ntsia saum ntuj tuaj. Tus TSWV yuav ua rau peb vammeej, ces peb lub tebchaws yuav muaj qoobloo nplua mias rau peb sau. Txojkev ncaj ncees yuav ua tus TSWV ntej los thiab kho kev rau nws. Tus TSWV, thov koj mloog thiab teb kuv tej lus thov, vim kuv tas kev cia siab thiab qaug zog heev lawm. Thov cawm kom kuv dim ntawm txojkev tuag, rau qhov kuv yeej hwm koj; thov cawm kuv uas yog koj tus tubtxib, kuv cia siab ntsoov rau koj. Koj yog kuv tus Vajtswv, thov koj hlub kuv; kuv thov ib hnub tsaus ntuj ntais. Tus TSWV, thov pab kom koj tus tubtxib tau kev zoo siab, vim kuv tej lus thov twb tuaj txog koj lawm. Koj yeej ua zoo rau peb thiab zam peb lub txim, koj txojkev hlub uas tsis paub kawg muaj rau txhua tus uas thov koj. Tus TSWV, thov koj mloog kuv tej lus thov; mloog kuv lub suab quaj uas thov koj pab kuv. Thaum kuv muaj kev ntxhov siab kuv hu txog koj, koj yeej teb kuv tej lus thov. Tus TSWV, tsis muaj dua lwm tus vajtswv zoo cuag koj, tsis muaj leejtwg txawj ua tau tej txujci zoo li koj ua. Txhua haivneeg uas koj tau tsim yuav tuaj txhos caug pehawm koj; lawv yuav qhuas koj lub npe uas zoo kawg nkaus. Koj yog tus muaj hwjchim loj thiab ua tau tej txujci tseemceeb; koj tib leeg xwb thiaj yog Vajtswv. Tus TSWV, thov koj qhia kom kuv paub ua raws li koj lub siab nyiam, kuv yuav hwm koj ntawm lub siab ncaj ncees; thov pub kom kuv muaj lub siab dawb paug pehawm koj. Tus TSWV uas yog kuv tus Vajtswv, kuv yuav qhuas koj lub npe kawg siab kawg ntsws; thiab kuv yuav tshaj tawm koj lub npe kom nrov ncha mus ibtxhis. Koj txojkev hlub muaj nyob mus tsis paub kawg li! Koj tau cawm kuv dim ntawm lub qhov tuag los. Vajtswv, cov neeg khavtheeb pheej tuaj tawmtsam kuv; cov neeg siab phem pheej nrhiav yuav muab kuv tua povtseg, cov neeg ntawd yog cov uas tsis quav ntsej koj li. Tiamsis tus TSWV, koj yog tus uas muaj kev hlub thiab yog tus Vajtswv uas muaj kev hlub tshua; koj ibtxwm muaj lub siab ntev, siab zoo thiab ua ncaj ncees. Thov koj tig los cuag kuv thiab hlub tshua kuv; thov txhawb kuv lub zog thiab cawm kuv; rau qhov kuv muaj lub siab dawb paug pehawm koj ib yam li koj tus tubtxib ua muab siab npuab koj. Tus TSWV, thov qhia koj txojkev ua siab dawb siab zoo rau kuv; cov neeg uas ntxub kuv yuav raug kev txajmuag, thaum lawv pom koj pub kuv muaj kev zoo siab thiab pab kuv. Tus TSWV tsim nws lub nroog rau saum lub roob uas dawbhuv; Tus TSWV hlub lub nroog Yeluxalees tshaj lwm thaj chaw uas nyob hauv lub tebchaws Yixalayees. Vajtswv lub nroog, cia li ua tib zoo mloog tej lus zoo uas nws hais txog koj: “Thaum kuv suav tej haivneeg uas mloog kuv lus npe, kuv suav cov Iziv thiab cov Npanpiloos huv tibsi; cov Filitees, cov Tiles thiab cov Sudas, kuv yuav suav lawv npe nrog cov neeg hauv lub nrog Yeluxalees.” Lawv yuav hais tias txhua haivneeg uas nyob saum Roob Xi-oos, tus uas muaj Hwjchim Loj kawg nkaus yuav ua kom lub Roob Xi-oos nyob ruaj khov. Tus TSWV yuav sau cov neeg ntawd tej npe rau hauv ntawv khaws cia, thiab suav hais tias lawv puavleej yog neeg hauv lub nroog Yeluxalees. Lawv dhia seevcev thiab hu nkauj hais tias, “Xi-oos yog lub hauvpaus uas txhawv koob hmoov los rau peb sawvdaws.” Tus TSWV uas yog Vajtswv thiab yog kuv tus Cawmseej, kuv quaj ib hnub tsaus ntuj ntais, thiab thaum tsaus ntuj kuv txav los nyob ntawm koj xubntiag. Thov mloog kuv tej lus thov; thov mloog kuv lub suab quaj uas thov koj pab! Muaj ntau yam kev ntxhov siab los raug kuv ua rau kuv yuav luag tuag. Kuv zoo ib yam li tus neeg uas twb yuav tuag; kuv lub zog ntaug tas lawm. Kuv raug muab tso tseg nrog cov neeg uas tuag lawm; kuv zoo ib yam li cov neeg uas luag muab tua tso rau hauv qhov ntxa, cov neeg uas koj yeej tsis nco txog, thiab koj muab lawv tso tseg lawm. Koj muab kuv pov rau hauv lub qhov ntxa uas tob, thiab pov rau hauv lub qhov ntuj uas tsaus nti. Koj txojkev chim tsuam kuv hnyav kawg li, thiab nphau los npog kuv ib yam li nthwv dej hiavtxwv ntas. Koj ua rau kuv cov phoojywg khiav tas tso kuv tseg; koj ua rau kuv txaus lawv ntxub kawg nkaus li. Kuv raug kaw rau sab hauv thiab khiav tsis dim li; kuv ob lub qhovmuag qhib tsis taus vim kev txomnyem. Tus TSWV, kuv niaj hnub hu txog koj thiab tsa tes thov koj. Koj ua tej txujci tseemceeb rau cov neeg tuag lawm thiab los? Lawv puas sawv los thiab qhuas koj? Luag puas piav koj txojkev hlub uas tsis paub kawg rau hauv qhov ntxa, lossis piav koj txojkev ncaj ncees rau hauv qhov chaw puastsuaj? Puas pom koj tej txujci tseemceeb nyob hauv qhov chaw tsaus ntuj nti, lossis koj txojkev ua zoo puas nyob hauv lub tebchaws uas muab tso tseg lawm? Tus TSWV, kuv thov koj pab; kuv niaj tagkis thov koj. Tus TSWV, vim li cas koj tso kuv tseg? Vim li cas koj tig nraubqaum rau kuv lawm? Kuv yeej raug kev txomnyem txij thaum kuv tseem hluas los thiab kuv twb yuav luag tuag; kuv tas kev cia siab vim koj txojkev rau txim hnyav heev. Koj txojkev chim tsuam nkaus kuv; koj txojkev npautaws uas txaus ntshai ua rau kuv puastsuaj tas. Tej ntawd vij puagncig kuv ib hnub tsaus ntuj ib yam li dej nyab; tej ntawd thaiv kuv kev txhua phab tagnrho. Koj ua rau kuv tus phoojywg uas zoo tshaj plaws tso kuv tseg, tsuas yog kev tsaus ntuj thiaj tseem ua phoojywg rau kuv xwb. Tus TSWV, kuv yuav niaj hnub hu nkauj qhuas koj txojkev hlub uas tsis paub kawg; kuv yuav qhia koj txojkev ncaj ncees mus ibtxhis. Kuv paub hais tais, koj txojkev hlub yeej muaj nyob mus ibtxhis, thiab koj txojkev ncaj ncees nyob ruaj nrees ib yam li lub ntuj. Koj hais tias, “Kuv tau coglus nrog tus neeg uas kuv xaiv lawm; kuv tau coglus rau kuv tus tubtxib Daviv hais tias, ‘Koj cajces yuav tau ua vajntxwv mus li; kuv yuav ceev koj lub zwmtxwv kom muaj nyob mus ibtxhis.’ ” Qaum ntuj hu nkauj qhuas tej txujci tseemceeb uas koj ua; tus TSWV, cov neeg dawbhuv yuav hu nkauj qhuas koj txojkev ncaj ncees! Tus TSWV, nyob saum ntuj yeej tsis muaj leejtwg zoo li koj; cov timtswv ceebtsheej tsis muaj ib tug yuav zoo npaum li koj; cov neeg dawbhuv txhua tus puavleej hwm koj; thiab sawv ntawm koj xubntiag hauv lub rooj sablaj. Tus TSWV uas yog Vajtswv tus uas muaj hwjchim loj kawg nkaus, tsis muaj lwm tus muaj hwjchim npaum li koj lawm; tus TSWV, koj yeej ncaj ncees rau txhua yam uas koj ua. Koj kav tagnrho tej hiavtxwv uas muaj zog; koj ua rau tej nthwv dej ntas ntawd tus thiab nyob ntsiag to. Koj muab Lahaj uas yog tus niag zaj tsuj nthi thiab muab tua kiag; koj siv koj lub zog loj zog nchav ua rau koj cov yeebncuab swb lawm. Lub ntuj thiab lub ntiajteb yog koj tug; koj tsim txhua yam uas muaj nyob hauv lub ntiajteb no. Koj yog tus tsim sab qaumteb thiab sab qabteb; lub Roob Tanpaus thiab lub Roob Helemoos hu nkauj zoo siab qhuas koj. Ua li cas koj muaj hwjchim loj ua luaj! Ua li cas koj muaj zog loj zog nchav ua luaj li! Koj lub tebchaws cog ruaj khov rau ntawm txojkev ncaj ncees thiab kev tseeb, txhua yam uas koj ua qhia rau peb paub hais tias koj yog tus siab zoo thiab muaj kev hlub. Cov neeg uas hu nkauj qhuas koj thiab cov neeg uas ua lub neej nyob hauv qhov kaj ntawm koj txojkev ua siab dawb siab zoo, lawv muaj kev zoo siab heev. Vim muaj koj lawv thiaj zoo siab tas hnub; thiab lawv qhuas koj txojkev ua siab dawb siab zoo. Koj pab peb muaj yeej loj kawg li; vim koj txojkev hlub, koj thiaj pub peb kovyeej. Tus TSWV, koj xaiv tus uas tiv thaiv peb; koj yog cov Yixalayees tus Vajtswv Dawbhuv uas pub peb muaj vajntxwv. Tau ntev los lawm zaj yogtoog uas koj hais rau koj tus tubtxib uas muab siab npuab koj hais tias, “Kuv tau pab ib tug tubrog uas nto npe heev; kuv tau muab lub zwmtxwv cob rau tus uas kuv xaiv ntawm cov pejxeem los. Kuv tau muab roj hliv rau saum kuv tus tubtxib Daviv taubhau thiab tsa nws ua vajntxwv. Kuv yuav txhawb nws lub zog mus li, kuv lub hwjchim yuav ua rau nws muaj zog heev. Nws cov yeebncuab yuav kov tsis yeej nws; thiab cov neeg siab phem los yuav kov tsis yeej nws. Kuv yuav tsuj ntiag nws cov yeebncuab thiab tua txhua tus uas ntxub nws. Kuv yuav hlub nws thiab ua siab zoo rau nws; kuv yuav pab kom nws kovyeej luag mus li. Kuv yuav nthuav nws lub tebchaws kom dav txij ntua ntawm Hiavtxwv Meditelanes mus txog ntua tus Dej Efalates. Nws yuav hais rau kuv tias, ‘Koj yog kuv leej Txiv thiab yog kuv tus Vajtswv; koj yog lub pobzeb uas yog kuv Txojkev Cawm Dim.’ Kuv yuav tsa nws ua kuv tus tub hlob, nws yog tus vajntxwv uas muaj hwjchim loj dua lwm tus vajntxwv. Kuv yuav ceev kuv tej lus cog tseg rau nws mus li, thiab tej uas kuv tau nrog nws sib coglus yuav nyob mus ibtxhis. Nws lub zwmtxwv yuav nyob ruaj khov ib yam li lub ntuj; thiab nws cajces yuav ua vajntxwv mus li. “Tiamsis yog nws cajces tsis hwm kuv tej kevcai, thiab tsis ua lub neej raws li kuv tej lus samhwm, thiab yog lawv tsis ceev kuv tej lus qhuab ntuas thiab tsis khaws kuv tej lus samhwm cia, ces kuv yuav rau txim rau lawv vim lawv tej kev txhaum; kuv yuav ua kom lawv raug kev txomnyem vim tej kev txhaum uas lawv ua. Txawm li cas los kuv yuav tsis tso txojkev hlub Daviv tseg, lossis yuav nco ntsoov tej lus uas kuv cog tseg rau nws lawm. Kuv yuav tsis rhuav tej lus uas kuv cog tseg rau nws, lossis yuav tsis thim tej lus uas kuv cog tseg rau nws. “Kuv tuav kuv lub npe uas dawbhuv coglus ib zaug xwb kav mus tas ibtxhis; kuv yuav tsis dag Daviv ib zaug li. Nws yuav muaj xeebntxwv tsis tu mus li thiab yog tseem muaj lub hnub tawm tuaj, kuv yuav tsomkwm nws lub tebchaws mus li. Nws lub tebchaws yuav nyob ruaj khov ib yam li lub hli, kuv ua tus timkhawv tseeb nyob saum nruab ntug.” Tiamsis koj chim kawg rau tus vajntxwv uas koj tau xaiv tseg; koj tau tso nws tseg thiab cia nws nyob qhuav nquas cia. Koj rhuav koj tej lus cog tseg rau koj tus tubtxib thiab muab nws lub kausmom kub pov rau hauv pas av. Koj muab nws lub nroog tej ntsa yeej rhuav puas tas thiab cia nws tej chaw fajxwm pob puas tas. Cov neeg uas dua kev nyiag nws tej khoom tas; tej neeg zejzog puavleej luag nws plig. Koj pub nws cov yeebncuab tua yeej nws lawm; koj ua rau nws cov yeebncuab muaj kev zoo siab. Koj ua kom nws tej cuabyeej ua rog siv tsis tau thiab cia nws cov yeebncuab kovyeej nws. Koj tau tshem nws tus cwj tawm ntawm nws mus, thiab muab nws lub zwmtxwv tsoo vau rau hauv av lawm. Koj txiav nws lub hnubnyoog kom luv, thiab tsis pub kom nws tau ntsejmuag hlo li. Tus TSWV, koj txawm yuav nraim peb mus ibtxhis li los? Koj txojkev chim uas kub li hluavtaws tseem yuav nyob ntev npaum li cas? Nco ntsoov hais tias kuv txojsia luv heev, nco ntsoov hais tias koj tsim peb los ua neeg xwb. Leejtwg thiaj yuav nyob ibtxhis tsis txawj tuag? Yuav ua li cas neeg thiaj khiav dim ntawm lub qhov ntxa? Tus TSWV, koj txojkev hlub thaum ub dua qhov twg lawm? Tej lus uas koj cog tseg rau Daviv nyob qhov twg lawm? Thov nco ntsoov kuv uas yog koj tus tubtxib, kuv raug luag thuam heev, kuv tiv tsis taus cov neeg siab phem tej lus tsawm foom li lawm. Tus TSWV, koj cov yeebncuab tau txob thuam tus vajntxwv uas koj xaiv! Nws mus txog qhov twg los luag pheej thuam nws. Thov qhuas tus TSWV mus ibtxhis li! Amees! Amees! Tus TSWV, koj yeej ibtxwm yog peb lub chaw nyob. Thaum koj tsis tau tsim lub ntiajteb thiab tej toj roob hauv pes, koj yeej muaj nyob los lawm, thiab koj yeej yog Vajtswv mus ibtxhis li. Koj kom neeg rov mus ua av li qub; koj muab neeg hloov mus ua av dua. Koj saib ib txhiab xyoo tsuas ntev li ib hnub xwb; ib txhiab xyoo ntawd tsuas zoo ib yam li nag hmo uas twb dhau lawm, lossis zoo ib yam li ib txoos teev thaum tsaus ntuj. Koj kuav peb mus ib yam li nthwv dej kuav; peb ua neej nyob twb tsis ntev npaum li ib zaj npau suav. Peb zoo ib yam li tej nroj tsuag uas nthaw kaus thaum sawv ntxov, nws loj hlob thiab tawg paj, thaum yuav tsaus ntuj nws cia li ntsws thiab qhuav lawm. Koj txojkev chim ua rau peb raug kev puastsuaj tas; koj txojkev npautaws ua rau peb ntshai kawg li. Koj muab peb tej kev txhaum tso rau ntawm koj xubntiag, txawm yog tej kev txhaum uas peb ua nraim nkoos los koj yeej pom huv tibsi. Vim koj txojkev chim txiav peb txojsia, peb thiaj ua neej nyob tsis ntev, peb lub neej xaus mus ib yam li lub suab ntxhi uas ploj zuj zus lawm. Peb tsuas ua neej nyob txog xya caum xyoo xwb, tus uas khov kawg tsuas nyob txog yim caum xyoo; txawm yog peb ua neej nyob ntev los tsuas muaj kev txomnyem thiab nyuaj siab xwb; peb ua neej nyob tsis ntev, ces peb txojsia txawm yaj ntshis lawm. Puas muaj leejtwg paub txog koj txojkev chim? Puas muaj leejtwg paub hais tias thaum koj npautaws neeg yuav ntshai npaum twg? Thov koj qhia kom peb paub hais tias peb txojsia luv kawg li, peb thiaj yuav xeev los ua neeg ntse. Koj tseem yuav chim ntev li cas ntxiv? Tus TSWV, thov koj hlub koj cov tubtxib? Thov cia peb niaj tagkis tau txais koj txojkev hlub uas tsis paub kawg kom puv npo peb lub siab, peb thiaj muaj lub siab xyivfab thiab hu nkauj tas peb simneej. Thov koj pub kom peb muaj kev zoo siab ntau npaum li tej kev nyuaj siab uas koj tso los raug peb ntaus xyoo lawm. Thov pub peb cov uas yog koj tubtxib pom koj tej haujlwm tseemceeb; thiab thov cia peb cov xeebntxwv pom koj lub tshwjchim uas ci ntsa iab. Tus TSWV uas yog peb tus Vajtswv, thov koj foom koob hmoov rau peb. Thov pab kom txhua yam haujlwm uas peb ua ntawd tiav thiab vammeej! Tus uas mus cawm siav ntawm tus TSWV thiab tus uas nyob hauv tus uas muaj Hwjchim Loj kawg nkaus txojkev tiv thaiv, mas tus ntawd thiaj hais tau rau tus TSWV hais tias, “Koj yog tus tiv thaiv thiab tsomkwm kuv. Koj yog kuv tus Vajtswv; kuv cia siab ntsoov rau koj.” Nws yuav tsis pub koj mag luag lub vojhlua, thiab nws yuav pab kom koj dim ntawm tej kab mob kev tuag. Nws yuav nthuav hlo nws ob phab tis los roos koj, nws yuav tsomkwm koj, koj yuav nyob tso siab plhuav; nws txojkev ncaj ncees yuav tsomkwm thiab tiv thaiv koj. Hmo ntuj los koj yuav tsis ntshai kev puastsuaj, lossis ntshai tej xub hneevnti uas luag tua nthaw nthav thaum nruab hnub, lossis tej kab mob uas los raug sawvdaws thaum hmo ntuj, lossis tej kev puastsuaj uas tuaj raug sawvdaws thaum nruab hnub. Txawm yog muaj neeg ib txhiab leej tuag nyob ntawm koj ib sab, thiab muaj ib vam leej tuag ibncig koj los yuav tsis muaj xwm dabtsi raug koj li. Koj yuav tsa qhovmuag saib thiab pom luag rau txim rau cov neeg ua phem. Koj muab tus TSWV ua tus tiv thaiv koj, tus uas muaj Hwjchim Loj kawg nkaus yog tus tsomkwm koj, thiaj yuav tsis muaj kev puastsuaj los raug koj, thiab kev nruj kev tsiv yuav tsis los ze koj vaj koj tsev. Vajtswv yuav txib nws cov timtswv los tsomkwm koj; lawv yuav tiv thaiv koj txhua qhov uas koj mus. Lawv ob txhais tes yuav hwj koj, tsis pub koj ob txhais kotaw raug pobzeb li. Koj yuav tsuj ntiag tsov ntxhuav thiab nab, txawm yog tej tsov ntxhuav uas tsiv heev thiab tej nab uas muaj taug los koj yuav muab tsuj nthi rau hauv koj qab xibtaws. Vajtswv hais tias, “Kuv yuav cawm cov neeg uas hlub kuv, thiab yuav tiv thaiv cov neeg uas lees kuv ua lawv tus TSWV. Thaum lawv thov txog kuv, kuv yuav teb lawv; thaum lawv raug kev nyuaj siab kuv yuav nrog lawv nyob. Kuv yuav cawm lawv kom dim thiab pub lawv tau ntsejmuag. Kuv yuav pub lawv muaj sia ntev ua neej nyob; thiab kuv yuav cawm kom lawv dim.” Tus TSWV, kuv ua koj tsaug thiab hu nkauj qhuas koj uas yog Vajtswv tus muaj hwjchim loj kawg nkaus; niaj tagkis qhia koj txojkev hlub uas tsis paub kawg, thiab niaj hmo qhia koj txojkev ncaj ncees, nrog tej suab nkauj nogncas thiab tej suab raj uas zoo heev. Tus TSWV, koj tej haujlwm uas tseemceeb ua rau kuv zoo siab heev; kuv hu nkauj zoo siab rau txhua yam uas koj tau ua los lawm. Tus TSWV, koj tej haujlwm tseemceeb kawg li! Koj txojkev xav tob kawg nkaus! Ua rau tus neeg ruam paub tsis txog; tus neeg ruam tsis totaub tej ntawd li: cov neeg siab phem yuav loj hlob ib yam li tej nroj tsuag, thiab cov neeg txhaum yuav vammeej; tiamsis lawv yuav raug kev puastsuaj tas, rau qhov koj yog tus TSWV uas muaj hwjchim nyob mus ibtxhis. Peb paub hais tias koj cov yeebncuab yuav tuag tas, thiab cov neeg siab phem yuav swb. Koj pub rau kuv muaj zog ib yam li tus nyujqus; koj foom koob hmoov rau kuv muaj kev zoo siab. Kuv pom hais tias kuv cov yeebncuab swb tas lawm, thiab hnov cov neeg siab phem quaj ntshoo nrooj. Cov neeg ncaj ncees yuav loj hlob ib yam li tej ntsuag txoob; thiab lawv yuav hlob zoo ib yam li tej ntoo ciab pem Lenpanoos. Lawv zoo ib yam li cov ntoo uas cog rau hauv tus TSWV lub tsev uas tawg paj ntsa iab nyob hauv peb tus Vajtswv lub Tuamtsev; txawm yog cov ntoo twb laus lawm los tseem ntsuab, txi taus txiv thiab khov heev. Qhov no qhia hais tias tus TSWV yeej ncaj ncees, tus uas tsomkwm kuv nws yeej tsis muaj ib qho txhaum li. Tus TSWV yog vajntxwv. Nws lub tshwjchim uas ci ntsa iab thiab nws lub zog loj zog ncha ua nws tsoos tsho hnav. Lub ntiajteb yeej muaj chaw nyob ruaj nrees tsis txawj txav li. Tus TSWV, koj lub zwmtxwv yeej nyob khov kho thaum chivkeeb los lawm, thiab koj yeej nyob ibtxhis thaum ub los lawm. Tus TSWV, tej hiavtxwv uas tob heev ua suab nrov nroo ntoos; tej suab ntawd nrov ntseeg nkaws tuaj. Tus TSWV yog tus uas muaj hwjchim loj kav saum ntuj ceebtsheej, nws muaj hwjchim loj tshaj tej suab dej hiavtxwv nrov, thiab muaj hwjchim loj dua tej nthwv dej hiavtxwv uas ntas nphau nphwv. Tus TSWV, koj txoj kevcai muaj nyob mus tsis paub ploj, thiab koj lub Tuamtsev uas dawbhuv yuav nyob mus ibtxhis. Tus TSWV, koj yog Vajtswv tus uas rau txim; thov qhia koj txojkev chim rau sawvdaws pom! Koj yog tus txiav txim rau neeg ntiajteb; thov koj sawv thiab ua pauj kom txaus nkaus rau cov neeg khavtheeb! Tus TSWV, cov neeg siab phem yuav zoo siab ntev li cas? Tseem tshuav ntev li cas thiab? Lawv yuav hais lus phem khavtheeb ntsuav, thiab khav tej kev phem uas lawv ua mus ntev li cas? Tus TSWV, lawv caij tsuj koj haivneeg, thiab lawv tsimtxom cov neeg uas yog koj tug. Lawv tua cov pojntsuam thiab cov menyuam ntsuag, thiab lawv tua lwm haivneeg uas los nyob hauv peb lub tebchaws. Lawv hais tias, “Tus TSWV yeej tsis pom peb li; cov Yixalayees tus Vajtswv tsis paub hlo li.” Kuv haivneeg, ua li cas nej yuav ruam ua luaj li? Cov neeg ruam, thaum twg nej mam li ntse? Vajtswv yog tus tsim peb muaj pobntseg, nws tseem tsis hnov thiab los? Vajtswv yog tus tsim peb muaj qhovmuag, nws tseem tsis pom thiab los? Vajtswv qhuab ntuas txhua haivneeg, nws tseem tsis rau txim rau lawv thiab los? Nws yog xibhwb rau txhua tus, nws tseem tsis muaj kev txawj ntse thiab los? Tus TSWV paub tej uas neeg xav hauv lub siab; nws paub hais tias tej uas neeg xav ntawd tsis muaj qabhau dabtsi. Tus TSWV, tus neeg uas koj qhia, thiab koj muab koj txoj kevcai cob rau mas muaj kev kaj siab lug. Koj pub rau tus ntawd tau so hnub uas muaj kev ntxhov siab mus txog hnub uas luag khawb tau lub qhov cuab tos tus neeg siab phem. Tus TSWV yuav tsis tso nws haivneeg tseg; nws yuav tsis ncaim nws cov neeg hlo li. Yuav rov muaj kev ua ncaj nyob hauv tej tsev tu plaub, ces cov neeg ncaj yuav ua ncaj ncees mus li. Leejtwg yuav sawv cev kuv mus tawmtsam cov neeg siab phem? Leejtwg tuaj kuv tog tawmtsam cov neeg ua phem ua qias? Yog tus TSWV tsis cawm kuv, kuv yuav cia li mus rau hauv tubtuag teb. Kuv hais tias, “Kuv ntog lawm lauj”; tiamsis tus TSWV, koj txojkev hlub uas tsis paub kawg pab kuv sawv rov los. Thaum kuv ntxhov siab thiab ua ywjfab ywjfwj, koj nplig kuv lub siab kom kuv rov muaj kev zoo siab. Vajtswv, koj yeej tsis koom siab nrog tus txiav txim tsis ncaj uas nws txiav txim tsis raws li txoj kevcai; nws tuavhauv ua tsis ncaj rau cov neeg zoo thiab txiav txim tuag rau tus neeg uas tsis muaj txim. Tiamsis tus TSWV tiv thaiv kuv; kuv tus Vajtswv tsomkwm kuv. Nws yuav rau txim rau lawv vim tej kev phem uas lawv ua, thiab ua kom lawv puastsuaj vim lawv tej kev txhaum; tus TSWV uas yog peb tus Vajtswv yuav ua kom lawv puastsuaj. Cia li nrog peb qhuas tus TSWV! Peb cia li hu nkauj zoo siab qhuas Vajtswv tus uas tsomkwm peb! Peb cia li los cuag nws, ua nws tsaug thiab hu nkauj zoo siab qhuas nws. Rau qhov tus TSWV yog Vajtswv tus uas muaj hwjchim loj, nws yog tus Vajntxwv uas muaj hwjchim loj tshaj lwm tus vajtswv. Nws kav tagnrho lub qab ntuj no, txij ntua hauv tej qhov tsua uas tob tob mus txog saum tej hauv roob siab. Nws kav tagnrho tej hiavtxwv uas nws tsim; thiab nws kav thooj av uas nws txhais tes puab. Cia li los thiab peb khoov ntshis pehawm nws; peb cia li txhos caug ntawm tus TSWV lub xubntiag, nws yog tus uas tsim peb! Nws yog peb tus Vajtswv; peb yog cov neeg uas nws tsomkwm, peb yog pab yaj uas nws pub zaub rau noj. Hnub no cia li mloog tej lus uas nws hais: “Nej tsis txhob ua neeg tawv ncauj li nej cov yawgkoob ua thaum nyob nram tiaj suabpuam Melinpas thiab Maxas. Thaum nyob nrad, lawv sim kuv siab, txawm yog lawv pom txhua yam uas kuv ua pab lawv lawm los lawv tseem sim kuv siab li ntawd. Plaub caug xyoo ntawd kuv dhuav cov neeg no kawg li. Kuv hais tias, ‘Ua li cas lawv yuav tsis muab siab npuab kuv hlo li! Lawv tsis kam mloog kuv tej lus qhuab qhia.’ Chim kuv siab, kuv thiaj hais lus txiav npluav rau lawv hais tias: ‘Nej yuav tsis tau mus nyob hauv lub tebchaws uas kuv muab rau nej.’ ” Cia li hu ib zaj nkauj tshiab qhuas tus TSWV! Neeg thoob ntiajteb cia li hu nkauj qhuas tus TSWV! Cia li hu nkauj qhuas tus TSWV thiab ua nws tsaug! Niaj hnub piav nws txojkev cawm dim rau sawvdaws mloog. Cia li piav nws lub koob lub npe kom nrov ncha moo lug rau txhua lub tebchaws, piav nws tes haujlwm tseemceeb rau txhua haivneeg tau hnov. Qhia nws tes haujlwm uas loj kawg nkaus rau txhua haivneeg. Tus TSWV yog tus muaj hwjchim loj tsimnyog sawvdaws qhuas nws kawg li; sawvdaws yuav tsum hwm nws heev dua hwm tej vajtswv huv tibsi. Lwm haivneeg tej vajtswv tsuas yog mlom xwb, tiamsis tus TSWV yog tus tsim lub ntuj. Nws lub koob meej thiab lub tshwjchim ci ntsa iab nyob ibncig nws; nws lub hwjchim thiab kev zoo nkauj nyob ibncig nws lub Tuamtsev. Neeg thoob ntiajteb, cia li qhuas tus TSWV; cia li qhuas nws lub tshwjchim thiab lub zog. Cia li qhuas tus TSWV lub npe uas muaj koob muaj meej; cia li nqa khoom tuaj fij rau hauv nws lub Tuamtsev. Sawvdaws yuav tsum tu lub siab kom dawbhuv mus pehawm tus TSWV; neeg ntiajteb cia li ntshai tshee hnyo ntawm nws xubntiag. Cia li hais rau txhua lub tebchaws hais tias, “Tus TSWV yog Vajntxwv! Lub ntiajteb yeej nyob ruaj nrees tsis txav li; nws yuav txiav txim ncaj ncees rau txhua haivneeg.” Lub ntiajteb thiab lub ntuj cia li zoo siab hlo! Hiavtxwv thiab txhua yam tsiaj uas nyob hauv hiavtxwv cia li qw ntshoo nrooj; tej liaj tej teb thiab tej qoobloo uas nyob hauv tej teb cia li zoo siab! Tej ntoo hauv havzoov yuav qw zoo siab thaum uas tus TSWV los kav lub ntiajteb no. Nws yuav kav neeg ntiajteb ntawm txojkev ncaj ncees thiab dawbhuv. Tus TSWV yog vajntxwv! Lub ntiajteb cia li zoo siab! Tej koog povtxwv hauv hiavtxwv, nej cia li zoo siab! Muaj huab tsaus nti nyob puagncig nws; nws kav neeg ntiajteb ntawm txojkev ncaj ncees thiab dawbhuv. Muaj nplaim hluavtaws ua nws ntej thiab kub nws cov yeebncuab uas nyob ibncig nws. Nws ua kom muaj xob laim ci pom kev mus thoob ntiajteb; lub ntiajteb pom thiab ntshai tshee hnyo. Tej hauv roob yaj li ciab ntab tabmeeg tus TSWV, tabmeeg tus Tswv uas kav tagnrho lub ntiajteb. Lub ntuj piav txojkev ncaj ncees, thiab txhua haivneeg pom nws lub tshwjchim uas ci ntsa iab. Txhua tus uas pe tej mlom yuav raug txajmuag; tagnrho tej vajtswv yuav txhos caug pehawm tus TSWV. Tus TSWV, vim koj txojkev txiav txim, cov neeg uas nyob hauv Xi-oos muaj kev zoo siab heev, thiab tej nroog hauv tebchaws Yudas los zoo siab kawg li. Tus TSWV uas muaj hwjchim loj kawg nkaus, koj yog tus uas kav tagnrho lub ntiajteb no; koj yog tus uas muaj hwjchim loj dua tej vajtswv huv tibsi. Tus TSWV hlub cov neeg uas ntxub tej kev phem kev qias; nws tsomkwm nws haivneeg txojsia; nws tso lawv dim ntawm cov neeg siab phem txhais tes. Qhov kaj ci rau cov neeg ncaj ncees, thiab ua rau cov neeg siab zoo muaj kev zoo siab kawg. Nej cov uas yog neeg ncaj ncees cia li zoo siab, vim txhua yam uas tus TSWV ua tas los lawm! Nco ntsoov txhua yam uas tus Vajtswv dawbhuv ua tas los lawm, thiab ua nws tsaug. Cia li hu ib zaj nkauj tshiab qhuas tus TSWV; nws tau ua tej txujci uas tseemceeb heev! Nws kovyeej los ntawm nws lub hwjchim thiab nws lub zog. Tus TSWV qhia nws txojkev muaj yeej; nws qhia nws lub hwjchim rau txhua haivneeg paub. Nws ua raws li tej lus uas nws cog tseg rau haivneeg Yixalayees, nws ua siab dawb siab zoo thiab hlub lawv mus ibtxhis. Txhuav haivneeg uas nyob txhua qhov puavleej pom peb tus Vajtswv txojkev muaj yeej. Neeg ntiajteb cia li hu nkauj zoo siab qhuas tus TSWV; cia li hu nkauj qhuas nws thiab zoo siab ua nws tsaug! Cia li hu nkauj qhuas tus TSWV! Cia li ntaus nkauj nogncas! Cia li tshuab raj thiab tshuab xyu! Thiab qw zoo siab qhuas tus TSWV uas yog peb tus vajntxwv. Dej hiavtxwv thiab txhua tsav yam uas nyob hauv hiavtxwv cia li qw ntshoo nrooj; lub ntiajteb thiab txhua yam uas nyob hauv lub ntiajteb cia li hu nkauj! Tej dej, nej cia li npuaj teg; tej hauv roob, nej cia li hu nkauj zoo siab ua ke tabmeeg tus TSWV, rau qhov nws los kav lub ntiajteb no lawm. Nws yuav kav neeg ntiajteb ntawm txojkev ncaj ncees thiab dawbhuv. Tus TSWV yog vajntxwv thiab tej neeg ntshai nws ua ibce tshee hnyo. Nws zaum saum nws lub zwmtxwv ntawm ob tug qhelunpees, thiab lub ntiajteb ua zog koog. Tus TSWV yog tus muaj hwjchim loj nyob hauv Xi-oos; nws yog tus uas kav txhua lub tebchaws huv tibsi. Txhua tus yuav qhuas nws lub npe thiab lub koob meej uas nrov ncha moo lug! Nws tib leeg yog tus uas Dawbhuv. Vajntxwv tus muaj hwjchim loj, nyiam txojkev ncaj ncees, koj muab txojkev ncaj ncees rau cov Yixalayees; koj coj txojkev ncaj ncees thiab kev dawbhuv los. Cia li qhuas tus TSWV uas yog peb tus Vajtswv; Cia li pehawm nws ntawm nws lub zwmtxwv! Nws tib leeg thiaj yog tus uas Dawbhuv! Mauxes thiab Aloos yog nws ob tug povthawj! thiab Xamuyees tib leeg yog tus uas thov tus TSWV; lawv hu tus TSWV thiab nws teb lawv tej lus thov. Tus TSWV hais lus hauv tauv huab tuaj rau lawv; lawv hwm tej kevcai thiab tej lus samhwm uas nws muab cob rau lawv lawm. Tus TSWV uas yog peb tus Vajtswv, koj teb koj haivneeg tej lus thov; txawm yog koj tau rau txim rau lawv vim lawv tej kev txhaum, los koj qhia rau lawv hais tias koj yog tus Vajtswv uas zam txim. Cia li qhuas tus TSWV uas yog peb tus Vajtswv; thiab pehawm nws ntawm nws lub roob dawbhuv; vim tus TSWV uas yog peb tus Vajtswv, nws yog tus dawbhuv! Neeg thoob plaws ntiajteb cia li hu nkauj qhuas tus TSWV! Cia li zoo siab thiab pehawm tus TSWV; cia li txav los nyob ntawm nws xubntiag thiab hu nkauj zoo siab. Cia li lees hais tias tus TSWV yog Vajtswv. Nws tsim peb thiab peb yog nws tug; peb yog nws haivneeg thiab peb yog nws pab yaj. Cia li mus hauv nws lub Tuamtsev thiab ua nws tsaug; cia li mus rau hauv tej chav tsev thiab qhuas nws. Cia li ua nws tsaug thiab qhuas nws lub npe. Tus TSWV yog tus uas zoo kawg nkaus; nws txojkev hlub nyob mus ibtxhis thiab nws txojkev ncaj ncees nyob mus ibtxhis tsis kawg. Tus TSWV, kuv hu nkauj qhuas koj, kuv zaj nkauj yog hais txog qhov uas koj ua siab dawb siab zoo thiab ncaj ncees. Kuv yuav xyaum ua lub neej kom tsis muaj leejtwg thuam tau li. Thaum twg koj mam los cuag kuv? Kuv yuav ua lub neej dawbhuv nyob hauv kuv lub tsev, thiab kuv yuav tsis quavntsej tej kev phem kev qias li. Kuv ntxub tej uas cov neeg khiav tawm ntawm Vajtswv mus lawm ua; kuv yuav tsis raus tes rau tej kev phem kev qias ntawd li. Kuv yuav tsis ua neeg siab nkhaus, thiab kuv yuav tsis koom nrog cov neeg siab phem. Kuv yuav muab cov neeg uas hais luag plig ua kom puastsuaj; kuv yuav tsis ua siab ntev rau tus neeg khavtheeb thiab muaj plhus hlo li. Kuv yuav pub cov neeg uas muaj lub siab npuab Vajtswv nyob hauv kuv lub loog. Kuv yuav cia cov neeg uas muaj lub siab ncaj ua kuv tes haujlwm. Yuav tsis muaj neeg dag nyob hauv kuv lub loog; yuav tsis muaj cov neeg ntsejmuag ncaj siab nkhaus nyob tabmeeg kuv. Kuv yuav rhuav cov neeg siab phem uas nyob hauv peb lub tebchaws ib hnub dhau ib hnub kom ploj mus tas; kuv yuav muab cov neeg limhiam ntiab tawm hauv tus TSWV lub nroog mus. Tus TSWV, thov koj mloog kuv tej lus thov, thiab mloog kuv lub suab uas thov koj pab! Thaum kuv raug kev txomnyem, thov koj tsis txhob khiav nkaum kuv! Thov koj tig ntsej mloog kuv tej lus thiab teb kuv thaum kuv thov koj. Kuv txojsia tabtom yuav ploj mus ib yam li cov pa ncho; thiab kuv lub cev tabtom kub cuag hluavtaws hlawv. Kuv raug luag tsuj ntog ib yam li tej nroj qhuav; kuv thiaj tsis nco qab los noj kuv cov mov lawm. Kuv ntsaj laws; kuv lub cev tshuav tawv qhwv pobtxha lawm xwb. Kuv zoo li tus noog uas nyob tom tiaj suabpuam, zoo ib yam li tus plas uas nyob hauv lub zos uas do cuas. Kuv pw tsis tsaug zog li; kuv zoo ib yam li tus noog uas nyob kho siab khuav saum rutsev; Kuv cov yeebncuab tuaj thuam kuv tas hnub; cov neeg uas tuam mom kuv tuav kuv lub npe foom tsis zoo. Kuv txojsia zoo ib yam li tus duab ntxoov ntxoo thaum yuav tsaus ntuj; kuv zoo ib yam li tej nroj uas qhuav lawm. Tiamsis tus TSWV, koj zaum saum koj lub zwmtxwv mus ibtxhis; txhua tiam neeg yuav nco ntsoov koj. Koj yuav sawv tsees los hlub Xi-oos; rau qhov twb txog lub sijhawm uas hlub Xi-oos lawm; lub sijhawm uas teem cia los txog lawm lauj! Koj cov tubtxib nyiam Xi-oos kawg li, txawm yog Xi-oos raug rhuav puastsuaj ua tej pawg pobzeb lawm los lawv tseem tshua nws kawg li. Txhua haivneeg yuav ntshai tus TSWV; txhua tus vajntxwv uas nyob hauv ntiajteb no yuav ntshai nws lub hwjchim. Thaum tus TSWV rov txhim kho lub nroog Xi-oos dua tshiab, nws lub hwjchim yuav tshwm rau sawvdaws pom. Nws yuav mloog nws haivneeg uas tsis muaj leejtwg mob siab rau tej lus thov. Cia li muab tej uas tus TSWV tau ua tas los lawm sau cia rau tej neeg yav tom ntej tau nyeem kom cov neeg uas tseem yuav yug los thiaj paub qhuas Vajtswv. Tus TSWV ntsia saum nws lub chaw dawbhuv saum ntuj tuaj, nws nyob saum ntuj ntsia tuaj rau hauv ntiajteb. Nws hnov cov neeg uas raug txim tej suab quaj thiab nws tso cov neeg uas raug luag rau txim kom dim kev tuag. Thiab neeg yuav piav nws lub npe hauv Xi-oos, thiab neeg yuav qhuas nws nyob hauv lub nroog Yeluxalees, rau thaum uas ntau haivneeg thiab ntau lub tebchaws tuaj sib sau ua ke pehawm tus TSWV. Tus TSWV txo kuv lub zog rau thaum kuv tseem hluas; nws txiav kuv txojsia kom kuv ua neej nyob tsis ntev. Vajtswv, thov koj tsis txhob coj kuv mus thaum kuv tseem yog ib nrab neej. Tus TSWV, koj yog tus uas nyob mus ibtxhis; thaum chivkeeb koj txhais tes tsim lub ntiajteb thiab tsim lub ntuj. Tej ntawd yuav ploj mus tas, tiamsis koj yuav nyob mus ibtxhis; tej ntawd yuav txawj qub thiab ntuag ib yam li tej tsoos tsho. Koj yuav muab tej ntawd hloov ib yam li luag hloov ris tsho, ces tej ntawd yuav ploj mus. Tiamsis koj zoo li qub, thiab koj yuav nyob mus ibtxhis tsis txawj kawg li. Peb tej tubki yuav nyob kaj siab lug, vim koj yog tus tiv thaiv, thiab lawv cov xeebntxwv yuav nyob tso siab plhuav. Kuv lub siab, cia li qhuas tus TSWV! Tagnrho kuv lub cev, cia li qhuas nws lub npe uas dawbhuv! Kuv lub siab, cia li qhuas tus TSWV thiab nco tsoov nws txiaj ntsig. Nws zam kuv tej kev txhaum huv tibsi thiab kho kuv tej mob zoo hlo. Nws pab kuv dim kev ploj kev tuag, nws hlub thiab tshua kuv, nws foom koob hmoov rau kuv. Nws pub txhua yam zoo rau kuv lub neej, yog li ntawd, kuv thiaj tseem hluas thiab muaj zog khov kho ib yam li tus dav. Tus TSWV pab cov uas raug luag tsimtxom, thiab nws tuaj lawv tog pab kom lawv yeej. Tus TSWV qhia nws tes haujlwm rau Mauxes thiab pub rau cov Yixalayees pom nws tej txujci tseemceeb. Tus TSWV yog tus siab dawb siab zoo thiab muaj kev hlub, nws tsis chim sai thiab nws hlub mus ibtxhis. Nws tsis cem thiab nws tsis chim mus ibtxhis. Nws tsis rau txim rau peb raws li tej kev txhaum uas tsimnyog peb raug, lossis tsis ua pauj peb lub txim thiab tej kev txhaum uas peb ua. Lub ntuj nyob siab ntawm lub ntiajteb npaum li cas, tus TSWV hlub cov uas hwm nws heev npaum li ntawd. Hnubtuaj deb hnubpoob npaum li cas, tus TSWV tshem peb tej kev txhaum mus povtseg deb npaum li ntawd. Leej txiv hlub nws cov menyuam npaum li cas, tus TSWV hlub cov ua hwm nws npaum li ntawd. Tus TSWV paub hais tias nws muab dabtsi los tsim peb; nws nco ntsoov hais tias peb yog hmoov av xwb. Peb txojsia zoo ib yam li tej nroj tsuag, peb loj hlob mos nyoos ib yam li lub paj roj; thaum cua ntsawj lub paj ntawd txawm zeeg lawm, thiab tsis muaj leejtwg rov pom lub paj ntawd dua. Tiamsis tus TSWV hlub cov neeg uas hwm nws mus ibtxhis, thiab nws muaj lub siab dawb siab zoo rau txhua tiam neeg, yog pub rau cov neeg uas coj raws li nws tej lus cog tseg, thiab mloog nws tej lus qhuab qhia kawg siab kawg ntsws. Tus TSWV muab nws lub zwmtxwv txawb rau saum ntuj; nws yog tus uas kav txhua tsav yam huv tibsi. Cov timtswv ceebtsheej uas muaj zog thiab muaj hwjchim, cov uas ua raws li tus TSWV tej lus qhuab qhia, thiab mloog tej lus uas nws hais, nej cia li qhuas tus TSWV! Txhua yam uas muaj hwjchim nyob saum qaum ntuj, nej yog tus TSWV cov tubtxib uas ua raws li nws lub siab nyiam, nej cia li qhuas tus TSWV! Txhua yam uas tus TSWV tsim los nyob txhua qhov uas nws kav, cia li qhuas tus TSWV. Kuv lub siab, cia li qhuas tus TSWV! Kuv lub siab, cia li qhuas tus TSWV! Tus TSWV uas yog kuv tus Vajtswv, koj yog tus uas muaj hwjchim loj! Koj lub koob meej thiab lub tshwjchim ci ntsa iab puagncig koj; koj muab qhov kaj qhwv koj. Koj muab lub ntuj nthuav ib yam li nthuav lub tsevntaub, koj tsim koj lub tsev rau saum cov nplaim dej uas nyob saum qaum ntuj. Koj siv cov huab ua koj lub tsheb, thiab koj caij rawv saum tej cua. Koj siv tej cua ua koj cov tub xa xov, thiab xob laim uas cig liab vog ua koj cov tubtxib. Koj muab lub ntiajteb txawb khov rau ntawm tej ncej uas txheem, lub ntiajteb yuav nyob qhov ntawd tsis txav chaw li. Koj kom dej hiavtxwv vov nkaus lub ntiajteb ib yam li tej tsoos tsho qhwv nkaus neeg lub cev, thiab dej nyab puv nkaus saum tej hauv roob. Thaum koj nthe nqho, dej txawm ntws; thaum dej hnov koj lub suab hais, dej cia li ntws laub lug lawm. Tej dej ntawd ntws saum tej roob thiab tej hav txhua nrho los rau ntawm qhov chaw uas koj tsim cia rau tej dej ntawd. Koj kem ciam tseg kom dej tsis muaj peevxwm ntws dhau tus ciam ntawd, kom tej dej ntawd thiaj tsis ntws los nyab lub ntiajteb no dua. Koj tsim tej dej cag ntws raws tej kwjha thiab tej dej uas ntws raws tej kwjdeg. Tej dej ntawd txhawv los rau tej tsiaj qus haus, thiab tej neesluav qus haus thaum tshaib nqis. Tej nas noog los ua zes rau saum tej ntoo uas nyob ze rau ntawm ntug dej thiab quaj seev yees. Koj tso nag saum ntuj los ywg tej roob, koj foom koob hmoov rau txhua qhov thoob plaws lub ntiajteb. Koj tsim kom muaj tej nroj tsuag hlav mos nyoos rau tej tsiaj txhu noj, thiaj muaj qoobloo rau neeg cog kom neeg thiaj muaj noj muaj haus, thiab muaj cawv txiv hmab los haus ua rau neeg zoo siab, kom muaj tej roj txiv ntoo ua rau neeg luag ntxhi, thiab muaj mov ua rau neeg muaj zog tuaj. Tej ntoo ciab pem Lenpanoos, puavleej tau dej nag txaus, tej ntoo ntawd yeej yog tus TSWV li, nws yog tus cog cia. Tej noog los ua zes rau saum tej ntoo ntawd, thiab os dej los ua zes rau ntawm tej ntoo thuv. Tej sai nyob saum tej roob siab, thiab tej Ntximtsua nyob hauv tej qhov tsua. Koj tsim muaj lub hli los quas hli thiab quas xyoo; lub hnub nws paub nws lub caij uas poob qho. Koj tsim kom muaj hmo ntuj, thiab thaum tsaus ntuj tej tsiaj nruab nrag tawm tuaj nrhiav noj. Tej thav tsov ntxhuav nyooj laws tawm mus nrhiav tej tsiaj uas Vajtswv pub rau lawv noj. Thaum hnub tawm tuaj tej tsiaj ntawd txawm rov mus nkaum rau hauv tej qhov uas lawv txeev pw. Ces tej neeg mam li tawm mus ua lawv tej haujlwm, thiab ua haujlwm tsis so mus txog thaum tsaus ntuj. Tus TSWV, koj tsim ib puas tsav yam! Thaum peb saib tej uas koj tsim los ntawd ua rau peb pom hais tias koj yog tus muaj tswvyim! Lub ntiajteb puv nkaus txhua tsav yam uas koj tau tsim tseg. Muaj hiavtxwv loj thiab dav heev, muaj tsiaj loj thiab tsiaj me suav tsis txheeb nyob hauv. Muaj tej nkoj uas neeg tsav mus los hauv hiavtxwv, thiab muaj tus Zaj uas yog tus tsiaj nyaum uas koj tsim tseg nyob ua si khuav hauv hiavtxwv. Tej tsiaj ntawd tos ntsoov koj pub rau lawv noj lawv haus thaum tshaib nqhis. Thaum koj pub rau lawv noj, lawv thiaj tau noj, koj pub rau lawv muaj noj muaj haus, lawv thiaj tau noj tau haus tsau. Thaum koj fee plhu tsis quavntsej, lawv ntshai kawg li; thaum koj rho koj txoj pa mus lawm, ces lawv txawm tuag thiab rov mus ua av li qub. Tiamsis thaum koj rau siav rau pa rau lawv, lawv ciaj sia tuaj, koj pub txojsia tshiab rau lub ntiajteb. Thov kom tus TSWV lub tshwjchim uas ci ntsa iab nyob mus ibtxhis! Thov kom tus TSWV tsuas muaj zoo siab rau tej uas nws tsim lawm. Tus TSWV tsa muag ntsia lub ntiajteb, lub ntiajteb ua zog koog; tus TSWV kov tej hauv roob, tej hauv roob txawm ncho pa auv niab tawm tuaj. Kuv yuav hu nkauj qhuas tus TSWV tas kuv simneej; kuv yuav hu nkauj ua kuv tus Vajtswv tsaug mus txog hnub kuv tuag. Thov kom kuv tej nkauj haum nws siab, rau qhov nws yog tus uas ua rau kuv zoo siab luag ntxhi. Thov kom cov neeg ua txhaum raug puastsuaj tu noob nrho hauv ntiajteb no mus; thov tsis txhob tseg ib tug neeg siab phem nyob hlo li. Kuv lub siab, cia li qhuas tus TSWV! Cia li qhuas tus TSWV! Cia li ua tus TSWV tsaug, cia li piav nws lub koob lub npe uas zoo kawg nkaus rau sawvdaws; cia li qhia kom txhua haivneeg paub tus TSWV tej haujlwm uas nws ua. Cia li hu nkauj qhuas tus TSWV; cia li qhia kom txhua tus paub tus TSWV tej txujci tseemceeb uas nws ua. Cia li zoo siab rau qhov peb yog Vajtswv tug; txhua tus uas pehawm nws cia li zoo siab. Cia li mus cuag tus TSWV thiab thov nws pab, thiab niaj hnub pehawm nws. Tus TSWV yog peb tus Vajtswv; nws yog tus uas txiav txim rau neeg ntiajteb txhua tus. Nws yuav ceev nws tej lus cog tseg mus ibtxhis, nws tej lus cog tseg kav txog ib txhiab tiam neeg. Tus TSWV yuav ceev tej lus uas nws tau cog tseg rau Anplahas thiab tej lus uas nws tau cog tseg rau Ixaj lawm. Tus TSWV coglus nrog Yakhauj tib zaug xwb kav mus ibtxhis. Nws hais tias, “Kuv yuav muab lub tebchaws Kana-as rau koj ua koj tug mus li.” Thaum Vajtswv haivneeg tsis tau huamvam coob, mas lawv tsiv ib qho rau ib qho hauv lub tebchaws Kana-as. Lawv tsiv ib haivneeg mus rau ib haivneeg, thiab lawv tsiv ib lub tebchaws mus rau ib lub tebchaws. Tiamsis Vajtswv tsis pub leejtwg tsimtxom lawv li; nws tsomkwm lawv thiab txwv tej vajntxwv hais tias: “Nej tsis txhob ua li cas rau cov tubtxib uas kuv xaiv lawm; nej tsis txhob kov kuv cov cevlus.” Tus TSWV rho lawv tej zaub mov lawm, thiab tso kev tshaib nqhis rau lawv lub tebchaws. Tiamsis nws tso ib tug txivneej ua lawv ntej mus, tus ntawd yog Yauxej, tus uas raug muab muag mus ua luag qhev. Luag muab saw hlau khi nws ob txhais kotaw, thiab muab khawb hlau khawm nws cajdab, mus txog thaum Yauxej tej lus tshwm muaj tseeb, tus TSWV tej lus ua timkhawv qhia hais tias Yauxej yog tus ncaj. Ces tus vajntxwv uas kav tebchaws Iziv thiaj samhwm kom cov nomtswv uas saib pejxeem muab Yauxej tso. Vajntxwv tsa Yauxej ua ib tug nom loj thiab ua tus tswj thoob plaws lub tebchaws, Yauxej muaj hwjchim loj tshaj vajntxwv tsoom nomtswv txhua tus, thiab muaj hwjchim samhwm rau vajntxwv cov tuavxam txhua tus. Ces Yakhauj thiaj tsiv mus rau nram tebchaws Iziv, thiab mus nyob hauv lub tebchaws ntawd lawm. Tus TSWV pub nws haivneeg muaj tubki huamvam coob thiab ua rau lawv muaj zog tshaj lawv cov yeebncuab. Nws ua kom cov neeg Iziv ntxub nws haivneeg thiab dag ntxias nws cov tubtxib. Ces nws txib Mauxes uas yog nws tus tubtxib, thiab Aloos tus uas nws xaiv tseg lawm mus. Mauxes thiab Aloos tau ua Vajtswv tes haujlwm loj, thiab ua tej txujci tseemceeb nram tebchaws Iziv. Vajtswv tso kev tsaus ntuj los rau hauv tebchaws Iziv, tiamsis cov neeg Iziv tsis mloog nws tej lus samhwm. Tus TSWV muab lawv tej dej hloov ua ntshav thiab ua rau lawv tej ntses tuag tas huv tibsi. Muaj qav los puv nkaus hauv lawv lub tebchaws; thiab los puv nkaus rau hauv vajntxwv lub loog. Vajtswv hais, ces txawm muaj yoov qaib thiab yoov ya los puv nkaus hauv lub tebchaws. Vajtswv tso lawg hloov nag thiab ua xob laim cig liab vog los rau hauv lawv lub tebchaws; Vajtswv ua rau lawv tej txiv hmab, txiv ncuavpias thiab tej ntoo lov tuag tas. Vajtswv hais, ces txawm muaj kooj ya los, muaj ntau vam tus kooj yeej suav tsis txheeb li. Cov kooj ntawd noj tej ntoo thiab tej qoobloo thoob plaws lub tebchaws tas dulug. Vajtswv tua cov neeg Iziv txhua yim tus tub hlob tuag tas. Ces tus TSWV thiaj coj cov Yixalayees khiav tawm; lawv coj nyiaj coj kub ntau heev nrog lawv mus, lawv txhua tus puavleej noj qab nyob zoo thiab muaj zog khov kho. Cov Iziv ntshai cov Yixalayees kawg li, thiab zoo siab uas cov Yixalayees khiav mus lawm. Vajtswv ua ib tauv huab los roos nws haivneeg, thiab ua tus nplaim hluavtaws rau lawv pom kev hmo ntuj. Lawv thov, thiab nws tso noog ncuab los; nws tso manas saum ntuj los rau lawv noj nplua mias. Nws rua pobzeb, ces txawm dej txhawv tawm los, thiab ntws mus rau hauv tiaj suabpuam cuag li ib tug dej. Nws nco ntsoov nws tej lus tseemceeb uas nws tau cog tseg rau nws tus tubtxib Anplahas lawm. Yog li ntawd, nws thiaj coj haivneeg uas nws xaiv tseg tawm mus, ces lawv hu nkauj zoo siab kawg li. Nws muab lwm haivneeg tej tebchaws los ua nws haivneeg tug, thiab cia nws haivneeg tau kav luag tej tebchaws. Yog li ntawd, nws haivneeg thiaj li ceev nws tej kevcai, thiab ua raws li nws tej lus samhwm. Cia li qhuas tus TSWV! Cia li qhuas tus TSWV! Cia li ua tus TSWV tsaug, rau qhov nws muaj lub siab dawb siab zoo, nws txojkev hlub nyob mus ibtxhis. Leejtwg thiaj muaj cuabkav piav tau tej txujci tseemceeb uas tus TSWV ua? Leejtwg thiaj txawj qhuas nws tas siab nrho? Cov neeg uas niaj hnub ua ncaj raws li tus TSWV tej lus samhwm, mas lawv yog cov uas muaj kev zoo siab kawg li. Tus TSWV, thaum koj pab koj haivneeg, thov koj nco ntsoov kuv; thaum koj cawm lawv thov xam txog kuv thiab. Thov kom kuv pom koj haivneeg vammeej thiab tau koom koj haivneeg ua neej nyob kaj siab lug, kom kuv thiaj tau nrog koj haivneeg tau koob meej. Peb tau ua txhaum ib yam li peb cov yawgkoob; peb tau ua kev txhaum thiab ua phem ua qias lawm. Thaum tseem nyob nram tebchaws Iziv peb cov yawgkoob tsis totaub Vajtswv tej txujci tseemceeb li; lawv tsis nco hais tias nws tau qhia nws txojkev hlub ntau zaus rau lawv, thiab thaum nyob rau ntawm Hiavtxwv Liab lawv tau ntxeev siab rau tus uas muaj Hwjchim Loj kawg nkaus. Txawm li ntawd los nws tseem cawm lawv raws li nws tau coglus tseg, yog nws xav qhia nws lub hwjchim loj rau lawv pom. Nws hais rau dej Hiavtxwv Liab, ces dej txawm faib hlo ua kev qhuav qhawv; nws coj nws haivneeg mus dhau rau sab tim ub. Nws pab lawv dim ntawm cov neeg uas ntxub lawv; nws cawm lawv dim ntawm lawv cov yeebncuab. Dej hiavtxwv nphau nphwv los npog nkaus lawv cov yeebncuab; ua rau cov yeebncuab tuag tas tsis seem ib tug li. Nws haivneeg thiaj ntseeg nws tej lus cog tseg thiab hu nkauj qhuas nws. Tiamsis lawv txawm siv tsis nco qab tej txujci uas tus TSWV tau ua lawm, lawv lam tau lam ua tsis yuav Vajtswv ua tus tuavxam li. Thaum nyob nram tiaj suabpuam, lawv lub siab hlob xav tau ntau, lawv thiaj sim Vajtswv siab; nws muab tej uas lawv thov rau lawv, tiamsis nws tso tej kab mob uas txaus ntshai heev los rau lawv. Thaum nyob nram tiaj suabpuam lawv ua saib tsis taus Mauxes thiab Aloos uas yog tus TSWV ob tug tubtxib uas dawbhuv. Ces av txawm qhib plho nqos kiag Dathas thiab nphau los txhub Anpilas tsevneeg; hluavtaws poob los kub lawv cov kwvtij thiab hlawv cov neeg siab phem tuag tas huv tibsi. Lawv muab kub nchuav tau ib tug mlom nyuj rau ntawm roob Xinais thiab lawv pe tus mlom nyuj ntawd; lawv muab tus mlom uas zoo li tus tsiaj noj zaub los hloov Vajtswv lub tshwjchim uas ci ntsa iab chaw. Lawv tsis nco qab Vajtswv tus uas tau ua tej txujci loj cawm lawv dim nram tebchaws Iziv lawm. Tus TSWV tau ua tej txujci tseemceeb nyob nram tebchaws Iziv! Thiab tau ua tej txujci uas xav tsis thoob nyob ntawm Hiavtxwv Liab! Thaum Vajtswv hais tias nws yuav ua kom nws haivneeg puastsuaj, Mauxes uas yog Vajtswv tus tubtxib uas nws xaiv txawm, sawv cheem tsis pub Vajtswv txojkev chim rhuav nws haivneeg. Cov Yixalayees tsis kam mus nyob hauv lub tebchaws uas tau zoo, rau qhov lawv tsis ntseeg Vajtswv txojlus cog tseg. Lawv nyob hauv lawv tej tsevntaub thiab yws tas zog, tsis kam mloog tus TSWV tej lus li. Yog li ntawd, nws thiaj hais rau lawv tias nws yuav cia kom lawv tuag tas rau hauv tiaj suabpuam thiab yuav muab lawv cov xeebntxwv raws khiav mus nyob ua sab ua sua xyaw lwm haivneeg; thiab yuav cia lawv tuag tas rau hauv luag tej tebchaws. Thaum nyob hauv lub nroog Pe-aus Vajtswv haivneeg tau mus nrog luag pe Npa-as, thiab mus nrog luag noj tej uas muab fij rau tej vajtswv uas tsis muaj sia. Tej uas lawv ua ntawd, ua rau tus TSWV npautaws, nws thiaj tso tej kab mob uas txaus ntshai heev los rau lawv. Tiamsis Finehas txawm sawv tsees mus rau txim rau cov neeg uas ua txhaum, ces tej kab mob ntawd thiaj dua mus lawm. Qhov ntawd yog ua kom lawv nco ntsoov tseg ib tiam dhau ib tiam mus ibtxhis li. Nyob ntawm lub qhovdej Melinpas, Mauxes ntxhov siab kawg li, vim cov Yixalayees tau ua rau tus TSWV chim heev. Lawv tau ua rau Mauxes npautaws kawg li, Mauxes thiaj lam tau lam hais lus tsis xav tom ntej tom qab. Lawv tsis muab cov yeebncuab tua kom tuag tas raws li tus TSWV hais, tiamsis lawv mus nrog cov neeg ntawd ua tshoob ua kos, thiab mus xyaum ua raws li cov neeg ntawd ua. Vajtswv haivneeg mus pe mlom, lawv thiaj mus mag luag lub vojhlua. Lawv muab lawv tej tub tej ntxhais tua fij rau tej mlom hauv tebchaws Kana-as. Lawv muab lawv tej menyuam uas tsis muaj txim tua; vim lawv tua neeg li ntawd, lawv lub tebchaws thiaj tsis huv lawm. Tej uas lawv ua ntawd, ua rau lawv tsis huv, thiab lawv tsis muab siab npuab Vajtswv lawm. Yog li ntawd, tus TSWV thiaj chim rau nws haivneeg; thiab nws dhuav lawv heev. Nws muab lawv cob rau lwm haivneeg txhais tes, thiab cia lawv cov yeebncuab tuaj kav lawv. Lawv raug lawv cov yeebncuab tsimtxom thiab raug yuam ua qhev. Tus TSWV tau pab lawv ntau zaus lawm, tiamsis lawv txhob txwm ntxeev siab rau nws, thiab lawv tau mus ua kev txhaum loj heev. Txawm li ntawd los, thaum lawv thov tus TSWV, nws hnov lawv tej suab quaj, thiab nws pab lawv dim kev txomnyem. Vim nws hlub tshua lawv, nws thiaj nco txog nws tej lus cog tseg, thiab vim nws txojkev hlub loj heev, nws thiaj hloov siab. Nws ua rau cov neeg uas tsimtxom lawv paub tu siab rau tej uas lawv ua limhiam ntawd. Tus TSWV uas yog peb tus Vajtswv, thov cawm peb, thiab coj peb ntawm hauv lwm haivneeg rov qab los kom peb thiaj tau ua koj tsaug thiab qhuas koj lub npe uas dawbhuv. Cia li qhuas tus TSWV uas yog cov Yixalayees tus Vajtswv; cia li qhuas nws nimno thiab qhua mus ibtxhis li. Thiab sawvdaws hais tias, “Amees!” Cia li qhuas tus TSWV! “Cia li ua tus TSWV tsaug, nws yog tus muaj lub siab zoo; nws txojkev hlub nyob mus ibtxhis!” Nej cov uas tus TSWV cawm dim lawm, cia li rov hais cov lus no txhua zaus uas nej qhuas tus TSWV. Nws tau cawm nej dim ntawm nej cov yeebncuab, thiab coj nej tawm hauv lwm haivneeg tej tebchaws, tsis hais sab hnubtuaj, sab hnubpoob, sab qaumteb thiab sab qabteb rov los. Muaj ibtxhia mus mus los los tom tiaj suabpuam, vim lawv nrhiav tsis tau kev mus rau hauv lub nroog uas lawv yuav mus nyob. Lawv tshaib plab thiab nqis dej heev, lawv tsis muaj chaw cia siab rau qhov twg li. Thaum lawv raug kev nyuaj siab, lawv hu txog tus TSWV, nws cawm lawv dim kev txomnyem. Nws coj lawv taug kev ncaj nraim mus rau hauv lub nroog uas lawv nyob. Lawv yuav tsum ua tus TSWV tsaug vim nws txojkev hlub uas tsis paub kawg, thiab vim tej txujci tseemceeb uas nws tau ua pab lawv lawm. Nws pub dej rau cov neeg nqhis dej haus kom txaus siab, thiab pub zaub mov zoo rau cov neeg tshaib plab noj tsau npo. Muaj qee leej nyob hauv txojkev uas tsaus ntuj nti thiab nyuaj siab ntxhov plawv kawg li, lawv raug luag muab saw hlau khi rau txim txomnyem ntsuav; vim lawv tawv nyom tus Vajtswv uas muaj hwjchim loj kawg nkaus tej lus samhwm thiab tsis mloog nws tej lus qhia. Lawv qaug zog vim ua haujlwm hnyav heev; lawv ntog los tsis muaj leejtwg pab lawv. Thaum lawv raug kev nyuaj siab, lawv hu tus TSWV, nws cawm lawv dim txojkev txomnyem. Nws coj lawv tawm hauv txojkev nyuaj siab thiab ntxhov plawv uas tsaus ntuj nti los, thiab nws ua rau tej saw hlau uas khi lawv tu pes nrho. Lawv yuav tsum ua tus TSWV tsaug vim nws txojkev hlub uas tsis paub kawg, thiab vim nws tej txujci tseemceeb uas nws tau ua pab lawv lawm. Nws tsoo tej qhovrooj uas yog tooj povtseg, thiab tsoo tej nqaj hlau ntsoog mos nyoos. Muaj qee leej ruam thiab raug txomnyem vim tej kev txhaum thiab kev phem kev qias uas lawv ua; lawv dhuav zaub mov kawg li, lawv twb yuav tuag. Thaum lawv raug kev nyuaj siab, lawv hu tus TSWV, nws cawm lawv dim tej kev txomnyem. Tus TSWV hais xwb, ces lawv tej mob txawm zoo thiab nws cawm lawv dim txojkev tuag. Lawv yuav tsum ua tus TSWV tsaug vim nws txojkev hlub uas tsis paub kawg, thiab vim tej txujci tseemceeb uas nws tau ua pab lawv lawm. Lawv yuav tsum fij khoom ua nws tsaug thiab zoo siab luag ntxhi hu nkauj qhia txhua yam uas tus TSWV tau ua lawm rau sawvdaws mloog. Muaj qee leej tsav nkoj mus los saum hiavtxwv, ua lag ua luam nrhiav noj. Lawv pom tej haujlwm uas tus TSWV muaj tswvyim ua tau, yog nws tej txujci tseemceeb uas nyob hauv hiavtxwv. Vajtswv hais xwb, ces txawm muaj tej nthwv cua ntsawj tuaj ua rau dej ntas nphau nphwv. Tej nkoj tshoom pes plaws rau nruab ntug thiab poob rov los rau qhov tob. Tej xwm no ua rau neeg poob siab thiab ntshai kawg; lawv ntog pujpoog ib yam li neeg qaug cawv, lawv tej kev txawj ntse pab tsis tau lawv lawm. Thaum lawv raug kev nyuaj siab lawv hu tus TSWV, nws cawm lawv dim txojkev txomnyem. Nws ua rau tej cua daj cua dub tu, thiab ua rau dej hiavtxwv nyob tus yees. Lawv zoo siab heev vim cua daj cua dub tu thiab dej hiavtxwv tus lawm. Tus TSWV coj lawv los txog ntua lub chaw nres nkoj raws li lawv lub siab xav tsis raug kev nyuaj siab li cas. Lawv yuav tsum ua tus TSWV tsaug vim nws txojkev hlub uas tsis paub kawg, thiab vim tej txujci tseemceeb uas nws tau ua pab lawv lawm. Lawv yuav tsum piav tus TSWV lub hwjchim loj rau zej tsoom sawvdaws paub, thiab qhuas nws rau ib tsoom thawjcoj uas tuaj ua ke sablaj mloog. Tus TSWV ua rau tej dej tu qhuav qhawv thiab ua rau tej dej cag tu nrho tsis ntws li lawm. Nws ua rau tej av rog qab ntsev tsis zoo cog dabtsi, vim cov neeg uas nyob hauv thaj av ntawd ua phem ua qias. Nws muab tej tiaj suabpuam hloov ua pasdej; thiab ua kom muaj qhovdej txhawv hauv tebchaws mojsab qhua. Nws cia cov neeg tshaib nqhis los nyob rau hauv, ces lawv txawm rhawv nroog nyob rau qhov ntawd. Lawv cog qoob thiab txiv hmab rau hauv tej teb thiab sau tau qoobloo ntau nplua mias. Nws foom koob hmoov rau nws haivneeg muaj tubki huamvam coob; nws tsis pub lawv tej tsiaj txhu tus noob li. Thaum Vajtswv haivneeg swb rog, vim raug luag tsimtxom thiab raug kev txomnyem, thaum ntawd Vajtswv thuam thiab saib tsis taus cov nomtswv, thiab ua kom lawv mus mus los los tom tiaj suabpuam uas tsis muaj kev. Tiamsis nws cawm cov neeg pluag kom dim txojkev txomnyem, thiab pub kom lawv tej tubki huamvam coob ib yam li tej pab yaj. Thaum cov neeg ncaj ncees pom tej xwm no mas lawv zoo siab kawg li, tiamsis cov neeg ua phem nyob ntsiag to tsis hais ib lo lus li. Thov kom cov neeg muaj tswvyim ras txog tej no; thov kom lawv lees paub hais tias tus TSWV yog tus uas muaj kev hlub uas tsis paub kawg. Vajtswv, kuv cia siab rau koj tib leeg xwb! Kuv yuav hu nkauj thiab qhuas koj! Kuv lub siab, cia li tsim dheev! Kuv lub raj thiab lub nkauj nogncas, cia li tsim dheev! Kuv yuav tsa kom lub hnub sawv. Tus TSWV uas nrog nraim txhua haivneeg nyob, kuv yuav ua koj tsaug. Kuv yuav qhuas koj tabmeeg ib tsoom tebchaws. Koj txojkev hlub uas tsis paub kawg siab mus nto ntuj; thiab koj txojkev ncaj ncees siab nto plaws ntuj ntsuab. Vajtswv, thov qhia koj lub hwjchim loj rau saum nruab ntug, thiab qhia koj lub tshwjchim uas ci ntsa iab rau neeg ntiajteb pom. Thov siv koj lub zog cawm peb; teb kuv tej lus thov kom haivneeg uas koj hlub thiaj li dim. Vajtswv hais lus hauv nws chav uas dawbhuv tuaj hais tias, “Kuv yog tus muaj yeej lawm, kuv yuav muab lub nroog Sekhees faib, thiab muab lub Hav Xukaus faib rau kuv haivneeg. Nkile-as thiab Manaxes puavleej yog kuv tug; Efalayees yog kuv lub kausmom thiab Yudas yog kuv tus cwj. Tiamsis kuv yuav siv Mau-am ua kuv lub tais ntxuav tes, kuv yuav muab kuv nkawm khau khiab pov rau hauv tebchaws Edoos, ua cim qhia hais tias lub tebchaws ntawd yog kuv tug lawm. Kuv yuav qw lub suab muaj yeej rau cov Filitees.” Vajtswv, leejtwg yuav coj kuv mus rau hauv lub nroog uas ruaj khov? Leejtwg yuav coj kuv mus rau hauv tebchaws Edoos? Vajtswv, koj tso peb tseg lawm los? Koj txawm yuav tsis nrog peb cov tubrog mus li los? Cia li pab peb tawmtsam tus yeebncuab ntawd; neeg txojkev pab tsis muaj qabhau dabtsi li. Yog Vajtswv tuaj peb tog peb yuav kovyeej; nws yuav ua rau peb cov yeebncuab swb. Vajtswv, kuv qhuas koj; thov koj tsis txhob nyob ntsiag to! Cov neeg siab phem thiab dag ntxias tuaj tawmtsam kuv, thiab lawv hais lus dag rhuav kuv rau ub rau no, thiab lawv hais tej lus phem qias rau kuv, thiab lawv lam tau lam tawmtsam kuv tsis muaj qabhau li. Txawm yog kuv hlub lawv thiab thov Vajtswv pab lawv, los lawv pheej tawmtsam kuv li. Lawv ua phem pauj kuv tej kev ua zoo thiab lawv muab kev ntxub pauj kuv tej kev hlub. Cia li xaiv ib tug txiav txim tsis ncaj mus sim kuv tus yeebncuab, thiab cia nws cov yeebncuab ib tug tuaj nkaug nws. Thov kom nws yog tus uas luag hais tias nws yog tus txhaum, thiab thov kom nws tej lus thov rov rau txim rau nws. Thov tsis txhob pub nws muaj sia nyob ntev; cia lwm tus los ua nws tes haujlwm. Thov kom nws cov menyuam ua ntsuag, thiab nws tus pojniam ua pojntsuam. Thov kom nws cov menyuam ua neeg lojleeb tsis muaj vajtse nyob; thov kom lawv raug raws tawm hauv lawv tej tsev uas puas tas ntawd mus! Thov kom cov neeg uas qiv rau nws tuaj txeeb nws vaj nws tsev; thov cia luag tuaj txeeb txhua yam uas nws khwv tau mus huv tibsi. Thov kom tsis txhob muaj ib tug twg ua zoo rau nws, lossis tsis txhob quavntsej tej menyuam ntsuag uas nws tso tseg li. Thov kom nws cov xeebntxwv tuag tas huv tibsi, kom tiam neeg tom ntej no tsis txhob muaj leejtwg nco txog nws lub npe li lawm. Thov kom tus TSWV nco ntsoov nws cov yawgkoob tej kev phem kev qias, thiab tsis txhob zam nws niam tej kev txhaum hlo li. Thov Vajtswv nco ntsoov lawv tej kev txhaum, tiamsis thov tsis txhob nco txog lawv hlo li lawm. Tus neeg ntawd tsis muaj lub siab dawb siab zoo; nws tsimtxom thiab tua cov neeg pluag, cov txomnyem thiab cov uas tas kev cia siab. Nws nyiam foom phem rau luag, thov kom nws tej lus foom phem ntawd rov los raug nws! Nws ntxub txojkev foom koob hmoov zoo rau luag, thov kom tsis txhob muaj neeg foom koob hmoov zoo rau nws. Nws muab tej lus foom phem los hnav ib yam li hnav ris tsho! Thov kom nws tej lus foom phem nkag mus rau hauv nws lub cev ib yam li dej, thiab nkag mus rau hauv nws cov pobtxha ib yam li roj. Thov kom tej lus foom phem ntawd looj nkaus nws li tej tsoo tsho thiab rig nws lub cev li txoj siv. Tus TSWV, thov koj rau txim rau kuv cov yeebncuab li ntawd, cov uas pheej hais lus phem tawmtsam kuv! Tiamsis tus TSWV uas kav ib puas tsav yam, thov koj pab kuv raws li koj tau coglus tseg lawm, thiab thov tso kuv dim vim koj txojkev hlub uas zoo kawg nkaus. Kuv pluag thiab txomnyem heev, tu kuv siab kawg li. Kuv tabtom yuav ploj mus ib yam li tus duab ntxoov ntxoo thaum yuav tsaus ntuj; kuv raug muab xyeeb povtseg ib yam li tus kooj. Kuv ob lub hauvcaug tsaug tsis muaj zog vim tsis tau mov noj; kuv yuag heev tshuav tawv qhwv txha lawm xwb. Thaum tej neeg pom kuv, lawv luag kuv nplig; lawv thuam kuv co hau nto. Tus TSWV uas yog kuv tus Vajtswv, thov koj pab kuv; vim koj yog tus muaj txojkev hlub uas tsis paub kawg, thov cawm kuv lauj! Thov ua rau kuv cov yeebncuab paub hais tias, yog koj txhais tes cawm kuv dim. Txawm yog lawv foom phem rau kuv, los koj yuav foom koob hmoov rau kuv. Thov kom cov neeg uas tsimtxom kuv swb hlo mus, thiab thov cia kuv uas yog koj tus tubtxib zoo siab. Thov kom kuv cov yeebncuab raug txajmuag; thov kom txojkev txajmuag looj nkaus lawv ib yam li hnav ris tsho. Kuv yuav tsa suab ua tus TSWV tsaug; kuv yuav qhuas nws tabmeeg ib tsoom neeg sawvdaws uas tuaj txoos ua ke, rau qhov nws tuaj tus neeg pluag tog, thiab cawm tus pluag dim ntawm cov neeg uas rau txim rau nws. Tus TSWV hais rau kuv tus tswv hais tias, “Koj cia li zaum ntawm kuv sab xis mus txog thaum kuv muab koj cov yeebncuab los rau nej tsuj.” Tus TSWV yuav nthuav koj lub hwjchim ua vajntxwv hauv lub nroog Xi-oos mus kom dav. Nws hais tias, “Koj cia li kav koj cov yeebncuab huv tibsi.” Hnub uas koj tawmtsam koj cov yeebncuab koj haivneeg yuav yeem tuaj koj tog. Koj cov tub hluas yuav tuaj cuag koj saum lub roob dawbhuv ib yam li tej lwg uas ntsu thaum sawv ntxov. Tus TSWV tau coglus li cas lawm, nws yeej tsis hloov li: “Koj yuav ua povthawj mus ibtxhis raws li Mekhixedes tau ua los lawm.” Tus TSWV nyob rawv ntawm koj sab xis; thaum nws chim, nws yuav ua kom tej vajntxwv swb hlo. Nws yuav txiav txim rau txhua haivneeg thiab ua kom neeg tuag pawglug rau hauv tshavrog; nws yuav kovyeej tej vajntxwv uas nyob thoob plaws ntiajteb. Vajntxwv yuav haus tus dej uas ntws raws ntug kev, tus dej ntawd yuav txhawb nws lub zog kom nws muaj yeej. Qhuas tus TSWV! Kuv yuav ua tus TSWV tsaug kawg siab kawg ntsws tabmeeg Vajtswv haivneeg uas tuaj sib sau ua ke. Tej txujci tseemceeb uas tus TSWV ua loj kawg li! Txhua tus uas txaus siab rau tej txujci ntawd, mas lawv xav paub tej txujci ntawd kawg li. Txhua yam uas tus TSWV ua tseemceeb thiab muaj koob meej kawg li; nws txojkev ncaj ncees nyob mus ibtxhis. Tus TSWV yeej ua kom peb nco ntsoov nws tej txujci tseemceeb mus li; nws yog tus muaj lub siab zoo thiab hlub tshua sawvdaws. Nws pub rau cov neeg uas hwm nws muaj noj muaj haus tsis tu pluas; nws yeej nco ntsoov nws tej lus cog tseg mus li. Nws qhia nws lub hwjchim loj rau nws haivneeg uas yog nws muab lwm haivneeg tej tebchaws rau lawv. Ib puas tsav yam uas nws ua puavleej tseeb thiab ncaj ncees; nws tej lus qhia yog tej uas cia siab tau. Nws tej lus qhia kav mus ibtxhis; tej lus ntawd qhia qhov tseeb thiab qhov ncaj. Nws tso nws haivneeg dim thiab coglus rau lawv mus ibtxhis. Nws yog tus Dawbhuv thiab muaj hwjchim loj kawg li! Tus uas hwm tus TSWV, tus ntawd thiaj yog tus muaj tswvyim, nws pub kev totaub rau cov uas mloog nws tej lus samhwm. Tsimnyog qhuas nws lub npe mus ibtxhis. Cia li qhuas tus TSWV! Tus uas hwm tus TSWV yog tus uas tau koob hmoov, tus uas txaus siab mloog tus TSWV tej lus yog tus uas tau kev zoo siab. Tus neeg siab zoo cajces yuav muaj hwjchim hauv lub tebchaws, nws cov xeebntxwv yuav tau koob hmoov. Nws cajces yuav muaj txiag nplua nuj thiab yuav vammeej mus li. Txawm yog cov neeg ncaj ncees nyob rau hauv qhov tsaus ntuj los qhov kaj yuav ci pom kev kaj nrig rau lawv, vim lawv muaj lub siab ncaj, hlub thiab tshua lwm tus. Tus uas ua siab dawb paug qiv rau luag, thiab ua haujlwm ncaj ncees yog tus uas tau koob hmoov. Tus uas ua ncaj ncees lub koob meej yuav tsis poob, luag yuav nco ntsoov nws mus ibtxhis. Txawm yog hnov tej xov tsis zoo los nws yeej tsis ntshai; nws ntseeg ruaj thiab tso siab rau tus TSWV. Nws tsis txhawj thiab tsis ntshai li; nws paub hais tias nws cov yeebncuab yuav swb. Nws ua siab dawb paug pub rau cov pluag, thiab nws hlub luag tsis tu li; nws yuav tau koob meej thiab sawvdaws yuav hwm nws. Cov neeg siab phem pom tej no mas lawv chim heev; lawv zawm hniav zog thiab ntxub nws heev los lawv kuj ploj tas; lawv tas kev cia siab mus ibtxhis li. Cia li qhuas tus TSWV! Nej cov uas yog tus TSWV cov tubtxib, nej cia li qhuas nws lub npe! Nej cia li qhuas nws lub npe, nimno thiab mus ibtxhis li. Cia li qhuas tus TSWV lub npe sab hnubtuaj mus ti sab hnubpoob. Tus TSWV uas kav txhua haivneeg, nws lub tshwjchim uas ci ntsa iab siab tshaj lub ntuj. Tsis muaj leejtwg zoo cuag tus TSWV uas yog peb tus Vajtswv lawm; nws zaum saum qhov chaw uas siab tshaj plaws, tiamsis nws nyob saud saib tuaj rau lub ntuj thiab lub ntiajteb. Nws tsa cov neeg pluag sawv hauv av los; nws rub cov neeg txomnyem tes hauv qhov tshauv los, thiab cia lawv mus nrog tej nomtswv zaum tau ua ke, yog tej nomtswv uas kav Vajtswv haivneeg. Nws pub tus pojniam uas tsis muaj menyuam kom muaj tsev nyob; nws pub tus pojniam ntawd muaj menyuam kom nws muaj kev zoo siab. Cia li qhuas tus TSWV! Thaum cov Yixalayees tawm hauv tebchaws Iziv los, thaum uas Yakhauj cov xeebntxwv tawm ntawm lwm haivneeg mus lawm, Cov Yudas tau ua tus TSWV haivneeg uas dawbhuv, thiab cov Yixalayees tau ua Vajtswv tug. Hiavtxwv Liab cia li qhuav thaum pom tus TSWV; tus Dej Yauladees cia li tsis ntws thaum pom tus TSWV. Tej hauv roob dhia caws qia li tej laug yaj; tej pov roob dhia tawg ncig lees li tej menyuam yaj. Hiavtxwv, vim li cas koj thiaj qhuav lawm? Thiab tus dej Yauladees, vim li cas koj thiaj tsis ntws lawm? Tej hauv roob, vim li cas nej thiaj dhia caws qias li tej laug yaj? Tej pov roob, vim li cas nej thiaj dhia tawg ncig lees li tej menyuam yaj? Thaum tus TSWV uas yog Yakhauj tus Vajtswv los, lub ntiajteb ua zog koog tabmeeg nws. Nws yog tus Vajtswv uas ua rau dej tawm hauv pobzeb los thiab ua rau tej tus dej ntws tawm hauv roob tsuas los. Tus TSWV, koj tib leeg, koj tib leeg xwb, thiaj yog tus tau koob meej! Peb tsis tsimnyog tau, rau qhov koj yog tus ncaj ncees thiab muaj txojkev hlub uas tsis paub kawg. Vim li cas lwm haivneeg yuav nug peb hais tias, “Nej tus Vajtswv nyob qhov twg?” Peb tus Vajtswv nyob saum ntuj; nws ua ib puas tsav yam raws li nws xav ua. Lawv tej mlom yog muab nyiaj thiab kub nchuav, tej ntawd puavleej yog neeg txhais tes ua xwb. Tej mlom ntawd muaj qhovncauj, tiamsis tsis txawj hais lus; muaj qhovmuag, tiamsis tsis pom kev; muaj pobntseg, tiamsis tsis hnov lus; muaj qhovntswg, tiamsis tsis hnov ntxhiab; muaj tes, tiamsis tsis txawj kov dabtsi, muaj kotaw, tiamsis tsis txawj tshais ruam; tej mlom ntawd ua tsis tau suab rov hauv qa tuaj li. Cov neeg uas nchuav mlom thiab cia siab rau tej mlom ntawd, lawv zoo li tej mlom uas lawv ncuav ntawd ntag. Cov Yixalayees, nej cia li tso siab rau tus TSWV. Nws yog tus pab nej thiab tiv thaiv nej. Vajtswv cov povthawj, nej cia li tso siab rau tus TSWV; Nws yog tus pab nej thiab tiv thaiv nej. Txhua tus uas pehawm tus TSWV, nej cia li tso siab rau tus TSWV; Nws yog tus pab nej thiab tiv thaiv nej. Tus TSWV nco ntsoov peb thiab yuav foom koob hmoov rau peb; tus TSWV yuav foom koob hmoov rau cov Yixalayees thiab rau Vajtswv cov povthawj txhua tus. Nws yuav foom koob hmoov rau txhua tus uas hwm nws, tsis hais tus hlob tus yau huv tibsi. Thov tus TSWV pub kom nej thiab nej cov tubki muaj xeebntxwv coob! Thov tus TSWV uas tsim lub ntuj thiab lub ntiajteb, foom koob hmoov rau nej. Lub ntuj yog Vajtswv tib leeg li, tiamsis nws muab lub ntiajteb pub rau neeg nyob. Tus tuag uas mus nyob hauv lub chaw uas ntsiag to yeej tsis txawj qhuas tus TSWV lawm. Tiamsis peb cov uas muaj sia nyob peb yuav ua nws tsaug, nimno thiab mus ibtxhis li. Cia li qhuas tus TSWV! Kuv hlub tus TSWV, vim nws hnov kuv tej lus; nws mloog kuv tej lus thov. Txhua zaus uas kuv thov nws, nws mloog kuv tej lus thov. Kev ploj kev tuag nyob ibncig kuv; lub qhov tuag nyob rawv tos kuv, ua rau kuv ntshai thiab lwj siab ntsuav li xwb. Ces kuv thov tus TSWV hais tias, “Tus TSWV, kuv thov koj cawm kuv txojsia lauj!” Tus TSWV yog tus muaj lub siab dawb siab zoo thiab ncaj ncees; peb tus Vajtswv yog tus muaj txojkev hlub. Tus TSWV tiv thaiv tus uas tas kev cia siab; thaum kuv raug kev txomnyem, nws cawm kuv dim. Kuv lub siab, cia li tso siab plhuav, rau qhov tus TSWV ua zoo rau kuv. Tus TSWV cawm kuv dim txojkev tuag; nws so kuv lub kua muag thiab tsis pub kuv swb li. Yog li ntawd, kuv thiaj ua kuv lub neej hauv ntiajteb no nrog cov neeg uas muaj sia nyob tabmeeg tus TSWV. Txawm yog muaj qee zaus kuv yws hais tias, “Kuv txomnyem heev,” thiab thaum kuv ntshai, kuv hais tias, “Kuv tsis tso siab rau leejtwg li los kuv tseem ntseeg tus TSWV.” Tus TSWV ua txhua yam zoo rau kuv, kuv yuav muab dabtsi pauj nws txiaj ntsig? Kuv yuav coj cawv txiv hmab tuaj fij rau tus TSWV, ua nws tsaug rau qhov nws cawm kuv dim. Hnub uas Vajtswv haivneeg tuaj txoos ua ke kuv yuav coj tej uas kuv tau coglus tseg lawm tuaj fij rau nws. Thaum tus TSWV cov neeg ib tug uas muab siab npuab nws tuag, mas tus TSWV mob siab kawg li. Tus TSWV, kuv yog koj tus tubtxib; kuv ua koj tes haujlwm ib yam li kuv niam uas yog koj tus ntxhais qhev ua ntag. Koj twb daws txoj saw hlau uas khi kuv lawm. Kuv yuav muab khoom fij ua koj tsaug thiab thov koj; Txhua haivneeg cia li qhuas tus TSWV! Ib tsoom neeg sawvdaws cia li qhuas tus TSWV! Tus TSWV txojkev hlub uas hlub peb mas loj kawg li, thiab nws txojkev ua ncaj ncees nyob mus ibtxhis li. Cia li qhuas tus TSWV! Cia li ua tus TSWV tsaug, rau qhov nws yog tus muaj lub siab zoo, thiab nws txojkev hlub nyob mus ibtxhis. Thov kom ib tsoom Yixalayees hais tias, “Nws txojkev hlub nyob mus ibtxhis.” Thov kom Vajtswv cov povthawj hais tias, “Nws txojkev hlub nyob mus ibtxhis.” Thov kom txhua tus uas pehawm tus TSWV hais tias, “Nws txojkev hlub nyob mus ibtxhis.” Thaum kuv ntxhov siab, kuv thov tus TSWV; nws teb kuv thiab tso kuv dim. Tus TSWV nrog nraim kuv nyob, kuv yuav tsis ntshai li; leejtwg muaj peevxwm ua tau li cas rau kuv? Twb yog tus TSWV tuaj kuv tog pab kuv, kuv yuav pom ntsoov kuv cov yeebncuab swb. Cia siab rau tus TSWV zoo dua qhov uas tso siab rau neeg. Cia siab rau tus TSWV zoo dua qhov uas tso siab rau tej nomtswv uas yog neeg. Muaj yeebncuab coob nyob ibncig kuv; tiamsis vim tus TSWV lub hwjchim kuv yuav ua kom lawv puastsuaj! Lawv nyob ibncig kuv txhua phab; tiamsis vim tus TSWV lub hwjchim kuv yuav ua kom lawv puastsuaj! Lawv sau nthwv ib yam li tej ntab tuaj vij puagncig kuv, tiamsis lawv yuav kub hnyiab ib yam li hluavtaws kub tej hmab pos. Vim tus TSWV lub hwjchim kuv yuav ua kom lawv puastsuaj. Luag tawmtsam kuv heev ua rau kuv yuav luag swb, tiamsis muaj tus TSWV pab kuv. Tus TSWV ua rau kuv muaj cuabkav thiab muaj zog; nws yog tus cawm kuv dim. Cia li mloog lub suab hu nkauj muaj yeej zoo siab uas nrov hauv Vajtswv haivneeg tej tsevntaub hais tias, “Yog tus TSWV lub hwjchim uas loj kawg nkaus tau ua tej ntawd! Nws lub hwjchim uas loj kawg nkaus ua rau peb muaj yeej, nws lub zog loj nrog peb mus hauv tshavrog!” Kuv yuav tsis tuag, tiamsis kuv yuav muaj sia nyob, thiab qhia tej uas tus TSWV tau ua lawm. Nws rau txim hnyav heev rau kuv, tiamsis nws tsis cia kuv tuag. Cia li qhib tej roojvag uas yog kev ncaj ncees rau kuv, kuv yuav mus rau hauv thiab ua tus TSWV tsaug! Ntawm no yog tus TSWV lub roojvag; tsuas yog tus neeg ncaj ncees thiaj mus tau rau hauv xwb. Tus TSWV, kuv ua koj tsaug rau qhov koj teb kuv tej lus thov, thiab koj pab kuv dim. Lub pobzeb uas cov kws ua tsev muab povtseg, luag twb muab lub pobzeb ntawd rov los ua lub thawj lawm. Qhov ntawd twb yog tus TSWV ua; tej ntawd ua rau peb xav tsis thoob li. Hnub no yog ib hnub uas tus TSWV pub rau peb muaj yeej; peb cia li zoo siab thiab txaus siab rau hnub no! Tus TSWV, thov cawm peb, thov cawm peb lauj! Tus TSWV, thov pab kom peb ua tau txhua yam tiav! Thov Vajtswv foom koob hmoov rau tus uas Vajtswv txib los! Peb foom koob hmoov hauv tus TSWV lub Tuamtsev rau koj. Tus TSWV yog Vajtswv; nws ua zoo kawg rau peb. Cia li nqa tej ceg ntoo mus ua kevcai ncig lub thaj. Koj yog kuv tus Vajtswv, kuv ua koj tsaug; koj yog kuv tus Vajtswv, kuv yuav qhia koj lub hwjchim uas loj rau sawvdaws. Cia li ua tus TSWV tsaug, rau qhov nws yog tus muaj lub siab zoo, thiab nws txojkev hlub nyob mus ibtxhis. Cov neeg uas ua lub neej tsis muaj leejtwg thuam tau, thiab ua lub neej raws li tus TSWV txoj kevcai yog cov uas tau koob hmoov. Cov neeg uas ua lub neej raws li Vajtswv tej lus samhwm, thiab hwm nws kawg siab kawg ntsws yog cov uas tau koob hmoov. Lawv tsis ua kev phem kev qias, tiamsis lawv ua lub neej raws li tus TSWV tej lus qhia. Tus TSWV, koj tau muab koj tej kevcai cob rau peb, thiab qhia kom peb niaj hnub coj raws li tej kevcai ntawd. Thov pab kom kuv muaj lub siab npuab koj thiab ua raws li koj tej kevcai. Yog kuv ua raws li koj tej lus samhwm, ces kuv yuav tsis poob ntsejmuag li. Thaum kuv paub koj tej kevcai ncaj ncees lawm, kuv yuav qhuas koj ntawm lub siab dawb paug. Kuv yuav hwm koj tej kevcai; thov koj tsis txhob tso kuv tseg! Yuav ua li cas ib tug tub hluas thiaj ua tau nws lub neej kom dawbhuv? Yog nws yuav tsum coj raws li koj tej lus samhwm. Kuv ua koj tes haujlwm kom zoo kawg kuv lub siab lub ntsws; thov pab kom kuv txhob tawv dhau koj tej lus samhwm. Kuv khaws koj tej lus rau hauv kuv lub siab, kuv thiaj tsis ua txhaum rau koj. Tus TSWV, kuv qhuas koj; thov qhia koj tej kevcai rau kuv. Kuv yuav muab tej kevcai uas koj qhia rau kuv lawm cim rau nruab siab. Kuv txaus siab ua raws li koj tej lus samhwm heev dua li txaus siab rau kev muaj txiag npluanuj. Kuv yuav niaj hnub kawm koj tej kevcai thiab cim ntsoov koj tej lus. Kuv txaus siab heev rau koj tej kevcai, thiab kuv yuav nco ntsoov koj tej lus samhwm. Thov koj ua zoo rau kuv uas yog koj tus tubtxib, kom kuv thiaj muaj txojsia nyob mloog koj tej lus. Thov koj qhib kuv ob lub qhovmuag kom kuv paub koj txoj kevcai thiab pom koj tej txujci tseemceeb. Kuv ua neej nyob hauv ntiajteb no ib vuag xwb, thov tsis txhob muab koj tej lus samhwm zais tsis qhia kuv paub. Kuv lub siab xav paub koj tej kevcai txhua lub sijhawm los ntev lawm. Koj cem cov neeg khavtheeb, thiab foom tsis zoo rau cov neeg uas tsis mloog koj tej lus samhwm. Thov koj pab kom kuv dim ntawm cov neeg uas saib tsis taus kuv thiab thuam kuv, rau qhov kuv niaj hnub ua raws li koj tej kevcai. Txawm yog tej nomtswv tuavhauv ntxeev siab rau kuv, los kuv yuav kawm koj tej lus qhia tsis tso tseg li. Koj tej lus ua rau kuv muaj kev kaj siab; tej lus ntawd yog tej uas qhuab ntuas kuv. Kuv twb yuav tuag, kuv pw rau hauv av lawm xwb; thov koj tsa kuv sawv rov los raws li koj tau coglus tseg lawm. Thaum kuv qhia txhua yam uas kuv tau ua tas los, thiab koj teb kuv tej lus thov lawm, thov koj qhia koj tej kevcai rau kuv. Thov pab kom kuv totaub koj tej kevcai, thiab kuv yuav xav ntsoov koj tej lus qhuab qhia uas zoo rau nruab siab. Tej kev nyuaj siab ua rau kuv lwj siab ntsuav; thov txhawb kuv lub zog raws li koj tau coglus tseg lawm. Thov koj ua zoo rau kuv thiab qhia koj tej kevcai rau kuv kom kuv thiaj tsis yuam kev mus ua txhaum. Kuv xaiv txojkev uas muab lub siab npuab koj; kuv ua lub neej raws li koj tej kevcai. Tus TSWV, kuv yeej ua raws li koj tej kevcai; thov tsis txhob cia kuv poob ntsejmuag. Kuv yuav maj nroos ua raws li koj tej lus samhwm, rau qhov koj yuav ua rau kuv totaub tej lus ntawd. Tus TSWV, thov qhia koj tej kevcai lub ntsiab rau kuv, kuv yuav niaj hnub ua raws li tej kevcai ntawd. Thov qhia kom kuv totaub koj tej kevcai, kuv yuav coj tej kevcai ntawd kom kawg siab kawg ntsws. Thov coj kuv txoj haukev kom mus raws li koj tej lus samhwm, rau qhov txoj kevcai ntawd ua rau kuv muaj kev kaj siab. Thov koj pub kom kuv muaj lub siab txawj ntshaw koj tej kevcai heev dua kev muaj txiag npluanuj. Thov koj pab kom kuv tswj tau kuv ob lub qhovmuag, tsis txhob saib tej yam tsis zoo; thov koj ua zoo rau kuv raws li koj tau coglus tseg lawm. Thov koj ua raws li tej lus uas koj cog tseg rau kuv uas yog koj tus tubtxib, yog tej lus uas koj cog tseg rau cov neeg uas hwm koj. Thov tshem txojkev poob ntsejmuag uas kuv ntshai kom deb ntawm kuv, rau qhov koj txoj kevcai ncaj ncees. Kuv xav ua raws li koj tej lus samhwm, kuv lub siab xav ntsoov rau koj tej kevcai; thov pub txojsia tshiab rau kuv, rau qhov koj yog tus ncaj ncees. Tus TSWV, thov qhia rau kuv paub hais tias koj yeej hlub kuv tiag, thiab cawm kuv raws li koj tau coglus tseg lawm. Kuv thiaj muaj lus teb cov neeg uas pheej thuam kuv, rau qhov kuv cia siab rau koj tej lus. Thov pab kom kuv niaj hnub hais koj tej lus tseeb, rau qhov kuv cia siab ntsoov rau koj tej kevcai. Kuv yuav niaj hnub ua raws li koj tej kevcai mus ibtxhis li. Kuv yuav ua neej nyob tso siab plhuav, rau qhov kuv ua lub neej raws li koj tej kevcai. Kuv yuav piav koj tej kevcai rau cov vajntxwv mloog, kuv yuav tsis txajmuag li. Kuv ua neej raws li koj tej lus samhwm ua rau kuv muaj kev kaj siab, rau qhov kuv nyiam tej lus samhwm ntawd heev. Kuv nyiam thiab hwm koj tej lus samhwm; kuv lub siab yuav xav ntsoov txog koj tej kevcai. Thov koj nco ntsoov tej lus uas koj tau cog tseg rau kuv uas yog koj tus tubtxib lawm; tej lus cog tseg ntawd ua rau kuv muaj kev cia siab. Txawm yog kuv raug kev txomnyem los tseem muaj koj txojlus nplig kuv siab, rau qhov koj tej lus cog tseg ua rau kuv muaj sia nyob. Cov neeg uas khavtheeb pheej txob thuam kuv, tiamsis kuv yeej tsis tso koj tej kevcai tseg li. Tus TSWV, thaum kuv xav txog koj tej kevcai uas muaj nyob thaum ub los lawm, tej ntawd txhawb kuv zog kawg li. Thaum kuv pom cov neeg siab phem tsis coj koj tej kevcai, mas mob kuv siab kawg li. Thaum kuv tseem ua neej nyob hauv lub ntiajteb no, kuv tau muab koj tej kevcai sau ua nkauj hu. Tus TSWV, thaum tsaus ntuj los kuv yeej nco ntsoov koj lub npe, thiab kuv ua raws li koj txoj kevcai. Thaum kuv ua raws li koj tej lus samhwm, mas kuv muaj kev kaj siab kawg li. Tus TSWV, koj yog ib puas tsav yam uas kuv xav yuav; kuv coglus tseg hais tias yuav ua raws li koj txoj kevcai. Kuv thov koj kawg siab kawg ntsws kom koj hlub kuv raws li koj tau coglus tseg lawm. Kuv twb tshuaj kuv lub neej tas lawm, kuv coglus hais tias kuv yuav ua raws li koj tej lus qhia; Kuv tsis tos li lawm, kuv yuav rawm ua raws li koj tej lus samhwm. Cov neeg siab phem cuab hmuv tos kuv kev, tiamsis kuv yeej nco ntsoov koj txoj kevcai. Ntuj teb tag hmo kuv sawv los qhuas koj, vim koj tej kevcai uas ncaj ncees. Kuv ua phoojywg rau txhua tus uas hwm koj, thiab rau txhua tus uas ua raws li koj tej kevcai. Tus TSWV, lub ntiajteb puv nkaus koj txojkev hlub uas tsis paub kawg; thov qhia koj tej kevcai rau kuv. Tus TSWV, koj yeej ua raws li koj tej lus cog tseg, thiab ua zoo rau kuv uas yog koj tus tubtxib. Thov pub tswvyim thiab kev txawj ntse rau kuv, rau qhov kuv cia siab rau koj tej lus samhwm heev. Thaum koj tsis tau cia kuv raug kev txomnyem, kuv yuam kev ua txhaum. Tiamsis nimno kuv ua raws li koj tej lus qhia lawm Koj yog tus ua zoo thiab muaj lub siab dawb; thov qhia koj tej kevcai rau kuv! Cov neeg uas khavtheeb hais lus dag liam kuv, tiamsis kuv ua raws li koj tej kevcai kawg siab kawg ntsws. Cov neeg ntawd tsis paub qabhau dabtsi, tiamsis koj txoj kevcai ua rau kuv zoo siab heev. Qhov uas koj cia kuv raug kev txomnyem muaj nqis rau kuv, rau qhov tej ntawd ua rau kuv paub koj tej kevcai. Txoj kevcai uas koj muab rau kuv ntawd muaj nqis tshaj tej nyiaj tej kub hauv ntiajteb no. Koj yog tus tsim kuv thiab cawm kuv dim; thov pub kom kuv totaub, kuv thiaj kawm tau koj tej kevcai. Thaum cov neeg uas hwm koj pom kuv mas lawv yuav zoo siab heev, rau qhov kuv cia siab rau koj tej lus cog tseg. Tus TSWV, kuv paub hais tias koj txojkev txiav txim yeej ncaj ncees, qhov uas koj rau txim rau kuv, koj yeej ua ncaj lawm. Thov cia koj txojkev hlub uas tsis paub kawg nplig kuv lub siab raws li koj tau coglus rau kuv uas yog koj tus tubtxib lawm. Thov koj hlub kuv, kuv thiaj muaj sia nyob, rau qhov koj tej kevcai ua rau kuv zoo siab heev. Thov kom cov neeg uas khavtheeb raug kev txajmuag, rau qhov lawv lam tau lam liam kuv; tiamsis kuv yuav cim kom tau koj tej kevcai rau nruab siab. Thov cia cov neeg uas hwm koj tuaj cuag kuv, kom lawv thiaj yuav paub koj tej kevcai. Thov kom kuv txawj hwm koj tej kevcai kawg siab kawg ntsws, kuv thiaj tsis raug kev txajmuag. Tus TSWV, kuv twb yuav tuag, kuv tos ntsoov koj txojkev cawm dim; kuv cia siab ntsoov rau koj tej lus. Kuv tos koj tej lus cog tseg tau ntev heev, kuv ob lub qhovmuag qhib tsis taus li lawm, thaum ntawd kuv hais tias, “Tav twg koj mam li los pab kuv?” Kuv tsis muaj nqis ib yam li lub hnab tawv ntim cawv txiv hmab uas luag tsis siv lawm; tiamsis kuv yeej nco ntsoov koj tej kevcai. Kuv uas yog koj tus tubtxib tseem yuav ua siab ntev tos txog tav twg? Thaum twg koj mam li rau txim rau cov neeg uas tsimtxom kuv? Cov neeg khavtheeb uas tsis hwm koj txoj kevcai khawb qhov tos kuv kev. Koj tej kevcai yog tej uas tso siab tau rau; muaj neeg tsimtxom kuv, thov koj pab kuv! Lawv txov yuav luag tau kuv txojsia kom ploj hauv ntiajteb no mus, tiamsis kuv yeej tsis tso koj tej kevcai tseg li. Rau qhov koj txojkev hlub uas tsis paub kawg ua zoo rau kuv, kuv thiaj ua taus raws li koj tej kevcai. Tus TSWV, koj txojlus yuav nyob mus ibtxhis; thiab nyob ruaj nrees saum ntuj ceebtsheej mus li. Koj txojkev ncaj ncees nyob ib tiam dhau ib tiam; koj teeb lub ntiajteb no tseg li cas, nws yuav nyob li ntawd mus li. Ib puas tsav yam nyob ruaj khov kho los txog niaj hnub no, twb yog vim tej lus uas koj tau hais tseg, rau qhov ib puas tsav yam ntawd yog koj tej tubtxib. Yog koj txoj kevcai tsis ua lub hauvpaus uas ua rau kuv zoo siab, ces kuv yuav ris tej kev txomnyem ntawd tuag li. Kuv yuav nco ntsoov koj tej lus qhia mus ibtxhis, vim muaj tej lus ntawd koj thiaj tseg kuv txojsia nyob. Kuv yog koj tug, thov koj cawm kom kuv dim; kuv yeej ibtxwm xyaum ua raws li koj tej kevcai. Cov neeg siab phem tos rawv tua kuv povtseg, tiamsis kuv yuav ua tib zoo xyuas koj tej kevcai saib hais li cas. Kuv paub hais tias tsis muaj ib yam dabtsi uas yuav zoo tas huv tibsi; tiamsis koj tej kevcai yeej zoo kawg nkaus li. Kuv nyiam koj txoj kevcai kawg nkaus li! Kuv xav ntsoov koj txoj kevcai ntawd tas hnub tas hmo. Kuv coj raws li koj txoj kevcai txhua lub sijhawm, txoj kevcai ntawd ua rau kuv ntse dua kuv cov yeebncuab. Kuv paub dua kuv cov xibhwb, rau qhov kuv ua tib zoo xyuas koj tej lus qhia saib hais li cas. Kuv txawj ntse dua cov neeg laus, rau qhov kuv ua raws li koj tej kevcai. Kuv yeej tsis nyiam ua kev phem kev qias, rau qhov kuv xav ua raws li koj txojlus. Kuv nco ntsoov koj tej lus qhia, rau qhov koj yog tus xibhwb uas qhia kuv ntag. Koj tej lus qhia qab zib tshaj zib ntab lawm thiab. Koj tej kevcai ua rau kuv muaj tswvyim. Yog li ntawd, kuv thiaj ntxub ib puas tsav yam kev phem. Koj txojlus zoo ib yam li lub teeb uas taws ua kuv ntej thiab ci rau kuv txoj haukev. Kuv yuav mloog tej lus tseeb uas koj qhia raws li kuv tau coglus tseg rau koj lawm. Tus TSWV, kuv raug kev txomnyem heev, thov koj pub kuv muaj sia ua neej nyob raws li tej lus uas koj cog tseg. Tus TSWV, thov koj lees tej lus uas kuv ua koj tsaug thiab thov qhia koj tej kevcai rau kuv. Kuv yeej txaus siab tuag txhua lub sijhawm; kuv yeej ncov ntsoov koj txoj kevcai rau nruab siab. Cov neeg siab phem cuab hmuv tos kuv kev, tiamsis kuv tsis hla koj tej kevcai li. Koj tej kevcai yog kuv peev nyiaj mus ibtxhis; thiab ua rau kuv zoo siab twjywm rau nruab siab. Kuv txiav txim siab ua raws li koj tej kevcai mus txog hnub kawg. Kuv ntxub cov neeg uas tsis muab siab npuab koj, tiamsis kuv nyiam koj txoj kevcai kawg li. Koj yog tus tuaj kuv tog thiab tiv thaiv kuv, kuv cia siab rau koj tej lus cog tseg. Nej cov uas ua phem ua qias cia li khiav ntawm kuv mus. Kuv yuav ua raws li kuv tus Vajtswv tej lus samhwm. Thov txhawb kuv lub zog raws li koj coglus tseg lawm, kuv thiaj muaj sia nyob; thov tsis txhob cia kuv txojkev cia siab ua rau kuv poob ntsejmuag. Thov tuav kuv tes, kuv thiaj kaj siab lug, kuv yuav niaj hnub ua raws li koj tej kevcai mus ibtxhis. Koj tsis lees paub cov uas tsis ua raws koj tej kevcai; lawv tej kev dag ntxias tsis muaj qabhau dabtsi li. Koj saib cov neeg siab phem tsis muaj nqis li tej quav tooj quav hlau, tiamsis kuv nyiam koj tej lus qhia kawg li. Kuv ibce tshee hnyo vim kuv ntshai koj, thiab kuv ntshai koj txojkev txiav txim kawg nkaus li. Kuv ua qhov tseeb thiab qhov zoo xwb; thov tsis txhob tso kuv rau kuv cov yeebncuab. Thov koj coglus hais tias koj yuav pab koj tus tubtxib; thov tsis txhob cia cov neeg khavtheeb tsimtxom kuv! Kuv ob lub qhovmuag qhib tsis taus vim tos koj tuaj cawm kuv, rau qhov koj tau coglus tseg rau kuv lawm. Thov ua zoo rau kuv raws li koj txojkev hlub uas tsis paub kawg, thiab qhia koj tej kevcai rau kuv. Kuv yog koj tus tubtxib, thov koj pab kom kuv totaub, kuv thiaj yuav paub koj tej lus qhia ntawd. Tus TSWV, twb yog lub sijhawm uas koj rau txim lawm, vim neeg tsis hwm koj txoj kevcai. Kuv nyiam koj tej kevcai tshaj nyiam kub, thiab nyiam tshaj tej uas tseem kub. Yog li ntawd, kuv thiaj ua raws li koj tej kevcai; kuv ntxub txhua yam kev txhaum huv tibsi. Koj tej lus qhia ua rau neeg xav tsis thoob li; kuv yuav coj raws li koj tej lus ntawd kom kawg siab kawg ntsws. Koj tej lus qhia ua qhov kaj ci pom kev rau kuv, thiab ua rau cov neeg ruam kom txawj ntse tuaj. Kuv tshaib nqhis koj tej lus qhuav siab qhawv. Thov koj tig los rau ntawm kuv thiab hlub kuv ib yam li koj ua rau cov neeg uas hlub koj. Thov koj tuav kuv kom nyob ruaj khov rau ntawm koj, raws li koj tau coglus tseg lawm, thiab tsis txhob cia tej kev phem kev qhia kovyeej kuv. Thov cawm kom kuv dim ntawm cov neeg uas tsimtxom kuv, kuv thiaj tau ua raws li koj tej lus samhwm. Thov koj nrog nraim kuv nyob thiab qhia kom kuv paub koj tej kevcai. Kuv tej kua muag ntws si laim ib yam li dej ntws, vim tej neeg tsis ua raws koj tej kevcai. Tus TSWV, koj yog tus uas ncaj ncees, thiab koj tej kevcai yog tej uas tseeb kawg nkaus. Tej kevcai uas koj muab rau peb coj ncaj thiab tseeb kawg li. Kuv npautaws ua rau kuv lub siab kub cuag hluavtaws hlawv, vim kuv cov yeebncuab tsis ua raws li koj tej lus qhia. Koj tej lus cog tseg yuav nyob ruaj nrees; kuv nyiam koj tej lus cog tseg heev! Kuv yog neeg tsis tseemceeb thiab luag saib tsis taus kuv, tiamsis kuv nco ntsoov koj tej lus qhia. Koj txojkev ncaj ncees yuav nyob mus ibtxhis, thiab koj txoj kevcai ibtxwm yog txoj tseeb. Kuv raug kev nyuaj siab ntxhov plawv, tiamsis koj tej kevcai ua rau kuv muaj kev kaj siab. Koj tej lus qhia yeej ibtxwm yog lus tseeb; thov koj pub kom kuv totaub kuv thiaj muaj sia nyob. Tus TSWV, kuv quaj thov koj kawg siab kawg ntsws; thov koj teb kuv, kuv yuav ua raws li koj tej lus samhwm! Kuv quaj hu koj; thov koj cawm kuv, kuv yuav ua raws li koj txoj kevcai. Ua ntej lub hnub tawm tuaj, kuv twb thov koj pab kuv lawm; kuv cia siab ntsoov rau koj tej lus cog tseg. Kuv pw tsis tsaug zog ib hmos kaj ntug, rau qhov kuv xav ntsoov txog koj tej lus cog tseg. Tus TSWV, thov koj mloog kuv tej lus thov, rau qhov koj yog tus muaj txojkev hlub uas tsis paub kawg, thov koj hlub kuv thiab tseg kuv txojsia! Cov neeg siab phem uas tsimtxom kuv tuaj ze kuv heev lawm, lawv yog cov neeg uas tsis ua raws li koj txoj kevcai. Tiamsis tus TSWV, koj nyob nrog nraim kuv, thiab koj tej lus samhwm puavleej yog lus tseeb. Kuv twb paub koj tej kevcai puag thaum ub los lawm; tej kevcai uas koj rhawv ntawd nyob mus ibtxhis li. Thov koj tsa qhovmuag saib kuv tej kev txomnyem thiab pab kom kuv dim, rau qhov kuv yeej nco ntsoov koj tej kevcai. Thov koj pab hais kuv rooj plaub thiab tso kuv dim; thov cawm kom kuv dim raws li koj tej lus cog tseg. Cov neeg siab phem yuav tsis dim, vim lawv tsis ua raws li koj tej kevcai. Tiamsis tus TSWV, koj txojkev hlub loj kawg nkaus li, thov koj hlub thiab cawm kom kuv dim! Kuv muaj yeebncuab thiab muaj neeg tsimtxom kuv coob heev, tiamsis kuv tsis tau tso koj tej kevcai tseg li. Thaum kuv tsa qhovmuag saib cov neeg ntxeev siab, kuv dhuav kawg nkaus li, vim lawv tsis ua raws li koj tej lus qhia. Tus TSWV, koj yeej paub hais tias kuv nyiam koj tej lus qhuab qhia npaum li cas. Koj yeej tsis hloov koj txojkev hlub li; yog li ntawd, thov cawm kuv lauj! Koj txoj kevcai lub ntsiab yeej yog lus tseeb; koj txojkev txiav txim uas ncaj ncees nyob mus ibtxhis. Kuv tsis tau ua txhaum los cov neeg uas muaj hwjchim lam tau lam tsimtxom kuv, tiamsis kuv yeej hwm koj txoj kevcai kawg siab li. Koj tej lus cog tseg ua rau kuv zoo siab npaum li tus neeg uas mus nrhiav tau ib lub qhov nyiaj. Kuv ntxub thiab dhuav cov neeg uas hais lus dag, tiamsis kuv nyiam koj txoj kevcai heev. Ib hnub twg kuv ua koj tsaug xya zaus vim koj txoj kevcai uas ncaj ncees. Cov neeg uas nyiam koj txoj kevcai nyob tso siab plhuav, thiab tsis muaj ib yam dabtsi ua rau lawv dawm ntog li. Tus TSWV, kuv tos ntsoov koj cawm kuv, thiab kuv ua raws li koj tej lus samhwm. Kuv ua raws li koj tej lus qhia; kuv nyiam koj tej lus kawg siab kawg ntsws. Kuv ua raws li koj tej kevcai thiab koj tej lus samhwm, koj yeej pom ntsoov txhua yam uas kuv ua tas los. Tus TSWV, thov kom kuv tej lus thov tuaj txog koj! Thov pub kom kuv totaub raws li koj tau coglus tseg. Thov mloog kuv tej lus thov, thiab pab kom kuv dim raws li koj tau coglus tseg! Kuv yuav niaj hnub ua koj tsaug, rau qhov koj qhia koj txoj kevcai rau kuv. Thov kom kuv tus nplaig hu nkauj qhuas koj txoj kevcai, rau qhov koj tej lus samhwm yog lus tseeb. Thov koj npaj rawv pab kuv, rau qhov kuv ua raws li koj tej lus qhia. Tus TSWV, kuv tos koj ntev loo los cawm kom kuv dim, thiab koj tej kevcai ua rau kuv nyob kaj siab lug. Thov koj pub kom kuv muaj sia nyob, kuv thiaj tau qhuas koj, thiab thov cia koj tej lus qhia pab kuv. Kuv ncig mus ncig los ib yam li tus yaj uas yuam kev lawm, thov koj tuaj nrhiav kuv uas yog koj tus tubtxib, rau qhov kuv yeej nco tsoov koj tej kevcai rau nruab siab. Thaum kuv raug kev ntxhov siab, kuv tsa ncauj thov tus TSWV pab thiab nws teb kuv tej lus thov. Tus TSWV, thov cawm kom kuv dim ntawm cov neeg dag tus nplaig, thiab dim ntawm cov neeg dag ntxias lub qhovncauj. Cov neeg dag, nej puas paub hais tias Vajtswv yuav ua dabtsi rau nej? Nej puas paub hais tias nws yuav rau txim li cas rau nej? Nws yuav muab cov tubrog tej xubvos uas ntse zuag plias, thiab muab tej hluavncaig uas cig liab ploog rau txim rau ntej! Kuv nrog nej nyob ntawm no nyuaj npaum nkaus li nyob hauv tebchaws Mesej lossis nrog cov neeg Kedas nyob. Kuv nrog cov neeg uas ntxub txojkev thajyeeb nyob los ntev lawm! Thaum twg kuv hais txog kev thajyeeb, mas lawv txawm xav ua rog ntag. Kuv tsa qhovmuag ntsia rau saum tej roob, saib kev cawm dim yuav tuaj qhov twg tuaj? Kev pab kuv yog tuaj ntawm tus TSWV tuaj, nws yog tus tsim lub ntuj thiab lub ntiajteb. Nws yuav tsis pub koj ntog; tus tiv thaiv koj yeej tsis tsaug zog ib zaug li. Yog tiag, tus uas tiv thaiv cov Yixalayees yeej tsis ncaws dab ntub lossis tsis tsaug zog li. Tus TSWV yuav zov rawv koj, nws nyob rawv ntawm koj ib sab thiab tiv thaiv koj. Nruab hnub lub hnub yuav tsis hlawv koj, lossis hmo ntuj lub hli yuav tsis ua li cas rau koj. Tus TSWV yuav tiv thaiv tsis pub koj raug tej kev puastsuaj; nws yuav tsomkwm kom koj nyob kaj siab lug. Tus TSWV yuav tiv thaiv koj thaum koj tawm mus thiab rov qab los txij hnub no mus ibtxhis li. Kuv zoo siab thaum lawv yaum kuv hais tias, “Peb cia li mus rau hauv tus TSWV lub tsev.” Yeluxalees, nimno peb nyob ntawm no lawm, peb tabtom sawv ntawm koj tej roojvag sab hauv! Yeluxalees yog lub nroog uas txhim kho dua tshiab, zoo nkauj thiab ruaj khov heev. Yog lub chaw uas txhua xeem Yixalayees tuaj txoos ua ke ua tus TSWV tsaug raws li nws tau samhwm rau lawv lawm. Qhov no yog lub zwmtxwv uas cov Yixalayees tej vajntxwv zaum txiav txim rau lawv cov pejxeem. Thov Vajtswv pab lub nroog Yeluxalees kom muaj kev thajyeeb li no: “Thov kom cov neeg uas hlub koj muaj kev vammeej lawm yav tom ntej. Thov kom muaj kev thajyeeb nyob sab hauv koj tus ntsa yeej, thiab muaj kev kaj siab nyob hauv koj tej loog.” Twb yog saib rau saum kuv tej kwvtij thiab tej phoojywg, mas kuv hais rau lub nroog Yeluxalees hais tias, “Thov kom koj nyob kaj siab lug.” Twb yog saib rau saum tus TSWV uas yog peb tus Vajtswv lub tsev, mas kuv thiaj thov Vajtswv pab kom koj muaj kev vammeej. Tus TSWV, kuv tsa qhov muag ntsia tuaj rau koj, ntsia tuaj rau saum lub ntuj qhov chaw uas koj nyob. Ib yam li cov tubtxib uas tos ntsoov lawv tus tswv, thiab ib yam li tus nkauj qhe tos ntsoov nws tus niam tsavcuab, tus TSWV uas yog peb tus Vajtswv, peb tos ntsoov mus txog thaum koj hlub peb. Tus TSWV thov koj hlub peb, thov koj hlub peb; rau qhov peb raug luag thuam heev lawm. Peb raug cov neeg npluanuj saib tsis taus los tau ntev heev, thiab peb raug cov neeg khavtheeb cem heev lawm. Yog thaum tus TSWV tsis tuaj peb tog lawm, peb yuav uas li cas? Cov Yixalayees, nej cia li teb kuv! “Yog tus TSWV tsis tuaj peb tog, thaum peb cov yeebncuab tuaj tua peb, lawv yuav cia li muab peb nqos ciaj, rau qhov lawv chim heev rau peb; dej yuav cia li huam nphau nphwv tuaj nyab peb thiab kuav peb mus; tej nthwv dej uas loj heev yuav cia li los kuav peb kom tuag tas.” Peb cia li ua tus TSWV tsaug, nws yog tus uas tsis pub yeebncuab tuaj rhuav tshem kom peb raug kev puastsuaj. Peb khiav dim ib yam li tus noog uas dim ntawm luag lub vojhlua; luag lub vojhlua tu nrho, peb thiaj dim plaws tau nyob ywj siab! Tus TSWV uas tsim ntuj tsim teb yog tus pab peb. Cov neeg uas cia siab rau tus TSWV zoo ib yam li lub Roob Xi-oos uas muab tshem tsis tau, thiab nyob ntawm nws qhov chaw mus ibtxhis li. Yog li ntawd, tus TSWV tsomkwm nws haivneeg thiab nyob puagncig lawv, tamsim no thiab mus ibtxhis ib yam li tej hauv roob thaiv lub nroog Yeluxalees. Cov neeg siab phem yuav tsis tau kav cov neeg ncaj ncees lub tebchaws; yog cov neeg ncaj ncees yuam kev ua phem, mas cov neeg siab phem thiaj tau kav xwb. Tus TSWV, thov koj ua zoo rau cov neeg uas ua zoo, thiab rau cov neeg uas coj raws li koj tej lus samhwm. Tiamsis thaum koj rau txim rau cov neeg ua phem, thov koj rau txim rau cov neeg uas tso koj tseg lawm thiab. Thov kom cov Yixalayees muaj kev thajyeeb. Thaum tus TSWV coj peb rov qab los nyob hauv lub nroog Yeluxalees, mas zoo li ua npau suav xwb! Peb luag nrov thiab hu nkauj zoo siab kawg; ces luag lwm haivneeg thiaj cav ntshoo nrooj txog peb hais tias, “Tus TSWV tau ua txujci loj heev pab lawv.” Yog tiag, tus TSWV tau ua txujci loj heev pab peb, peb zoo siab kawg li. Tus TSWV, thov pub kom peb rov vammeej dua, ib yam li los nag ua rau dej rov puv nkaus tej kwjdeg uas qhuav tas lawm. Thov kom cov neeg uas quaj ntsuag thaum lawv cog qoobloo, tau qw zoo siab luag ntxhi sau tej qoob ntawd. Cov neeg uas quaj ntsuag thaum coj tej noob qoob mus cog, lawv yuav hu nkauj seev yees mus sau tej qoob ntawd los tsev. Yog tus TSWV tsis ua tsev, ces cov neeg ua tsev tes haujlwm tsis muaj qabhau dabtsi; yog tus TSWV tsis tiv thaiv lub nroog, ces txawm yuav tso tubrog zov khov kho, los yeej tsis muaj qabhau dabtsi. Tus uas niaj hnub khwv noj khwv haus nws pw lig thiab sawv ntxov los nws tes haujlwm yeej tsis muaj qabhau dabtsi; rau qhov tus TSWV yeej foom koob hmoov rau tus uas nws hlub, thaum lub sijhawm uas tus ntawd tseem pw tsaug zog. Menyuam yog tej uas tus TSWV pub dawb rau neeg; menyuam yog koob hmoov los ntawm tus TSWV. Tus uas muaj menyuam thaum nws tseem hluas, nws zoo ib yam li tus tubrog uas muaj tsheej npo xub nyob ntawm nws txhais tes. Tus uas muaj xub hneev ntau yeej muaj kev kaj siab lug! Thaum nws nrog nws cov yeebncuab nyob tim ntsej tim muag hauv tsev tu plaub, nws yuav tsis swb li. Cov neeg uas mloog tus TSWV lus thiab ua raws li tus TSWV tej lus samhwm yog cov uas tau kev kaj siab. Koj yuav noj tej uas koj txhais tes khwv tau los; koj yuav muaj kev zoo siab thiab koj lub neej yuav vammeej. Koj tus pojniam yuav zoo ib yam li tsob txiv hmab uas txi txiv ncw heev hauv koj lub tsev, koj cov menyuam yuav zoo ib yam li tej ntsuag ntoo roj uas nyob puagncig koj lub rooj mov. Tus neeg uas mloog tus TSWV lus yuav tau koob hmoov nplua mias li ntawd. Thov tus TSWV foom koob hmoov saum Xi-oos los rau koj! Thov kom koj tau pom lub nroog Yeluxalees vammeej mus tas koj simneej! Thov kom koj muaj txojsia nyob ntev thiab pom koj tej xeebntxwv. Thov kom cov Yixalayees muaj kev thajyeeb. Cov Yixalayees, qhia tej uas nej cov yeebncuab tsimtxom nej thaum nej tseem hluas los rau peb paub saib. “Kuv cov yeebncuab yeej ibtxwm limhiam thiab tsimtxom kuv txij thaum uas kuv tseem hluas los, tiamsis lawv tsis tau kovyeej kuv ib zaug li. Lawv hlais kuv nraubqaum to ua tej kab tob heev, ua rau kuv lub nraubqaum zoo ib yam li daim teb uas luag laij lawm. Tiamsis tus TSWV yog tus ncaj ncees, nws tso kuv dim plaws txojkev ua luag qhev los.” Thov kom txhua tus uas ntxub lub nroog Xi-oos raug tua swb thiab thim rov qab. Thov kom lawv zoo ib yam li tej nroj uas tuaj saum rutsev, thiab qhuav tuag tas loj hlob tsis taus; tsis muaj leejtwg muab sua coj mus teeb ua tej pawg lossis nqa ua tej tsaug coj mus povtseg. Kom tej neeg uas dua kev thiaj tsis hais tias, “Thov tus TSWV foom koob hmoov rau nej! Peb tuav tus TSWV lub npe foom koob hmoov rau nej.” Tus TSWV, kuv txomnyem ntsuav thiab tws kev lawm, kuv thiaj tsa ncauj thov koj pab. Tus TSWV, thov koj mloog kuv lub suab hu; thov mloog tej lus uas kuv thov koj pab kuv! Yog koj cim peb tej kev txhaum cia lawm, leejtwg thiaj khiav dim tsis raug txim? Tiamsis koj zam txim rau peb, peb thiaj hwm koj thiab mloog koj lus. Kuv tos tus TSWV pab kuv kawg siab kawg ntsws thiab kuv tso siab rau nws tej lus. Kuv kub siab lug tos tus TSWV heev dua tej tub fajxwm ceeb laj tos kaj ntug, ceeb laj tos heev dua tej tub fajxwm tos kom kaj ntug. Cov Yixalayees, nej cia li tso siab rau tus TSWV, rau qhov nws muaj txojkev hlub uas tsis paub kawg thiab nws tos rawv yuav cawm kom nej dim. Nws yuav pab nws haivneeg Yixalayees kom dim ntawm lawv tej kev txhaum huv tibsi. Tus TSWV, kuv tso plhuav txojkev khavtheeb tseg, thiab nrauj ncua txojkev uas tsav hwjchim lawm. Kuv tsis txhawjxeeb txog tej kev txomnyem siab lossis tej uas nyuaj dhau rau kuv. Tiamsis kuv muaj lub siab tus thiab nyob twjywm ib yam li tus menyuam mos uas pw ntsiag to ntawm leej niam lub xubntiag; yog li ntawd, kuv lub siab thiaj nyob tus yees li tus menyuam mos. Cov Yixalayees, nej cia li tso siab rau tus TSWV hnub no thiab mus ibtxhis li. Tus TSWV, thov koj nco ntsoov Daviv thiab nws tej kev ntxhov siab. Tus TSWV, thov koj nco ntsoov nws tej lus cog tseg, yog tej lus nws yeem rau koj uas yog Yakhauj tus Vajtswv uas muaj hwjchim loj kawg nkaus hais tias: “Kuv yuav tsis mus tsev lossis mus pw; kuv yuav tsis so lossis pw tsaug zog mus txog thaum uas kuv npaj tau ib lub chaw rau kuv tus TSWV, thiab ib lub tsev rau Yakhauj tus Vajtswv uas muaj hwjchim loj kawg nkaus.” Thaum nyob hauv Npelehees, peb hnov hais txog lub Phijxab uas ntim Vajtswv tej lus cog tseg, thiab peb mus nrhiav tau lub Phijxab ntawm tej teb hauv lub nroog Ye-alees. Peb hais tias, “Peb cia li mus rau hauv tus TSWV lub tsev, cia peb mus pehawm nws ntawm nws lub zwmtxwv.” Tus TSWV, thov koj coj lub Phijxab uas ntim Vajtswv tej lus cog tseg, nrog koj los rau hauv lub Tuamtsev, lub Phijxab ntawd yog yam uas qhia koj lub hwjchim, thov koj nyob hauv lub Tuamtsev mus ibtxhis li. Thov kom koj cov povthawj niaj hnub ua ncaj ua ncees xwb; thov kom koj haivneeg txhua tus qw zoo siab luag ntxhi! Tus TSWV, koj coglus tseg rau Daviv uas yog koj tus tubtxib; thov koj tsis txhob tso tus vajntxwv uas koj xaiv lawm tseg. Koj coglus ruaj khov rau Daviv lawm, yog cov lus cog tseg uas koj yuav tsis thim li, koj hais tias, “Kuv yuav tsa koj cov tub ib tug ua vajntxwv, thiab nws yuav nyob koj chaw tom qab uas dua koj lawm. Yog koj cov tub ua raws li kuv tej lus cog tseg, thiab tej kevcai uas kuv muab cob rau lawv lawm, lawv cov xeebntxwv yuav tau ua vajntxwv hloov koj chaw mus ibtxhis.” Tus TSWV xaiv lub nroog Xi-oos; nws xav muab lub nroog ntawd ua nws lub chaw nyob. Nws hais tias, “Kuv yuav nyob qhov chaw no mus ibtxhis; kuv xav kav qhov chaw no. Kuv yuav pub lub nroog Xi-oos muaj txhua yam nplua mias raws li uas nws xav yuav; kuv yuav muab zaub mov rau cov neeg txomnyem hauv lub nroog ntawd kom tau noj tsau npo. Kuv yuav foom koob hmoov rau txhua yam haujlwm uas nws cov povthawj ua, ces nws cov pejxeem yuav hu nkauj zoo siab luag ntxhi. Kuv yuav tsa Daviv cov xeebntxwv ib tug hauv lub nroog no ua vajntxwv kom muaj hwjchim heev, thiab kuv yuav cia tus vajntxwv uas kuv xaiv kav qhov chaw no mus ibtxhis. Kuv yuav ua kom nws cov yeebncuab txajmuag, tiamsis lub tebchaws uas nws kav yuav muaj kev vammeej thiab npluanuj.” Qhov uas Vajtswv haivneeg los nyob ua ke li tej kwvtij yog ib qhov uas zoo thiab ua rau lawv muaj kev zoo siab heev! Zoo ib yam li cov roj muaj nqis uas muab hliv rau saum Aloos taubhau ntws los rau ntawm nws cov hwjtxwv thiab ntws mus rau ntawm nws lub ntsej tsho. Zoo ib yam li tej lwg saum Roob Helemoos uas nrog los rau saum tej ncov roob ntawm lub nroog Xi-oos. Qhov ntawd yog qhov chaw uas tus TSWV tau coglus foom koob hmoov pub kom muaj txojsia ntev dhawv tsis txawj kawg. Nej txhua tus uas yog tus TSWV cov tubtxib, thiab txhua tus uas ua haujlwm hauv nws lub tuamtsev thaum tsaus ntuj cia li los qhuas tus TSWV! Tsa nej ob txhais tes mus rau ntawm lub Tuamtsev thiab cia li qhuas tus TSWV! Thov kom tus TSWV uas tsim lub ntuj lub teb foom koob hmoov saum Xi-oos los rau nej sawvdaws! Cia li qhuas tus TSWV! Nej txhua tus uas yog tus TSWV cov tubtxib, nej cov uas sawv ntawm tus TSWV lub tsev, thiab hauv peb tus Vajtswv lub Tuamtsev, nej cia li qhuas tus TSWV lub npe. Cia li qhua tus TSWV, rau qhov nws yog tus zoo; cia li hu nkauj qhuas nws lub npe, rau qhov nws lub siab dawb siab zoo. Tus TSWV xaiv Yakhauj rau nws thiab xaiv haivneeg Yixalayees ua nws tug. Kuv paub hais tias peb tus TSWV yog tus muaj hwjchim loj; nws muaj hwjchim dua tej vajtswv huv tibsi. Nws ua tau txhua yam raws li nws lub siab nyiam, tsis hais saum ntuj thiab hauv ntiajteb no, hauv hiavtxwv lossis hauv nruab tiv txwv qhov uas tob heev. Nws yog tus ua kom huab sawv sab npoo ntuj no mus ti nkaus sab npoo ntuj tim ub; nws ua kom muaj xob laim rau nag los, thiab nws ua kom muaj cua ntsawj. Nyob hauv tebchaws Iziv nws tua cov Iziv tej tub hlob thiab tej tsiaj thawj tus menyuam ib yam nkaus. Nyob nrad nws ua ntau yam txujci tseemceeb uas xav tsis thoob li, nws rau txim rau Falaus thiab Falaus cov nomtswv huv tibsi. Nws ua rau ntau haivneeg raug puastsuaj thiab tua cov vajntxwv uas muaj hwjchim, xwsli: Xihoos uas ua vajntxwv kav cov Amaules, Aunkas uas ua vajntxwv kav tebchaws Npasas, thiab tagnrho cov vajntxwv uas kav tebchaws Kana-as. Nws muab lawv tej tebchaws rau nws haivneeg, nws muab rau cov Yixalayees. Tus TSWV, koj lub npe yuav nyob mus ibtxhis; thiab txhua tiam neeg yuav cav txog koj lub npe. Tus TSWV yuav tiv thaiv nws haivneeg; nws yuav hlub nws cov tubtxib. cov neeg txawv tebchaws tej mlom yog nyiaj yog kub thiab yog neeg txhais tes nchuav xwb. Lawv muaj qhovncauj, tiamsis tsis txawj hais lus; muaj qhovmuag, tiamsis tsis pom kev. Lawv muaj qhovntsej, tiamsis tsis hnov lus; thiab lawv tsis txawj ua pa. Cov neeg uas txua mlom thiab cia siab rau tej mlom, lawv zoo ib yam li tej mlom ntawd. Cov Yixalayees, nej cia li qhuas tus TSWV; Vajtswv cov povthawj, nej cia li qhuas tus TSWV! Cov Levis, nej cia li qhuas tus TSWV, cov uas pehawm tus TSWV, nej cia li qhuas nws! Cia li qhuas tus TSWV uas nyob hauv lub nroog Xi-oos, thiab nyob hauv nws lub tsev hauv lub nroog Yeluxalees. Cia li qhuas tus TSWV! Cia li ua tus TSWV tsaug, rau qhov nws yog tus muaj lub siab dawb siab zoo, nws txojkev hlub nyob mus ibtxhis. Cia li ua tsaug rau tus Vajtswv ntawm txhua tus vajtswv, rau qhov nws txojkev hlub nyob mus ibtxhis. Cia li ua tsaug rau tus TSWV ntawm txhua tus tswv, rau qhov nws txojkev hlub nyob mus ibtxhis. Nws tib leeg thiaj yog tus uas ua tau tej txujci tseemceeb, rau qhov nws txojkev hlub nyob mus ibtxhis. Nws yog tus muaj lub tswvyim uas tsim lub ntuj, rau qhov nws txojkev hlub nyob mus ibtxhis; nws tsim lub ntiajteb rau saum cov dej uas tob heev, rau qhov nws txojkev hlub nyob mus ibtxhis. Nws yog tus tsim lub hnub thiab lub hli, rau qhov nws txojkev nyob mus ibtxhis; lub hnub cia kav nruab hnub, rau qhov nws txojkev hlub nyob mus ibtxhis; lub hli thiab tej hnubqub cia kav hmo ntuj, rau qhov nws txojkev hlub nyob mus ibtxhis. Nws yog tus tua cov Iziv tej tub hlob, rau qhov nws txojkev hlub nyob mus ibtxhis. Nws coj cov Yixalayees tawm hauv tebchaws Iziv, rau qhov nws txojkev hlub nyob mus ibtxhis; ntawm nws txhais tes uas muaj zog thiab txhais npab uas muaj hwjchim, rau qhov nws txojkev hlub nyob mus ibtxhis. Nws ua rau Hiavtxwv Liab faib hlo rau ob sab, rau qhov nws txojkev hlub nyob mus ibtxhis; nws coj nws haivneeg hla dhau mus rau sab dej tim ub, rau qhov nws txojkev hlub nyob mus ibtxhis; tiamsis nws ua rau hiavtxwv nphau los npog Falaus cov tubrog, rau qhov nws txojkev hlub nyob mus ibtxhis. Nws coj nws haivneeg hla dhau tiaj suabpuam, rau qhov nws txojkev hlub nyob mus ibtxhis; nws tua cov vajntxwv uas muaj hwjchim, rau qhov nws txojkev hlub nyob mus ibtxhis; nws tua cov vajntxwv ua muaj koob meej nto moo lug, rau qhov nws txojkev hlub nyob mus ibtxhis; Xihoos uas yog tus vajntxwv kav cov Amaules, rau qhov nws txojkev hlub nyob mus ibtxhis; thiab Aunkas uas yog tus vajntxwv kav tebchaws Npasas, rau qhov nws txojkev hlub nyob mus ibtxhis; nws muab cov neeg ntawd tej tebchaws rau nws haivneeg nyob, rau qhov nws txojkev hlub nyob mus ibtxhis; nws muab tej tebchaws ntawd pub rau Yixalayees uas yog nws tus tubtxib, rau qhov nws txojkev hlub nyob mus ibtxhis. Thaum peb raug tua swb los nws nco ntsoov peb, rau qhov nws txojkev hlub nyob mus ibtxhis; nws tso peb dim ntawm peb cov yeebncuab, rau qhov nws txojkev hlub nyob mus ibtxhis. Nws pub rau neeg thiab tej tsiaj muaj noj muaj haus tsau npo, rau qhov nws txojkev hlub nyob mus ibtxhis. Cia li ua tsaug rau Vajtswv tus uas nyob saum ntuj, rau qhov nws txojkev hlub nyob mus ibtxhis. Peb zaum ntawm tej ntug dej hauv tebchaws Npanpiloos, thaum peb nco dheev txog lub nroog Xi-oos mas peb tsa suab hlo quaj. Peb muab peb tej nkauj nogncas khuam rau ntawm tej lwgzaj uas nyob ze peb. Cov neeg uas ntes peb mus ua qhev kom peb hu nkauj, lawv hais lus saib tsis tau peb tias, “Nej cia li hu ib zaj nkauj hais txog lub nroog Xi-oos rau peb mloog.” Thaum peb tseem nyob hauv luag lwm tebchaws, peb yuav ua li cas hu tau nkauj qhuas tus TSWV? Lub nroog Yeluxalees, yog kuv tsis nco qab txog koj, thov kom kuv tsis txhob txawj ntaus nkauj nogncas li lawm. Yog kuv tsis nco qab koj thiab xam tsis txog hais tias, koj yog tus uas ua rau kuv zoo siab tshaj plaws, ces thov kom kuv tsis txhob txawj hu nkauj ib zaug ntxiv li lawm. Tus TSWV, thov koj nco ntsoov tej uas cov Edoos tau ua, hnub uas lawv txeeb tau lub nroog Yeluxalees. Thov koj nco ntsoov tej lus uas lawv hais tias, “Cia li rhuav thiab tsoo kom nws ntsoog tas rau hauv av.” Lub nroog Npanpiloos, koj yuav raug puastsuaj, kom tsimnyog qhov uas koj tau ua rau peb lawm; tus uas muab koj cov menyuam mos ntsawm rau saum pobzeb ua pauj koj yuav zoo siab kawg li. Tus TSWV, kuv ua koj tsaug kawg siab kawg ntsws, kuv hu nkauj qhuas koj tabmeeg tej vajtswv. Kuv tig xubntiag rau ntawm koj lub tuamtsev uas dawbhuv, kuv nyo hau thiab qhuas koj lub npe, rau qhov koj txojkev hlub uas tsis paub kawg thiab txojkev ncaj ncees, rau qhov koj qhia koj lub npe thiab koj txojlus uas muaj hwjchim rau peb. Thaum kuv hu koj, koj teb kuv tej lus thov, koj txhawb kuv lub zog kawg li. Tus TSWV, tagnrho tej vajntxwv hauv ntiajteb no yuav qhuas koj, rau qhov lawv tau hnov koj tej lus cog tseg. Lawv yuav hu nkauj qhuas tej uas koj tau ua thiab koj lub tshwjchim loj uas ci ntsa iab. Txawm yog koj nyob saum qhov chaw uas siab tshaj plaws los koj hlub txog cov uas nyob qis hauv ntiajteb no, thiab cov neeg khavtheeb khiav tsis dim ntawm koj li. Thaum kev nyuaj siab nyob puagncig kuv, koj pab kuv dim. Koj tawmtsam kuv cov yeebncuab thiab koj lub hwjchim tso kuv dim. Tus TSWV, koj yuav ua txhua yam raws li koj tau coglus tseg lawm, Tus TSWV, koj txojkev hlub nyob mus ibtxhis. Thov koj tsis txhob tso tej haujlwm uas koj pib ntawd tseg. Tus TSWV, koj tshawb saib kuv lub siab thiab lub neej, koj yeej paub zoo. Koj paub ib puas tsav yam uas kuv ua, txawm yog nyob deb los koj yeej paub tej uas kuv lub siab xav huv tibsi. Koj yeej pom ntsoov kuv tsis hais thaum kuv ua haujlwm lossis kuv so, koj paub tej uas kuv ua huv tibsi. Txawm yog thaum kuv tseem tsis tau hais lus los koj twb xub paub ua ntej lawm hais tias kuv yuav hais dabtsi. Koj nyob puagncig kuv, koj lub tshwjchim tiv thaiv kuv. Koj yeej paub hais tias kuv yog neeg zoo li cas. Kuv yuav khiav mus nkaum qhov twg thiaj khiav dim koj? Kuv yuav khiav mus nkaum qhov twg, koj thiaj tsis pom kuv? Txawm yog kuv nce mus txog saum ntuj ceebtsheej los koj yeej nyob saud, yog kuv nqis mus rau hauv tubtuag teb los koj yeej nyob hauv thiab. Yog kuv ya mus dhau rau sab hnubtuaj lossis sab hnubpoob los koj yuav nyob qhov ntawd coj kuv kev, koj yuav nyob qhov ntawd pab kuv. Txawm yog kuv hu kom qhov tsaus ntuj los roos kuv lossis kom qhov kaj uas nyob puagncig kuv hloov ua qhov tsaus ntuj, los qhov tsaus ntuj twb tsis tsaus rau koj li; hmo ntuj los koj yeej pom kev kaj nrig ib yam li nruab hnub, koj saib qhov tsaus kaj nrig ib yam li qhov kaj. Koj yog tus tsim kuv lub cev txhua yam huv tibsi, thiab koj yog tus uas puab kuv rau hauv kuv niam plab. Kuv qhuas koj rau qhov koj thiaj yog tus uas tsimnyog sawvdaws hwm, tej uas koj ua mas kuv xav tsis thoob thiab tsis txawj piav li, tiamsis kuv paub hais tias tej ntawd yeej yog koj ua. Thaum kuv tej pobtxha tabtom hlob tuaj sib dhos ua ke hauv kuv niam plab, thiab kuv hlob nraim nkoos hauv nruab thiab los koj yeej paub hais tias kuv nyob hauv. Thaum kuv tseem tsis tau yug los, koj twb pom kuv lawm, kuv tej hnubnyoog ua neej nyob, koj twb xub muab sau rau hauv koj phau ntawv ua ntej uas tsis tau muaj tej hnubnyoog ntawd lawm. Vajtswv, kuv totaub nyuaj tej uas koj xav kawg li. Koj xav txhij xav txhua ua rau kuv suav tsis txheeb li! Yog kuv suav txheeb tej uas koj xav, ntshai muaj ntau dua tej suabzeb, thaum kuv tsim dheev los kuv tseem nrog koj nyob. Vajtswv, kuv xav kom koj muab cov neeg ua phem ua qias tua povtseg, kuv xav kom cov neeg limhiam txav deb ntawm kuv mus. Lawv hais tej lus phem thuam koj, lawv hais saib tsis taus koj lub npe. Tus TSWV, kuv ntxub cov neeg uas ntxub koj kawg li, thiab kuv dhuav cov neeg ntxeev siab uas tawmtsam koj. Kuv ntxub lawv kawg nkaus li, kuv suav hais tias lawv yog kuv cov yeebncuab. Vajtswv, thov koj tshuaj kuv kom paub kuv lub siab, thov koj sim kuv thiab nthuav tej uas kuv lub siab xav saib zoo li cas. Thov koj saib kuv lub siab saib puas muaj qhov txhaum li cas, thiab thov koj coj kuv taug txojkev uas nyob mus ibtxhis. Tus TSWV, thov koj pab kom kuv dim ntawm cov neeg siab phem, thov cawm kom kuv dim ntawm cov neeg limhiam. Lawv lub siab pheej xav ntsoov ua phem nkaus xwb, thiab niaj hnub do kom muaj kev sib cav sib ceg. Lawv tus nplaig muaj taug ib yam li taug nab, thiab lawv tej lus muaj taug ib yam li taug nab raj kubsai. Tus TSWV, thov koj tiv thaiv kuv kom dim ntawm cov neeg siab phem lub hwjchim, thov cawm kom kuv dim ntawm cov neeg uas xav txov kuv txojsia. Cov neeg khavtheeb cuab hmuv tos kuv kev, lawv cuab vas thiab cuab hmuv raws ntug kev kom mag kuv. Kuv hais rau tus TSWV hais tias, “Koj yog kuv tus Vajtswv.” Tus TSWV, thov koj mloog tej lus uas kuv thov koj pab kuv! Tus TSWV, kuv tus TSWV, tus tiv thaiv kuv uas muaj zog heev, koj twb cawm kuv dim hauv tshavrog los lawm. Tus TSWV, thov koj tsis txhob pub rau cov neeg siab phem raws li lawv thov, thov tsis txhob pub kom lawv tej kev ntxeev siab ntawd tiav. Thov koj tsis txhob pub kuv cov yeebncuab kovyeej kuv, thov kom tej lus phem uas lawv hais rov los raug lawv. Thov kom cov hluavncaig uas cig liab ploog poob los rau saum lawv taubhau, thov muab lawv pov rau hauv qhov ntuj kom tawm tsis tau los li. Thov kom cov neeg uas liam luag tsis tseeb tsis txhob yeej, thov kom txojkev phem los raug cov neeg limhiam thiab ua kom lawv raug kev puastsuaj. Tus TSWV, kuv paub hais tias koj yeej tuaj cov neeg pluag tog, thiab txiav txim ncaj rau cov neeg uas txomnyem. Cov neeg ncaj ncees yuav tuav koj lub npe ua koj tsaug, lawv yuav nyob ntawm koj lub xubntiag mus ibtxhis. Tus TSWV, kuv hu koj, thov koj pab kuv tamsim no! Thaum kuv hu koj, thov mloog kuv tej lus thov. Thov txais kuv tej lus thov ua cov tshuaj tsw qab rau koj, thiab kuv ob txhais tes uas tsa thov koj ua cov khoom fij rau koj thaum yuav tsaus ntuj. Tus TSWV, thov koj tswj kuv lub qhovncauj thiab kuv ob daim dincauj! Thov koj cheem kom kuv tsis txhob ua tej kev txhaum uas kuv lub siab xav ua, thiab tsis txhob cia kuv koom siab nrog cov neeg ua phem ua qias. Thov tsis txhob cia kuv muaj feem koom nrog lawv tej rooj noj rooj haus. Kuv txaus siab cia tus neeg zoo rau txim thiab cem kuv, tiamsis kuv tsis lees yuav cov neeg siab phem tej lus uas qhuas, rau qhov kuv niaj hnub thov Vajtswv tawmtsam lawv tej kev phem. Thaum lawv cov nomtswv raug muab txo poob tsag lawm, ces lawv yuav paub hais tias tus TSWV txojlus thiaj yog lus tseeb. Lawv tej pobtxha ib ya yuav nyob ib qho hauv qhov ntxa, ib yam li lub pobzeb uas muab tsoo tawg ntsoog ntxaws saum npoo av. Tiamsis tus TSWV uas kav ib puas tsav yam, kuv cia siab ntsoov rau koj. Kuv nrhiav koj txojkev tiv thaiv, thov tsis txhob cia kuv tuag! Thov koj pab kom kuv tsis txhob mag tej nta npuj uas luag cuab tos kuv, thiab tsib txhob mag tej vojhlua uas cov neeg siab phem cuab. Thov kom cov neeg siab phem rov mag lawv tej vojhlua, kom thaum kuv taug kev mus kuv thiaj tsis raug xwm dabtsi. Kuv tsa suab hlo thov tus TSWV pab, kuv thov nws pab kuv. Kuv yws txhua yam rau nws mloog, kuv qhia kuv tej kev nyuaj siab rau nws huv tibsi. Thaum kuv kawg tswvyim lawm, nws paub hais tias kuv yuav ua li cas, kuv cov yeebncuab cuab hmuv rau ntawm txojkev uas kuv mus. Thaum kuv tsa qhovmuag saib ibncig kuv, tsis muaj leejtwg pab kuv, tsis muaj leejtwg tiv thaiv kuv thiab tsis muaj leejtwg mob siab kuv. Tus TSWV, kuv quaj thov koj pab kuv; tus TSWV, koj thiaj yog tus uas tiv thaiv kuv, koj yog txhua yam uas kuv xav yuav nyob hauv kuv lub neej. Thov koj mloog kuv lub suab quaj hu kom koj pab kuv, rau qhov kuv tas kev cia siab lawm! Thov koj cawm kom kuv dim ntawm kuv cov yeebncuab, vim lawv muaj zog heev ua rau kuv kov tsis yeej. Thov koj tso kom kuv dim ntawm txojkev nyuaj siab, kuv yuav ua koj tsaug tabmeeg koj haivneeg, rau qhov koj ua siab dawb siab zoo rau kuv. Tus TSWV, thov koj mloog kuv tej lus thov! Koj yog tus uas ncaj ncees thov koj mloog kuv tej lus thov, koj yog tus uas muaj lub siab ncaj thov koj teb kuv tej lus thov! Thov tsis txhob coj kuv uas yog koj tus tubtxib mus txiav txim, rau qhov yeej tsis muaj ib tug neeg ncaj ncees tabmeeg koj li. Kuv tus yeebncuab caum kuv tua, thiab kuv swb nws lawm, nws coj mus kaw rau hauv lub tsev lojcuj uas tsaus ntuj nti, thiab kuv zoo li cov neeg uas twb tuag tau ntev los lawm. Kuv kawg tswvyim thiab kuv tas kev cia siab lawm. Kuv xav txog lub niaj lub xyoo uas dhau los lawm, kuv xav txog txhua yam uas koj tau ua tas los, kuv xav txog tej uas koj ua ntawd. Kuv tsa kuv ob txhais tes thov koj, kuv lub siab qhuav qhawv ib yam li cov av; kuv tshaib nqhis koj txojlus ib yam li nqhis dej. Tus TSWV, thov koj teb kuv tej lus thov tamsim no! Kuv tas kev cia siab lawm. Thov koj tsis txhob khiav nkaum kuv, nyob tsam kuv mus nyob xyaw cov neeg uas mus rau hauv tubtuag teb lawm. Thov koj niaj tagkis qhia koj txojkev hlub uas tsis paub kawg rau kuv, rau qhov kuv cia siab ntsoov rau koj xwb. Thov koj qhia saib tsimnyog kuv taug txojkev twg, rau qhov kuv tau thov koj lawm. Tus TSWV, kuv los cuag koj, thov koj tiv thaiv kuv, thov cawm kom kuv dim ntawm kuv cov yeebncuab. Koj yog kuv tus Vajtswv, thov koj qhia kom kuv paub ua raws li koj lub siab nyiam. Thov koj ua siab dawb siab zoo rau kuv thiab coj kuv taug txojkev uas tso siab lug! Tus TSWV, thov koj cawm kom kuv dim raws li koj tau coglus tseg lawm! Koj yog tus muaj lub siab dawb siab zoo, thov koj pab kom kuv dim kuv tej kev nyuaj siab! Vim koj hlub kuv heev, thov koj tua kuv cov yeebncuab povtseg, thiab muab cov neeg uas tsimtxom kuv ua kom puastsuaj tas, rau qhov kuv yog koj tus tubtxib. Cia li qhuas tus TSWV uas yog tus tiv thaiv kuv! Nws yog tus uas qhia kuv sib tua thiab npaj kuv mus ntaus nrog. Nws yog tus tiv thaiv kuv thiab tuaj kuv tog, yog kuv lub chaw cawm siav thiab yog kuv tus cawmseej, kuv tso siab plhuav rau nws. Nws tsa kuv ua tus kav tagnrho txhua haivneeg. Tus TSWV, neeg yog dabtsi, koj thiaj yuav xam txog nws, neeg yog leejtwg, koj thiaj li ua zoo rau nws ua luaj? Neeg zoo ib yam li ib nthwv cua xwb; nws txojsia zoo ib yam li tus duab ntxoov ntxoo uas nyob ib vuag xwb. Tus TSWV, thov koj cia li qhib plho rooj ntug nqis los, koj cia li kov tej hauv roob kom muaj pa ncho tawm tuaj. Cia li tso xob laim ua kom koj cov yeebncuab khiav ri sua, cia li tua koj cov xub hneevnti kom lawv khiav tas. Koj cev tes saum ntuj tuaj rub kuv tawm hauv cov dej uas tob tob thiab cawm kom kuv dim, thov koj cawm kom kuv dim ntawm cov neeg txawv tebchaws uas hais lus tsis tseeb thiab dag tsis ua raws li lawv tau coglus tseg. Vajtswv, kuv yuav hu ib zaj nkauj tshiab qhuas koj, kuv yuav ntaus nkauj nogncas thiab hu nkauj qhuas koj. Koj pub cov vajntxwv mus ntaus yeej rog, thiab koj tau cawm koj tus tubtxib Daviv dim. Thov koj cawm kuv dim ntawd kuv cov yeebncuab uas tsivtsaim heev, thov koj cawm kom kuv dim ntawm cov neeg txawv tebchaws uas hais lus tsis tseeb thiab dag tsis ua raws li lawv tau coglus tseg. Thov kom peb cov tub hluas loj hlob zoo li tej ntsuag ntoo, thiab thov kom peb cov ntxhais zoo li tej ncej kaum uas txheem lub loog. Thov kom peb tej txhab muaj txhua yam qoobloo puv nkaus, thov pub kom peb tej yaj uas nyob tom tiaj nrag yug tau menyuam coob txog ntau txhiab ntau vam tus. Thov kom peb tej nyuj huamvam coob ua npoj ntws, thiab tsis txhob muaj ib tug tshob lossis ploj li, thov kom tsis txhob muaj tej suab quaj ntxhov siab rau txhua txojkev. Cov neeg uas tau txais koob hmoov yog cov uas muaj kev kaj siab! Cov neeg uas muaj Vajtswv ua lawv tus TSWV yog cov uas tau koob hmoov. Kuv tus Vajtswv thiab kuv tus vajntxwv, kuv yuav piav koj lub hwjchim rau sawvdaws, thiab kuv yuav ua koj tsaug mus ibtxhis tsis kawg li. Kuv yuav niaj hnub ua koj tsaug thiab yuav qhuas koj mus ibtxhis tsis kawg li. Tus TSWV yog tus uas muaj hwjchim loj thiab tsimnyog sawvdaws qhuas nws kawg li, nws lub hwjchim loj dua tej uas peb lub siab xav. Txhua tiam neeg yuav qhuas tej txujci loj uas koj ua tas los, lawv yuav piav koj tej haujlwm tseemceeb kawg nkaus rau sawvdaws paub. Neeg yuav piav koj lub tshwjchim thiab koj lub koob meej, thiab kuv yuav xav ntsoov tej txujci tseemceeb uas koj tau ua tas los. Neeg yuav piav tej haujlwm tseemceeb uas koj ua, thiab kuv yuav piav koj lub hwjchim loj rau sawvdaws. Lawv yuav qhia txog ib puas tsav yam zoo uas koj ua thiab hu nkauj qhuas koj txojkev hlub. Tus TSWV yog tus muaj kev hlub thiab hmov tshua, nws tsis chim sai thiab nws muaj txojkev hlub uas tsis paub kawg. Nws ua zoo rau txhua tus thiab nws hlub ib puas tsav yam uas nws tsim. Tus TSWV, ib puas tsav yam uas koj tsim yuav qhuas koj, thiab koj haivneeg yuav ua koj tsaug. Lawv yuav piav txog koj lub tshwjchim uas ci ntsa iab hauv koj lub tebchaws, thiab qhia rau sawvdaws paub txog koj lub zog loj zog nchav, kom txhua tus paub txog koj tej haujlwm tseemceeb, thiab koj lub tshwjchim uas ci ntsa iab hauv koj lub tebchaws. Koj lub tebchaws yuav nyob mus ibtxhis, thiab koj yuav ua vajntxwv kav mus ibtxhis tsis kawg li. Tus TSWV yeej ua raws li nws tej lus cog tseg, thiab nws yeej hlub txhua yam uas nws tau tsim lawm. Nws pab txhua tus uas raug kev txomnyem; thiab tsa txhua tus uas ntog lawm sawv rov los. Ib puas tsav yam uas muaj sia puavleej cia siab ntsoov rau koj, thiab koj pub lawv muaj noj muaj haus raws li lawv siab xav. Koj pub rau lawv muaj txaus nkaus thiab txaus siab rau tej uas lawv muaj. Ib puas tsav yam uas tus TSWV ua puavleej ncaj ncees, nws muaj lub siab dawb siab zoo ua nws tes haujlwm. Nws nyob ze txhua tus uas thov nws, thiab txhua tus uas muab siab npuab nws. Nws pub rau txhua tus uas hwm nws raws li tej uas lawv xav yuav, nws hnov lawv tej suab thov thiab cawm lawv dim. Tus TSWV tiv thaiv txhua tus uas hlub nws, tiamsis nws yuav ua kom cov neeg siab phem raug kev puastsuaj. Kuv yuav niaj hnub qhuas tus TSWV, ib puas tsav yam uas nws tsim, cia li qhuas nws lub npe uas dawbhuv mus ibtxhis. Cia li qhuas tus TSWV! Kuv lub siab, cia li qhuas tus TSWV! Thaum kuv tseem ua neej nyob, kuv yuav qhuas tus TSWV, kuv yuav hu nkauj qhua kuv tus Vajtswv mus tas kuv simneej. Tsis txhob tso siab rau tej nomtswv, lawv yog neeg xwb, lawv yeej pab tsis tau nej dim kev ploj kev tuag li. Thaum lawv tuag, lawv yuav rov mus ua av; lawv tej tswvyim yuav kawg rau hnub ntawd. Tus uas muaj kev kaj siab yog tus uas muaj Yakhauj tus Vajtswv pab thiab tso siab plhuav rau tus TSWV uas yog nws tus Vajtswv, tus uas tsim lub ntuj, lub ntiajteb, hiavtxwv thiab ib puas tsav yam uas nyob saum ntuj, nyob hauv lub ntiajteb thiab nyob hauv hiavtxwv. Nws yeej ibtxwm uas raws li nws tej lus cog tseg; nws tuaj cov neeg uas raug luag tsimtxom tog, thiab nws pub mov rau cov neeg uas tshaib nqhis noj. Tus TSWV tso cov neeg raug txim kom tau nyob ywj siab thiab nws kho cov neeg digmuag kom pom kev. Nws tsa txhua tus uas ntog lawm sawv rov los, thiab nws hlub nws haivneeg uas ua ncaj ua ncees. Nws tsomkwm lwm haivneeg uas nyob hauv peb lub tebchaws, nws pab cov pojntsuam thiab cov menyuam ntsuag, tiamsis nws rhuav tshem cov neeg uas siab phem tej haujlwm. Tus TSWV yog tus Vajntxwv uas kav mus ibtxhis. Xi-oos, koj tus Vajtswv yuav kav mus ibtxhis li. Cia li qhuas tus TSWV! Cia li qhuas tus TSWV! Qhov uas hu nkauj qhuas peb tus Vajtswv yog ib qho uas zoo heev, yeej tsimnyog sawvdaws txaus siab thiab qhuas nws kawg li. Tus TSWV yog tus uas txhim kho lub nroog Yeluxalees, nws coj cov neeg uas raug luag ntes mus lawm rov qab los. Nws kho cov neeg uas siab ntsws puas tas thiab qhwv lawv tej qhov txhab. Nws yeej kom tseg saib pub muaj pestsawg lub hnubqub, thiab nws tis npe rau txhua lub hnubqub nyias muaj nyias npe. Peb tus TSWV yog tus uas muaj hwjchim thiab muaj zog loj zog nchav, tsis muaj leejtwg yuav totaub txog nws lub tswvyim. Nws txhawb tus uas txo hwjchim, tiamsis nws tsuj tus ua phem ua qias rau hauv av. Cia li hu nkauj qhua tus TSWV, cia li ntaus nkauj nogncas qhuas Vajtswv. Nws ua kom muaj huab nyob saum nruab ntug, nws tso nag los ywg lub ntiajteb thiab ua kom nroj tsuag tuaj saum tej pov roob. Nws pub kom tej tsiaj muaj noj muaj haus, thiab pub kom tej menyuam uablag tau noj thaum lawv quaj. Tsis yog nws txaus siab rau cov nees uas muaj zog, thiab tsis yog nws txaus siab rau cov tubrog uas siab tawv; tiamsis nws txaus siab rau cov neeg uas hwm nws, thiab cov neeg uas cia siab rau nws txojkev hlub uas tsis paub kawg. Yeluxalees, cia li qhuas tus TSWV! Xi-oos, cia li qhuas koj tus Vajtswv! Nws tsomkwm koj tej roojvag nyob ruaj khov kho, nws foom koob hmoov rau koj haivneeg. Nws tsomkwm tsis pub kom luag tuaj txeeb koj ciam dej ciam av, thiab nws pub kom koj ua tau qoobloo ntau. Nws hais rau lub ntiajteb thiab tej lus uas nws hais ua rau txhua yam tiav. Nws tso daus los puv toj roob hauv pes dawb paug ib yam li plaub yaj, thiab muaj te khov dawb paug rau txhua qhov ib yam li hmoov tshauv. Nws tso lawg los ib yam li tej pobzeb, yeej tsis muaj leejtwg tiv taus qhov uas nws tso los ntawd li! Nws hais lus xwb tej dej nkoog cia li yaj tas, nws tso cua ntsawj tuaj, ces tej dej cia li ntws lawm. Nws qhia nws txojlus rau Yakhauj, nws piav nws tej lus samhwm thiab tej kevcai rau cov Yixalayees. Nws tsis tau qhia tej ntawd rau lwm haivneeg li, rau qhov lwm haivneeg tsis paub nws tej kevcai. Cia li qhuas tus TSWV! Cia li qhuas tus TSWV! Nej cov uas nyob saum ntuj, cia li qhuas tus TSWV! Tagnrho nws cov timtswv, cia li qhuas nws, tagnrho nws cov tubrog saum ntuj, cia li qhuas nws. Lub hnub thiab lub hli, cia li qhuas nws, tej hnubqub uas ci ntsa iab, cia li qhuas nws. Ntuj ceebtsheej thiab tej dej uas nyob saum nruab ntug, cia li qhuas nws. Ib puas tsav yam cia li qhuas tus TSWV lub npe! Nws hais kom muaj, ces tej no txawm tshwmsim tuaj; twb yog nws hais tej no thiaj nyob ruaj khov qhov qub chaw mus ibtxhis, thiab tej ntawd yeej tsis hla tus TSWV tej lus li. Dej hiavtxwv thiab ib puas tsav yam tsiaj uas nyob hauv hiavtxwv, cia li tuaj hauv ntiajteb no qhuas tus TSWV; xob laim thiab lawg, daus thiab huab, thiab cua daj cua dub cia li mloog tus TSWV tej lus. Tej pov roob thiab tej hauv roob, tej ntoo uas txi txiv thiab tej havzoov, cia li qhua tus TSWV; txhua yam tsiaj, tsiaj nyeg thiab tsiaj qus, nab qa thiab tej noog, cia li qhuas tus TSWV. Tej vajntxwv thiab txhua haivneeg, vajntxwv cov tub thiab tej nomtswv, cia li qhuas tus TSWV; tej tub ntxhais hluas, tej laus thiab tej menyuam yaus, cia li qhuas tus TSWV ib yam nkaus. Ib puas tsav yam no cia li qhuas tus TSWV lub npe! Nws lub npe muaj koob meej dua txhua lub npe huv tibsi, nws lub tshwjchim nyob puv nkaus hauv ntiajteb thiab saum ntuj. Tus TSWV ua rau nws haivneeg muaj zog heev, nws haivneeg txhua tus puavleej qhuas nws, haivneeg ntawd yog cov Yixalayees uas nws hlub kawg nkaus. Cia li qhuas tus TSWV! Cia li qhuas tus TSWV! Cia li hu ib zaj nkauj tshiab qhuas tus TSWV, thaum nws haivneeg tuaj txoos ua ke, cia li qhuas nws! Cov Yixalayees, cia li zoo siab rau tus uas tsim nej, cov neeg hauv lub nroog Xi-oos, cia li zoo siab rau nej tus vajntxwv! Nej cia li seevcev qhuas tus TSWV lub npe; nej cia li ntaus nruas thiab ntaus nkauj nogncas qhuas nws. Tus TSWV txaus siab heev rau nws haivneeg; nws muab koob meej rau cov uas txo hwjchim kom lawv kovyeej. Cia Vajtswv haivneeg zoo siab vim lawv kovyeej thiab hu nkauj zoo siab tas hmo li. Cia lawv qw nrov nrov thaum lawv qhuas tus TSWV, tuav rawv lawv tej ntaj uas ntse zuag plias ntawm tes mus tua kom yeej ntau lub tebchaws thiab rau txim rau ntau haivneeg; muab saw tooj khi luag tej vajntxwv thiab muab saw hlau khi luag tej nomtswv; rau txim rau txhua haivneeg raws li Vajtswv tej lus samhwm. Qhov no yog Vajtswv haivneeg txojkev muaj yeej. Cia li qhuas tus TSWV! Cia li qhuas tus TSWV! Cia li qhuas Vajtswv hauv nws lub Tuamtsev! Cia li qhuas nws lub zog loj zog nchav saum ntuj ceebtsheej! Cia li qhuas tus TSWV vim tej txujci tseemceeb uas nws ua, cia li qhuas nws lub hwjchim uas loj kawg nkaus. Cia li tshuab raj qhua tus TSWV! Cia li ntaus nkauj nogncas thiab ntaus nruas npuaj qhuas nws. Cia li ntaus nruas thiab seevcev qhuas nws, cia li ntaus nkauj nogncas thiab tshuab raj qhuas nws. Cia li ntaus nruas npuaj qhuas nws. Cia li npuaj nruas nrov doog diaj qhuas nws. Ib puas tsav yam uas muaj sia, cia li qhuas tus TSWV! Cia li qhuas tus TSWV! Tej pajlug no yog Vajntxwv Daviv tus tub Xalumoos uas ua vajntxwv kav haivneeg Yixalayees tej pajlug. Tej no yuav pab kom yus paub hais tias lub tswvyim thiab tej lus qhuab ntuas zoo li cas, thiab yuav pab kom totaub tej ntsiab lus uas tob tob. Yuav qhia yus paub ua neej ntse ntsuav, paub ua neeg siab dawb siab zoo, paub ua qhov ncaj ncees, thiab ua raws kev raws cai. Yuav pab tau tus uas tsis thoob tsib to nrog txawj ntse tuaj thiab yuav qhia cov tub hluas paub ua neej. Yuav tsav tswvyim rau cov neeg uas twb txawj ntse lawm, yuav taw kev rau cov neeg uas kawm ntaub kawm ntawv kom lawv paub txhais tej pajlug lub ntsiab thiab totaub tej zaj uas cov neeg txawj ntse hais. Tus uas hwm tus TSWV, tus ntawd thiaj yog tus uas muaj kev txawj ntse. Cov neeg ruam nyiam thuam lub tswvyim thiab tsis kawm txuj kawm ci. Metub, cia li ua tib zoo mloog tej lus uas koj niam thiab koj txiv qhuab qhia koj. Niam thiab txiv tej lus qhia yuav pab kom koj paub ua lub neej zoo ib yam li cev zam uas ua rau koj zoo nraug. Metub, thaum cov neeg siab phem tuaj yaum koj mus ua txhaum, koj tsis txhob nrog lawv mus. Yog lawv hais tias, “Cia li nrog peb mus, peb mus tos kev tua neeg! Peb cia li mus ntes tej neeg tsis muaj txim dabtsi los ntaus ua si! Thaum peb ntsib lawv, lawv tseem muaj sia nyob ncus plaws, tiamsis thaum peb mus dhau lawm, lawv yuav tu siav nrho. Peb yuav mus huab luag tej khoom muaj nqis thiab coj tej uas peb huab tau los khaws cia puv nkaus rau hauv peb tej tsev. Koj cia li nrog peb mus thiab koom nrog peb, peb yuav muab tej uas peb mus huab tau los ntawd sib faib.” Metub, koj tsis txhob nrog cov neeg zoo li ntawd ua ke. Koj yuav tsum khiav tawm ntawm lawv mus. Lawv cov ntawd tswj tsis tau lawv lub siab kom tsis txhob ua txhaum. Lawv npaj rawv yuav tua neeg xwb. Yog cuab tsig rau noog pom yeej tsis mag noog ib zaug li, tiamsis cov neeg uas cuab hlua tos lwm tus kev yog lawv cuab hlua tos lawv xwb, lawv yeej yuav tuag rau lawv lub vojhlua. Kev ua tubsab los kuj ib yam li ntawd, cov neeg uas ua nruj ua tsiv rau luag yog lawv txov lawv txojsia. Cia li mloog! Tswvyim lub suab hu tom tej kev thiab tom tej kiab tej khw, thiab hu nrov ntxhe ntws tom tej roojvag nroog thiab txhua qhov chaw uas muaj neeg tuaj txoos ua ke hais tias, “Cov neeg ruam! Nej tseem yuav zoo siab ua neeg ruam li nej mus txog hnub twg? Nej yuav thuam kev txawj ntse mus txog thaum twg thiab? Nej tsis totaub li los? Cia li tig qhovntsej mloog thaum kuv ntuas nej, kuv yuav qhia tej lus zoo rau nej thiab yuav faib kuv tej tswvyim rau nej. Kuv twb hu nej thiab caw nej los mloog kuv hais lawm, tiamsis nej tsis tig qhovntsej mloog thiab tsis quavntsej kuv tej lus. Nej tsis khaws kuv tej lus qhia cia rau nruab siab, thiab tsis kam cia kuv qhuab ntuas nej. Yog li ntawd, thaum nej raug kev nyuaj siab ntxhov plawv kuv yuav tuaj dabros. Thaum nej txhawj ntshai thiab kev txomnyem los qhwv nkaus nej ib yam li nthwv cua daj cua dub ntsawj, ua rau nej raug mob ntsaj laws thiab raug kev txomnyem, kuv yuav tau zoo luag nej. Thaum ntawd nej yuav tsa ncauj hu xav tau tswvyim, tiamsis kuv yuav tsis teb nej. Nej nrhiav kuv rau txhua txoj xubke, tiamsis nej yuav nrhiav tsis pom kuv nyob qhov twg. Nej yeej ibtxwm tsis quavntsej tej kev txawj ntse thiab nej pheej tsis kam mloog tus TSWV tej lus li. Nej yeej tsis khaws kuv tej lus qhia cia, thiab thaum kuv qhuab ntuas nej, nej tsis quavntsej kuv tej lus hlo li. Vim li no nej yuav tau sau raws li tej uas nej tau ua los lawm, thiab nej tes haujlwm yuav ua rau nej dhuav. Tej neeg tsis paub qabhau tuag twb yog vim lawv tsis txais yuav lub tswvyim, thiab tej neeg ruam puastsuaj twb yog vim lawv tsis quavntsej kev txawj ntse. Tiamsis tus uas mloog kuv lus, tus ntawd yuav nyob khov kho thiab tso siab plhuav tsis ntshai ib yam dabtsi li.” Metub, koj cia li khaws nkaus kuv tej lus qhia rau nruab siab thiab cim ntsoov tej uas kuv kom koj ua. Yuav tsum ua tib zoo mloog tus neeg txawj ntse tej lus thiab muab siab rau mloog kom totaub zoo. Cia li kub siab lug nrhiav kev txawj ntse thiab thov koj thiaj yuav totaub. Koj cia li muab siab rau nrhiav tswvyim ib yam li nrhiav tej qhov nyiaj qhov kub uas nyob nraim nkoos. Yog koj ua li no koj yuav paub hwm tus TSWV thiab yuav paub tseeb hais tias Vajtswv yog tus zoo li cas. Tus TSWV yog tus uas pub tswvyim rau neeg; tej kev txawj kev ntse thiab kev totaub puavleej yog nws pub xwb. Nws tiv thaiv thiab pab cov neeg ncaj ncees. Nws tsomkwm cov neeg uas ua ncaj rau lwm tus, thiab nws saib xyuas cov neeg uas muab siab npuab nws. Yog koj mloog kuv lus koj yuav paub qhov tseeb, paub ua qhov ncaj ncees, paub ua raws kevcai thiab paub ua koj lub neej. Koj yuav ua tus neeg muaj tswvyim thiab tej uas koj paub ntawd yuav ua rau koj zoo siab. Tej uas koj totaub thiab tej uas koj paub txhij paub txhua yuav tsomkwm koj, thiab tiv thaiv kom koj thiaj tsis yuam kev mus ua txhaum. Thiab tej ntawd yuav kav rawv tsis pub koj mus ti cov neeg uas lam tau lam hais lus kom muaj kev kub ntxhov; cov neeg uas tso txojkev ncaj ncees tseg maub nuag mus rau txojkev phem. Lawv nyiam ua txhaum thiab txaus siab mus ua tej kev phem kev qias uas tsis muaj qabhau. Lawv yog cov neeg siab phem siab nkhaus, yeej tsis muaj leejtwg yuav cia siab tau rau lawv li. Koj yuav tau khiav kom dim ntawm tus pojniam uas hais lus mos lus muag ntxias kom luag tej yuam kev ua txhaum; nws ua tsis ncaj rau nws tus txiv thiab nws tsis nco qab txog nws tej lus cog tseg rau Vajtswv lawm. Yog koj mus rau hauv nws tsev, ces yog koj taug kev mus rau txojkev tuag ntag. Qhov uas koj mus rau hauv nws tsev twb yog mus rau hauv tubtuag teb lawm. Tus uas mus rau hauv tus pojniam ntawd tsev yeej tsis tau rov qab los li lawm. Nws yuav tsis tau rov qab los taug txojkev uas muaj txojsia ib zaug li. Yog li ntawd, koj yuav tsum xyaum ua koj lub neej raws li tus txivneej uas ua zoo thiab ua lub neej ncaj ncees. Cov neeg ncaj ncees thiab ua zoo yuav tau nyob hauv lub tebchaws. Tiamsis Vajtswv yuav muab tej neeg siab phem tshem tawm hauv lub tebchaws ntawd mus thiab muab tej neeg txhaum rho tawm ib yam li dob nroj povtseg ntag. Metub, koj tsis txhob muab kuv tej lus qhuab qhia tso tseg. Nco ntsoov tej lus uas kuv qhia rau koj lawm. Kuv tej lus qhuab qhia yuav ntxiv hnubnyoog rau koj, kom koj muaj sia nyob ntev thiab tau kev kaj siab lug. Tsis txhob muab txojkev ua zoo thiab kev ncaj ncees tso tseg. Muab tej ntawd los coj ntawm koj cajdab. Muab tej ntawd sau rau hauv koj lub siab. Yog koj ua li no, Vajtswv thiab neeg yuav txaus siab rau koj. Cia siab rau tus TSWV kom kawg koj lub siab lub ntsws. Tsis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov tus TSWV, nws thiaj yuav coj koj taug txojkev uas yog txoj tseeb. Tsis txhob xav hais tias koj yog tus ntse tshaj. Cia li hwm tus TSWV thiab tsis txhob mus ua kev txhaum. Yog koj ua li no, tej ntawd yuav zoo ib yam li hauv tshuaj kuab muaj tsuas uas kho tau koj tej qhov txhab thiab ua rau koj tej mob zoo zuj zus. Koj yuav tsum hwm tus TSWV thiab muab tej qoobloo zoo kawg nkaus uas koj khwv tau hauv koj daim teb coj mus fij rau nws. Yog koj ua li ntawd, koj yuav muaj qoobloo puv txhab, thiab koj yuav muaj cawv txib hmab ntau heev tsis muaj hub ntim tas. Metub, thaum tus TSWV qhuab ntuas koj, ua tib zoo mloog thiab khaws nkaus nws tej lus rau nruab siab kom koj thiaj paub ceevfaj. Tus TSWV qhuab ntuas tus uas nws hlub ib yam li leej txiv qhuab ntuas tus tub uas nws cia siab rau. Tus uas muaj tswvyim thiab totaub txhua tsav yam yeej nyob kaj siab lug. Lub tswvyim tseemceeb dua nyiaj, nws muaj nqis rau koj tshaj tej kub. Lub tswvyim muaj nqis tshaj tej saw kub; tej uas koj ntshaw tsis muaj ib yam dabtsi yuav piv tau lub tswvyim ntawd li. Lub tswvyim pab tau rau koj muaj sia nyob ntev, ua rau koj muaj txiag npluanuj thiab muaj koob muaj meej. Lub tswvyim muaj peevxwm pab tau koj ua lub neej txaus siab thiab coj koj ua neej tshav ntuj nrig. Cov neeg uas muaj tswvyim yeej ua neej nyob kaj siab lug. Lub tswvyim yuav ua rau lawv muaj sia nyob cus plaws. Tus TSWV lub tswvyim tsim lub ntiajteb no; nws txojkev txawj ntse muab lub ntuj teeb nyob muaj chaw. Nws lub tswvyim ua rau tej dej txawj ntws tawm los thiab tej huab thiaj ua tau nag los rau hauv ntiajteb no. Metub, tuav rawv koj lub tswvyim thiab kev txawj ntse cia. Tsis txhob cia tej ntawd khiav tawm ntawm koj mus. Tej tswvyim ntawd yuav ua rau koj muaj sia nyob, txaus siab thiab ua neej nyob kaj siab lug. Koj yuav taug kev kaj siab lug thiab tsis raug teebmeem ib zaug li. Thaum koj mus pw los koj yuav tsis ntshai, thiab koj yuav tau zoo pw tsaug zog ib hmos kaj ntug. Koj yuav tsis txhawj txog tej kev puastsuaj uas los ntawm tej neeg siab phem ib yam li cua daj cua dub ntsawj uas koj tsis ras txog. Tus TSWV yuav pub koj tau zoo nyob kaj siab lug. Nws yuav tsis cia koj mus mag lub vojhlua. Yog muaj tej yam uas koj pab tau lwm tus, cia li pab tsis txhob muab khaws cia. Yog koj muaj txawm peem uas yuav pab tau tej phoojywg zejzog, cia li pab tsis txhob kom nws tos txog tagkis tso. Tsis txhob ua ib yam dabtsi rau tej phoojywg zejzog uas nws nyob ntawm koj tog vaj tog tsev tu siab, nws yeej cia siab ntsoov rau koj xwb. Tsis txhob nrog leejtwg sib cav tej yam uas tsis muaj qabhau, yog nws tsis tau ua ib qhov phem rau koj. Tsis txhob khib tej neeg uas ua phem lossis tsis txhob xyaum ua li lawv ua, rau qhov tus TSWV ntxub tej neeg uas ua phem ua qias, tiamsis nws txaus siab rau cov neeg ncaj ncees. Tus TSWV foom phem rau tsevneeg uas ua limhiam, tiamsis nws foom koob hmoov rau tsevneeg uas ua ncaj ncees. Nws luag cov neeg khavtheeb plig, tiamsis nws hlub cov uas txo hwjchim. Cov neeg txawj ntse yuav tau koob meej zoo, tiamsis cov neeg ruam yuav poob ntsejmuag. Metub, cia li mloog koj txiv tej lus qhuab qhia. Ua tib zoo mloog koj thiaj li yuav totaub. Tej lus uas kuv qhuab qhia koj yeej yog tej lus zoo xwb, yog li ntawd, koj yuav tsum nco ntsoov txhua lo huv tibsi. Thaum kuv tseem yog menyuam tub uas yog kuv niam thiab kuv txiv tib tug tub, mas kuv txiv twb yeej qhuab qhia kuv lawm. Nws hais tias, “Nco ntsoov tej lus uas kuv qhia koj no rau nruab siab thiab tsis txhob muab tso tseg ib zaug li. Ua ib yam li kuv qhia koj lawm, koj thiaj yuav muaj sia ua neej nyob. Cia li txais yuav lub tswvyim thiab kev txawj ntse! Tsis txhob tso kuv tej lus tseg. Tsis txhob muab lub tswvyim tso povtseg, rau qhov nws yuav tsomkwm koj; saib lub tswvyim kom muaj nqis, nws thiaj yuav pab kom koj tau kev kaj siab lug. Qhov tseemceeb tshaj plaws, yog lub tswvyim. Koj yuav ua dabtsi los xij, koj yuav tsum xub nrhiav kom tau lub tswvyim. Saib lub tswvyim kom muaj nqis, nws yuav ua rau koj tau koob meej. Cia li puag nkaus lub tswvyim cia, nws thiaj yuav ua rau koj tau ntsejmuag. Tswvyim yuav yog lub kausmom kub rau koj ntoo nto moo lug.” Metub, mloog kuv tej lus. Khaws nkaus tej lus uas kuv qhia koj no cia, koj thiaj muaj txojsia ua neej nyob ntev. Kuv tau qhia tswvyim rau koj thiab coj koj ua neej rau txojkev ncaj ncees. Yog koj ua neej raws li kev txawj ntse, yuav tsis muaj ib yam dabtsi thaiv koj kev, thiab yuav tsis muaj ib yam dabtsi dawm koj kotaw thaum koj khiav. Nco ntsoov txhua yam uas koj tau kawm los lawm tsis txhob muab tso tseg. Koj tej kev kawm txawj kawm tse yog koj txojsia ntag, cia li ceev nws kom zoo. Tsis txhob mus rau tej qhov chaw uas cov neeg ua phem mus. Tsis txhob xyaum ua raws li tej neeg siab phem tus yam ntxwv. Tsis txhob ua phem ua qias hlo li! Cia li khiav kom dhau txojkev phem qias ntawd! Tsis txhob mus ua txojkev phem, saib ntsoov rau koj txoj haukev xwb. Tej neeg siab phem yog tsis tau ua kev txhaum, mas lawv pw tsis tsaug zog. Yog lawv tsis tau ua rau ib tug twg raug mob mas lawv tsis pw li. Kev ua phem thiab kev yuam cai zoo ib yam li yog lawv tej mov noj thiab dej haus ntag. Txojkev uas cov neeg ncaj ncees taug mas zoo ib yam li thaum lub hnub tabtom tawm tuaj pom kev txoog thiab ci zuj zus mus txog rau thaum tavsu. Cov neeg phem taug txojkev tsaus ntuj nti ib yam li hmo ntuj. Lawv ntog, tiamsis tsis pom qhov uas lawv dawm li. Metub, koj yuav tsum muab siab npuab tej lus uas kuv hais. Ua tib zoo mloog kuv tej lus. Tsis txhob cia kuv tej lus tawm ntawm koj mus. Nco ntsoov kuv tej lus thiab khaws nkaus cia rau nruab siab. Tej lus ntawd yuav pub txojsia thiab kev noj qab nyob zoo rau txhua tus uas totaub tej lus ntawd. Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav. Tsis txhob hais tej lus tsis tseeb. Tsis txhob hais lus dag thiab tsis txhob hais tej lus tsis zoo. Tsa qhovmuag saib ncaj nraim rau tom hauv ntej thiab saib ntsoov koj txoj haukev. Ua tib zoo xav ua ntej uas koj yuav ua ib yam dabtsi, mas koj thiaj ua tau qhov zoo. Cia li khiav tawm ntawm txojkev phem thiab taug kev ncaj nraim rau tom hauv ntej. Tsis txhob mus rau sab xis lossis sab laug. Metub, ua tib zoo mloog kuv lub tswvyim thiab kuv tej kev txawj ntse. Koj thiaj yuav paub coj koj tus cwjpwm zoo, thiab tej lus uas koj hais yuav qhia hais tias koj yog tus muaj kev txawj ntse. Luag tej pojniam lub qhovncauj hais lus mos lus muag qab zib ib yam li zib ntab thiab nwj nplua ib yam li pleev roj txiv ntoo, tiamsis tom qab ntawd nws tsis muab dabtsi rau koj li, tsuas yog muab kev iab kev daw thiab kev mob kev nkeeg rau koj xwb. Txojkev uas nws taug yog kev tuag; nws yuav coj koj mus rau hauv tubtuag teb. Nws tsis taug txojkev uas muaj txojsia; tiamsis nws lam ua neej xwb, nws twb tsis paub hais tias yuav muaj xwm dabtsi tshwm los rau nws li. Metub, nimno koj cia li mloog kuv hais thiab tsis txhob muab kuv tej lus ib los tso povtseg li. Cia li khiav tawm ntawm tej pojniam uas hais tas los no! Tsis txhob mus ze ntawm nws lub qhovrooj hlo li! Yog koj ua tsis zoo, lwm tus yuav tau txais koj lub koob meej, thiab koj yuav tuag thaum koj tseem hluas rau tej neeg uas tsis muaj kev hlub txhais tes, thiab luag tej yuav tuaj txeeb koj tej qhov txhia chaw, thiab tej uas koj khwv tau los yuav poob mus ua luag tug. Koj yuav pw quaj da luam saum lub txaj uas yog txojkev tuag; kas yuav muab koj cev nqaij noj tas, ces koj yuav hais tias, “Vim li cas kuv yuav tsis mloog luag tej lus qhuab qhia? Vim li cas kuv tsis cia luag qhuab ntuas kuv? Kuv tsis mloog tej lus uas kuv tus xibhwb qhia. Kuv tsis quavntsej tej lus qhia ntawd li. Thiab tib pliag ntshis xwb kuv cia li raug kev txajmuag tabmeeg tej neeg sawvdaws.” Koj yuav tsum ncaj ncees rau koj tus pojniam thiab hlub nws tib leeg xwb. Tej menyuam uas koj mus tham lwm tus pojniam muaj yuav tsis zoo rau koj. Tsimnyog cia koj tej menyuam ntawd loj hlob los pab koj, tsis yog tso rau luag qhua. Koj cia li txaus siab rau koj tus pojniam thiab nrhiav kev zoo siab nrog tus hluas nkauj uas koj yuav thaum koj tseem hluas. Nws zoo nkauj thiab ntxim hlub ib yam li tus xyuas muaslwj. Cia nws lub xubntiag ua chaw sov siab rau koj, cia nws txojkev hlub nyob puagncig koj. Metub, vim li cas koj mus hlub dua lwm tus pojniam lawm? Vim li cas koj mus nyiam lwm tus pojniam lub xubntiag? Tus TSWV pom txhua yam uas koj ua. Koj mus qhov twg los nws yeej saib ntsoov koj. Tus neeg siab phem txojkev txhaum yog lub vojhlua ntag. Nws txojkev txhaum ua lub vas rov khwb nws. Nws tuag, rau qhov nws tswj tsis tau nws lub siab. Nws txojkev ruam yuav xa nws mus rau hauv nws lub qhov ntxa. Metub, koj puas tau coglus rau leejtwg uas yuav pab them nws tej nuj nqi? Koj tej lus puas rov khi koj thiab koj tej lus cog tseg puas rov ua lub vojhlua cuab koj kev? Metub, yog koj tau coglus li ntawd, ces koj poob rau tus neeg ntawd qab hwjchim lawm; koj cia li mus cuag nws thiab thov thim koj tej lus cog tseg kom nws tso koj, koj thiaj yuav dim. Koj tsis txhob pw tsaug zog lossis nyob ncaws nruj nris. Cia li khiav tawm ntawm lub vojhlua ib yam li tus noog lossis tus muaslwj khiav ntawm tus neeg yos tua tsiaj. Tus neeg tubnkeeg, koj cia li mus saib ntsaum, saib ntsaum ua ntsaum lub neej li cas, koj thiaj li muaj tswvyim. Tej ntsaum twb tsis muaj thawjcoj, tsis muaj nomtswv, lossis tsis muaj ib tug thawjtswj kav li, tiamsis lub caij ntuj sov lawv txawj mus nrhiav zaub mov los npaj cia noj rau lub caij ntuj no. Tus neeg tubnkeeg, koj tseem yuav pw ntev li cas? Thaum twg koj mam li sawv? Tus neeg tubnkeeg hais tias, “Kuv tseem yuav tsaug ib tsig zog, thiab kuv yuav khawm tes so ib chim tso.” Tiamsis thaum nws tseem pw tsaug zog, kev txomnyem yuav los raug nws ib yam li tus tubsab nqa rawv qws tuaj huab nws lub neej ntag. Cov neeg tsis tsimtxiaj thiab siab phem tawm mus hais lus dag rau ub rau no. Lawv txiav muag thiab ua tus plees tsawv ntxias koj nkaus xwb, txhua yam uas lawv xav puavleej yog kev phem kev qias, thiab ua kom muaj teebmeem rau txhua qhov chaw. Vim li no, txojkev puastsuaj thiaj yuav los raug lawv thaum lawv tsis ceevfaj, thiab lawv tej nqaij yuav ntuag ua qhov txhab kho tsis tau. Metub, cia li ua raws li koj txiv qhia koj thiab tsis txhob tso koj niam tej lus qhia tseg. Khaws nkaus nkawd tej lus mus ua koj lub neej, thiab khaws nkaus tej lus ntawd rau hauv koj lub siab. Nkawd tej lus qhuab qhia yuav coj koj txoj haukev thaum koj tabtom taug kev, yuav tsomkwm koj thaum tsaus ntuj, thiab thaum nruab hnub tej lus ntawd yuav ntuas koj. Nkawd tej lus qhuab ntuas yuav ua lub teeb ci rau koj pom kev; nkawd tej lus qhuab qhia yuav pab tau koj kev ua neej. Tej lus ntawd hwjxwm tsis pub koj txav mus ti tej pojniam siab phem, thiab ntawm luag tej pojniam tej lus haub ntxias. Tsis txhob cia lawv tej kev zoo nkauj sim koj siab; tsis txhob cia lawv lub qhovmuag ua lub vojhlua soo tau koj. Ib tug txivneej muab ib lub ncuav ntiav tau ib tug niamntiav, tiamsis kev deev luag pojniam yuav ua rau nws puas mus tas ib simneej. Koj puas tso tau hluavtaws rau ntawm koj hauvsiab kom tsis txhob kub koj tej ris tsho? Koj puas mus tau saum cov ncaig taws uas cig ntsaj thuav kom tsis txhob kub koj ob txhais taw? Tus uas mus nrog luag tej pojniam pw yuav tsis dim ib yam li ntawd ntag. Yog leejtwg ua, nws yuav raug kev tsimtxom. Neeg tsis ntxub tus tubsab, yog hais tias nws nyiag zaub mov noj thaum nws tshaib plab; yog luag ntes tau nws, nws yuav tsum them xya npaug rov qab, nws yuav tau muab tagnrho tej uas nws muaj mus them. Tiamsis tus txivneej uas ua txhaum kev nkauj kev nraug, yog tus neeg uas tsis txawj xav. Yog nws rov ua rau nws raug kev puastsuaj ntag. Nws yuav raug txajmuag thiab raug ntaus; thiab nws yuav raug txob thuam mus tas simneej. Tsis muaj ib yam uas ua rau tus txiv chim thiab khib npaum li thaum uas luag tuaj txeeb nws tug; mas thaum nws ua pauj nws yuav ua kom txaus nkaus. Tus txiv yuav tsis kam txais yuav tej nyiaj uas nplua ntawd li; txawm yog yuav muab ntau npaum li cas los yeej daws tsis tau nws txojkev chim li. Metub, koj nco ntsoov kuv tej lus thiab khaws kuv tej lus cia rau nruab siab. Ua koj lub neej li kuv qhia, koj thiaj yuav muaj sia ua neej nyob. Koj yuav tsum ua tib zoo mloog kuv tej lus qhia ib yam li koj txuag koj ob lub qhovmuag. Nco ntsoov kuv tej lus qhia txhua lub sijhawm; muab khaws nkaus rau nruab siab. Suav hais tias lub tswvyim yog koj tus muam, thiab kev txawj ntse yog koj tus phoojywg zoo. Tej lus ntawd yuav tswj tsis pub kom koj mus ti luag tej pojniam, thiab tej pojniam uas hais lus mos lus muag. Muaj ib zaug kuv tuaj hauv kuv lub tsev saib ntawm qhovrai mus, kuv pom muaj ib pab tub hluas uas tsis tau paub qabhau taug kev tuaj, tiamsis muaj ib tug yog tus ruam tshaj cov. Nws txawm taug kev mus ze rau ntawm txojkev tshuam uas tus pojniam ntawd nyob, thiab mus ze rau ntawm tus pojniam ntawd lub tsev, thaum hnubpoob qho uas twb tsaus ntuj zuag lawm. Tus pojniam txawm tawm tuaj cuag tus tub hluas; tus pojniam ntawd hnav tsoos zoo ib yam li tus niamntiav thiab npaj tej tswvyim dag ntxias. Nws ua tus muaj plhus ntxiag tsis paub txajmuag rau tej neeg uas dua kev, lossis mus sawv ntawm tej kev tshuam tos, muaj qee zaus nws mus sawv piavyeev hauv tej plawv kev, muaj qee zaus nws mus sawv piavyeev hauv tej kiab tej khw. Nws xyab hlo npab mus puag nkaus tus tub hluas ntawd nwj kiag, saib ntsoov tus tub hluas tsis ntsais muag li thiab hais tias, “Hnub no kuv tua tsiaj fij thiab muaj tej nqaij theej txhoj ntawd ntau heev. Yog li ntawd, kuv thiaj tawm tuaj nrhiav koj. Mas kuv xav ntsib koj kawg li, muaj hmoo kuv thiaj ntsib koj ntawm no! Kuv twb muab tej ntaubmag txaij nraug zees uas coj nram tebchaws Iziv tuaj los pua kuv lub txaj huv tibsi lawm. Kuv twb muab tshuaj tsw qab mules, alu-es thiab kinamoos los pleev kuv lub txaj tsw qab ntxiag lawm. Cia li nrog kuv mus! Wb yuav sib puag pw zoo siab ib hmos kaj ntug. Wb ib leeg yuav txaus siab rau ib leeg txhais npab. Kuv tus txiv tsis nyob hauv tsev. Nws mus kev deb lawm. Nws nqa hlo lub hnab nyiaj nrog nws mus, thiab nws yuav mus ntev txog ob lub limtiam mam li rov qab los.” Tus pojniam ntawd hais tej lus mos lus muag haub ntxias, ces tus tub hluas thiaj qaug siab hlo rau tus pojniam ntawd tej lus ntxias. Tamsim ntawd nws cia li nrog tus pojniam mus ib yam li luag cab tus heev nyuj mus khi rau ntawm tswg tua, thiab ib yam li luag puav tus muaslwj khiav mus mag lub vojhlua, yog qhov chaw uas xibxub vos yuav chob mus ti nkaus rau hauv nws lub plawv. Nws zoo ib yam li tus noog uas ya mus mag lub vas, nws twb tsis paub hais tias nws txojsia twb poob mus rau txojkev puastsuaj lawm. Cov metub, nimno nej cia li mloog kuv hais thiab khaws kuv tej lus cia. Tsis txhob pub tej pojniam uas zoo li tus pojniam no ntxias tau nej lub siab; tsis txhob ua tus neeg uas tsis paub qabhau dabtsi thiab raws nws qab mus. Nws twb ua rau ntau tus txivneej raug puastsuaj thiab ua rau coob leej tuag lawm suav tsis txheeb. Yog koj mus rau hauv nws tsev, ces yog koj tabtom taug kev mus rau hauv tubtuag teb lawm ntag. Qhov ntawd yog txojkev tuag sai kawg nkaus li. Cia li mloog! Lub tswvyim tabtom hu. Txojkev totaub tabtom tsa nws lub suab hu. Lub tswvyim yeej sawv nres nroos saum tej ncov roob uas nyob ze rau ntawm tej ntug kev thiab ntawm tej kev tshuam. Lub tswvyim tuaj ntawm tej ncauj ke uas mus rau hauv nroog, thiab sawv ntawm tej roojvag ib sab hu hais tias, “Neeg, kuv twb hu nej lawm; kuv hu txhua tus uas nyob hauv ntiajteb no huv tibsi. Nej tseem yog menyuam mos xwb los? Cia li kawm ua li tej laus ua. Nej yog neeg ruam los? Cia li kawm kom ntse los mas. Ua tib zoo mloog kuv tej lus uas zoo tshaj plaws no; txhua yam uas kuv qhia nej yeej yog yam tseeb xwb. Yam uas kuv hais yog qhov tseeb; kuv ntxub tej lus dag kawg li. Txhua yam uas kuv hais puavleej yog lus tseeb; tsis muaj ib los twg yog lus dag lossis yuam kev li. Tus neeg uas txawj ntse, nws totaub tej lus no zoo; thiab txhua yam yoojyim rau tus uas txawj ntse. Khaws kuv tej lus qhuab ntuas cia zoo dua li khaws tej nyiaj txiag; khaws tej kev txawj ntse cia zoo dua khaws tej tseem kub. “Kuv yog lub tswvyim, kuv zoo dua tej hlaws muaj nqis; txhua yam uas nej xav yuav yeej piv tsis tau kuv li. Kuv yog lub tswvyim, thiab kuv muaj kev txawj ntse heev; kuv muaj kev txawj ntse thiab paub txiav txim. Kev uas hwm tus TSWV yog ntxub txojkev phem kev qias; kuv ntxub txojkev khavtheeb, txojkev limhiam, txojkev phem qias thiab tej lus dag kawg li. Kuv twb npaj tau tswvyim thiab yuav siv tej tswvyim ntawd tawm ntag. Kuv yog tus thoob tsib to nrog, thiab kuv yog tus muaj zog nchav. Kuv pab tej vajntxwv tswj teb kav chaw thiab pab tej nomtswv rhawv kevcai tswjhwm ncaj ncees. Txhua tus nomtswv uas kav hauv lub ntiajteb no, kuv yog tus uas pab lawv, tej coj plaub tsaws ntug thiab tej nomtswv qib siab los ib yam nkaus. Kuv hlub cov uas hlub kuv; yog leejtwg nrhiav kuv yeej yuav ntsib kuv. Nyiaj txiag thiab meejmom, kev npluanuj thiab kev vammeej kuv puavleej muaj. Tej uas koj tau ntawm kuv los zoo dua tej tseem kub thiab zoo dua tej tseem nyiaj. Kuv taug kev ncaj ncees; kuv ua raws li txojkev tseeb, kuv muab kuv tej nyiaj txiag rau tus uas hlub kuv, lawv tej tsevneeg muaj nyiaj muaj txiaj nplua mias. “Tus TSWV xub tsim kuv ua ntej dua ib puas tsav yam huv tibsi, kuv yog tes haujlwm uas nws xub ua puag thaum ub los lawm. Nws yeej tsim kuv puag thaum chivkeeb, kuv yeej nyob puag thaum tsis tau tsim lub ntiajteb no los lawm. Kuv tseem xub nyob dua thaum tsis tau muaj hiavtxwv thiab qhovdej txhawv. Kuv tseem xub nyob dua tej roob thiab ua ntej tej pov roob nyob muaj chaw, ua ntej Vajtswv tsim lub ntiajteb thiab tej tiaj nrag lossis thawj phoovtes av. Thaum Vajtswv muab lub ntuj mus tso nyob muaj chaw, kuv twb yeej nyob ntawd lawm, thaum nws nthuav lub ntuj kom tus npoo ntuj mus hla dej hiavtxwv, thaum nws muab tej huab mus tso rau saum nruab ntug, thaum nws qhib tej qhovdej hiavtxwv, thiab hais kom tej hiavtxwv tsuas ntws txij tej ciam uas nws kom tseg. Thaum nws puab tej cag ntiajteb kuv twb yeej nyob ntawd lawm. Kuv yeej nyob rawv ntawm nws ib sab ib yam li tus kws tsa tsev ntag, kuv yog tus uas niaj hnub ua rau nws zoo siab thiab nrog nws nyob sov siab so, kuv zoo siab rau lub ntiajteb thiab txaus siab rau tej neeg txhua haiv. “Cov metub hluas, nimno nej cia li mloog kuv hais. Ua li kuv hais, nej thiaj yuav tau zoo nyob kaj siab lug. Cia li mloog tej lus uas kuv qhia nej no. Tsis txhob muab tso tseg, nej thiaj yuav txawj ntse. Tus neeg uas mloog kuv tej lus, tus neeg uas niaj hnub tuaj sawv ntawm kuv lub qhovrooj tos yuav los hauv kuv lub tsev, yuav tau nyob kaj siab lug. Tus neeg uas nrhiav kuv yog nws nrhiav txojsia ntag, thiab tus TSWV yuav txaus siab rau nws. Tus neeg uas tsis los nrhiav kuv, tus ntawd, nws rov txov nws txojsia. Leejtwg ntxub kuv, ces yog nws nyiam txojkev tuag.” Lub tswvyim ua nws lub tsev thiab txhos xya tus ncej txheem lub tsev ntawd. Nws muab ib tug tsiaj tua ua pluas noj pluas haus, muab cawv xyaw rau, thiab coj mus txawb rau saum rooj. Nws tso nws cov txhais qhev mus rau saum qhov chaw siab hauv lub nroog hu tuaj hais tias, “Cov neeg ruam, nej cia li los ntawm no!” Thiab nws hais rau cov txivneej ruam tias, “Cia li tuaj, tuaj noj kuv tej zaub mov thiab haus tej cawv uas kuv tov tau lawm. Cia li tso plhuav txojkev ruam tseg, thiab raws txojkev txawj ntse qab, koj thiaj li yuav muaj sia nyob.” Yog koj ntuas tus neeg uas luag lwm tus plig, mas koj yuav raug thuam. Yog koj thuam tej neeg ua phem, mas koj yuav raug lus tsis zoo. Tsis txhob mus ntuas tus neeg ua luag lwm tus plig hlo li, nyob tsam nws yuav ntxub koj. Tiamsis yog koj ntuas tus neeg txawj ntse, mas nws yuav hwm koj. Txhua yam uas koj hais rau tus neeg txawj ntse yuav ua rau nws muaj tswvyim ntxiv. Tej uas koj qhia rau tus neeg ncaj ncees yuav ntxiv kom nws muaj kev txawj ntse. Tus uas muaj tswvyim yog tus uas paub hwm tus TSWV. Yog koj paub Vajtswv tus uas Dawbhuv, koj thiaj yog tus totaub tiag. Lub tswvyim yuav ntxiv kom koj muaj sia ua neej nyob ntau xyoo. Yog koj muaj tswvyim, koj yuav muaj koob muaj meej, tiamsis yog koj muab lub tswvyim povtseg, koj yuav raug kev txomnyem. Kev ruam zoo ib yam li tus pojniam uas suab nrov, tawv ncauj thiab tsis paub txajmuag li. Nws zaum rawv ntawm nws lub qhovrooj lossis saum lub chaw uas siab tshaj plaws hauv nroog, thiab hu tej neeg uas dhau kev tuaj mus ua lawv tej haujlwm hais tias, “Cov neeg tawv ncauj, nej cia li los ntawm no!” Nws hais rau tus txivneej ruam hais tias, “Cov dej uas nyiag los yeej qab zib dua. Tej ncuav uas nyiag los yeej qab tshaj.” Lawv tsis paub hais tias cov neeg uas tuag lawm, twb yog cov uas mus hauv tus pojniam ntawd tsev; cov neeg uas mus rau hauv nws tsev, yog cov uas nyob hauv tubtuag teb qhov uas tob tshaj plaws. Tej no yog Xalumoos tej pajlug: Tus tub uas muaj tswvyim ua rau leej txiv zoo siab heev rau nws; tus tub uas ruam coj kev ntxhov siab los rau nws niam. Tej nyiaj txiag uas koj tau los ntawm txojkev tsis ncaj ncees, yuav tsis ua rau koj npluanuj, tiamsis tej uas tau los ntawm kev ncaj ncees yuav cawm tau koj txojsia. Tus TSWV yuav tsis cia tej neeg ncaj ncees tshaib nqhis, tiamsis nws yuav tsis pub cov neeg siab phem tau tej uas lawv ntshaw. Kev tubnkeeg yuav ua rau koj pluag, tiamsis kev nquag yuav ua rau koj npluanuj. Tus uas muaj tswvyim, nws mob siab sau qoobloo rau thaum tej qoob siav, tiamsis tus uas pw thaum lub caij sau qoob yuav tau kev txajmuag. Tus neeg siab zoo yuav tau txais koob hmoov, tiamsis tus neeg siab phem hais tej lus tsis zoo. Luag yuav nco ntsoov tej neeg siab zoo lub koob mus li, tiamsis tus neeg siab phem yuav tsis muaj leejtwg nco txog. Tus neeg muaj tswvyim khaws luag tej lus qhuab ntuas, tiamsis tus neeg ntau ncauj yuav raug kev puastsuaj. Tus neeg ncaj ncees tau nyob kaj siab lug, tiamsis tus neeg tsis ncaj ncees yuav raug luag ntes. Tus uas zais siab mas ua kom muaj kev kub ntxhov, tiamsis tus uas ntuas luag tabmeeg yuav ua kom muaj kev sib haumxeeb. Tus neeg siab zoo tej lus yog lub qhovdej uas cawm siav, tiamsis tus neeg siab phem tos rawv ntxo luag xwb. Kev ntxub ua kom muaj teebmeem, tiamsis kev hlub ua rau kev cibnyeej ploj mus. Tus neeg txawj ntse hais tej lus uas luag totaub, tiamsis tus neeg ruam yuav raug luag nplawm. Tus neeg muaj tswvyim khaws tej kev txawj ntse cia, tiamsis thaum tus neeg ruam hais lus, ua rau muaj kev kub ntxhov. Nyiaj txiag tsomkwm cov neeg npluanuj, tiamsis cov pluag raug kev tsimtxom thiab puastsuaj. Nqi zog rau tus uas ua zoo yog txojsia, tiamsis tej uas tus ua phem tau yog kev puastsuaj. Tus neeg uas ua tib zoo mloog thaum luag qhuab ntuas yuav tau txojsia, tiamsis tus neeg uas tsis lees yuav luag tej lus ntuas yuav raug kev puastsuaj. Tus neeg uas zais nws tej kev ntxub rau nruab siab yog ib tug neeg dag. Leejtwg ua neeg ntau ncauj tus ntawd yog ib tug neeg ruam. Yog koj ua neeg ntau ncauj, yuav ua rau koj hais lus txhaum ntau ntxiv. Yog koj ntse, koj tsis txhob ua neeg ntau ncauj. Tus neeg siab zoo tej lus muaj nqis ib yam li tej tseem nyiaj, tus neeg siab phem tej kev xav tsis muaj qabhau dabtsi. Tus neej siab zoo tej lus pab tau coob leej, tiamsis tus neeg ruam tuag vim nws tsis txawj xav. Twb yog tus TSWV foom koob hmoov rau koj, koj thiaj muaj txiag npluanuj. Tsis yog qhov uas koj niaj hnub khwv ua rau koj npluanuj. Tus uas zoo siab ua txhaum yeej yog neeg ruam. Tus neeg txawj ntse yeej txaus siab rau nws lub tswvyim. Cov neeg ncaj ncees tau tej uas lawv xav yuav, tiamsis tej uas cov neeg ua phem ntshai yuav los raug lawv. Cua daj cua duab ntsawj cov neeg uas ua phem mus povtseg, tiamsis cov neeg ncaj ncees yuav tau zoo nyob kaj siab lug. Tsis txhob txib tus neeg tubnkeeg mus ua ib yam dabtsi rau koj. Nws yuav zoo li cov kua qaub rau koj cov kaus hniav lossis zoo li tej pa taws uas ntshawb koj qhovmuag. Ua lub neej hwm tus TSWV, koj thiaj yuav muaj txojsia ua neej nyob ntev. Cov neeg siab phem tuag ua ntej lawv lub caij nyoog. Cov neeg ncaj ncees txojkev cia siab coj lawv mus rau qhov tau zoo, tiamsis cov neeg ua phem ua neej tsaus ntuj nti tsis pom yav tom ntej. Tus TSWV tsomkwm tej neeg ncaj ncees, tiamsis nws rhuav tshem tej neeg uas ua txhaum. Cov neeg ncaj ncees yuav tau nyob hauv lub tebchaws, tiamsis cov neeg ua phem yuav raug muab ntiab tawm. Cov neeg ncaj ncees xaiv tej lus zoo hais, tiamsis luag yuav txwv tus nplaig uas hais lus phem. Cov neeg ncaj ncees paub hais tej lus uas txaus sawvdaws yuav, tiamsis cov neeg siab phem hais tej lus uas chob siab xwb. Tus TSWV ntxub cov neeg uas muab rab teev ntxo los luj rau luag. Nws txaus siab rau cov neeg uas muab rab teev tsis ntxo los luj rau luag. Tus neeg khavtheeb yuav poob ntsejmuag, tiamsis tus neeg txawj ntse paub txo hwjchim. Txojkev ncaj ncees yuav coj tus neeg ua zoo kev; cov neeg uas tsis ncaj yuav raug puastsuaj. Kev npluanuj yuav tsis muaj qabhau rau hnub uas koj tuag, tiamsis kev ncaj ncees yuav cawm tau koj txojsia. Txojkev ncaj ncees ua rau tus neeg siab zoo ua lub neej kaj siab, tiamsis tus neeg siab phem tej kev phem yuav rov ua rau nws raug puastsuaj. Txojkev ncaj ncees pab tau tus neeg siab ncaj dim, tiamsis tus neeg siab nkhaus yuav mag lub vojhlua uas yog nws txojkev ua phem. Thaum tus neeg siab phem tuag, nws txojkev cia siab tas nrog nws. Txhua yam uas nws cia siab rau yuav tsis muaj qabhau dabtsi. Cov neeg ncaj ncees tau txais kev cawm dim; cov neeg siab phem yuav raug kev puastsuaj. Tus neeg uas tsis hwm Vajtswv tej lus ua rau koj raug kev puastsuaj; tiamsis tus neeg ncaj ncees txojkev txawj ntse pab tau koj dim. Tej neeg hauv lub nroog zoo siab thaum cov neeg ncaj ncees tau koob hmoov, thiab lawv qw zoo siab thaum cov neeg ua phem tuag. Thaum cov neeg ncaj ncees foom koob hmoov, lub nroog muaj kev vammeej; tiamsis cov neeg siab phem tej lus ua rau lub nroog raug kev puastsuaj. Tus neeg ruam nyiam hais lus thuam lwm tus; yog koj ntse, koj tsis txhob ua neeg ntau ncauj. Tsis muaj leejtwg cia siab rau tus neeg ntau ncauj, tiamsis koj yeej tso siab tau rau tus uas koj ntseeg siab. Yog tsis muaj tus coj, lub tebchaws yuav poob mus, tiamsis yog muaj coob tus tuavxam yuav ua rau muaj kev tswjhwm ruaj khov. Yog koj tau coglus nrog lwm tus them nuj nqi, koj yuav tau ris cov nqi ntawd. Zoo dua koj cia li muab tso tseg tsis txhob koom tes nrog nws. Tus pojniam uas muaj lub siab zoo mas luag yeej hwm nws, tiamsis tus pojniam uas siab tsis ncaj yuav poob ntsejmuag. Tus neeg tubnkeeg yeej tsis nrog luag muaj nyiaj ib zaug li, tiamsis tus neeg nquag yuav muaj txiag npluanuj. Thaum koj ua siab dawb siab zoo yog koj ua zoo rau koj ntag. Tiamsis yog koj ua lub siab nruj tsiv, tej ntawd yuav rov los raug koj. Tus neeg ua phem tsis tau tej nqi zog zoo, tiamsis yog koj ua kev ncaj ncees, koj yuav tau tej nqi zog uas zoo. Tus uas ua lub neej nyob ruaj nrees rau txojkev ncaj ncees yuav muaj txojsia nyob, tiamsis tus uas pheej nrhiav nrhw txojkev phem ua yuav tuag mus. Tus TSWV ntxub cov neeg uas muaj lub siab limhiam, tiamsis nws hlub cov neeg ncaj ncees. Koj yuav tsum paub hais tias cov neeg ua phem ua qias yuav raug txim, tiamsis cov neeg ncaj ncees yuav khiav dim. Tus pojniam zoo nkauj uas tsis muaj tswvyim, zoo ib yam li lub khawb kub uas muab dai rau ntawm npua taubntswg ntag. Tej uas cov neeg zoo xav tau, yeej ibtxwm xaus rau yam zoo; thaum cov neeg ua phem tau yam uas lawv ntshaw, tsuas yog kev npautaws xwb. Muaj qee leej siv lawv tej nyiaj txiag lawm laub lug los lawv tseem muaj txiag npluanuj, tiamsis muaj ibtxhia qia dub kawg los lawv pluag kawg li. Ua neeg siab dawb siab zoo, koj lub neej thiaj yuav vammeej. Pab lwm tus, luag thiaj yuav pab koj. Tej neeg tsawm foom tus uas sau qoob los tseg cia tos muag kom tau nqi ntau, tiamsis luag qhuas tus uas muag pheej yig. Tus neeg uas nrhiav yam zoo yuav tau txais yam zoo, tiamsis tus neeg uas nrhiav yam phem yuav tau txais yam phem. Cov neeg uas tso siab rau lawv txojkev npluanuj yuav poob ib yam li tej nplooj thaum lub caij nplooj ntoos zeeg, tiamsis cov neeg ncaj ncees yuav vammeej ib yam li tej nplooj thaum lub caij nplooj ntoos hlav. Tus neeg uas pheej tsim teebmeem rau nws tsevneeg, thaum kawg nws yuav tsis muaj ib yam dabtsi li. Cov neeg ruam yuav tau ua cov neeg txawj ntse qhev mus li. Kev ncaj ncees pub txojsia, tiamsis kev nruj tsiv rho txojsia. Cov neeg ua zoo yeej tau txais nqi zog hauv lub ntiajteb no, koj yuav tsum paub hais tias cov neeg ua phem thiab cov neeg txhaum yuav raug txim. Tus neeg uas nyiam kev txawj ntse nws xav kom luag qhia nws thaum nws ua txhaum. Tus neeg uas tsis nyiam kev qhuab ntuas yog neeg ruam. Tus TSWV txaus siab rau cov neeg ua zoo, tiamsis nws rau txim rau cov neeg uas nyiam ua phem ua qias. Cov neeg ua phem yeej nyob tsis muaj chaw, tiamsis cov neeg ncaj ncees nyob ruaj khov kho. Tus pojniam uas tsimtxiaj yog lub kausmom yeebkoob rau nws tus txiv ntoo, tiamsis tus pojniam uas coj kev txajmuag los rau nws tus txiv zoo ib yam li cov kua paug uas nyob hauv tus txiv cov pobtxha. Cov neeg ncaj ncees yeej ua ncaj rau koj, tiamsis cov neeg siab phem xav dag ntxias koj xwb. Cov neeg siab phem tej lus tua neeg tuag, tiamsis cov neeg ncaj ncees tej lus pab tau lwm tus uas raug kev txomnyem nyuaj siab dim. Cov neeg siab phem ntog thiab puastsuaj mus, lawv yuav tsis muaj xeebntxwv tseg li, tiamsis cov neeg ncaj ncees tej xeebntxwv yuav nyob ruaj khov. Yog koj txawj ntse, luag yuav qhuas koj. Yog koj ruam, luag yuav saib tsis taus koj. Tus neeg uas luag saib tsis tseemceeb dabtsi, tiamsis nws muaj tubtxib, zoo dua tus neeg khavtheeb uas tsis muaj noj tsis muaj haus. Tus neeg siab zoo yeej tu nws tej tsiaj txhu zoo, tiamsis tus neeg siab phem yeej tsimtxom nws tej tsiaj txhu. Tus neeg nquag ua liaj ua teb, muaj noj nplua mias, tiamsis tus neeg ruam muab nws lub sijhawm siv tsis muaj nqis. Txhua yam uas tus neeg siab phem xav tau, yog nrhiav kev ua phem ua qias xwb, tiamsis tus neeg ncaj ncees nyob ruaj khov. Tus neeg siab phem tej lus rov ua lub vojhlua soo nws, tiamsis tus neeg ncaj ncees yuav khiav dim ntawm tej teebmeem. Koj yuav tau txais nqi zog raws li tej lus uas koj hais thiab tej haujlwm uas koj ua. Koj yuav tau txais raws li koj tau ua los lawm. Cov neeg ruam xav hais tias, lawv yog cov uas hais yog, tiamsis cov neeg uas mloog luag tej lus qhuab ntuas yog neeg txawj ntse. Thaum tus neeg ruam chim, nws ua rau luag paub tamsim ntawd ntag, tus neeg ntse nyiaj tau tej uas luag ua saib tsis taus nws. Tus neeg ncaj ncees ua timkhawv tseeb, tiamsis tus neeg dag ua timkhawv tsis ncaj. Tej lus tsis zoo chob luag siab ib yam li rab ntaj, tiamsis lo lus zoo nplig tau luag lub siab. Tus neeg uas hais lus dag yuav ua neej nyob tsis ntev, tiamsis tus neeg uas hais lus tseeb yuav muaj sia nyob ntev. Cov neeg uas tuavhauv ua kev phem lawv yog neeg dag ntxias, tiamsis cov neeg ua zoo yuav tau kev kaj siab lug. Tsis muaj kev phem los raug cov neeg ncaj ncees, tiamsis cov neeg siab phem yuav raug kev txomnyem. Tus TSWV ntxub tej neeg uas hais lus dag, tiamsis nws txaus siab rau cov neeg uas hais lus tseeb. Cov neeg txawj ntse muab tej uas lawv paub khaws cia rau nruab siab, tiamsis cov neeg ruam muab txojkev ruam qhia rau sawvdaws paub. Kev nquag yuav ua rau koj muaj hwjchim; kev tubnkeeg yuav ua rau koj mus ua luag qhev. Kev txhawjxeeb ua tau rau koj kev zoo siab ploj mus, tiamsis tej lus zoo yuav txhawb tau koj lub zog. Tus neeg ncaj ncees coj nws tus phoojywg mus rau txojkev zoo, tiamsis tus neeg siab phem coj mus rau kev puastsuaj. Yog koj ua neeg tubnkeeg, koj yuav tsis tau dabtsi, tiamsis yog koj nquag ua haujlwm, koj yuav tau txais koob hmoov. Kev ncaj ncees yog txojkev uas tau txojsia; kev ua phem yog txojkev tuag. Tus tub uas txawj ntse yeej ua tib zoo mloog thaum nws txiv qhuab ntuas nws, tiamsis tus uas muab hlob yeej tsis kam lees nws tej kev txhaum. Cov neeg siab zoo yuav tau nqi zog vim tej lus zoo uas lawv hais, tiamsis cov neeg dag ntxias nrhiav nrhw ua kev phem. Tus neeg uas tswj tau nws lub qhovncauj yuav ceev tau nws txojsia; tus neeg ntau ncauj yuav raug kev puastsuaj. Tus neeg tubnkeeg ntshaw npaum li cas los nws yeej tsis tau tej ntawd ib zaug li. Tus neeg nquag yuav tau txhua yam raws li nws lub siab xav. Cov neeg ncaj ncees ntxub txojkev dag, tiamsis cov neeg siab phem yuav txajmuag thiab poob ntsejmuag. Kev ncaj ncees tsomkwm tus neeg uas tsis muaj txim txhaum; kev txhaum ua rau tus neeg ua phem raug kev puastsuaj. Muaj ibtxhia ua li lawv yog neeg npluanuj, tiamsis lawv tsis muaj dabtsi li. Muaj ibtxhia ua li lawv yog neeg pluag, tiamsis lawv yog neeg muaj txiag npluanuj. Tus neeg npluanuj siv nyiaj txiag cawm nws txojsia, tiamsis tsis muaj leejtwg ua phem rau tus neeg pluag. Cov neeg ncaj ncees zoo ib yam li lub teeb ci pom kev lam lug, cov neeg siab phem zoo ib yam li lub teeb uas twb muab tshuab tuag lawm. Tus neeg muab hlob tsuas tsim kom muaj kev kub ntxhov, tiamsis tus neeg uas thov luag pab tuav tswvyim thiaj yog neeg ntse. Tej nyiaj uas nej tau los yoojyim yuav nyob tsis ntev; tiamsis tej nyiaj uas nej siv dag zog khwv tau los yuav muaj ntau ntxiv. Thaum koj tas kev cia siab, mob koj siab kawg li, tiamsis thaum tau kiag lawm ua rau koj zoo siab kawg. Yog koj tsis kam yuav luag tej lus ntuas, ces koj yuav raug teebmeem; coj raws li luag tej lus qhia koj thiaj ua neej kaj siab. Cov neeg txawj ntse tej lus qhuab qhia yog lub qhovdej cawm txojsia; tej lus ntawd yuav pab koj thaum koj raug kev txhawjxeeb. Luag yuav hwm tus neeg txawj ntse, tiamsis cov neeg uas luag tsis cia siab rau tabtom taug txojkev puastsuaj. Cov neeg txawj ntse yuav ua dabtsi lawv xub xav ua ntej mam li ua, tiamsis cov neeg ruam cia li khav lawv tej kev ruam rau sawvdaws mloog. Tus neeg xa xov tsis ncaj tsim kom muaj kev kub ntxhov, tiamsis tus uas xa xov ncaj yuav ua rau sawvdaws kaj siab lug. Tus uas tsis kam kawm txawj kawm ntse yuav pluag thiab txajmuag, tiamsis tus uas khaws luag tej lus ntuas cia rau nruab siab luag yuav hwm. Yog yus tau yam uas yus xav yuav mas zoo yus siab heev! Cov neeg ruam tsis kam tso lawv txojkev phem kev qias tseg li. Yog koj nrog cov neeg txawj ntse ua ke koj thiaj yuav txawj ntse. Yog koj ua phoojywg nrog cov neeg ruam, koj yuav raug kev puastsuaj. Teebmeem raws cov neeg txhaum qab rau txhua txhia txojkev, tiamsis cov neeg ncaj ncees yuav tau tej nqi zog zoo. Tus neeg siab zoo nws yuav muaj nyiaj txiag tseg rau nws tej xeebntxwv, tiamsis cov neeg txhaum tej nyiaj txiag yuav tseg cia rau cov neeg ncaj ncees yuav. Tus neeg pluag ua tau qoobloo ntau hauv nws daim teb, tiamsis tus neeg tsis ncaj tuaj txeeb tas lawm. Yog koj tsis qhuab qhia koj tus tub, ces yog koj tsis hlub nws. Yog koj hlub nws, koj yeej yuav ntuas nws. Cov neeg ncaj ncees muaj noj nplua mias, tiamsis cov neeg ua phem tshaib nqhis tas mus li. Tus pojniam uas muaj tswvyim tuav tau nws lub cuab lub yig nyob ruaj ntseg, tiamsis tus pojniam ruam muab nws lub cuab lub yig rhuav povtseg. Tus neeg ncaj ncees yeej paub ntshai tus TSWV. Tiamsis tus neeg tsis ncaj ncees tuam mom tus TSWV. Tus neeg ruam yeej khavtheeb thiab ntau ncauj; tus neeg txawj ntse tej lus yuav tiv thaiv nws. Yog tsis muaj nyuj laij teb koj yuav tsis tau qoobloo, tiamsis yog muaj nyuj laij teb koj yuav tau qoob puv txhab. Tus neeg uas ua timkhawv tseeb nws yeej tsis dag, tiamsis tus neeg uas ua timkhawv tsis tseeb, nws yeej hais lus dag. Cov neeg khavtheeb yeej nrhiav tsis tau kev txawj ntse li, tiamsis cov neeg txawj ntse kawm tau yoojyim heev. Txav kom deb ntawd cov neeg ruam; lawv yeej tsis muaj ib yam dabtsi qhia rau koj li. Vim li cas tus neeg ntse thiaj ntse? Rau qhov nws paub yam uas nws yuav ua. Vim li cas tus neeg ruam thiaj li ruam? Rau qhov nws xav hais tias nws paub lawm. Cov neeg ruam ua txhaum los lawv yeej tsis quavntsej, tiamsis cov neeg ua zoo txawj thov kom Vajtswv zam txim. Koj tej kev zoo siab los yog koj li, koj tej kev iab siab los yeej yog koj li. Tsis muaj leejtwg nrog koj muaj feem. Tus neeg siab phem lub tsev raug puastsuaj, tiamsis tus neeg ncaj ncees lub tsev yuav nyob ruaj nrees cia. Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag. Lub ncauj luag, tiamsis lub siab quaj ntsuag; thaum kev zoo siab dhau lawm, kev nyuaj siab nyob li qub. Cov neeg siab phem yuav tau txais tej uas lawv tau ua lawm. Cov neeg siab zoo yuav tau txais tej nqi zog zoo uas lawv ua. Tus neeg ruam ntseeg txhua yam, tiamsis cov neeg ntse ua tib zoo xav lawv mam li ua. Cov neeg muaj tswvyim hwm tus TSWV thiab txav deb ntawm txojkev phem, tiamsis cov neeg ruam tsis paub ceevfaj, lawv lam tau lam ua. Cov neeg uas chim sai mas ua tej yam uas ruam kawg nkaus li; cov neeg ntse ua taus siab ntev. Cov neeg ruam tau sau tej kev ruam uas lawv ua, tiamsis cov neeg ntse tau txais lub koob meej zoo. Cov neeg ua phem yuav txhos caug pe cov neeg ncaj ncees, thiab cov neeg siab phem yuav sawv ntawm roojvag hawm cov neeg ncaj ncees. Tus neeg pluag yeej tsis muaj leejtwg nyiam, txawm yog tej neeg zejzog los yeej tsis nyiam nws, tiamsis tus npluanuj muaj phoojywg coob. Yog koj xav tau kev zoo siab, cia li ua siab dawb paug rau tus pluag; yog koj txob thuam lwm tus, ces yog koj ua txhaum. Yog koj ua qhov zoo, luag yuav cia siab thiab hwm koj; yog koj tuav tswvyim ua phem, ces yog koj ua txhaum lawm. Ua neeg nquag koj lub neej thiaj li muaj nplua mias. Yog koj zaum tham ntau, koj yuav ua neeg pluag. Kev txawj ntse yog lub kausmom kub rau cov neeg muaj kev txawj ntse, tiamsis txojkev ruam yog txoj saw rau cov neeg ruam. Tus uas ua timkhawv tseeb cawm tau sawvdaws txojsia; tiamsis tus ua timkhawv tsis tseeb, yog nws ntxeev siab rau lwm tus. Hwm tus TSWV koj thiaj muaj chaw cia siab, thiab koj cov xeebntxwv thiaj tau chaw vamkhom. Koj puas xav zam kom dhau txojkev tuag? Kev hwm tus TSWV yog lub qhovdej cawm txojsia. Tus vajntxwv uas muaj pejxeem coob, nws yeej muaj hwjchim loj dua. Yog tsis muaj tej pejxeem ntawd, nws yeej tsis muaj hwjchim dabtsi li. Yog koj ua tau siab ntev, koj thiaj yog tus neeg txawj ntse, tiamsis yog koj ua neeg chim sai, ces qhia hais tias koj yog neeg ruam. Lub siab uas kaj nrig ua rau lub cev tsis muaj mob, tiamsis kev khib zoo ib yam li lub mob. Yog koj caij tsuj cov neeg pluag, ces yog koj saib tsis taus Vajtswv tus uas tsim lawv. Tiamsis kev ua siab dawb paug rau cov pluag yog kev qhuas Vajtswv. Cov neeg siab phem tej kev ua phem ua qias yuav coj kev puastsuaj los raug lawv, tiamsis cov neeg siab zoo tej kev ncaj ncees yuav tiv thaiv lawv. Lub tswvyim nyob hauv tus neeg txawj ntse, tiamsis tus ruam tsis paub txog lub tswvyim li. Kev ncaj ncees ua rau lub tebchaws vammeej; kev txhaum ua rau lub tebchaws raug txajmuag. Vajntxwv txaus siab rau cov nomtswv uas txawj ntse, tiamsis nws rau txim rau cov uas ua rau lub tebchaws raug txajmuag. Lo lus mos lus muag ua rau kev chim ploj mus, tiamsis lo lus nruj tsiv ua rau kev chim tawm tuaj. Thaum cov neeg txawj ntse hais lus, lawv hais tej lus ntse ntsuav, tiamsis cov neeg ruam hais lus tsis muaj hauvpaus hauvntsis. Tus TSWV pom txhua yam xwmtxheej uas muaj nyob txhua qhov, nws saib ntsoov peb, thaum peb ua zoo lossis thaum peb ua phem. Tus nplaig uas hais lus zoo yog tsob tshuaj uas cawm txojsia, tiamsis tus nplaig uas hais lus phem ua rau luag ntsawv siab. Tus neeg ruam yeej tsis quavntsej leej txiv tej lus qhia, tus neeg ntse yeej khaws leej txiv tej lus ntuas. Tej neeg ncaj ncees txuag tau lawv tej nyiaj txiag, tiamsis tej neeg siab phem tej nyiaj txiag yuav ploj mus tas thaum lawv ntsib kev txomnyem. Kev txawj ntse yog los ntawm cov neeg muaj tswvyim, tsis yog los ntawm cov neeg ruam. Tus TSWV txaus siab rau cov neeg siab zoo tej lus thov, tiamsis nws ntxub tej khoom fij uas cov neeg siab phem coj tuaj fij. Tus TSWV ntxub tej haujlwm uas cov neeg siab phem ua, tiamsis nws txaus siab rau cov neeg ncaj ncees. Yog koj ua txhaum, koj yuav raug txim hnyav. Yog koj tsis cia luag ntuas koj, koj yuav tuag. Txawm yog tubtuag teb los yeej txwv tsis tau tsis pub tus TSWV paub hais tias hauv muaj dabtsi li. Yog li ntawd, neeg yuav ua li cas zais tau nws tej kev xav tsis pub Vajtswv paub? Cov neeg uas thuam lwm tus tsis nyiam kom luag ntuas; lawv yeej tsis thov kom cov neeg txawj ntse qhuab ntuas lawv. Thaum neeg zoo siab, lawv lub ntsejmuag luag ntxhi, tiamsis thaum lawv ntxhov siab, lawv lub ntsejmuag mluas mlob. Cov neeg txawj ntse xav kawm txujci ntxiv, tiamsis cov neeg ruam tsis quavntsej kawm dabtsi li. Tus neeg pluag ua neej tiv kev txomnyem ntsuav, tiamsis tus neeg uas muaj noj muaj haus niaj hnub muaj kev zoo siab. Ua neeg pluag uas paub ntshai tus TSWV zoo dua li ua neeg npluanuj, tiamsis muaj teebmeem. Noj zaub tsuag nyob nrog kev sib hlub zoo dua li noj nqaij nyob nrog kev sib ntxub. Tej lus phem ua rau muaj kev sib cav sib ceg, tiamsis ua siab ntev muaj kev sib haumxeeb. Tus neeg tubnkeeg txojkev tuaj pos fab hnyo, tiamsis tus neeg siab ncaj txoj haukev dav fo. Tus tub txawj ntse ua rau nws txiv zoo siab heev. Tsuas yog tus ruam thiaj saib tsis taus nws niam xwb. Cov neeg ruam zoo siab heev rau lawv tej kev ruam, tiamsis cov neeg ntse ua dabtsi los yog qhov tseeb. Khaws luag tej tswvyim cia kom zoo, koj thiaj yuav vammeej. Yog tsis tau tswvyim pab, koj ua haujlwm tsis tiav. Lo lus teb zoo ua rau luag zoo siab, lub sijhawm uas yus hais tau lo lus zoo ua rau yus kaj siab. Txojkev uas cov neeg txawj ntse taug coj mus tau txojsia, tsis yog coj mus rau hauv tubtuag teb. Tus TSWV yuav rhuav tshem cov neeg muab hlob tej vajtse, tiamsis nws yuav tsomkwm cov pojntsuam tej teej tug. Tus TSWV ntxub lub siab uas xav phem, tiamsis nws txaus siab rau tej lus mos lus muag. Tej pajlaum uas tau los ntawm kev tsis ncaj ncees yuav ua rau koj tsevneeg tau kev kub ntxhov. Tsis txhob yuav tej nyiaj uas luag coj tuaj xiab, koj thiaj muaj sia nyob ntev. Cov neeg siab zoo ua tib zoo xav ua ntej mam li teb luag. Cov neeg siab phem maj nroos teb luag, tiamsis ua kom muaj teebmeem xwb. Thaum cov neeg ncaj ncees thov, tus TSWV yeej mloog, tiamsis nws tsis quavntsej cov neeg txhaum tej lus thov. Ntsejmuag luag ntxhi ua rau koj zoo siab, thiab hnov xov zoo ua rau koj kaj siab lug. Yog koj ua tib zoo mloog thaum luag ntuas koj, koj thiaj yog tus ntse. Yog koj tsis kawm, ces yog koj rhuav koj xwb. Yog koj khaws luag tej lus qhuab ntuas, koj thiaj yuav txawj ntse. Hwm tus TSWV yog kev kawm txawj kawm ntse ntag. Koj yuav tsum txo hwjchim luag thiaj hwm koj. Peb yog cov uas npaj siab, tiamsis thaum kawg Vajtswv yog tus uas ua kom tiav. Koj xav hais tias txhua yam uas koj ua puavleej yog, tiamsis tus TSWV paub tej uas koj lub siab xav. Tso koj tes haujlwm rau tus TSWV ua tus coj, koj thiaj yuav ua tau tes haujlwm ntawd tiav. Txhua yam uas tus TSWV tsim, nyias yeej muaj nyias txoj hmoo; cov neeg siab phem txoj hmoo yog kev puastsuaj. Tus TSWV ntxub txhua tus uas khavtheeb, nws yuav tsis pub lawv khiav dim txojkev txiav txim li. Cia li ua zoo thiab ua ncaj ncees Vajtswv thiaj yuav zam koj lub txim. Yuav tsum hwm tus TSWV koj thiaj dim ntawm txojkev phem. Thaum tus TSWV txaus siab rau nej lawm, nws yuav ua kom nej tej yeebncuab nrog nej sib raug zoo. Ua ncaj ncees tau tsawg, zoo dua li ua tsis ncaj tau ntau. Koj yog tus npaj siab ua, tiamsis Vajtswv yog tus coj txoj haukev. Vajtswv pub hwjchim rau vajntxwv, nws thiaj paub txiav txim ncaj ncees. Tus TSWV xav kom muab rab teev tsis ntxo thiab lub kawm muaj txwm los luj, thiab txhua yam uas nej muag nej yuav tsum ua ncaj. Tej vajntxwv tsis tsimnyog ua kev phem kev qias, rau qhov lub zwmtxwv yog qhov chaw ncaj ncees. Vajntxwv xav hnov tej lus tseeb thiab txaus siab rau cov neeg uas hais tej lus tseeb ntawd. Tus neeg muaj tswvyim nrhiav kev ua rau vajntxwv zoo siab. Thaum vajntxwv chim lawm, muaj qee leej yuav tuag. Thaum vajntxwv ua lub ntsejmuag luag ntxhi, ua rau sawvdaws muaj sia; nws txojkev zoo siab zoo ib yam li tauv huab uas coj kob nag tshiab los. Tau tswvyim thiab kev txawj ntse zoo dua li tau nyiaj thiab kub. Txojkev uas cov neeg ncaj ncees taug yog txoj uas zam tej kev phem kev qias. Ua tib zoo saib txojkev uas koj yuav mus ntawd thiaj yuav txuag tau koj txojsia. Kev khavtheeb coj mus raug kev puastsuaj, thiab kev muab hlob yuav poob ntsejmuag. Ua neeg pluag thiab txo hwjchim zoo dua li ua neeg nruj tsiv thiab mus nrog cov neeg tubsab sib faib khoom. Khaws tej lus qhuab ntuas no cia, koj lub neej thiaj yuav vammeej. Cia siab rau tus TSWV koj thiaj yuav kaj siab lug. Tus neeg ntse, yog tus uas thoob tsib to nrog. Nws tej lus mos lus muag ua rau coob leej hwm thiab txaus ntshai. Tswvyim yog lub qhovdej cawm txojsia rau tus neeg ntse, tiamsis kev ruam yuav rau txim rau cov neeg ruam. Cov neeg txawj ntse xub xav ua ntej mam li hais, lawv hais yam twg yeej txaus luag yuav. Tej lus mos lus muag qab zib li zib ntab, thiab zoo ib yam li hauv tshuaj kuab muaj tsuas rau koj lub cev. Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag. Neeg pheej khwv vim yog lub ncauj yuav noj, neeg ua haujlwm hnyav rau qhov xav kom lub plab tsau. Cov neeg siab phem nrhiav kev ua phem rau lwm tus, tej lus uas lawv hais los mob luag cuag hluavtaws kub. Cov neeg siab phem nyiam taug xaiv, lawv tsim kev kub ntxhov thiab ua kom tej phoojywg tawg pab tawg pawg. Cov neeg limhiam ntxias lawv tej phoojywg thiab coj mus raug txojkev puastsuaj. Txav deb ntawm cov neeg uas pheej sib ntxhi thiab rov kaum muag saib koj, lawv yeej xav ua tej yam phem lawm ntag. Ua neej nyob ntev yog nqi zog ntawm txojkev ncaj ncees. Ua neej laus plaubhau dawb yog lub mom yeebkoob. Ua tau siab ntev zoo dua li muaj zog. Koj tswj tau koj lub saib zoo dua li koj ntaus yeej lub nroog. Neeg rho ntawv xav paub saib muaj xwm dabtsi tshwmsim, tiamsis Vajtswv yog tus txiav txim siab. Tsevneeg uas noj mov qhuav, tiamsis muaj kev kaj siab zoo dua li tsevneeg uas muaj noj muaj haus nplua mias, tiamsis muaj kev sib cav sib ceg. Tus tubtxib uas ntse yuav tau ua tus kav tus tswv tus tub uas rhuav ntsejmuag, thiab yuav tau txais tus tswv tej qubtxeeg qubteg ib yam li tus tub. Nyiaj thiab kub yuav raug muab hluavtaws sim, tiamsis tus TSWV yuav sim neeg lub siab. Cov neeg ua phem yeej nyiam lub tswvyim phem, thiab tus neeg dag yeej nyiam mloog tej lus dag. Yog koj saib tsis taus cov neeg pluag, ces yog koj tuam mom Vajtswv tus uas tsim lawv. Yog koj luag tus uas raug kev txomnyem plig, koj yuav raug txim. Tej neeg laus zoo siab heev rau lawv tej xeebntxwv ib yam li tej menyuam zoo siab rau lawv niam lawv txiv. Cov neeg muaj koob muaj meej yeej tsis lam hais tej lus dag ib zaug, tiamsis tej neeg ruam lam tau lam hais tej lus tsis tseemceeb. Muaj qee leej xav hais tias tej nyiaj uas luag muab tuaj xiab zoo li lub povhaum. Lawv xav hais tias tej nyiaj ntawd ua tau txhua yam. Yog koj xav kom neeg nyiam koj, thaum lawv ua txhaum rau koj, koj yuav tsum zam txim rau lawv. Tus uas cim ntsoov luag tej kev ua txhaum rau nruab siab yuav tu kev phoojywg. Tus neeg txawj ntse raug luag cem ib zaug xwb, nws ris siab hlo; tus neeg ruam raug luag ntaus quas pua nplawm los nws tsis hloov. Kev tuag yuav raug cov neeg siab phem uas pheej tsim kev kub ntxhov ib yam li tus tub ceevxwm uas tsis zam rau leejtwg li. Koj mus ntsib tus maum dais uas luag muab nws cov menyuam lawm zoo dua li koj mus ntsib tus neeg ruam uas rau siab ntso rau nws tes haujlwm ruam uas tsis muaj qabhau. Yog koj ua qhov phem pauj qhov zoo, mas kev phem yuav rov los raug koj. Kev pib sib cav sib ceg mas zoo ib yam li lub pasdej tauv uas pib paim. Cia li cheem tsis txhob pub kom nthuav loj tuaj. Rau txim rau tus neeg uas tsis muaj txim, thiab tso tus neeg uas muaj txim mus, yog ob yam uas tus TSWV ntxub. Muab nyiaj rau tus neeg ruam mus kawm ntawv, ces yeej tsis muaj qabhau dabtsi, rau qhov nws twb tsis muaj tswvyim li. Tej phoojywg twb txawj sib hlub txhua lub sijhawm. Yog kwvtij tsis paub sib pab thaum muaj kev txomnyem yuav zoo dabtsi? Tsuas yog tus neeg tsis muaj tswvyim thiaj lees them lwm tus tej nujnqis xwb. Tus uas nyiam kev txhaum yeej nyiam tsim teebmeem; yog koj pheej khavtheeb, ces yog koj nrhiav teebmeem ntag. Tus uas muaj lub siab xav phem thiab hais lus tsis zoo, yeej tsis muaj ib yam zoo rau nws lub neej, tsuas yog tau kev puastsuaj xwb. Leej txiv uas muaj tus tub ruam tsis muaj kev cia siab dabtsi li, tsuas muaj kev nyuaj siab thiab tu siab xwb. Kev zoo siab ua hauv tshuaj kuab muaj tsuas rau koj lub cev. Kev ntxhov siab ua rau koj lub neej tsaus ntuj nti. Cov tu plaub ntug uas siab phem yuav luag tej nyiaj xiab, yeej txiav txim tsis ncaj. Tus neeg txawj ntse muaj lub homphiaj ua haujlwm, tiamsis tus neeg ruam tsis paub pib qhov twg tuaj. Tus tub ruam ua rau nws txiv tu siab thiab ua rau nws niam nyuaj siab kawg li. Tsis muaj cai nplua tus neeg tsis muaj txim txhaum. Rau txim rau tus neeg zoo yog ua tsis ncaj. Tus neeg uas thoob tsib to nrog tsis ntau ncauj, thiab tus neeg uas ua siab ntev yog tus txawj ntse. Txawm yog tus ruam los yog nws nyob twjywm, ces luag xav hais tias nws ntse. Nws tsis hais lus luag suav hais tias nws yog tus muaj tswvyim. Cov neeg uas lawv tsuas pom lawv zoo xwb, lawv nrog tsis taus luag ua phoojywg, lawv tsis pom tej uas sawvdaws pom hais tias yog qhov zoo. Tus neeg ruam tsis quavntsej kev txawj ntse hlo li, tiamsis nws khav hais tias nws yog tus muaj tswvyim. Kev txhaum thiab kev txajmuag mus ua ke. Koj poob ntsejmuag, ces yog koj raug thuam. Tus neeg muaj tswvyim tej lus tob ib yam li hiavtxwv, thiab zoo ib yam li tus dej cag uas ntws ntshiab si. Tsis tsimnyog tsa tus neeg ua txhaum txoj cai thiab tsis tsimnyog rau txim rau tus neeg ncaj ncees. Tus neeg ruam ua rau muaj kev sib cav sib ceg, thiab nws twv ntxhias qhov sib ntaus. Tus neeg ruam tej lus rov ua rau nws raug kev puastsuaj. Nws tej lus rov ua lub vojhlua khi nws. Tej lus uas hais luag nplig zoo hais kawg li, sawvdaws thiaj nyiam hais ua luaj. Tus neeg tubnkeeg zoo ib yam li tus neeg uas ua kom muaj kev puastsuaj. Tus TSWV zoo ib yam li lub chaw tsomfaj uas ruaj khov heev thiab yog qhov chaw cawm siav uas cov neeg ncaj ncees vamkhom. Cov neeg npluanuj xav hais tias lawv tej nyiaj txiag tiv thaiv tau lawv ib yam li tus ntsa yeej uas siab thiab ruaj khov thaiv ibncig lub nroog. Tus uas tsis txo hwjchim yuav tsis muaj leejtwg hwm nws. Cov neeg uas khavtheeb yuav raug kev puastsuaj. Ua tib zoo mloog ua ntej tso koj mam teb. Yog koj tsis ua tib zoo mloog, ces koj yog tus neeg ruam thiab raug luag thuam ntag. Ua neej nyob koj nyiaj taus kev mob, tiamsis tsis muaj leejtwg tiv taus txojkev nyuaj siab. Cov neeg ntse nrhiav kev txawj ntse thiab muab siab rau kawm. Yog koj xav mus cuag ib tug neeg tseemceeb, cia li nqa khoom mus pub rau nws, ces koj yuav mus cuag tau nws. Tus yeejkom uas xub peev lus hauv tsev tu plaub zoo li nws muaj cai kawg, tiamsis cia txog thaum tus pemkom peev lus tas tso. Yog muaj ob tug neeg uas muaj cai sib luag sib kom mus rau hauv tsev tu plaub yuav tau rho ntawv kom muaj tus yeej tus xwb. Pab koj tus kwvtij nws thiaj yuav tiv thaiv koj ib yam li tus ntsa yeej uas thaiv lub nroog, tiamsis yog koj nrog nws sib ceg, nws yuav kaw qhovrooj tsis pub koj mus hauv nws tsev. Koj yuav tau txais raws li tej lus uas koj tau hais lawm. Tej lus uas koj hais cawm tau txojsia lossis txov txojsia. Yog li ntawd, koj yuav tau sau raws li tej lus uas koj hais. Koj yuav tau pojniam ces yog tau yam uas zoo, thiab koj tau txais koob hmoov zoo los ntawm Vajtswv. Tus neeg pluag hais tej lus uas zoo xwb, tiamsis tus neeg npluanuj teb nyaum kawg li. Muaj ibtxhia phoojywg kav tsis ntev, tiamsis muaj qee leej phoojywg tseem sib raug zoo dua tej kwvtij txheeb. Tus neeg pluag uas muaj kev ncaj ncees zoo dua tus neeg ruam uas pheej hais lus dag. Tus neeg siab kub tiamsis tsis muaj kev txawj ntse tsis zoo dabtsi. Tus uas tsis ua siab ntev yuav ua rau nws raug teebmeem. Muaj ibtxhia raug kev puastsuaj vim lawv tej haujlwm ruam thiab lawv liam txim rau tus TSWV. Cov neeg npluanuj muaj phoojywg coob zuj zus, tiamsis cov neeg pluag tej phoojywg tso lawv tseg. Tus uas ua timkhawv tsis tseeb hauv tsev tu plaub, nws yuav raug txim thiab khiav tsis dim li. Txhua tus nyiam tus neeg siab dawb siab zoo; thiab txhua tus xav ua phoojywg rau tus neeg uas muab khoom pub dawb tau rau lwm tus. Txawm yog tus neeg pluag tej kwvtij kiag los twb tsis nyiam nws; yog li ntawd, nws thiaj tsis muaj phoojywg. Txawm yog nws xav nrog luag ua phoojywg los luag tsis kam li. Cia li txaus siab rau koj thiab rau siab kawm kev txawj ntse, thiab cim ntsoov tej uas koj tau kawm lawm cia rau nruab siab koj lub neej thiaj yuav vammeej. Tus uas ua timkhawv tsis tseeb hauv tsev tu plaub yeej yuav raug txim, thiab tus uas hais lus dag yuav raug puastsuaj. Cov neeg ruam tsis tsimnyog nyob tej vajtse zoo, thiab tej qhev tsis tsimnyog kav tej nomtswv. Yog koj txawj xav, koj yuav tsum tswj kom tau koj txojkev chim. Txawm yog luag ua tsis yog rau koj los puam chawj, koj ua li ntawd zoo dua. Vajntxwv txojkev chim zoo ib yam li tus tsov ntxhuav nyooj, tiamsis qhov uas nws txaus siab zoo ib yam li kob nag rau tej roj ntsuag. Tus tub uas ruam yuav ua rau nws txiv raug kev puastsuaj. Tus pojniam uas yws taus zoo ib yam li lub tsev uas xau nag. Vajtse thiab nyiaj txiag yog niam thiab txiv tseg ua qubtxeeg qubteg rau tus tub, tiamsis tus pojniam uas paub tab yog tus TSWV muab rau nws. Ua neeg tubnkeeg tau zoo pw, tiamsis yuav tsis muaj noj tsis muaj haus. Hwm tus TSWV txoj kevcai, koj thiaj yuav muaj sia ua neej nyob ntev. Yog koj tsis quavntsej Vajtswv tej kevcai, koj yuav raug kev ploj kev tuag. Thaum koj muab rau tus pluag yog koj qiv rau tus TSWV ntag, ces tus TSWV yuav them rov rau koj. Cob qhia koj tej menyuam thaum lawv tseem yau, lawv thiaj kawm tau. Yog koj tsis qhuab qhia lawv, ces yog koj nrog lawv rhuav lawv lub neej. Yog leejtwg pheej npautaws sai, cia nws ris nws lub txim ntawd. Yog koj pab nws ib zaug lawm, lwm zaus koj yuav rov tau pab nws dua thiab. Yog koj khaws luag tej lus qhuab ntuas thiab muab siab rau kawm, muaj ib hnub koj yuav txawj ntse. Neeg xav ntau yam hauv lub siab yuav ua, tiamsis yuav yog haum tus TSWV siab thiaj ua tau. Ua neeg siab hlob ces poob ntsejmuag. Ua neeg pluag zoo dua ua neeg dag. Koj yuav tsum hwm tus TSWV, koj thiaj muaj sia ua neej nyob ntev, muaj kev txaus siab thiab tsis raug xwm phem dabtsi. Tus neeg tubnkeeg cev diav mus hais mov hauv lub tais twb laj nqa los rau ntawm nws lub ncauj. Qhov uas rau txim rau tus neeg uas thuam lwm tus ntawd, yuav ua rau tus neeg uas tsis paub kawm tau kev txawj ntse. Yog koj ntse, thaum luag qhuab ntuas koj, koj yuav kawm tau. Tus ua ntxeev siab rau nws txiv thiab ntiab nws niam tawm hauv tsev mus yog tus tub uas raug luag hais tsis zoo thiab txajmuag kawg. Metub, yog koj tso kev kawm tseg ces tsis ntev koj yuav tsis nco tej uas koj twb paub lawm. Tus uas ua timkhawv tsis tseeb ntxo lwm tus yog tus neeg tsis ncaj ncees. Tej neeg siab phem yeej nyiam kev phem kev qias. Tus neeg ruam uas khavtheeb yeej yuav mag nplawm xwb. Haus cawv ntau ua rau koj vwm thiab qw lom vab vab. Tsuas yog tus neeg ruam thiaj quav cawv xwb. Thaum vajntxwv chim, koj yuav ntshai ib yam li koj ntshai tsov ntxhuav nyooj; ua rau nws npautaws ces yog yus rov tua yus. Tus neeg ruam ua kom muaj kev sib cav sib ceg, tiamsis tus uas txav deb tej ntawd yuav tsis poob ntsejmuag. Tus tswv teb uas nkees laij nws thaj teb rau lub caij laij teb yuav tsis muaj qoob nrog luag sau. Tej uas neeg lub siab xav, zoo ib yam li cov dej uas nyob hauv lub qhovtshij tob tob, tiamsis tus uas muaj tswvyim yuav muab qhia rau sawvdaws paub. Txhua tus nyias taus nyias khav hais tias nws yog tus ncaj ncees, tiamsis yog yuav nrhiav tus neeg ncaj ncees tiag mas laj nrhiav tau. Cov menyuam uas tau koob hmoov twb yog leej txiv ua ncaj thiab ua zoo. Vajntxwv zaum ntawm lub rooj txiav txim nws pom thiab paub txhua tus tej kev phem. Puas muaj leejtwg hais tau hais tias, nws lub siab ncaj ncees thiab tsis muaj txhaum? Tus TSWV ntxub cov neeg uas muab rab teev ntxo los luj thiab muab lub kawm uas tsis txwm los yeem. Txawm yog ib tug menyuam los nws yeej ua nws tus yam ntxwv rau koj paub hais tias nws nyiam li cas. Koj yuav paub hais tias nws ua ncaj thiab ua zoo. Tus TSWV yeej pub rau peb muaj qhovmuag pom kev thiab muaj pobntseg hnov lus. Yog koj siv sijhawm pw ntau, koj yuav pluag. Rau siab ntso ua haujlwm koj thiaj yuav muaj noj muaj haus nplua mias. Tus uas tuaj muas khoom yws hais tias luag muag kim heev, tiamsis thaum nws tawm lawm, nws khav hais tias nws khom tau tus nqi pheej yig kawg li. Yog koj paub hais tej lus uas zoo tseem zoo tshaj tej kub lossis tej hlaws muaj nqis. Yog tus neeg ruam mus coglus them lwm tus tej nujnqis, yuav tau kom nws muab nws tej qhov txhia chaw mus yuam nqi ua ntej. Tej uas koj tau los ntawm kev tsis ncaj ncees yuav txaus koj siab ib yam li tej zaub mov uas qab heev, tiamsis tsis ntev yuav zoo ib yam li suabzeb nyob hauv koj qhovncauj. Khaws luag tej lus ntuas tib zoo cia, koj thiaj yuav vammeej. Yog tsis tau tuav tswvyim ua ntej tsis txhob rawm mus ntau rog. Tus neeg taug xaiv yeej tsis paub zais lus. Tsis txhob nrog tej neeg ntau ncauj ua ke. Yog koj cem koj niam koj txiv, koj txojsia yuav tu ib yam li lub teeb uas tuag thaum tsaus ntuj nti. Tej nyiaj uas koj khwv tau los yoojyim yuav ploj mus yoojyim ib yam nkaus. Tsis txhob ua pauj tej uas luag ua txhaum rau koj. Cia siab rau tus TSWV, nws yuav pab koj. Tus TSWV ntxub cov neeg uas muab rab teev ntxo coj los luj ntxo luag tug. Tus TSWV yog tus uas coj peb txoj haukev, leejtwg thiaj yuav paub nws lub neej yav tom ntej? Ua tib zoo xav ua ntej mam coglus muab khoom fij rau Vajtswv, nyob tsam koj yuav khuvxim tom qab. Tus vajntxwv uas ntse yeej paub tus neeg uas ua txhaum, nws yuav rau txim rau tus ntawd thiab tsis zam li. Tus TSWV paub peb tej kev xav uas nyob nraim nkoos hauv peb lub siab, peb yeej zais tsis tau tej ntawd. Tus vajntxwv uas yuav tau kav tebchaws ntev, yog tus uas muaj kev hlub, muaj siab zoo thiab kav ncaj ncees. Peb qhuas cov hluas lub zog thiab hwm cov laus uas plaubhau dawb paug. Raug ntaus thiab raug nplawm, ua rau peb hloov tau peb lub siab thiab ua lub neej zoo. Tus TSWV tswj vajntxwv lub siab yoojyim ib yam li nws tswj tus dej. Koj yuav xav hais tias txhua yam uas koj ua yeej yog, tiamsis tus TSWV yuav txiav txim raws li tej uas koj ua lawm. Ua ncaj ua ncees thiab ua zoo, txaus tus TSWV siab dua coj tej khoom tuaj fij rau nws. Lub qhovmuag uas qaujles thiab lub siab uas khavtheeb, yog kev txhaum. Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus. Tej nyiaj uas tau los ntawm kev tsis ncaj ncees, tsis ntev yuav ploj mus; tej nyiaj ntawd yuav coj koj mus raug kev ploj kev tuag. Cov neeg siab phem tej kev phem yuav ua rau lawv raug kev puastsuaj, rau qhov lawv ua tsis ncaj. Cov neeg txhaum taug txojkev nkhaus xwb, tiamsis cov neeg uas tsis muaj txim txhaum ua qhov zoo. Nyob saum rutsev zoo dua nrog tus pojniam uas yws taus nyob ua ke hauv tsev. Cov neeg siab phem nrhiav nrhw txojkev ua phem. Lawv tsis hlub leejtwg li. Thaum tus neeg khavtheeb raug txim, ua rau tus neeg ruam ntse tuaj. Tus neeg txawj ntse kawm tau tej uas luag qhia nws. Vajtswv yog tus ncaj ncees, nws paub txhua yam uas nyob hauv tus neeg siab phem tsev, thiab nws yuav ua kom tus ntawd raug kev puastsuaj. Yog koj ntsaws qhovntsej tsis kam mloog cov neeg txomnyem lub suab quaj thov, thaum koj quaj thov luag pab yuav tsis muaj leejtwg hnov. Yog muaj leejtwg chim rau koj, cia li muab ib yam khoom mus pub rau nws, yuav ua rau nws txojkev chim ploj mus. Thaum muaj txojkev ncaj ncees, yog kev zoo siab rau cov neeg ncaj ncees, tiamsis cov neeg siab phem tas kev cia siab. Txhua tus uas tso txojkev ua zoo tseg, txojkev tuag nyob tos rawv lawv. Tus uas nyiam kev lomzem yuav pluag. Tus uas nyiam quav cawv yuav tsis nrog luag muaj nyiaj. Qhov uas cov neeg siab phem, ua phem rau cov neeg ncaj ncees, yog lawv lob kev txomnyem rov rau lawv ris. Mus nyob tom tiaj suabpuam zoo dua li nrog tus pojniam uas tsawm taus thiab yws taus nyob ua ib tse. Cov neeg txawj ntse yeej ua neej npluanuj thiab muaj zoo vaj zoo tsev nyob, tiamsis cov neeg ruam khwv tau nyiaj npaum twg los lawv muab siv tas nrho. Ua siab dawb siab zoo thiab ua ncaj ua ncees, koj thiaj muaj sia nyob ntev; thiab luag thiaj yuav hwm thiab nyiam koj. Tus thawj tubrog uas txawj ntse muaj peevxwm txeeb tau lub nroog uas muaj cov tubrog uas muaj zog heev tiv thaiv thiab rhuav tau tus ntsa yeej uas luag tso siab rau. Yog koj tsis xav raug teebmeem, koj yuav tsum ceevfaj tej lus uas koj hais. Qhia tus neeg muaj plhus rau kuv thiab kuv yuav qhia tus neeg uas muab hlob, khavtheeb, thiab tsis txawj xav rau koj. Tus neeg tubnkeeg uas tsis kam mus ua haujlwm, yog nws rov muab nws tua povtseg; tej uas nws ua, nws tsuas xav hais tias saib yuav tau dabtsi. Tus neeg ncaj ncees, nws pub tau rau luag ntawm lub siab dawb paug. Tus TSWV ntxub tej khoom theej txhoj uas cov neeg siab phem coj tuaj fij rau nws, qhov uas nws ntxub tshaj mas yog lawv tsis ua los ntawm lub siab dawb paug. Tus neeg dag tej lus timkhawv yeej tsis txaus ntseeg, tiamsis tus neeg uas ua tib zoo xav tej lus yeej yuav tau. Cov neeg ncaj ncees ua tib zoo xav rau tej uas lawv ua, tiamsis cov neeg siab phem ua txuj ua li lawv yog tus zoo heev. Yog tus TSWV tawmtsam koj lawm, neeg lub tswvyim, txojkev txawj ntse thiab kev totaub yeej pab tsis tau koj li. Koj yog tus npaj tej nees kom txhij mus ntaus rog, tiamsis tus TSWV yog tus pab kom koj yeej. Yog koj xaiv yuav lub koob meej zoo lossis kev npluanuj, koj cia li xaiv yuav lub koob meej thiaj li zoo. Tus npluanuj thiab tus pluag qhov uas zoo sib thooj yog li no: nkawd puavleej yog tus TSWV tsim huv tibsi. Tus neeg paub qabhau pom tej xwm uas yuav los raug nws, nws txawm zam kev lawm, tiamsis tus neeg ruam taw hauv ntsoov mus rau qhov ntawd, thaum uas tau chaw ti nws mam li xeevxwm. Txo koj lub hwjchim thiab hwm tus TSWV, koj thiaj yuav muaj txiag npluanuj, muaj koob meej thiab muaj sia ua neej nyob ntev. Yog koj khuvxim koj txojsia, tsis txhob mus ze tej vojhlua uas cuab tos cov neeg ua phem txoj haukev. Qhia menyuam kom paub ua nws lub neej, nws yuav nco ntsoov tej lus ntawd mus tas nws simneej. Cov neeg pluag yeej ua cov neeg npluanuj qhev. Txais luag nyiaj ces yog ua luag qhev. Yog koj tseb tej uas tsis ncaj ncees, koj yuav tau sau kev puastsuaj, thiab qhov uas koj ua limhiam rau lwm tus yuav kawg mus. Ua neeg siab dawb siab zoo thiab pub koj tej zaub mov rau cov neeg pluag noj, koj thiaj yuav tau koob hmoov. Ntiab cov neeg khavtheeb tawm mus thiaj tsis muaj kev sib cav sib ceg lossis kev xyav luag moo tsis zoo ntxiv lawm. Yog koj muaj lub siab dawb siab zoo thiab hais lus mos lus muag, ces vajntxwv yuav yog koj tus phoojywg. Tus TSWV tsomkwm tej lus tseeb, tiamsis nws rhuav tshem tej lus dag. Tus neeg tubnkeeg nyob hauv tsev xwb, nws hais tias yog tawm mus nraum zoov tsov ntxhuav yuav tom. Kev ua nkauj ua nraug yog lub vojhlua, lub vojhlua ntawd yuav mag cov neeg uas tus TSWV chim rau lawm. Tej menyuam yau yeej los ua li tej neeg uas tsis paub qabhau, tiamsis rab nplawm yuav qhia kom lawv paub coj tus yam ntxwv zoo. Yog koj muab khoom pub rau cov neeg npluanuj lossis quab yuam cov pluag kom koj npluanuj ces koj yuav txomnyem. Ua tib zoo mloog, kuv yuav qhia koj saib tej neeg txawj ntse hais li cas. Rau siab ntso kawm lawv tej lus qhuab qhia no, yog koj nco tau tej lus ntawd thiab hais tau txhua lo yuav ua rau koj zoo siab heev. Kuv xav kom koj muab koj txojkev cia siab tso plhuav rau tus TSWV, vim li ntawd kuv thiaj muab tej lus no los qhia rau koj paub. Kuv sau tau peb caug nqe lus txawj ntse rau koj. Cov lus no yog kev txawj ntse thiab lus tuavxam uas zoo heev, thiab yuav qhia rau koj hais tias qhov twg yog qhov tseeb. Ces koj thiaj mus nrhiav tau tej lus tseeb los teb rau cov uas xa koj mus. Koj tsis txhob mus txeeb cov neeg pluag tug, vim lawv hais tsis taus; tsis txhob mus txeeb cov neeg uas tsis muaj leejtwg pab hauv tsev tu plaub ntiag tug. Tus TSWV yuav ua tus hais lawv tej plaub thiab txov txhua tus uas txov lwm tus txojsia lawm. Tsis txhob ua phoojywg nrog cov neeg uas siab ceev thiab ua nruj ua tsiv. Nyob tsam koj mus xyaum ua li lawv thiab hloov tsis tau li lawm. Tsis txhob coglus them lwm tus tej nuj nqi. Yog koj them tsis taus, txawm yog koj lub txaj pw los luag yuav tuaj nqa mus. Tsis txhob txav tus ciamteb qub uas koj tej yawgkoob tau tu tseg lawm. Koj puas pom cov neeg uas yog kws txawj thiab ua tau lawv tes haujlwm zoo? Lawv yuav tau ua haujlwm rau vajntxwv, tsis yog ua rau tej pejxeem. Thaum koj nrog ib tug neeg tseemceeb noj mov ua ke, nco ntsoov hais tias nws yog leejtwg. Yog koj qab los heev, yuav tsum tswj koj kev noj thiab haus. Tsis txhob zoo siab rau tej zaub mov qab qab uas nws rau los; tej zaum yog nws muab los sim koj xwb. Yuav tsum ua neeg ntse, tsis txhob cia nyiaj txiag yuam tau koj ua qhev. Rau qhov tib ntsais muag xwb, koj tej nyiaj txiag yuav ploj tas ib yam li tus dav uas muaj tis ya. Tsis txhob nrog tus neeg qia dub noj mov saum nws lub rooj lossis zoo siab rau tej zaub mov qab qab uas nws rau los. Nws yuav hu hais tias, “Cia li los noj,” tiamsis nws lub ncauj lam hu xwb, nws lub siab tsis yog li ntawd. Koj yuav ntuav tej uas koj noj lawm tawm, thiab tej lus zoo uas koj hais los yuav tsis muaj qabhau. Tsis txhob ntuas tus neeg ruam. Nws yuav muab koj tej lus saib tsis muaj qabhau. Tsis txhob txav tus ciamteb qub uas tu tseg lawm lossis txeeb cov menyuam ntsuag tej av. Tus TSWV uas muaj hwjchim yuav tuaj lawv tog thiab pab lawv ua ncauj ua lus tawmtsam koj. Muab siab rau kawm tej uas koj tus xibhwb qhia thiab khaws txhua yam ntawd cia. Tsis txhob muab kev qhuab qhia menyuam tso tseg; koj nplawm nws xwb, nws yeej tsis tuag. Yog koj nplawm nws yuav cawm tau nws dim ntawm txojkev puastsuaj. Metub, yog koj ua ib tug neeg txawj ntse, mas kuv yuav zoo siab kawg li. Kuv yuav txaus siab thaum kuv hnov koj hais tej lus uas ntse ntsuav. Tsis txhob khib rau tej neeg txhaum, cia li hwm tus TSWV, nws yuav coj koj lub neej. Yog koj ua li ntawd, koj lub neej yav tom ntej yuav kaj siab lug. Metub, ua tib zoo mloog, koj yuav tsum ntse thiab muab siab rau ua koj lub neej tiag tiag. Tsis txhob mus koom nrog cov neeg uas nyiam haus cawv lossis noj ntau haus ntau ua ke. Cov neeg quav cawv thiab saib hlob yuav pluag. Yog nej noj tas pw xwb, tsis ntev nej yuav hnav khaub hlab. Mloog koj txiv tej lus, yog tsis muaj nws yeej tsis muaj koj. Thaum koj niamlaus lawm, koj yuav tsum pauj nws txiaj ntsig. Qhov tseeb, tswvyim, kawm txhawj kawm ntse, thiab lub siab thoob tsib to nrog yog tej uas muaj nujnqis heev, tsimnyog muab khaws cia, tsis txhob muab muag. Leej txiv uas muaj tus tub ncaj ncees muaj kev zoo siab heev. Tus tub uas muaj kev txawj ntse yuav ua rau leej txiv tau koob meej. Koj yuav tsum ua kom koj niam thiab koj txiv tau ntsejmuag. Cia li ua rau koj niam muaj kev zoo siab. Metub, ua tib zoo mloog kuv tej lus thiab xyaum ua raws li kuv lub neej. Cov niamntiav thiab cov pojniam uas deev hluas nraug yog lub vojhlua uas coj mus rau txojkev tuag. Lawv zov rawv tos koj ib yam li tej tubsab thiab lawv ntxias tau ntau leej txivneej mus ua neeg tsis ncaj ncees lawm. Tsis txhob pub cawv ntxias tau koj, txawm yog cawv yuav liab ntshiab si, pom duab nyob zoj hauv lub khob thiab yoojyim nqos los xij. Yog koj haus, thaum kaj ntug koj yuav hnov mob taug leeg cuag li nab muaj taug tom. Kev phem yuav tshwm rau koj qhovmuag pom, thiab yuav ua rau koj xav tsis tawm lossis tsis paub yuav hais li cas. Yuav zoo li koj pw tus ntab yees saum nplaim dej hiavtxwv, thiab nyob saum lub nkoj tus hau ncej uas dai daim ntaub cug cua. Ces koj yuav hais tias, “Kuv twb raug luag ntaus, kuv raug luag nplawm los lawm, tiamsis kuv tsis nco qab tas lawm. Vim li cas kuv thiaj tsis sawv? Kuv tseem xav haus ntxiv thiab.” Tsis txhob khib rau cov neeg ua phem ua qias, thiab tsis txhob nrog lawv ua phoojywg, rau qhov lawv lub siab xav ua limhiam, thiab lawv lub ncauj hais tej lus tsis zoo. Tus uas muaj tswvyim thiab txawj ntse, nws lub tsev yuav nyob ruaj khov. Yog muaj kev txawj ntse, ces muaj tej rooj tog uas zoo nkauj thiab muaj nqis nyob hauv tsev. Muaj tswvyim zoo dua muaj zog, kev txawj ntse yeej tseemceeb dua lub dag lub zog. Nej yuav tsum npaj tswvyim kom zoo ua ntej nej mam li mus ntaus rog, yog muaj ntau tus tuav tswvyim nej yimhuab yuav kovyeej. Cov neeg txawj ntse hais tej lus uas tob tob ua rau tus neeg ruam tsis totaub; thaum sib tham txog tej yam tseemceeb, tus ruam tsis muaj lus hais li. Yog koj pheej nrhiav tswvyim ua phem xwb, luag yuav hais tias koj yog tus neeg thab plaub. Txhua yam uas tus neeg ruam xav puavleej yog kev txhaum. Sawvdaws ntxub tus neeg uas pheej thuam lwm tus. Yog koj qaug zog thaum raug kev ntxhov siab, ces yog koj siab yau heev. Tsis txhob ua xyem xyav, cia li pab tus neeg tsis muaj txim txhaum uas luag yuav coj mus tua povtseg. Koj yuav hais tias tsis yog koj feem xyuam, tiamsis Vajtswv paub thiab yuav txiav txim raws li koj ua. Nws ntsia ntsoov koj, nws yeej paub koj lub siab, thiab nws yuav muab nqi zog rau koj raws li tej uas koj ua lawm. Metub, cia li noj zib ntab, rau qhov zib ntab yog yam zoo. Cov zib ntab uas ntws ntawm daim nas ntab los qab zib rau koj tus nplaig, koj yuav paub hais tias tswvyim zoo ib yam li ntawd rau koj txojsia. Yog koj tau tswvyim, koj lub neej yav tom ntej yuav kaj siab lug. Tsis txhob ua li tus neeg siab phem uas pheej nrhiav tswvyim mus nyiag lossis rhuav tus neeg ncaj ncees tej vajtse. Tus neeg ncaj ncees ntog pestsawg zaus los nws yeej sawv taus, tiamsis kev puastsuaj rhuav tshem cov neeg ua phem. Tsis txhob zoo siab thaum koj tus yeebncuab raug kev puastsuaj, thiab tsis txhob zoo siab thaum nws ntog. Yog koj hnyos koj tus yeebncuab, tus TSWV yeej yuav paub; nws tsis nyiam koj ua li ntawd, thiab tej zaum nws yuav tsis rau txim rau koj tus yeebncuab. Tsis txhob nyuaj siab rau tej neeg ua phem, tsis txhob khib tej uas lawv ua. Tus neeg ua phem yeej tsis muaj kev cia siab rau yav tom ntej, thiab lawv lub neej tsaus ntuj nti. Kuv tus metub, koj yuav tsum hwm tus TSWV thiab hwm vajntxwv. Tsis txhob koom nrog cov neeg uas ntxeev siab tawmtsam tus TSWV thiab vajntxwv hlo li; cov neeg uas ua li ntawd twb yuav raug kev puastsuaj sai. Koj puas paub hais tias Vajtswv lossis vajntxwv yuav tso kev puastsuaj los rau koj hnyav npaum li cas? Tej lus no yog cov neeg txawj ntse hais: Qhov uas txhob txwm txiav txim tsis ncaj rau luag yog koj ua tsis yog lawm. Yog tus txiav txim phua lub txim tsis txhaum rau tus neeg txhaum, nws yuav raug luag foom thiab ntxub. Tiamsis tus uas txiav txim rau tus neeg ua txhaum, tus ntawd lub neej yuav vammeej thiab tau koob meej. Tus uas muab lo lus tseeb teb luag, qhia hais tias yog phoojywg zoo. Tsis txhob maj ua koj lub tsev thiab npaj koj lub cuab lub yig ua ntej koj npaj tau thaj teb thiab txhua yam txij tso. Tsis txhob ua timkhawv tsis tseeb tawmtsam lwm tus uas tsis tau ua txhaum lossis hais tej lus uas ntxias luag yuam kev. Tsis txhob hais tias, “Kuv yuav ua rau nws ib yam li nws tau ua rau kuv lawm. Kuv yuav pauj tej uas nws ua rau kuv lawm rov rau nws.” Kuv mus ncig thoob plaws tus neeg ruam thiab tus neeg tubnkeeg tej liaj teb thiab tej vaj txiv hmab huv tibsi lawm. Muaj pos thiab nroj fab puv nkaus daim teb xwb; tej ntsa zeb uas xov ncig daim teb puavleej pob tas rau hauv av. Kuv saib tej no thiab kuv muab xav mas kuv kawm tau tej yam zoo ntawm zaj no: Mus pw ib pliag thiab tsaug ib tsig zog tso; khawm tes so ib pliag tso, tiamsis thaum koj tseem tabtom pw tsaug zog, kev txomnyem yuav los raug koj ib yam li tubsab nqa rawv qws tuaj huab koj lub neej ntag. Ntawm no yog Xalumoos tej pajlug uas cov Yudas tus Vajntxwv Hexekiyas tej nomtswv muab sau tseg cia rau hauv tsev tu plaub. Peb hwm Vajtswv rau qhov nws npog txhua yam cia, peb hwm tej vajntxwv rau qhov lawv tshawb txhua yam tawm. Koj yeej tsis paub txog vajntxwv lub siab xav ib zaug li, nws xav tau dav tshaj peb; ntuj ceebtsheej siab thiab hiavtxwv tob npaum li cas nws yeej xav dhau peb deb npaum li ntawd. Cais tej quav hlau tawm ntawm cov tseem nyiaj mus thiaj li nchuav tau tej tais nyiaj zoo nkauj. Tsis txhob pub cov tuavxam siab phem nyob ze vajntxwv thiab nws cov nomtswv, vajntxwv thiaj tswj tau lub tebchaws ncaj ncees. Thaum koj sawv tabmeeg ntawm vajntxwv, tsis txhob ua txuj khav li koj yog tus neeg tseemceeb. Cia luag caw koj mus zaum lub chaw siab zoo dua li luag ntiab koj sawv thiab muab lub chaw ntawd rau lwm tus neeg uas tseemceeb dua koj zaum. Tej yam uas koj paub tsis tseeb, koj tsis txhob maj mus ua timkhawv rau hauv tsev tu plaub. Nyob tsam muaj dua lwm tus timkhawv pom qhov tseeb dua koj, thaum ntawd koj yuav ua li cas? Yog koj thiab koj tej phoojywg zejzog muaj tej lus tsis sib haumxeeb, neb cia li sib hais neb kom tas, tsis txhob muab hais ncha teb ncha chaw. Yog tsis ua li ntawd, luag yuav paub hais tias koj yog ib tug uas tsis zais tej lus tseemceeb cia, ces koj yuav txajmuag mus li. Lo lus zoo uas hais rau lub sijhawm tsimnyog hais zoo ib yam li tej kub uas muab vuam txaij nraug zees rau ntawm lub tais nyiaj. Tus neeg uas txaus siab mloog tus neeg uas twb pom dua ua dua los lawm tej lus ntuas, mas muaj nqis dua tej nplhaib lossis tej saw uas tseem kub. Tus neeg xa xov uas ncaj ua rau tus txib nws mus lub siab kaj ib yam li haus cov dej txias thaum lub caij sau qoob. Cov neeg uas coglus tseg hais tias, yuav muab yam ub yam no rau luag, tiamsis tsis muab, mas zoo ib yam li tauv huab thiab nthwv cua uas tsis muaj nag. Ua siab ntev thiaj yuav ntxias tau tej nomtswv thiab tej lus zoo ua rau luag lub siab muag. Tsis txhob noj zib ntab ntau dhau, yog noj ntau yuav ua rau koj ntuav. Tsis txhob niaj hnub mus cuav zos hauv koj tej phoojywg nruab ze, nyob tsam nws nkees nrog koj nyob thiab ntxub koj. Tej lus kom tsis tseeb zoo ib yam li tus qws lossis rab ntaj lossis xibxub vos uas ntse zuag plias. Cia siab rau tus neeg tsis ncaj thaum muaj kev ntxhov siab, ces zoo ib yam li tus lov hniav xo mov lossis tus tu taw mus kev. Hu nkauj rau tus neeg nyuaj siab mloog, ces zoo ib yam li tug neeg hle ris tsho mus tiv no lossis zoo li nphoo ntsev rau lub qhov txhab. Yog koj tus yeebncuab tshaib plab, cia li muab mov rau nws noj; yog nws nqhis dej, cia li muab dej rau nws haus. Yog koj ua li ntawd nws yuav txajmuag, tus TSWV thiaj yuav muab nqi zog rau koj. Cov cua uas tuaj sab qaumteb tuaj coj nag los li cas tus neeg taug xaiv ua rau muaj kev chim li ntawd. Nyob saum rutsev zoo dua li nrog tus pojniam uas yws tau nyob ua ke hauv tsev. Xov zoo tuaj lub tebchaws deb tuaj zoo ib yam li koj haus cov dej txias thaum koj nqhis dej qa qhuav qhawv. Tus neeg ncaj ncees uas cia tug neeg ua phem coj nws mus ua kev phem kev qias, ces zoo li lub qhovdej txhawv uas nro lossis lub qhovtshij uas muaj tshuaj lom nyob hauv. Noj zib ntab ntau yuav tsis zoo rau koj, thiab qhov uas cia luag qhuas koj ntau los yuav tsis zoo ib yam nkaus. Yog koj tswj tsis tau koj kev chim, ces koj tsis muaj kev pab ib yam li lub nroog uas tsis muaj ntsa yeej thaiv thiab qhib lug rau yeebncuab tuaj tua ntag. Qhuas tus neeg ruam tsis muaj qabhau ib yam li los daus rau thaum ntuj qhua lossis los nag rau lub caij sau qoob. Lo lus foom phem yuav tsis mob koj qhov twg li, tshwj hais tias yog koj yeej tau ua txhaum lawm. Yog koj ua zoo, tej lus ntawd zoo ib yam li tej noog uas ya los tiamsis tsis tsaws qhov twg li. Muab pas los nplawm nees, muab xauv los xam neesluav, thiab muab hlua tawv nplawm tus neeg uas tsis mloog lus. Yog koj teb tus neeg ruam tej lus nug, ces yog koj ruam ib yam li nws. Muab tej lus ruam teb rau tus neeg ruam tej lus nug kom nws thiaj paub hais tias, nws tsis ntse li nws xav. Yog koj cia tus ruam xa xov zoo ib yam li yog koj txiav koj txhais kotaw povtseg thiab yog koj tsub kev ntxhov siab ntxiv rau koj. Tus neeg ruam hais pajlug, ces tsuas zoo li tus neeg cegtawv mus kev. Yog qhuas tus ruam, ces zoo ib yam li muab ib lub pobzeb khi rau ntawm txoj zes hlua. Tus neeg ruam hais pajlug, ces zoo ib yam li tus neeg qaug cawv dig saus tawm ntawm nws txhais tes. Tus uas ntiav tus neeg ruam lossis tus qaug cawv ua nws tub zog, ces zoo ib yam li tus neeg tua hneevnti uas tsis saib qab saib hau mus raug lwm tus. Tus neeg ruam uas pheej ua tej yam ruam tas los rov ua dua, ces zoo ib yam li tus dev uas rov noj dev cov ntuav. Tus neeg ruam uas ruam kawg li tseem zoo dua tus uas nws xav hais tias, nws ntse heev tiamsis nws twb tsis ntse. Vim li cas tus neeg tubnkeeg thiaj tsis tawm hauv tsev mus sab nraud? Yog nws ntshai dabtsi? Puas yog ntshai tsov ntxhuav? Tus neeg tubnkeeg pw da luj luam saum txaj ib yam li daim txiag qhovrooj uas qoj mus qoj los. Tus neeg tubnkeeg cev diav mus hais mov hauv lub tais twb laj nqa los rau ntawm qhovncauj. Tus neeg tubnkeeg yuav xav hais tias nws ntse dua xya tus txivneej muaj tswvyim uas teb tau luag tej lus. Tus neeg uas mus raus tes rau luag tej lus sib ceg uas tsis yog nws feem xyuam, ces zoo ib yam li dev dhia es ntsiab dev nplooj ntseg. Yog tsis muaj taws, ces hluavtaws kuj tuag; yog tsis muaj tus neeg taug xaiv, ces yeej tsis muaj kev sib cav. Thee ua kom hluavtaws ciaj, ntoo ua kom nplaim taws cig, thiab tus neeg uas ua kom muaj teebmeem ua rau kev sib cav sib ceg loj tuaj. Tej lus uas hais luag plig zoo hais kawg li! Sawvdaws thiaj nyiam hais ua luaj! Tus neeg uas ncauj zoo tiamsis siab phem, mas zoo ib yam li lub hub uas muab vuam kom ci xwb. Tus neeg ntsejmuag ncaj siab nkhaus ntxub luag, tiamsis tseem ua txuj qhuas luag. Txawm yog nws hais lus zoo los tsis txhob ntseeg, rau qhov hauv nws lub siab puv nkaus kev ntxub ntxaug. Txawm yog nws zais qhov uas nws ntxub luag los sawvdaws yeej paub tej kev phem uas nws ua. Tus neeg uas khawb qhov cuab luag kev, yog nws rov cuab nws xwb. Leejtwg cuab yej, yej yuav rov tais nws tes. Yog koj ntxub leejtwg, koj thiaj dag kom nws raug mob. Tus neeg uas ncauj zoo siab phem yuav raug kev puastsuaj. Tsis txhob khav rau tagkis. Koj twb tsis paub hais tias thaum tseem tsis tau txog tagkis yuav muaj xwm dabtsi. Cia lwm tus thiab tej qhua qhuas koj, koj tsis txhob rov qhuas koj. Tej kev nyuaj siab uas cov neeg ruam rhawv muaj hnyav dua pobzeb thiab suabzeb. Kev chim yog kev nruj tsiv thiab kev puastsuaj, tiamsis txojkev khib tseem phem heev dua. Tabmeeg sib qhia zoo dua li cia nws xav hais tias koj tsis quavntsej nws. Koj tus phoojywg ua rau koj mob siab tsis txog txij twg, tiamsis thaum koj tus yeebncuab cev tes puag koj xubpwg yuav tsum ceevfaj. Thaum koj tsau plab, txawm yog zib ntab los tsis xav noj lawm, tiamsis thaum koj tshaib plab, txawm yog noj zaub mov iab los yeej qab zib. Tus neeg uas ncaim nws lub tsev mus deb lawm, zoo ib yam li tus noog uas nrug deb ntawm nws lub zes. Roj thiab tshuaj tsw qab ua rau koj txaus siab heev, tiamsis kev nyuaj siab ua rau kev kaj siab ploj mus. Tsis txhob tso koj tej phoojywg lossis koj txiv tej phoojywg tseg. Thaum koj raug kev nyuaj siab, tsis txhob mus cuag koj cov kwvtij uas nyob deb, tej phoojywg zejzog uas nyob ze tseem pab tau koj dua cov kwvtij uas nyob deb. Metub, cia li ua neeg ntse, kuv thiaj yuav zoo siab thiab muaj lus teb tej neeg uas saib tsis taus kuv. Tus neeg paub qabhau pom tej xwm uas yuav raug nws, nws txawm zam kev lawm, tiamsis tus neeg ruam too hau ntsoov mus rau qhov ntawd, thaum uas nws tau chaw ti nws mam li xeevxwm. Yog tus neeg ruam mus coglus them lwm tus tej nuj nqi, yuav tau kom muab nws tej qhov txhia chaw mus yuam nqi ua ntej. Yog koj mus tsa koj tus phoojywg thaum sawv ntxov, ces ib yam li yog koj cem nws ntag. Tus pojniam uas yws taus zoo ib yam li dej nag nrog tuj tauv. Koj yuav txwv tsis tau nws kom tsis txhob yws ib yam li koj txwv tsis tau cua lossis muab phoovtes cug roj. Hlau hov hlau li cas, tej neeg ib leeg kawm ntawm ib leeg ib yam li ntawd. Tu koj tej txiv ncuavpias kom zoo koj thiaj tau noj. Tus tubtxib uas tu nws tus tswv zoo yuav tau txais lus qhuas. Koj pom koj tus duab hauv dej li cas thiab koj lub siab xav li cas, ces koj tes haujlwm zoo li ntawd. Txojkev tuag txhaws tsis paub puv li cas, neeg txojkev ntshaw tsis paub txaus ib yam li ntawd. Nyiaj thiab kub muab hluavtaws sim; kev qhuas sim neeg lub siab. Txawm yog koj yuav muab tus neeg ruam ntaus tshuav tuag los nws tseem ruam nws li qub. Saib koj tej yaj tej nyuj kom zoo, rau qhov kev npluanuj tsis nyob mus ibtxhis. Txawm yog txhua haivneeg los yeej tsis nyob mus ibtxhis. Thaum koj sau tej zaub nyuj qhuav thiab hlais tej nyom pem tej ntav toj tas lawm, ces tej zaub twb pib hlav mos nyoos tuaj lawm. Koj muab tej plaub yaj los xaws ris tsho hnav thiab muab tej nyiaj uas koj muag tshis mus yuav teb. Dua li tej tshis uas seem cia tso kua mis yug koj thiab koj tsevneeg, thiab koj tej ntxhais qhev kom muaj noj muaj haus tsis tu. Cov neeg ua phem khiav thaum tsis muaj neeg caum ntes lawv, tiamsis cov neeg ncaj ua siab tawv qhawv ib yam li tsov ntxhuav. Thaum muaj kev ntxeev nom ntxeev tswv nyob hauv lub tebchaws yuav muaj ntau tus nomtswv los kav. Tiamsis thaum tus thawjcoj uas txawj ntse los kav lub tebchaws yuav nyob ruaj khov. Tus muaj hwjchim uas tsimtxom cov neeg pluag zoo ib yam li kob tuamtsam nag uas los ntaus tej qoobloo tuag tas. Yog koj tsis ua raws li kevcai, ces koj yog tus tuaj cov neeg ua phem tog, tiamsis yog koj hwm txoj kevcai, ces yog koj tawmtsam cov neeg siab phem. Cov neeg ua phem tsis paub txojkev ncaj ncees, tiamsis cov neeg uas hwm tus TSWV totaub zoo. Tus neeg txomnyem, tiamsis ncaj ncees zoo dua li tus npluanuj, tiamsis tsis ncaj ncees. Tus tub uas hwm kevcai yog tus txawj ntse. Tus uas ua phoojywg nrog tus neeg tsis tsimtxiaj ua rau nws txiv poob ntsejmuag. Yog koj tsub pajlaum ntau rau luag them kom koj npluanuj, koj tej nyiaj txiag yuav muab rau tus uas hlub cov neeg pluag. Yog koj tsis ua raws li kevcai, Vajtswv yuav ntxub thiab dhuav koj tej lus thov. Yog koj ntxias tus neeg ncaj ncees ua kev txhaum, ces yog koj cuab hlua rov mag koj. Tus neeg uas tsis ua txhaum yuav tau nqis zog. Tus neeg npluanuj ibtxwm xav hais tias nws txawj ntse, tiamsis tus neeg pluag uas muaj tswvyim tseem paub tus npluanuj lub qe heev dua. Thaum tus neeg siab zoo tau ua tus kav, txhua tus zoo siab; tiamsis thaum tus neeg siab phem ua tus kav, tej pejxeem khiav mus nkaum tas. Yog koj pheej npog tej kev txhaum tseg koj lub neej yuav tsis vammeej; yog koj lees thiab tso plhuav tej kev txhaum tseg Vajtswv yuav hlub koj. Niaj hnub mloog tus TSWV tej lus koj thiaj ua neej kaj siab lug. Yog koj ua neeg tawv ncauj, koj yuav raug kev puastsuaj. Tus neeg siab phem uas tswjhwm cov pluag, nws zoo ib yam li tus tsov ntxhuav uas nyooj lossis tus dais uas yuav sibtog. Tus thawjtswj uas tsis muaj tswvyim tsimtxom pejxeem; tus uas ntxub txojkev tsis ncaj ncees yuav tau ua tus tswjhwm mus ntev. Tus uas muaj txim tua neeg yog nws tabtom khawb qhov ntxa rau nws; tsis txhob cheem nws hlo li. Ua neeg ncaj ncees koj thiaj yuav nyob kaj siab lug; yog koj ua tsis ncaj, ces tos nco koj yuav ntog. Tus uas rau siab ntso ua liaj ua teb yuav muaj noj nplua mias, tiamsis tus uas pheej mus laug sijhawm ua dog ua dig yuav ua neeg pluag mus li. Cov neeg uas muaj lub siab ncaj yuav tau txais lub neej kaj siab, tiamsis yog koj xav npluanuj sai koj yuav raug txim ntag. Xaiv ntsejmuag yog ua tsis ncaj, tiamsis muaj tej tus txiav txim tsis ncaj, vim nws tau mentsis nyiaj xiab. Cov neeg qia dub xav kom npluanuj sai, lawv twb tsis paub hais tias thaum twg kev txomnyem yuav los raug lawv. Tus uas ntuas ib tug neeg twg, mas tom qab ntawd nws yuav zoo siab dua li tus uas thuam luag. Yog leejtwg xav hais tias, nyiag nws niam nws txiv los tsis txhaum, tus ntawd yeej zoo ib yam li tus uas ibtxwm ua tubsab los lawm. Tus neeg siab hlob ua kom muaj kev kub ntxhov, tiamsis tus uas cia siab rau tus TSWV lub neej yuav vammeej. Tus uas ua raws li nws lub siab xav xwb yog neeg ruam. Tus uas ua raws li cov neeg txawj ntse tej lus qhia yuav tau nyob kaj siab lug. Tus uas pub rau cov pluag yuav muaj noj tsis tu. Yog koj ua tus tsis pom cov pluag, neeg coob leej yuav foom phem rau koj. Thaum tus neeg siab phem los tswjhwm, tej pejxeem khiav nkaum; tiamsis thaum nws poob hwjchim lawm, cov neeg ncaj ncees yuav los kav. Tus uas tsis yuav luag tej lus ntuas, nws lub neej yuav puastsuaj thiab tsis muaj hnub zoo ntxiv li lawm. Thaum cov neeg ncaj ncees los ua nom kav, tej pejxeem zoo siab kawg, tiamsis thaum cov neeg siab phem los ua nom kav, tej pejxeem tau kev quaj ntsuag. Tus tub uas muaj tswvyim, leej txiv yuav txaus siab heev rau nws, tiamsis tus uas muab tej nyiaj mus siv rau tej niamntiav, ces yog muab nyiaj povtseg ntag. Thaum vajntxwv tswjhwm ncaj ncees, lub tebchaws yuav nyob ruaj khov, tiamsis thaum nws muab nyiaj txiag saib hlob, nws yuav ua rau lub tebchaws puastsuaj. Yog koj ua txuj qhuas tej phoojywg, ces yog koj rov cuab vojhlua tos koj kev. Cov neeg ua phem txojkev txhaum yuav rov los raug lawv, tiamsis cov neeg ncaj ncees yuav hu nkauj thiab muaj kev kaj siab lug. Tus neeg ncaj ncees yeej ua ncaj rau cov neeg pluag, tiamsis cov neeg siab phem tsis quavntsej txog li. Cov neeg uas thuam lwm tus yog cov uas ua rau lub nroog muaj kev kub ntxhov, tiamsis cov neeg ntse ua rau lub nroog nyob sib haumxeeb. Thaum tus neeg ntse ua plaub nrog tus neeg ruam, tus neeg ruam tsuas yog luag, qw thiab cem phem xwb. Cov neeg uas nyiam ua kom luag nqaij ntuag ntshav nrog ntxub tus neeg ua ncaj, tiamsis cov neeg ncaj ncees yuav tiv thaiv tus ntawd txojsia. Cov neeg ruam chim thiab npautaws sai, tiamsis cov neeg thoob tsib to nrog ua taus siab ntev thiab muab txojkev chim npog tseg. Yog tus thawjcoj nyiam mloog tej lus fi xov tsis tseeb, nws cov nomtswv yuav ua neeg dag. Qhov uas tus neeg pluag thiab tus neeg uas tsimtxom tus neeg pluag zoo ib yam yog li no: Tus TSWV pub rau nkawd muaj qhovmuag ib yam nkaus. Yog vajntxwv txiav txim ncaj ncees rau cov neeg pluag, nws yuav tau tswjhwm mus ntev. Kev qhuab ntuas thiab nplawm menyuam yuav ua rau tus menyuam tsimtxiaj; yog cia menyuam ua ywj siab, nws yuav ua rau leej niam raug kev txajmuag. Thaum cov neeg siab phem tau los ua tus tswjhwm, kev kub ntxhov yuav loj tuaj, tiamsis cov neeg ncaj ncees yuav pom cov neeg ua phem raug kev puastsuaj. Qhuab ntuas koj tej menyuam, lawv thiaj yuav ua rau koj zoo siab; lawv thiaj tsis ua rau koj raug txajmuag. Lub tebchaws uas tsis cia Vajtswv ua tus coj, lub tebchaws ntawd tsis muaj kev tswjhwm zoo. Tus neeg uas muaj kev kaj siab yog tus uas coj raws li Vajtswv txoj kevcai. Tus tubtxib uas koj ntuas ntawm ncauj xwb, nws yuav tsis mloog; nws yeej paub, tiamsis nws tsis ua li koj hais. Cia siab rau tus neeg ruam zoo dua li cia siab rau tus neeg uas hais lus tsis xav tom ntej tom qab. Yog koj muab txhua yam rau koj tus tubtxib raws li nws xav tau thaum tseem hluas los, muaj ib hnub nws yuav txeeb tagnrho tej uas koj muaj huv tibsi. Cov neeg uas npautaws sai ua kom muaj kev sib cav sib ceg thiab kev kub ntxhov. Kev khavtheeb yuav ua rau koj poob ntsejmuag, tiamsis yog koj txo hwjchim luag yuav hwm koj. Tus neeg tubsab tus kwvluag yog nws tus yeebncuab uas phem tshaj plaws; yog nws qhia qhov tseeb nyob hauv tsev tu plaub, nws yuav raug tsimtxom; yog nws tsis qhia qhov tseeb Vajtswv yuav foom phem rau nws. Kev ntshai luag ces yog lub vojhlua cuab tos koj kev, tiamsis yog koj cia siab rau tus TSWV mas koj yuav kaj siab lug. Txhua leej txhua tus xav kom tus thawjcoj txaus siab rau nws, tiamsis tsuas yog tus TSWV thiaj muab tau kev ncaj ncees. Cov neeg ncaj ncees ntxub cov neeg tsis ncaj ncees, thiab cov neeg ua phem ntxub cov neeg ua zoo. Ntawm no mus yog Yakes tus tub Ankus tej lus tseemceeb: “Vajtswv tsis nrog kuv nyob, Vajtswv tsis nrog kuv nyob, thiab tsis muaj leejtwg pab kuv. Kuv ruam ib yam li tus tsiaj, kuv tsis muaj kev txawj ntse li neeg muaj. Kuv yeej ibtxwm tsis tau kawm dua kev txawj ntse, thiab kuv yeej tsis paub hais tias muaj Vajtswv. Leejtwg tau nce mus saum ntuj ceebtsheej thiab nqis rov qab los? Leejtwg ntes tau cua rau hauv nws lub xibteg? Lossis muab ib daim ntaub los qhwv tau dej? Lossis muab tej ciam av ntiajteb los sib lo ua ke? Yog koj paub, nws yog leejtwg? Leejtwg yog nws tus tub? “Vajtswv yeej ceev tej lus uas nws tau cog tseg; nws zoo ib yam li daim hlau thaiv hniav ntaj rau txhua tus uas nrhiav txojkev pab. Tsis txhob ntxiv ib lo lus rau tus TSWV tej lus nyob tsam nws cem koj, thiab nws yuav paub hais tias koj yog tus neeg dag.” Vajtswv, thov koj pub kuv muaj ob yam no ua ntej kuv tuag: tsis txhob pub kuv ua ib tug neeg dag thiab tsis txhob cia kuv npluanuj dhau lossis pluag dhau; pub kom kuv muaj txaus noj txaus haus xwb. Yog kuv muaj ntau dhau lawm, ntshai kuv yuav hais tias kuv tsis vamkhom koj; tiamsis yog kuv pluag dhau lawm, tej zaum kuv yuav mus ua tubsab thiab ua rau kuv tus Vajtswv txajmuag. Tsis txhob nkaug ib tug tubtxib twg rau nws tus tswv hlo li, nyob tsam koj yuav raug foom tsis zoo thiab tau ris lub txim ntawd. Muaj tej tus neeg foom tsis zoo rau nws txiv thiab tsis nco nws niam txiaj ntsig. Muaj tej tus xav hais tias nws yog neeg ncaj ncees, tiamsis nws ua phem ua qias kawg li. Muaj tej tus xav hais tias nws thiaj yog neeg zoo xwb, ua li cas nws xav hais tias nws zoo tshaj lwm tus! Muaj tej tus neeg limhiam mus huab cov pluag thiab cov txomnyem tug, qhov ntawd yog tus neeg siab phem kev nrhiav noj nrhiav haus. Ib tug maumpeeb muaj ob tug menyuam, nkawd npe hu ua “Muab rau kuv!” Muaj plaub yam uas pheej tsis txaus siab li: tubtuag teb, tus pojniam uas muaj tsis taus menyuam, av qhuav xav tau dej nag, thiab hluavtaws kub toj tua tsis tau. Tus neeg uas nws luag nws txiv plig lossis tuam mom nws niam thaum nws niamlaus lawm, nws yuav raug dav npoj noj lossis uablag yuav thos nws ob lub qhovmuag. Muaj plaub yam uas ua rau kuv xav tsis thoob thiab tsis totaub, tej ntawd yog li no: Tus dav ya saum nruab ntug, tus nab nkag saum pobzeb, lub nkoj khiav taus nta yees saum nplaim dej hiavtxwv, thiab pojniam txivneej txawj sib nyiam. Tus pojniam uas tsis ncaj yog li no: nws ua txhaum kev nkauj kev nraug tas, nws mus da dej, thiab hais tias, “Kuv yeej tsis tau ua txhaum dabtsi.” Nyob hauv ntiajteb no muaj plaub yam uas ua rau neeg tsis txaus siab: Tus qhev tau los ua vajntxwv, tus neeg ruam muaj txhua yam noj, tus pojniam uas txhua tus ntxub tau txiv yuav, thiab tus ntxhais qhev tau los nyob nws tus niam tsavcuab chaw. Muaj plaub yam tsiaj uas me heev nyob hauv ntiajteb no, tiamsis ntse kawg li: Ntsaum: lawv tsis muaj zog, tiamsis thaum lub caij ntuj qhua lawv sau tej khoom noj los khaws tseg. Ntximtsua: lawv tsis muaj zog, tiamsis lawv ua lawv tej zes rau hauv tej qhov tsua. Kooj: lawv tsis muaj vajntxwv, tiamsis lawv ya ua ke tsheej pab. Nab qa tsiav: koj ntes tau tuavhauv koj xibteg, tiamsis nws tseem tau nyob hauv vajntxwv tej loog. Muaj plaub yam uas thaum lawv mus kev mas zoo saib kawg li yog: tsov ntxhuav muaj zog tshaj lwm yam tsiaj thiab tsis ntshai dabtsi li, tus laug tshis thiab tus lau qaib cooj uas mus kev khov kho, thiab tus vajntxwv uas sawv ntawm nws tsoom pejxeem hauv ntej. Yog koj ruam dhau es ua neeg khavtheeb thiab tuav tswvyim ua phem; cia li tseg thiab ua tib zoo xav! Yog koj nyoj mis nyuj, ces koj tau roj mis; yog koj ntaus luag cajntswg, ces luag qhovntswg yuav los ntshav; thiab yog koj mus thab kev chim, koj yuav raug kev kub ntxhov. Ntawm no yog tej lus tseemceeb uas vajntxwv Lemu-ees niam hais rau nws: “Kuv tus tub, koj yog leejtwg? Kuv tus tub uas yug hauv kuv plab los, koj yog leejtwg? Kuv tus tub uas kuv tau coglus, koj yog leejtwg? Tsis txhob muab koj lub zog siv tagnrho rau kev ua nkauj ua nraug thiab koj tej nyiaj txiag rau tej pojniam; lawv tau ua rau tej vajntxwv puastsuaj tas. Lemu-ees, cia li mloog kuv tej lus. Tej vajntxwv tsis tsimnyog haus cawv txiv hmab lossis tsis tsimnyog tej thawjcoj nyiam haus tej cawv ntsim. Thaum lawv haus cawv qaug lawm, lawv tsis nco qab tej kevcai thiab tsis quavntsej tej kev ua ncaj rau tej pejxeem lawm. Tej cawv ntsim yog cov neeg uas yuav raug kev puastsuaj thiab cov uas muaj kev nyuaj siab haus xwb. Cia lawv haus kom lawv tsis txhob nco txog lawv tej kev txomnyem thiab tej kev nyuaj siab. “Cia li pab cov neeg uas lawv tsis muaj cuabkav hais lawv zaj, cia li pab txheem cov tsis muaj txhaum uas tsis muaj chaw vamkhom. Pab txheem cov pluag thiab cov txomnyem txoj cai, pab lawv hais thiab txiav txim kom ncaj ncees.” Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd. Nws tus txiv tso siab plhuav rau nws, thiab nws lub neej yuav tsis txomnyem li. Nws ua zoo rau tus nws txiv thiab tsis ua phem mus tas nws lub neej li. Nws rau siab ntso ntos ntaub plaub yaj thiab ntaubmag los xaws ris tsho hnav. Nws mus ris zaub mov tom tej teb los ib yam li tej nkoj uas thauj khoom ua lag ua luam. Nws sawv ntxov los ua zaub ua mov rau tsevneeg noj thiab qhia haujlwm rau tej ntxhais qhev ua. Nws mus xyuas luag tej liaj teb thiab rho hlo nyiaj yuav; nws muab tej nyiaj uas nws khwv tau mus yuav txiv hmab los cog. Nws muaj zog, nws nquag thiab rau siab khwv kawg li. Nws paub hais tias txhua yam uas nws khwv tau los yeej muaj nqis, thiab nws ua haujlwm mus txog tej tag hmo. Nws saws ntuag thiab ntos ntaub los xaws ris tsho. Nws ua siab dawb siab zoo rau cov neeg pluag thiab cov txomnyem. Lub caij los daus los nws tsis txhawj, rau qhov nws tsevneeg muaj ris tsho sov hnav txhua tus. Nws ntos tej ntaub pua txaj thiab hnav tej ris tsho ntaubmag tsamxem uas zoo zoo xwb. Nws tus txiv yog ib tug neeg tseemceeb thiab muaj koob meej nto moo lug. Nws xaws ris tsho thiab siv muag rau tej tub lag tub luam. Nws ua taus niam thiab sawvdaws hwm nws, nws tsis txhawj txog lub neej yav tom ntej. Nws hais lus ntse ntsuav thiab tsis muaj ib lo siab leejtwg. Nws rau siab ntso khwv thiab saib ntshis tsis pub nws tsevneeg raug kev txomnyem. Nws tej menyuam nco nws txiaj ntsig, thiab nws tus txiv qhuas ntxhias nws. Nws tus txiv hais tias, “Muaj ntau tus pojniam yeej zoo kawg thiab, tiamsis koj yog tus uas zoo dua lawv sawvdaws.” Cev zam zoo rub tau neeg lub siab, thiab kev zoo nkauj txawj ploj mus, tiamsis tsimnyog qhuas tus pojniam uas hwm tus TSWV. Nws ua haujlwm zoo, cia li nco nws txiaj ntsig; nws yog tus uas tsimnyog sawvdaws hwm. Ntawm no yog tus neeg Txawj Ntse tej lus, nws yog Daviv tus tub uas ua vajntxwv nyob hauv lub nroog Yeluxalees. Tus neeg Txawj Ntse hais tias tsis muaj qabhau, tsis muaj qabhau li! Kev ua neej nyob yeej tsis muaj qabhau! Txhua yam yeej tsis muaj qabhau li. Qhov uas neeg sib zog ua haujlwm hnyav tiv tshav tiv nag hauv qab ntuj no ua rau lawv tau dabtsi los ntawm tej haujlwm uas lawv ua ntawd? Ib tiam tas tshwm dua ib tiam tuaj, tiamsis lub ntiajteb tseem nyob li qub. Lub hnub txawj tawm tuaj thiab txawj rov qab mus rau ntawm qhov chaw uas nws tawm tuaj, thiab rov tawm tuaj dua. Cua ntsawj mus rau nram qab ntug thiab ntsawj rov los rau pem hauv ntuj, cua ntsawj mus ntsawj los thiab ntsawj rov los rau qhov qub. Txawm yog txhua tus dej ntws mus rau hauv hiavtxwv los hiavtxwv kuj tsis puv li. Tej dej ntawd ntws rov rau pem hauv dej thiab ntws rov los rau qhov qub xwb. Txhua tsav yam ua rau kuv txog siav tas, kuv hais lus tsis puv pa li. Lub qhovmuag tseem ntsia tsis tau txaus thiab lub qhovntsej los mloog tsis tau dhuav. Tej xwmtxheej uas twb tshwm tas los lawm, los kuj yog tej uas tseem yuav tshwm los dua. Tej uas twb ua tas los lawm, los kuj yog tej uas tseem yuav ua dua thiab. Yeej tsis muaj ib yam dabtsi uas yog yam tshiab nyob hauv qab ntuj no li. Luag hais tias, “Saib maj, yam no yog ib yam tshiab!” Tiamsis tej ntawd twb yog tej uas xub muaj ua ntej peb nyob lawm. Tiam no tsis muaj leejtwg yuav nco tau tej thaum ub, thiab tej neeg uas tseem yuav yug los yeej tsis muaj leejtwg yuav nco tau tej xwm uas muaj hnub no thiab yav tas los. Kuv uas yog tus neeg Txawj Ntse, kuv tau ua vajntxwv kav cov Yixalayees nyob hauv lub nroog Yeluxalees. Kuv siv kuv tej kev txawj ntse los nrhiav thiab tshawb txhua yam uas muaj nyob hauv lub qab ntuj no; kuv pom hais tias Vajtswv muab lub nra hnyav heev rau neeg ris. Kuv twb pom txhua yam uas neeg ua nyob hauv qab ntuj no, kuv paub hais tias txhua yam uas lawv ua ntawd yeej tsis muaj qabhau li, tsuas zoo ib yam li caum cua xwb. Yam uas nkhaus lawm muab ua kom ncaj tsis tau; yam uas muaj tsis txwm yeej suav tsis tau ua kom txwm. Kuv xav hais tias, “Kuv yog tus uas txawj ntse tshaj lwm tus uas ua vajntxwv nyob hauv lub nroog Yeluxalees uas nyob ua ntej kuv lawm. Kuv paub tej tswvyim thiab kev txawj ntse tseeb kawg li.” Kuv npaj siab kawm kev txawj ntse, kev ruam, tswvyim thiab kev vwm saib txawv li cas. Tiamsis kuv pom hais tias tsuas zoo ib yam li kuv caum cua xwb. Tus neeg uas muaj kev txawj ntse ntau, nws kuj muaj kev nyuaj siab ntau. Thiab tus neeg uas paub ntau, nws kuj muaj kev txhawjxeeb ntau. Kuv xav hais tias cia kuv sim kev lomzem saib yuav zoo siab npaum li cas. Tiamsis kuv pom hais tias tej ntawd kuj tsis muaj qabhau li thiab. Kuv pom hais tias kev luag yog ib yam uas ruam kawg, thiab tej kev lomzem yeej coj tsis tau ib yam dabtsi los rau yus li. Kuv xav muaj tswvyim heev, kuv thiaj sim haus cawv thiab ua kev lomzem. Kuv xav hais tias qhov no yog yam zoo tshaj plaws rau neeg ua nws lub neej uas nyob ib nyuag ntu hauv ntiajteb no. Kuv ua ntau tes haujlwm tseemceeb kawg li. Kuv ua tau ntau lub tsev thiab ua ntau daim teb txiv hmab. Kuv ua ntau daim teb cog txiv ntoo, thiab kuv cog ntau yam txiv rau hauv. Kuv khawb ntau lub pasdej thiaj tau dej ywg kuv tej txiv hmab txiv ntoo. Kuv yuav tubqhe thiab nkauj qhe coob heev, kuv muaj tej tubqhe uas yug hauv kuv tsev. Kuv muaj nyuj, muaj tshis, thiab muaj yaj coob dua cov vajntxwv uas xub nyob ua ntej kuv hauv lub nroog Yeluxalees no. Kuv muaj nyiaj thiab muaj kub ntau kawg li; tej ntawd yog kuv sau cov vajntxwv nyob hauv cov tebchaws uas kuv kav tej nyiaj los khaws cia. Kuv muaj cov tub thiab cov ntxhais hu nkauj ua rau kuv zoo siab, thiab kuv muaj ntau tus pojniam txaus kuv siab kawg li. Kuv tau ua tus loj dua cov neeg uas xub nyob ua ntej kuv hauv lub nroog Yeluxalees no, thiab kuv tej tswvyim kuj nyob nrog nraim kuv. Txhua yam uas kuv xav yuav los kuv kuj tau; kuv xav ua kev lomzem los kuv yeej tsis tswj kuv lub siab li. Kuv txaus siab rau tej haujlwm uas kuv ua, thiab tej no yog kuv tej nqi zog. Kuv xav txog txhua yam haujlwm hnyav uas kuv tau sib zog khwv nyob hauv qab ntuj no, mas kuv pom hais tias txhua yam ntawd tsis muaj qabhau li, tsuas zoo ib yam li caum cua xwb. Tus vajntxwv twg los tsuas ua tej uas cov vajntxwv uas xub nyob ua ntej nws los lawm ua xwb. Ces kuv thiaj ua tib zoo xav txog kev txawj ntse, kev vwm, thiab kev ruam saib zoo li cas. Kuv pom hais tias, “Kev ntse zoo dua kev ruam ib yam li qhov pom kev zoo dua qhov tsaus ntuj. Cov neeg ntse pom lawv txoj haukev, tiamsis cov neeg ruam xuas dub mus kev xwb.” Txawm yog li ntawd los kuv pom hais tias thaum kawg lawv cov ntawd lub neej zoo ib yam nkaus. Kuv xav txog kuv hais tias, “Thaum kawg cov neeg ruam lub neej zoo li cas, ces kuv lub neej yuav zoo ib yam nkaus li ntawd. Yog li ntawd, tej kev txawj ntse uas kuv muaj yuav zoo dabtsi?” Tej kev txawj ntse no los yeej tsis muaj qabhau rau kuv li. Tsis muaj leejtwg yuav nco txog cov neeg txawj ntse thiab cov neeg ruam. Ib hnub tom ntej luag kuj yuav tsis nco txog peb ib yam nkaus. Cov neeg ntse los yuav tuag ib yam li cov neeg ruam thiab. Kuv xav hais tias kev ua neej tsis muaj qabhau, rau qhov txhua yam xwm uas kuv raug tas los ua rau kuv ntxhov siab kawg li. Txhua yam ntawd puavleej tsis muaj qabhau, tsuas zoo ib yam li caum cua xwb. Tej haujlwm uas kuv ua thiab tej uas kuv khwv tau nyob hauv qab ntuj no, yeej tsis muaj qabhau rau kuv, rau qhov kuv yeej paub hais tias kuv yuav muab tej ntawd tso tseg rau tus uas yuav los hloov kuv chaw, thiab leejtwg yuav paub hais tias tus uas yuav los ntawd nws yog tus ntse lossis yog tus ruam? Txawm yog nws yuav zoo li cas los xij, nws yeej yuav tau tej uas kuv lub tswvyim khwv tau rau hauv qab ntuj no. Tej ntawd los tsis muaj qabhau li. Yog li ntawd, kuv thiaj li rov khuvxim txog tej haujlwm hnyav uas kuv tau ua nyob hauv qab ntuj no. Neeg siv tswvyim, kev paub, thiab kev txawj ntse ua haujlwm tau nyiaj thiab ib puas tsav yam khaws cia, tiamsis kuj muab tej ntawd tso tseg rau lwm tus uas tsis tau siv dag siv zog khwv li yuav. Tej ntawd kuj tsis muaj qabhau thiab tsis tsimnyog li. Yus yuav tau dabtsi los ntawm qhov uas yus sib sib zog khwv thiab huas ua ntxhov siab hnyo hauv qab ntuj no? Yus txojsia yuav nyob ntev li cas los xij, txhua yam uas yus ua tsuas yog coj kev txhawjxeeb thiab kev ntxhov siab los rau yus xwb. Txawm yog ntuj teb tag hmo los yus lub siab yeej tsis tau so li. Tej no los tsis muaj qabhau li. Yam uas zoo tshaj plaws rau tibneeg yog kev noj kev haus, thiab txaus siab rau tej uas nws khwv tau los ntawd. Txawm li ntawd los kuv pom hais tias tej ntawd puavleej yog los ntawm Vajtswv. Yog tsis los ntawm Vajtswv los leejtwg yuav tau tej ntawd noj thiab muaj kev zoo siab? Vajtswv pub tswvyim, kev txawj ntse, thiab kev kaj siab rau tus uas ua haum nws siab, tiamsis Vajtswv kom cov neeg txhaum ua haujlwm hnyav, Vajtswv thiaj tau tej ntawd pub rau cov neeg uas ua haum Vajtswv siab. Tej no kuj tsis muaj qabhau li, tsuas yog zoo ib yam li caum cua xwb. Txhua yam uas muaj nyob hauv lub qab ntuj no yeej tshwmsim raws li Vajtswv tau teem caij teem nyoog tseg cia lawm xwb. Vajtswv teem kom muaj sijhawm yug thiab muaj sijhawm tuag, muaj sijhawm cog thiab muaj sijhawm sau, muaj sijhawm tua thiab muaj sijhawm kho kom zoo, muaj sijhawm muab rhuav povtseg thiab muaj sijhawm txhim kho dua tshiab. Vajtswv teem kom muaj sijhawm ntxhov siab thiab muaj sijhawm zoo siab, muaj sijhawm quaj ntsuag thiab muaj sijhawm seevcev lomzem, muaj sijhawm txawb pobzeb povtseg thiab muaj sijhawm khaws pobzeb rov los, muaj sijhawm sib nwj thiab muaj sijhawm tsis sib nwj. Muaj sijhawm nrhiav tau los thiab muaj sijhawm ploj mus, muaj sijhawm muab los khaws cia thiab muaj sijhawm muab povtseg, muaj sijhawm muab dua kom ntuag thiab muaj sijhawm muab ntxiv rau, muaj sijhawm nyob ntsiag to thiab muaj sijhawm sib tham. Vajtswv teem kom muaj sijhawm sib hlub thiab muaj sijhawm sib ntxub, muaj sijhawm ua tsov ua rog thiab muaj sijhawm nyob thajyeeb. Peb yuav tau dabtsi los ntawm txhua yam haujlwm uas peb ua ntawd? Kuv paub lub nra hnyav uas Vajtswv muab rau peb ris. Vajtswv yeej teem caij teem nyoog tseg rau txhua tsav yam lawm. Nws pub peb txawj ntshaw thiab paub txog lub neej yav tom ntej, tiamsis nws tsis pub peb txaus siab thiab totaub txhua yam uas nws tau ua ntawd. Yog li ntawd, kuv pom hais tias yam uas peb tau, ces tsuas yog cia li txaus siab rau tej uas peb muaj thiab tej uas peb ua thaum peb tseem ua neej nyob no xwb. Peb sawvdaws cia li noj thiab haus kom txaus siab rau tej uas peb khwv tau los. Tej ntawd yog tej uas Vajtswv muab pub rau peb. Kuv paub hais tias txhua yam uas Vajtswv ua yuav nyob mus ibtxhis. Koj yeej ntxiv tsis tau ib yam dabtsi rau thiab rho tsis tau ib yam dabtsi tawm li. Thiab txhua yam uas Vajtswv ua no yog ua kom peb ntshai thiab hwm nws. Tej uas tshwm los puavleej yog tej uas twb tshwmsim yav tas los lawm xwb. Vajtswv ua kom tej uas twb tshwmsim lawm rov tshwmsim tuaj dua. Dua li ntawd, kuv tseem pom hais tias nyob hauv qab ntuj no muaj tej kev phem kev qias nyob rau ntau qhov chaw uas tsimnyog muaj kev ncaj ncees thiab kev ua zoo. Kuv xav hais tias, “Vajtswv yeej yuav txiav txim rau tus uas ua ncaj thiab tus uas ua phem ib yam nkaus, rau qhov txhua tsav yam thiab txhua tes haujlwm yeej yuav tshwmsim los rau lub sijhawm uas twb teem tseg cia ua ntej lawm.” Kuv xav hais tias Vajtswv tabtom sim peb thiab qhia kom peb paub hais tias peb yeej zoo tsis tshaj tej tsiaj txhu. Neeg txoj hmoo thiab tsiaj txoj hmoo zoo ib yam nkaus; neeg thiab tsiaj puavleej txawj tuag. Neeg thiab tsiaj puavleej txawj ua pa; neeg yeej zoo tsis tshaj tsiaj, rau qhov neeg thiab tsiaj puavleej tsis muaj qabhau. Neeg thiab tsiaj puavleej yuav mus rau hauv tib qhov chaw. Neeg thiab tsiaj puavleej yog muab av puab, lawv thiaj yuav rov mus ua av. Yuav ua li cas yus thiaj paub hais tias neeg tus plig mus rau saum ntuj thiab tsiaj tus plig mus rau hauv av lawm? Yog li ntawd, kuv paub hais tias qhov zoo tshaj, ces yog txaus siab rau tes haujlwm uas peb ua. Tsis muaj lwm yam uas peb ua tau lawm. Tsis muaj ib yam uas qhia rau peb paub hais tias, tom qab uas peb tuag lawm, yuav muaj dabtsi tshwmsim rau peb. Kuv rov pom dua tej kev tsis ncaj ncees uas muaj nyob hauv lub qab ntuj no. Muaj cov neeg uas raug luag tsimtxom quaj ntsuag, tiamsis tsis muaj leejtwg pab lawv li. Qhov uas tsis muaj leejtwg pab lawv, vim cov neeg uas tsimtxom lawv ntawd yog cov uas muaj hwjchim. Kuv nrog cov neeg uas tuag lawm zoo siab, vim lawv tau zoo dua cov uas tseem ua neej nyob. Tiamsis tseem muaj cov uas tau zoo tshaj cov ciaj thiab cov tuag, cov ntawd yog cov uas tsis tau yug los; lawv tsis tau pom kev tsis ncaj ncees uas nyob hauv lub qab ntuj no. Kuv paub hais tias qhov uas neeg sib zog ua haujlwm hnyav kom lawv muaj, twb yog vim lawv khib tej uas luag zejzog twb muaj lawm. Tiamsis tej ntawd tsis muaj qabhau li, tsuas zoo ib yam li caum cua xwb. Tus uas luag hais tias yog neeg ruam yog tus uas puag tes puag taw cia nws tuag tshaib. Qhov uas yus muaj kev kaj siab mentsis zoo dua li yus ob txhais tes ua haujlwm txhua lub sijhawm. Tej ntawd tsuas zoo ib yam li caum cua xwb. Kuv tseem pom muaj dua lwm yam nyob hauv qab ntuj no uas tsis muaj qabhau. Tus txivneej uas nyob ib leeg, txawm yog nws tsis muaj tub, tsis muaj kwvtij los nws pheej rau siab ntso ua haujlwm thiab tsis txaus siab rau nws tej kev muaj txiag npluanuj li. Nws khwv tseg rau leejtwg, nws thiaj pheej tsis so kom muaj kev zoo siab li? Tej no los tsis muaj qabhau, thiab nws tseem ua lub neej txomnyem ntsuav xwb. Ob leeg zoo dua ib leeg, rau qhov ob leeg ua haujlwm tau nqi zog ntau dua. Yog ib tug ntog lawm, ib tug yuav rub nws tes sawv. Tiamsis tsis zoo rau tus uas nws ib leeg xwb, yog nws ntog lawm tsis muaj leejtwg yuav rub nws tes sawv. Lub caij ntuj no, ob leeg pw ua ke thiaj li sov, tiamsis tus uas pw ib leeg xwb yuav ua li cas sov? Yog ob leeg koom ua ke yuav tawmtsam yeej ib leeg. Txoj hlua uas muaj peb ntswg, rub tsis tu yoojyim. Kuv xav txog txhua tus neeg uas nyob hauv qab ntuj no, kuv paub hais tias nyob hauv cov neeg ntawd yuav muaj ib tug tub hluas los hloov vajntxwv chaw. Txawm yog tej pejxeem uas vajntxwv kav ntawd yuav muaj coob thiab tsawg los tom qab uas nws tuag lawm, tsis muaj leejtwg yuav nco txog tej txiaj ntsig uas nws ua tas los. Tej ntawd tsis muaj qabhau, tsuas zoo ib yam li caum cua xwb. Koj yuav tsum ceevfaj qhov uas mus hauv lub Tuamtsev; koj mus mloog zoo dua koj coj khoom mus fij ib yam li tus neeg ruam uas tsis paub hais tias qhov twg yog thiab qhov twg tsis yog. Yuav tsum ua tib zoo xav ua ntej koj mam hais thiab tsis txhob lam tau lam coglus rau Vajtswv. Vajtswv yog tus nyob saum ntuj thiab koj yog tus nyob hauv qab ntuj no, yog li ntawd tsis txhob hais ib los tshaj tej uas koj ua tau. Yog koj yimhuab txhawjxeeb yuav ua rau koj yimhuab ua npau suav ntau, thiab yog koj yimhuab hais lus ntau, yuav ua rau koj hais tej lus tsis zoo. Yog li ntawd, thaum koj coglus rau Vajtswv, koj yuav tsum maj ua kom tej lus cog tseg ntawd tiav. Nws yeej tsis txaus siab rau tus neeg ruam li. Koj yuav tsum ua raws li koj tej lus cog tseg rau nws lawm. Yog koj ua tsis tau li koj hais, mas zoo dua li uas koj tsis txhob coglus. Tsis txhob cia koj tej lus cog tseg ua rau koj mus ua txhaum, thiab tsis txhob mus hais rau Vajtswv cov povthawj hais tias koj hais yuam kev lawm xwb. Vim li cas koj ua kom Vajtswv npautaws rau koj? Vim li cas koj cia Vajtswv rhuav tej uas koj ua ntawd puastsuaj tas lawm? Tsis hais ua npau suav ntau lossis ua tej haujlwm tsis tseemceeb ntau lossis hais lus ntau yeej tsis muaj qabhau, yog li ntawd koj yuav tsum hwm Vajtswv xwb. Tsis txhob xav tsis thoob thaum koj pom nomtswv tsimtxom cov neeg pluag, tsis tsa lawv cai thiab txiav txim tsis ncaj rau lawv. Txhua tus nomtswv yeej muaj ib tug ua tus loj dua saib nws, thiab tseem muaj ib tug uas muaj meejmom siab dua saib lawv. Txawm yog vajntxwv los yeej cia siab rau tej qoobloo. Yog koj ntshaw nyiaj txiag, ces koj yuav tsis muaj kev txaus siab tas koj simneej li; yog koj ntshaw kom koj npluanuj, koj yuav tsis tau tej uas koj ntshaw ntawd. Tej ntawd yeej tsis muaj qabhau li. Yog koj yimhuab npluanuj, ces yimhuab muaj ntau leej uas koj yuav tau pub rau noj. Tej uas koj tau tsuas yog lo lus uas hais tias, koj muaj txiag npluanuj xwb. Tus neeg uas ua haujlwm hnyav, txawm yog muaj ntaus muaj tsawg los nws yeej pw tsaug zog zoo. Tiamsis tus neeg muaj txiag npluanuj muaj ntau yam kev nyuaj siab ua rau nws pw tsis tsaug zog. Kuv pom dua ib yam uas xav tsis thoob nyob hauv qab ntuj no yog qhov uas neeg pheej khaws nyiaj cia rau lub sijhawm uas lawv yuav siv, yog muaj tej yam xwm tsis zoo ua rau cov nyiaj ntawd tas dulug, ces lawv yuav tsis tshuav dabtsi tseg rau lawv tej menyuam li. Peb niam yug peb los liabqab, ces thaum peb rov mus los peb yuav mus liabqab; tej uas peb khwv tau, peb yuav coj tsis tau nrog peb mus. Qhov no yog ib yam tsis zoo: peb yug los li cas peb yuav rov qab mus li ntawd; qhov uas peb ua haujlwm hnyav, peb tau dabtsi? Tsuas zoo ib yam li caum cua xwb. Dua li ntawd, peb ua lub neej tsaus ntuj nti, muaj kev tu siab, kev ntxhov siab, kev chim, thiab kev mob kev nkeeg tas mus li xwb. Yam zoo uas kuv pom yog li no: cia li noj thiab haus, thiab txaus siab rau tej uas peb khwv tau los thaum Vajtswv pub peb ua neej nyob ib nyuag ntu hauv qab ntuj no; tej no yog feem uas Vajtswv pub rau peb. Yog Vajtswv pub rau ib tug neeg twg muaj txiag npluanuj, muaj liaj muaj teb, nws cia li txaus siab rau tej ntawd; nws yuav tsum ua Vajtswv tsaug thiab zoo siab rau tej uas nws khwv tau los. Rau qhov tej ntawd yog Vajtswv pub rau nws. Yog Vajtswv pub nws muaj kev zoo siab, ces nws yuav tsis muaj kev ntxhov siab rau lub neej uas nyob ib ntus ntawd. Kuv pom muaj kev tsis ncaj ncees nyob hauv qab ntuj no; tej kev tsis ncaj ntawd tsimtxom neeg hnyav kawg li. Vajtswv pub qee leej muaj txiag npluanuj, qee leej muaj meejmom, qee leej muaj liaj muaj teb thiab muaj txhua yam uas nws xav tau. Tiamsis Vajtswv tsis pub tus ntawd txaus siab rau tej uas nws khwv tau los. Vajtswv yuav muab tej ntawd rau lwm tus siv. Tej ntawd tsis muaj qabhau thiab yog kev tsis ncaj ncees xwb. Txawm yog ib tug neeg twg yuav muaj txog ib puas tus menyuam, thiab nws ua neej nyob ntev li cas los xij, yog nws tsis muaj kev zoo siab thiab thaum nws tuag yog luag tsis coj nws mus faus, ces kuv suav hais tias tus menyuam uas tsis tau yug los tseem zoo dua tus ntawd. Nws tsis txhob yug los yuav zoo dua, rau qhov nws yeej yuav ploj mus rau hauv qhov tsaus ntuj nti uas tsis muaj leejtwg nco txog nws li lawm. Txawm yog nws tsis tau los pom lub hnub thiab tsis tau paub kev ua neej zoo li cas los nws tseem tau so dua tus uas tuag lawm. Txawm yog nws yuav ua neej nyob txog ib txhiab lossis ob txhiab xyoo los xij, yeej tsis muaj kev txaus siab dabtsi. Thaum kawg nkawd yeej yuav mus rau tib qhov chaw xwb. Tus neeg uas rau siab ntso ua haujlwm nws tsuas tau noj tau haus xwb, tiamsis nws yeej tsis muaj kev txaus siab li. Tus neeg ntse zoo tshaj tus neeg ruam li cas? Thiab tus neeg pluag uas paub ua lub neej zoo yuav tau dabtsi? Tej ntawd yeej tsis muaj qabhau li, tsuas zoo ib yam li caum cua xwb. Cia li txaus siab rau tej uas koj muaj zoo dua li uas koj pheej ntshaw lwm yam. Txhua yam uas tshwm muaj ntawd, yeej teem tseg ntev los lawm. Peb sawvdaws paub hais tias tsis muaj leejtwg yuav cav ncauj yeej tus uas muaj tswvyim tshaj nws. Yog koj pheej cav ncauj ntau mas yimhuab tsis muaj qabhau, thiab koj yuav tsis tau dabtsi. Leejtwg yuav paub hais tias yam twg thiaj zoo rau neeg lub neej uas tsis muaj qabhau uas nyob ib ntus ib yam li tus duab ntxoov ntxoo uas yuav dhau mus? Puas muaj leejtwg paub hais tias tom qab uas nws tuag lawm, yuav muaj dabtsi tshwmsim rau lub qab ntuj no? Lub koob lub npe zoo, zoo dua tej roj tsw qab uas muaj nqis; thiab hnub tuag zoo dua hnub yug. Mus rau hauv lub tsev uas muaj kev quaj ntsuag zoo dua mus rau hauv lub tsev uas muaj rooj noj rooj haus thiab muaj kev lomzem. Cov uas tseem ua neej nyob yuav tsum nco ntsoov hais tias txojkev tuag yeej tos rawv peb txhua tus. Kev quaj ntsuag zoo dua kev luag ua tsuj ua tsaug, qhov ntawd ua rau koj lub ntsejmuag mluas tiamsis yuav ua rau koj muaj kev txawj ntse. Tus uas xav ntsoov rau txojkev tau zoo yog neeg ruam. Tus uas xav ntsoov rau txojkev tuag yog neeg ntse. Koj mloog tus neeg txawj ntse tej lus qhuab ntuas zoo dua li mloog tus neeg ruam hu nkauj qhuas koj. Tus neeg ruam lub suab luag zoo ib yam li tej txim taws uas tawg hauv qhovcub. Nws tsuas nrov qhuav xwb tsis muaj qabhau li. Thaum tus neeg ntse ua tsis ncaj rau lwm tus yog nws ua li tus neeg ruam ua. Yog koj yuav luag tej nyiaj xiab, ces yog koj rov ua rau koj poob ntsejmuag. Qhov uas xaus zoo dua qhov uas pib; kev ua siab ntev zoo dua kev khavtheeb. Tsis txhob npautaws sai; tsuas yog cov neeg ruam thiaj npautaws sai xwb. Tsis txhob nug hais tias, “Vim li cas yav tas los zoo dua tamsim no?” Qhov uas koj nug li ntawd tsis yog lus ntse. Txhua tus uas ua neej nyob yuav tsum muaj tswvyim, rau qhov tswvyim zoo ib yam li koj tau txais qubtxeeg qubteg, thiab lub tswvyim yuav tsomkwm koj ib yam li tej nyiaj txiag. Yam muaj nqis ntawm kev txawj ntse yog lub tswvyim uas muaj peevxwm ua rau koj nyob kaj siab lug. Cia li xav txog tej uas Vajtswv ua tas los; leejtwg yuav muaj cuabkav muab yam uas Vajtswv muab nkhaus lawm ua kom ncaj? Thaum koj noj qab nyob zoo, cia li zoo siab, thiab thaum koj raug kev txomnyem, nco ntsoov hais tias kev noj qab nyob zoo thiab kev txomnyem puavleej yog los ntawm Vajtswv los; koj tsis muaj cuabkav paub hais tias yuav muaj dabtsi tshwmsim los tom hauv ntej. Kuv pom txhua yam nyob hauv kuv lub neej uas tsis muaj qabhau. Tus neeg ncaj ncees tuag vim nws txojkev ncaj ncees, thiab tus neeg phem ua neej nyob ntev vim nws txojkev ua phem. Tsis txhob ua neeg ncaj lossis ntse dhau hwv, vim li cas koj yuav ua rau koj puastsuaj? Tiamsis tsis txhob ua neeg phem lossis ruam dhau hwv, vim li cas koj tuag ua ntej lub sijhawm uas teem tseg rau koj? Koj yuav tsum zam kom dhau ob yam ntawd huv tibsi. Yog koj ua lub neej hwm Vajtswv, koj yeej yuav zam dhau ob yam ntawd xwb. Tswvyim pab tau tus neeg txawj ntse ua tau haujlwm zoo dua kaum tus thawjtswj hauv ib lub nroog. Nyob hauv lub ntiajteb no yeej tsis muaj ib tug ua zoo txhua lub sijhawm lossis tsis ua txhaum li. Tsis txhob quavntsej tej uas luag hais, nyob tsam koj hnov koj tus tubtxib txob thuam koj; thiab koj los yeej tau txob thuam lwm tus ntau zaus lawm. Kuv siv kuv lub tswvyim sim txhua yam no. Kuv suav hais tias kuv yog tus neeg uas txawj ntse, tiamsis qhov tseeb txojkev txawj ntse nyob deb kuv heev. Yuav ua li cas thiaj paub hais tias kev ua neej nyob muaj qabhau? Qhov ntawd nyob tob heev, peb paub tsis txog li. Tiamsis kuv nrhiav thiab kawm kev txawj ntse; kuv nrhiav kom tau tswvyim thiab kev txawj ntse teb kuv tej lus nug, thiab kuv kawm kev ua siab phem thiab kev ruam saib zoo li cas. Kuv nrhiav tau ib yam uas iab siab tshaj txojkev tuag, yog tus pojniam uas muab nws txojkev hlub thab rau koj; nws yuav ntes koj ib yam li lub vas lossis rooj nta npuj uas mag koj; thiab nws sab npab uas puag koj yuav zoo ib yam li txoj saw hlau uas khi koj. Tus neeg uas ua haum Vajtswv siab thiaj yuav khiav dim, tiamsis tus pojniam ntawd yuav ntes tau cov neeg uas nyiam ua txhaum. Tus neeg Txawj Ntse hais tias, saib maj, kuv nrhiav ib yam dhau ib yam, kuv thiaj mus nrhiav tau lus teb kuv tej lus nug. Kuv nrhiav lwm yam lus teb tiamsis nrhiav tsis tau li. Kuv nrhiav tau ib tug txivneej uas kuv hwm, ntawm ib txhiab leej, tiamsis cov pojniam kuv nrhiav tsis muaj ib tug li. Tej uas kuv kawm tau yog li no: Vajtswv yeej tsim neeg los ua ncaj ua ncees, tiamsis yog peb pheej lob kev nyuaj siab los rau peb xwb. Tsuas yog tus neeg ntse thiaj li paub lub ntsiab lus meej xwb. Tswvyim ua rau nws muaj ntsejmuag luag ntxhi thiab ua rau nws txojkev chim ploj mus. Cia li ua raws li vajntxwv hais, thiab tsis txhob maj coglus rau Vajtswv. Vajntxwv yeej muaj cuabkav ua raws li nws siab nyiam; yog li ntawd, cia li khiav ntawm nws mus ua ntej koj raug kev puastsuaj. Vajntxwv yeej muaj hwjchim ua tau txhua yam, thiab tsis muaj leejtwg yuav hais tau rau nws hais tias koj ua dabtsi li ko? Yog koj mloog nws lus, koj yuav tsis raug puastsuaj, tus neeg ntse yeej paub lub sijhawm thiab paub hais tias yuav ua li cas thiaj zoo. Yeej muaj lub caij zoo thiab muaj txojkev zoo los ua txhua yam, tiamsis peb tsuas paub mentsis xwb! Peb yeej tsis muaj ib tug twg paub txog tej yam uas yuav tshwmsim los, thiab tsis muaj leejtwg qhia peb li. Tsis muaj leejtwg khiav dim txojkev tuag lossis tshem tau hnub tuag tawm ntawm nws mus. Qhov no yog npluav rog uas peb khiav tsis dhau thiab nyiag kev khiav tsis dim li. Kuv pom tej xwm uas tshwmsim hauv lub qab ntuj no, mas ibtxhia muaj hwjchim thiab ibtxhia raug txomnyem vim kev tswjhwm ntawm cov neeg muaj hwjchim. Kuv pom luag muab cov neeg ua phem uas tuag lawm coj mus faus; lawv pheej nkag mus thiab tawm hauv qhov chaw dawbhuv los, tiamsis tseem muaj neeg qhuas lawv nyob hauv tej nroog uas lawv ua kev phem kev qias. Tej ntawd los tsis muaj qabhau li. Vim li cas neeg pheej nyiam ua kev txhaum ua luaj? Rau qhov lawv ua txhaum li ntawd los lawv tsis raug txim tamsim ntawd. Tus neeg txhaum, txawm ua txhaum qas pua zaus los nws tseem ua neej nyob. Txawm li ntawd los kuv paub hais tias tus uas hwm Vajtswv thiaj yog tus uas muaj kev kaj siab, tiamsis cov neeg ua phem ua qias yuav tsis tau txojkev kaj siab ntawd. Lawv txojsia tsuas zoo ib yam li tus duab ntxoov ntxoo, thiab lawv yuav tuag thaum lawv tseem hluas, vim lawv tsis hwm Vajtswv. Muaj tej yam uas tshwmsim rau lub ntiajteb no: qee zaus cov neeg ncaj ncees raug txim theej cov neeg uas ua phem ua qias, thiab cov neeg ua phem ua qias tau txais cov neeg ncaj ncees tej nqi zog. Kuv thiaj li hais tias tej ntawd tsis muaj qabhau li. Yog li ntawd, kuv thiaj xav hais tias nyias yuav tsum txaus siab rau nyias lub neej, rau qhov tsis muaj ib yam ib yam dabtsi yuav zoo tshaj kev noj kev haus thiab nws rov txaus siab rau nws lawm. Nws tsuas ua tej haujlwm uas Vajtswv pub rau nws thaum uas nws ua neej nyob hauv ntiajteb no xwb. Thaum kuv muab siab rau nrhiav kev txawj ntse thiab kev ua haujlwm nyob hauv ntiajteb no, kuv pom hais tias nruab hnub thiab hmo ntuj los tsis muaj leejtwg tau so li, thiab tsis muaj leejtwg totaub hais tias Vajtswv ua dabtsi. Txawm yog koj rau siab nrhiav npaum twg los koj yeej tsis paub. Cov neeg txawj ntse khav hais tias lawv paub, tiamsis lawv yeej tsis paub li. Kuv xav ntev loo txog tej no, kuv pom hais tias cov neeg txawj ntse thiab cov neeg ncaj ncees, lawv tej kev sib hlub thiab tej kev sib ntxub puavleej nyob hauv Vajtswv lub xibteg. Tsis muaj leejtwg paub tej uas yuav los tav lawv hauv ntej. Tsis muaj dabtsi txawv li. Tib txoj hmoo phem los raug cov neeg ncaj ncees thiab cov neeg nkhaus, cov neeg siab zoo thiab cov neeg siab phem, cov neeg huv thiab cov neeg tsis huv, cov neeg muaj khoom fij thiab cov neeg uas tsis muaj. Tus neeg ncaj ncees los yeej zoo tsis tshaj tus neeg txhaum; tus neeg uas coglus los yeej zoo tsis tshaj tus neeg uas tsis coglus. Qhov no yog txoj hmoo phem uas los raug txhua tus neeg nyob hauv lub ntiajteb no ib yam nkaus. Dua li ntawd thaum lawv tseem ua neej nyob, lawv txhua tus lub siab puv nkaus tej kev phem thiab kev vwm ces tom qab ntawd lawv yuav tuag. Tiamsis yog leejtwg muaj sia nrog cov neeg uas ua neej nyob hauv ntiajteb no, tus ntawd tseem muaj kev cia siab; rau qhov tus dev uas tseem ciaj sia muaj nqis dua tus tsov ntxhuav uas tuag lawm. Tseeb tiag, cov neeg uas tseem ua neej nyob paub hais tias, muaj ib hnub twg lawv yuav tuag, tiamsis cov neeg uas tuag lawm tsis paub dabtsi li. Lawv yuav tsis tau nqi zog thiab tsis muaj leejtwg nco txog lawv li lawm. Lawv tej kev sib hlub, kev sib ntxub thiab tej kev khib puavleej tuag nrog lawv mus; lawv yuav tsis nrog luag muaj feem muaj tug hauv lub ntiajteb no ntxiv lawm. Cia li noj koj tej zaub mov thiab zoo siab; cia li haus koj tej cawv txiv hmab thiab kaj siab lug, rau qhov Vajtswv yeej pom zoo kom koj ua li ntawd. Txuag koj cev ris tsho kom dawb txhua lub sijhawm thiab pleev ntshis roj tsw qab rau koj lub taubhau. Cia li txaus siab ua neej nrog tus pojniam uas koj hlub mus tas koj lub neej uas tsis muaj qabhau. Cia li txaus siab rau koj lub neej uas tsis muaj qabhau, rau qhov tej ntawd thiaj yog tej uas koj muaj nyob hauv ntiajteb no. Cia li rau siab ntso ua tes haujlwm uas koj ua, rau qhov yuav tsis muaj haujlwm, tsis muaj kev xav, tsis muaj kev txawj ntse thiab tsis muaj tswvyim nyob hauv tubtuag teb, qhov chaw uas koj yuav mus nyob ntawd. Kuv pom dua lwm yam ntxiv nyob hauv lub ntiajteb no; cov neeg uas khiav ceev tshaj los yuav khiav tsis yeej txhua zaus uas muaj kev sib tw khiav, thiab cov neeg uas siab tawv heev los yuav sib ntaus sib tua tsis yeej lawm; cov neeg txawj ntse los yuav tsis muaj noj tsis muaj haus; cov neeg muaj tswvyim los tsis npluanuj, thiab cov neeg uas ua tau tshaj plaws los tsis tau ua cov tuav lub meejmom siab. Txoj hmoov phem yeej yuav los raug txhua tus. Tsis muaj leejtwg paub hais tias kev puastsuaj yuav los raug nws thaum twg ib yam li tej noog uas tos nco xwb twb mag luag tej hlua thiab ib yam li tej ntses uas mag luag lub vas. Yog li ntawd, peb yuav mag luag lub vojhlua thaum peb tsis nco ceevfaj. Muaj dua ib lub tswvyim zoo uas kuv pom nyob hauv ntiajteb no xwsli: Muaj ib lub nroog me me uas tsis muaj pejxeem coob nyob hauv. Muaj ib tug vajntxwv uas muaj hwjchim thiab muaj tubrog coob heev tuaj ntaus lub nroog ntawd. Nws tuaj vij thiab npaj tsoo tus ntsa yeej mus rau hauv lub nroog. Muaj ib tug neeg pluag uas ntse heev nyob hauv lub nroog ntawd; nws muaj cuabkav cawm tau lub nroog tsis raug luag tua, tiamsis tsis muaj leejtwg xav txog tus pluag ntawd li. Kuv hais tias muaj tswvyim zoo dua muaj zog, tiamsis tsis muaj leejtwg xav txog tus neeg pluag uas txawj ntse ntawd thiab tsis quavntsej nws tej lus li. Ua tib zoo mloog tus neeg txawj ntse tej lus uas nws maj mam hais zoo dua li mloog cov neeg ruam tus thawjtswj lub suab uas nthe nqho hauv lub rooj sablaj. Lub tswvyim ua tau ntau yam zoo dua tej cuabyeej ua rog, tiamsis tus neeg txhaum yeej ua tsis tau ib yam zoo li. Yoov tuag ua rau hwj roj tsw qab tsw phem, thiab txojkev ruam uas me me yuav ua rau lub tswvyim uas loj ploj tas. Raws li ibtxwm mas tus neeg ntse tsuas ua qhov yog, thiab tus neeg ruam thiaj ua tej yam uas tsis yog xwb. Cov neeg ruam txawm yog lawv mus qhov twg los lawv tus yam ntxwv yeej qhia rau luag paub hais tias lawv yog neeg ruam. Yog koj tus thawjtswj npautaws rau koj, koj tsis txhob khiav tso koj tes haujlwm tseg, rau qhov kev ua siab ntev thiaj tav tau txojkev chim. Tej kev phem uas kuv pom nyob hauv lub qab ntuj no yog tej uas cov thawjcoj ua tsis ncaj xwsli: muab cov neeg ruam los tuav lub meejmom siab, tiamsis muab cov neeg muaj txiag npluanuj los tuav lub meejmom qis. Kuv pom cov neeg ua qhev caij nees thiab cov nomtswv mus kotaw ib yam li cov qhev. Yog leejtwg khawb qhov, tus ntawd yeej yuav poob rau hauv lub qhov ntawd; thiab yog leejtwg rhuav phabntsa, nab yuav tom tus ntawd. Yog leejtwg txaug pobzeb, pobzeb yuav tais tus ntawd; yog leejtwg phua ntoo, ntoo yuav raug tus ntawd. Yog koj rab taus npub lawm, koj tsis hov, yuav qig koj lub zog heev. Tiamsis lub tswvyim pab tau koj ua haujlwm tiav. Yog koj xub cia nab tom tau koj ces koj ntxias tsis tau nab lawm. Tej lus uas tus neeg txawj ntse hais ua rau luag qhuas nws, tiamsis tej lus uas tus neeg ruam hais ua rau nws poob ntsejmuag. Yog nws pib hais tej lus ruam, thaum kawg yuav ua rau muaj kev chim thiab npautaws. Tus neeg ruam tham ib zaj tas pib ib zaj tuaj. Tsis muaj leejtwg paub tej uas yuav tshwmsim los yav tom ntej, thiab tsis muaj leejtwg qhia tau hais tias tom qab uas tuag lawm yuav muaj dabtsi tshwmsim. Tus neeg ruam uas tsis paub nrhiav kev rov qab mus tsev mas ua rau nws sab heev. Lub tebchaws uas tus vajntxwv tseem hluas thiab cov nomtswv pheej muaj rooj noj rooj haus tsheej tag hmo mas yuav raug kev puastsuaj. Tiamsis lub tebchaws uas tus vajntxwv paub txiav txim siab ua qhov zoo, thiab cov thawjcoj uas noj haus muaj caij muaj nyoog, lawv tswj tau lawv thiab tsis quav cawv mas yog lub tebchaws uas tau koob hmoov. Tus txivneej uas tubnkeeg kho nws lub rutsev ces lub tsev yuav xau nag thiab pob puas tas. Rooj noj rooj haus yuav ua rau koj zoo siab thiab cawv txiv hmab yuav ua rau koj kaj siab, tiamsis yog koj tsis muaj nyiaj txiag, koj yeej tsis tau tej ntawd. Tsis txhob thuam koj tus vajntxwv, txawm yog yuav xav twjywm xwb los tsis txhob xav li, thiab tsis txhob thuam cov neeg npluanuj, txawm yog yuav sib ntxhis twjywm hauv koj lub txaj los tsis txhob ntxhis li. Nyob tsam ces noog yuav coj koj tej lus mus hais qhia rau luag paub. Muab koj tej nyiaj coj mus rau cov neeg txawv tebchaws ua lag ua luam, muaj ib hnub twg koj thiaj yuav tau pajlaum. Muab koj tej nyiaj coj mus tso rau ntau qhov, yog koj yimhuab tso rau ntau qhov yimhuab zoo xwb, rau qhov koj tsis paub hais tias yuav muaj xwm dabtsi los raug koj hauv lub ntiajteb no. Tsob ntoo yuav vau mus rau seem twg los xij, tus cav ntoo yuav nyob qhov ntawd mus li. Thaum twg muaj huab tsaus nti los ces yog yuav los nag xwb. Yog leejtwg tos kom cua tus thiab huab cua zoo ces tus ntawd yuav cog tsis tau ib yam dabtsi thiab tsis muaj qoobloo sau li. Vajtswv yog tus tsim txhua tsav yam; koj yeej tsis totaub tej uas Vajtswv ua ib yam li koj tsis totaub hais tias yog li cas thiaj muaj taus txojsia rau hauv leej niam plab. Mus cog qoobloo thaum sawv ntxov thiab thaum yuav tsaus ntuj, rau qhov koj twb tsis paub hais tias cov twg yuav hlob zoo dua, cov no los cov tod lossis ob co yuav hlob zoo ib yam nkaus. Tus uas pom duab hnub ci thaum nruab hnub mas txaus siab heev. Cia li txaus siab rau lub caij lub nyoog uas koj nyob dhau los lawm. Txawm yog koj yuav ua neej nyob pestsawg xyoo los xij, nco ntsoov hais tias koj yuav nyob tsis ntev lawm. Yeej tsis muaj ib yam dabtsi uas koj cia siab li. Cov hluas, thaum nej tseem hluas cia li txaus siab rau nej lub neej hluas. Cia li ua raws li nej lub siab xav thiab ntshaw. Tiamsis nco ntsoov hais tias Vajtswv yuav txiav txim rau nej raws li txhua yam uas nej tau ua. Tsis txhob cia tej kev nyuaj siab thiab kev mob kev nkeeg los raug nej lub neej hluas uas tsis muaj qabhau. Yog li ntawd thaum nej tseem hluas, nej yuav tsum nco ntsoov tus uas tsim nej ua ntej lub niaj lub xyoo txav los ze thiab hnub phem yuav los raug nej, thaum ntawd nej yuav hais tias, “Kuv tsis xav ua neej nyob ntxiv lawm.” Thaum ntawd lub hnub, lub hli, thiab tej hnubqub yuav tsaus dub nciab, thiab tej huab uas ua nag tsaus nti yuav tsis txav ntawm nej mus. Ces thaum ntawd, nej ob txhais cajnpab uas tiv thaiv nej yuav tsis muaj zog, thiab nej ob txais ceg uas nimno muaj zog heev los yuav tsaug leeg. Nej cov hniav los tsuas tshuav qee tus zom mov lawm xwb, thiab nej ob lub qhovmuag los yuav plooj pom kev tsis tseeb lawm. Nej qhovntsej yuav tsis hnov tej suab nrov ntawm tej kev; nej yuav tsis hnov luag tej suab zom zeb lossis tej suab raj thiab suab nkauj nogncas lawm, tiamsis tej noog lub suab quaj yuav tsa nej sawv. Nej yuav ntshai tej chaw siab thiab tsis tau luag taug kev. Nej cov plaubhau yuav dawb tas; nej yuav hwj tsis tau nej lub cev thiab tsis ntshaw ib yam dabtsi li lawm. Rau qhov sawvdaws yuav mus rau ntawm lub chaw kawg thiab yuav muaj kev quaj ntsuag nyob txhua txojkev. Txoj saw nyiaj yuav hle thiab lub teeb tsav uas muab kub nchuav los yuav poob tawg tas; txoj hlua dej ntawm lub qhovtshij los yuav tu, thiab lub thoob daus dej los yuav tawg tas. Peb lub cev yuav rov mus ua av, thiab tus ntsujplig yuav rov mus cuag Vajtswv tus uas muab txojsia rau peb. Tus neeg Txawj Ntse hais tias tsis muaj qabhau, tsis muaj qabhau! Txhua yam tsis muaj qabhau li. Tiamsis vim tus neeg Txawj Ntse ntawd ntse heev, mas nws thiaj qhia rau tej neeg sawvdaws paub yam uas nws paub. Nws kawm paub ntau yam pajlug thiab nws tau sim tej pajlug ntawd yeej muaj tseeb tiag. Tus neeg Txawj Ntse ua tib zoo nrhiav tej lus nplig siab, thiab nws sau tej lus tseeb xwb. Tej pajlug uas cov neeg txawj ntse hais zoo ib yam li cov tub yug yaj tej pas uas lawv tav lawv cov yaj, thiab tej pajlug uas lawv sau nyob mus ibtxhis ib yam li tej ntsia hlau uas muab ntsia ruaj lawm. Tej pajlug ntawd yog Vajtswv uas yog tus Tswv yug yaj muab rau peb. Metub, tseem tshuav lwm yam uas koj yuav tau ua tib zoo saib. Sau ntau phau ntawv yuav tsis muaj hnub xaus, thiab kev kawm ntau yuav ua rau koj qaug zog. Thaum kawg no yuav tsum hwm Vajtswv thiab ua raws li nws tej lus samhwm, rau qhov nws tsim neeg los ua tes haujlwm ntawd. Vajtswv yuav txiav txim rau txhua yam uas peb ua, tsis hais ua zoo lossis ua phem, thiab tej uas peb ua tsis pub leejtwg paub. Zaj nkauj zoo tshaj plaws uas Xalumoos sau. Cia koj lub qhovncauj nwj kuv; koj txojkev hlub zoo tshaj tej cawv txiv hmab. Koj lub cev tsw qab ntxiag; thaum hais txog koj lub npe kuv nco txog koj tus ntxhiab. Tsis muaj ib tug pojniam uas yuav tsis nyiam koj li. Coj kuv nrog koj, thiab wb cia li khiav mus; cia li ua kuv tus vajntxwv thiab coj kuv mus rau hauv koj chav pw. Wb yuav muaj kev zoo siab ua ke, wb yuav qhuas txojkev hlub tshaj tej cawv txiv hmab. Twb yog vim li no txhua tus pojniam thiaj nyiam koj ua luaj! Ib tsoom pojniam uas nyob hauv lub nroog Yeluxalees, kuv dub doog tiamsis zoo nkauj heev, kuv dub ib yam li tej tsevntaub uas nyob tom tiaj suabpuam Kedas, tiamsis kuv zoo nkauj ib yam li tej ntaub tsuj hauv vajntxwv Xalumoos lub loog. Tsis txhob saib tsis taus kuv, vim kuv lub cev dub doog, rau qhov tshav ntuj ziab kuv thiaj hiav tawv. Kuv cov nus chim rau kuv thiab yuam kuv mus tu vaj txiv hmab, kuv thiaj tsis muaj sijhawm tu kuv lub cev. Tus uas kuv hlub, cia li qhia rau kuv saib, koj yuav coj koj pab yaj mus noj zaub qhov twg? Thaum tavsu koj cov tsiaj yuav mus so qhov twg? Vim li cas kuv thiaj yuav tsum tuaj nrhiav koj hauv luag lwm pab neeg zov yaj? Tus hluas nkauj uas kuv hlub tshaj plaws, koj puas paub qhov chaw? Koj cia li raws pab yaj no qab, nrhiav lub tshav zaub rau koj cov tshis uas nyob ze ntawm cov yug yaj tej tsevntaub. Tus uas kuv hlub, koj ntxim cov txivneej siab npaum nkaus li tus maum nees ntxim cov txiv nees xob uas luag Falaus tej tsheb nees siab ntag. Koj cov plaubhau zoo nkauj ntev npws loo npog koj lub plhu thiab dauv mus rau ntawm koj lub cajdab ib yam li tej saw uas zoo nkauj. Tiamsis peb yuav ua ib txoj saw kub uas muab tej qe nyiaj dai rau rau koj coj. Kuv tus vajntxwv tabtom pw saum nws lub txaj qhuas, thiab kuv cov tshuaj tsw qab, tsw qab ntxiag puv tsev. Tus uas kuv hlub muaj lub hnab tshuaj mules uas tsw qab ntxiag rau kuv thiab pw rawv hauv kuv lub xubntiag. Tus uas kuv hlub zoo ib yam li tej paj nroj qus uas tawg nyob hauv lub vaj txiv hmab hauv Enkedis. Tus uas kuv hlub, ua cas koj yuav zoo nkauj ua luaj; koj muaj sais muag ntxim hlub kawg li! Tus uas kuv hlub, ua li cas koj yuav zoo nraug tas npaud; ua li cas koj yuav ua rau kuv zoo siab ua luaj! Tej nroj ntsuab yuav ua wb lub chaw pw; tej ntoo ciab yuav ua wb tej nqaj tsev, thiab tej ntoo thuv yuav ua wb daim vuas nthab. Kuv yog ib lub nyuag paj ntoos uas nyob hauv Saloos, yog lub paj lilis uas nyob ntawm tej hav. Nws zoo ib yam li tsob paj lilis uas tuaj xyaw tej hmab pos, nws yog kuv tus hluas nkauj uas nyob nrog ib tsoom pojniam. Yog muab tus uas kuv hlub piv rau lwm tus txivneej, nws zoo ib yam li tsob txiv duaj uas tuaj xyaw tej ntoo havzoov ntag. Kuv nyiam nyob hauv qab nws tus duab ntxoov ntxoo, thiab kuv saj nws tej txiv qab zib kawg nkaus li. Nws coj kuv mus rau hauv lub tsev uas luag npaj muaj rooj noj rooj haus, nws tsa nws tus chij roos kuv qhia hais tias nws hlub kuv. Nws muab tej txiv hmab qhuav rau kuv noj kom kuv rov muaj zog, thiab muab txiv duaj rau kuv noj ua rau kuv laj siab kawg li! Vim txojkev hlub ua rau kuv tsaug muag. Nws xyab loo nws txhais npab laug tuaj rau kuv ncoo, thiab cev loo nws txhais npab xis tuaj puag nkaus kuv. Ib tsoom pojniam uas nyob hauv lub nroog Yeluxalees, nej cia li coglus rau kuv; cia li coglus rau tej kauv thiab tej muaslwj hais tias nej yuav tsis tuaj loojkoov wb txojkev hlub. Kuv hnov tus uas kuv hlub lub suab. Nws khiav ceev nrooj hla tej laj roob tuaj, khiav ceev heev hla tej pov roob los cuag kuv. Tus uas kuv hlub zoo ib yam li tus laug kauv thiab zoo ib yam li tus thav sai. Nws sawv npuab ntawm sab phabntsa. Nws xauj ntawm qhovrai tuaj, thiab xauj ntawm lub qhov tsev tuaj. Tus uas kuv hlub tsa ncauj nrog kuv tham. Tus uas kuv hlub, koj cia li tawm tuaj; kuv tus me hluas nkauj, koj cia li tawm tuaj nrog kuv mus. Caij ntuj no twb dhau, thiab caij ntuj nag twb tu lawm; nyob tim tej ntug nroog paj ntoos tawg ntsa iab. Tamsim no yog lub caij hu nkauj lawm ntag; hnov nquab quaj zom zaws hauv tej teb tuaj. Tej txiv ncuavpias tabtom pib siav; tej txiv hmab tabtom tawg paj zom zaws thiab tsw qab ntxiag. Tus uas kuv hlub, cia li tawm tuaj; kuv tus hluas nkauj, cia li tawm tuaj nrog kuv mus. Koj zoo ib yam li tus nquab uas mus nkaum hauv tej kis zeb. Thov cia kuv pom koj lub ntsejmuag uas ntxim hlub, thiab cia kuv hnov koj lub suab uas hais tej lus qab zib. Cia li ntes cov hma thiab tej menyuam hma los rau wb ua ntej uas cov hma ntawd yuav los rhuav wb lub vaj txiv hmab uas tabtom tawg paj ntsa iab. Tus uas kuv hlub yog kuv tug, thiab kuv yog nws tug. Nws yug nws pab yaj hauv lub hav paj lilis, mus txog thaum sawv ntxov uas muaj cov cua laj ntxiag tuaj, thiab qhov tsaus ntuj los ploj mus lawm. Tus nraugxwb uas kuv hlub rov qab los ib yam li tug laug kauv, thiab ib yam li tus thav sai uas nyob saum tej roob hauv Npethes. Txhua hmo uas kuv pw saum kuv lub txaj, kuv ua npau suav toog txog tus uas kuv hlub; kuv nrhiav nws, tiamsis nrhiav tsis tau li. Kuv thiaj sawv mus ncig thoob plaws hauv lub nroog, mus txhua nrho txhua txojkev loj thiab kev me. Kuv nrhiav tus uas kuv hlub nkaus xwb. Kuv nrhiav kawg, tiamsis tsis pom nws li Thaum cov fajxwm uas ncig hauv lub nroog pom kuv, kuv nug lawv hais tias, “Nej puas pom tus uas kuv hlub?” Thaum kuv ncaim lawv mus ib pliag xwb, kuv txawm ntsib nws; kuv khawm dai lias nws thiab tsis pub nws mus qhov twg li, mus txog thaum kuv coj nws mus rau hauv kuv niam lub tsev, thiab mus rau hauv chav tsev uas kuv niam yug kuv. Ib tsoom pojniam uas nyob hauv lub nroog Yeluxalees, nej cia li coglus rau kuv; cia li coglus rau tej kauv thiab tej muaslwj hais tias nej yuav tsis tuaj tabkaum wb txojkev hlub. Yam dabtsi uas tabtom tawm tom tiaj suabpuam tuaj uas zoo ib yam li tej pa taws ncho? Tej tshuaj tsw qab thiab tej tshuaj tsw qab mules uas cov tub lag tub luam muag ntawd yog dabtsi? Xalumoos tabtom tuaj, nws zaum rawv saum nws lub zwmtxwv; muaj rau caum leej tubrog tsomkwm nws tuaj, yog cov tubrog uas muaj zog tshaj hauv cov Yixalayees. Lawv cov ntawd puavleej txawj tua ntaj heev; thiab lawv yog cov tubrog uas txawj ntaus rog kawg li. Lawv txhua tus puavleej tuav rawv ntaj ntawm tes, thiab npaj rawv tos sib tua thaum tsaus ntuj. Vajntxwv Xalumoos muab cov ntoo uas coj pem tebchaws Lenpanoos tuaj ua nws lub zwmtxwv. Lub zwmtxwv ntawd muab nyiaj vuam tej ceg huv tibsi; daim uas thaiv nraum nraubqaum yog muab kub ua, daim ntaub tsamxem uas pua lub zwmtxwv yog cov pojniam hauv lub nroog Yeluxalees ntos. Cov pojniam hauv Xi-oos, cia li tawm tuaj saib Vajntxwv Xalumoos; nws ntoo rawv lub kausmom kub uas nws niam muab rau nws ntoo hnub txis tshoob, hnub uas nws muaj kev zoo siab thiab txaus siab kawg nkaus. Tus uas kuv hlub, ua li cas koj yuav zoo nkauj ua luaj! Koj ob lub qhovmuag nyob sab hauv daim ntaub uas npog koj lub ntsejmuag ci hob ntxim hlub kawg li. Koj cov plaubhau ntxhee yees ib yam li pab tshis uas khiav pem tej pov roob Nkile-as los. Koj cov hniav dawb ib yam li pab yaj uas luag nyuam qhuav muab txiav plaub thiab ntxuav tas. Txhua tus puavleej yug menyuam ntxaib tsis muaj ib tug tshob li. Koj ob daim dincauj zoo ib yam li pluaj ntaub liab; thaum koj hais lus ua cas koj ob daim dincauj ntxim hlub ua luaj. Koj ob sab plhu zoo ib yam li ob sab txiv ntsiavkws nyob sab hauv daim ntaub uas npog koj lub ntsejmuag. Koj lub cajdab zoo ib yam li Daviv lub chaw tsomfaj uas kheej du ntaug lees, muab ib txoj saw dai ib txhiab tus ncais rau koj coj puagncig cajdab. Koj ob lub mis zoo ib yam li ob tug menyuam kauv, ob tug menyuam kauv ntxaib uas tabtom noj zaub hauv lub hav paj lilis. Kuv yuav nyob saum lub pov roob uas muaj tshuaj tsw qab mules, yog lub pov roob uas muaj tshuaj tsw qab mus txog thaum sawv ntxov uas muaj cua ntsawj laj ntxiag tuaj thiab qhov tsaus ntuj ploj mus lawm. Tus uas kuv hlub, ua li cas koj zoo nkauj ua luaj; ua cas koj yuav zoo ua luaj tsis muaj ib qho phem li! Kuv tus nkauj nyab, koj cia li nqis saum Roob Lenpanoos los nrog kuv mus; koj cia li nqis saum roob Lenpanoos los cuag kuv. Koj cia li nqis saum Roob Amanas los, cia li nqis saum Roob Xenis thiab saum Roob Helemoos, qhov chaw uas tej tsov ntxhuav thiab tsov txaij nyob los. Kuv nplooj siab, kuv tus nkauj nyab, koj ob lub qhovmuag uas saib ntsoov kuv thiab tej saw uas koj coj ntawm cajdab twb nyiag kuv nplooj siab lawm. Koj txojkev hlub ua rau kuv txaus siab kawg nkaus li. Kuv nplooj siab thiab kuv tus nkauj nyab, koj txojkev hlub zoo tshaj tej cawv txiv hmab; koj tej tshuaj tsw qab tseem tsw qab tshaj tej txujlom lawm thiab. Tus uas kuv hlub, koj ob daim di ncauj qab zib npaum li zib ntab; koj tus nplaig yog kua mis thiab zib ntab rau kuv. Koj cev ris tsho tsw qab ntxiag li tus ntxhiab pem Lenpanoos. Kuv nplooj siab, kuv tus nkauj nyab, koj yog lub vaj uas nyob nraim nkoos, lub vaj uas xov lajkab thaiv, thiab lub qhovdej uas twb muaj tswv lawm; nyob hauv lub vaj ntawd tej txiv ntoo hlob zoo heev. Tej txiv ntoo ntawd hlob mos nyoos ib yam li tej txiv ntsiavkws thiab txi txiv zoo kawg nkaus li. Nyob qhov ntawd tsw qab ntxiag li henas thiab naj, xafiloos, kalamus thiab kinamoos, lossis tsw qab ntxiag li txhua yam tshuaj tsw qab. Muaj tej nroj mules thiab alaus tuaj hauv lub vaj ntawd nrog txhua yam ntoo tsw qab uas siv ua tej tshuaj tsw qab tshaj plaws. Yog lub vaj uas muaj qhovdej txhawv, yog tus dej uas ntws ntshiab si, yog tus dej uas txhawv thiab ntws pem roob Lenpanoos los. Cov cua sab qaumteb, cia li sawv. Cov cua sab qabteb, cia li ntsawj tuaj rau hauv kuv lub vaj kom tej pa tsw qab ntxiag mus rau txhua qhov. Cia tus uas kuv hlub tuaj rau hauv nws lub vaj, thiab cia nws los noj tej txiv ntoo uas qab tshaj plaws. Kuv nplooj siab, kuv tus nkauj nyab, kuv twb tuaj rau hauv kuv lub vaj lawm. Kuv tuaj de kuv tej txujlom thiab tej nroj mules uas tsw qab; kuv tabtom noj tej nas ntab thiab tej zib ntab; kuv tabtom haus tej cawv txiv hmab thiab tej kua mis. Cov phoojywg, cia li noj thiab haus mus txog thaum uas nej qaug rau txojkev hlub lawm tso! Kuv pw tsaug zog lawm, tiamsis kuv lub siab yeej tsim pes dheev li. Kuv ua npau suav toog hnov tus uas kuv hlub tuaj khob qhovrooj. Tus uas kuv hlub, kuv nplooj siab, kuv tus nquab, cia li qhib qhovrooj rau kuv los tsev. Kuv lub taubhau ntub lwg thiab ntsu tej lwg thaum ib tag hmo tas li lawm. Kuv twb hle khaubncaws lawm; vim li cas kuv tseem rov hnav dua thiab? Kuv twb ntxuav kuv txhais kotaw lawm, vim li cas kuv tseem rov tsuj av dua thiab? Tus uas kuv hlub cev nws txhais tes ntawm qhovrooj los, ua rau kuv lub siab dhia tigtoog thaum nws nyob ze kuv. Kuv twb npaj tos qhib qhovrooj rau nws los tsev lawm. Kuv muab tshuaj tsw qab mules pleev kuv txhais tes, kuv cov ntivtes puavleej pleev tshuaj mules huv tibsi, kuv mam cev tes mus tuav tus ntsia liaj rooj. Kuv qhib qhovrooj rau tus uas kuv hlub los tsev, tiamsis xyov nws twb mus dua qhov twg lawm. Ua li cas kuv xav hnov nws lub suab ua luaj li! Kuv tawm mus nrhiav nws, tiamsis nrhiav tsis tau; kuv hu nws tiamsis tsis hnov nws teb. Cov tub fajxwm uas zov lub nroog ntsib kuv; lawv muab kuv ntaus ua rau kuv tej nqaij ntsuab tas; cov tub fajxwm ntawm tus ntsa yeej muab kuv daim ntaub npog ntsejmuag dua. Ib tsoom pojniam uas nyob hauv lub nroog Yeluxalees, nej cia li coglus rau kuv; yog nej ntsib tus uas kuv hlub, nej cia li qhia rau nws hais tias kuv mob vim txojkev hlub. Tus uas zoo nkauj tshaj ib tsoom pojniam huv tibsi, puas yog tus uas koj hlub txawv dua lwm tus? Dabtsi ua rau tus uas koj hlub zoo tshaj tus uas luag lwm tus hlub, thiaj tsimnyog kom peb coglus rau koj? Tus uas kuv hlub zoo nraug thiab muaj zog heev; nws yog ib tug uas nto npe tshaj plaws nyob rau hauv ib txhiab leej ntawd. Nws lub ntsejmuag yog tej tseem kub thiab du ntaug lees; nws cov plaubhau ntev npws loo dub nciab li tus uablag. Nws ob lub qhovmuag zoo nkauj ib yam li cov nquab nyob raws ntug dej, cov nquab uas da kua mis thiab sawv nplawg ntia raws ntug dej. Nws lub plhu zoo ib yam li lub vaj uas muaj tshuaj tsw qab thiab txujlom puv nkaus tsw qab ntxiag. Nws ob daim dincauj zoo ib yam li tej paj lilis uas ntub tshuaj mules. Nws ob txhais tes zoo nkauj kawg nkaus, nws coj tej nplhaib uas muaj nqis tshaj plaws. Nws lub cev ntaj ntsug dulug ntaug lees ib yam li tus kaus ntxhw, muab tej hlaws xafiles dai thoob plaws rau nws lub cev. Nws ob txhais ncejpuab zoo ib yam li tej qe zeb uas muab cog rau saum thooj tseem kub. Nws lub cev ntaj ntsug zoo ib yam li lub Roob Lenpanoos uas muaj tej ntoo ciab tuaj puagncig. Nws lub ncauj hais lus qab zib ntxim nwj; nws lub cev ntaj ntsug ntxim nyiam thiab txaus siab kawg li. Cov ntxhais hauv lub nroog Yeluxalees, tus uas kuv nyiam thiab hlub zoo li no ntag. Tus hluas nkauj uas zoo nkauj tshaj plaws, tus uas koj hlub mus qhov twg lawm? Qhia rau peb saib tus uas koj hlub mus dua txojkev twg lawm, peb thiaj paub nrog koj nrhiav nws. Tus uas kuv hlub mus dua hauv nws lub vaj qhov chaw uas muaj tej ntoo tsw qab lawm. Nws tso nws cov tsiaj mus noj zaub hauv vaj thiab nws mus de tej paj lilis. Tus uas kuv hlub yog kuv tug, thiab kuv yog nws tug; nws tso nws cov yaj mus noj zaub hauv lub hav paj lilis. Tus uas kuv hlub, koj zoo nkauj ib yam li lub nroog Tilexas, thiab ntxim nyiam li lub nroog Yeluxalees, thiab zoo ib yam li thaum kuv pom tej nroog loj ua rau kuv xyu ib suab. Cia li tig koj ob lub qhovmuag uas saib kuv mus rau lwm qhov; lawv tabtom ntes kuv cia. Koj cov plaubhau ntxhee yees ib yam li pab tshis uas khiav pem tej pov roob Nkile-as los. Koj cov hniav dawb ib yam li pab yaj uas tawm hauv qhov chaw luag ntxuav los; txhua tus puavleej yug menyuam ntxaib, tsis muaj ib tug tshob li. Koj ob sab plhu zoo li ob sab txiv ntsiavkws nyob sab hauv daim ntaub uas npog koj lub ntsejmuag. Cia vajntxwv muaj rau caum tus poj vajntxwv, yim caum tus niamyau, thiab muaj hluas nkauj coob heev suav tsis txheeb. Tiamsis kuv tsuas hlub ib tug xwb, nws ntxim kuv siab npaum li tus nquab. Nws yog nws niam tib tug ntxhais nkaus xwb, nws yog tus uas nws niam hlub tshaj plaws. Txhua tus pojniam puavleej ntsia nws thiab qhuas nws; cov poj vajntxwv thiab vajntxwv cov niamyau puavleej hu nkauj qhuas nws. Tus pojniam no yog leejtwg? saib mas tshiab li thaum sawv ntxov, nws zoo nkauj heev thiab ci ntsa iab ib yam li lub hnub lossis lub hli. Kuv twb nqi mus rau hauv lub hav ntoo txiv qabrog lawm, mus saib tej ntsuag ntoo uas nyob hauv lub hav, mus saib tej hmab uas tabtom ua cos pib hlav nplooj, thiab tej ntoo txiv ntsiavkws uas tawg paj. Kuv ibce tshee hnyo, vim koj ua rau kuv qaug rau txojkev hlub ib yam li nyob hauv lub tsheb nees uas caij mus ntaus rog. Tus hluas nkauj Sulas, cia li seevcev, seevcev los mas! Cia peb saib koj seevcev. Vim li cas nej thiaj xav saib kuv thaum kuv seevcev nyob hauv nruab nrab ntawm ob pab neeg? Koj yog ib tug hluas nkauj uas zoo nkauj tshaj plaws huv tibsi! Koj ob txhais kotaw uas rau khau khiab ua cas yuav zoo nkauj ua luaj li. Koj ob txhais ncejpuab ntug ntoob zoo nkauj ib yam li tej nplhaib uas luag nchuav. Koj lub pujntaws zoo ib yam li lub ntim uas rau cawv txiv hmab tsis nqhuab li. Koj lub plab mog zoo ib yam li tes nplej uas muaj paj lilis nyob puagncig. Koj ob lub mis zoo ib yam li ib nkawm menyuam kauv ntxaib. Koj lub cajdab zoo ib yam li lub chaw tsomfaj uas muab kaus ntxhw ua. Koj ob lub qhovmuag zoo ib yam li tej pasdej hauv lub nroog Hesenpoos uas nyob ze lub roojvag ntawm lub nroog loj. Koj tus cajntswm ntxim nyiam ib yam li lub chaw tsomfaj pem Lenpanoos, uas yog qhov chaw fajxwm lub nroog Damaxes. Koj lub taubhau tsa siab ib yam li lub Roob Kalemees. Koj cov plaubhau ci ntaug lees li cov xov ntaub tsuj; cov plaubhau ntawd zoo nkauj kawg li, ua rau vajntxwv tsis nco qab mus kev. Ua li cas koj zoo nkauj thiab ntxim siab ua luaj! Tus uas ntxim hlub, ua cas koj yuav zoo tau txaus siab ua luaj. Koj lub cev yiag ib yam li tus toovlaj, thiab koj ob lub mis zoo ib yam li ob tauv txiv toovlaj. Kuv yuav nce tsob toovlaj thiab de nws cov txiv. Kuv saib koj ob lub mis zoo ib yam li tauv txiv hmab nyeg, koj ua pa tsw qab ntxiag ib yam li tej pa txiv duaj, thiab koj lub qhovncauj zoo li cov cawv txiv hmab uas qab tshaj plaws. Cia cov cawv txiv hmab nrog ncaj nraim mus rau ntawm tus uas kuv hlub, ntws mus ywg nws ob daim dincauj thiab nws cov hniav. Kuv yog tus uas kuv hlub tug thiab nws yeej xav tau kuv kawg li. Tus uas kuv hlub, cia li tawm tuaj, wb mus rau sab nraum ntug nroog thiab mus pw ib hmos hauv tej zos. Wb yuav sawv ntxov mus saib lub vaj txiv hmab, saib tej hmab puas tau pib hlav nplooj, saib tej cos paj puas tau tawg, thiab saib tej ntoo txiv ntsiavkws puas tau tawg paj. Nyob qhov ntawd kuv mam muab kuv txojkev hlub rau koj. Koj yuav hnov tej zaub ntug hauvpaus tsw qab ntxiag, thiab txhua yam txiv uas wb nyiam noj yeej nyob ze ntawd wb qhovrooj. Tus uas kuv hlub, kuv yeej khaws tej txiv qub thiab tshiab uas zoo tshaj plaws rau koj. Kuv xav hais tias kheev lam koj yog kuv tus nus uas kuv niam pub mis rau noj ntawm nws lub xubntiag. Yog kuv mus ntsib koj nyob ntawm kev, kuv yeej nwj kiag koj thiab yuav tsis muaj leejtwg xav li cas. Kuv yuav coj koj mus rau hauv kuv niam lub tsev, thiab koj yuav qhia txojkev hlub rau kuv. Kuv yuav muab cov cawv uas qab heev rau koj haus, yog kuv cov cawv txiv ntsiavkws uas tsw qab ntxiag. Koj sab teslaug yuav ua kuv lub tog rau ncoo, thiab koj sab tes xis yuav puag kuv pw. Ib tsoom pojniam uas nyob hauv lub nroog Yeluxalees, nej cia li coglus rau kuv hais tias nej yuav tsis tuaj tabkaum wb txojkev hlub. Leejtwg tabtom tuaj tom tiaj suabpuam tuaj, thiab nws txhais tes tuav rawv tus uas nws hlub. Kuv tsa koj sawv hauv qab tsob txiv duaj uas yog qhov chaw yug koj. Tsis txhob muab koj lub siab hlub leejtwg, tiamsis cia hlub kuv xwb; koj tsis txhob tuav leejtwg tes li, tiamsis tuav kuv tes xwb. Txojkev hlub muaj zog ib yam li txojkev tuag, txojkev khib muaj zog ib yam li lub qhov ntxa. Nws cig ib yam li nplaim taws thiab kub ib yam hluavtaws. Muab dej tua los tsis tau; dej huam tuaj nyab los yeej tsis tuag. Tiamsis yog leejtwg muab nyiaj txiag mus yuav txojkev hlub, nws yuav raug thuam. Peb muaj ib tug muam yau, nws ob lub mis tseem tsis tau o. Peb yuav ua li cas rau nws thaum uas muaj ib tug tub hluas tuaj yuav nws ua pojniam? Yog hais tias nws yog ib sab phabntsa, peb yuav muab nyiaj ua ib lub chaw tsomfaj zov nws. Yog hais tias nws yog ib lub roojvag, peb yuav muab tej txiag ntoo ciab los thaiv nws. Kuv yog sab phabntsa, kuv ob lub mis yog ob lub chaw tsomfaj. Tus uas kuv hlub yeej paub hais tias yog kuv mus nrog nws nyob mas kuv yuav tau txais kev kaj siab lug xwb. Xalumoos muaj ib lub vaj txiv hmab nyob ntawm Npa-as Hamoos. Nws muab lub vaj ntawd rau cov neeg ua teb cog txiv hmab; lawv ib leeg them ib txhiab lub nyiaj rau nws. Xalumoos, koj cia li txais ib txhiab lub nyiaj uas yog koj tug zoo siab hlo, cov ua teb tau txais ib leeg ob puas lub nyiaj ua nqi zog; lub vaj txiv hmab ntawd yog kuv tug. Tus uas kuv hlub, thov cia kuv hnov koj lub suab hais lus hauv vaj tuaj; kuv cov phoojywg los tos ntsoov mloog koj hais lus xwb. Tus uas kuv hlub, cia li los cuag kuv ib yam li tus kauv lossis tus thav sai uas nyob saum roob qhov chaw uas muaj tej nroj tsw qab. Zaj yogtoog uas Vajtswv qhia rau Amauxes tus tub Yaxayas kom nws pom txog cov Yudas thiab lub nroog Yeluxalees thaum lub sijhawm uas Uxiyas, Yauthas, Ahas thiab Hexekiyas lawv ua vajntxwv kav tebchaws Yudas. Tus TSWV hais tias, “Lub ntuj thiab lub ntiajteb, cia li mloog tej lus uas kuv hais! Tej menyuam uas kuv yug thiab tu hlob tau ntxeev siab rau kuv. Nyuj paub hais tias leejtwg yog nyuj tus tswv, thiab neesluav paub hais tias lub dab zaub uas tus tswv pub rau neesluav noj nyob qhov twg. Tiamsis cov Yixalayees tsis paub lawv tus tswv, kuv haivneeg tsis totaub hlo li.” Haivneeg uas ua txhaum, nej yog cov uas muaj kev txhaum loj, cov noob uas ua phem ua qias, cov menyuam uas ua kev puastsuaj! Nej tau tso tus TSWV tseg lawm; nej tuam mom cov Yixalayees tus Vajtswv uas dawbhuv thiab tig nraubqaum rau nws. Vim li cas nej yuav tsim kev nyuaj siab ntxiv thiab ntxeev siab tsis tseg li? Nej puas xav kom kuv rau txim rau nej ntxiv? Nej tej taubhau twb ua kiav txhab thoob plaws, thiab nej tej siab tej ntsws twb mob ncus nco lawm. Txij ntua hauv kotaw mus nto plaws saum taubhau thoob plaws nej lub cev twb tsis muaj ib qho zoo li; tsuas pom o doog thiab ua qhov txhab xwb. Nej twb tsis qhwv nej tej qhov txhab, tsis tu kom zoo thiab tsis muab tshuaj rau li. Nej lub tebchaws nyob qhuav qhawv tseg, nej tej nroog kub hnyiab tas tshuav txha av lawm xwb. Lwm haivneeg tuaj txeeb nej lub tebchaws kav tabmeeg nej thiab muab txhua yam uas nej muaj ua puastsuaj tas. Tus TSWV twb muab Xi-oos tus ntxhais tso povtseg zoo li lub tsev pheebsuab uas nyob hauv lub vaj txiv hmab lossis zoo li lub tsev uas nyob hauv daim teb dib lossis zoo li lub nroog uas luag vij lawm. Yog hais tias tus TSWV uas muaj hwjchim loj tsis pab kom peb qee leej dim, peb yuav zoo ib yam li lub nroog Xaudoos thiab lub nroog Kaumaulas ntag. Cov neeg uas kav lub nroog Xaudoos, nej cia li mloog tus TSWV tej lus! Cov neeg uas nyob hauv lub nroog Kaumaulas, nej cia li tig pobntseg mloog peb tus Vajtswv tej lus qhia. Tus TSWV nug hais tias, “Tej khoom uas nej coj tuaj fij ntau heev rau kuv ntawd puas tseemceeb rau kuv? Tej yaj thiab tej roj tsiaj uas nej muab tuaj hlawv fij rau kuv, dhuav kuv heev lawm; kuv yeej tsis txaus siab yuav tej tshav yaj, ntshav nyuj thiab ntshav tshis ntawd li. Leejtwg kom nej nqa tej no tuaj rau kuv thaum nej tuaj pehawm kuv? Leejtwg kom nej ua tej no thiab ncig mus ncig los ntawm kuv lub Tuamtsev? Tseg tsis txhob nqa nej tej khoom fij uas tsis muaj nqis tuaj lawm! Kuv dhuav nej tej pa hmoov tshuaj tsw qab uas nej hlawv ntawd kawg li. Kuv tiv tsis taus nej tej rooj noj rooj haus uas nej ua thaum Hli Xiab, tej Hnub Xanpataus, thiab thaum nej tuaj txoos ua ke ua kevcai; nej ua txhaum vim nej ua tsis ncaj. Kuv ntxub qhov uas nej ua rooj noj rooj haus thaum Hli Xiab, thiab tej Hnub Xanpataus. Tej ntawd yog lub nra uas kuv dhuav ris heev lawm. “Thaum nej tsa tes thov kuv, kuv yuav tsis ntsia nej, txawm yog nej yuav thov ntev npaum li cas los kuv yuav tsis mloog, rau qhov nej tej tes tua neeg. Ntxuav kom nej huv; tso plhuav tej kev phem kev qias uas kuv pom nej ua no tseg. Tso plhuav kev phem kev qias tseg thiab xyaum ua neeg zoo nrhiav kev ncaj ncees, pab tej neeg uas raug tsimtxom, ua ncaj rau cov menyuam ntsuag thiab pab cov pojntsuam.” Tus TSWV hais tias, “Peb cia li los sib hais txog zaj no. Txawm yog nej tej kev txhaum yuav liab cuag ntshav los kuv yuav ua kom dawb paug li daus, txawm yog nej tej kev txhaum dub doog los kuv yuav ua kom dawb paug li tej plaub yaj. Yog nej mloog kuv lus, nej yuav tau noj txhua yam zoo uas cog hauv lub tebchaws no; tiamsis yog nej tsis mloog kuv lus, nej ua neeg siab tawv thiab ntxeev siab, nej yuav raug kev ploj kev tuag. Kuv yog tus TSWV uas hais tej lus no ntag.” Lub nroog uas muaj kev ncaj ncees, nimno dhau mus ua niamntiav; thaum ub muaj neeg ncaj ncees nyob puv nkaus hauv, tiamsis nimno tshuav neeg tua neeg nyob lawm xwb. Lub nroog Yeluxalees, yav nram ntej koj zoo ib yam li cov tseem nyiaj, tiamsis nimno koj twb tsis muaj nqis li lawm. Yav nram ntej koj zoo ib yam li tej cawv txiv hmab uas qab heev, tiamsis nimno koj zoo ib yam li cov cawv uas tov dej lawm xwb. Koj cov nomtswv tau ntxeev siab thiab thooj siab koom ntsws nrog cov neeg tubsab; lawv txaus siab rau tej nyiaj uas luag coj tuaj xiab thiab tej khoom pub. Lawv tsis pab txheem cov menyuam ntsuag hauv tsev tu plaub thiab tsis mloog cov pojntsuam tej lus peev. Yog li ntawd, nej cia li mloog tus TSWV uas muaj hwjchim loj kawg nkaus uas yog cov Yixalayees tus Vajtswv uas muaj zog loj zog chav tej lus uas hais tias, “Kuv yuav ua pauj rau nej cov uas ua yeebncuab rau kuv kom nej thiaj yuav tsis ua rau kuv ntxoov siab ib zaug ntxiv lawm. Kuv yuav tawmtsam koj, kuv yuav muab koj tej teev dub ntxuav kom dawb thiab yuav so koj qhov ceb kom huv. Kuv yuav pub kom muaj cov thawjcoj thiab cov tuavxam ib yam li thaum ub koj muaj lawm. Ces luag thiaj yuav hu koj ua lub nroog uas zoo thiab ncaj ncees.” Vim Vajtswv yog tus ncaj ncees, nws thiaj cawm lub nroog Yeluxalees thiab txhua tus uas tso kev txhaum tseg lawm kom dim. Tiamsis cov neeg uas ntxeev siab rau Vajtswv thiab cov neeg ua txhaum, nws yuav muab tsuj kom puastsuaj; txhua tus uas tso nws tseg lawm, nws yuav muab tua huv tibsi. Koj yuav raug txajmuag vim koj txaus siab rau tej ntoo qhib ntawd; koj yuav poob ntsejmuag vim tej vaj tseemceeb uas koj tau xaiv. Koj yuav qhuav ntsws ntsee ib yam li tus ntoo qhib uas twb tuag lawm, thiab ib yam li lub vaj uas tsis muaj neeg ywg dej. Vim lawv tej kev ua phem ua qias, cov neeg muaj zog yuav raug kev puastsuaj ib yam li hluavtaws kub tej quavnyab thiab tsis muaj leejtwg tua tau li. Tej lus uas Vajtswv qhia rau Amauxes tus tub Yaxayas kom hais rau cov Yudas thiab lub nroog Yeluxalees: Yav tom ntej no lub roob uas lub Tuamtsev nyob rau saud yuav siab dua tej hau roob txhua lub huv tibsi; ntau haivneeg yuav sau nthwv tuaj rau saum lub roob ntawd. Ntau haivneeg yuav tuaj thiab hais tias, “Peb cia li mus saum tus TSWV lub roob, mus kom txog saum cov Yixalayees tus Vajtswv lub Tuamtsev. Nws yuav qhia peb tej uas nws xav kom peb ua; peb yuav taug txojkev uas nws xaiv rau peb taug. Vajtswv tej lus qhuab qhia tawm hauv lub nroog Yeluxalees tuaj; thiab nws hais lus hauv Xi-oos tuaj rau nws haivneeg.” Nws yuav ua tus txiav txim rau txhua haivneeg, lawv yuav muab lawv tej ntaj thiab riam los ntaus ua khais thiab muab tej hmuv ntaus ua liag. Ntau haivneeg yuav tsis ua tsov ua rog thiab yuav tsis muaj leejtwg npaj cuabyeej sib nkaug sib tua ntxiv li lawm. Yakhauj cov xeebntxwv, nimno peb cia li taug txojkev kaj nrig uas tus TSWV twb pub rau peb lawm. Vajtswv, koj tau muab koj haivneeg uas yog Yakhauj cov xeebntxwv tso povtseg lawm! Rau qhov lawv lub tebchaws puv nkaus cov neeg ua khawvkoob uas tuaj sab hnubtuaj tuaj thiab tuaj hauv tebchaws Filitees tuaj. Lawv xyaum ua raws li cov neeg txawv tebchaws ua. Lawv lub tebchaws muaj nyiaj muaj kub nplua mias, thiab lawv tej nyiaj txiag yeej tsis paub tas ib zaug li. Lawv lub tebchaws los muaj nees nyob puv nkaus hauv, thiab lawv ua tsheb nees tsis paub tso tseg li. Mlom nyob puv nkaus hauv lawv lub tebchaws, thiab lawv pe tej uas lawv txhais tes puab. Lawv txhua tus yuav raug txo hwjchim thiab poob ntsejmuag. Tus TSWV, thov tsis txhob zam txim rau lawv hlo li! Lawv yuav khiav mus nkaum hauv tej qhov tsua saum tej roob tsuas lossis khawb qhov nkaum kom dim tus TSWV txojkev chim, thiab khiav nkaum nws lub hwjchim thiab lub tshwjchim uas ci ntsa iab! Hnub ntawd cov neeg khavtheeb yuav raug txo hwjchim, thiab thaum ntawd cov neeg siab phem yuav raug kev puastsuaj. Ces Vajtswv tib leeg xwb thiaj yog tus zoo tshaj plaws. Hnub ntawd tus TSWV uas muaj hwjchim loj kawg nkaus yuav muab txhua tus uas muaj hwjchim, txhua tus uas khavtheeb, thiab cov neeg uas xav ua tus loj txo hwjchim kom tas. Nws yuav ua kom cov ntoo ciab pem roob Lenpanoos, thiab tagnrho cov ntoo qhib hauv tebchaws Npasas puastsuaj tas huv tibsi. Nws yuav rhuav tshem tej roob siab thiab tej hauv roob kom puastsuaj, rhuav txhua lub chaw tsomfaj, thiab tej ntsa yeej uas txhim zeb khov kho; rhuav cov Xapees tej nkoj thiab tej nkoj uas zoo nkauj kom tawg tas. Cov neeg khavtheeb yuav raug txo kom qis thiab muab cov neeg nruj tsiv ua kom puastsuaj. Hnub ntawd tus TSWV tib leeg yog tus yuav tau ntsejmuag. Thiab tej mlom yuav ploj mus tas huv tibsi. Tej neeg sawvdaws yuav khiav mus nkaum tas rau hauv tej qhov tsua saum tej roob tsuas lossis khawb qhov nkaum kom dim tus TSWV txojkev chim thiab khiav nkaum nws lub hwjchim thiab lub tshwjchim uas ci ntsa iab, thaum nws nqis los co lub ntiajteb no. Hnub ntawd lawv yuav muab tej nyiaj, tej kub, thiab tej mlom uas lawv puab coj mus povtseg kom tas huv tibsi, thiab tso tseg rau nas tsuag thiab puav los ua zes rau. Thaum Vajtswv nqis los co lub ntiajteb, tej neeg sawvdaws yuav khiav mus nkaum hauv tej qhov av thiab qhov tsua saum tej roob tsuas kom thiaj khiav dim nws txojkev chim, nws lub hwjchim thiab lub tshwjchim uas ci ntsa iab. Tsis txhob tso siab rau cov neeg uas txawj tuag. Lawv muaj nqis npaum li cas? Tus TSWV uas yog Vajtswv tus muaj hwjchim loj kawg nkaus, muab txhua yam thiab txhua tus neeg uas nyob hauv lub nroog Yeluxalees thiab hauv lub tebchaws Yudas uas cov neeg cia siab ntsoov rau tshem huv tibsi mus. Nws tseem muab lawv tej zaub mov thiab lawv tej dej, lawv cov neeg muaj zog thiab cov tubrog, cov txiav txim thiab cov povthawj, cov neeg ua khawvkoob thiab cov txwjlaug, tus thawj uas saib tsib caug leej tubrog thiab cov thawjcoj uas nrhiav kev vammeej, cov tuavxam tebchaws, thiab txhua tus neeg uas txawj khawvkoob tshem huv tibsi mus. Tus TSWV yuav cia lawv cov tub hluas uas tsis tau paub tab ua nom ua tswv kav cov pejxeem. Cov pejxeem ib leeg yuav tsimtxom ib leeg. Cov tub hluas yuav tsis hwm tej kev txwjlaug, thiab cov neeg tsis muaj meejmom yuav tsis hwm lawv cov nomtswv. Thaum txog lub sijhawm ntawd, ib tug hauv ib xeem yuav hais rau lawv ib tug kwvtij hais tias, “Koj yog tus uas tseem tshuav ris tsho hnav; koj cia li los ua tus coj peb lub sijhawm uas raug kev txomnyem no.” Tiamsis nws teb hais tias, “Kuv tsis ua! Kuv tsis kam pab nej. Kuv los tsis muaj ris tsho hnav thiab tsis muaj mov noj ib yam nkaus. Tsis txhob tsa kuv ua tus coj nej.” Yog lawm, lub nroog Yeluxalees tabtom raug kev puastsuaj! Cov Yudas ntog tas rau hauv av! Tej lus lawv hais thiab tej haujlwm uas lawv ua los puavleej tawmtsam Vajtswv; lawv tabmeeg tuam mom Vajtswv li ntag. Lawv tej kev ua tsis ncaj yuav rov ua povthawj tawmtsam lawv. Lawv tabmeeg ua kev txhaum ib yam li cov neeg Xaudoos ua. Kev puastsuaj los raug lawv, vim lawv lob kev phem los rau lawv. Hais rau cov neeg ncaj ncees hais tias lawv yuav muaj kev zoo siab, rau qhov lawv yuav tau txais nqi zog zoo vim tej haujlwm uas lawv ua. Tiamsis cov neeg ua phem yuav raug kev puastsuaj; tej uas lawv tau ua rau lwm tus lawm yuav rov los raug lawv. Cov neeg qiv nyiaj tsimtxom kuv haivneeg, thiab cov neeg uas txais nyiaj, qee tus tswv nyiaj tug. Kuv haivneeg, nej cov thawjcoj, coj nej mus yuam kev lawm. Yog li ntawd, nej thiaj tsis paub mus rau txojkev twg li. Tus TSWV yeej npaj rawv hais nws rooj plaub; nws npaj txhij yuav txiav txim rau nws haivneeg. Tus TSWV coj nws haivneeg cov thawjcoj thiab cov kev txwjlaug tuaj txiav txim. Nws hais li no: “Nej txeeb luag tej vaj txiv hmab, thiab nej mus txeeb cov neeg pluag tej khoom los cia rau hauv nej tej tsev puv nkaus li. Nej tsis muaj cai yuam kuv haivneeg thiab tsimtxom cov neeg pluag. Kuv yog tus TSWV uas muaj hwjchim loj kawg nkaus hais tej lus no.” Tus TSWV hais tias, “Nej saib cov ntxhais uas nyob hauv lub nroog Yeluxalees, khavtheeb heev! Lawv mus kev tsa ntswg rau saum ntuj. Lawv ob lub qhovmuag saib ntsoov tej kev phem uas lawv xav ua. Lawv tshais ruam mus kev mos nyoos ua rau tej tswb uas lawv coj ntawm lawv kotaw nrov zom zaws. Tiamsis kuv yuav rau txim rau lawv, kuv yuav chais lawv tej plaubhau kom dulug thiab cia lawv nyob taubhau do dus, kom lawv txajmuag.” Hnub ntawd tus TSWV yuav muab txhua yam uas cov pojniam hauv Yeluxalees pheej khavtheeb: tej saw uas lawv coj ntawm dabtaws, saum taubhau, ntawm cajdab, tej kauj toog uas lawv coj ntawm dabteg, lawv tej phuam pav taubhau, tej kausmom, tej txws tshuaj tsw qab uas lawv coj rawv ntawm tej cajnpab thiab tej siv uas sia ntawm duav; lawv tej nplhaib uas coj ntawm ntivtes, tej kauj ntswg uas coj ntawm qhovntswg; lawv tej tiab ntev uas zoo heev, tej tsho khuam thiab hnab nyiaj; lawv tej tsho ntev, tej phuam ntaubmag, tej phuam pav cajdab thiab tej phuam ntev uas lawv ntoo saum taubhau sau huv tibsi coj mus povtseg. Lawv xav pleev tshuaj kom tsw qab, tiamsis lawv yuav tsw ntxhiab; lawv xav sia tej siv uas zoo, tiamsis lawv yuav rhais tiab; lawv xav ntsis plaubhau kom zoo nkauj, tiamsis lawv yuav do hau; lawv xav hnav tej tsoos tso uas zoo, tiamsis lawv yuav hnav khaub hlab; lawv tej kev zoo nkauj yuav hloov ua kev txajmuag! Cov txivneej hauv nroog yuav tuag rau hniav ntaj hniav riam, thiab tej tubrog yuav tuag tas rau hauv tshavrog. Lub nroog Yeluxalees tej roojvag yuav quaj qw tu siab heev, thiab lub nroog ntawd zoo ib yam li tus pojniam liabqab uas zaum hauv av. Thaum txog lub sijhawm ntawd, xya tus pojniam yuav koom ib tug txivneej thiab hais tias, “Peb nrhiav rau peb noj peb hnav, tiamsis thov cia peb hu koj hais tias yog peb tus txiv. Yog li ntawd, peb thiaj yuav tsis muaj kev nyuaj siab thiab txajmuag hais tias peb tsis muaj txiv.” Thaum txog lub sijhawm ntawd, tus TSWV yuav ua kom txhua yam nroj tsuag thiab ntoo hauv lub tebchaws ntawd rov tuaj hlob mos nyoos thiab zoo nkauj heev. Cov pejxeem Yixalayees uas seem yuav zoo siab thiab tau koob meej rau tej qoobloo zoo uas lawv ua tau hauv tej teb. Txhua tus neeg uas seem thiab muaj npe teev tseg nyob hauv lub nroog Yeluxalees yog cov uas Vajtswv xaiv tseg thiab luag hu hais tias lawv yog cov dawbhuv. Thaum ntawd tus Tswv yuav ntxuav Xi-oos cov ntxhais tej kev txhaum thiab ntxuav tej ntshav uas nrog rau hauv lub plawv nroog Yeluxalees ntawm nws lub hwjchim uas yog kev txiav txim thiab lub hwjchim uas yog nplaim hluavtaws. Ces Vajtswv tso huab pos tsaus nti rau saum lub Roob Xi-oos thiab tej chaw uas lawv sib sau ua ke, nruab hnub muaj huab pos tsaus nti roos tshav, hmo ntuj muaj nplaim hluavtaws cig pom kev lam lug. Vajtswv lub hwjchim ci ntsa iab los roos lub nroog ntawd. Nruab hnub Vajtswv lub hwjchim yuav ua duab ntxoov ntxoo los roos lub nroog kom tshav tsis txhob kub, ua lub chaw rau lawv tau nyob thiab ua lub tsev rau lawv tau nkaum nagxob nagcua. Kuv yuav hu nkauj rau tus uas kuv hlub mloog, zaj nkauj no hais txog nws lub vaj txiv hmab: Tus uas kuv hlub muaj ib lub vaj txiv hmab nyob saum lub ncov roob uas av zoo heev. Nws khawb thiab khaws tej pobzeb tawm, nws cog tej yub txiv hmab zoo heev rau. Nws ua ib lub chaw tsomfaj zov tej txiv hmab ntawd. Nws khawb ib lub qhov ua chaw tsuam txiv hmab. Nws tos rawv kom tej txiv hmab siav, tiamsis tej txiv hmab qaub kawg li. Nimno nej cov uas nyob hauv lub nroog Yeluxalees thiab cov Yudas, “Nej cia li txiav txim rau kuv thiab kuv lub vaj txiv hmab. Puas tseem tshuav tej yam dabtsi uas tsimnyog kuv ua rau kuv lub vaj txiv hmab ntxiv thiab? Vim li cas thaum kuv mus de cov txiv zoo uas qab zib, ho de tau cov txiv phem uas qaub xwb? “Nimno kuv qhia rau nej paub qhov uas kuv yuav ua rau kuv lub vaj txiv hmab. Kuv yuav muab tej xovhlau uas xov ncig lub vaj rhuav povtseg, thiab lub vaj ntawd yuav raug kev puastsuaj; kuv yuav muab tej ntsa lajkab rhuav huv tibsi povtseg kom tej txiv hmab ntawd raug luag tsuj rau hauv av. Kuv yuav ua kom lub vaj txiv hmab no tuaj nroj tsuag kom tsis muaj neeg tav ntsis lossis npoog av rau tej hauvpaus; kuv yuav cia pos tshauv thiab pos rau miv tuaj laum nws. Kuv yuav txwv huab cua kom tsis muaj nag los ywg lub vaj no.” Tus TSWV uas muaj hwjchim loj kawg nkaus lub vaj txiv hmab yog cov Yixalayees. Cov Yudas yog cov txiv hmab uas nws cog rau. Nws cia siab ntsoov hais tias lawv yuav ua neeg zoo, tiamsis lawv ho ua neeg tua neeg. Nws cia siab ntsoov hais tias lawv yuav ua neeg ncaj ncees, tiamsis cov neeg uas raug lawv tsimtxom thov kom muaj kev ncaj ncees. Nej yuav raug kev puastsuaj lauj! Nej muas ntau lub tsev thiab ntau thaj teb los ntxiv rau tej uas nej twb muaj lawm. Tsis ntev yuav tsis muaj chaw rau lwm tus nrog nej nyob, tsuas tshuav nej nyob hauv lub tebchaws ntawd lawm xwb. Kuv hnov tus TSWV uas muaj hwjchim loj kawg nkaus hais tias, “Tagnrho tej tsev loj thiab zoo nkauj no yuav tsis muaj neeg nyob. Cog kaum pav txiv hmab, thaum siav tsuas tsuam tau ib thoob cawv xwb, thiab tseb kaum kawm noob nplej, thaum siav tsuas sau tau ib kawg xwb.” Nej yuav puastsuaj lauj! Nej sawv thaum tsis tau kaj ntug los pib haus cawv thiab nyob tsheej tag hmo haus cawv kom nej qaug. Thaum nej muaj noj muaj haus, nej ntaus nkauj nogncas, ntaus nruas, tshuab raj ntsaws thiab haus cawv. Tiamsis nej tsis totaub hais tias tus TSWV ua dabtsi. Yog li ntawd, nej thiaj yuav raug coj mus ib yam li cov neeg raug txim. Nej cov thawjcoj yuav tuag tshaib thiab nej cov pejxeem yuav tuag nqhis. Tubtuag teb tshaib nqhis heev, nws rua ncauj ras tos lawv. Tubtuag teb yuav nqos tej nomtswv hauv lub nroog Yeluxalees nrog tej pejxeem thiab lawv tej kev lomzem mus kom tas. Txhua tus yuav poob ntsejmuag, thiab tagnrho tej neeg khavtheeb yuav raug txo hwjchim. Tiamsis tus TSWV uas muaj hwjchim loj kawg nkaus yuav qhia nws lub hwjchim ntawm nws txojkev ncaj ncees, thiab Vajtswv tus dawbhuv qhia nws txojkev dawbhuv thaum nws txiav txim rau nws haivneeg. Yaj yuav noj tej nyom tuaj hauv tej nroog uas raug puastsuaj tas, thiab tej menyuam tshis yuav ntsib lub tshav zaub uas mos heev. Nej yuav puastsuaj lauj! Nej cov uas tsis kam tso kev txhaum tseg. Nej hais tias, “Cia tus TSWV ua raws li nws hais tias nws yuav ua kom peb thiaj pom yam uas nws ua ntawd. Cia cov Yixalayees tus Vajtswv uas Dawbhuv ua raws li tej uas nws tau npaj tseg lawm, peb thiaj yuav paub.” Nej yuav puastsuaj lauj! Nej muab tej lus phem ntxeev hais ua lus zoo thiab muab tej lus zoo ntxeev hais ua lus phem. Nej muab lus qab zib ntxeev ua lus iab lus daw thiab muab lus iab lus daw ntxeev hais ua lus qab zib. Nej cov uas pom hais tias nej ntse thiab nej cov uas xav hauv nej lub siab hais tias nej ntse yuav raug kev puastsuaj lauj! Cov neeg uas haus cawv ua tau thiab cov neeg siab tawv uas muab cawv sib tov haus yuav raug puastsuaj lauj! Tiamsis nej txiav txim tsis ncaj, nej yuav tej nyiaj xiab thiab tso tus txivneej uas muaj txim tawm nyob ywj siab thiab rau txim rau tus neeg ncaj ncees. Yog li nimno, tej quavnyab npleg thiab puamkhab kub hnyiab li cas, nej tej cag yuav lwj, yuav qhuav thiab cua yuav muab ntsawj ya tas ib yam li ntawd, vim nej tsis lees paub tus TSWV uas muaj hwjchim loj kawg nkaus txoj kevcai uas cov Yixalayees tus Vajtswv uas dawbhuv tau qhia tseg rau peb lawm. Tus TSWV chim heev rau nws haivneeg thiab nws tsa nws txhais tes rau txim rau lawv. Tej hauv roob yuav ua zog koog thiab yuav muab cov neeg tuag tso pawglug rau hauv tej plawv kev ib yam li tej khoom uas muab povtseg. Txawm yog twb muaj npaum li no los tus TSWV tseem chim tsis paub kawg, nws tseem pheej tsa nws txhais tes txiav txim tas zog li. Tus TSWV ua ib yam cim hu lub tebchaws uas nyob deb heev. Nws xuav hu kom lawv tuaj puag tim qab ntug tuaj cuag nws. Thiab lawv tuaj lawm tiag lauj; lawv tso sas ceev kawg li. Tsis muaj leejtwg yuav nkees, tsis muaj leejtwg yuav ntog li. Lawv yuav tsis tsaug zog ib zaug li, lawv tej siv sia los tsis xoob; tej hlua khau los tsis tu. Lawv tej xub hneev los ntse kawg nkaus, thiab lawv tej hneevnti los nta txhua rab tshuav qib lawm xwb. Lawv cov nees tej rau tawv ib yam li pobzeb, thiab lawv tej tsheb nees ntog zoo ib yam li khaub zeeg cua. Cov tubrog nyooj laws ib yam li tus tsov ntxhuav uas tom tau tsiaj thiab kwv mus rau qhov chaw uas tsis muaj tus los txeeb tau. Thaum txog hnub ntawd, lawv yuav nyooj nrov heev thoob plaws lub tebchaws Yixalayees ib yam li dej hiavtxwv ntas. Tig saib lub tebchaws saib! Kev tsaus ntuj thiab kev nyuaj siab los lawm lauj! Kev tsaus ntuj muab kev kaj laum tas lawm. Xyoo uas Vajntxwv Uxiyas tuag, kuv pom tus TSWV zaum saum nws lub zwmtxwv uas nyob siab heev, thiab nws lub tsho nthuav puv nkaus hauv lub Tuamtsev. Muaj ib co xelafees sawv puagncig tus TSWV; ib tug xelafees twg muaj rau phab tis: ob phab tis npog ntsejmuag, ob phab tis npog lub cev thiab ob phab tis ya. Lawv ib tug hais rau ib tug hais tias, “Dawbhuv, dawbhuv, dawbhuv! Vajtswv tus uas muaj hwjchim loj kawg nkaus, nws yog tus dawbhuv! Nws lub tshwjchim ci ntsa iab thoob plaws hauv qab ntuj.” Lawv tej suab hais lus ntawd ua rau ob tug ncej qhovrooj ua zog koog thiab muaj pa ncho auv niab puv nkaus hauv lub Tuamtsev. Kuv tau hais tias, “Kuv tsis muaj chaw cia siab rau leejtwg hlo li! Zaum no kuv tuag lauj, rau qhov tej lus uas kuv hais txhua lo puavleej txhaum, thiab kuv yog ib tug neeg uas nrog cov neeg hais lus phem lus qias nyob ua ke xwb. Txawm yog li ntawd los kuv lub qhovmuag twb pom kiag tus Vajntxwv uas yog tus TSWV tus uas muaj hwjchim loj kawg nkaus lawm.” Ces txawm muaj ib tug xelafees ya los cuag kuv; nws muab ciaj tais tau ib lub hluavncaig cig liab ploog tom lub thaj nqa los rau ntawm kuv. Nws tuav nkaus kuv ob daim dincauj thiab muab lub hluavncaig ntawd tso plhuav rau ntawm kuv ob daim dincauj thiab hais tias, “Nimno koj tej kev txhaum twb yaj tas, thiab kuv twb zam koj lub txim lawm, rau qhov lub hluavncaig no twb chwv koj ob daim dincauj lawm.” Ces kuv hnov tus TSWV nug hais tias, “Kuv yuav txib leejtwg mus? Leejtwg yuav ua tus sawv cev ntawm peb mus?” Ces kuv teb hais tias, “Kuv nyob ntawm no! Thov txib kuv mus!” Thiab nws hais rau kuv hais tias, “Koj cia li mus thiab hais rau cov neeg sawvdaws li no: ‘Nej mloog tas mloog thiab, tiamsis nej tsis totaub; nej saib tas saib thiab, tiamsis nej tsis pom muaj dabtsi tshwmsim li.’ ” Ces nws hais rau kuv hais tias, “Cia li ua kom haivneeg no lub siab ruam, pobntseg lag thiab qhovmuag dig kom lawv pobntseg los tsis hnov lus, qhovmuag los tsis pom kev thiab hais lus los tsis totaub. Yog tsis ua li ntawd, nyob tsam lawv ho tig los cuag kuv ces kuv kho lawv zoo lawm.” Kuv thiaj nug hais tias, “Tus TSWV, yuav zoo li no mus txog thaum twg?” Tus TSWV teb hais tias, “Mus txog thaum tej nroog raug puastsuaj tas tsis muaj neeg nyob lawm, mus txog thaum tej tsev khoob lug tsis muaj neeg nyob thiab mus txog thaum lub tebchaws nyob qhuav qhawv li tej roob mojsab qhua. Kuv yuav ntiab tej neeg khiav mus ploj qab ntais thiab kom lub tebchaws ciaj nroj tsuag tas nyob ntsiag to. Txawm yog muaj neeg seem nyob hauv txog ib feem nkaum xwb los lawv tseem yuav raug puastsuaj tas. Thiab lawv yuav zoo ib yam li tej ntoo qhib uas luag muab ntov tas tshuav lub hauvpaus lawm xwb.” (Lub hauvpaus ntoo ntawd piv txog Vajtswv haivneeg uas yuav rov hlav tuaj dua tshiab.) Thaum Yauthas tus tub Ahas uas yog Uxiyas tus xeebntxwv ua vajntxwv kav lub tebchaws Yudas, lub tebchaws tau sawv rog. Lexees uas ua vajntxwv kav lub tebchaws Xilias, thiab Lemaliyas tus tub Npekas uas ua vajntxwv kav lub tebchaws Yixalayees tau tuaj tua lub nroog Yeluxalees, tiamsis lawv txeeb tsis tau. Thaum muaj neeg mus qhia rau Daviv cov xeebntxwv paub hais tias, cov Xilias tau tuaj tsuam yeej rau hauv cheebtsam Efalayees lawm, Ahas thiab nws cov pejxeem lub siab tshee laim dais ib yam li cua ntsawj tej nplooj ntoo hauv havzoov. Tus TSWV hais rau Yaxayas hais tias, “Koj coj koj tus tub Se-ayasus, neb mus cuag vajntxwv Ahas. Neb yuav ntsib nws ntawm ntu kev uas cov neeg raus ntaub nyob ntawm tus kwjdeg uas los pem lub pasdej theem saud los xaus nkaus. Hais kom nws ceevfaj, tsis txhob ua lub siab ywjfab ywjfwj, tsis txhob ntshai lossis nyuaj siab hlo li. Rau qhov Vajntxwv Lexees thiab nws cov pejxeem Xilias thiab Vajntxwv Pekas uas yog Lemaliyas tus tub txojkev npautaws tsuas zoo li ob yav nyuag tw taws uas ncho ncho pa lawm xwb. Vim cov Xilias tau tuaj nrog cov Yixalayees thiab lawv tus vajntxwv ntxeev siab tawmtsam koj, lawv hais tias, cia peb mus tua lub tebchaws Yudas thiab ua kom lub tebchaws ntawd ntshai, thiab peb cia li txeeb lub tebchaws ntawd los ua peb tug, thiab muab Tanpees tus tub tsa ua vajntxwv kav lub tebchaws ntawd. “Tiamsis tus TSWV uas yog Vajtswv hais tias tej xwm no yuav tsis tshwmsim ib zaug li. Vim li cas? Rau qhov cov Xilias tsis muaj zog npaum li lub tuamceeb nroog Damaxes, thiab lub nroog Damaxes tsis muaj zog npaum li Vajntxwv Lexees. Tshuav rau caum tsib xyoo lawm xwb, haivneeg Yixalayees yuav tawg ua sab ua sua tas tsis tsheej ib haivneeg lawm. Thiab cov Yixalayees lub taubhau yog lub nroog Xamalis, thiab Xamalis lub taubhau yog Lemaliyas tus tub. “Yog koj kev ntseeg tsis ruaj tsis khov, koj yuav nyob tsis ruaj tsis khov ib yam nkaus.” Tus TSWV hais dua ib zaj ntxiv rau Ahas hais tias, “Cia li thov tus TSWV uas yog koj tus Vajtswv ua ib yam cim kom tshwmsim rau koj pom. Yam ntawd tawm puag hauv tubtuag teb qhov uas tob tshaj plaws lossis tawm puag saum qaum ntuj qhov uas siab tshaj plaws tuaj.” Tiamsis Ahas teb hais tias, “Kuv yuav tsis thov ib yam cim dabtsi, thiab kuv yuav tsis kam sim tus TSWV siab.” Yaxayas teb hais tias, “Vajntxwv Daviv cov xeebntxwv, nimno nej cia li mloog kuv hais. Qhov uas nej ua rau neeg tsiv siab, lawv thiaj ua tsis taus siab ntev, tseem tsis tau txaus nej siab thiab los? Nej thiaj ua kom Vajtswv tsiv siab thiab ua tsis tau siab ntev rau nej thiab puas yog? Yog li ntawd, Vajtswv yuav ua ib yam cim tseemceeb rau nej pom raws li tau hais los no. Ib tug nkaujxwb yuav xeeb tub thiab yuav yug tau ib tug metub, nws yuav muab tis npe hu ua ‘Emanu-ees.’ Nws yuav haus mis nyuj thiab noj zib ntab thaum nws paub tab lawm, nws tsis nyiam ua qhov phem tiamsis nws nyiam ua qhov zoo xwb. Thaum tus metub ntawd paub tab lawm, nws tsis nyiam ua qhov phem, tiamsis nws nyiam ua qhov zoo xwb; ob tug vajntxwv uas ua nruj ua tsiv rau koj ntshai ntawd ob lub tebchaws yuav nyob nphob xuav tseg. “Tus TSWV yuav coj kev txomnyem lwj siab los rau koj, koj cov pejxeem thiab koj txiv tsevneeg. Thaum ntawd nej yuav raug kev txomnyem heev, tseem txomnyem tshaj thaum cov Yixalayees faib tebchaws tawm ntawm cov Yudas uas nws coj tus vajntxwv kav cov Axilias tuaj tua nej. “Hnub ntawd, tus TSWV yuav xuav hu cov neeg Iziv kom sau nthwv tuaj ib yam li yoov ya tim ntug dej Niles tuaj, thiab hu cov neeg Axilias sau nthwv hauv lawv lub tebchaws tuaj ib yam li ntab tsiv. Lawv yuav tuaj sib sau ua npoj ntws rau hauv tej voshav, tej toj ntxhab, hauv tej kis pobzeb ntawm tej roob zeb thiab lawv yuav nyob puv nkaus ntawm tej hav pos thiab tej nras puamkhab. “Hnub ntawd, tus TSWV yuav ntiav ib tug txiav plaubhau tim tus dej Efalates sab hnubtuaj tuaj; tus txiav plaubhau ntawd yog cov Axilias tus vajntxwv ntag; nws yuav chais nej cov plaubhau, nej cov hwjtxwv thiab nej tej plaub thoob plaws ibce. “Hnub ntawd, ib tug xyuas nyuj thiab ob tug maum tshis xwb los yeej yuav cawm tau tus tswv teb txojsia; tus xyuas nyuj thiab ob tug maum tshis ntawd yuav muaj kua mis ntau heev thiab nws yuav muaj txaus noj txaus haus. Cov neeg uas seem nyob hauv lub tebchaws yuav muaj mis nyuj thiab zib ntab noj haus tsis tas li. “Hnub ntawd, tej vaj txiv hmab zoo heev uas muaj ib txhiab tsob txiv hmab, ib tsob twg ntaus nqi ib txhiab daim nyiaj los yuav muab tso tseg rau hmab pos thiab ntoo pos laum kom tuag tas. Neeg yuav nqa hneevnti thiab xubvos mus plob tua tsiaj hauv tej vaj ntawd. Rau qhov hmab pos thiab ntoo pos tuaj puv nkaus hauv lub tebchaws ntawd. Thiab hmab pos yuav tuaj puv nkaus saum tej pov roob uas zoo ua teb cog qoob cog loo, thiab tsis muaj leejtwg yuav txeem tau mus rau hauv li. Yuav ua chaw rau tej nyuj thiab tej yaj mus noj zaub lawm xwb.” Tus TSWV hais rau kuv hais tias, “Koj cia li mus muab ib daim txiag ntoo loj los thiab sau tej tus tsiaj ntawv loj hais li no: ‘Maj Nroos Mus Huab, Ceev Nrooj Mus Txeeb.’ Thiab kom Uliyas uas yog tus povthawj thiab Yenpelekhiyas tus tub Xakhaliyas uas yog ob tug neeg uas nej cia siab rau, los nrog ua timkhawv.” Tau tsis ntev tom qab no kuv tus pojniam txawm xeeb tub. Thaum yug tau wb tus metub, tus TSWV hais rau kuv hais tias, “Koj tis nws lub npe hu ua ‘Maj Nroos mus Huab, Ceev Nrooj mus Txeeb.’ Ua ntej tus metub no txawj hu hais tias, ‘Kuv niam’ lossis ‘Kuv txiv,’ tej txhab nyiaj uas nyob hauv lub nroog Damaxes, thiab tej khoom uas huab tau hauv lub nroog Xamalis los yuav raug tus vajntxwv uas kav tebchaws Axilias tuaj nqa mus tas huv tibsi.” Vajtswv hais dua ib zaug ntxiv. Nws hais tias, “Vim cov neeg no tsis lees paub tus Dej Silau-as uas ntws ntsiag to, thiab lawv ntshai vajntxwv Lexees thiab vajntxwv Pekas tshee hnyo. Kuv uas yog tus TSWV yuav coj tus Dej Efalates tuaj tawmtsam lawv, nws muaj zog thiab coob kawg li; nws yog tus vajntxwv uas kav tebchaws Axilias thiab tagnrho nws cov tubrog; nws yuav ntws thoob plaws tej kwj thiab huam puv nkaus ntug; nws yuav ntws mus thoob plaws lub tebchaws Yudas, yuav nyab nta yees txij nkaus xubpwg thiab nyab txhua tsav yam huv tibsi.” Vajtswv nrog peb nyob! Nws nthuav nws ob phab tis roos tagnrho lub tebchaws. Txhua haivneeg, nej cia li ntshai thiab tuaj txoos ua ke los mas! Tej tebchaws uas nyob deb, nej cia li mloog! Nej npaj rawv tos tawmtsam, tiamsis nej ntshai heev! Yog tiag, nej yeej npaj kom txhij, tiamsis nej ntshai kawg. Cia li npaj tswvyim, tiamsis yuav ua tsis tiav. Nej yuav ua tsis tau li nej hais, rau qhov Vajtswv nrog nraim peb. Tus TSWV hais rau kuv thaum nws txhais tes uas muaj hwjchim tuav nkaus kuv, nws ceebtoom kom kuv tsis txhob nrog cov neeg no taug lawv txojkev. Nws hais tias, “Tsis txhob koom nrog cov neeg uas tuavhauv ua phem thiab tsis txhob ntshai tej uas lawv ntshai. Koj yuav tsum nco ntsoov hais tias kuv yog tus TSWV uas muaj hwjchim loj kawg nkaus, kuv yog tus dawbhuv, kuv tib leeg thiaj yog tus uas koj yuav tsum ntshai. Rau qhov kuv yog tus dawbhuv kawg nkaus; kuv yuav yog lub pobzeb uas cov Yudas thiab cov Yixalayees dawm ntog. Thiab nws yuav ua ib rooj nta npuj caws tos cov neeg uas nyob hauv lub nroog Yeluxalees. Muaj ntau leej dawm ntog; lawv yuav ntog ua rau lawv nqaij ntuag ntshav nrog, lawv yuav mag rooj nta npuj thiab yuav mag lub vojhlua.” Nej cov uas yog kuv cov thwjtim, nej yuav tsum ceevfaj thiab khaws tej lus samhwm uas Vajtswv muab cob rau kuv ntawd. Kuv yuav nyob tos tus TSWV, txawm yog nws zais nws lub ntsejmuag tsis pub Yakhauj tsevneeg pom los kuv tseem tso siab plhuav rau nws. Kuv nyob ntawm no nrog cov menyuam uas tus TSWV muab pub rau kuv. Tus TSWV uas muaj hwjchim loj kawg nkaus lub zwmtxwv nyob saum lub Roob Xi-oos; nws txib peb los ua cim rau cov neeg Yixalayees. Tiamsis tej neeg yuav hais kom nej cia li mus nug cov neeg saib hmoov thiab saib yaig uas lawv hais lus tujtaws. Lawv yuav hais tias, “Puas tsimnyog cov pejxeem mus tuavxam nrog lawv tej vajtswv thiab mus tuavxam nrog cov neeg tuag kom pab cov neeg ciaj?” Nej yuav tsum teb lawv hais tias, “Mloog tej lus uas tus TSWV qhia rau nej xwb! Tsis txhob mloog cov neeg txawj saib yaig tej lus, tej uas lawv qhia yuav tsis muaj dabtsi zoo rau nej.” Cov pejxeem yuav taug kev mus thoob plaws lub tebchaws, tsis muaj kev cia siab thiab tshaib plab qaug zog zis. Thaum lawv tshaib plab thiab lawv chim, lawv yuav foom lawv tus vajntxwv thiab lawv tej vajtswv. Lawv yuav tsa qhovmuag ntsia saum ntuj lossis saib hauv av, tiamsis tsuas pom muaj kev nyuaj siab thiab kev tsaus ntuj xwb. Luag yuav raws lawv khiav mus rau hauv qhov tsaus ntuj nti ua rau lawv ntshai heev. Lawv yuav khiav tsis dim tej kev txomnyem ntawd ib zaug li. Txawm li ntawd los yuav tsis muaj kev nyuaj siab rau cov neeg uas twb raug kev txomnyem los lawm. Yav tas los nws tau coj kev txajmuag los rau xeem Xenpuloos lub tebchaws thiab xeem Nathalis lub tebchaws, tiamsis yav tom ntej no mus, txij ntua ntawm ntug dej hiavtxwv Meditelanes sab hnubtuaj mus txog ntua lub tebchaws uas nyob sab ntug Dej Yauladees tim ub, thiab pem Kalilais uas cov neeg txawv tebchaws nyob, nws yuav ua kom lawv rov tau ntsejmuag. Cov neeg uas taug kev tsaus ntuj nti tau pom kev kaj nrig. Lawv nyob hauv lub tebchaws uas tsaus ntuj nti, nimno tshav ntuj ci kaj nrig rau lawv lawm. Tus TSWV, koj ua rau lawv muaj kev zoo siab heev, twb yog koj pub lawv tau zoo nyob kaj siab lug. Lawv txhua tus zoo siab kawg rau tej uas koj tau ua, ib yam li cov neeg uas zoo siab thaum sau qoobloo lossis zoo siab ib yam li thaum faib tej khoom uas mus txeeb tau los. Rau qhov koj twb muab tus quab uas tsuam lawv xubpwg, thiab muab tus nplawm uas luag nplawm lawv nraubqaum lov lawm. Txhua nkawm khau uas cov tubrog rau thiab lawv cov ris tsho uas lo ntshav yuav muab sau huv tibsi coj mus hlawv. Muaj ib tug menyuam twb los yug hauv peb cov lawm! Vajtswv muab ib tug tub pub rau peb! Thiab nws yuav ua tus kav pab, nws lub npe yuav hu ua “Tus Tuavxam, tus uas muaj Txujci, Vajtswv tus muaj hwjchim, Vaj Leej Txiv tus uas nyob mus ibtxhis, Vajntxwv tus uas muaj kev thajyeeb.” Nws kev tswjhwm yuav nthuav loj zuj zus, thiab kev thajyeeb yuav muaj tsis paub kawg nyob saum Daviv lub zwmtxwv thiab thoob plaws nws lub tebchaws. Txij no mus, nws yuav txhim kho lub tebchaws thiab tswjhwm mus rau qhov tseeb thiab coj ncaj ncees mus ibtxhis tsis kawg. Tus TSWV uas muaj hwjchim loj kawg nkaus txiav txim siab yuav ua raws li tej no. Tus TSWV txiav txim rau Yakhauj cov xeebntxwv thiab lub tebchaws Yixalayees. Txhua tus neeg yuav paub zaj no, cov Efalayees thiab cov neeg uas nyob hauv lub nroog Xamalis khavtheeb hais tias, “Tej thwvcib twb pob tas lawm, tiamsis peb yuav muab tej pobzeb los txhim rau; twb muab tej nqaj ntoo xikamaus txiav povtseg tas lawm, tiamsis peb muab tej nqaj ntoo thuv uas khov heev los hloov.” Tus TSWV tshoov lawv cov yeebncuab siab kom tuaj tawmtsam lawv. Cov Xilias uas nyob sab hnubtuaj thiab cov Filitees uas nyob sab hnubpoob rua lawv tej qhovncauj tuaj nqos haivneeg Yixalayees. Txawm muaj li ntawd los Vajtswv tseem chim rau lawv, thiab nws txhais tes tseem rau txim rau lawv tsis tseg. Txawm yog tus TSWV uas muaj hwjchim loj kawg nkaus twb rau txim rau cov Yixalayees lawm los lawv tseem tsis zeem thiab tsis tig rov los cuag tus TSWV li. Tus TSWV yuav ua ib hnub txiav cov Yixalayees tej taubhau, kotw, tej nplooj toovlaj thiab nplooj tauj kom tas huv tibsi povtseg. Tus neeg laus thiab tus muaj meejmom yog lub taubhau, thiab cov cev Vajtswv lus uas lawv qhia tej lus dag yog tus kotw! Cov neeg uas coj tsoom pejxeem no twb yog cov coj lawv yuam kev thiab txhua tus uas lawv coj puavleej raug luag nqos huv tibsi lawm. Vim li ntawd, tus TSWV thiaj tsis zoo siab rau lawv cov tub hluas, thiab nws yuav tsis hlub cov menyuam ntsuag thiab cov pojntsuam, rau qhov txhua tus puavleej tsis hwm tus TSWV thiab muaj lub siab phem kawg li, thiab tej lus uas lawv hais puavleej yog lus phem xwb. Vim yog muaj tej no tus TSWV thiaj chim, thiab nws txhais tes tseem rau txim tsis tseg rau lawv. Cov neeg ua phem tej kev txhaum cig ib yam li lub cubtawg kub tej ntoo pos thiab hmab pos thiab tej toj roob hauv pes ncho pa auv niab. Vim tus TSWV uas muaj hwjchim loj kawg nkaus chim heev, lub tebchaws thiaj raug kub hnyiab, tej neeg thiaj zoo li cov roj uas raug hluavtaws kub, tsis muaj leejtwg yuav cawm tau nws tej kwvtij li. Cov pejxeem thoob tebchaws xawb txhua tsav yam los noj, tiamsis tsis tsau lawv plab; lawv tseem rov noj lawv cov menyuam! Cov Manaxes tawmtsam cov Efalayees thiab Efalayees tawmtsam cov Manaxes, thiab ob pab no sib sau tawmtsam cov Yudas. Vim tej no tus TSWV thiaj chim heev, thiab nws txhais tes tseem rau txim tsis tseg rau lawv. Cov neeg uas rhawv kevcai tsis ncaj ncees thiab cov neeg uas sau kevcai los tswj kuv haivneeg, tsis pub kev ncaj ncees rau cov txomnyem thiab txwv kuv haivneeg pluag txoj cai kom nej txeeb tau cov pojntsuam thiab cov menyuam ntsuag tug, mas nej yuav raug kev puastsuaj lauj! Nej yuav ua li cas thaum txog hnub uas Vajtswv txiav txim rau nej? Nej yuav ua li cas thaum nws coj lwm haivneeg uas nyob deb tuaj ua kom nej puastsuaj? Nej yuav mus kom leejtwg pab nej, thiab nej yuav muab nej tej nyiaj coj mus tso rau qhov twg? Nej yuav raug tua tuag tas rau hauv tshavrog lossis raug cab mus kaw nrog cov neeg raug txim. Vim tej no nws thiaj chim heev; nws txhais tes thiaj rau txim tsis tseg rau nej. Vajtswv hais tias, “Axilias! Kuv yuav siv cov Axilias ua rab qws rau txim rau cov neeg uas ua rau kuv chim. Kuv tso cov Axilias mus tawmtsam haivneeg uas tsis lees yuav Vajtswv; kuv hais kom lawv mus tawmtsam cov neeg uas ua rau kuv chim, kom mus txeeb, mus nyiag thiab mus tsimtxom cov neeg ntawd ib yam li tsuj tej hmoov av hauv tej plawv kev.” Tiamsis tej no tsis raws li cov Axilias tus huabtais xav, nws lub siab tsis xav li ntawd; nws lub homphiaj yog xav ua kom puastsuaj thiab txiav txhua haivneeg kom tu kev nrho xwb. Nws khav hais tias, “Tsis yog kuv cov thawj tubrog txhua tus puavleej yog vajntxwv huv tibsi los? Kuv txeeb tau lub nroog Kanaus thiab lub nroog Kakhemis, lub nroog Hamas thiab lub nroog Alepas. Kuv tua yeej lub nroog Xamalis thiab lub nroog Damaxes huv tibsi. Kuv txhais tes rau txim rau cov tebchaws uas pe mlom, cov mlom ntawd tseem ntau tshaj cov uas nyob hauv lub nroog Yeluxalees thiab hauv lub nroog Xamalis. Kuv twb ua rau lub nroog Xamalis thiab tej mlom uas nyob hauv raug puastsuaj tas huv tibsi lawm. Kuv yuav ua ib yam li ntawd rau lub nroog Yeluxalees thiab cov mlom uas nyob hauv kom puastsuaj thiab.” Tiamsis tus Tswv hais tias, “Thaum kuv ua kuv tej haujlwm saum Roob Xi-oos thiab hauv lub nroog Yeluxalees tas lawm, kuv yuav rau txim rau tus huabtais uas kav tebchaws Axilias, vim nws txojkev khavtheeb.” Tus huabtais uas kav tebchaws Axilias khav hais tias, “Tej haujlwm no yog kuv tib leeg ua tiav xwb. Kuv muaj zog, muaj tswvyim thiab ntse heev. Kuv nam lwm haivneeg tej ciam dej ciam av thiab txhav lawv tej nyiaj txiag nqa los. Kuv zoo li tus heev nyuj uas nrau cov neeg uas zaum saum tej zwmtxwv kom poob tas. Txhua haivneeg uas nyob hauv ntiajteb no zoo ib yam li tej zes noog; kuv muab lawv tej nyiaj txiag yoojyim ib yam li kuv muab tej qe noog; tsis muaj ib tug twg ntxuaj tis kom kuv ntshai thiab tsis muaj ib tug twg qhib ncauj nthe kuv li.” Tus TSWV hais tias, “Rab taus muaj peevxwm tsav tau hwjchim loj dua tus uas siv rab taus los? Rab kaw tseemceeb dua tus uas siv rab kaw los? Rab qws nqa tsis taus tus neeg uas siv rab qws; tsuas yog tus neeg uas siv rab qws thiaj nqa taus rab qws xwb.” Tus TSWV uas muaj hwjchim loj kawg nkaus yuav tso kab mob los rau txim rau cov neeg uas lawv txav lawv kom rog rog. Hauv lawv lub nrog cev yuav kub ib yam li hluavtaws hlawv. Vajtswv yog cov Yixalayees lub teeb uas ci pom kev, nws yog lub cubtawg ntawd ntag. Cov Yixalayees tus Vajtswv uas dawbhuv yuav ua tus nplaim taws, hnub ntawd yuav kub txhua yam, txawm yog tej hmab pos thiab ntoo pos los yuav kub hnyiab tas huv tibsi. Tus TSWV yuav muab nws tej havzoov thiab nws tej teb ua kom puastsuaj tas, tsis hais tus ntsujplig thiab lub cev yuav zoo ib yam li tej kab mob phem los raug cov neeg ntawd kom puastsuaj ntag. Hauv lub havzoov ntawd tsuas tshuav tsob puav ntoo lawm xwb, txawm yog tej menyuam yaus los yeej suav txheeb. Hnub ntawd cov Yixalayees uas seem yuav tsis vamkhom lub tebchaws uas muab lawv ua puastsuaj ntawd. Tiamsis lawv yuav muab siab npuab tus TSWV uas yog cov Yixalayees tus Vajtswv uas dawbhuv, tus ncaj ncees thiab tus tseeb. Cov Yixalayees uas seem yuav rov los cuag lawv tus Vajtswv uas muaj hwjchim loj kawg nkaus. Txawm yog cov Yixalayees coob npaum li tej suabzeb ntawm ntug hiavtxwv los cov uas tau rov los muaj tsawg kawg li. Kev txiav txim yeej muaj teem tseg rau neeg lawm, thiab yeej tsimnyog lawv raug kawg li. Tus TSWV tus uas muaj hwjchim loj kawg nkaus yuav tso kev puastsuaj los rau hauv lub ntiajteb no raws li nws hais tseg lawm. Tus TSWV uas muaj hwjchim loj kawg nkaus hais tias, “Kuv haivneeg uas nyob hauv lub nroog Xi-oos, nej tsis txhob ntshai cov Axilias thaum lawv nqa qws thiab nqa nplawm tuaj ntaus nej ib yam li cov Iziv tau ua rau nej. Kuv txojkev chim uas rau txim rau nej twb yuav dhau, kuv txojkev chim yuav ua kom lawv raug kev puastsuaj. Kuv yog tus TSWV uas muaj hwjchim loj kawg nkaus, kuv yuav muab kuv tus nplawm ntaus lawv ib yam li kuv ntaus cov Midias ntawm lub Pobzeb Aules, thiab kuv yuav tsa kuv tus nplawm rau saum cov dej hiavtxwv ib yam li kuv ua rau cov Iziv. Hnub ntawd, kuv yuav tso kom nej dim ntawm cov Axilias; lawv lub nra hnyav yuav plam saum nej xubpwg thiab lawv tus quab uas khuam nej cajdab yuav lov.” Cov tubrog Axilias tau mus txeeb lub nroog A-is; lawv tuaj dhau lub nroog Minkaloos, lawv thiaj muab lawv tej khoom coj tuaj tso rau hauv lub nroog Mikamas. Lawv hla dhau plaws lub kwjha rau sab tid, thiab lawv pw ib hmos hauv lub nroog Nkenpas; cov pejxeem uas nyob hauv lub nroog Lamas ntshai heev, thiab cov neeg uas nyob hauv Vajntxwv Xa-ules lub zos Nkinpe-as khiav tas lawm. Cov neeg Nkalees, cia li quaj los mas! Cov neeg La-isas, cia li mloog! Cov neeg Anathaus, cia li teb nws! Cov neeg Mamenas tabtom khiav, thiab cov neeg Nkenpas yuav tsum khiav tiag kom dim. Hnub no yeebncuab twb tuaj puv tas rau hauv lub nroog Naunpas lawm, thiab lawv yuav yoj nrig rau lub Roob Xi-oos uas nyob hauv lub nroog Yeluxalees. Tus TSWV uas muaj hwjchim loj kawg nkaus yuav muab lawv co kom poob ib yam li txo tej ceg ntoo. Lawv tej kev khavtheeb thiab tsav hwjchim uas siab heev yuav raug muab ntov kom vau thiab poob tsim. Tus TSWV yuav muab taus ntov lawv ib yam li ntov ntoo hauv plawv zoov, txawm yog tej ntoo uas zoo heev pem Roob Lenpanoos los yeej yuav vau tas huv tibsi. Daviv cajces zoo ib yam li tsob ntoo uas twb muab ntov lawm; tiamsis lub hauvpaus rov hlav dua ib tug ntsuag tshiab. Yog li ntawd, tus vajntxwv tshiab yuav sawv hauv Daviv cov xeebntxwv los. Vajtswv tus ntsujplig yuav pub kom nws muaj tswvyim, muaj kev txawj ntse thiab paub tswj nws haivneeg. Nws yuav paub tus TSWV lub siab nyiam thiab hwm tus TSWV, thiab nws nyob kaj siab lug vim nws mloog Vajtswv lus. Nws yuav tsis txiav txim raws li nws lub qhovmuag pom lossis nws lub pobntseg hnov, nws yuav txiav txim ncaj ncees rau cov neeg pluag thiab tsa cov neeg uas tsis muaj leejtwg pab txoj cai. Nws lo lus zoo li ib rab qws uas ntaus lub ntiajteb no, thiab nws tej pa yuav tua cov neeg siab phem. Kev ncaj ncees yuav ua nws txoj siv sia, thiab kev ua siab ncaj yuav ua pluaj ntaub rau nws pav duav. Hma thiab yaj yuav nyob tau ua ke, tsov pomtxwv yuav pw nrog menyuam tshis. Menyuam nyuj thiab menyuam tsov ntxhuav yuav noj zaub ua ke, thiab tej menyuam yaus yuav ua cov yug tej tsiaj ntawd. Nyuj thiab dais yuav noj zaub ua ke, menyuam nyuj thiab menyuam dais yuav pw ua ke. Tsov ntxhuav yuav noj quavnyab ib yam li nyuj noj. Txawm yog tus menyuam yaus uas tseem noj mis mus ua si ze ntawm tus nab muaj taug lub qhov los tsis ntshai, thiab menyuam yaus cev tes kov nab los nab tsis tom. Saum Xi-oos uas yog Vajtswv lub Roob dawbhuv yuav tsis muaj kev txhawj kev ntshai lossis kev phem kev qias. Tej neeg thoob ntiajteb yuav paub tus TSWV ib yam li dej puv nkaus hiavtxwv. Muaj ib hnub Yexais tus Cag yuav sawv ua ib yam cim tseemceeb rau txhua haivneeg pom; lawv yuav tuaj sib sau rau hauv nws lub nroog thiab hawm nws. Hnub ntawd, tus Tswv yuav siv nws lub hwjchim mus coj nws haivneeg uas tseem tshuav nyob pem tebchaws Axilias thiab nyob nram tebchaws Iziv, hauv tebchaws Patalaus, tebchaws Sudas, tebchaws Elames, tebchaws Npanpiloos, tebchaws Hamas thiab tej tebchaws uas nyob raws ntug dej hiavtxwv, thiab tej koog povtxwv hauv hiavtxwv rov los nyob rau hauv lawv lub qub teb qub chaw dua. Tus Tswv yuav ua ib yam cim qhia rau txhua haivneeg paub hais tias nws tabtom sau cov Yixalayees thiab cov Yudas uas tau khiav mus nyob ua sab ua sua rau plaub ceg kaum ntuj lawm rov los nyob ua ke dua. Cov Yixalayees tej kev khib yuav yaj tas mus, cov Yudas tej yeebncuab yuav raug txiav kom tu; cov Yixalayees yuav tsis khib cov Yudas ntxiv, thiab cov Yudas yuav tsis ua yeebncuab rau cov Yixalayees lawm. Lawv yuav sau zog ua ke mus tawmtsam cov Filitees uas nyob sab hnubpoob, thiab lawv ua ke mus huab cov neeg uas nyob sab hnubtuaj. Lawv yuav tua yeej cov Edoos thiab cov Mau-am, thiab cov Amoos yuav mloog lawv lus. Tus TSWV yuav ua kom Hiavtxwv Xu-es qhuav thiab tso khaub zeeg cua ntsawj tus Dej Efalates kom nqhuab, tsuas tseg xya ceg dej me xwb kom leejtwg los hla tau. Yuav muaj ib txojkev loj hauv tebchaws Axilias rau nws haivneeg Yixalayees taug rov los ib yam li thaum ub lawv cov yawgkoob rov nram tebchaws Iziv los. Hnub ntawd tej neeg yuav hu nkauj hais tias, “Tus TSWV, kuv ua koj tsaug! Koj tau chim heev rau kuv, tiamsis nimno koj tsis chim thiab koj nplig kuv lub siab lawm. Vajtswv yeej yog kuv tus cawmseej; kuv yuav cia siab rau nws thiab yuav tsis muaj kev ntshai li. Tus TSWV yog kuv lub zog kuv thiaj hu nkauj qhuas nws; thiab nws yog kuv tus cawmseej. Cov neeg nqhis dej zoo siab heev rau cov dej ntshiab li cas, Vajtswv haivneeg zoo siab heev thaum nws cawm lawv dim li ntawd.” Txog hnub ntawd, cov neeg yuav hu nkauj zoo siab hais tias, “Ua tus TSWV tsaug! Hu nws los pab nej los mas! Qhia tej uas nws tau ua tas los rau txhua haivneeg; Qhia nws lub hwjchim uas loj kawg nkaus rau lawv paub! Cia li hu nkauj qhuas Vajtswv vim nws tau ua tej txujci tseemceeb. Cia kom lub ntiajteb tau hnov zaj no. Nej txhua tus uas nyob hauv lub nroog Xi-oos cia li qw thiab hu nkauj! Cov Yixalayees tus Vajtswv uas dawbhuv yog tus muaj hwjchim loj kawg nkaus, nws nyob nrog nraim nws haivneeg.” Vajtswv kom Amauxes tus tub Yaxayas hais cov lus no rau lub nroog Npanpiloos. Tsa ib tug chij ntaus rog rau saum lub ncov roob do do, qw nrov nrov rau cov tubrog thiab co tes rau lawv kom cia li mus txeem cov nomtswv tej roojvag nroog. Tus TSWV thiaj hu nws cov tubrog uas muaj cuabkav thiab siab tawv tuaj tua npluav rog dawbhuv thiab rau txim rau cov neeg uas nws chim rau. Mloog tej suab nrov saum roob yog cov neeg uas coob coob tej suab, ntau haivneeg thiab ntau lub tebchaws tej suab tuaj sib sau ua ke. Vajtswv uas yog tus thawj rog tabtom txhij nws cov tubrog mus ntaus rog. Lawv tuaj hauv tej tebchaws uas nyob deb puag tim qab ntuj kawg tuaj. Vim tus TSWV txojkev chim nws thiaj los tawmtsam tej tebchaws ntawd kom puastsuaj tagnrho. Nej cia li ntsaj los mas! Hnub uas tus TSWV yuav los twb ze heev lawm, yog hnub uas tus muaj hwjchim loj kawg nkaus coj kev puastsuaj los rau nej. Txhua tus neeg txhais npab yuav tsaug leeg, thiab txhua tus txivneej yuav qaug zog tas. Lawv yuav ntshai heev thiab ibce mob cuag li tus pojniam mob plab yug menyuam. Lawv ntshai kawg, ib leeg tsa qhovmuag saib ib leeg, thiab lawv tej ntsejmuag kub cuag hluavtaws txhiab, vim lawv txojkev txajmuag. Hnub uas tus TSWV los yuav muaj kev nruj tsiv, kev npautaws thiab kev chim. Lub ntiajteb yuav ua suabpuam tas, thiab txhua tus neeg txhaum yuav raug kev puastsuaj. Txhua lub hnubqub saum nruab ntug thiab tej ntsauv hnubqub yuav tsis ci, lub hnub los yuav tsaus thiab lub hli los yuav tsis pom kev. Tus TSWV hais tias, “Kuv yuav tso kev puastsuaj loj heev los rau lub ntiajteb thiab rau txim rau cov neeg ua phem ua qias vim lawv tej kev txhaum, rau qhov lawv muaj txim. Kuv yuav txo cov neeg khavtheeb lub hwjchim thiab rau txim rau cov neeg siab phem uas ua nruj ua tsiv. Cov neeg uas seem muaj nqis tshaj tej tseem kub. Hnub ntawd, kuv uas yog tus TSWV tus muaj hwjchim loj kawg nkaus yuav qhia kuv txojkev chim, kuv yuav ua kom lub ntuj co ua zog koog, thiab co lub ntiajteb kom txav tawm ntawm nws qhov chaw mus. “Cov neeg txawv tebchaws uas nyob hauv lub nroog Npanpiloos yuav khiav rov qab mus rau hauv lawv lub tebchaws ib yam li tej kauv uas neeg mus raws tua thiab ib yam li pab yaj uas tsis muaj tus tswv saib. Tus uas luag ntsib yuav raug muab hno kom tshab, thiab tus uas luag ntes tau yuav raug muab ntaj tua kom tuag. Thaum ntawd lawv yuav nrhiav tsis muaj kev pab lawm; luag yuav nplawm lawv tej menyuam mos kom tuag tabmeeg lawv, luag yuav txeeb lawv tej tsev yuav, thiab luag yuav coj lawv tej pojniam mus yuam.” Tus TSWV hais tias, “Kuv tabtom tshoov cov Medes siab kom mus tua lub nroog Npanpiloos. Nyiaj los lawv tsis quavntsej thiab kub los lawv yeej tsis ntshaw li. Lawv yuav muab hneevnti thiab xubvos tua cov tub hluas. Lawv yuav tsis hlub cov menyuam mos thiab tsis hlub tshua cov menyuam yaus li. Lub nroog Npanpiloos uas zoo nkauj tshaj plaws tej nroog huv tibsi, yog lub nroog uas muaj cov neeg khavtheeb. Tiamsis kuv uas yog tus TSWV, kuv yuav hlawv lub nroog Npanpiloos povtseg ib yam li kuv twb hlawv lub nroog Xaudoos thiab lub nroog Kaumaulas lawm! Yuav tsis muaj neeg mus nyob rau hauv ntxiv lawm. Cov neeg Alav los yuav tsis mus teeb lawv tej tsevntaub, thiab tej neeg yug yaj los twb tsis cab lawv tej yaj mus noj zaub rau hauv lawm thiab. Lub nroog ntawd yuav ua qhov chaw rau tej tsiaj tom tiaj suabpuam los nyob, thiab ua chaw rau plas los ua zes. Yuav ua qhov chaw rau noog ntxhuav nyob, sai yuav los nyob thiab tsuj kom puastsuaj tas. Tej chaw tsomfaj thiab tej loog yuav ua chaw rau hma liab thiab hma ntsuab nqov ntuj. Npanpiloos lub sijhawm twb los yuav txog! Nws lub caij twb yuav dhau.” Tus TSWV hlub thiab nco txog Yakhauj, nws thiaj rov xaiv haivneeg Yixalayees dua thiab yuav tso lawv rov los nyob hauv lawv lub tebchaws. Cov neeg txawv tebchaws yuav los nrog lawv nyob. Ntau haivneeg yuav pab coj cov Yixalayees rov los rau hauv lawv lub tebchaws uas tus TSWV muab pub rau lawv lawm, thiab cov neeg txawv tebchaws yuav ua cov Yixalayees qhev nyob hauv lub tebchaws ntawd. Cov neeg uas thaum ub ntes cov Yixalayees, nimno cov Yixalayees yuav ntes lawv, thiab cov Yixalayees yuav tswjhwm cov neeg uas thaum ub tsimtxom lawv. Tus TSWV yuav tso cov Yixalayees dim ntawm lawv tej kev lwj siab, kev txomnyem thiab kev raug luag yuam ua haujlwm hnyav. Thaum tus TSWV ua tej no, lawv yuav thuam tus vajntxwv uas kav lub nroog Npanpiloos hais tias, “Tus vajntxwv uas limhiam tshaj plaws twb ntog lawm! Nws yuav tsis tau tsimtxom leejtwg ntxiv lawm! Tus TSWV twb muab cov neeg nruj tsiv tus qws thiab tus cwj lov povtseg lawm, vim lawv siv lawv txojkev chim tsimtxom tej neeg thiab tsis tseg txojkev tsimtxom tej haivneeg uas lawv mus tua yeej li. Nimno lub ntiajteb muaj kev kaj siab thiab muaj kev thajyeeb, thiab txhua tus yuav hu nkauj zoo siab. Tej ntoo thuv thiab ntoo ciab uas nyob pem Roob Lenpanoos zoo siab heev thiab hais tias, ‘Tus vajntxwv ntawd ntog lawm, yuav tsis muaj leejtwg tuaj ntov peb lawm.’ “Tubtuag teb qhib qhovrooj lug tos tus vajntxwv uas kav lub nroog Npanpiloos. Cov muaj hwjchim thaum ub uas kav lub ntiajteb no tej plig sawv zom zaws tuaj tos koj thaum koj los. Cov vajntxwv ntawd tej plig tawm zom zaws saum lawv tej zwmtxwv. Lawv yuav hais rau nws hais tias, ‘Nimno koj los tsaug muag thiab zoo ib yam li peb lawm xwb. Luag ibtxwm ntaus tej suab nkauj nogncas qhuas koj, tiamsis nimno koj los nyob hauv tubtuag teb no lawm. Koj pw saum lub txaj uas muaj kas ua koj daim pam pua thiab daim pam vov.’ ” Tus vajntxwv uas kav lub nroog Npanpiloos, koj yog lub hnubqub uas ci thaum yuav kaj ntug, koj tau poob saum ntuj los! Yav tas los koj tua yeej ntau haivneeg, tiamsis nimno twb muab koj pov rau hauv av lawm. Koj xav hais tias koj yuav nce mus saum ntuj thiab coj koj lub zwmtxwv mus teeb rau saum Vajtswv tej hnubqub uas siab tshaj plaws. Koj xav hais tias koj yuav mus zaum li tus vajntxwv rau saum lub roob pem sab qaumteb, qhov chaw uas tej vajtswv tuaj sib sau ua ke. Koj hais tias koj yuav nce mus saum cov huab thiab ua ib yam li Vajtswv tus uas muaj hwjchim loj kawg nkaus. Tiamsis luag yuav muab koj pov mus rau hauv tubtuag teb lub qhov uas tob tshaj plaws. Cov neeg tuag uas pom koj yuav tsa qhovmuag saib koj. Lawv yuav nug hais tias, “Tus txivneej no puas yog tus uas co lub ntiajteb thiab txhua lub tebchaws ua zog koog? Tus txivneej no puas yog tus uas ua rau ntau lub nroog raug puastsuaj thiab muab lub ntiajteb ntxeev ua suabpuam tas lawm? Tus txivneej no puas yog tus uas tsis tso nws cov neeg raug txim mus tsev li?” Tagnrho tej vajntxwv ntawm txhua haivneeg nyias yuav pw hauv nyias lub qhov ntxa, tiamsis koj tsis muaj qhov ntxa, thiab muab koj lub cev povtseg lwj tsus rau sab nraud. Tej tubrog uas tuag hauv tshavrog tej cev yuav tsuam koj lub cev sib xyaws daws rau hauv lub qhov pobzeb thiab muab txhub rau. Rau qhov koj muab koj lub tebchaws ua puastsuaj tas thiab koj tua koj haivneeg; yuav tsis muaj leejtwg muab koj coj mus faus li lwm tus vajntxwv. Yuav tsis pub koj tsevneeg uas ua phem ib tug seem hlo li. Npaj qhov chaw coj nws cov tub mus tua, vim tej kev txhaum uas lawv cov yawgkoob tau ua los lawm, tsis txhob pub lawv tau kav lub ntiajteb no thiab tsim tej nroog kom puv ntiajteb hlo li. Tus TSWV uas muaj hwjchim loj kawg nkaus hais tias, “Kuv yuav ua rau lub nroog Npanpiloos kom puastsuaj tas. Kuv tsis tseg ib yam dabtsi hlo li, tej menyuam yaus los tsis tseg cia, tsis pub kom muaj ib tug seem. Kuv yog tus TSWV uas hais tej lus no ntag. Kuv yuav muab lub nroog Npanpiloos ntxeev ua hav iav thiab ua chaw rau plas nyob. Kuv yuav muab rab khaubrhuab uas yog kev puastsuaj cheb lub nroog Npanpiloos thiab txhua yam mus povtseg. Kuv yog tus TSWV uas hais tej lus no ntag.” Tus TSWV uas muaj hwjchim loj kawg nkaus coglus hais tias, “Kuv tau kom tseg li cas lawm, kuv yuav ua raws li ntawd. Kuv tau npaj siab li cas lawm, kuv yuav ua kom tiav li ntawd. Kuv yuav muab cov Axilias ua kom puastsuaj tas rau hauv kuv lub tebchaws uas cov Yixalayees nyob, thiab muab lawv faus rau saum kuv tej hauv roob. Kuv yuav tshem cov Axilias tus quab saum kuv haivneeg lub xubpwg thiab tso kom lawv dim ntawm tej kev nyuaj siab uas lawv raug. Ntawm no yog kuv lub homphiaj rau lub ntiajteb, thiab kuv tsa kuv txhais tes mus rau txim rau ntau haivneeg.” Tus TSWV uas muaj hwjchim loj kawg nkaus npaj siab ua li no; nws tsa nws txhais tes rau txim thiab tsis muaj leejtwg cheem tau nws. Xyoo uas Vajntxwv Ahas tuag muaj ib tsab xov tuaj hais li no: Cov neeg Filitees, tus nplawm uas nplawm nej lov lawm, tiamsis nej tsis txhob rawm zoo siab. Thaum ib tug nab tuag lawm, muaj dua lwm tus uas tsiv tshaj los hloov tus ntawd chaw. Lub qe nab daug tau ib tug zaj uas ya taus. Tus TSWV yuav ua tus tswv yug yaj rau cov neeg txomnyem uas yog nws haivneeg thiab yuav cia lawv nyob kaj siab lug. Tiamsis nws yuav tso kev tshaib nqhis los rau cov Filitees thiab yuav tsis pub kom ib tug muaj sia nyob li. Cov Filitees tej nroog, cia li quaj qw thov kev pab los mas! Nej cia li ntshai! Yuav muaj pa ncho auv niab sab qaumteb tuaj ua rau cov tubrog tsis muaj ib tug siab tawv tiv tau hlo li. Peb yuav teb cov Filitees tsab xov uas lawv hais tuaj rau peb li cas? Peb yuav teb rau lawv hais tias, “Vajtswv yog tus txhim kho lub Roob Xi-oos kom nws haivneeg uas raug kev txomnyem thiaj tau chaw cawm siav.” Ntawm no yog cov lus uas hais txog lub tebchaws Mau-am. Ib hmos xwb lub nroog Ales thiab lub nroog Kiles raug kev puastsuaj tas thiab lub tebchaws nyob ntsiag to. Cov neeg hauv lub nroog Dinpoos nce mus quaj hauv lawv tej tsev teev dab saum tej ncov roob. Cov Mau-am uas nyob thoob plaws lub nroog Nenpaus thiab Medenpas quaj tu siab nrho muab lawv tej plaubhau thiab lawv tej hwjtxwv chais povtseg. Tej neeg puavleej npua ntaubtsaj mus nyob tom tej kev; cov neeg mus quaj nyiav hauv plawv nroog thiab saum tej rutsev. Cov neeg hauv lub nroog Hesenpoos thiab Ele-ales tsa suab hlo quaj, lawv tej suab quaj nrov mus txog puag tim Yahaxes. Twb yog vim li no cov tubrog thiaj ntshai tshee hnyo, thiab lawv zog ntaug tas huv tibsi. Kuv lub siab quaj dhi rau lub tebchaws Mau-am! Cov neeg tawg khiav mus rau hauv lub nroog Xau-as, thiab mus rau hauv lub nroog Elas Selisiyas. Qee leej quaj taug kev nce mus rau pem lub nroog Luhithas qee leej taug kev khiav mus rau hauv lub nroog Haulauna-ees; lawv quaj nrov heev rau lawv tej kev piamsij ntawd. Tus dej Nimilees nqhuab lawm, tej nyom uas tuaj ntawm ob sab ntug dej tuag tas thiab tsis tshuav ib yam nroj tsuag dabtsi tseem ntsuab nyob qhov twg li. Cov neeg nrhiav kev coj lawv tej khoom uas seem khiav mus hla lub Hav Vilaus. Tej suab quaj nrov thoob plaws tebchaws Mau-am. Nyob hauv lub nroog Ela-ees thiab Npelelis los yeej hnov tej suab quaj huv tibsi. Tus dej hauv lub nroog Dinpoos tsuas pom ntshav liab ploog xwb, thiab Vajtswv tseem muab tej yam uas phem tshaj plaws tsub ntxiv rau cov neeg uas nyob hauv thiab. Cov neeg Mau-am uas khiav dim thiab cov uas seem nyob hauv lub tebchaws puavleej raug tsov ntxhuav tom tuag tas. Cov Mau-am tso neeg cab ib tug menyuam yaj hauv lub nroog Xelas taug txojkev hauv tiaj suabpuam tuaj rau saum lub roob Xi-oos ua khoom pub rau tus nom kav lub tebchaws uas nyob hauv lub nroog Yeluxalees. Mau-am cov ntxhais mus sawv ntawm ntug Dej Alenoos tos hla dej thiab mus mus los los ib yam li tej menyuam noog uas muab tshem tawm ntawm lub zes. Lawv hais rau cov Yudas hais tias, “Thov qhia saib peb yuav ua li cas. Thov nej tsomkwm peb ib yam li tus ntoo uas ua duab ntxoov txias zias thaum tavsu thiab thov cia peb so hauv nej tus duab ntxoov ntxoo. Peb yog neeg tawg rog; thov muab peb zais rau ntawm qhov chaw uas tsis muaj leejtwg tuaj nrhiav tau hlo li. Thov cia peb nyob hauv nej lub tebchaws thiab tsomkwm kom peb dim ntawm cov neeg uas nrhiav peb tua.” (Cov neeg limhiam twb yuav dhau mus, kev puastsuaj twb yuav kawg, thiab cov neeg uas tsim kev kub ntxhov rau lub tebchaws kom puastsuaj twb yuav ploj mus. Ces yuav tsa Daviv ib tug xeebntxwv ua vajntxwv, nws yuav tswjhwm tsoom pejxeem ntawm lub siab ncaj ncees thiab kev hlub. Nws nrhiav txojkev ncaj ncees thiab maj ceev nrooj ua kom txojkev ncaj ncees ntawd tiav.) Cov Yudas teb hais tias, “Peb twb hnov hais tias cov Mau-am yog cov neeg khavtheeb. Peb paub lawv yog neeg khavtheeb thiab muaj plhus, tiamsis lawv tej lus khavtheeb tsis muaj qabhau li.” Cov neeg Mau-am yuav quaj vim tej kev txomnyem uas lawv raug ntawd. Lawv txhua tus yuav quaj heev thaum lawv nco txog tej zaub mov qab uas lawv noj hauv lub nroog Kiles Heles. Yuav muab lawv raws tawm khiav kom ploj qab ntais. Tej teb uas nyob ze lub nroog Hesenpoos thiab cov Xinpemas tej vaj txiv hmab raug puastsuaj tas. Cov txiv hmab ntawd yog cov uas luag de los ua cawv rau ntau haivneeg haus. Muaj ib zaug cov txiv hmab ntawd hlav mus deb heev, mus txog ntua ntawm lub nroog Yaxes sab hnubtuaj hlav mus txog ntua tiaj suabpuam, thiab sab hnubpoob hlav mus txog ntua ntawm Hiavtxwv Tuag sab tim ub. Yog li ntawd, kuv thiaj quaj rau cov Xinpemas cov txiv hmab ib yam li kuv quaj rau cov neeg Yaxes. Kuv tej kua muag poob rau lub nroog Hesenpoos thiab Ele-ales, vim muaj kev sib ntaus sib tua qw ntshoo nrooj los raug nej tej qoobloo thiab tej nplej uas nej twb sau tau lawm. Nimno tsis muaj leejtwg zoo siab rau tej teb uas zoo qoobloo. Tsis muaj leejtwg qw lossis hu nkauj hauv tej vaj txiv hmab. Tsis muaj leejtwg tsuam tej txiv hmab ua cawv; tej suab qw zoo siab los ntsiag tas lawm. Kuv seev tu siab nrho rau lub tebchaws Mau-am thiab lub nroog Kiles Heles. Thaum cov Mau-am pluav qaug zog zis nce mus rau saum lub roob uas yog qhov chaw lawv teev dab thiab thaum lawv mus txog rau hauv lub tsev teev dab, lawv thov los tsis tau dabtsi. Tej ntawd yog tus TSWV cov lus uas twb hais rau cov Mau-am ntxov los lawm. Tiamsis nimno tus TSWV hais tias, “Tshuav peb xyoo lawm xwb, cov Mau-am lub meejmom yuav poob mus. Feem coob yuav puastsuaj, tsuas tshuav qee leej seem nyob lawm xwb, lawv yuav qaug zog kawg li.” Tus TSWV hais tias, “Damaxes yuav tsis tau ua ib lub nroog ntxiv lawm; nws yuav puastsuaj tas ua ib pawg. Cov Xilias tej nroog yuav ua suabpuam mus ibtxhis. Tej nroog ntawd yuav ua tshav zaub rau yaj thiab nyuj noj, thiab tsis muaj leejtwg yuav raws tau tej tsiaj ntawd tawm khiav. Cov Yixalayees tej chaw fajxwm uas txhim pobzeb zoo heev yuav pob puas tas, thiab lub nroog Damaxes yuav poob hwjchim. Cov Xilias los yuav poob ntsejmuag ib yam li cov Yixalayees. Kuv yog tus TSWV uas muaj hwjchim loj kawg nkaus, kuv hais tej lus no ntag.” Tus TSWV hais tias, “Hnub ntawd, yuav muab cov Yixalayees lub hwjchim txo kom nqis, thiab kev pluag yuav los hloov kev npluanuj. Cov Yixalayees lub tebchaws yuav zoo nkaus li thaj teb uas twb hlais nplej thiab sau qoobloo tas, zoo li daim teb hauv lub Hav Lefayees thaum uas neeg muab tej qoobloo sau tas lawm. Cov Yixalayees tshuav qee leej thiaj dim xwb, lawv yuav zoo ib yam li tsob txiv ntoo roj uas luag muab tej txiv de tas tshuav ob peb lub txiv nyob puag saum ntsis lossis seem lub puav txiv nyob rau hauv tej ceg uas qis xwb. Kuv yog tus TSWV uas yog cov Yixalayees tus Vajtswv, kuv hais tej lus no ntag.” Hnub ntawd tej neeg yuav tig rov los cuag tus uas Tsim lawv kom pab lawv; nws yog cov Yixalayees tus Vajtswv uas dawbhuv. Lawv yuav tsis mob siab rau tej thaj uas lawv txua tau ntawm lawv tes lossis tsis cia siab rau tej uas lawv txhais tes txua, tsis hais tej mlom pojniam Aselas thiab tej thaj hlawv hmoov tshuaj tsw qab hlo li. Hnub ntawd tej nroog uas muaj ntsa yeej thaiv yuav puastsuaj thiab ua suabpuam tas ib yam li cov Hivis thiab cov Amaules uas khiav cov Yixalayees thiab muab lawv tej nroog tso tseg ntag. Cov Yixalayees, nej muab Vajtswv tus uas yog nej tus cawmseej thiab tus tiv thaiv nej ib yam li phab zeb tso tseg lawm. Nej tau mus xov tej vaj tseemceeb kom tau chaw pehawm cov neeg txawv tebchaws tej vajtswv. Txawm yog tej noob ntawd tuaj kaus mos nyoos thiab tawg paj kiag tagkis sawv ntxov uas nej cog ntawd los nej yuav tsis tau sau li. Hnub ntawd tsuas muaj kev txomnyem thiab kev mob kev nkeeg nkaus xwb. Ntau haivneeg tej suab quaj nrov ntsoog qees cuag li dej hiavtxwv ntas; cov neeg tej suab quaj suab qw nrov ntsoog qees cuag li dej ntsawj. Ntau haivneeg sawv los ua suab nrov ntsoog qees cuag li dej ntas, tiamsis Vajtswv cem lawv thiab ntiab lawv khiav mus deb kawg li lawm; nws muab lawv raws khiav ib yam li cua ntsawj tej hmoov av saum roob thiab ib yam li khaub zeeg cua ntsawj tej quavnyab ya ri niab. Thaum tsaus ntuj lawv mus tsim kev kub ntxhov, tiamsis thaum kaj ntug tsis muaj lawv lawm. Tej ntawd yog nqis zog rau txhua tus uas tuaj huab peb lub tebchaws. Tsuas hnov tej suab tis ntxuaj nrov tim tej ntug dej hauv lub tebchaws Sudas uas muaj cov nomtswv tsav cov nkoj uas muab tej tauj npaig ua tawm hauv lub tebchaws taug tus dej Niles tuaj. Nej cov neeg xa xov uas khiav ceev heev, nej cia li mus rau hauv lub tebchaws uas muaj cov neeg loj thiab nqaij tawv mos nyoos, mus rau ntawm haivneeg uas nyob deb thiab nyob ze los luag ntshai, thiab mus rau ntawm haivneeg uas muaj hwjchim thiab muaj zog heev uas muaj dej quas lawv lub tebchaws lawm. Txhua tus uas nyob hauv ntiajteb no cia li mloog! Tsa qhovmuag saib tus chij uas tsa rau saum hauv roob! Thiab thaum hnov luag tshuab raj tshuab xyu cia li mloog! Tus TSWV hais rau kuv hais tias, “Kuv yuav nyob saum ntuj no saib tuaj ib yam li ntsu lwg thaum hmo ntuj lub caij ntuj tsaug uas sau qoobloo thiab ib yam li tshav tuaj ziab thaum nruab hnub. Thaum ua ntej sau qoobloo uas tej paj txiv hmab zeeg thiab tej txiv hmab pib siav, yeebncuab yuav tuaj tua cov Sudas yoojyim ib yam li muab riam txiav tej ceg txiv hmab. Luag yuav muab lawv cov tubrog uas tuag lawm tso tseg rau tej tsiaj qus thiab noog noj. Lub caij ntuj qhua noog yuav tau noj lawv thiab lub caij ntuj no tej tsiaj yuav tau noj lawv.” Thaum txog lub sijhawm ntawd, tus TSWV uas muaj hwjchim loj kawg nkaus yuav tau txais tej khoom fij uas luag coj tim lub tebchaws uas muaj dej quas nruab nrab tuaj pub rau nws. Haivneeg ntawd yog haivneeg uas muaj zog thiab muaj hwjchim heev. Lawv loj thiab nqaij tawv mos nyoos, tej neeg uas nyob deb thiab nyob ze los puavleej ntshai lawv. Lawv yuav tuaj rau saum Roob Xi-oos, qhov chaw uas pehawm tus TSWV tus uas muaj hwjchim loj kawg nkaus. Ntawm no yog cov lus uas hais txog lub tebchaws Iziv. Saib lauj, tus TSWV caij rawv ib tauv huab ceev heev nqis los rau hauv lub tebchaws Iziv lawm. Cov neeg Iziv tej mlom yuav raug tsuj tabmeeg ntawm nws xubntiag, lawv poob siab thiab zog ntaug tas. Tus TSWV hais tias, “Kuv yuav tshoov cov Iziv siab kom lawv tej kwvtij sawv tawmtsam tej kwvtij, zejzog sawv tawmtsam zejzog, ib lub nroog sawv tawmtsam ib lub nroog thiab ib lub tebchaws yuav sawv tawmtsam ib lub tebchaws. Kuv yuav mus ua kom cov Iziv tej tswvyim ploj tas thiab ua kom lawv tej kev xav puastsuaj. Lawv yuav mus thov lawv tej mlom pab lawv, mus saib yaig thiab mus thov cov neeg uas tuag lawm tej ntsujplig pab lawv. Kuv yuav muab cov Iziv cob rau tus nom uas siab tawv heev txhais tes thiab tsa tus vajntxwv uas nruj tsiv tshaj plaws kav lawv. Kuv yog tus TSWV uas muaj hwjchim loj kawg nkaus, kuv hais tej lus no ntag.” Tus dej Niles yuav nqhuab, thiab tus niamdej yuav tu. Tej kwjdeg yuav tsw lwj ntxiag, thiab cov dej hauv tebchaws Iziv uas ntws los tshuam tus dej Niles yuav tu thiab nqhuab tas. Tej tauj npaig thiab kavtheej los yuav qhuav nkig nkuav, tej nroj tsuag uas tuaj ntawm ob sab ntug dej Niles, thiab tej qoobloo uas cog raws ob sab ntuj dej los yuav qhuav nkig nkuav thiab cua yuav muab ntsawj ya tas. Cov neeg uas nrhiav noj yug nws lub neej uas yog nuv ntses thiab ntaus ntses hauv tus dej Niles yuav tu siab thiab quaj; lawv yuav tsis siv lawv tej nuv thiab tej vas ntxiv lawm. Cov neeg ntsis paj los yuav ploj, thiab cov neeg ntos ntaub los yuav tas kev cia siab; cov neeg ntos ntaub hauv lub tebchaws yuav raug caij tsuj, thiab cov neeg uas mus ua zog kom tau nyiaj yuav tu siab heev. Cov thawjcoj hauv lub nroog Xau-as puavleej yog neeg ruam! Falaus cov neeg txawj ntse los tuavxam ruam kawg li! Nej yuav ua li cas hais rau Falaus hais tias, “Peb puavleej yog tub txawg tub ntse thiab peb yog cov vajntxwv puag thaum ub tej xeebntxwv?” Falaus, koj cov tuavxam uas txawj ntse nyob qhov twg? Cia lawv mam li qhia rau koj thiab ua rau koj paub, saib tus TSWV uas muaj hwjchim loj kawg nkaus muaj lub homphiaj li cas rau lub tebchaws Iziv. Cov thawjcoj hauv lub nroog Xau-as puavleej yog neeg ruam; cov thawjcoj hauv lub nroog Meefis raug kev ntxeev ntxias, cov uas ua ncej zeb txheem nws haivneeg tau coj cov Iziv mus yuam kev tas. Tus TSWV ua kom lawv muab tej lus tuavxam tsis sib totaub los hais. Cov Iziv thiaj ua txhua yam yuam kev thiab ntog pujpoog ib yam li tus neeg qaug cawv uas nws rov tsuj nws cov ntuav ntog. Tsis muaj ib yam dabtsi uas yuav pab tau lub tebchaws Iziv li, tsis hais taubhau lossis kotw, nplooj toovlaj lossis tej tauj npaig. Hnub ntawd cov Iziv yuav muaj lub siab muag ib yam li tej pojniam. Lawv yuav ntshai tshee hnyo thaum lawv pom tus TSWV uas muaj hwjchim loj kawg nkaus tsa nws txhais tes rau txim rau lawv. Cov Yudas yuav ua rau cov Iziv ntshai heev; txhua tus uas hnov yuav ntshai kawg nkaus, rau qhov tus TSWV uas muaj hwjchim loj kawg nkaus npaj tseg rau lawv lawm. Thaum ntawd, tsuas tshuav tsib lub nroog hauv tebchaws Iziv thiaj hais lus Henplais lawm xwb. Cov neeg uas nyob hauv yuav tuav tus TSWV uas muaj hwjchim loj kawg nkaus lub npe thov. Cov nroog ntawd muaj ib lub yuav hu ua “Lub Nroog Hnub.” Hnub ntawd yuav muaj ib lub thaj rau tus TSWV nyob hauv tebchaws Iziv thiab muaj ib tug ncej zeb uas muab fij rau tus TSWV nyob rau ntawm Iziv tus ciamteb. Ob yam ntawd yuav ua cim thiab ua timkhawv rau tus TSWV uas muaj hwjchim loj kawg nkaus nyob hauv tebchaws Iziv. Thaum lawv quaj hu thov txog tus TSWV, vim muaj neeg tuaj tsimtxom lawv, tus TSWV thiaj txib ib tug los cawm lawv, tsomkwm lawv thiab tso lawv dim. Hnub ntawd tus TSWV yuav qhia nws rau cov neeg Iziv paub; lawv yuav paub tus TSWV thiab pehawm nws; lawv yuav coj tsiaj tuaj tua hlawv fij thiab muab khoom tuaj fij rau nws. Lawv coglus rau nws thiab ua raws li tej lus uas lawv tau cog tseg. Tus TSWV yuav rau txim rau cov Iziv, tiamsis nws yuav rov kho kom lawv zoo. Lawv yuav tig los cuag nws thiab nws yuav mloog lawv tej lus thov thiab yuav kho kom lawv tej mob zoo. Hnub ntawd yuav muaj ib txoj niam kev loj nram tebchaws Iziv mus txog rau pem tebchaws Axilias. Cov Axilias yuav mus nram tebchaws Iziv, cov Iziv yuav tuaj pem tebchaws Axilias, thiab cov Iziv yuav nrog cov Axilias pehawm Vajtswv ua ke. Hnub ntawd cov Yixalayees yuav muaj vajhuam sib luag ib yam li cov Iziv thiab cov Axilias, thiab peb haivneeg ntawd yuav ua rau neeg ntiajteb tau koob hmoov. Tus TSWV uas muaj hwjchim loj kawg nkaus yuav foom koob hmoov rau lawv hais tias, “Kuv foom koob hmoov rau cov Iziv uas yog kuv haivneeg, cov Axilias uas kuv tsim, thiab cov Yixalayees uas kuv xaiv tseg.” Xyoo uas Xalenkoos ua vajntxwv kav tebchaws Axilias, nws tau tso ib tug thawj tubrog tuaj tua lub nroog Asedaus thiab txeeb tau lub nroog ntawd. Lub sijhawm ntawd tus TSWV hais rau Yaxayas uas yog Amauxes tus tub hais tias, “Koj cia li muab cev ris tsho ntaubmag uas koj hnav thiab muab nkawm khau khiab uas koj rau hle tseg.” Yaxayas thiaj mus kev liabqab thiab tsis rau khau li tus TSWV tau hais rau nws ntawd. Thaum luag txeeb tau lub nroog Asedaus lawm, tus TSWV hais tias, “Kuv tus tubtxib Yaxayas mus kev liabqab thiab tsis rau khau tau peb xyoos. Qhov no ua lub cim qhia hais tias yuav muaj tej xwmtxheej los raug lub tebchaws Iziv thiab lub tebchaws Sudas. Axilias tus vajntxwv yuav muab cov Iziv thiab cov Sudas uas nws ntes tau ntawd hle ris tsho liabqab coj mus ua neeg poob tebchaws. Cov hluas thiab cov laus yuav mus kev liabqab pobtw liab vog thiab tsis rau khau, ua rau cov Iziv txajmuag kawg li. Cov neeg uas cia siab rau cov Sudas thiab khavtheeb rau cov Iziv yuav thim rov qab thiab txajmuag heev. Cov neeg uas nyob ntawm ntug hiavtxwv uas npuab lub tebchaws Axilias hais tias, ‘Nej sim saib, cov neeg uas peb cia siab rau thiab cov neeg uas peb mus cuag kom coj peb khiav tawm ntawm cov Axilias tus vajntxwv raug luag ntes lawm! Zaum no peb yuav ua li cas thiaj khiav dim?’ ” Zaj lus uas hais ntsig txog cov Npanpiloos tej kev puastsuaj tawm hauv lub tebchaws uas txaus ntshai heev tuaj ib yam li cov khaub zeeg cua ntsawj hla tiaj suabpuam tuaj. Tej xwmtxheej phem uas kuv ua yogtoog pom ntawd, yog pom cov neeg ntxeev siab tawm mus tsim kev kub ntxhov thiab cov neeg tubsab tawm mus nyiag luag. Cov Elames, cia li tawm mus ua rog los mas! Cov Medias, cia li tawm mus vij luag tej nroog los mas! Kuv yuav ua kom tej suab quaj suab qw uas cov Npanpiloos ua ntawd ntsiag mus. Thaum kuv ua yogtoog pom zaj no, kuv ntshai kawg thiab ua rau kuv mob npaum nkaus li tus pojniam mob plab yug menyuam ntag. Kuv taubhau kiv heev, thiab kuv ntshai ua ibce tshee hnyo. Kuv tos ib hnub tsaus ntuj tsis muaj dabtsi ua rau kuv cia siab tsuas yog kev txhawj ntshai xwb. Nyob rau hauv zaj yogtoog muaj ib rooj mov uas twb npaj tiav lawm; luag muab cov ntaub tuab nthuav pua rau cov qhua zaum. Thaum lawv tabtom noj haus, tamsim ntawd txawm muaj lus samhwm tuaj hais tias, “Cov nomtswv, cia li npaj nej cov thaiv hniav ntaj!” Tus TSWV hais rau kuv hais tias, “Cia li tso ib tug txivneej mus saib, thiab cia nws qhia tej uas nws pom rau nej. Yog hais tias nws pom cov txivneej caij nees ib nkawm quas ib nkawm, thiab cov txivneej uas caij neesluav thiab caij ntxhuav tuaj mas nws yuav tsum ua tib zoo saib kom tseeb tseeb.” Tus fajxwm hu los hais tias, “Kuv tus tswv, kuv tau sawv saum qhov chaw fajxwm saib tas hnub tas hmo.” Saib maj! Cov txivneej uas caij nees ib nkawm quas ib nkawm tuaj lawm lauj! Lawv teb hais tias, “Lub nroog Npanpiloos twb poob lawm! Tej vajtswv uas lawv pe poob rau hauv av thiab tawg tas lawm.” Kuv haivneeg Yixalayees, nej raug ntaus ib yam li ntaus nplej, tiamsis nimno kuv yuav qhia rau nej paub txog tej xov zoo uas kuv hnov los ntawm tus TSWV uas yog cov Yixalayees tus Vajtswv uas muaj hwjchim loj kawg nkaus. Ntawm no yog zaj lus uas hais txog lub nroog Eloos. Muaj ib tug neeg hu tom Xe-iles tuaj rau kuv hais tias, “Tus fajxwm, tshuav ntev li cas mam kaj ntug? Qhia rau kuv saib thaum twg mam kaj ntug?” Kuv teb hais tias, “Twb kaj ntug lawm, tiamsis twb yuav rov tsaus ntuj dua. Yog koj xav rov nug ntxiv, cia li hu rov tuaj thiab nug los tau.” Ntawm no yog zaj lus uas hais txog cov Alanpias. Cov neeg Dedas, nej taug kev tsheej pab los so rau ntawm cov Alanpias tej roob mojsab qhua, muab dej rau cov neeg uas tuaj nrhiav dej ntawm nej haus. Nej cov neeg uas nyob hauv tebchaws Temas, muab zaub mov rau cov neeg tawg rog noj. Vim lawv khiav kom dim ntawm tej hniav ntaj hniav riam uas yuav tua lawv, thiab khiav ntawm tej hneevnti uas nta tos yuav tua lawv thiab ntawm tej kev tsov kev rog. Tus TSWV hais rau kuv hais tias, “Tshuav ib xyoo ib yam li luag ntiav tub zog lawm xwb, mas cov Kedas lub meejmom uas loj yuav dhau mus. Cov Kedas uas txawj tua hneevnti thiab siab tawv, tsuas tshuav qee leej seem lawm xwb. Kuv yog tus TSWV uas yog cov Yixalayees tus Vajtswv, kuv hais tej lus no.” Ntawm no yog zaj lus hais rau lub Hav Yogtoog. Muaj xwmtxheej dabtsi? Vim li cas cov neeg hauv lub nroog nce tagnrho mus rau saum rutsev? Lub nroog uas puv nkaus tej suab luag ua nqaj ua nqug thiab tej suab lomzem zoo siab. Nej cov neeg uas tuag tsis yog tuag rau hniav ntaj hniav riam lossis tuag rau hauv tshavrog. Nej cov thawjcoj khiav tawm thiab tsis tau tua ib hnee li; lawv puavleej raug ntes. Txawm yog lawv khiav deb lawm los lawv tseem raug ntes coj los rau txim. Yog li ntawd, kuv thiaj hais tias tsis txhob quavntsej kuv; cia kuv quaj rau kuv txojkev lwj siab uas kuv haivneeg tuag tas lawm. Tsis txhob tuaj nplig kuv siab li. Tus TSWV uas muaj hwjchim loj kawg nkaus tau teem ib hnub tseg tso tej kev mob kev nkeeg, kev swb thiab kev ntxov siab los rau peb hauv lub Hav Yogtoog. Tej ntsa yeej uas thaiv peb lub nroog tau vau tawg tas thiab tej suab quaj thov pab nrov ntxhe mus thoob plaws pem tej ncov roob. Cov tubrog caij nees hauv tebchaws Elames tuaj, lawv khuam rawv hneevnti thiab xubvos. Cov tubrog uas tuaj hauv tebchaws Kiles tuaj npaj rawv lawv tej thaiv hniav ntaj. Tsheb nees yuav nyob puv nkaus rau hauv cov hav uas av zoo heev hauv tebchaws Yudas, thiab cov tubrog caij nees tuaj sawv tsheej pab ntawm lub nroog Yeluxalees tej roojvag. Tus TSWV tau muab tej cuabyeej uas tiv thaiv cov Yudas tshem povtseg lawm. Hnub uas muaj tej xwmtxheej no, nej yuav mus nrhiav tej cuabyeej ntawd hauv lub Tsev Havzoov, mas nej pom tus ntsa yeej uas thaiv Daviv lub Nroog, thiab lub pasdej uas nej tauv rau ntawm theem qis tawg ntau qhov, nej suav cov tsev hauv lub nroog Yeluxalees, thiab nej muab cov tsev ntawd tsoo yuav tej pobzeb mus txhim tus ntsa yeej uas tawg ntawd. Nej ua tau ib lub rhawv rau ntawm ob tus ntsa yeej kis nruab nrab ntim cov dej uas ntws hauv lub qub pasdej los. Tiamsis nej tsis tig pobntseg mloog Vajtswv tus uas npaj tej no thiab ua kom muaj tej no puag thaum ub los tej lus hlo li. Hnub ntawd tus TSWV uas muaj hwjchim loj kawg nkaus hais kom nej quaj thiab nyiav, chais nej tej plaubhau thiab hnav ntaubtsaj. Tiamsis nej tseem zoo siab thiab khav, nej tua nyuj thiab tua yaj los noj, thiab muab cawv txiv hmab los haus. Nej hais tias, “Peb cia li noj thiab haus kom txaus! Vim tagkis peb yuav tuag tas.” Tus TSWV uas muaj hwjchim loj kawg nkaus hais rau kuv hais tias, “Tej kev phem kev qias no yuav tsis muaj kev zam txim rau lawv mus txog thaum lawv tuag tas. Kuv uas yog Vajtswv, tus TSWV uas muaj hwjchim loj kawg nkaus, kuv hais tej lus no ntag.” Tus TSWV uas muaj hwjchim loj kawg nkaus txib kom kuv mus cuag Senas uas yog tus thawj saib lub tuamtsev thiab hais rau nws hais tias, “Koj tuaj ua dabtsi thiab leejtwg tso cai rau koj tuaj khawb qhov ntxa faus koj, txaug koj lub qhov ntxa rau saum ncov roob siab, thiab puab koj qhov chaw so rau saum roob zeb no? Saib lauj, tus neeg uas muaj zog, tus TSWV yuav tuaj nqa koj mus povtseg. Nws yuav tuav koj cia, thiab nws yuav muab koj dov ua ib thooj thiab muab koj pov mus rau ntawm lub tebchaws uas dav heev. Koj yuav tuag rau qhov ntawd, thiab koj tej tsheb nees ua rog yuav nyob rau qhov ntawd, vim koj tau ua rau koj tus tswv tsevneeg txajmuag. Tus TSWV yuav tshem koj tawm ntawm koj lub chaw ua haujlwm thiab yuav txo kom koj poob koj lub meejmom.” Tus TSWV hais rau Senas hais tias, “Hnub ntawd kuv yuav hu kuv tus tubtxib Eli-akees uas yog Hilekiyas tus tub tuaj, Kuv yuav muab nej cov nomtswv tej tsho ntev rau nws hnav thiab muab nej tej siv rau nws sia; thiab kuv yuav muab nej tej meejmom cob rau nws tes; nws yuav ua cov neeg hauv lub nroog Yeluxalees thiab cov Yudas leej txiv. Kuv yuav muab tus yuamsij uas qhib Daviv lub tsev tso rau saum nws xubpwg; nws qhib, yuav tsis muaj leejtwg kaw; thiab nws kaw, yuav tsis muaj leejtwg qhib tau. Kuv yuav muab nws cog rau ntawm lub chaw uas ruaj khov ib yam li tus ntsia hlau uas twb ntsia khov lawm, thiab nws yuav yog lub zwmtxwv uas luag hwm rau ntawm nws yawgkoob cajces. “Tiamsis tagnrho nws cov kwvtij thiab nws tej tubki yuav ua ib lub nra hnyav heev rau nws; lawv yuav khuam rau saum nws ib yam li tej laujkaub thiab tej tais phiab uas khuam rau ntawm tej ncej! Thaum txog hnub uas muaj tej xwmtxheej no tshwmsim tuaj, tus ncej uas cog rau qhov chaw ruaj yuav rho tawm thiab yuav vau. Txhua tsav yam uas yog lub nra hnyav khuam saum nws yuav poob tas.” Tus TSWV tau hais li ntawd. Ntawm no yog zaj lus uas hais rau lub nroog Tiles. Cov neeg uas ua haujlwm hauv tej nkoj tom plawv dej hiavtxwv, nej cia li quaj tu siab los mas! Nej lub chaw nres nkoj hauv Tiles, tej vajtse thiab tej chaw nres nkoj hauv lub tebchaws raug puastsuaj tas. Nej yuav hnov xov thaum nej cov nkoj rov tim tebchaws Xaipas los. Cov neeg uas nyob hauv koog povtxwv thiab cov neeg ua lag ua luam hauv Xidoos, nej cia li quaj ntsaj ntsoog qees! Nej txib neeg hla hiavtxwv mus yuav thiab muag tej nplej uas luag cog nram tebchaws Iziv, thiab mus cog kev lag kev luam nrog ntau haivneeg. Xidoos, koj cia li txajmuag los mas! Hiavtxwv thiab qab thu hiavtxwv uas tob heev hais tias, “Kuv tsis tau muaj dua menyuam. Kuv tsis tau tu dua tub lossis ntxhais li.” Thaum cov Iziv hnov tej xwmtxheej no, lawv yuav ceeb thiab nyuaj siab txog lub nroog Tiles tej chaw nres nkoj uas raug puastsuaj tas lawm. Cov neeg uas nyob hauv lub xeev Faunikias, nej cia li quaj qw, thiab nrhiav kev khiav hla kom dhau plaws mus rau tim tebchaws Xapees los mas! Lub nroog Tiles no puas yog lub nroog uas thaum ub ua rau nej muaj kev lomzem? Lub nroog no puas yog lub uas pheej txib neeg hla hiavtxwv mus txeeb luag tej tebchaws nyob? Leejtwg npaj siab li no tawmtsam lub nroog Tiles uas yog lub nroog nom nroog tswv, cov tub lag tub luam uas nyob hauv puavleej yog cov nomtswv uas muaj meejmom tshaj plaws hauv ntiajteb no los? Tus TSWV uas muaj hwjchim loj kawg nkaus twb npaj siab rau lub nroog ntawd lawm. Nws yuav rhuav lawv tej kev khavtheeb, tej uas lawv muaj thiab muab cov neeg uas muaj koob muaj meej txo kom poob ntsejmuag. Cov neeg txua nkoj uas nyob tim tebchaws Xapees, nej cia li mus ua nej tej teb kom thoob plaws hauv lub tebchaws! Nyob qhov ntawd tsis muaj leejtwg tsomkwm nej lawm. Tus TSWV tsa nws txhais tes rau saum hiavtxwv thiab nws muab txhua lub tebchaws co ua zog koog. Nws samhwm kom muab cov neeg uas nyob hauv lub xeev Faunikias tej chaw ua lag ua luam rhuav kom puastsuaj. Thiab nws hais tias lub nroog Xidoos uas yog tus ntxhais nkaujxwb, koj tej kev zoo siab tsis muaj lawm; thiab koj cov neeg puavleej raug tsimtxom. Txawm yog lawv khiav mus rau tim Xaipas los lawv yeej tsis muaj kev kaj siab hlo li. ( Twb yog cov Npanpiloos muab lub nroog Tiles ua tej tsiaj qus lub chaw nyob, tsis yog cov Axilias ua. Twb yog cov Npanpiloos tuaj puab lawv tej chaw tsomfaj rau hauv, lawv muab lub nroog Tiles tej vajtse uas txhim zeb rhuav povtseg thiab muab lub nroog ntawd ua puastsuaj tas.) Cov neeg ua haujlwm hauv nkoj, nej cia li quaj nyiav! Lub nroog uas nej cia siab rau twb raug puastsuaj tas lawm. Thaum txog hnub ntawd, lawv yuav tsis nco qab txog lub nroog Tiles mus txog xya caum xyoo uas yog tas ib tug vajntxwv tiam neej. Thaum tas xya caum xyoo lawm, yuav muaj tej yam tshwmsim rau lub nroog Tiles raws li tus niamntiav zaj nkauj uas hais tias, Nqa koj lub nkauj nogncas mus ncig kom thoob lub nroog no, Tus niamntiav uas tsis muaj neeg nco txog lawm. Cia li ntaus nkauj nogncas thiab hu koj tej nkauj coj cov txivneej rov qab los dua ib zaug ntxiv los mas! Thaum dhau xya caum xyoo lawm, tus TSWV yuav cia lub nroog Tiles rov qab los ua niamntiav li qub, thiab nws yuav xa nws cov neeg mus ua niamntiav rau txhua lub tebchaws hauv ntiajteb no. Tej nyiaj uas nws ua lag ua luam tau los yuav muab fij rau tus TSWV. Nws yuav tsis khaws ib qho cia li; cov neeg uas pehawm tus TSWV yuav tau nws cov nyiaj ntawd mus yuav zaub mov thiab yuav ris tsho hnav. Tus TSWV yuav muab lub ntiajteb ua kom puastsuaj thiab muab tso povtseg kom nyob qhuav qhawv tsis muaj dabtsi. Nws yuav muab lub ntiajteb ntxeev kom tej neeg tawg mus nyob ua sab ua sua. Yuav zoo ib yam li ntawd rau cov povthawj thiab cov pejxeem, cov tswv thiab cov qhev, cov pojnom thiab cov ntxhais qhev, cov muag thiab cov yuav, cov qiv thiab cov txais, cov muaj thiab cov pluag. Lub ntiajteb yuav raug muab tso povtseg kom tawg ntsoog ntxaws thiab puastsuaj tas. Tus TSWV tau hais tej lus no thiab yuav ua kom tej ntawd tiav. Lub ntiajteb yuav qhuav nkig nkuav; neeg thoob ntiajteb yuav qaug zog; lub ntiajteb thiab lub ntuj yuav tib txhij puastsuaj mus. Neeg tau ua rau lub ntiajteb poob kev txhaum vim lawv tsis coj Vajtswv tej kevcai thiab tsis ua raws li nws tej lus uas tau cog tseg mus ibtxhis. Yog li ntawd, lub ntiajteb thiaj raug Vajtswv tej lus foom. Neeg thiaj raug kev puastsuaj raws li tej kev txhaum uas lawv tau ua los lawm. Vim li ntawd, thiaj li seem qee leej lawm xwb. Cawv txiv hmab tshiab tsawg zuj zus, thiab tej tsob txiv hmab qhuav tas lawm. Txhua tus uas muaj kev zoo siab nimno ntxhov siab kawg, thiab lawv tej suab nkauj nogncas thiab suab nruas uas nrov lomzem xauv npo puavleej ntsiag tas. Qhov ntawd tsis muaj kev haus cawv hu nkauj lomzem hlo li; cawv iab kawg nkaus rau cov neeg uas haus cawv. Hauv lub nroog txhua yam nyob khoob lug cia, thiab tej neeg sawvdaws muab lawv xauv rau hauv lawv tej tsev kom tsis muaj neeg mus qhib tau hlo li. Tej neeg tuaj quaj qw tom tej plawv kev vim tsis muaj cawv haus. Kev zoo siab yuav tsis muaj mus ibtxhis; twb muab txojkev zoo siab tshem tawm hauv lub tebchaws mus lawm. Lub nroog los raug puastsuaj, thiab muab tej roojvag nroog rhuav povtseg tas. Tej xwmtxheej no yuav los raug txhua haivneeg uas nyob hauv lub qab ntuj no. Lub ntiajteb yuav zoo ib yam li lub caij sau qoobloo xaus, thiab zoo ib yam li de tej txiv ntoo roj saum txhua tsob ntoo thiab de tej ntxaib txiv hmab kawg ntawm cov hmab. Cov neeg uas seem yuav tsa suab hu nkauj zoo siab. Cov neeg uas nyob sab Hnubpoob yuav qw zoo siab rau tus TSWV lub hwjchim uas loj kawg nkaus, thiab cov neeg nyob sab Hnubtuaj yuav ua tus TSWV tsaug; tej tebchaws uas nyob raws ntug hiavtxwv yuav ua tus TSWV uas yog cov Yixalayees tus Vajtswv tsaug. Peb yuav hnov haivneeg Yixalayees hu nkauj deb deb puag tim qab ntuj kawg tuaj qhuas tus uas Ncaj Ncees. Tiamsis tsis muaj kev cia siab rau kuv li! Kuv raug puastsuaj lawm, kuv raug puastsuaj lawm lauj! Kuv raug kev ntxhov siab kawg li! Cov neeg ntxeev siab yimhuab ntxeev siab; lawv tej kev dag thiab kev phem huam loj zuj zus. Neeg ntiajteb! Nej cia li mloog kuv hais; kev txhawj kev ntshai, qhov hlauv thiab nta npuj cuab rawv tos nej kev lawm. Txhua tus uas khiav txojkev ntshai yuav mus poob lub qhov hlauv, thiab txhua tus uas khiav kom dim lub qhov hlauv yuav mus mag rooj nta npuj. Rooj ntug qhib plho tuamtsam nag laub lug saum ntuj los thiab ua rau lub ntiajteb co ua zog koog. Lub ntiajteb twb tawg ua tej nplais, lub ntiajteb faib pes hlo ua tej txauj thiab lub ntiajteb yoj cuag tus tsi. Lub ntiajteb ntog ib yam li tus neeg qaug cawv thiab ua yoj ua yees ib yam li nagxob nagcua ntsawj lub tsev pheebsuab. Tej kev txhaum hnyav kawg tsuam lub ntiajteb, nws thiaj ntog thiab sawv tsis taus ib zaug ntxiv li lawm. Hnub ntawd tus TSWV yuav rau txim rau cov muaj hwjchim uas nyob saum nruab ntug thiab cov vajntxwv hauv lub ntiajteb no. Vajtswv yuav sau tagnrho cov vajntxwv tuaj kaw ua ke rau hauv lub qhov av; nws yuav muab lawv kaw nkaus rau hauv tsev lojcuj mus txog hnub uas nws txiav txim rau lawv. Lub hli yuav tsaus thiab lub hnub yuav tsis ci lawm, rau qhov tus TSWV uas muaj hwjchim loj kawg nkaus yuav ua vajntxwv kav saum lub Roob Xi-oos thiab hauv lub nroog Yeluxalees; nws lub tshwjchim uas ci ntsa iab yuav tshwm los rau nws cov txwjlaug pom. Tus TSWV, koj yog kuv tus Vajtswv; kuv yuav hwm koj thiab qhuas koj lub npe. Koj tau ua ntau yam txujci tseemceeb tiav tas los lawm; koj ua ncaj ua ncees thiab ua tseeb raws li koj tau npaj tseg puag thaum ub los lawm. Koj tau ua rau ntau lub nroog puastsuaj tas, thiab muab lawv tej chaw fajxwm rhuav povtseg huv tibsi. Tej loog uas peb cov yeebncuab ua tseg rau hauv lub nroog yuav tsis txhim kho ntxiv mus tas ibtxhis. Txhua haivneeg uas muaj zog yuav qhuas koj; Tej nroog uas tej haivneeg limhiam nyob yuav ntshai koj. Koj yog lub chaw cawm siav rau cov neeg pluag thiab txomnyem, thiab cawm lawv dim thaum lub sijhawm uas lawv ntsib kev nyuaj siab. Koj yog lub tsev rau lawv nraim nagxob nagcua thiab yog tus duab ntxoov ntxoo rau lawv nraim tshav. Cov neeg limhiam ntaus lawv ib yam li cua daj cua dub ntsawj thaum lub caij ntuj no, thiab ib yam li tshav kub heev hauv lub tebchaws ntuj qhua teb nkig. Tiamsis Vajtswv, koj tau ua rau peb tej yeebncuab ploj tas lawm; koj ua rau cov neeg limhiam tej suab qw ntsiag tas ib yam li tauv huab roos tshav ntuj kub. Nyob saum Roob Xi-oos, tus TSWV uas muaj hwjchim loj kawg nkaus yuav npaj ib rooj mov rau txhua haivneeg hauv ntiajteb noj, yog ib rooj mov uas muaj tej zaub mov thiab tej cawv uas qab heev. Thaum nyob saum lub roob nws yuav muab txhua haivneeg tej kev nyuaj siab uas zoo ib yam li tauv huab tshem mus povtseg. Tus TSWV uas kav ib puas tsav yam yuav rhuav txojkev tuag kom puastsuaj mus ibtxhis; nws yuav so txhua tus lub kua muag, thiab nws yuav rhuav qhov uas lub ntiajteb no tsimtxom nws haivneeg. Tus TSWV yog tus hais tej lus no. Thaum muaj tej xwmtxheej no lawm, txhua tus neeg yuav hais tias, “Nws yog peb tus Vajtswv! Peb tso siab plhuav rau nws, thiab nws tau cawm peb txojsia. Nws yog tus TSWV! Peb tso siab plhuav rau nws; nimno peb zoo siab thiab xyivfab heev vim nws cawm peb dim lawm.” Tus TSWV yuav tsomkwm lub roob Xi-oos no, tiamsis yuav tsuj cov Mau-am ib yam li tsuj tej quavnyab npleg rau hauv pashawv. Lawv tsa tes ib yam li yuav ua luam dej, tiamsis tus TSWV yuav ua kom lawv poob ntsejmuag, thiab lawv tej npab yuav tsaug leeg. Nws yuav muab cov Mau-am tej chaw tsomfaj thiab lawv tej ntsa yeej uas siab rhuav kom puastsuaj thiab tsoo kom tawg tas xyaw hmoov av. Hnub ntawd yuav hu zaj nkauj no nyob hauv tebchaws Yudas: Peb muaj ib lub nroog ruaj khov heev; Vajtswv yog tus ntsa yeej uas thaiv lub nroog kom muaj txojkev cawm dim. Cia li qhib tej roojvag nroog tso haivneeg ncaj ncees uas ua raws li Vajtswv lub siab nyiam mus nyob hauv lub tebchaws ntawd. Tus TSWV, koj muab txojkev kaj siab uas zoo kawg nkaus rau cov neeg uas muab siab npuab koj, vim lawv tso siab pluav rau koj. Cia siab rau tus TSWV; nws yuav ua phab pobzeb tiv thaiv peb mus ibtxhis. Nws txo kom cov neeg khavtheeb poob hwjchim; nws muab cov neeg uas muaj zog lub nroog rhuav kom puastsuaj, thiab muab tej ntsa yeej tsoo kom vau tas rau hauv av. Nimno cov neeg txomnyem thiab cov neeg pluag yuav muab lub nroog ntawd tsuj nthi rau hauv lawv xibtaws. Tus TSWV, koj ua txojkev du heev rau cov neeg ncaj ncees taug; txojkev uas lawv taug tiaj heev. Peb yeej coj rawv koj txoj kevcai, thiab peb tos rawv koj ib leeg xwb; peb nco ntsoov koj lub npe rau nruab siab. Hmo ntuj kuv lub siab xav ntsoov txog koj; nruab hnub kuv lub siab xyivfab hlo nrhiav koj. Thaum koj txiav txim rau neeg ntiajteb, lawv yuav paub koj txojkev ncaj ncees. Txawm yog koj ua zoo npaum twg rau cov neeg siab phem los lawv yeej tsis paub txojkev ncaj ncees hlo li. Txawm yog lawv nyob hauv lub tebchaws uas muaj kev ncaj ncees no los lawv tseem pheej ua kev txhaum tsis tseg thiab tsis lees paub koj lub hwjchim uas loj kawg nkaus. Tus TSWV, koj yeej tsa tes siab kawg, tiamsis lawv tsis pom li. Cia lawv pom koj txojkev mob siab rau koj haivneeg, thiab cia lawv raug txajmuag. Cia cov hluavtaws uas koj npaj tseg rau koj cov yeebncuab kub lawv. Tus TSWV, koj pub kev thajyeeb rau peb; txhua tsav yam uas peb ua tiav lawm, twb yog koj pab peb. Tus TSWV uas yog peb tus Vajtswv, peb raug lwm tus tswv kav peb, tiamsis peb lees paub koj lub npe nkaus xwb. Nimno lawv twb tuag tas thiab tsis ciaj sia li lawm. Lawv tej ntsujplig yuav tsis sawv, vim koj yog tus rau txim rau lawv thiab ua kom lawv puastsuaj. Tiamsis tus TSWV, koj tau ua rau peb haivneeg huamvam thiab, nthuav peb lub tebchaws kom dav, koj yuav tau txais koob meej zoo kawg nkaus li. Tus TSWV, koj rau txim rau koj haivneeg, thiab lawv yuav thov koj thaum lawv raug kev nyuaj siab. Tus TSWV, koj ua rau peb quaj ib yam li tus pojniam uas quaj thaum nws mob plab yug menyuam. Peb suab menyuam thiab mob plab, tiamsis peb yug tsis tau dabtsi. Peb coj tsis tau kev cawm dim los rau hauv lub ntiajteb, thiab peb muab tsis tau txojsia rau neeg los yug hauv ntiajteb no. Peb cov neeg uas tuag lawm yuav rov muaj sia dua! Lawv tej cev yuav sawv rov qab los muaj sia. Cov neeg uas pw hauv tej qhov ntxa yuav sawv los hu nkauj zoo siab. Yog li ntawd, Vajtswv yuav tsa cov neeg uas tuag tau ntev lawm sawv los ib yam li lub lwg dej uas ci rau lub ntiajteb thaum sawv ntxov. Kuv haivneeg, nej cia li khiav rov qab mus rau hauv nej tej tsev thiab kaw qhovrooj rau. Nkaum tos kom Vajtswv txojkev chim dhau tso. Tus TSWV nqis saum ntuj uas yog nws qhov chaw nyob los rau txim rau neeg ntiajteb, vim lawv tej kev txhaum. Av yuav tsis nqus cov neeg uas raug luag tua tej ntshav, thiab lub ntiajteb yuav tsis faus cov neeg uas raug luag tua tuag lub cev. Hnub ntawd tus TSWV yuav siv nws lub hwjchim thiab muab nws rab ntaj rau txim rau tus Levi-athas uas yog tus nab txwj nab laug uas khiav lawm, tus Levi-athas ntawd yog tus nab txwj nab laug uas nkhaus ntswj pesyos, thiab nws yuav muab tus zaj uas nyob hauv hiavtxwv tua povtseg. Hnub ntawd tus TSWV yuav hais rau lub vaj txiv hmab uas ntxim siab hais tias, “Kuv uas yog tus TSWV, kuv tsomkwm nws, thiab kuv rau siab ntso ywg dej rau nws txhua lub sijhawm. Kuv zov rawv nws nruab hnub hmo ntuj kom tsis txhob muaj leejtwg tuaj ua phem rau nws. Kuv tsis chim rau lub vaj txiv hmab lawm. Yog tej hmab pos thiab ntoo pos sawv ua rog tawmtsam kuv, kuv yuav muab lawv hlawv kom kub hnyiab tas huv tibsi. Tiamsis yog kuv haivneeg cov yeebncuab xav kom kuv tsomkwm lawv, cia lawv cog kev phoojywg nrog kuv. Cia lawv cog phoojywg nrog kuv.” Muaj ib hnub tom ntej no Yakhauj cov xeebntxwv yuav nrhau cag ib yam li tsob ntoo, haivneeg Yixalayees yuav hlav nplooj thiab tawg paj. Thiab tej txiv yuav puv nkaus lub ntiajteb. Nws puas tau ntaus lawv ib yam li nws ntaus cov neeg uas tuaj ntaus lawv? Lossis lawv puas raug hlais ib yam li hlais cov neeg uas tuaj hlais lawv? Tus TSWV rau txim rau nws haivneeg uas yog tso lwm haivneeg tuaj ntes lawv. Nws coj lawv tawm nrog cov cua phem uas ntsawj sab hnubtuaj tuaj. Qhov uas yuav zam tau Yakhauj lub txim, yog yuav tsum muab tej pobzeb uas teeb lub thaj tsoo kom tawg ua hmoov tas ib yam li hmoov zebsib, thiab tsis txhob tseg ib lub thaj teev tus mlom pojniam Aselas lossis tej thaj hlawv hmoov tshua tsw qab nyob qhov twg li. Lub nroog uas txhim zeb khov kho raug puastsuaj tas. Nws yuav ua suabpuam ib yam li tej roob mojsab qhua tsis muaj dabtsi. Thiab nws yuav ciaj ua ib lub tshav zaub rau tej menyuam yaj noj, pw thiab zom zaub. Thaum tej ceg ntoo qhuav lawm, ces yeej yuav lov thiab tej pojniam yuav mus khaws los ua taws rauv. Vim haivneeg no tsis totaub, mas Vajtswv tus uas tsim lawv yuav tsis hlub lawv. Hnub ntawd txij ntua ntawm tus dej Efalates mus txog ntua nram cov Iziv tus ciamteb, tus TSWV yuav txheeb nws haivneeg ib tug zuj zus ib yam li tsoov tej npluag nplej tawm ntawm cov tseem nplej. Thiab hnub ntawd luag yuav tshuab raj tshuab xyu hu cov Yixalayees uas mus ploj rau pem tebchaws Axilias thiab raug ntiab mus rau nram tebchaws Iziv lawm, rov los pehawm tus TSWV saum lub roob dawbhuv hauv lub nroog Yeluxalees. Cov Efalayees yuav raug kev puastsuaj! Cov thawjcoj uas quav cawv lub kausmom yuav poob saum lawv taubhau los ib yam li tej paj ntoos zeeg. Lawv pleev roj tsw qab thiab tsa taubhau siab siab, tiamsis lawv pw ib yam li tus neeg qaug cawv uas twb yuav tuag. Saib lauj, tus TSWV npaj tau ib tug uas muaj hwjchim thiab muaj zog heev tuaj tawmtsam lawv; nws yuav tuaj ib yam li ib nthwv cua daj cua dub uas nrog lawg thiab ib yam li ib kob nagxob nagcua ua rau dej huam nphau nphwv los nyab thoob plaws lawv lub tebchaws. Cov Efalayees tej thawjcoj uas quav cawv thiab khavtheeb yuav raug muab tsuj ntiag rau hauv xibtaws. Cov thawjcoj uas khavtheeb ntawd lub koob meej tabtom yuav ploj mus ib yam li thawj phaum txiv ncuavpias uas xub siav, thiab leejtwg pom los cia li de noj. Muaj ib hnub tus TSWV uas muaj hwjchim loj kawg nkaus yuav ua lawv lub kausmom yeebkoob uas muaj meejmom kawg nkaus thiab ci ntsa iab rau nws haivneeg uas seem. Nws yuav pub lub siab uas muaj kev ncaj ncees rau tus neeg uas txiav txim thiab txhawb cov tubrog uas zov ntawm roojvag nroog kom muaj lub siab tawv. Cov povthawj thiab cov cev Vajtswv lus puavleej qaug cawv ntog pujpoog. Vim lawv haus cov cawv uas muaj zog heev, lawv thiaj tsis sib haum; lawv ntog pujpoog tsis meejpem, lawv thiaj tsis totaub tej yogtoog uas Vajtswv qhia thiab tsis paub tu tej plaub ntug uas luag coj tuaj rau lawv hais. Lawv tej rooj lo ntuav qias neeg ntsuav tsis muaj ib qho uas yuav huv siab hlo li. Lawv yws kuv kawg li. Lawv hais tias, “Nws yuav qhia tej kev txawj ntse rau leejtwg? Thiab nws yuav piav nws tej lus rau leejtwg? Nws qhia rau cov menyuam uas nyuam qhuav tso mis tseg los? Nws ua tib zoo qhia rau peb kawg li, nws qhia ib los rau ib los, ib kab rau ib kab thiab ib zaj rau ib zaj.” Yog nej tsis mloog kuv lus, ces Vajtswv yuav txib lwm haivneeg uas hais lus txawv tuaj qhia nej. Tus TSWV caw kom nej sawvdaws cia li so thiab nyob tso siab plhuav, tiamsis nej tsis mloog nws lus li. Twb yog vim li no, tus TSWV thiaj li qhia nej ib los rau ib los, ib kab rau ib kab thiab ib zaj rau ib zaj. Nej thiaj dawm txhua kauj ruam; thiab nej yuav mag nta npuj, raug mob thiab raug ntes coj mus kaw. Nej cov thawjcoj khavtheeb uas kav cov pejxeem hauv lub nroog Yeluxalees, nej cia li mloog tus TSWV hais. Rau qhov nej hais tias, “Peb tau coglus nrog kev tuag thiab tubtuag teb lawm. Mas peb tso siab hais tias thaum kev puastsuaj los peb yuav tsis tuag; vim peb vamkhom tej lus dag ntawd tsomkwm peb.” Twb yog vim li ntawd tus TSWV uas kav ib puas tsav yam thiaj hais tias, “Kuv muab ib lub pobzeb uas twb sim thiab tawv heev uas yog tus cag cog ruaj khov los tiag lub nroog Xi-oos: ‘Yog leejtwg ntseeg nws, tus ntawd yuav tsis raug kev ntxhov siab.’ Kuv yuav muab kev ncaj ncees ua txoj hlua ntsuas qhov ntev thiab muab kev tseeb ua lub thauj ntsuas qhov ntseg.” Lawg yuav los ntaus tej kev dag uas nej vamkhom thiab dej yuav kuav nej tej chaw cawm siav kom puastsuaj. Tej lus uas nej tau cog nrog kev tuag yuav raug muab rhuav mus, thiab tej lus uas nej pom zoo nrog tubtuag teb yuav muab tso povtseg; thaum kev puastsuaj los nej thiaj li yuav kovyeej. Txhua zaus uas kev puastsuaj yuav los coj nej mus; nws yuav los ib tagkis rau dhau ib tagkis, ib hnub dhau rau ib hnub thiab ib hmo dhau rau ib hmos. Txhua zaj lus uas Vajtswv hais yuav coj kev ntshai los ntxiv xwb. Koj zoo ib yam li tus neeg nyob hauv zaj pajlug uas hais tias nws pw lub txaj luv uas tsis txaus xyab taw, thiab vov daim pam nqaim uas npog tsis tas lub cev. Tus TSWV yuav sawv saum lub Roob Pelaxees thiab hauv lub hav Nkinpe-oos ua nws tes haujlwm, yog tes haujlwm uas sawvdaws tsis tau pom dua. Nws yuav ua kom nws tes haujlwm tiav, yog tes haujlwm uas txawv kawg li. Tsis txhob saib tsis taus kuv tej lus ceebtoom, nyob tsam txoj saw hlau hajyam yuav khi nej ruaj. Kuv twb hnov tus TSWV uas muaj hwjchim loj kawg nkaus txiav txim siab yuav muab lub tebchaws ua kom puastsuaj lawm. Tig pobntseg mloog lub suab uas kuv hais; ua tib zoo mloog tej lus uas kuv qhia. Tus neeg uas laij teb tseb nplej, nws niaj hnub mus laij li xwb los? Nws niaj hnub mus laij thiab haiv kom tej av ntxheev xwb los? Thaum nws mus pheej cov av tiaj lawm, nws txawm tseb noob zaub txhwb qaib thiab zaub txhwb nyug rau. Nws cog nplej ua tej kab thiab cog pobkws rau tej thaj uas cia cog pobkws, thiab muab lwm yam noob mus tseb rau ntawm nws tej ntug teb. Nws yeej paub ua nws yam haujlwm, rau qhov Vajtswv qhia rau nws. Nws tsis muab tus qws ntaus nplej los ntaus noob zaub txhwb nyug lossis nws tsis thawb tsheb mus luam noob zaub txhwb qaib; tiamsis nws muab tus pas sib sib ntaus noob zaub txhwb qaib thiab noob zaub txhwb nyug xwb. Yuav tsum muab nplej zom ua hmoov puab ncuav; tsis yog nws niaj hnub tsoov nplej mus ibtxhis li. Txawm yog nws cab nees luag tsheb mus tsuj nplej los nees yeej tsis tsuj tej txhuv kom ntsoog li. Tej tswvyim ntawd puavleej yog los ntawm tus TSWV uas muaj hwjchim loj kawg nkaus los xwb. Nws yog tus tuavxam uas zoo heev thiab muaj tswvyim kawg nkaus li. Yeluxalees uas yog Vajtswv lub thaj thiab lub nroog uas Daviv tsuam yeej yuav raug puastsuaj lauj! Cia li ua kevcai thiab ua rooj noj rooj haus ib xyoo dhau ib xyoo raws li lub caij nyoog uas teem tseg, Vajtswv mam tso kev puastsuaj los raug lub nroog uas hu ua “Vajtswv lub thaj.” Thaum ntawd yuav muaj kev quaj nyiav, thiab tagnrho lub nroog yuav zoo ib yam li lub thaj uas muaj ntshav nplooj nkaus saud. Vajtswv yuav tsuam yeej thiab ua chaw tsomfaj ibncig lub nroog thiab yuav tawmtsam koj. Kuv yuav tsuam yeej tawmtsam koj ib yam li Daviv. Ces koj yuav hais lus puag hauv lub qhov uas tob heev tuaj; koj yuav hais lus puag hauv qab tivtxwv tuaj; koj lub suab yuav hais hauv qhov av tuaj ib yam li pojntxoog lub suab, thiab koj yuav hais lus ntxhi hauv av tuaj. Yeluxalees, koj cov yeebncuab uas coob ua npoj ntws tuaj tua koj yuav raug ntsawj ya ib yam li hmoov av, thiab lawv cov tubrog uas txaus ntshai yuav raug ntsawj ya ib yam li tej npluag nplej. Tib npliag ntshis xwb, tus TSWV uas muaj hwjchim loj kawg nkaus yuav los cawm nej, nws yuav ua xob nroo, ua av qeeg, ua cua daj cua dub thiab ua tej nplaim taws uas hlawv kom kub dulug los pab nej. Txhua haivneeg uas tuaj tua lub nroog uas yog Vajtswv lub thaj, lawv tej cuabyeej ua rog thiab txhua yam puavleej yuav yaj thiab ploj huv tibsi ib yam li ua npau suav hmo ntuj, thiab zoo li tus neeg tshaib plab uas ua npau suav noj mov, tiamsis thaum tsim los tseem tshaib plab li qub lossis zoo li tus neeg nqhis dej uas nws ua npau suav haus dej, tiamsis thaum tsim los tseem nqhis dej thiab qa qhuav qhawv. Txhua haivneeg uas tuaj tua lub nroog Yeluxalees yuav zoo ib yam li ntawd ntag. Cia li ua neeg ruam los mas! Cia li ua neeg digmuag los mas! Cia li ua neeg vwm loj vwm leg, tiamsis tsis yog vwm cawv, cia li ntog pujpoog, tiamsis tsis yog qaug cawv txiv hmab! Tus TSWV ua kom nej ncaws dab ntub thiab tsaug zog looj hlias. Twb tsimnyog cov cev Vajtswv lus ua sawvdaws lub qhovmuag pom kev, tiamsis Vajtswv muab lawv tej qhovmuag npog lawm. Lub ntsiab lus uas txhua tus cev Vajtswv lus ua yogtoog pom yuav muab zais tsis pub nej paub zoo ib yam li thooj ntawv uas ntaus homthawj rau lawm. Yog nej coj mus rau ib tug uas paub nyeem thiab thov kom nws nyeem rau nej mloog, nws yuav teb hais tias, “Kuv tsis nyeem rau qhov ntaus homthawj rau lawm.” Yog nej muab thooj ntawv ntawd rau tus uas tsis paub nyeem thiab thov nws nyeem rau nej mloog, nws yuav teb hais tias, “Kuv tsis paub nyeem.” Tus TSWV hais tias, “Cov neeg no lub ncauj qhuas kuv, tiamsis lawv lub siab tsis npuab kuv, tej lus uas lawv qhuas kuv tsis muaj qabhau li. Qhov uas lawv pehawm kuv tsuas yog ua raws li kevcai thiab neeg qhia xwb. Vim li ntawd, kuv yuav rov ua tej txujci uas txawv heev rau cov neeg no pom dua kom lawv xav tsis thoob li; cov neeg ntse lub tswvyim yuav ruam tas, thiab kev txawj ntse ntawm cov neeg txawj ntse yuav ploj tas.” Lawv cov uas muab tej tswvyim zais tsis pub tus TSWV paub yuav raug puastsuaj lauj! Lawv ua tej yam nraim nkoos hauv qhov tsaus ntuj nti thiab xav hais tias tsis muaj leejtwg pom thiab paub hais tias lawv ua dabtsi. Lawv pom qhov zoo yog qhov phem! Tus puab laujkaub av thiab cov av, yam twg tseemceeb dua? Yam uas tus neeg ntawd puab puas muaj cuabkav hais rau tus puab hais tias, “Koj twb tsis tau puab kuv los sav”? Lossis yam uas nws puab ntawd puas hais rau tus puab hais tias, “Koj twb tsis muaj kev txawj ntse li.”? Puas yog tshuav tsis ntev lawm, lub havzoov Lenpanoos yuav dhau mus ua teb, thiab tej teb yuav rov ua havzoov? Thaum ntawd cov neeg uas lag ntseg yuav hnov luag nyeem ntawv, thiab cov neeg digmuag uas ua lub neej tsaus ntuj nti yuav pom kev. Cov neeg pluag thiab cov neeg txo hwjchim yuav tau txojkev kaj siab los ntawm tus TSWV uas yog cov Yixalayees tus Vajtswv uas dawbhuv. Tus uas tsimtxom luag lwm tus thiab pheej thuam Vajtswv yuav ploj mus. Txhua tus neeg uas pheej nyiam ua kev txhaum yuav raug kev puastsuaj. Cov neeg uas saib tsis taus lwm tus, cov neeg uas txheem tej plaub ntug tua neeg, thiab cov neeg uas ua timkhawv tsis tseeb ntxo cov neeg ncaj ncees kom raug txiav txim, Vajtswv yuav muab ua kom puastsuaj tas. Vim li ntawd, tus TSWV uas yog cov Yixalayees tus Vajtswv uas cawm Anplahas dim txojkev ntxhov siab hais tias, “Kuv haivneeg, nej yuav tsis txajmuag, thiab nej lub ntsejmuag yuav tsis ntshaus ntxiv li lawm. Thaum nej pom tej tubki uas kuv yuav pub rau nej, ces nej yuav paub hais tias kuv yog cov Yixalayees tus Vajtswv uas dawbhuv. Nej yuav tsum hwm kuv thiab paub ntshai kuv. Cov neeg ruam yuav totaub, thiab cov uas yws tujtaws yuav nyiam kawm Vajtswv txoj kevcai.” Tus TSWV hais tias, “Yudas cov thawjcoj raug kev puastsuaj vim lawv ntxeev siab rau kuv. Lawv ua raws li lawv lub tswvyim uas tsis yog kuv muab rau lawv, thiab lawv mus coglus nrog lwm haivneeg tawmtsam kuv, lawv thiaj ua txhaum tsub kev txhaum ntxiv zuj zus.” Lawv mus cuag cov Iziv kom pab lawv, tiamsis lawv tsis sablaj rau kuv li. Lawv xav kom cov Iziv pab lawv, yog li ntawd, lawv thiaj tso siab rau cov Iziv tus vajntxwv. Tiamsis Falaus txojkev pab yuav ua rau lawv txajmuag, thiab cov Iziv txojkev tiv thaiv yuav ua rau lawv poob ntsejmuag. Txawm yog lawv cov nomtswv mus txog rau hauv cov Iziv lub nroog Xau-as thiab lub nroog Hanes lawm los cov Yudas yuav raug kev txajmuag, rau qhov haivneeg ntawd ibtxwm pab tsis tau lawv, haivneeg ntawd yeej pab tsis tau lossis tsis muaj nqis rau lawv li, tiamsis tsuas coj kev txajmuag thiab kev poob ntsejmuag los rau lawv xwb. Ntawm no yog cov lus uas Vajtswv hais rau cov tsiaj nram tiaj suabpuam hais tias, “Cov nomtswv taug kev mus hla hauv lub tebchaws uas muaj kev txhawj ntshai, muaj tsov ntxhuav, muaj nab thiab muaj tej zaj uas txawj ya nyob. Lawv muab lawv tej khoom muaj nqis rau lawv tej neesluav thiab ntxhuav thauj mus pub haivneeg uas pab tsis tau lawv. Cov Iziv txojkev pab tsis muaj nqis dabtsi li. Yog li ntawd, kuv thiaj tis ib lub npe tshiab rau cov Iziv hu ua ‘Tus Lahaj uas ua tsis tau dabtsi.’ ” Tamsim no koj cia li mus nyob tabmeeg lawv thiab muab sau ua ib phau ntawv khaws tseg, kom yav tom ntej thiaj li muaj ntawv ua povthawj hais txog lawv tej kev txhaum mus ibtxhis li. Vim lawv yog cov neeg ntxeev siab rau Vajtswv thiab yog cov neeg dag uas tsis mloog tus TSWV tej lus qhuab qhia. Lawv hais kom cov cev Vajtswv lus nyob twjywm. Lawv hais tias, “Tsis txhob qhia tej qhov tseeb rau peb paub. Qhia tej uas peb nyiam rau peb mloog xwb. Cia peb ua raws li peb lub siab nyiam xwb. Cia li khiav mus thiab tsis txhob thaiv peb kev. Peb tsis xav hnov nej hais txog cov Yixalayees tus Vajtswv uas dawbhuv hlo li.” Tiamsis cov Yixalayees tus Vajtswv uas dawbhuv hais tias, “Nej saib tsis taus kuv tej lus qhia, nej tsuas nyiam ua limhiam thiab ntxias dag xwb. Nej yog neeg txhaum plaub. Nej zoo li tus ntsa yeej siab siab uas tawg pleb thoob plaws lawm; tib npliag ntshis xwb nej yuav vau tawg tas. Nej yuav tawg ua tej daim ib yam li tej laujkaub av; tej txhais uas tawg ntawd tsis muaj ib daig uas yuav zoo khaws los yawm hluavncaig lossis twb tsis zoo ce dej hauv thoob los haus li.” Cov Yixalayees tus TSWV Dawbhuv uas kav ib puas tsav yam hais rau sawvdaws hais tias, “Cia li tig rov los so, nej thiaj yuav dim; nyob twjywm thiab cia siab rau kuv, nej thiaj yuav muaj zog.” Tiamsis nej tsis kam ua li ntawd. Nej caij nees khiav kom dim nej cov yeebncuab. Nej cia li khiav los mas! Nej xav hais tias nej cov nees khiav ceev heev, tiamsis cov uas raws nej qab tseem ceev tshaj nej lawm thiab! Thaum yeebncuab ib tug tubrog tuaj hem nej, txawm yog nej muaj ib txhiab leej los nej yuav cia li khiav, thiab luag tsib tug tubrog tuaj hem nej xwb los nej yuav khiav tagnrho. Nej yuav tsis tshuav ib yam dabtsi seem li, tsuas tshuav tus ncej chij uas txhos rau saum ncov roob xwb. Tus TSWV tos ntev loo yuav foom koob hmoov rau nej; yog li ntawd, nws thiaj los hlub nej. Rau qhov tus TSWV yog Vajtswv tus uas ncaj ncees; cov neeg uas tos nws yuav tau txais koob hmoov. Nej cov uas nyob hauv lub nroog Yeluxalees yuav tsis quaj ib zaug ntxiv li lawm. Tus TSWV yog tus uas muaj kev hlub, thaum nej thov nws pab, nws yuav teb nej tej lus thov. Tus TSWV yuav muab lub ncuav uas yog txojkev txomnyem los rau nej noj thiab cov dej uas yog kev nyuaj siab los rau nej haus, txawm li ntawd los nej tus Xibhwb yuav tsis khiav nkaum nej li lawm; nej lub qhovmuag yuav pom nws. Thaum nej taug kev mus sab xis lossis sab laug, nej yuav hnov nws lub suab hu tom qab tuaj hais tias, “Txojkev tseeb yog txoj no. Cia li taug txoj no ntag.” Ces nej yuav muab nej tej mlom uas muab nyiaj nchuav thiab tej mlom uas muab kub vuam, coj mus povtseg ib yam li tej pojniam coj khaubncaws daim ntaub, thiab qw hais tias, “Cia li tawm ntawm kuv mus.” Tus TSWV yuav tso nag los ywg nej tej noob qoob uas tseb rau hauv av kom tej qoobloo yuav tuaj hlob mos nyoos, thiab yuav ua rau nej sau tau qoobloo ntau, thiab nej tej tsiaj txhu yuav tau lub tshav zaub uas mos nyoos noj. Nej tej nyuj thiab tej neesluav uas laij teb, yuav tau noj tej zaub zoo uas muab duav thiab rawg hlau yawm los rau noj. Hnub uas nej txeeb tau nej cov yeebncuab tej chaw fajxwm thiab tua lawv cov neeg tuag tas lawm, thaum ntawd tej kwjdeg saum tej hauv roob thiab tej ncov roob siab yuav muaj dej txhawv ntws ntshiab si los. Lub hli yuav ci ib yam li lub hnub, thiab lub hnub yuav ci tshaj li lub hnub ibtxwm ci los lawm xya npaug ntxiv ib yam li muab xya hnub los ua ib zaug ci. Thaum ntawd tus TSWV yuav qhwv thiab kho nws haivneeg tej qhov txhab uas nws tso los raug lawv. Saib lauj! Yuav pom tus TSWV lub tshwjchim ci ntsa iab puag tim qab ntuj kawg tuaj. Nplaim taws thiab pa taws yog nws txojkev chim. Nws tej lus kub ib yam li nplaim hluavtaws. Nws tso ib nthwv cua ntsawj ua nws ntej ib yam li dej tshoob txhua yam mus. Nthwv cua ntawd ua rau ntau haivneeg raug kev puastsuaj, thiab muab khawb hlau los khawm cov neeg ntawd puabtsaig coj lawv mus kom yuam kev. Tiamsis nej cov uas yog Vajtswv haivneeg, nej yuav zoo siab thiab hu nkauj li hmo uas nej ua kevcai noj rooj mov dawbhuv. Nej yuav zoo siab ib yam li cov neeg uas tshuab raj tshuab xyu mus rau saum tus TSWV lub Roob uas yog cov Yixalayees lub Pobzeb. Tus TSWV yuav cia sawvdaws hnov nws lub suab uas muaj hwjchim thiab pom nws txojkev chim uas loj kawg nkaus. Qhov ntawd yuav muaj nplaim taws, huab dub, lawg pobzeb thiab nagxob nagcua tsaus nti nrov nroo ntws los. Thaum lawv hnov tus TSWV lub suab thiab nws muab nws rab qws ntaus lawv, cov Axilias yuav ntshai heev. Txhua qhov uas tus TSWV muab rab nplawm uas yog txojkev rau txim los nplawm lawv, mas yuav muaj suab raj suab xyu thiab suab nkauj nogncas nrov ntsoog qees. Vajtswv yuav tua cov Axilias hauv tshavrog kom puastsuaj tas. Lub cubtawg cig ntsaj thuav uas twb npaj tseg yuav hlawv tus huabtais uas kav tebchaws Axilias ntawd tob thiab dav heev, thiab muab taws los teeb puv nkaus rau. Tus TSWV yuav tshuab nplaim taws leejfaj mus kub cov taws kom cig. Cov neeg uas mus thov kom cov Iziv pab yuav raug puastsuaj lauj! Lawv cia siab rau cov Iziv cov tubrog caij nees, tej tsheb nees ntaus rog thiab cov tubrog. Tiamsis lawv tsis cia siab rau tus TSWV uas yog cov Yixalayees tus Vajtswv Dawbhuv kom nws pab lawv li. Tus TSWV yeej paub tej uas nws ua lawm! Nws tso kev puastsuaj los nws tsis thim nws tej lus rov qab. Nws rau txim rau cov neeg uas ua phem ua qias thiab cov uas pab cov neeg ua phem ua qias ntawd. Cov Iziv yog neeg xwb, tsis yog Vajtswv; lawv tej nees yog tsiaj xwb, tsis yog ntsujplig. Thaum tus TSWV xyab tes tuaj, cov neeg uas tuaj pab lawv yuav raug tsuj, thiab lawv cov neeg uas tau kev pab los yuav ntog pawglug, thiab lawv sawvdaws yuav raug puastsuaj ua ke. Tus TSWV hais rau kuv hais tias, “Txawm yog cov yug yaj qw thiab nthe npaum twg los tus tsov ntxhuav uas tom tau yaj lawm yeej tsis ntshai thiab tsis khiav li; ib yam li ntawd ntag, yeej tsis muaj ib yam dabtsi txwv tau kuv uas yog tus TSWV uas muaj hwjchim loj kawg nkaus kom khiav tsis txhob tsomkwm lub Roob Xi-oos li. Tus TSWV uas muaj hwjchim loj kawg nkaus yuav tsomkwm thiab tiv thaiv lub nroog Yeluxalees ib yam li tus noog ya saum nws lub zes tsomkwm nws cov menyuam ntag.” Vajtswv hais tias, “Haivneeg Yixalayees, nej ua txhaum rau kuv thiab tawmtsam kuv lawm. Tiamsis nimno nej cia li rov los cuag kuv! Hnub ntawd nej txhua tus yuav muab tej mlom nyiaj mlom kub uas nej nchuav ntawd sau huv tibsi coj mus povtseg. Cov Axilias yuav raug puastsuaj tas rau hauv tshavrog, tiamsis tsis yog neeg lub hwjchim ua. Cov Axilias yuav khiav tawm hauv tshavrog, thiab lawv cov tub hluas yuav raug ntes mus ua luag qhev. Lawv tus huabtais yuav ntshai heev thiab khiav tshee hnyo lawm, thiab cov nomtswv los ntshai kawg nkaus li, lawv yuav muab lawv tej chij ua rog tso povtseg huv tibsi.” Tus TSWV uas muaj lub chaw pehawm nyob saum Roob Xi-oos, thiab muaj lub cubtawg uas hlawv khoom fij nyob hauv lub nroog Yeluxalees yog tus hais ntag. Nej saib, yuav muaj ib tug vajntxwv kav ncaj ncees, thiab nws cov nomtswv los yuav tswjhwm raws li txojkev ncaj ncees. Cov nomtswv ntawd, txhua tus yuav zoo ib yam li lub tsev uas thaiv cua thiab lub chaw nkaum cua daj cua dub. Lawv yuav zoo ib yam li tej dej uas ntws hauv tiaj suabpuam, thiab zoo ib yam li lub tsua uas ntxoov lub tiaj mojsab qhua. Cov neeg uas qhovmuag pom kev yuav pom mus li, thiab cov neeg uas pobntseg hnov lus yuav hnov mus li. Cov neeg uas ua dog ua dig yuav txawj ntse thiab paub qabhau, thiab cov neeg uas nplaig txhav yuav hais tau lus meej npliag lias. Yuav tsis muaj leejtwg xav hais tias neeg ruam yog neeg tsimtxiaj lossis hais tias tus neeg siab nkhaus yog neeg ncaj ncees. Tus neeg ruam yeej hais tej zaj ruam thiab nws lub siab xav ntsoov ua tej yam phem; nws ua tsis ncaj, hais lus saib tsis taus tus TSWV, nws tsis pub mov rau cov neeg tshaib plab noj thiab nws tsis pub dej rau cov neeg nqhis dej haus. Tus neeg siab nkhaus yeej muaj lub siab phem thiab nws ua kev phem nkaus xwb; nws dag noj dag haus thiab tuavhauv txov cov neeg pluag lub neej thiab yuam cov neeg txomnyem txoj cai. Tiamsis tus neeg tsimtxiaj ua qhov ncaj thiab tuav rawv txoj cai xwb. Cov pojniam uas ua neej nyob qhuas ntxhias tsis txob tsis txhawj dabtsi, nej cia li mloog tej lus uas kuv hais! Nimno nej noj nyob tsau npo, tiamsis lwm xyoo txog lub caij no nej yuav txomnyem ntsuav vim yuav tsis muaj txiv hmab rau nej de lawm. Cov pojniam uas ua neej nyob qhuas ntxhias tsis txob tsis txhawj dabtsi, nimno nej cia li ntshai ua ibce tshee hnyo, cia li hle nej tej tsoos tsho povtseg thiab muab ntaubtsaj los npua. Cia li ntaus nej hauvsiab thiab tu siab vim nej tej teb uas zoo qoobloo thiab tej vaj txiv hmab uas txi txiv ncw twb puastsuaj tas; nroj tsuag thiab hmab pos twb tuaj laum kuv haivneeg tej av lawm; txhua lub tsev uas neeg nyob kaj siab lug, thiab tej nroog uas muaj neeg nyob lomzem xauv npo cia li quaj! Txawm yog vajntxwv lub loog los yuav muab tso povtseg thiab lub tuamceeb nroog los yuav ua suabpuam tas. Tej tsev thiab tej chaw fajxwm yuav raug kev puastsuaj mus ibtxhis. Yuav ua qhov chaw rau tej neesluav qus tau kev zoo siab thiab ua tshav zaub rau yaj noj. Tiamsis tus TSWV yuav txib nws tus ntsujplig los rau peb dua ib zaug ntxiv. Lub tebchaws uas ua quavpoj yuav rov ua lub tebchaws uas av zoo, thiab tej teb yuav zoo qoobloo heev. Yuav muaj kev ncaj ncees nyob hauv tiaj suabpuam, thiab muaj kev ua zoo nyob hauv tej teb uas muaj qoobloo nplua mias. Thaum ntawd txhua tus yuav ua ncaj ua ncees, yuav muaj kev thajyeeb thiab nyob kaj siab lug mus ibtxhis. Kuv haivneeg yuav nyob tso siab lug ntawm qhov chaw uas muaj kev thajyeeb, hauv lub tsev uas nyob kaj siab lug thiab tsis muaj kev ntxhov siab dabtsi. ( Txawm yog lawg yuav los ntaus tej havzoov, thiab yuav muab lub nroog tsoo kom puastsuaj tas los nej txhua tus cia li zoo siab, vim muaj dej txaus los ywg tej noob qoob uas nej tseb thiab muaj tshav zaub txhua qhov rau nej tej neesluav thiab tej nyuj noj.) Thov kom peb cov yeebncuab raug kev puastsuaj! Txawm yog tsis muaj leejtwg huab thiab ntxeev siab rau lawv los lawv mus huab thiab ntxeev siab rau luag. Tiamsis thaum kawg lawv yuav raug luag huab thiab ntxeev siab rau lawv. Tus TSWV, thov koj hlub tshua peb. Peb cia siab ntsoov rau koj xwb. Thov tsomkwm peb ib hnub dhau ib hnub thiab cawm peb thaum peb raug kev ntxhov siab. Thaum koj tuaj peb tog tua peb cov yeebncuab, mas lawv tawg khiav ri rws. Tej khoom uas nej huab tau los yuav raug luag muab sau mus tso ua ke ib yam li ntes tej kooj txomfav. Tus TSWV yog tus uas muaj hwjchim loj kawg nkaus, nws kav txhua tsav yam. Nws yuav ua rau lub nroog Yeluxalees muaj txojkev ncaj ncees thiab kev tseeb. Nws yuav ua rau nws haivneeg nyob ruaj khov. Nws tsomkwm nws haivneeg txhua lub sijhawm, nws pub lawv muaj tswvyim, muaj kev txawj ntse thiab kev cawm dim. Qhov uas lawv hwm tus TSWV yog kev vammeej thiab kev npluanuj rau lawv. Cov neeg siab tawv tabtom tsa suab hu kom luag pab; cov nomtswv uas nrhiav kev sib haumxeeb, lawv quaj tu siab nrho. Tej niam kev nphob xuav tseg thiab tsis muaj leejtwg tau luag taug. Lawv tsis ua raws li tej lus cog tseg, lawv tsis ua raws li tej lus uas ua timkhawv thiab lawv ib leeg yuav tsis hwm ib leeg li lawm. Lub tebchaws quaj ntsuag thiab tsaug muag heev; tej ntoo pem Roob Lenpanoos ntsws thiab qhuav tas. Lub hav Saloos uas zoo qoobloo ua suabpuam tas. Tej ntoo hauv tebchaws Npasas thiab saum roob Kalemees tuag thiab zeeg nplooj tas huv tibsi lawm. Tus TSWV hais rau txhua haivneeg hais tias, “Nimno kuv yuav ua ib yam haujlwm qhia rau sawvdaws pom hais tias kuv muaj hwjchim loj npaum li cas. Nej npaj siab ua tej uas tsis muaj nqis thiab txhua yam uas nej ua tsis muaj qabhau dabtsi. Nej cov pa zoo ib yam li cub hluavtaws uas yuav kub kom nej puastsuaj mus. Nej yuav tawg ntsoog ntxaws li tej pobzeb uas muab hlawv ua hmoov zebsib ib yam li tej hav pos uas muab hlawv ua tshauv tas lawm. Kom nej cov uas nyob deb thiab nyob ze tau hnov tej uas kuv ua tas los no, thiab lees paub kuv lub hwjchim uas loj kawg nkaus.” Cov neeg txhaum hauv Xi-oos ntshai tshee hnyo. Lawv hais tias, “Vajtswv txojkev txiav txim zoo li lub cubtawg uas kub mus ibtxhis. Peb puas yuav khiav dim lub cubtawg ntawd?” Yog nej hais lus tseeb thiab taug txojkev ncaj ncees xwb, nej yeej yuav dim. Nej tsis txhob muab nej lub hwjchim mus dag ntxias cov pluag thiab tsis txhob yuav tej nyiaj uas luag nqa tuaj xiab nej. Tsis txhob koom nrog cov neeg tuav tswvyim tua neeg lossis ua kev phem kev qias. Ces nej yuav tau zoo nyob kaj siab lug; nej yuav tau nyob ntawm lub chaw uas ruaj khov ib yam li lub chaw fajxwm. Nej yuav tau mov noj thiab tau dej haus tsau npo. Muaj ib hnub nej yuav pom ib tug vajntxwv uas muaj tshwjchim ci ntsa iab, nws yuav kav lub tebchaws uas loj thiab dav heev. Qhov uas nej ibtxwm ntshai lwm haivneeg cov nomtswv, cov sau se thiab cov neeg tshuajxwm thaum ub los tsuas zoo li nej ua npau suav lawm xwb. Nej yuav tsis pom lwm haivneeg uas hais lus khavtheeb thiab hais tej lus txawv uas nej tsis paub ntxiv li lawm. Cia li tsa qhovmuag ntsia lub nroog Xi-oos uas yog qhov chaw peb ua kevcai hwm Vajtswv. Cia li tsa qhovmuag ntsia lub nroog Yeluxalees uas yog qhov chaw sawvdaws yuav nyob kaj siab lug! Thiab nws yuav zoo li lub tsevntaub uas luag tsis tshem, tej tswg los tsis rho thiab tej hlua khi los yeej tsis tu li. Tus TSWV yuav ua rau peb pom nws lub tshwjchim uas ci tsa iab. Peb yuav nyob hauv tej tiaj nrag uas dav raws tej ntug dej loj thiab dej me, yeebncuab yuav tsis tsav nkoj mus los hauv tej dej ntawd li lawm. Vim tus TSWV yog tus uas txiav txim, tus TSWV yog tus uas kav peb, thiab tus TSWV yog peb tus vajntxwv, nws yuav cawm kom peb dim. Nej cov hlua twb xoob tas thiaj khi tus ncej tsis ruaj lawm, thiab daim ntaub thiaj li tsis nthuav. Ces peb thiaj li txeeb tau tej khoom ntau heev coj los sib faib; txawm yog tej neeg sav ceg los puavleej tau huv tibsi. Cov neeg uas nyob hauv peb lub tebchaws yuav tsis muaj leejtwg nroo hais tias, “Kuv muaj mob”; thiab tus TSWV yuav zam lawv lub txim huv tibsi. Txhua haivneeg, cia li txav los kom ze! Sib sau los nyob ua ke thiab tig pobntseg mloog. Tagnrho lub qab ntuj thiab txhua tus uas nyob hauv ntiajteb cia li los ntawm no thiab tig pobntseg mloog. Vim tus TSWV chim heev rau txhua haivneeg thiab lawv cov yeebncuab. Nws thiaj rau txim hnyav rau lawv thiab muab lawv cob rau luag tua kom tuag tas huv tibsi. Tsis muaj neeg muab lawv faus, tiamsis yuav tso lawv tsw lwj ntxiag rau qhov ntawd; thiab ntshav yuav ntws liab ploog saum tej roob. Lub hnub, lub hli thiab tej hnubqub yuav poob tagnrho los rau hauv ntiajteb. Lub ntuj yuav ploj mus ib yam li thooj ntawv uas muab kauv cia, thiab tej hnubqub yuav poob ib yam li tej nplooj txiv hmab lossis tej nplooj txiv ncuavpias. Tus TSWV twb npaj nws rab ntaj tseg rau saum ntuj ceebtsheej lawm, nimno nws yuav los tawmtsam cov neeg Edoos uas nws twb teem txim tuag rau lawv lawm. Nws rab ntaj yuav lo lawv tej ntshav thiab tej roj ib yam li tej roj thiab tej ntshav yaj ntshav tshis uas muab ua khoom fij. Tus TSWV yuav muab tej khoom fij no coj mus fij rau hauv lub nroog Npauxelas; nws yuav tua kom neeg tuag coob heev rau hauv tebchaws Edoos. Tej heev nyujqus yuav ntog pawglug nrog lawv, thiab tej menyuam ntsuag nyuj los ntog nrog cov heev nyuj uas cajdab ntug ntoob. Lawv lub tebchaws yuav cam ntshav liab ploog thiab lawv tej av muaj roj meem mias. Vim tus TSWV muab ib hnub los ua pauj, thiab muab ib xyoos los rau txim rau tej uas lub nroog Xi-oos ua tas los lawm. Tej dej hauv tebchaws Edoos yuav hloov ua kua roj hmab, thiab av yuav hloov ua leejfaj. Tagnrho lub tebchaws yuav kub hnyiab ib yam li roj hmab. Lub tebchaws yuav kub hnyiab tas hnub tas hmo, thiab tej pa yuav ncho mus ibtxhis. Yuav muab lub tebchaws ntawd tso povtseg nyob qhuav nquas cia ib tiam dhau ib tiam, thiab tsis muaj leejtwg yuav kam taug kev mus hla lub tebchaws ntawd li. Plas thiab uablag yuav los ua zes nyob hauv lub tebchaws ntawd. Tus TSWV yuav rov muab lub tebchaws ntawd tso povtseg dua ib zaug ntxiv kom nyob qhuav nquas ib yam li thaum tsis tau tsim nws. Yuav tsis muaj vajntxwv kav lub tebchaws ntawd lawm, thiab lawv tej thawjcoj los tsis paub qabhau dabtsi. Hmab pos thiab ntoo pos yuav tuaj laum puv nkaus hauv tej loog thiab thoob plaws tej ntsa loog, hma thiab plas yuav los nyob hauv tej nroog ntawd. Tsiaj qus yuav nyooj zom zaws qhov ntawd tuaj, thiab tej dab yuav sib hu ib tug dhau ib tug. Tus dab hmo ntuj yuav los nrhiav chaw so qhov ntawd. Plas yuav los ua zes, nteg qe, puag qe thiab tu lawv tej menyuam. Dav npoj yuav sib sau los nyob qhov ntawd. Nrhiav hauv tus TSWV phau ntawv teev tej tsiaj thiab muab nyeem saib hais li cas. Tej tsiaj ntawd tsis muaj ib tug ploj li, thiab tsis muaj ib tug uas yuav tsis muaj nkawm li. Vim tus TSWV tau hais kom muaj li ntawd; thiab nws tus ntsujplig yuav coj lawv los nyob ua ke. Tus TSWV yuav muab lub tebchaws faib rau lawv kom nyias muaj nyias tug. Lawv yuav nyob hauv lub tebchaws ntawd ib tiam dhau ib tiam, thiab lub tebchaws yuav yog lawv tug mus ibtxhis. Tiaj suabpuam thiab lub tebchaws uas qhuav nkig nkuav yuav zoo siab heev, thiab yuav muaj paj tawg ntsa iab rau saum tej av qhuav. Tiaj suabpuam yuav hu nkauj thiab qw zoo siab; nws yuav zoo nkauj ib yam li tej Roob Lenpanoos, thiab av yuav rog ib yam li tej teb saum lub Roob Kalemees thiab Saloos. Txhua tus yuav pom tus TSWV lub koob meej thiab lub tshwjchim uas ci ntsa iab. Cia li txhawb txhais tes uas tsaug leeg, thiab lub hauvcaug uas tshee na tsis muaj zog lawm. Hais rau txhua tus uas tsis muaj kev cia siab hais tias, “Cuab zog khov kho thiab tsis txhob ntshai! Vajtswv yuav los cawm kom nej dim thiab rau txim rau nej cov yeebncuab.” Tus neeg digmuag yuav pom kev, thiab tus lag ntseg yuav hnov lus. Cov neeg sav ceg yuav sawv dhia cus plaws seevcev, thiab cov neeg hais tsis tau lus yuav qw zoo siab. Dej cag yuav ntws mus rau hauv tiaj suabpuam; lub tiaj suabzeb uas kub heev yuav ua pasdej, thiab thaj av qhuav yuav txhawv dej txhua qhov. Hma tej chaw nyob yuav tuaj nroj thiab tauj iab tas. Nyob qhov ntawd yuav muaj ib txoj niam kev hu ua “Txojkev uas Dawbhuv.” Tsis muaj neeg txhaum taug txojkev ntawd li; thiab cov neeg ruam yuav tsis taug txojkev ntawd ib zaug li. Yuav tsis muaj tsov ntxhuav nyob qhov ntawd thiab tsis muaj tej tsiaj nyaum taug txojkev ntawd. Cov neeg uas tus TSWV twb txhiv lawm thiaj taug txojkev ntawd xwb. Lawv yuav rov los rau hauv lub nroog Yeluxalees zoo siab hlo, hu nkauj thiab qw ntshoo nrooj zoo siab kawg. Lawv yuav muaj kev zoo siab mus ibtxhis, kev quaj ntsuag thiab kev tu siab yuav tsis muaj mus li lawm. Thaum Hexekiyas ua vajntxwv kav lub tebchaws Yudas tau kaum plaub xyoos lawm, Xenakhelis uas ua vajntxwv kav lub tebchaws Axilias tau tuaj tua cov Yudas tej nroog uas txhim ntsa loog ruaj khov kho thiab txeeb tau tej nroog ntawd huv tibsi lawm. Cov Axilias tus vajntxwv tso Lasakes uas yog ib tug thawj tubrog coj ib pab tubrog coob coob tawm hauv lub nroog Lakhis tuaj rau hauv lub nroog Yeluxalees thiab nug Vajntxwv Hexekiyas saib puas zeem. Lasakes tuaj sawv rau ntawm ntu kev uas cov neeg mus ua haujlwm raus ntaub ntawm tus kwjdeg uas ntws pem lub pasdej theem saud los. Muaj peb tug neeg Yudas uas yog Hexekiyas tus tub Eliyakees uas yog tus saib lub loog, Senpanas uas yog tus teev ntawv thiab Asas tus tub Yau-as uas yog tus ceev tej ntaub ntawv thiaj tawm mus cuag Lasakes. Cos Axilias tus thawj tubrog Lasakes hais rau lawv hais tias huabtais xav paub saib Vajntxwv Hexekiyas cia siab rau dabtsi? Koj hais tias, “Koj muaj tswvyim zoo thiab tubrog coob, tiamsis tej lus uas koj hais ntawd tsis muaj qabhau. Koj cia siab rau leejtwg koj thiaj ntxeev siab rau kuv? Koj cia siab rau cov Iziv tuaj pab koj, tiamsis lawv yuav zoo li muab tus tauj iab los ua pas nrig, nws yuav lov thiab chob koj tes. Falaus uas yog cov Iziv tus vajntxwv zoo li ntawd rau txhua tus uas cia siab rau nws ntag.” Cov Axilias tus thawj tubrog nam zog mus hais ntxiv tias, “Puas yog nej hais rau kuv tias nej cia siab rau tus TSWV uas yog nej tus Vajtswv? Puas yog Hexekiyas muab tej chaw teev dab saum roob siab thiab tej thaj rhuav puastsuaj tas, nws thiaj hais kom cov Yudas thiab cov Yixalayees mus pehawm Vajtswv rau ntawm tib lub thaj nkaus xwb? Kuv yuav nrog nej sib coglus ntawm kuv tus tswv uas yog cov Axilias tus huabtais lub npe, kuv yuav muab ob txhiab tus nees rau nej, yog nej nrhiav tau neeg coob los caij cov nees ntawd. Nej twb tsis muaj peevxwm tawmtsam tau kuv tus tswv ib tug nyuag tubrog uas me tshaj plaws no, ua li cas nej lam mus cia siab rau cov Iziv tej tsheb nees thiab cov tubrog caij nees ua dabtsi? Nej xav hais tias kuv tuaj tua nej lub tebchaws thiab muab ua kom puastsuaj, tsis muaj tus TSWV pab kuv no los? Twb yog Vajtswv txib kuv tuaj tua thiab rhuav kom nej puastsuaj ntag!” Ces Eliyakees, Senpanas thiab Yau-as hais rau Lasakes hais tias, “Thov hais lus Alamais rau koj cov tubtxib, peb thiaj totaub; tsis txhob hais lus Henplais rau peb, rau qhov tagnrho cov neeg uas sawv saum tus ntsa yeej puavleej mloog koj hais huv tibsi.” Tiamsis Lasakes hais tias, “Nej xav hais tias kuv tus tswv tso kuv tuaj hais cov lus no rau nej tus tswv thiab nej xwb no los? Tsis yog li ntawd, kuv hais rau cov neeg zaum saum tus ntsa yeej uas lawv yuav rov noj lawv cov quav thiab haus lawv cov zis kom hnov ib yam li nej thiab.” Ces Lasakes thiaj sawv tsees thiab hais ua lus Henplais nrov nrov hais tias, “Cia li mloog cov Axilias tus huabtais tej lus uas hais rau nej no! Huabtais hais tias: ‘Nej tsis txhob cia Hexekiyas ntxias tau nej, vim Hexekiyas yeej cawm tsis tau nej li.’ Thiab tsis txhob cia Hexekiyas ntxias nej cia siab rau tus TSWV uas pheej hais tias, ‘Tus TSWV yeej yuav cawm tau peb xwb; lub nroog no yuav tsis raug muab cob rau cov Axilias tus huabtais txhais tes ib zaug li.’ Tsis txhob mloog Hexekiyas tej lus hlo li! Cov Axilias tus huabtais hais tias, ‘Cia li ua phoojywg rau kuv thiab tawm tuaj cuag kuv. Nej txhua tus thiaj yuav tau noj nej tej txiv hmab, tej txiv ncuavpias thiab haus tej dej hauv nej tej qhovtshij mus txog thaum uas kuv tuaj coj nej mus nyob hauv lub tebchaws uas zoo li nej lub tebchaws uas muaj txiv hmab ntau ua cawv thiab muaj nplej ntau ua ncuav. Tsis txhob cia Hexekiyas dag nej hais tias tus TSWV yuav pab kom nej dim ntawm txojkev nyuaj siab. Luag lwm haivneeg tej vajtswv puas cawm tau kom lawv tej tebchaws dim ntawm cov Axilias tus huabtais txhais tes? Tamsim no Hamathas thiab Alepas tej vajtswv nyob qhov twg? Xefavais tej vajtswv nyob qhov twg? Lawv puas pab tau cov Xamalis dim ntawm kuv txhais tes? Tagnrho cov vajtswv hauv tej tebchaws no, tus vajtswv twg cawm tau nws lub tebchaws dim ntawm kuv txhais tes? Tus TSWV yuav ua li cas thiaj cawm tau lub nroog Yeluxalees kom dim ntawm kuv txhais tes?’ ” Tiamsis cov pejxeem nyob ntsiag to thiab tsis hais ib lo lus li, rau qhov Vajntxwv Hexekiyas samhwm hais tias, “Tsis txhob teb nws hlo li.” Ces Eliyakees uas yog Hilekiyas tus tub uas yog tus saib lub loog, Senpanas uas yog tus teev ntawv thiab Yau-as uas yog Axafes tus tub uas yog tus ceev ntaub ntawv dua rhe lawv tej tsho thiab khiav mus qhia tej lus uas Lasakes hais ntawd rau Vajntxwv Hexekiyas mloog. Thaum Vajntxwv Hexekiyas hnov li ntawd, nws nyuaj siab heev, nws thiaj dua rhe nws lub tsho, thiab muab ntaubtsaj los hnav thiab khiav mus rau tom tus TSWV lub Tuamtsev. Nws thiaj tso Eliyakees uas yog tus saib lub loog, Senpanas uas yog tus teev ntawv thiab tus povthawj laus mus cuag Amauxes tus tub Yaxayas uas yog tus cev Vajtswv lus. Lawv puavleej hnav ntaubtsaj tas huv tibsi. Lawv hais rau Yaxayas hais tias, “Vajntxwv Hexekiyas hais li no: hnub no yog hnub uas peb tau kev nyuaj siab; peb tabtom raug luag rau txim thiab txajmuag heev. Peb zoo ib yam li tus pojniam uas txog caij yug menyuam, tiamsis tsis muaj zog yug li. Cov Axilias tus huabtais tau txib nws tus thawj tubrog Lasakes tuaj hais lus tuam mom Vajtswv tus uas muaj sia nyob. Thov tus TSWV uas yog koj tus Vajtswv nrog hnov tej lus tuam mom no thiab rau txim rau tus neeg uas tau hais tej lus ntawd. Yog li ntawd, koj cia li thov Vajtswv pab peb cov pejxeem uas seem nyob no.” Thaum Yaxayas hnov Vajntxwv Hexekiyas tej lus lawm, Yaxayas hais rau lawv hais tias, “Nej cia li rov mus hais rau vajntxwv hais tias, ‘Tus TSWV hais li no: Tsis txhob ntshai cov Axilias tus huabtais tej lus uas nws tus tubtxib tuaj hais tuam mom kuv rau koj hnov ntawd. Kuv yuav tso ib tug ntsujplig los tshoov nws siab kom nws hnov ib cov lus xaiv thiab tig khiav rov qab mus rau pem nws lub tebchaws; nws yuav mus raug hniav ntaj tuag nyob hauv lub tebchaws ntawd.’ ” Thaum Lasakes hnov hais tias cov Axilias tus huabtais tawm hauv lub nroog Lakhis mus lawm, nws thiaj thim rov qab thiab mus ntsib huabtais thaum nws tabtom tua lub nroog Linpenas hnyav heev. Muaj neeg mus qhia rau cov Axilias tus huabtais hais tias, “Cov Sudas tus Vajntxwv Tilehakas coj ib pab tubrog Iziv tuaj tua koj lawm.” Thaum nws hnov dheev tej lus no, nws thiaj sau ib tsab ntawv xa mus rau Vajntxwv Hexekiyas tus uas kav cov Yudas hais tias, “Tsis txhob cia koj tus Vajtswv uas koj cia siab rau ntxias tau koj hais tias nws yuav tsis muab lub nroog Yeluxalees cob rau cov Axilias tus huabtais txhais tes hlo li. Koj puas tau hnov tej uas cov Axilias tus huabtais twb ua rau ntau lub tebchaws raug kev puastsuaj tas lawm? Koj xav hais tias koj tseem yuav khiav dim thiab no los? Thaum ub kuv cov yawgkoob twb muab lub nroog Nkauxas, lub nroog Halas thiab lub nroog Lexefas tua puastsuaj tas thiab muab cov neeg Npethedees uas nyob hauv lub nroog Telaxas tua tuag tas huv tibsi, thiab lawv tej vajtswv twb cawm tsis tau lawv dim hlo li. Lub nroog Hamas, lub nroog Alepas, lub nroog Xefavais, lub nroog Henas thiab lub nroog Ivas tej vajntxwv nyob qhov twg lawm?” Vajntxwv Hexekiyas txais tsab ntawv ntawm cov neeg uas xa ntawv tuaj thiab muab nthuav nyeem; Hexekiyas nqa tsab ntawv ntawd mus rau hauv tus TSWV lub Tuamtsev thiab muab nthuav tso tabmeeg tus TSWV. Hexekiyas thov tus TSWV hais tias, “Tus TSWV uas yog cov Yixalayees tus Vajtswv uas muaj hwjchim loj kawg nkaus, koj zaum rawv saum tus qhelunpees ob phab tis; koj tib leeg xwb thiaj yog tus Vajtswv uas kav txhua lub tebchaws hauv ntiajteb no. Koj yog tus uas tsim lub ntiajteb thiab lub ntuj. Tus TSWV, thov koj tig pobntseg mloog; Tus TSWV, thov koj tsa qhovmuag saib; thov koj mloog Xenakhelis tej lus uas nws xa tuaj hais tuam mom koj uas yog Vajtswv tus muaj sia nyob! Tus TSWV, peb paub cov Axilias tus huabtais tau muab ntau haivneeg tua puastsuaj tas, thiab ua rau lawv tej tebchaws nyob do dus cia, thiab muab lawv tej vajtswv uas tsis yog tej vajtswv tiag hlawv puastsuaj tas; tej ntawd tsuas yog neeg txhais tes muab ntoo thiab pobzeb los txua ua xwb. Tus TSWV uas yog peb tus Vajtswv, thov pab kom peb dim ntawd cov Axilias txhais tes thiaj ua rau txhua haivneeg uas nyob hauv ntiajteb no paub hais tias koj tib leeg xwb thiaj yog Vajtswv.” Ces Amauxes tus tub Yaxayas txib neeg mus hais rau Vajntxwv Hexekiyas hais tias, “Tus TSWV uas yog cov Yixalayees tus Vajtswv hais li no: vim koj tau thov kuv hais txog Xenakhelis uas yog cov Axilias tus vajntxwv, cov lus no yog tus TSWV hais rau Xenakhelis hais tias: Xi-oos tus ntxhais yuav luag koj plig thiab yuav thuam koj; Yeluxalees tus ntxhais yuav co hau tom koj qab. Tus uas koj thuam thiab saib tsis taus yog leejtwg? Koj tau qhib koj lub qhovncauj thiab tsa koj lub qhovmuag tawmtsam leejtwg? Twb yog koj tawmtsam cov Yixalayees tus Vajtswv uas dawbhuv ntag los sav! Koj tau tso koj tus tubtxib tuaj tuam mom tus TSWV, koj hais tias, kuv muaj tsheb nees ntau heev, kuv yuav coj tuaj nce rau saum tej roob siab uas yog tej roob siab tshaj plaws pem Lenpanoos, kuv mus txiav tej ntoo thuv uas siab tshaj plaws thiab tej ntoo ciab uas zoo tshaj plaws saum roob thiab mus rau hauv lub plawv zoov uas muaj ntoo siab heev. Koj khav hais tias koj tau khawb ntau lub qhovtshij, thiab haus tej dej uas nyob hauv luag lwm haivneeg tej tebchaws, thiab kuv yuav tsuj tej dej nram tebchaws Iziv kom nqhuab huv tibsi. “Koj tsis tau hnov hais tias kuv twb npaj siab los tau ntev lawm no los? Tej uas puag thaum ub kuv npaj tseg lawm, nimno kuv muab rho tawm los. Kuv twb pub hwjchim rau koj muab cov nroog uas ruaj khov tsoo tawg tas huv tibsi lawm. Cov neeg uas nyob hauv tej nroog ntawd tsis muaj hwjchim dabtsi li; lawv ntshai thiab yoob tas. Lawv zoo ib yam li tej nroj uas tuaj hauv tej teb lossis tej nroj uas tuaj saum rutsev, thaum cov cua kub uas ntsawj sab hnubtuaj tuaj, lawv cia li ntsws tas huv tibsi lawm. “Tiamsis kuv paub thaum koj zaum, thaum koj tawm mus thaum koj rov qab los thiab kuv paub tej lus phem uas koj cem kuv huv tibsi. Vim koj tau cem kuv thiab kuv twb hnov koj tej lus khavtheeb lawm, nimno kuv yuav muab nqe hlau los chaws koj qhovntswg thiab muab hwm txee los xam koj qhovncauj, thiab kuv yuav muab koj tig xubntiag taug txoj qub kev uas koj tuaj rov qab.” Ces Yaxayas hais rau Vajntxwv Hexekiyas hais tias, “Ntawm no yog ib lub cim uas qhia rau nej paub. Xyoo no thiab lwm xyoo nej yuav tau noj tej nplej uas nws tuaj nws, tiamsis xyoo peb nej yuav tau cog nplej thiab sau qoobloo thiab cog txiv hmab thiab yuav tau tej txiv hmab ntawd noj. Cov neeg uas seem nyob hauv tebchaws Yudas yuav vammeej ib yam li tej txiv ntoo nrhau cag ntsia av tob tob thiab txi txiv ncw heev. Tsuas tshuav cov neeg uas nyob hauv lub nroog Yeluxalees thiab saum lub Roob Xi-oos thiaj seem xwb, rau qhov tus TSWV uas muaj hwjchim loj kawg nkaus npaj siab kom muaj tej xwmtxheej no lawm. “Cov lus no yog tus TSWV hais rau cov Axilias tus huabtais: ‘Nws yuav tsis tau tuaj rau hauv lub nroog no thiab tsis tau tua ib xibxub vos rau hauv lub nroog no li. Tsis muaj tubrog yuav nqa tej thaiv hniav ntaj tuaj ze lub nroog no lossis tuaj puab ntswg vij lub nroog no li. Nws taug txojkev twg tuaj, nws yuav taug txojkev ntawd rov qab mus tsev, thiab nws yuav tsis tau nkag los rau hauv lub nroog no hlo li. Kuv uas yog tus TSWV, kuv yog tus hais tej lus no ntag. Kuv yuav tiv thaiv thiab tsomkwm lub nroog no, vim kuv tej lus cog tseg thiab vim tej lus uas kuv tau cog tseg rau kuv tus tubtxib Daviv lawm.’ ” Tus TSWV tus timtswv thiaj los rau hauv cov Axilias lub yeej thiab tua ib puas yim caum tsib txhiab leej tubrog tuag. Tagkis kaj ntug txoog uas tav lub caij neeg sawv, lawv txawm pom neeg tuag pawglug. Ces cov Axilias tus huabtais Xenakhelis thiaj rov qab mus tsev thiab mus nyob hauv lub nroog Nineves. Muaj ib hnub, thaum nws tabtom mus pehawm nws tus mlom Nixelaus hauv tsev teev mlom, ces Alamelej thiab Salexes uas yog nws ob tug tub txawm nqa nkawd ob rab ntaj mus muab nws tua tuag rau hauv lub tsev teev mlom ntawd, thiab nkawd khiav mus nyob rau tim tebchaws Alalaj lawm. Ces Esahadoos uas yog dua nws ib tug tub thiaj ua vajntxwv hloov nws chaw. Thaum ntawd Vajntxwv Hexekiyas mob hnyav heev thiab nws yuav zoo tsis taus. Amauxes tus tub Yaxayas uas yog tus cev Vajtswv lus mus xyuas Hexekiyas thiab hais rau nws hais tias, “Vajtswv hais tias koj yuav tsum npaj txhua yam kom txhij txhua tseg rau koj tsevneeg. Rau qhov koj yeej yuav tsis zoo, koj yuav tuag xwb.” Hexekiyas txawm tig hlo rau tim phabntsa thiab thov tus TSWV hais tias, “Tus TSWV, thov koj nco ntsoov hais tias kuv ua koj tes haujlwm ntawm lub siab ncaj ncees thiab muab siab npuab koj, thiab kuv rau siab ntso ua txhua yam zoo uas koj xav kom kuv ua.” Thiab nws quaj tu siab kawg li. Tus TSWV rov hais rau Yaxayas hais tias, “Koj cia li rov mus cuag Hexekiyas thiab hais rau nws hais tias, ‘Kuv yog tus TSWV uas yog koj yawgkoob Daviv tus Vajtswv, kuv twb hnov koj tej lus thov thiab pom koj tej kua muag lawm; kuv yuav ntxiv hnubnyoog rau koj ua neej nyob kaum tsib xyoos ntxiv. Kuv cawm koj thiab lub nroog Yeluxalees kom dim ntawm cov Axilias tus huabtais txhais tes, thiab kuv tseem yuav tiv thaiv lub nroog no mus.’ ” Yaxayas hais tias, “Tus TSWV yuav muab ib yam los ua cim qhia rau koj hais tias, nws yuav ua raws li nws tej lus cog tseg lawm. Tus TSWV yuav muab tus duab hnub thim rov qab kaum theem qi bntai ntawm tus ntaiv uas Vajntxwv Ahas ua,” ces tus duab hnub txawm thim rov qab kaum theem. Tom qab uas Hexekiyas tus mob zoo lawm, nws sau zaj nkauj no hu ua Vajtswv tsaug: Kuv hais tias, “Kuv txojsia uas tseemceeb tshaj plaws yuav mus rau ntawm lub roojvag uas yog txojkev tuag; kuv yuav tsis muaj sia nyob ib zaug ntxiv li lawm.” Kuv hais tias, “Kuv yuav tsis pom tus TSWV hauv cov neeg uas muaj sia nyob lub tebchaws; kuv lub qhovmuag yuav tsis pom cov neeg uas muaj sia hauv lub ntiajteb no ib zaug li lawm. Kuv txojsia twb raug muab txiav tu thiab twb kawg lawm, ib yam li lub tsevntaub uas muab rhuav tas lawm, zoo li tej ntaub uas muab txiab txias tus los. Kuv xav hais tias Vajtswv twb rho kuv txojsia lawm. Kuv quaj ib hmos kaj ntug rau kuv tus mob. Vajtswv muab kuv tej pobtxha lov tas ib yam li tsov ntxhuav cua kuv xav hais tias Vajtswv yuav rho kuv txojsia mus. Kuv ntsaj mos nyoos ib yam li tus luv lossis tus noog dej quaj, thiab kuv tsa hlo suab quaj ib yam li tus nquab. Kuv qhib tsis taus kuv ob lub qhovmuag saib saum ntuj. Tus TSWV, kuv ntxhov siab heev; thov koj pab kuv!” Kuv yuav hais li cas? Tus TSWV twb hais rau kuv, thiab nws twb ua raws li nws hais lawm. Kuv nyuaj siab heev thiab pw tsis tsaug zog li. Tus TSWV, qhov uas neeg muaj txojsia nyob twb yog vim muaj koj, thiab qhov uas kuv muaj txojsia nyob twb yog koj cawm. Thov pab kho kuv tus mob kom zoo thiab pub kuv rov muaj txojsia! Kuv tej kev nyuaj siab yuav hloov mus ua kev kaj siab. Koj cawm kuv txojsia dim ntawm lub qhov uas yog txojkev puastsuaj los; koj zam tagnrho kuv tej kev txhaum. Tsis muaj ib tug nyob hauv tubtuag teb yuav txawj ua koj tsaug; cov tuag lawm yeej tsis txawj cia siab rau koj txojkev ncaj ncees li. Tsuas yog tus muaj sia nyob thiaj txawj ua koj tsaug ib yam li hnub no kuv ua xwb. Tej lus uas leej txiv qhia cov menyuam yog tej uas hais tias koj yog tus ncaj ncees tiag. Tus TSWV, koj tau kho kuv tus mob zoo lawm. Peb yuav ntaus nkauj nogncas thiab hu nkauj ua koj tsaug, peb yuav ua koj tsaug hauv koj lub Tuamtsev mus tas simneej. Ces Yaxayas hais tias, “Nej cia li muab txiv ncuavpias los tsoo qhwv vajntxwv lub rwj, nws thiaj yuav zoo.” Vajntxwv Hexekiyas nug hais tias, “Yam dabtsi ua lub cim qhia rau kuv paub hais tias kuv yuav tau mus rau hauv tus TSWV lub Tuamtsev?” Lub sijhawm ntawd Npaladas tus tub Melaudas Npaladas uas ua vajntxwv kav lub tebchaws Npanpiloos hnov hais tias Vajntxwv Hexekiyas mob, nws sau ib tsab ntawv thiab xa ib co khoom tuaj rau Hexekiyas. Hexekiyas tos txais lawv thiab coj lawv mus ncig saib nws tej txhab nyiaj, txhab kub, tej txujlom, tej roj tsw qab thiab nws tej cuabyeej ua rog. Tsis tshuav ib yam dabtsi hauv nws tej txhab lossis hauv nws lub tebchaws uas nws tsis tau coj lawv mus saib li. Ces Yaxayas tus uas cev Vajtswv lus txawm tuaj cuag Vajntxwv Hexekiyas thiab nug nws hais tias, “Cov neeg ntawd tuaj qhov twg tuaj thiab lawv hais li cas rau koj?” Hexekiyas teb hais tias, “Lawv tuaj tim tebchaws Npanpiloos uas deb heev tuaj.” Yaxayas nug hais tias, “Lawv pom dabtsi hauv koj lub loog?” Hexekiyas teb hais tias, “Lawv pom txhua yam huv tibsi; tsis tshuav ib yam nyob hauv tej txhab uas kuv tsis tau qhia rau lawv li.” Ces Yaxayas txawm hais rau Vajntxwv Hexekiyas hais tias, “Tus TSWV uas muaj hwjchim loj kawg nkaus hais li no: Saib lauj, lub sijhawm twb los ze zuj zus rau txhua yam uas nyob hauv koj lub loog no lawm, thiab txhua yam uas koj cov yawgkoob khaws cia puag thaum ub los txog niaj hnub no yuav raug luag coj mus kom tas rau tim tebchaws Npanpiloos tsis seem ib yam dabtsi hlo li; tus TSWV hais li ntawd. Koj cov tub uas koj yug thiab koj tej xeebntxwv puavleej yuav raug lawv ntes coj mus thiab muab sam cia nyob ua haujlwm hauv tus vajntxwv uas kav lub nroog Npanpiloos lub loog.” Vajntxwv Hexekiyas teb Yaxayas hais tias, “Tus TSWV tej lus uas koj hais no zoo kawg li.” Vim kuv xav hais tias, “Yuav muaj kev thajyeeb thiab kev kaj siab rau tiam uas kuv tseem ua neej nyob no.” Vajtswv hais tias, “Nplig kuv haivneeg lub siab, nplig lawv siab los mas! Txhawb cov neeg uas nyob hauv lub nroog Yeluxalees zog. Qhia rau lawv hais tias lawv twb raug kev txomnyem txaus lawm, thiab nimno kuv twb zam lawv tej kev txhaum tas lawm. Kuv rau txim ob npaug rau lawv tej kev txhaum.” Muaj ib lub suab qw hais tias, “Kho kev tom roob mojsab qhua tos tus TSWV! Kho kev tom tiaj suabpuam kom ncaj rau tus TSWV! Txhub txhua lub kwjha kom puv, muab txhua lub roob thiab ncov roob khawb kom tiaj; tej qhov zawj muab txhub kom sib txig, thiab muab qhov siab thiab qhov qis pheej kom tiaj xwmyeem. Thaum ntawd tus TSWV yuav muab nws lub tshwjchim uas ci ntsa iab nthuav qhia rau neeg txhua tus pom. Tus TSWV yog tus hais tej lus no ntag.” Muaj ib lub suab qw hais tias, “Cia li qhia rau sawvdaws!” Kuv nug hais tias, “Kuv yuav qhia dabtsi? Qhia hais tias, txhua tus neeg zoo ib yam li tej nroj tsuag; lawv ua neej nyob ntev ib yam li tej paj ntoos xwb. Thaum tus TSWV tshuab pa tuaj ntsawj tej nroj tsuag qhuav, tej paj los yuav zeeg tas; neeg zoo ib yam li tej nroj tsuag ntawd. Tej nroj yeej txawj qhuav thiab tej paj yeej txawj zeeg; tiamsis peb tus Vajtswv txojlus nyob mus ibtxhis li.” Yeluxalees cia li nce mus rau saum roob siab, thiab qhia txojmoo zoo! Xi-oos cia li hu nrov nrov tshaj tawm txojmoo zoo! Tus TSWV uas yog Vajtswv nrog nws lub hwjchim los thiab nws txhais npab yuav tswjhwm. Nws coj nqi zog los rau cov neeg uas nws cawm dim lawm. Nws yuav tu nws pab yaj ib yam li tus tswv yug yaj, nws yuav sau zog tej menyuam yaj los puag rau ntawm nws ob txhais npab, nws yuav muab lawv puag hlo rau hauv nws lub xubntiag, thiab ua siab ntev coj tej yaj uas muaj menyuam mos. Leejtwg muaj peevxwm muab phoovtes yeem dej hiavtxwv saib hnyav npaum li cas lossis muab nws txhais tes ntsuas tau lub ntuj? Leejtwg muaj peevxwm muab lub ntiajteb no sau los ntim rau hauv khob lossis muab tej hauv roob thiab tej ncov roob los tso rau saum teev luj? Leejtwg thiaj muaj peevxwm qhia tau tus TSWV tus Ntsujplig lossis ua tau nws tus tuavxam uas qhia nws? Vajtswv nrog leejtwg tuavxam kom nws thoob tsib to nrog, thiab leejtwg qhia txojkev ncaj ncees, kev txawj ntse, kev totaub thiab kev paub rau nws? Txhua haivneeg twb tsis muaj nqis dabtsi rau tus TSWV li, twb tsis npaum li teev dej uas nrog ntawm lub tshob los; nws suav hais tias lawv zoo li tej hmoov av uas lo ntawm rab teev xwb; thiab nws nqa tej koog povtxwv sib ib yam li tej hmoov av. Txawm yog tej tsiaj pem Lenpanoos los twb tsis txaus tua hlawv fij rau Vajtswv, thiab tej ntoo los yeej tsis txaus ua taws hlawv. Tus TSWV suav hais tias txhua haivneeg yeej tsis tseemceeb dabtsi thiab tsis muaj nqis dabtsi rau tus TSWV hlo li. Nej yuav muab Vajtswv piv rau leejtwg? Nej yuav ua li cas piav tau hais tias nws tus yam ntxwv zoo li cas? Nws tsis zoo li tus mlom uas neeg puab uas muab kub los vuam rau thiab muab saw nyiaj dai rau. Tus neeg pluag uas tsis muaj nyiaj tsis muaj kub coj mus fij, nws mus xaiv tej ntoo uas tsis txawj lwj coj los fij. Nws coj mus rau tus kws txua ntoo txua ib tug mlom uas tsis txawj txav taw rau nws. Tsis muaj neeg qhia rau nej paub li los? Nej tsis tau hnov dua li los? Nej tsis paub hais tias lub ntiajteb no pib li cas los li los? Tus tsim lub ntiajteb no yog tus zaum saum lub zwmtxwv uas siab kawg nkaus; nws tuaj saud ntsia neeg ntiajteb luaj li tus kooj xwb. nws muab lub ntuj nthuav ib yam li daim ntaub qhovrai, thiab nthuav lub ntiajteb zoo ib yam li lub tsevntaub rau neeg nyob. Nws muab cov nomtswv txo kom poob hwjchim thiab ua rau lawv tsis muaj nqis dabtsi hlo li. Lawv zoo ib yam li tej yub zaub uas muab cog kiag ces txawm nrhau cag, thaum Vajtswv ua pa tej yub zaub cia li ntsws thiab tuag tas thiab ya ri niab ib yam li tej quavnyab npleg. Vajtswv tus uas dawbhuv nug hais tias, nej muab kuv piv rau leejtwg, thiab kuv zoo li leejtwg? Tsa koj ob lub qhovmuag ntsia saum nruab ntug saib! Leejtwg yog tus tsim tej hnubqub uas koj pom ntawd? Nws coj tej hnubqub ntawd tawm tuaj ua tsheej pab ib yam li pab tubrog, nws paub muaj pestsawg lub thiab nws tis npe rau txhua lub nyias muaj nyias npe. Nws lub hwjchim thiab lub zog kav tej ntawd thiaj tsis muaj ib lub ploj li. Cov Yixalayees, vim li cas nej thiaj yws hais tias tus TSWV tsis pom txog nej tej kev txomnyem lossis tsis pab thaum nej raug luag ua tsis ncaj rau nej? Nej tsis tau paub dua li los? Nej tsis tau hnov dua li los? Tus TSWV yog Vajtswv tus uas muaj sia nyob mus ibtxhis, nws tsim tagnrho lub ntiajteb no. Nws ibtxwm tsis tsaug leeg lossis qaug zog ib zaug li. Tsis muaj leejtwg paub txog nws lub siab xav hlo li. Nws ntxiv zog rau tus uas qaug zog thiab tus tsaug leeg kom tus ntawd rov muaj zog tuaj. Txawm yog tej hluas los lawv yeej txawj qaug zog, thiab cov tub hluas los ntog pujpoog; tiamsis cov neeg uas cia siab ntsoov rau tus TSWV yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg. Vajtswv hais tias, “Tej tebchaws uas nyob deb, nej cia li mloog kuv hais thiab nyob twjywm! Nej cia li npaj mus hais plaub hauv tsev tu plaub; nej yuav muaj sijhawm hais nej zaj. Cia peb ua ke mus txiav txim saib leejtwg yog tus muaj cai. “Leejtwg mus zes tus uas muaj yeej tim sab hnubtuaj tuaj, thiab cia nws kovyeej txhua qhov txhia chaw uas nws mus lawm? Leejtwg cia nws tua yeej txhua tus vajntxwv thiab txhua haivneeg? Nws rab ntaj tua lawv ntog pawglug ib yam li lawv yog tej hmoov av xwb. Nws rab hneevnti tua lawv tawg khiav ri niab ib yam li cua ntsawj tej quavnyab npleg ya. Nws caum lawv qab thiab khiav huas lawv ntej mus tsis raug xwmtxheej dabtsi; nws khiav ceev heev kotaw yuav luag tsis chwv av. Leejtwg yog tus ua kom muaj tej xwm no tshwmsim tuaj? Leejtwg yog tus uas teev caij nyoog keebkwm thaum ub los? Kuv yog tus TSWV uas nyob thaum chivkeeb, thiab kuv yog tus uas yuav nyob thaum kawg. “Cov neeg uas nyob tej tebchaws deb pom tej haujlwm uas kuv ua tas los lawm, lawv ntshai tshee hnyo. Yog li ntawd, lawv thiaj sib sau tuaj ua ke. Txhua tus nyias pab nyias tej kwvtij zejzog thiab hais rau lawv tej kwvtij hais tias, ‘Ua siab loj tsis txhob ntshai.’ Tus kws txua ntoo txhawb tus kws nchuav kub zog hais tias, ‘Zoo kawg li!’ Tus uas muab rauj ntaus tej mlom kom du ntaug lees txhawb tus uas muab ntsia los ntsia lub zog. Lawv hais tias, ‘Ham tau zoo kawg li’, thiab lawv muab ntsia hlau ntsia tus mlom ntawd rau ntawm nws qhov chaw. “Tiamsis nej cov Yixalayees uas yog kuv cov tubtxib, Yakhauj tus uas kuv tau xaiv tseg, thiab yog kuv tus phoojywg Anplahas cov xeebntxwv; nej yog cov uas kuv tau coj puag tim qab ntuj kawg rov los thiab hu nej puag tim plaub ceg kaum ntuj uas deb kawg nkaus los. Kuv hais rau nej hais tias, ‘Nej yog kuv cov tubtxib,’ kuv twb xaiv nej cia lawm thiab kuv tsis tso nej tseg ib zaug li; nej tsis txhob ntshai, rau qhov kuv nrog nraim nej, kuv yog nej tus Vajtswv, nej tsis txhob poob siab; Kuv yuav pab nej thiab txhawb kom nej muaj zog, kuv sab tes xis yuav puag rawv nej. “Cov neeg uas chim rau nej, lawv yuav swb thiab raug txajmuag; cov neeg uas tawmtsam nej, lawv yuav puastsuaj thiab tuag tas. Nej mus nrhiav cov neeg uas tawmtsam nej, tiamsis nej tsis ntsib lawv; cov neeg uas ua rog rau nej, lawv yuav puastsuaj thiab tuag tas. Kuv yog tus TSWV, nej tus Vajtswv; kuv yeej tuav rawv nej sab tes xis, thiab kuv hais rau nej hais tias, ‘Tsis txhob ntshai kuv yuav pab nej!’ ” Tus TSWV hais tias, “Cov Yixalayees uas yog Yakhauj cov xeebntxwv! Kuv yog cov Yixalayees tus Vajtswv uas dawbhuv, kuv yuav pab nej thiab txhiv kom nej dim. Kuv yuav ua kom nej zoo ib yam li lub tshuab zom nplej uas hniav tshiab thiab ntse zuag plias. Nej yuav ntaus tej hauv roob thiab muab tsoo kom tawg ntsoog ntxaws, thiab nej yuav muab tej ncov roob tsoo kom ua hmoov tas. Nej yuav tsuab lawv w rau saum nruab ntug, cua yuav muab lawv ntsawj ya mus povtseg, thiab cua daj cua dub yuav muab lawv ntsawj ya ri niab. Thiab nej yuav zoo siab heev, rau qhov kuv yog nej tus Vajtswv; nej yuav qhuas kuv uas yog cov Yixalayees tus Vajtswv uas dawbhuv. “Thaum kuv haivneeg uas pluag thiab txomnyem tuaj nrhiav dej haus, thaum lawv nqhis dej qa qhuav qhawv lawm, kuv uas yog tus TSWV mam li teb lawv tej lus thov, kuv uas yog cov Yixalayees tus Vajtswv tsis tso lawv tseg li. Kuv yuav ua kom muaj dej txhawv saum tej roob qhua thiab ua kom dej txhawv hauv tej hav. Kuv yuav ua rau tej tiaj suabpuam kom muaj pasdej txhua qhov. Kuv yuav ua kom ntoo thuv, ntoo akaxias, ntoo lwgzaj thiab ntoo ntseej, tuaj taus saum tej roob mojsab qhua uas qhuav nkig nkuav. Kuv yuav ua kom tiaj suabpuam ciaj zoov nujtxeeg, ntoo thuv, ntoo ciab thiab ntoo roj yuav tuaj ua ke. Cia neeg ntiajteb pom thiab paub hais tias kuv yog tus TSWV uas ua tej no. Lawv thiaj yuav paub hais tias haivneeg Yixalayees tus Vajtswv dawbhuv yog tus uas tsim tej no.” Tus TSWV uas yog Yakhauj tus Vajtswv hais tias, “Cia li tuaj hais nej rooj plaub thiab coj nej lub tswvyim uas txawj sib cav tshaj plaws nrog nej tuaj ntawm no! Cia lawv coj lawv tej mlom tuaj, thiab kom tej mlom ntawd qhia rau peb saib yuav muaj dabtsi tshwmsim thiab. Qhia tej xwmtxheej puag thaum ub rau peb saib yog dabtsi, peb thiaj paub tej ntawd, thiab peb thiaj paub hais tias lawv tawm qhov twg los; lossis qhia tej yam uas yuav tshwmsim los yav tom ntej rau peb. Qhia kom peb paub saib yuav muaj dabtsi tshwmsim los yav tom ntej no kom peb thiaj paub hais tias nej yog vajtswv tiag! Ua tej yam zoo lossis tej yam phem kom peb ntshai thiab yoob tas saib! Nej tsis tseemceeb dabtsi, thiab tej uas nej ua los tsis muaj qabhau; cov neeg uas xaiv nej ua lawv tej vajtswv mas vuabtsuab kawg li. “Kuv twb xaiv ib tug neeg uas nyob sab Hnubtuaj tseg lawm, kuv yuav coj nws pem sab qaumteb tuaj tua nej. Nws yuav tsuj cov nomtswv ib yam li tsuj tej hmoov av, thiab zoo li tus puab laujkaub tsuj tej av nplaum. Leejtwg qhia zaj no thaum ub lawm peb thiaj paub lossis qhia ua ntej peb thiaj hais tau hais tias, ‘Nws hais yog lawm’? Nej tsis muaj ib tug twg hais txog zaj no, tsis muaj leejtwg hnov nej piav ib los hlo li. Kuv yog tus TSWV, kuv twb qhia tej xov zoo rau lub nroog Xi-oos lawm; Kuv txib ib tug xa xov mus qhia lub nroog Yeluxalees hais tias, ‘Koj cov pejxeem tabtom los lawm! Lawv tabtom los tsev!’ Thaum kuv ntsia cov mlom ntawd, lawv hais tsis tau lus; tsis muaj ib tug twg teb tau tej lus uas kuv nug hlo li. Tagnrho cov mlom no tsis muaj qabhau kiag li; lawv ua tsis tau ib yam dabtsi, cov mlom ntawd tsis muaj zog thiab tsis muaj hwjchim.” Tus TSWV hais tias, “Tus no yog kuv tus tubtxib uas kuv txhawb nws lub zog; nws yog tus uas kuv xaiv tseg, kuv txaus siab heev rau nws. Kuv muab kuv tus ntsujplig rau nws, thiab nws yuav coj kev ncaj ncees los rau txhua haivneeg. Nws yuav tsis qw lossis tsa suab quaj lossis hais lus nrov hauv tej plawv kev. Tus tauj iab uas twb po lawm nws yuav tsis muab lov, lossis lub teeb uas twb yuav tuag nws tsis muab tshuab kom tuag. Nws yuav coj txojkev ncaj ncees mus ibtxhis los rau sawvdaws. Nws yuav tsis tas kev cia siab lossis qaug zog hlo li, nws yuav rhawv kom muaj kev ncaj ncees nyob hauv lub ntiajteb no; thiab tej tebchaws uas nyob deb tos ntsoov nws txoj kevcai.” Vajtswv tsim lub ntuj thiab muab lub ntuj nthuav khwb rau saud; nws tsim lub ntiajteb thiab txhua yam uas nyob hauv; nws rau siav thiab rau pa rau txhua tus neeg uas nyob hauv lub ntiajteb. Thiab nimno tus TSWV uas yog Vajtswv hais rau nws tus tubtxib hais tias, “Kuv yog tus TSWV uas tau hu koj los thiab muab lub hwjchim rau koj, kom neeg pom txojkev ncaj ncees uas nyob hauv lub ntiajteb no. Kuv yuav muab koj ua lo lus cog tseg rau txhua tus neeg; kuv yuav muab koj ua lub teeb ci mus rau txhua haivneeg. Koj yuav ua rau tej neeg digmuag pom kev, thiab yuav tso cov neeg uas raug kaw hauv tsev lojcuj uas tsaus ntuj nti tawm los. “Kuv tib leeg xwb thiaj yog tus TSWV uas yog koj tus Vajtswv. Tsis pub ib tug vajtswv twg muaj feem koom kuv lub hwjchim; kuv tsis pub tej mlom muaj feem koom kuv lub koob meej. Tej uas kuv hais tseg twb muaj lawm, nimno kuv yuav qhia tej yam tshiab rau nej ua ntej thaum uas tej ntawd tsis tau tshwm los.” Cia li hu ib zaj nkauj tshiab qhuas tus TSWV, neeg ntiajteb hu nkauj qhuas nws! Nej cov uas tsav nkoj hauv hiavtxwv cia li qhuas nws; txhua yam tsiaj uas nyob hauv hiavtxwv, cia li qhuas nws. Cov tebchaws uas nyob deb thiab txhua tus neeg uas nyob hauv, cia li hu nkauj qhuas nws! Tej tiaj suabpuam thiab tej nroog uas nyob hauv cia li qhuas Vajtswv; cov neeg uas nyob hauv lub nroog Kedas cia li qhuas nws; cov neeg uas nyob hauv lub nroog Xelas cia li qw zoo siab saum tej ncov roob tuaj. Cia lawv txhawb nqa tus TSWV lub koob meej, thiab cia cov neeg uas nyob tej tebchaws deb qhuas nws. Tus TSWV tawm mus ntaus rog ib yam li tus tubrog uas muaj zog heev, nws npaj txhij thiab kub siab lug mus sib tua hauv tshavrog. Nws nthe nqho ntaus rog thiab qw nrov nrov; nws qhia nws lub hwjchim rau nws cov yeebncuab pom. Vajtswv hais tias, “Kuv ua twjywm tau ntev los lawm, kuv tsis teb kuv haivneeg. Tiamsis nimno twb txog lub sijhawm uas kuv pib ua haujlwm lawm; kuv qw ib yam li tus pojniam uas tabtom yug menyuam. Kuv yuav rhuav tej hauv roob thiab ncov roob kom puastsuaj thiab muab tej xyoob ntoo thiab tej nroj tsuag ua kom qhuav tas. Kuv yuav ua kom tej dej nqhuab ua suabpuam thiab muab tej pasdej ua kom nqhuab huv tibsi. “Kuv yuav coj kuv haivneeg uas digmuag taug txojkev uas lawv ibtxwm tsis tau taug dua. Kuv yuav muab lawv txojkev tsaus ntuj hloov ua kev kaj, thiab muab tej kev uas tsis xwmyeem ncaws kom tiaj rau lawv taug. Tej no yog tej uas kuv yuav ua, thiab kuv yuav tsis muab tej no tso tseg ib zaug li. Cov neeg uas cia siab rau tej mlom, lawv hu tej mlom ntawd hais tias, ‘Nej yog peb cov vajtswv,’ lawv yuav raug txajmuag thiab poob ntsejmuag.” Tus TSWV hais tias, “Nej cov neeg lag ntseg, ua tib zoo mloog! Nej cov neeg digmuag, ua tib zoo saib kom tseeb! Puas muaj leejtwg digmuag heev tshaj kuv tus tubtxib lossis lag ntseg tshaj tus xa xov uas kuv txib los? Cov Yixalayees, nej twb pom ntau yam los lawm, tiamsis zoo li nej tsis pom li. Nej muaj qhovntsej, tiamsis zoo li nej tsis hnov li.” Tus TSWV yog tus Vajtswv uas muaj lub siab kub lug cawm kom neeg dim, nws thiaj muab nws tej kevcai thiab tej lus qhuab qhia saib rau qhov siab, thiab nws xav kom nws haivneeg hwm tej kevcai ntawd. Tiamsis nws haivneeg raug luag huab thiab luag nyiag; lawv raug luag ntes kaw rau hauv tej qhov uas tsaus ntuj nti thiab muab lawv zais rau hauv tej tsev lojcuj, lawv raug luag huab, luag nyiag tsis muaj leejtwg cawm tau lawv; lawv raug luag nyiag thiab luag huab los tsis muaj leejtwg tuaj hais tias, “Cia li tso lawv.” Nej cov leejtwg yuav tig pobntseg mloog zaj no? Txij no mus nej puas yuav ua tib zoo mloog? Leejtwg muab cov Yixalayees cob rau cov neeg uas tuaj huab lawv? Twb yog tus TSWV uas peb tau ua txhaum rau lawm muab ntag! Peb tsis ua peb lub neej raws li nws lub siab nyiam lossis tsis mloog tej lus qhuab qhia uas nws tau qhia rau peb. Yog li ntawd, nws thiaj tso nws txojkev chim los raug peb, thiab ua kom peb ntsib kev tsov kev rog uas txomnyem ntsuav. Nws txojkev chim kub cov Yixalayees ib yam li hluavtaws, tiamsis peb tsis paub hais tias muaj xwm dabtsi thiab peb yeej tsis xeevxwm hlo li. Cov Yixalayees, tus TSWV uas tsim nej hais tias, “Nej tsis txhob ntshai, kuv yuav cawm kom nej dim. Kuv twb tuav nej npe hu nej lawm, vim nej yog kuv haivneeg. Thaum nej hla tej dej tob, kuv yuav nrog nraim nej lossis nej mus hauv dej, dej yuav tsis tshoob nej. Thaum nej mus hauv cov nplaim hluavtaws, hluavtaws yuav tsis kub nej; txojkev sim siab no yuav txov tsis tau nej. Rau qhov kuv yog tus TSWV uas yog nej tus Vajtswv. Kuv yog cov Yixalayees tus Vajtswv dawbhuv uas cawm kom nej dim. Kuv muab cov Iziv los ua nqi txhiv nej, muab cov Sudas thiab cov Xenpas los pauv nej. Kuv muab tagnrho txhua haivneeg los txhiv nej txojsia, rau qhov nej muaj nqis rau kuv heev, kuv ua kom nej tau ntsejmuag, thiab kuv hlub nej kawg nkaus li. Tsis txhob ntshai, kuv nrog nraim nej! “Kuv yuav coj nej puag tim hnubtuaj thiab sau nej puag tim hnubpoob rov qab los. Kuv yuav hais rau cov nyob sab qaumteb kom tso lawv los thiab cov nyob sab qabteb kom tsis txhob cheem lawv nyob. Cia li tso kuv cov tub uas nyob deb heev rov los thiab cov uas nyob puag tim qab ntuj kawg rov qab los. Lawv yog kuv haivneeg, kuv tsim lawv los ua kom kuv tau koob meej, kuv yog tus puab lawv thiab tsim lawv ntag.” Vajtswv hais tias, “Coj haivneeg uas muaj qhovmuag, tiamsis tsis pom kev; muaj pobntseg, tiamsis tsis hnov lus tuaj! Cia txhua haivneeg tuaj sib sau ua ke. Leejtwg muaj cuabkav hais tau nws zaj thiab qhia rau peb saib yuav muaj yam dabtsi tshwmsim yav tom ntej? Cia lawv coj lawv tej vajtswv tuaj ua timkhawv rau lawv, cia lawv hnov thiab tau hais tej lus tseeb. Tus TSWV hais tias, “Cov Yixalayees, nej yog kuv cov timkhawv, kuv xaiv nej los ua kuv cov tubtxib kom nej thiaj paub kuv thiab ntseeg kuv, thiab paub hais tias kuv tib leeg xwb thiaj yog Vajtswv. Yeej ibtxwm tsis muaj lwm tus vajtswv uas nyob ua ntej kuv thiab yav tom ntej los yuav tsis muaj li. “Kuv tib leeg xwb thiaj yog tus TSWV, tsuas yog kuv tib leeg xwb thiaj cawm tau nej dim. Kuv twb xub qhia tej xwm no rau nej paub ua ntej lawm, ces kuv mam los pab kom nej dim. Cov neeg txawv tebchaws tsis muaj ib tug vajtswv ua tau tej uas kuv ua no; nej puavleej yog kuv cov timkhawv. Kuv yog Vajtswv thiab kuv yeej yuav zoo li no mus ibtxhis li. Tsis muaj ib tug twg yuav khiav dhau kuv lub hwjchim; tej uas kuv ua yeej tsis muaj leejtwg hloov tau ib zaug li.” Cov Yixalayees tus Vajtswv uas dawbhuv, tus TSWV uas txhiv nej dim hais tias, “Vim kuv xav cawm kom nej dim, kuv thiaj txhij tubrog mus tua lub nroog Npanpiloos; kuv yuav tsoo tej roojvag nroog kom tawg tas, thiab tej neeg lub suab qw yuav ua suab quaj suab nyiav. Kuv yog tus TSWV, nej tus Vajtswv uas dawbhuv. Cov Yixalayees, kuv yog tus uas tsim nej thiab yog tus vajntxwv uas kav nej ntag.” Tus TSWV hais tias leejtwg yog tus rhawv txojkev phua plhawv hiavtxwv rau sab tim ub, yog txojkev uas tshab plaws hauv tus dej uas ntsawj ceev heev. Tus TSWV thiaj coj lawv pab tubrog coob coob uas muaj zog heev mus raug kev puastsuaj, cov tubrog tsav tsheb nees thiab tej nees tog tas rau hauv dej thiab lawv tsis sawv li lawm. Lawv ploj ntshis mus ib yam li tus nplaim teeb uas tuag lawm. Tiamsis tus TSWV hais tias, “Tsis txhob nco txog tej xwmtxheej uas twb dhau los lawm lossis tsis txhob xav txog tej xwm ntawd li. Kuv tabtom ua yam tshiab; nimno yam ntawd twb tshwm tuaj lawm, nej tsis pom yam ntawd li los? Kuv yuav ua ib txojkev mus phua plhawv hauv tej nras mojsab qhua, thiab muaj dej txhawv ntws nto hauv tej tiaj suabpuam. Txawm yog tej tsiaj qus los yuav hwm kuv, tej hma thiab noog ntxhuav puavleej yuav qhuas kuv, rau qhov kuv ua kom muaj dej nyob hauv tej nras mojsab qhua, thiab ua kom muaj dej txhawv ntws nto hauv tej tiaj suabpuam kom haivneeg uas kuv xaiv thiaj tau dej haus. Lawv yog haivneeg uas kuv tsim tseg ua kuv tug, lawv yuav hu nkauj qhuas kuv!” Tus TSWV hais tias, “Cov Yixalayees, txawm yog kuv pab nej npaum li ntawd los nej tseem dhuav kuv thiab tsis pehawm kuv li. Nej twb tsis coj nej tej yaj tuaj tua hlawv fij rau kuv lossis ua rau kuv tau ntsejmuag los ntawm nej tej khoom fij li. Kuv tsis tau ua kom nej nyuaj siab vim tej khoom ntawd lossis ua kom nej qaug zog vim tej hmoov tshuaj tsw qab. Nej twb tsis tau muab nyiaj muas hmoov tshuaj tsw qab tuaj fij rau kuv lossis muab tej roj tsiaj uas nej tua ua khoom fij coj tuaj fij rau kuv. Tiamsis nej ua rau kuv nyuaj siab vim nej tej kev txhaum, kuv dhuav nej tej kev txhaum kawg li. Kuv yog Vajtswv tus uas zam txim rau nej; kuv ua li no, vim kuv yog tus zoo, thiab kuv yuav tsis cim ntsoov nej tej kev txhaum cia. “Cia li piav tej qub lus rau kuv; peb los sib cav ua ke, thiab peev nej zaj tuaj saib nej puas yog tus uas tsis muaj txhaum! Nej thawj tug yawgkoob tau ua txhaum; nej cov thawjcoj tau ntxeev siab rau kuv, thiab nej cov nomtswv saib tsis taus kuv qhov chaw dawbhuv. Kuv thiaj tso kev puastsuaj los raug haivneeg Yixalayees; kuv thiaj tso kuv haivneeg rau luag txob thuam.” Tus TSWV hais tias, “Cov Yixalayees uas yog kuv cov tubtxib, Yakhauj cov xeebntxwv yog haivneeg uas kuv xaiv tseg lawm, nimno nej cia li mloog kuv hais! Tus TSWV hais tias, kuv yog tus tsim nej, kuv tsim nej rau hauv leej niam plab thiab kuv yuav pab nej: Yakhauj uas yog kuv tus tubtxib, koj tsis txhob ntshai; Yesuloos yog tus uas kuv xaiv tseg lawm! “Kuv yuav tso dej los rau hauv lub tebchaws uas nqhis dej, thiab ua kom muaj dej ntws saum tej av uas qhuav nkig nkuav. Kuv yuav tso kuv tus ntsujplig los rau nej cov xeebntxwv, thiab foom koob hmoov rau nej cov menyuam. Lawv yuav hlob mos nyoos li tej nroj uas tuaj ntawm ntug dej, thiab zoo li tej ntoo uas tuaj ntawm ntug dej. “Tej neeg ib leej hais rau ib leeg hais tias, ‘Kuv yog tus TSWV neeg.’ Lawv yuav kiav xeem ua neeg Yixalayees. Nyias taus nyias sau tus TSWV lub npe rau ntawm nyias txhais npab hais tias nws yog Vajtswv haivneeg.” Tus TSWV yog cov Yixalayees tus Vajntxwv thiab yog tus uas tsomkwm lawv, tus TSWV uas muaj hwjchim loj kawg nkaus hais tias, “Kuv yog lub hauvpaus thiab lub ntsis, tsuas yog kuv thiaj yog Vajtswv xwb; tsis muaj dua lwm tug vajtswv li lawm, tsuas yog kuv tib leeg xwb.” Leejtwg thiaj muaj peevxwm ua tau li kuv ua? Leejtwg thiaj muaj peevxwm qhia txhua yam puag thaum hauvpaus uas kuv tsim kuv haivneeg los thiab mus txog thaum kawg rau peb mloog? Kuv haivneeg, nej tsis txhob ntshai! Kuv twb qhia txhua yam uas tshwmsim puag thaum hauvpaus rau nej paub los txog niaj hnub no, thiab nej yog kuv cov timkhawv ntag. Puas muaj lwm tus vajtswv nyob qhov ntawd? Qhov ntawd puas muaj tej tus vajtswv uas muaj hwjchim heev uas kuv tsis tau hnov dua li? Cov neeg uas puab mlom yeej tsis tseemceeb thiab tej vajtswv uas lawv hwm tsis muaj nqis dabtsi. Cov neeg uas pe tej vajtswv no yog neeg digmuag thiab tsis paub qabhau, lawv yuav raug kev txajmuag. Qhov uas neeg nchuav mlom nyiaj mlom kub los pe, tsis muaj qabhau dabtsi li. Txhua tus uas pe mlom yuav raug kev txajmuag; cov neeg uas puab mlom lawv yog neeg xwb, tsis muaj nqis dabtsi. Cia li tso lawv los rau ntawm lub rooj txiav txim; lawv yuav ntshai thiab txajmuag heev. Tus kws ntaus hlau muab ib thooj hlau coj mus hlawv rau hauv lub lwjhlaus. Nws sab npab uas muaj zog tuav rauj ntaus thooj hlau ua tau ib tug mlom. Thaum nws ua haujlwm nws tshaib plab, nqhis dej thiab tsaug muag kawg li. Tus txua ntoo muab hlua ntsuas thooj ntoo. Nws muab cwjmem kos thoob plaws, nws muab txaug los txaug thooj ntoo ntawd kom zoo nkaus li neeg tus yam ntxwv, thiab coj mus teeb rau hauv nws lub tsev. Nws ntov tej ntoo ciab lossis xaiv tej ntoo npeb lossis ntoo qhib hauv havzoov los siv. Lossis nws cog yub ntoo thuv cia, tos nag los ywg kom tej yub thuv ntawd hlob. Tus neeg ntawd muab ib tog los ua taws rauv, thiab muab ib tog los txua ua mlom. Nws muab ib tog ua taws rauv nte thiab rauv cub mov; dua li ntawd nws muab ib tog los txua ua ib tug mlom rau nws pe. Nws muab ibtxhia los ua taws rauv; nws ci nqaij noj qhuas ntxhias, thiab nws txaus siab heev; nws tau tej hluavtaws ntawd nte, nws hais tias, “Ua li cas yuav zoo thiab sov ua luaj! Tej ntoo no cig zoo kawg.” Tog ntoo uas seem, nws muab txua ua ib tug mlom; nws pe thiab teev tus mlom ntawd, nws thov tus mlom ntawd hais tias, “Koj yog kuv tus vajtswv, thov koj pab kom kuv dim lauj!” Lawv lub siab ruam kawg li, lawv qi muag nti thiab ntsaws qhovntsej kom lawv tsis pom thiab tsis paub dabtsi. Tus uas txua mlom ras tsis txog hais tias, “Kuv muab ib tog ntoo los ua taws rauv. Kuv ci ncuav thiab ci nqaij saum cov ncaig los noj. Tog ntoo uas seem, kuv muab txua ua ib tug mlom, thiab kuv tabtom pe tog ntoo ntawd ntag!” Qhov uas nws pe mlom zoo li noj tshauv ntag. Lawv lub siab ruam coj lawv mus yuam kev. Lawv tsis pom hais tias tus mlom uas lawv tuav rawv ntawm tes tsis yog vajtswv hlo li. Tus TSWV hais tias, “Yakhauj, nco ntsoov tej no. Cov Yixalayees, nej yog kuv cov tubtxib uas kuv tsim. Cov Yixalayees, nej yog kuv cov tubtxib kuv yuav nco ntsoov nej mus li. Kuv muab nej tej kev txhaum tshem mus povtseg ib yam li tauv huab, thiab tshem nej lub txim ib yam li lub lwg dej thaum sawv ntxov. Nej cia li rov los cuag kuv, kuv yog tus uas txhiv nej dim.” Lub ntuj, cia li hu nkauj zoo siab rau qhov tus TSWV ua tej no tiav lawm; nruab tivtxwv, cia li tsa suab qw nrov nrov; tej hauv roob, cia li hu nkauj zoo siab, havzoov thiab txhua tus ntoo, cia li hu nkauj zoo siab! Tus TSWV twb txhiv cov Yixalayees dim lawm, qhov uas nws ua li ntawd yog ua kom sawvdaws pom nws lub tshwjchim uas ci ntsa iab. “Kuv yog tus TSWV, kuv yog nej tus cawmseej; kuv yog tus tsim nej rau hauv leej niam plab. Kuv yog tus TSWV uas tsim ib puas tsav yam. Kuv tib leeg yog tus nthuav lub ntuj; kuv tib leeg yog tus tsim lub ntiajteb. Kuv ua kom cov neeg saib hmoov tej lus tsis tseeb, thiab muab cov neeg uas txawj saib hnub saib hli tej lus rhuav kom tsis tshwmsim raws li lawv hais. Kuv tsis mloog tej lus uas cov neeg ntse hais, thiab kuv ua kom lawv hais lawv tej lus tsis muaj kuab. Tiamsis thaum kuv tus tubtxib mus qhia tej uas yuav tshwmsim los thiab thaum kuv tus tubtxib mus qhia tej uas kuv yuav ua, kuv yuav ua kom tej ntawd tiav raws li tej lus uas kuv hais. Kuv qhia lub nroog Yeluxalees hais tias, yuav muaj neeg rov los nyob hauv, thiab lawv yuav rov txhim kho cov Yudas tej nroog dua tshiab; thiab kuv yuav txhim kho lawv tej vuas pob puas tas lawm dua tshiab. Kuv hais rau dej hiavtxwv tob hais tias, ‘Cia li nqhuab, kuv yuav ua kom tej dej nqhuab tas huv tibsi.’ Kuv hais rau Xailas hais tias, ‘Koj yog kuv tus tub yug yaj, koj yuav ua kuv tes haujlwm kom tiav raws li kuv lub siab nyiam; koj yuav hais kom neeg txhim kho lub nroog Yeluxalees dua tshiab, thiab hais kom lawv pua lub tuamtsev dua tshiab.’ ” Tus TSWV xaiv Xailas ua vajntxwv. Tus TSWV tsa Xailas tua kom yeej txhua haivneeg; nws txib Xailas mus txo tej vajntxwv kom poob hwjchim; tus TSWV yuav qhib ntau lub nroog tej roojvag rau nws txeem mus rau hauv. Tus TSWV thiaj hais rau Xailas hais tias, “Kuv yuav ua koj ntej mus kho kev rau koj, thiab muab tej hauv roob nphau kom tiaj sib txig. Kuv yuav tsoo tej roojvag tooj kom tawg ua tej daim, thiab muab tej nqaj hlau txiav kom tu tas huv tibsi. Kuv yuav muab tej nyiaj hauv qhov tsaus ntuj nti uas tsis muaj leejtwg paub pub rau koj, ces koj thiaj yuav paub hais tias kuv yog tus TSWV uas yog cov Yixalayees tus Vajtswv tuav koj lub npe hu koj. Vim kuv pom txog Yakhauj tus uas yog kuv tus tubtxib, thiab cov Yixalayees uas kuv xaiv tseg lawm, kuv thiaj tuav koj lub npe hu koj; txawm yog koj tsis paub kuv los kuv twb pub rau koj tau koob meej lawm. “Kuv yog tus TSWV, yeej tsis muaj dua lwm tus Vajtswv li lawm; txawm yog koj tsis paub kuv los kuv yuav txhawb koj lub zog. Kuv ua li no kom txhua tus uas nyob thoob qab ntuj paub hais tias kuv yog tus TSWV thiab tsis muaj dua lwm tus vajtswv lawm. Kuv tsim qhov kaj thiab qhov tsaus, kuv yog tus pub koob hmoov thiab tso kev puastsuaj los. Kuv yog tus TSWV, tej no puavleej yog kuv tsim huv tibsi. Kuv yuav tso kev muaj yeej ib yam li nag los saum ntuj los; lub ntiajteb yuav tau txais txojkev muaj yeej ntawd; kev thajyeeb thiab kev ncaj ncees yuav tawg paj txi txiv hauv lub ntiajteb. Kuv yog tus TSWV tus uas yuav ua kom tej no tshwmsim los.” Lub laujkaub av muaj cuabkav nrog tus uas puab laujkaub sib cav los? Nws tsuas yog ib lub laujkaub uas zoo li lwm lub thiab xwb. Cov av nplaum puas nug tus uas puab lub laujkaub hais tias, “Koj ua dabtsi?” Lub laujkaub puas yws tus uas puab lub laujkaub hais tias, “Koj twb tsis txawj puab li los sav!” Tus uas nug nws niam nws txiv hais tias, “Vim li cas neb yug tau kuv zoo li no?” Tus ntawd yuav raug kev puastsuaj. Tus TSWV uas yog cov Yixalayees tus Vajtswv uas dawbhuv, yog tus npaj tej uas yuav muaj los yav tom ntej; nws hais tias nej tsis muaj cai yuav nug txog kuv cov menyuam lossis qhia haujlwm rau kuv ua li! Kuv yog tus uas tsim lub ntiajteb thiab tsim neeg los nyob rau hauv. Kuv siv kuv lub hwjchim los nthuav lub ntuj; kuv kav lub hnub, lub hli thiab tej hnubqub huv tibsi. Kuv tshoov Xailas siab kom nws ua tej no tiav raws li kuv npaj tseg thiab kho tej uas tsis zoo kom zoo. Txhua txojkev uas nws taug kuv yuav kho kom ncaj. Nws yuav rov txhim kho kuv lub nroog Yeluxalees dua tshiab, thiab tso kuv cov neeg uas raug luag ntes mus kom dim rov los. Tsis muaj leejtwg ntiav lossis muab nyiaj xiab kom nws ua tej no li. Tus TSWV uas muaj hwjchim loj kawg nkaus yog tus hais tej lus no ntag. Tus TSWV hais rau cov Yixalayees hais tias, “Cov Iziv thiab cov Sudas tej nyiaj yuav yog nej tug, thiab cov neeg Xenpas uas loj siab yuav tau ua nej qhev; luag yuav muab saw hlau khi rawv lawv mus ua nej qab. Lawv yuav txhos caug ntua pe nej thiab lees hais tias, ‘Vajtswv nrog nraim nej nyob thiab nws tib leeg xwb thiaj yog Vajtswv. Cov Yixalayees tus Vajtswv uas cawm nws haivneeg dim kev puastsuaj, yog tus Vajtswv uas tsis tshwm rau leejtwg pom. Cov neeg uas puab mlom yuav raug txajmuag thiab poob ntsejmuag. Tiamsis tus TSWV yog tus uas cawm cov Yixalayees dim; lawv yuav kovyeej mus ibtxhis thiab lawv yuav tsis poob ntsejmuag ib zaug li.’ ” Tus TSWV yog tus uas tsim lub ntuj, nws tib leeg thiaj yog Vajtswv. Nws yog tus uas tsim lub ntiajteb, nws ua kom ntiajteb nyob ruaj khov mus ibtxhis. Nws tsis tau tsim lub ntiajteb los nyob do cuas tsis muaj dabtsi, tiamsis nws tsim los rau neeg nyob. Nws yog tus uas hais tias, “Kuv yog tus TSWV, tsis muaj dua lwm tus vajtswv lawm. Kuv tsis tau hais nraim nkoos tsis pub leejtwg hnov lossis npog tej uas kuv ua lub ntsiab tsis pub leejtwg paub. Kuv tsis tau hais kom cov Yixalayees tuaj nrhiav kuv hauv qhov tsaus ntuj nti. Kuv yog tus TSWV, kuv hais tej lus tseeb xwb; thiab yam uas yog, kuv thiaj qhia rau sawvdaws paub.” Tus TSWV hais tias, “Nej txhua haivneeg uas dim kev tuag ntawd, nej cia li sib sau los ua ke thiab txav los kom ze! Tej neeg nqa rawv tej mlom ntoo thiab thov tej vajtswv uas cawm tsis tau lawv. Lawv tsis paub dabtsi. Cia li tuaj rau hauv tsev tu plaub thiab peev nej tej lus; cia cov neeg uas lawv hais daws lawv zaj sib tuavxam ua ke. Leejtwg piav tej no thaum ub los lawm, tsis yog kuv uas yog tus TSWV piav los? Kuv yog Vajtswv tus dawbhuv thiab yog tus cawmseej, yeej tsis muaj dua lwm tus vajtswv li lawm. “Txhua haivneeg uas nyob hauv ntiajteb, cia li tig los cuag kuv nej thiaj yuav dim! Kuv thiaj yog Vajtswv yeej tsis muaj dua lwm tus vajtswv li. Kuv tej lus cog tseg yeej yog lus tseeb, thiab yuav tsis hloov li. Kuv qhia tseeb hais tias txhua tus yuav tau txhos caug ntawm kuv xubntiag, thiab lawv lees hais tias lawv yuav muab siab npuab kuv. “Lawv yuav hais tias tsuas yog tus TSWV tib leeg xwb thiaj yuav pub lawv kovyeej thiab muaj zog,” tiamsis txhua tus uas ntxub kuv yuav raug kev txajmuag. Kuv yog tus TSWV uas yuav cawm tagnrho Yakhauj cov xeebntxwv kom dim, thiab lawv yuav ua kuv tsaug. “Thaum ub muaj neeg tuaj pe tus mlom Npeles thiab tus mlom Nenpaus, tiamsis nimno luag muab rau tsiaj thauj lawm xwb; tej mlom ntawd tsuas ua lub nra hnyav rau tej tsiaj xwb. Cov mlom ntawd yeej pab tsis tau kom mlom dim li; luag thiaj coj cov mlom ntawd mus lawm. Ntawm no yog qhov kawg rau lub nroog Npanpiloos tej vajtswv. “Yakhauj cov xeebntxwv uas yog haivneeg Yixalayees uas tseem tshuav nyob, nej cia li mloog kuv hais. Kuv yeej saib xyuas nej puag thaum uas nyuam qhuav yug tau nej los. Kuv yog nej tus Vajtswv thiab kuv yuav saib xyuas nej mus txog thaum nej laus thiab plaubhau dawb lawm. Kuv yog tus tsim nej thiab yuav tu nej; kuv yuav pab nej thiab tso kom nej dim.” Tus TSWV hais tias, “Nej yuav muab kuv piv rau leejtwg? Puas muaj lwm tug zoo li kuv thiab? Cov neeg qhib lawv tej hnab rho lawv tej kub los thiab muab lawv tej nyiaj los luj saum teev. Lawv ntiav ib tug txawj nchuav kub tuaj nchuav ib tug mlom; ces lawv mus txhos caug pe tus mlom ntawd. Lawv tsaws tus mlom ntawd rau saum xubpwg kwv mus; lawv coj mus txawb rau ib qho chaw, tus mlom ntawd mus tsis tau qhov twg li. Leejtwg thov nws los nws tsis paub teb lossis nws cawm tsis tau leejtwg dim ntawm txojkev puastsuaj li. “Nco ntsoov tej no thiab ua tib zoo xav, nej cov neeg uas ntxeev siab, cia li khaws nkaus rau nruab siab. Nco ntsoov tej xwmtxheej uas tshwmsim puag thaum ub los lawm; kuv yog Vajtswv, tsis muaj dua lwm tus li lawm; kuv yog Vajtswv, tsis muaj lwm tus zoo li kuv. Thaum chivkeeb kuv twb yeej qhia zaj uas yuav tshwmsim los thaum ntiajteb yuav kawg lawm. Kuv hais tias, ‘Tej uas kuv twb npaj lawm yuav nyob khov kho; kuv yuav ua txhua yam kom tiav raws li kuv tau npaj tseg lawm.’ Kuv tabtom hu ib tug neeg khiav ceev cuag dav ya tim hnubtuaj tuaj; nws nyob lub tebchaws uas deb heev tuaj, nws yuav ua kuv tes haujlwm kom tiav. Kuv hais li cas, kuv yuav ua li ntawd, thiab kuv npaj siab li cas, kuv yuav ua li ntawd ntag. “Cov neeg siab tawv, yog leejtwg xav hais tias, nws tseem nyob deb ntawm txojkev dim, ces cia li mloog kuv tej lus! Kuv coj txojkev cawm dim los ze thiab nyob tsis deb nej lawm. Kuv txojkev cawm dim yuav tsis muab ncua tseg li; Kuv yuav cawm lub nroog Yeluxalees thiab yuav coj lub koob meej zoo los rau cov Yixalayees.” Tus TSWV hais tias, “Npanpiloos tus ntxhais nkaujxwb, koj cia li nqis los zaum saum cov hmoov av; Npanpiloos tus ntxhais, koj cia li nqis los zaum hauv av qhov uas tsis muaj lub zwmtxwv! Vim luag yuav tsis hu hais tias koj yog tus nkauj mog uas zoo nkauj ntxiv lawm. Muab lub zeb los zom hmoov nplej, yaws koj daim ntaub npog ntsejmuag, hle koj lub tsho ntev, qaws koj daim tiab thiab daws koj txhais nrhoob kwm dej mus. Koj yuav nyob liabqab thiab luag yuav pom koj qhov chaw txajmuag. Kuv yuav ua pauj thiab yuav tsis tseg leejtwg li.” Tus uas txhiv peb dim lub npe hu ua tus TSWV uas muaj hwjchim loj kawg nkaus; nws yog cov Yixalayees tus Vajtswv tus uas dawbhuv. Tus TSWV hais tias, “Npanpiloos tus ntxhais, koj cia li zaum twjywm thiab mus rau hauv qhov tsaus ntuj nti; vim li ntawd luag yuav tsis hu koj ua ntau lub tebchaws tus poj vajntxwv ntxiv lawm. Yav tas los kuv chim heev rau kuv haivneeg, kuv thiaj rho kuv txoj koob hmoov rov qab lawm. Kuv muab lawv cob rau koj tes, thiab koj tsis hlub lawv hlo li. Txawm yog cov twb laus lawm los koj tseem muab tus quab uas hnyav tshaj plaws khuam rau saum lawv xubpwg. Koj hais tias, ‘Kuv yuav tau ua poj vajntxwv mus ibtxhis,’ vim li ntawd, koj thiaj tsis khaws tej no rau nruab siab lossis tsis xav txog hais tias tej no yuav txawj kawg. “Koj tus uas nyiam kev lomzem, koj cia li mloog tej lus no; koj xav hais tias koj twb dim thiab tau nyob kaj siab lug lawm. Koj hais tias koj muaj hwjchim loj ib yam li Vajtswv, thiab yeej tsis muaj ib tug zoo npaum li koj. Koj xav hais tias, koj yuav tsis tau ua pojntsuam lossis tau kev txomnyem uas koj tej menyuam tuag tso koj tseg. Muaj ib hnub, tso nco xwb ob yam xwm no yuav tshwm los raug koj; vim koj tej tswvyim phem thiab koj tej khawvkoob, koj cov menyuam thiab koj tus txiv yuav tuag tso koj tseg. “Koj cia siab ntsoov rau koj tej kev phem kev qias nkaus xwb; koj hais tias, ‘yeej tsis muaj leejtwg pom kuv hlo li.’ Koj lub tswvyim thiab tej kev txawj ntse twb ua rau koj yuam kev lawm, thiab koj xav hauv koj lub siab hais tias, ‘Kuv yog Vajtswv ntag, tsis muaj dua lwm tus lawm.’ Koj yuav raug kev puastsuaj, thiab koj tej khawvkoob yuav pab tsis tau koj. Koj yuav raug txojkev piamsij uas koj tsis nco txog, yog txojkev piamsij uas koj yeej tsis tau xav txog li. Koj cia siab ntsoov rau koj tej khawvkoob thiab koj tej dab neeb uas koj ibtxwm coj thaum koj tseem hluas los lawm. Tej zaum tej ntawd yuav pab tau koj thiab tej zaum yuav ua rau koj cov yeebncuab ntshai. Koj qaug zog tas vim muaj ntau tus nrog koj tuavxam; Cia li kom koj cov neeg uas txawm saib hnubqub mus sawv tom hauv ntej thiab pab koj; lawv yog cov neeg uas kawm txog tej hnubqub, lawv muab lub ntuj faib ua tej ntsug thiab qhia koj ib hlis dhau ib hlis saib yuav muaj xwm dabtsi los raug koj. “Lawv zoo ib yam li cov quavnyab npleg, thiab hluavtaws yuav kub lawv! Lawv tsis muaj peevxwm pab kom lawv dim ntawm cov nplaim taws ntawd li. Tsis yog cov hluavncaig uas txhiab kom sov, thiab tsis yog lub cubtawg uas rauv rau lawv nte. Cov neeg uas ua haujlwm rau koj yuav ua li no rau koj. Lawv yog cov txawj saib hnubqub rau koj thaum koj tseem hluas los. Lawv yuav ncaim koj thiab nyias mus nyias lawm, yuav tsis muaj leejtwg pab kom koj dim li.” Cov Yixalayees uas yog Yudas cov xeebntxwv nej cia li mloog tej lus no: Nej tuav Vajtswv lub npe coglus hais tias peb yuav pehawm cov Yixalayees tus Vajtswv, tiamsis nej tsis ua raws li nej tej lus ntawd. Nej hais tias nej yog cov pejxeem uas nyob hauv lub nroog dawbhuv thiab tso siab plhuav rau cov Yixalayees tus Vajtswv uas lub npe hu ua tus TSWV uas muaj hwjchim loj kawg nkaus. Tus TSWV hais rau cov Yixalayees hais tias, “Thaum ub kuv twb qhia rau nej lawm hais tias yuav muaj dabtsi tshwmsim los; yog li ntawd, thaum nej tsis nco txog, kuv thiaj ua kom tej ntawd tshwm los. Kuv yeej paub hais tias, nej yog neeg tawv ncauj, nej lub cajdab tawv npaum li hlau, thiab nej lub hauvpliaj tawv npaum li tooj dag. Yog li ntawd, kuv twb xub qhia txog nej lub neej yav tom ntej rau nej paub puag thaum ub los lawm. Kuv qhia ua ntej uas tej ntawd tshwmsim los kom nej tsis txhob khav hais tias, yog nej tej mlom ntoo lossis mlom tooj ua kom tej ntawd tshwmsim los. “Nej twb hnov tej no thiab pom tej ntawd lawm. Nej txawm tsis lees paub li los? Txij no mus kuv yuav qhia tej yam tshiab rau nej paub, yog tej yam nraim nkoos uas nej tsis tau paub dua li. Tej xwmtxheej uas kuv nyuam qhuav ua no nej yeej tsis tau hnov dua li. Yog nej hnov lawm, nej yuav khav hais tias, ‘Pej twb paub lawm.’ Nej yeej ibtxwm tsis hnov, nej yeej ibtxwm tsis paub li; txij puag thaum ub los, nej lub qhovntsej yeej tsis qhib. Vim kuv paub nej lub siab yeej tsis ncaj, thiab nej yeej yog neeg ntxeev siab thaum yug tau nej los li lawm. “Vim kuv xav kom neeg qhuas kuv lub npe, kuv cheem kuv txojkev chim tseg rau nruab siab. Kuv cheem tej ntawd thiaj tsis ua rau nej puastsuaj. Kuv tau coj kev nyuaj siab los sim nej ib yam li nchuav nyiaj hauv yeejvub, tiamsis kuv pom hais tias nej tsis muaj nqis dabtsi li. Vim kuv xav ua kuv, vim kuv xav ua rau kuv xwb, kuv thiaj ua tej no, kuv yuav tsis pub leejtwg saib tsis taus kuv lub npe lossis tsis pub leejtwg muaj feem koom nrog kuv lub tshwjchim.” Tus TSWV hais tias, “Yakhauj, koj cia li mloog kuv tej lus, Yixalayees tus uas kuv tau hu! Kuv yog Vajtswv, kuv yog lub hauvpaus thiab yog lub ntsis. Yog kuv txhais tes tsim lub ntiajteb, thiab kuv sab tes xis nthuav lub ntuj; thaum kuv hu, lub ntiajteb thiab lub ntuj tib txhij tawm tuaj. “Nej sawvdaws cia li sib sau los ua ke thiab mloog kuv hais! Lawv cov ntawd, leejtwg thiaj qhia tau tej lus no rau sawvdaws? Tus TSWV hlub Xailas heev, tus TSWV thiaj xaiv Xailas ua nws tes haujlwm rau lub nroog Npanpiloos thiab tus TSWV txhais tes yuav tawmtsam lub nroog Npanpiloos. Kuv yog tus hais thiab yog tus hu Xailas ntag; kuv coj nws los thiab ua kom nws vammeej. “Cia li txav los kom ze thiaj hnov zaj uas kuv hais no. Kuv yeej qhia zaj no puag thaum chivkeeb los tsis zais li, thiab yeej tshwm muaj tseeb raws li kuv tej lus.” (Nimno tus TSWV uas yog Vajtswv muab nws lub hwjchim rau kuv thiab txib kuv mus.) Cov Yixalayees tus Vajtswv uas dawbhuv, tus TSWV uas cawm nej dim hais tias, “Kuv yog tus TSWV uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug. “Yog nej ua tib zoo mloog kuv tej lus samhwm! Ces tej koob hmoov yuav ntws laub lug los rau nej ib yam li tus dej ntws tsis paub nqhuab li. Nej tej kev vammeej yuav zoo ib yam li hiavtxwv ntas. Nej tej tubki yuav huamvam coob suav tsis txheeb ib yam li tej suabzeb, lawv tej npe yuav tsis raug rho tawm ntawm kuv lossis tsis raug puastsuaj li.” Cia li khiav tawm hauv lub nroog Npanpiloos mus, cia li khiav kom dim. Cia li hu nkauj zoo siab rau txhua qhov paub hais tias, “Tus TSWV tau txhiv nws tus tubtxib Yixalayees dim lawm!” Thaum tus TSWV coj nws haivneeg taug kev los hla tiaj suabpuam qhov uas tshav ntuj kub heev ntawd, lawv yeej tsis raug txojkev txomnyem thiab nqhis dej li. Tus TSWV ua kom dej txhawv hauv pobzeb los rau lawv haus; nws rua lub pobzeb thiab dej thiaj tawm hauv los. Tus TSWV hais tias, “Tsis muaj kev kaj siab rau cov neeg ua txhaum li.” Txhua lub tebchaws uas nyob deb, cia li mloog kuv hais. Cov neeg uas nyob deb, tus TSWV twb xaiv kuv thaum tseem tsis tau yug kuv, thiab nws yeej tis kuv lub npe thaum kuv tseem nyob hauv kuv niam plab lawm. Nws ua rau kuv tej lus ntse ib yam li hniav ntaj, nws muab nws txhais tes thaiv kuv. Nws ua rau kuv zoo ib yam li xibxub uas ntse heev thiab npaj rawv tos tua lawm xwb. Nws hais rau kuv tias, “Cov Yixalayees, nej yog kuv cov tubtxib, nej yuav ua rau kuv tau koob meej.” Kuv hais tias, “Kuv twb ua haujlwm hnyav heev tiamsis tsis muaj qabhau! Kuv twb siv kuv lub zog tiamsis tsis muaj dabtsi tiav.” Txawm li ntawd los kuv tseem tso siab rau tus TSWV, thiab kuv tus TSWV yuav coj nqi zog los rau kuv. Tus TSWV twb tsa kuv ua nws tus tubtxib thaum kuv tseem nyob hauv kuv niam plab, tus TSWV tsa kuv ua nws tus tubtxib coj nws haivneeg Yixalayees uas tawg ua sab ua sua lawm rov qab los cuag nws. Tus TSWV yuav pub kuv tau ntsejmuag, thiab Vajtswv yog kuv lub zog, tus TSWV hais rau kuv tias, “Kuv tus tubtxib, kuv muab tes haujlwm tseemceeb dua yav tas los lawm rau koj ua; koj yuav ua rau cov Yixalayees uas tseem seem nyob rov vammeej tshaj qub. Tsis yog li ntawd xwb, kuv tseem yuav cia koj ua lub teeb ci rau txhua haivneeg kom neeg ntiajteb thiaj yuav dim.” Tus Vajtswv uas dawbhuv uas cawm cov Yixalayees dim, hais rau tus neeg uas raug luag thuam thiab tus uas raug lwm haivneeg tej nomtswv cov tubtxib ntxub hais tias, “Tej vajntxwv yuav pom koj thiab sawv hawm koj, cov nomtswv yuav pom koj thiab khoov ntshis hawm koj, rau qhov tus TSWV uas yog cov Yixalayees tus Vajtswv uas dawbhuv, nws yog tus ncaj ncees, nws twb xaiv koj cia lawm.” Tus TSWV hais rau nws haivneeg hais tias, “Thaum txog lub sijhawm uas kuv cawm nej, kuv yuav hlub nej, kuv yuav tsomkwm nej, kuv yuav teb nej tej lus thov thiab nej yuav yog kuv lo lus cog tseg rau lwm haivneeg. Kuv yuav cia nej rov mus nyob hauv nej lub tebchaws uas nimno fab hnyo. Kuv yuav hais rau cov neeg uas raug luag ntes hais tias, ‘Cia li tawm mus!’ thiab hais rau cov neeg uas nyob hauv qhov tsaus ntuj nti hais tias, ‘Cia li los rau ntawm qhov pom kev!’ Lawv yuav nrhiav noj saum tej roob ib yam li tej yaj; lawv yuav tsis raug kev tshaib kev nqhis. Lub hnub thiab tej cua sov tom tiaj suabpuam yuav tsis kub lawv, vim tus uas hlub lawv yuav coj lawv kev mus. Nws yuav coj lawv mus rau ntawm qhov uas muaj dej txhawv. “Kuv yuav rhawv ib txoj niam kev saum tej roob rau kuv haivneeg taug. Kuv haivneeg yuav los deb deb los, lawv yuav los sab qaumteb, sab hnubpoob thiab los hauv lub nroog Axavas uas nyob sab qabteb los.” Lub ntuj, cia li hu nkauj! Lub ntiajteb, cia li qw zoo siab! Tej toj roob hauv pes, cia li tsa suab hu nkauj! Tus TSWV yuav nplig nws haivneeg siab; nws yuav hlub nws haivneeg uas raug kev txomnyem. Tiamsis cov neeg uas nyob hauv lub nroog Yeluxalees hais tias, “Tus TSWV twb tso peb tseg lawm! Peb tus TSWV tsis nco qab peb lawm.” Yog li ntawd, tus TSWV teb hais tias, “Puas muaj ib leej niam twg uas tsis nco qab nws tus menyuam mos, thiab tsis hlub tus menyuam uas nws yug? Txawm yog leej niam tsis nco qab nws tus menyuam los xij, kuv yuav nco ntsoov nej thiab tsis tso nej tseg ib zaug li. Yeluxalees, kuv yeej nco ntsoov koj! Kuv muab koj lub npe sau rau hauv kuv ob lub xibteg, kuv saib ntsoov koj mus li. “Tshuav tsis ntev cov neeg uas yuav txhim kho lub nroog Yeluxalees twb yuav los thiab cov neeg uas rhuav tshem koj yuav khiav mus. Cia li tsa qhovmuag ntsia ibncig saib tej xwm ntawd, koj haivneeg tabtom sib sau ua ke, lawv yuav los cuag koj. Tus TSWV hais tias, kuv yog tus uas muaj sia nyob, koj yuav zoo siab rau koj haivneeg ib yam li tus nkauj nyab zoo siab rau nws tej npauj nyiag npauj kub. “Nej lub tebchaws raug puastsuaj nyob do cuas cia, nimno lub tebchaws yuav tsis txaus cov neeg uas tabtom los ntawd nyob. Thiab cov neeg uas muab koj ua puas tas lawm, yuav raug luag raws kom khiav mus deb heev. Muaj ib hnub nej cov menyuam uas yug thaum nej raug luag ntes mus, yuav hais rau nej tias, ‘Lub tebchaws no nqaim rau peb heev, peb xav kom tau lub tebchaws uas dav dua lub no thiaj txaus peb nyob!’ Ces koj yuav xav hais tias, ‘Leejtwg yug cov menyuam no rau kuv? Kuv tej menyuam twb tuag tas thiab kuv muaj tsis taus menyuam lawm. Kuv raug luag ntes coj mus nyob rau lwm lub tebchaws uas deb heev, tiamsis leejtwg tu cov menyuam no loj hlob? Kuv twb nyob do cuas cia lawm, es tej menyuam no tseem los qhov twg los thiab?’ ” Tus TSWV uas muaj hwjchim loj kawg nkaus hais rau nws haivneeg hais tias, “Kuv yuav co tes rau txhua haivneeg, thiab qhia rau cov neeg sawvdaws kom puag nej cov tub ntawm lawv xubntiag thiab ris nej cov ntxhais los tsev. Tej vajntxwv yuav zoo li nej txiv, tej poj vajntxwv yuav zoo li nej niam. Lawv yuav khoov ntshis hawm nej thiab txo hwjchim qis kawg nkaus li. Ces nej thiaj yuav paub hais tias kuv yog tus TSWV; cov neeg uas tos rawv kuv pab yuav tsis nkim lawv lub zog li.” Nej puas muaj peevxwm mus muab tej khoom uas cov tubrog huab tau los? nej puas muaj peevxwm mus tso cov neeg uas tus neeg limhiam ntes lawm? Tus TSWV teb hais tias, “Txawm yog cov neeg uas raug cov tubrog ntes los yuav coj mus, thiab tej khoom uas cov neeg limhiam huab tau los yuav coj mus. Kuv yuav tawmtsam cov neeg uas tawmtsam nej, thiab kuv yuav cawm nej cov menyuam kom dim. Kuv yuav ua kom cov neeg uas tsimtxom nej rov sib tua ua lwj ua liam ib yam li cov neeg qaug cawv. Ces thaum ntawd txhua haivneeg thiaj paub hais tias kuv yog tus TSWV tus uas yog nej tus Cawmseej thiab tus uas txhiv nej dim; kuv yog Yakhauj tus Vajtswv tus uas muaj hwjchim loj kawg nkaus.” Tus TSWV hais tias, “Koj xav hais tias kuv tso kuv haivneeg tseg ib yam li tus txivneej uas muab nws tus pojniam nrauj lawm no los? Daim ntawv nrauj nyob qhov twg? Koj xav hais tias kuv muab koj muag rau luag coj mus rau txim ib yam li tus txivneej uas muab nws cov menyuam muag mus ua qhev no los? Tsis yog li ntawd, koj raug muag vim koj tej kev txhaum; koj raug xa mus povtseg vim koj niam tau ua txhaum xwb. “Vim li cas, thaum kuv los tsis muaj ib tug neeg nyob ntawd? Vim li cas, thaum kuv hu tsis muaj ib tug neeg teb li? Kuv txhais npab luv heev pab tsis tau koj los? Lossis yog kuv tsis muaj hwjchim tso koj dim? Kuv muaj peevxwm hais kom dej hiavtxwv nqhuab, thiab muab tej hav dej hloov ua suabpuam tej ntses yuav tuag tsw lwj ntxiag. Kuv muab kev tsaus ntuj los thaiv lub ntuj thiab muab ntaubtsaj los qhwv lub ntuj.” Tus TSWV uas yog Vajtswv pub tswvyim rau kuv, yog li ntawd, kuv thiaj txhawb tau cov neeg uas qaug zog. Txhua tagkis nws pub kuv muaj lub siab kub lug mloog tej lus uas nws qhia rau kuv. Tus TSWV uas yog Vajtswv ua rau kuv txawj totaub, kuv tsis tau ntxeev siab lossis khiav tawm ntawm nws. Kuv tig nraubqaum rau cov neeg uas nplawm kuv. Kuv tsis tau cheem cov neeg uas thuam kuv, kuv tig xubntiag rau lawv thaum lawv rho kuv cov hwjtxwv, thiab nto qaubncaug rau kuv lub ntsejmuag. Tiamsis tej lus uas lawv thuam tsis mob kuv li, rau qhov tus TSWV uas yog Vajtswv pab kuv lawm. Kuv ua siab ntev rau lawv. Kuv paub hais tias, kuv yeej tsis raug kev txajmuag ib zaug li, rau qhov Vajtswv nyob ze kuv, thiab nws paub hais tias kuv yog neeg tsis muaj txim. Leejtwg xav ua plaub rau kuv? Wb cia li ua ke mus rau hauv tsev tu plaub! Leejtwg xav ua yeebncuab rau kuv? Nws sim txav los ze kuv saib! Tus TSWV uas yog Vajtswv yeej pab kuv; leejtwg thiaj yuav hais tau tias kuv ua txhaum? Lawv yuav ploj tas ib yam li tej ris tsho uas ntsaum kabrwg noj lawm. Nej cov ntawm ko puas muaj leejtwg hwm Vajtswv thiab mloog tej lus uas nws tus tubtxib qhia? Txawm yog nws taug txojkev uas tsaus ntuj nti los nws cia siab rau tus TSWV lub npe thiab tso siab plhuav rau nws tus Vajtswv. Nej txhua tus uas tuav tswvyim txov lwm tus, nej tej tswvyim ntawd yuav rov los txov nej. Tus TSWV yuav ua kom tej ntawd los raug nej ntag. Nej yuav raug kev tsimtxom thiab txomnyem kawg li. Tus TSWV hais tias, “Nej cov uas nrhiav txojkev ncaj ncees thiab xav nrhiav tus TSWV, nej cia li mloog kuv hais. Cia li saib lub pobzeb uas nej muab txaug thiab qhov chaw uas nej khawb pobzeb. Cia li saib nej yawgkoob Anplahas, thiab nej pogkoob Xalas, tus uas yug nej cov uas ua xeebntxwv; thaum kuv hu Anplahas, nws tsis muaj ib tug menyuam li, tiamsis kuv foom koob hmoov rau nws thiab pub rau nws muaj menyuam; kuv pub rau nws muaj xeebntxwv coob suav tsis txheeb li. “Tus TSWV yuav nplig cov neeg hauv lub nroog Yeluxalees, thiab cov neeg nyob hauv lub nroog uas raug puastsuaj tas lawm siab, thiab yuav muab lub nroog Yeluxalees tej nras mojsab ua kom zoo li lub Vaj Edees. Yeluxalees tej tiaj suabpuam yuav zoo li tus TSWV lub vaj; yuav muaj kev zoo siab thiab kev kaj siab nyob hauv Yeluxalees, yuav muaj lub suab hu nkauj qhuas kuv thiab ua kuv tsaug. “Kuv haivneeg, nej cia li mloog kuv hais, thiab nej cia li tig pobntseg mloog kuv tej lus; kuv txoj kevcai thiab txojkev ncaj ncees yuav ua lub teeb ci rau txhua haivneeg pom kev. Kuv yuav los cawm lawv sai sai ntag; kuv txojkev cawm dim twb los lawm, thiab kuv txhais npab yuav kav txhua haivneeg. Cov tebchaws uas nyob deb tos nrhw kuv, thiab cia siab ntsoov rau kuv txhais npab uas yuav cawm lawv dim. Nej cia li tsa qhovmuag saib saum nruab ntug, thiab saib rau hauv ntiajteb, vim lub ntuj yuav yaj ntshis ib yam li tej pa taws; lub ntiajteb yuav ntuag tas ib yam li tej qub ris tsho, thiab tej neeg uas nyob hauv ntiajteb yuav tuag tas ib yam li tej yoov. Tiamsis kuv txojkev cawm dim yuav nyob mus ibtxhis, thiab kuv txojkev ncaj ncees yuav nyob mus tsis paub kawg li. “Nej cov uas paub txojkev ncaj ncees, nej cia li mloog kuv hais; cov neeg uas khaws kuv txoj kevcai rau nruab siab, nej tsis txhob ntshai thaum neeg thuam thiab saib tsis taus nej; vim ntsaum kabrwg yuav noj lawv ib yam li noj tej qub ris tsho, thiab kas yuav noj lawv ib yam li noj tej tawv yaj; tiamsis kuv txojkev ncaj ncees yuav nyob mus ibtxhis, thiab kuv txojkev cawm dim yuav muaj rau txhua tiam neeg.” Tus TSWV, sawv los pab peb lauj! Siv koj lub hwjchim cawm peb ib yam li koj tau ua los lawm. Tsis yog koj twb muab Lahaj txiav ua tej thooj, thiab muab tus zaj hauv hiavtxwv tsuav tu tas lawm los? Twb yog koj ua rau dej hiavtxwv nqhuab, thiab ua kev qhuav qhawv hauv dej mus rau sab tim ub, kom cov neeg uas koj twb cawm dim lawm mus dhau dej rau sab tid. Cov neeg uas koj twb cawm dim lawm, yuav rov qab los thiab hu nkauj zoo siab hauv lub nroog Yeluxalees, lawv yuav muaj kev zoo siab thiab kaj siab lug mus ibtxhis; kev txomnyem quaj ntsuag thiab kev tu siab yuav tsis raug lawv lawm. Tus TSWV hais tias, “Kuv yog tus txhawb nej lub zog, vim li cas nej yuav ntshai cov neeg uas txawj tuag uas twb tsis muaj sia nyob ntev npaum li tej nyom? Nej tsis nco qab tus TSWV uas tsim nej, tus uas nthuav lub ntuj thiab pua lub ntiajteb lawm los? Vim li cas nej ua neej nyob ntshai rwg cov neeg uas tsimtxom nej thiab xav kom nej puastsuaj? Lawv tej kev nruj tsiv yeej ua tsis tau li cas rau nej. Tshuav tsis ntev, kuv yuav tso cov neeg raug txim dim los; lawv yuav tsis tuag thiab tsis tau mus rau hauv lub qhov ntxa, thiab lawv yuav tsis tu ncua zaub mov noj li lawm. “Kuv uas yog tus TSWV tus uas yog nej tus Vajtswv, kuv yog tus do hiavtxwv kom ntas nphau tej niag nthwv thiab nrov nroo ntws. Kuv lub npe hu ua tus TSWV tus uas muaj hwjchim loj kawg nkaus! Kuv muab kuv tej lus qhia cob rau nej thiab kuv txhais tes tiv thaiv nej, kuv nthuav lub ntuj thiab pua lub ntiajteb, kuv hais rau cov neeg hauv lub nroog Yeluxalees hais tias, ‘Nej yog kuv haivneeg.’ ” Yeluxalees, sawv los mas! Koj cia li sawv tsees los! Koj twb haus tus TSWV lub khob uas yog txojkev txiav txim lawm, lub khob ntawd yog nws txojkev chim uas ua rau koj ntog pujpoog. Cov menyuam uas koj yug tsis muaj ib tug coj koj kev, cov menyuam uas koj tu hlob tsis muaj ib tug los tuav koj tes. Yuav muaj ob yam kev puastsuaj los raug nej; nej lub tebchaws yuav muaj kev tsov kev rog kom piamsij tas, nej haivneeg yuav tuag tas rau kev tshaib kev nqhis thiab hniav ntaj hniav riam. Yuav tsis muaj leejtwg tuaj nplig nej siab. Nej cov menyuam yuav tsaug muag; lawv pw pawglug ntawm tej kev, lawv zoo ib yam li tus muaslwj uas mag tus neeg tua nqaij lub vas. Lawv raug nej tus Vajtswv tej lus chim thiab nws tej lus cem. Nej cov uas raug kev txomnyem hauv lub nroog Yeluxalees, nej ntog pujpoog li qaug cawv, tiamsis tsis yog haus cawv; tus TSWV uas yog nej tus Vajtswv, tus uas tuaj nws haivneeg tog hais tias, “Nej saib, kuv muab lub khob uas yog kuv txojkev chim tshem tawm ntawm nej mus lawm; lub tais uas yog kuv txojkev chim nej tsis tau haus ntxiv lawm. Kuv yuav muab lub khob ntawd rau tus neeg uas tsimtxom nej uas hais rau nej tias, ‘Nej cia li pw hauv av ua kev rau peb tsuj; thiab muab nej lub nraubqaum ua kev rau peb taug.’ ” Yeluxalees, sawv los mas, cia li sawv; cuab koj lub zog khov kho! Vajtswv lub nroog uas Dawbhuv, cia li hnav tej ris tsho uas zoo tshaj plaws! Cov neeg uas tsis ua kevcai txiav thiab cov neeg tsis huv yuav tsis tuaj rau hauv koj ntxiv lawm. Yeluxalees, nchos koj tej hmoov av! Sawv mus zaum saum lub zwmtxwv. Xi-oos tus ntxhais, daws txoj saw hlau uas khi koj cajdab kom plam! Tus TSWV uas kav ib puas tsav yam hais rau nws haivneeg hais tias, “Thaum nej mus ua luag qhev, luag twb tsis muab nyiaj yuav nej; ib yam li ntawd, tsis tas yuav muab nyiaj txhiv nej rov qab los li thiab.” Vim tus TSWV uas yog Vajtswv hais tias: Thawj zaug uas kuv haivneeg mus nyob nram tebchaws Iziv, tsis muaj leejtwg yuam kom lawv mus; tiamsis tom qab ntawd cov Axilias tau tuaj yuam lawv mus thiab tsis them ib yam dabtsi li. Tus TSWV hais tias, “Nimno tej xwm uas zoo li no twb muaj nyob hauv lub nroog Npanpiloos lawm thiab. Lawv ntes nej mus ua qhev, lawv twb tsis them nqi yuav nej. Cov neeg uas kav nej, lawv muab hlob, khavtheeb thiab saib tsis taus kuv li. Muaj ib hnub twg nej yuav lees paub hais tias, kuv yog Vajtswv, thiab thaum ntawd nej yuav paub hais tias, kuv twb hais tej lus no rau nej lawm.” Thaum nej pom tus neeg hla toj roob hauv pes xa xov zoo tuaj, mas nej zoo siab kawg li, nws tuaj qhia txojkev thajyeeb uas yog txojmoo zoo! Nws tshaj tawm txojkev cawm dim, nws hais rau cov neeg hauv lub nroog Yeluxalees hais tias, “Nej tus Vajtswv yog vajntxwv!” Cov neeg uas zov lub nroog qw zom zaws zoo siab heev. Vim lawv qhovmuag pom ntsoov tus TSWV rov los rau hauv lub nroog Yeluxalees lawm. Lub nroog Yeluxalees uas tawg tas lawm, cia li hu nkauj zoo siab luag ntxhi! Tus TSWV yuav cawm nws lub nroog Yeluxalees thiab nplig nws haivneeg siab. Ib tsoom neeg thoob ntiajteb yuav pom tus Tswv siv nws lub hwjchim uas loj kawg nkaus cawm nws haivneeg. Cia li tawm hauv lub nroog Npanpiloos no mus kom tas! Tsis txhob kov tej uas tsis huv hlo li; nej cov uas nqa tus TSWV tej cuabyeej siv hauv lub Tuamtsev, cia li tawm hauv lub nroog mus thiab ua kevcai ntxuav kom nej huv. Zaum no tsis tas nej yuav maj tawm, rau qhov tsis yog nej nyiag kev khiav, tus TSWV uas yog nej tus Vajtswv yuav coj nej txoj haukev, thiab cov Yixalayees tus Vajtswv yuav thaiv tom nej qab. Tus TSWV hais tias, “Kuv tus tubtxib yuav ua nws tes haujlwm kom tiav; nws yuav tau ntsejmuag thiab sawvdaws yuav txhawb nqa nws, yuav tsa nws ua tus loj tshaj plaws. Thaum lawv pom dheev nws, muaj coob leej ntshai thiab yoob tas; nws lub ntsejmuag thiab nws lub cev txawv, zoo tsis thooj li neeg lub. Nimno nws yuav ua rau ntau haivneeg xav tsis thoob, thiab tej vajntxwv yuav yoob tas hais tsis taus ib lo lus li. Tej uas lawv tsis tau paub thiab tsis tau pom dua, lawv yuav pom thiab totaub.” Cov neeg sawvdaws teb hais tias, “Leejtwg yuav ntseeg tej uas peb tau hais? Leejtwg yuav pom hais tias tej no yog tus TSWV txhais tes ua? Twb yog tus TSWV pom zoo kom nws tus tubtxib loj hlob ib yam li tsob ntoo uas nrhau cag tuaj ntawm thaj av qhuav. Nws lub cev ntaj ntsug tsis zoo nraug, peb thiaj tsis nyiam nws; nws tsis muaj ib qho zoo txaus nyiam, peb thiaj tsis ntshaw nws. Peb saib tsis taus nws thiab muab nws tso povtseg, nws raug kev txomnyem thiab nyiaj rawv txojkev mob; tsis muaj leejtwg yuav tig saib nws. Peb tsis quavntsej nws ib yam li nws tsis tsimtxiaj dabtsi. “Tiamsis nws ris peb tej kev txomnyem thiab ris peb tej kev mob kev nkeeg, txawm yog nws pab peb npaum li ntawd los peb tseem hais tias qhov uas nws raug kev txomnyem twb yog Vajtswv rau txim rau nws. Twb yog vim peb tej kev txhaum nws thiaj raug ntaus nqaij ntuag ntshav nrog, twb yog vim tej kev phem uas peb ua, nws thiaj raug nplawm. Qhov uas nws raug txim txomnyem ntsuav, yog pab kom peb tau nyob kaj siab lug, nws raug nplawm twb yog kho kom peb tej kev mob kev nkeeg zoo. Peb txhua tus zoo li tej yaj uas yuam kev lawm; peb sawvdaws nyias mus nyias ib txojkev raws li nyias lub siab nyiam, tiamsis tus TSWV muab peb lub txim uas tsimnyog peb raug tso rau nws ris. “Nws raug tsimtxom thiab nws ntxhov siab kawg, tiamsis nws muaj lub siab mos siab muag, nws tsis hais ib los li. Nws zoo ib yam li tus yaj uas luag cab mus tua, thiab zoo ib yam li tus yaj uas luag tabtom muab txiav plaub los nws twb tsis quaj ib suab li. Nws raug ntes, raug tsimtxom thiab raug coj mus tua povtseg los tsis muaj leejtwg quavntsej nws li. Twb yog vim peb sawvdaws lub txim, nws thiaj raug tua tuag. Txawm yog nws yeej tsis tau ua ib qho txhaum thiab nws lub qhovncauj yeej tsis tau hais ib lo lus dag li los lawv cia li muab nws coj mus faus nrog cov neeg txhaum thiab faus rau hauv tus txivneej uas npluanuj lub qhov ntxa.” Tus TSWV hais tias, “Kuv yeej pom zoo cia nws raug kev txomnyem. Nws tuag thiaj theej tau neeg lub txhoj thiab zam tau neeg lub txim. Yog li ntawd nws yuav pom nws tej xeebntxwv; nws yuav muaj sia nyob ntev, thiab nws yuav ua kom kuv tes haujlwm tiav. Tom qab uas nws raug kev txomnyem dhau lawm, nws yuav rov muaj kev zoo siab dua ntxiv; nws yuav paub hais tias txojkev txomnyem uas nws raug tsis nkim nws lub zog. Kuv tus tubtxib ncaj ncees uas kuv txaus siab, yuav ris coob leej ntau tus lub txim, vim tej uas nws ua ntawd, kuv thiaj zam lawv lub txim. Yog li ntawd, kuv yuav pub koob meej rau nws; nws yuav tau nrog cov neeg uas ua tus loj thiab muaj hwjchim nyob; nws txaus siab tso nws txojsia tseg, nws los nrog cov neeg txhaum nyob; nws ris sawvdaws lub txim thiab thov tus Tswv zam lawv lub txim.” Yeluxalees, koj zoo li tus pojniam uas muaj tsis taus menyuam, tiamsis nimno koj yuav tau hu nkauj zoo siab. Nimno koj yuav muaj menyuam coob tshaj tus pojniam uas nws tus txiv nrog nraim nws nyob. Cia li ua koj lub tsevntaub kom dav ntxiv, txuas tej hlua tsevntaub kom ntev, thiab txhos tej tswg kom khov! Koj yuav txav koj ciam dej ciam av kom dav mus ntxiv; koj tej pejxeem yuav rov los nyob hauv lawv tej qub teb qub chaw uas nimno lwm haivneeg kav lawm. Tej nroog uas nimno ua suabpuam tas lawm, yuav rov muaj neeg nyob puv nkaus. Koj tsis txhob ntshai, koj yuav tsis raug kev txajmuag lawm, koj yuav tsis swb leejtwg li. Koj yuav tsis nco txog tej kev plees kev yi uas koj ua thaum koj tseem hluas, thiab tsis nco txog tej kev nyuaj siab uas thaum koj ua pojntsuam lawm. Tus uas Tsim koj yuav zoo li koj tus txiv, nws lub npe hu ua tus TSWV tus uas muaj hwjchim loj kawg nkaus. Cov Yixalayees tus Vajtswv dawbhuv uas pab kom koj dim, yog tus kav tagnrho lub ntiajteb no huv tibsi. Yixalayees, koj zoo li tus pojniam hluas uas tus txiv muab tso tseg ua rau koj nyuaj siab kawg li. Tiamsis tus TSWV hu koj rov qab los cuag nws thiab hais rau koj hais tias, “Kuv tso koj tseg ib nyuag ntu xwb, vim kuv hlub koj heev, kuv yuav coj koj rov los. Vim kuv chim heev, kuv thiaj fee plhu rau koj ib ntus, tiamsis kuv yuav rov hlub koj mus ibtxhis.” Tus TSWV uas pab koj dim, yog tus hais tej lus no. “Thaum Nau-es tiam kuv tau coglus cia yuav tsis pub dej nyab lub ntiajteb ib zaug ntxiv lawm. nimno kuv coglus yuav tsis chim rau koj ib zaug ntxiv li lawm thiab; kuv yuav tsis cem lossis rau txim rau koj li. Tej zaum cov hauv roob thiab pov roob yuav tawg mus, tiamsis kuv txojkev uas hlub koj yuav tsis paub kawg li. Kuv coglus tseg hais tias yuav muaj kev thajyeeb, mas kuv yuav ua raws li kuv tej lus ntawd mus ibtxhis.” Tus TSWV uas hlub koj yog tus uas hais tej lus no. Tus TSWV hais tias, “Yeluxalees, koj yog lub nroog uas raug kev txomnyem lwj siab, tsis muaj leejtwg pab thiab tsis muaj leejtwg nplig koj siab li; kuv yuav muab tej pobzeb muaj nqis los pua koj. Kuv yuav muab tej hlaws lunpis puab ua koj tej chaw tsomfaj, muab tej pobzeb uas ci li nplaim taws los ua koj tej roojvag, thiab muab tej hlaws muaj nqis ua tus ntsa yeej thaiv ibncig koj. “Kuv yuav qhia koj haivneeg thiab yuav pub kev vammeej thiab kev thajyeeb rau lawv. Txojkev ncaj ncees yuav ua rau koj nyob ruaj khov kho; koj yuav tsis raug luag tsimtxom thiab yuav tsis muaj kev txhawj kev ntshai. Yog leejtwg tawmtsam koj los tsis yog kuv tso ncauj, yog leejtwg ntaus koj, tus ntawd yuav swb koj. “Kuv yog tus tsim tus kws hlau, nws thiaj teeb lwjhlaus ntaus cuabyeej ua rog. Twb yog kuv tsim tus tubrog, nws thiaj coj tej cuabyeej ntawd mus ua rog. Tsis muaj ib yam cuabyeej twg uas yuav tawmtsam tau koj li, koj yuav muaj lus teb cov neeg uas nkaug koj. Kuv yuav tiv thaiv kuv cov tubtxib thiab pab kom lawv yeej.” Tus TSWV yog tus uas hais tej lus no. Tus TSWV hais tias, “Leejtwg nqhis dej, cia li los haus, muaj dej nyob ntawm no! Leejtwg tsis muaj nyiaj, cia li los yuav dawb thiab noj! Cia li los yuav cawv txiv hmab thiab mis nyuj, tsis tas them nyiaj li. Vim li cas nej siv nej tej nyiaj mus yuav tej uas tsis yog mov? Vim li cas nej siv nej tej nqi zog mus yuav tej uas tsis txaus nej siab? Cia li mloog kuv hais, nej thiaj tau noj tej zaub mov uas zoo, nej lub siab thiaj tsau npo rau tej zaub mov uas zoo tshaj plaws. “Kuv haivneeg, nimno nej cia li mloog thiab los cuag kuv nej thiaj yuav muaj sia nyob! Kuv coglus ruaj khov rau nej mus ibtxhis, thiab kuv yuav muab tej koob hmoov uas kuv twb coglus rau Daviv lawm pub rau nej. Kuv tsa Daviv ua ib tug thawjcoj thiab kav txhua haivneeg, thiab kuv yuav qhia kuv lub hwjchim ntawm nws mus rau lawv. Nimno nej yuav nqua hu ib tsoom tebchaws tuaj, lawv yeej ibtxwm tsis tau paub nej li, tiamsis nimno lawv yuav los poog nej. Kuv yog tus TSWV nej tus Vajtswv uas yog cov Yixalayees tus Vajtswv uas dawbhuv, kuv yuav ua kom tej no tshwm tuaj; kuv yuav ua kom nej tau koob meej thiab hwjchim.” Cia li nrhiav tus TSWV thaum uas tseem yuav ntsib tau nws, cia li thov nws pab thaum nws tseem nyob ze nej. Cia cov neeg siab phem tso lawv txojkev phem tseg, thiab cia cov neeg tsis ncaj tso lawv txojkev xav phem tseg. Cia lawv tig los cuag tus TSWV, Vajtswv thiaj yuav hlub lawv; los cuag peb tus Vajtswv, nws thiaj yuav zam lawv lub txim. Tus TSWV hais tias, “Tej uas kuv xav zoo tsis thooj li tej uas nej xav, thiab tej uas kuv ua zoo tsis thooj li tej uas nej ua. Lub ntuj nyob siab lub ntiajteb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd. “Daus thiab nag los saum nruab ntug los tsis rov qab rau saud lawm, yog los ywg lub ntiajteb kom qoobloo loj hlob tawg paj txi txiv, thiaj muaj noob tseb thiab kom muaj mov rau neeg tau noj. Tej lus uas kuv hais tawm lawm zoo ib yam li ntawd ntag; tej lus ntawd yuav tsis rov qab los cuag kuv dawb do ib zaug li, tiamsis yuav tawg paj txi txiv raws li kuv xav tseg lawm, kuv tej lus yuav ua txhua yam uas kuv tso nws mus ua. “Nej yuav tawm hauv lub nroog Npanpiloos mus zoo siab hlo, luag yuav coj nej tawm kaj siab lug hauv lub nroog ntawd mus. Tej roob thiab tej pov roob yuav tsa suab hu nkauj, thiab tej xyoob tej ntoo yuav qw zoo siab. Ntoo ciab yuav loj hlob tuaj hloov ntoo pos chaw, thiab ntoo tsw qab yuav tuaj hauv hav pos. Tej no yuav ua rau sawvdaws nco ntsoov thiab ua lub cim nco txog kuv uas yog tus TSWV, tus uas tau ua tej no mus ibtxhis li.” Vajtswv hais rau nws haivneeg hais tias, “Cia li coj ncaj thiab ua qhov tseeb, tshuav tsis ntev lawm kuv yuav los cawm nej. Kuv yuav foom koob hmoov rau cov uas coj thiab hwm hnub Xanpataus. Kuv yuav foom koob hmoov rau txhua tus uas tsis ua kev phem kev qias.” Tus neeg txawv tebchaws uas koom tus TSWV haivneeg tsis txhob hais tias, “Tus TSWV yuav tsis kam kuv nrog nws haivneeg pehawm Vajtswv.” Tus neeg sam tsis txhob yws hais tias, “Kuv tsuas zoo li tus ntoo qhuav lawm xwb.” Tus TSWV hais rau tus neeg sam hais tias, “Yog koj hwm kuv hnub Xanpataus, ua haum kuv siab, thiab coj ncaj raws li kuv txoj kevcai, mas kuv yuav pub koj muaj npe nyob rau hauv kuv lub Tuamtsev thiab ntawm kuv haivneeg. Qhov uas koj lub npe yuav tsis raug rho tawm mus ibtxhis, yuav zoo dua koj muaj tub thiab muaj ntxhais coob.” Thiab tus TSWV hais rau cov neeg txawv tebchaws uas los zwm ua nws haivneeg hais tias uas hlub nws thiab tu nws, hwm nws hnub Xanpataus, thiab coj raws li nws txojlus cog tseg hais tias, “Kuv yuav coj lawv mus nyob hauv Xi-oos uas yog kuv lub roob dawbhuv, kom lawv muaj kev zoo siab nyob hauv kuv lub tsev uas yog qhov chaw pehawm kuv, kuv yuav txais lawv tej khoom uas muab fij rau saum lub thaj. Kuv lub Tuamtsev yuav hu ua txhua haivneeg qhov chaw thov Vajtswv.” Tus TSWV uas kav ib puas tsav yam tau coj nws haivneeg Yixalayees uas raug luag ntes mus lawm rov qab los thiab coglus hais tias nws tseem yuav coj lwm haivneeg los koom nrog lawv thiab. Tus TSWV hais rau cov neeg txawv tebchaws kom lawv los ib yam li tej tsiaj qus los noj nws haivneeg. Nws hais tias, “Tagnrho cov thawjcoj uas tsimnyog ceebtoom rau kuv haivneeg qhovmuag dig lawm! Lawv tsis paub ib yam dabtsi li. Lawv zoo li cov dev zov qhovrooj uas tsis txawj tom, lawv tsuas pw ntxeev luj luam thiab ua npau suav nkaus xwb. Yog li cas lawv yuav nyiam tsaug zog ua luaj! Cov dev ntawd noj ntau npaum li cas los tsis paub tsau li. Cov tub yug yaj no tsis totaub ib yam dabtsi; lawv nyias taus nyias tig xubntiag mus rau nyias txojkev, thiab lawv nyias tsuas xav kom nyias tau ntau xwb, tsis pub rau leejtwg li. Cov neeg quav cawv hais tias, ‘Cia li muab cawv los thiab haus kom ntau npaum li peb haus taus! Tagkis peb tseem yuav haus ntau tshaj hnub no thiab.’ ” Thaum cov neeg zoo tuag, tsis muaj leejtwg quavntsej lossis mob siab lawv li. Tiamsis thaum lawv tuag, lawv dim kev nyuaj siab lawm. Cov neeg uas ua lub neej ncaj ncees tau mus so ntawm qhov chaw tau zoo thiab kaj siab lug lawm. Cov neeg txawj ua khawvkoob tej menyuam, cov neeg ua nkauj ua nraug thiab ua niamntiav uas yog neeg txhaum, nej cia li los ntawm no kuv yuav txiav txim rau nej! Nej luag leejtwg plig? Nej rua ncauj thiab hlev nplaig rau leejtwg? Nej tsis yog roj ntsha ntawm cov neeg ntxeev siab thiab cajces ntawm cov neeg dag los? Nej mus pe mlom thiab pheej sib dee hauv tej qab ntoo qhib thiab ntawm txhua tsob ntoo uas muaj nplooj ntxoov nyos. Nej muab nej cov menyuam mus tua fij rau hauv tej qhov tsua uas nyob ze ntawm tej pasdej txhawv. Nej muab tej pobzeb uas du ntaug lees hauv tej qhov tsua ntawd los ua mlom rau nej pe. Nej hliv cawv thiab coj qoobloo mus fij rau tej pobzeb ntawd. Nej xav hais tias kuv txaus siab rau tej ntawd no los? Nej nce mus fij khoom rau saum tej roob siab thiab mus sib dee. Nej muab nej tej mlom los teeb rau ntawm nej tej taw rooj. Nej tso kuv tseg; nej yaws pam thiab nce mus nrog cov uas nej hlub pw saum nej lub txaj uas dav heev, nej them nyiaj rau lawv nrog nej pw. Thiab nej yeej ua kom txaus nkaus nej siab. Nej muab tshuaj tsw qab pleev kom nej tsw qab ntxiag mus pe tus vajtswv Maulej. Nej txib nej tej nomtswv mus deb heev, txawm yog hauv tubtuag teb los lawv mus txog huv tibsi. Nej qaug zog zis vim nej taug kev deb heev, tiamsis nej hais tsis taus hais tias, “Tas kev cia siab lawm”; vim nej xav hais tias cov vajtswv ntawd yuav txhawb nej lub zog. Yog li ntawd, nej thiaj tsis nkees hlo li. Tus TSWV hais tias, “Cov vajtswv twg tau ua rau nej ntshai kom nej dag kuv thiab tsis nco qab txog kuv lawm? Vim kuv nyob ntsiag to tau ntev los lawm, nej thiaj tso kuv tseg thiab tsis hwm kuv puas yog? Kuv yuav nthuav tej kev ncaj ncees uas nej khav thiab tej haujlwm uas nej ua tawm, tiamsis tej ntawd yuav tsis pab nej li. Thaum nej quaj thov pab, cia nej cov mlom los cawm nej. Khaub zeeg cua yuav nqa cov mlom ntawd mus povtseg! Tiamsis cov uas cia siab rau kuv yuav tau nyob hauv kuv lub tebchaws thiab pehawm kuv hauv kuv lub Tuamtsev.” Tus TSWV hais tias, “Cia kuv haivneeg rov qab los cuag kuv. Tshem tej tog khaub ntawm kuv haivneeg txojkev mus povtseg! Cia li kho txojkev kom zoo thiab tiav log! “Kuv yog tus Vajtswv uas muaj hwjchim loj kawg nkaus thiab yog tus dawbhuv uas nyob mus ibtxhis. Kuv nyob saum qhov chaw siab thiab dawbhuv, thiab kuv nrog cov neeg uas txo hwjchim thiab lees kev txhaum nyob. Yog li ntawd, kuv thiaj txhawb cov neeg uas txo hwjchim thiab lees kev txhaum kom lawv muaj kev cia siab. Kuv yuav pub txojsia rau kuv haivneeg, thiab kuv yuav tsis suav txim lossis tsis chim rau lawv mus ibtxhis li lawm. Kuv chim rau lawv, vim lawv tej kev txhaum thiab ua siab hlob. Yog li ntawd, kuv thiaj rau txim rau lawv thiab muab lawv tso tseg. Txawm li ntawd los lawv tseem ua siab tawv thiab pheej ua raws li lawv lub siab nyiam xwb. “Kuv paub lawv tes haujlwm lawm, tiamsis kuv yuav kho kom lawv zoo mob. Kuv yuav coj lawv, pab lawv thiab yuav nplig cov uas muaj kev txomnyem siab. Kuv yuav pub kev thajyeeb rau txhua tus, tsis hais cov uas nyob deb lossis nyob ze! Kuv yuav kho kuv haivneeg kom zoo mob. Tiamsis tus neeg uas ua phem ua qias zoo li dej hiavtxwv ntas mus ntas los tsis paub tus li, thiab ua rau tej yam qias tawm tuaj. Cov neeg ua txhaum tsis muaj kev kaj siab hlo li.” Tus TSWV yog tus hais tej lus no. Tus TSWV hais tias, “Cia li qw kom kawg koj lub zog! Thiab qhia rau kuv haivneeg Yixalayees kom lawv paub txog lawv tej kev txhaum! Lawv pehawm kuv txhua hnub, lawv ua txuj kub siab lug xav paub kuv txojkev thiab ua raws li kuv tej kevcai. Lawv thov kom kuv muab txojkev ncaj ncees rau lawv, mas lawv thiaj txaus siab pehawm kuv.” Tej neeg nug hais tias, “Yog tus TSWV tsis pom, vim li cas peb ho ua kevcai yoo mov? Yog nws tsis quavntsej, vim li cas yuav cia peb yoo tshaib tsis noj dabtsi?” Tus TSWV teb lawv hais tias, “Yeej muaj tseeb, rau qhov hnub uas nej ua kevcai yoo mov, nej tsuas ua kom nej tau ntsejmuag thiab tsimtxom cov neeg uas ua haujlwm rau nej xwb. Qhov tseeb, nej ua kevcai yoo mov yog ua kom nej tau kev ua phem thiab tau kev sib ceg sib ntaus xwb. Nej xav hais tias nej ua li ntawd, kuv yuav mloog nej tej lus thov no los? Thaum nej ua kevcai yoo mov tsimtxom nej; nej nyo taubhau ib yam li daim nplooj nyom thiab muab ntaubtsaj pua nej pw. Ua li ntawd, nej hu ua kevcai yoo mov thiab xav hais tias kuv yuav txaus siab rau tej ntawd no los? “Txoj kevcai yoo mov uas kuv txaus siab ua yog li no: Daws tej saw hlau ntawm txojkev tsimtxom thiab txo tus quab ntawm txojkev tsis ncaj ncees, thiab tso cov neeg uas nej tsimtxom tawm mus. Faib nej tej zaub mov rau cov neeg tshaib plab noj thiab qhib qhovrooj rau cov neeg pluag uas tsis muaj tsev nyob. Pub ris tsho rau cov neeg txomnyem tau hnav, thiab yuav tsum pab nej tej kwvtij. “Ces kuv txojkev kaj yuav ci rau nej ib yam li lub hnub ci thaum sawv ntxov, thiab nej tej qhov txhab yuav zoo sai. Kuv yuav nrog nraim nej thiab ua nej tus cawmseej; kuv lub hwjchim yuav tsomkwm puagncig nej. Ces thaum nej thov, tus TSWV yuav teb nej; thaum nej hu kom nws pab, nws yuav teb hais tias kuv nyob ntawm no. “Yog nej txo tus quab ntawm txojkev tsimtxom, tso tus cwjpwm uas taw ntes nki rau luag, thiab tseg tsis hais tej lus phem lus qias; yog nej pub zaub mov rau cov neeg tshaib plab noj thiab pab cov neeg txomnyem. Ces tej kev tsaus ntuj uas nyob ibncig nej yuav hloov ua lub teeb ci rau nej pom kev ib yam li thaum tavsu. Kuv yuav ua tus coj nej kev mus ibtxhis thiab pub txhua yam zoo rau nej kom txaus nej siab. Kuv yuav pub nej muaj zog thiab noj qab nyob zoo. Nej yuav zoo ib yam li lub vaj uas muaj dej ywg tsis tseg thiab ib yam li tus dej uas ntws tsis paub nqhuab li. Nej haivneeg yuav rov txhim kho tej vajtse uas thaum ub twb puastsuaj tas lawm, thiab yuav rov ua vaj ua tsev rau tej qub chaw. Luag yuav hu nej hais tias yog cov neeg uas txhim kho ntsa yeej dua tshiab, thiab yog cov kho tej vajtse uas twb raug puastsuaj tas lawm.” Tus TSWV hais tias, “Yog nej ceev hnub Xanpataus ua hnub dawbhuv thiab hnub ntawd nej tsis ua tej yam raws li nej lub siab nyiam; nej hwm kuv hnub uas dawbhuv tsis txhob taug kev, tsis txhob ua haujlwm thiab tsis txhob hais lus phem, ces nej thiaj yuav tau kev kaj siab vim nej mloog kuv lus. Kuv yuav kom txhua haivneeg hauv qab ntuj no hwm nej, nej yuav zoo siab heev rau lub tebchaws uas kuv muab pub nej yawgkoob Yakhauj lawm. Kuv yog tus TSWV uas hais tej lus no.” Tsis txhob xav hais tias tus TSWV txhais npab luv thiaj pab tsis tau nej dim lossis nws lag ntseg lawm, nws thiaj tsis hnov nej tej lus thov! Twb yog vim nej tej kev txhaum nws thiaj tsis hnov nej tej lus thov. Thaum nej pehawm Vajtswv nej tej kev txhaum quas nej thiab Vajtswv lawm. Nej muaj txim vim nej hais lus dag, nej ua limhiam thiab tua neeg. Nej kom luag mus rau hauv tsev tu plaub, tiamsis nej tsis ua ncaj. Nej hais lus dag kom nej yeej luag. Nej tuav tswvyim phem ua kom luag swb. Nej lub tswvyim phem zoo li tus nab muaj taug cov qe. Yog muab ib lub qe ntawd tsoo, ces nab yeej tawm hauv los. Tiamsis nej tej tswvyim ntawd tsis muaj qabhau dabtsi, tsuas zoo li muab kablaug tsov tej sab los ntos ua ntaub xwb. Nej niaj hnub tuav tswvyim ua phem, thiab nyiag kev ntshis mus ua txhaum. Nej lub siab xav ntsoov qhov phem xwb. Nej mus txog qhov twg muaj kev puastsuaj txog qhov ntawd. Nej mus txog qhov twg cov neeg uas nyob qhov ntawd tsis muaj kev kaj siab li. Tej uas nej ua puavleej tsis ncaj thiab nej taug txojkev nkhaus xwb. Txhua tus uas taug txojkev nkhaus yuav raug puastsuaj. Cov pejxeem hais tias, “Nimno peb paub hais tias vim li cas Vajtswv tsis pab peb dim ntawm cov neeg uas tsimtxom peb. Peb nrhiav txojkev kaj taug, tiamsis tsuas tau txojkev tsaus xwb, thiab peb maub mus ib yam li tej neeg digmuag. Txawm yog tavsu nrig los peb dawm ntog pujpoog ib yam li maub hmo ntuj, thiab ib yam li peb nyob hauv tubtuag teb qhov uas tsaus ntuj nti. Peb ntshai thiab poob siab heev. Peb tos ntsoov Vajtswv los pab kom peb dim ntawm txojkev tsimtxom thiab ua tsis ncaj, tiamsis nws tsis los pab peb. “Tus TSWV, peb tau ua txhaum ntau kawg rau koj lawm. Peb tej kev txhaum nkaug peb rau koj, nimno peb pom peb tej kev txhaum lawm. Peb tau ntxeev siab rau koj, tso koj tseg thiab tsis ua raws li koj txoj kevcai. Peb tsimtxom luag thiab tso koj tseg. Tej uas peb xav los yeej tsis tseeb thiab tej lus uas peb hais yog lus dag xwb. Peb muab txojkev ncaj ncees tshem tseg lawm, thiab txojkev ua zoo nyob nrug deb peb. Peb dawm txojkev tseeb ntog rau hauv plawv nroog, thiab kev ua siab dawb siab zoo tsis tau chaw nyob. Nyob hauv peb cov Yixalayees, kev ncaj ncees muaj tsawg kawg li; yog leejtwg tso kev phem tseg, mas nws tseem raug luag tsimtxom thiab.” Tus TSWV pom tej no, nws thiaj tsis txaus siab, vim tsis muaj neeg ua ncaj lawm. Tus TSWV xav tsis thoob, xyov ua li cas tsis pom muaj leejtwg pab cov neeg uas raug luag tsimtxom. Yog li ntawd, nws thiaj yuav siv nws lub hwjchim pab kom lawv dim thiab nws yuav kovyeej tej neeg phem ntawd. Nws yuav muab kev ncaj ncees los ua lub tsho hlau hnav thiab muab txojkev cawm dim los ua lub kausmom hlau ntoo. Nws muab kev pauj los ua lub tsho ntev hnav, thiab muab kev siab kub los qhwv nws lub cev. Tus TSWV yuav rau txim rau nws cov yeebncuab raws li tej uas lawv tau ua los lawm. Txawm yog cov neeg uas nyob tej tebchaws deb los tus TSWV yuav rau txim huv tibsi. Txhua tus uas nyob sab hnubtuaj mus ti sab tim hnubpoob yuav ntshai nws lub hwjchim uas loj kawg nkaus. Nws yuav los ib yam li dej huam, thiab ib yam li cua daj cua dub ntsawj. Tus TSWV hais rau nws haivneeg hais tias, “Kuv yuav los rau hauv lub nroog Yeluxalees, cawm nej thiab thaiv nej txhua tus uas tso kev txhaum tseg lawm. Thiab kuv yuav coglus rau nej li no: kuv muab kuv lub hwjchim thiab kuv tej lus qhia cob rau nej mus ibtxhis, thiab txij hnub no mus nej yuav tsum hwm kuv, qhia nej cov menyuam thiab nej tej xeebntxwv kom txawj hwm kuv mus ibtxhis.” Lub nroog Yeluxalees, cia li sawv, vim qhov kaj twb los rau koj, thiab tus TSWV lub tshwjchim ci ntsa iab los rau saum koj lawm. Kev tsaus ntuj roos tagnrho lub ntiajteb, thiab kev tsaus ntuj dub nciab npog txhua haivneeg, tiamsis tus TSWV yuav ua qhov kaj los rau koj pom kev, thiab luag yuav pom nws lub tshwjchim uas ci ntsa iab saum koj. Txhua haivneeg yuav los rau hauv koj txojkev kaj, thiab tej vajntxwv yuav los rau hauv tus duab tshav ntuj uas nyuam qhuav tawm hnub tshiab. Cia li tsa qhovmuag saib ibncig koj thiab ntsia tej uas tabtom tshwmsim los: Koj haivneeg tabtom sib sau ua ke yuav rov los tsev! Koj cov tub yuav taug kev deb rov los. Luag yuav puag koj cov ntxhais ib yam li puag menyuam los. Thaum koj pom tej no koj yuav zoo siab kawg li. Koj lub siab yuav tshee hnyo thiab zoo siab kawg nkaus. Lawv yuav nqa lwm haivneeg tej nyiaj los rau koj; tej nyiaj thiab txhua yam yuav hla hiavtxwv los cuag koj. Yuav muaj ntau pab ntxhuav los tim tebchaws Midias thiab lub nroog Efas los nyob puv nkaus hauv koj lub tebchaws. Cov ntxhuav ntawd yuav thauj kub thiab tshuaj tsw qab hauv tebchaws Senpas tuaj rau koj. Neeg yuav piav txog txoj xov zoo uas tus TSWV tau ua lawm rau sawvdaws mloog. Luag yuav coj cov neeg Kedas thiab cov neeg Nenpayaus tej yaj tuaj rau koj tua ua khoom fij thiab muab hlawv rau saum lub thaj kom haum tus TSWV siab. Tus TSWV yuav ua kom nws lub Tuamtsev muaj koob meej dua qub. Cov nkoj uas txawj ya ib yam li tej huab thiab txawj ya ib yam li tej nquab uas ya los rau hauv zes ntawd yog cov twg? Cov nkoj ntawd tuaj ntawm tej tebchaws uas nyob deb tuaj, yog xa Vajtswv haivneeg los tsev. Lawv thauj nyiaj thiab kub los pub rau tus TSWV tus uas yog cov Yixalayees tus Vajtswv uas dawbhuv kom tau koob meej, Vajtswv ua kom ib tsoom tebchaws hwm nws haivneeg. Tus TSWV hais rau lub nroog Yeluxalees hais tias, “Cov neeg txawv tebchaws yuav puab koj tej ntsa yeej, thiab lawv cov vajntxwv yuav ua koj cov tubtxib; vim kuv chim, kuv thiaj rau txim rau koj, tiamsis vim kuv hmov tshua koj, kuv thiaj hlub koj. Koj tej roojvag yuav qhib tas hnub tas hmo, kom txhua haivneeg tej vajntxwv thiaj tau kev coj lawv tej nyiaj tuaj rau koj. Haivneeg twg lossis lub tebchaws twg uas tsis kam ua koj tubtxib yuav raug kev puastsuaj; lawv tej tebchaws yuav raug muab tso tseg nyob qhuav nquas cia. “Lenpanoos lub koob meej yuav los rau koj, nws tej ntoo thuv, ntoo npeb thiab ntoo ciab yuav raug txiav los txhim kho kuv lub tuamtsev kom zoo nkauj, kuv yuav ua kom lub nroog Yeluxalees ci ntsa iab. Cov neeg uas tsimtxom koj, lawv tej tub yuav tuaj pe koj, thiab cov neeg uas saib tsis taus koj yuav tuaj txhos caug ntawm koj xubntiag pe koj. Lawv yuav hu koj hais tias, ‘Tus TSWV lub Nroog’ thiab hu hais tias, ‘Xi-oos yog cov Yixalayees tus Vajtswv uas Dawbhuv lub Nroog.’ “Luag yuav tsis ntxub koj lossis tso koj tseg ua lub nroog uas nyob lwj siab thiab qhuav nquas cia ib zaug li lawm. Kuv yuav ua kom koj vammeej thiab zoo nkauj, koj yuav yog qhov chaw uas neeg nyob kaj siab lug mus ibtxhis. Txhua haivneeg thiab tej vajntxwv yuav yug koj ib yam li leej niam pub mis rau nws tus menyuam. Koj yuav paub hais tias kuv yog tus TSWV tus uas cawm koj dim, thiab kuv yog cov Yixalayees tus Vajtswv tus uas muaj hwjchim loj kawg nkaus pab koj dim. “Kuv yuav muab kub los hloov tooj liab, muab nyiaj thiab tooj liab los hloov hlau thiab ntoo, thiab yuav muab hlau los hloov pobzeb rau koj; Koj tej nomtswv yuav tsis quab yuam koj ntxiv lawm. Kuv yuav kom lawv kav ncaj ncees thiab kom muaj kev thajyeeb. Neeg yuav tsis hnov tej suab sib ntaus sib tua nyob hauv koj lub tebchaws; koj lub tebchaws yuav tsis raug kev puastsuaj ntxiv lawm. Tiamsis kuv yuav tiv thaiv koj ib yam li tus ntsa yeej, koj yuav qhuas kuv rau qhov kuv twb pab koj dim lawm. “Nruab hnub lub hnub yuav tsis ci rau koj, lossis hmo ntuj lub hli yuav tsis ci rau koj lawm thiab; Tiamsis kuv uas yog koj tus TSWV yuav ci kaj nrig rau koj mus ibtxhis, kuv lub tshwjchim yuav ci ntsa iab rau saum koj. Koj lub hnub yuav tsis poob qho, thiab koj lub hli yuav tsis tsaus ntxiv lawm. Vim tus TSWV yuav ua lub teeb ci rau koj pom kev mus ibtxhis, thiab koj tej kev nyuaj siab twb yuav xaus. Koj haivneeg yuav ua ncaj; lawv yuav tau lub tebchaws los ua lawv tug mus ibtxhis. Kuv tsim lawv, kuv cog lawv, kom lawv qhia kuv lub hwjchim rau sawvdaws. Tsevneeg uas tsawg yuav dhau mus ua ib xeem, thiab xeem uas tsawg yuav dhau mus ua ib haivneeg uas muaj hwjchim; Kuv yog tus TSWV, kuv yuav ua kom tej no muaj los sai sai ntag.” Tus TSWV uas kav ib puas tsav yam tus ntsujplig los kav kuv lub siab, rau qhov tus TSWV tau xaiv kuv coj txojmoo zoo mus qhia rau cov neeg pluag, thiab mus nplig cov neeg uas muaj kev lwj siab, qhia txojkev dim rau cov neeg uas raug luag ntes, thiab qhia kev thajyeeb rau cov neeg raug txim. Nws txib kuv mus qhia kom sawvdaws paub hais tias, twb txog lub sijhawm uas tus TSWV yuav cawm nws haivneeg, thiab nws ntaus yeej lawv cov yeebncuab lawm. Nws txib kuv mus nplig txhua tus uas muaj kev quaj ntsuag, thiab muab kev zoo siab pauj kev quaj ntsuag rau cov neeg uas nyob hauv lub nroog Xi-oos, muab kev zoo siab thiab kev kaj siab pauj kev lwj siab, muab zaj nkauj uas hu qhuas tus TSWV pauj kev txomnyem nyuaj siab. Lawv yuav zoo ib yam li tsob ntoo uas tus TSWV cog tseg. Lawv yuav ua ncaj ua ncees mas sawvdaws yuav qhuas Vajtswv vim tej haujlwm zoo uas nws tau ua lawm. Lawv yuav rov txhim kho tej qub nroog uas puastsuaj tas lawm, thiab rov kho tej chaw uas muab tso tseg tau ntau tiam dhau los lawm dua tshiab. Cov neeg txawv tebchaws yuav yug nej tej tsiaj, laij nej tej teb thiab tu nej tej vaj txiv hmab; luag yuav hu nej hais tias yog tus TSWV cov povthawj, thiab hu nej hais tias yog cov uas tuav Vajtswv tes haujlwm. Nej yuav tau txhua haivneeg tej nyiaj, thiab nej yuav khav ntxhias rau luag tej nyiaj uas nej tau los ntawd. Nej txojkev txajmuag thiab kev poob ntsejmuag twb dhau lawm, nej yuav tau nyob hauv nej lub tebchaws. Nej yuav tau nyiaj thiab txhua tsav yam ib npaug ntxiv; thiab nej yuav zoo siab mus ibtxhis li. Tus TSWV hais tias, “Vim kuv nyiam txojkev ncaj ncees, kuv ntxub txojkev ua tubsab thiab ua kev txhaum kawg li. Vim kuv yog tus uas ncaj ncees kuv yuav muab nqi zog rau kuv haivneeg, thiab kuv yuav coglus rau lawv mus ibtxhis li. Kuv haivneeg yuav tau koob meej ntawm ib tsoom tebchaws; txhua tus uas pom lawv yuav paub hais tias, lawv yog haivneeg uas kuv foom koob hmoov rau lawm.” Yeluxalees zoo siab heev rau tej uas tus TSWV tau ua lawm. Nws zoo li tus nkauj nyab thiab tus nraug vauv uas hnav tau cev tsoos mus rau hauv rooj tshoob. Vajtswv muab kev cawm dim thiab kev muaj yeej rau nws hnav. Ib yam li tej noob qoob uas muab tseb lawm yeej yuav tuaj taus kaus, Tus TSWV uas kav ib puas yam tsav yuav cawm nws haivneeg. Thiab txhua haivneeg yuav qhuas tus TSWV. Vim Xi-oos kuv yuav tsis nyob twjywm, thiab vim lub nroog Yeluxalees kuv yuav tsis nyob ntsiag to, mus txog thaum nws txojkev ncaj ncees ci li duab hnub thaum sawv ntxov, thiab nws txojkev cawm dim ci li tes tsau thaum tsaus ntuj. Yeluxalees, txhua haivneeg yuav pom koj txojkev muaj yeej, thiab txhua tus vajntxwv yuav pom koj tau koob meej, thiab luag yuav hu koj lub npe tshiab uas tus TSWV muab rau koj. Koj yuav yog lub kausmom kub uas zoo nkauj heev ntawm tus TSWV txhais tes, thiab yog lub kausmom vajntxwv uas nyob ntawm koj tus Vajtswv txhais tes. Luag yuav tsis hu koj hais tias, “Muab tso povtseg,” thiab tsis muab koj lub tebchaws tso tseg nyob qhuav nquas cia; luag yuav hu koj hais tias, “Kuv txojkev zoo siab nyob hauv nws,” thiab yuav hu koj lub tebchaws hais tias, “Sib yuav zoo siab,” vim tus TSWV txojkev zoo siab nyob hauv koj, mas koj yuav zoo li leej txiv rau lub tebchaws. Ib tug tub hluas yuav ib tug nkaujxwb ua pojniam li cas, mas tus uas tsim koj yuav yuav koj ib yam li ntawd; tus nraug vauv txaus siab rau nws tus pojniam li cas, mas koj tus Vajtswv txaus siab rau koj ib yam li ntawd. Yeluxalees, kuv cia cov neeg fajxwm nyob saum koj tej ntsa yeej, tsis hais nruab hnub thiab hmo ntuj, lawv hais tsis tseg rau tus TSWV, kom nco ntsoov nws tej lus cog tseg thiab tsis pub kom tus TSWV tso lawv tseg ib zaug li. Lawv yuav tsis pub tus TSWV mus so txog thaum nws txhim kho lub nroog Yeluxalees tiav, thiab ua kom tau lub nroog rau txhua haivneeg qhuas. Tus TSWV tau coglus tseg thiab yuav ua kom tiav raws li nws hais: “Kuv yuav tsis pub mov rau nej coj mus yug nej cov yeebncuab ntxiv lawm, thiab cov neeg txawv tebchaws yuav tsis haus tej cawv txiv hmab uas nej ua tau. Tiamsis koj yog tus cog thiab yog tus sau tej qoobloo ntawd; koj yuav tau noj tej ncuav ntawd thiab ua Vajtswv tsaug. Koj yog tus npaj thiab sau tej txiv hmab los ua ke; koj yuav tau tej txiv hmab ntawd thiab tej cawv txiv hmab los haus nyob hauv kuv lub tuamtsev.” Cov neeg hauv lub nroog Yeluxalees, nej cia li mus kom dhau plaws cov roojvag, rhawv kev rau cov pejxeem sawvdaws taug; cia li ncaws txojkev loj, khaws tej pobzeb hauv plawv kev povtseg, thiab tsa chij rau txhua haivneeg pom. Tus TSWV tshaj tawm rau txhua haivneeg hais tias, “Nej cia li qhia rau cov neeg hauv lub nroog Yeluxalees hais tias, ‘Tsa qhovmuag saib, nej txojkev cawm dim twb los lawm lauj!’ Nws coj nqi zog los rau cov neeg uas nws twb cawm dim lawm.” Luag yuav hu nej hais tias, “Vajtswv haivneeg uas dawbhuv yog haivneeg uas Vajtswv Cawm dim.” Luag yuav hu lub nroog Yeluxalees hais tias, “Lub Nroog Uas Vajtswv Hlub,” thiab “Lub Nroog Uas Vajtswv Tsis Muab Tso Tseg li.” “Tus uas tuaj hauv lub nroog Npauxelas uas nyob hauv tebchaws Edoos tuaj yog leejtwg? Tus uas hnav cev ris tsho liab uas taug kev khov kho tuaj ntawd yog leejtwg?” Twb yog tus TSWV uas muaj hwjchim cawm tau neeg dim tabtom tuaj qhia nws txojkev kovyeej. “Vim li cas tus TSWV cev ris tsho thiaj liab zoo li tus txivneej uas tsuj txiv hmab ua cawv cev ris tsho?” Tus TSWV teb hais tias, “Kuv muab txhua haivneeg tsuj ib yam li tsuj txiv hmab, mas tsis muaj leejtwg tuaj pab kuv li. Kuv chim, kuv thiaj tsuj lawv thiab lawv tej ntshav txaws lo kuv cev ris tsho tas. Twb txog lub sijhawm uas kuv cawm kuv haivneeg thiab rau txim rau lawv cov yeebncuab lawm. Kuv tsa qhovmuag ntsia ibncig tsis muaj leejtwg tuaj pab kuv, kuv xav tsis thoob li. Tiamsis vim kuv txojkev chim ua rau kuv muaj zog heev, kuv thiaj kovyeej. Vim kuv txojkev chim, kuv thiaj muab txhua haivneeg los tsuj paim pes txua. Kuv muab lawv cov ntshav hliv rau hauv av.” Kuv yog Yaxayas, kuv qhia tus TSWV txojkev hlub uas tsis paub kawg; Kuv qhuas nws vim tej uas nws tau ua rau peb tas los lawm. Nws foom koob hmoov nplua mias rau cov Yixalayees, rau qhov nws muaj lub siab hlub mus ibtxhis. Tus TSWV hais tias, “Lawv yog kuv haivneeg; lawv yuav tsis dag kuv ib zaug li.” Yog li ntawd, nws thiaj cawm lawv kom dim ntawm lawv tej kev txomnyem. Twb yog tus TSWV tso nws tus timtswv los cawm lawv ntag. Vim nws txojkev hlub thiab kev ua siab ntev nws thiaj tso lawv dim. Nws yeej ibtxwm saib xyuas lawv puag thaum ub los, tiamsis lawv ntxeev siab rau nws thiab ua rau nws tus ntsujplig dawbhuv tu siab; yog li ntawd nws thiaj ua yeebncuab rau lawv thiab tawmtsam lawv. Tiamsis lawv nco txog txheej thaum ub, tiam uas tus TSWV tus tubtxib Mauxes nyob, lawv thiaj nug hais tias, “Nimno tus TSWV uas cawm nws haivneeg cov thawjcoj uas hla hiavtxwv los nyob qhov twg? Tus TSWV uas pub nws tus ntsujplig rau Mauxes nyob qhov twg? Tus TSWV uas hais kom Mauxes ua tej txujci tseemceeb qhia nws lub hwjchim rau sawvdaws pom, nws muab hiavtxwv faib rau ob sab ua kev rau nws haivneeg taug los kom nws tau ntsejmuag mus ibtxhis nyob qhov twg lawm?” Vim tus TSWV coj lawv kev los, lawv kotaw cuab nplua ib yam li tej nees qus thiab lawv tsis ntog li. Tus TSWV coj nws haivneeg mus so ib yam li luag coj tej tsiaj mus rau lub hav uas muaj zaub mos nyoos. Nws coj nws haivneeg kev, nws lub npe thiaj muaj koob meej. Tus TSWV, thov tsa koj lub qhovmuag saum ntuj uas yog koj qhov chaw dawbhuv uas muaj koj lub tshwjchim ci ntsa iab saib peb. Koj txojkev hlub thiab mob siab rau peb nyob qhov twg lawm? Koj tsis xam muaj peb li lawm los? Tus TSWV thov koj tsis txhob muab peb tso tseg. Tus TSWV, koj thiaj yog peb txiv. Txawm yog Anplahas thiab Yakhauj nkawd yog peb yawgkoob los nkawd yeej tsis paub txog peb li, tiamsis tus TSWV, tsuas yog koj tib leeg uas yog peb txiv, koj thiaj yog tus uas ibtxwm pab peb dim xwb. Vim li cas koj cia peb yuam kev ua tsis raws li koj txojkev lawm? Vim li cas koj cia peb tawv ncauj ua luaj, peb thiaj tso koj tseg lawm? Thov tig los saib koj cov tubtxib thiab koj haivneeg. Peb yog koj haivneeg uas dawbhuv; peb raug yeebncuab raws khiav mus ib ntus, thiab peb cov yeebncuab muab koj lub chaw uas dawbhuv ua puastsuaj tas. Koj ua rau peb ib yam li koj yeej tsis tau kav peb dua, thiab ib yam li peb tsis yog koj haivneeg li ntag. Tus TSWV, ua li cas koj tsis qhib plho rooj ntug thiab nqis los kom tej hauv roob thiaj yuav pom koj thiab ntshai ua zog koog? Tej roob yuav tshee ua zog kais ib yam li dej npau hauv lub laujkaub uas rhaub hauv qhovcub. Thov koj los qhia koj lub hwjchim rau koj cov yeebncuab pom, thiab ua rau txhua haivneeg ntshai tshee hnyo tabmeeg ntawm koj xubntiag! Muaj ib zaug koj tau los ua tej yam uas peb ntshai kawg li rau peb pom; peb yeej tsis tau xav txog hais tias yuav muaj li ntawd; tej toj roob hauv pes ua zog koog thaum tej ntawd pom koj. Txij puag thaum ub los yeej tsis tau muaj leejtwg pom lossis hnov ib tug Vajtswv uas zoo li koj, leejtwg ua tej haujlwm loj npaum li no pab txhua tus uas cia siab rau nws. Koj txais yuav txhua tus uas txaus siab ua neeg ncaj, cov ntawd yog cov neeg uas nco ntsoov ua lub neej raws li koj lub siab nyiam. Koj twb chim rau peb lawm, tiamsis peb tseem ua txhaum ntxiv thiab; txawm yog thaum ub koj twb chim rau peb npaum li ntawd los peb pheej ua txhaum tsis tseg li. Peb txhua tus puavleej tau ua txhaum huv tibsi; txawm yog tej haujlwm zoo uas peb ua los puavleej qias zoo ib yam li txoj phuam uas tsis tau muab ntxhua. Twb yog vim peb tej kev txhaum, peb thiaj zoo ib yam li tej nplooj qhua uas cua muab ntsawj ya tas lawm. Tsis muaj leejtwg tig los thov koj; tsis muaj leejtwg tuaj thov koj pab li. Twb yog vim peb tej kev txhaum koj thiaj khiav nkaum peb thiab muab peb tso tseg lawm. Tiamsis tus TSWV, koj yeej yog peb leej txiv. Peb zoo li cov av nplaum, thiab koj yog tus puab peb. Yog li ntawd, tus TSWV, thov koj tsis txhob chim rau peb thiab tsis txhob cim ntsoov peb tej kev txhaum mus ibtxhis. Vim peb yog koj haivneeg thov koj hlub peb. Koj tej nroog tseemceeb raug piamsij ua suabpuam tas; txawm yog lub nroog Yeluxalees los raug luag muab tsoo puas tas tsis muaj neeg nyob hauv lawm. Peb lub Tuamtsev uas dawbhuv thiab zoo nkauj yog qhov chaw uas peb cov yawgkoob tuaj qhuas koj twb raug hluavtaws kub tas, thiab txhua thaj chaw uas peb txaus siab rau puavleej raug puastsuaj tas huv tibsi lawm. Tus TSWV, koj tsis quavntsej tej no los? Koj txawm tsis ua ib yam dabtsi li ntag los? Koj yuav cia peb tsau tsawv txojkev txomnyem kom peb tiv tsis taus li los? Tus TSWV hais tias, “Kuv tos rawv yuav teb kuv haivneeg tej lus thov, tiamsis lawv tsis thov kuv li. Kuv tos rawv lawv los cuag kuv, tiamsis lawv tsis kam los li thiab. Txawm yog kuv hais tias, ‘Kuv nyob ntawm no yuav pab nej los lawv tsis kam thov kuv li.’ Kuv niaj hnub tos ntsoov kuv cov neeg uas muaj lub siab tawv, tiamsis lawv pheej mus ua txhaum raws li lawv lub siab nyiam. Lawv tsis paub txajmuag, lawv thiaj ua kom kuv chim. Lawv muab khoom mus fij rau dab hauv lawv tej vaj tseemceeb thiab hlawv tej hmoov tshuaj tsw qab rau saum tej thaj txi dab. Hmo ntuj lawv nkag mus rau hauv tej qhov tsua thiab hauv tej qhov ntxa, mus sablaj nrog cov neeg tuag lawm tej plig. Lawv noj nqaij npuas thiab haus tej kua nqaij uas muab fij rau dab lawm. Thiab lawv tseem hais rau luag tias, ‘Txav deb ntawm peb, vim peb huv dua nej!’ Cov uas hais li no, kuv ntxub kawg li, kuv txojkev chim rau lawv, mas zoo ib yam li lub cubtawg uas cig tsis paub tuag. “Twb muaj lus sau tseg lawm hais tias, kuv yuav tsis zam txim rau lawv li, tiamsis kuv yuav ua pauj rau lawv, kuv yuav rau txim rau lawv tej kev txhaum thiab lawv cov yawgkoob tej kev txhaum huv tibsi. Rau qhov lawv tau mus hlawv hmoov tshuaj tsw qab rau saum tej roob rhuav kuv ntsejmuag. Yog li ntawd, kuv yuav rau txim kom txaus nkaus rau tej kev phem uas lawv ua los lawm.” Tus TSWV hais tias, “Tsis muaj ib tug twg muab tej txiv hmab zoo ua kom puastsuaj li; tiamsis tsuas muab tej txiv hmab ntawd los ua cawv haus xwb. Ib yam li ntawd, kuv yuav tsis ua rau lawv raug kev puastsuaj, vim lawv yog kuv cov tubtxib uas ua kuv tes haujlwm. Kuv yuav foom hmoov zoo rau cov Yixalayees uas yog xeem Yudas, mas lawv cajces yuav tau kuv lub tebchaws uas muaj roob muaj hav los ua lawv tug; cov neeg uas kuv xaiv los ua kuv cov tubtxib yuav tau nyob hauv lub tebchaws ntawd. Lawv yuav pehawm kuv thiab yuav coj lawv tej yaj tej nyuj mus noj zaub hauv lub Tiaj Saloos uas nyob sab hnubpoob thiab hauv lub Hav Covnyom uas nyob sab hnubtuaj. “Tiamsis nej cov uas tau tso kuv tseg, nej tsis nco txog kuv lub roob Xi-oos uas dawbhuv; nej teeb thaj teev tus mlom Nkas thiab tus mlom Menis uas yog cov vajtswv ntawm txoj hmoov zoo thiab hmoov phem. Nej yuav tau qhov phem; nej yuav tuag rau hniav ntaj hniav riam, vim thaum kuv hu nej tsis teb, thiab thaum kuv hais nej tsis mloog. Nej too hau ntsoov mus ua kev phem, vim nej tsis mloog kuv lus. Kuv hais rau nej hais tias, cov tubtxib uas hwm kuv thiab mloog kuv lus yuav muaj noj muaj haus nplua mias, tiamsis nej yuav tshaib nqhis. Kuv cov tubtxib yuav zoo siab heev, tiamsis nej yuav poob ntsejmuag. Kuv cov tubtxib yuav hu nkauj zoo siab, tiamsis nej yuav quaj lwj siab ntsuav. Cov neeg uas kuv xaiv tseg lawm, yuav tuav nej lub npe foom tsis zoo; kuv yog tus TSWV uas kav txhua tsav yam, kuv yuav muab nej tua povtseg, tiamsis kuv yuav muab cov neeg uas mloog kuv lus tis dua npe tshiab. Cov neeg uas nyob hauv lub tebchaws no thov koob hmoov, yuav tsum thov ntawm Vajtswv tus uas muaj kev ncaj ncees. Yog leejtwg yuav coglus, yuav tsum tuav Vajtswv tus uas muaj kev ncaj ncees lub npe, mas nej thiaj tsis nco txog tej kev txomnyem uas nej raug los lawm.” Tus TSWV hais tias, “Kuv yuav tsim dua lub ntuj tshiab thiab lub ntiajteb tshiab. Nej yuav tsis nco txog tej uas twb muaj tas los lawm. Nej cia li zoo siab rau tej uas kuv tsim dua tshiab ntawd mus ibtxhis. Cov neeg uas nyob hauv lub nroog Yeluxalees tshiab uas kuv tsim yuav muaj kev zoo siab thiab nyob kaj siab lug. Kuv yuav zoo siab rau lub nroog Yeluxalees thiab txaus siab kawg nkaus rau kuv haivneeg; yuav tsis hnov suab quaj suab nyiav nyob hauv lub nroog ntawd ib zaug ntxiv li lawm. Nyob hauv lub nroog ntawd cov menyuam mos yuav tsis muaj kev ploj kev tuag, thiab txhua tus neeg yuav muaj sia nyob ntev. Cov neeg uas muaj hnubnyoog ib puas xyoo los tseem zoo li tus hluas. Yog leejtwg tuag ua ntej ntawd, ces yog kuv rau txim rau nws xwb. Txhua yam uas lawv ua yeej yuav tiav, thiab lawv tej menyuam yuav tsis raug kev puastsuaj. Kuv yuav foom koob hmoov rau lawv thiab lawv cov xeebntxwv ib tiam dhau ib tiam mus ibtxhis li. Thaum lawv tseem thov kuv tsis tau xaus, kuv twb teb lawv lawm. Hma thiab menyuam yaj yuav nrhiav noj ua ke; tsov ntxhuav yuav noj quavnyab ib yam li nyuj noj; neeg thiab tsiaj yuav tsis ntshai nab ntxiv lawm. Saum kuv lub roob Xi-oos uas dawbhuv, yuav tsis muaj tej xwm phem dabtsi lawm.” Tus TSWV hais tias, “Ntuj ceebtsheej yog kuv lub zwmtxwv, ntiajteb yog kuv lub chaw tiag taw. Nej yuav ua lub tsev zoo li cas rau kuv nyob, thiab qhov chaw uas kuv nyob yuav zoo li cas? Kuv yog tus uas tsim lub ntuj thiab lub ntiajteb no tagnrho huv tibsi! Kuv txaus siab heev rau cov neeg uas txo hwjchim, cov neeg uas hloov dua siab tshiab, cov neeg uas hwm kuv thiab mloog kuv lus. “Neeg ua raws li lawv lub siab nyiam xwb. Lawv tua ib tug heev nyuj thiab tua ib tug neeg hlawv fij los lawv suav hais tias zoo ib yam; lawv tua ib tug menyuam yaj thiab muab ib tug dev lov cajdab hlawv fij los lawv suav hais tias zoo ib yam; lawv muab nplej thiab ntshav npua fij los lawv suav hais tias zoo ib yam; lawv hlawv tshuaj tsw qab thiab pe mlom los lawv suav hais tias zoo ib yam. Lawv nyiam ua kev phem kev qias xwb. Yog li ntawd, kuv yuav tso tej sub tawg sub ntsha uas lawv ntshai los raug lawv, rau qhov thaum kuv hu tsis muaj leejtwg teb, thaum kuv hais tsis muaj leejtwg mloog. Lawv txhob txwm tsis mloog kuv lus thiab mus ua phem nkaus xwb.” Nej cov uas ntshai thiab hwm tus TSWV, cia li mloog nws tej lus no: “Rau qhov nej muab siab npuab kuv, nej cov neeg muaj qee leej thiaj li ntxub nej thiab tsis kam nrog nej sib raug zoo. Lawv thuam nej hais tias, ‘Cia tus TSWV ua nws tej txujci rau nej pom thiab cawm kom nej dim, peb xav pom nej txojkev zoo siab kawg li.’ Tiamsis lawv yuav poob ntsejmuag! Ua tib zoo mloog! Tej suab nrov ntsoog qees hauv nroog, thiab lub suab uas nrov hauv lub Tuamtsev tuaj twb yog tus TSWV rau txim rau nws cov yeebncuab ntag! “Kuv lub nroog uas dawbhuv zoo ib yam li tus pojniam uas yug tau menyuam sai heev, tsis hnov mob plab li twb yug tau nws tus tub lawm. Puas muaj leejtwg tau hnov lossis tau pom dua ib zaug li? Puas muaj ib haivneeg twg uas ib hnub xwb, txawm yuav cia li sawv tau ua ib lub tebchaws? Lub nroog Xi-oos yuav huamvam sai ua ib haivneeg; nws yuav tsis tau tiv kev txomnyem ntxiv lawm. Nej tsis txhob xav hais tias kuv coj kuv haivneeg los txog lub caij yug lawv los kuv tseem tsis tau pub yug.” Tus TSWV yog tus uas hais tej lus no ntag. Nej cov uas nyiam lub nroog Yeluxalees, nej cia li nrog lub nroog Yeluxalees zoo siab, thiab txaus siab rau nws! Nej cov uas quaj ntsuag rau lub nroog Yeluxalees, nej cia li nrog nws zoo siab! Nej yuav zoo siab rau lub nroog Yeluxalees txojkev vammeej, ib yam li tus menyuam uas txaus siab tau noj nws niam lub mis. Tus TSWV hais tias, “Kuv yuav coj kev vammeej los rau nej mus ibtxhis; txhua haivneeg tej nyiaj yuav ntws laub lug los rau nej ib yam li tus dej ntws tsis paub nqhuab li. Nej yuav zoo li tus menyuam mos uas leej niam hlub heev, thiab muab puag rawv noj mis hauv nws lub xubntiag. Kuv yuav nplig nej siab hauv lub nroog Yeluxalees ib yam li leej niam nplig nws cov menyuam siab. Thaum nej pom tej xwm no tshwmsim los nej yuav zoo siab; qhov ntawd yuav ua rau nej muaj zog thiab noj qab nyob zoo. Ces nej thiaj yuav paub hais tias kuv yog tus TSWV uas pab cov neeg mloog kuv lus, thiab kuv chim rau kuv cov yeebncuab.” Tus TSWV yuav nrog nplaim taws ua ke los. Nws yuav caij rawv cua daj cua dub los thiab nws yuav rau txim rau tus uas ua rau nws chim. Tus TSWV yuav tso hluavtaws thiab ntaj los rau txim rau txhua haivneeg nyob hauv ntiajteb uas nws pom hais tias ua txhaum, mas tej neeg yuav raug tua tuag coob kawg li. Tus TSWV hais tias, “Cov neeg uas ua kevcai ntxuav kom lawv huv mus pe dab rau hauv tej vaj txi dab, noj nqaij npuas, noj nas tsuag thiab noj tej zaub mov uas kuv txwv tsis pub noj yuav raug kev puastsuaj tas. Kuv yeej paub tej haujlwm uas lawv ua thiab tej uas lawv lub siab xav. Kuv yuav sau txhua haivneeg los ua ke. Thaum lawv los txhij lawm, lawv yuav pom kuv lub hwjchim thiab paub hais tias kuv yog tus uas txiav txim rau lawv. “Tiamsis kuv yuav tseg qee leej nyob thiab txib lawv mus qhia txhua haivneeg thiab tej tebchaws deb deb uas tsis tau hnov kuv lub npe thiab tsis tau pom dua kuv lub hwjchim, thiab mus rau tim tebchaws Xapees, tebchaws Linpias thiab tebchaws Lidias uas muaj cov neeg txawj tua hneevnti, thiab hauv tebchaws Tunpas, thiab pem tebchaws Kilis. Lawv yuav mus qhia kuv lub hwjchim rau hauv cov tebchaws ntawd. Lawv yuav coj nej cov kwvtij tawm hauv txhua lub tebchaws rov los rau kuv. Lawv yuav coj nej cov kwvtij caij nees, caij zag, caij ntxhuav, caij tsheb nees ua rog thiab caij tsheb nyuj los rau ntawm kuv lub roob dawbhuv ib yam li cov Yixalayees muab hmoov nplej ntim rau hauv tej tais phiab uas ntxuav huv lawm, thiab yuav coj mus fij rau hauv lub Tuamtsev. Kuv yuav tsa lawv qee leej ua povthawj thiab ua cov Levis, tus TSWV hais li ntawd.” Tus TSWV hais tias, “Kuv lub hwjchim yuav tuav lub ntuj tshiab thiab lub ntiajteb tshiab kom nyob ruaj, mas nej cajces thiab nej lub npe yuav nyob ruaj khov ib yam li ntawd. Txhua hnub Hli Xiab thiab Hnub Xanpataus, txhua haivneeg yuav tuaj pehawm kuv hauv lub nroog Yeluxalees no. Thaum lawv tawm mus, lawv yuav pom cov neeg uas ntxeev siab rau kuv tej cev tuag. Cov kas uas noj lawv tej cev yuav tsis tuag thiab yuav tsis muaj leejtwg tua tau tej hluavtaws uas kub lawv ntawd li. Tej cev tuag ntawd yuav qias neeg thoob ntiajteb.” Phau ntawd no yog Hilekiyas tus tub Yelemis tej lus. Yelemis yog ib tug ntawm cov povthawj uas nyob hauv lub nroog Anathaus hauv cov Npeenyamees cheebtsam av. Thaum Amoos tus tub Yauxiyas ua vajntxwv kav tebchaws Yudas tau kaum peb xyoo, tus TSWV txawm los hais rau Yelemis, thiab thaum Yehauyakees uas yog Yauxiyas tus tub ua vajntxwv kav tebchaws, tus TSWV rov hais rau Yelemis ib zaug txiv. Tom qab ntawd tus TSWV rov hais ntau zaus rau Yelemis mus txog thaum uas Yauxiyas tus tub Xedekiyas ua vajntxwv kav tebchaws tau kaum ib xyoos. Ces xyoo kaum ib lub tsib hlis ntuj, luag txawm tuaj ntes cov neeg uas nyob hauv lub nroog Yeluxalees coj mus lawm. Tus TSWV hais rau kuv hais tias, “Thaum koj tseem tsis tau xeeb rau hauv koj niam plab, kuv twb xaiv koj thiab thaum tsis tau yug koj, kuv twb tsa koj ua tug cev Vajtswv lus rau txhua haivneeg lawm.” Kuv teb hais tias, “Tus TSWV uas kav ib puas tsav yam, kuv tsis paub yuav qhia li cas, rau qhov kuv tseem hluas.” Tus TSWV hais rau kuv hais tias, “Koj tsis txhob hais tias koj tseem hluas, tiamsis koj cia li mus rau hauv cov neeg uas kuv txib koj mus, thiab qhia txhua yam uas kuv kom koj qhia rau lawv. Koj tsis txhob ntshai cov neeg ntawd, rau qhov kuv yuav nrog nraim koj thiab tsomkwm koj. Kuv yog tus TSWV uas hais li ntawd.” Tus TSWV txawm cev tes kov kuv lub qhovncauj thiab hais rau kuv hais tias, “Koj mloog kuv hais, kuv muab kuv tej lus tso rau hauv koj qhovncauj. Hnub no kuv tsa koj ua tus muaj hwjchim kav txhua haivneeg thiab txhua lub tebchaws. Koj muaj peevxwm muab rho tawm thiab muab rhuav, ua kom puastsuaj thiab muab povtseg, tsim tsa thiab muab cog.” Tus TSWV nug kuv hais tias, “Yelemis, koj pom dabtsi?” Kuv teb hais tias, “Kuv pom ib tug ceg txiv duaj.” Tus TSWV hais rau kuv hais tias, “Yog lawm! Kuv tabtom saib ntsoov kom muaj raws li kuv tej lus.” Tus TSWV rov hais rau kuv hais tias, “Koj pom dabtsi thiab?” Kuv teb hais tias, “Kuv pom luag rhaub ib laujkaub dej npau dugdam nyob sab qaumteb thiab lub ncauj qaij rau sab nram no.” Tus TSWV hais rau kuv hais tias, “Yuav muaj kev puastsuaj sab qaumteb tuaj raug cov neeg uas nyob hauv lub tebchaws no, rau qhov kuv tabtom hu kom txhua haivneeg uas nyob sab qaumteb tuaj. Lawv cov vajntxwv yuav teeb lawv tej zwmtxwv rau ntawm lub nroog Yeluxalees tej roojvag, puagncig tus ntsa yeej thiab puagncig cov Yudas tej nroog. Kuv yuav rau txim rau kuv haivneeg rau qhov lawv ua txhaum thiab tso kuv tseg. Lawv mus hlawv khoom fij rau luag tej vajtswv thiab puab mlom rau lawv pe. Yelemis, koj cia li mus qhia txhua yam uas kuv kom koj qhia rau lawv. Koj tsis txhob ntshai lawv, yog nimno koj ntshai, thaum koj mus nrog lawv nyob, koj yimhuab yuav ntshai heev dua. Tus TSWV kom kuv coj cov lus no mus hais rau lub nroog Yeluxalees hais tias, “Kuv nco ntsoov thaum koj tseem hluas, koj muab siab npuab kuv, thaum uas wb nyuam qhuav sib yuav koj hlub kuv heev; koj raws kuv qab los hla tiaj suabpuam thiab los hla lub tebchaws uas tsis muaj leejtwg cog qoobloo li. Yixalayees, koj yog kuv tug xwb; koj yog kuv thawj cov qoobloo. Kuv tso kev puastsuaj thiab kev txomnyem los raug cov neeg uas ua phem rau koj; Kuv yog tus TSWV uas hais li ntawd.” Tus TSWV hais tias, cov Yixalayees txhua xeem uas yog Yakhauj cov xeebntxwv, nej cia li mloog kuv tej lus. Tus TSWV hais tias: “Nej cov yawgkoob pom kuv ua txhaum dabtsi, lawv thiaj li khiav ntawm kuv mus lawm? Lawv mus pe tej mlom uas tsis muaj qabhau, thiaj ua rau lawv tsis tseemceeb lawm. Kuv cawm lawv dim nram tebchaws Iziv los; Kuv coj lawv hla tiaj suabpuam uas yog tiaj suabzeb, muaj qhov ntuj thiab yog lub tebchaws qhuav nkig nkuav, tuag tshiab tuag nqhis, tsis muaj neeg nyob thiab tsis muaj neeg hla lub tebchaws ntawd li. Txawm li ntawd los lawv tsis muab siab npuab kuv li. Kuv coj lawv los nyob hauv lub tebchaws uas av rog thiab zoo qoob, kom lawv thiaj tau noj tej txiv hmab txiv ntoo thiab txhua yam uas zoo. Tiamsis lawv los ua rau kuv lub tebchaws liamsim tas; lawv ua rau lub tebchaws uas kuv muab rau lawv tsis huv lawm. Cov povthawj los tsis quavntsej nug txog kuv hais tias, ‘Tus TSWV nyob qhov twg lawm?’ Kuv cov povthawj tsis lees paub kuv lawm. Cov nomtswv ntxeev siab rau kuv, kuv cov cevlus tuav Npa-as npe cevlus rau sawvdaws; thiab lawv mus pe tej mlom uas tsis muaj nqis. “Yog li ntawd, kuv uas yog tus TSWV thiaj nrog kuv haivneeg ua plaub, kuv yuav nkaug lawv cov xeebntxwv. Nej cia li mus kom txog tim koog povtxwv Xaipas uas nyob sab hnubpoob, thiab cia li txib neeg mus rau tim lub tebchaws Kedas uas nyob sab hnubtuaj. Nej yuav pom hais tias yeej tsis tau muaj tej xwm li no ib zaug li. Tsis muaj ib haivneeg twg nyob hauv ntiajteb no tso lawv tej vajtswv tseg, txawm yog tej ntawd tsis yog vajtswv tiag los lawv yeej tsis tso tseg li. Kuv yog tus Vajtswv uas ua rau kuv haivneeg tau ntsejmuag, tiamsis lawv tso kuv tseg mus pe tej vajtswv uas pab tsis tau lawv. Yog li ntawd, kuv thiaj hais kom lub ntuj qeeg ua zog koog, ua rau txaus ntshai thiab xav tsis thoob, rau qhov kuv haivneeg tau ua ob yam kev txhaum: lawv tso kuv uas yog lub qhovdej txhawv tseg, thiab lawv mus khawb dua ib co qhovdej, tiamsis tej qhovdej ntawd tawg pleb dej xau tas lawm. “Yixalayees tsis yog tus ua luag qhev; nws tsis yog tus uas yug los ua luag qhev, vim li cas nws cov yeebncuab pheej soj nraim nws qab? Tej yeebncuab nyooj laws rau nws ib yam li tsov ntxhuav nyooj; lawv ua rau nws lub tebchaws ciaj quavpoj thiab nws tej nroog puastsuaj tas nphob xuav cia tsis muaj neeg nyob. Cov neeg uas nyob hauv lub nroog Meefis thiab Tafahes tuaj muab nws plaubhau chais do dus. Yixalayees, koj lob tej xwm no rov los raug koj! Kuv yog tus TSWV uas yog koj tus Vajtswv, kuv coj koj kev los, tiamsis koj tso kuv tseg lawm. Koj pheej yuav mus haus dej hauv tus dej Niles uas nyob nram tebchaws Iziv ua dabtsi? Koj xav hais tias koj ua li ntawd yuav muaj nqis rau koj no los? Koj pheej yuav mus haus dej hauv tus dej Efalates uas nyob hauv tebchaws Axilias ua dabtsi? Koj tej kev phem kev qias yuav ua rau koj raug kev puastsuaj, thiab qhov uas koj tso kuv tseg yuav ua siv ua npog los raug koj. Thaum koj raug kev txomnyem, koj yuav paub hais tias, qhov uas koj tso tus TSWV uas yog koj tus Vajtswv tseg txhaum loj kawg li. Kuv yog tus TSWV uas kav ib puas tsav yam thiab muaj hwjchim loj kawg nkaus hais li ntawd.” Tus TSWV uas kav ib puas tsav yam hais tias, “Yixalayees, koj tsis cia kuv ua tus kav koj los ntev lawm; koj tsis mloog kuv lus thiab tsis xav pehawm kuv. Tiamsis koj mus ua niamntiav rau ntawm tej chaw pe mlom, saum tej roob siab thiab hauv tej qab ntoo. Kuv muab koj cog ib yam li cog lub noob txiv hmab uas zoo. Tiamsis vim li cas koj txia ua tsob txiv hmab qus uas tsis muaj nqis lawm? Txawm yog koj muab tej tshuaj uas muaj zog npaum li cas los ntxuav los kuv tseem pom koj qhov ceb rau qhov koj lub txim lo rawv koj. Koj yuav ua li cas hais tau hais tias, koj tsis tau ua rau koj lub cev tsis huv, thiab tsis tau pe tus mlom Npa-as li? Koj sim xav saib koj tau ua txhaum npaum li cas nram kwjha lawm; koj cia li lees paub tej kev txhaum uas koj ua. Koj zoo ib yam li tus maum ntxhuav qus uas nyob tsis tsheej chaw, thiab dhia ras rhi rau tom tiaj suabpuam. Thaum txog caij tshov lawm, leejtwg yuav muaj cuabkav tswj tau nws? Thaum ntawd tus txiv ntxhuav yuav tshov tau nws yoojyim heev. Tus maum ntxhuav yeej ibtxwm ua li ntawd thaum lub caij tshov. Yixalayees, koj tsis txhob khiav ua rau kotaw hle tawv tas, thiab ua qa qhuav qhawv mus nrhiav luag tej vajtswv. Tiamsis koj tseem hais tias, ‘Tsis tau! Kuv tsis rov qab los lawm. Kuv yeej nyiam lwm haivneeg tej vajtswv kuv yuav tsis tso tseg li.’ ” Tus TSWV hais tias, “Tus tubsab uas luag ntes tau, nws poob ntsejmuag li cas; nej cov Yixalayees, tsis hais cov vajntxwv, cov nomtswv, cov povthawj thiab cov cevlus yuav poob ntsejmuag ib yam nkaus li ntawd. Nej cov uas hais tias tsob ntoo yog nej txiv thiab lub pobzeb yog nej niam, nej txhua tus yuav poob ntsejmuag heev. Yeej yuav muaj tej xwm no los raug nej, rau qhov nej tso kuv tseg thiab tsis rov los cuag kuv lawm, tiamsis thaum nej raug kev txomnyem nej tseem tsa ncauj thov kuv pab thiab. “Tej vajtswv uas nej puab rau nej pe nyob qhov twg? Yog tej ntawd cawm tau nej, ces thaum nej raug kev txomnyem, cia li hu tej ntawd los pab nej! Cov Yudas, nej muaj ntau tus vajtswv npaum li nej tej nroog. Nej yws kuv ua dabtsi? Vim li cas nej ntxeev siab rau kuv? Kuv rau txim rau nej los nej tsis zeem; nej tsis cia kuv qhuab ntuas nej. Nej muab nej cov cevlus tua povtseg; nej tsiv ib yam li tus tsov ntxhuav ntag. Cov Yixalayees, nej cia li tig pobntseg mloog kuv tej lus. Kuv zoo ib yam li lub tiaj suabpuam thiab lub tebchaws uas ua siv ua npog rau nej los? Vim li cas nej hais tias nej yuav ua raws li nej siab nyiam xwb, nej tsis xav rov los cuag kuv lawm? Tus hluas nkauj yeej nco ntsoov nws cev zam, lossis tus nkauj nyab yeej nco ntsoov nws cev tsoos uas hnav txis tshoob. Tiamsis kuv haivneeg tsis nco qab kuv los ntev suav tsis txheeb lawm. Nej txawj ntxias kom luag lwm tus nyiam nej. Txawm yog tej pojniam uas ua phem tshaj los tseem tuaj kawm ntawm nej. Nej tej ris tsho tsuas cov neeg txomnyem thiab cov neeg uas tsis muaj txim tej ntshav xwb, tsis yog tsuas tubsab tej ntshav li. “Twb muaj tej no los nej tseem hais tias, ‘Peb tsis muaj txim, tus TSWV yeej tsis chim rau peb.’ Tiamsis kuv uas yog tus TSWV yuav rau txim rau nej vim nej hais tias nej tsis tau ua txhaum. Vim li cas nej yuav hloov siab mus pe luag lwm haivneeg tej vajtswv sai ua luaj? Cov Iziv yuav ua rau nej tu siab nrho ib yam li cov Axilias tau ua rau nej lawm. Nej yuav tso cov Iziv tseg; nej yuav txajmuag tsis muaj cuabkav tsa qhovmuag saib leejtwg. Kuv yog tus TSWV, kuv tsis lees paub tej neeg uas nej cia siab rau; lawv yuav pab tsis tau nej li.” Tus TSWV hais tias, “Yog ib tug txivneej twg nrauj nws tus pojniam, thiab tus pojniam ntawd mus yuav dua lwm tus txivneej lawm, ces tus txiv qub mus yuav tsis tau tus pojniam ntawd rov los lawm. Yog ua li ntawd yuav ua rau lub tebchaws tsis huv. Tiamsis Yixalayees, koj mus deev ntau tus hlua nraug, nimno koj tseem rov los cuag kuv dua thiab los? Koj cia li tsa qhovmuag saib saum tej ncov roob. Puas tshuav ib qho chaw twg uas koj tsis tau mus ua niamntiav rau saud li? Koj mus sawv ntawm tej ntug kev tos koj tej hluas nraug, ib yam li cov neeg Alav zov kev tos tua tej neeg uas dua kev tom tiaj suabpuam. Koj ua niamntiav thiaj ua rau lub tebchaws tsis huv lawm. Twb yog vim li ntawd, kuv thiaj sau nag rov qab thiab tsis tso nag los rau lub caij ntuj nag. Koj zoo ib yam li tus niamntiav uas tsis paub txajmuag. “Nimno koj mam li hais rau kuv hais tias, ‘Koj yog kuv txiv, koj yeej ibtxwm hlub kuv thaum tseem yau los. Koj yuav tsis npautaws rau kuv txhua lub sijhawm, thiab koj yuav tsis chim rau kuv mus ibtxhis li.’ Yixalayees, koj yeej hais li ntawd tiag, tiamsis koj tseem ua kev phem kev qias raws li koj siab nyiam.” Thaum Yauxiyas ua vajntxwv kav tebchaws, tus TSWV hais rau kuv hais tias, “Koj puas pom Yixalayees ua li tus pojniam uas tsis mloog lus ua? Nws tso kuv tseg thiab mus ua niamntiav rau saum txhua lub ncov roob thiab hauv qab txhua tsob ntoo uas muaj nplooj ntxoov nyos. Kuv xav hais tias thaum nws ua tej no txaus siab lawm, nws yuav tig rov los cuag kuv. Tiamsis nws tsis rov los cuag kuv li lawm, thiab nws tus vivncaus Yudas uas siab tsis ncaj los pom ntsoov tej uas nws ua. Yudas twb pom kuv muab Yixalayees nrauj thiab xa nws mus lawm, rau qhov nws tso kuv tseg thiab mus ua niamntiav. Tiamsis Yudas uas yog Yixalayees tus vivncaus tsis ntshai li. Yudas los kuj mus ua niamntiav thiab tsis paub txajmuag li. Nws ua rau lub tebchaws tsis huv, nws ua kev nkauj kev nraug nrog tej mlom pobzeb thiab tej mlom ntoo. Tom qab ntawd, Yudas uas yog Yixalayees tus vivncaus uas siab tsis ncaj ua txuj rov los cuag kuv; tiamsis nws lub siab yeej tsis npuab kuv li. Kuv yog tus TSWV uas hais li ntawd.” Tus TSWV hais rau kuv hais tias txawm yog Yixalayees tau tso tus TSWV tseg lawm los nws tseem zoo tshaj Yudas tus uas siab tsis ncaj. Tus TSWV kom kuv hais rau Yixalayees hais tias, “Yixalayees uas siab tsis ncaj, koj cia li rov los cuag kuv. Kuv yog tus uas muaj kev hlub thiab yuav tsis chim; kuv yuav tsis chim rau koj mus ibtxhis. Koj cia li lees hais tias koj tau ua txhaum thiab ntxeev siab rau tus TSWV uas yog koj tus Vajtswv. Thiab koj cia li lees hais tias koj tau ua niamntiav nrog lwm haivneeg tej vajtswv nyob hauv tej qab ntoos uas muaj nplooj ntxoov nyos thiab koj tsis mloog kuv tej lus. Kuv yog tus TSWV uas hais li ntawd. “Cov neeg uas siab tsis ncaj, nej cia li rov los cuag kuv; nej yog kuv tug. Kuv yuav xaiv nej cov ib tug hauv ib lub nroog thiab ib xeem twg ob leeg, thiab kuv yuav coj nej rov mus rau saum lub Roob Xi-oos. Kuv yuav pub kom nej muaj cov nomtswv uas mloog kuv lus, lawv yuav muaj tswvyim thiab kev txawj ntse tswjhwm nej. Thaum nej huamvam coob heev nyob hauv lub tebchaws ntawd, tej neeg yuav tsis hais txog tus TSWV lub Phijxab lawm. Lawv yuav tsis hais lossis nco txog li; lawv tsis yuav thiab tsis ua dua ib lub ntxiv lawm. Thaum txog lub sijhawm ntawd luag yuav hu Yeluxalees hais tias, ‘Tus TSWV lub Zwmtxwv,’ thiab txhua haivneeg yuav tuaj ua ke pehawm kuv. Lawv yuav tsis ua raws li lawv lub siab tawv thiab lawv lub siab phem yuam lawv ua lawm. Yixalayees yuav koom nrog Yudas, thiab lawv yuav ua ke rov pem lub tebchaws sab qaumteb uas lawv raug ntes mus rov los rau hauv lub tebchaws uas kuv tau muab rau lawv cov yawgkoob ua lawv tug mus ibtxhis.” Tus TSWV hais tias, “Yixalayees, kuv txaus siab yuav koj los ua kuv tub, thiab yuav muab lub tebchaws uas ntxim siab rau koj, yog lub tebchaws uas zoo tshaj lwm lub tebchaws hauv ntiajteb no. Kuv txaus siab cia koj hu kuv ua txiv thiab tsis txhob tso kuv tseg ib zaug ntxiv lawm. Tiamsis koj tsis muab siab npuab kuv ib yam li tus pojniam uas siab tsis ncaj. Kuv yog tus TSWV uas hais li ntawd.” Muaj ib lub suab nrov saum tej ncov roob tuaj: lub suab ntawd yog cov Yixalayees lub suab quaj thiab thov, rau qhov lawv ua txhaum thiab tsis nco qab tus TSWV uas yog lawv tus Vajtswv lawm. Nej cov uas tso kuv tseg lawm, cia li rov los cuag kuv uas yog nej tus TSWV; kuv yuav kho nej tej mob kom zoo thiab pub kom nej muaj lub siab ncaj. Nej teb hais tias, “Peb cia li rov mus cuag tus TSWV, rau qhov nws yog peb tus Vajtswv. Peb tej mlom uas peb pe saum tej ncov roob pab tsis tau peb li. Tus TSWV uas yog cov Yixalayees tus Vajtswv thiaj pab tau peb xwb. Tiamsis qhov uas peb pe Npa-as uas yog tus vajtswv rhuav ntsejmuag ntawd ua rau peb tej tsiaj txhu, tej tub, tej ntxhais tuag tas thiab txhua yam uas peb cov yawgkoob tsim cia puastsuaj tas. Tsimnyog peb txajmuag thiab pw da luam rau hauv av tiv txojkev txajmuag. Peb thiab peb cov yawgkoob tau ua txhaum rau tus TSWV uas yog peb tus Vajtswv; peb yeej tsis hwm thiab tsis mloog nws lus tiag.” Tus TSWV hais tias, “Cov Yixalayees, yog nej xav rov los cuag kuv, nej cia li tig hlo rov los. Yog nej tso tej mlom uas kuv ntxub tseg thiab muab siab npuab kuv, kuv yuav pub nej tuav kuv lub npe nrog lwm tus sib coglus. Thaum ntawd txhua haivneeg yuav thov kuv foom koob hmoov rau lawv, thiab lawv yuav ua kuv tsaug.” Tus TSWV hais rau cov Yudas thiab cov neeg uas nyob hauv lub nroog Yeluxalees hais tias, “Nej cia li laij nej tej liaj tej teb uas tsis tau laij; tsis txhob muab nej tej noob nplej mus tseb rau hauv hav pos. Cov Yudas thiab cov neeg uas nyob hauv lub nroog Yeluxalees, nej yuav tsum ua raws li nej tau coglus rau kuv uas yog nej tus TSWV, thiab muab nej lub siab tso rau kuv kav. Yog nej tsis ua li ntawd, kuv txojkev chim yuav kub cuag hluavtaws, vim nej tej kev phem kev qias. Tsis muaj leejtwg yuav cheem tau kuv txojkev chim li.” Nej cia li tshuab raj tshuab xyu nrov nroo ntws mus thoob tebchaws! Cia li hais nrov nrov rau cov Yudas thiab cov neeg uas nyob hauv Yeluxalees kom sawvdaws cia li khiav mus rau hauv tej nroog uas muaj ntsa yeej thaiv. Ceebtoom kom sawvdaws mus rau hauv lub nroog Xi-oos; cia li khiav tiag kom dim tsis txhob ua siab hnyav; tus TSWV yuav tso kev nruj kev tsiv thiab kev puastsuaj loj kawg nkaus tuaj sab qaumteb tuaj. Tus uas ua rau txhua haivneeg puastsuaj twb sawv kev tuaj ib yam li tus tsov ntxhuav tawm hauv havzoov los. Nws yuav tuaj ua kom cov Yudas puastsuaj. Tej nroog loj hauv tebchaws Yudas yuav puastsuaj tas, thiab tej nroog yuav nphob xuav tsis muaj neeg nyob. Sawvdaws cia li hnav ntaubtsaj, quaj ntsuag thiab nyuaj siab, rau qhov tus TSWV txojkev chim tseem tsis tau tshem ntawm cov Yudas mus. Tus TSWV hais tias, “Thaum txog hnub ntawd cov vajntxwv thiab cov nomtswv txhua tus yuav qaug zog; cov povthawj yuav ceeb thiab cov cev Vajtswv lus yuav xav tsis thoob li.” Kuv hais tias, “Tus TSWV uas kav ib puas tsav yam, koj tau dag cov neeg uas nyob hauv lub nroog Yeluxalees! Koj hais tias yuav muaj kev thajyeeb lug rau hauv, tiamsis hniav ntaj hniav riam twb hlais lawv cajpas lawm.” Thaum txog lub sijhawm ntawd yuav muaj tus mus hais rau cov neeg uas nyob hauv lub nroog Yeluxalees hais tias, cua daj cua dub tabtom ntsawj tom tiaj suabpuam tuaj rau lawv. Tsis yog tej cua uas ntsawj tej npluag nplej xwb, tiamsis yog tej cua muaj zog heev uas tus TSWV tso tuaj! Qhov ntawd yog tus TSWV txiav txim rau nws haivneeg. Nej saib! Yeebncuab tuaj ib yam li tej twv huab dub. Nws tej tsheb nees dhia tuaj ib yam li nthwv cua daj cua dub ntsawj, thiab nws tej nees khiav ceev dua dav ya. Peb swb lawm! Peb puastsuaj lawm! Yeluxalees, cia li ntxuav tej kev phem hauv koj lub siab kom huv, koj thiaj yuav dim koj lub txim. Koj tseem yuav xav txog tej kev txhaum ntawd mus txog thaum twg? Muaj neeg xa xov tsis zoo hauv lub nroog Das thiab saum Efalayees tej roob tuaj. Lawv tuaj ceebtoom rau txhua haivneeg thiab Yeluxalees hais tias yeebncuab tabtom tuaj hauv lub tebchaws uas deb heev tuaj. Cov yeebncuab ntawd yuav tuaj qw tawmtsam cov Yudas tej nroog, thiab yuav vij lub nroog Yeluxalees ib yam li cov neeg zov teb, rau qhov cov neeg hauv Yeluxalees ntxeev siab rau tus TSWV. Tus TSWV hais li ntawd. Yudas, koj coj kev puastsuaj rov los raug koj, rau qhov koj ua koj lub neej thiab koj tes haujlwm raws li koj siab nyiam xwb. Twb yog koj tej kev txhaum ua rau koj raug kev txomnyem ntag; txojkev txomnyem ntawd yuav ua rau koj qhuav siab qhawv. Kuv tus mob! Kuv nyiaj tsis taus kuv tus mob lawm! Kuv lub siab! Kuv lub siab puas tas lawm! Kuv hnov tej suab xyu thiab tej suab sib ntaus sib tua nrov, ua rau kuv nyob tsis tswm li. Kev puastsuaj ib yam tas ib yam tuaj ua rau lub tebchaws puastsuaj tas. Tib ntsais muag xwb peb tej tsevntaub puastsuaj tas; thiab tej ntaub qhovrai ntuag tas ua tej daim. Kuv tseem yuav pom tej chij uas kwv ntaus rog thiab hnov tej suab xyu thiab suab raj nrov mus txog thaum twg? Tus TSWV hais tias, “Kuv haivneeg ruam kawg nkaus; lawv tsis paub kuv. Lawv zoo ib yam li tej menyuam uas ruam; lawv tsis totaub li. Lawv tsuas txawj mus ua kev phem kev qias xwb, tiamsis lawv tsis paub ua qhov zoo.” Kuv saib lub ntiajteb mas nws nyob qhuav nquas cia; thiab saib rau saum nruab ntug tsis pom ib qho kaj li. Kuv tsa muag saib saum tej roob, pom tej roob ua zog koog, thiab tej pov roob los nyob tsis tus. Kuv saib tsis pom muaj neeg li; txawm yog tej noog los ya khiav tas. Lub tebchaws uas av rog thiab zoo qoob los ua suabpuam tas, tej nroog hauv lub tebchaws los puastsuaj tas vim tus TSWV txojkev chim. ( Tus TSWV hais tias lub tebchaws yuav nyob qhuav nquas cia, tiamsis nws yuav tsis ua kom puastsuaj tagnrho.) Lub ntiajteb yuav quaj ntsuag thiab lub ntuj yuav tsaus nti. Tus TSWV hais li cas nws yeej tsis hloov li. Nws txiav txim siab li cas nws yeej tsis thim li. Thaum hnov tej suab nees dhia thiab tej suab hneevnti nrov, txhua tus yuav khiav tawm. Ibtxhia yuav khiav mus rau hauv havzoov, ibtxhia yuav nce mus rau saum tej roob zeb. Txhua lub nroog yuav nyob qhuav nquas cia thiab yuav tsis muaj neeg nyob hauv ntxiv li lawm. Yeluxalees, koj raug puastsuaj lawm! Vim li cas koj hnav tej ris tsho liab? Vim li cas koj coj saw nyiaj sawv kub thiab zas qhovmuag? Koj tseev zam kom koj zoo nkauj, tiamsis tsis muaj qabhau; koj tej hluas raug tso koj tseg thiab lawv xav muab koj tua povtseg lawm xwb. Kuv hnov koj lub suab quaj ib yam li tus pojniam uas yug menyuam, thiab qw ib yam li tej pojniam uas yug thawj tug menyuam. Lub suab ntawd yog Yeluxalees lub suab quaj huas siav, xyab nws txhais tes thiab hais tias, “Kuv puastsuaj lawm! Lawv tabtom tuaj muab kuv tua povtseg!” Cov neeg uas nyob hauv lub nroog Yeluxalees, cia li mus rau tom tej kev! Tsa qhovmuag saib puagncig nej! Nej saib kom tseeb! Mus nrhiav tom tej kiab tej khw saib puas muaj ib tug neeg ncaj ncees thiab muab siab npuab Vajtswv? Yog nej nrhiav tau tus neeg ncaj ncees, ces tus TSWV yuav zam Yeluxalees lub txim. Txawm yog nej hais tias nej pehawm tus TSWV, nej hais li ntawd tiamsis nej tsis ua raws li nej hais. Qhov tseemceeb, tus TSWV xav kom nej muaj txojkev ncaj ncees xwb. Tus TSWV nplawm nej, tiamsis nej tsis quavntsej; nws ntaus nej tiamsis nej tsis xyaum ua zoo. Nej tawv ncauj heev, thiab tsis tso nej tej kev txhaum tseg li. Kuv xav hais tias, “Cov neeg no tsis meejpem thiab tsis paub qabhau li. Lawv ua li neeg ruam; lawv tsis paub ua tej uas lawv tus Vajtswv nyiam, thiab lawv tsis paub tej uas Vajtswv xav kom lawv ua. Kuv yuav mus cuag cov neeg uas muaj meejmom thiab nrog lawv tham. Lawv paub tej uas lawv tus Vajtswv nyiam, thiab lawv paub tej uas tus TSWV xav kom lawv ua.” Tiamsis lawv txhua tus tsis lees paub tus TSWV lub hwjchim thiab tsis mloog nws lus. Vim li ntawd tsov ntxhuav thiaj tawm hauv havzoov los tom lawv; hma yuav los tom tiaj suabpuam los muab lawv dua kom ntuag ua tej daim, thiab tsov txaij yuav nyas los rau hauv lawv tej nroog. Yog lawv tawm mus rau sab nraud, lawv yuav raug dua ua tej daim, vim lawv ua kev txhaum ntau heev thiab tso Vajtswv tseg zuj zus lawm. Tus TSWV hais tias, “Vim li cas kuv thiaj zam txim rau kuv haivneeg? Lawv tso kuv tseg thiab mus pe tej mlom uas tsis yog vajtswv lawm. Kuv pub kuv haivneeg tau noj tsau npo, tiamsis lawv mus ua kev nkauj kev nraug thiab siv lawv lub sijhawm mus deev tej niamntiav. Lawv zoo ib yam li tej txiv nees qus uas rog thiab xav nce maum; lawv xav ntsoov rau txojkev deev luag tej pojniam. Puas tsimnyog cia kuv rau txim rau lawv vim lawv tej kev txhaum, thiab cia kuv ua pauj rau haivneeg uas ua li no? Kuv yuav cia yeebncuab tuaj luaj kuv haivneeg tej vaj txiv hmab povtseg, tiamsis tsis pub ua kom lawv tuag tas; kuv yuav kom yeebncuab muab lawv tej ceg txiv hmab ntshua povtseg; rau qhov tej ceg txiv hmab ntawd tsis yog kuv li. Cov Yixalayees thiab cov Yudas tsis muab siab npuab kuv hlo li. Kuv yog tus TSWV uas hais li ntawd.” Tus TSWV haivneeg tsis lees paub nws thiab hais tias, “Nws yeej yuav tsis ua li cas rau peb li. Yuav tsis muaj kev puastsuaj los raug peb; yuav tsis muaj kev tsov kev rog lossis kev ntshai kev nqhis los raug peb li.” Cov Yixalayees, tus TSWV yuav coj ib haivneeg uas nyob deb heev tuaj tawmtsam nej. Yog haivneeg uas muaj zog thiab nyob ntev los lawm, nej tsis paub haivneeg ntawd tej lus li. Lawv cov tubrog uas tua hneevnti muaj zog heev thiab tua tsis hlub leejtwg li. Lawv yuav noj nej tej qoob thiab tej zaub mov; lawv yuav tua nej tej tub tej ntxhais kom tuag tas. Lawv yuav tua nej tej tsiaj txhu thiab yuav luaj nej tej txiv hmab thiab ntov tej txiv ncuavpias povtseg. Tej nroog muaj ntsa yeej uas nej cia siab rau yuav raug yeebncuab tej tubrog muab tsoo pob puas tas. Tus TSWV hais tias, “Txawm yog li cas los hnub ntawd kuv yuav tsis pub kom kuv haivneeg tuag tu noob. Yelemis, thaum lawv nug hais tias vim li cas kuv ua tej no, koj hais rau lawv hais tias vim lawv tso kuv tseg thiab mus pe luag lwm haivneeg tej vajtswv hauv nej lub tebchaws. Yog li ntawd, lawv yuav tau mus pe lwm haivneeg tej vajtswv nyob rau lwm lub tebchaws.” Tus TSWV hais tias, “Koj cia li mus hais rau Yakhauj cov xeebntxwv hauv tebchaws Yudas hais tias: Nej cov uas yog neeg ruam thiab tsis totaub cia li tig pobntseg mloog kuv tej lus; nej muaj qhovmuag tiamsis tsis pom kev thiab muaj pobntseg tiamsis tsis hnov lus. Kuv yog tus TSWV; vim li cas nej tsis hwm kuv? Vim li cas nej tsis ntshai kuv tshee hnyo ntawm kuv xubntiag? Kuv muab lub tiaj suabzeb ua ciam quas dej hiavtxwv, yog tus ciam uas nyob mus ibtxhis tsis muaj leejtwg hla dhau. Txawm yog hiavtxwv ntsawj tuaj los yuav tsis dhau, thiab hiavtxwv ntas tuaj los yuav tsis pob. Tiamsis nej yog neeg tawv ncauj thiab ntxeev siab; nej mus xu das rau ib cag thiab tso kuv tseg. Txawm yog kuv tso nag los raws caij raws nyoog rau nej thiab pub nej muaj qoobloo sau txhua xyoo los nej tsis paub hwm kuv li. Nej tej kev txhaum ua rau nej tsis tau txais Vajtswv tej koob hmoov. “Muaj ib cov neeg siab phem nyob nrog kuv haivneeg; lawv pw zov tos ib yam li tej neeg nthuav tsig cuab noog, tiamsis yog lawv cuab hmuv kom mag neeg. Tej neeg mus cuab tau noog puv tawb li cas, cov neeg siab phem mus huab luag tej khoom los puv tsev ib yam li ntawd. Vim li ntawd lawv thiaj npluanuj, muaj hwjchim thiab muaj noj muaj haus nplua mias ua rau lawv rog. Lawv ua kev phem kev qias tsis paub dhuav li. Lawv tsis pab tsa tej menyuam ntsuag cai lossis tsis ua ncaj rau cov neeg uas raug luag tsimtxom. “Tiamsis kuv uas yog tus TSWV yuav rau txim rau lawv vim tej uas lawv ua ntawd; kuv yuav ua pauj rau haivneeg no. Muaj ib yam xwm phem uas xav tsis thoob tshwm rau hauv lub tebchaws no: cov cev Vajtswv lus hais lus dag xwb; cov povthawj tswjhwm cov pejxeem raws li cov cev Vajtswv lus hais, thiab kuv haivneeg tsis cam li. Tiamsis thaum kawg lawv yuav ua li cas?” Cov Npeenyamees, nej cia li khiav kom dim! Cia li tawm hauv lub nroog Yeluxalees mus! Nej cia li tshuab raj tshuab xyu kom nrov ntshoo nrooj hauv Tekau-as thiab rauv taws hauv Npes Hakhelees kom ncho pa. Kev txomnyem thiab kev puastsuaj yuav tuaj sab qaumteb tuaj raug nej. Lub nroog Xi-oos zoo nkauj kawg li tiamsis yuav raug puastsuaj tas; tej vajntxwv thiab lawv tej tubrog yuav tuaj tsuam yeej rau qhov ntawd. Lawv yuav tsa lawv tej tsevntaub raws li lawv siab nyiam puagncig lub nroog. Lawv yuav hais tias, “Cia li npaj kom txhij, peb yuav mus tua lub nroog Yeluxalees! Peb yuav mus tua thaum tavsu!” Tiamsis tom qab ntawd lawv hais tias, “Lig heev lawm, hnub twb yuav poob qho thiab ntxoov ntxoo los luas lawm yuav tsaus ntuj. Peb tos kom tsaus ntuj, peb mam mus tua; peb yuav rhuav lub nroog tej chaw fajxwm kom puastsuaj tas.” Tus TSWV uas muaj hwjchim loj kawg nkaus hais rau cov vajntxwv ntawd kom mus txiav ntoo los meem ua chaw nce mus vij lub nroog Yeluxalees. Tus TSWV hais tias, “Kuv yuav rau txim rau lub nroog Yeluxalees, vim nws tsimtxom lwm tus. Dej txhawv hauv lub qhovtshij tuaj li cas, tej kev phem kev qias txawv hauv Yeluxalees tuaj li ntawd. Kuv hnov hais tias muaj kev nruj kev tsiv thiab kev puastsuaj lossis kev mob kev nkeeg thiab qaij ntuag ntshav nrog nyob hauv lub nroog ntawd xwb. Cov neeg hauv Yeluxalees, cia tej kev txomnyem no qhia rau nej lossis cia kuv tso nej tseg; kuv yuav muab nej lub nroog hloov ua suabpuam kom tsis muaj neeg nyob.” Tus TSWV uas muaj hwjchim loj kawg nkaus hais rau kuv hais tias, “Cov Yixalayees yuav raug luag lwg kom dulug ib yam li tej ceg txiv hmab uas luag de txiv tas lawm. Yog li ntawd nej yuav tsum pab kom txhua tus dim thaum uas tseem muaj sijhawm.” Kuv thiaj teb hais tias, “Yog kuv mus hais thiab ntuas lawv, leejtwg yuav mloog kuv hais? Lawv yog neeg tawv ncauj thiab tsis mloog koj tej lus; lawv luag tej uas koj kom kuv qhia rau lawv. Koj txojkev chim tawmtsam lawv kub lug hauv kuv tuaj ua rau kuv nyiaj tsis taus lawm.” Ces tus TSWV hais rau kuv hais tias, “Muab kuv txojkev chim hliv rau saum tej menyuam uas nyob ntawm tej kev thiab rau tej tub hluas uas tuaj sib sau ua ke. Tej pojniam thiab txivneej yuav raug luag ntes mus, thiab tej neeg laus los luag yuav tsis tseg li. Lawv tej vajtse, tej liaj teb thiab tej pojniam luag yuav txeeb coj mus rau lwm tus. Kuv yuav rau txim rau cov neeg hauv lub tebchaws no. Cov neeg ntawd tsis hais cov nomtswv lossis tej pejxeem txhua tus ua tsis ncaj kom lawv npluanuj; txawm yog cov cev Vajtswv lus thiab cov povthawj los ua tsis ncaj rau tej pejxeem ib yam nkaus. Lawv yuav hais tias kuv haivneeg tej qhov txhab tsuas yog kes mentsis xwb. Lawv hais tias, ‘zoo lawm lauj,’ tiamsis qhov tseeb tiag yeej tsis tau zoo li. Qhov uas lawv ua kev phem kev qias li ntawd, lawv puas paub txajmuag? Lawv yeej tsis paub txajmuag li. Lawv twb tsis paub hais tias ua li ntawd lawv yuav poob ntsejmuag; yog li ntawd, lawv thiaj poob ntsejmuag li lwm tus uas twb poob lawm. Thaum kuv rau txim rau lawv, ces yog hnub kawg rau lawv lawm. Kuv yog tus TSWV uas hais li ntawd.” Tus TSWV hais rau nws haivneeg hais tias, “Nej cia li mus sawv tom kev tshuam ntsia thiab nug luag hais tias tej qub kev thaum ub nyob qhov twg thiab txojkev uas zoo dua ntais yog txoj twg? Nej cia li taug txoj ntawd, nej thiaj yuav tau nyob kaj siab lug.” Tiamsis lawv teb hais tias, “Peb yuav tsis ua li ntawd.” Tus TSWV tsa ib cov neeg mus zov tos mloog luag tshuab raj tshuab xyu ceebtoom rau sawvdaws. Tiamsis lawv teb hais tias, “Peb tsis mloog.” Yog li ntawd, tus TSWV thiaj hais tias, “Txhua haivneeg, nej cia li tig pobntseg mloog, nej thiaj paub hais tias yuav muaj xwm dabtsi tshwmsim los raug kuv haivneeg. Lub ntiajteb, koj cia li mloog kuv hais; kuv yuav tso kev puastsuaj los raug haivneeg no, rau qhov lawv tsis mloog kuv lus thiab tsis ua raws li kuv tej lus qhia. Tej hmoov tshuaj tsw qab uas lawv coj hauv tebchaws Senpas lossis tej txujlom uas lawv coj hauv lub tebchaws deb heev tuaj yuav muaj nqis dabtsi rau kuv? Kuv yuav tsis txais lawv tej khoom fij thiab tej tsiaj uas lawv coj tuaj hlawv fij. Kuv yuav ua kom cov neeg ntawd dawm ntog. Lawv tej txiv tub, tej phoojywg thiab tej neeg zejzog yuav tuag tas huv tibsi.” Tus TSWV hais tias, “Yuav muaj neeg tuaj hauv lub tebchaws pem sab qaumteb tuaj; lawv yog haivneeg muaj hwjchim uas nyob deb heev tabtom npaj tuaj ua rog. Lawv tuav rawv ntaj thiab hneevnti ntawm tes; lawv yog cov neeg uas ua nruj ua tsiv thiab tsis hlub leejtwg li. Lawv caij nees dhia nrov nroo ntws tuaj cuag dej hiavtxwv ntas. Lawv npaj nroos yuav tua lub nroog Yeluxalees.” Cov neeg uas nyob hauv lub nroog Yeluxalees hais tias, “Thaum peb hnov tej xwm no, peb tej tes tsaug leeg tsa tsis taus; peb ntshai heev ibce mob lwj ntsuav ib yam li tus pojniam uas mob plab yug menyuam. Peb tsis muaj peevxwm tawm mus rau tom tej ntug zos lossis taug kev mus rau qhov twg li, rau qhov peb cov yeebncuab yeej npaj rawv tos tua peb xwb, ua rau peb ntshai kawg li.” Tus TSWV hais rau nws haivneeg hais tias, “Nej cia li npua ntaubtsaj thiab da qhov tshauv. Quaj kua muag ntws laws ib yam li nej quaj nej tus tub uas nej hlub tuag, rau qhov tib ntsais muag xwb yeebncuab twb tuaj tua nej lawm. Yelemis, koj cia li sim kuv haivneeg ib yam li koj sim tooj sim hlau, saib lawv yog neeg zoo li cas. Lawv yog neeg ntxeev siab, tawv ncauj thiab lawv tawv npaum nkaus li tej tooj thiab tej hlau. Lawv yog neeg tsis ncaj thiab nyiam taug xaiv rau ub rau no. Lub yeejvub yeej kub kawg lawm, tiamsis tej quav tooj quav hlau tseem tsis yaj thiab ntws tawm li. Txawm yog kuv muab kuv haivneeg nchuav dua los yuav tsis muaj nqis dabtsi, rau qhov tseem muaj cov neeg ua phem nrog lawv nyob. Sawvdaws yuav hu lawv hais tias yog tej quav tooj quav hlau uas tsis muaj nqis, rau qhov kuv uas yog tus TSWV tso lawv tseg lawm.” Nej tsis txhob ntseeg luag tej lus uas dag hais tias, ‘Peb dim lawm! Ntawm no yog tus TSWV lub Tuamtsev, ntawm no yog tus TSWV lub Tuamtsev, ntawm no yog tus TSWV lub Tuamtsev!’ “Nej cia li tso plhuav nej lub neej qub thiab tes haujlwm tsis zoo uas nej ua tseg, ib leeg ua ncaj rau ib leeg. Tsis txhob quab yuam lwm haivneeg, cov menyuam ntsuag thiab tej pojntsuam. Tsis txhob tua tej neeg tsis muaj txim uas nyob hauv nej lub tebchaws. Tsis txhob pe luag tej vajtswv, rau qhov tej ntawd yuav ua rau nej raug kev puastsuaj. Yog nej ua lub neej tshiab, kuv thiaj yuav pub nej nyob hauv lub tebchaws uas kuv muab rau nej cov yawgkoob ua lawv tug mus ibtxhis lawm. “Nej sim saib, nej tsuas cia siab rau tej lus dag ntxias xwb. Nej ua tubsab, tua neeg, deev luag pojniam luag txiv, dag twv ntuj twv teb, tua tsiaj fij rau Npa-as, thiab pe luag tej vajtswv uas nej yeej tsis tau pe dua li. Nej ua tej uas kuv ntxub los nej tseem muaj plhus tuaj sawv tabmeeg kuv hauv lub Tuamtsev thiab khav hais tias, ‘Peb twb dim lawm!’ Nej xav hais tias kuv lub Tuamtsev yog qhov chaw rau tej tubsab tuaj nkaum no los? Kuv twb pom tej uas nej ua tas lawm. Nej cia li mus rau pem lub nroog Silaus thiab saib lub chaw uas yav tas los kuv xaiv tseg ua thawj lub chaw rau sawvdaws pehawm kuv saib zoo li cas lawm. Kuv ua rau lub nroog ntawd puastsuaj tas, twb yog vim kuv haivneeg Yixalayees ua kev phem kev qias. Nej tau ua tej kev txhaum uas kuv hais ntawd lawm. Txawm yog kuv ntuas nej ntau zaus lawm los nej tsis mloog kuv hais li, thiab thaum kuv hu nej los nej tsis teb. Yog li ntawd, kuv yuav rhuav lub Tuamtsev uas nej cia siab rau ib yam li kuv rhuav lub nroog Silaus lawm. Thaj chaw uas kuv muab rau nej cov yawgkoob thiab nej no kuv yuav muab rhuav ib yam li kuv rhuav lub nroog Silaus thiab. Kuv yuav ntiab nej khiav ntawm kuv mus ib yam li kuv ntiab nej cov kwvtij Yixalayees tawm mus lawm. Kuv yog tus TSWV uas hais li ntawd.” Tus TSWV hais tias, “Yelemis, koj tsis txhob thov kuv pab cov neeg no. Koj tsis txhob quaj thiab thov kuv cawm lawv; tsis txhob thov kuv zam txim rau lawv, rau qhov kuv yuav tsis mloog koj tej lus thov. Koj tsis pom tej uas lawv tabtom ua nyob hauv cov Yudas tej nroog thiab tom tej kev uas nyob hauv lub nroog Yeluxalees los? Tej menyuam mus khaws taws, cov txivneej rauv taws, cov pojniam ntse hmoov nplej puab ncuav cub coj mus fij rau tus mlom pojniam uas hu ua niam vajntxwv ntuj; lawv muab cawv hliv fij rau lwm tus vajtswv ua kom kuv chim. Tiamsis kuv puas yog tus uas chim? Lawv thiaj yog cov uas chim thiab poob ntsejmuag. Yog li ntawd, kuv yog tus TSWV uas kav ib puas tsav yam yuav hliv kuv txojkev chim los rau lub Tuamtsev no. Kuv yuav hliv rau saum tej neeg, tej tsiaj txhu, tej ntoo thiab tej qoobloo. Kuv txojkev chim zoo ib yam li lub cubtawg uas tsis muaj leejtwg yuav tua tau. “Kuv haivneeg, tej tsiaj uas nej coj tuaj tua hlawv fij rau kuv, muaj ibtxhia nej muab hlawv tagnrho fij rau saum lub thaj thiab muaj ibtxhia nej noj tau. Txawm yog txoj kevcai txwv tsis pub noj los kuv uas yog tus TSWV hais tias nej noj tau. Thaum kuv coj nej cov yawgkoob tsiv nram tebchaws Iziv los, kuv tsis tau hais txog tej tsiaj uas lawv coj tuaj tua hlawv fij lossis lwm yam khoom fij li. Tiamsis kuv hais kom lawv mloog kuv lus, kuv thiaj yog lawv tus Vajtswv thiab lawv thiaj yog kuv haivneeg. Kuv hais kom lawv coj raws li kuv tej lus, lawv lub neej thiaj yuav vammeej. Tiamsis lawv tsis mloog kuv hais lossis tsis quavntsej kuv tej lus li. Lawv tawv ncauj thiab ua raws li lawv lub siab phem qhia lawv. Vim li ntawd, lawv thiaj ua phem zuj zus thiab ua tsis tau zoo li lawm. Txij hnub uas nej cov yawgkoob tsiv nram tebchaws Iziv los txog nimno, kuv txib kuv cov tubtxib uas yog cov cevlus tuaj cevlus rau nej tsis tu ncua li. Tiamsis nej tsis quavntsej lossis tsis mloog lawv tej lus qhia. Nej tseem hajyam tawv ncauj thiab ntxeev siab ua phem tshaj nej cov yawgkoob. “Yog li ntawd Yelemis, koj yuav piav tej lus no rau kuv haivneeg, tiamsis lawv yuav tsis mloog koj hais; koj hu lawv, tiamsis lawv yuav tsis teb. Koj yuav hais rau lawv hais tias lawv yog haivneeg uas tsis mloog tus TSWV uas yog lawv tus Vajtswv lus, txawm yog kuv rau txim rau lawv los lawv tsis zeem li. Lawv tsis cia siab rau kuv, tsis muaj leejtwg hais txog kuv li lawm. “Cov neeg uas nyob hauv lub nroog Yeluxalees, nej cia li quaj ntsuag; nej cia li txiav nej tej plaubhau thiab coj mus povtseg. Cia li mus hu zaj nkauj quaj ntsuag saum tej ncov roob, rau qhov kuv uas yog tus TSWV chim rau nej, kuv thiaj tso kuv haivneeg tseg lawm. “Cov Yudas ua phem ua qias kawg li. Lawv muab lawv tej mlom uas kuv ntxub coj tuaj tso rau hauv kuv lub Tuamtsev, ua rau lub Tuamtsev tsis huv lawm. Lawv tseem teeb tau ib lub thaj hu ua Taufes rau hauv lub Hav Hinoos ua chaw rau lawv coj lawv tej tub tej ntxhais mus tua hlawv fij. Tiamsis kuv tsis tau kom lawv ua li ntawd, kuv tsis tau xav txog tej ntawd li. Yog li ntawd, muaj ib hnub sawvdaws yuav tsis hu hais tias Taufes lossis lub Hav Hinoos lawm, tiamsis yuav hu ua lub Hav tua neeg. Luag yuav coj tej neeg tuag tuaj faus rau ntawd, rau qhov tsis muaj chaw faus tuag lawm. Tej noog thiab tej tsiaj nruab nrag yuav los noj tej cev tuag ntawd, thiab yuav tsis muaj leejtwg lawv tej tsiaj ntawd khiav. Lub tebchaws ntawd yuav ua suabpuam. Kuv yuav ua kom tej suab raj suab qeej uas nrov lomzem thiab kev noj tshoob haus kos hauv cov Yudas tej nroog thiab hauv lub nroog Yeluxalees tej kev ntsiag mus. “Lub sijhawm ntawd luag yuav tuaj khawb cov Yudas tej vajntxwv, tej nomtswv, cov povthawj, cov cev Vajtswv lus thiab cov pejxeem uas nyob hauv lub nroog Yeluxalees tej pobtxha tawm hauv lawv tej qhov ntxa mus. Tsimnyog sau tej pobtxha ntawd coj mus faus, tiamsis luag muab lawv tej pobtxha tso pawglug rau saum npoo av ib yam li tej quav nyuj. Luag yuav muab tej pobtxha ntawd tso rau lub hnub, lub hli thiab tej hnubqub ziab; lub hnub lub hli, thiab tej hnubqub uas lawv teev, lawv pe, lawv mus tuavxam nrog thiab lawv nyiam. Cov neeg uas seem ntawm haivneeg uas ua phem ua qias no, lawv nyob ntawm tej chaw uas kuv ntiab lawv mus nyob, lawv yuav ntshaw tuag tshaj ntshaw ua neej nyob. Kuv yog tus TSWV uas muaj hwjchim loj kawg nkaus hais li ntawd.” Tus TSWV kom kuv hais rau nws haivneeg hais tias, “Tus neeg uas ntog lawm, txawm yuav tsis sawv li los? Tus neeg uas yuam kev lawm, txawm yuav tsis thim rov los li los? Kuv haivneeg, vim li cas nej khiav ntawm kuv mus, nej txawm tsis tig rov los cuag kuv li lawm? Nej nyiam nej tej mlom heev, nej thiaj tsis rov los cuag kuv. Kuv ua tib zoo mloog, tiamsis nej tsis hais tej lus tseeb li. Nej cov tsis muaj ib tug uas txawj tu siab rau nws tej kev txhaum; nej cov tsis muaj ib tug nug hais tias, ‘Kuv ua txhaum dabtsi?’ Nej txhua tus nyias ua raws li nyias lub siab nyiam ib yam li tus nees uas khiav too hau ntsoov mus rau hauv tshavrog. Txawm yog tej noog pashawv los twb paub lub caij uas ya rov los rau ntawm nws lub chaw; tej nquab, tej luv thiab tej noog dej los twb paub lub caij tsiv. Tiamsis kuv haivneeg, nej tsis paub txoj kevcai uas kuv muab rau nej coj li.” Nej yuav ua li cas hais tau tias nej yog neeg txawj ntse thiab nej paub kuv tej kevcai zoo? Nej saib, cov sau kevcai twb muab tej kevcai hloov lawm. Nej tej neeg txawj ntse yuav raug kev txajmuag, lawv yuav ntshai thiab raug ntes mus; lawv twb tsis lees paub kuv tej lus, yuav ua li cas hais tias lawv muaj tswvyim? Yog li ntawd, kuv yuav muab lawv tej teb rau lwm tus thiab yuav muab lawv tej pojniam rau lwm tus txivneej yuav. Cov neeg ntawd, tsis hais tej nomtswv lossis tej pejxeem txhua tus puavleej ua tsis ncaj kom lawv npluanuj. Txawm yog cov cev Vajtswv lus thiab cov povthawj los uas tsis ncaj rau cov pejxeem ib yam nkaus. Lawv suav hais tias kuv haivneeg tej qhov txhab tsuas yog kes mentsis xwb. Lawv thiaj hais tias, ‘Zoo lawm lauj!’ Tiamsis qhov tseeb tiag yeej tsis tau zoo li. Kuv haivneeg, nej tsis txajmuag rau tej kev phem kev qias uas nej ua li los? Nej tsis paub txajmuag li; nej twb tsis paub hais tias ua li ntawd nej yuav poob ntsejmuag! Yog li ntawd, nej thiaj poob ntsejmuag li lwm tus uas twb poob ntsejmuag lawm; thaum kuv rau txim rau nej ces yog hnub kawg rau nej ntag. Kuv yog tus TSWV uas hais li ntawd. “Kuv xav sau kuv haivneeg ib tug txivneej uas nws sau nws tej qoob; tiamsis lawv zoo ib yam li tsob txib hmab thiab tsob txiv ncuavpias uas tsis txi txiv; txawm yog tej plooj twb qhuav thiab zeeg tas lawm los kuv yuav cia lwm haivneeg tuaj txeeb lub tebchaws no.” Tus TSWV haivneeg sib nug hais tias, “Peb tseem yuav nyob li no tos ua dabtsi? Peb cia li khiav mus rau hauv tej nroog uas muaj ntsa yeej thiab tuag rau ntawd. Tus TSWV uas yog peb tus Vajtswv yeej pom zoo cia peb tuag; tus TSWV muab tshuaj muaj taug rau peb haus, vim peb ua txhaum rau nws lawm. Peb nrhiav kev thajyeeb, tiamsis tsis tau ib qho zoo li; peb nrhiav kev khov mob, tiamsis tau kev txhawj kev ntshai xwb. Peb cov yeebncuab twb tuaj nyob txhij hauv lub nroog Das lawm; peb hnov lawv tej nees tshuab zom zaws. Thaum lawv cov nees hee ua rau peb lub tebchaws ntseeg nkaws. Peb cov yeebncuab tuaj rhuav peb lub tebchaws thiab txhua yam uas nyob hauv, peb lub nroog thiab cov neeg uas nyob hauv kom puastsuaj huv tibsi.” Tus TSWV hais tias, “Nej ntsa qhovmuag saib, kuv yuav tso ib cov nab muaj taug los rau hauv nej; cov nab ntawd yuav tom nej, nej yuav ntxias tsis tau li.” Kuv txojkev quaj ntsuag kho tsis tau li, mob kuv lub siab kawg. Nej mloog saib! Kuv hnov kuv haivneeg lub suab quaj thoob plaws tebchaws, “Tus TSWV tsis nyob saum roob Xi-oos lawm los? Tus vajntxwv uas kav Xi-oos tsis nyob lawm los?” Tus TSWV uas yog lawv tus vajntxwv teb hais tias, “Vim li cas nej pe nej tej mlom thiab nyo taubhau hawm lwm haivneeg tej vajtswv uas tsis muaj qabhau ua rau kuv chim?” Tej neeg quaj hais tias, “Lub caij ntuj kub twb xaus thiab lub caij sau qoobloo los twb dhau lawm, tiamsis peb tseem tsis tau dim.” Kuv lub siab quaj ntsuag vim kuv cov neeg raug puastsuaj lawm; kuv quaj tu siab nrho ua rau kuv ibce txhav tas. Txawm tsis muaj tshuaj nyob hauv cheebtsam Nkile-as li los? Txawm tsis muaj kws kho mob nyob qhov ntawd li los? Vim li cas tsis muaj leejtwg kho kuv haivneeg kom zoo mob li? Kuv xav kom kuv lub taubhau yog lub qhovdej txhawv, thiab cia kuv ob lub qhovmuag ua ciav dej rau kua muag ntws; kuv thiaj tau quaj tas hnub tas hmo rau kuv haivneeg uas raug luag tua tuag. Kuv xav kom muaj ib lub chaw rau kuv nyob tom tiaj suabpuam, kom kuv nyob nrug deb kuv haivneeg. Lawv txhua tus yog neeg tsis ncaj thiab yog neeg ntxeev siab. Lawv nyiam hais lus dag; lawv tsis hais lus tseeb tiamsis lawv hais lus dag thoob tebchaws. Tus TSWV hais tias, “Kuv haivneeg ua kev phem kev qias ib yam tas ib yam tuaj, thiab lawv tsis lees paub hais tias kuv yog lawv tus Vajtswv.” Txhua tus yuav tsum ceevfaj nws tus phoojywg, thiab tsis muaj leejtwg ntseeg nws tus kwvtij siab; rau qhov tej kwvtij puavleej hais lus dag ib yam li Yakhauj, thiab txhua tus puavleej txob thuam nws tej phoojywg. Vim li no tus TSWV uas muaj hwjchim loj kawg nkaus thiaj li hais tias, “Kuv haivneeg ua phem ua qias heev, kuv yuav ua li cas rau lawv? Kuv yuav sim lawv, kuv yuav muab kuv haivneeg nchuav dua tshiab ib yam li nchuav nyiaj. Lawv tus nplaig ntse zuag plias ib yam li tej xubvos, lawv ibtxwm hais lus dag. Lawv ua txuj hais lus zoo rau lawv tej neeg zejzog, tiamsis yog lawv cuab hmuv tos luag kev xwb. Kuv yuav tsis rau txim rau lawv vim tej uas lawv ua ntawd los? Kuv yuav tsis ua pauj haivneeg uas ua li no los? Kuv yog tus TSWV uas hais li ntawd.” Yelemis hais tias, “Kuv yuav quaj ntsuag rau tej hauv roob thiab quaj rau tej tshav zaub, rau qhov tej ntawd qhuav tas lawm, thiab tsis muaj leejtwg taug kev hla qhov ntawd li. Tsis hnov tej tsiaj nyeg ua suabsab qhov twg li; tej noog thiab tej tsiaj qus los khiav tas lawm.” Tus TSWV hais tias, “Kuv yuav ua kom lub nroog Yeluxalees puastsuaj tas thiab cia ua chaw rau tej hma nyob; tej nroog hauv tebchaws Yudas yuav ua suabpuam tsis muaj neeg nyob.” Kuv nug hais tias, “Tus TSWV, vim li cas lub tebchaws no yuav qhuav ua suabpuam tas, thiab tsis muaj neeg taug kev hla qhov ntawd li lawm? Leejtwg thiaj yog tus ntse thiab totaub tej no? Koj yuav qhia rau leejtwg kom nws mus piav rau lwm tus?” Tus TSWV teb hais tias, “Tej no tshwmsim twb yog vim kuv haivneeg tso kuv tej lus uas kuv qhia rau lawv tseg lawm. Lawv tsis mloog thiab tsis ua raws li kuv tej lus. Tiamsis, lawv tawv ncauj thiab mus pe tej mlom Npa-as ib yam li lawv cov yawgkoob qhia lawv pe. Yog li ntawd, koj cia li saib tej uas kuv uas yog tus TSWV, cov Yixalayees tus Vajtswv uas muaj hwjchim loj kawg nkaus yuav ua: kuv yuav muab nroj iab rau kuv haivneeg noj thiab muab tshuaj muaj taug rau lawv haus. Kuv yuav muab lawv ntiab mus nrog lwm haivneeg uas lawv thiab lawv cov yawgkoob tsis tau paub thiab tsis tau pom dua nyob, thiab kuv yuav cia yeebncuab tuaj tawmtsam lawv mus txog hnub uas muab lawv rhuav puastsuaj tas.” Tus TSWV uas muaj hwjchim loj kawg nkaus hais tias, “Nej xav saib yuav muaj dabtsi tswm los! Cia li hu cov pojniam uas txawj nyiav tuaj nyiav, thiab hu cov pojniam uas txawj hu nkauj quaj ntsuag tuaj hu nkauj.” Tej neeg hais tias, “Cia li kom lawv kavtsij tuaj hu nkauj thiab nyiav rau peb mus txog thaum peb tej kua muag ntws si laim thiab peb tej tawv muag ntub ntsuav kua muag.” Nej mloog tej suab quaj hauv lub nroog Xi-oos: “Peb raug puastsuaj lawm lauj! Peb poob ntsejmuag kawg li! Peb cia li tawm hauv peb lub tebchaws mus; peb tej vajtse luag twb muab rhuav pob puas tas lawm.” Kuv hais tias, “Nej cov pojniam cia li mloog tus TSWV hais thiab ua tib zoo mloog nws tej lus. Qhia nej tej ntxhais kom txawj nyiav thiab qhia nej tej phoojywg kom txawj hu nkauj quaj ntsuag. Kev tuag twb nkag ntawm peb tej qhovrai los rau hauv peb tej tsev, thiab tua peb tej menyuam uas tabtom ua si ntawm tej kev, thiab tej tub hluas uas ncig tom tej kiab tej khw lawm. Tej neeg tuag pawglug rau txhua qhov chaw ib yam li tej quav nyuj tom tej nras, thiab ib yam li tej hnab nplej uas cov neeg hlais nplej ua poob tsis muaj leejtwg sau. Tej lus no yog tus TSWV kom kuv hais.” Tus TSWV hais tias, “Cov neeg txawj ntse tsis txhob khav lawv tej tswvyim, lossis cov neeg muaj zog tsis txhob khav lawv lub zog, lossis cov neeg npluanuj tsis txhob khav lawv tej nyiaj txiag. Yog leejtwg xav khav, nws yuav tsum khav hais tias nws paub thiab totaub kuv, rau qhov kuv txojkev hlub nyob mus ibtxhis; kuv ua ncaj thiab hais tseeb xwb. Tej no yog tej uas haum kuv siab. Kuv yog tus TSWV uas hais li ntawd.” Cov Yixalayees, nej cia li mloog tej lus uas tus TSWV hais rau nej. Nws hais tias, “Nej tsis txhob ua kev phem kev qias ib yam li lwm haivneeg ua; tsis txhob cia tej xwm uas tshwmsim saum nruab ntug ua rau nej xav tsis thoob, txawm yog lwm haivneeg ntshai tej ntawd los xij. Cov neeg ntawd tej kev ntseeg tsis muaj qabhau dabtsi; lawv mus txiav ntoo hauv havzoov los rau cov kws txua ntoo muab cuabyeej txua thiab muab nyiaj muab kub vuam rau; lawv muab ntsia hlau ntsia kom tsis txob vau. Tej mlom ntawd zoo ib yam li tej mojzeej uas luag muab dai rau tom tej teb dib thiab tej mlom ntawd tsis txawj hais lus; luag yuav tsum nqa tej mlom ntawd, rau qhov tej mlom ntawd tsis txawj mus kev. Nej tsis txhob ntshai tej mlom ntawd, rau qhov mlom ua tsis tau phem rau nej thiab pab tsis tau nej.” Tus TSWV, tsis muaj leejtwg yuav zoo npaum li koj; koj yog tus muaj zog loj zog nchav, koj lub koob lub npe nrov ncha moo lug thiab muaj hwjchim heev. Tus vajntxwv uas kav txhua haivneeg, leejtwg thiaj tsis kam hwm koj? Koj yog tus uas tsimnyog peb hwm. Txhua haivneeg tej neeg txawj ntse lossis lawv tej vajntxwv tsis muaj ib tug zoo npaum li koj. Lawv cov ntawd puavleej ruam thiab tsis thoob tsib. Tej mlom ntawd yog ntoo xwb, qhia tsis tau dabtsi rau nej. Lawv muab tej nyiaj uas coj tim tebchaws Xapees tuaj thiab cov kub uas coj hauv tebchaws Ufas los vuam tej mlom ntawd; tej mlom ntawd puavleej yog cov neeg uas nchuav nyiaj nchuav kub thiab txawj txua ntoo txua xwb; lawv muab tej ris tsho ntaub xiav thiab ntaub tsamxem rau tej mlom ntawd hnav; tej ntaub ntawd yog cov neeg uas txawj ntos ntaub ntos xwb. Tiamsis tus TSWV, koj yog tus Vajtswv tseeb, koj yog tus Vajtswv uas muaj sia nyob, thiab yog tus vajntxwv uas nyob mus ibtxhis. Thaum koj chim lub ntiajteb ua zog koog; txhua haivneeg tiv tsis taus koj txojkev chim. ( Nej yuav tsum qhia rau lawv hais tias tej mlom ntawd tsis yog cov uas tsim lub ntiajteb thiab lub ntuj, tej mlom ntawd yuav puastsuaj tas; thiab yuav tsis muaj nyob hauv lub ntiajteb no lawm.) Tus TSWV tsim lub ntiajteb los ntawm nws lub hwjchim; nws tsim lub qab ntuj los ntawm nws lub tswvyim, thiab nthuav lub ntuj los ntawm nws txojkev txawj ntse. Thaum tus TSWV hais rau tej dej saum nruab ntug, ces tej dej ntawd txawm nrov nroo ntws; nws ua kom muaj huab tsaus nti tim qab ntug los. Nws ua kom muaj xob laim rau thaum nag los, thiab tso cua hauv nws lub txhab tuaj ntsawj. Neeg txhua tus puavleej ruam thiab tsis muaj kev txawj ntse; cov neeg nchuav mlom yuav raug txajmuag, rau qhov tej mlom uas lawv nchuav tsis ciaj sia thiab cuav xwb. Tej mlom ntawd tsis muaj nqis thiab tsimnyog raug thuam; thaum tus TSWV txiav txim rau lawv, lawv yuav puastsuaj tas. Yakhauj tus Vajtswv tsis zoo li tej mlom ntawd; nws yog tus uas tsim ib puas tsav yam thiab nws yog tus xaiv cov Yixalayees ua nws haivneeg. Nws lub npe hu ua tus TSWV uas muaj hwjchim loj kawg nkaus. Cov neeg uas nyob hauv lub nroog Yeluxalees, luag tuaj vij nej lawm! Nej cia li sawbsim nej tej khoom. Tus TSWV yuav ntiab nej tawm hauv lub tebchaws no mus; nws yuav tso kev txomnyem los rau nej mus txog hnub uas nej puastsuaj tas tsis tshuav ib tug seem li. Tus TSWV hais li ntawd. Cov neeg uas nyob hauv lub nroog Yeluxalees quaj hais tias, “Peb raug mob sab kawg li! Peb tej qhov txhab yuav kho tsis zoo li. Peb xav hais tias peb yuav tiv tau tej no. Peb tej tsevntaub puastsuaj tas; tej hlua uas rub los po thiab tu tas. Peb tej menyuam ploj tas tsis tshuav ib tug nrog peb nyob pab peb tsa tsevntaub; thiab tsis tshuav ib tug pab peb dai tej ntaub thaiv qhovrai lawm.” Kuv teb hais tias, “Peb cov thawjcoj ruam kawg li, lawv tsis thov tus TSWV ua tus coj kev. Twb yog vim li no lawv thiaj ua tsis tau ib yam dabtsi li, thiab peb cov neeg thiaj khiav mus nyob ua sab ua sua tas lawm. Nej cia li mloog! Muaj ib tsab xov tuaj! Yog lub suab ua tsov ua rog uas nrov doog diaj sab qaumteb tuaj; lawv yuav tuaj ua kom cov Yudas tej nroog ua suabpuam tas ua chaw rau tej hma nyob.” Tus TSWV, kuv paub hais tias tsis muaj leejtwg uas nws rov ua tus tswv kav nws; thiab tsis muaj leejtwg nws rov tswj nws lub neej. Tus TSWV, thov koj ntuas koj haivneeg, tiamsis thaum koj chim, thov koj tsis txhob ua nruj ua tsiv lossis rau txim hnyav rau peb nyob tsam peb tuag lawm. Thov tshem koj txojkev chim mus rau txhua haivneeg uas tsis pehawm koj thiab mus rau cov neeg uas tso koj tseg lawm. Lawv tua koj haivneeg; lawv tau ua rau peb puastsuaj tas, thiab ua rau peb lub tebchaws puastsuaj huv tibsi lawm. Tus TSWV hais rau kuv hais tias, “Koj cia li ua tib zoo mloog kuv tej lus cog tseg no. Koj mus hais rau cov Yudas thiab cov neeg uas nyob hauv lub nroog Yeluxalees hais tias kuv yog tus TSWV uas yog cov Yixalayees tus Vajtswv, kuv tau foom tsis zoo rau txhua tus uas tsis coj thiab tsis ua raws li tej lus cog tseg no lawm. Tej lus no yog tej uas kuv cog tseg rau lawv cov yawgkoob thaum kuv coj lawv tawm nram tebchaws Iziv uas zoo ib yam li lawv nyob hauv lub qhovcub nchuav hlau los. Kuv hais kom lawv mloog kuv lus thiab ua raws li kuv tej lus samhwm. Kuv hais rau lawv hais tias yog lawv mloog kuv lus, lawv yuav ua kuv haivneeg thiab kuv yuav ua lawv tus Vajtswv. Ces kuv yuav ua raws li tej lus uas kuv cog tseg rau lawv cov yawgkoob uas hais tias kuv yuav muab lub tebchaws av rog thiab zoo qoob rau lawv uas nimno lawv twb tau lawm.” Kuv teb tus TSWV hais tias, “Kuv yuav ua li ntawd.” Thaum ntawd tus TSWV hais rau kuv hais tias, “Koj cia li mus rau hauv cov Yudas tej nroog thiab tom tej kev hauv lub nroog Yeluxalees. Koj qhia kuv tej lus rau lawv mloog thiab kom lawv ua raws li kuv tej lus cog tseg no. Thaum kuv coj lawv cov yawgkoob tawm nram tebchaws Iziv los, kuv ntuas lawv hnyav kawg kom lawv mloog kuv lus, thiab kuv tseem niaj hnub ntuas lawv los txog nimno. Tiamsis lawv tsis mloog thiab tsis ua raws li kuv tej lus li. Lawv tseem tawv ncauj thiab ua phem ib yam li qub. Kuv kom lawv ua raws li kuv tej lus cog tseg, tiamsis lawv tsis ua. Kuv thiaj rau txim rau lawv raws li tej lus uas kuv hais tseg lawm.” Tom qab ntawd tus TSWV hais rau kuv hais tias, “Cov Yudas thiab cov neeg uas nyob hauv lub nroog Yeluxalees tabtom tuavhauv tawmtsam kuv. Lawv rov ua tej kev txhaum uas lawv cov yawgkoob ua. Lawv cov yawgkoob tsis ua raws li tej lus uas kuv hais; lawv pehawm luag tej vajtswv. Cov Yixalayees thiab cov Yudas rhuav tej lus uas kuv cog tseg rau lawv cov yawgkoob lawm. Yog li ntawd, kuv uas yog tus TSWV thiaj qhia rau lawv hais tias kuv yuav tso kev puastsuaj los raug lawv thiab lawv yuav khiav tsis dim li. Thaum lawv thov kuv pab, kuv yuav tsis mloog lawv tej lus thov. Thaum ntawd cov Yudas thiab cov neeg uas nyob hauv lub nroog Yeluxalees yuav mus thov tej vajtswv uas lawv teev thiab pe kom pab lawv. Tiamsis thaum uas kev puastsuaj tuaj ti lawv lawm, tej vajtswv ntawd yuav pab tsis tau lawv li. Cov Yudas tej mlom ntau npaum nkaus li lawv tej nroog, thiab cov neeg uas nyob hauv lub nroog Yeluxalees teeb thaj teev tus mlom Npa-as uas phem qias ntau npaum nkaus li tej kev hauv lub nroog. Yelemis, koj tsis txhob thov kuv pab cov neeg no. Thaum lawv raug kev txomnyem, lawv thov kuv pab, kuv yuav tsis mloog lawv tej lus.” Tus TSWV hais tias, “Cov neeg uas kuv hlub tabtom ua phem ua qias. Lawv muaj cai tuaj hauv kuv lub Tuamtsev ua dabtsi? Lawv xav hais tias lawv tuaj coglus thiab muab tsiaj tua hlawv fij, ces lawv txawm yuav dim kev puastsuaj no los? Thiab lawv yuav muaj kev zoo siab no los? Muaj ib zaug kuv hu hais tias lawv yog tsob txiv ntoo roj uas muaj nplooj tsaus nti thiab txi txiv zoo nkauj kawg; tiamsis nimno kuv yuav muab hluavtaws hlawv tej nplooj kom kub hnyiab cig nrov nroo ntws cuag xob nroo thiab muab tej ceg lov huv tibsi. “Kuv yog tus TSWV uas muaj hwjchim loj kawg nkaus, yog tus uas cog cov Yixalayees thiab cov Yudas; tiamsis nimno kuv hais rau lawv hais tias, kuv yuav tso kev puastsuaj los raug lawv. Lawv rov ua rau lawv raug kev puastsuaj rau qhov lawv ua txhaum; lawv tua tsiaj fij rau Npa-as thiaj ua rau kuv chim.” Tus TSWV qhia rau kuv paub hais tias kuv cov yeebncuab tuavhauv yuav tua kuv. Thaum tus TSWV tsis tau qhia rau kuv paub, kuv zoo ib yam li tus menyuam yaj uas luag yuav cab mus tua. Kuv tsis paub hais tias luag twb tuavhauv yuav ua phem rau kuv. Luag hais tias, “Peb cia li muab tsob ntoo uas tseem khov kho ntawd ntov povtseg; cia li muab nws tua kiag kom tsis muaj leejtwg nco txog nws li lawm.” Kuv thov tus TSWV hais tias, “Tus TSWV uas muaj hwjchim loj kawg nkaus, koj yog tus uas txiav txim ncaj ncees; koj paub neeg lub siab thiab neeg tej kev xav. Kuv thov koj ua pauj cov neeg ntawd rau kuv pom ntsoov, rau qhov kuv twb muab kuv rooj plaub tso rau koj hais lawm.” Cov neeg Anathaus xav muab kuv tua povtseg, lawv hais rau kuv hais tias yog kuv pheej cev tus TSWV tej lus, lawv yuav muab kuv tua povtseg. Yog li ntawd, tus TSWV uas muaj hwjchim loj kawg nkaus hais tias, “Kuv yuav rau txim rau lawv txhua tus! Lawv tej tub hluas yuav raug hniav ntaj hniav riam tuag; lawv tej menyuam yuav tuag tas rau kev ntshai kev nqhis. Kuv twb teem sijhawm tso kev puastsuaj los raug cov neeg Anathaus lawm; thaum txog lub sijhawm ntawd lawv yuav tsis dim ib tug li.” “Tus TSWV, yog kuv ua plaub rau koj, koj yuav yog tus uas yeej xwb. Tiamsis kuv xav nug koj txog txojkev ncaj ncees. Vim li cas cov neeg siab phem tsuas muaj vammeej zuj zus xwb? Vim li cas cov neeg siab tsis ncaj ua dabtsi los tiav? Koj yog tus cog lawv, lawv thiaj nrhau cag; lawv loj hlob thiab tawg paj txi txiv; lawv niaj hnub hais koj lub npe, tiamsis lawv lub siab tsis npuab koj. Tiamsis tus TSWV, koj paub kuv zoo; koj pom ntsoov tej uas kuv ua thiab paub hais tias kuv hlub koj npaum li cas. Thov koj ntiab cov neeg siab phem no mus ib yam li tus yaj uas luag cab mus tua; koj zov rawv lawv mus txog thaum luag muab lawv tua lawm. Yuav cia peb lub tebchaws qhuav thiab tej nroj tsuag hauv peb tej liaj teb ntsws mus txog thaum twg? Tej tsiaj thiab tej noog tuag tas vim tej kev phem kev qias uas peb cov neeg ua; lawv hais tias, ‘Vajtswv yeej tsis paub tej uas peb ua.’ ” Tus TSWV hais tias, “Yelemis, yog koj nrog neeg sib tw, koj twb qaug zog lawm, koj yuav ua li cas nrog nees sib tw khiav? Yog hais tias koj twb tsis tau luag nyob hauv tej tiaj nrag no, koj yuav ua li cas tau luag nyob hauv lub havzoov ntawm ntug dej Yauladees? Koj tej kwvtij thiab koj tsevneeg ntxeev siab rau koj thiab lawv ua ib nqag tawmtsam koj. Txawm yog lawv hais lus zoo rau koj los koj tsis txhob tso siab rau lawv.” Tus TSWV hais tias, “Kuv tso cov Yixalayees tseg lawm; kuv tsis lees paub haivneeg uas kuv xaiv. Kuv muab haivneeg uas kuv hlub cob rau lawv cov yeebncuab tes. Haivneeg uas kuv xaiv ntxeev siab rau kuv; lawv nyooj rau kuv ib yam li tus tsov ntxhuav nyooj hauv havzoov, vim li ntawd kuv thiaj ntxub lawv. Haivneeg uas kuv xaiv zoo ib yam li tus noog uas tej dav ya txhua phab tuaj muab. Cia li hu tej tsiaj qus tuaj nrog noj. Ntau tus nomtswv txawv tebchaws tuaj rhuav kuv lub vaj txiv hmab puastsuaj tas; lawv tuaj tsuj kuv tej teb ua lwj ua liam; lawv ua rau lub tebchaws uas kuv hlub ua suabpuam tas. Lawv ua rau kuv lub tebchaws nyob qhuav nquas cia; lub tebchaws quaj saib ntsoov kuv. Thoob plaws lub tebchaws ua suabpuam tas tsis muaj leejtwg quavntsej li. Cov neeg huab noj huab haus tuaj nyob puv nkaus saum tej roob mojsab qhua. Kuv thiaj tso kev tsov kev rog tuaj rhuav lub tebchaws kom puastsuaj tas; tsis muaj leejtwg tau nyob kaj siab lug li. Kuv haivneeg cog nplej, tiamsis lawv sau tau txhauv xwb; lawv rau siab ua haujlwm, tiamsis lawv tsis tau ib yam dabtsi li. Twb yog vim kuv txojkev chim lawv thiaj tsis muaj qoob sau.” Tus TSWV hais tias, “Kuv muaj lus yuav hais rau tej haivneeg uas nyob ibncig cov Yixalayees lub tebchaws uas ua rau lub tebchaws uas kuv muab rau cov Yixalayees puastsuaj lawm. Kuv yuav tshem cov neeg siab phem ntawd tawm hauv lawv tej tebchaws mus ib yam li luag dob nroj povtseg, thiab kuv yuav cawm cov Yudas kom dim ntawm lawv cov yeebncuab tes. Tiamsis tom qab uas muab lawv tshem tawm lawm, kuv yuav rov hlub lawv; kuv yuav coj txhua haivneeg rov mus nyob hauv lawv tej tebchaws. Yog lawv ntseeg thiab ua raws li kuv haivneeg txoj kevcai kawg siab kawg ntsws, thiab tuav kuv lub npe coglus hais tias, ‘Tus TSWV muaj sia nyob’, ib yam li lawv kom kuv haivneeg tuav Npa-as lub npe coglus, lawv thiaj yuav muaj feem nrog kuv haivneeg nyob ua ke thiab vammeej. Tiamsis yog ib haivneeg twg tsis mloog kuv lus, kuv yuav tshem haivneeg ntawd thiab ua kom lawv puastsuaj. Kuv yog tus TSWV uas hais li ntawd.” Tus TSWV hais kom kuv mus yuav ib txoj siv ntaubmag los sia, tiamsis nws hais rau kuv hais tias, “Koj tsis txhob muab ntxhua dej li.” Yog li ntawd, kuv thiaj mus yuav tau ib txoj siv ntaubmag los sia. Ces tus TSWV rov hais rau kuv hais tias, “Koj cia li mus rau ntawm tus Dej Efalates thiab muab txoj siv ntawd zais rau hauv ib lub qhov ntawm cov pobzeb.” Kuv thiaj coj txoj siv ntawd mus zais ze rau ntawm tus Dej Efalates raws li tus TSWV hais rau kuv. Tau tsis ntev tom qab no tus TSWV hais kom kuv rov mus muab txoj siv ntawm tus dej Efalates los. Yog li ntawd kuv thiaj rov mus, thaum kuv mus txog ntawm qhov chaw uas kuv zais txoj siv, kuv pom hais tias txoj siv twb lwj tas tsis zoo lawm. Tus TSWV rov hais rau kuv hais tias, “Qhov no yog qhia rau koj paub hais tias, kuv yuav rhuav cov Yudas thiab cov neeg uas nyob hauv lub nroog Yeluxalees txojkev khavtheeb kom puastsuaj tas. Cov neeg ua phem ua qias no tsis mloog kuv lus. Lawv tawv ncauj thiab ua phem ua qias tshaj yav tas los, lawv teev thiab pe lwm haivneeg tej vajtswv. Yog li ntawd, lawv yuav zoo ib yam li txoj siv uas lwj tas tsis zoo siv lawm. Kuv xav kom cov Yixalayees thiab cov Yudas cog ruaj rau ntawm kuv ib yam li txoj siv uas khi ruaj rau ntawm duav. Kuv ua li ntawd kom lawv thiaj tau ua kuv haivneeg, qhuas kuv thiab hwm kuv lub npe; tiamsis lawv tsis mloog kuv lus li.” Tus TSWV uas yog Vajtswv hais rau kuv hais tias, “Yelemis, koj hais kom cov Yixalayees ntim cawv txiv hmab puv nkaus rau txhua lub hub. Lawv yuav teb koj hais tias, lawv paub hais tias yuav tsum ntim cawv txiv hmab kom puv txhua lub hub. Koj hais rau lawv hais tias kuv uas yog tus TSWV, kuv yuav muab cawv txiv hmab txhaus cov neeg uas nyob hauv lub tebchaws no, tsis hais cov vajntxwv uas yog Daviv cov xeebntxwv, cov povthawj, kuv cov cev Vajtswv lus thiab cov neeg uas nyob hauv lub nroog Yeluxalees mus txog thaum lawv qaug cawv huv tibsi. Ces kuv yuav muab lawv tsoo kom tawg ib yam li cov hub sib tsoo tawg, tsis hais tus laus lossis tus hluas los yuav tuag tas. Kuv yuav muab lawv tua kom tuag tas, tsis hmov tsis tshua lossis tsis hlub lawv li.” Cov Yixalayees, tus TSWV twb hais lawm! Cia li txo hwjchim thiab mloog nws lus. Hwm tus TSWV uas yog nej tus Vajtswv ua ntej uas nws tsis tau tso kev puastsuaj los, thiab ua ntej nej kotaw dawm ntog saum tej roob; ua ntej nws muab qhov kaj uas nej xav tau hloov ua qhov tsaus ntuj dub nciab. Yog nej tsis mloog lus, kuv yuav mus quaj twjywm nyob ib qho, vim nej txojkev khavtheeb; kuv yuav quaj tu siab heev kom kuv tej kua muag ntws sib laim, rau qhov tus TSWV haivneeg raug luag ntes mus lawm. Tus TSWV hais rau kuv hais tias, “Koj cia li hais kom vajntxwv thiab nws niam, cia li nqis saum lub zwmtxwv los, rau qhov nkawd ob lub kausmom kub twb poob saum nkawd taubhau los lawm. Tej nroog uas nyob hauv tebchaws Yudas sab qabteb luag twb tuaj vij tas lawm; tsis muaj leejtwg mus tau rau hauv tej nroog ntawd li. Cov Yudas raug ntes huv tibsi lawm.” Yeluxalees, koj cia li tsa qhovmuag saib! Koj tej yeebncuab tabtom tuaj sab qaumteb tuaj! Cov neeg uas muab tso rau koj saib uas ua rau koj khav nyob qhov twg lawm? Thaum cov neeg uas koj xav hais tias yog koj cov phoojywg tuaj tua yeej koj thiab tswjhwm koj, koj yuav hais li cas? Yuav mob koj npaum nkaus li tus pojniam uas tabtom mob plab yuav yug menyuam. Yog koj nug hais tias, “Vim li cas tej xwm no thiaj los raug kuv? Vim li cas luag dua kuv tej ris tsho ntuag tas thiab yuam kuv?” Twb yog vim koj ua kev txhaum ntau heev. Tus neeg tawv dub puas hloov tau nws daim tawv kom dawb lossis tus tsov txaij puas hloov tau kom tsis txhob txaij? Yog hais tias ob yam uas hais no hloov tau tsis tas koj yuav qhia, tej neeg siab phem yeej yuav hloov ua tau neeg zoo. Tus TSWV yuav ua kom koj tawg ri sua ib yam li tej quavnyab uas cov cua tom tiaj suabpuam ntsawj. Tus TSWV hais tias tej no yog tej uas koj tau. Tej no yog tej uas kuv npaj tseg rau koj, rau qhov koj tau tso kuv tseg thiab cia siab rau tej vajtswv cuav. Tus TSWV yuav hle koj cev ris tsho kom koj liabqab thiab txajmuag. Nws pom ntsoov koj ua tej uas nws ntxub. Thiab nws pom ntsoov koj mus pe luag tej vajtswv saum tej ncov roob thiab hauv tej tiaj nrag ib yam li tug txivneej uas nyas nrhw tham luag tej pojniam lossis ib yam li tus txiv nees xob uas raws nciav tus maum nees qab. Cov neeg uas nyob hauv lub nroog Yeluxalees, nej puastsuaj lawm! Thaum twg nej mam li ua tau neeg zoo? Tus TSWV qhia rau kuv txog ntuj qhua teb nkig hais tias, “Yudas tabtom quaj ntsuag; nws tej nroog puastsuaj tas, nws tej pejxeem da hauv av thiab ntxhov siab kawg, thiab Yeluxalees quaj thov kev pab. Cov neeg npluanuj txib lawv tej tubtxib mus nqa dej; cov tubtxib mus rau ntawm tej qhov uas khawb tos dej nag, tiamsis tsis muaj dej, lawv nqa thoob qhuav rov qab los tsev. Lawv qaug zog thiab ntxhov siab heev, lawv thiaj muab ntaub kauv ntsejmuag. Vim tsis muaj nag los lawv lub tebchaws thiaj qhuav heev, cov neeg ua liaj ua teb ntxhov siab kawg, lawv thiaj muab ntaub kauv lawv ntsejmuag. Txawm yog tus maum muaslwj hauv havzoov uas nyuam qhuav yug tau menyuam los cia li muab tus menyuam tso tseg vim tsis muaj zaub noj. Tej neesluav qus sawv saum tej ncov roob uas do dus, thiab ua pa txog siav qhi ib yam li tej hma; tej neesluav ntawd tsaus muag tsis pom kev vim tsis muaj zaub noj. Kuv haivneeg quaj thov kuv hais tias, ‘Tus TSWV txawm yog peb tej kev txhaum tawmtsam peb los thov koj pab peb raws li koj tau coglus tseg lawm. Peb tau tso koj tseg ntau zaus, peb tau ua txhaum rau koj lawm tiag. Tus TSWV, koj yog cov Yixalayees lub chaw vamkhom, koj yog tus uas pab peb dim ntawm txojkev puastsuaj. Vim li cas koj ua ib yam li tus qhua uas nyob hauv peb lub tebchaws, thiab ib yam li tus neeg taug kev uas pw ib hmos xwb? Vim li cas koj zoo ib yam li tus neeg uas ceeb ib plhaw, thiab zoo ib yam li tus tubrog uas pab tsis tau leejtwg li? Tiamsis tus TSWV, koj tseem nrog nraim peb! Peb yog koj haivneeg, thov koj tsis txhob tso peb tseg.’ ” Tus TSWV hais txog haivneeg no hais tias, “Lawv nyiam tso kuv tseg, thiab lawv tsis tswj lawv lub siab li. Yog li ntawd, kuv thiaj tsis txaus siab rau lawv. Kuv yuav nco ntsoov lawv tej kev txhaum thiab rau txim rau lawv vim tej kev txhaum uas lawv ua.” Tus TSWV hais rau kuv hais tias, “Koj tsis txhob thov kuv pab cov neeg no. Txawm yog lawv yoo mov thov kuv los kuv yuav tsis mloog lawv tej lus thov; txawm yog lawv tua tsiaj thiab muab nplej tuaj hlawv fij rau kuv los kuv yuav tsis txaus siab rau lawv. Kuv yuav tua kom lawv tuag tas rau hauv tshavrog thiab cia lawv tuag tshaib tuag nqhis, tuag mob tuag ntsaj.” Kuv hais rau tus TSWV hais tias, “Tus TSWV uas kav ib puas tsav yam, koj yeej paub hais tias cov uas cev koj lus tabtom hais rau sawvdaws hais tias yuav tsis muaj kev tsov kev rog thiab tsis muaj kev tshaib kev nqhis li lawm, rau qhov koj tau coglus hais tias peb lub tebchaws yuav muaj kev thajyeeb xwb.” Tiamsis tus TSWV teb hais tias, “Kuv cov cevlus tuav kuv lub npe hais lus dag xwb; kuv tsis tau txib lawv mus lossis kuv tsis tau kom lawv mus qhia lossis tsis tau hais ib los rau lawv li. Tej yogtoog uas lawv qhia ntawd tsis yog los ntawm kuv; tej uas lawv qhia tshwm ntawd tsis muaj qabhau, yog lawv xav xwb. Kuv uas yog tus TSWV yuav qhia rau koj paub tej uas kuv yuav ua rau cov cevlus uas kuv tsis tau txib lawv mus, tiamsis lawv cia li tuav kuv lub npe qhia rau sawvdaws hais tias yuav tsis muaj kev tsov kev rog thiab kev tshaib kev nqhis los raug lub tebchaws no ib zaug li lawm. Kuv yuav tso kev tsov kev rog thiab kev tshaib kev nqhis los raug cov neeg ntawd. Cov neeg uas hnov cov cevlus ntawd qhia yuav tuag tas rau kev tsov kev rog thiab kev tshaib kev nqhis ib yam nkaus. Luag yuav muab lawv tej cev tuag pov rau ntawm tej ntug kev hauv lub nroog Yeluxalees, thiab yuav tsis muaj neeg muab lawv faus. Tej xwm no yuav los raug lawv thiab lawv tej pojniam menyuam huv tibsi. Kuv yuav ua kom lawv tau ris tej kev phem kev qias uas lawv tau ua tas los lawm.” Tus TSWV kom kuv piav kuv tej kev ntxhov siab rau sawvdaws mloog hais tias, “Cia kuv quaj tas mus li, cia kuv lub kua muag los tas hnub tas hmo, rau qhov kuv haivneeg mob txomnyem ntsuav thiab lawv raug luag tsimtxom lwj siab kawg li. Thaum kuv tawm mus rau tom tej nras liaj, kuv pom tej neeg uas raug luag tua tuag pawglug; thaum kuv mus rau hauv tej nroog, kuv pom tej neeg tuag tshaib pawglug. Cov povthawj thiab cov cev Vajtswv lus rau siab ntso ua haujlwm, tiamsis lawv tsis paub hais tias lawv ua dabtsi.” Tus TSWV, koj tso cov Yudas tseg lawm tiag los? Puas yog koj ntxub cov neeg uas nyob hauv Xi-oos? Ua li cas koj yuav ntaus peb sab ua luaj tsis muaj hnub kho tau li? Peb nrhiav kev thajyeeb tiamsis tsis tau qhov zoo li; peb cia siab hais tias peb tej mob yuav zoo, tiamsis yimhuab txhawj ntshai. Tus TSWV, peb tau ua txhaum rau koj lawm tiag; peb lees peb thiab peb cov yawgkoob tej kev txhaum rau koj. Thov nco ntsoov koj tej lus cog tseg thiab tsis txhob ntxub peb; thov koj tsis txhob cia luag ua saib tsis taus lub nroog Yeluxalees; lub nroog ntawd yog koj lub zwmtxwv uas ci ntsa iab. Thov koj tsis txhob rhuav tej lus uas koj cog tseg rau peb lawm. Lwm haivneeg tej mlom ua tsis tau kom nag los; lub ntuj los yeej ua tsis tau kom nag los. Tus TSWV uas yog peb tus Vajtswv, peb cia siab rau koj xwb, tsuas yog koj tib leeg thiaj yog tus uas ua tau tej no. Tus TSWV hais rau kuv hais tias, “Txawm yog Mauxes thiab Xamuyees sawv ntawm no thov kuv los kuv yuav tsis hlub cov neeg no li. Cia li ntiab lawv mus; kuv tsis xav pom lawv lawm. Thaum lawv nug koj hais tias, ‘Peb yuav mus qhov twg?’ Koj cia li qhia kuv tej lus rau lawv hais tias, ‘Cov uas yuav tuag mob tuag ntsaj yeej yuav tuag mob tuag ntsaj; cov uas yuav tuag rau hniav ntaj hniav riam yeej yuav tuag rau hniav ntaj hniav riam; cov uas yuav tuag rau kev tshaib kev nqhis, yeej yuav tuag rau kev tshaib kev nqhis; cov uas yuav raug luag ntes yeej yuav raug luag ntes.’ “Kuv uas yog tus TSWV tau txiav txim siab tso plaub yam kev puastsuaj los raug lawv, lawv yuav tuag rau hniav ntaj hniav riam; dev yuav muab lawv luag mus, noog yuav los noj lawv lub cev, thiab tej tsiaj qus yuav los khee noj lawv tej nqaij uas seem. Kuv yuav ua kom txhua haivneeg hauv ntiajteb no ntshai lawv, vim tej uas Hexekiyas tus tub Manaxes uas ua vajntxwv kav tebchaws Yudas nyob hauv lub nroog Yeluxalees ua.” Tus TSWV hais tias, “Cov neeg uas nyob hauv Yeluxalees, leejtwg thiaj yuav hlub nej, thiab leejtwg thiaj yuav nrog nej tu siab? Leejtwg yuav tos taus nug hais tias nej nyob li cas lawm? Tus TSWV hais tias nej tau tso kuv tseg lawm, nej tig nraubqaum rau kuv. Vim li ntawd kuv thiaj ntaus nej, rau qhov kuv tswj tsis tau kuv txojkev chim lawm. Kuv yuav muab nej ntiab tawm ntawm txhua lub nroog hauv lub tebchaws no mus ib yam li cua ntsawj tej quavnyab. Kuv yuav ua rau nej cov uas yog kuv haivneeg kom puastsuaj, kuv tua nej tej menyuam vim nej tsis tso nej tej kev txhaum tseg. Tej pojntsuam uas nyob hauv nej lub tebchaws tseem ntau tshaj tej suabzeb ntawm ntug hiavtxwv. Kuv tua nej tej tub uas tseem hluas thiab ua rau lawv niam quaj ntsuag. Kuv yuav tso kev siv kev npog thiab sub tawg sub ntsha los raug lawv thaum lawv nco tsis txog li. Leej niam uas muaj xya tus menyuam tuag huv tibsi lawm, nws yuav cia li tsis nco qab thiab ua tsis taus pa. Txawm yog nruab hnub nrig los yuav tsaus ntuj nti rau nws; nws yuav poob ntsejmuag thiab mob siab kawg li. Kuv yuav cia nej tej yeebncuab tuaj tua nej cov uas tseem ua neej nyob. Kuv yog tus TSWV uas hais li ntawd.” Kuv yog tus neeg uas tsis muaj kev kaj siab li! Vim li cas kuv niam thiaj yug kuv rau hauv lub ntiajteb no? Kuv thiaj tau nrog txhua tus neeg hauv lub tebchaws no sib cav sib ceg. Kuv tsis tau txais nyiaj ntawm leejtwg lossis qiv nyiaj rau leejtwg, tiamsis txhua tus foom phem rau kuv. Tus TSWV, yog hais tias kuv tsis ua koj tes haujlwm kawg siab kawg ntsws, yog kuv tsis tau thov koj pab kuv tej yeebncuab thaum lawv raug kev txomnyem nyuaj siab, ces cia lawv tej lus foom tsis zoo raug kuv. ( Tsis muaj leejtwg lov tau cov hlau xyaw tooj uas luag coj sab qaumteb tuaj.) Tus TSWV hais rau kuv hais tias, “Vim kuv haivneeg ua kev txhaum thoob tebchaws, kuv thiaj rau txim rau lawv uas yog tso yeebncuab tuaj huab lawv tej nyiaj tej kub. Kuv yuav cia lawv mus ua lawv cov yeebncuab qhev nyob rau hauv lub tebchaws uas lawv tsis tau paub dua li, rau qhov kuv txojkev chim zoo ib yam li lub cubtawg thiab yuav kub mus ibtxhis.” Kuv teb hais tias, “Tus TSWV, koj yeej paub txhua yam. Thov koj nco ntsoov kuv thiab pab kuv. Thov koj ua pauj rau cov neeg uas tsimtxom kuv. Koj tsis txhob ua siab ntev rau lawv nyob tsam lawv tuaj tua tau kuv. Thov nco ntsoov hais tias vim koj tes haujlwm, kuv thiaj raug tej kev txomnyem no. Tus TSWV uas yog Vajtswv tus muaj hwjchim loj kawg nkaus, kuv yog koj tug, kuv mloog tej lus uas koj hais rau kuv, koj tej lus nyob hauv kuv lub siab, ua rau kuv kaj siab thiab zoo siab kawg. Kuv tsis muaj sijhawm mus nrog luag ua kev lomzem thiab tso dag tso luag li. Kuv mloog koj lus, kuv thiaj mus nyob ib leeg ua rau kuv chim siab heev. Vim li cas kuv thiaj muaj tej kev nyuaj siab no? Vim li cas kuv tej qhov txhab pheej huam loj zuj zus? Vim li cas thiaj kho tsis zoo li? Puas yog koj xav ua kom kuv zoo li lub hav qhuav uas tsis muaj dej lub caij ntuj qhua?” Tus TSWV teb kuv hais tias, “Yog koj rov los cuag kuv, kuv yuav pub koj ua kuv tus tubtxib dua. Yog koj hais lus tseeb tsis hais lus dag, koj yuav rov tau ua kuv tus cevlus dua. Tej neeg yuav rov tuaj cuag koj, tsis tas koj yuav mus cuag lawv. Kuv yuav ua kom koj tawv ib yam li tus ntsa yeej tooj thaiv haivneeg no; txawm yog lawv tawmtsam koj los lawv yuav kov tsis yeej. Kuv yuav nrog nraim koj thiab tsomkwm koj kom koj tau nyob kaj siab lug. Kuv yuav cawm koj kom dim ntawm cov neeg siab phem thiab limhiam lub hwjchim. Kuv yog tus TSWV uas hais li ntawd.” Tus TSWV rov hais rau kuv hais tias, “Koj tsis txhob yuav pojniam lossis yug menyuam rau hauv thaj chaw uas zoo li no. Kuv yuav qhia kom koj paub tej xwm uas yuav muaj los raug cov menyuam uas yug rau ntawm thaj chaw no thiab lawv niam lawv txiv. Lawv yuav raug tej mob phem tuag tas, thiab yuav tsis muaj leejtwg nyiav lossis faus lawv. Lawv tej cev tuag yuav lwj ua tej pawg li tej quav nyuj rau saum npoo av. Lawv yuav raug hniav ntaj hniav riam tuag lossis tuag tshaib tuag nqhis; tej noog thiab tej tsiaj qus yuav los noj lawv. “Koj tsis txhob mus rau hauv lub tsev uas muaj kev quaj nyiav. Koj tsis txhob nyiav leejtwg li. Kuv yuav tsis foom koob hmoov rau kuv haivneeg kom nyob kaj siab lug lossis hlub thiab tshua lawv li. Tus npluanuj thiab tus pluag los yeej yuav tuag tas rau hauv lub tebchaws no, yuav tsis muaj leejtwg nyiav lawv lossis coj lawv mus faus li. Tsis muaj leejtwg yuav muab nws hlais lossis chais nws tej plaubhau qhia hais tias nws quaj ntsuag. Tsis muaj leejtwg yuav pab leg kev noj kev haus rau tsevneeg uas muaj kev ploj tuag thiab nplig lawv siab li. Tsis muaj leejtwg hlub tus uas niamtxiv tuag tas tso nws tseg. “Tsis txhob mus rau hauv lub tsev uas muaj rooj noj rooj haus. Tsis txhob mus nrog lawv nyob lossis noj haus li. Koj cia li mloog tus TSWV uas yog cov Yixalayees tus Vajtswv uas muaj hwjchim loj kawg nkaus tej lus. Kuv yuav ua kom tej suab lomzem zoo siab thiab kev noj tshoob haus kos ntsiag mus. Cov neeg tiam no qhovmuag yuav pom ntsoov tej ntawd. “Thaum koj qhia tej no rau lawv tas, lawv yuav nug koj hais tias, ‘Vim li cas tus TSWV thiaj rau txim hnyav ua luaj rau peb? Peb tej kev txhaum yog dabtsi? Peb tau ua txhaum dabtsi tawmtsam tus TSWV uas yog peb tus Vajtswv?’ Koj cia li qhia tus TSWV tej lus rau lawv hais tias, ‘Twb yog vim nej cov yawgkoob tso kuv tseg, mus pe luag tej vajtswv. Lawv tso kuv tseg thiab tsis mloog kuv tej lus qhia. Nej tseem ua phem tshaj nej cov yawgkoob thiab. Nej txhua tus puavleej tawv ncauj, siab phem thiab tsis mloog kuv lus li. Yog li ntawd, kuv yuav muab nej ntiab tawm hauv lub tebchaws no mus rau lub tebchaws uas nej lossis nej cov yawgkoob tsis paub dua li. Nyob hauv lub tebchaws ntawd nej yuav tau pe luag tej vajtswv nruab hnub hmo ntuj, thiab kuv yuav tsis hlub nej li.’ ” Tus TSWV hais tias, “Twb txog lub sijhawm uas neeg tsis tuav kuv lub npe coglus hais tias Vajtswv tus uas muaj sia nyob tau coj cov Yixalayees tawm nram tebchaws Iziv los, tiamsis lawv yuav tuav kuv lub npe coglus hais tias Vajtswv tus uas muaj sia nyob tau coj cov Yixalayees uas nyob sab qaumteb thiab hauv tej tebchaws uas kuv ntiab lawv mus nyob ntawd rov los. Kuv yuav coj lawv rov los nyob hauv lawv lub tebchaws, yog lub tebchaws uas kuv muab rau lawv cov yawgkoob lawm. Kuv yog tus TSWV uas hais li ntawd.” Tus TSWV hais tias, “Kuv yuav tso tej neeg cuab ntses coob heev tuaj ntes cov neeg no. Kuv yuav tso tej neeg tua nqaij tuaj caum lawv tua saum tej roob, tej pov roob thiab hauv tej qhov tsua. Kuv pom txhua yam uas lawv ua, tsis muaj ib yam uas kuv tsis pom li. Tsis muaj ib yam dabtsi roos tau lawv tej kev txhaum kom kuv tsis pom li. Kuv yuav rau txim ob npaug rau lawv tej kev txhaum thiab kev phem kev qias, rau qhov lawv txua tej mlom uas tsis muaj sia thiab coj tej mlom ntawd los tso puv tebchaws ua rau kuv lub tebchaws tsis huv lawm.” Tus TSWV, koj yog tus uas tsomkwm thiab txhawb kuv lub zog; thaum kuv raug kev txomnyem nyuaj siab koj pab kuv. Txhua haivneeg thoob qab ntuj yuav tuaj cuag koj thiab hais tias, “Peb cov yawgkoob tsis muaj dabtsi li tsuas yog tej vajtswv cuav thiab tej mlom uas tsis muaj nqis xwb. Neeg tseem tsim tau vajtswv rau neeg pe thiab los? Tej uas neeg txhais tes ua yeej tsis yog vajtswv li.” Tus TSWV hais tias, “Yog li ntawd, kuv yuav ua tib zaug ua kom txhua haivneeg pom kuv lub zog thiab lub hwjchim; lawv thiaj paub hais tias kuv yog tus TSWV.” Tus TSWV hais tias, “Cov Yudas, luag muab cwjmem hlau sau nej tej kev txhaum cia; muab tus txaug uas yog pobzeb muaj nqis txaug rau hauv nej lub siab thiab muab sau rau ntawm nej tej ces kaum thaj lawm. Nej cov neeg pheej mus pe tus mlom Aselas tom tej thaj thiab tej ncej uas teeb rau nws hauv tej qab ntoos saum tej ncov roob, thiab saum tej roob tom tej tiaj nrag. Kuv yuav cia nej tej yeebncuab tuaj txeeb nej tej nyiaj tej kub thiab qhov txhia chaw, vim tej kev txhaum uas nej ua thoob plaws lub tebchaws. Nej yuav tau tso lub tebchaws uas kuv muab rau nej lawm tseg, thiab kuv yuav kom nej mus ua nej cov yeebncuab qhev rau lub tebchaws uas nej yeej tsis tau paub dua li, rau qhov kuv txojkev chim zoo ib yam li lub cubtawg uas cig tsis paub tuag li.” Tus TSWV hais tias, “Kuv yuav rau txim rau tus neeg uas khiav tawm ntawm kuv mus cia siab rau neeg lub zog, thiab cia siab rau tej neeg uas txawj tuag. Nws zoo ib yam li tsob ntoo uas tuaj tom tiaj suabpuam uas loj hlob hauv tej mojsab qhua ntawm thaj av qab ntsev uas tsis muaj dabtsi tuaj li. Tsis muaj ib yam dabtsi zoo rau nws li. “Tiamsis kuv yuav foom koob hmoov rau tus uas cia siab rau kuv. Nws zoo ib yam li tsob ntoo uas tuaj ntawm ntug dej thiab nrhau cag mus rau hauv dej. Txawm yog tshav ntuj kub los nws yeej tsis ntshai, rau qhov nws tej nplooj tsis qhuav tsis ntsws li; txawm yog tsis muaj nag los nws yeej tsis txhawj; thiab nws yeej tawg paj txi txiv raws caij raws nyoog. “Leejtwg thiaj paub tau neeg lub siab? Tsis muaj ib yam dabtsi uas txawj dag ntxias li neeg lub siab; lub siab ntawd mob loj thiab kho tsis zoo li. Kuv yog tus TSWV uas paub neeg txojkev xav thiab sim neeg lub siab. Kuv pub rau txhua tus raws li nws lub neej thiab raws li tes haujlwm uas nws ua.” Tus neeg uas tau nyiaj los ntawm kev ua tsis ncaj zoo ib yam li tus noog uas puag tej qe uas tsis yog nws nteg. Thaum nws ib nrab neej nws kev npluanuj yuav ploj mus tas, thiab thaum kawg nws yuav yog tus uas ruam tshaj plaws. Peb lub Tuamtsev zoo ib yam li lub zwmtxwv uas ci ntsa iab, nyob saum lub roob siab thaum chivkeeb los lawm. Tus TSWV, cov Yixalayees cia siab rau koj nkaus xwb; txhua tus uas tso koj tseg lawm yuav raug kev txajmuag. Lawv yuav ploj tas ib yam li tej npe ntawv uas sau rau ntawm tej hmoov av; rau qhov lawv tso koj uas yog tus TSWV uas yog lub qhovdej txhawv tseg lawm. Tus TSWV, thov koj kho kuv, kuv thiaj yuav zoo; thov cawm kuv, kuv thiaj yuav dim. Kuv qhuas koj tib leeg xwb! Tej neeg hais rau kuv hais tias, “Tus TSWV txojlus nyob qhov twg? Cia li ua kom tiav!” Tiamsis tus TSWV, kuv tsis tau txhib kom koj tso kev puastsuaj los raug lawv; kuv tsis tau xav hais tias ib hnub twg kom muaj kev txomnyem los raug lawv. Tus TSWV, koj yeej paub tej no; koj paub tej lus uas kuv hais. Thov koj tsis txhob ua nruj ua tsiv rau kuv; thaum kuv raug kev txhawjxeeb koj yog kuv lub chaw vamkhom. Tus TSWV, thov koj ua kom cov neeg uas tsimtxom kuv raug txajmuag, tiamsis thov koj pab cawm kuv. Thov koj ua nruj ua tsiv rau lawv, tiamsis tsis txhob ua rau kuv. Koj cia li tso kev puastsuaj los raug lawv kom lawv puastsuaj tas! Tus TSWV hais rau kuv hais tias, “Yelemis, koj cia li mus rau ntawm lub Roojvag Neeg uas cov Yudas cov vajntxwv mus rau hauv lub nroog thiab tawm los, thiab mus rau ntawm tej roojvag hauv lub nroog Yeluxalees qhia kuv tej lus rau lawv; koj qhia rau cov vajntxwv, cov Yudas thiab tej neeg txhua tus uas nyob hauv lub nroog Yeluxalees uas mus thiab los ntawm tej roojvag kom lawv cia li mloog kuv tej lus. Koj hais rau lawv hais tias yog lawv xav muaj txojsia nyob, hnub Xanpataus kom lawv tsis txhob nqa ib yam dabtsi mus thiab los; lawv yuav tsum tsis txhob nqa ib yam dabtsi ntawm lub nroog Yeluxalees tej roojvag sab nraud los rau sab hauv, lossis hnub Xanpataus tsis txhob nqa ib yam dabtsi hauv lawv tej tsev mus rau sab nraud. Lawv yuav tsum tsis txhob ua haujlwm hnub Xanpataus; lawv yuav tsum saib hnub Xanpataus ua hnub tseemceeb raws li kuv tau samhwm rau lawv cov yawgkoob lawm. Lawv cov yawgkoob tsis mloog kuv lus lossis tsis quavntsej kuv li. Tsis yog li ntawd xwb, lawv tseem tawv ncauj; lawv tsis mloog kuv lus lossis tsis ua raws li kuv tej lus qhia. “Koj qhia rau lawv kom lawv yuav tsum mloog kuv tej lus samhwm. Hnub Xanpataus lawv tsis txhob nqa ib yam dabtsi tawm ntawm cov roojvag hauv lub nroog mus rau sab nraud. Lawv yuav tsum saib hnub Xanpataus ua hnub tseemceeb thiab hnub ntawd lawv tsis txhob ua ib yam haujlwm dabtsi li. Cov Yudas cov vajntxwv thiab cov nomtswv yuav mus thiab los ntawm lub nroog Yeluxalees tej roojvag, muaj meejmom thiab hwjchim ib yam li Vajntxwv Daviv, thiab tagnrho cov pejxeem Yudas thiab cov neeg hauv lub nroog Yeluxalees yuav caij nees thiab tsheb nees los puv nkaus hauv lub nroog Yeluxalees. Neeg yuav tuaj hauv cov Yudas tej nroog thiab hauv tej zos uas nyob puagncig lub nroog Yeluxalees, hauv xeem Npeenyamees cheebtsam av, tim tej taw roob, saum tej roob siab thiab hauv tebchaws Yudas sab qabteb tuaj. Lawv yuav coj tej khoom hlawv fij theej txhoj, tej qoobloo, tej tshuaj tsw qab thiab tej khoom fij ua tsaug tuaj rau kuv hauv lub Tuamtsev. Tiamsis lawv yuav tsum mloog kuv lus thiab saib hnub Xanpataus ua hnub tseemceeb. Hnub Xanpataus lawv yuav tsum tsis txhob nqa ib yam dabtsi tawm hauv lub nroog Yeluxalees tej roojvag mus rau sab nraud. Yog hais tias lawv tsis mloog kuv lus, kuv yuav tso hluavtaws hlawv lub nroog Yeluxalees tej roojvag. Hluavtaws yuav kub lub nroog Yeluxalees tej loog thiab yuav tsis muaj leejtwg tua tau li.” Tus TSWV hais rau kuv hais tias, “Koj cia li mus rau nram tus puab laujkaub av lub tsev, kuv muaj lus yuav hais rau koj nrad.” Yog li ntawd, kuv thiaj mus rau nram tus puab laujkaub av lub tsev, kuv pom nws tabtom puab laujkaub. Thaum nws puab ib lub laujkaub twg tsis zoo, nws txawm rov muab cov av zuaj puab ua dua lwm yam. Thaum ntawd tus TSWV hais rau kuv hais tias, “Nej cov Yixalayees, nej xav hais tias kuv tsis muaj cai ua rau nej ib yam li tus puab laujkaub av ua rau cov av nplaum ntawd no los? Cov av nplaum nyob hauv tus puab laujkaub txhais tes li cas, nej nyob hauv kuv txhais tes ib yam li ntawd. Yog thaum twg kuv hais tias kuv yuav rho, yuav rhuav lossis yuav ua kom ib haivneeg lossis ib lub tebchaws twg puastsuaj mus, tiamsis yog haivneeg ntawd tso lawv tej kev phem kev qias tseg, kuv yuav hloov siab tsis ua raws li tej lus uas kuv twb hais tseg lawm. Yog kuv hais rau ib haivneeg lossis ib lub tebchaws twg hais tias kuv yuav txhim kho haivneeg lossis lub tebchaws ntawd kom vammeej, tiamsis haivneeg ntawd ua kev phem kev qias tsis mloog kuv lus, kuv yuav hloov siab tsis ua raws li tej lus uas kuv hais. Yog li ntawd, koj cia li qhia rau cov Yudas thiab cov neeg uas nyob hauv lub nroog Yeluxalees hais tias kuv tabtom npaj tawmtsam thiab yuav rau txim rau lawv. Koj hais kom lawv cia li tso lawv tej kev txhaum tseg, tig rov los ua qhov zoo thiab xyaum ua lub neej tshiab. Lawv yuav teb koj hais tias, ‘Peb tsis ua li ntawd, peb yuav tawv ncauj thiab ua phem ua qias raws li peb lub siab nyiam.’ ” Tus TSWV hais tias, “Cia li nug txhua haivneeg saib puas muaj neeg hnov dua tej xwm no los tsis muaj? Cov Yixalayees ua txhaum loj kawg li lawm. Puas yog tej hauv roob siab hauv tebchaws Lenpanoos yeej ibtxwm muaj daus? Puas yog tej dej uas txhawv txias zias saum tej roob yeej ntws tsis tu li? Tiamsis kuv haivneeg tso kuv tseg; lawv mus hlawv tshuaj tsw qab fij rau tej mlom. Lawv taug kev mus qhov twg los dawm lawv kotaw; lawv tsis ua raws li tej kevcai thaum ub lawm; lawv tsis taug kev, lawv plos hav fab xwb. Lawv ua rau lub tebchaws no liamsim tas, luag yuav saib tsis taus lub tebchaws no mus ibtxhis; tej neeg uas dhau kev yuav xav tsis thoob thiab co hau nto. Kuv yuav ua rau kuv haivneeg tawg khiav ri sua tabmeeg lawv tej yeebncuab ib yam li tej hmoov av uas cov cua sab hnubtuaj tuaj ntsawj. Kuv yuav tig nraubqaum rau lawv; thaum lawv raug kev puastsuaj kuv yuav tsis pab lawv.” Thaum ntawd sawvdaws hais tias, “Peb cia li tuavhauv tawmtsam Yelemis! Peb yeej muaj cov povthawj qhia peb, muaj cov neeg uas muaj tswvyim qhia tau peb thiab muaj cov cev Vajtswv lus uas yuav cev Vajtswv lus rau peb. Peb cia li nrhiav lus kom Yelemis, peb tsis txhob mloog nws tej lus.” Yog li ntawd, kuv thiaj thov tus TSWV hais tias, “Tus TSWV, thov koj mloog kuv tej lus thov thiab mloog tej lus uas cov yeebncuab txob thuam kuv. Lawv muab kev phem pauj kev zoo los? Lawv khawb qhov tos kuv kev. Koj nco ntsoov hais tias kuv tau tsa ncauj thov koj kom txo koj tej kev chim tsis txhob rau txim rau lawv. Tus TSWV, nimno thov cia kom lawv tej menyuam tuag tshaib tuag nqhis thiab tuag rau hniav ntaj hniav riam. Cia tej pojniam nyob ua pojntsuam tsis muaj txiv thiab tsis muaj menyuam; cia tej txivneej tuag mob tuag ntsaj, thiab cia tej tub hluas tuag rau hauv tshavrog. Thov koj txib ib pab neeg mus huab lawv tej vajtse thaum lawv tsis nco qab kom lawv quaj ntshai tshee hnyo. Lawv khawb qhov thiab cuab hmuv tos kuv kev. Tus TSWV, koj paub hais tias lawv tuavhauv yuav tua kuv povtseg. Thov koj tsis txhob tshem lawv tej kev txhaum lossis zam txim rau lawv li. Thov koj ua kom lawv ntog nrom kus swb hlo thiab rau txim hnyav rau lawv thaum koj tseem chim.” Tus TSWV kom kuv mus yuav ib lub hub. Nws kom kuv coj cov txwjlaug thiab cov povthawj laus qee leej tawm ntawm lub Roojvag Txhais laujkaub mus rau tom lub Hav Hinoos thiab qhia tus TSWV tej lus rau lawv. Tus TSWV kom hais rau cov Yudas cov vajntxwv thiab cov neeg uas nyob hauv lub nroog Yeluxalees hais tias, “Nej cia li mloog kuv uas yog tus TSWV cov Yixalayees tus Vajtswv uas muaj hwjchim loj kawg nkaus tej lus. Kuv yuav tso kev puastsuaj los rau ntawm thaj chaw no kom tej neeg uas hnov zaj no xav tsis thoob. Kuv yuav ua li no rau qhov sawvdaws tso kuv tseg thiab mus tua tsiaj hlawv fij rau luag tej vajtswv ua rau qhov chaw no tsis huv lawm. Tej vajtswv ntawd yog tej uas lawv, lawv cov yawgkoob thiab lawv cov vajntxwv tsis tau paub dua li. Lawv tua cov neeg uas tsis muaj txim ntau leej rau ntawm thaj chaw no, thiab lawv teeb ntau lub thaj rau lawv tua lawv tej menyuam hlawv fij rau Npa-as. Kuv tsis tau samhwm kom lawv ua; kuv tsis tau xav txog tej ntawd li. Tus TSWV hais tias vim lawv ua li ntawd muaj ib hnub twg luag yuav tsis hu thaj chaw ntawd ua Taufes lossis lub Hav Hinoos lawm, tiamsis luag yuav hu ua lub Hav Tua Neeg. Kuv yuav rhuav cov Yudas thiab cov neeg uas nyob hauv lub nroog Yeluxalees tej tswvyim rau ntawm thaj chaw no. Kuv yuav cia lawv cov yeebncuab kovyeej lawv thiab muab lawv tua tuag tas rau hauv tshavrog. Kuv cia tej noog thiab tej tsiaj nruab nrag noj lawv. Kuv yuav tso kev puastsuaj los rau hauv lub nroog no. Txhua tus neeg uas dua kev tuaj pom tej xwm no lawv yuav poob siab thiab xav tsis thoob li. Yeebncuab yuav tuaj vij lub nroog thiab nrhiav kev tua cov neeg uas nyob hauv. Vim yeebncuab vij lub nroog, luag zov nruj heev, ua rau cov neeg nyob hauv muaj kev tshaib nqhis thiab txomnyem kawg, lawv ib leeg yuav tua ib leeg noj thiab tua lawv tej menyuam noj.” Tom qab ntawd tus TSWV kom kuv tsoo lub hub tabmeeg cov neeg uas nrog kuv mus ntawd thiab kom kuv qhia tus TSWV tus uas muaj hwjchim loj kawg nkaus tej lus rau lawv hais tias, “Kuv yuav ntaus cov neeg no thiab rhuav lub nroog no ib yam li muab lub hub no tsoo tawg tas, tsis muaj leejtwg yuav muab lub hub no rov sib lo tau. Luag yuav coj tej neeg tuag mus faus rau hauv Taufes, rau qhov tsis muaj lwm thaj chaw faus tuag lawm. Kuv hais rau nej hais tias kuv yuav ua rau lub nroog no thiab cov neeg uas nyob hauv ib yam li ua rau Taufes ntag. Tej tsev hauv lub nroog Yeluxalees, cov Yudas cov vajntxwv tej tsev, thiab saum tej rutsev uas cov neeg mus hlawv hmoov tshuaj tsw qab fij rau tej hnubqub thiab hliv cawv fij rau luag tej vajtswv puavleej tsis huv ib yam li Taufes.” Tom qab ntawd kuv txawm tawm hauv Taufes, qhov chaw uas tus TSWV txib kuv mus qhia nws tej lus los. Kuv mus sawv ntawm lub tshavpuam uas nyob sab nraum lub Tuamtsev thiab qhia rau sawvdaws hais tias tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, “Kuv yuav rau txim rau lub nroog no thiab tej zos uas nyob ibncig ze no, raws li uas kuv twb hais tseg lawm, rau qhov nej tawv ncauj thiab tsis mloog kuv lus.” Thaum Imeles tus tub Pasehus uas ua povthawj thiab ua tus thawj saib haujlwm hauv lub Tuamtsev hnov kuv hais tej lus no, nws txawm kom luag nplawm kuv thiab muab saw hlau xauv kuv kotaw ze rau ntawm lub Roojvag Npeenyamees theem siab ntawm lub Tuamtsev. Hnub tom qab thaum sawv ntxov uas Pasehus tuaj tso kuv, kuv hais rau nws hais tias, “Tus TSWV tsis tis koj npe hu ua Pasehus. Nws tis koj npe hu ua ‘Kev Kub Ntxhov Txhua Qhov.’ Tus TSWV hais tias, ‘Kuv yuav ua kom koj rov ua kev kub ntxhov rau koj thiab koj tej phoojywg, thiab koj yuav pom yeebncuab rho ntaj tua koj tej phoojywg txhua tus povtseg. Kuv yuav muab cov Yudas txhua tus cob rau tus vajntxwv uas kav tebchaws Npanpiloos tes; nws yuav coj ibtxhia mus rau tim nws lub tebchaws thiab muab ibtxhia tua povtseg. Kuv yuav cia yeebncuab tuaj huab lawv tej nyiaj thiab tej qhov txhia chaw uas muaj nqis hauv lub nroog mus; txawm yog cov Yudas cov vajntxwv tej nyiaj thiab tej qhov txhia chaw los luag yuav coj mus rau tim tebchaws Npanpiloos. Pasehus, luag yuav ntes koj thiab koj tsevneeg mus rau tim tebchaws Npanpiloos thiab. Koj yuav tuag thiab luag yuav muab koj faus nrog koj tej phoojywg uas koj tau dag ntxias.’ ” Tus TSWV, koj tau dag kuv, kuv thiaj raug luag dag ntxias. Koj muaj zog thiab muaj hwjchim tshaj kuv. Txhua tus saib tsis taus kuv thiab luag kuv plig tas hnub li. Thaum twg kuv hais lus, kuv yuav tsum tau quaj thiab qw hais tias, “Kev Nruj Tsiv! Kev Puastsuaj!” Tus TSWV, luag txob thuam kuv thiab muab kuv tso daj tso luag txhua lub sijhawm, vim kuv qhia koj txojlus. Tiamsis thaum kuv hais tias, “Cia kuv tsis txhob xav txog tus TSWV thiab hais txog nws lub npe ntxiv lawm,” thaum ntawd koj txojlus kub ib yam li hluavtaws hauv kuv lub siab tuaj. Kuv ua tiag nyiaj, tiamsis kuv tiv tsis taus ntxiv lawm. Kuv hnov sawvdaws sib ntxhi hais tias, “Muaj kev kub ntxhov nyob rau txhua qhov; Peb cia li mus hais qhia rau tus TSWV uas muaj hwjchim loj!” Txawm yog kuv tej phoojywg zoo los lawv tos nrhw nkaug kuv. Lawv sib tham hais tias, “Tej zaum peb yuav ntxias thiab ntes tau nws los ua pauj tej uas nws ua rau peb.” Tiamsis tus TSWV, koj yog tus uas tuaj kuv tog; koj yog tus muaj zog thiab muaj hwjchim, cov uas tsimtxom kuv yuav ntog. Lawv yuav poob ntsejmuag mus ibtxhis, rau qhov lawv ntes tsis tau kuv. Lawv yuav nco ntsoov lawv txojkev poob ntsejmuag mus ibtxhis. Tiamsis tus TSWV uas muaj hwjchim loj kawg nkaus, koj sim tej neeg ncaj ncees, koj paub neeg lub siab xav. Yog li ntawd, kuv muab kuv rooj plaub tso rau koj, thov cia kuv pom koj ua pauj rau kuv cov yeebncuab. Cia li hu nkauj qhuas tus TSWV! Cia li ua tus TSWV tsaug! Nws cawm tus uas raug luag tsimtxom dim ntawm cov neeg siab phem. Cia li foom tsis zoo rau hnub uas yug kuv! Tsis txhob nco txog hnub uas kuv niam yug kuv! Cia li foom tsis zoo rau tus txivneej uas coj xov zoo los qhia rau kuv txiv hais tias, “Koj tau ib tug tub lawm!” ua rau kuv txiv zoo siab heev. Cia kom nws zoo ib yam li tej nroog uas tus TSWV muab rhuav puastsuaj tas tsis hlub li. Cia nws hnov tej suab quaj thiab suab ntsaj thaum sawv ntxov thiab tej suab txhib tubrog sib ntaus sib tua thaum tavsu, rau qhov nws tsis muab kuv tua thaum kuv tseem nyob hauv niam plab. Cia kuv niam lub plab ua kuv lub ntxa mus ibtxhis li. Vim li cas cia kuv yug los raug kev txomnyem nyuaj siab, thiab ua lub neej poob ntsejmuag tas mus li xwb? Vajntxwv Xedekiyas uas kav tebchaws Yudas txib Pasehus uas yog Makhiyas tus tub thiab tus povthawj Xefaniyas uas yog Ma-axeyas tus tub tuaj hais rau kuv hais tias, “Thov koj pab wb nug tus TSWV, rau qhov Vajntxwv Nenpukajnexales uas kav tebchaws Npanpiloos thiab nws cov tubrog twb tuaj vij peb lub nroog lawm. Tej zaum tus TSWV yuav ua ib yam txujci pab peb thiab yuav ua kom Nenpukajnexales thim rov qab.” Tus TSWV kom kuv hais rau ob tug uas tuaj cuag kuv kom rov mus hais rau Xedekiyas hais tias tus TSWV uas yog cov Yixalayees tus Vajtswv hais li no: “Xedekiyas, kuv yuav ua kom koj cov tubrog swb thaum nej mus tua tus vajntxwv uas kav tebchaws Npanpiloos thiab nws cov tubrog. Kuv yuav sau koj cov tubrog tej cuabyeej ua rog los cia rau hauv plawv nroog. Kuv lub zog loj zog nchav, kev chim, kev npautaws thiab kev nruj kev tsiv yuav tawmtsam nej. Kuv yuav tua txhua tus uas nyob hauv lub nroog no; tej neeg thiab tsiaj txhu yuav raug tej kab mob aws mob ntsha tuag tas. Tiamsis koj, koj cov nomtswv thiab cov pejxeem uas dim hniav ntaj hniav riam, dim kev tshaib nqhis thiab dim kev mob aws mob ntsha, kuv yuav muab nej cob rau Vajntxwv Nenpukajnexales uas yog nej tus yeebncuab uas xav muab nej tua povtseg. Nenpukajnexales yuav muab nej tua tuag tas, tsis hlub lossis tsis tseg nej ib tug li. Kuv yog tus TSWV uas hais li ntawd.” Tus TSWV kom kuv hais rau cov neeg ntawd hais tias, “Nej cia li mloog kuv hais! Kuv yog tus TSWV, kuv muab ob yam rau nej xaiv saib nej xaiv txojsia lossis txojkev tuag. Yog leejtwg nyob hauv nroog yuav tuag rau hniav ntaj hniav riam, lossis yuav tuag rau kev tshaib nqhis, lossis tuag rau kev mob kev nkeeg. Tiamsis yog leejtwg mus thawj cov tubrog Npanpiloos uas tuaj vij lub nroog, tus ntawd yuav dim tsis raug tua. Kuv txiav txim siab lawm hais tias kuv yuav tsis zam lub nroog no, kuv yuav muab rhuav kom puastsuaj tas. Kuv yuav muab lub nroog no cob rau tus vajntxwv uas kav tebchaws Npanpiloos tes, nws yuav hlawv lub nroog kom kub hnyiab tas. Kuv yog tus TSWV uas hais li ntawd.” Lub nroog Yeluxalees, koj nyob siab tshaj tej hav ib yam li lub roob tsuas uas siab dua tej tiaj nrag. Tiamsis kuv yuav tawmtsam koj. Koj khav hais tias tsis muaj leejtwg yuav tuaj tawmtsam tau koj lossis tsoo tau koj tej ntsa yeej los rau hauv koj lub chaw nyob. Tiamsis kuv yuav rau txim rau koj vim tej uas koj ua. Kuv yuav muab hluavtaws hlawv koj lub loog, thiab hluavtaws yuav kub txhua yam uas nyob ibncig ntawd. Kuv yog tus TSWV uas hais li ntawd.” “Kuv uas yog tus TSWV, kuv samhwm kom nej yuav tsum ua zoo thiab ua ncaj, nej yuav tsum pab tus uas raug luag dag ntxias. Tsis txhob quab yuam lossis tsimtxom cov neeg txawv tebchaws, cov menyuam ntsuag lossis tej pojntsuam; thiab tsis txhob tua cov neeg uas tsis muaj txim rau ntawm qhov chaw dawbhuv no. Yog nej muab siab rau ua raws li kuv tej lus no, ces Daviv cov xeebntxwv yuav tau ua vajntxwv kav tebchaws mus li. Lawv, lawv cov nomtswv thiab lawv tej pejxeem yuav tau caij nees thiab caij tsheb nees mus thiab los ntawm lub loog no tej roojvag. Tiamsis yog nej tsis mloog kuv tej lus samhwm, ces kuv qhia rau nej hais tias, kuv yuav ua kom lub loog no pob puas tas. Kuv yog tus TSWV uas hais li ntawd. “Kuv saib cov Yudas tus vajntxwv lub loog zoo nkauj ib yam li cheebtsam Nkile-as thiab ib yam li tej roob Lenpanoos; tiamsis kuv yuav ua kom lub loog nyob qhuav nquas cia tsis muaj neeg nyob. Kuv yuav tso neeg tuaj rhuav lub loog kom puastsuaj. Lawv yuav nqa taus tuaj ntov tej ncej ntoo ciab uas zoo nkauj thiab muab hlawv kom kub hnyiab tas. “Tom qab ntawd tej neeg txawv tebchaws uas dhau kev tuaj yuav sib nug hais tias, vim li cas kuv uas yog tus TSWV yuav ua li ntawd rau lub nroog loj no. Ces lawv yuav teb hais tias twb yog vim cov Yudas tsis ua raws li tus TSWV uas yog lawv tus Vajtswv tej lus cog tseg, thiab lawv mus pe luag tej vajtswv lawm.” Cov Yudas, nej tsis txhob quaj Vajntxwv Yauxiyas; thaum nws tuag nej tsis txhob nyiav. Tiamsis nej cia li quaj ntsuag rau Yau-ahas uas yog Yauxiyas tus tub; luag twb ntes nws coj mus lawm, nws yuav tsis rov los pom lub tebchaws uas nws niam yug nws ib zaug li lawm. Tus TSWV hais txog Yauxiyas tus tub Yau-ahas uas ua vajntxwv kav tebchaws Yudas hloov nws txiv chaw hais tias, “Nws tawm ntawm no mus lawm yuav tsis tau rov los li. Nws yuav tuag rau hauv lub tebchaws uas luag coj nws mus, thiab nws yuav tsis tau rov los rau hauv lub tebchaws no li.” Tus uas ua nws lub tsev ntawm lub siab tsis ncaj, txuas nws lub tsev kom dav ntawm lub siab nkhaus; thiab yuam nws tej tub zog ua haujlwm tsis them nqi zog rau lawv, tus ntawd yuav raug puastsuaj. Tus uas hais tias, “Kuv yuav ua ib lub loog loj rau kuv kom muaj tej chav dav heev rau tshooj saud.” Yog li ntawd, nws thiaj ua qhovrai rau nws lub tsev, muab txiag ntoo ciab los xov thiab vuam kob liab rau, tus ntawd yuav puastsuaj. Koj muab ntoo ciab los ua tsev rau koj nyob, koj txawm tau ua tus vajntxwv uas zoo tshaj lwm tus no los? Koj txiv yeej ibtxwm txaus siab rau nws lub neej, nws ibtxwm ua ncaj thiab ua zoo thiab txhua yam uas nws ua puavleej vammeej. Nws txiav txim ncaj rau tus txomnyem, txhua yam uas nws ua puavleej zoo. Tus uas ua li no thiaj yog tus uas paub Vajtswv. Tiamsis koj tsuas pom koj thiaj yog tus zoo xwb; koj tua cov neeg uas tsis muaj txim thiab quab yuam koj tej pejxeem. Tus TSWV hais li ntawd. Yog li ntawd, tus TSWV thiaj hais txog Yauxiyas tus tub Yehauyakees uas ua vajntxwv kav tebchaws Yudas hais tias, “Thaum nws tuag tsis muaj leejtwg yuav nyiav lossis hais rau nws hais tias, ‘Ua li cas koj tuag txomnyem ua luaj, kuv tus phoojywg, ua li cas yuav tuag txomnyem ua luaj li!’ Yuav tsis muaj leejtwg los kua muag rau nws lossis quaj hais tias, ‘Kuv tus tswv! Kuv tus vajntxwv!’ Luag yuav coj nws mus faus ib yam li luag tus neesluav mus pov rau sab nraum lub nroog Yeluxalees tej roojvag.” Cov neeg hauv lub nroog Yeluxalees, nej cia li mus rau pem tebchaws Lenpanoos thiab qw nrov nrov, cia li mus rau hauv tebchaws Npasas thiab tsa suab hlo quaj; cia li mus qw nrov nrov saum tej roob hauv tebchaws Mau-am, rau qhov cov uas tuaj nej tog raug puastsuaj tas lawm. Tus TSWV hais rau koj thaum uas koj tseem vammeej, tiamsis koj tsis mloog nws lus. Koj ibtxwm ua koj lub neej li ntawd; koj yeej tsis mloog tus TSWV lus li. Cua yuav ntsawj koj tej thawjcoj mus tas, cov uas tuaj koj tog yuav raug luag ntes coj mus; koj yuav poob ntsejmuag thiab txajmuag heev, vim tej kev phem kev qias uas koj tau ua tas los lawm. Koj tau zoo thiab nyob kaj siab lug hauv tej tsev uas muab tej ntoo ciab pem tebchaws Lenpanoos los ua; tiamsis koj yuav quaj ntsaj laws thaum kev mob los raug koj ib yam li tus pojniam uas mob plab yug menyuam. Tus TSWV hais rau Vajntxwv Yehauyakhees uas yog vajntxwv Yehauyakees tus tub uas ua vajntxwv kav lub tebchaws Yudas hais tias, “Kuv uas yog Vajtswv tus muaj sia nyob, txawm yog koj yog lub nplhaib homthawj ntawm kuv sab tes xis los kuv yuav muab hle, thiab muab cob rau cov neeg uas koj ntshai thiab xav muab koj tua povtseg. Kuv yuav muab koj cob rau Vajntxwv Nenpukajnexales uas kav tebchaws Npanpiloos thiab nws cov tubrog. Kuv yuav cia luag ntes koj thiab koj niam uas yug koj mus rau lwm lub tebchaws. Koj yuav mus rau lub tebchaws uas tsis yog qhov chaw yug koj, thiab neb yuav mus tuag rau qhov ntawd. Neb yuav xav rov los rau lub tebchaws no heev, tiamsis neb yuav tsis tau rov los lawm.” Kuv hais tias, “Puas yog Vajntxwv Yehauyakhees zoo ib yam li lub hub tawg uas luag muab povtseg tsis muaj leejtwg xav yuav li? Twb yog vim li ntawd nws thiab nws cov menyuam thiaj raug ntes coj mus rau lub tebchaws uas lawv tsis tau paub dua li.” Lub tebchaws, lub tebchaws, lub tebchaws! Cia li mloog tej lus uas tus TSWV hais: “Tus txivneej no yeej raug foom tsis zoo kom nws cov menyuam ploj tas, nws yog ib tug neeg uas ua dabtsi los ua tsis tau li. Nws yuav tsis muaj xeebntxwv los kav lub tebchaws Yudas ib yam li Daviv muaj xeebntxwv los hloov nws chaw. Kuv yog tus TSWV uas hais li ntawd.” Tus TSWV yuav rau txim rau cov nomtswv uas tua nws haivneeg thiab ua kom lawv tawg ua sab ua sua mus. Ntawm no yog tej lus uas tus TSWV uas yog cov Yixalayees tus Vajtswv hais rau cov nomtswv uas saib tus TSWV haivneeg hais tias, “Nej tsis saib xyuas kuv haivneeg; nej ntiab lawv tawm, lawv thiaj mus nyob ua sab ua sua. Nimno kuv yuav rau txim rau nej vim nej ua phem ua qias. Kuv yuav sau kuv haivneeg uas tseem nyob hauv tej tebchaws uas kuv ntiab lawv mus nyob ntawd, rov qab los nyob hauv lawv tej zejzog. Lawv yuav muaj tub muaj ki huamvam coob heev. Kuv yuav tsa kom muaj nomtswv saib kuv haivneeg. Lawv yuav tsis txhawj tsis ntshai, thiab kuv yuav tsis rau txim rau lawv ntxiv lawm. Kuv yog tus TSWV uas hais li ntawd.” Tus TSWV hais tias, “Muaj ib hnub kuv yuav xaiv Daviv cov xeebntxwv ib tug uas ncaj ncees ua vajntxwv. Tus vajntxwv no yuav kav pejxeem ntse ntsuav, thiab nws yuav ua ncaj ua ncees rau sawvdaws thoob plaws lub tebchaws. Thaum tus vajntxwv no los kav lawm, cov Yudas yuav nyob tso siab lug, thiab cov Yixalayees yuav muaj kev thajyeeb. Luag yuav hu nws hais tias, ‘Tus TSWV uas Yog Peb Txojkev Cawm Dim.’ Tus TSWV hais tias, “Muaj ib hnub sawvdaws yuav tsis tuav kuv lub npe coglus hais tias Vajtswv tus uas muaj sia nyob coj peb cov Yixalayees tawm nram tebchaws Iziv los. Tiamsis lawv yuav tuav kuv lub npe coglus hais tias Vajtswv tus uas muaj sia nyob yog tus coj peb cov Yixalayees tawm hauv lub tebchaws uas nyob sab qaumteb thiab hauv tej tebchaws uas peb raug ntes mus rov qab los. Thaum ntawd lawv yuav nyob hauv lawv lub tebchaws.” Kuv siab ntsws puas tas thiab kuv ibce tshee hnyo. Kuv zoo ib yam li tus neeg uas qaug cawv, zoo ib yam li tus neeg uas haus cawv txiv hmab ntau dhau lawm. Vim tus TSWV thiab nws tej lus uas dawbhuv. Cov neeg uas nyob hauv lub tebchaws ua kev nkauj kev nraug tsis muaj ib tug muab siab npuab tus TSWV li; tus TSWV thiaj foom tsis zoo rau lub tebchaws, tej tshav zaub hauv tej tiaj nrag thiaj qhuav tas, vim lawv siv lawv lub hwjchim ua kev tsis ncaj ncees. Tus TSWV hais tias, “Kuv cov cevlus thiab cov povthawj puavleej tsis ncaj; kuv pom lawv ua kev phem kev qias nyob hauv lub Tuamtsev. Lawv taug txojkev nplua thiab tsaus ntuj nti, kuv yuav ua kom lawv dawm ntog. kuv yuav tso kev puastsuaj los raug lawv; lub sijhawm uas rau txim rau lawv los txog lawm. Kuv yog tus TSWV uas hais li ntawd. Kuv pom Xamalis cov cevlus tej kev txhaum: lawv tuav Npa-as lub npe cevlus rau sawvdaws, thiab lawv coj kuv haivneeg Yixalayees yuam kev lawm. Tiamsis kuv pom cov cevlus uas nyob hauv lub nroog Yeluxalees tseem ua kev phem kev qias heev tshaj; lawv ua nkauj ua nraug thiab hais lus dag; lawv coj neeg ua kev txhaum; vim li ntawd, thiaj tsis muaj ib tug tso kev phem kev qias tseg. Kuv saib lawv txhua tus puavleej ua kev phem kev qias ib yam li cov neeg uas nyob hauv lub nroog Xaudoos thiab lub nroog Kaumaulas. “Yog li ntawd, tus TSWV uas muaj hwjchim loj kawg nkaus thiaj hais rau cov cevlus uas nyob hauv lub nroog Yeluxalees li no: Kuv yuav muab tej nroj uas iab heev rau lawv noj thiab muab tej tshuaj lom rau lawv haus, rau qhov lawv tau ua kev phem kev qias thoob plaws lub tebchaws.” Tus TSWV uas muaj hwjchim loj kawg nkaus hais rau cov neeg uas nyob hauv Yeluxalees hais tias, “Nej tsis txhob mloog cov cevlus cuav hais; lawv tsuas qhia tej kev cia siab tsis tseeb rau nej thiab qhia raws li lawv xav xwb, tsis yog kuv kom lawv qhia. Cov cevlus cuav hais rau cov neeg uas tsis kam mloog kuv tej lus hais tias, ‘Nej yuav tau nyob kaj siab lug.’ Thiab hais rau txhua tus neeg tawv ncauj hais tias, ‘Yuav tsis muaj kev puastsuaj los raug nej li.’ ” Kuv hais rau nej hais tias, “Cov cevlus cuav ntawd tsis muaj ib tug paub tej uas tus TSWV xav. Lawv cov ntawd tsis muaj ib tug tau hnov lossis totaub tus TSWV tej lus lossis lawv tsis mloog thiab tsis quavntsej tej lus uas tus TSWV hais li. Tus TSWV txojkev chim yog nthwv nagxob nagcua thiab yog cua daj cua dub uas los qhwv nkaus cov neeg siab phem taubhau, thiab cov cua ntawd yuav tsis tu mus txog thaum tus TSWV ua tiav raws li nws npaj tseg lawm. Muaj ib hnub nws haivneeg yuav paub txog tej uas nws ua no.” Tus TSWV hais tias, “Kuv tsis tau tso cov cevlus cuav ntawd tuaj, tiamsis lawv tuaj lawv xwb. Kuv tsis tau hais rau lawv, tiamsis lawv tuav kuv lub npe cevlus. Yog lawv paub tej uas kuv xav, ces lawv yeej yuav mus cev kuv tej lus rau kuv haivneeg thiab ua kom kuv haivneeg tso lawv tej kev txhaum tseg. “Kuv yog tus Vajtswv uas nyob tau txhua qhov, tsis yog nyob ib qhov xwb. Tsis muaj leejtwg yuav khiav nkaum rau ib qho twg uas kuv tsis pom li. Nej puas paub hais tias kuv nyob tau txhua qhov, tsis hais saum ntuj lossis hauv ntiajteb no? Kuv paub tej uas cov cevlus cuav ntawd hais, lawv tuav kuv lub npe dag hais tias yog lawv ua yogtoog pom kuv hais rau lawv. Cov cevlus cuav ntawd tseem yuav hais lus dag thiab coj kuv haivneeg yuam kev mus txog thaum twg? Lawv xav hais tias tej yogtoog uas lawv qhia ntawd yuav ua rau kuv haivneeg tso kuv tseg ib yam li lawv cov yawgkoob tso kuv tseg mus teev Npa-as lawm. Tus cevlus uas ua npau suav tsuas piav nws zaj npau suav nkaus xwb, tiamsis tus cevlus uas hnov kuv tej lus, nws yeej ua tib zoo qhia tej lus ntawd. Yog muab quavnyab piv rau hnab nplej, yam twg yuav zoo dua? Kuv txojlus zoo ib yam li hluavtaws thiab zoo ib yam li rab rauj uas tsoo tau tej pobzeb tawg ntsoog ntxaws. Kuv yuav tawmtsam cov cevlus cuav uas muab lwm tus tej lus qhia rau sawvdaws hais tias yog kuv tej lus. Kuv yuav tawmtsam cov cevlus cuav uas lawv hais lawv tej lus xwb los lawv tseem khav hais tias yog kuv hais. Nej cia li mloog kuv uas yog tus TSWV hais! Kuv yuav tawmtsam cov cevlus cuav uas muab lawv tej npau suav dag piav rau sawvdaws mloog. Lawv piav thiab khav lawv tej npau suav dag kuv haivneeg yuam kev. Kuv tsis tau hais rau lawv thiab txib lawv mus, lawv ua tsis tau dabtsi pab sawvdaws li. Kuv yog tus TSWV uas hais li ntawd.” Tus TSWV hais rau kuv hais tias, “Yelemis, thaum twg kuv cov neeg ib tug, lossis ib tug cevlus lossis ib tug povthawj twg tuaj nug koj hais tias, ‘Tus TSWV txojlus hais li cas?’ koj yuav tsum teb rau lawv hais tias, ‘Nej ua rau tus TSWV nyuaj siab, thiab nws yuav muab nej ntiab tawm mus.’ Yog cov neeg no ib tug lossis ib tug cevlus lossis ib tug povthawj twg hais tias, ‘Tus TSWV nyuaj siab,’ kuv yuav rau txim rau tus ntawd thiab nws tsevneeg huv tibsi. Tsimnyog lawv nyias nug nyias tus phoojywg thiab tus kwvtij hais tias, ‘Tus TSWV teb li cas?’ lossis ‘Tus TSWV hais li cas?’ Yog li ntawd, lawv thiaj tsis hais lo lus uas hais tias, ‘Tus TSWV nyuaj siab,’ yog leejtwg hais lo lus ntawd, kuv yuav muab kuv txojlus ua kom tus ntawd nyuaj siab. Rau qhov cov neeg ntawd tau hloov tus TSWV uas yog Vajtswv tus muaj sia nyob thiab muaj hwjchim loj kawg nkaus tej lus lawm. Yelemis, koj cia li nug cov cevlus ntawd hais tias, ‘Tus TSWV teb li cas rau nej? Tus TSWV hais li cas rau nej?’ Yog lawv tsis mloog kuv lus, lawv pheej hais lo lus uas hais tias, ‘Tus TSWV nyuaj siab,’ ces koj hais rau lawv hais tias, ‘Kuv yuav muab lawv tshem tawm mus povtseg kom nrug deb ntawm kuv, tsis hais lawv thiab lub nroog uas kuv muab rau lawv cov yawgkoob lawm.’ Kuv yuav ua kom lawv txajmuag mus ibtxhis thiab poob ntsejmuag tas mus li.” Tus TSWV qhia ob tawb txiv ncuavpias uas txawb rau ntawm hauv ntej lub Tuamtsev rau kuv. (Qhov no yog tom qab uas Vajntxwv Nenpukajnexales uas kav tebchaws Npanpiloos tuaj ntes tau Yehauyakees tus tub Yehauyakhees uas ua vajntxwv kav tebchaws Yudas thiab cov Yudas cov nomtswv, tej neeg ntaus hlau, thiab tej neeg uas paub ua haujlwm uas nyob hauv lub nroog Yeluxalees coj mus rau tim tebchaws Npanpiloos lawm.) Thawj lub tawb ntim cov txiv ncuavpias uas zoo thiab yog cov uas xub siav; muaj ib lub tawb ntim cov txiv ncuavpias phem uas tsis zoo noj li. Tus TSWV nug kuv hais tias, “Yelemis, koj pom dabtsi?” Kuv teb hais tias, “Kuv pom txiv ncuavpias. Cov txiv zoo, mas zoo heev, tiamsis cov txiv phem mas phem heev tsis zoo noj li.” Yog li ntawd, tus TSWV hais rau kuv hais tias, “Kuv yog tus TSWV uas yog cov Yixalayees tus Vajtswv hais tias cov neeg uas raug ntes mus rau tebchaws Npanpiloos zoo ib yam li cov txiv ncuavpias uas zoo thiab kuv yuav ua zoo rau lawv. Kuv yuav tsomkwm lawv thiab coj lawv rov los rau hauv lub tebchaws no. Kuv yuav txhim kho kom lawv rov vammeej thiab tsis muab lawv rhuav povtseg; kuv yuav muab lawv cog thiab tsis dob lawv povtseg lawm. Kuv yuav ua kom lawv paub hais tias kuv yog tus TSWV. Lawv yuav ua kuv haivneeg thiab kuv yuav ua lawv tus Vajtswv, rau qhov lawv yuav muaj lub siab dawb paug rov los cuag kuv. “Vajntxwv Xedekiyas uas kav tebchaws Yudas, nws cov nomtswv tswj tebchaws, thiab cov pejxeem uas seem hauv lub nroog Yeluxalees uas nyob hauv lub tebchaws no lossis cov uas khiav mus nyob rau nram tebchaws Iziv lawm, kuv uas yog tus TSWV yuav ua kom lawv zoo ib yam li tawb txiv ncuavpias phem uas tsis zoo noj. Kuv yuav tso kev puastsuaj los raug lawv kom txhua haivneeg uas nyob thoob ntiajteb ntshai. Tej neeg yuav luag lawv plig, muab lawv hais tso dag tso luag, txob thuam thiab luag yuav tuav lawv lub npe foom tsis zoo rau txhua qhov chaw uas kuv ntiab lawv mus nyob. Kuv yuav tso kev tsov kev rog, kev tshaib kev nqhis thiab kev mob kev nkeeg los rau lawv, kom lawv tuag tas tsis tshuav ib tug seem nyob hauv lub tebchaws uas kuv muab rau lawv thiab lawv cov yawgkoob.” Thaum Yauxiyas tus tub Yehauyakees ua vajntxwv kav tebchaws Yudas tau plaub xyoos lawm, tus TSWV hais rau kuv txog cov Yudas. (Lub sijhawm ntawd yog thawj xyoo uas Nenpukajnexales ua vajntxwv kav tebchaws Npanpiloos.) Kuv hais rau cov Yudas thiab cov neeg uas nyob hauv lub nroog Yeluxalees hais tias, “Tau nees nkaum peb xyoos lawm, suav txij xyoo kaum peb uas Amoos tus tub Yauxiyas ua vajntxwv kav tebchaws Yudas los txog niaj hnub no, tej uas tus TSWV hais rau kuv, kuv yeej piav huv tibsi rau nej lawm, tiamsis nej yeej tsis quavntsej tej lus ntawd li. Tsis yog li ntawd xwb, tus TSWV yeej tso nws cov tubtxib uas yog nws cov cevlus qhia rau nej ua ntu zus los nej tsis quavntsej li. Lawv kom nej tso nej lub neej ua phem ua qias thiab nej tej kev txhaum tseg, nej thiaj yuav tau mus nyob hauv lub tebchaws uas tus TSWV muab rau nej thiab nej cov yawgkoob mus ibtxhis li. Lawv qhia kom nej tsis txhob pe luag tej vajtswv lossis pe tej mlom uas nej puab ua rau tus TSWV chim. Yog nej mloog tus TSWV lus, nws yuav tsis rau txim rau nej. Tus TSWV hais tias nej yeej tsis mloog nws lus, nej pheej pe nej tej mlom ua rau tus TSWV chim, nws thiaj rau txim rau nej. “Vim nej tsis mloog nws lus li ntawd, tus TSWV uas muaj hwjchim loj kawg nkaus hais tias, ‘Kuv yuav kom cov neeg uas nyob sab qaumteb thiab kuv tus tubtxib Nenpukajnexales uas ua vajntxwv kav tebchaws Npanpiloos tuaj tawmtsam cov Yudas thiab cov tebchaws ibncig kom raug luag txob thuam, ntshai, poob ntsejmuag thiab puastsuaj mus tas ibtxhis. Kuv yog tus TSWV uas hais li ntawd. Kuv yuav ua kom lawv tej suab qw lomzem zoo siab thiab kev noj tshoob haus kos ntsiag mus. Lawv yuav tsis hnov neeg zom zeb thiab tsis muaj leejtwg taws teeb lawm. Lub tebchaws no yuav puastsuaj thiab nyob qhuav nquas cia; tej tebchaws uas nyob ibncig ntawd yuav ua tus vajntxwv uas kav tebchaws Npanpiloos qhev xya caum xyoo. Tom qab ntawd kuv yuav rau txim rau cov Npanpiloos thiab lawv tus vajntxwv, vim lawv tej kev txhaum. Kuv yuav rhuav lub tebchaws kom puastsuaj tas mus ibtxhis. Kuv yuav rau txim rau lub tebchaws Npanpiloos kom raug puastsuaj raws li tej kev puastsuaj uas kuv ua rau lwm haivneeg uas kuv kom Yelemis sau tseg rau hauv phau ntawv no. Kuv yuav ua pauj rau cov Npanpiloos raws li tej kev phem uas lawv tau ua lawm, lawv yuav tau mus ua ntau haivneeg thiab ntau tus vajntxwv uas muaj hwjchim qhev.’ ” Tus TSWV uas yog cov Yixalayees tus Vajtswv hais rau kuv hais tias, “Ntawm no yog khob cawv txiv hmab uas puv nkaus kuv txojkev chim, koj cia li coj mus rau txhua haivneeg haus. Thaum lawv haus tas, lawv yuav qaug thiab tsis meejpem, rau qhov kuv tso kev tsov kev rog tuaj tawmtsam lawv.” Yog li ntawd, kuv thiaj txais lub khob ntawm tus TSWV txhais tes thiab coj mus rau txhua haivneeg haus raws li tus TSWV txib kuv mus. Yeluxalees thiab tagnrho tej nroog hauv tebchaws Yudas, cov vajntxwv thiab tej nomtswv yuav tau haus lub khob ntawd, tej nroog yuav ua suabpuam tas, cov vajntxwv thiab tej nomtswv yuav raug luag txob thuam, thiab luag yuav tuav lawv lub npe foom tsis zoo ib yam li niaj hnub no. Tus TSWV uas yog cov Yixalayees tus Vajtswv uas muaj hwjchim loj kawg nkaus kom kuv hais rau lawv hais tias lawv yuav tsum haus kom qaug thiab ntuav, kom lawv ntog thiab sawv tsis taus, rau qhov kuv tso kev tsov kev rog tuaj tawmtsam lawv. Yog lawv tsis kam txais lub khob ntawm koj tes mus haus, koj hais rau lawv hais tias, tus TSWV uas muaj hwjchim loj kawg nkaus hais kom lawv yuav tsum haus lub khob ntawd. Kuv yuav tso kev puastsuaj los raug kuv lub nroog. Lawv xav hais tias lawv yuav dim tsis raug txim no los? Tsis yog li ntawd, lawv yuav tsum raug txim xwb, rau qhov kuv yuav tso kev tsov kev rog los rau tej neeg uas nyob hauv lub ntiajteb no. Kuv yog tus TSWV uas muaj hwjchim loj kawg nkaus hais li ntawd. “Yelemis, koj yuav tsum qhia kuv tej lus no txhua lo rau lawv, koj hais rau cov neeg ntawd hais tias, ‘Tus TSWV yuav nyooj laws saum ntuj, thiab nthe nqho saum ntuj uas yog qhov chaw siab tuaj. Nws yuav nyooj laws tawmtsam nws haivneeg; nws yuav qw ib yam li tus neeg uas tsuj txiv hmab qw. Neeg ntiajteb txhua tus yuav hnov nws lub suab, thiab nws lub suab yuav nrov ntxhe mus txog qab ntuj kawg. Tus TSWV ua plaub tawmtsam txhua haivneeg. Nws yuav coj txhua tus neeg tuaj rau ntawm lub rooj txiav txim, thiab yuav muab cov neeg ua phem ua qias tua povtseg. Tus TSWV yog tus uas hais li ntawd.’ ” Tus TSWV uas muaj hwjchim loj kawg nkaus hais tias kev puastsuaj yuav los raug ib haivneeg dhau rau ib haivneeg, thiab yuav muaj ib nthwv cua daj cua dub ntsawj tim qab ntug tuaj. Hnub ntawd tej neeg uas tus TSWV tua yuav tuag pawglug sab ntuj tim no mus ti nkaus sab ntuj tim ub. Yuav tsis muaj leejtwg quaj nyiav thiab coj lawv mus faus li. Lawv yuav lwj ua tej pawg rau saum npoo av ib yam li tej quav nyuj. Nej cov uas yog thawjcoj, nej cov uas saib kuv pab yaj, nej cia li quaj nrov nrov! Cia li quaj da luam rau hauv av. Rau qhov twb txog lub sijhawm uas muab nej tua lawm, luag yuav muab nej hlais ib yam li hlais tej laug yaj. Nej yuav khiav tsis dim li. Tus TSWV twb tso nws haivneeg tseg ib yam li tus tsov ntxhuav khiav tawm ntawm nws lub qhov mus lawm. Tej kev tsov kev rog uas txaus ntshai thiab tus TSWV txojkev chim ua rau lub tebchaws ua suabpuam tas. Thaum Yauxiyas tus tub Yehauyakees ua vajntxwv kav tebchaws Yudas tau tsis ntev, tus TSWV hais rau kuv hais tias, “Koj cia li mus sawv ntawm lub tshavpuam ntawm lub Tuamtsev, qhia tej lus uas kuv samhwm rau koj lawm txhua lo rau cov neeg uas tuaj txhua lub nroog hauv tebchaws Yudas tuaj pehawm kuv ntawd. Koj qhia tej lus no rau sawvdaws tsis txhob tseg ib los li. Tej zaum lawv yuav mloog thiab tso lawv tej kev txhaum tseg. Yog lawv ua li ntawd, kuv yuav hloov siab tsis tso kev puastsuaj los raug lawv vim tej kev txhaum uas lawv tau ua.” Tus TSWV kom kuv hais rau sawvdaws hais tias, “Nej yuav tsum ua raws li kuv uas yog tus TSWV tej lus uas qhia rau nej lawm thiaj yog nej mloog kuv lus, thiab nej yuav tsum muab siab rau mloog tej lus uas cov cevlus uas yog kuv cov tubtxib qhia rau nej. Kuv txib lawv tuaj qhia nej ua ntu zus, tiamsis nej tsis mloog tej uas lawv qhia li. Yog nej tsis ua raws li kuv tej lus, kuv yuav ua kom lub Tuamtsev no puastsuaj ib yam li kuv ua rau lub nroog Silaus; txhua haivneeg hauv ntiajteb yuav tuav lub nroog no npe foom tsis zoo.” Cov povthawj, cov cev Vajtswv lus thiab cov pejxeem puavleej hnov kuv hais li no hauv lub Tuamtsev; thaum kuv qhia tus TSWV tej lus rau lawv mloog tas, lawv sau nthwv los ntes kuv thiab hais tias, “Koj hais tej lus no, tsimnyog muab koj tua povtseg lawm! Ua li cas koj lam tuav tus TSWV lub npe hais tias, lub Tuamtsev no yuav zoo ib yam li lub nroog Silaus thiab lub nroog no yuav puastsuaj tas tsis muaj neeg nyob hauv li lawm?” Ces lawv txawm los vij nkaus kuv. Thaum cov Yudas tej thawjcoj hnov tej xwm no, lawv tawm ceev rooj hauv vajntxwv lub loog mus rau ntawm lub Tuamtsev thiab mus zaum ntawm lub Roojvag Tshiab. Cov povthawj thiab cov cev Vajtswv lus hais rau cov thawjcoj thiab cov pejxeem hais tias, “Yeej tsimnyog muab tus txivneej no tua povtseg lawm, rau qhov nws tau foom tsis zoo rau peb lub nroog no, raws li nej twb hnov nws tej lus lawm.” Ces kuv teb lawv hais tias, “Yog tus TSWV txib kuv tuaj foom tsis zoo rau lub Tuamtsev thiab lub nroog no raws li tej lus uas nej tau hnov kuv hais lawm. Nej yuav tsum hloov nej lub siab thiab tej haujlwm dua tshiab tsis txhob ua li qub lawm. Nej yuav tsum mloog tus TSWV uas yog nej tus Vajtswv lus, nws thiaj yuav hloov siab tsis ua rau nej puastsuaj raws li nws tau hais rau nej lawm. Nimno kuv nyob rau hauv nej txhais tes lawm, nej cia li ua rau kuv raws li nej pom zoo thiab yog kev yog cai. Tiamsis kom nej paub hais tias yog nej tua kuv, nej thiab cov neeg uas nyob hauv lub nroog no puavleej ua txhaum vim nej tua ib tug neeg uas tsis muaj txim, rau qhov yog tus TSWV txib kuv coj tej lus qhuab ntuas no tuaj qhia rau nej.” Cov thawjcoj thiab cov pejxeem thiaj hais rau cov povthawj thiab cov cev Vajtswv lus hais tias, “Tsis tsimnyog muab tus txivneej no tua, rau qhov nws tuav tus TSWV uas yog peb tus Vajtswv lub npe qhia peb.” Tom qab ntawd cov thawjcoj qee leej thiaj sawv hais rau cov pejxeem uas tuaj sablaj ntawd hais tias, “Lub sijhawm uas Hexekiyas ua vajntxwv kav tebchaws Yudas, Mikhas uas yog tus cev Vajtswv lus nyob hauv lub nroog Mauleses qhia rau sawvdaws hais tias tus TSWV uas muaj hwjchim loj kawg nkaus hais li no: ‘Luag yuav laij lub nroog Xi-oos ib yam li laij teb; Lub nroog Yeluxalees yuav pob puas tas ua ib pawg, thiab lub roob uas luag ua lub Tuamtsev rau saud yuav ciaj havzoov.’ Vajntxwv Hexekiyas thiab cov Yudas twb tsis muab Mikhas tua. Tiamsis Hexekiyas hwm tus TSWV thiab nws ua raws li tus TSWV lub siab nyiam. Tus TSWV thiaj hloov siab tsis ua rau lawv puastsuaj raws li nws hais tseg lawm. Nimno peb tabtom lob kev puastsuaj los rau peb ntag.” ( Muaj dua ib tug txivneej hu ua Uliyas, nws yog Semayas tus tub uas nyob hauv lub nroog Kili-as Ye-alees, nws tuav tus TSWV lub npe foom tsis zoo rau lub nroog thiab lub tebchaws no ib yam li Yelemis foom. Thaum Vajntxwv Yehauyakees, nws cov tubrog thiab tej nomtswv hnov Uliyas hais li ntawd, vajntxwv txawm nrhiav Uliyas tua povtseg. Tiamsis thaum Uliyas hnov li ntawd, nws ntshai, nws txawm khiav mus rau nram tebchaws Iziv kom nws dim. Vajntxwv Yehauyakees txawm txib Anpaus tus tub Enathas thiab qee leej mus rau nram tebchaws Iziv thiab ntes Uliyas rov los. Lawv mus ntes tau Uliyas thiab coj nws rov los rau Vajntxwv Yehauyakees, vajntxwv thiaj kom luag muab Uliyas tua thiab coj mus pov rau ntawm lub toj ntxas uas faus tej neeg txomnyem.) Tiamsis twb yog muaj Safas tus tub Ahikas cawm kuv, luag thiaj tsis muab kuv rau cov pejxeem tua povtseg. Thaum Xedekiyas tus tub Yauxiyas ua vajntxwv kav tebchaws Yudas tau tsis ntev, tus TSWV hais kom kuv muab ntoo txua ua ib tug quab thiab muab ib pluaj hlua tawv khi rau thiab muab khuam rau ntawm kuv cajdab. Tus TSWV kom kuv xa xov mus rau tus vajntxwv uas kav tebchaws Edoos, tus vajntxwv uas kav tebchaws Mau-am, tus vajntxwv uas kav tebchaws Amoos, tus vajntxwv uas kav lub nroog Tiles thiab tus vajntxwv uas kav lub nroog Xidoos thiab cov sawv cev uas tuaj cuag Vajntxwv Xedekiyas hauv lub nroog Yeluxalees. Tus TSWV uas yog cov Yixalayees tus Vajtswv uas muaj hwjchim loj kawg nkaus kom kuv mus hais rau lawv, kom lawv coj tus TSWV tej lus mus hais rau lawv cov vajntxwv hais tias, “Kuv lub hwjchim thiab lub zog loj zog nchav tsim lub ntiajteb, tsim neeg thiab txhua yam tsiaj uas nyob hauv lub ntiajteb no; kuv yuav pub lub hwjchim ntawd rau tus uas kuv pom zoo. Kuv yog tus uas muab txhua haivneeg cob rau kuv tus tubtxib Nenpukajnexales uas ua vajntxwv kav tebchaws Npanpiloos, txawm yog tej tsiaj qus los kuv kom ua nws qhev huv tibsi. Txhua haivneeg yuav ua nws qhev, thiab lawv yuav ua nws tus tub thiab nws tus xeebntxwv qhev mus txog lub sijhawm uas nws lub tebchaws poob. Lwm haivneeg thiab tej vajntxwv uas muaj hwjchim yuav kav nws lub tebchaws thiab nws yuav ua lawv qhev. “Tiamsis yog muaj ib haivneeg twg lossis ib lub tebchaws twg tsis ua raws li nws txoj kevcai tswjhwm, kuv yuav rau txim rau haivneeg ntawd. Lawv yuav raug hniav ntaj hniav riam tuag, raug kab mob kev nkeeg tuag thiab tuag tshaib tuag nqhis, mus txog hnub uas kuv tso Vajntxwv Nenpukajnexales tuaj tua lawv kom puastsuaj tas. Nej tsis txhob mloog nej cov cevlus lossis tus uas khav hais tias nws paub tej uas yuav muaj los yav tom ntej, tsis hais npau suav lossis txheev tej neeg uas tuag lawm tej plig lossis ua khawvkoob. Lawv yuav kom nej tsis txhob mus ua vajntxwv Npanpiloos qhev. Lawv yuav cevlus dag ntxias nej kom nej raug luag coj mus deb ntawm nej lub tebchaws. Kuv yuav ntiab nej tawm mus kom nej raug kev puastsuaj. Tiamsis yog haivneeg twg txaus siab zwm rau tus vajntxwv uas kav tebchaws Npanpiloos thiab ua nws qhev, kuv yuav cia lawv nyob hauv lawv lub tebchaws thiab lawv yuav tau ua lawv tej liaj tej teb. Kuv yog tus TSWV uas hais li ntawd.” Kuv hais ib yam li ntawd rau Vajntxwv Xedekiyas uas kav tebchaws Yudas hais tias, “Koj cia li zwm rau tus vajntxwv kav tebchaws Npanpiloos, ua nws thiab nws cov pejxeem qhev, koj thiaj yuav muaj sia nyob. Vim li cas koj thiab koj cov pejxeem yuav tuag rau hniav ntaj hniav riam lossis tuag rau kev tshaib kev nqhis lossis tuag rau kab mob kev nkeeg? Tej no yog tej uas tus TSWV hais tias yuav los raug haivneeg uas tsis txaus siab zwm rau tus vajntxwv uas kav tebchaws Npanpiloos. Nej tsis txhob mloog cov cevlus uas hais rau nej hais tias tsis txhob mus thawj tus vajntxwv uas kav tebchaws Npanpiloos. Lawv dag nej xwb. Tus TSWV hais tias nws tsis tau txib lawv tuaj, lawv tuav nws lub npe dag nej xwb. Yog li ntawd tus TSWV yuav ntiab nej tawm mus, nej thiab cov cevlus uas dag yuav raug tua tuag tas.” Kuv thiaj hais rau cov povthawj thiab cov pejxeem raws li tus TSWV tej lus uas hais tias, “Nej tsis txhob mloog cov cevlus uas hais tias tshuav tsis ntev luag yuav coj tej khoom muaj nqis hauv tus TSWV lub Tuamtsev rov tim tebchaws Npanpiloos los. Lawv dag nej xwb. Nej tsis txhob mloog lawv tej lus! Cia li zwm rau tus vajntxwv uas kav tebchaws Npanpiloos, nej thiaj yuav muaj sia nyob! Vim li cas yuav cia lub nroog no pob puas tas ua ib pawg? Yog hais tias lawv yog cov cevlus tseeb thiab yog kuv hais rau lawv tiag, lawv cia li thov kuv uas yog tus TSWV uas muaj hwjchim loj kawg nkaus kom luag tsis txhob coj tej khoom muaj nqis hauv lub Tuamtsev thiab hauv cov Yudas tus vajntxwv lub loog mus rau tebchaws Npanpiloos.” ( “Nej cia li mloog tus TSWV uas yog cov Yixalayees tus Vajtswv uas muaj hwjchim loj kawg nkaus hais txog tej khoom muaj nqis uas tseem tshuav hauv lub Tuamtsev thiab hauv cov Yudas tus vajntxwv lub loog uas nyob hauv lub nroog Yeluxalees: Luag yuav coj tej ntawd mus rau tebchaws Npanpiloos thiab yuav nyob tid mus txog hnub uas kuv pom hais tias tsimnyog coj tej ntawd rov los cia rau hauv qhov chaw no dua. Kuv yog tus TSWV uas hais li ntawd.” Thaum lub tsib hlis ntuj uas yog xyoo plaub uas Xedekiyas ua vajntxwv, Axules tus tub Hananiyas uas yog tus cevlus nyob hauv lub nroog Nkinpe-oos hais rau kuv hauv lub Tuamtsev tabmeeg cov povthawj thiab cov pejxeem hais tias, tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, “Kuv twb rhuav tus vajntxwv uas kav tebchaws Npanpiloos lub hwjchim lawm. Tshuav li ob xyoos lawm xwb, kuv yuav coj tus TSWV lub Tuamtsev tej khoom muaj nqis uas Vajntxwv Nenpukajnexales muab coj mus rau tim tebchaws Npanpiloos lawm rov los cia rau hauv qhov chaw no dua. Kuv tseem yuav coj cov Yudas tus Vajntxwv Yehauyakhees uas yog Yehauyakees tus tub thiab cov Yudas uas raug ntes mus rau tebchaws Npanpiloos lawm rov los huv tibsi. Kuv yuav rhuav tus vajntxwv uas kav tebchaws Npanpiloos lub hwjchim. Kuv yog tus TSWV uas hais li ntawd.” Kuv hais rau Hananiyas tabmeeg cov povthawj thiab cov pejxeem uas nyob hauv lub Tuamtsev hais tias, “Zoo kawg li lawm! Kuv cia siab hais tias tus TSWV yeej yuav ua raws tej ntawd! Kuv cia siab hais tias nws yuav ua kom tej lus uas koj hais tiav, thiab coj tus TSWV lub Tuamtsev tej khoom muaj nqis thiab cov Yudas uas raug ntes mus rov los. Tiamsis koj ua tib zoo mloog tej lus uas kuv hais rau koj thiab cov pejxeem sawvdaws. Cov cev Vajtswv lus uas nyob ua ntej koj thiab kuv tiam tau hais tias yuav muaj kev tsov kev rog, kev tshaib kev nqhis thiab kev mob kev nkeeg los raug ntau lub tebchaws thiab ntau haivneeg uas muaj hwjchim. Tiamsis tus cev Vajtswv lus uas qhia tshwm hais tias yuav muaj kev thajyeeb, ces txawm muaj li nws hais, tus cev Vajtswv lus ntawd thiaj yog tus uas tus TSWV txib los.” Ces Hananiyas txawm muab tus quab ntawm kuv cajdab tshem tawm thiab muab tsoo lov ua ob peb ya, thiab nws hais tabmeeg sawvdaws hais tias, “Ob xyoos saum no, tus TSWV yuav muab tus quab uas Vajntxwv Nenpukajnexales muab khuam rau txhua haivneeg cajdab tsoo kom lov tas ib yam li no.” Ces kuv txawm ncaim mus lawm. Tom qab ntawd tsis ntev tus TSWV kom kuv mus hais rau Hananiyas hais tias, “Koj muaj cuabkav tsoo tus quab ntoo no lov, tiamsis nws yuav muab tus quab hlau los hloov. Tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, nws yuav muab tus quab hlau khuam rau saum txhua haivneeg cajdab, thiab kom lawv mus ua Vajntxwv Nenpukajnexales tus uas kav tebchaws Npanpiloos qhev. Tus TSWV hais tias txawm yog tej tsiaj qus los yuav ua Vajntxwv Nenpukajnexales qhev huv tibsi.” Yelemis hais rau Hananiyas hais tias, “Koj cia li mloog kuv hais! Tus TSWV tsis tau txib koj tuaj, koj ntxias cov neeg no ntseeg koj tej lus dag. Yog li ntawd, tus TSWV hais tias nws yuav tshem koj tawm hauv ntiajteb no. Koj yuav tuag ua ntej lub xyoo no tas, vim koj ntxias cov neeg no ntxeev siab rau tus TSWV.” Ces xyoo ntawd thaum lub xya hli ntuj, Hananiyas txawm tuag lawm. Ntawm no yog tsab ntawv uas kuv sau xa hauv Yeluxalees mus rau cov thawjcoj, cov povthawj, cov cev Vajtswv lus thiab cov neeg uas raug Nenpukajnexales ntes hauv Yeluxalees coj mus rau tebchaws Npanpiloos lawm. Kuv sau kuv tsab ntawv no tom qab uas Vajntxwv Yehauyakhees, nws niam, cov nomtswv, cov Yudas thiab Yeluxalees tej thawjcoj, cov kws tooj kws hlau thiab cov kws txua ntoo raug luag ntes hauv Yeluxalees mus lawm. Kuv muab tsab ntawv no rau Safas tus tub Elaxas thiab Hilekiyas tus tub Nkemaliyas uas cov Yudas tus Vajntxwv Xedekiyas txib mus cuag Vajntxwv Nenpukajnexales uas kav tebchaws Npanpiloos nqa mus. Tsab ntawv ntawd hais tias: “Tus TSWV uas yog cov Yixalayees tus Vajtswv uas muaj hwjchim loj kawg nkaus hais li no rau cov uas tus TSWV kom Nenpukajnexales tuaj ntes hauv Yeluxalees mus rau tebchaws Npanpiloos hais tias, ‘Nej cia li ua vaj ua tsev nyob; cia li ua liaj ua teb cog txiv hmab txiv ntoo noj. Nej cia li yuav pojniam kom muaj tub muaj ntxhais; yuav nyab rau nej tej tub, thiab qua nej tej ntxhais, nej tej tub tej ntxhais thiaj yuav muaj tub muaj ki huamvam coob. Nej yuav tsum huamvam kom coob tsis txhob cia tu noob. Cia li tsim tej nroog uas kuv cia luag ntes nej mus nyob kom zoo. Nej cia li thov kuv pab tej nroog ntawd, yog tej nroog ntawd vammeej ces nej yuav vammeej. Kuv yog tus TSWV uas yog cov Yixalayees tus Vajtswv ntuas nej hais tias nej tsis txhob cia cov cevlus lossis lwm tus uas uas nrog nej nyob khav hais tias lawv txawj saib tej uas yuav tshwm los yav tom ntej dag ntxias nej, thiab tsis txhob ntseeg lawv tej npau suav. Lawv tuav kuv lub npe dag ntxias nej xwb. Kuv tsis tau txib lawv tuaj. Kuv yog tus TSWV uas muaj hwjchim loj kawg nkaus hais li ntawd.’ “Tus TSWV hais tias, ‘Thaum nej mus nyob hauv Npanpiloos puv xya caum xyoo lawm, kuv yuav los pab nej raws li kuv coglus tseg hais tias kuv yuav coj nej rov los nyob hauv nej lub tebchaws. Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yav tom ntej. Thaum ntawd nej yuav hu kuv, los cuag kuv thiab thov kuv, kuv yuav teb nej. Yog nej nrhiav kuv kawg siab kawg ntsws, nej yuav ntsib kuv. Kuv hais rau nej tias, nej yuav ntsib kuv, thiab kuv yuav coj nej tawm hauv lub tebchaws uas kuv ntiab nej mus nyob rov los. Kuv yuav sau nej hauv txhua lub tebchaws thiab txhua qhov chaw uas kuv cia luag ntes nej mus nyob rov los rau hauv nej lub tebchaws. Kuv yog tus TSWV uas hais li ntawd.’ “Nej hais tias, tus TSWV twb pub rau nej muaj cov cev Vajtswv lus nyob hauv tebchaws Npanpiloos lawm. Nej cia li mloog tej lus uas tus TSWV hais txog tus vajntxwv uas zaum saum Daviv lub zwmtxwv, thiab cov neeg uas nyob hauv lub nroog no, yog nej cov kwvtij uas tsis raug luag ntes nrog nej mus. Tus TSWV uas muaj hwjchim loj kawg nkaus hais tias, ‘Kuv yuav tso kev tsov kev rog, kev tshaib kev nqhis thiab kab mob kev nkeeg los rau lawv, thiab kuv yuav ua kom lawv zoo li cov txiv ncuavpias lwj uas tsis zoo noj. Kuv yuav tso kev tsov kev rog, kev tshaib kev nqhis, thiab kab mob kev nkeeg caum lawv, thiab txhua haivneeg thoob ntiajteb yuav pom tej ntawd thiab ntshai. Kuv ntiab lawv mus nyob txog qhov twg los luag yuav ntshai thiab ceeb, vim tej xwm uas los raug lawv. Luag yuav luag lawv plig thiab tuav lawv lub npe foom tsis zoo. Tus TSWV hais tias vim lawv tsis mloog tej lus uas kuv txib cov cevlus uas yog kuv cov tubtxib los qhia lawv ua ntu zus, tej xwm no thiaj los raug lawv. Lawv yeej tsis mloog kuv lus. Nej cov uas kuv ntiab tawm hauv Yeluxalees mus rau tebchaws Npanpiloos lawm, nej cia li mloog kuv uas yog tus TSWV tej lus.’ “Tus TSWV uas yog cov Yixalayees tus Vajtswv uas muaj hwjchim loj kawg nkaus hais txog Kaulayas tus tub Ahaj thiab Ma-axeyas tus tub Xedekiyas uas tuav kuv lub npe cevlus dag nej, kuv yuav muab nkawd cob rau Vajntxwv Nenpukajnexales uas kav tebchaws Npanpiloos, nws yuav muab nkawd tua tabmeeg nej. Thaum cov neeg uas raug ntes hauv tebchaws Yudas mus rau tebchaws Npanpiloos lawm xav foom tsis zoo rau leejtwg, lawv hais tias, ‘Thov kom tus TSWV ua rau koj ib yam li nws ua rau Xedekiyas thiab Ahaj uas vajntxwv Npanpiloos muab hlawv ciaj lawm.’ Nkawd ua txhaum loj kawg li, rau qhov nkawd deev luag tej pojniam thiab tuav kuv lub npe hais lus dag, kuv tsis tau kom nkawd hais. Kuv paub tej uas nkawd ua thiab kuv ua timkhawv tawmtsam nkawd. Kuv yog tus TSWV uas hais li ntawd.” “Tus TSWV tsa koj ua povthawj hloov Yehauyadas chaw, thiab nimno koj yog tus thawj uas saib tus TSWV lub Tuamtsev; koj cia li ntes txhua tus neeg vwm uas ua txuj ua tus cevlus, muab saw hlau khi nws thiab muab cuab hlau cuab nws cajdab. Vim li cas koj tseem tsis ua li ntawd rau Yelemis uas nyob hauv Anathaus uas pheej cev Vajtswv lus rau sawvdaws? Koj cia li txwv nws, vim nws tau sau ntawv xa tuaj rau cov uas nyob tim tebchaws Npanpiloos no hais tias lawv yuav nyob tim no ntev; kom lawv cia li ua vaj ua tsev nyob, ua liaj ua teb thiab cog txiv hmab txiv ntoo noj.” Tus povthawj Xefaniyas nyeem tsab ntawv no rau kuv mloog, ces tus TSWV hais rau kuv hais tias, Tus TSWV uas yog cov Yixalayees tus Vajtswv hais rau kuv hais tias, “Yelemis, koj cia li sau tej lus uas kuv hais rau koj huv tibsi rau ib phau ntawv, rau qhov thaum txog sijhawm lawm, kuv yuav pub kom cov Yixalayees thiab cov Yudas uas yog kuv haivneeg rov vammeej ib yam li qub. Kuv yuav coj lawv rov los rau hauv lub tebchaws uas kuv muab rau lawv cov yawgkoob, lawv thiaj yuav rov tau lub tebchaws no ua lawv tug. Kuv yog tus TSWV uas hais li ntawd.” Tus TSWV hais rau cov Yixalayees thiab cov Yudas hais tias, “Kuv hnov ib lub suab quaj uas txaus ntshai heev, yog lub suab quaj txomnyem, tsis yog lub suab luag zoo siab. Nimno nej cia li ua ib zoo xav saib! Tej txivneej puas yug tau menyuam? Ua li cas kuv pom txhua tus txivneej nyias pos rawv nyias lub plab ib yam li tus pojniam uas mob plab yuav yug menyuam? Vim li cas lawv tej plhu thimxem tas li? Muaj ib hnub sawvdaws yuav raug kev txhawj kev ntshai; tsis muaj ib hnub uas yuav ntshai npaum li hnub ntawd, yog lub sijhawm uas kuv haivneeg ntxhov siab heev, tiamsis lawv yuav dim.” Tus TSWV uas muaj hwjchim loj kawg nkaus hais tias, “Thaum txog hnub ntawd, kuv yuav txo tus quab uas khuam lawv cajdab thiab daws tej sawv hlau uas khi lawv povtseg, lawv thiaj tsis tau mus ua lwm haivneeg qhev ntxiv lawm. Tiamsis lawv yuav ua kuv uas yog tus TSWV lawv tus Vajtswv tes haujlwm thiab ua Daviv tus xeebntxwv uas kuv yuav tsa ua lawv tus vajntxwv tes haujlwm. “Kuv haivneeg, nej tsis txhob ntshai; cov Yixalayees, nej tsis txhob poob siab. Kuv yuav pab kom nej dim hauv lub tebchaws uas deb heev rov los, nej yuav tau rov los nyob hauv nej lub tebchaws kaj siab lug. Nej yuav tau rov los nyob tso siab plhuav thiab tsis muaj leejtwg ua rau nej ntshai li lawm. Kuv yuav nrog nraim nej thiab cawm nej; kuv yuav rhuav tej tebchaws uas kuv ntiab nej mus nyob ntawd, tiamsis kuv yuav tsis ua rau nej puastsuaj. Kuv yuav rau txim rau nej, tiamsis kuv tsuas rau raws li nej tej kev txhaum xwb; Kuv yog tus TSWV uas hais li ntawd.” Tus TSWV hais rau nws haivneeg hais tias, “Yuav tsis muaj leejtwg kho tau nej tej qhov txhab; yuav tsis muaj leejtwg kho tau nej tej nqaij uas to kom zoo. Yuav tsis muaj leejtwg tu nej, tsis muaj tshuaj qhwv nej tej qhov txhab, thiab yuav tsis muaj leejtwg kho tau nej. Cov neeg uas hlub nej twb tso nej tseg lawm; lawv tsis quavntsej nej. Kuv tawmtsam nej ib yam li kuv yog nej tus yeebncuab, kuv rau txim rau nej, rau qhov nej ua kev txhaum ntau thiab ua kev phem kev qias heev. Nej tsis txhob nroo txog nej tej mob, yeej tsis muaj leejtwg kho tau. Tej no twb yog kuv rau txim rau nej ntag, rau qhov nej ua kev txhaum ntau thiab ua kev phem kev qias heev. Cov neeg uas nimno ntxo nej noj, lawv yuav raug luag ntxo noj ib yam nkaus, nej tej yeebncuab yuav raug luag ntes coj mus ua qhev huv tibsi. Tej neeg uas tsimtxom nej yuav raug luag tsimtxom, thiab tej neeg uas tuaj huab nej, luag yuav tuaj huab lawv thiab. Txawm yog nej cov yeebncuab thuam hais tias, ‘Luag twb tso lub nroog Xi-oos tseg tsis muaj neeg quavntsej nws los xij.’ Kuv yuav ua kom nej rov noj qab nyob zoo, kuv yuav kho nej tej qhov txhab kom nqawm. Kuv yog tus TSWV uas hais li ntawd.” Tus TSWV hais tias, “Kuv yuav coj kuv haivneeg rov los nyob hauv lawv lub tebchaws, thiab kuv yuav hlub txhua tsevneeg huv tibsi; lawv yuav rov txhim kho lub nroog Yeluxalees dua tshiab, thiab khov vajntxwv lub loog kom rov zoo li qub. Tej neeg uas nyob hauv lub nroog yuav hu nkauj ua tsaug, thiab lawv yuav qw zoo siab kawg li. Kuv yuav foom koob hmoov kom lawv huamvam coob, thiab kuv yuav ua kom lawv tau ntsejmuag. Kuv yuav pub kom haivneeg no muaj hwjchim ib yam li yav thaum ub, kuv yuav tsa lawv lub neej kom nyob ruaj khov; thiab kuv yuav rau txim rau txhua tus uas tsimtxom lawv. Tus TSWV hais tias, “Muaj ib hnub kuv yuav ua cov Yixalayees txhua xeem tus Vajtswv thiab lawv yuav ua kuv haivneeg. Kuv hlub cov Yixalayees uas seem tuag ntawm tiaj suabpuam. Thaum cov Yixalayees xav so, kuv tuaj deb deb tshwm rau lawv pom. Cov Yixalayees, kuv yeej ibtxwm hlub nej, kuv yuav hlub nej mus ibtxhis. Kuv yuav muab nej hloov dua tshiab. Nej yuav rov tau npuaj nej tej nruas, seevcev thiab zoo siab luag ntxhi. Nej yuav rov tau xov vaj cog txiv hmab rau saum tej roob hauv Xamalis, thiab cov neeg uas cog tej txiv hmab yuav tau noj tej txiv hmab uas lawv cog. Muaj ib hnub cov tub fajxwm yuav tuaj saum Efalayees tej roob hu hais tias, ‘Peb cia li mus cuag tus TSWV uas yog peb tus Vajtswv saum lub roob Xi-oos.’ ” Tus TSWV hais tias, “Cia li hu nkauj zoo siab rau haivneeg Yixalayees uas yog haivneeg tseemceeb dua lwm haivneeg. Cia li hu nej tej nkauj qhuas hais tias, ‘Tus TSWV cawm nws haivneeg; nws cawm cov neeg uas seem txhua tus.’ Kuv yuav sau lawv sab qaumteb thiab tim qab ntuj kawg rov los, tsis hais tej neeg tuag tes tuag taw thiab tej neeg digmuag lossis tej pojniam suab menyuam thiab tej uas twb yuav txog caij yug, puavleej yuav los huv tibsi, lawv yuav los sib sau ua ib haivneeg. Thaum kuv coj kuv haivneeg rov los, lawv yuav quaj thiab thov kuv. Kuv yuav coj lawv los txog ntua tej dej cag uas ntshiab si, lawv taug kev tiaj kev tus, lawv yuav tsis ntog. Kuv yog cov Yixalayees leej txiv, thiab Efalayees yog kuv tus tub hlob.” Tus TSWV hais tias, “Txhua haivneeg, nej cia li mloog kuv hais thiab qhia kuv txojlus rau tej tebchaws deb uas nyob raws ntug hiavtxwv. Kuv ua rau kuv haivneeg tawg khiav mus nyob ua sab ua sua, tiamsis kuv yuav sau lawv rov los nyob ua ke thiab kuv yuav tsomkwm lawv ib yam li tus tswv yaj zov nws pab yaj. Kuv tso cov Yixalayees nyob thajyeeb lug, kuv cawm lawv dim ntawm haivneeg uas muaj hwjchim txhais tes. Lawv yuav los hu nkauj luag ntxhi saum lub nroog Xi-oos, kuv pub lawv muaj qoobloo thiab muaj cawv txiv hmab, muaj roj txiv ntoo, muaj yaj, muaj tshis, muaj nyuj thiab muaj nees. Lawv yuav zoo ib yam li lub vaj uas luag ywg dej nraim; lawv yuav muaj txhij muaj txhua raws li lawv xav yuav xav tau. Thaum ntawd tej ntxhais yuav seevcev luag ntxhi, cov txivneej, tsis hais laus thiab hluas yuav zoo siab kawg nkaus. Kuv yuav nplig lawv siab, muab lawv tej kev quaj ntsuag hloov ua kev lomzem, thiab muab lawv tej kev nyuaj siab hloov ua kev zoo siab. Kuv yuav pub cov povthawj muaj noj muaj haus nplua mias, thiab kuv yuav pub kuv haivneeg muaj txhua yam txaus lawv siab. Kuv yog tus TSWV uas hais li ntawd.” Tus TSWV hais tias, “Sawvdaws yuav hnov suab quaj suab nyiav hauv lub nroog Lamas, yog lub suab quaj uas tu siab kawg li. Laxees yuav quaj ntsuag rau nws tej menyuam; tsis muaj leejtwg yuav nplig tau nws siab, rau qhov nws tej menyuam tuag tas lawm. Nej tsis txhob quaj, cia li so kua muag. Txhua yam uas nej ua yuav tawg paj txi txiv, nej cov menyuam yuav rov hauv yeebncuab tej tebchaws los. Nej tseem muaj kev cia siab rau qhov nej tej tubki yuav tau rov los. Kuv yog tus TSWV uas hais li ntawd. “Kuv hnov haivneeg Yixalayees seev hais tias, ‘Tus TSWV, peb zoo ib yam li tus tsiaj uas tsis muaj tswv cob, tiamsis koj cob qhia peb kom mloog koj lus. Thov koj coj peb rov los, peb zoo siab tig rov los cuag tus TSWV uas yog peb tus Vajtswv. Peb khiav ntawm koj mus lawm, tiamsis tsis ntev peb xav rov los cuag koj. Thaum koj rau txim rau peb lawm, peb nyuaj siab heev. Peb poob ntsejmuag thiab txajmuag kawg li, rau qhov thaum peb tseem hluas peb tau ua txhaum lawm.’ “Yixalayees, koj yog kuv tus tub uas kuv hlub heev, koj yog tus menyuam uas kuv hlub tshaj plaws. Thaum twg kuv hais txog koj lub npe, kuv hlub thiab nco txog koj. Kuv nco ntsoov koj rau nruab siab, thiab kuv yuav hlub koj. Koj cia li tshuam nplooj rau txojkev uas koj mus, thiab cia li taug koj txoj qub lw rov los. Yixalayees, koj cia li rov qab los nyob hauv koj tej qub zej qub zos. Nej cov uas tsis muab lub siab npuab kuv, tseem yuav ua xyem xyav mus txog thaum twg? Kuv twb tsim ib yam tshiab uas txawv dua lwm yam rau hauv ntiajteb no lawm: Yam ntawd txawv npaum nkaus li tus pojniam ua tus tsomkwm tus txivneej.” Tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, “Thaum kuv coj lawv rov los nyob rau hauv lawv lub tebchaws, cov uas nyob hauv tej nroog hauv tebchaws Yudas yuav rov hais tias, ‘Thov tus TSWV foom koob hmoov rau lub roob dawbhuv uas yog tus TSWV lub chaw nyob hauv lub nroog Yeluxalees.’ Neeg yuav nyob hauv tebchaws Yudas thiab txhua lub nroog; lawv yuav ua liaj ua teb thiab yug yaj yug tshis ua npoj ntws. Kuv yuav txhawb tej neeg qaug zog kom rov muaj zog, thiab kuv yuav pub tej neeg uas tshaib nqhis kom muaj noj muaj haus. Thaum ntawd sawvdaws yuav hais tias, ‘Kuv tso siab lug pw tsaug zog thiab sawv los muaj zog khov kho.’ “Kuv uas yog tus TSWV hais rau nej hais tias twb txog hnub uas kuv pub kom lub tebchaws Yixalayees thiab Yudas muaj neeg nyob txhua qhov thiab muaj tsiaj txhu ua npoj ntws lawm. Yav tas los kuv rhuav lawv lub neej, tshem lawv tawm, chua lawv kotaw kom lawv ntog, ua rau lawv puastsuaj thiab tso kev ploj kev tuag los raug lawv, tiamsis nimno kuv yuav tsa lawv, txhim kho lawv thiab txhawb lawv lub neej. Thaum txog lub sijhawm ntawd sawvdaws yuav tsis hais ib zaug ntxiv hais tias, ‘Niamtxiv noj txiv qaub ua rau menyuam los qaubncaug.’ Tus uas noj txiv qaub tsuas qaub ntawm nws lub ncauj xwb; txhua tus uas ua txhaum nyias tuag rau nyias txojkev txhaum xwb.” Tus TSWV hais tias, “Twb yuav txog hnub uas kuv coglus tshiab rau cov Yixalayees thiab cov Yudas. Tej lus cog tseg tshiab no yuav tsis zoo li tej lus uas kuv cog tseg rau lawv cov yawgkoob thaum kuv coj lawv tawm nram tebchaws Iziv los. Txawm yog kuv zoo ib yam li lawv txiv los lawv yeej tsis ua raws li kuv tej lus cog tseg. Cov lus cog tseg tshiab uas kuv cog rau cov Yixalayees yog li no: kuv yuav ua kom lawv nco ntsoov kuv tej kevcai rau nruab siab. Kuv yuav ua lawv tus Vajtswv thiab lawv yuav ua kuv haivneeg. Txij no mus tsis tas lawv yuav qhia kom lawv haivneeg paub tus TSWV, rau qhov txhua tus tsis hais tus hlob tus yau yuav paub kuv zoo. Kuv yuav zam txim rau lawv thiab kuv yuav tsis cim ntsoov lawv tej kev txhaum li lawm. Kuv yog tus TSWV uas hais li ntawd.” Tus TSWV ua lub hnub ci pom kev rau nruab hnub, ua lub hli thiab tej hnubqub ci pom kev rau hmo ntuj. Nws do dej hiavtxwv ntas nphau pes nphwv; nws lub npe hu uas tus TSWV uas muaj hwjchim loj kawg nkaus. Nws coglus tseg hais tias lub ntuj lub teb nyob ntev npaum li cas, cov Yixalayees yuav ciaj ua ib haivneeg nyob ntev ib yam li ntawd. Yog leejtwg ntsuas tau saum nruab ntug, lossis ntsuas tau nruab tivtxwv, ces kuv thiaj tso tau cov Yixalayees tseg, txawm yog lawv ua txhaum los kuv tsis tso lawv tseg. Kuv yog tus TSWV uas hais li ntawd. Tus TSWV hais tias, “Twb yuav txog hnub uas kuv txhim kho lub nroog Yeluxalees dua tshiab, txij ntua ntawm lub chaw tsomfaj Hananees sab hnubpoob mus txog ntua ntawm lub Roojvag Ceg Kaum. Lub nroog tus ciam sab hnubpoob pib qhov ntawd mus txog rau saum lub roob Nkalej thiab nkhaus mus cob rau ntawm Nkau-as. Thoob plaws lub hav uas luag faus tuag thiab pov liamsim, thiab tej teb uas nyob raws ntug Hav Kiloos mus txog rau ntawm lub Roojvag Nees mus rau sab hnubtuaj, yuav yog kuv qhov chaw tseemceeb. Yuav tsis muaj leejtwg rhuav lossis ua kom lub nroog no puastsuaj li lawm.” Tus TSWV hais rau kuv thaum uas Xedekiyas ua vajntxwv kav lub tebchaws Yudas tau kaum xyoo, thiab Nenpukajnexales ua vajntxwv kav lub tebchaws Npanpiloos tau kaum yim xyoo. Thaum lub sijhawm uas tus vajntxwv kav lub tebchaws Npanpiloos cov tubrog tuaj tua lub nroog Yeluxalees, kuv raug ntes mus kaw rau hauv vajntxwv lub loog ib chav. Vajntxwv Xedekiyas yog tus uas ntes kuv mus kaw thiab nws kom kuv hais tias, “Vim li cas koj cevlus hais tias, tus TSWV yuav cia tus vajntxwv uas kav lub tebchaws Npanpiloos tuaj txeeb lub nroog Yeluxalees, thiab Vajntxwv Xedekiyas yuav khiav tsis dim. Nws yuav raug vajntxwv Nenpukajnexales ntes mus thiab nrog nws tham tim ntej tim muag. Xedekiyas yuav raug coj mus rau tim tebchaws Npanpiloos, nws yuav nyob tid mus txog hnub uas kuv nrog nws hais tas. Txawm yog nws yuav tawmtsam cov Npanpiloos los nws yuav kov tsis yeej. Kuv yog tus TSWV uas hais li ntawd.” Tus TSWV hais rau kuv hais tias, kuv tus txiv ntxawm Salumes tus tub Hanamees yuav tuaj cuag kuv thiab kom kuv yuav nws thaj teb uas nyob hauv Anathaus, hauv xeem Npeenyamees cheebtsam av, rau qhov kuv yog tus uas txheeb ze nws tshaj thiab yog tus uas muaj cai yuav tau nws thaj teb ntawd los ua kuv tug. Ces txawm muaj raws li tus TSWV hais rau kuv, Hanamees tuaj ntsib kuv ntawm lub tshavpuam kom kuv yuav nws thaj teb. Yog li ntawd, kuv thiaj paub hais tias, yog tus TSWV hais rau kuv tiag. Kuv txawm yuav Hanamees thaj teb, tus nqi yog kaum xya daim nyiaj; kuv thiaj muab nyiaj los luj rau nws. Kuv suam npe rau daim ntawv nias homthawj tabmeeg sawvdaws thiab kuv muab teev los luj nyiaj rau nws. Kuv muab daim ntawv yuav teb uas teev tej lus cog tseg thiab nias homthawj rau thiab daim ntawv uas tsis nias homthawj cob rau Npalus uas yog Neliyas tus tub thiab yog Maxeyas tus xeebntxwv tabmeeg Hanamees, cov timkhawv uas nrog suam npe rau ob daim ntawv yuav teb thiab cov neeg uas tuaj zaum hauv lub tshavpuam ntawd. Kuv hais rau Npalus tabmeeg sawvdaws hais tias, “Tus TSWV uas yog cov Yixalayees tus Vajtswv uas muaj hwjchim loj kawg nkaus samhwm kom koj cia li txais ob daim ntawd no: daim ntawv yuav teb uas teev tej lus cog tseg thiab nias homthawj rau thiab daim ntawv uas tsis nias homthawj mus ntsaws rau hauv ib lub hub cia, thiaj yuav nyob ntev mus yav tom ntej. Tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, tseem yuav muaj neeg yuav vaj yuav tsev, yuav liaj yuav teb thiab yuav vaj txiv hmab nyob hauv lub tebchaws no mus ntxiv.” Tom qab uas kuv muab daim ntawv yuav teb rau Npalus lawm, kuv thov Vajtswv hais tias, “Tus TSWV uas kav ib puas tsav yam, koj lub hwjchim thiab tus zog loj zog nchav tsim lub ntiajteb thiab lub ntuj; tsis muaj ib yam dabtsi nyuaj rau koj ua tsis tau li. Koj qhia koj txojkev hlub uas tsis paub kawg rau ntau txhiab tiam neeg, tiamsis koj rau txim rau neeg vim lawv niam lawv txiv tej kev txhaum. Koj yog Vajtswv tus uas muaj hwvxyeej loj; koj yog tus TSWV uas muaj hwjchim loj kawg nkaus. Koj muaj tswvyim npaj homphiaj thiab koj tes haujlwm loj kawg nkaus. Koj pom txhua yam uas neeg ua, thiab koj muab nqi zog rau lawv raws li lawv tes haujlwm. Ntau xyoo dhau los koj ua tej txujci tseemceeb nram tebchaws Iziv, thiab koj tseem ua tej txujci ntawd rau cov Yixalayees thiab lwm haivneeg pom los txog niaj hnub no. Yog li ntawd, koj lub npe thiaj nrov ncha moo lug mus rau txhua qhov. Twb yog koj ua tej txujci tseemceeb rau peb cov yeebncuab pom, lawv thiaj ntshai heev; koj lub zog thiab koj lub hwjchim coj koj haivneeg Yixalayees nram tebchaws Iziv los. Koj muab lub tebchaws uas av rog thiab zoo qoob rau koj haivneeg raws li koj twb tau coglus rau lawv cov yawgkoob lawm. Tiamsis thaum lawv los nyob hauv lub tebchaws lawm, lawv tsis mloog koj tej lus samhwm lossis ua raws li koj tej lus qhia; lawv tsis ua raws li koj kom lawv ua. Vim li ntawd, koj thiaj tso tej kev puastsuaj los raug lawv. “Cov tubrog Npanpiloos tuaj vij thiab meem ntswg thoob plaws kom tua tau lub nroog. Kev sib ntaus sib tua, kev tshaib kev nqhis thiab kev mob kev nkeeg thiaj ua rau lub nroog poob rau cov yeebncuab tes. Tej uas koj hais thiaj tshwm rau koj pom lawm tiag. Tus TSWV uas kav ib puas tsav yam, koj kom kuv yuav thaj teb tabmeeg cov neeg uas tuaj ua timkhawv, tiamsis nimno lub nroog yuav poob rau cov neeg Npanpiloos tes.” Tus TSWV hais rau kuv hais tias, “Kuv yog tus TSWV uas yog neeg ntiajteb tus Vajtswv. Tsis muaj ib yam dabtsi uas nyuaj rau kuv ua tsis tau li. Kuv yuav muab lub nroog no cob rau Vajntxwv Nenpukajnexales uas kav tebchaws Npanpiloos thiab nws cov tubrog; lawv yuav txeeb lub nroog, thiab zes hluavtaws hlawv lub nroog. Hluavtaws yuav kub lub nroog thiab tej tsev uas lawv mus hlawv khoom saum rutsev fij rau Npa-as thiab hliv cawv txiv hmab fij rau luag tej vajtswv, thiaj ua rau kuv chim. Cov Yixalayees thiab cov Yudas yeej ibtxwm tsis ua raws li kuv siab nyiam, thiab tej uas lawv ua, ua rau kuv chim. Cov neeg uas nyob hauv lub nroog no ua rau kuv chim thiab npautaws txij hnub uas lawv pib rhawv lub nroog los lawm. Kuv twb txiav txim siab yuav muab lub nroog rhuav povtseg, rau qhov cov Yudas thiab cov neeg uas nyob hauv lub nroog Yeluxalees, cov vajntxwv, cov thawjcoj, cov povthawj thiab cov cev Vajtswv lus tau ua kev phem kev qias. Txawm yog kuv qhia lawv tas rov qhia dua los lawv tsis mloog thiab tsis xyaum ua zoo, tiamsis lawv tig nraubqaum rau kuv. Lawv coj lawv tej mlom uas phem qias los tso rau hauv lub Tuamtsev uas yog qhov chaw neeg tuaj pehawm kuv thiab ua rau kuv lub tuamtsev tsis huv lawm. Lawv ua ib lub thaj rau Npa-as hauv lub Hav Hinoos, coj lawv tej tub tej ntxhais mus tua hlawv fij rau tus vajtswv Maulej. Kuv tsis tau hais kom lawv ua tej ntawd, thiab kuv tsis tau xav hais tias lawv yuav ua tej ntawd kom cov Yudas ua txhaum.” Tus TSWV uas yog cov Yixalayees tus Vajtswv hais rau kuv hais tias, “Yelemis, tej neeg hais tias kev tsov kev rog, kev tshaib kev nqhis thiab kev mob kev nkeeg yuav ua rau lub nroog no poob rau tus vajntxwv uas kav tebchaws Npanpiloos tes. Koj cia li mloog kuv yuav hais dua lwm yam ntxiv thiab. Kuv yuav sau lawv hauv cov tebchaws uas kuv ntiab lawv mus nyob thaum kuv chim thiab npautaws rau lawv, kuv yuav coj lawv rov los nyob qhov chaw no thiab cia lawv nyob kaj siab lug. Lawv yuav ua kuv haivneeg thiab kuv yuav ua lawv tus Vajtswv. Kuv yuav pub lawv ua ib lub siab thiab taug ib txojkev, kom lawv hwm kuv txhua lub sijhawm, lawv thiab lawv tej xeebntxwv thiaj tau lub neej zoo. Kuv yuav coglus rau lawv kom nyob mus ibtxhis. Kuv yuav ua zoo rau lawv mus li, thiab kuv yuav ua kom lawv hwm kuv kawg siab kawg ntsws, lawv thiaj tsis tso kuv tseg. Kuv yuav txaus siab ua txhua yam zoo rau lawv thiab pub kom lawv nyob ruaj rau hauv lub tebchaws no mus li. “Kuv tau tso kev txomnyem los rau haivneeg no npaum li cas, kuv yuav pub tej uas zoo rau lawv npaum li ntawd, raws li kuv tau coglus tseg lawm. Tej neeg hais tias lub tebchaws no yuav ua suabpuam tsis muaj neeg lossis tsiaj nyob, thiab yuav muab cob rau cov Npanpiloos. Tiamsis tseem muaj neeg yuav liaj yuav teb hauv lub tebchaws no dua ib zaug ntxiv. Yuav muaj neeg yuav liaj yuav tej teb, ua ntawv suam npe, nias homthawj rau thiab kom neeg tuaj ua timkhawv. Lawv yuav ua li no nyob rau hauv xeem Npeenyamees cheebtsam av, hauv tej zos uas nyob ibncig lub nroog Yeluxalees, hauv cov Yudas tej nroog, cov nroog uas nyob saum tej laj roob, nyob raws tej taw roob thiab hauv tebchaws Yudas sab qabteb. Kuv yuav coj lawv rov los nyob hauv lawv lub tebchaws. Kuv yog tus TSWV uas hais li ntawd.” Thaum uas kuv tseem raug kaw nyob hauv chav uas cov tub fajxwm zov, tus TSWV rov hais rau kuv dua. Tus TSWV uas tsim lub ntiajteb, rhawv lub ntiajteb thiab muab txawb nyob muaj chaw, nws lub npe hu ua tus TSWV, yog tus uas hais rau kuv hais tias, “Koj cia li thov kuv, kuv yuav teb koj; kuv yuav qhia tej txujci tseemceeb uas koj tsis tau paub rau koj. Kuv yog tus TSWV uas yog cov Yixalayees tus Vajtswv hais tias luag yuav tuaj vij lub nroog Yeluxalees, muab tej tsev uas nyob hauv lub nroog thiab cov Yudas tus vajntxwv lub loog rhuav kom puastsuaj tas. Cov Yudas ibtxhia yuav sawv tawmtsam cov Npanpiloos, tiamsis vim kuv txojkev chim thiab npautaws, kuv yuav muab lawv tua kom tuag pawglug rau txhua qhov. Kuv tso lub nroog no tseg, vim cov neeg uas nyob hauv ua phem ua qias. Tiamsis kuv yuav kho lub nroog thiab nws cov neeg kom noj qab nyob zoo. Kuv yuav pub kom lawv nyob tso siab lug tsis ntshai dabtsi. Kuv yuav pub kom cov Yudas thiab cov Yixalayees muaj kev vammeej, thiab kuv yuav txhim kho lawv lub neej ib yam li yav thaum ub. Txawm yog lawv ntxeev siab thiab ua txhaum tawmtsam kuv, los kuv yuav zam lawv lub txim thiab ntxuav lawv tej kev txhaum. Yeluxalees yuav ua qhov chaw rau kuv zoo siab, tau koob meej thiab tau ntsejmuag; txhua haivneeg thoob ntiajteb yuav ntshai ibce tshee hnyo thaum lawv hnov tej txujci tseemceeb uas kuv ua rau cov neeg uas nyob hauv Yeluxalees thiab tej kev vammeej uas kuv pub rau lub nroog ntawd.” Tus TSWV hais tias, “Tej neeg sib tham hais tias qhov chaw no zoo ib yam li lub tiaj suabpuam uas tsis muaj neeg lossis tsiaj nyob. Yeej yog li lawv hais tiag; cov Yudas tej nroog yuav tsis muaj neeg lossis tsiaj nyob thiab tej kev hauv lub nroog Yeluxalees yuav tsis muaj neeg taug li. Tiamsis nej yuav hnov hais tias qhov chaw ntawd rov muaj suab zoo siab thiab suab noj tshoob haus kos. Nej yuav hnov suab hu nkauj zoo siab thiab coj khoom ua tsaug tuaj fij rau kuv hauv lub Tuamtsev; lawv yuav hais tias, ‘Cia li ua tus TSWV uas muaj hwjchim loj kawg nkaus tsaug, rau qhov nws yog tus muaj siab dawb siab zoo thiab nws txojkev hlub nyob mus ibtxhis.’ Kuv yuav ua kom lub tebchaws no rov vammeej ib yam li thaum ub. Kuv yog tus TSWV uas hais li ntawd.” Tus TSWV uas muaj hwjchim loj kawg nkaus hais tias, “Lub tebchaws no zoo ib yam li lub tiaj suabpuam, tsis muaj neeg lossis tsiaj nyob, tiamsis yuav rov ua tshav zaub rau cov tub yug yaj coj lawv tej yaj mus noj zaub. Cov tub yug yaj yuav txheeb lawv tej yaj nyob hauv tej nroog, saum tej laj roob, ntawm tej taw roob, hauv tebchaws Yudas sab qabteb, hauv xeem Npeenyamees cheebtsam av, hauv tej zos uas nyob ibncig lub nroog Yeluxalees thiab hauv cov Yudas tej nroog. Kuv yog tus TSWV uas hais li ntawd.” Tus TSWV hais tias, “Twb yuav txog lub sijhawm uas kuv ua kom txhua yam tiav raws li kuv tej lus cog tseg rau cov Yudas thiab cov Yixalayees. Thaum txog lub sijhawm ntawd, kuv yuav xaiv Daviv ib tug xeebntxwv uas ncaj ncees los ua vajntxwv. Tus vajntxwv ntawd yuav kav lub tebchaws ncaj ncees. Kuv yuav cawm cov Yudas thiab cov neeg hauv lub nroog Yeluxalees kom dim thiab nyob kaj siab lug. Luag yuav hu lub nroog hais tias, ‘Tus TSWV uas yog Peb Txojkev Cawm Dim.’ Tus TSWV hais tias Daviv yuav muaj xeebntxwv los ua vajntxwv kav cov Yixalayees tsis tu ncua, thiab xeem Levis yuav tau ua povthawj ua kuv tes haujlwm uas yog muab tsiaj, qoobloo thiab tej khoom theej txhoj hlawv fij tsis tu ncua rau kuv.” Tus TSWV hais rau kuv hais tias, “Kuv coglus rau nruab hnub thiab hmo ntuj, kom nyias muaj raws li nyias lub caij; lo lus cog tseg ntawd tsis muaj leejtwg rhuav tau li. Kuv tau coglus tseg rau kuv tus tubtxib Daviv ib yam li ntawd hais tias, nws cajces yuav tau ua vajntxwv tsis tu ncua, thiab cov povthawj uas yog xeem Levis los yuav tau ua kuv tes haujlwm mus li; tej lus cog tseg no los tsis pub leejtwg rhuav tau li. Kuv yuav pub kom kuv tus tubtxib Daviv cov xeebntxwv thiab cov povthawj uas yog xeem Levis huamvam coob ib yam li tej hnubqub saum nruab ntug thiab tej suabzeb ntawm ntug hiavtxwv uas tsis muaj leejtwg suav txheeb.” Tus TSWV hais rau kuv hais tias, “Koj puas hnov tej neeg hais tias kuv twb muab ob tsevneeg uas yog cov Yudas thiab cov Yixalayees uas kuv xaiv ntawd tso tseg lawm? Vim li ntawd luag thiaj saib tsis taus kuv haivneeg thiab tsis suav hais tias lawv yog ib haivneeg li. Tiamsis kuv uas yog tus TSWV, kuv twb coglus rau nruab hnub thiab hmo ntuj thiab ua kom muaj kevcai tswj lub ntiajteb thiab lub ntuj. Yeej yuav muaj tseeb raws li kuv tej lus cog tseg no; yog li ntawd, kuv yuav tsis hloov tej lus uas kuv cog tseg rau Yakhauj cov xeebntxwv thiab kuv tus tubtxib Daviv. Kuv yuav xaiv Daviv cov xeebntxwv ib tug los ua thawjcoj kav Anplahas, Ixaj thiab Yakhauj cov xeebntxwv. Kuv yuav hlub kuv haivneeg thiab pub kom lawv rov vammeej dua.” Tus TSWV hais rau kuv thaum lwm haivneeg tej tubrog tuaj pab Vajntxwv Nenpukajnexales uas kav tebchaws Npanpiloos thiab nws cov tubrog thiab cov neeg uas zwm rau nws tuaj ntaus lub nroog Yeluxalees thiab tej nroog uas nyob ze ibncig ntawd. Tus TSWV uas yog cov Yixalayees tus Vajtswv, kom kuv mus hais rau Vajntxwv Xedekiyas uas kav tebchaws Yudas hais tias, “Kuv uas yog tus TSWV, yuav muab lub nroog no cob rau tus vajntxwv uas kav tebchaws Npanpiloos, nws yuav muab hlawv kom kub hnyiab tas. Koj yuav khiav tsis dim li; koj yuav raug luag ntes coj mus cob rau Nenpukajnexales. Koj yuav tau mus ntsib nws thiab nrog nws tham tim ntsej tim muag, ces nws yuav coj koj mus rau tim tebchaws Npanpiloos. Xedekiyas, koj cia li mloog tej lus uas kuv hais txog koj, koj yuav tsis raug tua tuag rau hauv tshavrog. Koj yuav tuag kaj siab lug, luag yuav hlawv tshuaj tsw qab rau koj thiab faus koj ib yam li thaum ub luag hlawv tshuaj tsw qab thiab faus koj cov yawgkoob thiab cov vajntxwv uas tuag ua ntej lawm. Lawv yuav quaj nyiav koj hais tias, ‘Peb tus vajntxwv tuag lawm!’ Kuv yog tus TSWV uas hais li ntawd.” Kuv thiaj coj tus TSWV tej lus mus hais rau Vajntxwv Xedekiyas uas nyob hauv Yeluxalees thaum tus vajntxwv uas kav tebchaws Npanpiloos cov tubrog tuaj tua lub nroog Yeluxalees thiab tua cov Yudas lub nroog Lakhis thiab Axekas uas yog ob lub nroog hauv tebchaws Yudas uas tseem muaj ntsa yeej thaiv. Vajntxwv Xedekiyas thiab cov pejxeem uas nyob hauv lub nroog Yeluxalees coglus hais tias, lawv yuav tso cov Henplais uas ua luag qhev kom dim kev ua qhev, tsis hais pojniam lossis txivneej, kom cov kwvtij Henplais tsis muaj ib tug ua luag qhev li. Cov thawjcoj thiab tej pejxeem sawvdaws pom zoo tso lawv tej qhev thiab tsis yuam lawv ua qhev ntxiv lawm. Lawv tau tso cov qhev ntawd tiag, tiamsis tom qab ntawd tsis ntev, lawv rov hloov siab thiab mus coj cov qhev rov los ua qhev dua. Ces tus TSWV uas yog cov Yixalayees tus Vajtswv kom kuv mus hais rau cov neeg hais tias, “Kuv tau coglus rau nej cov yawgkoob thaum uas kuv tso lawv tawm nram tebchaws Iziv los kom lawv dim ntawm txojkev ua luag qhev. Kuv hais rau lawv hais tias cov neeg Henplais uas nws muab nws muag ua qhev thiab ua haujlwm rau lawv puv rau lub xyoos lawm, xyoo xya lawv yuav tsum tso cov qhev ntawd. Tiamsis nej cov yawgkoob tsis quavntsej lossis tsis mloog kuv hais li. Ob peb hnub uas dhau los ntawd nej tau hloov siab ua kom haum kuv siab nyiam. Nej sawvdaws yeej pom zoo tso nej cov kwvtij Henplais uas ua nej qhev thiab coglus tabmeeg kuv hauv lub Tuamtsev uas nej pehawm kuv. Tiamsis nej rov hloov siab thiab saib tsis tau kuv. Nej rov mus coj cov qhev uas nej twb muab tso mus lawm rov los thiab yuam kom lawv ua nej qhev dua. Yog li ntawd, nimno kuv uas yog tus TSWV hais rau nej hais tias nej yeej tsis mloog kuv lus; nej tsis tso nej tej kwvtij Henplais kom dim kev ua qhev. Yog li ntawd, kuv yuav tso nej nyob ywjpheej: yog kev ywjpheej mus tuag rau hauv tshavrog, tuag rau kev tshaib kev nqhis thiab tuag rau kab mob kev nkeeg. Kuv yuav ua kom txhua haivneeg thoob ntiajteb ntshai vim tej uas kuv ua rau nej. Kuv yuav muab lawv cob rau lawv tej yeebncuab uas nrhiav nrhw tua lawv povtseg, tej tsiaj qus thiab noog yuav los noj lawv. Kuv yuav muab Vajntxwv Xedekiyas uas kav tebchaws Yudas thiab nws cov nomtswv cob rau cov neeg uas nrhiav nrhw tua lawv povtseg. Kuv yuav muab lawv cob rau cov tubrog Npanpiloos uas twb thim rov qab lawm. Kuv yuav hais rau lawv kom lawv tig rov los rau hauv lub nroog. Lawv yuav tua lub nroog, txeeb lub nroog thiab hlawv lub nroog kom kub hnyiab tas. Kuv yuav ua kom cov Yudas tej nroog zoo ib yam li lub tiaj suabpuam uas tsis muaj neeg nyob. Kuv yog tus TSWV uas hais li ntawd.” Thaum uas Yauxiyas tus tub Yehauyakees ua vajntxwv kav tebchaws Yudas, tus TSWV hais rau kuv hais tias, “Koj cia li mus ntsib Lekhas cuab kwvtij thiab nrog lawv tham. Thiab coj lawv tuaj rau hauv lub Tuamtsev ib chav thiab muab cawv txiv hmab rau lawv haus.” Yog li ntawd, kuv thiaj coj Yaxaniyas uas yog dua ib tug Yelemis tus tub, (tus Yelemis no yog Hanpaxiniyas tus tub), thiab tagnrho Yaxaniyas cov kwvtij thiab cov tub uas yog Lekhas cuab kwvtij tuaj rau hauv lub Tuamtsev. Kuv coj lawv mus rau hauv Idaliyas uas yog tus cev Vajtswv lus tus tub Hanas cov tub chav tsev. Chav tsev no nyob txheej saud uas ncaj ntawm Salumes tus tub Ma-axeyas chav. Ma-axeyas yog tug zov lub Tuamtsev tej qhovrooj. Kuv muab ib cov hwj uas muaj cawv puv nkaus thiab ib cov khob los txawb rau ntawm Lekhas cuab kwvtij xubntiag thiab hais rau lawv hais tias, “Sawvdaws haus cawv.” Tiamsis lawv teb hais tias, “Peb tsis haus cawv. Peb yawgkoob Yaunadas uas yog Lekhas tus tub qhia rau peb hais tias, kom peb lossis peb cov xeebntxwv tsis txhob haus cawv hlo li. Nws tseem qhia ntxiv hais tias peb tsis txhob ua vaj ua tsev lossis ua liaj ua teb, lossis cog txiv hmab, lossis yuav cawv txiv hmab li. Thiab nws samhwm ntxiv hais tias kom peb nyob tsevntaub xwb, peb thiaj tau nyob ntev hauv lub tebchaws no, ib yam li cov neeg uas tsis muaj tebchaws. Peb yeej ibtxwm mloog peb yawgkoob Yaunadas uas yog Lekhas tus tub tej lus uas nws ntuas peb. Peb cov no ibtxwm tsis haus cawv txiv hmab, peb tej pojniam menyuam los yeej tsis haus li. Tiamsis thaum Vajntxwv Nenpukajnexales tuaj tua lub tebchaws no, peb thiaj khiav tuaj rau hauv lub nroog Yeluxalees kom peb dim ntawm cov Npanpiloos thiab cov Xilias tej tubrog xwb. Twb yog vim li ntawd peb thiaj los nyob hauv lub nroog Yeluxalees.” Yaunadas cov xeebntxwv mloog nws lus, thiab lawv yeej tsis haus cawv txiv hmab los txog niaj hnub no. Kuv qhia nej ua ntu zus, tiamsis nej tsis mloog kuv lus li. Kuv txib kuv cov tubtxib uas yog cov cevlus tuaj qhia nej tsis tu ncua; lawv qhia kom nej tso nej tej kev phem kev qias tseg thiab ua qhov zoo. Lawv ntuas kom nej tsis txhob pe mlom thiab teev lwm haivneeg tej vajtswv, nej thiaj yuav tau mus nyob hauv lub tebchaws uas kuv muab rau nej cov yawgkoob lawm. Tiamsis nej yeej tsis mloog thiab tsis quavntsej kuv tej lus li. Yaunadas cov xeebntxwv ua raws li lawv yawgkoob tej lus samhwm, tiamsis nej tsis mloog kuv lus li. Yog li ntawd, kuv yog tus TSWV uas yog cov Yixalayees tus Vajtswv uas muaj hwjchim loj kawg nkaus yuav tso tej kev puastsuaj los raug nej cov Yudas thiab cov neeg uas nyob hauv lub nroog Yeluxalees raws li kuv hais tseg lawm. Kuv yuav ua li no rau qhov nej tsis mloog kuv lus, thiab nej tsis teb kuv thaum kuv hu nej.” Kuv thiaj hais rau Lekhas cuab kwvtij tias tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, “Nej mloog nej yawgkoob Yaunadas tej lus uas nws samhwm rau nej; nej ua raws li nws tej lus qhia, thiab nej ua txhua yam raws li nws samhwm. Yog li ntawd, kuv yog tus TSWV uas yog cov Yixalayees tus Vajtswv uas muaj hwjchim loj kawg nkaus, coglus hais tias Lekhas tus tub Yaunadas yuav muaj xeebntxwv los ua kuv tes haujlwm mus li.” Thaum Yauxiyas tus tub Yehauyakees ua vajntxwv kav tebchaws Yudas tau plaub xyoos, tus TSWV hais rau kuv hais tias, “Koj mus muab ib thooj ntawv los sau tej uas kuv qhia rau koj txog cov Yixalayees, cov Yudas thiab txhua haivneeg. Cia li sau txhua yam uas kuv qhia rau koj, txij thaum Yauxiyas ua vajntxwv kav tebchaws Yudas los txog niaj hnub no. Thaum cov Yudas hnov hais tias kuv yuav ua kom lawv puastsuaj, tej zaum lawv yuav tseg tsis ua kev phem kev qias lawm. Kuv yuav zam lawv lub txim thiab tej kev phem kev qias uas lawv ua.” Kuv txawm hu Neliyas tus tub Npalus tuaj thiab kuv piav txhua yam uas tus TSWV qhia rau kuv lawm rau Npalus sau rau hauv ib thooj ntawv. Tom qab ntawd kuv hais rau Npalus hais tias, “Luag txwv tsis pub kuv mus rau hauv lub Tuamtsev. Yog li ntawd, hnub uas sawvdaws tuaj yoo mov hauv lub Tuamtsev raws li kevcai, kuv xav kom koj mus rau tod thiab nyeem thooj ntawv uas tus TSWV kom kuv piav rau koj sau rau sawvdaws mloog, lawv thiaj hnov txhua yam uas tus TSWV hais rau kuv. Koj yuav tsum coj mus nyeem rau qhov chaw uas sawvdaws hnov kom cov Yudas uas tuaj hauv lawv tej nroog tuaj tau hnov txij txhua. Tej zaum lawv yuav thov tus TSWV thiab tso lawv tej kev txhaum tseg, rau qhov tus TSWV qhia hais tias nws yuav rau txim rau lawv, vim nws chim thiab npautaws heev.” Npalus thiaj mus nyeem tus TSWV tej lus hauv lub Tuamtsev rau sawvdaws mloog raws li kuv hais. Thaum Yehauyakees ua vajntxwv kav tebchaws Yudas tau tsib xyoo thiab cuaj hli, cov neeg uas nyob hauv Yeluxalees thiab cov Yudas txawm tuaj rau hauv lawv tej nroog thiab yoo mov raws li kevcai kom tus TSWV txaus siab rau lawv. Thaum Npalus tabtom nyeem thooj ntawv uas sau tej lus uas tus TSWV qhia rau kuv rau sawvdaws mloog hauv lub Tuamtsev. Npalus sawv hauv Safas tus tub Nkemaliyas uas yog tus teev ntawv chav. Chav ntawd nyob txheej saud, ze ntawm lub Roojvag Tshiab uas mus rau hauv lub Tuamtsev. Thaum Nkemaliyas tus tub Mikayas uas yog Safas tus xeebntxwv mloog Npalus nyeem tus TSWV txojlus hauv thooj ntawv tas lawm, Mikayas txawm mus rau hauv tus teev ntawv chav tsev ua haujlwm hauv vajntxwv lub loog; muaj cov nomtswv ntau leej tuaj nyob hauv sablaj: cov nomtswv ntawd yog tus teev ntawv Elisamas, Semayas tus tub Delayas, Akhenpaus tus tub Enathas, Safas tus tub Nkemaliyas, Hananiyas tus tub Xedekiyas thiab cov nomtswv ntau leej tuaj nyob hauv. Mikayas thiaj piav tej uas nws hnov Npalus nyeem rau cov pejxeem mloog ntawd txhua yam rau cov nomtswv. Thaum ntawd cov nomtswv thiaj txib Nethaniyas tus tub Yehudis (Yehudis yawg yog Selemiyas thiab nws yawgkoob yog Kusis), mus hais kom Npalus coj thooj ntawv uas nws nyeem rau sawvdaws mloog tuaj rau lawv saib. Npalus thiaj nqa thooj ntawv ntawd mus rau lawv. Lawv hais rau Npalus hais tias, “Koj cia li zaum thiab nyeem thooj ntawv rau peb mloog.” Yog li ntawd, Npalus thiaj nyeem rau lawv mloog. Thaum nws nyeem cov lus ntawd tas, lawv ntshai heev ib leeg saib ib leeg thiab lawv hais rau Npalus hais tias, “Peb yuav tsum mus qhia zaj no rau vajntxwv paub.” Cov nomtswv nug Npalus hais tias, “Koj cia li qhia rau peb saib ua li cas koj thiaj sau tau tej lus no? Puas yog Yelemis piav rau koj sau?” Npalus teb hais tias, “Yelemis piav tej lus no txhua lo rau kuv, kuv thiaj muab cwjmem sau tej lus ntawd rau hauv thooj ntawd no.” Cov nomtswv hais rau Npalus hais tias, “Koj thiab Yelemis cia li khiav mus nkaum; tsis txhob pub leejtwg paub hais tias neb nyob qhov twg li.” Cov nomtswv muab thooj ntawv ntawd khaws cia rau hauv Elisamas uas yog tus teev ntawv chav tsev ua haujlwm, lawv txawm mus rau hauv vajntxwv chav tsev thiab piav txhua yam rau vajntxwv mloog. Vajntxwv kom Yehudis mus muab thooj ntawv los rau nws. Yehudis thiaj mus rau hauv Elisamas chav tsev ua haujlwm thiab nqa thooj ntawv ntawd los nyeem rau vajntxwv thiab cov nomtswv uas sawv puagncig vajntxwv mloog. Thaum ntawd yog lub caij ntuj no, vajntxwv zaum tsaws nte taws hauv nws lub loog chav uas rauv taws. Thaum Yehudis nyeem tas peb plaub ntus lawm, vajntxwv txawm muab chais hlais tej ntus uas nyeem tas lawm pov hlawv. Nws pheej hlais ib ntus zuj zus li ntawd pov hlawv mus txog thaum thooj ntawv ntawd tas. Tiamsis tsis pom vajntxwv thiab nws cov nomtswv ntshai lossis nyuaj siab txog tej uas lawv hnov ntawd li. Txawm yog Enathas, Delayas thiab Nkemaliyas lawv thov kom vajntxwv tsis txhob muab thooj ntawv ntawd hlawv los vajntxwv tsis mloog lawv hais li. Tom qab ntawd vajntxwv kom Yelamees uas yog vajntxwv tus tub, nrog Aliyees tus tub Xelayas thiab Anpedees tus tub Selemiyas, tuaj ntes kuv thiab Npalus uas yog kuv tus teev ntawv. Tiamsis tus TSWV muab wb zais lawm. Thaum Vajntxwv Yehauyakees muab thooj ntawv uas kuv piav rau Npalus sau ntawd hlawv tas lawm, tus TSWV kom kuv muab dua ib thooj ntawv los sau txhua yam raws li sau rau thawj thooj ntawv lawm. Tus TSWV kom kuv sau rau Yehauyakees hais tias, “Koj muab thooj ntawv ntawd hlawv thiab koj nug Yelemis hais tias, vim li cas nws thiaj sau hais tias tus vajntxwv uas kav tebchaws Npanpiloos yuav tuaj tua lub tebchaws no, luag yuav tua tej neeg thiab tej tsiaj txhu kom tuag tas. Yog li ntawd, nimno kuv uas yog tus TSWV hais rau koj uas yog Vajntxwv Yehauyakees paub hais tias koj cov xeebntxwv yuav tsis muaj ib tug tau nyob saum Daviv lub zwmtxwv kav tebchaws li lawm. Luag yuav muab koj lub cev tuag pov rau sab nraud, nruab hnub tshav ntuj yuav ziab thiab hmo ntuj yuav tsau lwg tsawv. Kuv yuav rau txim rau koj, koj cov xeebntxwv thiab koj cov nomtswv, vim tej kev txhaum uas nej ua. Tsis hais koj lossis koj cov pejxeem uas nyob hauv lub nroog Yeluxalees thiab cov Yudas puavleej tsis mloog kuv tej lus ntuas; yog li ntawd, kuv yuav ua kom nej puastsuaj raws li kuv tau hais tseg lawm.” Tom qab ntawd kuv muab dua ib thooj ntawv los rau kuv tus teev ntawv Npalus uas yog Neliyas tus tub sau txhua yam raws li kuv piav rau nws. Nws sau txhua yam lus raws li cov lus uas kuv piav rau nws sau rau thawj thooj ntawd lawm. Vajntxwv Nenpukajnexales uas kav tebchaws Npanpiloos tsa Yauxiyas tus tub Xedekiyas ua vajntxwv kav tebchaws Yudas hloov Yehauyakees tus tub Yehauyakhees. Tiamsis Xedekiyas cov nomtswv lossis cov pejxeem tsis mloog tej lus uas tus TSWV kom kuv hais rau lawv li. Vajntxwv Xedekiyas txib Selemiyas tus tub Yehukas thiab Ma-axeyas tus tub Xefaniyas uas ua povthawj tuaj kom kuv thov tus TSWV uas yog peb tus Vajtswv pab peb haivneeg. Thaum ntawd luag tseem tsis tau coj kuv mus kaw, kuv tseem nyob ywjpheej thiab mus los ib yam li sawvdaws. Thaum cov tubrog Npanpiloos tabtom vij lub nroog Yeluxalees, lawv hnov hais tias cov tubrog Iziv twb hla Iziv tus ciamteb tuaj lawm, ces cov tubrog Npanpiloos txawm cia li thim rov qab. Tom qab ntawd tus TSWV uas yog cov Yixalayees tus Vajtswv kom kuv hais rau Xedekiyas hais tias, “Iziv cov tubrog uas tuaj pab nej, lawv yuav rov mus tsev. Ces cov tubrog Npanpiloos yuav rov tuaj tua, txeeb lub nroog thiab muab hlawv povtseg. Kuv uas yog tus TSWV hais rau nej hais tias nej tsis txhob tso siab hais tias cov Npanpiloos yuav tsis rov tuaj tua nej lawm, lawv yeej yuav rov tuaj xwb. Txawm yog nej tua cov tubrog Npanpiloos swb lawm los tshuav lawv cov tubrog uas raug mob pw hauv tej tsevntaub tseem yuav sawv los hlawv lub nroog povtseg.” Cov tubrog Npanpiloos thim ntawm lub nroog Yeluxalees mus, rau qhov cov tubrog Iziv tuaj ze lawm. Yog li ntawd, kuv thiaj sawv kev tawm hauv lub nroog Yeluxalees mus rau pem xeem Npeenyamees cheebtsam av, mus saws kuv tsevneeg thaj av ua kuv tug. Tiamsis thaum kuv mus txog ntawm lub Roojvag Npeenyamees, Selemiyas tus tub Iliyas uas yog Hananiyas tus xeebntxwv thiab yog tus thawj saib cov tubrog zov roojvag, txawm thaiv kuv kev thiab hais rau kuv hais tias, “Koj yuav mus thawj cov Npanpiloos puas yog?” Kuv teb hais tias, “Tsis yog li koj hais! Tsis yog kuv mus thawj lawv.” Tiamsis Iliyas tsis ntseeg kuv. Nws cia li ntes kuv mus cuag cov nomtswv. Cov nomtswv npautaws heev rau kuv, lawv thiaj kom luag nplawm kuv thiab coj kuv mus kaw rau hauv Yaunathas uas yog ib tug teev ntawv lub tsev, luag muab lub tsev ntawd ua tsev lojcuj. Lawv muab kuv kaw rau txheej hauv av, kuv nyob rau hauv tau ntev loo. Tom qab ntawd, Vajntxwv Xedekiyas txib neeg tuaj tso kuv tawm los; vajntxwv nug kuv twjywm hauv nws lub loog hais tias, “Tus TSWV puas muaj dabtsi hais rau koj?” Kuv teb hais tias, “Muaj, tus TSWV hais tias nws yuav muab koj cob rau tus vajntxwv uas kav tebchaws Npanpiloos.” Kuv nug Xedekiyas hais tias, “Kuv ua txhaum dabtsi rau koj thiab koj cov nomtswv lossis koj cov pejxeem, koj thiaj ntes kuv mus kaw rau hauv tsev lojcuj? Koj cov cev Vajtswv lus uas hais rau koj hais tias, ‘Tus vajntxwv uas kav tebchaws Npanpiloos yuav tsis tuaj tua koj lossis lub tebchaws no dua twg tas lawm?’ Vajntxwv, thov koj mloog thiab ua raws li tej lus uas kuv thov koj. Thov koj tsis txhob xa kuv rov mus kaw rau hauv Yaunathas lub tsev lawm. Yog koj ua li ntawd, kuv yeej yuav tuag rau tod xwb.” Yog li ntawd, Vajntxwv Xedekiyas thiaj kom luag muab kuv kaw rau hauv nws lub loog ib chav uas muaj tubrog zov, thiab nws kom cov neeg cub ncuav ntawm ntug kev nqa ncuav tuaj rau kuv noj txhua hnub nyob qhov ntawd mus txog thaum tsis muaj ncuav nyob hauv lub nroog li lawm. Mathas tus tub Sefatiyas, Pasehus tus tub Nkedaliyas, Selemiyas tus tub Yehukas, thiab Makhiyas tus tub Pasehus hnov tus TSWV tej lus uas kuv qhia lawv hais tias, “Yog leejtwg nyob hauv lub nroog no yuav tuag tas rau hniav ntaj hniav riam lossis kev tshaib kev nqhis lossis kab mob kev nkeeg. Tiamsis yog leejtwg mus thawj cov Npanpiloos, nws yuav dim txojsia tsis raug luag tua.” Kuv hais rau lawv hais tias tus TSWV hais li no: “Kuv yuav muab lub nroog no cob rau tus vajntxwv uas kav tebchaws Npanpiloos tej tubrog, thiab lawv yuav txeeb tau lub nroog.” Cov nomtswv thiaj mus hais rau vajntxwv hais tias, “Tsimnyog muab tus txivneej no tua povtseg. Rau qhov nws hais tej lus no ua rau cov tubrog uas nyob hauv lub nroog poob siab, thiab nws hais ib yam li ntawd rau cov neeg uas tseem nyob hauv lub nroog. Nws tsis nrhiav kev pab sawvdaws; nws tsuas xav kom sawvdaws ntxhov siab xwb.” Vajntxwv Xedekiyas teb hais tias, “Cia li ua raws li nej hais! Nej yuav ua li cas rau nws los nyob ntawm nej; kuv tsis txwv nej li.” Yog li ntawd, cov nomtswv thiaj tuaj coj kuv mus thiab muab hlua dauv kuv rau hauv vajntxwv tus tub Makhiyas lub qhovtshij uas nyob hauv lub tshavpuam ntawm vajntxwv lub loog. Lub qhovtshij ntawd tsis muaj dej, tsuas muaj av nkos xwb, kuv thiaj nyob tsau tsawv cov av nkos ntawd. Enpemelej uas yog neeg Sudas ua haujlwm nyob hauv vajntxwv lub loog hnov hais tias, lawv coj kuv mus tso rau hauv lub qhovtshij qhuav lawm. Thaum ntawd vajntxwv tseem nrog nws cov nomtswv sablaj ntawm lub Roojvag Npeenyamees. Yog li ntawd, Enpemelej thiaj mus qhia rau vajntxwv hais tias, “Vajntxwv, tej uas cov neeg no ua rau Yelemis, lawv ua tsis yog lawm. Lawv coj nws mus kaw rau hauv lub qhovtshij qhuav, ces nws yeej yuav tuag tshaib xwb, rau qhov tsis muaj mov nyob hauv lub nroog no li lawm.” Thaum vajntxwv hnov li ntawd, nws kom Enpemelej coj peb tug neeg nrog nws tuaj rub kuv tawm hauv lub qhovtshij ntawd los ua ntej kuv tuag. Enpemelej thiaj coj cov txivneej ntawd nrog nws mus hauv chav tsev rau khoom hauv vajntxwv lub loog thiab muab tej qub ris tsho ua hlua dauv los rau kuv. Nws hais kom kuv muab tej qub ris tsho ntawd xiab kuv ob lub qhovtso, txoj hlua thiaj tsis zawm kuv. Kuv thiaj ua li ntawd, lawv thiaj muab hlua rub kuv tawm hauv lub qhovtshij qhuav los. Lawv coj kuv rov los nyob hauv chav uas muaj tubrog zov hauv vajntxwv lub loog. Vajntxwv Xedekiyas kom neeg tuaj coj kuv mus cuag nws ntawm lub Tuamtsev lub qhovrooj peb. Vajntxwv hais rau kuv hais tias, “Kuv yuav nug koj ib los, koj cia li qhia ncaj rau kuv tsis txhob zais li.” Kuv teb nws hais tias, “Yog kuv qhia tseeb rau koj, koj yuav muab kuv tua povtseg thiab yog kuv pab koj tuavxam los koj yuav tsis mloog kuv tej lus.” Vajntxwv Xedekiyas coglus twjywm rau kuv hais tias, “Vajtswv yog tus muaj sia nyob, nws pub peb muaj sia, nws nyob saud pom, kuv yuav tsis tua koj lossis muab koj cob rau cov neeg uas xav muab koj tua povtseg.” Kuv hais rau Xedekiyas hais tias tus TSWV uas yog cov Yixalayees tus Vajtswv uas muaj hwjchim loj kawg nkaus hais li no, “Yog koj yeem mus thawj tus vajntxwv uas kav tebchaws Npanpiloos tej tubrog, luag yuav tsis tua koj thiab tsis hlawv lub nroog no. Koj thiab koj tsevneeg yuav muaj sia nyob, tiamsis yog koj tsis yeem mus thawj luag, ces kuv yuav muab lub nroog no cob rau tus vajntxwv uas kav tebchaws Npanpiloos cov tubrog. Lawv yuav muab lub nroog no hlawv thiab koj yuav khiav tsis dim ntawm lawv li.” Tiamsis Vajntxwv Xedekiyas teb hais tias, “Kuv ntshai nyob tsam cov Npanpiloos muab kuv cob rau peb cov neeg Yudas uas twb khiav mus thawj lawv lawm tsimtxom xwb.” Kuv hais rau vajntxwv hais tias, “Yuav tsis muaj leejtwg muab koj cob rau cov neeg ntawd. Kuv thov kom koj ua raws li tus TSWV tej lus uas kuv qhia rau koj no; koj thiaj tsis raug luag tua thiab nyob tso siab plhuav. Tiamsis yog koj tsis yeem mus thawj cov tubrog Npanpiloos, ces yuav muaj raws li tus TSWV ua rau kuv ua yogtoog pom lawm. Hauv zaj yogtoog ntawd kuv pom tej pojniam uas seem nyob hauv tus vajntxwv uas kav tebchaws Yudas lub loog raug luag coj mus cob rau tus vajntxwv uas kav tebchaws Npanpiloos tej tubrog. Koj cia li mloog tej lus uas cov pojniam sib tham thaum lawv taug kev, lawv hais tias, ‘Vajntxwv tej phoojywg tau dag ntxias nws lawv yuam nws ua raws li lawv siab xav. Nimno nws ob txhais kotaw zom pas av lawm, nws tej phoojywg khiav tas thiab tso nws tseg.’ ” Tom qab ntawd kuv hais tias, “Luag yuav coj koj tej pojniam tubse mus cob rau cov Npanpiloos, txawm yog koj los yuav tsis dim li. Tus vajntxwv uas kav tebchaws Npanpiloos yuav ntes koj thiab muab lub nroog no hlawv povtseg.” Vajntxwv Xedekiyas teb hais tias, “Koj tsis txhob qhia tej no rau leejtwg paub, luag thiaj tsis tua koj. Yog cov nomtswv paub hais tias kuv tuaj nrog koj tham, lawv yuav nug koj saib wb tau sib tham dabtsi. Lawv yuav hais tias yog koj qhia tej no rau lawv, lawv yuav tsis tua koj povtseg. Koj cia li hais rau lawv hais tias yog koj tuaj thov kom kuv tsis txhob xa koj rov mus kaw kom tuag rau tom tsev lojcuj xwb.” Tom qab ntawd cov nomtswv txawm tuaj nrhiav kuv thiab nug kuv. Kuv qhia rau lawv raws li uas vajntxwv hais rau kuv, ces lawv txawm tsis nug kuv ntxiv lawm, rau qhov tsis muaj leejtwg hnov zaj uas wb sib tham ntawd li. Luag kav kuv nruj nyob rau hauv chav uas muaj tubrog zov hauv vajntxwv lub loog mus txog hnub uas luag txeeb tau lub nroog Yeluxalees lawm. Thaum Xedekiyas ua vajntxwv kav tebchaws Yudas tau cuaj xyoos, lub kaum hli ntuj, Vajntxwv Nenpukajnexales uas kav tebchaws Npanpiloos coj tagnrho nws cov tubrog tuaj tua lub nroog Yeluxalees. Thaum Xedekiyas ua vajntxwv kav tebchaws Yudas tau kaum ib xyoos, hnub xiab cuag lub plaub hlis ntuj, luag tuaj tsoo tus ntsa yeej mus rau hauv lub nroog. ( Thaum luag txeeb tau lub nroog Yeluxalees lawm, tus vajntxwv uas kav tebchaws Npanpiloos cov nomtswv txawm los teeb chaw ua haujlwm rau ntawm lub Roojvag Nruab Nrab. Cov nomtswv ntawd yog Nenkas Xalexes, Xankas Nenpaus, Xaxekhimes thiab muaj dua ib tug Nenkas Xalexes.) Thaum Vajntxwv Xedekiyas thiab nws cov tubrog pom tej xwm no, lawv tawm khiav thaum ib tag hmo hla vajntxwv lub vaj mus rau ntawm lub roojvag uas nyob kem nruab nrab ntawm ob txheej ntsa yeej mus rau tom lub hav Yauladees lawm. Tiamsis cov tubrog Npanpiloos caum lawv qab mus, ntes tau Vajntxwv Xedekiyas ntawm lub tiaj nrag uas nyob ze lub nroog Yelikaus. Lawv coj nws mus cob rau Vajntxwv Nenpukajnexales ntawm lub nroog Lilas uas nyob hauv cheebtsam Hamas, thiab Nenpukajnexales txiav txim rau Xedekiyas qhov ntawd. Nenpukajnexales muab Xedekiyas cov tub tua tabmeeg Xedekiyas hauv lub nroog Lilas, thiab nws kom luag muab cov Yudas tej nomtswv tua huv tibsi. Tom qab ntawd, nws muab Xedekiyas ob lub qhovmuag kaus povtseg thiab muab sawv hlau khi Xedekiyas cab mus rau tebchaws Npanpiloos lawm. Thaum ntawd cov tubrog Npanpiloos hlawv Xedekiyas lub loog thiab cov pejxeem tej vajtse kub hnyiab tas thiab tsoo lub nroog Yeluxalees tus ntsa yeej pob tas. Thaum kawg Nenpuxaladas uas yog tus thawj tubrog txawm ntes cov neeg uas seem nyob hauv lub nroog thiab cov neeg uas los thawj nws, coj mus rau tebchaws Npanpiloos lawm. Nws tseg cov neeg txomnyem uas tsis muaj liaj teb nyob hauv tebchaws Yudas; nws muab tej vaj txiv hmab thiab tej liaj teb faib rau lawv. Vajntxwv Nenpukajnexales kom Nenpuxaladas uas yog nws tus thawj tubrog hais rau cov tubrog hais tias, “Nej cia li mus nrhiav kom tau Yelemis thiab ua zoo tu nws. Nej tsis txhob ua phem rau nws, yog nws xav tau dabtsi, nej cia li muab rau nws.” Yog li ntawd, Nenpuxaladas uas yog tus thawj tubrog thiaj nrog Nenpusanpas uas yog tus nomtswv loj, Nenkas Xalexes thiab lwm tus uas yog cov Npanpiloos tus vajntxwv cov nomtswv tuaj tso kuv tawm hauv chav uas muaj tubrog zov hauv vajntxwv lub loog los. Lawv tso kuv rau Ahikas tus tub Nkedaliyas uas yog Safas tus xeebntxwv coj kuv mus kom txog tsev. Yog li ntawd, kuv thiaj tau nrog kuv cov neeg nyob ua ke. Thaum kuv tseem raug kaw rau hauv chav uas muaj tubrog zov hauv vajntxwv lub loog, tus TSWV kom kuv mus hais rau Enpemelej uas yog neeg Sudas hais tias tus TSWV uas yog cov Yixalayees tus Vajtswv uas muaj hwjchim loj kawg nkaus hais li no: “Kuv yuav ua kom lub nroog no puastsuaj raws li kuv tau hais tseg lawm, tsis yog ua kom vammeej. Koj yuav pom ntsoov lub nroog no puastsuaj. Tiamsis hnub ntawd kuv uas yog tus TSWV yuav cawm koj thiab yuav tsis muab koj cob rau cov neeg uas koj ntshai. Kuv yuav cawm koj kom dim, koj yuav tsis raug hniav ntaj hniav riam tuag. Tiamsis koj yuav muaj sia ua neej nyob, rau qhov koj tso siab rau kuv. Kuv yog tus TSWV uas hais li ntawd.” Tus TSWV hais rau kuv tom qab Nenpuxaladas uas yog tus thawj tubrog tso kuv tawm hauv Lamas. Luag muab saw hlau khi kuv coj nrog cov neeg hauv lub nroog Yeluxalees thiab cov Yudas uas raug ntes mus rau tebchaws Npanpiloos. Tus thawj tubrog coj kuv mus rau ib cag thiab hais rau kuv hais tias, “Tus TSWV uas yog koj tus Vajtswv ua rau lub tebchaws no puastsuaj tas, nimno nws ua raws li nws tau hais tseg lawm. Tej no tshwmsim twb yog vim koj cov neeg ua txhaum rau tus TSWV thiab tsis mloog nws lus. Nimno kuv yuav daws txoj saw hlau uas khi koj ob txhais tes thiab tso koj. Yog koj xav nrog kuv mus rau tebchaws Npanpiloos los tau, kuv yuav saib xyuas koj. Tiamsis yog koj tsis xav nrog kuv mus los tau. Muab lub tebchaws no rau koj xaiv, koj yuav mus nyob qhov twg los tau raws li koj nyiam.” Thaum kuv tseem tsis tau teb, Nenpuxaladas hais rau kuv hais tias, “Koj cia li mus nrog Ahikas tus tub Nkedaliyas uas yog Safas tus xeebntxwv nyob; tus vajntxwv uas kav tebchaws Npanpiloos tsa nws ua tswvxeev saib tej nroog hauv tebchaws Yudas. Koj cia li mus nrog nws thiab cov pejxeem nyob, lossis koj xav mus nyob qhov twg los nyob ntawm koj siab nyiam.” Nws muab ib qho khoom thiab zaub mov noj rau kuv thiab tso kuv rov los lawm. Kuv thiaj mus nrog Nkedaliyas thiab cov pejxeem uas seem nyob hauv lub nroog Mixepas hauv lub tebchaws. Cov Yudas cov nomtswv thiab cov tubrog qee leej uas tsis kam mus thawj cov Npanpiloos hnov hais tias tus vajntxwv uas kav lub tebchaws Npanpiloos tsa Nkedaliyas uas yog Ahikas tus tub ua tswvxeev kav lub tebchaws thiab kav cov neeg txomnyem uas tsis raug ntes coj mus rau tim tebchaws Npanpiloos, lawv thiaj tsis kam zwm rau cov neeg Npanpiloos. Yog li ntawd, Nethaniyas tus tub Yisamayees, Kaleyas tus tub Yauhanas, Tahumes tus tub Xelayas, Efayis cov tub uas nyob hauv lub nroog Netaufas thiab Yexaniyas uas nyob hauv Ma-akas nrog lawv cov neeg mus cuag Nkedaliyas hauv lub nroog Mixepas. Nkedaliyas hais rau lawv hais tias, “Nej cia li los thawj cov Npanpiloos tsis txhob ntshai. Nej cia li nyob hauv lub tebchaws no thiab zwm rau tus vajntxwv uas kav tebchaws Npanpiloos, nej thiaj yuav tau nyob kaj siab lug. Kuv yuav nyob hauv Mixepas no thiab thaum cov Npanpiloos tuaj, kuv yuav ua tus sawv cev nej sawvdaws. Tiamsis nej cia li rov mus nyob hauv nej tej zos, sau tej cawv txiv hmab, tej txiv hmab txiv ntoo, thiab roj txiv ntoo los cia rau hauv txhab thiab ntim rau hauv hub.” Thaum cov Yudas uas nyob hauv tebchaws Mau-am, Amoos, Edoos thiab cov uas nyob lwm tebchaws hnov hais tias tus vajntxwv uas kav tebchaws Npanpiloos tso cai rau cov Yudas ibtxhia nyob hauv tebchaws Yudas, thiab nws tsa Nkedaliyas ua tus tswvxeev kav lawv. Yog li ntawd, lawv thiaj rov hauv tej tebchaws uas lawv raug ntiab mus nyob rov los rau hauv tebchaws Yudas. Lawv mus cuag Nkedaliyas hauv Mixepas, lawv sau tau cawv txiv hmab thiab txiv hmab txiv ntoo ntau kawg li. Tom qab ntawd Yauhanas thiab cov thawj tubrog uas tsis kam mus thawj cov Npanpiloos tuaj cuag Nkedaliyas hauv Mixepas, lawv hais rau nws hais tias, “Koj puas paub hais tias Vajntxwv Npa-alis uas kav tebchaws Amoos txib Yisamayees tuaj tua koj?” Tiamsis Nkedaliyas tsis ntseeg tej lus uas lawv hais. Yauhanas mus hais twjywm tau Nkedaliyas hais tias, “Thov cia kuv mus muab Yisamayees tua povtseg tsis pub kom leejtwg paub. Vim li cas yuav cia nws tuaj tua koj? Yog ua li ntawd, yuav ua rau cov Yudas uas los nrog koj nyob tawg mus nyob ua sab ua sua thiab yuav ua rau cov neeg uas seem nyob hauv tebchaws Yudas raug kev puastsuaj.” Tiamsis Nkedaliyas teb hais tias, “Koj tsis txhob ua li ntawd! Tej uas koj hais txog Yisamayees ntawd tsis muaj tseeb!” Xyoo ntawd thaum lub xya hli ntuj, Nethaniyas tus tub Yisamayees uas yog Elisamas tus xeebntxwv yog cajceg vajntxwv thiab yog vajntxwv ib tug nomtswv loj, txawm coj kaum leej tubrog tuaj cuag Nkedaliyas hauv Mixepas. Thaum lawv tabtom noj mov ua ke, Yisamayees thiab nws kaum leej tubrog txawm rho lawv tej ntaj tua Nkedaliyas tuag. Yisamayees tseem tua cov Yixalayees txhua tus uas nrog Nkedaliyas nyob hauv Mixepas thiab cov tubrog Npanpiloos uas tuaj nyob hauv tuag tas huv tibsi. Hnub tom qab thaum uas tsis tau muaj neeg paub hais tias Nkedaliyas raug tua tuag, muaj yim caum leej txivneej tuaj hauv Sekhees, Silaus thiab Xamalis tuaj txog. Lawv chais lawv tej hwjtxwv, dua lawv tej ris tsho thiab lawv rov hlais lawv lub cev. Lawv coj qoobloo thiab hmoov tshuaj tsw qab mus fij rau hauv lub Tuamtsev. Ces Yisamayees txawm ua txuj tsa suab hlo quaj tawm hauv Mixepas tuaj tos lawv. Thaum nws pom dheev lawv, nws hais rau lawv hais tias, “Thov nej los xyuas Nkedaliyas.” Thaum lawv mus txog hauv lub nroog lawm, Yisamayees thiab nws cov tubrog txawm muab lawv tua thiab coj mus pov rau hauv ib lub qhovtshij. Tiamsis lawv pab ntawd muaj kaum leej hais rau Yisamayees hais tias, “Thov koj tsis txhob tua peb! Peb muaj qib, muaj nplej, muaj roj txiv ntoo thiab muaj zib ntab nyob hauv peb tej teb.” Yog li ntawd, nws thiaj tsis tua lawv. Lub qhovtshij uas Yisamayees muab cov neeg uas nws tua pov rau hauv loj heev uas yog Vajntxwv Axas khawb thaum lub sijhawm cov Yixalayees tus Vajntxwv Npasas tuaj tua nws. Yisamayees muab cov neeg uas nws tua pov puv nkaus rau hauv lub qhovtshij ntawd. Yisamayees ntes vajntxwv cov ntxhais thiab tagnrho cov pejxeem uas tus thawj tubrog Nenpuxaladas tseg rau Nkedaliyas saib nyob hauv Mixepas. Yisamayees coj cov neeg uas nws ntes ntawd mus rau tebchaws Amoos lawm. Thaum Yauhanas thiab cov thawj tubrog uas nrog nws hnov tej xwm uas Yisamayees tua neeg ntawd, lawv txawm coj lawv cov tubrog mus caum cuag Yisamayees rau ntawm lub pasdej loj hauv Nkinpe-oos. Thaum cov neeg uas Yisamayees ntes pom Yauhanas thiab cov thawj tubrog uas nrog nws mus ntawd, lawv zoo siab heev, thiab lawv khiav mus rau ntawm Yauhanas. Tiamsis Yisamayees thiab nws yim leej tubrog khiav dim mus rau tebchaws Amoos lawm, Yauhanas ntes tsis tau li. Yauhanas thiab cov thawj tubrog uas nrog nws mus thiaj coj cov neeg uas Yisamayees ntes hauv Mixepas mus rov qab los, tom qab uas Nkedaliyas raug tua tuag lawm, tsis hais cov tubrog, cov pojniam menyuam thiab cov neeg uas ua haujlwm hauv vajntxwv lub loog rov qab hauv Nkinpe-oos los. Kale-as tus tub Yauhanas thiab Hausayas tus tub Axaliyas, thiab cov thawj tubrog txhua tus nrog cov pejxeem sawvdaws, tsis hais tus hlob tus yau tuaj hais rau kuv hais tias, “Thov koj mloog peb tej lus thov! Koj cia li thov tus TSWV uas yog peb tus Vajtswv pab peb cov uas seem nyob ntawm no. Yav tas los peb muab coob, tiamsis nimno peb tshuav tsawg heev raws li koj pom no lawm xwb. Koj thov tus TSWV uas yog peb tus Vajtswv qhia rau peb saib peb yuav mus qhov twg thiab peb yuav ua li cas.” Kuv teb lawv hais tias, “Kuv pom zoo. Kuv yuav thov tus TSWV uas yog peb tus Vajtswv raws li nej tej lus thov saib nws teb li cas, kuv mam li qhia rau nej paub. Kuv yuav tsis zais ib los li.” Lawv hais rau kuv hais tias, “Thov tus TSWV ua timkhawv ncaj thiab tseeb rau peb, yog peb tsis ua raws li tus TSWV uas yog peb tus Vajtswv tej lus samhwm rau peb. Txawm yog tej lus teb uas peb kom koj thov tus TSWV uas yog peb tus Vajtswv yuav haum peb siab thiab tsis haum los peb yuav mloog nws lus. Yog hais tias peb mloog nws lus, peb yuav noj qab nyob zoo.” Kaum hnub tom qab, tus TSWV hais rau kuv; yog li ntawd, kuv thiaj hu Yauhanas thiab cov thawj tubrog uas nrog nws nyob thiab cov pejxeem tuaj. Kuv hais rau lawv hais tias, “Tus TSWV uas yog cov Yixalayees tus Vajtswv uas nej kom kuv thov nws hais tias, ‘Yog nej txaus siab nyob hauv tebchaws no, kuv yuav tsis rhuav nej, tiamsis yuav pab kom nej vammeej; kuv yuav cog nej kom ruaj thiab tsis dob nej povtseg. Txojkev puastsuaj uas kuv tso los raug nej, ua rau kuv tu siab kawg li. Nej tsis txhob ntshai tus vajntxwv uas kav tebchaws Npanpiloos. Kuv yuav nrog nraim nej thiab yuav pab nej kom dim ntawm nws lub hwjchim. Rau qhov kuv yog tus muaj txojkev hlub, kuv yuav ua kom nws muaj lub siab hlub nej thiab tso nej rov mus tsev. Kuv yog tus TSWV uas hais li ntawd.’ tej kev tsov kev rog uas nej ntshai yuav los raug nej, thiab kev tshaib kev nqhis uas nej txhawj yuav caum tau nej; nej yuav tuag tas rau nram tebchaws Iziv. Txhua tus uas txiav txim siab khiav mus rau nram tebchaws Iziv yuav tuag tas rau hniav ntaj hniav riam lossis kev tshaib kev nqhis lossis kab mob kev nkeeg. Lawv yuav tsis muaj ib tug khiav dim txojkev puastsuaj uas kuv tso los rau lawv ntawd li.’ “Tus TSWV uas yog cov Yixalayees tus Vajtswv hais tias, ‘Kuv txojkev chim thiab npautaws tau phwj tuaj raug cov neeg uas nyob hauv lub nroog Yeluxalees li cas, ces kuv txojkev chim thiab npautaws yuav phwj los raug nej thaum nej khiav mus nyob nram tebchaws Iziv ib yam li ntawd. Nej yuav raug txob thuam thiab luag yuav tuav nej lub npe foom tsis zoo. Luag yuav ntshai thiab tsis xav pom nej, thiab nej yuav tsis tau rov los pom lub tebchaws no ntxiv li lawm.’ ” Kuv hais ntxiv hais tias, “Tus TSWV hais kom nej cov uas seem nyob hauv tebchaws Yudas no, tsis txhob tsiv mus rau nram tebchaws Iziv. Yog li ntawd, hnub no kuv ntuas nej hais tias nej tau ua yuam kev lawm. Nej kom thov tus TSWV uas yog peb tus Vajtswv pab nej, thiab nej coglus hais tias nej yuav ua txhua yam raws li tus TSWV tej lus samhwm. Nimno kuv twb qhia txhua yam rau nej lawm, tiamsis nej tsis mloog tus TSWV uas yog peb tus Vajtswv tej lus uas nws txib kuv tuaj qhia rau nej no li. Yog li ntawd, nej nco hais tias nej yuav raug hniav ntaj hniav riam, kev tshaib kev nqhis thiab kab mob kev nkeeg tuag tas rau hauv lub tebchaws uas nej xav mus nyob ntawd.” Thaum kuv piav tus TSWV uas yog lawv tus Vajtswv tej lus txhua yam uas nws txib kuv mus qhia rau lawv tas. Ces Axaliyas uas yog Hausayas tus tub, Kaleyas tus tub Yauhanas thiab cov neeg khavtheeb txawm hais rau kuv hais tias, “Koj dag xwb. Tus TSWV uas yog peb tus Vajtswv yeej tsis tau txib koj tuaj hais kom peb tsis txhob tsiv mus nyob nram tebchaws Iziv. Yeej yog Neliyas tus tub Npalus rau tswvyim rau koj tuaj tawmtsam peb, muab peb cob rau cov Npanpiloos kom tua peb lossis ntes peb coj mus rau tim tebchaws Npanpiloos xwb.” Yog li ntawd, tsis hais Yauhanas lossis cov thawj tubrog lossis cov pejxeem yeej tsis mloog tus TSWV uas yog lawv tus Vajtswv tej lus samhwm kom nyob twjywm hauv lub tebchaws Yudas li. Ces Yauhanas thiab cov thawj tubrog thiaj coj cov pejxeem uas nyob hauv lub tebchaws Yudas thiab cov neeg uas raug ntiab tawm mus nyob lwm tebchaws rov qab los ntawd huv tibsi mus rau nram tebchaws Iziv lawm: tsis hais cov txivneej, tej pojniam menyuam, vajntxwv cov ntxhais, cov neeg uas tus thawj tubrog Nenpuxaladas tso rau Nkedaliyas saib, thiab coj Npalus thiab kuv nrog lawv mus. Lawv tsis mloog tus TSWV tej lus samhwm, lawv mus nyob rau nram tebchaws Iziv thiab mus nyob rau hauv lub nroog Tapahes. Thaum peb nyob ntawm Tapahes, tus TSWV hais rau kuv tias, “Koj cia li muab ib cov pobzeb loj los faus rau hauv plawv txojkev uas pua roj hmab uas mus rau ntawm Vajntxwv Falaus lub loog uas nyob hauv lub nroog Tapahes. Koj ua li no rau cov Yudas saib ntsoov. Koj qhia rau lawv hais tias kuv yog tus TSWV uas yog cov Yixalayees tus Vajtswv uas muaj hwjchim loj kawg nkaus yuav coj kuv tus tubtxib uas yog Vajntxwv Nenpukajnexales uas kav tebchaws Npanpiloos tuaj rau ntawm thaj chaw no, thiab nws yuav teeb nws lub zwmtxwv thiab tsa nws lub tsevntaub rau saum cov pobzeb uas koj faus no. Nenpukajnexales yuav tuaj tua yeej lub tebchaws Iziv cov neeg uas teem tseg kom tuag rau kab mob kev nkeeg, yuav tuag rau kab mob kev nkeeg, cov uas teem tseg kom raug ntes, yuav raug luag ntes; thiab cov uas teem tseg kom tuag rau hniav ntaj hniav riam, yuav tuag rau hniav ntaj hniav riam. Kuv yuav hlawv cov Iziv tej tuamtsev uas lawv teev lawv tej vajtswv, thiab tus vajntxwv uas kav tebchaws Npanpiloos yuav muab lawv tej vajtswv hlawv lossis coj mus. Tus yug yaj ntxhua nws tej ris tsho kom tuv tuag tas li cas, ces tus vajntxwv uas kav tebchaws Npanpiloos yuav tuaj muab lub tebchaws Iziv no rhuav kom dulug li ntawd, thiab nws yuav rov kaj siab lug mus lawm. Nws yuav rhuav tej ncej zeb tseemceeb ntawm lub nroog Heli-aupulis hauv tebchaws Iziv thiab hlawv tej tuamtsev uas cov Iziv pe lawv tej vajtswv povtseg.” Tus TSWV hais rau kuv txog cov Yudas uas nyob hauv tebchaws Iziv, hauv lub nroog Minkedaus, lub nroog Tapahes, lub nroog Meefis thiab cov nroog uas nyob rau sab qabteb hauv tebchaws Iziv. Tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, “Nej twb pom tej kev puastsuaj uas kuv tso los raug lub nroog Yeluxalees thiab tej nroog uas nyob hauv tebchaws Yudas lawm. Txawm yog nimno los tseem puas tas thiab tsis muaj neeg nyob, rau qhov cov neeg uas nyob hauv tej nroog ntawd ua kev phem kev qias ua rau kuv chim. Lawv tua tsiaj hlawv fij rau luag tej vajtswv thiab pe tej vajtswv uas tsis hais lawv lossis nej thiab nej cov yawgkoob tsis tau pe dua li. Kuv yeej tso kuv cov tubtxib uas yog cov cevlus qhia nej ua ntu zus kom nej tsis txhob ua tej kev phem kev qias uas kuv ntxub ntawd. Tiamsis nej tsis quavntsej lossis mloog kuv tej lus. Nej tsis tso nej tej kev phem kev qias lossis kev tua tsiaj hlawv fij rau luag tej vajtswv tseg li. Vim li ntawd, kuv thiaj hliv kuv txojkev chim thiab npautaws los rau tej nroog hauv tebchaws Yudas thiab tej kev hauv lub nroog Yeluxalees thiab tso hluavtaws hlawv tej ntawd kom kub hnyiab tas. Tej nroog ntawd thiaj puastsuaj tas nyob qhuav nquas los txog niaj hnub no. “Yog li ntawd, nimno kuv yog tus TSWV uas yog cov Yixalayees tus Vajtswv uas muaj hwjchim loj kawg nkaus nug nej li no: vim li cas nej pheej ua tej kev phem kev qias ntawd? Puas yog nej xav cia cov txivneej, cov pojniam, cov hluas thiab cov menyuam mos raug kev puastsuaj kom tsis seem ib tug li? Vim li cas nej pheej pe mlom thiab tua tsiaj hlawv fij rau luag tej vajtswv hauv tebchaws Iziv uas nej los nyob ua rau kuv chim? Puas yog nej ua li no kom nej raug kev puastsuaj rau txhua haivneeg thoob ntiajteb txob thuam thiab tuav nej lub npe foom tsis zoo? Nej tsis nco txog tej kev phem kev qias uas nej cov yawgkoob, cov vajntxwv uas kav tebchaws Yudas thiab lawv cov pojniam, nej thiab nej tej pojniam tau ua nyob hauv tebchaws Yudas thiab ntawm tej kev hauv lub nroog Yeluxalees lawm los? Tiamsis nej yeej tsis txo nej lub hwjchim los txog niaj hnub nimno li. Nej tsis hwm kuv lossis ua nej lub neej raws li tej kevcai uas kuv muab cob rau nej thiab nej cov yawgkoob lawm. “Yog li ntawd, kuv yog tus TSWV uas yog cov Yixalayees tus Vajtswv uas muaj hwjchim loj kawg nkaus yuav tawmtsam nej thiab rhuav kom cov Yudas puastsuaj. Kuv yuav ua kom cov Yudas uas txiav txim siab tsiv mus nyob nram tebchaws Iziv, tsis hais tus hlob tus yau raug puastsuaj tas. Lawv yuav tuag rau hniav ntaj hniav riam lossis kev tshaib kev nqhis. Luag yuav ntshai lawv, txob thuam lawv thiab tuav lawv lub npe foom tsis zoo. Kuv yuav rau txim rau txhua tus uas los nyob hauv tebchaws Iziv ib yam li kuv tso kev tsov kev rog, kev tshaib kev nqhis thiab kab mob kev nkeeg los rau txim rau lub nroog Yeluxalees. Tsis pub cov Yudas uas seem thiab khiav mus nyob nram tebchaws Iziv khiav dim li. Lawv yuav tsis muaj ib tug tau rov mus rau tebchaws Yudas uas lawv xav rov mus nyob. Yuav tsis muaj leejtwg tau rov mus nyob, tsuas tshwj cov uas raug luag ntes mus lawm xwb thiaj yuav tau rov los.” Cov txivneej uas paub hais tias lawv cov pojniam tua tsiaj hlawv fij rau luag tej vajtswv, cov pojniam uas sawv ntawd thiab cov pojniam Yudas uas nyob hauv tebchaws Iziv sab qabteb ua ib pab coob heev tuaj hais rau kuv tias, “Peb tsis lees paub tej lus uas koj tuav tus TSWV lub npe tuaj hais rau peb. Peb yuav ua txhua yam raws li peb tau hais lawm tias peb yuav ua. Peb yuav tua tsiaj hlawv fij rau peb tus vajtswv uas yog Niam Vajntxwv Ntuj thiab yuav hliv cawv txiv hmab fij rau nws ib yam li peb cov yawgkoob, peb cov vajntxwv thiab peb cov thawjcoj ibtxwm ua hauv cov Yudas tej nroog thiab ntawm tej kev hauv lub nroog Yeluxalees. Ces peb yuav muaj zaub muaj mov noj nplua mias, peb yuav vammeej thiab tsis txomnyem li. Tiamsis txij thaum peb tseg tsis tua tsiaj hlawv fij rau tus Niam Vajntxwv Ntuj thiab tsis hliv cawv txiv hmab fij rau nws lawm, ces peb tsis muaj dabtsi thiab peb cov neeg tuag tas rau hniav ntaj hniav riam thiab kev tshaib kev nqhis lawm.” Cov pojniam ntawd hais ntxiv hais tias, “Thaum peb puab ncuav ci, peb puab tej lub zoo li tus Niam Vajntxwv Ntuj, tua tsiaj hlawv fij rau nws thiab hliv cawv txiv hmab fij rau nws los peb tej txiv yeej pom zoo peb ua li ntawd.” Kuv thiaj hais rau cov txivneej thiab cov pojniam uas tuaj hais li ntawd tias, “Tej khoom uas nej, nej cov yawgkoob, nej cov vajntxwv, nej cov thawjcoj thiab cov neeg uas nyob hauv tebchaws Yudas coj tuaj fij rau hauv cov Yudas tej nroog thiab ntawm tej kev hauv lub nroog Yeluxalees, nej xav hais tias tus TSWV tsis paub lossis tsis nco qab tej ntawd lawm no los? Nej lub tebchaws puastsuaj tsis muaj neeg nyob los txog niaj hnub no twb yog vim tus TSWV tsis xav saib tej kev phem kev qias thiab kev nkauj kev nraug uas nej ua ntawd ntag. Luag yuav ntshai nej, txob thuam nej thiab tuav nej lub npe foom tsis zoo. Tej kev puastsuaj no los raug nej, vim nej tua tsiaj hlawv fij rau luag tej vajtswv, ua txhaum rau tus TSWV thiab tsis mloog nws tej lus samhwm.” Tiamsis nej cia li mloog kuv uas yog tus TSWV uas muaj hwjchim loj kawg nkaus tuav kuv lub npe coglus rau nej cov Yixalayees uas nyob hauv tebchaws Iziv no: Kuv yuav tsis pub nej tuav kuv lub npe coglus hais tias, ‘Kuv tuav tus TSWV uas muaj sia nyob thiab kav ib puas tsav yam lub npe coglus!’ Kuv yuav saib ntsoov tsis pub kom nej vammeej, tiamsis yuav cia kom nej puastsuaj. Nej yuav tuag tas, tsis hais tuag rau hniav ntaj hniav riam lossis tuag kab mob kev nkeeg, mus txog hnub uas nej tsis tshuav ib tug li. Tiamsis nej cov qee leej yuav dim tsis tuag rau hauv tebchaws Iziv thiab yuav tau rov mus rau pem tebchaws Yudas. Cov uas dim ntawd yuav paub hais tias leejtwg tej lus thiaj yog lus tseeb. Kuv tej lus lossis lawv tej. Kuv uas yog tus TSWV yuav muab ib yam ua cim los qhia rau nej paub hais tias kuv yuav rau txim rau nej thiab ua kom nej puastsuaj rau ntawm qhov chaw no, nej thiaj paub hais tias muaj tseeb raws kuv tej lus tiag. Kuv yuav muab Falaus Haufelas uas kav tebchaws Iziv cob rau nws cov yeebncuab uas xav muab nws tua povtseg, ib yam li kuv muab Vajntxwv Xedekiyas uas kav tebchaws Yudas cob rau Vajntxwv Nenpukajnexales uas kav tebchaws Npanpiloos uas yog Xedekiyas tus yeebncuab uas xav muab nws tua povtseg.” Tom qab uas Yauxiyas tus tub Yehauyakees ua vajntxwv kav tebchaws Yudas tau plaub xyoo lawm, kuv piav tus TSWV tej lus txhua lo rau Neliyas tus tub Npalus sau rau hauv thooj ntawv. Tus TSWV uas yog cov Yixalayees tus Vajtswv hais tias, “Npalus, koj hais tias, ‘Kuv tiv tsis taus lawm! Kuv twb raug kev txomnyem los tus TSWV tseem tsub kev nyuaj siab ntxiv rau kuv. Kuv niaj hnub quaj qaug zog tas tsis tau so li!’ “Tiamsis kuv uas yog tus TSWV yuav muab tej uas kuv ua rhuav thiab dob tej uas kuv cog povtseg. Kuv yuav ua li ntawd kom thoob plaws lub ntiajteb. Koj pheej yuav nrhiav kev tau zoo rau koj xwb no los? Koj tsis txhob ua li ntawd; kuv yuav tso kev puastsuaj los raug neeg ntiajteb; tiamsis txawm yog koj nyob qhov twg los koj yuav dim thiab tau txojsia. Kuv yog tus TSWV uas hais li ntawd.” Tus TSWV hais rau kuv txog tej haivneeg, yog xub hais txog cov Iziv. Tus TSWV hais txog Falaus Nekaus uas yog cov Iziv tus vajntxwv cov tubrog uas Vajntxwv Nenpukajnexales uas kav tebchaws Npanpiloos tuaj tua yeej hauv lub nroog Kakhemis uas nyob ze ntawm tus dej Efalates yog xyoo plaub uas Yehauyakees ua vajntxwv kav tebchaws Yudas: “Iziv cov thawj tubrog qw hais tias, ‘Cia li npaj nej tej thaiv hniav ntaj kom txhij mus ntaus rog! Muab eeb nog rau nej tej nees thiab caij! Cia li ntoo kausmom hlau thiab mus sawv ua tej kab! Hov nej tej hmuv thiab hnav nej tej tsho hlau!’ ” Tiamsis tus TSWV nug hais tias, “Kuv pom dabtsi? Lawv ntshai thiab thim rov qab. Lawv cov tubrog raug tua ua rau lawv ntshai thiab khiav tsis saib qab li. Txawm yog cov uas khiav ceev heev los yeej khiav tsis dhau; cov tubrog los khiav tsis dim. Lawv dawm thiab ntog tas rau ntawm tus Dej Efalates sab qaumteb. Leejtwg thiaj yuav sawv taus nphau nphwv ib yam li tus dej Niles thiab ib yam li tus dej uas huam puv nkaus ntug? Twb yog Iziv sawv nphau nphwv ib yam li tus dej Niles, thiab ib yam li tus dej uas huam puv nkaus ntug. Iziv hais tias, ‘Kuv yuav huam thiab nyab lub ntiajteb; kuv yuav rhuav tej nroog thiab tej neeg uas nyob hauv kom puastsuaj tas. Tej nees cia li dhia mus thiab tej tsheb cia li ntog! Cia li txhij cov Sudas thiab cov Linpias tej tubrog uas nqa tej thaiv hniav ntaj, thiab cov Lidias tej tubrog uas txawj tua hneevnti mus.’ ” Hnub no yog tus TSWV uas kav ib puas tsav yam thiab muaj hwjchim loj kawg nkaus hnub: hnub no nws yuav ua pauj; hnub no nws yuav rau txim rau nws cov yeebncuab. Nws rab ntaj yuav noj lawv tej nqaij kom tsau thiab haus lawv tej ntshav kom txaus siab. Hnub no tus TSWV uas muaj hwjchim loj kawg nkaus muab cov uas nws tua tuag lawm, coj mus fij rau ntawm tus Dej Efalates sab qaumteb. Cov Iziv, nej cia li mus rau pem cheebtsam Nkile-as thiab nrhiav tshuaj rau nej! Nej tej tshuaj tsis zoo thiab kho tsis tau nej tej mob. Txhua haivneeg hnov nej tej kev txajmuag, thiab txhua tus hnov nej quaj. Tej tubrog sib dawm ntog rau hauv av. Thaum Vajntxwv Nenpukajnexales uas kav tebchaws Npanpiloos tuaj tua tebchaws Iziv. Tus TSWV hais rau kuv tias, “Koj cia li mus qhia rau lub nroog Menkidaus, lub nroog Meefis thiab lub nroog Tapahes hauv tebchaws Iziv hais tias, ‘Nej cia li npaj sib tua, rau qhov yuav muaj kev tsov kev rog tuaj ua kom nej puastsuaj. Vim li cas nej tus vajtswv Anpis uas muaj hwjchim vau lawm? Twb yog tus TSWV muab tsoo tawg tas lawm!’ Nej cov tubrog dawm ntog tas lawm; nej ib leeg hais rau ib leeg hais tias, ‘Peb cia li rov mus tsev, mus cuag peb cov neeg, peb thiaj dim yeebncuab tej hniav ntaj hniav riam!’ “Lawv tis dua ib lub npe tshiab rau Falaus uas yog cov Iziv tus vajntxwv hu ua ‘Tus uas ua Tsis Tau Dabtsi Cia Nws Lub Sijhawm Dhau Mus.’ Kuv yog tus TSWV uas muaj hwjchim loj kawg nkaus uas yog Vajtswv tus uas muaj sia nyob thiab yog vajntxwv. Lub Roob Tanpaus sawv siab tshaj tej hauv roob thiab lub Roob Kalemees sawv siab tshaj hiavtxwv li cas, tus uas yuav tuaj tawmtsam nej muaj zog npaum li ntawd. Cov Iziv, nej cia li sawbsim, luag yuav tuaj ntes nej mus; Meefis yuav ua suabpuam tsis muaj neeg nyob. Iziv zoo ib yam li tus xyuas nyuj uas zoo nkauj heev, tiamsis ib tug yoov mosdab yuav tuaj sab qaumteb tuaj tom nws. Txawm yog tej tubrog uas nws ntiav tuaj pab nws los tsuas zoo ib yam li tus xyuas nyuj ntawd. Lawv tiv tsis tau tej kev sib ntaus sib tua; lawv thim khiav rov qab. Hnub uas lawv raug kev puastsuaj twb los txog lawm, yog hnub uas lawv raug txiav txim. Thaum yeebncuab cov tubrog tuaj ze lawm, Iziv khiav nrov xuav ib yam li nab nkaug. Yeebncuab nqa taus tuaj tua cov Iziv ib yam li ntov ntoo thiab ib yam li luag ntov zoov. Yeebncuab cov tubrog coob heev yeej suav tsis txheeb li; lawv cov tubrog coob tshaj tej kooj txomfav. Cov Iziv raug kev txajmuag; lawv yuav swb cov neeg uas tuaj sab qaumteb tuaj. Kuv yog tus TSWV uas hais li ntawd.” Tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, “Kuv yuav rau txim rau Amoos uas yog Thenpes tus vajtswv, cov Iziv, lawv tej vajtswv thiab lawv tej vajntxwv. Kuv muab Falaus uas kav tebchaws Iziv thiab txhua tus uas tuaj nws tog cob rau Vajntxwv Nenpukajnexales uas kav tebchaws Npanpiloos thiab cov tubrog uas xav muab nws tua povtseg. Tom qab ntawd yuav muaj neeg rov qab los nyob hauv tebchaws Iziv ib yam li yav tas los lawm. Kuv yog tus TSWV uas hais li ntawd.” “Kuv haivneeg, nej tsis txhob ntshai, haivneeg Yixalayees, nej tsis txhob txhawj! Kuv yuav pab nej cov uas luag ntes mus nyob rau lub tebchaws uas deb heev. Nej yuav tau rov los tsev thiab nyob kaj siab lug; nej yuav nyob tso siab lug thiab tsis muaj leejtwg ua rau nej ntshai. Kuv yuav los cuag nej thiab cawm nej. Kuv yuav rhuav txhua haivneeg uas kuv ntiab nej mus nrog nyob kom puastsuaj, tiamsis kuv yuav tsis cia kom nej puastsuaj. Kuv yuav rau txim rau nej, tiamsis thaum kuv rau txim rau nej, kuv yuav ua ncaj. Kuv yog tus TSWV uas hais li ntawd.” Ua ntej uas Falaus tuaj tua lub nroog Nkaxas, tus TSWV hais rau kuv txog cov Filitees. Nws hais tias, “Nej saib! Dej yuav nphau nphwv sab qaumteb tuaj thiab yuav kuav ib yam li dej nyab. Dej yuav nyab puv nkaus lub tebchaws thiab txhua yam, yuav nyab tej nroog thiab tej neeg huv tibsi. Tej neeg yuav quaj qw thov kev pab; neeg thoob ntiajteb txhua tus yuav quaj qhuav siab qhawv. Lawv yuav hnov tej suab nees dhia nrov, tej tsheb nees caij tua rog thiab tej log tsheb nrov doog diaj. Tej niam tej txiv yuav khiav tsis tig saib lawv tej menyuam; lawv tej npab yuav tsaug dai vias. Twb txog lub sijhawm uas rhuav cov Filitees kom puastsuaj lawm, kuv yuav txiav lub nroog Tiles thiab lub nroog Xidoos kev pab cov Filitees uas seem. Rau qhov kuv uas yog tus TSWV yuav rhuav cov Filitees uas nyob raws ntug hiavtxwv Keletes kom puastsuaj. Cov neeg uas nyob hauv Nkaxas yuav quaj ntsuag, cov neeg uas nyob hauv Asekeloos puastsuaj tas lawm. Cov Filitees yuav quaj ntsuag mus txog thaum twg? Nej cia li qw hais tias, ‘Tus TSWV rab ntaj! Thaum twg koj mam li tseg tsis tua neeg? Cia li rov mus rau hauv koj lub hnab thiab so!’ Tiamsis yuav ua li cas rab ntaj thiaj so tau thaum kuv tseem kom nws ua haujlwm? Kuv samhwm kom nws tua cov neeg uas nyob hauv lub nroog Asekeloos thiab cov neeg uas nyob raws ntug hiavtxwv.” Ntawm no yog tus TSWV uas muaj hwjchim loj kawg nkaus hais txog lub tebchaws Mau-am: “Cov neeg hauv Nenpaus raug puastsuaj, rau qhov lawv tej nroog twb pob puas tas lawm! Luag txeeb tau lub nroog Kili-athayees, tsoo nws tej chaw fajxwm pob tas, thiab nws cov pejxeem poob ntsejmuag kawg li; Mau-am lub koob meej uas ncha moo lug ploj lawm. Yeebncuab twb tuaj txeeb tau lub nroog Hesenpoos, lawv yuav rhuav lub tebchaws Mau-am kom puastsuaj tas. Lub nroog Mamees los yuav puastsuaj ib yam nkaus, rau qhov yuav muaj tubrog tuaj tawmtsam nws. Cov neeg hauv Haulunayees yuav quaj qw hais tias, ‘Kev nruj tsiv! Kev puastsuaj!’ “Mau-am twb raug puastsuaj tas lawm; cia li mloog cov menyuam yaus tej suab quaj. Hnov lawv tej suab seev taug kev mus rau pem lub nroog Luhis; tej suab quaj txomnyem taug kev mus rau nram lub nroog Haulunayees. Lawv hais tias, ‘Cia li khiav tiag kom nej dim! Khiav ib yam li tus neesluav qus uas nyob tom tiaj suabpuam!’ “Mau-am, koj cia siab rau koj lub zog thiab koj txojkev npluanuj, tiamsis nimno koj twb swb lawm; koj tus mlom Khemaus yuav raug luag coj nrog nws cov nomtswv thiab cov povthawj mus rau lwm lub tebchaws. Tsis muaj ib lub nroog yuav dim kev puastsuaj li, tej voshav thiab tej tiaj nrag puavleej yuav raug kev puastsuaj tas. Kuv yog tus TSWV uas hais li ntawd. Cia li muab ib daim lag zeb npog Mau-am, rau qhov nws twb yuav puastsuaj. Nws tej nroog los yuav puastsuaj tas tsis muaj neeg nyob li lawm.” ( Tus uas tsis ua tus TSWV tes haujlwm ntawm lub siab dawb paug yuav raug foom tsis zoo! Tus uas tsis tua cov Mau-am raws li tus TSWV hais, tus ntawd yuav raug foom tsis zoo!) Tus TSWV hais tias, “Mau-am yeej ibtxwm tau zoo nyob tso siab plhuav, tsis raug luag ntes mus rau lwm lub tebchaws. Mau-am zoo ib yam li cov cawv txiv hmab uas luag tshwj tseg tsis muab theej ib lub hub rau ib lub. Cov cawv txiv hmab tseem qab thiab tsw qab ntxiag li qub. “Yog li ntawd, nimno twb txog lub sijhawm uas kuv yuav tso neeg tuaj muab Mau-am hliv povtseg ib yam li hliv cawv txiv hmab. Lawv yuav muab cov cawv txiv hmab hliv povtseg kom tej hub khoob lug cia thiab yuav muab tej hub tsoo kom tawg tas. Ces cov Mau-am yuav poob ntsejmuag vim lawv tus vajtswv Khemaus ib yam li cov Yixalayees poob ntsejmuag vim tus vajtswv Npethes uas lawv cia siab rau. “Cov neeg Mau-am, vim li cas nej khav hais tias nej cov tubrog uas ua tau thiab muaj siab tawv ntaus rog? Mau-am thiab nws tej nroog twb raug puastsuaj tas; Nws tej tub hluas uas ua tau heev los twb raug tua tuag tas lawm. Kuv yog tus TSWV uas yog vajntxwv tus uas muaj hwjchim loj kawg nkaus, kuv hais li ntawd. Tej kev puastsuaj uas yuav raug Mau-am twb los ze lawm, thiab tej kev puastsuaj uas yuav raug nws twb los yuav txog. “Nej cov uas nyob puagncig Mau-am cia li quaj nyiav nws, nej txhua tus uas paub txog nws lub koob meej cia li hais tias, ‘Mau-am lub hwjchim uas tswj teb kav chaw twb ploj lawm; nws lub meejmom thiab nws lub zog tsis muaj tas lawm.’ Cov neeg uas nyob hauv lub nroog Dinpoos, nej cia li txo hwjchim los zaum rau hauv av; rau qhov Mau-am tus yeebncuab twb tuaj tawmtsam nej lawm, nws yuav rhuav nej tej chaw fajxwm kom puastsuaj tas. Cov neeg uas nyob hauv lub nroog Alu-es, nej cia li mus sawv ntawm kev tos; thiab nug cov neeg uas khiav los kom lawv qhia nej saib muaj xwm dabtsi. Lawv yuav teb nej hais tias, ‘Mau-am twb pob puas tas lawm, nws poob ntsejmuag heev, cia li quaj nyiav nws. Cia li qhia rau cov neeg uas nyob raws tus ntug dej Alenoos kom paub hais tias Mau-am twb puastsuaj tas lawm.’ “Kev txiav txim tabtom los raug lub nroog Hauloos, lub nroog Yaxas, lub nroog Mefas, lub nroog Dinpoos, lub nroog Nenpaus, lub nroog Npethes Dilathayees, lub nroog Kili-athayees, lub nroog Npenkamus, lub nroog Npeme-oos, lub nroog Keli-aus thiab lub nroog Npauxelas uas nyob hauv tiaj nrag. Kev txiav txim twb los raug cov nroog uas nyob hauv tebchaws Mau-am tsis hais deb thiab ze. Mau-am lub zog twb ntaug thiab nws lub hwjchim twb ploj lawm. Kuv yog tus TSWV uas hais li ntawd.” Tus TSWV hais tias, “Muab cawv rau Mau-am haus kom qaug, rau qhov nws ntxeev siab rau kuv. Mau-am yuav da nws cov ntuav, ces tej neeg yuav luag nws. Mau-am, koj puas nco hais tias koj muab cov Yixalayees tso daj tso luag? Koj ua rau lawv ib yam li lawv yog tubsab. “Cov neeg uas nyob hauv tebchaws Mau-am, nej cia li khiav tawm hauv nej tej nroog mus nyob rau saum tej roob tsuas! Ua li tus nquab uas ua zes rau ntawm rooj tsuas. Mau-am khavtheeb heev! Peb hnov nws tej lus khavtheeb, tsav hwjchim, muab hlob thiab nws xav txog nws xwb. Kuv uas yog tus TSWV, kuv paub nws lub siab uas khavtheeb. Nws tej lus khav yog lus dag, thiab nws tej haujlwm tsis ruaj tsis khov. Yog li ntawd, kuv yuav quaj cov neeg Mau-am txhua tus thiab quaj cov neeg hauv tebchaws Kiles Heles. Kuv yuav quaj cov neeg Xinpemas heev dua kuv quaj cov neeg Yaxes. Lub nroog Xinpemas, koj zoo ib yam li tsob txiv hmab uas tej ceg hlav dhau Hiavtxwv Tuag mus txog lub nroog Yaxes. Tiamsis nimno koj tej txiv ntoo thiab txiv hmab uas siav thaum lub caij ntuj qhua twb raug luag muab rhuav puastsuaj tas lawm. Tej kev zoo siab thiab kev lomzem raug tshem hauv lub tebchaws Mau-am uas av rog thiab zoo qoob lawm. Kuv tsis pub kom lawv tso tau kua txiv hmab; yuav tsis muaj neeg tso kua txiv hmab thiab qw lomzem li lawm. “Cov neeg uas nyob hauv Hesenpoos thiab hauv Ele-ales yuav tsa suab quaj, thiab lawv tej suab quaj yuav ntxhe mus txog lub nroog Yahas; cov neeg Xau-as los hnov lawv tej suab quaj, thiab lawv tej suab quaj nrov mus txog lub nroog Haulunayees thiab lub nroog Elas Selisiyas. Txawm yog tus Dej Niles los yuav qhuav. Kuv yuav txwv tsis pub cov Mau-am tua tsiaj hlawv fij rau lawv tej chaw teev mlom thiab hlawv tshuaj tsw qab rau lawv tej vajtswv. Kuv yog tus TSWV uas hais li ntawd. “Yog li ntawd, kuv lub siab thiaj quaj ntsuag rau cov Mau-am thiab cov Kiles Heles ib yam li tus neeg uas tshuab zaj raj quaj ntsuag, rau qhov txhua yam uas yog lawv tug twb ploj tas lawm. Lawv txhua tus chais lawv tej plaubhau thiab hwjtxwv. Lawv hlais lawv tej tes thiab muab ntaubtsaj los npua. Nyob rau saum cov Mau-am tej rutsev thiab tom tej tshavpuam tsis hnov suab dabtsi li, tsuas hnov tej suab quaj nyiav nkaus xwb. Rau qhov kuv ua rau Mau-am ntsoog tas ib yam li lub hub uas muab tsoo tawg tas tsis muaj leejtwg xav yuav. Mau-am raug rhuav puastsuaj thiab poob ntsejmuag, nws cia li tsa suab hlo quaj! Mau-am puastsuaj tas ua rau txhua haivneeg uas nyob puagncig nws luag nws nplig heev. Kuv yog tus TSWV uas hais li ntawd.” Tus TSWV coglus hais tias, yuav muaj ib haivneeg tuaj tua cov Mau-am ib yam li tus dav ya qwvlwg ntxiaj los txeeb nws tej nroog thiab tej chaw fajxwm. Hnub ntawd Mau-am tej tubrog yuav ntshai ib yam li tus pojniam yuav yug menyuam. Mau-am yuav raug rhuav kom puastsuaj tsis tau ua ib haivneeg lawm, rau qhov nws ntxeev siab rau kuv. Tej kev txhawj ntshai, tej qhov thiab tej vojhlua twb cuab tos cov Mau-am kev lawm. Kuv yog tus TSWV uas hais li ntawd. Yog leejtwg khiav kev txhawj ntshai tus ntawd yuav poob qhov, thiab yog leejtwg nce tawm hauv qhov los tus ntawd yuav mag vojhlua, rau qhov tus TSWV twb npaj kev puastsuaj tos cov Mau-am lawm. Cov neeg uas tsis muaj leejtwg pab khiav mus nrhiav chaw nkaum rau hauv Hesenpoos, lub nroog uas yav tas los Vajntxwv Xihoos kav, tiamsis hluavtaws tabtom kub cig lam lug. Hluavtaws kub cov Mau-am uas nyiam ua rog hauv tiaj nrag mus rau saum tej hauv roob siab. Mau-am raug puastsuaj lawm! Cov neeg uas pe tus mlom Khemaus raug puastsuaj, thiab lawv tej tub tej ntxhais raug luag ntes coj mus rau lwm lub tebchaws lawm. Tej uas hais tas los no yuav los raug cov Mau-am, tiamsis muaj ib hnub tus TSWV yuav pub kom cov Mau-am rov muaj kev vammeej dua. Tus TSWV hais rau cov Amoos hais tias, “Cov Yixalayees tsis muaj tub los? Lawv tsis muaj ib tug los tuav lawv lub tebchaws li los? Vim li cas lawv cia cov neeg uas pe tus mlom Maulej tuaj txeeb xeem Khas cheebtsam av rau lawv nyob lawm? Tiamsis twb txog lub sijhawm uas kuv ua kom cov neeg uas nyob hauv lub nroog Lanpas hnov tej suab sib ntaus sib tua; lub nroog ntawd yuav puastsuaj thiab tej zos uas nyob ibncig yuav kub hnyiab tas. Ces cov Yixalayees thiaj yuav txeeb tau lawv lub tebchaws uas luag txeeb lawm rov los. Cov neeg uas nyob hauv lub nroog Hesenpoos, cia li tsa suab quaj! Lub nroog A-is raug puastsuaj lawm! Cov pojniam uas nyob hauv lub nroog Lanpas, cia li quaj ntsuag! Cia li npua ntaubtsaj thiab quaj ntsuag! Cia li mus mus los los tsis paub mus qhov twg! Luag yuav coj nej tus vajtswv Maulej, cov povthawj thiab cov nomtswv mus rau lwm lub tebchaws. Cov neeg siab tsis ncaj, vim li cas nej khavtheeb ua luaj? Nej lub zog twb ntaug lawm. Vim li cas nej cia siab rau nej lub zog thiab hais tias, “Yuav tsis muaj leejtwg tawmtsam tau peb li.” Kuv yuav tso kev txhawj ntshai txhua phab tuaj rau nej. Nej txhua tus nyias taus nyias huas siav khiav, nej mus nyob qhov twg los yuav tsis muaj leejtwg sau nej rov los nyob ua ke li lawm. “Tiamsis tom qab ntawd kuv yuav ua kom cov Amoos rov vammeej dua. Kuv yog tus TSWV uas hais li ntawd.” Tus TSWV uas muaj hwjchim loj kawg nkaus hais txog cov Edoos hais tias, “Cov Edoos txawm tsis muaj ib tug ntse li los? Lawv cov tuavxam tsis paub qhia lawv li los? Lawv tej tswvyim ploj tas lawm los? Cov neeg Dedas, nej cia li khiav thiab cia li tig hlo rov qab! Cia li khiav mus nkaum! Kuv yuav rhuav kom Exaus cov xeebntxwv puastsuaj tas, rau qhov twb txog lub sijhawm uas kuv rau txim rau lawv lawm. Thaum neeg de txiv hmab, lawv tseg ibtxhia cia rau ntawm txoj hmab, thiab yog tubsab tuaj thaum tsaus ntuj, lawv tsuas nyiag tej uas lawv xav yuav xwb. Tiamsis thaum kuv rhuav Exaus cov xeebntxwv, kuv yuav tsis tseg ib qhov chaw rau lawv nkaum li, kuv ua li ntawd kom lawv tsis tau chaw nraim cev. Cov Edoos puastsuaj tas tsis tshuav ib tug seem li. Tseg nej tej menyuam ntsuag rau kuv, kuv yuav tu thiab tsomkwm lawv. Nej cov pojntsuam los kom lawv tso siab rau kuv. “Txawm yog cov uas tsis xav raug txim los yuav raug txim. Nej xav hais tias, nej yuav tsis raug txiav txim no los? Yeej tsis tau li, nej yuav tsum raug txim xwb! Kuv coglus hais tias lub nroog Npauxelas yuav ua suabpuam thiab ua lub chaw rau luag ntshai tsis xav pom; tej neeg dua kev yuav txob thuam thiab tuav nws lub npe foom tsis zoo, thiab tej zos uas nyob ibncig los yuav puastsuaj tas. Kuv yog tus TSWV uas hais li ntawd.” Kuv hais tias, “Edoos, kuv twb hnov tus TSWV tso neeg xa xov mus rau ntau haivneeg kom sau lawv tej tubrog tuaj tawmtsam nej lawm. Tus TSWV yuav ua kom nej qaug zog thiab tsis muaj leejtwg hwm nej. Nej txojkev khavtheeb dag ntxias nej. Tsis muaj leejtwg hwm nej li nej xav. Txawm yog nej yuav nyob saum tej roob tsuas, thiab saum tej hauv roob siab; nyob siab ib yam li tej dav ya los tus TSWV yuav chua kom nej poob los. Kuv yog tus TSWV uas hais li ntawd.” Tus TSWV hais tias, “Txojkev puastsuaj uas yuav los raug cov Edoos txaus ntshai heev ua rau txhua tus neeg uas dua kev ceeb thiab ntshai kawg li. Lub tebchaws Edoos yuav raug kev puastsuaj ib yam li lub nroog Xaudoos thiab lub nroog Kaumaulas, thaum ob lub nroog ntawd thiab tej zejzog uas nyob puagncig raug kev puastsuaj, yuav tsis muaj neeg nyob hauv ib zaug ntxiv li lawm. Kuv yog tus TSWV uas hais tej lus no. Kuv yuav ua kom cov Edoos khiav tawm hauv lawv lub tebchaws mus, thaum lawv tsis nco ceevfaj ib yam li tus tsov ntxhuav tawm hauv thaj havzoov ntawm ntug dej Yauladees mus rau hauv lub tshav zaub ntag. Ces tus thawjcoj uas kuv xaiv yuav tau kav lub tebchaws. Leejtwg thiaj yuav piv tau kuv? Leejtwg thiaj yuav muaj cuabkav nrog kuv sib tw? Tus thawjcoj twg thiaj yuav tawmtsam yeej kuv? Yog li ntawd, nej cia li mloog tej uas kuv npaj siab yuav ua rau cov Edoos thiab cov neeg uas nyob hauv lub nroog Temas. Luag yuav coj lawv tej menyuam mus, yuav ua rau txhua tus ntshai heev. Thaum Edoos puastsuaj, lub ntiajteb ua zog koog thiab yuav hnov lawv lub suab quaj rov mus txog nram Hiavtxwv Liab. Yeebncuab yuav tuaj tua lub nroog Npauxelas ib yam li tus dav ya qwvlwg ntxiaj los. Hnub ntawd Edoos tej tubrog yuav ntshai ib yam li tus pojniam uas yuav yug menyuam.” Tus TSWV hais txog lub nroog Damaxes li no: “Thaum cov neeg uas nyob hauv lub nroog Hamas thiab Anpas hnov tej xov tsis zoo, lawv yuav txhawj thiab ntxhov siab heev. Kev txhawj thiab kev ntxhov siab ua rau lawv lub siab nyob tsis tus ib yam li hiavtxwv ntas. Cov neeg uas nyob hauv lub nroog Damaxes qaug zog, ntshai thiab khiav mus lawm. Lawv mob thiab txomnyem siab ib yam li tus pojniam uas mob plab yuav yug menyuam. Lub nroog uas ibtxwm nto npe thiab muaj kev lomzem twb puastsuaj tas lawm. Hnub ntawd nws tej tub hluas yuav raug tua tuag rau ntawm tej kev thiab hauv lub nroog, thiab nws tej tubrog yuav puastsuaj tas. Kuv yuav hlawv lub nroog Damaxes tej ntsa yeej, thiab hluavtaws yuav kub Vajntxwv Npeehadas lub loog. Kuv yog tus TSWV uas muaj hwjchim loj kawg nkaus hais li ntawd.” Tus TSWV hais txog xeem Kedas thiab tej xeev uas cov nomtswv hauv lub nroog Haxaules tswjhwm uas Vajntxwv Nenpukajnexales uas kav tebchaws Npanpiloos tuaj txeeb tau lawm hais tias, “Cia li mus tua xeem Kedas thiab rhuav cov neeg uas nyob sab hnubtuaj kom puastsuaj tas! Cia li mus huab lawv tej tsevntaub, tej yaj tej tshis, tej ntaub vov tsev thiab txhua yam uas muaj nyob hauv lawv tej tsevntaub. Cab lawv tej ntxhuav mus thiab hais rau lawv hais tias, ‘Tej kev txhawj ntshai tuaj vij nej lawm lauj!’ ” Tus TSWV hais tias, “Cov neeg uas nyob hauv lub nroog Haxauses, nej cia li khiav mus nkaum kom deb. Vajntxwv Nenpukajnexales uas kav tebchaws Npanpiloos twb tuaj vij thiab yuav tua nej. Nws hais tias, ‘Peb cia li mus tua cov neeg uas nyob tso siab plhuav! Lawv lub nroog tsis muaj roojvag lossis tsis xauv thiab tsis muaj dabtsi thaiv li.’ “Cia li cab tagnrho lawv tej ntxhuav thiab tej yaj tej tshis mus. Kuv yuav muab cov neeg uas txiav lawv tej plaubhau luv luv raws khiav ri sua rau txhua txojkev, thiab kuv yuav tso kev puastsuaj txhua phab los raug lawv. Lub nroog Haxaules yuav ua suabpuam mus ibtxhis, ua chaw rau tej hma los nyob. Yuav tsis muaj neeg nyob hauv ntxiv lawm. Kuv yog tus TSWV uas hais li ntawd.” Thaum Xedekiyas ua vajntxwv kav tebchaws Yudas tau tsis ntev, tus TSWV uas muaj hwjchim loj kawg nkaus hais rau kuv txog cov Elas tias, “Kuv yuav muab cov tubrog Elas uas tua hneevnti uas ua rau cov Elas muaj zog heev tua kom tuag tas. Kuv yuav tso cua ntsawj plaub ceg kaum ntuj tuaj tawmtsam cov Elas, thiab kuv yuav raws nws cov neeg kom khiav ri sua mus rau txhua qhov, tsis muaj ib lub tebchaws uas nws haivneeg tsis tau mus nyob li. Kuv yuav ua kom cov Elas ntshai lawv cov yeebncuab uas xav muab lawv tua povtseg. Vim kuv txojkev chim, kuv yuav ua kom cov Elas puastsuaj thiab tso tubrog tuaj tua lawv mus txog thaum lawv tu noob tas. Kuv yuav rhuav lawv cov vajntxwv thiab cov thawjcoj kom puastsuaj tas thiab txawb kuv lub zwmtxwv rau qhov ntawd. Tiamsis tom qab ntawd, kuv yuav pub kom cov Elas rov vammeej dua. Kuv yog tus TSWV uas hais li ntawd.” Tus TSWV hais rau kuv txog lub nroog Npanpiloos thiab nws cov neeg li no: “Koj cia li qhia rau txhua haivneeg! Tshaj tawm rau sawvdaws! Cia li tsa chij thiab tshaj tawm kom sawvdaws paub! Tsis txhob zais ib yam dabtsi li! Npanpiloos swb lawm! Luag twb muab nws tus vajtswv Madus tsoo tawg tas lawm! Npanpiloos tej mlom raug rhuav poob ntsejmuag; nws tej mlom uas phem qias raug tsoo tawg tas! “Muaj ib haivneeg uas nyob rau sab qaumteb yuav tuaj tua lub nroog Npanpiloos kom ua suabpuam tas. Tej neeg thiab tej tsiaj txhu yuav khiav tas tsis nyob hauv lawm.” Tus TSWV hais tias, “Thaum txog lub sijhawm ntawd, cov Yixalayees thiab cov Yudas yuav quaj los nrhiav kuv uas yog lawv tus Vajtswv. Lawv yuav nug txojkev uas mus rau hauv lub nroog Xi-oos thiab taug txojkev ntawd mus. Lawv yuav nrog kuv coglus ruaj khov mus ibtxhis tsis rhuav li lawm. “Kuv haivneeg zoo ib yam li pab yaj uas tus yug yaj cia lawv mus yuam kev rau saum tej roob. Lawv mus ib lub roob rau ib lub roob ib yam li pab yaj uas nrhiav tsis tau kev rov los tsev. Txhua tus uas ntsib lawv muab lawv tua. Lawv cov yeebncuab hais tias, ‘Cov Yixalayees ua txhaum rau tus TSWV; yog li ntawd, tej uas peb ua yeej tsis txhaum. Lawv cov yawgkoob yeej ibtxwm cia siab rau tus TSWV. Yog li ntawd, tsimnyog lawv yuav tsum muab siab npuab tus TSWV thiab.’ “Cov Yixalayees, nej cia li khiav tawm hauv lub nroog Npanpiloos mus! Cia li tso lub tebchaws no tseg! Nej cia li ua cov uas xub khiav ntag! Kuv yuav tshoov tej haivneeg nyob sab qaumteb uas muaj zog heev ua ib pab tuaj tawmtsam lub nroog Npanpiloos; lawv yuav tuaj tsheej kev tuaj tua thiab txeeb tau lub tebchaws Npanpiloos. Lawv yog cov uas tua hneevnti ncaj heev, lawv tua tsis sav li. Luag yuav tuaj huab lub nroog Npanpiloos; cov neeg uas tuaj huab yuav nqa txhua yam zoo uas lawv xav yuav mus. Kuv yog tus TSWV uas hais li ntawd.” Tus TSWV hais tias, “Cov Npanpiloos, nej huab kuv haivneeg. Nej zoo siab thiab txaus siab ib yam li tus xyuas nyuj dhia tom tshav zaub lossis ib yam li tus txiv nees xob uas hee laws, tiamsis nej lub nroog yuav poob ntsejmuag thiab txajmuag kawg li. Npanpiloos yuav poob qis tshaj txhua lub tebchaws huv tibsi; nws yuav ua suabpuam qhuav nkig nkuav tsis muaj dej. Vim kuv txojkev chim, Npanpiloos raug rhuav puastsuaj tas tsis muaj neeg nyob; tej neeg uas dua kev yuav ceeb thiab xav tsis thoob. “Cov neeg uas tua hneevnti yuav tuaj sawv ua tsheej phiaj vij tua lub nroog Npanpiloos. Cia li tua nej tej xub hneevnti rau hauv Npanpiloos, rau qhov nws tau ua txhaum rau kuv uas yog tus TSWV lawm. Cia li qw thiab dhia mus vij lub nroog! Nimno Npanpiloos twb los thawj lawm. Luag twb rhuav nws tej ntsa yeej pob tas lawm. Kuv tabtom ua pauj cov Npanpiloos. Yog li ntawd, nej cia li ua pauj cov Npanpiloos thiab ua rau lawv ib yam li lawv tau ua rau lwm haivneeg lawm. Tsis txhob cog thiab sau qoob hauv lub tebchaws ntawd li. Lwm haivneeg uas nyob hauv lub tebchaws ntawd yuav ntshai tej tubrog uas tuaj tua lub nroog Npanpiloos, lawv yuav cia li rov qab mus tsev.” Tus TSWV hais tias, “Cov Yixalayees zoo ib yam li pab yaj uas tsov ntxhuav caum tawg khiav ri sua. Thawj zaug lawv raug tus vajntxwv uas kav tebchaws Axilias tua, thiab tom qab ntawd lawv raug Vajntxwv Nenpukajnexales uas kav tebchaws Npanpiloos cua lawv tej pobtxha. Vim li ntawd, kuv yog tus TSWV uas yog cov Yixalayees tus Vajtswv uas muaj hwjchim loj kawg nkaus yuav rau txim rau Vajntxwv Nenpukajnexales thiab nws lub tebchaws ib yam li kuv rau txim rau tus vajntxwv uas kav tebchaws Axilias. Kuv yuav coj cov Yixalayees rov los rau hauv lawv lub tebchaws. Lawv yuav tau noj tej qoob uas lawv cog rau saum Roob Kalemees thiab ntawm cheebtsam Npasas thiab tau noj tej qoob uas yog lawv cog rau hauv cheebtsam Efalayees thiab Nkile-as. Thaum txog lub sijhawm ntawd cov Yixalayees yuav tsis ua txhaum thiab cov Yudas yuav tsis ua kev phem kev qias, rau qhov kuv yuav zam txim rau cov neeg uas kuv tseg lawv txojsia. Kuv yog tus TSWV uas hais li ntawd.” Tus TSWV hais tias, “Cia li mus tua lub tebchaws Melathayees thiab cov neeg Pekaus. Tua thiab rhuav kom lawv puastsuaj tas. Cia li ua txhua yam raws li kuv samhwm rau nej. Kuv yog tus TSWV uas hais li ntawd. Tej suab sib ntaus sib tua nrov thoob tebchaws, thiab muaj kev puastsuaj loj heev. Npanpiloos muab rauj tsoo lub ntiajteb tawg ntsoog ntxaws, nimno rab rauj ntawd twb tawg tas lawm! Tej xwm uas raug lub tebchaws Npanpiloos ua rau txhua haivneeg thoob ntiajteb ceeb loj kawg li. Npanpiloos, koj sawv tawmtsam kuv, nimno koj twb mag lub vojhlua uas kuv cuab tos koj kev lawm; txawm li ntawd los koj twb tsis paub li. Kuv twb qhib lub chaw uas ntim kuv tej cuabyeej ua rog, vim kuv txojkev chim kuv thiaj rho tej ntawd tawm, rau qhov kuv yog tus TSWV uas muaj hwjchim loj kawg nkaus thiab kav ib puas tsav yam. Kuv muaj haujlwm tseemceeb ua nyob hauv tebchaws Npanpiloos. Cia li puav tua txhua phab tuaj thiab tsoo lub txhab rau khoom kom tawg; sau tej khoom uas lawv huab tau los teeb ua tej pawg ib yam li tej pawg nplej; cia li rhuav lub tebchaws kom puastsuaj tsis txhob tseg ib yam dabtsi li. Cia li tua lawv tej tubrog! Cia li muab lawv tua kom tuag tas! Cov Npanpiloos raug puastsuaj lawm! Twb txog lub sijhawm uas rau txim rau lawv lawm!” ( Cov neeg uas khiav hauv tebchaws Npanpiloos rov los rau hauv lub nroog Yeluxalees, lawv hais tias tus TSWV uas yog peb tus Vajtswv tau ua pauj rau cov Npanpiloos, vim tej uas lawv tau ua tsis zoo rau nws lub Tuamtsev.) “Cia li hais kom cov neeg uas txawj tua hneevnti nqa lawv tej hneevnti thiab xubvos mus tawmtsam lub nroog Npanpiloos. Cia li mus vij lub nroog thiab tsis pub ib tug twg khiav dim li. Ua pauj rau nws raws li tej uas nws tau ua lawm, thiab ua phem rau nws raws li nws tau ua rau lwm tus lawm, rau qhov nws tau khavtheeb tawmtsam kuv uas yog cov Yixalayees tus TSWV uas Dawbhuv. Yog li ntawd, nws tej tub hluas yuav raug tua tuag tas rau ntawm tej kev hauv nroog, thiab tagnrho nws cov tubrog yuav raug tua tuag tas rau hnub ntawd. Kuv yog tus TSWV uas hais li ntawd. “Npanpiloos, koj lub siab puv nkaus kev khavtheeb, yog li ntawd, kuv uas yog tus TSWV uas muaj hwjchim loj kawg nkaus thiab kav ib puas tsav yam yuav tawmtsam koj. Twb txog lub sijhawm uas kuv rau txim rau koj lawm! Koj haivneeg uas khavtheeb yuav dawm thiab ntog tsis muaj leejtwg pab tsa koj sawv li. Kuv yuav hlawv koj tej nroog thiab ib puas tsav yam uas nyob puagncig ntawd kom kub hnyiab tas.” Tus TSWV uas muaj hwjchim loj kawg nkaus hais tias, “Cov Yixalayees thiab cov Yudas raug luag tsimtxom hnyav kawg. Cov uas ntes lawv ntawd zov lawv nruj heev tsis pub lawv mus qhov twg li. Tiamsis tus uas yuav tso lawv dim muaj zog heev, nws lub npe hu ua tus TSWV uas muaj hwjchim loj kawg nkaus. Nws yuav los txiav lawv rooj plaub thiab coj kev thajyeeb los rau lub ntiajteb no, tiamsis cov Npanpiloos yuav raug kev ntxhov siab.” Tus TSWV hais tias, “Cia kev tuag los raug Npanpiloos! Cia kev tuag los raug nws cov pejxeem, nws cov nomtswv thiab nws tej tub txawg tub ntse. Cia kev tuag los raug nws cov cevlus cuav, vim lawv ruam kawg li! Cia kev tuag los raug nws cov tubrog, ua rau lawv ntshai kawg li! Cia li rhuav nws tej nees thiab tsheb nees kom puastsuaj! Cia kev tuag los raug tej tubrog uas nws ntiav tuaj pab, ua rau lawv qaug zog! Cia li rhuav nws tej txhab nyiaj thiab huab nws tej nyiaj mus. Cia nws lub tebchaws qhuav nkig nkuav thiab ua kom nws tej dej tu nqhuab tas. Npanpiloos yog lub tebchaws uas muaj mlom ntau thiaj ua rau sawvdaws qaug siab rau tej mlom ntawd. “Yog li ntawd, tej tsiaj nruab nrag, hma thiab tej noog tsis huv yuav los nyob hauv Npanpiloos. Txij no mus yav tom ntej yuav tsis muaj neeg mus nyob hauv li lawm. Tej kev puastsuaj uas los raug lub nroog Npanpiloos zoo ib yam li tej uas los raug lub nroog Xaudoos, Kaumaulas thiab tej zos uas nyob ibncig ntawd. Yuav tsis muaj neeg los nyob qhov ntawd li lawm. Kuv yog tus TSWV uas hais li ntawd. “Muaj neeg tabtom tuaj sab qaumteb tuaj, yog haivneeg uas muaj zog thiab muaj ntau tus vajntxwv taug kev deb tuaj ua rog. Lawv npaj rawv lawv tej hneevnti thiab tej ntaj; lawv limhiam thiab tsis hlub leejtwg li. Lawv caij nees dhia nrov nroo ntws tuaj tawmtsam lub nroog Npanpiloos ib yam li hiavtxwv ntas. Tus Vajntxwv uas kav tebchaws Npanpiloos hnov txog tej xwm no, ua rau nws ob txhais npab tsaug tas tsis muaj zog li lawm. Kev ntxhov siab ua rau nws mob ib yam li tus pojniam uas mob plab yug menyuam. “Kuv yuav ua kom cov Npanpiloos khiav tawm hauv lawv lub nroog mus thaum lawv tsis nco ceev fij ib yam li tus tsov ntxhuav uas tawm hauv thaj havzoov ntawm ntug Dej Yauladees mus rau hauv lub tshav zaub. Ces tus thawjcoj uas kuv xaiv yuav tau kav lub tebchaws. Leejtwg thiaj yuav piv tau kuv? Leejtwg thiaj yuav muaj cuabkav nrog kuv sib tw? Tus thawjcoj twg thiaj yuav tawmtsam yeej kuv? Yog li ntawd, nej cia li mloog tej uas kuv npaj siab yuav ua rau lub nroog Npanpiloos thiab nws cov pejxeem. Luag yuav coj lawv tej menyuam mus, yuav ua rau txhua tus ntshai heev. Thaum lub nroog Npanpiloos puastsuaj, lub ntiajteb ua zog koog thiab txhua haivneeg yuav hnov nws lub suab quaj.” Tus TSWV hais tias, “Kuv tabtom tso cua ntsawj kev puastsuaj tuaj tawmtsam Npanpiloos thiab nws cov pejxeem. Kuv yuav tso lwm haivneeg tuaj rhuav Npanpiloos ib yam li cua ntsawj tej quavnyab. Hnub uas kev puastsuaj los txog, lawv yuav tuaj txhua phab tuaj tua Npanpiloos kom lub tebchaws nyob qhuav nquas cia. Tsis txhob pub nws cov tubrog tau sijhawm tua lawv tej hneevnti lossis hnav lawv tej ris tsho ua rog li. Tsis txhob tseg tej tub hluas li. Tua cov tubrog kom tuag tas! Lawv yuav raug mob thiab tuag rau ntawm tej kev hauv lawv tej nroog. Kuv yog tus TSWV uas yog Vajtswv tus muaj hwjchim loj kawg nkaus; txawm yog cov Yixalayees thiab cov Yudas tau ua txhaum tawmtsam kuv uas yog cov Yixalayees tus Vajtswv uas dawbhuv los kuv tsis tso lawv tseg. Nej cia li khiav tawm hauv Npanpiloos mus! Khiav tiag kom nej dim! Tsis txhob this cov Npanpiloos lub txim tuag. Nimno kuv tabtom ua pauj thiab rau txim rau cov Npanpiloos raws li lawv tsimnyog raug. Npanpiloos zoo ib yam li lub khob kub hauv kuv txhais tes uas muab rau neeg ntiajteb haus kom qaug. Txhua haivneeg uas haus cov cawv hauv lub khob ntawd ua rau lawv tsis meejpem lawm. Tos nco xwb Npanpiloos cia li ntog thiab puastsuaj lawm! Cia li quaj ntsuag rau Npanpiloos! Cia li muab tshuaj qhwv nws tej qhov txhab tej zaum nyaj nws yuav zoo. Tej neeg txawv tebchaws uas nyob ntawd hais tias, ‘Peb pab Npanpiloos, tiamsis pab tsis tau. Peb cia li rov qab mus tsev. Vajtswv rau txim hnyav heev rau Npanpiloos nws thiaj puastsuaj lawm.’ ” Tus TSWV hais tias, “Kuv haivneeg, nej cia li qw hais tias, ‘Peb cov uas nyob ntawm nws sab xis, cia li mus piav tej uas tus TSWV uas yog peb tus Vajtswv tau ua lawm rau cov neeg uas nyob hauv lub nroog Yeluxalees paub.’ ” Tus TSWV twb tshoov cov vajntxwv uas kav tebchaws Medias siab kom tuaj rhuav tebchaws Npanpiloos raws li nws npaj siab lawm. Rau qhov lawv tau tuaj rhuav tus TSWV lub Tuamtsev, nws thiaj ua pauj rau lawv. Cov thawj tubrog samhwm hais tias, “Nej cia li hov nej tej xubvos! Cia li nqa nej tej thaiv hniav ntaj! Cia li kwv chij coj tubrog mus tsoo lub nroog Npanpiloos tej ntsa yeej. Cia li tso tubrog mus zov tej chaw fajxwm khov kho! Tso tubrog mus zov kev tos kom zoo!” Tus TSWV tau ua rau cov Npanpiloos raws li nws tau hais tseg lawm. Muaj ntau tus dej thiab ntau lub qhov nyiaj qhov kub nyob hauv lub tebchaws ntawd, tiamsis nws lub sijhawm tas thiab nws txojsia tu lawm. Tus TSWV uas muaj hwjchim loj kawg nkaus coglus hais tias, nws yuav coj neeg coob heev ib yam li cov kooj txomfav tuaj tawmtsam lub nroog Npanpiloos, lawv yuav qw zoo siab rau qhov lawv yeej lawm. Tus TSWV tsim lub ntiajteb los ntawm nws lub hwjchim; nws tsim lub qab ntuj los ntawm nws lub tswvyim; thiab nthuav lub ntuj los ntawm nws txojkev txawj ntse. Thaum tus TSWV hais rau tej dej saum nruab ntug, ces tej dej txawm nrov nroo ntws; nws ua kom muaj huab tsaus nti tim qab ntug los. Nws ua kom muaj xob laim thaum los nag, thiab tso cua hauv nws lub txhab tuaj ntsawj. Neeg txhua tus puavleej ruam thiab tsis muaj kev txawj ntse; cov neeg nchuav mlom yuav raug txajmuag; rau qhov tej mlom uas lawv nchuav tsis muaj sia thiab cuav xwb. Tej mlom ntawd tsis muaj qabhau thiab tsimnyog raug thuam; thaum tus TSWV los txiav txim rau lawv, lawv yuav puastsuaj tas. Yakhauj tus Vajtswv tsis zoo li tej mlom ntawd; nws yog tus uas tsim ib puas tsav yam, thiab nws xaiv cov Yixalayees los ua nws haivneeg. Nws lub npe hu ua tus TSWV uas muaj hwjchim loj kawg nkaus. Tus TSWV hais tias, “Npanpiloos, koj yog kuv rab rauj uas yog kuv tej cuabyeej ua rog. Kuv siv koj tsoo ntau haivneeg thiab ntau lub tebchaws, tsoo cov tubrog caij nees thiab tej nees, tsoo cov tsav tsheb nees thiab tej tsheb nees, tua cov txivneej thiab cov pojniam, tua cov laus thiab cov hluas, tua tej menyuam tub thiab tej menyuam ntxhais, tua cov neeg yug yaj thiab lawv tej yaj, tua tej tub qoob tub loo thiab lawv tej nees laij teb, tua tej tswvxeev thiab tej nomtswv huv tibsi povtseg.” Tus TSWV hais tias, “Nej yuav pom kuv ua pauj rau Npanpiloos thiab nws cov pejxeem uas tau ua phem ua qias rau lub nroog Yeluxalees. Npanpiloos, koj zoo ib yam li lub hauv roob uas ua rau lub ntiajteb puastsuaj, tiamsis kuv uas yog tus TSWV, kuv yog koj tus yeebncuab. Kuv yuav chua koj rau hauv av thiab cia koj da qhov tshauv. Tej pobzeb uas tawm ntawm koj los tsis muaj ib lub zoo coj mus ua tsev li, koj yuav ua suabpuam mus ibtxhis. Kuv yog tus TSWV uas hais li ntawd. “Cia li kwv chij txhij tubrog thiab tshuab raj tshuab xyu kom txhua haivneeg npaj mus ua rog tawmtsam Npanpiloos! Hais kom lub tebchaws Alalaj, Minis thiab Akenas cov tubrog coj ib cov nees coob ib yam li cov kooj txomfav mus tua Npanpiloos thiab tsa ib tug ua tus thawjcoj mus tua rog. Kom txhua haivneeg npaj mus ua rog rau Npanpiloos. Cia li hais kom Medias cov vajntxwv, lawv cov thawjcoj, cov nomtswv thiab cov tubrog uas nyob hauv tej tebchaws uas lawv kav tuaj. Lub ntiajteb qeeg ua zog koog, rau qhov tus TSWV ua rau Npanpiloos puastsuaj ua suabpuam tas tsis muaj neeg nyob raws li nws tau npaj tseg lawm. Npanpiloos tej tubrog tseg tsis sib tua lawm, lawv nyob twjywm hauv tej yeej, rau qhov lawv zog ntaug tas zoo li tej pojniam xwb. Tej roojvag nroog pob puas tas, thiab lawv tej vajtse los kub hnyiab tas huv tibsi lawm. Cov neeg mus tshabxo rau tus vajntxwv uas kav tebchaws Npanpiloos ib tug tas ib tug tuaj hais tias nws lub nroog twb puastsuaj tas lawm. Yeebncuab twb tuaj txeeb tau tus dej uas ntws phua hauv lub nroog thiab twb hlawv tej chaw fajxwm kub hnyiab tas lawm. Cov tubrog Npanpiloos ntshai tshee hnyo ua ibce tuag tas. Tsis ntev yeebncuab twb yuav muab lawv hlais thiab tsuj ib yam li luag tsuj nplej hauv lub tshav ntaus nplej. Kuv yog tus TSWV uas yog cov Yixalayees tus Vajtswv uas muaj hwjchim loj kawg nkaus hais li ntawd.” Tus vajntxwv uas kav cov Npanpiloos muab lub nroog Yeluxalees noj lawm. Nws ua rau lub nroog nyob khoob lug cia ib yam li lub hub; zoo ib yam li tus zaj nqos lub nroog Yeluxalees. Nws coj txhua yam uas nws xav tau mus tas thiab tseg tej uas nws tis xav yuav xwb. Cov neeg uas nyob hauv Xi-oos cia li hais tias, “Cia Npanpiloos ris lub txim uas nws ua nruj ua tsiv rau peb!” Cov neeg uas nyob hauv lub nroog Yeluxalees cia li hais tias, “Cia Npanpiloos ris lub txim uas nws ua rau peb raug kev txomnyem!” Yog li ntawd, tus TSWV hais rau cov neeg uas nyob hauv lub nroog Yeluxalees hais tias, “Kuv yuav pab txheem nej rooj plaub, thiab kuv yuav ua pauj nej cov yeebncuab raws li tej uas lawv tau ua rau nej lawm. Kuv yuav ua kom Npanpiloos tej qhovdej thiab tej dej cag qhuav. Kom lub tebchaws puastsuaj ua chaw rau tej tsiaj qus los nyob. Tej neeg dua kev yuav txob thuam thiab ntshai, tsis muaj leejtwg mus nyob hauv. Cov Npanpiloos yuav nyooj ib yam li tsov ntxhuav thiab yuav quaj ib yam li tej menyuam tsov ntxhuav. Puas yog lawv ua neeg siab hlob? Kuv yuav npaj ib rooj noj haus rau lawv, kom lawv noj tsau haus qaug thiab zoo siab. Lawv yuav mus pw thiab tsis sawv li lawm. Kuv yuav coj lawv mus tua ib yam li luag tua tej menyuam yaj, tej tshis thiab tej laug yaj. Kuv yog tus TSWV uas hais li ntawd.” Tus TSWV hais txog Npanpiloos li no: “Lub nroog uas neeg ntiajteb qhuas luag twb txeeb tau lawm! Npanpiloos raug puastsuaj ua rau neeg ntiajteb ntshai kawg li! Dej hiavtxwv ntas nphau nphwv thiab nrov nroo ntws tuaj nyab Npanpiloos. Tej nroog hauv Npanpiloos yuav ua suabpuam tsis muaj dej, neeg yuav ntshai tsis mus qhov ntawd lossis tsis muaj neeg mus nyob hauv. Kuv yuav rau txim rau Npeles uas yog Npanpiloos tus vajtswv kom nws tsis txhob mus nyiag luag tug; tej neeg ntiajteb yuav tsis hawm nws ntxiv lawm. “Npanpiloos tej ntsa yeej twb pob puas tas lawm. Cov Yixalayees, nej cia li khiav tawm hauv Npanpiloos mus! Cia li khiav kom nej dim ntawm kuv txojkev chim. Tsis txhob ntshai lossis qaug zog rau tej xwm tsis zoo uas nej hnov. Tej xwm tsis zoo ntawd ib xyoos luag hais txawv lawm ib yam, yog hais txog tej xwm ua nruj ua tsiv hauv lub tebchaws uas ib tug vajntxwv sawv tawmtsam ib tug. Twb yuav txog lub sijhawm uas kuv rau txim rau Npanpiloos tej mlom; thoob plaws nws lub tebchaws yuav poob ntsejmuag, thiab nws tej pejxeem yuav raug luag tua tuag tas. Thaum cov neeg uas nyob sab qaumteb tuaj rhuav Npanpiloos puastsuaj lawm, txhua tsav yam uas nyob hauv lub ntiajteb thiab saum nruab ntug yuav qw zoo siab heev. Vim Npanpiloos tau ua rau tej neeg uas nyob thoob ntiajteb raug kev ploj kev tuag thiab ua rau cov Yixalayees coob leej raug kev ploj kev tuag, nimno Npanpiloos thiaj yuav poob rau luag tes. Kuv yog tus TSWV uas hais li ntawd.” Tus TSWV hais rau nws haivneeg uas nyob hauv Npanpiloos hais tias, “Nej twb dim kev tuag lawm! Nimno nej cia li tawm mus! Tsis txhob tos li! Txawm yog nej mus nyob deb nej lub tebchaws los nej yuav tsum nco ntsoov kuv uas yog nej tus TSWV thiab xav ntsoov txog lub nroog Yeluxalees. Nej hais tias, ‘Peb raug luag rhuav ntsejmuag ua rau peb txajmuag kawg. Peb tas kev cia siab, rau qhov cov neeg txawv tebchaws tuaj txeeb tau lub Tuamtsev uas yog qhov chaw Dawbhuv lawm.’ Yog li ntawd, kuv qhia rau nej hais tias twb yuav txog lub sijhawm uas kuv rau txim rau Npanpiloos tej mlom, thiab cov neeg uas raug mob thoob tebchaws yuav ntsaj zom zaws. Txawm yog Npanpiloos yuav nce mus txog saum nruab ntug thiab ua chaw fajxwm ruaj khov rau saud los kuv yuav tso neeg mus rhuav kom puastsuaj tas. Kuv yog tus TSWV uas hais li ntawd.” Tus TSWV hais tias, “Nej cia li mloog tej suab quaj hauv Npanpiloos, tej suab quaj suab nyiav hauv lub tebchaws uas raug puastsuaj. Kuv tabtom rhuav Npanpiloos kom nws lub suab ntsiag. Tej tubrog tuaj nrov nroo ntws ib yam li dej hiavtxwv ntas, thiab qw ntshoo nrooj tuaj tawmtsam nws. Lawv tuaj rhuav Npanpiloos kom puastsuaj; Npanpiloos tej tubrog twb raug luag ntes, thiab lawv tej hneevnti lov tas lawm. Kuv yog tus TSWV uas rau txim rau txojkev phem kev qias, thiab kuv yuav rau txim rau Npanpiloos kom tsimnyog nws tej kev txhaum. Kuv yuav muab cawv rau nws cov nomtswv, tej tub txawg tub ntse, tej thawjcoj thiab tej tubrog haus kom qaug. Lawv yuav mus pw thiab tsis sawv li lawm. Kuv yog tus Vajntxwv uas hais li ntawd; Kuv yog tus TSWV uas muaj hwjchim loj kawg nkaus. Npanpiloos tus ntsa yeej uas ruaj khov yuav pob puas tas rau hauv av, thiab nws tej roojvag tsomfaj raug hlawv kub hnyiab tas. Tes haujlwm uas txhua haivneeg ua tsis muaj qabhau, lawv tej zog ntaug tas. Kuv yog tus TSWV uas muaj hwjchim loj kawg nkaus hais li ntawd.” Yelemis samhwm rau Xelayas uas yog Vajntxwv Xedekiyas ib tug nom, Xelayas yog Neliyas tus tub thiab yog Maxeyas tus xeebntxwv. Thaum uas Xedekiyas ua Vajntxwv kav tebchaws Yudas tau plaub xyoo, Xelayas raug ntes nrog Vajntxwv Xedekiyas mus rau tebchaws Npanpiloos lawm. Kuv sau ib thooj ntawv hais txog tej kev puastsuaj uas yuav los raug Npanpiloos; tej lus uas kuv sau no yog hais txog tej kev puastsuaj thiab lwm yam uas yuav los raug Npanpiloos. Kuv hais rau Xelayas hais tias, “Thaum koj mus txog tim Npanpiloos lawm, koj nco ntsoov nyeem kuv cov lus uas sau rau hauv thooj ntawv no nrov nrov rau sawvdaws mloog. Tom qab ntawd nej thov Vajtswv hais tias, ‘Tus TSWV koj hais tias koj yuav rhuav lub nroog no kom tsis muaj ib yam dabtsi nyob hauv, tsis hais neeg lossis tej tsiaj txhu thiab lub nroog no yuav ua suabpuam mus ibtxhis.’ Xelayas, thaum koj nyeem thooj ntawv no rau lawv mloog tas lawm, koj muab pav rau ib lub pobzeb thiab muab pov rau hauv tus Dej Efalates thiab hais tias, ‘Yuav muaj tej xwm li no los raug Npanpiloos, Npanpiloos yuav tog rau hauv qab thu ib yam li no thiab tsis tawm los li lawm, rau qhov tus TSWV yuav tso kev puastsuaj los raug Npanpiloos.’ ” Yelemis cov lus xaus li no. Thaum Xedekiyas ua vajntxwv kav tebchaws Yudas, nws hnubnyoog muaj nees nkaum ib xyoos, nws nyob hauv lub nroog Yeluxalees kav tau kaum ib xyoo. Nws niam hu ua Hamutas, nws niam yog tus Yelemis uas nyob hauv lub nroog Linas tus ntxhais. Vajntxwv Xedekiyas ua txhaum rau tus TSWV ib yam li Vajntxwv Yehauyakees ua. Tus TSWV chim rau cov neeg hauv lub nroog Yeluxalees thiab hauv tebchaws Yudas, nws thiaj muab lawv ntiab tawm mus lawm. Xedekiyas ntxeev siab rau Vajntxwv Nenpukajnexales uas kav tebchaws Npanpiloos. Yog li ntawd, thaum Xedekiyas ua vajntxwv tau cuaj xyoos, lub kaum hli hnub xiab kaug, Nenpukajnexales thiaj coj nws cov tubrog tuaj tua lub nroog Yeluxalees. Lawv tuaj tsuam yeej nyob sab nraum ntug nroog thiab lawv meem ib tug ntswg puagncig lub nroog, thiab lawv vij lub nroog Yeluxalees mus txog thaum Xedekiyas kav tebchaws tau kaum ib xyoos. Xyoo ntawd, lub plaub hlis hnub xiab cuag, thaum ntawd sawvdaws tshaib nqhis heev, tsis muaj ib yam dabtsi noj li lawm, cov yeebncuab tsoo tus ntsa yeej ib qho pob. Txawm yog cov tubrog Npanpiloos twb vij lub nroog tas lawm los thaum ib tag hmo Vajntxwv Xedekiyas thiab nws cov tubrog tseem khiav tawm mus hla vajntxwv lub vaj mus rau ntawm lub roojvag uas nyob kem nruab nrab ntawm ob txheej ntsa yeej mus rau tom lub Hav Yauladees lawm. Tiamsis cov tubrog Npanpiloos caum lawv qab mus ntes tau Vajntxwv Xedekiyas ntawm lub tiaj nrag uas nyob ze lub nroog Yelikaus. Nws cov tubrog khiav tas tso nws tseg. Thaum lawv ntes tau Xedekiyas lawm, lawv coj nws los cob rau Vajntxwv Nenpukajnexales ntawm lub nroog Lilas hauv cheebtsam Hamas thiab Nenpukajnexales txiav txim rau Xedekiyas qhov ntawd. Nenpukajnexales muab Xedekiyas cov tub tua tabmeeg Xedekiyas hauv lub nroog Lilas thiab Nenpukajnexales kom luag muab cov Yudas tej nomtswv tua huv tibsi. Tom qab ntawd, Nenpukajnexales muab Xedekiyas ob lub qhovmuag kaus povtseg thiab muab saw hlau khi cab mus rau tim tebchaws Npanpiloos lawm. Xedekiyas nyob hauv tsev lojcuj mus txog hnub uas nws tuag li. Thaum Nenpukajnexales ua vajntxwv kav tebchaws Npanpiloos tau kaum cuaj xyoos, lub tsib hlis hnub xiab kaug, Nenpuxaladas uas yog vajntxwv tus tuavxam thiab yog tus thawj tubrog txawm tuaj rau hauv lub nroog Yeluxalees. Nws hlawv lub Tuamtsev, vajntxwv lub loog, cov nomtswv tej tsev ua haujlwm thiab tagnrho tej vajtse hauv Yeluxalees kub hnyiab tas; thiab nws cov tubrog muab tej ntsa yeej tsoo pob puas tas huv tibsi. Nenpuxaladas ntes cov neeg uas seem nyob hauv lub nroog, tsis hais cov uas khiav los thawj, cov neeg uas txawj txaug yam ub yam no uas nyob hauv lub nroog mus rau tebchaws Npanpiloos huv tibsi lawm. Tiamsis nws tseg cov neeg txomnyem ibtxhia uas tsis muaj liaj tsis muaj teb nyob rau hauv tebchaws Yudas thiab nws kom lawv ua luag tej teb thiab tej vaj txiv hmab. Cov Npanpiloos muab tej ncej tooj, tej tsheb txawb, lub rhawv tooj uas txawb ntawm lub Tuamtsev tsoo tawg tas thiab lawv nqa tej tooj ntawd mus rau tim tebchaws Npanpiloos lawm. Lawv tseem nqa tej taumtxhob, tej ciblaug tooj uas luag siv yawm tshauv saum lub thaj, tej txiab txiav teebxeeb, tej tais phiab rau tej ntshav tsiaj uas tua theej txhoj, tej laujkaub uas hlawv hmoov tshuaj tsw qab thiab tej twj taig tooj uas siv ua kevcai hauv lub Tuamtsev mus huv tibsi lawm. Lawv nqa txhua yam uas muab nyiaj muab kub nchuav ua huv tibsi mus lawm: tsis hais tej laujkaub me, tej yias rau ncaig taws, tej tais phiab rau tej ntshav tsiaj uas tua theej txhoj, tej ciblaug tooj yawm tshauv, tej ncej txawb teeb, tej laujkaub rau hmoov tshuaj tsw qab thiab tej tais uas rau cawv txiv hmab ua khoom fij. Tej uas Vajntxwv Xalumoos tsim tseg rau hauv lub Tuamtsev: tsis hais ob tug ncej tooj, cov tsheb txawb, lub rhawv tooj thiab kaum ob tug nyuj uas txawb lub rhawv tooj rau saud, tej no hnyav heev muab los luj tsis tau rau saum teev. Ob tsham txiv ntsiavkws ntawd, ib tsham twg muaj ib puas lub, tiamsis yog tuaj hauv no saib rau saud, tsuas pom cuaj caum rau lub xwb. Dua li ntawd, Nenpuxaladas uas yog tus thawj tubrog tseem ntes Xelayas uas yog tus Povthawj Hlob thiab tus povthawj Xefaniyas uas yog tus pab thiab ntes peb tug neeg tseemceeb uas tu lub Tuamtsev coj mus lawm. Nenpuxaladas ntes tus thawj tubrog uas saib tagnrho cov tubrog, vajntxwv xya tus tuavxam, tus thawj tubrog uas yog tus pab thiab tuav cov tubrog tej ntaub ntawv thiab rau caum leej neeg tseemceeb uas nyob hauv lub nroog mus lawm. Nenpuxaladas coj cov neeg ntawd mus cob rau Vajntxwv Nenpukajnexales ntawm lub nroog Lilas hauv cheebtsam Hamas. Vajntxwv Nenpukajnexales kom luag muab lawv ntaus thiab tua rau hauv lub nroog ntawd. Yog li ntawd, luag thiaj coj cov Yudas tawm hauv lawv lub tebchaws mus lawm. Ntawm no yog hais txog cov Yudas uas Vajntxwv Nenpukajnexales ntes coj mus: thaum Nenpukajnexales ua vajntxwv tau xya xyoo, nws ntes cov Yudas peb txhiab nees nkaum peb leeg; thiab thaum nws ua vajntxwv tau kaum yim xyoo, nws ntes cov Yudas yim pua peb caug ob leeg hauv lub nroog Yeluxalees coj mus; thiab thaum nws ua vajntxwv tau nees nkaum peb xyoo, Nenpuxaladas rov tuaj ntes tau cov Yudas xya pua plaub caug tsib leeg. Xam tagnrho cov neeg uas raug luag ntes coj mus, muaj plaub txhiab rau pua leej. Xyoo uas Evimeludas pib ua vajntxwv kav tebchaws Npanpiloos, nws hlub Yehauyakhees uas ua vajntxwv kav tebchaws Yudas, nws thiaj tso Yehauyakhees tawm hauv tsev lojcuj. Suav txij hnub uas luag ntes Yehauyakhees hauv tebchaws Yudas mus txog hnub uas luag tso nws tawm hauv tsev lojcuj los yog tau peb caug xya xyoo rau lub kaum ob hlis hnub nees nkaum tsib. Vajntxwv Evimeludas ua zoo rau Yehauyakhees thiab muab nws saib hlob dua lwm tus vajntxwv uas luag ntes mus rau hauv tebchaws Npanpiloos. Yog li ntawd, luag thiaj muab dua ib cev ris tsho rau Yehauyakhees hnav, hloov cev uas nws hnav nyob hauv tsev lojcuj thiab nws niaj hnub tau nrog vajntxwv noj mov saum vajntxwv lub rooj mus tas nws simneej. Thaum uas Yehauyakhees tseem ua neej nyob, Vajntxwv Evimeludas uas kav tebchaws Npanpiloos niaj hnub muab nyiaj rau Yehauyakhees yuav noj yuav hnav kom txaus mus txog hnub uas tas Yehauyakhees simneej. Lub nroog Yeluxalees uas nyob mluas mlob, yav tas los muaj neeg nyob xauv npo! Yav tas los neeg ntiajteb qhuas nws kawg li, Nimno nws zoo ib yam li tus pojntsuam lawm xwb; Cov nomtswv hauv tej nroog puavleej poob mus ua luag qhev. Yeluxalees quaj ib hmos kaj ntug, kua muag ntws laws ntawm nws lub plhu; Nws tej qub phoojywg tsis muaj ib tug tuaj nplig nws siab li; Cov neeg uas koom tes nrog nws los tig rov ntxeev siab rau nws Thiab cov neeg ntawd txhua tus puavleej tawmtsam nws. Cov neeg Yudas yog cov qhev uas tas kev cia siab lawm, Lawv raug ntiab khiav mus deb heev ntawm lawv lub tebchaws. Lawv mus nyob rau lwm lub tebchaws uas tsis muaj ib lub chaw yog lawv tug, Yeebncuab nyob puagncig lawv, tsis muaj kev khiav dim li. Nimno tsis muaj ib tug neeg tuaj pehawm Tus TSWV hauv lub Tuamtsev hnub uas dawbhuv li lawm. Cov hluas nkauj uas hu nkauj los raug kev txomnyem ntsuav, Thiab cov povthawj los tsuas niaj hnub quaj dhuj dhev xwb. Tej roojvag nroog qhib lug cia thiab Xi-oos lwj siab ntsuav. Yeluxalees cov yeebncuab vammeej; Lawv muaj hwjchim lawv thiaj tswj tau nws. Tus TSWV ua rau nws raug kev txomnyem vim tej kev txhaum uas nws ua; Nws cov menyuam raug luag ntes thiab coj mus tas lawm. Yeluxalees lub koob meej uas nrov ncha moo lug tsuas yog muaj yav tas los xwb. Nws cov thawjcoj zoo li tej muaslwj uas tshaib plab qaug zog zis lawm xwb, Lawv khiav qaug zog zi ua cov neeg uas caum lawv tua ntej. Lub nroog Yeluxalees uas raug puastsuaj lawm nimno nyob kho siab khuav, Nws tig rov los xav txog lub koob meej uas thaum ub nyob ncha moo lug. Thaum nws poob mus rau yeebncuab tes lawm, tsis muaj leejtwg kam pab nws li; Cov neeg uas tua yeej nws luag nws plig thaum uas nws poob tsam. Yeluxalees lub koob meej twb ploj tas lawm; nws liabqab thiab raug luag thuam. Nws quaj pos muag nti thiab txajmuag kawg li. Yeluxalees rov ua rau nws vuabtsuab heev vim nws txojkev txhaum. Luag pom ntsoov Yeluxalees txojkev ua phem ua qias, Tiamsis nws yeej tsis nyuaj siab txog nws lub neej hlo li. Nws poob tsam txaus ntshai kawg li, yeej tsis muaj leejtwg nplig tau nws lub siab. Nws cov yeebncuab twb yeej lawm, nws mam li quaj thov tus TSWV hlub. Cov yeebncuab huab tagnrho nws tej nyiaj huv tibsi mus lawm. Nws pom ntsoov lawv tuaj rau hauv lub Tuamtsev, Qhov chaw uas tus TSWV txwv tsis pub lwm haivneeg mus rau hauv li. Nws cov neeg quaj ntsoog qees nrhiav saib puas muaj dabtsi noj; Lawv muab lawv tej nyiaj mus muas mov noj cawm lawv txojsia. Lub nroog Yeluxalees tsa suab hlo quaj hais tias, “Tus TSWV thov koj tsa qhovmuag ntsia kuv, saib kuv txojkev txomnyem.” Lub nroog Yeluxalees quaj rau cov neeg dhau kev hais tias, “Nej cia li tsa qhovmuag saib kuv maj!” Yeej tsis muaj leejtwg raug txomnyem npaum li kuv raug, Yog txojkev txomnyem uas tus TSWV tso los rau kuv thaum lub sijhawm uas nws chim. Tus TSWV tso hluavtaws saum ntuj los kub ti nkaus rau hauv kuv lub nrog cev, Nws cuab hlua mag kuv kotaw thiab chua kom kuv ntog rau hauv av. Ces nws tso kuv tseg thiab cia kuv nyiaj mob. “Nws sau tagnrho kuv tej kev txhaum los ua ke thiab muab pav ua ib qhoo; Nws muab tej kev txhaum ntawd los rig rau kuv cajdab, Thiab ua rau kuv lub zog ntaug nphaws vim hnyav heev. Tus TSWV muab kuv cob rau cov yeebncuab tes thiab kuv tsis muaj zog tawmtsam lawv. “Tus TSWV luag kuv cov tubrog uas siab tawv tshaj plaws ntawd plig kawg li, Nws tso ib pab tubrog tuaj rhuav ua rau kuv cov tub hluas raug puastsuaj tas; Nws tsuj kuv cov neeg ib yam li tsuam txiv hmab. “Twb yog vim li no kuv tej kua muag thiaj ntws si laim hauv kuv ob lub qhovmuag los, Tsis muaj leejtwg nplig kuv siab; tsis muaj leejtwg txhawb kuv lub zog li. Yeebncuab ntaus yeej kuv, kuv cov neeg tsis tshuav ib yam dabtsi li. “Kuv cev tes ncuv, tiamsis tsis muaj leejtwg pab; Tus TSWV tau hu kom yeebncuab tuaj txhua txoj haukev tuaj tawmtsam kuv; Lawv saib kuv zoo ib yam li tej khoom uas tsis muaj nqis. “Tiamsis tus TSWV yeej ncaj ncees, vim kuv tsis mloog nws lus xwb. Cov neeg uas nyob txhua qhov nej cia li mloog kuv hais, Nej cia li tsa qhovmuag ntsia kuv tej mob saib. Kuv cov tub hluas thiab ntxhais hluas twb raug luag ntes coj mus tas lawm. “Kuv hu cov neeg uas koom tes nrog kuv, tiamsis lawv tsis kam pab kuv. Kuv cov povthawj thiab cov thawjcoj mus nrhiav zaub mov noj cawm lawv txojsia, Tiamsis lawv mus tuag tas rau ntawm tej kev hauv nroog lawm. “Tus TSWV, thov koj tsa qhovmuag saib kuv tus mob, Saib kuv tus ntsujplig uas txomnyem ntsuav lauj! Kuv lub siab puas tas rau txojkev quaj ntsuag vim kuv tej kev txhaum. Muaj kev tua neeg nyob txhua txojkev; hauv tsev los muaj neeg tuag pawglug. “Thov mloog kuv lub suab quaj, vim tsis muaj leejtwg nplig kuv siab. Kuv cov yeebncuab zoo siab heev vim koj tso kev puastsuaj los rau kuv. Thov coj hnub zoo uas koj tau coglus tseg lawm los rau kuv; Thiab ua kom kuv cov yeebncuab raug kev txomnyem ib yam li kuv raug. “Thov koj txiav txim rau lawv vim lawv tej kev ua phem ua qias; thov rau txim rau lawv ib yam li koj rau txim rau kuv, vim kuv tej kev txhaum. Kuv quaj rau kuv txojkev txomnyem, thiab mob kuv siab kawg nkaus li.” Tus TSWV txojkev chim los khwb nkaus lub roob Xi-oos tsaus nti. Nws muab Xi-oos lub koob meej uas nto moo lug rhuav puastsuaj tas. Txawm yog nws lub Tuamtsev los hnub uas nws chim nws yeej muab tso povtseg. Tus TSWV yuav rhuav txhua lub zos hauv tebchaws Yudas Kom puastsuaj tas tsis hlub tshua leejtwg hlo li. Thiab muab tej chaw fajxwm uas tiv thaiv lub tebchaws rhuav povtseg. Nws ua rau lub tebchaws thiab tej thawjcoj kom raug kev txajmuag. Vim tus TSWV chim heev, nws thiaj ua rau cov Yixalayees lub zog ntaug; Nws tsis pab peb thaum cov yeebncuab tuaj tua peb. Nws tawmtsam peb ib yam ib hluavtaws kub txhua yam puastsuaj tas lawm. Nws taw nws cov xub hneevnti rau peb ib yam li taw rau tej yeebncuab; Nws muab txhua tus uas peb nyiam thiab tshua tua povtseg huv tibsi. Nws hliv nws txojkev chim ib yam li nplaim taws los rau Xi-oos tus ntxhais lub tsevntaub. Tus TSWV rhuav cov Yixalayees ib yam li nws rhuav tej yeebncuab ntag; Nws muab Yeluxalees tej chaw fajxwm thiab tej tsev rhuav puastsuaj tas. Nws coj txojkev txomnyem uas tsis txawj kawg los rau cov Yudas. Nws muab lub Tuamtsev uas yog qhov chaw pehawm nws tsoo tawg tas; Tus TSWV ua kom Xi-oos tsis txhob nco qab txog hnub dawbhuv thiab Hnub Xanpataus. Cov vajntxwv thiab cov povthawj puavleej raug nws txojkev chim ib yam nkaus. Tus TSWV muab nws lub thaj tso tseg thiab ua rau nws lub Tuamtsev dawbhuv ua suabpuam tas. Nws tso cai rau yeebncuab tuaj muab lub Tuamtsev tej ntsa yeej tsoo tawg tas. Lawv qw muaj yeej rau ntawm qhov chaw uas thaum peb pehawm Vajtswv thiab zoo siab. Tus TSWV yeej txiav txim siab ua kom Xi-oos tus ntxhais tus ntsa yeej raug puastsuaj; nws twb muab hlua ntsuas tib zoo tas lawm; nws yeej tsis cheem nws txhais tes uas rhuav lub nroog ntawd. Tej chaw tsomfaj thiab tej ntsa yeej nimno twb vau tas ua ib pawg lawm. Tej roojvag puas tas vau rau hauv av, Nws muab tej nqaj roojvag tsoo tawg ua tej daim. Cov vajntxwv thiab cov nomtswv raug luag ntes coj mus lawm; Txoj kevcai los tsis muaj leejtwg qhia, Thiab tus TSWV tsis ua rau cov cev Vajtswv lus ua yogtoog pom li lawm. Yeluxalees cov neeg laus zaum tsaws hauv av tsis hais lus li; Lawv tsuab hmoov av rau saum lawv taubhau thiab muab ntaubtsaj los hnav. Cov ntxhais hluas nyo taubhau ti nkaus rau hauv av. Kuv quaj heev thiaj ua rau kuv qhovmuag plooj tas; kuv tus plig ua mob ntsuav. Kuv tu siab heev ua rau kuv lub zog ntaug tas vim kuv haivneeg txojkev puastsuaj. Tej menyuam thiab cov menyuam mos ntog tsis nco qab tas rau ntawm tej kev hauv nroog. Cov menyuam ntawd quaj rau lawv niam hais tias, “Tshaib plab thiab nqhis dej kawg li;” Lawv ntog pawglug rau ntawm tej kev ua rau lawv tej nqaij to tas, Lawv siav yau zuj zus thiab tuag rau ntawm lawv niam lub xubntiag. Yeluxalees uas kuv hlub, kuv yuav hais li cas rau koj? Yuav ua li cas kuv thiaj rov nplig tau koj lub siab? Tsis tau muaj dua ib tug twg uas txomnyem npaum li no. Koj txojkev puastsuaj hnyav npaum nkaus li dej hiavtxwv; tsis muaj leejtwg pab tau. Koj cov cev Vajtswv lus tsis muaj dabtsi qhia rau koj lawm, tiamsis lawv dag xwb; Lawv tej lus qhuab qhia yeej nthuav tsis tau koj txojkev txhaum tawm. Lawv ua rau koj xav hais tias tsis tas koj hloov dua siab tshiab. Cov neeg dua kev ntawm lub nroog no saib tsis taus koj kiag li. Lawv co taubhau nto thiab luag lub nroog Yeluxalees uas puastsuaj tas lawm hais tias, “Ntawm no puas yog lub nroog uas zoo nkauj heev? Ntawm no puas yog txojkev zoo siab ntawm lub ntiajteb no?” Tagnrho koj cov yeebncuab puavleej saib tsis taus koj Thiab ua qhovmuag qaujles ntxub koj kawg nkaus li. Lawv zij ncaug thiab ntxi muag rau koj hais tias, “Peb ua rau nws puastsuaj lawm lauj! Hnub no yog hnub uas peb tos ntsoov xav pom heev ntag!” Thaum kawg tus TSWV tau ua raws li nws tau npaj tseg lawm; Nws ua rau peb puastsuaj tas tsis hlub tshua leejtwg, Raws li nws twb ceebtoom rau peb ua ntej ntev los lawm. Nws cia peb cov yeebncuab kovyeej peb, nws cia lawv zoo siab thaum peb ntog lawm. Yeluxalees, cia koj tej ntsa yeej quaj qw rau tus TSWV! Cia koj tej kua muag ntws tawm ib yam li tej dej tas hnub tas hmo; Cia li quaj thiab tu siab kom koj lub zog ntaug. Koj sawv tas los sawv dua los quaj thov tus TSWV ib hmos kaj ntug plaws; Cia li qhib koj lub siab thiab thov kom nws hlub tshua koj tej menyuam, Tej menyuam tuag tshaib pawglug ntawm tej ntug kev. Tus TSWV, thov koj tsa qhovmuag ntsia cov neeg uas koj ua rau lawv raug kev txomnyem ntawd lauj! Cov pojniam tabtom noj tej menyuam uas lawv hlub heev! Cov povthawj thiab cov cev Vajtswv lus raug luag tua tuag rau hauv lub Tuamtsev. Tej laus thiab tej hluas los tuag pawglug rau ntawm tej kev ib yam nkaus, Cov tub hluas thiab ntxhais hluas raug yeebncuab muab ntaj tua tuag tas. Hnub uas koj chim koj muab lawv tua tuag pawglug tsis hlub tshua leejtwg li. Koj caw kuv cov yeebncuab tuaj npaj Rooj noj rooj haus txaus ntshai heev nyob puagncig kuv. Thiab hnub uas koj chim yeej tsis muaj leejtwg khiav dim li. Lawv muab cov menyuam uas kuv tu hlob thiab kuv hlub tua povtseg tas. Kuv yog ib tug uas paub hais tias qhov uas Vajtswv rau txim ntawd hnyav npaum li cas. Nws ntiab thiab coj kuv mus ti nkaus rau hauv qhov uas tob tshaj plaws thiab tsaus ntuj nti. Nws muab kuv ntaus tas los ntaus dua tsis hlub kuv hlo li. Nws ua rau kuv tej nqaij tej tawv ntuag rua ras thiab tsoo kuv tej pobtxha lov. Nws muab kuv kaw rau hauv txojkev txomnyem thiab lwj siab. Nws yuam kuv nyob hauv qhov chaw tsaus ntuj nti ib yam li cov neeg uas twb tuag tau ntev los lawm. Nws muab saw hlau khi kuv; kuv yog tus neeg raug txim uas tsis muaj kev cia siab hais tias yuav khiav dim li. Kuv tsa suab hlo quaj nrov nrov thov pab, Tiamsis Vajtswv tsis mloog kuv tej lus thov li. Kuv mus kev qaug poj qaug poog; Nws muab tej txiag zeb los ua ntsa loog thaiv kuv txhua txoj haukev. Tus TSWV tos kuv kev ib yam li tus dais; Nws dhia tuaj tom kuv ib yam li tus tsov ntxhuav. Nws coj kuv mus rau tom ntug kev, Muab kuv dua ntuag ua tej daim, thiab tso kuv povtseg. Nws nta nws rab hneev thiab muab kuv cuab ua daim phiaj rau nws tua. Nws tua nws cov xub tuaj raug kuv mus tob heev rau hauv kuv lub nrog cev. Neeg luag kuv plig ib hnub tsaus ntuj; lawv muab kuv tso daj tso luag ua si. Tus TSWV muab txojkev txomnyem uas iab siab heev rau kuv noj thiab haus nkaus xwb. Nws muab kuv lub ntsejmuag coj mus txhuam rau hauv av thiab muab kuv cov hniav tsoo saum pobzeb lov tas. Kuv thiaj tsis nco txog kev noj qab nyob zoo, kev thajyeeb thiab kev zoo siab li lawm. Kuv txojsia nyob tsis ntev lawm; Kuv txojkev cia siab rau tus TSWV twb ploj tas lawm. Kuv xav txog txojkev lwj siab, kuv tsis muaj vajtse nyob, Mas yog tej tshuaj lom uas iab kawg nkaus li. Kuv pheej xav txog txojkev lwj siab thiab kuv nyuaj siab kawg nkaus. Thaum kuv nco txog tej no ua rau kuv rov muaj kev cia siab. Tus TSWV txojkev hlub uas ruaj khov thiab nws txojkev hlub tshua yeej muaj tsis paub kawg, Txojkev hlub ntawd muaj txhua hnub, ib yam li lub hnub niaj tagkis tawm tuaj. Kuv tsuas muaj tus TSWV tib leeg xwb, yog li ntawd kuv thiaj cia siab rau nws. Tus TSWV yeej ua zoo rau txhua tus uas vamkhom nws, Qhov uas zoo tshaj, yog ua lub siab ntev tos mus txog hnub uas nws los cawm peb, Thiab qhov uas zoo tshaj, yog peb xyaum ua siab ntev thaum hluas los. Thaum peb raug kev txomnyem, peb yuav tsum ua siab ntev zaum ntsiag to. Tsimnyog peb txhos caug nyo ti nkaus hauv av, yog ua li ntawd tseem muaj kev cia siab. Txawm yog raug ntaus thiab raug thuam los peb yeej zoo siab txais huv tibsi. Tus TSWV yog tus muaj kev hlub thiab nws yuav tsis tso peb tseg mus ibtxhis. Txawm yog nws ua rau peb raug kev ntxhov siab los nws yeej hlub peb raws li nws txojkev hlub uas ruaj khov. Tus TSWV yeej tsis muaj pluaj siab cia peb raug kev ntxhov siab lossis kev tsimtxom. Thaum peb raug luag caij tsuj hauv tsev lojcuj los tus TSWV yeej paub; Tus TSWV paub thaum peb tsis ua ncaj ncees li nws hais; Thaum luag txiav txim tsis ncaj hauv tsev tu plaub los tus TSWV yeej paub. Tsuas yog tej uas haum tus TSWV siab xwb thiaj li ua tau. Kev zoo thiab kev phem los ib yam nkaus, Puavleej yog tus TSWV uas muaj hwjchim loj kawg nkaus hais thiaj li muaj. Vim li cas peb pheej yws thaum peb raug txim, vim peb tej kev txhaum? Cia peb tshuaj saib peb lub neej thiab tig rov los cuag tus TSWV. Cia peb qhib peb lub siab rau Vajtswv tus uas nyob saum ntuj thiab thov hais tias, “Tus Tswv, peb tau ua txhaum thiab ntxeev siab rau koj lawm, koj tsis tau zam txim rau peb li. “Koj caum peb thiab tua peb povtseg; koj txojkev chim roos koj txojkev hlub lawm, Tauv huab uas yog koj txojkev npautaws tuab heev peb tej lus thov thiaj tuaj tsis txog koj. Koj ua rau peb raug neeg ntiajteb saib zoo ib yam li tej khoom uas tsis muaj nqis. “Peb cov yeebncuab txhua tus thuam peb thiab saib tsis taus peb. Peb twb raug kev txomnyem thiab kev puastsuaj los lawm; Peb ua neej nyob tuav xovxeeb thiab ntshai kawg li. Kuv kua muag ntws laws thaum kuv pom kuv haivneeg raug kev puastsuaj. “Kuv cov kua muag yuav ntws los tsis paub tu ib yam li tus dej ntws, Mus txog thaum tus TSWV tsa qhovmuag ntsia saum ntuj tuaj pom peb lawm. Thaum kuv pom tej xwmtxheej los raug cov pojniam uas nyob hauv lub nroog mas kuv tu siab kawg. “Cov neeg uas ua yeebncuab rau kuv cia li lam ntxub kuv thiab cuab hlua mag kuv ib yam li noog mag tsig. Lawv muab kuv pov ciaj rau hauv ib lub qhov thiab muab ib lub pobzeb npog lub ncauj qho. Dej vov dhau plaws saum kuv taubhau, thiab kuv xav hais tias, “Kev tuag los ze lawm lauj.” “Tus TSWV, kuv nyob puag hauv qab qho, kuv quaj thov koj, Thiab thaum kuv thov kom koj mloog kuv tej lus thov, koj yeej hnov. Koj teb kuv tej lus thov thiab hais kom kuv tsis txhob ntshai. “Tus TSWV, koj twb tuaj tso kuv dim, thiab cawm tau kuv txojsia lawm. Tus TSWV, koj twb pom tej uas luag ua tsis ncaj rau kuv lawm, thov koj txiav txim kom ncaj ncees rau kuv rooj plaub. Koj yeej paub hais tias kuv cov yeebncuab ntxub kuv heev thiab tuavhauv tawmtsam kuv li cas. “Tus TSWV, koj yeej paub tej uas lawv tuavhauv ua phem rau kuv; Thiab koj yeej hnov tej lus uas lawv thuam kuv. Lawv hais txog kuv thiab tuav tswvyim ua phem rau kuv ib hnub tsaus ntuj. Lawv muab kuv tso daj tso luag thaum sawv ntxov mus txog thaum tsaus ntuj. “Tus TSWV, thov koj rau txim rau lawv raws li tej uas lawv tau ua tas los lawm. Thov koj foom phem rau lawv thiab tsis txhob pub kom lawv muaj kev cia siab hlo li. Thov koj caum lawv thiab raws kom lawv khiav tawm hauv lub ntiajteb no mus tas dulug.” Peb tej kub tsis ci lawm; tej pobzeb uas ua lub Tuamtsev pob poob pawglug rau hauv tej kev. Xi-oos cov tub hluas muaj nqis rau peb ib yam li tej kub, tiamsis nimno lawv muaj nqis ib yam li tej laujkaub av lawm xwb. Txawm yog tus maum hma los yeej pub mis rau nws tej menyuam noj; Tiamsis kuv haivneeg ua nruj ua tsiv rau lawv tej menyuam ib yam li tej noog ntxhuav. Lawv cia lawv tej menyuam tuag tshaib tuag nqhis tas; Tej menyuam mus thov zaub mov noj, tiamsis tsis muaj leejtwg muab ib yam dabtsi rau lawv li. Cov neeg uas ibtxwm tau noj tej zaub mov zoo Puavleej tuag tshaib tas rau ntawm tej kev; Cov neeg uas ibtxwm npluanuj yuav mus fawb zaub mov ntawm tej chaw pov liamsim noj. Kuv haivneeg raug txim hnyav tshaj cov neeg hauv lub nroog Xaudoos, tib npliag ntshis xwb, lawv twb raug kev puastsuaj tas rau Vajtswv txhais tes. Peb cov nomtswv huv tshaj tej daus thiab dawb dua kua mis, lawv nyob cus plaws thiab muaj zog khov kho tsis muaj mob li. Nimno lawv pw pawglug hauv tej kev tsis muaj neeg paub, Lawv tej ntsejmuag dub nciab vim twb tuag lawm; Lawv tej tawv qhuav ib yam li tawv ntoo qhwv nkaus lawv tej txha, Cov neeg uas tuag rau hauv tshavrog zoo tshaj cov uas yoo tshaib yoo nqhis tuag vim tsis muaj mov cawm lawv txojsia. Txojkev puastsuaj uas los raug kuv haivneeg mas txaus ntshai kawg; cov pojniam uas hlub lawv tej menyuam los cia li muab tej menyuam tua noj. Tus TSWV tso nws txojkev chim uas loj kawg nkaus tawm tuaj; nws zes hluavtaws rau Xi-oos kub hnyiab tas rau hauv av. Cov vajntxwv uas nyob hauv ntiajteb no, lossis cov neeg uas nyob thoob qab ntuj, yeej tsis ntseeg hais tias yeebncuab thiab tubrog muaj cuabkav nkag tau lub nroog Yeluxalees tej roojvag li. Tiamsis muaj neeg nkag tau los, vim nws cov cev Vajtswv lus ua txhaum thiab nws cov povthawj lub txim thiaj ua rau cov neeg ncaj ncees tuag tas lawm. Yeluxalees cov thawjcoj ncig mus ncig los txhua txojkev li cov neeg digmuag, lawv ibce lo ntshav thoob plaws tsis muaj leejtwg kam kov lawv. Tej neeg qw rau lawv hais tias, “Nej cov neeg uas tsis huv! Cia li khiav mus! Tsis txhob tuav kuv!” Yog li ntawd, lawv thiaj khiav ib lub tebchaws mus rau ib lub tebchaws, tsis muaj leejtwg kam txais tos lawv hlo li. Tus TSWV yeej tsis mob siab txog lawv; nws thiaj muab lawv ntiab mus nyob ua sab ua sua. Nws yeej tsis xam txog peb cov povthawj thiab cov thawjcoj li lawm. Peb lub qhovmuag ntsia ntsoov mus txog thaum uas tsis muaj txojkev pab li lawm. Peb pheej tos kev pab ntawm ib haivneeg uas tsis muaj ib yam dabtsi pab peb. Yeebncuab yeej ntsia ntsoov peb; peb tsis muaj cuabkav tawm mus rau tom tej kev li; Peb lub sijhawm twb dhau; hnub kawg twb los txog lawm. Cov neeg uas caum ntes peb tseem khiav ceev tshaj tej dav uas rwg saum nruab ntug los. Lawv caum ntes peb saum tej ncov roob; Thaum peb tsis ceevfaj lawv ntes tau peb hauv tiaj suabpuam. Lawv ntes tau peb lub hauvpaus txojsia, yog tus vajntxwv uas tus TSWV xaiv; yog tus uas peb cia siab hais tias yuav tiv thaiv tau peb ntawm txhua pab yeebncuab. Cov Edoos thiab cov Uxis nej cia li luag zoo siab. Kev puastsuaj yeej yuav los raug nej ib yam nkaus thiab; nej yuav vau zoj vau zis liabqab ploog txajmuag kawg li. Xi-oos twb raug rau txim pauj nws lub txim txaus lawm; tus TSWV yuav tsis cia peb raug luag ntes coj mus ib zaug ntxiv lawm. Tiamsis Edoos, tus TSWV yuav rau txim rau koj; nws yuav nthuav tej kev txhaum uas koj ua ntawd tawm huv tibsi. Tus TSWV, thov koj nco txog tej xwm uas tau los raug peb ntawd. Thov koj tsa qhovmuag ntsia peb thiab peb tej kev txajmuag. Peb tej liaj tej teb poob rau lwm haivneeg tes lawm; cov neeg txawv tebchaws tuaj nyob hauv peb tej vajtse tas lawm. Cov uas yog peb txiv raug yeebncuab muab tua tuag tas huv tibsi, thiab nimno tshuav cov uas yog peb niam ua pojntsuam nyob lawm xwb. Peb yuav tau them nyiaj rau tej dej uas peb haus; peb yuav tau muab nyiaj muas ntoo los rau peb ua taws rauv. Luag raws thiab nplawm peb ib yam li nplawm tej neesluav lossis tej ntxhuav; Peb sab kawg nkaus, tiamsis luag tsis pub peb so li. Peb mus thov nram tebchaws Iziv thiab pem tebchaws Axilias, peb thiaj muaj zaub mov txaus noj yug peb txojsia. Peb cov yawgkoob yeej ua txhaum tiag, tiamsis lawv twb tuag tas lawm; peb raug kev txomnyem vim peb tau ris lawv tej kev txhaum. Peb raug cov neeg uas twb tsimtxiaj tsis npaum li cov qhev tuaj tswjhwm peb, thiab tsis muaj leejtwg pab kom peb dim ntawm lawv txhais tes. Cov neeg tua neeg nyob thoob plaws tom tej ntug nroog; Thaum peb mus nrhiav zaub mov noj, peb pheej hmoo tuav siav rawv mus xwb. Kev tshaib plab ua rau peb ua npaws ibce kub lug ib yam li lub qhovcub. Peb cov pojniam puavleej raug luag mos saum Roob Xi-oos; peb cov ntxhais los raug luag yuam hauv cov Yudas tej zos. Peb cov thawjcoj raug luag ntes coj mus dai cajdab tuag tas; tsis muaj leejtwg hwm peb cov neeg laus hlo li lawm. Peb cov tub hluas raug luag yuam mus zom nplej ib yam li tej qhev; cov menyuam tub raug luag yuam mus kwv ntoo hnyav heev ntog pujpoog. Tsis muaj cov laus tuaj zaum ntawm tej roojvag nroog, thiab tsis muaj cov hluas tuaj ntaus suab nkauj li lawm. Txojkev zoo siab khiav tawm ntawm peb lub neej mus lawm; Txojkev quaj ntsuag los hloov peb tej kev seevcev zoo siab chaw. Txhua yam uas peb khav yeej tsis muaj dabtsi li lawm. Peb ua txhaum, nimno peb thiaj raug kev puastsuaj. Vim li ntawd peb lub siab thiaj mob lwj ntsuav thiab peb pom kev tsis tseeb vim peb tej kua muag los tas, Lub Roob Xi-oos nyob kho siab khuav thiab ua suabpuam tas, thiab hma los khawb los ntaug ua rau puastsuaj tas. Tiamsis tus TSWV, koj yog tus vajntxwv uas nyob mus ibtxhis thiab yuav tswj teb kav chaw mus txog thaum lub sijhawm kawg. Vim li cas koj thiaj tso peb tseg ntev ua luaj li? Koj puas tseem nco txog peb ntxiv lawm thiab? Tus TSWV, thov coj peb rov qab los cuag koj! Thov coj peb rov qab! Thov rov qab txhim kho kom peb muaj koob meej li thaum ub. Lossis koj yeej muab peb tso tseg mus ibtxhis li lawm? Puas yog koj txojkev chim yeej tsis muaj hnub kawg li? Lub plaub hlis ntuj hnub xiab tsib, xyoo peb caug kuv yog Npuxis tus tub Exekees uas ua povthawj, kuv tau nrog cov Yudas uas raug ntes coj mus nyob rau ntawm tus Dej Khenpales hauv lub nroog Npanpiloos. Ntuj txawm qhib, ces kuv ua yogtoog pom Vajtswv los qhia rau kuv. ( Yog xyoo tsib uas Vajntxwv Yehauyakhees raug luag ntes coj mus). Thaum kuv nyob hauv lub nroog Npanpiloos uas nyob ntawm tus ntug dej Khenpales, tus TSWV los hais rau kuv thiab nws lub hwjchim los kav hlo kuv. Kuv tsa muag ntsia rau saud, kuv pom muaj nagxob nagcua los sab qaumteb los. Muaj xob laim ci liab pesvog hauv ib tauv huab loj loj tuaj, thiab lub ntuj uas nyob puagncig tauv huab ntawd los ci ntsa iab. Nyob rau hauv qhov uas xob laim ci liab pesvog ntawd, muaj ib yam ci zoo li tooj dag. Nyob rau hauv cov nagxob nagcua ntawd, kuv pom plaub tug qhelunpees zoo ib yam li neeg, tiamsis ib tug qhelunpees twg muaj plaub lub ntsejmuag thiab plaub phab tis. Lawv tej tes taw yiaglees, thiab muaj rau zoo ib yam li rau nyuj. Lawv ci ib yam li tej tooj dag uas luag muab txhuam tau lawm. Dua li ntawd, ib tug qhelunpees twg muaj plaub txhais tes zoo li tes neeg, ib txhais tes nyob hauv qab ib phab tis. Thiab cov qhelunpees ntawd, lawv cov ntsejmuag thiab koojtis zoo li no: txhua tus qhelunpees nthuav tis tuaj sib twb ua ib lub vojvoog plaub ceg kaum. Thaum lawv mus kev, lawv mus ua ib pab tsis tig li. Cov qhelunpees ntawd, txhua tus muaj plaub lub ntsejmuag uas zoo tsis sib thooj. Lub ntsejmuag uas zoo li neeg nyob tom hauv ntej, lub ntsejmuag uas zoo li tsov ntxhuav nyob sab xis, lub ntsejmuag uas zoo li tus heev nyuj nyob sab laug, thiab lub ntsejmuag uas zoo li tus dav nyob tom qab. Ib tug qhelunpees twg nthuav ob phab tis tsa rau saud, tus tom qab nthuav tis mus twb tus tom ntej phab tis, thiab muaj dua ob phab tis dauv npog lub cev. Txhua tus qhelunpees twg muaj plaub lub ntsejmuag rau plaub sab. Cov qhelunpees ntawd yuav mus rau sab twg los yeej mus tau raws li lawv xav tsis tas yuav tig cev li. Nyob hauv cov qhelunpees, muaj dua ib yam zoo li ib teg tsau uas cig lam lug mus mus los los. Cov nplaim taws ntawd ya tej ntshuas liab pesvog ib yam li xob laim tawm tuaj. Cov qhelunpees ntawd txav mus mus los los ceev cuag xob laim. Thaum kuv tseem ntsia ntsoov plaub tug qhelunpees ntawd, kuv pom ib tug qhelunpees twg muaj ib lub log nyob ntawm ib sab, cov log ntawd puavleej chwv av. Plaub lub log ntawd zoo ib yam nkaus; cov log ntawd ci ib yam li tej qe zeb muaj nqis; thiab ib lub log twg tseem muaj dua ib lub log uas nyob rau ntawm ces kaum sab xis, cov log ntawd thiaj ntog tau mus rau txhua phab. Muaj qhovmuag nyob thoob plaws cov log ntawd tej npoo. Thaum twg cov qhelunpees ntawd mus kev, ces cov log ntawd txawm ntog nrog mus thiab, yog cov qhelunpees ntawd ya mus siab, ces cov log ntawd nqa siab thiab. Cov qhelunpees ntawd xav mus qhov twg los lawv yeej mus tau, thiab cov log ntog raws li cov qhelunpees ntawd, rau qhov cov qhelunpees yog cov uas tswj cov log ntawd. Thaum twg cov qhelunpees ntawd mus kev, nres lossis ya siab rau saum nruab ntug, cov log yeej mus raws nraim li cov qhelunpees ntawd. Nyob ntawm cov qhelunpees taubhau rau saud, muaj ib yam nthuav zoo li lub tsev kheej uas muab cov qe zeb muaj nqis ci ci ua. Cov qhelunpees ntawd sawv hauv qab qhov uas zoo li lub tsev kheej ntawd, lawv nthuav tis ib tug twb ib tug, thiab muab ob phab tis nthuav npog lub cev. Thaum cov qhelunpees ntawd ya, kuv hnov lawv ntxuaj tis nrov ib yam li dej hiavtxwv ntas, thiab ib yam li pab tubrog coob coob mus kev lossis ib yam li Vajtswv tus uas muaj Hwjchim Loj kawg nkaus lub suab. Thaum lawv tsaws, lawv qhaws nkaus lawv tej tis, tiamsis tseem muaj ib lub suab nrov saum qhov uas zoo li lub tsev kheej uas nyob saum cov qhelunpees ntawd taubhau tuaj. Nyob saum qhov uas zoo li lub tsev ntawd muaj ib qho zoo li lub zwmtxwv uas yog muab cov qe zeb xafiles ua, thiab tus uas zaum saum lub zwmtxwv ntawd, muaj tus yam ntxwv zoo li neeg. Tus yam ntxwv ntawd ci ib yam li tej tooj dag uas muab hlawv rau hauv qhovcub. Muaj nplaim taws cig lam lug puagncig tus yam ntxwv ntawd, thiab nyob hauv cov nplaim taws ntawd, muaj ib yam xim zoo li tus duab zaj. Qhov ntawd yog tus TSWV lub tshwjchim uas ci ntsa iab nyob ntawm nws xubntiag. Thaum kuv pom dheev li ntawd, ces kuv nyo ntshis ti nkaus rau hauv av, kuv hnov ib lub suab hais tias, “Tub noobneej, koj cia li sawv. Kuv muaj lus yuav hais rau koj.” Thaum lub suab ntawd hais tagnrho, Vajtswv tus ntsujplig txawm los kav hlo kuv ua rau kuv sawv nres nroos, thiab kuv hnov ib lub suab hais ntxiv tias, “Tub noobneej, kuv yuav txib koj mus cuag cov Yixalayees. Lawv tau ntxeev siab tawmtsam kuv thiab lawv tseem ntxeev siab qees ib yam li lawv cov yawgkoob tau ua los lawm. Lawv tawv ncauj thiab tsis hwm kuv, yog li ntawd kuv thiaj txib koj mus qhia rau lawv hais tias tus TSWV uas kav ib puas tsav yam yog tus hais tej lus no rau lawv. Txawm yog cov neeg ntxeev siab ntawd yuav nyiam mloog koj hais thiab tsis mloog los xij, lawv yuav paub hais tias muaj ib tug cev Vajtswv lus nrog lawv nyob lawm. “Tiamsis, tub noobneej, koj yuav tsum tsis txhob ntshai lawv lossis tej lus uas lawv hais. Lawv yuav tsis txaus siab thiab yuav saib tsis taus koj; yuav zoo li koj mus nyob hauv cov raubris teb. Txawm li ntawd los koj tsis txhob ntshai cov neeg ntxeev siab ntawd lossis tej lus uas lawv hais rau koj. Koj yuav tsum tau qhia rau lawv raws li kuv kom koj qhia, txawm yog lawv yuav mloog koj hais thiab tsis mloog los xij. Nco ntsoov hais tias lawv yeej yog neeg ntxeev siab thiab phem kawg li. “Tub noobneej, koj cia li mloog tej lus uas kuv hais rau koj. Koj tsis txhob ntxeev siab ib yam li lawv cov ntawd. Koj cia li rua qhovncauj thiab noj yam uas kuv yuav muab rau koj noj.” Kuv txawm pom dheev ib txhais tes tuav rawv ib thooj ntawv cev tuaj rau kuv. Txhais tes ntawd nthuav kiag thooj ntawv rau kuv saib, kuv pom muaj npe ntawv sau rau hauv thooj ntawv ntawd thoob plaws ob sab tibsi, muaj tej suab quaj tu siab kawg nkaus, tej suab quaj ntsuag thiab suab ntsaj sau rau hauv thooj ntawv ntawd. Vajtswv hais tias, “Tub noobneej, koj cia li noj thooj ntawv no thiab mus hais rau cov Yixalayees.” Kuv thiaj li rua qhovncauj, thiab nws muab thooj ntawv rau kuv noj. Nws hais tias, “Tub noobneej, cia li noj thooj ntawv uas kuv muab rau koj; noj kom tsau koj lub plab.” Thaum kuv noj thooj ntawv ntawd, mas qab zib npaum li zib ntab ntag. Vajtswv hais tias, “Tub noobneej, koj cia li mus cuag cov Yixalayees thiab hais rau lawv raws li kuv qhia rau koj lawm. Kuv tsis txib koj mus rau lwm haivneeg uas koj tsis paub luag tej lus, tiamsis yog txib koj mus rau haivneeg Yixalayees xwb. Yog hais tias kuv txib koj mus rau tej haivneeg uas hais tej lus koj tsis yoojyim totaub, lawv tseem yuav mloog koj hais dua. Tiamsis cov Yixalayees yuav tsis muaj ib tug mloog koj hais, txawm yog kuv hais los lawv twb tsis mloog. Lawv cov ntawd yeej yog noob tawv ncauj thiab tsis mloog lus. Nimno kuv yuav ua kom koj muaj lub siab tawv ib yam li lawv, koj thiaj muaj cuabkav tiv taus lawv. Kuv yuav ua kom koj tawv ib yam li lub qe zeb muaj nqis uas tawv dua tej zebntais; koj tsis txhob ntshai cov neeg ntxeev siab ntawd hlo li.” Vajtswv hais ntxiv tias, “Tub noobneej, cia li ua tib zoo mloog tej lus uas kuv hais rau koj thiab khaws txhua yam rau nruab siab. Koj cia li mus cuag koj cov neeg uas raug luag ntes coj mus rau lwm tebchaws lawm, thiab hais rau lawv hais tias tus TSWV uas kav ib puas tsav yam yog tus hais li no. Txawm yog lawv yuav mloog koj hais thiab tsis mloog los xij.” Ces Vajtswv tus ntsujplig txawm los muab kuv nqa hlo, thiab kuv hnov ib lub suab hais tom qab tuaj hais tias, “Cia li qhuas tus TSWV uas muaj tshwjchim ci ntsa iab uas nyob saum ntuj!” Kuv hnov cov qhelunpees cov tis sib txhuam thiab cov log lub suab saum nruab ntug nrov cuag av qeeg thoob ntiajteb. Tus TSWV tus ntsujplig los kav hlo kuv thiab coj kuv mus; kuv dhuav thiab npautaws kawg li. Yog li ntawd, kuv thiaj mus rau hauv Tiles Anpis uas nyob ntawm ntug Dej Khenpales, qhov chaw uas cov Yixalayees raug ntes mus nyob, thiab kuv nyob qhov ntawd tau xya hnub, kuv xav tsis thoob rau tej uas kuv pom thiab kuv hnov ntawd li. Tom qab xya hnub ntawd tus TSWV rov hais rau kuv. Nws hais tias, “Tub noobneej, kuv muab koj tsa ua ib tug fajxwm saib cov Yixalayees. Koj yuav coj kuv tej lus ceebtoom mus qhia rau lawv. Yog kuv hais tias ib tug neeg txhaum yuav tuag, tiamsis koj tsis qhia kom nws hloov siab thiab kom nws tsis txhob raug kev ploj kev tuag, nws yuav tuag vim nws tej kev txhaum mas kuv yuav muab nws lub txim rau koj ris. Yog hais tias koj twb xub qhia rau tus neeg txhaum ntawd lawm, tiamsis nws tsis kam tso nws tej kev txhaum tseg, mas tus ntawd yuav tuag vim nws tej txhaum, tiamsis koj yuav dim. “Yog ib tug neeg ncaj ncees tso kev ncaj ncees tseg mus ua txhaum thiab yog kuv muab kev sim siab los cuab nws kev. Yog koj tsis mus qhia nws mas nws yuav tuag vim nws tej kev txhaum, kuv yuav tsis suav tej uas nws tau ua zoo tas los lawm, thiab kuv yuav muab nws lub txim rau koj ris. Yog koj ntuas ib tug neeg ncaj ncees kom tsis txhob ua txhaum, yog nws mloog koj lus thiab tsis ua txhaum, nws yuav tsis raug kev ploj kev tuag, ces kuv yuav tseg koj txojsia.” Tus TSWV lub hwjchim los kav hlo kuv thiab tus TSWV hais rau kuv hais tias, “Koj cia li sawv mus rau tom lub voshav. Kuv muaj lus yuav hais rau koj tod.” Yog li ntawd, kuv thiaj mus rau tom lub voshav, kuv pom tus TSWV lub tshwjchim ci ntsa iab ib yam li kuv tau pom ntawm ntug Dej Khenpales. Kuv txawm qhau cev hlo ntsejmuag ti nkaus rau hauv av, tiamsis Vajtswv tus ntsujplig los kav hlo kuv thiab tsa kuv sawv. Tus TSWV hais rau kuv hais tias, “Koj cia li rov mus tsev, kaw qhovrooj thiab nyob twjywm. Tub noobneej, koj yuav raug luag muab hlua khi thiab koj yuav khiav tsis dhau ntawm lawv mus li. Kuv yuav ua kom koj tus nplaig txhav thiab hais tsis tau lus rau cov neeg ntxeev siab ntawd. Thaum kuv hais rau koj thiab pub koj rov hais tau lus, ces koj yuav hais rau lawv hais tias tus TSWV uas kav ib puas tsav yam hais li no. Lawv cov ntawd muaj ibtxhia yuav mloog koj hais, thiab muaj ibtxhia yuav tsis mloog, rau qhov lawv yog cajces ntxeev siab.” Vajtswv hais tias, “Tub noobneej, koj mus nqa ib daim thwvcib los tso rau ntawm koj xubntiag thiab muab suam ua lub nroog Yeluxalees. Koj ua kom muaj ntsa yeej puagncig lub nroog, ua chaw fajxwm, muab av meem ua ib tug tswg tiv rog, thiab tso tej cuabyeej rhuav lub nroog puagncig lub nroog. Koj muab ib daim hlau los tsa ua ib tug ntsa yeej quas koj thiab lub nroog; koj tig ntsejmuag mus rau ntawm lub nroog, piv txog lub nroog tabtom raug luag tuaj tua, thiab koj yog tus uas tuaj vij lub nroog ntawd ntag. Qhov no yuav ua ib qho cim tseemceeb rau haivneeg Yixalayees. Thaum koj ua li ntawd tas lawm, koj ho pw tig rau sab xis tiv kev txomnyem plaub caug hnub, vim cov Yudas tej kev txhaum. Ib xyoos twg kuv rau txim rau koj ib hnub. “Koj tig xubntiag rau lub nroog Yeluxalees; nqus nrig rau lub nroog thiab cev kuv tej lus tawmtsam lub nroog ntawd. Kuv yuav muab koj khi rau ntawd kom koj tig tsis tau cev mus txog thaum luag tuaj vij tau lub nroog tso! “Koj cia li muab hmoov pias, hmoov nplej, hmoov taum lag, hmoov taum mog, hmoov cej, thiab hmoov qib sib xyaws zuaj puab ua ib co ncuav. Npaj tej ntawd rau koj noj lub sijhawm peb puas cuaj caum hnub uas koj pw tig rau sab laug ntawd. Ib hnub twg tsuas pub koj noj yim lag ncuav xwb, tsis pub koj noj tshaj ntawd li. Ib hnub twg tsuas pub koj haus ob khob dej xwb, tsis pub koj haus tshaj ntawd li. Koj muab neeg tej quav qhuav ua taws rauv, ci ncuav saum cov ncaig quav neeg ntawd thiab coj mus noj tabmeeg rau txhua tus pom.” Tus TSWV hais tias, “Cov Yixalayees yuav tau noj tej zaub mov tsis huv uas txwv tsis pub noj, thaum uas kuv ntiab lawv mus nyob rau lwm tebchaws lawm.” Kuv teb hais tias, “Tus TSWV uas kav ib puas tsav yam, kuv ua tsis tau li ko! Kuv yeej tsis tau ua ib yam tsis huv rau kuv lub cev li. Txij thaum uas kuv tseem yog menyuam yaus los kuv yeej tsis tau noj tej nqaij tsiaj uas nws tuag nws lossis tej tsiaj qus tom tuag li. Kuv yeej tsis tau noj ib yam zaub mov uas tsis huv li.” Yog li ntawd, Vajtswv hais tias, “Zoo lawm lauj! Kuv yuav cia koj muab quav nyuj hloov quav neeg, thiab koj yuav ci ncuav saum cov ncaig quav nyuj ntawd.” Vajtswv hais ntxiv tias, “Tub noobneej, kuv yuav txiav tsis pub kom lub nroog Yeluxalees muaj noj muaj haus. Cov neeg uas nyob hauv yuav nyuaj siab heev, ces lawv yuav muab teev luj zaub mov rau lawv noj thiab luj dej rau lawv haus lawm xwb. Zaub mov thiab dej haus los kuj tas; mas lawv yuav tas kev cia siab, thiab lawv yuav raug kev puastsuaj vim lawv tej kev txhaum.” Tus TSWV hais tias, “Tub noobneej, cia li muab ib rab ntaj uas ntse heev los chais koj cov hwjtxwv thiab cov plaubhau kom dulug. Muab teev los luj cov plaubhau ntawd thiab muab faib ua peb feem. Thaum luag vij lub nroog dhau lawm, koj muab ib feem coj mus hlawv rau hauv nroog; muaj dua ib feem koj muab koj rab ntaj tsuav ncig lub nroog, thiab muab dua ib feem tso rau cua tshuab ya mus, kuv yuav rho kuv rab ntaj caum. Koj muab ob peb txoj plaubhau ntsaws rau hauv koj lub nqaws tsho cia. Thiab koj rov rho ob peb txoj coj mus hlawv rau hauv qhovcub dua thiab cia kom kub hnyiab tas. Txij ntawd mus, hluavtaws yuav kis mus kub haivneeg Yixalayees kom tas.” Tus TSWV uas kav ib puas tsav yam hais tias, “Koj saib! Kuv muab lub nroog Yeluxalees tso rau hauv plawv ntiajteb uas muaj ntau lub tebchaws nyob puagncig nws. Tiamsis vim Yeluxalees tawmtsam kuv tej lus samhwm, kuv thiaj paub hais tias nws ua phem tshaj lwm haivneeg thiab tawv ncauj tshaj cov tebchaws uas nyob puagncig nws. Yeluxalees tso kuv tej lus samhwm tseg thiab tsis coj raws li kuv tej kevcai. Yeluxalees, kuv yog tus TSWV uas kav ib puas tsav yam, koj mloog kuv hais. Vim koj tsis coj raws li kuv tej kevcai thiab tsis ceev kuv tej lus samhwm, koj thiaj tsim kev kub ntxhov ntau dua cov tebchaws uas nyob puagncig koj. Koj tseem xyaum ua raws li lwm haivneeg ua thiab. Kuv yog tus TSWV uas kav ib puas tsav yam, kuv qhia rau koj hais tias kuv yog koj tus yeebncuab ntag. Kuv yuav rau txim rau koj tabmeeg txhua haivneeg. Vim tej kev phem kev qias uas koj ua, kuv yuav rau txim rau lub nroog Yeluxalees uas yav tas los kuv tsis tau rau dua thiab yav tom ntej los yuav tsis rau ib zaug li lawm. Vim li ntawd, cov neeg uas nyob hauv lub nroog Yeluxalees, niamtxiv yuav noj menyuam thiab menyuam yuav noj niamtxiv. Kuv yuav rau txim rau nej cov uas tseem ua neej nyob kom khiav mus nyob ua sab ua sua rau txhua qhov. “Kuv yog Vajtswv tus uas muaj sia nyob, kuv hais rau nej hais tias vim nej tau ua kev phem kev qias thiab pe mlom ua rau kuv lub Tuamtsev tsis huv lawm, kuv yuav muab nej tso tseg tsis hlub nej hlo li. Nej cov neeg ib feem peb yuav tuag rau kev mob kev nkeeg thiab kev tshaib kev nqhis rau hauv nroog; ib feem peb yuav tuag rau hniav ntaj hniav riam rau sab nraum ntug nroog; thiab ib feem peb kuv yuav muab tso rau cua ntsawj ya mus thiab kuv yuav rho ntaj caum. “Nej yuav raug kuv txojkev chim thiab kev npautaws mus txog thaum kuv lub siab nqig. Thaum nej pom tej no lawm, nej yuav paub hais tias kuv yog tus TSWV uas tau hais tej no; kuv khib vim tej uas nej ua tsis ncaj. Lwm haivneeg uas nyob puagncig nej, txhua tus uas dua kev yuav luag nej plig, txob thuam nej thiab yuav lug kev mus. “Thaum kuv chim, kuv npautaws thiab rau txim rau nej, txhua haivneeg uas nyob puagncig nej yuav ntshai heev. Lawv yuav saib tsis taus nej thiab muab nej tso dag tso luag. Kuv yuav txiav tsis pub kom nej muaj kev noj kev haus, cia nej tuag tshaib tuag nqhis. Nej yuav nyiaj tshaib yoo nqhis tiv kev mob ib yam li xibxub vos chob nej. Kuv yuav tso kev tshaib kev nqhis thiab tej tsiaj qus los noj nej tej menyuam; kuv yuav tso kab mob kev nkeeg, kev siv kev npog, thiab kev tsov kev rog los raug nej. Kuv yog tus TSWV uas hais tej li ntawd.” Tus TSWV hais rau kuv hais tias: “Tub noobneej, koj tsa qhovmuag saib cov Yixalayees tej roob thiab qhia kuv tej lus rau lawv. Koj hais kom cov Yixalayees tej roob mloog tus TSWV uas kav ib puas tsav yam tej lus thiab hais rau tej roob, tej pov roob, tej kwjha thiab tej hav li no: Kuv yuav rho ntaj tsuav cov neeg tej chaw pe mlom kom puastsuaj tas. Tej thaj fij khoom thiab tej thaj hlawv tshuaj tsw qab yuav raug rhuav kom tawg tas. Txhua tus neeg yuav raug tua tuag tas rau ntawm lawv tej mlom. Kuv yuav muab Yixalayees cov neeg tuag tso rau ntawm lawv tej mlom hauv ntej; kuv yuav muab lawv tej pobtxha tso pawglug puagncig lawv tej thaj. Cov Yixalayees tej nroog yuav raug rhuav puastsuaj tas; lawv tej thaj thiab lawv tej mlom yuav raug tsoo kom tawg ntsoog ntxaws; lawv tej thaj hlawv tshuaj tsw qab los yuav tawg tas, thiab tej haujlwm uas lawv ua yuav ploj mus. Yuav muaj neeg tuag pawglug txhua qhov, ces nej cov uas seem yuav paub hais tias kuv yog tus TSWV. “Kuv yuav cia ibtxhia khiav dim tsis raug luag tua thiab yuav coj lawv mus nrog lwm haivneeg nyob, lawv yuav mus ua neeg poob tebchaws. Thaum ntawd lawv yuav nco txog kuv thiab paub hais tias kuv yog tus uas rau txim rau lawv thiab ua rau lawv poob ntsejmuag, vim lawv tsis muab siab npuab kuv, lawv tso kuv tseg thiab mus pe mlom. Ces lawv yuav rov ntxub lawv, vim tej kev phem kev qias uas lawv tau ua tas los lawm. Lawv yuav paub hais tias kuv yog tus TSWV, thiab kuv tej lus yog lus tseeb tsis yog lam hais.” Tus TSWV uas kav ib puas tsav yam hais tias, “Koj cia li npuaj teg ntaug taw thiab quaj tu siab nrho vim tej kev phem kev qias thiab tej kev pe dab pe mlom uas cov Yixalayees tau ua. Lawv yuav tuag tas rau hauv tshavrog lossis kev tshaib kev nqhis lossis kev mob kev nkeeg. Cov uas nyob deb yuav tuag rau kab mob kev nkeeg; cov uas nyob ze yuav raug tua tuag tas rau hauv tshavrog; cov uas dim hauv tshavrog los yuav tuag rau kev tshaib kev nqhis. Lawv yuav raug kuv txojkev chim uas loj kawg nkaus. Thaum nej pom tej tuag nyob ntawm tej mlom thiab nyob puagncig tej thaj, thoob plaws rau saum tej pov roob siab, saum tej ncov roob, hauv qab txhua tsob ntoo uas muaj nplooj tsaus nti, txhua tsob qab ntoo qhib thiab txhua qhov chaw uas lawv hlawv khoom fij rau lawv tej mlom, ces nej txhua tus yuav paub hais tias kuv yog tus TSWV tiag. Kuv yuav tsa tes tawmtsam lawv thiab ua kom lawv lub tebchaws raug puastsuaj. Kuv yuav ua kom lub tebchaws ua tsis tau noj, txij kiag nram tiaj suabpuam los txog ntua pem lub nroog Linpelas uas nyob rau sab qaumteb, thiab yuav tsis tseg chaw rau cov Yixalayees nyob li. Ces nej txhua tus yuav paub hais tias kuv yog tus TSWV.” Tus TSWV hais rau kuv hais tias, “Tub noobneej, kuv yog tus TSWV uas kav ib puas tsav yam, kuv hais tej lus no rau cov Yixalayees lub tebchaws: Hnub kawg los txog lub tebchaws lawm! “Cov Yixalayees, hnub kawg twb los txog nej lawm. Nej yuav raug kuv txojkev chim, rau qhov kuv yuav txiav txim rau nej pauj tej kev phem kev qias uas nej tau ua tas los lawm. Kuv yuav tsis tseg nej thiab tsis hlub nej li. Kuv yuav rau txim rau nej vim tej kev phem kev qias uas nej tau ua, nej thiaj paub hais tias kuv yog tus TSWV.” Tus TSWV uas kav ib puas tsav yam hais tias, “Yuav muaj kev siv kev npog los raug nej ib yam tas ib yam tuaj. Hnub kawg los txog lawm, hnub kawg los txog lawm. Kev siv kev npog zaum kawg los tawmtsam nej lawm. Nws los txog lawm. Hnub kawg los txog rau nej cov neeg uas nyob hauv lub tebchaws no lawm. Lub sijhawm los txog lawm, yuav tsis muaj pe mlom thiab kev lomzem nyob saum tej roob, tiamsis tsuas muaj kev nyuaj siab lawm xwb. “Tshuav tsis ntev lawm nej yuav raug kuv txojkev chim. Kuv yuav rau txim pauj tej kev phem kev qias uas nej tau ua los lawm. Kuv yuav tsis tseg nej thiab tsis hlub nej li. Kuv yuav rau txim rau nej vim tej kev phem kev qhia uas nej tau ua, nej thiaj paub hais tias kuv yog tus TSWV thiab yog tus uas rau txim rau nej.” Hnub uas muaj kev puastsuaj los txog lawm. Kev siv kev npog tabtom huam loj zuj zus. Thiab kev khavtheeb muaj tshwm tuaj. Kev siv kev npog huam loj zuj zus mus ua kev phem kev qias. Lawv tej kev muaj txiag npluanuj, kev ua nom ua tswv thiab kev muaj koob muaj meej yuav ploj mus tas. Lub sijhawm los txog lawm. Tus uas muag khoom los tsis txhob tu siab, tus uas yuav khoom los tsis txhob zoo siab, rau qhov Vajtswv txojkev txiav txim yuav los raug txhua tus huv tibsi. Yam uas tej tub lag tub luam muab muag lawm, lawv yeej muab tsis tau rov los tas lawv simneej, rau qhov Vajtswv yuav txiav txim rau txhua tus tsis zam li. Cov neeg uas ua phem ua qias yuav tsis muaj ib tug muaj sia nyob. Thaum luag tshuab xyu sawvdaws yeej npaj txhij lawm, tiamsis tsis muaj leejtwg kam mus ntaus rog, vim li ntawd Vajtswv txojkev chim thiaj yuav los raug txhua tus huv tibsi. Nyob sab nraud muaj kev sib ntaus sib tua txhua qhov, nyob sab hauv muaj kev mob kev nkeeg thiab kev tshaib kev nqhis. Tus uas nyob tom teb yuav tuag rau hniav ntaj hniav riam, thiab tus uas nyob hauv nroog los yuav tuag rau kev mob kev nkeeg thiab kev tshaib kev nqhis. Muaj ibtxhia yuav khiav dim mus rau saum tej hauv roob ib yam li tej nquab uas ntshai thiab ya hauv hav los. Lawv yuav quaj tu siab rau lawv tej kev txhaum. Lawv tej cajnpab yuav tsaug leeg, thiab lawv tej hauvcaug yuav tshee tsis muaj zog. Lawv yuav muab ntaubtsaj los npua thiab quaj tshee hnyo. Lawv yuav muab lawv tej plaubhau chais, thiab lawv yuav raug kev txajmuag. Lawv yuav muab lawv tej nyiaj tej kub povtseg rau hauv plawv kev ib yam li tej liamsim, vim tej nyiaj tej kub ntawd pab tsis tau lawv dim ntawm tus TSWV txojkev chim uas loj kawg nkaus. Tej nyiaj tej kub uas lawv muaj los yeej daws tsis tau lawv txojkev tshaib nqhis thiab pab tsis tau kom lawv muaj kev txaus siab. Tej nyiaj tej kub ntawd tsuas yog ua kom lawv mus ua kev txhaum xwb. Lawv khavtheeb rau lawv tej saw nyiaj saw kub uas zoo nkauj, tiamsis lawv siv tej ntawd nchuav ua tej mlom uas phem qias. Vim li ntawd tus TSWV thiaj muab lawv tej nyiaj tej kub tig mus ua kev phem tawmtsam lawv. Tus TSWV hais tias, “Kuv yuav cia lwm haivneeg tuaj huab ib puas tsav yam uas lawv muaj. Cov neeg uas tsis ncaj ncees yuav tuaj txeeb lawv tej nyiaj txiag thiab coj mus siv ua kev phem kev qias. Thaum tubsab tuaj tsoo nkag mus ua tsis huv rau lub Tuamtsev thiab nqa tej khoom tsimtxiaj mus ua kev phem kev qias los kuv yeej yuav tsis quavntsej lawv li. “Muaj kev kub ntxhov, kev sib ntaus sib tua thoob lub tebchaws, thiab kev siv kev npog nyob hauv txhua lub nroog. Kuv yuav coj lwm haivneeg uas ua phem kawg nkaus tuaj rau hauv nej lub tebchaws, thiab cia lawv txeeb nej tej vajtse. Thaum uas kuv tso lwm haivneeg tuaj ua tsis huv rau nej lub Tuamtsev, nej cov neeg uas muaj zog heev yuav ua tsis tau dabtsi. Kev txhawj kev ntshai los txog lawm. Nej yuav nrhiav kev thajyeeb tiamsis yuav nrhiav tsis tau li. Kev siv kev npog ib yam tas ib yam tuaj, thiab yuav muaj xaiv muaj lus hais tsis paub tas. Nej yuav thov cov cev Vajtswv lus kom cev Vajtswv lus rau nej, tiamsis Vajtswv tsis los qhia rau lawv lawm. Cov povthawj yuav tsis muaj lus dabtsi qhia rau cov neeg, thiab cov txwjlaug los yuav tsis muaj tswvyim tuavxam lawm. Vajntxwv yuav quaj ntsuag, tej nomtswv yuav tas kev cia sab, thiab cov pejxeem yuav ntshai tshee hnyo. Kuv yuav rau txim rau nej vim tej uas nej tau ua tas los lawm, thiab kuv yuav txiav txim rau nej ib yam li nej tau txiav txim rau lwm tus lawm. Nej thiaj paub hais tias kuv yog tus TSWV.” Lub rau hli ntuj hnub xiab tsib xyoo rau uas peb raug ntes mus nyob rau lwm tebchaws, cov Yudas tej thawjcoj uas raug ntes mus nrog kuv nyob ua ke hauv kuv tsev. Tamsim ntawd tus TSWV uas kav ib puas tsav yam lub hwjchim los kav hlo kuv. Kuv tsa qhovmuag saib rau saud, kuv pom muaj ib yam zoo li tus neeg. Txij ntawm nws lub duav rov hauv zoo li hluavtaws thiab txij ntawm nws lub duav rov saud zoo li tej tooj dag uas luag muab txhuam ci ci lawm. Nws cev ib yam zoo li txhais tes tuaj kov kuv cov plaubhau. Nyob hauv zaj yogtoog ntawd, Vajtswv tus ntsujplig txawm los nqa hlo kuv rau saum nruab ntug thiab coj kuv mus rau hauv Yeluxalees. Nws coj kuv nkag ntawm lub roojvag sab qaumteb mus rau hauv lub Tuamtsev, nyob qhov ntawd muaj ib tug mlom uas Vajtswv ntxub heev. Kuv pom cov Yixalayees tus Vajtswv lub tshwjchim zoo ib yam li kuv tau pom zaum tas los ntawm ntug dej Khenpales. Vajtswv hais rau kuv hais tias, “Tub noobneej, koj cia li ntsia mus rau sab qaumteb.” Kuv txawm ntsia rau pem, kuv pom ib tug mlom uas Vajtswv ntxub heev nyob ze ntawm lub thaj uas yog txojkev los tom lub roojvag los. Vajtswv hais rau kuv hais tias, “Tub noobneej, koj puas pom muaj dabtsi tshwmsim? Koj saib tej kev phem kev qias uas cov Yixalayees ua ntawm no ua rau kuv khiav deb zuj zus ntawm kuv lub chaw dawbhuv mus lawm. Koj tseem yuav pom tej yam uas phem tshaj tej no thiab.” Nws coj kuv mus rau ntawm txojkev uas los nraum lub tshavpuam los thiab qhia kom kuv saib ib lub qhov ntawm sab phabntsa. Nws hais tias, “Tub noobneej, koj cia li tsoo sab phabntsa no.” Kuv txawm tsoo sab phabntsa ntawd tawg txua rau hauv thiab pom ib lub qhovrooj. Nws hais rau kuv hais tias, “Koj cia li mus rau sab hauv thiab saib tej kev phem kev qias uas lawv ua nyob rau hauv.” Yog li ntawd, kuv thiaj mus rau hauv thiab saib. Kuv pom luag nraj tej duab ua tej tug nab thiab lwm yam tsiaj tsis huv, thiab tej mlom uas cov Yixalayees pe puv nkaus rau tim tej phabntsa. Cov Yixalayees tej thawjcoj xya caum leej tuaj nyob ntawd, Safas tus tub Yaxaniyas los nrog lawv nyob ntawd thiab. Lawv cov ntawd ib leeg tuav rawv ib qho hmoov tshuaj tsw qab hlawv ua pa ncho auv niab. Vajtswv nug kuv hais tias, “Tub noobneej, koj puas pom tej uas cov Yixalayees tej thawjcoj tuaj ua nyob nraim nkoos ntawd? Lawv tabtom pehawm hauv chav uas muaj tej duab mlom nyob puv nkaus. Lawv hais tias, ‘Tus TSWV tsis pom peb li! Nws twb tso peb lub tebchaws tseg lawm.’ ” Ces tus TSWV hais rau kuv hais tias, “Koj tseem yuav pom lawv ua tej kev phem kev qias uas phem tshaj ntawd thiab.” Tus TSWV coj kuv mus rau ntawm lub roojvag sab pem lub Tuamtsev thiab qhia kom kuv ntsia cov pojniam uas tuaj quaj nyiav tus mlom Tamus. Nws nug kuv hais tias, “Tub noobneej, koj puas pom tej ntawd? Koj tseem yuav pom tej yam uas phem tshaj tej ntawd thiab.” Yog li ntawd, nws coj kuv mus saib chav hauv plawv lub Tuamtsev. Nyob ze ntawm txojkev uas mus rau hauv chav pehawm Vajtswv, ntu nruab nrab ntawm qabkhav thiab lub thaj, muaj nees nkaum tsib leeg txivneej nyob ntawd. Lawv tig nraubqaum rau ntawm chav pehawm Vajtswv, tig xubntiag thiab nyo taubhau rau sab hnubtuaj pe lub hnub uas tabtom tawm tuaj. Tus TSWV hais rau kuv ntxiv hais tias, “Tub noobneej, koj puas pom tej ntawd? Cov neeg Yudas tseem tsis tau txaus siab rau tej kev phem kev qias uas koj tau pom ntawd thiab tej kev kub ntxhov uas muaj thoob plaws lub tebchaws li. Tsis tas li ntawd xwb, lawv tseem tuaj rau hauv lub Tuamtsev no ua tej kev phem kom txaus lawv siab thiab ua kom kuv chim. Koj saib! Lawv ua txhua yam tawmtsam kuv npaum li lawv yuav ua tau. Lawv yuav raug kuv txojkev chim uas loj kawg nkaus. Kuv yuav tsis tseg thiab tsis hlub lawv li. Txawm yog lawv yuav quaj thov kuv los kuv yuav tsis mloog lawv tej lus thov.” Kuv hnov Vajtswv hu nrov nrov hais tias, “Nej cov uas yuav rau txim rau lub nroog, cia li los ntawm no, coj nej tej cuabyeej ua rog nrog nej.” Tamsim ntawd, txawm muaj rau tus txivneej tawm ntawm lub roojvag sab ped los, lawv txhua tus puavleej nqa cuabyeej ua rog thiab tig xubntiag rau sab qaumteb. Muaj ib tug txivneej hnav ris tsho ntaubmag nrog lawv pab ntawd los, nws tuav rawv ib lub thauv kua cwjmem. Lawv los sawv rau ntawm lub thaj tooj. Cov Yixalayees tus Vajtswv lub tshwjchim uas ci ntsa iab txawm tawm ntawm tus qhelunpees uas yog nws qhov chaw mus rau ntawm txoj ncauj ke uas mus rau hauv lub Tuamtsev. Tus TSWV hu tus txivneej uas hnav ris tsho ntaubmag hais tias, “Koj cia li mus kom thoob plaws lub nroog Yeluxalees thiab nias cim rau txhua tus uas muaj kev txomnyem nyuaj siab hauvpliaj, vim tej kev phem kev qias uas lawv ua hauv lub nroog.” Thiab kuv hnov Vajtswv hais rau pab neeg ntawd hais tias, “Nej cia li raws tus txivneej ntawd qab mus kom thoob lub nroog thiab tua txhua tus, tsis txhob zam thiab tsis txhob hlub leejtwg li. Lojxov tua cov yawg laus, cov tub hluas, cov ntxhais hluas, cov pojniam thiab cov menyuam huv tibsi. Tiamsis nej tsis txhob ua li cas rau cov uas muaj lub cim nias rau ntawm hauvpliaj lawm. Nej cia li pib tua ntawm kuv lub Tuamtsev no mus.” Lawv txawm pib tua cov thawjcoj uas sawv ntawm lub Tuamtsev. Vajtswv hais rau lawv hais tias, “Nej cia li ua kom lub Tuamtsev tsis huv. Coj tej neeg tuag los tso pawglug rau hauv tej chav. Nej cia li nqis tes ua haujlwm!” Ces lawv txawm pib tua cov neeg uas nyob hauv nroog. Thaum lawv tseem tua cov neeg ntawd, kuv nyob ib leeg xwb. Kuv txhos cuag ntua nyo ua ntsejmuag ti nkaus hauv av thiab quaj thov hais tias, “Tus TSWV uas kav ib puas tsav yam, koj chim heev rau lub nroog Yeluxalees, ces koj txawm yuav muab cov pejxeem uas seem hauv tebchaws Yixalayees tua kom tuag tas li los?” Vajtswv teb hais tias, “Cov Yixalayees thiab cov Yudas tau ua txhaum thiab muaj txim loj heev. Lawv tua neeg txhua qhov thoob plaws lub tebchaws thiab lawv sib ntaus sib tua puv nkaus hauv lub nroog Yeluxalees. Lawv hais tias kuv uas yog tus TSWV twb tso lawv lub tebchaws tseg lawm, kuv yeej tsis pom lawv li. Tiamsis kuv yuav tsis tseg lawv thiab hlub lawv li; kuv yuav ua pauj rau lawv ib yam li lawv tau ua rau lwm tus lawm.” Ces tus txivneej uas hnav ris tsho ntaubmag rov los hais rau tus TSWV hais tias, “Kuv twb mus ua tiav raws li koj tej lus samhwm lawm.” Kuv tsa muag ntsia qhov uas zoo li lub ntuj ncaj ntawm cov qhelunpees taubhau rau saud, kuv pom muaj ib yam zoo li lub zwmtxwv uas yog muab cov qe zeb xafiles ua. Vajtswv hais rau tus txivneej hnav ris tsho ntaubmag hais tias, “Koj cia li chaws kis nruab nrab ntawm cov log uas nyob hauv qab cov qhelunpees thiab muab phoovtes yawm cov hluavncaig uas cig liab ploog nqa los; thiab coj mus w kom thoob plaws lub nroog.” Kuv ntsia ntsoov tus txivneej ntawd mus. Thaum nws mus rau hauv, cov qhelunpees tseem tabtom sawv ntawm lub Tuamtsev sab nrad thiab muaj huab los puv nkaus chav hauv plawv. Tus TSWV lub tshwjchim txawm tawm ntawm cov qhelunpees mus rau ntawm txojkev uas mus rau hauv lub Tuamtsev. Ces huab txawm los qhwv nkaus lub Tuamtsev thiab tus TSWV lub tshwjchim ci ntsa iab puv nkaus hauv chav tsev ntawd. Cov qhelunpees ntxuaj tis nrov heev ua rau cov neeg uas nyob sab nraum chav ntawd hnov huv tibsi. Lub suab ntawd nrov ib yam li Vajtswv tus uas muaj Hwjchim Loj kawg nkaus lub suab. Thaum tus TSWV hais kom tus txivneej uas hnav ntaubmag mus muab cov hluavncaig ntawm kis nruab nrab cov log hauv qab cov qhelunpees, tus txivneej ntawd txawm mus sawv ze ntawm ib lub log. Cov qhelunpees ib tug txawm cev tes mus muab ob peb lub hluavncaig los tso rau hauv tus txivneej uas hnav ris tsho ntaubmag txhais tes, tus txivneej ntawd nqa cov hluavncaig thiab tawm mus lawm. Kuv pom cov qhelunpees txhua tus muaj ib yam zoo li neeg txhais tes nyob hauv qab lawv txhua phab tis. Thaum cov qhelunpees mus kev, lawv yeej mus tau rau txhua phab tsis tas tig li. Lawv yeej mus tau ua ke rau txhua phab raws li lawv xav mus. Lawv tej cev, tej nraubqaum, tej tes, tej tis thiab tej log puavleej muaj qhovmuag huv tibsi. Cov log ntawd zoo ib yam li cov uas kuv twb xub pom hauv thawj zaj yogtoog lawm. Txhua tus qhelunpees twg muaj plaub lub ntsejmuag. Lub ib zoo li tus heev nyuj lub, lub ob zoo li neeg lub, lub peb zoo li tsov ntxhuav lub thiab lub plaub zoo li dav lub. (Lawv yog tib co qhelunpees uas kuv pom ntawm ntug Dej Khenpales.) Thaum cov qhelunpees ntawd ya rau saum nruab ntug, cov log nrog lawv mus thiab. Thaum lawv nthuav tis ya los cov log yeej nrog lawv mus ua ke. Thaum cov qhelunpees nres los cov log kuj nres; thiab thaum cov qhelunpees ya los cov log kuj ya thiab, rau qhov cov qhelunpees yog cov uas tswj cov log ntawd. Tamsim ntawd tus TSWV lub tshwjchim uas ci ntsa iab txawm tawm ntawm txojkev uas mus rau hauv lub Tuamtsev mus nres ncaj rau saum cov qhelunpees. Thaum kuv tseem saib ntsoov, cov qhelunpees txawm nthuav tis ya hauv ntiajteb no mus, ces cov log txawm ya nrog lawv mus lawm. Lawv mus nres rau ntawm lub roojvag sab hnubtuaj ntawm lub Tuamtsev, thiab tus TSWV lub tshwjchim uas ci ntsa iab los qhwv nkaus cov qhelunpees ntawd. Kuv tseem nco tau hais tias yog tib co qhelunpees uas kuv twb xub pom nyob hauv qab cov Yixalayees tus Vajtswv ntawm ntug Dej Khenpales. Cov qhelunpees ntawd txhua tus muaj plaub lub ntsejmuag, plaub phab tis thiab muaj ib yam zoo li neeg txhais tes nyob hauv qab lawv txhua phab tis. Lawv cov ntsejmuag zoo ib yam li cov ntsejmuag uas kuv twb xub pom nyob ntawm ntug Dej Khenpales. Txhua tus qhelunpees mus ncaj nraim rau tom hauv ntej. Vajtswv tus ntsujplig los nqa hlo kuv mus rau ntawm lub roojvag uas nyob ntawm lub Tuamtsev sab hnubtuaj. Muaj nees nkaum tsib leeg txivneej nyob ze ntawm lub roojvag, muaj Axules tus tub Yaxaniyas thiab Npenayas tus tub Pelatiyas uas yog ob tug thawjcoj ntawm lawv haivneeg nrog lawv nyob ntawd. Vajtswv hais rau kuv hais tias, “Tub noobneej, cov txivneej uas koj pom ntawd tuavhauv ua phem ua qias thiab qhia cov neeg hauv lub nroog no ua txhaum. Lawv hais tias, ‘Tsis ntev peb yuav tau ua tsev dua. Lub nroog no zoo ib yam li lub laujkaub uas nyob hauv qhovcub, thiab peb zoo ib yam li cov nqaij uas hau hauv lub laujkaub ntawd, tiamsis txawm li cas los lub laujkaub tseem thaiv peb ntawm cov nplaim taws.’ Tub noobneej, koj cia li cev tej lus cem cov neeg ntawd tamsim no.” Vajtswv tus ntsujplig los kav hlo kuv, thiab tus TSWV qhia kom kuv hais cov lus no rau cov neeg ntawd hais tias, “Cov Yixalayees, kuv paub tej uas nej hais thiab tej uas nej tuavhauv ua lawm. Nej tua neeg coob leej hauv lub nroog no thiaj muaj neeg tuag pawglug rau txhua txojkev. “Kuv yog tus TSWV uas kav ib puas tsav yam hais li no rau nej. Lub nroog no yog lub laujkaub uas tabtom nyob hauv qhovcub, tiamsis dabtsi yog cov nqaij uas hau rau hauv? Twb yog cov neeg tuag uas nej tua ntag! Nej yuav tsis tau nyob hauv lub nroog no lawm, kuv yuav muab nej tshem rau sab nraum ntug nroog! Nej puas ntshai tej hniav ntaj? Kuv yuav txib ib pab neeg nqa ntaj tuaj tua nej. Tus TSWV uas yog Vajtswv hais li ntawd. Kuv yuav coj nej tawm mus rau nraum ntug nroog thiab muab nej cob rau cov neeg txawv tebchaws. Kuv twb txiav txim rau nej lawm, nej yuav raug tua tuag rau hauv nej lub tebchaws. Ces txhua tus thiaj yuav paub hais tias kuv yog tus TSWV. Lub nroog no yuav tsis tiv thaiv nej li lub laujkaub tiv thaiv cov nqaij; txawm yog nej yuav nyob hauv lub tebchaws Yixalayees no qhov twg los kuv yuav rau txim rau nej. Nej yuav paub hais tias kuv yog tus TSWV uas rau txim rau nej, vim nej coj lwm haivneeg tej kevcai; nej ua li ntawd yog nej rhuav kuv tej kevcai thiab kuv tej lus samhwm!” Thaum kuv tseem cev Vajtswv lus, Pelatiyas cia li vau hlo tuag lawm. Kuv txhos caug ntua ua ntsejmuag ti nkaus hauv av thiab thov hais tias, “Tus TSWV uas kav ib puas tsav yam, thov tsis txhob ua li ko! Koj txawm yuav muab cov neeg uas seem hauv tebchaws Yixalayees tua kom tuag tas li los?” Tus TSWV hais rau kuv hais tias, “Tub noobneej, cov neeg uas nyob hauv Yeluxalees sib tham txog koj thiab koj cov kwvtij Yixalayees uas raug ntes mus rau lwm tebchaws. Lawv hais tias, ‘Cov neeg uas raug ntes mus ntawd nyob nrug deb lub tebchaws uas muaj kev pehawm tus TSWV. Tus TSWV twb muab lub tebchaws no cob rau peb ua peb tug lawm.’ “Koj hais rau koj cov kwvtij uas raug ntes mus rau lwm tebchaws raws li kuv cov lus no: Kuv yog tus TSWV uas ntiab lawv mus nyob rau tej tebchaws uas deb thiab ua kom lawv tawg mus nyob xyaw ntau haivneeg. Tiamsis, txawm li ntawd los kuv yuav nrog lawv nyob hauv cov tebchaws ntawd. “Kuv yog tus TSWV uas kav ib puas tsav yam, koj hais kuv tej lus no rau lawv hais tias kuv yuav sau lawv hauv cov tebchaws uas lawv mus nyob ntawd rov qab los thiab yuav muab lub tebchaws Yixalayees rov rau lawv. Thaum lawv rov los lawv yuav tsum tso txhua yam kev phem kev qias thiab tej mlom uas lawv muaj tseg huv tibsi! Kuv yuav pub lub siab tshiab thiab txojkev xav tshiab rau lawv. Kuv yuav rho lawv lub siab uas tawv li pobzeb povtseg thiab muab lub siab uas mloog lus rau lawv. Ces lawv yuav ua raws li kuv tej kevcai thiab muab siab npuab kuv tej lus samhwm. Lawv yuav yog kuv haivneeg thiab kuv yuav yog lawv tus Vajtswv. Tiamsis kuv yuav rau txim rau cov neeg uas ua kev phem kev qias thiab pe mlom. Kuv yuav rau txim rau lawv, vim tej uas lawv tau ua tas los lawm.” Tus TSWV uas kav ib puas tsav yam hais tej lus no. Cov qhelunpees pib ya tawm thiab cov log los txawm nrog cov qhelunpees mus lawm. Cov Yixalayees tus Vajtswv lub tshwjchim uas ci ntsa iab los roos nkaus lawv. Lub tshwjchim txawm ncaim lub nroog thiab mus rau tim lub roob uas nyob ntawm lub nroog sab hnubtuaj lawm. Nyob rau hauv zaj yogtoog ntawd, Vajtswv tus ntsujplig nqa hlo kuv thiab coj kuv rov mus rau tim tebchaws Npanpiloos uas peb raug ntes mus nyob, ces zaj yogtoog txawm ploj lawm. Kuv thiaj piav txhua yam uas tus TSWV ua rau kuv pom rau cov neeg uas raug ntes mus ntawd mloog. Tus TSWV hais rau kuv hais tias, “Tub noobneej, koj nrog cov neeg ntxeev siab nyob. Lawv muaj qhovmuag, tiamsis lawv tsis pom dabtsi; lawv muaj qhovntsej, tiamsis lawv tsis hnov lus, rau qhov lawv yog cov neeg ntxeev siab. “Tub noobneej, cia li sawbsim koj tej khoom thiab tawm mus ib yam li koj yog tus neeg poob tebchaws thiab cia li mus rau lwm qhov thaum nruab hnub nrig tabmeeg sawvdaws. Tej zaum qhov uas koj tawm mus li ntawd yuav ua rau lawv pom hais tias lawv yog neeg ntxeev siab. Cia li nqa koj pob khoom thiab sawv kev mus rau lwm qhov thaum nruab hnub nrig ib yam li tus neeg poob tebchaws kom txhua tus pom thiab saib ntsoov koj mus. Thaum lawv ntsia ntsoov koj, koj cia li tho ib lub qhov ntawm sab phabntsa thiab nqa koj pob khoom tawm ntawm lub qhov ntawd mus. Cia lawv ntsia ntsoov koj tsaws koj pob khoom rau saum xubpwg thiab tawm mus rau sab nraud tsaus ntuj nti, pos nkaus koj qhovmuag kom koj tsis pom kev thiab tsis paub xyov yuav mus rau qhov twg. Qhov uas koj ua ntawd, yog ua lub cim qhia rau cov Yixalayees paub.” Kuv ua raws li tus TSWV qhia rau kuv. Hnub ntawd kuv txawm sawbsim tau ib pob khoom ib yam li tus neeg poob tebchaws, thiab hnub ntawd thaum yuav tsaus ntuj kuv txawm muab tes tho ib lub qhov ntawm sab phabntsa thiab tawm mus rau sab nraud. Lawv ntsia ntsoov kuv tsaws pob khoom rau saum xubpwg thiab sawv kev mus lawm. Tagkis tom qab tus TSWV rov los hais rau kuv hais tias, “Tub noobneej, nimno cov Yixalayees uas ntxeev siab nug hais tias koj ua dabtsi li ntawd; koj teb rau lawv raws li tus TSWV uas kav ib puas tsav yam kom koj hais. Cov lus no yog hais rau tus nom uas kav lub nroog Yeluxalees thiab cov pejxeem uas nyob hauv lub nroog ntawd. Koj hais rau lawv tias qhov uas koj ua li ntawd, yog ib lub cim qhia rau lawv paub hais tias lawv yuav raug luag ntes coj mus ua neeg poob tebchaws. Tus nom uas kav lawv los yuav tsaws hlo nws pob khoom rau saum xubpwg thiab tawm khiav ntawm lub qhov uas luag tho rau nws ntawm sab phabntsa mus tsaus ntuj nti. Nws pos nkaus qhovmuag thiab tsis paub xyov yuav mus rau qhov twg. Tiamsis kuv yuav nthuav kuv lub vas khwb nkaus nws cia. Ces kuv yuav coj nws mus rau hauv lub nroog Npanpiloos uas yog qhov chaw nws yuav tuag tsis pom lub nroog ntawd. Kuv yuav ntiab nws cov nomtswv, cov tuavxam thiab cov tub fajxwm kom tawm khiav mus rau txhua txojkev, ces luag yuav nrhiav lawv tua povtseg. “Thaum kuv ntiab lawv tawm mus nyob xyaw lwm haivneeg rau lwm lub tebchaws, lawv yuav paub hais tias kuv yog tus TSWV. Kuv yuav tseg lawv cov ntawd ibtxhia dim hniav ntaj hniav riam, dim kev tshaib kev nqhis thiab dim kev mob kev nkeeg kom thaum lawv nrog lwm haivneeg nyob, lawv yuav lees paub hais tias lawv tau ua phem ua qias loj kawg nkaus, thiab lawv yuav paub hais tias kuv yog tus TSWV.” Tus TSWV hais rau kuv hais tias, “Tub noobneej, koj yuav noj mov ua ibce tshee hnyo thiab koj haus dej ntshai ua ibce tshee laim dais. Tus TSWV uas kav ib puas tsav yam kom kuv hais rau cov neeg hauv lub nroog Yeluxalees uas seem nyob hauv lawv lub tebchaws li no: Lawv yuav noj mov ua ibce tshee hnyo thiab haus dej ntshai ua ibce tshee laim dais. Lawv lub tebchaws yuav raug luag lwg kom nyob qhuav qhuas cia, rau qhov cov neeg uas nyob hauv lub tebchaws ntawd tsis ua raws li kuv tej kevcai. Tej nroog uas nimno muaj neeg nyob puv nkaus yuav puastsuaj, thiab lub tebchaws yuav ua suabpuam tas. Ces lawv thiaj yuav paub hais tias kuv yog tus TSWV.” Tus TSWV hais rau kuv hais tias, “Tub noobneej, vim li cas cov Yixalayees pheej hais zaj pajlug no: ‘Lub sijhawm dhau zuj zus lawm, thiab tej lus qhia tshwm tsis muaj dabtsi tshwm li’? Nimno koj cia li qhia tus TSWV uas kav ib puas tsav yam tej lus rau lawv. Kuv yuav ua kom lawv tej pajlug tsis muaj tas. Lawv yuav tsis hais txog zaj pajlug ntawd hauv lub tebchaws Yixalayees ntxiv li lawm. Koj qhia rau lawv li no: Twb txog lub sijhawm lawm, thiab tej lus qhia tshwm yuav tshwm muaj tseeb! “Yuav tsis muaj tej zaj yogtoog cuav lossis tsis muaj cov cevlus dag kom neeg yuam kev nyob hauv cov Yixalayees ntxiv lawm. Kuv yog tus TSWV, kuv hais li cas yeej yuav muaj li ntawd. Kuv yuav tsis ncua sijhawm, vim nej tau ntxeev siab tas nej tiam neej li. Yog li ntawd, kuv yuav ua raws li kuv tau hais rau nej lawm. Kuv yog tus TSWV uas kav ib puas tsav yam hais li ntawd.” Tus TSWV hais rau kuv hais tias, “Tub noobneej, cov Yixalayees xav hais tias tej uas koj ua yogtoog pom thiab tej lus qhia tshwm tseem tshuav ntev mam li tshwm los. Tus TSWV uas kav ib puas tsav yam kom kuv hais rau lawv li no: Kuv yuav tsis ncua sijhawm lawm, yuav muaj tseeb li tej lus uas kuv hais. Kuv yog tus TSWV uas kav ib puas tsav yam hais li ntawd.” Tus TSWV hais rau kuv hais tias, “Tub noobneej, koj cia li cem cov Yixalayees cov cev Vajtswv lus uas pheej cev Vajtswv lus raws li lawv xav xwb. Koj hais kom lawv cia li mloog tus TSWV tej lus.” Tus TSWV uas kav ib puas tsav yam hais tias, “Cov cev Vajtswv lus uas ruam yuav raug puastsuaj! Lawv hais raws li lawv xav xwb, lawv tsis tau ua yogtoog pom dabtsi li. Cov Yixalayees, nej cov cev Vajtswv lus tsis muaj nqis ib yam li tej hma uas nyob hauv lub nroog uas pob puas tas lawm. Lawv tsis zov tej qhov uas sab phabntsa vau lawm lossis lawv tsis kho sab phabntsa ntawd. Yog li ntawd, hnub uas tus TSWV los thiab muaj kev tsov kev rog tuaj, cov Yixalayees yuav tiv tsis tau. Tej zaj yogtoog uas lawv ua yog cuav thiab tej lus qhia tshwm uas lawv hais yog lus dag xwb. Lawv dag hais tias yog lawv cev kuv tej lus, tiamsis kuv tsis tau txib lawv mus. Tsis tas li ntawd xwb, lawv tseem xav kom tej lus uas lawv hais yog lus tseeb! Kuv qhia rau lawv hais tias, tej zaj yogtoog uas nej pom yog cuav thiab tej lus qhia tshwm uas nej hais yog lus dag. Nej hais tias yog nej hais kuv cov lus, tiamsis kuv tsis tau hais rau nej!” Tus TSWV uas kav ib puas tsav yam hais rau lawv hais tias, “Nej tej lus yog lus cuav thiab tej zaj yogtoog uas nej pom yog dag xwb. Kuv yog tus uas tawmtsam nej ntag. Kuv yuav rau txim rau nej cov uas cev Vajtswv lus cuav thiab hais tej lus qhia tshwm uas ua rau neeg yuam kev. Thaum kuv haivneeg tuaj sib sau sablaj ua ke, nej yuav tsis tau koom nrog lawv; nej tej npe yuav tsis muaj nyob hauv phau ntawv uas teev cov Yixalayees tej npe; nej yuav tsis tau rov los rau hauv nej lub tebchaws. Ces nej thiaj yuav paub hais tias kuv yog tus TSWV uas kav ib puas tsav yam. “Cov cev Vajtswv lus uas ua rau kuv haivneeg yuam kev hais tias cia li tso siab tsis muaj dabtsi. Tiamsis tsis yog li ntawd! Kuv haivneeg puab tau tus ntsa yeej lawm, ces cov cev Vajtswv lus mam coj hmoov sib tuaj leem rau. Koj hais rau cov cev Vajtswv lus ntawd hais tias lawv tus ntsa yeej yuav pob puas tas. Kuv yuav tso nag thiab tso lawg hlob heev los ntaus thiab cua daj cua dub yuav ntsawj tus ntsa yeej ntawd. Tus ntsa yeej ntawd yuav pob, ces txhua tus yuav nug koj hais tias cov hmoov sib uas leem tus ntsa yeej dua twg tas lawm?” Tus TSWV uas kav ib puas tsav yam hais tias, “Kuv chim, kuv thiaj tso cua daj cua dub, tso nag thiab lawg los ntaus lawv tus ntsa yeej. Kuv txhob txwm rhuav tus ntsa yeej uas lawv muab hmoov sib leem kom tawg tas, tshuav tus taw ntsa lawm xwb. Tus ntsa yeej yuav vau los ntaus nej tuag tas. Ces txhua tus thiaj yuav paub hais tias kuv yog tus TSWV. “Tus ntsa yeej thiab cov neeg uas muab hmoov sib leem tus ntsa yeej yuav raug kuv txojkev chim uas loj kawg nkaus. Ces kuv yuav qhia rau koj hais tias tus ntsa yeej thiab cov neeg uas muab hmoov sib leem tus ntsa yeej twb ploj tas lawm, cov cev Vajtswv lus ntawd, yog cov uas hais rau lub nroog Yeluxalees kom cia li tso siab thaum uas tsis muaj kev tso siab!” Tus TSWV uas kav ib puas tsav yam yog tus hais li ntawd. Tus TSWV hais tias, “Tub noobneej, nimno koj tsa qhovmuag ntsia koj haivneeg cov pojniam uas pheej hais tej lus qhia tshwm. Koj cia li cem lawv thiab qhia tus TSWV uas kav ib puas tsav yam tej lus rau lawv hais tias, “Cov pojniam ko yuav raug puastsuaj! Nej xaws tej pluaj ntaub rau txhua tus coj ntawm dabteg thiab ntos phuam rau txhua tus ntoo saum taubhau kom lawv muaj hwjchim tswj lwm tus lub neej. Nej xav tau lub hwjchim uas tswj kuv haivneeg txojsia thiab txojkev tuag mus siv kom muaj nqi rau nej. Nej ua saib tsis taus kuv tabmeeg kuv haivneeg kom nej tau ob peb phoovtes hmoov nplej thiab tau ob peb lub ncuav. Nej tua tej neeg uas tsis tsimnyog tuag, tiamsis nej tseg cov neeg uas tsimnyog tuag cia. Nej ua li ntawd kom dag tau kuv haivneeg ntseeg nej.” Tus TSWV uas kav ib puas tsav yam hais li no: “Kuv ntxub tej pluaj ntaub uas nej coj ntawm dabteg uas nej siv tswj kuv haivneeg txojsia thiab txojkev tuag. Kuv yuav chua tej ntawd ntawm nej tes mus thiab tso cov neeg uas raug nej tswjhwm kom dim. Kuv yuav chua nej tej phuam povtseg thiab tso kuv haivneeg kom dim ntawm nej lub hwjchim. Ces nej yuav paub hais tias kuv yog tus TSWV. “Nej tej lus dag ua rau cov neeg ncaj ncees uas kuv tsis xav kom raug mob qaug zog kawg li. Nej tav kev tsis pub cov neeg ua phem tso lawv tej kev phem kev qias tseg kom lawv thiaj tau txojsia. Nimno nej tej zaj yogtoog cuav thiab tej lus qhia tshwm ua rau neeg yuam kev tsis muaj lawm. Kuv cawm kuv haivneeg dim ntawm nej lub hwjchim lawm, nej thiaj yuav paub hais tias kuv yog tus TSWV.” Cov Yixalayees cov thawjcoj qee leej tuaj nug kuv saib tus TSWV nyiam li cas. Ces tus TSWV hais rau kuv hais tias, “Tub noobneej, cov neeg no twb muab lawv lub siab fij rau tej mlom thiab cia tej mlom ntawd coj lawv mus ua txhaum. Lawv xav hais tias kuv yuav teb lawv thiab no los? “Tus TSWV uas kav ib puas tsav yam kom kuv hais rau lawv li no: Txhua tus Yixalayees uas cia tej mlom kav lawv lub siab thiab coj lawv mus ua txhaum tseem tuaj cuag tus cev Vajtswv lus kom nrog tuavxam, kuv yog tus uas yuav teb lawv tej lus xav tau thiab teb tej lus kom tsimnyog tej uas lawv tej mlom xa tau. Tej mlom ntawd ua rau cov Yixalayees txav deb ntawm kuv lawm, tiamsis kuv cia siab hais tias kuv cov lus teb yuav coj tau cov Yixalayees rov los muab lub siab npuab kuv. “Tus TSWV uas kav ib puas tsav yam kom kuv hais rau cov Yixalayees li no: Nej cia li tso plhuav nej tej mlom uas phem qias tseg thiab tig rov los cuag kuv. “Thaum cov Yixalayees ib tug twg lossis cov neeg txawv tebchaws ib tug twg uas nrog nej cov Yixalayees nyob khiav tawm ntawm kuv mus pe mlom thiab tseem tuaj cuag tus cev Vajtswv lus kom nrog tuavxam, mas kuv uas yog tus TSWV yuav teb nws. Kuv yuav tawmtsam nws. Kuv yuav muab nws ua qauv hais. Kuv yuav tshem nws tawm hauv kuv haivneeg mus, nej thiaj yuav paub hais tias kuv yog tus TSWV. “Yog ib tug cev Vajtswv lus twg raug dag ntxias kom teb tej lus cuav, qhov uas ua li ntawd twb yog kuv uas yog tus TSWV dag ntxias nws. Kuv yuav tshem nws tawm hauv haivneeg Yixalayees mus. Tus cev Vajtswv lus thiab tus uas tuaj thov kom cev Vajtswv lus yuav raug txim hnyav ib yam nkaus. Kuv yuav ua li no kom cov Yixalayees thiaj tsis tso kuv tseg mus ua tej kev txhaum uas ua rau lawv tsis huv. Lawv yuav yog kuv haivneeg thiab kuv yuav yog lawv tus Vajtswv.” Tus TSWV uas kav ib puas tsav yam hais tej lus no. Tus TSWV hais rau kuv hais tias, “Tub noobneej, yog ib lub tebchaws twg ua txhaum thiab tsis muab siab npuab kuv, ces kuv yuav rhuav tsis pub kom muaj kev noj kev haus rau lub tebchaws ntawd. Kuv yuav tso kev tshaib kev nqhis los raug cov neeg thiab tej tsiaj kom tuag tas huv tibsi. Txawm yog thaum Nau-es, Daniyees thiab Yauj, lawv peb leeg ntawd ua neej nyob los lawv tej kev ncaj ncees tsuas cawm tau lawv txojsia nkaus xwb.” Tus TSWV uas kav ib puas yam hais tej lus no. “Lossis kuv yuav tso tej tsiaj nyaum los tom tej neeg thoob tebchaws kom tas thiab ua rau lub tebchaws nyob qhuav nquas cia, kom tsis muaj leejtwg tau luag taug kev hla lub tebchaws ntawd; kuv yog tus TSWV uas kav ib puas tsav yam thiab yog Vajtswv tus uas muaj sia nyob hais tias txawm yog Nau-es, Daniyees thiab Yauj nyob ntawd los lawv yeej cawm tsis tau lawv cov menyuam kom dim. Lawv tsuas cawm tau lawv xwb, lub tebchaws yuav ua suabpuam tas. “Lossis kuv yuav tso kev tsov kev rog tuaj tua lub tebchaws thiab siv ntaj tua cov neeg thiab tej tsiaj kom tuag tas huv tibsi; kuv yog tus TSWV uas kav ib puas tsav yam thiab yog tus Vajtswv uas muaj sia nyob hais tias txawm yog Nau-es, Daniyees thiab Yauj nyob ntawd los lawv yeej cawm tsis tau lawv cov menyuam kom dim, lawv tsuas cawm tau lawv xwb. “Yog hais tias kuv chim, kuv tso sub tawg sub ntsha los raug lub tebchaws kom cov neeg thiab tej tsiaj tuag tas huv tibsi; kuv yog tus TSWV uas kav ib puas tsav yam thiab yog tus Vajtswv uas muaj sia nyob hais tias, txawm yog Nau-es, Daniyees thiab Yauj nyob ntawd los lawv yeej cawm tsis tau lawv cov menyuam kom dim. Lawv txojkev ncaj ncees tsuas cawm tau lawv xwb.” Tus TSWV uas kav ib puas tsav yam hais tias, “Kuv yuav tso kuv plaub yam kev rau txim uas hnyav heev los rau lub nroog Yeluxalees xwsli: Kev tsov kev rog, kev tshaib kev nqhis, kev mob kev nkeeg, thiab tej tsiaj nyaum los rhuav kom cov neeg thiab tej tsiaj tuag tas huv tibsi. Yog muaj leejtwg seem tuag thiab coj tau nws cov menyuam los cuag nej, nej yuav pom hais tias lawv ua phem ua qias kawg li, ces nej yuav paub hais tias kuv rau txim ncaj ncees rau lub nroog Yeluxalees; nej thiaj yuav paub hais tias txhua yam uas kuv ua tas los yeej tsimnyog lawm.” Tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, yuav ua li cas muab tsob hmab piv tau rau tsob ntoo? Yog muab tsob txiv hmab piv rau tsob ntoo uas nyob hauv havzoov yuav txawv li cas? Koj puas siv tau tsob hmab ntawd ua tau ib yam dabtsi? Koj puas muab tau tsob hmab ntawd los ua nqelauj dai tau tej yam dabtsi? Nws tsuas zoo ua taws rauv xwb. Yog thaum ob tog tw kub hnyiab tas thiab ntu nruab nrab ua hluavncaig lawm, koj puas tseem siv tau kom muaj nqis? Thaum tseem tsis tau muab hlawv twb siv tsis tau ua dabtsi. Tom qab uas nws kub hnyiab tas ua hluavncaig lawm hajyam siv tsis tau li lawm.” Tus TSWV uas kav ib puas tsav yam hais li no: “Luag sau tej hmab hauv havzoov coj mus hlawv povtseg li cas, kuv yuav coj cov Yixalayees uas nyob hauv lub nroog Yeluxalees mus ib yam li ntawd, thiab kuv yuav rau txim rau lawv. Lawv twb dim hluavtaws kub ib zaug lawm, tiamsis zaum no hluavtaws yuav kub lawv kom dulug. Thaum kuv rau txim rau lawv, nej yuav paub hais tias kuv yog tus TSWV. Vim lawv tsis muab siab npuab kuv; yog li ntawd, kuv yuav muab lawv lub tebchaws ua kom ua suabpuam tas.” Tus TSWV uas kav ib puas tsav yam hais tej lus no. Tus TSWV hais rau kuv ntxiv hais tias, “Tub noobneej, koj cia li qhia tej kev phem kev qias uas Yeluxalees tau ua lawm. Koj qhia tus TSWV uas kav ib puas tsav yam tej lus rau Yeluxalees hais tias, “Koj yug hauv lub tebchaws Kana-as. Koj txiv yog neeg Amaules thiab koj niam yog neeg Hitis. Thaum yug tau koj los tsis muaj leejtwg txiav koj txoj hlab ntaws lossis ntxuav koj, tsis muab ntsev txhuam lossis muab khaubncaws qhwv koj. Thaum yug tau koj los tsis muaj leejtwg hlub koj thiab mob siab ua tej uas hais tas los ntawd rau koj. Luag thiaj muab koj pov rau tom tiaj nrag. “Kuv dua kev tuaj pom koj tsau ntshav tsawv. Koj ibce lo ntshav tas, tiamsis kuv tsis cia koj tuag. Kuv ua rau koj hlob mos nyoos ib yam li tus ntsuag ntoo. Koj thiaj hlob tiav nkauj. Koj ob lub mis puv zoo thiab koj cov plaubhau ntev npws loo, tiamsis koj tseem liabqab. “Thaum kuv rov dua kev tuaj, kuv pom hais tias txog lub sijhawm uas koj nyiam hluas nraug lawm. Kuv thiaj muab kuv lub tsho loj qhwv koj lub cev uas liabqab. Kuv coglus yuav hlub koj thiab yuav koj ua kuv tus pojniam kom koj yog kuv tug.” Tus TSWV uas kav ib puas tsav yam hais li ntawd. “Kuv muab dej los ntxhuav tej ntshav ntawm koj lub cev, thiab muab roj tsw qab pleev koj. Kuv muab ib daim tiab uas taw suab yi rau koj hnav thiab muab ib nkawm khau tawv uas zoo heev rau koj rau; kuv muab phuam ntaubmag rau koj ntoo thiab muab tsho ntaub tshwbkab rau koj hnav. Kuv muab kauj toog npab thiab xauv rau koj coj. Kuv muab khawb khawm koj qhovntswg, muab qhwsntsej rau koj coj, thiab muab kausmom kub rau koj ntoo. Koj coj saw nyiaj saw kub thiab hnav tej ntaubmag thiab ntaub tshwbkab uas zoo heev. Koj tau noj tej ncuav uas yog muab cov tseem hmoov nplej puab, thiab koj muaj zib ntab thiab roj txiv ntoo noj. Koj cev zam zoo nkauj ci ntsa iab, koj thiaj tau los ua ib tug poj vajntxwv. Koj txojkev zoo nkauj ua rau koj muaj koob meej nto moo lug rau txhua haivneeg, rau qhov kuv muab koj tseev zam txaus nyiam thiab ntxim luag siab heev.” Tus TSWV uas kav ib puas tsav yam hais li ntawd. “Tiamsis koj cia li siv koj txojkev zoo nkauj thiab nto moo mus nrog txhua tus uas tuaj cuag koj ua kev nkauj kev nraug. Koj muab tej khaubncaws ibtxhia coj mus dai rau hauv koj tej chaw pe mlom thiab chaw ua niamntiav; ibtxwm yeej tsis muaj li no, thiab yuav tsis muaj ntxiv li lawm. Koj muab tej saw nyiaj saw kub uas kuv muab rau koj coj mus nchuav ua tej tus mlom txivneej thiab koj ua kev nkauj kev nraug nrog tej mlom ntawd. Koj muab kuv tej tiab taw suab yi uas kuv muab rau koj coj mus rau tej mlom hnav; koj muab roj txiv ntoo thiab tej hmoov tshuaj tsw qab uas kuv muab rau koj coj mus fij rau tej mlom. Kuv pub koj muaj tej zaub mov uas yog tej tseem hmoov nplej, tej roj txiv ntoo thiab zib ntab noj, tiamsis koj muab coj mus ua khoom fij rau tej mlom lawm.” Tus TSWV uas kav ib puas tsav yam hais li ntawd. “Koj muab tej tub tej ntxhais uas koj yug rau kuv coj mus tua fij rau tej mlom. Koj mus ua kev nkauj kev nraug los tseem tsis txaus koj siab, koj thiaj coj kuv cov menyuam ntawd mus tua fij rau tej mlom no los? Thaum koj mus ua kev phem kev qias uas yog ua niamntiav, koj yeej tsis nco qab txog thaum koj tseem yau uas liabqab tsuas thiab pw tsau ntshav tsawv ntawd lawm.” Tus TSWV uas kav ib puas tsav yam hais tias, “Koj raug kev puastsuaj lawm! Raug puastsuaj lawm! Koj ua txhua yam kev phem kev qias thiab koj tseem mus ua tej chaw pe mlom rau ntawm tej ntug kev ua chaw ua niamntiav. Koj coj koj txojkev zoo nkauj mus da pas av. Koj muab koj lub cev rau txhua tus uas tuaj cuag koj, thiab koj niaj hnub ua niamntiav. Koj cia cov neeg Iziv uas yog phoojywg nruab ze tuaj nrog koj pw hauv koj txaj, thiab koj pheej ua niamntiav ua rau kuv chim heev. “Kuv thiaj tsa tes rau txim rau koj thiab tshem tej koob hmoov uas yog koj feem ntawm koj mus. Kuv muab koj cob rau koj cov yeebncuab uas yog neeg Filitees kom lawv ua rau koj raws li lawv siab nyiam; koj tej kev phem kev qias ua rau cov ntxhais Filitees poob ntsejmuag. “Vim koj tsis txaus siab rau tej kev phem kev qias uas koj ua nrog lwm cov neeg, koj thiaj raws cov Axilias qab. Koj yog lawv tus niamntiav, txawm li ntawd los tseem tsis txaus koj siab qees. Tsis tas li ntawd xwb koj tseem ua niamntiav rau cov Npanpiloos uas yog lub tebchaws uas muaj tej tub lag tub luam, tiamsis lawv cov ntawd los kuj tsis txaus koj siab li thiab.” Tus TSWV uas kav ib puas tsav yam hais tias, “Koj tau ua ib puas tsav yam ib yam li tus niamntiav uas tsis paub txajmuag li. Koj ua chaw pe mlom rau txhua txojkev thiab ua niamntiav rau hauv tej chaw ntawd. Tiamsis tsis yog koj ua niamntiav yuav nyiaj ib yam li tej niamntiav ibtxwm ua. Koj yog tus pojniam uas muaj txiv, tiamsis tsis hlub tus txiv thiaj mus ua kev kauj kev nraug. Tus niamntiav tiag mas luag them nyiaj rau nws, tiamsis koj tseem muab khoom pub thiab muab nyiaj ntiav hluas nraug tuaj txhua qhov tuaj nrog koj pw. Koj yog ib tug niamntiav uas txawv dua luag tej. Tsis muaj leejtwg yuam kom koj ua niamntiav. Luag tsis them nyiaj rau koj; koj them nyiaj rau luag! Koj yeej txawv dua lwm tus niamntiav tiag.” Yeluxalees uas yog tus niamntiav! Koj cia li mloog tus TSWV uas kav ib puas tsav yam tej lus. Tus TSWV uas kav ib puas tsav yam hais li no: “Koj hle koj tej ris tsho ib yam li tus niamntiav koj muab koj lub cev rau koj tej hluas nraug thiab rau koj tej mlom uas phem qias, thiab tua koj tej menyuam fij rau tej mlom ntawd. Vim li no kuv yuav coj tagnrho koj tej qub hluas nraug tuaj ua ke, tsis hais cov uas koj nyiam thiab cov uas koj ntxub huv tibsi. Kuv yuav coj lawv tuaj sawv puagncig koj, ces kuv yuav muab koj tej ris tsho hle kom lawv pom koj liabqab. Kuv yuav rau txim rau koj, vim koj ua kev nkauj kev nraug thiab tua neeg. Kuv chim thiab npautaws kuv thiaj rau txim kom koj tuag. Kuv yuav muab koj cob rau lawv tes, lawv yuav rhuav koj tej chaw ua niamntiav thiab pe mlom. Lawv yuav chua pesntia koj tej ris tsho thiab tej saw nyiaj saw kub cia kom koj nyob liabqab. “Lawv yuav sau nthwv tuaj muab pobzeb ntaus koj thiab muab ntaj txiav kom koj tu ua ob peb ya. Lawv yuav muab koj tej vajtse hlawv kom kub hnyiab tas thiab kuv yuav rau txim rau koj tabmeeg ib tsoom pojniam. Kuv yuav txwv kom koj tseg tsis txhob ua niamntiav thiab tseg tsis txhob muab khoom pub koj tej hluas nraug. Ces kuv txojkev chim thiaj yuav txias thiab kuv lub siab thiaj yuav tus. Kuv yuav tsis chim thiab tsis khib ntxiv lawm. Koj tsis nco txog thaum koj tseem yau uas kuv tu koj, koj thiaj li mus ua ib puas tsav yam rau kuv chim. Yog li ntawd, kuv thiaj ua pauj tej uas koj tau ua los lawm. Vim li cas koj ua kev nkauj kev nraug tsub rau tej kev pe mlom uas phem qias?” Tus TSWV uas kav ib puas tsav yam hais li ntawd. Tus TSWV hais tias, “Neeg yuav siv zaj pajlug no hais ntsig txog koj uas yog lub nroog Yeluxalees hais tias, ‘Leej niam zoo li cas, ces tus ntxhais zoo ib yam li ntawd.’ Koj yog koj niam tus ntxhais tiag. Koj niam ntxub nws tus txiv thiab nws tej menyuam. Koj zoo ib yam li koj cov vivncaus uas ntxub lawv cov txiv thiab cov menyuam. Koj thiab koj cov vivncaus leej niam yog neeg Hitis thiab nej txiv yog neeg Amaules. “Koj tus niamlaus yog lub nroog Xamalis uas nyob nrog nws tej zos sab qaumteb. Koj tus niamhluas yog lub nroog Xaudoos uas nyob nrog nws tej zos sab qabteb. Tsis yog koj ua li lawv ua xwb, tej kev phem kev qias uas lawv ua ntawd tseem tsis txaus koj siab. Tsis ntev koj yuav mus ua phem ua qias tshaj tej uas lawv ua thiab.” Tus TSWV uas kav ib puas tsav yam hais tias, “Kuv yog Vajtswv tus uas muaj sia nyob hais li no: Koj tus niamhluas uas yog lub nroog Xaudoos thiab nws tej zos twb tsis tau ua kev phem kev qias npaum li koj thiab koj tej zos ua. Ntawm no yog Xaudoos txojkev txhaum: Nws thiab nws cov ntxhais khavtheeb, rau qhov lawv muaj noj muaj haus nplua mias thiab nyob kaj siab lug, tiamsis lawv tsis hlub cov neeg txomnyem thiab cov neeg pluag. Lawv khavtheeb thiab tawv ncauj kawg li. Thaum kuv pom lawv ua tej uas kuv ntxub, kuv thiaj rhuav kom lawv raug kev puastsuaj. “Xamalis tej kev txhaum twb tsis npaum li koj tej kev txhaum ib nrab. Koj tau ua kev phem kev qias ntau dua nws. Yog muab nws piv rau koj, mas koj tus niamlaus zoo li tus uas tsis muaj ib qho txhaum li. Nimno koj yuav tsum ris txojkev txajmuag. Koj tej kev txhaum ntau dua koj cov vivncaus; yog muab lawv piv rau koj, ces zoo li lawv nyob ib cag tsis tau ua txhaum li. Koj cia li tiv kev txob thuam thiab ris kev txajmuag, rau qhov koj ua rau koj cov vivncaus zoo li lawv tsis muaj txhaum.” Tus TSWV hais rau Yeluxalees hais tias, “Kuv yuav rov txhim kho lub nroog Xaudoos thiab nws tej zos lub nroog Xamalis thiab nws tej zos kom rov vammeej dua. Kuv yuav rov txhim kho kom koj vammeej ib yam nkaus. Koj yuav rov txajmuag rau tej kev phem kev qias uas koj tau ua lawm, thiab koj txojkev txhaum yuav ua rau koj cov vivncaus pom hais tias lawv zoo dua koj. Xamalis thiab Xaudoos yuav rov zoo li qub, koj thiab koj tej zos los yuav rov zoo li qub thiab. Thaum koj khavtheeb, koj muab koj tus niamhluas uas yog Xaudoos hais tsis zoo ua ntej uas koj tej kev phem kev qias raug nthuav tawm. Nimno koj zoo li nws; cov Edoos, cov Filitees thiab cov neeg uas nyob puagncig koj uas ntxub koj los hais koj plig tsis zoo. Koj yuav raug txim vim tej kev phem kev qias uas koj tau ua tas los.” Tus TSWV hais li ntawd. Tus TSWV uas kav ib puas tsav yam hais tias, “Kuv yuav ua rau koj raws li koj tau ua lawm, rau qhov koj tsis ua li koj coglus, koj rhuav koj tej lus cog tseg. Txawm li ntawd los kuv yuav nco ntsoov kuv tej lus cog tseg rau koj thaum koj tseem yau, thiab kuv yuav coglus rau koj mus ibtxhis. Koj yuav rov nco txog tej kev phem uas koj tau ua tas los lawm; koj yuav txajmuag thaum koj coj koj tus niamhluas thiab niamlaus rov los. Kuv yuav cia nkawd zoo ib yam li yog koj ntxhais, tiamsis kuv tsis coglus rau nkawd li uas kuv coglus rau koj. Kuv yuav nrog koj coglus dua tshiab, koj thiaj yuav paub hais tias kuv yog tus TSWV. Kuv yuav zam tej kev txhaum uas koj tau ua tas los, tiamsis koj yuav nco ntsoov tej ntawd thiab txajmuag heev tsis xav hais lus li.” Tus TSWV uas kav ib puas tsav yam tau hais li ntawd. Tus TSWV hais rau kuv hais tias, “Tub noobneej, koj cia li qhia ib zaj lus pivtxwv rau cov Yixalayees, tus TSWV uas kav ib puas tsav yam kom koj hais li no rau lawv: Muaj ib tug dav loj uas ob phab tis zoo nkauj thiab cov plaub tis ntev heev. Tus dav ntawd ya mus rau saum roob Lenpanoos thiab lov tau ib lub ntsis ntoo ciab; tus dav coj lub ntsis ciab ntawd mus rau hauv lub tebchaws uas muaj kev lag kev luam thiab muab cog rau hauv lub nroog uas cov tub lag tub luam nyob. Tus dav ho coj ib lub noob hauv tebchaws Yixalayees mus cog rau hauv ib thaj av zoo uas muaj dej txaus yug kom lub noob ntawd tuaj kaus thiab loj hlob. Tus yub ntawd tuaj ua ib tsob hmab tsis siab, tiamsis nws ncau ceg nthuav rau ob sab. Tsob hmab ntawd cov ceg hlav mus txog rau ntawm tus dav, thiab cov cag nrhau mus tob. Cov ceg thiab cov nplooj tsaus nti. “Muaj dua ib tug dav loj uas ob phab tis ntev thiab muaj plaub tuab heev. Tsob hmab nrhau cag mus txog rau ntawm tus dav, thiab cov ceg los hlav nplooj mus rau ntawm tus dav; tsob hmab cia siab hais tias tus dav yuav muab dej yug nws ntau dua hauv lub vaj uas nws tuaj. Tiamsis tsob hmab ntawd yeej cog tau rau hauv thaj av zoo uas muaj dej txaus, nws cov ceg thiaj hlav nplooj ntau, tawg paj txi txiv thiab ua ib tsob hmab uas zoo heev. “Kuv yog tus TSWV uas kav ib puas tsav yam, kuv nug li no: Tsob hmab no puas yuav loj hlob taus? Thawj tus dav yeej dob tau tsob hmab, zaws cov txiv thiab ntshua tej ceg povtseg kom tsob hmab qhuav. Tsis tas yuav sib zog lossis cia ib haivneeg uas muaj zog tuaj dob povtseg li. Tsob hmab ntawd yeej cog rau hauv thaj av uas zoo lawm tiag, tiamsis nws puas yuav loj hlob taus; thaum cov cua sab hnubtuaj ntsawj tuaj, nws puas yuav ntsws? Nws puas yuav tuag tshav rau ntawm thaj chaw uas nws tuaj?” Tus TSWV hais rau kuv hais tias, “Koj nug saib cov neeg ntxeev siab puas paub zaj lus pivtxwv ntawd lub ntsiab. Koj hais rau lawv hais tias vajntxwv Npanpiloos tuaj rau hauv Yeluxalees, ntes cov Yudas tus vajntxwv thiab nws cov nomtswv coj mus rau tim tebchaws Npanpiloos lawm. Vajntxwv Npanpiloos tseem ntes cov Yudas tus vajntxwv tsevneeg ib tug coj mus thiab yuam kom nws coglus ua raws li vajntxwv hais. Nws ntes cov nomtswv coj mus kaw, tsis pub kom haivneeg Yudas sawv taus thiab kom lawv ua raws li tej lus uas cog tseg lawm xwb. Tiamsis cov Yudas tus vajntxwv ntxeev siab thiab tso ib pab nomtswv mus rau nram tebchaws Iziv coj nees thiab tubrog coob heev tuaj. Nws puas yuav ua tiav? Nws ua li ntawd, nws puas yuav khiav dim? Nws yuav rhuav tsis tau nws tej lus cog tseg thiab khiav tsis dim li!” Tus TSWV uas kav ib puas tsav yam hais tias, “Kuv yog tus Vajtswv uas muaj sia nyob, cov Yudas tus vajntxwv yuav tuag rau hauv tebchaws Npanpiloos, rau qhov nws rhuav tej lus cog tseg uas nws nrog vajntxwv Npanpiloos uas tsa nws ua vajntxwv ntawd lawm. Txawm yog Falaus muaj tubrog coob heev los yuav pab cov Yudas tus vajntxwv tua tsis yeej, thaum cov Npanpiloos tuaj khawb av meem tus ntsa yeej kom tua tau neeg tuag coob ntawd. Cov Yudas tus vajntxwv saib tsis taus thiab rhuav tej lus cog tseg lawm. Nws ua txhua yam li ntawd mas nimno nws yuav khiav tsis dim li.” Tus TSWV uas kav ib puas tsav yam hais tias, “Kuv yog tus Vajtswv uas muaj sia nyob, kuv yuav rau txim rau nws vim nws tuav kuv lub npe coglus hais tias nws yuav ua raws li tej lus cog tseg ntawd. Kuv yuav nthuav vas khwb nws. Kuv yuav coj nws mus rau tim tebchaws Npanpiloos thiab rau txim rau nws, rau qhov nws tsis muab siab npuab kuv. Nws cov tubrog uas siab tawv tshaj yuav tuag tas rau hauv tshavrog, thiab cov seem yuav tawg khiav ua sab ua sua rau txhua qhov. Koj thiaj yuav paub hais tias kuv yog tus TSWV uas hais tej lus no.” Tus TSWV uas kav ib puas tsav yam hais li no: “Kuv yuav txiav tsob ntoo ciab uas siab lub ntsis, thiab lov tus ntsuag mos; kuv yuav coj mus cog rau saum roob siab, yog cov Yixalayees lub roob uas siab tshaj plaws. Nws yuav ncau ceg, txi txiv thiab peem tsheej ua ib tsob ntoo ciab loj heev. Yuav muaj txhua yam noog los ua zes thiab nyob ntawm tej ceg. Txhua tsob ntoo uas nyob hauv lub tebchaws yuav paub hais tias kuv yog tus TSWV. Kuv ua rau cov ntoo uas siab kom qis, thiab ua kom cov ntoo uas qis siab tuaj. Kuv ua rau cov ntoo uas tseem ntsuab kom tuag tshav, thiab ua kom cov ntoo uas qhuav lawm rov hlav nplooj. Kuv yog tus TSWV uas hais tej lus no. Kuv yuav ua raws li tej lus uas kuv tau hais lawm.” Tus TSWV hais rau kuv hais tias, “Zaj pajlug uas tej neeg niaj hnub hais hauv tebchaws Yixalayees yog dabtsi? ‘Niamtxiv noj txiv qaub, tiamsis menyuam los qaubncaug.’ ” Tus TSWV uas kav ib puas tsav yam hais tias, “Kuv yog Vajtswv tus uas muaj sia nyob, kuv yuav tsis pub nej niaj hnub hais zaj pajlug no hauv lub tebchaws Yixalayees ntxiv lawm. Txhua tus txojsia yog kuv li, tsis hais niamtxiv thiab menyuam huv tibsi. Tus twg ua txhaum, tus ntawd tuag xwb. “Pivxam hais tias muaj ib tug neeg zoo uas siab ncaj thiab ua ncaj ua ncees; nws tsis pe cov Yixalayees tej mlom thiab tsis noj tej khoom uas fij rau mlom ntawm qhov chaw uas txwv tsis pub pe mlom. Nws tsis tau deev luag tej pojniam lossis nrog tus pojniam uas tseem coj khaubncaws pw. Nws tsis dag lossis nyiag leejtwg. Nws thim tej uas luag coj tuaj yuam nqi ntawm nws rov rau luag; nws pub zaub mov rau cov neeg tshaib nqhis noj lossis muab ris tsho rau cov neeg liabqab hnav. Nws tsis qiv nyiaj rau leejtwg kom them pajlaum. Nws tsis ua kev phem kev qias, thiab nws txiav txim ncaj ncees rau cov uas muaj xaiv muaj lus. Tus neeg uas ua li ntawd, yog tus uas hwm kuv tej lus samhwm thiab coj raws li kuv tej kevcai. Nws yog tus ncaj ncees thiab nws yuav muaj sia nyob,” tus TSWV uas kav ib puas tsav yam hais li ntawd. “Pivxam hais tias tus neeg no muaj ib tug tub ua tubsab thiab tua neeg, nws ua tej uas hais los saum no ib yam uas leej txiv tsis tau ua ib zaug li. Nws noj tej khoom uas fij rau mlom ntawm qhov chaw uas txwv tsis pub pe mlom thiab deev luag tej pojniam. Nws dag ntxias cov neeg pluag, nws ua tubsab, thiab nws tsis thim tej uas luag coj tuaj yuam nqi ntawm nws rov rau luag. Nws mus pe mlom thiab ua kev phem kev qias; nws qiv nyiaj rau luag kom luag them pajlaum. Nws puas yuav muaj sia nyob? Nws yuav tsis muaj! Nws tau ua tej kev phem kev qias no mas nws yuav tuag. Nws yuav ris nws lub txim ntawd tuag. “Pivxam hais tias muaj dua ib tug txivneej muaj ib tug tub. Tus tub ntawd pom txhua yam kev txhaum uas leej txiv ua, tiamsis nws tsis ua phem raws li leej txiv ua. Nws tsis mus pe cov Yixalayees tej mlom, tsis noj tej khoom uas fij rau tej mlom ntawm qhov chaw uas txwv tsis pub pe mlom, thiab nws tsis deev luag tej pojniam, tsis tsimtxom lossis nyiag leejtwg. Nws thim tej uas luag coj tuaj yuam nqi ntawm nws rov rau luag. Nws pub zaub mov rau cov neeg tshaib nqhis noj thiab muab ris tsho rau tej neeg liabqab hnav. Nws tsis ua kev phem kev qias, thiab tsis qiv nyiaj rau leejtwg kom them pajlaum. Nws ua raws li kuv tej kevcai thiab coj raws li kuv tej lus samhwm. Nws yuav tsis tuag vim nws txiv tej kev txhaum, tiamsis nws yuav muaj sia nyob. Tiamsis nws txiv ua tubsab, huab luag tug, thiab niaj hnub ua phem ua qias rau txhua tus. Yog li ntawd, nws yuav tuag vim nws tej kev txhaum. “Tiamsis nej nug hais tias, ‘Yog li cas tus tub thiaj tsis raug txim vim leej txiv tej kev txhaum?’ Lo lus teb mas yog tus tub ua ncaj thiab ua zoo. Nws ceev thiab ua raws li kuv tej kevcai, nws thiaj muaj sia nyob. Tsuas yog tus uas ua txhaum thiaj yuav raug tuag xwb. Tus tub yuav tsis raug txim vim leej txiv tej kev txhaum. Thiab leej txiv yuav tsis raug txim vim tus tub tej kev txhaum. Tus neeg ncaj ncees yuav tau nqi zog vim nws ua ncaj, thiab tus neeg ua tsis ncaj yuav raug txomnyem vim tej kev phem kev qias uas nws ua. “Tus neeg uas tso nws tej kev txhaum tseg thiab ua raws li kuv tej Kevcai, nws xyaum coj ncaj thiab ua zoo, nws yuav tsis tuag; tiamsis nws yuav muaj sia nyob. Kuv yuav zam nws tej kev txhaum huv tibsi, thiab nws yuav muaj sia nyob rau qhov nws coj ncaj. Tus TSWV uas kav ib puas tsav yam nug hais tias, ‘Nej xav hais tias kuv xav pom tus neeg ua txhaum tuag no los?’ Tsis yog li ntawd, kuv tsuas xav pom tus neeg txhaum tso nws tej kev txhaum tseg thiab muaj sia nyob xwb. “Yog muaj ib tus neeg ncaj ncees tso nws txojkev ua zoo tseg thiab mus ua kev phem kev qias ib yam li cov neeg ua phem ua qias ua, tus ntawd puas yuav muaj sia nyob? Tsis yog li ntawd! Kuv yuav tsis suav tej uas nws tau ua zoo yav tas los li. Nws yuav tuag vim nws tej kev txhaum thiab tsis muab siab npuab kuv. “Tiamsis nej hais tias, ‘Tej uas tus TSWV uas kav ib puas tsav yam ua, nws ua tsis ncaj.’ Nej cov Yixalayees, cia li mloog kuv hais. Nej xav hais tias tej uas kuv ua, kuv ua tsis ncaj no los? Nej yog cov uas ua tsis ncaj ntag! Thaum tus neeg ncaj ncees tso nws txojkev ua zoo tseg thiab mus ua kev phem kev qias, nws yuav tuag; nws tuag vim tej kev phem kev qias uas nws ua. Thaum tus neeg tsis ncaj ncees tso nws tej kev txhaum tseg, rov los coj ncaj thiab ua zoo, nws yuav tau txojsia. Nws thim xav thiab tso kev txhaum tseg, yog li ntawd, nws yuav tsis tuag, tiamsis yuav muaj sia nyob. Nej cov Yixalayees hais tias, ‘Tej uas tus TSWV uas kav ib puas tsav yam ua, nws ua tsis ncaj.’ Nej xav hais tias, tej uas kuv ua, kuv ua tsis ncaj no los? Nej yog cov uas ua tsis ncaj ntag! “Kuv uas yog tus TSWV uas kav ib puas tsav yam hais rau nej cov Yixalayees hais tias, kuv yuav txiav txim rau nej txhua tus raws li tes haujlwm uas nej tau ua los lawm. Cia li tso nej tej kev phem kev qias tseg, tsis txhob cia nej tej kev txhaum coj nej mus raug kev puastsuaj. Nej cia li tso plhuav tej kev phem kev qias uas nej niaj hnub ua tseg, muab lub siab tshiab thiab txojkev xav tshiab los coj. Vim li cas nej cov Yixalayees yuav xav tuag ua luaj?” Tus TSWV uas kav ib puas tsav yam hais tias, “Kuv tsis xav kom ib tug twg tuag li. Cia li tso nej tej kev txhaum tseg, nej thiaj muaj sia nyob.” Tus TSWV hais kom kuv hu zaj nkauj quaj ntsuag no rau cov Yixalayees ob tug nom: Neb niam zoo ib yam li tus maum tsov ntxhuav! Nws tu nws cov menyuam loj hlob nrog cov txiv tsov ntxhuav uas tsiv heev. Nws tu tus menyuam ntawd thiab qhia kom txawj mus nrhiav noj; nws thiaj ua ib tug tsiaj uas noj neeg. Ntau haivneeg hnov nws lub moo thiab khawb qhov tos nws kev. Luag muab nqelauj nqe nws cab mus rau nram tebchaws Iziv lawm. Thaum nws pom hais tias qhov uas nws niaj hnub tos tsis muaj qabhau, nws tas kev cia siab. Nws tu dua ib tug menyuam, tus ntawd loj hlob ua ib tug tsov ntxhuav tsiv heev. Thaum nws loj hlob tiav ib tug txiv tsov ntxhuav lawm, nws nrog lwm cov tsov ntxhuav mus nrhiav tom tsiaj. Nws xyaum mus noj tsiaj thiab ua ib tug tsiaj uas noj neeg. Nws tsoo luag tej chaw fajxwm, thiab rhuav luag tej nroog puas tas. Txhua zaus uas nws nyooj ua rau cov neeg hauv lub tebchaws ntawd ntshai heev. Ntau haivneeg sib sau ua ke tuaj tua nws; muaj neeg coob heev tuaj txhua qhov chaw tuaj. Lawv nthuav lawv tej vas khwb thiab ntes tau nws. Lawv muab nws kaw rau hauv ib lub nkuaj, thiab coj nws mus cuag cov Npanpiloos tus vajntxwv. Lawv tso neeg zov rawv nws tsis pub nws nyooj, kom tsis hnov nws lub suab nyooj saum tej roob uas nyob hauv tebchaws Yixalayees lawm. Neb niam zoo ib yam li tsob txiv hmab uas cog ze rau ntawm ntug dej. Nyob qhov ntawd muaj dej nplua mias, tsob txiv hmab muaj nplooj tsaus nti thiab txi txiv ncw heev. Tsob txiv hmab tej ceg khov heev thiab ua tau vajntxwv tej cwj. Tsob txiv hmab siab heev mus nto plaws saum cov huab; txhua tus pom tsob txiv hmab ntawd muaj nplooj ntau thiab siab heev. Tiamsis txawm muaj neeg limhiam muab nws dob povtseg. Cov cua sab hnubtuaj ntsawj ua rau nws cov txiv qhuav. Nws tej ceg ntshua tas; thiab luag muab tej ceg qhuav coj mus hlawv povtseg. Nimno luag muab nws coj mus cog rau tom tiaj suabpuam ntawm thaj av uas tsis muaj dej. Tiamsis hluavtaws cia li cig saum tej ntsis txiv hmab, kub tej ceg thiab tej txiv tas dulug. Cov ceg ntawd tsis khov thiab tsis tau ua vajntxwv tej cwj lawm. Ntawm no yog zaj nkauj quaj ntsuag uas luag hu tas rov hu dua. Lub tsib hlis ntuj hnub xiab kaug, xyoo xya uas peb raug ntes coj mus rau lwm tebchaws. Cov Yixalayees cov thawjcoj qee leej tuaj nug kuv saib tus TSWV nyiam li cas. Tus TSWV hais rau kuv hais tias, “Tub noobneej, koj cia li hais rau cov neeg uas tuaj cuag koj hais tias tus TSWV uas kav ib puas tsav yam hais li no: Puas yog nej xav tuaj nug saib kuv nyiam li cas? Kuv yog Vajtswv tus uas muaj sia nyob, kuv tsis pub nej nug kuv ib los li. Kuv yog tus TSWV uas kav ib puas tsav yam, tej lus no yog kuv hais. “Tub noobneej, koj puas tau npaj yuav txiav txim rau lawv? Koj cia li qhia kom lawv paub txog tej kev phem kev qias uas lawv cov yawgkoob tau ua tas los lawm. Koj cia li qhia tej uas kuv hais no rau cov Yixalayees. Thaum kuv xaiv cov Yixalayees kuv tau coglus tseg rau lawv lawm. Thaum lawv tseem nyob nram tebchaws Iziv, kuv qhia rau lawv li no: Kuv yog tus TSWV uas yog lawv tus Vajtswv. Kuv coglus rau lawv hais tias kuv yuav coj lawv tawm nram tebchaws Iziv los nyob rau hauv lub tebchaws uas kuv tau xaiv tseg rau lawv lawm. Lub tebchaws ntawd av rog thiab zoo ua noj ua haus dua lwm lub tebchaws. Kuv hais kom lawv tso tej mlom phem qias uas lawv nyiam tseg thiab tsis txhob cia cov Iziv tej vajtswv cuav ua rau lawv tsis huv, rau qhov kuv yog tus TSWV uas yog lawv tus Vajtswv. Tiamsis lawv tawmtsam kuv, tsis mloog kuv lus, tsis tso lawv tej kev phem kev qias, lossis tsis tso kev pe cov Iziv tej vajtswv cuav tseg. Thaum lawv tseem nyob nram Iziv, lawv twb yuav raug kuv txojkev chim uas loj kawg nkaus. Tiamsis kuv tsis ua li ntawd, yog kuv ua li ntawd, luag yuav txob thuam kuv lub npe. Kuv tau qhia rau cov Iziv uas cov Yixalayees nrog nyob hais tias kuv yuav coj cov Yixalayees tawm hauv cov Iziv lub tebchaws mus. “Kuv thiaj tau coj cov Yixalayees khiav tawm hauv tebchaws Iziv los rau tiaj suabpuam lawm. Kuv muab kuv tej lus samhwm thiab tej kevcai qhia rau lawv; yog leejtwg ua raws li kuv tej lus samhwm thiab tej kevcai ntawd yuav tau txojsia. Kuv muab hnub Xanpataus ua ib lub cim coglus nruab nrab ntawm lawv thiab kuv kom lawv paub hais tias kuv yog tus TSWV uas ua rau lawv dawbhuv. Tiamsis thaum cov Yixalayees tseem nyob nram tiaj suabpuam, lawv ntxeev siab rau kuv thiab tsis mloog kuv lus. Lawv rhuav kuv tej kevcai thiab tsis coj raws li kuv tej lus samhwm uas pub tau txojsia rau tus uas ua raws li ntawd. Thaum lawv tseem nyob ntawm tiaj suabpuam, lawv saib hnub Xanpataus tsis tseemceeb. Kuv txojkev chim twb yuav ua rau lawv raug kev puastsuaj. Tiamsis kuv tsis ua li ntawd, yog kuv ua li ntawd, cov neeg uas pom ntsoov kuv coj cov Yixalayees tawm hauv tebchaws Iziv los yuav txob thuam kuv lub npe. Yog li ntawd, thaum lawv tseem nyob nram tiaj suabpuam, kuv coglus rau lawv hais tias kuv yuav tsis coj lawv mus rau hauv lub tebchaws uas kuv yuav muab rau lawv, yog lub tebchaws uas av rog thiab zoo ua noj ua haus dua lwm lub tebchaws. Kuv tau coglus li ntawd, rau qhov lawv rhuav kuv tej kevcai thiab tsis coj raws li kuv tej lus samhwm, thiab lawv saib hnub Xanpataus tsis tseemceeb, lawv nyiam pe lawv tej mlom heev dua. “Tiamsis kuv hlub lawv heev. Kuv thiaj tsis tua kom lawv tuag rau nram tiaj suabpuam. Kuv ntuas cov Yixalayees tej hluas li no: Nej tsis txhob xyaum coj raws li nej cov yawgkoob tau ua los lawm; tsis txhob coj raws li lawv tej kevlig kevcai lossis pe lawv tej mlom uas ua rau nej tsis huv. Kuv yog tus TSWV uas yog nej tus Vajtswv. Nej yuav tsum uas raws li kuv tej kevcai thiab tej lus samhwm. Muab hnub Xanpataus ua hnub dawbhuv qhov ntawd yuav ua lub cim rau peb tej lus cog tseg thiab yuav ua rau nej nco ntsoov hais tias kuv yog tus TSWV uas yog nej tus Vajtswv. “Tiamsis cov neeg uas nyob tiam ntawd, ntxeev siab rau kuv. Lawv rhuav kuv tej kevcai thiab tsis ua raws li kuv tej lus samhwm uas pub tau txojsia rau tus uas ua raws li tej ntawd. Thaum lawv tseem nyob nram tiaj suabpuam, lawv saib hnub Xanpataus tsis tseemceeb, kuv txojkev chim twb yuav ua rau lawv raug kev puastsuaj. Tiamsis kuv tsis ua li ntawd, yog kuv ua li ntawd, cov neeg uas pom ntsoov kuv coj cov Yixalayees khiav tawm hauv tebchaws Iziv los yuav txob thuam kuv lub npe. Kuv thiaj coglus dua rau lawv nyob nram tiaj suabpuam hais tias kuv yuav ua kom lawv mus nyob ri sua thoob plaws ntiajteb. Kuv ua li ntawd, rau qhov lawv rhuav kuv tej kevcai thiab tsis coj raws li kuv tej lus samhwm, lawv saib hnub Xanpataus tsis tseemceeb thiab lawv pe tej mlom uas lawv cov yawgkoob tau pe los lawm. “Kuv thiaj muab tej kevcai uas tsis zoo thiab tej lus samhwm uas cawm tsis tau txojsia rau lawv. Kuv cia lawv fij tej khoom uas ua rau lawv tsis huv thiab cia lawv muab lawv cov tub hlob tua fij. Qhov ntawd yog kev rau txim kom lawv paub hais tias kuv yog tus TSWV. “Tub noobneej, koj cia li mus hais tus TSWV uas kav ib puas tsav yam tej lus rau cov Yixalayees li no: Qhov uas lawv cov yawgkoob tsis muab siab npuab kuv ua rau kuv poob ntsejmuag heev. Kuv coj lawv los rau hauv lub tebchaws uas kuv tau coglus tseg hais tias yuav muab rau lawv. Tiamsis thaum lawv pom tej roob siab thiab tej ntoo uas muaj nplooj tsaus nti, lawv tua tsiaj fij rau tej ntawd. Qhov uas lawv tua tsiaj hlawv fij thiab muab cawv txiv hmab fij rau tej ntawd ua rau kuv chim heev rau lawv. Kuv nug lawv hais tias tej chaw siab uas nej mus ntawd yog dabtsi? Lawv thiaj hu tej chaw ntawd hais tias, ‘Chaw Siab’ los txog niaj hnub no. Nimno koj cia li mus hais kuv tej lus rau cov Yixalayees li no: Vim li cas nej ua tej kev txhaum uas nej cov yawgkoob ua thiab pe lawv tej mlom? Txawm yog nimno los nej tseem muab khoom thiab muab nej tej menyuam tua hlawv fij rau mlom, thiab ua rau nej tsis huv ib yam li nej cov yawgkoob. Nej cov Yixalayees tseem nug hais tias kuv nyiam li cas! Kuv yog tus TSWV uas kav ib puas tsav yam thiab yog Vajtswv tus uas muaj sia nyob, kuv yuav tsis pub nej nug ib yam dabtsi li. Nej xav hais tias nej yuav ua kom nej zoo ib yam li lwm haivneeg thiab zoo ib yam li cov neeg uas nyob rau lwm lub tebchaws uas pe tej ntoo thiab tej pobzeb. Tiamsis nej yuav ua tsis tau li ntawd.” “Kuv yog tus TSWV uas kav ib puas tsav yam thiab yog Vajtswv tus uas muaj sia nyob, kuv hais rau nej hais tias thaum kuv chim, kuv yuav siv kuv txhais tes thiab kuv lub hwjchim uas loj kawg nkaus tswj nej. Thaum kuv coj nej tawm hauv cov tebchaws uas kuv ntiab nej mus nyob ua sab ua sua rov los kuv yuav qhia kuv lub hwjchim thiab kuv txojkev chim rau nej. Kuv yuav coj nej mus rau ntawm ‘Lub Tiaj Suabpuam Ntau Haivneeg,’ thiab kuv yuav rau txim rau nej tim ntsej tim muag qhov ntawd. Tus TSWV uas kav ib puas tsav yam hais tias kuv yuav rau txim rau nej ib yam li kuv rau txim rau nej cov yawgkoob nram tiaj Suabpuam Xinais.” “Kuv yuav tswj nej nruj heev thiab ua kom nej hwm kuv tej lus cog tseg. Kuv yuav tshem cov neeg ntxeev siab thiab cov neeg txhaum tawm ntawm nej mus. Kuv yuav coj lawv tawm hauv tej tebchaws uas nimno lawv nyob mus, tiamsis kuv yuav tsis coj lawv rov los rau hauv tebchaws Yixalayees. Nej thiaj yuav paub hais tias kuv yog tus TSWV.” Tus TSWV uas kav ib puas tsav yam hais tias, “Cov Yixalayees, nej cia li mus pe mlom raws li nej siab nyiam! Tiamsis kuv hais rau nej hais tias tom qab ntawd nej yuav tsum hwm kuv lub npe uas dawbhuv thiab tseg tsis txhob fij khoom rau nej tej mlom lawm. Nej cov Yixalayees yuav pehawm kuv saum kuv lub roob dawbhuv uas yog cov Yixalayees lub roob siab hauv tebchaws no. Kuv yuav txaus siab rau nej thiab xav kom nej coj tej khoom theej txhoj, tej khoom fij uas zoo tshaj, thiab tej khoom fij uas dawbhuv tuaj pub rau kuv. Tom qab uas kuv coj nej tawm hauv cov tebchaws uas kuv ntiab nej mus ua sab ua sua rov los nyob ua ke lawm, kuv yuav txais nej tej khoom fij, ces txhua haivneeg yuav paub hais tias kuv yog tus uas dawbhuv. Thaum kuv coj nej rov los nyob rau hauv lub tebchaws Yixalayees uas kuv tau coglus tseg hais tias kuv yuav muab rau nej cov yawgkoob, ces nej yuav paub hais tias kuv yog tus TSWV. Nej yuav nco txog tej kev poob ntsejmuag thiab tej kev phem kev qias uas ua rau nej tsis huv. Nej yuav ntxub nej vim tej kev txhaum uas nej ua tas los lawm. Cov Yixalayees, nej yuav paub hais tias kuv yog tus TSWV, thaum kuv nrog nej hais, kuv tsis hais raws li nej tes haujlwm phem thiab tej kev phem kev qias uas nej ua, rau qhov kuv yog tus TSWV uas dawbhuv.” Tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, koj cia li saib mus rau sab qabteb. Koj cia li cem sab qabteb thiab cev Vajtswv lus cem thaj havzoov uas nyob sab qabteb. Koj hais kom thaj havzoov uas nyob sab qabteb mloog tus TSWV uas kav ib puas tsav yam tej lus uas li no: Nej Saib! Kuv tabtom zes hluavtaws hlawv txhua tsob ntoo, tsis hais tej ntoo qhuav lossis ntoo nyoos hauv nej. Tsis muaj ib yam uas yuav tua tau cov hluavtaws ntawd li. Hluavtaws yuav kub sab qabteb ti nkaus sab qaumteb, ces txhua tus yuav hnov hluavtaws kub ntaiv hwv. Lawv txhua tus yuav paub hais tias kuv yog tus TSWV uas zes hluavtaws hlawv lawv thiab yuav tsis muaj leejtwg tua tau cov hluavtaws ntawd.” Tiamsis kuv thov hais tias, “Tus TSWV uas kav ib puas tsav yam, thov tsis txhob cia kuv ua tej no! Rau qhov txhua tus yuav yws hais tias, nws ibtxwm hais tau xwb, nws ua tsis tau.” Tus TSWV hais rau kuv hais tias, “Tub noobneej, koj cia li cev kuv tej lus cem lub nroog Yeluxalees thiab foom phem rau tej chaw uas neeg pe mlom. Koj hais rau cov Yixalayees lub tebchaws hais tias kuv yog tus TSWV uas kav ib puas tsav yam, kuv hais li no: Kuv yog nej tus yeebncuab! Kuv yuav rho kuv rab ntaj tua nej txhua tus, tsis hais tus ua zoo lossis tus ua phem. Kuv yuav siv kuv nrab ntaj tawmtsam txhua tus pib sab qaumteb mus ti nkaus sab qabteb. Txhua tus yuav paub hais tias kuv yog tus TSWV, kuv rho kuv nrab ntaj lawm mas kuv yuav tsis muab ntsaws rau hauv hnab hlo li. “Tub noobneej, koj cia li quaj li tus neeg uas tas kev cia siab lawm. Koj quaj li ntawd tabmeeg sawvdaws. Thaum lawv nug koj hais tias, ‘Vim li cas koj quaj li ntawd?’ Koj teb lawv hais tias vim lawv yuav hnov xov tsis zoo. Thaum lawv hnov tej xov ntawd lawv yuav ntshai kawg nkaus, lawv tej npab yuav tsaug leeg, lawv lub zog yuav ntaug thiab lawv tej hauvcaug yuav tshee hnyo. Lub sijhawm twb los txog lawm; tej no yeej yuav tshwmsim.” Tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, koj cia li cev tus TSWV uas kav ib puas tsav yam tej lus rau lawv li no: Muaj ib rab ntaj, rab ntaj ntawd luag twb hov tau ntse thiab txhuam ci nplas lawm. Luag hov rab ntaj ntawd tua neeg thiab txhuam ci nplas cuag xob laim. Yuav tsis muaj kev kaj siab rau kuv haivneeg uas tsis mloog kuv tej lus thiab tsis quavntsej kuv tej kev rau txim. Luag txhuam rab ntaj ci nplas npaj cia siv lawm xwb. Luag hov thiab txhuam raj ntaj ci nplas coj mus cob rau tus neeg tua neeg txhais tes. Tub noobneej, koj cia li quaj tu siab; rau qhov rab ntaj ntawd yuav tua kuv haivneeg thiab tua tagnrho cov Yixalayees tej thawjcoj huv tibsi. Lawv yuav raug tua tuag tas nrog kuv haivneeg. Cia li ntaus koj hauvsiab vim tsis muaj kev cia siab lawm! Kuv tabtom sim kuv haivneeg; yog lawv tsis kam hloov siab, tej uas kuv hais ntawd yuav los raug lawv. “Tub noobneej, koj cia li cev Vajtswv lus. Koj cia li npuaj teg, ces rab ntaj yuav txiav mus txiav los; rab ntaj ntawd yog rab ntaj tua neeg uas txaus ntshai heev thiab yog rab ntaj uas txov neeg txojsia. Rab ntaj ntawd yuav ua rau kuv haivneeg zog ntaug thiab ntog. Kuv yuav muab kuv rab ntaj uas cia tua neeg hov ci nplas cuag xob laim hem lawv hauv lub nroog. Rab ntaj uas ntse heev, koj cia li txiav mus rau sab xis thiab sab laug! Koj cia li txiav mus rau txhua phab. Kuv los yuav npuaj teg, thiab kuv txojkev chim yuav ntaug. Kuv yog tus TSWV uas hais li ntawd.” Tus TSWV hais rau kuv hais tias, “Tub noobneej, koj cia li tshuam phiaj rau ntawm ob txojkev uas vajntxwv Npanpiloos yuav coj nws rab ntaj tuaj. Ob txojkev ntawd tuaj hauv ib lub tebchaws tuaj. Koj tshuam daim phiaj rau ntawm ob txojkev tshuam uas mus rau hauv lub nroog. Tshuam ib daim phiaj qhia vajntxwv kev mus rau hauv cov Amoos lub nroog Lanpas thiab ib daim qhia kev mus rau hauv lub nroog Yeluxalees uas muaj chaw fajxwm ruaj khov hauv tebchaws Yudas. Tus vajntxwv uas kav tebchaws Npanpiloos tuaj sawv ntawm ob daim phiaj ntawm kev tshuam; nws tsis paub hais tias yuav mus txojkev twg, ces nws muab tej xub hneevnti co; nws tuavxam nrog nws tej mlom thiab saib tus tsiaj uas tua ua khoom fij lub siab. Vajntxwv sab tes xis tuav rawv ib tus vos sau hais tias lub nroog ‘Yeluxalees’! Tus vos ntawd qhia rau vajntxwv kom cia li qw ntaus rog, tsoo tej roojvag, khawb av puab ntswg, thiab khawb kwj ncig lub nroog. Cov neeg hauv Yeluxalees yuav tsis ntseeg tej no, rau qhov lawv tau coglus tseg lawm. Tiamsis tej lus qhia tshwm ntawd yog qhia lawv tej kev txhaum thiab ceebtoom rau lawv paub hais tias lawv yuav raug ntes. Tom qab ntawd tus TSWV uas kav ib puas tsav yam hais rau lawv li no: Nej tej kev txhaum twb tshwm rau sawvdaws pom lawm. Txhua tus pom hais tias nej tau ua txhaum loj heev. Txhua yam uas nej ua qhia rau sawvdaws paub hais tias nej ua txhaum. Txog sijhawm rau txim rau nej lawm, kuv yuav muab nej cob rau nej cov yeebncuab. “Cov Yixalayees tej thawjcoj uas ua phem thiab tsis dawbhuv, hnub uas rau txim zaum kawg rau nej twb los txog lawm. Kuv yog tus TSWV uas kav ib puas tsav yam, tej lus no yog kuv hais. Cia li hle nej tej kausmom kub thiab hle pluaj ntaub uas khi nej taubhau tseg. Yuav tsis zoo li qub lawm. Yuav tsa cov neeg pluag kom muaj hwjchim! Thiab yuav txo cov thawjtswj kom poob hwjchim! Puastsuaj, puastsuaj! Kuv yuav ua kom lub nroog puastsuaj. Tiamsis tej xwm no yuav tsis tau muaj mus txog thaum tus uas kuv xaiv los rau txim rau lub nroog los txog. Kuv yuav muab lub nroog cob rau tus ntawd. “Tub noobneej, koj cia li cev tus TSWV uas kav ib puas tsav yam tej lus rau cov Amoos uas txob thuam cov Yixalayees li no: ‘Npaj rab ntaj txhij lawm; luag txhuam rab ntaj ntawd ci nplas cuag xob laim cia tua neeg lawm xwb. Tej yogtoog cuav uas nej pom thiab tej lus qhia tshwm uas nej hais yog lus dag xwb. Nej ua kev phem kev qias, hnub uas rau txim zaum kawg rau nej los txog lawm. Rab ntaj yuav los txiav nej cajdab. “ ‘Cia li ntsaws rab ntaj rau hauv hnab! Kuv yuav txiav txim rau nej ntawm thaj chaw uas kuv tsim nej thiab hauv lub tebchaws uas yug nej. Kuv yuav ua kom nej raug kuv txojkev chim uas cig li nplaim taws. Thiab kuv yuav muab nej cob rau cov neeg nruj tsiv uas muaj cuabkav ua kom nej raug kev puastsuaj. Nej yuav raug hluavtaws hlawv kom kub hnyiab tas. Nej cov ntshav yuav nrog rau hauv nej lub tebchaws, thiab yuav tsis muaj leejtwg nco txog nej lawm.’ ” Tus TSWV hais li ntawd. Tus TSWV hais rau kuv hais tias, “Tub noobneej, koj npaj txiav txim rau lub nroog Yeluxalees uas tua neeg lawm los? Koj cia li qhia kom nws paub tej kev phem kev qias uas nws tau ua lawm. Kuv yog tus TSWV uas kav ib puas tsav yam, koj cia li qhia kuv tej lus rau lub nroog hais tias, ‘Vim koj tau tua koj cov neeg ntau tus thiab pe mlom ua rau koj tsis huv, koj lub sijhawm kawg twb los txog lawm. Qhov uas koj tua neeg ua rau koj muaj txim thiab qhov uas kom pe mlom ua rau koj tsis huv. Koj hnub kawg los txog, thiab koj lub sijhawm twb tas lawm! Kuv thiaj cia lwm haivneeg txob thuam thiab saib tsis tau koj. Tej tebchaws nyob deb thiab nyob ze los saib tsis taus koj, rau qhov koj tsis ua raws li kuv tej kevcai. Yixalayees cov thawjcoj tso siab rau lawv lub zog thiab lawv tua neeg. Cov neeg uas nyob hauv koj, tsis muaj ib tug hwm niam hwm txiv li. Koj dag ntxias cov neeg txawv tebchaws, txhav cov pojntsuam thiab tej menyuam ntsuag tug. Koj tsis hwm kuv tej chaw dawbhuv thiab saib hnub Xanpataus tsis tseemceeb. Koj cov neeg muaj qee leej dag kom luag muab lwm tus tua povtseg. Qee leej noj tej khoom uas fij rau mlom, thiab qee leej ua kev nkauj kev nraug. Qee leej nrog nws txiv tus niam tshiab pw. Qee leej yuam tej pojniam thaum uas tseem coj khaubncaws. Qee leej ua kev nkauj kev nraug, thiab qee leej deev nws tus nyab lossis nws tus muam uas tsis koom niam. Koj cov neeg qee leej cia luag ntiav nws mus tua neeg. Qee leej qiv nyiaj thiab tsub pajlaum ntau rau nws cov kwvtij Yixalayees them; nws npluanuj vim txeeb luag tug. Lawv cov ntawd tsis nco txog kuv lawm.” Tus TSWV uas kav ib puas tsav yam hais li ntawd. “ ‘Kuv yuav tsa kuv txhais tes ntaus koj cov neeg uas ua tubsab thiab tua neeg. Tom qab uas kuv rau txim rau koj lawm, koj xav hais tias leejtwg tseem muaj zog thiab tsa taus npab? Kuv yog tus TSWV uas hais tej lus no, kuv yuav ua raws li kuv hais. Kuv yuav ntiab nej khiav mus nyob rau ntau lub tebchaws thiab nyob xyaw lwm haivneeg, thiab yuav ua kom nej tej kev phem kev qias ploj mus. Thiab luag lwm haivneeg yuav tsis hwm nej, nej thiaj yuav paub hais tias kuv yog tus TSWV.’ ” Tus TSWV hais rau kuv hais tias, “Tub noobneej, cov Yixalayees tsis muaj nqis rau kuv lawm. Lawv zoo ib yam li tej quav tooj liab, tooj dawb, hlau, txhuas thiab nyiaj uas luag cais tawm hauv yeejvub los lawm xwb. Yog li ntawd, kuv yog tus TSWV uas kav ib puas tsav yam hais tias lawv muaj nqis li tej ntawd lawm xwb. Kuv yuav coj lawv ua ke los rau hauv lub nroog Yeluxalees ib yam li tus neeg uas muab nyiaj, tooj liab, hlau, txhuas thiab tooj dawb los tso rau hauv lub yeejvub. Kuv txojkev chim yuav kub kom lawv yaj tas ib yam li hluavtaws kub tej ntawd. Kuv yuav sau lawv los nyob rau hauv lub nroog Yeluxalees; kuv txojkev chim yuav ua cubtawg hlawv kom lawv yaj tas. Lawv yuav raug tus TSWV txojkev chim uas loj kawg nkaus; lawv yuav yaj tas rau hauv lub nroog Yeluxalees ib yam li tej nyiaj uas yaj rau hauv lub yeejvub.” Tus TSWV rov hais rau kuv hais tias, “Tub noobneej, koj hais rau cov Yixalayees hais tias lawv lub tebchaws tsis huv lawm. Kuv yuav rau txim rau lawv los ntawm kuv txojkev chim. Cov thawjcoj ntawd zoo ib yam li cov tsov ntxhuav uas nyooj laws rau tej tsiaj uas lawv tom tau. Lawv tua neeg, huab luag tej nyiaj thiab tej khoom uas muaj nqis, thiab lawv tua neeg ua rau muaj pojntsuam coob heev. Cov povthawj rhuav kuv txoj kevcai thiab ua rau kuv tej khoom dawbhuv tsis huv lawm. Lawv tsis cais hais tias yam twg dawbhuv thiab yam twg tsis dawbhuv. Lawv tsis qhia qhov txawv ntawm yam uas huv thiab yam uas tsis huv rau sawvdaws paub, thiab lawv saib hnub Xanpataus tsis tseemceeb. Qhov tseemceeb yog cov Yixalayees tsis hwm kuv. Cov nomtswv zoo ib yam li tej hma uas muab tej tsiaj uas lawv tom tau dua ib thooj rau ib qho. Lawv tua neeg ua kom lawv muaj txiag npluanuj. Cov cev Vajtswv lus muab kev txhaum npog tseg ib yam li neeg muab hmoov sib dawb pleev phabntsa. Lawv pom tej yogtoog cuav thiab piav tej lus qhia tshwm tsis tseeb. Lawv khav hais tias yog lawv hais tus TSWV uas kav ib puas tsav yam tej lus, tiamsis kuv uas yog tus TSWV tsis tau hais rau lawv li. Cov neeg npluanuj huab thiab nyiag luag li. Lawv quab yuam cov neeg pluag thiab txhav cov neeg txawv tebchaws tug. Kuv nrhiav lawv cov ntawd ib tug uas txawj kho phabntsa thiab sawv nres nroos ntawm sab phabntsa uas puas lawm, tiv thaiv lub tebchaws kom kuv txojkev chim tsis txhob rhuav lub tebchaws, tiamsis kuv nrhiav tsis tau ib tug li. Yog li ntawd, kuv thiaj cia kuv txojkev chim los raug lawv kom lawv puastsuaj tas ib yam li hluavtaws hlawv, vim lawv tau ua kev phem kev qias.” Tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, muaj ob vivncaus uas koom ib leej niam; thaum nkawd nyuam qhuav tiav nkauj nyob hauv tebchaws Iziv, nkawd mus ua niamntiav, ua rau nkawd lub cev nkaujxwb puas lawm. Tus niamlaus npe hu ua Auhaulas, (nws piv txog lub nroog Xamalis) nws tus niamhluas hu ua Auhaulinpas (nws piv txog lub nroog Yeluxalees). Kuv yuav nkawd ua kuv pojniam huv tibsi, thiab nkawd puavleej yug tubki rau kuv. Auhaulas yog kuv tus pojniam, tiamsis nws pheej mus ua niamntiav nrog nws cov hluas nraug uas tuaj pem tebchaws Axilias tuaj. Cov hluas nraug ntawd yog cov tubrog uas hnav tej tsoos tsho ntaubmag xiav, lawv yog nomtswv thiab thawj tubrog qib siab; lawv puavleej caij nees, lawv hluas thiab zoo nraug heev. Auhaulas pheej ua niamntiav rau cov tubrog Axilias thiab qaug rau kev nkauj kev nraug, nws thiaj mus pe cov Axilias tej mlom ua rau nws tsis huv lawm. Nws pheej ua niamntiav ib yam li thaum nws tseem nyob nram tebchaws Iziv uas nws ua rau nws lub cev nkaujxwb puas. Thaum nws tseem yog nkaujxwb twb muaj txivneej tuaj nrog nws pw ib yam li tus niamntiav lawm. Kuv thiaj muab nws cob rau nws cov hluas nraug Axilias uas nws nyiam heev. Lawv muab nws hle liabqab, txeeb nws tej tub tej ntxhais coj mus, thiab rho ntaj tua nws. Tej pojniam nyob rau txhua qhov sib ntxhi zom zaws hais txog nws txoj hmoov phem. “Auhaulinpas uas yog nws tus niamhluas pom ntsoov tej no los nws tseem ua niamntiav heev dua Auhaulas uas yog nws tus niamlaus lawm thiab. Nws xav ua niamntiav rau cov Axilias tej nomtswv thiab tej thawj tubrog uas hnav tej tsoos tsho ci nplas; lawv cov ntawd puavleej caij nees, lawv hluas thiab zoo nraug heev. Kuv pom hais tias Auhaulinpas ua txhaum kev nkauj kev nraug heev, thiab nws tus niamlaus los ua ib yam li nws. Thaum nws pom dheev cov duab ntawd, nws lub siab qauglais rau kev nkauj kev nraug thiab tso xov mus rau cov tubrog Npanpiloos. Cov tubrog Npanpiloos tuaj nrog nws pw. Lawv ua rau nws lub cev tsis huv, thaum kawg nws thiaj mus nrog lawv ua phem ua qias. Auhaulinpas liabqab qhia rau txhua tus paub hais tias nws yog niamntiav. Kuv dhuav nws ib yam li kuv dhuav nws tus niamlaus thiab. Nws mus ua niamntiav heev dua yav tas los; nws coj tus yam ntxwv ib yam li thaum nws tseem yog ntxhais hluas uas nws ua niamntiav nyob nram tebchaws Iziv. Nws xav ua niamntiav rau cov txivneej uas muaj zog ib yam li tej txiv neesluav lossis txiv nees xob.” ( Auhaulinpas, koj xav rov mus ua niamntiav li qub uas thaum koj tseem yog ntxhais hluas nyob nram tebchaws Iziv uas yog cia tej txivneej tuaj kov koj ob lub mis thiab ua rau koj lub cev nkaujxwb puas.) “Kuv yog tus TSWV uas kav ib puas tsav yam hais rau Auhaulinpas li no: Koj zog ntaug tas rau koj cov hluas nraug lawm, tiamsis kuv yuav ua kom lawv chim heev rau koj, thiab kuv yuav coj lawv tuaj vij koj. Kuv yuav coj cov Npanpiloos, cov Khalede-as, cov Pekaus, cov Sau-as, cov Kau-as thiab cov Axilias tuaj. Kuv sau cov nomtswv thiab cov thawj tubrog hluas uas zoo nraug heev tuaj; tagnrho cov nomtswv no puavleej caij nees thiab muaj meejmom siab. Lawv yuav coj tubrog coob, coj tsheb ua rog thiab tsheb thauj khoom tuaj sab qaumteb tuaj tua koj. Lawv muaj tej thaiv hniav ntaj thiab kausmom hlau, lawv yuav tuaj vij koj. Kuv yuav muab koj cob rau lawv, thiab lawv yuav txiav txim rau koj raws li lawv txoj kevcai. Kuv chim heev rau koj, kuv thiaj cia lawv tuaj ua rau koj raws li lawv txojkev chim. Lawv yuav txiav koj lub taubntswg, ob lub pobntseg thiab tua koj cov menyuam povtseg. Lawv yuav coj koj tej tub tej ntxhais mus hlawv ciaj. Lawv yuav chua koj tej khaubncaws thiab txeeb koj tej saw nyiaj saw kub. Kuv yuav ua kom koj tso plhuav koj txojkev ua nkauj ua nraug thiab kev ua niamntiav li koj pheej ua nyob nram tebchaws Iziv tseg. Koj yuav tsis tsa qhovmuag saib tej mlom lossis xav txog lub tebchaws Iziv ntxiv lawm.” Tus TSWV uas kav ib puas tsav yam hais li no: “Kuv yuav muab koj cob rau cov neeg uas koj ntxub thiab cov neeg uas koj dhuav. Lawv ntxub koj heev, lawv yuav txeeb txhua yam uas koj khwv tau mus, cia koj nyob liabqab rau luag pom li tus niamntiav. Koj txojkev ua nkauj ua nraug thiab ua niamntiav coj tej no los raug koj. Koj ua niamntiav rau ntau haivneeg thiab pe mlom ua rau koj tsis huv lawm. Koj ua raws li koj tus niamlaus; yog li ntawd, kuv yuav muab lub khob uas nws haus lawm rau koj haus thiab.” Tus TSWV uas kav ib puas tsav yam hais tias, “Koj yuav haus koj tus niamlaus lub khob; lub khob ntawd loj thiab tob heev, txhua tus yuav thuam thiab luag koj plig; lub khob ntawd puv kawg li. Lub khob ntawd yuav ua rau koj qaug thiab txomnyem heev, yog lub khob kev ntshai thiab kev puastsuaj, yog koj tus niamlaus Xamalis lub khob ntag. Koj yuav haus khee kawv hauv qab khob, lub khob tawg thiab tej txhais yuav hlais koj ob lub mis. Kuv yog tus TSWV uas kav ib puas tsav yam, kuv hais li ntawd.” Tus TSWV uas kav ib puas tsav yam hais li no: “Rau qhov yog koj tsis nco qab kuv thiab tig nraubqaum rau kuv, koj thiaj raug kev txomnyem vim koj ua kev nkauj kev nraug thiab ua niamntiav.” Tus TSWV hais rau kuv hais tias, “Tub noobneej, koj npaj txiav txim rau Auhaulas thiab Auhaulinpas lawm los? Koj cia li nthuav tej kev phem kev qias uas nkawd tau ua lawm. Nkawd ua kev nkauj kev nraug thiab tua neeg, ua nkauj ua nraug nrog tej mlom thiab tua tej menyuam uas nkawd yug rau kuv fij rau tej mlom. Tsis tas li ntawd xwb nkawd tseem ua rau kuv lub Tuamtsev tsis huv thiab saib kuv hnub Xanpataus tsis tseemceeb. Txhua hnub uas nkawd tua kuv tej menyuam fij rau tej mlom, nkawd ua tsis huv rau kuv lub Tuamtsev! “Nkawd txib neeg tsis tseg mus caw tej txivneej uas nyob deb heev thiab lawv txawm tuaj. Nkawd ob vivncaus mus da dej, zas tawv muag thiab muab saw nyiaj saw kub los coj. Nkawd zaum ntawm lub tog uas zoo heev; muaj ib lub rooj uas rau tej tshuaj tsw qab thiab roj txiv ntoo uas kuv muab rau nkawd nyob ntawm nkawd hauv ntej. Muaj ib pab neeg sib tham ntshoo nrooj puagncig nkawd. Lawv yog ib pab txivneej uas tuaj tom tiaj suabpuam tuaj. Lawv nqa kauj toog tuaj looj rau ob vivncaus ntawd cajnpab thiab muab kausmom yeebkoob uas zoo nkauj heev rau nkawd ntoo. Kuv xav hais tias luag siv ob vivncaus ntawd ua niamntiav thiaj ua rau nkawd lub cev puas tas rau kev ua nkauj ua nraug. Cov txivneej ntawd niaj hnub rov tuaj cuag ob tug niamntiav ntawd. Lawv pheej tuaj cuag Auhaulas thiab Auhaulinpas uas nyiam ua nkauj ua nraug heev ntawd. Cov neeg ncaj ncees yuav rau txim rau nkawd, rau qhov nkawd ua kev nkauj kev nraug thiab tua neeg. Nkawd ua nkauj ua nraug thiab tes lo ntshav.” Tus TSWV uas kav ib puas tsav yam hais tias, “Cia li coj ib pab neeg tuaj huab thiab txeeb nkawd tej khoom. Cia pab neeg ntawd muab pobzeb ntaus ntawd, muab ntaj tua nkawd, tua nkawd cov menyuam thiab hlawv nkawd tej vajtse huv tibsi. Kuv yuav txwv tsis pub neeg ua kev nkauj kev nraug thoob tebchaws thiab ntuas txhua tus pojniam kom tsis txhob ua kev nkauj kev nraug li nkawd ua. Kuv yuav rau txim rau neb ob vivncaus, vim neb tau ua kev nkauj kev nraug thiab pe tej mlom. Neb thiaj yuav paub hais tias kuv yog tus TSWV uas kav ib puas tsav yam.” Lub kaum hli ntuj hnub xiab kaug, xyoo cuaj uas peb raug ntes mus, tus TSWV hais rau kuv li no: “Tub noobneej, koj cia li teev hnub no cia, rau qhov hnub no yog hnub uas vajntxwv Npanpiloos tuaj vij lub nroog Yeluxalees. Koj cia li qhia tus TSWV uas kav ib puas tsav yam tej lus pivtxwv rau lawv hais tias: Cia li muab lub laujkaub txawb rau hauv qhovcub thiab hliv dej rau. Muab cov nqaij uas zoo tshaj plaws uas yog thooj pwgpu thiab thooj ncejpuab tso rau hauv, xaiv tej pobtxha uas zoo tso rau hauv thiab. Xaiv cov nqaij yaj uas zoo heev tso rau hauv; muab taws los rauv rau hauv qab lub laujkaub ntawd. Cia kom cov dej npau; tsaws cov pobtxha thiab cov nqaij.” Tus TSWV uas kav ib puas tsav yam hais tias, “Lub nroog uas tua neeg raug puastsuaj lawm! Nws zoo ib yam li lub laujkaub xeb xeb uas ibtxwm tsis ntxuav li. Luag muab cov nqaij hauv lub laujkaub npo ib daim zuj zus tsis tshuav ib daim seem li. Lub nroog tua neeg tsis muab tej ntshav hliv rau hauv av kom hmoov av npog tej ntshav, tiamsis nws muab hliv rau saum lub pobzeb. Kuv tseg cov ntshav ntawd nyob rau saum lub pobzeb, tsis muab dabtsi npog li kom kuv txojkev chim thiaj tau ua pauj rau nws.” Tus TSWV uas kav ib puas tsav yam hais li no: “Lub nroog uas tua neeg puastsuaj lawm! Kuv yuav sau taws ntau heev los teeb tseg. Cia li nqa taws los ntxiv, ntxuaj kom cubtawg cig! Tsaws cov nqaij kom muag, muab do xyaw txujlom! Muab cov pobtxha hlawv kom kub hnyiab tas. Cia li muab lub laujkaub tooj tso rau saum cov ncaig taws kom kub heev. Thaum cov xeb nti tas lawm lub laujkaub thiaj rov huv; txawm ua li ntawd los cov xeb uas khub lub laujkaub yuav nti tsis tas. Yeluxalees, koj txojkev ua nkauj ua nraug ua rau koj lub cev tsis huv lawm. Txawm yog kuv ntxuav los koj yeej tsis huv. Koj yuav tsis huv mus txog thaum koj raug kuv txojkev chim uas loj kawg nkaus. Kuv uas yog tus TSWV, kuv hais li no: Lub sijhawm txiav txim twb los txog lawm. Kuv yuav tsis tseg thiab tsis hlub koj li. Koj yuav raug txim raws li tej kev txhaum uas koj tau ua lawm.” Tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, kuv tshuab ib pas xwb ua rau tus uas koj hlub heev ya mus rau lwm qhov lawm. Tsis pub koj yws, quaj lossis poob ib lub kua muag li. Tsis pub koj lub suab ncia rau leejtwg hnov. Cia li ntoo phuam thiab rau khau, luag thiaj tsis paub hais tias koj quaj ntsuag. Tsis txhob npog koj lub ntsejmuag lossis noj tej zaub mov uas cov neeg quaj ntsuag noj.” Thaum sawv ntxov kuv tseem nrog cov neeg sawvdaws tham. Thaum tsaus ntuj kuv tus pojniam tuag lawm, ces hnub tom qab kuv txawm ua raws nraim li tus TSWV hais rau kuv. Tej neeg nug kuv hais tias, “Vim li cas koj thiaj ua li no?” Kuv teb lawv hais tias, “Tus TSWV hais rau kuv kom hais rau nej cov Yixalayees li no: Nej khav hais tias lub Tuamtsev ua rau nej muaj hwjchim. Nej nyiam tuaj saib, tiamsis tus TSWV yuav ua kom nws lub Tuamtsev tsis huv. Ces cov hluas hauv nej tej tsevneeg uas tseem nyob hauv lub nroog Yeluxalees yuav raug tua tuag tas rau hauv tshavrog. Thaum ntawd nej yuav ua li kuv ua. Nej yuav tsis muab ntaub npog nej lub ntsejmuag thiab yuav tsis noj tej zaub mov uas cov neeg quaj ntsuag noj. Nej yuav ntoo phuam thiab rau khau; nej tsis txhob quaj lossis nyiav. Nej yuav puastsuaj tas vim nej tej kev txhaum, thiab nej ib leeg yuav nroo rau ib leeg. Kuv yog Exekees, kuv ua lub cim rau nej ntag; nej yuav ua txhua yam raws li kuv ua. Tus TSWV hais tias thaum tej no tshwmsim lawm, nej thiaj yuav paub hais tias, kuv yog tus TSWV uas kav ib puas tsav yam.” Tus TSWV hais tias, “Tub noobneej, kuv yuav tshem lub Tuamtsev uas lawv khav hais tias ua rau lawv muaj hwjchim thiab nyiam tuaj saib ntawd thiab lawv tej tub tej ntxhais mus huv tibsi. Hnub ntawd yuav muaj qee leej dim kev puastsuaj los qhia tej ntawd rau koj. Hnub ntawd koj yuav rov hais tau lus rau tus uas dim los ntawd, koj yuav tsis nyob ntsiag to lawm. Koj yuav ua lub cim rau tej neeg sawvdaws, lawv thiaj yuav paub hais tias kuv yog tus TSWV.” Tus TSWV hais rau kuv hais tias, “Tub noobneej, koj cia li cev kuv tej lus cem cov Amoos. Koj hais kom lawv cia li mloog tus TSWV uas kav ib puas tsav yam tej lus: Nej zoo siab qhov uas luag ua tsis huv rau kuv lub Tuamtsev, cov Yixalayees lub tebchaws ua suabpuam, thiab cov Yudas raug luag ntes mus. Vim nej zoo siab li ntawd, kuv yuav cia cov neeg uas nyob sab hnubtuaj tuaj tua yeej nej. Lawv yuav tuaj tsuam yeej tubrog thiab nyob hauv nej lub tebchaws. Lawv yuav tau noj nej tej txiv hmab thiab haus nej tej kua mis nyuj. Kuv yuav muab lub nroog Lanpas hloov ua chaw kaw ntxhuav thiab muab lub tebchaws Amoos ua chaw kaw yaj, nej thiaj yuav paub hais tias kuv yog tus TSWV. “Tus TSWV uas kav ib puas tsav yam hais li no: Nej npuaj teg thiab dhia pajpaws zoo siab heev. Nej saib tsis taus cov Yixalayees lub tebchaws. Vim nej ua li ntawd, kuv yuav muab nej cob rau lwm haivneeg cia luag tuaj huab thiab txeeb nej tug. Kuv yuav rhuav kom nej tu noob thiab ua tsis tau ib haivneeg lossis ib lub tebchaws. Nej thiaj yuav paub hais tias kuv yog tus TSWV.” Tus TSWV uas kav ib puas tsav yam hais tias, “Vim cov Mau-am hais tias cov Yudas tsuas zoo li lwm haivneeg xwb; yog li ntawd, kuv yuav cia luag tuaj tua cov nroog uas tiv thaiv cov Mau-am tus ciamteb, cov nroog ntawd yog Npethes Yesimaus, Npa-as Me-oos thiab Kili-athayees. Kuv yuav cia cov neeg uas nyob sab hnubtuaj tuaj tua yeej cov Mau-am thiab cov Amoos kom cov Mau-am ua tsis tau ib haivneeg ntxiv lawm. Kuv yuav rau txim rau cov Mau-am, lawv thiaj yuav paub hais tias kuv yog tus TSWV.” Tus TSWV uas kav ib puas tsav yam hais tias, “Vim cov Edoos ua nruj ua tsiv pauj rau cov Yudas, ces thaum kawg lub txim thiaj los raug rau cov Edoos. Kuv hais rau sawvdaws paub hais tias kuv yuav rau txim rau cov Edoos, txhua tus neeg thiab tej tsiaj kom tuag tas huv tibsi. Kuv yuav ua kom lawv lub tebchaws ua suabpuam, txij ntua ntawm lub nroog Temas mus txog ntua rau lub nroog Dedas, thiab tej neeg yuav raug tua tuag tas rau hauv tshavrog. Kuv yuav cia kuv haivneeg Yixalayees ua pauj cov Edoos rau kuv, thiab lawv yuav ua rau cov Edoos raws li kuv txojkev chim. Cov Edoos thiaj yuav paub hais tias kuv txojkev rau txim hnyav npaum li cas.” Tus TSWV uas kav ib puas tsav yam hais li ntawd. Tus TSWV uas kav ib puas tsav yam hais tias, “Tub noobneej, cov Filitees ua nruj ua tsiv pauj rau cov neeg uas ibtxwm yog lawv cov yeebncuab, lawv thiaj muab cov neeg uas lawv ntxub rhuav puastsuaj tas. Yog li ntawd, kuv thiaj hais tias kuv yuav ua kom cov Filitees tu noob nrho. Kuv yuav ua rau cov uas seem nyob hauv lub tiaj nrag Filitees kom puastsuaj huv tibsi. Kuv yuav rau txim hnyav pauj rau lawv kom txaus nkaus. Lawv yuav raug kuv txojkev chim. Lawv thiaj yuav paub hais tias kuv yog tus TSWV.” Lub hli ntawd hnub xiab ib, xyoo kaum ib uas peb raug ntes mus, tus TSWV hais rau kuv hais tias: “Tub noobneej, cov neeg hauv lub nroog Tiles qw zoo siab hais tias, ‘Yeluxalees puastsuaj lawm! Nws tej kev lag kev luam tu lawm! Nws yuav tsis nrog peb sib tw lawm!’ “Kuv yog Tus TSWV uas kav ib puas tsav yam, kuv hais li no: Lub nroog Tiles, kuv yog koj tus yeebncuab ntag, kuv yuav coj ntau haivneeg tuaj tua koj, lawv yuav tuaj ib yam li tej nthwv dej hiavtxwv nphau. Lawv yuav tuaj rhuav tus ntsa yeej uas thaiv nej lub nroog thiab tsoo nej tej chaw tsomfaj kom pob tas. Kuv yuav cheb tej hmoov av kom dulug, tsuas tseg lub pobzeb cia xwb. Cov neeg ntaus ntses yuav tuaj ziab lawv tej vas rau saum lub pobzeb uas nyob hauv hiavtxwv. Kuv yog tus TSWV uas kav ib puas tsav yam hais li ntawd. Ntau haivneeg yuav tuaj huab lub nroog Tiles, thiab lawv yuav muab ntaj tua cov neeg hauv tej nroog uas nyob hauv nws lub tebchaws. Ces cov Tiles thiaj yuav paub hais tias kuv yog tus TSWV.” Tus TSWV uas kav ib puas tsav yam hais tias, “Kuv yuav coj tus vajntxwv uas muaj hwjchim loj dua lwm tus vajntxwv tuaj tua lub nroog Tiles. Tus ntawd yog Vajntxwv Nenpukajnexales uas kav tebchaws Npanpiloos. Nws yuav coj ib pab tubrog coob uas muaj nees, tsheb nees, thiab tubrog caij nees tuaj sab qaumteb tuaj. Cov neeg hauv tej nroog uas nyob hauv lub tebchaws ntawd yuav raug tua tuag tas. Cov yeebncuab yuav khawb av meem kom nce tau tus ntsa yeej thiab lawv muab tej vuas ua daim thaiv hniav ntaj tuaj tua nej. Lawv yuav siv cuabyeej tuaj tsoo nej tej ntsa yeej thiab siv tej nqaj hlaus tsoo nej tej chaw tsomfaj. Lawv cov nees yuav khiav ua pa av ncho auv niab tuaj voob nkaus nej. Cov nees luag tsheb los hla tej roojvag hauv lub nroog uas puas tas lawm; tej suab nrov ntseeg nkaws ua rau nej tej ntsa yeej ua zog koog. Lawv cov tubrog caij nees yuav khiav tsaus nti hauv nej tej kev thiab muab ntaj tua nej cov neeg tuag pawglug. Nej tej ncej uas loj thiab khov yuav raug tsoo vau tas rau hauv av. Nej cov yeebncuab yuav huab nej tej nyiaj txiag thiab txeeb nej tej khoom lag luam. Lawv yuav tsoo nej tej ntsa yeej thiab rhuav nej tej vajtse uas zoo kom puas tas. Lawv yuav coj tej pobzeb, tej ntoo thiab tej roj hmab mus pov rau hauv hiavtxwv. Kuv yuav ua kom nej tej suab hu nkauj thiab suab nkauj nogncas ntsiag. Kuv tsuas tseg lub pobzeb cia rau cov neeg ntaus ntses tau ziab lawv tej vas xwb. Nej yuav tsis tsim lub nroog ntawd ntxiv lawm. Kuv yog tus TSWV uas kav ib puas tsav yam hais li ntawd.” Tus TSWV uas kav ib puas tsav yam hais rau lub nroog Tiles hais tias, “Thaum luag tuaj tua yeej nej lawm, cov neeg uas nyob raws ntug hiavtxwv yuav hnov cov neeg uas raug luag tua tej suab quaj, ua rau lawv ntshai heev. Tagnrho cov vajntxwv uas nyob raws ntug hiavtxwv yuav nqis saum lawv tej zwmtxwv los. Lawv yuav hle lawv lub tsho loj thiab tej ris tsho tseg thiab zaum hauv av ua ibce tshee hnyo. Lawv ntshai tej xwm phem uas los raug nej, ua rau lawv tswj tsis tau qhov uas lawv tshee li. Lawv yuav hu zaj nkauj quaj ntsuag no rau nej hais tias: Lub nroog uas nto npe tshaj plaws puastsuaj lawm! Nws tej nkoj raug muab tshem tawm hauv hiavtxwv mus lawm. Koj thiab koj cov neeg uas kav tej hiavtxwv ua rau cov neeg uas nyob raws ntug hiavtxwv ntshai kawg li. Hnub uas koj swb ua rau cov neeg uas nyob raws ntug hiavtxwv tshee hnyo thiab lawv txhua tus yoob tas, vim tej kev puastsuaj uas los raug koj.” Tus TSWV uas kav ib puas tsav yam hais tias, “Kuv yuav ua kom koj nyob do cuas li tej nroog uas puas tas tsis muaj neeg nyob lawm. Kuv yuav cia dej hiavtxwv los nyab koj. Kuv yuav xa koj mus rau hauv tubtuag teb thiab nrog cov neeg tiam thaum ub nyob. Kuv yuav cia koj mus nrog cov tuag hauv tubtuag teb nyob xyaw tej uas pob puas tas mus ibtxhis. Vim li ntawd yuav tsis muaj neeg los nyob hauv koj, thiab koj yuav tsis tau ua ib lub nroog rau cov neeg ciaj nyob lawm. Kuv yuav muab koj ua ib qho pivtxwv uas txaus ntshai heev, hnub ntawd yog koj hnub kawg. Neeg yuav nrhiav koj tiamsis nrhiav tsis tau.” Tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, koj cia li hu ib zaj nkauj quaj ntsuag rau lub nroog Tiles, yog lub nroog uas nyob ntawm ntug hiavtxwv thiab ua lag ua luam nrog cov neeg uas nyob raws ntug hiavtxwv txhua qhov. Koj cia li qhia tus TSWV uas kav ib puas tsav yam tej lus rau nws hais tias, “Lub nroog Tiles, koj khav hais tias koj zoo nkauj kawg li. Hiavtxwv yog koj lub tsev. Cov neeg uas tsim koj, tsim tau koj zoo li lub nkoj uas zoo nkauj heev; Lawv muab ntoo thwjsuab pem roob Helemoos los ua ntsa xov koj thiab coj ntoo ciab pem roob Lenpanoos los ua koj cov ncej. Lawv coj cov ntoo qhib nram tebchaws Npasas los txua ua duav; Lawv coj ntoo ciab nram tebchaws Xaipas los ua lub samthiaj thiab muab kaus ntxhw los pua. Lawv muab cov ntaubmag zoo heev uas coj nram tebchaws Iziv los xaws ua koj daim ntaus cua, luag tuaj deb saib los paub. Koj cov momkaum yog muab cov ntaub xiav uas coj nram ntug hiavtxwv Elisas los xaws vov. Koj cov neeg tsav nkoj tuaj hauv lub nroog Xidoos thiab Alevas tuaj. Koj cov neeg tsav nkoj yog cov uas txawj tsav heev. Koj cov kws txua ntoo hauv nkoj yog cov uas kawm txawj hauv lub nroog Nkinpas los lawm. Cov neeg tsav nkoj mus rau txhua qhov uas koj ua lam ua luam. “Cov neeg Pawxias, Lidias thiab Linpias tuaj ua koj cov tubrog. Lawv muab lawv tej thaiv hniav ntaj thiab kausmom hlau khuam rau hauv koj kom koj tau koob meej. Cov tubrog Alevas tuaj zov koj tej ntsa loog, thiab cov neeg Nkamas tuaj zov koj tej chaw tsomfaj. Lawv coj lawv tej thaiv hniav ntaj tuaj khuam rau ntawm koj tej phabntsa, thiab lawv yog cov neeg uas tuaj tseev zam kom koj zoo nkauj. “Cov neeg uas nyob tim tebchaws Xapees uas tuaj nrog koj ua luam, lawv coj nyiaj, coj hlau, txhuas thiab coj tooj tuaj pauv koj tej khoom lag luam. Koj ua lag ua luam nrog cov neeg Kilis, Tunpas thiab Mesej. Lawv coj tubqhe thiab tej twj taig tooj tuaj pauv koj tej khoom lag luam. Cov neeg uas nyob hauv Npethes Taunkamas coj nees thauj nra, nees caij ntaus rog, thiab nees zag tuaj pauv koj tej khoom lag luam. Cov neeg uas nyob hauv Laudi-as los kuj tuaj nrog koj ua lag ua luam; thiab cov neeg uas nyob hauv tej tebchaws raws ntug hiavtxwv los kuj coj kaus ntxhw thiab ntoo kubtwm tuaj pauv koj tej khoom lag luam ib yam nkaus. Cov neeg Xilias tuaj yuav koj tej khoom thiab tej uas koj ua tau hauv koj lub tebchaws. Lawv coj tej qe zeb muaj nqis, ntaub xiav, ntaub tsuj, ntaubmag, qe zeb kaulas, thiab qe zeb iav tuaj pauv koj tej khoom lag luam. Cov Yudas thiab cov Yixalayees coj hmoov nplej, zib ntab, roj txiv ntoo thiab roj tsw qab tuaj pauv koj tej khoom lag luag. Cov neeg Dedas coj ntaub pua eeb nees tuaj pauv koj tej khoom lag luam. Cov neeg Alanpias thiab cov nomtswv hauv tebchaws Kedas coj yaj, coj menyuam yaj thiab coj tshis tuaj pauv koj tej khoom lag luam. Cov neeg hauv Senpas thiab La-amas coj tej qe zeb muaj nqis, coj kub thiab txhua yam roj tsw qab tuaj pauv koj tej khoom lag luam. Cov neeg hauv lub nroog Halas, Kanes thiab Edees tej tub lag tub luam hauv Senpas, Asules thiab Khilimas puavleej tuaj nrog koj pauv kev lag kev luam. Lawv coj tej tsoos tsho ntaub xiav, coj ntaub tsuj thiab ntaub pua tsev uas txaij zoo nkauj, coj hlua, thiab ligxov tuaj muag rau koj. Cov neeg Xapees tej nkoj thauj khoom lag luam tuaj rau koj. “Koj zoo ib yam li lub nkoj nyob hauv hiavtxwv uas ntim khoom puv nkaus. Thaum koj cov neeg nquam koj mus txog ntawm ntug hiavtxwv, cov cua sab hnubtuaj txawm ntsawj koj mus rau tom plawv hiavtxwv lawm. Thaum koj tog rau hauv hiavtxwv lawm, koj tej nyiaj txiag, tej khoom lag luam, cov neeg caij nkoj thiab tsav nkoj, cov kws txua ntoo, cov tub lag tub luam, cov tubrog uas nyob hauv nkoj thiab txhua yam ploj tas rau hauv hiavtxwv. Cov neeg hauv nkoj tej suab qw ntxhe mus txog rau tim ntug dej. “Cov neeg tsav nkoj, tsav lawv tej nkoj mus rau tim ntug hiavtxwv, thiab txhua tus uas nyob hauv nkoj tawm tas mus rau sab nraud. Lawv txhua tus quaj thiab tu siab heev txog koj, lawv tsuab hmoov av rau saum taubhau thiab quaj da hauv qhov tshauv. Lawv chais lawv tej plaubhau, thiab muab ntaubtsaj los npua. Lawv quaj iab siab kawg li. Lawv hu zaj nkauj quaj ntsuag rau koj hais tias, ‘Leejtwg thiaj piv tau lub nroog Tiles uas nimno twb tog rau hauv hiavtxwv lawm? Thaum koj thauj tej khoom hauv hiavtxwv mus, koj ua rau ntau haivneeg txaus siab heev. Thiab ua rau tej vajntxwv hauv qab ntuj no muaj txiag npluanuj los ntawm koj tej khoom lag luam. Nimno koj pob puas tas rau hauv hiavtxwv; koj tog rau hauv qab thu. Koj tej khoom thiab koj cov neeg ua lag ua luam ploj tas nrog koj rau hauv hiavtxwv lawm.’ “Txhua tus uas nyob raws ntug hiavtxwv yoob tas, vim tej xwm phem uas los raug koj. Txawm yog lawv cov vajntxwv los yeej ntshai ua ntsejmuag thimxem tas li. Koj ploj ntais lawm, ploj mus ibtxhis li. Tej tub lag tub luam nyob thoob ntiajteb ntshai tshee hnyo; lawv ntshai nyob tsam lawv raug tej xwm phem uas koj raug.” Tus TSWV hais rau kuv hais tias: “Tub noobneej, koj cia li hais tus TSWV uas kav ib puas tsav yam tej lus rau tus vajntxwv uas kav lub nroog Tiles li no: Koj khav hais tias koj yog vajtswv, koj zaum saum vajtswv lub zwmtxwv uas muaj hiavtxwv nyob puagncig. Koj ua ib yam li koj yog vajtswv, tiamsis koj yog neeg xwb, koj tsis yog vajtswv. Koj xav hais tias koj ntse tshaj Daniyees, tsis muaj ib yam dabtsi uas koj yuav tsis paub li? Koj lub tswvyim thiab kev txawj ntse ua rau koj npluanuj muaj nyiaj muaj kub puv txhab. Koj ua lag ua luam ntse heev thiab tau pajlaum ntau kawg. Koj khavtheeb rau koj tej kev npluanuj! “Yog li ntawd, kuv yog tus TSWV uas kav ib puas tsav yam, kuv hais rau koj li no: Rau qhov koj xav hais tias koj ntse ib yam li vajtswv, kuv yuav tso cov yeebncuab uas yog neeg txawv tebchaws tuaj tawmtsam koj. Lawv yuav tuaj rhuav txhua yam khoom zoo uas koj ua tau los ntawm koj lub tswvyim thiab kev txawj ntse. Lawv yuav muab koj pov rau hauv tubtuag teb; koj yuav tuag rau hauv plawv hiavtxwv li tej neeg uas raug luag tua. Thaum lawv yuav tua koj, koj tseem hais tias koj yog vajtswv thiab los? Thaum koj nyob tim ntsej tim muag cov neeg uas tua koj, koj yuav yog neeg xwb, koj tsis yog vajtswv. Koj yuav tuag li cov neeg uas tsis ua kevcai txiav, tuag rau cov neeg txawv tebchaws tes. Kuv yog tus TSWV uas kav ib puas tsav yam hais li ntawd.” Tus TSWV hais rau kuv hais tias, “Tub noobneej, koj cia li quaj ntsuag rau tus vajntxwv kav lub nroog Tiles uas yuav raug tej xwm phem. Koj cia li hais tus TSWV uas kav ib puas tsav yam tej lus rau nws li no: Yav tas los koj muaj yam ntxwv zoo, koj ntse thiab zoo nraug kawg li! Koj nyob hauv Vajtswv lub Vaj Edees thiab koj hnav tej tsoos tsho qe zeb muaj nqis uas yog kanelias, khixaulais, aunixis, npelis, taupas, yapes, xafiles, nkanes thiab emelas. Koj hnav kub ci ntsa iab thiab tej ntawd yog npaj tseg rau koj hnub uas tsim koj lawm. Kuv tso ib tug qhelunpees zov koj. Koj nyob saum kuv lub roob dawbhuv thiab mus mus los los ntawm cov pobzeb hluavtaws. Koj yeej muaj tus cwjpwm zoo txij thaum kuv tsim koj los txog hnub uas koj mus ua kev phem kev qias. Koj ua lag ua luam khwv kawg, qhov ntawd coj koj mus ua txhaum kevcai thiab poob rau kev txhaum. Kuv thiaj ntiab koj khiav tawm saum kuv lub roob dawbhuv mus, thiab tus qhelunpees uas zov koj los ntiab koj tawm ntawm cov pobzeb hluavtaws mus. Koj khavtheeb vim koj zoo nraug; koj lub tswvyim ploj tas vim koj lub koob meej nto moo lug. Vim li ntawd, kuv thiaj muab koj pov rau hauv ntiajteb, kuv rau txim rau koj tabmeeg tej vajntxwv. Koj ua txhaum loj vim koj ua lag ua luam tsis ncaj, thiab ua rau koj lub chaw pehawm tsis huv lawm. Yog li ntawd, kuv thiaj tso hluavtaws los hlawv koj kom ua tshauv tas rau hauv ntiajteb tabmeeg tej neeg sawvdaws. Koj ploj ntais lawm tiag, ploj mus ibtxhis li. Txhua haivneeg uas paub koj yuav ntshai thiab yoob tas, lawv ntshai nyob tsam lawv raug tej xwm phem uas koj raug.” Tus TSWV hais rau kuv hais tias, “Tub noobneej, koj cia li cev kuv tej lus cem lub nroog Xidoos. Koj cia li hais tus TSWV uas kav txhua tsav yam tej lus rau cov neeg hauv Xidoos li no: Xidoos, kuv yog koj tus yeebncuab; txhua tus neeg yuav qhuas kuv vim tej uas kuv tau ua rau koj. Lawv yuav paub hais tias kuv yog tus TSWV uas dawbhuv, thaum kuv rau txim rau cov neeg uas nyob hauv koj. Kuv yuav tso kab mob los raug koj thiab ua kom muaj ntshav ntws puv nkaus txhua txojkev. Yuav muaj yeebncuab tuaj txhua phab tuaj tua koj, thiab koj cov pejxeem yuav raug tua. Ces koj thiaj yuav paub hais tias kuv yog tus TSWV.” Tus TSWV hais tias, “Cov tebchaws uas nyob puagncig cov Yixalayees yuav tsis txob thuam thiab tsis tsimtxom lawv lawm. Lawv thiaj yuav paub hais tias kuv yog tus TSWV uas kav ib puas tsav yam.” Tus TSWV uas kav ib puas tsav yam hais tias, “Kuv yuav coj cov Yixalayees tawm hauv tej tebchaws uas lawv mus nyob rov qab los. Txhua haivneeg thiaj yuav paub hais tias kuv yog tus TSWV uas dawbhuv. Cov Yixalayees yuav tau rov los nyob hauv lawv lub tebchaws uas kuv muab rau kuv tus tubtxib Yakhauj lawm. Cov Yixalayees yuav nyob kaj siab lug hauv lub tebchaws ntawd. Lawv yuav ua vaj ua tsev thiab cog txiv hmab. Kuv yuav rau txim rau cov tebchaws nyob puagncig lawv uas pheej txob thuam thiab tsimtxom lawv. Lawv yuav nyob kaj siab lug, lawv thiaj paub hais tias kuv yog tus TSWV uas yog lawv tug Vajtswv.” Lub kaum hli ntuj hnub kaum ob, xyoo kaum uas peb raug ntes mus, tus TSWV hais rau kuv hais tias, “Tub noobneej, koj cia li cev kuv tej lus cem Falaus uas yog cov Iziv tus vajntxwv. Koj qhia rau nws hais tias, nws thiab nws cov neeg yuav raug txim. Koj hais tus TSWV uas kav ib puas tsav yam tej lus rau Falaus uas yog cov Iziv tus vajntxwv li no: Kuv yog koj tus yeebncuab, koj yog tus nab qa loj uas tsiv heev pw hauv hav dej. Koj hais tias tus dej Niles yog koj li, thiab koj tsim nws. Kuv yuav muab nuv chob koj puabtsaig kom tshab plaws thiab ua kom cov ntses uas nyob hauv koj tus dej lo koj tej nplai. Kuv yuav muab koj thiab cov ntses uas lo rau ntawm koj cov nplai pov rau tom tiaj suabpuam thiab yuav tsis muaj neeg muab koj faus. Kuv yuav cia tej noog thiab tej tsiaj los noj koj. Cov neeg uas nyob hauv tebchaws Iziv thiaj yuav paub hais tias kuv yog tus TSWV.” Tus TSWV hais tias, “Cov Yixalayees tso siab rau koj txojkev pab, tiamsis koj twb khov tsis cuag tus nyuag kav tauj iab. Thaum cov Yixalayees cev tes tuav koj, koj lov chob lawv pwgpu, thiab thaum lawv pheeb koj, koj lov ua rau lawv sav duav. Yog li ntawd, kuv yog tus TSWV uas kav ib puas tsav yam hais qhia rau koj hais tias kuv yuav tso neeg nqa ntaj tuaj tua koj; lawv yuav tua koj cov neeg thiab tej tsiaj txhu kom tuag tas. Tebchaws Iziv yuav nyob qhuav nquas cia, koj thiaj yuav paub hais tias kuv yog tus TSWV. “Rau qhov koj hais tias tug dej Niles yog koj li thiab koj yog tus tsim, nimno kuv yog koj thiab tus dej Niles tus yeebncuab. Kuv yuav ua kom tebchaws Iziv nyob qhuav nquas cia, txij ntua ntawm lub nroog Minkedaus uas nyob sab qaumteb mus ti nkaus lub nroog Axavas uas nyob sab qabteb, thiab mus txog rau ntawm cov neeg Sudas tus ciamteb. Yuav tsis muaj neeg lossis tsiaj taug kev hla lub tebchaws ntawd li. Yuav tsis muaj neeg nyob rau hauv lub tebchaws ntawd plaub caug xyoo. Kuv yuav ua kom tebchaws Iziv nyob nphob xuav rau hauv ntiajteb no. Nws tej nroog yuav pob puas mus txog plaub caug xyoo thiab yuav puastsuaj phem tshaj lwm lub nroog. Kuv yuav ua kom cov neeg Iziv poob tebchaws. Lawv yuav tawg mus nyob xyaw lwm haivneeg rau txhua lub tebchaws.” Tus TSWV uas kav ib puas tsav yam hais tias, “Tom qab uas dhau plaub caug xyoo lawm, kuv yuav coj cov neeg Iziv uas mus nyob xyaw lwm haivneeg rov qab los, thiab kuv yuav cia lawv los nyob rau sab qabteb hauv tebchaws Iziv uas yog lawv qub teb qub chaw. Lawv lub tebchaws yuav tsis muaj hwjchim; lub tebchaws ntawd yog lub uas tsis muaj hwjchim tshaj plaws hauv ntiajteb no. Lawv yuav tsis tau kav lwm haivneeg ntxiv lawm. Kuv yuav ua kom lawv tsis muaj hwjchim, lawv thiaj yuav kav tsis tau lwm haivneeg. Cov Yixalayees yuav tsis mus vamkhom cov Iziv pab lawm. Cov Iziv txojkev txhaum ua rau cov Yixalayees pom hais tias lawv tso siab yuam kev rau cov Iziv lawm. Ces cov Yixalayees thiaj yuav paub hais tias kuv yog tus TSWV uas kav ib puas tsav yam.” Lub ib hlis ntuj hnub xiab ib, xyoo nees nkaum xya uas peb raug ntes mus, tus TSWV hais rau kuv hais tias, “Tub noobneej, Vajntxwv Nenpukajnexales uas kav tebchaws Npanpiloos twb sawv kev tuaj ntaus lub nroog Tiles lawm. Nws yuam nws cov tubrog kom ris nra hnyav heev ua rau lawv do hau thiab xubpwg hle tawv tas. Txawm li ntawd los nws thiab nws cov tubrog tsis tau ib yam dabtsi hauv lub nroog Tiles ua nqi zog li. Kuv yog tus TSWV uas kav ib puas tsav yam, kuv hais li no: Kuv yuav muab lub tebchaws Iziv cob rau Vajntxwv Nenpukajnexales. Nws yuav huab thiab nqa cov Iziv tej nyiaj tej kub mus them nws cov tubrog. Kuv yuav muab lub tebchaws Iziv ua nqi zog rau nws, rau qhov nws cov tubrog ua haujlwm rau kuv. Kuv yog tus TSWV uas kav ib puas tsav yam hais li ntawd. “Txog thaum uas tej ntawd tshwmsim lawm, kuv yuav ua kom cov Yixalayees rov muaj hwjchim. Exekees, koj cia li mus hais kom txhua tus hnov, lawv thiaj yuav paub hais tias kuv yog tus TSWV.” Tus TSWV hais rau kuv ntxiv hais tias, “Tub noobneej, koj cia li cev kuv tej raws li tus TSWV uas kav ib puas tsav yam tej lus: Hnub uas muaj kev txhawj ntshai los yuav txog! Hnub ntawd twb los ze lawm, yog hnub uas tus TSWV rau txim, Yog hnub muaj kev tsaus ntuj thiab kev txomnyem rau txhua haivneeg. Yuav muaj kev ua tsov ua rog hauv tebchaws Iziv, thiab muaj kev kub ntxhov nyob hauv tebchaws Sudas. Ntau leej yuav raug tua rau hauv tebchaws Iziv; Neeg yuav tuaj huab ua rau lub tebchaws puastsuaj tas. “Kev sib tua zaum no ua rau cov tubrog Sudas, Lidias, Linpias, Alanpias, Kub thiab kuv cov tubrog raug tua tuag tas.” Tus TSWV hais tias, “Cov neeg uas tuaj pab cov Iziv thiab Iziv cov tubrog uas khavtheeb yuav raug tua tuag tas rau hauv tshavrog. Txij ntua ntawm Minkedaus uas nyob sab qaumteb mus txog rau ntawm lub nroog Axavas uas nyob sab qabteb. Kuv yog tus TSWV uas kav ib puas tsav yam hais li ntawd. Cov tebchaws ntawd yuav nyob qhuav nquas hauv ntiajteb, thiab lawv tej nroog yuav puastsuaj tas. Thaum uas kuv zes hluavtaws hlawv lub tebchaws Iziv, cov neeg uas pab nws yuav raug tua tuag tas huv tibsi, lawv thiaj yuav paub hais tias kuv yog tus TSWV. “Thaum txog hnub ntawd cov Iziv yuav raug puastsuaj tas. Kuv yuav tso ib pab neeg caij nkoj mus hem cov neeg Sudas uas nyob tso siab lug kom lawv ntshai heev. Hnub ntawd twb los yuav txog!” Tus TSWV uas kav ib puas tsav yam hais tias, “Kuv yuav cia Vajntxwv Nenpukajnexales uas kav tebchaws Npanpiloos ua kom tebchaws Iziv txojkev npluanuj ploj kiag mus. Nenpukajnexales thiab nws tsoom tubrog uas tsis hlub leejtwg yuav coj ntaj tuaj tua tebchaws Iziv kom puastsuaj tas thiab yuav muaj neeg tuag nyob rau txhua qhov. Kuv yuav ua kom tus dej Niles nqhuab thiab muab lub tebchaws Iziv rau cov neeg txawv tebchaws uas siab phem ua kom puastsuaj tas. Kuv uas yog tus TSWV hais li ntawd.” Tus TSWV uas kav ib puas tsav yam hais tias, “Kuv yuav rhuav tej mlom thiab tej vajtswv cuav uas nyob hauv lub nroog Meefis kom puastsuaj. Kuv yuav ua rau txhua tus ntshai kom tsis muaj ib tug neeg twg kam los kav lub tebchaws Iziv li. Kuv yuav ua kom tebchaws Iziv sab qabteb nyob qhuav nquas cia thiab zes hluavtaws hlawv lub nroog Xau-as uas nyob sab qaumteb, thiab kuv yuav rau txim rau lub tuamceeb nroog Thenpes. Kuv txojkev chim yuav los raug lub nroog Peluxi-oos uas yog cov Iziv lub nroog ruaj khov. Thiab kuv yuav rhuav lub nroog Thenpes tej kev npluanuj. Kuv yuav zes hluavtaws hlawv lub tebchaws Iziv, ces lub nroog Peluxi-oos yuav raug kev txomnyem. Lub nroog Thenpes tej ntsa yeej pob tas thiab dej yuav nyab lub nroog. Cov tub hluas uas nyob hauv lub nroog Heli-aupulis thiab Npunpatis yuav raug luag tua tuag tas, dua li cov yuav raug luag ntes mus. Thaum kuv txo cov Iziv lub hwjchim thiab lawv txojkev khavtheeb, kev tsaus ntuj yuav los raug lub nroog Tapahes. Huab yuav los nroos lub tebchaws Iziv, ces cov neeg uas nyob hauv nws tej nroog yuav raug luag ntes mus. Thaum kuv rau txim rau lub tebchaws Iziv, lawv thiaj yuav paub hais tias kuv yog tus TSWV.” Lub ib hlis ntuj hnub xiab xya, xyoo kaum ib uas peb raug ntes mus, tus TSWV hais rau kuv hais tias: “Tub noobneej, kuv twb ua rau Falaus uas yog cov Iziv tus vajntxwv txhais npab lov lawm. Tsis muaj leejtwg muab ntaub qhwv kho kom zoo thiab muaj zog rov tuav taus ntaj. Yog li ntawd, kuv yog tus TSWV uas kav ib puas tsav yam, kuv hais li no: Kuv yog Falaus uas yog cov Iziv tus vajntxwv tus yeebncuab, kuv yuav lov dua nws ib sab npab kom ob sab lov huv tibsi, nws thiaj tuav tsis taus ntaj. Kuv yuav ua kom cov Iziv tawg mus nyob thoob ntiajteb. Kuv yuav ua rau tus vajntxwv uas kav tebchaws Npanpiloos ob txhais npab muaj zog heev thiab muab kuv rab ntaj cob rau nws. Tiamsis kuv yuav muab Falaus uas yog cov Iziv tus vajntxwv ob txhais npab lov, ces nws yuav quaj thiab tuag tabmeeg nws tus yeebncuab. Kuv yuav txo Falaus lub zog thiab txhawb cov Npanpiloos tus vajntxwv lub zog. Thaum kuv muab kuv rab ntaj rau tus vajntxwv uas kav lub tebchaws Npanpiloos mus tua tebchaws Iziv, txhua tus thiaj yuav paub hais tias kuv yog tus TSWV. Kuv yuav ua kom cov Iziv tawg mus nyob thoob ntiajteb. Lawv thiaj yuav paub hais tias kuv yog tus TSWV.” Lub peb hlis ntuj hnub xiab ib, xyoo kaum ib uas peb raug ntes mus, tus TSWV hais rau kuv hais tias, “Tub noobneej, koj cia li hais rau Falaus uas yog cov Iziv tus vajntxwv thiab nws cov neeg li no: Koj muaj zog heev! Kuv yuav muab koj piv rau dabtsi? Koj zoo ib yam li tsob ntoo ciab nyob pem Lenpanoos uas muaj nplooj thiab ceg dauv zoo nkauj, thiab siab nto plaws saum cov huab. Muaj dej yug tsob ntoo loj hlob, cov dej hauv av yug tsob ntoo kom siab. Luag ywg dej rau tsob ntoo ntawd lub hauvpaus, thiab nws cov dej phwj mus rau txhua tsob ntoo hauv thaj zoov ntawd. Vim muaj dej txaus, tsob ntoo ntawd thiaj loj thiab siab tshaj lwm tsob, nws ncau ceg ntau thiab ntev. Txhua yam noog los ua zes rau ntawm nws tej ceg; tej tsiaj qus los yug menyuam rau hauv qab tsob ntoo ntawd; Txhua haivneeg thoob ntiajteb tuaj nraim hauv nws tus duab ntxoo. Tsob ntoo ntawd zoo nkauj kawg li, nws siab thiab tej ceg ntev heev. Nws tej cag nrhau mus ti nkaus cov dej hauv nruab tivtxwv. Hauv Vajtswv lub vaj tsis muaj ib tsob ntoo ciab uas piv tau tsob ntawd. Tsis muaj ib tsob ntoo uas muaj ceg ntau piv tau tsob ntoo ntawd li. Hauv Vajtswv lub vaj tsis muaj ib tsob ntoo zoo nkauj npaum li tsob ntawd. Kuv ua rau tsob ntoo ntawd zoo nkauj thiab ncau ceg ntau heev. Tsob ntoo ntawd ua rau tej ntoo hauv Vajtswv lub Vaj Edees khib kawg li. “Tus TSWV uas kav ib puas tsav yam hais rau koj hais tias, vim tsob ntoo ntawd siab mus nto saum cov huab, nws thiaj khavtheeb; yog li ntawd, kuv thiaj cia lwm haivneeg ib tug nom tuaj kav nws. Tus nom ntawd yuav rau txim rau tsob ntoo ntawd raws li nws txojkev phem kev qias. Cov neeg txawv tebchaws uas tsis muaj kev hlub yuav tuaj ntov tsob ntoo ntawd povtseg. Nws tej ceg thiab tej kav yuav poob puv nkaus rau saum tej roob thiab tej hav hauv lub tebchaws ntawd. Txhua haivneeg uas nyob hauv tsob ntoo ntawd tus duab ntxoo yuav khiav tas. Tej noog yuav ya los tsaws rau saum tus cav ntoo thiab tej tsiaj qus yuav los tsuj tej ceg. Yog li ntawd, txij no mus yuav tsis muaj ib tsob ntoo siab mus nto saum cov huab lawm. Txawm yog yuav ywg dej ntau npaum li cas los yeej yuav tsis siab li tsob ntawd. Tej ntawd puavleej yuav puastsuaj ib yam li tej neeg ntiajteb uas twb xub mus rau hauv tubtuag teb lawm.” Tus TSWV uas kav ib puas tsav yam hais tias, “Thaum tsob ntoo mus rau hauv tubtuag teb, kuv yuav ua kom cov dej hauv nruab tivtxwv los voob nkaus nws. Kuv yuav sau tej dej rov qab kom ntau tus dej yuav tsis ntws. Rau qhov tsob ntoo ntawd tuag lawm, kuv yuav cia kev tsaus ntuj los qhwv nkaus Lenpanoos tej Roob thiab ua kom txhua tsob ntoo hauv havzoov qhuav tas. Thaum kuv muab nws pov rau hauv tubtuag teb, txhua haivneeg yuav hnov lub suab nrov qeeg nkaws. Txhua tsob ntoo hauv lub vaj Edees thiab txhua tsob ntoo saum roob Lenpanoos uas raug xaiv thiab tau dej txaus uas twb mus rau hauv tubtuag teb lawm yuav zoo siab vim tsob ntoo ntawd poob rau hauv tubtuag teb lawm thiab. Lawv yuav nrog nws mus rau hauv tubtuag teb nrog cov uas twb mus ua ntej lawm nyob ua ke. Cov uas nyob hauv tsob ntoo ntawd tus duab ntxoo yuav raug ntiab mus nyob xyaw txhua haivneeg. “Tsob ntoo ntawd yog Falaus thiab nws cov pejxeem. Tsis muaj ib tsob ntoo hauv lub vaj Edees siab thiab muaj hwjchim li tsob ntawd. Tiamsis nimno nws mus rau hauv tubtuag teb thiab nrog cov neeg tsis ua kevcai txiav uas raug tua tuag rau hauv tshavrog nyob ib yam li cov ntoo hauv lub vaj Edees. Tus TSWV uas kav ib puas tsav yam hais li ntawd.” Lub kaum ob hlis ntuj hnub xiab ib, xyoo kaum ob uas peb raug ntes mus, tus TSWV hais rau kuv hais tias, “Tub noobneej, koj cia li hais rau Falaus uas yog cov Iziv tus vajntxwv li no: Koj hais tias koj yog tus tsov ntxhuav uas nyob xyaw txhua haivneeg, tiamsis koj zoo li tus nab qa loj uas nyob hauv pasdej. Koj ob txhais kotaw do ua rau lub pasdej nro tas thiab tej dej tsis huv lawm. Thaum muaj ntau haivneeg tuaj sib sau ua ke, kuv yuav muab kuv lub vas khwb nkaus koj thiab cia lawv cab koj mus rau tim ntug. Kuv yuav muab koj pov rau hauv av, cia tej noog thiab tej tsiaj hauv ntiajteb tuaj noj koj. Kuv yuav muab koj lub cev tuag uas lwj pov mus kom puv txhua lub roob thiab txhua lub hav. Kuv yuav muab koj cov ntshav hliv kom ntws mus puv txhua lub roob thiab txhua tus dej. Thaum kuv ua rau koj puastsuaj, kuv yuav ua kom lub ntuj tsau ntais, tej hnubqub, lub hnub thiab lub hli yuav tsis ci lawm. Kuv yuav muab tej uas ci pom kev rau saum nruab ntug tshem tawm kom lub ntiajteb tsaus ntuj nti. Kuv yog tus TSWV uas kav ib puas tsav yam hais li ntawd. “Kuv yuav ua rau ntau haivneeg raug kev nyuaj siab, thaum kuv ntiab koj mus nyob xyaw ntau haivneeg hauv tej tebchaws uas koj tsis tau paub dua. Tej uas kuv ua rau koj yuav ua rau ntau haivneeg yoob tas. Thaum kuv yoj kuv rab ntaj, tej vajntxwv yuav ntshai heev. Hnub uas koj poob mus ntawd lawv txhua tus yuav ntshai heev thiab txhawj txog lawv txojsia.” Tus TSWV uas kav ib puas tsav yam hais rau cov Iziv tus vajntxwv hais tias, “Koj yuav raug tus vajntxwv uas kav tebchaws Npanpiloos rab ntaj tua xwb. Kuv yuav cia lwm haivneeg cov tubrog uas ua nruj ua tsiv nqa ntaj tuaj tua koj cov neeg kom tuag tas. Koj thiab txhua yam uas ua rau koj khav yuav raug puastsuaj tas. Kuv yuav muab koj tej tsiaj tua kom tuag tas rau ntawm tej ntug pasdej. Yuav tsis tshuav neeg lossis tsiaj los ua kom dej nro lawm. Kuv yuav cia koj tej dej nyob tus yees thiab ntshiab si thiab cia koj tej dej ntws ntsiag to. Kuv yog tus TSWV uas kav ib puas tsav yam hais li ntawd. Thaum kuv muab tebchaws Iziv ua kom nyob qhuav nquas cia thiab tua cov neeg uas nyob hauv tuag tas lawm, lawv thiaj yuav paub hais tias kuv yog tus TSWV. Ntawm no yog zaj nkauj quaj ntsuag uas luag yuav hu. Tej pojniam hauv txhua haivneeg yuav hu zaj nkauj quaj ntsuag rau Iziv thiab nws cov neeg. Kuv yog tus TSWV uas kav ib puas tsav yam hais li ntawd.” Lub ib hlis ntuj hnub kaum tsib xyoo kaum ob uas peb raug ntes mus, tus TSWV hais rau kuv hais tias, “Tub noobneej, koj cia li quaj ntsuag rau cov neeg Iziv. Koj cia li xa lawv nrog lwm haivneeg uas muaj hwjchim mus rau hauv tubtuag teb. Koj hais rau lawv hais tias: “Nej xav hais tias nej zoo nkauj tshaj luag lwm tus no los? Nej yuav tau mus rau hauv tubtuag teb thiab pw nrog cov neeg uas tsis ua kevcai txiav. “Cov Iziv yuav tuag nrog cov neeg uas raug tua rau hauv tshavrog. Twb npaj rab ntaj txhij lawm yuav tua lawv txhua tus. Cov thawj uas muaj hwjchim thiab cov neeg uas tuaj cov Iziv tog, lawv zoo siab tos txais cov Iziv mus rau hauv tubtuag teb. Lawv qw hais tias, ‘Cov neeg tsis ua kevcai txiav uas raug tua tuag rau hauv tshavrog los pw ntawm no lawm!’ “Axilias cov tubrog tej ntxa nyob puagncig nws. Lawv yog cov uas raug hniav ntaj tuag rau hauv tshavrog; lawv tej ntxa nyob hauv qhov uas tob tshaj plaws hauv tubtuag teb. Nws cov tubrog puavleej tuag tas rau hauv tshavrog, thiab lawv tej ntxa nyob puagncig nws. Lawv tau ua rau tej neeg uas tseem ua neej nyob hauv ntiajteb ntshai kawg. “Elas cov tubrog tej ntxa nyob puagncig nws. Lawv yog cov uas raug hniav ntaj tuag rau hauv tshavrog, thiab lawv mus rau hauv tubtuag teb tsis tas ua kevcai txiav li. Thaum tseem ua neej nyob lawv ua nruj ua tsiv, tiamsis nimno lawv tuag xyab luas thiab poob ntsejmuag kawg. Elas pw nrog cov neeg uas raug hniav ntaj tuag rau hauv tshavrog, thiab nws cov tubrog tej ntxa nyob puagncig nws. Lawv puavleej tsis tau ua kevcai txiav thiab raug tua tuag rau hauv tshavrog. Thaum tseem ua neej nyob lawv ua nruj ua tsiv, tiamsis nimno lawv tuag xyab luas thiab poob txajmuag kawg, lawv nrog cov neeg uas raug tua tuag rau hauv tshavrog nyob ua ke. “Mesej thiab Tunpas cov tubrog tej ntxa nyob puagncig nkawd. Lawv yog cov uas raug hniav ntaj tuag rau hauv tshavrog, lawv tsis tau ua kevcai txiav li. Lawv tau ua rau tej neeg uas tseem ua neej nyob hauv ntiajteb ntshai kawg. Luag tsis hwm lawv thiab tsis coj lawv mus faus ib yam li cov thawjcoj tiam thaum ub uas muab lawv tej cuabyeej ua rog nrog lawv mus rau hauv tubtuag teb, muab lawv tej ntaj tiag lawv taubhau, thiab muab lawv tej thaiv hniav ntaj tso rau saum lawv lub cev. Cov neeg ntawd ua rau tej neeg uas tseem ua neej nyob hauv ntiajteb ntshai kawg. “Qhov ntawd qhia hais tias cov Iziv yuav raug tua thiab pw nrog cov neeg tsis ua kevcai txiav uas raug hniav ntaj tuag rau hauv tshavrog. “Edoos nrog nws cov vajntxwv thiab nws cov thawjcoj nyob hauv thiab. Lawv muaj tubrog coob thiab muaj hwjchim heev, tiamsis nimno lawv nrog cov neeg tsis ua kevcai txiav uas raug hniav ntaj tuag rau hauv tshavrog pw ua ke hauv tubtuag teb. “Cov nomtswv uas nyob sab qaumteb thiab cov Xidaunias nyob ntawd thiab. Yav tas los lawv muaj hwjchim ua rau neeg ntshai heev, tiamsis nimno lawv nrog cov neeg tsis ua kevcai txiav uas raug hniav ntaj tuag rau hauv tshavrog poob ntsejmuag kawg mus rau hauv tubtuag teb. Lawv koom txojkev txajmuag nrog cov neeg uas mus rau hauv tubtuag teb. “Thaum Falaus pom lawv tuag li ntawd ua rau nws zoo siab kawg, rau qhov Falaus thiab nws cov tubrog los raug hniav ntaj tuag rau hauv tshavrog thiab,” tus TSWV uas kav ib puas tsav yam hais li ntawd. “Falaus ua rau cov neeg uas tseem ua neej nyob ntshai kawg, tiamsis Falaus thiab nws cov tubrog yuav nrog cov neeg tsis ua kevcai txiav uas raug hniav ntaj tuag rau hauv tshavrog pw ua ke hauv tubtuag teb.” Tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, cia li hais rau koj cov neeg hais tias thaum kuv coj kev tsov kev rog tuaj rau hauv lub tebchaws, yog cov neeg uas nyob hauv lub tebchaws xaiv lawv ib tug ua tus fajxwm thiab thaum nws pom muaj yeebncuab tuaj tawmtsam lub tebchaws, nws tshuab raj tshuab xyu ceebtoom rau sawvdaws. Yog leejtwg hnov lub suab ceebtoom ntawd, tiamsis nws tsis quavntsej li, yog yeebncuab muab nws tua tuag, ces nws ris nws lub txim xwb. Nws tuag vim nws tsis quavntsej lub suab ceebtoom. Tiamsis yog nws ua raws li lub suab ceebtoom, ces nws yeej yuav khiav dim xwb. Tiamsis yog tus fajxwm pom yeebncuab tuaj, nws tsis tshuab raj tshuab xyu ceebtoom rau sawvdaws paub, yog yeebncuab tua cov neeg txhaum ib tug twg lawm, ces kuv yuav muab tus ntawd lub txim rau tus fajxwm ris. “Tub noobneej, nimno kuv yuav tsa koj ua ib tug fajxwm rau cov Yixalayees. Koj yuav tsum qhia kuv tej lus ceebtoom rau lawv paub. Yog kuv hais rau ib tug neeg txhaum hais tias, tus neeg txhaum, koj yuav tuag, tiamsis koj tsis mus qhia kom nws tso kev txhaum tseg nws thiaj tsis tuag, mas tus ntawd yuav tuag rau nws txojkev txhaum, ces kuv yuav muab nws lub txim rau koj ris. Yog koj twb qhia rau tus neeg txhaum ntawd lawm, tiamsis nws tsis tso nws txojkev txhaum tseg, nws yuav tuag rau nws txojkev txhaum, ces kuv yuav tsis muab nws lub txim rau koj ris.” Tus TSWV hais rau kuv hais tias, “Tub noobneej, koj hais rau cov Yixalayees hais tias nej pheej hais tias, ‘Peb nyuaj siab rau peb tej kev txhaum thiab tej kev phem kev qias uas peb tau ua. Peb puastsuaj lawm. Peb yuav ua li cas ua neej nyob?’ Koj hais rau lawv hais tias kuv yog tus TSWV uas kav ib puas tsav yam, thiab yog Vajtswv tus uas muaj sia nyob, kuv tsis xav pom tug neeg txhaum tuag. Kuv tsuas xav pom nws tso nws txojkev txhaum tseg thiab muaj txojsia nyob xwb. Cov Yixalayees, nej cia li tso nej tej kev phem kev qias tseg. Vim li cas nej xav tuag? “Tub noobneej, nimno koj cia li hais rau cov Yixalayees hais tias yog muaj ib tug neeg ncaj ncees mus ua txhaum, tej kev ncaj ncees uas nws ua tas los yeej pab tsis tau nws li. Yog muaj ib tus neeg txhaum tso nws tej kev phem kev qias tseg, nws yuav tsis raug txim. Tiamsis yog ib tug neeg ncaj ncees mus ua txhaum, kuv yuav tsis zam txim rau nws li. Txawm yog kuv hais tias kuv yuav muab txojsia rau tus neeg ncaj ncees, tiamsis nws xav hais tias tej kev ncaj ncees uas nws ua yav tas los pab tau nws lawm. Nws cia li mus ua kev txhaum, ces kuv yuav tsis suav nws tej kev ncaj ncees yav tas los li. Nws yuav tuag rau nws tej kev txhaum. Yog kuv hais rau ib tug neeg txhaum hais tias, “Koj yuav tuag,” tiamsis yog nws tso nws tej kev txhaum tseg, ua ncaj ncees thiab ua zoo, xwsli: nws thim tej khoom uas nws nyiag los rov rau luag, nws tso kev txhaum tseg thiab ua raws li txoj kevcai uas pab tau neeg muaj txojsia, ces nws yuav muaj sia nyob tsis tuag. Kuv yuav zam tej kev txhaum uas nws ua tas los, thiab nws yuav muaj sia nyob rau qhov nws rov los ua ncaj thiab ua zoo lawm. “Nej cov neeg hais tias, ‘Tej uas tus TSWV ua, nws ua tsis ncaj,’ tsis yog li ntawd, tiamsis lawv yog cov uas ua tsis ncaj ntag! Yog muaj ib tug neeg ncaj ncees tso kev ua zoo tseg thiab mus ua kev phem kev qias, nws yuav tuag rau nws txojkev txhaum. Yog muaj ib tug neeg txhaum tso nws tej kev txhaum tseg rov los ua ncaj thiab ua zoo, nws yuav muaj sia ua neej nyob. Cov Yixalayees, nej hais tias tej uas kuv ua, kuv ua tsis ncaj. Yog li ntawd, kuv yuav txiav txim rau nej raws li tes haujlwm uas nej ua tas los lawm ntag.” Lub kaum hli ntuj hnub xiab tsib, xyoo kaum ob uas peb raug ntes mus, txawm muaj ib tug txivneej khiav dim hauv lub nroog Yeluxalees tuaj qhia rau kuv hais tias luag txeeb tau lub nroog Yeluxalees lawm. Ua ntej hmo uas tus txivneej ntawd tuaj cuag kuv, kuv twb xub hnov tus TSWV lub hwjchim los nyob ntawm kuv lawm. Tagkis tom qab uas tus txivneej ntawd tuaj txog, tus TSWV ua rau kuv hais tau lus. Tus TSWV hais rau kuv hais tias, “Tub noobneej, cov neeg uas nyob hauv cov Yixalayees tej nroog uas pob puas tas lawm hais tias, ‘Tsuas muaj Anplahas ib leeg xwb, Vajtswv thiaj muab lub tebchaws no rau nws; tiamsis nimno peb coob heev lawm; yog li ntawd, lub tebchaws yog peb sawvdaws tug huv tibsi.’ “Koj cia li hais tus TSWV uas kav ib puas tsav yam tej lus rau lawv li no: Nej noj tej nqaij uas txheem ntshav, pe mlom thiab tua neeg. Vim li cas nej tseem hais tias, lub tebchaws no yog nej tug? Nej tso siab rau nej tej ntaj, nej ua kev phem kev qias thiab nej deev luag tej pojniam. Vim li cas nej tseem hais tias lub tebchaws no yog nej tug? “Kuv yog tus TSWV uas kav ib puas tsav yam thiab yog Vajtswv tus uas muaj sia nyob, koj hais rau lawv hais tias cov neeg nyob hauv tej nroog uas pob puas tas lawm yuav raug hniav ntaj tuag tas. Cov uas nyob tom tiaj suabpuam yuav raug tej tsiaj qus tom. Cov uas khiav mus nkaum rau pem tej roob thiab hauv tej qhov tsua yuav raug kab mob tuag tas. Kuv yuav ua kom lub tebchaws no nyob qhuav nquas cia, thiab lawv lub zog uas ua rau lawv khavtheeb yuav ploj mus. Tej roob hauv tebchaws Yixalayees los yuav nyob qhuav nquas tsis muaj leejtwg taug kev hla li. Thaum kuv rau txim rau cov neeg vim lawv tej kev txhaum thiab ua rau lub tebchaws nyob qhuav nquas cia, lawv thiaj yuav paub hais tias kuv yog tus TSWV.” Tus TSWV hais tias, “Tub noobneej, thaum koj haivneeg tuaj nyob ua ke rau ntawm tej ntsa loog lossis ntawm lawv tej qhovrooj sib tham txog koj. Lawv ib leeg hais rau ib leeg hais tias, ‘Peb cia li mus mloog saib tus TSWV hais li cas rau peb.’ Kuv haivneeg sib sau tsheej pab tuaj mloog tej lus uas koj hais, tiamsis lawv tsis ua raws li koj hais. Lawv lub ncauj lam hais lus zoo xwb, lawv tseem ua phem ua qias li qub. Koj tsuas zoo li tus uas muaj lub suab zoo hu zaj nkauj sib hlub thiab txawj ntaus nkauj nogncas rau lawv mloog xwb. Lawv hnov tej lus uas koj hais, tiamsis lawv tsis ua raws li ntawd. Tej lus uas koj hais tias yuav tshwm muaj, tej ntawd twb tshwm muaj lawm. Thaum ntawd lawv thiaj yuav paub hais tias muaj ib tug cev Vajtswv lus nrog lawv nyob.” Tus TSWV hais rau kuv hais tias, “Tub noobneej, koj cia li cem cov Yixalayees cov thawjcoj. Koj hais tus TSWV uas kav ib puas tsav yam tej lus rau lawv li no: Nej cov uas yog Yixalayees cov tub yug yaj raug puastsuaj lawm lauj! Nej tsuas nrhiav rau nej noj xwb, nej tsis pub thiab tsis tu pab yaj li. Nej haus yaj mis, hnav tej tsoos tsho uas muab plaub yaj ntos, thiab tua tej menyuam yaj uas rog rog noj. Tiamsis nej tsis pub thiab tsis tu kuv pab yaj li. Nej tsis tu tus yaj uas qaug zog, tsis kho tus uas muaj mob, tsis muab ntaub qhwv tus uas muaj qhov txhab, tsis coj tus uas yuam kev rov los thiab tsis mus nrhiav tus uas ploj lawm. Tiamsis nej quab yuam pab yaj thiab ua nruj ua tsiv rau lawv. Vim tsis muaj tus yug pab yaj, cov yaj thiaj tawg tas, thiab tej tsiaj qus thiaj muab cov yaj tom noj. Yog li ntawd, kuv pab yaj thiaj mus mus los los saum tej laj roob thiab saum tej roob siab. Lawv tawg mus nyob thoob ntiajteb los tsis muaj leejtwg nrhiav thiab coj lawv rov qab los. “Nej cov uas yog tub yug yaj, cia li mloog tus TSWV uas kav ib puas tsav yam tej lus uas hais rau nej li no: Kuv yog Vajtswv tus uas muaj sia nyob, nej cia li mloog kuv hais. Kuv pab yaj raug tej tsiaj qus tom, vim tsis muaj tus tub yug yaj. Kuv cov yug yaj tsis mus nrhiav kuv pab yaj, tiamsis lawv tsuas nrhiav rau lawv noj xwb, lawv tsis pub thiab tsis tu kuv pab yaj li. Cov yug yaj, nej cia li mloog kuv hais! Kuv yog tus TSWV uas kav ib puas tsav yam, kuv hais tias kuv yog nej tus yeebncuab. Kuv yuav txeeb kuv pab yaj ntawm nej mus tsis pub nej yug kuv pab yaj; kuv yuav tsis pub kom nej tau noj tau haus ntawm kuv pab yaj. Kuv yuav cawm kom kuv pab yaj dim tsis pub rau nej tua noj lawm. “Tus TSWV uas kav ib puas tsav yam hais tias kuv yuav mus nrhiav kuv cov yaj thiab tu lawv kom zoo ib yam li tus yug yaj mus nrhiav nws pab yaj uas tawg ua sab ua sua lawm, thiab coj lawv rov los tsev. Kuv yuav cawm lawv dim ntawm kev tsaus ntuj thiab kev txhawj ntshai. Kuv yuav coj lawv tawm hauv lwm haivneeg tej tebchaws los. Sau lawv los nyob ua ke thiab yuav coj lawv rov los nyob hauv lawv lub tebchaws. Kuv yuav coj lawv mus rau saum cov Yixalayees tej roob uas muaj dej cag thiab cia lawv noj tej zaub hauv lub tebchaws uas muaj neeg nyob. Kuv yuav cia lawv noj tej zaug mos, thiab saum cov Yixalayees tej roob yuav yog lawv tej tshav zaub; lawv yuav pw noj tej zaub mos uas nyob saum cov Yixalayees tej roob. Kuv yuav ua tus yug kuv pab yaj thiab nrhiav chaw rau lawv so. Kuv yog tus TSWV uas kav ib puas tsav yam hais li ntawd. “Kuv yuav mus nrhiav cov yaj uas ploj lawm thiab coj cov yuam kev rov los, muab ntaub qhwv cov uas muaj qhov txhab, kho cov uas muaj mob thiab pab cov uas qaug zog; tiamsis cov uas rog thiab muaj zog, kuv yuav muab ua kom puastsuaj mus, rau qhov kuv yog tus yug yaj uas ncaj ncees. “Tus TSWV uas kav ib puas tsav yam hais tias nej cov uas yog kuv pab yaj, kuv yuav txiav txim rau nej ib tug zuj zus, muab tus phem cais tawm ntawm tus zoo thiab cais cov yaj tawm ntawm cov tshis. Nej noj tej zaub uas zoo los tsis txaus nej siab, nej tseem muab kotaw tsuj tej zaub uas nej noj seem. Nej haus tej dej uas ntshiab los tsis txaus nej siab, nej tseem muab kotaw do tej dej uas nej haus seem kom nro thiab. Kuv cov yaj yuav noj tej zaub uas nej muab kotaw tsuj thiab haus tej dej uas nej muab kotaw do kom nro lawm xwb los? “Yog li ntawd, kuv yog tus TSWV uas kav ib puas tsav yam, kuv hais rau nej tias kuv yuav txiav txim rau nej, tsis hais cov yaj rog thiab cov yaj yuag huv tibsi. Nej muab xubpwg thawb thiab muab kub nrau cov yaj uas qaug zog kom lawv tawg ri sua rau txhua qhov. Tiamsis kuv yuav cawm kuv pab yaj kom dim ntawm txojkev puastsuaj. Kuv yuav txiav txim rau kuv pab yaj ib tug zuj zus, muab tus zoo cais tawm ntawm tus phem. Kuv yuav tsa ib tug ua tus yug yaj, tus ntawd yog kuv tus tubtxib Daviv, nws yuav pub zaub rau lawv noj thiab ua lawv tus yug lawv. Kuv yog tus TSWV, kuv yuav ua lawv tus Vajtswv thiab kuv tus tubtxib Daviv yuav ua lawv tus vajntxwv. Kuv yog tus TSWV uas hais li ntawd. Kuv yuav coglus pub kev thajyeeb rau lawv thiab raws tej tsiaj qus tawm hauv lawv lub tebchaws mus; kuv pab yaj yuav nyob thiab pw hauv havzoov tso siab lug. “Kuv yuav foom koob hmoov rau lawv thiab cia lawv nyob puagncig kuv lub roob uas dawbhuv. Kuv yuav tso nag los raws caij nyoog, tej nag ntawd yog koob hmoov uas kuv tso los. Tej ntoo yuav tawg paj txi txiv, tej teb yuav zoo qoobloo, thiab txhua tus yuav tau nyob kaj siab lug hauv lawv lub tebchaws. Thaum kuv daws txoj saw hlaus uas khi kuv haivneeg thiab tso lawv dim ntawm cov neeg uas ntes lawv coj mus ua qhev, lawv thiaj yuav paub hais tias kuv yog tus TSWV. Lwm haivneeg yuav tsis tuaj huab lawv thiab tej tsiaj qus yuav tsis tom lawv. Lawv yuav nyob kaj siab lug, tsis muaj leejtwg tuaj ua rau lawv ntshai lawm. Kuv yuav muab lub tebchaws uas av zoo thiab av rog rau lawv thiab yuav tsis pub kom muaj kev tshaib nqhis nyob hauv lawv lub tebchaws. Lwm haivneeg yuav tsis txob thuam lawv ntxiv lawm. Txhua tus yuav paub hais tias kuv yeej tsomkwm cov Yixalayees uas yog kuv haivneeg. Kuv yog tus TSWV uas kav ib puas tsav yam hais li ntawd.” “Nej yog kuv pab yaj, yog pab yaj uas kuv yug zoo; nej yog kuv cov neeg thiab kuv yog nej tus Vajtswv,” tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, koj cia li cem lub tebchaws Edoos.” Koj hais tus TSWV uas kav ib puas tsav yam tej lus rau nws hais tias: “Edoos cov roob, kuv yog koj tus yeebncuab! Kuv yuav muab koj ua kom nyob qhuav nquas cia. Kuv yuav ua kom koj tej nroog pob puas tas; thiab cia lub tebchaws nyob qhuav nquas, koj thiaj paub hais tias kuv yog tus TSWV. “Koj ibtxwm yog cov Yixalayees tus yeebncuab; koj ua rau cov Yixalayees raug hniav ntaj tuag thaum kuv tso kev puastsuaj los raug lawv thiab thaum kuv rau txim zaum kawg rau lawv, vim lawv tej kev txhaum. Yog li ntawd, kuv yog tus TSWV uas kav ib puas tsav yam thiab yog Vajtswv tus uas muaj sia nyob, kuv yuav npaj kev tuag rau koj, kev tuag yuav caum koj, koj yuav khiav tsis dim li. Koj ua txhaum vim koj tua neeg. Kuv yuav ua kom lub tebchaws Edoos tej roob nyob qhuav nquas cia thiab tua txhua tus uas taug kev hla lub tebchaws ntawd. Kuv yuav ua kom neeg tuag puv nkaus saum tej roob, thiab cov neeg uas raug hniav ntaj tuag hauv tshavrog tej cev yuav puv nkaus saum tej laj roob thiab hauv tej hav. Kuv yuav ua kom koj lub tebchaws nyob qhuav nquas mus ibtxhis thiab yuav tsis muaj neeg nyob hauv koj tej nroog li lawm. Ces koj thiaj yuav paub hais tias kuv yog tus TSWV. “Txawm yog kuv yog tus TSWV uas yog lawv tus Vajtswv los koj tseem hais tias haivneeg Yudas thiab Yixalayees thiab lawv ob lub tebchaws puavleej yog koj li, koj yuav ua tus kav lawv. Kuv yog tus TSWV uas kav ib puas tsav yam thiab yog Vajtswv tus uas muaj sia nyob, kuv yuav ua pauj koj tej kev chim, kev khib thiab kev ntxub kuv haivneeg rov rau koj. Lawv thiaj yuav paub hais tias yog kuv rau txim rau koj, vim tej uas koj tau ua rau lawv lawm. Koj yuav paub hais tias kuv yog tus TSWV uas hnov koj tej lus txob thuam cov Yixalayees tej roob hais tias, ‘Cov Yixalayees tej roob peb muab ua puastsuaj tas thiab nyob qhuav nquas cia lawm.’ Kuv twb hnov nej tej lus khavtheeb thiab tej lus uas nej hais tawmtsam kuv lawm.” Tus TSWV uas kav ib puas tsav yam hais tias, “Kuv yuav ua kom koj nyob qhuav nquas cia, neeg thoob ntiajteb thiaj yuav zoo siab vim koj raug puastsuaj ib yam li koj zoo siab thaum koj pom haivneeg Yixalayees raug rhuav nyob qhuav nquas cia. Lub roob Xe-iles thiab tagnrho tebchaws Edoos yuav nyob qhuav nquas cia, lawv txhua tus thiaj yuav paub hais tias kuv yog tus TSWV.” Tus TSWV hais tias, “Tub noobneej, koj cia li hais rau cov Yixalayees tej roob kom lawv mloog tus TSWV uas kav ib puas tsav yam tej lus uas hais li no: Nej cov yeebncuab hais rau nej hais tias, ‘Tej laj roob uas nyob puag thaum ub los puavleej yog peb li!’ “Koj cia li cem lawv raws li tus TSWV uas kav ib puas tsav yam tej lus uas hais rau lawv li no: Thaum cov neeg nyob puagncig cov Yixalayees tuaj tua thiab txeeb cov Yixalayees tej roob, lawv txhua tus luag cov Yixalayees plig. Cov Yixalayees tej roob, nej cia li mloog tus TSWV uas kav ib puas tsav yam tej lus uas hais rau tej hauv roob, tej laj roob, tej dej, tej hav, tej chaw uas pob puas tas uas nyob qhuav nquas cia, thiab tej nroog uas neeg khiav tas uas raug tej tebchaws nyob puagncig tsimtxom thiab luag plig. “Tus TSWV uas kav ib puas tsav yam hais tias, vim kuv khib heev kuv thiaj tawmtsam cov neeg uas nyob puagncig cov Yixalayees thiab tawmtsam cov Edoos uas muaj plhus ntxiag tuaj txeeb kuv lub tebchaws thiab kuv tej tshav zaub ua lawv tug lawm. “Yog li ntawd, koj cia li hais rau lub tebchaws Yixalayees, hais rau tej roob, tej laj roob, tej dej thiab tej hav raws li tus TSWV uas kav ib puas tsav yam tej lus uas hais tias kuv khib thiab chim heev, vim kuv haivneeg raug cov neeg uas nyob puagncig lawv thuam thiab saib tsis taus. Kuv yog tus TSWV uas kav ib puas tsav yam, kuv coglus hais tias lwm haivneeg uas nyob puagncig yuav raug rhuav kom poob ntsejmuag. Tiamsis tej ntoo saum cov Yixalayees tej roob yuav rov hlav nplooj thiab tawg paj txi txiv rau cov Yixalayees uas yog kuv haivneeg. Nej yuav tau rov los nyob hauv nej lub tebchaws sai sai. Kuv tuaj nej tog, kuv yuav ua kom nej rov tau laij nej tej teb thiab cog nej tej qoobloo. Kuv yuav ua kom nej haivneeg huamvam coob tuaj. Nej yuav rov los nyob hauv nej tej nroog thiab yuav rov txhim kho tej uas pob puas tas lawm. Kuv yuav ua kom neeg thiab tsiaj txhu huamvam coob. Nej yuav coob tshaj yav tas los ntau npaug thiab nej yuav muaj tubki coob. Kuv yuav cia nej nyob hauv lub tebchaws ntawd ib yam li nej nyob los lawm, thiab kuv yuav ua kom nej vammeej tshaj yav tas los. Nej thiaj yuav paub hais tias kuv yog tus TSWV. Kuv yuav coj cov Yixalayees uas yog kuv haivneeg rov los nyob hauv lub tebchaws. Lub tebchaws yuav yog nej tug thiab nej tej menyuam yuav tsis tshaib nqhis lawm. “Kuv yog tus TSWV uas kav ib puas tsav yam, kuv hais li no: Tej neeg hu koj hais tias koj yog lub tebchaws noj neeg thiab hais tias, nws nyiag nws tej menyuam. Tiamsis txij no mus koj yuav tsis noj neeg thiab tsis nyiag koj tej menyuam lawm. Kuv yog tus TSWV uas kav ib puas tsav yam hais li ntawd. Kuv yuav tsis pub koj lub tebchaws hnov lwm haivneeg tej lus txob thuam, koj yuav tsis tau ris txojkev txajmuag; thiab koj yuav tsis nyiag koj haivneeg tej menyuam lawm.” Kuv yog tus TSWV uas kav ib puas tsav yam hais li ntawd. Tus TSWV hais rau kuv hais tias, “Tub noobneej, thaum cov Yixalayees tseem nyob hauv lawv lub tebchaws, lawv lub neej thiab tes haujlwm ua rau lub tebchaws tsis huv lawm. Kuv saib lawv tes haujlwm tsis huv ib yam li tus pojniam uas coj khaubncaws. Vim lawv tua neeg thiab pe mlom ua rau lawv lub tebchaws tsis huv lawm, kuv thiaj cia lawv raug kuv txojkev chim uas loj kawg nkaus. Kuv rau txim rau lawv vim lawv lub neej thiab tes haujlwm tsis zoo, kuv thiaj ntiab lawv mus nyob rau lwm tebchaws lawm. Txawm yog lawv mus nyob lub tebchaws twg los lawv ua rau luag txob thuam kuv lub npe uas dawbhuv; rau qhov luag hais tias, ‘Cov neeg ntawd yog tus TSWV haivneeg, tiamsis lawv raug ntiab tawm hauv tus TSWV lub tebchaws mus lawm.’ Kuv hwm kuv lub npe uas dawbhuv txhua qhov uas cov Yixalayees mus nyob, lawv ua rau kuv poob ntsejmuag. “Yog li ntawd, koj cia li hais tus TSWV uas kav ib puas tsav yam tej lus rau cov Yixalayees li no: Yam uas kuv yuav ua tsis yog saib rau saum cov Yixalayees, tiamsis vim kuv lub npe dawbhuv uas nej ua rau kuv poob ntsejmuag hauv txhua lub tebchaws uas nej mus nyob. Thaum kuv qhia kuv lub npe uas dawbhuv rau lwm haivneeg, yog lub npe uas nej ua rau kuv poob ntsejmuag tabmeeg lawv, lawv thiaj yuav paub hais tias kuv yog tus TSWV. Kuv yog tus TSWV uas kav ib puas tsav yam hais li ntawd. Kuv txib nej mus qhia rau ntau haivneeg paub hais tias kuv yog Vajtswv tus uas dawbhuv. Kuv yuav tso nej tawm hauv txhua haivneeg tej tebchaws thiab coj nej rov los nyob hauv nej lub tebchaws. Kuv yuav muab dej nchos rau nej thiab ntxuav kom nej huv ntawm nej tej mlom thiab txhua yam uas ua rau nej tsis huv lawm. Kuv yuav muab lub siab tshiab thiab txojkev xav tshiab rau nej. Kuv yuav muab nej lub siab uas tawv li pobzeb povtseg thiab muab lub siab uas mloog lus rau nej. Kuv yuav pub kuv tus ntsujplig rau nej, kom nej coj tau raws li kuv txoj kevcai thiab ceev kuv tej lus samhwm. Nej yuav tau nyob hauv lub tebchaws uas kuv muab rau nej cov yawgkoob lawm. Nej yuav yog kuv haivneeg thiab kuv yuav yog nej tus Vajtswv. Kuv yuav cawm kom nej dim ntawm txhua yam uas ua rau nej tsis huv. Kuv yuav ua kom muaj qoobloo nplua mias rau nej, nej thiaj yuav tsis tshaib nqhis ntxiv lawm. Kuv yuav ua kom nej tej txiv ntoo txi txiv ncw thiab ua rau nej tej teb ntsu qoobloo, nej thiaj yuav tsis tshaib nqhis thiab tsis poob ntsejmuag rau luag lwm haivneeg. Nej yuav nco txog tej kev phem kev qias thiab tej uas nej ua tsis zoo, nej yuav rov ntxub nej vim tej kev txhaum uas nej tau ua tas los lawm. Cov Yixalayees, kuv xav kom nej paub hais tias tej uas kuv ua no tsis yog saib rau saum nej, tiamsis yog kuv xav kom nej paub txajmuag rau tej uas nej ua ntawd. Kuv yog tus TSWV uas kav ib puas tsav yam, kuv hais li ntawd.” Tus TSWV uas kav ib puas tsav yam hais tias, “Thaum kuv ntxuav kom nej dawbhuv ntawm nej tej kev txhaum lawm, kuv yuav coj nej rov mus nyob hauv nej tej nroog thiab nej yuav rov txhim kho tej nroog uas pob puas tas lawm. Txhua tus uas dua kev mus los hla nej lub tebchaws, lawv pom hais tias nej lub tebchaws nyob qhuav nquas cia, tiamsis nimno kuv yuav cia nej rov los cog qoobloo rau hauv nej lub tebchaws. Tej neeg yuav sib tham hais tias, ‘Yav tas los lub tebchaws no nyob qhuav nquas cia, tiamsis nimno rov zoo li lub Vaj Edees lawm. Tej nroog uas pob puas tas thiab nyob qhuav nquas cia rov muaj vajtse khov kho thiab muaj neeg nyob xauv npo li qub.’ Lwm haivneeg uas seem nyob puagncig koj thiaj yuav paub hais tias kuv yog tus TSWV uas rov txhim kho tej nroog uas pob puas tas thiab rov cog qoobloo rau hauv lub tebchaws uas nyob qhuav nquas lawm. Kuv yog tus TSWV, kuv coglus hais tias kuv yuav ua tej no; kuv yuav ua li ntawd tiag.” Tus TSWV uas kav ib puas tsav yam hais tias, “Kuv yuav cia cov Yixalayees rov los thov kuv pab lawv dua ib zaug thiab kuv yuav pub kom lawv huamvam coob ua npoj ntws ib yam li pab yaj. Tej nroog uas nimno pob puas tas lawm yuav rov muaj neeg los nyob puv nkaus ib yam li lub nroog Yeluxalees uas yav tas los muaj yaj nyob puv nkaus thiab muab tua ua khoom fij rau hnub uas ua kevcai. Ces lawv thiaj yuav paub hais tias kuv yog tus TSWV.” Tus TSWV lub hwjchim los kav hlo kuv, ces nws tus ntsujplig txawm coj kuv mus rau hauv lub hav uas muaj pobtxha puv nkaus. Tus TSWV coj kuv mus ncig thoob plaws lub hav ntawd, kuv pom muaj pobtxha nyob hauv ntau kawg li; cov pobtxha ntawd qhuav tas lawm. Tus TSWV nug kuv hais tias, “Tub noobneej, tej pobtxha no puas yuav ciaj sia taus lawm?” Kuv teb hais tias, “Tus TSWV uas kav ib puas tsav yam, tsuas yog koj tib leeg thiaj paub xwb!” Tus TSWV hais rau kuv hais tias, “Koj cia li cev kuv tej lus rau cov pobtxha no. Koj hais rau cov pobtxha qhuav no kom cia li mloog tus TSWV tej lus. Koj hais rau cov pobtxha no hais tias, tus TSWV uas kav ib puas tsav yam hais rau nej li no: Kuv yuav tshuab pa rau nej kom nej ciaj sia. Kuv yuav muab leeg, muab nqaij, muab tawv los qhwv nej, thiab kuv yuav rau pa rau nej kom nej rov ciaj sia. Nej thiaj yuav paub hais tias kuv yog tus TSWV.” Kuv thiaj cev tus TSWV tej lus rau cov pobtxha no raws li tus TSWV hais rau kuv; thaum kuv tabtom hais, kuv txawm hnov cov pobtxha ntawd los sib dhos nrov nrij nrawj ua ke nyob raws li nyias chaw. Thaum kuv tsa qhovmuag ntsia, kuv pom muaj lees muaj nqaij rau saum cov pobtxha thiab muaj tawv hlav los qhwv cov nqaij; tiamsis tsis tau muaj sia li. Tus TSWV hais rau kuv hais tias, “Tub noobneej, koj cia li cev kuv tej lus rau tej cua. Koj hais rau cov cua hais tias tus TSWV uas kav ib puas tsav yam hais kom cua cia li tuaj plaub ceg kaum ntuj tuaj tshuab pa rau cov cev tuag no kom lawv rov ciaj sia.” Kuv txawm cev tus TSWV tej lus raws li nws hais rau kuv. Ces pa txawm nkag los rau hauv cov cev tuag ntawd, lawv txawm ciaj sia thiab sawv. Lawv coob npaum nkaus li ib pab tubrog coob coob. Tus TSWV hais rau kuv hais tias, “Tub noobneej, cov Yixalayees zoo li cov pobtxha no ntag. Lawv hais tias lawv qhuav tas lawm, lawv tsis muaj kev cia siab rau yav tom ntej li. Koj cia li cev kuv tej lus rau kuv haivneeg Yixalayees hais tias kuv yog tus TSWV uas kav ib puas tsav yam, kuv yuav qhib lawv tej qhov ntxa. Kuv yuav rho thiab coj lawv rov los rau hauv tebchaws Yixalayees. Thaum kuv qhib lawv tej qhov ntxa thiab rho lawv hauv tej qhov ntxa los, lawv thiaj yuav paub hais tias kuv yog tus TSWV. Kuv yuav muab kuv tus ntsujplig tso rau hauv lawv, mas lawv yuav ciaj sia thiab kuv yuav cia lawv nyob hauv lawv lub tebchaws. Lawv thiaj yuav paub hais tias kuv yog tus TSWV. Kuv yeej coglus tseg lawm hais tias kuv yuav ua tej no, ces kuv yuav ua li ntawd. Kuv yog tus TSWV uas hais li ntawd.” Tus TSWV hais rau kuv hais tias, “Tub noobneej, koj cia li muab ib tug pas ntoo los thiab sau npe ntawv rau tus pas ntawd hais tias, ‘Cov Yudas lub tebchaws.’ Thiab koj muab dua ib tug pas ntoo los sau dua ib cov npe ntawv rau tus pas ntawd hais tias, ‘Cov Yixalayees lub tebchaws.’ Ces koj muab ob tug pas ntawd, ob tog tw los sib twb ua ke ua ib tug. Thaum koj cov neeg nug koj hais tias qhov uas koj ua li ntawd yog txhais li cas, ces koj teb rau lawv hais tias tus TSWV uas kav ib puas tsav yam yuav muab tus pas ntoo uas piv txog cov Yixalayees los tuav twb rau tus pas ntoo uas piv txog cov Yudas. Kuv yuav tuav ob tug pas no ua ib tug rau hauv kuv txhais tes. “Koj cia li muab ob tug pas ntawd tuav ua ib teg rau hauv koj txhais tes tabmeeg rau sawvdaws pom. Koj hais rau lawv hais tias tus TSWV uas kav ib puas tsav yam hais tias, kuv yuav coj kuv haivneeg tawm hauv lwm lub tebchaws uas lawv mus nyob ntawd rov los nyob rau hauv lawv lub tebchaws. Kuv yuav muab lawv ua ib haivneeg nyob hauv lub tebchaws ntawd, saum cov Yixalayees tej roob thiab yuav muaj ib tug Vajntxwv kav lawv. Lawv yuav tsis ua ob haivneeg nyob ob lub tebchaws lawm. Lawv yuav tsis pe tej mlom uas ua rau lawv tsis huv lossis lawv tsis ua txhaum ntxiv li lawm. Kuv yuav pab kom lawv dim ntawm lawv tej kev txhaum thiab kev ntxeev siab rau kuv. Kuv yuav ntxuav kom lawv huv; lawv yuav ua kuv haivneeg thiab kuv yuav ua lawv tus Vajtswv. Muaj ib tug zoo li kuv tus tubtxib Daviv yuav los ua vajntxwv kav lawv. Lawv yuav koom ib tug vajntxwv, lawv yuav muab siab npuab thiab ua raws li kuv tej kevcai. Lawv yuav nyob hauv lub tebchaws uas kuv muab rau kuv tus tubtxib Yakhauj, yog lub tebchaws uas lawv cov yawgkoob ibtxwm nyob los lawm. Lawv tej menyuam thiab tej xeebntxwv yuav nyob hauv lub tebchaws ntawd mus ibtxhis. Muaj ib tug zoo ib yam li kuv tus tubtxib Daviv los ua vajntxwv kav lawv mus ibtxhis li. Kuv yuav coglus nrog lawv sib raug zoo kom lawv nyob tso siab lug mus ibtxhis. Kuv yuav foom koob hmoov rau lawv kom lawv huamvam coob, thiab kuv yuav tsa kuv lub Tuamtsev rau hauv lawv lub tebchaws mus ibtxhis. Kuv yuav nrog lawv nyob; kuv yuav ua lawv tus Vajtswv thiab lawv yuav ua kuv haivneeg. Thaum kuv tsa kuv lub Tuamtsev rau hauv lawv, txhua haivneeg yuav paub hais tias kuv yog tus TSWV uas xaiv cov Yixalayees los ua kuv haivneeg mus ibtxhis.” Tus TSWV hais rau kuv hais tias, “Tub noobneej, koj cia li cev kuv tej lus cem Nkos uas yog tus vajntxwv kav lub nroog Mesej thiab Tunpas uas nyob hauv tebchaws Mankos. Koj cia li cev kuv tej lus cem nws thiab hais rau nws hais tias tus TSWV uas kav ib puas tsav yam hais tias, kuv yog nws tus yeebncuab. Kuv yuav muab nws tig rov qab thiab muab nuv chob nws lub puabtsaig, cab nws, nws cov tubrog, nws cov nees thiab cov tubrog caij nees rov qab. Cov tubrog ntawd coob heev, lawv coj cuabyeej ua rog: coj daim thaiv hniav ntaj, sia siv thiab coj ntaj. Cov tubrog Pawxias, Sudas thiab Linpias los nrog nws tuaj, thiab tagnrho cov tubrog ntawd puavleej muaj daim thaiv hniav ntaj thiab muaj kausmom hlau. Cov tubrog uas nyob hauv Nkaumes thiab Npethes Taunkamas sab qaumteb thiab muaj lwm haivneeg tej tubrog coob heev nrog nws tuaj. Nkos thiab cov tubrog uas nws kav cia li npaj kom txhij. Ntau xyoo tom qab nws yuav mus ntaus lub tebchaws uas cov neeg nyuam qhuav rov hauv lwm tebchaws los nyob, thiab lawv nyob tsis ntshai kev tsov kev rog. Nws yuav mus vij cov Yixalayees tej roob uas nyob qhuav nquas tau ntau xyoo los lawm, tiamsis nimno cov neeg ntawd nyob tso siab lug. Nws thiab nws cov tubrog nrog lwm haivneeg cov tubrog ua ke mus ntaus rog ib yam li nthwv nagxob nagcua thiab ib yam li tauv huab los roos lub tebchaws.” Tus TSWV uas kav ib puas tsav yam hais rau Nkos hais tias, “Thaum txog lub sijhawm ntawd koj yuav xav thiab npaj ua phem. Koj hais tias, ‘Kuv yuav mus vij lub tebchaws uas tej zos tsis muaj ntsa yeej thaiv; kuv yuav tua cov neeg uas nyob tso siab lug. Lawv tej zos tsis muaj ntsa yeej thiab tsis muaj roojvag thaiv.’ Koj yuav huab cov neeg uas nyob hauv cov nroog uas yav tas los twb raug puastsuaj ib zaug lawm. Lawv tawm hauv lwm tebchaws rov los sib sau ua ke, nimno lawv muaj tsiaj txhu, muaj tebchaws thiab nyob hauv plawv ntiajteb. Cov neeg Senpas, Dedas, thiab cov tub lag tub luam uas nyob hauv cov nroog tim tebchaws Xapees yuav tuaj nug koj hais tias, ‘Koj twb txhij tau tubrog mus tua rog thiab huab khoom lawm los? Puas yog koj xav tau nyiaj tau kub, tsiaj txhu, thiab khoom noj khoom haus nplua mias rov los tsev?’ ” Tus TSWV uas kav ib puas tsav yam hais kom kuv mus cev tus TSWV tej lus rau Nkos hais tias, “Nimno, kuv haivneeg Yixalayees nyob tso siab lug, koj yuav sawv kev ntawm koj qhov chaw uas nyob sab qaumteb coj koj cov tubrog thiab lwm haivneeg cov tubrog uas coob heev tuaj, cov tubrog ntawd txhua tus puavleej caij nees. Koj yuav tuaj tua kuv haivneeg Yixalayees ib yam li nagxob nagcua los thoob plaws lub tebchaws. Thaum txog lub sijhawm ntawd, kuv yuav kom koj mus tua kuv lub tebchaws. Qhov uas kuv cia koj ua li ntawd ua rau ntau haivneeg paub hais tias kuv yog tus TSWV uas dawbhuv. Koj yog tus uas ntau xyoo dhau los kuv cov tubtxib uas yog cov Yixalayees cov cev Vajtswv lus tau hais tias txog thaum ntawd kuv yuav coj koj tuaj tua cov Yixalayees.” Tus TSWV uas kav ib puas tsav yam hais li ntawd. Tus TSWV uas kav ib puas tsav yam hais tias, “Hnub uas Nkos tuaj tua cov Yixalayees, kuv yuav chim heev. Thaum kuv chim thiab npautaws, kuv txojkev chim yuav kub cuag hluavtaws, hnub ntawd av yuav qeeg loj heev nyob hauv cov Yixalayees lub tebchaws. Tej ntses, tej noog, tej tsiaj loj tsiaj me thiab txhua tus neeg uas nyob hauv ntiajteb puavleej ntshai kuv tshee hnyo. Tej roob siab yuav nphau, tej roob zeb roob tsuas yuav ua zog koog thiab tej ntsa yeej yuav pob tas. Kuv yuav tso kev puastsuaj los ua rau Nkos ntshai heev, ces Nkos cov tubrog yuav rho ntaj rov sib tua. Kuv yog tus TSWV uas kav ib puas tsav yam hais li ntawd. Kuv yuav rau txim rau Nkos kom raug kab mob thiab muaj kev sib ntaus sib tua. Kuv yuav tso nagxob nagcua nrog lawg thiab nplaim hluavtaws leejfaj los rau nws, nws cov tubrog thiab lwm haivneeg cov tubrog. Qhov uas kuv ua li ntawd yog qhia rau lwm haivneeg paub hais tias kuv yog tus muaj hwjchim loj thiab yog tus uas dawbhuv. Lawv thiaj yuav paub hais tias kuv yog tus TSWV.” Tus TSWV uas kav ib puas tsav yam hais tias, “Tub noobneej, koj cia li cev kuv tej lus tawmtsam Nkos uas yog vajntxwv kav lub nroog Mesej thiab Tunpas hais tias kuv yog nws tus yeebncuab. Kuv yuav muab nws tig mus rau lwm txojkev thiab coj nws kev deb heev pem sab qaumteb tuaj kom txog rau ntawm cov Yixalayees tej roob. Kuv yuav ntaus nws rab hneevnti kom poob ntawm nws sab teslaug thiab ntaus nws cov xub kom poob ntawm nws sab tes xis. Nkos thiab nws cov tubrog, thiab lwm haivneeg cov tubrog uas koom nrog nws yuav tuag tas rau saum cov Yixalayees tej roob; kuv yuav cia noog thiab tej tsiaj qus los noj lawv tej cev tuag. Lawv yuav tuag tas rau tom tej tiaj nrag. Kuv yog tus TSWV uas kav ib puas tsav yam hais li ntawd. Kuv yuav tso hluavtaws hlawv tebchaws Mankos thiab cov nroog uas nyob raws ntug dej hiavtxwv uas tej neeg nyob kaj siab lug, lawv thiaj yuav paub hais tias kuv yog tus TSWV. Kuv yuav ua kom kuv haivneeg Yixalayees paub kuv lub npe uas dawbhuv, thiab kuv yuav tsis cia kuv lub npe raug luag txob thuam ntxiv lawm. Txhua haivneeg thiaj yuav paub hais tias kuv yog tus TSWV uas yog cov Yixalayees tus Vajtswv uas dawbhuv.” Tus TSWV uas kav ib puas tsav yam hais tias, “Hnub uas kuv hais tseg ntawd yeej yuav muaj tshwm los xwb. Cov neeg uas nyob hauv cov Yixalayees tej nroog yuav tawm mus khaws tej cuabyeej ua rog: Tej thaiv hniav ntaj, tej hneevnti, tej xub, tej hmuv thiab tej qws los cia ua taws txaus rauv xya lub xyoo. Lawv yuav tsis tau mus txiav taws hauv tej teb lossis tom tej havzoov rau qhov lawv tau tej cuabyeej ua rog ntawd ua taws rauv lawm. Cov Yixalayees yuav mus tua thiab huab cov neeg uas tau tuaj tua thiab huab lawv yav tas los lawm.” Tus TSWV uas kav ib puas tsav yam hais li ntawd. Tus TSWV hais tias, “Hnub ntawd kuv yuav muab cov Neeg taug kev lub Hav hauv tebchaws Yixalayees uas nyob sab hnubtuaj ntawm ntug Hiavtxwv Tuag rau Nkos ua chaw faus tuag. Luag yuav muab Nkos thiab nws cov tubrog faus rau hauv lub hav ntawd. Ces luag yuav hu lub hav ntawd hais tias, ‘Nkos cov Tubrog lub Hav.’ Cov Yixalayees faus cov neeg tuag ntawd xya lub hlis mam tas, ces lub tebchaws thiaj rov huv. Cov neeg uas nyob hauv tebchaws sib pab muab cov neeg tuag ntawd faus; ces hnub uas kuv muaj yeej, cov neeg uas faus cov tuag ntawd yuav tau koob meej. Kuv yog tus TSWV uas kav ib puas tsav yam hais li ntawd. Tom qab xya lub hlis lawm lawv yuav xaiv ib cov txivneej mus ncig lub tebchaws nrhiav cov neeg tuag uas seem thiab muab faus lub tebchaws thiaj huv. Thaum cov txivneej ntawd mus nrhiav pom cov neeg tuag tej pobtxha, ces lawv rhais cim rau ntawm cov pobtxha ib sab, cov neeg faus tuag mam li coj cov pobtxha ntawd mus faus rau hauv Nkos cov tubrog lub hav. (Luag yuav tis npe rau ib lub nroog nyob ntawd hu ua Hamaunas.) Ces lub tebchaws thiaj huv lawm.” Tus TSWV uas kav ib puas tsav yam hais rau kuv hais tias, “Tub noobneej, koj cia li hu tej noog thiab tej tsiaj qus uas nyob puagncig ntawd tuaj noj tej khoom fij uas kuv yuav muab rau lawv noj. Muaj ib rooj noj haus loj nyob rau saum cov Yixalayees tej roob, lawv yuav tuaj noj nqaij thiab haus ntshav. Tej noog thiab tej tsiaj qus yuav tuaj noj cov tubrog tej nqaij thiab haus cov nomtswv uas kav ntiajteb tej ntshav ib yam li haus tej laug yaj, tej menyuam yaj, tej tshis thiab tej txiv nyuj uas rog cov ntshav hauv tebchaws Npasas. Thaum kuv tua cov neeg ntawd ib yam li tua tsiaj ua khoom fij, tej noog thiab tej tsiaj qus yuav noj tej roj ua rau lawv dhuav thiab haus tej ntshav ua rau lawv qaug. Tej noog thiab tej tsiaj qus yuav tau noj tej nqaij nees, cov tubrog caij nees, cov nomtswv, thiab txhua tus tubrog uas nyob saum kuv lub rooj. Kuv yog tus TSWV uas kav ib puas tsav yam hais li ntawd.” Tus TSWV hais tias, “Kuv yuav ua kom txhua haivneeg pom kuv lub tshwjchim uas ci ntsa iab, thaum uas kuv txiav txim rau txhua haivneeg. Txij thaum ntawd los cov Yixalayees yuav paub hais tias kuv yog tus TSWV uas yog lawv tus Vajtswv. Txhua haivneeg yuav paub hais tias qhov uas cov Yixalayees raug ntes mus nyob rau lwm tebchaws vim lawv tau ua kev txhaum tawmtsam kuv. Kuv tso lawv tseg lawv thiaj raug yeebncuab tej hniav ntaj tuag rau hauv tshavrog. Kuv rau txim rau lawv raws li lawv tej kev phem kev qias thiab ua tsis huv, kuv thiaj tso lawv tseg lawm.” Tus TSWV uas kav ib puas tsav yam hais tias, “Nimno kuv yuav hlub Yakhauj cov xeebntxwv uas yog haivneeg Yixalayees, thiab ua kom lawv rov vammeej dua. Kuv yuav hwm kuv lub npe uas dawbhuv. Thaum lawv rov los nyob kaj siab lug hauv lawv lub tebchaws yuav tsis muaj leejtwg tuaj ua phem rau lawv, lawv yuav tsis nco txog lawv txojkev txajmuag uas lawv tau ntxeev siab rau kuv lawm. Kuv yuav coj kuv haivneeg uas raug ntiab mus nyob rau lwm haivneeg uas yog lawv cov yeebncuab tej tebchaws rov qab los. Thaum ntawd txhua haivneeg thiaj yuav paub hais tias kuv yog tus Vajtswv uas dawbhuv. Kuv haivneeg thiaj yuav paub hais tias kuv yog tus TSWV uas yog lawv tus Vajtswv. Lawv yuav paub zaj no zoo, rau qhov kuv cia lawv raug luag ntes mus nyob rau lwm tebchaws; nimno kuv coj lawv rov los nyob rau hauv lawv lub tebchaws, tsis tseg ib tug nyob rau lwm tebchaws li. Kuv yuav pub kuv tus ntsujplig rau kuv haivneeg Yixalayees, kuv yuav tsis tso lawv tseg ib zaug li lawm. Kuv yog tus TSWV uas kav ib puas tsav yam hais li ntawd.” Hnub xiab kaug lub xyoo tshiab uas yog xyoo nees nkaum tsib uas peb raug ntes mus, thiab tom qab kaum plaub xyoos uas luag tuaj txeeb tau lub nroog Yeluxalees. Hnub ntawd tus TSWV lub hwjchim los kav hlo kuv thiab coj kuv mus. Hauv zaj yogtoog ntawd Vajtswv coj kuv mus tso rau saum ib lub roob siab siab hauv lub tebchaws Yixalayees. Nyob ntawm kuv hauv ntej kuv pom ib koog tsev zoo li ib lub nroog nyob sab qabteb. Thaum nws coj kuv mus ze lub nroog ntawd kuv pom ib tug neeg ci ib yam li tooj dag. Nws tuav rawv ib txoj hlua ntaubmag thiab ib tug pas ntsuas sawv ntawm roojvag. Nws hais rau kuv hais tias, “Tub noobneej, koj cia li tsa qhovmuag saib. Koj ua tib zoo mloog thiab nco tej lus uas kuv hais rau koj. Kuv coj koj tuaj yog xav qhia tej no rau koj; koj cia li mus qhia txhua yam uas koj pom rau cov Yixalayees.” Kuv pom ib tug ntsa yeej uas xov puagncig lub Tuamtsev. Tus txivneej ntawd txawm muab nws tus pas uas ntev rau tshim coj los ntsuas tus ntsa yeej qhov tuab muaj rau tshim thiab qhov siab muaj rau tshim. Ces nws mus rau ntawm lub roojvag sab hnubtuaj. Nws nce ntaiv mus rau theem saud, nws ntsuas lub roojvag qhov tob muaj rau tshim. Nyob ntawm lub roojvag sab tod muaj ib txojkev, txojkev ntawd ib sab twg muaj peb lub chaw fajxwm. Cov chaw ntawd ib chav twg qhov dav muaj rau tshim, qhov ntev muaj rau tshim, thiab tej phabntsa uas quas cov chaw ntawd tuab tsib tshim. Muaj dua ib txojkev nyob sab nraud ntev rau tshim, txojkev ntawd mus rau hauv sab uas tig rau ntawm lub Tuamtsev. Txojkev uas mus rau hauv lub Tuamtsev, ib sab twg muaj peb lub chaw fajxwm, cov chaw fajxwm ntawd qhov dav thiab qhov ntev ib yam nkaus, thiab tej sab phabntsa uas quas cov chav ntawd los tuab ib yam nkaus.) Tus txivneej ntawd ntsuas lub roojvag qhov dav muaj kaum tshim, thiab qhov ntev muaj kaum peb tshim. Sab phabntsa ntawm hauv ntej cov chav fajxwm, qhov siab muaj ib tshim thiab qhov tuab muaj ib tshim. (Cov chaw ntawd txhua chav puavleej dav rau tshim.) Nws ntsuas cov chaw ntawm sab phabntsa tom qab ib chav rau ib chav hla txojkev ntawd muaj nees nkaum tsib tshim. Nws ntsuas chav uas mus rau ntawm lub tshavpuam, qhov dav muaj rau caum tshim. Nws ntsuas lub roojvag sab phabntsa nraud mus rau sab phabntsa hauv muaj tsib caug tshim. Nyob ntawm tus ntsa loog sab nraud muaj ib co qhovrai qhib thiab sab ntsa loog hauv luag txaug tej duab toovlaj rau. Tus txivneej ntawd coj kuv ntawm lub roojvag mus rau hauv lub tshavpuam. Nyob raws tus ntsa loog sab hauv muaj peb caug chav uas tig tuaj rau ntawm lub tshavpuam, thiab sab nraum cov chav ntawd luag muab pobzeb pua puagncig lub tshavpuam. Lub tshavpuam sab nraud qis dua lub tshavpuam sab hauv. Nws ntsuas lub roojvag theem qis sab hauv mus rau ntawm lub roojvag theem siab sab nraud muaj ib puas tshim. Ces tus txivneej ntawd ntsuas ntawm lub roojvag sab qaumteb mus rau ntawm lub tshavpuam uas nyob sab nraud. Nws ntsuas cov chaw fajxwm uas peb lub nyob rau ib sab kev, cov phabntsa uas quas cov chav thiab txojkev uas nkag sab nraud los dav thiab tuab ib yam nkaus li cov uas nyob ntawm lub roojvag sab hnubtuaj. Lub roojvag qhov ntev muaj sib caug tshim thiab qhov dav muaj nees nkaum tsib tshim. Cov chav, cov qhovrai thiab cov duab toovlaj uas luag txaug rau ntawm cov phabntsa zoo ib yam li cov uas luag txaug rau ntawm cov roojvag uas nyob sab hnubtuaj thiab. Muaj xya theem qib ntai nce mus rau saum lub roojvag uas nkag mus rau hauv lub tshavpuam. Ncaj ntawm lub roojvag sab qaumteb los muaj ib lub roojvag mus rau lub tshavpuam sab hauv zoo ib yam li lub roojvag uas nyob sab hnubtuaj. Tus txivneej ntawd ntsuas qhov deb ntu nruab nrab ntawm ob lub roojvag ntawd muaj ib puas tshim. Tus txivneej ntawd coj kuv mus rau sab qabteb; nyob nrad muaj ib lub roojvag thiab. Nws ntsuas cov phabntsa sab hauv thiab lub roojvag dav thiab tuab ib yam li lub roojvag sab qaumteb thiab lub sab hnubtuaj. Lub roojvag ntawd muaj qhovrai ib yam li lwm lub roojvag thiab. Lub roojvag ntawd qhov ntev muaj tsib caug tshim thiab qhov dav muaj nees nkaum tsib tshim. Muaj xya theem qib ntai nce mus rau saum lub roojvag uas nkag mus rau hauv lub tshavpuam. Luag txaug tej tsob duab toovlaj rau ntawm ob sab phabntsa hauv raws txojkev. Tus txivneej ntawd ntsuas ntawm lub roojvag sab qabteb los rau ntawm lub tshavpuam uas nyob sab hauv muaj ib puas tshim. Tus txivneej ntawd coj kuv ntawm lub roojvag sab qabteb mus rau ntawm lub tshavpuam sab hauv. Nws ntsuas lub roojvag ntawd txhua phab, qhov ntev thiab qhov dav ib yam nkaus li lwm lub roojvag thiab. Lub roojvag uas tig rau ntawm lub tshavpuam sab nraud muaj tej duab toovlaj uas luag txaug rau ntawm ob sab phabntsa raws txojkev. Muaj yim theem qib ntai nce mus rau saum lub roojvag. Tus txivneej ntawd coj kuv ntawm lub roojvag sab hnubtuaj mus rau ntawm lub tshavpuam sab hauv. Nws ntsuas lub roojvag ntawd txhua phab, qhov ntev thiab qhov dav ib yam li lwm lub roojvag thiab. Cov chaw fajxwm, cov roojvag thiab cov phabntsa uas nyob sab hauv puavleej dav thiab tuab ib yam li lwm lub roojvag thiab. Tej chav ntawd puavleej muaj qhovrai nyob puagncig. Lub roojvag qhov ntev muaj tsib caug tshim thiab qhov dav muaj nees nkaum tsib tshim. Lub roojvag uas tig rau ntawm lub tshavpuam sab nraud. Luag txaug tej duab toovlaj rau ob sab phabntsa raws txojkev. Muaj yim theem qib ntai nce mus rau saum lub roojvag. Ces tus txivneej ntawd coj kuv mus rau ntawm lub roojloog sab qaumteb. Nws ntsuas lub roojvag ntawd, qhov ntev thiab qhov dav ib yam li lwm lub roojvag thiab. Cov chaw fajxwm, tej duab uas txaug rau ntawm tej phabntsa sab hauv, cov roojvag thiab tej qhovrai uas nyob puagncig cov chav ntawd puavleej dav thiab tuab ib yam li lwm lub roojvag thiab. Lub roojvag ntawd qhov ntev muaj tsib caug tshim thiab qhov dav muaj nees nkaum tsib tshim. Lub roojvag uas tig rau ntawm lub tshavpuam sab hauv. Muaj tej duab toovlaj uas luag txaug rau ntawm ob sab phabntsa raws txojkev. Muaj yim theem qib ntai nce mus rau saum lub roojvag. Nyob ntawm lub tshavpuam sab nraud muaj ib chav txuas nkaus lub roojvag sab hauv uas nyob sab qaumteb. Luag siv chav ntawd ntxuav tej tsiaj uas yuav coj mus hlawv ua khoom fij. Chav uas nyob ntawm lub roojvag muaj plaub lub rooj, ib sab txawb ob lub. Lawv muab tej tsiaj uas ua khoom fij coj los tua rau saum plaub lub rooj ntawd, tsis hais tej tsiaj uas yuav muab hlawv theej txhoj lossis daws txim. Nyob rau hauv chav sab nraud muaj plaub lub rooj zoo ib yam li plaub lub uas nyob sab hauv thiab, ib sab roojvag txawb ob lub rooj rau sab ped. Tagnrho yog muaj yim lub rooj uas coj tej tsiaj ua khoom fij tuaj tua rau saud: Plaub lub nyob rau sab hauv thiab plaub lub nyob rau sab nraum lub tshavpuam. Plaub lub rooj uas nyob sab hauv yog siv tua cov tsiaj uas hlawv ua khoom fij; cov rooj ntawd muab pobzeb txaug ua. Qhov siab muaj ib tshim, qhov dav thiab qhov ntev puavleej muaj ib tshim thiab ib dos. Tej cuabyeej uas lawv siv tua tej tsiaj ua khoom fij, lawv muab cia rau saum cov rooj ntawd. Muaj ib co nqelauj ntev li tus ntivtes ntsia thoob plaws rau ntawm cov phabntsa. Tej nqaij uas tua ua khoom fij lawv muab tso rau saum cov rooj ntawd. Nws coj kuv mus rau hauv lub tshavpuam sab hauv. Nyob hauv muaj ob chav, chav uas nyob ntawm lub roojvag sab qaumteb tig rau sab qabteb thiab chav uas nyob ntawm lub roojvag sab qabteb tig rau sab qaumteb. Tus txivneej ntawd hais rau kuv hais tias cov povthawj uas ua haujlwm hauv lub tuamtsev nyob hauv chav uas tig rau sab qabteb, thiab cov povthawj uas hlawv tsiaj fij rau saum lub thaj nyob hauv chav uas tig mus rau sab qaumteb. Cov povthawj ntawd yog Xadaus cajces; lawv puavleej yog xeem Levis thiab yog cov uas muaj cai mus cuag tau tus TSWV. Tus txivneej ntawd ntsuas lub tshavpuam sab hauv qhov dav thiab qhov ntev muaj ib puas tshim ib yam nkaus. Lub tuamtsev nyob rau sab hnubpoob thiab lub thaj nyob ntawm hauv ntej lub Tuamtsev. Nws coj kuv mus rau ntawm lub qhovrooj uas mus rau hauv lub Tuamtsev. Nws ntsuas lub qhovrooj ntawd qhov siab muaj tsib tshim thiab qhov dav muaj kaum plaub tshim, thiab ob tug ncej qhovrooj tuab peb tshim. Cov qib ntai uas nce mus rau saum lub qhovrooj, qhov ntev muaj nees nkaum tshim thiab qhov dav muaj kaum ob tshim, thiab muaj ob sab phabntsa nyob ntawm ob sab qhovrooj. Tom qab ntawd tus txivneej ho coj kuv mus rau chav hauv plawv uas yog Chav Dawbhuv. Nws ntsuas cov ncej ib sab twg dav rau tshim thiab lub qhovrooj dav kaum tshim, ob sab phabntsa ntawm lub qhovrooj ib sab twg tuab tsib tshim. Nws ntsuas lub cheeb hauv chav ntawd qhov ntev muaj plaub caug tshim thiab qhov dav muaj nees nkaum tshim. Nws mus rau chav hauv plawv thiab ntsuas cov ncej ntawm lub qhovrooj muaj ob tshim, lub qhovrooj dav rau tshim, thiab ob sab phabntsa ib sab twg tuab xya tshim. Nws ntsuas chav ntawd lub cheeb, qhov dav thiab qhov ntev muaj nees nkaum tshim ib yam nkaus. Chav no yog chav uas nyob hauv plawv. Nws hais rau kuv hais tias, “Chav no yog Chav uas Dawbhuv kawg nkaus.” Tus txivneej ntawd ntsuas lub Tuamtsev sab phabntsa sab hauv qhov tuab muaj rau tshim. Muaj tej chav me me dav plaub tshim raws lub Tuamtsev sab phabntsa. Cov chav ntawd luag ua peb tshooj, ib tshooj twg muaj peb caug chav. Cov phabntsa uas xov txhua chav ntawd, tshooj saud nyias dua tshooj hauv qab, ua li ntawd los txog tshooj kawg hauv qab. Yog li ntawd, cov phabntsa thiaj txheem taus tej tshooj ntawd khov, tsis tas ntsia cov phabntsa rau ntawm lub Tuamtsev li. Yog tuaj sab nraud saib lub Tuamtsev cov phabntsa txij ntua hauv taw ntsa mus nto rau saum tus nqajtsuag tuab ib yam nkaus. Muaj ob tug ntaiv raws lub Tuamtsev sab phabntsa nraum cov chav mus rau saud ib tshooj rau ib tshooj. Lub tsev nyob sab hnubpoob uas tig tuaj rau ntawm lub Tuamtsev lub tshavpuam, qhov dav muaj xya caum tshim, qhov ntev muaj cuaj caum tshim thiab cov phabntsa tuab tsib tshim. Tus txivneej ntawd ntsuas thoob plaws lub Tuamtsev sab nraud qhov ntev muaj ib puas tshim. Thiab sab tom qab lub Tuamtsev mus rau ntawm lub tsev uas nyob sab hnubpoob muaj ib puas tshim; qhov dav ntawm hauv ntej lub Tuamtsev sab hnubtuaj thiab lub tshavpuam muaj ib puas tshim thiab. Nws ntsuas lub tsev qhov ntev mus rau sab hnubpoob nrog ob tog momkaum muaj ib puas tshim. Lub qhovrooj uas mus rau hauv lub Tuamtsev, Chav Dawbhuv, thiab Chav uas Dawbhuv kawg nkaus puavleej yog muab txiag ntoo xov hauv taw ntsa mus nto plaws rau saum cov qhovrai. Cov qhovrai puavleej muaj daim kaw. Cov phabntsa sab hauv lub Tuamtsev, luag txaug duab thoob plaws hauv taw ntsa mus rau saud txij nkaus cov qhovrooj yog txaug ua duab toovlaj thiab duab qhelunpees, ib tug quas ib tug thoob plaws sab phabntsa. Ib tug qhelunpees twg muaj ob lub ntsejmuag: Lub ntsejmuag neeg tig rau sab uas muaj tsob toovlaj, lub ntsejmuag tsov ntxhuav tig dua rau lwm sab uas muaj tsob toovlaj thiab. Txaug li ntawd thoob plaws cov phabntsa hauv taw ntsa mus txij nkaus cov qhovrooj. Cov ncej qhovrooj ntawm Chav Dawbhuv ua plaub fab. Ntawm hauv ntej Chav uas Dawbhuv kawg nkaus muaj ib yam zoo li lub thaj uas muab ntoo txua, qhov siab muaj peb tshim thiab qhov dav muaj ob tshim. Cov ceg, tus tab, thiab cov thaiv puavleej yog ntoo. Tus txivneej ntawd hais rau kuv hais tias, “Lub rooj no yog lub uas txawb rau ntawm tus TSWV xubntiag.” Muaj dua ib lub qhovrooj mus rau ntawm Chav Dawbhuv thiab muaj ib lub mus rau hauv Chav uas Dawbhuv kawg nkaus. Ob lub qhovrooj ntawd puavleej muaj ob daim txiag qhovrooj uas qhib tau rau ob sab. Luag txaug tej duab toovlaj thiab tej duab qhelunpees rau cov txiag qhovrooj ntawm Chav Dawbhuv ib yam li cov uas luag txaug rau ntawm tej phabntsa. Thiab luag muab ntoo los ntsia ua lub qhovrooj sab nraud. Chav ntawm ob sab phabntsa puavleej muaj qhovrai, thiab luag txaug tej duab toovlaj rau ntawm cov phabntsa. Tus txivneej ntawd coj kuv mus rau ntawm lub tshavpuam sab nraud thiab coj kuv mus rau hauv lub tsev uas nyob sab qaumteb ntawm lub Tuamtsev. Lub tsev ntawd nyob tsis deb lub tsev uas nyob rau sab hnubpoob ntawm lub Tuamtsev. Lub tsev no qhov ntev muaj ib puas tshim thiab qhov dav muaj tsib caug tshim. Sab uas tig rau ntawm lub Tuamtsev qhov dav ntawm lub tsev ntawd mus rau ntawm lub Tuamtsev muaj nees nkaum tshim, thiab ib sab tig rau ntawm lub tshavpuam sab nraum uas luag muab pobzeb pua lawm. Lub tsev ntawd ua peb tshooj, ib tshooj txuas ib tshooj. Lub tsev no sab nrad muaj ib txojkev tshab plaws hauv, dav kaum tshim thiab ntev ib puas tshim thiab muaj qhovrooj mus rau hauv tej chav. Cov chav uas nyob tshooj saum kawg nqaim dua cov chav uas nyob tshooj nruab nrab thiab tshooj hauv qab kawg, rau qhov ob tshooj saud luag tseg qabkhav dav dua. Cov chav ntawm peb tshooj ntawd puavleej ua sib txuas, yog li ntawd thiaj tsis muaj ncej txheem ib yam li cov tsev uas nyob rau hauv lub tshavpuam. Muaj ib txojkev tshab plaws hauv lub tsev ntawd ib yam li lub pem sab qaumteb, thiab txojkev ntawd qhov dav thiab qhov ntev los zoo ib yam, thiab puavleej muaj qhovrooj mus rau hauv tej chav ib yam nkaus. Hauv qab cov chav ntawm lub tsev sab nrad muaj ib lub qhovrooj nyob ntawm sab phabntsa uas nyob sab hnubtuaj los xaus. Tus txivneej ntawd hais rau kuv hais tias, “Ob lub tsev no puavleej dawbhuv. Cov povthawj uas mus cuag tus TSWV nqa tej khoom fij dawbhuv los noj rau hauv ob lub tsev no. Rau qhov cov chav ntawd dawbhuv, cov povthawj thiaj coj tej khoom fij uas dawbhuv los tso rau hauv: tej qoobloo, tej tsiaj theej txhoj daws txim lossis ntxuav kev txhaum. Thaum cov povthawj mus rau hauv lub Tuamtsev lawm, yog lawv yuav tawm mus rau sab nraud lub tshavpuam, lawv yuav tsum muab tej tsho dawbhuv uas lawv hnav pehawm tus TSWV hle cia thiab hloov dua khaubncaws mam li tawm mus rau sab nraud uas muaj neeg.” Thaum tus txivneej ntawd ntsuas lub Tuamtsev sab hauv tas lawm, nws coj kuv ntawm lub roojvag sab hnubtuaj mus rau sab nraud thiab ntsuas puagncig lub Tuamtsev sab nraud. Nws nqa tus pas ntsuas mus ntsuas sab hnubtuaj ntawm lub Tuamtsev muaj tsib puas tshim. plaub phabntsa loog ntawd, ib phab twg ntev tsib puas tshim. Tus ntsa loog quas qhov dawbhuv thiab qhov uas tsis dawbhuv. Tus txivneej ntawd coj kuv mus rau ntawm lub roojvag uas tig mus rau sab hnubtuaj, kuv pom cov Yixalayees tus Vajtswv lub tshwjchim ci ntsa iab sab hnubtuaj tuaj. Vajtswv lub suab nrov nroo ntws ib yam li dej hiavtxwv ntas, ces tus TSWV lub tshwjchim ci ntsa iab rau lub ntiajteb. Zaj yogtoog no zoo ib yam li zaj uas kuv pom thaum Vajtswv rhuav lub nroog Yeluxalees, thiab zaj uas kuv pom nyob ntawm ntug Dej Khenpales. Ces kuv cia li txhos caug ntua thiab nyo ntshis rau hauv av. Tus TSWV lub tshwjchim los ntawm lub roojvag sab hnubtuaj mus rau hauv lub Tuamtsev. Tus TSWV tus ntsujplig los kav hlo kuv thiab coj kuv mus rau ntawm lub tshavpuam sab hauv; kuv pom tus Tswv lub tshwjchim ci ntsa iab thoob plaws lub Tuamtsev. Tus txivneej ntawd sawv ntawm kuv ib sab, ces kuv hnov tus TSWV hais lus hauv lub Tuamtsev tuaj rau kuv tias, “Tub noobneej, ntawm no yog kuv lub zwmtxwv. Kuv yuav nrog cov Yixalayees nyob thiab kav lawv mus ibtxhis li. Tsis hais cov Yixalayees lossis lawv cov vajntxwv yuav tsis mus pe lwm haivneeg tej vajtswv thiab tsis nyob ze lawv tej vajntxwv tej cev tuag, ua rau kuv lub npe uas dawbhuv raug txob thuam. Cov vajntxwv ntawd ua lawv lub loog tej qhovrooj, tej pawsrooj, thiab tej ncej qhovrooj ncaj kuv lub Tuamtsev tej pawsrooj thiab tej ncej qhovrooj, tsuas yog muaj tib sab phabntsa quas lawv thiab kuv nkaus xwb. Lawv ua rau kuv lub npe uas dawbhuv raug txob thuam vim txojkev phem kev qias uas lawv ua; kuv chim, kuv thiaj ua rau lawv puastsuaj tas. Txij no mus lawv yuav tsum tseg tsis txhob pe lwm haivneeg tej vajtswv thiab tshem lawv cov vajntxwv tej cev tuag kom deb ntawm kuv. Yog lawv ua li ntawd, kuv yuav nrog lawv nyob mus ibtxhis.” Tus TSWV hais rau kuv hais tias, “Tub noobneej, koj cia li qhia tus qauv ua lub Tuamtsev no rau cov Yixalayees kom lawv txajmuag rau tej kev txhaum uas lawv tau ua lawm. Yog lawv paub txajmuag rau tej uas lawv tau ua tas los lawm, koj mam li qhia tus qauv uas ua lub Tuamtsev rau lawv paub: Daim duab tsev, txojkev los thiab txojkev tawm, lub cheeb tsev, txhua yam uas ua lub Tuamtsev, tej kev kevcai thiab kev tswjhwm huv tibsi. Koj cia li sau txhua yam no qhia rau lawv, kom lawv paub hais tias yuav ua li cas thiaj npaj tau thiab ua tau raws li tus qauv thiab tej kevcai. Ntawm no yog lub Tuamtsev txoj kevcai: Puagncig lub tuamtsev mus rau saum tej pov roob puavleej yog qhov chaw dawbhuv.” Ntawm no yog ntsuas lub thaj, yog siv tib tug pas uas ntsuas lub Tuamtsev. Lub thaj ntawd tus taw puagncig siab ib tshim thiab dav ib tshim, thiab puab ib daim ua tus ntug raws tus taw siab ib dos. Txij ntawm tus taw hauv av mus rau saum ntu me siab ob tshim dav ib tshim; txij ntawm ntu me mus rau saum ntu loj siab plaub tshim thiab dav ib tshim. Lub thaj theem kawg saud siab plaub tshim, lub ncauj nthuav thiab muaj plaub tug kub nyob ntawm plaub ceg kaum. Lub thaj ua plaub fab, ib fab twg muaj kaum ob tshim. Lub npoo thaj qhov loj nthuav ua plaub fab, ib fab twg muaj kaum plaub tshim, thiab tus puab npoo dav ib dos. (Tus npoo thaj dav ib tshim.) Tus ntaiv nyob rau sab hnubtuaj. Tus TSWV uas kav ib puas tsav yam hais rau kuv hais tias, “Tub noobneej, koj cia li mloog tej lus uas kuv hais. Thaum ua tau lub thaj lawm, koj cia li tua tsiaj hlawv fij rau saud thiab muab cov ntshav nchos rau saud ua kevcai fij lub thaj. Cov povthawj xeem Levis uas yog Xadaus cajces thiaj yog cov uas tuaj cuag tau kuv thiab fij khoom rau kuv xwb. Kuv yog tus TSWV uas kav ib puas tsav yam hais li ntawd. Koj muab ib tug ntsuag nyuj rau lawv tua fij daws txim. Koj muab ib co ntshav mus nchos rau plaub tug kub saum plaub ceg kaum thaj thiab thoob plaws lub npoo thaj. Qhov uas koj ua li no yog ua kevcai ntxuav kom lub thaj huv. Koj muab tus nyuj uas tua fij daws txim coj mus hlawv fij rau ntawm lub Tuamtsev sab nraud. Hnub tom qab koj muab ib tug laug tshis uas tsis muaj ib qho phem li coj los tua fij daws txim; thiab koj muab cov ntshav nchos rau saum lub thaj ua kevcai ntxuav ib yam li koj muab cov ntshav nyuj ua lawm. Thaum uas koj ua kevcai ntxuav li ntawd tas lawm, koj muab ib tug ntsuag nyuj thiab ib tug thav yaj uas tsis muaj ib qho phem li coj los rau kuv. Cov povthawj yuav muab ntsev nphoo rau ob tug tsiaj ntawd thiab muab tua hlawv fij rau kuv. Xya hnub ntawd, ib hnub twg koj yuav tsum muab ib tug thav tshis, ib tug ntsuag nyuj, thiab ib tug thav yaj uas tsis muaj ib qho phem li los tua ua khoom fij daws txim kom txwm xya hnub. Xya hnub ntawd cov povthawj ua kevcai ntxuav lub thaj kom tiav. Thaum dhau xya hnub ntawd lawm, hnub yim cov povthawj mam pib fij khoom rau saum lub thaj, hlawv khoom theej txhoj thiab fij khoom ua kev sib raug zoo. Ces kuv yuav txaus siab rau nej sawvdaws. Kuv yog tus TSWV uas kav ib puas tsav yam hais li ntawd.” Tus txivneej ntawd coj kuv mus rau ntawm lub roojvag sab nraud uas nyob ntawm lub Tuamtsev sab hnubtuaj. Lub roojvag ntawd luag muab kaw lawm, thiab tus TSWV hais rau kuv hais tias, “Lub roojvag no yuav kaw thiab tsis qhib. Tsis pub leejtwg qhib thiab mus lub roojvag no li, rau qhov tus TSWV uas yog cov Yixalayees tus Vajtswv tau mus lub roojvag no lawm. Lub roojvag no yuav kaw mus li. Tsuas yog tus vajntxwv thiaj mus tau qhov ntawd thiab noj tau tej zaub mov dawbhuv ntawm kuv lub rooj. Nws los thiab tawm ntawm lub roojvag no mus xwb.” Ces tus txivneej ntawd coj kuv ntawm lub roojvag sab qaumteb mus rau ntawm hauv ntej lub Tuamtsev. Thaum kuv tsa qhovmuag ntsia, kuv pom tus TSWV lub tshwjchim ci ntsa iab thoob plaws tus TSWV lub Tuamtsev. Kuv txhos caug ntua thiab nyo taubhau ti nkaus hauv av; tus TSWV hais rau kuv hais tias, “Tub noobneej, koj ua tib zoo mloog tej uas koj hnov thiab ua tib zoo saib tej uas koj pom. Kuv yuav qhia tej kevcai siv lub Tuamtsev rau koj. Koj nco ntsoov hais tias leejtwg thiaj mus tau rau hauv lub Tuamtsev thiab tawm rov los, thiab leejtwg mus tsis tau rau hauv lub Tuamtsev. “Koj cia li hais rau cov Yixalayees uas yog neeg ntxeev siab hais tias kuv yog tus TSWV uas kav ib puas tsav yam; kuv yuav tsis cia nej ua kev phem kev qias ntxiv lawm. Lawv tau ua tsis huv rau kuv lub Tuamtsev, vim lawv cia cov neeg txawv tebchaws uas tsis ua kevcai txiav thiab tsis mloog kuv lus, mus rau hauv kuv lub Tuamtsev thaum nej tabtom muab tej roj thiab tej ntshav tsiaj fij rau kuv. Kuv haivneeg tau rhuav qhov uas kuv nrog lawv sib coglus lawm, vim tej kev phem kev qias uas lawv tau ua tas los. Lawv tsis ua cov saib thiab tu tej khoom dawbhuv hauv kuv lub Tuamtsev; lawv cia cov neeg txawv tebchaws ua tej haujlwm ntawd. “Kuv yog tus TSWV uas kav ib puas tsav yam hais tias tsis pub ib tug neeg txawv tebchaws uas tsis tau ua kevcai txiav thiab tsis mloog kuv tej lus mus rau hauv kuv lub Tuamtsev. Txawm yog cov neeg txawv tebchaws uas ibtxwm nrog cov Yixalayees nyob los tsis pub mus rau hauv li.” Tus TSWV hais rau kuv hais tias, “Kuv yuav rau txim rau cov Levis uas nrog cov Yixalayees yuam kev ua txhaum, tso kuv tseg thiab mus pe mlom lawm. Tsimnyog lawv ua kuv tes haujlwm hauv kuv lub Tuamtsev, zov tej roojvag, tu lub Tuamtsev, tua tej tsiaj uas cov neeg coj tuaj tua hlawv ua khoom fij theej txhoj thiab pab tej neeg sawvdaws. Tiamsis vim lawv coj cov Yixalayees mus pe mlom, qhov uas lawv ua li ntawd thiaj ua rau cov Yixalayees poob rau txojkev txhaum. Kuv yog tus TSWV uas kav ib puas tsav yam, kuv coglus hais tias kuv yuav rau txim rau lawv. Tsis pub lawv ua cov povthawj uas ua kuv tes haujlwm lossis mus ze tej khoom dawbhuv lossis mus rau hauv Chav uas Dawbhuv kawg nkaus. Vim lawv ua kev phem kev qias kuv thiaj rau txim rau lawv. Kuv yuav tsa lawv ua cov zov lub Tuamtsev, cov hu nkauj thiab saib lwm yam haujlwm hauv lub Tuamtsev.” Tus TSWV uas kav ib puas tsav yam hais tias, “Thaum cov Yixalayees tso kuv tseg, cov povthawj xeem Levis uas yog Xadaus cajces tseem muab lub siab npuab kuv thiab ua kuv tes haujlwm hauv lub Tuamtsev. Nimno lawv thiaj yog cov uas los cuag tau kuv thiab ua kuv tes haujlwm uas yog muab roj thiab ntshav tsiaj fij rau kuv. Lawv cov ntawd thiaj li mus tau rau hauv kuv lub Tuamtsev, fij khoom rau saum lub thaj, thiab ua cov coj kev pehawm Vajtswv hauv lub Tuamtsev. Thaum lawv los ntawm lub roojvag los rau hauv chav uas nyob hauv lub Tuamtsev, lawv yuav tsum hnav tej tsoos tsho ntaubmag. Tsis txhob hnav tej tsoos tsho ntaub plaub yaj, thaum lawv los ua haujlwm chav hauv lossis hauv lub Tuamtsev. Lawv hnav ris ntaubmag luv thiab muab ib pluaj ntaubmag pav taubhau, tiamsis tsis txhob hnav tej yam uas ua rau lawv nto hws. Ua ntej lawv tawm mus rau ntawm lub tshavpuam sab nraud uas cov neeg nyob, lawv yuav tsum hloov cov khaubncaws uas lawv hnav ua haujlwm cia rau hauv chav dawbhuv tso. Lawv mam li hnav tej khaubncaws uas lawv ibtxwm hnav, thiaj tsis ua rau tej neeg raug mob. “Tsis pub cov povthawj chais lawv tej plaubhau kom dulug lossis tseg lawv tej plaubhau kom ntev dhau, tiamsis yuav tsum txiav kom zoo saib. Tsis pub cov povthawj haus cawv txiv hmab ua ntej lawv mus rau chav uas nyob sab hauv. Tsis pub cov povthawj yuav pojnrauj, tsuas pub yuav tus nkaujxwb uas yog neeg Yixalayees lossis tus pojntsuam uas tus txiv yog povthawj xwb. “Cov povthawj yuav tsum qhia kom kuv haivneeg paub yam uas dawbhuv thiab yam uas tsis dawbhuv thiab kom paub yam uas huv thiab yam uas tsis huv. Thaum muaj plaub ntug, cov povthawj yog cov txiav txim raws li kuv tej kevcai. Lawv yuav ceev tej rooj noj rooj haus raws li kuv tej kevcai, kev tswjhwm thiab ceev hnub Xanpataus ua hnub tseemceeb. “Tsis pub cov povthawj mus kov tus neeg tuag uas yuav ua rau lawv tsis huv, lawv tsuas kov tau tus uas yog lawv niam lawv txiv, lawv cov menyuam lossis lawv tus tijlaug, tus kwv lossis tus muam uas tseem tsis tau yuav txiv xwb. Tom qab uas tus ntawd ua kevcai ntxuav kom huv lawm, nws yuav tau tos xya hnub nws mam li mus rau chav uas nyob hauv lub Tuamtsev thiab fij khoom ua kevcai ntxuav kom huv, nws thiaj rov mus ua tau haujlwm nyob hauv lub Tuamtsev. Kuv yog tus TSWV uas kav ib puas tsav yam hais li ntawd. “Cov povthawj kev noj haus yog cov Yixalayees muab raws li kuv tau hais tseg lawm. Cov povthawj tsis muaj liaj tsis muaj teb ua lawv tug; kuv yog tus uas yug lawv. Tej khoom fij uas yog qoobloo, tej tsiaj uas coj tuaj theej txhoj thiab tej tsiaj uas coj tuaj fij daws txim puavleej yog muab ua zaub mov rau cov povthawj. Cov povthawj tau txhua yam uas cov Yixalayees coj tuaj rau kuv ua lawv tug. Txhua yam qoobloo uas nej sau tau, nej muab thawj tawb uas zoo tshaj ntawm thawj cov uas nej sau tau thiab txhua yam uas nej coj tuaj fij rau kuv yog cov povthawj tug. Txhua zaus uas nej cub ncuav, nej muab thawj lub rau cov povthawj, kuv thiaj foom koob hmoov rau nej tsevneeg. Cov povthawj yuav tsum tsis txhob noj tej noog lossis tej tsiaj uas nws tuag nws lossis tej tsiaj uas lwm tus tsiaj tom tuag hlo li.” Thaum nej muab lub tebchaws faib rau txhua xeem, nej yuav tsum tshwj ib thaj av hauv lub tebchaws rau tus TSWV ua qhov chaw dawbhuv. Qhov ntev muaj nees nkaum tsib txhiab tshim thiab qhov dav muaj nees nkaum txhiab tshim. Thaj av uas cia ua lub Tuamtsev ua xwmfab xwmmeem, ib phab twb muaj tsib puas tshim. Thiab txhua phab yuav tsum tseg av seem tsib caug tshim rau sab nraud. Ib nrab ntawm thaj av ntawd muab nees nkaum tsib txhiab tshim ntev thiab kaum txhiab tshim dav cia ua lub Tuamtsev uas yog qhov chaw dawbhuv kawg nkaus. Thaj av ntawd yog thaj uas dawbhuv hauv lub tebchaws thiab yog thaj uas tseg cia rau cov povthawj uas ua tus TSWV tes haujlwm hauv lub Tuamtsev. Thaj av ntawd cia ua tsev rau cov povthawj nyob thiab ua lub Tuamtsev. Ib nrab thaj av ntawd yog cia ua tsev rau cov Levis uas ua haujlwm hauv lub Tuamtsev. Lawv ua vaj ua tsev nyob hauv thaj av ntawd. Nej muab thaj av sab nraud uas nyob npuab thaj chaw dawbhuv, qhov ntev muaj nees nkaum tsib txhiab tshim thiab qhov dav muaj tsib txhiab tshim ua cov Yixalayees tug. Nej tshwj ib thaj av rau tus vajntxwv uas kav lub tebchaws. Thaj av ntawd txij ntua ntawm thaj chaw dawbhuv sab hnubpoob mus txog rau ntug Hiavtxwv Meditelanes, thiab sab hnubtuaj mus txog rau tus ciamteb kawg. Thaj av ntawd qhov ntev, mas ntev ib yam li cov Yixalayees lub tebchaws tus ciamteb sab hnubtuaj mus rau sab hnubpoob. Thaj av ntawd yog tus vajntxwv uas kav tebchaws uas nyob rau hauv lub tebchaws Yixalayees tug, nws thiaj tsis txeeb tej av uas tseg ua cov Yixalayees tug. Tus TSWV uas kav ib puas tsav yam hais tias, “Nej cov nomtswv uas kav cov Yixalayees tau ua txhaum ntev los lawm! Nej cia li tseg tsis txhob quab yuam thiab tsimtxom cov pejxeem. Cia li ua qhov ncaj thiab ua qhov tseeb. Nej tsis txhob ntiab kuv cov neeg tawm hauv lawv lub tebchaws mus ntxiv lawm. Kuv yog tus TSWV uas kav ib puas tsav yam hais li ntawd. “Nej yuav tsum siv tus efas thiab lub npaj uas tsis ntxo luag: “Lub efas uas luj tej yam qhuav yuav tsum sib luag li lub npaj uas luj tej yam ua kua. Ib efas muaj ib feem ntawm ib haumes, thiab ib npaj los muaj ib feem ntawm ib haumes. “Qhov uas nej luj yog li no: nees nkaum kelas muaj ib sekees, rau caum sekees muaj ib minas. “Tagnrho cov neeg uas nyob hauv lub tebchaws yuav tsum coj tej khoom fij tuaj rau tus vajntxwv uas kav cov Yixalayees. Tus vajntxwv tes haujlwm yog muab tej tsiaj uas tua hlawv fij tagnrho, tej qoobloo thiab muab tej cawv txiv hmab fij ua khoom theej txhoj rau cov Yixalayees thaum ua Kevcai Hli Xiab, hnub Xanpataus thiab lwm yam kevcai. Nws yog tus muab tej tsiaj fij daws txim, fij tej qoobloo, tej tsiaj uas hlawv fij tagnrho thiab tej khoom uas fij ua kev sib raug zoo, kuv thiaj tshem cov Yixalayees tej kev txhaum.” Tus TSWV uas kav ib puas tsav yam hais tias, “Lub ib hlis ntuj hnub xiab ib, koj yuav tsum muab ib tug ntsuag nyuj uas tsis muaj ib qho phem li tuaj tua ua khoom fij ntxuav lub Tuamtsev. Tus povthawj yuav muab ib co ntshav ntawm tus tsiaj uas tua fij daws txim coj mus pleev rau lub Tuamtsev ob tug ncej qhovrooj, plaub ceg kaum thaj thiab cov ncej roojvag uas mus rau chav sab hauv. Lub ib hlis ntuj hnub xiab xya koj ua ib yam nkaus li uas koj ua hnub xiab ib, nyob tsam muaj tej tus yuam kev ua txhaum lossis tsis quavntsej nws tej kev txhaum. Koj thiaj li ntxuav tau lub Tuamtsev kom huv. “Lub ib hlis ntuj hnub kaum plaub nej yuav tsum pib ua Kevcai Hla Dhau. Xya hnub ntawd nej noj tej ncuav uas tsis xyaw keeb xwb. Thawj hnub tus vajntxwv yuav tsum muab ib tug ntsuag nyuj tua fij daws nws thiab cov pejxeem sawvdaws lub txim. Xya hnub uas ua kevcai ntawd ib hnub twg tus vajntxwv yuav tsum fij ib tug ntsuag nyuj thiab ib tug laug yaj uas tsis muaj ib qho phem li hlawv tagnrho fij rau tus TSWV. Thiab xya hnub ntawd, ib hnub twg nws muab ib tug laug tshis tua fij daws txim. Nws muab ib efas hmoov nplej fij nrog ib tug nyuj, ib efas hmoov nplej fij nrog ib tug yaj thiab ib efas hmoov nplej twg xyaw peb hwj roj txiv ntoo. “Lub xya hlis ntuj hnub kaum tsib uas pib ua kevcai nyob tsev pheebsuab, tus vajntxwv yuav tsum fij tej tsiaj uas muab hlawv tagnrho, tej tsiaj uas hlawv fij daws txim, tej qoobloo thiab tej roj txiv ntoo ib yam li ua kevcai hla dhau.” Tus TSWV uas kav ib puas tsav yam hais tias, “Rau hnub uas ua haujlwm ntawd yuav tsum muab lub roojvag sab hnubtuaj uas mus rau chav sab hauv kaw, tiamsis qhib hnub Xanpataus thiab hnub uas ua kevcai Hli Xiab. Tus vajntxwv uas kav lub tebchaws yuav mus ntawm lub tshavpuam sab nraud mus rau ntawm lub roojvag thiab sawv ntawm ib sab tus ncej roojvag thaum uas cov povthawj muab nws tej khoom hlawv fij tagnrho thiab fij tej khoom ua kev sib raug zoo. Nws yuav pehawm tus TSWV nyob qhov ntawd thiab tawm rov los rau sab nraud. Lub roojvag ntawd tsis txhob kaw mus txog thaum tsaus ntuj. Txhua hnub Xanpataus thiab txhua lub Kevcai Hli Xiab, cov pejxeem sawvdaws tuaj txhos caug pehawm tus TSWV ntawm lub roojvag. Hnub Xanpataus tus vajntxwv yuav tsum coj rau tus menyuam yaj thiab ib tug laug yaj uas tsis muaj ib qho phem li tuaj hlawv fij tagnrho rau tus TSWV. Txhua zaus uas fij ib tug laug yaj twg nws muab ib efas hmoov nplej fij nrog thiab fij ib tug menyuam yaj twg nws muab hmoov nplej ntau npaum li cas fij nrog los tau, tiamsis ib efas hmoov nplej twg muab peb fwj roj txiv ntoo xyaw. Thaum txog hnub ua Kevcai Hli Xiab, tus vajntxwv muab ib tug ntsuag nyuj, rau tus menyuam yaj thiab ib tug laug yaj uas tsis muaj ib qho phem li tuaj tua fij. Txhua zaus uas vajntxwv fij tus ntsuag nyuj thiab tus laug yaj, nws muab ib efas hmoov nplej fij nrog, thiab fij ib tug menyuam yaj twg, nws muab hmoov nplej ntau npaum li cas fij nrog los tau, tiamsis ib efas hmoov nplej twg muab peb hwj roj txiv ntoo xyaw. Tus vajntxwv tuaj lub roojvag twg tuaj, ces nws tawm lub roojvag ntawd rov qab xwb. “Txhua zaus uas ua kevcai cov pejxeem uas tuaj pehawm tus TSWV, cov uas tuaj ntawm lub roojvag sab qaumteb tuaj, thaum rov qab yuav tsum tawm lub roojvag sab qabteb mus thiab cov uas tuaj lub ntawm roojvag sab qabteb tuaj, thaum rov qab yuav tsum tawm lub roojvag sab qaumteb mus. Tsis pub leejtwg tawm lub roojvag uas nws tuaj rov qab. Tus vajntxwv yuav tsum tuaj thaum cov pejxeem tuaj thiab rov qab thaum cov pejxeem rov. Hnub ua kevcai thiab ua rooj noj haus raws li teem cia, lawv muab ib efas hmoov nplej fij nrog ib tug ntsuag nyuj lossis tus laug yaj. Cov menyuam yaj, lawv yuav muab hmoov nplej ntau npaum li cas los tau, tiamsis ib efas hmoov nplej twg muab peb hwj roj txiv ntoo xyaw. “Thaum tus vajntxwv xav fij khoom tshwjxeeb rau tus TSWV, tsis hais tej khoom uas muab hlawv fij tagnrho lossis fij ua kev sib raug zoo, yuav tsum qhib lub roojvag sab hnubtuaj uas mus rau chav sab hauv rau nws mus. Nws muab khoom fij ib yam li nws fij hnub Xanpataus. Thaum nws tawm los lawm yuav tsum kaw lub roojvag.” Tus TSWV hais tias, “Txhua tagkis sawv ntxov yuav tsum muab ib tug menyuam yaj hnubnyoog ib xyoos uas tsis muaj ib qho phem li coj los tua hlawv tagnrho fij rau tus TSWV. Yuav tsum niaj hnub ua li no. Txhua tagkis twg yuav tsum muab ib feem rau ntawm ib efas hmoov nplej xyaw ib hwj roj txiv ntoo coj mus fij. Txoj kevcai fij khoom rau tus TSWV no yuav tsum coj mus ibtxhis li. Tus menyuam yaj, cov hmoov nplej thiab cov roj txiv ntoo yuav tsum coj mus fij rau tus TSWV txhua tagkis mus ibtxhis li.” Tus TSWV uas kav ib puas tsav yam hais tias, “Yog tus vajntxwv uas kav tebchaws faib nws tej liaj tej teb rau nws cov tub ib tug twg, ces thaj av ntawd yuav yog tus tub ntawd thiab nws cov xeebntxwv tug mus li. Tiamsis yog vajntxwv muab nws ib thaj av faib rau nws ib tug tubtxib, ces thaum txog xyoo tso thaj av ntawd yuav thim rov qab rau tus vajntxwv. Thaj av ntawd yeej yog vajntxwv tug, tsuas yog vajntxwv thiab nws cov tub thiaj yog tswv av mus li. Vajntxwv tsis txhob txeeb cov pejxeem tej liaj tej teb los ua nws tug. Nws tsuas muab tau tej av uas yog nws tug lawm pub rau nws cov tub xwb; nws tsis txhob quab yuam kuv haivneeg thiab txeeb lawv tej liaj tej teb.” Ces tus txivneej ntawd coj kuv mus rau ntawm lub roojvag uas tig mus rau cov chav uas nyob sab ped uas ze lub roojvag sab qabteb ntawm chav sab hauv. Cov chav dawbhuv no yog cia rau cov povthawj nyob. Nws qhia ib chav ntawm cov chav uas nyob sab hnubpoob rau kuv hais tias, “Ntawm no yog chav uas cov povthawj hau cov nqaij uas yuav coj mus fij daws txim lossis fij theej txhoj thiab cub tej ncuav uas coj mus fij; ua li ntawd thiaj tsis coj tej khoom dawbhuv tawm mus rau sab nraum lub tshavpuam uas yuav ua rau tej neeg raug mob.” Txhua lub ces kaum tshavpuam luag muab pobzeb txhim ua ntsa thoob plaws thiab ua qhovcub npuab cov phabntsa. Tus txivneej ntawd hais rau kuv hais tias, “Cov qhovcub no yog cov uas cov neeg ua haujlwm hauv lub Tuamtsev hau tej nqaij uas cov neeg coj tuaj fij.” Tus txivneej ntawd coj kuv rov los rau ntawm lub qhovrooj Tuamtsev. Muaj ib tug dej txhawv hauv qab lub qhovrooj ntws mus rau sab hnubtuaj (rau qhov lub Tuamtsev tig rau sab hnubtuaj). Tus dej ntawd ntws hauv qab lub Tuamtsev sab nrad mus hla lub thaj ces kaum sab qabteb. Tus txivneej ntawd coj kuv ntawm lub Tuamtsev mus rau pem lub roojvag sab qaumteb thiab ncig mus rau ntawm lub roojvag uas tig rau sab hnubtuaj, ces tug dej ntawd ntws tawm ntawm lub roojvag sab qabteb. Tus txivneej ntawd muab nws tus pas los ntsuas ntawm lub qhov uas dej txhawv mus rau sab hnubtuaj muaj ib txhiab tshim, thiab nws coj kuv nqis rau hauv dej; dej tob txij kuv pobtaws xwb. Nws ntsuas mus ntxiv ib txhiab tshim, dej tob txij kuv hauvcaug. Nws rov ntsuas mus ntxiv ib txhiab tshim, dej tob txij kuv duav lawm. Nws tseem rov ntsuas dua ib txhiab tshim ntxiv, dej tob heev ua rau kuv kwm tsis dhau lawm. Dej tob heev mus tsis tau li, yuav tau ua luam dej thiaj mus dhau xwb. Nws hais rau kuv hais tias, “Tub noobneej, koj sau tej no cia.” Ces tus txivneej ntawd txawm coj kuv rov mus rau tim ntug dej; thaum uas kuv mus txog rau tid, kuv pom muaj ntoo ntau ntau nyob raws ob sab ntug dej. Nws hais rau kuv hais tias, “Tus dej no ntws phua plhawv lub tebchaws mus rau sab hnubtuaj, mus tshuam lub hav Yauladees thiab ntws mus rau Hiavtxwv Tuag lawm. Thaum tus dej no ntws mus txog nram Hiavtxwv Tuag, cov dej no yuav hloov cov dej daw ntsev hauv hiavtxwv kom tsuag. Tus dej no ntws mus txog qhov twg, yuav muaj txhua yam tsiaj thiab muaj ntses coob nyob hauv. Tus dej no yuav ua rau Hiavtxwv Tuag tsuag, thiab tus dej no ntws mus txog qhov twg txhua tsav yam yuav muaj sia. Cov neeg nrhiav ntses yuav tuaj ziab lawv tej vas ntawm ntug hiavtxwv, txij ntua ntawm lub Qhovdej Enkedis mus txog rau ntawm lub Qhovdej Enekalayees. Lub pasdej ntawd yuav muaj ntau yam ntses nyob hauv ib yam li Hiavtxwv Meditelanes. Tiamsis tej pasdej thiab tej hav iav uas nyob raws ntug hiavtxwv yuav tsis tsuag. Tej dej ntawd yuav daw ntsev li qub. Muaj txhua yam ntoo uas txi txiv noj tau tuaj raws ob sab ntug dej. Cov ntoo ntawd tej nplooj tsis ntsws, tsis qhuav thiab txi txiv txhua lub hli, rau qhov muaj tus dej uas txhawv hauv lub Tuamtsev los yug cov ntoo ntawd. Cov ntoo ntawd tej txiv cia noj thiab tej nplooj cia ua tshuaj.” Tus TSWV uas kav ib puas tsav yam hais tias, “Ntawm no yog tej ciamteb hauv lub tebchaws uas muab faib rau kaum ob xeem Yixalayees, thiab xeem Yauxej tau ob npaug. Kuv tau coglus tseg rau nej cov yawgkoob lawm hais tias kuv yuav muab lub tebchaws no rau lawv ua lawv tug mus li; nimno nej cia li muab faib kom sawvdaws tau sib npaug zos. “Tus ciam sab qaumteb txij ntua ntawm ntug Hiavtxwv Meditelanes mus rau ntawm lub nroog Heloos, mus rau lub Dawm Hamas thiab mus rau lub nroog Xedas, mus rau ntawm lub nroog Npeluthas thiab Xinpelais (ob lub nroog no nyob ntu nruab ntawm lub nroog Damaxes thiab lub nroog Hamas), thiab mus rau ntawm lub nroog Tekoos uas nyob npuab tus ciamteb ntawm cheebtsam Haulas. Tus ciam sab qaumteb, txij ntua ntawm ntug Hiavtxwv Meditelanes mus rau ntawm lub Nroog Enoos, mus hla ntawm lub nroog Damaxes thiab lub nroog Hamas tus ciamteb mus rau sab qaumteb lawm. “Tus ciam sab hnubtuaj, txij ntua ntawm lub nroog Damaxes thiab lub nroog Haulas ntu nruab nrab uas yog tus Dej Yauladees ua ciam rau tebchaws Yixalayees nyob sab hnubpoob thiab cheebtsam Nkile-as nyob sab hnubtuaj, mus ti nkaus rau ntawm lub nroog Tamaj uas nyob ntawm ntug dej Hiavtxwv Tuag. “Tus ciam sab qabteb, txij ntua ntawm lub nroog Tamaj mus rau ntawm cov pasdej Kades Melinpas nce rau sab qaumteb hnubpoob raws cov Iziv tus ciamteb mus rau ntawm Hiavtxwv Meditelanes lawm. “Tus ciam sab hnubpoob yog raws ntug Hiavtxwv Meditelanes nce mus rau ntawm Hamas sab hnubpoob. “Cia li muab lub tebchaws no faib rau nej kaum ob xeem Yixalayees; lub tebchaws no yuav ua nej tug mus li. Cov neeg txawv tebchaws uas nrog nej nyob thiab lawv tej tubki uas yug hauv nej lub tebchaws muaj feem tau av los ua lawv tug thaum nej faib av. Nej yuav tsum ua zoo rau lawv ib yam li nej ua rau nej cov kwvtij Yixalayees, lawv muaj cai nrog nej cov Yixalayees txhua xeem rho ntawv faib av. Txhua tus neeg txawv tebchaws muaj feem nrog xeem uas lawv nrog nyob ntawd tau av los ua lawv tug. Kuv yog tus TSWV uas kav ib puas tsav yam tau hais li ntawd.” Tshwj ib thaj av npuab xeem Yudas thaj, thaj av ntawd qhov dav thiab qhov ntev sib npaug zos, qaumteb rau qabteb muaj nees nkaum tsib txhiab tshim thiab hnubtuaj rau hnubpoob muaj nees nkaum tsib txhiab tshim ib yam nkaus li tej feem uas muab rau kaum ob xeem ntawd. Yuav ua lub Tuamtsev rau hauv thaj av ntawd. Thaj av uas tshwj tseg rau tus TSWV, qhov ntev muaj nees nkaum tsib txhiab tshim thiab qhov dav muaj nees nkaum txhiab tshim. Cov povthawj tau ib feem ntawm thaj av dawbhuv no los ua lawv tug. Qhov ntev sab hnubtuaj rau sab hnubpoob muaj nees nkaus tsib txhiab tshim thiab qhov dav qaumteb rau qabteb muaj kaum txhiab tshim. Tus TSWV lub Tuamtsev nyob rau hauv plawv thaj av no. Thaj av dawbhuv no yog tseg rau cov povthawj uas yog Xadaus cajces. Lawv muab siab npuab kuv, tsis tso kuv tseg thiab tsis koom nrog cov Yixalayees ua txhaum ib yam li cov Levis uas tau mus ua txhaum lawm. Yog li ntawd, lawv thiaj tau ib feem ntawm thaj av uas tshwj tseg nyob npuab ntawm cov Levis li, thaj av ntawd yog thaj uas dawbhuv kawg nkaus. Cov Levis tau ib feem ntawm thaj av uas tshwj tseg nyob sab qabteb npuab cov povthawj li. Thaj av ntawd hnubtuaj rau hnubpoob qhov ntev muaj nees nkaum tsib txhiab tshim, thiab qaumteb rau qabteb muaj nees nkaum txhiab tshim. Thaj av uas muab fij rau tus TSWV yog thaj uas zoo tshaj plaws hauv lub tebchaws; tsis pub muab muag, muab pauv lossis muab hloov rau leejtwg li. Thaj av ntawd dawbhuv thiab yog tus TSWV tug. Thaj av seem sab nraud uas npuab thaj dawbhuv qhov ntev muaj nees nkaum tsib txhiab tshim thiab qhov dav muaj tsib txhiab tshim, yog tseg rau cov pejxeem ua vaj ua tsev nyob rau hauv plawv thiab tseg sab nraud ua tshav tsiaj. Thaj av uas lawv ua vaj ua tsev nyob ntawd, dav thiab ntev xwmfab xwmmeem, ib phab twg muaj plaub txhiab tsib puas tshim. Lub nroog ntawd tseg av seem puagncig sab nraud cia ua tshav tsiaj, ib phab twg dav ob puas tsib caug tshim thiab ntev ob puas tsib caug tsim. Thaj av seem uas nyob npuab ntawm thaj av dawbhuv, sab hnubtuaj muaj kaum txhiab tshim thiab sab hnubpoob muaj kaum txhiab tshim. Thaj av ntawd cia cog qoobloo rau cov neeg uas ua haujlwm hauv lub nroog noj. Cov Yixalayees txhua xeem uas nyob hauv lub nroog mus ua cov teb ntawd. Thaj av uas tshwj tseg ntawd, dav thiab ntev xwmfab xwmmeem, ib phab twg muaj nees nkaum tsib txhiab tshim uas yog xam thaj av uas ua lub nroog nrog. Thaj av nyob sab qabteb uas muab tu rau xeem Khas, tus ciam txij ntua ntawm Tamaj mus rau sab qabteb hnubpoob mus txog rau cov pasdej Kades, thiab sab qaumteb hnubpoob, txij ntua ntawm cov Iziv tus ciamteb mus rau Hiavtxwv Meditelanes. Tus TSWV uas kav ib puas tsav yam hais tias, “Ntawm no yog hais txog qhov uas muab lub tebchaws faib rau cov xeem Yixalayees ua lawv tug.” Tus ntsa yeej puagncig lub nroog muaj kaum yim txhiab tshim. Txij no mus lub nroog yuav muaj npe hu ua “Tus TSWV Nyob Ntawm No!” Thaum uas Yehauyakhees ua vajntxwv kav tebchaws Yudas tau peb xyoos lawm, Vajntxwv Nenpukajnexales uas kav tebchaws Npanpiloos tau tuaj vij thiab tua lub nroog Yeluxalees. Tus TSWV cia Nenpukajnexales tuaj ntes tau Vajntxwv Yehauyakhees thiab coj qee yam khoom tseemceeb uas nyob hauv lub Tuamtsev mus lawm. Nws tseem ntes tau ib co neeg coj mus rau tim nws lub tsev teev dab uas nyob hauv lub nroog Npanpiloos thiab muab tej khoom tseemceeb ntawd mus tso rau hauv tej chav rau khoom hauv lub tsev teev dab ntawd. Vajntxwv Nenpukajnexales samhwm kom Asenpenas uas yog tus thawj saib nws lub loog mus xaiv cov tub hluas Yixalayees uas lawv ntes tau los ntawd qee leej uas yog cajces vajntxwv thiab yog cajces ua nom ua tswv tuaj kawm txujci. Cov hluas ntawd yuav tsum yog cov uas zoo nraug, muaj tswvyim zoo, kawm paub ntau yam, kawm tau sai thiab yog neeg tsis muaj mob, lawv thiaj li yuav mus ua taus haujlwm nyob hauv vajntxwv lub loog. Asenpenas yuav tsum tau qhia cov hluas ntawd kom txawj nyeem thiab sau tau cov neeg Npanpiloos cov ntawv. Vajntxwv hais kom luag niaj hnub muab zaub mov thiab cawv txiv hmab uas qab heev, ib yam li cov uas luag muab rau cov neeg uas nyob hauv vajntxwv lub loog noj thiab haus, rau cov hluas ntawd noj thiab haus. Thaum lawv kawm puv peb lub xyoos thiab tiav lawm, yuav coj lawv mus cuag vajntxwv. Cov hluas uas luag xaiv mus ntawd muaj npe li nram no: Daniyees, Hananiyas, Misayees thiab Axaliyas lawv cov no puavleej yog xeem Yudas. Tus thawjcoj uas saib vajntxwv lub loog muab lawv tis dua npe hu li no: Npeetesaxas, Sadalas, Mesakas thiab Anpenekaus. Daniyees tsis xav ua rau nws lub cev tsis huv, nws thiaj xav hais tias nws yuav tsis noj tej zaub mov thiab tsis haus tej cawv txiv hmab uas nyob hauv vajntxwv lub loog. Yog li ntawd, nws thiaj thov kom Asenpenas pab nws. Vajtswv ua rau Asenpenas nyiam thiab hlub Daniyees. Asenpenas tseem ntshai vajntxwv thiab, nws thiaj hais rau Daniyees hais tias, “Vajntxwv hais kom koj noj thiab haus tej no. Yog koj tsis noj, thaum vajntxwv pom hais tias koj tsis puv li lwm tus tub hluas, tej zaum vajntxwv yuav muab kuv tua povtseg los tsis paub.” Yog li ntawd, Daniyees thiaj mus cuag tus uas Asenpenas tsa ua tus saib Daniyees thiab nws peb tug phoojywg. Daniyees hais tias, “Thov cia koj sim peb; koj muab zaub mov rau peb noj thiab muab dej rau peb haus mus txog kaum hnub tso. Ces koj ua tib zoo ntsia peb thiab cov tub hluas uas noj vajntxwv tej zaub mov saib peb txawv lawv li cas los tsis txawv, koj thiaj paub hais tias tsimnyog yuav tsum noj yam dabtsi zoo dua.” Tus uas saib Daniyees lawv thiaj pom zoo cia lawv sim kaum hnub saib zoo li cas. Thaum puv kaum hnub lawm ua ciav nws pom hais tias Daniyees lawv puv thiab muaj zog tshaj cov tub hluas uas noj vajntxwv tej zaub mov. Yog li ntawd, tus uas saib Daniyees lawv, thiaj tsis muab vajntxwv tej zaub mov rau lawv noj lawm, tiamsis nws muab zaub, mov thiab dej rau lawv noj thiab haus lawm xwb. Vajtswv pub plaub tug hluas ntawd muaj kev txawj ntse, kawm ntawv tau zoo thiab paub ntau yam txujci. Thiab Vajtswv tseem pub rau Daniyees txawj txhais tej yogtoog thiab tej npau suav. Thaum txwm nkaus peb lub xyoos uas vajntxwv teem cia lawm, Asenpenas txawm coj tagnrho cov tub hluas uas nws xaiv ntawd mus cuag Vajntxwv Nenpukajnexales. Vajntxwv nrog lawv txhua tus tham mas nws pom hais tias Daniyees, Hananiyas, Misayees thiab Axaliyas lawv ntse tshaj lwm tus; vajntxwv thiaj muab lawv los ua haujlwm nyob hauv nws lub loog. Txhua yam uas vajntxwv nug lawv, lawv paub tagnrho. Vajntxwv pom hais tias lawv plaub leeg ntawd teb tau zoo dua cov neeg uas txawj saib tes lossis txawj ua yeessiv uas nyob hauv vajntxwv lub tebchaws kaum npaug lawm. Daniyees ua haujlwm nyob hauv vajntxwv lub loog mus txog thaum Xailas uas yog tus huabtais kav tebchaws Pawxias tuaj tua yeej thiab txeeb tau lub tebchaws Npanpiloos. Thaum Nenpukajnexales ua vajntxwv tau ob xyoos, nws txawm ua ib zaj npau suav. Zaj npau suav ntawd ua rau nws ntxhov siab heev thiab pw tsis tsaug zog li. Yog li ntawd, nws thiaj hu cov neeg uas txawj saib tes, txawj ua yeessiv, txawj saib yaig thiab txawj saib xyab, tuaj txhais nws zaj npau suav. Thaum lawv tuaj txog lawm, nws hais rau lawv hais tias, “Kuv ua ib zaj npau suav tsis zoo mas kuv ntxhov siab heev; kuv xav paub hais tias zaj npau suav ntawd yog li cas thiab hais txog dabtsi?” Lawv hais lus Alamais rau vajntxwv hais tias, “Thov kom vajntxwv muaj sia nyob mus ibtxhis! Thov qhia vajntxwv zaj npau suav rau peb, peb yuav txhais cov ntsiab lus rau vajntxwv paub.” Vajntxwv hais rau lawv hais tias, “Kuv twb txiav txim siab lawm hais tias yog nej piav tsis tau zaj npau suav thiab txhais tsis tau cov ntsiab lus rau kuv paub, ces kuv yuav muab nej hlais ib daig zuj zus thiab yuav muab nej tej vajtse rhuav povtseg huv tibsi. Tiamsis yog nej qhia thiab txhais tau rau kuv, kuv yuav muab nqi zog thiab pub koob meej rau nej. Nej cia li piav thiab txhais rau kuv mloog tamsim no.” Lawv rov hais rau vajntxwv hais tias, “Yog vajntxwv piav vajntxwv zaj npau suav rau peb mloog, peb thiaj yuav paub txhais zaj npau suav ntawd.” Vajntxwv teb hais tias, “Kuv paub hais tias nej xav sej kuv xwb, tiamsis kom nej paub hais tias kuv twb hais tseeb rau nej lawm; yog nej tsis piav zaj npau suav rau kuv paub, ces nej txhua tus yuav raug txim ib yam nkaus. Nej yeej tuavhauv lawm hais tias nej yuav dag kuv ntau yam kom kuv hloov kuv tej lus, tiamsis kuv yeej tsis hloov hlo li. Nej cia li qhia kuv zaj npau suav rau kuv, kuv thiaj paub hais tias nej txawj txhais.” Lawv hais ntxiv rau vajntxwv hais tias, “Tej neeg uas nyob hauv ntiajteb no yeej tsis muaj ib tug uas yuav qhia tau tej uas koj hais ko rau koj paub li. Thiab tej vajntxwv, tsis hais tus uas yuav muaj hwjchim loj npaum li cas los yeej tsis muaj ib tug uas yuav hais li koj hais ko rau cov neeg uas txawj saib tes, txawj ua yeessiv thiab txawj saib xyab hlo li. Tej lus uas koj nug ko nyuaj heev tsis muaj leejtwg yuav teb tau rau koj; ntshai tsuas yog tej vajtswv thiaj yuav teb tau xwb, tiamsis tej vajtswv ntawd yeej tsis nrog neeg nyob ua ke.” Vim lawv teb li ntawd vajntxwv thiaj chim heev. Nws tau samhwm kom luag muab nws cov tuavxam tua povtseg huv tibsi. Ces vajntxwv thiaj tawm ib tsab ntawv samhwm rau sawvdaws paub hais tias kom muab lawv cov ntawd tua povtseg, lojxov Daniyees thiab nws peb tug phoojywg huv tibsi. Daniyees txawm mus cuag Ali-aus uas yog tus thawj saib cov tubrog uas zov vajntxwv lub loog. Ali-aus yog tus uas vajntxwv yuav tso mus tua vajntxwv cov tuavxam. Daniyees ua tib zoo xav ua ntej nws mam mus nug Ali-aus hais tias yog vim li cas vajntxwv yuav tawm tsab ntawv tawv ua luaj li ntawd? Ali-aus thiaj piav zaj ntawd rau Daniyees mloog. Daniyees mus cuag vajntxwv tamsim ntawd. Nws thov vajntxwv kom pub sijhawm ntev mentsis rau lawv, nws mam li qhia thiab txhais zaj npau suav ntawd rau vajntxwv. Daniyees rov qab los tsev, thiab nws piav zaj ntawd rau Hananiyas, Misayees thiab Axaliyas uas yog nws peb tug phoojywg mloog. Nws hais kom lawv thov Vajtswv tus uas nyob saum ntuj hlub lawv thiab qhia tej yam uas tsis muaj leejtwg paub rau lawv kom lawv thiaj yuav tsis raug tua nrog cov tuavxam uas nyob hauv lub nroog Npanpiloos. Ces hmo ntawd Daniyees txawm ua yogtoog pom thiab Vajtswv qhia zaj uas tsis muaj leejtwg paub ntawd rau Daniyees. Ces Daniyees ua Vajtswv tus uas nyob saum ntuj tsaug: “Vajtswv yog tus txawj ntse thiab muaj hwjchim loj! Cia li qhuas nws mus ibtxhis. Vajtswv yog tus tswj lub sijhawm thiab tej caij nyoog; nws tsa thiab txo tej vajntxwv; nws yog tus pub kom neeg muaj tswvyim thiab txawj ntse. Nws muab tej uas neeg tsis paub thiab tsis pom los nthuav qhia rau sawvdaws; nws paub tej uas nyob nraim nkoos hauv qhov tsaus ntuj nti thiab muaj qhov pom kev ci kaj nrig nyob puagncig nws. Kuv yawgkoob tus Vajtswv, kuv ua koj tsaug thiab hwm koj. Koj pub tswvyim thiab dag zog rau kuv. Koj teb kuv tej lus thov thiab ua rau peb paub teb vajntxwv.” Tom qab ntawd Daniyees thiaj mus cuag Ali-aus tus uas vajntxwv samhwm kom mus tua vajntxwv cov tuavxam. Daniyees hais tias, “Thov tsis txhob muab lawv cov ntawd tua; cia li coj kuv mus cuag vajntxwv, kuv yuav qhia thiab txhais nws zaj npau suav rau nws.” Ali-aus thiaj li coj Daniyees mus cuag vajntxwv thiab hais rau vajntxwv hais tias, “Kuv nrhiav tau cov Yudais uas peb ntes los ntawd muaj ib tug yuav txhais tau koj zaj npau suav.” Vajntxwv hais rau Daniyees (tus uas muaj dua ib lub npe hu ua Npeetesaxas) hais tias, “Koj puas muaj cuabkav qhia tau kuv zaj npau suav thiab txhais cov ntsiab lus rau kuv paub tiag?” Daniyees teb vajntxwv hais tias, “Vajntxwv, cov neeg uas txawj saib xyab, txawj ua yeessiv thiab txawj saib hnubqub yeej tsis muaj ib tug yuav paub txhais zaj npau suav ntawd rau koj li. Tsuas muaj Vajtswv tib leeg tus uas nyob saum ntuj thiaj qhia tau tej uas tsis muaj neeg paub no rau sawvdaws. Vajntxwv, Vajtswv qhia tej uas yuav muaj los yav ntom ntej no rau koj paub. Koj zaj npau suav thiab tej yogtoog uas koj pom thaum koj tseem pw yog li no: “Vajntxwv, thaum koj pw tsaug zog thiab koj ua npau suav pom tej uas yuav muaj los yav tom ntej; thiab Vajtswv tus uas qhia tau tej uas tsis muaj neeg paub rau sawvdaws, nws qhia tej uas yuav muaj los yav tom ntej no rau koj. Nimno Vajtswv twb qhia tej yam uas tsis muaj neeg paub rau kuv lawm, tsis yog vim kuv txawj ntse dua lwm tus, tiamsis yog Vajtswv xav qhia kom koj paub zaj npau suav ntawd thiab tej uas koj xav paub. “Vajntxwv, koj ua yogtoog pom ib tug mlom uas loj thiab siab heev sawv ntawm koj xubntiag. Tus mlom ntawd ci ntsa iab thiab txaus ntshai kawg li. Tus mlom ntawd lub taubhau yog tseem kub, lub hauvsiab thiab ob txhais cajnpab yog nyiaj, lub duav thiab ob txhais ncejpuab ntug yog tooj liab, ob txhais ceg yog hlau, thiab ob txhais kotaw yog hlau xyaw av nplaum. Thaum koj tabtom ntsia tus mlom ntawd, txawm muaj ib lub pobzeb loj loj ntais rhe saum pobtsuas los uas tsis yog neeg txhais tes ua poob los raug tus mlom ntawd ob txhais kotaw uas yog hlau xyaw av nplaum tawg ntsoog ntxaws. Ces tamsim ntawd tej qhov uas yog av nplaum, yog hlau, yog tooj liab thiab yog nyiaj yog kub, txawm tawg ntsoog ntxaws ua tej daim ib yam li tej npluag nplej uas nyob hauv tshav ntaus nplej thaum lub caij ntuj qhua; ces cua muab ntsawj ya tas lawm tsis tshuav ib qho li. Tiamsis lub pobzeb uas poob los raug tus mlom ntawd txawm loj zuj zus tuaj ua ib lub roob puv nkaus ntiajteb. “Koj zaj npau suav muaj raws li uas kuv hais tas los no. Nimno kuv yuav qhia zaj npau suav ntawd lub ntsiab rau vajntxwv saib yog li cas. Vajntxwv, koj yog tus uas muaj hwjchim loj dua tej tus vajntxwv huv tibsi. Vajtswv tus uas nyob saum ntuj, tsa koj ua huabtais, nws pub koj muaj hwjchim, muaj zog thiab muaj koob meej nto moo lug. Vajtswv tsa koj ua tus kav txhua qhov uas muaj neeg nyob, kav ib puas tsav yam tsiaj thiab tej noog. Lub taubhau kub ntawd yog koj ntag. Tom qab koj, yuav muaj dua lwm lub tebchaws sawv los, lub tebchaws ntawd muaj hwjchim yau dua koj, thiab tom qab ntawd lub tebchaws peb uas yog cov tooj liab sawv los thiab yuav kav tagnrho lub ntiajteb no. Thiab tom qab ntawd lub tebchaws plaub yuav sawv, lub tebchaws ntawd tawv ib yam li hlau, rau qhov hlau tsoo thiab ntaus ib puas tsav yam tawg taus. Vim lub tebchaws ntawd tawv ib yam li hlau uas tsoo ib puas tsav yam tawg taus, mas nws yuav tsoo thiab ntaus cov tebchaws uas xub sawv ua ntej ntawd kom tawg tas huv tibsi. Txhais kotaw thiab cov ntivtaw uas koj pom av thiab hlau sib xyaws ntxaws txhais hais tias, yuav muaj ntau lub tebchaws los sib koom ua ke. Nws yuav muaj qee yam tawv ib yam li hlau, rau qhov muaj hlau thiab av nplaum sib xyaw ntxaws. Cov ntivtaw uas yog av xyaw hlau, txhais hais tias lub tebchaws ntawd ibtxhia muaj zog thiab ibtxhia tsis muaj zog. Qhov uas koj pom muaj av nplaum xyaw hlau, txhais hais tias cov nomtswv uas kav lub tebchaws ntawd yuav tso lawv tej tub tej ntxhais sib yuav kom nyob tau ua ke, tiamsis lawv yuav koom tsis tau ua ke ib yam li hlau thiab av nplaum yeej tsis sib lo li. Lub sijhawm uas cov nomtswv ntawd tseem kav tebchaws, Vajtswv tus uas nyob saum ntuj yuav tsa ib lub tebchaws uas yuav nyob mus tsis paub kawg li. Lub tebchaws ntawd yuav tsis muaj leejtwg kovyeej nws, nws yuav rhuav tej tebchaws ntawd kom puastsuaj tas, tiamsis nws yuav nyob mus ibtxhis. Qhov uas koj pom lub pobzeb uas tsis yog neeg txhais tes ua ntais poob saum pobtsuas los raug tus mlom neeg uas ib qhov yog hlau, ib qhov yog tooj liab, ib qho yog av, ib qhov yog nyiaj, thiab ib qho yog kub ntawd yog Vajtswv tus muaj hwjchim loj kawg nkaus qhia kom koj paub tej uas yuav muaj los yav ntom ntej no. Koj zaj npau suav muaj raws li kuv hais tas los no. Nimno kuv twb piav thiab txhais koj zaj npau suav lub ntsiab meej rau koj lawm.” Vajntxwv Nenpukajnexales txhos caug ntua hauv av pe Daniyees, thiab nws hais kom luag cia li muab qoobloo thiab tshuaj tsw qab tuaj fij rau Daniyees. Vajntxwv hais tias, “Koj tus Vajtswv yog tus uas muaj hwjchim loj dua tej vajtswv, nws yog tus Tswv uas kav tagnrho tej vajntxwv thiab yog tus uas qhia tej uas neeg tsis paub rau sawvdaws. Kuv paub li no, rau qhov nws qhia koj txhais tau tej uas tsis muaj leejtwg paub.” Vajntxwv tsa Daniyees ua ib tug nomtswv loj thiab muab tej khoom muaj nqis ntau yam rau Daniyees. Nws tsa Daniyees ua tus kav lub xeev Npanpiloos thiab cia Daniyees ua tus thawj saib vajntxwv cov tuavxam. Daniyees thov vajntxwv tsa Sadalas, Mesakas thiab Anpenekaus ua cov saib haujlwm hauv lub xeev Npanpiloos, tiamsis Daniyees ua tus loj nrog vajntxwv hauv lub loog. Vajntxwv Nenpukajnexales nchuav tau ib tug mlom kub siab rau caum tshim thiab dav rau tshim, thiab nws muab teeb rau ntawm lub tiaj Dulas hauv lub xeev Npanpiloos. Vajntxwv tso neeg mus hu tagnrho nws cov nomtswv tuaj sib sau ua ke, tsis hais cov nomtswv uas nrog vajntxwv kav cov pejxeem, cov tswvxeev, cov pab tus tswvxeev, cov ceev nyiaj txiag, cov txiav txim cov ceevxwm thiab tagnrho nws cov tubtxib uas nyob hauv nws lub tebchaws tuaj nrog koom ua kevcai pe tus mlom kub ntawd. Thaum uas vajntxwv tsoom nomtswv tuaj txhij thiab mus sawv rau ntawm tus mlom kub ntawd xubntiag tabtom yuav ua kevcai pe tus mlom ntawd, txawm muaj ib tug tshaj tawm nrov nrov rau sawvdaws hais tias, “Nej txhua tus ntawm txhua haivneeg thiab txhua xeem, tsis hais cov neeg uas hais yam lus twg li! Thaum nej hnov dheev suab xyu, suab raj ntsia, suab raj nplaim thiab suab nkauj nogncas nrov, nej cia li txhos caug pe tus mlom kub uas vajntxwv Nenpukajnexales muab teeb tseg ntawd. Yog leejtwg tsis kam pe luag yuav ntes tus ntawd coj mus pov rau hauv lub cubtawg uas nplaim cig sib ntswg yos.” Yog li ntawd, thaum sawvdaws hnov suab raj suab xyu nrov, txhua tus ntawm txhua haivneeg thiab txhua xeem, tsis hais cov neeg uas hais yam lus twg, txawm pe tus mlom kub uas Vajntxwv Nenpukajnexales teeb tseg ntawd. Cov neeg Npanpiloos qee leej tau kom cov Yudais rau vajntxwv. Lawv hais rau Vajntxwv Nenpukajnexales hais tias, “Thov kom koj muaj sia nyob mus ibtxhis. Koj hais rau sawvdaws hais tias thaum pib tshuab raj tshuab xyu, ces kom txhua tus cia li pe tus mlom kub; yog leejtwg tsis pe koj yuav muab tus ntawd pov rau hauv cubtawg. Cov Yudais uas koj tau tsa los saib haujlwm nyob hauv lub xeev Npanpiloos muaj qee leej tuaj ntawm no. Lawv tsis ua raws li koj hais. Lawv cov ntawd yog Sadalas, Mesakas thiab Anpenekaus. Lawv peb leeg no tsis hwm thiab tsis kam pe tus mlom kub uas koj teeb tseg ntawd.” Thaum vajntxwv hnov li ntawd nws chim heev, nws thiaj tso neeg mus ntes lawv peb leeg ntawd los cuag nws. Vajntxwv nug lawv hais tias, “Sadalas, Mesakas thiab Anpenekaus, nej tsis hwm thiab tsis kam pe kuv tus mlom kub no puas yog? Ib pliag nej hnov dheev suab xyu, suab raj ntsia, suab raj nplaim thiab suab nkauj nogncas nrov, nej cia li pe tus mlom kub ntawd. Yog nej tsis kam pe kuv yuav muab nej pov rau hauv cubtawg. Nej xav hais tias tseem yuav muaj dua ib tug vajtswv nyob qhov twg los pab tau nej thiab no los?” Sadalas, Mesakas thiab Anpenekaus teb vajntxwv hais tias, “Vajntxwv, tsis yog peb xav hais kom peb yeej koj. Tiamsis yog hais tias tus Vajtswv uas peb hwm pom zoo pab peb, nws yeej yuav pab kom peb dim ntawm cov nplaim taws thiab ntawm koj txhais tes. Txawm yog nws tsis pab peb los peb hais rau koj hais tias peb yeej yuav tsis hwm thiab tsis pe tus mlom kub uas koj teeb tseg ntawd li.” Vajntxwv Nenpukajnexales chim heev rau Sadalas, Mesakas thiab Anpenekaus. Nws ua ntsejmuag dub nciab rau lawv. Nws thiaj samhwm kom nws cov tubtxib mus ntxiv taws kom lub cubtawg cig hlob dua qub xya npaug ntxiv. Nws hais kom nws cov tubrog uas muaj zog heev mus muab Sadalas, Mesakas thiab Anpenekaus lawv khi thiab coj mus pov rau hauv cubtawg. Cov tubrog txawm muab lawv peb leeg ntawd khi, cia lawv hnav lawv tej ris tsho, tsho loj, tsho me, ntoo kausmom huv tibsi thiab muab lawv pov rau hauv lub cubtawg. Vim vajntxwv tau hais kom lawv muab taws tsav ntxiv kom cig hlob dua qub, nplaim taws thiaj li kub cov tubrog uas muab lawv peb leeg ntawd pov rau hauv lub cubtawg tuag lawm. Thaum Sadalas, Mesakas thiab Anpenekaus lawv peb leeg poob mus rau hauv lub cubtawg hlua tseem khi nrees lawv. Tamsim ntawd Vajntxwv Nenpukajnexales txawm poob siab nthav thiab nws sawv tsees mus nug cov tubtxib hais tias, “Puas yog peb khi peb tug txivneej coj mus pov rau hauv lub cubtawg xwb?” Lawv teb hais tias, “Vajntxwv, yeej muaj tseeb li koj hais.” Vajntxwv rov hais tias, “Ua li cas kuv pom muaj plaub tug txivneej mus mus los los hauv lub cubtawg tsis muaj hlua khi lawv, thiab lawv tsis kub hnyiab li; tus plaub muaj ntsis zoo li ib tug timtswv.” Vajntxwv Nenpukajnexales txawm mus rau ntawm lub rooj qho cubtawg, nws xauj thiab hu hais tias, “Sadalas, Mesakas thiab Anpenekaus, nej cov uas yog Vajtswv tus uas muaj Hwjchim Loj kawg nkaus cov tubtxib, nej cia li tawm los.” Tamsim ntawd lawv txawm tawm los. Cov nomtswv uas nrog vajntxwv kav pejxeem thiab cov tswvxeev, vajntxwv cov tuavxam thiab nws cov tubtxib sawvdaws los saib lawv peb tug txivneej ntawd mas lawv tsis kub hnyiab li: plaubhau twb tsis caws ib txoj, ris tsho los tsis kub hnyiab, thiab lawv lub cev los twb tsis tsw nchauv li. Vajntxwv hais tias, “Thov ua Sadalas, Mesakas thiab Anpenekaus tus Vajtswv tsaug! Nws txib nws tus timtswv los cawm peb tug txivneej uas pehawm thiab tso siab rau nws. Lawv tsis ua raws li kuv tej lus, lawv yeem tso lawv txojsia tseg zoo dua li uas pe tej vajtswv uas tsis yog tus Vajtswv tiag. “Nimno kuv hais rau sawvdaws hais tias txhua tus ntawm txhua haivneeg, thiab txhua xeem, tsis hais cov neeg uas hais yam lus twg, yog leejtwg thuam Sadalas, Mesakas thiab Anpenekaus lawv tus Vajtswv, ces cia li muab tus ntawd hlais ib daig zuj zus thiab muab nws tej vajtse rhuav povtseg huv tibsi. Yeej tsis muaj ib tug vajtswv twg uas yuav pab tau neeg dim li tus Vajtswv no li.” Vajntxwv Nenpukajnexales tsa Sadalas, Mesakas thiab Anpenekaus lawv ua nom loj tshaj qub kav lub xeev Npanpiloos. Vajntxwv Nenpukajnexales sau tsab ntawv uas hais nram qab no xa mus rau txhua tus ntawm txhua haivneeg thiab txhua xeem, tsis hais cov neeg uas hais yam lus twg, nyob thoob plaws ntiajteb hais tias, “Thov kom nej sawvdaws noj qab nyob zoo thiab nyob kaj siab lug. Kuv thov qhia tej txujci tseemceeb uas yog Vajtswv tus uas muaj hwjchim loj kawg nkaus ua rau kuv pom rau nej paub. “Yam uas Vajtswv ua rau peb pom tseemceeb heev li! Tej txujci uas Vajtswv ua yog lub hwjchim uas loj kawg nkaus! Vajtswv yog tus Vajntxwv uas nyob mus ibtxhis; nws yuav kav mus tsis muaj hnub kawg. “Kuv ua neej nyob sov siab so hauv kuv lub vaj lub tsev, kuv muaj ib puas tsav yam siv tsis tag. Kuv tsis txob tsis txhawj ib yam dabtsi li. Tiamsis kuv ua ib zaj npau suav txaus ntshai heev thaum kuv tseem pw; zaj yogtoog uas kuv pom ntawd ua rau kuv ntshai kawg li. Kuv tso neeg mus hu kuv cov tuavxam uas ibtxwm nrog kuv tuav tswvyim hauv lub nroog Npanpiloos kom tuaj cuag kuv thiab qhia kuv zaj npau suav ntawd rau kuv saib yog li cas. Cov neeg uas txawj saib tes, txawj ua yeessiv, txawj saib xyab thiab txawj saib hnubqub thiaj tuaj cuag kuv. Kuv piav kuv zaj npau suav rau lawv mloog, tiamsis tsis muaj leejtwg txhais tau rau kuv li. Tom qab ntawd Daniyees txawm tuaj cuag kuv (Daniyees muaj dua ib lub npe hu ua Npeetesaxas raws li kuv tus vajtswv lub npe.) Nws muaj tej vajtswv uas dawbhuv tus ntsujplig nrog nraim nws. Kuv thiaj li piav kuv zaj npau suav rau nws mloog. Kuv hais rau nws hais tias, Npeetesaxas, koj yog cov neeg uas txawj saib tes tus thawj; kuv paub hais tias Vajtswv tus uas dawbhuv tus ntsujplig nrog nraim koj nyob. Thiab paub hais tias koj yeej totaub tej uas tsis muaj neeg paub. Kuv zaj npau suav yog li no. Koj cia li qhia rau kuv saib lub ntsiab txhais li cas. “Thaum kuv pw tsaug zog kuv ua npau suav pom ib tsob ntoo siab siab sawv hauv plawv ntiajteb. Tsob ntoo ntawd pheej siab zuj zus mus nto ntuj. Txhua tus uas nyob hauv ntiajteb no puavleej pom tsob ntoo ntawd. Tsob ntoo ntawd tej nplooj zoo nkauj heev, txi txiv ua nrw niab, txaus neeg ntiajteb tuaj noj. Tej tsiaj nruab nrag puavleej los nraim ntxoo hauv qab tsob ntoo ntawd, thiab noog kuj los ua zes rau saum tej ceg. Neeg thiab txhua yam uas muaj sia los tuaj noj tsob ntoo ntawd tej txiv. “Thaum kuv tabtom xav txog zaj npau suav no, kuv pom ib tug timtswv nqis saum ntuj los thiab saib ncig peslees. Nws hais nrov nrov hais tias, ‘Cia li muab tus ntoo no ntov, muab cov ceg thiab cov nplooj lwg kom tas, thiab muab tej txiv w rau txhua qhov. Raws tej tsiaj nruab nrag uas nyob hauv qab tsob ntoo kom khiav mus thiab raws tej noog uas nyob saum tej ceg kom ya tas, thiab muab saw tooj saw hlau los khi lub hauvpaus ntoo tseg rau nram tiaj. “ ‘Cia kom lwg ntsu los ntub tus txivneej no thiab cia nws nrog tej tsiaj nruab nrag thiab tej xyoob ntoo nyob ua ke. Nws lub siab yuav tsis zoo li neeg lub mus txog xya xyoo tiamsis yuav zoo li tsiaj lub. Cov timtswv ceebtsheej uas saib sawvdaws hais tias cov neeg uas nyob rau txhua qhov yuav tsum paub hais tias, Vajtswv tus uas muaj Hwjchim Loj kawg nkaus, nws muaj hwjchim loj dua tej tebchaws uas neeg ua vajntxwv kav, thiab nws xav tsa leejtwg ua vajntxwv kav tej tebchaws ntawd los tau; txawm yog tus ntse thiab tus ruam los nws yeej tsa tau.’ “Vajntxwv Nenpukajnexales hais tias, “Kuv zaj npau suav yog muaj raws li kuv tau piav tas los no. Koj cia li txhais zaj npau suav ntawd rau kuv. Kuv cov tuavxam uas pab kuv tuav tswvyim yeej tsis muaj ib tug txhais tau li tiamsis koj yeej yuav txhais tau, rau qhov tej vajtswv uas dawbhuv tus ntsujplig nrog nraim koj nyob.” Daniyees uas muaj dua ib lub npe hu ua Npeetesaxas poob siab nthav thiab tsis paub yuav hais li cas. Vajntxwv thiaj li hais rau nws hais tias, “Npeetesaxas, koj tsis txhob poob siab txog tej xwm uas yuav muaj los raws li zaj npau suav no.” Npeetesaxas teb hais tias, “Vajntxwv, thov kom koj zaj npau suav thiab tej xwm hauv koj zaj npau suav ntawd, raug koj cov yeebncuab xwb tsis txhob raug rau koj. Koj pom ib tsob ntoo loj thiab siab heev, lub ntsis siab nto ntuj plaws, txhua tus neeg uas nyob hauv ntiajteb no puavleej pom tsob ntoo ntawd. Tsob ntoo ntawd tej nplooj zoo nkauj heev thiab txi txiv ua nrw niab txaus neeg nyob thoob ntiajteb noj. Tej tsiaj nruab nrag los kuj los nraim ntxoo hauv tsob qab ntoo ntawd, thiab tej noog kuj los ua zes rau saum tej ceg. “Vajntxwv, koj yog tsob ntoo ntawd ntag, koj muaj zog mus nto ntuj, vammeej, muaj hwjchim thiab koj lub hwjchim kav mus thoob plaws lub ntiajteb. Vajntxwv, thaum koj tseem saib tsob ntoo ntawd, muaj ib tug timtswv nqis saum ntuj los hais tias, ‘Cia li ntov tsob ntoo no muab txiav kom tu thiab muab phua kom tawg, tsuas tseg lub hauvpaus ntoo nyob xwb. Thiab muab saw tooj saw hlau los khi lub hauvpaus ntoo cia rau nram tiaj. Cia kom lwg ntsu los ntub tus txivneej ntawd, thiab cia nws nrog tej tsiaj nruab nrag nyob nram tiaj xya xyoo.’ “Vajntxwv, tej xwm no yog tej uas Vajtswv tus uas muaj Hwjchim Loj kawg nkaus qhia rau koj paub txog tej uas yuav muaj los raug koj. Luag yuav ntiab koj khiav tsis pub koj nrog neeg nyob ua ke; koj yuav mus nrog tej tsiaj nruab nrag nyob. Koj yuav noj zaub ib yam li tej nyuj, thiab koj yuav pw hauv havzoov hav tsuag ntub lwg ntsuav mus txog xya xyoo. Tom qab ntawd koj yuav lees hais tias Vajtswv tus uas muaj hwjchim loj kawg nkaus yog tus kav tej tebchaws uas sawv vajntxwv kav thiab nws tsa neeg ua vajntxwv raws li nws pom zoo. Qhov uas tus timtswv hais kom tseg lub hauvpaus ntoo cia yog txhais hais tias thaum koj lees hais tias Vajtswv yog tus uas kav tagnrho lub ntiajteb. Ces koj yuav rov qab tau ua vajntxwv dua ib zaug ntxiv. Vajntxwv, koj cia li ua raws li uas kuv hais no: Koj tseg tsis txhob ua txhaum! Koj cia li ua zoo thiab hlub cov neeg txomnyem. Yog hais tias koj ua li no, koj yuav vammeej mus li.” Txhua yam uas tau hais ntawd txawm muaj tshwm los raug Vajntxwv Nenpukajnexales tiag. Tom qab ntawd kaum ob lub hlis, muaj ib hnub vajntxwv ncig mus ncig los saum nws lub tsev uas nyob hauv lub nroog Npanpiloos. Vajntxwv hais tias, “Lub nroog Npanpiloos no yog lub nroog uas loj kawg li. Kuv tsim lub nroog no ua kuv lub tuamceeb nroog kom sawvdaws thiaj li pom kuv lub hwjchim, kuv lub meejmom thiab kuv lub koob lub npe.” Thaum vajntxwv tseem hais lus tsis tau xaus, txawm muaj ib lub suab hais nrov ntxhe ntws saum ntuj tuaj hais tias, “Vajntxwv Nenpukajnexales, koj cia li mloog kuv hais! Kuv twb txo koj lub hwjchim, koj yuav tsis tau ua vajntxwv kav tebchaws lawm. Luag yuav muab koj ntiab tawm tsis pub koj nrog neeg nyob, koj yuav mus nrog tej tsiaj nruab nrag nyob ua ke, koj yuav noj zaub ib yam li tej nyuj mus txog xya xyoo. Tom qab ntawd koj yuav lees hais tias Vajtswv tus uas muaj Hwjchim Loj kawg nkaus yog tus kav tej tebchaws uas sawv vajntxwv kav, thiab Vajtswv tsa neeg ua vajntxwv raws li nws pom zoo.” Tamsim ntawd txawm muaj raws li tej lus no. Luag cia li muab Vajntxwv Nenpukajnexales ntiab khiav tsis pub nws nrog neeg nyob thiab nws mus noj zaub li nyuj noj. Nws lub cev ntub lwg ntsuav, nws cov plaubhau ntev ib yam li tis dav, thiab nws cov rau tes ntev ib yam li tej rau noog. Vajntxwv hais tias, “Thaum dhau xya lub xyoo lawm, kuv tsa qhovmuag ntsia saum ntuj. Kuv rov feeb meej, kuv thiaj ua tus Vajtswv uas muaj Hwjchim Loj kawg nkaus tsaug. Kuv qhuas thiab ua rau tus Vajtswv uas muaj sia nyob mus ibtxhis tau koob meej. “Vajtswv yuav kav mus ibtxhis, thiab nws lub tebchaws yuav nyob ruaj nrees mus tsis paub kawg. Nws suav hais tias neeg ntiajteb tsis tseemceeb dabtsi; cov timtswv saum ntuj thiab neeg ntiajteb puavleej nyob hauv nws lub xibteg. Tsis muaj leejtwg muaj cuabkav cheem tau tsis pub nws ua raws li nws lub siab nyiam lossis nug hais tias nws ua dabtsi. “Thaum kuv feeb meej lawm kuv rov tau koob meej, tau meejmom thiab rov tau kav lub tebchaws dua. Kuv cov nomtswv thiab kuv cov tubtxib puavleej zoo siab rov qab yuav kuv. Kuv rov tau ntsejmuag thiab muaj hwjchim heev dua yav tas los. “Nimno kuv uas yog Nenpukajnexales thov qhuas, thov hawm thiab ua rau tus Vajntxwv uas nyob saum Ntuj tau koob meej. Ib puas tsav yam uas Vajtswv ua puavleej yog thiab ncaj ncees, thiab nws ua tau rau cov neeg khavtheeb poob ntsejmuag.” Muaj ib hmos Vajntxwv Npesaxas txawm npaj ib rooj noj haus loj. Nws caw tsoom nomtswv loj ib txhiab leej tuaj nrog nws noj mov. Thaum uas lawv tabtom haus cawv txiv hmab, Vajntxwv Npesaxas txawm txib nws cov tubqhe mus muab tej khob nyiaj khob kub thiab tej tais nyiaj tais kub uas nws txiv Nenpukajnexales mus huab hauv lub tuamtsev tim lub nroog Yeluxalees los ntawd nqa los rau vajntxwv, nws tsoom nomtswv, nws cov pojniam thiab nws cov niamyau hliv cawv txiv hmab haus. Tamsim ntawd lawv thiaj li mus nqa tej khob nyiaj khob kub los hliv cawv rau lawv sawvdaws haus thiab qhuas tej mlom uas muab nyiaj, muab kub, muab tooj liab, muab hlau, muab ntoo thiab muab pobzeb ua ntawd. Tamsim ntawd txawm muaj ib txhais tes neeg cev loo los sau ntawv rau ntawm sab phabntsa uas luam hmoov sib uas taws teeb ci pom kev lam lug. Vajntxwv kuj pom thaum uas txhais tes ntawd tseem tabtom sau sau ntawv, mas ua rau vajntxwv lub ntsejmuag thimxem tas; nws poob siab thiab ntshai kawg li, thiab nws ob lub hauvcaug tshee mos nyoos. Vajntxwv thiaj hu tawg ntho kom tso neeg mus hu cov neeg uas txawj ua yeessiv, txawj saib xyab thiab txawj saib hnubqub kom tuaj cuag nws. Thaum lawv cov ntawd tuaj txog, nws hais rau lawv hais tias, “Leejtwg nyeem tau cov ntawv no thiab txhais tau cov ntsiab lus rau kuv paub, ces kuv yuav muab kuv lub tsho ntaub tsamxem thiab txoj saw kub uas coj muaj hwvxyeej rau tus ntawd hnav thiab coj. Thiab kuv yuav muab tus ntawd tsa ua ib tug nom loj uas yog ua tus yau theem peb ntawm kuv nrog kuv kav tebchaws.” Vajntxwv cov tuavxam tuaj tagnrho, tiamsis tsis muaj leejtwg nyeem tau cov ntawv ntawd thiab txhais tsis tau cov ntsiab lus rau vajntxwv li. Vim li no Vajntxwv Npesaxas hajyam poob siab heev thiab ua ntsejmuag ntshaus tas. Vajntxwv cov tuavxam los yeej tsis pom qab yuav ua zaj twg li. Thaum vajntxwv niam hnov vajntxwv thiab nws tsoom nomtswv hais lus nrov ntsoog qees, nws txawm mus rau hauv chav tsev uas lawv noj mov ntawd. Nws hais rau vajntxwv hais tias, “Thov kom vajntxwv muaj sia nyob mus ibtxhis. Vajntxwv, koj tsis txhob txhawj ua ntsejmuag thimxem tas li ko! Nyob hauv lub tebchaws uas koj kav no muaj ib tug txivneej uas muaj tej vajtswv uas dawbhuv tus ntsujplig nrog nws nyob. Lub sijhawm uas koj txiv tseem ua vajntxwv mas tus ntawd pab tau koj txiv. Nws muaj tswvyim pab tau txhua yam thiab nws txawj ntse ib yam li tej timtswv. Vajntxwv Nenpukajnexales uas yog koj txiv tau tsa tus txivneej ntawd ua tus uas saib tagnrho cov neeg uas txawj saib tes, txawj ua yeessiv, txawj saib xyab thiab txawj saib hnubqub. Nws ntse heev thiab txawj txhais tau tej npau suav, tej txhiaj txhais uas neeg hais thiab nws paub tej uas tsis muaj neeg paub. Koj cia li txib neeg mus hu Daniyees, tus uas koj txiv muab tis dua npe hu ua Npeetesaxas kom tuaj cuag koj. Nws yuav txhais tau tej lus no huv tibsi rau koj.” Tamsim ntawd lawv txawm mus coj Daniyees tuaj cuag vajntxwv. Vajntxwv hais rau Daniyees hais tias, “Koj yog Daniyees los? Koj puas yog cov neeg Yudais uas kuv txiv lawv coj tim tebchaws Yudas los? Kuv hnov hais tias tej vajtswv uas dawbhuv tus ntsujplig nrog nraim koj thiab hnov hais tias koj txawj ntse kawg li; koj paub thiab muaj tswvyim heev. Kuv twb hu kuv cov tuavxam thiab cov neeg uas txawj ua yeessiv tuaj txhais cov lus no rau kuv, tiamsis lawv txhais tsis tau li. Kuv hnov hais tias koj paub thiab txawj txhais tej zaj uas tsis muaj neeg paub lub ntsiab lus rau sawvdaws. Yog koj nyeem tau thiab txhais tau cov npe ntawv ntawd lub ntsiab rau kuv paub. Kuv yuav muab lub tsho ntaub tsamxem thiab txoj saw kub uas coj muaj hwvxyeej rau koj hnav thiab coj. Thiab kuv tseem yuav muab koj tsa ua ib tug nom loj uas yog tus yau theem peb ntawm kuv nrog kuv kav lub tebchaws no.” Daniyees teb hais tias, “Vajntxwv thov koj cia li muab tej uas koj yuav muab ko khaws tseg lossis muab rau lwm tus. Txawm li cas los kuv yuav nyeem thiab txhais cov ntsiab lus ntawd rau koj, tiamsis kuv tsis yuav nqi zog li. “Vajtswv tus uas muaj Hwjchim Loj kawg nkaus tau tsa koj txiv Nenpukajnexales ua tus vajntxwv uas muaj hwjchim loj thiab pub nws muaj koob meej nyob nto moo lug; nws thiaj muaj hwjchim heev. Txhua tus ntawm txhua haivneeg, txhua xeem, thiab tsis hais cov neeg uas hais yam lus twg los puavleej ntshai koj txiv ua ibce tshee hnyo. Yog nws xav tua leejtwg nws yeej tua tau. Yog nws xav tso leejtwg dim, nws yeej tso tau. Thiab nws yuav txo leejtwg nws yeej txo tau raws li nws pom zoo. Tiamsis yog vim qhov uas nws khavtheeb, tawv ncauj thiab ua nruj ua tsiv heev, nws thiaj li poob hwjchim thiab tsis tau ua vajntxwv lawm. Luag muab nws ntiab khiav tsis pub nws nrog neeg nyob, thiab nws lub siab txawm zoo li tsiaj lub lawm; nws mus nrog tej neesluav qus nyob rau nruab nrag. Nws noj zaub li nyuj noj thiab nws pw hauv havzoov hav tsuag tsau lwg tsawv tsis muaj dabtsi vov. Thaum kawg nws mam li lees hais tias Vajtswv tus uas muaj hwjchim loj yog tus kav neeg ntiajteb thiab tej tebchaws uas sawv muaj vajntxwv kav. Thiab nws lees hais tias Vajtswv xav tsa leejtwg ua vajntxwv kav tebchaws los yeej tau. “Tiamsis Npesaxas, koj uas yog nws tus tub, txawm yog koj twb paub tej no zoo lawm los koj tsis txo koj lub hwjchim li thiab. Koj tau ua txhaum tawmtsam tus TSWV uas kav saum ntuj uas yog koj mus rho tej khob thiab tej tais uas nqa hauv Vajtswv lub Tuamtsev los, koj coj los rau koj thiab koj tsoom nomtswv, koj cov pojniam thiab koj cov niamyau hliv cawv txiv hmab haus, thiab nej qhuas tej vajtswv uas muab nyiaj, muab kub, muab tooj liab, muab hlau, muab ntoo thiab muab pobzeb ua, tej vajtswv ntawd tsis pom kev, tsis hnov lus thiab tsis paub ib yam dabtsi li. Koj tsis hwm Vajtswv tus uas tuav koj txojsia thiab kav tagnrho ib puas tsav yam uas koj ua. Twb yog vim li ntawd Vajtswv thiaj ua ib txhais tes los sau tej lus ntawd ntag. “Cov npe ntawv ntawd sau hais tias: ‘MENES, MENES, TEKELES, PALEXEES.’ MENES, txhais hais tias Vajtswv twb suav thiab teem cov hnub uas koj ua vajntxwv kav tebchaws tseg lawm, tsuas pub koj ua vajntxwv txij li no xwb; TEKELES, txhais hais tias Vajtswv twb muab koj luj tas lawm, koj sib heev. PALEXEES, txhais hais tias Vajtswv yuav muab koj lub tebchaws faib ua ob lub. Mas muab ib nrab faib rau cov neeg Medes thiab muab ib nrab faib rau cov neeg Pawxias.” Tamsim ntawd Vajntxwv Npesaxas txawm hais kom lawv muab nws lub tsho loj coj los rau Daniyees hnav thiab muab txoj saw kub uas coj muaj hwvxyeej los rau Daniyees coj. Nws tsa Daniyees ua tus nom loj theem peb ntawm nws nrog nws kav tebchaws. Ces hmo ntawd Npesaxas uas yog vajntxwv kav lub tebchaws Npanpiloos txawm raug luag muab tua povtseg lawm. Dali-us uas yog neeg Medes txawm txeeb ua tus uas kav lub tebchaws ntawd. Lub sijhawm ntawd Dali-us muaj hnubnyoog rau caum ob xyoos. Vajntxwv Dali-us txawm pom zoo yuav tsa ib puas nees nkaum leej los ua cov tswvxeev mus kav txhua lub xeev hauv lub tebchaws uas nws kav. Vajntxwv tau tsa Daniyees thiab tsa dua ob tug ua cov uas tshuaj saib cov tswvxeev tes haujlwm, kom vajntxwv thiaj li kav thiab tswj tau lub tebchaws zoo. Daniyees los tuav lub luag haujlwm uas yog tshuaj saib cov tswvxeev ua haujlwm. Nws ua tau zoo tshaj li lwm tus uas tshuaj saib cov tswvxeev. Thiab Daniyees tseem ua haujlwm zoo tshaj cov tswvxeev txhua tus huv tibsi. Vim li ntawd vajntxwv thiaj xav muab Daniyees tsa ua tus uas saib thoob plaws lub tebchaws. Lwm tus nom uas nrog Daniyees tshuaj saib cov tswvxeev tes haujlwm txawm pheej nrhiav lus kom Daniyees. Lawv soj nraim Daniyees kev ua haujlwm kav tebchaws saib nws puas ua yuam kev qhov twg, lawv thiaj li tau lus kom nws; tiamsis lawv nrhiav tsis tau ib qho uas Daniyees ua yuam kev uas lawv yuav kom tau nws li, rau qhov Daniyees yog ib tug neeg uas muab siab rau ua haujlwm thiab nws tsis ua tej uas txhaum kevcai thiab tej uas tsis ncaj hlo li. Lawv txawm sib tham hais tias, “Peb yeej yuav nrhiav tsis tau ib yam dabtsi los kom Daniyees li. Tsuas yog nrhiav tau lus kom qhov uas nws coj nws tus Tswv txoj Kevcai nkaus xwb.” Yog li ntawd, lawv thiaj li mus cuag vajntxwv Dali-us thiab hais rau vajntxwv hais tias, “Vajntxwv, thov kom koj muaj sia nyob mus ibtxhis. Peb txhua tus uas saib haujlwm thoob plaws koj lub tebchaws, tsis hais cov uas tshuaj saib cov tswvxeev tes haujlwm lossis cov uas pab tus tswvxeev lossis cov nomtswv saib haujlwm lwm yam, peb sawvdaws puavleej pom zoo hais tias tsimnyog koj yuav tsum ua ib txoj kevcai rau sawvdaws coj. Thov koj cia li txwv tu nrho hais tias peb caug hnub saum no tsis pub leejtwg thov ib tug vajtswv twg lossis thov ib tug neeg twg li, tsuas yog thov koj tib leeg xwb. Yog leejtwg hla koj tej lus no ces cia li muab tus ntawd pov rau hauv lub qhov uas kaw tsov ntxhuav. Vajntxwv, thov koj cia li tsim txoj kevcai no thiab sau koj lub npe rau thiaj tseemceeb raws li Medes thiab Pawxias txoj kevcai uas yeej hloov tsis tau li.” Yog li ntawd, Vajntxwv Dali-us thiaj sau npe rau hauv tsab ntawv kevcai ntawd. Thaum Daniyees paub hais tias Vajntxwv sau npe rau hauv tsab ntawv ntawd lawm, nws txawm rov mus tsev. Nws lub tsev chav uas nyob txheej saud muaj ib lub qhovrai qhib lug tig ncaj mus rau lub nroog Yeluxalees. Nws mus txhos caug tig xubntiag rau ntawm lub qhovrai ntawd thiab thov Vajtswv ib hnub twg peb zaug raws li nws ibtxwm thov. Thaum cov neeg uas ntxub Daniyees pom Daniyees thov Vajtswv, lawv txawm sau nthwv mus cuag vajntxwv thiab kom Daniyees rau vajntxwv hais tias, “Vajntxwv, koj twb sau koj lub npe rau hauv tsab ntawv uas koj txwv hais tias peb caug hnub saum no tsuas pub sawvdaws thov koj tib leeg xwb. Yog leejtwg thov ib tug vajtswv twg lossis ib tug neeg twg, ces cia li muab tus ntawd pov rau hauv lub qhov uas kaw tsov ntxhuav.” Vajntxwv teb hais tias, “Yeej muaj raws li nej hais ko lawm tiag. Tej lus ntawd yog tej lus uas txwv tu nrho, raws li Medes thiab Pawxias txoj kevcai mas yeej rhuav tsis tau hlo li.” Lawv txawm hais rau vajntxwv hais tias, “Tus Daniyees uas ntes tim tebchaws Yudas los, nws tsis hwm koj thiab tsis mloog tej lus uas koj hais rau sawvdaws ntawd li. Nws niaj hnub thov nws tus Vajtswv, ib hnub twg nws thov peb zaug.” Thaum vajntxwv hnov li ntawd, nws ntxhov siab heev thiab nws nrhiav saib puas muaj ib txojkev twg yuav pab tau Daniyees. Nws thiaj nrhiav kev pab Daniyees ib hnub tsaus ntuj ntais. Cov neeg ntawd rov qab tuaj cuag vajntxwv dua thiab hais tias, “Vajntxwv, koj yeej paub lawm hais tias raws li Medes thiab Pawxias txoj kevcai mas tej lus uas vajntxwv hais rau sawvdaws lawm yeej tsis muaj ib los twg yuav hloov tau li.” Ces vajntxwv thiaj kom lawv muab Daniyees coj mus pov rau hauv lub qhov uas kaw tsov ntxhuav, thiab nws hais rau Daniyees hais tias, “Thov koj tus Vajtswv uas koj muab siab npuab pab cawm koj.” Lawv muab daim lag zeb los npog lub rooj qho, thiab vajntxwv muab nws lub homthawj thiab cov nomtswv lub homthawj nias rau saum daim lag zeb tsis pub kom leejtwg tuaj pab tau Daniyees dim li. Vajntxwv rov qab mus rau hauv nws lub loog; hmo ntawd nws tsis noj mov, tsis pub luag tuaj ua kev lomzem raws li ibtxwm ua, thiab nws pw tsis tsaug zog ib hmos kaj ntug. Vajntxwv sawv ntxov tsees khiav mus rau tom lub qhov uas kaw tsov ntxhuav. Thaum nws mus yuav txog, nws hu nrov nrov ua suab quaj tu siab nrho hais tias, “Daniyees uas yog Vajtswv tus muaj sia nyob tus tubtxib, koj tus Vajtswv uas koj muab siab npuab puas pab tau koj dim ntawm cov tsov ntxhuav los tsis tau?” Daniyees teb hais tias, “Vajntxwv, thov kom koj muaj sia nyob ntev dhawv mus ibtxhis tsis kawg. Vajtswv txib nws tus timtswv los kaw cov tsov ntxhuav qhovncauj tsis pub tsov ua li cas rau kuv. Vajntxwv, qhov uas Vajtswv ua li no rau kuv, vim nws paub hais tias kuv tsis muaj txim thiab kuv tsis tau ua ib qhov yuam kev li.” Vajntxwv zoo siab kawg li, nws thiaj hais kom lawv cia li rub Daniyees tawm hauv qhov tsov los, lawv thiaj sib pab rub Daniyees tes tawm los. Lawv pom hais tias Daniyees yeej tsis raug mob ib qho li, vim nws tso siab rau Vajtswv. Vajntxwv thiaj samhwm kom muab cov neeg uas kom Daniyees ntawd thiab lawv tej pojniam menyuam pov huv tibsi rau hauv lub qhov uas kaw tsov ntxhuav ntawd. Thaum lawv muab cov neeg ntawd pov rau hauv lub qhov kaw tsov ntxhuav, cov neeg ntawd poob twb tsis tau ti rau hauv qab qho, tsov twb dhia tuaj muab lawv dua noj tas lawm. Tom qab ntawd Vajntxwv Dali-us sau ib tsab ntawv xa mus rau txhua tus ntawm txhua haivneeg thiab txhua xeem, tsis hais cov neeg uas hais yam lus twg uas nyob thoob lub tebchaws uas nws kav hais li no: “Thov kom nej sawvdaws ntsib kev noj qab nyob zoo, muaj kev kaj siab lug thiab muaj kev vammeej mus lawm yav ntom ntej. Kuv hais rau sawvdaws paub hais tias txhua tus pejxeem uas kuv kav yuav tsum hwm thiab saib taus Daniyees tus Vajtswv. “Nws yog tus Vajtswv uas muaj sia nyob, thiab nws yuav kav mus ibtxhis. Nws lub tebchaws yuav tsis raug kev puastsuaj, thiab nws yuav muaj hwjchim nyob mus ibtxhis li. Nws cawm thiab pab tau neeg dim; nws ua tej txujci tseemceeb uas peb xav tsis thoob rau saum nruab ntug thiab hauv ntiajteb no. Nws tau pab Daniyees dim tsis pub tsov ntxhuav tom.” Lub sijhawm uas Dali-us kav lub tebchaws Npanpiloos thiab Xailas kav lub tebchaws Pawxias, mas Daniyees lub neej zoo thiab vammeej heev. Daniyees hais tias thawj xyoo uas Npesaxas ua vajntxwv kav lub tebchaws Npanpiloos, muaj ib hmos thaum uas kuv tseem pw saum txaj, kuv txawm ua ib zaj npau suav. Kuv muab zaj npau suav thiab tej uas kuv pom hmo ntawd sau tseg li no: Muaj ib co cua tuaj plaub ceg kaum ntuj tuaj ntsawj cov nplaim dej hiavtxwv. Tamsim ntawd txawm cia li muaj plaub tug tsiaj loj tawm hauv hiavtxwv tuaj. Cov tsiaj ntawd zoo tsis sib thooj, thawj tug muaj ntsis zoo li tus tsov ntxhuav, tiamsis nws muaj tis ib yam li dav. Thaum kuv tseem saib ntsoov ntawd, luag txawm muab nws tej plaub tis rho povtseg, thiab muab tus tsiaj ntawd tsa sawv ntsug li tus neeg. Thiab luag pub tus tsiaj ntawd txawj xav li neeg. Kuv pom dua tus tsiaj ob muaj ntsis zoo li tus dais uas tabtom sawv ntsug nres nroos, thiab nws npuav rawv peb tug pobtxha tav ntawm nws qhovncauj; thiab muaj ib lub suab hais rau nws hais tias, “Cia li noj nqaij kom tsau.” Thaum kuv tseem saib ntsoov, kuv txawm pom dua ib tug tsiaj tawm tuaj. Tus tsiaj peb ntawd muaj ntsis zoo li tus tsov pomtxwv, tiamsis nws muaj plaub sab tis nyob nraum nraubqaum ib yam li tis noog. Thiab nws muaj plaub lub taubhau, saib mas zoo li nws muaj hwjchim heev. Thaum kuv tseem saib ntsoov, kuv txawm pom dua ib tug tsiaj uas yog tus plaub. Tus tsiaj ntawd tsivtsaim, phem thiab muaj zog heev. Nws muaj ib co hniav hlau loj loj; nws noj zaws zog tej yam uas nws tom tau los thiab muab tej seem uas nws noj tsis tas tsuj pes ntiag ua lwj ua liam povtseg. Tus tsiaj no muaj kaum tus kub, thiab nws zoo tsis thooj li lwm tus tsiaj. Thaum kuv saib cov kub ntawd, kuv pom ib tug kub me me tuaj xyaw cov kub ntawd. Thaum tus kub me me ntawd tawm tuaj mas ua rau peb tug kub uas xub tuaj rho hlo los. Tus kub no muaj qhovmuag thiab qhovncauj ib yam li neeg. Nws hais lus khav txiv ntxhias. Thaum kuv tseem saib ntsoov tus tsiaj ntawd, muaj neeg nqa tej zwmtxwv los txawb rau qhov ntawd. Ces tus uas muaj sia nyob ibtxhis txawm los zaum saum cov zwmtxwv ntawd ib lub. Nws cev ris tsho dawb paug ib yam li cov daus thiab nws cov plaubhau dawb ib yam li cov plaub yaj. Nws lub zwmtxwv muaj nplaim taws cig laim lias, thiab lub zwmtxwv cov log los muaj nplaim taws cig laim lias thoob plaws. Tej nplaim taws cig liab vog ntawm lub zwmtxwv ua ib kabsab ntws li dej ntws. Muaj ntau txhiab leej ua cov tu nws, thiab muaj ntau plhom neeg sawv ze ntawm nws lub xubntiag. Cov txiav txim txawm pib tshuaj tej plaub ntug thiab lawv muab tej ntaub ntawv nthuav los nyeem. Thaum kuv tseem saib ntsoov, kuv hnov tus kub me me ntawd lub suab hais khav txiv ntxhias, kuv mam li ntsia dheev ua ciav luag twb muab tus tsiaj plaub tua tuag lawm, thiab luag muab tus tsiaj ntawd pov rau hauv cubtawg kub hnyiab tas. Peb tug tsiaj uas tseem ciaj, luag muab txo hwjchim tas, thiab luag cia peb tug tsiaj ntawd muaj sia nyob ib nyuag ntu xwb. Hmo ntawd thaum kuv tabtom ua yogtoog pom tej no, kuv pom muaj ib tug zoo li tus neeg. Nws txawm los ze rau ntawm kuv; muaj ib co huab los roos nws thiab muaj dua ib tug los coj nws mus cuag tus uas muaj sia nyob ibtxhis. Luag pub nws muaj meejmom, muaj koob meej thiab muaj hwjchim tswj teb kav chaw kom txhua tus ntawm txhua haivneeg thiab txhua xeem, tsis hais cov neeg uas hais yam lus twg, thiaj yuav tau ua nws qhev. Nws yuav muaj hwjchim mus ibtxhis thiab nws yuav kav mus tsis paub kawg. Tej uas kuv ua yogtoog pom no ua rau kuv poob siab thiab ntxhov siab kawg li. Kuv thiaj li mus cuag cov neeg uas sawv ntawd ib tug thiab thov nws qhia tej ntawd rau kuv. Yog li ntawd, nws thiaj qhia lub ntsiab rau kuv. Nws hais tias, “Plaub tug tsiaj ntawd yog piv txog plaub lub tebchaws uas yuav muaj vajntxwv sawv los kav. Tiamsis Vajtswv tus uas muaj Hwjchim Loj kawg nkaus haivneeg yuav tau nws lub hwjchim thiab yuav kav lub tebchaws ntawd mus ibtxhis.” Kuv thiaj yimhuab xav paub zaj uas hais txog tus tsiaj plaub. Tus tsiaj ntawd zoo tsis thooj li lwm tus tsiaj. Nws yog ib tug tsiaj uas tsivtsaim heev. Nws tej hniav yog hlau, thiab tej rau yog tooj liab. Nws noj zaws zog tej uas nws tom tau los thiab muab tej seem uas nws noj tsis tas tsuj ua lwj ua liam povtseg. Kuv xav paub txog kaum tug kub thiab tus kub me me uas tuaj ua rau peb tug kub uas xub tuaj cia li rho hlo lawm. Tus kub me me ntawd muaj qhovmuag thiab muaj qhovncauj, thiab nws hais lus khav txiv ntxhias; saib mas yam li tus kub me me ntawd tsiv dua lwm tus kub huv tibsi. Thaum kuv tseem saib ntsoov, tus kub ntawd txawm tawmtsam yeej Vajtswv haivneeg lawm. Tom qab ntawd tus uas muaj sia nyob mus ibtxhis txawm los txiav txim. Thaum nws txiav txim, nws tuaj Vajtswv tus uas muaj Hwjchim Loj kawg nkaus haivneeg tog. Twb txog lub sijhawm uas Vajtswv haivneeg tau txais lub hwjchim kav tebchaws lawm. Nws txhais tej uas kuv ua yogtoog pom rau kuv hais tias, “Tus tsiaj plaub yog lub tebchaws plaub nyob hauv ntiajteb no uas yuav sawv muaj vajntxwv los kav. Lub tebchaws ntawd yuav zoo tsis thooj li lwm lub. Nws yuav tsoo lub ntiajteb no thiab yuav muab tsuj kom puastsuaj tas huv tibsi. Kaum tus kub ntawd yog kaum tus vajntxwv uas yuav sawv los kav lub tebchaws ntawd. Tom qab ntawd yuav muaj dua ib tug vajntxwv sawv los kav. Tus vajntxwv no yuav zoo tsis thooj li cov vajntxwv uas twb xub kav ua ntej lawm; nws yuav txo peb tug vajntxwv ntawd kom poob. Nws yuav hais lus twm Vajtswv tus uas muaj Hwjchim Loj kawg nkaus, thiab nws yuav tsimtxom Vajtswv haivneeg. Nws yuav txhob txwm sim hloov Vajtswv Txojlus thiab tej Kevcai saib puas hloov tau. Vajtswv haivneeg yuav poob rau hauv nws txhais tes peb xyoos thiab rau lub hlis. Tom qab ntawd cov txiav txim uas yog neeg qaum ntuj yuav pib tshuaj plaub ntug. Lawv yuav txiav txim txo nws lub hwjchim thiab ua kom nws puastsuaj mus. Luag yuav muab lub ntiajteb tej tebchaws uas muaj vajntxwv kav, tej hwjchim thiab tej kev vammeej cob rau tus Vajtswv uas muaj Hwjchim Loj kawg nkaus haivneeg tuav. Vajtswv haivneeg yuav muaj hwjchim kav mus ibtxhis. Tagnrho tej nomtswv uas nyob hauv ntiajteb no yuav ua lawv qhev thiab yuav mloog lawv lus.” Tej uas kuv ua yogtoog pom ces muaj npaum li no xwb. Thaum kuv pom tej ntawd ua rau kuv ntshai heev, kuv ntsejmuag thimxem tas, tiamsis kuv nco ntsoov tej ntawd cia rau nruab siab. Daniyees hais tias thaum uas Npesaxas ua vajntxwv tau peb xyoos lawm, kuv rov ua dua ib zaj yogtoog uas yog zaj ob. Kuv ua yogtoog pom hais tias kuv nyob hauv lub nroog Xuxas uas muaj ntsa yeej thaiv puagncig thiab nyob hauv lub tebchaws Elas. Kuv mus sawv ze ze ntawm tus Dej Ulais. Thaum kuv tsa qhovmuag ntsia, kuv txawm pom ib tug laug yaj sawv ntawm ntug dej, nws tuaj ob tug kub ntev heev. Nws tus kub uas tuaj tom qab ntev dua tus kub uas xub tuaj. Kuv pom tus laug yaj ntawd yoj kub mus rau sab hnubpoob sab ped thiab sab nrad. Tsis muaj ib tug tsiaj uas yuav cheem tau nws lossis khiav dim ntawm nws li. Nws ua raws li nws lub siab, nws thiaj khavtheeb heev. Thaum uas kuv tabtom ua tib zoo muab zaj no coj los xav saib yog li cas, txawm muaj ib tug laug tshis khiav ceev heev sab hnubtuaj tuaj, zoo li nws tej tes taw twb tsis chwv av li. Tus laug tshis ntawd muaj ib tug kub khov kho tuaj ntawm nws lub hauvpliaj. Thaum tus laug tshis tuaj yuav txog ntawm tus laug yaj uas kuv pom sawv ntawm ntug dej, tus tshis txawm khiav ncaj nraim mus nrau tus laug yaj. Kuv saib ntsoov tus laug tshis nrau tus laug yaj ntawd. Tus laug tshis npautaws heev, nws sib zog nrau ua rau tus laug yaj ob tug kub lov ntho lawm. Tus laug yaj tsis muaj zog thiaj kov tsis yeej. Tus laug tshis thiaj nrau ua rau tus laug yaj ntog da luam rau hauv av. Tus laug tshis muab tus laug yaj tsuj nthi tsis muaj leejtwg pab cawm tau tus laug yaj dim li. Tus laug tshis txawm khavtheeb heev zuj zus, tiamsis thaum nws khav heev ntawd, nws tus kub txawm lov ntho lawm. Ces txawm tuaj dua plaub tug kub khov kho li tus qub. Thiab cov kub ntawd nyias lem nyias mus rau ib qho. Muaj ib tug kub me me txawm ncau hauv plaub tug kub ntawd ib tug tuaj. Tus kub ntawd nthuav nws lub hwjchim mus rau sab qabteb, sab hnubtuaj thiab mus rau hauv lub Tebchaws uas Vajtswv tau coglus tseg yuav muab pub rau nws haivneeg Yixalayees nyob. Nws muaj zog heev zuj zus, thiab nws yuav ntaus cov tubrog qaum ntuj thiab tej hnubqub. Nws muab tej hnubqub qee ntsauv pov los rau hauv av thiab muab tsuj nthi tseg. Nws tseem kwvnyom tus thawj tubrog uas kav cov tubrog qaum ntuj tej lus. Nws txwv tsis pub leejtwg tua tsiaj fij rau tus thawj tubrog qaum ntuj ntawd. Thiab nws ua rau lub Tuamtsev puastsuaj tas. Sawvdaws pheej ua kev txhaum ntawm lub Tuamtsev; lawv tsis tua tsiaj hlawv ua khoom fij raws li yav tas los uas lawv niaj hnub ua thiab lawv tso Vajtswv txoj Kevcai uas yog txoj tseemceeb tseg. Tus kub no ua tau ib puas tsav yam tagnrho. Kuv hnov ob tug timtswv sib tham; muaj ib tug hais rau ib tug hais tias, “Thaum twg tej xwm uas hais hauv zaj yogtoog no mam li dua mus? Tej neeg niaj hnub ua kev phem kev qias, yuav niaj hnub tua tsiaj theej txhoj mus ntev li cas? Luag yuav tsuj cov tubrog qaum ntuj thiab lub Tuamtsev mus txog hnub twg?” Ob tug timtswv ntawd muaj ib tug teb hais tias, “Yuav muaj li no mus kom txog ib txhiab ib puas tsib caug hnub, thiab lub sijhawm ntawd yuav tsis muaj neeg tua tsiaj fij lawm, tsis hais thaum sawv ntxov lossis thaum yav tsaus ntuj. Tom qab ntawd lawv yuav rov los kho Vajtswv lub Tuamtsev dua tshiab.” Daniyees hais tias thaum kuv pom tej ntawd kuv ua tib zoo saib kom totaub. Tamsim ntawd txawm muaj ib tug zoo li tus neeg los sawv ntawm kuv hauv ntej, thiab kuv hnov ib lub suab hu sab ntug Dej Ulais tim ub tuaj hais tias, “Khali-ees, koj cia li txhais tej uas nws pom ntawd lub ntsiab rau nws paub.” Khali-ees txawm los sawv ntawm kuv ib sab; kuv ntshai heev thiab kuv cia li ntog rau hauv av. Tus timtswv ntawd hais rau kuv hais tias, “Tub noobneej, kom koj totaub hais tias zaj yogtoog uas koj pom ntawd yog qhia txog lub sijhawm uas ntiajteb kawg.” Thaum tus timtswv tabtom hais lus, kuv cia li tsis nco qab hlias lawm, tiamsis tus timtswv ntawd thiaj los tsa kuv sawv thiab hwj kuv lub cev. Nws hais rau kuv hais tias, “Kuv qhia rau koj paub hais tias thaum uas Vajtswv chim heev lawm yuav zoo li cas. Zaj yogtoog no yog qhia txog lub sijhawm uas ib puas tsav yam kawg. “Tus laug yaj uas koj pom muaj ob tug kub ntawd piv txog lub tebchaws Medes thiab lub tebchaws Pawxias. Tus laug tshis piv txog lub tebchaws Kilis, thiab tus kub uas tuaj ntawm nws hauvpliaj yog piv txog haivneeg Kilis thawj tug vajntxwv. Plaub tug kub uas tuaj ntawm thawj tug kub uas lov lawm qhov chaw yog piv txog plaub lub tebchaws uas tawg tawm ntawm thawj lub tebchaws, tiamsis yuav tsis muaj zog npaum li thawj lub tebchaws lawm. “Lub sijhawm uas plaub lub tebchaws ntawd yuav kawg, cov neeg uas nyob hauv twb ua kev phem kev qias txaus raug txim lawm. Thaum ntawd yuav muaj ib tug sawv los ua vajntxwv, tiamsis nws yuav tawv ncauj, ua nruj ua tsiv thiab dag ntxias sawvdaws. Tus vajntxwv no muaj hwjchim loj heev zuj zus tuaj, tiamsis lub sijhawm ntawd tsis yog nws lub zog ua tau. Nws yuav ua rau sawvdaws raug kev puastsuaj loj kawg nkaus, thiab nws yuav ua tau ib puas tsav yam tiav tagnrho. Nws yuav ua rau cov neeg uas muaj hwjchim thiab Vajtswv haivneeg kom raug kev puastsuaj. Vim nws muaj lub tswvyim uas phem heev, nws yuav ua ib puas tsav yam ntxias kom nws tau kav tebchaws. Nws yuav khavtheeb heev thiab nws yuav rhuav kom neeg coob tus puastsuaj tsis muaj leejtwg ras txog li. Txawm yog tus Vajntxwv ntawm tej vajntxwv los nws yeej tsis ntshai li. Tiamsis lub hwjchim uas tsis yog neeg lub yuav ua rau nws raug kev puastsuaj. Zaj yogtoog uas hais txog tej tsiaj uas neeg muab tua hlawv fij thaum sawv ntxov thiab thaum tsaus ntuj uas kuv qhia rau koj paub no yeej yuav tiav, tiamsis koj yuav tsum npog zaj no cia tsis txhob qhia rau leejtwg paub, rau qhov tseem tshuav ntev mam li txog lub sijhawm uas muaj raws li zaj yogtoog no.” Daniyees hais tias kuv qaug zog thiab mob tau ntau hnub kuv mam li sawv taus mus ua tej haujlwm uas vajntxwv muab cob rau kuv ua. Zaj yogtoog ntawd ua rau kuv xav tsis thoob thiab kuv tsis totaub hlo li. Vajntxwv Xawxes uas yog neeg Medes tus tub Dali-us ua vajntxwv kav lub tebchaws Npanpiloos. Daniyees hais tias thawj xyoos uas Dali-us ua vajntxwv kav tebchaws, kuv kawm Vajtswv tej ntawv thiab kuv xav txog lub nroog Yeluxalees uas yuav raug puastsuaj xya caum xyoo raws li tus TSWV tau hais rau Yelemis tus uas cev Vajtswv lus sau tseg lawm. Kuv kub siab lug thov tus Tswv uas yog Vajtswv. Kuv yoo mov, kuv hnav ntaubtsaj thiab kuv zaum hauv qhov tshauv. Kuv thov tus Tswv uas yog Vajtswv, thiab kuv lees tej kev txhaum uas kuv haivneeg ua. Kuv thov hais tias, “Tus Tswv uas yog Vajtswv. Koj yog tus uas muaj hwjchim loj, peb hwm koj. Koj yeej ua raws nraim li koj tej lus cog tseg. Koj hlub tus uas muab siab npuab koj thiab ua raws li koj tej lus. “Peb tau ua txhaum; peb lub siab yeej phem thiab peb yuam kev lawm. Peb tsis mloog koj lus, thiab peb tsis kam ua tej uas koj qhia kom peb ua raws li koj lub siab nyiam. Peb pheej tsis ntseeg tej uas koj cov cevlus qhia peb. Lawv yog koj cov tubtxib uas koj txib los piav qhia rau peb cov vajntxwv, cov nomtswv, cov yawgkoob thiab rau peb haivneeg sawvdaws. Tus TSWV, koj yog tus uas ncaj ncees, tiamsis peb sawvdaws pheej ua txhaum. Luag saib tsis taus peb cov Yixalayees uas nyob tim tebchaws Yudas, cov uas nyob hauv lub nroog Yeluxalees thiab cov uas raug koj ntiab tawm khiav mus rau lwm lub tebchaws deb thiab ze lawm. Luag saib tsis taus peb, vim peb tsis muab siab npuab koj. Tus Tswv, peb cov vajntxwv, peb cov nomtswv thiab peb sawvdaws tau ua phem ua qias rau koj. Txawm yog peb pheej ntxeev siab rau koj los koj tseem hlub thiab zam peb lub txim. Tus TSWV uas yog peb tus Vajtswv, thaum koj txib koj cov cevlus uas yog koj cov tubtxib tuaj qhia kom peb ua raws li koj tej Kevcai los peb tsis mloog koj tej lus li. Cov Yixalayees puavleej ua txhaum koj tej Kevcai thiab tsis mloog koj tej lus. Peb sawvdaws tau ua txhaum, koj thiaj rau txim rau peb raws li koj tej lus foom phem uas sau rau hauv koj tus tubtxib Mauxes phau Kevcai lawm. Koj rau txim rau peb thiab cov nomtswv raws li koj tau hais tseg. Koj rau txim rau lub nroog Yeluxalees hnyav tshaj li uas koj rau txim rau lwm lub nroog hauv ntiajteb no huv tibsi. Peb raug ib puas tsav yam txim raws li tej lus uas Mauxes phau Kevcai qhia tseg. Tus Tswv uas yog peb tus Vajtswv, txawm yog nimno los peb tseem tsis mob siab ua raws li koj lub siab nyiam. Peb pheej ua kev txhaum tsis tso tseg, thiab peb tsis ua raws li qhov tseeb. Tus TSWV uas yog peb tus Vajtswv, koj yeej xav tseg lawm hais tias koj yuav rau txim rau peb; nimno koj twb rau txim rau peb li ntawd lawm tiag, rau qhov ib puas tsav yam uas koj ua koj yeej ua ncaj, tiamsis yog peb tsis mloog koj lus xwb. “Tus TSWV uas yog peb tus Vajtswv, qhov uas koj coj koj haivneeg khiav tawm nram tebchaws Iziv los yog ua rau kom sawvdaws pom koj lub hwjchim. Niaj hnub no los peb tseem nco ntsoov koj lub hwjchim ntawd. Peb tau ua txhaum lawm tiag, peb yeej muaj txim. Yav tas los lawm, koj tau tsomkwm peb, mas thov koj tsis txhob chim rau lub nroog Yeluxalees ntxiv lawm. Yeluxalees yog koj lub nroog thiab yog koj lub roob uas dawbhuv. Tagnrho cov tebchaws uas nyob puagncig peb txob thuam lub nroog ntawd thiab koj haivneeg, vim peb tej kev txhaum thiab tej kev phem kev qias uas peb cov yawgkoob tau ua tas los. Vajtswv, thov koj mloog kuv tej lus thov. Thov koj pab kom rov muaj neeg txhim kho koj lub Tuamtsev uas puas tas lawm kom rov qab zoo li qub, sawvdaws thiaj li yuav paub hais tias koj yog Vajtswv. Vajtswv, thov koj mloog peb lub suab thov. Thov koj tsa qhovmuag saib peb cov uas raug kev ntxhov siab thiab saib cov neeg uas raug kev txomnyem hauv lub nroog uas hu raws li koj lub npe. Peb tsa ncauj thov koj tsis yog vim peb yog neeg ncaj ncees, tiamsis vim koj yog tus uas hlub peb thiab yog tus ncaj ncees. Tus TSWV, thov koj mloog peb tej lus thov. Tus TSWV, thov koj zam peb lub txim. Tus TSWV, thov koj mloog thiab teb peb tej lus thov! Tus TSWV, thov koj tsis txhob tos ntev, sawvdaws thiaj paub hais tias koj yog Vajtswv! Lub nroog thiab cov neeg no yog koj tug.” Kuv thov Vajtswv, kuv lees kuv tej kev txhaum thiab kuv cov neeg tej kev txhaum rau Vajtswv. Kuv thov tus TSWV uas yog kuv tus Vajtswv kom rov muaj kev txhim kho lub Tuamtsev. Thaum kuv tseem thov, tus timtswv Khali-ees uas thawj zaug kuv ua yogtoog pom txawm los cuag kuv. Lub sijhawm kuv thov Vajtswv ntawd yog lub caij uas tua tsiaj fij thaum yuav tsaus ntuj. Khali-ees hais rau kuv hais tias, “Daniyees, kuv los qhia kom koj totaub zaj uas yuav muaj los yav tom ntej no. Thaum koj pib thov Vajtswv, nws twb teb koj tej lus thov lawm; nws yeej hlub koj. Nimno kuv yuav qhia zaj yogtoog ntawd rau koj, koj ua tib zoo mloog kuv hais. “Xya caum zaus xya ntawd yog lub sijhawm uas teem cia rau koj haivneeg thiab lub nroog dawbhuv uas dim ntawm tej kev phem kev qias. Thiab Vajtswv yuav zam txim rau cov neeg uas ua txhaum. Txij thaum ntawd mus yuav muaj kev ncaj ncees mus ibtxhis, thiaj yuav muaj raws li tej zaj yogtoog uas hais txog yav tom ntej no. Thiab yuav rov muab lub Tuamtsev dawbhuv fij rau Vajtswv dua. Koj yuav tsum ua tib zoo xav kom txhua txhua thiab totaub meej meej txog tej uas kuv yuav hais no. Suav txij li hnub uas Vajtswv hais kom rov txhim kho lub nroog Yeluxalees dua tshiab mus txog thaum tus uas Vajtswv xaiv los ua tus thawjtswj los txog lawm, yuav ntev txog plaub caug cuaj xyoos. Lub nroog Yeluxalees uas luag txhim kho dua tshiab ntawd yuav muaj ntau txojkev thiab tej ntsa yeej yuav khov kho vij lub nroog. Lub nroog no yuav nyob ruaj khov plaub puas peb caug plaub xyoos, uas yog tiam muaj kev txomnyem ntxhov siab. Thaum kawg tiam ntawd tus uas Vajtswv xaiv cia ua tus thawj, txawm yog nws tsis tau ua txhaum los nws yuav raug luag muab tua povtseg. Ib tug thawjtswj tebchaws uas muaj hwjchim loj tej tubrog yuav tuaj rhuav lub nroog thiab lub Tuamtsev. Tej kev tsov kev rog uas Vajtswv kom muaj thaum kawg yuav ua rau ib puas tsav yam puastsuaj tas ib yam li thaum dej nyab. Tus thawjtswj tebchaws ntawd yuav nrog ntau leej coglus ruaj khov thiab muaj kev sib raug zoo txog xya xyoo. Thaum xyoo xya ntawd mus txog ib nrab, nws yuav ua kom sawvdaws tseg tsis tua tsiaj thiab tsis muab khoom fij rau Vajtswv lawm. Nyob saum lub Tuamtsev qhov chaw uas siab tshaj plaws yuav muaj ib yam txawv txawv uas phem qias kawg nkaus teeb rau saud, thiab yam ntawd yuav nyob saud mus txog thaum tus uas nqa yam ntawd tuaj raug txim raws li Vajtswv tau npaj tseg rau nws lawm.” Thaum Xailas ua huabtais kav tebchaws Pawxias tau peb xyoos lawm, Vajtswv qhia ib zaj lus rau Daniyees tus uas muaj dua ib lub npe hu ua Npeetesaxas. Tej lus ntawd yog lus tseeb, tiamsis tsis yoojyim totaub. Vajtswv los qhia tej lus ntawd lub ntsiab rau Daniyees paub hauv nruab npau suav. Daniyees hais tias lub sijhawm ntawd kuv nyuaj siab tau peb lub limtiam. Kuv noj dabtsi los tsis qab, ib daig nqaij los kuv tsis noj, ib pas kua txiv hmab los kuv tsis haus. Tau peb lub limtiam nkaus kuv tsis pleev tshuaj tsw qab thiab tsis ntsis plaubhau li. Xyoo ntawd thawj lub hlis hnub nees nkaum plaub, kuv tabtom sawv ntawm tus dej loj Tikis. Kuv tsa qhovmuag ntsia pom ib tug neeg hnav ris tsho ntaubmag thiab sia ib txoj siv kub. Nws lub cev ci nplas ib yam li tej hlaws muaj nqis. Nws lub ntsejmuag ci ib yam li xob laim; nws lub qhovmuag ci ib yam li hluavtaws. Nws ob txhais cajnpab thiab ob txhais ceg ci pom kev lam lug ib yam li tej tooj liab uas luag muab txhuam tau ci ci lawm. Thiab nws lub suab hais lus nrov npaum nkaus li ib pab neeg coob coob lub suab nrov. Kuv tib leeg pom zaj yogtoog no xwb. Cov neeg uas nrog kuv nyob ua ke, lawv tsis pom dabtsi li, tiamsis lawv ntshai kawg lawv, khiav mus nkaum tas lawm. Tshuav kuv tib leeg nyob ntsia zaj yogtoog uas txawv txawv no xwb. Kuv ibce tsaug tsis muaj zog li lawm. Kuv lub ntsejmuag thimxem tas tsis muaj leejtwg cim tau kuv li. Thaum kuv hnov nws hais lus, kuv cia li ntog rau hauv av thiab tsis nco qab hlias lawm. Tiamsis muaj ib txhais tes los tsa kuv sawv txhos caug ntua, kuv ibce tshee hnyo. Tus timtswv ceebtsheej hais rau kuv hais tias, “Daniyees, Vajtswv hlub koj heev. Koj cia li sawv thiab ua tib zoo mloog kuv tej lus. Vajtswv txib kuv los cuag koj.” Thaum nws hais li ntawd tas, kuv txawm sawv ntsug ibce tshee hnyo. Nws hais rau kuv hais tias, “Daniyees, koj tsis txhob ntshai! Thawj hnub uas koj txo koj lub hwjchim thiab tsa suab thov Vajtswv kom koj totaub zaj no lub ntsiab, nws twb hnov koj tej lus thov lawm. Kuv los teb koj tej lus thov ntawd ntag. Tiamsis tus timtswv uas zov lub tebchaws Pawxias tawmtsam kuv tau nees nkaum ib hnub nkaus. Tom qab ntawd Mikhayees uas yog ib tug thawj ntawm cov timtswv ceebtsheej thiaj los pab kuv, ces kuv txawm tso Mikhayees tawmtsam nrog tus timtswv uas zov lub tebchaws Pawxias. Kuv los qhia rau koj paub tej uas yuav muaj tshwm los yav ntom ntej no thiab yuav muaj los raug koj haivneeg. Tej uas koj tau ua yogtoog pom ntawd yog tej uas yuav tshwm los yav ntom ntej no ntag.” Thaum nws hais li ntawd kuv txawm nyo taubhau rau hauv av, kuv hais tsis taus ib lo lus li. Tus timtswv ceebtsheej uas muaj ntsis zoo li tus neeg txawm cev tes kov kuv daim dincauj. Kuv thiaj hais rau nws hais tias, “Tus Tswv, zaj yogtoog no ua rau kuv ibce tshee hnyo tsis muaj zog li lawm. Kuv zoo ib yam li tus tubqhe uas sawv ntawm nws tus tswv xubntiag. Kuv yuav hais li cas rau koj, rau qhov kuv twb tsis muaj zog thiab ua tsis taus pa li lawm.” Nws txawm rov kov kuv dua ib zaug ntxiv, kuv thiaj li muaj zog mentsis tuaj. Nws hais rau kuv hais tias, “Vajtswv hlub koj heev, yog li ntawd koj tsis txhob txhawj lossis ntshai, cia li ua siab loj.” Thaum nws hais li ntawd tas, kuv mloog zoo li kuv lub cev txawm muaj zog tuaj, ces kuv thiaj hais rau nws hais tias, “Tus Tswv, thov koj cia li qhia tej uas koj yuav hais ntawd rau kuv. Koj twb pab kuv muaj zog mentsis lawm.” “Nws yog tus uas pab thiab tiv thaiv kuv. Tej lus uas kuv qhia rau koj paub no yog lus tseeb tiag.” Tus timtswv ceebtsheej hais tias, “Yuav muaj dua peb tug vajntxwv los kav tebchaws Pawxias. Tom qab ntawd tus vajntxwv plaub yuav los kav, nws yuav muaj txiag npluanuj heev dua lwm tus vajntxwv. Thaum nws muaj hwjchim thiab muaj txhua tsav txhua yam txhij lawm, nws yuav mus tua lub tebchaws Kilis. “Tom qab ntawd yuav muaj dua ib tug vajntxwv uas siab tawv heev los kav ntau lub tebchaws. Nws yuav ua ib puas tsav yam raws li nws lub siab nyiam. Thaum uas nws muaj hwjchim heev lawm tej tebchaws uas nws kav yuav tawg ua plaub pab, thiab nws cajces yuav tsis tau ua vajntxwv kav tebchaws lawm, tiamsis luag lwm tus yuav los kav. Lawv cov ntawd yuav tsis muaj hwjchim loj npaum li nws. “Tus vajntxwv uas kav lub tebchaws Iziv yuav muaj hwjchim heev, tiamsis nws cov thawj tubrog muaj ib tug tseem muaj hwjchim loj dua nws mas tus ntawd yuav kav ntau lub tebchaws. Tom qab ntawd ntau xyoo tus vajntxwv uas kav lub tebchaws Iziv yuav mus nrog tus vajntxwv uas kav lub tebchaws Xilias sib raug zoo. Nws yuav muab nws tus ntxhais rau tus vajntxwv Xilias yuav ua pojniam. Tiamsis lawv tsuas sib raug zoo ib ntus xwb. Tus ntxhais ntawd tus txiv, nws tus tub, thiab cov tubtxib uas nrog nws mus ntawd yuav raug luag muab tua povtseg tas huv tibsi. Tom qab ntawd nws cov neejtsa yuav muaj ib tug los ua vajntxwv kav tebchaws. Tus ntawd yuav tawmtsam cov Xilias tus vajntxwv cov tubrog. Nws yuav mus rau hauv cov Xilias lub yeej thiab yuav tua yeej lawv. Nws yuav muab lawv tej mlom thiab txhua yam muaj nqis uas muab nyiaj muab kub ua, thiab muab fij rau tej vajtswv lawm, nqa huv tibsi mus rau nram tebchaws Iziv. Ob peb xyoos tom qab uas lub tebchaws tsis muaj kev sib ntaus sib tua lawm, cov Xilias tus vajntxwv mam li txhij tubrog mus tua lub tebchaws Iziv. Tiamsis cov Iziv tus vajntxwv yuav tua cov Xilias tus vajntxwv cov tubrog swb thiab thim rov qab. “Cov Xilias tus Vajntxwv cov tub npaj yuav ua rog thiab txhij tau ib pab tubrog coob heev ua npoj ntws. Cov tub ntawd muaj ib tug yuav sau hlo cov tubrog tuaj ib yam li nthwv dej ntsawj mus dhau plaws rau hauv yeebncuab lub yeej thiab ntaus lawv tawg rhe. Cov Iziv tus vajntxwv yuav chim heev, nws txhij tubrog tuaj tua cov Xilias tus vajntxwv thiab ntes tau nws cov tubrog coob heev coj los ua qhev. Cov Iziv tus Vajntxwv khavtheeb heev, rau qhov nws mus ntaus yeej rog thiab tua luag tej tubrog tuag coob leej tiamsis tsis yog nws yuav kovyeej mus li. “Cov Xilias tus Vajntxwv yuav rov txij tubrog coob tshaj cov qub tuaj ntxiv. Thaum zoo hnub zoo nyoog lawm, nws thiab nws cov tubrog uas muaj tej cuabyeej ua rog khov kho mam li rov qab tuaj ntaus dua. Thaum ntawd yuav muaj ntau leej sawv tawmtsam cov Iziv tus vajntxwv. Daniyees, koj cov neeg uas tsivtsaim heev ibtxhia yuav ntxeev siab, vim lawv twb ua yogtoog pom lawm, tiamsis lawv yuav swb luag. Cov Xilias tus Vajntxwv yuav tuaj vij thiab txeeb tau ib lub nroog uas muaj ntsa yeej khov kho thaiv. Cov tubrog Iziv yuav tua tsis yeej, txawm yog cov tubrog Iziv uas txawj tua rog heev los yuav tua tsis yeej. Cov Xilias yuav ua ib puas tsav yam raws li lawv lub siab nyiam, yuav tsis muaj leejtwg cheem tau lawv. Lawv yuav tuaj nyob hauv lub tebchaws uas Vajtswv coglus tseg hais tias nws yuav muab rau cov Yixalayees, thiab lawv yuav kav tagnrho lub tebchaws ntawd. “Cov Xilias tus Vajntxwv yuav tuav tswvyim thiab txhij tagnrho nws cov tubrog mus tua cov Iziv tus vajntxwv. Nws yuav mus nrog cov yeebncuab sib coglus thiab yuav muab nws tus ntxhais rau cov Iziv tus vajntxwv yuav ua pojniam. Nws yuav ua li ntawd nws thiaj tau kev mus rhuav cov yeebncuab lub tebchaws kom puastsuaj, tiamsis nws yuav ua tsis tau raws li nws lub siab xav tseg. Ces tom qab ntawd nws yuav mus ua rog rau cov tebchaws uas nyob raws ntug hiavtxwv, txeeb kom tau ntau lub tebchaws. Tiamsis muaj ib tug thawj tubrog uas yog dua lwm haivneeg yuav tuaj tua yeej nws ua rau nws poob ntsejmuag heev. Tus thawj tubrog ntawd yuav pauj vajntxwv txojkev khavtheeb rov rau vajntxwv. Cov Xilias tus Vajntxwv yuav rov mus rau pem nws cov yeej uas nyob hauv nws lub tebchaws, tiamsis nws yuav swb luag thiab nws lub koob meej yuav ploj mus. “Tom qab ntawd yuav muaj dua ib tug los ua vajntxwv. Tus vajntxwv ntawd yuav txib ib tug nom mus quab yuam cov pejxeem them se kom nws lub tebchaws thiaj li muaj txiag npluanuj. Tom qab ntawd tus vajntxwv no yuav raug luag nyiag tua povtseg, tsis yog raug tua tuag tabmeeg rau sawvdaws pom lossis tuag rau hauv tshavrog.” Tus timtswv ceebtsheej ntawd qhia ntxiv hais tias, “Tus vajntxwv tshiab uas yuav los kav tebchaws Xilias ntawd yog ib tug neeg limhiam heev. Nws yeej tsis muaj feem tau los ua vajntxwv, tiamsis ib sijhuam xwb nws cia li tau los ua vajntxwv. Nws yuav dag thiab txeeb tau luag tej hwjchim. Txhua tus uas tawmtsam nws, txawm yog tus Povthawj Hlob uas ua Vajtswv tes haujlwm, los yeej yuav raug tshem mus. Nws yuav mus ntxias lwm haivneeg nrog nws sib raug zoo. Txawm yog nws kav ib haivneeg tsawg tsawg xwb los nws yuav muaj zog heev zuj zus. Nws yuav nyiag kev mus tua ib lub xeev uas vammeej heev, thiab nws ua tej yam uas nws cov yawgkoob tsis tau ua dua li. Nws yuav muab tej uas nws mus txeeb tau los ntawd faib rau nws pab nws pawg xwb. Nws npaj mus ntaus luag tej yeej, tiamsis nws tsuas ua tau li ntawd ib ntus xwb. “Nws muaj lub siab tawv thiab txhij tubrog coob heev mus ntaus tus vajntxwv uas kav lub tebchaws Iziv, thiab nws tsis ntshai leejtwg li. Cov Iziv tus vajntxwv los yuav txhij cov tubrog uas ua tau tshaj thiab muaj zog khov kho tuaj tiv thaiv, tiamsis cov Iziv tus vajntxwv yuav tua tsis yeej raws li nws siab xav, rau qhov nws raug luag dag ntxias xwb. Nws cov neeg uas pab nws tuav tswvyim yog cov uas yuav txov nws ntag. Nws cov tubrog yuav raug luag tua tuag coob. Tom qab ntawd ob tug vajntxwv no yuav nyob ua ke noj haus, tiamsis nkawd nyias taus nyias xav yuav ua zaj phem; ib tug yuav dag ib tug. Nkawd yuav ua tsis tau raws li nkawd lub siab xav, rau qhov tseem tsis tau txog lub sijhawm uas Vajtswv teem cia. Cov Xilias tus vajntxwv yuav coj tej khoom uas nws tuaj txeeb tau tagnrho rov mus rau pem nws lub tebchaws. Nws npaj siab yuav rhuav txoj kevcai uas Vajtswv haivneeg coj. Nws yuav ua raws li nws siab nyiam tso nws mam li rov qab mus rau pem nws lub tebchaws. “Tom qab ntawd nws tseem npaj siab yuav rov mus tua lub tebchaws Iziv dua thiab. Zaum no yuav zoo tsis thooj li zaum uas tas los lawm. Cov tubrog Loos yuav caij nkoj tuaj tav nws kev, ua rau nws ntshai heev. “Ces nws yuav thim nws cov tubrog thiab chim heev rov los. Nws mam li los tuav tswvyim rhuav Vajtswv txoj Kevcai uas Vajtswv haivneeg coj. Nws ua raws li cov neeg uas twb tso Vajtswv txoj kevcai tseg lawm hais. Nws cov tubrog qee leej yuav mus ua tsis huv rau tus TSWV lub Tuamtsev. Lawv tsis pub sawvdaws niaj hnub tua tsiaj fij. Lawv yuav muab yam uas phem qias kawg nkaus, thiab tsiv saib tshaj plaws los teeb cia rau hauv. Tus vajntxwv ntawd yuav ntxias tau cov neeg uas tso Vajtswv txoj kevcai tseg lawm, tiamsis cov neeg uas tseem muab siab npuab Vajtswv yuav nyob ruaj nrees tiv. Cov txwjlaug uas txawj ntse yuav qhia lawv tej kev txawj ntse rau ntau leej, tiamsis cov txwjlaug ntawd qee leej yuav tuag rau hniav ntaj hniav riam, qee leej yuav raug luag muab hluavtaws hlawv tuag, qee leej yuav raug ntaus, raug huab thiab coj mus ua qhev ib ntus. Thaum tabtom muaj kev sib ntaus sib tua ntxhov hnyo ntawd yuav muaj neeg tuaj pab Vajtswv haivneeg qho mentsis. Txawm yog muaj cov neeg tuaj pab li ntawd los lawv yog cov neeg uas tsis muaj lub siab pab tiag tiag. Cov txwjlaug uas txawj ntse ntawd muaj qee leej yuav raug luag tua povtseg, tiamsis tej no yog luag tshau Vajtswv haivneeg kom huv tsis muaj txhaum mus txog lub sijhawm kawg uas Vajtswv teem cia. “Tus vajntxwv uas kav lub tebchaws Xilias yuav ua raws li nws lub siab nyiam. Nws yuav khav hais tias nws muaj hwjchim loj dua tej vajtswv thiab loj dua Vajtswv tus uas muaj Hwjchim Loj kawg nkaus. Nws yuav ua li no mus txog thaum uas Vajtswv rau txim rau nws. Rau qhov Vajtswv yeej yuav ua raws li Vajtswv tau teem tseg lawm. Cov Xilias tus vajntxwv yuav tsis quavntsej tus vajtswv uas nws cov yawgkoob ibtxwm teev los, thiab nws yuav tsis quavntsej tus vajtswv uas cov pojniam nyiam heev. Nws yuav tsis quavntsej txog ib tug vajtswv twg hlo li. Rau qhov nws xav hais tias nws yog tus uas muaj hwjchim loj dua tej ntawd huv tibsi. Thaum nws tseg tsis teev tej vajtswv uas hais tas los ntawd, nws yuav teev tus vajtswv uas tsomkwm tej yeej tubrog. Nws yuav muab nyiaj muab kub, muab tej qe zeb, thiab tej khoom uas muaj nqis coj mus fij rau tus vajtswv uas nws cov yawgkoob yeej ibtxwm tsis tau teev dua los ib zaug li. Nws yuav siv cov neeg uas teev lwm tus vajtswv tuaj zov nws tej yeej. Nws yuav muab lub meejmom siab rau cov neeg uas ua nws pejxeem; nws yuav tsa lawv ua cov nomtswv loj thiab yuav faib av ua nqi zog rau lawv. “Thaum yuav kawg lub sijhawm uas cov Xilias tus vajntxwv kav tebchaws, tus vajntxwv uas kav lub tebchaws Iziv yuav sau nws cov tubrog tuaj tua lub tebchaws Xilias. Thaum ntawd cov Xilias tus vajntxwv yuav sau tagnrho nws cov tubrog huv tibsi, tsis hais tej tsheb ua rog, tej tubrog caij nees, thiab tej nkoj ua rog yuav tsaus nti ib tog tuaj cuag dej ntws tuaj ntaus ntau lub tebchaws. Nws tseem yuav tua lub tebchaws uas Vajtswv tau coglus tseg hais tias nws yuav muab rau cov Yixalayees nyob. Yuav muaj neeg tuag sib tsub sib nias txog qas txhiab qas vam leej. Tiamsis lub tebchaws Edoos, tebchaws Mau-am, thiab cov neeg uas seem nyob hauv tebchaws Amoos yuav khiav dim. Cov Xilias tus vajntxwv yuav ntaus ntau lub tebchaws, txawm yog lub tebchaws Iziv los nws npaj siab yuav mus ntaus thiab. Nws yuav nqa txhua yam uas muab kub thiab muab nyiaj ua thiab txhua yam khoom muaj nqis hauv lub tebchaws Iziv mus. Nws tseem yuav mus ntaus kom yeej lub tebchaws Linpias thiab tebchaws Sudas huv tibsi. Tiamsis nws yuav hnov xov sab hnubtuaj thiab sab qaumteb tuaj ua rau nws ntshai kawg, ces nws yuav ntaus rog hnyav mas neeg yuav tuag coob heev. Nws tseem yuav rub nws tej tsevntaub uas loj rau ntawm ntug hiavtxwv thiab saum lub roob uas luag ua lub Tuamtsev ntu nruab nrab, tiamsis nws yuav tuag twjywm tsis muaj leejtwg pab nws li.” Tus timtswv ceebtsheej uas hnav cev ris tsho ntaubmag hais tias, “Lub sijhawm ntawd Mikhayees uas yog tus timtswv ceebtsheej uas muaj hwjchim loj uas tsomkwm koj haivneeg yuav los. Thaum ntawd yuav muaj kev txomnyem kawg nkaus. Txij thaum chiv muaj neeg los mus txog niaj hnub no yeej tsis tau muaj dua kev txomnyem loj npaum li zaum no. Thaum txog lub sijhawm ntawd koj haivneeg txhua tus uas muaj npe sau rau hauv Vajtswv phau ntawv yuav dim. Cov neeg uas tuag lawm muaj coob leej yuav sawv rov qab los. Muaj ibtxhia yuav tau txojsia ntev dhawv mus ibtxhis tsis kawg, tiamsis muaj ibtxhia yuav raug kev txomnyem thiab kev txajmuag mus ibtxhis li. Cov txwjlaug uas txawj ntse yuav ci ntsa iab ib yam li tej duab ci saum ntuj. Thiab cov neeg uas qhia tau ntau leej los ua neeg ncaj ncees yuav ci ntsa iab ib yam li tej hnubqub mus ibtxhis.” Tus timtswv ceebtsheej ntawd hais rau kuv hais tias, “Daniyees, koj cia li kaw phau ntawv ntawd thiab nias homthawj rau tsis pub nthuav mus txog lub sijhawm ntiajteb kawg. Txij no mus muaj neeg coob leej yuav sib zog nrhiav kom totaub txog tej yam uas yuav tshwm los tiamsis yuav nkim lawv lub zog xwb.” Tom qab ntawd kuv pom dua ob tug txivneej sawv ntawm ntug dej, ib leeg sawv ib sab ntug dej. Muaj ib tug hais rau tus timtswv ceebtsheej uas hnav ris tsho ntaubmag thiab sawv pem hauv dej uas nrug deb mentsis hais tias, “Tshuav ntev li cas tej xwm uas txawv txawv no mam li dua mus?” Tus timtswv ceebtsheej ntawd tsa nws ob txhais tes rau saum ntuj thiab tuav Vajtswv tus uas muaj sia nyob mus ibtxhis lub npe coglus. Kuv hnov nws hais tias, “Yuav ntev peb xyoos thiab rau hli. Thaum luag tsimtxom Vajtswv haivneeg dhau lawm, mas ib puas tsav yam no mam li yuav dua mus.” Kuv hnov tej lus uas nws hais tiamsis kuv tsis totaub. Kuv thiaj nug hais tias, “Tus Tswv, tej xwm no yuav dua mus li cas?” Nws teb kuv hais tias, “Daniyees, koj mus tau lawm, rau qhov tej lus no luag yuav muab npog cia tsis pub leejtwg paub mus txog thaum lub sijhawm kawg. Yuav muaj neeg coob leej raug ntxuav kom huv. Cov neeg ua phem yuav tsis totaub, tiamsis lawv tsuas muaj ua phem mus li. Tsuas yog cov neeg txawj ntse thiaj yuav totaub xwb. “Txij hnub uas luag tsis pub sawvdaws niaj hnub coj tsiaj tuaj tua fij thiab luag muab yam uas phem qias kawg nkaus uas ua kom muaj kev kub ntxhov coj los teeb cia mus txog lub sijhawm kawg yuav ntev ib txhiab ob puas cuaj caum hnub mam li dua mus. Txhua tus uas muab siab npuab Vajtswv yuav nyob ruaj khov mus dhau ib txhiab peb puas peb caug tsib hnub, thiab lawv yuav nyob kaj siab lug! “Daniyees, koj los yuav tsum tau muab siab npuab Vajtswv mus txog hnub kawg. Koj yeej yuav tuag, tiamsis thaum lub sijhawm ntiajteb kawg koj yuav sawv rov los txais koj tej nqi zog.” Ntawm no yog tus TSWV cov lus hais rau Npelais tus tub Hauxeyas, tiam uas Uxiyas, Yauthas, Ahas, thiab Hexekiyas ua vajntxwv kav tebchaws Yudas thiab Yehau-as tus tub Yelaunpau-as ua vajntxwv kav tebchaws Yixalayees. Thawj zaug uas tus TSWV hais rau Hauxeyas mas nws hais tias, “Koj cia li mus yuav pojniam; koj tus pojniam yuav tsis muab siab npuab koj, thiab koj cov menyuam yuav coj ib yam li nws. Kuv haivneeg tso kuv tseg thiab mus ua cov neeg uas tsis muaj lub siab ncaj rau kuv ib yam li ntawd.” Yog li ntawd, Hauxeyas thiaj mus yuav Nkaumes uas yog Dinpelayees tus ntxhais ua pojniam. Thaum nkawd yug tau thawj tug tub, tus TSWV hais rau Hauxeyas hais tias, “Koj tis nws lub npe hu ua ‘Yexelees,’ rau qhov tshuav tsis ntev lawm kuv yuav rau txim rau tus vajntxwv uas kav tebchaws Yixalayees, vim nws yawgkoob Yehus tau tua neeg hauv lub nroog Yexelees. Kuv yuav ua kom Yehus cajces vajntxwv tuag tu noob nrho mus. Thaum txog lub sijhawm ntawd kuv yuav ua kom cov tubrog Yixalayees raug puastsuaj tas rau hauv lub Voshav Yexelees.” Tom qab ntawd Nkaumes yug tau ib tug ntxhais. Tus TSWV hais rau Hauxeyas hais tias, “Koj tis nws lub npe hu ua ‘Tsis hlub,’ rau qhov kuv yuav tsis hlub cov Yixalayees lossis tsis zam txim rau lawv lawm. Tiamsis kuv yuav hlub cov Yudas. Kuv yog tus TSWV uas yog lawv tus Vajtswv, kuv yuav cawm lawv, tiamsis tsis yog kuv siv ntaj lossis hneevnti thiab xubvos lossis nees thiab tubrog caij nees los cawm lawv.” Thaum uas Nkaumes tus ntxhais tseg taus mis lawm, nws rov suab menyuam thiab yug tau ib tug tub. Tus TSWV hais rau Hauxeyas hais tias, “Koj tis nws lub npe hu ua ‘Tsis Yog Kuv Haivneeg,’ rau qhov cov Yixalayees tsis yog kuv haivneeg thiab kuv tsis yog lawv tus Vajtswv lawm.” Cov Yixalayees yuav coob ib yam li tej suabzeb ntawm ntug hiavtxwv uas tsis muaj leejtwg suav txheeb lossis luj tau. Nimno Vajtswv hais rau lawv hais tias, “Nej tsis yog kuv haivneeg,” tiamsis muaj ib hnub nws yuav hais rau lawv hais tias, “Nej yog Vajtswv tus uas muaj sia nyob mus ibtxhis cov menyuam!” Cov Yudas thiab cov Yixalayees yuav rov los sib sau ua ke ua ib haivneeg dua. Lawv yuav xaiv ib tug los ua lawv tus thawjcoj, lawv yuav rov huamvam thiab vammeej dua nyob hauv lawv lub tebchaws. Yuav muaj li ntawd tiag, Yexelees hnub ntawd yuav yog hnub uas tseemceeb heev! Yog li ntawd, cia li hu koj cov kwvtij Yixalayees hais tias, “Vajtswv Haivneeg” thiab cov uas “Tus TSWV Hlub.” Kuv cov menyuam, nej cia li thov nej niam; txawm hais tias nws tsis yog kuv tus pojniam thiab kuv tsis yog nws tus txiv los nej thov kom nws tso txojkev ua nkauj ua nraug thiab ua niamntiav tseg. Yog nws tsis tso tej ntawd tseg, kuv yuav muab nws tej ris tsho hle kom nws nyob liabqab ploog ib yam li hnub uas nws yug los. Kuv yuav ua kom nws qhuav ib yam li lub tebchaws uas qhuav nkig nkuav, thiab nws yuav nqhis dej tuag. Yog li ntawd, kuv yuav muab pos los xov vaj ncig nws thiab xov lajkab thaiv nws txoj haukev. Nws yuav caum nws cov hluas nraug qab tiamsis nws raws tsis cuag lawv. Nws yuav mus nrhiav lawv tiamsis nrhiav tsis tau. Ces nws yuav hais tias, “Kuv yuav rov mus nrog kuv thawj tug txiv nyob, yav tas los kuv lub neej yeej zoo tshaj tamsim no lawm ntau.” Nws yuav tsis kam lees hais tias tej nplej, cawv txiv hmab, roj txiv ntoo thiab tagnrho tej nyiaj tej kub uas nws pheej coj mus fij rau Npa-as ntawd yog kuv muab rau nws. Yog li ntawd, thaum txog lub caij sau qoob kuv yuav muab tej nplej thiab tej cawv txiv hmab uas kuv muab pub nws lawm coj rov los, thiab kuv yuav muab tej ntaub plaub yaj thiab tej ntaubmag uas kuv muab rau nws xaws ua ris tsho hnav coj rov los huv tibsi. Kuv yuav muab nws hle liabqab tabmeeg nws tej hluas nraug, thiab yuav tsis muaj leejtwg muaj cuabkav cawm tau nws kom dim ntawm kuv txhais tes. Kuv yuav ua kom nws tej rooj noj rooj haus uas niaj xyoo thiab niaj hli ua, tej kevcai hnub Xanpataus thiab tej rooj noj haus uas nws teem tseg ntawd kom tu nrho mus. Kuv yuav muab tej txiv hmab thiab txiv ncuavpias uas nws khav hais tias yog nws cov hluas nraug muab them nws, rau qhov nws nrog lawv ua nkauj ua nraug, ua kom puastsuaj tas huv tibsi. Kuv yuav muab nws tej vaj txiv hmab thiab txiv cev ua kom qhuav qhawv ib yam li mojsab qhua; tej tsiaj qus yuav los muab ua kom puastsuaj tas. Kuv yuav rau txim rau nws vim nws tsis nco qab kuv lawm; nws tau mus hlawv tshuaj tsw qab rau Npa-as, thiab coj saw nyiaj saw kub mus caum nws cov hluas nraug qab. Tus TSWV yog tus uas hais li ntawd. Yog li ntawd, kuv yuav coj nws mus tso rau tom tiaj suabpuam dua; kuv yuav hais lus mos lus muag rau nws thiaj coj tau nws rov los. Kuv yuav muab nws tej vaj txiv hmab rov qab rau nws thiab muab lub Hav Covnyom hloov ua lub roojloog uas cia siab tau. Nws yuav teb kuv tej lus ib yam li thaum nws tseem hluas uas nws nyuam qhuav los nram tebchaws Iziv los. Nws yuav rov hu kuv ua nws tus txiv, nws yuav tsis hu kuv ua nws tus Npa-as ntxiv lawm. Kuv yuav tsis pub nws hais txog Npa-as lub npe ib zaug li lawm. Lub sijhawm ntawd kuv yuav coglus rau tej tsiaj qus thiab tej noog kom tsis txhob los tom kuv haivneeg. Kuv yuav tshem tej cuabyeej ua rog tawm hauv lub tebchaws mus kom tas, tsis hais tej ntaj thiab tej hneevnti; kuv yuav cia kuv haivneeg nyob kaj siab lug thiab muaj kev thajyeeb. Yixalayees, kuv yuav yuav koj ua kuv tus pojniam; kuv yuav ua ncaj thiab muab siab npuab koj; kuv yuav hlub thiab hmov tshua koj, thiab yuav koj ua kuv tug mus ibtxhis li. Kuv yuav ua raws li kuv tej lus cog tseg thiab yuav koj ua kuv tug, thiab koj yuav lees yuav kuv ua koj tus TSWV. Kuv yuav tsa kuv haivneeg rau hauv lub tebchaws ntawd thiab ua kom lawv vammeej. Kuv yuav hlub cov neeg uas muaj lub npe hu hais tias “Tsis Hlub,” thiab hlub cov neeg uas hu hais tias “Tsis Yog Kuv Haivneeg” Kuv yuav hais tias, “Nej yog kuv haivneeg,” thiab lawv yuav teb hais tias, “Koj yog peb tus Vajtswv.” Tus TSWV hais rau kuv hais tias, “Koj cia li rov qab mus hlub tus pojniam uas mus deev hluas nraug lawm. Koj yuav tsum hlub nws ib yam li kuv tseem hlub cov Yixalayees, txawm yog lawv tso kuv tseg thiab mus pe lwm tus vajtswv thiab muab tej txiv hmab qhuav coj mus fij rau tej mlom, los kuv tseem hlub lawv.” Yog li ntawd, kuv thiaj muab tau kaum tsib daim nyiaj thiab xya tawb nplej mus yuav nws rov los. Kuv hais rau nws hais tias, “Kom nws nyob tos kuv, tsis txhob mus ua niamntiav lossis deev hluas nraug li. Txawm yog kuv los kuv yuav nyob tos nws xwb.” Cov Yixalayees yuav nyob ntev loo ib yam li ntawd, yuav tsis muaj vajntxwv lossis cov thawjcoj, tsis muaj khoom fij lossis tsis muaj tej ncej zeb tseemceeb, tsis muaj mlom lossis mojzeej rau lawv pe li. Tiamsis muaj ib lub sijhawm cov Yixalayees yuav rov los cuag tus TSWV uas yog lawv tus Vajtswv thiab los cuag vajntxwv Daviv ib tug xeebntxwv. Thaum ntawd lawv yuav hwm tus TSWV thiab yuav tau txais tej khoom zoo uas nws muab pub rau lawv. Tus TSWV muaj lus kom cov neeg uas nyob hauv lub tebchaws no. Cov Yixalayees, nej cia li mloog tej lus uas hais tias, “Cov neeg uas nyob hauv lub tebchaws no, tsis muaj kev ncaj ncees lossis kev hlub, thiab tsis lees paub hais tias kuv yog lawv tus Vajtswv. Lawv coglus thiab tsis ua raws li tej lus cog tseg ntawd; lawv hais lus dag, tua neeg, ua tubsab thiab ua kev nkauj kev nraug. Muaj kev phem kev qias ntau zuj zus, thiab muaj kev tua neeg ib tug tas ib tug tuaj. Yog li ntawd, lub tebchaws yuav qhuav thiab txhua tsav yam uas nyob hauv lub tebchaws yuav tuag tas. Txhua yam tsiaj thiab noog, thiab txawm yog tej ntses hauv dej los yuav tuag tas huv tibsi.” Tus TSWV hais tias, “Tsis pub nej leejtwg kom lossis cem tej pejxeem hlo li, kuv tsuas cem nej cov uas yog povthawj xwb. Nej niaj hnub niaj hmo ua txhaum, thiab cov cevlus los ua txhaum ib yam li nej. Kuv yuav muab haivneeg Yixalayees uas yog nej niam rhuav kom puastsuaj mus. Kuv haivneeg raug puastsuaj vim lawv tsis lees paub kuv. Nej cov uas yog povthawj los tsis lees paub kuv thiab tso kuv tej lus qhuab qhia tseg. Yog li ntawd, kuv thiaj tsis lees paub nej thiab tsis pub nej cov tub los ua kuv cov povthawj. “Nej yimhuab muaj povthawj coob, nej yimhuab ua txhaum tawmtsam kuv; yog li ntawd, kuv yuav muab nej tej kev tau ntsejmuag hloov ua kev poob ntsejmuag. Nej muaj txiag npluanuj vim nej cia kuv haivneeg mus ua kev txhaum; yog li ntawd, nej thiaj xav kom lawv hajyam ua kev txhaum ntau zuj zus ntxiv. Nej yuav raug txim txomnyem ib yam li tej neeg sawvdaws ntag! Kuv yuav rau txim rau nej raws li tej uas nej tau ua lawm. Nej yuav noj tej khoom fij uas yog nej tug, tiamsis tseem tshaib plab qees. Nej yuav pe thiab thov ntau tus vajtswv kom nej muaj tubki, tiamsis nej yuav muaj tsis taus tubki, rau qhov nej tau tso kuv tseg thiab mus pe lwm tus vajtswv lawm.” Tus TSWV hais tias, “Twb yog tej cawv txiv hmab qub thiab tshiab ua rau kuv haivneeg tsis meejpem lawm! Lawv mus pe tej mlom ntoo! Lawv khov kuam saib tej uas lawv xav paub! Lawv tso kuv tseg. Lawv muab lawv fij rau lwm tus vajtswv ib yam li tus pojniam uas mus ua niamntiav. Lawv coj khoom mus fij saum tej roob thiab mus hlawv tshuaj tsw qab hauv tej qab ntoos uas muaj nplooj ntxoov nyos saum tej roob, rau qhov tus duab ntxoov ntxoo ua rau laj siab ntxiag. “Yog li ntawd, nej tej ntxhais thiaj mus ua niamntiav, thiab nej tej nyab thiaj mus deev hluas nraug. Txawm li ntawd los kuv yuav tsis rau txim rau nej tej ntxhais thiab tej nyab uas ua txhaum li ntawd, rau qhov nej cov uas yog txivneej twb mus nrog tej niamntiav nyob ua ke hauv lub tsev teev mlom thiab nrog luag koom muab khoom fij rau dab rau mlom. Raws li muaj pajlug hais tseg tias, ‘Ib tug neeg uas tsis muaj tswvyim yuav raug puastsuaj.’ “Txawm yog nej cov Yixalayees tsis muab siab npuab kuv los thov kom cov Yudas tsis txhob mus ua txhaum li nej ua. Tsis txhob mus pehawm hauv lub nroog Nkilenkas lossis hauv lub nroog Npethavees, lossis tsis txhob mus nyob hauv tej nroog ntawd tuav tus TSWV uas muaj sia nyob lub npe coglus li. Cov Yixalayees tawv ncauj ib yam li tej nees zag. Kuv yuav ua li cas yug tau lawv ib yam li yug pab yaj hauv tshav zaub? Cov Yixalayees qaug rau txojkev pe mlom lawm. Cia lawv ua ywj lawv lub siab. Thaum lawv haus cawv txiv hmab ntau lawm, lawv zoo siab hlo mus sib deev lawv nyiam kev poob ntsejmuag heev dua tau ntsejmuag. Lawv yuav raug luag cab mus ib yam li cua ntsawj, thiab lawv yuav raug kev txajmuag vim qhov uas lawv fij khoom rau dab. “Cov povthawj, nej cia li mloog! Cov Yixalayees, nej cia li ua tib zoo mloog! Cov uas yog vajntxwv cajces, nej cia li mloog! Tsimnyog nej txiav txim ncaj ncees tiamsis nej tsis ua. Yog li ntawd nej yuav raug txim. Nej yog rooj nta npuj uas caws tos nyob hauv lub nroog Mixepas, yog lub vas uas nthuav rau saum lub Roob Tanpaus, thiab yog lub qhov uas tob heev hauv lub nroog Akaxias, kuv yuav rau txim rau nej txhua tus huv tibsi. Kuv paub Yixalayees lub siab, nws yeej khiav tsis dhau kuv li. Nws yeej tsis muaj lub siab ncaj, thiab nws cov neeg yeej tsis tsimnyog pehawm kuv.” Tej kev phem kev qias uas cov neeg ua ntawd thaiv lawv txoj haukev tsis pub lawv los cuag tau lawv tus Vajtswv. Lawv lub siab xib rau kev pe dab pe mlom, lawv thiaj tsis lees yuav tus TSWV. Cov Yixalayees tej kev khavtheeb rov kom lawv. Lawv tej kev txhaum ua rau lawv ntog, thiab cov Yudas nrog lawv ntog ib yam nkaus. Lawv coj lawv tej yaj thiab nyuj mus tua fij rau tus TSWV, tiamsis tej ntawd pab tsis tau lawv dabtsi li. Lawv nrhiav tsis tau tus TSWV, rau qhov nws twb tso lawv tseg lawm. Lawv tsis muab siab npuab tus TSWV; lawv tej menyuam tsis yog tus TSWV menyuam. Yog li ntawd, tshuav tsis ntev lawv thiab lawv tej liaj tej teb yuav raug puastsuaj tas. Cia li tshuab xyu hauv lub nroog Nkinpe-as! Cia li tshuab xyu ceebtoom hauv lub nroog Lamas! Cia li qw ntshoo nrooj hauv lub nroog Npethavees! Cov Npeenyamees cia li mus ntaus rog! Hnub rau txim twb los yuav txog, cov Yixalayees yuav raug puastsuaj. Cov Yixalayees, yeej yuav muaj tej xwm no los tiag tiag li! Tus TSWV hais tias, “Kuv chim rau cov Yudas, rau qhov lawv cov thawjcoj tau txhij tubrog tuaj tua cov Yixalayees thiab txeeb lawv lub tebchaws. Yog li ntawd, kuv yuav rau txim hnyav rau lawv ib yam li dej nyab. Cov Yixalayees raug tsimtxom; luag txeeb tau lawv lub tebchaws lawm, rau qhov lawv pheej mus thov cov neeg uas pab tsis tau tuaj pab lawv xwb. Kuv yuav tso kev puastsuaj los rau cov Yixalayees thiab yuav ua kom cov Yudas puastsuaj mus. “Thaum cov Yixalayees pom hais tias lawv raug mob sab heev thiab thaum cov Yudas pom lawv tej qhov txhab, ces cov Yixalayees thiaj mus thov cov Axilias tus vajntxwv uas muaj hwjchim loj tuaj pab lawv, tiamsis nws tsis muaj cuabkav cawm tau lawv lossis kho tau lawv tej qhov txhab zoo. Kuv yuav tawmtsam cov Yixalayees thiab cov Yudas ib yam li tus tsov ntxhuav. Kuv yuav muab lawv dua ua tej daim povtseg. Thaum kuv cab lawv mus povtseg tsis muaj leejtwg yuav muaj cuabkav cawm tau lawv li. “Vim kuv haivneeg tej kev txhaum, kuv yuav muab lawv tso tseg mus txog thaum uas lawv txomnyem txaus, thiab lawv tig rov los cuag kuv tso. Tej zaum thaum lawv raug kev txomnyem li ntawd, lawv yuav tig rov los nrhiav kuv.” Tej neeg hais tias, “Peb cia li rov mus cuag tus TSWV! Nws tau ua rau peb raug mob, tiamsis nws yuav kho peb tej mob kom zoo; nws tau ua rau peb tej nqaij to, tiamsis nws yuav qhwv peb tej qhov txhab puas yog? Ob peb hnub saum no nws yuav muab peb hloov dua tshiab, thiab peb yuav tau mus nrog nws nyob. Cia peb xyaum tiag kom paub tus TSWV. Nws yuav los cuag peb ib yam li qhov kaj ntug uas niaj tagkis muaj thiab ib yam li kob nag tshiab uas niaj xyoo los rau hauv lub ntiajteb.” Tiamsis tus TSWV hais tias, “Cov Yudas thiab cov Yixalayees, kuv yuav ua dabtsi rau nej? Nej hlub kuv ib yam li cov huab tsaus ib pliag thaum sawv ntxov thiab ib yam li tej lwg dej uas tshav ntuj tuaj ziab ces qhuav tas lawm xwb. Twb yog vim li ntawd kuv thiaj txib kuv cov cevlus los qhia kuv tej kev txiav txim thiab kev puastsuaj rau nej. Nej twb pom tseeb thiab paub meej tej uas kuv xav tau ntawm nej lawm. Qhov uas kuv xav tau yog kom nej muaj txojkev hlub, tsis yog tus tsiaj uas nej muab tua theej txhoj. Kuv xav kom kuv haivneeg paub kuv tseeb dua li uas cia lawv coj khoom tuaj fij rau kuv. “Tiamsis thaum lawv los txog rau ntawm lub nroog Adas xwb, lawv twb rhuav kuv tej lus cog tseg lawm. Nkile-as yog lub nroog uas cov neeg ua phem ua qias thiab tua neeg nyob puv nkaus. Cov povthawj zoo ib yam li tej tubsab uas tos rawv ua limhiam rau tej neeg taug kev. Lawv tua neeg raws txojkev uas mus rau ntawm qhov chaw dawbhuv hauv Sekhees, thiab txhua yam kev phem no yog lawv txhob txwm ua xwb. Kuv pom muaj ib yam uas phem heev nyob hauv cov Yixalayees: Qhov ntawd yog kuv haivneeg mus pe mlom ua rau lawv tsis huv lawm. “Hais rau nej cov Yudas paub hais tias kuv twb teem caij yuav rau txim rau nej raws li tej kev txhaum uas nej niaj hnub ua ntawd lawm. “Thaum uas kuv xav kho kuv haivneeg Yixalayees thiab ua kom lawv rov vammeej dua, los kuv tsuas pom tej kev phem kev qias uas lawv ua xwb. Lawv ib leeg dag ntxias ib leeg; lawv tsoo luag tsev thiab nyiag luag khoom; lawv huab luag tug ntawm tej kev. Lawv xav tsis txog hais tias kuv yuav cim ntsoov tej kev phem kev qias uas lawv ua; lawv tej kev txhaum nyob puagncig lawv, thiab kuv pom ntsoov tsis muaj ib yam dabtsi roos tau li.” Tus TSWV hais tias, “Tej pejxeem tuavhauv dag ntxias uas phem rau vajntxwv thiab nws cov nomtswv. Lawv sawvdaws puavleej yog neeg ntxeev siab thiab tsis sib hwm. Lawv tej kev ntxub kub ib yam li lub qhovtxos uas luag rauv cub ncuav thiab cig ntsaj thuav mus txog thaum ncuav siav tsis tsij taws ntxiv li. Hnub uas lawv ua kevcai hawm vajntxwv, lawv muab cawv txhaus vajntxwv thiab nws cov nomtswv kom qaug thiab vwm cawv ua dog ua dig. Lawv txojkev tuavhauv kub ib yam li lub qhovtxos. Lawv txojkev chim ntaiv hwv ib hmo, ces thaum kaj ntug lawv txojkev chim txawm cig plaws ib yam li tej nplaim taws. “Vim lawv txojkev chim uas kub heev ntawd, lawv thiaj muab lawv cov thawjcoj tua povtseg. Lawv cov vajntxwv raug tua ib tug dhau ib tug, tiamsis tsis muaj leejtwg tsa ncauj thov kuv pab li.” Tus TSWV hais tias, “Cov Yixalayees zoo ib yam li lub ncuav uas muab cub siav txog nrab xwb. Lawv cia siab kawg rau tej haivneeg uas nyob puagncig lawv. Lawv twb tsis paub hais tias qhov uas lawv tso siab rau cov neeg txawv tebchaws ntawd ua rau lawv lub zog ntaug zuj zus lawm. Vajtswv twb teem hnub kawg cia rau lawv lawm, tiamsis lawv tsis paub li. Cov Yixalayees tej kev khavtheeb rov kom lawv lawm. Txawm yog twb muaj tej xwm no los lawv tseem tsis kam tig los cuag tus TSWV uas yog lawv tus Vajtswv. Cov Yixalayees lub siab ywjfab ywjfwj ib yam li tus nquab uas ya mus ya los tsis paub yuav tsaws qhov twg; thawj zaug lawv mus thov cov Iziv pab, ces tom qab ntawd lawv ho mus thov cov Axilias pab! Tiamsis kuv yuav nthuav vas cuab lawv ib yam li cuab noog. Kuv yuav rau txim rau lawv, vim tej kev phem kev qias uas lawv tau ua tas los. “Lawv raug puastsuaj lawm! Lawv tau ntxeev siab rau kuv thiab tso kuv tseg. Lawv yuav raug kev puastsuaj. Kuv xav cawm kom lawv dim, tiamsis lawv tsis muaj nplooj siab pehawm kuv tiag. Lawv tsis muaj lub siab dawb paug thov kuv tiag, tiamsis lawv lam quaj tso cev da xwb. Thaum lawv thov kuv pub nplej thiab cawv txiv hmab rau lawv, lawv muab riam hlais lawv tej nqaij to. Lawv ntxeev siab rau kuv! Kuv yog tus cob qhia lawv thiab txhawb kom lawv muaj zog los lawv tseem ntxeev siab tawmtsam kuv. Lawv tso kuv tseg thiab mus teev tus vajtswv uas tsis muaj hwjchim dabtsi li. Kuv cia siab tsis tau rau lawv ib yam li tus qhaub hneevnti uas tuag duav lawm. Rau qhov lawv cov thawjcoj khavtheeb heev, lawv yuav raug hniav ntaj tuag tas, thiab cov Iziv yuav luag lawv plig.” Tus TSWV hais tias, “Cia li tshuab xyu ceebtoom rau sawvdaws! Yeebncuab sau nthwv tuaj rau hauv kuv lub tebchaws ib yam li tus dav ya tuaj! Kuv haivneeg tsis ua raws li tej lus uas kuv tau cog tseg rau lawv, thiab lawv tau ntxeev siab tawmtsam kuv tej lus qhia. Txawm yog li ntawd los lawv tseem muaj plhus hu kuv ua lawv tus Vajtswv thiab khav hais tias lawv yog kuv haivneeg thiab paub kuv, tiamsis lawv tsis kam lees yuav qhov zoo. Vim li ntawd lawv cov yeebncuab thiaj caum lawv tua. “Kuv haivneeg xaiv lawv cov vajntxwv, tiamsis lawv xaiv raws li lawv pom zoo xwb. Lawv tsa tej thawjcoj, tiamsis kuv tsis pom zoo. Lawv muab lawv tej nyiaj tej kub coj mus nchuav mlom rau lawv pe; lawv ua li ntawd twb yog lawv rov ua rau lawv raug kev puastsuaj ntag. Kuv ntxub tus mlom nyuj uas cov neeg hauv lub nroog Xamalis pe kawg li. Kuv npautaws heev rau lawv. Thaum twg lawv mam li tso lawv txojkev pe mlom ntawd tseg? Tus mlom uas tus neeg Yixalayees nchuav ntawd yeej tsis yog tus vajtswv tiag! Tus mlom nyuj uas sawvdaws pe hauv lub nroog Xamalis yuav raug muab tsoo kom tawg mos nyoos. Yog lawv tseb cua, lawv yuav tau sau nagxob nagcua! Cov nplej hauv daim teb uas tseem tsis tau siav, yeej muab tsis tau los ua ncuav li. Tiamsis yog siav lawm, tej neeg txawv tebchaws yuav tuaj muab noj tas. Cov Yixalayees zoo ib yam li lwm haivneeg, thiab tsis muaj nqis ib yam li lub laujkaub av uas tawg lawm. Cov Yixalayees tawv ncauj npaum nkaus li tej neesluav qus, lawv ua raws li lawv lub siab nyiam xwb. Lawv mus thov cov Axilias tuaj pab thiab lawv mus ntiav lwm haivneeg tuaj pab tiv thaiv lawv lub tebchaws. Tiamsis nimno kuv yuav sau zog lawv los ua ke thiab rau txim rau lawv. Tshuav tsis ntev tus vajntxwv uas kav tebchaws Axilias yuav tuaj tsimtxom lawv, lawv yuav raug mob quaj da pes luam. “Cov Yixalayees yimhuab teeb ntau lub thaj los daws kev txhaum, mas yimhuab muaj ntau lub chaw rau lawv mus ua kev txhaum ntxiv! Kuv sau tau ntau zaj lus qhuab ntuas uas suav tsis txheeb qhia rau cov Yixalayees, tiamsis lawv tsis lees yuav; lawv suav hais tias yog tej lus uas lawv tsis tau hnov dua thiab yog lwm haivneeg li. Lawv coj tsiaj tuaj tua fij rau kuv, thiab lawv noj tej nqaij uas yog cov khoom fij ntawd. Tiamsis kuv yog tus TSWV kuv tsis txaus siab rau lawv; nimno kuv yuav cim ntsoov lawv tej kev txhaum thiab rau txim rau lawv, vim tej uas lawv tau ua ntawd; kuv yuav xa lawv rov qab mus rau nram tebchaws Iziv! “Cov Yixalayees ua tau ntau lub loog, tiamsis lawv tsis nco qab tus uas Tsim lawv lawm. Thiab cov Yudas tsim tau ntau lub nroog uas txhim ntsa yeej khov kho. Tiamsis kuv yuav tso hluavtaws los hlawv lawv tej loog thiab tej nroog kom puastsuaj tas.” Cov Yixalayees, nej cia li tseg tsis txhob ua rooj noj rooj haus ib yam li tej neeg tsis hwm Vajtswv ua. Nej tau tso nej tus Vajtswv tseg thiab tsis muab siab npuab nws lawm. Nej muab nej muag rau Npa-as thoob tebchaws ib yam li tej niamntiav, thiab nej txaus siab rau tej nplej uas nej xav hais tias yog nws muab them rau nej! Tiamsis tshuav tsis ntev nej yuav tsis muaj nplej thiab roj txiv ntoo txaus rau nej noj thiab tsis muaj cawv txiv hmab rau nej haus lawm. Cov Yixalayees yuav tsis nyob hauv tus TSWV lub tebchaws lawm, tiamsis lawv yuav tau rov mus nyob nram tebchaws Iziv thiab yuav tau noj tej zaub mov uas tsis huv nyob pem tebchaws Axilias. Thaum lawv mus nyob hauv lwm haivneeg tej tebchaws lawv yuav tsis muab cawv txiv hmab lossis tsiaj tuaj fij rau tus TSWV lawm. Txhua tus uas noj lawv tej zaub mov ntawd yuav ua rau nws tsis huv ib yam li noj tej zaub mov hauv tsev pam tuag. Tej zaub mov ntawd tsuas yog cov neeg uas tshaib plab noj xwb; tej zaub mov ntawd tsis muaj ib yam uas yuav zoo coj mus fij rau hauv tus TSWV lub Tuamtsev li. Thaum txog lub sijhawm uas teem tseg ua kevcai hawm tus TSWV, lawv yuav ua li cas? Thaum txog hnub uas kev puastsuaj los ti, tej neeg yuav tawg khiav mus nyob ua sab ua sua; cov Iziv yuav sau lawv los ua ke, coj lawv mus faus rau hauv Meefis! Lawv tej txhab nyiaj thiab tej vajtse yuav tuaj nroj tsuag thiab tuaj pos ntxhov hnyo. Twb txog lub sijhawm uas lawv raug txim thiab lub sijhawm uas lawv yuav sau lawv tej kev txhaum. Thaum muaj li ntawd, cov Yixalayees yuav paub! Nej hais tias, “Tus cev Vajtswv lus no ruam kawg nkaus li! Tus neeg uas Vajtswv tshoov siab ntawd vwm lawm.” Nej ntxub kuv heev, vim nej ua txhaum loj kawg li. Vajtswv tau txib kuv ua ib tug cev Vajtswv lus ntuas nws haivneeg Yixalayees. Tiamsis txhua qhov uas kuv mus nej cuab hlua tos kuv kev ib yam li cuab noog. Hauv Vajtswv lub tebchaws los tej neeg tseem ua yeebncuab rau cov cev Vajtswv lus. Lawv ua phem ua qias ib yam li thaum uas lawv nyob hauv Nkinpe-as. Vajtswv yuav cim ntsoov tej kev txhaum uas lawv ua thiab rau txim rau lawv vim tej uas lawv ua ntawd. Tus TSWV hais tias, “Thaum chivthawj uas kuv nrhiav tau cov Yixalayees zoo ib yam li kuv pom tsob txiv hmab uas tuaj hauv tiaj suabpuam. Thaum chivthawj uas kuv pom nej cov yawgkoob zoo ib yam li kuv pom thawj phaum txiv ncuavpias uas siav thaum txog caij. Tiamsis thaum lawv los txog ntawm lub Roob Pe-aus, lawv txawm pib pe Npa-as thiab tsis ntev lawv txawm mus ua phem ua qias ib yam li tej vajtswv uas lawv nyiam pe ntawd lawm. Cov Yixalayees lub hwjchim yuav ploj mus ib yam li tus noog ya, lawv yuav tsis muaj tubki; lawv tej pojniam yuav tsis xeeb tub thiab tsis yug menyuam lawm. Txawm yog lawv muaj taus menyuam los kuv yuav coj huv tibsi mus tsis tseg ib tug muaj sia nyob li. Thaum kuv tso haivneeg no tseg lawm, lawv yuav raug kev txomnyem loj kawg nkaus.” Tus TSWV, kuv twb pom luag caum lawv cov menyuam thiab muab tua lawm. Kuv yuav thov kom koj ua li cas rau cov neeg no? Thov koj ua rau lawv tej pojniam kom muaj tsis taus menyuam thiab ua kom lawv tsis muaj mis pub lawv tej menyuam. Tus TSWV hais tias, “Lawv pib ua kev txhaum nyob hauv lub nroog Nkilenkas. Kuv thiaj pib ntxub lawv thaum ntawd los. Thiab vim yog tej kev phem kev qias uas lawv ua ntawd kuv thiaj yuav muab lawv ntiab tawm hauv kuv lub tebchaws mus. Kuv yuav tsis hlub lawv ntxiv lawm; lawv cov thawjcoj puavleej ntxeev siab tawmtsam kuv. Cov Yixalayees zoo ib yam li tsob ntoo uas tej cag twb qhuav tas thiab tsis txi txiv lawm. Lawv yuav tsis muaj menyuam, txawm yog lawv muaj los kuv yuav muab tej menyuam uas lawv hlub heev tua povtseg huv tibsi.” Tus Vajtswv uas kuv pehawm yuav tso nws haivneeg tseg vim lawv tsis mloog nws lus. Lawv yuav ua neeg poob tebchaws mus nyob xyaw luag lwm haivneeg. Cov Yixalayees zoo ib yam li tsob txiv hmab uas txi txiv ncw heev. Lawv vammeej npaum twg, lawv yimhuab teeb thaj ntau npaum ntawd. Lawv lub tebchaws ua tau qoobloo ntau npaum twg, lawv yimhuab teeb ncej zeb ntau npaum ntawd rau lawv pe. Cov neeg uas muaj lub siab dag ntxias yuav raug kev txomnyem vim lawv tej kev txhaum ntawd. Vajtswv yuav rhuav lawv tej thaj thiab tsoo lawv tej ncej zeb kom puastsuaj tas. Tsis ntev cov neeg no yuav hais tias, “Peb tsis muaj vajntxwv, rau qhov peb tsis hwm tus TSWV. Txawm yog peb muaj vajntxwv los nws yuav ua tau dabtsi pab peb?” Lawv hais lus ua dog ua dig tsis muaj hauvpaus hauvntsis lawv coglus dag. Lawv muab kev ncaj ncees hloov ua kev tsis ncaj ncees ib yam li tsob tshuaj kuab taw hnyuv uas loj hlob hauv daim teb uas luag laij cia lawm. Cov neeg uas nyob hauv lub nroog Xamalis yuav ntshai thiab quaj ntsuag tus mlom heev nyuj uas yog muab kub nchuav ua nyob hauv lub nroog Npethees. Lawv thiab cov povthawj uas pe tus mlom ntawd yuav quaj ntsuag. Lawv yuav tsa suab quaj thaum luag muab tej kub uas vuam tus mlom ntawd tev tas lawm. Luag yuav coj tus mlom ntawd mus pub rau cov Axilias tus vajntxwv uas muaj hwjchim loj. Yixalayees yuav poob ntsejmuag thiab txajmuag vim nws ua raws li luag tej lus haub ntxias. Yixalayees tus vajntxwv yuav raug luag cab mus ib yam li daim nplais ntoo uas dej tshoob lawm. Tej tsev teev mlom uas nyob saum roob hauv lub nroog Avees uas cov Yixalayees pheej mus pe mlom yuav raug puastsuaj tas. Pos thiab nroj yuav tuaj laum lawv tej thaj. Tej neeg yuav thov tej roob hais tias, “Thov npog peb lauj!” thiab thov tej pov roob hais tias, “Thov txhub peb lauj!”. Tus TSWV hais tias, “Txij thaum cov Yixalayees ua txhaum rau kuv hauv lub nroog Nkinpe-as los, lawv yeej tsis tso txojkev txhaum uas lawv ua ntawd tseg li. Yog li ntawd, yuav muaj kev tsov kev rog tuaj tua lawv hauv lub nroog Nkinpe-as. Kuv yuav tawmtsam cov neeg ua txhaum no thiab rau txim rau lawv. Ntau haivneeg yuav sib sau ua ke tuaj tua lawv, thiab lawv yuav raug txim rau qhov lawv tau ua txhaum ntau heev. “Yav tas los cov Yixalayees zoo ib yam li tus xyuas nyuj uas twb cob tau thiab tos rawv coj mus tsuj nplej lawm xwb. Tiamsis kuv npaj siab muab tus quab khuam rau nws lub cajdab uas ntug ntoob kom nws ua haujlwm hnyav dua qhov qub. Kuv kom Yudas cab rab khais thiab kom Yixalayees cab lub zuag. Kuv hais tias, ‘Nej cia li mus laij dua daim teb tshiab rau nej cog kev ncaj ncees thiab sau tej koob hmoov uas kuv muab rau txhua tus uas muab siab npuab kuv. Twb txog lub sijhawm uas nej los cuag kuv uas yog nej tus TSWV lawm, kuv yuav los thiab nchuav koob hmoov rau nej.’ Tiamsis nej tsis ua li ntawd; nej tseb kev phem thiab sau kev tsis ncaj ncees nkaus xwb. Nej tej kev dag twb tawg paj txi txiv rau nej noj lawm. “Vim nej cia siab rau nej tej tsheb nees thiab nej cov tubrog uas coob heev, thiaj yuav muaj tsov muaj rog tuaj tua nej haivneeg, thiab tagnrho nej tej chaw fajxwm yuav puastsuaj tas. Mas yuav zoo ib yam li hnub uas Vajntxwv Salemas tuaj tua lub nroog Npethanpees; tej pojniam thiab cov menyuam raug luag muab tsuj tuag tas. Tej xwm zoo li ntawd yuav los raug nej cov neeg uas nyob hauv lub nroog Npethees vim tej kev phem kev qias uas nej ua tas los lawm. Thaum pib sib tua xwb cov Yixalayees tus vajntxwv twb raug tua tuag lawm.” Tus TSWV hais tias, “Thaum Yixalayees tseem yog menyuam yaus kuv hlub nws heev, thiab kuv hu nws tawm nram tebchaws Iziv los ua kuv tus tub. Tiamsis kuv yimhuab hu nws, nws yimhuab khiav ntawm kuv mus deb npaum ntawd. Kuv haivneeg tua tsiaj fij rau Npa-as; lawv hlawv tshuaj tsw qab rau tej mlom. Kuv yog tus uas qhia cov Yixalayees mus kev. Kuv tsaws kuv haivneeg los puag rau ntawm kuv ob txhais npab, tiamsis lawv tsis paub hais tias kuv yog tus uas tu lawv hlob li. Kuv ua tib zoo rub lawv los cuag kuv thiab kuv hlub lawv kawg. Kuv tsaws hlo lawv los puag npuab kuv lub plhu; kuv khoov mus tu lawv thiab pub mov rau lawv noj. “Lawv tsis kam tig rov los cuag kuv; yog li ntawd, lawv yuav tsum tau rov mus rau nram tebchaws Iziv, thiab haivneeg Axilias yuav tswjhwm lawv. Yuav muaj tsov muaj rog tuaj tua lawv tej nroog thiab tsoo tej roojvag kom pob puas tas. Luag yuav ua kom kuv haivneeg raug puastsuaj tas, vim lawv xav hais tias tej uas lawv ua yeej zoo heev lawm. Lawv tawv ncauj thiab khiav tawm ntawm kuv mus. Lawv yuav tsa suab hlo quaj vim tus quab uas lawv kwv, tiamsis yuav tsis muaj leejtwg muab tus quab ntawd tshem ntawm lawv mus li. “Yixalayees, kuv yuav ua li cas tso taus koj? Kuv yuav ua li cas thiaj tso taus koj tseg? Kuv puas khuv ua kom koj puastsuaj ib yam li kuv ua rau lub nroog Amas lossis ua rau koj ib yam li kuv ua rau lub nroog Xenpauyees? Kuv lub siab yeej tsis kheev kuv ua li ntawd! Rau qhov kuv hlub koj heev. Thaum kuv chim kuv yuav tsis rau txim rau koj; kuv yuav tsis ua kom cov Yixalayees raug puastsuaj ib zaug ntxiv li lawm. Rau qhov kuv yog Vajtswv, kuv tsis yog noobneej. Kuv yog tus Dawbhuv, kuv nrog nej nyob. Kuv yuav tsis los cuag nej ua tus npautaws tsawv. “Thaum kuv nyooj laws ib yam li tus tsov ntxhuav rau kuv haivneeg tej yeebncuab, kuv haivneeg yuav raws kuv qab. Lawv yuav maj ceev nrooj tim sab hnubpoob rov los cuag kuv. Lawv yuav khiav ceev npaum nkaus li tej noog ya nram tebchaws Iziv los thiab ceev npaum nkaus li nquab ya pem tebchaws Axilias los. Kuv yuav coj lawv rov los nyob hauv lawv tej vajtse dua. Kuv yog tus TSWV uas hais li ntawd.” Tus TSWV hais tias, “Cov Yixalayees hais lus dag thiab ntxeev ntxias puagncig kuv, thiab cov Yudas tseem ntxeev siab tsis tseg rau kuv uas yog Vajtswv tus Dawbhuv thiab ncaj ncees. Txhua yam uas cov Yixalayees ua thaum sawv ntxov mus txog thaum tsaus ntuj yeej tsis muaj nqis dabtsi li tsuas yog coj kev puastsuaj los xwb. Lawv ntxeev siab thiab ua limhiam heev zuj zus. Lawv nrog cov Axilias coglus ua phoojywg thiab nrog cov Iziv ua lag ua luam.” Tus TSWV muaj lus kom cov Yudas; nws yuav rau txim rau cov Yixalayees raws li tej kev txhaum uas lawv ua. Nws yuav ua pauj tej kev txhaum uas lawv ua rov rau lawv. Lawv yawgkoob Yakhauj yeej nrog nws tijlaug Exaus uas nkawd yog menyuam ntxaib sib tawmtsam thaum tseem nyob hauv leej niam plab lawm; thaum Yakhauj loj hlob los, nws tau nrog Vajtswv sib qhau thiab. Nws qhau yeej ib tug timtswv ceebtsheej. Nws tau quaj thiab thov kom foom koob hmoov rau nws. Vajtswv los rau peb yawgkoob Yakhauj pom thiab nrog nws tham nyob hauv Npethees. Tus no yog tus TSWV uas yog Vajtswv tus muaj hwjchim loj kawg nkaus; tus TSWV lub npe yeej yog lub npe uas tsimnyog sawvdaws pehawm. Yakhauj cov xeebntxwv, nimno nej cia li cia siab rau nej tus Vajtswv thiab rov los cuag nws. Ua siab dawb siab zoo thiab ua siab ncaj thiab ua siab ntev tos nej tus Vajtswv. Tus TSWV hais tias, “Cov Yixalayees lub siab tsis ncaj ib yam li cov Kana-as thiab ntag; lawv nyiam muab rab teev tsis txwm los luj ntxo cov neeg uas tuaj yuav khoom ntawm lawv. Lawv hais tias, ‘Peb npluanuj heev, peb muaj hmoo kawg nkaus. Txawm yog peb ua tsis ncaj kom peb npluanuj los yeej tsis muaj leejtwg hais tau peb li.’ Tiamsis kuv yog tus TSWV, nej tus Vajtswv uas tau coj nej khiav nram tebchaws Iziv los, kuv yuav ua kom nej rov mus nyob tsevntaub ib yam li thaum nej nyob nram tiaj suabpuam uas kuv los cuag nej. “Kuv tau los hais rau cov cevlus ua rau lawv pom ntau zaj yogtoog thiab kuv kom cov cevlus ntuas kuv haivneeg ntau zaus. Tiamsis lawv tseem pe tej mlom hauv Nkile-as thiab, cov neeg uas pe tej mlom ntawd yuav tuag tas. Lawv cab tej heev nyuj mus tua fij nyob hauv Nkilenkas; tej thaj ntawd yuav raug rhuav ua tej pawg pobzeb nyob rau hauv tej tiaj nrag.” Peb yawgkoob Yakhauj tau khiav mus rau tim Mexuputamias, nws tau mus ua haujlwm rau ib tug txivneej thiab yug tus txivneej ntawd pab yaj kom nws tau pojniam. Tus TSWV txib ib tug cevlus mus cawm haivneeg Yixalayees kom dim ntawm txojkev ua qhev nram tebchaws Iziv thiab nws saib xyuas lawv. Cov Yixalayees ua rau tus TSWV chim heev; yeej tsimnyog cia lawv tuag mus vim lawv tej kev txhaum. Tus TSWV yuav rau txim rau lawv, vim tej uas lawv ua rau nws poob ntsejmuag ntawd. Yav tas los, yog xeem Efalayees hais, lwm xeem Yixalayees ntshai; lawv puavleej tsa qhovmuag ntsia cov Efalayees. Tiamsis Efalayees ua txhaum rau qhov lawv mus pe Npa-as, vim li no lawv yuav tuag tas. Lawv tseem pheej ua txhaum vim qhov uas lawv nchuav mlom rau lawv pe; tej mlom nyiaj ntawd yog ua raws li neeg lub tswvyim thiab yog neeg txhais tes ua xwb, los lawv tseem hais tias, “Cia li muab khoom mus fij rau tej mlom ntawd!” Neeg yuav ua li cas mus nwj tej mlom heev nyuj ntawd! Vim li ntawd, cov neeg ntawd yuav yaj ntshis ib yam li tej huab pw hav thaum sawv ntxov thiab ib yam li tej lwg dej uas tshav ntuj tuaj ziab qhuav thaum nruab hnub. Lawv yuav zoo ib yam li tej npluag nplej uas cua muab ntsawj ya tawm hauv lub tshav nplej thiab zoo ib yam li tej pa taws uas ncho tawm hauv lub cubtawg mus lawm. Tus TSWV hais tas, “Kuv yog tus TSWV uas yog nej tus Vajtswv, kuv coj nej tawm nram tebchaws Iziv los. Nej tsis muaj dua lwm tus Vajtswv li tsuas yog kuv xwb. Kuv tib leeg thiaj yog nej tus cawmseej. Kuv saib xyuas nej thaum nej nyob nram tiaj suabpuam, lub tebchaws uas qhuav nkig nkuav. Tiamsis thaum nej los nyob rau hauv lub tebchaws uas av zoo, nej tau noj tsau npo thiab txaus siab heev, ces nej txawm cia li khavtheeb thiab tsis nco qab kuv lawm. Yog li ntawd, kuv yuav tawmtsam nej ib yam li tus tsov ntxhuav. Kuv yuav tos nej kev ib yam li tus tsov pomtxwv. Kuv yuav tawmtsam nej ib yam li tus maum dais uas nws cov menyuam ploj lawm; kuv yuav muab nej dua ib yam li tsov ntxhuav dua; thiab kuv yuav muab nej dua ua tej daim ib yam li tej tsiaj qus dua. “Cov Yixalayees, kuv yuav ua kom nej puastsuaj mus! Leejtwg yuav pab tau nej? Nej thov kom muaj ib tug vajntxwv thiab muaj cov thawjcoj, tiamsis lawv yuav ua li cas pab tau nej haivneeg? Chim kuv siab kuv thiaj pub nej muaj vajntxwv, thiab kuv npautaws heev kuv thiaj coj lawv rov lawm. “Cov Yixalayees txojkev txhaum thiab lub txim twb muab sau tseg cia lawm thiab twb muab tej ntaub ntawv ntawd khaws cia rau qhov chaw zoo lawm. Tseem tshuav sijhawm rau cov Yixalayees tau txojsia, tiamsis vim lawv ruam heev lawv thiaj tsis kam txais yuav txojsia ntawd ib yam li tus menyuam uas twb yuav yug tiamsis nws tsis kam tawm hauv leej niam plab los li. Kuv yuav tsis cawm cov neeg no kom dim hauv tubtuag teb lossis pab kom lawv dim ntawm txojkev tuag lub hwjchim. Kev tuag, cia li tso koj tej sub tawg sub ntsa los! Tubtuag teb, cia li tso koj txojkev puastsuaj los! Kuv yuav tsis hlub haivneeg no ntxiv lawm. Txawm yog cov Yixalayees hlob mos nyoos ib yam li tej nroj tsuag, los kuv yuav tso cov cua kub kub uas nyob sab hnubtuaj ntsawj tom tiaj suabpuam tuaj, kom lawv tej qhovtshij thiab tej dej cag qhuav tas. Cua yuav ntsawj txhua yam uas muaj nqis mus tas huv tibsi. Lub nroog Xamalis yuav raug txim vim nws ntxeev siab tawmtsam kuv. Nws cov neeg yuav tuag tas rau hauv tshavrog; tej menyuam mos yuav raug luag tsuj rau hauv av, thiab tej pojniam uas suab menyuam yuav raug luag phais.” Cov Yixalayees, nej cia li rov los cuag tus TSWV uas yog nej tus Vajtswv. Nej txojkev txhaum ua rau nej dawm thiab ntog lawm. Nej cia li rov los cuag tus TSWV thiab tsa ncauj thov nws hais tias, “Thov zam peb tej kev txhaum thiab mloog peb tej lus thov; peb yuav ua koj tsaug raws li peb tau coglus tseg lawm. Cov Axilias yeej pab tsis tau peb, thiab tej nees uas caij mus ntaus rog yeej tiv thaiv tsis tau peb. Peb yuav tsis hu peb tej mlom hais tias lawv yog peb tus vajtswv ib zaug ntxiv lawm. Tus TSWV, koj yeej hlub cov neeg uas tsis pom qab mus cuag leejtwg li lawm.” Tus TSWV hais tias, “Kuv yuav coj kuv haivneeg rov qab los cuag kuv dua. Kuv yuav hlub lawv kom kawg kuv lub siab lub ntsws; kuv yuav tsis chim rau lawv ntxiv lawm. Kuv yuav ua kom Yixalayees zoo ib yam li thaj av qhuav uas tau dej nag; lawv yuav tawg paj ib yam li tej paj ntoos uas tawg tshiab tshiab; lawv nrhau cag ntsia av tob ib yam li tej ntoo pem Lenpanoos. Lawv yuav ciaj sia thiab hlav dua kaus tshiab, thiab yuav zoo nkauj npaum nkaus li tej ntoo roj. Lawv yuav tsw qab ib yam li tej ntoo ciab pem Lenpanoos. Kuv yuav tau tsomkwm lawv dua ib zaug ntxiv. Lawv yuav cog qoobloo thiab yuav txi ncw ib yam li tsob txiv hmab. Lawv yuav nto moo lug ib yam li tej cawv txiv hmab pem Lenpanoos. Cov Yixalayees yuav tsis quavntsej tej mlom ntxiv lawm; kuv yuav teb lawv tej lus thov thiab saib xyuas lawv. Kuv yuav ua duab ntxoo roos lawv ib yam li tsob ntoo uas nplooj ntsuab thawm xyoo; kuv yog lub hauvpaus koob hmoov rau lawv.” Thov kom txhua tus uas txawj ntse totaub txog tej lus uas sau tseg no thiab muab khaws nkaus cia rau nruab siab. Tus TSWV txojkev yeej yog txoj tseeb, thiab cov neeg ncaj ncees uas taug txojkev no yuav tau txojsia, tiamsis cov neeg txhaum yuav dawm thiab ntog vim lawv tsis mloog tej lus no. Ntawm no yog tus TSWV cov lus uas hais rau Pethuyees tus tub Yau-ees. Nej cov neeg laus cia li ua tib zoo mloog; txhua tus uas nyob hauv tebchaws Yudas, nej cia li mloog. Puas tau muaj tej yam zoo li no tshwmsim los rau nej tiam lossis nej cov yawgkoob tiam? Cia li piav tej no qhia rau nej cov menyuam; ces lawv mam li piav qhia rau lawv tej menyuam, lawv ib tiam yuav piav qhia rau ib tiam mus li. Kooj txomfav ib pab tas ib pab tuaj nyob puv nkaus ntawm tej qoobloo; yam twg uas ib pab kooj noj tsis tas mas lwm pab kooj los muab khee noj kom tas. Cov neeg qaug cawv, nej cia li sawv thiab quaj; cov neeg quav cawv, nej cia li tsa suab hlo quaj; rau qhov tej txiv hmab uas yuav cia ua cawv tshiab twb puastsuaj tas lawm. Ib pab tubrog kooj ya tsaus nti tuaj tawmtsam peb lub tebchaws; lawv muaj zog heev thiab coob kawg nkaus suav tsis txheeb li; lawv tej hniav ntse npaum nkaus li hniav tsov ntxhuav. Lawv muab peb tej vaj txiv hmab noj tas dulug thiab noj peb tej ntoo txiv ncuavpias tas huv tibsi. Lawv noj tej nplooj thiab kaws tej tawv, tsuas tshuav tej kav nyob dawb paug cia xwb. Tej pejxeem, nej cia li quaj ib yam li tus hluas nkauj quaj tus hluas nraug uas nws tabtom yuav mus yuav ua nws tus txiv, tiamsis tus hluas nraug ntawd cia li tuag lawm. Tsis muaj nplej lossis cawv txiv hmab coj mus fij rau hauv lub Tuamtsev; cov povthawj quaj ntsuag vim tsis muaj neeg nqa khoom tuaj fij rau tus TSWV lawm. Tej teb av liab nploog cia, tej av qhuav nkig nkuav, rau qhov tej qoobloo puastsuaj tas; tej txiv hmab thiab tej txiv ntoo roj los qhuav ntsws tas. Cov neeg ua liaj ua teb, nej cia li tu siab; cov neeg uas tu tej vaj txiv hmab, nej cia li tsa suab quaj, rau qhov tej qib, tej nplej thiab tej qoobloo twb puastsuaj tas lawm. Tej txiv hmab thiab txiv ncuavpias qhuav thiab ntsws; tej txiv ntoo puavleej qhuav thiab tuag tas. Tej neeg sawvdaws nyob nyuaj siab ntsuav. Nej cov povthawj uas fij khoom ntawm lub thaj cia li npua ntaubtsaj thiab quaj! Cia li mus rau hauv lub Tuamtsev thiab quaj ib hmos kaj ntug! Rau qhov tsis muaj nplej lossis cawv txiv hmab fij rau nej tus Vajtswv lawm. Cia li hais kom sawvdaws yoo mov, cia li hu sawvdaws tuaj ua ke! Cia li hu cov thawjcoj thiab tagnrho cov Yudas tuaj rau hauv tus TSWV uas yog nej tus Vajtswv lub Tuamtsev thiab thov nws pab. Twb yuav txog hnub uas tus TSWV teem cia, yog hnub uas tus muaj Hwjchim Loj kawg nkaus yuav ua kom ib puas tsav yam raug puastsuaj. Hnub ntawd yog hnub uas sawvdaws yuav ntshai kawg nkaus li! Peb saib ntsoov peb tej qoobloo raug puastsuaj tas. Tsis muaj kev zoo siab nyob hauv Vajtswv lub Tuamtsev lawm. Tej noob qoob lwj tas rau hauv tej av qhuav. Tsis muaj qoobloo sau los rau hauv tej txhab, yog li ntawd tej txhab thiaj pob puas tas. Tej nyuj qaug zog zis rau qhov tsis muaj zaub rau nyuj noj li lawm; tej yaj los tsis muaj zaub noj ib yam nkaus. Tus TSWV, kuv tsa ncauj thov koj, vim tej nroj tsuag thiab tej ntoo tuag tas ib yam li hluavtaws plhov. Txawm yog tej tsiaj qus los puavleej tsa suab quaj thov koj pab, rau qhov tej hav dej qhuav tas lawm. Nej cia li nyob saum Vajtswv lub roob Xi-oos uas dawbhuv tshuab xyu ceebtoom rau sawvdaws. Cov Yudas, nej cia li ntshai ua ibce tshee hnyo! Rau qhov twb yuav txog hnub uas tus TSWV teem tseg. Hnub ntawd ntuj yuav tsaus ntais, teb yuav tsaus nti, huab laum nkaus ntuj tsaus dub nciab. Cov tubrog kooj ntawd nias tsam tsaus nti tuaj ib yam li duab ntxoov ntxoo roos tej roob. Yeej tsis tau muaj dua ib yam zoo li no hlo li, thiab yuav tsis muaj ib zaug zoo li no ntxiv lawm. Lawv noj tej nroj tsuag thiab qoobloo tas dulug ib yam li hluavtaws kub. Lub tebchaws no zoo ib yam li lub Vaj Edees nyob tom lawv hauv ntej, tiamsis tom lawv qab av liab ploog ib yam li tiaj suabpuam. Tsis muaj ib yam dabtsi yuav khiav dim ntawm lawv li. Lawv lub cev zoo ib yam li nees lub; lawv khiav ib yam li tej nees uas caij mus ntaus rog. Thaum lawv dhia mus rau saum tej roob mas nrov npaum li tej tsheb nees nrov thiab nrov nroo ntws ib yam li hluavtaws kub nroj tsuag qhuav. Lawv sawv ua tsheej kab coob ib yam li cov tubrog uas npaj nroos yuav ntaus rog. Lawv mus txog qhov twg txhua tus neeg ntshai ua ntsejmuag thimxem tas. Cov kooj ntawd mos tsaus tsi tuaj ib yam li pab tubrog; lawv nce tej ntsa yeej ib yam li tej tubrog. Lawv too hau ntsoov nias tsam mus rau tom hauv ntej tsis tig saib qab lossis ib tug tsis txeeb ib tug ntej li. Lawv nias luag tej yeej tuaj tsis muaj leejtwg tiv tau li. Lawv txeem tuaj rau hauv nroog, lawv dhia hla tej ntsa yeej tuaj; lawv nce pes hlo mus rau saum tej tsev thiab nkag ntawm tej qhovrai mus ib yam li tej tubsab. Thaum lawv taug kev tuaj lub ntiajteb ua zog koog, lub ntuj ntseeg nkawg. Lub hnub thiab lub hli cia li tsaus dub nciab, thiab tej hnubqub los cia li tsis ci lawm. Tus TSWV nthe nqho nws cov tubrog. Cov tubrog uas mloog nws lus muaj coob thiab muaj zog kawg li. Hnub uas tus TSWV teem cia yog hnub uas sawvdaws yuav ntshai kawg nkaus! Leejtwg tseem yuav dim tau? Tus TSWV hais tias, “Txawm yog li ntawd los nimno nej cia li tso plhuav nej tej kev txhaum ntawd tseg, thiab tig rov los cuag kuv ntawm nej lub siab dawb paug, cia li yoo mov, quaj ntsuag thiab tu siab. Nej yuav tsum ua rau luag pom hais tias nej nyuaj siab tiag, tsis yog lam dua nej tej ris tsho xwb.” Cia li rov los cuag tus TSWV uas yog nej tus Vajtswv. Nws muaj lub siab dawb siab zoo thiab puv npo txojkev hlub; nws muaj lub siab ntev thiab ua raws li nws tej lus cog tseg; nws zoo siab yuav zam txim thiab tsis rau txim rau nej. Tej zaum tus TSWV uas yog nej tus Vajtswv yuav hloov siab thiab foom koob hmoov kom nej muaj qoobloo nplua mias. Ces nej yuav muaj qoobloo thiab cawv txiv hmab fij rau tus TSWV. Cia li tshuab xyu saum Roob Xi-oos; hu sawvdaws tuaj ua ke thiab ua kevcai yoo mov! Cia li hu kom cov pejxeem tuaj ua ke; kom lawv txhua tus npaj tuaj koom lub rooj sablaj tseemceeb; coj cov laus, cov menyuam yaus thiab cov menyuam mos tuaj huv tibsi. Txawm yog tej niamtxiv uas sib yuav tshiab los lawv yuav tsum tawm hauv lawv tej tsev tuaj mus koom. Cov povthawj uas tu tus TSWV ntawm lub thaj thiab ntawm txojkev uas mus rau hauv lub Tuamtsev kis nruab nrab, cia li quaj thiab thov Vajtswv hais tias, “Tus TSWV, thov hlub koj haivneeg. Thov tsis txhob cia lwm haivneeg txob thuam peb, saib tsis taus peb thiab hais tias, ‘Nej tus Vajtswv nyob qhov twg?’ ” Tom qab ntawd tus TSWV rov hlub nws lub tebchaws thiab hlub nws haivneeg. Nws teb lawv tej lus thov hais tias, “Nimno kuv yuav pub kom nej muaj nplej, cawv txiv hmab thiab roj txiv ntoo ces nej yuav txaus siab heev. Lwm haivneeg yuav tsis txob thuam nej ntxiv lawm. Kuv yuav raws cov tubrog kooj uas tuaj pem qaumteb tuaj kom tawm mus thiab yuav ntiab ib txhia mus rau tom tiaj suabpuam. Kuv yuav puav pab uas ua ntej mus rau hauv Hiavtxwv Tuag, thiab kuv yuav puav pab tom qab mus rau hauv Hiavtxwv Meditelanes. Lawv tej cev tuag yuav tsw lwj ntxiag. Kuv yuav ua kom lawv puastsuaj tas vim tej uas lawv tau ua rau nej lawm. “Tej liaj tej teb, nej tsis txhob ntshai tiamsis cia li xyivfab thiab zoo siab rau tej uas tus TSWV tau pab nej lawm. Tej tsiaj txhu, tsis xob ntshai. Tej tshav zaub los twb rov hlav ntsuab xiab, tej ntoo los rov tawg paj txi txiv thiab tej txiv hmab, txiv ncuavpias los muaj nplua mias lawm. “Cov neeg hauv Xi-oos, cia li zoo siab; zoo siab rau tej uas tus TSWV uas yog nej tus Vajtswv twb pab nej lawm. Nws tso nag los kom txaus rau lub caij ntuj nag; nws tso nag ntuj tsaug thiab nag ntuj tshiab los rau nej ib yam li yav thaum ub. Yuav muaj nplej puv nkaus hauv nej tej tshav nplej; thiab tej rhawv tsuam txiv hmab yuav muaj cawv txiv hmab thiab roj txiv ntoo puv phwj yaws. Ntau xyoo uas tas los kooj txomfav noj nej tej qoobloo tas lawm, tiamsis nimno kuv yuav them rov qab rau nej, kuv yog tus uas tso cov tubrog no tuaj tawmtsam nej ntag. Nimno nej yuav muaj noj muaj haus nplua mias thiab txaus nej siab. Nej yuav qhuas tus TSWV uas yog nej tus Vajtswv, tus uas ua tej haujlwm zoo heev pab nej. Kuv haivneeg yuav tsis raug luag txob thuam ntxiv lawm. Cov Yixalayees, nej yuav paub hais tias kuv nrog nraim nej thiab kuv yog tus TSWV uas yog nej tus Vajtswv, tsis muaj dua lwm tus lawm. Kuv haivneeg yuav tsis raug luag txob thuam ntxiv lawm. “Tom qab ntawd kuv yuav pub kuv tus ntsujplig los rau txhua tus: nej tej tub thiab tej ntxhais yuav qhia kuv txojlus; nej cov laus yuav ua npau suav, thiab nej cov tub hluas yuav pom tej zaj yogtoog. Thaum txog lub sijhawm ntawd, kuv yuav pub kuv tus ntsujplig rau tej tubtxib tsis hais pojniam lossis txivneej. “Thaum txog hnub ntawd kuv yuav ua tej yam cim qhia rau saum nruab ntug thiab hauv ntiajteb; yuav muaj ntshav nrog, hluavtaws thiab pa taws ncho auv niab. Ua ntej hnub tseemceeb thiab tej kev txhawj ntshai uas tus TSWV teem cia ntawd los txog, lub hnub yuav tsaus thiab lub hli yuav liab ib yam li ntshav. Tiamsis txhua tus uas thov tus TSWV pab yuav dim. Raws li tus TSWV tau hais tseg lawm tias, ‘Muaj qee leej uas nyob hauv Yeluxalees yuav khiav dim; cov neeg uas kuv xaiv lawm thiaj yuav muaj sia nyob xwb.’ ” Tus TSWV hais tias, “Thaum txog lub sijhawm ntawd kuv yuav rov txhim kho lub tebchaws Yudas thiab lub nroog Yeluxalees kom vammeej. Kuv yuav sau txhua haivneeg tuaj ua ke thiab coj lawv mus rau hauv lub Hav Txiav Txim. Kuv yuav txiav txim rau lawv nyob hauv lub hav ntawd raws li tej uas lawv ua rau kuv haivneeg lawm. Lawv ua rau cov Yixalayees tawg mus nyob ua sab ua sua rau lwm tebchaws thiab muab kuv lub tebchaws Yixalayees faib rau lawv. Lawv rho ntawv saib leejtwg tau cov neeg uas raug ntes ntawd. Lawv muab tej tub thiab tej ntxhais muag mus ua luag qhev kom tau nyiaj mus them tej niamntiav thiab yuav cawv haus. “Tiles, Xidoos thiab lub tebchaws Filitees, nej pheej ua dabtsi rau kuv? Puas yog nej yuav ua phem pauj kuv? Yog nej ua li ntawd kuv yuav ua pauj rau nej tamsim no ntag! Nej muab kuv tej nyiaj tej kub thiab nqa kuv tej khoom uas muaj nqis mus tso rau hauv nej tej tuamtsev lawm. Nej coj cov neeg hauv tebchaws Yudas thiab hauv lub nroog Yeluxalees mus muag rau cov neeg Kilis kom lawv mus nyob deb lawv lub tebchaws. Nimno kuv yuav coj lawv tawm hauv tej tebchaws uas nej coj lawv mus muag ntawd rov qab los. Kuv yuav ua rau nej ib yam li nej tau ua rau lawv lawm. Kuv yuav cia luag coj nej tej tub thiab tej ntxhais mus muag rau cov neeg Yudas; cov Yudas yuav muab nej tej tub tej ntxhais muag mus rau cov neeg Xanpees uas nyob deb heev. Kuv yog tus TSWV uas hais li ntawd. “Cia li qhia rau txhua haivneeg li no: ‘Nej cia li npaj mus ua rog, txhij nej cov tubrog uas txawj ntaus rog tuaj; sau tagnrho nej cov tubrog tuaj thiab sawv kev mus! Cia li muab nej tej khais laij teb los ntaus ua ntaj thiab muab nej tej liag hlais nplej los ntaus ua hmuv. Txawm yog tus uas tsis muaj zog li los yuav tsum tau mus ntaus rog. Nej txhua haivneeg uas nyob ibncig ntawm no, cia li tuaj sib sau rau hauv lub voshav.’ ” Tus TSWV, thov koj cia li tso koj cov tubrog tuaj tawmtsam lawv! “Txhua haivneeg yuav tsum npaj kom txhij tuaj rau hauv lub Hav Txiav Txim. Kuv uas yog tus TSWV yuav zaum qhov ntawd txiav txim rau txhua haivneeg uas nyob ibncig ntawd. Lawv yog cov neeg uas ua phem heev; cia li muab lawv hlais ib yam li hlais nplej; cia li muab lawv tsuam ib yam li tsuam txiv hmab kom cov kua ntws si laim.” Thaum muaj ntau txhiab ntau vam leej neeg tuaj rau hauv lub Hav Txiav Txim lawm. Ces hnub uas tus TSWV teem cia twb los yuav txog. Lub hnub thiab lub hli yuav tsaus dub nciab, thiab tej hnubqub yuav tsis ci lawm. Tus TSWV nthe nqho saum lub Roob Xi-oos tuaj; nws lub suab nrov ntxhe ntws hauv lub nroog Yeluxalees; lub ntiajteb thiab lub ntuj ntseeg nkaws. Tiamsis nws yuav tsomkwm nws haivneeg. “Cov Yixalayees, nej yuav tsum paub hais tias kuv yog tus TSWV uas yog nej tus Vajtswv. Kuv nyob saum lub Roob Xi-oos uas yog kuv lub roob dawbhuv. Yeluxalees yuav yog lub nroog uas dawbhuv; tej neeg txawv tebchaws yuav ntaus tsis yeej ib zaug li lawm. Thaum txog lub sijhawm ntawd luag yuav cog txiv hmab puv nkaus saum tej roob, thiab yuav pom nyuj noj zaub nplawg ntia saum tej roob; Tebchaws Yudas yuav muaj dej nplua mias haus tsis tas. Muaj ib tug dej yuav ntws hauv tus TSWV lub Tuamtsev mus ywg lub Hav Akaxias. “Tebchaws Iziv yuav ua tiaj suabpuam, thiab tebchaws Edoos yuav puastsuaj tas, rau qhov lawv tau tuaj tua lub tebchaws Yudas thiab tua nws tej neeg uas tsis muaj txim. Tej no yog tus cevlus Amaus tej lus; nws yog ib tug tub yug yaj uas nyob hauv lub zos Tekau-as. Thaum Uxiyas ua vajntxwv kav tebchaws Yudas, thiab Yehau-as tus tub Yelaunpau-as ua vajntxwv kav tebchaws Yixalayees, Vajtswv tau qhia txhua yam txog cov Yixalayees rau Amaus, ob xyoos ua ntej uas av qeeg. Amaus hais tias, “Tus TSWV lub suab nrov nroo ntws saum lub Roob Xi-oos tuaj; nws lub suab nrov ntxhe ntws hauv lub nroog Yeluxalees. Tej tshav zaub qhuav tas huv tibsi thiab tej nroj tsuag saum Roob Kalemees los daj tas.” Tus TSWV hais tias, “Cov neeg uas nyob hauv lub nroog Damaxes ua txhaum tas los rov ua txhaum dua thiab, twb yog vim li no kuv yuav rau txim rau lawv. Lawv tau ua nruj ua tsiv rau cov neeg Nkile-as. Yog li ntawd, kuv thiaj yuav tso hluavtaws los hlawv lub tsev uas Vajntxwv Haxayees ua thiab kuv yuav hlawv Vajntxwv Npeehadas tej yeej tubrog kom kub hnyiab tas. Kuv yuav tsoo lub nroog Damaxes tej roojvag thiab muab cov neeg uas nyob hauv lub Hav Avees thiab tus thawj uas kav lub nroog Npethedees ntiab tawm mus. Cov neeg Xilias yuav raug ntes coj mus kaw rau hauv tebchaws Kiles.” Tus TSWV hais tias, “Cov neeg Nkaxas ua txhaum tas los rov ua txhaum dua thiab, twb yog vim li no kuv yuav rau txim rau lawv. Lawv coj txhua haivneeg los thiab muab muag mus ua qhev rau tebchaws Edoos. Yog li ntawd, kuv yuav tso hluavtaws los hlawv lub nroog Damaxes tej ntsa yeej thiab hlawv lawv tej yeej tubrog kom kub hnyiab tas. Kuv yuav muab cov thawjcoj uas kav lub nroog Asedaus thiab lub nroog Asekeloos ntiab tawm mus. Kuv yuav rau txim rau lub nroog Ekiloos, thiab cov neeg Filitees uas seem yuav tuag tas huv tibsi.” Tus TSWV hais tias, “Cov neeg Tiles ua txhaum tas los rov ua txhaum dua thiab, twb yog vim li no kuv yuav rau txim rau lawv. Lawv coj txhua haivneeg los thiab muab muag mus ua qhev rau tebchaws Edoos thiab tsis ua raws li tej lus uas lawv tau cog tseg hais tias yuav ua phoojywg ntawd li. Yog li ntawd, kuv yuav tso hluavtaws los hlawv lub nroog Tiles tus ntsa yeej thiab hlawv lawv tej yeej tubrog kom kub hnyiab tas.” Tus TSWV hais tias, “Cov neeg Edoos ua txhaum tas los rov ua txhaum dua, twb yog vim li no kuv yuav rau txim rau lawv. Lawv caum lawv cov kwvtij uas yog cov Yixalayees tua thiab tsis hlub lawv li. Lawv tsis tso lawv tej kev nruj kev tsiv tseg li. Yog li ntawd, kuv yuav tso hluavtaws los hlawv lub nroog Temas thiab lub nroog Npauxelas tej yeej tubrog kom kub hnyiab tas.” Tus TSWV hais tias, “Cov neeg Amoos ua txhaum tas los rov ua txhaum dua thiab, twb yog vim li no kuv yuav rau txim rau lawv. Lawv mus txeeb lwm haivneeg lub tebchaws los ua lawv tug, thiab lawv muab cov pojniam hauv cheebtsam Nkile-as uas tseem tabtom suab menyuam phais plab. Yog li ntawd, kuv yuav tso hluavtaws los hlawv lub nroog Lanpas tej ntsa yeej thiab tej yeej tubrog kom kub hnyiab tas. Hnub uas ua rog yuav muaj suab qw nrov ntshoo nrooj, thiab yuav muaj kev sib ntaus sib tua ib yam li cua daj cuab dub ntsawj. Lawv tus vajntxwv thiab nws cov nomtswv yuav raug ntes mus ua luag qhev.” Tus TSWV hais tas, “Cov neeg Mau-am ua txhaum tas los rov ua txhaum dua thiab, twb yog vim li no kuv yuav rau txim rau lawv. Lawv saib vajntxwv Edoos cov pobtxha tsis muaj nqis, lawv thiaj muab hlawv ua tshauv tas lawm. Kuv yuav tso hluavtaws los hlawv lub tebchaws Mau-am thiab lub nroog Keli-aus tej yeej tubrog kom kub hnyiab tas. Cov neeg Mau-am yuav tuag tas rau hauv tshavrog thaum sib ntaus sib tua ntxhov hnyo thiab thaum tej tubrog tshuab xyu thiab qw ntshoo nrooj. Kuv yuav tua tus thawj uas kav lub tebchaws Mau-am thiab cov thawjcoj hauv lub tebchaws ntawd povtseg huv tibsi.” Tus TSWV hais tias, “Cov neeg Yudas ua txhaum tas los rov ua txhaum dua thiab, twb yog vim li no kuv yuav rau txim rau lawv. Lawv thuam kuv tej lus qhia thiab tsis coj raws li kuv tej kevcai. Tej vajtswv cuav uas lawv cov yawgkoob ibtxwm teev ua rau lawv yuam kev lawm. Yog li ntawd, kuv yuav tso hluavtaws los hlawv cov Yudas thiab lub nroog Yeluxalees tej yeej tubrog kom kub hnyiab tas.” Tus TSWV hais tias, “Cov neeg Yixalayees ua txhaum tas los rov ua txhaum dua thiab, twb yog vim li no kuv yuav rau txim rau lawv. Lawv muab cov neeg ncaj ncees uas tshuav lawv nqi muag mus ua luag qhev, cov neeg ntawd txomnyem heev; txawm yog ib nkawm khau khiab xwb los lawv twb tsis muaj nyiaj them. Lawv caij tsuj cov neeg uas tsis muaj chaw vamkhom thiab muab cov neeg txomnyem thawb ntiag rau ib cag. Ob txiv tub mus deev ib tug nkauj qhe ua rau luag saib tsis taus kuv lub npe uas dawbhuv. Txhua qhov chaw uas neeg mus pehawm puavleej muaj neeg pw rawv saum tej khaubncaws uas lawv mus muab ntawm cov neeg txomnyem uas tshuav lawv nqi los yuam nqi cia. Lawv mus muab cov neeg ntawd tej cawv txiv hmab los haus hauv lawv tus Vajtswv lub tuamtsev. “Kuv haivneeg, twb yog vim kuv tseem hlub tshua nej, kuv thiaj ua rau cov neeg Amaules raug kev puastsuaj tas; lawv yog cov neeg uas tej txivneej siab ib yam li tej ntoo ciab thiab tawv npaum nkaus li tej ntoo qhib ntag. Kuv coj nej tawm nram tebchaws Iziv los thiab coj nej ncig mus ncig los nram tiaj suabpuam tau plaub caug xyoo, thiab kuv muab cov Amaules lub tebchaws rau nej ua nej tug. Kuv tau xaiv nej cov tub qee leej los ua cov cevlus thiab cov tub hluas qee leej los ua cov Naxis. Cov Yixalayees, tej no puas yog lus tseeb tiag? Kuv yog tus TSWV, tej lus no yog kuv hais. Tiamsis nej yuam kom cov Naxis haus cawv thiab txwv tsis pub cov cevlus qhia kuv tej lus. Nimno kuv yuav muab nej tsuj nthi rau hauv av, thiab nej yuav ntsaj ib yam li lub tsheb uas ntim nplej puv nkaus uas ntog nrov qij qej ntag. Cov neeg uas khiav ceev yuav khiav tsis dim; cov neeg uas muaj zog heev lub zog yuav ntaug, thiab cov tubrog yuav tsis muaj peevxwm cawm tau lawv txojsia. Cov neeg tua hneevnti yuav sawv tsis taus ntawm lawv qhov chaw, cov neeg khiav ceev yuav khiav tsis taus, thiab cov uas caij nees lawv yuav khiav tsis dim li. Thaum txog hnub ntawd, cov tubrog uas siab tawv heev yuav muab lawv tej cuabyeej tso tseg thiab khiav lawm xwb. Tus TSWV yog tus hais tej lus no.” Cov Yixalayees, nej yog haivneeg uas tus TSWV coj tawm nram tebchaws Iziv los, nej cia li mloog tej lus uas tus TSWV hais txog nej: “Txhua haivneeg uas nyob hauv lub ntiajteb no, tsuas yog nej haivneeg nkaus xwb, kuv thiaj paub thiab hlub. Nej tau ua txhaum loj heev, kuv yuav rau txim rau nej.” Ob tug txivneej uas tsis tau sib tham haum ua ntej puas yuav taug kev mus ua ke tau? Yog tsov ntxhuav tom tsis tau tsiaj, nws puas yuav nyooj hauv havzoov tuaj? Yog thav tsov ntxhuav tom tsis tau dabtsi, nws puas yuav nyooj hauv nws lub qhov tuaj? Yog tsis rau w, noog puas yuav mag ntxiab? Yog tsis muaj ib yam dabtsi mus nphav rooj ntxiab, ntxiab puas yuav txhais? Tej suab raj suab xyu uas tshuab txhib tubrog hauv nroog yuav tsis ua rau cov pejxeem ntshai los? Yog tus TSWV tsis pub kom muaj kev puastsuaj los raug lub nroog yuav ua li cas muaj tau? Tug TSWV uas kav ib puas tsav yam yuav ua ib yam dabtsi, nws yeej xub qhia rau nws cov tubtxib uas yog cov cevlus paub ua ntej nws mam ua. Thaum tsov ntxhuav nyooj puas muaj leejtwg tawv tsis ntshai? Thaum tus TSWV uas kav ib puas tsav yam hais lawm, puas yuav muaj leejtwg npog tsis kam qhia nws tej lus? Cia li qhia rau cov neeg uas nyob hauv tej loog hauv tebchaws Iziv thiab hauv lub nroog Asedaus hais tias, “Cia li mus sib sau rau pem cov pov roob uas nyob puagncig lub nroog Xamalis, sawvdaws yuav pom tej xwm phem thiab tej kev nruj tsiv uas cov neeg hauv lub nroog ntawd ua.” Tus TSWV hais tias, “Cov neeg no txeeb thiab coj luag tej khoom los tso puv nkaus rau hauv lawv tej vajtse. Lawv tsis paub yuav ua neeg ncaj ncees li. Yog li ntawd, yeebncuab yuav tuaj vij lawv lub tebchaws, muab lawv tej ntsa yeej rhuav kom puastsuaj thiab huab lawv tej cuabtam.” Tus TSWV hais tias, “Thaum tsov ntxhuav tom ib tug yaj noj, ntshai tus tswv yaj tsuas txeeb tau ob txhais kotaw lossis ib sab pobntseg xwb. Ib yam nkaus li ntawd cov neeg Xamalis uas pw da luj luam saum tej rooj uas pua ntaub tsuj ntaub npuag tsuas muaj qee leej thiaj khiav dim xwb.” Tus TSWV uas yog Vajtswv, tus uas muaj Fwjchim Loj kawg nkaus hais tias, “Nej cia li ua tib zoo mloog thiab hais rau Yakhauj cov xeebntxwv tias hnub uas kuv rau txim rau cov Yixalayees vim lawv tej kev txhaum; kuv yuav rhuav tej thaj uas nyob hauv lub nroog Npethees kom puastsuaj. Tej thaj txhua ceg kaum yuav tawg tas thiab poob rau hauv av. Kuv yuav rhuav tej tsev uas neeg tuaj so thaum lub caij ntuj no thiab lub caij ntuj sov. Tej tsev uas muab kaus ntxhw ua yuav pob tas ua tsheej pawg; txhua lub tsev loj los yuav raug rhuav kom puastsuaj tas.” Cov pojniam hauv lub nroog Xamalis, nej ua tib zoo mloog tej lus no; nej rog ib yam li cov nyuj uas luag pub zaub rau noj zoo heev pem tebchaws Npasas. Nej tsimtxom cov neeg txomnyem, quab yuam cov neeg pluag, thiab yuam kom nej cov txiv hliv cawv rau nej haus! Tus TSWV uas kav ib puas tsav yam yog tus dawbhuv, nws tau coglus tseg hais tias, “Thaum txog hnub ntawd luag yuav muab nqelauj los nqe nej cajdab cab mus; nej txhua tus yuav zoo ib yam li tus ntses uas mag nuv. Luag yuav cab nej tawm hauv tej qhov ntsa yeej tawg mus thiab muab nej pov rau sab nraud.” Tus TSWV uas kav ib puas tsav yam hais tias, “Cov Yixalayees, nej cia li mus ua kev txhaum tom qhov chaw dawbhuv uas nyob hauv Npethees. Yog nej pheej yuav ua kev txhaum xwb. Nej cia li mus rau hauv lub nroog Nkilenkas thiab ua kev txhaum kom kawg siab kawg ntsws! Cia li niaj tagkis cab tsiaj mus tua ua khoom fij thiab nqa nej tej ib feem kaum mus fij peb hnub ib zaug. Cia li mus muab nej tej ncuav tuaj fij ua Vajtswv tsaug thiab cia li khav tej uas nej muab tshaj coj tuaj ua khoom fij! Nej yeej yog cov neeg uas nyiam ua li ntawd. “Kuv yog tus tso tej kev tshaib kev nqhis los rau nej txhua lub nroog, tiamsis nej tseem tsis tig rov los cuag kuv. Kuv tsis tso nag los ywg nej tej qoobloo thaum nej tej liaj tej teb qhuav heev. Kuv tso nag los rau qee lub nroog, tiamsis dua li tej kuv tsis tso, thiab kuv tso nag los rau qee thaj teb, tiamsis dua li tej av yuav qhuav nkig nkuav. Tej neeg nqhis dej qaug zog zis, cov neeg uas nyob hauv ob peb lub nroog sau nthwv tuaj rau hauv lub nroog uas lawv cia siab hais tias lawv yuav nrhiav tau dej haus, tiamsis qhov ntawd kuj tsis muaj dej txaus haus thiab. Txawm li ntawd los nej tseem tsis tig rov los cuag kuv. “Kuv tso cua tuaj ntsawj nej tej qoobloo qhuav tas; kuv tso kooj los noj nej tej vaj txiv hmab, nej tej txiv ncuavpias thiab nej tej txiv ntoo roj tas huv tibsi. Txawm li ntawd los nej tseem tsis tig rov qab los cuag kuv. “Kuv tso sub tawg sub ntsha los rau nej ib yam li kuv tso los rau lub tebchaws Iziv. Kuv tua nej cov tub hluas tuag tas rau hauv tshavrog thiab cab nej tej nees mus tas; kuv ua kom nej tau hnia tej neeg uas tuag tej kua lwj hauv nej tej yeej. Txawm li ntawd los nej tseem tsis tig rov los cuag kuv.” Tus TSWV hais tias, “Kuv twb ua rau nej cov ibtxhia raug puastsuaj ib yam li kuv ua rau lub nroog Xaudoos thiab lub nroog Kaumaulas; nej cov uas seem zoo ib yam li daim taws uas thau hauv qhovcub los. Txawm li ntawd los nej tseem tsis tig rov los cuag kuv li. Yog li ntawd, cov Yixalayees, kuv yuav rau txim rau nej. Nej cia li npaj tos, rau qhov kuv yuav txiav txim rau nej!” Vajtswv yog tus uas tsim tej toj roob hauv pes thiab tej cua. Nws qhia nws tej kev xav rau neeg paub; nws hloov nruab hnub mus ua hmo ntuj. Nws mus kev saum lub ntiajteb qhov chaw siab. Nws lub npe hu ua tus TSWV uas yog Vajtswv tus muaj Hwjchim Loj kawg nkaus! Cov Yixalayees, nej cia li mloog zaj nkauj quaj ntsuag uas kuv hu rau nej no: Tus nkaujxwb Yixalayees twb ntog lawm, thiab yuav tsis sawv li! Nws yuav pw rau hauv av mus li thiab tsis muaj leejtwg yuav tsa nws sawv. Tus TSWV uas kav ib puas tsav yam hais tias, “Ib lub nroog hauv tebchaws Yixalayees xa ib txhiab leej tubrog tawm mus ntaus rog, tiamsis tsuas tshuav ib puas leej rov los xwb; muaj dua ib lub nroog xa ib puas leej tubrog tawm mus, tiamsis tsuas tshuav kaum leej rov los xwb.” Tus TSWV hais rau cov Yixalayees hais tias, “Nej cia li los cuag kuv, nej thiaj yuav muaj sia ua neej nyob. Tsis txhob mus pehawm kuv hauv Npesenpas. Tsis txhob mus nrhiav kuv hauv Npethees, nyob pem Npethees tsis muaj dabtsi li. Tsis txhob mus pem lub nroog Nkilenkas, nws cov neeg twb raug ntes coj mus rau lwm tebchaws lawm.” Nej cia li mus cuag tus TSWV, nej thiaj yuav muaj sia ua neej nyob. Yog nej tsis mus cuag nws, nws yuav sau zog cov Yixalayees mus ib yam li hluavtaws kub. Hluavtaws yuav kub cov neeg uas nyob hauv lub nroog Npethees, thiab yuav tsis muaj leejtwg tua tau tej hluavtaws ntawd li. Nej cov uas muab txojkev ncaj ncees hloov ua kev iab kev daw thiab muab txojkev tseeb tso tseg, nej raug kev puastsuaj lawm lauj! Tus TSWV tsim tej hnubqub Peleyas thiab Auliyoos. Nws muab hmo ntuj hloov ua nruab hnub thiab muab nruab hnub hloov ua hmo ntuj. Nws hu kom dej tawm hauv hiavtxwv tuaj thiab muab hliv rau lub ntiajteb. Nws lub npe hu ua tus TSWV. Nws tso kev puastsuaj los rau cov neeg uas muaj hwjchim thiab lawv tej ntsa yeej uas khov heev. Nej ntxub txhua tus uas coj ncaj thiab hais lus tseeb nyob hauv tsev tu plaub. Nej tsimtxom cov neeg txomnyem thiab nyiag lawv tej qoobloo. Yog li ntawd, nej yuav tsis tau nyob hauv tej tsev pobzeb zoo zoo uas nej ua thiab tsis tau haus tej kua txiv hmab uas nej cog. Kuv paub nej muaj txim loj thiab nej tau ua txhaum ntau heev. Nej tsimtxom cov neeg ua zoo, nej yuav luag tej nyiaj xiab, thiab nej txwv tsis pub luag txiav txim ncaj ncees rau cov neeg pluag. Yog li ntawd, nimno yog lub sijhawm uas muaj kev phem kev qias heev, cov neeg txawj ntse thiaj nyob twjywm tsis ua dabtsi li! Nej yuav tsum xyaum ua zoo tsis txhob ua phem, nej thiaj muaj sia ua neej nyob. Tus TSWV uas yog Vajtswv tus muaj Hwjchim Loj kawg nkaus thiaj yuav nrog nej nyob ib yam li nej tau khav hais tias nws nrog nraim nej nyob. Nej yuav tsum ntxub txojkev ua phem, nyiam txojkev ua zoo, thiab nej yuav tsum hais tej lus tseeb nyob hauv tsev tu plaub. Tej zaum tus TSWV yuav hlub cov neeg uas tseem nyob hauv lub tebchaws no. Yog li ntawd, tus TSWV uas muaj Hwjchim loj kawg nkaus, tus uas kav ib puas tsav yam hais tias, “Nyob rau hauv tej nroog yuav muaj neeg quaj ntsuag raws tej kev. Txawm yog tej tub qoob tub loo los luag yuav hu tuaj nyiav tej tuag nrog cov neeg uas luag ntiav tuaj nyiav tej tuag. Yuav muaj neeg quaj nyiav ntshoo nrooj hauv tej vaj txiv hmab. Tej no yuav tshwm tuaj, rau qhov kuv yuav los txiav txim rau nej.” Tus TSWV yog tus uas hais li ntawd. Nej cov uas xav pom tus TSWV hnub yuav raug kev puastsuaj lauj! Hnub ntawd yuav muaj dabtsi zoo rau nej? Vim hnub ntawd yog hnub uas yuav tsaus ntuj nti rau nej, tsis yog hnub uas ci rau nej pom kev. Hnub ntawd yuav zoo ib yam li tus neeg uas khiav tsov ntxhuav mus ntsib dais! Lossis zoo ib yam li tus neeg uas los txog tsev muab tes tiag rau tim phabntsa txawm raug nab tom. Tus TSWV hnub yuav coj kev tsaus ntuj los, tsis yog coj kev kaj los; yuav yog hnub uas tsaus ntuj nti, tsis muaj qhov kaj hlo li. Tus TSWV hais tias, “Kuv ntxub nej tej kev ua rooj noj rooj haus ntawd heev; kuv saib tsis taus tej ntawd li lawm. Thaum nej coj tej tsiaj tuaj tua hlawv ua khoom fij thiab coj tej qoobloo tuaj fij rau kuv, kuv yuav tsis txais yuav; thiab kuv yuav tsis txais tej tsiaj uas nej muab txav rog rog coj tuaj tua fij rau kuv ntawd. Cia li tseg, tsis txhob hu nkauj nrov nrov lawm; kuv tsis xav hnov nej tej suab nkauj nogncas nrov. Tiamsis cia txojkev ncaj ncees ntws ib yam li dej ntws, thiab cia txojkev tseeb ntws ib yam li tus dej ntws tsis paub nqhuab. “Cov Yixalayees, thaum kuv coj nej kev tau plaub caug xyoo nram tiaj suabpuam, kuv tsis tau hais kom nej muab tsiaj tuaj tua theej txhoj thiab ua khoom fij rau kuv li. Tiamsis nimno, vim nej tau pe tus mlom Xakus uas yog nej tus vajntxwv thiab pe lub hnubqub Kaivas uas yog nej tus vajtswv; nej yuav coj tej mlom ntawd nrog nej mus, thaum kuv muab nej ntiab mus nyob hauv lub tebchaws uas dhau ntawm lub nroog Damaxes mus lawm.” Tus TSWV uas muaj npe hu ua Vajtswv tus muaj Hwjchim Loj kawg nkaus hais li ntawd. Kev txomnyem yuav los raug nej cov uas nyob tso siab lug hauv lub nroog Xi-oos thiab nej cov uas nyob kaj siab lug hauv lub nroog Xamalis, nej cov uas yog neeg tseemceeb ntawm haivneeg Yixalayees, thiab nej yog cov uas tsoom pejxeem cia siab rau. Nej cia li mus saib lub nroog Kalenes, ces ho mus saib lub nroog Hamas uas loj heev, thiab nqis mus saib cov Filitees lub nroog Nkas. Puas yog cov nroog no zoo tshaj cov Yudas thiab cov Yixalayees ob lub tebchaws? Puas yog lawv tej ciam dej ciam av dav tshaj nej li? Nej yeej tsis xav pom hnub uas muaj kev puastsuaj, tiamsis tej uas nej ua tabtom coj hnub ntawd los ze nej lawm. Kev puastsuaj yuav los raug nej cov uas tau zoo pw saum tej rooj uas pua ntaub tsuj ntaub npuag thiab tua xyuas nyuj thiab thav yaj noj xwb! Nej nyiam sau tej nkauj tshiab hu ib yam li Daviv thiab hu nrog tej suab nkauj nogncas. Nej haus tej tais cawv puv phwj yaws thiab muab tej roj tsw qab uas kim kim los pleev ua tsw qab ntxiag, tiamsis nej tsis quavntsej thaum nej pom cov Yixalayees lub tebchaws raug kev puastsuaj. Yog li ntawd, nej yuav yog thawj pab uas raug luag ntes coj mus rau lwm tebchaws. Qhov uas nej muaj rooj noj rooj haus thiab ua kev lomzem yuav tsis muaj ntxiv lawm. Tus TSWV uas yog Vajtswv tus muaj Hwjchim Loj kawg nkaus tau coglus ruaj khov tseg hais tias, “Kuv ntxub cov Yixalayees tej kev khavtheeb; kuv ntxub lawv tej vajtse uas ci ntsa iab. Kuv yuav muab nej lub tuamceeb nroog thiab txhua tsav yam uas nyob hauv cob rau nej cov yeebncuab tes.” Txawm yog ib tsevneeg tshuav kaum leej txivneej xwb los lawv yeej yuav tuag tas huv tibsi. Tus tuag ntawd ib tug kwvtij uas saib kev pam tuag yuav tuaj coj tus tuag tawm hauv tsev mus. Nws yuav nug cov neeg uas nyob hauv lub tsev ntawd hais tias, “Puas muaj lwm tus nrog nej nyob thiab?” Ces lawv yuav teb hais tias, “Tsis muaj.” Ces tus kwvtij ntawd yuav hais tias, “Ua twjywm! Peb yuav tsum ceevfaj tsis txhob tuav tus TSWV lub npe li.” Thaum tus TSWV tso ncauj lawm, tej tsev tsis hais lub loj lub me yuav puastsuaj tas. Nees puas khiav tso sasntws tau saum tej roob tsuas? Puas muaj neeg cab nyuj mus laij tau hiavtxwv? Tiamsis nej muab txojkev ncaj ncees hloov mus ua tshuaj lom neeg thiab muab yam zoo hloov ua yam phem. Nej khav hais tias nej mus txeeb tau lub nroog Laudenpas. Nej khav hais tias, “Peb yeej muaj zog txaus uas mus txeeb tau lub nroog Kalenais los ua peb tug.” Tug TSWV uas yog Vajtswv tus muaj Hwjchim Loj kawg nkaus hais tias, “Cov Yixalayees, kuv tabtom txib cov tubrog txawv tebchaws tuaj tua nej lub tebchaws. Lawv yuav tsimtxom nej txij ntawm lub dawm Hamas sab qaumteb mus txog nram tus dej Alanpas uas nyob sab qabteb.” Tus TSWV uas kav ib puas tsav yam ua rau kuv pom ib zaj yogtoog. Thaum luag hlais tej zaub nyuj uas yog vajntxwv tug tas lawm, kuv pom tus TSWV tso ib co kooj coob heev los noj tej zaub nyuj uas tabtom pib hlav zom zaws tuaj. Nyob rau hauv zaj yogtoog ntawd, kuv pom kooj muab txhua yam nroj tsuag uas ntsuab mos nyoos hauv lub tebchaws noj tas dulug, ces kuv thiaj hais rau tus TSWV hais tias, “Tus TSWV uas kav ib puas tsav yam, thov koj zam txim rau koj haivneeg! Lawv yuav ua li cas ua neej nyob? Rau qhov lawv tseem yau thiab tsis muaj zog li!” Tus TSWV hloov siab thiab hais tias, “Kuv yuav tsis pub tej uas koj pom no tshwmsim.” Tus TSWV uas kav ib puas tsav yam rov ua rau kuv pom dua ib zaj yogtoog. Kuv pom tus TSWV npaj hluavtaws los rau txim rau nws haivneeg. Cov hluavtaws ntawd twb kub lub hiavtxwv puag hauv nruab tivtxwv thiab pib kub thooj av no lawm. Ces kuv hais tias, “Tus TSWV uas kav ib puas tsav yam, thov koj cia li tsum! Koj haivneeg yuav ua li cas ua neej nyob? Rau qhov lawv tseem yau thiab tsis muaj zog li!” Tus TSWV rov hloov dua siab thiab hais tias, “Tej no yuav tsis pub kom tshwmsim ib yam nkaus.” Tus TSWV rov ua rau kuv pom dua ib zaj yogtoog. Kuv pom tus TSWV sawv ntawm ib sab ntsa yeej uas luag siv txoj hlua ntsuas qhov uas luag ua tiav lawm; thiab nws tuav rawv txoj hlua ntawm nws txhais tes. Nws nug kuv hais tias, “Amaus, koj pom dabtsi?” Kuv teb hais tias, “Kuv pom ib txoj hlua.” Ces nws hais tias, “Kuv siv txoj hlua no qhia rau kuv haivneeg paub hais tias lawv zoo ib yam li tej ntsa yeej uas tsis siv txoj hlua ntsuas kom ncaj. Kuv yuav tsis hloov siab ib zaug ntxiv li lawm; kuv yeej yuav rau txim rau lawv. Qhov chaw uas Ixaj cov xeebntxwv pehawm kuv yuav raug puastsuaj. Cov Yixalayees qhov chaw dawbhuv los yuav muab tso tseg nphob xuav cia. Kuv yuav ua kom Vajntxwv Yelaunpau-as cov xeebntxwv raug hniav ntaj hniav riam tuag tu noob nrho mus.” Amaxiyas uas yog tus povthawj nyob hauv Npethees tau qhia mus rau Vajntxwv Yelaunpau-as uas kav tebchaws Yixalayees hais tias, “Amaus tabtom tuav tswvyim haub ntxias cov pejxeem kom ntxeev siab rau koj. Tej lus uas nws qhia ntawd yuav rhuav lub tebchaws no kom puastsuaj. Nws hais li no: ‘Yelaunpau-as yuav tuag rau hauv tshavrog, thiab cov Yixalayees yuav raug luag ntes coj tawm hauv lawv lub tebchaws mus rau lwm tebchaws.’ ” Ces Amaxiyas txawm hais rau Amaus hais tias, “Yawg cevlus, txaus lawm lauj! Koj cia li rov qab mus rau nram tebchaws Yudas thiab qhuab qhia nyob nrad. Cia lawv them nqi zog rau koj. Tsis txhob qhuab qhia hauv lub nroog Npethees no ib zaug ntxiv lawm. Rau qhov ntawm no yog vajntxwv qhov chaw pehawm uas yog lub tebchaws no lub tuamtsev.” Amaus teb hais tias, “Kuv tsis yog tus cev Vajtswv lus uas yuav nqi zog. Kuv yog ib tug neeg yug tsiaj, thiab kuv tu tej txiv ncuavpias xwb. Tiamsis tus TSWV tau coj kuv tawm ntawm kuv tes haujlwm yug yaj thiab hais kom kuv tuaj cevlus rau nws haivneeg Yixalayees xwb. Yog li ntawd, nimno koj cia li mloog tej lus uas tug TSWV hais. Koj hais kom kuv tseg tsis txhob cev Vajtswv lus thiab tseg tsis txhob qhuab qhia cem cov Yixalayees lawm. Yog li ntawd Amaxiyas, tus TSWV hais rau koj hais tias, ‘Koj tus pojniam yuav mus ua niamntiav nyob hauv nroog, thiab koj cov menyuam yuav raug tua tuag tas rau hauv tshavrog. Yuav muab koj lub tebchaws faib rau luag, thiab koj yuav mus tuag rau hauv lwm haivneeg uas tsis ntseeg Vajtswv lub tebchaws. Thiab haivneeg Yixalayees yuav raug luag coj tawm hauv lawv lub tebchaws mus nyob rau lwm tebchaws.’ ” Tus TSWV uas kav ib puas tsav yam rov ua rau kuv pom dua ib zaj yogtoog. Kuv pom ib tawb txiv ntoo. Tus TSWV nug kuv hais tias, “Amaus, koj pom dabtsi?” Kuv teb hais tias, “Kuv pom ib tawb txiv ntoo.” Tug TSWV hais rau kuv hais tias, “Lub sijhawm kawg twb los txog kuv haivneeg Yixalayees lawm. Kuv yuav tsis hloov siab ib zaug ntxiv li lawm, kuv yuav rau txim rau lawv xwb. Thaum txog hnub ntawd tej suab hu nkauj hauv vajntxwv lub loog yuav hloov ua suab quaj suab nyiav. Yuav muaj neeg tuag nyob txhua qhov. Luag yuav coj lawv mus povtseg ntsiag to.” Nej cov uas caij tsuj cov neeg txomnyem thiab tuavhauv ua kom cov neeg pluag uas nyob hauv lub tebchaws puastsuaj, nej cia li mloog. Nej xav twjywm hauvsiab hais tias, “Peb laj tos hnub dawbhuv dhau kawg li peb yuav rawm muag peb tej qoobloo. Thaum twg hnub Xanpataus mam li dhau, kom peb thiaj tau muag peb tej qoobloo? Ces peb muab muag kom kim kim, txob txwm luj kom tsis puv thiab kho peb tej teev los luj ntxo cov neeg uas tuaj yuav peb tej qoob. Peb muab peb tej nplej uas tsis puv muag ua nqi kim kim. Peb mus nrhiav yuav tus neeg pluag uas tshuav luag nqi los ua qhev; txawm yog ib nkawm khau khiab xwb los nws twb them tsis taus luag.” Tus TSWV uas yog cov Yixalayees tus Vajtswv tau coglus hais tias, “Kuv yuav cim ntsoov tej kev phem uas lawv ua ntawd cia. Yog li ntawd, av yuav qeeg, thiab lub tebchaws yuav co ua zog koog; lub tebchaws yuav huam thiab nphau nphwv ib yam li tus Dej Niles. Ces txhua tus neeg uas nyob hauv lub tebchaws yuav quaj ntsuag. Thaum txog lub sijhawm ntawd kuv yuav ua kom lub hnub poob thaum tavsu, thiab thaum nruab hnub lub ntiajteb yuav tsaus nti. Kuv yog tus TSWV uas kav ib puas tsav yam hais li ntawd. Kuv yuav muab nej tej rooj noj rooj haus hloov mus ua ntees ploj ntees tuag thiab muab tej nkauj uas nej hu ua kev zoo siab hloov mus ua suab quaj suab nyiav. Kuv yuav ua kom nej muab nej tej plaubhau chais thiab muab ntaubtsaj los hnav, thiab nej yuav zoo ib yam li tej niamtxiv uas quaj nyiav nkawd ib tug tub uas tuag lawm. Hnub ntawd yuav yog hnub kawg uas lwj siab tshaj plaws. “Thaum txog lub sijhawm ntawd kuv yuav tso kev tshaib nqhis los rau lub tebchaws. Tej neeg yuav tshaib nqhis heev, tiamsis tsis yog tshaib mov; lawv yuav nqhis heev tiamsis tsis yog nqhis dej. Lawv yuav tshaib thiab nqhis tus TSWV tej lus. Kuv yog tus TSWV uas kav ib puas tsav yam hais li ntawd. Tej neeg yuav taug kev ntawm Hiavtxwv Tuag mus txog rau tom Hiavtxwv Meditelanes thiab ncig sab qaumteb mus txog rau sab hnubtuaj. Lawv yuav nrhiav tus TSWV txojlus rau txhua qhov chaw, tiamsis lawv yuav nrhiav tsis tau li. Hnub ntawd tej tub hluas thiab ntxhais hluas uas muaj zog khov kho los yuav qaug zog heev vim txojkev tshaib nqhis. Cov neeg uas twv ntxhias tej mlom hauv lub nroog Xamalis hais tias, ‘Muaj cov Das tus vajtswv’ lossis ‘Muaj cov Npesenpas tus vajtswv’, cov neeg ntawd yuav ntog tas thiab tsis sawv rov los ib zaug li lawm.” Kuv pom tus TSWV sawv ntawm lub thaj ib sab. Nws samhwm hais tias, “Cia li siv zog tsoo lub Tuamtsev tej hau ncej kom tej taw ntsa ua zog koog. Tsoo kom tej ntawd tawg tas thiab cia tej ntawd poob mus tsoo tej neeg taubhau. Kuv yuav tua cov neeg uas seem txhua tus kom tuag tas rau hauv tshavrog. Yuav tsis pub leejtwg khiav dhau; tsis pub ib tug twg khiav tau dim li. Txawm yog lawv yuav khawb lawv txojkev mus txog rau hauv tubtuag teb los kuv yuav ntes lawv rov los. Txawm yog lawv yuav nce mus txog saum ntuj los kuv yuav coj lawv nqis rov los. Yog lawv khiav mus nkaum puag saum ncov roob Kalemees los kuv yuav nrhiav kom tau thiab ntes lawv los. Yog lawv khiav mus nkaum puag hauv qab thu hiavtxwv los kuv yuav hais kom tus tsiaj NYAUM hauv hiavtxwv mus tom lawv. Yog lawv raug lawv cov yeebncuab ntes coj mus lawm los kuv yuav hais kom lawv cov yeebncuab muab lawv tua huv tibsi. Kuv twb txiav txim siab lawm hais tias kuv yuav ua kom lawv raug kev puastsuaj tas thiab yuav tsis pab lawv ib zaug ntxiv li lawm.” Tus TSWV uas kav ib puas tsav yam uas muaj hwjchim loj kawg nkaus, nws kov lub ntiajteb, lub ntiajteb qeeg ua zog koog; txhua tus uas nyob hauv lub ntiajteb yuav quaj ntsuag. Lub ntiajteb yuav nphau pes nphwv saus pes zog ib yam li tus Dej Niles. Tus TSWV tsim nws lub tsev rau saum ntuj ceebtsheej. Nws tsim nruab ntug zoo li lub kaus roos lub ntiajteb. Nws hu kom dej tawm hauv hiavtxwv tuaj thiab muab hliv rau lub ntiajteb. Nws lub npe hu ua tus TSWV! Tus TSWV hais tias, “Cov Yixalayees, kuv xav txog cov neeg Sudas ib yam li kuv xav txog nej. Kuv coj cov neeg Filitees hauv koog povtxwv Keletes thiab cov Xilias hauv tebchaws Kiles los ib yam li kuv coj nej nram tebchaws Iziv los thiab ntag. Kuv uas yog tus TSWV uas kav ib puas tsav yam, kuv saib ntsoov lub tebchaws Yixalayees uas puv nkaus txojkev txhaum, thiab kuv yuav ua kom nws raug kev puastsuaj tas hauv lub ntiajteb no mus. Tiamsis kuv yuav tsis ua kom Yakhauj cov xeebntxwv raug puastsuaj. “Kuv yuav tso ncauj thiab tshau cov Yixalayees ib yam li luag muab vabtshaus tshau nplej. Kuv yuav muab lawv xyaw txhua haivneeg thiaj tshem tau cov neeg uas tsis muaj nqis povtseg. Cov neeg txhaum uas nyob xyaw kuv haivneeg yuav raug tua tuag tas rau hauv tshavrog, lawv yog cov uas hais tias, ‘Vajtswv yuav tsis cia kev phem los raug peb ib zaug li.’ ” Tus TSWV hais tias, “Thaum txog hnub ntawd kuv yuav rov txhim kho Daviv lub tebchaws uas zoo ib yam li lub tsev uas twb puas tas lawm. Kuv yuav txhim kho tej ntsa yeej dua tshiab. Kuv yuav rov kho thiab ua kom zoo ib yam li lub qub thaum ub. Cov Yixalayees yuav ntaus yeej cov neeg uas seem nyob hauv lub tebchaws Edoos thiab txhua haivneeg uas thaum ub yog kuv haivneeg ib zaug los lawm,” tus TSWV uas ua kom muaj tej no tshwmsim yog tus hais tej lus no. Tus TSWV hais tias, “Hnub ntawd twb los yuav txog; thaum ntawd tej qoobloo yuav siav sai heev thiab sau tsis yeej, thiab tej txiv hmab los yuav siav sai heev, tsuam kua txiv hmab los twb tsuam tsis yeej. Cawv qab zib yuav nrog saum tej hauv roob los, thiab tej cawv ntawd yuav ntws laub lug saum tej pov roob. Kuv yuav coj kuv haivneeg rov los nyob rau hauv lawv lub tebchaws. Lawv yuav rov txhim kho lawv tej nroog uas puas tas lawm rau lawv nyob; lawv yuav xov vaj cog txiv hmab thiaj tau cawv txiv hmab haus; lawv yuav xov vaj cog txiv ntoo thiaj tau txiv ntoo noj. Kuv yuav cia lawv nyob hauv lub tebchaws uas kuv muab pub rau lawv ua lawv tug lawm, thiab kuv yuav tsis muab lawv ntiab tawm ib zaug ntxiv li lawm.” Tug TSWV uas yog nej tus Vajtswv hais li ntawd. Ntawm no yog Aunpadiyas zaj lus qhia tshwm uas tus TSWV uas kav ib puas tsav yam hais txog cov Edoos. Tus TSWV tau txib nws tus cevlus mus rau ntau lub tebchaws, thiab peb tau hnov nws tej lus hais tias, “Npaj kom txhij! Cia peb mus ua rog rau cov Edoos!” Tus TSWV hais rau cov Edoos tias, “Kuv yuav ua kom nej qaug zog; txhua tus neeg yuav txob thuam nej. Nej lub siab uas khavtheeb tau ntxias dag nej. Nej cov uas nyob hauv tej qhov tsua saum tej pobtsuas, hauv nej tej tsev uas siab heev nyob saum tej roob, nej yuav xav hais tias, ‘Leejtwg thiaj muaj cuabkav chua tau kuv los?’ Txawm yog nej ua nej tej tsev nyob siab ib yam li zes dav, thiab txawm yog nej tej tsev nyob siab nrog tej hnubqub sib txig los kuv yuav chua kom nej poob los rau hauv av. “Thaum tsaus ntuj tubsab tuaj, lawv tsuas nyiag tej uas lawv xav yuav xwb. Thaum tej neeg de txiv hmab, lawv yeej tseg ibtxhia cia. Tiamsis nej cov yeebncuab tuaj huab nej tas dulug tsis tseg ib yam dabtsi li. Exaus cov xeebntxwv, nej yuav raug tubsab nyiag, thiab nej tej nyiaj yuav raug luag huab coj mus tas dulug. Cov neeg uas koom tes nrog nej tau dag ntxias nej, lawv tau muab nej ntiab tawm hauv nej lub tebchaws mus. Cov neeg uas ua phoojywg rau nej nimno lawv kovyeej nej lawm. Cov phoojywg uas nrog nej noj ib tsum mov lawv cuab hmuv tos nej kev; lawv yuav hais rau nej tias, ‘Nws tej kev txawj ntse nyob qhov twg lawm?’ “Hnub uas kuv rau txim rau cov Edoos, kuv yuav muab lawv cov neeg uas txawj ntse ua kom puastsuaj tas thiab muab lawv tej tswvyim rhuav tshem mus povtseg. Lub nroog Temas cov tubrog yuav ntshai kawg nkaus li, thiab txhua tus tubrog uas nyob hauv lub nroog Edoos yuav raug tua tuag tas. “Vim nej tau mus nyiag thiab tua nej cov kwvtij uas yog Yakhauj cov xeebntxwv, nej yuav raug kev puastsuaj thiab yuav raug txajmuag mus ibtxhis. Hnub uas yeebncuab tsoo lawv tej roojvag, thaum ntawd nej mus sawv ib cag saib. Nej lub siab yeej phem ib yam li cov neeg txawv tebchaws uas tuaj nqa tej khoom muaj nqis hauv lub nroog Yeluxalees mus sib faib. Nej tsis txhob saib tsis taus nej cov kwvtij uas txomnyem hauv lub tebchaws Yudas. Nej tsis txhob zoo siab hnub uas lawv raug kev puastsuaj. Nej tsis txhob luag lawv plig thaum lawv raug kev nyuaj siab. Nej tsis txhob tuaj rau hauv kuv haivneeg lub nroog, tsis txhob ua saib tsis taus lawv tej kev txomnyem, thiab tsis txhob huab lawv tej nyiaj txiag hnub uas lawv raug kev puastsuaj. Nej tsis txhob mus sawv ntawm tej kev tshuam ntes cov neeg uas nrhiav kev khiav. Nej tsis txhob muab lawv cob rau yeebncuab tes hnub uas lawv raug kev txomnyem. “Hnub uas tus TSWV yuav txiav txim rau txhua haivneeg twb los ze lawm. Edoos, koj tau ua li cas rau luag lawm, luag yuav ua li ntawd rov rau koj. Tej uas koj tau ua lawm yuav rov los raug koj. Kuv haivneeg tau haus lub khob dej iab uas yog txojkev txiav txim saum kuv lub roob dawbhuv. Tiamsis txhua haivneeg uas nyob ibncig ntawd tseem yuav tau haus khob dej iab tshaj uas yog txojkev txiav txim; lawv yuav haus khee hlo thiab ploj ntais mus lawm. “Tiamsis muaj qee leej yuav khiav dim saum lub Roob Xi-oos, thiab lub roob ntawd yuav ua qhov chaw dawbhuv. Yakhauj tsevneeg yuav tau lub tebchaws los ua lawv tug. Yakhauj thiab Yauxej nkawd cov xeebntxwv yuav zoo ib yam li hluavtaws; lawv yuav rhuav tshem Exaus cov xeebntxwv ib yam li hluavtaws kub tej quavnyab. Exaus cajces yuav tsis muaj ib tug khiav dim li. Kuv yog tus TSWV uas hais li ntawd.” “Cov Yudas uas nyob yav qabteb yuav tuaj txeeb tau lub tebchaws Edoos. Cov neeg uas nyob raws tej taw roob sab hnubpoob yuav tuaj txeeb tau lub tebchaws Filitees. Cov Yixalayees yuav mus txeeb tau cov Efalayees thiab cov Xamalis cheebtsam av, cov Npeenyamees yuav mus txeeb tau cheebtsam Nkile-as. Cov tubrog Yixalayees pem qaumteb uas raug luag ntes mus lawm, yuav rov qab los thiab mus ntaus yeej lub xeev Faunikias mus rau sab qaumteb mus txog rau Xalefas. Cov neeg uas luag ntes hauv Yeluxalees coj mus nyob rau hauv Xaledis yuav los txeeb tej nroog hauv tebchaws Yudas sab qabteb. Cov neeg muaj yeej uas nyob hauv lub nroog Yeluxalees, yuav mus ntaus lub tebchaws Edoos thiab kav lub tebchaws ntawd. Thiab tus TSWV yuav ua Vajntxwv kav lawv.” Muaj ib hnub Vajtswv hais rau Yaunas uas yog Amitais tus tub. Vajtswv hais tias, “Koj cia li mus rau pem lub nroog Nineves uas loj heev thiab qhia rau lub nroog ntawd, vim lawv tej kev ua phem ua qias twb nrov tuaj txog kuv lawm.” Tiamsis Yaunas xav khiav ntawm Vajtswv mus, nws thiaj mus rau lwm qhov lawm. Nws mus rau hauv lub nroog Yaupas; thaum nws mus txog nrad, nws pom ib lub nkoj uas tabtom yuav sawv kev mus rau tim tebchaws Xapees. Nws txawm them nqi nkoj thiab nrog cov neeg ntawd mus rau tim tebchaws Xapees, kom nws nyob deb ntawm tus TSWV. Tiamsis tus TSWV tso cua daj cua dub hlob heev los ntsawj hiavtxwv ua rau lub nkoj yuav tog. Cov neeg uas nyob hauv lub nkoj ntshai heev thiab quaj qw, nyias thov nyias tus vajtswv pab. Lawv thau tej khoom hnyav hauv lub nkoj povtseg pov rau hauv hiavtxwv kom lub nkoj sib. Thaum ntawd Yaunas mus pw tsaug zog rau theem hauv qab lawm. Tus thawj tsav nkoj nqis mus pom Yaunas thiab hais rau nws tias, “Koj tseem pw tsaug zog ua dabtsi? Cia li sawv thiab thov koj tus Vajtswv pab. Tej zaum nws yuav hlub peb thiab cawm peb txojsia.” Cov neeg hauv lub nkoj sib tham zom zaws hais tias, “Cia peb sau sawvdaws npe thiab rho ntawv saib leejtwg yog tus ua txhaum thiaj ua rau peb raug kev txhawj ntshai li no.” Lawv txawm pom zoo ua li ntawd, ces lawv rho tau Yaunas lub npe. Yog li ntawd, lawv thiaj hais rau Yaunas hais tias, “Koj cia li qhia rau peb tamsim no saib! Leejtwg yog tus ua txhaum thiaj li muaj tej xwm no? Koj tuaj ua dabtsi ntawm no? Koj tuaj lub tebchaws twg tuaj? Thiab koj yog haivneeg dabtsi?” Yaunas teb hais tias, “Kuv yog neeg Henplais, kuv pehawm tus TSWV uas yog Vajtswv tus nyob saum ntuj; nws yog tus tsim lub ntiajteb thiab dej hiavtxwv.” Yaunas qhia rau lawv hais tias nws tabtom khiav tus TSWV. Cov neeg hauv nkoj ntshai heev thiab lawv hais rau Yaunas tias, “Qhov uas koj ua no yog ib qho tsis zoo thiab tsis tsimnyog ua hlo li!” Cua daj cua duab ntsawj hlob heev zuj zus; yog li ntawd, cov neeg hauv nkoj thiaj li nug Yaunas hais tias, “Peb yuav ua li cas rau koj cua thiaj tu?” Yaunas teb hais tias, “Nej muab kuv pov rau hauv hiavtxwv, cua thiaj yuav tu. Kuv paub hais tias kuv yog tus uas ua txhaum lawm, thiaj muaj cua daj cua dub los ntsawj nej li no.” Txawm yog li ntawd los cov neeg hauv lub nkoj tsis ua raws li Yaunas hais, lawv pheej tas zog nquam kom lub nkoj mus lawm tim ntug xwb. Tiamsis cua daj cua dub pheej ntsawj hlob heev zuj zus tuaj ua rau lawv nquam lub nkoj mus tsis tau rau qhov twg li. Yog li ntawd, lawv thiaj tsa suab thov tus TSWV hais tias, “Tus TSWV, thov koj tsis txhob rau txim tuag rau peb, vim qhov uas peb txov tus txivneej no txojsia. Tus TSWV, thov koj lees paub tej no; twb yog koj ua thiaj muaj tej no ntag.” Ces lawv txawm muab Yaunas pov rau hauv hiavtxwv, thiab tamsim ntawd hiavtxwv cia li tus thiab tsis ntas lawm. Thaum cov neeg hauv lub nkoj pom li ntawd, lawv ntshai tus TSWV heev; lawv muab khoom hlawv fij rau tus TSWV thiab coglus yuav pehawm nws. Tiamsis tus TSWV kom ib tug ntses loj heev tuaj nqos Yaunas, Yaunas nyob hauv ntses plab tau peb hnub peb hmos. Yaunas thov tus TSWV uas yog nws tus Vajtswv hauv ntse plab tuaj hais tias: “Tus TSWV, vim kuv txojkev txomnyem, kuv thov koj, thiab koj twb teb kuv tej lus thov lawm. Kuv nyob hauv tubtuag teb quaj thov koj pab kuv, koj hnov kuv tej lus thiab teb kuv tej lus thov. Koj muab kuv pov rau hauv qab thu hiavtxwv qhov uas tob tshaj plaws, nyob hauv no dej nyab puagncig kuv, koj lub hwjchim ua dej nphau pes nphwv los npog kuv. Kuv thiaj xav hais tias koj muab kuv xyeeb tawm ntawm koj lub xubntiag mus, thiab kuv yuav tsis tau pom koj lub Tuamtsev uas dawbhuv ib zaug li lawm. Dej nphau nphwv los npog kuv thiab ua rau kuv ua tsis taus pa li lawm; hiavtxwv nyab puagncig kuv thiab tej ntxhuab hauv hiavtxwv rig thoob plaws kuv lub taubhau. Kuv poob mus ti nkaus rau hauv tej qab taw roob, hauv lub tebchaws uas tej roojvag kaw ntom nti mus ibtxhis li. Tiamsis tus TSWV uas yog kuv tus Vajtswv, koj rub kuv tawm hauv tivtxwv dej los muaj txojsia nyob. Tus TSWV, thaum uas kuv txojsia yuav tu, kuv thov koj pab kuv; koj nyob hauv koj lub Tuamtsev uas dawbhuv hnov kuv tej lus thov. Cov neeg pe tej mlom uas tsis muaj nqis dabtsi yeej tsis muab lub siab npuab koj. Tiamsis kuv yuav hu nkauj qhuas koj yuav tua tsiaj fij rau koj, thiab kuv yuav ua raws li uas kuv tau coglus tseg rau koj lawm. Txojkev cawm dim yog los ntawm tus TSWV los xwb!” Ces tus TSWV thiaj hais kom tus ntses tawm tuaj ntuav Yaunas rau tim ntug dej, thiab tus ntse txawm uas li ntawd. Tus TSWV rov hais rau Yaunas hais tias, “Koj cia li mus rau pem lub nroog Nineves uas yog lub nroog loj, thiab mus qhia rau lawv raws li tej lus uas kuv twb qhia rau koj lawm.” Yog li ntawd, Yaunas thiaj mloog tus TSWV lus thiab mus rau pem lub nroog Nineves uas yog lub nroog uas loj heev, mus kotaw peb hnub thiaj li dhau. Yaunas sawv kev mus rau pem lub nroog; thaum uas nws mus tau ib hnub lawm, nws tshaj tawm hais tias, “Tshuav plaub caug hnub saum no, lub nroog Nineves yuav raug puastsuaj!” Cov neeg uas nyob hauv lub nroog Nineves txawm ntseeg Vajtswv tej lus. Yog li ntawd, lawv thiaj txiav txim siab kom txhua tus ua kevcai yoo mov. Tsis hais tej nomtswv, tej tubqhe, thiab tus hlob tus yau muab ntaubtsaj los npua qhia hais tias lawv twb tso txojkev txhaum tseg lawm. Thaum tus vajntxwv uas kav lub nroog Nineves hnov dheev txog tej lus ntawd, nws txawm nqis saum nws lub zwmtxwv los, hle nws lub tsho ntev tseg, muab ntaubtsaj los npua, thiab mus zaum hauv qhov tshauv. Nws tshaj tawm rau tsoom pejxeem hauv lub nroog Nineves hais tias, “Ntawm no yog vajntxwv thiab nws cov nomtswv tej lus samhwm rau sawvdaws: Tsis pub leejtwg noj ib yam dabtsi; tsis hais txhua tus neeg, txhua tus nyuj thiab txhua tus yaj huv tibsi. Txhua tus neeg thiab txhua tus tsiaj yuav tsum npua ntaubtsaj. Txhua tus yuav tsum thov Vajtswv kom kawg siab kawg ntsws thiab tso tej kev phem kev qias huv tibsi tseg. Tej zaum Vajtswv yuav hloov siab; tej zaum nws yuav tsis chim rau peb thiab peb yuav tsis tuag!” Vajtswv pom tej uas lawv tau ua ntawd; nws pom lawv tso lawv tej kev txhaum tseg lawm tiag. Yog li ntawd, Vajtswv thiaj hloov siab thiab tsis rau txim rau lawv raws li uas nws tau hais tseg. Yaunas tsis txaus siab rau tej no thiab nws chim kawg li. Yog li ntawd, Yaunas thiaj thov Vajtswv hais tias, “Tus TSWV, thaum kuv yuav sawv kev hauv tsev tuaj, kuv puas tau hais rau koj ua ntej tias koj yeej yuav ua li no? Twb yog vim li no kuv thiaj nrhiav kev khiav mus rau tim tebchaws Xapees. Kuv paub koj yog tus Vajtswv uas muaj kev hlub, siab ntev, siab dawb siab zoo, npaj rawv tos hloov siab thiab tsis rau txim. Tus TSWV, tamsim no thov koj cia li rho kuv txojsia mus, rau qhov yog kuv tuag yuav zoo dua li kuv ua neej nyob.” Tus TSWV teb hais tias, “Puas tsimnyog koj chim npaum li ko?” Yaunas tawm hauv lub nroog mus rau sab hnubtuaj thiab nws mus so rau tid. Nws ua tau ib lub tsev pheebsuab rau nws nraim ntxoo tos saib puas muaj xwm dabtsi tshwmsim rau lub nroog Nineves. Tus TSWV uas yog Vajtswv ua ib tsob ntoo tuaj ua duab ntxoov ntxoo rau Yaunas nraim tshav, thiab ua rau Yaunas zoo siab kawg li. Yaunas txaus siab heev rau tsob ntoo ntawd. Tiamsis hnub tom qab thaum kaj ntug txoog, Vajtswv kom ib tug kab los noj tsob ntoo ntawd; tsob ntoo cia li ntsws thiab tuag lawm. Thaum lub hnub tawm tuaj, Vajtswv tso ib cov cua kub heev ntsawj sab hnubtuaj tuaj, thiab tshav ntuj ziab Yaunas taubhau ua rau nws tsaus muag. Yog li ntawd, Yaunas thiaj xav hais tias kheev lam yog nws twb tuag lawm. Nws thiaj hais tias, “Cia kuv tuag mus yuav zoo dua li kuv ua neej nyob.” Tiamsis Vajtswv hais rau Yaunas hais tias, “Puas tsimnyog koj chim rau tsob ntoo no?” Yaunas teb hais tias, “Yeej tsimnyog kuv chim kawg li; kuv chim tshuav tuag lawm xwb!” Tus TSWV hais rau Yaunas hais tias, “Ib hmos xwb tsob ntoo no hlob tuaj, thiab ib hmos xwb tsob ntoo no tuag lawm; koj twb tsis tau siv dag siv zog cog tsob ntoo no thiab koj twb tsis tau ua kom nws loj hlob tuaj, ua ciav koj twb khuvxim tsob ntoo no tas npaum. Yog li ntawd, kuv yimhuab khuvxim lub nroog Nineves uas yog lub nroog loj ntawd. Dua li ntawd, tseem muaj tej menyuam yaus uas tsis paub qabhau dabtsi coob tshaj ib puas nees nkaum txhiab leej nyob hauv lub nroog ntawd; thiab tseem muaj tej tsiaj txhu coob ua npoj ntws nyob hauv.” Ntu uas Yauthas, Ahas, thiab Hexekiyas ua vajntxwv kav tebchaws Yudas, tus TSWV tau hais tej lus no rau Mikhas uas yog tus cev Vajtswv lus nyob rau hauv lub nroog Mauleses. Tus TSWV qhia txhua yam no rau Mikhas txog lub nroog Xamalis thiab lub nroog Yeluxalees. Txhua haivneeg, nej cia li mloog tej lus no; txhua tus neeg uas nyob hauv ntiajteb, nej cia li mloog tej lus no! Tus TSWV uas kav ib puas tsav yam yuav ua timkhawv tawmtsam nej. Cia li mloog! Nws hais tej lus no hauv nws lub tuamtsev saum ntuj tuaj. Tus TSWV tabtom nqis saum nws lub chaw uas dawbhuv los; nws yuav nqis thiab taug kev saum tej ncov roob los. Ces tej hauv roob yuav yaj hauv nws qab xibtaws ib yam li muab ciab ntab sub saum hluavtaws; tej hauv roob yuav ntws laub lug los rau hauv tej hav ib yam li dej ntws saum tej ncov roob los. Txhua yam no yuav muaj tshwmsim los vim cov neeg Yixalayees tau ua txhaum loj heev thiab tau ntxeev siab rau Vajtswv. Leejtwg yog tus uas ua rau cov Yixalayees ntxeev siab? Twb yog cov neeg hauv lub nroog Xamalis ntag! Leejtwg tau pe mlom hauv tebchaws Yudas? Twb yog cov neeg hauv lub nroog Yeluxalees ntag! Yog li ntawd, tus TSWV thiaj hais tias, “Kuv yuav ua kom lub nroog Xamalis puastsuaj tas ua ib pawg rau hauv tiaj nrag thiab ua chaw rau luag cog txiv hmab. Kuv yuav muab lub nroog ntawd tej thwvcib nchuav rau hauv kwjha, tsuas tseg tej daim txiag zeb uas pua lub nroog lawm xwb. Lub nroog ntawd tej mlom yuav raug luag muab tsoo tawg ntsoog ntxaws; txhua yam uas neeg nqa tuaj fij rau hauv tsev niamntiav yuav kub hnyiab, thiab lub nroog ntawd tej mlom yuav raug rhuav kom puastsuaj tas. Lub nroog Xamalis muab tej ntawd los teev los pe, tiamsis nimno nws cov yeebncuab yuav tuaj nqa tej ntawd coj mus teev rau hauv lwm lub tsev niamntiav.” Mikhas hais tias, “Vim tej xwm no kuv thiaj ntxhov siab thiab quaj ntsuag. Kuv yuav mus taw do thiab liabqab mus qhia rau sawvdaws paub kuv tej kev nyuaj siab. Kuv yuav tsa suab hlo quaj ib yam li hma nqov ntuj thiab quaj seev yees ib yam li noog ntxhuav quaj. Vim tsis muaj neeg kho tau Xamalis tej qhov txhab, thiab Yudas yuav raug kev txomnyem ib yam nkaus li ntawd; kev puastsuaj twb tuaj ti ntawm lub nroog Yeluxalees tej roojvag uas kuv haivneeg nyob lawm.” Tsis txhob qhia rau peb cov yeebncuab uas nyob hauv lub nroog Nkathas paub hais tias peb swb lawm; tsis txhob cia lawv pom nej quaj ntsuag. Cov neeg Npes Le-afalas, nej cia li quaj da hauv av qhia hais tias nej tas kev cia siab lawm. Cov neeg uas nyob hauv lub nroog Safis raug luag ntes coj liabqab ploog mus thiab txajmuag ntsuav. Cov neeg uas nyob hauv Xanas yuav tsis muaj cuabkav tawm hauv lawv lub nroog mus rau sab nraud. Thaum nej hnov cov neeg hauv Npethexees nyiav, nej yuav paub hais tias tsis muaj chaw cawm siav nyob qhov twg lawm. Cov neeg uas nyob hauv Malaus ua neej nyob lwj siab ntsuav tos nrhw txojkev cawm dim, rau qhov tus TSWV twb tso txojkev puastsuaj tuaj ti lub nroog Yeluxalees lawm. Nej cov uas nyob hauv lub nroog Lakhis, cia li muab nees los cab tej tsheb nees ua rog. Nej nyiam ua txhaum ib yam li cov neeg Yixalayees ua thiaj ua rau cov neeg uas nyob hauv lub nroog Yeluxalees ua txhaum tas. Cov Yudas, tamsim no nej cia li khiav tawm hauv lub nroog Muleses Nkas mus. Cov neeg hauv lub nroog Akhaxis yuav tsis tuaj pab cov Yixalayees tej vajntxwv lawm. Cov Malesas, tus TSWV yuav muab nej cob rau cov yeebncuab uas tuaj txeeb nej lub nroog. Cov Yixalayees tej thawjcoj yuav khiav mus nkaum rau hauv lub qhov tsua ntawm Adulas. Cov Yudas, nej cia li txiav nej tej plaubhau thiab quaj nyiav nej tej menyuam uas nej hlub. Chais nej tej plaubhau kom do dus ib yam li taubhau dav npoj, rau qhov nej tej menyuam yuav raug luag ntes coj mus nyob rau lwm qhov. Cov neeg uas pw saum txaj tuav tswvyim mus ua phem yuav raug kev txomnyem. Thaum kaj ntug txoog lawv tawm mus ua phem raws li lawv twb xav tseg lawm. Thaum lawv xav tau luag tej teb, lawv mus txeeb kiag los ua lawv tug; thaum lawv xav tau luag tej tsev, lawv mus txeeb kiag los rau lawv yuav. Tsis muaj ib tug neeg twg uas nws tsevneeg lossis nws tej cuabtam yuav nyob tso siab lug tsis ploj li. Yog li ntawd, tus TSWV thiaj hais tias, “Kuv yuav tso kev puastsuaj los raug nej, thiab nej yuav khiav tsis dim li. Thaum nej raug kev ntxhov siab li ntawd, nej yuav tsis tau mus kev muaj plhus ntxiag lawm. Thaum txog hnub ntawd neeg yuav muab nej txojkev puastsuaj los piav ua yam ntxwv qhia rau sawvdaws, thiab lawv yuav hu nkauj qhia nej txojkev tu siab rau sawvdaws mloog li no: Peb raug kev puastsuaj tas lawm lauj! Tus TSWV twb muab peb lub tebchaws tshem mus lawm, thiab muab cob rau cov neeg uas tuaj ntes peb ntawd txhais tes.” Yog li ntawd, thaum txog hnub uas tus TSWV rov tu lub tebchaws rau nws haivneeg nyob, nej yuav tsis muaj ib tug nrog luag muaj feem muaj tug li. Cov neeg yws kuv hais tias, “Koj tsis txhob tuaj qhia peb, tsis txhob qhia tej ntawd lawm. Vajtswv yeej tsis pub kom peb poob ntsejmuag ib zaug li. Koj xav hais tias cov Yixalayees raug foom tsis zoo lawm no los? Tus TSWV ua tsis taus siab ntev lawm los? Nws yog tus uas yuav ua tej ntawd ntag los? Nws tsis hais lus mos lus muag rau cov neeg uas ua ncaj li ntag los?” Tus TSWV teb hais tias, “Nej tuaj tawmtsam kuv haivneeg ib yam li yog yeebncuab. Cov neeg uas rov hauv tshavrog los xav hais tias lawv yuav tau zoo nyob kaj sab lug hauv lawv tej tsev, tiamsis nej mus tos kev huab lawv tej tsho loj nqa mus lawm. Nej muab tej pojniam uas yog kuv haivneeg ntiab tawm hauv lawv tej tsev uas yog lawv lub chaw tshua, thiab nej tsis pub lawv tej menyuam los yuav kuv txoj koob hmoov mus ibtxhis. Nej cia li sawv tawm mus; ntawm no tsis muaj chaw rau nej nkaum lawm. Twb yog vim nej tej kev txhaum, lub tebchaws thiaj raug kev puastsuaj. “Cov neeg no nyiam tus cevlus uas mus ncig dag rau ub rau no hais tias, ‘Kuv yog tus qhia rau nej hais tias cawv txiv hmab thiab cawv ntxwg yuav nchuav laub lug los rau nej.’ “Tiamsis kuv yuav sau tagnrho nej cov Yixalayees uas seem los nyob ua ke. Kuv yuav coj nej los ua ke ib yam li pab yaj uas los sib sau rau hauv nkuaj. Yuav muaj neeg los nyob puv nkaus hauv nej lub tebchaws dua ib zaug ntxiv ib yam li pab yaj uas nyob puv nkaus hauv lub tshav zaub.” Tus TSWV yuav qhib kev rau lawv thiab coj lawv hauv lub tebchaws uas lawv raug ntes mus nyob rov qab los. Lawv yuav tsoo tej roojvag nroog tawg txua thiab tawm mus nyob ywj siab. Tus TSWV uas yog lawv tus Vajntxwv yuav coj lawv kev tawm mus. Nej cov uas ua thawj tswjhwm cov Yixalayees, nej cia li ua tib zoo mloog! Tsimnyog nej yuav tsum paub txojkev ncaj ncees, tiamsis nej ntxub txojkev ua zoo thiab nyiam txojkev ua phem. Nej muab kuv haivneeg laws tawv ciaj thiab luas lawv tej nqaij tawm ntawm lawv tej pobtxha. Nej noj kuv haivneeg, nej muab lawv laws tawv, tsoo lawv tej pobtxha thiab muab lawv tsuav ib yam li tsuav qaij rau hauv laujkaub. Muaj ib hnub twg nej yuav quaj hu tus TSWV, tiamsis nws yuav tsis teb nej. Nws yuav tsis mloog nej tej lus thov vim tej kev phem kev qias uas nej tau ua tas los. Kuv haivneeg raug cov cevlus cuav coglus dag ntxias hais tias, cov uas them nqi rau lawv yuav tau txais kev thajyeeb, tiamsis cov uas tsis them nqi rau lawv yuav ntsib kev tsov kev rog. Tus TSWV hais rau cov cevlus ntawd hais tias, “Cov cevlus, nej lub neej twb yuav xaus; lub hnub twb yuav poob qho. Rau qhov nej coj kuv haivneeg yuam kev, nej yuav tsis ua yogtoog pom qhov tseeb, thiab nej yuav tsis paub qhia tej uas yuav muaj los yav tom ntej li lawm.” Cov neeg uas paub txog yav tom ntej yuav poob ntsejmuag vim tej lus uas lawv qhia tsis tseeb. Lawv yuav poob ntsejmuag rau qhov tus TSWV tsis teb lawv tej lus lawm. Tiamsis tus TSWV pub nws tus ntsujplig thiab lub hwjchim rau kuv; nws pub kuv paub txojkev ncaj ncees thiab pub kuv muaj lub siab tawv mus qhia cov Yixalayees kom lawv paub lawv tej kev txhaum. Nej cov uas ua thawj tswjhwm cov Yixalayees, nej cia li ua tib zoo mloog kuv tej lus; nej ntxub txojkev ncaj ncees thiab muab qhov zoo ntxeev ua qhov phem. Nej muab txojkev tsis ncaj ncees thiab luag tej roj ntsha los pua lub nroog Yeluxalees uas yog Vajtswv lub nroog. Cov thawjcoj uas tswjhwm lub nroog no, lawv txiav txim vim lawv xav tau tej nyiaj uas luag coj tuaj xiab lawv; cov povthawj txhais txoj Kevcai vim tej nqi zog uas luag them rau lawv; cov cevlus qhia tej uas yuav tshwm los yav tom ntej vim xav tau nyiaj xwb, lawv cov ntawd khav hais tias tus TSWV yeej nrog nraim lawv nyob. Lawv hais tias, “Tus TSWV nrog nraim peb, yeej tsis muaj ib yam xwm dabtsi yuav los raug peb li.” Twb yog vim nej ntag, lub nroog Xi-oos thiaj raug luag muab laij ib yam li laij teb, lub nroog Yeluxalees yuav raug luag muab rhuav kom puastsuaj tas ua ib pawg, thiab lub pov roob uas ua lub Tuamtsev rau yuav ciaj ua havzoov. Muaj ib hnub tom ntej no lub roob uas ua lub Tuamtsev rau saud yuav yog lub uas siab tshaj cov, nws tshwm siab dua txhua lub pov roob huv tibsi. Ntau haivneeg yuav tuaj nchuav ntws rau ntawm lub roob ntawd, thiab lawv yuav hais tias, “Peb cia li nce mus rau saum tus TSWV lub ncov roob, mus rau saum cov Yixalayees tus Vajtswv lub Tuamtsev. Vajtswv yuav qhia rau peb paub tej uas nws xav kom peb ua; peb yuav taug txojkev uas nws xaiv rau peb lawm. Tus TSWV tej lus qhuab qhia tabtom tawm hauv lub nroog Yeluxalees tuaj; nws tuaj saum lub roob Xi-oos hais rau nws haivneeg.” Nws yuav txiav txim rau txhua haivneeg rau cov neeg uas muaj hwjchim loj tsis hais nyob deb thiab nyob ze. Lawv yuav muab lawv tej ntaj ntaus ua khais thiab yuav muab lawv tej hmuv ntaus ua liag. Txhua haivneeg yuav tseg tsis ua rog thiab tsis npaj sib tua ntxiv lawm. Txhua tus yuav nyob kaj siab lug ntawm nyias tej vaj txiv hmab, txiv ncuavpias, thiab yuav tsis muaj leejtwg ua rau nws tau kev txhawj kev ntshai li. Tus TSWV uas muaj Hwjchim Loj kawg nkaus tau coglus tseg li ntawd. Txhua haivneeg nyias pe thiab mloog nyias tus vajtswv lus, tiamsis peb yuav pe thiab mloog tus TSWV uas yog peb tus Vajtswv lus mus ibtxhis tsis kawg. Tus TSWV hais tias, “Thaum txog lub sijhawm lawm, kuv yuav sau tagnrho cov neeg uas kuv tau rau txim rau kom luag ntes coj mus ua qhev txomnyem ntsuav ntawd rov qab los nyob ua ke dua. Lawv puavleej yog neeg sav ceg thiab nyob deb ntawm lawv tej vajtse, tiamsis kuv yuav tsa cov neeg uas seem kom pib ua dua lub neej tshiab, thiab lawv yuav ua ib haivneeg uas muaj hwjchim heev. Kuv yuav nyob saum lub Roob Xi-oos kav lawv, suav txij hnub ntawd mus ibtxhis li.” Lub nroog Yeluxalees, koj yog lub nroog uas Vajtswv zov rawv tsomkwm nws haivneeg ib yam li tus tswv yug yaj uas sawv saum lub chaw tsomfaj zov nws pab yaj; koj yuav rov tau ua lub tuamceeb nroog rau koj lub tebchaws ib yam li yav thaum ub. Vim li cas koj quaj nrov ua luaj? Vim li cas koj raug kev txomnyem npaum nkaus li tus pojniam uas tabtom yug menyuam? Puas yog koj tsis muaj vajntxwv, thiab koj cov tuavxam tuag tas lawm? Cov neeg uas nyob hauv Yeluxalees, nej cia li quaj ntswj pesyos thiab ntsaj ib yam li tus pojniam uas tabtom yug menyuam, rau qhov nimno nej yuav tau tso nej lub nroog tseg thiab mus nyob tom tej roob mojsab. Nej yuav tau mus nyob tim tebchaws Npanpiloos, tiamsis tus TSWV yuav pab kom nej dim ntawm nej cov yeebncuab. Ntau haivneeg tau sib sau tuaj tua koj. Lawv hais tias, “Peb yuav tsum rhuav kom tau lub nroog Yeluxalees! Peb yuav pom lub nroog no raug puastsuaj lauj!” Tiamsis tej haivneeg ntawd tsis paub tej uas tus TSWV xav. Lawv twb tsis paub hais tias tus TSWV sau lawv los ua ke yuav txiav txim rau lawv ib yam li luag sau nplej los pawv cia yuav muab ntaus. Tus TSWV hais tias, “Cov neeg uas nyob hauv Yeluxalees, nej cia li mus rau txim rau nej cov yeebncuab! Kuv yuav ua kom nej muaj zog ib yam li tus heev nyuj uas muaj txwm kub hlau thiab muaj rau tooj. Nej yuav ntaus yeej ntau haivneeg thiab coj tej nyiaj uas lawv mus txeeb tau los tuaj pub rau kuv uas yog tus TSWV uas kav lub ntiajteb.” Cov Yixalayees, cia li txhij nej cov tubrog! Luag twb tuaj vij peb lawm! Luag twb tuaj tawmtsam cov Yixalayees tus thawjcoj lawm. Tus TSWV hais tias, “Npelehees Efalathas, koj yog ib lub nroog uas me tshaj plaws nyob hauv tebchaws Yudas, tiamsis kuv yuav tso ib tug thawjcoj los tshwm rau hauv koj los kav cov Yixalayees; nws yeej muaj cajces sib txuas ua ntu zus thaum ub los.” Yog li ntawd, tus TSWV yuav muab nws haivneeg tso rau lawv cov yeebncuab txhais tes mus txog thaum tus pojniam suab menyuam yug tau nws tus tub. Ces nws haivneeg uas raug luag ntes mus lawm yuav rov sib sau los ua ib haivneeg dua. Thaum nws los, tus TSWV uas yog Vajtswv yuav pub tus TSWV lub dag lub zog thiab lub hwjchim rau nws kav nws haivneeg. Nws haivneeg yuav nyob kaj siab lug, rau qhov txhua haivneeg thoob ntiajteb yuav lees hais tias nws yog tus uas muaj hwjchim loj kawg nkaus, thiab nws yuav coj txojkev kaj siab lug los rau sawvdaws. Thaum cov Axilias tuaj vij peb lub tebchaws thiab hla tuaj rau hauv peb ciam dej ciam av, peb yuav tso peb cov thawj tubrog uas siab tawv tshaj plaws mus tua lawv. Lawv yuav rho lawv tej ntaj tua yeej lub tebchaws Axilias, lub tebchaws Nilaus, thiab lawv yuav pab kom peb dim ntawm cov Axilias uas tuaj tua peb lub tebchaws. Cov Yixalayees uas seem yuav zoo ib yam li tej lwg dej uas tus TSWV tso los yug ntau haivneeg, thiab zoo ib yam li cov nag uas los yug tej qoobloo. Lawv yuav vamkhom Vajtswv xwb tsis vamkhom neeg lawm. Cov seem uas tseem nrog txhua haivneeg nyob yuav zoo ib yam li tus tsov ntxhuav uas mus nrhiav tsiaj tom noj hauv havzoov lossis hauv tshav zaub: Nws nkag mus nyob hauv pab yaj, dhia mus mos pab yaj, thiab muab cov yaj dua ua tej daim; nyob qhov ntawd yeej tsis muaj kev cia siab rau leejtwg yuav pab tau dim. Cov Yixalayees yuav tua yeej lawv cov yeebncuab thiab ua kom cov yeebncuab ntawd puastsuaj tas. Tus TSWV hais tias, “Thaum lub sijhawm ntawd kuv yuav cab nej cov nees mus thiab muab tej tsheb nees rhuav kom puastsuaj tas. Kuv yuav rhuav nej tej nroog uas nyob hauv nej lub tebchaws thiab muab nej tej ntsa yeej tsoo kom pob puas tas huv tibsi. Kuv yuav rhuav tshem nej tej khawvkoob kom puastsuaj thiab tsis pub nej cov neeg uas saib hmoov ib tug seem nyob qhov twg li. Kuv yuav muab tej mlom uas nej pe thiab tej ncej zeb uas nej teev tsoo povtseg; nej yuav tsis tau pe tej mlom uas nej txhais tes puab ib zaug ntxiv li lawm. Kuv yuav muab tej mlom pojniam Aselas hauv nej lub tebchaws tsoo povtseg thiab muab nej tej nroog rhuav kom puastsuaj tas. Vim kuv chim heev, kuv yuav ua nruj ua tsiv pauj txhua haivneeg uas tsis mloog kuv lus.” Nej cia li mloog tus TSWV rooj plaub uas nrog cov Yixalayees sib hais. Tus TSWV, cia li sawv thiab hais koj rooj plaub; thov cia tej toj roob hauv pes nrog ua timkhawv hnov koj tej lus. Tej roob thiab tej hauvpaus cag uas tuav lub ntiajteb nyob mus ibtxhis, nej cia li ua tib zoo mloog tus TSWV rooj plaub! Tus TSWV tau kom ib rooj plaub nrog nws haivneeg. Nws tabtom ua plaub rau cov Yixalayees. Tus TSWV hais tias, “Kuv haivneeg, kuv tau ua li cas rau nej? Kuv tau ua rau nej nyuaj siab los? Nej cia li teb kuv! Kuv tau coj nej tawm nram tebchaws Iziv los; kuv tau tso nej dim ntawm txojkev ua luag qhev; kuv txib Mauxes, Aloos thiab Milias ua cov coj nej. Kuv haivneeg, nco ntsoov tej uas cov Mau-am tus Vajntxwv Npalaj tuav tswvyim ua phem rau nej thiab tej uas Npe-aus tus tub Npala-as tau teb rau Npalaj ntawd. Nco ntsoov tej xwmtxheej uas thaum nej tabtom tawm hauv lub yeej ntawm Akaxias los rau ntawm Nkilenkas. Nco ntsoov tej no, nej thiaj yuav paub tej uas kuv tau pab nej dim ua ntu zus los.” Thaum kuv mus pehawm tus TSWV uas yog Vajtswv tus uas kav saum qaum ntuj, kuv yuav coj dabtsi mus rau nws? Kuv yuav coj tej menyuam nyuj uas zoo tshaj plaws mus tua hlawv ua khoom fij rau nws los? Tus TSWV puas yuav txaus siab, yog hais tias kuv coj ib txhiab tus yaj lossis tej roj txiv ntoo uas txhawv li tus dej tsis tu mus rau nws? Puas yog kuv yuav tau muab kuv tus tub hlob mus tua ua khoom fij rau tus TSWV thiaj theej tau kuv lub txhoj? Yeej tsis tau hlo li, tus TSWV twb qhia yam zoo rau peb lawm. Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwjchim nrog peb tus Vajtswv sib raug zoo. Tus uas hwm tus TSWV thiaj yog tus muaj tswvyim. Tus TSWV hais rau cov neeg uas nyob hauv nroog hais tias, “Nej cov uas tuaj sib sau rau hauv nroog, nej cia li ua tib zoo mloog! Hauv cov neeg ua phem tej tsev puv nkaus tej khoom uas lawv mus dag tau los. Lawv muab rab teev tsis txwm luj ntxo luag tug noj; kuv ntxub tej ntawd kawg li. Kuv yuav ua li cas thiaj zam txim tau rau cov neeg uas muab rab teev tsis txwm coj los luj ntxo luag tug ntawd? Nej cov neeg uas muaj txiag npluanuj, nej nrhiav nrhw huab cov neeg txomnyem tug los rau nej yuav, thiab nej txhua tus puavleej yog neeg dag xwb. Yog li ntawd, kuv twb pib ua kom nej raug puastsuaj, vim tej uas nej ua txhaum ntawd lawm. Nej yuav tau noj tiamsis tsis tsau plab, nej tseem tshaib nqhis. Nej yuav nqa ntau yam mus, tiamsis nej yuav txuag tsis tau tej ntawd cia; txhua yam uas nej khaws cia kuv yuav muab ua kom puastsuaj tas rau hauv tshavrog. Nej tseb noob nplej, tiamsis nej yuav tsis muaj qoobloo sau. Nej tsuam txiv ntoo roj, tiamsis nej yuav tsis muaj roj siv. Nej tsuam cawv txiv hmab, tiamsis nej yuav tsis muaj cawv haus. Tej no yuav tshwmsim tuaj, vim nej tau ua phem raws nraim li Vajntxwv Aumelis thiab nws tus tub uas yog Vajntxwv Ahaj ua. Nej xyaum ua raws li nkawd ua, yog li ntawd kuv yuav ua kom nej raug kev puastsuaj thiab luag yuav thuam nej. Tej neeg uas nyob txhua qhov yuav saib tsis taus nej.” Kuv tas kev cia siab lawm lauj! Kuv zoo ib yam li tus neeg tshaib plab uas xawb tsis tau ib lub txiv nyob saum ntoo, thiab tsis muaj txiv hmab nyob ntawm tej hmab de los noj li. Txhua rev txiv hmab uas qab thiab thawj phaum txiv ncuavpias luag twb muab de tas lawm. Tsis tshuav ib tug neeg ncaj ncees nyob hauv lub tebchaws hlo li; tsis muaj ib tug neeg uas muab siab npuab Vajtswv. Txhua tus npaj rawv tos tua neeg. Txhua tus nyas nrhw yuav tua nws tej kwvtij zejzog. Lawv txhua tus puavleej nyiam ua phem. Cov nomtswv thiab cov txiav txim xav tau luag tej nyiaj xiab. Tus uas ua zoo neej xav tau ib yam dabtsi nws tsa ncauj hais xwb luag yeej tuaj sib txoos ua ke tuav tswvyim lawm ntag. Txawm yog tus uas ua zoo thiab ua ncaj tshaj plaws ntawm lawv cov ntawd los tseem zoo li tsob pos xwb. Twb txog hnub uas Vajtswv yuav txiav txim rau cov neeg ntawd raws li uas nws tau hais kom cov cevlus uas yog cov neeg fajxwm ceebtoom rau lawv lawm. Nimno lawv ntxhov siab heev. Tsis txhob ntseeg koj tej kwvtij zejzog lossis tsis txhob cia siab rau koj tej phoojywg. Txawm yog tej lus uas koj hais rau koj tus pojniam los koj yuav tsum tau ceevfaj. Lub sijhawm no tej tub yuav thuam leej txiv hais tias ruam, tej ntxhais yuav tawmtsam leej niam, thiab tej nyab yuav nrog cov niampog sib cav sib ceg; koj cov yeebncuab yog koj tsevneeg ntag. Tiamsis kuv yuav ntsia ntsoov tus TSWV; kuv tos rawv Vajtswv, tus uas yuav los cawm kom kuv dim. Kuv tus Vajtswv yuav mloog kuv tej lus thov. Peb tej yeebncuab tsis muaj lus yuav hnyos peb. Peb ntog lawm, tiamsis peb yuav sawv tau rov los dua. Tamsim no peb nyob hauv qhov chaw uas tsaus ntuj nti, tiamsis tus TSWV yuav ua lub teeb ci rau peb pom kev. Peb tau ua txhaum rau tus TSWV lawm, yog li ntawd peb yuav tau ua siab ntev tiv nws txojkev chim mus ib nyuag ntu. Tiamsis txog thaum kawg nws yuav tuaj peb tog thiab pab daws peb tej plaub ntug. Nws yuav coj peb tawm mus rau ntawm qhov kaj; peb yuav ntsia ntsoov nws cawm peb dim. Thaum ntawd peb cov yeebncuab yuav pom tej no, thiab lawv yuav poob ntsejmuag heev. Lawv yog cov yeebncuab uas hnyos peb hais tias, “Tus TSWV uas yog nej tus Vajtswv nyob qhov twg?” Peb yuav ntsia ntsoov lawv swb, thiab peb yuav pom luag tsuj lawv ib yam li neeg tsuj av nkos tom tej kev. Cov neeg uas nyob hauv lub nroog Yeluxalees, twb txog lub sijhawm uas nej rov kho tus ntsa yeej uas thaiv lub nroog lawm. Thaum ntawd nej lub nroog tej ciam yuav dav fo mus ntxiv. Tej neeg uas khiav mus nyob txhua qhov lawm sawvdaws yuav tau rov los. Sab hnubtuaj, lawv yuav los pem tebchaws Axilias los; sab qabteb, lawv yuav los nram tebchaws Iziv los. Lawv yuav los ntawm tej tebchaws uas nyob ntawm ntug dej Efalates los, los tim tej hiavtxwv uas nyob deb, thiab saum tej roob uas nyob deb los. Tiamsis lub ntiajteb yuav ua suabpuam tas, rau qhov neeg ntiajteb ua phem ua qias. Tus TSWV, koj cia li ua tus tswv yug yaj saib koj haivneeg; lawv yog haivneeg uas koj tau xaiv tseg lawm. Txawm yog lawv nyob ua twmzeej rau tom tej roob mojsab qhua los nyob puagncig lawv tseem muaj tej tebchaws uas zoo qoobloo heev. Thov cia lawv mus noj tej zaub uas ntau heev hauv lub tebchaws Npasas thiab cheebtsam Nkile-as, ib yam li lawv tau noj puag thaum ub lawm. Tus TSWV, thov koj ua tej txujci tseemceeb rau peb pom ib yam li koj tau ua thaum koj coj peb khiav nram tebchaws Iziv los. Thaum txhua haivneeg pom tej no yuav ua rau lawv siab ntsws puas thiab zog ntaug tas. Lawv yuav pos qhovncauj thiab ntsaws qhovntsej vim lawv ntshai heev. Lawv yuav nkag chaub laug hauv av ib yam li nab; lawv yuav ntshai tshee hnyo tawm hauv lawv tej chaw nkaum tuaj. Lawv yuav ntshai tshee hnyo tig rov qab los cuag tus TSWV uas yog peb tus Vajtswv. Tus TSWV, yeej tsis muaj ib tug vajtswv zoo npaum li koj, koj zam txim rau koj haivneeg uas seem rov los. Koj tsis chim mus ibtxhis, tiamsis koj txaus siab hlo hlub peb mus li. Koj yuav rov hlub peb dua ib zaug ntxiv. Koj yuav muab peb tej kev txhaum tsuj ntiag rau hauv koj qab xibtaws thiab muab tej kev txhaum ntawd mus pov rau puag hauv qab thu hiavtxwv. Koj yuav ua ncaj thiab hlub koj haivneeg uas yog Anplahas thiab Yakhauj cov xeebntxwv raws li koj tau coglus rau peb cov yawgkoob puag thaum ub lawm. Ntawm no yog cov lus uas hais txog lub nroog Nineves thiab yog ib zaj yogtoog uas Nahus tau pom, Nahus nyob hauv lub nroog Elekauses. Tus TSWV uas yog Vajtswv khib thiab tsis zam txim rau leejtwg li; nws rau txim rau cov neeg uas tawmtsam nws. Nws ua pauj rau nws cov yeebncuab vim nws txojkev chim. Tus TSWV yeej tsis chim sai, tiamsis nws muaj hwjchim heev, thiab nws tsis cia tus neeg txhaum dim dawb tsis raug txiav txim. Tus TSWV mus txog qhov twg muaj nagxob nagcua txog qhov ntawd; muaj huab laum nkaus ib yam li tej pa av ntawm tus TSWV txhais kotaw! Nws samhwm rau hiavtxwv, hiavtxwv cia li qhuav lawm! Nws ua rau tej dej nqhuab qhuav tas huv tibsi. Tej tiaj nrag hauv tebchaws Npasas qhuav nkig nkuav, lub Roob Kalemees qhuav ua av luaj liab ploog, thiab tej paj ntoos uas nyob pem Lenpanoos ntsws tas. Tej hauv roob siab yuav qeeg ntawm tus TSWV xubntiag; tej ncov roob yuav yaj tas ntawm nws hauv ntej. Thaum tus TSWV tshwm los lub ntiajteb ua zog koog. Lub ntiajteb thiab tej neeg tshee laim dais. Thaum tus TSWV chim lawm leejtwg thiaj yuav muaj sia nyob? Leejtwg thiaj yuav dim tau ntawm nws txojkev npautaws uas txaus ntshai heev? Nws txojkev chim uas kub ib yam li hluavtaws phwj tuaj, tej pobzeb los yuav tawg ua hmoov tas tabmeeg nws. Tus TSWV yog tus uas zoo; nws tsomkwm nws haivneeg thaum muaj kev kub ntxhov; nws cawm cov neeg uas tig rov qab los cuag nws. Nws rhuav tej yeebncuab kom puastsuaj tas ib yam li dej huam los tshoob tej hmoov av; nws muab cov neeg uas tawmtsam nws xa mus rau txojkev tuag. Ua li cas nej thiaj ntxeev siab tawmtsam tus TSWV? Nws yuav rhuav kom nej puastsuaj tas. Tsis muaj leejtwg tawmtsam yeej nws ib zaug li. Nej zoo ib yam li tej hmab pos uas sib qhaib thiab tej quavnyab qhuav uas yuav raug hluavtaws kub. Tus neeg uas tuav tswvyim ua phem ua qias thiab ntxeev siab tawmtsam tus TSWV twb yog tawm hauv lub nroog Nineves tuaj ntag los sav! Tus TSWV hais rau nws haivneeg Yixalayees hais tias, “Txawm yog cov Axilias muaj zog thiab coob heev los lawv yuav raug puastsuaj thiab ploj tas mus. Kuv haivneeg, kuv ua kom nej raug kev txomnyem ntag, tiamsis kuv yuav tsis ua ib zaug ntxiv lawm. Nimno kuv yuav txo cov Axilias lub hwjchim uas quab yuam nej kom xaus mus thiab muab lawv tej saw hlau uas khi nej txiav kom tu tas.” Tej no yog tej lus uas tus TSWV hais txog cov Axilias hais tias, “Lawv yuav tsis muaj xeebntxwv los ris lawv lub npe mus ntxiv lawm. Kuv yuav muab tej mlom hauv lawv tej vajtswv tej tsev rhuav kom puastsuaj tas. Kuv tabtom npaj ib lub qhov ntxa rau cov Axilias; lawv tsis tsimnyog ua neeg nyob lawm.” Saib maj, muaj ib tug xa xov tabtom taug kev saum roob coj xov zoo tuaj lawm! Nws tuaj tshaj tawm txojkev muaj yeej! Cov Yudas, nej cia li npaj ua kevcai noj haus zoo siab thiab muab tej khoom uas nej tau coglus tseg lawm fij rau Vajtswv. Cov neeg siab phem yuav tsis tuaj tua nej lub tebchaws ntxiv li lawm. Lawv twb raug puastsuaj tas lawm! Nineves, koj yuav raug luag tua! Lub hwjchim uas yuav tsoo koj twb los txog lawm. Tus tubrog uas tiv thaiv! Cia li zov kev kom zoo! Cia li npaj tos sib tua! ( Tus TSWV twb rov txhim kho kom haivneeg Yixalayees tau koob meej ib yam li yav thaum ub uas lawv cov yeebncuab tseem tsis tau tuaj tua lawv.) Yeebncuab tej tubrog nqa tej daim thaiv hniav ntaj uas liab nploog thiab hnav tej ris tsho uas liab nploog. Lawv yeej npaj txhij tuaj tua rog lawm! Lawv tej tsheb nees ntaus rog cig lam lug cuag nplaim taws! Lawv tej nees khiav rag ntws tuaj! Lawv tej tsheb nees ntaus rog nias tsaus tsi los rau hauv tej plawv kev, thiab tej nees cab tsheb khiav mus khiav los hauv plawv nroog. Tej tsheb ntawd cig lam lug ib yam li tes tsau thiab cig laim lias cuag xob laim. Nws hu cov thawj tubrog; thaum lawv sib tw khiav mus lawv dawm ntog pawglug. Lawv khiav nplawg ntia mus rau ntawm tus ntsa yeej thiab rho lawv tej thaiv hniav ntaj los npaj tos. Tej roojvag uas nyob ze tus dej los qhib lug cia; muaj kev txhawj ntshai loj heev nyob hauv lub loog. Tus poj vajntxwv los raug ntes coj mus; nws cov ntxhais qhev quaj ntsuag ib yam li nquab quaj; thiab lawv ntaus lawv tej hauvsiab quaj tu siab nrho. Thaum cov neeg khiav tawm hauv lub nroog Nineves zoo ib yam li cov dej paim hauv lub pasdej tauv. Muaj ib lub suab qw nrov nrov hais tias, “Nres! Nres!” Tiamsis tsis muaj leejtwg tig rov qab li. Cia li huab tej nyiaj! Cia li huab tej kub! Muaj nyiaj thiab kub puv nkaus hauv lub nroog! Nineves raug puastsuaj ua suabpuam thiab nyob qhuav nquas cia! Lawv tej siab ntsws puas tas vim txojkev txhawj ntshai; lawv tej hauvcaug tshee mos nyoos, lawv zog ntaug thiab ntsejmuag daj tas. Puas yog nimno lub nroog ntawd zoo ib yam li lub qhov tsov ntxhuav uas yog qhov chaw tsov pub menyuam mis thiab yog qhov chaw uas tus txiv thiab tus maum tsov ntxhuav mus qhov twg lawm los cov menyuam tsov ntxhuav nyob tso siab plhuav? Tsov ntxhuav yuav muab tus tsiaj uas nws tom tau dua faib rau lwm tus thiab nws cov menyuam noj; nws yuav muab tej nqaij dua pov pawglug rau hauv nws lub chaw. Tus TSWV uas muaj hwjchim loj kawg nkaus hais tias, “Kuv yog koj tus yeebncuab ntag! Kuv yuav muab koj tej tsheb nees hlawv kom kub hnyiab tas. Koj cov tubrog yuav raug tua tuag tas rau hauv tshavrog, thiab kuv yuav coj txhua yam uas koj mus txeeb tau ntawm lwm tus los mus huv tibsi thiab yuav tsis hnov koj tej neeg xa xov tej suab ntxiv lawm.” Kev puastsuaj los raug lub nroog uas muaj kev dag ntxias, kev tua neeg thiab kev npluanuj uas koj mus txhav thiab huab tau los! Cia li mloog tej suab nplawm nees, tej suab tsheb, tej suab nees dhia thiab tej suab tsheb nees ntog nrov. Cov neeg uas caij nees khiav tuaj nqa ntaj hniav ci nplas thiab tej hmuv ntse zuag plias! Neeg tuag sib tsub sib nias ua tsheej pawg; muaj neeg tuag suav tsis txheeb, neeg tuaj dawm tej tuag ntawd ntog. Nineves uas yog tus niamntiav tabtom raug rau txim; Tus pojniam uas zoo nkauj ua rau ntau leej tuag rau nws lub tswvyim phem; nws ntxias ntau haivneeg lub siab qauglais rau nws. Tus TSWV uas muaj hwjchim loj kawg nkaus hais tias, “Nineves, kuv yuav rau txim rau koj! Kuv yuav muab koj hle liabqab ploog rau txhua haivneeg saib, luag yuav pom koj qhov chaw txajmuag. Kuv yuav saib koj tsis muaj nqis thiab muab txojkev phem kev qias los qhwv koj. Tej neeg uas pom koj yuav luag koj plig. Txhua tus uas pom koj yuav fee hlo rau lwm qhov. Lawv yuav hais tias, ‘Nineves raug puastsuaj tas lawm lauj! Puas yuav muaj leejtwg hlub tshua nws thiab? Puas yuav muaj leejtwg mus nplig tau nws siab?’ ” Nineves, koj tseem zoo tshaj Thenpes uas yog cov Iziv lub tuamceeb nroog thiab los? Nws muaj ib tug dej loj thaiv nws ib yam li tus ntsa yeej thaiv; tus dej Niles yog tus uas thaiv nws ntag. Nineves kav tagnrho tebchaws Sudas thiab tebchaws Iziv, nws lub hwjchim yeej tsis muaj qhov kawg li; Linpias yog ib lub tebchaws uas koom tes nrog nws thiab. Cov neeg hauv lub nroog Thenpes raug luag ntes coj mus lawm. Lawv tej menyuam raug luag ntaus tuag rau txhua txojkev. Luag muab saw hlau khi lawv tej thawjcoj thiab muab faib rau cov neeg uas tuaj ntes tau lawv ntawd cab mus. Nineves, koj yuav ntog ib yam li tus neeg qaug cawv! Koj tseem yuav nrhiav kev khiav kom dim ntawm koj cov yeebncuab. Koj tej chaw fajxwm yuav zoo ib yam li tej ntoo txiv ncuavpias uas cov txiv siav lawm: Koj tuav tsob ntoo co ces tej txiv poob los nkag koj qhovncauj xwb. Koj tej tubrog zoo ib yam li tej pojniam, koj lub tebchaws thiaj tiv tsis yeej koj tej yeebncuab. Hluavtaws yuav kub koj tej nqaj roojvag huv tibsi. Mus nqa dej los npaj cia vim luag yuav tuaj vij koj, thiab txhij koj cov tubrog zov tej chaw fajxwm kom zoo! Cia li tsuj av kom nplaum los puab ua thwvcib, thiab muab tej thwvcib ntawd hlawv kom tawv. Txawm yog koj yuav ua npaum li cas los xij, koj yuav raug hlawv kub hnyiab tuag lossis raug tua tuag rau hauv tshavrog. Koj yuav raug luag ntiab khiav mus tas ib yam li tej qoobloo uas kooj txomfav muab noj tas lawm. Koj huamvam coob ib yam li kooj txomfav ntag. Koj tej tub lag tub luam muaj ntau tshaj tej hnubqub saum nruab ntug. Tiamsis nimno lawv ploj tas ib yam li tej kooj txomfav uas nthuav tis ya tas lawm. Koj cov nomtswv zoo ib yam li tej kooj txomfav uas los nyob ntawm ntsa lajkab tej hnub uas no no ntag. Tiamsis thaum lub hnub tawm tuaj ziab, lawv ya tas tsis muaj leejtwg paub xyov lawv ya mus rau qhov twg lawm! Tus vajntxwv uas kav tebchaws Axilias, koj cov tswvxeev tuag tas, thiab koj cov nomtswv tsaug zog mus ibtxhis! Koj cov pejxeem khiav ua sab ua sua mus rau saum tej roob tsis muaj leejtwg coj lawv rov qab los tsev li lawm. Tsis muaj tshuaj kho koj tej qhov txhab, thiab koj tej qhov txhab los yuav tsis txawj zoo. Txhua tus uas hnov txog koj tej kev puastsuaj, lawv yuav luag npuaj teg zoo siab heev. Puas muaj leejtwg khiav dim koj txojkev ua limhiam uas tsis paub kawg li? Ntawm no yog tus TSWV tej lus uas hais rau Hanpakus tus uas cev Vajtswv lus. Tus TSWV, kuv yuav thov koj ntev npaum li cas koj mam li mloog thiab cawm kom peb dim ntawm txojkev ua limhiam? Vim li cas koj cia kuv pom tej kev txomnyem nyuaj siab no? Ua li cas koj sawv twjywm ntsia tej kev txhaum ntawd xwb? Muaj kev puastsuaj thiab kev yuam cai nyob ibncig kuv, muaj kev sib ntaus sib tua thiab kev sib cav sib ceg nyob txhua qhov. Txoj kevcai tsis tseemceeb thiab tsis muaj qabhau lawm, tsis muaj neeg ua ncaj ua ncees. Cov neeg siab phem quab yuam cov neeg ncaj ncees, txojkev phem thiaj muab txojkev ncaj ncees npog tas lawm. Tus TSWV hais rau nws haivneeg tias, “Nej cia li tsa qhovmuag ntsia txhua haivneeg uas nyob ibncig nej, thiab tej uas nej pom yuav ua rau nej xav tsis thoob. Kuv yuav ua tej yam tshwm kom thaum nej hnov tej ntawd nej yuav tsis ntseeg. Kuv yuav tsa cov neeg Npanpiloos uas muaj lub siab ceev thiab lub siab nruj tsiv uas muaj hwjchim. Lawv tabtom tawm tuaj mus kom thoob lub ntiajteb thiab yuav txeeb luag lwm lub tebchaws kav. Lawv tso hemthawj kom sawvdaws txhawj thiab ntshai, thiab lawv khavtheeb; lawv tsis yuav leejtwg txoj kevcai, lawv yuav lawv txoj kevcai nkaus xwb. “Lawv tej nees khiav ceev dua tsov pomtxwv thiab nyaum tshaj tej hma uas tshaib plab. Lawv cov tubrog caij nees khiav rag ntws ceev heev ntawm tej tebchaws uas nyob deb tuaj; lawv khiav ceev heev tuaj ib yam li tus dav rwg los muab qaib. “Lawv cov tubrog tuaj txeeb tebchaws kav ua limhiam ntsuav, thiab thaum lawv tuaj txog ua rau txhua tus ntshai tshee hnyo. Cov neeg uas lawv ntes tau mas coob npaum nkaus li tej suabzeb suav tsis txheeb. Lawv saib tsis taus cov vajntxwv thiab luag cov nomtswv loj plig ua tsuj ua tsaug. Tsis muaj ib lub yeej twg uas yuav tiv thaiv tau lawv; lawv khawb av los meem kom siab thiab txeeb kom tau lub nroog ntawd. Lawv txeeb tau lub nroog twg, lawv dhau plaws mus ib yam li nthwv cua ntsawj ib vuag xwb; cov neeg no muab lawv lub hwjchim saib hlob ib yam li yog lawv tus vajtswv ntag.” Tus TSWV, koj yeej yog Vajtswv tus uas nyob puag thaum ub los lawm. Koj yog kuv tus Vajtswv, tus dawbhuv thiab nyob mus ibtxhis. Tus TSWV yog kuv tus Vajtswv thiab yog tus tsomkwm kuv, koj tau xaiv cov neeg Npanpiloos thiab pub lawv muaj hwjchim loj, kom lawv rau txim tau rau peb. Ua li cas koj tseem tseg cov neeg ua phem ua qias ntawd cia? Koj ob lub qhovmuag dawbhuv heev, ntsia tsis taus tej kev phem kev qias, thiab koj yeej tsis kam sawv tabmeeg cov neeg txhaum ntawd li. Tiamsis yog vim li cas thaum cov neeg phem tuaj muab cov neeg uas ncaj ncees tua povtseg tas lawm, koj nyob ntsiag to tsis quavntsej li? Yog li cas koj saib neeg zoo ib yam li tej ntses hauv hiavtxwv lossis tej kab tej ntsaum uas tsis muaj tus kav thiab coj lawv kev li xwb? Cov Npanpiloos tuaj ntes neeg thiab muab nuv ntses chob ib yam li tej neeg ntawd yog ntses. Lawv muab vas khwb cov neeg ntawd cab thiab luag qw ua tsuj ua tsaug zoo siab kawg rau cov neeg uas lawv ntes tau ntawd. Lawv pe lawv tej vas thiab tua tsiaj fij rau tej vas ntawd, rau qhov lawv tej vas ntawd ua rau lawv npluanuj heev. Puas yog lawv yuav siv lawv tej ntaj tua kom ntau lub tebchaws raug kev puastsuaj mus, tsis muaj kev hlub li? Kuv yuav nce mus rau saum kuv lub chaw tsomfaj thiab tos saib tus TSWV yuav kom kuv hais li cas thiab nws yuav teb kuv tej lus yws li cas. Tus TSWV teb li no rau kuv: “Koj cia li muab zaj uas kuv qhia rau koj hauv nruab npau suav, sau kom meej rau ntawm tej txiag zeb kom tus neeg uas khiav ceev los thiaj nyeem tau. Koj cia li muab tej lus no sau tseg cia, rau qhov tej xwm uas kuv qhia rau koj no tseem tsis tau txog caij tshwm los. Tiamsis lub sijhawm ntawd yuav los txog sai sai, thiab tej uas kuv qhia rau koj yuav tshwm raws li ntawd. Yuav pom tej ntawd maj mam tshwm los, tiamsis koj ua siab ntev tos; tej ntawd yuav muaj los tiag thiab yuav tsis ncua sijhawm ntxiv li lawm. Cov lus ntawd yog hais li no: ‘Cov neeg ua phem ua qias yuav tsis muaj sia nyob, tiamsis cov neeg uas ncaj ncees yuav muaj sia nyob, rau qhov lawv muab siab npuab Vajtswv.’ ” Kev muaj txiag npluanuj ntxias tau neeg yuam kev. Cov neeg siab hlob uas khavtheeb thiab xav tau ntau tsis paub txaus, ib yam li txojkev tuag. Twb yog vim li ntawd, lawv thiaj txeeb ib lub tebchaws rau ib lub tebchaws kom tau los ua lawv tug. Txhua haivneeg uas raug tua swb lawm yuav cem thiab saib tsis taus cov neeg uas tuaj tua yeej lawv. Lawv yuav cem hais tias, “Nej tau txeeb luag tug los ua nej tug, tiamsis nej yuav raug kev puastsuaj! Nej yuav yuam cov neeg uas tshuav nej nqis them rov rau nej kom nej npluanuj mus txog hnub twg?” Tiamsis thaum nej ras txog, cov neeg uas nej tsimtxom twb sau nthwv tuaj tsib tej nqi uas nej tshuav lawv thiab yuam kom nej them ib npaug ntxiv rau lawv. Yeebncuab yuav tuaj thiab ua rau nej ntshai tshee hnyo. Lawv yuav huab txhua yam uas nej muaj nqa huv tibsi mus! Nej tau mus huab ntau haivneeg, tiamsis nimno cov neeg uas seem yuav tuaj huab nej, vim nej tua neeg thiab ua limhiam tawmtsam tej neeg thoob ntiajteb thiab txeeb luag tej nroog. Nej raug puastsuaj lawm lauj! Nej lub cuab lub yig muaj txiag npluanuj rau qhov nej mus yuam cai txeeb luag tug, thiab nej tseem xav ua kom nej tsevneeg tau zoo nyob tso siab plhuav tsis ntshai dabtsi li! Tiamsis nej tej tswvyim phem ntawd twb ua rau nej tsevneeg txajmuag kawg nkaus; qhov uas nej muab ntau haivneeg ua puastsuaj tas lawm twb yog nej rov lob kev puastsuaj los rau nej ntag. Txawm yog tej ntsa yeej pobzeb los yuav quaj qw ntshoo nrooj cem nej, thiab tej qhab tse los yuav hnyos nej ntsoog qees. Nej raug puastsuaj lawm! Nej ua kev nruj kev tsiv thiab tua neeg, nej thiaj rhawv thiab tsim tau lub nroog. Txhua haivneeg uas nej ntaus yeej ua haujlwm nkim lawv lub zog qhuav xwb, thiab txhua yam uas lawv ua ntawd puavleej raug kub hnyiab tas huv tibsi. Tus TSWV uas muaj hwjchim loj kawg nkaus yog tus uas ua tej no ntag. Tiamsis lub ntiajteb yuav puv nkaus tus TSWV txojkev txawj ntse thiab lub tshwjchim ib yam li muaj dej puv nkaus hiavtxwv. Nej raug puastsuaj lawm! Thaum nej npautaws, nej ua rau tej neeg zejzog poob ntsejmuag tas; nej tau ua rau lawv mus kev ntog pujpoog ib yam li tus neeg qaug cawv. Nej xav hais tias nej ua li ntawd nej thiaj yuav tau ntsejmuag, tiamsis nej hajyam yuav poob ntsejmuag heev. Txawm yog nej los yuav qaug cawv thiab ntog pujpoog ib yam nkaus. Tus TSWV yuav muab lub khob uas yog txojkev txiav txim los rau nej haus, thiab nej lub koob meej yuav hloov mus ua kev poob ntsejmuag. Nej muab tej ntoo pem Roob Lenpanoos ntov tas li cas, nimno nej yuav raug luag ntov ib yam li ntawd. Nej muab tej tsiaj pem Lenpanoos tua tas li cas, nimno tej tsiaj ntawd yuav ua kom nej ntshai heev li ntawd. Tej xwm no tshwm tuaj twb yog vim txojkev txhaum uas nej tua neeg thiab vim tej uas nej tau ua rau neeg ntiajteb thiab lawv tej nroog puastsuaj. Tej mlom ntawd muaj nqis dabtsi? Nws yog yam uas neeg ob txhais tes puab, thiab nws yeej qhia tsis tau ib yam tseeb rau nej tsuas yog dag xwb. Tus mlom ntawd ua puas tau dabtsi zoo kom tus uas puab nws cia siab rau nws; nws yog tus vajtswv uas tsis txawj hais lus xwb los sav! Nej raug puastsuaj lawm! Nej hais rau ib thooj ntoo tias, “Cia li tsim dheev!” Lossis hais rau ib lub pobzeb tias, “Cia li sawv!” Tus mlom ntawd puas qhia tau ib zaj dabtsi rau nej? Txawm yog luag muab nyiaj muab kub vuam tus mlom ntawd ci nplas los nws yeej tsis muaj sia li. Tus TSWV nyob hauv nws lub Tuamtsev uas dawbhuv; txhua tus neeg uas nyob hauv lub ntiajteb no cia li nyob twjywm ntawm nws lub xubntiag. Ntawm no yog Hanpakus uas yog tus cev Vajtswv lus, tej lus thov Vajtswv: Tus TSWV, kuv tau hnov txog tej uas koj tau ua tas los thiab ua rau kuv ntshai kawg nkaus li. Nimno thov koj rov qab ua koj tej haujlwm tseemceeb uas thaum ub koj twb ua lawm rau peb tiam uas tseem ua neej nyob no pom dua! Txawm yog thaum koj chim heev los thov koj hlub tshua txog peb thiab. Vajtswv yuav tuaj hauv lub tebchaws Edoos tuaj dua; Vajtswv tus uas dawbhuv tabtom rov saum tej hauv roob Palas los. Nws lub tshwjchim ci ntsa iab plooj nkaus saum nruab ntug, thiab neeg thoob ntiajteb puavleej ua nws tsaug. Thaum nws los, nws lub tshwjchim ci ntsa iab cuag xob laim; muaj nplaim taws cig laim lias ntawm nws txhais tes; qhov ntawd yog qhov chaw uas nws zais nws lub hwjchim. Nws tso tej kab mob mus ua nws ntej thiab kom kev tuag raws nws qab. Thaum uas nws nres, lub ntiajteb co ua zog koog; thaum nws laj muag ntsia, txhua haivneeg ntshai tshee hnyo. Tej roob uas ibtxwm nyob thaum ub los co ua zog koog; tej ncov roob uas ibtxwm muaj nyob los saus pes zog ploj tas lawm; tej ncov roob ntawd yog tej uas thaum ub nws ibtxwm hla los mus. Kuv pom cov neeg Kusas ntshai kawg nkaus li thiab cov neeg Midias mas ntshai ua ibce tshee hnyo. Tus TSWV, puas yog tej dej ntawd ua rau koj chim? Puas yog dej hiavtxwv ua rau koj npautaws? Koj nyob rawv saum tej huab dawb; tauv huab dub yog koj lub tsheb, koj tuaj pab koj haivneeg kom muaj yeej. Koj npaj rawv yuav tua koj rab hneevnti tuaj, thiab npaj rawv koj xibxub vos tua tuaj lawm xwb. Koj ua kom muaj xob laim tua lub ntiajteb no tawg rhe. Thaum tej roob pom koj, lawv ntshai tshee ua zog koog; dej nchuav laub lug saum nruab ntug los. Tej dej uas nyob hauv qab tivtxwv av nyooj laws tuaj thiab nphau tej niag nthwv siab kawg nkaus li. Thaum koj tej xubvos ya ua duab ci nplas ceev heev tuaj, thiab koj tej hmuv ya ua duab ci hob tuaj lawm, lub hnub thiab lub hli txawm nres nkaus rau ntawm nws qhov chaw. Koj rhais ruam hla lub ntiajteb ua tus chim hnyo tuaj; thiab koj tsuj ntiag txhua haivneeg ua tus npautaws vog. Koj tuaj cawm koj haivneeg thiab cawm tus vajntxwv uas koj xaiv tseg. Koj muab cov neeg ua phem tus thawjcoj tua povtseg, thiab muab cov neeg uas tuaj nws tog tua tu noob nrho. Koj tua tej xubvos tuaj ntsia nkaus nws tus thawj tubrog thaum nws pab tubrog tuaj ib yam li nthwv nagxob nagcua ntsawj peb tawg ua sab ua sua ib yam li cov neeg uas soj rawv yuav tsimtxom cov neeg pluag. Koj cov nees txauj dej hiavtxwv, thiab hiavtxwv txawm ntas nphau pes nphwv tuaj. Thaum kuv hnov tej xwm no, kuv ntshai tshee hnyo; kuv daim dincauj tshee mos nyoos vim kuv ntshai heev. Kuv ibce tuag tas, thiab kuv ob txhais kotaw sib dawm kuv thiaj ntog. Kuv yuav nyob ntsiag to tos mus txog thaum lub sijhawm uas Vajtswv los rau txim rau cov neeg uas tawmtsam peb tso. Txawm yog tej ntoo txiv ncuavpias tsis tawg paj thiab tej txiv hmab tsis txi txiv, txawm yog tej ntoo roj txiv zeeg tas thiab tej liaj tej teb qoobloo tsis tuaj, txawm yog tej yaj tuag tas thiab tej nkuaj nyug khoob lug cia xwb los kuv tseem muaj kev zoo siab thiab txaus siab, vim muaj tus TSWV uas yog Vajtswv ua kuv tus Cawmseej. Tus TSWV uas kav ib puas tsav yam pub rau kuv muaj zog. Nws ua rau kuv ob txhais kotaw mus kev nplaum ib yam li tus sai, thiab nws tsomkwm kuv kaj siab lug saum tej laj roob. Cov lus no yog tus TSWV hais rau Xefaniyas tus uas cev Vajtswv lus, ntu uas Amoos tus tub Yauxiyas ua vajntxwv kav tebchaws Yudas. (Xefaniyas yog xeebntxwv los ntawm Vajntxwv Hexekiyas, Amaliyas, Kedaliyas, thiab Kusis.) Tus TSWV hais tias, “Kuv tabtom yuav rhuav kom ib puas tsav yam uas nyob hauv lub ntiajteb raug puastsuaj, tsis hais tej neeg, tej tsiaj txhu, tej noog thiab tej ntses huv tibsi. Kuv yuav muab cov neeg ua phem ua qias rhuav kom puastsuaj tas. Kuv yuav rhuav txhua haivneeg kom puastsuaj tas tsis tseg ib tug li. Kuv yog tus TSWV uas hais li ntawd. “Kuv yuav rau txim rau cov neeg hauv Yeluxalees thiab cov Yudas. Kuv yuav muab tej chaw uas luag pe Npa-as ua kom puastsuaj tas mus, thiab yuav tsis muaj leejtwg nco tau cov thawj uas coj npa-as kevcai li lawm. Kuv yuav muab txhua tus neeg uas nce mus rau saum rutsev thiab pe lub hnub, lub hli thiab tej hnubqub ua kom puastsuaj tas. Kuv tseem yuav muab cov neeg uas pehawm kuv thiab muab lub siab npuab kuv, tiamsis ho tuav tus vajtswv Maulej lub npe coglus ua kom puastsuaj huv tibsi. Kuv yuav muab txhua tus neeg uas tso kuv tseg, tsis raws kuv qab, thiab tsis los cuag kuv lossis tsis thov kuv ua tus coj lawv txoj haukev ua kom puastsuaj tas.” Hnub uas tus TSWV yuav zaum ntawm nws lub zwmtxwv txiav txim twb los ze lawm; yog li ntawd, nej cia li nyob twjywm ntawm nws xubntiag. Tus TSWV tabtom npaj nws haivneeg coj mus ua khoom fij thiab twb caw yeebncuab tuaj huab cov Yudas lawm. Tus TSWV hais tias, “Txog hnub uas tua cov Yudas, kuv yuav rau txim rau cov nomtswv, vajntxwv cov tub, thiab txhua tus uas mus xyaum coj lwm haivneeg tej kevcai. Kuv yuav rau txim rau cov neeg pe dab, ua tubsab, thiab tua neeg huab luag tej khoom nqa los tso puv nkaus hauv lawv tus tswv lub tsev. Tus TSWV hais tias, “Thaum txog hnub ntawd, nej yuav hnov lub suab quaj ntawm lub Roojvag Ntses hauv lub nroog Yeluxalees tuaj. Nej yuav hnov tej suab quaj ntsoog qees ntawm lub nroog txuas tshiab thiab hnov tej suab sib tsoo nrov qeeg nkaws saum tej pov roob tuaj. Nej cov uas nyob theem qis ntawm lub nroog, nej cia li quaj ntsuag thaum nej hnov tej no, rau qhov tej tub lag tub luam thiab lawv tej khoom muaj nqis puastsuaj tas lawm! “Thaum ntawd kuv yuav taws teeb mus tshawb lub nroog Yeluxalees. Kuv yuav rau txim rau cov neeg uas txaus siab thiab cia siab rau lawv xwb; cov uas lawv xav hauv lawv lub siab hais tias, ‘Tus TSWV yeej tsis ua zoo lossis ua phem li!’ Lawv tej nyiaj yuav raug luag huab thiab lawv tej vajtse yuav raug rhuav kom puastsuaj tas. Lawv yuav tsis tau nyob hauv tej tsev uas lawv tabtom ua lossis yuav tsis tau haus tej cawv txiv hmab uas lawv cog rau hauv lawv tej vaj.” Hnub tseemceeb uas yog tus TSWV hnub twb los ze lawm, hnub ntawd los ze zuj zus thiab los ceev heev li! Hnub ntawd yuav iab siab kawg, txawm yog tej tubrog uas siab tawv los yuav cia li tsa suab hlo quaj thiab tas kev cia siab! Hnub ntawd yuav yog ib hnub uas npautaws heev, yog hnub uas muaj kev txomnyem thiab ntxhov siab kawg, yog hnub uas muaj kev puastsuaj, yog hnub uas tsaus ntuj nti, yog hnub uas tsaus dub nciab thiab pos huab nti, yog hnub uas hnov tej suab raj suab xyu txhib tubrog thiab hnov tej suab sib ntaus sib tua quaj ntsoog qees hauv tej nroog uas txhim zeb khov kho thiab saum tej chaw tsomfaj tuaj. Tus TSWV hais tias, “Kuv yuav tso sub tawg sub ntsha los rau neeg kom txhua tus mus kev ib yam li tus digmuag. Vim lawv tau ua txhaum tawmtsam kuv, mas nimno lawv cov ntshav yuav raug muab hliv tawm ib yam li hliv dej, thiab lawv tej cev tuag yuav lwj pawglug saum tej npoo av.” Thaum txog hnub ntawd, tus TSWV yuav qhia nws txojkev chim rau sawvdaws; txawm yog lawv tej nyiaj tej kub los yuav cawm tsis tau lawv dim. Lub ntiajteb yuav raug tus TSWV txojkev chim ib yam li hluavtaws kub; nws yuav ua kom txhua tus uas nyob hauv lub ntiajteb no puastsuaj tag. Haivneeg uas tsis paub txajmuag, nej cia li los sib sau ua ke ua ntej nej yuav ntsws thiab tuag ib yam li tej paj ntoos, ua ntej tus TSWV txojkev chim los kub nej thiab ua ntej hnub uas tus TSWV qhia nws txojkev npautaws rau nej. Cov neeg uas txo hwjchim nyob hauv lub tebchaws no thiab cov neeg uas mloog nws tej lus, nej txhua tus cia li tig los cuag tus TSWV. Cia li ua ncaj ncees thiab txo hwjchim tabmeeg tus TSWV. Tej zaum nej yuav khiav dim ntawm tus TSWV txojkev txiav txim, hnub uas tus TSWV qhia nws txojkev chim rau nej. Yuav tsis muaj ib tug neeg seem nyob hauv lub nroog Nkaxas li lawm. Asekeloos yuav ua suabpuam tas. Cov neeg hauv Asedaus yuav raug ntiab tawm khiav mus thaum tavsu, thiab cov neeg hauv Ekiloos yuav raug ntiab tawm khiav hauv lawv lub nroog mus. Nej cov Filitees uas nyob raws ntug hiavtxwv raug kev puastsuaj lawm lauj! Tus TSWV twb txiav txim rau nej lawm. Nws yuav ua kom nej puastsuaj tas thiab yuav tsis tseg nej ib tug seem hlo li. Nej tej av uas nyob raws ntug dej hiavtxwv yuav ua tshav zaub rau cov tub yug yaj tuaj ua tsev thiab ua nkuaj rau lawv tej yaj nyob. Cov Yudas uas seem yuav kav nej lub tebchaws. Lawv yuav coj lawv tej tsiaj tuaj noj zaub thiab pw hauv cov Akeseloos tej tsev. Tus TSWV uas yog lawv tus Vajtswv yuav nrog nraim lawv thiab pab kom lawv lub neej rov vammeej. Tus TSWV uas muaj hwjchim loj kawg nkaus hais tias, “Kuv twb hnov cov Mau-am thiab cov Amoos tej lus thuam thiab tej lus uas hais saib tsis taus kuv haivneeg thiab khav hais tias lawv yuav tuaj txeeb kuv haivneeg lub tebchaws lawm. Kuv qhia tseeb rau nej hais tias kuv yog tus TSWV uas yog cov Yixalayees tus Vajtswv uas muaj sia nyob, kuv coglus hais tias cov Mau-am thiab cov Amoos yuav raug muab rhuav kom puastsuaj tas ib yam li lub nroog Xaudoos thiab lub nroog Kaumaulas. Lawv yuav ciaj ua qhov ntsev thiab puastsuaj mus ibtxhis, tej nroj tsuag yuav tuaj fab hnyo thoob plaws xwb. Kuv haivneeg uas seem yuav huab thiab txeeb lawv lub tebchaws.” Twb yog vim li ntawd, cov Mau-am thiab cov Amoos uas khavtheeb yuav raug txim, rau qhov lawv txob thuam tus TSWV uas muaj hwjchim loj kawg nkaus haivneeg. Tus TSWV yuav ua kom lawv ntshai heev; nws yuav muab tej vajtswv uas nyob hauv ntiajteb no txo kom tsis muaj qabhau, ces txhua haivneeg nyias thiaj yuav nyob hauv nyias lub tebchaws pehawm tus TSWV. Tus TSWV tseem yuav tua cov neeg Sudas kom tuag tas huv tibsi thiab. Tus TSWV yuav siv nws lub hwjchim rhuav lub tebchaws Axilias kom puastsuaj. Nws yuav muab lub nroog Nineves rhuav kom puastsuaj ua suabpuam tas nyob qhuav nquas cia. Ces Nineves yuav ua lub chaw rau tej yaj, tej tshis, thiab txhua yam tsiaj yuav los nyob los pw. Plas yuav los nyob hauv tej tsev uas puas tas ntawd thiab quaj ntawm tej qhovrai. Uablag yuav los quaj ntawm tej taw rooj. Tej ntoo ciab uas xov tej tsev hauv lub nroog yuav raug muab tsoo coj mus povtseg. Twb yog vim li ntawd, thiaj muaj tej no tshwmsim los raug lub nroog uas khavtheeb txog nws lub zog thiab xav hais tias nws tau zoo nyob kaj siab lug lawm. Thiab nws cov neeg xav hais tias lawv lub nroog yog lub uas loj tshaj plaws tej nroog hauv lub ntiajteb no. Lub nroog ntawd yuav nyob ntsiag to thiab yuav ua chaw rau tej tsiaj qus los nyob lawm xwb! Tej neeg uas dhau kev yuav ntshai yoob tas thiab thim rov qab. Yeluxalees raug kev puastsuaj vim ua tsis ncaj, nws ntxeev siab thiab tsimtxom nws cov neeg. Nws yeej tsis mloog tus TSWV tej lus lossis tsis yuav tus TSWV tej lus ntuas. Nws tsis cia siab rau tus TSWV lossis tsis thov tus TSWV pab. Nws cov nomtswv zoo ib yam li cov tsov ntxhuav uas nyooj laws xwb; nws cov txiav txim zoo ib yam li cov hma uas tshaib plab heev, noj ntau thiab tsis tseg ib nyuag pobtxha seem cia rau tagkis li. Cov cev Vajtswv lus tsis muab siab rau ua lawv tej haujlwm, tiamsis ntxias noj ntxias haus nkaus xwb; cov povthawj ua rau qhov chaw dawbhuv tsis tseemceeb lawm thiab hloov Vajtswv txoj kevcai raws li lawv lub siab nyiam. Tiamsis tus TSWV tseem nyob hauv lub nroog; nws ncaj ncees thiab tsis ua txhaum li. Nws ua ncaj ncees rau nws haivneeg txhua tagkis tsis tu ncua li. Txawm li ntawd los cov neeg tsis ncaj ncees tseem ua txhaum qees tsis paub txajmuag li. Tus TSWV hais tias, “Kuv twb coj txhua haivneeg mus tas huv tibsi lawm; kuv twb muab lawv tej nroog rhuav puastsuaj tas, tseg lawv tej ntsa loog thiab tej chaw tsomfaj tawg ntsoog ntxaws cia lawm xwb. Tej nroog ua suabpuam tas, thiab tej kev nphob xuav tsis muaj leejtwg taug li. Kuv xav hais tias kuv haivneeg yuav hwm kuv thiab yuav mloog kuv tej lus ntuas, thiab lawv yuav nco qab ntsoov tej lus uas kuv tau qhia rau lawv. Tiamsis tsis ntev xwb lawv tseem ua phem tshaj li uas lawv ibtxwm ua los lawm.” Tus TSWV hais tias, “Nej tos mentsis, tos txog hnub uas kuv txiav txim rau txhua haivneeg tso. Kuv yeej txiav txim siab yuav sau txhua haivneeg thiab txhua lub tebchaws los nyob ua ke thiab yuav muab kuv txojkev chim hliv rau lawv. Thoob plaws lub ntiajteb yuav raug kev puastsuaj tas los ntawm cov hluavtaws uas yog kuv txojkev chim. “Ces kuv yuav muab txhua haivneeg hloov, thiab lawv yuav pehawm kuv tib leeg xwb tsis pe lwm tus vajtswv li lawm. Lawv txhua tus yuav mloog kuv lus. Txawm yog kuv haivneeg uas tawg ua sab ua sua mus nyob deb rau nram tebchaws Sudas lawm los lawv yeej yuav coj khoom tuaj fij rau kuv. Thaum txog lub sijhawm ntawd, nej cov uas yog kuv haivneeg yuav tsis txajmuag rau tej uas nej tau ntxeev siab tawmtsam kuv lawm. Kuv yuav muab txhua tus neeg khavtheeb thiab muaj plhus tshem tawm kom tas, thiab nej yuav tsis ntxeev siab rau kuv saum kuv lub Roob Dawbhuv ib zaug ntxiv li lawm. Kuv yuav cia cov neeg txo hwjchim thiab cov neeg txomnyem nrog nej nyob, lawv thiaj yuav tuaj thov kuv pab lawv. Cov Yixalayees uas seem yuav tsis ua txhaum rau leejtwg, tsis hais lus dag, lossis dag ntxias lwm tus. Lawv yuav vammeej thiab ua neej nyob kaj siab lug tsis ntshai leejtwg li.” Cov Yixalayees, cia li hu nkauj thiab qw zoo siab! Lub nroog Yeluxalees, cia li zoo siab kom kawg koj lub siab lub ntsws! Tus TSWV twb tseg tsis rau txim rau koj lawm; nws twb muab koj cov yeebncuab tshem tawm tas huv tibsi lawm. Tus TSWV uas yog cov Yixalayees tus Vajtswv yeej nrog nraim koj nyob; nimno tsis txhob ntshai tej kev puastsuaj ib yam dabtsi hlo li lawm. Thaum txog lub sijhawm ntawd lawv yuav hais rau lub nroog Yeluxalees tias, “Lub Nroog Xi-oos, koj tsis txhob ntshai! Tsis txhob cia koj ob txhais tes tsaug leeg hlo li! Tus TSWV uas yog nej tus Vajtswv yeej nrog nraim nej nyob; nws lub hwjchim ua rau nej kovyeej lawm! Tus TSWV yuav txaus siab kawg rau nej vim nws txojkev hlub, nws yuav pub nej muaj lub neej tshiab. Nws yuav hu nkauj thiab zoo siab heev rau nej ib yam li cov neeg uas zoo siab rau rooj noj rooj haus.” Tus TSWV hais tias, “Kuv twb tshem txojkev puastsuaj tawm ntawm nej thiab twb tshem nej txojkev txajmuag tawm huv tibsi lawm. Tabtom txog lub sijhawm lawm lauj! Kuv yuav rau txim rau cov neeg uas tsimtxom nej; kuv yuav cawm txhua tus uas cegtawv thiab yuav coj cov neeg uas raug ntes rov qab los tsev; kuv yuav muab lawv txojkev txajmuag hloov ua kev tau ntsejmuag, thiab txhua haivneeg hauv ntiajteb yuav qhuas lawv. Tabtom txog lub sijhawm lawm lauj! Kuv yuav coj nej cov uas tawg mus nyob ua sab ua sua rov los tsev; kuv yuav ua kom nej lub koob lub npe nrov ncha moo lug mus thoob ntiajteb; thiab kuv yuav ua kom nej rov muaj kev vammeej dua ib zaug ntxiv.” Tus TSWV yog tus hais li ntawd. Thaum Huabtais Dali-us kav lub tebchaws Pawxias tau ob xyoo lawm, lub rau hli ntuj hnub xiab ib, tus TSWV los hais rau Hakais tus uas cev Vajtswv lus. Tus TSWV cov lus, yog hais rau Se-atiyees tus tub Xelunpanpees uas ua tswvxeev kav lub xeev Yudas, thiab hais rau tus Povthawj Hlob Yausuas uas yog Yehauxadas tus tub. Tus TSWV uas muaj hwjchim loj hais rau Hakais tias, “Cov neeg sawvdaws hais tias lub sijhawm no tseem tsis tau yog lub caij uas yuav txhim kho lub Tuamtsev.” Yog li ntawd, tus TSWV thiaj muab cov lus no rau Hakais tus uas cev Vajtswv lus kom mus hais rau cov neeg sawvdaws hais tias, “Kuv haivneeg, vim li cas nej twb nyob tej tsev zoo zoo lawm, tiamsis kuv lub Tuamtsev pob puas tas li?” Nej puas pom tej xwmtxheej uas tabtom yuav los raug nej? Nej cog qoob ntau, tiamsis nej sau tau tsawg. Nej muaj zaub mov noj, tiamsis tsis tsau. Nej muaj cawv txiv hmab haus, tiamsis tsis qaug. Nej muaj ris tsho hnav, tiamsis tsis sov. Tej neeg uas ua haujlwm tau nyiaj los tsis txaus siv. Nej puas pom hais tias, yog vim li cas thiaj muaj tej xwmtxheej no los raug nej? Nej cia li mus pem tej roob thiab txiav ntoo los kho lub Tuamtsev; kuv thiaj yuav txaus siab, thiab neeg thiaj tau chaw tuaj pehawm kuv kom tsimnyog. “Nej cia siab hais tias yuav sau tau qoobloo ntau, tiamsis nej sau tau tsawg kawg li. Thiab thaum nej coj tej qoobloo los rau hauv tsev, kuv yuav muab tshuab kom ya tas. Vim li cas kuv thiaj ua li ntawd? Rau qhov thaum kuv lub Tuamtsev pob puas tas, nej txhua tus nyias rau siab ntso ua nyias lub tsev nkaus xwb. Twb yog vim li ntawd lub ntuj thiaj tsis muaj nag los, thiab lub ntiajteb tsis pub kom nej tej qoobloo tuaj taus li. Kuv tso ntuj qhuav teb nkig los rau lub tebchaws, saum tej roob, tej teb npleg, teb txiv hmab thiab teb txiv ntoo roj, txhua yam qoobloo uas tuaj hauv av, neeg thiab tsiaj txhu, thiab txhua yam uas nej cog ntawd huv tibsi.” Xelunpanpees, Yausuas, thiab tagnrho cov neeg uas raug luag ntes mus thiab tau rov qab tim tebchaws Npanpiloos los, tau ua raws li tus TSWV uas yog lawv tus Vajtswv tej lus. Lawv ntshai thiab hwm tus cevlus Hakais uas yog tus TSWV tus tubtxib kawg li. Hakais thiaj qhia tus TSWV tej lus rau cov pejxeem li no hais tias: “Kuv yuav nrog nraim nej nyob, ntawm no yog kuv tej lus cog tseg rau nej.” Tus TSWV tshoov Xelunpanpees uas yog tus tswvxeev uas kav lub xeev Yudas, Yausuas uas yog tus Povthawj Hlob, thiab tagnrho cov neeg uas raug luag ntes mus thiab tau rov los siab kom lawv txhua tus txhim kho lub Tuamtsev. Lawv thiaj pib txhim kho tus TSWV uas yog lawv tus Vajtswv uas muaj hwjchim loj kawg nkaus lub Tuamtsev, thaum lub rau hli ntuj hnub nees nkaum plaub tom qab uas Dali-us ua huabtais kav lub tebchaws tau ob xyoos lawm. Lub xya hli ntuj hnub nees nkaum ib uas yog tib lub xyoos ntawd, tus TSWV los hais rau Hakais uas yog tus cev Vajtswv lus dua ib zaug ntxiv. Tus TSWV kom Hakais mus hais rau Xelunpanpees uas yog tus tswvxeev uas kav lub xeev Yudas, hais rau Yausuas uas yog tus Povthawj Hlob, thiab hais rau cov pejxeem sawvdaws tias, “Nej puas muaj leejtwg nco tau hais tias lub Tuamtsev thaum ub zoo npaum li cas? Nimno nej saib zoo li cas lawm? Nej saib lub Tuamtsev zoo li tsis tseemceeb li lawm. Tiamsis nimno, nej txhua tus tsis txhob qaug zog; nej cia li rau siab ntso ua haujlwm, rau qhov kuv nrog nraim nej nyob. Thaum nej khiav nram tebchaws Iziv los, kuv tau coglus rau nej hais tias, kuv yuav nrog nraim nej nyob. Yog li ntawd kuv tseem nrog nraim nej nyob, nej tsis txhob ntshai. “Tshuav tsis ntev kuv yuav co lub ntuj thiab lub ntiajteb, thooj av thiab dej hiavtxwv. Kuv yuav rhuav txhua haivneeg, thiab yuav coj lawv tej nyiaj tej kub los tso rau ntawm no kom lub Tuamtsev thiaj muaj nyiaj puv nkaus. Tej nyiaj thiab tej kub uas nyob hauv ntiajteb no puavleej yog kuv li huv tibsi. Lub Tuamtsev tshiab no yuav zoo tshaj lub qub thaum ub; kuv yuav pub kom kuv haivneeg muaj kev vammeej thiab nyob kaj siab lug qhov ntawd.” Tus TSWV uas muaj hwjchim loj kawg nkaus yog tus hais tej lus no. Thaum lub cuaj hli ntuj hnub nees nkaum plaub uas Dali-us ua huabtais kav tebchaws tau ob xyoos lawm, tus TSWV uas muaj hwjchim loj kawg nkaus rov los hais rau Hakais uas yog tus cev Vajtswv lus dua ib zaug ntxiv. Tus TSWV hais tias, “Koj cia li nug cov povthawj raws li tej kev tswjhwm no: Yog hais tias leejtwg muab ib thooj nqaij uas twb muab fij theej txhoj lawm, ntsaws rau hauv nws lub nqaws tsho ntev nqa tawm mus, thiab yog hais tias nws lub tsho ntawd chwv tej ncuav, tej zaub mov, tej cawv txiv hmab, tej txiv ntoo roj, lossis txhua yam khoom noj, puas yuav ua rau tej khoom ntawd dawbhuv lawm?” Thaum uas tus cev Vajtswv lus nug li ntawd tas lawm, cov povthawj teb hais tias, “Yeej tsis huv li.” Ces Hakais nug hais tias, “Yog muaj ib tug neeg twg ua rau nws tsis huv vim nws mus kov tus neeg tuag lawm, thiab nws ho los kov tej zaub mov no, puas yuav ua rau tej zaub mov ntawd tsis huv thiab?” Cov povthawj teb hais tias, “Yog tiag, yeej ua rau tej zaub mov ntawd tsis huv lawm.” Hakais hais tias, “Tus TSWV hais tias haivneeg uas nyob hauv lub tebchaws no thiab txhua yam uas cov neeg no khwv tau los zoo ib yam li ntawd; thiab txhua yam uas lawv muab fij rau saum lub thaj yeej tsis huv lawm.” Tus TSWV hais tias, “Nej puas pom tej xwmtxheej uas muaj los raug nej? Ua ntej uas nej pib txhim kho lub Tuamtsev, nej yuav mus rau ntawm lub txhab nplej, cia siab hais tias yuav yawm tau nees nkaum kawm nplej, tiamsis tsuas yawm tau kaum kawm xwb. Nej yuav mus rau ntawm qhov chaw tsuam txiv hmab, daus kom tau tsib caug thoob kua txiv hmab, tiamsis nej tsuas daus tau nees nkaum thoob xwb. Kuv yuav tso cua los nplawm thiab tso lawg los ntaus txhua yam uas nej cog kom puastsuaj tas, txawm li ntawd los nej tseem tsis tau tso lub siab qub tseg li thiab. Hnub no yog hnub nees nkaum plaub lub cuaj hli ntuj, yog hnub uas pua tau lub plag Tuamtsev tiav log lawm. Nej sim saib txij no mus yuav muaj dabtsi tshwmsim tuaj? Txawm yog tsis tshuav nplej, tsis tshuav txiv hmab, tsis tshuav txiv ncuavpias, tsis tshuav txiv ntsiavkws thiab tsis tau txog caij txi txiv ntoo roj los txij no mus kuv yeej yuav foom koob hmoov rau nej.” Hnub nees nkaum plaub lub hlis ntawd, tus TSWV rov hais rau Hakais dua zaum ob kom nws mus hais rau Xelunpanpees uas yog tus tswvxeev uas kav lub xeev Yudas hais tias, “Kuv tabtom yuav co lub ntuj thiab lub ntiajteb, thiab muab txhua lub zwmtxwv ntawm txhua lub tebchaws ntxeev thiab txo lawv tej hwjchim. Kuv yuav muab lawv tej tsheb nees thiab cov neeg uas tsav tsheb nees ntxeev; tej nees yuav tuag tas, thiab lawv cov neeg uas caij nees ib leeg yuav tig tua ib leeg kom tuag tas. Xelunpanpees uas yog kuv tus tubtxib, hnub ntawd kuv yuav coj koj mus, thiab kuv yuav tsa koj tuav kuv lub npe kav tebchaws. Koj yog tus uas kuv xaiv tseg lawm.” Tus TSWV uas muaj hwjchim loj kawg nkaus yog tus hais tej lus no. Xyoo ob thaum lub yim hli ntuj uas Dali-us ua huabtais kav tebchaws Pawxias, tus TSWV tau hais cov lus no rau Xakhaliyas uas yog tus cev Vajtswv lus uas yog Npelekhiyas tus tub, thiab yog Idaus tus xeebntxwv. Tus TSWV uas muaj hwjchim loj kawg nkaus hais rau Xakhaliyas kom mus hais rau cov neeg tias, “Kuv uas yog tus TSWV chim heev rau nej cov yawgkoob, tiamsis nimno kuv hais rau nej tias, ‘Nej cia li rov los cuag kuv, thiab kuv yuav rov los cuag nej. Tsis txhob ua li nej cov yawgkoob ua tas los lawm. Yav thaum ub cov cevlus tau muab kuv tej lus coj mus piav qhia lawv, kom lawv tsis txhob ua kev phem kev qias, cia li tso lub neej uas ua kev txhaum tseg. Tiamsis lawv tsis mloog lossis tsis quavntsej kuv tej lus li. Nej cov yawgkoob thiab cov cev Vajtswv lus lus ntawd thiaj tsis muaj sia nyob tas lawm. Kuv tej lus thiab tej kevcai, kuv twb qhia rau kuv cov tubtxib uas yog cov cevlus lawm, lawv tseem tsis tau muab qhia rau nej cov yawgkoob thiab los? Yog li ntawd, lawv thiaj lees txim hais tias, tus TSWV uas muaj hwjchim loj kawg nkaus txiav txim rau peb raws li tej uas peb tau ua, thiab yeej tsimnyog peb raug raws li tus TSWV tau npaj siab lawm.’ ” Xyoo ob thaum lub kaum ib hlis ntuj (yog lub hli Senpas) hnub nees nkaum plaub uas Dali-us ua huabtais kav tebchaws ntawd, muaj ib hmos kuv ua yogtoog pom tus TSWV los hais ib co lus rau kuv. Kuv pom tus TSWV ib tug timtswv caij rawv ib tug txiv nees liab. Nws txawm los nres rau ntawm ib koog ntoo miles uas nyob hauv ib lub hav, thiab nyob tom nws qab muaj dua ib cov nees liab, nees txaij thiab nees dawb. Kuv nug nws hais tias, “Tus TSWV, cov nees no yog piv txog dabtsi?” Nws teb hais tias, “Kuv yuav qhia rau koj, saib cov nees no yog piv txog dabtsi. Tus TSWV tso cov nees ntawd tuaj tshuaj lub ntiajteb.” Cov nees ntawd txawm rov los tshabxo rau tus timtswv ceebtsheej hais tias: “Peb tau mus ncig thoob plaws lub ntiajteb, peb pom lub ntiajteb nyob ntsiag to thiab tsis muaj leejtwg pab li.” Ces tus timtswv ceebtsheej hais tias, “Tus TSWV uas muaj hwjchim loj kawg nkaus, koj yeej chim rau lub nroog Yeluxalees thiab tej nroog hauv tebchaws Yudas los tau xya caum xyoos no lawm. Tseem tshuav ntev li cas koj thiaj li yuav hlub thiab hmov tshua lawv?” Tus TSWV teb ib co lus nplig siab rau tus timtswv ceebtsheej ntawd, thiab tus timtswv ceebtsheej hais kom kuv cia li qhia raws li tus TSWV uas muaj hwjchim loj kawg nkaus tej lus uas hais tias: “Kuv yeej hlub tshua Yeluxalees uas yog kuv lub nroog dawbhuv, thiab kuv chim kawg nkaus rau txhua haivneeg uas muaj kev zoo siab nyob ntsiag to thiab muaj kev thajyeeb lug ntawd. Thaum kuv thim kuv txojkev chim los rau kuv haivneeg ib nyuag ntu ntawd, txhua haivneeg ua rau kuv haivneeg raug txomnyem kawg li lawm. Yog li ntawd, kuv thiaj rov los rau hauv lub nroog Yeluxalees thiab qhia kuv txojkev hlub rau lub nroog ntawd. Kuv yuav rov txhim kho lub Tuamtsev dua tshiab, thiab yuav rov txhim kho lub nroog kom zoo.” Tus timtswv ceebtsheej tseem kom kuv qhia ntxiv hais tias: “Tus TSWV uas muaj hwjchim loj kawg nkaus hais tias, nws tej nroog yuav rov vammeej dua, nws yuav pab lub nroog Yeluxalees dua ib zaug ntxiv thiab hu hais tias yog nws lub nroog.” Muaj dua ib zaj yogtoog uas kuv pom plaub tug kub nyuj. Kuv txawm nug tus timtswv ceebtsheej uas nrog kuv tham ntawd hais tias, “Cov kub nyuj no piv txog dabtsi?” Nws teb kuv hais tias, “Cov kub nyuj no piv txog tej tebchaws uas muaj hwjchim hauv lub ntiajteb uas tau muab cov Yudas, cov Yixalayees thiab cov neeg hauv lub nroog Yeluxalees raws khiav ri sua rau ub rau no.” Ces tus TSWV coj kuv mus saib plaub tug neeg ua haujlwm uas ib leeg tuav rawv ib rab rauj. Kuv nug hais tias, “Cov txivneej no tabtom tuaj ua dabtsi?” Nws teb hais tias, “Lawv tuaj hem thiab ntaus txhua haivneeg uas tuaj muab lub tebchaws Yudas tsuj puastsuaj tas, thiab muab cov Yudas raws khiav mus nyob ua sab ua sua lawm.” Kuv ua dua ib zaj yogtoog pom ib tug txivneej tuav rawv ib txoj hlua ntsuas ntawm nws txhais tes. Kuv nug nws hais tias, “Koj yuav mus qhov twg?” Nws teb hais tias, “Kuv yuav mus ntsuas lub nroog Yeluxalees, saib ntev thiab dav npaum li cas.” Ces kuv pom tus timtswv ceebtsheej uas pheej nrog kuv tham ntawd txav zog mus rau tom hauv ntej thiab muaj dua ib tug timtswv ceebtsheej los nrog nws tham. Thawj tug timtswv ceebtsheej hais rau lwm tus timtswv ceebtsheej hais tias, “Koj cia li khiav mus hais rau tus tub hluas uas tuav txoj hlua ntsuag ntawd tias, yuav ua tsis tau ntsa yeej thaiv lub nroog Yeluxalees, rau qhov muaj neeg thiab tsiaj txhu nyob coob heev rau hauv lub nroog. Tus TSWV coglus hais tias, nws yuav ua tus ntsa yeej nplaim taws thaiv thiab tsomkwm puagncig lub nroog, thiab nws lub tshwjchim yuav ci ntsa iab hauv lub nroog ntawd.” Yog leejtwg ntaus nej, ces yog nws ntaus kuv lub ntsiabmuag ntag.” Yog li ntawd, tus TSWV uas muaj hwjchim loj kawg nkaus txib kom kuv coj nws cov lus mus qhia rau txhua haivneeg uas tau tuaj huab nws haivneeg hais tias: “Tus TSWV yuav tawmtsam nej, thiab cov neeg uas twb ua nej qhev ib zaug lawm yuav tuaj huab nej.” Thaum tej no tshwm tuaj, txhua tus yuav paub hais tias tus TSWV uas muaj hwjchim loj kawg nkaus txib kuv tuaj ntag. Tus TSWV hais tias, “Cov neeg hauv Yeluxalees, nej cia li hu nkauj zoo siab! Kuv tabtom los nrog nej nyob lawm!” Thaum lub sijhawm ntawd yuav muaj ntau haivneeg los cuag tus TSWV thiab ua nws haivneeg. Nws yuav nrog nej nyob thiab nej yuav paub hais tias twb yog nws txib kuv tuaj cuag nej. Cov Yudas yuav tau rov los ua tus TSWV haivneeg nyob hauv nws lub tebchaws uas dawbhuv dua ib zaug ntxiv, thiab lub nroog Yeluxalees yuav yog lub nroog uas nws hlub tshaj plaws tej nroog huv tibsi. Nej txhua tus nyob twjywm tabmeeg tus TSWV, rau qhov nws tabtom nqis ntawm nws lub chaw dawbhuv los. Kuv ua dua ib zaj yogtoog, tus TSWV ua rau kuv pom tus Povthawj Hlob Yausuas tabtom sawv ntawm tus TSWV tus timtswv hauv ntej. Thiab Ntxwgnyoog sawv ntawm Yausuas sab xis npaj rawv tos yuav kaug Yausuas. Tus TSWV tus timtswv hais rau Ntxwgnyoog hais tias, “Ntxwgnyoog, thov kom tus TSWV rau txim rau koj! Thov kom tus TSWV uas hlub lub nroog Yeluxalees rau txim rau koj. Tus neeg no zoo ib yam li tus pas ntoo uas twb muab rho tawm hauv qhovcub los lawm.” Yausuas hnav ib cev ris tsho lo av heev sawv qhov ntawd. Tus timtswv ceebtsheej hais rau cov timtswv uas sawv ntawm nws hauv ntej tias, “Cia li muab cev ris tsho lo av heev uas tus txivneej ntawd hnav hle povtseg.” Thiab nws hais rau Yausuas tias, “Kuv twb muab koj tej kev txhaum tshem tas lawm, kuv yuav muab dua ib cev ris tsho tshiab rau koj hnav.” Nws hais kom cov timtswv ceebtsheej uas nrog nws tuaj ntawd muab ib pluaj ntaub uas huv heev los khi Yausuas taubhau. Lawv ua raws li nws hais, thiab lawv muab ib cev ris tsho tshiab los rau Yausuas hnav thaum uas tus TSWV tus timtswv tseem nyob ntawd. Ces tus timtswv ceebtsheej qhia rau Yausuas hais tias tus TSWV uas muaj hwjchim loj kawg nkaus hais tias: “Yog koj coj raws li kuv tej kevcai thiab lees ua tej haujlwm uas kuv muab cob rau koj, ces koj yuav tau ua tus saib kuv lub Tuamtsev thiab tej chav tsev uas nyob rau hauv, thiab kuv yuav mloog koj tej lus thov ib yam li kuv mloog cov timtswv uas nyob ntawm kuv xubntiag tej lus thov. Yausuas uas yog tus Povthawj Hlob, koj cia li mloog kuv hais; thiab nej cov povthawj uas yog nws tsoom phoojywg cia li mloog kuv hais, nej sawvdaws yog lub cim zoo rau yav tom ntej: kuv yuav coj kuv tus tubtxib uas hu ua Tus Ceg los rau nej pom! Kuv muab ib lub pobzeb uas muaj xya nreej los tso rau ntawm Yausuas xubntiag. Kuv yuav txaug ib cov lus rau ntawm lub pobzeb thiab tib hnub xwb kuv yuav tshem lub tebchaws no tej kev txhaum mus kom tas huv tibsi. Thaum txog hnub ntawd, nyias yuav caw nyias tej phoojywg nruab ze tuaj nyob hauv nej tej vaj txiv hmab thiab txiv ncuavpias, muaj kev zoo siab, kev thajyeeb thiab kev kaj siab lug.” Tus timtswv ceebtsheej uas pheej nrog kuv tham rov los rau ntawm kuv dua, thiab tsa kuv ib yam li tsa tus neeg uas tsaug zog sawv. Nws nug kuv hais tias, “Koj pom dabtsi?” Kuv teb hais tias, “Kuv pom ib tug ncej txawb teeb uas yog muab kub ua, thiab muaj ib lub tais ntim roj txawb rau saud. Saum tus ncej txawb teeb ntawd muaj xya lub teeb uas nyias muaj nyias ib tug teebxeeb. Dua li ntawd tseem muaj ob tsob txiv ntoo roj nyob ntawm tus ncej txawb teeb ntawd, ib tsob nyob ib sab.” Ces kuv nug tus timtswv ceebtsheej hais tias, “Tus TSWV, tej no yog piv txog dabtsi?” Nws teb kuv hais tias, “Koj tsis paub los?” Kuv teb nws hais tias, “Tus tswv, kuv tsis paub li.” Tus timtswv ceebtsheej kom kuv coj tus TSWV cov lus no mus qhia rau Xelunpanpees hais tias, “Koj yuav ntaus yeej rog, tiamsis tsis yog qhov uas koj muaj tubrog coob lossis koj lub zog, tiamsis yog kuv tus ntsujplig lub hwjchim xwb. Txawm yog muaj kev covnyom loj luaj lub hauv roob los yuav yaj ntshis ntawm koj hauv ntej mus. Koj yuav rov txhim kho lub Tuamtsev dua, thaum uas koj tso lub pobzeb kawg rau ntawm nws qhov chaw, cov neeg yuav qw hais tias, ‘Zoo nkauj kawg, zoo kawg nkaus li lauj!’ ” Tus TSWV rov hais ib co lus rau kuv dua. Nws hais tias, “Xelunpanpees twb pua lub Tuamtsev tas lawm, thiab nws yuav ua kom lub Tuamtsev no tiav. Thaum muaj li no lawm, kuv haivneeg yuav paub hais tias, kuv yog tus uas tau txib koj mus cuag lawv. Tus timtswv ceebtsheej ntawd hais rau kuv tias, “Xya lub teeb ntawd yog tus TSWV xya lub qhovmuag uas pom thoob plaws lub ntiajteb no.” Lawv twb tas kev cia siab lawm, rau qhov lawv tsis pom muaj txojkev zoo ntxiv lawm. Tiamsis lawv yuav pom Xelunpanpees rau siab ntso ua lub Tuamtsev, thiab lawv yuav zoo siab heev.” Ces kuv nug nws hais tias, “Yog li ntawd, ob tsob txiv ntoo roj uas ib tsob nyob ib sab ntawm tus ncej txawb teeb yog txhais li cas? Thiab ob tus ceg ntoo roj uas ib tug nyob ib sab ntawm tus kais kub uas hliv roj ntawd yog txhais li cas?” Nws teb kuv hais tias, “Koj tsis paub los?” Kuv teb hais tias, “Kuv tsis paub li.” Ces nws hais tias, “Ntawd yog piv txog ob tug neeg uas Vajtswv tau xaiv thiab muab txhawb meejthawj los ua tus TSWV uas kav tagnrho lub ntiajteb no tes haujlwm.” Kuv rov tsa qhovmuag ntsia, thiab zaum no kuv pom ib thooj ntawv ya saum nruab ntug. Tus timtswv ceebtsheej nug kuv hais tias, “Koj pom dabtsi?” Kuv teb nws hais tias, “Kuv pom ib thooj ntawv ya saum nruab ntug; ntev nees nkaum tshim thiab dav kaum tshim.” Ces nws rov hais rau kuv tias, “Thooj ntawv ntawd yog sau tej lus foom phem uas yuav coj tawm mus kom thoob lub tebchaws. Nyob rau ntawm thooj ntawv ntawd muaj ib sab sau hais tias, txhua tus tubsab yuav raug muab tshem tawm hauv lub tebchaws no mus; thiab nyob rau ib sab sau hais tias, txhua tus uas coglus dag yuav raug tshem tawm mus ib yam nkaus. Tus TSWV uas muaj hwjchim loj kawg nkaus hais tias, nws yuav tso tej lus foom phem tawm mus, thiab tej lus ntawd yuav mus nkag rau hauv txhua tus tubsab thiab txhua tus uas coglus dag tej tsev. Tej lus ntawd yuav nyob hauv lawv tej tsev thiab ua kom lawv puastsuaj tas.” Tus timtswv ceebtsheej rov los tshwm rau kuv pom thiab hais rau kuv tias, “Koj saib! Muaj dua ib yam tshwm tuaj lawm thiab!” Kuv nug hais tias, “Qhov ntawd yog dabtsi?” Nws teb hais tias, “Yog ib lub tawb uas piv txog tej kev txhaum uas lub tebchaws no ua.” Lub hau khwb lub tawb ntawd yog muab tooj dawb ua. Thaum kuv tsa qhovmuag ntsia, lub hau txawm qhib hlo thiab muaj ib tug pojniam zaum hauv lub tawb ntawd! Tus timtswv ceebtsheej hais tias, “Tus pojniam ntawd piv txog kev phem kev qias.” Ces tus timtswv ceebtsheej txawm muab tus pojniam ntawd nias rov rau hauv lub tawb thiab muab lub hau khwb kiag rau lawm. Kuv tsa hlo qhovmuag ntsia thiab pom ob tug pojniam ya ncaj nraim los rau ntawm kuv, ob phab tis ntxuaj muaj zog ib yam li tus noog dej. Nkawd cia li tsawv nkaus lub tawb thiab ya plaws lawm. Kuv nug tus timtswv ceebtsheej hais tias, “Nkawd nqa lub tawb mus rau qhov twg lawm?” Nws teb hais tias, “Nkawd nqa mus rau tim tebchaws Npanpiloos lawm, nkawd yuav ua ib lub tuamtsev rau lub tawb ntawd. Thaum twg ua tau lub tuamtsev lawm, nkawd yuav muab lub tawb ntawd tso rau hauv, rau tej neeg tuaj pehawm.” Kuv ua dua ib zaj yogtoog. Zaum no kuv pom plaub lub tsheb nees tabtom tawm hauv ob lub roob tooj dag kis nruab nrab tuaj. Thawj lub tsheb yog cov nees liab luag, lub tsheb ob yog cov nees dub luag, lub tsheb peb yog cov nees dawb luag, thiab lub tsheb plaub yog cov nees txaij luag. Ces kuv nug tus timtswv ceebtsheej hais tias, “Tus TSWV, cov nees ntawd piv txog dabtsi?” Nws teb kuv hais tias, “Plaub pab nees no piv txog plaub nthwv cua; lawv tabtom tawm ntawm tus TSWV uas kav lub ntiajteb no lub xubntiag tuaj.” Lub tsheb uas cov nees dub luag yog mus rau sab qaumteb thiab mus rau Npanpiloos lawm, cov nees dawb mus rau sab hnubpoob, thiab cov nees txaij mus rau nram lub tebchaws uas nyob sab qabteb. Thaum uas cov nees txaij tawm tuaj, lawv tos tsis taus yuav rawm mus tshuaj xyuas lub ntiajteb. Tus timtswv ceebtsheej thiaj hais tias, “Nej cia li mus tshuaj xyuas lub ntiajteb!” ces lawv txawm mus lawm. Tus timtswv ceebtsheej qw nrov nrov rau kuv hais tias, “Cov nees uas mus rau sab qaumteb uas yog mus rau tim tebchaws Npanpiloos lawm, ua rau tus TSWV txojkev chim txias lawm.” Tus TSWV muab cov lus no cob rau kuv. Nws hais tias, “Koj nqa tej nyiaj tej kub uas Heledais, Taunpiyas thiab Yedayas muab mus tso rau hauv Xefaniyas tus tub Yauxiyas lub tsev. Lawv yog cov uas raug ntes mus thiab nyuam qhuav rov tim tebchaws Npanpiloos los. Cia li muab tej nyiaj tej kub uas lawv muab ntawd, nchuav ua ib lub kausmom yeebkoob thiab muab rau Yausuas uas yog Yehauxadas tus tub ntoo. Koj qhia rau nws hais tias tus TSWV uas muaj hwjchim loj kawg nkaus hais li no: ‘Tus txivneej uas hu ua Tus Ceg, lub neej yuav vammeej nyob ntawm qhov chaw uas nws nyob thiab rov txhim kho tus TSWV lub Tuamtsev. Nws yog tus uas yuav ua tus TSWV lub Tuamtsev thiab txais lub meejmom ua tus vajntxwv, thiab nws yuav kav nws haivneeg. Muaj ib tug povthawj yuav sawv ntawm nws lub zwmtxwv, nkawd yuav ua haujlwm sib haumxeeb thiab nyob kaj siab lug.’ Muab lub kausmom yeebkoob ntawd khaws cia rau hauv tus TSWV lub Tuamtsev ua lub cim nco txog Heledais, Taunpiyas, Yedayas thiab Yauxiyas.” Cov neeg uas nyob deb yuav tuaj pab txhim kho tus TSWV lub Tuamtsev. Thaum txhim kho lub Tuamtsev lawm, nej yuav paub hais tias tus TSWV uas muaj hwjchim loj kawg nkaus txib kuv tuaj cuag nej. Tej no yeej yuav tshwmsim yog hais tias nej mloog tus TSWV uas yog nej tus Vajtswv tej lus. Xyoo plaub thaum lub cuaj hli ntuj (uas yog lub hli Kislev) hnub xiab plaub uas Dali-us ua vajntxwv kav tebchaws, tus TSWV hais ib co lus rau kuv. Cov neeg hauv Npethees tso Salexes, Lenkemelej, thiab lawv cov neeg tuaj rau hauv tus TSWV uas muaj hwjchim loj kawg nkaus lub Tuamtsev, lawv tuaj thov kom tus TSWV foom koob hmoov rau lawv, lawv nug cov povthawj thiab cov cevlus hais tias: “Puas tsimnyog uas peb quaj ntsuag vim lub Tuamtsev raug puastsuaj tas, thiab ua kevcai yoo mov rau thaum lub tsib hlis ntuj raws li peb ibtxwm ua los ntau xyoo lawm?” Ntawm no mus yog cov lus uas tus TSWV hais rau kuv. Nws hais tias, “Koj cia li qhia rau cov pejxeem uas nyob hauv lub tebchaws no thiab cov povthawj hais tias, qhov uas lawv ua kevcai yoo mov thiab quaj ntsuag thaum lub tsib hlis thiab lub xya hli ntuj uas tau xya caum xyoo los no tsis yog ua hwm kuv. Thaum lawv noj lawv haus ntawd, tsuas yog ua kom lawv txaus siab nkaus xwb.” Ntawm no yog tej lus uas tus TSWV hais rau cov cevlus txheej thaum ub uas lub nroog Yeluxalees tseem vammeej thiab muaj neeg nyob puv nkaus hauv, thiab thaum ntawd cov neeg tsis yog nyob hauv tej zos uas nyob ibncig lub nroog ntawd xwb, tiamsis tseem nyob mus rau sab qabteb thiab thoob plaws ntawm tej taw roob uas nyob sab hnubpoob huv tibsi. Tus TSWV hais cov lus no rau Xakhaliyas tias: “Kuv twb qhia cov lus no rau kuv haivneeg thaum ub los lawm hais tias: ‘Nej yeej yuav pom txojkev ncaj ncees nyob hauv nej kev coj noj coj ua, thiab nej yuav tsum ua siab dawb siab zoo thiab ib leeg hlub ib leeg. Nej tsis txhob tsimtxom cov pojntsuam, tej menyuam ntsuag thiab cov neeg txawv tebchaws uas nrog nej nyob, lossis tus uas raug kev txomnyem. Thiab tsis txhob nyas nrhw ua phem rau ib leeg tus twg li.’ “Tiamsis kuv haivneeg tawv ncauj heev tsis mloog kuv lus li. Lawv ntsaws lawv tej pobntseg, thiab lawv lub siab tawv ib yam li pobzeb. Vim lawv tsis mloog kuv tej lus qhuab qhia uas kuv txib cov cevlus thaum ub mus qhia lawv, kuv thiaj li chim heev. Rau qhov lawv tsis mloog kuv hais; thaum lawv thov, kuv thiaj tsis teb lawv. Kuv muab lawv ntiab tawm mus nyob rau lwm tebchaws ib yam li cua daj cua dub ntsawj. Thiab muab lub tebchaws uas zoo heev no tso tseg nyob qhuav nquas cia tsis muaj leejtwg nyob lawm.” Tus TSWV uas muaj hwjchim loj kawg nkaus hais cov lus no rau Xakhaliyas tias: “Kuv npaj siab ntev los lawm, yuav pab lub nroog Yeluxalees, vim kuv hlub cov neeg hauv lub nroog ntawd heev, yog txojkev hlub uas ua rau kuv chim kawg nkaus rau nws cov yeebncuab. Kuv yuav rov los nyob hauv Yeluxalees uas yog kuv lub nroog dawbhuv. Yuav hu Yeluxalees ua lub nroog uas muaj kev ncaj ncees, thiab yuav muab tus TSWV uas muaj hwjchim loj kawg nkaus lub roob hu ua roob dawbhuv. Cov neeg laus, tsis hais pojniam txivneej, cov laus heev uas nrig pas mus kev lawm xwb, yuav rov tau zaum ntawm tej chaw ua si hauv lub nroog. Thiab tej tub tej ntxhais yuav rov ua si nplawg ntia ntawm tej kev dua ib zaug ntxiv. “Tus TSWV hais tias, tej zaum zaj no yuav nyuaj heev rau cov neeg uas nyob tiam no, tiamsis yeej tsis nyuaj rau kuv hlo li. Kuv yuav cawm kuv haivneeg kom dim ntawm tej tebchaws uas lawv raug ntes mus ua luag qhev, thiab yuav coj lawv tim sab hnubtuaj thiab sab hnubpoob rov los nyob rau hauv lub nroog Yeluxalees. Lawv yuav ua kuv haivneeg thiab kuv yuav ua lawv tus Vajtswv, kuv yuav kav lawv ntawm lub siab dawb paug thiab txojkev ncaj ncees. “Nej cia li kub siab lug! Nimno nej twb hnov tej lus uas cov cev Vajtswv lus hais thaum lub sijhawm uas luag pib pua lub plag tsev uas yog rov txhim kho kuv lub Tuamtsev dua tshiab lawm. Ua ntej lub sijhawm ntawd, yeej tsis muaj leejtwg ntiav taus neeg lossis tej tsiaj los ua haujlwm, thiab yeej tsis muaj leejtwg dim ntawm nws cov yeebncuab li. Kuv ua rau cov neeg ntawd kom ib leeg rov tawmtsam ib leeg. Tiamsis nimno kuv yuav tsis ua rau haivneeg no cov uas seem nyob ib yam li kuv ua yav tas los lawm. Lawv yuav cog lawv tej qoobloo thiab nyob thajyeeb lug; lawv tej txiv hmab yuav txi txiv ncw, av yuav zoo qoob heev, thiab yuav muaj nag ntau. Kuv yuav muab tagnrho tej koob hmoov no rau kuv haivneeg uas seem ntawd. Cov Yudas thiab cov Yixalayees! Yav tas los cov neeg txawv tebchaws ib leeg foom phem rau ib leeg hais tias, ‘Thov kom tej kev puastsuaj uas los raug cov Yudas thiab cov Yixalayees poob los raug koj ib yam nkaus!’ Tiamsis kuv yuav cawm nej, ces cov neeg txawv tebchaws ib leeg yuav rov hais rau ib leeg tias, ‘Thov kom koj tau txais tej koob hmoov uas cov Yudas thiab cov Yixalayees tau txais lawm!’ Yog li ntawd, nej cia li ua siab loj thiab tsis txhob ntshai.” Tus TSWV uas muaj hwjchim loj kawg nkaus hais tias, “Thaum uas nej cov yawgkoob tau ua rau kuv chim, kuv twb npaj siab tso kev puastsuaj los rau lawv thiab kuv yeej tsis hloov siab li, thiab kuv ua raws li kuv tau npaj tseg lawm. Tiamsis nimno kuv npaj siab yuav foom koob hmoov rau cov neeg hauv lub nroog Yeluxalees thiab hauv tebchaws Yudas. Yog li ntawd, nej tsis txhob ntshai. Ntawm no yog tej uas nej yuav tau ua: Ib leeg yuav tsum hais lus tseeb rau ib leeg, txiav txim ncaj ncees hauv tsev tu plaub, qhov uas ua siab dawb siab zoo coj kev thajyeeb los rau sawvdaws. Tsis txhob tuav tswvyim ua phem rau lwm tus. Tsis txhob coglus ua timkhawv tsis tseeb. Kuv ntxub txojkev dag, kev ua tsis ncaj thiab ua nruj ua tsiv.” Tus TSWV uas muaj hwjchim loj kawg nkaus hais tej lus no rau Xakhaliyas tias: “Ua kevcai yoo mov thaum lub plaub hlis, tsib hlis, xya hli thiab lub kaum hli ntuj, yog cov kevcai zoo siab thiab lomzem rau cov neeg Yudas ntag. Nej yuav tsum nyiam qhov tseeb thiab txojkev thajyeeb.” Tus TSWV uas muaj hwjchim loj kawg nkaus hais tias, “Thaum txog lub sijhawm ntawd, yuav muaj neeg coob heev nyob hauv ntau lub nroog tuaj rau hauv lub nroog Yeluxalees. Cov neeg uas tuaj hauv ib lub nroog tuaj, yuav hais rau cov neeg uas tuaj dua lwm lub nroog tuaj hais tias, ‘Peb tabtom tuaj pehawm tus TSWV uas muaj hwjchim loj kawg nkaus thiab thov nws foom koob hmoov rau peb. Nej cia li nrog peb mus los mas!’ Muaj neeg coob heev thiab ntau haivneeg uas muaj hwjchim yuav tuaj pehawm tus TSWV uas muaj hwjchim loj kawg nkaus hauv lub nroog Yeluxalees thiab thov nws foom koob hmoov rau lawv. Thaum txog lub sijhawm ntawd, kaum tus neeg txawv tebchaws yuav tuaj cuag ib tug neeg Yudais thiab hais tias, ‘Peb xav nrog nej tau koob hmoov, rau qhov peb hnov hais tias Vajtswv nrog nraim nej nyob.’ ” Ntawm no yog tus TSWV cov lus: Nws tau txiav txim rau lub tebchaws Hadakes thiab lub nroog Damaxes. Tsis yog txiav txim rau txhua xeem Yixalayees xwb, tiamsis txiav txim rau cov Xilias lub tuamceeb nroog uas yog tus TSWV tug, lub nroog Hamas uas nyob rau ntawm tebchaws Hadakes tus ciamteb, thiab tej nroog uas nyob pem Tiles thiab Xidoos, thiab tagnrho lawv tej kev txawj ntse huv tibsi. Lub nroog Tiles tau ua tej chaw fajxwm uas khov heev thaiv nws thiab sau nyiaj sau kub los teeb ua tej pawg cia, ua rau luag saib zoo li tej pawg liamsim xwb. Tiamsis tus TSWV yuav muab txhua yam uas nws muaj tshem mus povtseg. Tus TSWV yuav muab nws tej kev npluanuj pov rau hauv hiavtxwv, thiab lub nroog yuav raug hlawv kom kub hnyiab tas ua tshauv. Lub nroog Asekeloos yuav pom tej xwm no thiab yuav ntshai heev. Lub nroog Nkaxas yuav pom tej xwm no thiab yuav mob siab kawg nkaus. Lub nroog Ekiloos los ib yam nkaus, nws yuav tas kev cia siab thiab ntshai tshee hnyo. Lub nroog Nkaxas yuav tsis muaj vajntxwv, thiab yuav muab lub nroog Asekeloos tso cia ua suabpuam. Ntau haivneeg yuav tuaj nyob sib xyaws ntxaws hauv lub nroog Asedaus. Tus TSWV hais tias, “Kuv yuav muab cov neeg Filitees txo hwjchim kom lawv tsis txhob khavtheeb lawm. Lawv yuav tseg tsis noj nqaij xyaw ntshav, lossis tej khoom noj uas txwv tsis pub noj lawm. Tagnrho cov neeg uas seem yuav tau los ua kuv haivneeg thiab zoo ib yam li xeem Yudas. Ekiloos yuav tau los ua ib feem ntawm kuv haivneeg ib yam li cov Yenpus twb tau los ua lawm. Kuv yuav tsomkwm kuv lub tebchaws thiab tsis pub kom muaj tubrog tuaj tau rau hauv. Kuv yuav tsis pub kom kuv haivneeg raug cov neeg Tiles tsimtxom ntxiv lawm. Rau qhov kuv yeej pom ntsoov kuv haivneeg raug kev txomnyem loj kawg li.” Cov neeg hauv Xi-oos, nej cia li zoo siab, cia li zoo siab! Cov neeg hauv Yeluxalees, nej cia li qw zoo siab hlo! Saib lauj, nej tus vajntxwv tabtom los cuag nej lawm! Nws yog tus ncaj ncees thiab coj kev muaj yeej los, tiamsis nws txo hwjchim thiab caij ib ib tug neesluav los. Tus TSWV hais tias, “Kuv yuav muab tej tsheb nees ua rog tshem tawm ntawm cov Yixalayees, thiab coj tej nees tawm hauv lub nroog Yeluxalees mus; thiab tej hneevnti uas tua rog yuav raug rhuav kom puastsuaj tas. Nej tus vajntxwv yuav ua kom txhua haivneeg muaj kev thajyeeb; nws yuav kav ib lub hiavtxwv rau ib lub hiavtxwv, txij ntua ntawm tus dej Efalates mus txog qab ntuj kawg.” Tus TSWV hais tias, “Rau qhov kuv tau nrog nej coglus uas yog muab ntshav ua khoom fij ua lub cim nias rau, kuv yuav tso nej haivneeg kom dim ntawm qhov chaw tsis muaj dej uas luag coj nej mus nyob rov los. Cov neeg uas raug ntes mus, nimno nej rov muaj kev cia siab lawm, nej cia li rov los; rov los nyob hauv nej lub tebchaws tso siab lug. Nimno kuv qhia rau nej hais tias, kuv yuav them ob npaug rov rau nej thiab foom koob hmoov rau tej uas nej raug kev txomnyem los lawm. Kuv yuav siv Yudas ib yam li tus tubrog rab hneevnti, thiab siv cov Yixalayees ib yam ib cov xubvos. Kuv yuav siv cov neeg hauv Xi-oos ib yam li rab ntaj mus tua cov neeg Kilis.” Tus TSWV yuav tshwm los rau saum nws haivneeg; nws yuav tua nws tej xubvos ib yam li xob laim. Tus TSWV uas kav ib puas tsav yam tshuab raj tshuab xyu; nws yuav nrog nagxob nagcua tuaj nram sab qabteb tuaj. Tus TSWV uas muaj hwjchim loj kawg nkaus yuav tiv thaiv nws haivneeg, thiab lawv yuav rhuav kom lawv cov yeebncuab puastsuaj tas. Lawv yuav qw ntshoo nrooj hauv tshavrog ib yam li tej neeg qaug cawv, thiab lawv yuav ua rau lawv cov yeebncuab nqaij ntuag ntshav nrog; tej ntshav ntawd yuav ntws ib yam li tej ntshav ua khoom fij uas muab hliv rau saum lub thaj. Thaum txog lub sijhawm ntawd, tus TSWV yuav cawm nws haivneeg, ib yam li tus tswv yug yaj cawm nws pab yaj dim ntawm txojkev puastsuaj. Lawv yuav ci ntsa iab rau lub tebchaws ib yam li lub kausmom kub. Ua cas lub tebchaws yuav zoo thiab zoo nkauj ua luaj! Nplej thiab cawv yuav ua rau cov hluas hlob mos nyoos thiab muaj zog heev. Cia li thov kom tus TSWV tso nag tshiab los rau lub caij nplooj ntoos hlav. Tus TSWV yog tus uas tso nag tshauv thiab tuamtsam nag los, ua kom tej qoobloo hlob ntsuab xwbxiab rau txhua leej txhua tus. Tej neeg mus pe mlom thiab saib hmoov, tiamsis tej lus uas luag teb rau lawv yog lus dag thiab tsis muaj qabhau dabtsi. Muaj qee leej txhais npau suav, tiamsis coj nej kom ua yuam kev xwb; tej lus uas lawv nplig nej siab yeej tsis muaj tseeb li. Yog li ntawd, cov neeg thiaj ncig mus ncig los ib yam li tus yaj uas yuam kev lawm. Lawv raug luag tsimtxom vim lawv tsis muaj thawjcoj. Tus TSWV hais tias, “Kuv chim heev rau cov neeg txawv tebchaws uas kav kuv haivneeg, thiab kuv yuav rau txim rau lawv. Cov Yudas yog kuv haivneeg, thiab kuv yog tus TSWV uas muaj hwjchim loj kawg nkaus, kuv yuav tsomkwm lawv. Lawv yuav zoo li kuv cov nees uas caij ntaus rog uas muaj zog heev hauv tshavrog. Yuav muaj cov nomtswv, cov thawjcoj thiab cov thawj tubrog sawv hauv lawv los tswjhwm kuv haivneeg. Cov Yudas yuav muaj yeej ib yam li cov tubrog uas muab lawv cov yeebncuab tsuj nthi rau hauv cov av nkos ntawm tej kev. Lawv yuav mus ntaus rog rau qhov tus TSWV nrog nraim lawv, thiab txawm yog cov yeebncuab tej tubrog uas caij nees los lawv yuav tua yeej. “Kuv yuav ua kom cov Yudas muaj zog heev; kuv yuav cawm cov Yixalayees kom dim plaws los. Kuv yuav hlub tshua lawv thiab coj lawv rov los tsev. Lawv yuav nyob xauv npo ib yam li uas kuv tsis tau tso lawv tseg. Kuv yog tus TSWV uas yog lawv tus Vajtswv; kuv yuav teb lawv tej lus thov. Cov Yixalayees yuav muaj zog ib yam li pab tubrog, yuav zoo siab ib yam li cov neeg uas haus cawv txiv hmab. Lawv cov xeebntxwv yuav nco ntsoov txojkev uas muaj yeej, thiab zoo siab heev rau tej uas tus TSWV tau ua tas los lawm. “Kuv yuav hu kuv haivneeg thiab sau lawv rov los nyob ua ke. Kuv yuav cawm lawv thiab ua kom lawv rov huamvam coob ib yam li thaum ub. Txawm yog kuv muab lawv ntiab mus nrog txhua haivneeg nyob, thiab txawm yog lawv mus nyob puag tim tej tebchaws uas deb heev los lawv tseem yuav nco ntsoov kuv. Lawv thiab lawv tej menyuam yuav dim thiab yuav ua ke rov los tsev. Kuv yuav coj lawv tawm hauv tebchaws Iziv thiab Axilias rov los, thiab cia lawv rov los nyob hauv lawv lub tebchaws. Kuv yuav cia lawv mus nyob hauv Nkile-as thiab pem Lenpanoos huv tibsi; yuav muaj neeg mus nyob thoob plaws hauv lub tebchaws. Txawm yog thaum lawv hla hiavtxwv muaj teebmeem rau lawv los kuv yog tus TSWV, kuv yuav ua kom tej dej ntas ntawd tus, thiab tus dej Niles uas tob tshaj plaws yuav qhuab tas. Cov Axilias txojkev khavtheeb yuav raug txo kom qis, thiab lub tebchaws Iziv uas muaj zog heev yuav poob hwjchim. Kuv yuav txhawb kom kuv haivneeg muaj zog heev; lawv thiaj yuav pehawm kuv thiab mloog kuv lus.” Tus TSWV yog tus uas hais tej lus no. Lenpanoos, cia li qhib koj lub qhovrooj, hluavtaws thiaj yuav kub koj tej ntoo ciab! Cov ntoo thuv, cia li quaj ntsuag rau qhov tej ntoo ciab twb vau tas lawm; tej ntoo uas muaj meejmom twb raug rhuav puastsuaj tas lawm! Tej ntoo qhib hauv tebchaws Npasas, cia li quaj ntsuag, tej roob ntoo uas tsaus nti twb raug luag muab ntov vau tas lawm! Cov nomtswv tsa suab hlo quaj tu siab kawg li; lawv tej meejmom twb poob tas! Cia li mloog tsov ntxuav tej suab nyooj; thaj zoov uas yog lawv qhov chaw nkaum nyob raws tus dej Yauladees raug puastsuaj tas lawm! Tus TSWV uas yog kuv tus Vajtswv hais rau kuv tias, “Koj cia li ua yam li koj yog ib tug yug yaj uas zov rawv ib pab yaj uas tabtom raug luag coj mus tua. Cov tswv muab cov yaj tua thiab rov mus tsev tsis raug txim dabtsi. Lawv muab cov nqaij coj mus muag thiab hais tias, ‘Ua tus TSWV tsaug! Peb npluanuj heev!’ Txawm yog lawv yog cov tswv yaj los lawv twb tsis hlub tshua cov yaj.” ( Tus TSWV hais tias, “Kuv yuav tsis hlub ib tug neeg twg nyob hauv ntiajteb no ntxiv lawm. Kuv yuav muab txhua haivneeg cob rau lawv cov nomtswv tes. Cov nomtswv no yuav rhuav lub ntiajteb, thiab kuv yuav tsis cawm lub ntiajteb kom dim ntawm lawv lub hwjchim li.”) Cov neeg muag yaj thiab cov yuav yaj ntiav kuv ua tug yug cov yaj uas yuav coj mus tua. Kuv muab tau ob tug pas ntoo los: muaj ib tug kuv tis npe hu ua “Nyiam” thiab muaj dua ib tug kuv tis npe hu ua “Koom ua ke.” Thiab kuv ua tus tu pab yaj ntawd. Kuv txawm ua tsis taus siab ntev rau peb tug yug yaj uas pheej ntxub kuv, kuv thiaj ua rau lawv peb tug ntawd raug puastsuaj tas huv tibsi rau tib lub hlis nkaus xwb. Ces kuv hais rau cov yaj tias, “Kuv yuav tsis ua nej tus yug yaj ntxiv lawm. Cia cov neeg uas yuav tuag, tuag mus. Cia cov neeg uas yuav puastsuaj, raug puastsuaj mus. Cia cov neeg uas seem, ib leeg ua kom ib leeg raug puastsuaj huv tibsi thiab.” Ces kuv txawm muab tus pas ntoo uas hu ua “Nyiam” los, thiab muab lov, kom rhuav tus TSWV tej lus uas tau cog tseg rau ntau haivneeg lawm. Yog li ntawd, tus TSWV tej lus cog tseg thiaj raug muab rhuav hnub ntawd lawm. Cov neeg uas muag yaj thiab cov yuav yaj puavleej tsa qhovmuag saib kuv, thiab lawv paub hais tias yog tus TSWV hais rau kuv txog tej uas kuv ua ntawd ntag. Kuv hais rau lawv tias, “Yog nej txaus siab, nej cia li them kuv tej nqi zog rau kuv. Tiamsis, yog nej tsis txaus siab, nej muab khaws cia los tau.” Ces lawv thiaj muab tau peb caug daim nyiaj los them kuv. Tus TSWV hais rau kuv tias, “Koj cia li coj cov nyiaj ko mus tso rau hauv qhov chaw cia nyiaj hauv lub Tuamtsev.” Yog li ntawd, kuv thiaj coj peb caug daim nyiaj uas lawv muab ua nqi zog rau kuv ntawd mus tso rau hauv qhov chaw cia nyiaj hauv lub Tuamtsev lawm. Ces kuv muab tus pas ntoo uas hu ua “Koom ua ke” lov, thiab ua rau cov Yudas thiab cov Yixalayees tawg nyob tsis taus ua ke. Ces tus TSWV hais rau kuv tias, “Koj cia li rov qab ua ib yam li koj yog ib tug yug yaj, thiab zaum no koj ua ib yam li ib tug yug yaj uas tsis tsimtxiaj hlo li. Kuv tau tsa ib tug yug yaj ua tus saib kuv pab yaj, tiamsis nws tsis pab cov yaj uas raug luag ntaus puastsuaj lawm; nws tsis mus nrhiav tus uas ploj lossis tsis kho tus uas raug mob lossis tsis pub zaub rau cov seem noj li. Tiamsis nws xav noj tej yaj uas rog thiab muab yaj tej rau taw tev huv tibsi. Tus yug yaj uas tsis tsimtxiaj li ntawd raug puastsuaj lawm lauj! Nws muab nws pab yaj tso tseg lawm. Kev tsov kev rog yuav rhuav nws lub hwjchim kom puastsuaj. Nws txhais npab yuav qhuav thiab nws lub qhovmuag sab xis yuav dig.” Ntawm no yog tus TSWV tej lus uas hais txog cov Yixalayees, tus TSWV yog tus uas nthuav lub ntuj, yog tus uas tsim lub ntiajteb, thiab yog tus uas rau siav rau pa rau neeg ntiajteb. Nws hais tias, “Kuv yuav ua kom Yeluxalees zoo ib yam li khob cawv; txhua haivneeg uas nyob puagncig nws yuav haus thiab ntog pawglug ib yam li qaug cawv. Thaum luag tuaj vij lub nroog Yeluxalees, tej nroog uas nyob hauv tebchaws Yudas yuav raug vij ib yam nkaus. Tiamsis thaum txog lub sijhawm ntawd, kuv yuav ua kom Yeluxalees zoo li lub pobzeb uas hnyav heev, haivneeg twg uas tuaj tsaws lub pobzeb ntawd yuav raug mob. Txhua haivneeg uas nyob hauv ntiajteb no yuav sau nthwv tuaj tawmtsam nws. Lub sijhawm ntawd kuv yuav hem kom lawv tej nees ntshai thiab ua kom cov neeg caij nees txhua tus vwm huv tibsi. Kuv yuav saib xyuas cov Yudas, tiamsis kuv yuav ua kom lawv cov yeebncuab tej nees digmuag tas. Ces xeem Yudas yuav rov hais rau lawv tias, ‘Tus TSWV uas yog Vajtswv tus uas muaj hwjchim loj kawg nkaus txhawb nws haivneeg uas nyob hauv lub nroog Yeluxalees kom lawv muaj zog loj zog nchav!’ “Lub sijhawm ntawd kuv yuav ua kom xeem Yudas zoo ib yam li cov hluavtaws uas kub ib thaj havzoov lossis kub ib thaj teb uas nplej siav heev lawm, lawv yuav muab txhua haivneeg uas nyob puagncig lawv rhuav kom puastsuaj tas. Cov neeg uas nyob hauv lub nroog Yeluxalees yuav nyob tso siab lug hauv lub nroog. “Kuv yog tus TSWV, kuv yuav xub pab kom cov tubrog Yudas muaj yeej, kom lub meejmom uas Daviv cov xeebntxwv thiab cov neeg uas nyob hauv Yeluxalees tau txais ntawd thiaj tsis loj tshaj lub meejmom uas lwm pab Yudas tau txais. Lub sijhawm ntawd tus TSWV yuav tiv thaiv cov neeg uas nyob hauv Yeluxalees, txawm yog cov neeg qaug zog uas nrog lawv nyob hauv los yuav muaj zog ib yam li Daviv. Daviv cov xeebntxwv yuav coj lawv kev ib yam li tus TSWV tus timtswv, thiab zoo ib yam li Vajtswv ntag. Lub sijhawm ntawd kuv yuav rhuav tshem txhua haivneeg uas pheej nrhiav kev tuaj tawmtsam lub nroog Yeluxalees. “Kuv yuav pub kom Daviv cov xeebntxwv thiab cov neeg uas nyob hauv lub nroog Yeluxalees muaj lub siab puv npo txojkev hlub thiab muaj lub siab kub lug thov Vajtswv. Lawv yuav saib ntsoov tus uas lawv muab nkaug tuag lawm, thiab lawv yuav quaj nws ib yam li tus uas muaj ib tug menyuam uas tuag lawm. Lawv yuav quaj nws tu siab nrho ib yam li cov neeg uas quaj lawv thawj tug tub hlob uas tuag lawm. Lub sijhawm ntawd cov neeg uas tabtom quaj ntsuag hauv lub nroog Yeluxalees yuav coob ib yam li cov neeg uas tabtom quaj nyiav Hadali-moos uas nyob hauv lub tiaj Menkidaus. Tus TSWV uas muaj hwjchim loj kawg nkaus hais tias, “Thaum txog lub sijhawm ntawd, lub qhovdej ntshiab uas huv siab si yuav qhib plho ntxuav Daviv cov xeebntxwv thiab cov neeg uas nyob hauv lub nroog Yeluxalees tej kev txhaum thiab tej kev pe mlom mus povtseg. Lub sijhawm ntawd, kuv yuav tshem cov mlom uas nyob hauv lub tebchaws ntawd tej npe tawm mus kom tas, thiab tsis muaj leejtwg yuav nco txog lawv ntxiv li lawm. Kuv yuav tshem txhua tus uas khav hais tias nws yog tus cev Vajtswv lus thiab muab lawv txojkev uas ntshaw pe mlom coj mus povtseg. Yog leejtwg tseem nyiam ua tus cevlus, mas nws niam nws txiv yuav tsum qhia rau nws hais tias, ‘Nws yuav raug muab tua kom tuag, rau qhov nws khav hais tias yog nws qhia tus TSWV txojlus, tiamsis yog nws hais tej lus dag xwb.’ Thaum nws cevlus, nws niam thiab nws txiv yuav tsum muab nws ntaus kom tuag. Thaum txog lub sijhawm ntawd, cov cevlus yuav raug txajmuag, txhua tus yuav tsis khav lawv tej yogtoog; lawv yuav tsis hnav cov cevlus tej tsho ntev mus dag ntxias neeg ntxiv lawm. Tiamsis, nws yuav hais tias, ‘Kuv tsis yog ib tug cevlus. Kuv yog ib tug neeg ua teb xwb, kuv lub neej yeej ibtxwm yog neeg ua teb los txog niaj hnub no.’ Yog leejtwg nug nws hais tias, ‘Ua li cas koj muaj qhov txhab nyob ntawm koj hauvsiab?’ nws yuav teb hais tias, ‘Kuv raug tej qhov txhab no hauv kuv tus phoojywg tsev los.’ ” Tus TSWV uas muaj hwjchim loj kawg nkaus hais tias, “Rab ntaj, koj cia li sawv, thiab mus tua tus tub yug yaj uas ua haujlwm rau kuv! Cia li muab nws tua kom tuag, ces cov yaj yuav tawg khiav ri sua rau ub rau no. Kuv yuav tawmtsam kuv haivneeg, thiab nyob thoob plaws hauv lub tebchaws yuav muaj neeg tuag txog ob feem peb. Kuv yuav sim ib feem peb uas seem ntawd, thiab yuav muab lawv ntxuav kom dawbhuv ib yam li tej nyiaj uas coj mus hlawv hauv qhovcub kom tau tej tseem nyiaj. Kuv yuav sim lawv ib yam li sim kub. Ces lawv yuav thov kuv, thiab kuv yuav teb lawv tej lus thov. Kuv yuav qhia rau lawv hais tias lawv yog kuv haivneeg, thiab lawv yuav lees hais tias kuv yog lawv tus Vajtswv.” Hnub uas tus TSWV yuav los zaum ntawm lub rooj txiav txim twb los ze heev lawm. Lub nroog Yeluxalees yuav raug luag huab, thiab tej khoom uas luag huab tau ntawd yuav muab faib rau nej qhovmuag saib ntsoov. Tus TSWV yuav coj txhua haivneeg tuaj ua ke ua rog rau lub nroog Yeluxalees. Luag yuav txeeb tau lub nroog thiab huab tej vajtse, thiab tej pojniam yuav raug luag yuam. Cov neeg ib nrab yuav raug luag ntes coj mus rau lwm tebchaws, tiamsis cov uas seem yuav tsis raug coj tawm hauv lub nroog mus. Ces tus TSWV yuav tawm mus tua txhua haivneeg ntawd, ib yam li nws tau ntaus rog yav tas los lawm. Thaum txog lub sijhawm ntawd, nws yuav sawv saum lub Roob Txiv Ntoo Roj uas nyob ntawm lub nroog Yeluxalees sab hnubtuaj. Ces lub Roob Txiv Ntoo Roj yuav tawg ua ob sab, txij ntua sab hnubtuaj mus rau sab hnubpoob yuav ua ib lub kwjha loj heev. Lub roob ntawd ib sab yuav txav nce toj mus rau sab qaumteb, thiab ib sab yuav txav nqis hav mus rau sab qabteb. Nej yuav tau kev khiav dim hauv lub hav uas dav heev ntawd mus rau sab roob nraum ub. Nej yuav khiav dim ib yam li nej cov yawgkoob khiav thaum av qeeg tiam uas Vajntxwv Uxiyas kav tebchaws Yudas. Tus TSWV uas yog kuv tus Vajtswv yuav los, thiab coj tagnrho cov timtswv ceebtsheej nrog nws los. Thaum txog lub sijhawm ntawd, yuav tsis muaj ntuj no thiab dej nkoog, lossis tsis muaj kev tsaus ntuj. Txawm yog hmo ntuj los yuav hloov ua nruab hnub pom kev kaj nrig. Tsuas yog tus TSWV tib leeg xwb thiaj paub hais tias, thaum twg lub sijhawm no mam li los txog. Thaum txog hnub ntawd, yuav muaj ib tug dej txhawv hauv lub nroog Yeluxalees los, ib ceg yuav ntws mus rau nram Hiavtxwv Tuag thiab ib ceg yuav ntws mus rau tom Hiavtxwv Meditelanes. Tus dej ntawd yuav ntws thawm niaj thawm xyoo, tsis hais lub caij ntuj qhua lossis lub caij ntuj nag. Tus TSWV yuav los ua Vajntxwv kav lub ntiajteb, txhua tus yuav tuaj pehawm nws tus uas yog Vajtswv, thiab nws muaj tib lub npe xwb. Tagnrho cheebtsam ntawm Nkenpas sab qaumteb los txog rau ntawm Limoos sab qabteb, mas yuav muab meem kom tiaj sib txig. Lub nroog Yeluxalees yuav yog lub chaw tsomfaj uas nyob siab tshaj tej tebchaws uas nyob puagncig nws; lub nroog ntawd yuav pib kiag ntawm lub Roojvag Npeenyamees mus txog ntua ntawm lub Roojvag Ces kaum uas yeej yog ib lub roojvag thaum ub los lawm, thiab txij ntua ntawm lub chaw tsomfaj Hananees mus rau ntawm vajntxwv lub chaw tsuam txiv hmab. Cov neeg yuav nyob kaj siab lug hauv qhov chaw ntawd, yuav tsis muaj kev puastsuaj los raug lawv ib zaug ntxiv li lawm. Tus TSWV yuav tso ib yam kab mob uas txaus ntshai heev los rau txhua haivneeg uas tuaj ua rog tawmtsam lub nroog Yeluxalees. Lawv tej nqaij yuav lwj thaum lawv tseem ciaj sia; lawv lub qhovmuag thiab tus nplaig yuav lwj tas huv tibsi. Lub sijhawm ntawd tus TSWV yuav ua kom lawv feeb tsis meej thiab ntshai heev, lawv ib leeg yuav ntes ib leeg thiab ib leeg yuav tawmtsam ib leeg. Cov Yudas yuav tiv thaiv lub nroog Yeluxalees. Lawv yuav huab txhua haivneeg tej khoom muaj nqis: kub, nyiaj, thiab ris tsho tau ntau kawg li. Tej kab mob phem uas txaus ntshai no yuav raug rau tej nees, tej nees zag, tej ntxhuav, tej neesluav, thiab raug txhua yam tsiaj uas nyob hauv cov yeebncuab tej yeej. Ces cov neeg uas seem ntawm txhua haivneeg uas tuaj tua lub nroog Yeluxalees yuav tsum niaj xyoo tuaj pehawm Vajntxwv tus uas yog tus TSWV tus muaj hwjchim loj kawg nkaus thiab ua Kevcai nyob Tsev Pheebsuab hauv lub nroog Yeluxalees. Yog hais tias ib haivneeg twg tseem tsis kam mus pehawm Vajtswv tus uas yog tus TSWV uas muaj hwjchim loj kawg nkaus, ces yuav tsis muaj nag los rau lawv lub tebchaws. Yog cov Iziv tsis kam tuaj ua Kevcai nyob Tsev Pheebsuab, lawv yuav raug yam kab mob phem uas tus TSWV tso los rau txhua lub tebchaws uas tsis kam mus pehawm nws ntawd. Tej no yog txojkev rau txim uas yuav raug cov neeg Iziv thiab txhua haivneeg uas tsis kam mus ua Kevcai nyob Tsev Pheebsuab. Lub sijhawm ntawd txawm yog tej tswb nees los yuav sau ntawv rau hais tias, “Fij rau tus TSWV.” Tej laujkaub uas siv ua noj hauv lub Tuamtsev yuav dawbhuv ib yam li tej tais uas txawb rau ntawm lub thaj hauv ntej. Txhua lub laujkaub uas siv ua noj hauv Yeluxalees thiab hauv tebchaws Yudas yuav muab tshwj tseg rau ib cag thiaj tau siv pehawm tus TSWV uas muaj hwjchim loj kawg nkaus. Cov neeg uas tuaj fij khoom yuav siv tej laujkaub ntawd los hau tej nqaij uas coj tuaj tua ua khoom fij. Thaum txog lub sijhawm ntawd, yuav tsis muaj kev ua lag ua luam nyob hauv tus TSWV tus uas muaj hwjchim loj kawg nkaus lub Tuamtsev lawm. Ntawm no yog cov lus uas tus TSWV hais rau Malakis kom nws coj mus qhia rau cov Yixalayees. Tus TSWV hais rau nws haivneeg tias, “Kuv yeej ibtxwm hlub nej.” Tiamsis lawv nug tus TSWV hais tias, “Koj hlub peb li cas?” Tus TSWV teb hais tias, “Exaus thiab Yakhauj yog ob kwvtij, tiamsis kuv hlub Yakhauj thiab nws cov xeebntxwv, kuv ntxub Exaus thiab nws cov xeebntxwv. Kuv muab Exaus lub ncov roob rhuav kom puastsuaj thiab muab nws lub tebchaws tso tseg rau tej tsiaj qus nyob.” Exaus cov xeebntxwv uas yog cov Edoos hais tias, “Txawm yog peb tej nroog puastsuaj tas lawm los peb yuav rov txhim kho dua tshiab,” ces tus TSWV yuav teb hais tias, “Cia lawv yeejmeem txhim kho dua tshiab ntag, kuv yuav rov muab tej nroog ntawd rhuav povtseg dua. Tej neeg yuav hu lawv hais tias, ‘Lub tebchaws ua phem,’ thiab ‘Haivneeg uas tus TSWV chim rau lawv mus ibtxhis li.’ ” Cov Yixalayees lub qhovmuag yuav tau pom tej xwmtxheej ntawd, thiab lawv yuav hais tias, “Txawm yog dhau ntawm cov Yixalayees tus ciamteb lawm los tus TSWV tseem muaj hwjchim loj kawg nkaus.” Tus TSWV uas muaj hwjchim loj kawg nkaus hais rau cov povthawj tias, “Tus tub yeej hwm leej txiv, thiab tus qhev yeej hwm nws tus tswv. Kuv yog nej txiv, ua li cas nej tsis hwm kuv? Kuv yog nej tus tswv, ua li cas nej tsis hwm kuv? Nej saib tsis taus kuv, thiab nej tseem nug hais tias, ‘Peb saib tsis taus koj li cas?’ Twb yog vim nej muab tej zaub mov uas tsis muaj nqis coj mus fij rau saum kuv lub thaj. Nej tseem muaj plhus nug hais tias, ‘Peb tsis hwm koj li cas?’ Kuv yuav qhia qhov uas nej ua saib tsis taus kuv lub thaj rau nej. Thaum nej coj tus tsiaj digmuag, muaj mob lossis cegtawv tuaj tua fij rau kuv, nej xav hais tias ua li ntawd yeej tsis txhaum li los? Nej sim coj cov tsiaj zoo li ntawd mus pub rau tus tswvxeev saib! Nws puas yuav zoo siab lossis txaus siab rau nej?” Nimno nej cov uas yog povthawj, nej sim thov kom Vajtswv hlub peb saib. Nws yuav tsis teb nej tej lus thov, rau qhov yog tim nej ua txhaum lawm. Tus TSWV uas muaj Hwjchim loj kawg nkaus hais tias, “Kuv xav kom nej ib tug mus muab lub Tuamtsev tej qhovrooj kaw, tsis pub nej lam mus rauv taws rau saum kuv lub thaj. Kuv tsis txaus siab rau nej; kuv yuav tsis lees tej khoom uas nej coj tuaj fij rau kuv ntawd. Tej neeg nyob thoob ntiajteb puavleej hwm kuv. Lawv hlawv tshuaj tsw qab txhua qhov fij rau kuv thiab muab tej khoom uas txaus kuv siab fij rau kuv xwb. Lawv sawvdaws puavleej ua rau kuv tau ntsejmuag! Tiamsis thaum nej hais tias kuv lub thaj tsis muaj nqis thiab thaum nej saib tsis taus tej zaub mov uas nej coj tuaj fij rau saum kuv lub thaj, twb yog nej tsis hwm kuv ntag. Nej hais tias, ‘Peb dhuav tej no kawg nkaus li!’ nej ua saib tsis taus kuv. Vim li ntawd nej thiaj coj tus tsiaj uas nej mus nyiag los lossis tus tsiaj lov ceg lossis tus tsiaj muaj mob tuaj fij rau kuv. Nej xav hais tias kuv yuav lees yuav tej tsiaj ntawd no los?. Kuv yuav foom tsis zoo rau tus neeg dag uas tau coglus hais tias, nws yuav muab nws pab tsiaj tus uas zoo tshaj plaws fij rau kuv, tiamsis nws muab tus uas phem tshaj plaws tuaj fij rau kuv xwb. Kuv yog tus vajntxwv uas muaj hwjchim loj kawg nkaus, thiab txhua haivneeg puavleej hwm kuv lub npe.” Tus TSWV uas muaj hwjchim loj kawg nkaus hais rau cov povthawj tias, “Tej lus no yog kuv hais rau nej: Nej yuav tsum ua nej tes haujlwm kom kuv tau ntsejmuag. Yog nej tsis mloog kuv hais, kuv yuav foom tsis zoo rau nej. Kuv yuav foom tsis zoo rau tej khoom uas luag coj tuaj pub rau nej. Qhov tseeb, kuv twb foom tsis zoo rau tej ntawd lawm, vim nej tsis ua raws li kuv tej lus. Kuv yuav rau txim rau nej cov menyuam thiab yuav muab tej tsiaj uas nej coj tuaj tua fij rau kuv ntawd cov quav pleev nej ntsejmuag, thiab kuv yuav coj nej mus pov rau ntawm qhov chaw uas pov tej quav tsiaj. Thaum ntawd nej yuav paub hais tias kuv twb hais rau nej lawm, kom kuv tej lus cog tseg rau cov povthawj uas yog cov Levis cov xeebntxwv yuav nyob mus ibtxhis. “Hauv kuv cov lus cog tseg, kuv coglus hais tias kuv yuav pub kom lawv muaj sia ntev thiab nyob kaj siab lug, thiab kuv pub tej no rau lawv kom lawv hwm kuv. Thaum ntawd lawv puavleej hwm thiab ntshai kuv kawg li. Lawv yeej qhia tej zaj tseeb xwb, lawv tsis lam qhia tej zaj uas tsis yog li. Lawv ua neej raws li kuv lub siab nyiam; tsis yog lawv coj ncaj xwb, tiamsis lawv tseem pab tau coob leej tso txojkev ua phem tseg thiab. Cov povthawj yog cov uas qhia kom sawvdaws paub Vajtswv tseeb. Tsimnyog tej neeg mus cuag cov povthawj kom lawv qhia sawvdaws paub ua lub neej haum kuv siab, rau qhov cov povthawj yog cov uas cev tus TSWV uas muaj hwjchim loj kawg nkaus tej lus. “Tiamsis nimno nej cov uas yog povthawj tau tso txojkev tseeb tseg lawm. Tej lus uas nej qhia twb ua rau coob leej mus ua txhaum lawm. Nej rhuav tej lus uas kuv cog tseg rau nej. Yog li ntawd, kuv yuav ua kom cov Yixalayees saib tsis taus nej, rau qhov nej tsis ua raws li kuv tej lus qhia, thaum nej qhia kuv haivneeg, nej tsis qhia sawvdaws ib yam.” Puas yog peb sawvdaws koom ib leeg txiv? Puas yog tib tug Vajtswv tsim peb sawvdaws xwb? Vim li cas peb rhuav tej lus cog tseg uas peb ib leeg coglus rau ib leeg. Thiab vim li cas peb thiaj thuam tej lus uas Vajtswv tau cog tseg rau peb cov yawgkoob lawm? Cov Yudas tsis ua raws li tej lus uas lawv cog tseg rau Vajtswv lawm, lawv ua tej kev phem kev qias nyob hauv lub nroog Yeluxalees thiab thoob plaws hauv lub tebchaws. Lawv tau ua rau lub Tuamtsev uas Vajtswv hlub kawg nkaus tsis huv lawm. Cov txivneej tau mus yuav tej ntxhais uas pe lwm haivneeg tej vajtswv los ua pojniam. Thov tus TSWV muab cov neeg uas ua li ntawd tshem tawm hauv cov Yixalayees mus kom tas, thiab tsis txhob pub lawv nrog peb haivneeg koom coj tej khoom tuaj fij rau tus TSWV uas muaj hwjchim loj kawg nkaus ntxiv li lawm. Muaj dua ib yam uas nej ua, nej tuaj quaj ua kua muag los ntub tus TSWV lub thaj tas, vim nws tsis yuav tej khoom uas nej coj tuaj fij rau nws. Nej tseem muaj plhus nug hais tias, vim li cas nws thiaj tsis yuav tej khoom fij ntawd? Nws tsis yuav rau qhov nws paub hais tias koj tsis ua raws li tej lus cog tseg rau tus pojniam uas koj yuav thaum koj tseem hluas. Nws yog koj txij nkawm, tiamsis koj rhuav tej lus uas koj cog tseg rau nws lawm. Txawm yog koj tau coglus rau Vajtswv hais tias, koj yuav muab lub siab npuab nws los koj tsis ua raws li koj hais. Puas yog Vajtswv twb muab koj los koom ua ib lub cev thiab ib lub siab nrog nws lawm? Vim li cas Vajtswv thiaj ua li no? Twb yog nws xav kom neb muaj tub muaj ki uas yog Vajtswv haivneeg tiag. Yog li ntawd nej tsis txhob rhuav tej lus uas nej cog tseg rau nej tus pojniam lawm. Tus TSWV uas yog cov Yixalayees tus Vajtswv hais tias, “Kuv ntxub txojkev sib nrauj heev. Kuv ntxub thaum uas muaj ib tug twg ua nruj ua tsiv rau nws tus pojniam. Nej yuav tsum nco ntsoov tsis txhob rhuav nej tej lus cog tseg uas hais tias nej yuav muab siab npuab nej tus pojniam.” Nej ua rau tus TSWV dhuav nej tej lus hais kawg li. Tiamsis nej tseem nug hais tias, “Peb ua rau tus TSWV dhuav li cas?” Nej ua rau nws dhuav thaum uas nej hais tias, “Tus TSWV uas muaj hwjchim loj kawg nkaus xav hais tias txhua tus uas ua txhaum puavleej yog neeg zoo; thiab hais tias, nws yeej nyiam lawv.” Lossis nej nug hais tias, “Vajtswv tus uas ncaj ncees nyob qhov twg?” Tus TSWV uas muaj hwjchim loj kawg nkaus teb hais tias, “Kuv yuav txib kuv ib tug tubtxib ua ntej mus kho kev tos kuv. Thaum ntawd tus TSWV uas nej niaj hnub tos yuav los rau hauv nws lub Tuamtsev. Tus tubtxib uas nej xav pom los ntev lawm, yuav los thiab tshaj tawm kuv tej lus cog tseg.” Tiamsis hnub uas nws los, leejtwg yuav muaj cuabkav fim taus nws? Thaum nws tshwm plaws los, leejtwg tseem yuav muaj sia nyob thiab? Nws yuav zoo ib yam li cov tshuaj zawv khaubncaws uas muaj zog, thiab zoo ib yam li cov nplaim taws uas cig hauv lub yeejvub nchuav hlau. Nws yuav los txiav txim ib yam li tus neeg nchuav nyiaj, nws muab nyiaj nchuav kom tau cov tseem nyiaj. Tus TSWV tus tubtxib yuav los muab cov povthawj ntxuav kom dawbhuv ib yam li tej nyiaj tej kub uas tus nchuav nyiaj twb muab nchuav tau lawm. Yog li ntawd, lawv thiaj yuav coj tej khoom uas haum tus TSWV siab tuaj fij rau nws. Yog li ntawd, tej khoom uas cov Yudas thiab cov neeg hauv Yeluxalees coj tuaj fij rau tus TSWV thiaj yuav txaus nws siab ib yam li thaum ub lawv ibtxwm ua los lawm. Tus TSWV uas muaj hwjchim loj kawg nkaus hais tias, “Kuv yuav los xyuas nej thiab txiav txim rau sawvdaws, thiab kuv yuav nthuav sawvdaws tej kev txhaum, tsis hais cov neeg uas txawj ua yeessiv, cov neeg uas deev luag pojniam luag txiv, cov neeg uas ua timkhawv tsis tseeb, cov neeg uas dag nws tej tub zog tej nyiaj yuav, thiab cov neeg uas txhav cov pojntsuam, tej menyuam ntsuag, thiab cov neeg txawv tebchaws tug noj, thiab txhua tus uas tsis hwm kuv. “Kuv yog tus TSWV, kuv yeej tsis hloov li; yog li ntawd nej cov uas yog Yakhauj cov xeebntxwv tseem tsis tau tu noob. Nej zoo ib yam li nej cov yawgkoob uas nyob ua ntej nej lawm thiab ntag, nej tau tso kuv tej kevcai tseg thiab tsis ua raws li tej kevcai ntawd. Nej cia li tig rov los cuag kuv, kuv thiaj yuav tig los cuag nej. Tiamsis nej nug hais tias, ‘Peb yuav ua li cas thiaj tig tau rov los cuag koj?’ Kuv nug nej hais tias, ‘Puas tsimnyog ib tug neeg twg qee Vajtswv tug?’ Yeej tsis tsimnyog, tiamsis nej pheej qee kuv tug. Nej nug hais tias, ‘Peb qee koj dabtsi?’ Twb yog nej tsis muab ib feem kaum thiab tej khoom fij rau kuv. Kuv twb foom tsis zoo rau nej txhua tus lawm, rau qhov tagnrho nej haivneeg puavleej qee kuv tug. Nej yuav tsum nqa tej uas nej muaj ib feem kaum tuaj tso rau hauv lub Tuamtsev, thiaj li muaj noj muaj haus nplua mias nyob rau hauv. Nej sim ua raws li kuv hais saib, nej yeej yuav pom kuv qhib rooj ntug nchuav koob hmoov ntau nplua mias los rau nej. Kuv yuav tsis pub kab thiab kooj noj nej tej qoobloo, thiab nej tej txiv hmab yuav txi txiv ncw. Thaum ntawd txhua haivneeg yuav hu nej ua cov neeg uas tau koob hmoov, rau qhov nej lub tebchaws yog lub uas tau zoo noj tau zoo nyob.” Tus TSWV hais tias, “Nej hais lus phem kawg nkaus thuam kuv, tiamsis nej tseem nug hais tias, ‘Peb hais lus phem li cas thuam koj?’ Nej hais tias, ‘Qhov uas peb tu Vajtswv ntawd, yeej tsis muaj nqis dabtsi li. Yog peb ua raws li tus TSWV uas muaj hwjchim loj kawg nkaus hais lossis lees tej kev txhaum uas peb ua tas los lawm rau nws huv tibsi, puas yuav muaj nqis dabtsi rau peb thiab? Peb ibtxwm pom cov neeg khavtheeb yog cov uas tau koob hmoov; cov neeg ua phem tsis yog muaj kev vammeej xwb, tiamsis lawv tseem txhob txwm ua txhaum sim Vajtswv siab los Vajtswv yeej tsis rau txim rau lawv li.’ ” Thaum cov neeg uas paub ntshai tus TSWV, lawv ib leeg hais rau ib leeg, tus TSWV yeej mloog ntsoov thiab hnov tej lus uas lawv hais ntawd. Cov neeg uas paub ntshai tus TSWV thiab hwm nws, lawv tej npe puavleej muab sau rau hauv ib phau ntawv rau tus TSWV khaws tseg lawm. Tus TSWV uas muaj hwjchim loj kawg nkaus hais tias, “Lawv yuav yog kuv haivneeg. Thaum txog hnub uas kuv los ua kuv tes haujlwm, lawv yuav yog kuv tug. Kuv yuav hlub lawv ib yam li leej txiv hlub nws tus tub uas tu nws ntag. Kuv haivneeg yuav pom cov neeg ncaj ncees thiab cov neeg ua phem ua qias dua ib zaug ntxiv saib sib txawv li cas, cov neeg uas ua kuv tes haujlwm thiab cov neeg uas tsis ua, saib sib txawv li cas.” Tus TSWV uas muaj hwjchim loj kawg nkaus hais tias, “Thaum txog hnub ntawd cov neeg khavtheeb thiab cov neeg ua phem ua qias yuav kub hnyiab ib yam li tej quavnyab. Hnub ntawd lawv yuav kub hnyiab tas, thiab lawv yuav tsis tshuav ib yam dabtsi seem li. Tiamsis kuv lub hwjchim yuav tawm tuaj cawm nej cov uas mloog kuv lus ib yam li lub hnub tawm tuaj, thiab coj kev kho mob los rau nej ib yam li tej duab hnub tuaj ziab. Nej yuav nyob ywj siab thiab muaj kev kaj siab ib yam li tej menyuam nyuj uas tso tawm hauv nkuaj los. Thaum txog hnub uas kuv los ua kuv tes haujlwm, nej yuav tawmtsam yeej cov neeg ua phem, thiab nej yuav tsuj lawv ib yam li tsuj tej hmoov av. “Nej nco ntsoov kuv tus tubtxib Mauxes tej lus qhia, yog tej kevcai thiab tej lus samhwm uas kuv muab rau nws saum Roob Xinais, kom cov Yixalayees txhua tus yuav tsum coj thiab ua raws li ntawd. “Tiamsis ua ntej hnub tseemceeb thiab hnub uas tus TSWV los txiav txim, kuv yuav txib Eliyas uas yog tus cev Vajtswv lus los qhia nej. Nws yuav coj cov uas ua niam ua txiv thiab tej menyuam rov los nyob ua ke sib raug zoo dua; yog tsis ua li ntawd, kuv yuav los thiab rhuav nej lub tebchaws kom puastsuaj.” Zaj no yog hais txog Yexus Khetos cov yawgkoob tej npe. Yexus yog Daviv tub thiab Daviv yog Anplahas xeebntxwv. Txij thaum Anplahas los txog Vajntxwv Daviv, Yexus cov yawgkoob muaj li no: Anplahas yog Ixaj txiv, Ixaj yog Yakhauj txiv, Yakhauj yog Yudas thiab nws cov kwvtij txiv, Yudas yog Peles thiab Xelas txiv (nkawd niam yog Tamaj), Peles yog Heloos txiv, Heloos yog Las txiv, Las yog Anpinadas txiv, Anpinadas yog Nasoos txiv. Nasoos yog Xalemoos txiv, Xalemoos yog Npau-am txiv, (Npau-am niam yog Lahaj), Npau-am yog Aunpes txiv, (Aunpes niam yog Luv), Aunpes yog Yexais txiv, Yexais yog Vajntxwv Daviv txiv. Txij thaum Daviv los txog rau thaum cov Yixalayees raug ntes mus rau tebchaws Npanpiloos, Yexus cov yawgkoob muaj li no: Daviv yog Xalumoos txiv, (Xalumoos niam yog Uliyas tus pojniam), Xalumoos yog Lehaunpau-as txiv, Lehaunpau-as yog Anpiyas txiv, Anpiyas yog Axas txiv, Axas yog Yehausafas txiv, Yehausafas yog Yehaulas txiv, Yehaulas yog Uxiyas txiv, Uxiyas yog Yauthas txiv, Yauthas yog Ahas txiv, Ahas yog Hexekiyas txiv, Hexekiyas yog Manaxes txiv, Manaxes yog Amoos txiv, Amoos yog Yauxiyas txiv, Yauxiyas yog Yehauyakhees thiab nws cov kwvtij txiv. Txij thaum cov Yixalayees raug ntes mus rau tebchaws Npanpiloos los txog rau thaum yug Yexus, Yexus cov yawgkoob muaj li no: Yehauyakhees yog Se-atiyees txiv, Se-atiyees yog Xelunpanpees txiv, Xelunpanpees yog Anpi-us txiv, Anpi-us yog Eli-akees txiv, Eli-akees yog Axaus txiv, Axaus yog Xadaus txiv, Xadaus yog Akhis txiv, Akhis yog Eli-us txiv, Eli-us yog Ele-axas txiv, Ele-axas yog Mathas txiv, Mathas yog Yakhauj txiv, Yakhauj yog Yauxej txiv. Malis uas yog Yexus niam yog Yauxej tus pojniam. Yexus yog tus uas sawvdaws hu ua tus Cawmseej. Yog li ntawd, txij thaum Anplahas los txog Daviv, muaj kaum plaub tiam, txij thaum Daviv los txog thaum cov Yixalayees raug ntes mus rau tebchaws Npanpiloos muaj kaum plaub tiam, thiab txij thaum cov Yixalayees raug ntes mus rau tebchaws Npanpiloos los txog thaum yug tus Mexiyas muaj kaum plaub tiam. Zaj uas yuav hais no yog hais txog zaj uas Yexus los yug rau hauv lub ntiajteb no. Yauxej twb xub qhaib Malis uas yog Yexus niam cia lawm. Tiamsis thaum nkawd tseem tsis tau sib yuav, Malis paub hais tias Vaj Ntsujplig tus Dawbhuv ua rau nws xeeb tub lawm. Yauxej tus uas qhaib Malis yog ib tug neeg ncaj ncees, nws tsis xav cia Malis poob ntsejmuag, nws txawm xav hais tias, nws yuav tso Malis twjywm tseg. Thaum Yauxej tseem xav txog zaj ntawd, Yauxej txawm ua npau suav pom tus Tswv ib tug timtswv los hais rau nws hais tias, “Yauxej uas yog Daviv tus xeebntxwv, koj tsis txhob nyuaj siab. Koj cia li mus yuav Malis los ua koj pojniam. Rau qhov twb yog Vaj Ntsujplig tus Dawbhuv ua rau Malis xeeb tub. Malis yuav yug ib tug metub, koj yuav tsum tis tus metub ntawd npe hu ua Yexus, rau qhov nws yog tus uas yuav los cawm nws haivneeg kom lawv dim lawv lub txim.” Tej no muaj raws li tej lus uas tus Tswv tau qhia rau tus cev Vajtswv lus lawm hais tias, “Ib tug nkaujxwb yuav xeeb tub thiab yuav yug ib tug metub thiab sawvdaws yuav hu nws lub npe hais tias Emanu-ees” (Lub npe no txhais hais tias, “Vajtswv nrog peb nyob”). Thaum Yauxej tsim dheev los, nws txawm mus coj Malis los ua nws pojniam raws li tus Tswv tus timtswv tau hais rau nws lawm. Tiamsis Yauxej yeej tsis nrog Malis pw mus txog thaum uas Malis yug tus metub ntawd. Thaum yug tau lawm, Yauxej tis tus metub ntawd npe hu ua Yexus. Yexus yug hauv lub nroog Npelehees uas nyob hauv cov Yudais lub tebchaws. Lub sijhawm ntawd Helauj ua vajntxwv kav tebchaws. Tom qab ntawd tsis ntev muaj cov neeg uas txawj saib hnubqub ob peb leeg tuaj sab hnubtuaj tuaj txog hauv lub nroog Yeluxalees. Lawv nug hais tias, “Tus metub uas yuav ua cov Yudais tus vajntxwv, nws yug rau qhov twg? Peb pom nws lub hnubqub uas qhia hais tias, nws yug los lawm tawm tim sab hnubtuaj tuaj, peb thiaj tuaj pehawm nws.” Thaum Vajntxwv Helauj hnov li ntawd, nws thiab tej neeg uas nyob hauv lub nroog Yeluxalees nyuaj siab heev. Helauj txawm hu cov thawj ntawm cov povthawj, thiab cov xibhwb uas qhia Vajtswv txoj kevcai tuaj ua ke thiab nug lawv hais tias, “Tus Mexiyas yuav yug rau qhov twg?” Lawv teb hais tias, “Nws yuav yug hauv lub nroog Npelehees uas nyob hauv cov Yudais lub tebchaws. Tus uas cev Vajtswv lus sau li no tseg hais tias, ‘Lub nroog Npelehees uas nyob hauv tebchaws Yudas, Koj tsis yog lub nroog uas me dua tej nroog hauv lub xeev Yudas; Rau qhov yuav muaj ib tug thawjcoj los yug hauv koj. Nws yuav coj kuv haivneeg Yixalayees.’ ” Ces Helauj txawm hu cov neeg uas txawj saib hnubqub los cuag nws tsis pub leejtwg paub. Helauj kom lawv qhia nws saib lub sijhawm twg lawv pom lub hnubqub ntawd tawm tuaj. Tom qab ntawd Helauj kom lawv mus nram lub nroog Npelehees thiab hais rau lawv hais tias, “Nej cia li mus nrhiav tus metub ntawd; yog nej mus nrhiav tau nws lawm, nej rov qab los qhia rau kuv, kuv yuav mus pehawm nws thiab.” Thaum Helauj hais li ntawd tas, ces lawv txawm tawm mus lawm. Thaum lawv tabtom taug kev mus lawv pom lub hnubqub uas lawv xub pom tim sab hnubtuaj. Lub hnubqub ntawd coj lawv kev mus thiab lub hnubqub ntawd mus nres ncaj ntawm qhov chaw uas tus metub ntawd nyob lawm saum. Thaum lawv pom lub hnubqub ntawd, lawv zoo siab kawg li. Thaum lawv mus rau hauv tsev, lawv pom tus metub thiab Malis uas yog tus metub ntawd niam, lawv txhos caug ntua pehawm tus metub. Lawv thau lawv tej kub, tej tshuaj tsw qab thiab tej roj tsw qab mules hauv lawv cov hnab los pub rau tus metub. Hmo ntawd lawv ua npau suav pom Vajtswv los hais rau lawv hais tias kom lawv mus lwm txojkev mus tsev tsis txhob rov mus qhia rau Helauj. Thaum cov neeg txawj saib hnubqub rov mus lawm, Yauxej ua npau suav pom tus Tswv ib tug timtswv los hais rau Yauxej hais tias, “Koj cia li sawv thiab coj tus metub thiab nws niam khiav mus rau nram tebchaws Iziv, thiab nyob nrad mus txog thaum uas kuv kom nej mus rau lwm qhov. Rau qhov Vajntxwv Helauj tabtom nrhiav tus metub no tua povtseg.” Yauxej txawm sawv tsees coj tus metub thiab Malis maub khiav mus rau nram tebchaws Iziv. Yauxej lawv nyob nrad mus txog thaum Helauj tuag. Tej no muaj kom tiav raws li tus cev Vajtswv lus tau hais tseg lawm hais tias, “Kuv yuav hu kuv tus Tub tawm hauv tebchaws Iziv los.” Thaum Helauj paub hais tias cov tub txawg uas txawj saib hnubqub dag nws lawm, nws chim heev. Nws txawm txib neeg mus rau hauv lub nroog Npelehees thiab tej zejzog uas nyob ibncig lub nroog ntawd, muab cov menyuam tub uas muaj hnubnyoog ob xyoos rov hauv tua povtseg huv tibsi. Helauj ua li no kom haum lub sijhawm uas cov neeg txawj saib hnubqub pom lub hnubqub ntawd. Tej no muaj kom tiav raws li Yelemis uas yog tus cev Vajtswv lus qhia tseg hais tias, “Sawvdaws yuav hnov suab quaj suab nyiav hauv lub nroog Lamas, yog lub suab quaj uas tu siab kawg li. Laxees yuav quaj ntsuag rau nws tej menyuam; tsis muaj leejtwg yuav nplig tau nws siab, rau qhov nws cov menyuam tuag tas lawm.” Tom qab uas Helauj tuag lawm Yauxej tseem nyob nram tebchaws Iziv, Yauxej txawm ua npau suav pom tus Tswv ib tug timtswv los hais rau Yauxej hais tias, “Koj cia li sawv tsees coj tus metub thiab nws niam rov qab mus rau pem tebchaws Yixalayees, rau qhov tus uas yuav tua tus metub no twb tuag lawm.” Yauxej txawm sawv tsees coj tus metub thiab Malis rov qab mus rau pem tebchaws Yixalayees. Tiamsis thaum Yauxej hnov hais tias Akhilaus ua vajntxwv kav tebchaws Yudas hloov nws txiv Helauj chaw lawm. Yauxej ntshai, Yauxej tsis kam mus nyob qhov ntawd. Yauxej rov qab ua npau suav pom Vajtswv los qhia rau nws, ces nws txawm mus rau pem lub xeev Kalilais lawm. Nws thiaj mus nyob hauv ib lub nroog hu ua Naxales. Yauxej ua li no kom muaj tiav raws li tej lus uas cov cev Vajtswv lus tau qhia tseg txog tus metub ntawd hais tias, “Sawvdaws yuav hu nws hais tias, nws yog neeg Naxales.” Thaum ntawd Yauhas tus uas muab neeg ua kevcai raus dej, nws tawm mus qhuab qhia tom roob mojsab qhua hauv cov Yudais lub tebchaws. Yauhas hais tias, “Nej cia li tso plhuav nej tej kev txhaum tseg rau qhov Ntuj Ceebtsheej twb los ze lawm!” Yauhas yog tus uas Yaxayas uas yog tus cev Vajtswv lus twb qhia tseg lawm hais tias, “Muaj ib tug hais nrov nrov tom roob mojsab qhua hais tias, ‘Cia li kho kev tos tus Tswv; kho kev kom ncaj, nws yuav los!’ ” Yauhas tej ris tsho yog muab plaub ntxhuav ua; nws sia siv tawv, nws noj kooj thiab zib ntab. Muaj neeg coob coob hauv lub nroog Yeluxalees thiab thoob plaws cov Yudais lub tebchaws, thiab hauv tej zos uas nyob ob cag ntawm tus Dej Yauladees tuaj cuag Yauhas. Cov neeg nyias lees nyias lub txim, Yauhas muab lawv ua kevcai raus dej hauv tus dej Yauladees. Thaum Yauhas pom cov Falixais thiab cov Xadukais coob leej tuaj thov Yauhas, kom Yauhas muab lawv ua kevcai raus dej, Yauhas hais rau lawv hais tias, “Cov niag nab, leejtwg qhia rau nej hais tias, nej yuav khiav dim Vajtswv txojkev txiav txim uas yuav muaj los sai sai no? Nej yuav tsum ua nej lub neej kom tsimnyog qhov uas nej twb tso nej tej kev txhaum tseg lawm. Nej tsis txhob khav hais tias nej yog Anplahas cov xeebntxwv, ces nej txawm yuav dim tsis raug txim. Kuv qhia rau nej hais tias txawm yog Vajtswv yuav muab tej pobzeb los ua Anplahas cov xeebntxwv los nws yeej ua tau! Nimno twb npaj tau rab taus lawm, yuav ntov tej ntoo txhua tsob ntoo uas tsis txi cov txiv zoo, yuav muab ntov pov rau hauv cub hluavtaws huv tibsi. Qhov uas kuv muab nej ua kevcai raus rau hauv dej, qhia hais tias nej twb tso nej tej kev txhaum tseg lawm, tiamsis tus uas yuav lawv kuv qab los, nws yuav muab nej raus los ntawm Vaj Ntsujplig tus Dawbhuv thiab ntawm hluavtaws. Tus ntawd muaj hwjchim loj dua kuv; kuv twb tsis tsimnyog nqa nws nkawm khau khiab. Nws tuav rawv ib rab ntxuam, nws yuav ntxuaj nws pawg nplej kom cov npluag ya tawm huv tibsi! Nws yuav muab cov nplej zoo ntim rau hauv nws lub txhab, tiamsis nws yuav muab cov npluag pov rau hauv cub hluavtaws uas cig tsis paub tuag.” Thaum ntawd Yexus tuaj pem Kalilais tuaj cuag Yauhas ntawm tus dej Yauladees kom Yauhas muab Yexus ua kevcai raus dej. Tiamsis Yauhas tsis kam, Yauhas hais rau Yexus hais tias, “Tsimnyog koj muab kuv ua kevcai raus dej, ua li cas koj ho tuaj cuag kuv?” Yexus teb Yauhas hais tias, “Koj cia li muab kuv ua kevcai raus dej, rau qhov twb tsimnyog peb ua txhua yam raws li Vajtswv pom zoo kom peb ua.” Yog li ntawd, Yauhas thiaj muab Yexus ua kevcai raus dej. Thaum Yexus ua kevcai raus dej tas, nws tawm hauv dej los. Tamsim ntawd rooj ntug txawm qhib plho, nws pom Vajtswv tus Ntsujplig zoo li tus nquab los tsaws saum nws taubhau. Muaj ib lub suab hais saum ntuj tuaj hais tias, “Tus no yog kuv tus Tub uas kuv hlub, kuv txaus siab rau nws.” Tom qab ntawd Vaj Ntsujplig coj Yexus mus rau tom roob mojsab qhua kom dab Ntxwgnyoog tau sim Yexus siab. Yexus nyob tod tau plaub caug hnub plaub caug hmo, nws tsis tau noj ib yam dabtsi li. Thaum dhau lub sijhawm ntawd lawm nws tshaib plab heev. Dab Ntxwgnyoog los hais rau Yexus hais tias, “Yog koj yog Vajtswv tus Tub tiag, koj cia li hais kom lub pobzeb no txia ua mov.” Yexus teb hais tias, “Vajtswv txojlus sau tseg hais tias, ‘Tsis yog mov xwb thiaj cawm tau neeg txojsia, tiamsis yog Vajtswv tej lus txhua lo thiaj cawm tau.’ ” Tom qab ntawd dab Ntxwgnyoog txawm coj Yexus mus rau hauv lub nroog Yeluxalees uas yog lub nroog Dawbhuv. Nws coj Yexus mus rau saum lub Tuamtsev qhov chaw uas siab tshaj plaws. Nws hais rau Yexus hais tias, “Yog koj yog Vajtswv tus Tub tiag, koj cia li dhia rau hauv av, rau qhov Vajtswv txojlus sau tseg hais tias, ‘Vajtswv yuav kom nws cov timtswv tsomkwm koj; lawv ob txhais tes yuav hwj koj thiab yuav tsis pub koj ob txhais kotaw tsoo pobzeb li.’ ” Yexus teb dab Ntxwgnyoog hais tias, “Vajtswv txojlus hais tias, ‘Koj tsis txhob sim tus Tswv uas yog koj tus Vajtswv siab.’ ” Tom qab ntawd dab Ntxwgnyoog txawm coj Yexus mus rau saum ib lub roob siab siab, thiab ua rau Yexus pom tagnrho tej tebchaws hauv qab ntuj no thiab pom tej kev vammeej hauv tej tebchaws ntawd. Dab Ntxwgnyoog hais rau Yexus hais tias, “Yog koj txhos caug pe kuv, kuv yuav muab txhua yam no rau koj.” Yexus hais rau dab Ntxwgnyoog hais tias, “Ntxwgnyoog, koj cia li khiav mus! Vajtswv txojlus hais tias, ‘Nej yuav tsum pehawm tus Tswv uas yog nej tus Vajtswv tib leeg thiab ua nws tes haujlwm xwb!’ ” Ces dab Ntxwgnyoog txawm ncaim Yexus mus lawm. Tom qab ntawd muaj ib cov timtswv ceebtsheej los tu Yexus. Thaum Yexus hnov hais tias luag ntes Yauhas coj mus kaw rau hauv tsev lojcuj lawm, ces Yexus txawm mus rau pem Kalilais. Yexus tsis mus nyob hauv lub nroog Naxales, tiamsis nws mus nyob hauv lub nroog Kapena-us, ntawm ntug dej Hiavtxwv Kalilais uas yog xeem Xenpuloos thiab xeem Nathalis cheebtsam av. Tej no muaj tiav raws li Yaxayas tus uas cev Vajtswv lus tau qhia tseg hais tias, “Xeem Xenpuloos cheebtsam av thiab xeem Nathalis cheebtsam av uas nyob sab ntug dej Yauladees tim ub, ntawm txojkev uas mus rau tom hiavtxwv, yog lub xeev Kalilais uas lwm Haivneeg nyob. Cov neeg uas nyob qhov tsaus ntuj yuav pom kev kaj nrig. Thiab txojkev kaj ntawd yuav ci rau cov neeg uas nyob hauv qhov tsaus ntuj uas yog txojkev tuag.” Txij thaum ntawd los Yexus txawm pib qhia rau sawvdaws hais tias, “Nej cia li tso nej tej kev txhaum tseg, rau qhov Ntuj Ceebtsheej twb los ze lawm!” Thaum Yexus tabtom taug ntug dej Hiavtxwv Kalilais, nws pom ob kwvtij uas yog, Ximoos (tus uas hu ua Petus) thiab nws tus kwv Adales, nkawd tabtom muab vas ntaus ntses hauv hiavtxwv. Yexus hais rau nkawd hais tias, “Neb cia li nrog kuv mus, kuv yuav qhia kom neb paub mus nrhiav neeg.” Tamsim ntawd nkawd txawm tso plhuav nkawd ob lub vas tseg thiab nrog Yexus mus. Yexus mus tom ntej mentsis, Yexus txawm pom dua ob kwvtij uas yog, Yakaunpaus thiab Yauhas, nkawd yog Xenpedais tub. Nkawd tabtom nrog nkawd txiv Xenpedais ntxiv vas hauv nkoj, Yexus txawm hu nkawd nrog Yexus mus. Tamsim ntawd nkawd txawm tso lub nkoj thiab nkawd txiv tseg, nkawd nrog Yexus mus. Yexus mus thoob plaws hauv lub xeev Kalilais, nws qhuab qhia hauv tej tsev sablaj, thiab qhia txojmoo zoo uas hais txog Vajtswv lub Tebchaws. Thiab Yexus kho cov neeg muaj mob tsis hais cov neeg mob yam mob twg los nws kho zoo huv tibsi. Yexus lub moo nrov ncha mus thoob plaws tebchaws Xilias, ces sawvdaws txawm coj tej neeg muaj mob, tsis hais tus mob yam mob twg tuaj cuag Yexus, tej neeg raug dab, tej neeg qaug dabpeg thiab tej neeg tuag tes tuag taw los Yexus kho txhua tus zoo huv tibsi. Muaj neeg coob coob hauv lub xeev Kalilais, hauv lub nroog Dekapaulis, hauv lub nroog Yeluxalees, hauv cov Yudais lub tebchaws thiab hauv lub tebchaws uas nyob sab ntug dej Yauladees tim ub tuaj nrog Yexus mus. Thaum Yexus pom cov neeg coob coob li ntawd Yexus txawm mus rau pem roob, thaum Yexus zaum lawm. Yexus cov thwjtim txawm los cuag Yexus. Yexus txawm pib qhia lawv: “Cov uas paub hais tias lawv ua tsis tau lawv lub neej raws li Vajtswv lub siab nyiam; cov ntawd tau koob hmoov, rau qhov Ntuj Ceebtsheej yog lawv tug! Cov uas paub nyuaj siab rau lawv tej kev txhaum; cov ntawd tau koob hmoov rau qhov Vajtswv yuav nplig lawv siab! Cov uas txo hwjchim, cov ntawd tau koob hmoov; lawv yuav tau txais tej uas Vajtswv coglus tseg hais tias Vajtswv yuav muab rau lawv. Cov uas xav ua raws li Vajtswv lub siab nyiam, cov ntawd tau koob hmoov; Vajtswv yuav muab rau lawv kom txaus nkaus li lawv lub siab xav. Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv! Cov uas muaj lub siab ncaj ncees, cov ntawd tau koob hmoov; lawv yuav pom Vajtswv! Cov uas ua rau neeg nyob sib haumxeeb, cov ntawd tau koob hmoov; Vajtswv yuav hu lawv hais tias, lawv yog Vajtswv cov menyuam! Cov uas raug luag tsimtxom vim lawv ua raws li Vajtswv lub siab nyiam, cov ntawd tau koob hmoov; rau qhov Ntuj Ceebtsheej yog lawv tug. “Thaum luag thuam nej thiab tsimtxom nej, vim nej yog kuv cov thwjtim, nej tau koob hmoov. Nej cia li zoo siab rau qhov Vajtswv twb npaj nqi zog ntau kawg li cia rau saum ntuj ceebtsheej rau nej lawm. Thaum ub luag twb tsimtxom cov uas cev Vajtswv lus li no lawm thiab. “Nej yog cov ntsev uas las neeg ntiajteb. Yog cov ntsev tsuag lawm, yuav ua li cas ua kom rov qab ntsev tau? Cov ntsev ntawd tsis muaj nqis dabtsi, tsuas muaj yuav muab povtseg thiab neeg yuav muab tsuj xwb. “Nej yog lub teeb uas ci rau neeg ntiajteb pom kev. Lub nroog uas nyob saum roob yeej tsis muaj ib yam dabtsi yuav thaiv tau lub nroog ntawd. Tsis muaj leejtwg taws teeb thiab muab phiab khwb rau; tiamsis tsuas muaj yuav muab txawb rau qhov chaw siab kom txhua tus uas nyob hauv lub tsev pom kev. Ib yam li ntawd, nej yuav tsum ci rau sawvdaws pom tej haujlwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceebtsheej. “Nej tsis txhob xav hais tias yog kuv los rhuav Mauxes txoj Kevcai thiab tej lus uas cov cev Vajtswv lus tau qhia tseg lawm. Tsis yog kuv los rhuav tej lus ntawd, tiamsis yog kuv los ua kom tej lus ntawd tiav. Kuv qhia rau nej hais tias, yog lub ntuj thiab lub ntiajteb tseem muaj nyob, ces txoj Kevcai ntawd yuav tsis muaj ib los poob mus txog thaum txhua yam tiav lawm. Yog leejtwg tsis kam ua raws li nqe lus uas me dua hauv txoj Kevcai no thiab nws tseem qhia lwm tus kom tsis txhob ua raws li ntawd, ces Vajtswv yuav suav hais tias tus ntawd yog tus uas yau dua ntais uas nyob saum ntuj Ceebtsheej. Tiamsis tus uas ua raws li txoj Kevcai ntawd thiab qhia rau lwm tus kom ua raws li ntawd, ces tus ntawd yuav yog tus loj uas nyob saum ntuj Ceebtsheej. Kuv qhia rau nej hais tias, yog nej tsis ua ncaj dua cov xibhwb uas qhia Vajtswv txoj Kevcai thiab cov Falixais, ces nej yuav tsis tau mus nyob saum ntuj Ceebtsheej. “Nej twb hnov tej lus uas luag qhia rau cov neeg thaum ub lawm hais tias, ‘Tsis txhob tua neeg; tus uas tua neeg, tus ntawd yuav raug txim.’ Tiamsis nimno kuv qhia rau nej hais tias, yog leejtwg chim rau nws tus kwvtij, tus ntawd yuav raug txim, thiab tus uas hais rau nws tus kwvtij hais tias, ‘Neeg ruam,’ ces luag yeej yuav coj tus ntawd mus rau cov nomtswv txiav txim; thiab tus uas hu nws ib tug kwvtij hais tias, ‘Neeg vwm,’ ces tus ntawd lub txim txaus nws poob mus rau hauv ntujtawg lawm. Yog li ntawd, thaum koj tabtom muab khoom rau saum lub thaj yuav fij rau Vajtswv thiab koj nco hais tias koj tau ua txhaum rau koj ib tug kwvtij lawm, koj cia li tso plhuav tej khoom fij rau ntawm hauv ntej lub thaj, koj cia li rov qab mus hais kom neb sib haum tso, koj mam li rov qab tuaj muab koj tej khoom fij rau Vajtswv. “Yog leejtwg xyuam phaj kom koj rau hauv tsev tu plaub thiab yuav coj koj mus hais plaub, ua ntej uas tsis tau mus hais plaub, koj cia li thov nws kom neb rov sib haum, nyob tsam thaum neb mus txog hauv lub tsev tu plaub ntug lawm. Nws yuav muab koj rau tus txiav txim, ces tus txiav txim yuav muab koj cob rau tus ceevxwm, thiab tus ceevxwm yuav coj koj mus kaw rau hauv tsev lojcuj. Kuv qhia tseeb rau koj hais tias koj yuav tawm tsis tau hauv qhov chaw ntawd mus txog thaum uas koj them nqi tas. “Nej twb hnov tej lus uas luag qhia hais tias, ‘Tsis txhob deev luag pojniam luag txiv.’ Tiamsis nimno kuv qhia rau nej hais tias yog leejtwg saib ib tug pojniam thiab xav deev tus pojniam ntawd, qhov uas nws saib li ntawd kuj txhaum ib yam li nws twb tau deev tus pojniam ntawd lawm ntag. Yog koj sab qhovmuag xis ua rau koj ua txhaum, koj cia li muab sab qhovmuag ntawd kaus povtseg! Koj muaj ib sab qhovmuag xwb zoo dua li muab tagnrho koj lub cev pov rau hauv ntujtawg. Yog koj sab tes xis ua rau koj ua txhaum, ces koj cia li muab sab tes ntawd txiav povtseg! Koj tshuav ib sab tes xwb, zoo dua li muab tagnrho koj lub cev pov rau hauv ntujtawg. “Muaj dua ib zaj uas luag qhia hais tias, ‘Yog leejtwg yuav nrauj nws tus pojniam, mas nws yuav tsum ua ntawv nias tes sib nrauj rau nws tus pojniam.’ Tiamsis nimno kuv qhia rau nej hais tias, yog leejtwg tus pojniam tsis tau deev hluas nraug, nws cia li muab nrauj lawm, kuj yog nws ua rau tus pojniam ntawd ua txhaum kev nkauj kev nraug, thiab yog leejtwg mus yuav tus pojniam ntawd, kuj ib yam li tus ntawd deev luag pojniam. “Thiab nej twb hnov tej lus uas luag qhia rau cov neeg thaum ub lawm hais tias, ‘Nej yuav tsum ua raws li nej tau coglus tseg rau tus Tswv lawm, tsis txhob rhuav tej lus cog tseg ntawd.’ Tiamsis nimno kuv qhia rau nej hais tias, thaum nej coglus tseg, nej tsis txhob twv ntuj twv teb. Tsis txhob twv lub ntuj, rau qhov lub ntuj yog Vajtswv lub zwmtxwv; tsis txhob twv lub ntiajteb, rau qhov lub ntiajteb yog Vajtswv qhov chaw tiag taw; tsis txhob twv txog lub nroog Yeluxalees, rau qhov lub nroog Yeluxalees yog tus Vajntxwv uas muaj hwjchim loj lub. Tsis txhob twv rau nej lub taubhau, rau qhov nej ua tsis tau kom nej ib txoj plaubhau dawb lossis ib txoj dub. Qhov uas yog, nej cia li hais tias, ‘Yog;’ qhov uas tsis yog, nej cia li hais tias, ‘Tsis yog.’ Yog nej hais tshaj ob lo lus ntawd, ces tej lus ntawd yog los ntawm dab Ntxwgnyoog los xwb. “Nej twb hnov tej lus uas qhia hais tias, ‘Qhovmuag pauj qhovmuag, hniav pauj hniav.’ Tiamsis nimno kuv qhia rau nej hais tias nej tsis txhob ua pauj. Yog leejtwg ntaus nej sab plhu xis, nej cia li tig sab laug rau nws ntaus thiab. Yog leejtwg kom nej rau hauv tsev tu plaub, txeeb yuav nej lub tsho uas hnav tuaj sab hauv, nej cia li hle nej lub tsho uas hnav tuaj sab nraud rau tus ntawd thiab. Yog leejtwg yuam nej kom ris nws lub nra mus ib kilumev, nej cia li ris mus ob kilumev. Yog leejtwg tuaj thov yuav nej ib yam dabtsi, nej cia li muab rau nws; yog leejtwg qiv nej ib yam dabtsi, nej cia li qiv rau nws. “Nej twb hnov tej lus uas hais tias, ‘Hlub nej cov kwvtij thiab ntxub nej cov yeebncuab.’ Tiamsis nimno kuv qhia rau nej hais tias, ‘Hlub nej cov yeebncuab thiab thov Vajtswv pab rau cov uas tsimtxom nej,’ yog nej ua li no, nej thiaj yog Leej Txiv tus uas nyob saum ntuj cov menyuam. Rau qhov Vajtswv ua nws lub hnub ci rau cov neeg ua phem thiab cov neeg ua zoo, thiab tso nag los rau cov neeg ncaj thiab cov neeg tsis ncaj ib yam nkaus. Yog nej tsuas hlub cov uas hlub nej xwb, nej xav hais tias Vajtswv tseem yuav muab nqi zog rau nej thiab no los? Txawm yog cov neeg sau se los lawv twb paub hlub cov neeg uas hlub lawv thiab. Yog nej tsuas hwm nej cov kwvtij nkaus xwb, nej ho ua tau zoo tshaj lwm tus qhov twg? Txawm yog cov neeg uas tsis paub Vajtswv los lawv twb paub sib hwm thiab. Yog li ntawd, nej yuav tsum ua zoo kawg nkaus ib yam li nej Leej Txiv tus uas nyob saum ntuj ceebtsheej, nws yog tus zoo kawg nkaus. “Nej yuav tsum ceevfaj, tsis txhob coj Vajtswv txoj Kevcai kom lwm tus qhuas nej xwb. Yog nej ua li ntawd, nej Leej Txiv tus uas nyob saum ntuj ceebtsheej yuav tsis muab nqi zog rau nej. “Yog li ntawd, thaum nej pub ib yam dabtsi rau tej neeg txomnyem, nej tsis txhob qhia rau tus ub tus no, ib yam li cov neeg ntsejmuag ncaj siab nkhaus ua nyob rau hauv tej tsev sablaj thiab ntawm tej kev tshuam kom luag qhuas lawv. Kuv qhia rau nej hais tias lawv twb tau lawv tej nqi zog lawm. Tiamsis thaum nej pab ib tug neeg txomnyem, nej tsis txhob pub nej sab teslaug paub hais tias nej sab tes xis ua dabtsi. Thaum nej pab lwm tus, nej cia li pab twjywm xwb, nej Leej Txiv tus uas nyob saum ntuj pom tej uas nej ua twjywm ua ntawd nws thiaj yuav muab nqi zog rau nej. “Thaum nej thov Vajtswv, nej tsis txhob ua li cov neeg ntsejmuag ncaj siab nkhaus ua. Lawv nyiam mus sawv thov Vajtswv hauv tej tsev sablaj thiab ntawm tej kev tshuam kom luag pom lawv. Kuv qhia rau nej hais tias lawv twb tau lawv tej nqi zog lawm. Tiamsis thaum nej thov Vajtswv, nej cia li mus rau hauv txaj thiab kaw rooj paim tso, nej mam li thov nej Leej Txiv tus uas nej qhovmuag tsis pom. Nws thiaj yuav muab nqi zog rau nej. “Thaum nej thov Vajtswv, nej tsis txhob hais mus hais los tej lus uas tsis muaj qabhau ib yam li cov neeg tsis ntseeg Vajtswv, lawv xav hais tias yog lawv thov ntev li ntawd Vajtswv thiaj yuav hnov. Nej tsis txhob ua li lawv. Thaum nej tsis tau thov, nej Leej Txiv twb paub tej uas nej xav yuav lawm. Nej yuav tsum thov li no: ‘Peb Leej Txiv tus uas nyob saum ntuj ceebtsheej; Thov kom sawvdaws hwm koj lub npe; thov koj los kav neeg lub siab; thov koj pab kom peb ua tau raws li koj lub siab nyiam yam li cov uas nyob saum ntuj. Thov koj pub mov rau peb muaj noj hnub no. Thov koj zam txim rau peb ib yam li peb twb zam txim rau cov uas ua txhaum rau peb lawm. Thov koj tsis txhob cia tej kev sim siab ntxias tau peb, tiamsis thov koj pab kom peb dim ntawm dab Ntxwgnyoog txhais tes.’ “Yog nej zam txim rau tus uas ua txhaum rau nej lawm, nej Leej Txiv tus uas nyob saum ntuj ceebtsheej thiaj yuav zam txim rau nej. Tiamsis yog nej tsis zam txim rau lwm tus, nej Leej Txiv tus uas nyob saum ntuj ceebtsheej yuav tsis zam txim rau nej thiab. “Thaum nej ua kevcai yoo mov, nej tsis txhob ua ntsejmuag mluas mluas ib yam li cov neeg uas ntsejmuag ncaj siab nkhaus. Lawv ua txuj ua ntsejmuag mluas mlob, kom sawvdaws paub hais tias yog lawv yoo mov. Kuv qhia rau nej hais tias lawv twb tau lawv tej nqi zog lawm. Tiamsis thaum nej ua kevcai yoo mov, nej cia li ntxuav muag thiab ntsis plaubhau, kom lwm tus tsis paub hais tias yog nej yoo mov. Tsuas pub nej Leej Txiv tus uas nej qhovmuag tsis pom paub xwb. Ces nej Leej Txiv tus uas pom tej uas nej ua twjywm ua, nws thiaj yuav muab nqi zog rau nej. “Nej tsis txhob khaws nyiaj txiag thiab qhov txhia chaw rau nej hauv ntiajteb no, rau qhov hauv ntiajteb no muaj ntsaum kabrwg thiab xeb noj, thiab muaj tubsab nyiag. Tiamsis nej cia li khaws nyiaj txiag thiab qhov txhia chaw cia rau nej saum ntuj ceebtsheej, qhov ntawd tsis muaj ntsaum kabrwg thiab xeb noj, thiab tsis muaj tubsab nyiag. Rau qhov nej tej nyiaj txiag thiab qhov txhia chaw nyob qhov twg, nej lub siab yeej yuav nyob qhov ntawd. “Ob lub qhovmuag yog lub teeb uas ci rau lub cev pom kev. Yog nej ob lub qhovmuag pom kev tseeb, tagnrho nej lub cev yuav pom kev kaj nrig; tiamsis yog nej ob lub qhovmuag pom kev tsis tseeb, tagnrho nej lub cev yuav tsaus ntuj nti. Yog hais tias qhov pom kev uas nej muaj tsaus lawm, qhov tsaus ntawd tsuas muaj yuav tsaus heev zuj zus ntxiv xwb! “Tsis muaj leejtwg yuav ua qhev tau rau ob tug tswv. Yog nws ua li ntawd, nws yuav ntxub ib tug thiab nyiam ib tug; nws yuav hwm ib tug thiab saib tsis taus ib tug. Yog nej yuav muab Vajtswv thiab nyiaj txiag saib hlob ib yam nkaus yeej tsis tau. “Vim li ntawd kuv thiaj qhia rau nej, kom nej tsis txhob txhawj hais tias nej yuav tsum muaj zaub mov lossis yuav tsum muaj ris tsho hnav thiaj nyob taus. Rau qhov txojsia tseemceeb dua tej zaub mov, thiab lub cev tseemceeb dua tej ris tsho. Nej sim ua tib zoo xav saib tej noog uas ya saum nruab ntug, cov noog ntawd tsis cog qoobloo, tsis hlais thiab tsis sau ntim rau hauv txhab; tiamsis nej Leej Txiv tus uas nyob saum ntuj ceebtsheej tseem yug cov noog ntawd! Nej tseem muaj nqis dua cov noog ntawd. Nej tej kev txhawj ntawd puas yuav pab tau kom nej muaj txojsia nyob ob peb xyoos ntxiv? “Thiab ua li cas nej yuav txhawj hais tias, nej yuav muab dabtsi los hnav? Nej sim saib tej paj ntoos tom tiaj nrag tawg li cas. Tej paj ntoos ntawd twb tsis ua haujlwm thiab tsis ntos ntaub hnav. Tiamsis kuv qhia rau nej hais tias, txawm yog Vajntxwv Xalumoos muaj nyiaj txiag ntau kawg li los nws twb tsis tau hnav ib cev ris tsho zoo npaum li tej paj ntoos ntawd ib lub li. Tej nroj tsuag uas nyob hnub no, tagkis luag twb yuav muab pov hlawv rau hauv qhovcub, ua ciav Vajtswv twb pub rau tej nroj tsuag ntawd zoo nkauj ua luaj, yog li ntawd, Vajtswv yimhuab yuav pub rau nej muaj hnav zoo dua tej roj tsuag ntawd. Ua li cas nej kev ntseeg yuav tsawg ua luaj! “Yog li ntawd, nej tsis txhob txhawj hais tias, ‘Peb yuav muab dabtsi los noj los haus thiab los hnav?’ (Cov neeg uas tsis ntseeg Vajtswv, lawv niaj hnub txhawj txog tej no.) Nej Leej Txiv tus uas nyob saum ntuj ceebtsheej yeej paub hais tias nej yuav tsum muaj tej no. Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej. Yog li ntawd, nej tsis txhob txhawj rau tagkis, rau qhov tagkis yeej muaj kev txhawj txaus rau tagkis lawm. Kev nyuaj siab hnub twg yeej muaj txaus rau hnub ntawd, tsis tas yuav mus nrhiav kev nyuaj siab los ntxiv. “Nej tsis txhob txiav txim rau lwm tus, Vajtswv thiaj yuav tsis txiav txim rau nej, rau qhov Vajtswv yuav txiav txim rau nej ib yam li nej tau txiav txim rau lwm tus, thiab nej muab lub luaj li cas luj rau lwm tus lawm, Vajtswv yuav muab lub luaj li ntawd luj rau nej. Vim li cas nej yuav saib qhov nyuag hmoov ntoo uas nyob hauv nej tus kwvtij lub qhovmuag, tiamsis nej twb tsis paub hais tias muaj ib yav ntoo nyob hauv nej lub qhovmuag. Thaum tseem muaj ib yav ntoo nyob hauv nej lub qhovmuag, nej tsis txhob hais rau nej tus kwvtij hais tias, ‘Cia kuv pab muab koj qhov nyuag hmoov ntoo uas nyob hauv koj lub qhovmuag?’ Nej cov uas yog neeg ntsejmuag ncaj siab nkhaus! Nej cia li xub muab yav ntoo hauv nej lub qhovmuag tso, nej thiaj yuav pom kev muab qhov nyuag hmoov ntoo hauv nej tus kwvtij lub qhovmuag. “Nej tsis txhob muab tej yam uas muaj nqis pov rau dev, nyob tsam dev tig los tom nej. Nej tsis txhob muab tej hlaws muaj nqis pov rau ntawm npua hauv ntej, npua yuav muab tsuj xwb. “Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhovrooj rau nej. Rau qhov txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhovrooj rau nws. Nej cov uas yog leej txiv, yog nej tus menyuam thov mov, nej yuav muab pobzeb rau los? Lossis yog tus menyuam thov ntses, nej yuav muab nab rau los? Txawm yog nej yog neeg txhaum los nej tseem paub muab yam uas zoo rau nej tej menyuam. Yog li ntawd, nej Leej Txiv tus uas nyob saum ntuj ceebtsheej, nws yimhuab yuav muab tej uas zoo dua tej ntawd rau txhua tus uas thov nws thiab! “Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus. Ua li no thiaj raws li Mauxes txoj Kevcai thiab raws li cov cev Vajtswv lus tau qhia tseg lawm. “Nej yuav tsum mus lub qhovrooj nqaim, rau qhov lub qhovrooj loj thiab txojkev dav coj mus rau ntujtawg thiab muaj coob leej taug txojkev ntawd, tiamsis lub qhovrooj nqaim thiab txojkev me uas mus nyuaj yuav coj mus tau txojsia, cov neeg uas taug txojkev ntawd tsis muaj coob leej. “Nej yuav tsum ceevfaj cov cevlus cuav; thaum lawv tuaj cuag nej, lawv ua txuj ua li lawv yog cov yaj, tiamsis lawv lub siab phem ib yam li hma. Thaum nej pom lawv tes haujlwm nej yuav paub. Tsob pos tshauv yeej tsis txi txiv hmab, thiab tsob ntoo pos ntshav yeej tsis txi txiv ncuavpias. Ib yam nkaus li ntawd, tsob ntoo zoo yeej txi cov txiv zoo, tsob ntoo phem yeej txi cov txiv phem. Tsob ntoo zoo yeej tsis txi cov txiv phem, thiab tsob ntoo phem yeej tsis txi cov txiv zoo. Txhua tsob ntoo uas tsis txi cov txiv zoo, luag yuav muab ntov thiab muab pov rau hauv cub hluavtaws. Yog li ntawd, nej yuav paub cov xibhwb cuav los ntawm tej haujlwm uas lawv ua. “Tsis yog txhua tus uas hu kuv hais tias, ‘Tus Tswv! tus Tswv,’ ces yuav tau mus Ntuj Ceebtsheej. Tiamsis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb. Thaum txog hnub ntawd yuav muaj ntau leej hais rau kuv hais tias, ‘Tus Tswv! tus Tswv, peb twb tuav koj lub npe qhia Vajtswv Txojlus, peb tuav koj lub npe ntiab dab thiab ua ntau yam txujci tseemceeb!’ Thaum ntawd kuv yuav hais rau lawv hais tias, ‘Cov neeg siab phem, cia li khiav mus, kuv tsis paub nej!’ “Yexus hais tias, txhua tus uas hnov kuv tej lus thiab ua raws li tej lus ntawd, tus ntawd zoo ib yam li tus uas muaj tswvyim, nws ua nws lub tsev rau saum pobzeb. Thaum los nagxob nagcua, dej nyab thiab cua ntsawj lub tsev ntawd. Lub tsev ntawd tsis vau, rau qhov nws ua rau saum pobzeb. “Tus uas hnov kuv tej lus, tiamsis tsis ua raws li tej lus ntawd, tus ntawd zoo ib yam li tus uas tsis muaj tswvyim, nws ua nws lub tsev rau saum cov suabzeb. Thaum los nagxob nagcua, dej nyab thiab cua ntsawj lub tsev ntawd, ces lub tsev ntawd txawm vau thiab puastsuaj tas huv tibsi lawm!” Thaum Yexus qhia tej no tas lawm, cov neeg uas tuaj mloog Yexus qhia ntawd xav tsis thoob li. Yexus muaj hwjchim qhia thiab Yexus qhia tsis thooj li cov xibhwb uas qhia Vajtswv txoj Kevcai qhia. Thaum Yexus nqis pem roob los, muaj neeg coob coob tuaj raws Yexus qab. Muaj ib tug txivneej mob ruas los txhos caug ntua ntawm Yexus hauv ntej thov hais tias, “Tus Tswv, yog koj txaus siab kho kuv tus mob, koj yeej kho tau kuv zoo.” Yexus txawm cev tes mus tuav nkaus tus ntawd thiab hais tias, “Kuv txaus siab pab koj. Koj tej ruas cia li zoo hlo!” Tamsim ntawd nws tej ruas txawm zoo tas huv tibsi lawm. Yexus hais rau nws hais tias, “Koj tsis txhob mus qhia zaj no rau leejtwg li, tiamsis koj cia li ncaj nraim mus cuag tus povthawj thiab kom nws saib hais tias koj tej ruas twb zoo lawm. Tom qab ntawd koj cia li nqa khoom mus fij rau Vajtswv raws li Mauxes tau qhia tseg, sawvdaws thiaj paub hais tias koj twb zoo lawm.” Thaum Yexus mus txog hauv lub nroog Kapena-us, muaj ib tug thawj tubrog pawg pua tuaj cuag Yexus. Nws thov Yexus hais tias, “Tus Tswv, kuv tus tubtxib mob heev tom tsev, nws tes taw twb txhav tas thiab nws txomnyem kawg.” Yexus hais tias, “Kuv yuav mus kho nws.” Tus thawj tubrog teb hais tias, “Tus Tswv, koj tsis txhob mus. Kuv yog ib tug uas tsis tsimnyog koj yuav mus hauv kuv lub tsev. Thov koj hais ib los xwb ces kuv tus tubtxib yeej yuav zoo. Txawm yog kuv los tseem muaj ib co hlob uas kav kuv, thiab kuv muaj ib co tubrog uas kuv kav. Yog kuv hais rau tus no hais tias, ‘Mus!’ ces nws txawm mus. Yog kuv hais rau tus tod hais tias, ‘Los!’ ces nws txawm los. Thiab yog kuv hais rau kuv tus tubtxib hais tias, ‘Ua li no!’ ces nws txawm ua li ntawd.” Thaum Yexus hnov tus thawj tubrog hais li ntawd, Yexus xav tsis thoob li, Yexus thiaj tig mus hais rau cov neeg coob coob uas raws Yexus qab hais tias, “Kuv qhia rau nej hais tias, txawm yog hauv cov Yixalayees los kuv tsis tau pom ib tug uas muaj kev ntseeg npaum li tus no. Kuv qhia rau nej hais tias, yuav muaj neeg coob coob tuaj sab hnubtuaj thiab tuaj sab hnubpoob tuaj. Lawv cov ntawd yuav nrog Anplahas, Ixaj thiab Yakhauj lawv nyob ua ke hauv Vajtswv lub Tebchaws. Tiamsis cov neeg uas twb tsimnyog yuav tau mus nyob hauv Vajtswv lub Tebchaws, lawv yuav tsis tau mus, rau qhov lawv tsis mloog Vajtswv lus. Lawv yuav raug muab pov rau hauv qhov uas tsaus ntuj nti. Lawv yuav quaj qw tom hniav qawv qhov ntawd.” Yexus txawm hais rau tus thawj tubrog ntawd hais tias, “Koj cia li rov qab mus tsev, koj tus tubtxib yuav zoo raws li koj ntseeg.” Ces tamsim ntawd tus thawj tubrog tus tubtxib tom tsev txawm zoo lawm. Thaum Yexus mus rau hauv Petus tsev, Yexus pom Petus niamtais ua npaws thiab pw saum txaj. Yexus tuav nws txhais tes; ces nws txawm zoo thiab nws sawv los ua zaub ua mov rau Yexus noj. Thaum yuav tsaus ntuj muaj neeg coj tej neeg uas raug dab tuaj cuag Yexus. Yexus hais tib los xwb ces dab txawm tawm lawm, thiab Yexus kho tej neeg uas muaj mob txhua tus zoo huv tibsi. Yexus ua li ntawd kom muaj tiav raws li Yaxayas tus uas cev Vajtswv lus tau qhia tseg lawm hais tias, “Nws muab peb tej kev tsaus muag tshem thiab nws ris peb tej kev mob kev nkeeg mus lawm.” Thaum Yexus pom muaj neeg coob coob nyob puagncig nws, Yexus txawm hais rau cov thwjtim hais tias, “Cia li mus rau sab hiavtxwv tim ub.” Muaj ib tug xibhwb qhia Vajtswv txoj Kevcai tuaj cuag Yexus thiab hais tias, “Xibhwb, kuv yuav nrog koj mus, txawm yog koj yuav mus qhov twg los kuv yuav nrog koj mus.” Yexus teb tus ntawd hais tias, “Txawm yog hma los muaj qhov nkaum, thiab noog los muaj zes, tiamsis Neeg Leej Tub tsis muaj chaw pw.” Muaj dua ib tug uas yog ib tug thwjtim hais tias, “Tus Tswv, thov cia kuv mus faus kuv txiv tso, kuv mam li nrog koj mus.” Yexus teb hais tias, “Koj cia li nrog kuv mus, cia cov neeg tuag faus lawv tus tuag.” Tom qab ntawd Yexus nce mus rau hauv lub nkoj, thiab nws cov thwjtim nrog nws mus. Tamsim ntawd txawm muaj cua daj cua dub hlob heev ntsawj dej ntas los ntaus lub nkoj ua rau lub nkoj twb yuav tog. Tiamsis thaum ntawd Yexus pw tsaug zog lawm. Cov thwjtim txawm mus tsa Yexus thiab hais tias, “Tus Tswv, thov koj pab peb, peb twb yuav tuag!” Yexus teb hais tias, “Ua li cas nej yuav ntshai ua luaj? Ua li cas nej kev ntseeg yuav tsawg ua luaj?” Yexus txawm sawv tsees los txwv cua thiab dej, cua txawm tu thiab dej tsis ntas lawm. Cov thwjtim xav tsis thoob li, lawv sib tham hais tias, “Tus no yog leejtwg, ua li cas cua thiab dej ho mloog nws lus!” Thaum Yexus mus txog ntawm cheebtsam Nkadalas uas nyob rau sab ntug hiavtxwv tim ub, Yexus txawm ntsib ob tug txivneej uas raug dab tawm tom roob toj ntxas los. Nkawd tsiv kawg li, tsis muaj leejtwg kam taug txojkev ntawd. Thaum Yexus ntsib dheev nkawd, nkawd txawm qw nrov nrov hais tias, “Vajtswv tus Tub, koj tuaj thab wb ua dabtsi? Twb tsis tau txog lub sijhawm, koj txawm siv tuaj tsimtxom wb lawm los?” Nyob tsis deb ntawd, muaj ib pab npua coob coob tabtom nrhiav noj. Cov dab txawm thov Yexus hais tias, “Yog koj yuav ntiab peb tawm mus, thov cia peb mus rau hauv pab npua ntawd.” Yexus hais rau cov dab ntawd hais tias, “Cia li mus.” Cov dab mus nkag rau pab npua, ces pab npua txawm dhia mus poob tsag tsua rau hauv hiavtxwv tuag tas huv tibsi lawm. Cov neeg uas zov npua ntawd txawm khiav mus rau hauv nroog, qhia tej xwm ntawd thiab qhia zaj uas dab tawm hauv ob tug txivneej ntawd rau sawvdaws mloog. Cov neeg uas nyob hauv nroog txawm tawm tuaj saib Yexus; thaum lawv pom Yexus, lawv txawm thov kom Yexus tawm hauv lawv cheebtsam ntawd mus rau lwm qhov. Yexus txawm nce mus rau hauv nkoj thiab hla hiavtxwv rov los txog rau hauv nws lub nroog, txawm muaj neeg muab pam qhwv ib tug txivneej tuag tes tuag taw kwv tuaj cuag Yexus. Thaum Yexus pom hais tias lawv muaj kev ntseeg heev li ntawd, Yexus thiaj hais rau tus tuag tes tuag taw ntawd hais tias, “Metub, koj tsis txhob nyuaj siab! Kuv twb zam koj lub txim lawm.” Muaj cov xibhwb uas qhia Vajtswv txoj Kevcai qee leej sib tham hais tias, “Tus txivneej no hais lus saib tsis taus Vajtswv!” Yexus twb paub tej uas lawv hais lawm, nws thiaj hais rau lawv hais tias, “Ua li cas nej yuav xav phem ua luaj li? Lo lus uas hais tias, ‘Kuv twb zam koj lub txim lawm,’ lossis lo lus uas hais tias, ‘Koj cia li sawv tsees mus tsev. Ob los no lo twg yuav yoojyim hais dua’? Kuv ua li no qhia rau nej paub hais tias, Neeg Leej Tub muaj hwjchim hauv ntiajteb no zam txim rau neeg.” Yexus thiaj hais rau tus txivneej uas tuag tes tuag taw hais tias, “Koj cia li sawv thiab nqa koj daim pam mus tsev!” Tus txivneej ntawd txawm sawv tsees mus tsev lawm. Thaum sawvdaws pom li ntawd, lawv ntshai kawg thiab lawv ua Vajtswv tsaug, rau qhov Vajtswv twb pub hwjchim rau neeg lawm. Yexus txawm tawm qhov ntawd mus, thaum nws tabtom taug kev mus, nws pom ib tug txivneej sau se hu ua Mathais, zaum ntawm lub rooj sau se. Yexus hais rau Mathais hais tias, “Koj cia li nrog kuv mus.” Ces Mathais txawm sawv tsees nrog Yexus mus. Thaum Yexus tabtom noj mov hauv Mathais tsev, cov neeg sau se thiab cov neeg txhaum ntau leej tuaj nrog Yexus thiab nws cov thwjtim zaum ntawm rooj noj mov ua ke. Thaum cov Falixais pom li ntawd, lawv txawm nug Yexus cov thwjtim hais tias, “Ua li cas nej tus xibhwb nrog cov neeg sau se thiab cov neeg txhaum noj mov ua ke?” Yexus hnov lawv sib tham li ntawd, nws teb hais tias, “Cov neeg tsis muaj mob yeej tsis mus cuag kws tshuaj, tsuas yog cov neeg muaj mob thiaj mus cuag kws tshuaj xwb. Nej cia li mus nyeem Vajtswv Txojlus uas hais tias, ‘Qhov uas kuv xav tau yog, kom nej muaj lub siab hlub, tsis yog tus tsiaj uas muab tua theej txhoj,’ rau qhov kuv tsis yog los hu cov neeg ncaj ncees, tiamsis yog kuv los hu cov neeg txhaum.” Tom qab ntawd Yauhas tus uas muab neeg ua kevcai rau dej, cov thwjtim txawm tuaj nug Yexus hais tias, “Ua li cas peb cov thiab cov Falixais pheej ua kevcai yoo mov, tiamsis koj cov thwjtim tsis ua li?” Yexus teb lawv hais tias, “Nej xav hais tias thaum tus nraug vauv tseem nrog nws cov phoojywg noj tshoob ua ke, lawv yuav nyuaj siab no los? Lawv yeej tsis nyuaj siab li! Tiamsis thaum txog lub sijhawm uas luag coj tus nraug vauv mus lawm, ces lawv yuav yoo mov.” “Yeej tsis muaj leejtwg yuav muab ib daim ntaub tshiab los ntxiv lub tsho qub, yog nws ua li ntawd, daim ntaub tshiab yuav rub ua rau lub tsho qub hajyam ntuag loj xwb. Thiab tsis muaj leejtwg yuav muab cov cawv txiv hmab tshiab ntim rau hauv lub hnab tawv qub. Yog nws ua li ntawd, lub hnab tawv qub yuav tawg cov cawv txiv hmab yuav los tas, thiab lub hnab tawv yuav tsis zoo siv lawm. Tiamsis cov cawv txiv hmab tshiab yuav tsum muab ntim rau hauv lub hnab tawv tshiab, lub hnab tawv thiaj tsis tawg, cov cawv txiv hmab thiaj tsis txeej.” Thaum Yexus tseem tabtom hais li ntawd rau lawv, cov Yudais ib tug nom txawm tuaj txhos caug ntawm Yexus kotaw thiab thov hais tias, “Kuv tus ntxhais nyuam qhuav tu siav nrho no, thov koj mus tsa tes rau saum nws, nws thiaj yuav ciaj rov los.” Yexus txawm sawv tsees nrog tus nom ntawd mus, Yexus cov thwjtim nrog Yexus mus thiab. Thaum ntawd, muaj ib tug pojniam coj khaubncaws tau kaum ob xyoos tsis tu li, nws txiv ntiag los rau ntawm Yexus nraubqaum thiab kov Yexus lub tw tsho. Nws xav hais tias, “Yog kuv kov Yexus lub tw tsho, kuv tus mob yuav zoo.” Yexus tig hlo saib tus pojniam ntawd, thiab hais rau nws hais tias, “Mentxhais, koj tsis txhob nyuaj siab! Vim koj ntseeg, koj tus mob thiaj zoo lawm.” Tamsim ntawd tus pojniam ntawd tus mob txawm zoo hlo lawm. Thaum Yexus mus txog hauv tus nom ntawd lub tsev, nws pom cov neeg tshuab qeej ntaus nruas thiab sawvdaws quaj nyiav ntshoo nrooj. Yexus txawm hais kom cov neeg ntawd tawm mus rau nraum zoov thiab hais tias, “Tus ntxhais no tsis tuag, nws tsaug zog xwb!” Ces sawvdaws txawm luag Yexus zom zaws. Thaum cov neeg tawm mus tas lawm, Yexus txawm mus rau hauv chav uas lawv tso tus ntxhais ntawd, thiab tuav nkaus tus ntxhais ntawd txhais tes, ces tus ntxhais ntawd txawm sawv tsees. Zaj no nrov ncha moo lug mus thoob plaws cheebtsam ntawd. Thaum Yexus tawm qhov ntawd thiab taug kev mus, muaj ob tug txivneej digmuag raws nws qab. Nkawd hu Yexus nrov nrov hais tias, “Daviv tus Tub, thov koj hlub wb!” Thaum Yexus mus rau hauv tsev lawm, ob tug txivneej digmuag ntawd txawm los cuag nws. Yexus nug nkawd hais tias, “Neb puas ntseeg hais tias kuv kho tau neb?” Nkawd teb hais tias, “Tus Tswv, wb ntseeg.” Ces Yexus txawm kov nkawd ob lub qhovmuag thiab hais tias, “Cia li muaj raws li neb ntseeg!” Nkawd txawm rov pom kev li qub lawm. Yexus txwv nkawd hais tias, “Neb tsis txhob qhia zaj no rau leejtwg li!” Tiamsis nkawd tawm mus thiab qhia Yexus lub moo nrov ncha mus thoob plaws cheebtsam ntawd. Thaum ob tug txivneej digmuag ntawd tabtom tawm mus, txawm muaj neeg coj ib tug txivneej uas raug dab thiab hais tsis tau lus tuaj cuag Yexus. Thaum Yexus ntiab dab tawm lawm, tamsim ntawd tus txivneej ntawd txawm hais tau lus. Sawvdaws xav tsis thoob thiab hais tias, “Peb tsis tau pom dua li no nyob hauv lub tebchaws Yixalayees li!” Tiamsis cov Falixais hais tias, “Yog Ntxwgnyoog uas yog dab tus thawj pub hwjchim rau nws, nws thiaj ntiab tau dab tawm.” Yexus mus txhua nrho hauv tej nroog thiab hauv tej zos. Nws qhuab qhia hauv tej tsev sablaj, nws qhia Txojmoo Zoo uas hais txog Vajtswv lub Tebchaws, thiab kho tej neeg uas muaj mob, txawm yog tus mob li cas los Yexus kho tau zoo huv tibsi. Thaum Yexus saib cov neeg coob coob ntawd, nws hlub lawv kawg li, rau qhov lawv ntxhov siab thiab tsis muaj leejtwg pab lawv, lawv zoo ib yam li pab yaj uas tsis muaj tus tswv yug. Ces Yexus hais rau nws cov thwjtim hais tias, “Cov nplej uas zoo hlais lawm muaj ntau, tiamsis cov neeg uas hlais muaj tsawg. Nej cia li thov tus tswv teb kom nws txib dua ib co neeg mus pab hlais nws cov nplej.” Yexus hu nws kaum ob tug thwjtim los rau ntawm nws. Nws muab hwjchim rau lawv ntiab tau dab thiab kho tau txhua yam mob huv tibsi. Kaum ob tug timthawj ntawd npe hu li no: Ximoos (tus uas hu ua Petus) thiab nws tus kwv Adales; Yakaunpaus thiab nws tus kwv Yauhas, nkawd yog Xenpedais tub; Filis thiab Npataulaumais; Thaumas thiab Mathais uas yog tus sau se; Yakaunpaus uas yog Alafais tus tub, thiab Thade-us; Ximoos tus uas xav kom nws haivneeg muaj kev ywjpheej, thiab Yudas Ixakali-us tus uas ntxeev siab rau Yexus. Yexus txib kaum ob tug thwjtim mus thiab nws qhia rau lawv hais tias, “Nej tsis txhob mus rau hauv Lwm Haivneeg, thiab tsis txhob mus hauv cov Xamalis tej nroog. Tiamsis nej cia li mus nrhiav cov neeg Yixalayees, rau qhov lawv zoo li pab yaj uas ploj lawm. Nej cia li mus qhia hais tias, ‘Ntuj Ceebtsheej twb los ze lawm!’ Nej cia li mus kho tej neeg uas muaj mob, tsa cov neeg uas tuag lawm sawv rov qab los, kho cov neeg mob ruas thiab ntiab dab tawm. Kuv pub lub hwjchim dawb dawb rau nej, yog li ntawd, nej yuav tsum pub dawb rau lwm tus tsis txhob yuav nqi. Nej tsis txhob nqa kub, nqa nyiaj lossis nqa txiaj toog liab hauv nej tej hnab tshos mus; thaum nej mus, nej tsis txhob khuam hnab thoobpuab, tsis txhob npaj tsho mus hloov, tsis txhob nqa khau lossis pas nrig mus. Rau qhov tus uas ua haujlwm yeej tsimnyog luag pub rau nws noj nws hnav. “Thaum nej mus txog hauv ib lub nroog twg lossis hauv ib lub zos twg, nej cia li mus rau hauv tus uas txaus siab hu nej mus so hauv nws tsev, thiab nyob hauv nws tsev mus txog thaum nej tawm hauv lub nroog ntawd mus. Thaum nej mus hauv leejtwg tsev, nej yuav tsum xub hais lus noj qab nyob zoo rau lawv. Yog tsevneeg ntawd hu nej mus hauv lawv tsev, lawv yuav tau koob hmoov, tiamsis yog lawv tsis hu nej mus hauv lawv tsev, lawv yuav tsis tau koob hmoov li. Yog tsevneeg twg lossis lub nroog twg tsis hu nej thiab tsis mloog tej lus uas nej qhia, ces thaum nej tawm mus, nej cia li nchos tej hmoov av uas lo nej kotaw povtseg. Kuv qhia tseeb rau nej hais tias, hnub uas Vajtswv txiav txim, nws yuav rau txim rau lub nroog ntawd hnyav dua li nws rau txim rau lub nroog Xaudoos thiab lub nroog Kaumaulas! “Nej cia li mloog kuv hais! Kuv txib nej mus ib yam li pab yaj uas yuav mus rau hauv pab hma. Nej yuav tsum ntse ib yam li tus nab thiab muaj lub siab mos siab muag ib yam li tus nquab. Nej yuav tsum ceevfaj, rau qhov yuav muaj neeg ntes nej coj mus rau hauv tsev tu plaub, thiab luag yuav muab nej nplawm hauv tej tsev sablaj. Luag yuav coj nej mus sawv tabmeeg tej nomtswv thiab cov vajntxwv, lawv yuav taug nej zaj, vim nej ua kuv tes haujlwm, nej thiaj yuav muaj sijhawm qhia Txojmoo Zoo rau lawv thiab rau lwm Haivneeg. Thaum lawv coj nej mus thiab taug nej zaj, nej tsis txhob txhawj hais tias nej yuav hais li cas. Thaum txog lub sijhawm ntawd, Vajtswv yuav qhia kom nej paub hais. Tej lus uas nej yuav hais tsis yog nej tej lus, tiamsis yog nej Leej Txiv tus Ntsujplig qhia rau nej. “Tij yuav muab kwv, kwv yuav muab tij coj mus cob rau luag tua. Txiv yuav ua ib yam nkaus li ntawd rau tej menyuam, thiab menyuam yuav tawmtsam niamtxiv thiab coj mus rau luag tua. Txhua tus yuav ntxub nej vim nej yog cov uas ntseeg kuv, tiamsis tus uas ua siab ntev mus txog thaum kawg tus ntawd yuav dim. Yog lub nroog twg tsimtxom nej, nej cia li khiav mus rau lwm lub nroog. Kuv qhia tseeb rau nej hais tias, thaum nej tseem tsis tau mus qhia thoob tej nroog hauv lub tebchaws Yixalayees, Neeg Leej Tub twb los lawm. “Tsis muaj ib tug tub kawm ntawv uas yuav paub tshaj nws tus xibhwb, thiab tsis muaj ib tug tubqhe uas yuav muaj hwjchim dua nws tus tswv. Yog ib tug tub kawm ntawv paub li nws tus xibhwb lawm, thiab tus tubqhe muaj hwjchim npaum li nws tus tswv kuj zoo lawm. Yog tus tswv tsev twb tau lub npe hu ua Npexenpus lawm, ces nws tsevneeg hajyam yuav tau lub npe phem dua li ntawd thiab! “Yog li ntawd, nej tsis txhob ntshai neeg, rau qhov tej uas neeg muab npog cia lawm, yuav muaj tus muab nthuav los rau sawvdaws saib, thiab tej uas tsis muaj leejtwg paub, yuav muaj tus muab qhia rau sawvdaws. Tej uas kuv qhia rau nej thaum tsaus ntuj, nruab hnub nej yuav tsum qhia rau sawvdaws, thiab tej uas kuv hais twjywm rau nej, nej yuav tsum mus qhia rau sawvdaws hnov Nej tsis txhob ntshai tus uas tua tau nej lub cev, tiamsis tua tsis tau nej tus ntsujplig; nej yuav tsum ntshai Vajtswv tus uas muab tau nej lub cev thiab nej tus ntsujplig pov rau hauv ntujtawg. Ob tug noog tsev luag muag ib xu xwb puas yog? Tiamsis yog nej Leej Txiv tsis pom zoo cia ib tug poob rau hauv av, yeej tsis poob li. Thiab txawm yog nej tej plaubhau los Vajtswv twb suav txhua txoj huv tibsi lawm. Yog li ntawd, nej tsis txhob ntshai; nej muaj nqis heev dua ntau tus noog tsev! “Tus uas lees tabmeeg sawvdaws hais tias, nws yog kuv li, ces kuv yuav lees yuav tus ntawd tabmeeg kuv Txiv tus uas nyob saum ntuj ceebtsheej ib yam li ntawd. Tiamsis tus uas tsis lees yuav kuv tabmeeg sawvdaws, kuv yuav tsis lees tus ntawd tabmeeg kuv Txiv tus uas nyob saum ntuj ceebtsheej thiab. “Nej tsis txhob xav hais tias, yog kuv coj kev thajyeeb los rau ntiajteb. Tsis yog li ntawd, kuv tsis coj kev thajyeeb los, tiamsis kuv coj rab ntaj los. Kuv los, yog los ua kom tub tawmtsam txiv, ntxhais tawmtsam niam, thiab nyab tawmtsam pog; yus cov yeebncuab uas phem tshaj yog yus tsevneeg. “Tus uas hlub nws niam nws txiv heev dua hlub kuv, tus ntawd tsis tsimnyog ua kuv tus thwjtim; tus uas hlub nws tej tub tej ntxhais heev dua hlub kuv, tus ntawd tsis tsimnyog ua kuv tus thwjtim. Tus uas tsis kwv nws tus ntoo khaublig nrog kuv mus, tus ntawd tsis tsimnyog ua kuv tus thwjtim. Tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia, vim nws ntseeg kuv, tus ntawd yuav tau txojsia. “Tus uas tos txais nej, twb yog nws tos txais kuv; thiab tus uas tos txais kuv, twb yog tus ntawd tos txais tus uas txib kuv los. Tus uas tos txais Vajtswv ib tug tubtxib, vim nws paub hais tias tus ntawd yog tus uas qhia Vajtswv Txojlus, ces nws yuav tau nqi zog ib yam li tus tubtxib ntawd. Tus uas tos txais ib tug neeg ncaj ncees, rau qhov nws paub hais tias tus ntawd yog neeg ncaj ncees, ces nws yuav tau nqi zog ib yam li tus ntawd. Kuv qhia tseeb rau nej hais tias tus uas muab ib khob dej txiag rau kuv cov thwjtim tus uas yau dua ntais haus, vim nws paub hais tias tus ntawd yog kuv tus thwjtim, ces nws yuav tau nqi zog.” Thaum Yexus qhia nws kaum ob tug thwjtim tas lawm, nws txawm tawm qhov ntawd mus qhia thiab qhuab qhia rau hauv tej nroog uas nyob ze ntawd. Thaum Yauhas tus uas muab neeg ua kevcai raus dej tseem raug kaw rau hauv tsev lojcuj, hnov txog tej uas Yexus niaj hnub ua, nws txawm txib nws cov thwjtim qee leej mus cuag Yexus. Lawv tuaj nug Yexus hais tias, “Thov koj qhia rau peb saib koj puas yog tus uas Yauhas hais tias yuav los, lossis peb tseem yuav tos dua lwm tus?” Yexus teb hais tias, “Nej cia li rov mus qhia tej uas nej hnov thiab tej uas nej pom lawm rau Yauhas hais tias, Cov neeg digmuag rov pom kev, cov neeg tuag ceg mus taus kev, cov neeg mob ruas zoo, cov neeg lag ntseg hnov lus, cov neeg tuag lawm sawv rov los thiab twb muaj neeg mus qhia Txojmoo Zoo rau cov neeg txomnyem lawm. Tus uas ntseeg kuv, tus ntawd tau koob hmoov.” Thaum Yauhas cov thwjtim rov mus lawm, Yexus txawm hais rau cov neeg coob coob ntawd hais tias, “Thaum nej mus cuag Yauhas tom roob mojsab qhua, nej mus saib dabtsi? Nej mus saib tus tauj iab uas cua tshuab rawv mus rawv los los? Nej mus saib dabtsi? Nej mus saib tus uas hnav tej tsoos tsho zoo zoo los? Tsuas yog cov neeg uas nyob hauv vajntxwv lub loog thiaj tau hnav zoo xwb! Nej qhia rau kuv saib, nej mus saib dabtsi? Mus saib ib tug cev Vajtswv lus los? Yog lawm, tiamsis tus uas nej pom ntawd muaj hwjchim loj dua ib tug cev Vajtswv lus. Tus Yauhas no yog tus uas Vajtswv Txojlus twb xub qhia tseg lawm. Vajtswv hais tias, ‘Kuv yuav txib kuv tus tubtxib ua koj ntej mus kho kev tos koj.’ Kuv qhia tseeb rau nej hais tias txhua tus uas yug los ntawm pojniam, tsis muaj ib tug muaj hwjchim npaum li Yauhas tus uas muab neeg ua kevcai raus dej. Tiamsis tus uas yau tshaj nyob saum ntuj Ceebtsheej, tus ntawd tseem muaj hwjchim loj dua Yauhas thiab. Txij thaum Yauhas tus uas muab neeg ua kevcai raus dej qhuab qhia los txog niaj hnub no, muaj cov neeg uas tawmtsam qhov uas neeg mus Ntuj Ceebtsheej, thiab muaj cov neeg uas sib zog txeeb kom tau mus Ntuj Ceebtsheej. Cov cev Vajtswv lus thiab Mauxes txoj Kevcai yeej qhia txog Ntuj Ceebtsheej los txog rau Yauhas, thiab yog nej ntseeg tej lus uas lawv qhia ntawd, nej yeej yuav ntseeg hais tias Yauhas yog Eliyas tus uas lawv hais tias, nws yuav los. Yog li ntawd, leejtwg muaj pobntseg cia li mloog! “Kuv yuav muab cov neeg tiam no piv rau dabtsi? Lawv zoo ib yam li tej menyuam yaus uas ua si tom tshavpuam. Pab no hais rau pab tod hais tias, ‘Peb twb tshuab raj lawm, tiamsis nej tsis seevcev! Peb quaj nyiav tiamsis nej tsis mob siab!’ Yauhas los, nws ua kevcai yoo mov thiab nws tsis haus cawv txiv hmab, sawvdaws thiaj hais tias, ‘Nws raug dab lawm!’ Neeg Leej Tub los, nws noj thiab haus, sawvdaws thiaj hais tias, ‘Nej saib, tus neeg no noj loj haus loj, nws nrog cov neeg uas sau se thiab cov neeg txhaum ua phoojywg!’ Tus uas pom Vajtswv tes haujlwm, tus ntawd yuav paub tseeb hais tias Vajtswv yog tus muaj tswvyim.” Yexus txawm cem cov neeg uas nyob hauv tej nroog uas Yexus tau mus ua txujci tseemceeb ntau zaug lawm, rau qhov lawv tsis kam tso lawv tej kev txhaum tseg. “Lub nroog Khaulaxis, koj yuav raug kev puastsuaj! Lub nroog Npexaidas, koj yuav raug kev puastsuaj! Tej txujci tseemceeb uas twb ua rau neb pom lawm, yog ua tej ntawd rau hauv lub nroog Tiles thiab lub nroog Xidoos, ces cov neeg uas nyob hauv ob lub nroog ntawd twb xub muab ntaubtsaj los npua thiab tsuab tshauv nphoo rau ibce ntxov los lawm! Lawv yuav ua li ntawd kom sawvdaws paub hais tias, lawv twb tso lawv tej kev txhaum tseg lawm. Kuv qhia rau neb hais tias, hnub uas Vajtswv txiav txim, nws yuav rau txim rau neb hnyav dua rau txim rau lub nroog Tiles thiab lub nroog Xidoos. Lub nroog Kapena-us, koj yuav tsa koj lub hwjchim mus kom txij ntuj los? Yuav muab koj pov mus rau hauv ntujtawg! Yog hais tias, tej txujci tseemceeb uas ua rau koj pom lawm, ua rau hauv lub nroog Xaudoos, lub nroog ntawd yeej yuav nyob los txog niaj hnub no. Kuv qhia rau koj hais tias, hnub uas Vajtswv txiav txim, nws yuav rau txim rau koj hnyav dua li nws rau txim rau lub nroog Xaudoos!” Thaum ntawd Yexus hais tias, “Txiv, koj yog tus Tswv uas kav lub ntuj thiab lub ntiajteb no! Kuv ua koj tsaug, rau qhov koj twb muab tej no zais cia tsis qhia rau cov neeg muaj tswvyim thiab txawj ntse paub, tiamsis koj qhia tej ntawd rau cov neeg uas tsis txawj tsis ntse paub xwb. Txiv, koj yeej pom zoo cia ua li ntawd. “Kuv Txiv twb muab ib puas tsav yam tso rau kuv lawm. Tsis muaj leejtwg paub Leej Tub, tsuas yog Leej Txiv thiaj paub xwb, thiab tsis muaj leejtwg paub Leej Txiv, tsuas yog Leej Tub thiab cov uas Leej Tub pom zoo qhia rau thiaj paub xwb. “Nej cov uas sab sab vim ris nra hnyav, nej cia li los cuag kuv, kuv yuav cia nej so. Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so. Tus quab uas kuv muab rau nej kwv yoojyim kwv, thiab lub nra uas kuv muab rau nej ris, lub ntawd tsis hnyav.” Tsis ntev tom qab ntawd, Hnub Xanpataus Yexus taug kev mus txog hauv ib daim teb npleg. Yexus cov thwjtim tshaib plab, lawv txawm de hnab nplej los tev noj. Thaum cov Falixais pom cov thwjtim ua li ntawd, lawv hais rau Yexus hais tias, “Koj saib, Hnub Xanpataus koj cov thwjtim ua li ntawd, lawv ua txhaum peb txoj Kevcai lawm!” Yexus teb hais tias, “Nej tsis tau nyeem zaj uas thaud Daviv thiab nws cov neeg tshaib plab nws ua li cas los? Daviv mus rau hauv Vajtswv lub Tuamtsev, Daviv thiab nws cov neeg muab tej ncuav uas twb muab fij rau Vajtswv lawm los noj. Txawm yog Vajtswv txoj kevcai txwv tsis pub lwm tus noj cov ncuav ntawd, tsuas yog cov povthawj noj xwb los lawv tseem muab noj thiab. Lossis nej tsis tau nyeem txoj Kevcai uas hais tias, txhua Hnub Xanpataus cov povthawj uas nyob hauv lub Tuamtsev ua txhaum kevcai Hnub Xanpataus, tiamsis tsis muaj neeg hais tias lawv ua txhaum no los? Kuv qhia tseeb rau nej hais tias nyob ntawm no muaj ib yam uas tseemceeb dua lub Tuamtsev. Vajtswv Txojlus hais tias, ‘Qhov uas kuv xav tau, yog kom nej muaj lub siab hlub, tsis yog tus tsiaj uas muab tua theej txhoj.’ Yog nej totaub zaj no lawm, nej yuav tsis rau txim rau cov uas tsis tau ua txhaum; rau qhov Neeg Leej Tub yog tus Tswv Hnub Xanpataus.” Yexus tawm qhov ntawd thiab mus rau hauv ib lub tsev sablaj, muaj ib tug txivneej qhuav tes nyob qhov ntawd. Cov neeg uas tuaj nyob ntawd muaj qee leej xav nrhiav txim rau Yexus, lawv txawm nug Yexus hais tias, “Kho mob Hnub Xanpataus puas txhaum Kevcai?” Yexus teb lawv hais tias, “Yog nej cov leejtwg muaj ib tug yaj poob qhovtshij Hnub Xanpataus, nej tsis mus muab rho tawm los? Neeg muaj nqis heev dua tus yaj! Yog li ntawd, txoj Kevcai yeej pub peb pab neeg Hnub Xanpataus.” Ces Yexus hais rau tus txivneej qhuav tes ntawd hais tias, “Koj cia li xyab koj txhais tes.” Nws txawm xyab hlo nws txhais tes, ua ciav nws txhais tes txawm zoo hlo ib yam li sab uas tsis qhuav lawm. Cov Falixais txawm tawm mus sablaj saib yuav ua li cas lawv thiaj tua tau Yexus. Thaum Yexus paub li ntawd, nws txawm tawm qhov chaw ntawd mus lawm; thiab muaj neeg coob coob nrog nws mus. Yexus kho tej neeg uas muaj mob txhua tus zoo huv tibsi, thiab nws txwv tsis pub lawv mus qhia nws rau leejtwg li. Nws ua li no kom muaj tiav raws li Yaxayas uas yog tus cev Vajtswv lus tau qhia tseg lawm hais tias, “Tus no yog kuv tus tubtxib uas kuv xaiv tseg lawm, kuv hlub nws thiab kuv txaus siab rau nws, kuv yuav tso kuv tus Ntsujplig los rau saum nws, thiab nws yuav qhia kuv txojkev ncaj ncees rau txhua haivneeg paub. Nws yuav tsis nrog leejtwg sib cav sib ceg lossis qw nrov nrov, lossis nws yuav tsis hais lus nrov nrov ntawm tej kev. Tus tauj iab uas po lawm, nws yuav tsis muab lov, lossis lub teeb uas twb yuav tuag, nws yuav tsis tshuab kom tuag. Nws yuav ua siab ntev mus txog thaum txojkev ncaj ncees kovyeej lawm, thiab txhua haivneeg yuav cia siab rau nws.” Thaum ntawd muaj neeg coj ib tug txivneej digmuag thiab hais tsis tau lus tuaj cuag Yexus, rau qhov nws raug dab. Yexus kho tus txivneej ntawd zoo, ces nws txawm hais tau lus thiab pom kev lawm. Cov neeg uas pom Yexus ua li ntawd, lawv xav tsis thoob li, lawv sib nug hais tias, “Nws puas yog Daviv tus Tub?” Thaum cov Falixais hnov sawvdaws hais li ntawd, lawv teb hais tias, “Nws ntiab tau dab tawm twb yog Npexenpus uas yog dab tus thawj pub hwjchim rau nws.” Yexus twb paub tej uas lawv xav thiab nws hais rau lawv hais tias, “Yog ib lub tebchaws twg tawg ua ob peb pab lawm, thiab cov neeg ntawd sib ntaus sib tua, ces lub tebchaws ntawd yuav puastsuaj mus. Thiab ib lub nroog twg lossis ib tsevneeg twg tawg ua ob peb pab lawm, thiab cov neeg ntawd sib ntaus sib tua, ces lawv yeej yuav tawg tas mus. Yog cov neeg uas dab Ntxwgnyoog kav sib ntaus sib tua, ces kuj piv ib yam li lawv twb tawg ua ob peb pab lawm, tsis ntev lawv yuav tawg mus tas! Nej hais tias yog Npexenpus pub hwjchim rau kuv ntiab tau dab. Yog li ntawd, yog leejtwg pub hwjchim rau nej cov neeg uas ntiab tau dab ntiab dab? Nej cov neeg uas ntiab tau dab yog cov uas yuav txiav txim rau nej! Tsis yog li nej hais! Tiamsis yog Vajtswv tus Ntsujplig pub hwjchim rau kuv, kuv thiaj ntiab tau dab. Qhov ntawd qhia rau nej paub hais tias, Vajtswv lub Tebchaws twb los txog nej lawm. “Tsis muaj leejtwg yuav tsoo mus tau rau hauv tus txivneej uas muaj zog lub tsev thiab huab nws tej qhov txhia chaw, tsuas yog nws xub muab tus uas muaj zog ntawd khi tso, nws thiaj huab tau tej qhov txhia chaw hauv tus ntawd tsev. “Tus uas tsis tuaj kuv tog, tus ntawd yeej tawmtsam kuv. Tus uas tsis koom nrog kuv, tus ntawd ua kom tawg pab tawg pawg. Yog li ntawd, kuv thiaj hais rau nej hais tias, txhua yam kev txhaum uas neeg ua lossis txhua lo lus phem uas neeg hais, Vajtswv zam txim tau, tiamsis yog leejtwg thuam Vaj Ntsujplig tus Dawbhuv, Vajtswv yuav zam txim tsis tau rau tus ntawd. Yog leejtwg thuam Neeg Leej Tub, Vajtswv zam txim tau rau tus ntawd, tiamsis yog leejtwg thuam Vaj Ntsujplig tus Dawbhuv, Vajtswv yuav zam txim tsis tau rau tus ntawd, tsis hais tiam no lossis tiam tom ntej. “Tsob ntoo zoo yeej txi cov txiv zoo; tsob ntoo phem yeej txi cov txiv phem, yog yus pom cov txiv yus yeej paub hais tias, tsob ntoo ntawd yog tsob phem lossis tsob zoo. Cov niag nab! Nej yog neeg siab phem nej yuav ua li cas hais tau lus zoo! Rau qhov lub siab xav li cas, lub ncauj yeej hais li ntawd. Tus neeg siab zoo yeej hais tej lus zoo; thiab tus neeg siab phem yeej hais tej lus phem.” Kuv qhia rau nej hais tias, “Hnub uas Vajtswv txiav txim, txhua tus nyias yuav tsum tau lees txhua lo lus tsis muaj qabhau uas nyias tau hais lawm rau Vajtswv. Nej yuav raug txim lossis tsis raug, yog nyob ntawm tej lus uas nej hais.” Cov xibhwb uas qhia Vajtswv txoj Kevcai thiab cov Falixais qee leej tuaj hais rau Yexus hais tias, “Xibhwb, peb xav kom koj ua ib yam txujci tseemceeb rau peb saib.” Yexus teb hais tias, “Cov neeg tiam no ua phem ua qias thiab tsis ntseeg Vajtswv li. Nej xav kom kuv ua ib yam txujci tseemceeb rau nej saib no los? Kuv yuav tsis ua! Zaj txujci uas nej yuav pom tsuas yog Yaunas zaj xwb. Yaunas nyob hauv tus ntses loj loj lub plab tau peb hnub peb hmos li cas, Neeg Leej Tub yuav nyob hauv nruab a peb hnub peb hmos ib yam li ntawd. Hnub uas Vajtswv txiav txim, cov neeg uas nyob hauv lub nroog Nineves yuav sawv qhia nej tej kev txhaum rau nej, rau qhov thaum lawv hnov Yaunas qhia, lawv txawm tso lawv tej kev txhaum tseg. Kuv qhia rau nej hais tias muaj ib tug nyob ntawm no, nws tseem muaj hwjchim loj dua Yaunas thiab! Hnub uas Vajtswv txiav txim, tus poj vajntxwv uas kav tebchaws Senpas yuav sawv qhia nej tej kev txhaum rau nej, rau qhov nws tuaj nram nws lub tebchaws tuaj mloog Vajntxwv Xalumoos piav nws tej kev txawj ntse; kuv qhia rau nej hais tias muaj ib tug nyob ntawm no, nws tseem muaj hwjchim loj dua Vajntxwv Xalumoos thiab! “Thaum dab tawm hauv ib tug neeg lub cev mus lawm, tus dab ntawd txawm mus rau tom roob mojsab qhua thiab nrhiav chaw so. Yog nws nrhiav tsis tau, nws yuav hais tias, ‘Kuv yuav rov qab mus rau tom kuv lub qub tsev uas kuv tawm tuaj.’ Thaum nws rov los txog nws lub qub tsev, ua ciav tsis muaj leejtwg nyob, thiab twb tu dulug cia lawm. Nws txawm mus coj xya tus dab uas tsiv dua nws los nrog nws nyob hauv lub tsev ntawd. Thaum kawg tus neeg ntawd hajyam txomnyem heev dua thaum chivthawj. Cov neeg siab phem tiam no yuav raug kev txomnyem ib yam li ntawd ntag.” Thaum Yexus tseem tabtom qhia cov neeg uas nyob ntawd, ces Yexus niam thiab Yexus cov kwv txawm tuaj txog. Lawv sawv sab nraud thiab lawv hais tias lawv xav nrog Yexus tham. Muaj ib tug hais rau Yexus hais tias, “Koj niam thiab koj cov kwv tuaj sawv sab nraud, lawv xav nrog koj tham.” Yexus teb hais tias, “Leejtwg yog kuv niam? Leejtwg yog kuv cov kwv?” Yexus taw tes rau cov thwjtim thiab hais tias, “Cov no yog kuv niam thiab kuv cov kwv. Tus uas ua raws li kuv Txiv tus uas nyob saum ntuj ceebtsheej lub siab nyiam, tus ntawd yog kuv tus kwv, kuv tus muam thiab kuv niam.” Tib hnub ntawd Yexus txawm tawm hauv tsev mus zaum nram ntug hiavtxwv. Muaj neeg coob coob tuaj nyob puagncig Yexus, nws thiaj nce mus rau hauv lub nkoj, ces cov neeg coob coob sawv ntawm ntug dej. Yexus ua lus pivtxwv qhia ntau zaj rau lawv mloog hais tias, “Muaj ib tug txivneej nqa noob nplej mus tseb. Thaum nws tseb cov noob nplej rau hauv daim teb, muaj qee lub poob rau hauv plawv kev, ces noog txawm los khaws noj lawm. Muaj qee lub poob rau ntawm qhov av uas hauv muaj pobzeb tiv lawm. Cov noob ntawd tuaj sai sai, vim av tsis tob. Thaum tshav ntuj kub, cov kaus ntsws thiab qhuav lawm; vim tus cag ntsia av tsis tob. Muaj qee lub poob rau hauv lub hauvpaus pos, ces tsob pos hlob tuaj laum cov nplej ntawd tuag tas lawm. Muaj qee lub poob rau ntawm qhov av zoo, cov ntawd txhawv taus. Qee hnab txi tau ib puas lub, qee hnab txi tau rau caum lub thiab qee hnab txi tau peb caug lub.” Yexus xaus lus hais tias, “Yog leejtwg muaj pobntseg cia li mloog!” Cov thwjtim los nug Yexus hais tias, “Ua li cas koj pheej ua lus pivtxwv qhia lawv xwb?” Yexus teb hais tias, “Zaj uas neeg tsis tau paub hais txog Ntuj Ceebtsheej, kuv twb qhia rau nej lawm, tiamsis tsis tau qhia rau cov neeg ntawd paub. Rau qhov tus uas twb muaj lawm, yeej yuav muab ntxiv kom nws muaj nplua mias, tiamsis tus uas tsis muaj, txawm yog nws tsuas muaj mentsis xwb los Vajtswv yuav muab rho mus huv tibsi. Vim li ntawd, kuv thiaj ua lus pivtxwv qhia xwb, rau qhov lawv ntsia, tiamsis lawv tsis pom, lawv mloog, tiamsis lawv tsis hnov thiab tsis totaub. Ua li ntawd, thiaj muaj tiav raws li Yaxayas uas yog tus cev Vajtswv lus tau hais tseg hais tias, ‘Nej yuav mloog tas mloog thiab, tiamsis nej yuav tsis totaub; nej yuav saib tas saib thiab, tiamsis nej yuav tsis pom, rau qhov cov neeg no lub siab ruam, lawv tsis xav mloog, lawv ntsaws pobntseg, lawv tsis xav saib, lawv qi qhovmuag. Yog tsis ua li ntawd, nyob tsam lawv qhovmuag yuav pom, lawv pobntseg yuav hnov, lawv yuav totaub, ces lawv yuav tig rov los cuag kuv, thiab kuv yuav kho lawv tej mob zoo.’ “Tiamsis nej yog cov uas muaj hmoo, nej qhovmuag thiaj pom thiab nej pobntseg thiaj hnov. Kuv qhia tseeb rau nej hais tias, cov cev Vajtswv lus thiab cov neeg ncaj ncees tos ntev loo, lawv xav pom tej uas nej pom, tiamsis lawv tsis tau pom, lawv xav hnov tej uas nej hnov, tiamsis lawv tsis tau hnov. “Nej cia li mloog, kuv yuav txhais zaj lus pivtxwv uas hais txog tus tseb nplej lub ntsiab rau nej. Cov neeg uas hnov zaj lus uas hais txog Ntuj Ceebtsheej tiamsis tsis totaub, zoo ib yam li lub noob nplej uas poob rau hauv plawv kev. Dab Ntxwgnyoog txawm los txeeb tej lus ntawd hauv lawv lub siab lawm. Cov noob nplej uas poob rau ntawm qhov av uas hauv muaj pobzeb tiv lawm, piv txog Vajtswv txojlus uas thaum neeg hnov dheev, lawv txaus siab hlo txais yuav tamsim ntawd. Tiamsis Txojlus ntawd cog tsis ruaj rau hauv lawv lub siab, Txojlus ntawd nyob tsis ntev. Thaum lawv raug kev txomnyem lossis kev tsimtxom, ces lawv txawm muab tso tseg tamsim ntawd. Cov noob nplej uas poob rau hauv lub hauvpaus pos, piv txog Vajtswv txojlus uas neeg hnov; tiamsis lawv tej kev nyuaj siab, kev ntshaw nyiaj hlob tuaj laum Vajtswv txojlus lawm, lawv txojkev ntseeg thiaj tsis loj hlob. Thiab cov noob nplej uas poob rau ntawm qhov av zoo, piv txog Vajtswv txojlus uas neeg hnov thiab totaub: cov neeg ntawd ibtxhia txi tau ib puas lub, ibtxhia txi tau rau caum lub thiab ibtxhia txi tau peb caug lub.” Yexus qhia dua ib zaj lus pivtxwv rau lawv mloog hais tias, “Ntuj Ceebtsheej piv ib yam li ib tug txivneej uas coj noob nplej mus tseb rau hauv nws daim teb. Muaj ib hmos thaum sawvdaws pw tsaug zog tas lawm, tus ntawd tus yeebncuab txawm coj ib co noob txhauv tuaj tseb xyaw rau cov nplej, ces nws txawm khiav lawm. Thaum cov nplej loj hlob thiab pib txhawv lawm, ua ciav pom muaj txhauv tuaj xyaw thiab. Tus tswv cov tubtxib los hais rau nws hais tias, ‘Tus tswv, puas yog koj tsuas tseb cov noob nplej zoo rau hauv koj daim teb xwb? Ua li cas nimno ho muaj txhauv tuaj xyaw thiab?’ Nws teb lawv hais tias, ‘Tej ntawd yog yeebncuab ua xwb.’ Cov tubtxib nug nws hais tias, ‘Koj puas xav kom peb mus muab cov txhauv ntawd dob povtseg?’ Nws teb hais tias, ‘Tsis txhob mus dob, nyob tsam thaum nej dob cov txhauv, nej yuav dob tau cov nplej thiab. Cia cov nplej thiab cov txhauv nyob ua ke mus txog lub caij hlais tso, kuv mam hais kom cov hlais xub hlais cov txhauv pav ua tej tes thiab muab mus pov hlawv, thiab sau cov nplej los rau hauv kuv lub txhab.’ ” Yexus hais dua ib zaj lus pivtxwv rau lawv mloog hais tias, “Ntuj Ceebtsheej piv ib yam li lub noob zaub. Muaj ib tug txivneej coj ib lub noob zaub mus cog rau hauv nws daim teb. Lub noob zaub ntawd, me dua lwm yam noob huv tibsi. Thaum lub noob ntawd tuaj lawm, nws loj hlob ua ib tsob uas loj dua tej zaub huv tibsi. Nws loj ua ib tsob ntoo thiab noog los ua zes rau saum nws tej ceg.” Yexus hais dua ib zaj lus pivtxwv rau lawv mloog hais tias, “Ntuj Ceebtsheej piv ib yam li cov keeb uas ib tug pojniam muab xyaw rau peb siab hmoov nplej, thiab ua rau cov hmoov nplej su tas huv tibsi.” Tej zaj uas Yexus qhia rau sawvdaws, nws ua lus pivtxwv qhia xwb, tsis muaj ib zaj uas nws tsis ua lus pivtxwv qhia li. Nws ua li ntawd kom muaj tiav raws li Yaxayas uas yog tus cev Vajtswv lus tau qhia tseg hais tias, “Thaum kuv hais rau lawv, kuv yuav ua lus pivtxwv hais xwb; kuv yuav qhia tej uas tsis muaj neeg paub txij thaum tsim lub ntiajteb los rau lawv mloog.” Yexus txawm tso cov neeg coob coob ntawd tseg thiab nws mus rau hauv tsev, nws cov thwjtim los hais rau nws hais tias, “Thov koj txhais zaj lus pivtxwv uas koj hais txog cov txhauv hauv daim teb ntawd rau peb mloog saib yog li cas.” Yexus qhia hais tias, “Tus uas tseb cov noob nplej zoo yog Neeg Leej Tub; daim teb yog lub ntiajteb no; cov noob nplej uas zoo yog cov neeg uas yog Vajtswv cov; cov txhauv yog cov neeg uas yog dab Ntxwgnyoog cov. Thiab tus yeebncuab uas tuaj tseb cov noob txhauv ntawd yog dab Ntxwgnyoog. Lub caij hlais yog lub sijhawm uas ntiajteb kawg, cov hlais yog cov timtswv ceebtsheej. Lub sijhawm ntiajteb kawg yuav zoo ib yam li thaum lawv sau cov txhauv mus povtseg. Neeg Leej Tub yuav txib nws cov timtswv mus sau cov neeg uas ua rau lwm tus ua txhaum thiab cov neeg ua phem ua qias huv tibsi tawm hauv nws lub tebchaws thiab coj cov neeg ntawd mus pov rau hauv lub cubtawg uas cig hlob hlob, lawv yuav quaj tom hniav qawv qhov ntawd. Thaum ntawd Vajtswv cov neeg yuav ci ntsa iab ib yam li lub hnub nyob hauv lawv Leej Txiv lub Tebchaws. Yog leejtwg muaj pobntseg cia li mloog! “Ntuj Ceebtsheej piv ib yam li hub nyiaj uas luag muab faus cia rau hauv ib daim teb. Muaj ib tug mus pom ces nws txawm muab av npoog rau, nws zoo siab kawg li. Nws rov mus muab nws lub cuabtam muag huv tibsi, thiab muab cov nyiaj mus yuav daim teb ntawd. “Thiab Ntuj Ceebtsheej piv ib yam li ib tug tub luam mus nrhiav yuav cov hlaws uas muaj nqis. Thaum nws mus nrhiav pom ib co hlaws uas muaj nqis dua tej huv tibsi lawm, nws txawm rov los muab nws lub cuabtam muag thiab muab cov nyiaj mus yuav cov hlaws ntawd. “Thiab Ntuj Ceebtsheej piv ib yam li lub vas cuab ntses uas luag muab cuab rau hauv hiavtxwv mag tau txhua yam ntses. Thaum lub vas mag tau ntses ntau heev lawm, cov neeg cuab ntses txawm rub lub vas los rau tim ntug. Lawv zaum xaiv cov ntses zoo ntim rau hauv tawb, thiab muab cov uas tsis muaj nqis povtseg. Thaum lub sijhawm ntiajteb kawg yuav zoo li ntawd ntag. Cov timtswv yuav los muab cov neeg ua phem cais tawm ntawm cov neeg ua zoo mus, thiab coj mus pov rau hauv lub cubtawg uas cig hlob hlob, lawv yuav quaj tom hniav qawv qhov ntawd.” Yexus nug cov thwjtim hais tias, “Nej puas totaub tej no?” Lawv teb hais tias, “Peb totaub lawm.” Ces Yexus txawm hais rau lawv hais tias, “Yog li ntawd, txhua tus xibhwb uas qhia Vajtswv txoj Kevcai uas twb kawm paub txog Ntuj Ceebtsheej lawm, lawv zoo ib yam li tus tswv tsev uas muab nws tej qhov txhia chaw qub thiab tshiab rho tawm hauv nws lub txhab los siv.” Thaum Yexus qhia tej zaj lus pivtxwv no tas lawm, nws txawm tawm qhov ntawd thiab rov mus rau hauv nws lub nroog. Nws mus qhuab qhia hauv lub tsev sablaj, thiab cov neeg uas hnov nws qhia xav tsis thoob li. Lawv sib tham hais tias, “Nws tau tej tswvyim no qhov twg los? Thiab ua li cas nws ua tau tej txujci no? Nws puas yog tus kws ntoo tus tub? Nws niam puas yog Malis? Thiab nws cov kwv puas yog Yakaunpaus, Yauxej, Ximoos thiab Yudas? Puas yog nws cov muam puavleej nyob hauv lub nroog no? Nws tau tej tswvyim no qhov twg los?” Lawv txawm tsis hwm Yexus. Yexus hais rau lawv hais tias, “Tej neeg ob cag puavleej hwm tus cev Vajtswv lus, tsuas yog cov neeg uas nyob hauv nws lub zos thiab nws tsevneeg thiaj tsis hwm nws xwb.” Yexus tsis tau ua tej txujci tseemceeb ntau pestsawg qhov ntawd, rau qhov lawv tsis ntseeg. Lub sijhawm ntawd, Helauj tus uas kav lub xeev Kalilais hnov txog Yexus lub moo. Nws txawm qhia rau nws cov nomtswv hais tias, “Tus no yeej yog Yauhas tus uas muab neeg ua kevcai raus dej sawv hauv qhov tuag rov los lawm, nws thiaj ua tau tej txujci tseemceeb no.” Rau qhov Helauj tau txib neeg mus ntes Yauhas khi thiab coj nws mus kaw rau hauv tsev lojcuj. Helauj ua li ntawd twb yog Helauj yuav Helaudias uas yog Helauj tus kwv Filis tus pojniam. Rau qhov Yauhas tus uas muab neeg ua kevcai raus dej hais rau Helauj hais tias, “Qhov uas koj yuav Helaudias ua koj pojniam txhaum kevcai lawm!” Helauj xav tua Yauhas, tiamsis nws ntshai cov Yudais, rau qhov sawvdaws paub tseeb hais tias Yauhas yog ib tug cev Vajtswv lus. Hnub uas luag nco txog Helauj hnub yug, Helaudias tus ntxhais los seevcev rau sawvdaws saib, Helauj txaus siab heev, Helauj coglus rau tus ntxhais hais tias, “Yog koj thov yam twg, kuv yuav muab yam ntawd rau koj!” Tus ntxhais txawm mus thov Helauj raws li nws niam qhia rau nws lawm hais tias, “Koj cia li muab Yauhas tus uas muab neeg ua kevcai raus dej lub taubhau txiav tso rau hauv lub phaj nqa los rau kuv ntawm no!” Vajntxwv nyuaj siab kawg li, tiamsis vim nws tau coglus tabmeeg sawvdaws lawm, nws thiaj ua raws li tus ntxhais thov. Ces nws txawm txib neeg mus txiav Yauhas cajdab hauv tsev lojcuj. Lawv muab Yauhas lub taubhau tso rau hauv lub phaj nqa los rau tus ntxhais, ces tus ntxhais nqa mus rau nws niam. Yauhas cov thwjtim txawm tuaj muab Yauhas lub cev coj mus faus lawm; thiab lawv mus qhia tej no rau Yexus paub. Thaum Yexus hnov hais tias Yauhas tuag lawm, Yexus tib leeg txawm caij nkoj tawm qhov ntawd mus rau ib qhov chaw uas tsis muaj neeg. Thaum sawvdaws hnov hais tias, Yexus mus rau qhov ntawd lawm, lawv txawm tawm hauv lawv tej nroog taug ntug dej caum Yexus qab mus. Thaum Yexus tawm hauv nkoj los, nws pom muaj neeg coob coob, nws hlub lawv thiab nws kho lawv cov neeg muaj mob txhua tus zoo huv tibsi. Thaum yuav tsaus ntuj, Yexus cov thwjtim los hais rau Yexus hais tias, “Qhov no nyob deb nroog thiab twb lig lig lawm, thov koj kom sawvdaws mus nrhiav muas mov tom tej zos noj.” Yexus teb hais tias, “Tsis txhob kom lawv mus, nej cia li muab mov rau lawv noj!” Cov thwjtim teb hais tias, “Peb tsuas muaj tsib lub ncuav thiab ob tug ntses xwb.” Yexus hais tias, “Cia li muab los rau kuv.” Yexus kom sawvdaws zaum ntawm tej nyom; Yexus muab tsib lub ncuav thiab ob tug ntses los, ces nws tsa qhovmuag saib rau saum ntuj thiab ua Vajtswv tsaug, thiab muab cov ncuav ntais cev rau cov thwjtim thiab cov thwjtim coj mus faib rau sawvdaws noj. Txhua tus puavleej tau noj tsau huv tibsi. Cov thwjtim mus sau cov ncuav seem uas sawvdaws noj tsis tas tau kaum ob tawb puv nkaus. Cov neeg uas noj mov hnub ntawd, cov txivneej muaj kwvlam li tsib txhiab leej, tsis suav cov pojniam thiab menyuam. Tom qab ntawd Yexus kom cov thwjtim nce mus rau hauv nkoj thiab caij hla hiavtxwv ua ntej mus rau sab tim ub, ces Yexus txawm kom sawvdaws rov mus tsev. Tom qab uas Yexus kom lawv mus tsev tas lawm, nws tib leeg nce mus thov Vajtswv pem roob. Thaum tsaus ntuj lawm nws tseem nyob nws pem roob; Lub sijhawm ntawd cov thwjtim twb caij nkoj mus txog ib nrab dej lawm. Cua ntsawj tom hauv ntej tuaj ua rau dej ntas tej niag twv tuaj ntaus lub nkoj. Thaum plaub teev yuav kaj ntug, Yexus los kotaw saum nplaim dej los cuag cov thwjtim. Thaum lawv pom Yexus los kotaw sau nplaim dej, lawv ntshai kawg li thiab qw hais tias, “Yog Dab!” Tamsim ntawd Yexus hais rau lawv hais tias, “Nej tsis txhob poob siab! Yog kuv ntag, tsis txhob ntshai!” Petus hais tias, “Tus Tswv, yog hais tias yog koj tiag, thov koj hais kom kuv mus tau saum nplaim dej tuaj cuag koj.” Yexus teb hais tias, “Cia li tuaj!” Petus txawm tawm hauv lub nkoj mus kotaw saum nplaim dej mus cuag Yexus. Tiamsis thaum Petus pom cua ntsawj hlob hlob nws ntshai kawg li, ces nws txawm tog zog rau hauv dej, nws hu nrov nrov hais tias, “Tus Tswv, thov koj pab kuv!” Tamsim ntawd Yexus txawm cev loo tes mus tuav nkaus Petus thiab hais tias, “Ua li cas koj kev ntseeg yuav tsawg ua luaj li! Ua li cas koj tsis cia siab?” Thaum nkawd nce mus rau hauv lub nkoj, ces cua txawm tu lawm. Cov thwjtim uas nyob hauv lub nkoj txawm txhos caug ntua hawm Yexus thiab hais tias, “Koj yog Vajtswv tus Tub tiag.” Yexus thiab nws cov thwjtim caij nkoj hla Hiavtxwv mus txog tim Nkenexales. Cov neeg uas nyob cheebtsam ntawd paub hais tias yog Yexus. Lawv txawm txib neeg mus qhia rau cov neeg uas nyob puagncig cheebtsam ntawd. Ces lawv txawm coj tej neeg muaj mob tuaj cuag Yexus. Lawv thov Yexus hais tias, cia lawv kov Yexus lub tw tsho xwb; lawv txhua tus uas tau kov puavleej zoo huv tibsi. Tom qab ntawd muaj cov Falixais thiab cov xibhwb uas qhia Vajtswv txoj Kevcai qee leej tuaj nram lub nroog Yeluxalees tuaj cuag Yexus thiab nug hais tias, “Ua li cas koj cov thwjtim tsis ua raws li tej kevcai uas peb cov yawgkoob ibtxwm qhia rau peb? Koj cov thwjtim tsis xub ntxuav tes raws li kevcai tso mam li noj mov!” Yexus teb hais tias, “Ua li cas nej ua raws li tej kevcai, tiamsis nej tsis ua raws li Vajtswv Txojlus qhia? Vajtswv hais tias, ‘Koj yuav tsum hwm koj niam koj txiv,’ thiab hais tias, ‘Yog leejtwg cem nws niam nws txiv, yuav tsum muab tus ntawd tua povtseg.’ Tiamsis nej qhia hais tias, ‘Yog leejtwg muaj ib yam dabtsi uas yuav pab tau nws niam nws txiv, tiamsis nws hais tias, kuv twb muab rau Vajtswv lawm,’ tsis tas tus ntawd yuav hwm nws niam hwm nws txiv lawm. Qhov uas nej ua li nej tej kevcai no, yog nej ua saib tsis taus Vajtswv Txojlus. Cov neeg ntsejmuag ncaj siab nkhaus! Qhov uas Yaxayas tus uas cev Vajtswv lus tau hais txog nej yeej muaj tseeb tiag: Vajtswv hais tias, ‘Cov neeg no lub qhovncauj hwm kuv, tiamsis lawv lub siab tsis npuab kuv. Qhov uas lawv pehawm kuv tsis muaj nqis li, Rau qhov lawv muab neeg tej kevcai los qhia ib yam li tej kevcai ntawd yog kuv tej kevcai!’ ” Yexus hu cov neeg coob coob ntawd los cuag nws, thiab nws hais rau lawv hais tias, “Nej ua tib zoo mloog kuv hais, nej thiaj totaub! Tsis yog yam uas mus rau hauv neeg lub qhovncauj, ua rau neeg ua txhaum, tiamsis yog tej uas tawm hauv neeg lub qhovncauj los, thiaj ua rau neeg ua txhaum xwb.” Thaum ntawd cov thwjtim los hais rau Yexus hais tias, “Koj tsis paub hais tias tej lus uas koj hais ntawd ua rau cov Falixais chim kawg li los?” Yexus teb hais tias, “Txhua tsob ntoo uas tsis yog kuv Txiv tus uas nyob saum ntuj cog, yuav muab rho huv tibsi povtseg. Puam chawj lawv! Lawv yog cov thawjcoj uas coj cov digmuag; yog ib tug digmuag coj ib tug digmuag kev, ces nkawd yeej yuav poob qhov xwb.” Petus hais tias, “Thov koj txhais zaj lus pivtxwv no rau peb.” Yexus teb cov thwjtim hais tias, “Nej tseem tsis totaub li lawv cov ntawd thiab los? Nej tsis paub hais tias, yam uas mus ntawm neeg lub qhovncauj mus rau hauv neeg lub plab, yam ntawd tawm dhau lawm xwb. Tiamsis tej lus uas neeg lub qhovncauj hais, yog tawm hauv neeg lub siab los, tej lus ntawd ua rau neeg ua txhaum. Rau qhov yam uas tawm hauv neeg lub siab los, ua rau neeg ua phem, tua neeg, deev luag pojniam luag txiv, ua kev nkauj kev nraug, ua tubsab, hais lus dag thiab rhuav lwm tus ntsejmuag. Tej no yog tej uas ua rau neeg ua txhaum, tiamsis qhov uas tsis ntxuav tes mam li noj mov, yeej tsis ua rau neeg ua txhaum.” Yexus tawm qhov ntawd mus rau pem cheebtsam uas ze lub nroog Tiles thiab lub nroog Xidoos. Muaj ib tug pojniam uas yog neeg Kana-as, nyob hauv cheebtsam ntawd tuaj cuag Yexus, thiab thov hais tias, “Daviv tus Tub, thov koj hlub kuv! Kuv tus ntxhais raug dab, ua rau nws txomnyem kawg li.” Tiamsis Yexus tsis teb tus pojniam ntawd ib los li. Yexus cov thwjtim los cuag Yexus thiab hais tias, “Koj kom nws khiav mus! Rau qhov nws pheej raws peb qab thiab quaj thov li ntawd!” Yexus teb hais tias, “Vajtswv tsuas txib kuv los nrhiav cov Yixalayees uas yog pab yaj uas ploj lawm xwb.” Thaum tus pojniam hnov li ntawd, nws txawm los txhos caug ntua ntawm Yexus kotaw, thiab thov hais tias, “Tus Tswv, thov koj pab kuv.” Yexus teb hais tias, “Tsis tsimnyog muab menyuam tej mov pov rau tej dev noj.” Tus pojniam ntawd teb hais tias, “Yog los mas, tus Tswv, tiamsis txawm yog tej dev los tseem tau noj tej mov seem uas poob saum tus tswv lub rooj los thiab.” Yexus teb tus pojniam ntawd hais tias, “Koj yog ib tug pojniam uas muaj kev ntseeg heev! Koj yeej yuav tau raws li koj thov.” Ces lub sijhawm ntawd nws tus ntxhais txawm zoo lawm. Yexus tawm qhov ntawd rov los, thiab taug ntug Hiavtxwv Kalilais mus rau pem roob thiab zaum. Muaj neeg coob coob tuaj cuag nws, lawv coj tej neeg uas qhuav tes qhuav taw, digmuag, cegtawv, hais tsis tau lus thiab cov neeg uas muaj mob ntau leej tuaj tso rau ntawm Yexus kotaw; thiab Yexus kho lawv txhua tus zoo huv tibsi. Thaum cov neeg sawvdaws pom cov neeg uas hais tsis tau lus, hais tau lus, tej neeg cegtawv zoo, tej neeg qhuav tes qhuav taw mus taus kev thiab tej neeg digmuag pom kev lawm, ces sawvdaws xav tsis thoob thiab ua cov Yixalayees tus Vajtswv tsaug. Yexus hu cov thwjtim los cuag nws thiab hais rau lawv hais tias, “Kuv hlub cov neeg no, vim lawv tuaj nrog kuv nyob tau peb hnub, thiab nimno lawv tsis muaj dabtsi noj lawm. Kuv tsis xav cia lawv yoo tshaib li ntawd mus tsev, nyob tsam lawv tsaus muag ntog tom tej kev.” Cov thwjtim nug Yexus hais tias, “Ntawm no yog roob mojsab qhua xwb, peb yuav mus nrhiav mov qhov twg los kom txaus cov neeg no noj?” Yexus nug cov thwjtim hais tias, “Nej muaj pestsawg lub ncuav?” Lawv teb hais tias, “Peb muaj xya lub ncuav thiab ob peb tug ntses me me xwb.” Yexus hais kom sawvdaws zaum hauv av. Ces nws txawm muab xya lub ncuav thiab cov ntses ntawd los ua Vajtswv tsaug, thiab muab ntais cev rau cov thwjtim; cov thwjtim coj mus faib rau sawvdaws noj. Txhua tus puavleej tau noj tsau huv tibsi. Cov thwjtim mus sau cov ncuav seem uas sawvdaws noj tsis tas, tau xya tawb puv nkaus. Cov neeg uas noj mov, cov txivneej muaj plaub txhiab leej, tsis suav cov pojniam thiab menyuam. Thaum Yexus kom sawvdaws rov mus tsev tas lawm, Yexus txawm nce nkoj mus rau tim cheebtsam Mankadas lawm. Cov Falixais thiab cov Xadukais qee leej tuaj cuag Yexus, xav sim nws, lawv kom nws ua ib yam txujci tseemceeb saum ntuj los rau lawv saib. Tiamsis Yexus teb lawv hais tias, “Thaum hnub yuav poob qho, nej pom qab ntug liab liab, nej hais tias, ‘Tagkis yuav tshav ntuj.’ Thaum kaj ntug nej pom hauv ntuj liab nploog thiab tsaus nti, nej paub hais tias yuav los nag. Nej saib huab saib cua, nej twb paub hais tias yuav tshav ntuj lossis yuav los nag, tiamsis tej txujci uas niaj hnub no muaj lawm, nej ho tsis paub. Yexus txawm hais rau lawv hais tias, cov neeg tiam no ua phem ua qias thiab lawv tsis ntseeg Vajtswv! Nej xav kom kuv ua ib yam txujci tseemceeb rau nej saib. Kuv yuav tsis ua! Tsuas yog nej yuav pom Yaunas zaj xwb.” Ces Yexus txawm tso lawv tseg thiab mus rau lwm qhov lawm. Thaum lawv caij nkoj hla Hiavtxwv mus rau sab tim ub, cov thwjtim tsis nco qab ntim mov mus. Yexus hais rau lawv hais tias, “Nej yuav tsum ceevfaj cov Falixais thiab cov Xadukais cov keeb.” Ces cov thwjtim sib tham hais tias, “Ntshai yog peb tsis ntim mov tuaj, nws thiaj hais li ntawd.” Yexus twb paub tej uas lawv tham lawm, nws txawm hais tias, “Vim li cas nej pheej sib tham txog qhov uas nej tsis ntim mov tuaj?” Ua li cas nej kev ntseeg yuav tsawg ua luaj! Nej tseem tsis tau totaub los? Nej tsis nco qab zaum uas kuv muab tsib lub ncuav ntais faib rau tsib txhiab leej noj los? Nej sau tej uas seem tau pestsawg tawb? Thiab zaum uas kuv muab xya lub ncuav ntais faib rau plaub txhiab leej noj, nej sau tej uas seem tau pestsawg tawb? Ua li cas nej tsis totaub zaj uas kuv hais rau nej? Kuv twb tsis tau hais txog mov los sav. Tiamsis kuv hais kom nej ceevfaj cov Falixais thiab cov Xadukais cov keeb. Thaum ntawd cov thwjtim thiaj totaub hais tias, Yexus tsis tau hais kom lawv ceevfaj tej keeb uas muab xyaw ncuav, tiamsis nws hais kom lawv ceevfaj cov Falixais thiab cov Xadukais tej lus qhia. Yexus mus rau pem cheebtsam uas nyob ze lub nroog Xixaleyas Filipis, nws nug nws cov thwjtim hais tias, “Sawvdaws hais tias Neeg Leej Tub yog leejtwg?” Lawv teb hais tias, “Qee leej hais tias, nws yog Yauhas tus uas muab neeg ua kevcai raus dej, qee leej hais tias nws yog Eliyas, qee leej hais tias nws yog Yelemis lossis yog ib tug cev Vajtswv lus.” Yexus nug lawv hais tias, “Nej ne, nej ho hais tias kuv yog leejtwg?” Ximoos Petus teb hais tias, “Koj yog tus Mexiyas uas yog Vajtswv tus uas muaj sia nyob tus Tub.” Yexus teb hais tias, “Yauhas tus tub Ximoos, koj hmoov zoo kawg! Tej lus no tsis yog neeg qhia rau koj, tiamsis yog kuv Txiv tus uas nyob saum ntuj ceebtsheej qhia rau koj. Kuv hais rau koj tias, koj yog Petus, thiab kuv yuav tsa kuv pawg ntseeg rau saum lub pobzeb no, txawm yog kev tuag los yuav kov tsis yeej pawg ntseeg ntawd. Kuv yuav muab tus yuamsij uas qhib Ntuj Ceebtsheej rau koj; yam uas koj txwv hauv ntiajteb no, Vajtswv yuav txwv yam ntawd saum ntuj ceebtsheej. Yam uas koj tso cai hauv ntiajteb no, Vajtswv yuav tso cai yam ntawd saum ntuj Ceebtsheej.” Yexus txwv nws cov thwjtim tsis pub lawv qhia rau leejtwg paub hais tias, nws yog tus Mexiyas. Txij thaum ntawd los Yexus txawm pib qhia rau nws cov thwjtim hais tias, “Kuv yuav tsum mus nram lub nroog Yeluxalees, cov txwjlaug, cov thawj ntawm cov povthawj, thiab cov xibhwb uas qhia Vajtswv txoj Kevcai yuav tsimtxom kuv thiab muab kuv tua, tiamsis peb hnub kuv yuav sawv hauv qhov tuag rov qab los.” Petus txawm coj Yexus mus rau ib cag thiab cheem hais tias, “Tus Tswv, thov Vajtswv txwv kom tsis txhob muaj li ntawd. Koj yeej yuav tsis raug tej no li!” Yexus tig hlo los hais rau Petus hais tias, “Niag Dab Ntxwgnyoog, koj cia li khiav ntawm kuv mus! Koj tsis txhob tav kuv kev, tej uas koj xav ko yog neeg li xwb, tsis yog Vajtswv li.” Yexus hais rau cov thwjtim hais tias, “Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus. Rau qhov tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia, vim nws ntseeg kuv, tus ntawd yuav tau txojsia. Yog leejtwg tau ib puas tsav yam hauv ntiajteb no los ua nws tug, tiamsis nws txojsia tu lawm, tej ntawd yuav muaj nqis dabtsi rau nws? Yeej tsis muaj ib yam dabtsi uas nws yuav coj mus txhiv tau nws txojsia rov qab los. Thaum Neeg Leej Tub los, nws muaj Leej Txiv lub tshwjchim ci ntsa iab, thiab nws cov timtswv yuav nrog nws los, thiab nws yuav muab nqi zog rau txhua tus raws li tes haujlwm uas lawv tau ua lawm. Kuv qhia tseeb rau nej hais tias, cov neeg uas nyob ntawm no muaj qee leej yuav tsis tau tuag ua ntej uas lawv pom Neeg Leej Tub los ua Vajntxwv.” Tom qab ntawd rau hnub, Yexus coj Petus, Yakaunpaus thiab Yakaunpaus tus kwv Yauhas nrog Yexus mus rau saum ib lub roob siab, tsis muaj lwm tus nrog lawv mus. Thaum lawv tabtom saib Yexus, Yexus lub cev txawm hloov hlo: Nws lub ntsejmuag ci ib yam li lub hnub, thiab nws cev ris tsho ci ntsa iab dawb paug. Peb tug thwjtim ntawd pom Mauxes thiab Eliyas nrog Yexus tham. Petus hais rau Yexus hais tias, “Tus Tswv, peb tuaj nyob ntawm no zoo kawg li! Yog koj pom zoo, kuv yuav ua peb lub tsev pheebsuab rau ntawm no, ib lub rau koj, ib lub rau Mauxes thiab ib lub rau Eliyas.” Thaum Petus tseem tabtom hais li ntawd, txawm muaj ib tauv huab ci dawb paug los roos lawv, thiab muaj ib lub suab hais hauv tauv huab ntawd tuaj hais tias, “Tus no yog kuv tus Tub uas kuv hlub, kuv txaus siab rau nws, nej cia li mloog nws lus.” Thaum cov thwjtim hnov lub suab ntawd, lawv ntshai kawg li, lawv txawm txhos caug ntua nyo rau hauv av. Yexus los tuav nkaus lawv thiab hais tias, “Nej cia li sawv, tsis txhob ntshai.” Lawv tsa qhovmuag saib, tsis pom leejtwg li, tsuas pom Yexus tib leeg xwb. Thaum lawv nqis pem roob los, Yexus txwv hais tias, “Nej tsis txhob qhia zaj uas nej pom ntawd rau leejtwg paub mus txog thaum Neeg Leej Tub sawv hauv qhov tuag rov qab los tso.” Cov thwjtim nug Yexus hais tias, “Vim li cas cov xibhwb uas qhia Vajtswv txoj Kevcai hais tias Eliyas yuav xub los?” Yexus teb hais tias, “Eliyas yeej yuav xub los tiag, thiab nws yuav npaj txhua yam kom tiav log. Kuv qhia rau nej hais tias, Eliyas twb los lawm, tiamsis neeg tsis paub nws, lawv thiaj ua rau nws raws li lawv siab nyiam. Lawv yuav tsimtxom Neeg Leej Tub ib yam li ntawd thiab.” Cov thwjtim totaub hais tias, qhov uas Yexus hais rau lawv ntawd, yog nws hais txog Yauhas tus uas muab neeg ua kevcai raus dej. Thaum Yexus thiab nws peb tug thwjtim rov los txog ntawm cov neeg coob coob, txawm muaj ib tug txivneej tuaj txhos caug ntua ntawm Yexus kotaw, thiab thov hais tias, “Tus Tswv, thov koj hlub kuv tus tub, nws qaug dabpeg thiab txomnyem kawg li. Nws pheej ntog rau hauv qhovcub thiab rau hauv dej. Kuv coj nws tuaj rau koj cov thwjtim kho, tiamsis lawv kho tsis tau.” Yexus teb hais tias, “Cov neeg tsis ntseeg thiab tsis ncaj! Kuv tseem yuav nrog nej nyob ntev npaum li cas, thiab kuv yuav ua siab ntev rau nej mus txog hnub twg? Cia li coj tus metub los rau kuv!” Yexus ntiab dab, ces dab txawm tawm ntawm tus metub mus, thiab tamsim ntawd tus metub txawm zoo lawm. Tom qab ntawd Yexus cov thwjtim los cuag nws twjywm thiab nug hais tias, “Vim li cas peb ntiab tsis tau dab tawm?” Yexus teb hais tias, “Twb yog vim nej tsis muaj kev ntseeg txaus. Kuv qhia tseeb rau nej hais tias, yog nej muaj kev ntseeg luaj lub noob zaub, nej hais rau lub roob no hais tias, ‘Cia li txav ntawm no mus rau tod!’ Ces lub roob ntawd yeej yuav txav mus. Nej yuav ua tau txhua yam huv tibsi! [Tiamsis nej yuav tsum thov Vajtswv thiab yoo mov, nej thiaj ntiab tau yam dab no.”] Thaum Yexus thiab nws cov thwjtim tuaj ua ke rau hauv lub xeev Kalilais, Yexus hais rau lawv hais tias, “Luag yuav ntes Neeg Leej Tub coj mus tsimtxom. Luag yuav muab nws tua; tiamsis peb hnub nws yuav sawv hauv qhov tuag rov qab los.” Cov thwjtim nyuaj siab kawg li. Thaum Yexus thiab nws cov thwjtim tuaj txog hauv lub nroog Kapena-us, cov neeg uas sau se rau lub Tuamtsev los cuag Petus thiab nug hais tias, “Koj tus xibhwb puas them se rau lub Tuamtsev?” Petus teb hais tias, “Them hos.” Thaum Petus mus rau hauv tsev, Yexus txawm nug hais tias, “Ximoos, koj xav li cas? Leejtwg yog cov uas them se rau tej vajntxwv hauv ntiajteb no? Lawv cov tubki lossis lwm tus them?” Petus teb hais tias, “Lwm tus them xwb.” Yexus hais tias, “Yog li ntawd, tsis tas cov tubki yuav them li. Tiamsis peb tsis txhob ua rau lawv ntsawv siab? Koj cia li mus nuv ntses nram Hiavtxwv. Thawj tus ntses uas koj nuv tau, koj cia li muab lub qhovncauj rua, koj yuav pom ib lub nyiaj nyob hauv. Koj nqa lub nyiaj ntawd mus them kuv se thiab koj se.” Thaum lub sijhawm ntawd cov thwjtim los cuag Yexus, thiab nug hais tias, “Leejtwg yog tus loj dua ntais saum ntuj Ceebtsheej?” Yexus hu ib tug menyuam yaus los sawv ntawm lawv xubntiag, thiab hais tias, “Kuv qhia tseeb rau nej hais tias, yog nej tsis hloov nej lub siab kom zoo li tug menyuam yaus no lub, ces nej yuav tsis tau mus saum ntuj Ceebtsheej. Tus uas txo hwjchim li tus menyuam yaus no, tus ntawd yuav yog tus uas loj dua ntais nyob saum ntuj Ceebtsheej. Tus uas lees yuav tus menyuam yaus no ntawm kuv lub npe, kuj yog tus ntawd lees yuav kuv. “Yog leejtwg ua rau cov menyuam uas ntseeg kuv no ib tug ua txhaum, cia li muab hlua khi ib txhib zeb uas loj dai rau tus ntawd cajdab, thiab coj nws mus pov rau hauv hiavtxwv yuav zoo dua. Lub ntiajteb no yuav raug puastsuaj, rau qhov muaj tej uas ua rau neeg ua txhaum! Yeej yuav muaj tej ntawd los, tiamsis tus uas ua kom muaj tej ntawd yuav raug kev puastsuaj! “Yog koj txhais tes lossis koj txhais kotaw ua rau koj ua txhaum, koj cia li muab txhais ntawd txiav povtseg! Yog koj tu ib sab tes lossis ib sab kotaw, koj tau txojsia, zoo dua li koj muaj ob txhais tes lossis ob txhais kotaw, thiab muab koj pov rau hauv lub cubtawg uas cig tsis paub tuag mus ibtxhis li. Thiab yog koj ib sab qhovmuag ua rau koj ua txhaum, koj cia li muab sab ntawd kaus povtseg! Koj muaj ib sab qhovmuag xwb, koj tau txojsia, zoo dua li koj muaj ob sab qhovmuag, thiab muab koj pov rau hauv ntujtawg. “Nej yuav tsum ceevfaj, tsis txhob saib tsis taus cov menyuam no ib tug: Kuv qhia rau nej hais tias, cov timtswv ceebtsheej uas nyob ntawm kuv Txiv tus uas nyob saum ntuj Ceebtsheej lub xubntiag niaj hnub tsomkwm cov menyuam no. [Qhov uas Neeg Leej Tub los, yog los nrhiav cov uas yuam kev lawm.] “Nej xav li cas? Muaj ib tug txivneej muaj ib puas tus yaj, yog ib tug ploj lawm, nws yeej yuav tso cuaj caum cuaj tug rau pem ntav toj, thiab mus nrhiav tus uas ploj lawm. Kuv qhia rau nej hais tias, thaum nws nrhiav tau lawm, nws zoo siab rau tus uas ploj lawm heev dua li nws zoo siab rau cuaj caum cuaj tug uas tsis ploj. Ib yam nkaus li ntawd, nej Leej Txiv tus uas nyob saum ntuj Ceebtsheej yeej tsis xav kom cov menyuam no ib tug puastsuaj li. “Yog koj ib tug kwvtij ua txhaum rau koj, koj cia li mus qhia nws qhov txhaum rau nws thaum neb ob leeg xwb. Yog nws mloog koj lus, koj yuav tau nws rov los ua koj kwvtij li qub. Tiamsis yog nws tsis mloog koj lus, koj cia li coj ib lossis ob tug nrog koj mus, thiaj raws li Vajtswv Txojlus uas tau qhia tseg hais tias, ‘Thaum koj mus qhia ib tug qhov txhaum rau nws, koj yuav tsum coj ob peb leeg nrog koj mus ua timkhawv.’ Tiamsis yog nws tsis mloog lawv lus, nej cia li mus piav txhua yam qhia rau cov ntseeg. Yog nws tsis mloog cov ntseeg lus thiab, ces nej cia li suav hais tias nws yog lwm haivneeg lossis yog ib tug neeg uas sau se. “Kuv qhia tseeb rau nej hais tias, yam twg uas nej txwv hauv ntiajteb no, Vajtswv yuav txwv yam ntawd saum ntuj ceebtsheej, thiab yam twg uas nej tso cai hauv ntiajteb no, Vajtswv yuav tso cai yam ntawd saum ntuj ceebtsheej. “Kuv qhia ntxiv rau nej hais tias, yog nej cov uas nyob hauv ntiajteb no muaj ob leeg ua ib lub siab thov yam twg, kuv Txiv tus uas nyob saum ntuj ceebtsheej yuav pub yam ntawd rau nkawd. Rau qhov yog muaj ob lossis peb leeg tuaj nyob ua ke qhov twg tuav kuv lub npe thov, kuv yuav nrog lawv nyob qhov ntawd.” Petus los nug Yexus hais tias, “Tus Tswv, yog kuv ib tug kwvtij pheej ua txhaum rau kuv, kuv yuav zam txim rau nws pestsawg zaus? Zam xya zaus los?” Yexus teb hais tias, “Tsis yog xya zaus xwb, tiamsis yog xya zaus xya caum. Ntuj Ceebtsheej piv ib yam li ib tug vajntxwv mus txheeb nws tej ntawv saib nws cov tubtxib puas muaj leejtwg tshuav nws nqi. Thaum nws nyuam qhuav pib txheeb, txawm muaj neeg cov ib tug tubtxib uas tshuav vajntxwv nqi ib plhom nyiaj los cuag vajntxwv. Tus tubtxib ntawd tsis muaj nyiaj them, ces vajntxwv thiaj hais kom tus tubtxib ntawd, cia li muab nws thiab nws pojniam menyuam thiab txhua yam uas nws muaj mus muag huv tibsi, kom tau nyiaj los them nws tej nqi. Tus tubtxib ntawd txawm txhos caug ntua ntawm vajntxwv kotaw thiab thov hais tias, ‘Thov koj ua siab ntev rau kuv, kuv mam li mus nrhiav los them rau koj huv tibsi!’ Vajntxwv hlub tus tubtxib ntawd, ces vajntxwv txawm zam tej nqi huv tibsi rau nws thiab tso nws mus lawm. “Thaum tus tubtxib ntawd tawm mus, nws mus ntsib ib tug uas yog lawv tib pab tubtxib. Tus ntawd tshuav nws nqi ib puas lub nyiaj xwb. Nws txawm ntsiab nkaus tus ntawd nyem cajpas thiab hais tias, ‘Koj cia li them cov nqi uas koj tshuav kuv los rau kuv tamsim no!’ Tus ntawd txhos caug ntua thov nws hais tias, ‘Thov koj ua siab ntev rau kuv, kuv mam li nrhiav los them rau koj!’ Tiamsis tus tubtxib ntawd tsis yib li, nws txawm coj tus ntawd mus kaw rau hauv tsev lojcuj, mus txog hnub uas tus ntawd them nqis tas. Thaum nws tib pab tubtxib pom nws ua li ntawd, lawv chim heev, lawv thiaj mus qhia zaj ntawd rau vajntxwv. Vajntxwv txawm hu tus tubtxib ntawd tuaj cuag nws thiab hais tias, ‘Tus tubtxib uas siab phem! Kuv twb zam tej nujnqis uas koj tshuav kuv huv tibsi rau koj lawm, vim koj thov kuv. Tsimnyog koj yuav tsum hlub tus tubtxib uas yog koj tib pab, ib yam li kuv twb hlub koj lawm.’ Vajntxwv chim heev, nws txawm kom luag muab tus tubtxib ntawd coj mus kaw rau hauv tsev lojcuj mus txog hnub uas tus ntawd them nqi tas.” Yexus xaus lus hais tias, “Yog nej ib leeg tsis zam txim rau ib leeg, kuv Txiv tus uas nyob saum ntuj ceebtsheej yuav ua ib yam nkaus li ntawd rau nej thiab.” Thaum Yexus qhia tej ntawd tas lawm, nws txawm tawm hauv lub xeev Kalilais mus rau nram lub xeev Yudas sab Dej Yauladees tim ub. Muaj neeg coob coob nrog nws mus, thiab nyob qhov ntawd, nws kho lawv txhua tus zoo mob huv tibsi. Cov Falixais qee leej tuaj cuag Yexus, lawv xav sim Yexus. Lawv nug Yexus hais tias, “Peb txoj kevcai puas pub rau ib tug txivneej twg muab nws tus pojniam nrauj, tsis hais nws ua txhaum loj lossis ua txhaum yau?” Yexus teb hais tias, “Nej tsis tau nyeem Vajtswv Txojlus uas hais tias, ‘Thaum chivkeeb Vajtswv tau tsim txivneej thiab pojniam los?’ Thiab hais tias, ‘Twb yog vim li no tus tub thiaj tso nws niam nws txiv tseg, thiab mus nrog nws tus pojniam nyob, nkawd yuav koom ua ib lub cev.’ Nkawd tsis yog ob leeg lawm, tiamsis yog ib leeg xwb. Vajtswv twb muab nkawd los txis ua txij ua nkawm lawm, yog li ntawd neeg tsis txhob muab nkawd cais.” Cov Falixais rov nug Yexus hais tias, “Vim li cas Mauxes ho tso cai rau tus txivneej ua ntawv nrauj rau nws tus pojniam, ces nrauj tau?” Yexus teb hais tias, “Qhov uas Mauxes tso cai rau nej nrauj pojniam, twb yog vim nej tawv ncauj tsis muaj neeg hais tau. Tiamsis thaum chivkeeb yeej tsis muaj li ntawd. Kuv qhia rau nej hais tias, yog leejtwg tus pojniam tsis tau mus deev hluas nraug, nws cia li muab nrauj lawm, yog nws mus yuav dua pojniam, ces yog nws deev luag pojniam.” Cov thwjtim hais rau Yexus hais tias, “Yog yuav pojniam yuav txiv zoo li ntawd, ces tsis txhob yuav kuj zoo dua?” Yexus teb hais tias, “Tsis yog txhua tus yuav ua tau li txojlus no qhia, tiamsis tsuas yog tus uas Vajtswv pub rau thiaj ua tau xwb. Muaj qee leej tsis yuav pojniam, rau qhov lawv yeej zoo li ntawd thaum nruab thiab los; muaj qee leej tsis yuav, rau qhov luag ua rau lawv zoo li ntawd, thiab muaj qee leej tsis yuav, rau qhov lawv xav ua Vajtswv tes haujlwm. Yog leejtwg coj tau raws li txojlus no qhia, cia li khaws coj.” Muaj neeg coj tej menyuam yaus tuaj cuag Yexus thiab thov kom Yexus cev tes plhws cov menyuam taubhau thiab foom koob hmoov rau lawv, tiamsis cov thwjtim cem cov neeg ntawd. Yexus hais tias, “Cia li coj cov menyuam los cuag kuv, tsis txhob txwv lawv, rau qhov Ntuj Ceebtsheej yog cov neeg uas muaj lub siab mos siab muag ib yam li cov menyuam yaus no tug.” Thaum Yexus cev tes plhws cov menyuam ntawd tas, ces Yexus txawm tawm qhov chaw ntawd mus lawm. Muaj ib zaug, ib tug txivneej tuaj cuag Yexus thiab nug hais tias, “Xibhwb, yam twg yog yam zoo uas kuv yuav tsum ua, kuv thiaj tau txojsia ntev dhawv mus ibtxhis?” Yexus teb hais tias, “Vim li cas koj nug kuv hais txog yam twg yog yam zoo? Tsuas muaj tib tug thiaj ua zoo xwb. Yog koj xav tau txojsia, koj yuav tsum coj raws li Vajtswv txoj Kevcai.” Nws rov nug Yexus hais tias, “Yog nqe twg?” Yexus teb hais tias, “Tsis txhob tua neeg; tsis txhob deev luag pojniam luag txiv; tsis txhob ua tubsab; tsis txhob ua timkhawv tsis tseeb. Hwm koj niam koj txiv; thiab hlub koj tej kwvtij zejzog ib yam li koj hlub koj lub cev.” Tus hluas ntawd teb hais tias, “Tej ko, kuv twb coj txhua nqe huv tibsi lawm. Tseem tshuav yam twg uas kuv tsis tau ua thiab?” Yexus hais rau nws hais tias, “Yog koj xav ua tus uas zoo kawg nkaus, koj cia li mus muab koj tej qhov txhia chaw muag huv tibsi, thiab muab cov nyiaj ntawd faib rau cov neeg pluag, koj thiaj yuav yog tus uas npluanuj nyob saum ntuj ceebtsheej; tom qab ntawd, koj cia li tuaj nrog kuv mus.” Thaum tus hluas ntawd hnov Yexus hais li no, nws nyuaj siab kawg thiab tawm lawm, rau qhov nws npluanuj heev. Yexus hais rau nws cov thwjtim hais tias, “Kuv qhia tseeb rau nej hais tias, ib tug neeg npluanuj yuav mus Ntuj Ceebtsheej mas nyuaj kawg li. Kuv hais ntxiv rau nej hais tias, ib tug ntxhuav nkag lub qhov koob tseem yoojyim dua ib tug neeg npluanuj mus rau Vajtswv lub tebchaws.” Thaum cov thwjtim hnov li ntawd, lawv xav tsis thoob li. Lawv nug hais tias, “Yog li ntawd, leejtwg thiaj yuav dim tau?” Yexus tsa qhovmuag saib lawv thiab teb hais tias, “Neeg ua tsis tau, tiamsis Vajtswv ua tau ib puas tsav yam huv tibsi.” Ces Petus hais rau Yexus hais tias, “Peb twb tso txhua yam tseg thiab nrog koj txog tav no, peb yuav tau dabtsi?” Yexus hais rau lawv hais tias, “Kuv qhia tseeb rau nej hais tias, thaum Neeg Leej Tub zaum saum lub zwmtxwv uas ci ntsa iab hauv lub ntiajteb tshiab, mas nej kaum ob leeg uas nrog kuv no yuav tau zaum saum kaum ob lub zwmtxwv, thiab txiav txim rau kaum ob xeem Yixalayees. Thiab txhua tus uas tso vajtse, tso kwvtij, tso nkauj muam, tso niamtxiv, tso menyuam thiab tso liaj teb tseg, vim nws ntseeg kuv, tus ntawd yuav tau tshaj ib puas npaug thiab nws yuav tau txojsia ntev dhawv mus ibtxhis. Tiamsis muaj ntau tus uas nimno ua cov thawj yuav tau mus nyob tom tw, thiab cov uas nimno nyob tom tw yuav tau los ua cov thawj. “Ntuj Ceebtsheej piv ib yam li ib tug tswv vaj uas sawv ntxov mus nrhiav tub zog tuaj tu nws lub vaj txiv hmab. Nws hais haum nrog cov tub zog, ib hnub twg ib lub nyiaj, ces nws txawm kom cov tub zog mus tu nws lub vaj. Thaum cuaj teev, nws rov mus tom khw, nws pom ib cov neeg sawv ncig nquj nquas tsis muaj haujlwm ua. Nws txawm hais rau lawv hais tias, ‘Nej cia li mus tu kuv lub vaj txiv hmab, kuv yuav muab nqi zog kom tsimnyog rau nej.’ Lawv txawm mus lawm. Thaum kaum ob teev thiab thaum peb teev, nws kuj mus ua ib yam li thawj ob zaug uas nws tau ua los lawm. Thaum yuav luag txog tsib teev, nws rov mus rau tom khw, nws pom ib cov neeg sawv ncig nquj nquas thiab. Ces nws hais rau lawv hais tias, ‘Vim li cas nej tuaj nyob ib hnub dawb dawb ntawm no tsis ua dabtsi li?’ Lawv teb hais tias, ‘Twb tsis muaj leejtwg ntiav peb.’ Nws thiaj hais rau lawv hais tias, ‘Nej cia li mus tu kuv lub vaj txiv hmab thiab.’ “Thaum tsaus ntuj lawm, tus tswv vaj kom tus uas saib cov tub zog mus hu cov tub zog los thiab them nqi zog rau lawv. Nws hais tias, ‘Koj xub muab rau cov uas tuaj tom qab tso, koj mam li muab rau cov uas xub tuaj.’ Cov uas tuaj ua haujlwm thaum tsib teev, lawv ib leeg tau ib lub nyiaj. Cov uas xub tuaj xav hais tias, lawv yuav tau ntau dua cov uas tuaj tom qab; tiamsis lawv ib leeg tsuas tau ib lub nyiaj thiab xwb. Thaum muab nyiaj rau lawv tas lawm, lawv txawm yws rau tus tswv vaj hais tias, ‘Cov neeg uas tuaj ua haujlwm thaum yuav tsaus ntuj, lawv nyuam qhuav ua tau ib txoos teev xwb, peb tiv tshav ua haujlwm ib hnub tsaus ntuj los koj muab rau peb npaum li koj muab rau lawv thiab xwb!’ Tus tswv vaj teb rau lawv cov ntawd ib tug hais tias, ‘Phoojywg, tsis yog kuv ua tsis ncaj rau koj, koj twb yeej zoo siab ua ib hnub ib lub nyiaj lawm los sav. Koj cia li nqa koj lub nyiaj thiab mus tsev. Kuv zoo siab muab rau tus uas tuaj tom qab npaum li uas kuv muab rau koj. Kuv tsis muaj cai muab kuv tej nyiaj siv raws li kuv pom zoo los? Koj pom kuv muaj lub siab dawb, koj txawm khib los?’ ” Yexus xaus lus hais tias, “Cov uas nimno nyob tom tw yuav tau mus ua cov thawj, thiab cov uas nimno ua cov thawj, yuav tau los nyob tom tw.” Thaum Yexus mus nram lub nroog Yeluxalees, nws coj nws kaum ob tug thwjtim nrog nws mus, thaum lawv taug kev mus, nws hais twjywm rau lawv hais tias, “Nej ua tib zoo mloog, peb yuav mus rau nram lub nroog Yeluxalees. Nyob nrad, yuav muaj neeg ntes Neeg Leej Tub coj mus rau cov thawj ntawm cov povthawj thiab cov xibhwb uas qhia Vajtswv txoj Kevcai. Lawv yuav txiav txim coj nws mus tua povtseg, thiab muab nws rau lwm haivneeg, lawv yuav thuam nws thiab ua saib tsis taus nws, muab nws nplawm thiab muab nws ntsia rau saum ntoo khaublig; thiab peb hnub nws yuav sawv hauv qhov tuag rov qab los.” Xenpedais tus pojniam coj nws ob tug tub tuaj cuag Yexus. Nws txhos caug ntua ntawm Yexus kotaw thiab thov ib yam ntawm Yexus. Yexus nug nws hais tias, “Koj xav tau dabtsi?” Nws teb hais tias, “Thov koj coglus rau kuv hais tias, thaum koj los ua Vajntxwv lawm, koj yuav pub kuv ob tug tub, ib tug zaum ntawm koj sab xis thiab ib tug zaum ntawm koj sab laug.” Yexus teb hais tias, “Yam uas neb thov ntawd, neb tsis totaub. Lub khob uas kuv yuav haus, neb puas haus taus?” Nkawd teb hais tias, “Wb haus taus.” Yexus hais rau nkawd hais tias, “Neb yeej yuav haus taus lub khob uas kuv haus, tiamsis qhov uas neb ib leeg yuav zaum ntawm kuv sab xis thiab ib leeg yuav zaum ntawm kuv sab laug, kuv tsis muaj cuabkav muab rau neb. Ob lub chaw ntawd, kuv Txiv npaj rau leejtwg, tus ntawd thiaj tau xwb.” Thaum cov thwjtim kaum leej hnov li ntawd, lawv chim rau nkawd. Yexus hu cov thwjtim los ua ke thiab hais rau lawv hais tias, “Nej twb paub lawm hais tias, cov nomtswv uas kav tebchaws muaj hwjchim loj dua cov pejxeem, thiab lawv yuam kom cov pejxeem ua raws li lawv hais. Tiamsis nej cov tsis txhob ua li ntawd. Yog nej cov leejtwg xav ua tus hlob, tus ntawd yuav tsum ua nej tus tubtxib; thiab yog nej cov leejtwg xav ua tus thawj, tus ntawd yuav tsum ua nej tus qhev. Ib yam li Neeg Leej Tub, nws los nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej.” Thaum Yexus thiab nws cov thwjtim tabtom tawm hauv lub nroog Yelikaus mus, muaj neeg coob coob raws nws qab mus. Muaj ob tug txivneej digmuag zaum ntawm ntug kev hnov hais tias Yexus taug kev tuaj, ces nkawd txawm hu nrov nrov hais tias, “Daviv tus Tub! Thov koj hlub wb!” Cov neeg coob coob ntawd cheem nkawd hais tias neb tsis txhob hais lus, tiamsis nkawd hajyam hu nrov hais tias, “Daviv tus Tub! Thov koj hlub wb!” Yexus txawm nres thiab hu nkawd los cuag nws, nws nug nkawd hais tias, “Neb xav kom kuv pab neb dabtsi?” Nkawd teb hais tias, “Tus Tswv, thov koj kho wb ob lub qhovmuag kom pom kev!” Yexus hlub nkawd, nws txawm cev tes mus kov nkawd ob lub qhovmuag; ces tamsim ntawd nkawd txawm pom kev, thiab nkawd nrog Yexus mus. Thaum Yexus thiab nws cov thwjtim mus yuav txog lub nroog Yeluxalees, lawv mus txog ntawm lub zos Npefakhes uas nyob ntawm roob txiv ntoo roj. Yexus txawm txib ob tug thwjtim ua ntej mus thiab qhia nkawd hais tias, “Neb cia li ncaj nraim mus rau hauv lub zos uas nyob tom neb hauv ntej, thaum neb mus txog neb yuav pom ob niamtub neesluav khi cia qhov ntawd. Neb cia li daws thiab cab los rau kuv. Yog muaj leejtwg nug neb, neb cia li teb hais tias, ‘Tus Tswv xav siv’; ces tus ntawd yuav cia neb cab los tamsim ntawd.” Muaj li no kom tiav raws li tus cev Vajtswv lus tau qhia tseg lawm hais tias, “Cia li qhia rau cov neeg uas nyob hauv lub nroog Xi-oos hais tias nej tus vajntxwv tabtom los cuag nej! Nws txo hwjchim thiab caij ib tug menyuam neesluav los.” Ob tug thwjtim txawm mus ua raws li Yexus qhia. Nkawd thiaj cab tau ob niamtub neesluav los, nkawd hle nkawd ob lub tsho ntev los pua tus menyuam neesluav nraubqaum rau Yexus caij. Cov neeg coob coob uas nrog Yexus mus ntawd, muaj ibtxhia hle lawv tej tsho los pua kev, thiab ibtxhia txiav nplooj ntoos los pua kev. Cov neeg coob coob uas mus ua Yexus ntej thiab cov uas raws Yexus qab qw nrov nrov hais tias, “Cia li qhuas Daviv tus Tub! Thov Vajtswv foom koob hmoov rau tus uas Vajtswv txib los! Cia li qhuas Vajtswv tus uas nyob saum ntuj ceebtsheej!” Thaum Yexus mus txog hauv lub nroog Yeluxalees lawm, cov neeg uas nyob hauv lub nroog, ras zom zaws thiab sib nug hais tias, “Tus no yog leejtwg?” Cov neeg coob coob ntawd teb hais tias, “Tus no yog Yexus uas yog ib tug cev Vajtswv lus, nws tuaj pem lub nroog Naxales uas nyob hauv lub xeev Kalilais tuaj.” Yexus mus rau ntawm lub Tuamtsev, thiab ntiab cov neeg uas tuaj ua lag ua luam ibncig ntawm lub Tuamtsev tawm mus. Nws muab cov neeg pauv nyiaj tej rooj thiab cov neeg uas muag nquab tej rooj zaum ntxeev pes hlo. Yexus hais rau lawv hais tias, “Vajtswv Txojlus sau tseg hais tias, ‘Sawvdaws yuav hu kuv lub Tuamtsev hais tias, yog lub tsev uas thov Vajtswv.’ Tiamsis nej muab ua qhov chaw rau tubsab nkaum!” Muaj cov neeg digmuag thiab cegtawv tuaj cuag Yexus hauv lub Tuamtsev, thiab Yexus kho lawv txhua tus zoo huv tibsi. Thaum cov thawj ntawm cov povthawj thiab cov xibhwb uas qhia Vajtswv txoj Kevcai pom tej txujci tseemceeb uas Yexus ua ntawd, thiab hnov cov menyuam yaus uas tuaj nyob hauv lub Tuamtsev qw hais tias, “Cia li qhuas Daviv tus Tub!” Ces lawv chim kawg li. Lawv hais rau Yexus hais tias, “Koj tsis hnov tej lus uas cov menyuam ntawd hais los?” Yexus teb hais tias, “Kuv hnov. Nej tsis tau nyeem Vajtswv Txojlus uas hais tias, ‘Koj twb cob cov menyuam yaus thiab cov menyuam mos liab kom paub qhuas Vajtswv lawm los.’ ” Yexus txawm ncaim lawv thiab tawm hauv lub nroog mus pw tom lub zos Npethanis lawm. Hnub tom qab thaum sawv ntxov, Yexus taug kev rov mus rau tom lub nroog, nws tshaib plab. Nws pom ib tsob txiv ncuavpias nyob ntawm ntug kev, nws txawm mus saib, tiamsis tsis pom muaj txiv li, tsuas muaj nplooj xwb. Yexus hais rau tsob ntoo hais tias, “Txij no mus koj yuav tsis tau txi txiv ib zaug li lawm!” Tamsim ntawd tsob txiv ncuavpias txawm cia li qhuav lawm. Thaum cov thwjtim pom li ntawd lawv xav tsis thoob thiab hais tias, “Ua li cas tsob txiv ncuavpias no yuav tuag sai ua luaj li ntawd?” Yexus teb hais tias, “Kuv qhia tseeb rau nej hais tias, yog nej ntseeg tiag tiag, nej yeej muaj cuabkav ua tau ib yam li kuv ua rau tsob txiv ncuavpias no. Tsis tas li ntawd xwb, yog nej hais rau lub roob no hais tias, ‘Cia li txav lawm nram dej hiavtxwv,’ ces lub roob yeej yuav mus raws li nej hais. Yog nej ntseeg tiag, nej thov yam twg, nej yuav tau yam ntawd.” Yexus rov mus rau hauv lub Tuamtsev; thaum nws tabtom qhia, cov thawj ntawm cov povthawj thiab cov txwjlaug txawm tuaj nug Yexus hais tias, “Ua li cas koj muaj cai tuaj ua tej no? Leejtwg tso cai rau koj?” Yexus teb lawv hais tias, “Kuv yuav nug nej ib los, yog nej teb tau, kuv mam li qhia rau nej paub hais tias yog vim li cas kuv muaj cai ua tej no. Leejtwg tso cai rau Yauhas muab neeg ua kevcai raus dej, Vajtswv lossis neeg?” Lawv txawm sib tham hais tias, “Yog peb teb hais tias, ‘Vajtswv kom Yauhas ua,’ nws yuav hais rau peb hais tias, ‘Vim li cas nej ho tsis ntseeg Yauhas tej lus?’ Yog peb teb hais tias, ‘Neeg kom Yauhas ua,’ Peb ntshai nyob tsam cov pejxeem ho ua phem rau peb, rau qhov sawvdaws yeej paub hais tias Yauhas yog ib tug cev Vajtswv lus.” Yog li ntawd, lawv thiaj teb Yexus hais tias, “Peb tsis paub!” Yexus hais rau lawv hais tias, “Yog li ntawd, kuv yuav tsis qhia rau nej paub hais tias yog leejtwg tso cai rau kuv ua tej no thiab.” “Nej xav li cas? Muaj ib tug txivneej muaj ob tug tub. Leej txiv mus hais rau tus tub hlob hais tias, ‘Metub, hnub no koj mus tu kuv lub vaj txiv hmab.’ Tus tub teb hais tias, ‘Kuv tsis mus.’ Tiamsis tom qab ntawd nws txawm mus lawm. Leej txiv ho mus hais rau tus tub yau ib yam li ntawd thiab. Tus tub yau teb hais tias, ‘Txiv, kuv mam li mus.’ Tiamsis nws tsis mus. Ob tug tub no, tus twg yog tus uas mloog leej txiv lus?” Lawv teb hais tias, “Yog tus tub hlob.” Yexus hais rau lawv hais tias, “Kuv qhia rau nej hais tias, cov neeg sau se thiab cov niamntiav yuav xub tau mus rau hauv Vajtswv lub Tebchaws ua ntej nej. Rau qhov Yauhas tus uas muab neeg ua kevcai raus dej twb los qhia txojkev ncaj ncees rau nej, tiamsis nej tsis ntseeg, tsuas yog cov neeg sau se thiab cov niamntiav thiaj ntseeg xwb. Txawm yog nej pom li ntawd los nej tsis tso nej tej kev txhaum tseg thiab los ntseeg nws tej lus.” Yexus hais tias, “Nej mloog, kuv yuav qhia ib zaj lus pivtxwv rau nej. Muaj ib tug tswv vaj, nws xov tau ib lub vaj thiab cog txiv hmab rau hauv, nws khawb ib lub qhov tsuam txiv hmab thiab ua lub chaw tsomfaj zov. Nws muab tso rau ib cov neeg tu sib faib cov txiv, ces nws txawm mus rau lwm tebchaws lawm. Thaum txog lub caij de txiv hmab, nws txawm txib nws cov tubtxib mus sau cov txiv hmab uas yog nws tug los rau nws. Tiamsis cov neeg uas tu lub vaj txawm muab tus tswv cov tubtxib ntes, muab ib tug ntaus, muab ib tug tua thiab muab pobzeb ntaus ib tug. Tus tswv txib dua ib cov tubtxib coob dua thawj pab mus, cov neeg uas tu lub vaj kuj ua phem rau cov tubtxib ntawd ib yam nkaus li thawj zaug thiab. Thaum kawg tus tswv vaj txib nws tus tub mus cuag lawv. Nws xav hais tias, ‘Lawv yuav hwm kuv tus tub.’ Tiamsis thaum cov neeg uas tu lub vaj pom tus tswv tus tub tuaj, lawv sib tham hais tias, ‘Tus no yog tus tswv vaj tus tub, peb cia li muab nws tua povtseg, peb thiaj tau nws lub vaj!’ Lawv txawm ntes kiag nws, muab nws thawb mus rau sab ntug vaj nraud thiab muab nws tua povtseg.” Yexus nug hais tias, “Thaum tus tswv vaj rov qab los, nws yuav ua li cas rau cov neeg uas tu lub vaj ntawd?” Lawv teb hais tias, “Nws yuav muab cov neeg siab phem uas tu lub vaj ntawd tua povtseg huv tibsi, thiab muab lub vaj ntawd rau lwm cov tu. Thaum txog lub caij faib txiv hmab, lawv yuav faib cov uas yog nws tug rau nws.” Yexus hais rau lawv hais tias, “Nej tsis tau nyeem Vajtswv Txojlus uas hais tias, ‘Lub pobzeb uas cov kws ua tsev muab povtseg, lub ntawd twb los ua lub thawj lawm. Qhov no yog tus Tswv ua; peb pom li ntawd, peb xav tsis thoob li!’ ” Yexus hais ntxiv hais tias, “Kuv qhia rau nej hais tias, Vajtswv yuav muab nws lub Tebchaws tshem tawm ntawm nej mus rau ib haivneeg uas mloog Vajtswv lus.” [Yog leejtwg ntog tsoo lub pobzeb ntawd, tus ntawd lub cev yuav tawg tas, yog lub pobzeb ntawd poob los tsoo leejtwg, tus ntawd lub cev yuav ntsoog tas huv tibsi.] Thaum cov thawj ntawm cov povthawj thiab cov Falixais hnov tej lus pivtxwv uas Yexus qhia ntawd, lawv paub hais tias yog Yexus hais txog lawv. Ces lawv txawm xav ntes Yexus tamsim ntawd, tiamsis lawv ntshai cov pejxeem, rau qhov sawvdaws yeej paub hais tias Yexus yog ib tug cev Vajtswv lus. Yexus hais dua ob peb zaj lus pivtxwv rau sawvdaws mloog hais tias, “Ntuj Ceebtsheej piv ib yam li ib tug vajntxwv yuav nyab rau nws tus tub thiab noj tshoob. Vajntxwv txawm txib nws cov tubtxib mus hu cov qhua uas nws twb caw lawm kom tuaj nrog nws noj tshoob, tiamsis tsis muaj leejtwg tuaj li. Nws thiaj txib dua ib pab tubtxib mus hais rau cov qhua uas nws twb caw lawm hais tias, ‘Kuv rooj tshoob, kuv twb npaj txhij lawm. Kuv tej sam nyuj thiab kuv tej menyuam nyuj rog rog, kuv twb tua thiab ua siav tas lawm, nej cia li tuaj noj!’ Tiamsis cov qhua ntawd tsis muaj leejtwg quavntsej li, nyias txawm mus ua nyias haujlwm tas lawm: Tus mus ua teb los muaj, tus mus ua luam los muaj, dua li tej tseem ntes cov tubtxib ntawd, muab lawv ntaus thiab muab tua povtseg. Vajntxwv chim heev; nws txawm txhij nws cov tubrog mus muab cov neeg tua neeg ntawd tua povtseg, thiab muab lawv lub nroog hlawv tas huv tibsi. Vajntxwv txawm hu nws cov tubtxib los thiab hais rau lawv hais tias, ‘Kuv rooj tshoob, kuv twb npaj txhij lawm, tiamsis cov neeg uas kuv caw ntawd, lawv tsis tsimnyog tuaj noj. Nej cia li mus rau tom tej kev loj, nej ntsib leejtwg los hu kom lawv cia li tuaj noj kuv rooj tshoob no.’ Ces cov tubtxib txawm tawm mus rau tom tej kev, tej neeg uas lawv ntsib, tsis hais tus zoo tus phem los lawv hu kom tuaj huv tibsi; sawvdaws tuaj nyob puv nkaus vajntxwv tsev. “Thaum vajntxwv los saib cov qhua uas tuaj, nws pom ib tug txivneej uas hnav ris tsho tsis phim rooj tshoob. Vajntxwv nug hais tias, ‘Phoojywg, koj twb tsis hnav cev ris tsho ua tshoob, ua li cas koj ho tuaj hauv no?’ Tiamsis tus ntawd hais tsis taus ib los li. Vajntxwv txawm hais rau vajntxwv cov tubtxib hais tias, ‘Nej cia li muab tus ntawd pav tes pav taw, thiab muab nws pov rau sab nraud qhov uas tsaus ntuj nti. Nyob qhov ntawd nws yuav quaj qw tom hniav qawv.’ ” Yexus xaus lus hais tias, “Cov neeg uas tau hu lawm muaj coob, tiamsis cov uas xaiv tau muaj tsawg.” Cov Falixais txawm tawm mus sablaj hais tias, lawv yuav nug li cas, Yexus thiaj hais txhaum. Lawv txib lawv cov thawj qee leej thiab Helauj cov qee leej tuaj cuag Yexus thiab nug hais tias, “Xibhwb, peb paub hais tias koj yog tus ncaj ncees, thiab qhia Vajtswv Txojlus tseeb rau neeg, koj tsis xaiv leejtwg ntsejmuag li, txawm yog lawv yuav nyiam thiab tsis nyiam los xij. Koj qhia rau peb saib, koj xav li cas? Yog peb them se rau Xixas puas txhaum peb txoj kevcai los tsis txhaum?” Yexus twb paub lawv lub siab xav phem lawm, nws thiaj hais rau lawv hais tias, “Cov niag neeg ntsejmuag ncaj siab nkhaus! Nej tuaj sim kuv ua dabtsi? Cia li muab lub nyiaj uas yuav coj mus them se ntawd los rau kuv saib!” Lawv txawm muab lub nyiaj rau Yexus, Yexus nug lawv hais tias, “Lub ntsejmuag thiab lub npe uas sau rau ntawm lub nyiaj no yog leejtwg lub?” Lawv teb hais tias, “Yog Xixas lub.” Yexus hais rau lawv hais tias, “Yam uas yog Xixas li, cia li muab rau Xixas thiab yam uas yog Vajtswv li, cia li muab rau Vajtswv.” Thaum lawv hnov li ntawd, lawv xav tsis thoob li; ces lawv txawm tso Yexus tseg thiab khiav lawm. Tib hnub ntawd cov Xadukais qee leej tuaj cuag Yexus. Lawv yog cov uas tsis ntseeg hais tias, neeg yuav sawv hauv qhov tuag rov qab los. Lawv nug Yexus hais tias, “Xibhwb, Mauxes hais tias yog tus txiv tuag thaum nws tus pojniam tsis tau muaj menyuam, nws tus kwv yuav tsum yuav tus niamtij, tus tijlaug thiaj muaj xeebntxwv. Yav tas los hauv peb lub zos no muaj xya leej kwvtij. Tus tijlaug yuav pojniam, tiamsis tseem tsis tau muaj menyuam, nws txawm tuag lawm, tso tus pojniam rau tus kwv yuav. Thaum tseem tsis tau muaj menyuam tus kwv txawm tuag lawm thiab. Tus kwv peb mus txog tus kwv xya, lawv puavleej ua ib yam nkaus li ntawd, thiab lawv tuag tas huv tibsi. Thaum kawg los tus pojniam ntawd tuag lawm thiab. Yog li ntawd, hnub uas cov neeg tuag sawv rov qab los, tus pojniam ntawd yuav yog tus twg tus pojniam? Rau qhov lawv puavleej tau yuav nws huv tibsi lawm.” Yexus teb lawv hais tias, “Nej xav yuam kev lawm! Rau qhov nej tsis totaub Vajtswv Txojlus thiab tsis paub Vajtswv lub hwjchim. Thaum cov neeg uas tuag lawm sawv rov qab los, lawv yuav zoo ib yam li cov timtswv uas nyob saum ntuj ceebtsheej, lawv tsis yuav pojniam tsis yuav txiv lawm. Nej tsis tau nyeem zaj uas Vajtswv tsa cov neeg tuag sawv rov qab los los? Vajtswv twb qhia rau nej lawm hais tias, ‘Kuv yog Anplahas tus Vajtswv, Ixaj tus Vajtswv thiab Yakhauj tus Vajtswv.’ Vajtswv tsis yog cov neeg tuag tus Vajtswv, tiamsis yog cov neeg ciaj tus Vajtswv.” Thaum cov neeg coob coob hnov tej uas Yexus qhia ntawd, lawv xav tsis thoob li. Thaum cov Falixais hnov hais tias cov Xadukais tsis muaj lus teb tau Yexus li, lawv txawm tuaj ua ke sablaj, muaj ib tug xibhwb qhia Vajtswv txoj Kevcai uas nyob hauv lawv pab ntawd, nws xaub Yexus hais tias, “Xibhwb, Vajtswv txoj Kevcai nqe twg yog nqe uas tseemceeb dua ntais huv tibsi?” Yexus teb hais tias, “ ‘Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.’ Nqe no thiaj yog nqe uas tseemceeb dua ntais. Thiab nqe ob uas tseemceeb hais li no hais tias: ‘Hlub koj tej kwvtij zejzog ib yam li koj hlub koj lub cev.’ Mauxes txoj Kevcai thiab cov cev Vajtswv lus tej lus qhia puavleej nyob tagnrho hauv ob nqe no.” Thaum cov Falixais tabtom sablaj ua ke, Yexus nug lawv hais tias, “Nej xav li cas txog tus Mexiyas? Nws yog leejtwg tus tub?” Lawv teb hais tias, “Nws yog Daviv tus tub.” Yexus rov nug lawv hais tias, “Yog li cas Vaj Ntsujplig tshoov Daviv siab, kom Daviv hu nws hais tias, ‘Tus Tswv’? Daviv hais tias, ‘Tus Tswv hais rau kuv tus Tswv hais tias, koj cia li los zaum ntawm kuv sab xis mus txog thaum kuv muab koj cov yeebncuab los rau koj tsuj.’ Daviv twb hu nws hais tias, ‘Tus Tswv,’ yuav ua li cas hais tau tias, tus Mexiyas yog Daviv tus tub?” Tsis muaj leejtwg teb taus Yexus ib los li. Txij li hnub ntawd los, tsis muaj leejtwg kam nug Yexus li lawm. Tom qab ntawd Yexus hais rau cov neeg coob coob thiab nws cov thwjtim hais tias, “Cov xibhwb uas qhia Vajtswv txoj Kevcai thiab cov Falixais yog cov uas muaj cuabkav txhais Mauxes txoj Kevcai. Yog li ntawd, nej yuav tsum mloog lawv lus thiab ua raws li tej lus uas lawv qhia, tiamsis tsis txhob xyaum ua raws li lawv ua; rau qhov lawv tsis ua raws li lawv qhia. Lawv muab tej nra hnyav los nog rau sawvdaws ris, tiamsis lawv twb tsis kam cev lawv tus ntivtes mus pab thiab tej nra ntawd li. Lawv ua yam twg lawv xav ua kom sawvdaws qhuas lawv xwb. Lawv xaws tej lub hnab me me ntim Vajtswv Txojlus, muab pav rau ntawm lawv hauvpliaj thiab ntawm lawv tej cajnpab, lawv hnav tej tsho ntev ntev uas ntxhoo kab lws! Thaum muaj rooj noj rooj haus thiab thaum lawv mus rau hauv tej tsev sablaj, lawv mus xaiv zaum lub chaw zoo xwb. Thaum lawv mus tom tej khw, lawv nyiam kom sawvdaws hwm lawv thiab hu lawv hais tias, ‘Xibhwb.’ Tsis txhob cia leejtwg hu nej hais tias ‘Xibhwb,’ rau qhov nej sawvdaws puavleej yog kwvtij huv tibsi, thiab nej tsuas muaj tib tug xibhwb xwb. Cov neeg uas nyob hauv ntiajteb no, nej tsis txhob hu leejtwg hais tias, ‘Txiv,’ rau qhov nej tsuas muaj tib leeg Txiv tus uas nyob saum ntuj ceebtsheej xwb. Thiab tsis txhob cia leejtwg hu nej hais tias, ‘Tus Tswv,’ rau qhov nej tsuas muaj tib tug Tswv uas yog tus Mexiyas xwb. Nej cov leejtwg xav ua tus hlob, tus ntawd yuav tsum ua nej sawvdaws qhev. Tus uas tsav hwjchim, Vajtswv yuav txo tus ntawd lub hwjchim, thiab tus uas txo hwjchim, Vajtswv yuav tsav tus ntawd lub hwjchim. “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Rau qhov nej kaw qhovrooj tsis pub leejtwg mus Ntuj Ceebtsheej. Txawm yog nej los nej twb tsis mus hauv, thiab cov uas xav mus los nej tseem txwv tsis pub lawv mus. [Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej txeeb cov pojntsuam tej vajtse los ua nej tug, thiab ua txuj thov Vajtswv ntev ntev, kom sawvdaws qhuas nej. Vim li ntawd nej yuav raug txim hnyav dua sawvdaws!] “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej caij nkoj hla dej Hiavtxwv mus thoob tebchaws nrhiav kom tau ib tug los coj nej txoj kevcai; tiamsis thaum nej nrhiav tau lawm, nej ua rau tus ntawd tsimnyog poob rau hauv ntujtawg tshaj nej ob npaug! “Cov neeg digmuag uas coj lwm tus kev, nej yuav raug kev puastsuaj! Nej qhia hais tias, yog leejtwg tuav txog lub Tuamtsev coglus, yog nws tsis ua raws li nws coglus los tau; tiamsis yog nws tuav txog tej nyiaj kub uas nyob hauv lub Tuamtsev coglus, nws yuav tsum ua raws li nws tau coglus tseg lawm. Cov neeg digmuag uas ruam! Yam twg tseemceeb dua? Tej kub lossis lub Tuamtsev uas ua rau tej kub ntawd tseemceeb? Thiab nej tseem qhia hais tias, ‘Yog leejtwg tuav txog tej thaj fij coglus, nws tsis ua raws li nws coglus los tau. Tiamsis yog nws tuav txog tej khoom fij uas nyob saum lub thaj coglus, nws yuav tsum ua raws li nws tau coglus lawm.’ Cov neeg digmuag! Yam twg tseemceeb dua? Tej khoom fij uas nyob saum lub thaj lossis lub thaj uas ua rau tej khoom ntawd muaj nqis? Yog li ntawd, thaum leejtwg tuav txog lub thaj fij uas rau tej khoom uas fij rau Vajtswv, yog nws tuav txog lub thaj thiab cov khoom fij uas nyob saum lub thaj huv tibsi; Thiab thaum leejtwg tuav txog lub Tuamtsev coglus, ces yog tuav txog lub Tuamtsev thiab tus Vajtswv uas nyob hauv lub Tuamtsev ntawd coglus; thiab thaum leejtwg tuav txog lub ntuj coglus, ces yog nws tuav txog lub zwmtxwv thiab tus uas nyob saum lub zwmtxwv ntawd coglus. “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej muab tej txujlom, tsis hais pumhub, zaub txhwb thiab xyab txhob, ib feem kaum rau Vajtswv, tiamsis nej tsis ua raws li tej lus tseemceeb uas Vajtswv txoj Kevcai qhia kom neeg ua ncaj ncees, muaj kev hlub thiab ua lub siab ncaj. Tsimnyog nej ua raws li tej lus qhia no, thiab tsis txhob tso lwm nqe tseg. Cov neeg digmuag uas coj lwm tus kev! Tus yoov poob rau hauv cov dej uas nej yuav haus, nej tseem muab lim huv tibsi, tiamsis nej twb nqos ib tug ntxhuav lawm nej tsis paub! “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej ibtxwm ntxuav tais ntxuav khob sab nraud kom huv huv, tiamsis sab hauv puv nkaus tej kev phem kev qias thiab siab hlob. Cov Falixais uas digmuag! Yog nej xub ntxuav tais ntxuav khob sab hauv kom huv lawm, ces sab nraud yeej yuav huv thiab. “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej zoo ib yam li lub ntxa uas pleev hmoov sib sab nraud dawb paug, tiamsis sab hauv puv nkaus pobtxha neeg tuag thiab tsw lwj ntxiag xwb. Nej zoo ib yam nkaus li ntawd, sawvdaws saib sab nraud, sawvdaws xav hais tias, nej yog neeg zoo, tiamsis nej yog neeg ntsejmuag ncaj siab nkhaus thiab ua txhaum. “Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej txhim cov cev Vajtswv lus tej ntxa zoo nkauj heev, thiab ua rau tej pejthuam uas neeg puab nco txog cov neeg ncaj ncees thaum ub, kom zoo nkauj. Thiab nej hais tias, yog peb nyob tiam uas peb cov yawgkoob nyob, peb yuav tsis nrog lawv tua cov cev Vajtswv lus. Nej hais li ntawd, kuj yog nej lees hais tias, nej yog cov uas tua cov cev Vajtswv lus ntawd cov xeebntxwv ntag! Yog li ntawd, nej cia li ua tej uas nej cov yawgkoob tau ua lawm kom tiav! Cov niag nab, thiab nab cov menyuam! Nej xav hais tias, nej yuav tsis raug txiav txim thiab yuav tsis poob mus rau hauv ntujtawg no los? Kuv qhia tseeb rau nej hais tias, kuv yuav txib cov uas cev Vajtswv lus, cov neeg muaj tswvyim thiab ib cov xibhwb tuaj qhia nej; nej yuav muab qee leej tua povtseg, muab qee leej ntsia rau saum ntoo khaublig, muab qee leej nplawm hauv tej tsev sablaj thiab ntiab lawv khiav ib lub nroog mus rau ib lub nroog. Vim li ntawd, nej yuav tau ris cov neeg uas tua cov uas tsis tau ua txhaum lub txim. Txij thaum Anpees tus uas tsis muaj txim raug tua los txog thaum nej tua Npelekhiyas tus tub Xakhaliyas ntawm lub Tuamtsev thiab lub thaj fij kis nruab nrab. Kuv qhia tseeb rau nej hais tias, cov neeg tiam no yuav tau ris cov neeg uas tua neeg ntawd lub txim huv tibsi! “Yeluxalees, Yeluxalees! Koj muab cov uas cev Vajtswv lus tua povtseg, koj muab pobzeb ntaus cov tubtxib uas Vajtswv txib los qhia koj! Muaj ntau zaus kuv twb yuav muab koj cov pejxeem los puag, ib yam li tus poj qaib cuab nws cov menyuam los puag rau hauv nws ob sab qab tis, tiamsis koj tsis cia kuv ua li ntawd! Nimno koj lub Tuamtsev yuav raug muab tso tseg nyob qhuav nquas cia. Kuv qhia rau koj hais tias, txij no mus, koj yuav tsis pom kuv mus txog hnub uas koj hais tias, ‘Thov Vajtswv foom koob hmoov rau tus uas Vajtswv txib los.’ ” Thaum Yexus tabtom tawm ntawm lub Tuamtsev mus, nws cov thwjtim txawm taw tes kom Yexus saib tej tsev uas nyob ibncig lub Tuamtsev. Yexus hais tias, “Yog tiag, nej twb pom tej tsev no lawm? tiamsis kuv qhia tseeb rau nej hais tias, tej pobzeb uas muab sib dhos ua ke ntawd txhua lub yuav pluam nyias nyob nyias tas huv tibsi.” Thaum Yexus nyob pem lub Roob Txiv Ntoo Roj, nws cov thwjtim los cuag nws twjywm thiab nug hais tias, “Thov koj qhia rau peb saib thaum twg mam li muaj tej no, thiab yuav muaj yam twg qhia rau peb paub hais tias, twb txog lub sijhawm uas koj yuav los thiab lub ntiajteb yuav kawg.” Yexus teb hais tias, “Nej yuav tsum ceevfaj, tsis txhob pub leejtwg dag ntxias tau nej yuam kev. Yuav muaj ntau leej tuav kuv lub npe dag ntxias nej hais tias, ‘Kuv yog tus Mexiyas!’ thiab lawv yuav dag ntxias ntau leej yuam kev. Nej yuav hnov suab ntaj suab riam nyob ze nej thiab yuav hnov tej tebchaws uas nyob deb ua tsov ua rog; nej tsis txhob poob siab, yeej yuav xub muaj tej ntawd, tiamsis tej ntawd tsis tau qhia hais tias twb txog lub sijhawm ntiajteb kawg lawm. Ib lub tebchaws yuav sawv tawmtsam ib lub tebchaws; thiab ib haivneeg yuav sawv tawmtsam ib haivneeg. Yuav muaj kev tshaib kev nqhis thiab av yuav qeeg txhua qhov. Tej ntawd zoo ib yam li tus pojniam uas nyuam qhuav pib mob plab yuav yug menyuam. “Thaum ntawd yuav muaj neeg ntes nej coj mus tsimtxom thiab muab nej tua povtseg. Txhua haivneeg yuav ntxub nej, vim nej yog cov uas ntseeg kuv. Lub sijhawm ntawd yuav muaj ntau leej tso kev ntseeg tseg; lawv ib leeg yuav ntxeev siab rau ib leeg thiab ib leeg yuav ntxub ib leeg. Yuav muaj cov cevlus cuav coob leej dag ntxias kom neeg coob leej yuam kev. Thaum tej kev phem huam loj heev, sawvdaws yuav tsis txawj sib hlub lawm. Tiamsis tus uas ua siab ntev mus txog hnub kawg, tus ntawd yuav dim. Thaum muaj neeg mus qhia Txojmoo Zoo uas hais txog Ntuj Ceebtsheej mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg. “Nej yuav pom luag muab yam uas ‘Phem Kawg Nkaus’ tso rau hauv qhov chaw dawbhuv, raws li Daniyees tus uas cev Vajtswv lus tau hais tseg lawm.” (Tus uas nyeem zaj no, cia li totaub!) “Thaum ntawd cov neeg uas nyob hauv lub xeev Yudas, cia li khiav mus rau pem tej roob. Tus uas nyob nraum zoov, tsis txhob mus nqa ib yam dabtsi hauv tsev. Tus uas nyob tom teb, tsis txhob rov los nqa nws lub tsho ntev. Lub sijhawm ntawd, tej pojniam uas suab menyuam thiab cov pojniam uas muaj menyuam mos noj mis yuav txomnyem kawg li! Nej cia li thov Vajtswv pab kom nej tsis txhob tau khiav lub caij ntuj no lossis Hnub Xanpataus! Rau qhov lub sijhawm ntawd sawvdaws yuav txomnyem kawg nkaus, txij thaum chivkeeb los txog niaj hnub no yeej tsis tau muaj kev txomnyem npaum li zaug no. Thiab yav tom ntej yuav tsis muaj li zaum no lawm. Tiamsis Vajtswv twb txiav hnub txiav nyoog kom luv lawm. Yog nws tsis ua li ntawd yeej yuav tsis muaj ib tug dim li. Qhov uas Vajtswv txiav hnub txiav nyoog kom luv li ntawd yog vim nws hlub haivneeg uas nws tau xaiv cia lawm. “Thaum ntawd yog leejtwg hais rau nej hais tias, ‘Nej saib, tus Mexiyas nyob ntawm no!’ lossis hais tias, ‘Nws nyob tod!’ los nej tsis txhob ntseeg tus ntawd tej lus. Rau qhov yuav muaj tus Mexiyas cuav thiab tej cevlus cuav los ua tej txujci tseemceeb ntxias Vajtswv haivneeg, saib puas yuav ntxias tau kom lawv yuam kev. Nej yuav tsum nco ntsoov tej lus uas kuv twb qhia rau nej no lawm. “Yog leejtwg hais rau nej hais tias, ‘Nej saib, nws nyob tom roob mojsab qhua!’ Nej tsis txhob mus saib lossis lawv hais tias, ‘Nej saib, nws nkaum ntawm no!’ Nej tsis txhob ntseeg. Rau qhov hnub uas Neeg Leej Tub los, yuav zoo ib yam li xob laim tim sab hnubtuaj ci mus txog rau tim sab hnubpoob. “Cev tuag nyob qhov twg, dav npoj yuav sau nthwv los rau qhov ntawd. “Lub sijhawm uas tej kev txomnyem ntawd dhau lawm, lub hnub yuav tsaus, lub hli yuav tsis ci, tej hnubqub saum ntuj yuav poob los, thiab txhua yam uas muaj hwjchim nyob saum nruab ntug yuav ua zog koog tas huv tibsi. Thaum ntawd nej yuav pom ib lub cim tshwm saum nruab ntug qhia hais tias Neeg Leej Tub yuav los. Txhua haivneeg hauv qab ntuj no yuav quaj nyiav ntsoog qees thaum lawv pom Neeg Leej Tub nrog nws lub tshwjchim uas ci ntsa iab thiab nws lub hwjchim los saum ntuj los. Nws yuav txib nws cov timtswv tshuab raj tshuab xyu nrov nrov hu. Lawv yuav mus sau cov neeg uas nws xaiv cia lawm txhua nrho plaub ceg kaum ntuj, sab ntuj tim no mus txog sab ntuj tim ub los nyob ua ke. “Nej saib tsob txiv ncuavpias qhia li cas. Thaum nws tej ceg rov ntsuab thiab pib hlav nplooj mos nyoos, nej paub hais tias twb yuav txog lub caij ntuj nag. Ib yam nkaus li ntawd, thaum nej pom tej ntawd, nej yuav paub hais tias nws twb los ze ntawd qhovrooj lawm. Kuv qhia tseeb rau nej hais tias thaum cov neeg tiam no tseem tuag tsis taus tas, twb xub muaj tej ntawd lawm. Lub ntuj thiab lub ntiajteb yuav ploj mus, tiamsis kuv tej lus yuav tsis muaj ib los poob li. “Tiamsis hnub ntawd thiab lub sijhawm ntawd tsis muaj leejtwg paub, txawm yog cov timtswv ceebtsheej lossis Neeg Leej Tub los yeej tsis paub li; tsuas yog Leej Txiv tib leeg thiaj paub xwb. Lub sijhawm uas Neeg Leej Tub los yuav zoo ib yam li tej uas tshwmsim rau tiam Nau-es nyob. Thaum dej tseem tsis tau los nyab ntiajteb, sawvdaws ua noj ua haus, ua tshoob ua kos mus txog hnub uas Nau-es nce mus rau hauv lub nkoj; lawv tsis paub mus txog thaum dej los nyab thiab kuav lawv mus tas huv tibsi li cas, ces thaum Neeg Leej Tub los yuav zoo ib yam li ntawd. Lub sijhawm ntawd muaj ob tug txivneej ua haujlwm ua ke tom teb, yuav coj ib tug mus tseg ib tug cia. Muaj ob tug pojniam zom zeb ua ke: yuav coj ib tug mus tseg ib tug cia. Nej yuav tsum ceevfaj zov tos, rau qhov nej tsis paub lub sijhawm uas nej tus Tswv yuav los. Nej yeej paub hais tias, yog tus tswv tsev xub paub hais tias, thaum twg tubsab yuav tuaj, nws yeej yuav zov tos tsis pub tubsab los tau rau hauv nws tsev. Yog li ntawd, nej yuav tsum zov tos, rau qhov Neeg Leej Tub yuav los lub sijhawm uas nej tsis ceevfaj. “Tus tubtxib uas ncaj thiab muaj tswvyim, tus tswv yuav tsa nws ua tus loj uas saib tus tswv cov tubtxib, thiab thaum txog sijhawm noj, tus ntawd yuav ua tus faib zaub faib mov rau cov tubtxib noj. Thaum tus tswv rov los pom tus tubtxib ntawd tabtom ua tej haujlwm no, ces tus tubtxib ntawd yuav tau ntsejmuag! Kuv qhia tseeb rau nej hais tias, tus tswv yuav tsa tus tubtxib ntawd ua tus saib tus tswv tej qhov txhia chaw. Tiamsis yog tus tubtxib muaj lub siab phem, thiab xav hais tias tshuav ntev kuv tus tswv mam rov los, ces nws txawm muab cov tubtxib ntaus thiab mus nrog cov neeg quav cawv noj haus ua ke. Nws tsis paub hnub twg thiab lub sijhawm twg, nws tus tswv yuav los, nws thiaj tsis ceevfaj. Tus tswv yuav muab tus tubtxib ntawd hlais ua tej daim, thiab muab nws pov mus nrog cov neeg uas ntsejmuag ncaj siab nkhaus nyob. Lawv yuav quaj tom hniav qawv qhov ntawd. “Lub sijhawm ntawd Ntuj Ceebtsheej piv ib yam li kaum tus hluas nkauj uas taws teeb mus tos tus nraug vauv. Tsib tug tsis muaj tswvyim thiab tsib tug muaj tswvyim. Cov uas tsis muaj tswvyim, lawv nqa teeb, tiamsis tsis npaj roj txhab. Cov uas muaj tswvyim, lawv nqa teeb thiab ib leeg npaj ib hwj roj nqa mus. Twb lig lig lawm tus nraug vauv pheej tsis txawj tuaj, ces cov hluas nkauj txawm tsaug zog ncaws nruj nris. “Thaum txog ib tag hmo txawm muaj ib lub suab hu nrov nrov hais tias, ‘Tus nraug vauv tuaj lawm! Cia li tawm tuaj tos nws!’ Kaum tus hluas nkauj txawm sawv huv tibsi, thiab nyias kho nyias lub teeb kom cig. Ces tsib tus uas tsis muaj tswvyim hais rau tsib tus uas muaj tswvyim hais tias, ‘Thov muab nej cov roj faib mentsis rau peb, rau qhov peb cov teeb roj tas lawm twb yuav tuag.’ Tsib tug uas muaj tswvyim teb hais tias, ‘Tsis tau, nyob tsam tsis txaus rau peb thiab nej. Nej cia li mus nrhiav yuav tom khw rau nej.’ Thaum tsib tug uas tsis muaj tswvyim tabtom mus yuav roj lawm; tus nraug vauv txawm tuaj txog. Tsib tug muaj tswvyim uas twb xub npaj roj tseg lawm, txawm nrog tus nraug vauv mus noj tshoob hauv tsev, thiab kaw qhovrooj rau lawm. “Tom qab ntawd tsib tug hluas nkauj uas tsis muaj tswvyim rov los txog. Lawv txawm hu hais tias, ‘Tus tswv, tus tswv! Thov qhib qhovrooj rau peb!’ Tus nraug vauv teb hais tias, ‘Kuv tsis paub nej!’ ” Yexus xaus lus hais tias, “Nej yuav tsum ceevfaj, rau qhov nej tsis paub hnub twg thiab lub sijhawm twg yuav muaj li ntawd. “Ntuj Ceebtsheej piv ib yam li ib tug txivneej yuav mus rau lwm tebchaws; nws hu nws cov tubtxib los, thiab kom lawv saib nws tej vajtse thiab tej qhov txhia chaw. Nws muab tsib caug choj nyiaj rau ib tug, nees nkaum choj rau ib tug, thiab kaum choj rau ib tug raws li lawv muaj tswvyim coj mus siv ua lag ua luam. Ces nws txawm mus lawm. Tus tubtxib uas tau tsib caug choj, tamsim ntawd nws txawm coj mus ua luam, thiab nws tsam tsib caug choj ntxiv. Tus tubtxib uas tau nees nkaum choj, kuj coj mus ua luam tsam nees nkaum choj ntxiv. Tiamsis tus tubtxib uas tau kaum choj, nws txawm muab nws tus tswv cov nyiaj coj mus faus av tseg. “Tom qab ntawd ntev loo, cov tubtxib ntawd tus tswv rov qab los txheeb saib lawv ib leeg tsam pestsawg choj. Tus tubtxib uas tau tsib caug choj txawm nqa tsib caug choj uas nws tsam los hais tias, ‘Tus Tswv, koj muab tsib caug choj rau kuv, koj saib kuv tsam tsib caug choj thiab.’ Tus tswv hais tias, ‘Zoo heev, koj yog tus tubtxib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug!’ Tus tubtxib uas tau nees nkaum choj, txawm los hais tias, ‘Tus tswv, koj muab nees nkaum choj rau kuv, koj saib kuv tsam nees nkaum choj thiab.’ Tus tswv hais tias, ‘Zoo heev, koj yog tus tubtxib uas zoo thiab ncaj ncees! Tej yam me me uas koj saib, koj ua ncaj. Kuv yuav tsa koj ua tus saib yam uas loj. Koj cia li los nrog kuv nyob kaj siab lug!’ Tus tubtxib uas tau kaum choj txawm los hais rau tus tswv hais tias, ‘Tus Tswv, kuv paub hais tias koj yog ib tug neeg tsiv heev; koj ibtxwm hlais tej uas tsis yog koj cog, thiab sau tej uas tsis yog koj tseb. Kuv ntshai, kuv thiaj coj koj cov nyiaj mus faus av tseg. Koj saib, koj cov nyiaj nyob ntawm no.’ Tus tswv hais tias, ‘Tus tubtxib uas siab phem thiab tubnkeeg!’ Koj twb paub hais tias kuv ibtxwm hlais tej uas tsis yog kuv cog, thiab sau tej uas tsis yog kuv tseb. Ua li cas koj tsis muab kuv cov nyiaj mus tso rau hauv txhab nyiaj, thaum kuv rov los, kuv thiaj tau kuv cov nyiaj thiab tau paj ntxiv? Nej cia li muab cov nyiaj ntawm nws coj mus ntxiv rau tus uas muaj ib puas choj. Rau qhov txhua tus uas muaj lawm, yuav muab ntxiv kom lawv muaj nplua mias; tiamsis tus uas tsis muaj, txawm yog nws muaj mentsis xwb los yuav muab rho ntawm nws mus. Cia li muab tus tubtxib uas tsis tsimtxiaj no pov rau sab nraum qhov uas tsaus ntuj nti, nws yuav quaj tom hniav qawv qhov ntawd. “Thaum Neeg Leej Tub los ua Vajntxwv, tagnrho cov timtswv ceebtsheej yuav nrog nws los, thiab nws yuav zaum saum nws lub zwmtxwv uas ci ntsa iab. Txhua haivneeg hauv qab ntuj yuav tuaj sib sau ua ke rau ntawm nws xubntiag, thiab nws yuav muab sawvdaws cais ua ob pab, ib yam li tus tswv yug yaj muab pab yaj cais tawm ntawm pab tshis mus. Nws yuav kom cov neeg ncaj ncees los nyob ntawm nws sab xis, thiab kom cov neeg uas tsis ncaj ncees los nyob ntawm nws sab laug. Thaum ntawd Vajntxwv yuav hais rau cov neeg uas nyob ntawm nws sab xis hais tias, ‘Nej cov uas tau kuv Txiv txoj koob hmoov, nej cia li los kav lub tebchaws uas twb npaj rau nej thaum tsim lub ntiajteb los lawm. Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev. Thaum kuv tsis muaj ris tsho hnav; nej muab rau kuv hnav. Thaum kuv muaj mob, nej tuaj tu kuv. Thaum kuv raug kaw rau hauv tsev lojcuj, nej tuaj saib kuv!.’ Thaum cov neeg ncaj ncees hnov li ntawd, lawv yuav teb hais tias, ‘Tus Tswv, thaum twg peb pom koj tshaib plab, thiab muab mov rau koj noj lossis pom koj nqhis dej, muab dej rau koj haus? Thaum twg koj tuaj ua qhua, peb hu koj los hauv peb tsev lossis pom koj tsis muaj ris tsho hnav, thiab peb muab rau koj hnav? Thaum twg peb pom koj muaj mob lossis raug kaw hauv tsev lojcuj, thiab peb tuaj saib koj?’ Vajntxwv yuav teb hais tias, ‘Kuv qhia tseeb rau nej hais tias, thaum uas nej tau pab kuv cov kwvtij no ib tug, txawm yog tus ntawd muaj hwjchim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag!’ “Thiab nws hais rau cov uas nyob ntawm nws sab laug hais tias, ‘Nej cov uas raug Vajtswv foom tsis zoo. Nej cia li khiav ntawm kuv mus rau hauv lub cubtawg uas cig tsis paub tuag mus ibtxhis uas twb npaj tseg rau dab Ntxwgnyoog thiab nws cov tubtxib mus nyob lawm! Thaum kuv tshaib plab, nej tsis pub mov rau kuv noj; thaum kuv nqhis dej, nej tsis pub dej rau kuv haus; thaum kuv tuaj ua qhua, nej tsis hu kuv los hauv nej tsev. Thaum kuv tsis muaj ris tsho hnav, nej tsis muab rau kuv hnav; thaum kuv muaj mob thiab raug kaw rau hauv tsev lojcuj, nej tsis tuaj tu thiab saib kuv.’ Lawv yuav teb nws hais tias, ‘Tus Tswv, thaum twg peb pom koj tshaib plab, nqhis dej, tuaj ua qhua lossis tsis muaj ris tsho hnav, thiab raug kaw rau hauv tsev lojcuj, peb tsis pab koj?’ Tus Vajntxwv yuav teb lawv hais tias, ‘Kuv qhia tseeb rau nej hais tias, qhov uas nej tsis pab cov neeg no tus uas yau dua cov, ces yog nej tsis pab kuv ntag.’ Cov neeg ntawd yuav raug txim mus ibtxhis li, tiamsis cov neeg ncaj ncees yuav tau txojsia ntev dhawv mus ibtxhis tsis kawg.” Thaum Yexus qhia tej no rau lawv tas lawm, nws hais rau cov thwjtim hais tias, “Nej twb paub lawm hais tias, tshuav ob hnub xwb txog lub caij ua Kevcai Hla Dhau, thiab luag yuav muab Neeg Leej Tub coj mus ntsia rau saum ntoo khaublig.” Cov thawj ntawm cov povthawj thiab cov txwjlaug tuaj ua ke sablaj hauv tus Povthawj Hlob Kaiyafas tsev, nrhiav kev yuav ntes Yexus twjywm coj mus tua povtseg. Lawv hais tias, “Peb tsis txhob ntes nws thaum sawvdaws tabtom ua kevcai, nyob tsam tej pejxeem yuav ntxhov.” Thaum Yexus nyob hauv Ximoos, tus uas thaud mob ruas ib zaug lawm lub tsev tom lub zos Npethanis. Thaum Yexus tabtom noj mov muaj ib tug pojniam nqa ib hwj roj tsw qab uas kim heev tuaj hliv rau Yexus taubhau. Thaum cov thwjtim pom li ntawd, lawv tsis txaus siab thiab hais tias, “Ua li cas muab cov roj tsw qab ntawd nkim povtseg? Yog muab hwj roj ntawd muag yuav tau nyiaj ntau, thiab muab cov nyiaj ntawd mus pub rau cov neeg pluag kuj zoo dua!” Yexus twb paub tej uas lawv hais ntawd lawm, nws hais rau lawv hais tias, “Ua li cas nej ua rau tus pojniam no nyuaj siab? Qhov uas nws ua rau kuv ntawd yog qhov zoo. Yeej yuav muaj cov neeg pluag nrog nej nyob mus li, tiamsis kuv yuav tsis nrog nej nyob mus ib simneej. Qhov uas tus pojniam no hliv roj tsw qab rau kuv lub cev, twb yog nws tu kuv lub cev cia rau hnub uas faus kuv. Kuv qhia tseeb rau nej hais tias, qhov uas tus pojniam no ua yuav nrov ncha mus rau hauv qab ntuj no txhua qhov uas muaj neeg mus qhia Txojmoo Zoo, kom sawvdaws nco txog tes haujlwm uas tus pojniam no tau ua lawm.” Tom qab ntawd, Yexus kaum ob tug thwjtim, tus uas hu ua Yudas Ixakali-us txawm mus cuag cov thawj ntawm cov povthawj, thiab nug hais tias, “Yog kuv muab Yexus rau nej, nej yuav muab dabtsi rau kuv?” Lawv txawm suav tau peb caug lub nyiaj rau nws. Txij hnub ntawd los Yudas txawm nrhiav sijhawm muab Yexus rau lawv. Thawj hnub uas lawv ua Kevcai Noj Ncuav tsis xyaw Keeb, cov thwjtim txawm los cuag Yexus thiab nug nws hais tias, “Koj xav kom peb mus npaj pluas hmo uas ua Kevcai Hla Dhau rau koj noj qhov twg?” Yexus teb hais tias, “Nej cia li mus cuag ib tug txivneej uas nyob hauv nroog thiab hais rau nws hais tias, ‘Xibhwb hais tias, kuv lub sijhawm los ze lawm; kuv thiab kuv cov thwjtim yuav los ua Kevcai Hla Dhau hauv koj tsev.’ ” Cov thwjtim txawm mus npaj pluag mov ua Kevcai Hla Dhau raws li Yexus hais rau lawv lawm. Thaum tsaus ntuj, Yexus thiab kaum ob tug thwjtim zaum noj mov. Thaum lawv tabtom noj mov, Yexus hais tias, “Kuv qhia rau nej hais tias, nej cov uas nyob ntawm no muaj ib tug yuav ntxeev siab rau kuv.” Thaum cov thwjtim hnov li ntawd, lawv nyuaj siab heev, lawv nyias taus nyias nug Yexus hais tias, “Tus Tswv, koj hais li ko, puas yog koj hais kuv?” Yexus teb hais tias, “Tus uas nrog kuv koom ntsw ib lub tais, tus ntawd yog tus uas yuav ntxeev siab rau kuv. Neeg Leej Tub yuav tuag raws li Vajtswv Txojlus sau tseg hais txog nws, tiamsis tus uas ntxeev siab rau Neeg Leej Tub, nws yuav raug kev puastsuaj! Yog nws tsis txhob yug los kuj yuav zoo dua!” Yudas tus uas ntxeev siab rau Yexus, nug hais tias, “Xibhwb, koj hais li ko puas yog koj hais kuv?” Yexus teb hais tias, “Koj hais yog lawm.” Thaum lawv tseem noj mov Yexus txawm muab ib lub ncuav los thiab ua Vajtswv tsaug, nws muab lub ncuav ntawd ntais cev rau cov thwjtim thiab hais tias, “Lub ncuav no yog kuv lub cev, nej cia li txais mus noj.” Tom qab ntawd Yexus muab ib khob cawv txiv hmab los, thiab ua Vajtswv tsaug, nws muab khob cawv txiv hmab ntawd cev rau lawv thiab hais tias, “Nej txhua tus cia li txais mus haus, khob cawv txiv hmab no, yog kuv cov ntshav uas ua lub homthawj nias rau Vajtswv Txojlus cog tseg. Kuv cov ntshav no yuav ntws los ntxuav ntau leej tej kev txhaum huv tibsi mus. Kuv qhia rau nej hais tias, kuv yuav tsis haus cov cawv txiv hmab no mus txog hnub uas kuv nrog nej haus cov cawv txiv hmab tshiab hauv kuv Txiv lub Tebchaws.” Thaum lawv hu ib zaj nkauj tas, lawv txawm tawm mus rau pem Roob Txiv Ntoo Roj lawm. Yexus hais rau cov thwjtim hais tias, “Hmo no nej txhua tus yuav khiav tas huv tibsi tso kuv tseg, rau qhov Vajtswv Txojlus sau tseg lawm hais tias, ‘Vajtswv yuav tua tus tswv yug yaj, thiab pab yaj yuav tawg nyias khiav nyias tas huv tibsi.’ Tiamsis thaum kuv sawv hauv qhov tuag rov qab los lawm, kuv yuav ua nej ntej mus pem Kalilais.” Petus teb hais tias, “Txawm yog sawvdaws tso koj tseg tas lawm los kuv yuav tsis tso koj tseg li!” Yexus hais rau Petus hais tias, “Kuv qhia rau koj hais tias, hmo no thaum qaib tsis tau qua, koj yuav hais peb zaug hais tias, koj tsis paub kuv.” Petus teb hais tias, “Txawm yog kuv yuav nrog koj tuag los kuv yeej yuav tsis hais tias, kuv tsis paub koj li!” Thiab tagnrho cov thwjtim puavleej hais ib yam nkaus. Yexus nrog nws cov thwjtim mus rau ntawm qhov chaw uas hu ua Khexemanes, nws hais rau cov thwjtim hais tias, “Nej nyob ntawm no, kuv yuav mus thov Vajtswv tod.” Yexus txawm coj Petus thiab Xenpedais ob tug tub nrog nws mus. Yexus nyuaj siab thiab ntxhov siab kawg li, thiab nws hais rau lawv hais tias, “Kuv nyuaj siab thiab ntxhov siab kawg li, twb yuav tuag, nej cia li nrog kuv nyob ntawm no tsis txhob tsaug zog.” Yexus mus tom ntej mentsis, ces nws txhos caug ntua rau hauv av thiab thov Vajtswv hais tias, “Kuv Txiv, yog koj pom zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiamsis cia ua raws li koj lub siab nyiam xwb!” Thaum Yexus rov los rau ntawm peb tug thwjtim, nws pom lawv tsaug zog tas lawm; nws hais rau Petus hais tias, “Nej twb yoo tsis taus dab ntub nrog kuv nyob ib txoos teev li los? Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis cev nqaij daim tawv qaug zog kawg li.” Yexus rov mus thov Vajtswv dua zaum ob hais tias, “Kuv Txiv, yog koj tsis pom zoo muab lub khob no tshem ntawm kuv mus, yuav cia kuv haus xwb, ces cia ua raws li koj lub siab nyiam.” Yexus rov los dua thiab pom cov thwjtim tsaug zog tas lawm; lawv rua tsis taus qhovmuag li. Yexus rov mus thov Vajtswv zaum peb, nws hais ib yam li thawj ob zaug. Yexus rov qab los thiab hais rau cov thwjtim hais tias, “Nej tseem yuav tsaug zog thiab so kom txaus tso los? Nimno twb txog lub sijhawm uas Neeg Leej Tub yuav raug ntes coj mus rau cov neeg txhaum txhais tes lawm. Nej cia li sawv peb mus. Nej saib, tus neeg uas ntxeev siab rau kuv twb tuaj txog lawm!” Thaum Yexus tseem tabtom hais li ntawd, Yudas uas yog ib tug ntawm kaum ob tug thwjtim txawm tuaj txog. Muaj ib pab neeg coob coob nqa ntaj nqa qws nrog nws tuaj. Pab ntawd yog cov thawj ntawm cov povthawj thiab cov txwjlaug tso tuaj. Tus uas ntxeev siab rau Yexus, nws xub qhia rau cov neeg coob coob ntawd lawm hais tias, “Kuv nwj tus twg, ces yog tus ntawd ntag; nej cia li ntes nws!” Thaum Yudas tuaj txog, nws ncaj nraim mus rau ntawm Yexus thiab hais tias, “Nyob zoo, xibhwb.” Ces nws txawm nwj kiag Yexus. Yexus teb hais tias, “Phoojywg, koj yuav ua dabtsi cia li ua nrawm nroos.” Cov neeg ntawd txawm sau nthwv los ntes Yexus, thiab tuav nws ruaj ruaj. Cov neeg uas nrog Yexus nyob ntawd muaj ib tug rho hlo nws rab ntaj los tib ntag rau tus Povthawj Hlob ib tug qhev sab pobntseg xis tu nrho. Yexus hais rau tus ntawd hais tias, “Koj cia li muab koj rab ntaj ntxig rov rau hauv hnab, rau qhov txhua tus uas siv ntaj yeej yuav tuag rau hniav ntaj. Koj tsis paub hais tias, yog kuv thov kuv Txiv, nws yeej yuav txib nws cov timtswv coob dua kaum ob pawg txhiab los pab kuv tamsim no los? Tiamsis yog kuv ua li ntawd, yuav tsis tiav raws li Vajtswv Txojlus uas hais tias yuav tsum muaj li no.” Thaum ntawd, Yexus hais rau cov neeg coob coob ntawd hais tias, “Nej nqa ntaj nqa qw tuaj ntes kuv, ib yam li kuv yog tubsab los? Kuv niaj hnub nyob hauv lub Tuamtsev qhia nej, ua li cas nej ho tsis ntes kuv? Tiamsis yeej yuav muaj li no thiaj tiav raws li Vajtswv tej lus uas cov cev Vajtswv lus tau sau tseg lawm.” Ces cov thwjtim txawm khiav tas lawm thiab tso Yexus tseg. Cov neeg uas ntes Yexus, coj Yexus mus rau tom tus Povthawj Hlob Kaiyafas tsev, cov xibhwb uas qhia Vajtswv txoj Kevcai thiab cov txwjlaug twb tuaj ua ke sablaj qhov ntawd lawm. Tiamsis Petus raws Yexus qab nrug deb deb, nws mus txog ntawm lub tshavpuam ntawm tus Povthawj Hlob lub tsev, ces nws txawm mus nrog cov neeg uas zov tus Povthawj Hlob lub tsev nyob ua ke nraum tshavpuam, tos saib luag yuav ua li cas rau Yexus. Cov thawj ntawm cov povthawj thiab tagnrho cov nomtswv nrhiav lus nkaug Yexus, lawv thiaj tau kev muab Yexus tua povtseg. Txawm yog muaj ntau leej tuaj ua timkhawv dag los lawv nrhiav tsis tau lus nkaug Yexus. Thaum kawg muaj ob tug txivneej los nkaug hais tias, “Nws hais tias, kuv yuav rhuav lub Tuamtsev thiab peb hnub, kuv yuav ua kom tau ib lub tshiab.” Tus Povthawj Hlob txawm sawv tsees nug Yexus hais tias, “Nkawd nkaug koj li ntawd, koj tsis muaj lus teb li los?” Tiamsis Yexus tsis teb ib los li. Tus Povthawj Hlob rov hais rau Yexus hais tias, “Koj cia li tuav Vajtswv tus uas muaj sia nyob lub npe coglus hais tias, koj yog tus Mexiyas uas yog Vajtswv tus Tub.” Yexus teb hais tias, “Koj hais yog lawm. Tiamsis kuv hais rau nej sawvdaws tias, txij no mus nej yuav pom Neeg Leej Tub nyob ntawm Vajtswv tus uas muaj hwjchim loj kawg nkaus sab xis, thiab nrog huab nrog cua los saum ntuj los!” Ces tus Povthawj Hlob txawm dua rhe nws lub tsho thiab hais tias, “Nws hais lus saib tsis taus Vajtswv! Tsis tas peb yuav mus nrhiav timkhawv ntxiv! Nej twb hnov nws tej lus ntawd lawm! Nej xav li cas?” Lawv teb hais tias, “Nws ua txhaum lawm, tsimnyog muab nws tua povtseg.” Lawv txawm nto qaubncaug rau Yexus ntsejmuag thiab ntaus nws; thiab cov uas xuas tawg ncuav rau Yexus, lawv hais tias, “Tus Mexiyas, koj sim twv saib yog leejtwg ntaus koj!” Thaum Petus tseem zaum ntawm tshavpuam, tus Povthawj Hlob ib tug ntxhais qhev txawm tuaj hais rau Petus hais tias, “Koj yog ib tug uas ibtxwm nrog Yexus tus uas yog neeg Kalilais los sav.” Tiamsis Petus tsis lees li, nws tabmeeg hais rau sawvdaws hais tias, “Qhov uas koj hais ko kuv tsis paub li.” Petus txawm mus rau tom roojvag, ho muaj dua ib tug ntxhais qhev pom Petus, thiab nws hais rau cov txivneej uas nyob ntawd hais tias, “Tus no yog tus uas ibtxwm nrog Yexus tus uas yog neeg Naxales ntag.” Petus rov tsis lees dua thiab nws twv hais tias, “Kuv tsis paub tus txivneej ntawd!” Tom qab ntawd mentsis, cov neeg uas sawv ntawd, txawm los hais rau Petus hais tias, “Koj yeej yog lawv cov ib tug tiag, rau qhov koj lub suab hais zoo ib yam li lawv!” Petus txawm twv hais tias, “Kuv tsis paub tus txivneej ntawd. Yog kuv dag thov Vajtswv rau txim rau kuv!” Tamsim ntawd qaib txawm qua, ces Petus txawm nco dheev txog tej lus uas Yexus hais rau Petus hais tias, “Thaum qaib tsis tau qua, koj yuav hais peb zaug hais tias, koj tsis paub kuv.” Petus txawm tawm mus rau sab nraud, thiab quaj tu siab kawg li. Thaum sawv ntxov, cov thawj ntawm cov povthawj thiab cov txwjlaug txawm sablaj pom zoo hais tias, lawv yuav coj Yexus mus tua povtseg. Lawv muab saw hlau khi Yexus, thiab coj mus rau Philaj uas yog cov neeg Loos tus tswvxeev. Thaum Yudas tus uas ntxeev siab rau Yexus hnov hais tias, luag txiav txim rau Yexus lawm, nws tu siab heev, rau qhov nws ua txhaum lawm. Ces nws txawm nqa peb caug lub nyiaj rov qab mus rau cov thawj ntawm cov povthawj thiab cov txwjlaug. Nws hais tias, “Qhov uas kuv muab ib tug neeg tsis tau ua txhaum rau luag tua, yog kuv ua txhaum lawm!” Lawv teb hais tias, “Peb tsis nrog koj paub, ntawd yog koj haujlwm xwb!” Yudas txawm muab cov nyiaj ntawd pov rau hauv lub Tuamtsev; ces nws txawm mus dai cajdab tuag lawm. Cov thawj ntawm cov povthawj thiaj khaws cov nyiaj ntawd thiab hais tias, “Yog yuav muab cov nyiaj no tso rau hauv lub txhab nyiaj hauv lub Tuamtsev, yuav txhaum kevcai, rau qhov cov nyiaj no yog nqi ntshav.” Thaum lawv sablaj pom zoo lawm, lawv txawm muab cov nyiaj ntawd mus yuav tus Kws Puab Laujkaub Av Thaj Teb, cia ua toj ntxas faus lwm haivneeg. Twb yog vim li ntawd sawvdaws thiaj hu thaj teb ntawd hais tias, “Teb Ntshav” los txog niaj hnub no. Tej no muaj kom tiav raws li Yelemis uas yog tus cev Vajtswv lus tau qhia tseg lawm hais tias, “Cov Yixalayees twb hais haum lawm hais tias, ib tug neeg nqi taubhau tsuas yog peb caug lub nyiaj xwb. Lawv thiaj muab cov nyiaj ntawd mus yuav tus kws puab laujkaub av thaj teb, raws li tus Tswv tau hais rau kuv lawm.” Thaum Yexus sawv ntawm cov neeg Loos tus tswvxeev xubntiag, nws nug Yexus hais tias, “Koj puas yog cov Yudais tus vajntxwv?” Yexus teb hais tias, “Yog li koj hais.” Tiamsis thaum cov thawj ntawm cov povthawj thiab cov txwjlaug nkaug Yexus, Yexus tsis teb lawv ib los li. Philaj thiaj hais rau Yexus hais tias, “Koj tsis hnov tej lus uas lawv nkaug koj li los?” Tiamsis Yexus tsis teb ib los li, tus tswvxeev xav tsis thoob, xyov yog ua li cas Yexus thiaj tsis teb. Raws li ibtxwm, txhua xyoo thaum txog lub caij ua Kevcai Hla Dhau, cov neeg Loos tus tswvxeev yuav tsum tso ib tug neeg raug txim raws li cov pejxeem thov. Lawv thov tus twg, nws tso tus ntawd. Thaum ntawd muaj ib tug txivneej raug txim hu ua Yexus Npalanpas uas sawvdaws yeej paub nws zoo. Thaum cov pejxeem tuaj ua ke coob coob, Philaj txawm nug lawv hais tias, “Nej xav kom kuv tso tus twg rau nej? Tso tus Yexus Npalanpas lossis tso Yexus tus uas hu ua Mexiyas?” Philaj paub hais tias lawv khib, lawv thiaj ntes Yexus coj tuaj rau nws. Thaum Philaj nyob ntawm lub rooj hais plaub, Philaj tus pojniam txib neeg tuaj hais rau Philaj hais tias. “Koj tsis txhob ua li cas rau tus txivneej uas tsis muaj txim no, rau qhov nag hmo kuv ua npau suav txog tus txivneej no, ua rau kuv nyuaj siab kawg li.” Cov thawj ntawm cov povthawj thiab cov txwjlaug ntxias cov pejxeem kom thov Philaj tso Npalanpas, thiab muab Yexus coj mus tua povtseg. Tiamsis Philaj nug hais tias, “Nej xav kom kuv tso ob tug no, tus twg rau nej?” Lawv teb hais tias, “Npalanpas!” Philaj nug lawv hais tias, “Yog li ntawd, nej yuav kom kuv ua li cas rau Yexus tus uas hu ua Mexiyas?” Lawv teb hais tias, “Muab nws ntsia rau saum ntoo khaublig!” Tiamsis Philaj nug lawv hais tias, “Nws ua txhaum dabtsi?” Lawv sawvdaws hajyam qw nrov nrov hais tias, “Muab nws ntsia rau saum ntoo khaublig!” Thaum Philaj pom hais tias, cov pejxeem yeej yuav ua kom muaj kev kub ntxhov xwb, nws pab tsis tau Yexus lawm. Nws txawm muab dej los ntxuav tes tabmeeg sawvdaws thiab hais tias, “Lub txim uas nej tua tus txivneej no, kuv tsis kam ris, cia nej ris nej!” Ces cov pejxeem sawvdaws teb hais tias, “Lub txim uas peb tua tus txivneej no, cia peb thiab peb cov menyuam ris!” Philaj txawm tso Npalanpas rau lawv, nws kom cov tubrog muab Yexus nplawm, thiab coj mus ntsia rau saum ntoo khaublig. Thaum ntawd, Philaj cov tubrog txawm coj Yexus mus rau hauv tus tswvxeev lub tsev, thiab cov tubrog txawm los sawv vij Yexus. Lawv muab Yexus lub tsho hle, thiab muab ib lub tsho ntev tsamxem los kho rau Yexus hnav. Lawv muab hmab pos los ua kauj looj Yexus taubhau, thiab muab ib tug kav tauj rau Yexus sab tes xis tuav; lawv txawm txhos caug ntawm Yexus xubntiag luag thiab hais lus saib tsis taus Yexus hais tias, “Thov kom cov Yudais tus Vajntxwv muaj sia nyob ntev!” Lawv nto qaubncaug rau Yexus, thiab muab tus kav tauj los ntaus Yexus taubhau. Thaum lawv ua saib tsis taus Yexus tas lawm, lawv muab lub tsho ntev tsamxem ntawd hle, thiab muab lub qub kho rov rau Yexus hnav. Ces lawv txawm coj Yexus tawm mus ntsia rau saum tus ntoo khaublig lawm. Thaum lawv tabtom mus lawv ntsib ib tug txivneej hu ua Ximoos uas nyob hauv lub nroog Kulenes tuaj. Lawv yuam nws kwv Yexus tus ntoo khaublig mus txog ib qhov chaw hu ua Khaulakhauthas uas txhais hais tias, “Pobtxha Taubhau,” Lawv muab kua iab xyaw cawv txiv hmab rau Yexus haus; tiamsis thaum Yexus saj mentsis lawm, nws tsis kam haus. Thaum lawv muab Yexus ntsia rau saum ntoo khaublig lawm, lawv muab nws cev ris tsho los twv saib leejtwg tau yam twg. Lawv ua li ntawd tas, ces lawv txawm zaum zov nws. Lawv muab ib daim txiag sau nqe lus uas nkaug Yexus, ntsia rau saum tus ntoo khaublig, ncaj ntawm Yexus taubhau rau saum hais tias, “Tus no yog Yexus tus uas yog cov Yudais tus Vajntxwv.” Thaum ntawd lawv muab ob tug tubsab ntsia rau saum ob tug ntoo khaublig, muab ib tug txhos rau ntawm Yexus sab xis thiab muab ib tug txhos rau ntawm Yexus sab laug. Cov neeg uas dhau txojkev ntawd, lawv co taubhau thiab thuam Yexus hais tias: “Koj hais tias koj yuav rhuav lub Tuamtsev, thiab peb hnub, koj yuav rov ua tau ib lub tshiab! Yog koj yog Vajtswv tus tub tiag, koj cia li pab kom koj dim thiab nqis kiag saum tus ntoo khaublig ko los!” Cov thawj ntawm cov povthawj thiab cov xibhwb uas qhia Vajtswv txoj Kevcai, puavleej thuam Yexus thiab hais tias, “Nws cawm tau lwm tug, tiamsis nws ho pab tsis tau nws! Nws tsis yog cov Yixalayees tus Vajntxwv los? Yog nws nqis saum tus ntoo khaublig los tamsim no, peb thiaj yuav ntseeg nws! Nws cia siab rau Vajtswv thiab hais tias nws yog Vajtswv tus Tub. Yog li ntawd, peb sim saib, saib Vajtswv puas yuav cawm kom nws dim tamsim no!” Txawm yog ob tug tubsab uas raug ntsia rau saum ntoo khaublig ib yam li Yexus los kuj thuam Yexus thiab. Thaum hnub ntseg, txawm tsaus ntuj nti thoob plaws lub tebchaws ntawd mus txog thaum peb teev. Thaum peb teev ntawd, Yexus hu nrov nrov hais tias, “Elis, Elis, lemas xanpathanis?” lo lus ntawd txhais hais tias, “Kuv tus Vajtswv! Kuv tus Vajtswv! Ua li cas koj tso kuv tseg lawm?” Cov neeg uas sawv ntawd muaj qee leej uas hnov Yexus hais li ntawd. Lawv hais tias, “Nws hu Eliyas!” Tamsim ntawd, muaj ib tug txawm dhia mus muab ib lub xwbkuab raus cawv txiv hmab qaub chob rau ib tug kav tauj cev mus rau Yexus haus. Tiamsis muaj dua ib co hais tias, “Tos mentsis tso, peb ntsia saib Eliyas puas yuav los cawm kom nws dim!” Yexus rov quaj hu dua ib zaug nrov nrov, ces nws txawm tu siav nrho lawm. Tamsim ntawd daim ntaub uas thaiv hauv lub Tuamtsev ntuag rhe saud ti nkaus hauv taw ua ob daig. Lub ntiajteb ua zog koog, tej pobzeb pobtsuas tawg zos zaws. Tej qhov ntxa txawm qhib thiab cov neeg ntseeg Vajtswv uas tuag lawm, muaj ntau leej muaj sia sawv rov los. Lawv txawm tawm hauv qhov ntxa los, thiab thaum Yexus sawv hauv qhov tuag rov qab los lawm, ces lawv txawm mus rau hauv lub nroog Yeluxalees, thiab cov neeg uas nyob hauv muaj tau leej pom lawv. Thaum tus thawj tubrog thiab cov tubrog uas zov Yexus pom lub ntiajteb ua zog koog thiab pom txhua yam uas muaj los ntawd, lawv ntshai kawg li, thiab lawv sib tham hais tias, “Tus no yeej yog Vajtswv tus Tub tiag!” Muaj ntau leej pojniam tuaj sawv deb deb saib. Lawv yog cov uas ibtxwm pab Yexus thiab nrog Yexus tuaj pem Kalilais tuaj. Cov pojniam ntawd yog Malis Madalas, Malis tus uas yog Yakaunpaus thiab Yauxej niam, thiab muaj ib tug yog Xenpedais tus pojniam. Thaum yuav tsaus ntuj, muaj ib tug txivneej npluanuj hu ua Yauxej uas nyob pem lub nroog Alimathas txawm tuaj txog. Nws yog Yexus ib tug thwjtim thiab, nws mus cuag Philaj thiab thov Philaj muab Yexus lub cev rau nws. Ces Philaj thiaj kom lawv mus muab Yexus lub cev rau Yauxej, Yauxej muab ib chaws ntaubmag tshiab los qhwv Yexus lub cev, thiab kwv mus tso rau hauv lub qhov ntxa tshiab uas nws txaug rau hauv ib phab zeb. Nws dov ib daim txiag zeb loj loj los npog lub rooj ntxas cia, thiab nws txawm mus tsev lawm. Malis Madalas thiab muaj dua ib tug Malis, zaum ntawm rooj ntxas saib. Hnub tom qab uas yog Hnub Xanpataus lawm, cov thawj ntawm cov povthawj thiab cov Falixais mus cuag Philaj thiab hais tias, “Peb nco tau hais tias, thaum tus neeg dag ntawd tseem muaj sia nyob, nws hais tias, ‘Peb hnub kuv yuav sawv rov qab los.’ Yog li ntawd, thov koj tso neeg mus zov lub ntxa zoo zoo kom puv peb hnub, nyob tsam nws cov thwjtim yuav tuaj nyiag nws lub cev thiab mus qhia rau sawvdaws hais tias, nws twb sawv hauv qhov tuag rov qab los lawm. Ces zaj uas lawv dag ntawd, hajyam yuav phem heev dua thawj zaug.” Philaj txawm hais rau lawv hais tias, “Nej cia li coj ib pab tubrog mus zov lub ntxa zoo zoo raws li nej zov tau.” Lawv txawm mus nias homthawj rau daim txiag zeb, thiab tso tubrog zov. Tom qab Hnub Xanpataus uas yog Hnubkaj thaum sawv ntxov, Malis Madalas thiab muaj dua ib tug Malis mus saib Yexus lub ntxa. Tamsim ntawd ntiajteb ua zog koog, tus Tswv ib tug timtswv nqis los muab daim txiag zeb uas npog lub rooj ntxas dov tawm, thiab nws zaum ntawm daim txiag zeb ntawd. Nws lub ntsejmuag ci ib yam li xob laim, thiab nws cev ris tsho dawb paug ib yam li daus. Cov tubrog uas zov lub ntxa ntshai ua ibce tshee hnyo thiab txhav tas ib yam li cov neeg tuag lawm. Tus timtswv hais rau ob tug pojniam ntawd hais tias, “Neb tsis txhob ntshai; kuv paub hais tias yog neb tuaj nrhiav Yexus tus uas luag muab ntsia rau saum ntoo khaublig. Nws tsis nyob ntawm no, nws twb sawv raws li nws qhia tseg lawm. Neb cia li los saib qhov chaw uas luag tso nws lub cev. Neb cia li rov mus qhia rau nws cov thwjtim hais tias, nws twb sawv hauv qhov tuag rov los lawm. ‘Nws yuav ua nej ntej mus rau pem Kalilais; thiab nej yuav ntsib nws ped!’ Nco ntsoov tej uas kuv hais rau neb no.” Nkawd txawm rov nrawm nroos ntawm lub ntxa mus lawm, nkawd ntshai los ntshai, zoo siab los zoo siab, thiab sib tw khiav rov mus qhia rau Yexus cov thwjtim paub. Thaum nkawd tabtom rov mus, nkawd txawm ntsib Yexus. Yexus hais rau nkawd hais tias, “Thov kom neb tau nyob kaj siab lug.” nkawd los tuav nkaus Yexus ob txhais kotaw thiab pehawm nws. Yexus hais rau nkawd hais tias, “Nej tsis txhob ntshai, neb cia li mus qhia kuv cov thwjtim kom lawv mus rau pem Kalilais, lawv yuav pom kuv ped.” Thaum ob tug pojniam ntawd tabtom taug kev mus, cov tubrog uas zov lub ntxa qee leej khiav mus rau hauv nroog thiab qhia tej uas muaj lawm rau cov thawj ntawm cov povthawj mloog. Thaum cov thawj ntawm cov povthawj mus nrog cov txwjlaug sablaj tas; lawv txawm muab nyiaj ntau rau cov tubrog thiab hais tias, “Nej yuav tsum hais tias, thaum ib tag hmo uas nej tsaug zog lawm, ces nws cov thwjtim txawm tuaj nyiag nws lub cev lawm. Nej tsis txhob txhawj, yog tus tswvxeev hnov txog zaj no, peb mam li hais nws, tsis pub nej raug teebmeem.” Cov tubrog txais cov nyiaj ntawd, ces lawv txawm ua raws li cov povthawj hais. Zaj no nrov ncha mus thoob plaws txhua qhov rau cov Yudais hnov txog niaj hnub no. Kaum ib tug thwjtim txawm mus rau pem Kalilais thiab nce mus rau pem lub roob raws li Yexus hais rau lawv lawm. Thaum lawv mus pom Yexus, lawv txawm txhos caug ntua pehawm nws, tiamsis tseem muaj qee leej ua xyem xyav. Yexus txav los ze lawv thiab hais rau lawv hais tias, “Vajtswv twb muab hwjchim rau kuv kav tagnrho ib puas tsav yam saum ntuj thiab hauv ntiajteb no lawm. Yog li ntawd, nej cia li tawm mus qhia txhua haivneeg hauv qab ntuj no, kom lawv los ua kuv cov thwjtim: Nej yuav tsum tuav Vaj Leej Txiv, Vaj Leej Tub thiab Vaj Ntsujplig tus Dawbhuv lub npe, muab lawv ua kevcai raus dej. Thiab qhia kom lawv paub coj raws li txhua yam uas kuv tau qhia rau nej lawm; thiab kuv yuav nrog nraim nej mus txog hnub uas lub ntiajteb no kawg.” Ntawm no yog Txojmoo Zoo uas hais txog Yexus Khetos uas yog Vajtswv tus Tub. Lub hauvpaus chiv yog raws li Yaxayas uas yog tus cev Vajtswv lus tau sau tseg lawm hais tias, “Vajtswv hais tias, ‘Kuv yuav txib kuv tus tubtxib ua koj ntej mus kho kev tos koj.’ Muaj ib tug hais nrov nrov tom roob mojsab qhua hais tias, ‘Cia li kho kev tos tus Tswv; kho kev kom ncaj nws yuav los!’ ” Yauhas tus uas muab neeg ua kevcai raus dej tawm tom roob mojsab qhua los; nws muab neeg ua kevcai raus dej thiab qhuab qhia hais tias, “Nej yuav tsum tso nej tej kev txhaum tseg thiab ua kevcai raus dej, Vajtswv thiaj yuav zam nej lub txim.” Cov neeg uas nyob thoob plaws hauv lub xeev Yudas thiab hauv lub nroog Yeluxalees tuaj mus mloog Yauhas qhuab qhia. Lawv txhua tus nyias lees nyias lub txim, thiab Yauhas muab lawv ua kevcai raus dej hauv tus dej Yauladees. Yauhas hnav cev ris tsho uas muab plaub ntxhuav ua, nws sia siv tawv, nws noj kooj thiab zib ntab. Yauhas qhia hais tias, “Tus uas yuav lawv kuv qab los tseem muaj hwjchim loj dua kuv. Kuv twb tsis tsimnyog khoov mus daws nws txoj nyuag hlua khau. Kuv muab nej ua kevcai raus rau hauv dej, tiamsis tus ntawd yuav muab nej ua kevcai raus los ntawm Vaj Ntsujplig tus Dawbhuv.” Tom qab ntawd tsis ntev Yexus txawm tuaj pem lub zos Naxales uas nyob hauv lub xeev Kalilais tuaj, thiab Yauhas muab nws ua kevcai raus dej hauv tus dej Yauladees. Thaum Yexus sawv hauv dej los, tamsim ntawd Yexus txawm pom rooj ntug qhib plho, thiab pom Vaj Ntsujplig zoo li ib tug nquab los rau saum Yexus. Thiab Yexus hnov ib lub suab hais saum ntuj tuaj hais tias, “Koj yog kuv tus Tub uas kuv hlub. Kuv txaus siab rau koj.” Tamsim ntawd Vaj Ntsujplig kom Yexus mus rau tom roob mojsab qhua; Yexus nyob tod tau plaub caug hnub, dab Ntxwgnyoog sim Yexus siab. Yexus nrog tej tsiaj qus nyob, tiamsis muaj ib co timtswv ceebtsheej los tu Yexus. Thaum lawv muab Yauhas kaw lawm, tom qab ntawd Yexus txawm mus rau pem Kalilais thiab qhia Vajtswv Txojmoo Zoo ped. Yexus qhia hais tias, “Twb txog lub sijhawm uas Vajtswv lub Tebchaws los ze lawm! Nej cia li tso nej tej kev txhaum tseg los ntseeg Txojmoo Zoo!” Thaum Yexus tabtom taug ntug dej Hiavtxwv Kalilais mus, nws pom ob tug neeg nrhiav ntses uas yog Ximoos thiab nws tus kwv Adales tabtom muab vas ntaus ntses hauv hiavtxwv. Yexus hais rau nkawd hais tias, “Neb cia li nrog kuv mus, kuv yuav qhia kom neb paub mus nrhiav neeg.” Tamsim ntawd, nkawd txawm tso plhuav nkawd ob lub vas tseg thiab nrog Yexus mus. Yexus mus tom ntej mentsis, nws pom dua ob tug kwvtij uas yog Yakaunpaus thiab Yauhas; nkawd yog Xenpedais tub. Nkawd tabtom ntxiv vas hauv nkoj. Thaum Yexus pom dheev nkawd Yexus txawm hu nkawd los; nkawd txawm tso nkawd txiv Xenpedais thiab cov tubtxib tseg rau hauv lub nkoj, thiab nkawd nrog Yexus mus. Yexus thiab nws cov thwjtim mus txog hauv lub nroog Kapena-us, Hnub Xanpataus Yexus mus qhuab qhia hauv lub tsev sablaj. Cov neeg uas tuaj mloog Yexus qhuab qhia, lawv xav tsis thoob li, rau qhov Yexus tej lus qhia tseemceeb heev; nws qhia tsis thooj li cov xibhwb uas qhia Vajtswv txoj Kevcai qhia. Tamsim ntawd muaj ib tug txivneej raug dab los rau hauv tsev sablaj; nws qw nrov nrov hais tias, “Yexus uas yog neeg Naxales, koj tuaj ua kom peb puastsuaj los? Kuv paub koj yog leejtwg, koj yog Vajtswv tus tubtxib uas dawbhuv!” Yexus hais tawv tawv rau dab hais tias, “Koj tsis txhob hais lus, koj cia li tawm hauv tus txivneej no mus!” Dab txawm ua rau tus txivneej ntawd huam ib tshaj thiab qw nrov nrov, ces dab txawm tawm plaws lawm. Cov neeg uas nyob ntawd xav tsis thoob li, lawv txawm sib nug hais tias, “Muaj dua ib zaj lus qhia tshiab los ua cas? Tus txivneej no muaj hwjchim ntiab tau dab, thiab dab kuj mloog nws lus!” Yexus lub moo txawm nrov ncha mus thoob plaws txhua qhov hauv lub xeev Kalilais. Yakaunpaus, Yauhas thiab tagnrho Yexus cov thwjtim nrog Yexus tawm hauv tsev sablaj mus rau tom Ximoos thiab Adales tsev. Ximoos niamtais ua npaws thiab pw saum txaj; thaum Yexus mus txog ntua hauv tsev, muaj neeg qhia rau Yexus hais tias Ximoos niamtais mob. Yexus txawm mus saib nws; Yexus tuav nws tes rub nws sawv. Ces nws txawm zoo thiab sawv los ua zaub ua mov rau lawv noj. Thaum hnub poob qho uas yuav tsaus ntuj muaj neeg coj tej neeg uas muaj mob thiab tej neeg uas raug dab tuaj cuag Yexus. Tej neeg zejzog tuaj nyob nraum qhovrooj. Yexus kho txhua tus uas muaj mob zoo huv tibsi, thiab Yexus ntiab ntau tus dab tawm. Yexus tsis pub dab hais lus rau qhov dab yeej paub Yexus. Hnub tom qab thaum kaj ntug txoog, Yexus txawm sawv thiab tawm hauv tsev mus rau tom ib qhov chaw uas tsis muaj neeg thiab thov Vajtswv. Ximoos thiab nws cov phoojywg mus nrhiav Yexus; thaum lawv nrhiav tau Yexus lawm, lawv hais rau Yexus hais tias, “Muaj neeg coob coob tuaj nrhiav koj.” Yexus teb hais tias, “Peb yuav tsum mus txhua nrho tej zos uas nyob ibncig no, thiab kuv yuav tsum mus qhia hauv tej zos ntawd, rau qhov kuv yeej los ua tes haujlwm no.” Yexus txawm mus thoob plaws hauv lub xeev Kalilais, nws qhuab qhia hauv tej tsev sablaj, thiab nws ntiab ntau tus dab tawm hauv cov neeg uas raug dab mus. Muaj ib tug txivneej mob ruas tuaj cuag Yexus; nws txhos caug ntua ntawm Yexus kotaw thiab thov hais tias, “Yog koj txaus siab kho kuv tus mob, koj yeej kho tau.” Yexus hlub nws heev, Yexus txawm cev tes mus tuav nws thiab Yexus teb hais tias, “Kuv txaus siab pab koj, koj tej ruas cia li zoo hlo!” Tamsim ntawd nws tej ruas txawm zoo tas huv tibsi lawm. Yexus txwv nws tawv tawv thiab kom nws cia li mus; Yexus hais tias, “Koj tsis txhob qhia zaj no rau leejtwg. Koj cia li ncaj nraim mus cuag tus povthawj kom nws saib hais tias koj tej ruas twb zoo lawm; thiab tom qab ntawd koj cia li nqa khoom mus hlawv fij rau Vajtswv raws li Mauxes tau qhia tseg, sawvdaws thiaj paub hais tias koj twb zoo lawm.” Tiamsis nws mus qhia zaj no rau sawvdaws hnov thoob plaws txhua qhov huv tibsi, nws tsis zais li. Txij hnub ntawd los Yexus mus tsis tau tabmeeg hauv tej nroog lawm. Tiamsis Yexus mus rau tom tej qhov chaw uas tsis muaj neeg nyob coob, thiab pheej muaj neeg tuaj txhua qhov tuaj cuag Yexus. Tau ob peb hnub tom qab ntawd Yexus rov qab los txog rau hauv lub nroog Kapena-us, sawvdaws hnov hais tias Yexus rov los tsev lawm. Muaj neeg coob coob tuaj xyuas Yexus, lawv nyob puv tsev tas, txawm yog ntawm qhovrooj los twb tsis tau kev mus rau hauv tsev. Thaum Yexus tabtom qhia Txojmoo Zoo rau lawv mloog, ces txawm muaj plaub leeg kwv ib tug txivneej tuag tes tuag taw tuaj rau Yexus kho. Tiamsis muaj neeg coob coob, lawv tsis tau kev kwv nws mus cuag Yexus, ces lawv txawm nce mus rau saum rutsev thiab rhuav ib qho ncaj ntawm Yexus rau saum. Thaum lawv qhib tau lawm, lawv txawm muab hlua khi daim pam uas pua nws tso nws dauv mus rau hauv. Thaum Yexus pom hais tias lawv muaj kev ntseeg heev, Yexus txawm hais rau tus txivneej uas tuag tes tuag taw ntawd hais tias, “Metub, kuv twb zam koj lub txim lawm.” Cov xibhwb uas qhia Vajtswv txoj Kevcai qee leej uas zaum ntawd xav hais tias, “Ua li cas nws yuav hais li ntawd? Nws hais li ntawd kuj yog nws saib tsis taus Vajtswv! Tsis muaj leejtwg zam tau neeg lub txim, tsuas yog Vajtswv tib leeg xwb thiaj zam tau!” Tamsim ntawd Yexus paub hais tias lawv xav li ntawd, Yexus txawm hais rau lawv hais tias, “Ua li cas nej xav li ntawd? Lo lus uas hais rau tus txivneej tuag tes tuag taw no hais tias, ‘Kuv twb zam koj lub txim lawm,’ lossis lo lus uas hais tias, ‘Cia li sawv muab koj daim pam pua chaw nqa mus tsev,’ ob lo lus no lo twg yuav yoojyim hais dua? Kuv ua li no qhia rau nej paub hais tias Neeg Leej Tub muab hwjchim nyob hauv ntiajteb no zam txim tau rau neeg.” Yexus thiaj hais rau tus txivneej tuag tes tuag taw hais tias, “Kuv hais rau koj hais tias koj cia li sawv thiab nqa koj daim pam pua chaw mus tsev.” Thaum sawvdaws tabtom ntsia ntsoov nws, nws txawm sawv tsees nqa hlo nws daim pam pua chaw tawm nrawm nroos mus lawm. Lawv xav tsis thoob li, lawv qhuas Vajtswv hais tias, “Peb tsis tau pom dua li no ib zaug li!” Yexus rov qab mus nram ntug Hiavtxwv Kalilais. Muaj ib pab neeg coob coob tuaj cuag nws, ces nws txawm qhia lawv. Thaum Yexus tabtom mus, nws pom ib tug txivneej sau se hu ua Levis uas yog Alafais tus tub zaum ntawm lub rooj sau se. Yexus hais rau Levis hais tias, “Koj cia li nrog kuv mus.” Ces Levis txawm sawv tsees nrog Yexus mus. Tom qab ntawd Yexus mus noj mov hauv Levis tsev. Cov neeg sau se thiab cov neeg txhaum ntau leej nrog Yexus mus, thiab muaj coob leej nrog Yexus thiab Yexus cov thwjtim noj mov ua ke. Cov xibhwb uas qhia Vajtswv txoj Kevcai uas yog cov Falixais qee leej pom Yexus nrog cov neeg txhaum thiab cov neeg sau se noj mov ua ke, lawv txawm nug Yexus cov thwjtim hais tias, “Vim li cas Yexus yuav nrog cov neeg sau se thiab cov neeg txhaum noj mov?” Yexus hnov lawv nug li ntawd, Yexus txawm teb hais tias, “Cov neeg tsis muaj mob yeej tsis mus cuag kws tshuaj, tsuas yog cov neeg muaj mob thiaj mus cuag kws tshuaj xwb. Kuv tsis yog los hu cov neeg ncaj ncees, tiamsis kuv los hu cov neeg txhaum.” Muaj ib zaug Yauhas tus uas muab neeg ua kevcai raus dej cov thwjtim thiab cov Falixais tabtom ua kevcai yoo mov, txawm muaj neeg tuaj nug Yexus hais tias, “Ua li cas Yauhas cov thwjtim thiab cov Falixais cov thwjtim ua kevcai yoo mov, tiamsis koj cov tsis yoo?” Yexus teb hais tias, “Nej xav hais tias thaum tus nraug vauv tseem nrog nws cov phoojywg noj tshoob ua ke, lawv yuav yoo mov no los? Thaum tus nraug vauv tseem nrog lawv nyob, lawv yeej yuav tsis yoo li. Tiamsis thaum txog lub sijhawm uas luag coj tus nraug vauv mus lawm, ces lawv yuav yoo mov. “Tsis muaj leejtwg yuav muab daim ntaub tshiab los ntxiv lub tsho qub; yog ua li ntawd, daim ntaub tshiab yuav ua rau lub tsho qub hajyam ntuag loj ntxiv. Thiab tsis muaj leejtwg yuav muab cov cawv txiv hmab tshiab ntim rau hauv lub hnab tawv qub; yog ua li ntawd, cov cawv txiv hmab tshiab yuav tsam kom lub hnab tawv qub tawg. Cov cawv txiv hmab yuav los tas, thiab lub hnab tawv qub yuav tsis zoo siv lawm. Cov cawv txiv hmab tshiab yuav tsum muab ntim rau hauv lub hnab tawv tshiab, lub hnab tawv thiaj tsis tawg.” Muaj ib zaug uas yog Hnub Xanpataus, Yexus thiab nws cov thwjtim taug kev mus txog hauv ib daim teb npleg, cov thwjtim txawm de hnab nplej los tev noj. Thaum cov Falixais pom Yexus cov thwjtim ua li ntawd, lawv txawm hais rau Yexus hais tias, “Koj saib, Hnub Xanpataus koj cov thwjtim ua li ntawd, lawv ua txhaum peb txoj kevcai lawm.” Yexus teb hais tias, “Nej tsis tau nyeem zaj uas thaud Daviv thiab nws cov neeg tshaib plab, lawv xav tau dabtsi noj, nws ua li cas los? Daviv mus rau hauv lub Tuamtsev thiab muab tej ncuav uas twb muab fij rau Vajtswv lawm los noj. Thaum ntawd yog lub sijhawm uas Anpiyathas ua tus Povthawj Hlob. Raws li peb txoj Kevcai, tsuas yog cov povthawj thiaj noj tau tej ncuav ntawd xwb, tiamsis Daviv noj thiab muab faib rau cov neeg uas nrog nws ua ke noj huv tibsi.” Yexus xaus lus hais tias, “Vajtswv tsim Hnub Xanpataus rau neeg, tsis yog tsim neeg rau Hnub Xanpataus. Yog li ntawd, Neeg Leej Tub yog tus Tswv Hnub Xanpataus.” Yexus txawm rov qab mus rau hauv tsev sablaj; muaj ib tug txivneej qhuav tes nyob ntawd. Cov neeg uas nyob ntawd muaj qee leej xav nrhiav txim rau Yexus, lawv txawm ntsia saib Hnub Xanpataus Yexus puas yuav kho tus txivneej ntawd txhais tes los tsis kho. Yexus hais rau tus txivneej uas qhuav tes ntawd hais tias, “Koj cia li sawv los ntawm no.” Yexus txawm nug sawvdaws hais tias, “Hnub Xanpataus peb txoj kevcai cia peb ua li cas? Cia ua zoo lossis cia ua phem? Cawm txojsia lossis cia txojsia tu?” Tiamsis tsis muaj leejtwg teb li. Yexus ntsia cov neeg uas nyob ntawd, nws chim thiab nws nyuaj siab rau lawv rau qhov lawv muaj lub siab tawv. Yexus hais rau tus txivneej uas qhuav tes hais tias, “Koj cia li xyab hlo koj txhais tes.” Nws xyab hlo tes, ces nws txhais tes txawm rov zoo li qub lawm. Tamsim ntawd cov Falixais txawm tawm hauv tsev sablaj mus nrog Helauj cov neeg qee leej sablaj; lawv tuav tswvyim yuav muab Yexus tua povtseg. Yexus thiab nws cov thwjtim mus rau nram ntug Hiavtxwv Kalilais, muaj neeg coob coob nrog Yexus mus thiab. Cov neeg ntawd muaj ibtxhia tuaj hauv lub xeev Kalilais tuaj, muaj ibtxhia tuaj nram xeev Yudas tuaj, muaj ibtxhia tuaj nram lub nroog Yeluxalees tuaj, muaj ibtxhia tuaj nram cheebtsam Idumias tuaj, muaj ibtxhia tuaj sab ntug dej Yauladees tim ub tuaj, thiab muaj ibtxhia tuaj pem tej zos uas nyob ze lub nroog Tiles thiab lub nroog Xidoos tuaj. Cov neeg ntawd tuaj xyuas Yexus, rau qhov lawv hnov txog tes haujlwm uas Yexus ua. Muaj neeg coob coob, ces Yexus txawm hais kom nws cov thwjtim npaj ib lub nkoj tos nws, cov neeg coob coob ntawd thiaj tsis txav los ti Yexus. Yexus kho ntau leej mob zoo lawm, ces tej neeg uas muaj mob txawm pheej sib txiv los kom ze, lawv thiaj kov tau Yexus. Txhua zaus uas cov neeg raug dab pom Yexus, lawv txawm qhau cev hlo ntawm Yexus kotaw thiab qw nrov nrov hais tias, “Koj yog Vajtswv tus Tub.” Yexus txwv tawv tawv cov dab ntawd hais tias, “Nej tsis txhob qhia hais tias kuv yog leejtwg.” Tom qab ntawd Yexus txawm nce mus rau pem ib lub roob. Nws hu cov neeg uas nws xav yuav ua nws cov timthawj los cuag nws, ces lawv txawm los cuag nws. Nws xaiv tau kaum ob leeg, nws hu kaum ob leeg ntawd ua cov timthawj. Nws hais rau lawv hais tias, “Kuv xaiv nej los nrog kuv nyob. Kuv yuav txib nej mus qhia Txojmoo Zoo, thiab kuv yuav pub hwjchim rau nej kom nej ntiab tau dab.” Kaum ob leeg uas Yexus xaiv ntawd yog: Ximoos (tus uas Yexus tis dua ib lub npe hu ua Petus); Yakaunpaus thiab nws tus kwv Yauhas, nkawd yog Xenpedais tub; (Yexus tis npe rau nkawd hu ua Npau-anekes, rau qhov “Nkawd Siab Ceev Heev”); Adales, Filis, Npataulaumais, Mathais, Thaumas, Yakaunpaus uas yog Alafais tus tub, Thade-us, Ximoos tus uas xav kom nws haivneeg muaj kev ywjpheej, thiab Yudas Ixakali-us tus uas ntxeev siab rau Yexus. Yexus mus txog hauv ib lub tsev, muaj dua ib cov neeg coob coob tuaj Yexus thiab nws cov thwjtim tsis khoom noj mov li. Thaum Yexus tsevneeg hnov li ntawd, lawv txawm mus nrhiav Yexus thiab coj Yexus los tsev rau qhov muaj neeg hais tias, “Yexus vwm lawm!” Cov xibhwb uas qhia Vajtswv txoj Kevcai qee leej uas tuaj nram Yeluxalees tuaj hais tias, “Yog Npexenpus pub hwjchim rau nws! Yog dab Ntxwgnyoog pub hwjchim rau nws, nws thiaj ntiab tau dab.” Yexus txawm hu cov neeg coob coob ntawd los cuag nws, thiab nws ua lus pivtxwv qhia rau lawv hais tias, “Dab Ntxwgnyoog yuav ua li cas ntiab tau dab Ntxwgnyoog? Yog muaj ib lub tebchaws tawg ua ob peb pab, thiab cov neeg ntawd sib ntaus sib tua, ces lub tebchaws ntawd yeej yuav puastsuaj mus. Yog tsevneeg twg tsis sib haum, ces tsevneeg ntawd yeej yuav tawg mus tas. Cov neeg uas dab Ntxwgnyoog kav, yog lawv tsis sib haum lawv yeej yuav nyob tsis tau ua ke; lawv yuav tawg mus tas. “Tsis muaj leejtwg yuav tsoo mus tau rau hauv tus txivneej uas muaj zog heev lub tsev thiab huab nws tej qhov txhia chaw, tsuas yog nws xub muab tus uas muaj zog ntawd khi tso, nws thiaj huab tau tej qhov txhia chaw hauv tus ntawd tsev. “Kuv qhia tseeb rau nej hais tias txhua yam kev txhaum uas neeg ua thiab txhua lo lus phem uas neeg hais mas Vajtswv zam tau. Tiamsis tus uas thuam Vaj Ntsujplig tus Dawbhuv, Vajtswv zam txim tsis tau rau tus ntawd. Tus ntawd yuav tsum ris nws lub txim mus ibtxhis.” ( Yexus hais li ntawd rau qhov muaj qee leej hais tias, “Yexus raug dab.”) Thaum ntawd Yexus niam thiab Yexus cov kwv tuaj sawv nraum zoov; lawv tso neeg mus hu Yexus los. Muaj neeg coob coob zaum puagncig Yexus. Lawv hais rau Yexus hais tias, “Koj saib, koj niam thiab koj cov kwv tuaj nrhiav koj; lawv nyob sab nraud.” Yexus teb hais tias, “Leejtwg yog kuv niam? Thiab cov twg yog kuv cov kwv?” Yexus txawm ntsia cov neeg uas zaum puagncig nws thiab hais tias, “Cov neeg uas nyob ntawm no thiaj yog kuv niam thiab kuv cov kwv! Tus uas ua raws li Vajtswv lub siab nyiam, tus ntawd thiaj yog kuv tus kwv, yog kuv tus muam thiab yog kuv niam.” Yexus rov qab mus qhia nram ntug dej Hiavtxwv Kalilais dua ib zaug. Muaj neeg coob coob tuaj cuag Yexus, ces Yexus thiaj nce mus zaum rau hauv ib lub nkoj hauv hiavtxwv; cov neeg coob coob ntawd sawv tim ntug dej. Yexus ua lus pivtxwv qhia ntau zaj rau lawv mloog hais tias, “Nej ua tib zoo mloog! Muaj ib tug txivneej nqa nplej mus tseb. Thaum nws tseb cov noob nplej rau hauv daim teb, muaj qee lub poob rau hauv plawv kev, ces noog txawm ya los khaws noj lawm. Muaj qee lub poob rau ntawm qhov av uas hauv muaj pobzeb tiv lawm. Cov noob ntawd tuaj sai sai rau qhov av tsis tob. Thaum tshav ntub kub cov kaus nplej txawm ntsws thiab qhuav lawm, rau qhov cov cag ntsia av tsis tob. Muaj qee lub poob rau hauv lub hauvpaus pos, ces tsob pos hlob tuaj laum cov nplej ntawd tuag tas lawm, thiab cov nplej txhawv tsis taus. Tiamsis muaj qee lub poob rau ntawm qhov av zoo, cov ntawd tuaj kaus, hlob sai thiab txhawv zoo; qee hnab txi tau peb caug lub, qee hnab txi tau rau caum lub thiab qee hnab txi tau ib puas lub.” Yexus xaus lus hais tias, “Yog leejtwg muaj pobntseg, cia mloog!” Thaum Yexus nyob ib leeg xwb, cov neeg uas hnov Yexus qhia muaj qee leej nrog cov thwjtim tuaj thov Yexus txhais zaj lus pivtxwv ntawd rau lawv paub. Yexus hais rau lawv hais tias, “Yav tas los nej tsis paub zaj uas hais txog Vajtswv lub Tebchaws, tiamsis nimno Vajtswv twb qhia zaj ntawd rau nej paub lawm. Txhua zaj uas lwm tus hnov puavleej yog lus pivtxwv xwb, kom muaj tiav raws li Vajtswv Txojlus uas hais tias, ‘Lawv yuav ntsia tas ntsia thiab, tiamsis lawv yuav tsis pom; lawv yuav mloog tas mloog thiab, tiamsis lawv yuav tsis totaub. Yog lawv pom thiab totaub lawm, nyob tsam lawv yuav rov los cuag Vajtswv, thiab Vajtswv yuav zam lawv lub txim.’ ” Yexus hais rau lawv hais tias, “Nej tsis totaub zaj lus pivtxwv no los? Yog nej tsis totaub zaj no, nej yuav ua li cas totaub lwm zaj? Tus tseb nplej twb yog tus uas qhia Vajtswv Txojlus. Cov noob nplej uas poob rau hauv plawv kev ntawd piv txog Vajtswv Txojlus uas tseb rau hauv neeg lub siab. Thaum lawv hnov dheev lawm, tamsim ntawd dab Ntxwgnyoog txawm los txeeb Txojlus ntawd hauv lawv lub siab mus lawm. Cov noob nplej uas poob rau ntawm qhov av uas hauv muaj pobzeb tiv lawm, piv txog Vajtswv Txojlus uas neeg hnov dheev lawv txaus siab hlo txais yuav tamsim ntawd, tiamsis Txojlus ntawd cog tsis ruaj rau hauv lawv lub siab; lawv ntseeg ib nyuag ntu xwb. Thaum lawv raug kev txomnyem lossis raug kev tsimtxom vim lawv ntseeg Txojlus ntawd, ces lawv txawm thim rov qab lawm. Cov noob nplej uas poob rau hauv lub hauvpaus pos, piv txog Vajtswv Txojlus uas neeg hnov, tiamsis lawv tej kev nyuaj siab, kev ntshaw nyiaj thiab ntshaw yam ub yam no txawm loj hlob tuaj laum Vajtswv Txojlus, ces lawv lub neej thiaj tsis tawg paj thiab tsis txi txiv. Cov noob nplej uas poob rau ntawm qhov av zoo, piv txog Vajtswv Txojlus uas neeg hnov thiab lawv khaws tej lus ntawd cia rau hauv lawv lub siab. Lawv lub neej thiaj tawg paj txi txiv: muaj qee hnab txi tau peb caug lub, muaj qee hnab txi tau rau caum lub thiab muaj qee hnab txi tau ib puas lub.” Yexus qhia ntxiv hais tias, “Puas muaj leejtwg taws teeb thiab muab phiab khwb rau lossis muab txawb rau hauv qabtxag? Tsuas muaj yuav muab txawb rau saum qhov chaw siab xwb. Tej uas muab zais cia lawm yeej yuav muaj neeg pom, thiab tej uas muab npog cia lawm yeej yuav muaj tus muab nthuav los rau sawvdaws saib. Yog leejtwg muaj pobntseg, cia li mloog!” Yexus hais ntxiv rau lawv hais tias, “Nej yuav tsum ua tib zoo mloog tej uas nej hnov! Nej muab lub luaj li cas luj rau lwm tus, Vajtswv yuav muab lub luaj li ntawd luj rau nej. Tsis yog li ntawd xwb Vajtswv tseem yuav tsub ntxiv rau nej thiab. Tus uas muaj lawm, Vajtswv yuav muab ntxiv rau tus ntawd, tiamsis tus uas tsis muaj, txawm yog nws muaj mentsis xwb los Vajtswv yuav muab tej ntawd rho ntawm nws mus.” Yexus qhia ntxiv hais tias, “Vajtswv lub Tebchaws piv ib yam li ib tug txivneej mus tseb nplej rau hauv nws daim teb. Hmo ntuj nws pw tsaug zog, nruab hnub nws sawv ua haujlwm; hmo ntuj lossis nruab hnub cov noob nplej tuaj kaus thiab pheej hlob zuj zus. Nws tsis paub xyov ua li cas cov nplej txawj hlob li ntawd. Twb yog cov av ua kom nplej tuaj thiab txhawv; xub muaj tus kaus mos mos hlob tuaj mam li txhawv, tom qab rau txhuv tas mam li pib daj qab hnab. Thaum nplej siav lawm, tus txivneej ntawd txawm muab liag mus hlais, rau qhov twb txog lub caij hlais lawm.” Yexus qhia ntxiv hais tias, “Yuav muab Vajtswv lub Tebchaws piv rau yam twg thiaj phim? Thiab yuav ua lus pivtxwv li cas qhia sawvdaws thiaj totaub? Vajtswv lub Tebchaws piv ib yam li lub noob zaub; lub noob ntawd yog lub uas me dua lwm yam noob hauv ntiajteb no, thiab muaj ib tug txivneej nqa mus cog rau hauv av. Tsis ntev lub noob ntawd txawm tuaj kaus thiab hlob tuaj loj dua tej zaub huv tibsi; nws ncau ceg ntau thiab noog los ua zes rau saum tej ceg uas muaj nplooj roos.” Yexus qhia Vajtswv Txojlus rau sawvdaws, nws ua lus pivtxwv ntau zaj zoo li tej uas nws xub qhia tas los lawm rau lawv; tej uas nws qhia ntawd nws tsuas qhia tej zaj uas lawv yuav totaub xwb. Thaum nws qhia sawvdaws nws ua lus pivtxwv qhia xwb, tiamsis thaum nws tib leeg nrog cov thwjtim nyob nws txhais txhua zaj rau cov thwjtim paub. Hnub ntawd thaum yuav tsaus ntuj, Yexus hais rau nws cov thwjtim hais tias, “Peb cia li hla hiavtxwv mus rau sab tim ub.” Lawv ncaim sawvdaws mus lawm; Yexus xub mus nyob hauv lub nkoj, cov thwjtim mam li nce lawv qab mus rau hauv thiab coj Yexus nrog lawv mus. Muaj ob peb lub nkoj nrog Yexus lawv lub mus thiab. Tamsim ntawd txawm muaj cua daj cua dub hlob heev ntsawj dej ntas los rau hauv lub nkoj; dej twb yuav puv lub nkoj. Yexus rau ncoo pw tsaug zog tom tw nkoj, cov thwjtim txawm los tsa Yexus hais tias, “Xibhwb, koj tsis quavntsej peb li los? Peb twb yuav tuag.” Yexus sawv tsees los txwv cua hais tias, “Cia li tu!” Thiab txwv dej hais tias, “Cia li tus.” Ces cua txawm tu thiab dej txawm tsis ntas lawm. Yexus hais rau nws cov thwjtim hais tias, “Vim li cas nej ntshai ua luaj? Ua li cas nej tsis muaj kev ntseeg li?” Tiamsis lawv ntshai kawg; lawv sib tham hais tias, “Tus no yog leejtwg? Ua li cas cua thiab dej yuav mloog nws lus?” Yexus thiab nws cov thwjtim mus txog sab ntug Hiavtxwv Kalilais tim ub uas yog cheebtsam Nkelaxas. Thaum Yexus tawm hauv lub nkoj los, tamsim ntawd muaj ib tug txivneej raug dab tawm tom roob toj ntxas los cuag Yexus. Tus txivneej ntawd muaj ib tug dab nyob hauv nws, thiab tus txivneej ntawd yeej nyob tom roob toj ntxas xwb. Muaj neeg twb muab saw hlau khi nws ntau zaus, tiamsis nws muaj zog heev nimno lawv khi tsis tau nws lawm. Lawv muab saw hlau khi nws tes nws taw ntau zaus, tiamsis txhua zaus uas lawv khi nws, nws muab rub tu tas thiab muab tej khawb hlau uas xauv nws kotaw lov tas. Nws muaj zog heev, tsis muaj leejtwg kovyeej nws li. Nws yos tas hnub tas hmo tom toj ntxas thiab pem tej roob, nws pheej qw nrov nrov thiab muab pobzeb hlais nws lub cev. Thaum nws pom Yexus, nws tseem nyob deb tsawv; nws txawm khiav los txhos caug ntua ntawm Yexus kotaw, thiab qw nrov nrov hais tias, “Yexus uas yog Vajtswv tus uas muaj hwjchim loj kawg nkaus tus Tub! Koj tuaj thab kuv ua dabtsi? Muaj Vajtswv nyob saum ntuj pom, kuv thov koj tsis txhob tsimtxom kuv!” ( Nws hais li ntawd rau qhov Yexus hais rau nws hais tias, “Niag dab phem, koj cia li tawm hauv tus txivneej no mus!”) Yexus nug nws hais tias, “Koj lub npe hu li cas?” Nws teb hais tias, “Kuv lub npe hu ua ‘Coob’, rau qhov peb muaj coob tus!” Nws txawm thov Yexus hais tias, “Thov koj tsis txhob ntiab peb tawm hauv thaj chaw no mus.” Nyob ze ntawd muaj ib pab npua coob coob tabtom nrhiav noj ntawm ib nta toj. Cov dab ntawd thov Yexus cia lawv mus rau hauv pab npua ntawd. Yexus txawm cia cov dab mus rau hauv pab npua, ces cov dab txawm tawm plaws hauv tus txivneej mus nkag rau pab npua. Pab npua ntawd yuav luag muaj ob txhiab tus. Thaum dab mus rau hauv pab npua lawm, ces pab npua txawm dhia mus poob tsag tsua rau hauv hiavtxwv tuag tas huv tibsi lawm. Thaum cov neeg uas zov npua pom li ntawd, lawv txawm khiav rov qab mus qhia tej ntawd rau cov neeg uas nyob hauv nroog thiab hauv tej zos uas nyob ibncig lub nroog ntawd, ces sawvdaws txawm tuaj xyuas saib muaj li cas tiag. Thaum lawv tuaj txog ntawm Yexus, lawv pom tus neeg uas raug ntau tus dab zaum ntawd; nws hnav ris tsho thiab nws twb feeb meej lawm; lawv ntshai kawg li. Cov neeg uas pom Yexus ntiab dab, lawv txawm qhia zaj uas Yexus ntiab dab tawm hauv tus txivneej ntawd thiab qhia txog pab npua rau sawvdaws mloog. Thaum sawvdaws hnov li ntawd, lawv txawm thov kom Yexus tawm hauv lawv cheebtsam ntawd mus. Thaum Yexus tabtom nce mus rau hauv lub nkoj, tus txivneej uas raug dab thov Yexus hais tias, “Cia kuv nrog koj mus!” Tiamsis Yexus tsis kheev, Yexus hais rau nws hais tias, “Koj cia li rov qab mus tsev thiab qhia rau koj cov kwvtij paub hais tias tus Tswv pab koj thiab hlub koj npaum li cas.” Tus txivneej ntawd txawm mus qhia thoob plaws hauv lub nroog Dekapaulis txog tej uas Yexus tau pab nws lawm rau sawvdaws mloog; txhua tus uas hnov nws qhia xav tsis thoob li. Yexus txawm caij nkoj hla hiavtxwv rov qab mus rau sab tim ub. Muaj neeg coob coob tuaj cuag Yexus ntawm ntug dej. Muaj ib tug txivneej hu ua Yailus; nws yog tus uas saib haujlwm hauv lub tsev sablaj hauv lub nroog ntawd. Thaum nws tuaj txog, nws txawm los txhos caug ntua ntawm Yexus kotaw. Nws thov Yexus hais tias, “Kuv tus ntxhais mob hnyav heev twb yuav tuag. Thov koj mus cev tes tuav nws, nws thiaj yuav zoo.” Yexus nrog Yailus mus thiab muaj neeg coob coob nrog Yexus mus sib nphoo ntxuas. Muaj ib tug pojniam uas coj khaubncaws tau kaum ob xyoos tsis tu, thiab nws txomnyem kawg li. Nws ntiav ntau tus kws tshuaj kho, tiamsis tsis zoo. Txawm yog nws siv tagnrho nws cov nyiaj kho los tsis zoo, nws pheej mob loj zuj zus ntxiv xwb. Tus pojniam ntawd hnov sawvdaws hais tias Yexus txawj kho mob, ces nws txawm nrog sawvdaws raws Yexus qab mus. Nws xav hais tias, “Yog kuv kov Yexus lub tw tsho, kuv tus mob yuav zoo.” Nws txawm cev tes mus kov Yexus lub tw tsho, tamsim ntawd ntshav txawm tu nrho, thiab nws mloog nws lub cev twb zoo lawm. Tamsim ntawd Yexus paub hais tias, hwjchim tawm ntawm nws mus lawm, Yexus txawm tig hlo los nug cov neeg uas raws nws qab hais tias, “Leejtwg kov kuv lub tw tsho?” Yexus cov thwjtim teb hais tias, “Koj tsis pom hais tias, muaj neeg coob ua luaj li no txiv koj los; ua li cas koj yuav nug hais tias leejtwg kov koj lub tw tsho?” Tiamsis Yexus tseem ntsia tej neeg uas sawv ibncig Yexus saib yog leejtwg kov Yexus. Tus pojniam ntawd paub hais tias nws tus mob zoo lawm nws ntshai ua ibce tshee hnyo, nws txawm los txhos caug ntua ntawm Yexus kotaw thiab qhia txhua yam rau Yexus. Yexus hais rau nws hais tias, “Mentxhais, koj tus mob zoo lawm twb yog vim koj ntseeg. Koj cia li mus tso siab lug, koj tus mob twb zoo lawm.” Thaum Yexus tseem tabtom hais li ntawd, txawm muaj neeg txib ob peb leeg tuaj tom Yailus tsev tuaj hais rau Yailus hais tias, “Koj tus ntxhais twb tuag lawm. Ua li cas koj tseem yuav tabkaum xibhwb ua dabtsi thiab?” Tiamsis Yexus tsis quavntsej tej lus uas lawv hais ntawd, Yexus hais rau Yailus hais tias, “Koj tsis txhob ntshai, cia li ntseeg.” Yexus tsis pub sawvdaws nrog nws mus, nws tsuas pub Petus, Yakaunpaus thiab Yakaunpaus tus kwv Yauhas nrog nws mus xwb. Thaum lawv mus txog ntawm Yailus tsev, Yexus pom sawvdaws ua ntxhov quav niab thiab quaj nyiav ntsoog qees hauv tsev. Yexus mus rau hauv tsev thiab hais rau sawvdaws hais tias, “Nej ua ntxhov quav niab thiab quaj ua dabtsi? Tus Mentxhais ntawd tsis tuag, nws tsaug zog xwb.” Sawvdaws luag Yexus zom zaws. Yexus kom lawv tawm mus rau nraum zoov, ces Yexus txawm coj tus menyuam ntawd niam thiab txiv thiab Yexus peb tug thwjtim nrog nws mus rau hauv lub txaj uas tus menyuam ntawd pw. Yexus mus tuav nkaus tus menyuam ntawd txhais tes thiab hais rau nws hais tias, “Talithas kumis,” lo lus ntawd txhais hais tias, “Mentxhais, kuv hais rau koj hais tias koj cia li sawv tsees!” Tamsim ntawd tus ntxhais ntawd txawm sawv tsees mus kev. (Nws hnubnyoog muaj kaum ob xyoos.) Thaum sawvdaws pom li ntawd, sawvdaws xav tsis thoob li. Tiamsis Yexus hais tawv tawv rau lawv kom tsis txhob mus qhia zaj no rau leejtwg li, thiab Yexus hais tias, “Nej cia li muab mov los rau tus Mentxhais no noj.” Yexus txawm tawm qhov ntawd rov qab mus rau hauv nws lub nroog; nws cov thwjtim nrog nws mus thiab. Hnub Xanpataus Yexus mus qhia hauv lub tsev sablaj. Cov neeg coob coob uas mloog Yexus qhia xav tsis thoob li. Lawv sib tham hais tias, “Nws tau tej no qhov twg los? Lub tswvyim uas nws tau no yog tswvyim dabtsi? Nws ua li cas ua tau tej txujci tseemceeb ntawd? Nws puas yog ib tug kws ntoo uas yog Malis tus tub, thiab Yakaunpaus, Yauxej, Yudas thiab Ximoos lawv puas yog nws cov kwv? Thiab puas yog nws cov muam nrog peb nyob ntawm no?” Cov neeg ntawd txawm tsis hwm Yexus. Yexus hais rau lawv hais tias, “Tej neeg ob cag puavleej hwm tus uas cev Vajtswv lus, tsuas yog cov neeg uas nyob hauv nws lub zos, nws cov kwvtij thiab nws tsevneeg thiaj tsis hwm nws xwb.” Yexus tsis tau ua tej txujci tseemceeb ntau pestsawg qhov ntawd, nws tsuas cev tes tuav ob peb leeg kom lawv tej mob zoo xwb. Yexus xav tsis thoob li, rau qhov cov neeg uas nyob hauv nws lub nroog ntawd tsis ntseeg nws. Tom qab ntawd, Yexus mus qhia thoob plaws txhua lub zos uas nyob hauv lub tebchaws ntawd. Yexus hu kaum ob tug thwjtim los cuag nws, thiab nws txib lawv mus qhia Txojmoo Zoo; nws kom lawv ob leeg mus ib qho. Thiab nws pub hwjchim rau lawv kom ntiab tau dab tawm, thiab nws hais rau lawv hais tias, “Nej tsis txhob nqa dabtsi mus, tsuas pub nej nqa tus pas nrig xwb. Tsis txhob ntim mov, tsis txhob khuam hnab thoobpuab, thiab tsis txhob nqa nyiaj mus. Nej yuav tsum rau khau, tiamsis tsis txhob npaj tsho mus hloov.” Yexus hais ntxiv rau lawv hais tias, “Yog yim twg zoo siab hu nej mus hauv lawv tsev, nej cia li mus so hauv yim ntawd mus txog hnub uas nej tawm hauv lub nroog ntawd mus. Nej mus txog lub nroog twg yog tsis muaj neeg hu nej mus hauv lawv tej tsev, thiab lawv tsis mloog nej tej lus qhia, nej cia li tawm qhov ntawd mus thiab nchos tej hmoov av uas lo nej kotaw povtseg. Nej ua li ntawd kom lawv paub hais tias lawv muaj txim!” Cov thwjtim txawm mus, thiab lawv qhia sawvdaws kom nyias tso nyias tej kev txhaum tseg. Tej neeg uas raug dab los cov thwjtim ntiab dab tawm, thiab cov neeg muaj mob los cov thwjtim muab roj pleev thiab kho txhua tus zoo huv tibsi. Vajntxwv Helauj hnov tej no, rau qhov Yexus lub moo twb nrov ncha mus thoob plaws txhua qhov chaw lawm. Muaj qee leej hais tias, “Tus Yauhas uas muab neeg ua kevcai raus dej twb sawv rov qab los lawm! Nws thiaj ua tau tej txujci tseemceeb ntawd!.” Tiamsis muaj qee leej hais tias, “Yexus yog Eliyas.” Muaj qee leej hais tias, “Yexus yog ib tug cev Vajtswv lus ib yam li cov uas cev Vajtswv lus thaum ub ib tug.” Thaum Helauj hnov sawvdaws hais li ntawd, nws hais tias, “Tus ntawd twb yog tus Yauhas uas muab neeg ua kevcai raus dej ntag! Kuv twb muab nws txiav cajdab lawm, tiamsis nimno nws sawv rov qab los!” Helauj yog tus uas hais kom luag ntes Yauhas coj mus kaw rau hauv tsev lojcuj. Helauj ua li ntawd twb yog nws ua kom haum Helaudias siab. Txawm yog Helaudias yog Helauj tus kwv Filis tus pojniam los Helauj tseem yuav Helaudias los ua nws pojniam thiab. Thaum Yauhas tseem ua neej nyob, nws pheej ntuas Helauj hais tias, “Qhov uas koj yuav koj tus kwv tus pojniam txhaum kevcai lawm!” Vim li ntawd Helaudias thiaj ntxub Yauhas heev thiab xav muab Yauhas tua povtseg, tiamsis tua tsis tau rau qhov Helauj tsis kheev tua. Helauj ntshai Yauhas, rau qhov Helauj paub hais tias Yauhas yog ib tug neeg ncaj ncees thiab dawbhuv, Helauj thiaj tsis pub leejtwg ua phem rau Yauhas. Txawm yog tej uas Yauhas qhia pheej ua rau Helauj nyuaj siab los Helauj nyiam mloog Yauhas qhia. Muaj ib hnub Helaudias nrhiav tau kev ua phem rau Yauhas lawm. Hnub ntawd yog hnub uas Helauj ua ib rooj mov nco txog Helauj hnub yug Helauj hu cov nomtswv, cov thawj tubrog thiab cov neeg tseemceeb hauv lub xeev Kalilais tuaj nrog Helauj noj mov. Helaudias tus ntxhais txawm los seevcev rau sawvdaws saib. Nws ua li ntawd, Helauj thiab cov nomtswv sawvdaws txaus siab kawg li. Vajntxwv Helauj txawm hais rau tus ntxhais hais tias, “Koj xav yuav dabtsi koj cia li thov? Kuv yuav muab pub rau koj.” Helauj txawm coglus hais tias, “Kuv qhia tseeb rau koj hais tias yog koj thov yam twg, kuv yuav muab yam ntawd rau koj; txawm yog koj xav tau kuv lub tebchaws ib nrab los kuv yuav muab rau koj!” Tus ntxhais txawm tawm mus nug nws niam hais tias, “Kuv yuav thov dabtsi?” Nws niam teb hais tias, “Koj cia li thov yuav Yauhas tus uas muab neeg ua kevcai raus dej lub taubhau.” Tamsim ntawd tus ntxhais txawm rov los cuag Vajntxwv Helauj thiab hais tias, “Kuv xav kom koj muab Yauhas tus uas muab neeg ua kevcai raus dej lub taubhau tso rau hauv ib lub phaj nqa los rau kuv tamsim no!” Tus ntxhais hais li ntawd vajntxwv nyuaj siab kawg li, tiamsis nws hloov tsis tau lus lawm rau qhov nws twb coglus rau tus ntxhais tabmeeg sawvdaws lawm. Helauj txawm txib ib tug tubrog mus txiav Yauhas cajdab. Ces tus tubrog txawm mus rau tom tsev lojcuj thiab txiav Yauhas cajdab; nws muab Yauhas lub taubhau tso rau hauv ib lub phaj nqa los rau tus ntxhais, ces tus ntxhais txawm nqa mus rau nws niam. Thaum Yauhas cov thwjtim hnov li ntawd, lawv txawm tuaj muab Yauhas lub cev kwv mus faus lawm. Yexus cov timthawj rov qab los cuag nws thiab qhia txhua yam uas lawv mus ua thiab qhia lawm rau Yexus mloog. Muaj neeg coob coob pheej tuaj mloog Yexus qhia, pab mloog tas pab tuaj. Yexus thiab nws cov thwjtim tsis tau so li, txawm yog yuav noj mov los twb tsis khoom noj. Yexus thiaj hais rau cov thwjtim hais tias, “Peb cia li mus rau tej qhov chaw uas tsis muaj neeg, nej thiaj tau so mentsis.” Yexus thiab nws cov thwjtim txawm caij nkoj hla hiavtxwv mus rau ib qho chaw uas tsis muaj neeg. Txawm li ntawd los muaj ntau leej pom Yexus thiab nws cov thwjtim sawv kev mus, lawv paub hais tias yog Yexus thiab nws cov thwjtim. Cov neeg ntawd txawm khiav raws ntug hiavtxwv mus, lawv xub mus txog qhov chaw uas Yexus thiab nws cov thwjtim yuav mus. Thaum Yexus tawm hauv lub nkoj los, nws pom cov neeg coob coob ntawd, nws hlub lawv kawg li, rau qhov lawv zoo li pab yaj uas tsis muaj tus tswv yug. Yexus thiaj pib qhia ntau zaj rau lawv mloog. Thaum yuav tsaus ntuj Yexus cov thwjtim los hais rau Yexus hais tias, “Twb lig lig lawm, ntawm no tsis muaj mov, koj cia li kom sawvdaws mus nrhiav yuav mov tom tej zos thiab tej teb uas nyob ntawm no noj.” Yexus hais rau cov thwjtim hais tias, “Nej cia li nrhiav rau lawv noj.” Cov thwjtim nug Yexus hais tias, “Koj xav kom peb muab ob puas lub nyiaj mus yuav mov los rau sawvdaws noj los?” Yexus txawm hais rau cov thwjtim hais tias, “Nej cia li mus saib nej muaj pestsawg lub ncuav?” Thaum lawv mus saib, lawv rov los qhia rau Yexus hais tias, “Peb muaj tsib lub ncuav thiab ob tug ntses.” Yexus kom cov thwjtim mus hais rau cov neeg coob coob ntawd kom zaum ua tej pab rau ntawm tej nyom. Cov neeg ntawd txawm zaum ua tej pab, qee pab muaj ib puas leej, thiab qee pab muaj tsib caug leej. Nws muab tsib lub ncuav thiab ob tus ntses los; nws ntsa qhovmuag saib rau saum ntuj thiab ua Vajtswv tsaug thiab muab cov ncuav ntais faib rau nws cov thwjtim nqa mus faib rau sawvdaws; nws muab ob tus ntses faib rau sawvdaws thiab. Txhua tus puavleej tau noj tsau huv tibsi. Cov thwjtim mus sau tej ncuav thiab tej ntses seem uas sawvdaws noj tsis tas tau kaum ob tawb puv nkaus. Cov neeg uas noj mov hnub ntawd, cov txivneej xwb muaj tsib txhiab leej. Tamsim ntawd Yexus txawm kom cov neeg sawvdaws rov mus tsev, thiab nws kom nws cov thwjtim nce mus hauv nkoj caij hla dej hiavtxwv ua nws ntej mus nyob tim lub nroog Npexaidas tos nws. Thaum sawvdaws mus tas lawm, Yexus nce mus thov Vajtswv pem roob. Thaum tsaus ntuj cov thwjtim twb caij nkoj mus txog ib nrab dej lawm, Yexus tseem nyob ib leeg pem roob. Yexus pom nws cov thwjtim nquam nkoj nyuaj kawg li, rau qhov muaj cua nplawm lub nkoj. Thaum yuav kaj ntug Yexus los kotaw saum nplaim dej los cuag cov thwjtim. Nws yeej yuav dhau plaws lawv mus, tiamsis thaum cov thwjtim pom nws mus sau nplaim dej, lawv xav hais tias nws yog dab, lawv txawm qw ntsoog qees. Thaum lawv pom nws, lawv ntshai kawg li. Tamsim ntawd Yexus hais rau lawv tias, “Nej tsis txhob poob siab! Twb yog kuv ntag, tsis txhob ntshai.” Yexus nce mus nrog cov thwjtim nyob hauv lub nkoj, ces cua txawm tu lawm. Cov thwjtim xav tsis thoob li. Lawv tsis totaub zaj uas Yexus muab ncuav faib rau tsib txhiab leej noj, rau qhov lawv lub siab tawv. Yexus thiab nws cov thwjtim caij nkoj hla hiavtxwv mus txog tim Nkenexales, lawv txawm tso lub nkoj rau ntawm ntug hiavtxwv. Thaum Yexus lawv tabtom tawm hauv lub nkoj los, tamsim ntawd cov neeg uas nyob ntawd paub hais tias yog Yexus. Cov neeg ntawd txawm khiav mus qhia rau tej neeg uas nyob hauv cheebtsam ntawd hais tias Yexus nyob qhov twg. Lawv txawm muab pam qhwv cov neeg uas muaj mob kwv tuaj rau Yexus kho qhov ntawd. Txhua qhov uas Yexus mus, tsis hais lub zos loj lossis lub zos me lossis hauv tej nroog, pheej muaj neeg coj lawv tej neeg muaj mob tuaj tso rau ntawm tej khw. Lawv thov Yexus hais tias, “Cia peb cov neeg muaj mob kov koj lub tw tsho; ces txhua tus uas kov puavleej zoo huv tibsi.” Muaj cov Falixais thiab cov xibhwb uas qhia Vajtswv txoj Kevcai qee leej tuaj nram lub nroog Yeluxalees tuaj cuag Yexus. Lawv pom Yexus cov thwjtim qee leej noj mov tsis ntxuav tes raws li txoj kevcai uas qhia hais tias, Yuav tsum xub ntxuav tes tso mam li noj mov. ( Raws li cov Falixais thiab cov Yudais cov yawgkoob tau qhia rau lawv lawm, yog lawv tsis tau ntxuav tes, lawv yeej tsis noj mov; txhua yam uas lawv yuav tom khw los, lawv yuav tsum muab ntxuav tso mam li noj. Lawv coj ntau txoj kevcai uas lawv cov yawgkoob qhia rau lawv lawm, tsis hais ntxuav laujkaub, tais diav, tej tais tooj liab thiab tej txaj pw. ) Cov Falixais thiab cov xibhwb uas qhia Vajtswv txoj Kevcai nug Yexus hais tias, “Vim li cas koj cov thwjtim tsis ua raws li peb cov yawgkoob qhia, lawv tsis xub ntxuav tes tso mam noj mov?” Yexus teb hais tias, “Qhov uas Yaxayas tus uas cev Vajtswv lus hais tseg txog nej yeej muaj tseeb tiag! Nej yog cov neeg ntsejmuag ncaj siab nkhaus raws li nws sau tseg hais tias, ‘Vajtswv hais tias cov neeg no lub ncauj hwm kuv, tiamsis lawv lub siab tsis npuab kuv. Qhov uas lawv pehawm kuv tsis muaj nqis li, rau qhov lawv muab neeg tej kevcai qhia ib yam li tej ntawd yog kuv txoj kevcai!’ “Nimno nej tsis coj raws li Vajtswv Tej Lus Qhia, nej ho mus coj raws li neeg tej kevcai.” Thiab Yexus hais ntxiv tias, “Ua li cas nej yuav ntse ua luaj li? Nej muab Vajtswv txoj kevcai tso tseg kom nej tau kev mus ua raws li nej tej kevcai. Mauxes qhia hais tias, ‘Nej yuav tsum hwm nej niam nej txiv,’ thiab hais tias, ‘Yog leejtwg cem nws niam nws txiv yuav tsum muab tus ntawd tua povtseg.’ Tiamsis nej qhia hais tias, ‘Yog leejtwg muaj ib yam dabtsi yuav pab tau rau nws niam nws txiv, tiamsis nws hais tias tej ntawd twb muab rau Vajtswv lawm, ces tsis tas nws yuav pab nws niam nws txiv.’ Nej ua li ntawd twb yog nej ua saib tsis taus Vajtswv Txojlus, rau qhov nej qhia raws li nej cov yawgkoob qhia rau nej xwb. Thiab nej tseem ua ntau yam zoo li no.” Yexus rov hu cov neeg coob coob los cuag nws, thiab nws hais rau lawv hais tias, “Nej txhua tus ua tib zoo mloog kuv tej lus nej thiaj totaub. Tsis yog yam uas mus rau hauv neeg lub qhovncauj ua rau neeg ua txhaum, tiamsis yog tej uas tawm hauv neeg lub siab los thiaj ua rau neeg ua txhaum.” Yog leejtwg muaj pobntseg, cia li mloog. Thaum Yexus ncaim cov neeg coob coob ntawd mus rau hauv tsev lawm, nws cov thwjtim los thov kom nws txhais zaj lus pivtxwv ntawd. Yexus teb lawv hais tias, “Nej tsis totaub ib yam li lawv cov ntawd thiab los? Nej tsis paub hais tias tsis yog yam uas mus rau hauv neeg lub qhovncauj ua rau neeg ua txhaum, rau qhov tej ntawd tsis mus rau hauv neeg lub siab, tsuas mus rau hauv neeg lub plab thiab tawm lawm xwb.” (Yexus qhia li no yog nws hais tias tej zaub mov neeg noj tau huv tibsi tsis txhaum.) Yexus hais ntxiv tias, “Tej uas tawm hauv neeg lub siab los tej ntawd thiaj ua rau neeg ua txhaum. Tej uas neeg xav hauv nruab siab, tej ntawd coj neeg mus ua txhaum kev nkauj kev nraug, ua tubsab, tua neeg, deev luag pojniam luag txiv, ntshaw luag tug, ua txhua yam phem, dag ntxias, ua phem ua qias, khib, xyav lwm tu moo, khavtheeb thiab ua neeg ruam. Tej ntawd puavleej tawm hauv neeg lub siab los thiab ua rau neeg ua txhaum.” Tom qab ntawd Yexus mus rau pem cheebtsam uas ze lub nroog Tiles. Nws mus rau hauv ib lub tsev. Nws tsis xav pub leejtwg paub hais tias nws nyob hauv, tiamsis nws nraim tsis tau. Muaj ib tug pojniam, nws tus ntxhais raug dab hnov hais tias Yexus tuaj, nws txawm tuaj txhos caug ntua ntawm Yexus kotaw. Tus pojniam ntawd yog lwm haivneeg; nws yug hauv lub xeev Faunikias tebchaws Xilias. Nws thov kom Yexus ntiab dab tawm ntawm nws tus ntxhais mus. Tiamsis Yexus hais tias, “Peb yuav tsum xub pub mov rau menyuam noj tso. Rau qhov tsis tsimnyog peb yuav muab menyuam tej mov pov rau dev noj.” Tus pojniam ntawd teb hais tias, “Tus Tswv, txawm li ntawd los tej dev uas nyob hauv qab rooj twb tau noj menyuam tej qub mov thiab!” Yexus txawm hais rau nws hais tias, “Twb yog vim lo lus uas koj hais ko, koj cia li rov qab mus tsev, dab twb tawm hauv koj tus ntxhais lawm!” Nws txawm rov mus tsev thiab pom nws tus ntxhais pw saum txaj; dab twb tawm lawm. Tom qab ntawd Yexus tawm hauv lub nroog Tiles thiab hla lub nroog Xidoos mus rau nram Hiavtxwv Kalilais uas yog taug txojkev mus rau nram lub nroog Dekapaulis. Muaj ib co neeg coj ib tug txivneej lag ntseg uas hais tsis tau lus tuaj cuag Yexus thiab thov Yexus cev tes tuav nws. Yexus coj tus txivneej ntawd mus rau ib qho nrug deb ntawm cov neeg coob coob. Yexus muab ntivtes ntxig rau hauv tus txivneej ntawd ob lub qhovntsej, thiab nws muab ntivtes tub qaubncaug pleev tus ntawd tus nplaig. Yexus tsa qhovmuag saib saum ntuj thiab nws xyu ib suab, ces nws txawm hais rau tus txivneej ntawd hais tias, “Efathas,” lo lus ntawd txhais hais tias, “Cia li qhib hlo!” Tamsim ntawd tus txivneej ntawd txawm hnov lus; nws tus nplaig tsis txhav thiab hais tau lus meej lawm. Yexus txwv tsis pub sawvdaws qhia zaj no rau leejtwg li. Txawm yog Yexus txwv lawv heev npaum li cas los nws txwv tsis tau; lawv hajyam qhia heev ntxiv xwb. Txhua tus uas hnov tej no xav tsis thoob li; lawv sib tham hais tias, “Txhua yam uas nws ua puavleej zoo huv tibsi. Txawm yog tej neeg lag ntseg los nws kho tau hnov lus; cov neeg uas hais tsis tau lus los nws kho hais tau lus!” Tom qab ntawd tsis ntev muaj dua ib co neeg coob coob tuaj ua ke. Tej mov uas lawv ntim tuaj, lawv noj tas lawm Yexus txawm hu nws cov thwjtim los cuag nws thiab hais rau lawv hais tias, “Kuv hlub cov neeg no heev, lawv twb tuaj nrog kuv nyob ntawm no tau peb hnub lawm, lawv tsis muaj dabtsi noj. Yog kuv cia lawv mus tsev tsis muab mov rau lawv noj, nyob tsam lawv tsaus muag thiab ntog tom tej tog kev rau qhov ibtxhia tuaj deb tuaj.” Yexus cov thwjtim hais rau Yexus hais tias, “Ntawm no yog roob mojsab qhua xwb, leejtwg yuav mus nrhiav tau mov los rau sawvdaws noj?” Yexus nug cov thwjtim hais tias, “Nej muaj pestsawg lub ncuav?” Lawv teb hais tias, “Peb muaj xya lub.” Yexus kom sawvdaws zaum hauv av. Yexus muab xya lub ncuav los ua Vajtswv tsaug thiab muab ntais cev rau cov thwjtim nqa mus faib rau sawvdaws; cov thwjtim txawm ua li ntawd. Cov thwjtim muaj ob peb tug ntses me me. Thaum Yexus ua Vajtswv tsaug tas, Yexus kom cov thwjtim nqa cov ntses mus faib rau sawvdaws thiab. Txhua tus puavleej tau noj tsau huv tibsi. Cov neeg uas noj mov hnub ntawd yuav luag muaj plaub txhiab leej. Cov thwjtim mus sau tej seem uas sawvdaws noj tsis tas tau xya tawb puv nkaus. Tom qab ntawd Yexus kom sawvdaws rov qab mus tsev; tamsim ntawd Yexus thiab nws cov thwjtim txawm nce mus rau hauv nkoj, thiab caij mus rau tim cheebtsam Damanuthas lawm. Cov Falixais qee leej tuaj nrog Yexus sib cav; lawv xav sim Yexus, lawv txawm kom Yexus ua ib yam txujci tseemceeb rau lawv saib, lawv thiaj ntseeg hais tias yog Vajtswv txib Yexus los. Yexus xyu ib suab thiab hais tias, “Ua li cas cov neeg tiam no tsuas xav pom tej txujci tseemceeb xwb? Kuv qhia tseeb rau nej hais tias kuv yuav tsis ua tej txujci tseemceeb rau cov neeg no pom li!” Yexus txawm tso lawv tseg thiab nce mus rau hauv nkoj, caij hla mus rau sab tim ub lawm. Cov thwjtim tsis nco ntim mov mus, lawv tsuas muaj ib lub ncuav nyob hauv lub nkoj xwb. Yexus hais rau lawv tias, “Nej yuav tsum ceevfaj cov Falixais thiab Helauj cov keeb.” Cov thwjtim txawm sib tham hais tias, “Ntshai yog peb tsis ntim mov tuaj, nws thiaj hais li ntawd.” Yexus twb paub tej uas lawv sib tham ntawd lawm, nws txawm hais rau lawv tias, “Ua li cas nej sib tham hais txog qhov uas nej tsis ntim mov tuaj? Nej tseem tsis pom thiab tsis totaub los? Ua li cas nej yuav ruam ua luaj li? Nej twb muaj qhovmuag, nej tsis pom los? Nej twb muaj qhovntsej, nej tsis hnov los? Nej tsis nco qab thaum kuv muab tsib lub ncuav ntais faib rau tsib txhiab leej noj, nej sau tej uas seem ntawd tau pestsawg tawb?” Lawv teb hais tias, “Peb sau tau kaum ob tawb.” “Thiab thaum kuv muab xya lub ncuav ntais faib rau plaub txhiab leej noj, nej sau tej uas seem tau pestsawg tawb?” Lawv teb hais tias, “Peb sau tau xya tawb.” Yexus nug lawv hais tias, “Nej tseem tsis tau totaub thiab los?” Yexus thiab nws cov thwjtim mus txog hauv lub nroog Npexaidas. Muaj neeg coj ib tug txivneej digmuag tuaj cuag Yexus thiab thov Yexus kho tus digmuag ntawd. Yexus tuav tus txivneej ntawd tes thiab coj nws mus rau tom ntug zos. Yexus nti qaubncaug pleev tus ntawd ob lub qhovmuag thiab cev tes kov. Yexus nug tus ntawd hais tias, “Koj pom dabtsi?” Tus txivneej ntawd tsa qhovmuag saib thiab hais tias, “Kuv pom neeg mus mus los los, tiamsis lawv zoo li tej ntoo.” Yexus rov cev tes mus kov tus ntawd ob lub qhovmuag dua ib zaug. Nws rua tau qhovmuag, nws lub qhovmuag zoo lawm, thiab nws pom kev tseeb. Yexus kom nws cia li mus tsev thiab hais tias, “Koj tsis txhob rov mus rau hauv zos lawm.” Tom qab ntawd Yexus thiab nws cov thwjtim mus rau pem tej zos uas nyob ibncig lub nroog Xixas Filipis. Thaum lawv tabtom taug kev mus, Yexus nug cov thwjtim hais tias, “Nej qhia kuv saib, sawvdaws hais tias kuv yog leejtwg?” Cov thwjtim teb hais tias, “Muaj qee leej hais tias koj yog Yauhas tus uas muab neeg ua kevcai raus dej, muaj qee leej hais tias koj yog Eliyas thiab muaj qee leej hais tias, koj yog ib tug uas cev Vajtswv lus.” Yexus nug hais tias, “Nej ne, nej hais tias kuv yog leejtwg?” Petus teb hais tias, “Koj yog tus Mexiyas.” Yexus txwv lawv hais tias, “Nej tsis txhob mus qhia rau leejtwg hais tias kuv yog tus Mexiyas.” Tom qab ntawd Yexus txawm pib qhia rau nws cov thwjtim hais tias, “Neeg Leej Tub yuav raug tsimtxom ntau yam. Cov txwjlaug, cov thawj ntawm cov povthawj thiab cov xibhwb uas qhia Vajtswv txoj Kevcai yuav tsis lees yuav nws. Lawv yuav muab nws tua povtseg, tiamsis tom qab ntawd peb hnub nws yuav sawv hauv qhov tuag rov qab los.” Yexus qhia zaj no tseeb tseeb rau cov thwjtim, ces Petus txawm coj Yexus mus rau ib cag thiab cheem Yexus. Tiamsis Yexus tig los saib nws cov thwjtim thiab cem Petus hais tias, “Dab Ntxwgnyoog, koj cia li khiav ntawm kuv mus. Tej uas koj hais ko tsis yog raws li Vajtswv lub siab, tiamsis yog hais raws li neeg lub siab xwb.” Yexus txawm hu cov neeg coob coob ntawd thiab nws cov thwjtim los cuag nws. Nws hais rau lawv hais tias, “Yog leejtwg xav nrog kuv mus, tus ntawd yuav tsum tswj nws lub siab thiab kwv nws tus ntoo khaublig nrog kuv mus. Rau qhov tus uas khuvxim nws txojsia, tus ntawd yuav tsis tau txojsia. Tiamsis tus uas tsis khuvxim nws txojsia, vim nws ntseeg kuv thiab mus qhia Txojmoo Zoo, tus ntawd yuav tau txojsia. Yog leejtwg tau ib puas tsav yam hauv ntiajteb no los ua nws tug, tiamsis nws txojsia tu lawm, tej ntawd yuav muaj nqis dabtsi rau nws? Yeej tsis muaj ib yam dabtsi uas nws yuav coj mus txhiv tau nws txojsia rov qab los li! Yog leejtwg txajmuag qhia kuv lub npe thiab kuv tej lus rau cov neeg txhaum tiam no, ces thaum Neeg Leej Tub tus uas muaj Leej Txiv lub tshwjchim ci ntsa iab nrog cov timtswv uas dawbhuv los saum ntuj los, nws yuav txajmuag lees hais tias tus ntawd yog nws li.” Yexus hais ntxiv rau lawv hais tias, “Kuv qhia tseeb rau nej hais tias cov neeg uas nyob ntawm no muaj qee leej yuav tsis tau tuag ua ntej lawv pom Vajtswv lub Tebchaws nrog Vajtswv lub hwjchim los.” Tom qab ntawd rau hnub Yexus coj Petus, Yakaunpaus thiab Yauhas nrog Yexus mus rau saum ib lub roob siab; tsis muaj lwm tus nrog lawv mus. Thaum peb tug thwjtim tabtom ntsia ntsoov Yexus, Yexus lub cev txawm hloov hlo, thiab Yexus cev ris tsho ci ntsa iab dawb paug. Tej neeg uas nyob hauv ntiajteb no tsis muaj leejtwg yuav ntxhua tau ibce ris tsho dawb npaum li ntawd. Peb tug thwjtim ntawd pom Eliyas thiab Mauxes nrog Yexus tham. Petus txawm hais rau Yexus hais tias, “Xibhwb, peb tuaj nyob ntawm no zoo kawg li! Peb yuav ua peb lub tsev pheebsuab, ib lub rau koj, ib lub rau Mauxes thiab ib lub rau Eliyas.” Petus lawv ntshai kawg li, Petus thiaj hais li ntawd. Muaj ib tauv huab los nroos lawv thiab muaj ib lub suab hais hauv tauv huab ntawd tuaj hais tias, “Tus no yog kuv tus Tub uas kuv hlub, nej cia li mloog nws lus!” Tamsim ntawd cov thwjtim txawm xam ncig lees, tiamsis tsis pom leejtwg li, tsuas pom Yexus tib leeg nrog lawv nyob xwb. Thaum Yexus thiab nws peb tug thwjtim nqis pem roob los, Yexus txwv peb tug thwjtim ntawd hais tias, “Nej tsis txhob qhia tej uas nej pom ntawd rau leejtwg paub mus txog thaum uas Neeg Leej Tub sawv hauv qhov tuag rov qab los tso.” Ces lawv txawm khaws Yexus tej lus rau nruab siab. Lawv tsis qhia rau leejtwg li. Tiamsis lawv sib tham hais tias, “Qhov uas nws hais tias ‘sawv hauv qhov tuag rov qab los’ yog nws hais txog dabtsi?” Ces lawv thiaj nug Yexus hais tias, “Vim li cas cov xibhwb uas qhia Vajtswv txoj Kevcai hais tias Eliyas yuav xub los?” Yexus teb hais tias, “Eliyas yeej xub los tiag, nws los npaj txhua yam cia. Vim li cas Vajtswv txojlus hais tias Neeg Leej Tub yuav raug tsimtxom thiab sawvdaws yuav saib tsis taus nws? Tiamsis kuv qhia tseeb rau nej hais tias Eliyas twb los lawm, tej neeg ua phem rau nws raws li lawv lub siab xav thiab raws li Vajtswv txojlus sau tseg hais tias lawv yuav ua li ntawd rau nws.” Thaum Yexus thiab peb tug thwjtim rov los txog ntawm Yexus cov thwjtim, lawv pom muaj neeg coob coob tuaj nyob puagncig cov thwjtim thiab muaj cov xibhwb uas qhia Vajtswv txoj Kevcai qee leej tabtom nrog cov thwjtim sib cav. Thaum cov neeg ntawd pom dheev Yexus, lawv xav tsis thoob li, ces sawvdaws txawm khiav zom zaws mus rau ntawm Yexus thiab hawm nws. Yexus nug nws cov thwjtim hais tias, “Nej nrog lawv sib cav txog dabtsi?” Muaj ib tug txivneej ntawm cov neeg coob coob ntawd teb hais tias, “Xibhwb, kuv coj kuv tus metub tuaj thov koj pab kho, rau qhov nws raug dab thiab hais tsis tau lus. Txhua zaus uas dab tuaj, dab ua rau nws ntog rau hauv av; nws npuas ncauj tawm plaws; nws zom hniav nrov qij qawj; thiab nws ibce txhav tas. Kuv thov koj cov thwjtim ntiab dab tawm, tiamsis lawv ntiab tsis tau.” Yexus hais rau lawv hais tias, “Ua li cas nej cov neeg tiam no pheej tsis ntseeg li! Kuv tseem yuav nrog nej nyob ntev li cas thiab? Thiab kuv tseem yuav ua siab ntev rau nej mus txog thaum twg? Cia li coj tus metub los rau kuv!” Lawv txawm coj tus metub los rau Yexus. Thaum dab pom dheev Yexus, dab txawm ua rau tus metub ntawd huam ib tshaj, ntog kiag rau hauv av nti mus nti los, thiab npuas ncauj nto plaws. Yexus nug tus metub ntawd leej txiv hais tias, “Nws ua li no tau hov ntev los lawm?” Leej txiv teb hais tias, “Nws twb ua li no thaum me me los lawm. Muaj ntau zaus dab ua rau nws ntog rau hauv qhovcub thiab rau hauv dej kom nws tuag. Yog koj pab tau, thov koj hlub thiab pab wb ob txiv tub!” Yexus hais rau tus metub ntawd leej txiv hais tias ua li cas koj hais tias, “Yog koj pab tau! Yog leejtwg ntseeg, kuv yeej ua tau txhua yam huv tibsi.” Tamsim ntawd tus metub leej txiv hais tias, “Kuv ntseeg tiamsis tsis txaus, thov koj pab kom kuv muaj kev ntseeg ntxiv!” Thaum Yexus pom cov neeg coob coob txav los ze zuj zus, Yexus txawm hais rau tus dab ntawd hais tias, “Ua li cas koj ua rau tus metub no lag ntseg thiab hais tsis tau lus? Kuv hais rau koj hais tias koj cia li tawm hauv tus metub no mus, tsis txhob rov qab los rau hauv nws ib zaug li lawm!” Dab qw nrov nrov thiab ua rau tus metub huam ib tshaj heev heev, ces tus dab txawm tawm plaws lawm. Tus metub ntawd zoo li ib tug neeg tuag, sawvdaws txawm hais zom zaws hais tias, “Nws tuag lawm!” Tiamsis Yexus cev tes mus tuav nkaus tus metub txhais tes thiab rub nws sawv, ces nws txawm sawv tsees sawv ntsug. Thaum Yexus mus rau hauv tsev lawm, nws cov thwjtim nug nws twjywm hais tias, “Vim li cas peb ntiab tsis tau tus dab ntawd tawm?” Yexus teb hais tias, “Yam dab no yus yuav tsum thov Vajtswv thiaj ntiab tau tawm.” Yexus thiab nws cov thwjtim tawm qhov ntawd hla dhau plaws Kalilais mus. Yexus tsis xav pub leejtwg paub hais tias, nws nyob qhov twg, rau qhov nws tabtom qhia rau cov thwjtim hais tias, “Yuav muaj neeg muab Neeg Leej Tub coj mus rau luag tua, tiamsis tom qab ntawd peb hnub nws yuav sawv hauv qhov tuag rov qab los.” Cov thwjtim tsis totaub lub ntsiab lus uas Yexus qhia, tiamsis lawv ntshai nug nws. Yexus thiab nws cov thwjtim mus txog hauv lub nroog Kapena-us thiab mus rau hauv tsev, Yexus txawm nug cov thwjtim hais tias, “Puagta thaum peb taug kev tuaj, nej pheej sib cav hais txog dabtsi?” Tiamsis lawv tsis teb Yexus li, rau qhov thaum taug kev tuaj lawv sib cav txog qhov uas leejtwg yuav tau ua tus loj dua. Thaum Yexus zaum lawm, nws hu nws kaum ob tug thwjtim los cuag nws thiab hais rau lawv hais tias, “Yog leejtwg xav ua tus thawj, tus ntawd yuav tsum nyob tom tw thiab ua sawvdaws qhev.” Yexus mus coj ib tug menyuam yaus los sawv ntawm cov thwjtim xubntiag. Yexus puag tus menyuam yaus ntawd thiab hais rau cov thwjtim hais tias, “Tus uas lees yuav cov menyuam yaus no ib tug los ntawm kuv lub npe kuj yog tus ntawd lees yuav kuv, thiab leejtwg lees yuav kuv, tsis yog nws lees yuav kuv tib leeg xwb, tiamsis yog nws lees yuav tus uas txib kuv los thiab.” Yauhas hais rau Yexus hais tias, “Xibhwb, peb pom ib tug txivneej tuav koj lub npe ntiab dab; peb txwv tsis pub nws ua li ntawd, rau qhov nws tsis yog peb cov.” Yexus hais rau lawv hais tias, “Tsis txhob txwv nws; leejtwg tuav kuv lub npe ua tej txujci tseemceeb, tom qab ntawd nws yeej yuav tsis thuam kuv. Tus uas tsis tawmtsam peb, tus ntawd yog peb cov. Kuv qhia tseeb rau nej hais tias tus uas muab ib khob dej rau nej haus, vim nws paub hais tias nej yog kuv cov thwjtim, ces tus ntawd yeej yuav tau nqi zog.” “Yog leejtwg ua rau cov menyuam uas ntseeg kuv no ib tug ua txhaum, cia li muab hlua khi ib txhib zeb loj loj dai rau tus ntawm cajdab thiab coj nws mus pov rau hauv hiavtxwv yuav zoo dua. Yog koj txhais tes ua rau koj ua txhaum, cia li muab koj txhais tes ntawd txiav povtseg! Koj muaj ib sab tes xwb koj tau txojsia zoo dua li koj muaj ob sab tes, es koj poob mus rau hauv ntujtawg qhov uas muaj hluavtaws cig tsis paub tuag li. [Qhov ntawd tej kas uas noj lawv ntawd tsis txawj tuag, thiab hluavtaws yuav cig mus ibtxhis li.] Thiab yog koj ib txhais kotaw ua rau koj ua txhaum, cia li muab koj txhais kotaw ntawd txiav povtseg! Koj muaj ib sab kotaw xwb koj tau txojsia zoo dua li koj muaj ob txhais kotaw, es koj poob mus rau hauv ntujtawg. [Qhov ntawd tej kas uas noj lawv ntawd tsis txawj tuag, thiab hluavtaws yuav cig mus ibtxhis li.] Thiab yog koj ib sab qhovmuag ua rau koj ua txhaum, cia li muab koj sab qhovmuag ntawd kaus povtseg! Koj muaj ib sab qhovmuag xwb koj tau mus Vajtswv lub Tebchaws zoo dua li cia koj muaj ob sab qhovmuag, es koj poob mus rau hauv ntujtawg. “Qhov ntawd ‘tej kas uas noj lawv ntawd tsis txawj tuag, thiab hluavtaws yuav cig mus ibtxhis li.’ “Vajtswv yuav muab hluavtaws hlawv txhua tus kom huv ib yam li cov nqaij uas muab ntsev las yuav coj mus fij. “Ntsev yog yam uas zoo; tiamsis yog ntsev tsuag lawm, nej yuav ua li cas kom rov qab ntsev tau? “Nej yuav tsum ua li cov ntsev uas zoo, thiab nej yuav tsum nyob sib haum.” Yexus tawm hauv lub nroog ntawd mus rau nram lub xeev Yudas thiab hla tus dej Yauladees mus rau sab tim ub. Muaj neeg coob coob tuaj cuag Yexus, thiab Yexus qhia lawv ib yam li nws niaj zaus qhia. Cov Falixais qee leej tuaj cuag Yexus thiab xav sim Yexus. Lawv nug Yexus hais tias, “Peb txoj kevcai puas pub ib tug txivneej twg muab nws tus pojniam nrauj?” Yexus teb lawv hais tias, “Mauxes sau tseg li cas qhia rau nej?” Lawv teb hais tias, “Mauxes pub peb nrauj tiamsis yuav tsum xub ua ntawv nias tes tso mam li nrauj tau.” Yexus hais rau lawv hais tias, “Qhov uas Mauxes sau txoj cai ntawd rau nej twb yog nej tawv ncauj. Tiamsis thaum chivkeeb uas Vajtswv tsim lub ntuj thiab lub ntiajteb, ‘Vajtswv tsim tus txivneej thiab tus pojniam.’ ‘Twb yog vim li no tus txivneej thiaj tso nws niam nws txiv tseg, thiab mus nrog nws tus pojniam nyob, thiab nkawd yuav koom ua ib lub cev.’ Yog li ntawd, nkawd tsis yog ob leeg lawm tiamsis yog ib leeg xwb. Vajtswv twb muab nkawd txis ua txij ua nkawm lawm; yog li ntawd, neeg tsis txhob muab nkawd cais.” Thaum Yexus thiab cov thwjtim mus rau hauv tsev lawm, cov thwjtim txawm nug Yexus txog zaj no. Yexus hais rau lawv hais tias, “Yog leejtwg muab nws tus pojniam nrauj thiab mus yuav dua pojniam kuj yog nws deev luag pojniam. Ib yam nkaus li ntawd yog ib tug pojniam muab nws tus txiv nrauj, thiab nws mus yuav dua txiv kuj yog nws deev luag txiv.” Muaj neeg coj lawv tej menyuam tuaj cuag Yexus thiab thov Yexus cev tes plhws cov menyuam yaus, tiamsis cov thwjtim cem cov neeg ntawd. Thaum Yexus pom cov thwjtim ua li ntawd, Yexus tsis txaus siab thiab nws hais rau cov thwjtim hais tias, “Cia cov menyuam los cuag kuv, tsis txhob txwv lawv, rau qhov Vajtswv lub Tebchaws yog cov neeg uas muaj lub siab mos siab muag li cov menyuam ntawd tug. Kuv qhia tseeb rau nej hais tias yog leejtwg tsis muaj lub siab mos siab muag li cov menyuam yaus no, tus ntawd yuav tsis tau Vajtswv lub Tebchaws ua nws tug.” Yexus txawm rub cov menyuam yaus ntawd los rau hauv nws xubntiag; nws cev tes plhws lawv txhua tus thiab foom koob hmoov rau lawv. Thaum Yexus tabtom sawv kev mus, muaj ib tug txivneej khiav khiav tuaj txhos caug ntua ntawm Yexus hauv ntej; nws nug Yexus hais tias, “Tus Xibhwb uas muaj lub siab zoo, kuv yuav ua li cas kuv thiaj tau txojsia uas ntev dhawv mus ibtxhis?” Yexus teb nws hais tias, “Vim li cas koj hu kuv hais tias tus uas muaj lub siab zoo? Tsis muaj ib tug uas muaj lub siab zoo tsuas yog Vajtswv tib leeg xwb. Koj yeej paub tej kevcai uas hais tias, ‘Tsis txhob tua neeg; tsis txhob deev luag pojniam luag txiv; tsis txhob ua tubsab; tsis txhob ua timkhawv tsis tseeb; tsis txhob ntxo luag tug; yuav tsum hwm koj niam koj txiv.’ ” Tus txivneej ntawd hais tias, “Xibhwb, tej uas koj hais ko kuv twb coj thaum kuv tseem yau los lawm.” Yexus hlub tus ntawd, Yexus tsa qhovmuag saib nws thiab hais tias, “Tseem tshuav ib qho uas koj tsis tau ua. Koj cia li rov mus muab koj tej qhov txhia chaw muag huv tibsi thiab muab cov nyiaj ntawd coj mus faib rau cov neeg pluag, koj thiaj yog tus npluanuj nyob saum ntuj ceebtsheej; tom qab ntawd, koj cia li tuaj nrog kuv mus.” Thaum tus txivneej ntawd hnov dheev Yexus hais li ntawd, nws ua ntsejmuag ntshaus ntsho; nws txawm rov mus tsev lawm, nws nyuaj siab kawg li rau qhov nws npluanuj heev. Yexus tig los ntsia cov thwjtim thiab hais rau lawv hais tias, “Cov neeg npluanuj yuav mus Vajtswv lub Tebchaws mas nyuaj kawg li!” Thaum cov thwjtim hnov Yexus hais li ntawd lawv xav tsis thoob li, tiamsis Yexus hais ntxiv hais tias, “Cov menyuam, neeg mus Vajtswv lub Tebchaws mas nyuaj kawg li! Ib tus ntxhuav nkag lub qhov koob yoojyim dua ib tug neeg npluanuj mus Vajtswv lub Tebchaws.” Cov thwjtim hnov li ntawd, lawv hajyam xav tsis thoob. Lawv sib tham hais tias, “Yog li ntawd, leejtwg thiaj yuav dim?” Yexus tsa qhovmuag saib cov thwjtim thiab hais tias, “Neeg ua tsis tau, tiamsis Vajtswv ua tau; rau qhov Vajtswv ua tau ib puas tsav yam huv tibsi.” Ces Petus hais rau Yexus hais tias, “Peb twb tso txhua yam tseg thiab tuaj nrog koj mus lawm.” Yexus hais rau lawv hais tias, “Yog tiag, tiamsis kuv qhia tseeb rau nej hais tias tus uas tso vajtse, tso kwvtij, tso nkauj muam, tso niam, tso txiv, tso menyuam thiab tso liaj teb tseg vim nws nrog kuv mus thiab qhia Txojmoo Zoo, tiam no nws yuav tau ib puas npaug ntxiv, xwsli: vajtse, kwvtij, nkauj muam, niam thiab txiv, menyuam, liaj teb thiab nws yuav raug kev tsimtxom; tiam tom ntej nws yuav tau txojsia ntev dhawv mus ibtxhis. Tiamsis muaj ntau leej uas nimno ua cov thawj lawv yuav tau mus nyob tom tw, thiab muaj ntau leej uas nyob tom tw yuav tau los ua cov thawj.” Thaum Yexus thiab nws cov thwjtim taug kev mus rau nram lub nroog Yeluxalees, Yexus ua cov thwjtim ntej; cov thwjtim poob siab, thiab cov neeg uas lawv qab ntshai kawg li. Yexus txawm rov coj cov thwjtim mus rau ib cag thiab qhia tej xwm uas yuav los raug nws rau lawv mloog. Yexus hais tias, “Nimno peb tabtom taug kev mus rau nram lub nroog Yeluxalees. Thaum mus txog nrad yuav muaj neeg ntes Neeg Leej Tub coj mus rau cov thawj ntawm cov povthawj thiab cov xibhwb uas qhia Vajtswv txoj Kevcai. Lawv yuav txiav txim coj nws mus tua povtseg thiab muab nws rau lwm haivneeg; lawv yuav thuam nws, ua saib tsis taus nws, nto qaubncaug rau nws, nplawm nws thiab muab nws tua povtseg; tom qab ntawd peb hnub nws yuav sawv hauv qhov tuag rov qab los.” Tom qab ntawd Yakaunpaus thiab Yauhas uas yog Xenpedais ob tug tub tuaj cuag Yexus thiab hais tias, “Xibhwb, thov koj pub yam uas wb xav tau rau wb.” Yexus nug nkawd hais tias, “Neb xav kom kuv muab dabtsi rau neb?” Nkawd teb hais tias, “Thaum koj ua vajntxwv zaum saum koj lub zwmtxwv uas ci ntsa iab, thov koj cia wb ib tug nyob ntawm koj sab xis, ib tug nyob ntawm koj sab laug.” Yexus hais rau nkawd hais tias, “Yam uas neb thov no, neb tsis totaub. Lub khob uas kuv yuav haus neb puas haus taus? Txoj kevcai raus dej uas kuv yuav raus neb puas raus taus?” Nkawd teb hais tias, “Taus xwb.” Yexus hais rau nkawd hais tias, “Lub khob uas kuv yuav haus neb yeej yuav haus taus, thiab txoj kevcai raus dej uas kuv yuav raus neb yeej yuav raus taus tiag. Tiamsis qhov uas neb ib tug yuav nyob ntawm kuv sab xis thiab ib tug yuav nyob ntawm kuv sab laug ntawd, kuv muab tsis tau rau neb. Yog Vajtswv npaj rau leejtwg, tus ntawd thiaj tau xwb.” Thaum cov thwjtim kaum leej hnov li ntawd, lawv chim rau Yakaunpaus thiab Yauhas nkawd. Yexus hu cov thwjtim txhua tus los ua ke thiab hais rau lawv hais tias, “Nej twb paub lawm hais tias cov nomtswv uas saib pejxeem muaj hwjchim kav pejxeem, thiab cov thawj muaj hwjchim yuam kom cov pejxeem ua raws li lawv hais. Tiamsis nej tsis txhob ua li ntawd; nej cov yog leejtwg xav ua tus hlob, tus ntawd yuav tsum ua sawvdaws tus tubtxib, thiab nej cov yog leejtwg xav ua tus thawj, tus ntawd yuav tsum ua sawvdaws qhev. Txawm yog Neeg Leej Tub los, nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej.” Yexus thiab nws cov thwjtim tuaj txog hauv lub nroog Yelikaus. Thaum Yexus lawv tabtom taug kev hauv lub nroog mus, muaj neeg coob coob nrog lawv mus. Lawv mus ntsib ib tug txivneej digmuag hu ua Npatimes nyob ntawm ntug kev thov khawv, nws yog Times tus tub. Thaum nws hnov sawvdaws hais tias Yexus tus uas yog neeg Naxales tuaj, ces nws txawm hu nrov nrov hais tias, “Yexus uas yog Daviv tus Tub! Thov koj hlub kuv!” Muaj ntau leej cheem nws kom nws tsis txhob hais lus, tiamsis nws hajyam hu nrov hais tias, “Daviv tus Tub, thov koj hlub kuv!” Yexus txawm nres thiab hais tias, “Hu nws los ntawm no.” Yog li ntawd, lawv txawm mus hais rau tus digmuag hais tias, “Yexus hu koj, koj cia li zoo siab thiab sawv mus cuag nws.” Tus digmuag txawm hle hlo nws lub tsho ntev thiab sawv tsees mus cuag Yexus. Yexus nug tus digmuag hais tias, “Koj xav kom kuv pab koj dabtsi?” Tus digmuag teb hais tias, “Xibhwb, kuv xav rov pom kev.” Yexus hais rau nws hais tias, “Koj cia li mus, koj txojkev ntseeg twb ua rau koj ob lub qhovmuag zoo lawm.” Tamsim ntawd nws txawm pom kev thiab nrog Yexus taug kev mus. Thaum Yexus lawv mus yuav txog ntawm lub zos Npefakhes thiab lub zos Npethanis uas nyob ze lub nroog Yeluxalees, lawv mus txog ntawm lub Roob Txiv Ntoo Roj. Yexus txib nws ob tug thwjtim ua nws ntej mus; nws qhia nkawd hais tias, “Neb cia li ncaj nraim mus rau hauv lub zos uas nyob tom neb hauv ntej. Thaum neb mus txog hauv lawm, neb yuav pom ib tug menyuam neesluav khi rau ntawm ib tug ncej. Tus menyuam neesluav ntawd tsis tau muaj neeg caij ib zaug li, neb cia li daws cab los. Yog muaj leejtwg nug neb hais tias neb yuav daws cab mus ua dabtsi? Neb cia li teb hais tias, tus Tswv xav siv, ib ntsis nws mam li xa rov qab los.” Nkawd mus pom ib tug menyuam neesluav khi rau ntawm ntug kev ze ntawm qhovrooj. Thaum nkawd tabtom daws tus neesluav, cov neeg uas nyob ntawd muaj qee leej nug hais tias, “Neb yuav daws tus menyuam neesluav cab mus ua dabtsi?” Nkawd teb raws li Yexus tau qhia rau nkawd lawm, ces lawv txawm cia nkawd cab mus. Nkawd cab tus menyuam neesluav mus rau Yexus, nkawd hle nkawd ob lub tsho ntev pua tus menyuam neesluav nraubqaum rau Yexus caij. Muaj ntau leej hle lawv tej tsho pua hauv kev, muaj ibtxhia mus txiav nplooj tom ntug zos nqa los pua kev. Cov neeg uas ua ntej thiab cov uas lawv qab sawvdaws qw nrov nrov hais tias, “Ua Vajtswv tsaug! Thov Vajtswv foom koob hmoov rau tus uas Vajtswv txib los! Thov Vajtswv foom koob hmoov rau tus uas yuav kav neeg lub siab, ib yam li thaud peb yawgkoob Daviv kav nws haivneeg! Cia li qhuas Vajtswv tus uas nyob saum ntuj ceebtsheej!” Thaum Yexus mus txog hauv lub nroog Yeluxalees lawm, nws mus rau hauv lub Tuamtsev thiab nws saib txhua yam hauv lub Tuamtsev. Tiamsis thaum ntawd twb yuav tsaus ntuj, nws thiaj coj kaum ob tug thwjtim nrog nws mus rau tom lub zog Npethanis. Hnub tom qab thaum Yexus thiab nws cov thwjtim rov qab tom lub zos Npethanis los, Yexus tshaib plab heev. Nws pom ib tsob txiv ncuavpias muaj nplooj tsaus nti nyob tom nws hauv ntej, Yexus txawm mus saib, saib puas txi txiv. Tiamsis thaum nws mus txog tsis pom muaj ib lub txiv li, tsuas pom muaj nplooj xwb rau qhov tseem tsis tau txog lub caij txi. Yexus txawm hais rau tsob txiv ncuavpias ntawd hais tias, “Txij no mus yuav tsis muaj leejtwg tau noj koj cov txiv ib zaug li lawm!” Cov thwjtim hnov Yexus hais li ntawd rau tsob ntoo. Thaum Yexus lawv mus txog hauv lub nroog Yeluxalees lawm, Yexus mus rau ntawm lub Tuamtsev thiab ntiab cov neeg uas tuaj ua lag ua luam kom tawm mus. Nws muab lawv tej rooj pauv nyiaj thiab cov neeg uas muag nquab tej rooj zaum ntxeev pes hlo. Thiab nws txwv tsis pub leejtwg coj ib yam dabtsi tuaj muag rau ntawm lub tshavpuam ntawm lub Tuamtsev. Yexus hais rau lawv hais tias, “Vajtswv txojlus sau tseg hais tias, ‘Sawvdaws yuav hu kuv lub Tuamtsev hais tias yog lub tsev uas txhua haivneeg tuaj thov Vajtswv.’ Tiamsis nej muab ua qhov chaw rau tubsab nkaum!” Cov thawj ntawm cov povthawj thiab cov xibhwb uas qhia Vajtswv txoj Kevcai hnov tej no, lawv txawm nrhiav kev muab Yexus tua povtseg. Lawv ntshai Yexus rau qhov sawvdaws xav tsis thoob rau Yexus tej lus qhia. Thaum yuav tsaus ntuj Yexus thiab nws cov thwjtim txawm tawm hauv lub nroog mus lawm. Hnub tom qab thaum sawv ntxov Yexus thiab nws cov thwjtim rov qab mus rau tom lub nroog. Lawv pom tsob txiv ncuavpias twb qhuav lawm. Txawm yog tej cag los qhuav tas huv tibsi. Petus nco dheev txog Yexus cov lus thiab hais rau Yexus hais tias, “Xibhwb, koj saib tsob txiv ncuavpias uas nag hmo koj foom twb qhuav tas lawm!” Yexus teb lawv hais tias, “Yog nej ntseeg Vajtswv tiag, kuv qhia tseeb rau nej hais tias yog nej hais rau lub roob no kom txav mus rau hauv hiavtxwv, lub roob no yeej yuav txav mus. Tiamsis nej yuav tsum ntseeg hais tias yuav muaj raws li nej hais, ces yeej yuav muaj raws li ntawd tiag. Twb yog vim li ntawd kuv thiaj hais rau nej hais tias thaum nej thov Vajtswv pub ib yam dabtsi rau nej, nej yuav tsum ntseeg hais tias Vajtswv twb pub yam ntawd rau nej lawm nej thiaj yuav tau yam uas nej thov. Thaum nej sawv ntsug thov Vajtswv, nej yuav tsum zam txim rau tus uas tau ua txhaum rau nej lawm. Yog nej ua li ntawd nej Leej Txiv tus uas nyob saum ntuj ceebtsheej thiaj yuav zam nej lub txim. [Yog nej tsis zam txim rau lwm tus, nej Leej Txiv tus uas nyob saum ntuj ceebtsheej yuav tsis zam txim rau nej thiab.”] Yexus thiab nws cov thwjtim mus rau hauv lub nroog Yeluxalees. Thaum Yexus mus rau hauv lub tshavpuam ntawm lub Tuamtsev, cov thawj ntawm cov povthawj, cov xibhwb uas qhia Vajtswv txoj Kevcai thiab cov txwjlaug tuaj cuag Yexus; lawv nug Yexus hais tias, “Ua li cas koj muaj cai ua tej no? Leejtwg tso cai rau koj?” Yexus teb lawv hais tias, “Kuv yuav nug nej ib los; yog nej teb tau, kuv mam li qhia rau nej hais tias yog vim li cas kuv muaj cai ua tej no. Nej sim qhia rau kuv saib leejtwg tso cai rau Yauhas muab neeg ua kevcai raus dej, Vajtswv lossis neeg?” Lawv txawm sib tham hais tias, “Peb yuav teb li cas thiaj zoo? Yog peb teb hais tias Vajtswv kom Yauhas ua, nws yuav hais tias, ‘Ua li cas nej ho tsis ntseeg Yauhas tej lus?’ Yog peb teb hais tias, ‘Neeg kom Yauhas ua…’ ” (Peb ntshai nyob tsam cov pejxeem ua phem rau peb, rau qhov sawvdaws yeej paub hais tias Yauhas yog tus cev Vajtswv lus.) Lawv thiaj teb Yexus hais tias, “Peb tsis paub.” Yexus hais rau lawv hais tias, “Yog li ntawd, kuv yuav tsis qhia rau nej hais tias yog leejtwg tso cai rau kuv ua tej no thiab.” Yexus ua lus pivtxwv qhia rau lawv hais tias, “Muaj ib tug txivneej xov tau ib lub vaj thiab cog txiv hmab rau hauv; nws khawb ib lub qhov tsuam txiv hmab thiab ua lub chaw tsomfaj zov. Nws muab tso rau ib co neeg tu sib faib cov txiv, ces nws txawm mus rau lwm tebchaws lawm. Thaum txog lub caij de txiv hmab, nws txawm txib nws ib tug tubtxib mus sau tej txiv uas yog nws tug los rau nws. Cov neeg uas tu lub vaj ntes tus tubtxib ntawd, muab nws ntaus, thiab ntiab nws rov qab mus tes dawb tes npliag. Tus tswv vaj rov txib dua ib tug tubtxib mus cuag cov neeg uas tu lub vaj; cov neeg uas tu lub vaj muab tus tubtxib ntawd ntaus taubhau to thiab ua ob peb yam phem rau nws. Tus tswv vaj rov txib dua ib tug tubtxib mus; cov neeg uas tu lub vaj muab tus tubtxib ntawd tua povtseg; tom qab ntawd tus tswv vaj txib dua ntau leej mus los lawv ua ib yam li ua rau cov uas xub mus. Lawv muab qee leej ntaus thiab muab qee leej tua povtseg. Tshuav tus tswv vaj tus tub xwb thiaj tsis tau mus. Thaum kawg tus tswv vaj thiaj txib nws tib leeg tub uas nws hlub heev mus cuag cov neeg uas tu lub vaj. Nws xav hais tias, ‘Lawv yuav hwm kuv tus tub.’ Tiamsis lawv sib ntxhi hais tias, ‘Tus no yog tus tswv vaj tus tub. Peb cia li muab nws tua povtseg, peb thiaj tau lub vaj!’ Lawv txawm ntes kiag tus tub ntawd, muab nws tua thiab muab nws pov rau sab ntug vaj nraud.” Yexus nug hais tias, “Yog li ntawd, tus tswv vaj yuav ua li cas rau cov neeg uas tu lub vaj? Nws yeej yuav mus muab cov neeg ntawd tua povtseg huv tibsi, thiab muab nws lub vaj tso rau lwm cov tu. Nej twb nyeem Vajtswv Txojlus uas hais tias, ‘Lub pobzeb uas cov kws ua tsev muab povtseg, lub ntawd twb los ua lub thawj lawm. Qhov no yog tus Tswv ua, peb xav tsis thoob li!’ ” Cov Yudas cov thawjcoj nrhiav kev ntes Yexus, rau qhov lawv paub hais tias, Yexus qhia zaj lus pivtxwv ntawd tawmtsam lawv. Tiamsis lawv ntshai cov neeg coob coob ntawd, lawv txawm cia li khiav lawm. Lawv txib cov Falixais qee leej thiab Helauj cov neeg qee leej mus cuag Yexus thiab nug nws ob peb yam saib nws puas yuav hais txhaum. Lawv tuaj cuag Yexus thiab nug hais tias, “Xibhwb, peb paub hais tias koj yog tus ncaj ncees, koj tsis xaiv leejtwg ntsejmuag. Koj tsis ua raws li neeg lub siab, tiamsis koj qhia Vajtswv txojkev tseeb rau neeg. Koj qhia rau peb saib, yog peb them se rau Xixas puas txhaum peb txoj kevcai los tsis txhaum?” Tiamsis Yexus twb paub lawm hais tias yog lawv tuaj sim nws xwb, nws thiaj teb lawv hais tias, “Nej tuaj sim kuv ua dabtsi? Nej cia li muab ib lub nyiaj los rau kuv saib.” Lawv muab ib lub nyiaj los rau Yexus. Yexus nug lawv hais tias, “Lub ntsejmuag thiab lub npe ntawm lub nyiaj no yog leejtwg lub?” Lawv teb hais tias, “Yog Xixas lub.” Yexus hais tias, “Yog li ntawd, yam uas yog Xixas li nej cia li muab rau Xixas thiab yam uas yog Vajtswv li nej cia li muab rau Vajtswv.” Thaum lawv hnov Yexus hais li ntawd, lawv xav tsis thoob li. Cov Xadukais qee leej uas tsis ntseeg hais tias, neeg yuav sawv hauv qhov tuag rov qab los, qee leej tuaj ntsib Yexus thiab nug hais tias, “Xibhwb, Mauxes sau ib txoj kevcai qhia rau peb hais tias, ‘Yog tus txiv tuag thaum nws tus pojniam tseem tsis tau muaj menyuam, nws tus kwv yuav tsum yuav tus niamtij, tus tijlaug thiaj muaj xeebntxwv.’ Thaud muaj xya leej kwvtij; tus tijlaug yuav pojniam tiamsis tseem tsis tau muaj menyuam, nws txawm tuag lawm. Tus kwv yuav tus niamtij ntawd, tsis tau muaj menyuam, tus kwv txawm tuag lawm; tus kwv ob ho yuav tus niamtij, tiamsis nws kuj tuag lawm thiab, tagnrho xya leej kwvtij uas yuav tus pojniam ntawd puavleej tuag huv tibsi tsis tau muaj menyuam. Thaum kawg tus pojniam ntawd kuj tuag lawm thiab. Yog li ntawd, thaum txog hnub uas cov neeg tuag sawv rov qab los, tus pojniam ntawd yuav yog leejtwg tus pojniam? Rau qhov lawv xya leej kwvtij ntawd puavleej tau yuav nws lawm.” Yexus teb hais tias, “Nej xav yuam kev lawm, rau qhov nej tsis totaub Vajtswv Txojlus thiab tsis paub Vajtswv lub hwjchim. Thaum cov neeg uas tuag lawm sawv rov qab los, lawv yuav zoo ib yam li cov timtswv uas nyob saum ntuj ceebtsheej; lawv tsis yuav pojniam tsis yuav txiv lawm. Hais txog qhov uas cov neeg tuag sawv rov qab los, nej puas tau nyeem Mauxes phau ntawv uas hais txog cov nplaim taws uas cig ntawm tsob ntoo? Vajtswv hais rau Mauxes hais tias, ‘Kuv yog Anplahas tus Vajtswv, Ixaj tus Vajtswv thiab Yakhauj tus Vajtswv,’ Vajtswv tsis yog cov neeg tuag tus Vajtswv, tiamsis nws yog cov neeg ciaj tus Vajtswv. Nej xav yuam kev lawm!” Muaj ib tug xibhwb uas qhia Vajtswv txoj Kevcai nyob ntawd hnov lawv sib tham. Nws pom Yexus ua tib zoo teb cov Xadukais, nws txawm los nug Yexus hais tias, “Vajtswv txoj kevcai, nqe twg yog nqe uas tseemceeb dua ntais huv tibsi?” Yexus teb hais tias, “Nqe no yog nqe uas tseemceeb dua ntais; ‘Cov neeg Yixalayees, nej ua tib zoo mloog! Tus Tswv uas yog peb tus Vajtswv, nws tib leeg xwb thiaj yog tus Tswv. Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog.’ Nqe ob uas tseemceeb hais li no hais tias, ‘Hlub koj tej kwvtij zejzog ib yam li koj hlub koj lub cev.’ Tsis muaj dua lwm nqe uas tseemceeb tshaj ob nqe no lawm.” Tus xibhwb uas qhia Vajtswv txoj kevcai teb Yexus hais tias, “Yog lawm, xibhwb! Yeej muaj tseeb li koj hais tiag, tsuas muaj tib tug Tswv uas yog Vajtswv xwb, tsis muaj dua lwm tus Vajtswv lawm. Yog li ntawd, yus yuav tsum hlub Vajtswv kawg siab kawg ntsws, kawg plab kawg plawv thiab kawg lub dag lub zog, thiab yus yuav hlub yus tej kwvtij zejzog ib yam li yus hlub yus lub cev. Yog ua raws li ob nqe no kuj tseemceeb dua li yus muab tej tsiaj tua theej txhoj thiab muab khoom hlawv fij rau Vajtswv.” Yexus pom hais tias nws muaj tswvyim teb, ces Yexus txawm hais rau nws hais tias, “Koj nyob tsis deb Vajtswv lub Tebchaws lawm.” Tom qab ntawd tsis muaj leejtwg kam nug Yexus li lawm. Thaum Yexus tabtom qhia hauv lub Tuamtsev, nws nug hais tias, “Ua li cas cov xibhwb uas qhia Vajtswv txoj Kevcai hais tias tus Mexiyas yog Daviv tus Tub? Vaj Ntsujplig tshoov Daviv siab, Daviv thiaj hais tias, ‘Tus Tswv hais rau kuv tus Tswv hais tias, koj cia li zaum ntawm kuv sab xis mus txog thaum uas kuv muab koj cov yeebncuab los rau koj tsuj.’ Daviv twb hu nws hais tias ‘Tus Tswv’; yog li ntawd, yuav ua li cas hais tau tias tus Mexiyas yog Daviv tus tub?” Cov neeg coob coob uas tabtom mloog Yexus qhia ntawd lawv zoo siab kawg li. Yexus qhia lawv hais tias, “Nej yuav tsum ceevfaj cov xibhwb uas qhia Vajtswv txoj Kevcai. Lawv nyiam hnav tej tsho ntev ncig mus ncig los tom khw kom sawvdaws hwm lawv, thiab lawv xaiv tej chaw uas zoo hauv tej tsev sablaj lossis hauv tej rooj noj rooj haus zaum xwb. Lawv txhav tej pojntsuam tej vajtse yuav thiab thov Vajtswv ntev ntev kom sawvdaws qhuas lawv. Lawv yeej yuav raug txim hnyav dua lwm tus huv tibsi!” Yexus nyob ze lub phijxab uas sawvdaws coj nyiaj tuaj tso hauv lub Tuamtsev; Yexus saib cov neeg uas tuaj tso nyiaj. Muaj cov neeg npluanuj ntau leej tso nyiaj ntau ntau rau hauv lub phijxab; thiab muaj ib tug pojntsuam pluag pluag muab ob lub txiaj toog tuaj tso rau hauv. Yexus hu nws cov thwjtim los cuag nws thiab hais rau lawv hais tias, “Kuv qhia tseeb rau nej hais tias tus pojntsuam uas pluag pluag ntawd tso nyiaj ntau dua lwm tus. Rau qhov lwm tus muab lawv tej nyiaj uas seem coj tuaj tso xwb, tiamsis tus pojntsuam uas pluag pluag no, nws muab hlo ob lub txiaj toog uas nws muaj tuaj tso huv tibsi.” Thaum Yexus tabtom tawm ntawm lub Tuamtsev mus, Yexus cov thwjtim muaj ib tug hais rau Yexus hais tias, “Xibhwb, koj saib tej pobzeb thiab tej tsev ntawd zoo nkauj kawg li!” Yexus teb hais tias, “Koj pom tej tsev uas loj loj no los? Kuv qhia rau koj hais tias tej pobzeb uas muab sib dhos ua ke ntawd txhua lub yuav pluam nyias nyob nyias tas huv tibsi.” Thaum Yexus nyob pem lub Roob Txiv Ntoo Roj uas nyob ncaj lub Tuamtsev sab tid, thaum ntawd Petus, Yakaunpaus, Yauhas thiab Adales los nug Yexus twjywm. Lawv hais tias, “Koj qhia rau peb saib, thaum twg mam li muaj tej no thiab yuav muaj yam dabtsi qhia rau peb paub hais tias twb txog lub sijhawm uas muaj tej ntawd lawm?” Yexus qhia rau lawv hais tias, “Nej yuav tsum ceevfaj, tsis txhob pub leejtwg dag ntxias tau nej yuam kev. Yuav muaj ntau leej tuav kuv lub npe hais rau nej hais tias, ‘Kuv yog nws!’ thiab lawv yuav dag ntxias ntau leej yuam kev. Thaum nej hnov suab ntaj suab riam nyob ze nej thiab hnov tej tebchaws nyob deb ua tsov ua rog, nej tsis txhob poob siab, yeej yuav xub muaj tej ntawd, tiamsis tej ntawd tsis tau qhia hais tias twb txog lub sijhawm ntiajteb kawg lawm. Ib lub tebchaws yuav sawv tawmtsam ib lub tebchaws, thiab ib haivneeg yuav sawv tawmtsam ib haivneeg. Yuav muaj av qeeg txhua qhov thiab yuav muaj kev tshaib kev nqhis. Tej ntawd zoo ib yam li tus pojniam uas nyuam qhuav pib mob plab yuav yug menyuam. “Nej yuav tsum ceevfaj rau qhov yuav muaj neeg ntes nej coj mus rau hauv tej tsev hais plaub; luag yuav muab nej ntaus hauv tej tsev sablaj thiab yuav coj nej mus sawv tabmeeg tej nomtswv thiab tej vajntxwv, vim nej yog cov uas ntseeg kuv. Thaum ntawd yog lub sijhawm zoo rau nej qhia Txojmoo Zoo. Tiamsis yuav tsum muaj neeg mus qhia Txojmoo Zoo rau txhua haivneeg ua ntej tso, mam li muaj tej no. Thaum luag ntes nej coj mus rau hauv tej tsev hais plaub, nej tsis txhob txhawj hais tias nej yuav hais li cas; thaum txog lub sijhawm ntawd, Vajtswv yuav qhia kom nej paub hais, rau qhov tej lus uas nej hais tsis yog nej tej lus; tiamsis yog Vaj Ntsujplig tus Dawbhuv tej lus. Tej kwvtij ib tug yuav muab ib tug coj mus rau luag tua; txiv yuav ua ib yam li ntawd rau tej menyuam. Thiab tej menyuam yuav tawmtsam niamtxiv thiab coj mus rau luag tua. Txhua tus yuav ntxub nej vim nej yog cov uas ntseeg kuv, tiamsis tus uas ua siab ntev mus txog hnub kawg tus ntawd yuav dim. “Nej yuav pom ‘Yam uas phem kawg nkaus’ nyob hauv qhov chaw uas tsis tsimnyog yam ntawd nyob.” (Tus uas nyeem zaj no, cia li totaub!) “Thaum ntawd cov neeg uas nyob hauv lub xeev Yudas cia li khiav mus rau pem tej roob. Tus uas nyob nraum zoov tsis txhob rov mus nqa ib yam dabtsi hauv tsev. Tus uas nyob tom teb tsis txhob rov los nqa nws lub tsho ntev hauv tsev. Lub sijhawm ntawd tej pojniam uas suab menyuam thiab tej pojniam uas muaj menyuam mos noj mis yuav txomnyem kawg li. Nej yuav tsum thov Vajtswv pab kom nej tsis txhob tau khiav lub caij ntuj no! Txij thaum Vajtswv tsim lub ntiajteb los txog niaj hnub no tsis tau muaj kev txomnyem heev npaum li zaum no, thiab yav tom ntej yuav tsis muaj li zaum no lawm. Tiamsis tus Tswv twb txiav hnub txiav nyoog kom luv lawm. Yog nws tsis ua li ntawd yeej yuav tsis muaj leejtwg dim li. Qhov uas Vajtswv txiav hnub txiav nyoog kom luv ntawd twb yog vim nws hlub nws haivneeg uas nws tau xaiv cia lawm. “Thaum ntawd yog leejtwg hais rau nej hais tias, ‘Nej saib, tus Mexiyas nyob ntawm no!’ lossis hais tias, ‘Nws nyob tod!’ nej tsis txhob ntseeg tus ntawd tej lus. Rau qhov yuav muaj tej Mexiyas cuav thiab tej cevlus cuav los ua tej txujci tseemceeb dag ntxias Vajtswv haivneeg saib puas yuav ntxias tau kom lawv yuam kev. Nej yuav tsum ceevfaj rau qhov kuv twb qhia tej no rau nej paub ua ntej lawm. “Thaum tej kev txomnyem ntawd dhau lawm, lub hnub yuav tsaus, lub hli yuav tsis ci, tej hnubqub saum ntuj yuav poob los, thiab txhua yam uas muaj hwjchim nyob saum nruab ntug yuav ua zog koog huv tibsi. Thaum ntawd sawvdaws yuav pom Neeg Leej Tub tshwm saum cov huab los, nws lub hwjchim thiab tus tshwjchim ci ntsa iab. Nws yuav txib nws cov timtswv mus txhua nrho plaub ceg kaum ntuj hu cov neeg uas Vajtswv twb xaiv cia lawm, sab ntuj tim no mus txog sab ntuj tim ub, los nyob ua ke. “Nej saib tsob txiv ncuavpias qhia li cas. Thaum nws tej ceg rov ntsuab thiab pib hlav nplooj mos nyoos, ces nej paub hais tias twb yuav txog lub caij ntuj nag. Ib yam nkaus li ntawd, thaum nej pom tej ntawd nej yuav paub hais tias nws twb los ze lawm. Kuv qhia tseeb rau nej hais tias thaum cov neeg tiam no tseem tuag tsis tau tas, twb xub muaj tej ntawd lawm. Lub ntuj thiab lub ntiajteb yuav ploj mus, tiamsis kuv tej lus yuav tsis muaj ib los poob li. “Tiamsis hnub ntawd thiab lub sijhawm ntawd tsis muaj leejtwg paub. Txawm yog cov timtswv ceebtsheej lossis Neeg Leej Tub los twb tsis paub; tsuas yog Leej Txiv tib leeg thiaj paub xwb. Nej yuav tsum ceevfaj thiab zov tos, rau qhov nej tsis paub hais tias thaum twg yuav txog lub sijhawm ntawd. Lub sijhawm ntawd zoo ib yam li ib tug txivneej uas tawm hauv nws lub tsev mus rau lawm qhov, tseg nws cov tubtxib zov tsev thiab faib haujlwm rau lawv, nyias muaj nyias ib tes haujlwm; thiab nws hais kom tus zov qhovrooj, zov zoo zoo. Yog li ntawd, nej yuav tsum zov zoo zoo rau qhov nej tsis paub hais tias thaum twg nej tus Tswv yuav rov los. Tej zaum nws yuav los thaum tsaus ntuj lossis thaum ib tag hmo lossis thaum qaib yuav qua lossis thaum kaj ntug. Nyob tsam nws los tamsim thiab pom nej tseem pw tsaug zog. Tej lus uas kuv qhia rau nej, kuv hais rau sawvdaws ib yam nkaus hais tias nej yuav tsum zov tos!” Tshuav ob hnub xwb txog hnub ua Kevcai Hla Dhau thiab ua Kevcai noj Ncuav tsis Xyaw Keeb. Cov thawj ntawm cov povthawj thiab cov xibhwb uas qhia Vajtswv txoj Kevcai tabtom nrhiav kev ntes Yexus twjywm coj mus tua povtseg. Lawv hais tias, “Peb tsis txhob rawm ua li ntawd thaum sawvdaws tseem tabtom ua kevcai, nyob tsam ua rau sawvdaws ntxhov.” Tom qab ntawd Yexus so hauv Ximoos tus uas thaud mob ruas ib zaug lawm lub tsev tom lub zos Npethanis. Thaum Yexus tabtom noj mov, muaj ib tug pojniam nqa ib hwj roj tsw qab kim heev uas muab naludas ua tuaj. Nws muab lub ncauj hwj lov thiab muab cov roj tsw qab ntawd hliv rau Yexus taubhau. Cov neeg uas nyob ntawd muaj qee leej tsis txaus siab thiab hais tias, “Ua li cas nws yuav muab cov roj tsw qab ntawd nkim povtseg? Yog muab coj mus muag yuav tau ntau dua peb puas lub nyiaj, thiab muab cov nyiaj ntawd mus pub rau cov neeg pluag kuj zoo dua!” Thiab lawv thuam tus pojniam ntawd heev. Tiamsis Yexus hais rau lawv hais tias, “Cia nws ua nws! Tsis txhob ua rau nws nyuaj siab! Qhov uas nws ua rau kuv ntawd yog ib qho zoo. Yeej yuav muaj cov neeg pluag nrog nej nyob mus li; nej xav pab lawv thaum twg los yeej tau, tiamsis kuv yuav tsis nrog nej nyob mus ib simneej. Tus pojniam no yeej ua raws li nws ua tau. Nws muab roj tsw qab hliv rau kuv lub cev, twb yog nws tu kuv lub cev tseg rau hnub uas faus kuv. Kuv qhia tseeb rau nej hais tias qhov uas tus pojniam no ua yuav nrov ncha mus rau txhua qhov hauv qab ntuj uas muaj neeg mus qhia Txojmoo Zoo, kom sawvdaws nco txog tej uas tus pojniam no tau ua lawm.” Tom qab ntawd Yexus kaum ob tug thwjtim tus uas hu ua Yudas Ixakali-us txawm mus cuag cov thawj ntawm cov povthawj, nws ntxeev siab muab Yexus muag rau lawv. Thaum lawv hnov Yudas hais li ntawd, lawv zoo siab kawg li. Lawv coglus hais tias lawv yuav muab nyiaj rau Yudas; yog li ntawd, Yudas txawm nrhiav sijhawm muab Yexus rau lawv. Thawj hnub uas ua Kevcai Noj Ncuav tsis Xyaw Keeb, hnub ntawd yog hnub uas sawvdaws tua menyuam yaj noj ua Kevcai Hla Dhau. Yexus cov thwjtim nug Yexus hais tias, “Koj xav kom peb mus npaj pluas mov ua Kevcai Hla Dhau rau koj noj qhov twg?” Yexus txawm txib nws ob tug thwjtim mus thiab qhia rau nkawd hais tias, “Neb cia li mus hauv lub nroog, yuav muaj ib tug txivneej kwv ib hub dej los ntsib neb. Neb cia li lawv nws qab mus rau hauv tsev, thiab neb hais rau tus tswv tsev hais tias, ‘Xibhwb hais tias koj yuav muab chav twg rau kuv thiab kuv cov thwjtim noj pluag mov ua Kevcai Hla Dhau?’ Tus tswv tsev ntawd yuav coj neb nce mus rau txheej saud, thiab nws yuav qhia ib chav dav dav uas twb muaj rooj muaj tog txhij lawm rau neb. Neb cia li npaj txhua yam cia rau qhov ntawd tos peb.” Ob tug thwjtim txawm mus hauv lub nroog, thiab pom txhua yam raws li Yexus qhia rau nkawd lawm, nkawd txawm npaj pluag mov ua Kevcai Hla Dhau rau qhov ntawd. Thaum yuav tsaus ntuj, Yexus thiab kaum ob tug thwjtim los txog. Thaum lawv tabtom noj mov ntawm rooj, Yexus hais tias, “Kuv qhia tseeb rau nej hais tias nej cov uas nrog kuv noj mov ntawm no muaj ib tug yuav ntxeev siab rau kuv; nws yog tus uas nrog kuv noj ua ke.” Thaum cov thwjtim hnov Yexus hais li ntawd lawv nyuaj siab, lawv nug Yexus zom zaws hais tias, “Koj hais li ko puas yog kuv?” Yexus teb hais tias, “Nej kaum ob leeg no yog ib leeg ntag, tus ntawd yog tus uas nrog kuv koom ntsw ib lub tais. Neeg Leej Tub yeej yuav tuag raws li Vajtswv Txojlus sau hais txog nws lawm. Tiamsis tus uas ntxeev siab rau Neeg Leej Tub, nws yuav raug kev puastsuaj! Yog nws tsis txhob yug los kuj yuav zoo dua!” Thaum lawv tseem tabtom noj hmo Yexus muab ib lub ncua los tuav ntawm tes. Nws ua Vajtswv tsaug thiab muab lub ncuav ntawd ntais cev rau nws cov thwjtim thiab hais tias, “Lub ncuav no yog kuv lub cev, nej cia li txais mus noj.” Tom qab ntawd Yexus muab ib khob cawv txiv hmab los thiab ua Vajtswv tsaug; nws muab khob cawv txiv hmab ntawd cev rau lawv thiab lawv txhua tus txais mus haus. Yexus hais rau lawv hais tias, “Cov cawv txiv hmab no yog kuv cov ntshav uas ntws los ntxuav ntau leej lub txim. Kuv cov ntshav yog ua lub homthawj uas nias rau Vajtswv Txojlus cog tseg. Kuv qhia rau nej hais tias kuv yuav tsis haus cov cawv txiv hmab no mus txog hnub uas kuv haus cov cawv txiv hmab tshiab hauv Vajtswv lub tebchaws.” Thaum lawv hu ib zaj nkauj tas lawv txawm tawm mus rau pem Roob Txiv Ntoo Roj lawm. Yexus hais rau lawv hais tias, “Nej txhua tus yuav khiav huv tibsi tso kuv tseg, rau qhov Vajtswv Txojlus sau tseg lawm hais tias, ‘Vajtswv yuav tua tus tswv yug yaj, thiab pab yaj yuav tawg nyias khiav nyias mus tas huv tibsi.’ Tiamsis thaum kuv sawv hauv qhov tuag rov qab los lawm, kuv yuav ua nej ntej mus rau pem Kalilais.” Petus teb Yexus hais tias, “Txawm yog sawvdaws tso koj tseg tas los kuv yuav tsis tso koj tseg!” Yexus hais rau Petus hais tias, “Kuv qhia rau koj hais tias hmo no thaum qaib tsis tau qua ob tsig, koj yuav hais peb zaug hais tias koj tsis paub kub.” Petus teb tawv qhawv hais tias, “Txawm yog kuv yuav nrog koj tuag los kuv yuav tsis hais tias kuv tsis paub koj ib zaug li!” Thiab tagnrho cov thwjtim puavleej hais ib yam nkaus. Yexus nrog nws cov thwjtim mus rau ntawm qhov chaw uas hu ua Khexemanes. Nws hais rau cov thwjtim hais tias, “Nej nyob ntawm no kuv yuav mus thov Vajtswv tod.” Yexus txawm coj Petus, Yakaunpaus thiab Yauhas nrog nws mus. Yexus nyuaj siab thiab ntxhov siab kawg li. Nws hais rau lawv hais tias, “Kuv nyuaj siab kawg li twb yuav tuag; nej cia li nrog kuv nyob ntawm no tsis txhob tsaug zog.” Yexus mus tom ntej mentsis, ces nws txawm txhos caug ntua rau hauv av thiab thov Vajtswv hais tias, yog tau thov kom nws tsis txhob raug txojkev txomnyem no. Nws thov hais tias, “Txiv, Kuv Txiv, koj ua tau ib puas tsav yam huv tibsi, thov koj muab lub khob no tshem ntawm kuv mus. Txawm li cas los thov koj tsis txhob ua raws li kuv lub siab nyiam, tiamsis ua raws li koj lub siab nyiam xwb.” Thaum Yexus rov qab los rau ntawm nws peb tug thwjtim, nws pom lawv tsaug zog tas lawm. Nws hais rau Petus hais tias, “Ximoos, koj tsaug zog lawm los? Koj twb yoo tsis taus dab ntub nrog kuv nyob ib txoos teev li los?” Thiab Yexus hais rau lawv hais tias, “Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis lub cev qaug zog heev.” Yexus rov qab mus thov Vajtswv dua ib zaug thiab hais ib yam li qub. Thaum nws rov qab los, nws pom cov thwjtim tsaug zog tas lawm; lawv rua tsis taus qhovmuag li, thiab lawv tsis paub yuav hais li cas rau nws. Thaum nws rov qab los zaum peb, nws hais rau lawv hais tias, “Nej tseem yuav tsaug zog thiab so kom txaus tso los? Tsaug zog li no xwb txaus lawm! Twb txog lub sijhawm lawm! Nej saib, Neeg Leej Tub yuav raug luag ntes coj mus rau cov neeg txhaum txhais tes. Nej cia li sawv peb mus. Nej saib, tus neeg uas ntxeev siab rau kuv twb tuaj txog lawm!” Thaum Yexus tseem tabtom hais li ntawd, ces Yudas uas yog ib tug ntawm kaum ob tug thwjtim txawm tuaj txog. Muaj ib pab neeg coob coob nqa ntaj nqa qws nrog nws tuaj. Pab ntawd yog cov thawj ntawm cov povthawj, cov xibhwb uas qhia Vajtswv txoj Kevcai thiab cov txwjlaug tso tuaj. Tus uas ntxeev siab rau Yexus twb xub qhia rau cov neeg ntawd lawm hais tias, “Kuv nwj tus twg, ces yog tus ntawd ntag. Nej cia li ntes nws thiab coj nws mus, nej saib zoo zoo tsis txhob pub nws khiav.” Thaum Yudas tuaj txog, nws ncaj nraim mus rau ntawm Yexus thiab hais tias, “Xibhwb!” Ces nws txawm nwj kiag Yexus. Cov neeg uas nrog Yudas tuaj, lawv txawm sau nthwv los ntes Yexus thiab tuav Yexus ruaj ruaj. Ces cov neeg uas sawv ze ntawd, muaj ib tug rho hlo nws rab ntaj los tib ntag rau tus Povthawj Hlob ib tug qhev sab pobntseg xis tu nrho. Yexus hais rau lawv hais tias, “Nej nqa ntaj nqa qws tuaj ntes kuv ib yam li kuv yog tubsab los? Kuv niaj hnub qhia nej hauv lub Tuamtsev, ua li cas nej ho tsis ntes kuv? Tiamsis yeej yuav muaj li no thiaj tiav raws li Vajtswv Txojlus.” Cov thwjtim txawm khiav tas tso Yexus tseg. Muaj ib tug tub hluas lawv Yexus qab, nws tsis hnav ris tsho, nws npua ib daim ntaubmag xwb. Cov neeg ntawd yuav ntes nws thiab, tiamsis nws muab daim ntaub ntawd hle hlo tseg thiab khiav liabqab ploog lawm. Tom qab ntawd lawv coj Yexus mus rau tom tus Povthawj Hlob lub tsev; cov thawj ntawm cov povthawj thiab cov xibhwb uas qhia Vajtswv txoj Kevcai twb tuaj ua ke sablaj qhov ntawd lawm. Petus lawv Yexus qab nrug deb deb, nws mus txog ntawm lub tshavpuam ntawm tus Povthawj Hlob lub tsev. Nws mus nrog cov neeg uas zov tus Povthawj Hlob lub tsev nte taws. Cov thawj ntawm cov povthawj nrhiav lus nkaug Yexus kom lawv tau cai muab Yexus tua povtseg, tiamsis lawv nrhiav tsis tau. Muaj ntau leej tuaj ua timkhawv dag hais tias Yexus ua txhaum, tiamsis tej lus uas lawv hais tsis sib thooj. Muaj qee leej sawv ua timkhawv nkaug Yexus hais tias, “Peb hnov nws hais tias, ‘Kuv yuav muab lub Tuamtsev uas yog neeg txhais tes ua no rhuav povtseg, thiab tom qab ntawd peb hnub kuv yuav ua tau ib lub tshiab uas tsis yog neeg txhais tes ua.’ ” Txawm yog lawv hais tib zaj xwb los lawv tej lus tsis sib thooj. Tus Povthawj Hlob txawm sawv tsees nug Yexus hais tias, “Lawv nkaug koj li ntawd, koj tsis muaj lus teb lawv li los?” Tiamsis Yexus ua twjywm tsis teb ib los li. Tus Povthawj Hlob rov nug Yexus hais tias, “Koj puas yog tus Mexiyas uas yog Vajtswv tus uas Dawbhuv tus Tub?” Yexus teb hais tias, “Kuv yog, thiab nej yuav pom Neeg Leej Tub nyob ntawm Vajtswv tus uas muaj hwjchim loj kawg nkaus sab xis thiab nrog huab nrog cua los saum ntuj los!” Thaum tus Povthawj Hlob hnov li ntawd, nws txawm dua rhe nws lub tsho thiab hais tias, “Tsis tas peb yuav mus nrhiav timkhawv ntxiv lawm! Nej twb hnov nws tej lus thuam ntawd lawm. Nej yuav hais li cas?” Lawv sawvdaws teb hais tias, “Nws ua txhaum lawm, tsimnyog muab nws tua povtseg.” Cov neeg ntawd muaj qee leej nto qaubncaug rau Yexus; lawv muab phuam pav Yexus qhovmuag thiab ntaus Yexus. Lawv hais rau Yexus hais tias, “Koj sim twv saib yog leejtwg ntaus koj?” Cov tubrog coj Yexus mus thiab xuas tawg ncuav rau Yexus. Petus tseem nyob ntawm tshavpuam; tus Povthawj Hlob ib tug ntxhais qhev tuaj pom Petus zaum nte taws, nws saib ntsoov Petus thiab hais tias, “Koj yog tus uas ibtxwm nrog Yexus tus uas yog neeg Naxales thiab los sav.” Tiamsis Petus tsis lees li. Petus teb hais tias, “Koj hais li ko xyov yog koj hais leejtwg, kuv tsis paub li...” Petus tawm mus txog ntawm roojvag, tamsim ntawm qaib txawm qua. Thaum tus ntxhais qhev pom Petus nyob ntawd, nws txawm hais rau cov neeg uas sawv ntawd hais tias, “Tus no yog Yexus lawv pab ib tug tiag!” Tiamsis Petus tsis lees dua ib zaug. Tom qab ntawd mentsis, cov neeg uas sawv ntawd hais rau Petus hais tias, “Koj tsis txhob hais tias koj tsis yog lawv pab ntawd ib tug, rau qhov peb twb paub hais tias koj yog neeg Kalilais.” Petus txawm twv hais tias, “Yog kuv dag, thov Vajtswv rau txim rau kuv. Kuv tsis paub tus txivneej uas nej hais ntawd li.” Tamsim ntawd qaib txawm qua zaum ob. Petus nco dheev txog tej lus uas Yexus hais rau Petus hais tias, “Thaum qaib tsis tau qua ob tsig, koj yuav hais peb zaug hais tias koj tsis paub kuv.” Petus quaj tu siab kawg li. Thaum kaj ntug lawm, cov thawj ntawm cov povthawj txawm mus nrog cov txwjlaug, cov xibhwb uas qhia Vajtswv txoj Kevcai thiab cov nomtswv sablaj saib lawv yuav ua li cas rau Yexus. Lawv muab Yexus khi coj mus rau Philaj. Philaj nug Yexus hais tias, “Koj yog cov Yudas tus vajntxwv los?” Cov thawj ntawm cov povthawj hais ntau zaj nkaug Yexus; Philaj rov nug Yexus hais tias, “Koj tsis teb lawv los? Koj tsis hnov lawv hais ntau zaj nkaug koj los?” Tiamsis Yexus tsis teb ib los li thiab, ua rau Philaj xav tsis thoob li. Raws li ibtxwm, txhua zaus uas ua Kevcai Hla Dhau, Philaj yeej tso ib tug neeg raug txim raws li cov pejxeem thov. Lawv thov tus twg, nws tso tus ntawd. Thaum ntawd muaj ib tug txivneej hu ua Npalanpas raug kaw hauv tsev lojcuj, vim nws nrog cov neeg ntxeev nom ntxeev tswv uas tua neeg. Thaum cov neeg coob coob ua ke tuaj thov Philaj tso ib tug neeg rau lawv raws li nws ibtxwm tso, Philaj nug lawv hais tias, “Nej xav kom kuv tso cov Yudais tus vajntxwv rau nej los?” Philaj yeej paub tseeb hais tias cov thawj ntawm cov povthawj khib, lawv thiaj ntes Yexus coj tuaj rau nws. Tiamsis cov thawj ntawm cov povthawj ntxias kom cov pejxeem thov Philaj tso Npalanpas los rau lawv. Philaj rov nug cov pejxeem hais tias, “Nej xav kom kuv ua li cas rau tus txivneej uas nej hu hais tias cov Yudais tus vajntxwv?” Lawv teb nrov nrov hais tias, “Muab nws ntsia rau saum ntoo khaublig!” Philaj nug lawv hais tias, “Nws ua txhaum dabtsi?” Lawv hajyam hais nrov dua qub hais tias, “Muab nws ntsia rau saum ntoo khaublig.” Philaj xav ua kom haum cov pejxeem sawvdaws siab, nws thiaj tso Npalanpas rau lawv. Tom qab ntawd nws kom luag muab Yexus nplawm thiab coj Yexus mus ntsia rau saum ntoo khaublig. Cov tubrog txawm coj Yexus mus rau hauv lub tshavpuam ntawm tus tswvxeev lub tsev thiab hu pab tubrog tagnrho tuaj ua ke. Lawv muab ib lub tsho ntev tsamxem rau Yexus hnav thiab muab hmab pos ua kauj looj Yexus taubhau. Lawv ua txuj hawm nws dog dig thiab hais tias, “Thov kom cov Yudais tus Vajntxwv muaj sia nyob ntev!” Lawv muab ib tug kav tauj ntaus Yexus taubhau, nto qaubncaug rau Yexus, txhos caug thiab ua txuj pe nws. Thaum lawv ua saib tsis taus Yexus tas lawm, lawv muab lub tsho ntev tsamxem hle thiab muab Yexus lub kho rau Yexus hnav. Lawv coj mus ntsia rau saum ntoo khaublig. Thaum lawv taug kev mus, lawv ntsib ib tug txivneej hu ua Ximoos; nws tuaj pem yajsab tuaj, yuav mus rau hauv lub nroog. Lawv yuam nws kwv Yexus tus ntoo khaublig. (Tus Ximoos no nyob hauv lub nroog Kulenes; nws ob tus tub yog Alexades thiab Lufus.) Lawv coj Yexus mus rau ntawm qhov chaw uas hu ua Khaulakhauthas, lub npe ntawd txhais hais tias, “Pobtxha Taubhau.” Thaum lawv mus txog ntawd lawm, lawv muab cawv txiv hmab xyaw tshuaj tsw qab mules cev rau Yexus haus, tiamsis Yexus tsis kam haus. Thaum lawv muab Yexus ntsia rau saum ntoo khaublig lawm, lawv muab Yexus cev ris tsho los twv saib leejtwg yuav tau yam twg. Lub sijhawm uas lawv muab Yexus ntsia rau saum ntoo khaublig yog thaum cuaj teev sawv ntxov. Lawv sau ib nqe lus nkaug Yexus hais tias, “Cov Yudais tus Vajntxwv.” Lawv muab ob tug tubsab ntsia rau saum ob tug ntoo khaublig, muab ib tug txhos rau ntawm Yexus sab xis thiab muab ib tug txhos rau ntawm Yexus sab laug. [ Tej no muaj tiav raws li Vajtswv Txojlus uas hais tias, “Luag suav hais tias nws ua txhaum ib yam li cov neeg ua txhaum.”] Cov neeg uas dhau txojkev ntawd, lawv co hau nto thiab thuam hais tias, “Koj hais tias koj yuav rhuav lub Tuamtsev thiab peb hnub koj yuav rov ua tau ib lub tshiab! Koj cia li pab koj kom dim thiab nqis saum tus ntoo khaublig ko los!” Cov thawj ntawm cov povthawj thiab cov xibhwb uas qhia Vajtswv txoj Kevcai thuam Yexus ib yam nkaus. Lawv sib tham hais tias, “Nws cawm tau lwm tus, tiamsis nws cawm tsis tau nws! Kom tus Mexiyas uas yog cov Yixalayees tus vajntxwv cia li nqis kiag saum tus ntoo khaublig los rau peb saib, peb thiaj yuav ntseeg nws!” Ob tug tubsab uas raug ntsia rau saum ntoo khaublig ib yam li Yexus los kuj thuam Yexus thiab. Thaum hnub ntseg txawm tsaus ntuj nti thoob plaws lub tebchaws, tsaus mus txog thaum peb teev hnub qaij. Thaum peb teev hnub qaij, Yexus hu nrov nrov hais tias, “Elau-is, Elau-is, lemas xanpathanis.” Lo lus ntawd txhais hais tias, “Kuv tus Vajtswv, kuv tus Vajtswv, ua li cas koj muab kuv tso tseg lawm?” Cov neeg uas sawv ntawd muaj qee leej hnov Yexus hais li ntawd, lawv hais tias, “Nej mloog saib, nws hu Eliyas!” Cov neeg ntawd muaj ib tug txawm mus muab ib tug kav tauj chob ib lub xwbkuab raus cawv txiv hmab qaub cev mus rau ntawm Yexus qhovncauj thiab hais tias, “Peb tos mentsis saib puas pom Eliyas los pab nws dim ntawm tus ntoo khaublig!” Yexus qw ib suab nrov nrov ces nws txawm tu sav nrho lawm. Tamsim ntawd daim ntaub uas thaiv hauv lub Tuamtsev txawm ntuag rhe saud ti nkaus rau hauv taw ua ob daig. Tus thawj tubrog uas sawv ze ntawm tus ntoo khaublig pom Yexus tuag li ntawd, nws hais tias, “Tus no yog Vajtswv tus Tub tiag.” Muaj ib co pojniam tuaj sawv deb deb saib. Cov pojniam ntawd yog Malis Madalas, Malis tus uas yog tus Yakaunpaus hluas thiab Yauxej nkawd niam, thiab Xalaumes. Cov pojniam ntawd yog cov uas ibtxwm pab Yexus thiab nrog Yexus tuaj pem Kalilais tuaj, thiab muaj dua ib co pojniam uas nrog Yexus tuaj rau hauv Yeluxalees los nyob ntawd thiab. Thaum yuav tsaus ntuj uas yog hnub npaj qhov txhia chaw cia rau Hnub Xanpataus, Yauxej uas nyob hauv lub nroog Alimathas txawm tuaj txog. Nws yog ib tug nomtswv uas sawvdaws hwm, thiab nws yog ib tug uas tos ntsoov Vajtswv lub Tebchaws yuav los. Yauxej mus thov Philaj kom muab Yexus lub cev rau nws. Thaum Philaj hnov hais tias Yexus tuag lawm, nws xav tsis thoob li. Nws hu tus thawj tubrog los nug saib Yexus tuag tau hov ntev lawm. Thaum tus thawj tubrog qhia rau Philaj tas lawm, Philaj pub Yauxej mus muab Yexus lub cev txo coj mus faus. Yauxej mus yuav tau ib chaws ntaubmag los; nws muab Yexus lub cev txo thiab muab chaws ntaubmag ntawd qhwv Yexus lub cev kwv mus faus rau hauv ib lub qhov ntxa uas luag txaug tau rau hauv ib phab pobzeb. Nws dov ib daim txiag zeb loj loj los npog lub rooj ntxas cia. Malis Madalas thiab Malis uas yog Yauxej niam pom qhov chaw uas Yauxej coj Yexus lub cev mus faus. Thaum dhau Hnub Xanpataus lawm, Malis Madalas, Malis uas yog Yakaunpaus niam thiab Xalaumes txawm mus yuav tshuaj tsw qab coj mus pleev Yexus lub cev. Hnubkaj thaum sawv ntxov, lawv mus txog tom lub ntxa thaum hnub tabtom tawm tuaj. Thaum lawv taug kev mus lawv sib tham hais tias, “Leejtwg yuav pab muab daim txiag zeb uas npog lub rooj ntxas dov tawm?” (Daim txiag zeb ntawd loj kawg li.) Thaum lawv mus yuav txog, lawv tsa qhovmuag saib thiab pom daim txiag zeb twb muab dov rau ib sab lawm. Lawv mus rau hauv lub qhov ntxa, thiab lawv pom ib tug tub hluas hnav ib lub tsho dawb ntev ntev nyob hauv lub qhov ntxa sab xis; lawv ntshai kawg li. Tus tub hluas ntawd hais rau lawv hais tias, “Nej tsis txhob ntshai, kuv paub hais tias nej tuaj nrhiav Yexus uas yog neeg Naxales uas luag muab ntsia rau saum ntoo khaublig. Nws tsis nyob ntawm no, nws twb sawv lawm! Nej saib ntawm no yog qhov chaw uas luag tso nws lub cev cia. Nej cia li rov qab mus qhia rau nws cov thwjtim thiab hais rau Petus hais tias, ‘Nws yuav ua nej ntej mus rau pem Kalilais, nej yuav ntsib nws ped raws li nws tau qhia rau nej lawm.’ ” Cov pojniam ntawd txawm tawm hauv lub qhov ntxa khiav rov qab los, ntshai ua ibce tshee hnyo. Lawv tsis qhia rau leejtwg li, rau qhov lawv ntshai heev. [ Hnub ib uas yog Hnubkaj thaum sawv ntxov uas Yexus sawv hauv qhov tuag rov qab los, Yexus xub los tshwm rau Malis Madalas pom. Tus Malis no yog tus uas thaud raug xya tus dab thiab Yexus ntiab cov dab ntawd tawm lawm. Cov pojniam mus cuag Petus thiab nws cov phoojywg thiab qhia txhua yam uas Yexus hais rau Petus lawv. Nws mus qhia tej uas nws pom rau Yexus cov phoojywg. Thaum ntawd lawv tabtom nyuaj siab thiab quaj ntsuag; Tom qab ntawd Yexus txib nws cov thwjtim mus qhia txojkev ncaj ncees thiab txojkev cawm dim uas nyob mus ibtxhis thoob plaws sab hnubtuaj mus rau sab hnubpoob]. lawv hnov Malis hais tias Yexus rov muaj txojsia thiab Malis twb pom Yexus lawm los lawv tsis ntseeg Malis tej lus li. Tom qab ntawd Yexus los tshwm rau ob tug thwjtim pom, thaum nkawd tabtom taug kev yuav mus pem yajsab, tiamsis nws lub cev hloov lawm. Nkawd rov qab los qhia tej no rau cov thwjtim mloog, tiamsis lawv tsis ntseeg nkawd tej lus li. Thaum kawg Yexus los tshwm rau kaum ib tug thwjtim pom thaum lawv tabtom noj mov. Yexus cem cov thwjtim, rau qhov lawv tsis ntseeg; lawv muaj lub siab tawv thiab tsis ntseeg tej lus uas cov neeg hais tias lawv twb pom Yexus sawv rov muaj sia lawm. Yexus hais rau cov thwjtim hais tias, “Nej cia li mus thoob plaws lub ntiajteb no thiab qhia Txojmoo Zoo kom sawvdaws hnov. Tus uas ntseeg thiab ua kevcai raus dej yuav dim, tiamsis tus uas tsis ntseeg yuav raug txim. Cov uas ntseeg yuav tau lub hwjchim ua tej txujci tseemceeb: lawv yuav tuav kuv lub npe ntiab tau dab tawm; lawv yuav hais tau tej lus txawv txawv. Yog lawv ntes nab los nab yuav tsis tom lawv. Yog lawv haus tej tshuaj muaj taug los lawv yuav tsis tuag; thaum lawv cev tes tuav cov neeg muaj mob, cov neeg ntawd yuav zoo.” Thaum Tswv Yexus qhia lawv tas, Vajtswv txawm coj Yexus mus rau saum ntuj ceebtsheej lawm, thiab nws mus zaum ntawm Vajtswv sab xis. Cov thwjtim txawm mus qhia thoob plaws txhua qhov, thiab tus Tswv nrog lawv ua haujlwm; nws pub hwjchim rau lawv ua tau tej txujci tseemceeb, sawvdaws thiaj paub hais tias tej lus uas lawv qhia yeej tseeb tiag.] [ The-aufilaus, muaj ntau leej tau sau qhia tej uas twb muaj hauv peb lawm, raws li uas muaj qee leej pom tej ntawd thaum nyuam qhuav pib muaj los, lawv yog cov uas qhia txojmoo zoo thiab qhia tej ntawd rau peb paub. Kuv twb ua tib zoo saib tej ntawd txhij txhua thaum hauvpaus los lawm. Yog li ntawd, The-aufilaus, koj yog tus uas paub qabhau, kuv thiaj sau tej ntawd txhua zaj, txij thaum hauvpaus mus txog thaum kawg rau koj paub. Koj thiaj yuav paub tseeb txhua zaj uas lawv qhia rau koj lawm. Lub sijhawm uas Helauj ua vajntxwv kav lub xeev Yudas, muaj ib tug povthawj hu ua Xakhaliyas, nws yog Anpiyas pab povthawj. Nws tus pojniam hu ua Elixanpes. Elixanpes yog Aloos ib tug xeebntxwv. Vajtswv pom hais tias nkawd yog neeg ncaj ncees, mloog Vajtswv lus thiab ua raws li Vajtswv txoj kevcai txhua nqe, tsis muaj ib qho uas luag yuav thuam tau nkawd li. Nkawd tsis muaj menyuam, rau qhov Elixanpes yeej ibtxwm xeeb tsis taus tub, thiab nkawd twb laus laus lawm. Muaj ib hnub Xakhaliyas tabtom ua nws tes haujlwm hauv lub Tuamtsev raws li cov povthawj niaj hnub ua. Raws li cov povthawj txoj kevcai, lawv rho ntawv tau Xakhaliyas mus hlawv hmoov tshuaj tsw qab rau saum lub thaj hauv lub Tuamtsev. Yog li ntawd, nws thiaj mus rau hauv tus Tswv lub Tuamtsev, lub sijhawm uas Xakhaliyas hlawv hmoov tshuaj tsw qab, cov neeg nyob sab nraud thov Vajtswv. Tus Tswv ib tug timtswv los sawv ntawm lub thaj uas hlawv hmoov tshuaj tsw qab sab xis. Thaum Xakhaliyas pom dheev tus timtswv ntawd, nws poob siab thiab ntshai kawg li. Tiamsis tus timtswv hais rau Xakhaliyas hais tias, “Koj tsis txhob ntshai! Vajtswv twb hnov koj tej lus thov lawm. Koj tus pojniam yuav yug ib tug metub rau koj. Koj yuav tis nws lub npe hu ua Yauhas. Thaum yug tau tus metub ntawd, koj yuav zoo siab kawg li, thiab yuav muaj neeg coob coob nrog koj zoo siab, rau qhov tus Tswv suav hais tias, nws yog ib tug neeg tseemceeb. Nws yuav tsis haus cawv txiv hmab lossis cawv ntxwg hlo li. Nws yuav puv npo Vaj Ntsujplig tus Dawbhuv hauv nruab thiab los, nws yuav coj cov Yixalayees coob leej rov los cuag tus Tswv uas yog lawv tus Vajtswv. Nws yuav muaj tswvyim thiab muaj hwjchim ib yam li Eliyas tus uas cev Vajtswv lus, nws yuav ua tus Tswv ntej mus ua kom tej txiv tub rov sib haum; nws yuav ua kom cov neeg uas tawv ncauj hloov ua neeg ncaj ncees; thiab nws yuav npaj ib cov neeg rau tus Tswv.” Xakhaliyas nug tus timtswv ntawd hais tias, “Yuav ua li cas kuv thiaj paub tej uas koj hais ko? Kuv twb laus heev, thiab kuv tus pojniam los twb laus laus lawm thiab.” Tus timtswv teb hais tias, “Kuv yog Khali-ees, kuv nyob ntawm Vajtswv xubntiag, Vajtswv txib kuv los qhia txoj xov zoo no rau koj. Thaum txog lub sijhawm lawm, yeej yuav muaj raws li kuv hais no tiag, tiamsis vim koj tsis ntseeg kuv tej lus, koj yuav hais tsis tau lus mus txog hnub uas muaj raws li tej uas kuv twb hais rau koj lawm.” Thaum ntawd cov neeg uas nyob sab nraud tos Xakhaliyas, lawv xav tsis thoob xyov yog ua li cas Xakhaliyas yuav nyob hauv lub Tuamtsev ntev ua luaj li. Thaum nws tawm los, nws hais tsis tau lus rau lawv, nws ua ruam piav rau lawv xwb. Lawv xav hais tias tej zaum yog muaj ib yam dabtsi tshwm rau nws pom hauv lub Tuamtsev. Thaum Xakhaliyas ua haujlwm hauv lub Tuamtsev tas lawm, nws rov qab mus tsev. Tom qab ntawd tsis ntev, Elixanpes uas yog Xakhaliyas tus pojniam txawm xeeb tub, Elixanpes nyob hauv tsev tau tsib lub hlis, nws tsis tawm mus qhov twg li. Elixanpes hais tias, “Nimno tus Tswv pab kuv thiab nws ua rau kuv tsis txajmuag rau leejtwg li lawm!” Thaum Elixanpes xeeb tub tau rau lub hlis lawm, Vajtswv txib nws tus timtswv Khali-ees los rau hauv lub nroog Naxales uas nyob hauv lub xeev Kalilais. Tus timtswv ntawd los cuag ib tug nkaujxwb hu ua Malis, tus uas Yauxej uas yog Vajntxwv Daviv tus xeebntxwv twb qhaib tseg lawm. Tus timtswv los hais rau Malis hais tias, “Koj yuav tau zoo nyob kaj siab lug! Tus Tswv nrog nraim koj nyob thiab foom koob hmoov ntau kawg rau koj lawm!” Thaum Malis hnov tus timtswv hais li ntawd, nws nyuaj siab heev, nws xav tsis thoob li, xyov tus timtswv hais li ntawd, yog hais txog dabtsi. Tus timtswv hais rau Malis hais tias, “Malis, koj tsis txhob ntshai, Vajtswv twb foom koob hmoov rau koj lawm. Koj yuav xeeb tub thiab yuav yug tau ib tug metub, koj yuav tis nws lub npe hu ua Yexus. Nws yuav ua tus tseemceeb, thiab sawvdaws yuav hu nws lub npe hais tias, yog Vajtswv tus uas muaj hwjchim loj kawg nkaus tus Tub. Tus Tswv uas yog Vajtswv yuav tsa nws ua vajntxwv, ib yam li nws yawgkoob Daviv, nws yuav ua vajntxwv kav Yakhauj cov xeebntxwv mus ibtxhis; thiab nws lub tebchaws yuav nyob mus tsis paub kawg li!” Malis nug tus timtswv hais tias, “Kuv yog ib tug nkaujxwb, yuav ua li cas muaj tau li ntawd?” Tus timtswv teb hais tias, “Vaj Ntsujplig tus Dawbhuv yuav los rau saum koj, thiab Vajtswv lub hwjchim yuav roos koj. Vim li no sawvdaws thiaj yuav hu tus metub uas dawbhuv uas yuav yug los ntawd hais tias, nws yog Vajtswv tus Tub. Koj saib koj tus phauj Elixanpes uas sawvdaws hais tias, nws ibtxwm xeeb tsis taus tub, txawm yog nws laus laus lawm los nimno nws twb xeeb tub tau rau lub hlis lawm, rau qhov yeej tsis muaj ib yam dabtsi uas Vajtswv yuav ua tsis tau li.” Malis hais tias, “Kuv yog Vajtswv tus ntxhais qhev, thov kom muaj raws li koj hais ko rau kuv.” Ces tus timtswv txawm ncaim Malis mus lawm. Tsis ntev tom qab ntawd, Malis txawm sawv kev thiab rau siab ntso mus txog ntawm ib lub nroog uas nyob saum laj roob hauv lub xeev Yudas, nws mus rau hauv Xakhaliyas tsev thiab hais noj qab nyob zoo rau Elixanpes. Thaum Elixanpes hnov dheev Malis lub suab hais rau nws, ces nws tus menyuam hauv plab txawm nti cuag dabtsi, thiab Elixanpes puv npo Vaj Ntsujplig tus Dawbhuv, thiab Elixanpes hais nrov nrov rau Malis hais tias, “Koj yog tus uas tau koob hmoov ntau tshaj plaws txhua tus pojniam huv tibsi, thiab koj tus menyuam hauv plab los tau koob hmoov thiab. Vim li cas kuv yuav tau txais txojkev hlub loj npaum li no, kuv tus Tswv leej niam tseem tuaj saib kuv thiab? Thaum kuv hnov dheev tej lus uas koj hais rau kuv, kuv tus menyuam uas nyob hauv kuv plab zoo siab thiab nti cuag dabtsi. Koj yuav zoo siab heev, rau qhov koj twb ntseeg hais tias, yuav muaj raws li tej lus uas tus Tswv hais rau koj lawm.” Malis hais tias, “Kuv lub siab cia li qhuas tus Tswv; Vajtswv uas yog kuv tus Cawmseej, nws ua rau kuv zoo siab kawg li. Rau qhov kuv yog nws ib tug ntxhais qhev uas tsis tseemceeb los nws tseem nco txog kuv thiab! Txij no mus txhua haivneeg yuav hu kuv hais tias, tus uas tau koob hmoov, vim tej uas Vajtswv tus uas muaj hwjchim loj kawg nkaus tau ua rau kuv lawm. Nws lub npe dawbhuv kawg nkaus; Vajtswv hlub txhua tus uas hwm nws ib tiam dhau ib tiam. Nws tsa nws txhais tes uas muaj hwjchim ua kom cov neeg uas khavtheeb tsis sib haum thiab tawg pab tawg pawg. Vajtswv muab cov vajntxwv uas muaj hwjchim txo ntawm lawv lub zwmtxwv, thiab Vajtswv muab cov neeg uas tsis muaj hwjchim tsa rau qhov chaw siab. Vajtswv pub tej zaub mov zoo rau cov neeg uas tshaib nqhis tau noj tsau npo. Nws ntiab cov neeg npluanuj khiav mus tes dawb tes npliag. Nws ua raws li nws tau coglus tseg rau peb cov yawgkoob lawm, thiab nws tau los pab cov neeg Yixalayees uas yog nws cov tubtxib. Nws nco ntsoov hlub Anplahas thiab Anplahas cov xeebntxwv mus ibtxhis li!” Malis nrog Elixanpes nyob yuav luag tau peb lub hlis, nws mam li rov mus tsev. Thaum txog caij uas Elixanpes yug menyuam, nws yug tau ib tug metub. Nws cov kwvtij neejtsa thiab tej neeg zejzog hnov hais tias, tus Tswv foom koob hmoov rau nws lawm, lawv nrog nws zoo siab kawg li. Thaum tus menyuam ntawd muaj yim hnub lawm, lawv tuaj muab nws ua kevcai txiav tawv, thiab lawv yuav tis nws lub npe hu ua Xakhaliyas raws li nws txiv. Tiamsis Elixanpes teb hais tias, “Tsis yog li ntawd! Yuav tsum tis nws lub npe hu ua Yauhas.” Lawv hais rau Elixanpes hais tias, “Koj twb tsis muaj ib tug kwvtij npe hu li ntawd los sav!” Lawv txawm ua ruam piav rau tus metub leej txiv nug saib nws nyiam tis tus metub ntawd lub npe hu li cas. Xakhaliyas kom lawv muab ib daim ntawv los rau nws, thiab nws sau hais tias, “Tus metub no lub npe hu ua Yauhas.” Lawv xav tsis thoob li! Tamsim ntawd Xakhaliyas txawm rov hais tau lus, thiab nws ua Vajtswv tsaug. Tej neeg zejzog ntshai kawg li, thiab zaj ntawd txawm nrov ncha mus thoob plaws tej zejzog uas nyob pem tej laj roob hauv lub xeev Yudas. Cov neeg uas hnov zaj no txawm khaws zaj no cia rau nruab siab thiab lawv sib tham hais tias, “Tus menyuam no loj hlob los nws yuav ua dabtsi?” Rau qhov Vajtswv lub hwjchim nrog nraim tus menyuam no. Xakhaliyas uas yog Yauhas txiv puv npo Vaj Ntsujplig tus Dawbhuv, thiab nws qhia ib zaj uas yuav muaj los yav tom ntej hais tias, “Peb cia li ua tus Tswv uas yog cov Yixalayees tus Vajtswv tsaug! Rau qhov nws los pab nws haivneeg thiab nws twb tso lawv dim lawm. Vajtswv txib ib tug Cawmseej uas muaj hwjchim los pab peb. Nws yog Vajtswv tus tubtxib Daviv ib tug xeebntxwv. Raws li Vajtswv tau coglus tseg rau cov cev Vajtswv lus uas dawbhuv thaum ub los lawm hais tias, nws yuav cawm kom peb dim ntawm peb cov yeebncuab txhais tes. Thiab dim ntawm txhua tus uas ntxub peb. Vajtswv hais tias, nws yeej hlub peb cov yawgkoob thiab yeej nco ntsoov tej lus tseemceeb uas nws tau cog tseg lawm. kom peb ua tau neeg dawbhuv thiab ncaj ncees raws li Vajtswv lub siab nyiam mus tas peb tiam neej. “Kuv tus metub, sawvdaws yuav hu koj hais tias, koj yog ib tug cev Vajtswv tus uas muaj hwjchim loj kawg nkaus lus. Koj yuav ua tus Tswv ntej mus kho kev tos nws, Thiab qhia rau Vajtswv haivneeg, kom lawv paub hais tias, Vajtswv yuav zam lawv lub txim kom lawv dim. Rau qhov peb tus Vajtswv yog tus uas hlub peb kawg nkaus. Nws txojkev cawm dim ci tuaj rau peb ib yam li tus duab tshav ntuj ci thaum sawv ntxov, thiab yuav ci mus rau txhua tus uas nyob hauv qhov tsaus ntuj uas yog txojkev tuag, thiab yuav coj tau peb mus taug txojkev uas peb yuav tau nyob kaj siab lug.” Tus metub ntawd loj hlob zoo thiab nws muaj tswvyim heev zuj zus, thiab nws nyob tom roob mojsab qhua mus txog hnub uas nws tawm los rau cov Yixalayees pom. Lub sijhawm ntawd Vajntxwv Aunkuxataus hais rau cov pejxeem uas nyob thoob plaws txhua lub tebchaws uas yog cov nomtswv Loos kav, kom sawvdaws tuaj sau npe. Thawj zaug uas muaj sau npe no, yog lub sijhawm uas Kuleni-us ua nom kav tebchaws Xilias. Txhua tus nyias txawm mus sau npe rau hauv nyias lub nroog. Yauxej tawm hauv lub nroog Naxales uas nyob pem Kalilais mus rau hauv lub nroog Npelehees uas nyob nram lub xeev Yudas uas thaum ub yug Vajntxwv Daviv. Yauxej mus rau hauv lub nroog ntawd, rau qhov nws yog Daviv xeebntxwv. Yauxej coj Malis tus uas nws twb qhaib lawm nrog nws mus sau npe thiab. Thaum ntawd Malis suab ib plab menyuam. Thaum nkawd tseem nyob hauv lub nroog Npelehees, twb txog caij uas Malis yug menyuam lawm. Malis yug nws tus metub hlob, nws muab khaubncaws qhwv tus menyuam thiab muab tso pw rau hauv ib lub dab zaub, rau qhov tej tsev so, neeg twb so puv tas lawm. Nyob thaj tsam ntawd muaj ib cov neeg yug yaj, lawv mus pw zov lawv cov yaj tom teb, thaum tsaus ntuj, tus Tswv ib tug timtswv los cuag lawv, thiab tus Tswv lub tshwjchim ci ntsa iab tuaj rau lawv, lawv poob siab thiab ntshai kawg li, tiamsis tus timtswv ntawd hais rau lawv hais tias, “Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub. Hnub no nej tus Cawmseej twb yug los rau hauv Daviv lub nroog lawm, nws yog Khetos uas yog tus Tswv! Nej yuav pom ib tug menyuam mos qhwv khaubncaws pw hauv lub dab zaub, qhov ntawd yog lub cim uas qhia hais tias, tus ntawd yog tus uas kuv hais.” Tamsim ntawd muaj ib pab timtswv ceebtsheej coob coob los nrog tus timtswv ntawd hu nkauj qhuas Vajtswv li no: “Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!” Thaum cov timtswv ncaim lawv rov qab mus rau saum ntuj ceebtsheej lawm, cov yug yaj txawm sib tham hais tias, “Peb cia li mus rau hauv lub nroog Npelehees thiab mus saib tej uas tus Tswv qhia rau peb lawm.” Lawv ceev nrooj mus rau hauv lub nroog, lawv pom Malis thiab Yauxej, thiab pom tus menyuam pw hauv ib lub dab zaub. Thaum cov yug yaj pom tus menyuam lawm, lawv qhia zaj uas tus timtswv ceebtsheej qhia rau lawv hais txog tus menyuam ntawd rau Malis thiab Yauxej mloog. Txhua tus uas hnov zaj uas cov yug yaj hais ntawd, sawvdaws xav tsis thoob li. Malis khaws tej lus ntawd thiab xav ntsoov rau nruab siab. Thaum cov yug yaj rov qab mus, lawv hu nkauj qhuas Vajtswv, rau qhov lawv hnov thiab pom raws li tus timtswv tau qhia rau lawv lawm. Thaum tus menyuam ntawd muaj yim hnub lawm, yog hnub uas muab nws ua kevcai txiav tawv raws li txoj kevcai txiav, thiab tis nws lub npe hu ua Yexus, raws li tus timtswv ceebtsheej qhia tseg rau Malis thaum tseem tsis tau xeeb tus metub ntawd. Thaum txog lub sijhawm uas Yauxej thiab Malis mus ua kevcai ntxuav raws li Mauxes txoj Kevcai, nkawd txawm coj tus metub Yexus mus pem lub nroog Yeluxalees thiab muab nws fij rau Vajtswv. Raws li muaj lus sau tseg rau hauv tus Tswv txoj kevcai lawm hais tias, “Yuav tsum muab txhua tus tub hlob fij rau tus Tswv.” Thiab nkawd nqa ib nkawm nquab liabrwg lossis nquab nyeg mus fij raws li twb muaj lus sau tseg rau hauv tus Tswv txoj kevcai lawm. Lub sijhawm ntawd muaj ib tug txivneej hu ua Xime-oos nyob hauv lub nroog Yeluxalees. Nws yog ib tug neeg ncaj ncees, nws hwm Vajtswv thiab niaj hnub tos lub sijhawm uas Vajtswv los cawm cov neeg Yixalayees. Vaj Ntsujplig tus Dawbhuv nrog nraim Xime-oos, thiab qhia rau nws hais tias nws yuav tsis tuag ua ntej uas nws pom tus Mexiyas uas Vajtswv coglus tseg. Hnub ntawd Vaj Ntsujplig coj Xime-oos mus rau hauv lub Tuamtsev. Thaum ntawd Yauxej thiab Malis coj nkawd tus metub Yexus tuaj ua kevcai hauv lub Tuamtsev raws li txoj kevcai qhia tseg, Xime-oos muab tus metub los puag thiab ua Vajtswv tsaug hais tias, “Tus Tswv, nimno koj twb ua raws li koj coglus tseg lawm, thov koj coj kuv uas yog koj tus tubtxib mus kaj siab lug, rau qhov kuv lub qhovmuag twb pom koj txojkev cawm dim uas koj npaj rau txhua haivneeg lawm. Nws yog lub teeb uas yuav ci mus rau lwm haivneeg pom kev, thiab yuav ua rau cov neeg Yixalayees uas yog koj haivneeg tau ntsejmuag.” Thaum Yexus niam thiab txiv hnov Xime-oos hais txog tus metub li ntawd, nkawd xav tsis thoob li. Xime-oos foom koob hmoov rau lawv thiab hais rau Malis uas yog Yexus niam hais tias, “Vajtswv xaiv tus metub no los ua kom cov Yixalayees ntau leej ntog thiab ntau leej sawv. Nws yog ib tug tseemceeb uas Vajtswv txib los, thiab yuav muaj ntau leej tawmtsam nws, thiab nws yuav muab tej uas neeg xav hauv nruab siab qhia rau sawvdaws paub, thiab yuav mob koj siab ib yam li rab ntaj chob.” Tamsim ntawd Anas txawm tuaj txog, thiab nws ua Vajtswv tsaug thiab hais txog tus metub ntawd rau txhua tus uas tabtom tos Vajtswv los cawm cov neeg uas nyob hauv lub nroog Yeluxalees kom dim mloog. Thaum Yauxej thiab Malis ua txhua yam tiav raws li tus Tswv txoj kevcai lawm, nkawd rov qab mus tsev rau pem lub nroog Naxales uas nyob hauv lub xeev Kalilais. Tus metub ntawd loj hlob zoo, nws muaj tswvyim thiab Vajtswv foom koob hmoov rau nws. Yexus niam thiab txiv niaj xyoo mus ua kevcai Hla Dhau nram lub nroog Yeluxalees. Thaum Yexus hnubnyoog muaj kaum ob xyoos, lawv txawm rov mus ua kevcai nram lub nroog Yeluxalees raws li nkawd ibtxwm ua los lawm. Thaum dhau lub sijhawm ua kevcai Hla Dhau lawm, nkawd rov qab mus tsev, tiamsis tus metub Yexus tseem nyob hauv lub nroog Yeluxalees. Nws niam thiab nws txiv tsis paub. Nkawd xav hais tias Yexus nrog cov neeg uas nrog nkawd tuaj rov qab mus lawm, nkawd mus tau ib hnub ke, nkawd mam li nrhiav saib nws puas nrog nkawd cov kwvtij thiab cov phoojywg. Tiamsis nkawd nrhiav tsis pom nws, nkawd thiaj rov qab mus nrhiav nram lub nroog Yeluxalees. Ces hnub peb nkawd thiaj nrhiav tau nws nyob hauv lub Tuamtsev, nws nrog cov xibhwb zaum ua ke, nws mloog lawv qhia thiab nug lawv. Txhua tus uas hnov nws teb, xav tsis thoob rau nws tej kev txawj ntse ntawd li. Thaum Yexus niam thiab txiv pom nws, nkawd kuj xav tsis thoob li thiab. Nws niam txawm hais rau nws hais tias, “Metub, ua li cas koj yuav ua li no rau wb? Koj txiv wb nrhiav koj thiab txhawj koj kawg li.” Nws teb nkawd hais tias, “Neb yuav nrhiav kuv ua dabtsi? Neb tsis paub hais tias kuv yuav nyob hauv kuv Txiv lub tsev no los?” Tiamsis nkawd tsis totaub tej lus uas nws hais ntawd. Yexus nrog nkawd rov qab mus rau pem lub nroog Naxales, thiab nws mloog nkawd lus. Nws niam khaws tej lus ntawd rau nruab siab. Yexus loj hlob zoo, muaj tswvyim, nws ua haum Vajtswv siab thiab haum neeg siab. Thaum Tinpeli-us ua vajntxwv kav tebchaws tau kaum tsib xyoos lawm, lub sijhawm ntawd Pauti-us Philaj ua tswvxeev kav lub xeev Yudas. Helauj ua nom kav lub xeev Kalilais thiab Helauj tus kwv Filis ua nom kav lub xeev Itule-as thiab lub xeev Takaunitis; Lixaniyas ua nom kav lub xeev Anpilees, Anas thiab Kaiyafas ua ob tug Povthawj Hlob. Lub sijhawm ntawd, Vajtswv qhia Vajtswv Txojlus rau Xakhaliyas tus tub Yauhas tom roob mojsab qhua. Yog li ntawd, Yauhas thiaj mus qhuab qhia thoob plaws cheebtsam uas nyob ntawm tus Dej Yauladees hais tias, “Nej yuav tsum tso nej tej kev txhaum tseg thiab ua kevcai raus dej, Vajtswv thiaj yuav zam txim rau nej.” Qhov no muaj raws li Yaxayas tus uas cev Vajtswv lus sau tseg rau hauv nws phau ntawv hais tias, “Muaj ib tug hais nrov nrov tom roob mojsab qhua hais tias, ‘Cia li kho kev tos tus Tswv; kho kev kom ncaj nws yuav los! Txhub txhua lub kwjha kom puv, khawb txhua lub roob thiab txhua lub pov roob kom tiaj. Kho tej kev nkhaus kom ncaj, muab qhov siab thiab qhov qis pheej kom tiaj xwm yeem. Txhua haivneeg yuav pom Vajtswv txojkev cawm dim!’ ” Muaj neeg coob coob tuaj cuag Yauhas kom Yauhas muab lawv ua kevcai raus dej. Yauhas hais rau lawv hais tias, “Cov niag nab! Leejtwg qhia rau nej hais tias, nej yuav khiav dim Vajtswv txojkev txiav txim uas twb los yuav txog? Nej yuav tsum ua nej lub neej rau sawvdaws pom hais nej twb tso nej tej kev txhaum tseg lawm. Nej tsis txhob khav hais tias, Anplahas yog nej yawgkoob. Kuv qhia rau nej hais tias, txawm yog Vajtswv muab tej pobzeb no los ua Anplahas cov xeebntxwv los nws yeej ua tau! Nimno twb muab rab taus tso rau ntawm lub hauvpaus ntoo lawm, twb yuav ntov tus ntoo; txhua tsob ntoo uas tsis txi cov txiv zoo, luag yuav muab ntov thiab muab pov rau hauv cub hluavtaws.” Cov neeg coob coob ntawd nug Yauhas hais tias, “Yog li ntawd, peb yuav ua li cas?” Yauhas teb lawv hais tias, “Yog leejtwg muaj ob lub tsho, yuav tsum muab ib lub pub rau tus uas tsis muaj, thiab yog leejtwg muaj mov muaj zaub, nws yuav tsum muab faib rau tus uas tsis muaj.” Cov neeg uas sau se muaj qee leej tuaj ua kevcai raus dej, thiab lawv nug Yauhas hais tias, “Xibhwb peb yuav ua li cas?” Yauhas teb hais tias, “Nej yuav tsum sau raws li kevcai xwb, tsis txhob sau tshaj.” Cov tubrog muaj qee leej nug Yauhas ib yam nkaus hais tias, “Ua li peb ne, peb yuav ua li cas?” Yauhas teb hais tias, “Nej tsis txhob yuam leejtwg lossis ntxias luag nyiaj yuav. Nej tau nyiaj hli npaum li cas, cia li txaus siab yuav li ntawd xwb.” Cov neeg uas cia siab ntsoov tos tus cawmseej xav hais tias, Yauhas yog tus Mexiyas ntag. Yauhas hais rau lawv hais tias, “Kuv muab nej ua kevcai raus dej, tiamsis tus uas yuav lawv kuv qab los, nws muaj hwjchim loj dua kuv, kuv twb tsis tsimnyog daws nws txoj nyuag hlua khau. Nws yuav muab nej ua kevcai raus los ntawm Vaj Ntsujplig tus Dawbhuv thiab ntawm hluavtaws. Nws tuav rawv rab ntxuam, nws yuav ntxuaj nws pawg nplej, kom cov npluag ya tawm huv tibsi. Nws yuav muab cov nplej zoo ntim rau hauv nws lub txhab, tiamsis nws yuav muab cov npluag pov rau hauv cub hluavtaws uas cig tsis paub tuag.” Yauhas qhia Txojmoo Zoo ntau zaj tsis sib thooj ntuas cov neeg ntawd, kom lawv hloov lawv lub siab. Tiamsis Yauhas cem Helauj tus uas ua nom kav lub xeev Kalilais, rau qhov Helauj yuav Helaudias uas yog Helauj tus kwv tus pojniam, thiab Helauj ua ntau yam phem. Helauj tseem ua ib qhov phem ntxiv uas yog nws ntes Yauhas coj mus kaw rau hauv tsev lojcuj. Tom qab uas sawvdaws ua kevcai raus dej tas lawm, Yexus ua kevcai raus dej thiab. Thaum Yexus tabtom thov Vajtswv, rooj ntug txawm qhib plho, thiab Vaj Ntsujplig tus Dawbhuv uas muaj lub cev zoo li tus nquab los rau saum Yexus. Thiab muaj ib lub suab hais saum ntuj tuaj rau Yexus hais tias, “Koj yog kuv tus Tub uas kuv hlub, kuv txaus siab rau koj.” Thaum Yexus pib ua haujlwm, nws hnubnyoog muaj kwvlam li peb caug xyoo. Raws li sawvdaws xav, Yexus yog Yauxej tub, Yauxej yog Helis tub, Helis yog Mathas tub, Mathas yog Levis tub, Levis yog Melekhis tub, Melekhis yog Yanenais tub, Yanenais yog Yauxej tub, Yauxej yog Matatiyas tub, Matatiyas yog Amaus tub, Amaus yog Nahus tub, Nahus yog Exalis tub, Exalis yog Nakhais tub, Nakhais yog Ma-as tub, Ma-as yog Matatiyas tub, Matatiyas yog Xemis tub, Xemis yog Yauxes tub, Yauxes yog Yaudas tub, Yaudas yog Yau-anas tub, Yau-anas yog Lexas tub, Lexas yog Xelunpanpees tub, Xelunpanpees yog Se-atiyees tub, Se-atiyees yog Nelis tub, Nelis yog Melekhis tub. Melekhis yog Adis tub, Adis yog Kauxas tub, Kauxas yog Emadas tub, Emadas yog Eles tub, Eles yog Yausuas tub, Yausuas yog Eli-exes tub, Eli-exes yog Yaulees tub, Yaulimes yog Mathas tub, Mathas yog Levis tub, Levis yog Xime-oos tub, Xime-oos yog Yudas tub, Yudas yog Yauxej tub, Yauxej yog Yaunames tub, Yaunames yog Eliyakees tub, Eliyakees yog Mele-as tub, Mele-as yog Menas tub, Menas yog Matathas tub, Matathas yog Nathas tub, Nathas yog Daviv tub. Daviv yog Yexais tub, Yexais yog Aunpes tub, Aunpes yog Npau-am tub, Npau-am yog Xalemoos tub, Xalemoos yog Nasoos tub, Nasoos yog Aminadas tub, Aminadas yog Amis tub, Amis yog Anis tub, Anis yog Heloos tub, Heloos yog Peles tub, Peles yog Yudas tub, Yudas yog Yakhauj tub, Yakhauj yog Ixaj tub, Ixaj yog Anplahas tub, Anplahas yog Telas tub, Telas yog Nahaus tub, Nahaus yog Xelus tub, Xelus yog Le-us tub, Le-us yog Pelej tub, Pelej yog Enpes tub, Enpes yog Selas tub, Selas yog Kainas tub, Kainas yog Afaxas tub, Afaxas yog Xees tub, Xees yog Nau-es tub, Nau-es yog Lamej tub, Lamej yog Methuxelas tub, Methuxelas yog Enauj tub, Enauj yog Yales tub, Yales yog Mahalalees tub, Mahalalees yog Kenas tub, Kenas yog Enauses tub, Enauses yog Xej tub, Xej yog Adas tub, Adas yog Vajtswv tub. Thaum Yexus rov qab ntawm tus Dej Yauladees mus, nws puv npo Vaj Ntsujplig tus Dawbhuv, thiab Vaj Ntsujplig coj nws mus rau tom roob mojsab qhua, dab Ntxwgnyoog sim Yexus siab tau plaub caug hnub. Lub sijhawm ntawd Yexus tsis tau noj ib yam dabtsi li, thaum dhau plaub caug hnub ntawd lawm, nws tshaib plab heev. Dab Ntxwgnyoog hais rau Yexus hais tias, “Yog koj yog Vajtswv tus Tub tiag, koj cia li hais kom lub pobzeb no txia ua mov.” Yexus teb hais tias, “Vajtswv Txojlus hais tias, ‘Tsis yog mov xwb thiaj cawm tau neeg txojsia.’ ” Tom qab ntawd, dab Ntxwgnyoog txawm coj Yexus mus rau saum ib qhov chaw siab siab, thiab ua rau Yexus pom tagnrho tej tebchaws hauv qab ntuj no. Dab Ntxwgnyoog hais rau Yexus hais tias, “Kuv yuav muab hlo lub hwjchim thiab ib puas tsav yam uas twb muab rau kuv lawm huv tibsi rau koj, rau qhov tej ntawd yog kuv tug, kuv yuav muab rau leejtwg los tau. Yog koj txhos caug pe kuv, ib puas tsav yam ntawd yuav yog koj tug tagnrho.” Yexus teb hais tias, “Vajtswv Txojlus sau qhia tseg hais tias, ‘Nej yuav tsum pehawm tus Tswv uas yog nej tus Vajtswv tib leeg thiab ua nws tes haujlwm xwb!’ ” Tom qab ntawd, dab Ntxwgnyoog txawm coj Yexus mus rau hauv lub nroog Yeluxalees, thiab nws coj Yexus nce mus rau saum lub Tuamtsev qhov uas siab tshaj plaws, nws hais rau Yexus hais tias, “Yog koj yog Vajtswv tus Tub tiag, koj cia li dhia rau hauv av, rau qhov Vajtswv Txojlus hais tias, ‘Vajtswv yuav kom nws cov timtswv los tsomkwm koj.’ Thiab tseem muaj ib los hais ntxiv tias, ‘Lawv ob txhais tes yuav hwj koj, thiab yuav tsis pub koj ob txhais kotaw tsoo pobzeb li.’ ” Yexus teb dab Ntxwgnyoog hais tias, “Vajtswv Txojlus hais tias, ‘Koj tsis txhob sim tus Tswv uas yog koj tus Vajtswv siab.’ ” Thaum dab Ntxwgnyoog dag Yexus txhua yam tas lawm, nws txawm ncaim Yexus mus txog thaum rov muaj sijhawm. Tom qab ntawd, Yexus rov qab mus rau pem Kalilais, thiab Vaj Ntsujplig tus Dawbhuv lub hwjchim nrog nraim nws. Nws lub moo nrov ncha mus thoob plaws cheebtsam ntawd. Yexus mus qhia hauv lawv tej tsev sablaj, thiab txhua tus uas hnov nws qhia, qhuas nws kawg li. Tom qab ntawd, Yexus mus txog hauv lub nroog Naxales uas nws loj hlob. Hnub Xanpataus nws mus rau hauv lub tsev sablaj raws li nws ibtxwm mus. Nws sawv ntsug nyeem Vajtswv Txojlus rau sawvdaws mloog, luag muab thooj ntawv uas Yaxayas tus uas cev Vajtswv lus sau los rau Yexus. Yexus nthuav thooj ntawv ntawd tau zaj uas hais tias, “Tus Tswv tus Ntsujplig nrog nraim kuv, Rau qhov nws tsa kuv ua tus qhia txojmoo zoo rau cov neeg txomnyem. Vajtswv txib nws mus qhia txojkev cawm dim rau cov neeg uas raug kaw, thiab kho cov neeg digmuag kom rov pom kev, thiab tso cov uas raug kev tsimtxom kom dim thiab qhia rau sawvdaws paub lub sijhawm uas tus Tswv yuav los cawm nws haivneeg.” Thaum Yexus nyeem tas, nws muab thooj ntawv ntawd kauv cia thiab muab rau tus uas saib tej ntawv ntawd, thiab nws txawm zaum. Txhua tus uas nyob hauv lub tsev sablaj saib ntsoov Yexus, Yexus pib qhia lawv hais tias, “Vajtswv Txojlus uas hnub no nej hnov twb tiav lawm.” Cov neeg ntawd qhuas thiab xav tsis thoob rau tej lus zoo uas nws hais ntawd. Lawv hais tias, “Tus no tsis yog Yauxej tus tub los?” Yexus hais rau lawv tias, “Kuv paub hais tias nej yeej yuav hais lo pajlug no rau kuv hais tias, ‘Koj yog tus kws tshuaj, koj yuav tsum xub kho koj kom zoo tso.’ Thiab nej yuav hais rau kuv hais tias, koj sim ua tej txujci uas peb hnov koj ua pem lub nroog Kapena-us, rau hauv koj lub nroog no rau peb saib.” Yexus hais rau lawv tias, “Kuv qhia tseeb rau nej hais tias, yeej tsis muaj ib tug cev Vajtswv lus uas cov neeg nyob hauv nws lub zos yuav hwm nws. Nej mloog kuv hais: Kuv qhia tseeb rau nej hais tias, thaum lub sijhawm uas Eliyas nyob, muaj tej pojntsuam coob coob nyob hauv tebchaws Yixalayees. Thaum ntawd nag tsis los tau peb xyoos thiab rau hli, thiab muaj kev tshaib plab thoob plaws lub tebchaws. Vajtswv tsis tau txib Eliyas mus pab cov pojntsuam uas nyob hauv tebchaws Yixalayees ib tug li, tiamsis tsuas txib Eliyas mus pab tus pojntsuam uas nyob hauv lub nroog Xalefas hauv cheebtsam Xidoos xwb. Thiab thaum lub sijhawm uas Elisas tus uas cev Vajtswv lus nyob, muaj cov neeg mob ruas coob coob nyob hauv tebchaws Yixalayees, tiamsis tsis muaj ib tug zoo ruas li, tsuas yog Na-amas tus uas yog neeg Xilias tib leeg thiaj zoo ruas xwb.” Thaum cov neeg uas nyob hauv lub tsev sablaj hnov Yexus hais li ntawd, sawvdaws chim heev. Lawv txawm sawv tsees muab Yexus thawb ntiag tawm hauv lub nroog mus, thiab coj Yexus mus rau saum hauv roob, yuav muab Yexus thawb rau hauv qab tsuas, rau qhov lub nroog ntawd nyob saum roob, tiamsis Yexus cia li phoom ntiag phua plhawv lawv thiab khiav mus lawm. Tom qab ntawd, Yexus mus rau pem lub nroog Kapena-us uas nyob hauv lub xeev Kalilais, hnub Xanpataus Yexus qhia cov neeg sawvdaws. Cov neeg ntawd xav tsis thoob rau tej uas Yexus qhia, rau qhov Yexus tej lus qhia muaj hwjchim heev. Muaj ib tug txivneej raug dab tuaj rau hauv lub tsev sablaj, nws qw nrov nrov hais tias, “Yexus uas yog neeg Naxales, koj tuaj ua kom peb puastsuaj los? Kuv paub koj yog leejtwg, koj yog Vajtswv tus Tub uas dawbhuv!” Yexus hais tawv tawv rau dab hais tias, “Koj tsis txhob hais lus, koj cia li tawm hauv tus txivneej no mus!” Dab txawm ua rau tus txivneej ntawd ntog kiag rau hauv av tabmeeg sawvdaws, ces dab txawm tawm plaws lawm, tsis ua rau tus txivneej ntawd raug mob li. Cov neeg coob coob ntawd xav tsis thoob thiab sib tham hais tias, “Tej lus ntawd yog hais li cas? Ua li cas nws tej lus yuav muaj hwjchim ua luaj li, thiab ntiab tau dab tawm!” Yexus lub moo txawm nrov ncha mus thoob plaws cheebtsam ntawd. Yexus tawm hauv lub tsev sablaj thiab mus rau hauv Ximoos tsev. Ximoos niamtais ua npaws nws kub cev heev. Lawv thov kom Yexus pab nws. Yexus mus sawv ntawm lub txaj uas Ximoos niamtais pw ib sab, thiab hais kom tus npaws cia li tu. Ces tus npaws txawm tu thiab nws sawv tsees tamsim ntawd los ua zaub ua mov rau Yexus lawv noj. Thaum hnub poob qho lawm, txhua tus uas muaj tej kwvtij uas muaj mob, lawv coj tuaj cuag Yexus: Yexus cev tes tuav txhua tus, ces lawv tej mob txawm zoo huv tibsi lawm. Thiab muaj ntau tus uas raug dab, Yexus ntiab dab tawm huv tibsi. Cov dab ntawd hais nrov nrov hais tias, “Koj yog Vajtswv tus Tub!” Tiamsis Yexus txwv tsis pub dab hais lus, rau qhov dab paub hais tias Yexus yog tus Mexiyas. Thaum kaj ntug, Yexus tawm hauv lub nroog mus rau ib qhov chaw uas tsis muaj neeg. Muaj ib pab neeg tuaj nrhiav Yexus, thaum lawv nrhiav tau nws lawm, lawv cheem tsis pub nws mus. Tiamsis nws hais rau lawv hais tias, “Kuv yuav tsum mus qhia Txojmoo Zoo uas hais txog Vajtswv lub Tebchaws rau lwm lub nroog thiab, rau qhov Vajtswv yeej txib kuv los ua tes haujlwm no.” Yexus mus qhuab qhia hauv tej tsev sablaj uas nyob txhua qhov hauv lub xeev Yudas. Muaj ib hnub Yexus nyob nram ntug Hiavtxwv Nkenexales, muaj neeg coob coob sib txiv qev tuaj cuag nws thiab mloog nws qhia Vajtswv Txojlus. Yexus pom ob lub nkoj nres ntawm ntug dej, cov neeg nrhiav ntses twb tawm hauv lawv tej nkoj mus ntxuav lawv tej vas lawm. Yexus nce mus rau hauv ib lub nkoj, lub ntawd yog Ximoos lub. Yexus thov kom Ximoos thawb lub nkoj mus kom nrug deb ntawm ntug dej mentsis. Yexus zaum hauv lub nkoj qhia cov neeg uas tuaj ntawd. Thaum nws qhia tas lawm, nws hais rau Ximoos hais tias, “Cia li nquam koj lub nkoj mus rau tom qhov uas tob tob, muab nej lub vas tso rau hauv dej thiaj yuav mag tau ntses.” Ximoos teb hais tias, “Tus Tswv, peb twb ntaus ib hmo kaj ntug tsis tau ib tug li, tiamsis kuv yuav tso lub vas mus raws li koj hais.” Lawv txawm tso lub vas mus, thiab mag tau ntses ntau kawg li, lub vas yuav luag ntuag. Lawv thiaj co tes kom lawv cov phoojywg uas caij lwm lub nkoj los pab lawv. Cov phoojywg txawm los pab, thiab lawv muab tau ob nkoj ntses puv nkaus, ua rau ob lub nkoj yuav luag tog. Thaum Ximoos Petus pom li ntawd, nws txhos caug ntua ntawm Yexus xubntiag thiab hais tias, “Tus Tswv, thov koj txav deb ntawm kuv. Rau qhov kuv yog neeg txhaum!” Ximoos thiab cov neeg uas nrog nws nyob ntawd xav tsis thoob hais tias, ua li cas yuav tau ntses ntau ua luaj. Ob tug uas nrog Ximoos ntaus ntses yog Yakaunpaus thiab Yauhas uas yog Xenpedais ob tug tub, nkawd xav tsis thoob ib yam nkaus. Yexus hais rau Ximoos hais tias, “Koj tsis txhob ntshai; txij no mus koj yuav ua tus mus nrhiav neeg.” Lawv sawvdaws rub ob lub nkoj los rau tim ntug, lawv txawm tso txhua yam tseg thiab nrog Yexus mus. Muaj ib zaug Yexus nyob hauv ib lub nroog. Nyob hauv lub nroog ntawd muaj ib tug mob ruas thoob plaws ibce. Thaum nws pom Yexus, nws txhos caug ntua rau hauv av thov Yexus hais tias, “Tus Tswv, yog koj txaus siab kho kuv tej ruas, koj yeej kho tau!” Yexus cev tes mus tuav nkaus tus ntawd thiab hais tias, “Kuv txaus siab pab koj, koj tej ruas cia li zoo hlo!” Tamsim ntawd nws tej ruas txawm zoo tas huv tibsi lawm. Yexus hais tias, “Koj tsis txhob mus qhia zaj no rau leejtwg li. Tiamsis koj cia li ncaj qha mus cuag tus povthawj, thiab kom nws saib hais tias koj tej ruas twb zoo lawm. Tom qab ntawd koj cia li nqa khoom mus fij rau Vajtswv raws li Mauxes txoj kevcai tau qhia tseg, sawvdaws thiaj paub hais tias koj tus mob twb zoo lawm.” Tiamsis Yexus lub moo hajyam nrov ncha mus thoob plaws txhua qhov, thiab muaj neeg coob coob tuaj mloog Yexus qhia thiab thov Yexus kho lawv tej mob. Tiamsis Yexus pheej mus rau tej qhov chaw uas tsis muaj neeg, thiab thov Vajtswv qhov ntawd. Muaj ib hnub thaum Yexus tabtom qhia, muaj cov Falixais thiab cov xibhwb uas qhia Vajtswv txoj Kevcai qee leej tuaj nyob ntawd mloog thiab, Lawv tuaj hauv txhua lub nroog uas nyob hauv lub xeev Yudas, thiab hauv lub nroog Yeluxalees tuaj. Yexus muaj tus Tswv lub hwjchim kho tau tej neeg uas muaj mob. Muaj qee leej muab pam qhwv ib tug txivneej tuag tes tuag taw kwv tuaj, thiab lawv yuav kwv mus rau hauv lub tsev thiab muab tso rau ntawm Yexus hauv ntej. Tiamsis vim muaj neeg coob coob, lawv tsis tau kev kwv mus rau hauv, lawv txawm kwv nws nce mus rau saum rutsev, lawv yaws cov vuas ib qho, thiab muab nws tso dauv mus rau ntawm Yexus hauv ntej uas nyob hauv plawv cov neeg sawvdaws. Thaum Yexus pom hais tias lawv muaj kev ntseeg heev, ces Yexus txawm hais rau tus txivneej tuag tes tuag taw ntawd hais tias, “Kuv tus phoojywg, kuv twb zam koj lub txim lawm.” Cov xibhwb uas qhia Vajtswv txoj Kevcai thiab cov Falixais sib tham hais tias, “Tus uas hais lus saib tsis taus Vajtswv ntawd, nws yog leejtwg? Tsis muaj leejtwg zam txim tau rau neeg, tsuas yog Vajtswv tib leeg xwb, thiaj zam tau!” Yexus twb paub tej uas lawv sib tham lawm, nws thiaj hais rau lawv hais tias, “Ua li cas nej yuav xav li ntawd? Lo lus uas hais tias, ‘Koj twb dim koj lub txim lawm,’ lossis lo lus uas hais tias, ‘Koj cia li sawv tsees mus kev!’ Ob lo lus no, lo twg yuav yoojyim hais dua? Kuv yuav ua li no qhia rau nej paub hais tias, Neeg Leej Tub muaj hwjchim hauv ntiajteb no zam txim tau rau neeg.” Yexus thiaj hais rau tus tuag tes tuag taw hais tias, “Kuv hais rau koj hais tias, koj cia li sawv, thiab nqa koj daim pam pua chaw mus tsev!” Tamsim ntawd nws txawm sawv tsees tabmeeg sawvdaws, nws nqa hlo nws daim pam pua chaw mus tsev thiab ua Vajtswv tsaug. Cov neeg coob coob ntawd xav tsis thoob, lawv ntshai, lawv qhuas Vajtswv thiab hais tias, “Ua li cas hnub no peb yuav pom tej no txawv ua luaj li!” Tom qab uas Yexus tawm qhov ntawd mus, nws pom ib tug txivneej sau se, hu ua Levis, nyob ntawm lub rooj sau se. Yexus hais rau Levis hais tias, “Koj cia li nrog kuv mus.” Levis txawm sawv tsees, tso txhua yam tseg, thiab nrog Yexus mus. Levis ua ib rooj mov hauv nws tsev rau Yexus noj, muaj cov neeg sau se coob leej thiab lwm tus nrog Yexus noj mov ua ke. Cov Falixais thiab cov xibhwb uas qhia Vajtswv txoj Kevcai uas yog cov Falixais pab, yws Yexus cov thwjtim hais tias, “Ua li cas nej nrog cov neeg sau se thiab cov neeg txhaum noj haus ua ke?” Yexus teb lawv hais tias, “Cov neeg uas tsis muaj mob, lawv yeej tsis mus cuag kws tshuaj, tsuas yog cov neeg muaj mob thiaj mus cuag kws tshuaj xwb. Kuv tsis yog los hu cov neeg ncaj ncees, tiamsis kuv los hu cov neeg txhaum, kom lawv tso lawv tej kev txhaum tseg.” Muaj qee leej hais rau Yexus hais tias, “Yauhas cov thwjtim pheej ua kevcai yoo mov thiab thov Vajtswv, cov Falixais cov thwjtim los ua ib yam nkaus li ntawd thiab; tiamsis koj cov thwjtim noj thiab haus tsis ua li lawv?” Yexus teb lawv hais tias, “Nej xav hais tias thaum tus nraug vauv tseem nrog nws cov phoojywg noj tshoob ua ke, lawv yuav yoo mov no los? Lawv yeej tsis yoo li! Tiamsis thaum txog lub sijhawm uas luag coj tus nraug vauv mus lawm, ces lawv yuav yoo mov.” Yexus hais ib zaj lus pivtxwv rau lawv hais tias, “Tsis muaj leejtwg yuav muab lub tsho tshiab dua ib daig coj mus ntxiv lub tsho qub. Yog nws ua li ntawd, kuj yog nws dua kom lub tsho tshiab ntuag xwb, thiab daim ntaub tshiab ntawd yeej tsis phim lub tsho qub. Thiab tsis muaj leejtwg yuav muab cov cawv txiv hmab tshiab ntim rau hauv lub hnab tawv qub. Yog nws ua li ntawd, cov cawv txiv hmab yuav tsam kom lub hnab tawv qub tawg, cov cawv txiv hmab yuav los tas, thiab lub hnab tawv qub yuav ntuag tas. Cov cawv txiv hmab tshiab yuav tsum muab ntim rau hauv lub hnab tawv tshiab. Yog leejtwg tau haus cov cawv txiv hmab qub lawm, nws yeej tsis xav haus cov tshiab. Rau qhov nws hais tias, ‘Cov qub qab dua.’ ” Hnub Xanpataus Yexus thiab nws cov thwjtim tabtom mus txog hauv ib daim teb npleg, Yexus cov thwjtim txawm de hnab nplej tev noj. Cov Falixais qee leej nug hais tias, “Vim li cas nej ua tej uas peb txoj Kevcai txwv tsis pub ua rau Hnub Xanpataus?” Yexus teb lawv hais tias, “Nej tsis tau nyeem zaj uas Daviv ua thaum Daviv thiab nws cov neeg tshaib plab los? Daviv mus rau hauv Vajtswv lub Tuamtsev, nws muab tej ncuav uas twb muab fij rau Vajtswv lawm noj, thiab muab faib rau nws cov neeg noj. Tiamsis peb txoj kevcai yeej tsis pub leejtwg noj tej ncuav ntawd, tsuas yog cov povthawj thiaj noj tau xwb.” Thiab Yexus xaus lus hais tias, “Neeg Leej Tub yog tus Tswv Hnub Xanpataus.” Muaj dua ib hnub yog Hnub Xanpataus, Yexus mus qhuab qhia hauv ib lub tsev sablaj. Muaj ib tug txivneej uas sab tes xis qhuav, nws tuaj nyob hauv thiab. Cov xibhwb uas qhia Vajtswv txoj Kevcai thiab cov Falixais xav nrhiav txim rau Yexus, lawv txawm ntsia saib Yexus puas kho mob Hnub Xanpataus. Tiamsis Yexus twb paub tej uas lawv xav lawm, nws thiaj hais rau tus neeg qhuav tes ntawd tias, “Koj cia li sawv los tom hauv ntej no.” Tus txivneej ntawd txawm sawv tsees los. Yexus hais rau lawv tias, “Kuv nug nej saib, peb txoj Kevcai qhia hais tias Hnub Xanpataus cia peb ua zoo lossis ua phem? Cawm neeg txojsia lossis cia txojsia tu?” Yexus tig mus saib cov neeg ntawd txhua tug, Yexus hais rau tus txivneej ntawd hais tias, “Koj cia li xyab hlo koj txhais tes.” Nws txawm xyab hlo nws txhais tes, ces nws txhais tes txawm zoo li qub lawm. Lawv cov ntawd chim heev, lawv sablaj saib yuav ua li cas rau Yexus. Tom qab ntawd, muaj ib hnub Yexus mus thov Vajtswv pem roob, thiab nws nyob pem thov Vajtswv ib hmos. Thaum kaj ntuj Yexus hu cov thwjtim los ntawm nws, nws xaiv lawv kaum ob leeg, nws hu lawv ua cov timthawj. Lawv cov ntawd yog: Ximoos, (tus uas Yexus tis npe hu ua Petus) thiab nws tus kwv Adales; Yakaunpaus, Yauhas, Filis, Npataulaumais, Mathais, Thaumas, Yakaunpaus uas yog Alafais tus tub, Ximoos (tus uas xav kom nws haivneeg muaj kev ywjpheej), Yudas uas yog Yakaunpaus tus tub, thiab Yudas Ixakali-us tus uas ntxeev siab rau Yexus. Yexus thiab nws cov timthawj nqis pem roob los nrog nws ib pab thwjtim coob coob sawv ua ke ntawm ib qhov chaw tiaj tiaj. Muaj neeg coob coob tuaj hauv lub xeev Yudas, hauv lub nroog Yeluxalees, hauv lub nroog Tiles thiab hauv lub nroog Xidoos uas nyob ntawm ntug hiavtxwv tuaj, lawv tuaj mloog Yexus qhuab qhia thiab thov kom Yexus kho lawv tej mob. Cov neeg uas raug dab tsimtxom los tuaj cuag Yexus, thiab Yexus kho lawv txhua tus zoo huv tibsi. Cov neeg coob coob ntawd kov Yexus, rau qhov muaj hwjchim tawm ntawm Yexus tuaj kho txhua tus uas muaj mob zoo huv tibsi. Yexus tsa qhovmuag saib nws cov thwjtim thiab hais rau lawv hais tias, “Nej cov uas txomnyem, nej tau koob hmoov, rau qhov Vajtswv lub Tebchaws yog nej tug! Nej cov uas nimno tshaib nqhis nej yuav tau koob hmoov, rau qhov nej yuav tau noj tsau npo! Nej cov uas nimno quaj ntsuag; nej yuav tau koob hmoov, rau qhov nej yuav muaj lub ntsejmuag luag. “Thaum luag ntxub nej thiab ntiab kom nej khiav, thuam nej thiab hais tias nej yog cov neeg ua phem, vim nej ntseeg Neeg Leej Tub, nej yuav tau koob hmoov! Thaum muaj li ntawd, nej cia li zoo siab thiab dhia luag ntxhi, rau qhov Vajtswv twb npaj nqi zog ntau kawg li cia saum ntuj ceebtsheej rau nej lawm. Rau qhov lawv cov yawgkoob twb ua ib yam li ntawd rau cov uas cev Vajtswv lus thaum ub lawm thiab. Nej cov uas nimno npluanuj nej yuav raug kev txomnyem, rau qhov nej twb tau zoo los lawm! Nej cov uas nimno tau noj tsau npo nej yuav raug kev txomnyem, rau qhov nej yuav tshaib nqhis. Nej cov uas nimno muaj lub ntsejmuag luag, nej yuav raug kev txomnyem, rau qhov nej yuav muaj kev nyuaj siab quaj ntsuag! “Thaum muaj neeg qhuas nej, nej yuav raug kev txomnyem, rau qhov nej tej yawgkoob twb hais ib yam nkaus li ntawd rau cov uas cevlus tsis tseeb thaum ub lawm thiab. “Tiamsis kuv hais rau nej cov uas mloog kuv qhia hais tias, hlub nej cov yeebncuab thiab ua zoo rau cov uas ntxub nej, foom koob hmoov rau cov neeg uas cem nej, thiab thov Vajtswv pab rau cov neeg uas tsimtxom nej. Yog leejtwg ntaus koj ib sab plhu, koj cia li tig sab tod rau nws ntaus thiab. Yog leejtwg txhav koj lub tsho uas hnav tuaj sab nraud, koj cia li hle lub tsho uas hnav tuaj sab hauv rau nws thiab. Txhua tus uas thov nej ib yam dabtsi, nej cia li muab rau lawv, thiab yog leejtwg muab nej ib yam dabtsi lawm, nej tsis txhob kom nws xa rov qab tuaj rau nej. Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus thiab. “Yog nej tsuas hlub cov uas hlub nej xwb, nej xav hais tias nej yuav tau koob hmoov no los? Txawm cov neeg txhaum los lawv twb paub hlub cov uas hlub lawv thiab! Yog nej tsuas ua zoo rau cov uas ua zoo rau nej xwb, nej xav hais tias nej yuav tau koob hmoov no los? Txawm yog cov neeg txhaum los lawv twb paub ua li ntawd thiab! Thiab yog nej tsuas qiv rau cov uas nej cia siab hais tias, lawv yuav them taus rov rau nej xwb, nej xav hais tias, nej yuav tau koob hmoov no los? Txawm yog cov neeg txhaum los lawv ib leeg twb kam qiv rau ib leeg thiab, thiab lawv cia siab hais tias yuav tau rov qab puv ntoob li qub. Tiamsis nej yuav tsum hlub nej cov yeebncuab thiab ua zoo rau lawv; nej cia li qiv rau lawv tsis txhob cia siab hais tias yuav tau puv ntoob li qub rov qab. Yog nej ua li ntawd, nej yuav tau nqi zog ntau, thiab nej yuav tau ua Vajtswv tus uas muaj hwjchim loj kawg nkaus cov menyuam. Rau qhov Vajtswv tseem hlub cov neeg uas ua phem thiab cov neeg uas tsis nco Vajtswv tshav ntuj. Nej yuav tsum muaj lub siab hlub ib yam li nej Leej Txiv tus uas muaj lub siab hlub. “Nej tsis txhob txiav txim rau lwm tus, Vajtswv thiaj yuav tsis txiav txim rau nej; nej tsis txhob rau txim rau lwm tus, Vajtswv thiaj yuav tsis rau txim rau nej; zam txim rau lwm tus, Vajtswv thiaj yuav zam txim rau nej. Nej pub rau lwm tus, Vajtswv thiaj yuav pub rau nej. Vajtswv yuav foom koob hmoov nplua mias rau nej, kom nej muaj nplua mias siv tsis tas. Nej muab lub luaj li cas luj rau lwm tus lawm, Vajtswv yuav muab lub luaj li ntawd luj rau nej.” Thiab Yexus qhia ib zaj lus pivtxwv rau lawv hais tias, “Ib tug digmuag yeej coj tsis tau ib tug digmuag kev li; yog nws ua li ntawd, nkawd yeej yuav mus poob kwjdeg xwb. Tsis muaj ib tug tub kawm ntawv uas yuav paub tshaj nws tus xibhwb; tiamsis txhua tus uas kawm tiav lawm, nws yeej yuav paub ib yam li nws tus xibhwb. “Vim li cas koj yuav saib qhov nyuag hmoov ntoo uas nyob hauv koj tus kwvtij lub qhovmuag, tiamsis koj twb tsis paub hais tias muaj ib yav ntoo nyob hauv koj lub qhovmuag? Ua li cas koj tseem yuav hais rau koj tus kwvtij hais tias, ‘Cia kuv pab muab qhov nyuag hmoov ntoo hauv koj lub qhovmuag tawm,’ tiamsis koj twb tsis pom yav ntoo uas nyob hauv koj lub qhovmuag. Tus neeg ntsejmuag ncaj siab nkhaus! Koj cia li xub muab yav ntoo uas nyob hauv koj lub qhovmuag tawm tso, koj thiaj yuav pom kev muab qhov nyuag hmoov ntoo uas nyob hauv koj tus kwvtij lub qhovmuag. “Tsob ntoo zoo yeej tsis txi cov txiv phem lossis tsob ntoo phem yeej txi tsis tau cov txiv zoo. Yog yus pom cov txiv, yus yeej paub hais tias, tsob ntoo ntawd yog tsob phem lossis tsob zoo. Yus yeej tsis de txiv ncuavpias ntawm tsob ntoo pos ntshav, thiab tsis de txiv hmab ntawm tsob pos tshauv li. Tus neeg siab zoo yeej hais tej lus zoo. Tus neeg siab phem yeej hais tej lus phem, rau qhov nws lub siab xav li cas, nws lub ncauj hais li ntawd. “Vim li cas nej hu kuv hais tias, ‘Tus Tswv, Tus Tswv,’ tiamsis nej ho tsis ua raws li kuv tej lus? Txhua tus uas los cuag kuv, mloog kuv lus thiab ua raws li kuv qhia, kuv yuav qhia rau nej paub hais tias, tus ntawd zoo li cas? Tus ntawd zoo ib yam li tus kws ua tsev, nws khawb qhov ncej tob tob, muab pobzeb los pua, mam li muab ncej los txhos rau. Thaum dej huam los ntaus lub tsev ntawd, lub tsev tsis ua zog, rau qhov nws ua lub tsev ntawd khov heev. Tus uas hnov kuv tej lus, tiamsis tsis ua raws li, tus ntawd zoo ib yam li tus kws ua tsev uas khawb qhov ncej tsis tob. Thaum dej huam los ntaus lub tsev, lub tsev ntawd txawm vau thiab puastsuaj tas huv tibsi lawm.” Thaum Yexus qhia tej ntawd rau sawvdaws mloog tas lawm, nws txawm mus rau pem lub nroog Kapena-us. Nyob hauv lub nroog ntawd muaj ib tug thawj tubrog pawg puas uas yog neeg Loos, nws muaj ib tug tubtxib uas nws hlub heev, tus tubtxib ntawd mob heev twb yuav tuag. Thaum tus thawj tubrog ntawd hnov luag hais txog Yexus, nws txawm txib cov Yudais cov txwjlaug qee leej mus thov Yexus tuaj pab kho nws tus tubtxib. Lawv mus cuag Yexus thiab thov tas zog hais tias, “Tsimnyog koj mus pab tus thawj tubrog ntawd, rau qhov nws hlub peb haivneeg, thiab nws ua ib lub tsev sablaj pub rau peb.” Yexus txawm nrog lawv mus. Thaum Yexus mus yuav luag txog tus thawj tubrog lub tsev, tus thawj tubrog txib nws ob peb tug phoojywg mus cheem Yexus hais tias, “Tus Tswv, nyob tsam tabkaum koj, kuv yog ib tug uas tsis tsimnyog koj yuav mus hauv kuv lub tsev; thiab kuv yog ib tug uas tsis tsimnyog tuaj cuag koj. Thov koj hais tib los xwb, ces kuv tus tubtxib yeej yuav zoo. Txawm yog kuv los tseem muaj cov hlob uas kav kuv, thiab kuv muaj ib co tubrog uas kuv kav. Yog kuv hais rau tus no hais tias, ‘Mus!’ Nws txawm mus; yog kuv hais rau tus tod hais tias, ‘Los!’ Nws txawm los; thiab yog kuv hais rau kuv tus tubtxib hais tias, ‘Ua li no!’ Nws txawm ua li ntawd.” Thaum Yexus hnov lawv hais li ntawd, nws xav tsis thoob li; nws tig mus hais rau cov neeg coob coob uas raws nws qab hais tias, “Kuv qhia rau nej hais tias, txawm yog hauv cov Yixalayees los kuv tsis tau pom ib tug uas muaj kev ntseeg npaum li tus no!” Cov uas tus thawj tubrog txib tuaj ntawd, rov mus txog tom tus thawj tubrog tsev, ua ciav tus tubtxib twb zoo lawm. Tom qab ntawd tsis ntev Yexus mus rau hauv lub nroog Na-is, Yexus cov thwjtim thiab ib co neeg coob coob nrog nws mus. Thaum Yexus mus txog ntawm lub roojvag uas mus rau hauv lub nroog, txawm muaj neeg kwv ib tug tuag tawm tuaj txog ntawd. Tus tuag ntawd yog ib tug pojntsuam tus tub, tus pojntsuam ntawd muaj tib tug tub xwb. Cov neeg coob coob uas nyob hauv nroog ntawd nrog nws tuaj. Thaum tus Tswv pom tus pojniam ntawd, tus Tswv hlub nws heev, thiab hais tias, “Koj tsis txhob quaj.” Yexus txawm txav zog mus tuav nkaus lub hleb, ces cov neeg uas kwv lub hleb txawm nres, Yexus hais tias, “Tus hluas! Kuv hais rau koj tias, koj cia li sawv tsees!” Tus tuag ntawd txawm sawv tsees zaum nrog lawv tham, Yexus coj nws mus rau nws niam. Cov neeg ntawd ntshai kawg li, thiab lawv qhuas Vajtswv hais tias, “Muaj ib tug cev Vajtswv lus uas muaj hwjchim heev twb los rau hauv peb cov lawm!” Thiab lawv hais tias, “Vajtswv twb los cawm nws haivneeg lawm!” Zaj uas Yexus ua no nrov ncha moo lug mus thoob plaws hauv lub xeev Yudas thiab tej cheebtsam uas nyob ibncig ntawd. Yauhas cov thwjtim qhia tej no huv tibsi rau Yauhas mloog, Yauhas hu nws ob tug thwjtim los thiab kom nkawd mus cuag tus Tswv thiab nug hais tias, “Koj puas yog tus uas Yauhas hais tias yuav los lossis peb tseem yuav tos dua lwm tus?” Thaum nkawd mus txog ntawm Yexus, nkawd hais tias, “Yauhas tus uas muab neeg ua kevcai raus dej, kom wb tuaj nug koj saib, koj puas yog tus uas yuav los lossis peb tseem yuav tos dua lwm tus?” Lub sijhawm ntawd Yexus kho cov neeg uas muaj mob ntau leej zoo, nws ntiab dab tawm ntawm cov neeg uas raug dab thiab nws kho cov neeg digmuag ntau leej pom kev. Yexus teb ob tug uas Yauhas txib tuaj hais tias, “Neb cia li rov qab mus qhia tej uas neb pom thiab neb hnov rau Yauhas hais tias cov neeg digmuag rov pom kev, cov neeg tuag ceg mus taus kev, cov neeg mob ruas zoo, cov neeg lag ntseg hnov lus, cov neeg uas tuag lawm sawv rov los thiab twb muaj neeg mus qhia txojmoo zoo rau cov neeg txomnyem lawm. Tus uas ntseeg kuv, tus ntawd yuav tau koob hmoov!” Thaum ob tug uas Yauhas txib tuaj rov qab mus lawm, Yexus qhia Yauhas zaj rau cov neeg coob coob ntawd mloog hais tias, “Thaum nej mus cuag Yauhas tom roob mojsab qhua, nej mus saib dabtsi? Nej mus saib tus tauj uas cua tshuab rawv mus rawv los los? Nej mus saib dabtsi? Nej mus saib tus neeg ua hnav tej tsoos tsho zoo zoo los? Tsuas yog cov neeg uas nyob hauv vajntxwv lub loog thiaj tau hnav zoo thiab tau noj seem noj so xwb! Nej qhia rau kuv saib, nej mus saib dabtsi? Nej mus saib ib tug uas cev Vajtswv lus los? Yog lawm, tiamsis kuv qhia rau nej hais tias, tus uas nej pom ntawd muaj hwjchim loj dua ib tug cev Vajtswv lus. Rau qhov tus Yauhas no, yog tus uas Vajtswv Txojlus twb xub qhia tseg lawm: Vajtswv hais tias, ‘Kuv yuav txib kuv tus tubtxib ua koj ntej mus kho kev tos koj.’ Kuv qhia rau nej hais tias, Txhua tus uas yug los ntawm pojniam tsis muaj ib tug muaj hwjchim npaum li Yauhas; tiamsis tus uas yau tshaj saum Vajtswv lub tebchaws, tus ntawd tseem muaj hwjchim loj dua Yauhas thiab.” Tagnrho cov neeg uas hnov Yauhas qhia: Tsuas yog cov pejxeem thiab cov sau se thiaj ntseeg hais tias Vajtswv yog tus ncaj ncees, thiab lawv thov kom Yauhas muab lawv ua kevcai raus dej. Tiamsis cov Falixais thiab cov xibhwb uas qhia Vajtswv txoj Kevcai, tsis kam ua tej uas Vajtswv kom lawv ua, thiab tsis kam Yauhas muab lawv ua kevcai raus dej. Yexus hais ntxiv tias, “Kuv yuav muab cov neeg tiam no piv rau dabtsi? Thiab lawv yuav zoo li cas? Lawv zoo ib yam li tej menyuam yaus uas ua si tom tshavpuam. Pab no hais rau pab tod hais tias, ‘Peb twb tshuab raj lawm, tiamsis nej tsis seevcev li! Peb quaj nyiav, tiamsis nej tsis mob siab!’ Yauhas tus uas muab neeg ua kevcai rau dej, nws los, nws ua kevcai yoo mov thiab nws tsis haus cawv txiv hmab, nej thiaj hais tias, ‘Nws raug dab lawm!’ Neeg Leej Tub los, nws noj thiab haus, nej thiaj hais tias, ‘Nej saib tus neeg no! Nws noj loj thiab haus loj, nws nrog cov neeg sau se thiab cov neeg txhaum ua phoojywg!’ Txhua tus uas lees yuav Vajtswv lub tswvyim, lawv tes haujlwm yuav ua rau sawvdaws pom hais tias, Vajtswv yog tus uas muaj tswvyim tiag.” Muaj ib tug Falixais hu Yexus mus nrog nws noj hmo, Yexus txawm mus rau hauv tus Falixais tsev thiab zaum noj mov. Muaj ib tug pojniam nyob hauv lub nroog ntawd, nws yog ib tug neeg ua txhaum. Nws hnov hais tias Yexus mus noj mov hauv tus Falixais tsev, nws nqa ib hwj roj tsw qab tuaj sawv sab tom qab ncaj ntawm Yexus kotaw, nws quaj kua muag los ntub Yexus ob txhais kotaw, thiab muab nws cov plaubhau los so, nws nwj Yexus kotaw thiab muab cov roj tsw qab hliv ywg Yexus kotaw. Thaum tus Falixais uas hu Yexus los noj mov pom li ntawd, nws xav hais tias, “Yog tus no yog ib tug cev Vajtswv lus tiag, nws yeej yuav paub hais tias tus pojniam uas kov nws ntawd, yog ib tug neeg txhaum!” Yexus hais rau tus Falixais ntawd hais tias, “Ximoos, kuv muaj ib lo lus xav hais rau koj.” Ximoos teb hais tias, “Tau los mas xibhwb, koj cia li hais.” Yexus txawm hais tias, “Muaj ob tug txivneej tshuav ib tug yawg nqi. Ib tug tshuav tsib puas lub nyiaj, ib tug tshuav tsib caug lub nyiaj. Nkawd puavleej tsis muaj nyiaj them tus yawg ntawd, ces tus yawg ntawd txawm zam nqi rau nkawd huv tibsi. Yog li, ob tug ntawd, tus twg yuav nco tus yawg ntawd txiaj ntsig heev dua?” Ximoos teb hais tias, “Kuv xav hais tias, yog tus uas tus yawg ntawd zam nqi ntau rau.” Yexus teb hais tias, “Yog li koj hais lawm.” Yexus tig mus saib tus pojniam ntawd, thiab hais rau Ximoos hais tias, “Koj puas pom tus pojniam no? Kuv tuaj txog hauv koj tsev, koj twb tsis muab dej ntxuav kuv kotaw, tiamsis tus pojniam no muab nws cov kua muag ntxuav kuv kotaw, thiab muab nws cov plaubhau so. Kuv tuaj, koj tsis nwj kuv, tiamsis txij thaum kuv tuaj txog hauv koj tsev, tus pojniam no nwj kuv txhais kotaw tsis tseg li. Koj twb tsis muab roj tsw qab pleev kuv taubhau, tiamsis tus pojniam no muab roj tsw qab hliv ywg kuv ob txhais kotaw. Kuv qhia rau koj hais tias, qhov uas tus pojniam no muaj kev hlub loj npaum li no, qhia hais tias Vajtswv twb zam nws tej kev txhaum huv tibsi lawm. Tiamsis tus uas Vajtswv zam txim tsawg, tus ntawd yeej nco Vajtswv txiaj ntsig tsawg.” Yexus hais rau tus pojniam ntawd hais tias, “Kuv twb zam txim rau koj lawm.” Cov neeg uas nrog Yexus noj mov ntawd, lawv xav hais tias, “Tus no yog leejtwg, nws thiaj zam txim tau?” Yexus hais rau tus pojniam ntawd hais tias, “Koj txojkev ntseeg twb cawm tau koj dim lawm; koj cia li mus kaj siab lug.” Tom qab ntawd Yexus mus txhua nrho hauv tej nroog thiab hauv tej zos, Yexus qhia Txojmoo Zoo uas hais txog Vajtswv lub Tebchaws. Yexus kaum ob tug thwjtim nrog nws mus, thiab cov pojniam qee leej uas yav nram ntej raug dab uas Yexus ntiab dab tawm thiab kho lawv tej mob zoo lawm. Cov pojniam ntawd yog Malis (tus uas hu ua Madalas), nws yog tus uas yav nram ntej Yexus ntiab xya tus dab tawm lawm; Yau-anas uas yog Khuxas tus pojniam. Khuxas yog tus uas zov Helauj lub tsev; Xuxanas thiab muaj dua ob peb tug pojniam, lawv yog cov uas pheej muab lawv tej nyiaj thiab qhov txhia chaw pab Yexus thiab nws cov thwjtim. Pheej muaj neeg tuaj hauv tej nroog tuaj cuag Yexus tsis tu ncua li; thaum cov neeg tuaj ua ke coob coob lawm, Yexus hais ib zaj lus pivtxwv rau lawv hais tias, “Muaj ib tug txivneej nqa noob nplej mus tseb, thaum nws tseb cov noob nplej rau hauv daim teb, muaj qee lub poob rau hauv plawv kev, qhov uas neeg tsuj mus tsuj los thiab noog txawm los khaws noj lawm. Muaj qee lub poob rau ntawm qhov av uas hauv muaj pobzeb tiv lawm, thaum cov nplej tuaj kaus, cov kaus cia li qhuav lawm, rau qhov av tsis noo. Muaj qee lub poob rau hauv lub hauvpaus pos, ces tsob pos hlob tuaj laum cov nplej tuag tas lawm. Thiab muaj qee lub poob rau ntawm qhov av zoo; cov ntawd tuaj zoo thiab txhawv taus, ib hnab twg txi tau ib puas lub.” Yexus xaus lus hais tias, “Yog leejtwg muaj pobntseg, cia li mloog.” Yexus cov thwjtim nug Yexus saib zaj lus pivtxwv uas Yexus hais ntawd txhais li cas. Yexus teb hais tias, “Zaj uas neeg tsis tau paub hais txog Vajtswv lub Tebchaws, kuv twb qhia rau nej paub lawm, tiamsis dua li lwm tus kuv ua lus pivtxwv qhia xwb. Txawm yog lawv ntsia los lawv yuav tsis pom, txawm yog lawv mloog los lawv yuav tsis totaub. “Zaj lus pivtxwv no ntxhais hais tias: Cov noob nplej, yog piv txog Vajtswv Txojlus. Cov noob nplej uas poob rau ntawm txojkev piv txog Vajtswv Txojlus uas neeg hnov, tiamsis dab Ntxwgnyoog txawm los txeeb txojlus ntawd tawm hauv lawv lub siab lawm, kom lawv tsis ntseeg thiab tsis tau txojkev cawm dim. Cov noob nplej uas poob rau ntawm qhov av uas hauv muaj pobzeb tiv lawm, piv txog Vajtswv Txojlus uas thaum neeg hnov dheev, lawv txaus siab hlo txais yuav, tiamsis txojlus ntawd cog tsis ruaj rau hauv lawv lub siab. Lawv ntseeg ib ntu xwb, thaum lawv raug kev sim siab, ces lawv cia li thim rov qab lawm. Cov noob nplej uas poob rau hauv lub hauvpaus pos, piv txog Vajtswv Txojlus uas neeg hnov; tiamsis lawv tej kev ntxhov siab, kev ntshaw nyiaj thiab kev lomzem hauv ntiajteb no hlob tuaj laum Vajtswv Txojlus lawm, lawv txojkev ntseeg thiaj tsis loj hlob. Cov noob nplej uas poob rau ntawm qhov av zoo, piv txog Vajtswv Txojlus uas neeg hnov; lawv muaj lub siab mos siab muag, siab dawb siab zoo khaws txojlus ntawd cia rau hauv lawv lub siab, thiab ua siab ntev mus txog hnub uas txojlus ntawd tawg paj thiab txi txiv. “Tsis muaj leejtwg taws teeb thiab muab phiab khwb rau lossis muab txawb rau hauv qabtxag. Tiamsis tsuas muaj yuav muab txawb rau saum qhov chaw siab xwb, kom cov neeg uas tuaj hauv tsev thiaj pom kev. “Tej uas muab zais cia lawm, yeej yuav muaj neeg pom; thiab tej uas muab npog cia lawm, yeej yuav muaj tus muab nthuav los qhia rau sawvdaws. “Yog li ntawd, nej yuav tsum ceevfaj thiab ua tib zoo mloog, rau qhov tus uas muaj lawm, yuav muab ntxiv kom tus ntawd muaj nplua mias, tiamsis tus uas tsis muaj, txawm yog nws xav hais tias, nws muaj mentsis los yuav muab rho ntawm nws mus.” Yexus niam thiab Yexus cov kwv yuav tuaj cuag Yexus, tiamsis muaj neeg coob coob lawv tsis tau kev tuaj cuag nws. Muaj ib tug los hais rau Yexus hais tias, “Koj niam thiab koj cov kwv tuaj sawv sab nraud, lawv xav ntsib koj.” Yexus hais rau sawvdaws tias, “Cov uas hnov Vajtswv Txojlus thiab ua raws li txojlus ntawd, thiaj yog kuv niam thiab kuv cov kwv.” Muaj ib hnub Yexus thiab nws cov thwjtim nce mus rau hauv nkoj, Yexus hais rau lawv hais tias, “Peb cia li hla hiavtxwv mus rau sab tim ub.” Ces lawv txawm mus. Thaum lawv tabtom nquam nkoj hla hiavtxwv mus, Yexus txawm pw tsaug zog lawm. Tamsim ntawd txawm muaj cua daj cua dub hlob heev ntsawj dej ntas los rau hauv lub nkoj, lawv txhua tus ntshai nyob tsam lub nkoj tog. Cov thwjtim mus tsa Yexus thiab hais tias, “Tus Tswv, tus Tswv, peb twb yuav tuag!” Yexus sawv tsees los txwv cua thiab dej, ces cua txawm tu thiab dej hiavtxwv uas nphau tej niag twv txawm tu tsis ntas lawm. Yexus hais rau cov thwjtim hais tias, “Nej kev ntseeg dua twb tas lawm?” Cov thwjtim xav tsis thoob thiab ntshai kawg, lawv sib tham hais tias, “Tus no yog leejtwg, nws yuav txwv tau cua thiab dej, cua thiab dej mloog nws lus thiab?” Yexus thiab nws cov thwjtim caij nkoj mus txog ntawm cheebtsam Nkelaxas uas nyob sab ntug Hiavtxwv Kalilais tim ub. Thaum Yexus tawm los rau tim ntug, nws ntsib ib tug txivneej raug dab uas nyob hauv nroog tuaj. Nws tsis hnav ris tsho thiab tsis nyob hauv tsev los ntev lawm, nws nyob tom roob toj ntxas xwb. Thaum nws pom Yexus, nws quaj qw txhos caug ntua ntawm Yexus xubntiag thiab hais nrov nrov hais tias, “Yexus uas yog Vajtswv tus uas muaj hwjchim loj kawg nkaus tus Tub! Koj tuaj thab kuv ua dabtsi? Kuv thov koj tsis txhob tsimtxom kuv!” Nws hais li ntawd, rau qhov Yexus twb hais kom dab cia li tawm ntawm nws mus. Dab nkag rau hauv nws ntau zaus, txawm yog muab saw hlau khi nws tes nws taw thiab tso neeg zov los nws muab nriaj tu tas huv tibsi, thiab dab yuam nws mus rau tom roob mojsab qhua. Yexus nug nws hais tias, “Koj lub npe hu li cas?” Nws teb hais tias, “Kuv lub npe hu ua Coob.” Rau qhov muaj ntau tus dab nyob rau hauv nws. Cov dab ntawd thov Yexus hais tias, “Tsis txhob ntiab peb mus rau hauv ntujtawg.” Nyob ze ntawd muaj ib pab npua coob coob tabtom nrhiav noj ntawm ib ntav toj. Cov dab ntawd thov Yexus hais tias, “Cia peb mus rau hauv pab npua ntawd,” ces Yexus txawm cia lawv mus. Dab tawm plaws hauv tus txivneej ntawd mus nkag rau hauv pab npua. Pab npua cia li khiav mus poob tsag tsua rau hauv hiavtxwv tuag tas huv tibsi lawm. Thaum cov neeg zov npua pom li ntawd, lawv txawm khiav rov qab mus qhia tej ntawd rau cov neeg uas nyob hauv tej zos uas nyob ibncig lub nroog ntawd. Ces sawvdaws txawm tawm tuaj mus saib muaj li cas tiag. Thaum lawv tuaj txog ntawm Yexus, lawv pom tus txivneej raug dab ntawd, nws feeb meej lawm, nws hnav ris tsho thiab nws zaum ntawm Yexus kotaw; lawv ntshai kawg li. Cov neeg uas pom tej no lawv qhia rau sawvdaws paub hais tias, ua li cas tus raug dab ntawd zoo lawm. Cov neeg uas nyob hauv cheebtsam Nkelaxas thov kom Yexus cia li tawm hauv cheebtsam ntawd mus, rau qhov lawv ntshai heev. Yog li ntawd, Yexus txawm nce rau hauv nkoj thiab mus lawm. Tus txivneej uas Yexus ntiab dab tawm ntawd, nws thov Yexus hais tias, “Cia kuv nrog koj mus.” Tiamsis Yexus kom nws rov qab mus thiab hais rau nws hais tias, “Koj cia li rov qab mus tsev thiab qhia tej uas Vajtswv pab koj lawm rau sawvdaws mloog.” Tus txivneej ntawd txawm mus thoob plaws lub nroog, thiab qhia tej uas Yexus pab nws lawm rau sawvdaws mloog. Thaum Yexus rov los txog sab ntug hiavtxwv tim no, twb muaj neeg coob coob tuaj nyob qhov ntawd tos nws lawm, thaum lawv pom nws, lawv zoo siab kawg li. Muaj ib tug txivneej hu ua Yailus, nws yog tus uas saib haujlwm hauv lub tsev sablaj hauv lub nroog ntawd, thaum nws tuaj txog, nws txhos caug ntua ntawm Yexus kotaw, thiab thov kom Yexus mus rau tom nws lub tsev, rau qhov nws tus ntxhais uas muaj hnubnyoog kaum ob xyoos, mob heev twb yuav tuag. Thaum Yexus tabtom taug kev mus, muaj neeg coob coob nrog Yexus mus sib nphoo ntxuas. Muaj ib tug pojniam coj khaubncaws tau kaum ob xyoos tsis tu, thiab nws txomnyem kawg li. Nws muab tagnrho nws tej nyiaj mus ntiav kws tshuaj kho, tiamsis tsis muaj ib tug kws tshuaj kho tau nws li. Nws txiv ntiag los rau ntawm Yexus nraubqaum, nws cev tes mus kov Yexus lub tw tsho, tamsim ntawd ntshav txawm tu nrho lawm. Yexus nug hais tias, “Leejtwg kov kuv?” Tiamsis tsis muaj leejtwg lees li, Petus teb hais tias, “Tus Tswv, cov neeg coob coob uas nyob puagncig koj, chwv koj xwb.” Tiamsis Yexus hais tias, “Yeej muaj ib tug kov kuv xwb, rau qhov kuv paub hais tias hwjchim twb tawm ntawm kuv lawm.” Tus pojniam ntawd paub hais tias Yexus paub lawm, nws txawm txhos caug ntua ntawm Yexus kotaw ua ibce tshee hnyo. Nws qhia rau Yexus tabmeeg sawvdaws hais tias, vim li cas nws kov Yexus lub tw tsho thiab yog li cas nws tus mob thiaj zoo lawm. Yexus hais rau nws hais tias, “Mentxhais, koj tus mob zoo lawm, twb yog vim koj ntseeg. Koj cia li mus kaj siab lug.” Thaum Yexus tabtom hais li ntawd, muaj ib tug tuaj tom Yailus tsev tuaj qhia rau Yailus hais tias, “Koj tus ntxhais twb tuag lawm, koj tsis txhob tabkaum xibhwb ntxiv lawm.” Thaum Yexus hnov li ntawd, Yexus hais rau Yailus hais tias, “Koj tsis txhob ntshai; cia li ntseeg, koj tus ntxhais yeej yuav ciaj.” Thaum Yexus mus txog hauv Yailus tsev lawm, nws tsis pub leejtwg nrog nws mus rau hauv txaj, tsuas pub Petus, Yauhas, Yakaunpaus thiab tus ntxhais niam thiab txiv nrog nws mus xwb. Cov neeg uas nyob hauv tsev, quaj nyiav tus ntxhais ntawd ntsoog qees. Yexus hais rau lawv hais tias, “Nej tsis txhob quaj quaj; tus Mentxhais no tsis tuag, nws pw tsaug zaug xwb!” Cov neeg ntawd luag Yexus zom zaws, rau qhov lawv yeej paub hais tias tus ntxhais ntawd tuag lawm tiag. Tiamsis Yexus mus tuav nkaus tus ntxhais ntawd tes thiab hais tias, “Mentxhais, koj cia li sawv!” Tus ntxhais ntawd txawm rov muaj sia thiab sawv tsees tamsim ntawd. Yexus kom lawv muab mov los rau tus ntxhais noj. Tus ntxhais ntawd niam thiab txiv xav tsis thoob li, tiamsis Yexus txwv tsis pub nkawd qhia tej no rau leejtwg. Yexus hu nws kaum ob tug thwjtim los, nws pub hwjchim rau lawv ntiab tau dab thiab kho tau mob zoo. Tom qab ntawd nws txib lawv mus qhia zaj uas hais txog Vajtswv lub Tebchaws thiab mus kho tej neeg uas muaj mob. Yexus hais rau lawv hais tias, “Thaum nej mus, nej tsis txhob nqa ib yam dabtsi mus: Txawm yog tus pas nrig, hnab thoobpuab, zaub mov, nyiaj thiab ris tsho hloov los tsis txhob nqa li. Yog yim twg zoo siab hu nej mus hauv lawv tsev, nej cia li mus so hauv yim ntawd mus txog hnub uas nej tawm hauv lub nroog ntawd mus; nej mus txog qhov twg, yog tsis muaj leejtwg hu nej mus so hauv lawv tej tsev, nej cia li tawm hauv lub nroog ntawd mus, thiab nchos tej hmoov av uas lo nej kotaw, nej ua li ntawd kom lawv paub hais tias lawv muaj txhim.” Cov thwjtim txawm mus rau txhua lub zos, lawv qhia txoj Txojmoo Zoo thiab kho tej neeg muaj mob uas nyob txhua qhov zoo huv tibsi. Helauj tus uas ua nom kav lub xeev Kalilais, thaum nws hnov tej uas Yexus ua ntawd, nws ntxhov siab heev; rau qhov muaj neeg hais tias, Yauhas tus uas muab neeg ua kevcai raus dej sawv hauv qhov tuag rov qab los lawm. Muaj qee leej hais tias, yog Eliyas rov qab los tshwm rau sawvdaws pom, thiab muaj qee leej hais tias yog ib tug cev Vajtswv lus txheej thaud sawv rov qab los. Helauj hais tias, “Kuv twb muab Yauhas txiav cajdab lawm; tus uas kuv hnov moo no ho yog leejtwg?” Helauj hajyam xav pom Yexus heev. Thaum cov timthawj rov qab los, lawv qhia txhua yam uas lawv mus ua lawm rau Yexus mloog. Yexus coj lawv mus rau tim ib lub nroog hu ua Npexaidas. Thaum cov neeg hnov hais tias, Yexus thiab nws cov thwjtim mus rau tid lawm, lawv txawm raws Yexus qab mus. Yexus zoo siab txais tos lawv txhua tus, thiab qhia zaj uas hais txog Vajtswv lub Tebchaws rau lawv, thiab nws kho txhua tus uas muaj mob zoo huv tibsi. Thaum hnub yuav poob qho, kaum ob tug thwjtim los hais rau Yexus hais tias, “Koj cia li kom sawvdaws mus nrhiav zaub mov noj thiab chaw pw hauv tej zos thiab hauv tej teb uas nyob ibncig ze ntawm no, rau qhov ntawm no nyob deb nroog.” Tiamsis Yexus hais rau cov thwjtim hais tias, “Nej cia li nrhiav rau lawv noj.” Cov thwjtim teb hais tias, “Peb tsuas muaj tsib lub ncuav thiab ob tug ntses xwb. Koj xav kom peb mus muas mov los rau sawvdaws noj los?” ( Cov txivneej uas nyob ntawd muaj kwvlam li tsib txhiab leej.) Yexus hais rau nws cov thwjtim hais tias, “Nej kom sawvdaws los zaum ua tej pab, ib pab twg tsib caug leej.” Cov thwjtim kom sawvdaws zaum raws li Yexus hais, Yexus muab tsib lub ncuav thiab ob tug ntses los, nws tsa qhovmuag ntsia saum ntuj thiab ua Vajtswv tsaug, nws muab cov ncuav thiab ob tug ntses ntais cev rau cov thwjtim nqa mus faib rau sawvdaws. Txhua tus puavleej tau noj tsau huv tibsi, cov thwjtim mus sau cov uas sawvdaws noj tsis tas tau kaum ob tawb. Muaj ib zaug thaum Yexus tib leeg tabtom thov Vajtswv, nws cov thwjtim los cuag nws. Yexus nug lawv hais tias, “Tej neeg sawvdaws hais tias kuv yog leejtwg?” Cov thwjtim teb hais tias, “Muaj qee leej hais tias koj yog Yauhas tus uas muab neeg ua kevcai raus dej. Muaj qee leej hais tias koj yog Eliyas thiab muaj qee leej hais tias koj yog ib tug ntawm cov cev Vajtswv lus txheej thaud sawv rov qab los.” Yexus nug cov thwjtim hais tias, “Nej ne, nej ho hais tias kuv yog leejtwg?” Petus teb hais tias, “Koj yog tus Mexiyas uas Vajtswv txib los.” Yexus txwv cov thwjtim tawv tawv hais tias, “Nej tsis txhob qhia zaj no rau leejtwg li.” Thiab nws hais ntxiv rau lawv tias, “Neeg Leej Tub yuav raug kev tsimtxom ntau yam, thiab cov txwjlaug, cov thawj ntawm cov povthawj thiab cov xibhwb uas qhia Vajtswv txoj Kevcai yuav tsis lees yuav nws. Lawv yuav muab nws tua povtseg, tiamsis tom qab ntawd peb hnub nws yuav sawv hauv qhov tuag rov qab los.” Thiab Yexus hais rau lawv hais tias, “Yog leejtwg xav nrog kuv mus, tus ntawd yuav tsum tswj nws lub siab thiab niaj hnub kwv nws tus ntoo khaublig nrog kuv mus. Rau qhov tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia vim nws ntseeg kuv, tus ntawd yuav tau txojsia. Yog leejtwg tau ib puas tsav yam hauv ntiajteb no los ua nws tug, tiamsis nws txojsia tu lawm, tej ntawd yuav muaj nqis dabtsi rau nws! Yog leejtwg txajmuag qhia kuv lub npe thiab kuv tej lus, thaum Neeg Leej Tub tus uas muaj Leej Txiv lub tshwjchim uas ci ntsa iab nrog cov timtswv dawbhuv los saum ntuj los, kuv yuav txajmuag lees hais tias tus ntawd yog kuv li. Kuv qhia tseeb rau nej hais tias, cov neeg uas nyob ntawm no, muaj qee leej yuav tsis tau tuag ua ntej lawv pom Vajtswv lub Tebchaws.” Yim hnub tom qab uas Yexus qhia tej ntawd tas, Yexus coj Petus, Yauhas thiab Yakaunpaus nrog nws mus thov Vajtswv pem roob. Thaum Yexus tabtom thov Vajtswv, Yexus lub ntsejmuag txawm hloov hlo, thiab nws cev ris tsho ci ntsa iab dawb paug. Tamsim ntawd muaj ob tug txivneej los nrog Yexus tham. Ob tug ntawd yog Mauxes thiab Eliyas, nkawd muaj tshwjchim ci ntsa iab thiab nkawd nrog Yexus tham txog tes haujlwm uas Vajtswv kom Yexus ua thiab yuav tiav rau thaum Yexus tuag rau hauv lub nroog Yeluxalees. Petus thiab Petus ob tug phoojywg tsaug zog heev, tiamsis lawv tsim dheev los, lawv pom Yexus lub tshwjchim ci ntsa iab thiab muaj ob tug txivneej nrog Yexus sawv ntawd. Thaum ob tug txivneej ntawd ncaim Yexus mus lawm, Petus hais rau Yexus hais tias, “Tus Tswv, peb tuaj nyob ntawm no zoo kawg li! Peb yuav ua peb lub tsev pheebsuab, ib lub rau koj, ib lub rau Mauxes thiab ib lub rau Eliyas.” (Petus tsis paub xyov ua cas Petus hais li ntawd.) Thaum Petus tseem tabtom hais li ntawd, txawm muaj ib tauv huab los roos lawv; cov thwjtim ntshai kawg li. Thiab muaj ib lub suab hais hauv tauv huab tuaj hais tias, “Tus no yog kuv tus Tub uas kuv xaiv cia lawm, nej yuav tsum mloog nws lus!” Thaum lub suab ntawd hais xaus lawm, lawv pom Yexus tib leeg nyob ntawd xwb. Peb tug thwjtim npog tej uas lawv pom ntawd, tsis qhia rau leejtwg paub li. Hnub tom qab, thaum Yexus thiab nws peb tug thwjtim nqis pem roob los, muaj neeg coob coob tuaj cuag Yexus. Muaj ib tug txivneej hauv pab neeg ntawd hu Yexus nrov nrov hais tias, “Xibhwb! Kuv thov koj pab kuv tus tub, kuv muaj tib leeg tub no xwb! Nws raug dab; thaum dab nkag rau hauv nws, tamsim ntawd nws qw nrov nrov thiab huam ib tshaj, ua rau nws npuas ncauj tawm plaws. Dab pheej tsimtxom nws thiab tsis kam tawm hauv kuv tus tub mus li! Kuv thov koj cov thwjtim ntiab dab tawm, tiamsis lawv ntiab tsis tau.” Yexus teb hais tias, “Cov neeg tsis ntseeg thiab tsis ncaj! Kuv tseem yuav nrog nej nyob ntev li cas? Thiab kuv yuav ua siab ntev rau nej mus txog thaum twg?” Yexus hais rau tus txivneej ntawd tias, “Cia li coj koj tus tub los ntawm no.” Thaum tus metub tabtom los, dab ua rau nws ntog kiag rau hauv av, nws huam ib tshaj thiab nti mus nti los. Yexus txawm ntiab kom dab tawm, Yexus kho tus metub ntawd thiab muab nws rov rau nws txiv. Cov neeg uas pom Vajtswv lub hwjchim uas loj kawg nkaus ntawd, lawv xav tsis thoob li. Thaum sawvdaws tseem pheej xav tsis thoob rau txhua yam uas Yexus ua ntawd, Yexus hais rau nws cov thwjtim hais tias, “Nej yuav tsum nco ntsoov tej uas kuv qhia rau nej no! Luag yuav ntes Neeg Leej Tub coj mus rau neeg tsimtxom.” Tiamsis cov thwjtim tsis totaub lub ntsiab lus uas Yexus hais ntawd li. Yexus tsis qhia lub ntsiab rau lawv, lawv thiaj tsis paub, thiab lawv ntshai nug Yexus txog zaj ntawd. Cov thwjtim sib cav hais tias, leejtwg yuav tau ua tus loj dua ntais. Yexus paub tej uas lawv xav ntawd, nws txawm coj ib tug menyuam yuav los sawv ntawm nws ib sab, thiab nws hais rau lawv hais tias, “Tus uas lees yuav tus menyuam yaus no los ntawm kuv lub npe, kuj yog nws lees yuav kuv. Thiab tus uas lees yuav kuv, kuj yog nws lees yuav tus uas txib kuv los, rau qhov tus uas yau dua ntais hauv nej cov, tus ntawm thiaj yog tus uas loj dua ntais.” Yauhas hais tias, “Tus Tswv, peb pom ib tug txivneej tuav koj lub npe ntiab dab, peb txwv tsis pub nws ua li ntawd, rau qhov nws tsis yog peb pab.” Yexus hais rau Yauhas thiab cov thwjtim hais tias, “Nej tsis txhob txwv nws, rau qhov tus uas tsis tawmtsam nej, tus ntawd yog nej pab.” Thaum ze lub sijhawm uas Vajtswv yuav coj Yexus mus rau saum ntuj ceebtsheej, Yexus txiav txim siab mus nram lub nroog Yeluxalees. Yexus txib ib co neeg ua nws ntej mus, lawv mus rau hauv cov Xamalis ib lub zos, thiab mus npaj txhua yam tos Yexus. Tiamsis cov neeg Xamalis tsis pub Yexus mus rau hauv lawv lub zos, rau qhov lawv paub hais tias Yexus yuav mus nram lub nroog Yeluxalees. Thaum Yakaunpaus thiab Yauhas uas yog Yexus ob tug thwjtim hnov li ntawd, nkawd hais rau Yexus hais tias, “Tus Tswv, koj puas kheev wb hu hluavtaws poob saum ntuj los hlawv cov neeg ntawd kom puastsuaj?” Yexus tig hlo mus cem nkawd. Ces Yexus thiab nws cov thwjtim txawm mus dua lwm lub zos lawm. Thaum lawv tabtom taug kev mus, muaj ib tug txivneej hais rau Yexus hais tias, “Kuv yuav nrog koj mus, txawm yog koj mus qhov twg los kuv yuav nrog koj mus.” Yexus teb tus ntawd hais tias, “Txawm yog hma los muaj qhov nkaum, thiab noog los muaj zes; tiamsis Neeg Leej Tub tsis muaj chaw pw.” Yexus hais rau lwm tus txivneej hais tias, “Koj cia li nrog kuv mus.” Tiamsis tus ntawd teb hais tias, “Tus Tswv, thov cia kuv mus faus kuv txiv tso, kuv mam li nrog koj mus.” Yexus teb hais tias, “Cia cov neeg tuag faus lawv tus tuag. Koj cia li mus qhia zaj uas hais txog Vajtswv lub Tebchaws.” Muaj dua ib tug txivneej hais tias, “Tus Tswv, kuv yuav nrog koj mus; tiamsis cia kuv mus hais rau kuv tsevneeg paub tso.” Yexus hais rau tus ntawd hais tias, “Yog leejtwg tabtom tuav khais laij liag, tiamsis nws pheej tig saib rov tom qab, tus ntawd tsis tsimnyog rau Vajtswv lub Tebchaws.” Tom qab ntawd tus Tswv xaiv dua xya caum ob leeg, thiab txib lawv ob leeg mus ib qho, ua Yexus ntej mus rau txhua lub nroog thiab txhua lub zos uas Yexus yuav mus. Yexus hais rau lawv hais tias, “Cov nplej uas zoo hlais lawm muaj ntau, tiamsis cov neeg uas hlais muaj tsawg. Nej cia li thov tus tswv teb kom nws txib dua ib co neeg mus pab hlais nws cov nplej. Nej cia li mus! Kuv txib nej mus ib yam li pab yaj uas yuav mus hauv pab hma. Nej tsis txhob nqa hnab nyiaj lossis hnab thoobpuab lossis khau; yog nej ntsib leejtwg ntawm kev, nej tsis txhob nrog tus ntawd tham. Thaum nej mus rau hauv leejtwg tsev, nej yuav tsum xub hais tias, ‘Thov Vajtswv foom koob hmoov rau nej.’ Yog tsevneeg ntawd muaj ib tug xav tau Vajtswv txoj koob hmoov, ces tus ntawd yuav tau raws li uas nej hais; tiamsis yog tsis muaj tus uas xav tau Vajtswv txoj koob hmoov, ces lo lus koob hmoov ntawd yuav rov los rau ntawm nej. Nej cia li nyob hauv lub tsev ntawd, lawv pub rau nej noj thiab haus li cas, nej cia li noj thiab haus li ntawd, rau qhov yeej tsimnyog tus uas ua haujlwm tau nqi zog. Tsis txhob tawm hauv lub tsev ntawd mus pw dua lwm lub tsev. Thaum nej mus txog lub nroog twg, yog cov neeg ntawd pub nej so, tej zaub mov uas lawv ua rau nej noj, nej cia li noj, nej cia li kho cov neeg uas muaj mob hauv lub nroog ntawd, thiab qhia rau lawv paub hais tias, ‘Vajtswv lub Tebchaws twb los ze nej lawm.’ Tiamsis thaum nej mus txog lub nroog twg, yog cov neeg ntawd tsis pub nej so, nej cia li mus rau tom tej kev thiab qhia hais tias, ‘Txawm yog tej nyuag plua av hauv nej lub nroog uas lo peb kotaw los peb yuav muab so huv tibsi, kom nej paub hais tias nej yuav raug kev puastsuaj. Tiamsis kom nej nco ntsoov hais tias Vajtswv lub Tebchaws twb los ze nej lawm!’ Kuv hais tseeb rau nej hais tias, Hnub uas Vajtswv Txiav Txim, nws yuav rau txim rau lub nroog ntawd hnyav dua li nws rau txim rau lub nroog Xaudoos! “Lub nroog Khaulaxis, koj yuav raug kev puastsuaj! Lub nroog Npexaidas, koj yuav raug kev puastsuaj! Tej txujci tseemceeb uas luag twb ua rau neb pom lawm, yog ua tej ntawd rau hauv lub nroog Tiles thiab lub nroog Xidoos, ces cov neeg uas nyob hauv ob lub nroog ntawd, twb xub muab ntaubtsaj los npua, zaum hauv qhov tshauv thiab tsuab tshauv los nphoo rau ibce puag ntxov los lawm. Lawv ua li ntawd, kom sawvdaws paub hais tias lawv twb tso lawv tej kev txhaum tseg lawm! Hnub uas Vajtswv txiav txim, nws yuav rau txim rau neb hnyav dua li uas nws rau txim rau lub nroog Tiles thiab lub nroog Xidoos. Lub nroog Kapena-us! Koj yuav tsa koj lub hwjchim kom mus txij ntuj los? Kuv yuav muab koj pov mus rau hauv ntujtawg!” Yexus hais rau nws cov thwjtim hais tias, “Tus uas mloog nej lus, tus ntawd yeej mloog kuv lus; tus uas tsis lees paub nej, tus ntawd yeej tsis lees paub kuv; thiab tus uas tsis lees paub kuv, tus ntawd yeej tsis lees paub tus uas txib kuv los.” Thaum xya caum ob leeg thwjtim rov qab los, lawv zoo siab kawg li. Lawv hais rau Yexus hais tias, “Tus Tswv, thaum peb tuav koj lub npe ntiab dab, dab kuj mloog peb lus thiab!” Yexus teb lawv hais tias, “Kuv pom dab Ntxwgnyoog poob saum ntuj los, ib yam li xob laim. Nej ua tib zoo mloog! Kuv twb pub hwjchim rau nej lawm, nej yuav tsuj tau nab thiab raubris teb, thiab nej yuav muaj hwjchim kovyeej dab Ntxwgnyoog, thiab yuav tsis muaj dabtsi ua rau nej raug mob. Tiamsis nej tsis txhob zoo siab rau qhov uas dab mloog nej lus ntawd; nej cia li zoo siab rau qhov uas Vajtswv twb sau nej lub npe cia rau saum ntuj ceebtsheej lawm.” Thaum ntawd Vaj Ntsujplig tus Dawbhuv ua rau Yexus zoo siab kawg li, Yexus hais tias, “Kuv Txiv, koj yog tus Tswv uas kav lub ntuj thiab lub ntiajteb no! Kuv ua koj tsaug, rau qhov koj twb muab tej no zais cia tsis qhia rau cov neeg muaj tswvyim thiab txawj ntse paub, tiamsis koj qhia tej ntawd rau cov neeg uas tsis txawj tsis ntse paub xwb. Txiv, koj yeej pom zoo ua li ntawd. “Kuv Txiv twb muab ib puas tsav yam rau kuv lawm. Tsis muaj leejtwg paub Leej Tub, tsuas yog Leej Txiv thiaj paub xwb, thiab tsis muaj leejtwg paub Leej Txiv, tsuas yog Leej Tub thiab cov uas Leej Tub pom zoo qhia rau thiaj paub xwb.” Yexus txawm tig mus hais twjywm rau cov thwjtim hais tias, “Tej uas nej pom no, yog nej muaj hmoo kawg nej thiaj pom! Kuv qhia rau nej hais tias, cov uas cev Vajtswv lus thiab cov vajntxwv ntau leej xav pom tej uas nej pom, tiamsis lawv tsis tau pom, lawv xav hnov tej uas nej hnov, tiamsis lawv tsis tau hnov.” Muaj ib tug xibhwb qhia Vajtswv txoj Kevcai tuaj nrog Yexus tham, thiab sim saib Yexus yuav teb li cas. Nws nug Yexus hais tias, “Xibhwb, kuv yuav ua li cas, kuv thiaj tau txojsia ntev dhawv mus ibtxhis tsis kawg?” Yexus teb nws hais tias, “Vajtswv Txojlus qhia li cas? Tej uas koj nyeem ntawd, koj totaub li cas?” Tus txivneej ntawd teb hais tias, “ ‘Hlub tus Tswv uas yog koj tus Vajtswv kawg siab kawg ntsws, kawg plab kawg plawv thiab kawg lub dag lub zog’; thiab ‘Hlub koj tej kwvtij zejzog ib yam li koj hlub koj lub cev.’ ” Yexus teb hais tias, “Yog li koj hais lawm; koj cia li ua li ntawd koj thiaj yuav tau txojsia.” Tiamsis tus xibhwb uas qhia Vajtswv txoj Kevcai, khav hais tias nws yog neeg ncaj ncees, nws thiaj nug Yexus hais tias, “Tus twg thiaj yog kuv tej kwvtij zejzog?” Yexus teb hais tias, “Muaj ib tug txivneej taug kev ntawm lub nroog Yeluxalees mus rau nram lub nroog Yelikaus, thaum nws mus txog ib tog kev, txawm muaj ib pab tubsab muab nws ris tsho lwg tas thiab muab nws ntaus yuav luag tuag tso rau ntawm kev. Ces muaj ib tug povthawj taug txojkev ntawd tuaj; thaum nws pom tus ntawd, nws txawm lug kev dub muag txig mus lawm. Tom qab ntawd muaj ib tug Levis taug kev tuaj txog ntawd thiab, nws mus ntsia tus ntawd ib plia, nws txawm lug kev dub muag txig mus lawm thiab. Tiamsis muaj ib tug neeg Xamalis taug kev tuaj txog ntawd, thaum nws pom tus uas tubsab ntaus, nws hlub tus ntawd heev. Nws txav zog mus xyuas, nws muab roj thiab muab cawv txiv hmab hliv rau tus mob ntawd tej qhov txhab thiab muab ntaub qhwv; nws tsaws tus mob ntawd caij nws tus neesluav, nws coj tus mob mus pw tom ib lub tsev so, thiab tu tus mob ntawd. Thaum kaj ntug tus neeg Xamalis muab tau ob lub nyiaj rau tus tswv tsev ntawd thiab hais tias, ‘Thov koj pab tu tus neeg mob no, yog koj siv tshaj ob lub nyiaj no, thaum kuv rov qab los, kuv mam li ntxiv rau koj.’ ” Yexus nug hais tias, “Koj sim xav saib, lawv peb tug no, tus twg yog tus uas tubsab ntaus ntawd tus kwvtij?” Tus xibhwb uas qhia Vajtswv Kevcai teb hais tias, “Twb yog tus uas hlub tus tubsab ntaus ntawd ntag.” Yexus hais rau nws tias, “Koj cia li mus ua ib yam li ntawd.” Thaum Yexus thiab nws cov thwjtim mus txog hauv ib lub zos, muaj ib tug pojniam hu ua Mathas, txawm hu Yexus mus so hauv nws tsev. Mathas muaj ib tug niamhluas hu ua Malis, Malis los zaum ntawm Yexus kotaw thiab mloog Yexus qhia. Mathas ntxhov siab rau tej haujlwm ntau uas nws kov tsis yeej, nws los hais rau Yexus hais tias, “Tus Tswv, koj tsis paub hais tias kuv tus niamhluas cia kuv tib leeg ua haujlwm xwb los? Koj hais kom nws cia li los pab kuv ua haujlwm!” Tus Tswv teb hais tias, “Mathas, Mathas! Koj txhawj thiab ntxhov siab rau ntau yam haujlwm kawg li, tiamsis tsuas muaj ib yam zoo xwb. Malis twb xaiv yam zoo ntawd lawm, tsis muaj leejtwg yuav txeeb tau yam uas nws muaj ntawd mus li.” Muaj ib zaug Yexus mus thov Vajtswv ntawm ib qhov chaw. Thaum nws thov Vajtswv tas lawm, nws ib tug thwjtim los hais rau nws hais tias, “Tus Tswv, thov koj qhia kom peb paub thov Vajtswv ib yam li Yauhas qhia nws cov thwjtim lawm.” Yexus hais rau nws cov thwjtim hais tias, “Thaum nej thov Vajtswv, nej hais li no: ‘Leej Txiv: Thov kom sawvdaws hwm koj lub npe; thov koj los kav neeg lub siab. Thov koj niaj hnub pub mov rau peb noj. Thov koj zam txim rau peb, rau qhov peb twb zam txim rau txhua tus uas ua txhaum rau peb lawm. Thov tsis txhob cia tej kev sim siab ntxias tau peb.’ ” Thiab Yexus hais rau nws cov thwjtim hais tias, “Thaum ib tag hmo, yog nej cov muaj ib tug mus rau tom nws tus phoojywg tsev thiab thov hais tias, ‘Phoojywg, thov txais koj peb lub ncuav rau kuv. Rau qhov kuv tus phoojywg dua kev tuaj so hauv kuv tsev, kuv tsis muaj mov rau nws noj!’ Yog tus phoojywg uas nyob hauv tsev teb hais tias, ‘Tsis txhob tuaj txob kuv! Kuv twb liaj qhovrooj, kuv thiab kuv cov menyuam twb pw tas lawm. Kuv yuav tsis sawv mus muab mov rau koj.’ Yog li ntawd, kuv qhia rau nej hais tias, txawm yog nkawd yog phoojywg zoo npaum li cas los nws yuav tsis sawv mus muab mov rau nws tus phoojywg, tiamsis vim qhov uas nws tus phoojywg pheej thov tsis paub txajmuag li. Nws yuav tau mus muab tej uas nws tus phoojywg xav tau rau tus phoojywg. Yog li ntawd, kuv qhia rau nej hais tias, nej thov, nej thiaj yuav tau; nej nrhiav, nej thiaj yuav ntsib thiab nej khob, luag thiaj yuav qhib qhovrooj rau nej. Rau qhov txhua tus uas thov, yeej yuav tau, txhua tus uas nrhiav yeej yuav ntsib thiab txhua tus uas khob, luag yeej yuav qhib qhovrooj rau nws. Nej cov uas yog leej txiv, yog nej tej menyuam thov ntses, nej yuav muab nab rau los? Lossis nej tej menyuam thov qaij, nej yuav muab raubris teb rau los? Txawm yog nej yog neeg txhaum los nej tseem paub muab yam zoo rau nej tej menyuam. Yog li ntawd, nej Leej Txiv tus uas nyob saum ntuj ceebtsheej, nws yimhuab yuav muab Vaj Ntsujplig tus Dawbhuv rau txhua tus uas thov nws!” Yexus ntiab tus dab uas ua rau ib tug txivneej hais tsis tau lus tawm lawm; tus txivneej ntawd txawm rov hais tau. Cov neeg coob coob uas nyob ntawd xav tsis thoob li. Tiamsis muaj qee leej xav hais tias, “Yog Npexenpus uas yog dab tus thawj pub hwjchim rau nws, nws thiaj ntiab tau dab.” Muaj qee leej xav sim Yexus, lawv txawm kom Yexus ua ib yam txujci tseemceeb rau sawvdaws saib hais tias, nws yog tus uas Vajtswv txib los. Yexus twb paub tej uas lawv xav lawm, thiab nws hais rau lawv hais tias, “Yog ib lub tebchaws twg tawg ua ob peb pab, thiab cov neeg ntawd sib ntaus sib tua, ces lub tebchaws ntawd yuav puastsuaj mus; thiab tsevneeg twg uas tsis sib haum, ces tsevneeg ntawd yeej yuav tawg tag mus. Yog cov neeg uas dab Ntxwgnyoog kav sib ntaus sib tua, lawv yuav nyob taus ua ke ntev li cas? Nej hais tias yog Npexenpus pub hwjchim rau kuv, kuv thiaj ntiab tau dab. Yog li ntawd, leejtwg pub hwjchim rau nej cov neeg uas ntiab tau dab, ntiab dab? Nej cov neeg uas ntiab tau dab, yog cov uas yuav txiav txim rau nej! Tsis yog li uas nej hais, tiamsis yog kuv muaj Vajtswv lub hwjchim, kuv thiaj ntiab tau dab, qhov ntawd qhia rau nej paub hais tias, Vajtswv lub Tebchaws twb los txog nej lawm. “Yog muaj ib tug txivneej uas muaj zog heev, nws npaj ntaj thiab riam khov kho zov nws lub tsev, yeej tsis muaj leejtwg yuav mus nyiag tau nws tej qhov txhia chaw. Tiamsis yog muaj ib tug uas muaj zog heev dua nws, ntaus yeej nws, thiab txeeb nws tej ntaj tej riam uas nws cia siab rau nqa mus tas huv tibsi, thiab tej uas nws huab tau, nws yuav coj mus sib faib. “Tus uas tsis tuaj kuv tog, tus ntawd yeej tawmtsam kuv; tus uas tsis koom nrog kuv, tus ntawd ua kom tawg pab tawg pawg xwb. “Thaum dab tawm hauv ib tug neeg lub cev mus lawm, tus dab ntawd txawm mus rau tom roob mojsab qhua, thiab yog nws nrhiav tsis tau chaw so, nws yuav hais tias, ‘Kuv yuav rov qab mus rau tom kuv lub qub tse uas kuv tawm tuaj.’ Thaum nws rov qab los txog nws lub qub tse, ua ciav twb tu dulug cia lawm. Tus dab ntawd txawm mus coj dua xya tus dab uas tsiv dua nws los nrog nws nyob hauv lub tsev ntawd. Thaum kawg tus neeg ntawd hajyam txomnyem dua thaum chivthawj.” Thaum Yexus hais li ntawd tas, muaj ib tug pojniam hais nrov nrov hauv pab neeg coob coob ntawd tuaj hais tias, “Tus pojniam uas yug koj thiab pub mis rau koj noj, yog tus uas tau koob hmoov!” Tiamsis Yexus teb hais tias, “Tsis yog li ntawd, cov neeg uas hnov Vajtswv Txojlus thiab ua raws li Txojlus ntawd, thiaj yog cov uas tau koob hmoov!” Thaum cov neeg coob coob tuaj sawv puagncig Yexus, Yexus hais rau lawv hais tias, “Cov neeg tiam no ua phem ua qias kawg li! Lawv thov kom kuv ua ib yam txujci tseemceeb, tiamsis kuv yuav tsis ua rau lawv pom. Zaj txujci tseemceeb uas lawv yuav pom tsuas yog Yaunas zaj xwb. Yaunas zaj ua lub cim rau cov neeg uas nyob hauv lub nroog Nineves pom li cas, Neeg Leej Tub yuav ua lub cim rau cov neeg tiam no ib yam li ntawd. Hnub uas Vajtswv Txiav Txim, tus Poj Vajntxwv uas kav tebchaws Senpas yuav sawv qhia cov neeg tiam no tej kev txhaum rau lawv. Rau qhov nws taug kev nram nws lub tebchaws tuaj mloog Vajntxwv Xalumoos piav nws tej kev txawj ntse. Kuv qhia rau nej hais tias, muaj ib tug nyob ntawm no tseem muaj hwjchim loj dua Xalumoos thiab. Hnub uas Vajtswv Txiav Txim, cov neeg uas nyob hauv lub nroog Nineves yuav sawv qhia nej tej kev txhaum rau nej, rau qhov thaum lawv hnov Yaunas qhia, lawv tso lawv tej kev txhaum tseg. Kuv qhia rau nej hais tias, muaj ib tug nyob ntawm no, nws tseem muaj hwjchim loj dua Yaunas thiab! “Tsis muaj leejtwg taws teeb thiab muab phiab khwb rau; tsuas muaj yuav muab txawb rau qhov chaw siab xwb, kom cov neeg uas tuaj huv tsev thiaj pom kev. Koj lub qhovmuag yog lub teeb uas ci rau koj lub cev pom kev. Yog koj lub qhovmuag pom kev tseeb, koj lub cev yeej yuav kaj nrig. Tiamsis yog koj lub qhovmuag pom kev tsis tseeb, tagnrho koj lub cev yeej yuav tsaus ntuj nti. Koj yuav tsum ceevfaj zoo, tsis txhob pub qhov pom kev uas koj muaj tsaus. Yog koj lub cev kaj nrig txhua qhov, tsis muaj ib qho tsaus, koj yuav ci ntsa iab thoob plaws, ib yam li muaj duab teeb ci tuaj rau koj.” Thaum Yexus qhia tas, muaj ib tug Falixais hu Yexus mus nrog nws noj mov; Yexus txawm mus hauv nws tsev, thiab zaum ntawm rooj mov. Thaum tus Falixais pom hais tias, Yexus tsis ntxuav tes raws li kevcai tso mam li noj, nws xav tsis thoob li. Tus Tswv hais rau nws hais tias, “Nej cov Falixais ibtxwm ntxuav khob ntxuav phaj sab nraud xwb, tiamsis hauv nej lub siab muaj kev phem kev qias puv nkaus. Ua li cas nej yuav ruam ua luaj li! Nej tsis paub hais tias Vajtswv tus uas tsim sab nraud, nws yog tus uas tsim sab hauv thiab? Nej cia li muab tej uas nyob hauv nej tej khob thiab tej phaj pub rau cov neeg pluag, txhua yam uas nej muaj thiaj yuav huv raws li kevcai. “Cov Falixais, nej yuav raug kev puastsuaj! Nej muab pumhub, luamlaws thiab txhua yam txujlom ib feem kaum fij rau Vajtswv, tiamsis nej ho tsis ua neeg ncaj ncees thiab tsis hlub Vajtswv. Nej yuav tsum ua tej no thiab lwm yam los nej yuav tau ua. “Cov Falixais, nej yuav raug kev puastsuaj! Nej nyiam xaiv tej chaw zoo hauv tej tsev sablaj zaum, thaum nej mus tom tej khw, nej nyiam kom sawvdaws hwm nej. Nej yuav raug kev puastsuaj! Nej zoo ib yam li tej ntxa uas tsis muaj dabtsi cim rau sau, neeg tsuj mus tsuj los, lawv tsis paub hais tias yog ntxa.” Muaj ib tug xibhwb uas qhia Vajtswv txoj Kevcai hais rau Yexus hais tias, “Xibhwb, koj hais li ntawd, kuj yog koj thuam peb!” Yexus teb hais tias, “Cov xibhwb uas qhia Vajtswv txoj Kevcai, nej yuav raug kev puastsuaj thiab! Nej muab lub nra hnyav uas tsis yoojyim ris rau lawv ris, tiamsis nej twb tsis cev nej tus nyuag ntivtes mus pab thiab tej nra ntawd li. Nej yuav raug kev puastsuaj! Nej txhim tej ntxa uas faus cov cev Vajtswv lus kom zoo nkauj. Cov cev Vajtswv lus twb yog cov uas nej cov yawgkoob muab tua povtseg lawm. Nej ua tej ntawd rau sawvdaws paub hais tias, nej pom zoo tej uas nej cov yawgkoob ua los lawm. Rau qhov nej cov yawgkoob yog cov uas tua cov cev Vajtswv lus, thiab nej yog cov uas txhim tej ntxa ntawd. Vim li no Vajtswv tus uas muaj tswvyim thiaj li hais tias, ‘Kuv yuav txib cov uas cev Vajtswv lus thiab kuv cov timthawj mus qhia lawv, tiamsis lawv yuav muab cov cev Vajtswv lus thiab cov timthawj qee leej tua, thiab yuav muab qee leej tsimtxom.’ Cov neeg tiam no yuav tau ris lub txim uas cov neeg tiam thaum ub tua cov cev Vajtswv lus, txij thaum tsim lub ntiajteb los txog niaj hnub no, suav txij thaum Anpees raug tua los txog thaum Xakhaliyas raug tua rau ntawm lub thaj fij khoom rau Vajtswv thiab qhov chaw Dawbhuv kis nruab nrab. Kuv qhia rau nej hais tias, cov neeg tiam no yuav tau ris cov neeg uas tua cov cev Vajtswv lus ntawd lub txim! “Cov xibhwb uas qhia Vajtswv txoj Kevcai, nej yuav raug kev puastsuaj! Nej muab tus yuamsij uas qhib lub tsev uas yog kev txawj ntse zais cia lawm; txawm yog nej los nej yuav tsis xav mus rau hauv, thiab yog lwm tus yuav mus hauv, los nej tseem txwv tsis pub lawv mus thiab!” Thaum Yexus tawm hauv tus Falixais tsev mus, cov xibhwb uas qhia Vajtswv txoj Kevcai thiab cov Falixais txawm thuam Yexus heev thiab nug Yexus ntau zaj saib nws puas hais txhaum, lawv thiaj yuav nrhiav tau txim rau nws. Thaum muaj neeg ntau txhiab leej tuaj nyob ua ke sib txiv qev, Yexus hais rau Yexus cov thwjtim hais tias, “Nej yuav tsum ceevfaj cov Falixais cov keeb. Kuv hais li no yog kuv hais txog cov Falixais uas ntsejmuag ncaj siab nkhaus. Tej uas neeg muab npog cia lawm, yuav muaj tus muab nthuav los rau sawvdaws saib, thiab tej uas tsis muaj leejtwg paub, yuav muaj tus muab los qhia rau sawvdaws. Yog li ntawd, txhua yam uas nej hais hauv qhov tsaus ntuj, thaum kaj ntug yuav muaj tus muab tej ntawd qhia rau sawvdaws, thiab tej uas nej sib ntxhi hauv tsev, yuav muaj tus muab tej ntawd coj mus qhia nrov nrov rau nraum zoov. “Kuv cov phoojywg, kuv qhia rau nej hais tias, nej tsis txhob ntshai tus uas tua tau nej lub cev, tiamsis tom qab ntawd nws ua tsis tau dabtsi tshaj qhov ntawd lawm. Kuv yuav qhia tus uas nej yuav tsum ntshai rau nej. Nej yuav tsum ntshai Vajtswv tus uas tua tau nej thiab muaj cuabkav muab nej pov rau hauv ntujtawg. Kuv qhia rau nej hais tias, nej yuav tsum ntshai Vajtswv! Tsib tug noog tsev, luag muag ob xu xwb puas yog? Txawm yog ib tug noog tsev xwb los Vajtswv yeej saib ntsoov. Txawm yog nej tej plaubhau los Vajtswv suav txhua txoj huv tibsi. Yog li ntawd, nej tsis txhob ntshai; nej muaj nqis heev dua ntau tus noog tsev. “Kuv qhia tseeb rau nej hais tias, tus uas lees tabmeeg sawvdaws hais tias nws yog kuv li, Neeg Leej Tub yuav lees tus ntawd tabmeeg Vajtswv cov timtswv ib yam li ntawd. Tiamsis tus uas tsis lees kuv tabmeeg sawvdaws, Neeg Leej Tub yuav tsis lees yuav tus ntawd tabmeeg Vajtswv cov timtswv. “Yog leejtwg thuam Neeg Leej Tub, Vajtswv zam txim tau rau tus ntawd. Tiamsis yog leejtwg thuam Vaj Ntsujplig tus Dawbhuv, Vajtswv yuav zam txim tsis tau rau tus ntawd. “Thaum lawv coj nej mus rau hauv tej tsev sablaj lossis coj nej mus cuag tej nomtswv, nej tsis txhob txhawj hais tias nej yuav hais daws nej zaj li cas. Rau qhov thaum ntawd Vaj Ntsujplig tus Dawbhuv yuav qhia rau nej paub hais tias, nej yuav hais li cas thiaj zoo.” Muaj ib tug txivneej nyob hauv pab neeg coob coob ntawd hais rau Yexus hais tias, “Xibhwb, thov koj hais kom kuv tus tijlaug faib kuv niam kuv txiv tej qubtxeeg qubteg rau kuv thiab.” Yexus teb hais tias, “Phoojywg, leejtwg tsa kuv ua tus txiav txim thiab faib qubtxeeg qubteg rau neb?” Yexus hais rau sawvdaws tias, “Nej txhua tus yuav tsum ceevfaj tsis txhob ntshaw yam ub yam no. Txawm yog nej muaj nyiaj ntxiag thiab qhov txhia chaw ntau npaum li cas los tej ntawd yeej pab tsis tau kom nej muaj txojsia nyob ntev.” Yexus hais ib zaj lus pivtxwv rau lawv hais tias, “Muaj ib tug txivneej npluanuj, nws muaj liaj muaj teb zoo thiab sau tau qoobloo ntau heev. Nws xav hais tias, ‘Kuv yuav ua li cas? Kuv tsis muaj chaw txaus ntim kuv tej qoobloo no.’ Nws xav hais tias, ‘Kuv yuav ua li no. Kuv yuav rhuav kuv lub txhab, thiab muab ua kom loj dua, thiaj txaus ntim kuv tej qoobloo thiab qhov txhia chaw. Ces kuv yuav hais rau kuv lub siab hais tias, koj muaj hmoo heev! Koj twb muaj txhua yam txhij zog uas kav ntau xyoo lawm. Koj cia li so nyob noj nyob haus.’ Tiamsis Vajtswv hais rau tus npluanuj ntawd tias, ‘Tus neeg ruam, hmo no koj txojsia twb yuav tu; yog li ntawd, tej qhov txhia chaw uas koj npaj tseg yuav yog leejtwg tug?’ ” Yexus xaus lus hais tias, “Tus uas npaj nyiaj txiag qhov txhia chaw los ua nws tug kom nws npluanuj, Vajtswv tsis suav hais tias tus ntawd yog neeg npluanuj.” Ces Yexus hais rau nws cov thwjtim hais tias, “Yog li ntawd, kuv thiaj qhia rau nej kom nej tsis txhob txhawj hais tias nej yuav tsum muaj zaub mov noj thiaj muaj sia nyob lossis yuav tsum muaj ris tsho hnav. Rau qhov txojsia tseemceeb dua tej zaub mov, thiab lub cev tseemceeb dua tej ris tsho. Nej ua tib zoo saib tej uablag: Uablag tsis cog qoob cog loo, thiab tsis hlais tsis sau; lawv tsis muaj txhab tsis muaj phawv ntim qoobloo cia; Vajtswv twb yug tej uablag! Nej tseem muaj nqis heev dua tej noog ntawd! Nej tej kev txhawj puas yuav pab tau kom nej muaj sia nyob ob peb xyoos ntxiv? Yog tej yam me me no nej twb ua tsis tau, nej tseem yuav mus txhawj lwm yam ua dabtsi? Nej ua tib zoo xav saib, tej paj ntoos tawg li cas? Lawv twb tsis ua haujlwm, tsis ntos ntaub hnav. Tiamsis kuv qhia rau nej hais tias, txawm yog Vajntxwv Xalumoos npluanuj kawg li los nws twb tsis tau hnav ib cev ris tsho zoo npaum li tej paj ntoos ntawd ib lub. Ua li cas nej kev ntseeg yuav tsawg ua luaj? Tej nroj tsuag uas tsuas nyob hnub no xwb, tagkis luag twb yuav muab pov hlawv rau hauv qhovcub, ua ciav Vajtswv twb pub rau tej paj ntoos ntawd zoo nkauj ua luaj. Yog li ntawd, Vajtswv hajyam yuav pub rau nej muaj hnav zoo dua tej nroj tsuag ntawd! “Yog li ntawd, nej tsis txhob txhawj hais tias, nej yuav mus nrhiav dabtsi los noj los haus. (Cov neeg uas tsis ntseeg Vajtswv hauv ntiajteb no niaj hnub nrhiav tej no.) Nej Leej Txiv yeej paub hais tias nej yuav tsum muaj tej no. Tiamsis nej yuav tsum xub nrhiav Vajtswv lub Tebchaws tso, nws mam li muab tej no ntxiv rau nej. “Cov menyuam yaj, txawm yog nej tsis coob los nej tsis txhob ntshai, rau qhov nej Leej Txiv twb txaus siab muab nws lub tebchaws rau nej lawm. Cia li muab nej tej qhov txhia chaw muag, thiab muab tej ntawd faib rau cov neeg pluag. Cia li xaws lub hnab rau nyiaj uas tsis txawj ntuag ntim nej tej nyiaj rau saum ntuj ceebtsheej, qhov ntawd nej tej nyiaj yuav tsis ploj, rau qhov tubsab nyiag tsis tau, thiab ntsaum kabrwg tsis noj. Nej tej nyiaj txiag thiab qhov txhia chaw nyob qhov twg, nej lub siab yeej nyob qhov ntawd. “Nej yuav tsum hnav ris tsho khov kho tos thiab taws teeb cia, ib yam li cov tubtxib uas npaj tos lawv tus tswv uas mus noj tshoob yuav rov los. Thaum tus tswv los txog thiab hu, tamsim ntawd cov tubtxib yuav qhib qhovrooj rau nws. Thaum tus tswv rov los pom cov tubtxib tseem zov tos, cov tubtxib ntawd yuav tau ntsejmuag! Kuv qhia rau nej hais tias, tus tswv ntawd yuav sia siv khov kho thiab yuav kom cov tubtxib zaum ntawm rooj, thiab nws yuav ua tus txhab zaub txhab mov rau lawv noj. Txawm yog tus tswv los thaum ib tag hmo lossis los thaum yuav kaj ntug, yog nws pom cov tubtxib tseem zov tos, cov tubtxib ntawd yuav tau ntsejmuag! Nej nco ntsoov hais tias, yog tus tswv tsev paub hais tias thaum twg tubsab yuav tuaj, nws yeej yuav zov tos, tsis pub kom tubsab los tau rau hauv nws tsev. Yog li ntawd, nej los yuav tsum zov tos, rau qhov Neeg Leej Tub yuav los lub sijhawm uas nej tsis ceevfaj.” Petus nug Yexus hais tias, “Tus Tswv, zaj lus pivtxwv uas koj hais no, yog koj hais rau peb lossis koj hais rau txhua tus?” Tus Tswv teb hais tias, “Tus tubtxib ncaj ncees thiab muaj tswvyim. Tus tswv yuav tsa nws ua tus loj uas saib tus tswv cov tubtxib. Thaum txog sijhawm noj, tus ntawd yuav ua tus uas faib zaub faib mov rau cov tubtxib noj. Thaum tus tswv rov los tsev thiab pom tus tubtxib ntawd tabtom ua tej haujlwm zoo no. Ces tus tubtxib ntawd yuav tau ntsejmuag. Kuv qhia rau nej hais tias, tus tswv yuav tsa tus tubtxib ntawd ua tus saib tus tswv tej qhov txhia chaw. Tiamsis yog tus tubtxib ntawd xav hais tias, tseem tshuav ntev nws tus tswv mam los, ces nws txawm muab cov tubtxib ntaus, tsis hais pojniam lossis txivneej huv tibsi, thiab nws noj tsau haus qaug, nws tsis paub hais tias lub sijhawm twg nws tus tswv yuav los txog, nws thiaj tsis ceevfaj. Tus tswv yuav muab tus tubtxib ntawd hlais ua tej daim, thiab muab nws pov mus nrog cov neeg uas tsis mloog lus nyob. “Tus tubtxib uas paub nws tus tswv lub siab lawm, tiamsis nws tsis ua raws li tus tswv xav kom nws ua. Tus tubtxib ntawd yuav mag nplawm. Tiamsis tus tubtxib uas tsis paub nws tus tswv lub siab, txawm yog nws ua txhaum txaus nplawm los nws yuav tsis mag nplawm ntau. Tus uas tau ntau, tus ntawd yuav tsum pauj ntau. Tus uas tau ntau dua, tus ntawd yuav tsum pauj ntau dua. “Qhov uas kuv los yog coj hluavtaws los hlawv lub ntiajteb, thiab kuv xav kom hluavtaws twb cig lawm! Kuv nyuaj siab kawg li, vim kuv yuav raug kev tsimtxom, thiab kuv yuav nyuaj siab mus txog thaum lub sijhawm ntawd dhau lawm. Nej xav hais tias, kuv coj kev sib haumxeeb los rau hauv lub ntiajteb no los? Kuv qhia rau nej hais tias, tsis yog li ntawd, kuv los ua kom neeg nyob tsis sib haum. Txij no mus tsevneeg uas muaj tsib lees yuav tsis sib haum, peb leeg yuav tawmtsam ob leeg, thiab ob leeg yuav tawmtsam peb leeg. Txiv yuav tawmtsam tub, tub yuav tawmtsam txiv; niam yuav tawmtsam ntxhais, ntxhais yuav tawmtsam niam; pog yuav tawmtsam nyab thiab nyab yuav tawmtsam pog.” Yexus hais rau sawvdaws hais tias, “Thaum nej pom huab tsaus nti sab hnubpoob los, tamsim ntawd nej hais tias, yuav los nag, ces txawm muaj li ntawd. Thiab thaum nej pom cua ntsawj sab qabteb tuaj, nej hais tias, twb yuav txog lub caij ntuj kub, ces txawm muaj li ntawd. Cov neeg ntsejmuag ncaj siab nkhaus! Nej saib huab saib cua, nej paub hais tias yuav tshav ntuj lossis yuav los nag, tiamsis ua li cas tej uas niaj hnub no muaj, nej ho tsis paub? “Vim li cas nej tsis ua tib zoo xav saib yuav ua yam twg thiaj zoo? Yog leejtwg xyuam phaj kom koj rau hauv tsev tu plaub, thiab yuav coj koj mus hais plaub, ua ntej uas tsis tau mus hais plaub, koj cia li thov nws kom neb rov sib haum, nyob tsam nws yuav coj koj mus cuag tus txiav txim, ces tus txiav txim yuav muab koj cob rau tus ceevxwm, thiab tus ceevxwm yuav muab koj kaw rau hauv tsev lojcuj. Kuv qhia tseeb rau koj hais tias, koj yuav tawm tsis tau hauv tsev lojcuj mus txog thaum uas koj them nqi tas.” Thaum lub sijhawm ntawd, muaj qee leej qhia rau Yexus hais txog zaj uas Philaj muab cov neeg Kalilais tua, thaum lawv tabtom tua tsiaj fij rau Vajtswv. Yexus teb lawv hais tias, “Nej xav hais tias, cov neeg Kalilais uas raug tua li ntawd, lawv muaj txim loj dua lwm tus neeg Kalilais huv tibsi no los? Tsis yog li ntawd! Kuv qhia rau nej hais tias, yog nej tsis tso nej tej kev txhaum tseg, nej yuav tuag ib yam li lawv cov ntawd thiab. Nej xav hais tias, kaum yim leej uas lub chaw tsomfaj vau los ntaus tuag tas hauv Xilau-as ntawd, yog lawv ua txhaum loj dua cov neeg uas nyob hauv lub nroog Yeluxalees huv tibsi no los? Tsis yog li ntawd! Kuv qhia rau nej hais tias, yog nej tsis tso nej tej kev txhaum tseg, nej yuav tuag tas ib yam li lawv cov ntawd thiab.” Yexus hais ib zaj lus pivtxwv rau lawv mloog hais tias, “Muaj ib tug txivneej cog ib tsob txiv ncuavpias rau hauv nws lub vaj txiv hmab. Nws mus saib, saib puas txi txiv, tiamsis tsis pom txi txiv li. Nws txawm hais rau tus uas tu lub vaj ntawd hais tias, ‘Koj saib, kuv tuaj saib tsob txiv ncuavpias no tau peb xyoos lawm, tiamsis kuv tsis pom txi ib lub txiv li. Koj cia li muab ntov povtseg! Ua li cas tseem yuav cia nws nyob ntxoov av ua dabtsi?’ Tiamsis tus uas tu lub vaj teb hais tias, ‘Tus tswv, thov cia nws nyob ib xyoos thiab tso. Kuv yuav khawb av npoog thiab rau chiv rau. Yog lwm xyoo nws txi txiv lawm kuj zoo, yog nws tsis txi txiv, koj mam li muab ntov povtseg.’ ” Muaj ib hnub uas yog Hnub Xanpataus, Yexus tabtom qhia hauv ib lub tsev sablaj. Muaj ib tug pojniam raug dab thiab mob tau kaum yim xyoo lawm; ua rau nws khoov duav sawv tsis tau ntseg. Thaum Yexus pom tus pojniam ntawd, Yexus hu nws los thiab hais rau nws hais tias, “Tus ntxhais, koj tus mob twb zoo lawm!” Yexus cev tes mus tuav nkaus tus pojniam ntawd, tamsim ntawd tus pojniam ntawd txawm sawv taus ntseg thiab nws ua Vajtswv tsaug. Thaum tus uas saib lub tsev sablaj pom Yexus kho mob Hnub Xanpataus, nws chim heev, nws hais rau cov neeg uas nyob ntawd hais tias, “Twb muaj rau hnub rau peb ua Vajtswv haujlwm; ua li cas rau hnub ntawd nej ho tsis tuaj kho mob, Hnub Xanpataus nej ho tuaj kho?” Tus Tswv teb hais tias, “Cov neeg ntsejmuag ncaj siab nkhaus! Hnub Xanpataus nej twb daws nyuj lossis daws neesluav cab tawm hauv nkuaj mus haus dej. Tus pojniam no twb yog Anplahas ib tug xeebntxwv, thiab dab Ntxwgnyoog twb muab nws khi tau kaum yim lub xyoo los lawm; Hnub Xanpataus tseem tsis tsimnyog daws kom nws dim thiab los?” Yexus teb li ntawd, ua rau cov neeg uas tawmtsam Yexus poob ntsejmuag kawg li. Tiamsis cov neeg uas pom tej txujci uas Yexus ua, lawv zoo siab heev. Yexus nug hais tias, “Kuv yuav muab Vajtswv lub Tebchaws piv rau dabtsi? Vajtswv lub tebchaws piv ib yam li lub noob zaub uas muaj ib tug coj mus cog rau hauv nws lub vaj. Lub noob zaub ntawd tuaj thiab loj hlob ua ib tsob ntoo uas loj heev, thiab noog los ua zes rau saum nws tej ceg.” Yexus rov nug dua hais tias, “Kuv yuav muab Vajtswv lub Tebchaws piv rau dabtsi? Vajtswv lub Tebchaws piv ib yam li cov keeb uas muaj ib tug pojniam muab xyaw rau peb siab hmoov nplej, thiab ua rau cov hmoov nplej su tas huv tibsi.” Yexus taug kev mus qhuab qhia rau tej neeg sawvdaws hauv tej nroog thiab tej zos mus txog nram lub nroog Yeluxalees. Muaj ib tug nug Yexus hais tias, “Tus Tswv, cov uas yuav dim txim muaj tsawg tsawg leej xwb los?” Yexus teb lawv hais tias, “Nej ua tiag txeem lub qhovrooj nqaim mus rau sab hauv. Kuv qhia rau nej hais tias, muaj ntau leej xav mus sab hauv, tiamsis lawv mus tsis tau. Thaum tus tswv tsev sawv los kaw qhovrooj lawm; nej yuav sawv sab nraud khob qhovrooj thiab hu hais tias, ‘Tus tswv, thov qhib qhovrooj rau peb!’ Tus tswv tsev yuav teb nej hais tias, ‘Kuv tsis paub xyov nej tuaj qhov twg tuaj!’ Thaum ntawd nej yuav teb hais tias, ‘Peb twb nrog koj noj koj haus; thiab koj twb tuaj qhia hauv peb lub nroog!’ Tus tswv tsev yuav rov hais rau nej hais tias, ‘Kuv tsis paub xyov nej tuaj qhov twg tuaj. Cov neeg siab phem, nej cia li khiav mus!’ Thaum nej pom Anplahas, Ixaj, Yakhauj thiab cov cev Vajtswv lus txhua tus nyob hauv Vajtswv lub Tebchaws, thaum ntawd nej cov uas tseem nyob sab nraud, nej yuav quaj qw tom hniav qawv! Yuav muaj neeg tuaj sab hnubtuaj, sab hnubpoob, sab qaumteb thiab sab qabteb tuaj nyob ua ke ntawm rooj mov hauv Vajtswv lub Tebchaws. Thaum ntawd tus uas nimno nyob tom tw yuav tau mus ua tus thawj, thiab tus uas nimno ua tus thawj, yuav tau los nyob tom tw.” Thaum lub sijhawm ntawd, cov Falixais qee leej tuaj cuag Yexus thiab hais rau nws hais tias, “Koj cia li khiav tawm qhov no thiab mus rau lwm qhov, Helauj yuav muab koj tua povtseg.” Yexus teb lawv hais tias, “Nej cia li mus qhia rau tus hma ntawd hais tias: ‘Hnub no thiab tagkis, kuv tseem ntiab dab thiab kho tej neeg muaj mob, hnub peb kuv tes haujlwm mam li tiav.’ Txawm li cas los xij, hnub no, tagkis thiab nagkis, kuv yeej yuav taug kev mus rau nram; rau qhov tsis tsimnyog yuav muab ib tug uas cev Vajtswv lus tua rau lwm qhov, tsuas tsimnyog muab tua rau hauv lub nroog Yeluxalees xwb. “Yeluxalees, Yeluxalees! Koj muab cov uas cev Vajtswv lus tua povtseg, koj muab pobzeb ntaus cov tubtxib uas Vajtswv txib los qhia koj! Muaj ntau zaus kuv twb yuav muab koj cov pejxeem los puag, ib yam li tus poj qaib cuab nws cov menyuam los puag rau hauv nws ob phab tis, tiamsis koj tsis cia kuv ua li ntawd! Nimno Vajtswv yuav muab koj lub Tuamtsev tso povtseg nyob qhuav nquas cia. Kuv qhia rau koj hais tias, koj yuav tsis pom kuv mus txog hnub uas koj hais tias, ‘Thov Vajtswv foom koob hmoov rau tus uas Vajtswv txib los.’ ” Muaj ib hnub uas yog Hnub Xanpataus, Yexus mus noj mov hauv cov Falixais ib tug thawj lub tsev; muaj neeg saib ntsoov Yexus. Muaj ib tug txivneej tes taw phobvog los cuag Yexus, Yexus nug cov xibhwb uas qhia Vajtswv txoj Kevcai thiab cov Falixais hais tias, “Peb txoj kevcai puas pub peb kho mob Hnub Xanpataus los tsis pub?” Tiamsis lawv tsis teb li. Yexus tuav nkaus tus txivneej ntawd, Yexus kho nws tus mob zoo thiab kom nws mus tsev lawm. Yexus hais rau lawv hais tias, “Hnub Xanpataus, yog nej leejtwg muaj ib tug menyuam lossis ib tug nyuj mus poob rau hauv qhovtshij lawm, txawm yog hnub ntawd yog Hnub Xanpataus los nej yeej yuav mus muab nrawm nroos xwb los sav?” Lawv teb tsis taus Yexus lo lus ntawd li. Yexus pom cov neeg uas tuaj noj mov muaj qee leej xaiv zaum pem hauv tsum, Yexus hais ib zaj lus pivtxwv rau lawv hais tias, “Thaum muaj neeg hu koj mus noj tshoob, koj tsis txhob xub mus xaiv zaum pem hauv tsum. Nyob tsam tus tswv tsev twb hu ib tug uas tseemceeb dua koj tuaj, thiab tus tswv tsev uas hu neb ob leeg tuaj, yuav los hais rau koj hais tias, ‘Cia tus no zaum lub chaw ko.’ Thaum ntawd koj yuav poob ntsejmuag heev, thiab koj yuav tau mus zaum tom qab. Thaum muaj neeg hu koj mus noj mov, koj yuav tsum xub mus zaum tom qab, thaum tus tswv tsev los, nws yuav hu koj hais tias, ‘Phoojywg, koj cia li mus zaum pem hauv tsum.’ Ces koj yuav tau ntsejmuag tabmeeg cov neeg uas nrog koj zaum noj mov ua ke ntawd. Rau qhov txhua tus uas khav hais tias nws muaj hwjchim, tus ntawd yuav poob hwjchim, tiamsis txhua tus uas txo hwjchim, yuav tau hwjchim.” Yexus hais rau tus tswv tsev ntawd hais tias, “Thaum koj noj sus lossis noj hmo, koj tsis txhob mus hu koj tej phoojywg, koj tej kwvtij neejtsa thiab tej neeg zejzog uas npluanuj tuaj xwb, rau qhov lawv yeej yuav ua ib rooj mov pauj rau koj. Thaum koj muaj noj muaj haus, koj cia li mus hu tej neeg pluag, tej neeg qhuav tes qhuav taw, tej neeg cegtawv thiab tej neeg digmuag tuaj noj; koj thiaj yuav tau koob hmoov, rau qhov lawv cov ntawd pauj tsis taus koj txiaj ntsig. Thaum Vajtswv tsa cov neeg ncaj ncees sawv hauv qhov tuag rov qab los, Vajtswv yuav muab nqi zog rau koj.” Cov neeg uas nrog Yexus zaum ntawm rooj mov hnov Yexus hais li ntawd, muaj ib tug hais rau Yexus hais tias, “Tus uas tau mus noj mov hauv Vajtswv lub tebchaws, tus ntawd yuav zoo siab kawg li!” Yexus hais rau nws hais tias, “Muaj ib tug txivneej ua ib rooj mov loj, nws mus caw ntau leej tuaj noj. Thaum txog lub sijhawm noj lawm, nws txib ib tug tubtxib mus hu cov neeg uas nws twb caw lawm hais tias, ‘Nej cia li mus, twb rau mov txhij lawm!’ Tiamsis cov neeg ntawd txhua tus yig hais tias, tsis khoom mus. Thawj tug hais rau tus tubtxib ntawd hais tias, ‘Kuv yuav tau ib thaj liaj, kuv yuav mus saib; koj rov mus hais rau koj tus tswv kom nws tsis txhob tu siab.’ Muaj dua ib tug hais tias, ‘Kuv muas tau tsib nkawm nyuj cia lawm, kuv yuav mus muab kuv cov nyuj sim laij liag. Koj rov mus hais rau koj tus tswv kom nws tsis txhob tu siab.’ Muaj dua ib tug hais tias, ‘Kuv nyuam qhuav yuav pojniam, yog li ntawd kuv tsis mus.’ Tus tubtxib rov mus qhia tej no rau nws tus tswv. Tus tswv chim heev, nws hais rau tus tubtxib tias, ‘Koj cia li mus rau tom tej kev loj kev me hauv nroog, coj tej neeg pluag, tej neeg qhuav tes qhuav taw, tej neeg digmuag thiab tej neeg cegtawv tuaj noj.’ Tus tubtxib rov los hais rau nws tus tswv hais tias, ‘Kuv twb mus ua raws li koj hais rau kuv lawm, tiamsis tseem tshuav chaw thiab.’ Tus tswv rov hais rau tus tubtxib ntawd hais tias, ‘Koj cia li mus rau tom tej kev loj thiab kev me, koj ntsib leejtwg los koj cia li coj tuaj kom puv kuv lub tsev. Kuv qhia rau nej hais tias, cov neeg uas twb caw lawm, tsis muaj ib tug yuav tau saj kuv rooj mov hlo li!’ ” Muaj neeg coob coob nrog Yexus ua ke mus, Yexus tig los hais rau lawv hais tias, “Yog leejtwg yuav los cuag kuv, tus ntawd yuav tsum hlub kuv heev dua li nws hlub nws niam nws txiv, nws pojniam menyuam, nws kwv nws tij, nws nkauj nws muam thiab heev dua li nws hlub nws lub cev, nws thiaj li ua tau kuv tus thwjtim. Tus uas tsis kwv nws tus ntoo khaublig nrog kuv mus, tus ntawd ua tsis tau kuv tus thwjtim. Nej cov yog muaj ib tug yuav ua ib lub chaw tsomfaj, tus ntawd yuav tsum xub zaum ua tib zoo xav saib yuav siv nyiaj npaum li cas, thiab nws puas yuav muaj nyiaj txaus ua tau. Yog nws tsis xub ua li ntawd, ces thaum txhos tau ncej lawm, nws yuav ua lub chaw tsomfaj ntawd tsis tiav. Cov neeg uas pom li ntawd yuav thuam nws hais tias, ‘Tus txivneej no pib ua, tiamsis nws tsis muaj peevxwm ua kom tiav!’ Tus vajntxwv uas muaj tubrog kaum txhiab leej, thaum nws yuav mus ua rog rau ib tug vajntxwv uas muaj tubrog nees nkaum txhiab leej, nws yeej yuav xub ua tib zoo xav saib, nws cov tubrog puas yuav mus ntaus yeej tus vajntxwv uas muaj tubrog nees nkaum txhiab leej ntawd. Yog nws xav hais tias nws yuav tua tsis yeej, thaum nws tseem nyob deb, nws yeej yuav xub txib neeg mus thov tus vajntxwv tod, kom ob tog sib raug zoo. Yexus xaus lus hais tias, ib yam nkaus li ntawd, tus uas tsis tso txhua yam uas nws muaj tseg, tus ntawd ua tsis tau kuv tus thwjtim. “Ntsev yog yam uas zoo, tiamsis yog ntsev tsuag lawm, yuav ua li cas kom rov qab ntsev tau. Cov ntsev ntawd tsis zoo siv ua dabtsi, muab rau av los av tsis zoo, thiab muab xyaw chiv los tsis zoo, tsuas muaj yuav muab povtseg xwb. Yog leejtwg muaj pobntseg cia li mloog!” Muaj ib zaug cov neeg sau se thiab cov neeg txhaum tuaj mloog Yexus qhia, cov Falixais thiab cov xibhwb uas qhia Vajtswv txoj Kevcai txawm yws hais tias, “Tus no nrog cov neeg txhaum ua ke thiab nrog lawv noj mov!” Yog li ntawd, Yexus thiaj hais ib zaj lus pivtxwv rau lawv mloog hais tias, “Nej cov yog leejtwg muaj ib puas tus yaj, yog ib tug ploj lawm, tus tswv yuav ua li cas? Nws yeej yuav tso cuaj caum cuaj tug rau tom hav zaub, thiab mus nrhiav tus yaj uas ploj lawm kom tau. Thaum nws nrhiav tau lawm, nws zoo siab heev, nws muab tsaws hlo rau saum xubpwg, thiab kwv los tsev. Ces nws hu nws cov kwvtij thiab tej neeg zejzog tuaj thiab hais rau lawv hais tias, ‘Nej cia li nrog kuv zoo siab, rau qhov kuv twb mus nrhiav tau kuv tus yaj uas ploj lawm!’ Ib yam nkaus li ntawd, kuv qhia rau nej hais tias, yog ib tug neeg txhaum tso nws tej kev txhaum tseg lawm, cov timtswv ceebtsheej yuav zoo siab rau tus ntawd heev dua li zoo siab rau cuaj caum cuaj tug uas lawv khav hais tias, lawv yog neeg ncaj ncees. “Lossis muaj ib tug pojniam muaj kaum lub nyiaj, yog ib lub poob lawm, nws yuav ua li cas? Nws yuav taws teeb, cheb tsev thiab tshawb nrhiav txhua qhov kom tau lub nyiaj ntawd. Thaum nws nrhiav tau nws lub nyiaj lawm, nws hu nws cov kwvtij thiab tej neeg zejzog tuaj, thiab nws hais rau lawv hais tias, ‘Kuv twb nrhiav tau kuv lub nyiaj uas poob lawm, nej cia li nrog kuv zoo siab!’ Ib yam li ntawd, kuv qhia rau nej hais tias, yog ib tug neeg txhaum tso nws tej kev txhaum tseg, Vajtswv cov timtswv yuav zoo siab kawg nkaus rau tus neeg txhaum uas tso nws tej kev txhaum tseg.” Yexus hais ntxiv hais tias, “Muaj ib tug txivneej muaj ob tug tub. Tus tub yau hais rau leej txiv hais tias, ‘Txiv, thov koj muab koj lub cuabtam cov uas yog kuv feem faib rau kuv.’ Leej txiv muab nws lub cuabtam tej uas yog nws tug faib rau nws ob tug tub. Tau ob peb hnub tom qab, tus tub yau muab tej uas yog nws tug muag tau nyiaj, ces nws txawm khiav mus rau lwm lub tebchaws deb deb lawm, nws tsis txuag nws tej nyiaj, nws ywj siab siv ua dog ua dig, nws muab nws tej nyiaj phob tas, thaum ntawd muaj kev tshaib plab thoob plaws lub tebchaws, nws tsis tshuav dabtsi li lawm. Nws thiaj mus nrog ib tug txivneej hauv lub nroog ntawd nyob, tus ntawd txib nws mus zov npua tom teb. Nws xav noj cov plhaub taum uas npua noj, kom tsau nws plab los tsis muaj leejtwg pub rau nws noj. Thaum nws nco dheev txog hais tias, ‘Kuv txiv cov tub zog muaj noj muaj haus tsis tas, ua li cas kuv yuav tuaj yoo tshaib ntawm no? Kuv yuav rov mus cuag kuv txiv thiab hais tias, “Txiv, kuv ua txhaum rau Vajtswv thiab ua txhaum rau koj lawm. Kuv tsis tsimnyog ua koj tus tub lawm; thov koj suav kuv ib yam li kuv yog koj ib tug tub zog xwb.” ’ Ces nws txawm sawv tsees taug kev rov mus cuag nws txiv. “Thaum nws los tsis tau txog uas tseem nyob hov deb, nws txiv pom nws thiab hlub nws kawg; nws txiv dhia loo mus puag nkaus tus tub nwj. Tus tub hais rau leej txiv hais tias, ‘Txiv, kuv ua txhaum rau Vajtswv thiab ua txhaum rau koj lawm. Kuv tsis tsimnyog ua koj tus tub lawm!’ Tiamsis leej txiv hais rau cov tubtxib hais tias, ‘Nej tsawg tsuag nqa cev ris tsho uas zoo zoo tuaj rau nws hnav. Nqa nplhaib tuaj rau nws coj, muab khau tuaj rau nws rau. Thiab mus muab tus menyuam nyuj uas rog rog coj los tua ua ib rooj mov rau sawvdaws noj ua kev zoo sab. Rau qhov kuv tus tub no twb tuag lawm, tiamsis nimno nws ciaj rov los; nws twb ploj lawm, tiamsis nimno nws rov los.’ Ces sawvdaws txawm noj haus zoo sab. “Thaum ntawd tus tub hlob nyob tom teb. Nws rov tom teb los txog ntawm tog tsev, nws hnov suab raj suab nkauj nogncas thiab suab seevcev nrov doog diaj hauv tsev tuaj. Nws hu ib tug tubtxib tuaj thiab nug hais tias, ‘Lawv ua dabtsi hauv tsev?’ Tus tubtxib ntawd teb hais tias, ‘Koj tus kwv rov qab los lawm. Koj txiv tua tus menyuam nyuj rog rog rau koj tus kwv noj, rau qhov koj tus kwv rov los, nws tseem noj qab nyob zoo.’ Tus tijlaug chim heev, nws tsis kam mus rau hauv tsev. Nws txiv thiaj tawm tuaj thov kom nws mus hauv tsev. Nws teb nws txiv hais tias, ‘Txiv, koj sim xav saib, kuv ua haujlwm rau koj ib yam li tus qhev tau ntau xyoo, kuv tsis tau tawv koj ib zaug li. Koj twb tsis pub ib yam dabtsi rau kuv. Txawm yog ib tug nyuag menyuam tshis los koj twb tsis muab rau kuv tua pub kuv cov phoojywg noj ib pluag zoo siab li! Tiamsis koj tus tub no, coj koj tej nyiaj mus ntiav niamntiav thiab phob phuam lam tas. Nws rov qab los, koj ho muab tus menyuam nyuj rog rog tua rau nws noj thiab!’ Leej txiv teb hais tias, ‘Metub, koj yeej ibtxwm nrog kuv nyob, txhua yam uas kuv muaj puavleej yog koj li. Yeej tsimnyog peb ua ib rooj mov noj thiab zoo siab, rau qhov koj tus kwv twb tuag lawm, tiamsis nimno nws ciaj rov los, nws twb ploj lawm, tiamsis nimno nws rov los.’ ” Yexus hais rau nws cov thwjtim hais tias, “Muaj ib tug neeg npluanuj, nws muaj ib tug thawj tubtxib uas saib nws lub vajtse. Muaj neeg los qhia rau tus npluanuj hais tias, koj tus thawj tubtxib muab koj tej nyiaj coj mus siv phuam lam ntsuav lawm, Yog li ntawd, tus npluanuj thiaj hu tus thawj tubtxib los thiab hais rau nws hais tias, ‘Zaj uas kuv hnov koj ua ntawd yog li cas tiag? Koj cia li muab tej ntaub ntawv uas teev tej nyiaj los rau kuv, rau qhov kuv tsis yuav koj ua kuv tej haujlwm lawm.’ Tus thawj tubtxib ntawd xav hais tias, ‘Kuv tus tswv twb yuav rho kuv tawm haujlwm, kuv yuav ua li cas thiaj zoo? Kuv yuav mus khawb av los tsis muaj zog, yuav mus thov khawv noj los txajmuag. Nimno, kuv paub hais tias kuv yuav ua li cas! Thaum tus tswv tsis pub kuv ua haujlwm lawm, thiaj muaj neeg hu kuv mus hauv lawv tej tsev.’ Nws txawm hu txhua tus uas tshuav nws tus tswv nqi ib tug zuj zus tuaj cuag nws. Nws nug thawj tug hais tias, ‘Koj tshuav tus tswv nqi npaum li cas?’ Tus ntawd teb hais tias, ‘Kuv tshuav ib puas thoob roj.’ Tus thawj tubtxib hais rau tus ntawd hais tias, ‘Daim ntawv no yog daim uas koj tshuav nqi, koj cia li mus zaum thiab sau kiag ua tsib caug thoob.’ Tus thawj tubtxib txawm nug dua ib tug hais tias, ‘Koj tshuav npaum li cas?’ Tus ntawd teb hais tias, ‘Kuv tshuav ib txhiab hnab nplej.’ Tus thawj tubtxib hais rau tus ntawd hais tias, ‘Daim ntawv no yog daim uas koj tshuav nqi, koj cia li sau ua yim caum hnab.’ Tus tswv qhuas tus thawj tubtxib uas tsis ncaj hais tias, tus tubtxib ntawd muaj tswvyim kawg li; rau qhov cov neeg uas nyob hauv ntiajteb no muaj tswvyim ua haujlwm heev dua cov neeg uas nyob qhov pom kev.” Yexus hais ntxiv hais tias, “Yog li ntawd kuv qhia rau nej hais tias, nej yuav tsum muab tej nyiaj hauv ntiajteb no coj mus zeem phoojywg. Thaum nej tej nyiaj tas lawm, cov neeg ntawd thiaj yuav tos txais nej hauv qhov chaw uas yuav nyob mus ibtxhis. Tus uas ua ncaj rau tej yam tsawg, nws yeej yuav ua ncaj rau yam ntau thiab; tus uas ua tsis ncaj rau tej yam tsawg, nws yeej yuav ua tsis ncaj rau tej yam ntau thiab. Tej nyiaj hauv ntiajteb no, nej twb siv tsis ncaj. Yog li ntawd, leejtwg yuav muab tej uas tseemceeb dua tej nyiaj ntawd rau nej thiab. Thiab yog nej ua tsis ncaj rau tej uas yog lwm tus tug, leejtwg yuav muab tej uas yog nej tug rau nej? “Yeej tsis muaj ib tug tubtxib yuav ua haujlwm tau rau ob tug tswv. Yog nws ua li ntawd, nws yuav ntxub ib tug thiab nyiam ib tug; nws yuav hwm ib tug thiab saib tsis taus ib tug. Yog nej yuav muab Vajtswv thiab nyiaj txiag saib hlob ib yam nkaus yeej tsis tau li.” Thaum cov Falixais hnov Yexus qhia tej ntawd, lawv txawm thuam Yexus, rau qhov lawv yog cov uas ntshaw nyiaj. Yexus hais rau lawv hais tias, “Nej yog cov neeg uas ua txuj ua kom sawvdaws xav hais tias, nej yog neeg zoo, tiamsis Vajtswv twb paub nej lub siab tas lawm. Rau qhov tej uas neeg xav hais tias muaj nqis, tej ntawd Vajtswv pom hais tias tsis muaj nqis. “Sawvdaws coj Mauxes txoj Kevcai thiab tej lus qhia uas cov cev Vajtswv lus sau tseg los txog lub sijhawm uas Yauhas tus uas muab neeg ua kevcai raus dej los qhia, txij thaum ntawd los muaj neeg mus qhia Txojmoo Zoo uas hais txog Vajtswv lub tebchaws, ces sawvdaws sib txeeb mus rau hauv lub tebchaws ntawd. Yog ua kom lub ntiajteb thiab lub ntuj puastsuaj mus, yoojyim dua li rhuav Mauxes txoj Kevcai ib tug tsiaj ntawv povtseg. “Yog leejtwg muab nws tus pojniam nrauj lawm thiab mus yuav dua pojniam, kuj yog nws ua txhaum kev nkauj kev nraug; thiab yog leejtwg mus yuav ib tug pojnrauj, kuj yog nws ua txhaum kev nkauj kev nraug ib yam nkaus. “Muaj ib tug npluanuj, nws hnav tej tsoos tsho zoo zoo uas kim kim, thiab niaj hnub muaj noj seem noj so. Muaj ib tug txivneej pluag pluag hu ua Laxalus, nws ibce mob ua paug viag, luag pheej coj nws tuaj tso rau ntawm tus npluanuj ib sab qhovrooj. Nws xav hais tias nyaj nws yuav tau noj tej mov uas poob saum tus npluanuj lub rooj los, txawm yog nws txomnyem npaum li ntawd los dev tseem los yaim nws tej qhov txhab thiab. Thaum tus txomnyem ntawd tuag, cov timtswv ceebtsheej los coj nws mus nyob ntawm Anplahas ib sab. Thaum tus npluanuj tuag, luag coj nws mus faus, thiab nws raug txomnyem nyob hauv tubtuag teb. Nws tsa qhovmuag ntsia saud, nws pom Anplahas nyob deb deb, thiab pom Laxalus nyob ntawm Anplahas ib sab. Tus npluanuj hu hais tias, ‘Txiv Anplahas! Thov koj hlub kuv, thiab txib Laxalus muab nws tus ntivtes mus ntub dej tuaj rau kuv tus nplaig kom laj mentsis, rau qhov kuv nyob hauv cov nplaim taws no, kuv txomnyem kawg li!’ Tiamsis Anplahas teb hais tias, ‘Metub, koj puas nco thaum koj tseem ua neej nyob, koj muaj noj muaj hnav, Laxalus txomnyem tsis muaj dabtsi li. Nimno nws tau zoo, koj ho mus nyob hauv qhov txomnyem. Tsis tas li ntawd xwb, tseem muaj ib tug kwj tob tob quas peb thiab nej lawm, cov sab tim peb no yuav tuaj rau sab tim nej los yeej tsis tau, thiab cov sab tim nej yuav hla tuaj rau sab tim peb no los yeej tsis tau.’ Tus npluanuj hais tias, ‘Txiv Anplahas, thov koj txib Laxalus rov mus kom txog kuv txiv tsev, kuv tshuav tsib tug kwvtij, kom Laxalus mus qhia rau lawv, nyob tsam lawv yuav tau los nyob hauv qhov txomnyem no thiab.’ Anplahas teb hais tias, ‘Koj cov kwvtij twb muab Mauxes txoj kevcai thiab tej lus uas cov cev Vajtswv lus sau tseg lawm, cia lawv coj raws li tej lus ntawd.’ Tus npluanuj teb hais tias, ‘Txiv Anplahas, tsis yog li ntawd, yog ib tug uas tuag lawm, sawv rov mus qhia rau lawv, lawv thiaj li yuav tso lawv tej kev txhaum tseg.’ Tiamsis Anplahas hais tias, ‘Yog lawv tsis mloog Mauxes thiab cov uas cev Vajtswv lus tej lus qhia, ces txawm yog ib tug uas tuag lawm sawv rov qab mus qhia rau lawv los lawv yeej yuav tsis ntseeg li.’ ” Yexus hais rau nws cov thwjtim hais tias, “Ua li cas los yeej yuav muaj ib yam ua rau neeg ua txhaum, tiamsis tus uas ua yam ntawd, nws yuav raug kev puastsuaj! Yog tus ntawd ua rau cov menyuam no ib tug ua txhaum, cia li muab hlua khi ib txhib zeb uas loj loj dai rau tus ntawd cajdab thiab coj nws mus pov rau hauv hiavtxwv yuav zoo dua! Yog li ntawd, nej yuav tsum ceevfaj zoo! “Yog koj pom koj ib tug kwvtij ua txhaum rau koj, koj yuav tsum ntuas nws. Yog nws lees nws tej kev txhaum lawm, koj cia li zam txim rau nws. Yog ib hnub nws ua txhaum rau koj xya zaus, thiab txhua zaus uas nws tuaj lees rau koj hais tias, ‘Kuv ua txhaum lawm,’ koj yuav tsum zam txim rau nws.” Cov timthawj hais rau Yexus hais tias, “Thov koj pab kom peb muab siab rau ntseeg ntxiv.” Tus Tswv hais rau lawv hais tias, “Yog nej muaj kev ntseeg luaj li lub noob zaub, nej yuav hais rau tsob ntoo zaub kab no hais tias, ‘Koj cia li rho hlo mus cog rau hauv hiavtxwv,’ ces tsob ntoo zaub kab ntawd yuav mloog nej hais.” “Nej cov yog leejtwg muaj ib tug tubtxib mus laij liag lossis mus yug yaj lawm, thaum nws rov qab nram liaj los, nej puas yuav hais rau tus tubtxib ntawd kom nws cia li los noj mov? Nej yeej yuav tsis hais li ntawd! Nej yuav hais rau nws hais tias, ‘Cia li tu cev khov kho mus ua mov rau kuv noj, thaum kuv noj kuv haus tas; koj mam li noj.’ Txawm yog tus tubtxib ua raws li nej hais los tsis tas nej yuav ua nws tsaug. Nej cov los kuj ib yam nkaus; thaum nej ua raws li kuv kom nej ua tas lawm, nej cia li hais tias, ‘Peb yog cov tubtxib uas tsis tseemceeb dabtsi li, peb tsuas ua raws li peb tes haujlwm xwb.’ ” Thaum Yexus mus nram lub nroog Yeluxalees, nws hla lub xeev Kalilais mus. Thaum nws tabtom yuav mus rau hauv ib lub zos, nws ntsib kaum tus mob ruas. Lawv sawv deb deb, thiab hu nrov nrov hais tias, “Tswv Yexus! Thov koj hlub peb!” Thaum Yexus pom dheev lawv, nws hais rau lawv hais tias, “Nej cia li mus cuag cov povthawj kom lawv saib nej.” Thaum cov neeg mob ruas ntawd tabtom mus, lawv tej ruas twb zoo lawm. Lawv cov ntawd muaj ib tug pom hais tias, nws tej ruas zoo tas lawm, nws txawm rov qab los thiab hais nrov nrov ua Vajtswv tsaug. Nws txhos caug ntua ntawm Yexus kotaw ua Yexus tsaug. Tus ntawd yog neeg Xamalis. Yexus hais tias, “Kaum leej twb zoo huv tibsi lawm; cuaj leeg dua twg tas lawm? Vim li cas tsuas muaj tib leeg uas yog lwm haivneeg los ua Vajtswv tsaug xwb?” Thiab Yexus hais rau tus ntawd hais tias, “Koj cia li sawv mus tsev; koj txojkev ntseeg twb ua rau koj tej ruas zoo lawm.” Cov Falixais muaj qee leej nug Yexus hais tias thaum twg Vajtswv lub Tebchaws mam li los? Yexus teb hais tias, “Thaum uas Vajtswv lub Tebchaws los, yuav tsis muaj ib yam dabtsi qhia rau leejtwg paub. Tsis muaj leejtwg yuav hais tias, ‘Nej saib, nws nyob ntawm no,’ lossis ‘Nyob tod!’; Rau qhov Vajtswv lub Tebchaws twb los lawm.” Yexus hais rau cov thwjtim hais tias, “Yeej yuav muaj ib lub sijhawm uas nej xav pom hnub uas Neeg Leej Tub rov los, tiamsis nej yuav tsis pom. Yuav muaj neeg hais rau nej hais tias, ‘Nej mus saib tod!’ lossis ‘Nej los saib ntawm no!’ Tiamsis nej tsis txhob mus saib. Hnub uas Neeg Leej Tub los, yuav muaj xob laim saum nruab ntug, ib sab ntuj mus rau ib sab ntuj. Tiamsis ua ntej ntawd, nws twb xub raug kev tsimtxom ntau yam thiab cov neeg tiam no tsis lees yuav nws. Tiam uas Nau-es ua neej nyob zoo li cas, lub sijhawm uas Neeg Leej Tub los yuav zoo ib yam nkaus li ntawd. Tej neeg sawvdaws niaj hnub noj haus, ua tshoob ua kos mus txog hnub uas Nau-es nce mus rau hauv nkoj, thiab dej los nyab tej neeg ntawd tuag tas huv tibsi. Lub sijhawm uas Neeg Leej Tub los yuav zoo ib yam li tiam uas Lauj nyob. Tej neeg sawvdaws niaj hnub ua noj ua haus, ua lag ua luam, ua liaj ua teb thiab ua vaj ua tsev. Hnub uas Lauj tawm hauv lub nroog Xaudoos mus, txawm muaj nplaim taws thiab leejfaj poob saum ntuj los kub tej neeg tuag tas huv tibsi. Hnub uas Neeg Leej Tub los, yuav zoo ib yam nkaus li ntawd. “Hnub ntawd tus uas nyob nraum zoov, tsis txhob mus nqa nws tej qhov txhia chaw hauv tsev; ib yam li ntawd, tus uas mus rau tom teb lawm, tsis txhob rov qab los rau hauv tsev. Nej yuav tsum nco ntsoov txog Lauj tus pojniam! Tus uas khuvxim nws txojsia, tus ntawd yuav tsis tau txojsia; tus uas tsis khuvxim nws txojsia, tus ntawd yuav tau txojsia. Kuv qhia rau nej hais tias hmo ntawd, ob tug neeg uas pw ibtxag: yuav coj ib tug mus, tseg ib tug cia. Ob tug pojniam uas zom zeb ua ke: yuav coj ib tug mus, tseg ib tug cia.” [Ob tug txivneej uas nyob tom teb, yuav coj ib tug mus, tseg ib tug cia.] Cov thwjtim nug Yexus hais tias, “Tus Tswv, yuav muaj li ntawd nyob rau qhov twg?” Yexus teb hais tias, “Cev tuag nyob qhov twg, dav npoj yuav sau nthwv mus rau qhov ntawd.” Yexus hais ib zaj lus pivtxwv rau nws cov thwjtim hais tias, kom lawv niaj hnub thov Vajtswv tsis txhob qaug zog. Yexus hais tias, “Nyob hauv ib lub nroog, muaj ib tug txiav txim uas tsis ntshai Vajtswv thiab tsis hwm leejtwg li. Nyob hauv lub nroog ntawd muaj ib tug pojntsuam uas niaj hnub tuaj thov tus txiav txim ntawd hais tias, ‘Thov koj pab hais rooj plaub uas luag kom kuv!’ Thaum chivthawj tus txiav txim tsis kam hais, tiamsis tom qab ntawd, nws xav hais tias, ‘Txawm yog kuv tsis ntshai Vajtswv thiab tsis hwm leejtwg li los, tus pojntsuam no pheej tuaj txob kuv, kuv yuav tau pab nws hais kom tas, nws thiaj yuav tsis niaj hnub tuaj txob kuv kom kuv ntxhov siab!’ ” Tus Tswv hais rau lawv ntxiv hais tias, “Nej twb hnov tus txiav txim uas siab tsis ncaj ntawd tej lus lawm. Vajtswv haivneeg uas niaj hnub niaj hmo thov Vajtswv pab, Vajtswv yuav tsis pab hais lawv zaj los? Vajtswv yuav tos ntev mam li pab lawv los? Kuv qhia rau nej hais tias, Vajtswv yeej yuav pab hais lawv zaj sai sai. Thaum Neeg Leej Tub los, cov neeg uas nyob hauv ntiajteb no puas yuav muaj tus uas ntseeg nws lawm?” Thiab Yexus hais ib zaj lus pivtxwv rau cov neeg uas khav hais tias, lawv yog neeg ncaj thiab lawv saib tsis taus lwm tus li no, “Muaj ib zaug ob tug txivneej mus thov Vajtswv hauv lub Tuamtsev: ib tug yog tus Falixais thiab ib tug yog tus sau se. Tus Falixais sawv ntsug thiab nws thov hais tias, ‘Vajtswv, kuv ua koj tsaug, kuv zoo tsis thooj li lwm tus, kuv tsis ua neeg siab hlob, kuv yog neeg ncaj ncees, kuv tsis zes luag tej pojniam thiab kuv tsis zoo li tus sau se ntawd. Xya hnub twg kuv ua kevcai yoo mov ob zaug, thiab tej nyiaj uas kuv khwv tau los, kuv muab ib feem kaum rau koj.’ Tiamsis tus sau se sawv nrug deb mentsis, nws tsis tsa qhovmuag saib saum ntuj, nws ntaus nws lub hauvsiab thiab hais tias, ‘Vajtswv, kuv yog neeg txhaum, thov koj hlub kuv!’ Yexus hais tias, kuv qhia rau nej hais tias, thaum nkawd rov mus tsev lawm, tus sau se yog tus uas ua haum Vajtswv siab, tsis yog tus Falixais. Rau qhov tus uas khav hais tias, nws muaj hwjchim, tus ntawd yuav poob hwjchim, tiamsis tus uas txo hwjchim, tus ntawd yuav tau hwjchim.” Muaj neeg coj lawv cov menyuam tuaj cuag Yexus thiab thov nws cev tes plhws lawv tej menyuam. Thaum cov thwjtim pom li ntawd, lawv txwv tsis pub cov neeg ua li ntawd, tiamsis Yexus hu cov menyuam yaus los cuag nws thiab hais tias, “Cia li tso cov menyuam yaus los cuag kuv, tsis txhob txwv lawv, rau qhov Vajtswv lub Tebchaws yog cov neeg uas muaj lub siab zoo li cov menyuam yaus no tug. Kuv qhia rau nej hais tias, yog leejtwg tsis txais yuav Vajtswv lub Tebchaws ib yam li cov menyuam yaus no, ces tus ntawd yuav tsis tau mus rau hauv Vajtswv lub Tebchaws li.” Cov Yudas ib tug thawjcoj tuaj nug Yexus hais tias, “Tus xibhwb uas muaj lub siab zoo, kuv yuav ua li cas kuv thiaj tau txojsia ntev dhawv mus ibtxhis?” Yexus nug nws hais tias, “Vim li cas koj hu kuv hais tias, tus uas muaj lub siab zoo? Yeej tsis muaj leejtwg siab zoo li, tsuas yog Vajtswv tib leeg xwb. Koj yeej paub Vajtswv txoj Kevcai uas hais tias, ‘Tsis txhob deev luag pojniam luag txiv; tsis txhob tua neeg; tsis txhob ua tubsab; tsis txhob ua timkhawv tsis tseeb thiab hwm koj niam koj txiv.’ ” Tus txivneej ntawd teb hais tias, “Tej kevcai uas koj hais ko kuv twb coj txhua nqe thaum kuv tseem yau los lawm.” Thaum Yexus hnov nws hais li ntawd, Yexus hais rau nws tias, “Tseem tshuav ib yam uas koj tsis tau ua. Koj cia li mus muab koj tej qhov txhia chaw muag huv tibsi, thiab muab cov nyiaj ntawd faib rau cov neeg pluag, koj thiaj yuav yog tus uas npluanuj nyob saum ntuj ceebtsheej; tom qab ntawd, koj cia li tuaj nrog kuv mus.” Thaum tus txivneej ntawd hnov Yexus hais li ntawd, nws nyuaj siab kawg li, rau qhov nws npluanuj heev. Thaum Yexus pom tus ntawd nyuaj siab heev, Yexus hais tias, “Cov neeg npluanuj yuav mus Vajtswv lub tebchaws mas nyuaj kawg li! Ib tug ntxhuav nkag lub qhov koob tseem yoojyim dua ib tug neeg npluanuj yuav mus rau Vajtswv lub Tebchaws.” Cov neeg uas hnov Yexus hais li ntawd, lawv nug Yexus hais tias, “Yog li ntawd, leejtwg thiaj yuav dim tau?” Yexus teb hais tias, “Tej uas neeg ua tsis tau, Vajtswv ua tau.” Ces Petus hais rau Yexus hais tias, “Peb twb tso vajtse tseg thiab tuaj nrog koj mus lawm.” Yexus hais rau lawv tias, “Kuv qhia tseeb rau nej hais tias, yog leejtwg tso vajtse, tso pojniam menyuam, tso kwvtij thiab tso niam tso txiv tseg, vim nws xav tau Vajtswv lub Tebchaws, tiam no nws yuav tau ntau dua tej uas nws muab tso tseg lawm, thiab lwm tiam, nws yuav tau txojsia ntev dhawv mus ibtxhis.” Yexus coj nws kaum ob tug thwjtim mus rau ib qho thiab nws hais rau lawv hais tias, “Nej ua tib zoo mloog! Peb yuav mus rau nram lub nroog Yeluxalees, kom txhua yam tiav raws li tej uas cov cev Vajtswv lus tau sau hais txog Neeg Leej Tub lawm. Yuav muaj neeg ntes nws coj mus rau lwm haivneeg, lawv yuav saib tsis taus nws, thuam nws thiab nti qaubncaug rau nws. Lawv yuav muab nws nplawm thiab muab nws tua povtseg, tiamsis tom qab ntawd peb hnub, nws yuav sawv hauv qhov tuag rov qab los.” Tiamsis cov thwjtim tsis totaub tej uas Yexus hais; Yexus tsis qhia lub ntsiab lus rau lawv, lawv thiaj tsis paub xyov Yexus hais txog dabtsi. Thaum Yexus mus yuav txog lub nroog Yelikaus, muaj ib tug txivneej digmuag zaum ntawm ntug kev thov khawv. Thaum tus digmuag hnov muaj neeg coob coob tham zom zaws taug kev tuaj, nws nug hais tias, “Nej ua dabtsi?” Lawv qhia rau nws hais tias, “Yexus tus uas yog neeg Naxales tabtom taug kev tuaj.” Tus digmuag ntawd hu nrov nrov hais tias, “Yexus uas yog Daviv tus Tub! Thov koj hlub kuv!” Cov neeg uas nyob ntawm nws hauv ntej txwv kom nws nyob twjywm tsis txhob qw. Tiamsis nws hajyam qw nrov nrov hais tias, “Daviv tus Tub, thov koj hlub kuv!” Yog li ntawd, Yexus txawm nres thiab kom lawv coj tus digmuag los cuag nws. Thaum tus digmuag los ze lawm Yexus nug nws hais tias, “Koj xav kom kuv ua dabtsi rau koj?” Tus digmuag teb hais tias, “Tus Tswv, thov pab kom kuv rov pom kev.” Yexus hais rau nws hais tias, “Koj cia li pom kev! Koj txojkev ntseeg twb ua rau koj pom kev lawm.” Tamsim ntawd nws txawm pom kev, nws nrog Yexus mus thiab ua Vajtswv tsaug. Thaum cov neeg coob coob pom li ntawd, lawv qhuas Vajtswv kawg li. Yexus tuaj txog hauv lub nroog Yelikaus, thiab yuav dhau mus. Nyob hauv muaj ib tug txivneej hu ua Xakhais, nws yog cov sau se tus thawj thiab nws muaj nyiaj heev. Xakhais xav pom Yexus saib yog tus twg, tiamsis muaj neeg coob coob ntis nws, nws ntsia tsis pom Yexus, rau qhov nws yog neeg qigtaub. Xakhais thiaj khiav huas sawvdaws ntej mus nce ib tsob ntoo xikamaus, kom nws pom Yexus, rau qhov Yexus yuav taug txojkev ntawd tuaj. Thaum Yexus tuaj txog ntawd, Yexus tsa qhovmuag ntsia thiab hais rau Xakhais hais tias, “Xakhais, koj cia li nqis los, rau qhov hnub no kuv yuav mus so hauv koj tsev.” Xakhais txawm nqis nrawm nroos los tos txais Yexus, thiab zoo siab kawg li. Cov neeg uas pom li ntawd, lawv thuam hais tias, “Ua li cas Yexus yuav mus so hauv tus neeg txhaum tsev!” Xakhais sawv ntsug thiab hais rau Yexus hais tias, “Tus Tswv, koj mloog kuv hais! Kuv yuav muab tej uas kuv muaj ib nrab faib rau cov neeg pluag. Thiab yog kuv tau muab leejtwg ib yam dabtsi los yuav lawm, kuv yuav them plaub npaug rov qab rau tus ntawd.” Yexus hais tias, “Hnub no txojkev cawm dim twb los rau hauv tus txivneej no lub tsev lawm. Tus txivneej no yog Anplahas ib tug xeebntxwv thiab. Neeg Leej Tub yeej los nrhiav cov neeg uas yuam kev lawm, thiab cawm kom lawv dim.” Thaum cov neeg tseem tabtom mloog Yexus hais ntawd, Yexus txawm hais ib zaj lus pivtxwv rau lawv mloog. Thaum nws mus yuav txog hauv lub nroog Yeluxalees, thiab tej neeg xav hais tias, Vajtswv lub Tebchaws twb los yuav txog. Yexus hais tias, “Muaj ib tug nom tabtom yuav sawv kev mus rau lwm lub tebchaws deb deb, kom luag muab nws tsa ua vajntxwv, nws mam li rov qab los. Thaum nws yuav mus, nws hu nws kaum tus tubtxib los thiab nws muab nyiaj rau lawv ib leeg ib choj; thiab hais rau lawv hais tias, ‘Nej cia li coj cov nyiaj no mus ua lag ua luam mus txog hnub kuv rov los.’ Tiamsis cov pejxeem uas nyob hauv tus nom ntawd lub tebchaws ntxub nws, lawv txawm txib neeg lawv qab mus hais tias, ‘Peb tsis yuav tus nom no ua peb tus vajntxwv.’ “Thaum luag tsa tus nom ntawd ua vajntxwv lawm, nws rov qab los thiab hu kom cov tubtxib uas nws muab nyiaj rau, tuaj cuag nws saib lawv mus ua luam ib leeg tsam pestsawg. Thawj tug tubtxib los hais tias, ‘Tus tswv, choj nyiaj uas koj muab rau kuv, kuv coj mus ua luam tsam kaum choj.’ Tus tswv hais tias, ‘Zoo heev, koj yog tus tubtxib uas mloog lus! Vim koj ua ncaj rau tej yam me me no, kuv yuav tsa koj ua tus uas saib kaum lub nroog.’ Tus tubtxib ob los hais tias, ‘Tus tswv, choj nyiaj uas koj muab rau kuv, kuv coj mus ua luam tsam tsib choj.’ Tus tswv hais rau tus tubtxib ntawd hais tias, ‘Koj yuav tau ua tus saib tsib lub nroog.’ Muaj dua ib tug tubtxib los hais tias, ‘Tus tswv, choj nyiaj uas koj muab rau kuv nyob ntawm no; kuv muab phuam qhwv khaws cia zoo zoo. Kuv ntshai koj, rau qhov koj yog ib tug neeg nruj tsiv heev. Koj ibtxwm hlais tej uas tsis yog koj cog, thiab sau tej uas tsis yog koj tseb.’ Tus tswv hais rau tus tubtxib ntawd hais tias, ‘Tus tubtxib uas siab phem! Kuv yuav rau txim rau koj raws li tej lus uas koj hais! Koj twb paub hais tias, kuv yog ib tug neeg uas nruj tsiv heev, kuv ibtxwm hlais tej uas tsis yog kuv cog, thiab sau tej uas tsis yog kuv tseb. Ua li cas koj tsis muab kuv choj nyiaj coj mus tso rau hauv txhab nyiaj? Thaum kuv rov qab los kuv thiaj tau kuv choj nyiaj thiab tau tej paj ntxiv?’ Nws hais rau cov neeg uas sawv ntawd hais tias, ‘Nej cia li muab nws choj nyiaj coj mus ntxiv rau tus tubtxib uas muaj kaum choj.’ Lawv hais rau tus tswv hais tias, ‘Tus tswv, tus ntawd twb muaj kaum choj lawm!’ Tus tswv teb hais tias, ‘Kuv qhia rau nej hais tias, txhua tus uas muaj lawm, yeej yuav muab ntxiv kom nws muaj ntau dua, tiamsis tus uas tsis muaj, txawm yog nws muaj mentsis xwb los yuav muab rho tawm ntawm nws mus. Cia li coj kuv cov yeebncuab uas tsis yuav kuv ua lawv tus vajntxwv los ntawm no, thiab muab lawv tua tabmeeg kuv!’ ” Thaum Yexus hais li no tas, nws txawm ua lawv ntej mus rau nram lub nroog Yeluxalees. Thaum Yexus mus yuav txog lub zos Npefakhes thiab lub zos Npethanis uas nyob ntawm lub Roob Txiv Ntoo Roj, nws txawm txib ob tug thwjtim ua nws ntej mus, thiab qhia rau nkawd hais tias, “Neb cia li ncaj nraim mus rau hauv lub zos uas nyob tom neb hauv ntej; thaum neb mus txog, neb yuav pom ib tug menyuam neesluav uas tsis tau muaj neeg caij dua li, khi cia qhov ntawd. Neb cia li daws cab los rau kuv ntawm no. Yog muaj leejtwg nug hais tias, ‘Neb yuav daws cab mus ua dabtsi?’ Neb teb tus ntawd hais tias, ‘Tus Tswv xav siv.’ ” Nkawd mus pom txhua yam raws li Yexus qhia rau nkawd. Thaum nkawd tabtom daws tus menyuam neesluav, tus tswv txawm nug nkawd hais tias, “Neb yuav daws cab mus ua dabtsi?” Nkawd teb hais tias, “Tus Tswv xav siv.” Nkawd cab tus menyuam neesluav los rau Yexus. Nkawd hle nkawd ob lub tsho ntev los pua tus menyuam neesluav nraubqaum rau Yexus caij. Thaum Yexus caij tus menyuam neesluav taug kev mus, tej neeg sawvdaws hle lawv tej tsho los pua hauv kev. Thaum Yexus mus yuav txog lub nroog Yeluxalees, ntawm txojkev uas nqis pem lub Roob Txiv Ntoo Roj los, cov neeg coob coob uas yog Yexus cov thwjtim txawm ua Vajtswv tsaug, vim tej txujci tseemceeb uas lawv tau pom, thiab lawv qhuas Vajtswv nrov nrov hais tias, “Thov Vajtswv foom koob hmoov rau tus vajntxwv uas Vajtswv txib los! Thov kom saum ntuj muaj kev kaj siab lug, thiab kom sawvdaws hwm Vajtswv tus uas muaj tshwjchim ci ntsa iab!” Cov Falixais qee leej uas nrog cov neeg coob coob ntawd, hais rau Yexus hais tias, “Xibhwb, koj hais kom koj cov thwjtim ua twjywm!” Yexus teb lawv hais tias, “Kuv qhia rau nej hais tias, yog lawv cov no ua twjywm lawm los tej pobzeb yeej yuav qw.” Thaum Yexus tuaj ze lub nroog Yeluxalees, nws pom lub nroog, nws quaj, nws hais tias, “Kheev lam koj paub tej uas yuav pab kom koj nyob kaj siab lug! Tiamsis nimno koj tsis paub tej ntawd. Rau qhov muaj ib hnub koj cov yeebncuab yuav tuaj puab ntsa yeej vij koj, thiab yuav tuaj txhua ceg kaum tuaj kuav koj. Lawv yuav ua rau koj thiab koj cov neeg uas nyob hauv koj, kom puastsuaj tas huv tibsi. Lawv yuav tsis cia ob lub pobzeb nyob sib txuas ua ke, rau qhov koj tsis nco txog lub sijhawm uas Vajtswv los pab koj lawm.” Yexus mus rau ntawm lub Tuamtsev, thiab ntiab tej neeg uas tuaj ua luam kom tawm mus, thiab Yexus hais rau lawv hais tias, “Vajtswv Txojlus sau tseg hais tias, ‘Kuv lub Tuamtsev yog qhov chaw thov Vajtswv.’ Tiamsis nej muab ua chaw rau tubsab nkaum.” Yexus niaj hnub qhia hauv lub Tuamtsev, cov thawj ntawm cov povthawj, cov xibhwb uas qhia Vajtswv txoj Kevcai, thiab cov thawjcoj ntawm cov pejxeem xav muab Yexus tua povtseg, tiamsis lawv ua tsis tau li cas rau Yexus, rau qhov sawvdaws nyiam mloog tej uas Yexus qhia heev. Muaj ib hnub thaum Yexus qhuab qhia cov neeg hauv lub Tuamtsev thiab qhia Txojmoo Zoo, cov thawj ntawm cov povthawj, cov xibhwb uas qhia Vajtswv txoj Kevcai thiab cov txwjlaug tuaj nug Yexus hais tias, “Koj qhia rau peb saib, ua li cas koj muaj cai ua tej no? Leejtwg tso cai rau koj?” Yexus teb lawv hais tias, “Kuv yuav nug nej ib los. Nej qhia rau kuv saib, leejtwg tso cai rau Yauhas muab neeg ua kevcai raus dej, Vajtswv lossis neeg?” Lawv txawm sib tham hais tias, “Peb yuav hais li cas? Yog peb hais tias ‘Vajtswv kom Yauhas ua,’ nws yuav hais rau peb hais tias, ‘Ua li cas nej ho tsis ntseeg Yauhas tej lus?’ Tiamsis yog peb hais tias, ‘Neeg kom Yauhas ua,’ Cov neeg coob coob uas nyob ntawm no yuav muab pobzeb ntaus peb, rau qhov sawvdaws yeej paub hais tias, Yauhas yog ib tug cev Vajtswv lus.” Lawv teb hais tias, “Peb tsis paub, xyov leejtwg tso cai rau nws.” Yexus hais rau lawv hais tias, “Yog li ntawd, kuv yuav tsis qhia rau nej hais tias, leejtwg tso cai rau kuv ua tej no.” Yexus hais ib zaj lus pivtxwv rau sawvdaws mloog hais tias, “Muaj ib tug txivneej cog tau ib vaj txiv hmab. Nws muab tso rau ib cov neeg tu sib faib cov txiv. Ces nws txawm mus rau lwm lub tebchaws tau ntev loo lawm. Thaum txog lub caij de txiv hmab, nws txib ib tug tubtxib mus cuag cov neeg uas tu lub vaj thiab sau tej txiv hmab uas yog nws tug los rau nws. Tiamsis cov neeg uas tu lub vaj muab tus tubtxib ntawd ntaus, thiab ntiab tus tubtxib ntawd rov qab los tsev tes dawb tes npliag. Tus tswv vaj ho txib dua ib tug tubtxib mus, tiamsis cov neeg uas tu lub vaj muab tus tubtxib ntawd ntaus, ua limhiam rau nws, thiab kom nws rov qab tes dawb tes npliag. Tus tswv vaj rov txib dua tus tubtxib peb mus, cov neeg uas tu lub vaj muab tus tubtxib ntawd ntaus nqaij ntuag ntshav nrog, thiab muab nws pov rau sab ntug vaj nraud. Ces tus tswv vaj hais tias, ‘Kuv yuav ua li cas? Yog kuv txib kuv tus tub uas kuv hlub mus, nyaj lawv yuav hwm kuv tus tub!’ Tiamsis thaum cov neeg uas tu lub vaj pom tus tswv tus tub tuaj, lawv txawm sib ntxhi hais tias, ‘Tus no yog tus tswv vaj tus tub, peb cia li muab nws tua povtseg, peb thiaj tau nws lub vaj!’ Cov neeg uas tu lub vaj muab tus tub ntawd thawb rau sab ntug vaj nraud, thiab muab nws tua povtseg.” Yexus nug hais tias, “Tus tswv vaj yuav ua li cas rau cov neeg uas tu lub vaj ntawd? Tus tswv vaj yeej yuav muab cov neeg uas tu lub vaj tua povtseg, thiab muab lub vaj ntawd rau lwm cov tu.” Thaum sawvdaws hnov Yexus hais li ntawd, lawv hais tias, “Nyaj yuav tsis muaj li ntawd.” Yexus saib lawv thiab nug hais tias, “Vajtswv txojlus hais li cas? ‘Lub pobzeb uas cov kws ua tsev muab povtseg, lub ntawd twb los ua lub thawj lawm.’ Yog leejtwg ntog mus tsoo lub pobzeb ntawd, tus ntawd lub cev yuav tawg tas; yog lub pobzeb ntawd poob los tsoo leejtwg, tus ntawd lub cev yuav ntsoog tas huv tibsi.” Cov xibhwb uas qhia Vajtswv txoj Kevcai thiab cov thawj ntawm cov povthawj xav ntes Yexus, rau qhov lawv paub hais tias, zaj lus pivtxwv uas Yexus hais ntawd, yog nws cem lawv; tiamsis lawv ntshai cov pejxeem. Lawv tos saib puas muaj sijhawm zoo ntes Yexus. Lawv ntiav qee leej kom ua txuj ua li neeg ncaj ncees mus nug Yexus, saib nws puas yuav hais txhaum, lawv thiaj zoo ntes nws coj mus rau tus tswvxeev uas muaj hwjchim. Cov neeg uas lawv ntiav, mus nug Yexus hais tias, “Xibhwb, peb paub hais tias tej lus uas koj hais, thiab tej uas koj qhia puavleej yog huv tibsi. Peb paub hais tias koj tsis xaiv leejtwg ntsejmuag li, tiamsis koj qhia Vajtswv Txojlus tseeb rau sawvdaws. Koj sim qhia rau peb saib, yog peb them se rau Xixas puas txhaum peb txoj kevcai los tsis txhaum?” Tiamsis Yexus twb xub paub lawv lub siab lawm, nws hais rau lawv hais tias, “Nej cia li muab ib lub nyiaj rau kuv saib, lub ntsejmuag thiab lub npe uas sau rau ntawm lub nyiaj no yog leejtwg lub?” Lawv teb hais tias, “Yog Xixas lub.” Yexus hais rau lawv hais tias, “Yam uas yog Xixas li, nej cia li muab rau Xixas, thiab yam uas yog Vajtswv li, nej cia li muab rau Vajtswv.” Lawv nrhiav tsis tau ib qho kom Yexus hais txhaum tabmeeg sawvdaws; lawv xav tsis thoob rau tej lus uas Yexus hais ntawd, lawv txawm nyob twjywm lawm. Cov Xadukais qee leej tsis ntseeg hais tias neeg yuav sawv hauv qhov tuag rov qab los, lawv tuaj cuag Yexus thiab nug hais tias, “Xibhwb, Mauxes sau txoj Kevcai no qhia peb hais tias, ‘Yog tus txiv tuag lawm, nws tus pojniam tseem tsis tau muaj menyuam, nws tus kwv yuav tsum yuav tus niamtij, tus tijlaug thiaj muaj xeebntxwv.’ Thaud muaj xya tus kwvtij, tus tijlaug yuav pojniam tiamsis tsis tau muaj menyuam, tus tijlaug tuag lawm, ces tus kwv ob yuav tus niamtij, tus kwv peb yuav tus niamtij ntawd thiab. Xya leej kwvtij puavleej yuav tus pojniam ntawd, lawv puavleej tuag tas, tsis tau muaj ib tug menyuam li. Thaum kawg tus pojniam ntawd txawm tuag lawm thiab. Yog li ntawd, hnub uas cov neeg tuag sawv rov qab los tus pojniam ntawd yuav yog leejtwg tus pojniam? Rau qhov lawv xya leej puavleej tau yuav nws huv tibsi lawm.” Yexus teb hais tias, “Cov pojniam thiab txivneej tiam no thiaj li sib yuav xwb, tiamsis cov pojniam thiab cov txivneej tsimnyog sawv los tau txojsia thiab mus nyob tiam tom ntej, cov ntawd tsis sib yuav li lawm. Lawv yuav zoo ib yam li cov timtswv ceebtsheej thiab yuav tsis tuag li. Lawv yog Vajtswv cov menyuam, rau qhov lawv twb sawv hauv qhov tuag rov qab los lawm. Thaum Mauxes hais txog cov nplaim taws uas cig ntawm tsob ntoo, nws hu tus Tswv hais tias, ‘Anplahas tus Vajtswv, Ixaj tus Vajtswv thiab Yakhauj tus Vajtswv.’ Zaj uas nws hais ntawd twb qhia rau sawvdaws hais tias, cov neeg uas tuag lawm, yeej yuav sawv rov qab los tau txojsia. Vajtswv yog cov neeg ciaj tus Vajtswv, nws tsis yog cov neeg tuag tus Vajtswv, raws li Vajtswv saib, txhua tus puavleej muaj txojsia nyob.” Cov xibhwb uas qhia Vajtswv txoj Kevcai qee leej hais tias, “Xibhwb, koj teb yog lawm!” Lawv hais li ntawd vim lawv tsis muaj cuabkav nug ntxiv lawm. Yexus nug lawv hais tias, “Yuav ua li cas hais tau tias, tus Mexiyas yog Daviv tus Tub? Rau qhov Daviv sau tseg rau hauv Phau Ntawv Nkauj hais tias, ‘Tus Tswv hais rau kuv tus Tswv hais tias: koj cia li los zaum ntawm kuv sab xis, mus txog thaum kuv muab koj cov yeebncuab los rau koj tsuj.’ Daviv twb hu nws hais tias ‘Tus Tswv’; yuav ua li cas hais tau tias, tus Mexiyas yog Daviv tus Tub?” Thaum cov neeg tabtom mloog Yexus qhia, Yexus hais rau nws cov thwjtim hais tias, “Nej yuav tsum ceevfaj, tsis txhob ua li cov xibhwb uas qhia Vajtswv txoj Kevcai, lawv nyiam hnav tej tsho ntev mus rau ub rau no, thiab thaum lawv mus tom tej khw, lawv nyiam kom sawvdaws hwm lawv; thaum lawv mus hauv tej tsev sablaj lossis mus nrog luag noj luag haus, lawv mus xaiv zaum lub chaw zoo xwb; Lawv txhav tej pojntsuam tug yuav, thiab lawv thov Vajtswv ntev ntev kom sawvdaws qhuas lawv! Lawv yeej yuav raug txim hnyav dua lwm tus huv tibsi!” Yexus tsa qhovmuag saib, nws pom cov neeg npluanuj tso nyiaj rau hauv lub phijxab uas nyob hauv lub Tuamtsev, thiab pom ib tug pojntsuam pluag pluag tabtom muab ob lub txiaj toog tso rau hauv. Yexus hais tias, “Kuv qhia rau nej hais tias, tus pojntsuam no tso ntau dua lwm tus. Rau qhov lwm tus muab tej nyiaj uas seem tuaj tso xwb; tiamsis tus pojntsuam uas pluag pluag no, nws muab hlo ob lub txiaj toog uas nws muaj tuaj tso huv tibsi.” Cov thwjtim qee leej sib tham hais txog lub Tuamtsev uas luag muab tej pobzeb uas zoo zoo nkauj los ua, thiab tej khoom uas luag coj tuaj fij rau Vajtswv. Yexus hais tias, “Tej uas nej pom no, thaum txog sijhawm lawm, yuav tsis muaj ob lub pobzeb dhos ua ke, txhua lub yuav pluam, nyias nyob nyias tas huv tibsi.” Lawv nug Yexus hais tias, “Xibhwb, thaum twg mam li muaj tej no? Thiab yam dabtsi yuav qhia rau peb paub hais tias, twb txog lub sijhawm uas yuav muaj tej ntawd lawm?” Yexus qhia hais tias, “Nej yuav tsum ceevfaj, tsis txhob pub leejtwg dag ntxias tau nej yuam kev. Yuav muaj ntau leej tuav kuv lub npe hais rau nej hais tias, ‘Kuv yog nws!’ thiab ‘Lub sijhawm twb los ze lawm!’ Tiamsis nej tsis txhob caum cov neeg ntawd mus. Thaum nej hnov muaj kev tsov kev rog thiab muaj kev kub ntxhov los nej tsis txhob ntshai. Yeej yuav xub muaj tej ntawd ua ntej, tiamsis tsis tau qhia hais tias, twb txog lub sijhawm kawg lawm.” Yexus hais tias, “Ib haivneeg yuav tawmtsam ib haivneeg; ib lub tebchaws yuav sawv tua ib lub tebchaws, yuav muaj av qeeg loj heev, yuav muaj kev tshaib kev nqhis, thiab yuav muaj mob thoob plaws txhua qhov huv tibsi; yuav muaj tej yam tshwm saum nruab ntug ua rau sawvdaws ntshai kawg li. Tiamsis thaum tseem tsis tau muaj tej ntawd, yuav muaj neeg ntes nej thiab tsimtxom nej; lawv yuav coj nej mus rau hauv tej tsev sablaj thiab muab nej kaw rau hauv tej tsev lojcuj. Luag yuav coj nej mus cuag tej vajntxwv thiab tej nomtswv, vim nej yog cov uas ntseeg kuv. Thaum ntawd yog lub sijhawm zoo rau nej qhia Txojmoo Zoo. Nej tsis txhob txhawj hais tias, nej yuav npaj teb li cas thiaj zoo, rau qhov kuv yuav pub tswvyim rau nej kom nej txawj hais, nej cov yeebncuab yuav teb tsis taus nej, thiab nrhiav tsis tau lus rau nej. Nej niam nej txiv, nej tej kwvtij, nej tej neejtsa thiab nej tej phoojywg yuav muab nej coj mus rau tej nomtswv, thiab luag yuav muab nej qee leej tua povtseg. Txhua tus yuav ntxub nej vim nej yog cov uas ntseeg kuv. Tiamsis txawm yog nej ib txoj plaubhau los yuav tsis tu saum nej taubhau mus. Nej yuav tsum ua siab ntev nyiaj tej kev txomnyem, nej thiaj yuav tau txojsia. “Thaum nej pom tubrog tuaj vij lub nroog Yeluxalees, nej paub hais tias, tsis ntev lub nroog yuav puastsuaj. Lub sijhawm ntawd cov neeg uas nyob hauv lub xeev Yudas, lawv yuav tsum khiav mus rau pem tej roob; cov neeg uas nyob hauv lub nroog yuav tsum tawm, thiab cov neeg uas nyob pem tej yajsab tsis txhob khiav mus rau hauv lub nroog. Rau qhov lub sijhawm ntawd yuav yog ‘Hnub Rau Txim,’ kom yam txhua tiav raws li Vajtswv txojlus hais tseg lawm. Lub sijhawm ntawd tej pojniam uas suab menyuam, thiab tej pojniam uas muaj menyuam mos yuav txomnyem kawg li! Lub tebchaws no yuav raug kev txomnyem kawg nkaus. Vajtswv yuav rau txim rau cov neeg no. Ibtxhia yuav tuag rau hniav ntaj hniav riam thiab ibtxhia yuav raug ntes mus rau lwm lub tebchaws; thiab lwm haivneeg yuav tuaj tsuj lub nroog Yeluxalees mus txog hnub uas tiav raws li lub sijhawm. “Thaum ntawd lub hnub, lub hli thiab tej hnubqub yuav tsis zoo li qub lawm. Txhua haivneeg uas nyob hauv ntiajteb no yuav yoob tas, thiab ntshai lub suab dej hiavtxwv ntas. Tej neeg yuav tsaug muag, vim lawv ntshai tej uas yuav muaj los raug thoob plaws lub ntiajteb no, rau qhov tej uas muaj hwjchim saum nruab ntug yuav ua zog koog. Thaum ntawd sawvdaws yuav pom Neeg Leej Tub tshwm saum nruab ntug, nws lub hwjchim thiab lub tshwjchim yuav ci ntsa iab. Thaum tabtom pib muaj tej no, nej yuav tsum sawv ntsug thiab tsa taubhau, rau qhov txojkev cawm dim twb los ze lawm.” Yexus hais ib zaj lus pivtxwv rau lawv mloog hais tias: “Nej sim saib tsob ntoo txiv ncuavpias thiab txhua yam ntoo. Thaum nej pom tej ntoo ntawd pib hlav nplooj, nej paub hais tias twb yuav txog lub caij ntuj nag. Ib yam nkaus li ntawd, thaum nej pom tej ntawd, nej yuav paub hais tias, Vajtswv lub Tebchaws twb los ze lawm. “Kuv qhia tseeb rau nej hais tias, thaum cov neeg tiam no tseem tuag tsis tau tas, twb xub muaj tej ntawd lawm. Lub ntuj thiab lub ntiajteb no yuav ploj mus, tiamsis kuv tej lus yuav tsis muaj ib los poob li. “Nej yuav tsum ceevfaj, tsis txhob cia nej lub siab qaug rau kev noj kev haus, thiab tsis txhob txhawj rau nej lub neej lossis yuav cia hnub ntawd los txog thaum nej tsis ceevfaj. Rau qhov hnub ntawd yuav los khwb nkaus tej neeg sawvdaws thoob plaws lub ntiajteb no ib yam li rooj yej. Nej yuav tsum ceevfaj thiab zov tos, niaj hnub thov Vajtswv pab kom nej nyiaj taus txhua yam uas yuav muaj los no, thiab nej thiaj yuav mus sawv taus ntawm Neeg Leej Tub lub xubntiag.” Yexus niaj hnub qhia hauv lub Tuamtsev, thiab thaum tsaus ntuj nws mus pw pem Roob Txiv Ntoo Roj. Txhua tagkis sawv ntxov, sawvdaws tuaj mloog Yexus qhuab qhia hauv lub Tuamtsev. Thaum yuav txog lub sijhawm ua Kevcai noj Ncuav tsis xyaw Keeb uas hu ua Kevcai Hla Dhau. Cov thawj ntawm cov povthawj thiab cov xibhwb uas qhia Vajtswv txoj Kevcai txawm nrhiav kev yuav ntes Yexus twjywm coj mus tua povtseg, rau qhov lawv tsis xav ntes Yexus tabmeeg cov pejxeem, nyob tsam sawvdaws ntxhov. Dab Ntxwgnyoog tshoov Yudas Ixakali-us uas yog ib tug ntawm kaum ob tug thwjtim siab. Yudas hais rau cov thawj ntawm cov povthawj thiab cov thawj tubrog uas zov lub Tuamtsev hais tias, nws yuav coj lawv mus ntes Yexus li cas. Lawv zoo siab thiab txaus siab yuav muab nyiaj rau Yudas. Yudas pom zoo li lawv hais, nws txawm nrhiav sijhawm coj lawv mus ntes Yexus thaum tsis muaj neeg pom. Thaum txog hnub uas ua Kevcai noj Ncuav tsis xyaw Keeb uas yog hnub uas lawv tua menyuam yaj noj ua Kevcai Hla Dhau. Yexus txib Petus thiab Yauhas, thiab qhia rau nkawd hais tias, “Neb cia li mus npaj pluas mov ua Kevcai Hla Dhau rau peb noj.” Nkawd nug Yexus hais tias, “Koj xav kom wb mus npaj rau qhov twg?” Yexus teb hais tias, “Thaum neb mus txog hauv lub nroog, yuav muaj ib tug txivneej kwv ib lub hub dej los ntsib neb. Neb cia li raws nws qab mus hauv tsev thiab hais rau tus tswv tsev hais tias, ‘Tus Tswv hais tias, koj yuav muab chav twg rau kuv thiab kuv cov thwjtim noj pluas mov ua Kevcai Hla Dhau?’ Tus tswv tsev yuav coj neb mus qhia ib chav dav dav uas nyob txheej saud thiab twb muaj rooj muaj tog txhij lawm rau neb, neb cia li npaj txhua yam rau qhov ntawd.” Nkawd txawm mus thiab pom muaj txhua yam raws li Yexus hais, thiab nkawd npaj pluas mov ua Kevcai Hla Dhau rau qhov ntawd. Thaum lub sijhawm noj mov lawm, Yexus thiab Yexus cov timthawj los zaum ntawm rooj mov. Yexus hais rau lawv hais tias, “Kuv xav nrog nej noj pluas mov ua Kevcai Hla Dhau no, ua ntej uas kuv raug tsimtxom! Kuv qhia rau nej hais tias, txij no mus kuv yuav tsis noj li no mus txog hnub uas pluas mov ua Kevcai Hla Dhau tiav nyob hauv Vajtswv lub Tebchaws.” Yexus muab khob cawv txiv hmab los ua Vajtswv tsaug, thiab hais tias, “Nej cia li txais lub khob no mus haus. Kuv qhia rau nej hais tias, txij no mus kuv yuav tsis haus cov cawv txiv hmab no mus txog hnub uas Vajtswv lub Tebchaws los.” Yexus muab ib lub ncuav los ua Vajtswv tsaug, nws muab ntais faib rau lawv, thiab hais tias, “Ntawm no yog kuv lub cev uas kuv muab pub rau nej. Nej ua li no, nej thiaj yuav nco ntsoov kuv.” Thaum lawv noj mov tas, Yexus muab ib khob cawv txiv hmab los ua ib yam nkaus li ntawd, nws hais tias, “Lub khob no yog Vajtswv Txojlus cog tseg tshiab uas muaj kuv cov ntshav ntws los ua lub homthawj nias rau lawm. “Tiamsis nej saib, tus uas ntxeev siab rau kuv, nws nrog kuv nyob ntawm rooj no ntag! Neeg Leej Tub yeej yuav tuag raws li Vajtswv npaj tseg lawm, tiamsis tus uas ntxeev siab rau Neeg Leej Tub, nws yuav raug kev puastsuaj!” Ces cov timthawj txawm sib nug zom zaws, saib leejtwg yog tus yuav ua li ntawd. Cov thwjtim sib cav zom zaws, saib leejtwg yuav tau ua tus loj dua ntais. Yexus hais rau lawv hais tias, “Lwm haivneeg cov vajtswv uas muaj hwjchim kav lawv tej pejxeem, thiab tej nomtswv uas muaj hwjchim hu lawv hais tias, ‘Cov uas saib cov Pejxeem.’ Tiamsis nej tsis txhob ua li ntawd; nej cov yog leejtwg xav ua tus hlob, tus ntawd yuav tsum ua ib yam li yog tus yau, thiab tus twg yog tus thawjcoj, tus ntawd yuav tsum ua ib yam li tus tubtxib. Tus twg yog tus loj dua? Tus uas zaum noj mov lossis tus tubtxib? Twb yog tus uas zaum noj mov ntag. Tiamsis kuv nrog nej nyob, kuv ua ib yam li tus tubtxib. “Txhua lub sijhawm uas kuv raug kev txomnyem, nej tsis tau tso kuv tseg; kuv Txiv tsa kuv ua tus muaj hwjchim kav lub ntiajteb li cas, kuv yuav tsa nej kom muaj hwjchim ib yam li ntawd. Nej yuav tau nrog kuv noj thiab haus nyob ntawm kuv lub rooj hauv kuv lub Tebchaws, thiab nej yuav tau zaum saum lub zwmtxwv txiav txim rau kaum ob xeem Yixalayees.” Yexus hais tias, “Ximoos, Ximoos! Koj mloog kuv hais! Vajtswv twb cia dab Ntxwgnyoog los sim nej txhua tus siab lawm, muab tus zoo cais tawm ntawm tus phem, ib yam li tus neeg yaj nplej muab vab ntxuaj cov npluag tawm ntawm cov nplej. Tiamsis Ximoos, kuv twb thov Vajtswv pab koj lawm, kom koj muab siab rau ntseeg. Thiab thaum koj los cuag kuv, koj yuav tsum txhawb koj cov kwvtij zog.” Petus teb hais tias, “Tus Tswv, kuv txaus siab nrog koj raug kaw rau hauv tsev lojcuj thiab tuag nrog koj!” Yexus hais tias, “Petus, kuv qhia rau koj hais tias, hmo no thaum qaib tsis tau qua, koj yuav hais peb zaug hais tias, koj tsis paub kuv.” Ces Yexus nug lawv hais tias, “Zaum tas los kuv txib nej mus, nej tsis nqa hnab nyiaj, hnab thoobpuab thiab khau, nej puas tu ncua ib yam dabtsi?” Lawv teb hais tias, “Peb tsis tu ncua dabtsi li.” Yexus hais tias, “Tiamsis nimno, tus uas muaj hnab nyiaj lossis hnab thoobpuab, tus ntawd yuav tsum nqa mus; tus uas tsis muaj ntaj, nws yuav tsum muab nws lub tsho loj muag thiab mus yuav ib rab ntaj. Kuv qhia rau nej hais tias, Vajtswv txojlus hais tias, ‘Luag suav nws nrog cov neeg muaj txim.’ Lo lus uas hais txog kuv ntawd yeej yuav tiav, rau qhov tej uas sau hais txog kuv, tej ntawd tabtom yuav tiav.” Cov thwjtim hais tias, “Tus Tswv, koj saib ntawm no! Peb muaj ob rab ntaj!” Yexus teb hais tias, “Tsis txhob hais ntxiv lawm!” Yexus tawm hauv lub nroog mus rau pem Roob Txiv Ntoo Roj, raws li nws ibtxwm mus; thiab cov thwjtim nrog nws mus. Thaum lawv mus txog ped, Yexus hais rau lawv hais tias, “Nej yuav tsum thov Vajtswv, kev sim siab thiaj yuav los ntxias tsis tau nej.” Yexus txawm ncaim lawv mus nrug deb kwvlam li txawb ib ncua pobzeb, thiab nws txhos caug ntua rau ntawm ib sab pobzeb thiab thov Vajtswv hais tias, “Txiv, yog koj pom zoo, thov koj muab lub khob no tshem ntawm kuv mus. Txawm yog li cas los koj tsis txhob ua raws li kuv lub siab nyiam, tiamsis ua raws li koj lub siab nyiam xwb.” Muaj ib tug timtswv ceebtsheej tshwm los rau Yexus pom thiab txhawb Yexus lub zog. Yexus nyuaj siab kawg nkaus, nws hajyam siv zog thov Vajtswv heev; nws tawm hws zoo li ntshav nrog rau hauv av. Thaum Yexus thov Vajtswv tas, nws sawv mus rau ntawm cov thwjtim, thiab nws pom lawv tsaug zog tas lawm, rau qhov lawv nyuaj siab heev. Yexus hais rau lawv hais tias, “Ua li cas nej yuav tsaug zog ua luaj? Nej cia li sawv thiab thov Vajtswv, kev sim siab thiaj yuav ntxias tsis tau nej.” Thaum Yexus tabtom hais li ntawd, muaj ib pab neeg coob coob tuaj txog, Yudas uas yog ib tug ntawm kaum ob tug thwjtim coj cov neeg ntawd tuaj. Nws txav zog los yuav nwj Yexus. Tiamsis Yexus hais tias, “Yudas, koj yuav nwj Neeg Leej Tub qhia rau lawv ntes nws los?” Thaum cov thwjtim uas nrog Yexus pom hais tias yuav muaj xwm, ces lawv txawm hais tias, “Tus Tswv, koj puas kheev peb muab ntaj tua lawv?” Cov thwjtim ib tug rho hlo ntaj los tib ntag rau tus Povthawj Hlob ib tug qhev sab nplooj ntseg xis tu nrho. Tiamsis Yexus hais tias, “Tsum li ntawd!” Yexus cev tes mus tuav tus ntawd lub nplooj ntseg thiab kho rov zoo li qub lawm. Ces Yexus hais rau cov thawj ntawm cov povthawj thiab cov thawj tubrog uas zov lub Tuamtsev, thiab cov txwjlaug uas tuaj ntes Yexus ntawd hais tias, “Nej nqa ntaj nqa qws tuaj ntes kuv, ib yam li kuv yog tubsab los? Kuv twb niaj hnub nrog nej nyob hauv lub Tuamtsev, nej ho tsis ntes kuv? Tiamsis nimno txog lub sijhawm uas nej ua haujlwm, thiab txojkev tsaus ntuj lub hwjchim twb kav lawm.” Lawv ntes Yexus thiab coj nws mus rau hauv tus Povthawj Hlob tsev; Petus raws qab mus nrug deb deb. Muaj neeg rauv ib cubtawg rau ntawm lub tshavpuam, Petus txawm mus nrog cov neeg ntawd nte taws. Muaj ib tug ntxhais qhev pom Petus nyob ntawm ib sab qhovcub, nws saib ntsoov Petus thiab hais tias, “Tus txivneej no yog ib tug uas nrog Yexus thiab!” Tiamsis Petus hais tias, “Tus muam, kuv yeej tsis paub tus ntawd li!” Tom qab ntawd mentsis, muaj ib tug txivneej pom Petus thiab hais tias, “Koj yog lawv pab ntawd ib tug thiab los sav!” Tiamsis Petus hais tias, “Txiv ntxawm, kuv tsis yog!” Tom qab ntawd kwvlam li uas ib txoos teev, txawm muaj dua ib tug txivneej hais rau sawvdaws hais tias, “Tus no yeej yog ib tug uas nrog Yexus nyob tiag tiag li, rau qhov nws yog ib tug neeg Kalilais thiab!” Tiamsis Petus teb hais tias, “Txiv ntxawm, tej uas koj hais ko kuv yeej tsis paub li!” Thaum Petus tabtom hais li ntawd, tamsim ntawd qaib txawm qua. Tus Tswv tig mus saib Petus, ces Petus txawm nco dheev txog lo lus uas tus Tswv hais rau nws hais tias, “Hmo no thaum qaib tsis tau qua, koj yuav hais peb zaug hais tias, koj tsis paub kuv.” Petus tawm mus rau sab nraud thiab quaj tu siab kawg li. Cov neeg uas zov Yexus, ua saib tsis taus nws thiab ntaus nws. Lawv muab phuam los pav Yexus qhovmuag thiab nug nws hais tias, “Koj sim twv saib, yog leejtwg ntaus koj?” Thiab lawv thuam Yexus ntau yam. Thaum kaj ntug lawm, cov txwjlaug, cov thawj ntawm cov povthawj thiab cov xibhwb uas qhia Vajtswv txoj Kevcai tuaj sablaj ua ke, thiab lawv kom coj Yexus tuaj sawv tabmeeg lawv. Lawv hais rau Yexus hais tias, “Koj qhia rau peb saib, koj puas yog tus Mexiyas?” Yexus teb hais tias, “Txawm yog kuv qhia nej los nej yuav tsis ntseeg; thiab yog kuv nug nej los nej yuav tsis teb kuv; Tiamsis txij no mus Neeg Leej Tub yuav nyob ntawm Vajtswv tus uas muaj hwjchim loj kawg nkaus sab xis.” Lawv txhua tus txawm nug hais tias, “Koj yog Vajtswv tus Tub los?” Yexus teb lawv hais tias, “Nej hais yog lawm.” Lawv hais tias, “Tsis tas peb yuav nrhiav timkhawv ntxiv lawm! Rau qhov peb twb hnov nws hais lawm!” Tagnrho cov neeg uas tuaj sablaj ntawd txawm sawv tsees coj Yexus mus cuag Philaj, lawv nkaug Yexus rau Philaj hais tias, “Peb ntes tus txivneej no thaum nws tabtom ntxias kom peb haivneeg ua yuam kev, thiab txwv tsis pub lawv them se rau Xixas, thiab nws khav hais tias nws yog tus Mexiyas uas yog vajntxwv.” Philaj nug Yexus hais tias, “Koj yog cov Yudais tus vajntxwv los?” Yexus teb hais tias, “Koj hais yog lawm.” Ces Philaj hais rau cov thawj ntawm cov povthawj thiab cov neeg coob coob ntawd hais tias, “Kuv tsis pom tus txivneej no muaj ib qhov txhaum li.” Tiamsis lawv hajyam hais tawv tawv hais tias, “Nws tej lus qhia ua rau sawvdaws muaj kev kub ntxhov thoob lub xeev Yudas. Nws pib qhia pem lub xeev Kalilais thiab tuaj txog ntawm no.” Thaum Philaj hnov lawv hais li ntawd, nws nug hais tias, “Tus txivneej no yog neeg Kalilais los?” Thaum Philaj paub hais tias Yexus tuaj pem cheebtsam uas Helauj kav tuaj, ces nws txawm xa Yexus mus cuag Helauj, rau qhov lub sijhawm ntawd Helauj tuaj so hauv lub nroog Yeluxalees. Thaum Helauj pom Yexus, Helauj zoo siab kawg li, rau qhov nws ibtxwm hnov Yexus lub moo, thiab xav pom Yexus ntev los lawm. Helauj cia siab hais tias nws yuav pom Yexus ua ib yam txujci tseemceeb. Helauj nug Yexus ntau zaj, tiamsis Yexus tsis teb li. Cov thawj ntawm cov povthawj thiab cov xibhwb uas qhia Vajtswv txoj Kevcai txav zog mus nkaug Yexus rau Helauj. Helauj thiab nws cov tubrog thuam Yexus thiab ua saib tsis taus Yexus; lawv muab ib lub tsho ntev uas zoo nkauj heev rau Yexus hnav, thiab xa nws rov qab mus rau Philaj. Txij hnub ntawd los Helauj thiab Philaj txawm sib raug zoo lawm; yav tas los nkawd ua yeebncuab. Philaj hu cov thawj ntawm cov povthawj, cov thawjcoj thiab cov pejxeem tuaj, thiab nws hais rau lawv hais tias, “Nej hais tias nws ntxias kom cov pejxeem yuam kev. Nimno kuv twb taug nws zaj tabmeeg nej sawvdaws lawm, thiab tsis pom nws muaj ib qho txhaum raws li uas nej nkaug nws ntawd. Helauj los tsis pom nws muaj ib qho txhaum li thiab, Helauj thiaj xa nws rov los rau peb. Tus txivneej no yeej tsis tau ua ib qho txhaum uas tsimnyog yuav muab nws tua povtseg. Yog li ntawd, kuv yuav kom luag muab nws nplawm thiab tso nws mus.” [Raws li ibtxwm, txhua zaus uas ua Kevcai Hla Dhau, Philaj yuav tsum tso ib tug neeg raug txim raws li cov pejxeem thov.] Cov neeg coob coob ntawd hais nrov nrov hais tias, “Muab nws tua povtseg! Thiab tso Npalanpas los rau peb!” (Npalanpas raug kaw rau hauv tsev lojcuj, vim nws ntxeev nom ntxeev tswv hauv lub nroog thiab nws tua neeg.) Philaj xav tso Yexus, nws thiaj rov hais rau cov neeg coob coob ntawd ib zaug ntxiv thiab. Tiamsis lawv hajyam qw nrov nrov hais tias, “Muab nws ntsia rau saum ntoo khaublig! Muab nws ntsia rau saum ntoo khaublig!” Philaj rov hais rau lawv ib zaug hais tias, “Vim li cas? Nws ua txhaum dabtsi? Kuv tsis pom nws muaj ib qho txhaum uas tsimnyog yuav muab nws tua! Kuv yuav kom luag muab nws nplawm thiab tso nws mus.” Tiamsis cov neeg coob coob ntawd qw tas zog kom Philaj muab Yexus ntsia rau saum ntoo khaublig. Thaum kawg lawv kovyeej Philaj. Philaj txawm txiav txim rau Yexus raws li lawv thov. Thiab Philaj tso tus txivneej uas lawv thov rau lawv. Tus ntawd yog tus uas raug kaw rau hauv tsev lojcuj, nws ntxeev nom ntxeev tswv thiab tua neeg. Ces Philaj muab Yexus rau lawv raws li lawv siab nyiam. Thaum lawv tabtom coj Yexus tawm mus; lawv ntsib ib tug txivneej hu ua Ximoos uas nyob hauv lub nroog Kulenes uas nyob pem yajsab tuaj yuav mus rau hauv lub nroog. Lawv ntes nws thiab yuam kom nws kwv tus ntoo khaublig nrog Yexus mus. Cov neeg coob coob uas raws Yexus qab ntawd, muaj ib co pojniam tsa suab hlo quaj nrov nrov, rau qhov lawv hlub Yexus heev. Yexus tig mus saib lawv thiab hais tias, “Cov pojniam uas nyob hauv lub nroog Yeluxalees! Nej tsis txhob quaj kuv, tiamsis cia li quaj nej thiab nej tej menyuam. Thaum txog lub sijhawm ntawd, sawvdaws yuav hais tias, ‘Cov pojniam uas ibtxwm xeeb tsis taus menyuam, thiab cov pojniam uas tsis tau xeeb dua menyuam thiab tsis tau pub dua mis rau menyuam noj, yog cov uas hmoov zoo!’ Lub sijhawm ntawd, yuav muaj neeg hais rau tej roob hais tias, ‘Nphau los tsuam peb!’ thiab yuav hais rau tej pov roob hais tias, ‘Pob los txhub peb!’ Yog lawv twb ua li no rau tsob ntoo uas tseem nyoos, thaum tsob ntoo qhuav lawm, lawv yuav ua li cas rau?” Lawv coj ob tug txivneej uas ua tubsab mus tua nrog Yexus. Thaum lawv mus txog ntawm qhov chaw uas hu ua “Pobtxha Taubhau,” lawv muab Yexus ntsia rau saum ntoo khaublig thiab muab txhos rau qhov ntawd, thiab muab ob tug tubsab ntsia rau saum ntoo khaublig, muab ib tug txhos rau ntawm Yexus sab xis thiab muab ib tug txhos rau ntawm Yexus sab laug. Yexus hais tias, “Txiv, thov koj zam txim rau lawv! Rau qhov lawv tsis paub hais tias lawv ua dabtsi.” Lawv muab Yexus cev ris tsho los twv saib leejtwg yuav tau yam twg. Tej neeg sawvdaws sawv ib cag saib. Cov Yudais cov thawjcoj thuam Yexus hais tias: “Nws twb pab tau lwm tus dim; yog hais tias nws yog tus Mexiyas uas Vajtswv xaiv tiag, nws cia li pab kom nws dim!” Cov tubrog thuam Yexus thiab lawv muab cawv txiv hmab qaub los cev rau Yexus haus, thiab hais tias, “Yog koj yog cov Yudais tus vajntxwv tiag, koj cia li pab kom koj dim!” Muaj ib cov lus sau rau ntawm ib daim txiag uas nyob ncaj ntawm Yexus taubhau rau saud hais tias, “Tus no yog cov Yudais tus vajntxwv.” Ob tug tubsab uas lawv muab ntsia rau saum ntoo khaublig ntawd, ib tug thuam Yexus hais tias, “Koj tsis yog tus Mexiyas los? Koj cia li pab koj thiab pab kom wb dim!” Tiamsis muaj dua ib tug cem hais tias, “Koj tsis ntshai Vajtswv los? Koj twb raug txim ib yam nkaus li nws thiab. Wb raug txim li no yeej tsimnyog qhov uas wb ua txhaum; tiamsis tus no tsis tau ua txhaum dabtsi li.” Nws hais rau Yexus hais tias, “Thaum koj rov qab los ua Vajntxwv, thov koj nco txog kuv thiab.” Yexus hais rau nws hais tias, “Kuv qhia tseeb rau koj hais tias, hnub no koj yuav tau nrog kuv nyob saum qhov chaw uas kaj siab lug.” Thaum hnub ntseg, lub hnub tsis ci lawm, thiab lub tebchaws tsaus ntuj nti mus txog thaum peb teev; daim ntaub uas thaiv hauv lub Tuamtsev txawm ntuag rhe ua ob daig. Yexus hu nrov nrov hais tias, “Txiv, kuv muab kuv txojsia tso rau hauv koj txhais tes!” Yexus hais li ntawd tas, nws txawm tuag lawm. Tus thawj tubrog pom muaj li ntawd, nws qhuas Vajtswv hais tias, “Yog tiag, tus no yeej yog neeg ncaj ncees!” Thaum cov neeg uas tuaj saib pom li no, lawv ntaus hauvsiab thiab rov qab mus tsev lawm. Cov neeg uas ibtxwm paub Yexus, thiab cov pojniam uas nrog Yexus tuaj pem lub xeev Kalilais tuaj, lawv sawv deb deb saib tej no. Nws mus cuag Philaj thiab thov Philaj muab Yexus lub cev rau nws. Ces nws muab Yexus lub cev txo, muab qhwv thiab muab kwv mus tso rau hauv lub qhov ntxa uas luag txaug rau hauv ib phab pobzeb, yeej tsis tau muaj leejtwg coj neeg mus tso rau hauv li. Hnub ntawd yog hnub uas npaj qhov txhia chaw tseg rau Hnub Xanpataus uas twb los yuav txog. Cov pojniam uas nrog Yexus tuaj pem Kalilais tuaj, lawv nrog Yauxej mus, lawv pom lub qhov ntxa, thiab Yauxej muab Yexus lub cev tso li cas los lawv pom huv tibsi. Lawv rov mus tsev, lawv npaj tej tshuaj tsw qab thiab tej roj tsw qab, yuav nqa mus pleev Yexus lub cev. Hnub Xanpataus lawv so raws li Vajtswv txoj Kevcai qhia tseg lawm. Hnubkaj thaum kaj ntug txoog, cov pojniam txawm nqa tej tshuaj tsw qab uas lawv twb npaj tseg lawm, thiab lawv mus rau tom lub qhov ntxa. Lawv pom daim txiag zeb uas npog lub rooj ntxas twb dov rau ib cag lawm, lawv mus saib hauv; tiamsis tsis pom Tswv Yexus lub cev lawm. Lawv sawv ntsug hauv thiab xav tsis thoob li, tamsim ntawd muaj ob tug txivneej hnav ris tsho ci ntsa iab los sawv ntawm lawv ib sab. Cov pojniam ntawd ntshai kawg, thiab nyo hau rau hauv av, saib tsis taus ob tug txivneej ntawd li, ob tug txivneej ntawd hais rau lawv hais tias, “Ua li cas nej tuaj nrhiav tus neeg ciaj ntawm cov neeg tuag no? Nws tsis nyob ntawm no; nws twb sawv lawm. Nej nco ntsoov tej lus uas nws hais rau nej, thaum nej tseem nyob pem lub xeev Kalilais hais tias, ‘Yeej yuav muaj neeg ntes Neeg Leej Tub coj mus rau cov neeg txhaum, muab nws ntsia rau saum ntoo khaublig thiab peb hnub tom qab, nws yuav sawv hauv qhov tuag rov qab los.’ ” Cov pojniam ntawd nco dheev txog Yexus tej lus, thiab lawv tawm hauv lub qhov ntxa rov los qhia tej ntawd rau kaum ib tug thwjtim thiab cov uas nrog lawv nyob mloog. Cov pojniam ntawd yog, Malis Madalas, Yauhanas thiab Malis uas yog Yakaunpaus niam; thiab muaj dua ob peb tug pojniam los qhia tej no rau cov timthawj. Tiamsis cov thwjtim xav hais tias, tej uas cov pojniam ntawd hais yog tso dag xwb, lawv thiaj tsis ntseeg cov pojniam ntawd tej lus. Tiamsis Petus cia li sawv tsees khiav mus rau tom lub qhov ntxa; nws khoov xauj hauv lub qhov ntxa, ua ciav tsis pom dabtsi, tsuas pom cov ntaub uas qhwv Yexus lub cev nyob hauv xwb. Nws rov qab los tsev, thiab xav tsis thoob rau tej uas nws pom ntawd. Tib hnub ntawd Yexus ob tug thwjtim tabtom taug kev mus rau pem lub zos Ema-us uas nyob nrug deb ntawm lub nroog Yeluxalees kwvlam li kaum ib kilumev, thiab nkawd sib tham txog tej uas twb tshwm muaj lawm. Thaum nkawd tseem sib tham thiab sib nug txog zaj ntawd, Yexus txawm los nrog nkawd taug kev mus; nkawd pom Yexus, tiamsis zoo li muaj tej yam ua rau nkawd cim tsis tau nws. Yexus nug nkawd hais tias, “Neb pheej sib tham dabtsi thaum neb taug kev?” Nkawd nres ua ntsejmuag mluas mlob. Ob tug ntawd, tus uas hu ua Kelupas, nug Yexus hais tias, “Tagnrho cov neeg uas nyob hauv lub nroog Yeluxalees puavleej paub tej uas nyuam qhuav muaj tau ob peb hnub los no huv tibsi, tsuas yog koj tib leeg thiaj tsis paub tej ntawd xwb los?” Yexus nug nkawd hais tias, “Tej ntawd yog dabtsi?” Nkawd teb hais tias, “Tej ntawd yog tej xwm uas Yexus tus uas yog neeg Naxales raug. Nws yog ib tug cev Vajtswv lus. Vajtswv thiab tej neeg sawvdaws puavleej pom hais tias, nws tej lus muaj hwjchim thiab nws ua tau tej txujci tseemceeb. Peb cov thawj ntawm cov povthawj thiab cov nomtswv muab nws rau Philaj txiav txim tua nws povtseg, thiab lawv muab nws ntsia rau saum ntoo khaublig. Peb cia siab hais tias nws yog tus uas yuav pab cov Yixalayees dim! Dua li ntawd, txij li muaj tej ntawd los twb tau peb hnub rau hnub no lawm. Cov pojniam uas yog peb pab qee leej tau ua rau peb xav tsis thoob li; thaum kaj ntug txoog lawv mus rau tom lub qhov ntxa, tiamsis lawv tsis pom Yexus lub cev lawm. Lawv rov los qhia rau sawvdaws hais tias, lawv pom cov timtswv ceebtsheej qhia rau lawv hais tias, Yexus twb rov muaj sia lawm. Peb cov muaj qee leej mus saib lub qhov ntxa, thiab pom muaj raws li cov pojniam ntawd hais tiag, tiamsis lawv tsis pom Yexus.” Ces Yexus hais rau nkawd hais tias, “Ua li cas neb yuav ruam ua luaj li, ua li cas neb tsis ntseeg tej uas cov cev Vajtswv lus tau qhia tseg lawm! Puas yog tus Mexiyas yeej yuav raug tsimtxom thiab tom qab ntawd nws yuav tau nws lub tshwjchim ci ntsa iab?” Yexus txawm piav Vajtswv Txojlus uas hais txog nws, nws xub pib qhia tej uas Mauxes sau thiab tej uas cov cev Vajtswv lus txhua tus sau tseg lawm. Thaum lawv mus yuav txog lub zos uas lawv mus ntawd, Yexus txawm ua li nws yuav dhau plaws mus. Tiamsis nkawd cheem hais tias, “Koj nrog wb so ntawm no, rau qhov twb yuav tsaus ntuj.” Yexus thiaj mus nrog nkawd so. Thaum Yexus nrog nkawd zaum noj mov ntawm rooj, Yexus muab ib lub ncuav los nws ua Vajtswv tsaug thiab muab faib rau nkawd noj. Yam uas plooj ntawm nkawd lub qhovmuag txawm tshem hlo lawm, nkawd thiaj paub hais tias, yog Yexus, tamsim ntawd Yexus cia li ploj ntais ntawm nkawd mus lawm. Nkawd sib tham hais tias, “Thaum peb taug kev tuaj, nws nrog wb tham thiab piav Vajtswv Txojlus rau wb mloog, mas wb lub siab kub lug cuag li hluavtaws hlawv puas yog?” Tamsim ntawd nkawd txawm sawv tsees rov qab mus rau nram lub nroog Yeluxalees, thiab nkawd mus rau ntawm kaum ib tug thwjtim thiab lwm tus uas tuaj nyob ua ke ntawd, thiab lawv sib tham hais tias, “Tus Tswv twb sawv rov los lawm tiag tiag! Nws twb los tshwm rau Ximoos pom lawm!” Nkawd txawm piav tej uas nkawd pom thaum nkawd taug kev mus, thiab thaum tus Tswv muab ncuav ntais faib rau nkawd noj, nkawd thiaj paub hais tias yog Yexus tiag rau lawv mloog. Thaum nkawd tseem tabtom piav txog tej uas nkawd pom ntawd rau cov thwjtim mloog, tamsim ntawd tus Tswv txawm los sawv nruab nrab ntawm lawv, thiab hais rau lawv hais tias, “Nej cia li tau nyob kaj siab lug.” Lawv poob siab thiab ntshai kawg, lawv xav hais tias yog lawv pom dab. Tiamsis Yexus hais rau lawv hais tias, “Ua li cas nej ntshai ua luaj li? Vim li cas nej tsis ntseeg? Nej cia li saib kuv ob txhais tes thiab kuv ob txhais kotaw, nej thiaj yuav paub hais tias yog kuv tiag. Nej cia li cev tes kov kuv, nej thiaj li yuav paub, rau qhov dab tsis muaj nqaij tsis muaj txha li uas nej pom kuv muaj no.” Thaum Yexus hais li ntawd, nws txawm xyab hlo nws ob txhais tes thiab ob txhais kotaw rau lawv saib. Lawv zoo siab kawg thiab xav tsis thoob li, tiamsis lawv tseem tsis tau ntseeg tiag; Yexus nug lawv hais tias, “Nyob ntawm no, nej puas muaj dabtsi noj?” Lawv muab ib daim nqaij ntses ci cev rau Yexus, Yexus txais mus noj tabmeeg lawv sawvdaws. Yexus hais rau lawv hais tias, “Tej no yog tej uas kuv twb qhia rau nej thaum kuv tseem nrog nej nyob: Rau qhov txhua yam uas Mauxes hais thiab tej uas cov cev Vajtswv lus sau tseg rau hauv Phau Ntawv Nkauj uas hais txog kuv ntawd puavleej yuav tiav.” Yexus txawm ua rau lawv totaub Vajtswv Txojlus, thiab Yexus hais rau lawv hais tias, “Twb muaj lus sau tseg lawm hais tias, tus Mexiyas yeej yuav raug kev tsimtxom thiab peb hnub tom qab, nws yuav sawv hauv qhov tuag rov qab los nej yuav tsum tuav nws lub npe mus qhia txojmoo zoo rau txhua haivneeg hauv qab ntuj no hais tias, Vajtswv yuav zam txim rau tus uas tso nws tej kev txhaum tseg. Nej cia li pib qhia hauv lub nroog Yeluxalees. Nej yuav tsum ua timkhawv qhia tej no rau sawvdaws paub. Kuv yuav muab yam uas kuv Txiv coglus tseg lawm rau nej. Tiamsis nej yuav tsum nyob hauv lub nroog Yeluxalees tos mus txog thaum uas nej tau lub hwjchim uas yuav los saum ntuj los.” Yexus coj lawv tawm hauv lub nroog Yeluxalees mus txog nram lub zos Npethanis. Nws tsa tes foom koob hmoov rau lawv. Thaum nws foom koob hmoov rau lawv tas, nws txawm ncaim lawv thiab Vajtswv coj nws mus rau saum ntuj lawm. Lawv pehawm nws thiab rov mus rau pem lub nroog Yeluxalees, lawv zoo siab kawg li, thiab lawv niaj hnub mus nyob hauv lub Tuamtsev ua Vajtswv tsaug. Thaum tsis tau tsim lub ntiajteb, Txojlus yeej muaj nyob lawm; Txojlus ntawd ibtxwm nrog Vajtswv nyob, thiab Txojlus ntawd yog Vajtswv. Thaum chivkeeb Txojlus ntawd yeej ibtxwm nrog Vajtswv nyob. Vajtswv kom nws tsim ib puas tsav yam huv tibsi; ib puas tsav yam ntawd tsis muaj ib yam uas tsis yog nws tsim li. Txojlus ntawd yog lub hauvpaus txojsia, thiab txojsia ntawd yog qhov kaj rau neeg pom kev. Qhov kaj ntawd ci tuaj rau hauv qhov tsaus, thiab qhov tsaus laum tsis tau qhov kaj kom tsaus. Vajtswv txib ib tug txivneej uas yog nws tus tubtxib hu ua Yauhas los qhia rau neeg sawvdaws txog qhov kaj kom txhua tus tau hnov Txojlus ntawd thiaj los ntseeg. Yauhas tsis yog qhov kaj; nws tsuas los qhia qhov kaj xwb. Qhov kaj ntawd yog qhov tseeb uas los rau hauv lub ntiajteb no thiab ci rau txhua haivneeg pom kev. Txojlus ntawd twb los nyob hauv ntiajteb no lawm, thiab Vajtswv kom nws tsim lub ntiajteb, tiamsis ntiajteb tsis paub nws. Nws los rau hauv nws lub tebchaws, tiamsis nws haivneeg tsis lees yuav nws. Txawm yog li ntawd los cov neeg uas lees yuav nws thiab ntseeg nws, nws pub lawv muaj cai los ua Vajtswv cov menyuam. Qhov uas lawv tau los ua Vajtswv cov menyuam tsis yog raws li neeg ibtxwm muaj menyuam uas yog muaj niam muaj txiv yug; Vajtswv yog lawv txiv. Txojlus ntawd tau los yug ua neeg, nws puv npo txojkev hlub, nws yog qhov tseeb thiab nws nrog peb nyob. Peb pom nws lub tshwjchim ci ntsa iab; Leej Txiv pub lub tshwjchim ntawd rau nws, rau qhov nws yog Leej Txiv tib leeg Tub. Yauhas qhia tus ntawd zaj rau sawvdaws. Yauhas hais nrov nrov hais tias, “Tus txivneej no yog tus uas kuv twb qhia rau nej lawm hais tias, ‘Nws yuav lawv kuv qab los, tiamsis nws muaj hwjchim loj dua kuv, rau qhov nws ibtxwm muaj nyob ua ntej yug kuv lawm.’ ” Nws hlub peb kawg nkaus, nws thiaj foom koob hmoov nplua mias rau peb sawvdaws tsis paub kawg li. Vajtswv muab txoj Kevcai rau Mauxes qhia rau peb, tiamsis Yexus Khetos qhia txojkev hlub thiab qhov tseeb rau peb. Yeej tsis tau muaj leejtwg pom Vajtswv ib zaug li. Tsuas yog Leej Tub uas yog Vajtswv thiab nyob ntawm Leej Txiv ib sab, nws qhia Vajtswv rau sawvdaws paub xwb. Cov Yudais tej nomtswv uas nyob hauv lub nroog Yeluxalees tso cov povthawj thiab cov Levis qee leej mus nug Yauhas hais tias, “Koj yog leejtwg?” Yauhas qhia tseeb rau lawv hais tias, “Kuv tsis yog tus Mexiyas.” Lawv nug hais tias, “Koj yog leejtwg? Koj puas yog Eliyas?” Yauhas teb hais tias, “Kuv tsis yog.” Lawv nug hais tias, “Koj puas yog tus uas cev Vajtswv lus?” Yauhas teb hais tias, “Kuv tsis yog.” Lawv hais tias, “Koj qhia rau peb saib koj yog leejtwg tiag, peb thiaj paub rov mus qhia rau cov neeg uas txib peb tuaj. Koj hais tias koj yog leejtwg?” Yauhas teb lawv raws li Yaxayas uas yog tus cev Vajtswv lus sau tseg hais tias, “Kuv yog tus uas hais nrov nrov tom roob mojsab qhua tuaj hais tias, ‘Kho kev kom ncaj tos tus Tswv!’ ” Cov neeg uas cov Falixais txib mus ntawd, lawv nug Yauhas hais tias, “Yog koj hais tias koj tsis yog tus Mexiyas, tsis yog Eliyas thiab tsis yog tus uas cev Vajtswv lus, vim li cas koj ho muab neeg ua kevcai raus dej?” Yauhas teb hais tias, “Kuv muab neeg ua kevcai raus dej tiag, tiamsis muaj ib tug nrog nej nyob ntawm no, nej twb tsis paub nws. Nws yog tus uas tabtom lawv kuv qab los, tiamsis kuv twb tsis tsimnyog daws nws txoj nyuag hlua khau.” Tej xwm no muaj hauv lub zos Npethanis uas nyob ntawm ntug dej Yauladees sab hnubtuaj, qhov chaw uas Yauhas muab neeg ua kevcai raus dej. Hnub tom qab, Yauhas pom Yexus taug kev tuaj rau ntawm nws, Yauhas hais tias, “Tus no yog Vajtswv tus menyuam yaj uas yuav ris neeg ntiajteb lub txim! Tus no yog tus uas kuv qhia hais tias, ‘Muaj ib tug tabtom lawv kuv qab los, nws muaj hwjchim loj dua kuv, rau qhov nws yeej ibtxwm muaj nyob ua ntej yug kuv lawm.’ Kuv tsis tau paub hais tias nws yog leejtwg, tiamsis kuv los muab neeg ua kevcai raus dej kom cov Yixalayees paub nws.” Yauhas ua timkhawv hais tias, “Kuv pom Vaj Ntsujplig zoo ib yam li tus nquab los saum ntuj los nyob saum nws. Kuv tseem tsis tau paub hais tias nws yog leejtwg, tiamsis Vajtswv tus uas txib kuv los muab neeg ua kevcai raus dej hais rau kuv hais tias, ‘Koj yuav pom Vaj Ntsujplig los rau saum ib tug txivneej; nws yog tus uas yuav muab neeg ua kevcai raus los ntawm Vaj Ntsujplig tus Dawbhuv.’ Yauhas hais tias, ‘Kuv twb pom nws lawm, thiab kuv qhia rau nej hais tias nws yog Vajtswv tus Tub.’ ” Hnub tom qab, thaum uas Yauhas tabtom nrog nws ob tug thwjtim sawv ua ke dua, thaum ntawd Yauhas pom Yexus taug kev tuaj. Yauhas hais tias, “Tus ntawd yog Vajtswv tus menyuam yaj!” Yauhas ob tus thwjtim hnov Yauhas hais li ntawd, ces nkawd txawm nrog Yexus mus lawm. Yexus tig los pom nkawd raws nws qab, Yexus nug nkawd hais tias, “Neb nrhiav dabtsi?” Nkawd teb hais tias, “Lanpis (lo lus no txhais hais tias ‘Xibhwb’), koj so qhov twg?” Yexus teb hais tias, “Neb cia li los saib.” (Thaum ntawd yog plaub teev hnub qaij.) Yog li ntawd, nkawd txawm nrog Yexus mus thiab pom qhov chaw uas Yexus nyob, thiab hnub ntawd nkawd nrog Yexus nyob. Ob tug uas hnov Yauhas hais thiab raws Yexus qab mus ntawd muaj ib tug yog Ximoos Petus tus kwv Adales. Adales txawm mus hais rau nws tus tijlaug Ximoos hais tias, “Wb twb ntsib tus Mexiyas lawm.” (Lo lus Mexiyas txhais hais tias “Khetos.”) Ces Adales thiaj coj Ximoos mus cuag Yexus. Yexus ntsia ntsoov Ximoos thiab hais tias, “Koj lub npe hu ua Ximoos uas yog Yauhas tus tub, tiamsis yuav muab koj hu ua Kefas.” (Lo lus Kefas thiab Petus txhais hais tias, “lub pobzeb.”) Hnub tom qab Yexus yuav mus pem Kalilais. Nws mus pom Filis, nws hu Filis hais tias, “Koj cia li nrog kuv mus!” ( Filis nyob hauv lub nroog Npexaidas uas Adales thiab Petus nkawd nyob.) Filis mus hais rau Nathana-ees hais tias, “Peb twb ntsib Yexus uas yog neeg Naxales uas yog Yauxej tus tub uas Mauxes sau hais txog nws hauv phau ntawv Kevcai thiab cov uas cev Vajtswv lus sau hais txog nws lawm.” Nathana-ees nug Filis hais tias, “Puas muaj ib yam dabtsi zoo uas tuaj hauv lub nroog Naxales tuaj?” Filis teb hais tias, “Koj cia li tuaj saib maj.” Thaum Yexus pom Nathana-ees tabtom tuaj cuag Yexus, Yexus txawm hais txog Nathana-ees hais tias, “Tus no yog ib tug neeg Yixalayees tiag; nws yeej tsis tau ua ib qho txhaum li!” Nathana-ees nug Yexus hais tias, “Ua li cas koj txawm siv paub kuv lawm?” Yexus teb hais tias, “Kuv twb pom koj thaum koj nyob hauv qab tsob txiv ncuavpias ua ntej uas Filis hu koj lawm.” Nathana-ees teb hais tias, “Xibhwb, koj yog Vajtswv tus Tub! Koj yog cov Yixalayees tus Vajntxwv tiag!” Yexus hais rau Nathana-ees hais tias, “Vim kuv hais rau koj tias kuv twb pom koj nyob hauv qab tsob txiv ncuavpias, koj thiaj li ntseeg los? Koj tseem yuav pom tej yam tseemceeb dua qhov no thiab!” Thiab Yexus hais rau nkawd hais tias, “Kuv qhia tseeb rau neb hais tias, neb yuav pom rooj ntug qhib thiab pom Vajtswv cov timtswv nce mus thiab nqis los ntawm Neeg Leej Tub xubntiag.” Tau ob hnub tom qab muaj neeg ua ib rooj tshoob hauv lub zos Kanas uas nyob hauv lub xeev Kalilais. Yexus niam mus nrog lawv noj tshoob; lawv caw Yexus thiab nws cov thwjtim mus koom thiab. Thaum cawv txiv hmab tas lawm, Yexus niam hais rau Yexus hais tias, “Lawv cov cawv txiv hmab tas lawm.” Yexus teb hais tias, “Tsis tas koj yuav hais li ko rau kuv, tseem tsis tau txog kuv lub sijhawm.” Ces Yexus niam hais rau cov tubtxib hais tias, “Nws kom nej ua dabtsi, nej cia li ua raws li nws hais.” Cov Yudais ibtxwm ua kevcai ntxuav, yog li ntawd thiaj muaj rau lub hub dej nyob ntawd; cov hub ntawd ib lub twg ntim tau plaub lossis tsib thoob dej. Yexus hais rau cov tubtxib hais tias, “Nej cia li mus nqa dej los hliv kom puv nkaus cov hub no.” Ces lawv txawm mus nqa dej los hliv puv nkaus rau hauv cov hub ntawd, thiab Yexus hais rau lawv hais tias, “Nej cia li ce mentsis nqa mus rau tus kavxwm.” Lawv txawm ce mentsis nqa mus rau tus kavxwm. Thaum tus kavxwm saj cov dej uas txia ua cawv txiv hmab ntawd lawm. Nws tsis paub hais tias muab cov cawv txiv hmab no qhov twg los (tiamsis cov tubtxib uas ce cov dej ntawd twb paub lawm); yog li ntawd tus kavxwm thiaj hu tus nraug vauv los thiab hais rau nws hais tias, “Txhua tus yeej xub muab cov thawj caw los rau sawvdaws haus ua ntej tso, thiab thaum sawvdaws haus ntau lawm, nws mam muab cov tw los rau sawvdaws haus. Tiamsis koj tsis ua li ntawd, koj ho muab cov thawj caw cia rau tom qab!” Thawj zaug txujci tseemceeb no Yexus ua hauv lub zos Kanas uas nyob hauv lub xeev Kalilais; nws ua li ntawd qhia nws lub hwjchim rau sawvdaws pom, thiab nws cov thwjtim pom li ntawd lawv ntseeg nws. Tom qab ntawd, Yexus thiab nws niam, nws cov kwv, thiab nws cov thwjtim txawm mus rau hauv lub zos Kapena-us thiab lawv nyob hauv tau ob peb hnub. Thaum yuav txog lub caij uas ua Kevcai Hla Dhau, Yexus txawm mus nram lub nroog Yeluxalees. Yexus pom tej neeg tuaj muag nyuj, yaj, nquab thiab cov neeg pauv nyiaj zaum pawglug ntawm lawv tej rooj ntawm lub Tuamtsev lub tshavpuam. Yog li ntawd, Yexus muab ib co hlua ntswj kiag ua ib qhoo thiab raws lawv tej nyuj thiab tej yaj tawm ntawm lub Tuamtsev huv tibsi mus; nws muab cov neeg pauv nyiaj tej rooj ntxeev pes hlo ua rau lawv tej nyiaj poob dawb vog; thiab Yexus hais rau cov neeg muag nquab hais tias, “Nej cia li nqa nej tej nquab khiav ntawm no mus! Tseg kiag tsis txhob tuaj muab kuv Txiv lub tsev ua chaw ua lag ua luam ib zaug li.” Thaum Yexus cov thwjtim pom li ntawd, lawv nco dheev txog Vajtswv Txojlus uas hais tias, “Vajtswv, kuv mob siab koj lub tsev heev, ib yam li hluavtaws kub hauv kuv lub siab.” Cov Yudais tej nomtswv los nug Yexus hais tias, “Koj puas ua tau tej txujci tseemceeb qhia rau peb hais tias koj muaj cai tuaj ua li no?” Yexus teb hais tias, “Nej cia li muab lub Tuamtsev no rhuav povtseg, thiab peb hnub xwb kuv yuav rov ua tau dua ib lub tshiab.” Lawv nug Yexus hais tias, “Lub Tuamtsev no peb ua tau plaub caug rau xyoo thiaj li tiav, peb hnub xwb koj puas yuav ua tau ib lub?” Tiamsis lub Tuamtsev uas Yexus hais ntawd yog hais txog nws lub cev. Yog li ntawd, thaum Vajtswv tsa Yexus sawv hauv qhov tuag rov qab los lawm, Yexus cov thwjtim nco dheev txog tej lus uas nws hais ntawd, lawv thiaj ntseeg Vajtswv Txojlus uas luag sau tseg thiab Yexus tej lus. Thaum lub sijhawm uas sawvdaws ua Kevcai Hla Dhau ntawd, Yexus tseem nyob hauv lub nroog Yeluxalees; muaj neeg coob coob los ntseeg Yexus, rau qhov lawv pom tej txujci tseemceeb uas Yexus ua. Tiamsis Yexus tsis ntseeg lawv siab, rau qhov nws yeej paub sawvdaws lub siab lawm. Tsis tas leejtwg yuav qhia nws lub siab rau Yexus li, rau qhov Yexus yeej paub txhua tus lub siab xav lawm. Cov Yudais muaj ib tug thawjcoj hu ua Nikaudemaus, nws yog ib tug ntawm cov Falixais. Muaj ib hmo nws tuaj cuag Yexus thiab hais rau Yexus hais tias, “Xibhwb, peb paub hais tias koj yog tus xibhwb uas Vajtswv txib los. Tsis muaj leejtwg ua tau tej txujci tseemceeb uas koj ua no, tsuas yog tus uas Vajtswv nrog nws, tus ntawd thiaj ua tau xwb.” Yexus teb hais tias, “Kuv qhia tseeb rau koj hais tias yog leejtwg tsis yug dua tshiab, tus ntawd yeej tsis pom Vajtswv lub Tebchaws li.” Nikaudemaus nug Yexus hais tias, “Ib tug neeg laus lawm, yuav ua li cas rov yug dua tshiab tau? Nws yeej mus tsis tau rau hauv nws niam plab thiab rov yug dua ib zaug!” Yexus teb hais tias, “Kuv qhia tseeb rau koj hais tias tus neeg uas tsis tau yug los ntawm dej thiab ntawm Vaj Ntsujplig, tus ntawd yeej mus tsis tau Vajtswv lub Tebchaws li. Tus uas yog neeg yug yeej yog neeg, tiamsis tus uas yug los ntawm Vaj Ntsujplig yeej yog ntsujplig. Koj tsis txhob poob siab rau tej lus uas kuv qhia rau koj hais tias, txhua tus yuav tsum yug dua tshiab. Cua yuav ntsawj mus sab twg los yeej tau; koj hnov cua tuaj, tiamsis cua tuaj qhov twg tuaj lossis cua mus qhov twg koj yeej tsis paub. Txhua tus uas yug los ntawm Vaj Ntsujplig zoo ib yam nkaus li ntawd.” Nikaudemaus nug Yexus hais tias, “Yuav ua li cas thiaj muaj tau raws li koj hais ko?” Yexus teb hais tias, “Koj twb yog cov Yixalayees ib tug xibhwb, ua li cas koj tseem tsis paub tej no thiab? Kuv qhia tseeb rau koj hais tias peb hais tej uas peb paub thiab qhia tej uas peb pom xwb los nej yeej tsis muaj ib tug ntseeg tej lus uas peb qhia li. Kuv qhia nej txog tej yam uas nyob hauv lub ntiajteb no xwb, nej twb tsis ntseeg; yog kuv tseem qhia tej yam uas nyob saum ntuj ceebtsheej nej hajyam yuav tsis ntseeg. Thiab yeej tsis tau muaj leejtwg mus txog saum ntuj ceebtsheej li, tsuas yog Neeg Leej Tub xwb, nws thiaj los saum ntuj ceebtsheej los. “Mauxes tsa tus nab tooj rau saum tus ncej tom tiaj suabpuam li cas, luag yuav muab Neeg Leej Tub dai ib yam li ntawd; yog li ntawd, txhua tus uas ntseeg nws yuav tau txojsia ntev dhawv mus ibtxhis. “Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis. “Qhov uas Vajtswv txib nws Leej Tub los rau hauv ntiajteb no, tsis yog los txiav txim rau neeg ntiajteb, tiamsis yog los cawm neeg ntiajteb kom lawv dim lawv lub txim. “Tus uas ntseeg Leej Tub yuav tsis raug txiav txim, tiamsis tus uas tsis ntseeg twb raug txiav txim lawm, rau qhov nws tsis ntseeg Vajtswv tib Leeg Tub. Qhov uas txiav txim yog li no: Qhov kaj twb los rau hauv lub ntiajteb lawm, tiamsis neeg nyiam qhov tsaus ntuj heev dua nyiam qhov kaj, rau qhov lawv nyiam ua phem ua qias. Tus uas nyiam ua phem ua qias yeej tsis nyiam qhov kaj thiab tsis los nyob hauv qhov kaj, rau qhov lawv tsis xav kom sawvdaws pom lawv tej kev phem kev qias. Tiamsis tus uas nyiam ua zoo yeej los nyob hauv qhov kaj kom sawvdaws pom hais tias nws ua nws tes haujlwm raws li Vajtswv lub siab nyiam.” Tom qab ntawd, Yexus thiab nws cov thwjtim mus rau nram lub xeev Yudas, Yexus nrog lawv nyob tau ib ntus thiab muab neeg ua kevcai raus dej. Thaum ntawd, Yauhas muab neeg ua kevcai raus dej hauv lub zos Ainoos uas nyob tsis deb ntawm lub zos Xalis thiab, rau qhov nyob ntawd muaj dej ntau. Neeg niaj hnub tuaj cuag Yauhas thiab thov Yauhas muab lawv ua kevcai raus dej. ( Thaum ntawd luag tseem tsis tau coj Yauhas mus kaw rau hauv tsev lojcuj.) Yauhas cov thwjtim qee leej nrog ib tug neeg Yudais sib cav hais txog txoj kevcai ntxuav. Yog li ntawd, lawv thiaj mus cuag Yauhas thiab hais tias, “Xibhwb, koj puas nco qab tus txivneej uas nrog koj ua ke ntawm tus dej Yauladees sab hnubtuaj uas koj hais ntawd? Tamsim no nws tabtom muab neeg ua kevcai raus dej, thiab sawvdaws puavleej mus cuag nws!” Yauhas teb hais tias, “Txhua yam uas neeg muaj puavleej yog Vajtswv pub rau lawv. Nej yeej hnov kuv hais tias, ‘Kuv tsis yog tus Mexiyas, tiamsis kuv yog tus uas Vajtswv txib los ua nws ntej xwb, nej sawvdaws yeej ua tau timkhawv li ntawd.’ Tus nkauj nyab yog tus nraug vauv pojniam, tiamsis tus phijlaj tsuas yog tus uas sawv ib sab ua luag thiab mloog xwb. Thaum nws hnov tus nraug vauv tej lus, nws zoo siab heev. Nimno kuv zoo siab ib yam nkaus li ntawd ntag. Nws yuav muaj hwjchim loj zuj zus, tiamsis kuv lub hwjchim yuav yau zuj zus.” Tus uas los saum ntuj los, nws muaj hwjchim loj dua sawvdaws. Tus uas nyob hauv ntiajteb yeej yog neeg ntiajteb thiab hais neeg ntiajteb zaj, tiamsis tus uas los saum ntuj los muaj hwjchim loj dua ib puas tsav yam. Nws qhia tej uas nws pom thiab tej uas nws hnov rau sawvdaws mloog, tiamsis tsis muaj leejtwg ntseeg nws tej lus. Tiamsis tus uas ntseeg nws tej lus, tus ntawd yeej ntseeg hais tias Vajtswv yog tus ncaj ncees. Tus uas Vajtswv txib los nws yeej hais Vajtswv tej lus, rau qhov Vajtswv pub Vajtswv tus Ntsujplig puv npo rau tus ntawd. Leej Txiv hlub nws tus Tub kawg li thiab muab ib puas tsav yam tso rau nws kav huv tibsi. Tus uas ntseeg Leej Tub yuav tau txojsia ntev dhawv mus ibtxhis, tiamsis tus uas tsis mloog Leej Tub tej lus yuav tsis tau txojsia; Vajtswv yuav rau txim rau tus ntawd. Cov Falixais hnov hais tias Yexus muaj thwjtim thiab muab neeg ua kevcai raus dej coob dua Yauhas. ( Qhov tseeb, Yexus yeej tsis tau muab neeg ua kevcai raus dej, tsuas yog Yexus cov thwjtim muab xwb.) Thaum Yexus hnov li ntawd, nws txawm tawm hauv lub xeev Yudas rov qab mus rau pem lub xeev Kalilais; nws yuav tsum taug txojkev uas mus hla lub xeev Xamalis mus. Yexus mus txog ntawm lub nroog Xikhas uas nyob hauv lub xeev Xamalis lub nroog ntawd nyob tsis deb ntawm thaj teb uas Yakhauj muab rau nws tus tub Yauxej. Thaum ub Yakhauj khawb tau ib lub qhovtshij rau ntawd. Thaum Yexus taug kev los txog ntawm lub qhovtshij ntawd, Yexus lim heev, nws thiaj zaum ntawm lub qhovtshij ntawd. Lub sijhawm ntawd yog thaum tavsu. Muaj ib tug pojniam Xamalis tuaj ce dej, Yexus hais rau tus pojniam ntawd hais tias, “Thov koj ce mentsis dej rau kuv haus.” ( Yexus cov thwjtim mus yuav zaub mov rau tom nroog lawm.) Tus pojniam ntawd teb Yexus hais tias, “Koj yog neeg Yudais, thiab kuv yog neeg Xamalis, ua li cas koj lam thov dej ntawm kuv haus?” (Cov Yudais yeej ibtxwm tsis koom siv cov Xamalis tej khob thiab tej tais li.) Yexus teb tus pojniam ntawd hais tias, “Yog koj paub yam uas Vajtswv yuav pub rau koj, thiab paub tus uas thov dej ntawm koj haus yog leejtwg, ces koj yeej yuav thov nws, thiab nws yuav muab cov dej uas cawm txojsia rau koj haus.” Tus pojniam ntawd hais tias, “Tus tswv, koj twb tsis muaj dabtsi ce dej, thiab lub qhovtshij no tob heev. Koj yuav muab cov dej uas cawm txojsia qhov twg los? Peb yawgkoob Yakhauj muab lub qhovtshij no rau peb; nws thiab nws cov tub thiab nws tej tsiaj puavleej haus cov dej hauv lub qhovtshij no. Koj tseem muaj hwjchim loj dua peb yawgkoob Yakhauj thiab los?” Yexus teb hais tias, “Txhua tus uas haus cov dej hauv lub qhovtshij no tseem yuav rov nqhis dua, tiamsis tus uas haus cov dej uas kuv muab rau nws yuav tsis nqhis ib zaug li lawm. Cov dej uas kuv muab rau nws yuav txhawv hauv nws lub siab thiab cawm nws txojsia mus ibtxhis.” Tus pojniam ntawd hais rau Yexus hais tias, “Tus tswv, thov koj muab cov dej uas koj hais ko rau kuv haus! Kuv thiaj yuav tsis nqhis dua thiab tsis tau tuaj ce dej hauv lub qhovtshij no lawm.” Yexus hais rau tus pojniam ntawd hais tias, “Koj cia li mus hu koj tus txiv tuaj ntawm no.” Tus pojniam ntawd teb hais tias, “Kuv tsis muaj txiv.” Yexus teb hais tias, “Koj hais tias koj tsis muaj txiv, koj hais yog lawm. Koj twb yuav tsib tug txiv lawm, thiab tus txivneej uas nimno koj nrog nyob ntawd los yeej tsis yog koj tus txiv. Tej uas koj qhia rau kuv ntawd, koj hais tseeb lawm.” Tus pojniam ntawd hais rau Yexus hais tias, “Tus tswv, kuv paub hais tias koj yog ib tug cev Vajtswv lus. Peb cov uas yog neeg Xamalis cov yawgkoob ibtxwm pehawm Vajtswv saum lub roob no, tiamsis nej cov uas yog neeg Yudais hais tias sawvdaws yuav tsum mus pehawm Vajtswv nram lub nroog Yeluxalees thiaj yog.” Yexus hais rau tus pojniam ntawd hais tias, “Koj cia li ntseeg kuv tej lus; twb yuav txog lub sijhawm uas neeg yuav tsis pehawm Leej Txiv saum lub roob no lossis nram lub nroog Yeluxalees lawm. Nej cov uas yog neeg Xamalis, nej tsis paub tus uas nej pehawm yog leejtwg; tiamsis peb cov uas yog neeg Yudais, peb paub tus uas peb pehawm, rau qhov tus Cawmseej los yug rau hauv cov neeg Yudais. Lub sijhawm ntawd tabtom los, thiab lub sijhawm ntawd twb los txog lawm; cov neeg uas pehawm Leej Txiv yuav pehawm ntawm sab Ntsujplig thiab qhov tseeb, rau qhov Leej Txiv xav kom sawvdaws muaj nplooj siab dawb paug pehawm nws tiag. Vajtswv yog Ntsujplig, cov uas pehawm Vajtswv yuav tsum pehawm ntawm sab ntsujplig thiab qhov tseeb.” Tus pojniam ntawd hais rau Yexus hais tias, “Kuv paub hais tias tus Mexiyas yuav los, thiab thaum nws los lawm, nws yuav qhia txhua yam rau peb.” Yexus teb hais tias, “Kuv yog nws, kuv tabtom nrog koj tham no ntag.” Tamsim ntawd Yexus cov thwjtim txawm los txog, lawv pom Yexus nrog tus pojniam ntawd tham, lawv xav tsis thoob li. Tiamsis tsis muaj ib tug nug tus pojniam ntawd hais tias, “Koj xav yuav dabtsi?” lossis nug Yexus hais tias, “Vim li cas koj nrog tus pojniam ntawd tham?” Ces tus pojniam ntawd txawm muab nws lub hub dej tso plhuav tseg; nws rov qab mus rau tom nroog, thiab nws hais rau cov neeg hauv nroog hais tias, “Nej cia li mus saib tus txivneej uas nyob tod saib, nws qhia txhua yam uas kuv tau ua tas los lawm huv tibsi rau kuv mloog! Nws puas yog tus Mexiyas?” Yog li ntawd, sawvdaws txawm tawm zom zaws hauv nroog tuaj saib Yexus. Thaum ntawd cov thwjtim hais rau Yexus hais tias, “Xibhwb, cia li los noj mov tso!” Tiamsis Yexus teb hais tias, “Kuv twb muaj mov noj lawm, tej ntawd nej tsis paub.” Yog li ntawd, cov thwjtim thiaj sib nug hais tias, “Leejtwg twb nqa mov tuaj rau nws noj lawm?” Yexus hais rau cov thwjtim hais tias, “Kuv tej mov yog ua raws li tus uas txib kuv los lub siab nyiam, thiab ua tes haujlwm uas nws tso rau kuv ua lawm kom tiav. Muaj ib lo lus uas nej hais tias, ‘Tshuav plaub hlis mam li txog caij hlais nplej.’ Tiamsis kuv qhia rau nej hais tias nej cia li tsa qhovmuag saib tej teb; nplej twb siav heev zoo hlais lawm! Tus neeg uas hlais nplej twb tau nqe zog lawm, thiab tej uas nws sau los cia twb tau txojsia ntev dhawv mus ibtxhis lawm; Yog li ntawd, tus uas cog thiab tus uas hlais yuav zoo siab kawg li. Vim li ntawd lo lus uas hais tias, ‘Muaj ib tug cog, thiab muaj dua ib tug hlais,’ lo lus ntawd yeej muaj tseeb tiag! Kuv txib nej mus hlais cov nplej hauv daim teb uas tsis yog nej lub zog ua; daim teb ntawd yog lwm tus lub zog ua, tiamsis nej tau sau tej uas yog lwm tus lub zog ua.” Cov neeg Xamalis uas nyob hauv lub nroog ntawd muaj ntau leej ntseeg Yexus, rau qhov tus pojniam ntawd hais rau lawv hais tias, “Nws qhia txhua yam uas kuv tau ua tas los lawm huv tibsi rau kuv mloog.” Yog li ntawd, thaum cov neeg Xamalis tuaj cuag Yexus, lawv cheem kom Yexus nrog lawv nyob, ces Yexus txawm mus nyob hauv lub nroog ntawd tau ob hnub. Muaj ntau leej los ntseeg Yexus ntxiv, rau qhov lawv hnov Yexus tej lus qhia, thiab lawv hais rau tus pojniam ntawd hais tias, “Nimno peb ntseeg tsis yog vim tej lus uas koj hais, tiamsis peb ntseeg vim peb tau hnov nws tej lus thiab peb paub hais tias nws yog neeg ntiajteb tus Cawmseej tiag.” Tom qab uas Yexus nyob hauv lub nroog ntawd tau ob hnub, nws txawm mus rau pem lub xeev Kalilais lawm. Rau qhov Yexus hais tias, “Cov neeg uas nyob hauv lub tebchaws uas tus cev Vajtswv lus nyob, cov neeg ntawd yeej tsis hwm nws.” Thaum Yexus mus txog pem lub xeev Kalilais, sawvdaws tuaj tos txais nws, rau qhov lawv tau mus ua Kevcai Hla Dhau nram lub nroog Yeluxalees thiab pom txhua yam uas Yexus ua thaum ua Kevcai Hla Dhau ntawd. Ces Yexus txawm rov qab mus rau hauv lub zos Kanas uas nyob hauv lub xeev Kalilais uas thaud Yexus muab dej txia ua cawv txiv hmab. Muaj ib tug nom nyob hauv lub nroog Kapena-us, nws tus tub mob heev. Thaum nws hnov hais tias Yexus rov qab nram lub xeev Yudas los txog rau hauv lub xeev Kalilais lawm, nws thiaj mus cuag Yexus thiab thov kom Yexus mus kho nws tus tub uas mob heev yuav tuag hauv lub nroog Kapena-us. Yexus hais rau tus nom ntawd tias “Yog nej tsis pom tej txujci tseemceeb, nej yeej tsis ntseeg kuv tej lus li?” Tus nom ntawd hais rau Yexus hais tias, “Tus tswv, cheem kuv tus tub tseem tsis tau tuag, thov koj mus pab kho!” Yexus hais rau tus nom ntawd hais tias, “Koj cia li rov qab mus tsev, koj tus tub yuav tsis tuag!” Tus nom ntawd ntseeg Yexus tej lus, nws txawm rov qab mus tsev lawm. Thaum nws tabtom taug kev mus tsev, nws cov tubtxib tuaj caum nws thiab qhia rau nws hais tias, “Koj tus tub zoo lawm.” Nws nug lawv hais tias thaum twg nws tus tub zoo lawm, thiab lawv teb hais tias, “Nag hmo thaum ib teev ces nws tus npaws txawm tu lawm.” Ces leej txiv nco dheev txog hais tias thaum ntawd yog lub sijhawm uas Yexus hais rau nws hais tias, “Koj tus tub yuav tsis tuag.” Yog li ntawd, nws thiab nws tsevneeg thiaj ntseeg Yexus. Txij thaum Yexus rov nram lub xeev Yudas los txog rau hauv lub xeev Kalilais, nws ua txujci tseemceeb ob zaug rau zaum no. Tom qab ntawd, thaum txog lub caij uas cov Yudais ua kevcai, Yexus txawm mus rau nram lub nroog Yeluxalees. Nyob hauv lub nroog Yeluxalees muaj ib lub pasdej nyob ze ze ntawm lub Roojvag Yaj thiab muaj tsib lub qabkhav nyob ncig lub pasdej; qhov chaw ntawd lus Henplais hu ua Npexathas. Muaj ib co neeg mob coob coob tuaj pw hauv tej qabkhav ntawd, cov neeg digmuag, cov neeg cegtawv thiab cov neeg tuag tes tuag taw. Lawv tuaj nyob ntawd tos saib thaum twg lub pasdej ntas. Rau qhov tus Tswv ib tug timtswv pheej los do lub pasdej ntawd. Thaum lub pasdej ntawd ntas, yog tus neeg mob twg xub nqis mus rau hauv lub pasdej, ces tus ntawd tej mob zoo. Muaj ib tug txivneej mob tau peb caug yim xyoo lawm, nws tuaj pw ntawm lub pasdej ntawd. Yexus pom nws pw ntawd, Yexus paub hais tias nws mob tau ntev los lawm; Yog li ntawd, Yexus thiaj nug nws hais tias, “Koj puas xav zoo?” Nws teb Yexus hais tias, “Tus tswv, thaum dej ntas tsis muaj leejtwg pab tuav kuv mus rau hauv lub pasdej; thaum kuv tabtom yuav nqis mus rau hauv, twb muaj lwm tus xub nqis ua kuv ntej mus rau hauv lawm.” Yexus hais rau nws hais tias, “Koj cia li sawv, yaws koj daim lev thiab mus.” Tamsim ntawd nws tus mob txawm cia li zoo hlo; ces nws txawm yaws hlo nws daim lev thiab mus lawm. Hnub ntawd yog hnub Xanpataus; yog li ntawd, cov Yudais tej nomtswv thiaj hais rau tus txivneej uas zoo mob ntawd hais tias, “Hnub no yog hnub Xanpataus, koj nqa koj daim lev taug kev mas txhaum peb cov neeg Yudais txoj Kevcai lawm.” Nws teb lawv hais tias, “Tus uas kho kuv zoo hais rau kuv hais tias, ‘Cia li yaws koj daim lev thiab mus.’ ” Lawv nug nws hais tias, “Tus uas hais kom koj ua li no yog leejtwg?” Tiamsis tus txivneej ntawd tsis paub hais tias Yexus yog leejtwg, rau qhov muaj neeg coob coob nyob ntawd, thiab Yexus twb mus rau lwm qhov lawm. Tom qab ntawd Yexus mus ntsib tus txivneej ntawd hauv lub Tuamtsev, thiab Yexus hais rau nws hais tias, “Koj mloog kuv hais, nimno koj twb zoo lawm, koj tseg tsis txhob ua txhaum lawm, nyob tsam koj raug kev txomnyem heev dua qub.” Ces tus txivneej ntawd txawm tawm mus qhia rau cov Yudais tej nomtswv hais tias tus uas kho nws zoo mob ntawd yog Yexus. Yog li ntawd, lawv txawm tuavhauv ua phem rau Yexus, rau qhov Yexus kho tus txivneej ntawd hnub Xanpataus. Yexus teb lawv hais tias, “Kuv Txiv yeej ua haujlwm tsis so li, yog li ntawd kuv yeej yuav ua haujlwm thiab.” Qhov uas Yexus hais no ua rau cov Yudais tej nomtswv hajyam xav muab Yexus tua povtseg; tsis yog qhov uas Yexus ua txhaum txoj kevcai hnub Xanpataus xwb, tiamsis Yexus tseem khav hais tias Vajtswv yog nws Txiv, thiab Yexus hais li uas nws muaj hwjchim sib luag zos li Vajtswv ntag. Yexus teb lawv hais tias, “Kuv qhia tseeb rau nej hais tias Leej Tub yeej tsis ua ib yam dabtsi raws li nws lub siab; nws tsuas ua tej uas nws pom nws Txiv ua xwb. Tej uas Leej Txiv ua, Leej Tub thiaj ua. Rau qhov Leej Txiv hlub Leej Tub thiab qhia ib puas tsav yam uas nws ua rau Leej Tub. Nws yuav qhia tej haujlwm uas tseemceeb dua tej no rau Leej Tub, thiab tej ntawd yuav ua rau nej xav tsis thoob. Leej Txiv tsa cov neeg uas tuag lawm sawv rov qab los li cas, Leej Tub yuav pub txojsia rau cov neeg uas nws pom zoo pub rau ib yam li ntawd. Leej Txiv tsis txiav txim rau leejtwg, tiamsis nws tsa Leej Tub ua tus txiav txim, kom txhua tus hwm Leej Tub ib yam li hwm Leej Txiv. Tus uas tsis hwm Leej Tub, tus ntawd yeej tsis hwm Leej Txiv tus uas txib Leej Tub los thiab. “Kuv qhia tseeb rau nej hais tias tus uas mloog kuv lus thiab ntseeg tus uas txib kuv los, tus ntawd thiaj tau txojsia ntev dhawv mus ibtxhis. Nws yuav tsis raug txiav txim, rau qhov nws twb tawm hauv txojkev tuag los tau txojsia lawm. Kuv qhia tseeb rau nej hais tias lub sijhawm tabtom los thiab twb los txog lawm; thaum ntawd yog thaum uas cov neeg tuag lawm yuav hnov Vajtswv tus Tub lub suab hu, thiab txhua tus uas hnov yuav ciaj rov qab los. Leej Txiv yog lub hauvpaus txojsia li cas, nws tsa Leej Tub ua lub hauvpaus txojsia ib yam li ntawd. Thiab Leej Txiv tsa Leej Tub ua tus txiav txim, rau qhov nws yog Neeg Leej Tub. Nej tsis txhob poob siab rau kuv tej lus no, rau qhov lub sijhawm tabtom los lawm; thaum ntawd cov neeg uas tuag lawm yuav hnov Leej Tub lub suab hu, thiab lawv yuav tawm hauv lawv tej qhov ntxa los: cov neeg uas ua zoo yuav sawv los tau txojsia, cov neeg uas ua phem ua qias yuav sawv los raug kev txiav txim. “Kuv tsis muaj cai ua ib yam dabtsi raws li kuv lub siab xav; kuv tsuas txiav txim raws li Vajtswv kom kuv txiav xwb; yog li ntawd, kuv yeej txiav txim ncaj ncees, rau qhov kuv tsis ua raws li kuv lub siab nyiam, tiamsis kuv tsuas ua raws li tus uas txib kuv los lub siab nyiam xwb. “Yog kuv rov ua kuv tus timkhawv, ces yeej tsis muaj neeg ntseeg tej uas kuv hais. Tiamsis yeej muaj ib tug ua kuv tus timkhawv, thiab kuv paub hais tias tej uas nws hais txog kuv, nws yeej hais tseeb xwb. Nej txib nej cov neeg mus cuag Yauhas, thiab Yauhas yeej ua timkhawv hais tias tej lus uas kuv hais puavleej tseeb. Tsis yog kuv xav kom neeg ua kuv tus timkhawv, tiamsis kuv hais li no kom nej dim nej lub txim. Yauhas zoo li lub teeb uas taws cig ntsa iab, thiab nej yuav zoo siab ib nyuag ntu thaum uas nej nyob hauv qhov kaj ntawd. Tiamsis kuv muaj ib qho timkhawv uas tseemceeb dua tej uas Yauhas hais: Tej uas kuv ua yog tej haujlwm uas Leej Txiv muab rau kuv ua, tej haujlwm uas kuv ua qhia rau sawvdaws paub tseeb hais tias kuv yog tus uas Leej Txiv txib los. Thiab Leej Txiv tus uas txib kuv los yeej ua timkhawv hais txog kuv zaj ib yam nkaus. Nej yeej ibtxwm tsis tau hnov nws lub suab lossis pom nws lub ntsejmuag, thiab nej yeej tsis khaws nws tej lus cia rau nruab siab, vim nej tsis ntseeg tus uas nws txib los. Nej kawm Vajtswv Txojlus, rau qhov nej xav hais tias txojlus ntawd yuav cawm tau nej txojsia mus ibtxhis; Vajtswv Txojlus ntawd twb hais txog kuv ntag! Tiamsis nej tsis kam los cuag kuv kom nej tau txojsia. “Kuv tsis xav kom neeg qhuas kuv. Tiamsis kuv paub hais tias nej tsis muaj lub siab hlub Vajtswv. Kuv yog tus uas kuv Txiv txib los, tiamsis nej tsis lees yuav kuv; tus uas tsis muaj leejtwg txib los, nws los nws xwb, nej ho lees yuav tus ntawd. Nej ib leeg nyiam ua rau ib leeg qhuas, tiamsis nej tsis muaj ib tug nyiam ua rau Vajtswv qhuas; yog li ntawd, nej yuav ua li cas ntseeg kuv tej lus. Nej tsis txhob xav hais tias kuv yuav nkaug nej rau kuv Txiv. Mauxes tus uas nej cia siab rau, nws yog tus uas yuav nkaug nej rau kuv Txiv. Yog nej ntseeg Mauxes tej lus, nej yeej yuav ntseeg kuv, rau qhov Mauxes yeej sau hais txog kuv. Yog nej twb tsis ntseeg tej lus uas Mauxes sau, nej yuav ua li cas ntseeg kuv tej lus?” Tom qab ntawd Yexus caij nkoj hla Hiavtxwv Kalilais mus rau sab tim ub (lub hiavtxwv ntawd muaj dua ib lub npe hu ua Tinpelias). Muaj neeg coob coob raws Yexus qab mus, rau qhov lawv pom tej txujci uas nws kho tau tej neeg muaj mob zoo. Yexus mus rau saum roob thiab nrog nws cov thwjtim zaum ua ke. Thaum ntawd twb yuav txog lub caij uas cov Yudais ua Kevcai Hla Dhau. Yexus tsa qhovmuag saib, nws pom neeg coob coob tabtom tuaj cuag nws; yog li ntawd, nws txawm hais rau Filis hais tias, “Peb yuav mus muas mov qhov twg thiaj li txaus sawvdaws noj?” ( Yexus hais li no yog nws sim Filis siab; qhov tseeb, Yexus twb paub lawm hais tias Yexus yuav ua li cas.) Filis teb hais tias, “Txawm yog muab ob puas tawm lub nyiaj mus yuav mov los ntshai ib leeg tsuas tau ib nyuag qhov me me xwb.” Yexus cov thwjtim muaj ib tug hu ua Adales, nws yog Ximoos Petus tus kwv, nws hais tias, “Muaj ib tug menyuam tub nyob ntawm no, nws muaj tsib lub ncuav thiab ob tug ntses. Tiamsis yuav tsis txaus cov neeg no noj.” Yexus hais tias, “Nej cia li hais kom sawvdaws zaum.” (Thaj chaw ntawd muaj muaj nyom.) Yog li ntawd, sawvdaws txawm zaum; cov txivneej uas nyob ntawd muaj kwvlam li tsib txhiab leej. Yexus muab tsib lub ncuav ntawd los ua Vajtswv tsaug, thiab nws muab faib rau sawvdaws noj. Nws muab ob tug ntses los ua ib yam nkaus li ntawd thiab, tus uas yuav noj ntau npaum li cas los tau. Thaum sawvdaws noj tsau lawm, Yexus hais rau nws cov thwjtim hais tias, “Nej cia li mus sau tej uas sawvdaws noj tsis tas los, tsis pub ib qho xuam li.” Yog li ntawd, cov thwjtim thiaj mus sau tej ncuav seem uas sawvdaws noj tsis tas tau kaum ob tawb puv nkaus. Thaum cov neeg sawvdaws pom Yexus ua zaj txujci tseemceeb no, lawv hais tias, “Tus no yog tus cev Vajtswv lus uas nqis los rau hauv ntiajteb no tiag!” Yexus paub hais tias lawv yuav tuaj muab nws yuam tsa ua vajntxwv; Yog li ntawd, nws tib leeg thiaj mus rau saum roob lawm. Thaum yuav tsaus ntuj, Yexus cov thwjtim mus rau nram ntug hiavtxwv; lawv nce rau hauv lub nkoj thiab caij nkoj hla hiavtxwv rov qab mus rau pem lub nroog Kapena-us. Thaum ntawd twb tsaus ntuj zuag lawm, Yexus tseem tsis tau los rau ntawm lawv. Ces txawm muaj cua daj cua dub ntsawj dej ntas cuag dabtsi. Cov thwjtim twb nquam lub nkoj mus deb kwvlam li tsib raus kilumev lawm, thaum lawv pom Yexus los kotaw sau nplaim dej los ze zuj zus rau ntawm lawv lub nkoj, lawv ntshai kawg li. Yexus hais rau lawv hais tias, “Nej tsis txhob ntshai, twb yog kuv ntag!” Lawv thiaj zoo siab cia Yexus los rau hauv lawv lub nkoj, tamsim ntawd lub nkoj twb mus txog ntua ntawm ntug qhov chaw uas lawv yuav mus lawm. Hnub tom qab cov neeg coob coob uas nyob sab ntug hiavtxwv tim ub pom hais tias tsuas muaj tib lub nkoj nyob ntawd xwb. Lawv paub hais tias Yexus yeej tsis tau nrog nws cov thwjtim caij lub nkoj ntawd mus, lawv tsuas pom cov thwjtim caij mus xwb. Muaj dua ib co nkoj tuaj tim lub nroog Tinpelias tuaj nres ze rau ntawm qhov chaw uas Yexus muab ncuav los ua Vajtswv tsaug thiab muab ntais faib rau sawvdaws noj. Thaum cov neeg coob coob ntawd paub hais tias Yexus thiab nws cov thwjtim tsis nyob qhov ntawd lawm, lawv txawm nce rau hauv cov nkoj ntawd thiab caij mus nrhiav Yexus rau tim lub nroog Kapena-us. Thaum cov neeg ntawd mus nrhiav tau Yexus nyob sab hiavtxwv tim ub lawm, lawv hais rau Yexus hais tias, “Xibhwb, thaum twg koj twb tuaj rau ntawm no lawm?” Yexus teb hais tias, “Kuv qhia tseeb rau nej hais tias twb yog vim kuv muab mov rau nej noj tsau, nej thiaj tuaj nrhiav kuv, tsis yog vim nej pom tej txujci tseemceeb uas kuv ua. Nej tsis txhob nrhiav tej mov uas txawj lwj, tiamsis nej yuav tsum nrhiav tej mov uas tsis txawj lwj. Neeg Leej Tub yuav muab cov mov uas cawm tau txojsia ntev dhawv mus ibtxhis rau nej, rau qhov Vajtswv tus uas yog Leej Txiv twb nias homthawj rau nws lawm.” Lawv nug Yexus hais tias, “Peb yuav ua li cas thiaj ua tau raws li Vajtswv xav kom peb ua?” Yexus teb hais tias, “Qhov uas Vajtswv xav kom nej ua yog nws xav kom nej ntseeg tus uas nws txib los.” Lawv teb hais tias, “Koj yuav ua yam txujci tseemceeb dabtsi rau peb saib kom peb ntseeg koj? Koj yuav ua dabtsi? Thaum ub peb cov yawgkoob noj manas tom tiaj suabpuam raws li Vajtswv Txojlus hais tias, ‘Nws muab mov saum ntuj los rau lawv noj.’ ” Yexus hais tias, “Kuv qhia tseeb rau nej hais tias tej mov uas Mauxes muab rau nej noj tsis yog tej uas los saum ntuj los; tej mov uas kuv Txiv muab rau nej noj thiaj yog tej tseem mov uas los saum ntuj los. Rau qhov tus uas los saum ntuj los, nws yog cov mov uas Vajtswv muab los cawm neeg ntiajteb txojsia.” Lawv thov Yexus hais tias, “Tus tswv, thov koj muab cov mov ntawd rau peb noj mus li.” Yexus qhia lawv hais tias, “Kuv yog cov mov uas cawm neeg txojsia. Tus uas los cuag kuv, tus ntawd yuav tsis tshaib ib zaug li; tus uas ntseeg kuv tus ntawd yuav tsis nqhis ib zaug li lawm. Kuv hais rau nej hais tias nimno nej twb pom kuv lawm, tiamsis nej tsis ntseeg kuv. Txhua tus uas kuv Txiv pub rau kuv, lawv yeej yuav los cuag kuv. Txhua tus uas los cuag kuv, kuv lees yuav huv tibsi, rau qhov kuv los saum ntuj los tsis yog los ua raws li kuv lub siab, tiamsis kuv los ua raws li tus uas txib kuv los lub siab nyiam. Tus uas txib kuv los kom kuv saib cov neeg uas nws pub rau kuv lawm, tsis txhob cia ib tug twg ploj li, thiab thaum txog hnub kawg kuv yuav tsa lawv txhua tus sawv hauv qhov tuag rov qab los. Rau qhov kuv Txiv xav kom txhua tus uas pom Leej Tub thiab ntseeg nws lawm muaj txojsia ntev dhawv mus ibtxhis. Thiab thaum txog hnub kawg kuv yuav tsa lawv sawv hauv qhov tuag rov qab los.” Ces cov Yudais txawm yws Yexus, rau qhov Yexus hais tias, “Kuv yog cov mov uas los saum ntuj los.” Yog li ntawd, lawv thiaj hais tias, “Tus txivneej no yog Yauxej tus tub Yexus los tsis yog? Peb yeej paub nws niam nws txiv huv tibsi. Ua li cas nws yuav hais tias nws los saum ntuj los?” Yexus hais rau lawv hais tias, “Nej cia li tseg tsis txhob yws li ntawd lawm. Yeej tsis muaj leejtwg los cuag tau kuv, tsuas yog Leej Txiv tus uas txib kuv los, nws coj leejtwg los tus ntawd thiaj tau los cuag kuv xwb; thiab thaum txog hnub kawg kuv yuav tsa tus ntawd sawv hauv qhov tuag rov qab los. Cov cev Vajtswv lus sau tseg hais tias, ‘Vajtswv yuav qhia txhua tus huv tibsi.’ Txhua tus uas hnov Leej Txiv tej lus thiab ua raws li nws qhia yeej los cuag kuv. Kuv hais li no tsis yog hais tias txhua tus puavleej pom Leej Txiv; tsuas yog tus uas Vajtswv txib los, nws tib leeg xwb thiaj pom Leej Txiv. Kuv qhia tseeb rau nej hais tias tus uas ntseeg kuv, tus ntawd twb tau txojsia ntev dhawv mus ibtxhis lawm. Kuv yog cov mov uas cawm neeg txojsia. Txawm yog nej cov yawgkoob tau noj manas tom tiaj suabpuam los lawv twb tuag tas lawm. Tiamsis yog leejtwg noj cov mov uas los saum ntuj los, tus ntawd yuav tsis tuag. Kuv yog cov mov uas los saum ntuj los cawm neeg txojsia. Tus uas noj cov mov no yuav tau txojsia ntev dhawv mus ibtxhis; thiab cov mov uas kuv yuav muab cawm neeg ntiajteb txojsia ntawd twb yog kuv cev nqaij ntag.” Ces cov Yudais txawm sib cav npautaws vog hais tias, “Tus txivneej no yuav ua li cas muab tau nws cev nqaij rau peb noj?” Yexus hais rau lawv hais tias, “Kuv qhia tseeb rau nej hais tias yog nej tsis noj Neeg Leej Tub cev nqaij thiab tsis haus nws cov ntshav, ces nej yuav tsis tau txojsia. Tus uas noj kuv cev nqaij thiab haus kuv cov ntshav, tus ntawd tau txojsia ntev dhawv mus ibtxhis, thiab thaum txog hnub kawg kuv yuav tsa nws sawv hauv qhov tuag rov qab los. Rau qhov kuv cev nqaij yog cov tseem mov, thiab kuv cov ntshav yog cov tseem dej. Tus uas noj kuv cev nqaij thiab haus kuv cov ntshav, tus ntawd nrog kuv koom ib txojsia, thiab kuv nrog tus ntawd koom ib txojsia. Leej Txiv tus uas txib kuv los, nws yog tus uas muaj txojsia; vim kuv nrog nws koom ib txojsia, kuv thiaj li muaj txojsia. Ib yam nkaus li ntawd, tus uas noj kuv cev nqaij tus ntawd tau txojsia, rau qhov kuv yog tus uas muaj txojsia. Cov mov no yog cov mov uas los saum ntuj los; cov mov no tsis zoo li cov mov uas nej cov yawgkoob noj, thiab lawv tuag tas lawm. Tus uas noj cov mov no yuav tau txojsia ntev dhawv mus ibtxhis.” Yexus hais cov lus no thaum nws qhia hauv lub tsev sablaj uas nyob hauv lub nroog Kapena-us. Cov neeg uas raws Yexus qab hnov tej lus uas nws qhia ntawd, muaj ntau leej hais tias, “Cov lus no nyuaj kawg li. Leejtwg thiaj yuav totaub?” Tiamsis Yexus paub hais tias lawv yws txog tej lus uas Yexus hais, Yexus thiaj hais rau lawv hais tias, “Tej lus uas kuv hais ntawd ua rau nej nyuaj siab los? Yog hais tias nej pom Neeg Leej Tub rov qab mus nyob saum qhov chaw uas nws ibtxwm nyob los lawm, nej ho yuav xav li cas? Vajtswv tus Ntsujplig ua tau rau neeg muaj sia, tiamsis neeg nqaij tawv ua tsis tau li ntawd. Tej lus uas kuv qhia rau nej ntawd yog ntsujplig thiab yog txojsia. Tiamsis nej cov muaj qee leej tsis ntseeg kuv tej lus.” (Yexus hais li ntawd, rau qhov thaum chivthawj nws twb xub paub lawm hais tias, nws cov thwjtim tus twg yog tus tsis ntseeg thiab tus twg yog tus uas yuav ntxeev siab rau nws.) Thiab Yexus hais ntxiv tias “Twb yog vim li no kuv thiaj hais rau nej tias yeej tsis muaj ib tug los cuag kuv, tsuas yog tus uas Leej Txiv tshoov nws lub siab thiaj los cuag kuv xwb.” Vim li ntawd, cov neeg uas caum Yexus qab muaj coob leej thiaj tso Yexus tseg thiab tsis nrog nws mus lawm. Yog li ntawd, Yexus thiaj nug nws kaum ob tug thwjtim hais tias, “Nej ne, nej yuav tso kuv tseg thiab los?” Ximoos Petus teb Yexus hais tias, “Tus tswv, yog peb tso koj tseg, peb yuav mus cuag leejtwg? Tsuas yog koj tib leeg tej lus xwb, thiaj pub tau txojsia ibtxhis rau neeg. Nimno peb ntseeg thiab paub tseeb hais tias koj yog tus dawbhuv uas Vajtswv txib los.” Yexus teb lawv hais tias, “Puas yog kuv xaiv nej kaum ob leeg no? Tiamsis nej cov ko muaj ib tug yog dab ntxwgnyoog.” Yexus hais li ntawd yog hais txog Ximoos Ixakali-us tus tub Yudas. Txawm yog Yudas yog ib tug ntawm Yexus kaum ob tug thwjtim los nws tseem ntxeev siab rau Yexus. Tom qab ntawd, Yexus mus mus los los hauv lub xeev Kalilais; nws tsis xav mus nram lub xeev Yudas, rau qhov cov Yudais tuavhauv yuav muab nws tua povtseg. Thaum yuav txog lub caij uas cov Yudais ua Kevcai nyob Tsev Pheebsuab, Yexus cov kwv hais rau Yexus hais tias, “Koj cia li mus rau nram lub xeev Yudas kom cov neeg uas caum koj qab thiaj li pom tej uas koj ua. Tsis muaj leejtwg muab tej uas nws ua zais, yog hais tias nws xav kom luag paub tej uas nws ua. Tej txujci tseemceeb uas koj ua no cia li ua qhia kom neeg ntiajteb paub koj.” ( Txawm yog Yexus cov kwv los lawv tseem tsis ntseeg Yexus thiab.) Yexus hais rau lawv hais tias, “Tseem tsis tau txog kuv lub sijhawm, tiamsis nej li lub sijhawm twg los yeej tau. Neeg ntiajteb tsis ntxub nej, tiamsis neeg ntiajteb ntxub kuv, rau qhov kuv pheej qhia lawv tej kev phem kev qias rau lawv. Nej yuav mus ua kevcai, nej mus nej. Kuv tsis mus, rau qhov tsis tau txog kuv lub sijhawm.” Tom qab uas Yexus hais li ntawd rau lawv tas lawm, Yexus tseem nyob hauv lub xeev Kalilais. Thaum Yexus cov kwv ua ntej mus ua kevcai lawm, tom qab ntawd Yexus txawm lawv qab mus thiab; tiamsis nws tsis tabmeeg mus, rau qhov nws tsis xav kom leejtwg paub. Thaum sawvdaws tabtom ua kevcai, cov Yudais tej nomtswv nrhiav Yexus ntawm qhov chaw uas sawvdaws tuaj ua kevcai ntawd. Lawv sib nug hais tias, “Nws nyob qhov twg?” Cov neeg coob coob ntawd sib ntxhi zom zaws hais txog Yexus; muaj ibtxhia hais tias, “Nws yog neeg zoo,” muaj ibtxhia hais tias, “Tsis yog li ntawd, nws yog tus uas ntxias sawvdaws xwb.” Tiamsis tsis muaj leejtwg muaj cuabkav piav Yexus zaj tabmeeg sawvdaws li, rau qhov lawv ntshai cov Yudais tej nomtswv. Thaum sawvdaws ua kevcai txog tog lawm, Yexus txawm mus qhuab qhia hauv lub Tuamtsev. Cov Yudais tej nomtswv xav tsis thoob thiab hais tias, “Ua li cas tus txivneej no yuav paub ua luaj li, nws twb tsis tau kawm ntawv li los sav?” Yexus teb hais tias, “Tej lus uas kuv qhia no tsis yog kuv tej lus, tiamsis yog Vajtswv tus uas txib kuv los tej lus. Yog leejtwg txaus siab ua raws li Vajtswv lub siab nyiam, tus ntawd yuav paub hais tias tej lus uas kuv qhia no yog Vajtswv kom kuv hais lossis yog kuv hais kev xwb. Tus neeg uas xav kom lwm tus qhuas nws, nws lam tau lam hais. Tiamsis tus uas xav ua kom luag qhuas tus uas txib nws los, nws yeej hais lus tseeb xwb, nws tsis hais dag. Puas yog Mauxes qhia Vajtswv txoj Kevcai rau nej? Tiamsis nej tsis muaj ib tug coj raws li txoj Kevcai ntawd li. Ua li cas nej tseem yuav muab kuv tua povtseg thiab?” Sawvdaws teb hais tias, “Koj raug dab vwm lawm! Leejtwg yuav muab koj tua povtseg no?” Yexus teb hais tias, “Kuv ua txujci tseemceeb ib zaug xwb, nej twb xav tsis thoob li. Mauxes kom nej muab nej tej menyuam ua kevcai txiav, thiab nej twb muab ib tug menyuam tub ua kevcai txiav Hnub Xanpataus (Mauxes tsis yog tus qhia kom nej ua kevcai txiav, tiamsis yog nej cov yawgkoob qhia nej ua). Yog nej twb muab ib tug menyuam tub ua kevcai txiav Hnub Xanpataus kom nej tsis txhob ua txhaum Mauxes txoj Kevcai, ua li cas kuv kho ib tug txivneej zoo mob Hnub Xanpataus nej tseem yuav npautaws rau kuv thiab? Tsis txhob txiav txim raws li nej qhovmuag pom xwb, tiamsis yuav tsum txiav txim raws li txojkev ncaj ncees.” Cov neeg uas nyob hauv lub nroog Yeluxalees muaj qee leej hais tias, “Tus txivneej no tsis yog tus uas cov nomtswv nrhiav yuav muab tua povtseg los? Nej saib! Nws tabmeeg qhia sawvdaws, tiamsis tsis muaj leejtwg muaj cuabkav hais dabtsi rau nws li! Ntshai lawv paub hais tias nws yog tus Mexiyas tiag! Thaum tus Mexiyas los, tsis muaj leejtwg paub hais tias nws los qhov twg los, tiamsis peb puavleej paub hais tias tus txivneej no los qhov twg los.” Thaum Yexus tabtom qhia hauv lub Tuamtsev, Yexus hais nrov nrov rau sawvdaws hais tias, “Nej yeej paub hais tias kuv los qhov twg los lawm tiag los? Tsis yog kuv lam los kuv. Tiamsis tus uas txib kuv los, nws yog tus ncaj ncees. Nej tsis paub nws, tiamsis kuv paub nws, rau qhov kuv los ntawm nws los, thiab nws yog tus txib kuv los.” Lawv txawm yuav ntes Yexus, tiamsis tsis muaj leejtwg nqis tes ntes nws li, rau qhov tsis tau txog nws lub sijhawm. Tiamsis cov neeg coob coob ntawd muaj ntau leej ntseeg Yexus, thiab lawv hais tias, “Thaum Tus Mexiyas los, nws tseem yuav ua tau ntau yam txujci tseemceeb dua tus txivneej no ua thiab los?” Thaum cov Falixais hnov cov neeg coob coob ntawd sib cav zom zaws txog Yexus, ces cov Falixais thiab cov thawj ntawm cov povthawj txawm txib ib co tubrog mus ntes Yexus. Yexus hais tias, “Kuv yuav tsis nrog nej nyob ntev lawm; kuv yuav rov mus cuag tus uas txib kuv los. Nej yuav nrhiav kuv, tiamsis nej yuav nrhiav tsis tau kuv, rau qhov qhov chaw uas kuv yuav mus ntawd nej mus tsis tau.” Cov Yudais tej nomtswv sib nug zom zaws hais tias, “Nws yuav mus qhov twg kom peb nrhiav tsis tau nws no? Ntshai nws yuav mus rau pem cov neeg Kilis tej nroog uas peb cov neeg nyob thiab qhia cov neeg Kilis los? Nws hais tias peb yuav nrhiav nws, tiamsis peb yuav nrhiav tsis tau nws, thiab qhov uas nws yuav mus ntawd peb mus tsis tau. Nws hais li ntawd yog nws hais li cas?” Hnub ua kevcai xaus yog hnub tseemceeb kawg nkaus, Yexus sawv ntsug hais nrov nrov rau sawvdaws hais tias, “Tus uas nqhis dej cia li los cuag kuv, kuv yuav muab dej rau nws haus raws li Vajtswv Txojlus hais tias, ‘Yog leejtwg ntseeg kuv, tus dej uas cawm neeg txojsia yuav txhawv hauv tus ntawd lub siab los.’ ” Yexus hais li no yog hais txog Vaj Ntsujplig; yog leejtwg ntseeg Yexus, tus ntawd yuav tau txais. Thaum lub sijhawm ntawd Vajtswv tseem tsis tau txib Vaj Ntsujplig los, rau qhov Vajtswv tseem tsis tau tsa Yexus ua tus muaj tshwjchim ci ntsa iab. Thaum cov neeg coob coob ntawd hnov Yexus hais li ntawd, muaj qee leej hais tias, “Tus txivneej no yog tus cev Vajtswv lus tiag!” Muaj qee leej hais tias, “Nws yog tus Mexiyas ntag!” Tiamsis muaj qee leej hais tias, “Tus Mexiyas yuav tsis tuaj pem Kalilais tuaj ib zaug li. Vajtswv Txojlus hais tias tus Mexiyas yuav yog Daviv ib tug xeebntxwv, thiab nws yuav los yug hauv lub nroog Npelehees uas thaum ub Daviv nyob.” Yog li ntawd, cov pejxeem thiaj tsis sib haum, vim qhov uas lawv sib cav hais txog Yexus ntawd. Muaj qee leej xav ntes Yexus, tiamsis tsis muaj leejtwg kam nqis tes ntes li. Thaum cov tubrog rov los txog, cov thawj ntawm cov povthawj thiab cov Falixais nug lawv hais tias, “Ua li cas nej tsis coj Yexus los?” Cov tubrog teb hais tias, “Yeej tsis muaj ib tug txawj hais li tus txivneej no hais li!” Cov Falixais nug hais tias, “Tsis yog nws ntxias tau nej lawm thiab los? Nej yeej ibtxwm tsis tau hnov hais tias cov nomtswv lossis cov Falixais ib tug ntseeg tus ntawd li los sav? Cov neeg coob coob uas tsis paub Mauxes txoj Kevcai ntawd, Vajtswv twb foom tsis zoo rau lawv lawm.” Cov Falixais ntawd muaj ib tug yog Nikaudemaus, nws yog tus uas twb mus nrog Yexus tham ib zaug lawm. Nws hais rau lawv hais tias, “Raws li peb txoj Kevcai, peb txiav txim tsis tau rau ib tug twg ua ntej uas peb tsis tau hnov nws peev lus thiab taug nws zaj tso.” Lawv teb hais tias, “Tsis yog koj tuaj pem Kalilais tuaj thiab los? Koj cia li nyeem Vajtswv Txojlus koj thiaj yuav paub hais tias yeej tsis muaj ib tug cev Vajtswv lus tuaj pem Kalilais tuaj li.” [ Ces lawv nyias txawm rov mus nyias tsev lawm, tiamsis Yexus nce mus rau pem Roob Txiv Ntoo Roj lawm. Hnub tom qab thaum kaj ntug txoog Yexus rov qab los rau hauv lub Tuamtsev. Muaj neeg coob coob tuaj cuag nws, ces nws zaum thiab qhia lawv. Cov xibhwb uas qhia Vajtswv txoj Kevcai thiab cov Falixais txawm coj ib tug pojniam uas lawv ntes tau thaum nws tabtom deev hluas nraug tuaj cuag Yexus; lawv coj tus pojniam ntawd tuaj sawv tabmeeg sawvdaws. Lawv hais rau Yexus hais tias, “Xibhwb, muaj neeg ntes tau tus pojniam no thaum nws tabtom deev hluas nraug. Mauxes txoj Kevcai qhia rau peb hais tias peb yuav tsum muab pobzeb ntaus tus neeg uas ua txhaum li tus pojniam no kom tuag. Yog li ntawd, saib koj yuav hais li cas?” Lawv hais li no yog lawv nrhiav lus xaub Yexus, kom lawv thiaj liam txim tau rau Yexus. Tiamsis Yexus txawm khoov thiab xuas ntivtes sau hauv av. Thaum uas lawv tseem sawv qhov ntawd thiab nug Yexus, Yexus txawm tsa hau hlo thiab hais rau lawv hais tias, “Nej cov uas nyob ntawm no, yog leejtwg yeej tsis tau ua txhaum li, tus ntawd cia li xub muab pobzeb ntaus tus pojniam no.” Ces Yexus rov khoov thiab xuas ntivtes sau hauv av dua. Thaum lawv hnov Yexus hais li ntawd, lawv txhua tus nyias txawm khiav nyias mus lawm, cov laus xub khiav ua ntej. Tsuas tshuav Yexus thiab tus pojniam uas tseem sawv ntawm Yexus hauv ntej xwb. Yexus tsa qhovmuag ntsia thiab hais rau tus pojniam ntawd hais tias, “Lawv dua twg tas lawm? Tsis muaj leejtwg rau txim rau koj los?” Tus pojniam ntawd teb hais tias, “Tus tswv, tsis muaj leejtwg rau txim rau kuv li.” Yexus hais tias, “Kuv yuav tsis rau txim rau koj thiab. Koj cia li mus tsev thiab tsis txhob ua txhaum ntxiv lawm.”] Yexus rov hais rau cov Falixais hais tias, “Kuv yog qhov kaj rau neeg ntiajteb. Tus uas raws kuv qab yuav tsis taug txojkev uas tsaus ntuj nti, tiamsis nws yuav tau lub neej tshav ntuj nrig.” Cov Falixais hais rau Yexus hais tias, “Tej lus uas koj hais ko yog koj rov ua koj tus timkhawv xwb; koj tej lus ko yeej tsis tseemceeb dabtsi.” Yexus teb hais tias, “Tsis yog li nej hais, txawm yog kuv rov ua kuv tus timkhawv los tej lus uas kuv hais yeej tseeb, rau qhov kuv paub hais tias kuv los qhov twg los thiab kuv yuav mus qhov twg. Tiamsis nej tsis paub xyov kuv los qhov twg los thiab kuv yuav mus qhov twg. Nej txiav txim raws li neeg lub siab xav, tiamsis kuv tsis txiav txim rau leejtwg. Tiamsis yog kuv txiav txim, kuv yeej txiav txim ncaj ncees, rau qhov tsis yog kuv tib leeg xwb; Leej Txiv tus uas txib kuv los, nws yeej nrog kuv txiav txim thiab. Twb muaj lus sau cia rau hauv nej txoj Kevcai lawm hais tias yog muaj ob leeg ua timkhawv lawm, qhov uas nkawd hais ntawd yeej muaj tseeb tiag. Kuv yeej ua tau kuv tus timkhawv, thiab Leej Txiv tus uas txib kuv los, nws ua kuv tus timkhawv thiab.” Lawv nug Yexus hais tias, “Koj txiv nyob qhov twg?” Yexus teb hais tias, “Nej twb tsis paub kuv, nej yuav ua li cas paub kuv Txiv. Yog nej paub kuv, nej yeej yuav paub kuv Txiv thiab.” Yexus hais tej lus no thaum nws qhia hauv lub Tuamtsev, hauv chav uas tso tej phijxab rau nyiaj. Tsis muaj leejtwg ntes Yexus, rau qhov tseem tsis tau txog nws lub sijhawm. Yexus rov hais ntxiv rau lawv hais tias, “Kuv yuav mus; nej yuav nrhiav kuv, tiamsis nej yuav tuag vim nej tej kev txhaum. Qhov uas kuv yuav mus, nej mus tsis tau.” Yog li ntawd, cov Yudais tej nomtswv hais tias, “Nws hais tias qhov uas nws yuav mus ntawd peb mus tsis tau. Tsis yog nws yuav muab nws tua povtseg los?” Yexus teb hais tias, “Nej yog neeg ntiajteb, tiamsis kuv los saum ntuj los. Nej nyob hauv lub ntiajteb no, tiamsis kuv tsis nyob hauv lub ntiajteb no. Twb yog vim li ntawd kuv thiaj qhia rau nej hais tias, nej yuav tuag vim nej tej kev txhaum. Yog nej tsis ntseeg hais tias, ‘Kuv Yog tus uas Kuv Yog,’ nej yuav tuag vim nej tej kev txhaum.” Lawv nug Yexus hais tias, “Koj yog leejtwg?” Yexus teb lawv hais tias, “Kuv yog tus uas kuv twb qhia rau nej thaum ub los lawm. Kuv muaj ntau zaj uas hais txog nej thiab txiav txim rau nej. Tus uas txib kuv los, nws yog tus ncaj ncees. Tej uas kuv qhia rau neeg ntiajteb, kuv tsuas qhia raws li tej uas nws kom kuv qhia xwb.” Lawv tsis totaub hais tias Yexus qhia lawv hais txog Leej Txiv li. Yog li ntawd, Yexus hais rau lawv hais tias, “Thaum twg nej muab Neeg Leej Tub dai lawm, nej thiaj yuav paub hais tias, ‘Kuv Yog tus uas Kuv Yog’; thiab nej yuav paub hais tias kuv tsis ua ib yam dabtsi raws li kuv lub siab, tiamsis kuv tsuas hais tej uas Leej Txiv kom kuv hais xwb. Thiab tus uas txib kuv los yeej nrog kuv nyob; nws tsis tso kuv tseg ib zaug li, rau qhov kuv ua txhua yam raws li nws lub siab nyiam xwb.” Cov neeg uas hnov Yexus tej lus muaj coob leej los ntseeg Yexus. Yog li ntawd, Yexus hais rau cov Yudais uas ntseeg nws hais tias, “Yog nej ua raws li tej lus uas kuv qhia, nej thiaj yog kuv cov thwjtim tiag. Nej yuav paub qhov tseeb, thiab qhov tseeb ntawd yuav tso nej dim.” Lawv teb hais tias, “Peb sawvdaws puavleej yog Anplahas cov xeebntxwv, thiab peb yeej tsis tau ua leejtwg qhev li. Lo lus uas koj hais tias, ‘Nej yuav dim’, yog koj hais li cas?” Yexus hais rau lawv hais tias, “Kuv qhia tseeb rau nej hais tias txhua tus uas ua txhaum puavleej ua txojkev txhaum qhev. Tus uas ua luag qhev yeej tsis nrog ib tsevneeg nyob mus tas simneej, tsuas yog tus tub thiaj yuav nyob xwb. Yog Leej Tub tso nej dim, ces nej thiaj yuav dim tiag tiag li. Kuv paub hais tias nej yog Anplahas cov xeebntxwv. Tiamsis nej pheej nrhiav kuv tua povtseg, rau qhov nej tsis ntseeg tej lus uas kuv qhia. Kuv hais raws li tej lus uas kuv Txiv qhia rau kuv, tiamsis nej ua raws li tej lus uas nej txiv qhia rau nej.” Lawv teb Yexus hais tias, “Peb txiv yog Anplahas.” Yexus hais rau lawv hais tias, “Yog nej yog Anplahas cov menyuam tiag, nej yeej yuav ua nej lub neej ib yam li Anplahas lub. Kuv tsuas qhia rau nej raws li qhov tseeb uas Vajtswv kom kuv qhia xwb, tiamsis nej pheej nrhiav kuv tua povtseg. Anplahas tsis ua li nej ua. Nej ua ib yam li nej txiv tau ua lawm.” Lawv teb hais tias, “Peb tsis yog menyuam tsaub, peb muaj tib leeg txiv xwb; peb txiv yog Vajtswv.” Yexus hais rau lawv hais tias, “Yog Vajtswv yog nej txiv tiag, nej yeej yuav hlub kuv, rau qhov Vajtswv yog tus uas txib kuv los thiab nimno kuv twb nrog nej nyob ntawm no. Tsis yog kuv los kuv xwb tiamsis yog Vajtswv txib kuv los. Ua li cas nej tsis totaub tej lus uas kuv hais no? Nej tsis totaub rau qhov nej tsis xav mloog tej lus uas kuv qhia. Dab Ntxwgnyoog yog nej txiv, thiab nej yeej nyiam ua raws li nej txiv lub siab. Txij thaum chivkeeb los dab Ntxwgnyoog yeej yog tus tua neeg thiab nws tsis ua raws li qhov tseeb, rau qhov nws tsis nyiam qhov tseeb. Tej lus uas nws hais nws hais dag xwb, rau qhov nws yeej yog tus niag dag thiab nws yog txhua tus uas dag leej txiv. Twb yog vim kuv qhia qhov tseeb, nej thiaj tsis ntseeg kuv tej lus. Nej cov leejtwg pom hais tias kuv ua txhaum? Tej lus uas kuv hais, kuv yeej hais tseeb xwb, ua li cas nej tsis ntseeg kuv? Tus uas los ntawm Vajtswv los yeej mloog Vajtswv lus. Nej tsis yog los ntawm Vajtswv los, nej thiaj tsis mloog Vajtswv lus.” Cov Yudais nug Yexus hais tias, “Lo lus uas peb hais tias koj yog neeg Xamalis thiab raug dab ntawd, peb hais tsis yog los?” Yexus teb lawv hais tias “Kuv tsis raug dab. Kuv yeej hwm kuv Txiv, tiamsis nej tsis hwm kuv. Kuv tsis tau kom leejtwg hwm kuv. Tiamsis muaj ib tug kom neeg hwm kuv, thiab tus ntawd yog tus uas yuav txiav txim. Kuv qhia tseeb rau nej hais tias tus uas ua raws li kuv tej lus qhia, tus ntawd yuav tsis tuag li.” Cov Yudais hais rau Yexus hais tias, “Nimno peb paub hais tias koj raug dab lawm, Anplahas los twb tuag thiab cov cev Vajtswv lus los twb tuag tas huv tibsi lawm, tiamsis koj ho hais tias tus uas coj raws li koj tej lus qhia tus ntawd yuav tsis tuag li. Koj hais tias koj muaj hwjchim loj dua peb txiv Anplahas uas twb tuag lawm thiab los? Cov cev Vajtswv lus twb tuag tas huv tibsi lawm. Koj tseem khav hais tias koj yog leejtwg?” Yexus teb hais tias, “Yog kuv rov qhuas kuv xwb, kuv tej lus yeej tsis muaj qabhau dabtsi li. Kuv Txiv yog tus uas qhuas kuv; nws yog tus uas nej hu hais tias yog nej tus Vajtswv. Nej yeej tsis paub nws, tiamsis kuv paub nws. Yog kuv hais tias kuv tsis paub nws, kuv yog tus uas hais dag ib yam li nej. Tiamsis kuv yeej paub nws, thiab kuv ua raws li nws tej lus. Nej txiv Anplahas zoo siab hais tias nws yuav pom hnub uas kuv los; nimno nws twb pom lawm, nws zoo siab kawg li.” Lawv hais rau Yexus hais tias, “Koj hnubnyoog twb tsis tau muaj tsib caug xyoo, ua li cas koj hais tias koj pom Anplahas?” Yexus teb lawv hais tias, “Kuv qhia tseeb rau nej hais tias, ‘Kuv xub nyob ua ntej Anplahas yug lawm.’ ” Lawv txawm khaws pobzeb yuav ntaus Yexus, tiamsis Yexus khiav nkaum thiab tawm hauv lub Tuamtsev mus lawm. Thaum Yexus tabtom taug kev mus, Yexus pom ib tug txivneej uas digmuag thaum nruab thiab los lawm. Yexus cov thwjtim nug Yexus hais tias, “Xibhwb, leejtwg ua txhaum thiaj ua rau tus txivneej no digmuag thaum nruab thiab los lawm? Yog nws ua txhaum lossis nws niam nws txiv ua txhaum?” Yexus teb hais tias, “Qhov uas nws digmuag li no tsis yog vim nws tej kev txhaum lossis vim nws niam nws txiv tej kev txhaum. Nws digmuag kom sawvdaws pom Vajtswv lub hwjchim xwb. Thaum uas tseem yog nruab hnub, peb yuav tsum ua tus uas txib kuv los tej haujlwm; thaum tsaus ntuj lawm yuav tsis muaj neeg pom kev ua haujlwm. Thaum kuv tseem nyob hauv ntiajteb no, kuv yog qhov kaj rau neeg ntiajteb pom kev.” Thaum Yexus hais li no tas, Yexus txawm nto qaubncaug rau hauv av; nws muab do xyaw hmoov av; Yexus muab cov av nkos ntawd pleev tus txivneej ntawd ob lub qhovmuag, thiab Yexus hais rau tus txivneej ntawd hais tias, “Koj cia li mus ntxuav muag ntawm lub pasdej Xilau-as.” (Lub npe no txhais hais tias, “Txib mus.”) Tus txivneej digmuag ntawd thiaj mus ntxuav muag thiab rov qab los, ces nws txawm pom kev lawm. Tej neeg zejzog thiab cov neeg uas pheej pom tus txivneej ntawd thov khawv txawm sib nug hais tias, “Tus txivneej no tsis yog tus uas niaj hnub zaum thov khawv los?” Muaj qee leej hais tias, “Nws yog tus ntawd ntag,” tiamsis muaj qee leej hais tias, “Nws zoo li tus ntawd xwb, tiamsis nws tsis yog tus ntawd.” Tus txivneej ntawd hais tias, “Kuv yog tus ntawd ntag.” Lawv nug nws hais tias, “Ua li cas koj ho pom kev lawm?” Nws teb hais tias, “Tus txivneej uas npe hu ua Yexus ua ib co av nkos los pleev kuv ob lub qhovmuag thiab hais kom kuv mus ntxuav muag ntawm lub pasdej Xilau-as. Yog li ntawd, kuv thiaj mus, thiab thaum kuv ntxuav muag tas, ces kuv qhovmuag txawm pom kev lawm.” Lawv nug hais tias, “Nws nyob qhov twg?” Tus txivneej ntawd teb hais tias, “Kuv tsis paub.” Lawv coj tus txivneej digmuag uas twb pom kev lawm mus cuag cov Falixais. Hnub uas Yexus ua av nkos pleev tus digmuag ntawd ob lub qhovmuag yog Hnub Xanpataus. Cov Falixais rov nug tus txivneej ntawd hais tias, “Ua li cas koj pom kev lawm?” Nws qhia rau lawv hais tias, “Tus ntawd muab mentsis av nkos pleev kuv ob lub qhovmuag, kuv mus ntxuav muag tas, ces kuv txawm pom kev lawm.” Cov Falixais muaj qee leej hais tias, “Tus txivneej uas ua li no yeej tsis yog tus uas Vajtswv txib los, rau qhov nws tsis hwm Hnub Xanpataus.” Tiamsis muaj qee leej hais tias, “Tus neeg txhaum yuav ua li cas ua tau tej txujci tseemceeb no?” Ces lawv txawm tsis sib haum lawm. Yog li ntawd, cov Falixais rov nug tus txivneej ntawd dua hais tias, “Koj hais tias yog tus ntawd kho koj ob lub qhovmuag pom kev, koj sim piav saib nws yog leejtwg?” Tus txivneej ntawd teb hais tias, “Nws yog ib tug cev Vajtswv lus.” Cov Yudais tej nomtswv tsis ntseeg hais tias tus txivneej ntawd yog tus digmuag uas twb pom kev lawm mus txog thaum uas lawv mus hu nws niam nws txiv tuaj, thiab lawv nug nkawd hais tias, “Tus no puas yog neb tus tub uas neb hais tias nws ibtxwm digmuag thaum nruab thiab los? Ua li cas nimno nws ho pom kev lawm?” Nws niam nws txiv teb hais tias, “Wb paub hais tias nws yog wb tus tub thiab paub hais tias nws ibtxwm digmuag thaum nruab thiab los tiag. Tiamsis wb tsis paub xyov ua cas nimno nws ho pom kev lawm, thiab wb tsis paub hais tias xyov leejtwg kho nws ob lub qhovmuag. Nws twb tiav hluas lawm, nej cia li nug nws xwb; nws mam li qhia rau nej.” Nws niam nws txiv hais li no, vim nkawd ntshai cov Yudais tej nomtswv, rau qhov cov Yudais tej nomtswv tau sablaj hais tias yog leejtwg lees hais tias Yexus yog tus Mexiyas, lawv yuav muab tus ntawd ntiab tawm hauv lub tsev sablaj mus. Twb yog vim li no nws niam nws txiv thiaj hais tias, “Nws twb tiav hluas lawm; nej cia li nug nws xwb!” Lawv txawm rov hu tus txivneej uas ibtxwm digmuag thaum nruab thiab ntawd los cuag lawv dua zaum ob; lawv hais rau nws hais tias, “Koj cia li coglus tabmeeg Vajtswv hais tias, koj yuav qhia qhov tseeb rau peb. Peb paub hais tias tus txivneej ntawd yog ib tug neeg txhaum.” Tus txivneej ntawd teb hais tias, “Kuv tsis paub hais tias tus ntawd yog ib tug neeg txhaum lossis tsis yog. Kuv tsuas paub hais tias kuv ibtxwm digmuag, tiamsis nimno kuv pom kev lawm xwb.” Lawv nug hais tias, “Nws ua li cas rau koj? Nws kho koj ob lub qhovmuag li cas, koj thiaj pom kev?” Tus txivneej ntawd teb hais tias, “Kuv twb qhia tas rau nej lawm, tiamsis nej tsis mloog kuv tej lus li. Ua li cas nej tseem xav rov qab hnov dua thiab? Puas yog nej xav ua nws thwjtim thiab?” Lawv txawm cem nws hais tias, “Koj thiaj yog tus ntawd tus thwjtim, tiamsis peb yog Mauxes cov thwjtim. Peb paub hais tias Vajtswv nrog Mauxes tham xwb; tus neeg ntawd xyov nws tuaj qhov twg tuaj peb tsis paub.” Tus txivneej ntawd teb lawv hais tias, “Kuv xav tsis thoob li! Xyov ua li cas nej tsis paub hais tias nws tuaj qhov twg tuaj, tiamsis nws ho kho tau kuv ob lub qhovmuag pom kev lawm! Peb paub hais tias Vajtswv yeej tsis mloog cov neeg txhaum tej lus; nws tsuas mloog cov neeg uas hwm nws thiab ua raws li nws tej lus xwb. Txij thaum chivkeeb uas muaj lub ntiajteb no los, tsis tau muaj leejtwg hnov hais tias muaj ib tug neeg twg kho tau tus neeg uas digmuag thaum nruab thiab los kom pom kev li. Yog tus ntawd tsis yog tus uas Vajtswv txib los, nws yeej ua tsis tau li no li.” Lawv teb hais tias, “Koj yog neeg txhaum thaum nruab thiab los lawm, koj tseem yuav ntuas peb thiab los?” Ces lawv txawm muab nws ntiab tawm hauv tsev sablaj mus lawm. Thaum Yexus hnov hais tias lawv muab tus txivneej ntawd ntiab tawm hauv tsev sablaj mus lawm, Yexus txawm mus nug nws hais tias, “Koj puas ntseeg Neeg Leej Tub?” Tus txivneej ntawd teb hais tias, “Xibhwb, thov koj qhia kuv saib Neeg Leej Tub yog leejtwg? Kuv thiaj paub ntseeg nws.” Yexus hais rau nws hais tias, “Koj twb pom Neeg Leej Tub lawm, nws yog tus uas tabtom nrog koj tham no ntag.” Tus txivneej ntawd hais tias, “Tus Tswv, kuv ntseeg lawm.” Nws txawm txhos caug ntua pehawm Yexus. Yexus hais tias, “Kuv los hauv lub ntiajteb no yog los txiav txim, kom tus digmuag pom kev thiab kom cov neeg uas pom kev digmuag.” Cov Falixais uas nyob ntawd muaj qee leej hnov Yexus hais li no, lawv txawm nug Yexus hais tias, “Tsis yog koj hais tias peb puavleej digmuag huv tibsi no los?” Yexus teb hais tias, “Yog nej digmuag, ces nej tsis yog neeg txhaum ib zaug li, tiamsis nej khav hais tias nej pom kev, yog li ntawd nej thiaj tseem yog neeg txhaum.” Yexus hais tias, “Kuv qhia tseeb rau nej hais tias tus uas mus hauv lub nkuaj yaj, yog nws tsis mus ntawm lub rooj nkuag mus nws cia li nce lwm qhov mus xwb, tus ntawd yog tubsab. Tus uas mus ntawm rooj nkuag mus, tus ntawd thiaj yog tus tswv yug yaj. Tus uas zov qhovrooj yuav qhib rooj nkuag rau nws, thaum nws cuab nws pab yaj tej npe, pab yaj paub nws lub suab thiab nws coj nws pab yaj tawm mus. Thaum nws coj nws pab yaj tawm mus lawm, nws mus ua pab yaj ntej thiab pab yaj raws nws qab, rau qhov pab yaj paub nws lub suab. Pab yaj yuav tsis raws lwm tus qab, tiamsis pab yaj yuav khiav ntawm tus ntawd mus, rau qhov pab yaj tsis paub tus ntawd lub suab.” Yexus hais zaj lus pivtxwv no rau lawv, tiamsis lawv tsis totaub xyov yog Yexus hais dabtsi. Yexus rov hais rau lawv hais tias, “Kuv qhia tseeb rau nej hais tias kuv yog lub rooj nkuag yaj. Txhua tus uas los ua kuv ntej puavleej yog tubsab xwb, tiamsis pab yaj tsis mloog lawv tej lus. Kuv yog lub rooj nkuag. Tus uas mus ntawm kuv mus, tus ntawd yuav dim; nws yuav mus mus los los thiab nrhiav tau zaub noj. Thaum tubsab tuaj tsuas yog tuaj nyiag, tuaj tua thiab ua kom puastsuaj xwb. Tiamsis kuv los, yog los ua kom nej tau txojsia thiab tau lub neej puv npo. “Kuv yog tus tswv yug yaj uas zoo. Tus tswv yug yaj uas zoo txaus siab tuag theej paj yaj. Tus uas luag ntiav zov pab yaj tsis yog tus tswv, thiab pab yaj tsis yog nws li. Thaum nws pom hma tuaj, nws yuav khiav tso pab yaj tseg; hma yuav tom pab yaj thiab pab yaj yuav khiav tas. Tus ntawd khiav, rau qhov luag ntiav nws zov pab yaj xwb, nws thiaj tsis mob siab pab yaj. Kuv muaj dua ib pab yaj uas tsis nyob hauv lub nkuaj no. Kuv yuav tsum mus coj lawv los rau hauv lub nkuaj no; lawv yuav mloog kuv lub suab, thiab lawv yuav los ua ib pab koom ib tug tswv xwb.” “Leej Txiv hlub kuv rau qhov kuv txaus siab tso kuv txojsia tseg; kuv ua li ntawd kuv thiaj tau kuv txojsia ntawd rov qab los. Tsis muaj leejtwg yuav txeeb tau kuv txojsia. Kuv txaus siab tso kuv txojsia tseg. Kuv muaj cai tso kuv txojsia tseg, thiab kuv muaj cai muab kuv txojsia rov qab los. Kuv Txiv kom kuv los ua li no.” Vim tej lus uas Yexus hais no thiaj ua rau cov Yudais rov tsis sib haum dua. Muaj ntau leej hais tias, “Nws raug dab! Nws vwm lawm! Ua li cas nej tseem yuav mloog nws tej lus ua dabtsi?” Tiamsis muaj qee leej hais tias, “Tus neeg uas raug dab yeej tsis txawj hais li tus no hais! Dab yeej kho tsis tau tus neeg uas digmuag kom pom kev li.” Thaum lub caij ntuj no uas ua kevcai nco txog hnub uas kho lub Tuamtsev hauv lub nroog Yeluxalees. Yexus ncig mus ncig los hauv Xalumoos lub qabkhav ntawm lub Tuamtsev; cov Yudais txawm sib sau tuaj cuag Yexus thiab nug nws hais tias, “Koj tseem yuav cia peb tos txog thaum twg thiab? Yog hais tias koj yog tus Mexiyas, koj cia li qhia qhov tseeb rau peb.” Yexus teb hais tias, “Kuv twb qhia rau nej lawm, tiamsis nej tsis ntseeg kuv tej lus. Tej haujlwm uas kuv Txiv kom kuv ua twb qhia kuv rau nej paub lawm; tiamsis nej tsis ntseeg, rau qhov nej tsis yog kuv pab yaj. Kuv pab yaj paub kuv lub suab; kuv paub kuv pab yaj thiab pab yaj raws kuv qab. Kuv muab txojsia ntev dhawv mus ibtxhis rau lawv; lawv yuav tsis tuag ib zaug li, thiab tsis muaj leejtwg yuav txeeb tau lawv hauv kuv txhais tes mus li. Tej uas kuv Txiv muab pub rau kuv tseemceeb dua txhua yam huv tibsi, thiab tsis muaj leejtwg tuaj txeeb tau tej uas Leej Txiv saib xyuas. Leej Txiv thiab kuv yog tib tug.” Ces cov Yudais txawm khaws pobzeb yuav rov ntaus Yexus dua. Yexus hais rau lawv hais tias, “Kuv Txiv kom kuv ua ntau yam haujlwm zoo rau nej pom; tej ntawd yam twg ua rau nej ntsawv siab, nej thiaj yuav muab pobzeb ntaus kuv?” Lawv teb hais tias, “Qhov uas peb yuav muab pobzeb ntaus koj tsis yog vim tej haujlwm zoo uas koj ua, tiamsis vim qhov uas koj hais lus saib tsis taus Vajtswv. Koj tsuas yog neeg xwb, tiamsis koj khav hais tias koj yog Vajtswv.” Yexus teb hais tias, “Twb muaj lus sau tseg rau hauv nej txoj Kevcai lawm, Vajtswv hais tias, ‘Nej yog tej vajtswv.’ Yog Vajtswv txojlus twb hais tias lawv yog ‘tej vajtswv;’ yog li ntawd, yeej tsis muaj leejtwg yuav rhuav tau Vajtswv Txojlus li. Kuv twb yog tus uas Leej Txiv xaiv thiab txib kuv los rau hauv ntiajteb. Ua li cas nej hais tias kuv hais lus saib tsis tau Vajtswv, rau qhov kuv hais tias kuv yog Vajtswv Leej Tub? Yog kuv tsis ua tej haujlwm uas kuv Txiv kom kuv ua, ces nej tsis txhob ntseeg kuv tej lus. Tiamsis kuv twb ua tej haujlwm ntawd lawm, txawm yog nej tsis ntseeg kuv los nej yuav tsum ntseeg tej haujlwm uas kuv ua ntawd; nej yuav paub hais tias Leej Txiv thiab kuv koom ib txojsia.” Ces lawv yuav rov ntes Yexus dua, tiamsis Yexus khiav lawm. Ces Yexus txawm hla tus dej Yauladees mus rau ntawm qhov chaw uas Yauhas muab neeg ua kevcai raus dej thiab Yexus mus nyob tid. Muaj neeg coob coob tuaj cuag Yexus, lawv hais tias, “Yauhas twb tsis tau ua ib yam txujci tseemceeb li, tiamsis txhua yam uas Yauhas hais txog tus txivneej no puavleej muaj tseeb.” Cov neeg uas tuaj ntawd muaj ntau leej ntseeg Yexus. Muaj ib tug txivneej hu ua Laxalus nyob hauv lub zos Npethanis, nws mob heev. Npethanis yog lub zos uas Malis thiab nws tus niamlaus Mathas nyob. ( Tus Malis no yog tus uas muab tshuaj tsw qab hliv rau Yexus kotaw thiab nws muab nws cov plaubhau so; tus Laxalus uas mob heev ntawd yog Malis tus nus.) Laxalus ob tug muam txib neeg mus hais rau Yexus hais tias, “Tus Tswv, koj tus phoojywg uas koj hlub mob heev.” Thaum Yexus hnov li ntawd, nws hais tias, “Laxalus tus mob no yuav tsis ua rau Laxalus tuag, tiamsis Laxalus tus mob yuav ua rau Vajtswv tau koob meej thiab yuav ua rau Vajtswv tus Tub tau koob meej.” Yexus hlub Mathas thiab Mathas tus niamhluas thiab Laxalus heev. Thaum uas Yexus hnov hais tias Laxalus mob heev ntawd, nws tseem nyob ntawm qhov chaw ntawd tau ob hnub ntxiv. Ces Yexus hais rau nws cov thwjtim hais tias, “Peb cia li rov qab mus rau nram lub xeev Yudas.” Cov thwjtim teb hais tias, “Xibhwb, nyuam qhuav tsis ntev no cov neeg uas nyob nrad twb yuav muab pobzeb ntaus koj; koj tseem yuav rov qab mus nrad dua thiab los?” Yexus hais tias, “Ib hnub muaj kaum ob txoos teev puas yog? Yog li ntawd tus uas taug kev nruab hnub yuav tsis dawm rau qhov nws pom qhov kaj uas ci rau lub ntiajteb. Tiamsis yog nws taug kev hmo ntuj nws yuav dawm, rau qhov nws tsis muaj qhov kaj.” Tom qab uas Yexus hais li no tas lawm, nws rov hais tias, “Peb tus phoojywg Laxalus twb tsaug zog lawm, tiamsis kuv yuav mus tsa nws sawv.” Cov thwjtim teb hais tias, “Tus Tswv, yog nws tsaug taus zog lawm, nws tus mob yeej yuav zoo.” Yexus hais li ntawd yog hais tias Laxalus twb tuag lawm, tiamsis cov thwjtim xav hais tias Yexus hais txog qhov uas Laxalus tsaug zog xwb. Yog li ntawd, Yexus txawm qhia tseeb rau lawv hais tias, “Laxalus twb tuag lawm, tiamsis kuv zoo siab uas muaj nej, kuv thiaj tsis nrog nws nyob ntawd, kuv ua li no kom nej ntseeg kuv. Peb cia li mus xyuas nws.” Thaumas (tus uas hu ua Ntxaib) thiaj hais rau cov phoojywg thwjtim hais tias, “Peb cia li nrog Xibhwb mus, peb thiaj yuav tau nrog nws tuag ua ke.” Thaum Yexus mus txog hauv Npethanis, Yexus hnov hais tias lawv twb muab Laxalus faus tau plaub hnub lawm. Lub zos Npethanis nyob nrug deb ntawm lub nroog Yeluxalees mus kwvlam li peb kilumev kev. Cov Yudais muaj coob leej tuaj nplig Mathas thiab Malis nkawd siab, rau qhov nkawd tus nus tuag lawm. Thaum Mathas hnov hais tias Yexus tabtom taug kev tuaj, Mathas txawm mus tos Yexus, tiamsis Malis nyob hauv tsev. Mathas hais rau Yexus hais tias, “Tus Tswv, yog koj nrog peb nyob ntawm no, kuv tus nus yuav tsis tuag! Tiamsis kuv paub hais tias txawm yog nimno koj thov Vajtswv ib yam dabtsi, Vajtswv yeej yuav muab yam ntawd rau koj.” Yexus hais rau Mathas hais tias, “Koj tus nus yeej yuav sawv rov qab los.” Mathas teb hais tias, “Kuv paub hais tias thaum txog hnub kawg nws yeej yuav sawv rov qab los tiag.” Yexus hais rau Mathas hais tias, “Kuv yog txojkev sawv hauv qhov tuag rov qab los thiab yog txojsia. Tus uas ntseeg kuv, txawm yog nws tuag lawm los nws yeej yuav muaj txojsia; tus uas muaj sia nyob thiab ntseeg kuv, tus ntawd yuav tsis tuag ib zaug li. Koj puas ntseeg kuv tej lus no?” Mathas teb hais tias, “Yog tiag, tus Tswv! Kuv ntseeg hais tias koj yog tus Mexiyas uas yog Vajtswv tus Tub uas los rau hauv ntiajteb no.” Tom qab uas Mathas hais li no tas, Mathas txawm rov los thiab hais twjywm rau nws tus niamhluas Malis hais tias, “Xibhwb tuaj lawm, nws nug nug koj.” Thaum Malis hnov dheev li ntawd, Malis txawm sawv tsees thiab tawm ceev nrooj mus cuag Yexus. ( Yexus tuaj tsis tau txog hauv zos, tiamsis nws tseem nyob ntawm qhov chaw uas Mathas mus tos nws.) Cov Yudais uas tuaj nplig Malis hauv Malis tsev pom Malis sawv tsees tawm ceev nrooj mus lawm, lawv txawm raws nws qab mus. Lawv xav hais tias nws yuav mus quaj tom lub ntxa. Thaum Malis mus txog ntawm qhov chaw uas Yexus nyob, nws pom dheev Yexus, nws txawm txhos cuag ntua rau ntawm Yexus kotaw. Nws hais tias, “Tus Tswv, yog koj nrog peb nyob ntawm no, kuv tus nus yuav tsis tuag.” Thaum Yexus pom Malis thiab cov Yudais uas nrog Malis tuaj ntawd quaj quaj; Yexus hlub lawv thiab nyuaj siab kawg li. Yexus thiaj nug lawv hais tias, “Nej coj Laxalus mus faus rau qhov twg lawm?” Lawv teb hais tias, “Tus Tswv, koj cia li mus saib.” Yexus txawm quaj. Yog li ntawd cov Yudais hais tias, “Nej saib, Yexus hlub Laxalus kawg li.” Tiamsis lawv cov ntawd muaj qee leej hais tias, “Nws twb kho tau tus txivneej uas digmuag kom pom kev, nws ua tsis tau kom Laxalus tsis txhob tuag los?” Yexus rov nyuaj siab kawg li, Yexus mus rau tom lub qhov ntxa uas luag txaug rau ntawm ib phab pobzeb thiab muaj ib daim txiag zeb npog lub rooj ntxas. Yexus hais tias, “Nej cia li muab daim txiag zeb tshem tawm.” Mathas uas yog tus tuag ntawd tus muam teb hais tias, “Tus Tswv, peb twb muab nws faus tau plaub hnub lawm, ntshai nws twb tsw tsw lwj lawm.” Yexus hais rau Mathas hais tias, “Kuv puas tau hais rau koj tias yog koj ntseeg koj yeej yuav pom Vajtswv lub hwjchim xwb no?” Yog li ntawd, lawv thiaj muab daim txiag zeb tshem tawm. Yexus txawm tsa qhovmuag saib saum ntuj thiab hais tias, “Txiv, kuv ua koj tsaug uas koj mloog kuv tej lus thov. Kuv paub hais tias koj yeej ibtxwm mloog kuv tej lus thov, kuv hais li no kom cov neeg uas nyob ntawm no ntseeg hais tias koj yog tus uas txib kuv los.” Thaum Yexus hais li ntawd tas, nws txawm hu nrov nrov hais tias, “Laxalus, koj cia li tawm los!” Laxalus txawm tawm los, tej ntaub tseem qhwv nws tes taw thiab muaj ib daim ntaub npog nws lub ntsejmuag. Yexus hais rau lawv hais tias, “Nej cia li daws tej ntaub uas qhwv nws ntawd thiab cia nws mus.” Thaum cov Yudais uas tuaj xyuas Malis pom tej uas Yexus ua ntawd, muaj ntau leej ntseeg Yexus. Tiamsis muaj qee leej rov mus cuag cov Falixais thiab qhia tej uas Yexus ua ntawd rau lawv. Cov Falixais thiab cov thawj ntawm cov povthawj mus sablaj rau cov nomtswv hais tias, “Peb yuav ua li cas rau tus txivneej uas ua ntau yam txujci tseemceeb no? Yog peb cia nws ua li no, nyob tsam cov pejxeem yuav ntseeg nws tas, thiab cov nomtswv Loos yuav tuaj muab lub Tuamtsev rhuav povtseg thiab muab peb haivneeg ua kom puastsuaj tas.” Lawv cov ntawd muaj ib tug hu ua Kaiyafas. Xyoo ntawd nws ua tus Povthawj Hlob, nws hais tias, “Ua li cas nej yuav ruam ua luaj! Nej tsis paub hais tias cia ib tug tuag theej sawvdaws zoo dua li uas cia tagnrho peb haivneeg raug kev puastsuaj huv tibsi no los?” Qhov tseeb, tej lus uas nws hais ntawd tsis yog nws lam hais; nws hais li ntawd, rau qhov xyoo ntawd nws ua tus Povthawj Hlob, yog nws qhia ua ntej hais tias Yexus yuav tuag theej cov Yudais lub txhoj, thiab tsis yog rau lawv xwb, tiamsis nws yuav coj tagnrho Vajtswv cov menyuam uas khiav mus nyob txhua qhov lawm rov los nyob ua ke dua. Txij hnub ntawd los cov Yudais tej nomtswv txawm tuavhauv yuav muab Yexus tua povtseg. Yog li ntawd, Yexus thiaj tsis tabmeeg mus mus los los hauv lub xeev Yudas lawm, tiamsis nws mus rau tom ib lub nroog hu ua Efalayees uas nyob ze tiaj suabpuam; nws nrog nws cov thwjtim nyob ntawd. Thaum ntawd twb yuav txog lub caij uas cov Yudais ua Kevcai Hla Dhau, muaj neeg coob coob tuaj pem tej yajsab tuaj rau hauv lub nroog Yeluxalees; lawv yuav xub tuaj ua kevcai ntxuav ua ntej tso mam li ua Kevcai Hla Dhau. Thaum lawv tuaj ua ke rau hauv lub Tuamtsev, lawv xam saib puas pom Yexus; lawv sib nug hais tias, “Nej xav li cas? Nws puas tuaj ua kevcai ntawm no los tsis tuaj?” Cov thawj ntawm cov povthawj thiab cov Falixais twb hais rau sawvdaws lawm hais tias yog leejtwg paub hais tias Yexus nyob qhov twg cia li mus qhia rau lawv, lawv yuav mus ntes Yexus. Tshuav rau hnub mam txog lub caij ua Kevcai Hla Dhau, Yexus txawm mus rau hauv lub zos Npethanis, Laxalus tus uas Yexus tsa sawv hauv qhov tuag rov qab los nyob hauv lub zos ntawd. Lawv ua ib pluag hmo rau Yexus noj; Mathas ua tus txhab zaub mov, Laxalus yog ib tug ntawm cov neeg uas nrog Yexus zaum ua ke ntawm rooj mov thiab. Ces Malis txawm muab tau ib hwj roj tsw qab kim heev uas yog muab roj naludas ua los hliv rau Yexus ob txhais taw thiab muab nws cov plaubhau so. Cov roj ntawd tsw thoob plaws hauv tsev. Thaum Yexus cov thwjtim tus uas hu ua Yudas Ixakali-us, tus uas yuav ntxeev siab rau Yexus, pom li ntawd nws txawm hais tias, “Ua li cas tsis muab hwj roj tsw qab no coj mus muag peb puas lub nyiaj, thiab muab cov nyiaj ntawd coj mus pub rau cov neeg pluag?” Yudas hais li ntawd tsis yog vim nws hlub cov neeg pluag, tiamsis vim nws yog tubsab. Nws yog tus ceev lub hnab nyiaj thiab nws pheej qee coj mus siv. Tiamsis Yexus hais tias, “Cia nws ua nws! Nws npaj tej no tseg rau hnub uas faus kuv. Yuav muaj cov neeg pluag nrog nej nyob mus li, tiamsis kuv yuav tsis nrog nej nyob mus li.” Cov Yudais muaj ntau leej hnov hais tias Yexus tuaj nyob hauv lub zos Npethanis; yog li ntawd, lawv txawm tuaj rau hauv thiab. Tsis yog lawv xav pom Yexus xwb, tiamsis lawv xav pom Laxalus tus uas Yexus tsa sawv hauv qhov tuag rov qab los thiab. Vim li ntawd cov thawj ntawm cov povthawj thiaj tuavhauv yuav muab Laxalus tua povtseg, vim hais tias qhov uas Yexus tsa Laxalus sawv ntawd ua rau cov Yudais coob leej ntseeg Yexus thiab tso cov povthawj tseg lawm. Hnub tom qab cov neeg coob coob uas tuaj ua Kevcai Hla Dhau hnov hais tias Yexus tabtom tuaj rau hauv lub nroog Yeluxalees. Yog li ntawd, lawv txawm mus txiav tej nplooj toovlaj nqa mus tos Yexus, thiab lawv hais nrov nrov hais tias, “Cia li qhuas Vajtswv! Thov Vajtswv foom koob hmoov rau tus uas Vajtswv txib los! Thov Vajtswv foom koob hmoov rau cov Yixalayees tus Vajntxwv!” Yexus pom ib tug neesluav thiab nws caij tus neesluav ntawd tuaj, raws li Vajtswv txojlus tau sau tseg lawm hais tias, “Lub nroog Xi-oos, koj tsis txhob ntshai. Koj saib, koj tus Vajntxwv tabtom caij ib tug menyuam neesluav los cuag koj.” Thaum ntawd Yexus cov thwjtim tsis totaub li, tiamsis thaum Vajtswv tsa Yexus sawv hauv qhov tuag rov qab los tau koob meej lawm, cov thwjtim nco dheev txog Vajtswv txojlus uas hais txog Yexus thiab tej uas neeg tau ua rau nws lawm. Cov neeg uas nrog Yexus ua ke thaum Yexus tsa Laxalus sawv hauv qhov tuag thiab hu Laxalus tawm hauv qhov ntxa los, lawv twb mus piav tej ntawd rau sawvdaws mloog lawm. Yog li ntawd, thiaj muaj neeg coob coob tuaj tos Yexus, rau qhov lawv hnov hais tias Yexus ua tau tej txujci tseemceeb. Ces cov Falixais txawm sib tham zom zaws hais tias, “Nej saib, peb ua tsis tau dabtsi li lawm! Nej saib, tas teb tas chaw puavleej caum nws lawm.” Thaum lub sijhawm ntawd cov neeg uas tuaj ua kevcai hauv lub nroog Yeluxalees muaj qee leej yog cov neeg Kilis. Lawv mus cuag Filis tus uas nyob hauv lub zos Npexaidas pem lub xeev Kalilais tuaj thiab hais tias, “Tus tswv, peb xav ntsib Yexus.” Filis mus hais rau Adales, ces nkawd txawm mus hais rau Yexus. Yexus teb hais tias, “Nimno twb txog lub sijhawm uas Neeg Leej Tub yuav tau txais koob meej lawm. Kuv qhia tseeb rau nej hais tias yog tsis muab lub noob nplej faus rau hauv av kom lwj, ces lub noob ntawd nws yuav nyob nws tib lub xwb. Yog lub noob nplej ntawd lwj thiaj yuav tuaj kaus thiab txi tau ntau lub. Tus uas khuvxim nws txojsia, tus ntawd yuav tsis tau txojsia; tus uas tsis khuvxim nws txojsia hauv lub ntiajteb no, tus ntawd yuav tau txojsia ibtxhis. Tus uas xav ua kuv tus tubtxib, tus ntawd yuav tsum nrog kuv mus, thiab kuv nyob qhov twg kuv tus tubtxib yuav nrog kuv nyob qhov ntawd. Kuv Txiv yuav qhuas tus uas ua kuv tus tubtxib. “Nimno kuv nyuaj siab kawg li, kuv yuav hais li cas thiaj zoo? Kuv yuav hais tias, ‘Txiv, thov tsis txhob cia lub sijhawm no los raug kuv.’ Tiamsis tsis txhob ua li ntawd, qhov uas kuv los twb yog los kom raug txojkev txomnyem uas yuav los ntawd ntag. Txiv, thov kom koj lub npe tau koob meej!” Ces muaj ib lub suab hais saum ntuj tuaj hais tias, “Kuv twb ua rau kuv lub npe tau koob meej lawm, thiab kuv yuav rov ua dua.” Cov neeg coob coob uas sawv ntawd hnov lub suab ntawd, muaj qee leej hais tias yog xob nroo, muaj qee leej hais tias, “Timtswv ceebtsheej nrog nws tham!” Tiamsis Yexus hais tias, “Lub suab ntawd tsis yog hais rau kuv, tiamsis yog hais rau nej. Nimno twb txog lub sijhawm uas txiav txim rau neeg ntiajteb lawm; nimno luag twb yuav muab tus uas kav lub ntiajteb no ntiab tawm mus. Thaum luag muab kuv dai, kuv yuav coj txhua haivneeg los cuag kuv.” ( Yexus hais li ntawd, twb yog nws qhia hais tias nws yuav tuag txomnyem li cas.) Cov neeg coob coob ntawd teb hais tias, “Peb txoj Kevcai qhia rau peb hais tias tus Mexiyas yuav nrog peb nyob mus ibtxhis li. Ua li cas koj ho hais tias luag yuav muab Neeg Leej Tub dai? Neeg Leej Tub yog leejtwg?” Yexus teb hais tias, “Qhov kaj tseem yuav nrog nej nyob ib nyuag ntu ntxiv. Thaum uas tseem pom kev, nej cia li rau siab ntso ua nej lub neej, nyob tsam tsaus nej ntuj; rau qhov tus uas maub hmo ntuj, nws yeej tsis paub hais tias nws tabtom mus qhov twg. Yog li ntawd, thaum tseem muaj qhov kaj, nej cia li ntseeg qhov kaj kom nej thiaj tau ua cov neeg uas nyob qhov kaj.” Tom qab uas Yexus hais li ntawd tas, Yexus txawm khiav mus nkaum kom lawv tsis pom nws. Txawm yog Yexus ua ntau yam txujci tseemceeb rau lawv pom los lawv tsis ntseeg nws li, tej no thiaj muaj tiav raws li Yaxayas uas yog tus cev Vajtswv lus tau hais tseg lawm hais tias, “Tus Tswv, leejtwg thiaj yuav ntseeg tej lus uas peb qhia? Tus Tswv ua nws hwjchim rau leejtwg pom?” Twb yog vim li ntawd lawv thiaj tsis ntseeg, rau qhov Yaxayas hais ntxiv hais tias, “Vajtswv ua rau lawv digmuag thiab ua rau lawv lub siab ruam kom lawv qhovmuag tsis pom kev thiab lawv lub siab tsis totaub; Vajtswv hais tias ua li ntawd lawv thiaj tsis txhob los cuag kuv kom kuv kho lawv.” Yaxayas hais li ntawd, rau qhov nws twb pom Yexus lub tshwjchim thiab nws twb hais txog Yexus zaj ntag. Txawm yog li ntawd los cov Yudais tej nomtswv kuj muaj ntau leej ntseeg Yexus; tiamsis vim lawv ntshai cov Falixais, lawv thiaj tsis qhia rau sawvdaws paub, kom lawv tsis raug ntiab tawm hauv lub tsev sablaj mus. Lawv nyiam kom neeg qhuas lawv heev dua li nyiam kom Vajtswv qhuas lawv. Yexus hais nrov nrov rau sawvdaws hais tias, “Tus uas ntseeg kuv tsis yog nws ntseeg kuv tib leeg xwb, tiamsis yog nws ntseeg tus uas txib kuv los thiab. Tus uas pom kuv, tus ntawd pom tus uas txib kuv los thiab. Kuv los ua qhov kaj rau neeg ntiajteb pom kev; txhua tus uas ntseeg kuv yuav tsis nyob hauv qhov tsaus ntuj lawm. Tus uas hnov kuv tej lus thiab tsis ua raws li kuv tej lus, kuv yuav tsis txiav txim rau tus ntawd. Kuv tsis yog los txiav txim rau neeg ntiajteb, tiamsis yog kuv los cawm neeg ntiajteb kom lawv dim lawv lub txim. Muaj ib tug yuav txiav txim rau tus uas tsis lees paub kuv thiab tsis mloog kuv tej lus qhia. Thaum txog hnub kawg, tej lus uas kuv qhia lawm yuav txiav txim rau tus ntawd. Rau qhov tej lus uas kuv hais ntawd tsis yog kuv hais raws li kuv lub siab, tiamsis Leej Txiv uas txib kuv los kom kuv hais thiab kuv qhia. Kuv paub hais tias nws tej lus samhwm yog txojsia mus ibtxhis. Tej lus uas kuv hais puavleej yog Leej Txiv qhia rau kuv hais.” Thaum yuav txog hnub ua Kevcai Hla Dhau, Yexus paub hais tias twb txog lub sijhawm uas nws yuav tawm hauv lub ntiajteb no rov mus cuag Leej Txiv lawm. Yexus yeej ibtxwm hlub nws cov neeg uas nyob hauv ntiajteb no, thiab nws yuav hlub lawv mus txog hnub kawg li. Thaum Yexus thiab nws cov thwjtim tabtom noj hmo, dab Ntxwgnyoog twb xub tshoov Ximoos Ixakali-us tus tub Yudas lub siab lawm kom nws ntxeev siab rau Yexus. Yexus paub hais tias Leej Txiv twb muab ib puas tsav yam tso rau nws kav huv tibsi lawm; nws paub hais tias Vajtswv txib nws los thiab nws yuav rov mus cuag Vajtswv. Yog li ntawd, Yexus txawm sawv ntawm rooj mov mus hle nws lub tsho ntev, thiab muab ib txoj phuam los sia ntawm duav. Ces nws muab dej hliv rau hauv lub phiab thiab nqa los ntxuav cov thwjtim kotaw thiab muab txoj phuam uas nws sia ntawm duav so lawv kotaw. Thaum Yexus ntxuav los txog ntawm Ximoos Petus, Ximoos Petus txawm hais rau Yexus hais tias, “Tus Tswv, koj yuav ntxuav kuv kotaw thiab los?” Yexus teb hais tias, “Tamsim no koj tseem tsis tau totaub qhov uas kuv ua no, tiamsis lwm hnub koj yuav totaub.” Petus hais tias, “Kuv yeej tsis pub koj ntxuav kuv kotaw ib zaug li!” Yexus teb hais tias, “Yog kuv tsis ntxuav koj kotaw, koj yuav tsis tau ua kuv tus thwjtim lawm.” Ximoos Petus teb hais tias, “Tus Tswv, yog li ntwd, thov tsis txhob ntxuav kuv kotaw xwb, tiamsis ntxuav kuv tes thiab taubhau huv tibsi.” Yexus hais tias, “Tus uas da dej nws lub cev yeej huv lawm, tsis tas yuav rov ntxuav dua, tsuas ntxuav nws kotaw lawm xwb. Nej txhua tus puavleej huv lawm, tsuas yog tshuav ib tug xwb thiaj tsis huv.” ( Yexus paub hais tias tus twg yog tus uas yuav ntxeev siab rau nws; yog li ntawd nws thiaj hais tias, “Nej txhua tus puavleej huv lawm, tsuas yog tshuav ib tug xwb thiaj tsis huv.”) Tom qab uas Yexus ntxuav lawv kotaw tas lawm, nws rov muab nws lub tsho ntev los hnav thiab rov los zaum nws lub chaw ntawm rooj mov. Yexus nug cov thwjtim hais tias, “Qhov uas kuv ua rau nej no, nej puas totaub? Nej hu kuv ua Xibhwb thiab tus Tswv, nej hu li ntawd yog lawm rau qhov kuv yeej yog tiag. Kuv yog nej tus Tswv thiab yog nej tus Xibhwb, kuv twb ntxuav nej kotaw lawm; yog li ntawd, nej ib leeg yuav tsum ntxuav ib leeg kotaw. Kuv ua qauv li no qhia rau nej kom nej xyaum ua raws li kuv ua rau nej lawm. Kuv qhia tseeb rau nej hais tias tus qhev yeej tsis muaj hwjchim loj dua nws tus tswv, thiab tus tubtxib yeej tsis muaj hwjchim loj dua tus uas txib nws mus. Thaum nej paub zaj no lawm, yog nej ua raws li ntawd nej yuav tau kev kaj siab! “Kuv tsis yog hais txog nej txhua tus; kuv yeej paub cov uas kuv xaiv cia lawm. Tiamsis yuav tsum muaj raws li Vajtswv txojlus uas hais tias, ‘Tus uas nrog kuv koom noj ib taig mov yuav ntxeev siab rau kuv.’ Kuv xub qhia rau nej ua ntej uas muaj tej no kom thaum muaj tej no tshwm tuaj, nej thiaj yuav ntseeg hais tias, ‘Kuv Yog Tus uas Kuv Yog.’ Kuv qhia tseeb rau nej hais tias tus uas lees yuav tus uas kuv txib los, tus ntawd lees yuav kuv; thiab tus uas lees yuav kuv, tus ntawd yeej lees yuav tus uas txib kuv los.” Tom qab uas Yexus hais li ntawd tas nws nyuaj siab heev, thiab nws hais tias, “Kuv qhia tseeb rau nej hais tias nej cov ko muaj ib tug yuav ntxeev siab rau kuv.” Cov thwjtim ib leeg txawm ntsia ib leeg, lawv tsis paub hais tias tus uas Yexus hais ntawd yog leejtwg. Yexus cov thwjtim tus uas Yexus hlub heev, nws zaum npuab Yexus. Ximoos Petus txawm ua laj muag rau tus thwjtim ntawd thiab hais tias, “Koj nug Yexus saib tus uas nws hais ntawd yog leejtwg?” Ces tus thwjtim ntawd tig mus nug Yexus hais tias, “Tus Tswv, tus ntawd yog leejtwg?” Yexus teb hais tias, “Kuv muab ncuav ntsw cev rau leejtwg noj, ces yog tus ntawd ntag.” Yog li ntawd, Yexus txawm muab ncuav ntsw cev rau Ximoos Ixakali-us tus tub Yudas noj. Thaum Yudas txhais nkaus qhov ncuav ntawd, dab Ntxwgnyoog txawm nkag rau hauv Yudas. Yexus hais rau Yudas hais tias, “Koj yuav ua dabtsi, koj cia li ua tsawg tsuag!” Cov thwjtim uas zaum ntawm rooj mov tsis muaj ib tug totaub hais tias, vim li cas Yexus hais li ntawd rau Yudas. Yudas yog tus ceev lub hnab nyiaj, cov thwjtim qee leej thiaj xav hais tias Yexus txib Yudas mus muas tej yam los rau lawv siv ua kevcai, lossis Yexus kom Yudas muab mentsis nyiaj mus pub rau cov neeg pluag. Yudas txais nkaus qhov ncuav ntawd noj, tamsim ntawd Yudas txawm tawm plaws mus lawm. Thaum ntawd twb tsaus ntuj lawm. Tom qab uas Yudas tawm mus lawm, Yexus hais tias, “Nimno twb txog lub sijhawm uas Neeg Leej Tub tau koob meej lawm; nimno nws yuav ua rau Vajtswv tau koob meej. Yog Neeg Leej Tub ua rau Vajtswv tau koob meej lawm, Vajtswv yuav ua rau Neeg Leej Tub tau koob meej ib yam nkaus thiab; Vajtswv yuav ua li ntawd tamsim no ntag. Kuv cov menyuam, kuv yuav nrog nej nyob tsis ntev lawm. Nej yuav nrhiav kuv, tiamsis nimno kuv qhia rau nej ib yam li kuv twb qhia rau cov Yudais tej nomtswv lawm hais tias, ‘Qhov chaw uas kuv yuav mus ntawd nej mus tsis tau.’ Nimno kuv yuav muab ib txoj kevcai tshiab rau nej: Nej ib leeg yuav tsum hlub ib leeg ib yam li kuv hlub nej. Nej ib leeg yuav tsum hlub ib leeg. Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim.” Ximoos Petus nug Yexus hais tias, “Tus Tswv, koj yuav mus qhov twg?” Yexus teb hais tias, “Qhov chaw uas kuv yuav mus ntawd, nimno koj nrog kuv mus tsis tau, tiamsis lwm hnub koj mam li lawv kuv qab los.” Petus nug hais tias, “Tus Tswv, ua li cas kuv nrog koj mus tsis tau? Kuv yeej txaus siab tuag theej koj!” Yexus teb hais tias, “Koj yeej txaus siab tuag theej kuv tiag los? Kuv qhia tseeb rau koj hais tias, thaum qaib tsis tau qua koj yuav hais peb zaug hais tias koj tsis paub kuv.” Yexus hais rau nws cov thwjtim hais tias, “Nej tsis txhob txhawj thiab tsis txhob nyuaj siab, nej cia li ntseeg Vajtswv thiab ntseeg kuv. Hauv kuv Txiv lub tsev muaj ntau chav, thiab kuv tabtom yuav mus tu chaw rau nej. Yog tsis muaj li ntawd, kuv yeej yuav tsis qhia li no rau nej. Thaum uas kuv tu tau chaw rau nej lawm, kuv yuav rov qab los thiab tos nej mus nrog kuv nyob; kuv nyob qhov twg nej yeej yuav nrog kuv nyob qhov ntawd. Qhov chaw uas kuv yuav mus nej twb paub kev mus lawm.” Thaumas hais rau Yexus hais tias, “Tus Tswv, peb tsis paub xyov koj yuav mus qhov twg; yog li ntawd, peb yuav ua li cas paub kev mus?” Yexus teb Thaumas hais tias, “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau.” Yexus hais rau lawv hais tias, “Nimno nej twb paub kuv lawm, nej yeej yuav paub kuv Txiv thiab txij no mus nej yuav paub nws thiab pom nws.” Filis hais rau Yexus hais tias, “Tus Tswv, thov koj qhia Leej Txiv rau peb pom kom peb txaus siab.” Yexus teb hais tias, “Filis, kuv twb nrog nej nyob ntev los lawm, ua li cas koj tseem tsis tau paub kuv thiab? Tus uas pom kuv, tus ntawd twb pom Leej Txiv lawm. Ua li cas koj tseem yuav hais tias, ‘Thov koj qhia Leej Txiv rau peb pom thiab’? Filis, koj tsis ntseeg hais tias kuv nyob hauv Leej Txiv thiab Leej Txiv nyob hauv kuv los?” Yexus hais rau nws cov thwjtim hais tias, “Tej lus uas kuv qhia rau nej no tsis yog kuv tej lus. Tiamsis yog Leej Txiv tus uas nyob hauv kuv, ua nws tes haujlwm xwb.” Nej cia li ntseeg tej lus uas kuv hais tias, kuv nyob hauv Leej Txiv thiab Leej Txiv nyob hauv kuv. Txawm yog nej tsis ntseeg li kuv hais los nej yuav tsum ntseeg tej haujlwm uas kuv ua. Kuv qhia tseeb rau nej hais tias tus uas ntseeg kuv yuav ua tej haujlwm uas kuv ua; tsis yog li ntawd xwb, nws tseem yuav ua tau ntau dua tej uas kuv ua, rau qhov kuv mus cuag Leej Txiv lawm. Thiab yog nej tuav kuv lub npe thov ib yam dabtsi kuv yuav pub yam ntawd rau nej, tej uas Leej Tub ua ntawd yuav ua rau Leej Txiv tau ntsejmuag. Yog nej tuav kuv lub npe thov kom kuv ua ib yam dabtsi, kuv yuav ua yam ntawd rau nej. “Yog nej hlub kuv, nej yeej yuav ua raws li kuv tej lus samhwm. Kuv yuav thov Leej Txiv, thiab nws yuav txib dua ib tug Pab los, tus ntawd yuav nrog nej nyob mus ibtxhis. Nws yog Vaj Ntsujplig, nws yuav qhia Vajtswv zaj uas yog qhov tseeb rau nej. Neeg ntiajteb tsis lees yuav nws, rau qhov lawv tsis pom nws lossis tsis paub nws. Tiamsis nej paub nws, rau qhov nws nrog nej nyob thiab nws yuav nyob hauv nej lub siab. “Kuv yuav tsis tso nej ua ntsuag ib zaug li; kuv yuav rov qab los cuag nej. Tshuav tsis ntev neeg ntiajteb yuav tsis pom kuv lawm, tiamsis nej yuav pom kuv; nej yuav muaj txojsia nyob, rau qhov kuv muaj txojsia nyob. Thaum txog hnub ntawd nej yuav paub hais tias kuv nyob hauv Leej Txiv thiab nej nyob hauv kuv ib yam li kuv nyob hauv nej. “Tus uas lees yuav kuv tej lus qhia thiab ua raws li tej lus ntawd, tus ntawd yog tus uas hlub kuv. Tus uas hlub kuv, kuv Txiv yuav hlub tus ntawd; kuv yuav hlub tus ntawd thiab qhia kuv rau nws paub.” Yudas (tus uas tsis yog Yudas Ixakali-us) hais tias, “Tus Tswv, ua li cas koj yuav qhia koj rau peb paub xwb, koj ho tsis qhia koj rau neeg ntiajteb paub?” Yexus teb Yudas hais tias, “Tus uas hlub kuv yeej ua raws li kuv tej lus qhia. Kuv Txiv yuav hlub tus ntawd; kuv Txiv thiab kuv yuav los cuag nws thiab nrog nws nyob. Tus uas tsis hlub kuv yeej tsis ua raws li kuv tej lus qhia. Thiab tej lus uas nej hnov kuv qhia ntawd tsis yog kuv tej lus tiamsis yog Leej Txiv tus uas txib kuv los tej lus. “Nimno kuv tseem nrog nej nyob, kuv thiaj qhia tej no rau nej. Tus Pab uas yog Vaj Ntsujplig tus Dawbhuv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm. “Kuv muab kuv txojkev kaj siab tso rau nej; txojkev kaj siab uas kuv muab pub rau nej, kuv tsis muab rau nej li neeg ntiajteb muab. Nej tsis txhob txhawj, tsis txhob nyuaj siab thiab tsis txhob ntshai. Nej twb hnov kuv hais rau nej hais tias, ‘Kuv yuav mus, tiamsis kuv yuav rov qab los cuag nej.’ Yog nej hlub kuv, nej yeej yuav zoo siab qhov uas kuv mus cuag Leej Txiv; rau qhov nws muaj hwjchim loj dua kuv. Nimno kuv qhia tej no rau nej, thaum muaj lawm nej thiaj yuav ntseeg kuv. Kuv yuav tsis tau nrog nej tham ntev lawm, rau qhov tus uas kav lub ntiajteb tabtom los lawm. Nws tsis muaj hwjchim kav kuv, tiamsis kuv ua ib puas tsav yam raws li Leej Txiv kom kuv ua, neeg ntiajteb thiaj paub hais tias kuv hlub Leej Txiv. “Cia li sawv peb mus. “Kuv yog tsob tseem txiv hmab, thiab kuv Txiv yog tus uas tu. Nws muab txhua ceg hmab uas tsis txi txiv ntshua tawm ntawm kuv mus povtseg. Txhua ceg hmab uas txi txiv nws muab tav kom hajyam txi txiv ncw. Tej lus uas kuv qhia nej, twb yog ntxuav kom nej huv ntag. Nej cia li txuas rau ntawm kuv thiab kuv yuav txuas rau ntawm nej. Tus ceg hmab uas tsis txuas rau ntawm txoj hmab yeej txi tsis taus txiv. Ib yam li ntawd, yog nej tsis txuas rau ntawm kuv, nej yeej txi tsis taus txiv. “Kuv yog tsob hmab, nej yog cov ceg. Tus uas txuas rau ntawm kuv, thiab kuv txuas rau ntawm nws, tus ntawd yuav txi txiv ncw; yog nej tsis txuas rau ntawm kuv, nej yeej ua tsis tau ib yam dabtsi li. Tus uas tsis txuas rau ntawm kuv, tus ntawd zoo ib yam li tus ceg hmab uas luag muab txiav povtseg; thaum qhuav lawm, luag yuav muab sua mus pov hlawv kom kub hnyiab tas huv tibsi. Yog nej txuas rau ntawm kuv thiab nej khaws kuv tej lus cia rau nruab siab lawm, nej xav yuav yam twg, nej cia li thov nej yuav tau yam ntawd. Yog nej txi txiv ncw, kuv Txiv yuav tau ntsejmuag, thiab yog nej ua li ntawd, nej yuav tau ua kuv cov thwjtim. Kuv hlub nej ib yam li kuv Txiv hlub kuv; nej yuav tsum muaj lub siab hlub ib yam li kuv. Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws. “Kuv hais tej no rau nej kom nej zoo siab ib yam li kuv zoo siab, thiab nej yuav zoo siab kawg nkaus li. Kuv lo lus samhwm yog li no: Nej ib leeg yuav tsum hlub ib leeg, ib yam li kuv hlub nej. Tus uas muaj kev hlub loj tshaj plaws yog tus uas zoo siab tuag theej nws cov phoojywg. Yog nej ua raws li kuv hais, nej thiaj yog kuv cov phoojywg. Nimno kuv tsis hu nej ua tubtxib lawm, rau qhov tus tubtxib tsis paub xyov nws tus tswv ua dabtsi. Tiamsis kuv hu nej ua phoojywg, rau qhov kuv twb qhia txhua yam uas kuv Txiv qhia rau kuv rau nej lawm. Tsis yog nej xaiv kuv, tiamsis yog kuv xaiv nej thiab tsa nej kom mus txi cov txiv uas nyob mus ibtxhis. Yog nej tuav kuv lub npe thov yam twg, Leej Txiv yuav pub yam ntawd rau nej. Tej lus uas kuv samhwm rau nej yog li no: Nej ib leeg yuav tsum hlub ib leeg. “Yog neeg ntiajteb ntxub nej, nej yuav tsum nco ntsoov hais tias, lawv twb xub ntxub kuv ua ntej lawm. Yog nej nyiam uas raws li neeg ntiajteb ua, ces neeg ntiajteb yuav hlub nej. Tiamsis nej tsis nyiam ua raws li neeg ntiajteb ua, rau qhov kuv twb xaiv nej tawm hauv lub ntiajteb no lawm; yog li ntawd, neeg ntiajteb thiaj li ntxub nej. Nej yuav tsum nco ntsoov tej lus uas kuv qhia rau nej hais tias, ‘Tus tubqhe yeej tsis muaj hwjchim loj dua nws tus tswv.’ Yog lawv tsimtxom kuv, lawv yuav tsimtxom nej thiab; yog lawv ua raws li kuv tej lus qhia, lawv yuav ua raws li nej tej lus qhia thiab. Lawv yuav ua tej no rau nej, vim nej yog kuv li, rau qhov lawv tsis paub tus uas txib kuv los. Yog kuv tsis tau los qhia lawv, lawv yeej yuav tsis muaj txim, tiamsis nimno lawv hais tsis tau hais tias lawv tsis muaj txim. Tus uas ntxub kuv, tus ntawd yeej ntxub kuv Txiv thiab. Yog kuv tsis tau los ua tej haujlwm uas tsis tau muaj neeg ua dua rau lawv pom ces lawv yeej tsis muaj txim, tiamsis lawv twb pom tej uas kuv ua lawm lawv thiaj ntxub kuv thiab kuv txiv. Yeej yuav muaj li no thiaj raws li tej lus uas sau tseg rau hauv lawv txoj kevcai hais tias, ‘Kuv twb tsis tau ua txhaum los lawv cia li ntxub kuv.’ “Tus Pab yog Vaj Ntsujplig, nws los qhia Vajtswv zaj uas yog qhov tseeb thiab yog Leej Txiv txib nws los. Kuv yuav kom Leej Txiv txib nws los, thiab nws yuav qhia kuv zaj rau nej. Thiab nej yuav qhia kuv zaj, rau qhov nej yeej nrog kuv nyob thaum chivthawj los lawm. “Kuv qhia tej no rau nej kom nej thiaj tsis tso kev ntseeg tseg. Lawv yuav ntiab nej tawm hauv tej tsev sablaj mus, thiab twb yuav txog lub sijhawm uas lawv coj nej mus tua povtseg; qhov uas lawv ua li ntawd lawv xav hais tias yog lawv ua Vajtswv tes haujlwm. Lawv yuav ua li no rau nej, rau qhov lawv tsis paub Leej Txiv thiab tsis paub kuv. Kuv xub hais li no qhia nej kom thaum txog lub sijhawm uas lawv tsimtxom nej, nej thiaj li yuav nco txog tej lus uas kuv twb qhia rau nej lawm. “Thaum chivthawj kuv tsis tau qhia tej no rau nej rau qhov kuv tseem nrog nej nyob. Tiamsis nimno kuv yuav mus cuag tus uas txib kuv los, txawm li ntawd los nej twb tsis muaj ib tug nug hais tias kuv yuav mus qhov twg. Nimno kuv qhia tej no rau nej, nej yuav nyuaj siab kawg li. Tiamsis kuv qhia tseeb rau nej hais tias qhov uas kuv ncaim nej mus yuav zoo dua; yog kuv tsis mus, tus Pab yuav tsis los cuag nej. Tiamsis yog kuv mus lawm, kuv yuav txib nws los nrog nej nyob. Thaum nws los lawm, nws yuav qhia rau neeg ntiajteb kom paub txog kev txhaum, kev ncaj ncees thiab Vajtswv txojkev txiav txim: qhov uas lawv muaj kev txhaum, vim lawv tsis ntseeg kuv; qhov uas muaj kev ncaj ncees, vim kuv yuav mus cuag Leej Txiv, thiab nej yuav tsis pom kuv lawm; qhov uas muaj kev txiav txim, vim tus uas kav lub ntiajteb twb raug txiav txim lawm. “Tseem tshuav ntau zaj uas kuv xav qhia rau nej, tiamsis ntshai nej yuav ris tsis taus. Thaum Vaj Ntsujplig tus uas qhia qhov tseeb los lawm, nws yuav qhia qhov tseeb rau nej; nws yuav tsis hais raws li nws xav, tiamsis nws tsuas hais tej uas nws tau hnov, thiab nws yuav qhia tej uas yuav muaj los yav tom ntej rau nej. Nws yuav ua rau kuv tau ntsejmuag, rau qhov nws yuav muab kuv tej lus coj los qhia rau nej. Tej uas Leej Txiv muaj puavleej yog kuv tug thiab. Twb yog vim li no, Vaj Ntsujplig thiaj coj tej uas kuv qhia rau nws lawm los qhia rau nej. “Tsis ntev no nej yuav tsis pom kuv lawm, thiab tom qab ntawd tsis ntev nej yuav rov pom kuv.” Ces Yexus cov thwjtim qee leej sib tham hais tias, “Nws hais rau peb hais tias, ‘Tsis ntev no nej yuav tsis pom kuv lawm, thiab tom qab ntawd tsis ntev nej yuav rov pom kuv,’ nws hais li ntawd, yog nws hais li cas? Thiab nws hais tias, ‘Rau qhov kuv yuav mus cuag Leej Txiv.’ Qhov uas nws hais tias, ‘tsis ntev no,’ yog hais li cas? Peb tsis paub xyov yog nws hais dabtsi.” Yexus paub tej uas lawv xav nug nws; yog li ntawd, Yexus thiaj hais rau lawv hais tias, “Puas yog nej sib nug txog qhov uas kuv hais tias, ‘Tsis ntev no nej yuav tsis pom kuv lawm, thiab tom qab ntawd tsis ntev nej yuav rov pom kuv’? Kuv qhia tseeb rau nej hais tias nej yuav quaj thiab ntxhov siab, tiamsis neeg ntiajteb yuav zoo siab kawg li; nej yuav nyuaj siab, tiamsis nej tej kev nyuaj siab ntawd yuav hloov ua kev zoo siab. Tus pojniam uas muaj menyuam hauv plab, thaum yuav txog caij yug nws txhawj kawg li. Tiamsis thaum nws yug tau tus menyuam, nws tsis nco qab qhov uas nws mob plab lawm; nws zoo siab heev rau qhov nws yug tau ib tug menyuam los rau hauv ntiajteb no. Nimno nej muaj kev nyuaj siab ib yam li ntawd, tiamsis kuv yuav rov los cuag nej dua, mas nej yuav zoo siab kawg li. Txojkev zoo siab ntawd tsis muaj leejtwg txeeb tau ntawm nej mus li. “Thaum txog hnub ntawd nej yuav tsis nug kuv ib los li lawm. Kuv qhia tseeb rau nej hais tias yog nej tuav kuv lub npe thov ib yam dabtsi ntawm Leej Txiv, nws yeej yuav pub yam ntawd rau nej. Nej ibtxwm tsis tuav kuv lub npe thov ib yam dabtsi los txog nimno. Nej cia li thov nej thiaj yuav tau; thaum nej tau lawm, nej yuav zoo siab kawg li. “Tej uas kuv hais rau nej no kuv ua lus pivtxwv hais xwb. Tiamsis thaum txog lub sijhawm ntawd kuv yuav tsis ua lus pivtxwv hais rau nej lawm, kuv yuav qhia Leej Txiv zaj tseeb tseeb rau nej. Thaum txog hnub ntawd nej yuav tuav kuv lub npe thov Leej Txiv; kuv tsis tau hais tias kuv yuav pab nej thov Leej Txiv, Leej Txiv yeej hlub nej, rau qhov nej hlub kuv thiab ntseeg hais tias kuv yog tus uas Vajtswv txib los. Yeej yog Leej Txiv txib kuv los hauv ntiajteb no, nimno kuv tabtom yuav tawm hauv lub ntiajteb no rov mus cuag Leej Txiv.” Ces Yexus cov thwjtim hais rau Yexus hais tias, “Zaum no koj qhia tseeb rau peb tiag, koj tsis ua lus pivtxwv qhia rau peb lawm. Nimno peb paub hais tias koj paub ib puas tsav yam huv tibsi, tsis tas ib tug twg yuav nug koj lawm; tej no ua rau peb paub hais tias koj yog tus uas Vajtswv txib los tiag.” Yexus teb lawv hais tias, “Nimno nej ntseeg lawm tiag los? Twb yuav txog lub sijhawm, nimno twb txog lub sijhawm ntawd lawm, nej nyias yuav khiav nyias mus tsev, thiab nej yuav tso kuv tseg. Txawm li ntawd los tsis yog kuv tib leeg nyob xwb, tiamsis Leej Txiv nrog kuv nyob thiab. Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm.” Tom qab uas Yexus hais li ntawd tas, nws tsa qhovmuag ntsia saum ntuj thiab hais tias, “Txiv, twb txog lub sijhawm lawm; thov koj ua kom Leej Tub tau koob meej, Leej Tub thiaj yuav ua rau koj tau koob meej, rau qhov koj tsa Leej Tub ua tus uas muaj hwjchim loj dua txhua tus neeg, kom Leej Tub thiaj pub tau txojsia ntev dhawv mus ibtxhis rau txhua tus uas koj muab rau nws lawm. Txojsia ntev dhawv mus ibtxhis ntawd yog qhov uas lawv paub koj thiab paub hais tias koj tib leeg thiaj yog Vajtswv thiab paub Yexus Khetos tus uas koj txib los. Kuv ua rau koj tau koob meej hauv ntiajteb no; tes haujlwm uas koj kom kuv ua, kuv twb ua tiav lawm. Txiv, nimno kuv nyob ntawm koj lub xubntiag; thov koj ua rau kuv tau koob meej ib yam li thaum uas tseem tsis tau tsim lub ntiajteb no wb ibtxwm tau koob meej. “Kuv twb qhia koj rau cov neeg uas koj muab pub rau kuv hauv ntiajteb no txhua tus paub lawm. Lawv yog koj tug, thiab koj muab lawv pub rau kuv, thiab lawv ua raws li koj tej lus. Nimno lawv paub hais tias ib puas tsav yam uas koj muab rau kuv puavleej yog koj tug; rau qhov tej lus uas koj hais rau kuv, kuv twb qhia huv tibsi rau lawv lawm; lawv khaws tej lus ntawd cia; lawv paub tseeb thiab ntseeg hais tias yog koj txib kuv los hauv ntiajteb no. “Kuv thov koj pab lawv; kuv tsis tau thov koj pab neeg ntiajteb, tiamsis kuv thov koj pab cov neeg uas koj twb muab rau kuv lawm, rau qhov lawv yog koj tug. Ib puas tsav yam uas kuv muaj puavleej yog koj tug, thiab ib puas tsav yam uas koj muaj puavleej yog kuv tug; thiab ib puas tsav yam ntawd ua rau kuv tau koob meej. Nimno kuv yuav rov qab los cuag koj, kuv yuav tsis nyob hauv lub ntiajteb no ntxiv lawm, tiamsis lawv tseem nyob hauv lub ntiajteb no. Leej Txiv tus uas Dawbhuv! Thov koj tsomkwm lawv ntawm koj lub npe uas muaj hwjchim, kom lawv thiaj yuav koom ib lub siab ib yam li koj thiab kuv koom ib lub siab. Thaum uas kuv tseem nrog lawv nyob, kuv tsomkwm lawv ntawm koj lub npe uas muaj hwjchim. Kuv tsomkwm lawv, lawv tsis muaj ib tug ploj li, tsuas yog tus uas yeej yuav puastsuaj thiaj puastsuaj xwb; yeej yuav muaj li ntawd kom tiav raws li tej lus uas twb sau tseg lawm. Nimno kuv tabtom yuav rov qab los cuag koj, thaum kuv tseem nyob hauv ntiajteb, kuv hais tej lus no kom lawv zoo siab ib yam li kuv zoo siab. Kuv twb qhia koj tej lus rau lawv lawm, ntiajteb thiaj ntxub lawv, rau qhov lawv tsis yog ntiajteb li ib yam li kuv tsis yog ntiajteb li. Kuv tsis tau thov kom koj coj lawv tawm hauv lub ntiajteb no mus, tiamsis kuv thov koj tsomkwm lawv kom lawv tsis txhob raug dab Ntxwgnyoog dag ntxias. Lawv tsis yog ntiajteb li ib yam li kuv tsis yog ntiajteb li. Koj txojlus yog lus tseeb; thov muab koj txojlus tseeb ntxuav kom lawv huv. Koj txib kuv los rau hauv lub ntiajteb no li cas, kuv txib lawv mus hauv lub ntiajteb ib yam li ntawd. Vim lawv, kuv thiaj muab kuv fij rau koj; kuv ua li ntawd kom lawv thiaj muab lawv fij rau koj. “Tsis yog kuv thov koj pab cov neeg no xwb, tiamsis kuv thov koj pab cov neeg uas hnov tej lus uas lawv qhia thiab los ntseeg kuv kom lawv koom ib lub siab. Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab, ntiajteb thiaj paub hais tias koj txib kuv los. Kuv ua rau lawv tau koob meej ib yam li koj ua rau kuv tau koob meej; kuv ua li ntawd kom lawv koom tau ib lub siab ib yam li wb koom tau ib lub siab. Kuv nyob hauv lawv thiab koj nyob hauv kuv, kuv ua li ntawd kom lawv thiaj koom tau ib lub siab, ntiajteb thiaj paub hais tias koj txib kuv los thiab paub hais tias koj hlub lawv ib yam li koj hlub kuv. “Txiv, kuv nyob qhov twg, kuv xav kom cov neeg uas koj muab pub rau kuv lawm, nrog kuv nyob qhov ntawd, lawv thiaj yuav pom lub hwjchim uas koj pub rau kuv, rau qhov koj yeej hlub kuv thaum tsis tau tsim lub ntiajteb los lawm. Txiv, koj yog tus uas Ncaj Ncees, ntiajteb tsis paub koj, tiamsis kuv paub koj; cov neeg no puavleej paub hais tias koj txib kuv los. Kuv qhia koj lub npe rau lawv paub lawm, thiab kuv tseem yuav niaj hnub qhia lawv kom lawv muaj txojkev hlub uas koj hlub kuv nyob hauv lawv, thiab kuv yuav nyob hauv lawv.” Thaum Yexus thov Vajtswv tas lawm, Yexus coj nws cov thwjtim hla lub kwjha Kiloos mus rau sab tid. Qhov ntawd muaj ib lub vaj; Yexus thiab nws cov thwjtim txawm mus rau hauv lub vaj ntawd. Yudas tus uas ntxeev siab rau Yexus yeej paub qhov chaw ntawd thiab, rau qhov Yexus twb coj cov thwjtim mus ntau zaus hauv lub vaj ntawd lawm. Yog li ntawd, Yudas thiaj coj ib co tubrog Loos thiab cov uas zov lub Tuamtsev qee leej uas cov thawj ntawm cov povthawj thiab cov Falixais tso tuaj, tuaj rau hauv lub vaj; lawv nqa ntaj, taws teeb thiab taws tsau cig lam lug tuaj. Yexus yeej paub tej xwm uas nws yuav raug, nws txav zog mus nug lawv hais tias, “Nej tuaj nrhiav leejtwg?” Lawv teb hais tias, “Peb tuaj nrhiav Yexus tus uas yog neeg Naxales.” Yexus teb lawv hais tias, “Nws yog kuv ntag.” Yudas tus uas ntxeev siab rau Yexus, nws nrog lawv sawv ua ke ntawd thiab. Thaum Yexus hais rau lawv hais tias, “Nws yog kuv ntag,” lawv thaub ncho rov qab thiab ntog pawglug rau hauv av. Yexus rov qab nug lawv hais tias, “Nej tuaj nrhiav leejtwg?” Lawv teb hais tias, “Peb tuaj nrhiav Yexus tus uas yog neeg Naxales.” Yexus hais rau lawv hais tias, “Kuv twb qhia rau nej hais tias nws yog kuv ntag; yog nej tuaj nrhiav kuv tiag, nej cia li tso cov neeg no mus.” ( Yexus hais li no kom tiav raws li tej lus uas Yexus hais tias, “Txiv, cov neeg uas koj muab rau kuv lawm tsis muaj ib tug ploj li.”) Ximoos Petus nqa ib rab ntaj; nws rho hlo nws rab ntaj tib ntag rau tus Povthawj Hlob ib tug qhev sab pobntseg xis tu nrho. Tus qhev ntawd hu ua Malekhus. Yexus hais rau Petus hais tias, “Koj cia li muab koj rab ntaj ntxig rov rau hauv hnab. Koj xav hais tias kuv yuav tsis haus lub khob uas kuv Txiv muab rau kuv haus no los?” Cov neeg Loos tus thawj tubrog thiab nws cov tubrog thiab cov Yudais cov tub ceevxwm txawm ntes Yexus thiab muab nws khi. Lawv xub coj Yexus mus cuag Anas uas yog Kaiyafas yawmtxiv; xyoo ntawd Kaiyafas yog tus Povthawj Hlob. Kaiyafas yog tus uas hais rau cov Yudais tej nomtswv hais tias cia ib tug tuag zoo dua cia sawvdaws tuag. Ximoos Petus thiab muaj dua ib tug thwjtim raws Yexus qab mus. Tus Povthawj Hlob paub tus thwjtim ntawd; tus thwjtim ntawd raws Yexus mus rau ntawm lub tshavpuam hauv tus Povthawj Hlob lub tsev, Petus sawv sab roojvag nraud. Tus thwjtim uas tus Povthawj Hlob paub, nws tawm tuaj hais rau tus ntxhais qhev uas nyob ntawm roojvag kom coj Petus los rau hauv tsev. Tus ntxhais qhev uas nyob ntawm roojvag hais rau Petus hais tias, “Koj yog tus txivneej uas raug ntes ntawd ib tug thwjtim los sav?” Petus teb hais tias, “Kuv tsis yog.” Hmo ntawd no heev, cov tubtxib thiab cov tub ceevxwm rauv tau ib cub thee, thiab sawvdaws sawv puagncig nte. Petus txawm mus nrog lawv nte thiab. Tus Povthawj Hlob nug Yexus txog Yexus cov thwjtim thiab Yexus tej lus qhuab qhia. Yexus teb hais tias, “Kuv tabmeeg qhia rau tej neeg sawvdaws; kuv yeej ibtxwm qhia hauv tej tsev sablaj thiab hauv lub Tuamtsev; cov Yudais yeej niaj zaus tuaj mloog kuv qhia. Kuv yeej tsis tau hais ib zaj nraim nkoos qhov twg li. Koj tseem yuav nug kuv ua dabtsi? Koj cia li nug cov neeg uas hnov kuv qhia saib kuv hais li cas rau lawv; lawv yeej paub tej uas kuv qhia huv tibsi.” Thaum Yexus tabtom hais li ntawd, muaj ib tug tub ceevxwm nyob ze ntawd txawm cia li tib tawg ncuav rau Yexus ntsejmuag thiab hais tias, “Koj teb tus Povthawj Hlob li ko los!” Yexus teb hais tias, “Yog kuv hais txhaum, koj cia li qhia kuv qhov txhaum rau sawvdaws paub. Tiamsis yog kuv hais tseeb, ua li cas koj lam ntaus kuv ua dabtsi?” Ces Anas thiaj xa Yexus mus rau Kaiyafas uas yog tus Povthawj Hlob; thaum ntawd lawv tseem khi rawv Yexus. Thaum Ximoos Petus tseem sawv nte taws. Cov neeg uas nyob ntawd hais rau Petus hais tias, “Koj yog tus txivneej uas raug ntes ntawd ib tug thwjtim los tsis yog?” Tiamsis Petus tsis lees li, Petus hais tias, “Kuv tsis yog.” Tus Povthawj Hlob ib tug qhev uas yog tus txivneej uas Petus txiav ib sab pobntseg tu ntawd ib tug kwvtij txawm nug Petus hais tias, “Puas yog kuv twb pom koj nrog tus txivneej ntawd nyob hauv vaj?” Petus rov qab hais tias, “Tsis yog kuv.” Tamsim ntawd qaib txawm qua. Thaum kaj ntug txoog, lawv coj Yexus tawm hauv Kaiyafas tsev mus rau ntawm Philaj lub loog. Cov Yudais tej nomtswv tsis kam mus hauv lub loog, rau qhov lawv tsis xav ua kom lawv tsis huv, lawv thiaj noj tau rooj mov uas ua Kevcai Hla Dhau. Yog li ntawd, Philaj thiaj tawm mus nug lawv hais tias, “Tus txivneej no ua txhaum dabtsi, nej thiaj coj nws tuaj cuag kuv?” Lawv teb hais tias, “Yog nws tsis tau ua txhaum, peb yeej tsis coj nws tuaj cuag koj.” Philaj hais rau lawv hais tias, “Nej cia li coj nws mus thiab taug nws zaj raws li nej txoj kevcai.” Cov Yudais teb hais tias, “Peb tsis muaj cai muab leejtwg tua povtseg.” ( Qhov no muaj raws li tej lus uas Yexus twb qhia ua ntej lawm hais tias nws yuav tuag li cas.) Philaj rov qab mus rau hauv loog thiab hu Yexus los cuag nws. Philaj nug Yexus hais tias, “Koj yog cov Yudais tus vajntxwv los?” Yexus teb hais tias, “Koj nug kuv raws li koj paub lossis yog lwm tus qhia kuv zaj rau koj xwb?.” Philaj teb hais tias, “Koj xav hais tias kuv yog neeg Yudais no los? Twb yog koj haivneeg thiab cov thawj ntawm cov povthawj ntes koj tuaj rau kuv xwb. Koj ua txhaum dabtsi?” Yexus teb hais tias, “Kuv lub tebchaws tsis yog lub ntiajteb no. Yog kuv lub tebchaws yog lub ntiajteb no, kuv cov thwjtim yeej yuav tawmtsam kom yeej, tsis pub leejtwg ntes tau kuv coj mus rau cov Yudais tej nomtswv. Tiamsis kuv lub tebchaws tsis yog lub ntiajteb no.” Philaj nug Yexus hais tias yog li ntawd, “Koj yog ib tug vajntxwv los?” Yexus teb hais tias, “Koj yog tus uas hu kuv ua vajntxwv. Twb yog vim li no, kuv thiaj los yug rau hauv lub ntiajteb no thiab qhia qhov tseeb. Txhua tus uas nyiam qhov tseeb yeej mloog kuv lus.” Philaj nug Yexus hais tias, “Qhov tseeb yog dabtsi?” Thaum Phijlaj hais li ntawd tas, Philaj tawm rov mus cuag cov Yudais rau sab nraud thiab hais rau lawv hais tias, “Kuv pom hais tias nws tsis tau ua ib qho txhaum uas txaus txiav txim rau nws li. Tiamsis raws li nej txoj kevcai, txhua zaus uas nej ua kevcai Hla Dhau, kuv yeej tso ib tug neeg raug txim rau nej. Nej puas xav kom kuv tso cov Yudais tus vajntxwv?” Lawv txawm hais nrov nrov rau Philaj hais tias, “Tsis txhob tso tus txivneej ntawd, koj cia li tso Npalanpas xwb.” (Npalanpas yog ib tug tubsab.) Tom qab ntawd Philaj txawm muab Yexus rau cov tubrog nplawm. Cov tubrog muab hmab pos ua kauj looj Yexus taubhau, thiab lawv muab ib lub tsho ntev tsamxem kho rau Yexus hnav. Lawv hais rau Yexus hais tias, “Cov Yudais tus vajntxwv, koj yuav muaj sia nyob ntev!” Thiab lawv xuas tawg ncuav rau Yexus ntsejmuag. Philaj rov tawm tuaj hais rau lawv hais tias, “Nej saib, kuv yuav coj nws tuaj rau nej kom nej paub hais tias kuv tsis pom nws ua ib qhov txhaum uas txaus txiav txim rau nws li.” Thaum Yexus tawm los, nws ntoo rawv lub kauj hmab pos thiab hnav lub tsho ntev tsamxem. Philaj hais rau lawv hais tias, “Nej saib! Tus txivneej ntawd nyob ntawm no.” Thaum cov thawj ntawm cov povthawj thiab cov tub ceevxwm uas zov lub Tuamtsev pom Yexus, lawv hais nrov nrov hais tias, “Muab nws ntsia rau saum ntoo khaublig! Muab nws ntsia rau saum ntoo khaublig!” Philaj hais rau lawv hais tias, “Nej cia li coj nws mus thiab muab nws ntsia rau saum ntoo khaublig. Kuv yeej tsis pom nws ua ib qho txhaum uas txaus txiav txim rau nws li.” Cov Yudais teb Philaj hais tias, “Peb muaj ib txoj kevcai, raws li txoj kevcai ntawd hais, mas tsimnyog muab nws tua povtseg, rau qhov nws khav hais tias nws yog Vajtswv tus tub.” Thaum Philaj hnov lawv hais li ntawd ua rau Philaj hajyam ntshai heev. Philaj rov mus hauv nws lub loog thiab nug Yexus hais tias, “Koj nyob qhov twg tuaj?” Tiamsis Yexus tsis teb Philaj ib los li. Philaj hais rau Yexus hais tias, “Koj txawm tsis teb kuv li los? Koj tsis paub hais tias kuv muaj cai tso tau koj thiab muaj cai muab koj ntsia rau saum ntoo khaublig no los?” Yexus teb hais tias, “Koj yeej tsis muaj hwjchim loj dua kuv, tsuas yog Vajtswv pub hwjchim rau koj xwb; tus uas ntes kuv coj tuaj rau koj, tus ntawd ua txhaum loj kawg li.” Thaum Philaj hnov Yexus hais li ntawd, nws xav muab Yexus tso. Tiamsis cov Yudais hais nrov nrov hais tias, “Yog koj muab nws tso mas koj yeej tsis yog Xixas tus phoojywg li. Tus uas khav hais tias nws yog vajntxwv, tus ntawd yog Xixas tus yeebncuab!” Thaum Philaj hnov li ntawd, Philaj txawm coj Yexus tawm los rau sab nraud thiab Philaj zaum saum lub rooj txiav txim, qhov chaw uas hu ua “Pua Pobzeb.” (Lus Henplais hu ua “Nkanpathas.”) Thaum ntawd yuav luag tavsu, hnub ntawd yog hnub uas npaj ua Kevcai Hla Dhau. Philaj hais rau cov Yudais hais tias, “Nej tus Vajntxwv nyob ntawm no.” Lawv hais nrov nrov hais tias, “Muab nws tua povtseg! Muab nws tua povtseg! Muab nws ntsia rau saum ntoo khaublig!” Philaj thiaj nug lawv hais tias, “Nej xav kom kuv muab nej tus vajntxwv ntsia rau saum ntoo khaublig los?” Cov thawj ntawm cov povthawj teb hais tias, “Peb muaj tib tug vajntxwv xwb, tus ntawd yog Xixas.” Ces Philaj txawm muab Yexus rau cov Yudais coj mus ntsia rau saum ntoo khaublig. Yog li ntawd, lawv thiaj coj Yexus tawm mus; thiab muab Yexus tus ntoo khaublig rau Yexus kwv, lawv coj Yexus mus txog ntawm qhov chaw uas hu ua “Pobtxha Taubhau.” (Lus Henplais hu ua “Khaulakhauthas.”) Nyob qhov ntawd lawv muab Yexus ntsia rau saum ntoo khaublig, thiab lawv coj tau ob tug txivneej tuaj ntsia rau saum ntoo khaublig, muab ib tug txhos rau ib sab thiab muab Yexus txhos rau hauv nruab nrab. Philaj sau ib daim ntawv ntsia rau saum Yexus tus ntoo khaublig. Cov lus ntawd nyeem hais li no: “Yexus tus uas yog neeg Naxales yog cov Yudais tus Vajntxwv.” Muaj neeg coob leej nyeem daim ntawv ntawd, rau qhov thaj chaw uas muab Yexus ntsia rau saum ntoo khaublig nyob tsis deb ntawm lub nroog. Cov ntawv ntawd sau ua lus Henplais, lus Latees thiab lus Kilis. Cov thawj ntawm cov povthawj hais rau Philaj hais tias, “Koj tsis txhob sau hais tias, ‘Cov Yudais tus Vajntxwv,’ tiamsis sau hais tias, ‘Tus txivneej no hais tias, kuv yog cov Yudais tus Vajntxwv.’ ” Philaj teb hais tias, “Kuv sau li cas yuav li ntawd.” Tom qab uas cov tubrog muab Yexus ntsia rau saum ntoo khaublig lawm, lawv muab Yexus tej ris tsho faib ua plaub co, ib leeg yuav ib co. Lawv tseem muab Yexus lub tsho ntev lawm thiab, lub tsho ntev ntawd ntos thoob plaws tsis muaj leejleeg li. Cov tubrog sib tham hais tias, “Peb tsis txhob muab lub tsho no dua, tiamsis cia peb muab twv saib leejtwg tau lub tsho ntawd xwb.” Tej uas lawv ua no muaj tiav raws li Vajtswv txojlus uas hais tias, “Lawv muab kuv tej ris tsho sib faib, thiab muab kuv lub tsho ntev twv saib leejtwg tau.” Twb yog vim li no cov tubrog thiaj ua li ntawd. Thaum ntawd Yexus niam, Yexus niam tus niamhluas, Malis uas yog Kelaupas tus pojniam thiab Malis Madalas, lawv sawv ze ntawm Yexus tus ntoo khaublig. Yexus pom nws niam thiab tus thwjtim uas nws hlub heev sawv ua ke ntawd, Yexus hais rau nws niam hais tias, “Niam, tus uas nrog koj sawv ntawm ko yog koj tus tub.” Yexus hais rau tus thwjtim ntawd hais tias, “Tus uas nrog koj sawv ntawd ko yog koj niam.” Txij thaum ntawd los tus thwjtim ntawd txawm coj Yexus niam mus nrog nws nyob lawm. Tom qab ntawd, Yexus paub hais tias txhua yam tiav tas lawm, nws hais tias, “Kuv nqhis dej,” (nws hais li ntawd kom muaj tiav raws li Vajtswv txojlus). Nyob qhov ntawd muaj ib taig kua txiv hmab qaub; lawv muab ib lub xwbkuab chob rau ntawm ib tug pas hixauv raus cov kua txiv hmab qaub ntawd thiab cev mus rau ntawm Yexus qhovncauj. Yexus haus cov kua txiv hmab qaub ntawd, thiab Yexus hais tias, “Tiav lawm lauj!” Ces Yexus txawm nyo hau ntshis thiab tu siav nrho tamsim ntawd. Cov Yudais tej nomtswv mus thov Philaj tso cai rau lawv muab cov neeg uas ntsia saum ntoo khaublig ntawd tsoo kom lov ceg thiab muab lawv txo saum ntoo khaublig los. Lawv ua li no rau qhov hnub ntawd yog hnub Npaj ua kevcai; cov Yudais tsis xav cia cov neeg tuag ntawd nyob saum ntoo khaublig Hnub Xanpataus, rau qhov Hnub Xanpataus yog hnub uas tseemceeb heev. Cov tubrog txawm mus muab ob tug uas lawv muab ntsia rau saum ntoo khaublig ib yam li Yexus tsoo kom lov ceg; lawv xub tsoo ib tug ua ntej mam li tsoo ib tug tom qab. Tiamsis thaum lawv mus txog ntawm Yexus, lawv pom hais tias Yexus twb tuag lawm, lawv thiaj tsis tsoo Yexus ob txhais ceg. Txawm li ntawd los tseem muaj ib tug tubrog muab nws rab hmuv nkaug Yexus sab tav to ntshua; tamsim ntawd ntshav thiab dej los si laim. ( Tus uas pom zaj no, nws ua timkhawv qhia rau sawvdaws hais tias yeej muaj tseeb, thiab nws paub hais tias nws hais tseeb xwb, nej thiaj yuav ntseeg zaj ntawd.) Qhov no muaj raws li Vajtswv txojlus uas hais tias, “Nws tej txha yeej tsis muaj ib yag yuav lov li.” Thiab Vajtswv txojlus muaj dua ib nqe hais tias, “Yuav muaj neeg saib ntsoov tus uas lawv xuas hmuv nkaug.” Tom qab ntawd, Yauxej uas nyob pem lub nroog Alimathas tuaj; nws mus thov Philaj cia nws muab Yexus lub cev txo. (Yauxej yog Yexus ib tug thwjtim thiab, tiamsis nws tsis qhia rau leejtwg paub, rau qhov nws ntshai cov Yudais.) Philaj tso cai rau Yauxej; yog li ntawd, Yauxej thiaj mus muab Yexus lub cev txo coj mus faus. Nikaudemaus tus uas mus cuag Yexus ib zaug thaum tsaus ntuj nrog Yauxej mus; nws nqa ib co roj ntoo tsw qab tov cov tshuaj tsw qab mules thiab alau-es muaj kwvlam li peb caug tawm choj mus thiab. Nkawd muab Yexus lub cev txo los, muab cov tshuaj tsw qab pleev thiab muab ntaubmag qhwv Yexus lub cev raws li cov Yudais txoj kevcai faus tuag uas lawv ibtxwm ua. Muaj ib lub vaj nyob ntawm qhov chaw uas lawv muab Yexus ntsia rau saum ntoo khaublig; nyob hauv lub vaj ntawd muaj ib lub qhov ntxa tshiab uas tseem tsis tau muaj leejtwg muab neeg tuag faus rau hauv li. Rau qhov hnub ntawd yog hnub uas cov Yudais Npaj ua kevcai thiab lub qhov ntxa ntawd nyob ze, lawv thiaj coj Yexus lus cev mus tso rau hauv lub qhov ntxa ntawd. Hnubkaj thaum sawv ntxov uas kaj ntug txoog, Malis Madalas mus txog ntawm lub ntxa thiab nws pom daim txiag zeb uas npog lub rooj ntxas twb dov rau ib cag lawm. Malis txawm khiav rov qab los cuag Ximoos Petus thiab tus thwjtim uas Yexus hlub, thiab nws hais rau nkawd hais tias, “Lawv twb muab tus Tswv nqa tawm hauv qhov ntxa lawm, peb tsis paub xyov lawv coj nws mus tso qhov twg lawm.” Petus thiab tus thwjtim ntawd txawm mus rau tom lub ntxa. Nkawd sib tw khiav mus, tiamsis tus thwjtim ntawd khiav ceev dua Petus nws thiaj xub mus txog ntawm lub ntxa. Nws khoov ntshis mus xauj hauv lub qhov ntxa; nws pom daim ntaubmag uas qhwv Yexus hle ua ib pawg rau hauv, tiamsis nws tsis nkag mus rau hauv. Thaum Ximoos Petus mus txog, nws txawm nkag plaws mus saib hauv lub qhov ntxa. Nws pom daim ntaubmag uas qhwv Yexus hle ua ib pawg rau hauv, thiab nws pom daim ntaub uas qhwv Yexus taubhau tais tso rau ib cag tsis nyob nrog daim ntaubmag uas qhwv Yexus. Tus thwjtim uas xub mus txog ntawm lub ntxa mam li nkag mus rau hauv, nws tau pom tej ntawd thiab ntseeg. ( Nkawd tseem tsis tau totaub Vajtswv txojlus uas hais tias nws yuav sawv hauv qhov tuag rov qab los.) Tom qab ntawd, nkawd rov qab los tsev lawm. Tiamsis Malis tseem sawv ntawm lub qhov ntxa sab nraud quaj. Thaum nws tseem quaj quaj ntawd nws khoov ntshis xauj hauv lub qhov ntxa, nws pom ob tug timtswv ceebtsheej hnav ris tsho dawb paug zaum ntawm qhov chaw uas tso Yexus lub cev rau; ib tug zaum pem taubhau thiab ib tug zaum nram kotaw. Nkawd nug Malis hais tias, “Mentxhais, ua li cas koj quaj?” Malis teb nkawd hais tias, “Xyov lawv coj kuv tus Tswv mus tso rau qhov twg lawm, kuv tsis paub li.” Thaum Malis hais li ntawd tas nws tig hlo los pom Yexus sawv ntawm nws ib sab, tiamsis nws tsis paub hais tias yog Yexus. Yexus nug Malis hais tias, “Mentxhais, ua li cas koj quaj?” Malis xav hais tias Yexus yog tus txivneej uas tu lub vaj ntawd, nws thiaj nug hais tias, “Tus tswv, yog koj muab nws mus tso rau qhov twg lawm, thov koj qhia rau kuv; kuv yuav mus nqa nws rov qab los.” Yexus hais rau Malis hais tias, “Malis!” Malis tig hlo mus saib Yexus thiab ua lus Henplais hais rau Yexus hais tias, “Lanpaunis!” (Lo lus no txhais hais tias, “Xibhwb.”) Yexus hais rau Malis hais tias, “Koj tsis txhob tuav kuv, rau qhov kuv tseem tsis tau rov mus cuag kuv Txiv. Koj cia li mus hais rau kuv cov kwvtij hais tias, ‘Kuv yuav rov mus cuag tus uas yog kuv Txiv thiab nej Txiv; nws yog kuv tus Vajtswv thiab nej tus Vajtswv.’ ” Yog li ntawd, Malis Madalas thiaj rov qab mus qhia rau cov thwjtim hais tias, “Kuv twb pom tus Tswv lawm”; thiab Malis qhia Yexus tej lus rau lawv. Hnubkaj thaum tsaus ntuj, cov thwjtim sib sau ua ke rau hauv ib lub tsev thiab liaj qhovrooj huv tibsi, rau qhov lawv ntshai cov Yudais tej nomtswv. Thaum ntawd Yexus los sawv nruab nrab hauv lawv; Yexus hais rau lawv hais tias, “Nej cia li muaj kev kaj siab.” Thaum Yexus hais li ntawd tas, nws cev nws ob txhais tes thiab thws nws sab tav rau lawv saib. Cov thwjtim zoo siab heev rau qhov lawv pom tus Tswv lawm. Yexus rov hais rau lawv dua hais tias, “Nej cia li muaj kaj siab. Leej Txiv txib kuv los li cas, kuv yuav txib nej mus ib yam nkaus li ntawd.” Thaum Yexus hais li ntawd tas, nws txawm tshuab pa rau lawv thiab hais tias, “Nej cia li txais yuav Vaj Ntsujplig tus Dawbhuv. Yog nej zam txim rau leejtwg, Vajtswv yuav zam txim rau tus ntawd; yog nej tsis zam txim rau leejtwg, Vajtswv yuav tsis zam tus ntawd lub txim thiab.” Thaumas (tus uas muaj dua ib lub npe hu ua Ntxaib) yog ib tug ntawm kaum ob tug thwjtim, nws tsis nrog cov thwjtim nyob ua ke thaum Yexus los tshwm rau lawv pom. Cov thwjtim qhia rau Thaumas hais tias, “Peb twb pom tus Tswv lawm.” Thaumas hais rau lawv hais tias, “Yog kuv tsis pom cov qhov ntsia hlau ntawm nws ob txhais tes tsis tau muab kuv tus ntivtes xuas lub qhov ntsia hlau thiab yog kuv tsis tau xuas lub qhov uas lawv nkaug nws sab tav mas kuv yeej tsis ntseeg li.” Tau ib limtiam tom qab, Yexus cov thwjtim rov tuaj sib sau rau hauv lub tsev ntawd dua; zaum no Thaumas nrog lawv nyob. Lawv liaj qhovrooj huv tibsi, tiamsis Yexus los sawv nruab nrab hauv lawv thiab hais tias, “Nej cia li muaj kev kaj siab.” Yexus hais rau Thaumas hais tias, “Koj cia li saib kuv ob txhais tes thiab cev koj tus ntivtes los xuas. Cev koj txhais tes los xuas lub qhov ntawm kuv sab tav. Tsis txhob ua xyem xyav, cia li ntseeg.” Thaumas teb Yexus hais tias, “Koj yog kuv tus Tswv thiab yog kuv tus Vajtswv!” Yexus hais rau Thaumas hais tias, “Koj pom kuv, koj thiaj ntseeg xwb los? Tus uas tsis tau pom kuv tiamsis nws ntseeg, tus ntawd tau koob hmoov.” Yexus ua ntau yam txujci tseemceeb rau nws cov thwjtim pom, tiamsis tsis tau muab sau rau hauv phau ntawv no. Tej uas sau rau hauv phau ntawv no yog sau los qhia kom nej ntseeg hais tias Yexus yog tus Mexiyas uas yog Vajtswv tus Tub; txhua tus uas ntseeg Yexus yuav tau txojsia ntev dhawv mus ibtxhis. Tom qab ntawd, Yexus rov los tshwm rau nws cov thwjtim pom nram ntug Hiavtxwv Tinpelias; thiab qhov uas nws los tshwm rau lawv pom muaj li no. Ximoos Petus, Thaumas (tus uas muaj dua ib lub npe hu ua Ntxaib), Nathana-ees (tus uas nyob hauv lub zos Kanas pem lub xeev Kalilais), Xenpedais ob tug tub thiab muaj dua ob tug ntawm Yexus cov thwjtim tuaj nyob ua ke. Ximoos Petus hais rau cov thwjtim ntawd hais tias, “Kuv yuav mus ntaus ntses.” Lawv hais rau Petus hais tias, “Peb yuav nrog koj mus thiab.” Lawv txawm nce rau hauv nkoj; hmo ntawd lawv ntaus ntses ib hmo tiamsis tsis tau ib tug ntses li. Thaum kaj ntug txoog, Yexus los sawv tim ntug dej, tiamsis cov thwjtim tsis paub hais tias yog Yexus. Yexus nug lawv hais tias, “Cov hluas, nej ntaus tsis tau ntses li los?” Lawv teb hais tias, “Ntaus tsis tau ib tug li.” Yexus hais rau lawv hais tias, “Nej cia li ntaus nej lub vas rau ntawm lub nkoj sab xis rau hauv thiaj yuav tau ntses.” Yog li ntawd, lawv txawm muab lub vas ntaus rau hauv thiab lub vas mag tau ntses ntau heev; lawv rub tsis taus lub vas los rau hauv nkoj li. Tus thwjtim uas Yexus hlub hais rau Petus hais tias, “Tus sawv tid yog peb tus Tswv ntag los sav!” Thaum Petus hnov dheev hais tias peb tus Tswv, Petus txawm muab nws lub tsho ntev los hnav, (rau qhov nws muab hle lawm) nws txawm dhia rau hauv hiavtxwv. Cov thwjtim uas tseem nyob hauv lub nkoj, lawv nquam lub nkoj thiab rub lub vas uas mag ntses puv nkaus los rau ntawm ntug dej, rau qhov lawv nyob tsis deb ntawm ntug dej kwvlam li tsib caug daj xwb. Thaum lawv mus txog tim ntug lawm, lawv pom ib cub thee cig ntsaj thuav muaj ntses thiab ncuav ci nyob saum cub thee ntawd. Yexus hais rau lawv hais tias, “Nej cia li nqa cov ntses uas nej nyuam qhuav ntaus tau tus puav los ntawm no.” Ximoos Petus nce rau hauv lub nkoj rub lub vas uas mag tau ntses puv nkaus ntawd los rau tim ntug; cov ntses loj uas lawv ntaus tau ntawd muaj ib puas tsib caug peb tug; txawm yog mag tau ntses ntau npaum li ntawd los lub vas tsis ntuag ib qho li. Yexus hais rau lawv hais tias, “Nej cia li los noj tshais.” Cov thwjtim tsis muaj ib tug muaj cuabkav nug Yexus hais tias, “Koj yog leejtwg?” rau qhov lawv paub hais tias nws yog lawv tus Tswv. Yog li ntawd, Yexus txawm mus muab ncuav thiab muab ntses los faib rau lawv noj. Tom qab uas Yexus sawv hauv qhov tuag rov qab los lawm, nws los tshwm rau cov thwjtim pom peb zaug rau zaum no. Thaum lawv noj tshais tas lawm, Yexus hais rau Ximoos Petus hais tias, “Ximoos Yauhas tus tub, koj hlub kuv tshaj lawv cov no los?” Ximoos teb Yexus hais tias, “Tus Tswv, koj yeej paub hais tias kuv hlub koj.” Yexus hais rau Ximoos hais tias, “Koj cia li yug kuv cov menyuam yaj.” Yexus rov hais dua zaum ob hais tias, “Ximoos Yauhas tus tub, koj puas hlub kuv?” Ximoos teb Yexus hais tias, “Tus Tswv, koj yeej paub hais tias kuv hlub koj.” Yexus hais rau Ximoos hais tias, “Koj cia li yug kuv pab yaj.” Yexus rov hais dua zaum peb hais tias, “Ximoos Yauhas tus tub, koj puas hlub kuv?” Petus nyuaj siab heev rau qhov Yexus nug Petus peb zaug hais tias, “Koj puas hlub kuv?” Petus txawm hais rau Yexus hais tias, “Tus Tswv, koj yeej paub ib puas tsav yam huv tibsi; koj yeej paub hais tias kuv hlub koj.” Yexus hais rau Petus hais tias, “Koj cia li yug kuv pab yaj. Kuv qhia tseeb rau koj hais tias thaum koj tseem hluas koj xav mus qhov twg, koj cia li tu cev zoj zeeg mus xwb. Tiamsis thaum koj laus lawm, koj yuav xyab tes rau luag khi thiab luag yuav coj koj mus rau qhov chaw uas koj tsis xav mus.” (Yexus hais li ntawd yog Yexus hais tias Petus yuav tuag li cas thiaj ua rau Vajtswv tau koob meej.) Yexus hais rau Petus hais tias, “Koj cia li nrog kuv mus.” Petus tig los pom tus thwjtim uas Yexus hlub nyob tom nkawd qab; nws yog tus uas txav los rau ntawm Yexus thaum lawv noj hmo thiab nug hais tias, “Tus Tswv, leejtwg yog tus uas yuav ntxeev siab rau koj?” Thaum Petus pom tus thwjtim ntawd, Petus nug Yexus hais tias, “Tus Tswv, ua li tus txivneej no ne, ho yuav zoo li cas?” Yexus teb Petus hais tias, “Yog kuv cia nws nyob mus txog hnub uas kuv rov qab los yeej tsis ua li cas rau koj. Koj cia li nrog kuv mus!” Zaj ntawd nrov ncha mus thoob plaws rau tej neeg sawvdaws hais tias tus thwjtim ntawd yuav tsis tuag. Tiamsis Yexus tsis tau hais tias tus thwjtim ntawd yuav tsis tuag; Yexus hais tias, “Yog kuv cia nws nyob mus txog hnub uas kuv rov qab los yeej tsis ua li cas rau koj?” Tus thwjtim ntawd yog tus uas hais tej lus no thiab muab sau tseg rau hauv ntawv; thiab peb paub hais tias tej lus uas nws hais yeej muaj tseeb. Tseem muaj ntau yam uas Yexus tau ua tas los lawm. Yog yuav muab tej ntawd sau tseg huv tibsi rau hauv ntawv, kuv xav hais tias lub ntiajteb no yuav tsis muaj chaw txaus ntim tej ntawv ntawd. The-aufilaus, Phau ntawv uas kuv xub sau, kuv sau hais txog txhua yam uas Yexus ua thiab qhia txij thaum uas nws pib ua haujlwm mus txog hnub uas Vajtswv coj nws mus saum ntuj. Thaum Yexus tsis tau mus saum ntuj, nws kom Vaj Ntsujplig tus Dawbhuv qhia nws cov timthawj uas nws xaiv tseg lawm. Rau qhov plaub caug hnub tom qab uas nws sawv hauv qhov tuag rov qab los, nws tau los tshwm rau lawv pom ntau zaus kom lawv paub hais tias nws tseem muaj sia nyob. Lawv tau pom nws thiab nws qhia lawv txog Vajtswv lub Tebchaws. Muaj ib zaug thaum Yexus nrog nws cov timthawj nyob ua ke, nws samhwm rau lawv hais tias, “Nej tsis txhob tawm hauv lub nroog Yeluxalees mus qhov twg li; nej yuav tsum nyob tos txog hnub uas nej tau raws li kuv Txiv coglus hais tias nws yuav pub rau nej. Qhov ntawd kuv twb qhia rau nej lawm. Yauhas muab neeg ua kevcai raus rau hauv dej, tiamsis tshuav ob peb hnub xwb nej yuav tau ua kevcai raus los ntawm Vaj Ntsujplig tus Dawbhuv.” Thaum cov timthawj nrog Yexus nyob ua ke, lawv nug Yexus hais tias, “Tus Tswv, lub sijhawm no koj yuav muab lub Tebchaws rov rau cov Yixalayees los?” Yexus hais rau lawv hais tias, “Tsis tas nej yuav paub hais tias hnub twg thiab lub sijhawm twg yuav muaj li ntawd. Lub sijhawm ntawd nyob ntawm Leej Txiv teem cia. Tiamsis thaum Vaj Ntsujplig tus Dawbhuv los nrog nej nyob lawm, nws yuav pub hwjchim rau nej, thiab nej yuav ua timkhawv qhia kuv zaj mus thoob plaws hauv lub nroog Yeluxalees, hauv lub xeev Yudas, hauv lub xeev Xamalis thiab mus txog qab ntuj kawg.” Thaum Yexus hais li ntawd tas, lawv tseem ntsia ntsoov Yexus, ces Vajtswv txawm coj Yexus mus saum ntuj lawm. Muaj ib tauv huab los roos nws, ces lawv tsis pom nws lawm. Thaum lawv tseem tabtom ntsiav ntsoov Yexus mus saum ntuj, ua ciav muaj ob tug txivneej hnav ris tsho dawb paug los sawv ntawm lawv. Nkawd hais rau lawv hais tias, “Cov neeg Kalilais, nej sawv saib saum ntuj ua dabtsi? Yexus tus uas Vajtswv nyuam qhuav coj mus saum ntuj lawm, nws yeej yuav rov qab los ib yam nkaus li uas nej pom nws mus ntag.” Cov timthawj txawm rov qab pem Roob Txiv Ntoo Roj los txog rau hauv lub nroog Yeluxalees. Lub roob ntawd nyob nrug deb ntawm lub nroog kwvlam li ib kilumev. Thaum lawv los txog hauv lub nroog Yeluxalees, lawv txawm mus rau hauv ib lub tsev, thiab nce mus rau ib chav uas nyob txheej saud; chav ntawd yog chav uas lawv tuaj so. Lawv cov ntawd yog Petus, Yauhas, Yakaunpaus, Adales, Filis, Thaumas, Npataulaumais, Mathais, Yakaunpaus uas yog Alafais tus tub, Ximoos tus uas xav kom nws lub tebchaws muaj kev ywjpheej thiab Yudas uas yog Yakaunpaus tus tub. Lawv cov no thiab ib co pojniam thiab Malis uas yog Yexus niam thiab Yexus cov kwv pheej tuaj ua ke thov Vajtswv hauv chav tsev ntawd. Ob peb hnub tom qab ntawd cov ntseeg tuaj sablaj ua ke, lawv muaj kwvlam li ib puas nees nkaum leej, ces Petus txawm sawv ntsug qhia cov neeg ntawd hais tias, “Cov kwvtij, yeej yuav muaj raws li Vajtswv Txojlus uas Vaj Ntsujplig qhia rau Vajntxwv Daviv sau hais txog Yudas tus uas coj neeg kev mus ntes Yexus. Yudas yeej yog ib tug hauv peb pab, Yexus tsa nws nrog peb ua tib txoj haujlwm.” (Cov nyiaj uas Yudas tau thaum Yudas ua phem, Yudas muab yuav ib thaj av. Qhov chaw uas Yudas lub cev poob, nws plab tawg thiab hnyuv tawm tas huv tibsi, twb yog ntawm thaj av ntawd ntag. Cov neeg uas nyob hauv lub nroog Yeluxalees hnov zaj no, lawv txawm hu thaj av ntawd raws li lawv lus hais tias, Akedamas uas txhais hais tias, “Thaj Av Ntshav.”) “Twb muaj lus sau tseg rau hauv Phau Ntawv Nkauj lawm hais tias, ‘Cia nws lub tsev nyob khoob lug; tsis txhob pub leejtwg mus nyob hauv lub tsev ntawd.’ Thiab muaj dua ib nqe sau tseg hais tias, ‘Cia lwm tus los hloov nws chaw ua nws tes haujlwm.’ “Yog li ntawd, tus uas yuav los nrog peb ua haujlwm, tus ntawd yuav tsum yog ib tug uas ibtxwm nrog peb ua ke thiab nrog peb tus Tswv Yexus mus rau ub rau no, txij thaum Yauhas qhuab qhia thiab muab neeg ua kevcai raus dej los txog hnub uas Vajtswv coj Yexus mus saum ntuj, mas tus ntawd thiaj nrog peb ua tau timkhawv hais tias Yexus twb sawv hauv qhov tuag rov qab los lawm tiag.” Ces lawv pom zoo muab ob tug neeg los rau sawvdaws xaiv, ob tug ntawd ib tug yog Yauxej uas hu ua Npaxanpas (lossis hu ua Yuxatus) thiab Mathias. Lawv txawm thov Vajtswv hais tias, “Tus Tswv, koj yog tus uas paub txhua tus lub siab huv tibsi; yog li ntawd, thov koj qhia rau peb saib ob tug no koj xaiv tus twg los ua timthawj hloov Yudas chaw ua tes haujlwm uas Yudas muab tso tseg thiab mus rau hauv qhov chaw uas yeej yog nws lub lawm.” Ces lawv txawm rho ntawv saib ob tug ntawd tau tus twg. Lawv rho tau Mathias. Txij hnub ntawd los Mathias txawm nrog kaum ib tug timthawj ntawd ua haujlwm. Thaum txog hnub Peetekos, cov ntseeg sawvdaws tuaj nyob ua ke rau hauv ib lub tsev. Ua ciav txawm muaj ib lub suab nrov nroo ntws saum ntuj los ib yam li ib nthwv cua hlob hlob los rau hauv lub tsev uas sawvdaws tabtom nyob ua ke. Lawv pom ib yam zoo li tus nplaim taws los faib pes rhe liab pesvog mus rau lawv txhua tus. Vaj Ntsujplig tus Dawbhuv los kav tagnrho lawv txhua tus lub siab, ces lawv txawm hais tau lwm yam lus raws li Vaj Ntsujplig kom lawv hais. Thaum ntawd cov Yudais uas hwm Vajtswv tuaj txhua lub tebchaws uas nyob hauv qab ntuj no tuaj so rau hauv lub nroog Yeluxalees. Thaum lawv hnov tej suab ntawd, cov neeg coob coob ntawd txawm tuaj saib saib yog li cas. Thaum lawv nyias hnov nyias lub tebchaws tej lus uas cov ntseeg ntawd hais, lawv xav tsis thoob li. Lawv tsis paub yuav hais li cas, ces lawv txawm hais tias, “Cov neeg uas tabtom hais lus no puavleej yog neeg Kalilais los sav! Ua li cas peb hnov lawv hais tau peb tej lus? Peb cov ntawm no muaj ibtxhia yog neeg Pathias, neeg Medias, thiab neeg Elas; muaj ibtxhia tuaj tim tebchaws Mexuputamias tuaj, tuaj hauv tebchaws Yudas tuaj, tuaj pem tebchaws Kapadaukias tuaj, tuaj pem tebchaws Pootus thiab tebchaws Axias tuaj, tuaj pem tebchaws Felinkias thiab pem tebchaws Pafilias tuaj, tuaj nram tebchaws Iziv tuaj, tuaj hauv tej cheebtsam hauv tebchaws Linpias uas nyob ze tebchaws Kilenes tuaj. Peb ibtxhia tuaj tim lub nroog Loos tuaj, tsis hais cov Yudais thiab lwm haivneeg uas kiav xeem ua neeg Yudais, thiab peb ibtxhia tuaj tim koog Povtxwv Keletes thiab nram tebchaws Alanpias tuaj. Txawm yog peb tuaj txhua qhov chaw tuaj los peb puavleej hnov lawv hais txog tej txujci tseemceeb uas Vajtswv tau ua lawm. Peb totaub, rau qhov tej lus uas lawv hais ntawd puavleej yog peb tej lus!” Lawv hnov li ntawd, lawv xav tsis thoob li; lawv sib nug zom zaws hais tias, “Tej no yog li cas?” Tiamsis muaj ibtxhia luag cov ntseeg zom zaws hais tias, “Cov neeg ntawd qaug cawv lawm!” Thaum ntawd Petus thiab kaum ib tug timthawj txawm sawv ntsug, ces Petus hais nrov nrov rau cov neeg coob coob ntawd hais tias, “Cov kwvtij Yudais thiab nej txhua tus uas nyob hauv lub nroog Yeluxalees no, nej ua tib zoo mloog tej uas kuv yuav qhia rau nej. Nimno nyuam qhuav cuaj teev sawv ntxov xwb, cov txivneej no tsis yog qaug cawv li nej hais; Tej uas muaj no yog raws li Yau-ees uas yog tus cev Vajtswv lus tau qhia tseg lawm hais tias, ‘Vajtswv hais tias, thaum txog tiam uas ntiajteb yuav kawg, kuv yuav ua li no: Kuv yuav pub kuv tus Ntsujplig rau txhua tug. Nej tej tub tej ntxhais yuav cev kuv tej lus. Nej tej tub hluas yuav ua yogtoog, thiab tej laus yuav ua npau suav. Tsis yog li ntawd xwb, thaum txog tiam ntawd, kuv yuav pub kuv tus Ntsujplig rau kuv cov tubtxib, tsis hais pojniam thiab txivneej huv tibsi, thiab lawv yuav cev kuv tej lus. Kuv yuav ua tej txujci tseemceeb rau saum nruab ntug, thiab hauv ntiajteb no. Yuav muaj ntshav, muaj nplaim taws thiab pa taws; thaum tseem tsis tau txog hnub tseemceeb uas ci ntsa iab uas tus Tswv los, lub hnub yuav tsaus thiab lub hli yuav liab li ntshav. Thaum ntawd tus uas thov tus Tswv pab, tus ntawd yuav dim.’ “Cov kwvtij Yixalayees, nej cia li mloog tej lus uas kuv yuav qhia no! Vajtswv txib Yexus tus uas yog neeg Naxales los ua tej txujci tseemceeb qhia Vajtswv lub hwjchim rau nej. Tej uas nej pom ntawd qhia rau nej paub hais tias Yexus yog tus uas Vajtswv txib los tiag. Qhov uas Vajtswv muab Yexus rau nej, nej muab nws rau cov neeg txhaum coj mus ntsia rau saum ntoo khaublig, thiab nej kom lawv muab nws tua povtseg, qhov ntawd twb yog raws li Vajtswv pom zoo thiab npaj tseg lawm. Tiamsis Vajtswv twb daws Yexus dim thiab tsa Yexus sawv hauv qhov tuag rov qab los lawm; txojkev tuag lub hwjchim yuam tsis tau nws. Rau qhov Daviv hais txog nws hais tias, ‘kuv niaj hnub pom tus Tswv nrog kuv nyob; nws nyob ntawm kuv sab xis, kuv thiaj tsis ntxhov siab. Twb yog vim li no kuv thiaj zoo siab, thiab tej lus uas kuv hais ua rau sawvdaws paub hais tias kuv zoo siab; txawm yog kuv yog neeg xwb los kuv tseem muaj kev cia siab, rau qhov koj yeej yuav tsis tso kuv tus ntsujplig rau hauv tubtuag teb; koj yuav tsis cia koj tus tubtxib uas ncaj ncees cev nqaij lwj rau hauv qhov ntxa. Koj twb qhia txojkev uas coj neeg mus txog txojsia rau kuv paub lawm thiab qhov uas koj nrog kuv nyob, ua rau kuv zoo siab kawg li.’ “Cov kwvtij, kuv yuav qhia rau nej paub txog peb yawgkoob Daviv. Nws twb tuag thiab lawv muab nws lub cev coj mus faus lawm; niaj hnub nimno nws lub ntxa tseem nyob. Thaum Daviv tseem ua neej nyob, nws yog ib tug uas cev Vajtswv lus. Nws paub tseeb hais tias Vajtswv twb coglus rau nws hais tias, Vajtswv yuav tsa nws ib tug xeebntxwv los ua vajntxwv ib yam li nws. Daviv twb paub ua ntej lawm hais tias, tus Mexiyas yuav sawv hauv qhov tuag rov qab los. Daviv thiaj hais tias, ‘Vajtswv yuav tsis tso nws tseg rau hauv tubtuag teb; nws cev nqaij yuav tsis lwj rau hauv qhov ntxa.’ Tus Yexus no yog tus uas Vajtswv tsa sawv hauv qhov tuag rov qab los, peb ua tau timkhawv hais tias, nws twb sawv hauv qhov tuag rov qab los lawm tiag. Vajtswv tus uas yog Yexus Txiv, nws coj Yexus mus nyob ntawm nws sab xis, thiab Vajtswv pub Vaj Ntsujplig rau Yexus raws li Vajtswv tau coglus tseg lawm. Nimno Yexus twb pub Vaj Ntsujplig rau peb lawm, raws li nej hnov thiab nej pom no. Daviv yeej tsis tau mus saum ntuj ceebtsheej dua li, tiamsis Daviv hais tias, ‘Tus Tswv hais rau kuv tus Tswv hais tias, koj cia li los nyob ntawm kuv sab xis mus txog thaum kuv muab koj cov yeebncuab los rau koj tsuj.’ “Yog li ntawd cov Yixalayees, nej sawvdaws yuav tsum paub hais tias tus Yexus uas nej muab ntsia rau saum ntoo khaublig, yog tus uas Vajtswv tsa ua tus Tswv thiab ua tus Mexiyas lawm.” Thaum sawvdaws hnov Petus hais li ntawd, lawv nyuaj siab kawg li, lawv txawm nug Petus thiab cov timthawj hais tias, “Cov kwvtij, peb yuav ua li cas?” Petus teb lawv hais tias, “Nej txhua tus nyias yuav tsum tso nyias tej kev txhaum tseg thiab ua kevcai raus dej ntawm Yexus Khetos lub npe, Vajtswv thiaj yuav zam txim rau nej thiab nej thiaj yuav tau Vaj Ntsujplig tus Dawbhuv. Rau qhov Vajtswv coglus tseg hais tias nws yuav pub tej no rau nej, rau nej cov menyuam thiab rau cov neeg nyob deb tus Tswv uas yog peb tus Vajtswv hu los ua nws haivneeg.” Petus tseem ntuas thiab qhia lawv ntxiv hais tias, “Nej yuav tsum nrhiav kev khiav kom dim, nej thiaj tsis raug txim li cov neeg siab phem no!” Cov neeg uas hnov Petus qhia muaj ntau leej ntseeg thiab ua kevcai raus dej. Hnub ntawd cov uas los ntseeg muaj kwvlam li peb txhiab leej. Lawv niaj hnub tuaj kawm tej uas cov timthawj qhia, lawv sib hlub sib pab, lawv koom noj Yexus rooj mov thiab thov Vajtswv ua ke. Thaum sawvdaws pom tej txujci tseemceeb uas cov timthawj ua, lawv xav tsis thoob li. Cov ntseeg sawvdaws koom ib lub siab, nyias nqa nyias tej qhov txhia chaw tuaj tso ua ke ua sawvdaws tug. Lawv muab lawv tej av thiab tej khoom uas yog lawv tug muag, thiab muab tej nyiaj ntawd faib rau txhua tus raws li tus uas muaj chaw siv. Lawv niaj hnub mus pehawm Vajtswv hauv lub Tuamtsev, thiab lawv noj Yexus rooj mov thiab noj mov ua ke hauv lawv tej tsev ib lub dhau ib lub, txawm yog muaj ntau muaj tsawg los lawv sawvdaws zoo siab noj. Lawv ua Vajtswv tsaug tsis tseg tsis tu, thiab tej neeg sawvdaws puavleej hwm lawv. Tus Tswv niaj hnub coj neeg los ntseeg coob zuj zus ntxiv rau cov ntseeg. Muaj ib hnub thaum peb teev hnub qaij, Petus thiab Yauhas mus rau hauv lub Tuamtsev. Thaum ntawd yog lub sijhawm uas sawvdaws tuaj thov Vajtswv. Muaj ib tug txivneej tuag ceg thaum nruab thiab los zaum ntawm lub roojvag uas hu ua lub Roojvag Zoo Nkauj. Niaj hnub muaj neeg kwv nws tuaj nyob ntawm roojvag thiab thov nyiaj ntawm cov neeg uas tuaj thov Vajtswv hauv lub Tuamtsev. Thaum nws pom Petus thiab Yauhas tabtom yuav mus hauv lub Tuamtsev, nws txawm thov kom nkawd pub ib yam dabtsi rau nws. Nkawd tsa qhovmuag saib tus txivneej uas tuag ceg ntawd, ces Petus txawm hais tias, “Koj cia li saib wb!” Tus txivneej ntawd xav hais tias nyaj nkawd yuav pub ib yam dabtsi rau nws ntag. Tiamsis Petus hais rau nws hais tias, “Kuv tsis muaj nyiaj, tiamsis kuv yuav muab yam uas kuv muaj rau koj: Kuv tuav Yexus Khetos tus uas yog neeg Naxales lub npe hais rau koj hais tias koj cia li sawv thiab mus kev!” Petus tuav nkaus tus txivneej ntawd sab tes xis rub nws sawv. Tamsim ntawd nws ob txhais ceg thiab ob lub pobtaws txawm muaj zog lawm; nws sawv tsees nrog Petus thiab Yauhas mus rau hauv lub Tuamtsev thiab nws dhia pajpaws ua Vajtswv tsaug. Cov neeg uas nyob ntawd pom nws mus kev thiab hnov nws ua Vajtswv tsaug, thiab thaum lawv pom dheev nws, lawv paub hais tias nws yog tus uas niaj hnub tuaj nyob ntawm lub Roojvag Zoo Nkauj thov nyiaj, lawv xav tsis thoob xyov yog ua li cas nws mus taus kev lawm. Thaum tus txivneej ntawd tseem tuav rawv Petus thiab Yauhas tes ntawm Xalumoos lub qabkhav, cov neeg uas pom li ntawd xav tsis thoob li. Lawv txawm khiav zom zaws los rau ntawm Petus nkawd. Thaum Petus pom cov neeg khiav zom zaws los, Petus hais rau lawv hais tias, “Cov kwvtij Yixalayees, ua li cas nej yuav xav tsis thoob rau tej no thiab ua li cas nej yuav saib ntsoov wb? Nej xav hais tias yog wb muaj hwjchim lossis yog wb ntseeg heev, wb thiaj ua rau tus txivneej no mus taus kev no los? Tus Vajtswv uas yog peb yawgkoob Anplahas, Ixaj thiab Yakhauj tus Vajtswv ua rau nws tus tubtxib Yexus tau koob meej. Tiamsis nej ntes nws coj mus rau cov nomtswv uas muaj hwjchim. Thaum Philaj taug nws zaj, txawm yog Philaj xav muab nws tso los nej tsis kam. Nws yog tus dawbhuv thiab ncaj ncees, tiamsis nej tsis kam Philaj tso nws. Nej ho thov kom Philaj tso tus neeg uas tua neeg rau nej. Nej muab tus uas cawm neeg txojsia tua povtseg, tiamsis Vajtswv tsa nws sawv hauv qhov tuag rov qab los, peb thiaj ua timkhawv hais tias nws twb sawv hauv qhov tuag rov qab los lawm tiag. Twb yog Yexus lub npe uas muaj hwjchim kho tau tus txivneej tuag ceg uas nej pom ntawd muaj zog ntag. Twb yog vim tus txivneej uas nej pom thiab paub no ntseeg Yexus, nws thiaj zoo. Nej pom hais tias nws zoo lawm vim nws ntseeg Yexus. “Cov kwvtij, kuv paub hais tias qhov uas nej thiab nej cov thawjcoj ua li ntawd rau Yexus, vim nej tsis paub. Yav thaum ub Vajtswv kom cov cev Vajtswv lus qhia ua ntej hais tias tus Mexiyas yuav raug kev tsimtxom; nimno twb muaj tiav raws li Vajtswv tau hais tseg lawm. Yog li ntawd, nej yuav tsum tso nej tej kev txhaum tseg thiab tig rov los cuag Vajtswv, Vajtswv thiaj yuav zam nej lub txim. Yog nej ua li ntawd, tus Tswv yuav pab kom nej tau zoo nyob kaj siab lug. Vajtswv yuav txib Yexus tus uas yog tus Mexiyas los pab nej. Yexus yuav nyob saum ntuj ceebtsheej mus txog thaum uas ib puas tsav yam hloov dua tshiab tas huv tibsi; tej no muaj raws li cov cev Vajtswv lus uas yog neeg dawbhuv thaum ub tau qhia tseg lawm. Rau qhov Mauxes hais tias, ‘Tus Tswv uas yog nej tus Vajtswv yuav tsa nej cov ib tug ua tus cev Vajtswv lus ib yam li nws tau tsa kuv, nej yuav tsum mloog txhua yam uas nws qhia rau nej. Yog leejtwg tsis mloog tej lus uas tus cev Vajtswv lus ntawd qhia, Vajtswv yuav muab tus ntawd tshem tawm ntawm nws haivneeg mus thiab tus ntawd yuav raug kev puastsuaj.’ Cov cev Vajtswv lus thaum ub uas yog suav txij Xamuyees los puavleej hais txog tej no ib yam nkaus. Thaum Vajtswv kom nws cov cevlus qhia nws tej lus cog tseg rau nej twb yog nws xav pab nej, thiab tej lus uas nws cog tseg rau nej cov yawgkoob twb yog nws coglus rau nej thiab. Vajtswv coglus tseg rau Anplahas hais tias, ‘Kuv yuav foom koob hmoov ntawm koj tus xeebntxwv mus rau txhua haivneeg hauv qab ntuj no.’ Yog li ntawd, Vajtswv thiaj txib nws tus tubtxib uas nws twb xaiv cia lawm los cuag nej ua ntej, nws foom koob hmoov rau nej kom nej thiaj tso nej tej kev txhaum tseg.” Thaum Petus thiab Yauhas tseem tabtom qhia cov neeg ntawd, cov povthawj qee leej, cov tubrog uas saib lub Tuamtsev tus thawj thiab ib co Xadukais txawm tuaj nrhiav nkawd. Lawv chim rau Petus thiab Yauhas heev, rau qhov nkawd qhia sawvdaws hais tias Yexus twb sawv hauv qhov tuag rov qab los lawm. Nkawd qhia li ntawd, sawvdaws thiaj paub hais tias neeg sawv tau hauv qhov tuag rov qab los. Lawv txawm ntes Petus thiab Yauhas coj mus kaw ib hmos, rau qhov thaum ntawd twb tsaus ntuj lawm. Tiamsis cov neeg uas tau hnov nkawd qhia zaj ntawd muaj ntau leej ntseeg Yexus; suav cov txivneej uas los ntseeg muaj kwvlam li tsib txhiab leej. Thaum kaj ntug lawm, cov Yudais tej thawjcoj, cov txwjlaug thiab cov xibhwb uas qhia Vajtswv txoj Kevcai tuaj ua ke sablaj hauv lub nroog Yeluxalees. Anas uas yog tus Povthawj Hlob, Kaiyafas, Yauhas, Alexades thiab lwm tus uas yog tus Povthawj Hlob tsevneeg tuaj nrog lawv sablaj thiab. Lawv coj Petus thiab Yauhas los sawv tabmeeg lawv, thiab lawv nug nkawd hais tias, “Leejtwg pub hwjchim rau neb? Thiab neb tuav leejtwg lub npe ua tej no?” Tamsim ntawd Vaj Ntsujplig tus Dawbhuv txawm los kav Petus lub siab, Petus teb lawv hais tias, “Cov nomtswv uas kav pejxeem thiab cov txwjlaug, hnub no nej nug wb li no yog nej nug txog qhov uas wb kho tus txivneej tuag ceg no lossis nug txog qhov uas nws ob txhais ceg zoo. Yog nej nug li ntawd, kuv teb rau nej thiab cov Yixalayees sawvdaws hais tias twb yog Yexus tus uas yog neeg Naxales ua rau tus txivneej uas sawv tabmeeg nej no zoo ntag. Yexus yog tus uas nej muab ntsia rau saum tus ntoo khaublig, tiamsis Vajtswv twb tsa nws sawv hauv qhov tuag rov qab los lawm. Yexus yog tus uas Vajtswv Txojlus qhia tseg hais tias, ‘Lub Pobzeb uas cov kws ua tsev muab povtseg, nimno twb muab lub ntawd los ua lub thawj lawm.’ Tsis muaj leejtwg cawm tau peb dim peb lub txim, tsuas yog Yexus tib leeg xwb thiaj cawm tau; tsis muaj dua lwm tus uas Vajtswv tso los cawm peb neeg ntiajteb kom peb dim peb lub txim.” Thaum lawv pom hais tias Petus thiab Yauhas muaj lub siab tawv teb li ntawd, lawv xav tsis thoob li, rau qhov lawv paub hais tias nkawd yeej tsis tau kawm ntawv. Ces lawv nco dheev txog hais tias nkawd yeej nrog Yexus nyob ua ke. Tiamsis lawv tsis muaj lus teb, rau qhov lawv pom tus txivneej tuag ceg uas zoo lawm nrog nkawd sawv ua ke ntawd. Lawv txawm kom Petus thiab Yauhas tawm mus rau nraum zoov, lawv sablaj hais tias, “Peb yuav ua li cas rau nkawd? Cov neeg uas nyob hauv lub nroog Yeluxalees no puavleej paub hais tias zaj txujci tseemceeb no twb yog nkawd ua; yog peb yuav hais tias tsis yog nkawd ua los yeej hais tsis tau. Peb yuav tsum txwv tsis pub nkawd hais Yexus lub npe rau leejtwg li, zaj no thiaj yuav tsis nrov ncha mus rau sawvdaws hnov.” Lawv txawm hu nkawd rov qab los thiab lawv hais rau nkawd kom nkawd tsis txhob hais lossis qhia Yexus zaj ib zaug li lawm. Tiamsis Petus thiab Yauhas teb lawv hais tias, “Wb mloog nej lus zoo dua li wb mloog Vajtswv lus los? Nej sim xav saib, ob qho no qhov twg yuav haum Vajtswv siab dua? Tej uas wb hnov thiab wb pom lawm, wb yeej yuav qhia, wb tsis npog li.” Cov nomtswv hajyam txwv nkawd tawv dua thawj zaug, ces lawv mam li tso nkawd mus. Lawv tsis paub yuav rau txim li cas rau nkawd, rau qhov tej neeg uas pom zaj txujci tseemceeb ntawd sawvdaws puavleej qhuas Vajtswv. Tus txivneej uas Vajtswv kho zoo ntawd hnubnyoog muaj plaub caug tawm xyoo lawm. Thaum cov nomtswv tso Petus thiab Yauhas lawm, nkawd rov mus rau ntawm cov ntseeg thiab qhia tej uas cov thawj ntawm cov povthawj thiab cov txwjlaug txwv nkawd rau lawv mloog. Thaum cov ntseeg hnov li ntawd, lawv koom ua ib lub siab thov Vajtswv hais tias, “Vajtswv, koj yog tus uas tsim lub ntuj thiab lub ntiajteb, tsim dej hiavtxwv thiab tsim ib puas tsav yam uas nyob saum nruab ntug, nyob hauv ntiajteb thiab hauv hiavtxwv. Koj kom Vaj Ntsujplig tus Dawbhuv qhia rau peb yawgkoob Daviv uas yog koj tus tubtxib hais tias, ‘Vim li cas lwm haivneeg chim heev, thiab tej neeg tuavhauv ua phem, tiamsis ua tsis tau? Cov vajntxwv uas kav lub ntiajteb no sawv nres nroos tos thiab cov nomtswv tuaj ua ke tawmtsam tus Tswv thiab tus Mexiyas.’ Yeej muaj li ntawd tiag, rau qhov Helauj thiab Pauti-us Philaj nkawd nrog lwm haivneeg thiab cov Yixalayees tuaj ua ke rau hauv lub nroog no tawmtsam Yexus tus uas yog koj tus tubtxib dawbhuv uas koj tsa ua tus Mexiyas lawm. Tej uas lawv ua no twb yog muaj raws li koj lub hwjchim thiab koj tau npaj siab tseg lawm. Tus Tswv, nimno thov koj tsa qhovmuag saib tej uas lawv ua nruj ua tsiv rau peb. Thiab thov koj pab peb cov uas yog koj cov tubtxib kom muaj lub siab tawv qhia koj Txojlus. Thov koj cev tes kho tej neeg uas muaj mob, thiab thaum peb tuav Yexus uas yog koj tus tubtxib uas dawbhuv lub npe, thov koj ua tej txujci tseemceeb rau sawvdaws pom.” Thaum lawv thov tas, qhov chaw uas lawv nyob ntawd txawm ua zog koog; Vaj Ntsujplig tus Dawbhuv txawm los kav lawv txhua tus lub siab, lawv thiaj muaj lub siab tawv qhia Vajtswv Txojlus. Cov ntseeg txhua tus puavleej koom ua ib lub siab; lawv nqa lawv tej qhov txhia chaw tuaj tso ua ke ua sawvdaws tug. Tsis muaj ib tug yuav hais tias tej uas nws muaj yog nws li. Vajtswv pub hwjchim rau cov timthawj, lawv thiaj muaj lub siab tawv ua timkhawv hais txog zaj uas Tswv Yexus sawv hauv qhov tuag rov qab los, thiab Vajtswv foom koob hmoov rau lawv txhua tus. Lawv cov ntawd tsis muaj ib tug txomnyem li. Cov uas muaj av ntau lossis muaj vaj muaj tsev ntau los lawv muab muag thiab coj cov nyiaj uas lawv muag tau tuaj rau cov timthawj; thiab cov timthawj muab cov nyiaj ntawd faib rau sawvdaws raws li tus uas muaj chaw siv. Yauxej kuj ua li ntawd thiab; Yauxej yog xeem Levis, nws yug tim lub koog Povtxwv Xaipas. Cov timthawj tis dua ib lub npe rau Yauxej hu ua Npananpas, (lub npe ntawd txhais hais tias “Tus uas Txhawb Zog.”) Nws muab nws daim teb muag thiab coj cov nyiaj tuaj rau cov timthawj. Muaj ib tug txivneej hu ua Ananias, nws tus pojniam hu ua Xafilas. Ananias muab nkawd thaj av muag, Ananias thiab nws tus pojniam koom siab muab cov nyiaj ntawd ibtxhia khaws cia lawm thiab coj ib co tuaj rau cov timthawj. Petus hais rau Ananias hais tias, “Ananias, ua li cas koj yuav cia dab Ntxwgnyoog kav koj lub siab kom koj dag Vaj Ntsujplig tus Dawbhuv? Cov nyiaj uas koj muag koj thaj av, koj twb muab ib co khaws cia lawm los sav? Thaum koj tsis tau muag koj thaj av, thaj av ntawd yeej yog koj li; thaum koj muab muag lawm, cov nyiaj yeej yog koj li thiab. Ua li cas koj yuav muaj lub siab ua li ntawd? Tsis yog koj dag neeg, tiamsis yog koj dag Vajtswv!” Thaum Ananias hnov Petus hais li ntawd, tamsim ntawd Ananias txawm vau hlo thiab tuag kiag lawm; thaum sawvdaws hnov zaj no, sawvdaws ntshai kawg li. Cov tub hluas txawm los muab Ananias lub cev qhwv thiab kwv coj mus faus lawm. Tom qab ntawd yuav luag peb txoos teev, Ananias tus pojniam tuaj txog, tiamsis nws tsis paub hais tias muaj tej xwm ntawd li. Petus hais rau Xafilas hais tias, “Koj qhia rau kuv saib, neb muag neb thaj av tau nyiaj li ntawd xwb tiag los?”. Xafilas teb hais tias, “Yog, yeej tau li ntawd xwb tiag.” Petus hais rau Xafilas hais tias, “Ua li cas koj thiab koj tus txiv yuav koom ua ib lub siab dag Vaj Ntsujplig tus Dawbhuv? Koj saib, cov neeg uas kwv koj tus txiv mus faus tabtom los txog ntawm qhovrooj; lawv yuav kwv koj mus faus ib yam nkaus thiab!” Tamsim ntawd Xafilas txawm vau hlo rau ntawm Petus kotaw thiab tuag lawm. Thaum cov tub hluas los txog, lawv pom hais tias Xafilas twb tuag lawm, ces lawv txawm kwv nws mus faus nrog nws tus txiv ua ke. Cov ntseeg thiab tej neeg uas hnov zaj no, lawv ntshai kawg li. Cov timthawj ua tej txujci uas xav tsis thoob ntau yam rau sawvdaws pom. Cov ntseeg niaj hnub tuaj nyob ua ke ntawm qhov chaw uas hu ua Xalumoos lub qabkhav. Txawm yog tsis muaj leejtwg los koom nrog cov ntseeg los sawvdaws qhuas cov ntseeg kawg li. Thiab pheej muaj neeg los ntseeg Vajtswv coob zuj zus, tsis hais pojniam lossis txivneej. Cov neeg uas pom tej txujci uas cov timthawj ua, lawv coj tej neeg muaj mob tuaj tso rau ntawm ntug kev. Lawv muab pam thiab muab lev pua rau cov neeg mob ntawd pw, lawv ua li ntawd lawv xav hais tias thaum Petus taug kev tuaj, Petus tus duab yuav roos cov neeg mob ntawd qee leej. Tsis yog li ntawd xwb cov neeg coob coob uas nyob hauv tej zog uas nyob ibncig lub nroog Yeluxalees tseem coj lawv tej neeg uas muaj mob thiab tej neeg uas raug dab tuaj rau cov timthawj kho, cov neeg ntawd txhua tus puavleej zoo huv tibsi. Yog li ntawd, tus Povthawj Hlob thiab cov Xadukais uas yog nws tib pab thiaj ntxub cov timthawj thiab tuavhauv ua phem rau cov timthawj, lawv txawm ntes cov timthawj coj mus kaw rau hauv tsev lojcuj. Tiamsis hmo ntawd tus Tswv ib tug timtswv los qhib lub tsev lojcuj tej qhovrooj thiab coj cov timthawj tawm mus. Nws hais rau lawv hais tias, “Nej cia li tawm mus sawv hauv lub Tuamtsev thiab qhia lub neej tshiab no rau sawvdaws mloog.” Cov timthawj txawm ua li ntawd, lawv thiaj sawv ntxov mus qhia cov neeg uas tuaj rau hauv lub Tuamtsev. Tus Povthawj Hlob thiab cov neeg uas yog nws tib pab txawm hu cov Yudais tej nomtswv thiab cov txwjlaug tuaj ua ke sablaj, lawv txib neeg mus coj cov timthawj hauv tsev lojcuj los cuag lawv. Tiamsis thaum cov neeg uas lawv txib mus txog hauv tsev lojcuj, lawv tsis pom cov timthawj lawm. Lawv txawm rov qab los hais rau cov nomtswv hais tias, “Thaum peb mus txog ntawm lub tsev lojcuj, peb pom lub qhovrooj tseem kaw zoo zoo, thiab muaj ntsuasphoo xauv huv tibsi. Cov tubrog uas zov los tseem sawv ntawm qhovrooj zov. Tiamsis thaum peb qhib qhovrooj mus txog hauv, tsis pom ib tug neeg nyob hauv li!” Thaum cov tubrog uas zov lub Tuamtsev tus thawj thiab cov thawj ntawm cov povthawj hnov lawv hais li ntawd, lawv xav tsis thoob li xyov cov timthawj dua twg lawm. Tamsim ntawd txawm muaj ib tug txivneej tuaj hais rau lawv hais tias, “Nej mloog kuv hais, cov neeg uas nej muab kaw rau hauv tsev lojcuj, nimno lawv tabtom qhia sawvdaws hauv lub Tuamtsev!” Tus thawj tubrog txawm coj nws cov tubrog mus ntes cov timthawj coj rov los, tiamsis cov tubrog tsis ua phem rau cov timthawj, rau qhov lawv ntshai nyob tsam cov pejxeem muab pobzeb ntaus lawv. Lawv coj cov timthawj los sawv tabmeeg cov nomtswv thiab tus Povthawj Hlob taug cov timthawj zaj. Nws hais rau lawv hais tias, “Peb twb txwv tu nrho hais tias nej tsis txhob tuav tus txivneej no lub npe qhia li no los sav; ua li cas nej tseem qhia thiab? Nej saib, tej uas nej qhia twb nrov ncha mus thoob plaws lub nroog Yeluxalees lawm. Nej tseem muab lub txim uas lawv tua tus txivneej ntawd rau peb ris thiab!” Petus thiab cov timthawj teb hais tias, “Peb yeej yuav mloog Vajtswv lus heev dua li mloog neeg lus. Nej muab nws ntsia rau saum tus ntoo khaublig thiab muab nws tua, tiamsis tom qab ntawd peb cov yawgkoob tug Vajtswv twb ntsa nws sawv hauv qhov tuag rov qab los lawm. Thiab Vajtswv kom nws mus nyob ntawm Vajtswv sab xis; Vajtswv tsa nws ua tus Thawj thiab ua tus Cawmseej. Vajtswv ua li ntawd kom cov Yixalayees tso lawv tej kev txhaum tseg, Vajtswv thiaj yuav zam txim rau lawv. Tej no peb thiab Vaj Ntsujplig tus Dawbhuv yeej ua tau timkhawv. Vaj Ntsujplig yog tus uas Vajtswv pub rau cov neeg uas mloog Vajtswv lus.” Thaum cov nomtswv hnov li ntawd, lawv chim heev; lawv xav muab cov timthawj tua povtseg tamsim ntawd. Tiamsis cov nomtswv ntawd muaj ib tug hu ua Nkamaliyees, nws yog cov Falixais thiab yog ib tug xibhwb uas qhia Vajtswv txoj Kevcai uas sawvdaws hwm heev. Nws sawv thiab kom luag coj cov timthawj tawm mus ib pliag nraum zoov, ces nws txawm hais rau cov nomtswv hais tias, “Cov kwvtij Yixalayees, nej tsis txhob rawm ua li cas rau cov neeg no, nej yuav tsum ua tib zoo taug lawv zaj tso. Nej puas nco hais tias yav tas los The-udas khav hais tias nws yog ib tug neeg tseemceeb, thiab yuav luag muaj plaub puas leej tuaj nws tog, tiamsis nws raug luag muab tua tuag lawm. Ces cov neeg uas tuaj nws tog txawm khiav ua dog ua dig tas, nimno twb tsis hnov leejtwg hais txog nws li lawm. Tom qab ntawd thaum cov nomtswv tabtom sau cov pejxeem tej npe saib muaj coob npaum li cas, thaum ntawd muaj ib tug txivneej hu ua Yudas, nws yog neeg Kalilais. Nws tuaj ntxias cov pejxeem kom sawvdaws tuaj nws tog, tiamsis muaj neeg muab nws tua tuag lawm thiab, ces cov neeg uas tuaj nws tog txawm khiav ua dog ua dig tas lawm. Yog li ntawd, kuv hais rau nej hais tias nej cia li tso cov timthawj no mus, tsis txhob ua li cas rau lawv. Tej haujlwm uas lawv ua ntawd, yog neeg kom lawv ua xwb ces tej ntawd yeej yuav ploj mus, tiamsis yog Vajtswv kom lawv ua ces nej yuav kov tsis yeej lawv li. Yog nej tawmtsam lawv, nyob tsam yog nej tawmtsam Vajtswv!” Cov nomtswv pom zoo raws li Nkamaliyees hais. Lawv hu cov timthawj los; lawv muab cov timthawj nplawm thiab txwv tsis pub lawv tuav Yexus lub npe qhia leejtwg li, ces lawv txawm tso cov timthawj mus lawm. Thaum cov timthawj tawm ntawm cov nomtswv mus, lawv zoo siab kawg li, rau qhov Vajtswv pom zoo cia cov uas qhia Yexus zaj raug kev txajmuag. Lawv niaj hnub mus qhia Txojmoo Zoo uas hais txog Yexus uas yog tus Mexiyas hauv lub Tuamtsev thiab hauv lawv tej tsev rau sawvdaws mloog. Tom qab ntawd pheej muaj neeg los ua Yexus cov thwjtim coob zuj zus ntxiv. Ces cov Yudais uas hais lus Kilis thiab cov Yudais uas hais lus Henplais tsis sib haum. Cov Yudais uas hais lus Kilis yws hais tias txhua hnub uas faib zaub mov thiab faib nyiaj txiag, lawv tsis faib rau cov pojntsuam uas yog neeg Yudais uas hais lus Kilis. Ces kaum ob tug timthawj thiaj hu cov ntseeg tuaj ua ke thiab hais rau lawv hais tias, “Tsis tsimnyog peb cov uas yog timthawj tso qhov uas qhia Vajtswv txojlus tseg thiab ua cov uas saib sawvdaws tej zaub mov. Yog li ntawd, cov kwvtij, nej cia li xaiv xya leej los rau peb; lawv yuav tsum yog cov uas sawvdaws hwm, puv npo Vaj Ntsujplig tus Dawbhuv thiab muaj tswvyim; peb yuav tsa lawv ua tes haujlwm no. Peb thiaj muaj sijhawm thov Vajtswv thiab mus qhia Vajtswv Txojlus.” Sawvdaws pom zoo ua raws li cov timthawj hais, ces lawv txawm xaiv Xatefanaus tus uas muab siab rau ntseeg thiab puv npo Vaj Ntsujplig tus Dawbhuv, thiab lawv xaiv Filis, Pakhaulus, Nikanaus, Timoos, Pamenas thiab Nikaulus tus uas nyob pem lub nroog Ati-aukias tuaj, nws yog lwm Haivneeg uas coj cov Yudais txoj kevcai. Cov ntseeg txawm coj xya leej ntawd los rau cov timthawj; cov timthawj tuav lawv, thov Vajtswv rau lawv thiab tsa lawv ua tes haujlwm ntawd. Vajtswv Txojlus txawm nrov ncha mus thoob plaws txhua qhov chaw. Cov thwjtim uas nyob hauv lub nroog Yeluxalees pheej muaj coob zuj zus ntxiv, thiab muaj cov povthawj ntau leej los ntseeg Yexus. Vajtswv foom koob hmoov rau Xatefanaus thiab pub hwjchim rau nws ua tau tej txujci tseemceeb uas xav tsis thoob rau sawvdaws pom. Tiamsis muaj qee leej tswvcuab tuaj hauv lub tsev (uas hu ua) cov neeg Ywjpheej lub tsev sablaj. Lawv cov ntawd muaj ibtxhia yog cov Yudais uas nyob hauv lub nroog Kilenes thiab lub nroog Alexadias tuaj, thiab cov Yudais uas tuaj pem lub tebchaws Kilikias thiab lub xeev Axias tuaj, lawv txawm nrog Xatefanaus sib cav. Tiamsis lawv cav tsis yeej Xatefanaus, rau qhov Vajtswv pub tswvyim rau Xatefanaus. Lawv txawm ntiav qee leej ua timkhawv dag hais tias, “Peb hnov tus txivneej no thuam Mauxes thiab thuam Vajtswv!” Lawv txhob txwm ua li ntawd kom cov pejxeem, cov txwjlaug thiab cov xibhwb uas qhia Vajtswv txoj Kevcai sawvdaws ntxhov. Lawv txawm sau nthwv los ntes Xatefanaus thiab coj nws mus cuag cov nomtswv. Thiab lawv coj ob peb tug los ua timkhawv dag hais tias, “Tus txivneej no niaj hnub thuam peb lub Tuamtsev uas dawbhuv thiab thuam Mauxes txoj kevcai. Peb hnov nws hais tias tus Yexus uas yog neeg Naxales yuav muab lub Tuamtsev no rhuav, thiab nws yuav hloov Mauxes txoj kevcai uas Mauxes muab rau peb!” Tagnrho cov neeg uas nyob hauv lub tsev sablaj ntawd saib ntsoov Xatefanaus, lawv pom nws lub ntsejmuag ci ib yam li ib tug timtswv ceebtsheej lub. Tus Povthawj Hlob nug Xatefanaus hais tias, “Koj tau hais li lawv hais tiag los?” Xatefanaus teb hais tias, “Nej cov uas ua kwv ua tij thiab ua txiv, nej cia li mloog kuv hais! Thaum peb yawgkoob Anplahas tseem nyob tim tebchaws Mexuputamias uas nws tseem tsis tau khiav mus nyob pem lub nroog Halas, Vajtswv lub tshwjchim uas ci ntsa iab tau tshwm los rau nws pom. Thiab hais rau nws hais tias, ‘Koj cia li tso koj tej kwvtij tseg thiab tawm hauv koj lub tebchaws no mus rau ib lub tebchaws uas kuv yuav qhia rau koj.’ Anplahas txawm tawm hauv tebchaws Khade-as mus rau pem lub nroog Halas. Thaum Anplahas txiv tuag lawm, Vajtswv hais kom Anplahas tsiv los nyob hauv lub tebchaws uas nimno nej nyob no. Thaum ntawd Vajtswv tseem tsis tau pub ib thaj av luaj xibteg rau Anplahas li, tiamsis Vajtswv coglus tseg hais tias Vajtswv yuav muab lub tebchaws ntawd rau nws thiab nws cov xeebntxwv ua lawv tug mus li. Thaum Vajtswv coglus rau Anplahas ntawd, Anplahas tseem tsis tau muaj menyuam. Vajtswv hais rau Anplahas hais tias, ‘Koj cov xeebntxwv yuav mus nrog lwm haivneeg nyob hauv luag lub tebchaws lawv yuav mus ua luag qhev, thiab luag yuav tsimtxom lawv plaub puas xyoo. Tiamsis kuv yuav rau txim rau cov neeg uas tsimtxom koj cov xeebntxwv; tom qab ntawd lawv yuav tawm hauv lub tebchaws ntawd los pehawm kuv ntawm no.’ Vajtswv muab txoj kevcai txiav rau Anplahas ua lub cim qhia hais tias Vajtswv coglus tseg rau Vajtswv haivneeg. Thaum yug Ixaj tau yim hnub lawm, Anplahas txawm muab Ixaj ua kevcai txiav. Ixaj muab Yakhauj ua kevcai txiav, thiab Yakhauj muab nws kaum ob tug tub uas yog peb haivneeg cov yawgkoob uas muaj koob meej nyob nto hmoo los ua kevcai txiav. “Yakhauj cov tub ntawd muaj lub siab khib rau lawv tus kwv Yauxej, lawv thiaj muab Yauxej muag mus ua qhev rau nram tebchaws Iziv. Tiamsis Vajtswv nrog nraim Yauxej thiab Vajtswv pab Yauxej dim Yauxej tej kev txomnyem. Thaum uas Yauxej mus cuag Falaus uas yog cov Iziv tus vajntxwv, Vajtswv pub tswvyim rau Yauxej ua tau haum Falaus siab, Falaus thiaj tsa Yauxej ua tus saib Falaus lub tebchaws thiab saib txhua yam hauv Falaus lub loog. Tom qab ntawd txawm muaj kev tshaib plab thoob plaws tebchaws Iziv thiab tebchaws Kana-as, sawvdaws txomnyem kawg li. Peb cov yawgkoob nrhiav tsis tau noj. Yakhauj hnov hais tias nyob nram tebchaws Iziv muaj mov, ces nws txawm txib peb cov yawgkoob mus nram tebchaws Iziv; zaum ntawd yog thawj zaug uas lawv mus nrad. Thaum lawv rov mus zaum ob, Yauxej thiaj qhia rau nws cov tijlaug paub hais tias nws yog lawv tus kwv thiab qhia nws tsevneeg rau Falaus paub. Yauxej txib neeg mus tos Yakhauj tus uas yog nws txiv, thiab kom Yakhauj coj tagnrho nws tsevneeg uas muaj xya caum tsib leeg los nyob hauv tebchaws Iziv. Yakhauj txawm mus nyob nram tebchaws Iziv. Yakhauj thiab nws cov tub puavleej tuag tas rau nrad. Lawv cov tubki txawm kwv lawv rov los faus rau ntawm lub toj ntxas uas nyob ntawm Sekhees. Lub toj ntxas ntawd yog lub uas thaum ub Anplahas muab nyiaj yuav ntawm cov neeg Hamaus los. “Thaum yuav txog lub sijhawm uas Vajtswv ua raws li Vajtswv tau coglus tseg rau Anplahas lawm, thaum ntawd peb haivneeg uas nyob hauv tebchaws Iziv huamvam coob heev. Thaum kawg muaj dua ib tug vajntxwv los kav tebchaws Iziv. Tus vajntxwv ntawd tsis paub Yauxej. Tus vajntxwv ntawd ua phem rau peb haivneeg, tsimtxom peb cov yawgkoob tsis pub lawv tu lawv tej menyuam thiab yuam kom lawv muab lawv tej menyuam mos povtseg kom tuag mus. Thaum ntawd yog lub sijhawm yug Mauxes, Mauxes yog ib tug metub uas zoo nraug heev. Nws niam nws txiv tu nws hauv tsev tau peb lub hlis, thiab thaum nkawd coj Mauxes mus tso rau nram ntug dej, Falaus tus ntxhais txawm coj mus tu thiab saws ua nws tub. Mauxes kawm paub cov neeg Iziv tej kev txawj kev ntse huv tibsi. Mauxes yog ib tug txawj ntse heev; nws ua yam twg los ua tau. “Thaum Mauxes hnubnyoog muaj plaub caug xyoo, nws mus ncig saib nws cov kwvtij Yixalayees. Nws pom ib tug neeg Iziv tsimtxom ib tug neeg Yixalayees, nws txawm muab tus neeg Iziv ntawd tua povtseg; nws ua li ntawd pauj qhov uas tus neeg Iziv tsimtxom tus Yixalayees. ( Mauxes ua li ntawd nws xav hais tias nyaj nws haivneeg yuav paub hais tias Vajtswv xaiv nws los pab lawv kom lawv dim, tiamsis lawv tsis paub.) Hnub tom qab nws pom ob tug neeg Yixalayees tabtom sib ntaus, nws txawm cheem nkawd hais tias, ‘Neb twb yog kwvtij; ua li cas neb tseem yuav sib ntaus ua dabtsi?’ Tiamsis tus uas ua txhaum txawm muab Mauxes thawb ntiag rau ib cag, thiab nws hais rau Mauxes hais tias, ‘Leejtwg tsa koj ua tus saib thiab txiav txim rau peb? Koj yuav muab kuv tua ib yam li nag hmo koj tua tus neeg Iziv thiab los?’ Thaum Mauxes hnov li ntawd, nws txawm khiav tawm hauv tebchaws Iziv mus nyob tim tebchaws Midias. Nws nyob hauv lub tebchaws ntawd, nws tau ob tug tub. “Tom qab plaub caug xyoo lawm, muaj ib tug timtswv ceebtsheej los tshwm rau Mauxes hauv cov nplaim taws ntawm ib tsob ntoo rau Mauxes pom tom tiaj suabpuam uas ze lub Roob Xinais. Thaum Mauxes pom li ntawd, Mauxes xav tsis thoob li, nws yuav txav mus saib ze ze, tiamsis nws hnov tus Tswv lub suab hais rau nws hais tias, ‘Kuv yog koj cov yawgkoob tug Vajtswv, kuv yog Anplahas, Ixaj thiab Yakhauj tus Vajtswv.’ Mauxes hnov li ntawd, Mauxes ntshai ua ibce tshee hnyo thiab tsa tsis taus qhovmuag saib li. Tiamsis tus Tswv hais rau Mauxes hais tias, ‘Koj cia li hle koj nkawm khau, rau qhov, qhov chaw uas koj sawv ntawm ko yog qhov chaw dawbhuv. Kuv twb pom kuv haivneeg raug kev tsimtxom nram tebchaws Iziv, thiab kuv twb hnov lawv lub suab quaj lawm, kuv thiaj los pab kom lawv dim tej kev tsimtxom ntawd. Koj cia li los ntawm no, kuv yuav txib koj mus nram tebchaws Iziv.’ “Tus Mauxes no twb yog tus uas cov Yixalayees tsis lees yuav, thiab lawv hais rau nws hais tias, ‘Leejtwg tsa koj ua tus saib thiab txiav txim rau peb?’ Vajtswv kom tus timtswv ceebtsheej los tshwm hauv tsob ntoo uas muaj nplaim taws rau Mauxes pom ua tus pab Mauxes tus uas Vajtswv txib mus ua tus saib thiab pab lawv kom dim. Thaum Mauxes coj cov Yixalayees tawm hauv tebchaws Iziv, nws ua tej txujci tseemceeb uas xav tsis thoob hauv tebchaws Iziv, ntawm ntug dej Hiavtxwv Liab thiab plaub caug xyoo uas lawv nyob tom tiaj suabpuam. Mauxes yog tus uas hais rau cov Yixalayees hais tias, ‘Vajtswv yuav txib ib tug hauv nej cov ua tus uas cev Vajtswv lus rau nej ib yam li nws tau tsa kuv lawm.’ Mauxes yog tus uas nrog cov Yixalayees nyob tom tiaj suabpuam; Mauxes nrog peb cov yawgkoob ua ke thiab nrog tus timtswv ceebtsheej uas los hais rau Mauxes saum Roob Xinais nyob. Thiab Mauxes yog tus uas cev Vajtswv lus rau peb. “Tiamsis peb cov yawgkoob tsis mloog nws lus; lawv muab nws thawb ntiag rau ib cag, thiab lawv xav rov qab mus nyob nram tebchaws Iziv. Lawv thiaj hais rau Aloos hais tias, ‘Koj cia li nchuav ib co mlom coj peb kev mus. Peb tsis paub hais tias xyov muaj xwm dabtsi rau Mauxes tus uas coj peb kev tawm hauv tebchaws Iziv los lawm.’ Ces thaum ntawd lawv txawm nchuav tau ib tug mlom zoo li ib tug nyuj; lawv muab tsiaj tua hlawv fij rau tus mlom ntawd, thiab lawv ua rooj noj rooj haus hawm tus mlom uas lawv txhais tes puab. Vim li ntawd, Vajtswv thiaj tso lawv tseg thiab cia lawv pe tej hnubqub uas nyob saum nruab ntug, raws li cov cev Vajtswv lus sau tseg lawm hais tias, ‘Cov Yixalayees! Plaub caug xyoo uas nej nyob tom tiaj suabpuam, tej tsiaj uas nej muab tua fij ntawd tsis yog nej tua fij rau kuv. Nej kwv tus vajtswv Maulej lub tsevntaub thiab coj tus mlom hnubqub Lefas uas yog nej tus vajtswv; tej ntawd yog tej uas nej txhais tes puab rau nej pe. Vim nej ua li ntawd, kuv yuav ntiab kom nej khiav dhau lub nroog Npanpiloos mus.’ “Thaum peb cov yawgkoob tseem nyob tom tiaj suabpuam, lawv muaj lub Tsevntaub uas yog qhov chaw nrog Vajtswv sib coglus. Lub Tsevntaub ntawd lawv ua raws li Vajtswv hais lossis ua raws li tus qauv uas Vajtswv muab qhia rau Mauxes. Tom qab ntawd, peb cov yawgkoob kwv lub Tsevntaub uas peb cov yawgsuab muab rau lawv nrog Yausuas mus txeeb tau lwm haivneeg lub tebchaws. Lawv mus txeeb tau twb yog Vajtswv ntiab cov neeg ntawd tawm, cia peb cov yawgkoob los nyob. Lub Tsevntaub nyob hauv lub tebchaws ntawd los txog rau Daviv tiam. Daviv ua haum Vajtswv siab, Daviv thiaj thov Vajtswv kom cia Daviv ua ib lub Tuamtsev rau Yakhauj tus Vajtswv nyob. Tiamsis thaum kawg Xalumoos yog tus uas ua lub Tuamtsev ntawd. “Tiamsis Vajtswv tus uas muaj hwjchim loj kawg nkaus tsis nyob hauv lub tsev uas neeg txhais tes ua; raws li tus cev Vajtswv lus hais tias, ‘Tus Tswv hais tias, ntuj ceebtsheej yog kuv lub zwmtxwv, thiab ntiajteb yog kuv lub chaw tiag taw. Nej yuav ua lub tsev luaj li cas rau kuv nyob? Thiab yuav ua kuv lub chaw so rau qhov twg? Tsis yog kuv txhais tes tsim ib puas tsav yam huv tibsi los?’ ” Xatefanaus hais ntxiv hais tias, “Cov neeg tawv ncauj, ua li cas nej tsis hnov Vajtswv Txojlus li! Nej niaj zaug tawmtsam Vaj Ntsujplig tus Dawbhuv ib yam li nej cov yawgkoob! Tsis muaj ib tug cev Vajtswv lus uas nej cov yawgkoob tsis tau tsimtxom li. Lawv tua cov cev Vajtswv lus uas xub qhia ua ntej lawm hais tias Vajtswv tus tubtxib uas ncaj ncees yuav los. Nws yog tus uas nej muab rau cov nomtswv, thiab lawv muab nws tua povtseg ntag. Txawm yog Vajtswv tus timtswv muab Vajtswv txoj kevcai rau nej los nej tsis ua raws li tej kevcai ntawd!” Thaum cov Yudais tej nomtswv hnov Xatefanaus hais li ntawd, lawv npautaws thiab chim heev; lawv zim hniav zog rau Xatefanaus. Tiamsis Xatefanaus puv npo Vaj Ntsujplig tus Dawbhuv, nws tsa qhovmuag saib saum ntuj; nws pom Vajtswv lub tshwjchim uas ci ntsa iab pom Yexus sawv ntawm Vajtswv sab xis. Xatefanaus hais rau lawv hais tias, “Nej saib! Kuv pom ntuj ceebtsheej qhib thiab pom Neeg Leej Tub sawv ntawm Vajtswv sab xis!” Thaum lawv hnov Xatefanaus hais li ntawd, lawv txawm qw nrov nrov thiab muab tes pos qhovntsej thiab khiav mus rau ntawm Xatefanaus, lawv muab Xatefanaus thawb ntiag rau sab nraum ntug nroog thiab muab pobzeb ntaus nws. Cov timkhawv uas nkaug Xatefanaus txawm hle lawv tej tsho tso rau ntawm ib tug tub hluas uas hu ua Xaulus kotaw. Thaum lawv tabtom muab pobzeb ntaus Xatefanaus, Xatefanaus thov Vajtswv hais tias, “Tswv Yexus, thov koj coj kuv tus ntsujplig mus nrog koj nyob!” Xatefanaus txhos caug ntua thiab hais nrov nrov hais tias, “Tus Tswv! Thov koj zam txim rau lawv.” Thaum nws hais li ntawd tas, ces nws txawm tu siav nrho lawm. Xaulus pom zoo lawv tua Xatefanaus thiab. Txij hnub ntawd los cov ntseeg uas nyob hauv lub nroog Yeluxalees raug tsimtxom heev. Tagnrho cov ntseeg sawvdaws khiav mus nyob txhua lub zos hauv lub xeev Yudas thiab lub xeev Xamalis, tsuas tshuav cov timthawj thiaj tsis khiav xwb. Cov txivneej uas hwm Vajtswv muaj qee leej tuaj muab Xatefanaus lub cev kwv mus faus; lawv quaj thiab hlub Xatefanaus kawg li. Xaulus tsimtxom cov ntseeg heev; nws mus hauv cov ntseeg tej tsev ib lub rau ib lub, nws ntes cov ntseeg, tsis hais pojniam lossis txivneej huv tibsi coj mus kaw rau hauv tsev lojcuj. Cov ntseeg uas khiav mus nyob rau txhua qhov chaw, lawv kuj mus qhia Txojmoo Zoo rau qhov ntawd. Filis mus rau hauv ib lub nroog uas nyob hauv xeev Xamalis, nws qhia hais txog tus Mexiyas rau cov neeg ntawd mloog. Thaum sawvdaws hnov Filis qhia thiab pom tej txujci tseemceeb uas Filis ua, lawv ua tib zoo mloog nws qhia. Cov neeg raug dab ntau leej tuaj cuag Filis kom Filis ntiab dab tawm, thaum dab yuav tawm, dab qw nrov nrov thiab tawm mus lawm. Filis kho tej neeg tuag tes tuag taw thiab tej neeg cegtawv txhua tus zoo huv tibsi. Cov neeg uas nyob hauv lub nroog ntawd sawvdaws zoo siab kawg li. Muaj ib tug txivneej hu ua Ximoos, nws nyob hauv lub nroog ntawd tau ntev los lawm. Nws yog ib tug uas txawj ua khawvkoob, nws pheej ua rau cov neeg Xamalis xav tsis thoob li. Nws khav hais tias nws yog ib tug neeg tseemceeb. Tagnrho cov neeg uas nyob hauv lub nroog ntawd, tsis hais tus hlob tus yau, puavleej hwm nws. Lawv hais tias, “Tus txivneej no muaj Vajtswv lub hwjchim uas hu ua ‘Lub Hwjchim Loj Kawg Nkaus.’ ” Lawv mloog nws lus, rau qhov nws twb ua khawvkoob rau lawv kom lawv muab siab npuab nws ntev los lawm. Tiamsis thaum sawvdaws hnov Txojmoo Zoo uas Filis qhia txog Vajtswv lub tebchaws thiab hais txog Yexus Khetos, lawv sawvdaws tsis hais pojniam lossis txivneej txawm los ntseeg Yexus thiab ua kevcai raus dej huv tibsi. Ximoos txawm los ntseeg Yexus thiab. Thaum nws ua kevcai raus dej tas lawm, nws pheej nrog Filis ua ke. Thaum nws pom tej txujci tseemceeb uas Filis ua, nws xav tsis thoob li. Thaum cov timthawj uas nyob nram lub nroog Yeluxalees hnov hais tias cov neeg Xamalis txais yuav Vajtswv Txojlus lawm, cov timthawj txawm txib Petus thiab Yauhas mus saib lawv. Thaum nkawd mus txog, nkawd thov Vajtswv pub Vaj Ntsujplig tus Dawbhuv rau cov ntseeg ntawd. Rau qhov Vaj Ntsujplig tus Dawbhuv tseem tsis tau los nrog cov ntseeg ntawd nyob, tsuas yog Filis tuav Yexus lub npe muab lawv ua kevcai raus dej lawm xwb. Petus thiab Yauhas nkawd tsa tes rau lawv, ces lawv txhua tus txawm tau txais Vaj Ntsujplig tus Dawbhuv. Thaum ob tug timthawj tsa tes rau cov ntseeg ntawd, Ximoos pom hais tias lawv txhua tus puavleej tau Vaj Ntsujplig tus Dawbhuv, ces Ximoos txawm muab nyiaj rau Petus thiab Yauhas nkawd. Ximoos hais rau nkawd hais tias, “Thov neb faib lub hwjchim no rau kuv thiab; thaum kuv tsa tes rau leejtwg, tus ntawd thiaj yuav tau Vaj Ntsujplig tus Dawbhuv.” Tiamsis Petus teb Ximoos hais tias, “Koj thiab koj cov nyiaj yuav tib txhij poob mus rau hauv ntujtawg, rau qhov koj xav hais tias koj muab nyiaj yuav tau lub hwjchim uas Vajtswv pub! Koj yuav tsis muaj feem los nrog peb koom ua tes haujlwm no, rau qhov Vajtswv paub hais tias koj lub siab tsis ncaj. Koj cia li tso plhuav tej kev phem uas koj xav ko tseg, thiab thov Vajtswv zam tej kev txhaum uas koj lub siab xav phem ntawd huv tibsi mus. Rau qhov kuv paub hais tias koj yog ib tug neeg siab hlob, thiab koj tej kev phem twb khi koj lawm, koj yuav nti tsis dim li.” Ximoos txawm hais rau Petus thiab Yauhas hais tias, “Thov neb thov Vajtswv pab kuv, kom kuv tsis txhob raug tej uas neb hais ntawd ib qho li.” Thaum Petus thiab Yauhas nkawd qhia tej uas nkawd pom thiab paub, thiab qhia tus Tswv Txojmoo Zoo rau sawvdaws mloog tas lawm, nkawd txawm rov qab los rau nram lub nroog Yeluxalees. Thaum nkawd taug kev rov qab los, nkawd qhia Txojmoo Zoo rau ntau lub zos uas nyob hauv lub xeev Xamalis. Tus Tswv ib tug timtswv los hais rau Filis hais tias, “Koj cia li sawv kev mus rau sab qabteb, koj taug txojkev uas tuaj tom lub nroog Yeluxalees tuaj mus rau nram lub nroog Nkaxas.” (Nimno txojkev ntawd tsis muaj neeg mus lawm.) Yog li ntawd, Filis txawm sawv kev mus; thaum Filis tabtom taug kev mus, nws ntsib ib tug nraug sam uas yog neeg Ethi-aupias thiab yog ib tug nomtswv uas saib niam Vajntxwv Kadakes uas kav tebchaws Ethi-aupias lub txhab nyiaj. Tus nom ntawd mus pehawm Vajtswv hauv lub nroog Yeluxalees thiab caij tsheb nees rov mus tsev. Thaum nws caij tsheb neeg rov mus tsev, nws nyeem phau ntawv uas Yaxayas uas yog tus cev Vajtswv lus sau tseg. Vaj Ntsujplig tus Dawbhuv txawm hais rau Filis hais tias, “Koj cia li caum kom cuag lub tsheb nees ntawd.” Filis khiav ceev nrooj mus, nws hnov tus nom ntawd tabtom nyeem Yaxayas uas yog tus cev Vajtswv lus phau ntawv. Filis nug hais tias, “Zaj uas koj nyeem ko, koj puas totaub?” Tus nom ntawd teb hais tias, “Twb tsis muaj leejtwg qhia lub ntsiab rau kuv, kuv yuav ua li cas totaub?” Tus nom ntawd txawm kom Filis nce mus nrog nws caij tsheb nees. Vajtswv Txojlus uas tus nom ntawd nyeem hais li no: “Lawv cab nws mus ib yam li cab tus yaj mus tua; nws zoo ib yam li tus yaj uas nyob twjywm rau luag txiav plaub; nws tsis hais ib los li. Lawv ua saib tsis taus nws thiab txiav txim tsis ncaj rau nws. Tsis muaj leejtwg yuav paub txog nws cov xeebntxwv rau qhov nws twb tsis muaj sia nyob hauv ntiajteb no lawm.” Tus nom ntawd hais rau Filis hais tias, “Thov koj qhia zaj no rau kuv saib. Tus uas cev Vajtswv lus hais li no yog nws hais txog leejtwg? Nws hais txog nws lossis nws hais txog lwm tus?” Filis txawm qhia txojmoo zoo uas hais txog Yexus zaj rau tus nom ntawd mloog. Nws qhia zaj uas tus nom ntawd tabtom nyeem ntag. Thaum nkawd tabtom caij tsheb nees taug kev mus, nkawd mus txog ntawm ib qho chaw uas muaj dej. Tus nom ntawd hais rau Filis hais tias, “Twb muaj dej nyob ntawm no, koj muab kuv ua kevcai raus dej puas tau?” [ Filis hais rau tus nom ntawd hais tias, “Yog koj ntseeg tiag tiag, kuv muab koj ua kevcai raus dej ntawm no los tau.” Tus nom ntawd teb hais tias, “Kuv ntseeg hais tias Yexus Khetos yog Vajtswv tus Tub.”] Tus nom ntawd txawm kom nres tsheb nees, ces nkawd txawm nqis mus rau hauv dej, thiab Filis muab tus nom ntawd ua kevcai raus dej. Thaum nkawd tawm hauv dej los, tus Tswv tus Ntsujplig txawm coj Filis mus rau lwm qhov; tus nom ntawd tsis pom Filis lawm, ces tus nom txawm caij tsheb nees mus tsev; nws zoo siab kawg li. Muaj neeg pom Filis nyob pem lub nroog Axautais; Filis mus qhia Txojmoo Zoo thoob plaws tej nroog uas nyob cheebtsam ntawd mus txog rau pem lub nroog Xixaleyas. Thaum ntawd Xaulus tseem ua nruj ua tsiv yuav tua cov uas ntseeg tus Tswv povtseg. Xaulus mus cuag tus Povthawj Hlob thiab thov ntawv ntes neeg coj mus rau cov Yudas tej thawj uas saib cov tsev sablaj pem lub nroog Damaxes hais tias nws muaj cai ntes cov uas coj tus Tswv txoj kevcai, tsis hais pojniam lossis txivneej coj mus kaw rau nram lub nroog Yeluxalees. Thaum Xaulus tabtom mus yuav txog lub nroog Damaxes, txawm muaj duab ci nplas saum ntuj tuaj rau nws. Nws txawm ntog kiag rau hauv av, nws hnov ib lub suab hais rau nws hais tias, “Xaulus, Xaulus! Ua li cas koj tsimtxom kuv?” Xaulus nug hais tias, “Tus Tswv, koj yog leejtwg?” Lub suab ntawd teb hais tias, “Kuv yog Yexus tus uas koj tsimtxom ntag. Koj cia li sawv mus rau hauv lub nroog, yuav muaj neeg qhia rau koj paub hais tias, koj yuav tsum ua dabtsi.” Cov txivneej uas nrog Xaulus mus ntawd, lawv txhua tus yoob tas huv tibsi; lawv hnov lub suab ntawd, tiamsis lawv saib tsis pom leejtwg li. Xaulus txawm sawv tsees thiab rua hlo qhovmuag, tiamsis nws ob lub qhovmuag tsis pom kev lawm. Lawv thiaj tuav nws tes mus rau hauv lub nroog Damaxes. Nws tsis pom kev tau peb hnub, peb hnub ntawd nws tsis noj lossis tsis haus ib yam dabtsi li. Nyob hauv lub nroog Damaxes muaj ib tug thwjtim hu ua Ananias. Ananias ua yogtoog pom tus Tswv los hais rau nws hais tias, “Ananias!” Ananias teb hais tias, “Tus Tswv, kuv nyob ntawm no.” Tus Tswv hais rau Ananias hais tias, “Koj cia li sawv tsees mus rau tom txojkev uas sawvdaws hu hais tias Txojkev Ncaj; koj mus nrhiav tus txivneej uas hu ua Xaulus uas yog neeg Talaxus hauv Yudas tsev. Nimno Xaulus tabtom thov Vajtswv, thiab Xaulus ua yogtoog pom ib tug txivneej hu ua Ananias los hauv tsev thiab tsa tes rau Xaulus kom nws rov pom kev.” Ananias teb hais tias, “Tus Tswv, muaj ntau leej qhia rau kuv hais tias tus txivneej ntawd ua phem heev rau cov ntseeg uas nyob hauv lub nroog Yeluxalees. Qhov uas nws tuaj rau hauv lub nroog Damaxes no twb yog nws tau ntawv ntawm tus thawj ntawm cov povthawj tuaj ntes cov uas pehawm koj.” Tiamsis tus Tswv hais rau Ananias hais tias, “Koj cia li mus, rau qhov kuv twb xaiv nws los ua kuv tes haujlwm lawm. Nws yuav mus qhia kuv zaj rau lwm Haivneeg, rau cov vajntxwv thiab rau cov Yixalayees. Kuv yuav qhia rau nws paub hais tias thaum nws mus ua kuv tes haujlwm, nws yuav raug kev txomnyem vim nws ntseeg kuv.” Ananias txawm mus rau tom Yudas tsev thiab tsa tes rau Xaulus. Nws hais rau Xaulus hais tias, “Me kwv Xaulus, tus Tswv Yexus uas koj pom tom kev txib kuv tuaj pab koj kom koj rov pom kev thiab puv npo Vaj Ntsujplig tus Dawbhuv.” Tamsim ntawd txawm muaj ib yam zoo li nplai ntses poob nthav ntawm Xaulus ob lub qhovmuag los, ces nws txawm rov pom kev li qub lawm. Nws sawv tsees los thiab Ananias muab nws ua kevcai raus dej; thaum nws noj mov tas, nws rov muaj zog. Xaulus nrog cov ntseeg hauv lub nroog Damaxes nyob tau ob peb hnub, nws mus tom tej tsev sablaj thiab qhia hais tias Yexus yog Vajtswv tus Tub. Txhua tus uas hnov nws qhia lawv xav tsis thoob li. Lawv sib nug hais tias, “Tus txivneej no tsis yog tus uas tsimtxom cov ntseeg nram lub nroog Yeluxalees los? Nws tuaj ntawm no twb yog nws tuaj ntes cov ntseeg coj rov qab mus rau cov thawj ntawm cov povthawj ntag los sav.” Tiamsis tej lus uas Xaulus qhia nrov ncha zuj zus. Thiab tej uas nws qhia ua timkhawv rau sawvdaws paub tseeb hais tias Yexus yog tus Mexiyas, ces cov Yudais uas nyob hauv lub nroog Damaxes txawm tsis muaj lus hais lawm. Tom qab ntawd tsis ntev, cov Yudais txawm sablaj hais tias lawv yuav muab Xaulus tua povtseg. Tiamsis twb muab neeg qhia rau Xaulus paub lawm. Cov Yudais niaj hnub niaj hmo zov lub nroog ntawd tej roojvag tos ntes Xaulus coj mus tua povtseg. Tiamsis muaj ib hmos Xaulus cov thwjtim muab ib lub tawb rau Xaulus nyob hauv, thiab lawv muab hlua khi lub tawb tso dauv rau sab ntsa yeej nraud. Thaum Xaulus khiav mus txog nram lub nroog Yeluxalees, nws txawm mus cuag cov thwjtim. Nws xav nrog lawv koom ua ib pab, tiamsis lawv ntshai nws, lawv tsis ntseeg hais tias nws yog ib tug thwjtim tiag. Tiamsis Npananpas coj Xaulus mus cuag cov timthawj. Npananpas qhia tej uas Xaulus pom thiab tau ua lawm rau lawv mloog. Npananpas qhia hais tias, thaum Xaulus tabtom taug kev mus pem lub nroog Damaxes, Xaulus twb pom tus Tswv Yexus, thiab tus Tswv twb nrog Xaulus tham lawm. Thiab Npananpas qhia rau lawv hais tias, thaum Xaulus nyob pem lub nroog Damaxes, Xaulus muaj lub siab tawv qhia Yexus zaj, nws tsis ntshai leejtwg li. Xaulus nrog cov timthawj nyob, nws mus thoob plaws lub nroog Yeluxalees, nws muaj lub siab tawv qhia Yexus zaj rau ub rau no. Xaulus pheej nrog cov Yudais uas hais lus Kilis sib tham thiab sib cav, tiamsis lawv cov ntawd tuavhauv yuav muab Xaulus tua povtseg. Thaum cov ntseeg hnov li ntawd, lawv txawm coj Xaulus mus rau pem lub nroog Xixaleyas thiab xa nws mus rau pem lub nroog Talaxus lawm. Thaum ntawd cov ntseeg uas nyob thoob plaws hauv lub xeev Yudas, lub xeev Kalilais thiab lub xeev Xamalis tsis muaj kev ntxhov siab tau ib ntus. Vaj Ntsujplig tus Dawbhuv txhawb cov ntseeg lub zog, ua rau cov ntseeg muab siab rau ntseeg; muaj neeg los ntseeg coob zuj zus ntxiv, thiab lawv ua lub neej hwm Vajtswv. Petus mus txhua nrho txhua qhov chaw. Muaj ib zaug nws mus saib cov ntseeg uas nyob pem lub nroog Lidas. Thaum nws nyob hauv lub nroog ntawd, nws pom ib tug txivneej hu ua Ane-as. Ane-as tuag tes tuag taw, nws sawv tsis taus mus qhov twg; nws pw saum txaj tau yim xyoo los lawm. Petus hais rau Ane-as hais tias, “Yexus twb kho koj zoo lawm. Koj cia li sawv tu koj lub chaw pw.” Tamsim ntawd Ane-as txawm sawv tsees. Tagnrho cov neeg uas nyob hauv lub nroog Lidas thiab hauv lub nroog Saloos pom Ane-as zoo lawm, lawv txawm ntseeg tus Tswv Yexus. Muaj ib tug pojniam hu ua Tanpithas nyob hauv lub nroog Yaupas, nws yog ib tug ntseeg Yexus. (Nws lub npe Kilis hu ua Daulakas lub npe ntawd txhais hais tias, “muaslwj.”) Nws niaj hnub ua zoo thiab pab cov neeg txomnyem. Thaum Petus tseem nyob nram lub nroog Lidas, Daulakas mob heev, nws txawm tuag lawm. Thaum lawv muab nws lub cev ntxuav tas, lawv nqa nws mus tso rau ib chav tsev txheej saud. Lub nroog Yaupas nyob ze lub nroog Lidas. Thaum cov ntseeg hnov hais tias Petus nyob nram lub nroog Lidas, lawv txawm txib ob tug txivneej mus hais rau Petus hais tias, “Koj cia li nrog wb mus tamsim no.” Petus txawm sawv tsees nrog nkawd mus. Thaum nws mus txog, nkawd coj nws mus rau chav tsev txheej saud. Cov pojntsuam los sawv vij Petus. Lawv quaj zom zaws thiab lawv kom Petus saib tej tsho loj tsho me uas thaum Daulakas tseem ua neej nyob, Daulakas xaws rau lawv hnav. Petus kom sawvdaws tawm mus sab nraud, thaum lawv tawm tas lawm, Petus txawm txhos caug thov Vajtswv; thaum nws thov tas, nws tig los hais rau tus tuag hais tias, “Tanpithas, koj cia li sawv.” Tanpithas txawm rua hlo qhovmuag, thaum nws pom Petus, nws sawv tsees zaum. Petus cev tes mus rub nws sawv. Petus txawm hu cov ntseeg thiab cov pojntsuam los saib thiab muab Daulakas cob rau lawv. Zaj no nrov ncha mus thoob plaws hauv lub nroog Yaupas, ces txawm muaj neeg coob coob los ntseeg tus Tswv Yexus. Petus nyob hauv lub nroog Yaupas tau ntau hnub, nws so hauv Ximoos tus uas luam tawv tsiaj lub tsev. Muaj ib tug txivneej uas yog neeg Loos nyob hauv lub nroog Xixaleyas hu ua Kauneli-us; nws yog ib tug thawj tubrog uas saib pab tubrog uas hu ua “Italis Pab.” Nws yog ib tug uas coj Vajtswv txoj kevcai nruj thiab nws tsevneeg puavleej hwm Vajtswv. Nws pheej pab cov neeg Yudais uas txomnyem, thiab nws niaj hnub thov Vajtswv. Muaj ib hnub thaum hnub qaij nws ua yogtoog pom Vajtswv ib tug timtswv los hauv nws chav tsev thiab hu nws hais tias, “Kauneli-us.” Kauneli-us saib dheev tus timtswv ntawd, nws ntshai kawg li, nws txawm nug tus timtswv hais tias, “Koj xav yuav dabtsi?” Tus timtswv teb hais tias, “Vajtswv twb hnov koj tej lus thov thiab pom tej uas koj pub rau cov neeg txomnyem lawm. Koj cia li txib neeg mus nram lub nroog Yaupas, mus hu Ximoos tus uas muaj dua ib lub npe hu ua Petus kom tuaj ntawm no. Petus nyob hauv Ximoos tus uas luam tawv tsiaj lub tsev; lub tsev ntawd nyob ntawm ntug hiavtxwv.” Thaum Vajtswv tus timtswv mus lawm, Kauneli-us txawm hu ob tug tubtxib thiab ib tug tubrog los cuag nws. Tus tubrog ntawd yog ib tug uas coj Vajtswv txoj kevcai nruj heev thiab yog ib tug uas niaj hnub ua haujlwm rau Kauneli-us. Kauneli-us piav tej uas nws pom huv tibsi rau lawv peb tug ntawd mloog, thiab nws txib lawv mus rau nram lub nroog Yaupas. Hnub tom qab thaum peb tug ntawd tabtom mus yuav txog lub nroog Yaupas. Thaum yuav luag tavsu, Petus nce mus thov Vajtswv saum tsev. Petus tshaib plab, nws xav noj mov; thaum luag tseem tabtom ua su noj, Petus txawm ua yogtoog. Petus pom rooj ntug qhib thiab muaj ib yam zoo li daim ntaub dav dav muaj hlua khi plaub ceg kaum tso dauv saum ntuj los rau hauv ntiajteb. Petus pom txhua yam tsiaj, tsis hais nab, nab qa, qav thiab tej noog puavleej nyob hauv daim ntaub ntawd. Ces txawm muaj ib lub suab hais rau Petus hais tias, “Petus, koj cia li sawv thiab muab tua noj!” Tiamsis Petus hais tias, “Tsis tau, tus Tswv! Kuv yeej ibtxwm tsis noj tej uas kevcai txwv tsis pub noj.” Lub suab ntawd txawm rov hais dua rau Petus hais tias, “Tej uas Vajtswv hais tias huv lawm, koj tsis txhob hais tias tsis huv.” Muaj li ntawd txog peb zaug, ces daim ntaub ntawd txawm rov rau saum ntuj lawm. Thaum Petus tabtom xav tsis thoob rau tej uas nws ua yogtoog pom ntawd, peb tus txivneej uas Kauneli-us txib tuaj, lawv tuaj nrhiav tau Ximoos lub tsev, thiab lawv sawv sab nraud qhovrooj. Lawv hu hais tias, “Ximoos Petus puas nyob hauv nej tsev?” Thaum Petus tseem xav txog zaj yogtoog uas nws pom ntawd, Vaj Ntsujplig txawm hais rau Petus hais tias, “Koj saib, muaj peb tug txivneej tuaj nrhiav koj. Koj cia li nqis mus rau txheej hauv thiab nrog lawv mus, tsis txhob xav li cas, rau qhov twb yog kuv txib lawv tuaj.” Petus nqis rau txheej hauv, thiab nws hais rau peb tug txivneej ntawd hais tias, “Tus uas nej tuaj nrhiav yog kuv ntag, nej tuaj nrhiav kuv ua dabtsi?” Lawv teb hais tias, “Tus thawj tubrog Kauneli-us txib peb tuaj. Nws yog ib tug neeg ncaj ncees thiab coj Vajtswv txoj kevcai nruj, cov Yudais sawvdaws puavleej hwm nws. Vajtswv ib tug timtswv hais rau nws hais tias, kom nws hu koj mus saib nws, nws thiaj yuav tau hnov tej uas koj qhia.” Ces Petus txawm coj cov txivneej ntawd los hauv tsev thiab lawv pw ib hmos ntawd. Hnub tom qab Petus txawm nrog lawv mus; cov ntseeg uas nyob hauv lub nroog Yaupas muaj qee leej nrog Petus mus thiab. Hnub tom qab Petus mam li mus txog hauv lub nroog Xixaleyas. Kauneli-us twb hu tej kwvtij neejtsa thiab tej phoojywg tuaj nyob hauv nws tsev tos Petus lawm. Thaum Petus mus yuav txog ntawm Kauneli-us tsev, Kauneli-us txawm tawm tuaj tos Petus thiab txhos caug ntua ntawm Petus kotaw hawm Petus. Tiamsis Petus tuav nkaus Kauneli-us tsa nws sawv thiab hais tias, “Koj cia li sawv! Kuv yog neeg ib yam li koj thiab xwb.” Petus thiab Kauneli-us txawm sib tham mus rau hauv tsev, Petus pom muaj neeg coob coob tuaj nyob tos nws lawm. Petus hais rau cov neeg ntawd hais tias, “Nej twb paub lawm hais tias cov Yudais txoj kevcai yeej ibtxwm tsis pub cov Yudais mus saib lossis nrog lwm Haivneeg, tiamsis Vajtswv qhia rau kuv hais tias kuv tsis txhob hu leejtwg hais tias yog neeg tsis huv. Yog li ntawd, thaum koj txib neeg tuaj hu kuv, kuv tsis yig li, kuv thiaj cia li tuaj. Kuv xav paub saib koj hu kuv tuaj ua dabtsi?” Kauneli-us teb hais tias, “Tau plaub hnub dhau los uas yog tib lub sijhawm thaum peb teev hnub qaij no, kuv tabtom thov Vajtswv hauv kuv tsev. Tamsim ntawd, kuv txawm pom ib tug txivneej hnav ris tsho ci ntsa iab los sawv ntawm kuv hauv ntej. Nws hais rau kuv tias, ‘Kauneli-us, Vajtswv twb hnov koj tej lus thov thiab pom tej uas koj muab pub rau cov neeg txomnyem lawm. Koj cia li txib neeg mus hu Ximoos Petus nram lub nroog Yaupas tuaj. Nws so hauv Ximoos tus uas luam tawv tsiaj lub tsev; lub tsev ntawd nyob ntawm ntug hiavtxwv.’ Ces tamsim ntawd kuv txawm txib neeg tuaj hu koj, thiab koj txaus siab hlo tuaj. Nimno Vajtswv nrog peb nyob ntawm no, peb tabtom tos mloog tej uas tus Tswv tau qhia kom koj hais rau peb.” Petus pib qhia rau lawv hais tias, “Nimno kuv paub tseeb hais tias Vajtswv tsis xaiv leejtwg ntsejmuag. Txawm yog haivneeg twg los xij, Vajtswv lees yuav txhua tus uas hwm Vajtswv thiab ua haum Vajtswv siab. Nej twb paub txojlus uas Vajtswv qhia rau cov neeg Yixalayees lawm. Txojlus ntawd yog Txojmoo Zoo uas hais tias tus uas ntseeg Yexus Khetos tus uas yog sawvdaws tus Tswv, tus ntawd yuav tau nyob kaj siab lug. Nej twb paub zaj uas pib muaj hauv lub xeev Kalilais thiab nrov ncha mus thoob plaws lub tebchaws Yixalayees, tom qab uas Yauhas qhia hais tias neeg yuav tsum ua kevcai raus dej. Thiab nej paub txog zaj uas Vajtswv twb pub Vaj Ntsujplig tus Dawbhuv thiab hwjchim rau Yexus tus uas yog neeg Naxales lawm. Yexus mus thoob plaws txhua qhov chaw, nws ua haujlwm zoo, thiab cov neeg uas raug dab nws ntiab dab tawm huv tibsi. Yexus ua tau li ntawd, rau qhov Vajtswv nrog nws. Peb twb pom txhua yam uas Yexus ua hauv cov Yixalayees tej zos, thiab hauv lub nroog Yeluxalees, peb ua tau timkhawv hais tias yeej muaj tseeb tiag. Txawm yog nws ua li ntawd los luag tseem muab nws coj mus ntsia rau saum ntoo khaublig thiab muab nws tua povtseg. Tiamsis peb hnub tom qab Vajtswv tsa nws sawv hauv qhov tuag rov qab los thiab nws tau los tshwm rau ib cov neeg pom. Tsis yog sawvdaws pom, tiamsis tsuas yog peb cov uas Vajtswv twb xub xaiv cia ua timkhawv pom xwb. Thaum Vajtswv tsa nws sawv hauv qhov tuag rov qab los, peb cov uas ua timkhawv peb tau nrog nws noj nws haus ua ke. Thiab nws kom peb mus qhia Txojmoo Zoo rau sawvdaws thiab ua timkhawv qhia hais tias nws yog tus uas Vajtswv tsa ua tus txiav txim rau cov neeg ciaj thiab cov neeg tuag. Cov uas cev Vajtswv lus puavleej hais tias Vajtswv yuav zam txim rau txhua tus uas ntseeg Yexus tus uas muaj hwjchim.” Thaum Petus tseem tabtom qhia, Vaj Ntsujplig tus Dawbhuv txawm los rau txhua tus uas tabtom mloog tej lus uas Petus qhia. Thaum cov Yudais uas ntseeg Yexus uas nrog Petus tuaj nram lub nroog Yaupas tuaj pom hais tias Vajtswv pub Vaj Ntsujplig tus Dawbhuv rau lwm Haivneeg lawm thiab, lawv xav tsis thoob li, rau qhov lawv hnov cov neeg ntawd hais tau lus txawv txawv thiab qhuas Vajtswv tus uas muaj hwjchim loj. Petus hais tias, “Cov neeg no twb tau txais Vaj Ntsujplig tus Dawbhuv ib yam li peb tau txais lawm. Leejtwg tseem yuav txwv tsis pub muab cov neeg no ua kevcai raus dej thiab?” Yog li ntawd, Petus thiaj tuav Yexus Khetos lub npe muab lawv ua kevcai raus dej. Ces lawv thov kom Petus nrog lawv nyob ob peb hnub. Cov timthawj thiab cov ntseeg uas nyob txhua qhov hauv lub xeev Yudas hnov hais tias lwm Haivneeg los ntseeg Vajtswv Txojlus lawm thiab. Thaum Petus rov qab mus txog nram lub nroog Yeluxalees, cov Yudais uas hais tias yuav tsum muab lwm Haivneeg xub ua kevcai txiav tso, mam li pub lawv los koom cov Yudais txawm thuam Petus hais tias, “Ua li cas koj mus saib lwm Haivneeg uas tsis ua kevcai txiav thiab tseem nrog lawv noj mov ua ke thiab?” Petus pib piav txhua yam uas nws pom thaum hauvpaus los rau lawv mloog hais tias, “Thaum kuv nyob hauv lub nroog Yaupas, kuv tabtom thov Vajtswv, ces kuv txawm ua yogtoog pom ib yam zoo li daim ntaub dav dav muaj hlua khi plaub ceg kaum tso dauv saum ntuj los rau ntawm kuv xubntiag. Kuv ua tib zoo saib, kuv pom muaj txhua yam tsiaj, tsis hais nab, nab qa, qav thiab tej noog nyob hauv daim ntaub ntawd. Ces kuv txawm hnov ib lub suab hais rau kuv hais tias, ‘Petus, koj cia li sawv thiab muab tua noj.’ Tiamsis kuv hais tias, ‘Tsis tau, tus Tswv! Kuv yeej ibtxwm tsis noj tej uas kevcai txwv tsis pub noj lossis tej tsiaj uas tsis huv.’ Lub suab ntawd rov hais rau kuv tias, ‘Tej uas Vajtswv hais tias huv lawm, koj tsis txhob hais tias tsis huv.’ Muaj li ntawd peb zaug, ces daim ntaub txawm rov rau saum ntuj lawm. Tamsim ntawd peb tug txivneej uas tuaj pem lub nroog Xixaleyas tuaj, lawv txawm tuaj txog hauv lub tsev uas kuv so. Vaj Ntsujplig hais kom kuv cia li nrog lawv mus tsis txhob xav li cas. Ces rau leej kwvtij ntawm no uas yog cov ntseeg uas nyob hauv lub nroog Yaupas, lawv nrog kuv mus pem lub nroog Xixaleyas thiab peb mus rau hauv Kauneli-us tsev. Kaneli-us hais rau peb hais tias nws pom ib tug timtswv ceebtsheej los hauv nws tsev thiab hais rau nws tias, ‘Koj cia li txib neeg mus nram lub nroog Yaupas, mus hu ib tug txivneej hu ua Ximoos Petus tuaj. Nws yuav qhia tej lus uas cawm koj thiab koj tsevneeg kom nej dim nej lub txim.’ Thaum kuv pib qhia, Vaj Ntsujplig tus Dawbhuv txawm los rau lawv ib yam li los rau peb thaum chivthawj. Thaum ntawd kuv txawm nco dheev txog tej lus uas tus Tswv qhia hais tias, ‘Yauhas muab nej ua kevcai raus rau hauv dej, tiamsis nej yuav tau ua kevcai raus los ntawm Vaj Ntsujplig tus Dawbhuv.’ Vajtswv twb pub Vaj Ntsujplig tus Dawbhuv rau lwm Haivneeg ib yam li nws pub rau peb cov uas ntseeg tus Tswv lawm thiab. Vajtswv twb pub rau lawv lawm, kuv yuav txwv Vajtswv los yeej tsis tau li.” Thaum lawv hnov li ntawd, lawv tsis thuam Petus lawm; lawv ua Vajtswv tsaug hais tias, “Nimno Vajtswv qhib kev rau lwm Haivneeg los ntseeg kom lawv thiaj tso lawv tej kev txhaum tseg thiab tau txojsia.” Thaum luag muab Xatefanaus tua lawm, cov ntseeg raug kev tsimtxom heev, ces cov ntseeg ibtxhia txawm tsiv mus nyob rau pem lub xeev Faunikias; ibtxhia tsiv mus nyob rau tim koog Povtxwv Xaipas thiab ibtxhia tsiv mus nyob rau pem lub nroog Ati-aukias, thiab lawv tsuas qhia txojmoo zoo rau cov Yudais nkaus xwb. Tiamsis cov ntseeg uas khiav mus ntawd, muaj cov neeg uas nyob hauv lub koog Povtxwv Xaipas thiab lub koog Povtxwv Kulenes, qee leej mus txog rau hauv lub nroog Ati-aukias, ces lawv qhia txojmoo zoo uas hais txog tus Tswv Yexus rau lwm Haivneeg thiab. Tus Tswv lub hwjchim nrog lawv thiaj muaj neeg coob coob ntseeg thiab los cuag tus Tswv. Thaum cov ntseeg uas nyob nram lub nroog Yeluxalees hnov li no, lawv txawm txib Npananpas mus rau pem lub nroog Ati-aukias. Thaum Npananpas mus txog ped, nws pom hais tias Vajtswv foom koob hmoov rau lawv, nws zoo siab kawg thiab nws txhawb lawv lub zog kom lawv muab siab npuab tus Tswv thiab ntseeg tiag tiag. Npananpas yog ib tug neeg ncaj ncees; nws puv npo Vaj Ntsujplig tus Dawbhuv thiab muab siab rau ntseeg. Nws coj tau cov neeg uas nyob hauv lub nroog ntawd coob leej los ntseeg tus Tswv. Tom qab ntawd Npananpas txawm mus nrhiav Xaulus hauv lub nroog Talaxus. Thaum nws nrhiav tau Xaulus lawm, nws coj Xaulus los nrog nws nyob hauv lub nroog Ati-aukias. Nkawd nrog cov ntseeg nyob tau ib xyoos, thiab nkawd niaj hnub qhia cov ntseeg uas coob coob ntawd. Pawg ntseeg uas nyob hauv lub nroog Ati-aukias yog thawj pawg uas tis lub npe hu ua Cov Ntseeg Yexus. Lub sijhawm ntawd muaj ib co cev Vajtswv lus tuaj nram lub nroog Yeluxalees tuaj txog pem lub nroog Ati-aukias. Vaj Ntsujplig kom cov cev Vajtswv lus ntawd tus uas hu ua Ankanpus sawv ntsug qhia txog tej uas yuav tshwm los yav tom ntej. Nws hais tias yuav muaj kev tshaib kev nqhis thoob plaws lub ntiajteb. (Ces lub sijhawm uas Kalaudi-us ua vajntxwv txawm muaj kev tshaib kev nqhis tiag). Cov ntseeg sawvdaws pom zoo kom ib leeg muab mentsis nyiaj raws li lawv muaj xa mus rau cov kwvtij ntseeg Yexus uas nyob nram lub xeev Yudas. Lawv txawm ua li ntawd, lawv muab cov nyiaj ntawd rau Xaulus thiab Npananpas coj mus rau cov txwjlaug uas saib cov ntseeg nrad. Lub sijhawm ntawd Vajntxwv Helauj muab cov ntseeg Yexus qee leej coj mus tsimtxom. Helauj kom luag muab ntaj tua Yauhas tus tijlaug Yakaunpaus povtseg. Thaum nws pom hais tias tej uas nws ua ntawd haum cov Yudais siab, nws txawm hais kom luag ntes Petus coj mus kaw rau hauv tsev lojcuj. (Thaum ntawd sawvdaws tabtom ua Kevcai Noj Ncuav tsis Xyaw Keeb.) Thaum lawv ntes tau Petus lawm, lawv coj Petus mus kaw rau hauv tsev lojcuj thiab kom plaub pab tubrog zov Petus, ib pab twg plaub leeg. Helauj xav hais tias tom qab uas ua Kevcai Hla Dhau tas, nws yuav coj Petus los txiav txim thiab muab Petus tua tabmeeg cov pejxeem. Thaum Petus tseem raug kaw hauv tsev lojcuj, cov ntseeg kub siab lug thov Vajtswv pab Petus. Ua ntej hnub uas Helauj yuav coj Petus los rau cov pejxeem, hmo ntawd Petus pw tsaug zog hauv ob tug tubrog kis nruab nrab. Luag muab ob txoj saw hlau khi Petus, thiab muaj tubrog zov lub tsev lojcuj lub roojvag huv tibsi. Tamsim ntawd tus Tswv ib tug timtswv txawm los sawv ntawm Petus ib sab, thiab muaj duab ci los rau hauv chav tsev uas Petus pw. Tus timtswv ntawd tuav nkaus Petus xubpwg diaj kom Petus tsim thiab hais rau Petus hais tias, “Koj cia li sawv!” Ces tamsim ntawd ob txoj saw hlau uas khi Petus ob txhais tes txawm plam plaws lawm. Tus timtswv hais rau Petus hais tias, “Koj cia li sia siv khov kho thiab rau khau.” Petus txawm ua li ntawd. Tus timtswv rov hais rau Petus hais tias, “Koj cia li muab koj lub tsho ntev hnav thiab nrog kuv mus.” Petus txawm lawv tus timtswv qab tawm mus rau sab nraud. Petus tsis paub xyov yog nws ua npau suav lossis yog tiag; nws xav hais tias ntshai yog nws ua npau suav xwb. Tus timtswv thiab Petus mus dhau thawj pab tubrog thiab mus dhau pab ob, nkawd mam li mus txog ntawm lub roojvag hlau uas yuav mus rau hauv lub nroog. Thaum nkawd los txog ntawm lub roojvag hlau, lub roojvag txawm qhib plho rau nkawd, nkawd txawm tawm mus. Nkawd taug kev mus mentsis, ces tus timtswv txawm ncaim Petus lawm. Thaum ntawd Petus thiaj feeb meej, thiab nws hais tias, “Nimno kuv paub tseeb hais tias Vajtswv txib nws ib tug timtswv saum ntuj los pab kuv dim ntawm Helauj txhais tes thiab dim ntawm tej kev phem uas cov Yudais yuav ua rau kuv lawm.” Thaum Petus paub hais tias Petus dim lawm, Petus txawm mus rau tom Malis uas yog Yauhas Malakaus niam lub tsev. Muaj neeg coob coob tuaj ua ke thov Vajtswv hauv. Petus mus khob qhovrooj thiab hu, ces ib tug nkauj qhe hu ua Laudas txawm los xauj saib yog leejtwg. Thaum nws nco tau hais tias yog Petus lub suab, nws zoo siab kawg li; nws tsis nco qhib qhovrooj, nws txawm khiav ceev nrooj mus qhia rau sawvdaws hais tias Petus sawv sab nraum qhovrooj. Lawv hais rau Laudas hais tias, “Ntshai koj vwm lawm.” Tiamsis Laudas hais tias, “Yog Petus tiag hos.” Lawv txawm hais tias, “Ntshai yog tus timtswv uas ibtxwm nrog Petus xwb.” Petus tseem nyob sab nraud khob qhovrooj. Thaum lawv qhib plho qhovrooj, lawv pom dheev Petus, lawv xav tsis thoob li. Petus kom sawvdaws ua twjywm, ces Petus txawm qhia qhov uas tus Tswv coj nws tawm hauv tsev lojcuj los rau lawv mloog, thiab nws hais rau lawv hais tias, “Nej cia li mus qhia tej no rau Yakaunpaus thiab cov ntseeg paub.” Thaum Petus hais li ntawd tas, ces nws txawm mus rau lwm qhov lawm. Thaum kaj ntug cov tubrog uas zov lub tsev lojcuj tsis pom Petus lawm, lawv poob siab kawg li. Helauj txib neeg mus nrhiav Petus, tiamsis lawv nrhiav tsis tau Petus. Helauj txawm hu cov tubrog uas zov lub tsev lojcuj los nug thiab kom luag muab cov tubrog uas zov lub tsev lojcuj tua povtseg. Tom qab ntawd Helauj tawm hauv lub xeev Yudas mus nyob tau ib ntus pem lub nroog Xixaleyas. Helauj chim rau cov neeg uas nyob hauv lub nroog Tiles thiab Xidoos, cov neeg ntawd ua ke tuaj cuag Helauj. Lawv xub mus cuag tus nom uas hu ua Npalatus uas saib Helauj lub tsev kom nws pab, lawv mam li mus cuag Helauj thiab thov nrog nws sib raug zoo. Lawv ua li ntawd, rau qhov lawv cov neeg pheej mus yuav mov hauv Helauj lub tebchaws los noj. Thaum txog hnub uas Helauj teem rau lawv tuaj cuag nws, Helauj hnav nws cev ris tsho vajntxwv thiab zaum saum nws lub zwmtxwv hais lus rau cov pejxeem. Cov pejxeem hais nrov nrov hais tias, “Lub suab no yog vajtswv lub suab tsis yog neeg lub.” Tamsim ntawd tus Tswv ib tug timtswv los rau txim rau Helauj, rau qhov Helauj tsis hwm Vajtswv. Txawm muaj kas noj Helauj lub cev, Helauj thiaj tuag lawm. Vajtswv Txojlus thiaj loj hlob thiab nthuav dav zuj zus mus rau txhua qhov. Thaum Npananpas thiab Xaulus ua haujlwm tas, nkawd txawm rov hauv lub nroog Yeluxalees mus, thiab nkawd coj Yauhas Malakaus nrog nkawd mus. Pawg ntseeg uas nyob hauv lub nroog Ati-aukias muaj qee leej yog cov cev Vajtswv lus, qee leej yog xibhwb: Cov ntawd ib tug yog Npananpas, ib tug yog Xime-oos tus uas (Hu Ua Dub), ib tug yog Luki-us, (tus uas yog neeg Kulenes), ib tug yog Mana-ees (tus uas nrog tus tswvxeev Helauj loj hlob ua ke), thiab ib tug yog Xaulus. Thaum lawv tabtom ua kevcai yoo mov thiab thov Vajtswv, Vaj Ntsujplig tus Dawbhuv hais rau lawv hais tias, “Nej cia li tsa Npananpas thiab Xaulus ua tes haujlwm uas kuv kom nkawd ua.” Thaum lawv ua kevcai yoo mov thiab thov Vajtswv tas, lawv tsa tes rau nkawd thiab txib nkawd mus ua haujlwm. Vaj Ntsujplig tus Dawbhuv txib Npananpas thiab Xaulus nkawd mus. Nkawd mus rau tom lub nroog Xelukias thiab caij nkoj mus rau tim lub koog Povtxwv Xaipas. Thaum nkawd mus txog hauv lub nroog Xalamis, nkawd txawm mus qhia Vajtswv txojlus rau hauv cov Yudais tej tsev sablaj. Nkawd coj Yauhas Malakaus mus pab nkawd ua haujlwm. Thaum lawv mus txog ntawm lub koog Povtxwv Pafaus, lawv ntsib ib tug txivneej hu ua Npalas-Yexus, nws yog ib tug neeg Yudais, nws txawj ua khawvkoob, thiab nws hais tias nws yog ib tug cev Vajtswv lus. Npalas-Yexus yog tus nom uas kav lub koog Povtxwv Xaipas tus phoojywg. Tus nom ntawd ntse heev, nws hu ua Xelanki-us Paulus. Nws thiaj txib neeg mus hu Npananpas thiab Xaulus los cuag nws, rau qhov nws xav mloog Vajtswv Txojlus. Tiamsis tus uas txawj ua khawvkoob (nws lub npe Kilis hu ua Elimas), nws tawmtsam Npananpas thiab Xaulus thiab tsis pub tus nom ntawd ntseeg Vajtswv Txojlus. Xaulus tus uas muaj dua ib lub npe hu ua Paulus puv npo Vaj Ntsujplig tus Dawbhuv, nws saib ntsoov Elimas thiab hais tias, “Koj yog dab Ntxwgnyoog tus tub! Koj tawmtsam txhua yam uas zoo; koj nyiam dag ntxias thiab ua phem xwb. Koj tseem yuav muab Vajtswv Txojlus uas yog qhov tseeb hloov ua lus dag thiab los! Nimno tus Tswv yuav rau txim rau koj; koj yuav tsis pom kev ib ntus, txawm yog duab tshav ntuj los koj yeej yuav saib tsis pom.” Tamsim ntawd txawm muaj ib yam zoo li huab los plooj nkaus Elimas ob lub qhovmuag, ces nws txawm tsis pom kev lawm; nws xuas mus rau ub rau no nrhiav neeg tuav nws tes coj nws mus. Thaum tus nom pom li ntawd, nws txawm ntseeg; nws xav tsis thoob rau Vajtswv Txojlus uas nws hnov ntawd. Paulus thiab nws ob tug phoojywg caij nkoj ntawm lub nroog Pafaus mus txog tim lub nroog Penkas hauv tebchaws Pafilias, ces Yauhas Malakaus txawm ncaim Paulus thiab Npananpas rov qab mus rau nram lub nroog Yeluxalees lawm. Paulus thiab Npananpas sawv kev hauv Penkas mus txog pem lub nroog Ati-aukias uas nyob hauv tebchaws Pixidias. Hnub Xanpataus nkawd mus mloog lus qhuab qhia hauv lub tsev sablaj. Thaum muaj neeg nyeem Mauxes txoj Kevcai thiab tej lus uas cov cev Vajtswv lus sau cia tas lawm, cov neeg uas saib lub tsev sablaj kom ib tug mus hais rau nkawd hais tias, “Ob tug kwvtij, yog neb muaj lus hais txhawb sawvdaws zog, thov neb cia li hais.” Paulus txawm sawv tsees thiab kom sawvdaws nyob twjywm, nws pib qhia hais tias, “Cov kwvtij Yixalayees thiab lwm Haivneeg uas hwm Vajtswv, nej cia li mloog kuv qhia! Cov Yixalayees tus Vajtswv xaiv peb cov yawgkoob los ua nws haivneeg. Thaum lawv khiav mus nyob nram tebchaws Iziv, Vajtswv foom koob hmoov rau lawv, lawv huamvam coob heev. Vajtswv tus uas muaj hwjchim loj kawg nkaus tau coj lawv khiav tawm nram tebchaws Iziv los. Vajtswv ua siab ntev rau lawv tau plaub caug xyoo tom tiaj suabpuam. Thaum lawv los txog hauv tebchaws Kana-as, Vajtswv ua rau xya haivneeg uas nyob hauv lub tebchaws ntawd puastsuaj tas huv tibsi, thiab Vajtswv muab lub tebchaws ntawd rau cov Yixalayees nyob. Lawv nyob hauv lub tebchaws ntawd tau kwvlam li plaub puas tsib caug xyoo. “Tom qab ntawd Vajtswv tsa cov thawjtswj kav cov Yixalayees los txog thaum uas Xamuyees ua tus cev Vajtswv lus. Thaum lawv thov kom Vajtswv tsa ib tug vajntxwv kav lawv, Vajtswv txawm tsa Kises uas yog xeem Npeenyamees tus tub Xa-ules ua vajntxwv kav lawv tau plaub caug xyoo. Tom qab ntawd Vajtswv tsis pub Xa-ules ua vajntxwv lawm, ces Vajtswv txawm tsa Daviv ua vajntxwv kav cov Yixalayees, rau qhov Vajtswv hais tias, ‘Kuv pom Yexais tus tub Daviv yog tus uas ua haum kuv siab, thiab nws yeej yuav ua raws li txhua yam uas kuv kom nws ua’. Vajtswv tau tsa Daviv ib tug xeebntxwv los ua cov Yixalayees tus Cawmseej raws li Vajtswv tau coglus tseg lawm. Tus Cawmseej ntawd yog Yexus ntag. Thaum Yexus tseem tsis tau ua nws tes haujlwm, Yauhas qhia kom cov Yixalayees tso lawv tej kev txhaum tseg thiab ua kevcai raus dej. Thaum Yauhas ua nws tes haujlwm yuav tiav, nws hais rau sawvdaws hais tias, ‘Nej xav hais tias kuv yog leejtwg? Kuv tsis yog tus uas nej tabtom tos; tus uas yuav lawv kuv qab los nws muaj hwjchim loj dua kuv, kuv twb tsis tsimnyog hle nws txhais khau ntawm nws kotaw.’ “Cov kwvtij uas yog Anplahas cov xeebntxwv thiab nej txhua tus uas yog lwm Haivneeg uas tuaj pehawm Vajtswv ntawm no, txojlus uas yog txojkev cawm dim twb los txog peb lawm! Cov neeg uas nyob hauv lub nroog Yeluxalees thiab lawv cov nomtswv tsis paub hais tias Yexus yog tus Cawmseej, thiab lawv tsis totaub tej lus uas cov cev Vajtswv lus sau tseg uas muaj neeg niaj hnub nyeem rau lawv mloog txhua Hnub Xanpataus. Tiamsis qhov uas lawv txiav txim muab Yexus tua ntawd twb yog muaj kom tiav raws li tej lus uas cov cev Vajtswv lus tau sau tseg lawm. Txawm yog lawv nrhiav tsis tau txim rau Yexus los lawv tseem kom Philaj muab nws tua povtseg. Txhua yam kev phem uas lawv ua rau Yexus yog muaj raws li Vajtswv Txojlus uas hais txog nws lawm; lawv muab Yexus lub cev txo saum tus ntoo khaublig los thiab kwv mus faus rau hauv ib lub qhov ntxa. Tiamsis Vajtswv twb tsa Yexus sawv hauv qhov tuag rov qab los, thiab Yexus los tshwm rau cov neeg uas nrog Yexus tuaj pem lub xeev Kalilais tuaj rau nram lub nroog Yeluxalees pom ntau zaus. Lawv thiaj ua tau timkhawv rau cov Yixalayees hais tias, lawv twb pom Yexus lawm. Qhov uas wb tuaj ntawm no yog wb xav kom nej hnov Txojmoo Zoo uas Vajtswv tau coglus tseg rau peb cov yawgkoob lawm hais tias nws yuav pab peb cov uas yog lawv cov xeebntxwv. Qhov uas Vajtswv tsa Yexus sawv hauv qhov tuag rov qab los yog Vajtswv ua raws li Vajtswv tau coglus tseg rau hauv Phau Ntawv Nkauj ntu ob hais tias, ‘Koj yog kuv tus Tub; hnub no kuv yog koj Txiv lawm.’ Thiab qhov no ntag, yog qhov uas Vajtswv hais txog nws yuav tsa Yexus sawv hauv qhov tuag rov los, Yexus lub cev yuav tsis lwj hauv qhov ntxa: ‘Kuv yuav foom koob hmoov nplua mias rau nej raws li kuv twb coglus tseg rau Daviv lawm;’ Thiab nws tseem hais dua lwm zaj hais tias, ‘Koj yuav tsis cia koj tus tubtxib uas muab siab npuab koj lub cev lwj rau hauv lub qhov ntxa.’ Thaum Daviv ua tej haujlwm uas Vajtswv muab rau nws ua tiav lawm, tom qab ntawd nws txawm tuag. Lawv coj nws lub cev mus faus nrog nws cov yawgkoob, thiab nws lub cev lwj rau hauv qhov ntxa lawm. Tiamsis tus uas Vajtswv tsa sawv hauv qhov tuag rov qab los, tus ntawd lub cev tsis lwj li. Cov kwvtij, nej yuav tsum paub tseeb hais tias qhov uas wb tabtom qhia rau nej, yog wb qhia hais tias Yexus yog tus uas zam tau nej lub txim. Thiab nej yuav tsum paub hais tias txhua tus uas ntseeg Yexus, Yexus yuav daws tej kev txhaum uas khi lawv huv tibsi mus. Tej kev txhaum ntawd Mauxes txoj kevcai yeej daws tsis tau. Yog li ntawd, nej yuav tsum ceevfaj nyob tsam nej raug tej uas cov cev Vajtswv lus sau tseg hais tias, ‘Nej saib, nej cov uas thuam Vajtswv tej lus, nej yuav xav tsis thoob thiab nej yuav puastsuaj mus, rau qhov lub sijhawm no kuv tabtom ua kuv tes haujlwm. Txawm yog muaj neeg qhia tes haujlwm ntawd rau nej los nej yuav tsis ntseeg!’ ” Thaum Paulus thiab Npananpas tabtom tawm hauv tsev sablaj mus, sawvdaws txawm thov hais tias, “Hnub Xanpataus tom ntej no thov neb rov tuaj qhia peb dua thiab.” Thaum sawvdaws rov mus tsev tas lawm, txawm muaj cov Yudais thiab lwm Haivneeg uas coj cov Yudais txoj kevcai ntau leej nrog Paulus thiab Npananpas nkawd mus. Nkawd nrog lawv tham thiab txhawb lawv zog kom lawv muab siab rau ntseeg thiab nco ntsoov Vajtswv tshav ntuj. Thaum txog Hnub Xanpataus, cov neeg uas nyob hauv lub nroog ntawd tuaj yuav luag tas tuaj mloog Vajtswv Txojlus. Thaum cov Yudais pom muaj neeg coob coob tuaj mloog nkawd qhia, lawv khib, lawv thuam tej lus uas Paulus qhia thiab cem Paulus. Tiamsis Paulus thiab Npananpas nkawd yimhuab muaj lub siab tawv qhia. Nkawd hais tias, “Wb yuav tsum xub qhia Vajtswv Txojlus rau nej ua ntej, tiamsis nej tsis txais yuav. Thiab nej suav hais tias nej tsis tsimnyog tau txojsia ntev dhawv mus ibtxhis. Yog li ntawd wb yuav tso nej tseg thiab mus qhia lwm haivneeg. Rau qhov Vajtswv hais rau wb hais tias, ‘Kuv tsa koj ua qhov uas pom kev ci rau lwm Haivneeg. Koj yuav qhia txojkev cawm dim mus thoob plaws hauv qab ntuj no.’ ” Thaum lwm Haivneeg hnov li ntawd, lawv zoo siab thiab qhuas tus Tswv Txojlus heev; thiab cov neeg uas Vajtswv xaiv los yuav txojsia ntev dhawv mus ibtxhis txawm los ntseeg. Tus Tswv Txojlus txawm nrov ncha mus thoob plaws cheebtsam ntawd. Tiamsis cov Yudais ua rau cov txivneej uas yog cov thawjcoj hauv lub nroog thiab cov pojniam uas yog lwm Haivneeg uas coj Vajtswv txoj kevcai nruj tau kev ntxhov siab. Cov Yudais ntawd tsimtxom Npananpas thiab Paulus thiab ntiab kom nkawd tawm hauv cheebtsam ntawd mus. Nkawd txawm nchos tej hmoov av uas lo nkawd kotaw povtseg kom lawv paub hais tias nkawd tsis quavntsej lawv, thiab nkawd txawm mus qhia hauv lub nroog Ikauni-us lawm. Cov ntseeg hauv lub nroog Ati-aukias zoo siab kawg li, thiab lawv puv npo Vaj Ntsujplig tus Dawbhuv. Thaum Paulus thiab Npananpas nyob hauv lub nroog Ikauni-us, pheej muaj neeg tsimtxom nkawd thiab. Nkawd mus qhia Vajtswv Txojlus hauv cov Yudais tej tsev sablaj, muaj cov Yudais thiab lwm Haivneeg los ntseeg coob heev. Tiamsis cov Yudais uas tsis ntseeg ntxias kom lwm Haivneeg nrog lawv ntxub cov uas ntseeg Yexus. Yog li ntawd, ob tug timthawj txawm nyob hauv lub nroog ntawd tau ntev loo. Nkawd muaj lub siab tawv qhia txog tus Tswv uas pub hwjchim rau nkawd ua tej txujci tseemceeb kom sawvdaws paub hais tias Vajtswv txoj koob hmoov uas nkawd qhia yog txoj tseeb. Ces cov neeg uas nyob hauv lub nroog ntawd txawm tawg ua ob pab: ib pab tuaj cov Yudais tog thiab ib pab tuaj ob tug timthawj tog. Lwm Haivneeg thiab cov Yudais qee leej txawm nrog lawv cov thawjcoj tuavhauv ua phem thiab muab pobzeb yuav ntaus ob tug timthawj. Thaum ob tug timthawj hnov li ntawd, nkawd txawm khiav mus rau nram lub nroog Lixathas thiab lub nroog Denpis uas nyob hauv tebchaws Likaunias thiab hauv tej cheebtsam uas nyob ibncig ntawd lawm. Thiab nkawd qhia txojmoo zoo rau cov neeg hauv ob lub nroog ntawd. Nyob hauv lub nroog Lixathas muaj ib tug txivneej tuag ceg thaum nruab thiab los, nws mus tsis taus kev li. Tus txivneej ntawd ua tib zoo mloog tej lus uas Paulus qhia. Paulus tsa qhovmuag saib nws thiab pom hais tias nws muaj kev ntseeg txaus pab nws ob txhais ceg zoo. Ces Paulus txawm hais nrov nrov rau nws hais tias, “Koj cia li sawv tsees.” Tus ntawd txawm sawv tsees ncig mus ncig los. Thaum sawvdaws pom tej uas Paulus ua ntawd, lawv ua lawv cov lus Likaunias qw nrov nrov hais tias, “Tej vajtswv txia ua neeg los cuag peb lawm.” Lawv txawm muab Npananpas hu ua Xus thiab muab Paulus hu ua Helemes, rau qhov Paulus yog tus qhia. Tus povthawj uas teev tus vajtswv Xus, nws lub tuamtsev nyob sab nraum ntug nroog, nws txawm cab ib tug txiv nyuj thiab nqa paj ntoos tuaj txog ntawm lub roojvag uas yuav mus rau hauv lub nroog. Tus povthawj ntawd thiab cov pejxeem yuav coj tej ntawd tuaj fij rau ob tug timthawj. Thaum Npananpas thiab Paulus hnov hais tias lawv yuav ua li ntawd rau nkawd, nkawd txawm muab nkawd ob lub tsho dua rhe thiab khiav mus rau hauv cov neeg coob coob ntawd. Nkawd hais nrov nrov rau lawv hais tias, “Nej ua dabtsi li no? Wb yog neeg ib yam li nej thiab xwb! Wb tuaj ntawm no, yog tuaj qhia Txojmoo Zoo rau nej, kom nej tso tej uas nej ua tsis muaj qabhau tseg thiab los ntseeg tus Vajtswv uas muaj sia nyob. Nws yog tus uas tsim lub ntuj, lub ntiajteb, dej hiavtxwv thiab ib puas tsav yam uas nyob saum nruab ntug thiab hauv hiavtxwv. Yav tas los Vajtswv cia txhua haivneeg nyias ua raws li nyias lub siab nyiam. Tes haujlwm zoo uas Vajtswv ibtxwm ua yog nws pub muaj tshav muaj nag kom tej qoobloo siav raws caij raws nyoog thiab pub zaub mov rau nej noj kom nej tau nyob kaj siab lug. Tej no qhia rau sawvdaws paub tseeb hais tias muaj Vajtswv tiag.” Txawm yog ob tug timthawj qhia li ntawd rau lawv los lawv pheej yuav muab khoom fij rau nkawd, nkawd cheem yuav luag tsis yeej lawv. Thaum cov Yudais uas nyob hauv lub nroog Ati-aukias hauv tebchaws Pixidias thiab hauv lub nroog Ikauni-us tuaj txog lawv txawm ntxias kom sawvdaws tuaj lawv tog. Lawv muab pobzeb ntaus Paulus thiab muab nws cab tawm hauv lub nroog mus; lawv xav hais tias nws tuag lawm. Tiamsis thaum cov ntseeg tuaj sawv vij Paulus, Paulus sawv thiab rov mus rau hauv lub nroog. Hnub tom qab Paulus thiab Npananpas txawm mus rau nram lub nroog Denpis lawm. Thaum Paulus thiab Npananpas qhia txojmoo zoo hauv lub nroog Denpis muaj ntau leej los ntseeg. Tom qab ntawd, nkawd txawm rov mus rau pem lub nroog Lixathas, lub nroog Ikauni-us, thiab lub nroog Ati-aukias hauv cheebtsam Pixidias. Nkawd nplig thiab txhawb kom cov ntseeg muab siab rau ntseeg tsis txhob tso kev ntseeg tseg. Nkawd qhia lawv hais tias, “Peb cov ntseeg yeej yuav raug ntau yam kev txomnyem, peb thiaj tau mus Vajtswv lub Tebchaws.” Paulus thiab Npananpas tsa muaj cov txwjlaug rau txhua pawg ntseeg; nkawd ua kevcai yoo mov thiab thov Vajtswv, nkawd muab lawv fij rau Vajtswv tus uas lawv ntseeg thiab cia siab rau. Tom qab ntawd nkawd txawm hla cheebtsam Pixidias mus txog nram tebchaws Pafilias. Nkawd qhia Vajtswv Txojlus hauv lub nroog Penkas tas, ces nkawd txawm mus rau hauv lub nroog Atalias, thiab nkawd caij nkoj los rau tim lub nroog Ati-aukias uas cov ntseeg tsa nkawd ua ob tug ua tes haujlwm qhia txojmoo zoo uas nimno nkawd twb ua tiav lawm. Thaum nkawd rov qab los txog hauv lub nroog Ati-aukias, nkawd hu cov ntseeg tuaj ua ke; nkawd piav txhua yam uas Vajtswv tau pab nkawd thiab qhia qhov uas Vajtswv qhib kev rau lwm Haivneeg los ntseeg Vajtswv lawm rau lawv mloog. Nkawd nrog cov ntseeg ntawd nyob tau ib ntus. Thaum Paulus nkawd tseem nyob hauv lub nroog Ati-aukias, muaj ob peb tug txivneej tuaj nram lub xeev Yudas tuaj txog hauv lub nroog Ati-aukias. Lawv qhia cov ntseeg hais tias, “Nej yuav tsum ua kevcai txiav raws li Mauxes txoj Kevcai nej thiaj yuav dim nej lub txim.” Paulus thiab Npananpas nrog lawv cov ntawd sib cav txog zaj no. Thaum kawg sawvdaws thiaj pom zoo cia Paulus thiab Npananpas thiab cov ntseeg uas nyob hauv lub nroog Ati-aukias qee leej mus rau nram lub nroog Yeluxalees, mus nrog cov timthawj thiab cov txwjlaug sablaj saib yuav ua li cas. Cov ntseeg txawm xa nkawd mus. Thaum nkawd tabtom taug kev mus hla lub xeev Faunikias thiab lub xeev Xamalis, nkawd qhia cov ntseeg uas nyob hauv ob lub xeev ntawd hais tias, muaj lwm Haivneeg los ntseeg Vajtswv lawm thiab. Thaum cov ntseeg hnov li ntawd, cov ntseeg zoo siab kawg li. Thaum Paulus lawv mus txog nram lub nroog Yeluxalees, cov ntseeg, cov timthawj thiab cov txwjlaug sawvdaws tuaj tos lawv. Paulus nkawd qhia tej uas Vajtswv pab nkawd thaum nkawd mus qhia Txojmoo Zoo rau lwm Haivneeg rau lawv mloog. Tiamsis cov ntseeg uas yog cov Falixais pab, muaj qee leej txawm sawv tsees thiab hais tias, “Yuav tsum muab lwm Haivneeg uas los ntseeg ntawd ua kevcai txiav, thiab kom lawv coj raws li Mauxes txoj Kevcai.” Cov timthawj thiab cov uas saib cov ntseeg txawm muab zaj no los sablaj saib yuav ua li cas. Lawv sablaj ntev loo hais tsis txawj haum, ces Petus txawm sawv tsees hais rau lawv hais tias, “Cov kwvtij, nej twb paub hais tias thaum chivthawj, peb cov uas nyob ntawm no, Vajtswv xaiv kuv ua tus qhia Txojmoo Zoo rau lwm Haivneeg kom lawv tau hnov thiab los ntseeg. Thiab Vajtswv tus uas paub sawvdaws lub siab, nws pub Vaj Ntsujplig tus Dawbhuv rau lawv ib yam li nws pub rau peb lawm. Vajtswv ua li ntawd kom sawvdaws paub hais tias Vajtswv pom zoo hu lwm Haivneeg los ntseeg thiab. Vajtswv suav hais tias lwm Haivneeg thiab peb zoo tib yam nkaus. Vajtswv zam txim rau lawv, twb yog vim lawv ntseeg Vajtswv. Yog li ntawd, ua li cas nej tseem yuav muab lub nra hnyav rau cov ntseeg ris? Txawm yog peb cov yawgkoob thiab peb los yeej ris tsis taus lub nra ntawd. Nej ua li no twb yog nej sim Vajtswv siab ntag. Nej ua li ntawd tsis yog lawm. Qhov uas peb dim peb lub txim twb yog vim tus Tswv Yexus hlub peb xwb. Lawv los kuj ib yam nkaus li peb thiab.” Thaum Petus hais li ntawd tas, sawvdaws txawm nyob twjywm mloog Npananpas thiab Paulus qhia txog tej txujci loj thiab tseemceeb uas Vajtswv ua thaum nkawd mus qhia lwm Haivneeg. Thaum nkawd qhia tas lawm, Yakaunpaus hais tias, “Cov kwvtij, nej cia li mloog kuv hais! Ximoos nyuam qhuav qhia rau peb mloog hais tias thawj zaug uas Vajtswv los pab lwm Haivneeg, Vajtswv xaiv ib co los ua Vajtswv haivneeg. Cov uas cev Vajtswv lus tau qhia txog zaj no raws li Vajtswv Txojlus sau tseg hais tias, ‘Tus Tswv hais tias, tom qab ntawd kuv yuav los muab Daviv lub tsev uas vau lawm ua dua tshiab. Txawm yog lub tsev ntawd vau tas lawm los kuv yuav ua dua tshiab. Kuv ua li no kom txhua haivneeg uas nyob hauv qab ntuj no tau kev los cuag kuv, tsis hais xeem twg li, txhua tus uas kuv xaiv cia lawm lawv yeej yuav los cuag kuv. Tus Tswv uas hais li no, nws twb qhia zaj no rau sawvdaws paub thaum ub los lawm.’ ” Yakaunpaus hais ntxiv tias, “Kuv xav hais tias peb tsis txhob kom lwm Haivneeg uas tabtom los ntseeg ua raws li tej kevcai ntawd. Tiamsis peb cia li sau ntawv mus qhia rau lawv hais tias, kom lawv tsis txhob noj tej qhov txhia chaw uas luag muab fij rau dab lawm, thiab tsis txhob deev luag pojniam luag txiv, tsis txhob noj tej nqaij tsiaj uas hlua zawm cajdab tuag thiab tsis txhob noj ntshav. Rau qhov thaum ub los txhua Hnub Xanpataus yeej muaj neeg nyeem Mauxes txoj Kevcai hauv tej tsev sablaj thiab muaj neeg qhia Mauxes tej lus hauv txhua lub nroog.” Tom qab ntawd cov timthawj, cov txwjlaug thiab cov ntseeg sawvdaws pom zoo xaiv lawv pab qee leej nrog Paulus thiab Npananpas mus rau pem lub nroog Ati-aukias. Lawv xaiv tau ob leeg nrog Paulus nkawd mus; ob tug uas lawv xaiv ntawd, ib tug yog Yudas tus uas muaj dua ib lub npe hu ua Npaxanpas thiab ib tug yog Xilas; sawvdaws puavleej hwm nkawd. Tsab ntawv uas lawv sau rau nkawd nqa mus hais li no: “Peb cov uas yog cov timthawj thiab cov txwjlaug uas yog nej cov kwvtij, peb sau tsab ntawv no tuaj rau nej txhua tus ntseeg uas yog lwm Haivneeg uas nyob hauv lub nroog Ati-aukias hauv tebchaws Xilias thiab hauv tebchaws Kilikias. Peb hnov hais tias, peb cov muaj qee leej tuaj ua rau nej ntxhov siab. Tej uas lawv qhia nej ntawd yeej tsis yog peb kom lawv tuaj qhia. Yog li ntawd peb thiaj sablaj pom zoo hais tias, cia peb xaiv peb cov ib ob tug nrog Npananpas thiab Paulus uas yog peb ob tug kwvtij uas peb hlub tuaj saib nej. Paulus nkawd yog ob tug uas muab siab rau ua peb tus Tswv Yexus Khetos tes haujlwm, nkawd tsis khuvxim nkawd txojsia. Peb txib Yudas thiab Xilas tuaj cuag nej; nkawd yuav qhia nej raws nraim li tej uas peb sau tuaj rau nej no. Vaj Ntsujplig tus Dawbhuv thiab peb pom zoo hais tias, peb tsis txhob muab lub nra hnyav rau nej ris, tsuas yog kom nej coj tej yam uas tseemceeb xwb. Tej ntawd yog li no: nej tsis txhob noj tej qhov txhia chaw uas luag muab fij rau dab lawm, tsis txhob noj ntshav, tsis txhob noj tej qaij tsiaj uas hlua zawm cajdab tuag thiab tsis txhob deev luag pojniam luag txiv. Yog nej coj tau tej no, ces yog nej ua tau zoo lawm. Thov kom nej tau nyob kaj siab lug.” Cov ntseeg txawm txib ob tug uas lawv xaiv tau lawm nrog Paulus nkawd mus. Thaum lawv mus txog pem lub nroog Ati-aukias, lawv hu cov ntseeg sawvdaws tuaj ua ke, thiab muab tsab ntawv ntawd rau cov ntseeg nyeem. Thaum cov ntseeg nyeem tas, lawv sawvdaws zoo siab kawg li, rau qhov tsab ntawv ntawd txhawb lawv lub zog heev. Yudas thiab Xilas yog ob tug xibhwb uas cev Vajtswv lus. Nkawd qhia ntau zaj rau cov ntseeg mloog; tej uas nkawd qhia ntawd txhawb cov ntseeg lub zog heev. Nkawd nrog cov ntseeg nyob tau ib ntus, tom qab ntawd cov ntseeg xa nkawd rov qab kaj siab lug mus cuag cov uas txib nkawd tuaj. [ Tiamsis Xilas hais tias nws yuav nrog lawv nyob ntawd.] Paulus thiab Npananpas tseem nyob hauv lub nroog Ati-aukias tau ib ntus. Nkawd thiab muaj ntau leej sib pab qhia Vajtswv Txojlus. Tsis ntev tom qab ntawd Paulus txawm hais rau Npananpas hais tias, “Wb mus saib cov ntseeg hauv txhua lub nroog uas wb tau mus qhia Vajtswv Txojlus rau lawv, saib sawvdaws nyob li cas lawm.” Npananpas xav coj Yauhas Malakaus nrog nkawd mus, tiamsis Paulus tsis pom zoo coj, rau qhov thawj zaug thaum lawv mus txog tim Pafilias, Malakaus cia li tso nkawd tseg khiav lawm; nws tsis pab nkawd ua haujlwm kom tiav. Paulus thiab Npananpas nkawd sib cav heev, ces nkawd nyias txawm ncaim mus nyias lawm. Npananpas coj Malakaus nrog nws mus, nkawd caij nkoj hla hiavtxwv mus rau tim lub koog povtxwv Xaipas. Paulus coj Xilas nrog nws mus. Thaum cov ntseeg thov Vajtswv foom koob hmoov rau nkawd tas, Paulus txawm sawv kev mus lawm. Paulus mus qhia thoob plaws hauv tebchaws Xilias thiab tebchaws Kilikias. Tej uas nws qhia ntawd txhawb cov ntseeg lub zog heev. Paulus mus txog pem lub nroog Denpis thiab lub nroog Lixathas. Cov neeg uas nyob hauv lub nroog Lixathas muaj ib tug hu ua Timautes. Timautes niam yog ib tug neeg Yudais uas ntseeg Vajtswv, tiamsis Timautes txiv yog neeg Kilis. Cov ntseeg uas nyob hauv lub nroog Lixathas thiab hauv lub nroog Ikauni-us sawvdaws puavleej hwm Timautes. Paulus xav coj Timautes nrog nws mus, Paulus txawm muab Timautes ua kevcai txiav. Paulus ua li ntawd, rau qhov cov Yudais uas nyob hauv lub tebchaws ntawd puavleej paub hais tias Timautes txiv yog neeg Kilis. Paulus lawv mus thoob plaws txhua lub nroog; lawv qhia tej kevcai uas cov timthawj thiab cov txwjlaug nram lub nroog Yeluxalees sau tuaj qhia rau sawvdaws mloog thiab kom sawvdaws ua raws li tej kevcai ntawd. Yog li ntawd, cov ntseeg thiaj muaj zog heev thiab niaj hnub muaj neeg los ntseeg coob zuj zus ntxiv. Tom qab ntawd Paulus lawv mus thoob plaws hauv cheebtsam Felinkias thiab cheebtsam Kalatias, rau qhov Vaj Ntsujplig tus Dawbhuv tsis pub lawv mus qhia hauv lub xeev Axias. Thaum lawv mus txog pem Mixias tus ciamteb, lawv yuav mus rau hauv lub xeev Npithinias, tiamsis Yexus tus Ntsujplig tsis pub lawv mus. Lawv txawm cia li hla dhau plaws lub nroog Mixias mus rau nram lub nroog Tau-as. Hmo ntawd Paulus txawm ua yogtoog pom ib tug txivneej Makedaunias sawv ntsug thov Paulus hais tias, “Thov koj hla tuaj pab peb cov nyob tim Makedaunias no.” Thaum Paulus ua yogtoog li ntawd, ces tamsim ntawd peb txawm sawbsim qhov txhia chaw yuav mus rau tim lub xeev Makedaunias, rau qhov peb paub tseeb hais tias Vajtswv hu peb mus qhia txojmoo zoo rau cov neeg uas nyob tid. Peb caij nkoj hauv lub nroog Tau-as ncaj nraim mus rau pem lub koog Povtxwv Xamaulakes, thiab hnub tom qab peb mus rau tim lub nroog Ne-apaulis. Peb taug kev tawm hauv lub nroog Ne-apaulis mus rau pem lub nroog Filipis. Lub nroog Filipis yog lub tuamceeb nroog hauv lub xeev Makedaunias uas yog cov neeg Loos tswjhwm. Peb nyob ntawd tau ob peb hnub. Thaum txog Hnub Xanpataus, peb txawm tawm hauv lub nroog mus rau tom ntug dej, peb xav hais tias nyaj yuav muaj ib qho chaw uas cov Yudais mus thov Vajtswv tod. Thaum peb mus txog, peb zaum thiab nrog cov pojniam uas nyob tod tham. Cov pojniam ntawd muaj ib tug hu ua Lidias, nws yog neeg Thiyatilas, nws tuaj ua luam muag ntaub yajpwm. Nws yog ib tug uas hwm Vajtswv. Thaum nws hnov Paulus qhia, tus Tswv qhib nws lub siab, ua rau nws totaub tej lus uas Paulus qhia. Ces Lidias thiab nws tsevneeg txawm ua kevcai raus dej, Lidias hais rau peb hais tias, “Yog nej pom hais tias kuv ntseeg Vajtswv tiag, ces nej cia li nrog kuv mus so hauv kuv tsev. Nws coj peb heev, ces peb txawm nrog nws mus rau tom nws tsev.” Muaj ib hnub thaum peb tabtom taug kev mus rau ntawm qhov chaw uas sawvdaws tuaj thov Vajtswv, peb ntsib ib tug ntxhais qhev, nws muaj dab thiab paub txog yav tom ntej. Qhov uas nws txawj saib hmoov li ntawd, ua rau cov neeg uas yuav nws los ua qhev tau nyiaj ntau heev. Nws pheej lawv Paulus peb qab thiab qw nrov nrov hais tias, “Cov txivneej no yog Vajtswv tus uas muaj hwjchim loj kawg nkaus cov tubtxib! Lawv tuaj qhia txojkev dim txim rau nej.” Nws pheej niaj hnub ua li ntawd, Paulus ntxhov siab, ces Paulus txawm tig hlo mus hais rau tus dab hais tias, “Kuv tuav Yexus Khetos lub npe ntiab koj, koj cia li tawm hauv tus ntxhais no lub cev mus.” Tamsim ntawd dab txawm tawm plaws lawm. Thaum cov neeg uas yuav tus ntxhais ntawd los ua qhev pom hais tias lawv yuav tsis tau nyiaj lawm lawv chim heev; lawv txawm ntes kiag Paulus thiab Xilas nkawd coj mus rau hauv plawv nroog rau sawvdaws saib. Lawv coj Paulus nkawd mus cuag cov nomtswv Loos thiab qhia rau cov nomtswv hais tias, “Ob tug txivneej no yog neeg Yudais, nkawd tuaj ua rau peb cov neeg uas nyob hauv lub nroog no ntxhov. Nkawd tuaj qhia tej kevcai uas txawv dua peb txoj. Peb yog neeg Loos, peb yeej tsis yuav tej kevcai ntawd thiab peb coj tsis tau.” Thaum lawv hais li ntawd tas, cov pejxeem txawm sau nthwv los yuav ntaus Paulus thiab Xilas nkawd. Cov nomtswv txawm muab nkawd tej ris tsho dua pes rhe povtseg thiab kom cov tubrog muab nkawd nplawm. Thaum cov tubrog muab nkawd nplawm tas, lawv txawm coj nkawd mus kaw rau hauv tsev lojcuj; lawv kom tus uas zov lub tsev lojcuj zov nkawd zoo zoo. Thaum lawv hais li ntawd tas, tus uas zov lub tsev lojcuj txawm muab nkawd kaw rau chav hauv plawv thiab muab nkawd xauv kotaw ruaj ruaj cia. Thaum kwvlam ib tag hmo, Paulus thiab Xilas tabtom thov Vajtswv thiab hu nkauj qhuas Vajtswv. Cov neeg uas nrog nkawd nyob ua ke hauv tsev lojcuj, lawv sawvdaws mloog nkawd thov Vajtswv thiab hu nkauj. Thaum nkawd tseem hu nkauj ua ciav av txawm qeeg nkaws ua rau lub tsev lojcuj ua zog koog. Ces tamsim ntawd lub tsev lojcuj tej qhovrooj txawm cia li qhib tagnrho thiab tej saw hlau uas khi cov neeg raug txim tej tes taw txawm plam tas huv tibsi. Tus uas zov lub tsev lojcuj tsim dheev nruab dab ntub los, ua ciav tej qhovrooj twb qhib tas lawm. Thaum nws pom li ntawd, nws xav hais tias ntshai cov neeg raug txim khiav tas lawm. Ces nws txawm rho hlo nws rab ntaj los yuav rov tua nws. Tiamsis Paulus hu nrov nrov hais tias, “Koj tsis txhob ua li ko rau koj, peb txhua tus puavleej tseem nyob txhij ntawm no.” Tus uas zov lub tsev lojcuj kom ib tug coj teeb mus rau nws. Nws txawm khiav ceev nrooj mus rau hauv, nws txhos caug ntua ntawm Paulus thiab Xilas kotaw. Nws ntshai ua ibce tshee hnyo. Nws coj Paulus nkawd tawm los, nws nug nkawd hais tias, “Ob tug tijlaug, kuv yuav ua li cas kuv thiaj dim kuv lub txim?” Paulus nkawd teb hais tias, “Koj thiab koj tsevneeg cia li ntseeg tus Tswv Yexus, nej thiaj yuav dim lub txim.” Nkawd qhia tus Tswv Txojlus rau tus uas zov lub tsev lojcuj thiab cov neeg uas nyob hauv tsev mloog. Hmo ntawd nws coj nkawd mus ntxuav nkawd tej qhov txhab uas luag nplawm to. Thaum ntxuav tas, nws thiab nws tsevneeg txawm ua kevcai raus dej. Thaum lawv ua kevcai raus dej tas, nws coj Paulus thiab Xilas rov mus pem nws tsev thiab ua mov rau nkawd noj. Nws thiab nws tsevneeg zoo siab kawg li, rau qhov lawv los ntseeg Vajtswv lawm. Thaum kaj ntug cov nomtswv Loos txib ib tug tub ceevxwm mus hais rau tus uas zov lub tsev lojcuj hais tias, “Cia li tso nkawd tawm mus.” Tus zov lub tsev lojcuj txawm hais rau Paulus hais tias, “Cov nomtswv tso neeg tuaj hais kom kuv tso koj thiab Xilas mus, yog li ntawd neb cia li mus kaj siab lug.” Tiamsis Paulus hais rau cov tub ceevxwm hais tias, “Lawv tsis tau taug wb zaj saib wb puas tau ua txhaum, lawv cia li muab wb nplawm tabmeeg sawvdaws. Txawm yog wb twb yog neeg Loos los lawv tseem nplawm wb thiab muab wb kaw rau hauv tsev lojcuj no. Nimno lawv ho yuav kom wb cia li tawm twjywm mus xwb yeej tsis tau li. Cia li kom cov nomtswv Loos tuaj tso wb.” Cov tub ceevxwm rov mus qhia tej no rau cov nomtswv Loos mloog. Thaum cov nomtswv Loos hnov hais tias Paulus thiab Xilas yog neeg Loos, lawv ntshai kawg li. Yog li ntawd, lawv txawm tuaj thov Paulus thiab Xilas nkawd zam txim rau lawv. Thaum lawv thov tas, lawv coj nkawd tawm hauv tsev lojcuj, thiab thov kom nkawd tawm hauv lub nroog mus. Thaum Paulus thiab Xilas tawm hauv tsev lojcuj mus, nkawd mus rau tom Lidias tsev. Muaj cov kwvtij ntseeg tuaj nyob ua ke hauv Lidias tsev, nkawd txhawb kom lawv muab siab rau ntseeg, thiab nkawd mus rau lwm qhov lawm. Thaum Paulus thiab Xilas nkawd hla dhau lub nroog Afipaulis thiab lub nroog Apaulaunias lawm, nkawd txawm mus txog nram lub nroog Thexalaunikes. Cov Yudais muaj ib lub tsev sablaj nyob hauv lub nroog ntawd. Paulus txawm mus qhia hauv lub tsev sablaj ntawd raws li nws txeev qhia, nws qhia li ntawd peb zaug rau peb Hnub Xanpataus. Nws muab Vajtswv Txojlus qhia thiab teb tej lus uas lawv nrog nws sib cav. Nws qhia rau lawv hais tias, “Yeej yuav muaj neeg muab tus Mexiyas tua, thiab tom qab ntawd, nws yuav sawv hauv qhov tuag rov qab los. Paulus hais tias, tus Yexus uas kuv tabtom qhia rau nej no, nws yog tus Mexiyas ntag.” Cov neeg uas tuaj mloog ntawd muaj qee leej ntseeg tej uas Paulus thiab Xilas qhia thiab muaj cov neeg Kilis uas hwm Vajtswv thiab cov pojniam uas tseemceeb ntau leej ntseeg tej uas Paulus nkawd qhia. Tiamsis cov Yudais ntxub nkawd, lawv txawm mus hu tej neeg tsis tsimtxiaj uas nyob tom tej kev tuaj nrog lawv ua ib pab. Lawv ua rau cov pejxeem uas nyob hauv lub nroog ntawd ntxhov, thiab lawv mus tsoo Yaxoos lub tsev nrhiav Paulus thiab Xilas nkawd; lawv yuav coj nkawd tawm los rau cov pejxeem txiav txim. Tiamsis lawv nrhiav tsis pom nkawd, lawv txawm ntes Yaxoos thiab ob peb tug ntseeg coj mus cuag cov nomtswv. Lawv qw nrov nrov hais tias, “Cov neeg no yog cov uas ua rau tej neeg uas nyob txhua qhov ntxhov. Nimno lawv tuaj txog hauv peb lub nroog lawm. Tiamsis Yaxoos tseem cia lawv pw hauv Yaxoos tsev thiab. Tsis yog li ntawd xwb, lawv tseem ua txhaum vajntxwv txoj kevcai; lawv qhia hais tias, nimno muaj dua ib tug vajntxwv hu ua Yexus los kav sawvdaws lawm.” Thaum cov pejxeem thiab cov nomtswv hnov li ntawd, lawv chim heev. Cov nomtswv txawm muab Yaxoos lawv nplua. Thaum lawv them nyiaj tas, cov nomtswv thiaj tso lawv mus. Thaum tsaus ntuj zuag cov ntseeg xa Paulus thiab Xilas nkawd mus rau nram lub nroog Npele-as. Thaum nkawd mus txog nrad, nkawd mus rau hauv cov Yudais lub tsev sablaj. Paulus qhia cov Yudais uas nyob hauv lub nroog Npele-as yoojyim dua li nws qhia cov uas nyob hauv lub nroog Thexalaunikes. Cov neeg Npele-as kub siab lug mloog Vajtswv txojlus thiab lawv niaj hnub kawm Vajtswv txojlus saib puas muaj tseeb raws li Paulus qhia. Cov neeg ntawd muaj ntau leej los ntseeg; muaj ntau leej pojniam Kilis uas sawvdaws hwm thiab ntau leej txivneej Kilis los ntseeg thiab. Thaum cov Yudais uas nyob hauv lub nroog Thexalaunikes hnov hais tias Paulus mus qhia Vajtswv Txojlus nram lub nroog Npele-as lawm, lawv txawm tuaj ua rau cov pejxeem uas nyob hauv lub nroog ntawd ntxhov. Thaum cov ntseeg pom muaj li ntawd, lawv txawm xa Paulus mus rau nram ntug hiavtxwv, tiamsis Xilas thiab Timautes tsis mus. Nkawd cia li nyob hauv lub nroog Npele-as. Lawv xa Paulus mus txog nram lub nroog Athees. Thaum cov uas xa Paulus yuav rov qab los rau pem lub nroog Npele-as, Paulus kom lawv mus hais rau Xilas thiab Timautes cia li tuaj cuag nws sai sai. Thaum Paulus nyob hauv lub nroog Athees tos Timautes thiab Xilas nkawd, nws pom lub nroog ntawd muaj mlom ntau heev, nws ntxhov siab kawg li. Nws mus hauv lub tsev sablaj, nws niaj hnub nrog cov Yudais thiab lwm Haivneeg uas hwm Vajtswv thiab cov neeg uas tuaj rau ntawm tej khw sib cav. Cov xibhwb uas yog cov Epikule-as pab thiab cov Xautau-is pab tuaj nrog Paulus sib cav thiab. Muaj qee leej thuam Paulus hais tias, “Tus neeg no twb tsis txawj ntse li, nws qhia ua dabtsi?” Dua li lwm tus hais tias, “Saib mas zoo li yog nws hais txog lwm haivneeg tej vajtswv.” Lawv hais li ntawd, rau qhov Paulus qhia hais txog Yexus zaj thiab qhia txog qhov uas neeg yuav sawv hauv qhov tuag rov qab los. Yog li ntawd, lawv txawm coj Paulus mus cuag cov nomtswv ntawm Alepankus. Lawv nug Paulus hais tias, “Zaj tshiab uas koj qhia ntawd yog li cas? Thov koj qhia rau peb mloog saib. Peb hnov koj qhia tej zaj txawv txawv uas peb tsis tau hnov dua. Peb xav paub saib zaj ntawd yog li cas tiag.” ( Lawv hais li ntawd, rau qhov cov neeg Athees thiab lwm haivneeg uas nyob hauv lub nroog ntawd nyiam mloog thiab nyiam sib tham txog tej zaj txawv txawv uas lawv tsis tau hnov dua.) Ces Paulus txawm sawv ntsug tabmeeg cov nomtswv thiab qhia lawv hais tias, “Cov neeg Athees, kuv pom nej muab siab rau teev nej tej mlom heev. Thaum kuv mus ncig saib nej lub nroog thiab mus saib tej chaw uas nej pe mlom, kuv pom muaj lus sau rau ntawm ib lub thaj hais tias, ‘Muab rau tus Vajtswv uas peb tsis paub.’ Tus uas nej pehawm tiamsis nej tsis paub ntawd twb yog tus uas nimno kuv qhia rau nej ntag. Tus Vajtswv uas tsim lub ntiajteb thiab ib puas tsav yam uas nyob hauv ntiajteb no, tus ntawd yog tus Tswv uas kav lub ntuj thiab lub ntiajteb. Nws yeej tsis nyob hauv tej tsev uas neeg ua. Vajtswv tsis pluag ib yam dabtsi li, nws yeej tsis kom leejtwg ua ib yam dabtsi rau nws. Rau qhov Vajtswv yog tus uas rau siav rau pa rau neeg thiab pub ib puas tsav yam rau sawvdaws. Vajtswv tsim txhua haivneeg tawm hauv tib tug neeg li roj ntsha los xwb, thiab kom lawv mus nyob thoob plaws hauv lub ntiajteb. Vajtswv tu tebchaws rau lawv thiab teem sijhawm kom lawv nyob ntev li cas. Vajtswv ua li ntawd kom lawv thiaj li los nrhiav Vajtswv. Yog lawv kub siab lug xav paub Vajtswv, lawv yeej yuav paub nws, rau qhov Vajtswv yeej nyob tsis deb ntawm peb txhua tug; raws li qee leej hais tseg hais tias, ‘Muaj Vajtswv, peb thiaj li ciaj sia mus mus los los thiab muaj sia nyob.’ Nej cov uas txawj hais kwv txhiaj muaj qee leej hais tias, ‘Peb puavleej yog Vajtswv cov menyuam thiab.’ Yog li ntawd, peb cov uas yog Vajtswv cov menyuam lawm, peb tsis txhob xav hais tias, Vajtswv zoo ib yam li tej mlom uas cov neeg muaj tswvyim muab nyiaj, muab kub nchuav thiab muab pobzeb txaug ua. Thaum neeg tseem tsis tau paub Vajtswv, Vajtswv tsis suav neeg lub txim. Tiamsis nimno Vajtswv twb qhia rau txhua haivneeg uas nyob thoob plaws hauv lub qab ntuj no hais tias, lawv yuav tsum tso lawv tej kev txhaum tseg. Rau qhov Vajtswv twb teem ib hnub cia lawm, hnub ntawd Vajtswv yuav txiav txim rau txhua haivneeg hauv qab ntuj no. Tus uas Vajtswv tsa los ua tus txiav txim, nws yuav txiav txim ncaj ncees. Thiab qhov uas Vajtswv tsa tus ntawd sawv hauv qhov tuag rov qab los, qhov ntawd qhia rau sawvdaws paub hais tias, tus ntawd yog tus uas Vajtswv tsa tiag.” Thaum cov neeg mloog Paulus qhia, lawv hnov Paulus hais tias muaj ib tug uas tuag lawm sawv hauv qhov tuag rov qab los, lawv txawm thuam thiab luag Paulus zom zaws. Tiamsis muaj qee leej hais tias, “Peb xav rov mloog koj qhia zaj no dua thiab.” Tom qab ntawd, Paulus txawm tawm hauv qhov chaw uas sawvdaws tuaj sablaj ntawd mus lawm. Muaj qee leej los ntseeg Yexus thiab los koom nrog Paulus. Cov neeg uas los ntseeg muaj ib tug nom hu ua Di-aunexi-us; muaj ib tug pojniam hu ua Damalis, thiab muaj dua ob leeg los ntseeg thiab. Tom qab ntawd Paulus txawm tawm hauv lub nroog Athees mus rau tim lub nroog Kauleethaus. Thaum nws nyob hauv lub nroog ntawd, nws ntsib ib tug neeg Yudais hu ua Akilas uas yug hauv tebchaws Pootus. Akilas tus pojniam hu ua Paxilas. Nkawd nyuam qhuav tuaj tim tebchaws Italis tuaj, rau qhov Vajntxwv Kalaudi-us ntiab cov Yudais txhua tus kom khiav tawm hauv lub nroog Loos mus. Paulus txawm mus saib Akilas nkawd; Paulus nrog nkawd nyob thiab nrog nkawd ua haujlwm ua ke. Paulus xaws tsevntaub ib yam li Akilas nkawd. Txhua Hnub Xanpataus Paulus mus rau hauv tsev sablaj; nws yaum cov Yudais thiab cov Kilis kom los ntseeg Yexus Khetos. Thaum Xilas thiab Timautes nkawd tuaj pem lub xeev Makedaunias tuaj txog hauv lub nroog Kauleethaus, Paulus txawm qhia Vajtswv Txojlus lawm xwb, nws tsis ua lwm yam haujlwm li. Nws ua timkhawv rau cov Yudais hais tias Yexus yog tus Mexiyas. Thaum lawv tawmtsam thiab thuam Paulus, Paulus txawm muab Paulus lub tsho nchos thiab hais rau lawv hais tias, “Yog nej lub txim poob los raug nej, nej tsis txhob liam hais tias kuv tsis qhia nej. Txij no mus, kuv yuav mus qhia lwm Haivneeg.” Paulus txawm ncaim lawv mus, nws mus nrog ib tug txivneej uas yog lwm Haivneeg uas hu ua Titi-us Yuxatus nyob. Nws yog ib tug uas hwm Vajtswv, nws lub tsev nyob ze lub tsev sablaj. Kixapus uas yog tus thawj saib lub tsev sablaj thiab nws tsevneeg txawm los ntseeg Yexus Khetos; thiab muaj ntau leej uas nyob hauv lub nroog Kauleethaus hnov Paulus qhia, lawv txawm los ntseeg thiab ua kevcai raus dej. Muaj ib hmos Paulus ua yogtoog pom tus Tswv los hais rau Paulus hais tias, “Koj tsis txhob ntshai, koj cia li qhia mus tsis txhob tso tseg, rau qhov kuv nrog koj nyob. Tsis muaj leejtwg yuav ua tau phem rau koj, rau qhov kuv cov thwjtim muaj ntau leej nyob hauv lub nroog no.” Yog li ntawd, Paulus thiaj nyob hauv lub nroog Kauleethaus qhia Vajtswv Txojlus rau sawvdaws tau ib xyoos thiab rau hli. Lub sijhawm uas Nkali-aus ua nom kav lub xeev Akhayas, cov Yudais tuavhauv ua ib lub siab ntes Paulus coj mus rau tom tsev hais plaub. Lawv hais tias, “Tus txivneej no yaum sawvdaws kom pehawm Vajtswv tsis raws li peb txoj kevcai.” Thaum Paulus tabtom yuav teb lawv, Nkali-aus hais rau cov Yudais hais tias, “Yog nws tau ua txhaum qhov twg lossis tau ua phem li cas rau nej cov Yudais, ces kuv yeej yuav ua siab ntev mloog nej tej lus. Tiamsis nej ho sib cav txog tej nyuag lus; tej nyuag npe thiab nej tej kevcai uas nej hais tsis sib haum xwb, ces cia nej sib hais nej, tej uas nej hais no kuv tsis kam txiav txim.” Nkali-aus txawm ntiab lawv tawm hauv lub tsev hais plaub mus. Ces lawv cov ntawd txawm mus ntes Xauthenes uas yog tus thawj saib lub tsev sablaj coj mus nplawm ntawm lub tsev hais plaub sab nraum qab tsib taug. Tiamsis Nkali-aus tsis quavntsej li. Paulus nrog cov ntseeg nyob hauv lub nroog Kauleethaus tau ob peb hnub ntxiv, nws mam li nrog Paxilas thiab Akilas caij nkoj mus rau tim tebchaws Xilias. Thaum lawv mus txog hauv lub nroog Keekhale-as, ces Paulus txawm muab nws cov plaubhau chais, rau qhov nws twb coglus hais tias nws yuav chais nws cov plaubhau. Thaum Paulus mus txog tim lub nroog Efexus, Paulus txawm ncaim Paxilas thiab Akilas nkawd. Thaum lawv sib ncaim lawm, Paulus mus rau hauv tsev sablaj thiab nrog cov Yudais sib cav. Lawv cov ntawd thov kom Paulus nrog lawv nyob ib ntus, tiamsis Paulus tsis kam nyob. Thaum nws yuav ncaim lawv mus, nws hais rau lawv hais tias, “Yog Vajtswv pom zoo kuv tuaj, kuv mam li rov qab tuaj qhia nej dua.” Ces Paulus txawm caij nkoj tawm hauv lub nroog Efexus mus lawm. Thaum Paulus mus txog nram lub nroog Xixaleyas, Paulus mus nram lub nroog Yeluxalees thiab mus saib cov ntseeg uas nyob nram. Tom qab ntawd nws rov los rau pem lub nroog Ati-aukias. Nws nyob hauv lub nroog Ati-aukias ib ntus, nws mam li mus txhua nrho qhov txhia chaw hauv cheebtsam Kalatias thiab Felinkias; nws mus qhia cov ntseeg kom muab siab rau ntseeg. Thaum ntawd muaj ib tug txivneej Yudais hu ua Apaulaus uas nyob hauv lub nroog Alexadias tuaj txog hauv lub nroog Efexus. Nws yog ib tug uas txawj qhia thiab paub Vajtswv Txojlus. Nws kawm tus Tswv txoj Kevcai. Nws kub siab lug qhia txog Yexus zaj, tej uas nws qhia ntawd puavleej muaj tseeb. Tiamsis nws tsuas paub txoj kevcai raus dej uas Yauhas qhia xwb. Apaulaus mus qhia hauv lub tsev sablaj tsis ntshai leejtwg li. Thaum Paxilas thiab Akilas hnov nws qhia, nkawd txawm coj nws mus rau tom nkawd tsev, thiab nkawd qhia Vajtswv zaj rau Apaulaus paub tseeb dua yav tas los. Thaum cov ntseeg uas nyob hauv lub nroog Efexus paub hais tias Apaulaus yuav hla mus rau tim tebchaws Kilis, lawv sau ib tsab ntawv xa mus rau cov ntseeg uas nyob tid kom lawv hlub Apaulaus. Thaum Apaulaus mus txog tid, nws pab lawv kawg li; lawv los ntseeg rau qhov Vajtswv foom koob hmoov rau lawv. Nws cav yeej cov Yudais tabmeeg sawvdaws, rau qhov nws tej lus tseemceeb, thiab nws muab Vajtswv Txojlus qhia rau lawv paub hais tias Yexus yog tus Mexiyas. Thaum Apaulaus nyob hauv lub nroog Kauleethaus, thaum ntawd Paulus mus txhua nrho cheebtsam Kalatias, nws mam li mus txog hauv lub nroog Efexus. Thaum nws tuaj txog lawm, nws ntsib cov ntseeg ob peb leeg, nws nug lawv hais tias, “Thaum nej los ntseeg, nej puas tau Vaj Ntsujplig tus Dawbhuv?” Lawv teb hais tias, “Peb tsis tau hnov dua hais tias muaj Vaj Ntsujplig tus Dawbhuv li.” Paulus nug lawv hais tias, “Yog li ntawd, nej ua kevcai raus dej li cas?” Lawv teb hais tias, “Peb ua raws li Yauhas txoj kevcai raus dej.” Paulus qhia rau lawv hais tias, “Yauhas txoj kevcai raus dej tsuas qhia hais tias cov uas ua kevcai raus dej ntawd yog cov uas twb tso kev txhaum tseg lawm; txawm yog li ntawd los Yauhas qhia hais tias sawvdaws yuav tsum ntseeg tus uas yuav lawv Yauhas qab los, tus ntawd yog Yexus.” Thaum lawv hnov Paulus hais li ntawd, lawv txawm tuav tus Tswv Yexus lub npe ua kevcai raus dej. Thaum Paulus tsa tes thiab thov Vajtswv rau lawv, Vaj Ntsujplig tus Dawbhuv los rau lawv txhua tus. Lawv txawm hais tau lus txawv txawv thiab lawv qhia Vajtswv Txojlus. Cov txivneej ntawd muaj kwvlam li kaum ob leeg. Paulus muaj siab tawv qhia hauv lub tsev sablaj hais txog Vajtswv lub Tebchaws tau peb lub hlis. Nws nrog cov neeg uas tuaj mloog nws qhia sib cav thiab yaum kom lawv los ntseeg Yexus. Tiamsis cov neeg ntawd qee leej muaj siab tawv tsis kam ntseeg Yexus. Lawv tabmeeg thuam Tswv Yexus zaj rau sawvdaws mloog. Ces Paulus txawm tso lawv tseg, coj nws cov thwjtim nrog nws mus, thiab nws niaj hnub mus qhia hauv Tilanus chav tsev sablaj. Nws pheej qhia li ntawd tau ob xyoos, cov Yudais thiab lwm Haivneeg uas nyob hauv lub xeev Axias thiaj tau hnov Vajtswv Txojlus. Vajtswv pub hwjchim rau Paulus ua tau tej txujci tseemceeb rau sawvdaws pom, thiab lawv muab Paulus txoj phuam so hws thiab Paulus daim ntaub npua ua haujlwm coj mus tso rau saum cov neeg uas muaj mob lub cev, ces cov neeg ntawd tej mob txawm zoo lawm, thiab cov neeg uas raug dab los dab cia li tawm lawm. Cov Yudais uas txawj ntiab dab muaj qee leej mus ntiab dab rau qhov ub qhov no. Lawv tuav Yexus lub npe ntiab dab saib dab puas tawm. Lawv hais rau dab hais tias, “Peb tuav Yexus tus muaj hwjchim uas Paulus qhia ntiab nej tawm.” Cov uas ua li ntawd twb yog cov Yudais tus Povthawj Hlob uas hu ua Xakevas xya leej tub ntag. Dab teb lawv hais tias, “Kuv yeej paub Yexus thiab paub Paulus, tiamsis nej ho yog leejtwg?” Tus txivneej uas raug dab ntawd txawm muab lawv ntaus; nws ntaus yeej lawv, lawv txawm khiav tawm hauv nws lub tsev mus. Lawv tej ris tsho ntuag thiab ibce to tas huv tibsi. Cov Yudais thiab lwm Haivneeg uas nyob hauv lub nroog Efexus puavleej hnov zaj no, lawv ntshai kawg li. Ces Tswv Yexus lub npe txawm nrov ncha moo lug mus thoob plaws txhua qhov. Cov uas twb xub los ntseeg lawm, muaj ntau leej tuaj lees lawv tej kev txhaum tabmeeg sawvdaws. Cov neeg uas txawj ua khawvkoob ntau leej muab lawv tej ntawv khawvkoob coj tuaj hlawv tabmeeg sawvdaws. Lawv tej ntawv ntawd raug nqi tsib caug txhiab lub nyiaj. Yog li ntawd, tus Tswv Txojlus uas muaj hwjchim thiaj nrov ncha mus thoob plaws txhua qhov thiab muaj neeg los ntseeg coob zuj zus. Thaum dhau tej xwm ntawd lawm, Paulus npaj siab hais tias nws yuav mus rau tim Makedaunias thiab Akhayas, nws mam li mus rau nram lub nroog Yeluxalees. Paulus hais tias, “Tom qab ntawd kuv yuav tsum mus rau tim lub nroog Loos.” Paulus txib Timautes thiab Elatus uas nrog nws ua haujlwm ua nws ntej mus rau tim lub xeev Makedaunias. Thaum nkawd mus lawm, Paulus tseem nyob hauv lub xeev Axias tau ib ntus thiab. Thaum ntawd nyob hauv lub nroog Efexus muaj kev kub ntxhov, rau qhov muaj neeg los ntseeg Yexus coob zuj zus. Nyob hauv lub nroog ntawd muaj ib tug txivneej hu ua De-meti-us, nws yog ib tug uas ntaus nyiaj muag, nws muab nyiaj nchuav ua tej lub nyuag tsev me me zoo li lub tsev teev tus mlom pojniam Atemis, ua rau cov neeg uas ntaus nyiaj tau nyiaj ntau heev. De-meti-us txawm mus hu cov uas ntaus nyiaj ntawd thiab lwm cov uas txawj ntaus nyiaj ib yam li lawv cov tuaj sablaj. Nws hais rau lawv hais tias, “Nej sawvdaws yeej paub hais tias twb yog vim peb ua tes haujlwm no peb thiaj tau noj tau haus. Nej twb pom thiab hnov tej uas tus Paulus ntawd qhia lawm. Nws qhia hais tias tej mlom uas peb nchuav no tsis tseemceeb dabtsi li. Nws hais li ntawd ua rau cov neeg uas nyob hauv lub nroog Efexus no thiab cov uas nyob thoob plaws lub xeev Axias tso txoj qub kevcai tseg yuav tas. Yog peb tsis ceevfaj, nyob tsam tej uas peb ua yuav poob nqi thiab ntshai sawvdaws yuav saib tsis taus lub tsev uas peb pe tus mlom pojniam Alatemis uas muaj hwjchim loj, ces tus mlom pojniam Alatemis uas cov neeg uas nyob hauv lub xeev Axias thiab tej neeg uas nyob thoob plaws hauv qab ntuj no pe yuav tsis muaj hwjchim lawm.” Thaum De-meti-us hais li ntawd tas, sawvdaws chim heev. Lawv txawm qw nrov nrov hais tias, “Cov neeg Efexus tus mlom pojniam Alatemis muaj hwjchim loj kawg nkaus.” Ces txawm muaj kev ntxhov thoob plaws hauv lub nroog Efexus. Sawvdaws txawm tuaj ntes kiag Nkayus thiab Alitakhus uas yog neeg Makedaunias cab mus rau tom lub tshavpuam, rau qhov nkawd nrog Paulus tuaj. Paulus xav mus cheem cov neeg ntawd, tiamsis cov ntseeg tsis kheev Paulus mus. Cov nomtswv uas nrog Paulus sib raug zoo, lawv txib neeg mus cheem kom Paulus tsis txhob mus hauv cov neeg coob coob uas nyob tom tshavpuam. Thaum ntawd cov neeg coob coob uas nyob tod tabtom ntxhov heev, nyias taus nyias qw li ub li no, rau qhov muaj ibtxhia tsis paub hais tias xyov lawv tuaj sablaj zaj dabtsi tiag! Cov Yudais txawm muab Alexades thawb mus rau tom sawvdaws hauv ntej, ces muaj qee leej xav hais tias tus uas ua txhaum ntshai yog Alexades. Alexades txawm co tes kom sawvdaws nyob twjywm, nws yuav qhia zaj ntawd rau sawvdaws saib yog li cas. Tiamsis thaum lawv pom hais tias Alexades yog neeg Yudais thiab, lawv qw tau ob txoos teev hais tias, “Cov neeg Efexus tus mlom Alatemis muaj hwjchim loj kawg nkaus.” Thaum kawg tus teev ntawv hauv lub nroog hais kom sawvdaws nyob twjywm. Nws hais tias, “Cov neeg Efexus, sawvdaws puavleej paub hais tias cov neeg uas nyob hauv lub nroog Efexus no yog cov uas tu lub tsev teev tus mlom Alatemis uas muaj hwjchim loj kawg nkaus thiab tu lub pobzeb tseemceeb uas poob saum ntuj los. Sawvdaws puavleej paub hais tias muaj li ntawd tiag. Yog li ntawd, nej cia li nyob twjywm tsis txhob lam tau lam ua rau sawvdaws ntxhov. Nej ntes nkawd los ua dabtsi? Nkawd twb tsis tau mus nyiag ib yam dabtsi hauv lub tsev teev mlom lossis thuam peb tus mlom los sav. Yog De-meti-us thiab nws cov neeg ntaus nyiaj ntawd xav nkaug leejtwg rau nomtswv, peb yeej muaj tsev hais plaub thiab muaj tus txiav txim huv tibsi, kom lawv mus sib hais lawm tod. Tiamsis yog nej ho muaj dua lwm zaj, nej yuav tsum hu sawvdaws tuaj ua ke sablaj tso mam li txiav txim. Yog peb tsis ua li no nyob tsam cov nomtswv yuav hais tias tej kev kub ntxhov hnub no yog peb ua, ces peb yuav tsis muaj lus teb lawv, rau qhov tej kev kub ntxhov no tsis muaj hauvpaus hauvntsis dabtsi.” Thaum nws hais li ntawd tas, ces nws txawm kom sawvdaws mus tsev. Thaum tsis muaj kev kub ntxhov lawm, Paulus hu cov ntseeg tuaj ua ke. Nws hais lus txhawb lawv zog tas, nws txawm ncaim lawv mus rau pem lub xeev Makedaunias lawm. Thaum nws taug kev mus, nws qhia ntau zaj txhawb cov ntseeg uas nyob hauv tej zejzog hauv lub xeev ntawd lub zog, nws mam li mus txog nram lub xeev Akhayas. Nws nyob hauv lub xeev Akhayas tau peb hlis. Thaum nws tabtom yuav caij nkoj mus rau tim tebchaws Xilias, nws hnov hais tias cov Yudais tuavhauv yuav ua phem rau nws. Ces nws txawm xav hais tias nws yuav rov qab mus rau pem lub xeev Makedaunias. Cov neeg uas nrog Paulus mus yog Pilehus tus tub Xaupates uas nyob hauv Npele-as, Alitakhus thiab Xekudus uas nyob hauv lub nroog Thexalaunikes; Nkayus uas nyob hauv lub nroog Denpis; Tikhikus thiab Taufimus uas nyob hauv lub xeev Axias thiab Timautes. Lawv cov ntawd xub ua ntej mus nyob nram lub nroog Tau-as tos peb. Thaum peb ua Kevcai Noj Ncuav tsis Xyaw Keeb tas, peb txawm caij nkoj tawm hauv lub nroog Filipis mus rau nram lub nroog Tau-as. Peb mus tau tsib hnub mam li mus txog nrad, thiab peb nyob nrad tau rau xya hnub. Hnub xya thaum tsaus ntuj peb tuaj noj mov ua ke thiab ua kevcai noj tus Tswv Rooj Mov. Paulus qhia lawv txog ib tag hmo, rau qhov thaum kaj ntug nws yuav ncaim lawv mus. Chav tsev txheej saum uas peb sablaj ntawd, lawv taws ntau lub teeb. Hmo ntawd muaj ib tug hluas hu ua Etikhus, nws nyob ntawm lub qhovrai mloog Paulus qhia. Thaum Paulus tseem tabtom qhia, Etikhus tsaug zog heev, nws txawm cia li looj hlias thiab poob ntawm lub qhovrai uas yog txheej tsev peb mus rau hauv av. Thaum lawv nqis mus muab nws tsa hlo nws twb tuag lawm. Tiamsis thaum Paulus nqis los txog, Paulus txawm mus puag nkaus tus hluas ntawd; Paulus hais rau sawvdaws hais tias, “Nej tsis txhob txhawj, nws twb muaj sia lawm.” Ces Paulus nce rov mus rau saum tsev thiab muab ncuav los faib rau sawvdaws noj raws li kevcai noj tus Tswv Rooj Mov. Paulus nrog sawvdaws tham mus txog kaj ntug, nws mam li ncaim lawv mus lawm. Sawvdaws pom tus hluas ntawd tseem muaj sia, lawv zoo siab kawg li, lawv txawm coj nws mus tsev. Peb caij nkoj ua ntej mus nyob nram lub nroog Axaus tos Paulus. Nws twb xub hais kom peb mus nyob nrad tos nws, rau qhov nws yuav mus kotaw mus rau nrad, nws mam li nrog peb caij nkoj mus. Thaum Paulus tuaj txog nram lub nroog Axaus, peb thiaj coj nws nrog peb caij nkoj mus rau nram lub nroog Mitilenes. Peb caij nkoj tawm hauv lub nroog Mitilenes mus ib hnub txog ntawm lub koog Povtxwv Khi-aus; hnub tom qab peb caij nkoj tawm ntawm Khi-aus mus ib hnub txog lub koog Povtxwv Xamaus, thiab hnub tom qab peb mus txog nram lub nroog Miletus. Paulus twb xav tseg lawm hais tias nws yuav tsis mus so hauv lub nroog Efexus, rau qhov nws tsis muaj sijhawm so hauv xeev Axias; nws yuav maj mus nram lub nroog Yeluxalees saib mus puas ncav hnub uas sawvdaws ua kevcai Peetekos. Yog li ntawd, peb thiaj caij nkoj dhau plaws mus tsis so hauv lub nroog Efexus. Thaum Paulus tseem nyob hauv lub nroog Miletus, nws txib neeg mus hu cov txwjlaug uas saib cov ntseeg pem lub nroog Efexus kom tuaj cuag nws. Thaum cov txwjlaug tuaj txog lawm, Paulus hais rau lawv hais tias, “Txij thaum kuv tuaj txog hauv lub xeev Axias los txog hnub no, kuv ua kuv lub neej zoo li cas los nej puavleej pom. Txawm yog cov Yudais pheej tuavhauv ua phem rau kuv kom kuv raug kev txomnyem los kuv tseem ua siab ntev ua Vajtswv tes haujlwm. Thaum kuv ua tes haujlwm ntawd, muaj qee zaus los kuv kua muag kawg li. Thiab nej twb paub hais tias, thaum kuv qhia nej hauv nej tej tsev thiab hauv tej tsev sablaj, kuv yeej qhia tej zaj uas yuav pab tau nej xwb, kuv tsis zais ib los li. Kuv pheej ntuas cov Yudais thiab lwm Haivneeg kom sawvdaws nyias tso nyias tej kev txhaum tseg, tig rov los cuag Vajtswv thiab ntseeg peb tus Tswv Yexus. Nimno Vaj Ntsujplig tus Dawbhuv yuav kom kuv mus nram lub nroog Yeluxalees. Thaum kuv mus txog nrad, kuv yuav raug kev txomnyem li cas los kuv tsis paub. Kuv tsuas paub raws li Vaj Ntsujplig qhia rau kuv lawm xwb. Nws qhia kuv hais tias kuv yuav raug kaw hauv tsev lojcuj thiab yuav raug kev txomnyem hauv tej nroog uas kuv yuav mus ntawd. Tiamsis kuv yeej tsis suav hais tias kuv lub neej tseemceeb dabtsi, rau qhov kuv xav ua tes haujlwm uas tus Tswv Yexus muab rau kuv ua kom tiav. Tes haujlwm ntawd yog mus qhia Txojmoo Zoo rau sawvdaws kom lawv paub hais tias Vajtswv hlub lawv. “Kuv twb mus txhua qhov qhia rau sawvdaws hais txog Vajtswv lub Tebchaws. Nimno kuv paub hais tias nej txhua tus uas nyob ntawm no yuav tsis muaj ib tug rov pom kuv li lawm. Yog li ntawd, hnub no kuv qhia rau nej hais tias yog nej cov leejtwg raug kev puastsuaj, nej tsis txhob liam hais tias kuv tsis qhia nej. Rau qhov kuv twb qhia tej uas Vajtswv xav kom nej paub rau nej lawm, kuv tsis tau zais ib qho li. Nej yuav tsum ceevfaj nyob tsam nej yuam kev thiab nej yuav tsum ua tib zoo saib pab yaj uas Vaj Ntsujplig tus Dawbhuv muab tso rau nej ua tus saib. Nej yuav tsum saib cov ntseeg ntawd ib yam li tus tswv yaj saib nws pab yaj. Cov ntseeg ntawd yog cov uas Vajtswv tus Tub tuag txhiv los ua nws cov lawm. Kuv paub hais tias thaum kuv mus lawm, hma yeej yuav los rau hauv nej cov. Thaum hma los, hma yuav tom txhua tus yaj huv tibsi. Txawm yog hauv nej cov los yeej yuav muaj qee leej qhia tsis tseeb ntxias cov ntseeg kom mus ua lawv thwjtim. Nej yuav tsum ceevfaj thiab nco ntsoov hais tias, kuv twb niaj hnub niaj hmo qhia nej tau peb xyoos los lawm. Thaum kuv qhia nej ntawd muaj qee zaus los kuv kua muag kawg li. “Nimno kuv yuav ncaim nej mus, kuv thov Vajtswv tsomkwm nej, nej yuav tsum khaws Vajtswv tej lus uas hais tias Vajtswv hlub nej rau hauv nej lub siab. Vajtswv Txojlus ntawd thiaj pab tau nej kom nej muab siab rau ntseeg thiab yuav pub tej koob hmoov uas Vajtswv twb npaj tseg cia rau cov uas ntseeg nws lawm rau nej. Kuv yeej tsis ntshaw leejtwg tej nyiaj tej kub lossis tej ris tsho hnav los ua kuv tug. Nej sawvdaws puavleej paub hais tias kuv thiab cov phoojywg uas nrog kuv ua haujlwm tau noj tau hnav twb yog vim kuv ob txhais tes khwv yug sawvdaws xwb, kuv yeej tsis tau thov leejtwg li. Txhua yam haujlwm uas kuv ua rau nej pom twb yog kuv ua qhia rau nej paub hais tias peb yuav tsum ua haujlwm hnyav li ntawd thiaj pab tau cov neeg uas tsis muaj zog. Thiab peb yuav tsum nco ntsoov tej lus uas tus Tswv Yexus qhia hais tias, ‘Thaum yus pub rau luag yus zoo siab heev dua thaum yus tau luag li.’ ” Thaum Paulus qhia lawv tas, Paulus thiab cov neeg uas mloog nws qhia sawvdaws txhos caug thov Vajtswv. Thaum Paulus yuav ncaim lawv mus, sawvdaws quaj quaj thiab lawv los puag Paulus xubpwg nwj Paulus. Lawv nyuaj siab kawg li, rau qhov nws hais tias lawv yuav tsis pom nws lawm, ces lawv txawm xa nws mus rau nram lub nkoj. Thaum peb ncaim lawv mus lawm, peb txawm caij nkoj ncaj nraim mus rau nram lub koog Povtxwv Kaus; hnub tom qab peb mus txog nram lub koog Povtxwv Laudes, thiab tom qab ntawm peb mam li mus txog lub nroog Patalas. Peb pom ib lub nkoj yuav mus rau tim lub xeev Faunikias, peb thiaj caij lub nkoj ntawd mus. Thaum peb mus pom lub koog Povtxwv Xaipas lawm, peb txawm mus sab qabteb rau tim tebchaws Xilias. Lawv yuav thau tej qhov txhia chaw hauv lub nkoj rau ntawm lub nroog Tiles, peb thiaj nres nkoj ntawm lub nroog ntawd. Thaum peb nrhiav tau cov ntseeg uas nyob hauv lub nroog Tiles lawm, peb nrog lawv nyob tau xya hnub. Vaj Ntsujplig qhia rau lawv kom lawv tsis txhob pub Paulus mus nram lub nroog Yeluxalees. Tiamsis thaum dhau xya hnub lawm, peb ncaim lawv mus. Lawv txhua tus thiab lawv tej pojniam menyuam sawvdaws puavleej xa peb mus txog nram ntug hiavtxwv, peb sawvdaws txhos caug ntawm ntug hiavtxwv thov Vajtswv. Ces peb txawm sib ncaim, thaum peb nce rau hauv nkoj, lawv txawm rov qab mus tsev lawm. Peb caij nkoj tawm hauv lub nroog Tiles mus kawg kev nkoj rau nram lub nroog Petaulemais, peb mus saib cov ntseeg hauv lub nroog ntawd thiab nrog lawv nyob tau ib hnub. Hnub tom qab peb mus rau nram lub nroog Xixaleyas. Peb mus so hauv Filis uas yog ib tug qhia txojmoo zoo lub tsev. Filis yog ib tug ntawm xya leej uas cov ntseeg nram lub nroog Yeluxalees tau xaiv los ua haujlwm. Filis muaj plaub tus ntxhais tsis tau yuav txiv. Lawv plaub leeg ntawd puavleej qhia Vajtswv Txojlus. Peb nyob hauv Filis tsev tau ob peb hnub, muaj ib tug cev Vajtswv lus hu ua Ankanpus tuaj nram xeev Yudas tuaj. Nws tuaj saib peb, nws muab Paulus txoj siv sia los khi nws tes nws taw, thiab nws hais tias Vaj Ntsujplig hais tias, “Cov Yudais uas nyob nram lub nroog Yeluxalees yuav muab tus uas sia txoj siv no khi ib yam li no thiab yuav muab nws rau lwm Haivneeg coj mus tsimtxom.” Thaum peb hnov li ntawd, peb thiab cov ntseeg uas nyob ntawd cheem tsis kheev Paulus mus rau nram lub nroog Yeluxalees. Tiamsis Paulus hais rau lawv hais tias, “Nej quaj ua dabtsi, nej yuav ua kom kuv nyuaj siab los? Kuv yeej npaj txhij lawm, tsis yog cov neeg hauv lub nroog Yeluxalees yuav muab kuv khi xwb, txawm yog lawv yuav kuv tua povtseg, vim kuv ua tus Tswv Yexus tes haujlwm los kuv yeej yuav mus nrad.” Peb cheem tsis tau nws, yog li ntawd peb txawm cia nws mus thiab hais tias, “Nyob tsam yog tus Tswv pom zoo.” Thaum ntawd peb txawm sawbsim qhov txhia chaw thiab mus rau nram lub nroog Yeluxalees. Cov ntseeg uas nyob hauv lub nroog Xixaleyas muaj qee leej nrog peb mus thiab, thaum peb mus txog, lawv coj peb mus so hauv Manaxoos tsev, yav tas los Manaxoos nyob pem lub koog Povtxwv Xaipas thiab nws twb ntseeg Vajtswv ntev los lawm. Thaum peb mus txog hauv lub nroog Yeluxalees, cov ntseeg zoo siab kawg li. Hnub tom qab Paulus nrog peb mus saib Yakaunpaus. Cov txwjlaug uas saib cov ntseeg twb tuaj nyob ntawd tos peb lawm. Thaum Paulus nrog lawv tham, Paulus piav txhua yam uas Vajtswv ua txij thaum Paulus mus qhia lwm Haivneeg rau lawv mloog. Thaum lawv hnov Paulus hais li ntawd, lawv ua Vajtswv tsaug. Lawv hais rau Paulus hais tias, “Tijlaug, koj twb paub hais tias cov Yudais muaj ntau txhiab leej los ntseeg Yexus lawm, lawv yog cov uas coj Mauxes txoj kevcai nruj. Lawv hnov hais tias, koj pheej mus qhia cov Yudais uas nyob hauv lwm Haivneeg tej tebchaws kom lawv tso Mauxes txoj Kevcai tseg, tsis txhob muab tej menyuam ua kevcai txiav, lawv tsis txhob ua raws li cov Yudais txoj kevcai uas sawvdaws ibtxwm coj los lawm. Lawv sawvdaws yeej yuav hnov hais tias koj tuaj txog ntawm no lawm. Yog li ntawd, koj yuav ua li cas? Peb xav kom koj ua li no. Muaj plaub tug txivneej nyob ntawm no, lawv tau coglus tseg hais tias, lawv yuav ua kevcai ntxuav; koj cia li nrog lawv mus thiab muab nyiaj pab them lawv tej nqi, lawv thiaj tau chais lawv tej plaubhau. Yog koj ua li ntawd, sawvdaws thiaj paub hais tias koj coj raws li Mauxes txoj Kevcai, koj tsis tau ua tej uas lawv hnov ntawd. Peb twb sau ib tsab ntawv rau lwm Haivneeg uas ntseeg Vajtswv lawm hais tias peb sawvdaws pom zoo kom lawv tsis txhob noj tej qhov txhia chaw uas muab fij rau dab, tsis txhob noj ntshav, tsis txhob noj tej qaij tsiaj uas hlua zawm cajdab tuag thiab tsis txhob deev luag pojniam luag txiv.” Yog li ntawd, Paulus coj plaub tus txivneej ntawd mus, thiab hnub tom qab nws nrog lawv ua kevcai ntxuav. Paulus mus qhia rau tus povthawj uas saib lub Tuamtsev paub hais tias thaum twg lawv mam li ua kevcai ntxuav tiav. Hnub uas lawv ua kevcai ntxuav tiav yog hnub uas lawv nqa khoom tuaj fij rau Vajtswv raws li lawv twb coglus tseg lawm hais tias lawv yuav ua li ntawd. Thaum Yuav dhau xya hnub uas lawv ua kevcai ntxuav ntawd, cov Yudais uas tuaj pem lub xeev Axias tuaj muaj qee leej pom Paulus nyob hauv lub Tuamtsev. Ces lawv txawm ntxias kom cov pejxeem ntxhov thiab lawv txawm ntes Paulus. Lawv qw nrov nrov hais tias, “Cov Yixalayees! Nej cia li los pab peb! Tus no yog tus uas pheej mus qhia txhua qhov kom sawvdaws ntxub cov Yixalayees, saib tsis taus Mauxes txoj Kevcai thiab lub Tuamtsev no. Tsis yog li ntawd xwb, nws tseem coj lwm Haivneeg tuaj rau hauv lub Tuamtsev thiab ua rau lub Tuamtsev tsis huv lawm.” ( Lawv hais li ntawd rau qhov lawv pom Taufimus uas tuaj pem lub nroog Efexus tuaj nrog Paulus nyob ua ke hauv lub nroog, lawv thiaj xav hais tias Paulus yeej coj Taufimus mus rau hauv lub Tuamtsev lawm.) Tej lus uas lawv hais ntawd ua rau cov pejxeem uas nyob hauv lub nroog ntxhov. Ces lawv txawm khiav zom zaws tuaj ntes Paulus thiab muab nws cab tawm hauv lub Tuamtsev mus. Tamsim ntawd txawm muaj ib tug los muab lub Tuamtsev tej qhovrooj kaw kiag lawm. Thaum cov neeg coob coob ntawd tabtom yuav muab Paulus tua povtseg, txawm muaj ib tug mus qhia rau tus thawj tubrog pawg txhiab uas saib cov tubrog Loos hais tias cov pejxeem uas nyob hauv lub nroog Yeluxalees no sawvdaws ntxhov heev lawm. Thaum tus thawj tubrog pawg txhiab hnov li ntawd, nws txawm coj cov thawj tubrog pawg pua thiab ib pab tubrog nrog nws mus saib yog ua cas cov pejxeem thiaj ntxhov li ntawd. Thaum cov pejxeem pom tus thawj tubrog pawg txhiab coj tubrog khiav tuaj, ces lawv txawm tsis ntaus Paulus lawm. Tus thawj tubrog pawg txhiab tuaj txog ntua ntawm Paulus, nws tuav nkaus Paulus thiab hais kom cov tubrog muab ob txoj saw hlau los khi Paulus. Tus thawj tubrog txawm nug hais tias, “Tus no yog leejtwg, thiab nws ua txhaum dabtsi?” Cov neeg ntawd lawv nyias hais nyias lawm ib yam tsis sib thooj. Ces tus thawj tubrog pawg txhiab paub tsis tseeb hais tias yog vim li cas, nws thiaj kom cov tubrog coj Paulus mus rau hauv cov tubrog lub yeej. Thaum lawv mus txog ntawm tus ntaiv, cov tubrog txawm muab Paulus nqa, rau qhov cov pejxeem ua nruj ua tsiv heev rau Paulus. Cov pejxeem lawv Paulus qab thiab qw ntsoog qees hais tias, “Cia li coj nws mus tua povtseg.” Thaum cov tubrog tabtom coj Paulus mus rau hauv lub tsev, Paulus txawm hais rau tus thawj tubrog pawg txhiab hais tias, “Thov cia kuv hais ib los rau koj puas tau?” Tus thawj tubrog pawg txhiab teb hais tias, “Koj paub lus Kilis thiab los? Koj tsis yog tus neeg Iziv uas yav tas los tawmtsam nomtswv thiab coj plaub txhiab leej uas tua neeg nrog nws mus rau tom roob mojsab qhua los?” Paulus teb hais tias, “Kuv yog neeg Yudais, kuv yug hauv lub nroog Talaxus uas nyob pem tebchaws Kilikias. Kuv yog cov neeg uas nyob hauv lub nroog Talaxus ntag. Lub nroog ntawd yog ib lub nroog tseemceeb. Thov koj cia kuv hais rau cov pejxeem ntawd mentsis.” Tus thawj tubrog pawg txhiab thiaj cia Paulus hais. Paulus txawm sawv ntsug ntawm tus ntaiv co tes rau sawvdaws kom nyob twjywm. Thaum sawvdaws nyob twjywm lawm, Paulus txawm ua lus Henplais qhia rau lawv hais tias, “Nej cov uas ua niam ua txiv thiab ua kwv ua tij sawvdaws, nej cia li mloog, kuv yuav hais daws kuv zaj!” Thaum sawvdaws hnov Paulus ua lus Henplais hais, lawv txawm nyob twjywm mloog. Paulus hais tias, “Kuv yog neeg Yudais, kuv yug hauv lub nroog Talaxus uas nyob pem tebchaws Kilikias, tiamsis kuv los loj hlob nyob hauv lub nroog Yeluxalees no. Nkamaliyees yog tus xibhwb uas qhia ntawv rau kuv ntag. Kuv tau kawm peb cov yawgkoob txoj kevcai huv tibsi lawm. Thiab kuv muab siab rau ua Vajtswv tes haujlwm ib yam li niaj hnub no nej pom kuv ua. Yav tas los kuv yog ib tug uas tau tsimtxom cov ntseeg. Muaj qee leej kuv muab tsimtxom tuag lawm. Kuv ntes cov ntseeg tsis hais pojniam lossis txivneej coj mus kaw rau hauv tsev lojcuj. Tus Povthawj Hlob thiab cov Yudais tej nomtswv puavleej paub hais tias kuv hais tseeb xwb. Lawv ua ntawv rau kuv nqa mus rau cov kwvtij Yudais uas nyob pem lub nroog Damaxes, thaum ntawd kuv mus ntes cov ntseeg uas nyob ped khi thiab cab los rau txim rau nram lub nroog Yeluxalees no. “Thaum yuav luag tavsu uas kuv tabtom taug kev mus yuav txog pem lub nroog Damaxes, txawm muaj duab tshav ntuj ci nplas saum ntuj tuaj rau kuv. Kuv txawm ntog kiag rau hauv av, kuv hnov ib lub suab hais rau kuv hais tias, ‘Xaulus, Xaulus! Ua li cas koj tsimtxom kuv?’ Kuv nug nws hais tias, ‘Tus Tswv, koj yog leejtwg?’ Nws teb kuv hais tias, ‘Kuv yog Yexus tus uas yog neeg Naxales uas koj tsimtxom ntag.’ Cov txivneej uas nrog kuv mus puavleej pom tus duab tshav ntuj uas ci tuaj rau kuv, tiamsis lawv tsis hnov lub suab uas hais rau kuv. Kuv nug hais tias, ‘Tus Tswv, yog li ntawd, kuv yuav ua li cas?’ Tus Tswv txawm hais rau kuv hais tias, ‘Koj cia li sawv mus rau hauv lub nroog Damaxes. Thaum koj mus txog tod yuav muaj neeg qhia rau koj paub txhua yam uas Vajtswv yuav kom koj ua.’ Tus duab tshav ntuj uas ci ci ntawd ua rau kuv ob lub qhovmuag tsis pom kev lawm. Ces cov txivneej uas nrog kuv mus ntawd thiaj li tuav kuv tes mus rau hauv lub nroog Damaxes. “Nyob hauv lub nroog Damaxes muaj ib tug txivneej hu ua Ananias uas coj Vajtswv txoj kevcai nruj, cov neeg Yudais uas nyob hauv lub nroog Damaxes puavleej hwm nws. Nws tuaj saib kuv, nws los sawv ntawm kuv ib sab thiab nws hais rau kuv hais tias, ‘Nyuag kwv Xaulus, koj cia li rov pom kev.’ Tamsim ntawd kuv ob lub qhovmuag txawm rov pom kev, thiab kuv tsa qhovmuag saib nws. Nws hais rau kuv hais tias, ‘Peb cov yawgkoob tug Vajtswv twb xaiv koj los ua tes haujlwm uas Vajtswv xav kom koj ua thiab kom koj pom Vajtswv tus tubtxib uas ncaj ncees thiab hnov lub suab uas nws hais rau koj. Rau qhov koj yuav ua timkhawv qhia nws zaj uas koj pom thiab koj hnov lawm rau sawvdaws paub. Nimno koj tseem yuav tos ua dabtsi? Koj cia li sawv tsees ua kevcai raus dej, thiab tuav tus Tswv lub npe thov, nws thiaj yuav zam koj tej kev txhaum.’ “Thaum kuv rov los txog hauv lub nroog Yeluxalees no, kuv tabtom thov Vajtswv hauv lub Tuamtsev, kuv ua yogtoog pom tus Tswv los hais rau kuv hais tias, ‘Nimno koj cia li tawm hauv lub nroog Yeluxalees no mus, rau qhov cov neeg uas nyob hauv lub nroog no yuav tsis mloog tej lus uas koj ua timkhawv txog kuv zaj.’ Thaum kuv hnov tus Tswv hais li ntawd, kuv hais rau nws hais tias, ‘Tus Tswv, sawvdaws puavleej paub hais tias kuv yog tus uas pheej mus ntes cov ntseeg koj txhua qhov hauv tej tsev sablaj. Kuv muab lawv ntaus thiab muab lawv cab mus kaw rau hauv tsev lojcuj. Thaum cov neeg uas ntxub Xatefanaus muab Xatefanaus tus uas ua timkhawv txog koj zaj tua povtseg, kuv nyob ntawd thiab; kuv nrog lawv pom zoo muab nws tua povtseg. Thiab cov neeg uas tua Xatefanaus hle lawv tej tsho cia rau kuv zov.’ Tus Tswv hais rau kuv hais tias, ‘Koj cia li mus, kuv yuav txib koj mus deb heev, mus qhia lwm Haivneeg.’ ” Cov neeg ntawd mloog Paulus qhia los txog thaum Paulus hais tias Vajtswv yuav txib nws mus qhia lwm Haivneeg, lawv txawm qw nrov nrov hais tias, “Tus neeg zoo li no tsis tsimnyog cia nws ua neej nyob, cia li muab nws tua! Cia li muab nws tua povtseg!” Cov neeg ntawd chim heev, lawv thiaj qw nrov nrov thiab hle lawv tej tsho pov zom zaws rau ub rau no thiab tsuab hmoov av w rau saum nruab ntug. Thaum tus thawj tubrog pawg txhiab pom li ntawd, nws txawm kom nws cov tubrog coj Paulus mus hauv lub yeej thiab kom lawv muab Paulus nplawm thiab nug Paulus saib yog vim li cas cov Yudais pheej yuav qw tawmtsam Paulus heev ua luaj li? Tiamsis thaum cov tubrog tabtom muab hlua khi Paulus yuav muab Paulus nplawm, Paulus hais rau tus thawj tubrog pawg pua uas sawv ze ntawm Paulus hais tias, “Thaum nej tseem tsis tau taug ib tug neeg Loos twg zaj, nej cia li muab nws nplawm, puas raws li txoj kevcai thiab?” Thaum tus thawj tubrog pawg pua, hnov Paulus hais li ntawd, nws mus qhia rau tus thawj tubrog pawg txhiab hais tias, “Ua li cas koj kom peb muab tus txivneej ntawd nplawm? Nws twb yog neeg Loos thiab los sav.” Tus thawj tubrog pawg txhiab los nug Paulus hais tias, “Koj cia li qhia kuv saib, koj yog neeg Loos thiab los?” Paulus teb hais tias, “Kuv yeej yog tiag.” Tus thawj tubrog pawg txhiab txawm hais tias, “Kuv yog neeg Loos thiab, tiamsis kuv them nyiaj ntau heev kuv thiaj tau los ua neeg Loos.” Paulus teb hais tias, “Koj them nyiaj ntau koj thiaj tau los ua, tiamsis thaum kuv yug los kuv yeej yog neeg Loos lawm.” Thaum cov neeg uas yuav taug Paulus zaj hnov li ntawd, lawv txawm txav ntawm Paulus mus deb zuj zus lawm. Thaum tus thawj tubrog pawg txhiab hnov Paulus hais tias Paulus yog neeg Loos, tus thawj tubrog ntawd ntshai heev, rau qhov nws muab Paulus khi lawm. Tus thawj tubrog pawg txhiab xav paub tseeb hais tias tej lus uas cov Yudais nkaug Paulus ntawd yog li cas tiag. Hnub tom qab tus thawj tubrog txawm kom cov tubrog muab txoj saw hlau uas khi Paulus daws; nws kom cov thawj ntawm cov povthawj thiab cov nomtswv sawvdaws tuaj ua ke. Thaum sawvdaws tuaj txhij lawm, nws txawm coj Paulus los sawv tabmeeg sawvdaws. Paulus tsa qhovmuag saib cov Yudais tej nomtswv thiab hais rau lawv hais tias, “Cov kwvtij, kuv lub siab yeej paub hais tias kuv ua kuv lub neej zoo tabmeeg Vajtswv los txog niaj hnub no.” Thaum tus Povthawj Hlob Ananias hnov Paulus hais li ntawd, nws kom cov neeg uas sawv ze ntawm Paulus ntaus Paulus qhovncauj. Paulus hais rau Ananias hais tias, “Tus niag neeg ntsejmuag ncaj siab nkhaus, Vajtswv yuav ntaus koj. Ua li cas koj tseem yuav muaj plhus tuaj nyob ntawm ko txiav txim rau kuv raws li Mauxes txoj Kevcai? Qhov uas koj kom lawv ntaus kuv, koj twb ua txhaum Mauxes txoj Kevcai lawm los sav!” Cov neeg uas sawv ze Paulus hais rau Paulus hais tias, “Koj tseem yuav saib tsis taus tus Povthawj Hlob uas ua Vajtswv tes haujlwm thiab los?” Paulus teb lawv hais tias, “Cov kwvtij, kuv tsis paub hais tias nws yog tus Povthawj Hlob, yog kuv paub ces kuv yuav tsis hais li ntawd, rau qhov Vajtswv Txojlus sau tseg hais tias, ‘Nej tsis txhob thuam tus uas saib nej.’ ” Thaum Paulus pom hais tias cov neeg uas tuaj sablaj ntawd muaj ibtxhia yog cov Xadukais thiab ibtxhia yog cov Falixais, ces Paulus txawm hais nrov nrov rau sawvdaws hais tias, “Cov kwvtij, kuv yog ib tug Falixais, kuv txiv yog ib tug Falixais thiab. Qhov uas lawv coj kuv tuaj rau nej taug kuv zaj, twb yog vim kuv cia siab hais tias cov neeg uas tuag lawm yuav muaj sia sawv hauv qhov tuag rov qab los.” Thaum Paulus hais li ntawd tas, cov Falixais thiab cov Xadukais txawm sib cav heev thiab lawv tsis sib haum lawm. ( Rau qhov cov Xadukais tsis ntseeg hais tias neeg yuav sawv tau hauv qhov tuag rov qab los thiab tsis ntseeg hais tias muaj cov timtswv ceebtsheej lossis muaj ntsujplig, tiamsis cov Falixais ntseeg hais tias muaj peb yam ntawd huv tibsi.) Sawvdaws yimhuab sib cav heev dua; cov xibhwb uas qhia Vajtswv txoj Kevcai uas yog cov Falixais pab muaj qee leej txawm sawv tsees thiab cem hais tias, “Peb tsis pom tus txivneej no ua ib qhov txhaum li! Tej zaum yog ntsujplig lossis timtswv ceebtsheej los hais rau nws tiag.” Thaum tus thawj tubrog pawg txhiab pom sawvdaws sib cav heev, nws ntshai nyob tsam lawv muab Paulus chua ntuag ua ob peb ceg, nws thiaj kom nws cov tubrog coj Paulus tawm hauv cov neeg ntawd mus rau hauv lub yeej. Hmo ntawd tus Tswv los sawv ntawm Paulus ib sab thiab hais rau Paulus hais tias, “Koj tsis txhob ntshai! Koj twb ua timkhawv qhia kuv zaj hauv lub nroog Yeluxalees lawm, koj yuav tsum ua ib yam li ntawd tim lub nroog Loos thiab.” Thaum kaj ntug cov Yudais txawm tuaj ua ke sablaj. Lawv coglus hais tias lawv yuav tsis noj tsis haus ib yam dabtsi mus txog thaum lawv tua tau Paulus tso. Cov neeg uas tuavhauv ntawd muaj plaub caug tawm leej. Ces lawv txawm mus cuag cov thawj ntawm cov povthawj thiab cov txwjlaug, thiab lawv hais tias, “Peb twb coglus lawm hais tias peb yuav tsis noj tsis haus ib yam dabtsi mus txog thaum uas peb tua tau Paulus tso. Yog li ntawd, nej thiab cov Yudais tej nomtswv cia li txib neeg mus hais rau cov neeg Loos tus thawj tubrog pawg txhiab kom coj Paulus tuaj cuag peb. Nej ua txuj hais rau nws hais tias nej xav taug Paulus zaj kom paub tseeb dua thawj zaug. Yog nej ua li ntawd peb yuav mus tos kev tua Paulus povtseg thaum nws tseem tuaj tsis tau txog ntawm no.” Tiamsis Paulus tus muam tus tub hnov lawv tuavhauv yuav muab Paulus tua povtseg, nws txawm mus rau hauv cov tubrog lub yeej thiab qhia qhov uas nws hnov ntawd rau Paulus paub. Paulus txawm hu ib tug thawj tubrog pawg pua los cuag nws thiab hais tias, “Thov koj coj tus tub hluas no mus cuag tus thawj tubrog pawg txhiab, nws muaj lus yuav hais rau tus thawj tubrog ntawd mloog.” Tus thawj tubrog pawg pua txawm coj tus tub hluas ntawd mus cuag tus thawj tubrog pawg txhiab thiab hais tias, “Tus Paulus uas raug txim ntawd thov kuv coj tus tub hluas no tuaj cuag koj; tus tub hluas no muaj lus yuav hais rau koj mloog.” Tus thawj tubrog pawg txhiab tuav tus tub hluas ntawd tes coj mus rau ib qho thiab nug hais tias, “Koj muaj lus dabtsi yuav hais rau kuv?” Tus tub hluas ntawd teb hais tias, “Cov Yudais tej nomtswv twb sablaj haum lawm hais tias tagkis lawv yuav tuaj thov koj coj Paulus mus cuag cov Yudais tej nomtswv; lawv yuav ua txuj hais tias, ‘Cov Yudais tej nomtswv xav taug Paulus zaj kom paub tseeb dua thawj zaug.’ Tiamsis koj tsis txhob mloog lawv hais, rau qhov twb muaj plaub caug tawm leej tabtom tos kev yuav tua Paulus. Cov neeg ntawd twb coglus tseg lawm hais tias, lawv yuav tsis noj tsis haus ib yam dabtsi mus txog thaum uas lawv tua tau Paulus tso. Lawv twb npaj txhij lawm, tiamsis lawv tseem tos saib koj yuav hais li cas xwb.” Tus thawj tubrog pawg txhiab txawm hais rau tus tub hluas ntawd hais tias, “Koj cia li rov qab mus tsev, thiab koj tsis txhob qhia qhov uas koj tuaj hais rau kuv no rau leejtwg li.” Tus thawj tubrog pawg txhiab hu nws ob tug thawj tubrog pawg pua los cuag nws thiab hais tias, “Neb cia li mus txhij ob puas leej tubrog, txhij cov tubrog caij neeg xya caum leej thiab cov tubrog nkaug hmuv ob puas leej; thaum cuaj teev tsaus ntuj, nej mus rau pem lub nroog Xixaleyas. Nej nrhiav nees rau Paulus caij, nej yuav tsum saib nws zoo zoo thiab xa nws mus kom txog Felis uas yog tus tswvxeev.” Tus thawj tubrog pawg txhiab sau ib tsab ntawv xa mus rau Felis. Tsab ntawv ntawd nws sau hais li no: “Hawm txog tus tswvxeev Felis, kuv yog Kelaudi-us Lixias. Kuv sau tsab ntawv no tuaj qhia rau koj paub hais tias cov Yudais tau ntes tus txivneej no; lawv twb yuav muab nws tua povtseg. Kuv hnov hais tias nws yog neeg Loos, kuv thiaj coj kuv cov tubrog mus pab nws. Kuv xav paub tseeb hais tias tej lus uas cov Yudais nkaug nws yog li cas tiag, kuv thiaj coj nws mus cuag cov Yudais tej nomtswv. Thaum peb taug nws zaj, kuv pom hais tias tej lus uas lawv nkaug nws, lawv hais txog qhov uas nws ua txhaum cov Yudais txoj kevcai xwb. Kuv tsis pom nws ua ib qho txhaum uas yuav tsimnyog muab nws tua povtseg lossis muab nws kaw rau hauv tsev lojcuj. Thaum kuv hnov hais tias cov Yudais tuavhauv yuav tos kev muab nws tua povtseg, kuv thiaj xa nws tuaj cuag koj. Kuv hais rau cov neeg uas nkaug nws hais tias kom lawv cia li tuaj hais tim ntsej tim muag ntawm koj.” Cov tubrog ntawd mus ua raws li tus thawj tubrog pawg txhiab hais. Hmo ntawd lawv coj Paulus mus txog pem lub nroog Atipatis. Hnub tom qab cov tubrog uas mus kotaw txawm rov qab mus rau nram lawv lub yeej lawm, tsuas tseg cov tubrog uas caij neeg xa Paulus mus rau pem lub nroog Xixaleyas xwb. Thaum lawv mus txog hauv lub nroog Xixaleyas lawm, lawv muab tsab ntawv uas Kelaudi-us Lixias sau rau tus tswvxeev thiab muab Paulus cob rau nws. Thaum tus tswvxeev nyeem tsab ntawv ntawd tas, nws nug Paulus hais tias, “Koj nyob lub tebchaws twg tuaj?” Thaum tus tswvxeev paub hais tias Paulus tuaj pem tebchaws Kilikias tuaj, tus tswvxeev hais rau Paulus hais tias, “Tos cov neeg uas nkaug koj tuaj txog tso kuv mam li mloog koj peev koj tej lus.” Tus tswvxeev kom cov tubrog zov Paulus zoo zoo hauv Vajntxwv Helauj lub loog. Tau tsib hnub tom qab Ananias uas yog tus Povthawj Hlob, ob peb tug txwjlaug thiab ib tug txivneej uas txawj txheem plaub hu ua Tetulus, lawv mus rau pem lub nroog Xixaleyas. Thaum lawv mus txog lawm, lawv txawm nkaug Paulus rau Felis uas yog tus Tswvxeev. Thaum lawv hu Paulus los, Tetulus txawm nkaug Paulus rau Felis mloog hais tias, “Koj ua peb niam peb txiv! Niaj hnub no peb muaj noj muaj haus, nyob kaj siab lug thiab peb lub tebchaws txhua qhov muaj kev vammeej los twb yog vim muaj koj saib. Txhua yam uas koj tau pab peb lawm, peb yeej nco ntsoov koj txiaj ntsig mus li. Ntshai yuav tabkaum koj, tiamsis kuv thov koj ua siab ntev; peb muaj lo puav lus yuav hais rau koj mloog. Peb pom hais tias tus txivneej no pheej ua rau cov Yudais uas nyob thoob plaws qab ntuj ntxhov, thiab nws yog tus thawjcoj ntawm cov Naxalenes pab. Tsis yog li ntawd xwb, nws tseem ua saib tsis taus lub Tuamtsev thiab, peb thiaj ntes nws. (Peb yeej yuav txiav txim rau nws raws li peb txoj kevcai. Tiamsis tus thawj tubrog pawg txhiab uas yog Lixias txawm tuaj txeeb Paulus ntawm peb tes mus lawm. Lixias hais rau cov neeg uas nkaug Paulus kom tuaj hais tim ntsej tim muag ntawm koj.) Yog koj ua tib zoo taug tus txivneej no zaj zoo zoo, koj yuav paub hais tias yeej muaj raws li tej lus uas peb hais.” Cov Yudais uas nyob ntawd hais zom zaws hais tias, “Tej uas Tetulus hais yeej muaj tseeb tiag.” Thaum tus tswvxeev kom Paulus hais daws Paulus zaj, Paulus hais tias, “Kuv paub hais tias koj yog tus txiav txim rau cov neeg uas nyob hauv lub tebchaws no tau ntau xyoo los lawm, kuv thiaj txaus siab hais daws kuv zaj rau koj mloog. Yog koj ua tib zoo saib, koj yeej yuav paub hais tias txij hnub uas kuv mus pehawm Vajtswv nram lub nroog Yeluxalees los txog hnub no twb tsis tau dhau kaum ob hnub. Cov Yudais yeej tsis tau pom kuv nrog leejtwg sib cav hauv lub Tuamtsev li. Lawv twb tsis pom kuv ua rau cov pejxeem ntxhov hauv lawv tej tsev sablaj lossis hauv lub nroog qhov twg li. Tej lus uas lawv nkaug kuv, lawv nrhiav tsis tau ib los tseeb uas qhia hais tias kuv tau ua txhaum. Txawm yog tsis muaj ib los tseeb los kuv thov lees ib qho rau koj hais tias kuv yeej coj raws li txoj Kevcai Tshiab uas lawv hais tias tsis tseemceeb. Tiamsis txoj kevcai ntawd yeej yog Vajtswv txoj uas peb cov yawgkoob yeej ibtxwm coj thaum ub los lawm. Kuv ntseeg txhua lo uas sau tseg rau hauv Mauxes txoj Kevcai thiab hauv tej ntawv uas cov cev Vajtswv lus tau sau tseg lawm huv tibsi. Kuv thiab lawv puavleej cia siab ib yam nkaus hais tias Vajtswv yuav tsa cov neeg uas tuag lawm txhua tus sawv rov qab los, tsis hais cov neeg ua phem lossis cov neeg ua zoo. Yog li ntawd, kuv thiaj muab siab rau ua kom haum Vajtswv siab thiab haum neeg siab. “Kuv twb tawm hauv lub nroog Yeluxalees mus nyob lwm qhov tau ntau xyoos lawm, kuv thiaj rov qab mus rau nram lub nroog Yeluxalees thiab coj mentsis nyiaj mus pub rau kuv haivneeg thiab muab tsiaj tua hlawv fij rau Vajtswv. Thaum kuv ua kevcai ntxuav tas, kuv tabtom muab tsiaj tua hlawv fij rau Vajtswv hauv lub Tuamtsev, ces lawv txawm tuaj pom kuv. Thaum ntawd tsis muaj neeg coob nrog kuv nyob ua ke thiab tsis muaj kev ntxhov dabtsi li. Cov Yudais uas tuaj pem lub xeev Axias tuaj muaj qee leej nyob ntawd thiab. Yog lawv pom hais tias thaum ntawd kuv ua txhaum, tsimnyog lawv tuaj nkaug kuv rau koj ntawm no, lossis kom cov neeg uas nyob ntawm no hais saib, thaum kuv qhia kuv zaj rau cov Yudais tej nomtswv mloog, cov uas nkaug kuv no ho pom kuv ua txhaum dabtsi. Tsuas tshwj thaum kuv sawv tabmeeg lawv, kuv hais ib los li no xwb: ‘Hnub no nej txiav txim rau kuv twb yog vim kuv ntseeg hais tias cov neeg uas tuag lawm, yuav sawv hauv qhov tuag rov qab los. Tseem muaj lwm lo uas lawv hais tias kuv ua txhaum thiab los?’ ” Felis yeej kawm paub txoj Kevcai Tshiab los lawm. Thaum nws hnov Paulus hais li ntawd, nws txawm kom sawvdaws tso tseg. Nws hais rau sawvdaws hais tias, “Tos Lixias uas yog tus thawj tubrog pawg txhiab tuaj txog tso, kuv mam li rov hais nej rooj plaub no dua.” Felis kom tus thawj tubrog pawg pua zov Paulus thiab hais tias, tsis txhob muab Paulus khi, cia nws cov phoojywg tuaj saib nws thiab tu nws. Tom qab ntawd ob peb hnub, Felis thiab Deluxilas uas yog Felis tus pojniam tuaj, Felis tus pojniam yog neeg Yudais, nws kom lawv coj Paulus los ntsib nkawd thiab kom Paulus qhia txojkev ntseeg Yexus rau nkawd mloog. Tiamsis thaum Paulus qhia txojkev ncaj ncees, kev tswj yus lub siab, thiab txojkev txiav txim uas yuav muaj los yav tom ntej rau nkawd mloog. Felis ntshai, nws txawm hais rau Paulus hais tias, “Koj cia li rov mus, lwm hnub kuv khoom tso kuv mam li rov hu koj tuaj dua.” Tiamsis Felis xav hais tias Paulus yuav muab nyiaj rau nws, nws thiaj pheej hu Paulus mus nrog nws tham ob peb zaug. Tom qab ntawd ob xyoos, Pauleki-us Fexatus los ua tus tswvxeev hloov Felis chaw. Felis xav kom cov Yudais nyiam Felis, Felis thiaj cia Paulus nws nyob nws hauv tsev lojcuj. Thaum Fexatus los ua tswvxeev tau peb hnub lawm, nws tawm hauv lub nroog Xixaleyas mus rau nram lub nroog Yeluxalees. Thaum nws mus txog nrad, cov thawj ntawm cov povthawj thiab cov Yudais tej thawjcoj txawm tuaj nkaug Paulus rau Fexatus. Lawv thov Fexatus hu kom Paulus tuaj rau hauv lub nroog Yeluxalees. Lawv thov li ntawd, rau qhov lawv twb tuavhauv tseg lawm hais tias lawv yuav tos kev muab Paulus tua povtseg. Fexatus teb hais tias, “Paulus tseem raug kaw pem lub nroog Xixaleyas. Tsis ntev no kuv yuav rov qab mus ped, yog nej pom Paulus ua txhaum dabtsi, nej cov uas ua thawj cia li nrog kuv mus rau pem lub nroog Xixaleyas nej mam li sib hais ped.” Fexatus tseem nrog lawv nyob hauv lub nroog Yeluxalees kwvlam li kaum hnub, nws mam li rov qab mus rau pem lub nroog Xixaleyas. Thaum nws mus txog ped lawm, hnub tom qab nws mus rau hauv lub tsev hais plaub, ces nws txawm txib neeg mus coj Paulus los cuag nws. Thaum Paulus los txog, cov Yudais uas tuaj nram lub nroog Yeluxalees tuaj txawm los sawv vij Paulus thiab nkaug Paulus ntau yam rau Fexatus, tiamsis lawv tsis muaj timkhawv li. Ces Paulus txawm hais daws Paulus zaj hais tias, “Kuv yeej tsis tau ua txhaum cov Yudais txoj kevcai thiab tsis tau ua saib tsis taus lub Tuamtsev lossis ua txhaum Huabtais Xixas li.” Tiamsis Fexatus xav kom cov Yudais nyiam Fexatus, ces nws txawm nug Paulus hais tias, “Koj puas xav mus rau nram lub nroog Yeluxalees, cia kuv mam li mus hais nej rooj plaub nrad?” Paulus teb hais tias, “Kuv twb nyob hauv Huabtais Xixas lub tsev hais plaub no lawm, yog li ntawd twb tsimnyog koj txiav txim rau kuv ntawm no. Koj yeej paub hais tias kuv tsis tau ua txhaum rau cov Yudais. Yog kuv tau ua txhaum kevcai lossis ua ib yam dabtsi uas tsimnyog muab kuv tua povtseg, kuv yeej tsis tawv tsis nyom li. Tiamsis yog tej lus uas lawv nkaug kuv ntawd tsis muaj tseeb, leejtwg tseem yuav muaj cuabkav muab kuv rau lawv? Kuv thov mus hais tim Huabtais Xixas.” Thaum Fexatus hnov Paulus hais li ntawd, nws txawm nrog nws cov tuavxam sablaj. Thaum lawv sablaj tas, nws hais rau Paulus hais tias, “Koj twb thov mus hais tim Huabtais Xixas lawm, yog li ntawd koj yuav tau mus cuag Xixas xwb.” Tom qab ntawd tsis ntev Vajntxwv Akipas thiab vajntxwv tus muam uas hu ua Npelanikes tuaj xyuas Fexatus hauv lub nroog Xixaleyas. Nkawd tuaj nyob tau ntau hnub, Fexatus txawm piav Paulus rooj plaub rau Vajntxwv Akipas mloog hais tias, “Lub sijhawm uas Felis ua tus tswvxeev kav lub xeev no, nws tau muab ib tug txivneej kaw rau hauv tsev lojcuj, nimno tus txivneej ntawd tseem nyob hauv tsev lojcuj; thiab thaum kuv mus rau nram lub nroog Yeluxalees, cov thawj ntawm cov povthawj thiab cov txwjlaug txawm tuaj nkaug tus txivneej ntawd rau kuv thiab thov kom kuv txiav txim rau nws. Tiamsis kuv hais rau lawv hais tias raws li cov Loos txoj kevcai, ob tog yuav tsum tuaj sib hais tim ncauj tim lus thiab cia tus pemkom hais daws nws zaj tas tso mam li txiav txim rau tus uas ua txhaum. Thaum lawv tuaj txhij lawm, hnub tom qab kuv mus nyob hauv lub tsev hais plaub thiab hu tus txivneej ntawd los cuag kuv. Thaum cov yeejkom sawv los hais, lawv tsis nkaug tej uas nws ua txhaum raws li kuv xav. Lawv tsuas sib cav hais txog lawv tej kevcai xwb, thiab lawv hais txog ib tug txivneej uas hu ua Yexus; nws twb tuag lawm, tiamsis Paulus hais tias tus txivneej ntawd tseem muaj sia nyob. Thaum ntawd kuv tsis paub yuav taug li cas thiaj paub zaj no tseeb, kuv thiaj nug Paulus saib nws puas kam mus nram lub nroog Yeluxalees, kuv mam li hais nws rooj plaub nrad. Tiamsis Paulus thov kom kuv cia nws nyob nws hauv lub tsev lojcuj thiab cia Huabtais Xixas mam li txiav txim rau nws. Kuv thiaj cia nws nyob nws hauv tsev lojcuj mus txog hnub uas kuv xa nws mus cuag Huabtais Xixas.” Vajntxwv Akipas hais rau Fexatus hais tias, “Kuv xav mloog tus txivneej ntawd hais.” Ces Fexatus teb hais tias, “Tagkis kuv yuav kom tus txivneej ntawd los piav rau koj mloog.” Hnub tom qab cov thawj tubrog thiab cov nomtswv hauv lub nroog nrog vajntxwv thiab Npelanikes mus rau hauv chav tsev hais plaub. Thaum Vajntxwv Akipas mus txog hauv chav tsev hais plaub lawm, Fexatus txib neeg mus hu Paulus los cuag vajntxwv. Thaum Paulus los txog, Fexatus hais rau vajntxwv hais tias, “Vajntxwv Akipas thiab nej txhua tus uas nyob ntawm no, nej sawvdaws puavleej pom tus txivneej no. Nws yog tus uas cov Yudais uas nyob hauv lub nroog no thiab cov uas nyob nram lub nroog Yeluxalees pheej tuaj kom kuv muab nws tua povtseg. Tiamsis kuv twb nug nws tas lawm, kuv tsis pom nws ua ib qho txhaum uas yuav txaus muab nws tua povtseg. Yog li ntawd, thaum nws thov mus hais tim Huabtais Xixas, kuv thiaj hais rau nws hais tias kuv yuav xa nws mus. Vajntxwv Akipas, kuv hais rau koj hais tias yeej tsis muaj ib qho tseemceeb uas yuav zoo sau tus txivneej no zaj mus qhia rau Huabtais Xixas paub. Yog li ntawd, kuv thiaj coj nws tuaj cuag sawvdaws, tiamsis qhov tseeb yeej yog kuv coj nws tuaj cuag koj kom koj taug nws zaj, kuv thiaj muaj lus sau xa mus rau Huabtais Xixas. Kuv xav hais tias yog tsis muaj ib qho tseemceeb uas zoo sau qhia hais tias tus uas raug txim ua txhaum dabtsi yeej tsis zoo xa tus ntawd mus cuag Huabtais Xixas.” Vajntxwv Akipas hais rau Paulus hais tias, “Kuv cia koj hais daws koj zaj.” Paulus xyab hlo tes thiab hais daws nws zaj li no: “Vajntxwv Akipas, kuv zoo siab kawg li, hnub no kuv tau los sawv ntawm koj xubntiag hais daws txhua zaj uas cov Yudais nkaug kuv hais tias kuv ua txhaum rau koj mloog, rau qhov koj yeej paub cov Yudais tej kevcai thiab tej uas peb cov Yudais hais tsis sib haum lawm. Yog li ntawd, thov koj ua siab ntev mloog kuv hais. “Txij thaum kuv yau los txog niaj hnub no, kuv lub neej zoo li cas los cov Yudais puavleej paub huv tibsi. Kuv yeej nrog kuv haivneeg nyob hlob hauv kuv lub tebchaws thiab hauv lub nroog Yeluxalees. Lawv yeej ibtxwm paub kuv thaum ub los lawm. Yog lawv kam ua timkhawv, lawv yeej ua tau timkhawv hais tias kuv yog ib tug Falixais uas yog pab coj nruj. Nimno kuv tuaj sawv ntawm no twb yog vim kuv cia siab rau tej uas Vajtswv tau coglus tseg rau peb cov yawgkoob lawm. Peb cov neeg kaum ob xeem puavleej muab siab rau niaj hnub niaj hmo ua raws li Vajtswv txoj Kevcai. Peb cia siab hais tias peb yuav tau raws li tej lus uas Vajtswv cog tseg ntawd. Vajntxwv, twb yog vim kuv cia siab li no cov Yudais thiaj hais tias kuv ua txhaum. Ua li cas nej cov uas yog neeg Yudais ib yam li kuv, nej pheej tsis ntseeg hais tias, Vajtswv tsa tau cov neeg uas tuag lawm sawv hauv qhov tuag rov qab los? “Yav tas los lawm, kuv yeej xav hais tias kuv yuav ua txhua yam tawmtsam Yexus tus uas yog neeg Naxales. Kuv thiaj ua li ntawd nram lub nroog Yeluxalees. Cov thawj ntawm cov povthawj tso cai rau kuv mus ntes cov ntseeg Vajtswv coj los kaw rau hauv tsev lojcuj. Thaum cov thawj txiav txim hais tias yuav muab cov ntseeg ntawd coj mus tua povtseg, kuv pom zoo li ntawd thiab. Muaj ntau zaug kuv mus ntes cov ntseeg hauv tej tsev sablaj los rau txim thiab yuam kom lawv tso lawv tej kev ntseeg tseg. Kuv ntxub lawv kawg li, kuv thiaj mus tsimtxom cov ntseeg uas nyob hauv lwm Haivneeg tej tebchaws thiab. “Yog li ntawd, kuv thiaj thov cov thawj ntawm cov povthawj ua ntawv tso cai rau kuv mus tsimtxom cov ntseeg pem lub nroog Damaxes. Vajntxwv, thaum tavsu uas kuv taug kev mus, kuv pom duab ci nplas saum ntuj tuaj, ci tshaj lub hnub tuaj rau kuv thiab cov neeg uas nrog kuv mus ntawd. Peb txawm ntog tas rau hauv av, kuv hnov ib lub suab ua lus Henplais hais rau kuv hais tias, ‘Xaulus, Xaulus! Ua li cas koj tsimtxom kuv? Yog koj tawmtsam kuv, yuav mob koj ib yam li tus nyuj uas tuam nws tus tswv tus pas, ces yeej yuav mob nyuj nqaij xwb.’ Kuv nug hais tias, ‘Tus Tswv, koj yog leejtwg?’ Tus Tswv teb hais tias, ‘Kuv yog Yexus tus uas koj tsimtxom ntag. Koj cia li sawv, qhov uas kuv los tshwm rau koj pom no yog kuv los tsa koj ua kuv tus tubtxib. Koj yuav mus qhia qhov uas hnub no koj pom kuv thiab tej uas kuv yuav ua rau koj pom yav tom ntej rau sawvdaws paub. Kuv yuav txib koj mus qhia cov Yixalayees thiab lwm Haivneeg; kuv yuav tsomkwm koj, tsis pub leejtwg ua phem rau koj. Kuv yuav txib koj mus qhia cov neeg uas nyob hauv qhov tsaus ntuj kom lawv tawm los nyob qhov pom kev thiab tawm hauv dab Ntxwgnyoog txhais tes los cuag Vajtswv. Thaum lawv los ntseeg kuv lawm, Vajtswv yuav zam txim rau lawv, lawv thiaj tau los nrog cov neeg uas Vajtswv xaiv cia ua Vajtswv haivneeg lawm nyob ua ke.’ “Vajntxwv Akipas, twb yog vim li ntawd, kuv thiaj ua raws li tej uas kuv hnov lub suab saum ntuj hais kom kuv ua. Kuv xub qhia cov neeg uas nyob hauv lub nroog Damaxes, kuv mam li mus qhia nram lub nroog Yeluxalees. Tom qab ntawd kuv mus qhia thoob plaws hauv lub xeev Yudais thiab qhia lwm Haivneeg kom sawvdaws nyias tso nyias tej kev txhaum tseg thiab tig rov los cuag Vajtswv, thiab nyias ua nyias lub neej kom phim qhov uas nyias twb tso nyias tej kev txhaum tseg lawm. Twb yog vim li ntawd, cov Yudais thiaj li tuaj ntes kuv hauv lub Tuamtsev; thaum ntawd lawv twb yuav muab kuv tua povtseg. Tiamsis Vajtswv niaj zaus pab kuv los txog hnub no, kuv thiaj li tau tuaj sawv ntawm no ua timkhawv qhia tej uas kuv pom thiab kuv paub lawm rau cov hlob cov yau sawvdaws mloog. Tej uas kuv qhia, kuv tsuas qhia raws li tej lus uas cov cev Vajtswv lus thiab Mauxes xub qhia tseg lawm hais tias tus Mexiyas yuav raug kev tsimtxom thiab nws yuav yog thawj tug uas sawv hauv qhov tuag rov qab los. Nws yuav qhia qhov kaj uas yog txojkev cawm dim rau cov Yudais thiab lwm Haivneeg.” Thaum Paulus tabtom hais daws Paulus zaj tsis tau tas, Fexatus txawm hais nrov nrov rau Paulus hais tias, “Paulus, koj vwm lawm! Tej kev txawj ntse uas koj kawm ua rau koj vwm lawm.” Paulus teb hais tias, “Fexatus, kuv tsis vwm! Kuv yeej meejpem thiab tej lus uas kuv hais no yeej muaj tseeb tiag. Vajntxwv Akipas, kuv muaj lub siab tawv qhia tej no rau koj, rau qhov koj yeej paub tej no tas lawm, vim tej no muaj tabmeeg sawvdaws. Kuv ntseeg hais tias koj yeej paub tej no huv tibsi lawm. Vajntxwv Akipas, koj puas ntseeg tej lus uas cov cev Vajtswv lus qhia? Kuv paub hais tias koj yeej ntseeg tej lus ntawd.” Vajntxwv Akipas hais rau Paulus hais tias, “Koj nyuam qhuav qhia mentsis rau kuv xwb, koj txawm siv xav hais tias koj yuav yaum tau kuv los ntseeg Yexus no los?” Paulus teb hais tias, “Txawm yog kuv qhia ntau qhia tsawg los kuv thov Vajtswv pab koj thiab nej txhua tus uas tabtom mloog kuv qhia no kom sawvdaws los ua ib yam li kuv ua, tsuas yog tsis txhob raug luag muab saw hlau khi li kuv raug no xwb.” Paulus hais li ntawd tas, Vajntxwv Akipas thiab tus Tswvxeev Fexatus, Npelanikes thiab cov neeg uas nyob ntawd txawm sawv. Thaum lawv tawm mus rau nraum zoov lawm, lawv sib tham hais tias, “Tus txivneej no tsis tau ua ib qho txhaum uas yuav txaus muab nws tua povtseg lossis muab nws kaw rau hauv tsev lojcuj.” Vajntxwv Akipas hais rau Fexatus hais tias, “Yog tus txivneej no tsis txhob thov mus hais tim Huabtais Xixas, ces peb cia li muab nws tso mus los tau.” Thaum cov nomtswv sablaj pom zoo hais tias, lawv yuav xa peb mus tim tebchaws Italis, lawv muab Paulus thiab ob peb tug neeg raug txim rau Yuli-us uas yog cov Loos tus thawj tubrog pawg pua uas saib pab tubrog uas hu ua “Huabtais Pab.” Ces peb nce mus rau hauv lub nkoj uas tuaj pem lub nroog Alametis tuaj. Lub nkoj ntawd tabtom yuav mus rau tim tej nroog uas muaj chaw nres nkoj hauv lub xeev Axias, peb txawm caij mus. Muaj ib tug txivneej hu ua Alitakhus nrog peb mus. Aletakhus yog neeg Makedaunias uas tuaj tim lub nroog Thexalaunikes tuaj. Hnub tom qab peb mus txog hauv lub nroog Xidoos. Yuli-us hlub Paulus, Yuli-us cia Paulus mus saib Paulus cov phoojywg, cov phoojywg ntawd thiaj muab tej qhov txhia chaw pub rau Paulus. Thaum peb caij nkoj tawm hauv lub nroog Xidoos mus, peb mus sab pem qaum lub koog Povtxwv Xaipas mus, rau qhov sab nrad cua ntsawj hlob heev. Thaum peb caij nkoj mus, peb mus ze lub xeev Kilikias thiab xeev Pafilias, peb mam li mus txog lub nroog Milas uas nyob hauv tebchaws Likias. Thaum peb tseem nyob hauv lub nroog Milas muaj ib lub nkoj tuaj nram lub nroog Alexadias tuaj, lub nkoj ntawd yuav mus rau tim tebchaws Italis. Tus thawj tubrog pawg pua txawm kom peb caij lub nkoj ntawm mus. Peb caij nkoj mus qeeb heev, rau qhov muaj cua ntsawj hlob heev tom hauv ntej tuaj peb thiaj mus tsis tau ceev. Peb mus tau ntau hnub, peb mam li mus txog hauv lub nroog Kanidus. Pheej muaj cua ntsawj hlob heev, peb mus tsis tau ncaj nraim, peb thiaj lem nkoj mus rau nram lub koog Povtxwv Keletes, thiab peb mus ze Keletes ces kaum uas hu ua Xalemaunes mus. Peb caij nkoj raws ntug koog povtxwv mus nyuaj kawg li, peb mam li mus txog ib qho chaw uas sawvdaws hu ua Qhov Chaw Zoo Nres Nkoj uas nyob ze lub nroog Laxe-as. Peb nyob ntawm qhov chaw nres nkoj ntawd tau ntev loo; tsis zoo caij nkoj mus lawm, rau qhov twb dhau hnub ua Kevcai Theej Txhoj lawm. Yog li ntawd Paulus thiaj hais rau sawvdaws hais tias, “Cov kwvtij, yog peb caij nkoj mus ntxiv, ntshai peb yuav muaj kev txhawj kev ntshai heev, lub nkoj thiab tej qhov txhia chaw uas peb thauj mus yuav puastsuaj tas huv tibsi, tsis yog li ntawd xwb tseem yuav muaj neeg tuag thiab.” Txawm yog Paulus hais li ntawd los tus thawj tubrog pawg puas tsis mloog Paulus hais, nws tsuas mloog tus tsav nkoj thiab tus tswv nkoj lus xwb. Lub caij ntuj no tsis zoo nres nkoj ntev ntawm qhov chaw ntawd, feem coob thiaj pom zoo caij nkoj tawm qhov chaw ntawd mus so tom lub nroog Faunis uas muaj chaw nres nkoj. Lub nroog Faunis yog qhov chaw nres nkoj ntawm lub koog Povtxwv Keletes uas tig rau sab qabteb hnubpoob thiab sab qaumteb hnubpoob. Lawv mus so qhov ntawd kom dhau lub caij ntuj no. Thaum muaj cua tuaj ntxiag sab qabteb tuaj, lawv xav hais tias zoo mus rau tim lub nroog Faunis. Lawv txawm rub lub thauj los rau saum lub nkoj, thiab lawv caij nkoj raws ntug lub koog Povtxwv Keletes mus. Tiamsis thaum lawv caij nkoj mus mentsis, txawm muaj ib nthwv cua ntsawj saum lub koog Povtxwv Keletes tuaj. Nthwv cua ntawd sawvdaws hu ua “Cov cua sab Hnubtuaj Qaumteb.” Cov cua ntawd ntsawj lub nkoj uas peb caij, lub nkoj txawm mus tsis tau raws ntug lub koog Povtxwv Keletes mus. Peb lem lub nkoj mus txog nram ib lub koog Povtxwv me me uas hu ua Kaudas. Thaum peb mus txog nrad cua ntsawj tsis heev, rau qhov muaj lub koog povtxwv ntawd thaiv lawm, peb thiaj rub lub nkoj me los khi rau ntawm lub nkoj loj, tiamsis peb rub nyuaj kawg li. Thaum lawv rub tau lub nkoj lawm, lawv muab hlua khi lub nkoj ruaj ruaj, rau qhov lawv ntshai nyob tsam lub nkoj mus tsoo cov suabzeb ntawm ntug Hiavtxwv Linpias, lawv thiaj muab daim ntaub cug cua txo, cia lub nkoj mus raws li cua ntsawj. Cua daj cua dub pheej tsis txawj tu li; thaum kaj ntug lawm, lawv muab tej qhov txhia chaw uas lawv thauj mus, thau povtseg rau hauv hiavtxwv. Hnub tom qab lawv txawm muab tej qhov txhia chaw uas lawv siv hauv lub nkoj thau povtseg huv tibsi thiab. Peb tsis pom lub hnub thiab lub hli tau ntau hnub los cua daj cua dub tseem ntsawj li qub. Thaum ntawd peb thiaj xav hais tias ntshai peb yuav tsis dim li lawm. Tau ntau hnub cov neeg uas nyob hauv lub nkoj tsis muaj leejtwg noj mov li, Paulus txawm sawv ntsug hais tias, “Cov kwvtij, yog nej ntxov mloog kuv lus, peb nyob twjywm tom lub koog Povtxwv Keletes tsis txhob tuaj, ces peb yeej tsis raug kev txomnyem thiab peb tej qhov txhia chaw yuav tsis poob tas. Tiamsis kuv hais rau nej hais tias nej tsis txhob txhawj! Peb cov uas nyob ntawm no yuav tsis muaj ib tug tuag li, tsuas yog lub nkoj yuav puas tas xwb. Kuv paub li no, rau qhov nag hmo tus Vajtswv uas kuv niaj hnub pehawm txib nws ib tug timtswv los hais rau kuv hais tias, ‘Paulus, koj tsis txhob ntshai! Koj yeej yuav tau mus sawv tabmeeg Huabtais Xixas xwb. Vajtswv hlub koj heev, Vajtswv yuav tsis pub cov neeg uas nyob hauv lub nkoj no ib tug tuag li.’ Yog li ntawd, cov kwvtij, nej tsis txhob txhawj! Rau qhov kuv ntseeg hais tias Vajtswv yeej yuav ua raws li nws tau qhia rau kuv lawm. Txawm yog li cas los peb lub nkoj yeej yuav mus khuam rau ib lub koog povtxwv xwb.” Cua daj cua dub ntsawj peb lub nkoj mus mus los los hauv Hiavtxwv Meditelanes tau kaum plaub hmos. Thaum kwvlam li ib tag hmo, cov neeg uas ua haujlwm hauv lub nkoj xav hais tias lub nkoj twb mus yuav txog tim ntug, lawv txawm muab ib txoj hlua khi lub thauj tso rau hauv Hiavtxwv ntsuag saib tob li cas. Thaum lawv ntsuas tas, lawv pom hais tias tseem tob nees nkaum daj, lub nkoj mus mentsis lawv rov ntsuas dua, lawv pom hais tias tob kaum tsib dag. Lawv ntshai nyob tsam lub nkoj mus tsoo pobzeb, lawv thiaj muab plaub lub thauj tom tw nkoj tso rau hauv hiavtxwv kom lub nkoj nres. Hmo ntawd peb laj tos txog kaj ntug kawg li. Cov neeg uas ua haujlwm hauv lub nkoj xav khiav, lawv txawm muab lub nkoj me tso rau hauv Hiavtxwv; lawv ua txuj ua yam li lawv yuav muab cov thauj hlau uas nyob tom taubhau nkoj tso rau hauv dej. Tiamsis Paulus hais rau tus thawj tubrog pawg pua thiab cov tubrog hais tias, “Yog cov neeg tsav nkoj no khiav lawm, ces nej cov nyob ntawm no yuav tsis muaj ib tug dim li.” Cov tubrog hnov Paulus hais li ntawd, cov tubrog txawm muab txoj hlua uas khi lub nkoj me txiav tso lub nkoj me rau dej ntsawj mus. Thaum yuav kaj ntug, Paulus kom sawvdaws noj mov. Paulus hais tias, “Nej twb tos saib cua daj cua dub puas tu los tau kaum plaub hnub no lawm, nej tsis tau noj ib yam dabtsi li. Yog li ntawd, thov nej cia li noj mov, nej thiaj li yuav tsis tuag. Txawm yog nej tej plaubhau los yuav tsis muaj ib txoj poob li.” Thaum Paulus hais li ntawd tas, Paulus txawm muab ib lub ncuav los ua Vajtswv tsaug tabmeeg sawvdaws, nws mam li muab ntais noj. Thaum lawv hnov Paulus hais li ntawd, lawv zoo siab mentsis, lawv txhua tus thiaj noj mov. Tagnrho peb cov uas nyob hauv lub nkoj muaj ob puas xya caum rau leej. Thaum lawv noj mov tas lawm, lawv muab cov nplej uas lawv thauj mus thau povtseg rau hauv hiavtxwv kom lub nkoj sib mentsis. Thaum kaj ntug lawm, cov neeg uas ua haujlwm hauv lub nkoj pom ib lub koog povtxwv, tiamsis lawv tsis paub hais tias yog lub twg. Lawv pom ib ceg hiavtxwv uas muaj suabzeb, lawv xav hais tias tso lub nkoj ncaj nraim mus rau ntawd nyaj yuav mus txog tim ntug. Lawv txawm muab tej hlua uas khi cov thauj txiav tso cov thauj rau hauv hiavtxwv thiab daws txoj hlua uas khi ob tug duav uas tswj lub nkoj povtseg, thiab lawv nthuav daim ntaub cug cua nyob tom taubhau rau cua ntsawj lub nkoj kom ncaj nraim mus rau tim ntug. Tiamsis thaum lawv caij lub nkoj mus tsis tau txog tim ntug, tog taubhau nkoj txawm mus daig nkaus ruaj ruaj rau ntawm cov suabzeb lawm; dej ntas tuaj ntsawj yav tw nkoj tawg yuav luag tas. Cov tubrog ntshai nyob tsam cov neeg raug txim ua luam dej khiav, lawv txawm sib tham hais tias yuav tsum muab cov neeg raug txim tua povtseg huv tibsi. Tiamsis tus thawj tubrog pawg pua xav pab Paulus, nws thiaj txwv tsis pub kom lawv muab cov neeg raug txim tua povtseg. Tus thawj tubrog hais kom cov uas txawj ua luam dej dhia rau hauv dej ua luam dej mus rau tim ntug, cov uas tsis txawj ua luam dej cia li muab tej daim txiag thiab tej yav ntoo uas lov ntawm lub nkoj los tiag hauvsiab ua luam dej mus rau tim ntug. Lawv ua li ntawd, sawvdaws thiaj mus txog tim ntug huv tibsi tsis muaj ib tug tuag li. Thaum peb txhua tus dim thiab tawm tau rau tim ntug lawm, peb thiaj paub hais tias lub koog povtxwv ntawd hu ua Malatas. Cov neeg uas nyob hauv lub koog povtxwv ntawd hlub peb kawg li. Lawv rauv taws rau peb nte, rau qhov thaum ntawd tabtom los nag thiab no heev. Paulus mus khaws tau ib tsuag tawg los, nws tabtom yuav muab tso rau hauv qhovcub; thaum pa taws ntshawb ib tug nab tawm hauv tsuag taws los tom Paulus txhais tes. Thaum cov neeg Malatas pom tus nab tom dai vias ntawm Paulus txhais tes, lawv sib tham hais tias, “Tus txivneej no ntshai nws yog ib tug neeg tua neeg; txawm yog nws dim kev tuag hauv Hiavtxwv los lawm los ntuj tseem tsis tseg nws nyob thiab.” Tiamsis Paulus nchos tus nab poob rau hauv qhovcub, Paulus tsis mob li cas li. Cov neeg ntawd pom nab tom Paulus txhais tes, lawv xav hais tias ntshai Paulus txhais tes yuav o lossis Paulus yuav cia li ntog thiab tuag kiag tamsim ntawd. Lawv tos tos tiamsis tsis pom muaj li cas, ces lawv ho hais tias, “Nws yog vajtswv.” Tus nom uas kav lub koog povtxwv Malatas hu ua Puli-us, nws lub tsev nyob tsis deb ntawm qhov chaw uas cov neeg Malatas rauv taws rau peb nte. Peb mus so hauv Puli-us tsev tau peb hnub, thiab Puli-us nrhiav zaub nrhiav mov zoo kawg rau peb noj. Thaum ntawd Puli-us txiv tabtom ua npaws thiab raws plab. Paulus mus saib Puli-us txiv hauv txaj thiab thov Vajtswv pab kho nws. Thaum Paulus thov Vajtswv, Paulus cev tes tuav nws, ces nws tej mob txawm zoo lawm. Thaum Paulus kho Puli-us txiv zoo lawm, cov neeg muaj mob uas nyob hauv lub koog povtxwv ntawd txawm tuaj cuag Paulus, thiab lawv txhua tus tej mob zoo huv tibsi. Cov neeg ntawd nqa ntau yam tuaj pub rau peb thiab ua peb tsaug. Thiab thaum peb yuav caij nkoj mus, lawv nqa qhov txhia chaw tuaj tso rau hauv lub nkoj rau peb tau siv. Peb nyob hauv lub koog povtxwv Malatas tau peb lub hlis, tom qab ntawd peb nce mus rau hauv lub nkoj uas hu ua “Vajtswv Ntxaib,” lub nkoj ntawd tuaj nram lub nroog Alexadias tuaj so rau hauv lub koog Povtxwv ntawd kom dhau lub caij ntuj no. Thaum peb mus txog pem lub nroog Xilakuxes, peb nyob ntawd tau peb hnub. Tom qab ntawd peb caij nkoj mus rau pem lub nroog Lenki-oos. Hnub tom qab muaj cua ntsawj sab qabteb tuaj, peb caij nkoj mus ob hnub thiaj mus txog pem lub nroog Pute-aulis. Thaum peb mus txog hauv lub nroog ntawd lawm, peb mus saib cov ntseeg. Lawv thov kom peb nrog lawv nyob xya hnub. Tom qab ntawd peb mam li mus txog pem lub nroog Loos. Thaum cov kwvtij ntseeg uas nyob hauv lub nroog Loos hnov hais tias peb mus, lawv txawm tuaj tos peb. Muaj ibtxhia tuaj tos peb nram lub khw Api-us, muaj ibtxhia tuaj tos peb nram lub zos uas hu ua Peb Lub Tsev So. Thaum Paulus pom cov ntseeg tuaj tos peb, nws ua Vajtswv tsaug thiab nws kaj siab mentsis. Thaum peb mus txog hauv lub nroog Loos lawm, cov nomtswv coj Paulus mus nyob rau ib qho, tsuas yog lawv tso ib tug tubrog zov Paulus xwb. Tau peb hnub tom qab Paulus txawm hu cov Yudais tej thawjcoj uas nyob hauv lub nroog ntawd tuaj sablaj. Thaum sawvdaws tuaj txhij lawm, Paulus hais rau lawv hais tias, “Cov kwvtij, txawm yog kuv tsis tau ua txhaum peb haivneeg lossis tsis tau ua txhaum peb cov yawgkoob tej kevcai los cov Yudais cia li ntes kuv tim lub nroog Yeluxalees thiab muab rau cov nomtswv Loos txiav txim. Thaum cov nomtswv Loos taug kuv zaj tas, lawv xav tso kuv, rau qhov lawv tsis pom kuv ua ib qho txhaum uas yuav txaus muab kuv tua povtseg, tiamsis cov Yudais txwv tsis pub lawv tso kuv, kuv thiaj thov tuaj cuag Huabtais Xixas. Kuv ua li no, tsis yog kuv yuav tuaj nkaug kuv haivneeg rau Huabtais Xixas. Qhov uas kuv hu nej tuaj ntawm no yog kuv xav pom nej thiab qhia rau nej paub hais tias, vim li cas luag thiaj muab saw hlau khi kuv. Kuv raug khi li no twb yog kuv ntseeg tus uas cov Yixalayees cia siab rau.” Lawv hais rau Paulus hais tias, “Cov neeg uas nyob tim lub xeev Yudas tsis muaj ib tug sau koj zaj tuaj qhia rau peb paub li. Thiab peb cov kwvtij uas nyob tid tuaj saib peb, tiamsis peb tsis hnov lawv hais ib yam dabtsi phem txog koj li. Peb cov uas tuaj ntawm no, peb xav paub hais tias zaj uas koj ntseeg yog li cas, rau qhov peb pheej hnov hais tias tej neeg uas nyob txhua qhov sawvdaws ntxub cov neeg uas ntseeg li koj ntseeg. Zaj no peb paub tsis tseeb, thov koj qhia rau peb.” Lawv txawm teem ib lub sijhawm yuav nrog Paulus tham. Thaum txog lub sijhawm ntawd, muaj neeg coob coob tuaj cuag Paulus hauv lub tsev uas Paulus nyob. Paulus qhia cov neeg uas tuaj ntawd ib hnub tsaus ntuj. Nws qhia txog Vajtswv lub Tebchaws. Nws muab tej lus uas Mauxes thiab cov cev Vajtswv lus sau tseg lawm qhia rau lawv kom lawv los ntseeg Yexus. Thaum Paulus qhia tas, muaj ibtxhia ntseeg tej uas Paulus qhia, tiamsis muaj ibtxhia tsis ntseeg. Cov neeg ntawd tsis sib haum, nyias txawm tawm nyias lawm. Thaum lawv yuav mus Paulus hais ib los rau lawv hais tias, “Vaj Ntsujplig tus Dawbhuv kom Yaxayas uas yog tus cev Vajtswv hais tseeb rau nej cov yawgkoob; nws hais tias, ‘Cia li mus hais rau cov neeg no hais tias nej yuav mloog tas mloog thiab, tiamsis nej yuav tsis totaub; nej yuav saib tas saib thiab, tiamsis nej yuav tsis pom; cov neeg no lub siab ruam, lawv tsis xav mloog, lawv thiaj ntsaws qhovntsej; lawv tsis xav pom lawv thiaj qi qhovmuag. Yog lawv tsis ua li ntawd nyob tsam lawv qhovmuag yuav pom, lawv qhovntsej yuav hnov thiab lawv yuav totaub, ces lawv yuav tig rov los cuag kuv, thiab kuv yuav kho lawv tej mob.’ ” Paulus xaus lus hais tias, “Kuv qhia rau nej hais tias twb muaj neeg mus qhia Vajtswv Txojlus uas yog txojkev cawm dim rau lwm Haivneeg lawm. Lawv yeej yuav mloog!” [Thaum Paulus hais li ntawd tas, cov Yudais sib cav heev, ces lawv nyias txawm tawm nyias mus lawm.] Paulus nyob hauv lub tsev uas nws ntiav tau ob xyoos txwm nkaus, nws tos txais txhua tus uas tuaj saib nws. Nws qhia txog Vajtswv lub Tebchaws thiab qhia Tswv Yexus Khetos zaj rau txhua tus mloog, nws tsis ntshai leejtwg li thiab tsis muaj leejtwg txwv nws. Kuv yog Paulus uas yog Yexus Khetos tus tubtxib; Vajtswv xaiv kuv ua ib tug timthawj thiab tsa kuv ua tus qhia nws Txojmoo Zoo. Txojmoo Zoo ntawd, Vajtswv twb coglus rau nws cov cevlus thaum ub kom muab sau tseg rau hauv Vajtswv txojlus uas tseemceeb lawm. Txojmoo Zoo ntawd hais txog Vajtswv tus Tub uas yog peb tus Tswv Yexus Khetos: nws los yug muaj roj ntshav ib yam li neeg, nws yog Daviv ib tug xeebntxwv; thiab raws li Vaj Ntsujplig tus Dawbhuv qhia hais tias Yexus yog Vajtswv tus Tub uas muaj hwjchim loj, rau qhov Vajtswv twb tsa nws sawv hauv qhov tuag rov qab los lawm. Vajtswv kom Yexus foom koob hmoov rau kuv thiab tsa kuv ua timthawj coj txojmoo zoo mus qhia rau txhua haivneeg kom ntseeg Vajtswv thiab mloog Vajtswv lus. Vajtswv twb hu nej cov uas nyob hauv lub nroog Loos no, los ua Yexus tug lawm thiab. Yog li ntawd, kuv thiaj sau tsab ntawv no tuaj rau nej txhua tus uas nyob hauv lub nroog Loos no, nej yog cov uas Vajtswv hlub thiab Vajtswv hu los ua nws haivneeg lawm. Thov Vajtswv tus uas yog peb Leej Txiv thiab tus Tswv Yexus Khetos foom koob hmoov rau nej, thiab pub kom nej tau nyob kaj siab lug. Ua ntej no, kuv ua kuv tus Vajtswv tsaug thiab ua Yexus Khetos tus uas pab nej tsaug, rau qhov tej neeg thoob qab ntuj hnov hais tias nej yog cov uas muab siab rau ntseeg. Kuv niaj hnub muab siab rau qhia Txojmoo Zoo uas hais txog Vajtswv tus Tub, thiab Vajtswv yeej paub hais tias kuv nco ntsoov nej thiab thov Vajtswv pab nej. Kuv thov Vajtswv hais tias yog Vajtswv pom zoo, thov Vajtswv qhib kev rau kuv tuaj xyuas nej. Rau qhov kuv xav pom nej thiab coj Vajtswv txojlus tuaj qhia nej, txhawb kom nej muab siab rau ntseeg ntxiv. Kuv hais li no yog hais tias kom peb ib leeg pab ib leeg; kuv kev ntseeg yuav pab nej thiab nej kev ntseeg yuav pab kuv. Cov kwvtij, nej yuav tsum nco ntsoov hais tias kuv npaj siab tuaj xyuas nej ntau zaus, tiamsis muaj tej yam pheej tabkaum ua rau kuv tuaj tsis tau. Kuv xav coj cov neeg uas nrog nej nyob ua ke kom lawv los ntseeg, ib yam li kuv twb coj lawm Haivneeg los ntseeg lawm. Rau qhov kuv tshuav cov neeg Kilis thiab cov neeg uas nyob hauv havzoov, cov txawj ntse thiab cov ruam nqi. Yog li ntawd, kuv thiaj kub siab lug xav tuaj qhia Txojmoo Zoo rau nej cov uas nyob hauv lub nroog Loos ib yam nkaus thiab. Kuv yeej tsis txajmuag qhia txojmoo zoo li; txojmoo zoo yog Vajtswv lub hwjchim uas cawm tau txhua tus uas ntseeg dim. Txojmoo Zoo ntawd, xub qhia rau cov Yudais thiab tom qab ntawd mam li qhia rau lwm Haivneeg. Txojmoo zoo qhia hais tias tus uas ntseeg thiaj yog tus uas ncaj ncees tabmeeg Vajtswv, txij thaum pib mus txog thaum xaus, raws li Vajtswv txojlus sau tseg lawm hais tias, “Tus uas ua lub neej ncaj ncees yog tus uas ntseeg, tus ntawd yuav tau txojsia.” Vajtswv tus uas nyob saum ntuj ceebtsheej chim rau tej kev txhaum thiab kev phem uas neeg ua, rau qhov lawv tej kev phem ntawd ua rau neeg tsis paub qhov tseeb lawm. Vajtswv rau txim rau lawv, rau qhov Vajtswv twb ua ib puas tsav yam qhia kom lawv paub Vajtswv, tiamsis lawv tseem tsis paub Vajtswv thiab. Txij thaum Vajtswv tsim lub ntiajteb los, txawm yog neeg tsis pom Vajtswv tus muaj hwjchim uas nyob mus ibtxhis thiab qhov uas nws yog Vajtswv los yog lawv saib ib puas tsav yam uas Vajtswv tsim, lawv yeej paub hais tias muaj Vajtswv tiag. Yog li ntawd, lawv yuav hais tias lawv tsis paub Vajtswv yeej tsis tau li. Txawm yog lawv twb paub Vajtswv lawm, los lawv tseem tsis hwm Vajtswv lossis tsis ua nws tsaug, lawv xav txog tej zaj uas tsis muaj qabhau, vim lawv lub siab ruam thiab tsaus ntuj nti. Lawv khav hais tias lawv yog neeg ntse, tiamsis lawv yog neeg ruam kawg li; twb tsimnyog lawv pehawm Vajtswv tus uas muaj sia nyob mus ibtxhis, tiamsis lawv ho mus pe tej mlom uas zoo li neeg, zoo li noog, zoo li tsiaj lossis zoo li nab. Twb yog vim li ntawd Vajtswv thiaj cia neeg mus ua phem ua qias raws li lawv lub siab nyiam, lawv ua kev nkauj kev nraug tsis paub txajmuag li, rau qhov lawv muab Vajtswv txojlus tseeb hloov ua lus dag. Twb tsimnyog lawv pehawm Vajtswv tus uas tsim ib puas tsav yam, tiamsis lawv ho mus pe thiab teev tej uas Vajtswv tsim xwb. Tsimnyog sawvdaws yuav tsum qhuas Vajtswv mus ibtxhis li, Amees! Twb yog vim neeg ua phem li no, Vajtswv thiaj cia lawv mus ua kev nkauj kev nraug tsis paub txajmuag li. Txawm yog tej pojniam los ib leeg deev ib leeg, thiab tej txivneej los ua ib yam nkaus li ntawd, raws li ibtxwm pojniam thiab txivneej thiaj ua niamtxiv xwb, tiamsis tej txivneej lawv tso qhov ntawd tseg, lawv ib leeg deev ib leeg tsis paub txajmuag li. Yog li ntawd, Vajtswv thiaj rau txim rau lawv. Twb yog vim neeg tsis kam lees hais tias muaj Vajtswv, Vajtswv thiaj li cia lawv mus ua phem ua qias raws li lawv lub siab nyiam; yog li ntawd, lawv thiaj mus ua tej uas tsis tsimnyog ua. Lawv ua txhua yam kev phem, lawv ua limhiam, siab hlob, ua nruj ua tsiv, sib khib, tua neeg, sib cav sib ceg, dag ntxias thiab xav phem. Lawv tuag xaiv thiab ib leeg hais lus phem rau ib leeg; lawv saib tsis taus Vajtswv, thuam lwm tus, khavtheeb, muab hlob, lawv niaj hnub tuav tswvyim ua phem thiab lawv tsis mloog niamtxiv lus; lawv tsis paub qhov phem qhov zoo; lawv tsis ua raws li lawv tau coglus tseg, lawv ib leeg tsis hlub ib leeg thiab lawv ib leeg tsis ua zoo rau ib leeg. Lawv yeej paub Vajtswv txoj kevcai uas hais tias, cov neeg uas ua phem li ntawd yeej tsimnyog raug kev tuag, tsis yog lawv ua tej kev phem ntawd xwb, lawv tseem pom zoo qhov uas lwm tus ua phem ntawd thiab. Nej xav hais tias nej muaj cuabkav txiav txim rau lwm tus no los? Yog nej txiav txim rau lwm tus, nej yuav tsis muaj lus Hais Daws nej zaj. Thaum nej txiav txim rau lwm tus, yog nej txiav txim rau nej ntag, rau qhov nej twb ua txhaum ib yam li lwm tus thiab. Peb paub hais tias qhov uas Vajtswv txiav txim rau cov neeg uas ua tej kev phem no nws yeej ua yog lawm. Nej txiav txim rau lwm tu, tiamsis nej tseem ua txhaum ib yam li lawv thiab, nej xav hais tias nej yuav khiav dim Vajtswv txojkev txiav txim no los? Lossis yog nej tuam mom Vajtswv txiaj ntsig, qhov uas Vajtswv ua siab dawb siab zoo thiab ua siab ntev rau nej. Nej yeej paub hais tias qhov uas Vajtswv ua siab dawb siab zoo rau nej yog nws xav kom nej tso nej tej kev txhaum tseg. Tiamsis qhov uas nej tawv ncauj thiab tsis kam tso nej tej kev txhaum tseg yog nej ua kom Vajtswv chim thiab txiav txim rau nej. Hnub uas Vajtswv txiav txim ncaj ncees, nws yuav txiav txim hnyav rau nej. Rau qhov Vajtswv yuav muab nqi zog rau txhua tus raws li tes haujlwm uas nws tau ua los lawm. Vajtswv yuav muab txojsia ntev dhawv mus ibtxhis rau cov neeg uas muaj lub siab ntev thiab niaj hnub ua zoo; thiab xav kom Vajtswv pub koob hmoov rau lawv, qhuas lawv thiab pub txojsia uas tsis txawj tuag rau lawv. Vajtswv yuav chim thiab npautaws rau cov neeg uas ua raws li lawv lub siab nyiam, lawv tsis nyiam qhov tseeb, tiamsis lawv nyiam kev phem kev qias xwb. Txhua tus neeg uas ua phem ua qias yuav raug kev txomnyem thiab nyuaj siab, cov Yudais yuav xub raug ua ntej, tom qab ntawd yog lwm Haivneeg. Tiamsis Vajtswv yuav foom koob hmoov, pub tshwjchim thiab kev kaj siab lug rau txhua tus uas ua zoo, yuav xub pub rau cov Yudais, tom qab ntawd yog pub rau lwm Haivneeg. Rau qhov Vajtswv yeej txiav txim rau txhua tus ib yam nkaus. Lwm Haivneeg yeej tsis muaj Mauxes txoj Kevcai, tiamsis lawv yuav raug puastsuaj, vim lawv ua txhaum. Cov Yudas muaj Mauxes txoj kevcai los lawv yuav raug txiav txim, vim lawv ua txhaum txoj kevcai ntawd. Rau qhov Vajtswv tsis suav hais tias cov neeg uas hnov Vajtswv txoj Kevcai yog cov uas ncaj ncees, tiamsis cov neeg uas ua raws li Vajtswv txoj Kevcai thiaj yog cov neeg ncaj ncees. Lwm Haivneeg yeej tsis muaj Vajtswv txoj Kevcai, tiamsis tej uas lawv ua lawv ua raws li txoj Kevcai ntawd qhia; txawm yog lawv tsis muaj Vajtswv txoj Kevcai los lawv yeej muaj ib txoj Kevcai nyob hauv lawv lub siab. Qhov uas lawv paub ua zoo ntawd qhia hais tias lawv yeej muaj Vajtswv txoj Kevcai nyob hauv lawv lub siab. Lawv lub siab uas paub qhov phem qhov zoo yuav qhia qhov tseeb rau lawv; qee zaus lawv lub siab qhia hais tias lawv ua txhaum, thiab qee zaus lawv lub siab qhia hais tias lawv ua zoo lawm. Thaum txog hnub uas Vajtswv txiav txim, Vajtswv yuav kom Yexus Khetos muab tej uas neeg lub siab xav nraim nkoos nthuav tawm los raws li Txojmoo Zoo uas kuv twb qhia lawm. Nej hais tias, nej yog neeg Yudais; nej cia siab rau Vajtswv txoj Kevcai thiab nej khav hais tias nej nrog Vajtswv sib raug zoo; nej yeej paub tej uas Vajtswv xav kom nej ua, thiab nej paub qhov phem qhov zoo, rau qhov Vajtswv txoj Kevcai twb qhia rau nej lawm; yog nej paub hais tias nej yog cov uas coj cov neeg digmuag kev, thiab yog lub teeb uas ci pom kev rau cov neeg uas nyob hauv qhov tsaus ntuj, thiab nej yog cov uas qhia cov ruam, yog cov xibhwb uas qhia cov menyuam yaus, nej muaj kev txawj ntse thiab paub Vajtswv txoj Kevcai uas yog qhov tseeb, nej cov uas qhia lwm tus, ua li cas nej tsis qhia nej? Nej qhia hais tias, “Tsis txhob ua tubsab,” tiamsis puas yog nej twb ua tubsab lawm? Nej hais tias, “Tsis txhob deev luag pojniam lossis luag txiv,” tiamsis puas yog nej twb deev lawm? Nej tsis nyiam pe mlom, tiamsis puas yog nej nyiag tej nyiaj tej kub hauv tej tsev teev mlom? Nej khav hais tias nej muaj Vajtswv txoj Kevcai, tiamsis puas yog nej tsis coj raws li txoj Kevcai ntawd ua rau Vajtswv poob ntsejmuag? Vajtswv txojlus hais tias, “Twb yog vim nej cov neeg Yudais, lwm Haivneeg thiaj thuam Vajtswv lub npe.” Yog nej ua raws li Vajtswv txoj Kevcai, qhov uas nej ua kevcai txiav thiaj tseemceeb; tiamsis yog nej tsis ua raws li Vajtswv txoj Kevcai qhia, nej zoo ib yam li tus uas tsis tau ua kevcai txiav. Yog lwm Haivneeg uas tsis tau ua kevcai txiav muaj ib tug coj raws li Vajtswv txoj Kevcai qhia, qhov uas nws tsis tau ua kevcai txiav ntawd, Vajtswv puas suav hais tias nws tsis ua kevcai txiav? Lwm Haivneeg uas tsis ua kevcai txiav ntawm nqaij tawv, tiamsis yog lawv ua raws li Vajtswv txoj Kevcai qhia lawv yuav txiav txim rau nej cov uas ua kevcai txiav raws li twb muaj lus sau tseg lawm, rau qhov nej tsis ua raws li Vajtswv txoj Kevcai. Rau qho tus uas yog neeg Yudais tiag, yog tus uas muaj lub siab tshiab thiab tus uas kevcai txiav tiag, tsis yog tus uas ua kevcai txiav ntawm nqaij tawv xwb. Tus uas yog neeg Yudais tiag yog tus uas muaj lub siab tshiab, thiab tus uas ua kevcai txiav tiag, yog tus uas ua raws li Vajtswv tus Ntsujplig qhia. Txawm yog neeg tsis qhuas tus uas muaj lub siab tshiab los Vajtswv qhuas tus ntawd. Puas yog cov Yudais tsimtxiaj dua lwm Haivneeg lossis qhov uas ua kevcai txiav muaj nqis dabtsi? Yeej muaj nqis rau txhua yam. Thawj qhov yog Vajtswv muab nws txojlus rau cov Yudais tuav. Tiamsis yog cov Yudais qee leej tsis ua raws li Vajtswv txojlus puas ua rau Vajtswv txojlus tsis muaj nqis lawm? Tsis yog li ntawd! Txawm yog txhua tus dag los Vajtswv tsis dag, raws li twb muaj lus sau tseg lawm hais tias, “Thaum koj hais lus sawvdaws yeej paub hais tias koj hais tseeb; thaum luag taug koj zaj, sawvdaws yeej paub hais tias koj tsis tau ua txhaum.” Peb ho yuav hais li cas, yog peb tej kev txhaum ua rau peb pom hais tias Vajtswv yog tus ncaj ncees. Peb yuav hais tias Vajtswv txiav txim tsis ncaj rau peb no los? (Kuv hais raws li neeg hais.) Tsis yog li ntawd! Yog hais tias Vajtswv ua tsis ncaj, nws yuav ua li cas muaj cuabkav txiav txim rau neeg ntiajteb? Yog hais tias kuv ua tsis ncaj rau sawvdaws pom Vajtswv tus uas ncaj ncees lub tshwjchim tseeb, ua li cas kuv tseem raug txim ib yam li tus neeg txhaum thiab? Ua li cas peb tsis hais tias, “Peb mus ua txhaum kom peb tau qhov zoo”? Muaj qee leej thuam peb hais tias peb hais li ntawd! Qhov uas lawv raug txim li ntawd yeej tsimnyog lawm. Peb cov uas yog neeg Yudais, peb zoo dua lwm Haivneeg los? Tsis yog li ntawd! Kuv twb qhia rau nej lawm hais tias txojkev txhaum yeej kav tagnrho cov neeg Yudais thiab lwm Haivneeg huv tibsi. Raws li Vajtswv Txojlus hais tias: “Yeej tsis muaj ib tug neeg ncaj ncees hlo li, tsis muaj ib tug totaub lossis nrhiav Vajtswv li. Txhua tus puavleej tso Vajtswv tseg; lawv txhua tus ua txhaum huv tibsi; tsis muaj leejtwg ua zoo li, txawm yog ib tug los twb tsis muaj. Lawv lub qa zoo ib yam li lub qhov ntxa uas qhib lug cia; lawv tus nplaig hais tej lus dag ntxias; lawv tej lus muaj taug ib yam li taug nab. Lawv lub qhovncauj foom phem thiab hais tej lus iab lus daw xwb. Lawv khiav ceev nrooj mus ua phem thiab tua neeg; txhua qhov uas lawv mus, lawv ua rau luag raug kev txomnyem thiab puastsuaj. Lawv tsis paub nrog leejtwg sib raug zoo, lossis lawv tsis paub ntshai Vajtswv li.” Nimno peb paub hais tias txhua nqe uas Vajtswv txoj Kevcai qhia yeej qhia kom neeg hwm txoj Kevcai, txhua tus thiaj tsis muaj lus hais, thiab Vajtswv yuav txiav txim rau txhua tus neeg hauv ntiajteb no. Rau qhov txhua tus uas ua raws li txoj Kevcai yeej tsis muaj ib tug ncaj ncees tabmeeg Vajtswv li; txoj kevcai ntawd tsuas qhia kom neeg paub neeg txojkev txhaum xwb. Tiamsis qhov uas nimno Vajtswv suav hais tias neeg ncaj ncees tabmeeg Vajtswv tsis yog vim neeg coj raws li txoj kevcai. Qhov tseeb, Mauxes txoj Kevcai thiab cov cev Vajtswv lus los puavleej ua timkhawv hais txog zaj no. Vajtswv suav hais tias txhua tus uas los ntseeg Yexus Khetos thiaj yog neeg ncaj ncees xwb. Rau qhov Vajtswv suav hais tias txhua tus uas ntseeg Yexus Khetos zoo ib yam nkaus; rau qhov txhua tus puavleej ua txhaum thiab tu ncua Vajtswv lub tshwjchim lawm. Vajtswv txojkev hlub uas nws muab pub dawb rau neeg yog nws txib Yexus Khetos los tuag txhiv neeg kom dim txim, Vajtswv thiaj suav hais tias neeg ncaj ncees tabmeeg Vajtswv. Vajtswv txib Yexus Khetos los tuag theej neeg lub txhoj thiab nws cov ntshav ntxuav neeg tej kev txhaum, Vajtswv thiaj zam tau neeg lub txhim, vim neeg ntseeg Yexus Khetos. Vajtswv ua li ntawd qhia hais tias Vajtswv yog tus ncaj ncees. Yav tas los Vajtswv ua siab ntev thiab tsis rau txim rau cov neeg uas ua txhaum. Qhov uas Vajtswv ua li no qhia hais tias Vajtswv yog tus ncaj ncees, Vajtswv tsis suav neeg lub txim, thiab Vajtswv pab kom txhua tus uas ntseeg Yexus Khetos ua tau neeg ncaj ncees. Yog li ntawd, peb yuav ua li cas khav tau? Yeej tsis muaj ib yam dabtsi uas peb khav tau. Tsis hais txoj kevcai twg lossis tes haujlwm twg li, tiamsis yog qhov uas ntseeg Yexus Khetos xwb. Yog li ntawd, peb paub hais tias tus uas Vajtswv suav hais tias ncaj ncees yog tus uas ntseeg, tsis yog tus uas coj raws li txoj kevcai qhia. Vajtswv tsuas yog cov Yudais tus Vajtswv xwb los? Nws tsis yog lwm Haivneeg tus Vajtswv los? Vajtswv yeej yog lwm Haivneeg tus Vajtswv thiab. Tsuas muaj tib tug Vajtswv xwb, Vajtswv suav hais tias txhua tus uas ntseeg Yexus Khetos, tsis hais cov Yudais lossis lwm Haivneeg yog cov uas ncaj ncees. Yog Vajtswv ua li ntawd, peb yuav suav hais tias Vajtswv txoj kevcai tsis tseemceeb no los? Tsis yog li ntawd! Peb cov uas ntseeg Yexus Khetos, peb hajyam suav hais tias Vajtswv txoj kevcai tog txoj uas tseemceeb. Yog li ntawd, peb yuav hais li cas txog peb yawgkoob Anplahas? Nws ua nws lub neej li cas? Yog Vajtswv suav hais tias Anplahas ncaj ncees, vim tej haujlwm uas Anplahas ua, ces Anplahas yeej muaj lus khav tau, tiamsis Anplahas yeej tsis muaj dabtsi yuav khav tau rau Vajtswv li. Vajtswv txojlus hais tias, “Anplahas ntseeg Vajtswv, vim qhov uas Anplahas ntseeg ntawd Vajtswv thiaj suav hais tias Anplahas yog neeg ncaj ncees.” Tus uas ua haujlwm nws yeej tau nqi zog, tej nqi zog uas nws tau tsis yog tau dawb, tiamsis yog nws khwv nws thiaj tau. Tus uas tsis cia siab rau nws tes haujlwm, tiamsis cia siab rau nws txojkev ntseeg thiab ntseeg Vajtswv tus uas pab cov neeg txhaum kom ua tau neeg ncaj ncees, qhov uas nws ntseeg li ntawd, Vajtswv suav hais tias nws yog tus ncaj ncees. Daviv los hais ib yam nkaus li ntawd, thaum nws hais txog tus uas muaj kev kaj siab yog tus uas Vajtswv suav hais tias ncaj ncees, tsis yog tus uas cia siab rau nws tes haujlwm: “Cov neeg txhaum uas Vajtswv zam txim rau lawm yog cov uas tau zoo nyob kaj siab lug. Tus uas Vajtswv tsis suav nws lub txim, tus ntawd tau zoo nyob kaj siab lug!” Txojkev kaj siab uas Daviv hais no tsuas yog rau cov neeg uas ua kevcai txiav xwb, lossis rau cov neeg uas tsis ua kevcai txiav thiab? Peb hais tias, “Anplahas ntseeg, Vajtswv thiaj suav hais tias Anplahas yog tus uas ncaj ncees.” Thaum twg Vajtswv suav hais tias Anplahas yog tus uas ncaj ncees? Ua ntej lossis tom qab uas Anplahas ua kevcai txiav? Tsis yog tom qab, tiamsis yog ua ntej uas Anplahas ua kevcai txiav. Qhov uas Anplahas ua kevcai txiav ntawd yog lub cim qhia rau sawvdaws paub hais tias Anplahas ntseeg Vajtswv, Vajtswv thiaj suav hais tias Anplahas yeej ncaj ncees ua ntej uas nws ua kevcai txiav. Yog li ntawd, Anplahas thiaj yog yawgkoob ntawm txhua tus uas ntseeg Vajtswv, txawm yog lawv tsis tau ua kevcai txiav los Vajtswv suav hais tias lawv yog neeg ncaj ncees. Qhov uas Anplahas yog cov neeg uas ua kevcai txiav tus yawgkoob tsis yog vim lawv ua kevcai txiav, tiamsis vim lawv ntseeg ib yam li peb yawgkoob Anplahas ntseeg; Anplahas xub ntseeg Vajtswv, nws mam li ua kevcai txiav. Vajtswv coglus rau Anplahas thiab Anplahas cov xeebntxwv hais tias, Vajtswv yuav muab lub ntiajteb no ua Anplahas tug, Vajtswv coglus li ntawd tsis yog vim Anplahas coj raws li txoj kevcai, tiamsis yog Anplahas ntseeg, Vajtswv thiaj suav hais tias Anplahas yog tus ncaj ncees. Yog Vajtswv muab tej uas Vajtswv coglus rau cov neeg uas coj raws li txoj Kevcai, ces qhov uas neeg ntseeg tsis muaj qabhau thiab Vajtswv cov lus cog tseg yeej tsis muaj ib los tseeb li. Vim muaj txoj kevcai Vajtswv thiaj rau txim rau neeg; yog tsis muaj txoj kevcai yeej tsis muaj neeg ua txhaum kevcai. Vajtswv coglus rau Anplahas vim nws ntseeg Vajtswv, Vajtswv yuav muab Vajtswv txoj koob hmoov uas Vajtswv coglus lawm pub dawb rau Anplahas cov xeebntxwv, tsis yog Vajtswv pub rau cov uas coj raws li txoj kevcai xwb, tiamsis yog pub rau cov uas ntseeg ib yam li Anplahas ntseeg. Rau qhov Anplahas yog peb sawvdaws tus yawgkoob; raws li Vajtswv txojlus hais tias, “Kuv tsa koj ua txhua haivneeg tus yawgkoob.” Vajtswv tej lus cog tseg ntawd tseemceeb heev; tus Vajtswv no yog tus uas Anplahas ntseeg, nws yog tus Vajtswv uas tsa tau cov neeg uas tuag lawm sawv hauv qhov tuag rov qab los thiab yog tus uas hais kom muaj ib puas tsav yam ces txawm muaj raws li nws hais. Txawm yog thaum Anplahas tsis tau pom muaj raws li tej uas Vajtswv coglus tseg los Anplahas tseem ntseeg thiab cia siab hais tias, “Nws yuav tau ua ntau haivneeg tus yawgkoob,” raws li Vajtswv txojlus hais tias, “Koj yuav muaj xeebntxwv coob, npaum li tej hnubqub saum nruab ntug.” Anplahas hnubnyoog twb yuav muaj ib puas xyoo; nws lub zog ntaug tas, thiab Xalas los xeeb tsis taus tub lawm; txawm li ntawd los nws tseem cia siab rau Vajtswv. Anplahas ntseeg Vajtswv tej lus cog tseg; qhov uas Anplahas ntseeg hajyam ua rau Anplahas cia siab rau Vajtswv, thiab nws ua Vajtswv tsaug. Anplahas paub tseeb hais tias Vajtswv yeej ua tua raws li Vajtswv coglus tseg. Twb yog vim Anplahas ntseeg, “Vajtswv thiaj suav hais tias Anplahas yog tus ncaj ncees.” Lo lus uas hais tias “Anplahas ncaj ncees,” tsis yog hais rau Anplahas tib leeg xwb, tiamsis yog hais txog peb txhua tus uas Vajtswv suav hais tias ncaj ncees thiab ntseeg Vajtswv tus uas tsa peb tus Tswv Yexus sawv hauv qhov tuag rov qab los. Vim peb tej kev txhaum Vajtswv thiaj cia Yexus Khetos los tuag theej peb lub txhoj, thiab qhov uas Vajtswv tsa Yexus sawv hauv qhov tuag rov qab los yog ua kom peb ua tau neeg ncaj ncees. Yog li ntawd, vim peb ntseeg, Vajtswv thiaj suav hais tias peb yog neeg ncaj ncees, peb tau nrog Vajtswv sib raug zoo, rau qhov peb tus Tswv Yexus Khetos pab peb. Vim peb ntseeg Yexus Khetos, peb thiaj tau Vajtswv txoj koob hmoov, thiab muaj sia nyob. Peb cia li zoo siab thiab cia siab hais tias, peb yuav tau Vajtswv lub tshwjchim uas ci ntsa iab. Tsis yog li ntawd xwb, peb zoo siab qhov uas peb raug kev txomnyem ntawd ua rau peb ua taus siab ntev, qhov uas peb ua taus siab ntev haum Vajtswv siab, thiab qhov uas peb ua haum Vajtswv siab, thiab qhov uas peb ua haum Vajtswv siab ua rau peb muaj kev cia siab. Txojkev cia siab no tsis ua rau peb poob ntsejmuag, rau qhov Vaj Ntsujplig tus Dawbhuv uas Vajtswv twb pub rau peb lawm, qhia rau peb hais tias Vajtswv hlub peb kawg li. Rau qhov peb pab tsis tau kom peb dim peb lub txim, Yexus Khetos thiaj los tuag txhiv peb cov uas yog neeg txhaum raws li lub sijhawm uas Vajtswv teem tseg lawm. Qhov uas ib tug twg yuav tuag theej tus neeg ncaj ncees, mas nyuaj kawg li. Tiamsis tej zaum yuav muaj qee leej txaus siab tuag theej tus neeg zoo thiab. Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb. Vim Yexus Khetos tuag theej peb lub txhoj, nimno peb thiaj ua tau neeg ncaj ncees, tsis yog li ntawd xwb, Vajtswv yuav tsis txiav txim rau peb, rau qhov Yexus Khetos cov ntshav twb ntxuav peb tej kev txhaum lawm. Thaum peb tseem yog Vajtswv cov yeebncuab, Vajtswv txib nws tus tub Yexus Khetos los tuag theej peb lub txhoj thiab coj peb los nrog Vajtswv sib raug zoo. Nimno peb twb nroog Vajtswv sib raug zoo lawm, tsis yog li ntawd xwb, peb twb dim peb lub txim lawm thiab. Rau qhov Yexus Khetos sawv hauv qhov tuag los lawm. Tsis yog li ntawd xwb, Vajtswv ua rau peb zoo siab kawg li, rau qhov nimno Yexus Khetos tus uas yog peb tus Tswv twb coj peb los nrog Vajtswv sib raug zoo lawm. Twb yog vim ib tug xub ua txhaum, neeg ntiajteb txhua tus thiaj ua txhaum. Vim tus ntawd ua txhaum, tus ntawd thiaj tuag. Yog li ntawd, txhua haivneeg uas nyob hauv ntiajteb no thiaj txawj tuag, rau qhov txhua tus puavleej tau ua txhaum lawm. Thaum Vajtswv tseem tsis tau qhia Vajtswv txoj Kevcai rau Mauxes, neeg twb xub ua txhaum lawm, tiamsis Vajtswv tsis suav neeg lub txim, rau qhov thaum ntawd tseem tsis tau muaj txoj kevcai. Txij thaum Adas tiam los txog Mauxes tiam, tej neeg puavleej muaj kev ploj kev tuag, txawm yog sawvdaws ua txhaum tsis thooj li Adas tus uas tsis mloog Vajtswv lus ua los sawvdaws puavleej tuag huv tibsi. Adas ua qauv txog tus uas yuav los. Tiamsis nkawd zoo tsis sib thooj, rau qhov txoj koob hmoov uas Vajtswv pub dawb rau peb ntawd zoo tsis thooj li Adas txojkev txhaum. Vim Adas ua txhaum, sawvdaws thiaj tuag. Tiamsis Vajtswv hlub peb kawg li, Vajtswv thiaj txib ib tug uas yog Yexus Khetos tus uas muaj lub siab hlub los pab sawvdaws. Vajtswv txoj koob hmoov thiab Adas txojkev txhaum zoo tsis sib thooj. Thaum Adas ua txhaum lawm, thiaj muaj txojkev txiav txim, tom qab ntawd muaj ntau leej ua txhaum, tiamsis vim txoj koob hmoov uas Vajtswv pub dawb rau neeg, Vajtswv thiaj zam txim rau sawvdaws. Vim ib tug ua txhaum, sawvdaws thiaj tuag, tiamsis tes haujlwm uas Yexus Khetos ua pab peb tseemceeb dua ntais huv tibsi. Txhua tus uas Vajtswv suav hais tias yog neeg ncaj ncees, lawv yuav tau txais Vajtswv txoj koob hmoov nplua mias uas Vajtswv pub dawb thiab lawv yuav muaj txojsia nrog Yexus Khetos kav mus ibtxhis. Twb yog vim ib tug ua txhaum, Vajtswv thiaj rau txim rau sawvdaws, tiamsis vim tes haujlwm uas Yexus Khetos ua, pab tau neeg dim txim thiab pub txojsia rau lawv. Vim ib tug tsis mloog Vajtswv lus, sawvdaws thiaj ua txhaum, tiamsis vim Yexus Khetos mloog Vajtswv lus, sawvdaws thiaj ua tau neeg ncaj ncees. Thaum muaj txoj Kevcai lawm sawvdaws hajyam ua txhaum; tiamsis qhov twg muaj kev txhaum, Vajtswv txojkev hlub hajyam muaj nyob qhov ntawd. Yog li ntawd, txojkev txhaum ua rau muaj kev ploj kev tuag li cas, Vajtswv txojkev hlub ua rau muaj txojkev ncaj ncees, thiab tau txojsia ntev dhawv los ntawm Yexus Khetos uas yog peb tus Tswv ib yam li ntawd. Yog li ntawd, peb yuav hais li cas? Puas tsimnyog peb pheej ua txhaum kom Vajtswv hajyam hlub peb ntxiv? Peb tsis txhob ua li ntawd! Peb twb tuag rau txojkev txhaum lawm, peb tseem yuav ua kev txhaum ntxiv dua thiab los? Nej twb paub lawm hais tias peb txhua tus uas ua kevcai raus dej, peb twb nrog Yexus Khetos koom ib txojsia lawm. Qhov uas ua kevcai raus rau hauv dej, yog peb tuag ib yam li Yexus tuag. Qhov uas luag muab peb raus rau hauv dej, yog luag muab peb faus nrog Yexus thiab peb koom nws txojkev tuag; yog li ntawd, Leej Txiv tus uas muaj hwjchim tsa Yexus sawv hauv qhov tuag rov qab los, nws yuav pub lub neej tshiab rau peb. Peb nrog Yexus koom nws txojkev tuag li cas, peb yuav tau nrog nws sawv hauv qhov tuag rov qab los ib yam li ntawd thiab. Peb paub hais tias peb lub neej qub twb raug muab ntsia tuag nrog Yexus Khetos rau saum nws tus ntoo khaublig lawm, ua li ntawd kom txojkev txhaum lub hwjchim puastsuaj mus, peb thiaj tsis tau ua txojkev txhaum qhev ntxiv lawm. Rau qhov tus neeg tuag, nws twb dim txojkev txhaum lub hwjchim lawm. Tiamsis yog peb tuag nrog Yexus Khetos, peb ntseeg hais tias peb yuav muaj txojsia nrog nws nyob ua ke thiab. Peb paub hais tias Vajtswv twb tsa Yexus Khetos sawv hauv qhov tuag rov qab los thiab nws yuav tsis tuag li lawm, rau qhov txojkev tuag yuam tsis tua nws. Qhov uas Yexus tuag, nws tsuas tuag tib zaug theej sawvdaws lub txhoj xwb; nimno nws muaj sia nyob, thiab nws nrog Vajtswv sib raug zoo. Ib yam li ntawd, nej yuav tsum nco ntsoov hais tias nej twb tuag rau txojkev txhaum thiab nrog Yexus Khetos koom ib txojsia nyob rau ntawm Vajtswv lawm. Yog li ntawd, nej tsis txhob cia txojkev txhaum kav nej lub cev uas txawj tuag, rau qhov txojkev txhaum ua rau nej ua raws li nej lub siab nyiam. Nej tsis txhob cia txojkev txhaum siv nej lub cev ib qho mus ua phem ua qias. Tiamsis muab nej lub cev pub rau Vajtswv ib yam li cov neeg uas Vajtswv twb tsa sawv hauv qhov tuag rov qab los lawm, thiab muab nej lub cev pub rau Vajtswv siv ua qhov ncaj ncees. Tsis txhob cia txojkev txhaum kav nej; rau qhov Mauxes txoj Kevcai tsis kav nej lawm, tiamsis Vajtswv txojkev hlub kav nej. Peb yuav ua li cas? Peb yuav cia li ua txhaum, vim Mauxes txoj Kevcai tsis kav peb lawm, tiamsis Vajtswv txojkev hlub kav peb sawvdaws los? Tsis txhob ua l ntawd! Nej yeej paub lawm hais tias yog nej zoo siab ua luag qhev thiab ntseeg luag lus, luag yeej yuav ua nej ua tus tswv. Yog nej cia txojkev txhaum ua nej tus tswv, thaum kawg nej yuav raug kev ploj kev tuag. Yog nej mloog Vajtswv lus, nej thiaj yog neeg ncaj ncees. Yav tas los nej ua txojkev txhaum qhev, tiamsis nimno kuv ua Vajtswv tsaug, rau qhov nej muab siab rau ua raws li tej lus ua luag qhia rau nej lawm. Vajtswv twb tso nej dim ntawm txojkev txhaum thiab nej twb cia txojkev ncaj ncees kav lawm. (Kuv hais li neeg hais, rau qhov nej tsis totaub.) Nej ibtxwm muab nej lub cev mus ua txojkev txhaum thiab kev phem kev qias qhev li cas lawm. Nimno nej yuav tsum muab nej lub cev mus ua qhov zoo thiab ua kev ncaj ncees qhev ib yam li ntawd. Thaum nej tseem ua txojkev txhaum qhev, txojkev ncaj ncees yeej tsis kav nej li. Tej uas nej ua tas los lawm, nej tau dabtsi? Tej ntawd ua rau nej txajmuag kawg li los sav! Tej uas nej ua ntawd, thaum kawg yog kev ploj kev tuag xwb! Tiamsis nimno Vajtswv twb tso nej dim ntawm txojkev txhaum los ua Vajtswv cov tubqhe lawm. Qhov uas nej tau yog Vajtswv ntxuav kom nej muaj lub siab dawbhuv thaum kawg nej thiaj tau txojsia ntev dhawv mus ibtxhis. Rau qhov nqi zog ntawm txojkev txhaum yog kev tuag, tiamsis txoj koob hmoov uas Vajtswv pub dawb yog txojsia ntev dhawv mus ibtxhis uas los ntawm Yexus Khetos tus uas yog peb tus Tswv los. Cov kwvtij, nej yeej paub hais tias kuv hais txog cov neeg uas twb paub tej kevcai lawm; tej kevcai ntawd tsuas kav tus neeg uas tseem ua neej nyob xwb. Raws li txoj kevcai, tus pojniam uas yuav txiv lawm, nws yuav tsum nrog nws tus txiv nyob mus txog thaum nws tus txiv tuag, tiamsis yog tus txiv tuag lawm, tus pojniam mus yuav lwm tus los yeej tsis txhaum kevcai. Yog hais tias nws tus txiv tseem nyob, nws cia li mus yuav dua txiv lawm, sawvdaws yuav hais tias nws deev hluas nraug; tiamsis yog nws tus txiv tuag lawm, nws mus yuav txiv tshiab los yeej tsis txhaum kevcai, thiab tsis muaj leejtwg yuav hais tias nws deev hluas nraug. Cov kwvtij, ib yam nkaus li ntawd, Mauxes txoj Kevcai yeej tsis kav nej cov uas nrog Yexus Khetos tuag ua ke lawm. Nimno Yexus Khetos tus uas Vajtswv tsa sawv hauv qhov tuag rov qab los twb yuav nej los ua nws tug lawm, nws ua li ntawd kom nej ua nej lub neej rau Vajtswv tau koob meej. Thaum uas peb tseem ua peb lub neej raws li neeg ibtxwm ua, vim txoj kevcai, txojkev txhaum thiaj tshoov peb lub siab kom peb nyiam mus ua txhaum thiab raug kev ploj kev tuag. Tiamsis nimno peb twb dim txoj kevcai uas khi peb, rau qhov peb zoo li cov neeg uas tuag lawm. Niaj hnub no peb thiaj tsis ua peb lub neej raws li txoj qub kevcai uas sau tseg rau hauv ntawv, tiamsis peb ua peb lub neej raws li txoj kevcai tshiab uas Vaj Ntsujplig qhia. Peb yuav hais li cas? Txoj kevcai yog kev txhaum los? Yeej tsis yog li ntawd! Tiamsis twb yog muaj txoj kevcai, kuv thiaj paub hais tias kev txhaum yog dabtsi. Yog txoj kevcai tsis hais tias, “Tsis txhob ntshaw luag tug,” ces kuv yeej tsis paub hais tias qhov uas ntshaw luag tug txhaum. Tiamsis txojkev txhaum muab txoj kevcai ua haukev tshoov kuv siab kom kuv ntshaw txhua yam. Yog tsis muaj txoj kevcai, ces txojkev txhaum yeej tuag lawm. Yav tas los kuv ua kuv lub neej tsis muaj txoj kevcai kav kuv, tiamsis thaum muaj txoj kevcai lawm, ua rau kev txhaum tshwm tuaj, thiab kuv thiaj tuag. Vajtswv rhawv txoj kevcai yog ua kom neeg tau txojsia, tiamsis kuv pom hais tias txoj kevcai ua rau kuv raug kev ploj kev tuag. Rau qhov txojkev txhaum muab txoj kevcai ua haukev los dag ntxias kuv thiab tua kuv povtseg. Yog li ntawd txoj kevcai yeej dawbhuv, thiab tej nqe kevcai los yeej dawbhuv, ncaj ncees thiab zoo kawg nkaus li. Puas yog txoj Kevcai uas yog txoj zoo ua rau kuv raug kev ploj kev tuag? Yeej tsis yog li ntawd! Twb yog txojkev txhaum muab txoj kevcai tua kuv, kuv thiaj raug kev ploj kev tuag. Yog li ntawd, kuv thiaj paub hais tias txojkev txhaum zoo li cas, thiab tej kevcai ntawd ua rau kuv pom hais tias txojkev txhaum pem kawg nkaus li. Peb paub hais tias Mauxes txoj Kevcai yog Vajtswv txoj; tiamsis kuv yog neeg, txojkev txhaum thiaj niaj hnub yuam kuv ua txhaum. Kuv tsis totaub tej uas kuv ua; vim li cas kuv ua tej uas kuv tsis nyiam ua, tiamsis tej uas kuv nyiam kuv ho tsis ua. Thaum kuv ua tej uas kuv tsis nyiam ua, kuv thiaj paub hais tias txoj kevcai ntawd yeej zoo tiag. Yog li ntawd, kuv tsis yog tus uas ua txhaum; tiamsis yog txojkev txhaum uas nyob hauv kuv lub siab ua xwb. Kuv paub hais tias kuv yog neeg xwb, kuv thiaj ua tsis tau ib qho zoo li. Kuv xav ua zoo, tiamsis kuv ua tsis tau. Kuv xav ua qhov zoo, tiamsis kuv ho tsis ua; kuv tsis xav ua qhov phem, tiamsis kuv ho ua. Yog kuv ua tej uas kuv tsis xav ua, tej ntawd yeej tsis yog kuv ua, tiamsis yog txojkev txhaum uas nyob hauv kuv lub siab ua. Yog li ntawd, kuv pom txoj kevcai zoo li no: thaum kuv xav ua qhov zoo, kuv ho xaiv ua qhov phem. Kuv muaj ib lub siab xav ua raws li Vajtswv txoj kevcai, tiamsis kuv pom hais tias kuv muaj dua ib lub siab tawmtsam txoj kevcai uas nyob hauv kuv lub siab. Lub siab ntawd thiaj yuam kuv mus ua txojkev txhaum qhev. Ua cas kuv yuav nyuaj siab ua luaj li? Leejtwg thiaj yuav cawm tua kuv dim ntawm lub siab uas coj kuv mus raug kev ploj kev tuag? Kuv ua Vajtswv tsaug uas peb tus Tswv Yexus Khetos twb pab kuv dim lawm. Yog li ntawd, kuv lub siab ua raws li Vajtswv kom kuv ua, tiamsis kuv lub cev ua raws li txojkev txhaum kom kuv ua. Nimno tus uas nrog Yexus Khetos koom ib txojsia, tus ntawd yuav tsis raug txiav txim. Rau qhov Vaj Ntsujplig tus uas coj peb los nrog Yexus Khetos koom ib txojsia twb tso peb dim ntawm txojkev txhaum thiab txojkev tuag lawm. Vim neeg ua tsis tau zoo, txoj kevcai thiaj pab tsis tau lawv. Tiamsis Vajtswv pab tau, rau qhov nws txib nws tus Tub los yug ua neeg thiab muaj roj ntsha ib yam li tej neeg txhaum, nws thiaj daws tau neeg lub txim. Vajtswv ua li ntawd kom peb ua tau raws li Vajtswv txoj kevcai uas ncaj ncees, tsis yog peb ua raws li peb lub siab qub qhia, tiamsis yog peb ua raws li Vaj Ntsujplig qhia. Tus uas ua lub neej raws li lub siab qub qhia, tus ntawd yeej ua raws li nws lub siab qub nyiam, tiamsis tus uas ua nws lub neej raws li Vaj Ntsujplig qhia, tus ntawd yeej ua raws li Vaj Ntsujplig lub siab nyiam. Tus uas ua raws li nws lub siab qub qhia, tus ntawd yuav raug kev ploj kev tuag, tiamsis tus uas ua raws li Vaj Ntsujplig qhia, tus ntawd yuav tau txojsia thiab kev kaj siab. Tus uas ua raws li nws lub siab qub qhia, tus ntawd ua yeebncuab rau Vajtswv; rau qhov nws tsis ua raws li Vajtswv txoj Kevcai, thiab qhov tseeb nws yeej coj tsis tua raws li txoj kevcai ntawd. Tus uas tseem ua raws li nws lub siab qub qhia, tus ntawd ua tsis tau haum Vajtswv siab. Yog Vajtswv tus Ntsujplig nyob hauv nej lub siab, nej yeej tsis ua raws li nej lub siab qub qhia nej, tiamsis nej ua raws li Vaj Ntsujplig qhia nej. Tus uas tsis muaj Yexus Khetos tus Ntsujplig, tus ntawd yeej tsis yog Yexus Khetos tug. Tiamsis yog Yexus Khetos nyob hauv nej lub siab, txawm yog nej lub cev tuag vim txojkev txhaum los nej tus Ntsujplig yuav tsis tuag, vim Vajtswv suav hais tias nej ncaj ncees lawm. Yog Vajtswv tus Ntsujplig uas tsa Yexus Khetos sawv hauv qhov tuag los nyob hauv nej lub siab lawm, ces tus uas tsa Yexus Khetos sawv hauv qhov tuag rov qab los, nws yuav tsa nej lub cev uas txawj tuag sawv rov qab los thiab, rau qhov Vaj Ntsujplig nyob hauv nej. Yog li ntawd cov kwvtij, peb yuav tsum ua raws li Vajtswv tus Ntsujplig qhia, tsis txhob ua raws li peb lub siab qub qhia. Yog nej ua nej lub neej raws li lub siab qub qhia, nej yeej yuav tuag; tiamsis yog nej ua nej lub neej raws li Vaj Ntsujplig qhia, nej thiaj yuav tso tau nej tej kev txhaum tseg thiab nej yuav tau txojsia. Tus uas cia Vajtswv tus Ntsujplig qhia, tus tus ntawd thiaj yog Vajtswv tus menyuam. Rau qhov nej tsis tau tus ntsujplig uas coj nej mus ua qhev kom nej txhawj nej ntshai, tiamsis nej tau Vaj Ntsujplig tus uas coj nej los ua Vajtswv cov menyuam, kom nej muaj cuabkav hu Vajtswv hais tias, “Anpas! Kuv Txiv!” Vajtswv tus Ntsujplig qhia rau peb lub siab hais tias peb yog Vajtswv cov menyuam. Vim peb yog Vajtswv cov menyuam lawm, peb yuav tau txais tej koob hmoov uas nws npaj tseg rau peb, thiab peb yuav tau nrog Yexus Khetos txais tej uas Vajtswv npaj tseg rau Yexus Khetos lawm; peb cov uas raug kev txomnyem ib yam li Yexus Khetos raug, peb yeej yuav tau Vajtswv lub tshwjchim uas ci ntsa iab ib yam li Yexus Khetos tau thiab. Kuv pom hais tias txojkev txomnyem uas tamsim no peb raug yeej piv tsis tau lub tshwjchim ci ntsa iab uas Vajtswv yuav pub rau peb yav tom ntej no. Ib puas tsav yam uas Vajtswv tsim tos ntsoov xav pom hnub uas Vajtswv cov menyuam los. Ib puas tsav yam uas Vajtswv tsim, yeej tsis xav raug kev puastsuaj, tiamsis Vajtswv pom zoo cia tej ntawd raug kev puastsuaj. Txawm li ntawd los tseem muaj kev cia siab hais tias muaj ib hnub twg ib puas tsav yam uas Vajtswv tsim, yuav dim ntawm txojkev puastsuaj thiab yuav nrog Vajtswv cov menyuam tau lub tshwjchim uas ci ntsa iab. Rau qhov peb paub hais tias txij thaum ub los txog niaj hnub no ib puas tsav yam uas Vajtswv tsim ntsaj ntsoog qees ib yam li tus pojniam uas mob plab yuav yug menyuam; tsis yog ib puas tsav yam uas Vajtswv tsim thiaj ntsaj ntsoog qees xwb, tiamsis peb cov uas tau txais Vaj Ntsujplig uas yog thawj txoj koob hmoov uas Vajtswv pub rau peb lawm, peb los ntsaj ntsoog qees tos ntsoov hnub uas Vajtswv hu peb hais tias peb yog nws cov menyuam, thiab txhiv kom peb dim. Twb yog vim peb cia siab li ntawd, peb thiaj dim; tiamsis yog peb qhovmuag twb pom yam uas peb cia siab rau lawm, ces qhov ntawd yeej tsis yog txojkev cia siab. Leejtwg tseem yuav cia siab rau tej uas nws qhovmuag twb pom lawm? Tiamsis yog peb cia siab rau tej uas peb qhovmuag tsis tau pom, peb yeej ua siab ntev tos tej ntawd. Thaum peb tsaug muas Vaj Ntsujplig pab peb; rau qhov peb tsis paub hais tias peb yuav thov yam twg, tiamsis Vaj Ntsujplig thov Vajtswv pab peb thaum peb tsis paub yuav hais li cas. Vajtswv tus uas pom peb lub siab yeej paub tej uas Vaj Ntsujplig thov, rau qhov tej uas Vaj Ntsujplig thov Vajtswv pab peb, tej ntawd yeej raws li Vajtswv lub siab nyiam. Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv pom zoo hu los raws li Vajtswv npaj tseg lawm. Txhua tus uas Vajtswv xaiv tua lawm, Vajtswv muab tshwj rau ib cag kom lawv muaj tus yam ntxwv zoo li nws tus Tub; Vajtswv ua li ntawd kom Leej Tub tau ua tus tij ntawm cov ntseeg. Thiab cov uas Vajtswv muab tshwj rau ib cag, yog cov uas Vajtswv hu lawv lawm; thiab cov uas Vajtswv hu, Vajtswv suav hais tias lawv yog cov ncaj ncees, thiab cov uas Vajtswv suav hais tias ncaj ncees, Vajtswv pub lub tshwjchim uas ci ntsa iab rau lawv. Peb tseem yuav hais li cas thiab? Yog Vajtswv tuaj peb tog lawm, leejtwg tseem yuav tawmtsam tau peb? Vajtswv tsis khuvxim nws tus Tub, tiamsis nws muab nws tus Tub los theej peb sawvdaws lub txhoj, tsis yog nws muab nws tus Tub xwb, tiamsis nws tseem muab txhua yam pub dawb rau peb thiab? Leejtwg tseem yuav liam txim tau rau cov neeg uas Vajtswv xaiv lawm? Vajtswv twb hais tias lawv tsis muaj txim lawm. Leejtwg tseem yuav rau txim tau rau peb? Yexus Khetos twb tuag thiab sawv hauv qhov tuag rov qab los lawm, nws nyob ntawm Vajtswv sab xis thiab thov Vajtswv pab peb. Tsis muaj ib yam dabtsi yuav cais tau peb tawm ntawm Yexus Khetos txojkev hlub, tsis hais teebmeem, kev nyuaj siab, kev tsimtxom, kev tshaib kev nqhis, kev txomnyem, kev txhawj ntshai, lossis kev ploj kev tuag. Raws li Vajtswv txojlus hais tias, “Vim peb ntseeg koj, luag thiaj niaj hnub yuav muab peb tua; luag ua rau peb ib yam li tus yaj uas luag yuav cab mus tua.” Txawm yog li ntawd los Yexus Khetos tus uas hlub peb, nws twb pab peb kovyeej txhua yam ntawd huv tibsi lawm. Rau qhov kuv paub tseeb hais tias tsis muaj ib yam dabtsi yuav cais tau peb ntawm Vajtswv txojkev hlub, tsis hais tuag lossis kev ua neej nyob, cov timtswv lossis cov uas muaj hwjchim kav saum nruab ntug, nimno lossis yav tom ntej, saum nruab ntug lossis hauv nruab tivtxwv, lossis ib puas tsav yam uas yog Vajtswv tsim yeej tsis muaj ib yam dabtsi cais tau peb ntawm Vajtswv txojkev hlub uas nws pub Yexus Khetos uas yog peb tus Tswv los tuag theej peb lub txhoj. Kuv yog tus uas ntseeg Yexus Khetos, tej lus uas kuv hais, kuv hais tseeb xwb kuv tsis dag; Vaj Ntsujplig tus Dawbhuv kav kuv lub siab ua rau kuv paub hais tias tej lus uas kuv hais, kuv yeej tsis dag. Kuv nyuaj siab kawg li, rau qhov kuv txhawj kuv haivneeg heev. Txawm yog Vajtswv foom tsis zoo rau kuv thiab muab kuv cais tawm ntawm Yexus Khetos mus los kuv yeej txaus siab, tsuav yog kuv haivneeg tau los nrog Vajtswv sib raug zoo xwb. Lawv yog cov Yixalayees uas Vajtswv xaiv los ua Vajtswv cov menyuam lawm, Vajtswv qhia nws lub tshwjchim uas ci ntsa iab rau lawv, Vajtswv coglus rau lawv, thiab qhia Vajtswv txoj kevcai rau lawv, Vajtswv qhia kom lawv paub pehawm Vajtswv, thiab qhia hais tias lawv yuav tau txais tej uas Vajtswv coglus tseg; lawv yog cov Henplais tej yawgkoob uas nto moo lug tej xeebntxwv; thiab Yexus Khetos tus uas los yug ua neeg, nws yog lawv haivneeg. Sawvdaws cia li qhuas Vajtswv tus uas kav ib puas tsav yam mus ibtxhis! Amees. Kuv tsis tau hais tias Vajtswv tsis ua raws li Vajtswv tej lus cog tseg; rau qhov Vajtswv tsis xaiv cov Yixalayees txhua tus los ua Vajtswv haivneeg, thiab tsis yog Anplahas cov xeebntxwv puavleej yog Vajtswv cov menyuam. Vajtswv hais rau Anplahas hais tias, “Ixaj cov menyuam thiaj yog koj cov xeebntxwv uas kuv coglus rau koj xwb.” Vajtswv hais li ntawd, twb yog Vajtswv hais tias, Anplahas cov tubki muaj ibtxhia thiaj li yog Vajtswv cov menyuam, ibtxhia tsis yog. Cov uas yog Vajtswv menyuam tiag, tsuas yog cov uas Vajtswv xub hais tseg lawm hais tias Anplahas yuav muaj xwb. Rau qhov Vajtswv cov lus cog tseg hais li no: “Lwm xyoo txog lub caij no, kuv yuav rov los thiab Xalas yuav yug tau ib tug tub.” Tsis yog li ntawd xwb. Lenpekas muaj ob tug tub uas yog tib leej txiv; nkawd txiv yog peb yawgkoob Ixaj. Raws li Vajtswv txojlus hais tias, “Kuv hlub Yakhauj, tiamsis kuv ntxub Exaus.” Peb yuav hais li cas? Peb yuav hais tias Vajtswv ua tsis ncaj no los? Tsis yog li ntawd! Rau qhov Vajtswv hais rau Mauxes hais tias, “Kuv pom zoo hmov tshua tus twg, kuv yuav hmov tshua tus ntawd, thiab kuv pom zoo hlub tus twg, kuv yuav hlub tus ntawd.” Qhov uas Vajtswv ua li ntawd, tsis yog raws li neeg xav yuav lossis vim qhov uas neeg ua zoo, tiamsis yog Vajtswv hlub xwb. Rau qhov Vajtswv txojlus hais rau Falaus hais tias, “Kuv tsa koj ua vajntxwv, kom sawvdaws pom kuv lub hwjchim, thiab kom kuv lub npe nrov ncha moo lug mus thoob qab ntuj.” Yog li ntawd, Vajtswv pom zoo hlub tus twg, Vajtswv yeej hlub tus ntawd, thiab Vajtswv pom zoo kom tus twg tawv ncauj tus ntawd yeej tawv ncauj. Nej cov muaj qee leej yuav hais rau kuv hais tias, “Yog li ntawd, ua li cas Vajtswv tseem hais tias muaj tus ua txhaum thiab? Leejtwg tseem yuav tawv dhau Vajtswv thiab?” Phoojywg, koj yog leejtwg, ua li cas koj tseem nrog Vajtswv sib cav thiab? Lub laujkaub av yeej tsis hais rau tus kws puab laujkaub hais tias, “Ua cas koj puab kuv zoo li no?” Tus kws puab laujkaub yeej muaj cai muab av los puab laujkaub raws li nws lub siab nyiam. Nws muab tib thooj av los puab ib lub zoo ib lub phem los nyob ntawm nws pom zoo. Ib yam nkaus li ntawd, Vajtswv xav qhia nws txojkev chim rau sawvdaws pom nws lub hwjchim. Tiamsis nws ua siab ntev rau cov neeg uas nws chim rau, cov neeg ntawd yog cov uas raug txojkev puastsuaj. Thiab Vajtswv xav kom peb pom Vajtswv lub tshwjchim ci ntsa iab uas Vajtswv muab pub rau peb cov uas Vajtswv hlub, peb yog cov uas Vajtswv xaiv tseg cia txais nws lub tshwjchim. Cov uas Vajtswv hu, tsis yog hu cov Yudais xwb, tiamsis yog hu lwm Haivneeg thiab. Vajtswv hais rau Hauxeyas sau tseg hais tias, “Cov neeg uas tsis yog kuv cov, kuv yuav hu ua ‘Kuv cov,’ thiab haivneeg uas kuv tsis hlub, kuv yuav hu ua ‘Haivneeg uas kuv hlub.’ Thiab nyob txhua qhov chaw uas kuv tsis hu lawv hais tias, ‘Nej yog kuv haivneeg,’ nyob qhov chaw ntawd kuv yuav hu lawv ua Vajtswv tus uas muaj sia nyob cov menyuam.” Thiab Yaxayas hais txog cov Yixalayees hais tias, “Txawm yog cov Yixalayees coob heev npaum li tej suabzeb ntawm ntug hiavtxwv los tsuas muaj qee leej thiaj yuav dim xwb; rau qhov tus Tswv twg yuav txiav txim rau lub ntiajteb no sai sai.” Thiab Yaxayas qhia hais tias, “Yog tus Tswv uas muaj hwjchim loj kawg nkaus tsis tseg peb kom muaj xeebntxwv, ces peb yeej yuav puastsuaj tas ib yam li lub nroog Xaudoos thiab lub nroog Kaumaulas.” Peb yuav hais li cas? Lwm Haivneeg yeej tsis xyaum coj raws li txojkev ncaj ncees, tiamsis vim lawv ntseeg, lawv thiaj ua tau neeg ncaj ncees; tiamsis cov Yixalayees xyaum coj raws li txoj kevcai qhia kom lawv ua tua neeg ncaj ncees, tiamsis lawv ua tsis tau raws li txoj kevcai qhia. Vim li cas lawv ua tsis tau? Rau qhov lawv tsis vamkhom txojkev ntseeg, tiamsis lawv cia siab rau tes haujlwm uas lawv ua xwb. Yog li ntawd, lawv thiaj dawm lub pobzeb uas Vajtswv txojlus hais tias, “Kuv yuav muab ib lub pobzeb tso rau hauv lub nroog Xi-oos; txhua tus neeg yuav dawm lub pobzeb ntawd; lub pobzeb ntawd yuav ua rau neeg ntog, tiamsis yog leejtwg ntseeg nws, tus ntawd yuav tsis poob ntsejmuag.” Cov kwvtij, kuv lub siab xav ntsoov txog kuv haivneeg thiab niaj hnub thov Vajtswv pab kom lawv dim. Kuv ua tau timkhawv hais tias lawv yeej muab siab npuab Vajtswv, txawm yog lawv muab siab npuab Vajtswv li ntawd los lawv tsis paub qhov tseeb. Lawv tsis quavntsej txojkev ncaj ncees uas Vajtswv qhia rau lawv, tiamsis lawv ua raws li lawv lub siab nyiam xwb, lawv thiaj tsis kam ua raws li Vajtswv txojkev ncaj ncees. Rau qhov Yexus Khetos twb los ua rau txoj kevcai ntawd tiav lawm, Vajtswv thiaj suav hais tias txhua tus uas ntseeg yog neeg ncaj ncees. Mauxes sau hais tias, “Tus ncaj ncees yog tus uas coj raws li Vajtswv txoj kevcai, thiab tus uas coj raws li tej kevcai tus ntawd tau txojsia.” Tiamsis txojkev ncaj ncees uas los ntawm txojkev ntseeg hais tias, “Tsis txhob xav hais tias, ‘Leejtwg thiaj yuav mus tau saum ntuj ceebtsheej?’ ” (Lo lus ntawd hais tias coj Yexus Khetos los.) “Lossis hais tias, ‘Leejtwg yuav mus hauv tubtuag teb?’ ” (Lo lus ntawd hais tias coj Yexus Khetos hauv qhov tuag rov qab los.) Txojkev ncaj ncees hais li no: “Vajtswv txojlus twb nyob ze nej lawm, nyob ntawm nej lub qhovncauj thiab hauv nej lub siab” (lo lus ntawd yog txojkev ntseeg uas peb qhia); yog koj lub qhovncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim. Rau qhov tus uas ntseeg hauv nws lub siab Vajtswv suav hais tias nws yog tus uas ncaj ncees, thiab tus uas lees ntawm nws lub qhovncauj, Vajtswv suav hais tias nws yog tus uas dim txim. Vajtswv txojlus hais tias, “Txhua tus uas ntseeg, nws yuav tsis poob ntsejmuag.” Zaj no hais rau cov Yudais thiab lwm Haivneeg huv tibsi; Vajtswv tus uas yog sawvdaws tus Tswv, nws foom koob hmoov nplua mias rau txhua tus uas thov nws. Vajtswv txojlus hais tias, “Txhua tus uas thov tus Tswv pab yuav dim.” Tiamsis yog lawv tsis tau ntseeg, lawv yuav ua li cas thov nws? Thiab lawv yuav ua li cas ntseeg tus uas lawv tsis tau hnov dua? Yog tsis muaj neeg mus qhia txojmoo zoo rau lawv, lawv yuav ua li cas hnov? Yog tsis muaj leejtwg txib lawv mus, lawv yuav ua li cas mus qhia txojmoo zoo? Vajtswv txojlus hais tias, “Cov neeg uas mus qhia txojmoo zoo txhais kotaw zoo kawg li!” Tiamsis tsis yog txhua tus yuav ntseeg txojmoo zoo ntawd; rau qhov Yaxayas hais tias, “Tus Tswv, leejtwg thiaj yuav ntseeg tej uas peb qhia?” Yog li ntawd, twb yog lawv hnov txojmoo zoo, lawv thiaj ntseeg, thiab txojmoo zoo uas lawv hnov ntawd yog Yexus Khetos tej lus. Tiamsis kuv nug hais tias, cov Yixalayees tsis tau hnov txojmoo zoo los? Qhov tseeb tiag, lawv yeej hnov lawm, rau qhov Vajtswv txojlus hais tias, “Lawv mus qhia txojmoo zoo thoob ntiajteb, thiab lawv tej lus nrov ncha mus txog qab ntuj kawg lawm.” Kuv rov qab nug dua hais tias, puas yog cov Yixalayees tsis totaub? Mauxes twb xub hais lawm hais tias, “Kuv yuav ua kom nej khib rau tej neeg uas tsis muaj tebchaws, thiab kuv yuav ua kom nej chim rau cov haivneeg ruam.” Thiab Yaxayas muaj lub siab tawv qhia hais tias, “Cov neeg uas tsis nrhiav kuv, lawv twb ntsib kuv lawm, cov neeg uas tsis nug txog kuv, kuv twb los tshwm rau lawv pom lawm.” Tiamsis Yaxayas hais txog cov Yixalayees hais tias, “Vajtswv hais tias, ‘Kuv tsa kuv ob txhais tes tas hnub tos cov neeg uas tsis mloog lus thiab cov neeg uas ntxeev siab.’ ” Kuv nug hais tias, Vajtswv twb tso nws haivneeg tseg lawm los? Yeej tsis tau muab tso tseg li! Kuv paub li no, rau qhov kuv yog ib tug Yixalayees, kuv yog Anplahas xeebntxwv thiab kuv yog xeem Npeenyamees. Vajtswv tsis tau muab haivneeg uas thaum ub nws xaiv tseg lawm tso povtseg ib zaug li. Nej twb paub Vajtswv txojlus zaj uas hais txog Eliyas thov Vajtswv rau txim rau cov Yixalayees, Eliyas hais tias, “Tus Tswv, lawv muab koj cov cevlus tua povtseg, thiab muab koj tej thaj fij tsoo tawg tas huv tibsi lawm; tsuas tshuav kuv tib leeg xwb, tiamsis lawv tseem niaj hnub nrhiav kuv tua povtseg thiab.” Tiamsis Vajtswv teb Eliyas li cas? Vajtswv hais tias, “Kuv twb xaiv tau xya txhiab leej cia ua kuv tug lawm, lawv yeej tsis tau txhos caug pe Npa-as li.” Ib yam nkaus li ntawd, nimno Vajtswv twb xaiv tau ib nyuag pab tseg lawm, Vajtswv hlub lawv kawg li. Vajtswv xaiv neeg tsis yog raws li lawv tes haujlwm, tiamsis Vajtswv hlub lawv xwb. Yog Vajtswv xaiv neeg raws li lawv tes haujlwm, ces Vajtswv txojkev hlub tsis yog txojkev hlub tiag. Yog li cas cov Yixalayees tsis tau tej uas lawv nrhiav? Tsuas yog tej pab nyuag neeg tsawg tsawg uas Vajtswv xaiv lawm thiaj tau xwb; dua li lwm pab ces ua ntsej lag muag dig tsis hnov Vajtswv hu li, raws li Vajtswv txojlus hais tias, “Vajtswv ua rau lawv lub siab thiab lawv lub tswvyim ruam lawm; lawv muaj qhovmuag tiamsis lawv tsis pom kev, lawv muaj qhovntsej, tiamsis lawv tsis hnov lus; lawv ua li ntawd los txog niaj hnub no li.” Thiab Daviv hais tias, “Thov kom lawv tej rooj noj rooj haus ua nta npuj thiab ua hlua mag lawv, thiab thov koj rau txim rau lawv, kom lawv raug kev puastsuaj; thov kom lawv tej qhovmuag dig, kom lawv tsis txhob pom kev, thiab thov kom lawv tsa tsis taus taubhau mus ibtxhis li.” Yog li ntawd, kuv nug hais tias, thaum cov Yudais dawm ntog, lawv twb raug kev puastsuaj lawm los? Tsis yog li ntawd! Tiamsis qhov uas lawv dawm ntog, ua rau lwm Haivneeg tau txojkev cawm dim, cov Yudais thiaj khib heev. Cov Yudais ua txhaum, neeg ntiajteb thiaj tau koob hmoov, thiab vim cov Yudais tsis ntseeg, lwm Haivneeg thiaj tau koob hmoov nplua mias; yog cov Yudais ntseeg tagnrho, mas hajyam yuav tau koob hmoov ntau! Nimno kuv hais rau nej cov uas yog lwm Haivneeg. Kuv yeej yog ib tug timthawj rau lwm Haivneeg, kuv yuav muab tes haujlwm uas kuv ua saib tseemceeb. Tej zaum yuav ua rau kuv haivneeg khib, tiamsis yuav cawm tau lawv qee leej dim. Thaum Vajtswv tso cov Yudais tseg lawm, Vajtswv coj lwm Haivneeg uas ua yeebncuab rau Vajtswv los nrog Vajtswv sib raug zoo. Thaum Vajtswv rov coj cov Yudais los cuag Vajtswv, lawv yuav zoo ib yam li cov neeg tuag uas sawv hauv qhov tuag rov los. Yog muab lub ncuav ntais ib qho fij rau Vajtswv lawm, ces lub ncuav ntawd yog Vajtswv li; thiab yog muab cov cag ntoo fij rau Vajtswv lawm, ces cov ceg puavleej yog Vajtswv li ib yam nkaus Vajtswv muab tsob txiv ntoo roj nyeg cov ceg txiav, thiab muab cov ceg txiv ntoo roj qus los txuas rau ntawm tsob txiv ntoo roj nyeg cov ceg qhov chaw. Nej cov uas yog lwm Haivneeg, nej yog cov ceg txiv ntoo roj qus, nimno nej tau cov dej uas tsob txiv ntoo roj nyeg uas yog cov Yudais nqus tuaj yug nej. Nej tsis txhob saib tsis taus cov ceg uas Vajtswv muab txiav lawm. Nej tsis txhob khavtheeb, rau qhov nej yog cov ceg xwb, tsis yog cov ceg nqus dej yug cov cag, tiamsis yog cov cag qus dej yug cov ceg. Nej yuav hais tias, “Qhov uas Vajtswv muab cov ceg ntawd txiav, twb yog Vajtswv yuav muab peb los txuas rau.” Yeej yog li ntawd tiag. Twb yog vim lawv tsis ntseeg, Vajtswv thiaj muab lawv txiav povtseg, thiab muab nej los txuas rau lawv qhov chaw. Tiamsis nej yuav tsum ceevfaj; nej tsis txhob khav hais tias nej tau los nyob lawv qhov chaw. Yog Vajtswv twb muab cov Yudais uas zoo li tej ceg txiv ntoo roj nyeg xiav povtseg; nej xav hais tias nws yuav tseg nej thiab no los? Yog li ntawd, nej ua tib zoo xav txog Vajtswv txojkev hlub thiab txojkev rau txim; Vajtswv rau txim rau cov neeg uas ua txhaum, yog nej ua zoo mus li, Vajtswv yuav hlub nej; yog nej tsis ua zoo Vajtswv yuav muab nej txiav tawm. Yog cov Yudais tso qhov uas lawv tsis ntseeg tseg thiab tig rov los cuag Vajtswv, Vajtswv yuav muab lawv txuas rov rau ntawm lawv qhov chaw; rau qhov Vajtswv muab los txuas rau tsob txiv ntoo roj nyeg lawm. Cov Yudais zoo ib yam li tsob txiv ntoo roj nyeg; yog Vajtswv muab cov ceg uas nws muab txiav lawm, coj rov los txuas rau ntawm tus ntoo yuav yoojyim dua. Nej cov uas yog lwm Haivneeg, nej zoo ib yam li cov ceg txiv ntoo roj qus uas Vajtswv muab los txuas rau tsob txiv ntoo roj nyeg lawm. Cov Yudais zoo ib yam li tsob txiv ntoo roj nyeg; yog Vajtswv muab cov ceg uas nws muab txiav lawm, coj rov los txuas rau ntawm tus ntoo yuav yoojyim dua. Yog li ntawd cov kwvtij, nej tsis txhob khav hais tias nej yog cov uas txawj ntse, kuv xav kom nej totaub txog yam uas neeg tsis paub: Cov Yixalayees tsuas tawv ncauj ib ntus xwb, lawv tsuas tawv mus txog thaum uas Vajtswv coj lwm Haivneeg los txhij lawm xwb. Thaum ntawd, cov Yixalayees txhua tus yuav dim; raws li Vajtswv txojlus hais tias, “Tus Cawmseej yuav los saum lub roob Xi-oos los; nws yuav muab Yakhauj cov xeebntxwv tej kev txhaum tshem huv tibsi mus. Kuv yuav zam txim rau lawv raws li tej lus uas kuv twb cog tseg rau lawv lawm.” Vim cov Yudais tsis kam lees yuav txojmoo zoo, Vajtswv thiaj ua yeebncuab rau lawv. Qhov ntawd, ua rau nej cov uas yog lwm Haivneeg thiaj tau los cuag Vajtswv; tiamsis Vajtswv suav hais tias lawv yog Vajtswv cov phoojywg vim lawv cov yawgkoob. Rau qhov Vajtswv yeej tsis hloov siab rau tus uas Vajtswv twb xaiv thiab foom koob hmoov rau lawm. Nej cov uas yog lwm Haivneeg, thaum ub nej yeej tsis mloog Vajtswv lus ib yam li thiab, tiamsis nimno Vajtswv hlub nej vim cov Yudais tsis mloog Vajtswv lus. Qhov uas niaj hnub no cov Yudais tsis mloog Vajtswv lus, lawv ua li ntawd kom lawv tau txais Vajtswv txojkev hlub ib yam li nej thiab. Rau qhov Vajtswv ua kom txhua tus tsis mloog Vajtswv lus, Vajtswv thiaj zoo hlub lawv. Vajtswv yog tus uas muaj ib puas tsav yam nplua mias! Vajtswv muaj tswvyim thiab kev txawj ntse! Leejtwg thiaj yuav paub Vajtswv lub siab? Leejtwg thiaj yuav totaub tej uas Vajtswv ua? Raws li Vajtswv txojlus hais tias, “Leejtwg thiaj yuav paub tus Tswv lub siab? Leejtwg thiaj yuav ua tau tus Tswv tus tuavxam? Leejtwg tau muab ib yam dabtsi rau Vajtswv, thiab Vajtswv pauj rov qab rau nws?” Vajtswv yog tus uas tsim ib puas tsav yam, Vajtswv lub hwjchim tuav ib puas tsav yam thiab ib puas tsav yam ntawd yog Vajtswv li. Thov kom Vajtswv tau koob meej mus ibtxhis li! Amees. Cov kwvtij, Vajtswv hlub peb kawg nkaus li, yog li ntawd kuv thiaj ntuas nej hais tias thaum nej tseem ua neej nyob no, nej yuav tsum muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam. Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus. Vim Vajtswv pub nws txojkev hlub rau kuv, kuv thiaj ntuas nej txhua tus hais tias, nej tsis txhob xav dhau tej uas nej ua tsis tau. Tiamsis nej yuav tsum muab nej txojkev ntseeg ntsuas saib, Vajtswv pub nej muaj peevxwm npaum li cas. Rau qhov peb lub cev yeej muaj ntau yam los koom ua ke, thiab txhua yam ntawd nyias ua nyias haujlwm. Ib yam nkaus li ntawd, txawm yog peb muaj coob leej los peb nrog Yexus Khetos koom ua ib lub cev, peb puavleej koom ib lub cev ib yam li peb lub cev muaj ntau yam sib koom. Vajtswv pub peb txhua tus nyias muaj nyias koob hmoov raws li Vajtswv pom zoo pub rau peb lawm. Yog peb tau txoj koob hmoov uas qhia Vajtswv txojlus, peb yuav tsum qhia raws li peb txojkev ntseeg; yog peb tau txoj koob hmoov pab lwm tus, peb cia li pab; yog peb tau txoj koob hmoov qhia, peb cia li qhia; yog peb tau txoj koob hmoov txhawb lwm tus zog, peb cia li txhawb. Tus uas muaj qhov txhia chaw pab lwm tus, tus ntawd yuav tsum muab pab ntawm lub siab dawb paug; tus uas ua thawjcoj, tus ntawd yuav tsum muab siab rau ua haujlwm; tus uas ua siab dawb siab zoo rau lwm tus, tus ntawd yuav tsum ua ntsejmuag luag ntxhi. Yuav tsum muaj lub siab ncaj ncees hlub tiag tiag; ntxub txojkev ua phem ua qias, thiab muab siab npuab qhov uas ua zoo; nej cov uas ntseeg Yexus Khetos, nej ib leeg yuav tsum hlub ib leeg, thiab nej ib leeg hwm ib leeg. Nej rau siab ntso ua haujlwm tsis txhob tubnkeeg, thiab yuav tsum muab siab rau ua tes haujlwm uas Vajtswv kom peb ua. Qhov uas nej cia siab rau Vajtswv yuav ua rau nej zoo siab, thiab thaum nej raug kev txomnyem nej yuav tsum ua siab ntev thiab thov Vajtswv tsis tseg tsis tu. Muab tej uas nej muaj pab cov ntseeg uas txomnyem; thiab yog muaj qhua tuaj, nej yuav tsum hu lawv los so hauv nej tej tsev. Nej yuav tsum thov Vajtswv foom koob hmoov rau cov neeg uas tsimtxom nej; thov Vajtswv foom koob hmoov rau lawv, tsis txhob thov Vajtswv foom tsis zoo rau lawv. Thaum muaj neeg zoo siab, nej cia li nrog lawv zoo siab; thaum muaj neeg quaj ntsuag, nej cia li nrog lawv quaj ntsuag. Nej yuav tsum koom ua ib lub siab. Nej tsis txhob khavtheeb, yog luag kom nej ua tej haujlwm uas tsis tseemceeb pestsawg los nej cia li ua. Tsis txhob xav hais tias nej yog neeg txawj ntse. Yog muaj leejtwg ua phem rau nej, nej tsis txhob ua phem pauj, tiamsis nej yuav tsum xyaum ua qhov uas sawvdaws pom hais tias yog tej uas zoo xwb. Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum. Cov kwvtij, nej tsis txhob ua pauj rau luag, tiamsis cia Vajtswv mam li ua pauj, rau qhov Vajtswv txojlus hais tias, “Kuv yog tus yuav ua pauj thiab kuv yog tus yuav rau txim, tus Tswv hais li ntawd.” Vajtswv txojlus hais tias, “Yog nej cov yeebncuab tshaib plab, nej cia li muab mov rau lawv noj; yog lawv nqhis dej, nej cia li muab dej rau lawv haus; yog nej ua li no lawv yuav txajmuag.” Tsis txhob cia txojkev phem kovyeej nej, tiamsis nej yuav tsum ua zoo, nej thiaj kovyeej txojkev phem. Sawvdaws yuav tsum mloog nomtswv lus, rau qhov tej nomtswv ntawd yog Vajtswv pom zoo thiaj muaj, thiab tej nomtswv ntawd puavleej yog Vajtswv tsa. Yog leejtwg tawmtsam nomtswv uas yog nws tawmtsam Vajtswv tus uas tsa tej nomtswv ntag, thiab Vajtswv yuav rau txim rau tus uas tawmtsam nomtswv ntawd. Tus neeg uas ua zoo yeej tsis ntshai nomtswv, tiamsis tus uas ua txhaum thiaj ntshai nomtswv. Nej yuav tsum ua zoo nej thiaj tsis ntshai nomtswv, nomtswv thiaj yuav qhuas nej; rau qhov nomtswv yog Vajtswv tus tubtxib uas ua haujlwm pab nej. Tiamsis yog nej ua txhaum, nej yeej yuav ntshai nws, rau qhov nws muaj hwjchim rau txim rau nej! Nws yog Vajtswv tus tubtxib uas rau txim rau cov neeg ua txhaum. Yog li ntawd, nej yuav tsum mloog nomtswv lus, tsis yog vim nej ntshai nyob tsam nej raug txim xwb, tiamsis vim nej lub siab yeej paub hais tias yuav tsum mloog nomtswv lus. Ib yam nkaus li ntawd, nej yuav tsum them se rau nomtswv, rau qhov yog Vajtswv kom tej nomtswv ua tes haujlwm no ntag. Yog li ntawd nej yuav tsum them txhua yam se: se liaj se teb, se vaj se tsev thiab tej se nyiaj txiag uas nej khwv tau, nej yuav tsum hwm thiab saib taus txhua tus nomtswv huv tibsi. Nej tsis txhob tshuav leejtwg nqi, tib qho uas nej tshuav luag nqis ces yog ib leeg yuav tsum hlub ib leeg; tus uas hlub lwm tus thiaj yog nws ua raws li txoj kevcai qhia. Txoj kevcai qhia hais tias, “Nej tsis txhob deev luag pojniam luag txiv; nej tsis txhob tua neeg; nej tsis txhob ua tubsab; nej tsis txhob ntshaw luag tug”; thiab muaj dua lwm nqe kevcai uas muab sau zog ua ib nqe hais li no hais tias, “Hlub koj tej kwvtij zejzog ib yam li koj hlub koj lub cev.” Yog nej hlub kwvtij zejzog, nej yeej tsis ua phem rau leejtwg; yog nej hlub lawv thiaj yog nej ua raws li txoj kevcai qhia. Nej yuav tsum ua li no, rau qhov nej twb paub lawm hais tias lub sijhawm no yog ciaj sawv tsis yog caij pw. Rau qhov nimno txojkev cawm dim los ze peb dua thaum uas peb nyuam qhuav los ntseeg; nimno yog ib tag hmo dua lawm, twb yuav kaj ntug. Peb yuav tsum tsis txhob ua li cov neeg uas nyob qhov tsaus ntuj ua, thiab peb yuav tsum muab tej cuabyeej uas Vajtswv muab rau peb los tuav; peb yuav tsum ua peb lub neej kom tsimnyog qhov uas peb yog neeg nruab hnub, tsis txhob qw ua nqaj ua nqug thiab haus cawv qaug, tsis txhob ua nkauj ua nraug thiab ua neeg tsis paub cai, tsis txhob sib cav sib ceg thiab sib khib. Tiamsis peb yuav tsum muab tus Tswv Yexus Khetos tej cuabyeej los tuav; thiab tsis txhob quavntsej tej kev phem kev qias uas nej lub siab nyiam ua. Nej yuav tsum txaus siab cia tus uas tsis ntseeg Vajtswv pestsawg nrog nej nyob, nej tsis txhob nrog nws sib cav txog nws txojkev ntseeg. Muaj qee leej ntseeg hais tias noj tau txhua yam huv tibsi, tiamsis tus uas tsis ntseeg Vajtswv pestsawg noj zaub xwb. Tus uas noj tau txhua yam tsis txhob saib tsis taus tus uas tsis noj, thiab tus uas noj zaub xwb, tsis txhob thuam tus uas noj tau txhua yam; rau qhov Vajtswv yeej lees yuav tus ntawd thiab. Koj yog leejtwg, koj thiaj thuam luag tus tubtxib? Tsuas yog tus tubtxib ntawd tus tswv thiaj hais tau hais tias, nws tus tubtxib ua zoo lossis ua phem xwb. Rau qhov tus Tswv pab tau kom nws ua zoo. Muaj qee leej xav hais tias qee hnub tseemceeb, qee hnub tsis tseemceeb, tiamsis muaj qee leej xav hais tias txhua hnub tseemceeb ib yam nkaus. Yog li ntawd, cia nyias ua raws li nyias lub siab xav xwb. Tus uas teem ib hnub ua hnub tseemceeb yeej yog nws hwm tus Tswv nws thiaj ua li ntawd. Ib yam nkaus li ntawd, tus uas noj tau txhua yam yeej yog nws hwm tus Tswv nws thiaj noj, rau qhov nws twb ua Vajtswv tsaug lawm, nws mam li noj; tus uas caiv tsis noj yam ub yam no los yeej yog nws hwm tus Tswv nws thiaj caiv, thiab nws yeej ua Vajtswv tsaug ib yam nkaus. Peb muaj sia nyob tsis yog peb muaj rau peb, thiab peb tuag, tsis yog peb tuag rau peb xwb. Yog peb muaj sia nyob, peb muaj sia nyob rau tus Tswv, thiab yog peb tuag, peb tuag rau ntawm tus Tswv; txawm yog peb muaj sia nyob lossis peb tuag, peb yeej yog tus Tswv neeg. Rau qhov Yexus Khetos tuag thiab sawv hauv qhov tuag rov qab los lawm, nws thiaj ua cov neeg ciaj thiab cov neeg tuag tus Tswv. Ua li cas nej pheej thuam nej cov kwvtij, thiab ua li cas nej pheej saib tsis taus nej cov kwvtij? Peb txhua tus yuav tau mus sawv tabmeeg Vajtswv thiab nws yuav txiav txim rau peb sawvdaws. Rau qhov Vajtswv txojlus hais tias, “Tus Tswv hais tias kuv yog Vajtswv tus uas muaj sia nyob; txhua tus yuav txhos caug pe kuv, thiab txhua tus lub qhovncauj yuav lees hais tias kuv yog Vajtswv.” Peb txhua tus nyias yuav tau qhia nyias zaj rau Vajtswv. Peb tsis txhob thuam lwm tus, tiamsis nej nco ntsoov tsis txhob ua rau lwm tus yuam kev ua txhaum. Kuv yog ib tug uas ntseeg tus Tswv Yexus Khetos, kuv paub hais tias yeej tsis muaj ib yam uas tsis huv li; tiamsis tus uas ntseeg hais tias yam ntawd tsis huv ces nws tsis txhob noj. Yog nej noj tej uas nej cov kwvtij caiv tsis noj, yeej yog nej tsis hlub lawv. Nej tsis txhob cia tej uas nej noj ua rau tus uas Yexus Khetos twb tuag txhiv lawm raug kev puastsuaj. Nej tsis txhob cia lwm tus thuam tej uas nej pom hais tias zoo lawm hais tias tsis zoo. Rau qhov Vajtswv lub tebchaws tsis yog kev noj kev haus, tiamsis yog kev ncaj ncees, kev thajyeeb thiab kev zoo siab uas Vaj Ntsujplig tus Dawbhuv pub rau peb. Tus uas ua Yexus Khetos tes haujlwm li no, nws ua haum Vajtswv siab thiab ua haum neeg siab. Yog li ntawd, peb yuav tsum muab siab rau ua tej uas yuav ua rau sawvdaws nyob sib haumxeeb thiab ua tej uas yuav txhawb tau lwm tus lub zog xwb. Tsis txhob muab tej zaub mov uas nej noj ua rau Vajtswv tes haujlwm tsis muaj nqis. Txhua yam zaub mov nej noj tau, tiamsis tsis txhob noj yam uas ua rau lwm tus yuam kev ua txhaum. Yog nej noj nqaij lossis haus cawv lossis ua ib yam dabtsi uas yuav ua rau nej cov kwvtij yuam kev ua txhaum, ces nej tsis txhob noj lossis tsis txhob ua yuav zoo dua. Tej uas nej ntseeg hais tias noj tau, nej cia li noj, tsuas cia Vajtswv thiab nej paub xwb. Tus uas noj tej uas nws lub siab qhia hais tias noj tsis txhaum, tus ntawd yeej tsis nyuaj siab. Tiamsis tus uas nws ua xyem xyav rau tej uas nws noj, thaum nws noj Vajtswv yuav rau txim rau nws, rau qhov nws tsis noj raws li nws lub siab qhia rau nws lawm; rau qhov txhua yam uas peb tsis ua los ntawm txojkev ntseeg ces yog kev txhaum. Peb cov uas muaj kev ntseeg ruaj lawm, tsimnyog peb pab cov uas kev ntseeg tsawg thiab peb tsis txhob ua kom haum peb siab xwb. Peb txhua tus yuav tsum ua kom haum peb cov kwvtij uas ntseeg siab thiaj yuav pab tau lawv, kom lawv muaj kev ntseeg ruaj. Rau qhov Yexus Khetos tsis tau ua kom haum nws siab xwb; tiamsis Vajtswv txojlus hais tias, “Tej lus uas luag thuam nej twb yog luag thuam kuv ntag.” Rau qhov Vajtswv txojlus uas thaum ub luag muab sau tseg rau hauv ntawv twb yog sau qhia rau peb. Vajtswv txojlus ua rau peb muaj kev cia siab, ua siab ntev thiab muab siab rau ntseeg ntxiv. Thov Vajtswv tus uas ua rau nej muaj lub siab ntev thiab muab siab rau ntseeg ntxiv pab kom nej nyob sib haumxeeb, nej thiaj yuav muaj tus yam ntxwv ib yam li Yexus Khetos. Yog nej ua li ntawd, nej thiaj yuav koom tau ua ib lub siab qhuas Vajtswv tus uas yog peb tus Tswv Yexus Khetos Leej Txiv. Nej ib leeg yuav tsum zoo siab hlo txais tos ib leeg, ib yam li Yexus Khetos tau txais yuav nej. Yog nej ua li ntawd, Vajtswv yuav tau koob meej. Kuv qhia rau nej hais tias qhov uas Yexus Khetos los pab cov neeg Yudais yog ua rau sawvdaws paub hais tias Vajtswv yog tus ncaj ncees, Vajtswv yeej yuav ua kom tiav raws li tej lus uas Vajtswv tau cog tseg rau lawv cov yawgkoob lawm, thiab nws pab kom lwm Haivneeg paub ua Vajtswv tsaug, rau qhov Vajtswv hlub lawv. Raws li Vajtswv txojlus uas hais tias, “Yog li ntawd, thaum kuv nrog lwm Haivneeg nyob kuv yuav ua koj tsaug; thiab kuv yuav hu nkauj qhuas koj lub npe.” Thiab hais ntxiv hais tias, “Lwm Haivneeg, nej cia li nrog Vajtswv haivneeg zoo siab!” Thiab tseem hais ntxiv hais tias, “Nej cov uas yog lwm Haivneeg, nej cia li ua tus Tswv tsaug thiab txhua haivneeg cia li qhuas nws!” Thiab Yaxayas hais ntxiv hais tias, “Yexais ib tug xeebntxwv yuav los, nws yuav kav lwm Haivneeg thiab lawv yuav tso siab plhuav rau nws.” Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, Vaj Ntsujplig tus Dawbhuv lub hwjchim yuav pab kom nej muaj kev cia siab rau Vajtswv heev zuj zus. Cov kwvtij, kuv paub hais tias nej yog cov uas muaj lub siab zoo, muaj kev txawj ntse, thiab ib leeg txawj qhia ib leeg. Qhov uas kuv muaj cuabkav sau tsab ntawv no tuaj rau nej, yog kuv xav ntuas kom nej nco tej yam tseemceeb uas yog Vajtswv txojkev hlub uas Vajtswv pub rau kuv, kuv thiaj tau ua Yexus Khetos ib tug tubtxib uas qhia Vajtswv txojmoo zoo rau lwm Haivneeg, ib yam li tus povthawj, kom lwm Haivneeg zoo li tej khoom fij uas haum Vajtswv siab, thiab Vaj Ntsujplig tus Dawbhuv ntxuav kom lawv huv. Kuv koom nrog Yexus Khetos, kuv thiaj muaj cuabkav khav tej haujlwm uas kuv ua rau Vajtswv. Kuv yeej tsis muaj cuabkav khav ib yam dabtsi li, tsuas yog tej uas Yexus Khetos siv kuv coj lwm Haivneeg los ntseeg Vajtswv, vim tej lus uas kuv qhia thiab tej haujlwm uas kuv ua, thiab Vaj Ntsujplig pub hwjchim rau kuv ua tej txujci tseemceeb. Yog li ntawd, kuv thiaj qhia Yexus Khetos Txojmoo Zoo hauv lub nroog Yeluxalees mus txog rau pem lub nroog Ilelikus. Tes haujlwm uas kuv nyiam ua tshaj, yog mus qhia txojmoo zoo rau txhua qhov uas tsis tau muaj neeg mus qhia Yexus Khetos zaj dua li, thiaj tsis muaj neeg hais tias, kuv mus tsa tsev rau ntawm lub qua tsev uas luag twb ncaws tau cia lawm. Raws li Vajtswv txojlus uas hais tias, “Cov neeg uas tsis tau muaj neeg qhia Yexus zaj rau lawv, lawv yuav pom; thiab cov neeg uas tsis tau hnov dua Yexus zaj, lawv yuav totaub.” Muaj ntau yam pheej tabkaum kuv, kuv thiaj tsis tau tuaj xyuas nej. Tiamsis nimno tim tej cheebtsam uas kuv nyob no, kuv twb ua haujlwm tiav lawm, kuv npaj siab los tau ob peb xyoos hais tias kuv yuav tau tuaj pom nej, thaum kuv mus tim tebchaws Xapees. Kuv cia siab hais tias thaum kuv tuaj ntawd, kuv yuav pom nej thiab tau nrog nej nyob ib ntus, ces nej yuav pab xa kuv mus rau tim tebchaws Xapees. Tamsim no kuv tabtom rov mus pab cov ntseeg uas nyob nram lub nroog Yeluxalees; rau qhov cov ntseeg uas nyob hauv Makedaunias thiab Akhayas, lawv txaus siab muab mentsis nyiaj xa mus pab cov ntseeg txomnyem uas nyob nram lub nroog Yeluxalees. Lawv yeej txaus siab hlo ua li ntawd. Lawv paub hais tias yeej tsimnyog lawv pauj cov neeg uas nyob nram lub nroog Yeluxalees txiaj ntsig. Rau qhov cov Yudais cia lwm Haivneeg tau los nrog cov Yudais koom Vajtswv txoj koob hmoov. Thaum kuv nqa cov nyiaj ntawd mus cob rau lawv lawm, kuv yuav mus rau tim tebchaws Xapees, tiamsis kuv yuav xub tuaj xyuas nej tso; kuv paub hais tias thaum kuv tuaj txog tim nej, Yexus Khetos yuav foom koob hmoov ntau kawg rau nej. Cov kwvtij, vim peb cov uas ntseeg peb tus Tswv Yexus Khetos thiab vim Vaj Ntsujplig twb ua rau peb txawj sib hlub lawm, yog li ntawd kuv thov nej kub siab lug thov Vajtswv pab kuv, kom cov neeg tsis ntseeg uas nyob hauv lub xeev Yudas tsis txhob ua phem rau kuv, thiab thov Vajtswv pab kuv, kom tes haujlwm uas kuv mus ua pab cov ntseeg uas nyob hauv lub nroog Yeluxalees haum sawvdaws siab. Yog Vajtswv pom zoo, kuv yuav zoo siab hlo tuaj xyuas nej, thiab thaum kuv tuaj pom nej lawm, kuv yuav zoo siab heev. Kuv thov Vajtswv tus uas ua rau peb tau nyob kaj siab lug nrog nraim nej txhua tus. Amees. Kuv qhia rau nej paub hais tias peb tus muam Fenpes, yog ib tug uas ua haujlwm pab pawg ntseeg hauv lub nroog Keekhale-as. Kuv thov nej tos txais nws ntawm tus Tswv lub npe, kom tsimnyog qhov uas peb yog Vajtswv haivneeg, thiab tej uas nws xav tau, nej cia li pab nws; rau qhov nws tau pab sawvdaws thiab pab kuv lawm. Thov nej hais noj qab nyob zoo rau Paxilas thiab Akilas nkawd, nkawd yog ob tug uas pab kuv ua Yexus Khetos tes haujlwm; thiab nkawd tau pab kuv, nkawd tsis khuvxim nkawd txojsia li, tsis yog kuv tib leeg nco nkawd ntshav ntuj xwb, tiamsis txhua pawg ntseeg uas yog lwm Haivneeg puavleej nco nkawd ntshav ntuj thiab. Thov nej hais noj qab nyob zoo rau cov ntseeg uas tuaj sablaj hauv nkawd tsev. Thov nej hais noj qab nyob zoo rau kuv tus phoojywg Epanetus, nws yog thawj tug uas los ntseeg Yexus Khetos hauv lub xeev Axias. Thov nej hais noj qab nyob zoo rau Malis tus uas muab siab rau ua haujlwm pab nej. Thov nej hais noj qab nyob zoo rau Adelaunikus thiab Yuniyas uas yog kuv ob tug kwvtij Yudais uas raug kaw nrog kuv ua ke hauv tsev lojcuj; nkawd yog ob tug uas cov thwjtim paub zoo, thiab nkawd xub los ntseeg Yexus Khetos ua ntej kuv. Thov nej hais noj qab nyob zoo rau Apiyatus uas yog kuv tus phoojywg zoo ntawm tus Tswv lub npe. Thov nej hais noj qab nyob zoo rau Ulanpanus uas yog ib tug phoojywg nrog peb ua Yexus Khetos tes haujlwm ua ke, thiab hais rau kuv tus phoojywg Xitakhis. Thov nej hais noj qab nyob zoo rau Apeles tus uas muab siab npuab Yexus Khetos, thiab hais noj qab nyob zoo rau Alitaunpulus tsevneeg. Thov nej hais noj qab nyob zoo rau kuv tus kwvtij Helaudi-oos thiab hais noj qab nyob zoo rau Nalekixus uas yog tsevneeg ntseeg Yexus. Hais kuv tej lus noj qab nyob zoo rau Tifanas thiab Tifauxas uas ua tus Tswv tes haujlwm, thiab hais rau Palixis uas yog kuv tus phoojywg zoo, nws ua tus Tswv tes haujlwm khwv kawg li. Kuv xa lus noj qab nyob zoo rau Lufus, nws yog tus uas nquag ua tus Tswv tej haujlwm kawg li; thiab hais noj qab nyob zoo rau nws niam tus uas ib yam li yog kuv niam thiab. Hais kuv tej lus noj qab nyob zoo rau Axikitus, Filenkoos, Helemes, Palaunpas, Helemas, thiab cov kwvtij thiab cov muam uas ntseeg Yexus uas nrog lawv nyob ntawd huv tibsi. Thov nej hais noj qab nyob zoo rau Filaunkus, Yulias, Nele-us thiab nws tus muam, thiab Aulipas thiab tagnrho cov ntseeg uas nrog lawv nyob ua ke ntawd huv tibsi. Nej ib leeg hais noj qab nyob zoo rau ib leeg ntawm txojkev sib hlub. Cov ntseeg Yexus Khetos puavleej xa lus noj qab nyob zoo tuaj rau nej. Cov kwvtij, kuv xav kom nej ceevfaj cov neeg uas ntxias kom sawvdaws tawg pab tawg pawg thiab kom peb tso tej lus qhia uas nej twb hnov lawm tseg. Nej tsis txhob quavntsej cov neeg ntawd tej lus qhia! Rau qhov cov neeg uas ua li ntawd lawv tsis yog cov uas ua peb tus Tswv Yexus Khetos tes haujlwm, tiamsis lawv tsuas tuaj nrhiav noj nrhiav haus nkaus xwb. Thiab lawv hais tej lus mos lus muag ntxias dag cov neeg uas tsis paub qabhau kom yuam kev. Txhua tus puavleej hnov hais tias nej mloog lus heev, yog li ntawd kuv zoo siab kawg li. Kuv xav kom nej ua neeg txawj ntse rau yam uas zoo; kuv xav kom nej ua li tus neeg ruam rau yam uas phem. Tshuav tsis ntev Vajtswv tus uas ua rau peb tau nyob kaj siab lug yuav muab dab Ntxwgnyoog nias nthi rau nej tsuj. Thov kom peb tus Tswv Yexus Khetos txoj koob hmoov nrog nraim nej sawvdaws. Timautes tus uas nrog kuv ua haujlwm ua ke, nws hais noj qab nyob zoo rau nej; thiab Luki-us, Yaxoos thiab Xauxipates uas yog kuv cov kwvtij Yudais, lawv hais noj qab nyob zoo rau nej thiab. Kuv yog Teti-us tus uas sau Paulus tsab ntawv no, kuv hais noj qab nyob zoo rau nej cov uas ntseeg Yexus thiab. Nkayus, tus uas kuv nrog nyob thiab muab nws lub tsev rau cov ntseeg ua chaw sablaj, nws hais noj qab nyob zoo rau nej sawvdaws. Elaxetus tus uas yog tus tuav cov nomtswv hauv lub nroog tej nyiaj thiab peb tus kwvtij Khualetus hais noj qab nyob zoo rau nej sawvdaws thiab. [Thov kom peb tus Tswv Yexus Khetos txojkev hlub nrog nraim nej txhua tus. Amees.] Peb cia li ua rau Vajtswv tau koob meej! Vajtswv yog tus uas pab tau kom nej muab siab rau ntseeg, txhua zaus uas kuv qhia txojmoo zoo kuv yeej qhia hais tias Vajtswv pab tau nej. Txojmoo zoo ntawd hais txog Yexus Khetos zaj uas ntau tiam yav tas los tsis muaj neeg paub. Tiamsis, nimno twb muaj neeg muab qhia rau sawvdaws paub raws nraim li Vajtswv tus uas muaj sia nyob mus ibtxhis tau qhia rau cov cev Vajtswv lus muab sau tseg rau hauv ntawv lawm, kom txhua haivneeg ntseeg thiab mloog Vajtswv lus. Thov kom Vajtswv tus uas muaj kev txawj ntse tib leeg tau koob meej los ntawm Yexus Khetos mus ibtxhis li. Amees. Kuv yog Paulus tus uas Vajtswv hu los ua Yexus Khetos tus timthawj raws li Vajtswv lub siab nyiam, thiab peb tus kwvtij Xauthenes sau tsab ntawv no xa tuaj rau cov ntseeg Vajtswv uas nyob hauv lub nroog Kauleethaus, txhua tus uas Vajtswv hu los ua Vajtswv haivneeg thiab tej neeg uas nyob txhua qhov chaw uas pehawm peb tus Tswv Yexus Khetos uas yog lawv thiab peb tus Tswv, kom tau nrog Yexus Khetos kom ib txojsia. Thov Vajtswv tus uas yog peb Leej Txiv thiab Yexus Khetos tus uas yog peb tus Tswv foom koob hmoov rau nej kom nej tau zoo nyob kaj siab lug. Kuv niaj hnub ua kuv tus Vajtswv tsaug, rau qhov Vajtswv pub Vajtswv txoj koob hmoov rau nej cov uas ntseeg Yexus Khetos lawm. Yexus Khetos ua rau nej muaj txhua yam, tsis hais tej lus uas nej hais thiab tej kev txawj ntse uas nej muaj. Qhov ntawd yog qhov uas ua rau nej ua timkhawv qhia txog Yexus Khetos zaj. Yog li ntawd, thaum uas nej tabtom tos peb tus Tswv Yexus Khetos rov qab los nej thiaj tau koob hmoov, tsis muaj ib yam uas nej yuav tsis tau li. Vajtswv yuav pab kom nej muab siab rau ntseeg mus txog hnub kawg, yog li ntawd hnub uas peb tus Tswv Yexus rov qab los, nej thiaj tsis muaj ib qho txhaum li. Vajtswv yog tus ncaj ncees; Vajtswv thiaj hu nej los nrog nws tus Tub Yexus Khetos uas yog peb tus Tswv sib nraug zoo. Cov kwvtij, kuv tuav peb tus Tswv Yexus Khetos lub npe ntuas nej sawvdaws, kom nej hais tej lus uas ua rau sawvdaws nyob sib haum thiaj tsis ua rau nej tawg ua pab ua pawg. Nej yuav tsum koom ua ib lub siab, xav ib yam thiab muaj ib lub homphiaj xwb. Cov kwvtij, Khalau-es tsevneeg qee leej tuaj qhia rau kuv hais tias, nej pheej sib cav sib ceg. Kuv hnov nej ib leeg hais lawm ib yam. Ib tug hais tias, “Kuv yog Paulus pab”; muaj dua lwm tus hais tias, “Kuv yog Apaulaus pab”; muaj dua lwm tug hais tias, “Kuv yog Petus pab”; thiab muaj dua lwm tus hais tias, “Kuv yog Yexus Khetos pab.” Nej muab Yexus Khetos faib ua ob peb tug los? Paulus yog tus uas tuag saum ntoo khaublig theej nej lub txhoj los? Lossis nej tuav Paulus lub npe muab neeg ua kevcai raus dej los? Kuv ua Vajtswv tsaug uas kuv tsis tau muab nej leejtwg ua kevcai raus dej, kuv tsuas yog muab Kixapus thiab Nkayus ua kevcai raus dej xwb. Yog li ntawd, yeej tsis muaj leejtwg tuav kuv lub npe muab nej ua kevcai raus dej. (Kuv twb muab Xatefanas tsevneeg ua kevcai raus dej lawm thiab; dua li ntawd, kuv tsis nco hais tias xyov kuv puas tau muab lwm tus ua kevcai raus dej thiab.) Rau qhov Yexus Khetos tsis tau txib kuv mus muab neeg ua kevcai raus dej, tiamsis nws txib kuv mus qhia txojmoo zoo. Thaum kuv qhia txojmoo zoo kuv tsis tau qhia raws li neeg lub tswvyim, nyob tsam ua rau qhov uas Yexus Khetos tuag saum tus ntoo khaublig tsis muaj nqis lawm. Cov neeg uas yuav raug kev puastsuaj xav hais tias, qhov uas Yexus Khetos tuag saum tus ntoo khaublig tsis tseemceeb dabtsi rau lawv li; tiamsis peb cov uas twb tau txais txojkev cawm dim lawm, peb paub hais tias qhov ntawd yog Vajtswv lub hwjchim ntag. Vajtswv txojlus hais tias, “Kuv yuav rhuav cov neeg txawj ntse lub tswvyim, thiab kuv tsis quavntsej cov tub txawg tub ntse tej kev txawj ntse.” Cov neeg ntse nyob qhov twg? Cov tub txawg tub ntse nyob qhov twg? Cov neeg uas txawj sib cav txog kev txawj ntse tiam no nyob qhov twg? Vajtswv twb ua rau neeg ntiajteb lub tswvyim ruam lawm. Rau qhov Vajtswv yog tus muaj tswvyim, Vajtswv pom hais tias neeg lub tswvyim pab tsis tau kom neeg paub Vajtswv li, Vajtswv pom zoo cawm cov neeg uas ntseeg Vajtswv txojlus uas peb qhia uas neeg suav hais tias tsis tseemceeb dabtsi. Cov neeg Yudais xav pom tej txujci tseemceeb lawv thiaj ntseeg, thiab cov neeg Kilis tsuas cia siab rau tej kev txawj ntse xwb. Tiamsis peb qhia zaj uas Yexus Khetos raug ntsia rau saum tus ntoo khaublig, zaj ntawd ua rau cov Yudais chim thiab ua rau lwm Haivneeg thuam hais tias tsis tseemceeb; tiamsis cov neeg uas Vajtswv hu, tsis hais cov Yudais lossis lwm Haivneeg puavleej paub hais tias, Yexus Khetos yog Vajtswv lub hwjchim thiab yog Vajtswv lub tswvyim. Rau qhov Vajtswv lub hwjchim uas neeg xav hais tias ruam, tseem ntse dua neeg lub tswvyim, thiab Vajtswv lub zog uas neeg xav hais tias tsis muaj zog, tseem muaj zog dua neeg lub zog. Cov kwvtij, nej ua tib zoo xav thaum Vajtswv hu nej los ntseeg, nej yog neeg zoo li cas: Raws li neeg xav, nej cov tsis muaj pestsawg leej txawj ntse, tsis muaj pestsawg leej muaj hwjchim thiab tsis muaj pestsawg leej ua nom ua tswv. Tiamsis Vajtswv xaiv yam uas neeg xav hais tias ruam kawg nkaus hauv lub ntiajteb no kom cov neeg txawj ntse txajmuag; thiab Vajtswv xaiv yam uas neeg suav hais tias tsis muaj zog hauv lub ntiajteb no kom cov neeg muaj zog poob ntsejmuag. Vajtswv xaiv tej uas neeg thuam, saib tsis taus thiab xav hais tias tsis tseemceeb, kom tej uas neeg xav hais tias tseemceeb puastsuaj mus, Vajtswv ua li no kom tsis muaj leejtwg yuav muaj cuabkav khav tau li. Tiamsis Vajtswv coj nej los nrog Yexus Khetos koom ib txojsia, Yexus Khetos yog lub tswvyim thiab txojkev ncaj ncees uas Vajtswv pub rau peb, peb thiaj tau los ua Vajtswv haivneeg uas dawbhuv kom peb dim peb lub txim, raws li Vajtswv txojlus hais tias, “Tus uas yuav khavtheeb, nws tsuas khav tau tej uas tus Tswv ua lawm xwb.” Cov kwvtij, thaum kuv tuaj xyuas nej, kuv tsis tau tuaj qhia Vajtswv txojlus tseeb uas tsis muaj neeg paub rau nej kom zoo mloog lossis qhia raws li kuv lub tswvyim xwb. Rau qhov kuv npaj siab hais tias thaum kuv tuaj txog tim nej, kuv yuav tsis qhia lwm zaj rau nej li, kuv tsuas qhia kom nej paub Yexus Khetos thiab qhov uas Yexus tuag saum tus ntoo khaublig rau nej xwb. Yog li ntawd, thaum kuv tuaj nrog nej nyob, kuv qaug zog thiab ntshai ua ibce tshee hnyo. Tej lus uas kuv hais thiab tej lus uas kuv qhia tsis yog neeg lub tswvyim, tiamsis yog tej lus uas qhia kom sawvdaws pom Vajtswv tus Ntsujplig lub hwjchim. Yog li ntawd, qhov uas nej ntseeg Vajtswv tsis yog nej cia siab rau neeg lub tswvyim, tiamsis yog nej cia siab rau Vajtswv lub hwjchim. Kuv yeej hais tej lus txawj ntse rau cov neeg uas paub tab lawm xwb, tiamsis tsis yog cov neeg tiam no lossis yog cov nomtswv tiam no tej tswvyim uas tabtom yuav ploj mus. Tiamsis kuv qhia Vajtswv lub tswvyim uas nyob nraim nkoos tsis muaj leejtwg paub. Lub tswvyim ntawd Vajtswv twb npaj tseg rau peb thaum uas tsis tau tsim lub ntiajteb no los lawm. Cov nomtswv uas kav lub ntiajteb no yeej tsis muaj ib tug paub lub tswvyim ntawd; yog lawv paub lawm, lawv yuav tsis muab tus Tswv uas muaj tshwjchim ci ntsa iab ntsia rau saum tus ntoo khaublig li. Tiamsis muaj lus sau tseg rau hauv Vajtswv txojlus hais tias, “Tej uas qhovmuag tsis tau pom lossis qhovntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm.” Tiamsis Vajtswv txib Vaj Ntsujplig los qhia zaj no rau peb paub; rau qhov Vaj Ntsujplig yeej paub txhua yam uas Vajtswv xav huv tibsi. Neeg ib leeg yeej tsis paub ib leeg lub siab, tsuas yog nyias thiaj paub nyias lub siab xwb; ib yam nkaus li ntawd tsuas yog Vajtswv tus Ntsujplig thiaj paub Vajtswv lub siab xwb. Peb tsis cia siab rau neeg lub tswvyim; tiamsis peb cia siab rau Vaj Ntsujplig tus uas Vajtswv txib los, kom peb thiaj paub txhua yam uas Vajtswv pub rau peb. Yog li ntawd, thaum peb qhia Vajtswv zaj rau cov neeg uas muaj Vajtswv tus Ntsujplig lawm, peb hais tej lus uas Vajtswv tus Ntsujplig qhia rau peb xwb, peb tsis hais tej lus uas cov neeg txawj ntse qhia rau peb. Tus uas tsis muaj Vaj Ntsujplig, tus ntawd yeej tsis tau txais tej uas Vajtswv tus Ntsujplig pub, rau qhov lawv pom hais tias tej ntawd tsis muaj qabhau dabtsi, thiab lawv tsis totaub txog tej ntawd, rau qhov lawv tsis muaj Vaj Ntsujplig lawv thiaj tsis totaub tej ntawd. Tus uas muaj Vaj Ntsujplig, tus ntawd thiaj paub hais tias yam twg muaj nqis thiab yam twg tsis muaj nqis, tiamsis tsis muaj leejtwg paub tus ntawd lub siab. Raws li Vajtswv txojlus hais tias, “Leejtwg thiaj paub tus Tswv lub siab? Leejtwg thiaj qhia tau nws?” Tiamsis peb twb muaj lub siab ib yam li Yexus Khetos lub lawm thiab. Cov kwvtij, kuv tsis qhia nej li uas kuv qhia cov uas twb muaj Vaj Ntsujplig kav lawv lub siab lawm; kuv qhia nej ib yam li nej tseem yog neeg ntiajteb, thiab ib yam li nej yog menyuam mos, rau qhov nej tsis tau paub Yexus Khetos tseeb. Kuv muab mis rau nej noj xwb, kuv tsis muab mov thiab zaub rau nej noj, rau qhov nej tseem noj tsis tau taus zaub mov. Txawm yog nimno los nej tseem noj tsis tau taus thiab, rau qhov nej tseem ua nej lub neej zoo li neeg ntiajteb ua. Yog nej tseem muaj kev sib khib thiab ib leeg nrog ib leeg sib cav sib ceg, yog nej ua li ntawd yeej yog nej ua lub neej zoo li neeg ntiajteb ua, thiab nej tseem yog neeg ntiajteb. Thaum nej cov muaj ib tug hais tias, “Kuv yog Paulus pab”, thiab muaj dua lwm tus hais tias, “Kuv yog Apaulaus pab”, twb yog nej ua raws li neeg ntiajteb ua ntag los sav! Apaulaus yog leejtwg? Paulus yog leejtwg? Wb tsuas yog Vajtswv ob tug tubtxib uas coj nej los ntseeg xwb, tus Tswv faib rau wb nyias muaj nyias ib tes haujlwm ua. Kuv yog tus cog, Apaulaus yog tus ywg dej, tiamsis tus uas ua kom loj hlob yog Vajtswv. Tus uas cog thiab tus uas ywg dej yeej tsis tseemceeb dabtsi, tiamsis Vajtswv yog tus uas tseemceeb, rau qhov nws yog tus uas ua kom loj hlob. Tus uas cog thiab tus uas ywg dej, nkawd tes haujlwm zoo ib yam nkaus; Vajtswv yuav muab nqi zog rau nkawd raws li tes haujlwm uas nkawd ua. Rau qhov wb yog Vajtswv ob tug tubtxib thiab ua haujlwm ua ke; nej yog Vajtswv thaj teb. Thiab nej yog Vajtswv lub tsev. Vim txoj koob hmoov uas Vajtswv pub rau kuv, kuv thiaj zoo li tus kws uas ua tsev, kuv txhos ncej thiab puam qhab cia, lwm tus tuaj vov thiab tuaj xov rau. Tiamsis txhua tus nyias yuav tsum ua tib zoo ua nyias tes haujlwm. Rau qhov yeej tsis muaj leejtwg yuav muaj cuabkav tsa dua lwm lub tsev hloov lub uas Vajtswv twb tsa tau lawm, lub ntawd yog Yexus Khetos ntag. Muaj qee leej yuav muab kub, muab nyiaj, muab tej pobzeb muaj nqis, muab ntoo, muab nqeeb thiab muab quavnyab tuaj vov thiab tuaj xov lub tsev ntawd, Hnub uas Yexus rov qab los, nws yuav muab txhua tus tes haujlwm nthuav qhia rau sawvdaws pom, Hnub ntawd yuav tsis muab npog cia lawm, rau qhov Hnub ntawd yuav muab hluavtaws sim txhua tus tes haujlwm saib puas ruaj puas khov. Yog tej uas sawvdaws coj tuaj vov lossis xov lub tsev ntawd leejtwg li tsis kub hnyiab, tus ntawd thiaj tau nqi zog. Tiamsis yog leejtwg tes haujlwm kub hnyiab lawm, nws yuav tsis tau dabtsi; nws yuav dim, tiamsis nws tsuas dim ib yam li tus uas khiav dim hauv hluavtaws los xwb. Nej yeej paub hais tias nej lub cev yog Vajtswv lub tuamtsev, thiab Vajtswv tus Ntsujplig nyob hauv nej lub siab? Yog leejtwg rhuav Vajtswv lub tuamtsev, Vajtswv yuav rhuav tus ntawd kom puastsuaj thiab. Rau qhov Vajtswv lub tuamtsev yog lub uas dawbhuv, thiab nej yog Vajtswv lub tuamtsev ntag. Yus tsis txhob rov dag yus. Yog nej leejtwg xav hais tias nws yog tus txawj ntse, nws yuav tsum ua li tus ruam, nws thiaj yog tus ntse. Tej uas neeg ntiajteb suav hais tias yog kev txawj ntse, tej ntawd Vajtswv suav hais tias yog kev ruam. Raws li Vajtswv txojlus hais tias, “Vajtswv muab cov neeg txawj ntse lub tswvyim rov los ua nta npuj cuab lawv kev”; thiab Vajtswv txojlus muaj dua ib los hais tias, “Tus Tswv paub tej uas cov neeg txawj ntse xav, tej ntawd tsis tseemceeb dabtsi li.” Yog li ntawd, nej tsis txhob khav tej uas neeg ua tau. Rau qhov txhua yam puavleej yog nej tug, tsis hais Paulus, Apaulaus, Petus, lub ntiajteb, txojsia, kev tuag, tiam no lossis tiam tom ntej, tej no puavleej yog nej tug, nej yog Yexus Khetos tug, thiab Yexus Khetos yog Vajtswv tug. Tsimnyog nej hwm hais tias peb yog Yexus Khetos cov tubtxib, peb tuav Vajtswv txojlus tseemceeb uas yav tas los tsis muaj leejtwg paub. Ib qho ntxiv, tus uas luag tsa los ua tubtxib, tus ntawd yuav tsum ncaj ncees rau nws tus tswv. Tiamsis tej uas nej lossis lwm tus txiav txim rau kuv, kuv pom hais tias tej ntawd tsis ua li cas rau kuv. Txawm yog kuv los kuv tsis txiav txim rau kuv. Kuv lub siab qhia rau kuv hais tias kuv yeej tsis tau ua txhaum, kuv hais li ntawd tsis yog kuv hais tias kuv tsis muaj txim. Tus Tswv yog tus uas yuav txiav txim rau kuv. Yog li ntawd, thaum tseem tsis tau txog lub sijhawm uas Vajtswv teem cia, nej tsis txhob txiav txim rau leejtwg. Tos txog Hnub uas tus Tswv los txiav txim thaum kawg; nws yuav muab tej uas neeg ua nyob hauv qhov tsaus ntuj los nthuav rau ntawm qhov pom kev thiab muab tej uas neeg lub siab xav nraim nkoos qhia rau sawvdaws paub. Thiab Vajtswv yuav qhuas txhua tus uas tsimnyog Vajtswv qhuas. Cov kwvtij, qhov uas kuv muab Apaulaus thiab kuv zaj coj los piav rau nej, twb yog kuv xav kom nej xyaum ua li wb tus yam ntxwv, nej thiaj paub qhov uas hais tias, “Tsis txhob ua dhau Vajtswv txojlus.” Tsis tsimnyog nej qhuas tus no thiab thuam tus tod. Leejtwg tsa nej lub neej zoo dua lwm tus lub? Txhua yam uas nej muaj puavleej yog Vajtswv pub rau nej los sav! Ua li cas nej tseem khav hais tias yog nej khwv tau? Nej twb muaj txhua yam uas nej xav tau lawm los? Nej twb npluanuj lawm los? Nej twb tau ua vajntxwv lawm los, ua li cas peb ho tsis tau ua vajntxwv? Kuv xav kom nej tau ua vajntxwv, peb thiaj li tau nrog nej ua vajntxwv thiab. Kuv xav hais tias Vajtswv muab peb cov uas yog timthawj tso tuaj tom tw, ib yam li cov neeg uas raug txim uas luag coj mus tua, rau qhov peb zoo li tus uas ua yeebyam rau lub ntiajteb no rau cov timtswv thiab rau neeg ntiajteb saib. Twb yog vim peb ua Yexus Khetos tes haujlwm, sawvdaws thiaj hais tias peb yog neeg ruam, tiamsis nej yog neeg ntse, nej thiaj ntseeg Yexus Khetos. Peb qaug zog, tiamsis nej muaj zog kawg li. Luag hwm nej, tiamsis luag thuam peb kawg li. Txawm yog niaj hnub no los peb tseem tshaib nqhis kawg li; peb tsis muaj ris tsho zoo nrog luag hnav; peb raug luag ntaus; peb tsis muaj tsev nrog luag nyob; peb ua haujlwm khwv heev peb thiaj tau noj tau haus. Thaum luag foom tsis zoo rau peb, peb thov Vajtswv foom koob hmoov rau luag; thaum luag tsimtxom peb, peb ua siab ntev nyiaj; thaum luag thuam peb, peb ua tib zoo hais luag. Peb zoo li tej khoom liamsim uas neeg ntiajteb muab povtseg, peb zoo li tej yam qias qias rau neeg ntiajteb los txog niaj hnub no. Kuv sau tsab ntawv no tuaj rau nej tsis yog kuv xav kom nej txajmuag, tiamsis kuv sau tuaj ntuas nej ib yam li kuv ntuas cov menyuam uas kuv hlub. Txawm yog nej yuav muaj kaum txhiab leej qhia Yexus Khetos zaj rau nej los nej tsuas muaj tib leeg txiv xwb. Kuv yog nej txiv, rau qhov kuv coj txojmoo zoo tuaj qhia rau nej thiab coj nej los ntseeg Yexus Khetos. Yog li ntawd, kuv thov nej ua nej lub neej raws li kuv tus yam ntxwv. Twb yog vim li no kuv thiaj txib Timautes tus uas kuv hlub, thiab yog ib tug tub uas ua lub neej ncaj ncees rau tus Tswv tuaj qhia nej, kom nej nco txog qhov uas kuv nrog Yexus Khetos koom ib txojsia thiab tej uas kuv qhia rau cov ntseeg uas nyob txhua qhov chaw. Nej cov muaj qee leej khavtheeb, rau qhov nej xav hais tias kuv yuav tsis tuaj xyuas nej lawm. Yog tus Tswv pom zoo tsis ntev no kuv yuav tuaj xyuas nej. Kuv xav tuaj xyuas nej saib cov neeg uas khav khav ntawd lawv ho ua tau lawv tej haujlwm zoo npaum li cas diam. Rau qhov Vajtswv lub tebchaws tsis yog neeg lub ncauj hais xwb, tiamsis yog tes haujlwm uas lawv ua. Nej nyiam li cas? Cia kuv nqa nplawm tuaj lossis cia kuv tuaj hlub thiab ua tib zoo qhia nej? Kuv hnov xov hais tias nej cov muaj qee leej ua txhaum kev nkauj kev nraug loj heev, txawm yog cov tsis ntseeg los lawv twb tsis ua txhaum loj npaum li ntawd; muaj neeg tuaj qhia rau kuv hais tias muaj ib tug tub cia li yuav nws niam tshiab los ua pojniam. Nej tseem muaj plhus khav thiab los? Twb tsimnyog nej nyuaj siab, thiab muab tus uas ua txhaum ntawd rho tawm hauv nej cov mus. Txawm yog kuv nyob deb nej los kuv lub siab nrog nraim nej nyob; yog kuv nrog nej nyob, ntshai kuv twb tuav peb tus Tswv Yexus lub npe rau txim rau tus uas ua txhaum ntawd lawm. Thaum nej tuaj sablaj ua ke, kuv lub siab yeej nrog nej thiab peb tus Tswv Yexus lub hwjchim yeej nrog nraim peb. Nej cia li muab tus ntawd cob rau dab Ntxwgnyoog ua kom nws lub cev puastsuaj mus, yog nej ua li ntawd, thaum txog Hnub uas tus Tswv los tus ntawd tus ntsujplig thiaj yuav dim. Tsis tsimnyog nej yuav khavtheeb hlo li! Nej twb paub lo lus uas hais tias, “Ib qhov keeb me me xwb ua rau lub ncuav su tuaj.” Nej yuav tsum muab tej keeb qub uas yog txojkev txhaum tso povtseg, nej thiaj yuav ua tau neeg dawbhuv. Yog nej ua li ntawd, nej thiaj yuav zoo li lub ncuav tshiab uas tsis xyaw keeb; kuv paub hais tias tsis muaj keeb nyob hauv nej lawm. Rau qhov Yexus Khetos uas yog tus menyuam yaj uas luag muab tua ua kevcai Hla Dhau, nws twb tuag theej peb lub txhoj lawm. Yog li ntawd, peb cia li ua kevcai Hla Dhau, peb tsis txhob muab cov qub keeb uas yog kev txhaum thiab kev phem kev qias los ua, tiamsis muab cov ncuav tsis xyaw keeb uas yog txojkev ncaj ncees thiab kev tseeb los ua xwb. Kuv twb sau ntawv tuaj qhia rau nej lawm hais tias, nej tsis txhob mus koom nrog cov neeg uas nyiam ua kev nkauj kev nraug hlo li. Qhov uas kuv hais li ntawd, tsis yog kuv hais txog tej neeg ntiajteb uas nyiam ua kev nkauj kev nraug lossis cov neeg uas ntshaw luag tug lossis cov neeg uas ua tubsab, lossis cov neeg uas pe mlom. Yog nej tsis nrog cov neeg ntawd nyob, ces nej yuav tsum tawm hauv lub ntiajteb no mus. Tiamsis qhov uas kuv sau tsab ntawv no tuaj rau nej, yog qhia kom nej tsis txhob mus koom nrog tus neeg uas nws ua txuj hais tias nws yog tus ntseeg, tiamsis nws tseem nyiam ua kev nkauj kev nraug, ntshaw luag tug, pe mlom, thuam lwm tus, quav cawv thiab ua tubsab. Txawm yog noj mov los nej tsis txhob nrog tus neeg uas zoo li ntawd koom tsum. Dua li ntawd, kuv tsis yog tus uas yuav txiav txim rau cov neeg uas tsis ntseeg. Tiamsis nej yog cov uas yuav txiav txim rau cov ntseeg. Vajtswv yog tus uas yuav txiav txim rau cov uas tsis ntseeg. Rau qhov Vajtswv txojlus hais tias, “Cia li muab tus uas ua phem ntawd ntiab tawm hauv nej cov mus.” Thaum nej cov ntseeg ib leeg ua plaub rau ib leeg, nej tseem coj mus rau cov tsis ntseeg nrog nej hais thiab los? Twb tsimnyog nej cia rau cov ntseeg nrog nej hais xwb los sav! Nej puas paub hais tias cov ntseeg yuav ua cov txiav txim rau neeg ntiajteb? Yog nej twb yuav txiav txim rau neeg ntiajteb, nej txawm yuav tsis muaj cuabkav hais tej nyuag plaub me me no thiab los? Nej tsis paub hais tias, peb twb yog cov uas yuav txiav txim rau cov timtswv no los? Yog li ntawd, tsimnyog peb hais tau tej nyuag plaub ntug uas niaj hnub muaj no thiab! Thaum nej muaj plaub ntug, nej yuav coj mus rau cov tsis ntseeg hais los? Kuv hais li no kom nej paub txajmuag. Nej cov yeej muaj tus txawj ntse uas yuav hais tau tej plaub ntug uas cov ntseeg ib leeg ua rau ib leeg, tiamsis cov ntseeg ib leeg tseem kom ib leeg mus rau hauv tsev tu plaub thiab cia cov tsis ntseeg hais. Qhov uas nej ib leeg kom ib leeg ntawd qhia rau sawvdaws paub hais tias, nej yeej tsis muab siab npuab Vajtswv. Ua li cas nej tsis ua tus swb? Ua li cas nej tsis cia luag ntxo nej zoo dua? Tiamsis nej ho tsis ua li ntawd, txawm yog nej yog tib cov ntseeg xwb los nej ib leeg tseem ua phem rau ib leeg, thiab ib leeg ntxo ib leeg. Nej tsis paub hais tias, cov neeg uas ua phem ua qias yuav tsis muaj feem mus nyob Vajtswv lub Tebchaws no los? Nej tsis txhob rov dag nej; cov neeg uas nyiam ua kev nkauj kev nraug, pe mlom, deev luag pojniam luag txiv, txivneej deev txivneej, pojniam deev pojniam, ua tubsab, ntshaw luag tug, quav cawv, thuam lwm tus thiab txhav luag tug. Cov neeg ntawd yuav tsis muaj feem mus nyob Vajtswv lub Tebchaws li. Yav tas los nej cov muaj qee leej ua ib yam nkaus li ntawd, tiamsis nimno Yexus Khetos twb ntxuav nej lub txim thiab muab nej pub rau Vajtswv lawm. Peb tus Tswv Yexus Khetos thiab Vajtswv tus Ntsujplig twb coj nej los nrog Vajtswv sib raug zoo lawm. Muaj qee leej yuav hais tias, “Kuv muaj cuabkav ua txhua yam tsis muaj leejtwg txwv tau kuv.” Tiamsis tsis yog txhua yam ntawd yuav muaj nqis rau koj huv tibsi. Kuv los muaj cuabkav hais tias, “Kuv ua tau txhua yam tsis muaj leejtwg txwv tau kuv, tiamsis kuv yuav tsis cia tej uas kuv ua ntawd yuam tau kuv ua tej ntawd qhev.” Lwm tus ho yuav hais tias, “Zaub mov yog npaj los rau lub plab, thiab lub plab yog npaj los ntim zaub mov.” Yeej yog li ntawd tiag, tiamsis Vajtswv yuav ua kom ob yam ntawd puastsuaj tas huv tibsi. Tus Tswv tsis tsim lub cev cia ua kev nkauj kev nraug, tiamsis yog tsim los cia pehawm tus Tswv. Vajtswv twb tsa tus Tswv sawv hauv qhov tuag rov qab los lawm, Vajtswv lub hwjchim yuav tsa peb txhua tus sawv rov qab los ib yam nkaus thiab. Nej yeej paub lawm hais tais nej lub cev yog Yexus Khetos tej tes taw. Kuv yuav muab Yexus Khetos tej tes taw mus ua niamntiav tej tes taw tsis tau li. Nej tsis paub hais tias tus neeg uas mus deev niamntiav, tus ntawd yeej nrog niamntiav koom ua ib lub cev lawm no los? Vajtswv txojlus hais tias, “Nkawd yuav koom ua ib lub cev.” Tiamsis tus uas nrog tus Tswv sib raug zoo, tus ntawd yeej nrog tus Tswv koom ib txojsia. Nej tsis txhob ua kev nkauj kev nraug. Tej kev txhaum uas neeg niaj hnub ua yeej tsis ua rau neeg lub cev qias, tiamsis tus uas ua kev nkauj kev nraug, tus ntawd ua rau nws lub cev qias. Nej tsis paub hais tias nej lub cev yog Vaj Ntsujplig tus Dawbhuv uas Vajtswv muab pub rau nej lub tuamtsev no los? Nws nyob hauv nej lub siab, nej tsis yog tus tswv uas kav nej lub cev, tiamsis Vajtswv yog tus tswv uas kav nej lub cev; Vajtswv twb txhiv nej kim kawg li los lawm. Yog li ntawd, nej yuav tsum cia nej lub cev ua rau Vajtswv tau ntsejmuag. Tej lus uas nej sau ntawv tuaj nug kuv ntawd nimno kuv teb rau nej hais tias, “Tus txivneej twg tsis yuav pojniam los yeej zoo.” Tiamsis vim muaj neeg ua kev nkauj kev nraug ntau heev, yog li ntawd tsimnyog txhua tus txivneej nyias muaj nyias ib tug pojniam, thiab txhua tus pojniam nyias muaj nyias ib tug txiv. Tus txiv yuav tsum tsis txhob cais nws tus pojniam, thiab tus pojniam los tsis txhob cais nws tus txiv, nkawd ib leeg yuav tsum txaus siab rau ib leeg. Tus pojniam tsis muaj cai kav nws lub cev, tiamsis tus txiv muaj cai kav tus pojniam; tus txiv los ib yam nkaus li ntawd, nws tsis muaj cai kav nws lub cev, tiamsis tus pojniam muaj cai kav tus txiv. Neb ob niamtxiv tsis txhob sib cais chaw pw, yog nej yuav cais, neb yuav tsum sib hais kom haum tso mam li cais hmo puav thiaj muaj sijhawm thov Vajtswv; tiamsis tom qab ntawd neb yuav tsum rov los pw ua ke. Yog neb tsis ua li ntawd nyob tsam neb tswj tsis tau neb lub siab, ces dab Ntxwgnyoog yuav ntxias tau neb ua txhaum. Kuv hais li no tsis yog kuv tsis pub nej sib yuav, kuv yeej pub nej sib yuav. Qhov tseemceeb, kuv xav kom nej ua lub neej ib yam li kuv; tiamsis Vajtswv pub nyias muaj nyias siab, ib leeg nyiam lawm ib yam. Nimno, kuv hais rau nej cov uas tseem tsis tau sib yuav thiab cov pojntsuam hais tias, yog nej nyob ib yam li kuv tsis txhob sib yuav ntshai yuav zoo dua. Tiamsis yog nej tswj tsis tau nej lub siab nej cia li sib yuav, yog nej sib yuav kuj yuav zoo dua qhov uas nej lub siab pheej ntshaw. Kuv hais ib los rau nej cov uas twb sib yuav lawm, tus pojniam yuav tsum tsis txhob tso nws tus txiv tseg, tej lus no tsis yog kuv hais tiamsis yog tus Tswv hais; yog nws muab nws tus txiv tso tseg, nws tsis txhob mus yuav dua txiv tshiab, tiamsis yog nws xav yuav txiv, nws cia li rov qab los yuav tus txiv qub xwb; thiab tus txiv tsis txhob muab nws tus pojniam nrauj. Kuv hais dua ib los ntxiv rau lwm tus (lo lus no yog kuv hais, tsis yog tus Tswv hais): Yog ib tug ntseeg twg nws tus pojniam tsis ntseeg, tiamsis tus pojniam ntawd zoo siab mus nrog tus txiv nyob, tus txiv tsis txhob muab tus pojniam ntawd nrauj. Thiab ib tug pojniam twg uas yog tus ntseeg yuav tus txiv uas tsis ntseeg, tiamsis tus txiv uas tsis ntseeg zoo siab nrog tus pojniam nyob, tus pojniam tsis txhob muab tus txiv ntawd nrauj. Yog tus niam ntseeg Vajtswv lawm, tus txiv yeej yog Vajtswv tug thiab. Yog tus txiv ntseeg Vajtswv lawm, tus niam yeej yog Vajtswv tug ib yam nkaus. Yog tsis yog li ntawd, nkawd cov menyuam yeej yuav zoo ib yam li cov tsis ntseeg tej menyuam, tiamsis tsis yog li ntawd nkawd cov menyuam yeej yog Vajtswv cov menyuam. Tiamsis yog hais tias tus uas tsis ntseeg xav tso tus ntseeg tseg los tso tau. Hais txog qhov no, cov ntseeg tsis hais tus txiv lossis tus pojniam muaj cai tso tseg tau. Rau qhov Vajtswv yeej hu nej kom los nyob sib haumxeeb. Tus pojniam uas ntseeg, koj puas paub hais tias koj yuav coj tau koj tus txiv los ntseeg. Lossis tus txiv uas ntseeg, koj puas paub hais tias koj yuav coj tau koj tus pojniam los ntseeg. Txhua tus nyias yuav tsum ua nyias lub neej raws li tus Tswv twb pub rau nws lawm, thiab ua raws li thaum Vajtswv hu nws los. Kuv yeej qhia txoj kevcai no rau txhua pawg ntseeg. Yog leejtwg ua kevcai txiav ua ntej uas Vajtswv hu nws, nws tsis txhob rhuav qhov uas nws ua kevcai txiav ntawd; yog Vajtswv hu tus uas tsis tau ua kevcai txiav los ntseeg, tsis tas nws yuav ua kevcai txiav lawm. Qhov uas neeg ua kevcai txiav thiab tsis ua, yeej tsis tseemceeb; qhov tseemceeb yog qhov uas mloog Vajtswv lus. Txhua tus nyias yuav tsum ua nyias lub neej raws li thaum Vajtswv hu nws los ntseeg. Thaum Vajtswv hu koj los ntseeg koj tseem ua qhev los? Koj tsis txhob nyuaj siab. Yog koj muaj kev tawm tau los nyob ywjpheej koj cia li tawm. Tus uas tus Tswv hu thaum nws tseem ua qhev, tus ntawd tus Tswv twb tso nws dim lawm; ib yam nkaus li ntawd, tus uas tsis ua qhev thaum Yexus Khetos hu nws los, nws yog Yexus Khetos tus qhev. Vajtswv twb txhiv nej kim kawg li los lawm; yog li ntawd nej tsis txhob cia neeg ntxias tau nej mus ua qhev. Cov kwvtij, nej yuav tsum nrog Vajtswv sib raug zoo ib yam li thaum uas Vajtswv nyuam qhuav hu nej los ntseeg. Nimno, kuv yuav hais txog cov neeg uas tseem tsis tau sib yuav; tej lus uas kuv hais no tus Tswv tsis tau kom kuv hais, tiamsis kuv hais raws li kuv pom zoo. Kuv tej lus sawvdaws yeej cia siab tau, rau qhov sawvdaws yeej paub hais tias tus Tswv foom koob hmoov rau kuv. Rau qhov kuv pom hais tias niaj hnub no sawvdaws muaj kev ntxhov siab heev, yog li ntawd kuv thiaj xav hais tias kom txhua tus txivneej nyias nyob nyias li ntawd ntshai yuav zoo dua. Koj puas tau muaj pojniam? Yog koj yuav lawm, tsis txhob muab tso tseg. Yog koj tsis tau yuav pojniam, koj tsis txhob yuav. Tiamsis yog koj yuav pojniam lawm los yeej tsis txhaum; thiab yog tus hluas nkauj uas tsis tau yuav txiv, nws yuav txiv los yeej tsis txhaum. Tiamsis kuv tsis xav kom nej muaj kev nyuaj siab li cov uas twb sib yuav lawm niaj hnub nyuaj siab. Cov kwvtij, qhov uas kuv hais yog li no: vim peb lub sijhawm twb dhau zuj zus lawm, txij no mus cov uas twb yuav pojniam lawm, cia li ua ib yam li cov uas tsis tau yuav; cov uas quaj ntsuag, cia li ua li uas tsis muaj kev quaj ntsuag; cov uas muaj kev zoo siab, cia li ua li uas tsis muaj kev zoo siab; cov uas yuav tau qhov txhia chaw, cia li ua li uas tsis tau dabtsi; tus uas siv qhov txhia chaw uas nyob hauv lub ntiajteb no, nws tsis txhob suav hais tias tej ntawd yog tej uas tseemceeb. Rau qhov lub ntiajteb no tabtom ploj mus lawm. Kuv tsis xav cia nej muaj kev nyuaj siab. Tus uas tsis yuav pojniam, nws muab siab rau ua tus Tswv tes haujlwm, rau qhov nws xav ua raws li tus Tswv lub siab nyiam. Tiamsis tus uas muaj pojniam lawm, nws rau siab ntso khwv noj khwv haus hauv lub ntiajteb no, nws ua li ntawd kom nws tus pojniam zoo siab rau nws; yog li ntawd tus txiv thiaj muaj ob txog haujlwm. Tus pojniam uas tsis tau yuav txiv lossis tus nkaujxwb, nws muab siab rau ua tus Tswv tes haujlwm, vim nws xav muab nws lub cev thiab lub siab fij rau tus Tswv; tiamsis tus pojniam uas yuav txiv lawm, nws rau siab ntso khwv noj khwv haus hauv lub ntiajteb no, rau qhov nws xav kom nws tus txiv zoo siab rau nws. Kuv hais li no tsis yog kuv txwv nej, tiamsis yog kuv xav pab nej. Kuv xav kom nej ua tej yam uas tsimnyog ua, thiab muab siab rau ua tus Tswv tes haujlwm tsis txhob ua neeg ywjfab ywjfwj. Yog tus tub thiab tus ntxhais twg uas twb sib qhaib lawm, tiamsis yog tus tub tswj tsis tau nws lub siab, thiab xav hais tias nkawd yuav tsum sib yuav xwb, ces tso nkawd sib yuav los tau. Qhov ntawd yeej tsis txhaum li. Tiamsis yog nws ua tau ib siab hais tias nws yuav tsis yuav pojniam ib simneej li, yog nws tswj tau nws lub siab thiab ua tau raws li nws xav, yog li ntawd nws tsis yuav tus hluas nkauj los hajyam zoo. Tus uas yuav tus ntxhais uas nws qhaib lawm, nws ua tau zoo tiamsis tus uas tsis yuav pojniam tseem hajyam ua tau zoo dua thiab. Tus pojniam uas muaj txiv, yog tus txiv tseem ua neej nyob nws yuav tsum nrog tus txiv nyob mus li; tiamsis yog nws tus txiv tuag lawm, nws yuav dua txiv tshiab los tau, tiamsis yuav tus uas ntseeg Vajtswv xwb. Kuv xav hais tias yog nws nyob taus li ntawd mus yuav muaj kev kaj siab dua. Tej lus uas kuv hais no yog Vajtswv tus Ntsujplig qhia kuv hais. Nimno kuv yuav hais txog tej zaub mov uas luag muab fij rau dab rau mlom: Peb yeej paub tej lus uas hais tias, “Peb txhua tus puavleej muaj kev txawj ntse,” txawm li ntawd los tej kev txawj ntse yeej ua rau neeg muaj kev khavtheeb xwb; tiamsis kev hlub thiaj ua rau neeg muaj kev vammeej. Tus uas xav hais tias nws twb paub ntau yam lawm, tus ntawd yeej tsis tau paub yam uas tseemceeb li. Tiamsis Vajtswv yeej paub txhua tus uas hlub Vajtswv. Kuv hais txog qhov uas noj tej zaub mov uas luag muab fij rau dab rau mlom lawm: Peb yeej paub hais tias, “neeg ntiajteb tej mlom tsis muaj ib tug muaj sia li,” thiab peb paub hais tias, “tsuas muaj tib tug Vajtswv xwb, yeej tsis muaj dua lwm tus li lawm.” Txawm yog neeg hu ntau tus ua “vajtswv” tsis hais nyob saum ntuj lossis nyob hauv ntiajteb no, yeej muaj ntau tus “vajtswv” thiab ntau tus “tswv”, tiamsis peb tsuas muaj tib tug Vajtswv xwb, nws yog Leej Txiv tus uas Tsim ib puas tsav yam thiab yog tus uas tuav peb txojsia; tsuas yog muaj tib tug Tswv xwb, nws yog Yexus Khetos, nws tsim ib puas tsav yam thiab nws tuav peb txojsia. Tiamsis cov uas ntseeg muaj ibtxhia tseem tsis tau paub tej no, lawv yog cov uas ibtxwm teev mlom los lawm. Yog li ntawd thaum lawv noj zaub noj mov, lawv tseem pheej xav hais tias, tej ntawd yog tej uas luag muab fij rau dab rau mlom lawm. Lawv paub tej ntawd tsis tshua tseeb, lawv thiaj xav hais tias yog lawv noj ntshai nyob tsam lawv ua txhaum. Tej zaub mov ntawd yeej pab tsis tau kom peb nrog Vajtswv sib raug zoo; txawm yog peb tsis tau noj los peb yeej tsis yuag, thiab yog peb noj los peb yeej tsis rog. Tiamsis nej yuav tsum ceevfaj, tsis txhob cia nej cov uas muaj cuabkav noj tau tej zaub mov ntawd ua rau cov neeg uas tsis tshua paub Vajtswv yuam kev ua txhaum. Nyob tsam muaj ib tug uas tsis tshua paub Vajtswv, tuaj pom nej cov uas yog cov paub, tabtom noj mov hauv tsev teev dab teev mlom, nws yuav cia li mus noj tej zaub mov uas muab fij rau tej dab tej mlom ntawd thiab. Twb yog vim nej yog cov paub, nej thiaj ua rau nej cov kwvtij uas tsis tshua paub Vajtswv uas Yexus Khetos twb tuag theej lawv lub txhoj lawm raug kev puastsuaj. Qhov uas nej ua li ntawd, twb yog nej ua txhaum Yexus Khetos ntag, rau qhov nej ua rau tus ntseeg uas tsis tshua paub Vajtswv xav yuam kev. Yog tej zaub mov uas kuv noj ua rau lawv ua txhaum, kuv yuav tsis noj nqaij ntxiv lawm, kuv thiaj tsis ua rau leejtwg yuam kev ua txhaum. Kuv tsis muaj cai los? Kuv tsis yog timthawj los? Kuv tsis tau pom Yexus uas yog peb tus Tswv los? Qhov ua nej tau los ntseeg tus Tswv, twb yog vim kuv qhia nej ntag. Txawm yog lwm tus tsis lees hais tias, kuv yog ib tug timthawj los tsimnyog nej lees kuv! Qhov uas nej nrog tus Tswv koom ib txojsia, qhov ntawd ua timkhawv hais tias kuv yog ib tug timthawj tiag. Thaum muaj neeg thuam kuv, kuv hais daws kuv zaj li no: Kuv txawm tsis muaj cai noj thiab haus vim tes haujlwm uas kuv ua li los? Petus thiab txhua tus timthawj, lawv puavleej muaj cuabkav coj pojniam menyuam nrog lawv mus rau ub rau no. Kuv yeej yog ib tug tubtxib thiab, kuv txawm tsis muaj cai li lawv los? Tsuas yog Npananpas thiab kuv wb thiaj yuav tsum nrhiav rau wb noj wb haus xwb los? Tus uas mus ua tubrog nws tseem nrhiav rau nws noj nws haus thiab los? Tus uas cog txiv hmab, nws txawm tsis de nws cov txiv hmab noj los? Tus uas yug yaj nws txawm tsis tso nws cov yaj tej kua mis haus los? Puas yog kuv hais raws li neeg ibtxwm hais? Puas yog Vajtswv txoj kevcai hais ib yam li no thiab? Muaj lus sau tseg rau hauv Mauxes txoj Kevcai lawm hais tias, “Thaum nej tabtom muab nyuj tsuj nplej, nej tsis txhob muab hnab looj nyuj qhovncauj.” Puas yog Vajtswv txhawj nyob tsam nyuj tsis tau noj? Vajtswv hais li ntawd tsis yog Vajtswv hais txog peb los? twb yog Vajtswv hais txog peb ntag. Tus uas laij teb thiab tus uas ntaus nplej, nkawd yeej cia siab hais tias nkawd yuav tau qoobloo sib npaug. Yog peb twb tseb Vajtswv txojlus rau hauv nej lub siab lawm, yog li ntawd peb sau nej tej zaub tej mov los yug peb, nej tseem hais tias peb sau ntau dhau lawm los? Yog lwm tus twb muaj cai kom nej yug lawv, yog li ntawd, peb hajyam muaj cai kom nej yug peb thiab? Txawm yog li los peb yeej txhob txwm tsis sau nej tug. Peb ua siab ntev nyiaj txhua yam kev txomnyem thiaj yuav tsis muaj ib yam dabtsi tabkaum Txojmoo Zoo uas hais txog Yexus Khetos zaj. Nej yeej paub hais tias cov uas ua haujlwm hauv lub Tuamtsev, lawv yeej tau tej zaub mov hauv lub Tuamtsev noj, thiab cov uas hlawv khoom fij ntawm lub thaj, lawv yeej tau tej ntawd noj. Ib yam nkaus li ntawd, tus Tswv qhia hais tias tsimnyog cov neeg uas ntseeg txojmoo zoo yuav tsum yug cov uas tuaj qhia txojmoo zoo. Tiamsis kuv yeej ibtxwm tsis sau nej tug. Txawm yog kuv sau tsab ntawv no tuaj rau nej los kuv tsis tau kom nej yug kuv. Yog kuv yuav thov nej yug kuv yeem cia kuv tuag zoo dua. Yeej tsis muaj leejtwg yuav muaj cuabkav thuam tej lus uas kuv khav hais tias kuv tsis thov nej yug kuv. Kuv yog tus qhia txojmoo zoo los kuv yeej tsis muaj cai khav hlo li. Rau qhov Vajtswv kom kuv qhia. Yog kuv tsis qhia txojmoo zoo kuv yeej yuav raug kev puastsuaj. Yog kuv yeem ua tes haujlwm ntawd, kuv yeej yuav tau nqi zog. Txawm yog kuv tsis yeem ua los tes haujlwm ntawd yeej yog kuv tes. Yog li ntawd kuv tau nqi zog dabtsi? Kuv tej nqi zog yog qhov uas kuv qhia txojmoo zoo, kuv tsis thov leejtwg ib yam dabtsi li. Thaum kuv mus qhia txojmoo zoo, kuv yeej muaj cai thov sawvdaws yug kuv tiamsis kuv tsis thov. Kuv yeej tsis ua leejtwg qhev; tiamsis kuv zoo siab ua sawvdaws qhev, kuv thiaj yuav coj tau neeg coob leej los ntseeg Yexus Khetos. Thaum kuv nrog cov neeg Yudais nyob ua ke, kuv ua ib yam li lawv, rau qhov kuv xav coj lawv los ntseeg. Txawm yog Mauxes txoj kevcai tsis muaj cuabkav yuam kuv lawm los thaum kuv nrog cov neeg uas xyaum coj Mauxes txoj kevcai nyob ua ke, kuv ua ib yam li lawv, rau qhov kuv xav coj lawv los ntseeg. Thaum kuv nrog lwm Haivneeg nyob ua ke, kuv ua ib yam li tus uas tsis coj cov Yudais txoj kevcai, rau qhov kuv xav coj lwm Haivneeg los ntseeg. Kuv hais li no, tsis yog kuv hais tias kuv tsis coj Vajtswv txoj kevcai, tiamsis qhov tseemceeb kuv yeej coj Yexus Khetos txoj kevcai. Thaum kuv nrog cov neeg uas tsis tshua paub Vajtswv pestsawg nyob ua ke, kuv ua ib yam li lawv, kuv thiaj coj tau lawv los ntseeg. Kuv xyaum ua li txhua haivneeg ua. Kuv ua li ntawd saib puas yuav pab tau qee leej rov los ua neeg tshiab. Kuv ua txhua yam no kom txojmoo zoo nrov ncha mus thoob txhua qhov, kuv thiaj tau koob hmoov. Nej yeej paub hais tias cov neeg uas sib tw khiav yeej tib txhij khiav, tiamsis tsuas muaj tib tug thiaj khiav yeej thiab tau nqi zog xwb. Nej cia li khiav tiag kom yeej, nej thiaj tau nqi zog. Txhua tus uas sib tw khiav, nws niaj hnub xyaum khiav raws li txoj kevcai, nws ua li ntawd los nws tsuas tau lub kausmom uas nyob tsis ntev xwb; tiamsis peb sib tw khiav kom peb tau lub kausmom uas nyob mus ibtxhis. Twb yog vim li no kuv thiaj khiav ncaj nraim mus kom txog tus ciam tom kawg; twb yog vim li no kuv thiaj ua li tug uas txawj ntaus nrig uas nws tsis lam ntau qhuav xwb. Kuv niaj hnub tswj rawv kuv lub cev rau qhov kuv yeej yog tus uas qhia lwm tus. Yog kuv tsis tswj kuv lub cev ntshai nyob tsam kuv tsis tau nrog luag sib tw khiav. Cov kwvtij, kuv xav kom nej nco ntsoov hais tias thaum peb cov yawgkoob nrog Mauxes mus tom tiaj suabpuam, muaj ib tauv huab roos lawv thiab lawv puavleej hla dhau hiavtxwv Liab mus huv tibsi. Qhov uas lawv nyob hauv tauv huab thiab mus hauv hiavtxwv qhia hais tias lawv yog Mauxes cov thwjtim. Thiab lawv txhua tus puavleej tau noj cov mov uas Vajtswv pub saum ntuj los, thiab lawv puavleej tau haus cov dej uas Vajtswv kom txhawv hauv lub pobzeb los. Yexus Khetos yog lub pobzeb uas niaj hnub nrog lawv ua ke. Txawm yog li ntawd los muaj ntau leej ua tsis haum Vajtswv siab, Vajtswv thiaj ua rau lawv tuag pawglug tom tiaj suabpuam. Tej ntawd qhia rau peb kom peb tsis txhob muaj lub siab ntshaw yam uas phem ib yam li lawv cov ntawd ntshaw, lossis lawv cov ntawd muaj qee leej pe mlom, peb tsis txhob ua li lawv. Raws li Vajtswv txojlus hais tias, “Sawvdaws zaum noj zaum haus tas, sawvdaws sawv dhia seevcev.” Lawv cov ntawd muaj qee leej ua txhaum kev nkauj kev nraug, tib hnub xwb lawv tuag nees nkaum peb txhiab leej, peb tsis txhob ua txhaum kev nkauj kev nraug li lawv cov ntawd. Lawv cov ntawd muaj qee leej sim tus Tswv siab, nab thiaj tom lawv tuag pawglug, peb tsis txhob sim tus Tswv siab li lawv cov ntawd. Lawv cov ntawd muaj qee leej pheej yws yws, tus Timtswv uas yog txojkev tuag thiaj ua rau lawv puastsuaj tas lawm, peb yuav tsum tsis txhob yws li lawv cov ntawd. Tej xwm uas lawv raug ntawd twb yog luag qhia sawvdaws, thiab luag muab sau cia ntuas peb kom peb ceevfaj, rau qhov peb yog cov uas nyob tiam uas yuav kawg. Yog leejtwg xav hais tias nws twb sawv khov kho lawm, nws yuav tsum ceevfaj nyob tsam nws ntog. Tej kev sim siab uas nej raug yeej yog tej kev sim siab uas sawvdaws raug. Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiamsis thaum nej raug kev sim siab Vajtswv yuav pab kom nej ua taus lub siab ntev. Yog li ntawd cov phoojywg uas kuv hlub, nej tsis txhob mus nrog luag pe dab pe mlom. Kuv hais rau nej ib yam li hais rau cov neeg uas paub qabhau; nej cia li khaws kuv tej lus coj mus ua tib zoo xav. Peb ua Vajtswv tsaug rau qhov peb muaj lub khob koob hmoov no. Thaum peb haus cov cawv txiv hmab hauv lub khob no, twb yog peb qhia hais tias peb koom Yexus Khetos cov ntshav. Thaum peb muab lub ncuav los ntais noj twb yog peb qhia hais tias, peb koom Yexus Khetos lub cev. Tsuas muaj tib lub ncuav xwb, txawm yog peb muaj coob leej los peb sawvdaws koom ib lub cev, rau qhov peb noj tib lub ncuav xwb. Yog nej ua tib zoo saib cov Yixalayees; tus uas noj tej khoom fij saum lub thaj, tus ntawd yeej muaj feem koom nrog Vajtswv. Kuv hais li ntawd puas yog kuv hais tias tej zaub mov uas muab fij rau dab rau mlom thiab tej dab tej mlom ntawd muaj nqis heev? Tsis yog li ntawd, kuv hais tias tej uas cov neeg tsis paub Vajtswv nqa tuaj fij rau saum tej thaj, yog lawv fij rau dab xwb tsis yog fij rau Vajtswv. Kuv yeej tsis xav kom nej koom nrog dab hlo li. Nej haus tus Tswv lub khob thiab haus dab lub khob yeej tsis tau. Yog nej yuav noj tus Tswv rooj mov thiab noj dab rooj mov yeej tsis tau ib yam nkaus. Puas yog peb xav ua kom tus Tswv khib? Peb xav hais tias peb muaj hwjchim loj dua nws no los? Lawv hais tias, “Peb yeej muaj cai ua tau txhua yam.” Yeej muaj tseeb li ntawd tiag, tiamsis tsis yog txhua yam ntawd yuav zoo rau lawv huv tibsi. “Peb yeej muaj cai ua tau txhua yam.” Tiamsis tsis yog txhua yam ntawd yuav pab tau lawv huv tibsi. Yus tsis txhob xam pom yus zoo xwb, tiamsis yus yuav tsum xam pom lwm tus zoo thiab. Txhua yam nqaij uas luag muag hauv tej kiab tej khw nej noj tau huv tibsi, tsis txhob nug yog nej xav hais tias noj tau. Rau qhov Vajtswv txojlus hais tias, “Lub ntiajteb thiab ib puas tsav yam uas nyob hauv lub ntiajteb puavleej yog tus Tswv tug tagnrho.” Yog tus neeg uas tsis ntseeg hu nej mus noj mov, yog nej txaus siab mus thiab tsis xav li cas, nej cia li noj tej zaub mov uas luag twb npaj tos nej lawm tsis txhob nug li. Tiamsis yog muaj neeg qhia rau nej hais tias, “Tej zaub mov ntawd luag twb muab fij rau dab rau mlom lawm,” ces nej tsis txhob noj, nyob tsam tus uas qhia rau nej ntawd xav yuam kev, rau qhov nej muaj lub siab uas paub qhov phem qhov zoo; kuv hais li ntawd tsis yog kuv ntshai nyob tsam nej xav yuam kuv, tiamsis kuv ntshai nyob tsam nej ua rau tus uas qhia nej ntawd xav yuam kev. Tej zaum yuav muaj neeg tuaj hais rau kuv tias, “Txawm yog lwm tus yuav xav li cas los cia kuv noj. Yog kuv twb ua Vajtswv tsaug tas lawm kuv mam noj, leejtwg tseem yuav muaj cuabkav txwv tsis pub kuv noj tej uas kuv ua Vajtswv tsaug ntawd thiab?” Yog li ntawd, nej yuav noj yuav haus lossis yuav ua ib yam dabtsi, nej yuav tsum ua kom Vajtswv tau ntsejmuag. Nej tsis txhob ua ib yam dabtsi uas yuav ua rau cov neeg Yudais lossis lwm Haivneeg lossis cov ntseeg Vajtswv tu siab. Nej cia li ua nej lub neej ib yam li kuv ua kuv lub. Ua ib yam li kuv ua kom haum sawvdaws siab. Kuv tsis xav ua kom zoo rau kuv xwb, tiamsis kuv xav ua kom zoo rau sawvdaws huv tibsi, ua li ntawd lawv thiaj yuav dim lawv lub txim. Nej xyaum ua raws li kuv tus yam ntxwv, ib yam li kuv xyaum ua raws li Yexus Khetos tus yam ntxwv. Kuv qhuas nej rau qhov nej nco ntsoov kuv thiab ua raws li tej lus uas kuv tau qhia nej lawm. Tiamsis kuv xav kom nej totaub hais tias Yexus Khetos yog txhua tus txivneej lub taubhau, tus txiv yog tus pojniam lub taubhau, thiab Vajtswv yog Yexus Khetos lub taubhau. Tus txivneej uas ntoo phuam thov Vajtswv lossis qhia Vajtswv txojlus, tus ntawd saib tsis taus Yexus Khetos. Tus pojniam uas tsis ntoo phuam thov Vajtswv lossis qhia Vajtswv txojlus, tus ntawd saib tsis tau nws tus txiv. Nws zoo ib yam li tus pojniam uas muab plaubhau chais tas lawm. Tus pojniam uas tsis ntoo phuam, zoo dua li muab nws cov plaubhau txiav. Tus pojniam uas chais plaubhau lossis txiav plaubhau nws yuav poob ntsejmuag, yog li ntawd nws yuav tsum ntoo phuam. Tsis tas txivneej yuav ntoo phuam, rau qhov txivneej yog Vajtswv tus yam ntxwv thiab lub hwvxyeej. Tiamsis pojniam yog txivneej lub hwvxyeej; rau qhov Vajtswv tsis tau tsim txivneej los ntawm pojniam, tiamsis tsim pojniam los ntawm txivneej. Thiab tsis tau tsim txivneej rau pojniam, tiamsis tsim pojniam rau txivneej. Vim cov timtswv ceebtsheej niaj hnub saib sawvdaws, yog li ntawd tsimnyog tus pojniam yuav tsum ntoo phuam, sawvdaws thiaj paub hais tias nws hwm nws tus txiv. Txawm li ntawd los peb cov uas ntseeg tus Tswv, tsis hais txivneej lossis pojniam ib leeg yeej vam ib leeg. Rau qhov Vajtswv tsim pojniam los ntawm txivneej, txawm li ntawd los txhua tus txivneej yog pojniam yug; thiab ib puas tsav yam puavleej yog Vajtswv tsim huv tibsi. Nej sim ua tib zoo xav saib thaum sawvdaws tuaj pehawm Vajtswv, puas tsimnyog tus pojniam uas tsis ntoo phuam thov Vajtswv? Raws li ibtxwm, nej yeej paub hais tias tus txivneej uas tseg plaubhau ntev, nws yeej yuav poob ntsejmuag, tiamsis tus pojniam uas tseg plaubhau ntev nws yuav tau ntsejmuag, rau qhov nws cov plaubhau npog nws lub taubhau ib yam li nws ntoo phuam. Tiamsis yog leejtwg xav sib cav txog zaj no, kuv tsuas hais tias peb thiab cov ntseeg Vajtswv uas nyob txhua qhov yeej muaj tib txoj cai no xwb. Tej uas kuv yuav qhia nej no tsis yog kuv qhuas nej, rau qhov thaum nej tuaj sablaj ua ke tsis yog nej tuaj ua zoo, tiamsis yog nej tuaj ua phem xwb. Thawj qhov uas muaj neeg tuaj qhia rau kuv yog hais tias, thaum nej cov uas ntseeg tuaj sib sau ua ke, nej tawg ua pab ua pawg; zaj no kuv xav hais tias yeej muaj tseeb li ntawd tiag. (Ua li cas los nej yuav tsum tawg ua ob peb pab, kom sawvdaws thiaj paub hais tias pab twg yog pab uas ua zoo.) Thaum nej tuaj sablaj ua ke tsis yog nej tuaj noj tus Tswv Rooj Mov. Rau qhov thaum txog sijhawm noj, nej nyias taus nyias huas mus noj nyias li tsis tos lwm tus, yog li ntawd muaj qee leej tsis tau noj, tiamsis muaj qee leej twb noj tsau haus qaug lawm. Nej tsis muaj tsev nyob thiab tsis muaj noj tsis muaj haus los? Lossis nej txhob txwm ua saib tsis taus cov ntseeg Vajtswv thiab ua kom cov neeg txomnyem txajmuag los? Nej xav hais tias kuv yuav hais li cas rau nej los? Kuv yuav qhuas nej no los? Kuv yeej tsis qhuas nej hlo li. Tej lus uas kuv twb qhia rau nej lawm yeej yog tus Tswv tej lus: Hmo uas luag ntxeev siab rau tus Tswv Yexus, nws muab ib lub ncuav los, nws ua Vajtswv tsaug, nws muab lub ncuav ntawd ntais thiab nws hais tias, “Lub ncuav no yog kuv lub cev uas kuv muab rau nej. Nej ua li no nej thiaj yuav nco ntsoov kuv.” Thaum noj hmo tas nws muab ib lub khob los ua ib yam nkaus li ntawd, thiab nws hais tias, “Lub khob no yog Vajtswv tej lus cog tseg tshiab uas muaj kuv cov ntshav ua lub cim nias rau. Thaum nej haus lub khob no, nej thiaj yuav nco ntsoov kuv.” Rau qhov txhua zaus uas nej noj lub ncuav no thiab haus lub khob no, yog nej qhia tus Tswv txojkev tuag mus txog hnub uas tus Tswv rov qab los. Yog li ntawd, tus uas tsis hwm tus Tswv, nws cia li noj tus Tswv lub ncuav lossis haus tus Tswv lub khob, tus ntawd muaj txim, vim nws ua txhaum tus Tswv lub cev thiab tus Tswv cov ntshav. Yog li ntawd, txhua tus yuav tsum ua tib zoo xav tso mam li noj lub ncuav thiab haus lub khob. Rau qhov tus uas noj lub ncuav no thiab haus lub khob no, yog nws tsis ua tib zoo xav txog tus Tswv lub cev, yog nws rov ua rau nws raug txim, vim qhov uas nws noj thiab haus ntawd. Twb yog vim li ntawd nej cov thiaj muaj ntau leej muaj mob, thiab muaj qee leej tuag lawm. Yog peb xub ua tib zoo xav thoob thoob ua ntej, Vajtswv thiaj yuav tsis rau txim rau peb. Tiamsis thaum tus Tswv rau txim rau peb, twb yog nws qhuab ntuas peb kom peb thiaj tsis nrog neeg ntiajteb raug txim. Yog li ntawd cov kwvtij, thaum nej tuaj ua ke noj tus Tswv Rooj Mov, nej ib leeg yuav tsum tos ib leeg sawvdaws mam li tib txhij noj. Yog leejtwg tshaib, nws cia li noj mov tom tsev tso mam li tuaj, yog nej ua li ntawd thaum nej tuaj sablaj ua ke, Vajtswv thiaj yuav tsis rau txim rau nej. Tshuav ob peb yam uas kuv tsis tau teb nej, cia kuv tuaj tso kuv mam li qhia nej. Cov kwvtij, qhov uas nej sau ntawv tuaj rau kuv hais tias Vaj Ntsujplig tus Dawbhuv pub koob hmoov rau peb nyias muaj nyias tswvyim. Nimno kuv xav kom nej paub tseeb txog tej koob hmoov ntawd. Nej twb paub lawm hais tias thaum nej tseem tsis tau ntseeg, nej raug luag ntxias mus pe tej mlom uas tsis muaj sia. Kuv xav kom nej paub hais tias tus uas muaj Vajtswv tus Ntsujplig nyob hauv nws lub siab, tus ntawd tsis foom Yexus ib zaug li. Thiab tsis muaj leejtwg yuav kam lees hais tias, Yexus yog tus Tswv, tsuas yog tus uas muaj Vajtswv tus Ntsujplig nyob hauv nws lub siab thiaj li kam lees xwb. Vaj Ntsujplig pub koob hmoov rau peb nyias muaj nyias tswvyim, tiamsis tej tswvyim ntawd puavleej yog tib tug Vaj Ntsujplig pub xwb. Peb nyias ua nyias ib tes haujlwm, tiamsis peb sawvdaws ua rau tib tug Tswv xwb. Vajtswv pub txhua tus nyias muaj nyias tswvyim ua haujlwm, tiamsis tej tswvyim ntawd puavleej yog Vajtswv tib leeg pub. Vaj Ntsujplig pub nyias muaj nyias tswvyim kom sawvdaws thiaj sib pab tau. Vaj Ntsujplig pub rau ib tug muaj tswvyim txawj qhuab qhia, thiab nws pub rau ib tug muaj tswvyim kawm txawj kawm ntse, tiamsis puavleej yog tib tug Vaj Ntsujplig pub xwb. Tib tug Vaj Ntsujplig ntawd pub ib tug muaj kev ntseeg, thiab pub ib tug muaj hwjchim kho tau mob zoo. Ib tug muaj hwjchim ua tau tej txujci tseemceeb, ib tug txawj qhia Vajtswv txojlus, ib tug txawj saib tej tswvyim uas yog Vaj Ntsujplig li thiab tej uas tsis yog. Ib tug txawj hais tej lus txawv txawv, ib tug txawj txhais tej lus txawv txawv ntawd. Tiamsis txhua yam no puavleej yog tib tug Vaj Ntsujplig pub xwb; nws pub rau txhua tus nyias muaj nyias tswvyim raws li nws pom zoo pub. Yexus Khetos zoo li lub cev uas muaj tes muaj taw, muaj taubhau thiab muaj siab muaj ntsws; txawm yog muaj ntau yam los puavleej koom ua ib lub cev. Ib yam nkaus li ntawd, tsis hais cov Yudais lossis lwm Haivneeg, cov ua qhev lossis cov uas tsis ua qhev, peb sawvdaws puavleej koom tib lub cev, peb ua kevcai raus dej los ntawm tib tug Vaj Ntsujplig thiab tib tug Vaj Ntsujplig ntawd nyob hauv peb. Rau qhov lub cev tsis yog muaj ib yam xwb, tiamsis muaj tes muaj taw, muaj taubhau thiab muaj siab muaj ntsws huv tibsi. Yog kotaw hais tias, “Kuv tsis yog tes, mas kuv tsis koom lub cev,” txawm yog kotaw yuav hais li ntawd los nws yeej koom rawv lub cev. Yog pobntseg hais tias, “Kuv tsis yog qhovmuag, mas kuv tsis koom lub cev,” txawm yog pobntseg yuav hais li ntawd los nws yeej koom rawv lub cev thiab. Yog lub cev muaj qhovmuag xwb, yuav ua li cas hnov tau lus? Thiab yog lub cev tsuas muaj pobntseg xwb, yuav ua li cas hnov ntxhiab? Twb yog vim li ntawd, Vajtswv thiaj tsim kom muaj tes muaj taw, muaj taubhau thiab muaj siab muaj ntsws los koom ua ib lub cev raws li Vajtswv pom zoo. Yog muaj tib yam xwb yeej hu tsis tau hais tias yog lub cev. Twb yog vim li ntawd, lub cev thiaj muaj tes muaj taw, muaj taubhau thiab muaj siab muaj ntsws. Yog li ntawd lub qhovmuag yuav hais rau txhais tes hais tias, “Kuv tsis yuav koj!” los yeej hais tsis tau. Lossis lub taubhau yuav hais rau txhais kotaw hais tias, “Kuv tsis yuav koj!” los yeej hais tsis tau ib yam nkaus. Peb lub cev muaj qee yam tsis tshua tseemceeb, tiamsis yog tsis muaj tej ntawd peb yeej tsis tsheej neeg; thiab tej uas peb xav hais tias tsis tseemceeb pestsawg, peb hajyam tu tej ntawd zoo dua; peb lub cev tej yam uas tsis zoo nkauj, peb hajyam tu kom zoo nkauj, yam uas zoo tsis tas yuav tu. Vajtswv yog tus uas muab tes muab taw, muab taubhau thiab muab siab muab ntsws los puab ua ib lub cev kom tej uas tsis tshua tseemceeb thiaj tseemceeb. Yog li ntawd, lub cev sib faib tsis tau, rau qhov txhua yam ntawd ib yam yeej pab ib yam. Yog lub cev muaj ib qho mob lawm, yeej yuav mob thoob plaws lub cev. Yog luag qhuas lub cev ib qho, tagnrho lub cev puavleej yuav tau ntsejmuag. Nej sawvdaws puavleej yog Yexus Khetos lub cev, thiab nej ib leeg yog ib yam ntawm lub cev. Vajtswv tsa peb nyias muaj nyias ib teg haujlwm nyob hauv pawg ntseeg: Thawj pab yog cov timthawj, pab ob yog cov cev Vajtswv lus, thiab pab peb yog cov xibhwb uas cob qhia; dua li ntawd muaj ibtxhia ua tau tej txujci tseemceeb, ibtxhia tau lub hwjchim kho mob zoo, muaj ibtxhia pab tau lwm tus, muaj ibtxhia txawj qhuab ntuas lwm tus thiab muaj ibtxhia hais tau lus txawv txawv. Tsis yog txhua tus ua timthawj lossis ua tus cev Vajtswv lus lossis ua xibhwb cob qhia. Tsis yog txhua tus tau lub hwjchim uas ua tau tej txujci tseemceeb, lossis kho tau mob zoo lossis hais tau lus txawv txawv lossis txawj txhais tau tej lus ntawd. Nej yuav tsum muab siab rau nrhiav tej koob hmoov uas tseemceeb tshaj plaws. Tiamsis nimno kuv yuav qhia ib zaj uas zoo tshaj tej ntawd huv tibsi rau nej. Txawm yog kuv hais tau txhua haivneeg tej lus thiab hais tau cov timtswv ceebtsheej tej lus los yog kuv tsis muaj kev hlub, ces tej lus uas kuv hais tau ntawd zoo li tej suab tswb tooj tswb hlau uas nrov nrov xwb. Txawm yog kuv yuav muaj lub tswvyim txawj qhuab qhia; muaj txhua yam kev txawj ntse, thiab totaub txhua yam uas tsis muaj neeg paub; thiab txawm yog kuv muaj kev ntseeg hais tau kom tej roob txav tau mus rau lwm qhov, tiamsis yog kuv tsis muaj kev hlub, ces kuv yeej tsis muaj nqis dabtsi hlo li. Txawm yog kuv yuav muab txhua yam uas kuv muaj pub rau lwm tus, thiab muab kuv lub cev rau luag hlawv los yog kuv tsis muaj kev hlub, ces yeej tsis muaj nqis dabtsi hlo li. Tus uas muaj kev hlub, nws ua taus siab ntev, nws muaj lub siab dawb siab zoo; nws tsis khib, tsis khavtheeb thiab tsis muab hlob; tus uas muaj kev hlub, nws tsis ua nruj ua tsiv, tsis qia dub, tsis chim sai; tsis cim ntsoov luag tej kev txhaum rau nruab siab; tus uas muaj kev hlub, nws tsis nyiam kev phem kev qias, tiamsis nws nyiam kev ncaj kev ncees. Tus uas muaj kev hlub, nws nyiaj taus txhua tsav yam, muab siab rau ntseeg, cia siab thiab ua siab ntev mus li. Txojkev hlub yuav nyob mus ibtxhis. Tiamsis cov uas txawj qhia Vajtswv txojlus, lawv tsuas qhia ib ntus xwb, cov uas txawj hais lus txawv txawv, lawv yuav tsis hais lawm thiab tej kev txawj ntse yuav ploj mus. Txawm yog peb kawm kev txawj ntse los peb tseem paub tsis txhij, thiab txawm yog peb txawj qhia Vajtswv txojlus los peb tseem qhia tsis tau zoo; tiamsis thaum peb paub txhij txhua lawm, ces tej uas peb paub tsis txhij ntawd yeej yuav ploj mus. Thaum kuv tseem yog menyuam yaus, kuv hais thiab kuv xav li menyuam yaus; nimno kuv hlob tiav txiv lawm, kuv tsis ua li menyuam yaus ua lawm. Rau qhov tej uas nimno peb pom, zoo li tus duab plooj plooj uas nyob hauv daim tsom iav xwb; tiamsis muaj ib hnub peb yuav pom tim ntsej tim muag. Nimno kuv tseem paub tsis tau txhij; tiamsis muaj ib hnub kuv yuav paub txhij ib yam li Vajtswv paub kuv. Nimno tseem muaj peb yam uas yuav nyob mus ibtxhis: kev ntseeg, kev cia siab thiab kev hlub; tiamsis kev hlub yog yam uas tseemceeb dua ntais huv tibsi. Nej yuav tsum sib hlub thiab kub siab lug thov Vaj Ntsujplig pub tswvyim rau nej, qhov tseemceeb yog thov lub tswvyim uas txawj qhia Vajtswv txojlus. Tus uas txawj hais lus txawv txawv tsis yog hais rau neeg, tiamsis yog hais rau Vajtswv, rau qhov tsis muaj leejtwg totaub tej lus uas nws hais. Tej lus uas nws hais ntawd, yog Vaj Ntsujplig kom nws hais. Tiamsis tus uas qhia Vajtswv txojlus yog qhia rau neeg kom pab tau sawvdaws, txhawb tau sawvdaws lub zog thiab nplig tau sawvdaws lub siab. Tus uas hais tau lus txawv txawv tsuas pab tau nws xwb, tiamsis tus uas qhia Vajtswv txojlus, tus ntawd pab tau txhua tus ntseeg huv tibsi. Kuv xav kom nej txhua tus hais tau lus txawv txawv; tiamsis kuv xav kom nej txawj qhia Vajtswv txojlus heev dua. Rau qhov tus uas txawj qhia Vajtswv txojlus yog tus uas muaj nqis heev dua tus uas hais tau lus txawv txawv, yog nws txhais tau tej lus txawv txawv ntawd thiaj yuav pab tau cov ntseeg xwb. Cov kwvtij, yog thaum kuv tuaj xyuas nej, kuv cia li hais lus txawv txawv rau nej, puas muaj qabhau rau nej? Yeej tsis muaj hlo li, yog kuv qhia Vajtswv tej lus qhia tshwm lossis tej kev txawj ntse lossis tej lus uas Vajtswv qhia rau kuv lossis tej lus qhuab qhia thiaj yuav muaj nqis rau nej. Tus neeg uas tshuab raj thiab qoj nkauj nogncas, yog nws tsis txawj pos ntiv raj thiab pos ntiv nkauj nogncas, yeej tsis muaj leejtwg paub hais tias nws tshuab thiab qoj hais li cas. Thiab yog tus neeg uas tshuab xyu nws tshuab tsis meej, leejtwg thiaj yuav paub npaj sib ntaus sib tua? Ib yam nkaus li ntawd, yog nej hais lus txawv txawv, cov mloog yuav ua li cas totaub? Nej tej lus yuav tsis muaj qabhau dabtsi. Txhua yam lus uas neeg ntiajteb hais puavleej muab lub ntsiab, tsis muaj ib yam uas tsis muaj lub ntsiab lus li. Tiamsis yog kuv tsis paub tus neeg uas nrog kuv tham ntawd cov lus, ces kuv thiab nws nyias yog nyias ib haivneeg. Nej txhua tus yeej kub siab lug xav tau lub tswvyim uas Vaj Ntsujplig pub, yog li ntawd nej yuav tsum xub thov tej uas yuav pab tau cov ntseeg kom vammeej tso. Tus neeg uas hais tau lus txawv txawv, nws yuav tsum thov Vajtswv pub tswvyim kom nws txawj txhais tau tej lus uas nws hais ntawd. Rau qhov tej lus txawv txawv uas kuv thov Vajtswv yeej yog kuv tus ntsujplig thov, tiamsis kuv tsis totaub tej lus ntawd. Yog li ntawd, thaum kuv yuav thov Vajtswv yuav tsum yog kuv lub siab totaub tej lus uas kuv hais; thaum kuv hu nkauj yuav tsum yog kuv lub siab totaub tej lus ntawd ib yam nkaus. Thaum nej ua Vajtswv tsaug yog nej hais lus txawv txawv, cov neeg uas tsis paub tej lus txawv txawv ntawd, lawv yuav ua li cas paub nrog nej hais “Amees”? Rau qhov lawv tsis paub xyov yog nej hais dabtsi. Txawm yog nej txawj ua Vajtswv tsaug npaum li cas los nej tej lus yeej pab tsis tau cov neeg uas tsis totaub ntawd li. Kuv ua Vajtswv tsaug uas kuv txawj hais lus txawv txawv ntau dua nej huv tibsi. Tiamsis thaum kuv qhia cov ntseeg, yog kuv hais tsib lo lus uas sawvdaws totaub, zoo dua li uas kuv hais kaum txhiab lo lus txawv txawv uas tsis muaj neeg paub. Cov kwvtij, nej tsis txhob xav li tej menyuam yaus xav, tiamsis nej yuav tsum xav li tej neeg laus xav; thiab ua ib yam li tej menyuam yaus uas tsis paub ua phem ua. Vajtswv txojlus sau tseg hais tias: “Tus Tswv hais tias, kuv yuav txib lwm Haivneeg tuaj qhia cov neeg no. Txawm li ntawd los kuv haivneeg yuav tsis mloog kuv tej lus.” Tej lus txawv txawv uas neeg hais yog ua rau cov tsis ntseeg pom Vajtswv lub hwjchim, tsis yog ua rau cov ntseeg pom. Tiamsis qhov uas qhia Vajtswv txojlus yog ua rau cov ntseeg pom Vajtswv lub hwjchim, tsis yog ua rau cov tsis ntseeg pom. Yog li ntawd, thaum cov ntseeg tuaj ua ke mloog lus qhuab qhia, yog txhua tus pib hais lus txawv txawv, cov ntseeg uas tsis totaub tej lus ntawd, thiab cov neeg uas tsis ntseeg lawv pom nej ua li ntawd, lawv yuav cia li hais tias nej vwm lawm. Tiamsis yog txhua tus qhia Vajtswv txojlus, thaum muaj cov tsis ntseeg lossis cov neeg sab nraud qee leej tuaj mloog, tej lus uas nws hnov ntawd yuav ua rau nws paub nws tej kev txhaum, thiab ua rau nws paub hais tias nws yuav raug txim, thiab Vajtswv yuav muab tej uas nws xav hauv nruab siab nthuav rau sawvdaws paub, thiab nws yuav txhos caug ntua pehawm Vajtswv thiab lees hais tias, “Vajtswv nrog nej nyob ntawm no tiag lauj!” Cov kwvtij, nej puas paub tej uas kuv hais ntawd yog dabtsi? Thaum nej tuaj ua ke pehawm Vajtswv, ib tug coj hu nkauj, ib tug qhuab qhia, ib tug qhia tej uas Vajtswv kom nws qhia, ib tug hais lus txawv txawv, thiab ib tug txhais tej lus txawv txawv ntawd. Nej yuav tsum ua txhua yam no thiaj pab tau pawg ntseeg kom vammeej. Yog leejtwg yuav hais lus txawv txawv, tsuas pub ob leeg lossis peb leeg hais xwb, cia ib tug hais tas ib tug mam li hais, thiab yuav tsum muaj ib tug txhais tej lus uas lawv hais ntawd. Tiamsis yog tsis muaj leejtwg txawj txhais, tus uas hais lus txawv txawv ntawd, cia nws hais twjywm hauv nruab siab thiab hais rau Vajtswv xwb. Cia ob tug lossis peb tug qhia Vajtswv lus, dua li lwm tus cia lawv mloog thiab xav saib tej lus ntawd qhia li cas. Tiamsis yog Vajtswv kom cov neeg uas tuaj zaum ua ke ntawd ib tug qhia, ces tus uas tabtom qhia cia li tsum. Nej cov uas qhia Vajtswv txojlus, nej ib tug qhia tas tso ib tug mam li qhia, cov uas mloog thiaj yuav kawm tau thiab tej uas nej qhia ntawd thiaj yuav txhawb tau sawvdaws lub zog. Tus uas txawj qhia Vajtswv txojlus, nws paub pib thiab paub xaus, rau qhov Vajtswv tsis xav kom peb ua dog ua dig, tiamsis nws xav kom peb ua muaj hauvpaus hauvntsis thiaj muaj kev kaj siab. Thaum cov ntseeg tuaj ua ke mloog lus qhuab qhia, cov pojniam yuav tsum nyob twjywm tsis txhob hais lus. Raws li cov Yudais Txoj Kevcai hais tias, cov pojniam tsis muaj cai ua thawjcoj. Yog cov pojniam xav paub dabtsi, kom nyias nug nyias tus txiv tom tsev. Qhov uas tus pojniam hais lus thaum sawvdaws tabtom mloog lus qhuab qhia, yog ib qhov uas txajmuag heev. Nej xav hais tias Vajtswv xub muab Vajtswv txojlus rau nej ua ntej no los? Lossis nej xav hais tias nej tib co thiaj li paub Vajtswv txojlus xwb. Yog leejtwg xav hais tias nws yog tus uas qhia Vajtswv txojlus lossis xav hais tias Vaj Ntsujplig twb pub hwjchim rau nws lawm, tus ntawd yeej paub hais tias tej uas kuv sau tuaj rau nej no yog tus Tswv tej lus. Tiamsis tus uas tsis quavntsej tej no, nej tsis txhob quavntsej tus ntawd hlo li. Yog li ntawd cov kwvtij, nej cia li muab siab rau qhia Vajtswv txojlus, tiamsis nej tsis txhob txwv tus uas hais tau lus txawv txawv. Txhua yam uas nej ua, nej yuav tsum ua kom zoo thiab tsis txhob lam ua dog ua dig. Cov kwvtij, kuv xav kom nej nco ntsoov txojmoo zoo uas kuv twb qhia rau nej thiab nej twb ntseeg lawm, thiab niaj hnub no los nej tseem ntseeg li qub. Yog nej cim ntsoov txojmoo zoo uas kuv qhia rau nej lawm, nej yeej yuav dim nej lub txim, ntshai yog nej ho tsis ntseeg tiag xwb. Tej lus uas Vajtswv muab rau kuv qhia nej ntawd, yog tej lus uas tseemceeb kawg li. Tej lus ntawd hais tias, Yexus Khetos tau tuag theej peb sawvdaws lub txhoj raws li muaj lus sau cia rau hauv Vajtswv txojlus hais tias, luag coj nws mus faus thiab tom qab ntawd peb hnub, Vajtswv tsa nws sawv hauv qhov tuag rov qab los, raws li Vajtswv txojlus sau tseg lawm. Twb yog li ntawd nws thiaj los tshwm rau Petus pom thiab tom qab ntawd nws los tshwm rau kaum ob tug timthawj pom. Thiab tom qab ntawd nws los tshwm rau tsib puas tawm leej pom, lawv cov ntawd coob leej tseem muaj sia nyob, tsuas yog qee leej thiaj tuag lawm xwb. Ces nws ho los tshwm rau Yakaunpaus pom, thiab tom qab ntawd nws los tshwm rau cov timthawj sawvdaws pom. Thaum kawg nws los tshwm rau kuv pom, kuv zoo li tus menyuam uas yug thaum tseem tsis tau txog caij yug. Kuv yog tus uas muaj lub hwjchim nqis dua cov timthawj huv tibsi, kuv tsis tsimnyog tau lub npe hu ua timthawj, rau qhov kuv tau tsimtxom cov ntseeg Vajtswv lawm. Tiamsis vim Vajtswv txoj koob hmoov, kuv thiaj tau ua ib tug timthawj, thiab txoj koob hmoov uas Vajtswv pub rau kuv ntawd tsis yog txoj uas tsis muaj nqis, yeej muaj nqis heev. Kuv ua haujlwm khwv dua cov timthawj huv tibsi, tsis yog kuv siv kuv lub zog ua xwb, tiamsis yog Vajtswv pub koob hmoov rau kuv, kuv thiaj ua tau. Txawm yog tej uas kuv qhia lossis tej uas lawv qhia los peb puavleej qhia ib yam nkaus, thiab tej ntawd yog tej uas nej twb ntseeg lawm. Peb twb qhia rau nej lawm hais tias Vajtswv twb tsa Yexus Khetos sawv hauv qhov tuag rov qab los lawm, ua li cas nej cov tseem muaj qee leej hais tias cov neeg uas tuag lawm yuav sawv tsis tau hauv qhov tuag los? Yog muaj li lawv hais ntawd tiag, ces Vajtswv kuj tsis tau tsa Yexus Khetos sawv hauv qhov tuag rov qav los; thiab yog hais tias Yexus Khetos tsis sawv hauv qhov tuag rov qab los, ces tej uas peb qhia yeej tsis muaj nqis dabtsi, thiab tej uas nej ntseeg los yeej tsis muaj nqis ib yam nkaus. Tsis tas li ntawd xwb, sawvdaws yuav pom hais tias peb qhia Vajtswv txojlus tsis tseeb, rau qhov peb qhia hais tias Vajtswv twb tsa Yexus Khetos sawv hauv qhov tuag rov qab los lawm, yog hais tias cov neeg uas tuag lawm tsis sawv hauv qhov tuag los li lawv hais ntawd tiag, ces Vajtswv kuj tsis tau tsa Yexus sawv hauv qhov tuag los. Rau qhov yog hais tias cov neeg uas tuag lawm tsis sawv hauv qhov tuag rov qab los, ces Vajtswv yeej tsis tau tsa Yexus Khetos sawv hauv qhov tuag rov qab los thiab. Yog hais tias Vajtswv tsis tau tsa Yexus Khetos sawv hauv qhov tuag rov qab los, ces qhov uas nej ntseeg yeej tsis muaj nqis dabtsi li, nej tseem muaj txim li qub. Thiab cov ntseeg Yexus Khetos uas twb tuag lawm, lawv yuav cia li puastsuaj mus li. Yog hais tias, qhov uas peb cia siab rau Yexus Khetos tsuas pab tau peb thaum peb tseem ua neej nyob no xwb, ces peb kuj yog cov uas txomnyem dua tej neeg uas nyob hauv ntiajteb no huv tibsi. Tiamsis qhov tseemceeb yog li no: Vajtswv twb tsa Yexus Khetos sawv hauv qhov tuag rov qab los lawm, Vajtswv ua li ntawd kom sawvdaws paub tseeb hais tias Vajtswv yuav tsa cov neeg uas tuag lawm sawv rov qab los thiab. Twb yog vim muaj ib tug uas txhaum, sawvdaws thiaj raug kev ploj kev tuag, thiab twb yog vim muaj ib tug sawv hauv qhov tuag rov qab los, sawvdaws thiaj yuav sawv tau ib yam li tus ntawd. Txhua tus puavleej raug kev ploj kev tuag, rau qhov sawvdaws yog Adas roj ntsha ib yam nkaus li ntawd, txhua tus yuav sawv hauv qhov tuag rov qab los, rau qhov sawvdaws nrog Yexus Khetos koom ib txojsia. Tiamsis txhua tus yuav sawv raws li Vajtswv teem tseg: Yexus Khetos yog tus uas xub sawv ua ntej; ces thaum txog lub sijhawm uas Yexus Khetos rov qab los, txhua tus uas ntseeg nws mam li sawv. Tom qab uas yog lub sijhawm kawg; Yexus Khetos yuav muab txhua tus nomtswv txo hwjchim tsis pub kav teb kav chaw, thiab nws yuav muab ib puas tsav yam uas muaj hwjchim cob rau Vajtswv tus uas yog nws Leej Txiv huv tibsi. Rau qhov Yexus Khetos yuav kav mus txog thaum Vajtswv muab txhua tus yeebncuab rau Yexus Khetos tsuj. Txojkev tuag yog tus yeebncuab uas thaum kawg Vajtswv yuav muab rhuav kom puastsuaj mus. Vajtswv txojlus hais tias, “Vajtswv muab ib puas tsav yam rau Yexus Khetos tsuj.” Lo lus uas hais tias, “Ib puas tsav yam” ntawd tsis tau hais txog Vajtswv tus uas muab ib puas tsav yam rau Yexus Khetos tsuj. Tiamsis thaum uas Vajtswv muab ib puas tsav yam rau Yexus Khetos kav lawm, ces Yexus Khetos uas yog Leej Tub yuav cia Vajtswv ua tus kav nws. Vajtswv yuav muab ib puas tsav yam rau Yexus kav; thiab Vajtswv yuav kav tagnrho ib puas tsav yam ntawd huv tibsi. Yog tsis muaj li ntawd, cov neeg uas ua kevcai raus dej pab cov neeg uas tuag lawm, lawv xav li cas lawv thiaj ua li ntawd? Yog hais tias cov neeg uas tuag lawm sawv tsis tau rov qab los, ua li cas lawv tseem ua kevcai raus dej rau cov neeg uas tuag lawm ua dabtsi thiab? Ua li cas peb tseem niaj hnub tiv kev txomnyem ua dabtsi? Cov kwvtij, kuv niaj hnub ntsib kev ploj kev tuag! Kuv zoo siab rau nej heev twb yog peb sawvdaws nrog Yexus Khetos tus uas yog peb tus Tswv koom ib txojsia. Qhov ntawd thiaj ua rau kuv qhia tej no rau nej. Yog kuv tawmtsam tej “tsiaj nyaum” hauv lub nroog Efexus raws li neeg lub siab nyiam, kuv yuav tau dabtsi? Yog hais tias cov neeg uas tuag lawm tsis sawv rov qab los, “Peb cia li noj thiab haus, rau qhov tagkis peb yuav tuag.” Tsis txhob pub leejtwg ntxias tau nej. “Tus uas mus nrog tus uas ua phem nyob ua ke, nws yeej yuav ua phem li tus ntawd.” Nej cia li tso plhuav nej tej kev txhaum tseg thiab tig rov qab los ua neeg zoo. Nej cov muaj qee leej tseem tsis tau paub Vajtswv, kuv hais li no kom nej paub txajmuag. Tej zaum yuav muaj neeg nug hais tias, “Cov neeg uas tuag lawm yuav ua li cas sawv tau rov qab los? Thaum lawv sawv rov qab los, lawv yuav muaj lub cev zoo li cas?” Ua li cas nej yuav ruam ua luaj li! Thaum nej muab lub noob qoob cog rau hauv av, yog lub noob ntawd tsis lwj yeej tuaj tsis taus kaus ib zaug li. Lub noob uas nej cog ntawd, txawm yog noob nplej lossis lwm yam noob los xij, tsis yog nej muab hlo ib tsob mus cog, tiamsis nej tsuas muab lub noob mus cog xwb, Vajtswv pub lub noob ntawd muaj nplooj muaj kav raws li nws pom zoo; thiab Vajtswv pub txhua yam noob nyias muaj nyias nplooj nyias kav raws li nyias yam noob. Txhua yam nyias yeej muaj nyias ib yam nqaij zoo tsis sib thooj; neeg muaj dua ib yam nqaij, tej tsiaj nyias muaj dua nyias ib yam nqaij, tsis hais tej noog thiab tej ntses los nyias yeej muaj dua nyias ib yam nqaij. Cov neeg saum ntuj lub cev zoo tsis thooj cov neeg hauv ntiajteb no lub cev; cov neeg saum ntuj thiab cov neeg hauv ntiajteb no lub cev nyias zoo nyias lawm ib yam. Lub hnub, lub hlis thiab tej hnubqub nyias ci txawv nyias lawm ib yam; thiab txawm yog tej hnubqub los ib lub yeej ci tsis thooj ib lub thiab. Ib yam nkaus li ntawd, lub cev uas luag muab faus, yog lub cev uas txawj tuag; lub cev uas sawv hauv qhov tuag rov qab los, yog lub cev uas tsis txawj tuag. Lub cev uas luag muab faus yeej tsis zoo nkauj thiab tsis muaj zog, tiamsis lub cev uas Vajtswv tsa sawv hauv qhov tuag rov qab los, lub cev ntawd zoo nkauj thiab muaj zog. Lub cev uas luag muab faus, yog lub uas muaj roj muaj ntshav, tiamsis thaum Vajtswv tsa sawv hauv qhov tuag rov qab los lawm, tus ntawd muaj lub cev tshiab. Yog twb muaj lub cev qub lawm yeej yuav muaj lub cev tshiab. Vajtswv txojlus hais tias, “Adas yog thawj tug uas Vajtswv tsim thiab Vajtswv rau siav rau pa kom ciaj sia,” tiamsis tus Adas uas los thaum kawg, yog tus uas pub tau txojsia rau neeg. Vajtswv xub pub neeg muaj lub cev uas muaj roj muaj ntshav, tom qab ntawd nws mam li pub neeg muaj lub cev tshiab. Thawj tug Adas yog Vajtswv muab av puab; tiamsis tus Adas ob, yog los saum ntuj ceebtsheej los. Neeg ntiajteb zoo ib yam li tus uas Vajtswv muab av los puab, tiamsis neeg qaum ntuj zoo ib yam li tus uas los saum ntuj los. Peb twb muaj tus yam ntxwv zoo li tus uas Vajtswv muab av los puab lawm; yog li ntawd peb yeej yuav muaj tus yam ntxwv zoo li tus uas los saum ntuj los thiab. Cov kwvtij, qhov uas kuv hais ntawd yog li no: lub cev uas muaj roj muaj ntshav yeej mus nyob tsis tau Vajtswv lub tebchaws, thiab tej uas txawj ploj txawj tuag yeej koom tsis tau tej uas tsis txawj ploj tsis txawj tuag li. Rau qhov lub cev uas txawj tuag yuav hloov ua lub uas tsis txawj tuag; lub cev uas txawj lwj yuav hloov ua lub uas tsis txawj lwj. Yog li ntawd thaum lub cev uas txawj ploj txawj tuag hloov ua lub uas tsis txawj ploj tsis txawj tuag lawm, ces thaum ntawd yuav muaj tiav raws li Vajtswv txojlus uas hais tias, “Peb kovyeej txojkev tuag lawm!” “Txojkev tuag, koj swb lawm lauj! Txojkev tuag, koj tej taug tsuag tas lawm lauj!” Txojkev tuag muaj taug yuam tau neeg rau qhov neeg muaj txim; yog tsis muaj Vajtswv txoj kevcai, txojkev txhaum yeej yuav tsis muaj hwjchim yuam neeg. Tiamsis peb cia li ua Vajtswv tsaug, rau qhov Vajtswv twb kom Yexus Khetos tus uas yog peb tus Tswv pab peb kovyeej lawm. Yog li ntawd cov kwvtij uas kuv hlub, nej yuav tsum muab siab rau ntseeg, tsis txhob ua ywjfab ywjfwj. Nej yuav tsum rau siab ntso ua tus Tswv tes haujlwm, rau qhov nej twb paub lawm hais tias tej haujlwm uas nej ua rau tus Tswv ntawd puavleej muaj nqis tsis muaj ib yam uas tsis muaj nqis li. Nimno kuv yuav hais txog tej nyiaj uas nej sau xa mus pab cov Yudais uas ntseeg Vajtswv nram lub nrog Yeluxalees. Nej yuav tsum ua ib yam li tej uas kuv qhia kom cov ntseeg uas nyob hauv lub xeev Kalatias ua. Txhua Hnubkaj nej yuav tsum muab tej nyiaj uas nej khwv tau los mentsis khaws cia. Tus uas tau ntau muab ntau, tus uas tau tsawg muab tsawg, yog nej ua li ntawd thaum kuv tuaj txog tsis tas yuav sau ntxiv lawm. Thaum kuv tuaj txog, kuv yuav txib cov neeg uas nej twb xaiv tau lawm, xa ntawv thiab xa cov nyiaj ntawd mus rau nram lub nroog Yeluxalees. Yog kuv xav hais tias tsimnyog kuv mus thiab kuv yuav coj lawv mus. Kuv yuav xub mus pem Makedaunias tso, tom qab ntawd kuv mam li tuaj xyuas nej, rau qhov kuv yuav tuaj pem Makedaunias tuaj. Tej zaum kuv yuav tuaj nrog nej nyob ib ntus lossis yuav nyob kom dhau caij ntuj no los tsis paub, tom qab ntawd yog kuv xav mus qhov twg nyaj nej yuav pab xa kuv mus. Kuv tsis xav tuaj pom nej ib pliag xwb; yog tus Tswv pom zoo, kuv yeej yuav tuaj nrog nej nyob ib ntus. Tiamsis kuv yuav nyob hauv lub nroog Efexus no mus txog hnub uas sawvdaws ua kevcai Peetekos tas tso, rau qhov nimno Vajtswv tabtom qhib qhovrooj rau kuv ua tes haujlwm tseemceeb thiab muaj nqis heev, txawm li ntawd los tseem muaj ntau leej tawmtsam kuv. Yog Timautes tuaj xyuas nej, nej cia li txaus siab tos txais nws, rau qhov nws ua tus Tswv tes haujlwm ib yam li kuv ua thiab. Yog li ntawd, nej yuav tsum saib taus nws, thiab pab xa nws mus kaj siab lug, nej ua li ntawd nws thiaj yuav rov los txog kuv; rau qhov kuv yeej tos ntsoov nws thiab cov kwvtij uas nrog nws tuaj. Nimno kuv hais txog peb tus kwv Apaulaus. Kuv twb hais kom nws nrog cov kwvtij tim no tuaj xyuas nej, tiamsis nws tseem tsis tau npaj siab tuaj lub sijhawm no. Txawm yog li cas los thaum nws khoom, nws yeej yuav tuaj xyuas nej xwb. Nej yuav tsum ceevfaj, muab siab rau ntseeg, ua siab tawv qhawv thiab cuab zog khov kho. Txhua yam uas nej ua, nej yuav tsum sib hlub sib pab. Nej yeej paub Xatefanas thiab nws tsevneeg zoo lawm; lawv yog tsevneeg uas xub los ntseeg hauv lub xeev Akhayas, thiab lawv zoo siab pab cov ntseeg Vajtswv. Cov kwvtij, kuv thov ntuas nej kom nej mloog cov neeg ntawd thiab lwm tus uas nrog lawv ua haujlwm ua ke ntawd lus. Txawm yog kuv tsis pom nej los kuv yeej zoo siab, rau qhov Xatefanas, Fautunatus thiab Akhayikus twb tuaj xyuas kuv lawm, thiab lawv ua rau kuv zoo siab ib yam li lawv ua rau nej zoo siab ntag. Tsimnyog peb hwm cov neeg uas zoo li ntawd. Cov ntseeg uas nyob hauv lub xeev Axias, xa lus noj qab nyob zoo tuaj rau nej. Akilas nkawd ob niamtxiv thiab cov ntseeg uas tuaj mloog lus qhuab qhia hauv nkawd tsev los hais noj qab nyob zoo rau nej thiab. Cov ntseeg uas nyob tim no los lawv puavleej hais noj qab nyob zoo rau nej thiab. Nej ib tug hais noj qab nyob zoo rau ib tug thiab ib tug hlub ib tug. Kuv yog Paulus, kuv yog tus sau tej lus noj qab nyob zoo no tuaj rau nej ntag. Yog leejtwg tsis hlub tus Tswv, tus ntawd yuav raug foom tsis zoo. Malanathas, peb tus Tswv, koj cia li los! Thov tus Tswv Yexus foom koob hmoov rau nej txhua tus. Kuv hlub nej txhua tus, rau qhov peb puavleej ntseeg Yexus Khetos. Kuv yog Paulus tus uas yog Yexus Khetos ib tug timthawj raws li Vajtswv lub siab nyiam, thiab Timautes uas yog peb tus kwv, sau tsab ntawv no tuaj rau cov ntseeg Vajtswv uas nyob hauv lub nroog Kauleethaus, thiab cov ntseeg Vajtswv txhua tus uas nyob thoob plaws hauv lub xeev Akhayas: Thov Vajtswv tus uas yog peb Leej Txiv thiab Tswv Yexus Khetos foom koob hmoov rau nej thiab pub kom nej tau nyob kaj siab lug. Peb cia li ua Vajtswv tus uas yog peb tus Tswv Yexus Khetos Leej Txiv tsaug. Leej Txiv tus uas yog Vajtswv, nws hlub peb thiab txhawb peb lub zog. Nws txhawb peb lub zog thaum peb raug txhua yam kev nyuaj siab, kom peb thiaj txhawb tau lwm tus lub zog thaum lawv raug tej kev nyuaj siab; peb txhawb lwm tus lub zog ib yam li Vajtswv twb txhawb peb lub zog lawm. Peb ua Yexus Khetos tes haujlwm, peb raug kev txomnyem ib yam li Yexus raug; tiamsis Vajtswv yuav pab peb ib yam li Vajtswv tau pab Yexus lawm. Qhov uas peb raug kev txomnyem yeej yuav txhawb tau nej lub zog, thiab pab kom nej dim; qhov uas Vajtswv txhawb peb lub zog, yuav txhawb nej lub zog ib yam nkaus, kom nej ua taus siab ntev tiv kev txomnyem ib yam li peb twb tiv los lawm. Yog li ntawd peb thiaj cia siab tau rau nej, rau qhov peb paub hais tias nej cov uas raug kev txomnyem ib yam li peb, Vajtswv yeej yuav txhawb nej ib yam li nws txhawb peb. Cov kwvtij, peb xav kom nej paub hais tias thaum peb mus pem lub xeev Axias, peb raug txomnyem heev kawg li, peb tiv yuav luag tsis dhau, peb xav hais tias peb yeej yuav tuag xwb. Peb zoo li tej neeg raug txim uas luag yuav coj mus tua. Tiamsis cia peb raug kev txomnyem li no, peb thiaj tsis cia siab rau peb lub tswvyim, tiamsis kom peb cia siab rau Vajtswv tus uas tsa tau neeg tuag sawv rov qab los. Nws pab peb dim ntawm txojkev tuag uas txaus ntshai heev, nws yeej yuav pab kom peb dim; thiab peb cia siab hais tias, nws tseem yuav pab peb mus lawm yav tom ntej, rau qhov nej niaj hnub thov Vajtswv pab peb. Yog muaj coob leej thov Vajtswv pab peb, Vajtswv yuav teb sawvdaws tej lus thov, thiab Vajtswv yuav foom koob hmoov rau peb; thiab yuav muaj coob leej ua Vajtswv tsaug vim Vajtswv pab peb. Peb yeej khav tau hais tias peb lub siab qhia rau peb paub hais tias, peb ua peb lub neej hauv ntiajteb no peb ua ncaj ua ncees, thiab muaj nplooj siab dawb paug. Txawm yog thaum peb nrog nej nyob los nej puavleej pom li ntawd. Peb ua tau li ntawd, rau qhov Vajtswv pab peb tsis yog peb ua raws li peb lub tswvyim. Tej uas peb sau tuaj rau nej, peb tsuas sau tej uas nej nyeem tau thiab totaub xwb; kuv xav hais tias nej yuav totaub hauvpaus nto ntsis, tiamsis nej twb totaub qee yam lawm, kuv cia siab hais tias nej yuav totaub txhua yam huv tibsi, yog li ntawd thaum txog hnub uas peb tus Tswv Yexus rov qab los nej yuav ua rau peb zoo siab ib yam li peb ua rau nej zoo siab. Thaum kuv paub li no lawm, kuv thiaj xav hais tias kuv yuav xub tuaj xyuas nej, kom nej tau koob hmoov ob npaug. Kuv xav hais tias, kuv yuav tuaj xyuas nej thaum kuv tuaj mus pem Makedaunias, thiab thaum kuv rov ped los, kuv yuav rov los xyuas nej dua ib zaug, kom nej thiaj tau xa kuv mus nram lub xeev Yudas. Kuv twb npaj siab tau li no lawm, kuv tseem yuav hloov siab thiab los? Kuv puas yog ib tug neeg uas hais tias “Tuaj, tuaj,” tiamsis ho “Tsis tuaj” los? Vajtswv yog tus ncaj ncees, tej lus uas kuv hais rau nej tsis yog tej lus uas hais tias, “Ua, ua,” tiamsis ho “Tsis ua.” Rau qhov Vajtswv tus tub Yexus Khetos uas Xilas, Timautes thiab kuv qhia rau nej, nws tsis yog tus uas hais tias, “Ua, ua,” tiamsis ho “Tsis ua.” Tiamsis nws yeej ibtxwm ua li nws hais; rau qhov tej uas Yexus ua puavleej tiav raws li Vajtswv tej lus cog tseg. Twb yog vim li ntawd peb cov uas ntseeg Yexus Khetos peb thiaj hais tias, “Amees”, yog peb ua rau Vajtswv tau koob meej. Vajtswv ua rau peb thiab nej paub hais tias peb nrog Yexus Khetos koom ib txojsia, thiab Vajtswv muab peb tshwj rau ib cag, nws nias cim rau peb thiab nws pub Vaj Ntsujplig tus Dawbhuv los kav peb lub siab, ua timkhawv hais tias peb yuav tau tej uas nws npaj tseg rau peb lawm. Vajtswv yeej paub kuv lub siab, kuv thiaj thov nws ua kuv tus timkhawv! Qhov uas kuv tsis tuaj rau hauv lub nroog Kauleethaus twb yog kuv tsis xav kom nej nyuaj siab. Peb tsis tau yuam kom nej yuav tsum ntseeg li ub li no; peb yeej paub hais tias nej twb ntseeg lawm. Tiamsis peb xav pab nej kom nej muaj kev kaj siab xwb. Yog li ntawd kuv thiaj ua ib siab tsis tuaj xyuas nej lawm, kom nej thiaj tsis muaj kev nyuaj siab. Yog kuv ua rau nej nyuaj siab lawm, leejtwg yuav ua rau kuv rov zoo siab? Tsuas yog nej cov uas kuv ua rau nyuaj siab lawm thiaj yuav ua rau kuv zoo siab xwb. Twb yog vim li no kuv thiaj sau thawj tsab ntawv ntawd tuaj rau nej, kuv tsis tuaj xyuas nej nyob tsam cov uas ua rau kuv zoo siab lawm yuav ua rau kuv nyuaj siab. Kuv cia siab hais tias thaum kuv zoo siab nej sawvdaws yeej yuav zoo siab thiab. Thaum kuv sau tsab ntawv ntawd tuaj rau nej, kuv nyuaj siab, ntxhov siab thiab los kuv kua muag kawg li; tsis yog kuv txhob txwm ua kom nej nyuaj siab, tiamsis yog kuv xav kom nej paub hais tias kuv hlub nej heev. Yog leejtwg ua rau ib tug twg nyuaj siab, tsis yog nws ua rau kuv xwb, tiamsis yog nws ua rau nej thiab, qhov uas kuv hais tias leejtwg, twb yog kuv tsis xav hais hnyav rau tus ntawd. Kuv xav hais tias nej cov uas rau txim rau tus ntawd nej twb rau txaus lawm. Yog li ntawd, nej yuav tsum zam txim rau tus ntawd thiab ua tib zoo ntuas nws, nyob tsam nws tej kev nyuaj siab ntawd ua rau nws tso Vajtswv tseg. Yog li ntawd, kuv thov nej ua tib zoo hais rau nws paub hais tias nej hlub nws. Kuv sau tsab ntawv ntawd tuaj rau nej, twb yog kuv sim saib nej puas mloog kuv lus. Thaum nej zam txim rau leejtwg, kuv yeej zam txim rau tus ntawd ib yam nkaus thiab. Yog tsimnyog kuv zam txim rau leejtwg, kuv yeej zam tus ntawd lub txim tabmeeg Yexus Khetos, vim kuv saib rau saum nej sawvdaws. Kuv ua li no kom dab Ntxwgnyoog thiaj ntxias tsis tau peb; rau qhov peb twb paub nws tes haujlwm tas lawm. Thaum kuv mus txog hauv lub nroog Tau-as kuv qhia Txojmoo Zoo uas hais txog Yexus Khetos, kuv pom tus Tswv twb qhib kev rau kuv ua haujlwm nyob hauv lub nroog ntawd lawm. Tiamsis kuv ntxhov siab heev, rau qhov kuv tsis pom peb tus kwv Titus nyob hauv. Yog li ntawd kuv thiaj ncaim cov neeg ntawd thiab mus rau pem Makedaunias lawm. Peb cia li ua Vajtswv tsaug, rau qhov Vajtswv niaj hnub coj peb txoj haukev, rau qhov Yexus Khetos twb ua rau peb muaj yeej lawm. Vajtswv txib peb mus qhia Yexus Khetos zaj rau txhua qhov ib yam li tej pa tshuaj tsw qab uas tsw thoob plaws txhua qhov txhia chaw. Rau qhov peb zoo li tej pa tshuaj tsw qab uas Yexus Khetos muab fij rau Vajtswv, tej pa ntawd tsw qab ntxiag mus rau cov neeg uas tabtom yuav dim thiab cov neeg uas tabtom yuav raug kev puastsuaj. Cov neeg uas tabtom yuav raug kev puastsuaj, lawv suav hais tias tej pa ntawd yog tej uas ua rau lawv raug kev ploj kev tuag; tiamsis cov neeg uas tabtom yuav dim, lawv suav hais tias tej pa ntawd yog tej uas ua rau lawv tau txojsia. Leejtwg thiaj yuav tsimnyog ua tes haujlwm no? Peb tsis zoo li cov neeg uas muab Vajtswv txojlus coj mus muag noj muag haus, tiamsis yog Vajtswv txib peb, peb thiaj qhia ncaj qhia ncees tabmeeg Vajtswv, rau qhov peb yog Yexus Khetos cov tubtxib tiag. Peb hais li no puas yog peb khavtheeb? Peb yuav tsum tau ntawv nqa tuaj rau nej ib yam li luag lwm tus lossis tau ntawv ntawm nej thiab los? Nej twb yog tsab ntawv uas peb muab sau rau hauv peb lub siab, kom txhua tus paub thiab tau nyeem ntag los sav! Qhov tseeb, Yexus Khetos yog tus sau tsab ntawv no thiab peb yog cov uas xa. Tsab ntawv no tsis yog nws muab kua mem sau, tiamsis yog nws muab Vajtswv tus uas muaj sia nyob tus Ntsujplig sau, thiab tsis yog sau rau ntawm tej txiag zeb, tiamsis yog sau rau hauv neeg lub siab. Peb hais li no, rau qhov Yexus Khetos ua rau peb cia siab rau Vajtswv. Peb yeej tsis tau khav hais tias peb muaj tswvyim ua tau tes haujlwm no. Qhov uas peb ua tau yog Vajtswv pub rau peb xwb; Vajtswv yog tus pub tswvyim rau peb qhia txoj kevcai tshiab, tsis yog txoj kevcai uas sau rau hauv ntawv, tiamsis yog Vaj Ntsujplig; txoj kevcai uas sau rau hauv ntawv ua rau neeg raug kev ploj kev tuag, tiamsis Vaj Ntsujplig ua rau neeg tau txojsia. Txoj Kevcai ntawd muab txaug ua npe ntawv rau ntawm ob daim txiag zeb, thiab thaum muaj txoj Kevcai ntawd sawvdaws pom Vajtswv lub tshwjchim uas ci ntsa iab. Lub tshwjchim ntawd twb ploj lawm los Mauxes lub ntsejmuag tseem ci heev, cov Yixalayees yeej ntsia tsis taus li. Txawm li ntawd los txoj Kevcai ntawd yeej yuav ua rau cov neeg uas xyaum ua raws li txoj Kevcai ntawd raug kev ploj kev tuag. Yog li ntawd qhov uas sawvdaws xyaum ua raws li Vaj Ntsujplig qhia, sawvdaws hajyam yuav pom Vajtswv lub tshwjchim uas loj dua ntawd thiab. Yog hais tias txoj kevcai uas ua rau neeg raug txim twb muaj tshwjchim loj npaum li ntawd; ces txoj kevcai uas ua rau neeg dim txim tseem hajyam muaj tshwjchim loj dua ntawd thiab! Peb hais tau hais tias lub tshwjchim uas nimno ci ntsa iab ntawd twb ua rau lub tshwjchim thaum ub tsis ci lawm. Rau qhov yam uas nyob ib ntus xwb, twb muaj tshwjchim loj npaum li ntawd, ces yam uas yuav nyob mus ibtxhis hajyam muaj tshwjchim loj dua ntawd thiab. Twb yog vim peb cia siab li ntawd peb thiaj muaj lub siab tawv. Peb tsis ua li Mauxes tus uas muab ntaub npog nws lub ntsejmuag kom cov Yixalayees tsis txhob pom nws lub tshwjchim ci ntsa iab uas ploj zuj zus mus ntawd. Tiamsis lawv lub siab tawv heev, txawm yog niaj hnub no los thaum lawv nyeem txoj qub kevcai, daim ntaub ntawd tseem npog rawv lawv ntsejmuag li. Tsuas yog tus uas ntseeg Yexus Khetos lawm thiaj tsis muaj daim ntaub ntawd npog ntsejmuag lawm xwb. Txawm yog niaj hnub no los thaum lawv nyeem Mauxes txoj kevcai daim ntaub ntawd tseem npog rawv lawv lub siab. Tiamsis luag twb muab daim ntaub ntawd yaws lawm, raws li Vajtswv txojlus hais txog Mauxes hais tias, “Thaum Mauxes tig rau ntawm tus Tswv, luag twb muab nws daim ntaub uas npog Mauxes ntsejmuag yaws lawm.” Lo lus uas hais tias tus Tswv, lo lus ntawd yog hais txog Vaj Ntsujplig, yog tus Tswv tus Ntsujplig nyob qhov twg qhov ntawd muaj kev thajyeeb. Peb txhua tus tsis muaj daim ntaub npog ntsejmuag lawm, peb zoo li daim tsom iav rau sawvdaws pom tus Tswv lub tshwjchim; thiab lub tshwjchim uas tus Tswv pub rau peb yog Vaj Ntsujplig, nws muab peb hloov kom peb muaj tus yam ntxwv zoo zuj zus li tus Tswv tus yam ntxwv. Vajtswv hlub peb heev nws thiaj muab tes haujlwm no rau peb ua, yog li ntawd peb thiaj tsis poob siab. Peb yeej tsis zais siab thiab tsis ua tej uas yuav poob ntsejmuag; peb tsis tau dag ntxias leejtwg lossis peb tsis hloov Vajtswv txojlus. Vajtswv yeej pom hais tias peb qhia tseeb xwb, peb niaj hnub qhia tej uas yuav ua rau sawvdaws nyias paub nyias tej kev txhaum. Rau qhov cov neeg uas tsis totaub Txojmoo Zoo uas peb qhia, tsuas yog cov neeg uas tabtom yuav raug puastsuaj xwb. Lawv tsis ntseeg, rau qhov tus vajtswv uas kav ntiajteb no ua rau lawv lub siab ruam lawm. Nws ua kom lawv tsis pom qhov kaj uas ci tuaj rau lawv, qhov kaj ntawd yog Txojmoo Zoo uas qhia txog Yexus Khetos lub tshwjchim uas ci ntsa iab, nws muaj tus yam ntxwv zoo li Vajtswv. Peb yeej tsis qhia txog peb zaj; peb qhia hais tias Yexus Khetos yog tus Tswv, thiab peb yog nej cov tubtxib, rau qhov peb ua Yexus Khetos tes haujlwm. Tus Vajtswv uas hais tias, “Qhov kaj cia li ci hauv qhov tsaus ntuj tuaj,” tus ntawd yog tus Vajtswv uas ua kom qhov kaj ci tuaj rau hauv peb lub siab, qhia kom peb paub Vajtswv lub tshwjchim uas ua rau Yexus Khetos lub ntsejmuag ci ntsa iab. Peb zoo li lub laujkaub av uas luag muab tej yam muaj nqis ntim rau hauv, kom sawvdaws thiaj pom lub hwjchim uas loj kawg nkaus uas yog Vajtswv lub, tsis yog peb lub. Peb niaj hnub raug kev nyuaj siab, tiamsis peb tsis poob siab; muaj qee zaus peb kawg tswvyim, tiamsis peb tsis tws kev; peb raug luag tsimtxom, tiamsis Vajtswv tsis tso peb tseg, luag muab peb ntaus ntog tiamsis peb tsis tuag. Peb txaus siab raug kev ploj kev tuag txhua lub sijhawm ib yam li Yexus Khetos, kom sawvdaws pom hais tias peb ua peb lub neej ib yam li Yexus Khetos lub. Thaum peb tseem ua neej nyob peb cov uas ua Yexus Khetos tes haujlwm, peb niaj hnub txaus siab raug kev ploj kev tuag kom sawvdaws pom peb ua peb lub neej ib yam li Yexus Khetos lub. Qhov uas peb raug kev ploj kev tuag, qhov ntawd ua rau nej tau txojsia. Tiamsis peb ntseeg raws li Vajtswv txojlus uas hais tias, “Kuv ntseeg kuv thiaj hais.” Peb yeej ntseeg yog li ntawd peb thiaj hais. Peb paub hais tias Vajtswv tus uas tsa Tswv Yexus sawv hauv qhov tuag rov qab los, nws yuav tsa peb cov uas nrog Yexus koom ib txojsia sawv hauv qhov tuag rov qab los ib yam nkaus, nws yuav coj peb thiab nej mus cuag nws. Ib puas tsav yam no puavleej yuav muaj nqis rau nej. Thaum muaj neeg coob zuj zus hnov hais tias, Vajtswv hlub sawvdaws, yuav muaj neeg ua Vajtswv tsaug coob zuj zus ntxiv ib yam nkaus. Tej ntawd puavleej ua rau Vajtswv tau ntsejmuag. Twb yog vim li ntawd peb thiaj tsis poob siab. Txawm yog peb lub cev tsaug zuj zus los peb lub siab tseem niaj hnub muaj zog ntxiv. Tej teebmeem me me uas peb raug ib nyuag ntu no, yuav ua rau peb tau txoj koob hmoov zoo uas yuav nyob mus ibtxhis, tej teebmeem uas peb raug yeej piv tsis tau txoj koob hmoov uas peb tau li. Rau qhov peb tsis muab siab npuab tej uas peb qhovmuag pom, tiamsis peb muab siab npuab tej uas peb qhovmuag tsis pom. Tej uas peb qhovmuag pom tsuas nyob ib ntus xwb, tiamsis tej uas peb qhovmuag tsis pom yuav nyob mus ibtxhis li. Peb paub hais tias peb lub cev zoo li lub tsev pheebsuab uas nyob hauv ntiajteb no thiab yog lub uas txawj puastsuaj, Vajtswv yuav ua ib lub tsev saum ntuj rau peb mus nyob, lub tsev uas nws ua ntawd yuav nyob mus ibtxhis. Nimno peb kub siab lug xav mus nyob lub tsev uas Vajtswv ua cia rau saum ntuj ceebtsheej lawm; thaum peb lub cev puastsuaj lawm peb thiaj yuav muaj tsev nyob. Thaum peb tseem ua neej nyob no peb niaj hnub nyuaj siab kawg li. Tsis yog peb xav rhuav peb lub cev uas zoo li lub tsev pheebsuab, tiamsis peb xav mus nyob lub tsev uas Vajtswv ua saum ntuj ceebtsheej rau peb nyob, kom peb lub cev uas txawj tuag hloov ua lub uas tsis txawj tuag. Vajtswv yog tus uas tu peb cia tos hnub uas nws yuav muab lub cev tshiab rau peb. Thiab nws pub nws tus Ntsujplig rau peb. Qhov uas nws ua li ntawd twb yog ib qho tseemceeb uas qhia rau peb hais tias peb yeej yuav tau tej uas nws npaj tseg rau peb lawm. Twb yog vim li ntawd peb thiaj muaj nplooj siab tawv qhawv tsis ntshai ib yam dabtsi li. Peb paub hais tias thaum peb tseem nyob hauv lub tsev pheebsuab no peb nyob deb peb tus Tswv Yexus lub tsev. Thaum peb tseem ua neej nyob no txawm yog peb tsis pom nws los peb cia siab rau nws. Peb tsis ntshai kev ploj kev tuag, rau qhov peb yeej xav mus nrog peb tus Tswv Yexus nyob heev dua li peb nyob hauv lub tsev pheebsuab no. Txawm yog li cas los peb yeej yuav ua raws li Vajtswv lub siab nyiam, tsis hais peb tseem nyob hauv no lossis mus nyob saum ntuj los peb yeej zoo siab, rau qhov peb txhua tus yuav tsum mus sawv ntawm Yexus Khetos lub xubntiag. Nws yuav taug pab zaj thiab muab nqi zog rau txhua tus raws li tej haujlwm uas sawvdaws tau ua los lawm, thaum sawvdaws tseem ua neej nyob no, tsis hais ua zoo lossis ua phem. Peb puavleej paub ntshai Vajtswv, yog li ntawd peb thiaj niaj hnub yaum sawvdaws los mloog Vajtswv lus. Vajtswv yeej paub peb txhua tus lub siab huv tibsi. Kuv xav hais tias nyaj nej yuav paub kuv lawm thiab. Peb hais li no tsis yog peb ho yuav rov piav peb lub neej qhia nej dua, tiamsis peb xav ua rau sawvdaws paub hais tias vim li cas nej qhuas peb, nej thiaj yuav muaj lus teb cov neeg uas nyiam saib neeg ntsejmuag xwb tsis saib neeg lub siab. Yog peb ua li tej neeg vwm, yeej yog peb ua rau Vajtswv tau ntsejmuag. Yog peb ua li tej neeg uas muaj tswvyim, yeej yog peb ua pab nej. Yexus Khetos tus uas muaj lub siab hlub nws kav tagnrho peb lub neej huv tibsi, rau qhov peb pom hais tias muaj ib tug tuag theej sawvdaws lub txhoj. Lo lus ntawd qhia hais tias sawvdaws puavleej koom nws txojkev tuag. Nws tuag theej txhua tus lub txhoj. Nws ua li ntawd kom cov neeg uas tseem ua neej nyob lawv tsis txhob ua lawv lub neej raws li lawv lub siab nyiam, tiamsis kom lawv ua lawv lub neej raws li nws lub siab nyiam. Nws yog tus uas tuag thiab yog tus uas Vajtswv tsav sawv hauv qhov tuag rov qab los. Nws ua li ntawd twb yog vim nws hlub lawv. Nimno peb tsis ntsuas leejtwg lub neej raws li neeg ibtxwm ntsuas. Txawm yog yav tas los peb pheej ntsuas Yexus Khetos lub neej raws li neeg ntsuas los nimno peb tsis ua li ntawd lawm. Tus uas nrog Yexus Khetos koom ib txojsia, tus ntawd yog neeg tshiab. Nws lub neej qub twb dua lawm nimno nws muaj lub neej tshiab. Ib puas tsav yam no puavleej yog Vajtswv ua. Vajtswv coj peb rov los nrog Vajtswv sib raug zoo rau qhov peb ntseeg Yexus Khetos. Thiab Vajtswv muab txoj haujlwm uas mus coj neeg los nrog Vajtswv sib raug zoo rau peb ua. Zaj uas peb niaj hnub qhia, zaj ntawd hais tias Vajtswv coj txhua haivneeg uas ntseeg Yexus Khetos los nrog Vajtswv sib raug zoo. Vajtswv tsis suav hais tias lawv muaj txim, thiab Vajtswv muab zaj uas hais tias Vajtswv coj neeg los nrog Vajtswv sib raug zoo rau peb qhia. Yog li ntawd peb thiaj ua Yexus Khetos cov tubtxib, piv ib yam li Vajtswv qiv peb qhovncauj ntuas nej. Yexus Khetos kom peb ntuas nej hais tias nej yuav tsum cia Vajtswv coj nej los nrog Vajtswv sib raug zoo. Yexus Khetos yeej ibtxwm tsis muaj txim, tiamsis Vajtswv muab peb lub txim rau nws ris. Vajtswv ua li ntawd kom peb cov uas nrog Yexus Khetos koom ib txojsia ua tau neeg ncaj ncees ib yam li Vajtswv yog tus uas ncaj ncees. Peb cov uas ua Vajtswv tes haujlwm, peb ntuas nej hais tias nej tsis txhob ua rau tej koob hmoov uas Vajtswv foom rau nej lawm tsis muaj nqis. Rau qhov Vajtswv txojlus hais tias, “Thaum lub sijhawm uas kuv txaus siab rau nej, thaum ntawd kuv mloog nej tej lus thov. Hnub uas nej dim yog kuv pab nej.” Nej ua tib zoo mloog kuv tej lus. Lub sijhawm no yog lub sijhawm uas Vajtswv pom zoo pab nej. Hnub no yog hnub ua nej yuav dim tau nej lub txim. Peb yeej tsis xav cia leejtwg thuam tau peb tes haujlwm, peb thiaj tsis muab ib yam dabtsi los cuab leejtwg kev. Peb ua txhua yam rau sawvdaws pom hais tias peb yog Vajtswv cov tubtxib. Peb ua siab ntev tiv teebmeem, nyiaj kev txomnyem thiab kev nyuaj siab. Luag muab peb nplawm, muab peb kaw rau hauv tsev lojcuj thiab puav peb ntes. Peb ua haujlwm khwv khwv yoo dab ntub zias thiab yoo tshaib yoo nqhis; txawm yog li ntawd los peb ua siab dawb siab zoo, paub qhov tseeb, ua siab ntev, muaj lub siab hlub lwm tus, sawvdaws thiaj pom hais tias peb yog Vajtswv cov tubtxib. Peb muaj lub siab hlub sawvdaws tiag tiag, peb niaj hnub qhia Vajtswv txojlus uas yog qhov tseeb thiab peb lub neej ua rau sawvdaws pom Vajtswv lub hwjchim. Tej cuabyeej uas peb siv tawmtsam yeebncuab thiab ntis peb lub cev twb yog qhov uas peb ua peb lub neej zoo thiab ncaj ncees. Tej neeg muaj ibtxhia hwm peb, ibtxhia saib tsis taus peb. Ibtxhia thuam peb ibtxhia qhuas peb. Txawm yog peb yeej hais lus tseeb xwb los tseem muaj neeg hais tias peb hais dag; peb zoo li cov neeg uas tsis muaj leejtwg paub, tiamsis sawvdaws puavleej paub peb. Peb zoo li cov neeg uas tuag lawm, tiamsis nej sim siab peb tseem muaj sia nyob. Luag tsimtxom peb, tiamsis peb tsis tuag; peb muaj kev txhawjxeeb, tiamsis peb tseem niaj hnub zoo siab. Peb yog neeg pluag, tiamsis peb tseem ua rau ntau leej npluanuj. Peb tsis muaj ib yam dabtsi li, tiamsis qhov tseemceeb ib puas tsav yam puavleej yog peb tug. Cov kwvtij uas nyob hauv lub nroog Kauleethaus, peb twb nthuav peb lub siab lub ntsws qhia tseeb rau nej lawm, peb tsis tau zais ib los hlo li. Peb tsis tau zais siab rau nej, tsuas yog nej thiaj zais siab rau peb xwb. Kuv suav hais tias nej yog kuv cov menyuam, kuv thiaj hais li no rau nej, nej cia li qhia hlo nej lub siab rau peb ib yam li peb twb qhia peb lub siab rau nej lawm. Tus uas ntseeg Vajtswv tsis txhob mus nrog tus uas tsis ntseeg koom kwv ib tug quab, rau qhov nkawd yeej kwv tsis tau ua ke. Qhov phem thiab qhov zoo, qhov kaj thiab qhov tsaus yeej nyob tsis tau ua ke. Yexus Khetos thiab dab Ntxwgnyoog yeej nyob tsis tau ua ke. Tus uas ntseeg thiab tus uas tsis ntseeg nyias yeej nyiam nyias lawm ib yam. Yeej tsis muaj leejtwg yuav nqa mlom mus teev hauv Vajtswv lub tuamtsev, rau qhov peb lub cev yog Vajtswv tus uas muaj sia nyob lub tuamtsev. Raws li Vajtswv txojlus uas hais tias, “Kuv yuav muab lawv ua kuv qhov chaw nyob thiab kuv yuav niaj hnub nrog lawv nyob. Kuv yuav yog lawv tus Vajtswv thiab lawv yuav yog kuv haivneeg.” Yog li ntawd tus Tswv thiaj hais tias, “Nej cia li tso plhuav lawv cov ntawd tseg mus nyob rau ib cag, thiab nej tsis txhob kov tej uas qias kuv thiaj yuav yuav nej. Kuv yuav yog nej txiv, nej yuav yog kuv cov tub cov ntxhais. Tus Tswv uas muaj hwjchim loj kawg nkaus yog tus uas hais li no.” Cov kwvtij uas kuv hlub, Vajtswv twb coglus li no rau peb lawm. Yog li ntawd, peb yuav tsum ua neeg zoo kawg nkaus thiab paub ntshai Vajtswv. Peb yuav tsum tso plhuav tej kev txhaum uas peb ua thiab peb xav huv tibsi tseg. Nej tsis txhob tso peb tseg. Peb yeej tsis tau ua txhaum rau leejtwg lossis xav txo leejtwg lub neej lossis ntxias leejtwg tug yuav. Kuv hais li no tsis yog kuv cem nej. Kuv twb qhia rau nej lawm hais tias nej niaj hnub nyob rawv hauv kuv lub siab. Txawm yog yuav ciaj thiab tuag los peb yeej yuav nyob ua ke mus li. Kuv cia siab rau nej thiab qhuas nej. Txawm yog peb raug kev txomnyem ntau yam los kuv tsis poob siab, kuv zoo siab kawg li. Thaum peb mus txog pem lub xeev Makedaunias peb tsis tau so li. Muaj kev kub ntxhov puagncig peb. Peb lub ncauj nrog luag sib cav, peb lub siab niaj hnub txhawj ntshai. Tiamsis Vajtswv tus uas txhawb cov neeg uas poob siab lub zog, nws txhawb peb lub zog, rau qhov nws kom Titus tuaj xyuas kuv. Tsis yog li ntawd xwb, Titus tuaj qhia rau kuv hais tias nej txhawb Titus lub zog. Nej xav xav pom kuv thiab tej uas nej ua los lawm ua rau nej nyuaj siab kawg li. Nws hais tias, nej muab siab npuab kuv heev. Tej ntawd ua rau kuv zoo siab kawg li. Txawm yog tsab ntawv uas kuv sau xa tuaj rau nej ntawd ua rau nej tu siab los xij, kuv yeej tsis tu siab li. Tsuas yog kuv muaj ntsis txhawj xwb, thaum kuv hnov hais tias tsab ntawv ntawd ua rau nej tu siab ib nyuag ntu. Tiamsis nimno kuv zoo siab tsis yog vim kuv ua rau nej tu siab, vim qhov uas nej tu siab ntawd ua rau nej tso nej tej kev txhaum tseg. Twb yog Vajtswv cia nej tu siab, yog li ntawd tej lus uas peb hais yeej tsis txhaum, rau qhov qhov uas Vajtswv cia nej tu siab, qhov ntawd ua rau nej tso nej tej kev txhaum tseg kom nej tau txojkev cawm dim. Yog li ntawd tsis tas leejtwg yuav tu siab. Tiamsis cov neeg uas tsis ntseeg Vajtswv txawm yog lawv paub tu siab rau lawv tej kev txhaum los yog lawv tsis tso tseg, lawv yeej yuav raug kev ploj kev tuag. Nej sim ua tib zoo xav saib, Vajtswv cia nej tu siab li ntawd muaj nqis hov ntau rau nej. Tej ntawd ua rau nej mob siab thiab ua rau nej kub siab lug daws nej zaj kom sawvdaws paub hais tias nej tsis tau ua txhaum, ua rau nej nco txog kuv thiab ua rau nej zoo siab rau txim rau tus uas ua txhaum. Tej uas muaj no sawvdaws puavleej pom hais tias nej tsis tau ua txhaum ib qho li. Yog li ntawd, txawm yog kuv sau tsab ntawv ntawd tuaj rau nej los kuv yeej tsis txhob txwm sau tuaj qhia tus uas ua txhaum ntawd lossis qhia tus uas tus ntawd ua txhaum rau. Tiamsis kuv sau tuaj qhia nej kom nej nco ntsoov hais tias, Vajtswv pom nej muab siab npuab peb kawg li. Twb yog vim li ntawd peb thiaj zoo siab. Tsis yog li ntawd xwb, Titus tuaj ua rau peb zoo siab kawg li thiab, rau qhov nej txhua tus puavleej ua rau nws tso siab plhuav tsis txob tsis txhawj lawm. Kuv qhuas nej rau nws. Qhov uas kuv qhuas li ntawd yeej tsis ua rau kuv poob ntsejmuag. Tej uas peb qhia nej puavleej yog tej uas tseemceeb tsis muaj ib qho dag li. Ib yam nkaus li ntawd, tej uas peb qhuas nej rau Titus yeej muaj tseeb tiag. Thaum Titus pom hais tias nej mloog nws lus, saib taus nws thiab hwm nws, nws hajyam hlub nej heev. Kuv zoo siab kawg li, rau qhov kuv yeej cia siab tau rau nej. Cov kwvtij peb xav kom nej paub hais tias Vajtswv twb foom koob hmoov ntau kawg rau cov ntseeg uas nyob qhov txhia chaw hauv lub xeev Makedaunias lawm. Tej kev txomnyem uas lawv raug twb yog sim saib lawv puas muab siab rau ntseeg. Txawm yog lawv txomnyem npaum li ntawd los lawv tseem zoo siab kawg li. Lawv yeej yog cov neeg uas pluag heev, tiamsis lawv muaj nplooj siab dawb paug muab lawv tej nyiaj pab lwm tus. Kuv paub hais tias lawv sau lawv tej nyiaj pab lwm tus raws li uas lawv pab tau. Tsis yog li ntawd xwb, lawv tseem muab tshaj tej ntawd thiab. Lawv niaj hnub thov peb cia lawv xa nyiaj mus pab cov ntseeg Vajtswv uas nyob nram lub xeev Yudas. Yeej tsis muaj leejtwg yuam lawv ua li ntawd, lawv cia li ua lawv xwb. Peb tsis xav hais tias lawv yuav muab ntau npaum li ntawd. Qhov tseemceeb lawv yeej xub cia peb tus Tswv kav lawv lub siab lawm. Thiab lawv zoo siab cia peb txib lawv mus ua haujlwm raws li Vajtswv pom zoo. Yog li ntawd peb thiaj thov Titus tus uas pib ua txoj haujlwm no rov tuaj tim nej. Nws yuav pab nej ua txoj haujlwm uas nej zoo siab ua ntawd kom tiav. Nej twb muaj txhua yam txhij lawm, tsis hais cov neeg uas muab siab rau ntseeg, cov uas txawj qhia, cov uas txawj ntse, cov uas kub siab lug pab lwm tus thiab cov uas hlub peb. Yog li ntawd tsimnyog nej zoo siab hlo pab ua txoj haujlwm no thiab. Kuv tsis yuam nej ua li ntawd, tiamsis kuv tsuas qhia rau nej hais tias lwm cov kub siab lug sib pab li cas xwb. Kuv xav paub hais tias nej puas muaj lub siab hlub tiag. Rau qhov nej yeej paub hais tias peb tus Tswv Yexus Khetos hlub peb kawg li. Txawm yog nws yog tus uas npluanuj los nws zoo siab los ua tus uas npluag. Nws ua li ntawd twb yog nws xav pab nej kom nej ua tau neeg npluanuj. Kuv xav hais tias nej cia li ua txoj haujlwm uas tsaib no nej twb pib ua lawm kom tiav. Yog nej ua li ntawd yuav zoo heev. Nej yeej yog cov uas xub pib ua txoj haujlwm ntawd, tiamsis tsis yog nej xub pib ua xwb, nej yeej zoo siab hlo ua thiab. Thaum chivthawj nej yeej kub siab lug ua. Yog li ntawd nimno nej cia li rau siab ntso ua kom tiav raws li nej ua tau. Rau qhov yog nej zoo siab hlo pab raws li nej muaj, Vajtswv zoo siab yuav npaum li ntawd, yeej tsis muaj leejtwg thov tej uas nej tsis muaj. Tsis yog kuv xav kom lwm cov tau zoo tiamsis cia nej txomnyem. Nimno nej muaj ntau, tsimnyog nej pab cov uas tsis muaj. Thaum nej tsis muaj, lawv muaj, lawv ho pab nej. Yog li ntawd nej sawvdaws yuav muaj sib npaug zos. Raws li Vajtswv txojlus hais tias, “Tus uas khaws tau ntau nws yeej tsis muaj seem, tus uas khaws tau tsawg los nws yeej muaj txaus.” Peb ua Vajtswv tsaug, rau qhov Vajtswv ua rau Titus muaj lub siab kub lug pab nej. Titus tuaj pab nej tsis yog vim peb thov nws xwb, tiamsis nws yeej zoo nws siab tuaj. Peb txib peb ib tug kwvtij nrog Titus tuaj. Tus kwvtij ntawd yog tus uas qhia txojmoo zoo, cov ntseeg uas nyob qhov txhia chaw puavleej hwm nws heev. Tsis yog li ntawd xwb, nws yog tus uas cov ntseeg tsa nrog peb ua txoj haujlwm sau nyiaj no. Txoj haujlwm no yuav ua rau peb tus Tswv Yexus Khetos tau ntsejmuag thiab ua rau cov ntseeg nrad paub hais tias peb yeej xav pab lawv tiag. Peb ua tib zoo ua li no kom thiaj tsis muaj xaiv muaj lus thaum peb xa cov nyiaj no mus pab cov ntseeg nrad. Rau qhov peb xav ua ncaj ua ncees. Tsis yog peb ua rau Vajtswv pom xwb, tiamsis peb ua rau neeg pom thiab. Yog li ntawd peb yuav txib peb tus kwvtij nrog lawv tuaj. Peb twb xyuas nws tes haujlwm ntau zaus lawm peb pom hais tias nws kub siab lug xav pab. Nimno nws cia siab tau rau nej, nws hajyam xav pab nej heev. Tus Titus uas yuav tuaj no nws yog ib tug uas nrog kuv ua haujlwm pab nej. Tiamsis cov kwvtij uas nrog Titus tuaj, lawv yog cov uas cov ntseeg uas nyob qhov txhia chaw txib tuaj. Thiab lawv yog cov uas ua rau Yexus Khetos tau ntsejmuag. Yog li ntawd nej yuav tsum hlub lawv, cov ntseeg uas nyob qhov txhia chaw thiaj yuav paub hais tias, nej hlub cov neeg uas lawv txib tuaj ntawd. Thiab lawv yuav paub hais tias tej lus uas peb qhuas nej rau lawv yeej muaj tseeb tiag. Tsis tas kuv yuav sau ntawv tuaj qhia nej hais txog tej nyiaj uas sawvdaws yuav xav mus pab cov ntseeg Vajtswv uas nyob nram lub xeev Yudas. Kuv yeej paub hais tias nej puavleej yuav zoo siab pab, kuv twb qhuas nej rau cov neeg pem lub xeev Makedaunias lawm hais tias, “Cov kwvtij uas nyob hauv lub xeev Akhayas lawv twb xub npaj nyiaj cia puag tsaib no los lawm.” Qhov uas nej kub siab lug xav pab, qhov ntawd ua rau lawv ras dheev ua txoj haujlwm no. Nimno kuv txib cov kwvtij no tuaj xyuas nej kom lawv pom hais tias tej lus uas kuv qhuas nej rau lawv, tsis yog kuv lam qhuas qhuav qhuav xwb, tiamsis nej yeej npaj nyiaj txhij raws li kuv tau hais lawm tiag. Yog cov neeg uas nyob pem lub xeev Makedaunias uas nrog kuv tuaj lawv pom hais tias nej tseem tsis tau npaj raws li kuv hais, ntshai nej thiab peb yuav poob ntsejmuag kawg li. Yog li ntawd kuv thiaj xav hais tias kuv yuav tsum thov cov kwvtij ntawd ua kuv ntej tuaj nram nej, cia lawv sau cov nyiaj uas nej twb xub hais tseg lawm hais tias nej yuav muab rau peb. Thaum kuv tuaj txog nej yuav npaj txhij lawm. Yog nej ua li ntawd lawv yuav pom hais tias nej yeej zoo siab hlo muab tsis yog kuv yuam nej. Nej yuav tsum nco ntsoov hais tias tus uas cog tsawg nws yeej yuav tau sau tawg. Tus uas cog ntau nws yeej yuav tau sau ntau. Yog li ntawd nyias yuav tsum muab raws li nyias twb xub xav tseg lawm, tsis yog yuav khuvxim lossis yus yuav yuam yus lub siab muab. Vajtswv tus uas muaj ib puas tsav yam. Nws yuav pub tej uas nej yuav tsum muaj rau nej kom nej niaj hnub muaj txaus siv thiab muaj txaus coj mus pab lwm tus. Raws li Vajtswv txojlus hais tias, “Tus uas muaj nplooj siab dawb paug pab cov neeg pluag, tus ntawd tes haujlwm yuav nyob mus ibtxhis.” Vajtswv tus uas pub noob qoob noob loo rau tus uas cog thiab pub zaub pub mov rau tus uas noj, nws yeej yuav pub tej noob qoob noob loo rau nej. Nws yuav ua kom tej qoobloo uas nej cog loj hlob zoo thiab tej haujlwm zoo uas nej ua tawg paj txi txiv ncw. Nws yuav pub ib puas tsav yam rau nej kom nej muaj txaus siv thiab muaj txaus pab lwm tus. Yog li ntawd yuav muaj ntau leej ua Vajtswv tsaug, rau qhov nej muab nej tej nyiaj rau peb nqa mus pab lawv. Tej uas nej ua no tsis yog yuav pab cov ntseeg Vajtswv uas txomnyem xwb, tiamsis yuav ua rau sawvdaws niaj hnub ua Vajtswv tsaug thiab. Thaum sawvdaws pom tej nyiaj uas nej pab no yuav muaj ntau leej ua Vajtswv tsaug, rau qhov nej muab siab npuab txojmoo zoo uas hais txog Yexus Khetos zaj uas nej ntseeg. Thiab nej muaj nplooj siab dawb paug pab lawv thiab pab sawvdaws. Lawv yuav nco ntsoov nej tshav ntuj thiab thov Vajtswv pab nej, rau qhov lawv pom hais tias Vajtswv twb foom koob hmoov ntau kawg rau nej lawm. Peb cia li ua Vajtswv tsaug, rau qhov Vajtswv twb pub Vajtswv txoj koob hmoov uas muaj nqis kawg nkaus rau peb lawm. Kuv yog Paulus. Nej ua tib zoo mloog kuv tej lus. Muaj neeg hais tias thaum kuv nrog nej nyob kuv ntshai nej, tiamsis thaum kuv tsis nrog nej nyob lawm kuv ua tawv kawg li tuaj rau nej. Yexus Khetos pub kuv muaj lub siab mos siab muag thiab lub siab hlub ib yam li nws, kuv thiaj thov ntuas nej hais tias, thaum kuv tuaj xyuas nej, nej tsis txhob ua rau kuv, tau ua tawv rau nej, rau qhov kuv yeej muaj cuabkav ua tawv rau cov neeg uas thuam peb hais tias peb xav kom peb tau ntsej tau muag ib yam li neeg ibtxwm xav. Peb yeej nyob hauv ntiajteb no tiag, tiamsis peb tsis tawmtsam li neeg ibtxwm tawmtsam. Thaum peb tawmtsam yeebncuab peb tsis siv tej cuabyeej uas neeg ibtxwm siv. Tiamsis peb siv tej cuabyeej uas Vajtswv tus uas muaj hwjchim muab rau peb, peb thiaj rhuav tau yeebncuab lub yeej kom puastsuaj; peb cem tej neeg uas qhia tsis tseeb kom lawv tsis muaj lus hais. Peb rhuav tej uas neeg muab los thaiv tsis pub sawvdaws paub Vajtswv. Thiab peb coj cov neeg uas ua yeebncuab rau Vajtswv los mloog Yexus Khetos lus. Thaum peb pom hais tias nej mloog lus lawm tiag, peb mam li rau txim rau tej uas tsis mloog lus. Nej ua tib zoo saib tej uas nej pom. Nej cov ntseeg puas muaj ib tug khav hais tias nws yog Yexus Khetos tus tubtxib. Yog muaj, tus ntawd yuav tsum ua tib zoo xyuas saib nws yog neeg zoo li cas. Rau qhov peb yog Yexus Khetos cov tubtxib ib yam nkaus li tus ntawd thiab. Txawm yog kuv khav hais tias peb tus Tswv Yexus Khetos nws pub hwjchim rau peb los kuv yeej tsis txajmuag hlo li. Nws ua li ntawd kom peb pab tau nej lub neej vammeej, tsis yog yuav rhuav nej lub neej. Kuv hais li no tsis yog kuv hais kom nej xav hais tias kuv pheej sau ntawv tuaj hem nej. Tej zaum yuav muaj neeg hais tias, “Paulus tej ntawv Paulus hais tawv kawg li, tiamsis thaum nws tuaj nws ua tus nyuag tuag e, nws hais lus twb tsis muaj kuab hlo li.” Tus uas lam hais li ntawd nws yuav tsum nco ntsoov hais tias tej lus uas peb sau rau hauv ntawv xa tuaj rau nej, thiab tej lus uas peb hais thaum peb nrog nej nyob, tej ntawd yeej tsis txawv qhov twg li. Txawm yog peb nyob deb nyob ze los peb yeej hais ib yam nkaus. Peb yeej tsis kam muab peb piv rau cov neeg uas lawv khav hais tias lawv zoo dua lwm tus. Cov neeg uas khav li ntawd lawv ruam kawg li. Lawv ib tug ntsuas ib tug thiab muab ib tug piv rau ib tug. Peb cov peb tsis khav tshaj tej uas peb muaj. Peb tsuas khav txij tej uas Vajtswv muab rau peb ua xwb, tej ntawd yog tej uas peb ua pab nej. Thaum peb tuaj xyuas nej thiab qhia txojmoo zoo uas hais txog Yexus Khetos zaj rau nej, peb tsis tau ua dhau tej uas Vajtswv kom peb ua. Peb tsis tau muab tes haujlwm uas lwm tus ua coj los khav, peb tsuas khav txij tej uas Vajtswv muab rau peb ua xwb. Peb cia siab hais tias nej yuav muab siab rau ntseeg zuj zus ntxiv thiab cia siab hais tias peb yuav ua tej haujlwm uas hajyam tseemceeb dua tej no pab nej. Txawm yog li ntawd los peb tsuas ua txij li tej uas Vajtswv tu cia rau peb ua xwb. Tom qab ntawd peb yuav tau mus qhia txojmoo zoo rau lwm qhov. Peb yeej yuav tsis khav tej haujlwm uas lwm tus twb xub mus ua cia lawm ib zaug li. Tiamsis Vajtswv txojlus hais tias, “Tus uas xav khav nws tsuas muaj cuabkav khav tej uas Vajtswv twb ua los lawm xwb.” Rau qhov tus uas nws lam khav nws xwb yeej tsis muaj leejtwg hwm nws, tiamsis tus uas Vajtswv qhuas sawvdaws puavleej yuav hwm tus ntawd. Txawm yog kuv hais lus zoo li tus ruam hais los thov nej ua siab ntev mloog kuv tej lus. Kuv khib nej ib yam li Vajtswv khib, rau qhov nej zoo ib yam li tus hluas nkauj uas tsis tau tham dua hluas nraug. Kuv twb qhaib nej cia rau ib tug txivneej lawm, tus ntawd yog Yexus Khetos. Kuv ntshai nyob tsam nej fav siab thiab tsis muab siab npuab Yexus Khetos tiag tiag ib yam li thaud nab ntxias tau Evas fav siab. Rau qhov nej zoo siab mloog cov neeg uas qhia Yexus Khetos zaj txawv li peb qhia. Nej twb tau Vajtswv tus Ntsujplig thiab txojmoo zoo uas peb qhia lawm, tiamsis nej tseem ho mus nrhiav lwm tus Ntsujplig thiab lwm txojmoo zoo. Kuv yeej tsis tau xav hais tias kuv muaj hwjchim yau dua nej cov timthawj uas nej hais tias muaj hwjchim. Txawm yog kuv tsis tshua txawj hais li tej neeg txawj ntse hais los kuv yeej paub tej uas kuv qhia lub ntsiab. Qhov tseemceeb, txhua yam haujlwm uas peb ua los lawm, puavleej ua rau nej paub tseeb tej lus uas kuv hais no huv tibsi. Thaum kuv tuaj qhia txojmoo zoo uas hais txog Vajtswv zaj rau nej, kuv yeej tsis thov ib qho nqi zog li. Kuv txo hwjchim kom nej tau ntsejmuag. Kuv ua li ntawd yog kuv ua txhaum lawm los? Thaum kuv tuaj nrog nej nyob qhia nej, yeej yog cov ntseeg uas nyob lwm qhov xa nyiaj tuaj yug kuv. Lawv xa nyiaj tuaj rau kuv li ntawd kuj ib yam li kuv nyiag lawv tej nyiaj tuaj ua haujlwm pab nej. Thaum kuv nrog nej nyob kuv tsis muaj nyiaj siv, kuv yeej tsis thov nej pab kuv, rau qhov cov kwvtij uas tuaj pem Makedaunias tuaj, lawv nqa tej uas kuv tsis muaj tuaj rau kuv. Yav tas los lawm kuv tsis tau ua rau nej ntxhov siab. Txawm yog yav tom ntej no los kuv yeej yuav tsis ua rau nej ntxhov siab thiab. Kuv yeej paub Yexus Khetos tej lus uas yog qhov tseeb. Yog li ntawd kuv paub hais tias tej uas kuv khav no yuav nrov ncha mus thoob plaws hauv lub xeev Akhayas tsis muaj leejtwg yuav txwv tau li. Vim li cas kuv thiaj hais li no? Kuv tsis hlub nej los? Vajtswv yeej paub hais tias kuv hlub nej. Tej uas nimno kuv ua, kuv yeej yuav ua mus li kom cov neeg uas nej hu ua timthawj, lawv thiaj tsis muaj lus khav hais tias lawv ua lawv tes haujlwm ib yam li peb ua. Lawv cov ntawd yeej tsis yog timthawj tiag, lawv yog timthawj cuav. Lawv ua lawv tes haujlwm ntxias sawvdaws. Thiab lawv ua txuj ua li lawv yog Yexus Khetos cov timthawj. Tej uas lawv ua ntawd yeej tsis txaus leejtwg yuav poob siab. Txawm yog dab Ntxwgnyoog los nws twb txia tau ua li ib tug timtswv ceebtsheej uas muaj hwjchim ci ntsa iab. Yog li ntawd, yog dab Ntxwgnyoog cov tubtxib yuav txia ua li cov tubtxib uas ncaj ncees yeej tsis nyuaj hlo li. Tiamsis thaum kawg lawv cov ntawd nyias yeej yuav tau raws li tej uas nyias tau ua los lawm. Kuv rov hais dua ib los rau nej hais tias, nej tsis txhob xav hais tias kuv yog neeg ruam. Yog nej xav li ntawd nej cia li ua siab ntev mloog kuv tej lus, cia kuv khav ob peb los li tus ruam khav. Tej lus uas kuv hais no tsis yog tej uas peb tus Tswv Yexus kom kuv hais. Qhov uas kuv khav no kuv lees hais tias kuv hais li tus ruam hais tiag. Yeej muaj neeg coob coob nyias niaj hnub khav hais tias nyias txawj nyias ntse. Yog li ntawd kuv yuav khav li lawv thiab. Nej yeej txawj ntse heev lawm. Nej thiaj ua siab ntev mloog cov neeg ruam hais. Nej ua siab ntev rau cov neeg uas yuam nej ua li ub li no, cov uas noj nej tug, cov uas cuab hmuv cuab nta tos nej kev, ua saib tsis taus nej lossis ntaus nej ntsejmuag. Kuv txajmuag lees rau nej hais tias, peb tsis muaj lub siab tawv ua li ntawd rau nej. Tiamsis yog lwm tus twb muaj cuabkav khav li ub li no, kuv yeej muaj cuabkav khav thiab. Kuv hais li no kuv hais li tus ruam hais. Lawv yog neeg Henplais los? Kuv yeej yog thiab. Lawv yog neeg Yixalayees los? Kuv yeej yog thiab. Lawv yog Anplahas cov xeebntxwv los? Kuv yeej yog thiab. Lawv yog Yexus Khetos cov tubtxib los? Kuv yog tus tubtxib uas zoo dua lawv. Kuv hais li no kuv hais li tus neeg vwm hais. Kuv ua haujlwm khwv dua lawv. Kuv raug kaw hauv tsev lojcuj ntau dua lawv. Kuv raug luag nplawm ntau dua lawv. Kuv ntsib kev ploj kev tuag ntau dua lawv. Cov Yudais muab kuv nplawm tsib zaug, ib zaug nplawm peb caug cuaj nplawg; cov neeg Loos muab nplawm nplawm kuv peb zaug. Muaj ib zaug luag muab pobzeb ntaus kuv. Kuv caij nkoj tog peb zaug. Muaj ib zaug kuv poob rau hauv hiavtxwv tau ib hnub ib hmos. Thaum kuv taug kev mus rau ub rau no kuv ntsib teebmeem, tsis hais dej nyab lossis tubsab ntaus. Kuv haivneeg thiab lwm haivneeg puavleej tsimtxom kuv. Kuv raug kev txomnyem tsis hais hauv tej nroog, hauv havzoov hav tsuag thiab hauv hiavtxwv, thiab tej kwvtij kwvnpawg los ua phem rau kuv. Kuv khwv tas hnub tas hmo tsis tau so tsis tau pw yoo dab ntub zias. Kuv tshaib kuv nqhis tsis muaj txaus noj txaus haus, tsis muaj ris tsho hnav. Tsis muaj tsev nyob. Tsis yog li ntawd xwb, kuv niaj hnub niaj hmo txhawj cov ntseeg uas nyob qhov txhia chaw. Yog leejtwg qaug zog kuv yeej nrog tus ntawd qaug zog thiab. Yog leejtwg ua txhaum kuv nyuaj siab kawg li. Yog kuv xav hais tias kuv yuav tsum khav xwb ces kuv yeej yuav khav hais txog zaj uas ua rau sawvdaws pom hais tias kuv yog tus uas tsis muaj hwjchim dabtsi li. Tsimnyog peb ua rau Vajtswv tus uas yog Yexus Khetos Leej Txiv tau ntsejmuag mus ibtxhis li. Nws yeej paub hais tias kuv tsis hais dag. Thaum kuv nyob hauv lub nroog Damaxes, Vajntxwv Aletas kom tus tswvxeev txib tubrog mus zov lub roojvag nroog tos ntes kuv. Tiamsis muaj neeg muab ib lub tawb ntim kuv thiab muab kuv tso dauv ntawm qhovrai rau sab nraud, tus tswvxeev thiaj ntes tsis tau kuv. Txawm yog tej uas kuv yuav khav tsis muaj qabhau los kuv yeej yuav khav. Tiamsis kuv yuav hais txog tej uas peb tus Tswv Yexus qhia rau kuv thiab ua rau kuv ua yogtoog pom. Kuv paub ib tug txivneej uas yog tus ntseeg. Tau kaum plaub xyoos los lawm, Vajtswv coj tus txivneej ntawd mus saum ntuj ceebtsheej qhov uas siab tshaj plaws. (Kuv yeej tsis paub xyov tus ntawd ua yogtoog xwb lossis muaj li ntawd tiag, Vajtswv tib leeg thiaj li paub.) Kuv thov hais dua li no, kuv paub hais tias Vajtswv coj tus ntawd mus saum qhov chaw uas tau zoo nyob kaj siab lug. (Kuv yeej tsis paub xyov tus ntawd ua yogtoog xwb lossis muaj li ntawd tiag, Vajtswv tib leeg thiaj li paub;) thaum nws mus nyob saud, nws hnov tej uas tsis muaj neeg piav tau thiab hnov tej uas luag tsis pub leejtwg qhia. Yog li ntawd kuv yuav khav txog tus ntawd zaj, tiamsis kuv zaj kuv yeej tsis khav li. Kuv tsuas khav hais txog zaj uas ua rau sawvdaws pom hais tias, kuv tsis muaj hwjchim dabtsi li xwb. Yog kuv xav khav kuv yeej tsis yog neeg ruam, rau qhov tej uas kuv hais puavleej muaj tseeb xwb. Txawm yog li cas los kuv yuav tsis khav, rau qhov kuv ntshai nyob tsam muaj neeg ho yuav qhuas kuv heev. Cia lawv qhuas tej uas lawv pom kuv ua thiab hnov kuv hais xwb. Vajtswv twb ua tej uas zoo kawg nkaus rau kuv pom lawm. Nws ntshai nyob tsam kuv khav heev nws thiaj cia kuv lub cev muaj ib qho mob. Qhov ntawd zoo li dab Ntxwgnyoog ib tug tubtxib uas muab kuv nplawm kom kuv tsis txhob khav. Kuv twb thov Vajtswv kho kuv qhov mob ntawd peb zaug lawm, tiamsis Vajtswv teb kuv hais tias, “Kuv pom zoo hlub koj ces txaus lawm. Kuv yuav pub kuv lub hwjchim rau tus uas qaug zog.” Vajtswv hais li no, yog li ntawd qhov uas kuv qaug zog ua rau kuv zoo siab kawg li, rau qhov Yexus Khetos lub hwjchim yuav tsomkwm kuv. Kuv yog tus uas ua Yexus Khetos tes haujlwm, yog li ntawd txawm yog kuv qaug zog, raug luag thuam, raug kev txomnyem, raug kev tsimtxom, raug kev nyuaj siab los kuv yeej zoo siab, rau qhov thaum kuv qaug zog thaum ntawd kuv yuav muaj zog. Kuv ua li tus neeg ruam ua, tiamsis yeej yog nej yuam kuv ua li ntawd. Twb tsimnyog nej yuav qhuas tej uas kuv ua tiamsis nej tsis qhuas. Txawm yog kuv tsis tsimtxiaj li los kuv yeej tsimtxiaj ib yam li cov neeg uas nej hu hais tias nej cov “timthawj.” Thaum kuv tuaj nrog nej nyob, kuv ua siab ntev ua haujlwm, kuv ua tej txujci loj thiab tseemceeb. Tej ntawd twb ua rau nej paub tseeb lawm hais tias, kuv yog ib tug timthawj tiag. Nej tseem xav hais tias kuv pab cov ntseeg uas nyob lwm qhov heev dua li pab nej thiab los? Kuv pab sawvdaws ib yam nkaus, tsuas yog kuv tsis tau thov nej yug kuv xwb. Yog kuv ua li ntawd txhaum lawm, thov nej zam txim rau kuv. Zaum no yog zaum peb uas kuv twb yuav tuaj xyuas nej. Kuv yuav tsis thov nej ib yam dabtsi li. Kuv xav tuaj xyuas nej xwb tsis yog kuv yuav tuaj thov nej nyiaj, rau qhov tej menyuam yeej tsis npaj qubtxeeg qubteg rau niamtxiv, tsuas muaj niamtxiv thiaj npaj qubtxeeg qubteg rau tej menyuam xwb. Kuv zoo siab muab kuv lub dag lub zog thiab kuv tej nyiaj huv tibsi pab nej. Twb yog vim kuv hlub nej heev, nej thiaj tsis hlub kuv zuj zus lawm los? Thaum kuv nrog nej nyob kuv yeej tsis tabkaum nej dabtsi li. Nyaj nej yuav pom li ntawd thiab, tiamsis ntshai yuav muaj qee leej hais tias kuv yog ib tug neeg muaj tswvyim heev, kuv txhob txwm tuaj ntxias nej. Kuv tau ntxias nej dabtsi yuav lossis kuv kom cov neeg uas kuv txib tuaj xyuas nej noj nej tug los? Kuv thov Titus thiab kuv txib ib tug ntseeg nrog Titus tuaj xyuas nej. Nyaj nej yuav tsis hais tias Titus noj nej tug. Titus wb koom ib lub siab pab nej thiab ua tib txoj haujlwm xwb. Tej zaum ntshai nej xav hais tias peb niaj hnub hais daws peb zaj xwb. Yeej tsis yog li nej xav. Peb hais raws li tej lus uas Yexus Khetos kom peb hais. Thaum peb hais peb yeej nco ntsoov hais tias, Vajtswv ntsia ntsoov peb. Cov kwvtij uas peb hlub, txhua yam uas peb ua yeej yog peb ua pab nej xwb. Kuv ntshai nyob tsam thaum kuv tuaj txog ntawm nej kuv yuav pom hais tias nej ua tsis haum kuv siab. Thiab nej yuav pom hais tias kuv ua tsis haum nej siab. Kuv ntshai nyob tsam kuv yuav pom nej sib cav sib ceg, sib khib sib ntxub, muaj lub siab hlob, ib leeg thuam ib leeg, taug xaiv, khavtheeb thiab tsim kev kub ntxhov. Lwm zaus thaum kuv tuaj xyuas nej, kuv ntshai nyob tsam Vajtswv rhuav kuv ntsejmuag. Thiab kuv yuav nyuaj siab rau cov neeg uas tseem tsis tau tso lawv tej kev txhaum tseg, tsis hais kev nkauj kev nraug thiab ua phem ua qias. Zaum no yog zaum peb uas kuv tuaj xyuas nej. Raws li Vajtswv txojlus hais tias, “Yog muaj xaiv muaj lus, yuav tsum yog ob leeg lossis peb leeg ua timkhawv thiaj tseeb.” Kuv xav ntuas nej cov uas twb ua txhaum los lawm thiab ntuas sawvdaws. Thaum kuv tuaj xyuas nej zaum ob kuv twb ntuas nej ib zaug lawm, tiamsis nimno txawm yog kuv nyob deb nej los kuv rov qab ntuas nej ib zaug ntxiv hais tias, lwm zaus thaum kuv tuaj kuv yuav rau txim rau cov neeg uas ua txhaum txhua tus huv tibsi. Nej yeej yuav pom hais tias tej uas kuv qhia yog tej uas Yexus Khetos kom kuv hais. Thaum nws taug nej zaj nws yuav tsis ua tus nyuag qaug zog zis, tiamsis nws yuav ua rau nej pom nws lub hwjchim. Thaum luag muab nws ntsia rau saum ntoo khaublig, nws ua tus qaug zog zis. Txawm yog li ntawd los nimno nws tseem muaj sia nyob, rau qhov Vajtswv tus uas muaj hwjchim twb tsa nws sawv hauv qhov tuag rov qab los lawm. Peb cov uas nrog nws koom ib txojsia peb qaug zog ib yam li nws. Tiamsis Vajtswv pub hwjchim rau peb ib yam li pub rau nws, peb thiaj muaj cuabkav ntuas nej. Nej cia li ua tib zoo xav thoob thoob saib nej puas yog cov uas muab siab rau ntseeg los tsis yog? Nyaj nej yuav paub lawm hais tias Yexus Khetos nyob hauv nej lub siab. Yog nej tsis paub ntshai nej tsis yog cov uas ntseeg tiag. Kuv xav hais tias, nyaj nej yuav paub hais tias peb yog cov uas ntseeg tiag. Peb niaj hnub thov Vajtswv pab nej kom nej tsis txhob ua txhaum. Peb thov li ntawd tsis yog peb ua rau sawvdaws xav hais tias peb yog cov uas twb ua zoo lawm. Txawm yog muaj neeg saib tsis taus peb los peb yeej xav kom nej ua tau neeg zoo. Rau qhov peb yeej tsis ua ib yam dabtsi tabkaum Vajtswv txojlus uas yog txoj tseeb, peb tsuas ua raws li txojlus tseeb ntawd xwb. Thaum peb qaug zog nej muaj zog peb zoo siab kawg li. Peb thiaj thov Vajtswv pab nej kom nej ua tau nej lub neej zoo zuj zus ntxiv. Twb yog vim li ntawd thaum kuv tseem nyob deb nej, kuv thiaj sau tsab ntawv no tuaj rau nej. Thaum kuv tuaj xyuas nej txawm yog kuv yeej muaj cuabkav cem nej los kuv yuav tsis hais hnyav rau nej. Rau qhov peb tus Tswv Yexus Khetos tsuas pub kuv muaj cuabkav tsa nej lub neej xwb, kuv tsis muaj cuabkav yuav rhuav nej lub neej. Cov kwvtij, kuv tej lus muaj npaum li no xwb, nej yuav tsum muab siab rau xyaum ua nej lub neej kom zoo kawg nkaus. Nej cia li khaws kuv tej lus cia, sawvdaws ua ib lub siab thiab ib tug tsis txhob nrhiav xaiv nrhiav lus rua ib tug. Yog nej ua li ntawd Vajtswv tus uas hlub nej thiab pub rau nej tau zoo nyob kaj siab lug, nws yuav nrog nraim nej nyob. Cov kwvtij, nej ib tug hais noj qab nyob zoo rau ib tug thiab ib tug yuav tsum hlub ib tug. Cov ntseeg Vajtswv txhua tus, lawv hais noj qab nyob zoo rau nej sawvdaws. Thov peb tus Tswv Yexus Khetos foom koob hmoov rau nej. Thov Vajtswv hlub nej. Thiab thov Vajtswv tus Ntsujplig uas ua rau nej nyob sib raug zoo nrog nraim nej nyob. Kuv yog Paulus uas yog Vajtswv ib tug timthawj. Qhov uas kuv tau ua Vajtswv ib tug timthawj, tsis yog neeg tsa kuv ua lossis yog Vajtswv kom leejtwg tsa kuv ua, tiamsis yog Yexus Khetos thiab Vajtswv tus uas yog peb Leej Txiv, tus uas tsa Yexus Khetos sawv hauv qhov tuag rov qab los tsa kuv ua timthawj. Cov kwvtij uas nrog kuv nyob, lawv puavleej xa lus noj qab nyob zoo tuaj rau cov ntseeg txhua tus uas nyob hauv Kalatias: Thov Vajtswv tus uas yog peb Leej Txiv thiab tus Tswv Yexus Khetos foom koob hmoov rau nej, thiab pab kom nej tau zoo nyob kaj siab lug. Yexus Khetos muab nws txojsia los txhiv peb lub txim, nws ua li ntawd kom peb dim tiam uas neeg ua phem no. Qhov uas Yexus pab peb li ntawd yeej raws li Vajtswv tus uas yog peb Leej Txiv lub siab nyiam. Thov kom Vajtswv tau ntsejmuag mus ibtxhis li. Amees. Qhov uas nej tso Yexus Khetos tus uas hlub nej thiab xaiv nej cia lawm tseg sai sai no, thiab qhov uas nej mus mloog lwm zaj uas tsis yog Vajtswv txojmoo zoo, nej ua li ntawd kuv xav tsis thoob li. Qhov tseemceeb yeej tsis muaj “lwm zaj uas yog txojmoo zoo li,” tiamsis qee leej tuaj ua rau nej ntxhov, rau qhov lawv xav hloov Yexus Khetos txojmoo zoo. Kuv qhia rau nej hais tias txawm yog peb lossis ib tug timtswv saum ntuj los qhia lwm zaj rau nej uas txawv txojmoo zoo uas peb twb qhia rau nej lawm, ces tus ntawd yeej yuav poob rau hauv ntujtawg. Yav tas los peb twb qhia zaj no rau nej lawm, nimno kuv yuav rov qab qhia dua ib zaug rau nej li no tias: Yog leejtwg tuaj qhia lwm zaj rau nej uas txawv txojmoo zoo uas nej twb ntseeg lawm, ces tus ntawd yeej yuav poob rau hauv ntujtawg. Kuv hais li no nej xav hais tias yog kuv hais kom neeg qhuas kuv no los? Tsis yog li ntawd! Tiamsis kuv hais kom haum Vajtswv siab xwb! Nej xav hais tias kuv hais kom neeg nyiam kuv no los? Yog kuv tseem ua li ntawd, ces kuv yeej ua tsis tau Yexus Khetos tus tubtxib. Cov kwvtij, kuv xav qhia rau nej paub hais tias, txojmoo zoo uas kuv niaj hnub qhia yeej tsis yog neeg txoj. Kuv tsis tau kawm zaj no ntawm leejtwg thiab yeej tsis muaj neeg qhia rau kuv, tiamsis tus uas qhia txojmoo zoo ntawd rau kuv, nws yog Yexus Khetos. Nej twb hnov lawm hais tias thaum uas kuv tseem coj cov Yudais txoj kevcai, kuv tsimtxom cov neeg uas ntseeg Vajtswv heev kawg nkaus li, thiab xav muab cov ntseeg tua povtseg kom tas huv tibsi. Thaum kuv tseem coj cov Yudais txoj kevcai, peb cov kwvtij Yudais uas nrog kuv ib phaum, kuv yog tus uas coj zoo tshaj, thiab kuv yog tus uas coj peb cov yawgkoob tej kevcai nruj dua sawvdaws. Tiamsis Vajtswv hlub kuv, nws twb xaiv kuv cia puag hauv nruab thiab los lawm. Thiab Vajtswv hu kuv los ua nws txoj haujlwm, Vajtswv pom zoo qhia nws tus tub rau kuv paub, rau qhov nws xav kom kuv mus qhia txojmoo zoo uas hais txog nws tus tub rau lwm haivneeg, thiab kuv tsis tau mus nram lub nroog Yeluxalees mus xyuas cov uas xub ua timthawj dua kuv lawm. Tiamsis kuv cia li mus nram tebchaws Alanpias thiab cia li rov qab mus pem lub nroog Damaxes. Tom qab ntawd tau peb xyoos kuv mam li mus xyuas Petus nram lub nroog Yeluxalees, kuv mus nrog nws nyob nrad tau kaum tsib hnub; tiamsis kuv tsis pom lwm tus timthawj li, tsuas pom Yakaunpaus tus uas yog tus Tswv tus kwv xwb. Tej uas kuv sau tuaj rau nej no kuv hais tseeb xwb. Muaj Vajtswv nyob saud pom, kuv tsis dag nej. Tom qab ntawd kuv thiaj mus pem tej nroog uas nyob hauv cheebtsam Xilias thiab Kilikias. Thaum ntawd cov ntseeg uas nyob nram lub xeev Yudas, lawv tsis tau pom dua kuv li. Lawv tsuas hnov lwm tus hais tias, “Tus neeg uas thaud tsimtxom peb, nimno nws qhia zaj uas peb ntseeg uas yav tas los nws pheej ua kom puastsuaj!” Thiab lawv ua Vajtswv tsaug, vim lawv hnov hais tias kuv ua Vajtswv tes haujlwm lawm. Tom qab ntawd kaum plaub xyoos, kuv thiab Npananpas mam li rov qab mus nram lub nroog Yeluxalees thiab kuv coj Titus nrog kuv mus. Thaum kuv hu cov thawj tuaj txhij lawm, kuv piav txojmoo zoo uas kuv niaj hnub coj mus qhia lwm haivneeg rau lawv mloog. Kuv ua li no, rau qhov kuv tsis xav cia leejtwg rhuav kuv txoj haujlwm, tsis hais tej uas kuv ua los lawm lossis tej uas niaj hnub nimno kuv tseem ua. Tus kwv Titus uas nrog kuv ua haujlwm ntawd, txawm yog nws yog neeg Kilis los tsis muaj leejtwg hais tias yuav tsum muab nws ua kevcai txiav, txawm yog li ntawd los tseem muaj neeg ua txuj tuaj hais tias lawv yog cov kwvtij ntseeg thiab yog peb pab. Lawv cov ntawd muaj qee leej xav coj Titus mus ua kevcai txiav. Cov neeg ntawd yog cov uas tuaj xauj saib vim li cas peb cov uas ntseeg Yexus Khetos, peb ho muaj kev thajyeeb. Lawv ua li ntawd rau qhov lawv xav ntxias peb ua lawv qhev, tiamsis peb yeej tsis kam ua raws li lawv qhia ib nyuag qhov li, rau qhov peb tsis xav cia leejtwg rhuav qhov tseeb uas yog txojmoo zoo, nej thiaj yuav muaj txojmoo zoo uas yog txoj tseeb mus li. Tiamsis cov neeg uas sawvdaws hu hais tias lawv yog cov thawj, lawv cov ntawd yeej tsis tau qhia ib yam dabtsi uas kuv tsis tau paub rau kuv li. Txawm yog yav tas los lawv zoo li cas los Vajtswv yeej tsis xaiv leejtwg ntsejmuag. Lawv cov ntawd pom hais tias Vajtswv muab txoj haujlwm qhia txojmoo zoo rau lwm haivneeg rau kuv ua, ib yam li Vajtswv muab txoj haujlwm qhia txojmoo zoo rau cov neeg Yudais rau Petus ua. Rau qhov Vajtswv tsa kuv ua ib tug timthawj qhia lwm haivneeg ib yam li Vajtswv tsa Petus ua timthawj qhia cov Yudais. Yakaunpaus, Petus, thiab Yauhas uas sawvdaws hu ua cov thawjcoj, lawv puavleej paub hais tias Vajtswv twb muab txoj haujlwm ntawd rau kuv ua lawm; lawv thiaj tuav kuv thiab Npananpas sab tes xis, peb txhua tus thiaj pom zoo hais tias cia Npananpas wb mus qhia lwm haivneeg thiab cia lawv qhia cov Yudais. Lawv tsuas thov kom wb nco ntsoov pab cov neeg pluag uas yog lawv pab. Qhov uas lawv thov ntawd kuv yeej ibtxwm muab siab rau pab los lawm. Thaum Petus tuaj nyob pem lub nroog Ati-aukias, kuv cia li tabmeeg cem nws, rau qhov sawvdaws yeej paub hais tias nws tau ua txhaum lawm. Thaum Yakaunpaus tseem tsis tau txib neeg tuaj, Petus yeej nrog lwm haivneeg uas ntseeg Vajtswv noj mov ua ke. Tiamsis thaum Yakaunpaus txib neeg tuaj txog, Petus txawm cia li tsis nrog lwm haivneeg noj mov ua ke lawm, rau qhov nws ntshai cov neeg uas qhia hais tias yuav tsum muab lwm haivneeg ua kevcai txiav. Cov Yudais uas ntseeg Vajtswv muaj ob peb leeg ntaus siab yau ib yam li Petus; txawm yog Npananpas los kuj yuam kev ua ib yam li lawv thiab. Thaum kuv pom hais tias lawv txhua tus tsis ua raws li qhov tseeb uas txojmoo zoo qhia, kuv thiaj tabmeeg cem Petus rau sawvdaws hais tias, “Koj yog neeg Yudais, tiamsis koj twb mus ua li lwm haivneeg ua, koj tsis ua li koj yog neeg Yudais lawm. Ua li cas koj tseem yuam kom lwm haivneeg ua li cov neeg Yudais ua thiab?” Peb yog neeg Yudais, peb “Tsis yog lwm Haivneeg uas muaj txim.” Tiamsis peb yeej paub hais tias tus uas Vajtswv suav hais tias ncaj ncees, tsis yog tus uas xyaum coj raws li Vajtswv txoj kevcai, tiamsis yog tus uas ntseeg Yexus Khetos. Txawm yog peb los kuj ib yam nkaus li ntawd, qhov uas Vajtswv coj peb los nrog Vajtswv sib raug zoo twb yog vim peb ntseeg Yexus Khetos, tsis yog vim peb xyaum coj raws li Vajtswv txoj kevcai. Rau qhov tus uas Vajtswv suav hais tias ncaj ncees yeej tsis yog tus uas xyaum coj raws li Vajtswv txoj kevcai. Peb cov uas ntseeg Yexus Khetos sib raug zoo, Vajtswv thiaj suav hais tias peb yog cov uas ncaj ncees, yog peb tseem ua txhaum li lwm haivneeg, peb yuav hais tias Yexus Khetos yog tus uas qhia peb ua txhaum no los? Tsis yog li ntawd! Yog kuv tseem rov qab mus muab txoj kevcai uas kuv twb muab rhuav lawm los ua dua, sawvdaws yeej yuav pom hais tias, kuv yog tus uas ua txhaum Vajtswv txoj kevcai. Thaum kuv tseem coj raws li Vajtswv txoj kevcai, kuv zoo li tus neeg uas tuag lawm. Tiamsis nimno Vajtswv txoj kevcai tsis kav kuv lawm, kuv thiaj tau kev ua kuv lub neej raws li Vajtswv lub siab nyiam. Yog li ntawd, kuv twb nrog Yexus Khetos tuag saum tus ntoo khaublig lawm, txojsia uas nimno kuv muaj tsis yog kuv txoj, tiamsis yog Yexus Khetos txoj. Qhov uas nimno kuv muaj txojsia nyob twb yog vim kuv ntseeg Vajtswv tus Tub, tus uas hlub kuv thiab muab nws txojsia los txhiv kuv. Vajtswv txoj koob hmoov kuv yeej tsis vwjtxheej, yog Vajtswv suav hais tias tus uas xyaum ua raws li Vajtswv txoj kevcai yog tus ncaj ncees lawm, ces qhov uas Yexus Khetos tuag yeej tsis muaj nqis dabtsi li! Cov neeg Kalatias uas ruam! Leejtwg ntxias tau nej lawm? Kuv twb qhia zaj uas Yexus Khetos raug ntsia rau saum ntoo khaublig rau nej paub tseeb, ib yam li nej lub qhovmuag twb pom kiag nws lawm ntag. Nej cia li qhia rau kuv saib: Qhov uas Vajtswv pub Vajtswv tus Ntsujplig rau nej, vim nej xyaum coj raws li Vajtswv txoj kevcai lossis vim nej mloog thiab ntseeg txojmoo zoo? Ua li cas nej yuav ruam ua luaj li! Thaum chivthawj nej twb ua raws li Vajtswv tus Ntsujplig qhia nej lawm, tiamsis nimno nej ho yuav siv nej lub dag lub zog ua kom tej ntawd tiav los? Ib puas tsav yam uas Vajtswv pab nej lawm, txawm tsis muaj nqis rau nej los? Yeej muaj los sav! Qhov uas Vajtswv pub Vaj Ntsujplig rau nej thiab ua tej txujci tseemceeb rau nej pom, vim nej xyaum coj raws li Vajtswv txoj kevcai lossis vim nej mloog thiab ntseeg txojmoo zoo? Ib yam li Vajtswv txojlus hais txog Anplahas hais tias, “Anplahas ntseeg Vajtswv, thiab twb yog vim Anplahas ntseeg, Vajtswv thiaj suav hais tias nws yog tus uas ncaj ncees.” Yog li ntawd, nej yuav tsum paub hais tias tsuas yog cov neeg uas ntseeg xwb thiaj yog Anplahas cov xeebntxwv. Vajtswv txojlus twb xub qhia tseg lawm hais tias, Vajtswv yuav coj lwm haivneeg uas ntseeg los nrog Vajtswv sib raug zoo. Yog li ntawd Vajtswv txojlus thiaj xub qhia Txojmoo Zoo rau Anplahas ua ntej hais tias, “Vim koj mloog Vajtswv lus, Vajtswv yuav foom koob hmoov rau txhua haivneeg hauv qab ntuj no.” Vim Anplahas ntseeg, Anplahas thiaj tau koob hmoov; yog li ntawd txhua tus uas ntseeg puavleej yuav tau koob hmoov ib yam li Anplahas. Cov neeg uas cia siab rau qhov uas lawv xyaum coj raws li Vajtswv txoj kevcai, cov neeg ntawd twb raug foom tsis zoo lawm. Rau qhov Vajtswv txojlus hais tias, “Yog leejtwg tsis ua raws li txhua nqe uas sau cia rau Vajtswv txoj kevcai, tus ntawd twb raug Vajtswv foom tsis zoo lawm.” Yog li ntawd, peb paub tseeb hais tias tus uas xyaum coj raws li Vajtswv txoj kevcai, tsis yog tus uas Vajtswv suav hais tias ncaj ncees, rau qhov Vajtswv txojlus hais tias, “Tsuas yog tus ntseeg, Vajtswv thiaj suav hais tias yog tus uas ncaj ncees thiab tau txojsia.” Tiamsis txoj kevcai yeej tsis muaj ib qho hais txog kev ntseeg li. Vim li ntawd Vajtswv txojlus thiaj hais tias, “Yog leejtwg coj tau raws li txoj kevcai txhua nqe, tus ntawd yuav tau txojsia.” Vajtswv txoj kevcai twb ua rau peb raug foom tsis zoo lawm, tiamsis Yexus Khetos los hloov peb chaw, nws thiaj raug foom tsis zoo; rau qhov Vajtswv txojlus hais tias, “Tus uas raug dai rau saum ntoo, tus ntawd twb raug foom tsis zoo lawm.” Thaum luag muab Yexus Khetos dai rau saum tus ntoo khaublig lawm, Vajtswv thiaj foom koob hmoov rau lwm haivneeg uas los ntseeg Yexus Khetos raws li Vajtswv tau coglus tseg rau Anplahas, thiab Vajtswv pub Vaj Ntsujplig rau peb txhua tus uas ntseeg Yexus Khetos raws li Vajtswv tau coglus tseg lawm. Cov kwvtij, sawvdaws puavleej paub hais tias yog muaj ob leeg tau sib coglus hais haum sau cia lawm, yeej tsis muaj leejtwg yuav rhuav tau lossis yuav muab lwm lo lus ntxiv tau rau. Thaum Vajtswv coglus rau Anplahas thiab Anplahas tus xeebntxwv. Vajtswv tsis tau hais tias, “Cog rau cov xeebntxwv” li uas muaj ntau leej, tiamsis Vajtswv hais tias, “Cog rau koj tus xeebntxwv,” Vajtswv hais li ntawd, nws hais txog tib leeg xwb, tus ntawd yog Yexus Khetos. Kuv hais li no twb yog kuv hais tias Vajtswv yog tus uas coglus tseg rau Anplahas thiab yog tus uas yuav ua raws li lo lus cog tseg ntawd. Vajtswv twb coglus tseg tau plaub puas peb caug xyoo lawm, mam li muaj Vajtswv txoj kevcai. Yog li ntawd, Vajtswv txoj kevcai yeej rhuav tsis tau Vajtswv lo lus cog tseg. Yog tus uas ua raws li Vajtswv txoj kevcai tau Vajtswv txoj koob hmoov lawm, ces tsis tas yuav tos txoj koob hmoov uas Vajtswv coglus tseg hais tias Vajtswv yuav pub rau Anplahas. Anplahas twb tau Vajtswv txoj koob hmoov raws li Vajtswv lo lus cog tseg lawm. Yog li ntawd, ua li cas Vajtswv tseem yuav qhia Mauxes sau ib txoj kevcai thiab? Qhov uas Vajtswv qhia Mauxes sau ib txoj kevcai ntxiv ntawd, twb yog Vajtswv xav kom neeg paub hais tias muaj kev txhaum. Vajtswv twb xav tseg lawm hais tias tsuas pub neeg coj txoj kevcai ntawd mus txog thaum Anplahas tus xeebntxwv uas Vajtswv lo lus cog tseg hais txog los xwb. Vajtswv kom cov timtswv ceebtsheej muab txoj kevcai ntawd rau Mauxes coj los qhia rau sawvdaws. Yog li ntawd, Mauxes yog tus uas cev Vajtswv lus xwb. Tiamsis yog muaj tib leeg ua haujlwm xwb, ces tsis tas yuav muaj tus uas cevlus. Vajtswv yeej yog tus uas ua txoj haujlwm ntawd. Yog li ntawd, Vajtswv txoj kevcai tawmtsam Vajtswv lo lus cog tseg los? Yeej tsis yog li ntawd. Yog muaj ib txoj kevcai uas cawm tau neeg txojsia, Vajtswv yeej yuav coj tus uas ua raws li txoj kevcai ntawd los nrog Vajtswv sib raug zoo. Tiamsis Vajtswv txojlus hais tias txhua tus uas nyob hauv qab ntuj no puavleej yog neeg txhaum huv tibsi; kom txhua tus uas ntseeg thiaj yuav tau txoj koob hmoov uas Vajtswv coglus tseg hais tias, Vajtswv yuav muab pub rau cov uas ntseeg Yexus Khetos. Thaum tseem tsis tau txog lub sijhawm uas yuav muaj neeg los ntseeg, Vajtswv txoj kevcai yeej ibtxwm khi peb los txog thaum uas peb paub los ntseeg. Yog li ntawd, Vajtswv txoj kevcai zoo ib yam li tus uas saib xyuas peb los txog lub sijhawm uas Yexus Khetos los, Vajtswv thiaj suav hais tias peb txhua tus uas ntseeg yog neeg ncaj ncees. Nimno twb txog lub sijhawm uas neeg paub los ntseeg lawm, yog li ntawd Vajtswv txoj kevcai thiaj tsis kav peb lawm. Nimno nej txhua tus uas ntseeg, nej puavleej yog Vajtswv cov menyuam, rau qhov nej nrog Yexus Khetos koom ib txojsia lawm. Nej twb ua kevcai raus dej rau sawvdaws pom lawm hais tias, nej yog cov uas nrog Yexus Khetos koom ib txojsia, nej thiaj coj tau nej tus yam ntxwv zoo ib yam li Yexus Khetos tus. Yog li ntawd, nej txhua tus uas nrog Yexus Khetos koom ib txojsia, tsis hais cov Yudais lossis lwm haivneeg, cov uas ua qhev lossis cov uas tsis ua qhev, tsis hais pojniam lossis txivneej, nej txhua tus puavleej koom ib lub siab rau ntawm Yexus Khetos. Nej txhua tus uas ntseeg Yexus Khetos, nej puavleej yog Anplahas cov xeebntxwv, nej yeej yuav tau tej uas Vajtswv coglus tseg lawm hais tias, nws yuav muab pub rau nej. Peb sawvdaws puavleej paub hais tias, raws li ibtxwm leej txiv yeej yuav muab nws tej qubtxeeg qubteg rau nws tus tub. Txawm yog tus tub yeej yuav tau ib puas tsav yam ntawd los thaum nws tseem yau, nws zoo ib yam li ib tug tubqhe xwb. Thaum nws tseem yau yeej muaj neeg saib xyuas nws thiab ceev nws tej nyiaj txiag mus txog hnub uas nws txiv teem cia lawm hais tias, nws txiv yuav muab rau nws. Ib yam nkaus li ntawd, thaum peb tseem tsis tau paub Vajtswv, peb ua dab tauj dab qhev. Tiamsis thaum txog lub sijhawm uas Vajtswv teem cia lawm, Vajtswv txib Vajtswv tus Tub los yug ua neeg, muaj ib tug pojniam yug nws. Thiab nws kuj coj raws li cov Yudais txoj kevcai ib yam li sawvdaws, nws thiaj pab tau cov neeg uas Vajtswv txoj kevcai muab khi cia lawm kom lawv dim. Nws ua li ntawd, peb thiaj tau ua Vajtswv cov menyuam. Vajtswv txib Vajtswv tus Tub tus Ntsujplig los nyob hauv peb lub siab, sawvdaws thiaj pom hais tias, peb yog Vajtswv cov menyuam, tus Vaj Ntsujplig ntawd yog tus uas qhia peb hu Vajtswv hais tias, “Anpas, kuv Txiv.” Yog li ntawd nej tsis yog qhev lawm, tiamsis yog tub. Vim nej yog Vajtswv cov tub lawm, nej thiaj yuav tau ib puas tsav yam uas Vajtswv khaws cia rau Vajtswv cov tub. Yav tas los nej tsis paub Vajtswv, nej thiaj mus ua dab tauj dab qhev, tiamsis nimno nej twb paub Vajtswv lawm. Yog kuv hais tias nimno Vajtswv twb paub nej lawm, ntshai yuav yog dua. Ua li cas nej tseem xav rov mus coj dab? Tej dab ntawd tsis muaj hwjchim yuav pab tau nej, nej tseem xav rov qab mus ua dab qhev dua thiab los? Nej niaj hnub saib hnub, saib hli, saib caij saib nyoog thiab saib niaj saib xyoo ua qhov tseemceeb. Nej pheej ua li ntawd, kuv ntshai nyob tsam tej uas kuv twb qhia rau nej lawm tsis muaj nqis dabtsi rau nej. Cov kwvtij, kuv thov nej ua nej lub neej ib yam li kuv ua kuv lub, rau qhov kuv twb ua kuv lub neej ib yam li nej ua nej lub lawm. Nej tsis tau ua txhaum rau kuv li. Nej twb paub lawm hais tias thawj zaug uas kuv tuaj xyuas nej, kuv mob lawm kuv thiaj li tau qhia txojmoo zoo rau nej. Txawm yog kuv tus mob ua rau nej tau kev nyuaj siab los nej tsis ntxub kuv, nej tseem saib taus kuv. Nej tu kuv zoo ib yam li kuv yog Vajtswv ib tug timtswv thiab ib yam li kuv yog Yexus Khetos ntag. Thaum kuv tuaj xyuas nej, nej zoo siab rau kuv kawg li! Nimno nej tsis nco qab lawm los? Kuv paub hais tias, txawm yog thaum ntawd kuv xav yuav nej lub qhovmuag los nej yeej yuav kaus rau kuv. Kuv yeej hais ncaj rau nej, kuv tsis dag nej, vim li ntawd nimno nej thiaj ntxub kuv los? Cov neeg ntawd muab siab npuab nej heev kom nej nyiam lawv ib yam li lawv nyiam nej, tiamsis lawv lub siab yeej phem, lawv xav ua kom nej thiab kuv tsis sib haum. Qhov uas muaj neeg muab siab npuab nej, qhov ntawd zoo heev, tsis hais thaum kuv nrog nej nyob lossis tsis nrog nej nyob, tsuav yog lawv muaj lub siab ncaj xwb. Cov menyuam uas kuv hlub, kuv txhawj nej ib yam li tus pojniam uas yuav yug menyuam, nws txhawj yug nws tus menyuam ntag. Ntshai kuv yuav txhawj li no mus txog thaum nej muaj lub siab zoo ib yam li Yexus Khetos lub. Yog tamsim no kuv nrog nej nyob, kuv yuav ua tib zoo qhia nej, rau qhov kuv txhawj nej heev. Nej cov uas nyiam xyaum ua raws li Vajtswv txoj kevcai, nej cia li qhia kuv saib txoj kevcai ntawd qhia li cas rau nej? Txoj kevcai ntawd qhia hais tias Anplahas muaj ob tug tub, ib tug yog tus pojniam uas ua qhev yug, ib tug yog tus pojniam uas tsis ua qhev yug. Anplahas tus tub uas yog tus ntxhais qhev yug, nws yug raws li neeg ibtxwm yug, tiamsis tus tub uas yog tus pojniam uas tsis ua qhev yug, nws yug raws li Vajtswv lo lus cog tseg uas hais tias nws yuav yug. Ob tug pojniam uas kuv piav rau nej no piv ib yam li yog Vajtswv ob txoj kevcai. Txoj kevcai uas Vajtswv muab saum Roob Xinais, piv ib yam li yog Hankas tus uas yug cov menyuam uas ua qhev. Piv ib yam li Hankas yog lub Roob Xinais uas nyob hauv tebchaws Alanpias thiab yog lub nroog Yeluxalees uas nimno tseem nyob, rau qhov lub nroog thiab cov pejxeem uas nyob hauv lub nroog puavleej poob mus ua luag qhev. Tiamsis lub nroog Yeluxalees uas nyob saum ntuj, nws tsis ua qhev, nws yog peb niam. Vim Vajtswv txojlus hais tias, “Tus pojniam uas xeeb tsis taus menyuam koj cia li zoo siab! Tus pojniam uas tsis tau mob dua plab yug menyuam, koj cia li qhia nrov nrov rau sawvdaws hais tias koj zoo siab kawg li! Rau qhov tus pojniam uas tus txiv muab tso tseg lawm, nws yuav muaj menyuam coob dua tus pojniam uas muaj tus txiv nrog nyob.” Cov kwvtij, nej puavleej yog Vajtswv cov menyuam raws li Vajtswv lo lus cog tseg, ib yam li Ixaj. Thaum ntawd tus tub uas yug raws li neeg ibtxwm yug, nws tsimtxom tus tub uas Vajtswv tus Ntsujplig yug; txawm yog niaj hnub nimno los tseem muaj li ntawd. Tiamsis Vajtswv txojlus hais li cas? Vajtswv txojlus hais tias, “Cia li ntiab tus ntxhais qhev thiab nws tus tub khiav mus; rau qhov tus ntxhais qhev tus tub yuav tsis tau leej txiv tej qubtxeeg qubteg uas yuav muab rau tus pojniam uas tsis yog qhev tus tub.” Yog li ntawd cov kwvtij, peb tsis yog tus ntxhais qhev cov menyuam, tiamsis peb yog tus pojniam uas tsis yog qhev cov menyuam. Nimno peb muaj kev ywjpheej, rau qhov Yexus Khetos twb tso peb cov uas ua qhev dim lawm. Yog li ntawd, nej yuav tsum muab siab rau ntseeg tsis txhob pub leejtwg coj nej rov qab mus ua qhev dua. Nej cia li ua tib zoo mloog kuv tej lus! Kuv yog Paulus, kuv qhia rau nej hais tias, yog nej kam ua kevcai txiav lawm, ces kuj ib yam li nej suav hais tias Yexus Khetos pab tsis tau nej. Kuv rov qab qhia dua rau nej hais tias tus uas ua kevcai txiav lawm, tus ntawd yuav tsum coj raws li Vajtswv txoj kevcai txhua nqe huv tibsi. Nej cov uas xyaum ua raws li Vajtswv txoj kevcai, kom Vajtswv suav hais tias nej yog cov uas ncaj ncees, nej twb ncaim Yexus Khetos mus lawm, nej yuav tsis tau Vajtswv txoj koob hmoov. Tiamsis peb cia siab hais tias Vajtswv yeej suav hais tias peb yog cov uas ncaj ncees, twb yog vim li no, peb thiaj ntseeg thiab niaj hnub tos Vajtswv tus Ntsujplig ua tus uas pab peb. Rau qhov peb cov uas twb nrog Yexus Khetos koom ib txojsia lawm, peb tsis suav hais tias, qhov uas ua kevcai txiav yog qhov uas tseemceeb, tiamsis peb suav hais tias qhov tseemceeb yog qhov uas tus ntseeg muaj lub siab hlub lwm tus. Nej twb ua nej lub neej raws li Vajtswv txojlus uas yog qhov tseeb lawm! Leejtwg tuaj txwv tsis pub nej ua raws li ntawd thiab? Vajtswv tus uas twb xaiv nej cia lawm, nws yeej tsis txwv nej. Sawvdaws yeej ibtxwm hais tias, “Ib qhov nyuag keeb xwb, yeej ua rau lub ncuav su tagnrho.” Tiamsis kuv tseem cia siab tau rau nej txhua tus uas nrog Yexus Khetos koom ib txojsia lawm hais tias nej yuav tsis lam mus ntseeg lwm zaj. Thiab kuv paub hais tias tus uas tuaj ua rau nej ntxhov ntawd, txawm yog nws yog leejtwg los Vajtswv yeej yuav rau txim rau nws. Cov kwvtij, nej sim xav saib yog kuv qhia hais tias sawvdaws yuav tsum ua kevcai txiav, ces kuv yeej tsis raug kev tsimtxom li. Ua li cas kuv tseem ho raug thiab no? Yog kuv qhia li ntawd tiag, ces zaj uas kuv qhia hais txog Yexus Khetos tus ntoo khaublig yeej yuav tsis ua rau sawvdaws tu siab. Kuv xav kom cov neeg uas tuaj ua rau nej ntxhov siab ntawd, lawv cia li muab lawv sam. Cov kwvtij, qhov uas Vajtswv tau xaiv nej cia lawm, twb yog nws xav kom nej muaj kev ywjpheej. Tiamsis nej tsis txhob muab txojkev ywjpheej ntawd ua nej txoj haukev mus ua kev phem kev qias. Nej yuav tsum sib hlub thiab ib leeg txaus siab hlo pab ib leeg. Rau qhov Vajtswv txoj kevcai txhua nqe puavleej muab sau zog ua ib nqe hais li no hais tias, “Hlub koj tej kwvtij zejzog ib yam li koj hlub koj lub cev.” Tiamsis yog nej ua li tej tsiaj, nej ib tug ntxo ib tug thiab ib tug ua limhiam rau ib tug, yog nej ua li ntawd nej ib tug yeej yuav ua rau ib tug raug kev puastsuaj. Kuv qhia rau nej li no: nej yuav tsum cia Vaj Ntsujplig kav nej lub neej, nej tsis txhob cia nej lub siab kav nej ib zaug li. Rau qhov neeg lub siab yeej tsis nyiam tej uas Vaj Ntsujplig nyiam, thiab Vaj Ntsujplig yeej tsis nyiam tej uas neeg lub siab nyiam, neeg lub siab thiab Vaj Ntsujplig yeej ua yeebncuab. Yog Vaj Ntsujplig coj nej kev, ces txoj kevcai yeej tsis muaj hwjchim kav nej lawm. Sawvdaws yeej paub tej uas neeg lub siab nyiam ua, tej ntawd yog li no: Kev ua nkauj ua nraug, kev phem kev qias thiab ua dog ua dig, pe dab pe mlom, ua neeb ua yaig, ua yeebncuab, sib ceg sib ntaus, sib khib, sib chim, xav ua tus hlob, sib faib ua pab ua pawg, ntshaw luag tug, quav yeeb, quav tshuaj, quav cawv, qw ua nqaj ua nqug thiab ua ntau yam uas zoo li tej no. Yav tas los kuv twb ntuas nej ib zaug lawm, tiamsis nimno kuv rov ntuas nej dua ib zaug hais tias cov neeg uas ua tej ntawd, lawv yeej yuav tsis tau Vajtswv lub Tebchaws los ua lawv tug ib zaug li. Tiamsis Vaj Ntsujplig yuav ua rau neeg muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj, tsis khavtheeb thiab paub tswj yus lub siab. Yeej tsis muaj ib txoj kevcai yuav txwv tej no hlo li. Cov uas ntseeg Yexus Khetos, lawv twb muab tej kev phem uas lawv lub siab nyiam ua huv tibsi los ntsia rau saum tus ntoo khaublig lawm. Vaj Ntsujplig twb pub txojsia rau peb lawm; peb yuav tsum cia nws kav tagnrho peb lub neej. Peb tsis txhob muab hlob, ib tug tsis txhob ua rau ib tug chim lossis ib tug tsis txhob khib ib tug. Cov kwvtij, yog nej pom ib tug ua txhaum nej cov uas muab siab rau ntseeg, nej yuav tsum ua tib zoo ntuas tus ntawd kom nws rov qab los ua zoo. Tiamsis thaum nej yuav mus ntuas nws, nej yuav tsum ceevfaj, nyob tsam nej yuam kev nrog nws mus ua txhaum thiab. Nej yuav tsum sib pab ris nra, yog nej ua li ntawd thiaj yog nej coj raws li Yexus Khetos txoj kevcai. Tus uas tsis yog neeg tseemceeb, yog nws lam khav hais tias nws yog tus uas tseemceeb, nws yeej rov dag nws xwb. Txhua tus nyias yuav tsum ua tib zoo xyuas nyias tes haujlwm saib zoo li cas tso. Yog leejtwg tes haujlwm zoo lawm, tus ntawd thiaj khav tau tsis tas nws yuav coj nws txoj haujlwm mus piv rau lwm tus txoj. Rau qhov txhua tus nyias yuav tsum ris nyias lub nra. Tus uas kawm Yexus Khetos tej lus, nws yuav tsum zoo siab hlo muab tej uas nws muaj faib rau tus uas qhia nws. Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb. Tus uas tseb tej uas neeg lub siab nyiam, tus ntawd yeej yuav tau sau kev ploj kev tuag raws li tej uas nws tseb. Tiamsis tus uas tseb tej uas Vaj Ntsujplig nyiam, tus ntawd yuav tau sau txojsia ntev dhawv mus ibtxhis. Yog li ntawd, peb tsis txhob nkees ua tej haujlwm zoo; yog peb pheej ua tsis tso tseg, muaj ib hnub peb yeej yuav tau sau xwb. Txhua lub sijhawm uas peb pab tau lwm tus, peb yuav tsum pab, tiamsis peb yuav tsum pab cov ntseeg heev dua. Nej sim ua tib zoo ntsia saib tej npe ntawv uas kuv txhais tes sau xa tuaj rau nej loj npaum li cas diam! Qhov uas cov neeg ntawd pheej yuav yuam nej ua kevcai txiav, twb yog lawv xav kom sawvdaws qhuas hais tias, nej twb ua raws li lawv hais lawm. Lawv qhia li ntawd, rau qhov lawv yeej paub hais tias, tus uas lees hais tias tsuas yog Yexus Khetos tus ntoo khaublig thiaj li pab tau neeg dim neeg lub txim xwb, tus ntawd yeej yuav raug kev tsimtxom. Txawm yog cov neeg uas ua kevcai txiav lawm los lawv twb tsis ua raws li Vajtswv txoj kevcai; cov neeg ntawd xav kom nej ua kevcai txiav lawv thiaj li tau lus khav hais tias nej twb zoo siab cia lawv muab nej ua kevcai txiav lawm. Tiamsis kuv yuav tsis khav li lawv, kuv tsuas khav hais txog peb tus Tswv Yexus Khetos tus ntoo khaublig xwb. Twb yog vim kuv ntseeg tus uas tuag saum ntoo khaublig, neeg ntiajteb thiaj suav hais tias kuv yog tus uas tuag lawm. Thiab kuv suav hais tias, tej uas muaj nyob hauv ntiajteb no tsis muaj ib yam uas tseemceeb li. Qhov uas neeg ua kevcai txiav lossis tsis ua, qhov ntawd yeej tsis tseemceeb dabtsi; qhov tseemceeb yog qhov uas neeg muaj dua lub siab tshiab. Thov Vajtswv foom koob hmoov rau txhua tus uas muaj lub siab tshiab, thiab cov ntseeg Vajtswv txhua tus kom sawvdaws tau zoo nyob kaj siab lug. Txij no mus, tsis txhob pub leejtwg tuaj ua rau kuv nyuaj siab dua lawm, rau qhov kuv lub cev uas muaj caws pliav twb ua rau sawvdaws pom lawm hais tias, kuv yog Yexus Khetos tus tubqhe. Cov kwvtij, thov peb tus Tswv Yexus Khetos foom koob hmoov rau nej txhua tus. Amees. Kuv yog Paulus tus uas Vajtswv tsa ua Yexus Khetos tus timthawj. Kuv sau tsab ntawv no xa tuaj rau nej cov uas ntseeg Vajtswv hauv lub nroog Efexus. Nej yog cov uas nrog Yexus Khetos koom ib txojsia thiab muab siab rau ntseeg Vajtswv. Peb thov Vajtswv tus uas yog peb Leej Txiv thiab tus Tswv Yexus Khetos foom koob hmoov rau nej thiab pub kom nej tau nyob kaj siab lug. Peb cia li ua Vajtswv tus uas yog peb tus Tswv Yexus Khetos Leej Txiv tsaug! Vim peb nrog Yexus Khetos koom ib txojsia, Vajtswv thiaj li foom ib puas tsav yam koob hmoov saum ntuj ceebtsheej los rau peb. Thaum tsis tau tsim ntuj tsim teb, Vajtswv twb xub xaiv peb los nrog Yexus Khetos koom ib txojsia thiab los ua Vajtswv haivneeg lawm. Vajtswv ua li ntawd, mas peb cov uas Vajtswv niaj hnub tsomkwm thiaj yuav ua tau neeg zoo kawg nkaus tsis muaj ib qho txhaum tabmeeg Vajtswv li. Vim Vajtswv hlub peb, Vajtswv thiaj xub xav tseg lawm hais tias Vajtswv yuav txib Yexus Khetos los coj peb mus ua Vajtswv cov menyuam. Qhov ntawd haum Vajtswv siab thiab raws li Vajtswv tau xav tseg lawm. Peb cia li qhuas Vajtswv tus uas hlub peb. Vim peb ntseeg Vajtswv, Leej Tub tus uas nws hlub kawg nkaus, mas Vajtswv thiaj pub nws txoj koob hmoov dawb dawb rau peb. Vim Yexus Khetos tuag txhiv peb lub txim, Vajtswv thiaj zam txim rau peb. Vajtswv txojkev hlub loj kawg li. Vajtswv txoj koob hmoov uas Vajtswv pub rau peb ntau nplua mias ntawd zoo kawg nkaus li! Vajtswv tus uas muaj tswvyim thiab paub ib puas tsav yam, tau txib Yexus Khetos los ua kom Vajtswv tes haujlwm tiav raws li Vajtswv twb xub xav tseg lawm. Txij thaum ub los Vajtswv tsis tau qhia tes haujlwm ntawd rau leejtwg paub, tiamsis nimno nws twb qhia rau peb paub lawm. Tes haujlwm uas Vajtswv yuav ua kom tiav ntawd, yog qhov uas Vajtswv yuav coj ib puas tsav yam uas Vajtswv tau tsim los lawm, tsis hais tej uas nyob saum nruab ntug thiab tej uas nyob hauv ntiajteb los nyob ua ke, thiab Vajtswv yuav tsa Yexus Khetos ua ib puas tsav yam ntawd tus thawj. Thaum txog lub sijhawm uas Vajtswv teem cia lawm, Vajtswv yuav ua li ntawd. Vajtswv twb xaiv peb cov uas nrog Yexus Khetos koom ib txojsia los ua Vajtswv haivneeg raws li Vajtswv twb xub xav tseg thaum tsis tau tsim lub ntuj thiab lub ntiajteb los lawm. Vajtswv ua li ntawd, rau qhov Vajtswv yeej ua ib puas tsav yam raws li Vajtswv pom zoo thiab raws li Vajtswv twb xub xav tseg lawm. Yog li ntawd peb cov uas twb xub tso siab rau Yexus Khetos, peb cia li qhuas Vajtswv tus uas muaj tshwjchim. Nej cov los kuj ib yam li peb thiab. Thaum nej tau hnov txojmoo zoo uas yog Txojlus tseeb uas cawm tau kom nej dim nej lub txim, nej thiaj ntseeg Yexus Khetos. Vajtswv pub Vaj Ntsujplig tus Dawbhuv rau nej raws li nws tau coglus tseg rau nej lawm. Vaj Ntsujplig tus Dawbhuv ntawd yog lub homthawj uas Vajtswv nias rau nej. Vajtswv ua li ntawd yog qhia rau nej paub hais tias nej yog Vajtswv haivneeg lawm. Qhov uas Vajtswv pub Vaj Ntsujplig tus Dawbhuv rau peb ntawd yog ib qho tseemceeb uas qhia rau peb paub hais tias peb yuav tau tej uas Vajtswv tau coglus lawm hais tias, Vajtswv yuav muab pub rau nws haivneeg. Thiab qhia rau peb paub hais tias Vajtswv yuav cia nws cov neeg tau nyob ywjpheej. Peb cia li qhuas Vajtswv tus uas muaj tshwjchim. Twb yog vim li ntawd, txij thaum kuv hnov hais tias nej muab siab rau ntseeg tus Tswv Yexus thiab hlub Vajtswv haivneeg txhua tus, mas kuv niaj hnub ua Vajtswv tsaug tsis tseg tsis tu. Kuv nco ntsoov thov Vajtswv pab nej. Kuv thov peb tus Tswv Yexus Khetos tus Vajtswv thiab tus uas yog peb Leej Txiv tus uas muaj hwjchim ci ntsa iab pub Vaj Ntsujplig tus Dawbhuv rau nej. Tus Ntsujplig ntawd yuav pub tswvyim rau nej thiab qhia Vajtswv rau nej kom nej paub Vajtswv heev zuj zus ntxiv. Kuv thov Vajtswv qhib nej lub siab kom nej totaub zoo, nej thiaj paub hais tias nej cov uas Vajtswv twb hu los cuag nws lawm, nej cia siab li cas rau Vajtswv. Thiab txoj koob hmoov uas Vajtswv coglus tseg hais tias Vajtswv yuav pub rau Vajtswv haivneeg zoo npaum li cas. Thiab paub hais tias, Vajtswv lub hwjchim uas ua haujlwm hauv peb cov ntseeg lub siab loj npaum li cas. Lub hwjchim ntawd twb yog lub uas Vajtswv tsa Yexus Khetos sawv hauv qhov tuag rov qab los, thiab coj Yexus mus nyob ntawm Vajtswv sab xis saum ntuj ceebtsheej. Yexus Khetos nyob saum ntuj ceebtsheej kav cov timtswv, kav tej vajntxwv thiab tej nomtswv uas muaj hwjchim kav hauv ntiajteb no tibsi. Yexus Khetos muaj hwjchim loj dua tej nomtswv uas sawvdaws hwm, tsis hais tiam no lossis tiam tom ntej. Vajtswv muab ib puas tsav yam huv tibsi rau Yexus Khetos kav, thiab Vajtswv tsa Yexus Khetos ua tus thawj saib cov ntseeg thiab ib puas tsav yam tagnrho. Cov ntseeg yog Yexus Khetos lub cev uas muaj txhua yam txhij. Yexus Khetos yog tus uas ua rau ib puas tsav yam uas nyob txhua qhov muaj txhij muaj txhua. Yav tas los nej zoo li cov neeg uas tuag lawm, rau qhov nej tsis mloog Vajtswv lus thiab nej ua txhaum. Thaum ntawd nej tseem nyiam ua ib yam li tej neeg uas nyob hauv ntiajteb no ua, thiab nej ua raws li tus uas kav saum nruab ntug qhia nej. Tus ntawd yog tus dab Ntxwgnyoog uas nimno kav cov neeg uas tsis mloog Vajtswv lus. Txawm yog peb cov los yav tas los peb yeej ua ib yam li lawv thiab; peb ntshaw kev phem kev qias thiab peb ua raws li peb lub cev thiab peb lub siab ibtxwm nyiam ua; yog li ntawd, Vajtswv yeej yuav rau txim rau peb ib yam li Vajtswv rau rau lwm tus. Tiamsis Vajtswv hlub peb kawg nkaus li. Peb tsis mloog Vajtswv lus thiab peb zoo li cov neeg uas tuag lawm los Vajtswv tseem pub peb rov muaj txojsia ib yam li Vajtswv tau tsa Yexus Khetos sawv hauv qhov tuag rov qab los. Vajtswv hlub nej kawg li, Vajtswv thiaj li cawm kom nej dim. Vim peb nrog Yexus koom ib txojsia, Vajtswv thiaj tsa peb nrog Yexus Khetos sawv rov qab los. Vajtswv ua li ntawd kom peb tau nrog Yexus Khetos kav saum ntuj ceebtsheej. Txij no mus rau yav tom ntej tej uas Vajtswv ua ntawd yuav qhia rau sawvdaws paub hais tias Vajtswv foom koob hmoov ntau kawg nkaus rau peb cov uas ntseeg Yexus Khetos, rau qhov Vajtswv hlub peb heev. Vajtswv tus uas hlub nej, nws cawm nej dim twb yog vim nej ntseeg. Qhov uas nej dim ntawd, tsis yog vim nej ua haujlwm zoo, tiamsis yog Vajtswv cia li pub dawb rau nej xwb. Qhov uas nej dim tsis yog nej lub dag lub zog ua mas nej thiaj tsis muaj lus khav tau. Peb yog cov uas Vajtswv txhais tes puab. Vajtswv tsim peb los nrog Yexus Khetos koom ib txojsia kom peb ua tau tej haujlwm zoo uas Vajtswv twb xub npaj tseg cia rau peb ua lawm. Cov Yudais hu nej cov uas yog lwm haivneeg hais tias, “Cov uas tsis ua kevcai txiav;” lawv hu nej li ntawd, rau qhov lawv yeej hu lawv ua cov uas ua kevcai txiav. (Txoj kevcai txiav yeej yog yam uas neeg txhais tes ua rau neeg lub cev). Nej cov uas yog lwm haivneeg, nej yuav tsum nco ntsoov hais tias yav tas los nej yeej tsis yog cov uas ua kevcai txiav. Nej yeej yog lwm haivneeg, nej tsis yog cov uas Vajtswv xaiv cia lawm. Nej tsis muaj feem nrog Vajtswv haivneeg tau tej koob hmoov uas Vajtswv coglus tseg yuav muab pub rau cov neeg uas nws xaiv tseg lawm. Nej nyob hauv ntiajteb no, nej tsis muaj chaw cia siab thiab nej tsis paub Vajtswv. Tiamsis nimno nej cov uas yav tas los nyob nrug deb, nej twb los nrog Yexus Khetos koom ib txojsia lawm. Vim Yexus Khetos tuag txhiv nej, Vajtswv thiaj coj nej los cuag Vajtswv. Rau qhov Yexus Khetos twb los ua rau cov Yudais thiab lwm haivneeg ua tau ib pab lawm, peb thiaj nyob tau ua ke. Sab phabntsa uas kem nruab nrab kom ob tog ua yeebncuab, Yexus Khetos twb los muab rhuav lawm. Nws rhuav cov Yudais txoj kevcai, tsis hais tej uas lawv qhia thiab tej uas lawv txwv. Nws ua li ntawd, twb yog nws tsim dua ib pab neeg tshiab tawm hauv ob pab neeg ntawd los nrog nws sib raug zoo. Vim Yexus Khetos tuag li ntawd, nws thiaj rhuav tau qhov uas ob haivneeg ntawd ua yeebncuab kom lawv los ua tau ib pab, thiab coj lawv rov los cuag Vajtswv. Yog li ntawd, Yexus Khetos thiaj los qhia txojmoo zoo uas ua rau sawvdaws nyob taus ua ke, tsis hais nej cov uas yog lwm haivneeg uas nyob nrug deb Vajtswv thiab cov Yudais uas nyob ze Vajtswv. Yog li ntawd, peb txhua tus uas ntseeg Yexus Khetos, tsis hais cov Yudais thiab lwm haivneeg, peb mus cuag tau Vajtswv, rau qhov peb puavleej koom Vajtswv tib tug Ntsujplig xwb. Yog li ntawd nej cov uas yog lwm haivneeg, nej tsis yog lwm haivneeg lawm, nej yog Vajtswv haivneeg. Nej muaj feem ib yam li Vajtswv haivneeg, thiab nej yog Vajtswv tsevneeg lawm. Vajtswv muab nej los ua rau saum lub qua tsev uas cov timthawj thiab cov cev Vajtswv lus twb ncaws tau cia lawm. Tus ncej tas ntawd yog Yexus Khetos ntag. Yexus yog tus uas txheem lub tsev ntawd kom khov, thiab ua kom tiav, thiaj li tau ib lub tuamtsev uas zoo kawg nkaus rau Vajtswv nyob. Vajtswv tabtom muab nej cov thiab lawv cov txhua tus uas nrog Yexus Khetos koom ib txojsia, los ua ib lub tsev rau Vajtswv tus Ntsujplig nyob. Twb yog vim li no kuv thiaj thov Vajtswv pab nej. Vim kuv ua Yexus Khetos tes haujlwm pab nej cov uas yog lwm haivneeg, kuv thiaj raug kaw rau hauv tsev lojcuj. Kuv xav hais tias nyaj nej yuav hnov moo lawm hais tias, Vajtswv tus uas hlub kuv, tsa kuv ua tes haujlwm no pab nej. Zaj uas yav tas los Vajtswv tsis tau qhia rau leejtwg paub, nimno Vajtswv twb qhia rau kuv paub lawm. (Kuv twb sau mentsis hais txog zaj no lawm. Yog nej nyeem tej uas kuv sau ntawd, nej yuav paub hais tias kuv totaub li cas txog Yexus Khetos zaj uas Vajtswv muab zais cia lawm.) Yav tas los Vajtswv tsis qhia rau leejtwg paub, tiamsis nimno Vajtswv tus Ntsujplig twb qhia rau cov timthawj thiab cov cev Vajtswv lus paub lawm. Zaj uas Vajtswv muab zais cia ntawd twb yog txojmoo zoo uas qhia hais tias Vajtswv foom koob hmoov rau lwm haivneeg ib yam li Vajtswv foom rau cov Yudais. Ob co puavleej yog tib lub cev tej tes taw, thiab sawvdaws puavleej yuav tau tej uas Vajtswv coglus tseg lawm hais tias nws yuav pub rau cov uas ntseeg Yexus Khetos. Vajtswv hlub kuv, Vajtswv thiaj li tsa kuv ua nws ib tug tubtxib qhia Txojmoo Zoo. Thiab Vajtswv pub nws lub hwjchim rau kuv, kuv thiaj ua tau tes haujlwm no. Kuv yog tus uas muaj hwjchim yau dua Vajtswv haivneeg txhua tus huv tibsi los Vajtswv tseem muab Txojmoo Zoo uas hais txog Yexus Khetos txoj koob hmoov uas tsimtxiaj kawg nkaus rau kuv coj mus qhia lwm haivneeg. Thiab qhia rau sawvdaws paub hais tias Vajtswv ua li cas ua tau raws li tej uas Vajtswv muab zais cia lawm. Vajtswv tus uas tsim ib puas tsav yam huv tibsi twb muab zaj ntawd zais cia thaum tsim lub ntuj thiab lub ntiajteb lawm. Nws ua li ntawd niaj hnub nimno cov timtswv ceebtsheej uas kav saum ntuj thiab cov uas muaj hwjchim thiaj yuav paub ib puas tsav yam uas yog Vajtswv lub hwjchim ua. Qhov uas lawv yuav paub tej no yog vim lawv pom tes haujlwm uas cov ntseeg ua. Tej uas Vajtswv ua no yog raws li tej uas Vajtswv twb xub xav tseg thaum ub los lawm. Thiab Vajtswv txib peb tus Tswv Yexus Khetos los ua kom tej ntawd tiav. Vim peb ntseeg thiab nrog Yexus Khetos koom ib txojsia, peb thiaj muaj cuabkav mus cuag Vajtswv. Yog li ntawd kuv thov qhia rau nej hais tias nej tsis txhob poob siab rau qhov uas kuv raug kev txomnyem pab nej. Qhov uas kuv raug li no yeej yuav muaj nqis rau nej. Twb yog vim li no kuv thiaj txhos caug ntua ntawm Vaj Leej Txiv lub xubntiag; nwg yog tus uas txhua haivneeg tsis hais cov uas nyob saum ntuj ceebtsheej thiab cov uas nyob hauv ntiajteb no hu hais tias Leej Txiv. Kuv thov Vajtswv tus uas muaj koob hmoov ntau kawg nkaus pub nws tus Ntsujplig lub hwjchim rau nej kom nej muaj lub siab tawv, thiab kuv thov Yexus Khetos los nyob hauv nej lub siab. Kuv thov Vajtswv pab kom nej muab siab npuab Vajtswv ib yam li tsob ntoo uas tej cag ntsia av tob tob thiab kom nej puv npo txojkev hlub. Kom nej thiab Vajtswv haivneeg txhua tus muaj cuabkav totaub hais tias Yexus Khetos txojkev hlub dav li cas, ntev li cas, siab li cas thiab tob li cas. Thiab kom nej paub Vajtswv txojkev hlub uas tsis muaj leejtwg paub txog, nej thiaj yuav paub tej uas Vajtswv ua txhij txhua. Peb cia li ua Vajtswv tsaug, rau qhov Vajtswv tus uas muaj hwjchim, nws nyob hauv peb lub siab. Nws ua tau ib puas tsav yam ntau dua li tej uas peb thov thiab tej uas peb xav. Peb cov ntseeg yuav tsum nrog Yexus Khetos ua kom Vajtswv tau koob meej ib tiam dhau ib tiam mus ibtxhis li! Amees. Kuv yog tus uas raug kaw rau hauv tsev lojcuj, rau qhov kuv ua Vajtswv tes haujlwm. Kuv thov nej ua nej lub neej kom phim qhov uas Vajtswv twb hu nej los ua Vajtswv haivneeg lawm. Nej yuav tsum txo hwjchim, ua siab dawb siab zoo thiab ua siab ntev. Nej ib tug yuav tsum pab ib tug, sawvdaws thiaj paub hais tias nej sib hlub tiag. Vajtswv tus Ntsujplig twb ua rau nej sib raug zoo lawm, thiab qhov uas nej sib raug zoo ntawd, twb rub nej los nyob ua ke sib haum lawm. Yog li ntawd, nej tsis txhob cia ib yam dabtsi ua rau nej nyob tsis taus ua ke. Peb sawvdaws puavleej koom ib lub cev thiab peb koom Vajtswv tib tug Ntsujplig. Vajtswv twb hu nej los ua nws haivneeg lawm, nej thiaj muaj chaw cia siab ib yam li peb. Peb koom tib tug Tswv, muaj tib txojkev ntseeg, thiab muaj tib txoj kevcai raus dej xwb. Txhua haivneeg puavleej koom tib tug Vajtswv, nws yog sawvdaws Txiv. Nws yog tus uas kav sawvdaws, nws txib sawvdaws ua nws tes haujlwm, thiab nws nyob hauv sawvdaws lub siab. Yexus Khetos pub peb txhua tus nyias muaj nyias tswvyim. Raws li Vajtswv txojlus hais tseg hais tias, “Thaum nws mus rau saum ntuj uas yog qhov chaw siab nws coj cov neeg uas raug luag ntes coob leej nrog nws mus, thiab nws pub tswvyim rau nws cov neeg.” Lo lus uas hais tias nws mus rau saum ntuj, txhais hais tias nws twb xub mus rau hauv nruab a qhov uas tob tshaj plaws. Yog li ntawd, tus uas mus rau hauv nruab a twb yog tus uas mus rau saum ntuj ceebtsheej ntag. Nws thiaj nyob tau txhua qhov chaw. Nws yog tus uas pub koob hmoov rau neeg, nws tsa qee leej ua timthawj, qee leej ua cov cev Vajtswv lus, qee leej ua xibhwb qhia Txojmoo Zoo, qee leej ua cov xibhwb qhia thiab qee leej ua cov saib cov ntseeg. Nws ua li ntawd twb yog nws qhia kom cov ntseeg paub ua Vajtswv tes haujlwm; cov ntseeg uas yog Yexus Khetos lub cev thiaj li yuav txawj loj hlob zuj zus mus txog thaum peb sawvdaws ua tau ib lub siab, ntseeg ib yam nkaus, paub tseeb Vajtswv tus Tub, thiab ua tau lub neej zoo ib yam li Yexus Khetos. Thaum ntawd peb yuav tsis ua li tej menyuam yaus uas mloog cov neeg dag tej lus, thiab raws luag qab rau ub rau no. Cov neeg dag ntawd txhob txwm dag kom sawvdaws yuam kev xwb. Peb tsis txhob ua li lawv, peb yuav tsum muaj txojkev hlub thiab hais lus tseeb, peb thiaj yuav ua tau lub neej zoo rau txhua fab li Yexus Khetos uas yog lub taubhau. Nws yog tus uas kav lub cev tej tes taw thiab tej siab tej ntsws. Nws muab tej ntawd los sib txuas ua ke, thiab nws pub lub cev muaj tej qij txha, tej yas txha thiaj los sib dhos ua ke. Yog li ntawd thaum tej tes taw nyias ua nyias tes haujlwm thiab sib hlub sib pab, ces lub cev thiaj li kheev hlob. Kuv thov qhia tseeb rau nej raws li uas Vajtswv twb xub qhia rau kuv lawm hais tias nej tsis txhob ua li cov neeg pe dab ua. Lawv xav tej zaj uas tsis muaj nqis dabtsi li. Lawv lub siab ruam thiab tsaus ntuj nti lawm. Lawv tsis tau txojsia uas Vajtswv pub rau cov ntseeg, rau qhov lawv tsis quavntsej thiab lawv tawv ncauj. Lawv tsis paub txajmuag; lawv muab lawv lub cev mus ua kev phem kev qias, lawv tsis tswj lawv lub siab, thiab lawv ua tej uas tsis tsimnyog ua. Yexus Khetos zaj uas nej kawm twb tsis qhia kom nej ua li ntawd. Nej twb hnov nws zaj lawm, thiab vim nej yog nws cov thwjtim, nej thiaj tau kawm tej lus tseeb uas nws qhia. Yog li ntawd, nej yuav tsum muab nej lub siab qub uas nej ibtxwm coj tso povtseg; lub siab qub uas niaj hnub ntxias kom nej ua kev phem kev qias ntawd tabtom yuav puastsuaj mus. Nej yuav tsum hloov dua siab tshiab. Nej yuav tsum muab lub siab tshiab los coj. Lub siab tshiab ntawd Vajtswv tsim zoo li Vajtswv tus yam ntxwv, sawvdaws thiaj pom hais tias nej ua nej lub neej ncaj ncees thiab dawbhuv. Yog li ntawd nej tsis txhob dag lawm. Txhua tus yuav tsum hais lus tseeb rau kwvtij zejzog, rau qhov peb sawvdaws puavleej yog tej tes taw uas koom Yexus lub cev. Yog thaum twg nej chim, nej tsis txhob pub qhov uas nej chim ntawd ua rau nej ua txhaum thiab tsis txhob chim tas hnub. Tsis txhob cia dab Ntxwgnyoog tau kev ntxias nej. Tus uas ibtxwm nyiag luag tug tsis txhob nyiag lawm. Nws khwv ntawm nws tes zoo dua, nws thiaj li yuav muaj yam ub yam no pab cov neeg txomnyem. Nej tsis txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog. Thiab tsis txhob ua rau Vajtswv tus Ntsujplig tu siab. Rau qhov Vajtswv tus Ntsujplig yog Vajtswv lub homthawj uas Vajtswv muab nias rau nej kom sawvdaws paub hais tias nej yog Vajtswv haivneeg. Vajtswv ua li ntawd kom nej paub hais tias muaj ib hnub Vajtswv yuav tso nej dim ntawm txojkev txhaum. Nej yuav tsum muab nej lub siab phem, lub siab ua nruj ua tsiv thiab lub siab heev tso povtseg. Tsis txhob sib cav sib ceg, tsis txhob thuam lwm tus thiab tsis txhob xav ib yam phem hlo li. Nej yuav tsum ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm. Vim nej yog Vajtswv cov menyuam uas Vajtswv hlub, nej yuav tsum xyaum ua nej lub neej raws li Vajtswv tus yam ntxwv. Nej yuav tsum hlub lwm tus ib yam li Yexus Khetos hlub peb, thiab nws muab nws txojsia los theej peb lub txhoj. Qhov ntawd zoo ib yam li tej tshuaj tsw qab uas luag muab fij rau Vajtswv thiab yog yam uas Vajtswv pom zoo yuav. Vim nej yog Vajtswv haivneeg lawm, tsis tsimnyog nej yuav ua nkauj ua nraug, ua kev phem kev qias thiab ntshaw luag tug. Txawm yog nej yuav hais txog xwb los twb tsis tsimnyog hais. Thiab tsis tsimnyog nej hais tej lus vuabtsuab uas ntsawv mloog thiab tej lus uas tsis muaj qabhau; nej cia li ua Vajtswv tsaug zoo dua. Kuv qhia tseeb rau nej hais tias cov neeg uas ua kev nkauj kev nraug, ua kev phem kev qias thiab ua neeg siab hlob, (rau qhov cov neeg siab hlob zoo ib yam li cov neeg uas pe dab pe mlom.) Cov neeg uas ua li ntawd, lawv yuav tsis muaj feem mus nyob hauv Yexus Khetos thiab Vajtswv lub tebchaws hlo li. Tsis txhob pub cov neeg uas hais tej lus tsis muaj hauvpaus hauvntsis ntxias tau nej. Twb yog vim muaj tej kev phem kev qias uas sawvdaws ua, Vajtswv thiaj yuav rau txim rau cov neeg uas tsis mloog Vajtswv lus. Yog li ntawd, nej tsis txhob mus nrog cov neeg ntawd ua ke hlo li. Yav tas los nej yeej nyob hauv qhov tsaus ntuj, tiamsis nimno nej cov uas ntseeg Vajtswv, nej twb los nyob hauv qhov pom kev lawm. Yog li ntawd, nej yuav tsum ua nej lub neej kom phim qhov uas nej yog cov uas nyob hauv qhov pom kev. Twb yog qhov pom kev ntawd ua rau nej ua tau txhua yam zoo, ua neeg ncaj ncees thiab hais lus tseeb. Nej yuav tsum ua tib zoo saib, saib nej yuav ua yam twg thiaj li haum Vajtswv siab. Cov neeg uas nyob hauv qhov tsaus ntuj nyiam ua tej kev phem kev qias, nej tsis txhob mus nrog lawv ua, rau qhov tej ntawd yeej tsis muaj nqis. Nej yuav tsum muab tej ntawd los nthuav rau qhov pom kev. Tej uas lawv ua nraim nkoos ntawd, txawm yog yuav hais txog xwb los twb txajmuag kawg li. Thaum muab ib puas tsav yam ntawd los nthuav rau qhov pom kev lawm, sawvdaws yuav pom hais tias tej ntawd zoo li cas. Rau qhov txhua yam uas los nyob hauv qhov pom kev yuav ci ib yam li qhov pom kev thiab. Twb yog vim li ntawd thiaj muaj lus sau tseg hais tias, “Tus neeg uas pw tsaug zog koj cia li tsim, thiab sawv hauv qhov tuag rov qab los, thiab cia Yexus Khetos ci rau koj pom kev.” Yog li ntawd nej yuav tsum ceevfaj thiab ua zoo. Tsis txhob ua li cov neeg ruam, tiamsis nej yuav tsum ua li cov neeg uas muaj tswvyim. Nej yuav tsum siv txhua lub sijhawm kom muaj nqis, rau qhov niaj hnub no tej neeg ua phem kawg li. Nej tsis txhob ua li cov neeg ruam, tiamsis nej yuav tsum ua tib zoo saib, saib Vajtswv xav kom nej ua yam twg. Nej tsis txhob haus cawv txiv hmab kom qaug, rau qhov tej ntawd yuav ua rau nej ua neeg tsis tsimtxiaj. Nej yuav tsum cia Vaj Ntsujplig kav nej lub siab. Nej ib tug yuav tsum qhia ib tug raws li tej lus uas nyob hauv Daviv phau nkauj, tej zaj nkauj qhuas Vajtswv thiab tej zaj nkauj uas cov ntseeg hu ua Vajtswv tsaug. Thaum nej hu tej zaj nkauj ntawd, nej yuav tsum hu ntawm lub siab xyivfab hlo. Nej cov uas ntseeg Yexus Khetos, nej yuav tsum niaj hnub ua Vajtswv uas yog Leej Txiv tsaug rau txhua yam los ntawm Yexus Khetos lub npe. Vim nej yog cov uas hwm Yexus Khetos, nej ib tug yuav tsum mloog ib tug lus. Nej cov uas yog pojniam, nej yuav tsum mloog nej tej txiv lus ib yam li nej mloog tus Tswv lus. Rau qhov tus txiv yog tus uas muaj hwjchim kav tus pojniam, ib yam li Yexus Khetos muaj hwjchim kav cov ntseeg. Cov ntseeg yog Yexus Khetos lub cev, thiab Yexus Khetos yog cov ntseeg tus Cawmseej. Yog li ntawd nej cov uas yog pojniam, nyias yuav tsum mloog nyias tus txiv lus txhua lo ib yam li cov ntseeg mloog Yexus Khetos lus. Nej cov uas yog txiv, nej yuav tsum hlub nej tej pojniam ib yam li Yexus Khetos hlub cov ntseeg thiab nws muab nws lub cev los txhiv cov ntseeg. Nws muab dej thiab muab nws Txojlus los ntxuav cov ntseeg kom huv, nws thiaj zoo muab lawv pub rau Vajtswv. Nws ua li ntawd nws thiaj tau cov ntseeg uas zoo kawg nkaus, tsis muaj ib qho txhaum, tsis ceb, tsis txoom thiab tsis muaj ib qho phem li los ua nws tug. Cov txiv yuav tsum hlub lawv cov pojniam ib yam li lawv hlub lawv lub cev. Tus txiv uas hlub nws tus pojniam, tus ntawd yeej hlub nws lub cev. Yeej tsis muaj leejtwg yuav ntxub nws lub cev. Tsuas muaj nws yuav tu ntshis thiab nrhiav zaub nrhiav mov los yug nws lub cev ib yam li Yexus Khetos ua rau cov ntseeg. Rau qhov peb sawvdaws puavleej koom Yexus lub cev. Raws li muaj lus sau cia rau hauv Vajtswv txojlus hais tias, “Twb yog vim li no tus tub thiaj tso nws niam nws txiv tseg, thiab mus nrog nws tus pojniam nyob, thiab nkawd ob leeg yuav koom ua ib lub cev.” Nqe no qhia ib qho tseemceeb rau peb, raws li kuv totaub, nqe no yog hais txog Yexus Khetos thiab cov ntseeg. Tiamsis nqe no yog hais txog nej thiab. Txhua tus txiv, nyias yuav tsum hlub nyias tus pojniam ib yam li nyias hlub nyias lub cev. Thiab txhua tus pojniam nyias yuav tsum hwm nyias tus txiv. Cov menyuam, nej yuav tsum mloog nej niam nej txiv lus, thiaj raws li tus Tswv txoj kevcai. Vajtswv txoj kevcai qhia hais tias, “Nej yuav tsum hwm nej niam nej txiv.” Nqe no yog thawj nqes uas Vajtswv coglus hais tias, “Yog nej ua li ntawd, nej yuav noj qab nyob zoo thiab muaj txojsia nyob ntev hauv lub ntiajteb no.” Nej cov uas ua niam ua txiv, nej tsis txhob ua rau nej tej menyuam chim. Nej yuav tsum qhuab ntuas nej tej menyuam raws li Vajtswv Txojlus qhia. Nej cov uas yog tubqhe, nej txhua tus yuav tsum mloog nej cov tswv lus thiab paub ntshai lawv. Nej yuav tsum rau siab ntso ua nej tes haujlwm tiag tiag ib yam li nej ua rau Yexus Khetos. Nej tsis txhob ua thaum lawv pom xwb kom lawv qhuas nej xwb, tiamsis nej yuav tsum rau siab ntso ua raws li Vajtswv lub siab nyiam, rau qhov nej yog Yexus Khetos cov tubqhe. Yog li ntawd nej cov uas yog tubqhe, nej yuav tsum zoo siab hlo ua nej tes haujlwm ib yam li nej ua rau Vajtswv, tsis yog ua rau neeg. Nej nco ntsoov hais tias Vajtswv yuav muab nqi zog rau txhua tus uas ua haujlwm zoo, tsis hais cov uas ua qhev thiab cov uas tsis ua qhev. Nej cov uas ua tswv, nej yuav tsum ua zoo ib yam li ntawd rau nej cov tubqhe; nej tsis txhob ua phem rau lawv. Nej yuav tsum nco ntsoov hais tias nej thiab nej cov tubqhe puavleej muaj tib tug TSWV nyob saum ntuj ceebtsheej, nws yog tus txiav txim rau txhua tus ib yam nkaus. Thaum kawg no kuv qhia rau nej hais tias nej yuav tsum nrog tus Tswv sib raug zoo, nej thiaj li yuav muaj zog thiab tau nws lub hwjchim uas loj kawg nkaus. Nej yuav tsum muab tej cuabyeej uas Vajtswv pub rau nej lawm los hnav. Yog nej ua li ntawd thaum dab Ntxwgnyoog tuaj ntxias nej, nej thiaj yuav kovyeej. Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim uas kav tiam tsaus ntuj. Yog li ntawd, nimno nej yuav tsum muab Vajtswv tej cuabyeej los hnav. Yog nej ua li ntawd thaum dab Ntxwgnyoog los tawmtsam nej, nej thiaj kovyeej. Thiab thaum tej kev tawmtsam ntawd dhau lawm, nej thiaj tseem nyob ruaj nrees. Yog li ntawd nej yuav tsum npaj tos. Cia li muab Txojlus tseeb los ua siv sia, muab kev ncaj ncees los ua daim hlau thaiv hauvsiab. Thiab nej yuav tsum muaj lub siab kub lug mus qhia txojmoo zoo uas hais txog txojkev kaj siab los ua khau rau. Nej yuav tsum niaj hnub tuav txojkev ntseeg thaiv nej ib yam li nej tuav daim hlau thaiv hniav ntaj. Yog nej ua li ntawd, nej yuav tua tau dab Ntxwgnyoog xibxub hluavtaws uas nws tua tuaj. Cia li muab txojkev dim txim uas Vajtswv pub rau nej lawm coj los ua kausmom hlau ntoo. Thiab muab Vajtswv Txojlus uas Vajtswv tus Ntsujplig pub rau nej coj los ua rab ntaj. Ib puas tsav yam uas nej ua no, nej yuav tsum thov Vajtswv pab. Nej yuav tsum thov Vajtswv txhua lub sijhawm raws li Vajtswv tus Ntsujplig coj nej. Vim li ntawd nej yuav tsum ceevfaj thiab ua siab ntev thov Vajtswv tsis txhob nkees. Thiab niaj hnub thov Vajtswv pab cov ntseeg sawvdaws. Thiab nej thov Vajtswv pab kuv, kom thaum kuv qhia Vajtswv txojlus, kuv muaj lub siab tawv qhia Txojmoo Zoo lub ntsiab lus rau sawvdaws paub. Txawm yog nimno kuv raug kaw rau hauv tsev lojcuj los kuv yeej yog ib tug xeebcom, vim kuv tseem qhia txojmoo zoo. Yog li ntawd, thov nej thov Vajtswv pab kom kuv muaj lub siab tawv qhia Txojmoo Zoo uas kuv yuav tsum qhia. Peb tus kwv Tikhikus uas peb hlub, nws yog ib tug tubtxib uas ua tus Tswv tes haujlwm; nws yuav qhia txhua yam haujlwm uas kuv ua rau nej, nej thiaj yuav paub hais tias kuv nyob li cas. Twb yog vim li ntawd kuv thiaj li txib nws tuaj saib nej. Kuv kom nws qhia rau nej paub hais tias peb sawvdaws nyob li cas, thiab nws yuav txhawb nej lub zog. Thov Vajtswv tus uas yog peb Leej Txiv thiab tus Tswv Yexus Khetos pab kom nej cov ntseeg tau nyob kaj siab lug, kom nej muab siab rau ntseeg thiab ib tug txawj hlub ib tug. Thov Vajtswv txoj koob hmoov nyob nrog txhua tus uas muaj lub siab hlub peb tus Tswv Yexus Khetos kom tsis txhob ploj ib zaug li. Kuv yog Paulus thiab Timautes uas yog Yexus Khetos ob tug tubtxib, wb sau tsab ntawv no xa tuaj rau nej txhua tus ntseeg Vajtswv uas nyob hauv lub nroog Filipis uas koom nrog Yexus Khetos, thiab cov txwjlaug uas saib cov ntseeg thiab cov uas pab ua Vajtswv txoj haujlwm: Thov Vajtswv tus uas yog peb Leej Txiv thiab Tswv Yexus Khetos foom koob hmoov rau nej, thiab pab kom nej tau zoo nyob kaj siab lug. Txhua zaus uas kuv nco txog nej sawvdaws, kuv nco ntsoov ua kuv tus Vajtswv tsaug; thiab txhua zaus uas kuv thov Vajtswv pab nej, kuv zoo siab kawg li, rau qhov nej tau pab kuv ua tes haujlwm uas qhia txojmoo zoo, txij thaum hauvpaus los txog niaj hnub nimno. Yog li ntawd kuv thiaj cia siab hais tias, Vajtswv tus uas pib ua haujlwm zoo rau hauv nej lub siab lawm, nws yeej yuav ua kom tes haujlwm ntawd tiav rau hnub uas Yexus Khetos los. Qhov uas kuv nco ntsoov nej txhua tus ntawd yeej tsimnyog lawm, rau qhov kuv hlub nej txhua tus! Nej sawvdaws puavleej nrog kuv tau txoj koob hmoov uas Vajtswv pub rau kuv, tsis hais thaum kuv raug kaw rau hauv tsev lojcuj thiab thaum luag tso kuv tawm los hais daws tej uas luag thuam txojmoo zoo, thiab ua kom sawvdaws paub hais tias txojmoo zoo yeej tseemceeb. Qhov uas kuv hais rau nej hais tias, kuv hlub nej ib yam li Yexus Khetos hlub, Vajtswv yeej paub hais tias kuv hais tseeb. Tej lus uas kuv thov Vajtswv pab nej, kuv thov kom nej ib tug txawj hlub ib tug heev zuj zus, kom nej paub tseeb thiab totaub txhua yam huv tibsi. Kuv thov Vajtswv pab nej li ntawd, nej thiaj li yuav paub hais tias yam twg yog yam uas zoo dua ntais. Yog nej paub li ntawd lawm, ces thaum txog Hnub uas Yexus Khetos rov qab los, nej thiaj yuav zoo kawg nkaus tsis muaj ib qho txhaum li. Twb yog vim Yexus Khetos nyob hauv nej lub siab lawm, nej thiaj ua tau nej lub neej zoo kawg nkaus rau Vajtswv tau ntsejmuag. Cov kwvtij, kuv xav qhia rau nej paub hais tias tej kev tsimtxom uas kuv raug, tej ntawd twb ua rau txojmoo zoo nrov ncha mus thoob plaws qhov txhia chaw lawm. Vim kuv raug kev tsimtxom, cov tubrog uas zov huabtais tsev thiab txhua tus uas nyob ntawm no, lawv thiaj paub hais tias, qhov uas kuv raug kaw hauv tsev lojcuj ntawd, twb yog vim kuv ua Yexus Khetos tus tubtxib. Thiab qhov uas kuv raug kaw hauv tsev lojcuj ntawd, qhov ntawd ua rau cov kwvtij ntseeg muab siab rau ntseeg tus Tswv heev ntxiv, thiab ua rau lawv muaj lub siab tawv mus qhia Vajtswv txojlus tsis ntshai leejtwg li. Muaj qee leej qhia Yexus Khetos zaj, rau qhov lawv khib thiab lawv nyiam sib cav sib ceg, tiamsis muaj qee leej muaj lub siab ncaj qhia tiag tiag. Lawv cov no hlub kuv lawv thiaj qhia li ntawd, rau qhov lawv yeej paub hais tias, Vajtswv tsa kuv ua tus uas teb cov neeg uas thuam txojmoo zoo. Tiamsis cov neeg uas tsis muaj lub siab ncaj qhia, lawv qhia kom sawvdaws qhuas lawv xwb; lawv xav hais tias lawv yuav ua kom kuv hajyam nyuaj siab heev, thaum uas kuv tseem raug kaw hauv tsev lojcuj no. Txawm yog lawv muaj lub siab ncaj qhia lossis tsis muaj los kuv yeej tsis poob siab li. Tsuav yog lawv qhia Yexus Khetos zaj rau txhua qhov xwb, ces kuv yeej zoo siab lawm. Thiab kuv yuav niaj hnub zoo siab, rau qhov kuv paub hais tias vim nej thov Vajtswv pab kuv, thiab vim Yexus Khetos tus Ntsujplig pab kuv, luag yeej yuav tso kuv tawm hauv tsev lojcuj xwb. Rau qhov kuv yeej cia siab hais tias Vajtswv yuav pab kom kuv tsis ua ib yam dabtsi rau kuv txajmuag li. Nws yuav pab kom kuv muaj lub siab tawv qhia tsis hais nimno lossis thaum twg li, kuv lub neej thiaj yuav ua rau Yexus Khetos tau ntsejmuag. Txawm yog kuv yuav ciaj thiab yuav tuag los kuv yeej yuav ua kuv lub neej kom Yexus Khetos tau ntsejmuag. Thaum kuv tseem ua neej nyob no, kuv nrog Yexus Khetos koom ib txojsia, thaum kuv tuag los kuv yeej yuav mus nrog Yexus Khetos nyob. Kuv xav mus nrog Yexus Khetos nyob, tiamsis yog kuv tes haujlwm hauv ntiajteb no tseem muaj nqis, yog li ntawd kuv tsis paub hais tias xyov kuv yuav xaiv txoj twg thiaj li zoo. Kuv ua ob lub siab. Kuv muaj ib lub siab xav tso lub ntiajteb no tseg thiab mus nrog Yexus Khetos nyob ntshai yuav zoo dua; tiamsis yog kuv nyob pab nej yuav muaj nqis rau nej heev. Thaum kuv paub tseeb li no lawm, kuv thiaj xav hais tias kuv yuav tsum nrog nej nyob pab nej, kom nej zoo siab rau tej uas nej twb ntseeg lawm, yog li ntawd thaum kuv rov qab tuaj nrog nej nyob, nej cov uas ntseeg Yexus Khetos, nej yuav zoo siab kawg li. Tiamsis qhov tseemceeb nej yuav tsum ua nej lub neej raws li Yexus Khetos txojmoo zoo, yog nej ua li ntawd txawm yog kuv tuaj xyuas nej thiab tsis tuaj los kuv yuav tau hnov xov hais tias, nej muab siab rau ntseeg thiab ua ib lub siab tawmtsam yeebncuab kom yeebncuab tsis txhob rhuav tau txojmoo zoo uas nej ntseeg. Nej tsis txhob ntshai cov neeg uas ua yeebncuab rau nej; yog nej ua siab tawv qhawv, lawv thiaj paub hais tias lawv yuav kov tsis yeej nej, nej yuav kovyeej lawv, rau qhov Vajtswv yuav pab kom nej kovyeej lawv. Txoj koob hmoov uas Vajtswv pub rau nej twb yog qhov uas nws hu nej los ua Yexus Khetos txoj haujlwm. Nej cov uas ua nws txoj haujlwm, tsis yog nej ntseeg nws xwb, tiamsis nej tseem yuav raug kev txomnyem thiab. Nimno nej yuav tsum tawmtsam ib yam li uas nej twb pom kuv tawmtsam los lawm, thiab raws li nej tau hnov hais tias kuv tseem tabtom tawmtsam. Qhov uas nej nrog Yexus Khetos koom ib txojsia, qhov ntawd ua rau nej muab siab rau ntseeg ntxiv, thiab qhov uas Yexus Khetos hlub nej ua rau nej zoo siab. Nej nrog Vaj Ntsujplig sib raug zoo, nej thiaj muaj lub siab dawb siab zoo thiab ua rau nej ib tug txawj hlub ib tug. Kuv thov ntuas nej kom nej txhua tus muaj lub siab xav ib yam nkaus, muaj lub siab hlub ib yam nkaus thiab sawvdaws koom ua ib lub siab, ib tug nrog ib tug sib raug zoo. Yog nej ua li ntawd yuav ua rau kuv zoo siab kawg li. Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug. Nej tsis txhob xav txog nej xwb, tiamsis nej yuav tsum xav txog lwm tus thiab. Tsimnyog nej muaj lub siab zoo ib yam li Yexus Khetos lub: Yexus yeej muaj hwjchim sib luag zos li Vajtswv, tiamsis nws tsis tau xav hais tias nws yuav tuav lub hwjchim ntawd mus li. Tiamsis nws zoo siab tso ib puas tsav yam tseg, nws los yug ua neeg. Nws ua nws lub neej zoo li ib tug tubqhe, thiab nws txo hwjchim. Nws txo hwjchim thiab niaj hnub ua raws li Vajtswv lub siab nyiam, txawm yog neeg muab nws ntsia rau saum ntoo khaublig los nws tseem mloog Vajtswv lus. Twb yog vim li no Vajtswv thiaj tsa nws ua tus loj dua ntais, thiab tis lub npe uas zoo tshaj tej npe huv tibsi rau nws. Vajtswv ua li ntawd kom Yexus lub peb muaj koob meej, txhua tus tsis hais cov uas nyob saum ntuj ceebtsheej, cov uas nyob hauv ntiajteb no thiab tej uas nyob hauv nruab tivtxwv puavleej yuav txhos caug pe nws, thiab txhua tus yuav lees hais tias Yexus Khetos yog tus Tswv, kom Vajtswv tus uas yog Leej Txiv thiaj tau koob meej. Yog li ntawd cov kwvtij uas kuv hlub, thaum kuv tseem nrog nej nyob, nej ibtxwm mloog kuv lus, txawm yog nimno kuv tsis nrog nej nyob lawm los nej yuav tsum mloog kuv lus heev dua yav tas los thiab. Nej yuav tsum paub ntshai Vajtswv ua ibce tshee hnyo, nej thiaj yuav dim nej lub txim, rau qhov Vajtswv yog tus uas niaj hnub ua haujlwm hauv nej lub siab kom nej xav ua Vajtswv tes haujlwm, thiab ua tau raws li Vajtswv lub siab nyiam. Ib puas tsav yam uas nej ua, nej tsis txhob yws thiab tsis txhob sib cav sib ceg, nej thiaj yuav ua tau neeg zoo uas tsis muaj leejtwg yuav thuam tau, thiab ua tau Vajtswv cov menyuam uas zoo kawg nkaus uas nrog cov neeg tsis ncaj thiab muaj txim nyob ua ke hauv ntiajteb no. Thaum nej qhia Vajtswv txojlus uas cawm neeg txojsia, nej yuav tsum ci rau lawv ib yam li cov hnubqub uas ci saum nruab ntug. Yog nej ua li ntawd thaum txog hnub uas Yexus Khetos rov qab los kuv yuav tau ntsejmuag. Rau qhov thaum ntawd sawvdaws yuav pom hais tias tej haujlwm uas kuv siv siv zog ua muaj nqis heev. Txawm yog muab kuv cov ntshav fij rau Vajtswv, thiaj ua rau nej kev ntseeg tiav los kuv yeej zoo siab; yog kuv zoo siab nej yeej yuav zoo siab thiab. Ib yam nkaus li ntawd, tsimnyog nej yuav zoo siab thiab ua rau kuv zoo siab. Kuv cia siab hais tias yog peb tus Tswv pom zoo, tsis ntev no kuv yuav txib Timautes tuaj xyuas nej, thiab thaum nws coj xov los qhia rau kuv lawm, kuv yuav qab siab nyob. Timautes tib leeg xwb, thiaj li xav ib yam li kuv thiab mob siab txog nej. Dua li lwm tus, lawv tsuas xav txog lawv tej haujlwm xwb, lawv tsis quavntsej Yexus Khetos tej haujlwm li. Nej twb paub lawm hais tias Timautes tes haujlwm muaj nqis heev; nws nrog kuv ua txoj haujlwm uas qhia txojmoo zoo ib yam li wb yog ob txiv tub. Yog li ntawd thaum twg kuv paub hais tias lawv yuav ua li cas rau kuv, kuv cia siab hais tias kuv yuav tau txib Timautes tuaj qhia rau nej sai sai. Thiab kuv cia siab hais tias, yog Vajtswv pom zoo tsis ntev no kuv yuav tau tuaj xyuas nej. Kuv xav hais tias kuv yuav txib peb tus kwv Epafauditus uas nej txib tuaj pab kuv ntawd rov qab los tim nej. Nws nrog kuv ua haujlwm thiab nws ua ib tug tubrog ib yam li kuv. Nws kub siab lug xav pom nej sawvdaws thiab nws nyuaj siab kawg, rau qhov uas nej tau hnov hais tias nws mob. Nws yeej mob tiag, nws twb yuav luag tuag, tiamsis Vajtswv hlub nws Vajtswv thiaj tsis pub nws tuag. Tsis yog Vajtswv hlub nws ib leeg xwb, tiamsis Vajtswv hlub kuv thiab. Vajtswv tsis pub nws tuag kom kuv thiaj tsis muaj kev nyuaj siab. Yog li ntawd, kuv thiaj li maj txib nws rov qab los tim nej, thaum nws thiab nej rov sib pom lawm, nej yuav zoo siab kawg li thiab kuv yuav tsis nyuaj siab lawm. Nej yuav tsum zoo siab hlo txais tos nws, rau qhov nws yog ib tug kwvtij uas ntseeg tus Tswv. Nej yuav tsum hwm tej lus neeg uas muab nws rau ua haujlwm li nws, rau qhov nws tuaj pab kuv ua tej uas nej pab tsis tau, nws twb yuav luag tuag vim nws ua Yexus Khetos tes haujlwm, nws yeej tsis khuvxim nws txojsia li. Cov kwvtij, thaum kawg no kuv thov kom nej cia li zoo siab qhov uas nej tau nrog tus Tswv koom ua ke. Qhov uas kuv rov sau tej uas kuv twb sau ib zaug tuaj rau nej lawm, yeej tsis ua rau kuv nyuaj siab dabtsi, tiamsis yuav ua rau nej paub ceevfaj nej thiaj tsis yuam kev. Nej yuav tsum ceevfaj cov neeg uas ua phem ua qias, cov neeg uas ua phem, cov neeg uas muab lawv lub cev hlais. Cov neeg uas ua kevcai txiav tiag yog peb, tsis yog lawv, peb paub pehawm Vajtswv rau qhov. Vaj Ntsujplig qhia peb, thiab peb zoo siab vim peb nrog Yexus Khetos koom ib txojsia, peb yeej tsis cia siab rau tej kevcai uas neeg uas. Yog kuv xav cia siab rau tej ntawd los yeej tau. Kuv yeej paub tej ntawd huv tibsi, yog leejtwg tseem xav hais tias nws cia siab rau tej kevcai uas neeg ua, kuv hajyam muaj chaw cia siab rau tej ntawd heev dua nws. Thaum yug kuv tau yim hnub lawm, lawv muab kuv ua kevcai txiav. Kuv yeej yog neeg Yixalayees, kuv yog xeem Npeenyamees, kuv yog neeg Henplais, kuv yug hauv haivneeg Henplais. Yog yuav hais txog qhov uas coj raws li cov Yudais tej kevcai, kuv yeej yog tus uas coj raws li cov Falixais pab. Yav tas los kuv coj txoj kevcai no nruj heev, kuv thiaj li tsimtxom cov ntseeg Yexus. Yog Vajtswv coj tus uas xyaum ua raws li Vajtswv txoj kevcai los nrog Vajtswv sib raug zoo lawm, ces Vajtswv yuav xub coj kuv los lawm, ces Vajtswv yuav xub coj kuv los nrog Vajtswv sib rau zoo, rau qhov kuv yeej coj raws li txoj kevcai, kuv tsis tau ua txhaum ib nqes li. Tiamsis tej uas yav tas los kuv suav hais tias muaj nqis, nimno kuv tsis suav hais tias tej ntawd muaj nqis lawm, rau qhov kuv xav ua kom haum Yexus Khetos siab. Tsis yog kuv suav hais tias tej ntawd tsis muaj nqis xwb, tiamsis yog txhua yam huv tibsi, rau qhov kuv xav tau yam uas muaj nqis heev dua tej ntawd; yam uas kuv xav tau ntawd yog qhov uas kuv xav muab siab npuab Yexus Khetos tus uas yog kuv tus Tswv heev dua yav tas los. Kuv ua kuv lub neej kom haum Yexus Khetos siab, kuv thiaj li tso ib puas tsav yam tseg. Kuv saib tej ntawd zoo ib yam li tej liamsim uas luag muab povtseg lawm xwb; kuv ua li ntawd kom kuv thiaj tau Yexus Khetos los ua kuv tus Tswv thiab kom kuv tau nrog nws koom ib txojsia. Txawm yog kuv xyaum ua raws li Vajtswv txoj kevcai los Vajtswv yeej tsis suav hais tias kuv yog neeg ncaj ncees. Tiamsis qhov uas Vajtswv suav hais tias kuv yog neeg ncaj ncees, twb yog vim kuv ntseeg Yexus Khetos. Txhua tus uas ntseeg, Vajtswv yeej suav hais tias lawv yog cov uas ncaj ncees. Yam uas kuv xav yuav heev dua lwm yam huv tibsi, yog qhov uas kuv xav paub Yexus Khetos heev dua yav tas los. Thiab xav tau lub hwjchim uas ua rau Yexus sawv hauv qhov tuag rov qab los. Kuv zoo siab nrog nws raug kev txomnyem thiab kuv xav muaj lub siab zoo li nws lub thaum nws raug kev tuag, kuv cia siab hais tias Vajtswv yeej yuav tsa kuv sawv hauv qhov tuag rov qab los. Kuv tsis tau khav hais tias kuv twb tau tej uas kuv hais los no lawm lossis ua tau kuv lub neej zoo kawg nkaus lawm, tiamsis kuv tseem tabtom siv zog ua saib kuv puas tau tej ntawd los ua kuv tug, ib yam li Yexus Khetos tau coj kuv los ua nws tug lawm. Cov kwvtij, kuv tsis tau xav hais tias kuv twb khiav mus txog tom kawg lawm; tsuas muaj ib yam uas kuv yuav ua xwb, yam ntawd yog li no: Kuv yuav tsis cim ntsoov tej uas kuv ua tas los lawm, tiamsis kuv yuav siv zog ntsos mus kom txog tej uas nyob tom hauv ntej. Yog li ntawd, kuv thiaj li khiav ncaj nraim mus rau tus ciam tom kawg kom kuv tau nqi zog. Qhov nqi zog ntawd yog txojsia ntev dhawv mus ibtxhis uas Vajtswv khaws cia rau saum ntuj ceebtsheej tos peb cov uas ntseeg Yexus Khetos. Peb cov uas paub Vajtswv tseeb lawm, tsimnyog peb txhua tus xav li ntawd. Tiamsis yog nej cov muaj qee leej xav lwm yam lawm, Vajtswv yuav qhia yam ntawd rau nej paub. Txawm yog li cas los peb yuav tsum coj raws li tej uas peb twb paub lawm. Cov kwvtij, nej yuav tsum xyaum ua raws li kuv ua, peb twb ua yam ntxwv rau nej xyaum lawm, yog li ntawd nej yuav tsum saib cov neeg uas coj raws li peb ua, nej thiaj yuav paub ua. Muaj ntau leej tsis ua lawv lub neej zoo, lawv thiaj saib tsis taus qhov uas Yexus Khetos tuag saum tus ntoo khaublig. Kuv twb qhia lawv zaj rau nej ntau zaus lawm. Nimno kuv rov qab qhia li no rau nej los kuv kua muag kawg li. Thaum kawg cov neeg ntawd yuav raug kev puastsuaj, lawv muab tej kev phem kev qias los saib hlob dua lwm yam huv tibsi. Yam uas twb tsimnyog lawv txajmuag los lawv tseem muab los khav, thiab lawv tsuas xav txog tej uas yog ntiajteb li xwb. Peb yog neeg qaum ntuj, peb niaj hnub ua siab ntev tos peb tus Cawmseej uas yog Tswv Yexus Khetos tus uas yuav los saum ntuj los. Nws yuav muab peb lub cev uas txawj mob txawj tuag no hloov dua tshiab kom zoo li nws lub cev uas ci ntsa iab tsis txawj mob tsis txawj tuag. Nws ua tau li ntawd, rau qhov nws muaj hwjchim muab ib puas tsav yam huv tibsi los rau nws kav. Yog li ntawd cov kwvtij, kuv hlub nej thiab nco nej heev! Nej ua rau kuv zoo siab thiab ua rau kuv tau ntsejmuag kawg li! Cov kwvtij uas kuv hlub, nej yuav tsum muab siab rau ntseeg tus Tswv tsis txhob tso nws tseg. E-audias thiab Xitikhes, kuv thov ntuas neb kom neb nyob sib haum thiaj tsimnyog qhov uas neb yog ob vivncaus uas ntseeg tus Tswv. Kuv qhia tus uas nrog kuv ua haujlwm hais tias koj yuav tsum pab ob tug pojniam ntawd, rau qhov nkawd yog ob tug uas muab siab rau pab kuv qhia txojmoo zoo, ib yam li Kalemes thiab cov uas nrog kuv ua haujlwm. Lawv cov ntawd yog cov uas muaj lub npe sau rau hauv Vajtswv phau ntawv uas Vajtswv sau cov neeg uas muaj txojsia ntev dhawv mus ibtxhis lawm tej npe. Nej yuav tsum niaj hnub zoo siab, rau qhov nej twb nrog tus Tswv koom ib txojsia lawm. Kuv rov hais ib los ntxiv hais tias: nej cia li zoo siab! Nej yuav tsum ua siab mos siab muag rau txhua tus. Tus Tswv twb yuav los sai sai no. Nej tsis txhob nyuaj siab rau ib yam dabtsi hlo li, thaum nej thov Vajtswv nej cia li qhia txhua yam uas nej xav yuav rau Vajtswv, thiab thaum nej thov nej yuav tsum nco ntsoov ua Vajtswv tsaug. Yeej tsis muaj leejtwg yuav paub qhov uas Vajtswv ua rau nej muaj kev kaj siab thiab qhov uas nej nrog Yexus Khetos koom ib txojsia thiab tej uas nej xav huv tibsi. Cov kwvtij, kuv thov xaus lus li no hais tias nej yuav tsum cim ntsoov tej uas zoo thiab tsimnyog qhuas rau hauv nej lub siab: tsis hais tej uas tseeb, tej uas tsimnyog hwm, tej uas ncaj ncees, tej uas dawbhuv, tej uas ntxim nyiam thiab tej uas yuav tau koob meej, nej yuav tsum khaws tej ntawd cia rau hauv nej lub siab huv tibsi. Nej yuav tsum ua raws li tej uas nej kawm thiab nej tau txais los lawm, tsis hais tej uas nej hnov kuv qhia thiab tej uas nej pom kuv ua. Nej yuav tsum ua raws li tej ntawd, Vajtswv tus uas ua rau peb muaj kev kaj siab, nws thiaj yuav nrog nraim nej nyob. Qhov uas kuv nrog tus Tswv koom ib txojsia qhov ntawd ua rau kuv zoo siab kawg li, nej twb tso kuv tseg tau ntev los lawm, tiamsis nimno nej ho rov qab pab kuv dua. Kuv hais li no tsis yog kuv hais tias nej tsis hlub kuv, qhov tseemceeb yog tsis muaj neeg dhau xwb, nej thiaj pab tsis tau kuv. Kuv hais li no tsis yog kuv yws hais tias tsis muaj neeg hlub kuv, txawm yog kuv yuav nyob li cas los kuv yeej nyob tau. Kuv twb paub lawm hais tias, thaum tsis muaj noj tsis muaj hnav zoo li cas thiab thaum muaj ntau lawm ho zoo li cas. Kuv yeej paub tej uas tsis yoojyim totaub no, tsis hais kuv nyob qhov twg thiab lub sijhawm twb, yuav tshaib yuav tsau, yuav muaj ntau muaj tsawg los kuv yeej tsis txhawj. Vim Yexus Khetos txhawb kuv lub zog, kuv thiaj tiv taus txhua tsav yam huv tibsi. Txawm yog li ntawd los kuv ua nej tsaug, rau qhov nej twb pab kuv thaum kuv raug kev txomnyem lawm. Nej cov uas yog neeg Filipis nej twb paub lawm hais tias thaum kuv xub tuaj qhia txojmoo zoo tim nej, tsis muaj leejtwg pab kuv li. Thaum kuv tawm hauv Makedaunias mus, tsuas yog nej cov thiaj li pab kuv xwb. Nej muaj ntau muaj tsawg los nej puavleej xa tuaj rau kuv. Thaum kuv nyob hauv lub nroog Thexalaunikes, nej xa qhov txhia chaw tuaj rau kuv, tsis yog xa ib zaug xwb tiamsis nej tseem xa tuaj ntxiv thiab. Tsis yog kuv xav tau nej tej qhov txhia chaw, tiamsis kuv xav kom tej uas nej xa tuaj rau kuv ntawd muaj nqis rau nej. Kuv sau tsab ntawv no tuaj qhia rau nej hais tias tej uas nej muab rau Epafauditus nqa tuaj rau kuv, kuv tau txais lawm, nimno kuv muaj ntau siv tsis tas li! Tej uas nej xa tuaj rau kuv ntawd zoo ib yam li tej tshuaj tsw qab uas sawvdaws muab fij rau Vajtswv, thiab yog tej uas Vajtswv pom zoo yuav. Kuv tus Vajtswv uas muaj koob hmoov nplua mias, nws yuav pub txhua yam uas nej xav tau rau nej, rau qhov nej yog cov uas ntseeg Yexus Khetos. Thov kom Vajtswv tus uas yog peb Leej Txiv tau koob meej mus ibtxhis li. Amees. Kuv hais noj qab nyob zoo rau nej txhua tus uas ntseeg Vajtswv thiab nej cov uas yog Yexus Khetos tug lawm. Cov kwvtij uas nrog kuv nyob ntawm no, lawv hais noj qab nyob zoo rau nej txhua tus ib yam nkaus thiab. Cov ntseeg Vajtswv txhua tus uas nyob ntawm no, lawv puavleej hais noj qab nyob zoo tuaj rau nej sawvdaws, tshwjxeeb yog cov uas nyob hauv huabtais lub loog yog cov hais. Thov tus Tswv Yexus Khetos foom koob hmoov rau nej txhua tus. Kuv yog Paulus tus uas Vajtswv tsa ua Yexus Khetos tus timthawj. Kuv thiab peb tus kwv Timautes sau tsab ntawv no xa tuaj rau Vajtswv haivneeg uas nyob hauv lub nroog Kaulauxais. Nej yog peb cov kwvtij uas muab siab rau ntseeg Yexus Khetos. Thov Vajtswv tus uas yog peb leej Txiv foom koob hmoov rau nej thiab pab kom nej tau nyob kaj siab lug. Txhua zaug uas peb thov Vajtswv pab nej, peb yeej nco ntsoov ua peb tus Tswv Yexus Khetos Leej Txiv tsaug, rau qhov peb twb hnov xov hais tias nej muab siab rau ntseeg Yexus Khetos thiab nej hlub Vajtswv haivneeg txhua tus huv tibsi. Thaum nej xub hnov Txojmoo Zoo uas yog txoj tseeb, nej paub hais tias Txojmoo Zoo ntawd ua rau nej muaj chaw cia siab. Vim nej cia siab rau tej uas Vajtswv twb khaws cia rau nej saum ntuj ceebtsheej lawm, nej thiaj muab siab rau ntseeg thiab sib hlub. Txojmoo Zoo tabtom nrov ncha mus thoob plaws hauv qab ntuj no, thiab Txojmoo Zoo ntawd coj tej koob hmoov zoo los ib yam li thaum uas Txojmoo Zoo nrov tuaj txog nej, nej paub hais tias yog Vajtswv hlub cov neeg uas muaj txim, nej thiaj tau txais tej koob hmoov zoo ntawd. Qhov uas nej paub li ntawd, twb yog peb tus kwv Epafas tus uas nrog peb ua haujlwm thiab yog tus uas peb hlub qhia rau nej. Nws yog ib tug uas muab siab rau pab peb ua Yexus Khetos tes haujlwm. Nws qhia rau peb hais tias Vaj Ntsujplig twb ua rau nej txawj sib hlub lawm. Vim li ntawd txij hnub uas peb tau hnov nej moo, peb thiaj niaj hnub thov Vajtswv pab nej tsis tseg li. Peb thov Vajtswv pab kom nej muaj tswvyim thiab totaub tej uas Vaj Ntsujplig tus Dawbhuv qhia, nej thiaj paub tej uas Vajtswv lub siab nyiam. Yog nej paub lawm, nej yuav ua tau neeg zoo raws li Vajtswv lub siab nyiam thiab niaj hnub ua tej uas haum Vajtswv siab. Nej lub neej yuav tawg paj txi txiv thiab nej yuav paub Vajtswv heev zuj zus. Thov Vajtswv tus uas muaj hwjchim txhawb nej lub zog kom nej muaj zog heev ntxiv, txawm yog nej tau zoo thiab txomnyem los nej thiaj ua taus siab ntev. Thiab nej yuav zoo siab hlo ua Leej Txiv tsaug. Leej Txiv yog tus uas coj nej los yuav nws txoj koob hmoov uas nws npaj cia rau nws haivneeg uas taug txojkev kaj. Vajtswv twb pab peb cov uas dab Ntxwgnyoog muab kaw rau hauv qhov tsaus ntuj dim lawm; thiab Vajtswv coj peb los nyob hauv qhov pom kev uas Vajtswv tus Tub kav. Tus Tub ntawd yog tus uas Vajtswv hlub thiab yog tus uas tso peb dim thiab zam peb lub txim. Yexus Khetos tus uas peb qhovmuag pom yeej zoo ib yam li Vajtswv tus uas peb qhovmuag tsis pom. Yexus Khetos yog Vajtswv tus Tub hlob. Nws muaj hwjchim loj dua ib puas tsav yam uas Vajtswv tsim huv tibsi. Tsis hais tej uas nyob saum nruab ntug thiab tej uas nyob hauv ntiajteb no, tej uas peb qhovmuag pom thiab tej uas peb qhovmuag tsis pom, cov timtswv ceebtsheej uas muaj hwjchim thiab tej nomtswv lossis cov vajntxwv thiab cov neeg uas muaj hwjchim kav ntiajteb, txhua yam ntawd puavleej yog Vajtswv hais kom Yexus tsim, thiab nws tsim tej ntawd rau nws. Yexus Khetos yeej xub nyob dua ib puas tsav yam huv tibsi, thiab nws tu kom nyias nyob muaj nyias chaw. Yexus Khetos yog lub taubhau rau lub cev. Lub cev yog cov neeg uas ntseeg Vajtswv. Nws yog lub hauvpaus uas ua kom lub cev ciaj sia. Nws yog thawj tug uas Vajtswv tsa sawv hauv qhov tuag rov qab los. Vajtswv ua li ntawd kom Yexus Khetos tib leeg thiaj ua tau ib puas tsav yam tus thawj. Rau qhov Vajtswv yeej pom zoo cia Vajtswv tus Tub muaj hwjchim thiab muaj yam ntxwv ib yam li Vajtswv. Vajtswv pom zoo kom Vajtswv tus Tub coj ib puas tsav yam uas nyob hauv qab ntuj no thiab nyob saum nruab ntug rov los ua Vajtswv tug. Vajtswv tso Vajtswv tus Tub los tuag saum tus ntoo khaublig, peb thiaj li tau los nrog Vajtswv sib raug zoo. Yav tas los nej ua tsis haum Vajtswv siab, nej ua yeebncuab rau Vajtswv, rau qhov nej nyiam ua phem tsis hais tej uas nej ua thiab tej uas nej xav. Tiamsis qhov uas nimno nej tau los nrog Vajtswv sib raug zoo twb yog vim Vajtswv tus Tub lub cev raug kev tuag txhiv nej. Vajtswv txib Vajtswv tus Tub los tuag txhiv nej, rau qhov Vajtswv xav kom thaum nej mus sawv ntawm Vajtswv lub xubntiag, nej ua tau neeg zoo kawg nkaus tsis muaj ib qho txhaum li. Nej yuav tsum muab siab rau ntseeg Txojmoo Zoo ib yam li thaum nej nyuam qhuav hnov. Thiab nej yuav tsum nco ntsoov qhov uas nej twb cia siab rau lawm. Nej tsis txhob pub leejtwg ua rau nej xav yuam kev. Txojmoo Zoo no yog txoj uas twb muaj neeg coj mus qhia rau txhua tus uas nyob hauv qab ntuj no lawm. Kuv yog ib tug tubtxib uas qhia Txojmoo Zoo ntawd ntag. Nimno kuv zoo siab raug kev txomnyem pab nej. Rau qhov kuv xav kom tej kev txomnyem uas Yexus Khetos raug pab nws lub cev tiav. Yexus Khetos lub cev yog cov neeg uas ntseeg Vajtswv. Vajtswv tsa kuv ua ib tug tubtxib pab cov ntseeg. Vajtswv kom kuv ua tes haujlwm no thiaj pab tau nej. Tes haujlwm no yog qhov uas qhia txog nws zaj. Nws kom kuv qhia txhij qhia txhua hais txog zaj uas nws twb muab zais cia tau ntau tiam los lawm, tsis pub rau leejtwg paub. Tiamsis nimno nws twb qhia rau nws haivneeg paub lawm. Vajtswv ua li no rau qhov Vajtswv yeej pom zoo qhia zaj uas tsis muaj neeg paub no rau nws haivneeg paub. Zaj ntawd yog zaj uas muaj nqis heev thiab zoo kawg nkaus. Vajtswv twb npaj zaj no cia rau txhua haivneeg lawm. Zaj uas Vajtswv muab zais cia lawm yog hais tias Yexus Khetos twb los nrog nej nyob lawm; yog li ntawd, nej yuav tau Vajtswv lub tshwjchim uas ci ntsa iab. Peb paub li no, peb thiaj qhia Yexus Khetos zaj rau sawvdaws. Peb ntuas thiab qhia txhua tus raws li peb muaj tswvyim qhia, rau qhov peb xav kom txhua tus uas ntseeg Yexus Khetos ua tau lawv lub neej zoo thiab coj tau lawv mus cuag Vajtswv. Yexus Khetos twb pub nws lub zog rau kuv lawm, kuv thiaj muab siab rau siv lub zog uas Yexus Khetos pub rau kuv ua kom tau raws li tej uas kuv xav ua. Kuv xav kom nej paub hais tias kuv ua haujlwm khwv kawg li pab nej thiab pab cov ntseeg uas nyob hauv lub nroog Laudikeyas, thiab cov neeg uas tseem tsis tau pom dua kuv. Qhov uas kuv ua li no yog kuv xav txhawb lawv lub zog thiab xav kom lawv ib tug txawj hlub ib tug. Thiab kom lawv totaub zoo, lawv thiaj yuav cia siab rau Yexus Khetos. Lawv thiaj li paub zaj uas Vajtswv muab zais cia lawm, zaj ntawd yog Yexus Khetos ntag. Yexus Khetos yog tus yuamsij uas qhib Vajtswv lub txhab tswvyim thiab kev txawj ntse uas Vajtswv muab zais cia lawm. Kuv qhia rau nej hais tias nej yuav tsum ceevfaj, tsis txhob pub leejtwg ntxias tau nej. Txawm yog lawv yuav txawj hais zoo npaum li cas los nej tsis txhob mloog lawv lus. Txawm yog kuv nyob deb nej los kuv lub siab yeej nrog nraim nej nyob. Kuv zoo siab kawg li, rau qhov kuv hnov hais tias nej cov uas ntseeg Yexus Khetos, nej puavleej ua ib lub siab. Nej twb lees hais tias Yexus Khetos yog nej tus Tswv lawm, yog li ntawd nej yuav tsum ua nej lub neej kom phim qhov uas nej nrog nws koom ib txojsia. Nej yuav tsum muab siab rau ntseeg Yexus Khetos ib yam li tus cag ntoo uas ntsia av tob tob. Thiab nej yuav tsum sawv khov kho ib yam li lub tsev uas cov ncej txhos tob tob. Nej yuav tsum muab siab npuab tej uas nej twb kawm los lawm. Thiab nej yuav tsum niaj hnub nco ntsoov ua Vajtswv tsaug. Nej yuav tsum ceevfaj. Nej tsis txhob mus mloog tej zaj uas tsis muaj hauvpaus hauvntsis uas sawvdaws qhuas hais tias, yog kev txawj kev ntse, nyob tsam nej tso Vajtswv tseg. Tej zaj ntawd yeej yog tej uas neeg ibtxwm qhia ib tiam dhau ib tiam los. Thiab tej ntawd yog dab li tsis yog Yexus Khetos li. Rau qhov Yexus los yug ua neeg, nws tus yam ntxwv zoo ib yam li Vajtswv Tus. Thiab nej cov uas nrog Yexus Khetos koom ib txojsia, nej twb zoo kawg nkaus lawm. Yexus Khetos yog tus uas muaj hwjchim loj dua cov uas kav saum nruab ntug thiab hauv ntiajteb no. Nej cov uas nrog Yexus Khetos koom ib txojsia, nej twb ua kevcai txiav lawm. Tsis yog neeg muab nej ua, tiamsis qhov uas Yexus Khetos pab nej dim nej lub siab uas pheej yuam nej lub cev mus ua txhaum, qhov ntawd twb yog nws muab nej ua kevcai txiav ntag. Thaum nej ua kevcai raus dej, twb yog muab nej faus nrog Yexus Khetos ua ke lawm. Thiab Vajtswv twb tsa nej nrog Yexus Khetos sawv rov qab los lawm, rau qhov nej cia siab rau Vajtswv lub hwjchim uas tsa Yexus sawv hauv qhov tuag rov qab los. Yav tas los nej zoo ib yam li cov uas tuag lawm, vim nej ua txhaum thiab nej yog lwm haivneeg uas yeej tsis muaj Vajtswv txoj kevcai kav. Tiamsis nimno Vajtswv coj nej los nrog Yexus Khetos koom ib txojsia. Vajtswv twb zam peb lub txim huv tibsi lawm. Vajtswv rhuav tej kevcai nruj uas kav peb. Thiab Vajtswv twb muab tej ntawd huv tibsi coj mus ntsia rau saum tus ntoo khaublig lawm. Yexus Khetos kovyeej ib puas tsav yam uas muaj hwjchim sau tus ntoo khaublig. Nws coj ib puas tsav yam ntawd los rau sawvdaws saib hais tias, nws yog tus uas yeej thiab tej ntawd yog cov uas swb. Yog li ntawd, nej tsis txhob pub leejtwg thuam nej hais tias ua li cas nej tsis caiv kev noj kev haus lossis hnub ua kevcai lossis hnub hli xiab lossis Hnub Xanpataus. Tej ntawd tsuas yog tej uas yuav muaj los yav tom ntej no tus duab xwb, tus uas tseemceeb yog Yexus Khetos. Nej tsis txhob pub tus uas khav hais tias nws zoo dua lwm tus thuam nej. Tus ntawd pheej hais tias nws ua yogtoog pom tej uas tseemceeb, nws ua txuj ua li nws yog tus uas tsis muab hlob; nws pehawm cov timtswv ceebtsheej, tus ntawd nws lam khav qhuav raws li nws xav xwb. Nws tsis muab siab npuab Yexus Khetos tus uas yog cov ntseeg lub taubhau. Yexus Khetos yog tus uas ntxiv roj ntxiv ntshav rau lub cev thiab muab tej qij txha los sib dhos. Nws muab tej leeg los tuav, lub cev thiaj nyob ruaj ua ke thiab txawj loj hlob zuj zus raws li Vajtswv lub siab nyiam. Nej twb nrog Yexus Khetos tuag thiab nej twb dim tej uas ibtxwm kav neeg hauv lub qab ntuj no lawm. Ua li cas nej tseem ua nej lub neej ib yam li neeg ntiajteb ua thiab? Ua li cas nej tseem coj tej kevcai uas qhia hais tias, tsis txhob tuav, tsis txhob saj thiab tsis txhob kov. Txawm yog peb ua raws li tej ntawd los thaum kawg yeej tsis muaj nqis dabtsi rau peb li. Tej kevcai ntawd tsuas yog tej uas neeg xav thiab neeg qhia xwb. Tej kevcai uas qhia neeg kom pe cov timtswv ceebtsheej, kom ua li cov neeg tsis muab hlob, thiab kom neeg tsimtxom neeg lub cev, sawvdaws saib yam li tej ntawd yog tej uas tseemceeb. Tiamsis tej ntawd yeej pab tsis tau kom neeg tswj tau neeg lub siab uas nyiam ua phem. Vajtswv twb tsa nej nrog Yexus Khetos sawv hauv qhov tuag rov qab los lawm; yog li ntawd, nej yuav tsum muab siab npuab tej uas nyob saum ntuj ceebtsheej, qhov chaw ntawd yog qhov uas Yexus Khetos zaum saum lub zwmtxwv uas nyob ntawm Vajtswv sab xis. Nej yuav tsum muab siab npuab tej uas nyob rau saum ntuj ceebtsheej, tsis yog muab siab npuab tej uas nyob hauv ntiajteb no. Rau qhov nej cov uas nrog Yexus Khetos koom ib txojsia, nej zoo li cov neeg uas tuag lawm. Nej txojsia Vajtswv twb muab khaws cia lawm. Yexus Khetos yog nej txojsia, thaum nws rov los nej yuav nrog nws ua ke los thiab nrog nws tau koob meej ib yam nkaus. Yog li ntawd tej kev phem kev qias uas nej lub siab nyiam ua, nej yuav tsum muab tso povtseg, tsis hais kev nkauj kev nraug lossis ua vuabtsuab lossis ntshaw luag tug lossis nyiam ua phem ua qias lossis ua neeg siab hlob. Tus neeg siab hlob, nws saib yam uas nws ntshaw tsimtxiaj dua Vajtswv. Vim muaj tej no Vajtswv thiaj yuav rau txim rau cov neeg uas tsis mloog Vajtswv lus. Yav tas los nej nyiam ua kev phem kev qias ib yam li cov neeg uas nyiam ua phem ua qias ntawd. Tiamsis nimno nej yuav tsum muab tej uas yuav hais no tso povtseg: kev chim, kev ua nruj ua tsiv, ua limhiam, nej tsis txhob thuam lwm tus thiab tsis txhob hais tej lus uas tshawv mloog ib zaug li. Nej ib tug tsis txhob dag ib tug, rau qhov nej twb muab nej lub siab qub thiab tej kev phem uas nej ibtxwm ua tso povtseg lawm. Nimno nej twb ua neeg tshiab lawm. Qhov uas nej ua tau neeg tshiab ntawd twb yog vim Vajtswv tus uas tsim nej niaj hnub pab nej kom nej coj tau tus yam ntxwv zoo li nws, nej thiaj li yuav paub nws zoo zuj zus. Tus uas ua neeg tshiab lawm, nws yeej tsis suav hais tias cov no yog neeg Kilis, cov no yog neeg Yudais, cov no yog cov uas ua kevcai txiav, cov no yog cov uas tsis ua kevcai txiav, cov no yog lwm haivneeg, cov no yog neeg qus, cov no yog cov ua qhev, cov no yog cov uas tsis ua qhev. Rau qhov Yexus Khetos yog txhua yam thiab nws nyob hauv lawv txhua tus lub siab. Nej yog Vajtswv haivneeg. Vajtswv hlub nej thiab xaiv nej cia ua nws cov menyuam lawm; yog li ntawd, nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev. Nej ib tug yuav tsum pab ib tug. Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm. Qhov uas tseemceeb dua tej ntawd huv tibsi, nej ib tug yuav tsum hlub ib tug tiag tiag. Yog nej ua li no, nej thiaj yuav nyob taus ua ke. Nej cov uas Yexus Khetos hu los koom ua ib lub cev, nej yuav tsum cia Yexus Khetos txojkev ncaj ncees coj nej lub neej. Nej yuav tsum niaj hnub ua Vajtswv tsaug. Nej yuav tsum khaws Yexus Khetos tej lus huv tibsi cia rau hauv nej lub siab. Nej ib tug yuav tsum ua tib zoo qhia ib tug, thiab ib tug ntuas ib tug tsis txhob lam tau lam hais li tej neeg uas tsis muaj tswvyim. Thaum nej hu nkauj, tsis hais tej nkauj uas Daviv sau lossis tej nkauj qhuas Vajtswv lossis tej nkauj uas cov ntseeg ibtxwm hu qhuas Vajtswv, nej yuav tsum zoo siab hlo ua Vajtswv tsaug. Txhua yam uas nej ua, nej yuav tsum ua kom tsimnyog qhov uas nej yog cov ntseeg tus Tswv Yexus. Nej cov uas ntseeg Yexus, nej cia li ua Vajtswv tus uas yog peb leej txiv tsaug. Nej cov uas yog pojniam, nyias yuav tsum mloog nyias tus txivneej lus, nej ua li ntawd thiaj tsimnyog qhov uas nej yog tus ntseeg Yexus. Nej cov uas yog txiv, nyias yuav tsum hlub nyias tus pojniam, tsis txhob ua limhiam rau nws. Nej cov uas yog menyuam, nej yuav tsum mloog nej niam nej txiv lus, nej ua li ntawd thiaj li haum Vajtswv siab. Nej cov uas yog niam yog txiv, nej tsis txhob lam tau lam ua rau nej cov menyuam chim, nyob tsam lawv tu siab. Nej cov uas yog tubtxib, nej yuav tsum mloog nej tus tswv lus txhua lo. Nej tsis txhob ua haujlwm thaum nej tus tswv pom kom nws qhuas nej xwb, tiamsis nej yuav tsum muab siab rau ua haujlwm tiag tiag rau qhov nej yog cov uas hwm tus Tswv. Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg. Yexus Khetos yog nej tus Tswv, nej yog nws cov tubtxib. Yog li ntawd, nej yuav tsum nco ntsoov hais tias nej yeej yuav tau tej nqi zog uas Vajtswv khaws cia rau Vajtswv haivneeg lawm. Tus uas ua txhaum yeej yuav tau sau tej uas nws tau ua los lawm, rau qhov Vajtswv yeej tsis xaiv leejtwg ntsejmuag hlo li. Nej cov uas yog tswv, nej yuav tsum ua ncaj rau nej cov tubtxib, tsis txhob hlub ib tug tseg ib tug. Nej yuav tsum nco ntsoov hais tias nej koom tib tug Tswv tus uas nyob saum ntuj ceebtsheej xwb. Nej yuav tsum niaj hnub nquag thov Vajtswv tsis txhob nkeeg thiab nco ntsoov ua nws tsaug. Thaum nej thov Vajtswv, nej yuav tsum thov nws qhib kev rau peb qhia Txojmoo Zoo uas hais txog Yexus Khetos zaj uas yav tas los tsis muaj neeg paub. Twb yog vim kuv qhia zaj ntawd kuv thiaj raug kaw rau hauv tsev lojcuj no. Thiab nej yuav tsum thov Vajtswv pub tswvyim rau kuv kom kuv txawj qhia tej uas tsimnyog kuv yuav tsum qhia, sawvdaws thiaj yuav totaub zoo. Nej yuav tsum ua nej lub neej kom zoo rau cov neeg uas tsis ntseeg pom. Thiab txhua zaus uas zoo qhia Txojmoo Zoo, nej cia li qhia tsis txhob cia nkim sijhawm. Tej lus uas nej hais, nej yuav tsum ua tib zoo hais kom sawvdaws xav mloog. Tej uas lwm tus nug nej, nej yuav tsum paub teb. Peb tus kwv Tikhikus uas yog peb tus phoojywg zoo, nws yuav qhia rau nej paub hais tias kuv nyob li cas, nws yog ib tug uas muab siab rau nrog peb ua Vajtswv tes haujlwm. Twb yog vim li ntawd kuv thiaj txib nws tuaj saib nej, nws yuav qhia rau nej paub hais tias peb nyob li cas thiab ua li cas, nej thiaj yuav zoo siab. Peb tus kwv Auneximus uas peb hlub, nws yuav nrog Tikhikus tuaj saib nej. Nws yeej yog nej pab thiab nws yog tus uas muab siab rau ua haujlwm. Thaum nkawd tuaj txog tim nej, nkawd yuav qhia txhua yam uas peb ua tim no rau nej paub. Alixakus tus uas raug kaw nrog kuv hauv tsev lojcuj, nws hais noj qab nyob zoo rau nej. Thiab Malakaus uas yog Npananpas tus kwvtij los hais noj qab nyob zoo rau nej. Kuv twb qhia ib zaug rau nej lawm hais tias yog Malakaus tuaj saib nej, nej cia li hu nws los so hauv nej tsev. Yausuas tus uas sawvdaws hu ua Yuxatus los hais noj qab nyob zoo rau nej thiab. Cov Yudais uas ntseeg Yexus lawm, tsuas muaj peb leeg ntawd xwb thiaj li nrog kuv qhia txog Vajtswv lub tebchaws. Lawv peb leeg ntawd tau pab kuv ntau kawg li. Epafas yeej yog nej pab thiab nws yog Yexus Khetos ib tug tubtxib, nws hais noj qab nyob zoo rau nej. Nws niaj hnub kub siab lug thov Vajtswv pab kom nej muab siab rau ntseeg thiab ua tau zoo zuj zus, thiab kom nej ua tau nej tes haujlwm raws li Vajtswv lub siab nyiam. Kuv ua tau timkhawv hais tias, nws ua haujlwm khwv kawg li pab nej thiab pab cov ntseeg uas nyob hauv lub nroog Laudikeyas thiab lub nroog Hailafulis. Lukas tus uas yog kws tshuaj uas peb hlub thiab Demas nkawd hais noj qab nyob zoo rau nej. Thov nej hais noj qab nyob zoo rau cov kwvtij ntseeg uas nyob hauv lub nroog Laudikeyas, rau Nifas, thiab rau pawg ntseeg uas tuaj pehawm Vajtswv hauv Nifas tsev. Thaum nej nyeem tsab ntawv no tas, nej yuav tsum muab xa mus rau cov ntseeg uas nyob hauv lub nroog Laudikeyas nyeem thiab. Thiab nej yuav tsum nyeem tsab ntawv uas cov ntseeg uas nyob hauv lub nroog Laudikeyas xa tuaj rau nej ib yam nkaus. Thov nej hais rau Akipus hais tias, tes haujlwm uas Vajtswv muab rau nws ua lawm, nws yuav tsum ua tib zoo ua kom tiav. Lo lus uas hais tias Paulus nco nco nej, twb yog kuv txhais tes sau ntag. Thov nej nco ntsoov hais tias kuv tseem raug kaw rau hauv tsev lojcuj. Thov Vajtswv foom koob hmoov rau nej txhua tus. Kuv yog Paulus. Kuv thiab Xilas, thiab Timautes sau tsab ntawv no xa tuaj rau nej txhua tus uas nyob hauv lub nroog Thexalaunikes uas ntseeg Vajtswv tus uas yog peb Leej Txiv thiab ntseeg tus Tswv Yexus Khetos. Thov Vajtswv foom koob hmoov rau nej, thiab pab kom nej tau nyob kaj siab lug. Peb niaj hnub ua Vajtswv tsaug thiab thov Vajtswv pab nej tsis tseg tsis tu, rau qhov peb nco ntsoov hais tias nej yog cov uas muab siab rau ntseeg. Thaum peb thov Vajtswv tus uas yog peb Leej Txiv, peb nco ntsoov hais tias nej tsis yog cov uas ntseeg ntawm lub ncauj xwb, tiamsis nej ua nej tes haujlwm rau sawvdaws pom thiab. Nej zoo siab hlo pab lwm tus. Txawm yog nej yuav ua haujlwm khwv npaum li cas los nej yeej tsis khuvxim nej lub zog li, thiab nej cia siab ntsoov rau peb tus Tswv Yexus Khetos. Cov kwvtij, peb paub hais tias Vajtswv hlub nej thiab xaiv nej cia ua nws haivneeg lawm. Peb paub li no, rau qhov Txojmoo Zoo uas peb coj tuaj qhia nej, tsis yog lo lus qhuav xwb. Tiamsis yog Vaj Ntsujplig tus Dawbhuv thiab Vajtswv lub hwjchim nrog nraim cov lus ntawd, thiab Txojlus ntawd yog txoj tseeb. Thaum peb nrog nej nyob peb ua peb lub neej zoo li cas los nej twb paub lawm. Peb ua li ntawd twb yog peb ua qhia nej kom nej paub ua nej lub neej. Nej twb xyaum ua raws li peb ua thiab raws li tus Tswv Yexus ua lawm. Txawm yog nej raug kev txomnyem heev los nej tseem zoo siab mloog tej lus uas Vaj Ntsujplig tus Dawbhuv qhia rau nej. Yog li ntawd, nej thiaj ua tau yam ntxwv zoo rau cov ntseeg uas nyob hauv lub xeev Makedaunias no, thiab cov ntseeg uas nyob nram lub xeev Akhayas xyaum. Rau qhov nej cov ntseeg uas nyob hauv lub nroog Thexalaunikes no, nej twb mus qhia Vajtswv Txojlus thoob plaws txhua qhov lawm, tsis yog qhia hauv lub xeev Makedaunias thiab lub xeev Akhayas xwb, tiamsis tej neeg uas nyob rau txhua qhov puavleej hnov moo hais tias nej twb ntseeg Vajtswv lawm. Yog li ntawd, tsis tas peb yuav hais ntxiv lawm. Sawvdaws puavleej hais tias thaum peb tuaj saib nej, nej zoo siab mloog peb qhia. Thiab lawv hais txog qhov uas nej muab nej tej dab tej mlom tso povtseg tig los cuag Vajtswv, kom nej tau ua Vajtswv tus uas muaj sia nyob tes haujlwm. Nws yog Vajtswv tiag. Thiab lawv hais txog qhov uas nej kub siab lug tos Vajtswv tus Tub Yexus uas yuav los saum ntuj ceebtsheej los. Tus ntawd yog Vajtswv tus Tub Yexus uas Vajtswv tsa sawv hauv qhov tuag rov qab los, thiab yog tus uas cawm peb dim ntawm Vajtswv txojkev chim uas yuav muaj los. Cov kwvtij, nej twb paub lawm hais tias thaum peb tuaj saib nej, mas muaj nqis heev rau nej. Thiab nej twb paub zoo hais tias, thaum peb tseem tuaj tsis tau txog ntawm nej, peb xub tuaj qhia pem lub nroog Filipis, cov neeg uas nyob ped, lawv tsimtxom peb thiab saib tsis taus peb kiag li. Tsis yog li ntawd xwb, thaum peb tuaj txog rau hauv nej lub nroog los tseem muaj neeg tawmtsam peb heev thiab. Txawm li ntawd los Vajtswv tseem pub peb muaj lub siab tawv qhia Txojmoo Zoo rau nej. Tej lus uas peb qhia nej, peb qhia tseeb xwb. Peb yeej tsis muaj ib nplooj siab uas xav ua phem lossis xav dag nej. Peb yeej tsis muaj nplooj siab xav li ntawd. Peb tsuas qhia tej uas Vajtswv muab rau peb qhia xwb. Rau qhov Vajtswv yeej pom zoo muab Txojmoo Zoo ntawd rau peb qhia. Tsis yog peb qhia kom haum neeg siab, tiamsis yog peb qhia kom haum Vajtswv siab, rau qhov Vajtswv yog tus uas niaj hnub saib ntsoov peb lub siab. Nej twb paub lawm hais tias thaum peb tuaj qhia nej, peb tsis tau lam qhuas leejtwg li lossis ntxias leejtwg tug yuav. Vajtswv yeej ua tau timkhawv hais tias peb hais tseeb xwb. Peb cov uas yog Yexus Khetos cov timthawj, peb yeej tsis tau kom leejtwg hwm peb, tsis hais nej lossis lwm tus, txawm yog peb yog Yexus Khetos cov timthawj los peb tsis yuam nej, tiamsis peb ua lub siab ntev rau nej ib yam li leej niam ua siab ntev tu nws cov menyuam. Peb hlub nej kawg li, peb thiaj coj Txojmoo Zoo uas Vajtswv muab rau peb lawm tuaj qhia rau nej. Tsis yog li ntawd xwb, peb tseem zoo siab muab peb lub zog huv tibsi pab nej, peb tsis khuvxim li, rau qhov peb hlub nej heev. Cov kwvtij, nyaj nej yuav nco tau hais tias, thaum peb nrog nej nyob, peb yeej ua haujlwm hnyav thiab khwv kawg li yug peb. Peb ua haujlwm tas hnub tas hmo, rau qhov peb tsis xav kom nej nyuaj siab rau peb lub sijhawm uas peb tuaj qhia Vajtswv Txojmoo Zoo rau nej. Nej thiab Vajtswv ua tau timkhawv hais tias thaum peb tseem nrog nej cov ntseeg nyob, peb ua peb lub neej zoo kawg nkaus, peb ua neeg ncaj ncees thiab peb tsis tau ua ib qho txhaum li. Nej twb paub lawm hais tias peb hlub nej txhua tus ib yam li leej txiv hlub nws cov menyuam. Peb twb txhawb nej lub zog thiab nplig nej siab lawm. Peb ua li ntawd kom nej thiaj paub ua nej lub neej haum Vajtswv siab. Vajtswv yog tus uas hu nej los ua nws haivneeg thiab los txais nws txoj koob hmoov. Tsis yog li ntawd xwb, tseem muaj ib qhov uas peb niaj hnub ua Vajtswv tsaug. Qhov ntawd yog qhov uas nej mloog thiab muab siab rau ntseeg Vajtswv Txojlus uas peb coj tuaj qhia nej. Thaum nej hnov lawm, nej cia siab hais tias, Txojlus ntawd tsis yog neeg txoj, tiamsis yog Vajtswv txoj. Txojlus uas nej cia siab rau ntawd yeej yog Vajtswv txoj tiag, rau qhov Vajtswv niaj hnub ua haujlwm hauv nej cov uas ntseeg lawm lub siab. Cov kwvtij, yav tas los nej raug kev tsimtxom ib yam li cov ntseeg Yexus Khetos uas nyob nram lub xeev Yudas. Nej haivneeg tsimtxom nej ib yam li cov neeg Yudais raug lawv haivneeg tsimtxom lawv thiab. Cov Yudais yog cov uas tau muab tus Tswv Yexus thiab cov cev Vajtswv lus tua povtseg, thiab lawv yog cov uas tau tsimtxom peb. Lawv tawmtsam Vajtswv thiab ntxub cov ntseeg. Tsis yog li ntawd xwb, lawv tseem txwv tsis pub peb coj Txojmoo Zoo uas cawm tau neeg dim neeg lub txim mus qhia rau lwm haivneeg thiab. Lawv ua li ntawd twb yog lawv tsub kev txhaum ntxiv rau tej uas lawv tau ua los lawm. Nimno Vajtswv yuav rau txim hnyav rau lawv. Cov kwvtij, qhov uas peb tau ncaim nej ib nyuag ntu, tsuas yog ncaim ntsej ncaim muag xwb, peb lub siab yeej tsis ncaim nej. Thaum ntawd peb nco nej heev thiab xav pom nej kawg li. Peb xav rov qab tuaj saib nej, kuv twb yuav tuaj ob peb zaug, tiamsis dab Ntxwgnyoog tsis pub peb tuaj. Thaum peb tus Tswv Yexus Khetos rov qab los, thiab peb mus nyob ntawm nws lub xubntiag, cov neeg uas yuav ua rau peb cia siab, ua rau peb zoo siab thiab ua rau peb muaj lus khav hais tias peb kovyeej lawm twb yog nej ntag. Rau qhov nej yog cov uas ua rau peb tau ntsejmuag thiab ua rau peb zoo siab. Peb xav hnov nej xov kawg li, peb ua tsis taus siab ntev lawm, peb thiaj pom zoo cia Xilas wb nyob wb hauv lub nroog Athees, thiab cia wb tus kwv Timautes tuaj saib nej. Timautes yog tus uas ua Vajtswv tes haujlwm qhia Txojmoo Zoo uas hais txog Yexus Khetos zaj ib yam li wb thiab. Wb txib nws tuaj txhawb nej lub zog thiab pab kom nej muab siab rau ntseeg. Nej txhua tus uas tabtom raug kev txomnyem thiaj yuav tsis poob siab. Nej yeej paub lawm hais tias, tej kev tsimtxom ntawd yog tej uas Vajtswv twb xub npaj tseg cia rau cov ntseeg lawm. Thaum peb tseem nrog nej nyob, peb twb qhia rau nej paub lawm hais tias, peb cov uas ntseeg yeej yuav raug kev tsimtxom. Nimno nej pom hais tias twb muaj li ntawd lawm tiag. Vim li ntawd kuv thiaj pom zoo txib Timautes tuaj saib nej. Kuv tsis hnov nej xov li, kuv ua tsis taus siab ntev lawm, kuv thiaj txib Timautes tuaj saib nej, saib nej puas tseem muab siab rau ntseeg. Kuv ntshai nyob tsam dab Ntxwgnyoog ntxias tau nej yuam kev, ces tes haujlwm uas peb ua los lawm yuav tsis muaj nqis dabtsi li. Timautes tau tuaj saib nej, nimno nws twb rov qab los txog wb lawm. Nws los qhia rau wb hais tias, nej tseem muab siab rau ntseeg thiab sib hlub. Nws hais rau wb hais tias nej nco nco wb thiab xav pom wb ib yam li wb xav pom nej. Wb txhawj thiab nyuaj siab heev, tiamsis thaum wb hnov hais tias, nej tseem muab siab rau ntseeg wb thiaj li qab siab nyob. Thaum wb hnov hais tias nej tseem muab siab npuab Vajtswv, wb thiaj tso siab plhuav lawm. Nimno peb ua Vajtswv tsaug tsis txawj tas, rau qhov peb paub hais tias nej muab siab rau ntseeg, peb zoo siab kawg li, peb tsis pom qab yuav ua Vajtswv tsaug li. Peb niaj hnub niaj hmo thov Vajtswv pab kom peb tau tuaj saib nej dua ib zaug, peb thiaj muaj sijhawm qhia nej, rau qhov tej uas nej ntseeg lawm, tseem tshuav qee yam uas nej tsis tau paub tseeb. Peb thov Vajtswv tus uas yog peb Leej Txiv thiab thov peb tus Tswv Yexus qhib kev kom peb tau tuaj saib nej. Peb thov Vajtswv pab kom nej ib tug txawj hlub ib tug heev dua yav tas los lawm, ib yam li uas niaj hnub no peb hlub nej. Yog nej xub muaj lub siab zoo li ntawd lawm, thaum peb tus Tswv Yexus coj cov uas ntseeg nws nrog nws los, thaum ntawd Vajtswv tus uas yog peb Leej Txiv yuav pom hais tias nej yog cov uas zoo kawg nkaus, nej tsis muaj ib qhov txhaum li. Cov kwvtij, peb twb qhia rau nej lawm hais tias nej yuav tsum ua nej lub neej li cas thiaj yuav haum Vajtswv siab, nej twb ua li peb qhia ntawd lawm. Tiamsis nimno peb thov ntuas nej raws li peb tus Tswv Yexus kom peb ntuas, nej yuav tsum ua nej lub neej kom zoo dua yav tas los lawm thiab. Rau qhov nej twb paub lawm hais tias tej lus uas peb qhia nej tsis yog peb tej lus, tiamsis yog peb tus Tswv Yexus tej lus. Vajtswv xav kom nej ua nej lub neej zoo kawg nkaus, tsis txhob ua kev nkauj kev nraug thiaj li haum Vajtswv siab. Nej txhua tus yuav tsum tswj nej lub cev thiab ncaj ncees rau nej tus pojniam, nej thiaj yuav ua tau haum Vajtswv siab thiab haum neeg siab. Cov neeg uas tsis paub Vajtswv, lawv muaj lub siab ntshaw ua phem ua qias, nej tsis txhob ntshaw li lawv. Nej yuav tsum nco ntsoov zaj no, nej tsis txhob ua kev nkauj kev nraug ib zaug li. Yog nej ua nkauj ua nraug nej yeej yuav ua txhaum lwm tus xwb. Yav tas los peb twb qhia rau nej paub lawm hais tias Vajtswv yuav rau txim rau cov neeg uas ua txhaum li ntawd. Vajtswv hu peb los ua neeg zoo, tsis yog hu peb los ua kev nkauj kev nraug. Yog leejtwg tsis ua raws li Txojlus no qhia tsis yog nws saib tsis taus neeg, tiamsis yog nws saib tsis taus Vajtswv tus uas pub Vaj Ntsujplig tus Dawbhuv rau nej. Tsis tas kuv yuav sau qhia rau nej hais tias nej cov uas ntseeg yuav tsum sib hlub, rau qhov Vajtswv twb qhia rau nej lawm hais tias ib tug yuav tsum hlub ib tug. Nej yeej hlub cov kwvtij ntseeg Yexus uas nyob txhua qhov hauv lub xeev Makedaunias lawm. Tiamsis cov kwvtij, peb thov ntuas nej hais tias nej ib tug yuav tsum hlub ib tug heev dua ntawd thiab. Nej yuav tsum niaj hnub xyaum ua neeg zoo tsis txhob ntau ncauj. Nej yuav tsum rau siab ntso ua nej tes haujlwm xwb tsis txhob mus tabkaum lwm tus. Thiab nej yuav tsum ua ntawm nej txhais tes tsis txhob tos lwm tus ua rau nej noj, raws li peb twb qhia rau nej lawm. Yog nej ua li no, cov uas tsis ntseeg Vajtswv thiaj yuav saib taus nej, thiab nej thiaj yuav tsis tos lwm tus ua rau nej noj. Cov kwvtij, peb xav kom nej paub tseeb hais tias cov neeg uas tuag lawm, lawv mus rau qhov twg lawm, nej thiaj yuav tsis quaj ntsuag ib yam li cov neeg uas tsis muaj chaw cia siab. Peb paub tseeb hais tias Yexus twb tuag thiab sawv hauv qhov tuag rov qab los lawm; yog li ntawd, peb thiaj ntseeg hais tias Vajtswv yuav coj cov ntseeg uas tuag lawm nrog Yexus sawv rov qab los thiab. Zaj uas peb qhia rau nej no twb yog peb qhia raws li peb tus Tswv Yexus tej lus qhia uas hais tias, hnub uas tus Tswv Yexus rov qab los, peb cov uas tseem ua neej nyob, peb yuav tsis xub ua cov uas tuag lawm ntej mus. Thaum tus Tswv Yexus yuav los saum ntuj los, sawvdaws yuav hnov ib lub suab hu nrov nrov saum ntuj tuaj, thiab yuav hnov tus thawj timtswv ceebtsheej lub suab hu thiab hnov Vajtswv lub suab raj suab xyu nrov. Ces cov neeg tuag lawm uas ntseeg Yexus yuav sawv hauv qhov tuag los. Tom qab ntawd Vajtswv yuav coj peb cov uas tseem ua neej nyob, nrog cov neeg ntawd ua ke nrog huab nrog cua mus ntsib tus Tswv saum ib nta ntuj, peb yuav nrog tus Tswv nyob mus ibtxhis li. Yog li ntawd, nej cia li muab tej lus no los nplig txhua tus lub siab. Cov kwvtij, tsis tas kuv yuav tsum sau qhia rau nej paub hais tias hnub twg thiab lub sijhawm twg yuav muaj tej ntawd. Rau qhov nej yeej paub lawm hais tias hnub uas tus Tswv Yexus yuav los, nws yuav los ib yam li tubsab tuaj hmo ntuj. Thaum sawvdaws tseem hais tias, “Peb tau zoo noj thiab tau zoo nyob kawg li lawm”, tamsim ntawd lawv yuav raug kev puastsuaj. Lawv yuav khiav tsis dim ib yam li tus pojniam uas mob plab yuav yug menyuam, nws yuav khiav tsis dim li. Tiamsis cov kwvtij, nej tsis yog cov uas nyob hauv qhov tsaus ntuj, txawm yog hnub ntawd yuav los ib yam li tus tubsab tuaj los tsis tas nej yuav ntshai. Rau qhov nej yog cov uas nyob qhov pom kev thiab nyob nruab hnub. Peb tsis yog cov uas nyob hmo ntuj lossis nyob hauv qhov tsaus ntuj. Yog li ntawd peb tsis txhob tsaug zog li lwm tus. Peb yuav tsum tsis txhob tsaug zog thiab ceevfaj zov tos. Tsuas yog thaum tsaus ntuj neeg thiaj pw tsaug zog thiab tsuas yog thaum tsaus ntuj neeg thiaj haus cawv qaug xwb. Tiamsis peb yog cov uas nyob nruab hnub, tsis tsimnyog peb yuav qaug rau ib yam dabtsi li. Peb yuav tsum muab kev ntseeg thiab kev hlub los ua daim thaiv hauvsiab, thiab peb yuav tsum muab qhov uas peb cia siab hais tias peb yuav dim peb lub txim, los ua lub kausmom hlau ntoo. Vajtswv yuav tsis rau txim rau peb cov uas Vajtswv xaiv cia lawm, tiamsis Vajtswv yuav zam txim rau peb cov uas ntseeg peb tus Tswv Yexus. Yexus Khetos yog tus uas tuag theej peb lub txhoj. Nws ua li ntawd kom peb thiaj tau nrog nws nyob mus ibtxhis li. Thaum Yexus rov qab los txawm yog peb tseem muaj sia nyob lossis peb tuag lawm los xij, peb yeej yuav tau mus nrog nws nyob. Yog li ntawd, nej ib tug yuav tsum txhawb ib tug zog, thiab ib tug pab ib tug, ib yam li niaj hnub no nej ua. Cov kwvtij, peb qhia nej hais tias tsimnyog nej yuav tsum hwm cov uas saib nej. Lawv yog cov uas Vajtswv xaiv los coj nej thiab qhia nej. Nej yuav tsum hwm lawv thiab hlub lawv, rau qhov lawv muab siab rau ua haujlwm pab nej. Nej yuav tsum nyob sib haumxeeb thiab sib hlub sib pab. Cov kwvtij, peb qhia nej hais tias nej yuav tsum ntuas tus neeg tubnkeeg, thiab txhawb tus uas tsis muaj lub siab tawv, pab tus uas qaug zog thiab ua siab ntev rau sawvdaws. Nej ib tug tsis txhob ua phem pauj ib tug, tiamsis nej ib tug yuav tsum ua zoo rau ib tug thiab ua zoo rau sawvdaws. Nej yuav tsum niaj hnub zoo siab. Nej yuav tsum thov Vajtswv tsis tseg tsis tu. Txawm yog nej raug kev txomnyem thiab tau zoo los nej yuav tsum ua Vajtswv tsaug. Vajtswv xav kom nej txhua tus uas nrog Yexus Khetos koom ib txojsia lawm ua tej no. Nej tsis txhob txwv Vaj Ntsujplig tus Dawbhuv. Nej tsis txhob thuam tej lus uas Vaj Ntsujplig kom neeg qhia. Nej yuav tsum ua tib zoo saib txhua yam huv tibsi, saib yam twg zoo, nej khaws yam ntawd cia. Nej yuav tsum zam kom dhau txhua yam kev phem huv tibsi. Thov Vajtswv tus uas pub rau peb tau nyob kaj siab lug, pab kom nej ua tau neeg zoo kawg nkaus. Thiab thov Vajtswv tsomkwm nej tus ntsujplig, nej lub siab thiab nej lub cev huv tibsi. Thaum peb tus Tswv Yexus Khetos rov los, nej thiaj yuav tsis muaj ib qhov txhaum li. Vajtswv tus uas hu nej los ua nws haivneeg, nws yuav ua kom tej no tiav, rau qhov nws yog tus uas ncaj ncees. Cov kwvtij, nej yuav tsum thov Vajtswv pab peb thiab. Nej ib tug yuav tsum hlub ib tug. Tus Tswv Yexus kom kuv qhia rau nej hais tias nej yuav tsum muab tsab ntawv no nyeem rau cov ntseeg txhua tus mloog. Thov peb tus Tswv Yexus Khetos foom koob hmoov rau nej sawvdaws. Kuv yog Paulus. Kuv thiab Xilas, thiab Timautes sau tsab ntawv no xa tuaj rau nej txhua tus uas nyob hauv lub nroog Thexalaunikes uas ntseeg Vajtswv tus uas yog peb Leej Txiv, thiab ntseeg tus Tswv Yexus Khetos. Thov Vajtswv tus uas yog peb Leej Txiv thiab thov tus Tswv Yexus Khetos foom koob hmoov rau nej thiab pab kom nej tau nyob kaj siab lug. Cov kwvtij, tsimnyog peb niaj hnub ua Vajtswv tsaug, rau qhov peb pom hais tias nej muab siab rau ntseeg heev zuj zus, thiab nej ib tug txawj hlub ib tug heev dua yav tas los. Twb yog li ntawd, peb thiaj qhuas nej rau cov ntseeg Vajtswv uas nyob txhua qhov txhia chaw hais tias, txawm yog nej raug kev tsimtxom thiab kev txomnyem los nej tseem ua taus siab ntev thiab muab siab rau ntseeg Vajtswv tsis tso tseg. Qhov no twb ua rau sawvdaws paub hais tias Vajtswv yog tus uas ncaj ncees. Nws ua li no kom sawvdaws pom hais tias nej yog cov uas tsimnyog los ua Vajtswv haivneeg. Rau qhov nej yog Vajtswv haivneeg nej thiaj raug kev txomnyem li no. Vajtswv yog tus uas ncaj ncees, nws yuav rau txim rau cov neeg uas tsimtxom nej. Nws yuav pab nej txhua tus uas raug kev txomnyem, kom nej thiab peb tau nyob kaj siab lug. Nws yuav pab peb li ntawd, thaum peb tus Tswv Yexus los saum ntuj los. Thiab thaum tus Tswv Yexus los yuav muaj cov timtswv ceebtsheej uas muaj Yexus lub tshwjchim thiab muaj nplaim taws cig lam lug nrog nws los, nws yuav rau txim rau cov neeg uas tsis mloog Vajtswv lus, thiab rau cov neeg uas tsis ntseeg Txojmoo Zoo uas hais txog peb tus Tswv Yexus. Cov neeg ntawd yuav raug txim mus ibtxhis, lawv yuav tsis tau nrog peb tus Tswv Yexus nyob. Lawv yuav tsis pom nws tus tshwjchim uas ci ntsa iab. Hnub uas Yexus rov qab los yuav muaj li no, hnub ntawd txhua tus uas nws xaiv los ua nws haivneeg lawm, lawv yuav ua rau nws tau koob meej. Thaum cov ntseeg ntawd pom Yexus lub tshwjchim, lawv yuav xav tsis thoob li. Thaum ntawd nej yuav nrog lawv nyob ntawd thiab, rau qhov nej twb ntseeg Yexus Txojlus uas peb coj tuaj qhia rau nej lawm. Twb yog li ntawd, peb thiaj niaj hnub thov Vajtswv pab kom nej ua tau nej lub neej phim qhov uas Vajtswv xaiv nej los ua nws haivneeg lawm. Peb thov Vajtswv tus uas muaj hwjchim pab nej kom nej ua tau nej lub neej zoo raws li nej twb xub xav tseg lawm hais tias nej yuav ua, thiab raws li tej haujlwm uas nej ntseeg hais tias Vajtswv yuav pab nej ua. Peb thov Vajtswv pab kom nej ua tau tes haujlwm ntawd tiav. Nej ua li ntawd, nej thiaj yuav ua rau peb tus Tswv Yexus Khetos tau koob meej, Vajtswv thiab tus Tswv Yexus Khetos uas hlub nej, yuav pub nej tau koob meej ib yam nkaus thiab. Cov kwvtij, qhov uas peb tus Tswv Yexus yuav rov los thiab qhov uas nws yuav coj peb sawvdaws mus nrog nws nyob, kuv thov qhia rau nej hais tias nej tsis txhob rawm poob siab lossis ntxhov siab rau qhov uas nej hnov hais tias, twb txog lub sijhawm uas Yexus los lawm. Tej zaum ntshai muaj tej tus qhia txog tej uas yuav tshwm muaj los yav tom ntej rau nej lossis muaj tej tus qhia hais li ntawd lossis muaj tej tus hais tias yog peb sau hais li ntawd rau hauv peb tej ntawv uas peb xa tuaj rau nej los tsis paub. Txawm yog li cas los xij, nej tsis txhob cia leejtwg ntxias tau nej li. Rau qhov thaum tseem tsis tau txog hnub uas tus Tswv Yexus rov qab los, yuav muaj neeg sau nthwv tuaj tawmtsam Vajtswv zaum kawg, thiab sawvdaws yuav pom tus uas ua phem ntawd los. Tus ntawd yog tus uas yuav raug kev puastsuaj. Nws yuav tawmtsam txhua yam uas neeg pe, thiab tej uas neeg hu ua vajtswv. Nws yuav khav hais tias nws yog tus uas muaj hwjchim loj dua ntais tej ntawd huv tibsi. Tsis yog li ntawd xwb, nws tseem yuav mus nyob hauv lub Tuamtsev, thiab qhia sawvdaws hais tias nws yog vajtswv ntag. Nej tsis nco qab lawm los? Thaum kuv tseem nrog nej nyob, kuv twb qhia tej ntawd rau nej lawm. Tiamsis niaj hnub nimno muaj ib yam txwv tsis pub kom tej ntawd tiav. Nej twb paub yam ntawd lawm. Thaum txog lub sijhawm ntawd sawvdaws yuav pom tus uas ua phem ntawd. Txojkev phem kev qias uas sawvdaws tsis paub, nimno twb pib muaj lawm. Tiamsis yuav tsis muaj tej ntawd mus txog thaum tus uas txwv raug ntiab tawm mus mam li muaj los. Thaum tus uas txwv raug ntiab tawm mus lawm, sawvdaws yuav pom tus uas ua phem ntawd. Thiab thaum tus uas ua phem ntawd los lawm, tus Tswv Yexus yuav tshuab pa tua tus ntawd povtseg. Thaum nws pom dheev Yexus thiab Yexus lub hwjchim uas ci ntsa iab, ces tamsim ntawd, nws yuav puastsuaj mus. Dab Ntxwgnyoog yuav txib tus uas ua phem ntawd los, thiab pub hwjchim rau nws kom nws ua tau ntau yam txujci txawv txawv. Thiab nws yuav ua tej yam uas ua rau sawvdaws xav tsis thoob li, tiamsis tej ntawd puavleej tsis tseeb. Nws yuav ua ntau yam kev phem ntxias cov neeg uas yeej yuav raug puastsuaj mus. Cov neeg ntawd yuav raug puastsuaj, rau qhov lawv tsis kam mloog thiab tsis nyiam Txojlus tseeb uas yuav pab tau kom lawv dim lawv lub txim. Twb yog li ntawd Vajtswv thiaj cia txojkev dag ntxias los tshoov lawv lub siab kom lawv ntseeg tej uas tsis tseeb. Yog li ntawd, Vajtswv yuav rau txim rau txhua tus uas nyiam ua phem thiab tsis ntseeg Txojlus tseeb. Cov kwvtij uas tus Tswv hlub, peb niaj hnub ua Vajtswv tsaug, rau qhov Vajtswv twb xaiv nej puag thaum chivkeeb los lawm, kom nej tau txais txojkev cawm dim los ntawm Vaj Ntsujplig lub hwjchim thiab ua rau nej ua tau haivneeg uas dawbhuv, vim qhov uas nej ntseeg qhov tseeb. Thaum peb qhia Txojmoo Zoo rau nej, Vajtswv hu nej los ntseeg kom nej dim nej lub txim. Nej thiaj yuav tau peb tus Tswv Yexus Khetos lub tshwjchim uas ci ntsa iab los ua nej tug. Yog li ntawd cov kwvtij, nej yuav tsum muab siab rau ntseeg tsis txhob tso tseg. Thiab nej yuav tsum khaws tej lus uas peb twb qhia rau nej lawm cia, tsis hais tej uas peb qhia nej thaum peb tseem nrog nej nyob, thiab tej uas peb sau rau hauv ntawv, nej yuav tsum khaws tej ntawd huv tibsi. Thov peb tus Tswv Yexus Khetos thiab Vajtswv tus uas yog peb Leej Txiv tus uas hlub peb, thiab txhawb peb lub zog, kom peb muaj kev cia siab mus li, nws yuav nplig nej lub siab thiab txhawb nej lub zog, kom nej ua tau txhua yam zoo, tsis hais tej haujlwm uas nej ua thiab tej lus uas nej hais. Cov kwvtij, thov nej niaj hnub thov Vajtswv pab peb kom peb muab siab rau qhia Vajtswv Txojlus. Vajtswv Txojlus thiaj yuav nrov ncha mus thoob plaws txhua qhov chaw, thiab muaj nqis rau sawvdaws ib yam li twb muaj nqis rau hauv nej lawm. Thiab thov Vajtswv pab kom peb dim ntawm cov neeg siab phem thiab limhiam txhais tes, rau qhov yeej yuav muaj ibtxhia tsis ntseeg Vajtswv Txojlus. Tiamsis Vajtswv yog tus uas ncaj ncees, nws yuav txhawb nej lub zog thiab tsis pub dab Ntxwgnyoog ua phem rau nej. Vajtswv twb qhia rau peb paub lawm hais tias nej tabtom ua raws li tej uas peb tau qhia rau nej lawm. Thiab nej tseem yuav niaj hnub ua li ntawd mus lawm yav tom ntej. Thov Vajtswv qhia nej lub siab kom nej paub mloog Vajtswv lus, thiab pab kom nej ua tau siab ntev ib yam li Yexus Khetos tau ua qhia rau nej lawm. Cov kwvtij, peb tuav peb tus Tswv Yexus Khetos lub npe samhwm rau nej hais tias nej tsis txhob mus nrog cov neeg tubnkeeg ua ke. Lawv cov ntawd tsis ua raws li tej lus uas peb qhia rau nej lawm. Nej sawvdaws puavleej paub hais tias yeej tsimnyog nej ua raws li nej tau pom peb ua los lawm, thaum peb tseem nrog nej nyob los peb yeej tsis nkees li. Peb tsis tos leejtwg yug peb, tiamsis peb niaj hnub niaj hmo siv zog ua haujlwm. Peb ua li ntawd kom nej cov thiaj tsis muaj ib tug ntxhov siab rau peb. Qhov uas peb ua li ntawd tsis yog peb tsis muaj cai hais kom nej yug peb, tiamsis yog peb ua yam ntxwv qhia rau nej kom nej paub ua li peb ua. Thaum peb tseem nrog nej nyob, peb qhia rau nej hais tias yog leejtwg tsis kam ua haujlwm, nej tsis txhob pub mov rau tus ntawd noj. Peb hais li no, rau qhov peb hnov hais tias nej cov muaj qee leej tubnkeeg, nyob dawb xwb, tsis ua ib yam haujlwm dabtsi li. Tsis yog li ntawd xwb, lawv tseem pheej mus tabkaum lwm tus tes haujlwm thiab. Peb tuav peb tus Tswv Yexus Khetos lub npe samhwm rau cov neeg tubnkeeg ntawd kom lawv yuav tsum ua haujlwm yug lawv, lawv tsis txhob tos luag noj xwb. Cov kwvtij, nej tsis txhob dhuav ua tej haujlwm zoo. Yog nej cov muaj leejtwg tsis mloog tej lus uas peb sau rau hauv tsab ntawv no, ces nej tsis txhob mus nrog tus ntawd ua ke, kom nws paub txajmuag rau tej uas nws tau ua los lawm. Tiamsis nej tsis txhob ntxub nws, nej yuav tsum ntuas nws ib yam li nej ntuas nej tej kwvtij. Thov tus Tswv uas yog lub hauvpaus ntawm txojkev kaj siab, pub txojkev kaj siab rau nej txhua lub sijhawm thiab txhua qhov uas nej mus. Thov tus Tswv nrog nraim nej sawvdaws nyob. Kuv yog Paulus, tsab ntawv no yog kuv txhais tes sau tuaj rau nej ntag. Kuv suam kuv lub npe rau txhua tsab ntawv uas kuv xa tuaj rau nej. Thov peb tus Tswv Yexus Khetos foom koob hmoov rau nej sawvdaws. Kuv yog Paulus uas yog Yexus Khetos tus timthawj. Vajtswv tus uas yog peb tus Cawmseej thiab Yexus Khetos tus uas peb cia siab rau tsa kuv ua ib tug timthawj. Timautes, kuv sau tsab ntawv no tuaj rau koj. Kuv hlub koj ib yam li koj yog kuv tus tub, rau qhov koj thiab kuv wb ntseeg ib yam nkaus. Thov Vajtswv tus uas yog peb Leej Txiv thiab peb tus Tswv Yexus Khetos foom koob hmoov rau koj, hlub koj thiab pab kom koj tau zoo nyob kaj siab lug. Kuv xav kom koj nyob twjywm hauv lub nroog Efexus. Kuv twb xub ntuas koj li ntawd thaum kuv yuav mus rau pem lub xeev Makedaunias. Kuv xav kom koj nyob twjywm hauv, rau qhov muaj qee leej txivneej uas nyob hauv lub nroog Efexus qhia tej zaj uas tsis tseeb; yog li ntawd, koj yuav tsum txwv tsis txhob pub lawv qhia. Koj yuav tsum kom lawv muab tej dabneeg thiab lawv cov yawgkoob tej npe uas sau cia rau hauv ntawv uas lawv hais tsis paub tas ntawd tso tseg, rau qhov tej ntawd yuav ua rau sawvdaws muaj lus sib cav sib ceg xwb, pab tsis tau kom sawvdaws ua haum Vajtswv siab. Tsuas yog peb ntseeg Yexus xwb peb thiaj ua tau haum Vajtswv siab. Kuv hais li no twb yog kuv xav kom nej txawj sib hlub, muaj lub siab dawb siab zoo, muaj lub siab ncaj ncees thiab ntseeg Vajtswv tiag tiag. Muaj qee leej tsis totaub tej uas kuv hais no, lawv thiaj yuam kev mus hais tej zaj uas tsis muaj hauvpaus hauvntsis lawm. Lawv xav ua xibhwb qhia Vajtswv txoj kevcai, tiamsis tej zaj uas lawv muaj siab tawv qhia ntawd lawv tsis totaub, tsis hais tej lus uas lawv hais thiab tej ntsiab lus los lawv yeej tsis paub. Peb paub hais tias Vajtswv txoj kevcai yeej zoo, tiamsis yuav tsum yog peb paub coj raws li thiaj zoo. Nej yuav tsum nco ntsoov hais tias tej kevcai tsis yog rhawv los qhia cov neeg ncaj ncees, tiamsis yog rhawv los rau cov neeg ua txhaum kevcai, cov neeg tsis mloog lus, cov neeg tsis hwm Vajtswv, cov neeg txhaum, cov neeg tua niam tua txiv, cov neeg tua neeg, cov neeg uas nyiam ua kev nkauj kev nraug, cov neeg uas txivneej deev txivneej, cov neeg nyiag neeg, cov neeg hais lus dag thiab ua timkhawv tsis tseeb lossis ua txhua yam tsis raws li Vajtswv Txojlus qhia. Txojlus ntawd muaj nyob hauv Txojmoo Zoo uas Vajtswv tus uas muaj hwjchim tau muab rau kuv qhia. Kuv ua peb tus Tswv Yexus Khetos tsaug, rau qhov nws pub rau kuv muaj sia muaj zog ua haujlwm. Kuv ua nws tsaug, rau qhov nws suav hais tias tsimnyog kuv ua nws tes haujlwm, nws thiaj tsa kuv ua. Txawm yog yav tas los kuv thuam nws, kuv tsimtxom nws thiab kuv ua saib tsis taus nws los Vajtswv tseem hlub kuv, rau qhov thaum ntawd kuv tsis tau ntseeg thiab tsis paub, kuv thiaj ua li ntawd rau nws. Peb tus Tswv Yexus Khetos foom koob hmoov ntau kawg rau kuv, thiab pab kom kuv muab siab rau ntseeg thiab hlub lwm tus. Tej ntawd yog tej uas Vajtswv pub rau txhua tus uas nrog Yexus Khetos koom ib txojsia. Qhov uas sawvdaws hais tias Yexus Khetos los hauv ntiajteb no yog nws los pab cov neeg uas muaj txim kom lawv dim lawv lub txim. Qhov no yog qhov uas tseemceeb, tsimnyog sawvdaws cia siab thiab txais yuav. Kuv yog tus muaj txim loj dua cov neeg uas muaj txim huv tibsi, tiamsis Vajtswv tseem hlub kuv. Qhov uas Vajtswv hlub kuv li ntawd, twb yog Vajtswv qhia rau sawvdaws paub hais tias txawm yog kuv muaj txim loj dua sawvdaws los Yexus Khetos tseem ua siab ntev rau kuv thiab. Yexus Khetos ua li ntawd yog nws ua yam ntxwv qhia rau cov neeg uas yav tom ntej yuav los ntseeg nws thiab yuav tau txojsia ntev mus ibtxhis kom lawv paub hais tias Yexus tseem ua siab ntev rau lawv ib yam li Yexus ua rau kuv lawm. Sawvdaws yuav tsum hwm Vajtswv thiab ua rau nws tau koob meej mus ibtxhis li. Nws yog tus Vajntxwv uas muaj tshwjchim loj dua ntais. Nws muaj sia nyob mus ibtxhis tsis txawj tuag. Nws tib leeg xwb thiaj yog Vajtswv, thiab peb qhovmuag tsis pom nws! Amees. Kuv tus tub Timautes, tej lus uas kuv qhia koj no yog raws li tej lus uas yav tas los cov neeg uas paub tej uas yuav muaj los yav tom ntej no twb hais txog koj lawm. Koj yuav tsum muab tej lus ntawd los ua ntaj ua riam, koj thiaj yuav tawmtsam yeej yeebncuab. Koj yuav tsum muab siab rau ntseeg thiab muaj lub siab ncaj siab ncees. Muaj qee leej tsis ua raws li lawv lub siab qhia, lawv thiaj tso Vajtswv tseg lawm. Cov neeg ntawd ib tug yog Himena-us thiab ib tug yog Alexades. Kuv twb muab nkawd tso rau dab Ntxwgnyoog lawm. Kuv ua li ntawd kom nkawd tsis txhob thuam Vajtswv. Qhov tseemceeb uas kuv xav kom nej ua yog nej yuav tsum thov Vajtswv pab sawvdaws thiab nej yuav tsum ua Vajtswv tsaug. Kuv thov nej thov Vajtswv pab cov vajntxwv thiab cov nomtswv. Yog peb ua li ntawd, peb yuav tau nyob kaj siab lug ua Vajtswv tes haujlwm thiab tau zoo ua peb lub neej kom phim qhov uas peb yog cov ntseeg. Qhov no yog qhov zoo thiab haum Vajtswv tus uas yog peb tus Cawmseej lub siab. Vajtswv xav kom tej neeg sawvdaws nyias dim nyias lub txim thiab xav kom lawv paub qhov tseeb. Rau qhov yeej muaj tib tug Vajtswv xwb, thiab muaj tib tug nyob nruab nrab ua kom neeg thiab Vajtswv sib cuag tau. Tus ntawd yog Yexus Khetos tus uas los yug ua neeg. Nws muab nws txojsia los theej sawvdaws lub txhoj; nws ua li ntawd yog nws qhia rau sawvdaws paub hais tias twb txog lub sijhawm uas Vajtswv teem cia lawm hais tias Vajtswv yuav pab kom neeg dim neeg lub txim. Yog li ntawd, Vajtswv thiaj tsa kuv ua ib tug timthawj thiab ua xibhwb qhia Vajtswv Txojlus uas yog qhov tseeb rau lwm haivneeg thiab coj lawv los ntseeg Vajtswv. Tej lus uas kuv hais no kuv hais tseeb xwb kuv tsis dag. Thaum cov neeg tuaj nyob ua ke mloog lus qhuab qhia, tsis hais hauv lub nroog twg lossis lub zog twg, kuv xav kom cov txivneej thov Vajtswv; cov ntawd yuav tsum yog cov uas muab siab rau ntseeg, tsis chim rau leejtwg, thiab tsis nrog leejtwg sib cav sib ceg. Kuv xav kom txhua tus pojniam paub txajmuag. Nyias yuav tsum tu nyias lub cev tsis txhob cia siv hle zab hle zuav lossis hnav tej tsoos tsho uas tsis tsimnyog hnav; tsis txhob ntxias plaubhau kom txawv luag zej luag zos lossis tsis txhob coj tej saw nyiaj saw kub lossis hnav tej tsoos tsho uas kim kim. Tiamsis txhua tus pojniam yuav tsum ua haujlwm zoo pab lwm tus thiaj tsimnyog qhov uas lawv hais tias lawv yog cov ntseeg Vajtswv. Cov pojniam yuav tsum nyob twjywm ua tib zoo mloog lus qhuab qhia. Kuv tsis pub cov pojniam qhia txivneej lossis tsav hwjchim loj dua cov txivneej. Cov pojniam yuav tsum nyob twjywm. Rau qhov Vajtswv xub tsim Adas mam li tsim Evas. Tsis yog dab Ntxwgnyoog los ntxias Adas, tiamsis yog los ntxias Evas, Evas thiaj ua txhaum. Tiamsis cov pojniam yuav dim, vim lawv yug menyuam, yog hais tias lawv muab siab rau ntseeg, muaj lub siab hlub lwm tus thiab ua haum Vajtswv siab. Muaj ib lo lus tseeb hais rau sawvdaws li no: Yog leejtwg xav ua tus thawj uas saib cov ntseeg, tus ntawd xav ua tes haujlwm uas zoo kawg nkaus. Tus thawj uas saib cov ntseeg yuav tsum yog tus uas tsis muaj chaw thuam li. Nws muaj ib tug pojniam xwb, nws xyuam xim, nws tswj tau nws lub siab, nws paub cai, nws nyiam qhua thiab nws txawj qhuab qhia. Nws tsis yog neeg quav cawv lossis neeg siab heev, tiamsis nws muaj lub siab ntev, tsis nyiam sib cav sib ceg, tsis ntshaw nyiaj txiag. Nws txawj tswjhwm nws tsevneeg thiab qhuab ntuas nws tej menyuam kom lawv hwm nws thiab mloog nws lus. Yog leejtwg tswj tsis tau nws tsevneeg, ces nws yuav ua li cas saib tau cov ntseeg Vajtswv. Tsis txhob muab tus uas nyuam qhuav los ntseeg tshiab tsa ua tus uas saib cov ntseeg, nyob tsam nws khavtheeb thiab raug txim ib yam li dab Ntxwgnyoog. Tus uas saib cov ntseeg yuav tsum yog tus uas cov tsis ntseeg Vajtswv los puavleej hwm, nws thiaj yuav tsis poob ntsejmuag thiab tsis mag dab Ntxwgnyoog lub vojhlua. Cov ntseeg uas pab ua Vajtswv tes haujlwm yuav tsum yog cov uas muaj tus cwjpwm zoo thiab sawvdaws hwm; lawv tsis ntau ncauj, tsis quav yeeb quav tshuaj, tsis quav cawv thiab tsis ntshaw nyiaj. Lawv yuav tsum yog cov uas muaj lub siab ncaj ncees, muab siab npuab Txojlus tseeb uas Vajtswv tau qhia rau sawvdaws lawm. Nej yuav tsum xub sim lawv tso, yog lawv ua tau nej mam li tsa lawv ua haujlwm. Lawv cov pojniam los yuav tsum zoo ib yam li lawv; cov pojniam ntawd yuav tsum yog cov uas xyuam xim, tsis nyiam taug xaiv thiab txhua yam uas lawv ua lawv ua ncaj. Tus ntseeg uas pab ua Vajtswv tes haujlwm yuav tsum yog tus uas muaj ib tug pojniam xwb thiab nws tswj tau nws tsevneeg. Tus ntseeg uas pab ua Vajtswv tes haujlwm yog nws ua nws tes haujlwm zoo nws yuav tau ntsejmuag thiab nws yuav muaj cuabkav qhia qhov uas peb nrog Yexus Khetos koom ib txojsia rau sawvdaws. Thaum kuv sau tsab ntawv no tuaj rau koj, kuv xav hais tias nyaj kuv yuav tau tuaj saib koj sai. Tiamsis yog kuv tsis tau tuaj sai, tsab ntawv no yuav qhia rau koj paub hais tias Vajtswv tsevneeg yuav tsum coj li cas. Vajtswv tsevneeg yog cov ntseeg Vajtswv tus uas muaj sia nyob. Cov ntseeg ntawd yog tus ncej uas txawb Vajtswv Txojlus uas yog qhov tseeb. Txhua tus puavleej paub hais tias zaj uas peb ntseeg yog zaj uas tseemceeb kawg nkaus. Nws los yug ua neeg, Vaj Ntsujplig qhia rau sawvdaws hais tias nws yog tus uas ncaj ncees; Vajtswv cov timtswv puavleej pom nws; muaj neeg qhia nws zaj rau txhua haivneeg, tej neeg uas nyob txhua qhov hauv ntiajteb no los ntseeg nws, thiab Vajtswv coj nws mus saum ntuj lawm. Vaj Ntsujplig qhia tseeb hais tias yav tom ntej yuav muaj qee leej tso Vajtswv tseg. Lawv yuav mus mloog dab tej lus dag thiab ua raws li dab qhia. Tej lus qhia ntawd yog tej lus dag uas cov neeg siab phem qhia ntxias sawvdaws. Lawv cov ntawd lub siab zoo li cov neeg uas tuag lawm lub. Txawm yog lawv ua txhaum loj npaum li cas los lawv tsis paub li. Cov neeg ntawd qhia hais tias tsis txhob sib yuav thiab hais tias tej khoom noj muaj qee yam tsis txhob noj, tiamsis Vajtswv yeej tsim tej ntawd rau neeg noj. Cov neeg uas paub Vajtswv Txojlus uas yog txoj tseeb, lawv yuav tsum xub ua Vajtswv tsaug tso mam li noj. Ib puas tsav yam uas Vajtswv tsim cia rau neeg noj puavleej zoo huv tibsi, tsis tas peb yuav caiv ib yam dabtsi li. Peb yeej noj tau txhua yam huv tibsi, tiamsis thaum peb yuav noj peb yuav tsum xub ua Vajtswv tsaug tso mam li noj. Rau qhov Vajtswv Txojlus thiab qhov uas peb thov Vajtswv foom koob hmoov twb ua rau tej ntawd zoo thiab huv lawm. Yog koj qhia tej no rau cov kwvtij uas ntseeg, sawvdaws yuav pom hais tias koj yog Yexus Khetos tus tubtxib uas ua haujlwm zoo, rau qhov koj muab siab rau ntseeg thiab coj raws li txojlus tseeb uas koj twb kawm los lawm. Koj tsis txhob mloog tej dabneeg uas sawvdaws niaj hnub hais, tej ntawd tsis muaj qabhau dabtsi thiab tsis yog Vajtswv zaj, koj tsis txhob mloog tej ntawd. Koj yuav tsum ua koj lub neej kom haum Vajtswv siab thiaj zoo. Yog peb xyaum khiav lossis xyaum ua li ub li no yuav muaj nqis mentsis rau peb lub cev. Tiamsis yog peb xyaum ua raws li Vajtswv txoj kevcai peb lub neej yuav zoo heev, tsis hais niaj hnub no lossis yav tom ntej. Zaj no yeej muaj tseeb tiag, tsimnyog sawvdaws khaws coj. Yog li ntawd, peb thiaj li ua siab ntev tiv kev txomnyem thiab rau siab ntso ua haujlwm, rau qhov peb cia siab rau Vajtswv tus uas muaj sia nyob uas yog tus Cawmseej. Qhov tseeb nws yog cov ntseeg tus Cawmseej. Koj yuav tsum qhia tej no rau sawvdaws. Koj tsis txhob pub leejtwg thuam hais tias koj tseem hluas, tiamsis koj yuav tsum ua koj lub neej rau cov ntseeg xyaum, tsis hais tej lus uas koj hais, tej haujlwm uas koj ua, hlub lwm tus, muab siab rau ntseeg thiab ua neeg zoo. Koj yuav tsum niaj hnub nyeem Vajtswv Txojlus rau sawvdaws mloog, qhuab qhia thiab cob qhia lawv mus txog thaum kuv tuaj. Tsis txhob muab lub tswvyim uas koj muaj tso tseg. Lub tswvyim ntawd twb muab rau koj thaum uas cov cev Vajtswv lus thiab cov txwjlaug tsa tes thov Vajtswv rau koj lawm. Koj yuav tsum muab siab rau ua raws li tej ntawd, sawvdaws thiaj yuav pom hais tias koj tes haujlwm zoo zuj zus ntxiv. Koj yuav tsum ua tib zoo saib, saib koj ua koj lub neej zoo li cas thiab saib tej uas koj qhia koj qhia li cas; koj yuav tsum ua tej ntawd mus, rau qhov tej ntawd yuav pab tau koj thiab pab tau cov neeg uas mloog koj qhia kom nej dim nej lub txim. Tsis txhob cem cov yawg laus, tiamsis koj yuav tsum ua tib zoo ntuas lawv ib yam li koj ntuas koj txiv. Cov uas hluas li koj, koj yuav tsum ntuas lawv ib yam li koj ntuas koj cov kwvtij. Koj ntuas cov pog laus ib yam li koj ntuas koj niam; thiab cov pojniam uas tseem hluas, koj yuav tsum muaj lub siab ncaj ntuas lawv ib yam li lawv yog koj cov muam. Koj yuav tsum saib taus cov pojntsuam uas tsis muaj leejtwg pab. Tiamsis tus pojntsuam uas muaj tub muaj ntxhais lossis muaj xeebntxwv, cov tub, cov ntxhais, thiab cov xeebntxwv yuav tsum yug nws, pauj nws txiaj ntsig thiaj haum Vajtswv siab. Tus pojntsuam uas tsis muaj leejtwg pab, nws yeej cia siab rau Vajtswv thiab niaj hnub niaj hmo thov Vajtswv pab nws tsis tseg tsis tu. Tiamsis tus pojntsuam uas nyiam ua plees ua yi, txawm yog nws tseem ua neej nyob los zoo li nws twb tuag lawm. Koj yuav tsum qhia zaj no rau cov ntseeg thiaj tsis muaj leejtwg thuam tau lawv. Yog leejtwg tsis pab nws kwv nws tij thiab nws tsevneeg, tus ntawd tsis txhob hais tias nws yog tus ntseeg Vajtswv. Yog nws tsis pab nws kwv nws tij ces nws tseem phem heev dua tus uas tsis ntseeg Vajtswv thiab. Koj tsis txhob sau tus pojntsuam uas hnubnyoog tsis tau muaj rau caum xyoo rau hauv phau ntawv uas teev cov pojntsuam tej npe. Tus pojntsuam uas sau tau npe yog tus uas yuav ib zaug txiv xwb, thiab yog tus uas sawvdaws qhuas hais tias nws ua haujlwm zoo thiab pab lwm tus. Nws qhia thiab tu nws cov menyuam, nws nyiam qhua, nws ntxuav cov ntseeg kotaw, nws pab cov neeg txomnyem, thiab nws muab siab rau ua txhua yam haujlwm zoo. Tiamsis koj tsis txhob sau coj pojntsuam uas tseem hluas tej npe rau hauv phau ntawv ntawd, rau qhov thaum lawv xav yuav txiv, lawv yuav tso Yexus Khetos tseg thiab mus yuav txiv. Lawv ua li ntawd yog lawv ua txhaum, rau qhov lawv tsis ua raws li tej lus uas lawv cog tseg rau Yexus Khetos lawm. Lawv yuav mus laug haujlwm tas hnub thiab mus cuav zos rau qhov ub qhov no. Tsis yog li ntawd xwb, lawv tseem yuav xyaum ua neeg taug xaiv, ua neeg thab plaub thiab hais tej lus uas tsis tsimnyog hais. Yog li ntawd, kuv xav kom cov pojntsuam uas tseem hluas rov qab yuav txiv, muaj tub muaj ki thiab tu vaj tu tsev. Yog lawv ua li ntawd, cov neeg uas ntxub peb cov uas ntseeg thiaj yuav tsis muaj lus thuam tau peb. Kuv hais li no, rau qhov qee leej pojntsuam tso Vajtswv tseg, thiab lawv nrog dab Ntxwgnyoog mus lawm. Yog hais tias tus pojniam uas ntseeg Vajtswv muaj ib tug pojntsuam nyob hauv nws tsev, nws yuav tsum pab, tsis txhob muab tes haujlwm ntawd tso rau cov ntseeg. Cia cov ntseeg pab cov pojntsuam uas tsis muaj leejtwg pab xwb. Tsimnyog muab nqi zog ob npaug rau cov txwjlaug uas ua haujlwm zoo, tiamsis tsimnyog muab nqi zog ntau dua rau cov uas qhuab qhia thiab cob qhia. Rau qhov Vajtswv txojlus hais tias, “Thaum nej muab nyuj tsuj nplej hauv lub tshav nplej, nej tsis txhob muab hnab looj nyuj qhovncauj.” thiab “Tsimnyog tus uas ua haujlwm tau nqi zog.” Yog leejtwg lam nkaug hais tias cov txwjlaug ib tug twg ua txhaum, yog tsis muaj ob leeg lossis peb leeg ua timkhawv hais tias tus ntawd tau ua txhaum tiag, koj tsis txhob rawm ntseeg. Yog leejtwg ua txhaum, koj yuav tsum ntuas tus ntawd tabmeeg sawvdaws kom lwm tus thiaj ntshai. Timautes, koj yuav tsum ua raws li tej lus uas kuv qhia rau koj no, koj tsis txhob xaiv leejtwg ntsejmuag. Txhua yam uas koj ua, koj yuav tsum ua rau sawvdaws ib yam nkaus. Tej lus uas kuv qhia koj no, tus Tswv Yexus Khetos thiab cov timtswv ceebtsheej uas Vajtswv twb xaiv cia lawm puavleej paub huv tibsi. Koj tsis txhob maj tsa leejtwg ua Vajtswv tes haujlwm, koj yuav tsum ua tib zoo saib nws tso, nyob tsam koj tau ris nws tej kev txhaum. Koj yuav tsum ua koj lub neej kom zoo kawg nkaus. Koj tsis txhob haus dej xwb, tiamsis koj yuav tsum haus mentsis cawv txiv hmab, koj lub plab thiaj tsis mob lawm. Muaj ibtxhia neeg ua txhaum mas paub tamsim thiab qhov txhaum ntawd yuav ua rau lawv raug txim. Tiamsis muaj ibtxhia ua txhaum mas tom qab ntawd sawvdaws mam li paub. Ib yam nkaus li ntawd, cov neeg uas ua zoo sawvdaws yeej yuav pom lawv tes haujlwm. Txawm yog cov neeg uas tsis ua rau sawvdaws pom los lawv yeej npog tsis tau tej haujlwm zoo uas lawv ua. Cov uas ua tubqhe nyias yuav tsum hwm nyias tus tswv thiaj tsis muaj leejtwg thuam Vajtswv lub npe thiab thuam tej lus uas peb qhia. Cov tubqhe uas tus tswv yog tus ntseeg, nyias yuav tsum hwm nyias tus tswv, rau qhov sawvdaws puavleej yog kwvtij ntseeg; lawv hajyam yuav tsum ua tus tswv tes haujlwm zoo, rau qhov tes haujlwm ntawd yuav pab tau cov ntseeg uas lawv hlub. Koj yuav tsum niaj hnub qhia thiab ntuas kom sawvdaws nco ntsoov tej no. Yog leejtwg qhia tej zaj uas txawv zaj no thiab qhia tsis raws li peb tus Tswv Yexus Khetos qhia, thiab qhia tsis raws li Vajtswv txoj kevcai, tus ntawd lam khavtheeb xwb, nws yeej tsis paub dabtsi li; nws nyiam sib cav sib ceg txog tej zaj uas tsis muaj hauvpaus hauvntsis. Qhov uas nws sib cav sib ceg ntawd yuav ua rau ib tug ntxub ib tug, ib tug cem ib tug, ib tug thuam ib tug thiab ib tug tsis cia siab rau ib tug. Cov neeg uas niaj hnub sib cav sib ceg, lawv zoo li cov neeg ruam; txawm yog lawv hais lus phem lus zoo los lawv tsis paub. Lawv xav hais tias yog lawv los ntseeg Vajtswv, lawv yuav npluanuj. Tseeb tiag, tus ntseeg uas txaus siab rau tej uas nws muaj lawm thiaj yog tus npluanuj tiag. Thaum peb niam peb txiv yug peb los, peb yeej tsis coj ib yam dabtsi los. Thaum peb tuag peb yeej yuav coj tsis tau ib yam dabtsi mus thiab. Yog li ntawd, yog peb muaj noj muaj hnav lawm, peb cia li txaus siab rau tej ntawd xwb. Tiamsis cov neeg uas xav npluanuj, dab yuav ntxias tau lawv mag dab lub vojhlua; lawv yuav lam tau lam ua phem thiab ua tej uas yuav ua rau lawv raug kev puastsuaj. Qhov uas neeg ntshaw nyiaj txiag yog ib qho uas ua rau neeg ua txhua yam phem. Muaj qee leej tso Vajtswv tseg lawm, thiab lawv rov ua rau lawv raug ntau yam kev txomnyem twb yog vim lawv xav tau nyiaj ntau heev. Tiamsis koj yog Vajtswv tus neeg lawm, koj tsis txhob ua tej uas hais tas los no. Koj yuav tsum ua ncaj ua ncees, ua zoo, muab siab rau ntseeg, muaj kev hlub, ua siab ntev thiab muaj lub siab mos siab muag. Txojkev ntseeg piv ib yam li neeg sib tw khiav. Koj yuav tsum sib zog khiav kom kawg koj lub zog, koj thiaj li tau txojsia uas ntev mus ibtxhis uas Vajtswv hu koj los yuav, rau qhov koj twb lees tabmeeg rau ntau leej thiab tabmeeg Vajtswv tus uas pub txojsia rau ib puas tsav yam thiab tabmeeg Yexus Khetos tus uas muaj txojkev ntseeg sawv khov kho ntawm Pooti-us Philaj lub xubntiag lawm. Kuv hais kom koj ua raws li tej lus ntawd thiab muab siab npuab tus Tswv mus txog hnub uas tus Tswv Yexus Khetos rov qab los. Tus Tswv Yexus yuav los raws li lub sijhawm uas Vajtswv teem cia lawm. Vajtswv yog tus foom koob hmoov, yog tus kav ib puas tsav yam, thiab yog tus Vajntxwv ntawm txhua tus vajntxwv thiab yog tus Tswv ntawm txhua tus tswv huv tibsi. Vajtswv tib leeg yog tus uas tsis txawj tuag; nws nyob hauv qhov pom kev uas tsis muaj leejtwg yuav txav tau mus ti. Tsis tau muaj leejtwg pom dua nws thiab tsis muaj leejtwg yuav pom tau nws li. Nws yog tus uas tsimnyog hwm thiab muaj hwjchim nyob mus ibtxhis! Amees. Koj hais kom cov neeg npluanuj tsis txhob khavtheeb, tsis txhob cia siab rau lawv tej nyiaj txiag thiab qhov txhia chaw, rau qhov tej ntawd yuav ploj mus, tiamsis kom lawv cia siab rau Vajtswv tus uas muaj siab dawb siab zoo thiab pub txhua yam rau peb kom peb muaj kev zoo siab. Koj hais kom lawv muaj lub siab dawb paub ua txhua yam haujlwm zoo, ua neeg muaj siab dawb siab zoo thiab muab tej uas lawv muaj faib rau lwm tus. Yog lawv ua li ntawd, ces yog lawv npaj qhov txhia chaw tseg rau lawv yav tom ntej kom lawv tau txojsia uas tsis txawj ploj mus ibtxhis los ua lawv tug. Timautes, koj khaws tej uas kuv qhia rau koj lawm cia zoo zoo. Koj tsis txhob nrog luag sib cav sib ceg txog tej lus uas tsis muaj qabhau ib yam li tej neeg ruam. Muaj qee leej xav hais tias yog “Kev txawj ntse.” Rau qhov muaj ibtxhia xav hais tias lawv muaj kev txawj ntse, vim lawv khav li ntawd lawv thiaj tso txojkev ntseeg tseg lawm. Thov Vajtswv foom koob hmoov rau nej sawvdaws. Kuv yog Paulus tus uas yog Yexus Khetos ib tug timthawj raws li Vajtswv lub siab nyiam; Vajtswv txib kuv mus qhia Txojmoo Zoo uas Vajtswv tau coglus tseg hais tias tus uas nrog Yexus Khetos sib raug zoo yuav tau txojsia. Timautes, tus tub uas kuv hlub. Thov Vajtswv tus uas yog peb leej Txiv thiab peb tus Tswv Yexus Khetos foom koob hmoov rau koj thiab pab kom koj tau nyob kaj siab lug. Timautes, kuv yog tus uas muab siab rau ua Vajtswv tes haujlwm ib yam li kuv cov yawgkoob ibtxwm ua los lawm; txhua zaug uas kuv thov Vajtswv pab koj, tsis hais nruab hnub lossis hmo ntuj, kuv yeej nco ntsoov ua Vajtswv tsaug. Kuv tseem nco ntsoov thaum wb yuav sib ncaim, koj quaj quaj. Nimno kuv nco koj thiab xav pom koj heev. Yog kuv pom koj lawm yuav zoo kuv siab kawg li. Kuv nco ntsoov hais tias koj muab siab rau ntseeg ib yam li koj pog Lau-is thiab koj niam Enikes. Nimno kuv cia siab hais tias koj tseem muab siab rau ntseeg, kuv thiaj hais rau koj hais tias koj yuav tsum siv lub tswvyim uas Vajtswv pub rau koj thaum kuv tsa tes rau koj thiab xa koj mus ua haujlwm. Rau qhov tus Ntsujplig uas Vajtswv pub rau peb yeej xav kom peb muaj lub siab tawv. Nws yuav ua haujlwm rau hauv peb lub siab kom peb muaj hwjchim, kom muaj lub siab hlub lwm tus, thiab kom peb paub tswj peb lub siab. Koj tsis txhob txajmuag ua timkhawv txog peb tus Tswv zaj thiab tsis txhob txajmuag rau qhov uas kuv raug kaw rau hauv tsev lojcuj. Kuv raug kaw li no twb yog vim kuv ua Yexus Khetos tes haujlwm. Koj yuav tsum ua siab ntev qhia Txojmoo Zoo, txawm yog koj raug kev txomnyem npaum li cas los Vajtswv yeej yuav txhawb koj lub zog kom koj ua tau. Vajtswv zam txim rau peb, thiab nws xaiv peb los ua nws haivneeg; nws ua li ntawd yog nws hlub peb thiab yog nws pom zoo ua, tsis yog vim peb ua haujlwm zoo. Thaum tseem tsis tau tsim ntuj tsim teb, Vajtswv twb muab txoj koob hmoov ntawd rau peb txhua tus uas ntseeg Yexus Khetos lawm. Nimno peb twb pom txoj koob hmoov ntawd lawm, rau qhov Yexus Khetos tus uas yog peb tus Cawmseej twb los yug rau hauv lub ntiajteb no lawm. Nws rhuav txojkev tuag lub hwjchim thiab nws qhia Txojmoo Zoo rau peb, peb thiaj paub hais tias muaj txojsia uas ntev dhawv mus ibtxhis. Vajtswv tsa kuv ua ib tug timthawj thiab ua ib tug xibhwb mus qhia Txojmoo Zoo; yog li ntawd, kuv thiaj raug kev txomnyem li no. Txawm li ntawd los kuv tsis txajmuag rau leejtwg li, rau qhov kuv paub hais tias tus uas kuv cia siab rau yog tus uas muaj hwjchim. Thiab kuv paub hais tias nws yeej yuav tsomkwm tej uas nws muab tso rau kuv lawm mus txog hnub uas Yexus rov qab los. Koj yuav tsum muab tej lus tseeb uas kuv qhia rau koj lawm los ua yam ntxwv thiab muab siab rau ntseeg thiab hlub lwm tus. Rau qhov Vajtswv xav kom peb txhua tus uas nrog Yexus Khetos sib raug zoo lawm muaj lub siab zoo li ntawd. Koj yuav tsum saib tej uas Vajtswv muab tso rau koj lawm zoo zoo, tsis txhob pub ploj li. Vaj Ntsujplig tus Dawbhuv uas nyob hauv peb txhua tus lub siab yuav pab koj saib tej ntawd. Koj twb paub lawm hais tias cov neeg uas nyob hauv lub xeev Axias Yau tau tso kuv tseg lawm. Cov neeg ntawd muaj ib tug hu ua Finkelus thiab ib tug hu ua Hemaunkenes. Kuv thov Vajtswv hlub Aunexifaulus tsevneeg, rau qhov nws txhawb kuv lub zog ntau zaus los lawm. Nws tsis txajmuag rau qhov uas kuv raug kaw rau hauv tsev lojcuj li. Thaum nws tuaj txog hauv lub nroog Loos, nws kub siab los nrhiav kuv rau txhua qhov, nws thiaj li nrhiav tau kuv. Koj twb paub lawm hais tias thaum kuv tseem nyob hauv lub nroog Efexus, nws tau pab kuv ntau yam. Kuv thov Vajtswv hais tias thaum txog hnub Vajtswv txiav txim, thov Vajtswv hlub nws thiab. Kuv tus tub, koj yuav tsum cia siab rau Vajtswv txoj koob hmoov uas Vajtswv pub rau peb cov uas nrog Yexus Khetos sib raug zoo. Koj yuav tsum muab tej lus uas koj thiab muaj ntau leej hnov kuv qhia lawm qhia rau cov neeg uas koj cia siab tau hais tias lawv yuav txawj qhia tej ntawd rau lwm tus. Koj yuav tsum nyiaj kev txomnyem, rau qhov koj yog Yexus Khetos tus tubrog uas ncaj ncees. Rau qhov tus tubrog uas tabtom mus ntaus rog, nws yeej ua raws li nws tus thawj tubrog lub siab nyiam xwb, nws yuav tsis mus ua liaj ua teb thiab ua lag ua luam ib zaug li. Tus uas sib tw khiav yog nws tsis ua raws li kevcai khiav, nws yuav tsis tau nqi zog. Tus ua teb uas rau siab ntso ua, nws yuav xub tau noj tej qoobloo uas nws sau tau. Tej lus uas kuv hais no koj yuav tsum muab ua tib zoo xav, Vajtswv yuav pab kom koj totaub txhua lo huv tibsi. Koj yuav tsum nco ntsoov Yexus Khetos tus uas yog Daviv tus xeebntxwv uas Vajtswv tsa sawv hauv qhov tuag rov qab los lawm raws li Txojmoo Zoo uas kuv qhia. Twb yog vim kuv qhia Txojmoo Zoo, kuv thiaj raug kev tsimtxom thiab raug luag muab saw hlau khi ib yam li kuv yog tus neeg ua phem. Txawm yog luag khi tau kuv lawm los xij, yeej tsis muaj leejtwg yuav khi tau Vajtswv Txojlus. Twb yog vim li ntawd, kuv thiaj ua siab ntev nyiaj ib puas tsav yam kev txomnyem, rau qhov kuv hlub cov neeg uas Vajtswv tau xaiv cia lawm, thiab xav kom lawv los ntseeg Yexus Khetos, lawv thiaj dim lawv lub txim ib yam li peb thiab lawv thiaj tau Vajtswv txoj koob hmoov thiab lub tshwjchim uas ci ntsa iab mus ibtxhis. Muaj ib lo lus tseeb uas hais tias, “Yog peb nrog nws tuag lawm, peb yuav tau nrog nws sawv hauv qhov tuag rov qab los. Yog peb ua taus siab ntev, peb yuav tau nrog nws kav. Yog peb tso nws tseg, nws yeej yuav tso peb tseg thiab.” Txawm yog peb tsis ua ncaj los nws tseem ua ncaj, rau qhov nws tsis rov dag nws ib zaug li. Koj yuav tsum qhia zaj no rau cov ntseeg thiab ntuas lawv kom lawv tsis txhob sib cav sib ceg txog tej nyuag lus uas sawvdaws hais; tej ntawd tsis muaj qabhau dabtsi. Tej lus sib cav sib ceg ntawd yuav ua rau cov neeg uas mloog yuam kev xwb. Koj yuav tsum xyaum ua koj lub neej kom haum Vajtswv siab thiab muab siab rau ua koj tes haujlwm tiag tiag, koj thiaj yuav tsis txajmuag. Thiab koj yuav tsum qhia raws li Vajtswv Txojlus. Koj tsis txhob ua li cov neeg uas niaj hnub hais ua dog ua dig, tej ntawd tsis muaj qabhau dabtsi, tsuas muaj yuav ua rau sawvdaws tso Vajtswv tseg zuj zus xwb. Tej lus uas lawv hais ntawd yuav huam loj ib yam li lub qhov txhab uas qawj tob zuj zus. Cov xibhwb uas hais tej lus ntawd yog Himena-us thiab yog Filetus nkawd. Nkawd qhia tsis raws li Vajtswv Txojlus. Nkawd qhia hais tias cov ntseeg twb sawv hauv qhov tuag rov qab los lawm. Nkawd qhia li ntawd ua rau cov ntseeg qee leej tsis muab siab rau ntseeg lawm. Tiamsis tus ncej uas Vajtswv muab txhos cia lawm yeej nyob khov kho. Muaj lus sau cia rau ntawm tus ncej ntawd hais tias, “Vajtswv yeej paub txhua tus uas yog Vajtswv menyuam,” thiab hais tias, “Tus uas hais tias nws yog Vajtswv menyuam, tus ntawd yuav tsum tso nws tej kev txhaum tseg.” Nyob hauv cov neeg uas npluanuj tej tsev muaj tais nyiaj tais kub thiab tais zeb tais av. Tej tais nyiaj tais kub, lawv muab los siv thaum muaj qhua tuaj, tiamsis thaum tsis muaj qhua tuaj lawv siv tej tais zeb tais av xwb. Yog leejtwg tso nws tej kev phem kev qias huv tibsi tseg, Vajtswv yuav muab ib txoj haujlwm tseemceeb rau nws ua, rau qhov nws zoo siab muab nws lub siab thiab lub cev huv tibsi rau Vajtswv kav thiab tos ntsoov saib Vajtswv yuav txib nws mus ua txoj haujlwm twg. Koj tsis txhob ua siab heev ib yam li cov hluas ibtxwm ua. Koj yuav tsum ua neeg ncaj ncees thiab muab siab rau ntseeg, hlub lwm tus thiab nrog sawvdaws sib raug zoo. Koj yuav tsum ua zoo li cov neeg uas ua haum Vajtswv siab ua. Lawv yog cov uas niaj hnub thov Vajtswv pab lawv. Koj tsis txhob ua li cov neeg uas niaj hnub hais tej zaj uas tsis muaj hauvpaus hauvntsis, rau qhov koj twb paub lawm hais tias tej ntawd yuav ua rau sawvdaws muaj lus sib cav sib ceg xwb. Tus uas ua Vajtswv tus tubtxib yuav tsum tsis txhob nrog luag sib cav sib ceg, nws yuav tsum hlub txhua tus, muab siab rau qhia, ua siab ntev, thiab ua tib zoo ntuas cov uas thuam nws. Yog nws ua li ntawd, tej zaum Vajtswv yuav pub kom cov neeg ntawd muaj sijhawm tso lawv tej kev txhaum tseg thiab ua raws li Vajtswv Txojlus. Thiab lawv yuav nco dheev hais tias lawv twb mag dab Ntxwgnyoog lub vojhlua lawm, thiab dab Ntxwgnyoog pheej yuam kom lawv ua raws li dab Ntxwgnyoog lub siab. Thaum lawv nco li ntawd, lawv yuav khiav dim. Koj yuav tsum nco ntsoov hais tias thaum lub sijhawm uas ntiajteb yuav kawg yuav muaj kev ntxhov siab heev. Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khavtheeb, yuav muab hlob, yuav tsis mloog niamtxiv lus, yuav tsis ris luag txiaj ntsig, thiab yuav saib tsis taus Vajtswv txoj kevcai; lawv yuav tsis sib hlub, tsis zam txim rau lwm tus, nyiam taug xaiv, tsis tswj lawv lub siab, ua neeg tsivtsaim thiab tsis nyiam ua zoo; lawv yuav ua neeg ntxeev siab, ua neeg siab heev, thiab lawv saib lawv tsimtxiaj dua lwm tus; lawv nyiam kev lomzem heev dua nyiam Vajtswv. Lawv yuav hais tias lawv yog cov uas ntseeg Vajtswv. Tiamsis lawv yeej tsis ua raws li Vajtswv txoj kevcai. Koj tsis txhob nrog cov neeg uas zoo li ntawd ua ke hlo li. Cov neeg ntawd muaj qee leej pheej mus hauv luag tej tsev, mus ntxias tej pojniam uas tsis tshua muaj tswvyim uas pheej nyuaj siab rau lawv tej kev txhaum thiab lub siab xav ntsoov rau tej kev phem kev qias. Cov pojniam ntawd niaj hnub kawm, tiamsis lawv tsis paub hais tias lub ntsiab lus yog li cas tiag. Cov neeg uas mus ntxias cov pojniam ntawd, lawv tawmtsam Vajtswv Txojlus ib yam li thaum ub Yanes thiab Yanpeles nkawd tawmtsam Mauxes. Lawv lub siab ruam thiab lawv tsis ntseeg Vajtswv lawm. Lawv ua tsis tau haujlwm ntxiv lawm, rau qhov sawvdaws pom hais tias lawv ruam ib yam li Yanes thiab Yanpeles. Timautes, koj twb ua raws li kuv tej lus qhia thiab ua raws li tej uas koj pom kuv ua lawm, thiab ua raws li tej uas kuv xav tseg lawm hais tias kuv yuav ua. Koj yeej paub hais tias kuv muab siab rau ntseeg, muaj lub siab ntev, hlub lwm tus, ua siab ntev, tiv kev tsimtxom thiab nyiaj kev txomnyem. Koj twb paub txhua yam uas kuv raug hauv lub nroog Ati-aukias, hauv lub nroog Ikaunias thiab hauv lub nroog Lixathas lawm. Txawm yog kuv raug kev tsimtxom heev npaum li ntawd los kuv tseem ua siab ntev tiv tej ntawd. Tiamsis qhov uas kuv dim tej ntawd twb yog peb tus Tswv Yexus pab kuv, kuv thiaj dim. Cov ntseeg Yexus Khetos txhua tus uas xav ua lub neej kom Vajtswv tau ntsejmuag, lawv yeej raug kev tsimtxom. Tiamsis cov neeg uas ua phem thiab cov neeg uas dag ntxias lwm tus, lawv tseem yuav ua phem heev zuj zus. Txawm yog lawv mus dag ntxias lwm tus los lawv twb tsis paub hais tias lwm tus twb dag ntxias lawv lawm thiab. Tiamsis koj tsis txhob ua li lawv. Koj yuav tsum ua raws li Vajtswv Txojlus uas koj tau kawm thiab cia siab rau lawm. Rau qhov koj yeej paub hais tias cov neeg uas qhia koj, lawv yeej tsis dag koj ib zaug li. Thiab koj yeej paub hais tias txij thaum koj tseem yau, koj yeej kawm Vajtswv Txojlus los lawm. Vajtswv Txojlus pab tau kom tus uas kawm muaj tswvyim; thiab yog nws los ntseeg Yexus Khetos, nws yuav dim nws lub txim. Vajtswv Txojlus txhua zaj puavleej yog Vajtswv tshoov neeg lub siab kom neeg sau. Vajtswv Txojlus yog txoj uas qhia qhov tseeb, qhuab ntuas tus uas ua txhaum, pab tau tus uas ua yuam kev, thiab qhia kom sawvdaws paub ua lub neej ncaj ncees. Vajtswv Txojlus qhia li ntawd kom tus uas ua Vajtswv txoj haujlwm thiaj paub txhij thiab txawj ua txhua yam haujlwm zoo. Timautes, tej lus uas kuv hais rau koj no Vajtswv thiab Yexus Khetos tus uas yuav los txiav txim rau cov neeg ciaj thiab cov neeg tuag yeej paub huv tibsi. Kuv qhia li no rau koj, rau qhov Yexus yuav los thiab nws yuav kav lub qab ntuj no. Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog. Rau qhov tshuav tsis ntev yuav tsis muaj neeg xav mloog Vajtswv Txojlus lawm. Lawv yuav ua raws li lawv lub siab nyiam xwb, thiab lawv yuav mus nrhiav ntau tus xibhwb los qhia tej zaj uas sawvdaws nyiam mloog. Lawv yuav tsis nyiam mloog Vajtswv Txojlus lawm. Lawv tsuas nyiam mloog tej dabneeg xwb. Tiamsis koj tsis txhob ua li lawv. Koj yuav tsum tswj koj lub siab txhua lub sijhawm, ua siab ntev nyiaj tej kev txomnyem mus qhia Txojmoo Zoo thiab muab siab rau ua txhua yam haujlwm uas Vajtswv muab rau koj ua lawm kom tiav. Timautes, nimno kuv zoo ib yam li tej khoom uas luag twb muab tso rau saum lub rooj yuav muab hlawv fij rau Vajtswv lawm. Twb txog lub sijhawm uas kuv yuav tso lub ntiajteb tseg. Kuv twb siv zog khiav kawg kuv lub zog lawm, kuv twb khiav mus txog qhov kawg lawm. Kuv muab siab npuab Vajtswv. Nimno kuv yuav tau nqi zog. Tej nqi zog ntawd yog tej uas Vajtswv khaws tseg rau cov neeg ncaj ncees. Thaum txog hnub ntawd tus Tswv uas txiav txim ncaj ncees, nws yuav muab pub rau kuv. Tsis yog pub rau kuv tib leeg xwb, tiamsis nws yuav pub rau txhua tus uas tos ntsoov hnub uas Yexus rov qab los. Koj cia li tuaj saib kuv sai sai. Rau qhov Demas qaug rau tej khoom hauv lub ntiajteb no lawm. Nws tso kuv tseg, nws khiav mus rau tim lub nroog Thexalaunikes lawm. Kelexes mus rau tim lub xeev Kalatias, thiab Titus mus rau tim lub nroog Dalematias lawm. Tsuas tshuav Lukas tib leeg nrog kuv nyob lawm xwb; koj cia li mus coj Malakaus nrog koj tuaj, rau qhov kuv xav kom nws pab kuv ua haujlwm. Kuv txib Tikhikus mus rau tim lub nroog Efexus lawm. Thaum koj tuaj, thov koj pab nqa kuv lub tsho ntev uas kuv muab tso rau hauv Kalepus tsev pem lub nroog Tau-as thiab nqa kuv cov ntawv tuaj rau kuv, tshwjxeeb yog nqa cov uas sau rau hauv tej tawv. Alexades tus uas yog tus kws nchuav tooj liab, nws ua phem kawg li rau kuv, Vajtswv yuav rau txim rau nws kom txaus nkaus tej uas nws tau ua rau kuv lawm. Koj yuav tsum ceevfaj zoo, rau qhov tus ntawd yog tus uas pheej tawmtsam tej uas peb qhia. Thawj zaug uas kuv hais daws kuv zaj, tsis muaj leejtwg pab kuv, sawvdaws puavleej tso kuv tseg. Thov Vajtswv zam txim rau lawv. Tiamsis Vajtswv nrog nraim kuv thiab nws txhawb kuv lub zog, kuv thiaj muaj zog mus qhia Vajtswv Txojlus rau lwm haivneeg. Vajtswv pab kuv dim kev tuag ib yam li dim hauv tsov ntxhuav lub qhovncauj los. Vajtswv yuav pab kuv kom dim txhua yam kev phem, thiab nws yuav coj kuv kev mus txog saum ntuj ceebtsheej. Thov kom Vajtswv tau koob meej mus ibtxhis li. Amees. Thov koj hais noj qab nyob zoo rau Paxilas thiab Akilas thiab Aunexifaulus tsevneeg. Elatus nyob tim lub nroog Kauleethaus, tiamsis kuv tso Taufimus rau tim lub nroog Miletus lawm rau qhov nws mob. Kuv xav kom koj tuaj thaum tseem tsis tau txog lub caij ntuj no. Enpulus, Pudees, Linus thiab Kelaudias hais noj qab nyob zoo rau koj, thiab cov kwvtij ntseeg sawvdaws hais noj qab nyob zoo rau koj thiab. Thov Vajtswv nrog nraim koj thiab foom koob hmoov rau nej sawvdaws. Kuv yog Paulus uas yog Vajtswv tus tubtxib thiab yog Yexus Khetos tus timthawj. Vajtswv xaiv kuv thiab txib kuv mus pab cov neeg uas Vajtswv tau xaiv cia lawm, thiab qhia kom lawv paub txojlus tseeb uas peb ntseeg, lawv thiaj yuav tau txojsia ntev dhawv mus ibtxhis. Thaum uas tsis tau tsim lub ntiajteb, Vajtswv coglus tseg hais tias nws yuav pub txojsia ntawd rau peb, nws hais li ntawd nws yeej tsis dag li. Thaum txog lub sijhawm uas Vajtswv teem cia lawm, Vajtswv qhia zaj no rau peb. Vajtswv tus uas yog peb tus Cawmseej, nws muab zaj no tso rau kuv, thiab kom kuv coj mus qhia rau sawvdaws. Titus, kuv sau tsab ntawv no xa tuaj rau koj tus uas yog kuv tus tub, rau qhov wb ntseeg ib yam nkaus. Thov Vajtswv tus uas yog peb Leej Txiv thiab Yexus Khetos tus uas yog peb tus Cawmseej foom koob hmoov rau koj thiab pab kom koj muaj kev kaj siab lug. Thaum kuv cia koj nyob hauv lub koog povtxwv Kaletes, kuv xav kom koj ua tes haujlwm uas peb tseem ua tsis tau tas ntawd kom tiav, thiab hauv txhua lub nroog uas muaj cov ntseeg nyob, kuv xav kom koj mus tsa ib co txwjlaug saib xyuas lawv. Koj yuav tsum nco ntsoov tej lus uas kuv twb qhia rau koj lawm hais tias: tus txwjlaug yuav tsum yog tus uas ua lub neej zoo uas tsis muaj leejtwg thuam li; nws muaj ib tug pojniam xwb, nws cov menyuam yuav tsum yog cov uas ntseeg Vajtswv thiab yog cov uas tsis muaj leejtwg thuam hais tias yog neeg lojleeb thiab tawv ncauj. Tus thawjcoj uas saib xyuas Vajtswv tes haujlwm hauv pawg ntseeg, yuav tsum yog tus uas tsis tau ua ib yam dabtsi rau luag thuam li. Nws tsis khavtheeb, tsis chim sai, tsis quav cawv, tsis muaj lub siab heev thiab tsis ntshaw luag tug; tiamsis nws nyiam qhua, nyiam qhov zoo, nws tswj tau nws lub siab, nws ua ncaj ncees, nws ua lub neej dawbhuv thiab xyaum ua lub neej zoo. Nws yuav tsum muab siab npuab Vajtswv tej lus uas nws twb kawm los lawm. Yog nws ua li ntawd, tej lus uas nws qhia yuav txhawb tau cov uas mloog lub zog, thiab yuav muab cov neeg uas tawmtsam tej lus hais txhaum nthuav rau sawvdaws paub. Rau qhov muaj coob leej ua neeg ntxeev siab thiab hais tej lus tsis muaj qabhau dag ntxias lwm tus kom yuam kev, cov neeg uas hais li ntawd, cov coob yog cov Yudais ua kevcai txiav. Koj yuav tsum txwv tsis txhob pub lawv qhia li ntawd, rau qhov lawv qhia tej zaj uas tsis tsimnyog ua rau txhua tsevneeg muaj kev kub ntxhov. Lawv qhia li ntawd twb yog lawv ntxias sawvdaws tej nyiaj yuav xwb. Muaj ib tug xibhwb uas yog neeg Kaletes, nws qhia hais tias, “Cov neeg Kaletes puavleej yog neeg dag, ua nruj ua tsiv ib yam li tej tsiaj thiab yog neeg tubnkeeg uas noj ntau.” Yeej muaj raws li tej lus uas tus ntawd hais tiag. Yog li ntawd koj yuav tsum ntuas lawv, lawv thiaj yuav muaj kev ntseeg ruaj, lawv thiaj yuav tsis niaj hnub mus mloog tej dabneeg uas cov Yudais hais, thiab tsis mus mloog tej zaj uas neeg lub tswvyim xav. Cov neeg uas qhia tej zaj ntawd, lawv yeej tsis kam ua raws li txojlus tseeb. Cov neeg uas muaj lub siab dawb siab zoo, lawv saib yam twg los puavleej yog yam uas zoo; tiamsis cov neeg siab phem thiab tsis cia siab rau Vajtswv, tej uas lawv saib tsis muaj ib yam uas lawv yuav hais tias yog yam uas zoo, rau qhov lawv lub siab thiab tej uas lawv xav hauv lawv lub siab yeej phem. Lawv hais tias lawv yog cov uas paub Vajtswv, tiamsis lawv tsis ua lawv lub neej zoo li cov uas paub Vajtswv ua, lawv yog neeg siab phem thiab tsis mloog leejtwg lus. Koj tsis txhob muab ib txog haujlwm tseemceeb tso rau cov neeg ntawd ua hlo li, rau qhov lawv yeej ua tsis tau. Titus, koj yuav tsum qhia raws li tej zaj tseemceeb uas yog txojkev ntseeg. Koj ntuas cov yawg laus kom lawv ua neeg xyuam xim, coj cai thiab paub tswj lawv lub siab; kom lawv muab siab rau ntseeg, muaj lub siab hlub thiab ua siab ntev. Koj qhia cov pog laus ib yam nkaus, kom lawv yuav tsum ua lawv lub neej dawbhuv rau Vajtswv tau ntsejmuag. Lawv tsis txhob ua neeg taug xaiv lossis ua neeg quav cawv. Lawv yuav tsum qhia tej zaj zoo rau cov pojniam hluas, cov pojniam hluas thiaj paub hlub lawv cov txiv thiab lawv cov menyuam, thiab qhia lawv kom lawv paub tswj lawv lub siab, ua neeg dawbhuv, nquag tu vaj tu tsev, ua siab dawb siab zoo thiab mloog lawv cov txiv lus, thiaj yuav tsis muaj leejtwg thuam Vajtswv txojlus. Koj qhia cov tub hluas ib yam nkaus, kom lawv paub tswj lawv lub siab. Koj yuav tsum ua txhua yam haujlwm zoo rau lawv xyaum. Thaum koj qhia Vajtswv txojlus koj yuav tsum ua tib zoo qhia tiag tiag. Koj yuav tsum hais tej lus zoo xwb, lwm tus thiaj yuav tsis muaj lus thuam tau koj. Cov neeg uas ntxub koj lawv yuav txajmuag, rau qhov lawv yuav tsis muaj ib lo lus thuam peb cov ntseeg. Koj qhia cov tubqhe kom lawv nyias mloog nyias tus tswv lus, thiab ua txhua yam kom haum tus tswv siab tsis txhob cav ncauj, thiab tsis txhob qee tus tswv tug. Lawv yuav tsum ua lawv lub neej rau sawvdaws pom hais tias lawv yog cov tubqhe uas ncaj ncees. Yog lawv ua li ntawd sawvdaws yuav saib taus Vajtswv tus uas yog peb tus cawmseej tej lus qhia. Rau qhov Vajtswv twb qhia txojkev dim txim uas nws pub dawb dawb rau sawvdaws rau peb paub lawm. Vajtswv ua li ntawd twb yog nws xav kom peb mloog nws lus, thiab tso peb tej kev phem kev qias tseg. Thiab kom peb paub tswj peb lub siab, ua tau neeg ncaj ncees thiab ua peb lub neej kom Vajtswv tau ntsejmuag, rau qhov peb tabtom cia siab ntsoov tos hnub uas Yexus Khetos tus uas yog peb tus Cawmseej rov qab los. Nws yog tus Vajtswv uas muaj hwjchim loj kawg nkaus. Yexus Khetos tau muab nws txojsia los txhiv peb kom peb dim txhua yam kev phem, thiab pab peb txhua tus uas nws tau xaiv cia lawm kom peb ua tau neeg zoo kawg nkaus, thiab kom peb muaj lub siab kub lug ua txhua yam haujlwm zoo. Koj qhia cov ntseeg thiab kom lawv ua raws li tej lus uas kuv qhia rau koj lawm, rau qhov koj yeej muaj cuabkav hais lawv. Yog li ntawd, tsis txhob cia leejtwg saib tsis taus koj. Koj qhia rau cov ntseeg hais tias lawv yuav tsum hwm tej nomtswv, mloog nomtswv lus thiab zoo siab hlo ua txhua yam haujlwm zoo. Koj qhia lawv kom lawv tsis txhob thuam leejtwg, tsis txhob nyiam sib cav sib ceg, tiamsis kom lawv ib leeg hlub ib leeg thiab nrog sawvdaws sib raug zoo. Koj yuav tsum qhia tej no rau sawvdaws, rau qhov yav tas los peb yeej yog neeg ruam, neeg tawv ncauj, neeg ua txhaum, peb qaug rau kev phem kev qias thiab rau txhua yam kev lomzem. Peb lub siab niaj hnub xav phem, ntshaw luag tug thiab ib leeg ntxub ib leeg. Tiamsis thaum Vajtswv tus uas yog peb tus Cawmseej nws qhia nws txojkev hlub rau sawvdaws, thaum ntawd Vajtswv muab peb lub txim tshem mus povtseg lawm. Vajtswv ua li ntawd, tsis yog vim peb ua ib yam haujlwm zoo, tiamsis vim Vajtswv hlub peb xwb. Vaj Ntsujplig tus Dawbhuv twb ntxuav peb lub siab kom peb muaj lub siab tshiab thiab nws tsim peb dua tshiab. Qhov uas Vajtswv pub Vaj Ntsujplig tus Dawbhuv rau peb, twb yog vim peb ntseeg Yexus Khetos tus uas yog peb tus Cawmseej, Vajtswv hlub peb li ntawd, Vajtswv thiaj suav hais tias peb yog neeg ncaj ncees, thiab peb cia siab hais tias Vajtswv yuav pub txojsia ntev dhawv mus ibtxhis rau peb. Tej lus no yog tej lus uas tseemceeb. Kuv xav kom koj niaj hnub qhia tej no, cov ntseeg Vajtswv thiaj muab siab rau ua txhua yam haujlwm zoo; tej ntawd yeej zoo thiab muaj nqis rau txhua tus. Tiamsis koj tsis txhob nrog leejtwg sib cav txog tej zaj uas tsis muaj hauvpaus hauvntsis, sib cav hais txog cov yawgkoob tej npe uas muaj nyob hauv ntawv thiab sib cav hais txog Vajtswv txoj kevcai. Qhov uas ib tug pheej nrog ib tug sib cav sib ceg, qhov ntawd tsis tseemceeb thiab tsis muaj qabhau dabtsi li. Koj yuav tsum ntuas tus uas pheej ua rau sawvdaws tsis sib haum, yog koj ntuas nws ob peb zaug, nws pheej tsis mloog, ces koj tsis txhob quavntsej nws li lawm. Rau qhov koj twb paub lawm hais tias tus neeg uas ua li ntawd nws yog tus uas ua phem kawg li, thiab nws tej kev txhaum yeej qhia tau hais tias nws yog tus uas ua txhaum. Yog thaum twg kuv txib Athenas lossis Tikhikus tuaj nyob tim ko, saib koj puas khoom tuaj nrog kuv nyob pem lub nroog Nikaupaulis, rau qhov kuv xav hais tias thaum txog lub caij ntuj no kuv yuav mus nyob ib ntus hauv lub nroog ntawd. Koj yuav tsum pab xa Xenas uas yog tus txheem plaub thiab Apaulaus mus, thiab saib nkawd puas muaj qhov txhia chaw txhij. Koj yuav tsum qhia cov ntseeg kom lawv xyaum ua txhua yam haujlwm zoo, thiab paub npaj tej uas yuav pab tau sawvdaws, thaum muaj haujlwm tseemceeb sawvdaws thiaj tau siv. Tsis tsimnyog cov ntseeg yuav ua dog ua dig. Txhua tus uas nrog kuv nyob ntawm no, lawv puavleej hais noj qab nyob zoo rau koj. Thov koj hais peb tej lus noj qab nyob zoo rau cov ntseeg. Thov Vajtswv foom koob hmoov rau nej txhua tus. Filemoos, kuv thiab peb tus kwv Timautes sau tsab ntawv no tuaj rau koj. Kuv raug kaw rau hauv tsev lojcuj, rau qhov kuv qhia Yexus zaj. Koj yog tus uas nrog wb ua tib txoj haujlwm thiab yog tus uas wb hlub. Thiab wb sau rau cov ntseeg uas tuaj mloog lus qhuab qhia hauv koj tsev, thiab rau wb tus muam Afias, thiab rau Akhipus tus uas ua Yexus Khetos ib tug tubrog ib yam li wb. Thov Vajtswv tus uas yog peb leej Txiv thiab peb tus Tswv Yexus Khetos foom koob hmoov rau nej, thiab pub kom nej tau nyob kaj siab lug. Filemoos, txhua zaug uas kuv thov Vajtswv, kuv thov Vajtswv pab koj thiab kuv ua kuv tus Vajtswv tsaug, rua qhov kuv hnov xov hais tias, koj muab siab rau ntseeg peb tus Tswv Yexus, thiab koj hlub cov ntseeg Vajtswv heev. Koj thiab wb puavleej yog tus ntseeg thiab nrog Yexus Khetos sib raug zoo. Yog li ntawd kuv thov Vajtswv pab peb cov uas ntseeg Yexus Khetos, kom peb paub tej uas Vajtswv qhia rau peb heev zuj zus ntxiv. Tus kwv, qhov uas koj muaj lub siab hlub cov ntseeg Vajtswv, thiab koj tau txhawb lawv txhua tus lub zog, qhov ntawd txhawb tau kuv lub zog thiab ua rau kuv zoo siab kawg li. Wb ob leeg puavleej yog tus uas ntseeg Yexus Khetos, yog li ntawd, kuv yeej muaj cuabkav kom koj ua raws li kuv hais. Tiamsis vim kuv hlub koj, kuv tsis xav ua li ntawd. Txawm yog kuv yog Yexus Khetos tus tubtxib uas nimno raug kaw rau hauv tsev lojcuj, vim kuv yog tus uas qhia Yexus Khetos zaj los kuv yeej tsis yuam kom koj ua raws li kuv hais. Kuv thov koj mloog, kuv yuav hais Auneximus zaj rau koj. Nimno nws yog kuv tus tub, rau qhov thaum kuv qhia Txojmoo Zoo rau nws, nws tau los ntseeg Yexus lawm. Filemoos, yav tas los nws yog tus neeg uas tsis tsimtxiaj, tiamsis nimno nws yog tus neeg tsimtxiaj rau koj thiab rau kuv lawm. Nimno kuv kom nws rov qab los nrog koj nyob. Kuv ua li ntawd, ib yam li kuv muab kuv ib nplooj siab faib rau koj lawm ntag. Kuv xav cia nws nrog kuv nyob pab kuv hloov koj chaw thaum uas kuv raug kaw rau hauv tsev lojcuj vim kuv qhia txojmoo zoo. Txawm yog li cas los xij, kuv tsis xav yuam kom koj pab kuv. Yog koj zoo siab pab, koj cia li pab. Txhua yam uas koj tsis pom zoo kuv ua, kuv yeej tsis ua. Qhov uas Auneximus ncaim koj mus ib ntus ntawd, tej zaum yog Vajtswv xav coj nws rov qab los nrog koj nyob mus li. Koj tsis txhob suav hais tias, nws yog ib tug tubtxib xwb, nimno nws tsimtxiaj dua ib tug tubtxib, nws los ua koj ib tug kwv, rau qhov nws ntseeg Yexus Khetos lawm. Kuv hlub nws kawg li thiab kuv paub hais tias koj hajyam yuav hlub nws heev dua, rau qhov nws yeej yog koj ib tug tubtxib thiab nws yog ib tug uas ntseeg tus Tswv. Yog li ntawd, yog koj suav hais tias kuv thiab koj, wb ob leeg puavleej ua Vajtswv tes haujlwm, koj yuav tsum rov qab txais yuav nws. Yog nws tau ua txhaum rau koj lossis nws tshuav koj nqi, kuv yuav them rau koj. Twb yog kuv txhais tes sau li no hais tias, “Kuv uas yog Paulus yuav them rau koj.” (Kuv yuav tsis suav hais tias, koj tshuav kuv nqi, qhov kuv qhia Txojmoo Zoo rau koj.) Yog li ntawd tus kwv, wb yog ob tug uas ntseeg Vajtswv, yog koj xav ua kom haum Vajtswv siab tiag, thov koj pab kuv zaj no, kuv thiaj yuav kaj siab mentsis. Thaum kuv tabtom sau tsab ntawv no tuaj rau koj, kuv cia siab hais tias, koj yuav ua raws li kuv thov. Tsis yog li ntawd xwb, koj tseem yuav ua ntau dua li kuv thov thiab. Tsis tas li ntawd xwb, thov koj npaj txaj chaw tos kuv, rau qhov kuv cia siab hais tias Vajtswv yeej yuav teb tej lus uas nej thov kom Vajtswv qhib kev rau kuv rov tuaj saib nej dua. Epalas tus uas raug kaw nrog kuv hauv tsev lojcuj vim wb qhia Yexus Khetos zaj. Nws hais noj qab nyob zoo rau koj thiab. Malakaus, Alitakhus, Demas thiab Lukas uas nrog kuv ua tib txoj haujlwm. Lawv hais tias kom hais noj qab nyob zoo rau koj thiab. Thov tus Tswv Yexus Khetos foom koob hmoov rau nej txhua Tus. Thaum ub muaj ntau zaus Vajtswv ua li ub li no qhia cov uas cev Vajtswv lus kom lawv qhia rau peb cov yawgkoob paub tej uas Vajtswv hais, tiamsis tiam kawg no Vajtswv txib Vajtswv tus Tub los qhia peb. Vajtswv tsa Vajtswv tus Tub ua tus tsim lub ntuj thiab lub ntiajteb. Thaum kawg Vajtswv yuav pub ib puas tsav yam huv tibsi ua tus Tub ntawd tug. Vajtswv lub hwjchim ua rau tus Tub ntawd ci ntsa iab. Nws muaj hwvxyeej ib yam li Vajtswv, nws tej lus uas muaj hwjchim loj kawg nkaus tuav lub ntuj thiab lub ntiajteb. Thaum nws theej neeg lub txhoj tas lawm, nws mus saum ntuj ceebtsheej. Nws mus zaum ntawm Vajtswv tus uas muaj hwjchim loj kawg nkaus sab xis. Vajtswv tis lub npe uas tseemceeb dua cov timtswv ceebtsheej lub rau Vajtswv tus Tub, ib yam li Vajtswv tsa Vajtswv tus Tub ua tus uas muaj hwjchim loj dua cov timtswv ceebtsheej. Rau qhov Vajtswv yeej tsis tau hais rau nws cov timtswv ib tug twg hais tias, “Koj yog kuv tus Tub; hnub no kuv ua koj Txiv lawm.” Lossis Vajtswv tau hais rau cov timtswv ib tug twg hais tias, “Kuv yuav yog nws Txiv, thiab nws yuav ua kuv tus Tub.” Thaum Vajtswv yuav txib Vajtswv tus Tub hlob nqis los hauv ntiajteb, Vajtswv rov hais dua li no: “Vajtswv cov timtswv txhua tus yuav tsum pehawm tus Tub.” Thaum Vajtswv hais txog cov timtswv, nws hais tias, “Vajtswv tsim Vajtswv cov timtswv zoo li cua, thiab nws tsim nws cov tubtxib zoo li nplaim taws.” Tiamsis thaum Vajtswv hais txog nws tus Tub, nws hais tias: “Vajtswv, koj lub tebchaws yuav nyob mus ibtxhis, Koj kav koj haivneeg mus rau txojkev ncaj ncees. Koj nyiam qhov zoo, koj ntxub qhov phem. Twb yog vim li no Vajtswv tus uas yog koj tus Vajtswv thiaj xaiv koj cia thiab ua rau koj zoo siab kawg li, rau qhov koj tau koob meej heev dua koj cov phoojywg.” Nws hais dua hais tias, “Tus Tswv, thaum chivkeeb koj tsim lub ntiajteb thiab yog koj txhais tes tsim lub ntuj. Tej ntawd puavleej yuav ploj mus, tiamsis koj yuav nyob mus li; tej ntawd yuav txawj qub ib yam li tej ris tsho. Koj yuav muab tej ntawd tais cia ib yam li luag tais lub tsho ntev, thiab koj yuav muab tej ntawd hloov ib yam li luag hloov ris tsho. Tiamsis koj yeej zoo li qub, koj yuav tsis txawj laus.” Vajtswv yeej tsis tau hais rau Vajtswv cov timtswv ib tug twg hais tias, “Koj cia li los zaum ntawm kuv sab xis mus txog thaum kuv muab koj cov yeebncuab rau koj tsuj.” Yog li ntawd, cov timtswv ceebtsheej tsuas yog cov neeg qaum ntuj uas ua Vajtswv txoj haujlwm xwb. Vajtswv txib lawv los pab cov neeg uas yuav dim lub txim. Yog li ntawd peb yuav tsum hajyam ua tib zoo khaws tej lus tseemceeb uas peb tau hnov los lawm cia zoo zoo, peb thiaj li yuav muab siab npuab tej lus ntawd. Rau qhov tej lus uas cov timtswv ceebtsheej qhia puavleej yog lus tseeb. Tus uas tsis mloog thiab tsis ua raws li tej lus ntawd, tus ntawd twb raug txim raws li nws tej kev txhaum lawm. Yog peb tsis quavntsej txojkev dim txim uas tseemceeb, peb yuav ua li cas dim tau. Tus Tswv yog tus uas xub qhia txojkev dim txim ntawd ntag. Cov neeg uas hnov nws qhia, lawv qhia tseeb rau peb hais tias muaj li ntawd tiag. Tsis yog li ntawd xwb, Vajtswv tseem ua tej txujci loj thiab tseemceeb thiab ua tej uas qhia nws lub hwjchim rau sawvdaws pom hais tias yeej muaj li lawv hais tiag. Thiab Vajtswv pub Vaj Ntsujplig tus dawbhuv rau sawvdaws raws li Vajtswv pom zoo pub. Vajtswv tsis tau tsa cov timtswv ceebtsheej ua cov kav lub ntiajteb tshiab uas peb hais txog uas yuav los tom ntej no. Tiamsis Vajtswv txojlus hais tias, “Vajtswv, neeg tsimtxiaj npaum li cas, koj ho xam txog lawv? Tej tibneeg, lawv tsimtxiaj npaum li cas koj ho yuav saib xyuas lawv? Koj tsim nws, koj pub nws muaj hwjchim yau dua cov timtswv ib nyuag ntu, koj pub nws muaj hwjchim thiab tau ntsejmuag, thiab tsa nws ua tus kav ib puas tsav yam huv tibsi.” Lo lus uas hais tias Vajtswv tsa neeg ua “tus kav ib puas tsav yam,” lo lus ntawd qhia tseeb hais tias tsis muaj ib yam dabtsi uas Vajtswv tsis muab rau neeg kav. Txawm li ntawd los nimno peb tseem tsis tau pom neeg kav ib puas tsav yam. Tiamsis peb pom hais tias Vajtswv cia Yexus muaj hwjchim yau dua cov timtswv ceebtsheej ib nyuag ntu. Vajtswv ua li ntawd, rau qhov Vajtswv tus uas hlub sawvdaws nws yuav txib Yexus los tuag theej sawvdaws lub txhoj. Nimno peb pom Yexus muaj lub tshwjchim ci ntsa iab thiab nws tau ntsejmuag, rau qhov nws raug kev tuag txomnyem ntsuav. Qhov uas Vajtswv tus uas tsim thiab saib xyuas ib puas tsav yam txib Yexus los raug kev txomnyem kom Yexus thiaj ua tau Yexus txoj haujlwm tiav, qhov ntawd Vajtswv ua yog lawm. Vajtswv ua li ntawd, nws thiaj yuav coj tau nws cov menyuam ntau leej los txais yuav nws txoj koob hmoov, rau qhov Yexus yog tus uas cawm lawv kom lawv dim lawv lub txim. Yexus thiab cov neeg uas Yexus twb pub lub siab tshiab rau lawm puavleej yog tib leeg txiv yug xwb. Twb yog vim li ntawd Yexus thiaj tsis txajmuag hu hais tias lawv yog nws cov kwvtij. Raws li tej lus uas nws hais tseg lawm hais tias, “Vajtswv, kuv yuav qhia koj zaj rau kuv cov kwvtij mloog; Kuv yuav hu nkauj ua koj tsaug tabmeeg cov neeg uas tuaj nyob ua ke mloog lus qhuab qhia.” Nws hais dua hais tias, “Kuv yuav cia siab rau Vajtswv.” Thiab nws hais ntxiv dua hais tias, “Kuv nrog cov menyuam uas Vajtswv pub rau kuv nyob ntawm no.” Vim cov menyuam ntawd puavleej yog neeg muaj roj muaj ntshav; yog li ntawd, Yexus thiaj los yug ua neeg muaj roj muaj ntshav ib yam li lawv. Nws ua li ntawd, nws txojkev tuag thiaj rhuav tau dab Ntxwgnyoog lub hwjchim uas ua kom neeg tuag puastsuaj mus thiab tso tau cov neeg uas ibtxwm ntshai kev ploj kev tuag kom lawv dim. Peb twb pom tseeb lawm hais tias tsis yog Vajtswv pab cov timtswv ceebtsheej tiamsis yog Vajtswv pab Anplahas cov xeebntxwv. Yog li ntawd, Yexus thiaj los yug ua neeg ib yam li nws cov kwvtij, nws thiaj tau ua lawv tus Povthawj Hlob uas ncaj ncees thiab muaj lub siab hlub uas ua Vajtswv txoj haujlwm. Nws ua li ntawd Vajtswv thiaj yuav zam tau sawvdaws lub txim. Nimno Yexus paub pab cov neeg uas raug kev sim siab, rau qhov nws twb raug kev sim siab thiab kev tsimtxom los lawm. Yog li ntawd, cov kwvtij uas ntseeg Yexus, nej puavleej yog cov uas Vajtswv hu los ua Vajtswv haivneeg lawm; nej yuav tsum ntsia ntsoov Yexus tus uas Vajtswv txib los ua tus Povthawj Hlob saib xyuas tej uas peb ntseeg. Yexus muaj nplooj siab dawb paug ua txoj haujlwm uas Vajtswv muab tso rau nws ua, ib yam li Mauxes muaj nplooj siab dawb paug pab cov Yixalayees uas yog Vajtswv tsevneeg txhua tus huv tibsi. Sawvdaws yeej qhuas tus kws ua tsev heev dua qhuas lub tsev. Ib yam nkaus li ntawd tsimnyog Yexus tau ntsejmuag heev dua Mauxes. Tej tsev yeej muaj tus ua, tiamsis Vajtswv yog tus tsim ib puas tsav yam. Mauxes muaj nplooj siab dawb paug pab Vajtswv tsevneeg txhua tus huv tibsi. Nws yeej yog ib tug tubtxib; nws hais txog tej uas Vajtswv yuav qhia rau sawvdaws yav tom ntej. Tiamsis Yexus Khetos yog Vajtswv tus Tub; nws muaj nplooj siab dawb paug saib xyuas Vajtswv tsevneeg. Yog peb muaj nplooj siab tawv qhawv thiab ua siab ntev tos tej uas peb cia siab rau, peb thiaj yuav ua tau Vajtswv tsevneeg. Rau qhov Vaj Ntsujplig tus Dawbhuv qhia hais tias, “Hnub no yog nej hnov Vajtswv lub suab hu, nej tsis txhob tawv ncauj ib yam li yav tas los nej cov yawgkoob ntxeev siab rau Vajtswv thiab ib yam li hnub uas lawv sim Vajtswv siab thaum lawv nyob tom tiaj suabpuam, Vajtswv hais tias, txawm yog nej cov yawgkoob pom tej uas kuv ua los tau plaub caug xyoo los lawv tseem sim kuv siab thiab. Twb yog vim li ntawd kuv thiaj chim rau lawv cov ntawd thiab kuv hais tias, ‘Lawv lub siab yeej nyiam ua phem thiab lawv tsis kawm kuv tej kevcai.’ Kuv chim, kuv thiaj coglus tseg hais tias, ‘Lawv cov ntawd yuav tsis tau los nrog kuv so ib zaug li.’ ” Cov kwvtij, nej yuav tsum ceevfaj zoo nyob tsam nej cov muaj ib tug muaj lub siab phem thiab tsis ntseeg, nws cia li tso Vajtswv tus uas muaj sia nyob tseg. Nej tsis txhob ua li ntawd, nej ib leeg yuav tsum niaj hnub pab ib leeg thaum peb tseem hu tau hais tias, “Hnub No”; yog nej ua li ntawd, kev txhaum yuav ntxias tsis tau nej ib tug twg ua neeg tawv ncauj. Yog peb muab siab npuab tej uas thaum chivthawj peb cia siab rau mus txog hnub kawg, peb yuav nrog Yexus Khetos tau koob hmoov ib yam nkaus. Vajtswv txojlus hais tias, “Hnub no yog nej hnov Vajtswv lub suab hu, nej tsis txhob tawv ncauj ib yam li yav tas los nej cov yawgkoob ntxeev siab rau Vajtswv.” Cov uas hnov Vajtswv lub suab hu thiab ntxeev siab rau Vajtswv yog cov twg? Twb yog txhua tus uas Mauxes coj tawm hauv tebchaws Iziv los ntag. Lub sijhawm plaub caug xyoo ntawd Vajtswv chim rau cov neeg twg? Vajtswv chim rau cov neeg uas ua txhaum, cov neeg ntawd twb yog cov uas tuag pawglug tom tiaj suabpuam. Thaum Vajtswv coglus tseg hais tias, “Lawv cov ntawd yuav tsis tau los so hauv qhov chaw uas kuv tu tseg rau lawv ib zaug li”, yog nws hais txog cov twg? Twb yog nws hais txog cov neeg uas ntxeev siab rau nws ntag. Yog li ntawd, peb paub hais tias vim lawv tsis ntseeg, Vajtswv thiaj tsis pub lawv mus hauv qhov chaw ntawd. Vajtswv coglus tseg rau peb hais tias nws yuav pub peb mus nrog nws so. Yog li ntawd, peb sawvdaws yuav tsum ceevfaj, nyob tsam nej cov muaj qee leej tsis tau mus nrog nws so. Rau qhov peb puavleej hnov txojmoo zoo ib yam li lawv tau hnov lawm thiab. Lawv hnov tiamsis txojmoo zoo ntawd tsis muaj nqis rau lawv, rau qhov thaum lawv hnov lawv tsis ntseeg. Peb cov uas ntseeg peb yuav tau mus nrog Vajtswv so. Raws li Vajtswv hais tseg hais tias, “Kuv chim kuv thiaj coglus hais tias, ‘Lawv cov ntawd yuav tsis tau los nrog kuv so ib zaug li.’ ” Txawm yog thaum Vajtswv tsim ntuj tsim teb, nws twb ua nws tej haujlwm tiav tas lawm los nws tseem hais li ntawd. Rau qhov Vajtswv txojlus muaj ib qho hais txog hnub xya hais tias, “Hnub xya Vajtswv so, Vajtswv tsis tsim ib yam dabtsi ntxiv lawm.” Muaj dua ib los hais txog zaj no hais tias, “Lawv cov ntawd yuav tsis tau los nrog kuv so ib zaug li.” Cov neeg thaum ub uas xub hnov txojmoo zoo lawv tsis tau mus nrog Vajtswv so rau qhov lawv tsis ntseeg, tiamsis Vajtswv pub lwm cov mus nrog Vajtswv so. Peb paub hais tias muaj li ntawd, rau qhov Vajtswv teem dua ib hnub tseg hu hais tias, “Hnub No.” Tom qab ntawd ntau xyoo Vajtswv kom Daviv hais txog zaj ntawd raws li twb hais tas los lawm hais tias, “Hnub no yog nej hnov Vajtswv lub suab hu, nej tsis txhob tawv ncauj.” Rau qhov yog Yausuas twb coj lawv sawvdaws mus nrog Vajtswv so lawm, ces tsis tas Vajtswv yuav rov hais dua hais tias hnub no. Txawm li cas los Vajtswv haivneeg yeej yuav tau so ib yam li hnub xya Vajtswv so. Rau qhov tus uas mus nrog Vajtswv so lawm, tus ntawd yuav tsis ua haujlwm ib yam li Vajtswv tsis ua haujlwm lawm. Yog li ntawd, tsimnyog peb sawvdaws yuav tsum ua tiag mus kom peb tau nrog Vajtswv so. Tsis txhob pub peb cov ib tug twg tsis mloog lus li lawv cov ntawd nyob tsam nws tsis tau mus so. Rau qhov Vajtswv tus uas muaj sia nyob, nws tej lus tseemceeb thiab muaj kuab kawg li. Tej lus ntawd ntse dua rab ntaj ob sab ntse, nkaug mus txog nruab plab nruab plawv nruab nqaij nruab txha. Tej lus ntawd paub tej uas neeg xav thiab paub neeg lub siab huv tibsi. Tsis muaj ib yam dabtsi uas neeg yuav muab ntis tau tsis pub Vajtswv pom. Ib puas tsav yam uas Vajtswv tsim los lawm Vajtswv yeej pom huv tibsi, thiab peb txhua tus nyias yuav tsum piav nyias lub neej qhia rau Vajtswv. Yog li ntawd, peb yuav tsum muab siab npuab tej uas peb hais tias, peb ntseeg, rau qhov peb muaj tib tug Povthawj Hlob uas twb mus cuag Vajtswv lawm, tus ntawd yog Vajtswv tus Tub Yexus. Peb tus Povthawj Hlob yeej paub tej uas peb qaug zog, rau qhov nws twb raug kev dag ntxias ib yam li peb los lawm. Txawm li ntawd los nws tsis tau ua ib qho txhaum li. Yog li ntawd, peb cia li ua siab tawv qhawv mus cuag Vajtswv tus uas zaum saum lub Zwmtxwv, rau qhov nws yog tus uas hlub peb. Nws yuav pab peb thiab foom koob hmoov rau txhua tus uas thov nws. Txhua tus Povthawj Hlob puavleej yog Vajtswv xaiv neeg los ua thiab tsa lawv ua Vajtswv txoj haujlwm pab sawvdaws. Thaum tus Povthawj Hlob ua txoj haujlwm ntawd, nws muab khoom fij rau Vajtswv thiab muab tsiaj tua theej sawvdaws lub txhoj. Vim nws qaug zog ib yam li sawvdaws, nws thiaj paub ua siab ntev pab cov neeg uas ruam thiab yuam kev ua txhaum. Tus Povthawj Hlob yog tus uas muab tsiaj tua theej sawvdaws lub txhoj, tiamsis vim nws yeej qaug zog ib yam li sawvdaws, nws yuav tsum theej nws lub txhoj thiab. Tsis muaj leejtwg yuav muaj cuabkav tsa nws ua tus Povthawj Hlob, tsuas yog Vajtswv pom zoo tsa tus twg tus ntawd thiaj tau ua, ib yam li Vajtswv pom zoo tsa Aloos ua tus Povthawj Hlob. Ib yam li ntawd, Yexus Khetos tsis tau khav hais tias nws yog ib tug Povthawj Hlob. Tiamsis Vajtswv yog tus uas hais rau nws hais tias, “Koj yog kuv tus Tub; hnub no kuv ua koj Txiv lawm.” Vajtswv hais dua ib los hais tias, “Koj yuav ua Povthawj Hlob mus ibtxhis ib yam li Mekhixedes.” Thaum Yexus tseem nyob hauv ntiajteb no, nws thov Vajtswv tus uas pab tau kom nws dim kev ploj kev tuag. Thaum nws thov nws quaj thiab los kua muag kawg li. Vajtswv mloog nws tej lus thov, rau qhov nws txo nws lub hwjchim thiab muab nws txojsia tso plhuav rau Vajtswv kav. Txawm yog Yexus yog Vajtswv tus Tub los nws tseem kawm mloog lus los ntawm txojkev uas tiv kev txomnyem. Thaum Vajtswv ua rau nws zoo kawg nkaus lawm, nws thiaj yog tus uas pub txojsia ntev dhawv mus ibtxhis rau txhua tus uas mloog nws lus. Tom qab ntawd Vajtswv tsa nws ua tus Povthawj Hlob ib yam li Mekhixedes. Peb tseem muaj ntau zaj uas yuav piav qhia nej tiamsis piav nyuaj heev, rau qhov nej tsis tshua totaub. Nimno twb tsimnyog nej ua taus xibhwb lawm, tiamsis tseem yuav tsum muaj neeg muab Vajtswv zaj lub hauvpaus los qhia nej dua. Twb tsimnyog nej noj taus zaub taus mov lawm, tiamsis nej tseem noj mis. Tus uas noj mis tus ntawd tseem yog menyuam yaus; nws tsis tau paub tseeb hais tias zaj twg yog zaj twg tsis yog. Tiamsis tej zaub mov tsuas yog cov laus thiaj noj taus xwb. Lawv twb xyaum los lawm lawv thiaj paub hais tias yam twg phem yam twg zoo. Yog li ntawd, peb tsis txhob pheej niaj hnub kawm Yexus Khetos txoj kevcai lub hauvpaus xwb, peb yuav tsum kawm ntxiv lawm tom ntej thiab. Peb tsis txhob rov pib qab ua dua, tsis hais tso tej uas tsis muaj nqis tseg ntseeg Vajtswv, lossis kevcai ntxuav kevcai tsa tes, zaj uas neeg tuag sawv hauv qhov tuag rov qab los, thiab zaj uas neeg raug txim mus ibtxhis. Tej ntawd peb twb kawm los lawm tsis tas peb yuav rov qab kawm dua. Peb yuav tsum kawm ntxiv mus lawm tom ntej. Yog Vajtswv pom zoo peb yeej yuav ua li ntawd. Cov neeg uas twb tso Yexus tseg lawm yuav ua li cas rov qab los hloov dua siab tshiab ib zaug ntxiv? Yav tas los Vajtswv ua rau cov neeg ntawd pom kev, nws foom koob hmoov rau lawv thiab nws pub Vaj Ntsujplig tus Dawbhuv rau lawv. Lawv puavleej paub hais tias Vajtswv txojlus yog txoj uas tseemceeb kawg li, thiab lawv twb pom lub hwjchim uas yuav muaj los tiam tom ntej no mentsis lawm. Txawm yog lawv paub li ntawd los tom qab ntawd lawv tseem tso Yexus tseg lawm thiab. Yog yuav coj lawv rov qab los hloov dua siab tshiab yeej tsis tau li, rau qhov qhov uas lawv tso Yexus tseg twb yog lawv rov muab Vajtswv tus Tub ntsia rau saum tus ntoo khaublig dua ib zaug thiab ua rau luag thuam luag rhuav Yexus ntsejmuag ntag. Vajtswv foom koob hmoov rau thaj av uas niaj hnub nqus dej nag. Tej qoobloo uas cog rau hauv thaj av ntawd yuav loj hlob zoo thiab yuav muaj nqis rau tus uas cog. Tiamsis yog thaj av ntawd muaj nroj thiab muaj pos tuaj xwb, thaj av ntawd tsis muaj nqis dabtsi li. Thaum kawg Vajtswv yuav foom tsis zoo rau thav av ntawd thiab hluavtaws yuav kub thaj av ntawd tas huv tibsi. Cov kwvtij uas peb hlub, txawm yog peb hais li no rau nej lawm los peb tseem cia siab tau rau nej. Peb paub hais tias nej muaj txoj koob hmoov uas zoo dua tej uas peb hais los lawm. Txoj ntawd yog txoj uas pab nej dim nej lub txim. Vajtswv yog tus ncaj ncees! Nws yeej yuav nco ntsoov tej haujlwm uas nej tau ua los lawm thiab qhov uas nej pab cov ntseeg ib yam li niaj hnub no nej tseem pab. Nej ua li ntawd twb yog vim nej muab siab npuab Vajtswv. Peb xav xav kom nej txhua tus muab siab npuab Vajtswv mus txog hnub kawg, nej thiaj yuav tau tej uas nej cia siab rau. Peb tsis xav pub nej ua neeg tubnkeeg, peb xav kom nej ua nej lub neej zoo li cov uas muab siab rau ntseeg thiab ua siab ntev lub, nej thiaj yuav tau tej uas Vajtswv coglus tseg lawm hais tias nws yuav muab pub rau nej. Thaum Vajtswv coglus tseg rau Anplahas, nws hais tseeb hais tias nws yuav ua raws li tej lus uas nws cog tseg. Thaum nws coglus tseg ntawd, nws tuav nws lub npe coglus xwb, rau qhov yeej tsis muaj ib tug uas muaj hwjchim loj dua nws. Vajtswv hais tias, “Kuv coglus tseg rau koj hais tias kuv yuav foom koob hmoov rau koj thiab kom koj cov xeebntxwv huamvam coob.” Anplahas ua siab ntev tos nws thiaj tau tej uas Vajtswv coglus tseg. Thaum ib tug neeg yuav coglus, nws yuav tsum tuav tus uas muaj hwjchim loj dua nws lub npe coglus. Tej lus uas nws coglus ntawd thiaj yuav ua rau sawvdaws tsis muaj lus sib cav sib ceg. Vajtswv xav kom cov uas yuav tau tej uas Vajtswv coglus tseg lawm paub tseeb hais tias Vajtswv yeej tsis hloov tej uas nws yuav ua, Vajtswv thiaj hais ib lo lus tseemceeb ntxiv rau lo lus uas nws tau cog tseg lawm. Yog li ntawd, ob yam no yeej hloov tsis tau; Vajtswv tsis hais dag. Peb cov uas khiav dim kev puastsuaj los nrog Vajtswv nyob lawm, peb thiaj yuav ua taus siab ntev tos yam uas peb cia siab hais tias yav tom ntej no peb yuav tau. Qhov uas peb cia siab no zoo ib yam li tus tswg uas muaj hlua khi peb lub siab kom nyob ruaj ruaj. Qhov uas peb cia siab ntawd yuav coj peb hla dhau daim ntaub uas thaiv hauv lub tuamtsev saum ntuj ceebtsheej mus rau sab hauv. Yexus twb xub ua peb ntej mus hauv qhov chaw ntawd lawm. Nws mus li ntawd twb yog nws pab peb. Nws ua tus Povthawj Hlob mus ibtxhis ib yam li Mekhixedes. Tus Mekhixedes no ua vajntxwv kav lub nroog Xalees, Vajtswv tus uas muaj hwjchim loj kawg nkaus tsa nws ua tus povthawj. Thaum Anplahas mus ntaus rog, Anplahas tua tau ntau tus vajntxwv. Thaum nws rov qab los, Mekhixedes tawm mus tos nws thiab foom koob hmoov rau nws. Anplahas muab tej qhov txhia chaw uas nws txeeb tau los ib feem kaum rau Mekhixedes. (Mekhixedes lub npe muaj ob lub ntsiab lus. Thawj lub txhais hais tias, “Tus Vajntxwv uas Ncaj Ncees”; thiab vim nws ua vajntxwv kav lub nroog Xalees, nws thiaj muaj dua ib lub npe uas txhais hais tias, “Tus Vajntxwv uas ua rau sawvdaws tau zoo nyob kaj siab lug.”) Yeej tsis muaj ntawv sau qhia tseg hais tias leejtwg yog Mekhixedes niam thiab txiv lossis qhia hais tias leejtwg yog nws yawgkoob. Tsis muaj ntawv sau qhia tseg hais txog hnub uas nws yug lossis hnub uas nws tuag. Nws ua tus povthawj mus ibtxhis ib yam li Vajtswv tus Tub. Yog li ntawd, nej sim ua tib zoo xav saib nws muaj hwjchim loj npaum li cas diam. Anplahas tus uas yog cov Yudais tus yawgkoob thiaj muab tej qhov txhia chaw uas nws txeeb tau los thaum nws mus ntaus rog ib feem kaum rau Mekhixedes. Vajtswv txoj kevcai qhia hais tias cov Levis cov xeebntxwv uas ua povthawj, lawv yuav tsum sau cov Yixalayees tej qhov txhia chaw ib feem kaum coj los ua lawv tug. Lawv ua li ntawd twb yog lawv sau lawv tib haivneeg tej qhov txhia chaw ntag. Txawm yog lawv yog Anplahas cov xeebntxwv los lawv tseem sau thiab. Mekhixedes yeej tsis yog cov Levis xeebntxwv, tiamsis nws sau Anplahas ib feem kaum thiab nws foom koob hmoov rau Anplahas tus uas tau tej uas Vajtswv coglus tseg. Qhov tseemceeb tus uas foom koob hmoov yeej muaj hwjchim loj dua tus uas tau txais koob hmoov. Txawm yog cov povthawj yog cov neeg uas txawj ploj txawj tuag los lawv tseem sau ib feem kaum, tiamsis Mekhixedes tsis zoo li lawv, nws sau ib feem kaum. Raws li muaj lus sau cia rau hauv Vajtswv Txojlus lawm hais tias nws yog tus uas muaj sia nyob. Tej zaum yuav muaj ib tug hais tias thaum Anplahas muab ib feem kaum rau Mekhixedes, kuj yog cov Levis muab lawm thiab. (Cov Levis tej xeebntxwv yeej yog cov uas sau sawvdaws ib feem kaum.) Rau qhov thaum Mekhixedes tawm mus tos Anplahas, thaum ntawd cov Levis tseem nyob hauv Anplahas tus uas yog cov Levis tus yawgkoob tej roj ntsha. Yog li ntawd, yog cov povthawj uas yog xeem Levis coj tau neeg los cuag Vajtswv lawm, ces tsis tas yuav muaj dua ib tug povthawj uas muaj yam ntxwv zoo li Mekhixedes los hloov cov povthawj uas muaj yam ntxwv zoo li Aloos. (Cov uas qhia Vajtswv txoj kevcai rau cov Yixalayees yog cov povthawj uas yog xeem Levis.) Rau qhov yog Vajtswv hloov cov povthawj lawm, nws yuav tsum hloov nws tej kevcai thiab. Peb tus Tswv uas peb hais txog no yog lwm xeem. Xeem ntawd luag yeej tsis pub ib tug ua povthawj li. Sawvdaws puavleej paub tseeb hais tias Yexus Khetos yug hauv xeem Yudas, thiab Mauxes tsis tau hais tias xeem ntawd yuav muaj tus ua povthawj. Zaj no ua rau sawvdaws paub hais tias twb muaj dua ib tug povthawj lawm. Tus ntawd muaj yam ntxwv zoo li Mekhixedes. Luag yeej tsis tsa nws ua povthawj raws li neeg tej kevcai, tiamsis vim nws yog tus uas muaj sia ntev dhawv mus ibtxhis, nws thiaj ua tau povthawj pab peb. Rau qhov Vajtswv hais txog nws hais tias, “Koj yuav ua povthawj mus ibtxhis ib yam li Mekhixedes.” Yog li ntawd, peb thiaj tso txoj qub kevcai tseg, rau qhov txoj kevcai ntawd pab tsis tau peb thiab tsis tseemceeb. Mauxes txoj kevcai ua tsis tau kom neeg ua tau zoo kawg nkaus. Nimno peb muaj ib qhov chaw cia siab uas tseemceeb dua qhov ntawd. Vim li ntawd peb thiaj los cuag tau Vajtswv. Dua li ntawd, thaum Vajtswv tsa Yexus ua povthawj Vajtswv yeej coglus tseg, tiamsis thaum lwm tus ua povthawj Vajtswv tsis tau coglus tseg. Thaum Vajtswv tsa Yexus ua tus povthawj, Vajtswv coglus tseg rau nws hais tias, “Tus Tswv coglus tseg hais tias, ‘Koj yuav ua povthawj mus ibtxhis li.’ ” Yog li ntawd, Yexus yog tus uas qhia tseg hais tias txoj kevcai tshiab zoo dua txoj qub. Xeem Levis pheej muaj neeg sawv ua povthawj ib tiam dhau ib tiam, rau qhov cov uas tuag ua tsis tau haujlwm lawm. Tiamsis Yexus muaj sia nyob mus ibtxhis, thiab nws tes haujlwm ua povthawj tsis poob mus rau lwm tus ua. Twb yog vim li ntawd, nws thiaj pab tau cov neeg uas nws coj los cuag Vajtswv, tsis hais nimno lossis yav tom ntej, rau qhov nws muaj sia nyob mus ibtxhis thiab thov Vajtswv pab cov neeg ntawd. Yog li ntawd, Yexus yog tus Povthawj Hlob uas pab tau txhua tus uas thov nws. Nws yog tus uas zoo kawg nkaus, nws tsis muaj ib qho txhaum li. Vajtswv coj nws tawm hauv cov neeg txhaum mus nyob saum ntuj ceebtsheej. Nws tsis zoo li tej Povthawj Hlob; tsis tas nws yuav niaj hnub muab tsiaj coj los tua theej nws lub txhoj ua ntej mam li theej sawvdaws lub, ib yam li tej Povthawj Hlob pheej ua. Nws muab nws lub cev theej sawvdaws lub txhoj tib zaug xwb, theej tau mus ibtxhis li lawm. Mauxes txoj kevcai ibtxwm tsa cov neeg uas zoo tsis heev ua Povthawj Hlob, tiamsis tej lus uas Vajtswv cog tseg tom qab Mauxes txoj kevcai tsa Leej Tub tus uas zoo kawg nkaus ua povthawj mus ibtxhis li. Zaj uas peb tabtom hais no lub ntsiab lus tseemceeb hais tias peb muaj ib tug Povthawj Hlob zoo li ntawd; nws zaum ntawm tus uas muaj hwjchim loj kawg nkaus lub zwmtxwv sab xis saum ntuj ceebtsheej. Nws ua tus povthawj hlob txoj haujlwm hauv Chav uas Dawbhuv Kawg Nkaus uas nyob hauv lub tsevntaub tseemceeb uas yog tus Tswv ua tsis yog neeg ua. Txhua tus Povthawj Hlob puavleej yog Vajtswv tsa lo ua cov uas muab khoom thiab tua tsiaj fij rua Vajtswv. Yog li ntawd, peb tus Povthawj Hlob yuav tsum muaj ib yam dabtsi fij rau Vajtswv thiab. Yog nimno nws tseem nyob hauv ntiajteb no nws yuav tsis ua povthawj, rau qhov twb muaj cov povthawj uas muab khoom fij rau Vajtswv raws li cov Yudais txoj kevcai lawm. Tej haujlwm uas cov povthawj ntawd ua tsuas yog tej uas muaj nyob saum ntuj tus yam ntxwv thiab tus duab xwb. Ib yam li thaud Mauxes tabtom yuav ua lub tsevntaub, Vajtswv hais rau Mauxes hais tias, “Koj yuav tsum ua txhua yam raws li tej qauv uas kuv qhia rau koj saum roob.” Tiamsis Vajtswv muab txoj haujlwm uas tseemceeb dua cov povthawj ntawd txoj rau Yexus ua. Ib yam li txoj kevcai tshiab uas Yexus ua kom neeg thiab Vajtswv sib cuag tau, txoj ntawd yeej zoo dua txoj qub, rau qhov txoj ntawd muaj lus cog tseg hais txog tej uas hajyam zoo dua. Yog txoj qub kevcai zoo lawm, ces tsis tas yuav muaj dua txoj tshiab. Tiamsis Vajtswv thuam nws haivneeg hais tias, “Tus Tswv hais tias, muaj ib hnub tom ntej no, kuv yuav pub ib txoj kevcai tshiab rau cov Yixalayees thiab rau xeem Yudas. Txoj ntawd yuav zoo tsis thooj li txoj uas kuv muab rau lawv cov yawgkoob; hnub uas kuv muab txoj kevcai ntawd, kuv tuav lawv tes coj lawv tawm hauv tebchaws Iziv los. Lawv tsis ua raws li txoj kevcai uas kuv muab rau lawv, yog li ntawd kuv thiaj tsis quavntsej lawv li lawm. Txoj no yog txoj kevcai uas kuv yuav muab rau cov Yixalayees. Tus Tswv hais tias, tom qab ntawd kuv yuav ua kom lawv nco ntsoov kuv txoj Kevcai, thiab kuv yuav sau txoj kevcai ntawd rau hauv lawv lub siab. Kuv yuav yog lawv tus Vajtswv, thiab lawv yuav yog kuv haivneeg. Tsis tas lawv yuav qhia rau tej neeg zejzog lossis qhia lawv tib haivneeg kom paub tus Tswv, rau qhov lawv txhua tus puavleej yuav paub kuv, tsis hais tus hlob tus yau. Kuv yuav ua siab ntev rau txhua tus uas ua txhaum thiab yuav tsis cim ntsoov lawv lub txim ib zaug li lawm.” Thaum Vajtswv hais txog ib txoj kevcai tshiab twb yog nws suav hais tias txoj qub kevcai tsis zoo siv lawm. Thiab tej uas qub lawm tsis hais yam twg los yeej yuav puastsuaj mus sai. Txoj qub kevcai yeej muaj lus qhia kom neeg paub pehawm Vajtswv, thiab muaj ib qho chaw uas neeg ua cia rau sawvdaws mus pehawm Vajtswv. Lawv ua ib lub tsevntaub, chav sab nraud sawvdaws hu hais tias Chav Dawbhuv. Nyob hauv muaj teeb, muaj rooj thiab muaj cov ncuav fij rau Vajtswv. Chav uas nyob tom qab ntawm daim ntaub thaiv uas yog daim ob uas mus rau sab hauv, sawvdaws hu hais tias Chav uas Dawbhuv Kawg Nkaus. Nyob hauv chav ntawd muaj ib lub rooj kub cia ua qhov chaw hlawv hmoov tshuaj tsw qab thiab muaj ib lub Phijxab vuam kub ntim txoj Kevcai rau hauv. Nyob hauv lub Phijxab ntawd muaj ib lub tais kub uas muaj hau kaw ntim Manas. Muaj Aloos tus pas nrig uas hlav nplooj thiab muaj ob daim txiag zeb uas sau txoj Kevcai. Lawv puab ob tug qhelunpees uas muaj Vajtswv lub tshwjchim uas ci ntsa iab rau saum lub Phijxab. Qhov ntawd yog Vajtswv qhov chaw nyob. Lawv puab ob tug qhelunpees ntawd nthuav tis vov qhov chaw uas Vajtswv zam txim rau neeg. Tiamsis nimno tsis yog lub sijhawm uas yuav qhia zaj no txhua txhua huv tibsi. Thaum npaj tej ntawd txhij rau hauv lawm, cov povthawj yuav tsum niaj hnub mus hauv lub tsevntaub chav ntawd ua lawv tes haujlwm. Tiamsis tsuas yog tus Povthawj Hlob tib leeg xwb thiaj mus tau rau hauv Chav Dawbhuv. Ib xyoos nws mus ib zaug; nws nqa cov ntshav tsiaj coj mus fij daws nws thiab daws sawvdaws tej kev txhaum uas sawvdaws yuam kev ua lawm. Vaj Ntsujplig tus Dawbhuv qhia tej ntawd rau sawvdaws paub tseeb hais tias thaum chav nraud tseem muaj nyob, Vajtswv tsis qhib kev rau sawvdaws mus hauv Chav uas Dawbhuv Kawg Nkaus. Chav ntawd piv txog daim ntaub ntag. Lub ntsiab lus txhais hais tias tej tsiaj uas sawvdaws muab tua fij rau Vajtswv pab tsis tau kom cov neeg uas tuaj pehawm Vajtswv ua tau neeg zoo. Tej ntawd tsuas yog zaub, yog mov, yog dej haus thiab yog tej kevcai ntxuav xwb. Tej ntawd yog tej kevcai uas neeg yuav tsum xyaum coj mus txog hnub uas Vajtswv hloov dua ib puas tsav yam tshiab. Tiamsis Yexus Khetos twb los ua tus Povthawj Hlob saib xyuas ib puas tsav yam zoo uas nimno twb muaj lawm. Lub tsevntaub uas Yexus mus ua haujlwm hauv, lub ntawd tseemceeb dua thiab zoo dua lub qub. Lub ntawd tsis yog neeg txhais tes ua thiab tsis yog lub uas Vajtswv tsim cia rau hauv ntiajteb no. Thaum Yexus mus hauv lub tsevntaub ntawd, nws mus hauv Chav uas Dawbhuv Kawg Nkaus tib zaug xwb; nws tsis nqa ntshav tshis thiab ntshav heev nyuj coj mus theej txhoj, tiamsis nws muab nws cov ntshav theej peb lub txhoj kom peb dim peb lub txim mus ibtxhis li. Lawv muab cov ntshav tshis thiab ntshav heev nyuj thiab tej tshauv uas hlawv tus menyuam xyuas nyuj ntawd nchos thiab nphoo rau cov neeg uas ua txhaum kevcai. Tej ntawd sau cov neeg ntawd tej kev txhaum mus. Yog li ntawd, Yexus Khetos cov ntshav hajyam muaj nqis heev dua tej ntawd thiab. Vajtswv tus uas muaj sia nyob mus ibtxhis, nws tus Ntsujplig kom Yexus muab Yexus lub cev uas zoo kawg nkaus pub rau Vajtswv theej neeg lub txhoj. Nws cov ntshav ntxuav peb lub siab kom peb dim tej kev txhaum uas peb tau ua los lawm, peb thiaj yuav ua tau Vajtswv tus uas muaj txojsia nyob tes haujlwm. Twb yog vim li ntawd Yexus Khetos thiaj ua ib txoj kevcai tshiab kom cov neeg uas Vajtswv hu los ua Vajtswv haivneeg lawm tau koob hmoov mus ibtxhis raws li tej lus uas Vajtswv cog tseg. Lawv yeej yuav tau, rau qhov muaj ib tug los tuag theej lawv tej kev txhaum uas lawv ua thaum lawv tseem coj raws li txoj qub kevcai. Yog thaum twg muaj neeg muab daim ntawv uas sau qhia faib qubtxeeg qubteg los nyeem, yuav tsum muaj ib tug paub tseeb hais tias tus uas sau daim ntawv ntawd tuag lawm tiag. Thaum tus uas sau daim ntawv ntawd tseem ua neej nyob daim ntawv ntawd tsis tseemceeb dabtsi, tsuas tseemceeb thaum tus ntawd tuag lawm xwb. Peb thiaj paub hais tias txawm yog thawj txoj kevcai los yuav tsum muaj nqaij ntuag ntshav nrog thiaj tseemceeb. Mauxes xub qhia txhua nqe raws li muaj hauv txoj Kevcai rau sawvdaws mloog, nws mam li muab ib re nplooj hixauv thiab cov plaub yaj uas lawv muab zas liab los raus cov ntshav heev nyuj thiab cov tshav tshis uas muab tov dej nchos rau phau ntawv uas sau Vajtswv txoj Kevcai thiab nchos rau cov pejxeem. Mauxes hais tias, “Cov ntshav no ua lub cim nias rau txoj kevcai uas Vajtswv kom nej coj.” Mauxes muab ntshav nchos rau lub tsevntaub thiab tej qhov txhia chaw uas sawvdaws siv thaum lawv pehawm Vajtswv ib yam nkaus li ntawd. Qhov tseemceeb, raws li Vajtswv txoj Kevcai yuav luag txhua yam yuav tsum muaj nqaij ntuag ntshav nrog thiaj raws li kevcai. Yog nqaij tsis ntuag ntshav tsis nrog Vajtswv yeej zam tsis tau neeg lub txim. Txawm yog tej ntawd puavleej piv txog tej uas nyob saum ntuj ceebtsheej los yuav tsum muaj nqaij ntuag ntshav nrog thiaj raws li kevcai. Tiamsis tej uas nyob saum ntuj ceebtsheej yuav tsum muaj yam uas tsimtxiaj dua tej ntawd thiaj haum Vajtswv siab. Rau qhov Yexus Khetos tsis mus hauv Chav Dawbhuv uas yog neeg txhais tes ua. Chav ntawd tsuas yog Chav Dawbhuv tus yam ntxwv xwb. Tiamsis nws mus saum ntuj ceebtsheej thiab nyob ntawm Vajtswv xubntiag thov Vajtswv pab peb. Cov Yudais tus Povthawj Hlob niaj xyoo nqa ntshav tsiaj mus hauv Chav uas Dawbhuv Kawg Nkaus. Tiamsis Yexus Khetos tsis niaj xyoo muab nws lub cev theej neeg lub txhoj. Yog Yexus ua li ntawd ces txij thaum tsim ntuj tsim teb los nws yuav tsum ib sij raug kev txomnyem ib zaug los txog niaj hnub nimno. Tiamsis tiam kawg no nws tsuas los tib zaug xwb, nws muab nws lub cev theej tau sawvdaws lub txhoj huv tibsi lawm. Txhua tus neeg puavleej yuav tuag ib zaug thiab tom qab ntawd Vajtswv yuav txiav txim rau lawv. Ib yam li ntawd Yexus Khetos muab nws lub cev pub rau Vajtswv tib zaug xwb ris tau ntau leej lub txim. Nws yuav rov qab los dua ib zaug. Zaum no tsis yog nws los theej neeg lub txhoj lawm, tiamsis nws los pab cov neeg uas tabtom tos nws kom lawv dim lawv lub txim. Cov Yudais txoj Kevcai tsuas yog tej tseemceeb uas yuav los tom ntej no tus duab xwb, yeej tsis yog tej ntawd tiag tiag. Txoj kevcai ntawd pab tsis tau cov neeg uas niaj xyoo nqa qhov txhia chaw mus theej txhoj kom ua tau neeg zoo li. Yog cov neeg uas mus pehawm Vajtswv ntawd twb dim lawv lub txim lawm tiag, ces lawv yeej yuav tsis niaj hnub xav txog lawv qhov txhaum thiab lawv yuav tsis muab tsiaj tua theej lawv lub txhoj lawm. Txawm yog li ntawd los qhov uas lawv theej lawv lub txhoj ntawd ua rau lawv niaj xyoo nco ntsoov lawv tej kev txhaum. Rau qhov tej ntshav heev nyuj thiab ntshav tshis yeej ntxuav tsis tau neeg tej kev txhaum mus ib zaug li. Twb yog vim li ntawd, thaum Yexus Khetos yuav los rau hauv ntiajteb no, nws hais rau Vajtswv hais tias, “Koj tsis yuav tej tsiaj uas neeg tua theej txhoj thiab tej khoom uas lawv muab fij rau koj, yog li ntawd koj thiaj npaj ib lub cev rau kuv lawm. Tej tsiaj uas neeg muab tua hlawv tagnrho rau saum lub thaj thiab tej uas lawv coj tuaj fij daws txim tsis haum koj siab. Tom qab ntawd kuv hais tias, ‘Vajtswv, kuv nyob ntawm no. Kuv yuav ua txhua yam uas koj xav kom kuv ua raws li muaj lus sau cia hais txog kuv hauv Phau Kevcai lawm.’ ” Thaum chivthawj nws hais tias, “Koj tsis yuav tej tsiaj uas neeg tua theej txhoj, tej khoom uas lawv fij rau koj, tej tsiaj uas neeg muab hlawv kheej rau saum lub thaj, tej uas lawv coj tuaj theej txhoj.” Txawm yog lawv ua tej ntawd raws li kevcai los tej ntawd puavleej tsis haum koj siab. Tom qab ntawd nws hais tias, “Vajtswv, kuv nyob ntawd no, kuv yuav ua txhua yam uas koj xav kom kuv ua.” Yog li ntawd, Vajtswv thiaj muab txoj qub kevcai uas neeg muab tsiaj tua theej txhoj ntawd tso tseg kom muaj ib txoj tshiab. Vim Yexus Khetos ua txhua yam raws li Vajtswv xav kom nws ua thiab vim nws muab nws lub cev pub rau Vajtswv theej peb lub txhoj, peb thiaj ua tau neeg zoo tsis muaj ib qho txhaum li. Qhov uas Yexus muab Yexus lub cev theej txhoj ntawd, nws ua tib zaug xwb theej tau mus ibtxhis li. Cov Yudais cov povthawj txhua tus ua haujlwm thiab muab tej tsiaj tua theej txhoj, lawv niaj hnub ua tib yam qub xwb; tej ntawd ntxuav tsis tau neeg tej kev txhaum mus ib zaug li. Tiamsis Yexus Khetos theej txhoj tib zaug xwb nws theej tau mus ibtxhis. Tom qab ntawd nws mus zaum ntawm Vajtswv sab xis. Nimno nws tseem nyob ntawd tos mus txog hnub uas Vajtswv muab nws cov yeebncuab los rau nws tsuj. Nws theej txhoj tib zaug xwb ua rau cov neeg uas nws xub ntxuav lawm ua tau neeg zoo kawg nkaus mus ibtxhis li. Vaj Ntsujplig tus Dawbhuv ua timkhawv rau peb hais tias yeej muaj li ntawd tiag. Nws xub hais tias, “Tus Tswv hais tias tom qab tiam ntawd kuv yuav pub txoj kevcai no rau lawv. Kuv yuav kom lawv nco ntsoov kuv txoj Kevcai, thiab kuv yuav sau txoj kevcai ntawd rau hauv lawv lub siab.” Thiab tom qab ntawd nws rov hais dua hais tias, “Kuv yuav tsis cim ntsoov lawv lub txim lossis lawv tej kev txhaum ib zaug li lawm.” Vajtswv twb zam tej kev txhaum ntawd lawm, yog li ntawd tsis tas peb yuav tua tsiaj theej txhoj li lawm. Cov kwvtij, twb yog vim Yexus tuag theej peb lub txhoj, peb thiaj muaj cuabkav mus rau hauv Chav uas Dawbhuv Kawg Nkaus. Nws qhia txojkev tshiab uas cawm neeg txojsia rau peb taug; nws qhib daim ntaub kom peb tau kev mus rau sab hauv, daim ntaub ntawd yog nws lub cev. Peb muaj ib tug Povthawj Hlob uas saib xyuas Vajtswv tsevneeg. Yog li ntawd, peb cia li muaj nplooj siab dawb paug los cuag Vajtswv thiab cia siab ntsoov rau nws rau qhov peb paub hais tias Yexus cov ntshav twb ntxuav peb lub siab thiab dej twb ntxuav peb lub cev huv tibsi lawm. Tej uas peb qhia hais tias peb cia siab rau, peb yuav tsum muab siab npuab tsis txhob tso tseg, rau qhov peb paub tseeb hais tias Vajtswv yeej yuav ua raws li Vajtswv tej lus cog tseg. Peb yuav tsum ua tib zoo xyuas saib peb yuav ua li cas ib tug thiaj txhawb tau ib tug lub zog kom ib tug txawj hlub ib tug thiab ib tug ua zoo rau ib tug. Sawvdaws yuav tsum tuaj ua ke mloog lus qhuab qhia tsis txhob tso tseg, ib yam li muaj qee leej tau tso tseg lawm. Nej puavleej paub hais tias twb yuav txog hnub uas Yexus rov qab los. Yog li ntawd peb ib tug hajyam yuav tsum txhawb ib tug lub zog heev dua qhov qub. Peb cov uas twb paub tseeb lawm, yog peb tseem txhob txwm ua txhaum dua yeej tsis muaj ib yam dabtsi yuav theej tau peb lub txhoj li, peb tsuas muaj kev txhawj kev ntshai tos rawv hnub uas Vajtswv rau txim thiab muab cov hluavtaws uas kub heev coj los hlawv cov neeg uas tawmtsam Vajtswv xwb. Yog muaj ob leeg lossis peb leeg ua timkhawv hais tias lawv pom ib tug ua txhaum Mauxes txoj kevcai, ces cia li muab tus uas ua txhaum ntawd tua povtseg tsis txhob khuvxim nws li. Yog li ntawd, tus uas saib tsis taus Vajtswv tus Tub hajyam muaj txim loj dua tus uas ua txhaum Mauxes txoj kevcai. Rau qhov nws saib tsis tau Yexus cov ntshav uas twb ntxuav nws tej kev txhaum lawm kom nws ua tau neeg zoo raws li Vajtswv txoj kevcai tshiab. Rau qhov peb paub tus uas hais tias, “Kuv yuav pauj kom tau”; thiab tus uas hais tias, “Tus Tswv yuav txiav txim rau nws haivneeg.” Sawvdaws puavleej paub hais tias tus uas poob rau hauv Vajtswv tus uas muaj sia nyob lub xibteg, tus ntawd yuav ntshai kawg nkaus li. Nej cia li ua tib zoo xav saib yav tas los nej lub neej zoo li cas. Thaum Vajtswv coj nej los nyob hauv qhov kaj lawm, tom qab ntawd txawm yog nej raug ntau yam kev txomnyem los nej tseem ua siab ntev tiv. Muaj qee zaus luag thuam thiab tsimtxom nej tabmeeg sawvdaws. Thaum nej pom nej tib pab raug luag tsimtxom puavleej mob nej siab. Nej muaj lub siab hlub cov neeg uas raug txim. Thaum muaj neeg txeeb nej tej qhov txhia chaw, nej zoo siab hlob cia lawv nqa mus, rau qhov nej paub hais tias nej twb muaj yam uas zoo dua tej ntawd lawm thiab yam ntawd yuav nyob mus ibtxhis. Nej tsis txhob poob siab, yog nej cia siab nej yeej yuav tau nqi zog ntau. Nej yuav tsum ua siab ntev, nej thiaj yuav ua tau raws li Vajtswv lub siab nyiam thiab tau tej uas Vajtswv coglus tseg hais tias nws yuav muab rau nej. Rau qhov Vajtswv txojlus hais tias, “Tshuav tsis ntev tus uas yuav los nws yuav los, thiab nws yuav tsis ncua sijhawm lawm. tiamsis kuv haivneeg uas ncaj ncees yuav muaj sia nyob vim lawv ntseeg; tiamsis yog lawv cov ntawd muaj ib tug thim rov qab lawm, kuv yuav tsis txaus siab rau tus ntawd.” Peb tsis yog cov uas thim rov qab mus raug kev puastsuaj, tiamsis peb yog cov uas ntseeg mus txog hnub uas peb dim peb lub txim. Kev ntseeg yog qhov uas peb paub tseeb hais tias peb yuav tau tej uas peb cia siab rau thiab yog qhov uas peb cia siab ntsoov rau tej uas peb qhovmuag tsis pom. Twb yog vim cov neeg txheej thaum ub ntseeg lawv thiaj ua tau haum Vajtswv siab. Twb yog vim peb ntseeg peb thiaj totaub hais tias thaum Vajtswv tsim ntuj tsim teb Vajtswv hais kom muaj, txawm cia li muaj tiag. Yog li ntawd tej uas peb qhovmuag pom yeej los ntawm tej uas peb qhovmuag tsis pom los. Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv. Vim Anpees ntseeg, Vajtswv thiaj suav hais tias Anpees yog tus ncaj ncees, rau qhov tej uas Anpees muab fij rau Vajtswv ntawd haum Vajtswv siab. Txawm yog Anpees twb tuag lawm los nimno nws kev ntseeg tseem niaj hnub qhia peb. Twb yog vim Enauj ntseeg, Enauj thiaj tsis tuag. Vajtswv coj nws mus thiaj tsis muaj leejtwg nrhiav tau nws, rau qhov Vajtswv twb coj nws mus lawm. Vajtswv txojlus hais tias, “Thaum Vajtswv tseem tsis tau coj Enauj mus, Enauj yeej ua haum Vajtswv siab.” Tus uas tsis ntseeg yeej ua tsis tau haum Vajtswv siab, rau qhov tus uas xav los cuag Vajtswv, tus ntawd yuav tsum ntseeg hais tias yeej muaj Vajtswv tiag, thiab Vajtswv yuav muab nqi zog rau tus uas los cuag Vajtswv. Twb yog vim Nau-es ntseeg, Nau-es thiaj mloog Vajtswv lus. Vajtswv qhia rau Nau-es txog tej xwmtxheej uas yav tom ntej yuav muaj los uas Nau-es qhovmuag tsis pom. Nau-es thiaj txua ib lub nkoj, Nau-es thiab nws tsevneeg thiaj dim kev ploj kev tuag. Vajtswv ua li ntawd twb yog nws rau txim rau tej neeg uas tsis ntseeg. Vim Nau-es ntseeg, Vajtswv thiaj suav hais tias Nau-es yog tus uas ncaj ncees. Twb yog vim Anplahas ntseeg, thaum Vajtswv kom Anplahas tawm mus nyob lub tebchaws uas Vajtswv coglus tseg hais tias Vajtswv yuav muab pub rau nws, nws thiaj mloog Vajtswv lus. Anplahas tawm hauv nws lub tebchaws mus, tiamsis nws tsis paub hais tias xyov nws yuav mus qhov twg. Twb yog vim Anplahas ntseeg, Anplahas thiaj tau mus nyob lub tebchaws uas Vajtswv coglus tseg hais tias Vajtswv yuav muab pub rau nws nyob. Anplahas nyob hauv tsevntaub ib yam li nws yog tus neeg uas tsis muaj tebchaws nyob. Tom qab ntawd Ixaj thiab Yakhauj nyob hauv tsevntaub ib yam li nkawd yawg Anplahas. Vajtswv coglus tseg rau nkawd ib yam li coglus rau Anplahas. Anplahas nyob li ntawd, rau qhov nws tabtom tos hnub uas Vajtswv coj nws mus hauv lub nroog uas nyob mus ibtxhis, lub nroog ntawd Vajtswv yog tus uas muab qauv thiab ua lub nroog ntawd. Twb yog vim Anplahas ntseeg, Anplahas thiaj muaj tub muaj ki. Txawm yog nws laus heev thiab Xalas ibtxwm xeeb tsis taus tub los nws cia siab hais tias Vajtswv yeej yuav ua raws li Vajtswv tej lus cog tseg. Txawm yog Anplahas laus laus lawm twb yuav tuag los nws tseem muaj xeebntxwv coob npaum li cov hnubqub uas nyob saum nruab ntug thiab npaum li cov suabzeb nram ntug hiavtxwv uas tsis muaj neeg suav txheeb. Cov neeg ntawd lawv muab siab rau ntseeg mus txog hnub uas lawv tuag. Lawv tseem tsis tau tau tej uas Vajtswv coglus tseg hais tias Vajtswv yuav muab pub rau lawv, tiamsis lawv cia siab hais tias yav tom ntej lawv yuav tau, lawv thiaj zoo siab tos. Lawv lees tabmeeg sawvdaws hais tias lawv tsis muaj teb tsis muaj chaw nyob hauv ntiajteb no, lawv taug kev tuaj ua qhua xwb. Peb paub hais tias cov neeg uas hais li ntawd lawv tabtom nrhiav teb nrhiav chaw nyob. Lawv yeej nco tsis txog lub tebchaws uas lawv tawm tuaj lawm. Yog lawv nco txog, nyaj lawv yuav tau rov qab mus nyob, tiamsis lawv xav mus nyob lub tebchaws uas zoo dua lub ntawd. Lub tebchaws uas lawv xav mus nyob yog saum ntuj ceebtsheej. Yog li ntawd, Vajtswv thiaj tsis txajmuag cia lawv hu nws hais tias nws yog lawv tus Vajtswv, rau qhov Vajtswv twb tu ib lub tebchaws cia rau lawv lawm. Twb yog vim Anplahas ntseeg, Anplahas thiaj coj nws tus tub Ixaj mus yuav muab tua fij rau Vajtswv. Thaum ntawd twb yog Vajtswv sim Anplahas siab. Txawm yog Vajtswv coglus tseg rau Anplahas lawm los Anplahas tseem zoo siab muab nws tib leeg tub coj mus tua fij rau Vajtswv thiab. Vajtswv twb hais rau Anplahas lawm hais tias, “Koj cov xeebntxwv yuav los ntawm Ixaj los.” Anplahas cia siab hais tias txawm yog Ixaj tuag lawm los Vajtswv yuav tsa Ixaj sawv hauv qhov tuag rov qab los. Qhov uas Vajtswv cheem tsis pub Anplahas tua Ixaj, qhov ntawd piv ib yam li Ixaj sawv hauv qhov tuag rov qab los ntag. Twb yog vim Ixaj ntseeg, Ixaj thiaj foom koob hmoov rau Yakhauj thiab Exaus. Ixaj qhia tej xwmtxheej uas yuav muaj los yav tom ntej rau nkawd. Twb yog vim Yakhauj ntseeg, thaum Yakhauj yuav tuag nws thiaj foom koob hmoov rau Yauxej ob tug tub. Thaum Yakhauj pehawm Vajtswv, Yakhauj muab nws tus pas nrig los txheem nws lub cev, rau qhov nws laus heev lawm. Twb yog vim Yauxej ntseeg, thaum Yauxej yuav tuag nws thiaj hais txog zaj uas cov Yixalayees yuav tawm hauv tebchaws Iziv mus. Thiab nws qhia qhov chaw uas nws kom lawv coj nws lub cev mus faus cia. Twb yog vim Mauxes niam thiab txiv ntseeg, thaum yug tau Mauxes, nkawd thiaj muab Mauxes zais tau peb lub hlis. Nkawd pom hais tias, nkawd tus metub ntawd zoo nraug heev, nkawd thiaj muaj lub siab tawv tsis ua raws li vajntxwv tej lus. Twb yog vim Mauxes ntseeg, thaum nws hlob lawm nws tsis pub sawvdaws hu hais tias nws yog Falaus tus ntxhais tus tub. Nws txaus siab nrog Vajtswv haivneeg raug kev txomnyem; nws hais tias nws ua li ntawd zoo dua li nws yuav mus ua tej kev phem kev qias uas nyob ib nyuag ntu xwb. Nws ntseeg hais tias Vajtswv yuav txib tus Mexiyas los pab Vajtswv haivneeg. Txawm yog tej uas nws ntseeg li ntawd ua rau luag thuam nws los nws pom hais tias qhov ntawd muaj nqis heev dua txhua tsav yam zoo uas nyob hauv tebchaws Iziv, rau qhov nws saib ntsoov tej uas yav tom ntej Vajtswv yuav muab rau nws. Twb yog vim Mauxes ntseeg, Mauxes thiaj tawm hauv tebchaws Iziv mus. Txawm yog vajntxwv chim rau nws los nws tsis ntshai. Nws tsis rov qab los, rau qhov nws ntseeg cuag li uas nws lub qhovmuag twb pom Vajtswv tus uas sawvdaws qhovmuag tsis pom ntag. Twb yog vim Mauxes ntseeg, Mauxes thiaj ua kevcai Hla Dhau thiab kom sawvdaws muab ntshav pleev qhovrooj. Lawv ua li ntawd tus timtswv uas yog txojkev tuag thiaj tsis tua cov Yixalayees cov tub hlob. Twb yog vim cov Yixalayees ntseeg, lawv cia li mus hauv hiavtxwv liab ib yam li lawv mus saum nruab nqhuab. Tiamsis thaum cov Iziv uas raws lawv qab mus hauv, dej cia li nphau los npog cov neeg Iziv tuag tas huv tibsi. Twb yog vim cov Yixalayees ntseeg, thaum lawv mus ncig lub nroog Yelikaus xya hnub lawm, lub nroog ntawd tej ntsa yeej txawm vau tas huv tibsi. Twb yog vim tus niamntiav uas hu ua Lahaj ntseeg nws thiaj dim. Nws tsis nrog cov neeg uas tsis mloog Vajtswv lus raug kev puastsuaj, rau qhov nws hu ob tug soj tebchaws los hauv nws tsev thiab pab nkawd. Kuv hais tso tseg txij no xwb, rau qhov kuv tsis muaj sijhawm txaus yuav hais txog Nkide-oos, Npalaj, Xaxoos, Yefethas, Daviv, Xamuyees thiab cov cev Vajtswv lus ntau leej. Twb yog vim lawv ntseeg, lawv thiaj ntaus tau tebchaws tagnrho. Lawv ua neeg ncaj ncees thiab lawv tau tej uas Vajtswv coglus tseg hais tias Vajtswv yuav muab rau lawv. Lawv ua rau tsov ntxhuav rua tsis taus qhovncauj. Lawv tua tau cov hluavtaws uas cig hlob hlob thiab khiav dim hniav ntaj hniav riam. Lawv qaug zog, tiamsis lawv ho rov qab muaj zog. Lawv muaj tswvyim ua tsov ua rog thiab lawv tawmtsam yeej lwm haivneeg cov tubrog. Twb yog vim muaj qee leej pojniam ntseeg, lawv thiaj tau lawv tej neeg uas tuag lawm sawv rov qab los. Muaj qee leej tsis kam tawm hauv tsev lojcuj, lawv zoo siab raug kev tsimtxom mus txog hnub tuag, rau qhov lawv cia siab hais tias Vajtswv yuav tsa lawv sawv hauv qhov tuag rov qab los thiab pub txojsia uas zoo dua lawv txoj rau lawv. Muaj qee leej raug luag thuam thiab raug luag nplawm, thiab muaj qee leej raug luag muab saw hlau khi thiab cia luag muab kaw rau hauv tsev lojcuj; muaj qee leej raug luag muab pobzeb ntaus, muaj qee leej raug luag muab kaw kaw ua ob ya, muaj qee leej raug luag muab ntaj tua, muaj qee leej hnav tawv yaj tawv tshis mus rau ub rau no, lawv tsis muaj noj tsis muaj haus, txomnyem thiab raug luag tsimtxom kawg li. Lawv yog neeg zoo dhau lawm, lub ntiajteb no tsis phim rau lawv nyob. Lawv tsis muaj vaj tsis muaj tsev, lawv mus nyob tom tej roob mojsab qhua thiab pem tej roob. Lawv nyob hauv tej qhov zeb qhov tsua thiab khawb qhov av nyob. Twb yog vim lawv ntseeg, lawv lub koob meej thiaj nrov ncha moo lug mus thoob plaws qhov txhia chaw. Tiamsis lawv tseem tsis tau tau tej uas Vajtswv coglus tseg hais tias Vajtswv yuav pub rau lawv, rau qhov Vajtswv twb tu yam uas zoo dua tej uas lawv muaj rau peb lawm. Vajtswv yeej xav kom lawv thiab peb tib txhij ua tau neeg zoo kawg nkaus. Peb twb muaj neeg coob coob nyob puagncig peb ua timkhawv rau peb lawm. Yog li ntawd, peb cia li muab txhua yam uas thaiv peb kev thiab tej kev txhaum uas khi peb tso povtseg, thiab peb cia li sib tw khiav ncaj nraim mus kom txog tus ciam tom kawg. Peb yuav tsum ntsia ntsoov Yexus tus uas yog peb lub hauvpaus kev ntseeg thiab ua kom peb kev ntseeg tiav. Thaum luag muab nws ntsia rau saum ntoo khaublig, nws ua siab ntev nyiaj tej kev txomnyem ntawd, nws tsis suav hais tias qhov uas nws tuag saum ntoo khaublig ua rau nws poob ntsejmuag, rau qhov nws paub hais tias thaum dhau txojkev txomnyem lawm, nws yuav zoo siab kawg li; nimno nws twb mus zaum ntawm Vajtswv lub zwmtxwv sab xis lawm. Nej yuav tsum nco ntsoov Yexus tej kev txomnyem thiab qhov uas nws ua siab ntev rau cov neeg txhaum uas ntxub nws. Yog nej ua li ntawd, nej yeej yuav tsis poob siab lossis tso Yexus tseg. Nej cov ua tawmtsam kev phem, nej tseem tsis tau tawmtsam mus txog hnub uas raug luag tua. Nej tsis nco qab tej lus uas Vajtswv ntuas nej lawm los? Nws ntuas nej rau qhov nej yog nws cov menyuam. Nws hais tias, “Metub, thaum tus Tswv qhuab ntuas koj, koj yuav tsum khaws nws tej lus cia, thiab thaum nws cem koj, koj tsis txhob poob siab. Rau qhov tus Tswv qhuab ntuas txhua tus uas nws hlub, thiab nws nplawm txhua tus uas nws coj los ua nws tub.” Nej yuav tsum ua siab ntev nyiaj tej uas nej raug, ib yam li nej ua siab ntev thaum nej txiv qhuab ntuas nej, rau qhov tej ntawd ua rau sawvdaws paub hais tias Vajtswv qhuab ntuas nej vim nej yog nws cov menyuam. Yeej tsis muaj ib tug menyuam uas leej txiv yuav tsis tau qhuab ntuas li. Yog Vajtswv tsis qhuab ntuas nej ib yam li nws qhuab ntuas nws cov menyuam tiag, ces nej yog menyuam tsaub xwb. Peb muaj niam muaj txiv qhuab ntuas peb, peb thiaj hwm nkawd. Yog li ntawd hajyam tsimnyog peb mloog peb Txiv tus uas nyob saum ntuj ceebtsheej lus, peb thiaj tau txojsia ntev dhawv mus ibtxhis. Peb niam peb txiv qhuab ntuas peb thaum peb tseem yau raws li lawv pom zoo xwb, tiamsis Vajtswv qhuab ntuas peb kom muaj nqis rau peb, peb thiaj li yuav ua tau neeg dawbhuv ib yam li Vajtswv yog tus uas dawbhuv. Thaum luag qhuab ntuas peb, thaum ntawd peb tsis kaj siab, peb nyuaj siab xwb; tiamsis tom qab ntawd cov neeg uas khaws luag tej lus qhuab ntuas rau nruab siab, cov neeg ntawd yuav tsimtxiaj thiab yuav tau zoo nyob kaj siab lug. Yog li ntawd, nej yuav tsum muab nej txhais tes uas tsaug lawm tsa ua haujlwm, thiab muab nej lub hauvcaug uas tsis muaj zog qoj kom mus taus kev. Nej yuav tsum taug kev ncaj nraim mus kom txog qhov kawg. Nej ua li ntawd, txhais kotaw uas cegtawv lawm thiaj yuav zoo. Yog nej tsis ua li ntawd, ntshai nyob tsam yuav kho tsis tau. Nej yuav tsum ua siab ntev nrog sawvdaws sib nraug zoo, thiab nej yuav tsum xyaum ua kom nej lub neej dawbhuv, rau qhov tus uas tsis muaj lub neej zoo li no yeej yuav tsis pom tus Tswv ib zaug li. Nej yuav tsum ceevfaj tsis txhob pub nej cov ib tub twg tso Vajtswv txoj koob hmoov tseg. Nej yuav tsum ceevfaj tsis txhob pub nej cov ib tug twg ua li tsob nroj iab uas ua rau ntau leej muaj kev ntxhov siab. Nej yuav tsum ceevfaj tsis txhob pub nej cov ib tug twg ua txhaum kev nkauj kev nraug lossis ua saib tsis taus Vajtswv ib yam li Exaus, nws muab nws lub npe tij pauv tib pluag mov noj xwb. Nej twb paub lawm hais tias tom qab ntawd Exaus xav tau nws txiv tej koob hmoov tiamsis tsis tau, rau qhov nws hloov tsis tau tej uas nws tau ua los lawm. Txawm yog nws quaj kua muag ntws si laim los nws tsis tau li lawm. Nej tsis tau mus pom lub roob Xinais ib yam li cov Yixalayees mus pom. Lawv pom tsaus huab nti, muaj hluavtaws cig liab ploog thiab cua daj cua dub ntsawj nrov nroo ntws, muaj suab xyu nrov qog qees thiab muaj ib lub suab hais lus nrov ntxhe ntws. Thaum sawvdaws hnov lub suab ntawd lawv thov kom tsis txhob hais ntxiv rau lawv lawm, rau qhov lawv tsis xav hnov tej lus uas hais tias, “Txawm yog ib tug tsiaj tuaj chwv lub taw roob no los yuav tsum muab pobzeb ntaus tus tsiaj ntawd kom tuag.” Sawvdaws pom li ntawd lawv ntshai kawg li, Mauxes thiaj hais tias, “Kuv ntshai ua ibce tshee hnyo.” Tiamsis nej tuaj txog lub roob Xi-oos thiab tuaj txog Vajtswv tus uas muaj sia nyob lub nroog. Lub nroog ntawd yog lub nroog Yeluxalees nyob saum ntuj ceebtsheej uas muaj cov timtswv ntau txhiab leej nyob, thiab tuaj nrog Vajtswv cov tub hlob nyob ua ke zoo siab; lawv cov ntawd yog cov uas muaj lub npe sau cia rau saum ntuj ceebtsheej. Nej tuaj cuag Vajtswv tus uas txiav txim rau sawvdaws thiab tuaj txog ntawm cov neeg ncaj ncees uas tuag lawm cov ntsujplig. Vajtswv twb ua rau lawv cov ntawd ua tau neeg zoo kawg nkaus lawm. Nej tuaj cuag Yexus tus uas ua kom muaj txoj kevcai tshiab, thiab tuaj cuag nws cov ntshav uas ntws los ywg sawvdaws; cov ntshav coglus ntawd zoo dua Anpees cov ntshav. Yog li ntawd, nej yuav tsum ceevfaj tsis txhob tawv tus uas qhia nej. Cov neeg uas tsis kam mloog tus uas qhia Vajtswv txojlus hauv ntiajteb no, cov neeg ntawd yeej tsis muaj ib tug dim li. Yog li ntawd, yog peb tsis mloog tus uas hais saum ntuj tuaj tej lus, peb hajyam yuav raug txim hnyav dua lawv thiab! Thaum ntawd Vajtswv lub suab ua rau lub ntiajteb ua zog koog, tiamsis nimno Vajtswv coglus tseg hais tias, “Tseem tshuav ib zaug kuv yuav ua kom lub ntiajteb ua zog koog, tsis yog lub ntiajteb xwb, tiamsis lub ntuj los yuav ua zog koog thiab.” Lo lus uas hais tias, “Tseem tshuav ib zaug”, lo lus ntawd qhia rau sawvdaws paub tseeb hais tias, tej uas Vajtswv tsim yuav ua zog koog thiab yuav raug muab tshem mus, tiamsis tej uas tsis ua zog yuav nyob khov kho mus li. Yog li ntawd, peb cia li ua Vajtswv tsaug, rau qhov peb tau lub tebchaws uas nyob khov kho ua peb tug. Peb yuav tsum ua nws tsaug thiab pehawm nws raws li nws lub siab nyiam. Thaum peb pehawm nws, peb yuav tsum hwm thiab paub ntshai nws; rau qhov peb tus Vajtswv yog cov nplaim taws uas kub tau txhua yam yaj tas huv tibsi. Cov ntseeg ib tug yuav tsum hlub ib tug ib yam li kwvtij sib hlub. Nej yuav tsum nco ntsoov hu tej qhua los so hauv nej tej tsev. Muaj qee leej hu tau cov timtswv ceebtsheej los lawv twb tsis paub hais tias yog cov timtswv. Nej yuav tsum nco ntsoov cov neeg uas raug kaw hauv tsev lojcuj ib yam li nej nrog lawv raug kaw, thiab nej yuav tsum nco ntsoov cov neeg uas raug kev tsimtxom ib yam li nej nrog lawv raug. Txojkev sib yuav yog ib qho uas tseemceeb, tsimnyog nej txhua tus yuav tsum saib taus qhov ntawd. Tus txiv thiab tus niam, ib tug yuav tsum ncaj ncees rau ib tug, rau qhov Vajtswv yuav rau txim rau cov neeg uas ua txhaum kev nkauj kev nraug thiab rau cov neeg uas deev luag pojniam luag txiv. Nej tsis txhob qaug rau nyiaj rau kub, nej muaj npaum li cas nej cia li zoo siab rau tej uas nej muaj; rau qhov Vajtswv hais tias, “Kuv yuav tsis tso koj tseg lossis kuv yuav tsis muab koj povtseg ib zaug li.” Yog li ntawd peb tsis txhob ntshai, peb cia li hais tias, “Tus Tswv yog tus uas pab kuv, kuv yuav tsis ntshai. Leejtwg yuav ua li cas tau rau kuv?” Nej yuav tsum nco ntsoov txog cov thawj uas yav tas los lawv ua cov saib nej, thiab qhia Vajtswv txojlus rau nej. Nej yuav tsum ua tib zoo xav saib thaud lawv ua lawv lub neej zoo li cas thiab lawv tuag li cas. Nej yuav tsum muab siab rau ntseeg ib yam li lawv. Yexus Khetos, nws yeej zoo nws li qub; nag hmo thiab hnub no nws zoo li cas, nws yeej zoo li ntawd mus ibtxhis li. Nej tsis txhob cia tej neeg uas qhia txawv txawv ntxias tau nej yuam kev. Qhov uas nej lub siab muaj zog twb yog vim Vajtswv foom koob hmoov rau nej, tsis yog vim nej caiv tsis noj yam ub yam no. Tej kevcai ntawd yeej pab tsis tau cov neeg uas xyaum coj raws li ntawd. Cov povthawj uas ua haujlwm hauv cov Yudais lub tsevntaub, lawv tsis muaj cai noj tej uas luag coj tuaj fij theej txhoj saum lub thaj. Cov Yudais tus Povthawj Hlob niaj zaus tua tsiaj nqa ntshav mus theej txhoj hauv Chav uas Dawbhuv Kawg Nkaus, tiamsis nws muab tus tsiaj ntawd nqa mus hlawv sab ntug yeej nraud. Twb yog vim li ntawd luag thiaj coj Yexus mus tua sab ntug nroog nraud. Yexus tuag li ntawd twb yog nws muab nws cov ntshav ntxuav sawvdaws lub txim huv tibsi mus. Yog li ntawd, peb cia li tawm mus cuag nws sab ntug yeej nraud thiab nrog nws tiv kev txajmuag. Rau qhov hauv ntiajteb no yeej tsis muaj ib lub nroog uas yuav nyob mus ibtxhis rau peb nyob, tiamsis peb tabtom tos lub nroog uas Vajtswv ua rau peb nyob yav tom ntej no. Yog li ntawd, peb cov uas ntseeg Yexus peb yuav tsum niaj hnub ua Vajtswv tsaug. Peb ua li ntawd ib yam li peb muab tej uas haum Vajtswv siab fij rau Vajtswv saum lub thaj. Kuv hais li no yog kuv hais tias peb lub qhovncauj yuav tsum niaj hnub ua Vajtswv tsaug. Nej yuav tsum nco ntsoov ua haujlwm zoo thiab ib tug pab ib tug, rau qhov tej ntawd haum Vajtswv siab. Nej yuav tsum mloog cov thawj uas saib xyuas nej tej lus thiab ua raws li lawv hais. Lawv niaj hnub saib xyuas nej lawv tsis nkees thiab tsis dhuav li, rau qhov lawv yuav tsum qhia tej haujlwm uas lawv ua rau Vajtswv. Yog nej mloog lawv lus, lawv yuav kaj siab lug ua lawv tej haujlwm. Yog nej tsis mloog lawv lus, lawv yuav nyuaj siab xwb, lawv yuav pab tsis tau nej hlo li. Thov nej niaj hnub thov Vajtswv pab peb, rau qhov peb paub tseeb hais tias peb tsis tau ua txhaum, peb niaj hnub xav ua tej haujlwm zoo xwb. Kuv thov nej kub siab lug thov Vajtswv kom nws yuav txib kuv rov tuaj xyuas nej sai sai. Vajtswv twb tsa peb tus Tswv Yexus sawv hauv qhov tuag rov qab los lawm. Twb yog vim Yexus tuag nws thiaj ua tau tus tswv yug yaj uas muaj hwjchim loj. Nws cov ntshav ua lub cim nias rau Vajtswv tej lus cog tseg uas yuav nyob mus ibtxhis. Thov Vajtswv tus uas pab nej tau zoo nyob kaj siab lug pub txhua yam zoo uas nej yuav tsum muaj rau nej, nej thiaj ua tau raws li Vajtswv lub siab nyiam. Thiab thov Vajtswv tshoov peb cov uas ntseeg Yexus Khetos lub siab kom peb ua tej uas haum Vajtswv siab. Thov kom Yexus Khetos tau ntsejmuag mus ibtxhis li! Amees. Cov kwvtij, kuv thov nej ua siab ntev mloog tej lus uas kuv sau tuaj ntuas nej no, rau qhov kuv yeej sau tsis ntau pestsawg tuaj rau nej. Kuv hais rau nej paub hais tias luag twb tso peb tus kwv Timautes tawm hauv tsev lojcuj lawm. Yog nws tuaj txog sai, kuv yuav coj nws nrog kuv tuaj xyuas nej. Thov nej hais peb tej lus noj qab nyob zoo rau nej cov thawjcoj thiab cov ntseeg Vajtswv txhua tus huv tibsi. Thov Vajtswv foom koob hmoov rau nej sawvdaws. Kuv yog Yakaunpaus uas yog Vajtswv thiab tus Tswv Yexus Khetos tus tubtxib: Kuv xa tsab ntawv no tuaj rau Vajtswv haivneeg uas tsiv mus nyob thoob plaws qhov txhia chaw hauv qab ntuj no. Cov kwvtij, thaum nej raug ntau yam kev nyuaj siab, nej cia li suav hais tias yog nej tau koob hmoov zoo kawg. Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv. Tiamsis nej yuav tsum ua siab ntev mus li tsis txhob tso tseg, nej thiaj yuav ua tau neeg zoo kawg nkaus, tsis muaj ib qho uas lwm tus yuav thuam tau. Yog nej leejtwg tsis muaj tswvyim, kom nws cia li thov ntawm Vajtswv, Vajtswv yuav pub tswvyim rau nws, rau qhov Vajtswv yog tus muaj siab dawb siab zoo pub ib puas tsav yam rau sawvdaws, nws tsis khuvxim li. Tiamsis thaum nej thov Vajtswv nej yuav tsum ntseeg tsis txhob ua xyem xyav. Tus uas ua xyem xyav, tus ntawd zoo ib yam li tej dej Hiavtxwv uas cua ntsawj ntas mus ntas los. Tus uas zoo li ntawd, nws tsis txhob xav hais tias nws yuav tau ib yam dabtsi ntawm Vajtswv li, rau qhov nws lub siab ywjfab ywjfwj, nws yuav ua yam twg los nws ua tsis tsheej. Tus kwvtij ntseeg uas pluag, nws yuav tsum zoo siab rau thaum Vajtswv tsa nws lub neej, thiab tus kwvtij ntseeg uas npluanuj, nws yuav tsum zoo siab rau thaum Vajtswv txo nws lub neej. Rau qhov cov neeg uas npluanuj yuav ploj mus ib yam li tej paj ntoos. Vim thaum hnub tuaj tshav ntuj kub tej paj ntoos yuav ntsws thiab zeeg tas tsis zoo nkauj lawm. Ib yam nkaus li ntawd, tus uas npluanuj yuav raug kev puastsuaj thaum nws tseem tabtom ua nws tes haujlwm ntxhov hnyo. Tus uas ua siab ntev nyiaj tej kev nyuaj siab, tus ntawd yuav tau nyob kaj siab lug. Rau qhov thaum nws tiv dhau tej kev sim siab ntawd lawm, nws yuav tau txojsia uas Vajtswv coglus tseg lawm hais tias Vajtswv yuav muab rau tus uas hlub Vajtswv. Yog tej kev sim siab ntawd ua rau nws yuam kev ua txhaum, nws tsis txhob hais tias, “Yog Vajtswv sim kuv.” Rau qhov tej kev phem ntxias tsis tau Vajtswv, thiab Vajtswv yeej tsis sim leejtwg siab li. Tiamsis tus uas ua txhaum, yeej yog nws lub siab uas nyiam ua phem coj nws mus ua txhaum. Thaum nws lub siab xeeb txojkev xav phem lawm, ces nws yuav mus ua txhaum, thiab thaum nws ua txhaum lawm, nws yuav raug kev ploj kev tuag. Cov kwvtij uas kuv hlub, nej tsis txhob pub leejtwg ntxias tau nej yuam kev. Ib puas tsav yam uas zoo thiab ib puas tsav yam koob hmoov uas zoo kawg nkaus yeej yog Vajtswv pub rau peb. Vajtswv yog tus uas tsim lub hnub, lub hli thiab tej hnubqub uas nyob saum nruab ntug. Lub hnub thiab lub hli yeej ua rau lub ntiajteb txawj kaj thiab txawj tsaus, tiamsis Vajtswv tsis zoo li ntawd, Vajtswv yeej zoo Vajtswv li qub. Vajtswv pom zoo qhia nws Txojlus tseeb rau peb, kom peb tau los ua nws cov menyuam, thiab ua ib puas tsav yam uas Vajtswv tsim cov thawj. Cov kwvtij uas kuv hlub, nej yuav tsum nco ntsoov hais tias txhua tus yuav tsum kub siab lug mloog, tiamsis tsis txhob maj hais thiab tsis txhob chim sai. Rau qhov peb tej kev chim yeej pab tsis tau kom peb ua tau neeg ncaj ncees raws li Vajtswv lub siab nyiam. Yog li ntawd, nej yuav tsum muab nej tej kev phem kev qias uas nej niaj hnub ua tso povtseg huv tibsi. Nej cia li ua raws li Vajtswv hais thiab khaws Vajtswv tej lus uas nws muab cog rau hauv nej lub siab lawm cia. Tej lus ntawd yuav pab tau kom nej dim nej lub txim. Nej yuav tsum xyaum ua raws li Vajtswv Txojlus, tsis yog ua cov mloog xwb. Yog nej mloog xwb, tsis ua raws li, ces kuj yog nej rov dag nej. Rau qhov tus uas mloog Vajtswv Txojlus tas lawm, tiamsis nws tsis ua raws li ntawd, tus ntawd zoo ib yam li tus uas nws saib nws lub ntsejmuag hauv daim tsom iav. Thaum nws saib tas nws tawm mus lawm, nws tsis nco qab hais tias nws lub ntsejmuag zoo li cas lawm. Tiamsis tus uas ua tib zoo saib tseeb tseeb txoj kevcai uas zoo kawg nkaus uas pab tau neeg dim los nyob ywjpheej. Tus uas khaws tej lus ntawd cia rau hauv nruab siab thiab xyaum ua raws li tej lus ntawd, thiab tsis yog mloog tas xwb tsis nco qab lawm, Vajtswv yuav foom koob hmoov rau nws. Tus uas xav hais tias nws yog tus uas coj Vajtswv txoj kevcai nruj lawm, tiamsis yog nws tsis ceev nws tus nplaig, ces qhov uas nws coj Vajtswv txoj kevcai nruj li ntawd yeej tsis muaj nqis rau nws li. Qhov uas nws ua li ntawd yog nws rov dag nws xwb. Txoj kevcai uas Vajtswv tus uas yog peb Leej Txiv suav hais tias yog txoj uas zoo thiab tseeb, txoj ntawd yog nej yuav tsum pab cov pojntsuam thiab cov menyuam ntsuag uas raug kev txomnyem quaj ntsuag. Thiab nej tsis txhob mus nrog neeg ntiajteb ua phem ua qias. Cov kwvtij, nej yog cov uas ntseeg peb tus Tswv Yexus Khetos tus uas muaj tshwjchim loj, nej tsis txhob xaiv leejtwg ntsejmuag li. Pivxam hais tias thaum nej tuaj ua ke mloog lus qhuab qhia muaj ib tug npluanuj hnav tsoos tsho zoo zoo, nws coj nplhaib nyiaj nplhaib kub, thiab muaj ib tug txomnyem hnav tsoos tsho khaub khaub hlab nkawd tuaj mloog lus qhuab qhia, yog nej saib taus tus uas hnav tsoos tsho zoo zoo thiab hais rau nws hais tias, “Koj los zaum ntawm lub rooj zoo zoo no.” Tiamsis nej hais rau tus txomnyem hais tias, “Koj sawv ntawm ko lossis koj los zaum hauv av ntawm peb kotaw no,” ces yog nej ua tsis ncaj thiab xaiv neeg ntsejmuag raws li nej lub siab phem xav xwb. Cov kwvtij uas kuv hlub, nej cia li mloog kuv hais! Vajtswv xaiv cov neeg pluag hauv ntiajteb no los ua cov uas muab siab rau ntseeg Vajtswv, thiab los ua Vajtswv haivneeg raws li Vajtswv tau coglus tseg lawm hais tias tus uas mloog Vajtswv lus, tus ntawd yuav tau ua Vajtswv haivneeg. Tiamsis nej saib tsis taus cov neeg pluag! Cov neeg uas tsimtxom nej thiab cab nej mus cuag tus txiav txim, twb yog cov neeg npluanuj ntag los sav. Lawv yog cov uas thuam lub npe zoo kawg nkaus uas Vajtswv tis rau nej. Yog nej ua raws li Vajtswv txoj kevcai uas sau cia rau hauv Vajtswv Txojlus uas hais tias, “Hlub koj tej kwvtij zejzog ib yam li koj hlub koj lub cev,” thiaj yog nej ua zoo tiag. Tiamsis yog nej xaiv neeg ntsejmuag ces yog nej ua txhaum. Txawm yog Vajtswv txoj kevcai los yeej qhia hais tias nej ua txhaum lawm thiab. Tus uas ua txhaum Vajtswv txoj kevcai ib nqe xwb, ces kuj yog nws ua txhaum txhua nqe huv tibsi. Rau qhov Vajtswv tus uas hais tias, “Tsis txhob deev luag pojniam luag txiv,” nws hais dua hais tias, “Tsis txhob tua neeg.” Ces txawm yog nej tsis tau deev luag pojniam luag txiv los yog nej tua neeg, ces yog nej ua txhaum kevcai lawm. Yog li ntawd, nej yuav tsum ceevfaj tej lus uas nej hais thiab tej haujlwm uas nej ua, rau qhov txoj kevcai uas pab tau nej dim los nyob ywjpheej ntawd yuav txiav txim rau nej. Hnub uas Vajtswv txiav txim, Vajtswv yuav txiav txim rau tus uas tsis hlub lwm tus, tiamsis Vajtswv yuav tsis txiav txim rau tus uas hlub lwm tus. Cov kwvtij, yog muaj ib tug hais tias nws yog tus uas ntseeg Vajtswv. Tiamsis nws tsis ua raws li nws ntseeg, ces yuav muaj qabhau dabtsi? Yog nws hais li ntawd xwb nws txojkev ntseeg puas yuav pab tau kom nws dim? Yog nej pom cov kwvtij ntseeg tsis hais pojniam lossis txivneej, lawv tsis muaj noj lossis tsis muaj hnav, nej hais rau lawv hais tias, “Thov Vajtswv foom koob hmoov rau nej kom muaj noj muaj hnav,” tiamsis nej tsis muab ib yam dabtsi rau lawv li, qhov uas nej hais li ntawd yuav muaj qabhau dabtsi? Txojkev ntseeg los kuj ib yam li ntawd. Yog nej hais tias nej ntseeg, tiamsis nej tsis ua ib yam haujlwm tshwm, ces nej txojkev ntseeg twb tuag lawm. Tej zaum yuav muaj ib tug hais rau kuv hais tias, “Koj yog tus uas ntseeg, tiamsis kuv yog tus uas ua haujlwm.” Kuv yuav teb tus ntawd hais tias, “Koj sim qhia koj txojkev ntseeg uas tsis ua haujlwm rau kuv saib zoo li cas? Kuv tes haujlwm mam li qhia kuv txojkev ntseeg rau koj.” Koj ntseeg hais tias yeej muaj tib tug Vajtswv xwb, koj ntseeg li ntawd zoo lawm, dab los kuj ntseeg ib yam nkaus li ntawd, thiab dab ntshai Vajtswv ua ibce tshee hnyo. Tus neeg ruam, kuv qhia rau koj paub hais tias txojkev ntseeg uas tsis ua haujlwm yeej tsis muaj qabhau dabtsi li. Peb yawgkoob Anplahas ua li cas nws thiaj ua tau haum Vajtswv siab? Qhov uas nws ua tau haum Vajtswv siab yog qhov uas nws muab Ixaj tus uas yog nws tib leeg tub tso rau saum lub thaj, thiab yuav muab tua fij rau Vajtswv ntag. Koj tsis pom los? Anplahas txojkev ntseeg thiab nws kev ua haujlwm mus ua ke. Nws tes haujlwm ua rau nws txojkev ntseeg tiav. Tej no yeej muaj raws li Vajtswv Txojlus uas sau tseg lawm hais tias vim Anplahas ntseeg Vajtswv, Vajtswv thiaj li coj Anplahas los nrog Vajtswv sib raug zoo. Thiab Vajtswv thiaj hais tias Anplahas yog nws tus phoojywg. Yog li ntawd, nej thiaj pom hais tias tus uas Vajtswv coj los nrog Vajtswv sib raug zoo, tus ntawd yeej ua haujlwm, nws tsis yog tus uas ntseeg xwb. Ib yam li tus niamntiav uas hu ua Lahaj, nws hu ob tug txivneej uas tuaj soj tebchaws mus hauv nws tsev, thiab qhia kom nkawd khiav lwm txojkev mus. Qhov uas nws pab nkawd li ntawd haum Vajtswv siab. Lub cev uas tsis muaj sia yog lub cev uas tuag lawm, ib yam li ntawd, txojkev ntseeg uas tsis ua haujlwm yog txojkev ntseeg uas tuag lawm thiab. Cov kwvtij, tsis tsimnyog nej coob leej yuav ntshaw ua xibhwb, rau qhov peb paub hais tias Vajtswv yuav ua tib zoo taug peb cov uas yog xibhwb nruj dua li taug lwm tus. Peb txhua tus pheej ib sij ua yuam kev ib zaug. Tus uas tsis tau hais lus yuam kev ib zaug li, tus ntawd yog tus uas zoo kawg nkaus, nws tswj tau nws lub siab thiab nws lub cev huv tibsi. Peb xam xauv rau nees, nees thiaj mloog peb lus, peb thiaj tswj tau kom nees mus qhov uas peb xav mus. Nej yuav tsum xav txog lub nkoj, txawm yog lub nkoj ntawd loj kawg li, thiab cua daj cua dub ntsawj hlob npaum li cas los lub nkoj yeej mus raws li tus duav hlais dej me me uas nyob tom tw nkoj uas tus tsav nkoj hwj. Ib yam nkaus li ntawd, txawm yog tus nplaig yog ib tug me me nyob ntawm lub cev xwb los tus nplaig muaj peevxwm hais tau ntau zaj. Nej sim xav saib ib lub nyuag ncaig taws me me xwb los muaj cuabkav kub toj rooj hauv pes txhua nrho. Tus nplaig zoo li hluavtaws. Tus nplaig ua tau rau txojkev txhaum nthuav loj mus thoob plaws yus lub cev. Tus nplaig zes tau hluavtaws hauv ntujtawg los hlawv peb txojsia. Neeg cob tau txhua yam tsiaj kom mloog lus, tsis hais nas, noog, nab, thiab tej ntses uas nyob hauv hiavtxwv huv tibsi. Tiamsis tsis muaj leejtwg cob tau tus nplaig. Tus nplaig phem thiab tswj tsis tau li, nws muaj taug lom neeg tuag. Peb siv peb tus nplaig ua Vajtswv tus uas yog peb Leej Txiv tsaug, thiab peb siv peb tus nplaig cem tej neeg zejzog. Tej neeg ntawd Vajtswv tsim muaj tus yam ntxwv zoo li Vajtswv. Lo lus ua Vajtswv tsaug thiab lo lus cem neeg puavleej yog tus nplaig hais. Cov kwvtij, tsis tsimnyog yuav muaj li ntawd. Dej qab zib thiab dej iab yeej tsis txhawv hauv tib lub qhovdej los ib zaug li. Cov kwvtij, tsob ntoo txiv ncuavpias yeej tsis txi txiv ntoo roj, thiab tsob txiv hmab yeej tsis txi txiv ncuavpias, thiab lub qhovdej daw yeej tsis txhawv dej tsuag. Nyob hauv nej cov yog leejtwg txawj ntse thiab totaub. Cia tus ntawd ua nws lub neej kom zoo thiab ua nws tej haujlwm zoo los ntawm kev txo hwjchim thiab muaj tswvyim. Tiamsis yog nej tseem muaj lub siab khib, cibnyeej thiab xav ua tus hlob, nej tsis txhob khav hais tias nej muaj tswvyim thiab ua tau haujlwm zoo. Yog nej khav li ntawd, ces yog nej tawmtsam Vajtswv Txojlus uas yog qhov tseeb xwb. Lub tswvyim zoo li ntawd yeej tsis yog los saum ntuj los, lub tswvyim ntawd yog ntiajteb li, thiab yog dab Ntxwgnyoog muab rau nej. Yog muaj kev sib ntxub thiab muaj neeg ntshaw ua tus hlob, yeej yuav muaj kev kub ntxhov thiab yuav muaj ntau yam kev phem. Tiamsis lub tswvyim uas los saum ntuj los yog lub uas zoo kawg nkaus. Lub tswvyim ntawd tsis ntau ncauj, paub cai, hais lus zoo, nrog luag ua phoojywg, hlub lwm tus, muab siab rau ua haujlwm zoo, tsis xaiv leejtwg ntsejmuag thiab tsis zais siab. Cov neeg uas ua rau sawvdaws nyob sib haumxeeb, lawv yuav pab tau sawvdaws ua tau neeg ncaj ncees. Yam dabtsi ua rau nej sib ntaus sib tua, thiab ua rau nej sib cav sib ceg? Puas yog tej kev ntshaw uas nyob hauv nej lub siab ua rau nej ua li ntawd? Nej xav yuav yam ub yam no, tiamsis tsis tau, nej txawm yuav muab luag tua povtseg. Nej ntshaw luag tug, tiamsis tsis tau, nej txawm sib cav sib ceg, sib ntaus sib tua. Nej tsis muaj tej uas nej xav yuav rau qhov nej tsis thov Vajtswv. Thaum nej thov nej tsis tau, rau qhov nej lub siab phem, tej uas nej thov ntawd nej yuav coj mus siv raws li nej lub siab nyiam xwb. Cov neeg siab phem, nej tsis paub hais tias cov uas ua li neeg ntiajteb ua, yog lawv ua yeebncuab rau Vajtswv. Yog li ntawd, tus uas ua li neeg ntiajteb ua, yog nws txhob txwm ua yeebncuab rau Vajtswv. Vajtswv txojlus hais tias, “Lub siab uas Vajtswv pub rau peb, lub siab ntawd ntshaw yam ub yam no heev.” Nej tsis txhob xav hais tias lo lus ntawd tsis tseeb. Tiamsis txoj koob hmoov uas Vajtswv pub rau peb hajyam zoo dua tej uas peb lub siab ntshaw. Rau qhov Vajtswv txojlus hais tias, “Vajtswv yuav tawmtsam tus uas khavtheeb, tiamsis Vajtswv yuav foom koob hmoov rau tus uas txo hwjchim.” Yog li ntawd, nej cia li mloog Vajtswv lus. Nej yuav tsum tawmtsam dab Ntxwgnyoog, dab thiaj yuav khiav ntawm nej mus. Nej cia li los nyob ze Vajtswv, Vajtswv thiaj yuav los nyob ze nej. Cov neeg txhaum, nej yuav tsum ntxuav nej tej tes kom huv. Cov neeg siab phem, nej yuav tsum tu nej lub siab kom zoo. Nej yuav tsum nyuaj siab thiab quaj ntsuag. Nej cov uas luag luag, nej cia li quaj. Nej cov uas zoo siab, nej cia li ntxhov siab. Nej cia li txo nej lub hwjchim tabmeeg Vajtswv, Vajtswv thiaj yuav tsa nej lub hwjchim. Cov kwvtij, nej ib tug tsis txhob hais lus saib tsis taus ib tug. Tus uas hais lus saib tsis taus nws kwv nws tij lossis txiav txim rau nws tej kwvtij, ces yog nws saib tsis taus Vajtswv txoj kevcai. Tus uas thuam Vajtswv txoj kevcai, tus ntawd nws tsis coj raws li Vajtswv txoj kevcai. Nws yog tus uas thuam xwb. Vajtswv tib leeg xwb thiaj yog tus uas muab kevcai rau peb coj, thiab txiav txim. Vajtswv tib leeg xwb thiaj yog tus uas pab tau kom neeg dim txim thiab ua tau kom neeg puastsuaj. Nej xav hais tias nej yog leejtwg, nej thiaj muaj cuabkav txiav txim rau lwm tus? Nej cov uas hais tias, “Hnub no lossis tagkis, peb yuav mus rau lwm lub nroog. Peb yuav mus nyob hauv lub nroog ntawd ib xyoos ua lag ua luam kom tau nyiaj ntau ntau.” Nej cia li mloog kuv qhia. Nej twb tsis paub hais tias xyov tagkis nej txojsia yuav zoo li cas. Nej txojsia zoo li tej huab uas nyob ib pliag xwb ces twb yaj tas lawm. Nej tsis txhob hais li ntawd, tsimnyog nej yuav tsum hais tias, “Yog haum Vajtswv siab, peb yuav ua yam ub yam no.” Tiamsis nej niaj hnub muab hlob thiab khavtheeb. Tej ntawd puavleej yog kev txhaum huv tibsi. Yog li ntawd tus uas paub ua qhov zoo, tiamsis nws tsis ua, tus ntawd txhaum. Nej cov uas yog neeg npluanuj, nimno nej mloog kuv hais. Nej cia li quaj, rau qhov nej twb yuav raug kev txomnyem. Tej uas nej muaj twb lwj tas, thiab nej tej ris tsho ntsaum kabrwg twb noj tas lawm. Nej tej nyiaj thiab tej kub twb xeb tas lawm. Tej xeb ntawd yuav ua timkhawv tawmtsam nej, thiab yuav noj nej cev nqaij ib yam li hluavtaws kub. Nej cov uas nyob tiam kawg no, nej niaj hnub khaws nyiaj rau nej kom nej npluanuj. Nej tsis them nqi zog rau cov neeg uas nej ntiav ua liaj ua teb. Nej cia li mloog lub suab uas lawv cem nej saib. Cov neeg uas nej ntiav hlais nplej, lub suab quaj twb nrov mus txog Vajtswv tus uas muaj hwjchim loj kawg nkaus lub pobntseg lawm. Nej ua neej nyob hauv ntiajteb no, nej muaj noj seem noj so thiab niaj hnub muaj kev lomzem kawg li. Nej txav kom nej rog ib yam li tus tsiaj uas luag txav cia tua noj. Nej rau txim thiab tua tus neeg uas tsis muaj txim los nws tsis tawmtsam nej li. Cov kwvtij, nej yuav tsum ua siab ntev tos hnub uas peb tus Tswv Yexus los. Nej sim saib tus neeg uas ua liaj ua teb saib, nws ua siab ntev li cas tos lub caij cog qoobloo. Nws ua siab ntev tos nag ntuj tshiab thiab nag ntuj tsaug. Nej yuav tsum ua lub siab ntev ib yam li ntawd, nej tsis txhob txhawj, rau qhov twb yuav txog hnub uas tus Tswv los. Cov kwvtij, nej ib tug tsis txhob ywg ib tug, tus Tswv thiaj tsis txiav txim rau nej. Tus uas yuav txiav txim twb los txog ntawm qhovrooj lawm. Cov kwvtij, nej yuav tsum ua siab ntev ib yam li cov cev Vajtswv lus uas tus Tswv tau txib los qhia sawvdaws. Txawm yog lawv raug kev tsimtxom heev npaum li cas los lawv tseem ua siab ntev nyiaj tej kev tsimtxom ntawd. Cov neeg uas ua siab ntev nyiaj tej kev tsimtxom, peb hu lawv ua cov uas tau koob hmoov. Nej twb hnov lawm hais tias Yauj yog tus uas ua siab ntev, thiab nej twb paub lawm hais tias tus Tswv npaj txhua yam rau Yauj thaum kawg. Rau qhov tus Tswv muaj lub siab hlub thiab hmov tshua. Cov kwvtij, qhov uas tseemceeb dua tej uas kuv hais los lawm yog li no: Thaum nej coglus ib yam dabtsi, nej tsis txhob twv ntuj twv teb lossis twv txog ib yam dabtsi hlo li. Yam uas yog nej cia li hais tias “Yog”, yam uas tsis yog, nej cia li hais tias “Tsis Yog”, Vajtswv thiaj yuav tsis txiav txim rau nej. Nej cov yog leejtwg raug kev txomnyem, tus ntawd yuav tsum thov Vajtswv. Yog leejtwg zoo siab, cia tus ntawd hu nkauj qhuas Vajtswv. Nej cov yog leejtwg muaj mob, tus ntawd yuav tsum txib neeg mus hu cov txwjlaug uas saib cov ntseeg tuaj thov Vajtswv pab nws, thiab tuav tus Tswv lub npe muab roj pleev nws. Yog lawv ntseeg, tej lus uas lawv thov yuav pab tau kom tus uas muaj mob ntawd zoo. Tus Tswv yuav ntxiv siav ntxiv zog kom nws rov muaj zog li qub. Thiab tus Tswv yuav zam tus ntawd tej kev txhaum huv tibsi. Yog li ntawd, nej ib tug yuav tsum lees kev txhaum rau ib tug, thiab ib tug thov Vajtswv pab rau ib tug, nej tej mob thiaj yuav zoo. Tej lus uas tus neeg ncaj ncees thov Vajtswv, tej lus ntawd muaj hwjchim heev. Eliyas yog ib tug neeg zoo li peb xwb, nws kub siab lug thov kom Vajtswv tsis txhob tso nag los rau hauv lub ntiajteb no, ces nag txawm tsis los tau peb xyoos thiab rau lub hlis. Tom qab ntawd nws rov qab thov Vajtswv kom Vajtswv tso nag los, ces Vajtswv txawm tso nag los rau hauv lub ntiajteb no, tej qoobloo thiaj tuaj taus. Cov kwvtij, yog nej cov muaj ib tug yuam kev tsis ua raws li Vajtswv Txojlus tseeb lawm, thiab muaj ib tug coj tau nws rov qab los, nej nco ntsoov hais tias tus uas coj tau tus uas ua txhaum rov qab los cuag Vajtswv, ces kuj yog nws pab tau tus uas yuam kev ua txhaum ntawd tus ntsujplig dim txojkev tuag, thiab Vajtswv yuav zam tus uas ua txhaum ntawd tej kev txhaum huv tibsi. Kuv yog Petus uas yog Yexus Khetos tus tubtxib, kuv sau tsab ntawv no xa tuaj rau nej txhua tus uas Vajtswv twb xaiv cia los ua Vajtswv haivneeg uas khiav mus nyob txhua nrho qhov txhia chaw hauv lub xeev Pootus, Kalatias, Kapadaukias, Axias thiab Npithinias. Vajtswv tus uas yog peb Leej Txiv, nws twb xaiv nej los ua nws haivneeg thiab nws txib nws tus Ntsujplig los pab nej kom nej ua tau nej lub neej rau Vajtswv tau ntsejmuag. Nws muab Yexus Khetos cov ntshav ntxuav nej lub siab kom nej lub siab dawbhuv, thiab nws xav kom nej mloog Yexus Khetos lus. Thov Vajtswv niaj hnub foom koob hmoov rau nej, thiab pab kom nej tau zoo nyob kaj siab lug mus li. Peb yuav tsum ua Vajtswv tus uas yog peb tus Tswv Yexus Khetos Leej Txiv tsaug! Rau qhov nws hlub peb kawg li, nws thiaj tsa Yexus Khetos sawv hauv qhov tuag rov qab los pab peb kom peb muaj txojsia tshiab. Nws ua li no peb txojkev cia siab thiaj ruaj khov thiab peb niaj hnub tos saib hnub twg peb yuav tau txoj koob hmoov uas Vajtswv npaj tseg rau Vajtswv haivneeg. Vajtswv twb khaws txoj koob hmoov ntawd cia rau saum ntuj ceebtsheej tos nej lawm. Txoj koob hmoov ntawd tsis txawj lwj, tsis txawj phem thiab tsis txawj qub li. Vajtswv twb npaj tej ntawd cia rau nej lawm. Vajtswv tus uas muaj hwjchim, nws yuav tsomkwm nej cov uas cia siab rau nws, thiab thaum txog hnub kawg Vajtswv yuav ua rau sawvdaws pom hais tias nej twb dim nej lub txim lawm. Txawm yog nej yeej yuav raug kev txomnyem nyuaj siab ib nyuag ntu los nej yuav tsum zoo siab, rau qhov uas nej yuav dim nej lub txim. Qhov uas Vajtswv cia nej raug tej kev txomnyem ntawd twb yog Vajtswv sim saib nej muab siab rau ntseeg npaum li cas. Txawm yog kub los neeg yuav tsum muab hluavtaws sim saib puas tseem kub. Yog li ntawd, Vajtswv yuav tsum muab nej txojkev ntseeg uas tseemceeb dua kub sim saib puas yuav thev taus. Yog nej thev taus, thaum txog hnub uas Yexus Khetos los Vajtswv yuav qhuas nej thiab nej yuav tau ntsejmuag. Txawm yog nej tsis pom nws los nej yeej hlub nws, thiab txawm yog nej qhovmuag tsis pom nws los nej yeej ntseeg nws. Yog li ntawd, nej thiaj zoo siab kawg nkaus tsis pom qab yuav piav li, rau qhov nej tabtom txais txojkev dim nej lub txim raws li uas nej cia siab rau Vajtswv. Cov cev Vajtswv lus twb nrhiav thiab ua tib zoo xyuas zaj uas hais txog txojkev dim txim ntawd tseeb tseeb lawm, lawv yog cov uas qhia ua ntej hais txog txoj koob hmoov uas Vajtswv yuav pub rau nej. Lawv niaj hnub ua tib zoo xyuas saib tshuav hov ntev thiaj txog lub sijhawm uas muaj li ntawd. Yexus Khetos tus Ntsujplig uas nyob hauv lawv lub siab qhia rau lawv hais tias thaum txog lub sijhawm ntawd Yexus Khetos yuav raug kev tsimtxom thiab tom qab ntawd Yexus yuav tau koob meej. Vajtswv twb qhia rau cov cev Vajtswv lus paub lawm hais tias tej haujlwm uas lawv ua ntawd tsis yog muaj nqis rau lawv xwb, tiamsis muaj nqis rau nej, niaj hnub nimno cov neeg uas qhia Txojmoo Zoo, lawv twb qhia tej zaj tseemceeb ntawd rau nej paub lawm, lawv yog cov uas muaj Vaj Ntsujplig tus Dawbhuv lub hwjchim. Yog li ntawd, nej yuav tsum tu nej lub siab zoo zoo tos, nej yuav tsum kub siab lug ua nej lub neej kom haum Vajtswv siab thiab cia siab ntsoov hais tias thaum Yexus Khetos rov qab los Vajtswv yuav pub Vajtswv txoj koob hmoov rau nej. Yav tas los thaum nej tseem tsis tau paub Vajtswv, nej niaj hnub nyiam ua txhaum, tiamsis nimno nej yuav tsum mloog Vajtswv lus, nej tsis txhob cia tej kev phem kev qias kav nej lub siab. Vajtswv tus uas tau hu nej los ua nws haivneeg, nws yog tus uas dawbhuv, yog li ntawd nej yuav tsum ua nej lub neej kom dawbhuv thiab. Vajtswv txojlus hais tias, “Nej yuav tsum ua neeg dawbhuv rau qhov kuv yog tus uas dawbhuv.” Thaum nej thov Vajtswv, nej hu nws hais tias Txiv, Vajtswv yog tus uas txiav txim rau txhua tus raws li tes haujlwm uas sawvdaws tau ua los lawm, nws tsis xaiv leejtwg ntsejmuag; yog li ntawd nej yuav tsum hwm Vajtswv mus tas nej simneej uas nyob hauv ntiajteb no. Rau qhov nej yeej paub lawm hais tias Vajtswv twb txhiv nej dim ntawm txoj qub kevcai uas nej cov yawgkoob qhia rau nej lawm. Yam uas Vajtswv muab txhiv nej yam ntawd tsis poob nqi li tej nyiaj tej kub, yam ntawd yog Yexus Khetos cov ntshav uas muaj nqis heev, Yexus Khetos zoo li tus menyuam yaj uas tsis muaj ib qho phem lossis dub doog li. Vajtswv twb xub xaiv Yexus Khetos cia thaum tsis tau tsim ntuj tsim teb los lawm, thiab lub sijhawm kawg no Vajtswv thiaj txib Yexus Khetos los pab nej. Twb yog vim li ntawd, nej thiaj ntseeg Vajtswv tus uas tsa Yexus Khetos sawv hauv qhov tuag rov qab los thiab pub hwjchim rau nws; yog li ntawd, nimno nej thiaj muab siab rau ntseeg thiab cia siab rau Vajtswv tib leeg xwb. Qhov uas nej mloog qhov tseeb ua rau nej muaj lub siab dawbhuv, thiab nej thiaj hlub txhua tus uas ntseeg Vajtswv. Yog li ntawd, nej ib tug yuav tsum hlub ib tug tiag tiag. Rau qhov nej twb yug dua tshiab lawm, qhov uas nej tau yug dua tshiab ntawd twb yog vim nej ntseeg Vajtswv txojlus uas muaj txojsia nyob mus ibtxhis. Tus uas yug nej ntawd nws tsis txawj tuag nws muaj txojsia nyob mus ibtxhis. Raws li Vajtswv txojlus hais tias, “Tej neeg txhua tus puavleej zoo ib yam li tej nroj tsuag, thiab lawv lub hwjchim zoo ib yam li tej paj nroj xwb. Thaum tej nroj tsuag tuag tej paj nroj yuav zeeg tas, tiamsis Vajtswv txojlus yuav nyob mus ibtxhis li.” Txojlus no yog Txojmoo Zoo uas twb muaj neeg muab qhia rau nej paub lawm. Yog li ntawd, nej yuav tsum tso txhua yam kev phem kev qias tseg, tsis txhob dag, tsis txhob ua neeg ntsejmuag ncaj siab nkhaus, tsis txhob khib thiab tsis txhob thuam lwm tus. Nej yuav tsum ua li tus menyuam mos liab uas nyuam qhuav yug, tus menyuam ntawd ib sij yuav noj ib zaug mis uas yog cov kua mis dawbhuv ntawm sab ntsujplig. Yog nej haus cov kua mis ntawd nej yuav hlob zoo thiab nej yuav dim nej lub txim. Raws li Vajtswv txojlus hais tias, “Nej twb tau saj tus Tswv txoj koob hmoov lawm.” Nej cia li los cuag peb tus Tswv uas muaj sia nyob, nws yog lub pobzeb uas neeg muab povtseg, rau qhov lawv hais tias lub ntawd tsis muaj nqis; tiamsis Vajtswv xaiv lub ntawd, rau qhov Vajtswv pom hais tias lub ntawd yog lub uas muaj nqis heev. Nej yog cov pobzeb uas Vajtswv xav muab los ua lub tuamtsev ntawm sab ntsujplig, yog li ntawd nej cia li los cuag Vajtswv. Nej yog cov povthawj uas dawbhuv uas ua haujlwm hauv lub tuamtsev, tej haujlwm uas nej ua haum Vajtswv siab, rau qhov nej yog cov uas ntseeg Yexus Khetos. Rau qhov Vajtswv txojlus hais tias, “Kuv xaiv ib lub pobzeb ua lub uas muaj nqis heev, kuv coj lub pobzeb ntawd mus teeb ua lub thawj rau hauv lub nroog Xi-oos; thiab yog leejtwg ntseeg nws yuav tsis poob ntsejmuag ib zaug li.” Lub pobzeb no muaj nqis rau nej txhua tus uas ntseeg, tiamsis tsis muaj nqis rau cov uas tsis ntseeg: “Lub pobzeb uas cov kws ua tsev muab povtseg lawm, Vajtswv twb muab lub pobzeb ntawd los ua lub thawj lawm.” Thiab muaj dua lwm nqe hais tias, “Neeg yuav dawm lub pobzeb ntawd thiab lub pobzeb ntawd yuav ua rau lawv ntog.” Qhov uas lawv dawm ntawd twb yog lawv tsis ntseeg Vajtswv txojlus, raws li Vajtswv twb pom zoo muab rau lawv lawm. Tiamsis nej yog haivneeg uas Vajtswv twb xaiv cia lawm, nej yog cov povthawj uas ua Vajtswv txoj haujlwm, nej yog haivneeg uas dawbhuv. Thiab nej yog Vajtswv haivneeg uas Vajtswv yuav txib mus qhia tej haujlwm tseemceeb uas Vajtswv tau ua los lawm rau sawvdaws paub. Vajtswv yog tus uas hu nej tawm hauv qhov tsaus ntuj los nyob hauv qhov pom kev. Yav tas los nej tsis yog Vajtswv haivneeg, tiamsis nimno nej yog Vajtswv haivneeg lawm; yav tas los nej tsis tau Vajtswv txojkev hlub, tiamsis nimno nej twb tau Vajtswv txojkev hlub lawm. Cov kwvtij, nej cia li mloog kuv tej lus, kuv yuav ntuas nej txhua tus. Nej tsis muaj tsev nyob hauv ntiajteb no, nej nyob ib yam li cov neeg uas taug kev tuaj ua qhua xwb. Nej tsis txhob cia tej kev phem kev qias uas niaj hnub tawmtsam nej kav nej lub siab. Nej yuav tsum ua nej lub neej kom zoo, txawm yog cov neeg tsis ntseeg Vajtswv uas nrog nej koom zej koom zos nyob ua ke, lawv thuam hais tias nej ua phem los lawv yeej yuav pom tes haujlwm zoo uas nej ua thiab thaum txog hnub uas Yexus rov qab los lawv yuav qhuas Vajtswv. Nej yog cov uas ntseeg peb tus Tswv Yexus, yog li ntawd nej yuav tsum mloog nomtswv lus, thiab ua raws li tej kevcai uas nomtswv qhia. Nej yuav tsum mloog huabtais lus, rau qhov nws yog tus uas muaj hwjchim loj dua ntais tej nomtswv huv tibsi. Thiab nej yuav tsum mloog cov tswvxeev lus, rau qhov huabtais tsa lawv ua cov uas rau txim rau cov neeg uas ua txhaum, thiab qhuas cov neeg uas ua zoo. Vajtswv xav kom nej ua tej haujlwm zoo, cov neeg uas tsis muaj tswvyim uas pheej lam tau lam hais tej zaj uas tsis muaj hauvpaus hauvntsis, lawv thiaj yuav tsis muaj lus hais lawm. Nej yuav tsum nyob li tus uas muaj kev ywjpheej; txawm yog nej muaj kev ywjpheej los Vajtswv yeej txwv tsis pub nej mus ua txhaum, nej yuav tsum ua li nej yog Vajtswv cov tubtxib. Nej yuav tsum saib taus sawvdaws thiab hlub cov ntseeg, nej yuav tsum paub ntshai Vajtswv thiab hwm huabtais. Nej cov uas yog tubqhe, nej yuav tsum mloog nej tus tswv lus thiab hwm nws, tsis yog nej yuav mloog tus tswv uas hlub nej thiab ua siab ntev rau nej lus xwb, tiamsis nej yuav tsum mloog tus uas ua limhiam rau nej thiab. Yog nej tsis tau ua txhaum, tiamsis luag tsimtxom nej thiab nej ua siab ntev nyiaj, rau qhov nej paub hais tias Vajtswv yeej xav kom nej ua li ntawd, Vajtswv yuav foom koob hmoov rau nej. Yog nej raug ntaus vim nej ua txhaum, txawm yog nej ua siab ntev nyiaj los yeej tsis muaj leejtwg qhuas nej. Tiamsis yog nej raug tsimtxom vim nej ua zoo, thiab nej ua siab ntev nyiaj, Vajtswv yuav foom koob hmoov rau nej. Vajtswv xav kom nej muaj lub siab zoo li ntawd, rau qhov Yexus Khetos twb raug kev tsimtxom this nej thiab ua yam ntxwv rau nej xyaum lawm, nws ua li ntawd nej thiaj yuav ua tau li nws ua. Yexus tsis tau ua ib qho txhaum, thiab tsis muaj leejtwg hnov nws hais ib lo lus dag li. Thaum luag thuam nws, nws tsis teb luag ib los li; thiab thaum luag tsimtxom nws, nws tsis foom luag, tiamsis nws muab tej ntawd tso rau Vajtswv tus uas txiav txim ncaj ncees. Yexus Khetos yog tus uas ris peb lub txim saum tus ntoo khaublig, kom txojkev txhaum tsis muaj hwjchim kav peb, peb thiaj ua tau neeg ncaj ncees. Yexus tej qhov txhab uas luag nplawm twb kho nej tej mob zoo tas lawm. Yav tas los nej zoo li pab yaj uas yuam kev lawm, tiamsis nimno tus Tswv uas yug nej thiab saib xyuas nej lub siab, nws twb coj nej rov qab los nrog nws ua ke lawm. Ib yam nkaus li ntawd, nej cov uas yog pojniam, nej yuav tsum mloog nej cov txiv lus, txawm yog nej cov txiv muaj qee leej tsis ntseeg Vajtswv txojlus los thaum lawv pom nej coj nej lub neej zoo, lawv yuav los ntseeg tsis tas nej yuav hais ib los li, rau qhov lawv yeej yuav pom qhov uas nej coj nej lub neej zoo thiab hwm lawv. Nej tsis txhob xav hais tias nej yuav tsum ntxias plaubhau zoo zoo lossis coj nyiaj coj kub lossis hnav tej tsoos zoo zoo nej thiaj yuav zoo nkauj. Tsis yog li ntawd, qhov uas nej zoo nkauj yog qhov uas nej muaj lub siab dawb siab zoo thiab paub cai, thiaj yog qhov uas Vajtswv pom hais tias muaj nqis. Cov pojniam txheej thaum ub uas mloog Vajtswv lus thiab muab siab rau ntseeg, lawv muaj lub siab zoo li ntawd thiab lawv mloog lawv tej txiv lus. Xalas muaj lub siab zoo li ntawd, nws mloog Anplahas lus thiab hu Anplahas hais tias tus tswv. Nimno nej yog Xalas cov ntxhais, yog nej ua zoo nej yeej yuav tsis ntshai ib yam dabtsi li. Nej cov uas ua txiv, nej yuav tsum niaj hnub nco ntsoov hais tias pojniam tsis muaj zog li nej. Yog li ntawd, nej yuav tsum saib taus nej tej pojniam, rau qhov Vajtswv yeej yuav pub txojsia rau lawv thiab rau nej ib yam nkaus. Yog nej ua li ntawd, thaum nej thov Vajtswv thiaj tsis muaj ib yam dabtsi los tabkaum nej. Thaum kawg no kuv thov ntuas nej hais tias nej yuav tsum ua ib lub siab thiab ib leeg hlub ib leeg ib yam li kwvtij sib hlub. Ib leeg pab ib leeg thiab ib leeg saib taus ib leeg. Nej tsis txhob ua phem pauj phem, yog leejtwg foom phem rau nej, nej tsis txhob foom phem pauj, tiamsis nej cia li thov Vajtswv foom koob hmoov rau nws. Rau qhov thaum Vajtswv hu nej los Vajtswv coglus tseg hais tias Vajtswv yuav foom koob hmoov rau nej. Raws li Vajtswv txojlus hais tias, “Tus uas xav tau kev kaj siab thiab muaj lub neej zoo, tus ntawd yuav tsum tsis txhob hais lus phem thiab tsis txhob hais tej lus dag. Nws yuav tsum tso nws tej kev phem tseg thiab ua txoj zoo; nws yuav tsum muab siab rau nrhiav kev tau zoo nyob kaj siab lug. Rau qhov Vajtswv yeej ntsia ntsoov cov neeg uas ncaj ncees, thiab nws niaj hnub mloog lawv tej lus thov; tiamsis nws tawmtsam cov neeg uas ua phem.” Yog nej ua nej lub neej zoo, leejtwg yuav ua tau phem rau nej? Yog nej ua nej lub neej zoo lawm, txawm yog muaj neeg tsimtxom nej los nej yeej yuav muaj kev kaj siab; nej tsis txhob ntshai lawv thiab tsis txhob txhawj. Nej yuav tsum hwm Yexus Khetos thiab cia nws ua tus Tswv kav nej lub siab. Nej yuav tsum npaj tos txhua lub sijhawm, yog thaum twg muaj neeg nug nej hais tias vim li cas nej muaj chaw cia siab, thaum ntawd nej thiaj paub teb lawv, tiamsis nej yuav tsum muaj lub siab mos siab muag teb lawv. Yog nej muaj lub siab zoo li ntawd lawm, thaum cov neeg uas thuam nej pom tej haujlwm zoo uas nej cov ntseeg ua, lawv yuav txajmuag rau tej lus uas lawv hais. Vim yog nej ua zoo, es nej thiaj raug kev tsimtxom, qhov ntawd haum Vajtswv siab dua qhov uas nej ua phem es nej raug kev tsimtxom. Rau qhov Yexus Khetos tuag tib zaug xwb txhiv tau sawvdaws lub txim lawm, nws yog tus ncaj ncees, nws tuag txhiv cov uas tsis ncaj ncees, nws ua li ntawd nws thiaj coj tau nej mus cuag Vajtswv. Luag muab nws lub cev tua tuag, tiamsis nws tus ntsujplig sawv rov qab los, thiab nws mus qhia Vajtswv txojlus rau cov ntsujplig uas luag muab kaw cia lawm. Cov ntsujplig ntawd yog cov neeg uas tsis mloog Vajtswv lus thaum lub sijhawm uas Nau-es txua nkoj, Vajtswv ua siab ntev rau lawv cov ntawd, tiamsis lawv tsis mloog Vajtswv lus. Cov neeg uas mus nyob hauv lub nkoj tsis muaj pestsawg leej, tsuas muaj yim leej xwb, yim leej ntawd thiaj dim dej nyab, cov dej ntawd piv txog txoj kevcai raus dej uas qhia hais tias nej twb dim nej lub txim lawm. Txoj kevcai ntawd tsis tau hais tias yuav ntxuav nej lub cev kom huv, tiamsis qhia hais tias nej yog cov uas tau coglus tseg rau Vajtswv lawm hais tias, nej yuav ua raws li Vajtswv lub siab nyiam. Txoj kevcai raus dej no pab tau nej dim, rau qhov Yexus Khetos twb sawv hauv qhov tuag los lawm, nws mus rau saum ntuj ceebtsheej thiab nws zaum ntawm Vajtswv sab xis, nws kav tagnrho cov timtswv saum ntuj thiab cov uas muaj hwjchim huv tibsi. Yexus Khetos twb raug kev tsimtxom lawm, yog li ntawd nej yuav tsum xav ib yam li Yexus, nej thiaj li yuav muaj zog. Rau qhov tus uas raug kev tsimtxom, tus ntawd twb tso nws txojkev txhaum tseg lawm. Yog li ntawd, txij no mus nej yuav tsum ua nej lub neej raws li Vajtswv lub siab nyiam, nej tsis txhob cia tej kev phem kev qias kav nej lub siab. Yav tas los nej niaj hnub ua li cov uas tsis ntseeg Vajtswv ua. Nej nyiam ua phem ua qias, quav cawv, noj tsau haus qaug, qw ua nqaj ua nqug thiab pe dab pe mlom. Nimno cov uas tsis ntseeg Vajtswv lawv xav tsis thoob, xyov ua li cas nej tsis nrog lawv mus ua phem ua qias, yog li ntawd lawv thiaj thuam nej. Tiamsis lawv cov ntawd nyias yuav tsum qhia nyias lub neej rau Vajtswv, Vajtswv twb npaj txhij lawm, nws yuav txiav txim rau cov neeg ciaj thiab cov neeg tuag. Twb yog vim li ntawd thiaj muaj neeg qhia Txojmoo Zoo rau cov neeg uas twb tuag lawm thiab, kom Vajtswv txiav txim rau lawv ib yam li txiav txim rau sawvdaws; qhia Txojmoo Zoo rau lawv kom thaum lawv mus nrog Vajtswv nyob, lawv thiaj ua tau lawv lub neej zoo ib yam li Vajtswv lub. Nimno twb yuav txog lub sijhawm uas ib puas tsav yam hauv ntiajteb no puastsuaj. Yog li ntawd nej yuav tsum tswj nej lub siab, ceevfaj thiab nquag thov Vajtswv. Qhov uas tseemceeb tshaj plaws huv tibsi, yog nej ib leej yuav tsum hlub ib leeg tiag tiag, rau qhov txojkev hlub npog tau txhua yam kev txhaum huv tibsi. Nej ib leeg yuav tsum zoo siab hlo hu ib leeg los tsev tsis txhob yws li. Vajtswv twb pub koob hmoov rau nej txhua tus lawm, yog li ntawd nej yuav tsum siv tej koob hmoov uas nej tau ntawd kom muaj nqis rau lwm tus. Tus uas qhia Vajtswv txojlus, nws yuav tsum qhia; tus uas pab ua haujlwm, nws yuav tsum siv nws lub dag lub zog uas Vajtswv pub rau nws, yog nej cov uas ntseeg Yexus Khetos ua li ntawd, nej yuav ua rau Vajtswv tau ntsejmuag, Vajtswv lub koob meej thiab Vajtswv lub hwjchim yeej yuav nyob mus ibtxhis li. Amees. Cov kwvtij uas kuv hlub, nej tsis txhob poob siab thaum nej raug kev tsimtxom, tej uas nej raug ntawd twb yog sim nej siab, nej tsis txhob xav hais tias tej kev tsimtxom ntawd tsis zoo li tej uas sawvdaws ibtxwm raug. Tiamsis nej yuav tsum zoo siab, rau qhov uas nej raug kev tsimtxom ib yam li Yexus Khetos twb raug los lawm. Thaum sawvdaws pom nws lub tshwjchim uas ci ntsa iab, nej yuav zoo siab kawg nkaus li. Yog leejtwg thuam nej vim nej yog cov uas ntseeg Yexus Khetos, nej cia li zoo siab; qhov uas lawv thuam nej ntawd qhia rau sawvdaws paub hais tias Vajtswv twb txib Vaj Ntsujplig los nrog nej nyob lawm, Vajtswv tus Ntsujplig ntawd yog tus uas muaj tshwjchim ci ntsa iab. Nej tsis txhob tua neeg, tsis txhob ua tubsab, tsis txhob ua phem thiab tsis txhob thab plaub, yog leejtwg ua li no, tus ntawd yeej yuav raug kev txomnyem. Tiamsis yog nej cov uas ntseeg Yexus Khetos, nej raug kev tsimtxom, nej cia li ua Vajtswv tsaug, nej tsis txhob txajmuag qhia rau cov neeg uas tsimtxom nej ntawd hais tias nej yog cov uas ntseeg Yexus Khetos. Nimno twb txog lub sijhawm uas Vajtswv yuav txiav txim lawm, Vajtswv yuav xub taug cov uas ntseeg Vajtswv zaj ua ntej. Yog Vajtswv xub taug peb zaj ua ntej, thaum Vajtswv taug cov uas tsis ntseeg Vajtswv txojmoo zoo zaj lawv yuav ua li cas? Raws li Vajtswv txojlus hais tias, “Yog cov neeg ncaj ncees twb dim txim nyuaj; yog li ntawd, cov neeg txhaum uas tsis muaj Vajtswv lawv yuav ua li cas dim tau?” Yog li ntawd, nej cov uas Vajtswv pom zoo cia nej raug kev txomnyem, nej yuav tsum kub siab lug ua tej haujlwm zoo, thiab tso siab plhuav rau tus uas Tsim nej, nws yeej yuav ua raws li nws tau coglus tseg lawm. Kuv thov ntuas cov txwjlaug uas saib xyuas nej cov uas ntseeg Vajtswv, kuv yog ib tug txwjlaug thiab. Kuv yeej pom Yexus Khetos raug kev txomnyem, thiab thaum Yexus rov qab los kuv yuav tau ntsejmuag ib yam li nws. Nej yuav tsum yug pab yaj uas Vajtswv muab tso rau nej saib. Vajtswv twb pom zoo muab txoj haujlwm ntawd rau nej ua lawm. Yog li ntawd, nej yuav tsum zoo siab hlo ua tsis txhob lam tuav txoj haujlwm ntawd. Nej yuav tsum muab siab rau ua tiag tiag, tsis txhob pheej xav txog tej nqi zog uas nej yuav tau xwb. Nej tsis txhob yuam pab yaj uas Vajtswv muab tso rau nej saib, tiamsis nej yuav tsum ua yam ntxwv zoo rau lawv xyaum. Yog nej ua li ntawd, thaum tus Tswv yug yaj uas yog tus thawj rov qab los, nws yuav muab lub kausmom kub uas ci ntsa iab mus ibtxhis ua nqi zog rau nej. Ib yam nkaus li ntawd, nej cov uas yog tub hluas, nej yuav tsum mloog cov yawg laus tej lus. Nej txhua tus yuav tsum txo nej lub hwjchim thiab ib tug pab ib tug; rau qhov Vajtswv txojlus hais tias, “Vajtswv tawmtsam tus uas khavtheeb, tiamsis Vajtswv pub koob hmoov rau tus uas txo hwjchim.” Yog li ntawd, nej yuav tsum txo nej lub hwjchim thiab cia Vajtswv tus uas muaj hwjchim kav nej. Yog nej ua li ntawd thaum txog hnub uas Vajtswv teem cia lawm, nej yuav tau ntsejmuag. Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv. Nej yuav tsum ceevfaj zov zoo tsis txhob nkees, rau qhov dab Ntxwgnyoog tus uas yog nej tus yeebncuab, nws mus mus los los ib yam li tus tsov ntxhuav uas quaj nrhiav tom tsiaj noj. Nej yuav tsum muab siab rau ntseeg thiab tawmtsam dab Ntxwgnyoog, rau qhov nej twb paub lawm hais tias cov kwvtij ntseeg uas nyob thoob plaws hauv qab ntuj no, lawv tabtom raug kev tsimtxom ib yam li nej raug thiab. Tiamsis thaum nej raug kev tsimtxom ib nyuag ntu dhau lawm, tom qab ntawd Vajtswv tus uas muaj koob hmoov nplua mias yuav pab kom nej ua tau neeg zoo kawg nkaus, thiab kom nej muab siab rau ntseeg Vajtswv heev ntxiv. Nws yuav txhawb nej lub zog kom nej nyob ruaj nrees. Nws yog tus uas muaj lub siab hlub nej kawg nkaus li. Nws yuav pub nws lub tshwjchim ci ntsa iab uas nyob mus ibtxhis rau nej cov uas twb nrog Yexus Khetos koom ib txojsia lawm. Thov kom Vajtswv lub hwjchim muaj nyob mus ibtxhis li. Amees. Tus uas pab kuv xa tsab ntawv luv luv no yog Xilas, nws yog ib tug kwvtij ntseeg uas muaj lub siab ncaj ncees. Kuv sau tsab ntawv no tuaj txhawb nej zog thiab qhia rau nej paub hais tias Vajtswv txoj koob hmoov zoo kawg nkaus li. Nej yuav tsum muab siab rau ua raws li kuv twb qhia rau nej lawm. Cov ntseeg uas nyob hauv lub nroog Npanpiloos uas Vajtswv tau xaiv lawm ib yam li nws xaiv nej, lawv hais noj qab nyob zoo rau nej, thiab kuv tus tub Malakaus los hais noj qab nyob zoo rau nej ib yam nkaus. Nej ib leeg yuav tsum hlub ib leeg thiaj tsimnyog qhov uas nej yog cov ntseeg. Thov kom txojkev thajyeeb nrog nej txhua tus uas ntseeg Yexus Khetos. Kuv yog Ximoos Petus tus uas yog ib tug tubtxib thiab yog Yexus Khetos tus timthawj. Kuv sau tsab ntawv no xa mus rau txhua tus uas ntseeg Yexus Khetos tus uas yog peb tus Vajtswv thiab peb tus Cawmseej uas yog tus ncaj ncees. Nws pub nej thiab peb muaj cuabkav los ntseeg ib yam nkaus. Thov Vajtswv foom koob hmoov thiab pub txojkev kaj siab rau nej txhua tus uas paub Vajtswv thiab paub peb tus Tswv Yexus Khetos lawm. Vajtswv tus uas muaj hwjchim, nws pub txhua yam zoo rau peb, kom peb ua tau peb lub neej haum nws siab. Nws ua li ntawd rau qhov peb paub tus uas hu peb los yuav nws lub hwjchim, thiab pab tau peb ua tau neeg ncaj ncees ib yam li nws. Vajtswv coglus tseg hais tias nws yuav muab nws txoj koob hmoov uas zoo kawg nkaus rau peb, nws ua li ntawd kom nej txhua tus uas tau txoj koob hmoov ntawd dim tej kev phem kev qias uas yuav coj neeg ntiajteb mus raug kev puastsuaj, thiab kom nej lub neej zoo ib yam li Vajtswv lub. Twb yog vim li ntawd nej cov uas ntseeg Vajtswv, nej yuav tsum muab siab rau ua tej haujlwm zoo; nej ua haujlwm zoo lawm, nej yuav tsum muaj tswvyim; nej muaj tswvyim lawm, nej yuav tsum tswj nej lub siab; nej tswj nej lub siab lawm, nej yuav tsum ua siab ntev; nej ua siab ntev lawm, nej yuav tsum ua nej lub neej kom haum Vajtswv siab; nej ua haum Vajtswv siab lawm, nej yuav tsum sib hlub li kwvtij sib hlub; nej sib hlub li kwvtij sib hlub lawm, nej yuav tsum sib hlub li cov ntseeg sib hlub. Yog nej niaj hnub ua nej lub neej zoo li ntawd, tej ntawd yuav ua rau nej paub peb tus Tswv Yexus Khetos heev ntxiv, thiab nej lub neej yuav tawg paj txi txiv. Tiamsis tus uas tsis ua nws lub neej zoo li ntawd, tus ntawd qhovmuag fam lawm, nws pom tsis tseeb thiab nws tsis nco qab hais tias Yexus Khetos twb ntxuav nws tej kev txhaum huv tibsi lawm. Yog li ntawd cov kwvtij, nej yuav tsum muab siab rau ua haujlwm heev dua yav tas los thiaj tsimnyog qhov uas Vajtswv hu thiab xaiv nej cia lawm. Yog nej ua li ntawd, nej yuav tsis yuam kev ib zaug li. Yog nej ua li ntawd, Vajtswv thiaj yuav pub nej muaj feem mus nyob hauv peb tus Tswv Yexus Khetos tus uas yog peb tus Cawmseej lub tebchaws uas nyob mus ibtxhis li. Yog li ntawd, kuv yuav niaj hnub ntuas nej kom nej nco ntsoov tej no, txawm yog nej twb paub tej ntawd thiab nej muab siab rau ua raws li Vajtswv txojlus lawm los kuv tseem yuav ntuas nej thiab. Thaum kuv tseem ua neej nyob no kuv xav hais tias tsimnyog kuv yuav tsum ntuas kom nej nco ntsoov tej ntawd. Rau qhov kuv yeej paub hais tias, tshuav tsis ntev kuv yuav tso kuv lub cev uas txawj tuag no tseg raws li peb tus Tswv Yexus Khetos twb qhia tseeb rau kuv lawm. Yog li ntawd, kuv xav kom nej nco tej ntawd cia, thaum dua kuv lawm nej thiaj yuav nco ntsoov mus li. Peb twb qhia zaj uas hais txog peb tus Tswv Yexus Khetos lub hwjchim thiab zaj uas nws yuav rov qab los rau nej lawm; thaum peb qhia tej ntawd rau nej, peb tsis tau qhia raws li tej dabneeg uas cov neeg txawj ntse hais, tiamsis peb lub qhovmuag yeej pom kiag nws lub hwjchim lawm ntag. Thaum Vajtswv tus uas yog Leej Txiv pub koob meej thiab pub lub tshwjchim uas ci ntsa iab rau nws, thaum ntawd peb yeej nrog nws nyob ua ke, thiab muaj lub suab uas hais hauv lub Tshwjchim uas Ci Ntsa Iab tuaj rau nws hais tias, “Tus no yog kuv tus Tub uas kuv hlub, kuv txaus siab heev rau nws.” Thaum peb nrog nws nyob saum lub roob dawbhuv ntawd, peb puavleej hnov lub suab uas hais saum ntuj tuaj rau nws. Yog li ntawd, peb hajyam cia siab rau tej lus uas cov cev Vajtswv lus tau qhia tseg lawm. Yog nej khaws tej lus ntawd cia rau hauv nej lub siab yuav zoo heev, rau qhov tej lus ntawd zoo ib yam li lub teeb uas ci hauv qhov tsaus ntuj mus txog thaum kaj ntug, thiab lub hnubqub uas ci ci thaum kaj ntug yuav ci rau hauv nej lub siab. Dhau li ntawd nej yuav tsum nco ntsoov hais tias yeej tsis muaj ib tug uas yuav muaj tswvyim txhais tau tej lus qhia tshwm uas cov cev Vajtswv lus tau sau tseg lawm. Rau qhov tej lus qhia tshwm ntawd tsis yog neeg qhia, tiamsis yog Vaj Ntsujplig tus Dawbhuv tshoov neeg lub siab kom lawv qhia Vajtswv txojlus xwb. Yav tas los cov Yixalayees muaj cov cev Vajtswv lus uas qhia tseeb thiab cov uas qhia tsis tseeb, niaj hnub no nej yeej yuav muaj cov xibhwb uas qhia tsis tseeb ib yam li txheej thaum thiab. Lawv yuav qhia tej zaj uas yuav coj nej mus raug kev puastsuaj rau nej, thiab lawv yuav tsis lees hais tias lawv paub Yexus Khetos tus uas tuag txhiv lawv lawm, thiab tib ntsais muag xwb lawv yuav raug kev puastsuaj. Txawm yog li ntawd los tseem muaj ntau leej yuav ua phem ua qias raws li cov neeg ntawd ua; twb yog vim lawv ua li ntawd, thiaj li muaj neeg thuam txojkev uas yog txoj tseeb. Cov xibhwb cuav ntawd lawv muaj lub siab hlob, lawv qhia tej zaj uas tsis muaj hauvpaus hauvntsis ntxias nej kom lawv tau zoo xwb. Tus uas yuav txiav txim, nws twb txiav txim rau lawv ntxov los lawm, thiab tus uas yuav ua kom lawv puastsuaj nws twb npaj txhij lawm. Rau qhov Vajtswv yeej tsis zam txim rau cov timtswv ceebtsheej uas ua txhaum ib tug li. Nws muab lawv pov rau hauv ntujtawg, lawv raug kaw rau hauv qhov chaw uas tsaus ntuj nti, tos mus txog Hnub uas Vajtswv Txiav Txim rau lawv. Thaum Vajtswv tso dej los nyab ntiajteb, cov neeg uas ua txhaum lawv tuag tas huv tibsi tsis muaj ib tug dim li, tsuas yog Nau-es tus uas qhia txojkev ncaj ncees thiab xya leej uas nrog Nau-es nyob ua ke thiaj dim xwb. Vajtswv rau txim rau cov neeg uas nyob hauv lub nroog Xaudoos thiab lub nroog Kaumaulas, nws tso hluavtaws los hlawv ob lub nroog ntawd kub hnyiab tas huv tibsi. Nws ua li ntawd twb yog nws qhia rau cov neeg uas ua txhaum kom lawv paub hais tias lawv yuav puastsuaj ib yam nkaus li cov neeg uas nyob hauv ob lub nroog ntawd. Vajtswv pab Lauj tus uas yog neeg ncaj ncees dim; Lauj nyuaj siab rau cov neeg uas ua kev phem kev qias kawg li. Rau qhov Lauj tus uas yog neeg ncaj ncees, nws nrog cov neeg ntawd nyob ua ke, nws niaj hnub pom tej kev phem uas lawv ua thiab hnov tej lus phem uas lawv hais, ua rau nws ntxhov siab kawg li. Yog li ntawd, peb thiaj paub hais tias Vajtswv pab tau cov neeg uas Vajtswv kav lawm kom lawv dim lawv tej kev nyuaj siab; thiab Vajtswv muab tau cov neeg uas ua txhaum kaw cia mus txog hnub uas Vajtswv txiav txim rau lawv. Thaum Vajtswv txiav txim rau sawvdaws, Vajtswv yuav txiav txim rau cov neeg uas ua phem ua qias thiab tsis hwm Vajtswv hnyav dua li nws txiav txim rau sawvdaws. Cov xibhwb cuav ntawd, lawv muaj lub siab tawv thiab lawv nyiam ua raws li lawv lub siab xwb; lawv saib tsis taus cov uas muaj hwjchim saum nruab ntug. Txawm yog cov timtswv ceebtsheej muaj zog thiab muaj hwjchim loj dua cov xibhwb cuav ntawd los lawv twb tsis thuam thiab tsis nkaug rau Vajtswv hais tias cov xibhwb cuav ntawd ua txhaum. Tiamsis cov xibhwb cuav ntawd ua raws li lawv lub siab nyiam xwb; lawv ruam ib yam li tej tsiaj qus uas yug los rau luag ntes thiab luag tua, lawv thuam tej zaj uas lawv tsis totaub. Lawv yuav raug puastsuaj ib yam li tej tsiaj nruab nrag, thiab lawv yuav raug kev txomnyem, rau qhov lawv twb ua rau lwm tus raug txomnyem lawm. Txawm yog nruab hnub nrig los lawv ua kev phem kev qias, noj haus qw ua nqaj ua nqug, lawv hais tias tej uas lawv ua ntawd ua rau lawv zoo siab kawg li. Thaum lawv nrog nej noj mov ua ke, lawv ua phem ua qias rhuav nej ntsejmuag; lawv ua li ntawd, rau qhov lawv yeej nyiam tej ua lawv ua ntawd. Lawv tsuas nrhiav nrhw ua kev nkauj kev nraug xwb; lawv niaj hnub ua txhaum tsis paub dhuav li. Lawv ntxias cov neeg uas tsis tshua muaj tswvyim mus ua txhaum. Lawv xyaum ua neeg siab hlob. Vajtswv twb foom tsis zoo rau lawv lawm. Lawv tso txojkev ua ncaj tseg, lawv thiaj yuam kev mus ua txhaum ib yam li Npe-aus tus tub Npala-as, Npala-as ua txhaum rau qhov nws ntshaw nyiaj, thiab nws paub hais tias nws ua txhaum lawm, rau qhov nws tus neesluav hais tau lus li neeg thiab txwv tsis pub nws mus ua dog ua dig li tej neeg vwm ua. Cov xibhwb cuav ntawd zoo ib yam li lub qhovdej uas dej qhuav tas, thiab zoo ib yam li tauv huab uas cua daj cua dub ntsawj ya tas lawm; Vajtswv twb npaj qhov chaw uas tsaus ntuj nti cia rau lawv lawm. Lawv nyiam hais tej lus uas tsis muaj hauvpaus hauvntsis, lawv ua kev phem kev qias ntxias cov neeg uas nyuam qhuav tso txojkev txhaum tseg, kom cov neeg ntawd rov qab yuam kev ua txhaum. Lawv coglus rau cov neeg ntawd hais tias lawv yuav pab kom cov neeg ntawd muaj kev ywjpheej; txawm yog lawv hais li ntawd los lawv tseem ua txojkev puastsuaj qhev, rau qhov tus uas nti tsis dim yam uas khi nws, tus ntawd yeej ua yam ntawd qhev. Cov neeg uas los ntseeg Yexus Khetos tus uas yog peb tus Cawmseej, lawv twb dim tej kev phem hauv ntiajteb no lawm. Yog lawv cia tej kev phem ntawd rov qab khi lawv, thaum kawg lawv lub siab hajyam yuav phem dua thaum chivthawj. Yog lawv tsis paub txojkev ncaj ncees, zoo dua li lawv paub lawm, es lawv ho tsis ua raws li tej lus uas Vajtswv qhia rau lawv. Tej uas lawv raug ntawd ua rau sawvdaws paub tseeb hais tias yeej muaj raws li zaj pajlug uas hais tias, “Dev rov qab mus noj dev cov ntuav” thiab hais tias, “Tus npua uas luag muab dej ntxuav huv huv lawm, nws rov qab mus da pas av dua.” Cov kwvtij uas kuv hlub, tsab ntawv no yog tsab ob uas kuv sau xa tuaj rau nej. Tsab ntawv no thiab tsab uas kuv xub sau xa tuaj rau nej lawm, kuv sau tuaj ntuas nej txhua tus uas muaj lub siab ncaj ncees, kom nej nco ntsoov tej uas nej twb paub lawm. Kuv xav kom nej nco ntsoov tej lus uas thaum ub cov cev Vajtswv lus uas yog neeg ncaj ncees tau qhia tseg lawm, thiab kuv xav kom nej nco ntsoov tus Tswv tus uas yog peb tus Cawmseej tej lus uas cov timthawj twb qhia rau nej lawm. Thawj lo uas kuv yuav qhia nej hais li no: Thaum txog lub sijhawm kawg yuav muaj neeg thuam nej, cov neeg ntawd lawv yuav ua phem ua qias raws li lawv lub siab nyiam, thiab lawv yuav nug nej hais tias, “Yexus Khetos coglus hais tias nws yuav rov qab los no puas yog? Ua li nws nyob qhov twg? Peb cov yawgkoob twb tuag tas lawm, txij thaum tsim lub ntiajteb los txog niaj hnub nimno, ib puas tsav yam tseem nyob li qub tsis muaj ib yam txawv txav li.” Lawv tsis quavntsej qhov uas thaum ub Vajtswv hais kom muaj lub ntuj thiab lub ntiajteb, ces txawm cia li muaj raws li Vajtswv hais; lub ntiajteb tawm hauv dej los thiab Vajtswv kom dej nyob puagncig lub ntiajteb, twb yog vim li ntawd dej thiaj nyab lub ntiajteb no, cov neeg uas nyob txheej thaum ub thiaj li tuag tas huv tibsi lawm. Tiamsis Vajtswv ceev lub ntiajteb thiab lub ntuj uas niaj hnub nimno muaj nyob rau hluavtaws hlawv raws li Vajtswv tau hais tseg lawm. Vajtswv yuav ceev cia mus txog hnub uas cov neeg ua phem raug txiav txim thiab raug puastsuaj. Cov kwvtij uas kuv hlub, nej yuav tsum nco ntsoov lo lus uas hais li no: tus Tswv suav hais tias, ib hnub ntev ib yam li ib txhiab xyoo thiab ib txhiab xyoo ntev ib yam li ib hnub. Muaj qee leej xav hais tias, Vajtswv tseem yuav tos ntev Vajtswv mam li ua raws li Vajtswv tau coglus tseg lawm, tiamsis yeej tsis yog li lawv xav. Vajtswv ua siab ntev rau nej, rau qhov nws tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg. Hnub uas tus Tswv los, hnub ntawd nws yuav los ib yam li tubsab tuaj. Hnub ntawd thaum muaj suab nrov qeeg nkaws lub ntuj yuav ploj ntais mus, hluavtaws yuav kub ib puas tsav yam uas nyob saum nruab ntug yaj tas. Lub ntiajteb thiab ib puas tsav yam uas nyob hauv ntiajteb puavleej yuav kub hnyiab tas huv tibsi thiab. Tej ntawd yuav puastsuaj mus huv tibsi, yog li ntawd nej yuav tsum ua nej lub neej zoo li cas? Tsimnyog nej ua nej lub neej kom dawbhuv thiab hwm Vajtswv, nej yuav tsum niaj hnub tos hnub uas Vajtswv yuav los, thiab muab siab rau ua kom hnub ntawd los txog sai. Hnub ntawd yog hnub uas lub ntuj yuav kub hnyiab tas, thiab hluavtaws yuav kub ib puas tsav yam uas nyob saum nruab ntug yaj tas huv tibsi. Tiamsis Vajtswv twb coglus tseg lawm hais tias yuav muaj lub ntuj tshiab thiab lub ntiajteb tshiab. Nyob hauv lub ntuj tshiab thiab lub ntiajteb tshiab uas peb niaj hnub tos ntawd muaj kev ncaj ncees xwb. Yog li ntawd cov kwvtij uas kuv hlub, thaum nej tseem tabtom tos hnub ntawd nej yuav tsum ua nej lub neej kom dawbhuv rau Vajtswv pom hais tias, nej ua haum Vajtswv siab thiab nej tsis muaj ib qhov txhaum li. Nej yuav tsum nco ntsoov hais tias qhov uas peb tus Tswv ua siab ntev rau nej, twb yog nws cia sijhawm rau nej kom nej dim nej lub txim, ib yam li peb tus kwv Paulus uas peb hlub, twb sau tej ntawd tuaj qhia rau nej raws li Vajtswv pub tswvyim rau nws lawm. Txhua tsab ntawv uas nws sau, nws yeej hais txog zaj no. Tej uas nws sau ntawd muaj qee lo tsis tshua yoojyim totaub. Cov neeg uas paub tsis tseeb thiab lub siab ywjfab ywjfwj, lawv txhais tej lus ntawd tsis raws li lub ntsiab, ib yam li lawv txhais lwm zaj uas nyob hauv Vajtswv txojlus. Qhov uas lawv ua li ntawd yuav ua rau lawv raug kev puastsuaj xwb. Tiamsis cov kwvtij uas kuv hlub, nej yeej paub zaj no lawm; yog li ntawd, nej yuav tsum ceevfaj zoo nyob tsam nej yuam kev ua txhaum ib yam li cov neeg uas ua phem ntawd ua, thiab nej yuav tsis muab siab rau ntseeg zuj zus lawm. Nej yuav tsum muab siab rau ntseeg, nej thiaj yuav paub peb tus Tswv Yexus Khetos uas yog peb tus Cawmseej, thiab paub nws txojkev hlub zuj zus mus. Sawvdaws yuav tsum niaj hnub hwm nws thiab hwm mus ibtxhis li. Amees. Peb sau zaj uas hais txog txojlus uas cawm neeg txojsia qhia rau nej paub; txojlus ntawd yeej nyob puag thaum chivkeeb los lawm. Peb hnov nws tej lus, peb qhovmuag pom nws thiab peb txhais tes tau tuav nws lawm. Thaum tus uas cawm neeg txojsia ntawd los peb puavleej pom nws, peb thiaj hais txog nws zaj thiab qhia txojsia ntev dhawv mus ibtxhis rau nej. Txojsia ntawd yeej nrog Leej Txiv nyob thiab Leej Txiv twb qhia txojsia ntawd rau peb lawm. Peb qhia tej uas peb pom thiab peb hnov lawm rau nej kom nej thiaj tau los nrog Leej Txiv thiab nws tus Tub Yexus Khetos sib raug zoo ib yam li peb twb nrog nws sib raug zoo lawm. Peb sau li no tuaj rau nej kom peb puv npo txojkev zoo siab. Zaj no yog zaj uas Vajtswv tus Tub qhia rau peb, peb thiaj qhia zaj no rau nej hais tias Vajtswv yog qhov pom kev; thiab tsis muaj ib qho tsaus nyob hauv nws hlo li. Yog peb hais tias peb twb nrog Vajtswv sib raug zoo lawm, tiamsis peb tseem ua peb lub neej ib yam li cov uas nyob hauv qhov tsaus ntuj ua, yog li ntawd tej uas peb hais lossis tej uas peb ua puavleej dag huv tibsi. Tiamsis yog peb nyob hauv qhov pom kev ib yam li Vajtswv tus uas nyob hauv qhov pom kev, peb ib leeg yeej nrog ib leeg sib raug zoo thiab Vajtswv tus Tub Yexus Khetos cov ntshav twb ntxuav peb tej kev txhaum huv tibsi lawm. Yog peb hais tias peb tsis muaj txhaum, peb rov dag peb xwb, thiab peb yeej tsis paub qhov tseeb hlo li. Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus. Yog peb hais tias peb tsis tau ua txhaum, peb hais li ntawd kuj ib yam li peb hais tias Vajtswv yog tus dag, thiab peb yeej tsis ntseeg nws tej lus li. Cov menyuam, kuv sau tsab ntawv no tuaj qhia nej, nej thiaj li yuav tsis ua txhaum; tiamsis yog leejtwg ua txhaum, peb muaj ib tug thov Leej Txiv pab peb; tus ntawd yog Yexus Khetos tus uas ncaj ncees. Thiab Yexus Khetos yog tus uas tuag theej peb lub txhoj Vajtswv thiaj zam peb tej kev txhaum, tsis yog zam peb tej kev txhaum xwb, tiamsis nws zam txhua haivneeg hauv ntiajteb no tej kev txhaum huv tibsi thiab. Yog peb ua raws li Vajtswv tej lus qhia, thiaj yog peb paub nws tseeb. Yog ib tug hais tias, “Kuv twb paub Vajtswv lawm,” tiamsis tus ntawd tsis ua raws li Vajtswv tej lus ces tus ntawd dag xwb, nws yeej tsis paub qhov tseeb li. Tiamsis tus uas ua raws li Vajtswv tej lus, tus ntawd thiaj yog tus uas hlub Vajtswv tiag. Twb yog vim li no, peb thiaj paub tseeb hais tias peb nrog Vajtswv sib raug zoo tiag: Yog leejtwg hais tias, “Kuv twb nrog Vajtswv sib raug zoo lawm,” tus ntawd yuav tsum ua nws lub neej kom zoo li Yexus Khetos lub. Cov phoojywg uas kuv hlub, txoj kevcai uas kuv sau tuaj rau nej no tsis yog txoj tshiab, tiamsis yog txoj qub uas nej ibtxwm coj thaum chivkeeb los lawm. Txoj kevcai qub ntawd yog txoj uas nej twb hnov lawm. Txawm yog li cas los txoj kevcai uas kuv sau tuaj rau nej no yeej yog txoj tshiab, rau qhov nej saib rau ntawm Yexus Khetos thiab ntawm nej, nej yeej pom hais tias txoj kevcai no yog txoj tshiab. Vim qhov tsaus ntuj tabtom yuav dhau mus, thiab qhov pom kev tabtom ci ntsa iab los lawm. Tus uas hais tias, “Kuv nyob hauv qhov pom kev,” tiamsis nws tseem ntxub nws kwv nws tij, tus ntawd tseem nyob hauv qhov tsaus ntuj. Tus uas hlub nws kwv nws tij, tus ntawd yog tus uas nyob hauv qhov pom kev, thiab nws yuav tsis ua ib yam dabtsi rau lwm tus ua txhaum. Tiamsis tus uas ntxub nws kwv nws tij, tus ntawd nyob hauv qhov tsaus ntuj; nws mus kev ib yam li tus uas maub hmo ntuj, thiab nws tsis paub hais tias nws tabtom mus txog qhov twg, rau qhov qhov tsaus ntuj plooj nws lub qhovmuag lawm. Cov menyuam, kuv sau tej no tuaj rau nej, rau qhov Vajtswv twb zam txim rau nej txhua tus uas Yexus Khetos tuag theej lawm. Kuv sau tej no tuaj rau nej cov uas ua txiv, rau qhov nej twb paub tus uas ibtxwm muaj sia nyob thaum chivkeeb los lawm. Kuv sau tej no tuaj rau nej cov uas yog tub hluas, rau qhov nej twb tawmtsam yeej dab Ntxwgnyoog lawm. Cov menyuam, kuv sau tej no tuaj rau nej, rau qhov nej twb paub Leej Txiv lawm. Kuv sau tej no tuaj rau nej cov uas ua txiv, rau qhov nej twb paub tus uas ibtxwm muaj sia nyob thaum chivkeeb los lawm. Kuv sau tej no tuaj rau nej cov tub hluas, rau qhov nej muaj zog heev; Vajtswv txojlus nyob hauv nej lub siab thiab nej twb tawmtsam yeej dab Ntxwgnyoog lawm. Nej tsis txhob hlub lub ntiajteb lossis cia siab rau ib yam dabtsi uas nyob hauv lub ntiajteb. Yog nej hlub lub ntiajteb lawm, nej yeej yuav tsis hlub Leej Txiv tus uas hlub nej. Txhua yam uas yog ntiajteb li, tsis hais tej uas neeg lub siab ntshaw, tej uas neeg lub qhovmuag pom thiab xav yuav, thiab txhua yam hauv ntiajteb uas neeg qhuas hais tias yog yam uas tseemceeb, tej ntawd puavleej yog ntiajteb li xwb; tsis muaj ib yam uas yog Leej Txiv li. Lub ntiajteb thiab txhua yam hauv ntiajteb uas neeg ntshaw tabtom yuav dua mus; tiamsis tus uas ua raws li Vajtswv lub siab nyiam, tus ntawd yuav nyob mus ibtxhis li. Cov menyuam, twb yuav txog lub sijhawm kawg! Nej twb hnov lawm hais tias tus uas ua yeebncuab rau Yexus Khetos yuav los; nimno twb muaj ntau leej ua yeebncuab rau Yexus Khetos lawm. Yog li ntawd peb thiaj paub hais tias twb yuav txog lub sijhawm kawg. Lawv cov ntawd twb ncaim peb mus lawm, rau qhov lawv tsis yog peb cov; yog lawv yog peb cov tiag, lawv yeej yuav nrog peb nyob. Tiamsis qhov uas lawv ncaim peb mus, twb ua rau sawvdaws paub hais tias lawv yeej tsis yog peb cov. Tiamsis Yexus Khetos twb txib Vaj Ntsujplig tus Dawbhuv los nrog nej nyob lawm, yog li ntawd nej txhua tus thiaj paub qhov tseeb. Qhov uas kuv sau tsab ntawv no tuaj rau nej tsis yog vim nej tsis paub qhov tseeb, tiamsis vim nej twb paub lawm, thiab nej paub hais tias tus uas paub qhov tseeb nws yeej tsis dag ib zaug li. Yog li ntawd leejtwg yog tus uas hais dag? Tus uas hais dag twb yog tus uas hais tias Yexus tsis yog tus Mexiyas. Tus uas hais li ntawd yog Yexus Khetos tus yeebncuab, rau qhov nws tsis kam ntseeg Leej Txiv thiab Leej Tub. Tus uas tsis ntseeg Leej Tub, tus ntawd yeej tsis ntseeg Leej Txiv. Tus uas ntseeg Leej Tub, tus ntawd yeej ntseeg Leej Txiv ib yam nkaus thiab. Yog li ntawd, nej yuav tsum khaws tej lus uas nej hnov thaum ub los lawm cia rau hauv nej lub siab. Yog nej nco ntsoov tej uas nej hnov thaum ub los lawm, nej yeej yuav niaj hnub nrog Leej Tub thiab Leej Txiv sib raug zoo. Qhov no yog raws li tej lus uas Yexus Khetos coglus tseg rau peb hais tias nws yuav pub txojsia ntev dhawv mus ibtxhis rau peb. Tej uas kuv sau tuaj rau nej no yog kuv hais txog cov neeg uas xav ntxias kom nej yuam kev. Tiamsis Yexus Khetos twb txib Vaj Ntsujplig tus Dawbhuv los nrog nej nyob lawm. Yog Vajtswv tus Ntsujplig twb nyob hauv nej lub siab lawm tsis tas yuav muaj neeg qhia nej. Rau qhov Vajtswv tus Ntsujplig qhia txhua tsav yam rau nej, thiab tej uas nws qhia rau nej ntawd puavleej tseeb xwb tsis muaj ib qho dag li. Yog li ntawd, nej yuav tsum ua raws li tej uas Vaj Ntsujplig qhia rau nej thiab cia Yexus Khetos kav nej lub siab mus li. Cov menyuam, nej yuav tsum cia Yexus Khetos kav nej lub neej; yog nej ua li ntawd thaum txog hnub uas nws rov qab los, nej thiab peb thiaj li yuav tsis ntshai, thiab thaum peb pom nws peb yuav tsis txajmuag rau nws. Nej yeej paub hais tias Yexus Khetos yog tus uas ncaj ncees; yog li ntawd, tsimnyog nej paub hais tias txhua tus uas ua ncaj ncees yeej yog Vajtswv cov menyuam. Nej sim ua tib zoo xav saib Leej Txiv hlub peb npaum li cas! Nws hlub peb kawg nkaus li, nws thiaj hu peb ua nws cov menyuam, thiab qhov tseeb peb yeej yog Vajtswv cov menyuam tiag. Twb yog vim li ntawd cov neeg uas tsis paub Vajtswv thiaj tsis paub peb. Cov phoojywg, nimno peb yog Vajtswv cov menyuam lawm, tiamsis peb tseem tsis tau paub tseeb hais tias yav tom ntej peb yuav zoo li cas. Peb tsuas paub hais tias thaum Yexus Khetos rov qab los, peb yuav zoo li nws, rau qhov peb yuav pom tseeb hais tias nws zoo li cas tiag. Txhua tus uas cia siab rau Yexus Khetos yeej yuav tswj kom nws ua tau lub neej dawbhuv ib yam li Yexus Khetos uas yog tus dawbhuv. Tus uas ua txhaum, tus ntawd rhuav Vajtswv txoj kevcai, rau qhov txojkev txhaum yeej yog qhov uas rhuav txoj kevcai. Nej twb paub lawm hais tias, qhov uas Yexus Khetos los hauv ntiajteb no twb yog nws los tuag theej neeg sawvdaws lub txhoj, thiab nej yeej paub hais tias nws tsis tau ua txhaum ib qho li. Tus uas cia Yexus Khetos kav nws lub neej lawm, tus ntawd tsis nyiam ua txhaum; tiamsis tus uas tseem nyiam ua txhaum, tus ntawd yeej tsis tau pom lossis tsis tau paub Yexus Khetos li. Kuv cov menyuam, nej tsis txhob pub leejtwg dag ntxias tau nej! Tus uas ua zoo, tus ntawd yog tus uas ncaj ncees ib yam li Yexus Khetos yog tus ncaj ncees. Tus uas nyiam ua txhaum, tus ntawd yog dab Ntxwgnyoog menyuam, rau qhov dab Ntxwgnyoog yog tus uas ua txhaum puag thaum chivkeeb los lawm. Qhov uas Vajtswv tus Tub los hauv ntiajteb no twb yog nws los rhuav dab Ntxwgnyoog tes haujlwm. Tus uas yog Vajtswv menyuam lawm, tus ntawd yeej tsis nyiam ua txhaum, rau qhov nws yog Vajtswv cov noob; thiab Vajtswv yog nws txiv, nws thiaj tsis nyiam ua txhaum. Tus uas yog Vajtswv menyuam thiab tus uas yog dab Ntxwgnyoog menyuam sib txawv li no: Tus uas tsis nyiam ua ncaj ncees lossis tsis hlub nws kwv nws tij, tus ntawd tsis yog Vajtswv menyuam. Tej lus uas hais tias peb ib leeg yuav tsum hlub ib leeg, tej lus no nej yeej hnov thaum chivthawj los lawm. Peb tsis txhob ua li Ka-ees; Ka-ees cia dab Ntxwgnyoog kav nws lub siab, nws muab nws tus kwv Anpees tua povtseg. Vim li cas Ka-ees thiaj tua nws tus kwv? Rau qhov nws tes haujlwm phem, thiab nws tus kwv tes haujlwm zoo. Cov kwvtij, yog tej neeg uas nyob hauv ntiajteb no ntxub nej, nej tsis txhob poob siab. Peb paub hais tias peb twb dim txojkev tuag lawm, nimno peb muaj txojsia tshiab; peb paub li no rau qhov peb muaj lub siab hlub peb cov kwvtij. Tus uas tsis muaj lub siab hlub lwm tus, tus ntawd zoo ib yam li tus neeg uas tuag lawm. Tus uas ntxub nws kwv nws tij, tus ntawd ua txhaum ib yam li tus neeg uas tua neeg; nej twb paub lawm hais tias tus neeg tua neeg yeej tsis tau txojsia ntev dhawv mus ibtxhis li. Qhov uas peb paub txojkev hlub yog li no: Yexus Khetos muab nws txojsia los txhiv peb. Yog li ntawd tsimnyog peb yuav tsum zoo siab muab peb txojsia txhiv peb cov kwvtij thiab. Yog tus npluanuj pom nws kwv nws tij txomnyem, tiamsis nws tsis quavntsej lawv li, tus ntawd yuav ua li cas hais tau hais tias nws yog tus uas hlub Vajtswv. Cov menyuam, peb tsis txhob hlub luag ntawm lub ncauj lo lus xwb; tiamsis peb yuav tsum pab lawv, sawvdaws thiaj pom hais tias peb muaj lub siab hlub tiag tiag. Yog li ntawd, peb thiaj paub hais tias peb yog Vajtswv tus uas yog qhov tseeb cov menyuam; yog li ntawd peb thiaj tsis ntshai mus cuag Vajtswv, rau qhov thaum peb lub siab qhia hais tias peb ua txhaum, peb paub hais tias Vajtswv yog tus uas paub peb lub siab thiab nws yeej paub ib puas tsav yam huv tibsi. Yog li ntawd, Cov phoojywg, yog peb lub siab tsis qhia rau peb hais tias peb ua txhaum, thaum peb mus cuag Vajtswv, peb yeej yuav tsis ntshai. Peb thov yam twg, nws yuav pub yam ntawd rau peb, rau qhov peb mloog nws lus thiab ua tej uas haum nws siab. Nws qhia rau peb hais tias kom peb ntseeg nws tus Tub Yexus Khetos thiab kom peb ib tug hlub ib tug raws li tej lus uas Yexus Khetos twb qhia rau peb lawm. Tus uas ua raws li Vajtswv tej lus, tus ntawd yeej nrog Vajtswv sib raug zoo, thiab Vajtswv nrog tus ntawd sib raug zoo. Rau qhov Vaj Ntsujplig tus uas Vajtswv pub rau peb twb qhia li ntawd rau peb paub hais tias Vajtswv nrog peb sib raug zoo lawm. Cov phoojywg uas kuv hlub, nej tsis txhob rawm ntseeg txhua tus uas khav hais tias lawv muaj Vaj Ntsujplig, tiamsis nej yuav tsum ua tib zoo xyuas saib tus ntsujplig ntawd puas yog Vajtswv tus tiag. Rau qhov muaj cov xibhwb cuav ntau leej tawm mus qhia rau txhua qhov txhia chaw lawm. Txhua tus uas lees hais tias Yexus Khetos los yug ua neeg, cov ntawd thiaj yog cov uas muaj Vajtswv tus ntsujplig. Twb yog vim li no nej thiaj paub hais tias cov twg yog cov uas muaj Vajtswv tus Ntsujplig tiag. Tiamsis txhua tus uas tsis lees hais tias Yexus los yug ua neeg, tus ntawd tsis muaj Vajtswv tus Ntsujplig. Tus ntsujplig uas nws muaj ntawd yog Yexus Khetos tus yeebncuab tus ntsujplig uas nej twb hnov lawm hais tias nws yuav los; nimno nws twb los nyob hauv ntiajteb no lawm. Cov menyuam, nej yog Vajtswv cov menyuam thiab nej twb tawmtsam yeej cov xibhwb cuav lawm, rau qhov Vaj Ntsujplig tus uas nyob hauv nej lub siab muaj hwjchim loj dua tus ntsujplig uas nyob hauv tej neeg ntiajteb lub siab. Cov xibhwb cuav ntawd qhia tej uas yog ntiajteb zaj xwb, rau qhov lawv yog neeg ntiajteb thiab neeg ntiajteb yeej nyiam mloog lawv qhia. Tiamsis peb yog Vajtswv cov menyuam. Tus uas paub Vajtswv, tus ntawd yeej mloog peb qhia; tus uas tsis yog Vajtswv li, tus ntawd yeej tsis mloog peb qhia. Yog li ntawd peb thiaj paub hais tias tus uas muaj tus Ntsujplig tseeb thiab tus uas muaj tus ntsujplig cuav txawv li cas. Cov phoojywg, peb ib leeg yuav tsum hlub ib leeg, rau qhov Vajtswv yog tus uas ua rau peb txawj sib hlub. Tus uas muaj kev hlub tus ntawd yog Vajtswv menyuam thiab nws yeej paub Vajtswv. Tus uas tsis muaj kev hlub, tus ntawd yeej tsis paub Vajtswv, rau qhov Vajtswv yog tus uas muaj kev hlub. Vajtswv txib nws tib leeg Tub los rau hauv ntiajteb no kom peb cov uas ntseeg nws tus Tub tau txojsia tshiab. Vajtswv ua li ntawd twb yog Vajtswv qhia rau peb hais tias nws hlub peb. Txojkev hlub lub ntsiab yog li no: Tsis yog peb hlub Vajtswv, tiamsis yog Vajtswv hlub peb thiab nws txib nws tus Tub los tuag theej peb lub txhoj, Vajtswv thiaj zam tau peb lub txim. Cov phoojywg, Vajtswv twb hlub peb npaum li ntawd lawm, yog li ntawd tsimnyog peb ib leeg yuav tsum hlub ib leeg. Yeej tsis tau muaj leejtwg pom Vajtswv ib zaug li, tiamsis yog peb ib leeg hlub ib leeg Vajtswv yeej nrog peb sib raug zoo, thiab nws yuav pub kom peb muaj kev hlub ib yam li nws. Rau qhov Vajtswv twb pub Vajtswv tus Ntsujplig rau peb lawm, peb thiaj paub hais tias Vajtswv nrog peb sib raug zoo thiab peb nrog Vajtswv sib raug zoo. Peb twb pom thiab peb twb qhia rau sawvdaws paub lawm hais tias Leej Txiv txib nws tus Tub los ua neeg ntiajteb tus Cawmseej. Tus uas qhia hais tias Yexus yog Vajtswv tus Tub, Vajtswv yeej nrog tus ntawd sib raug zoo thiab tus ntawd yeej nrog Vajtswv sib raug zoo. Peb paub thiab peb ntseeg hais tias Vajtswv hlub peb. Vajtswv yog tus uas muaj kev hlub; yog leejtwg muaj kev hlub, tus ntawd yeej nrog Vajtswv sib raug zoo, thiab Vajtswv yeej nrog tus ntawd sib raug zoo. Yog peb muaj kev hlub ib yam li Vajtswv lawm, peb yuav tsis ntshai Hnub uas Vajtswv txiav txim, rau qhov peb cov uas nyob hauv lub ntiajteb no peb lub neej twb zoo ib yam li Yexus Khetos lub lawm. Tus uas muaj kev hlub lawm tsis tas nws yuav ntshai, rau qhov txojkev hlub uas zoo kawg nkaus yuav tshem tau txojkev ntshai tawm. Yog li ntawd tus uas ntshai, tus ntawd tseem tsis tau muaj kev hlub, rau qhov nws ntshai nyob tsam nws raug txim. Peb muaj kev hlub rau qhov Vajtswv twb xub hlub peb lawm. Tus uas hais tias, “Kuv hlub Vajtswv,” tiamsis nws tseem ntxub nws kwv nws tij, tus ntawd hais dag xwb. Yog nws twb tsis hlub nws kwv nws tij tus uas nws qhovmuag pom, nws yuav ua li cas hlub Vajtswv tus uas nws qhovmuag tsis pom. Tej lus uas Yexus Khetos qhia rau peb yog li no: Tus uas hlub Vajtswv, tus ntawd yuav tsum hlub nws kwv nws tij. Tus uas ntseeg hais tias Yexus yog tus Mexiyas, tus ntawd yog Vajtswv menyuam; thiab tus uas hlub leej txiv, nws yeej yuav hlub leej txiv cov menyuam ib yam nkaus thiab. Qhov uas peb paub hais tias peb hlub Vajtswv cov menyuam yog li no: Vim peb hlub Vajtswv thiab ua raws li Vajtswv tej lus qhia. Qhov uas peb hlub Vajtswv yog peb ua raws li tej lus uas Vajtswv hais. Thiab Vajtswv tej lus peb yeej coj tsis nyuaj li, rau qhov Vajtswv cov menyuam txhua tus puavleej kovyeej lub ntiajteb lawm. Thiab qhov uas peb kovyeej lub ntiajteb twb yog vim peb ntseeg Yexus Khetos. Leejtwg thiaj yuav kovyeej lub ntiajteb? Tus uas kovyeej lub ntiajteb tsuas yog tus uas ntseeg hais tias Yexus yog Vajtswv tus Tub xwb. Thaum Yexus Khetos los muaj ob yam tseemceeb; nws ua kevcai raus dej thiab nws tuag theej neeg lub txhoj. Tsis yog dej thiaj tseemceeb xwb, tiamsis yog dej thiab ntshav huv tibsi. Thiab Vaj Ntsujplig yeej ua timkhawv hais tias muaj tseeb li ntawd tiag, rau qhov Vaj Ntsujplig yeej yog tus uas hais tseeb xwb. Muaj peb yam ua timkhawv, xwsli: Vaj Ntsujplig, dej thiab ntshav; peb yam no puavleej hais ib yam nkaus. Thaum muaj neeg ua timkhawv, peb yeej ntseeg tej lus uas lawv hais; yog li ntawd, tsimnyog peb hajyam yuav tsum ntseeg lo lus timkhawv uas Vajtswv hais txog nws tus Tub, rau qhov lo lus timkhawv ntawd tseemceeb dua tej uas neeg hais. Tus uas ntseeg Vajtswv tus Tub, tus ntawd yeej ntseeg Vajtswv lo lus timkhawv; tiamsis tus uas tsis ntseeg Vajtswv tej lus, tus ntawd yuav hais tias Vajtswv yog tus uas hais dag, rau qhov nws tsis ntseeg lo lus timkhawv uas Vajtswv hais txog Vajtswv tus Tub. Lo lus timkhawv ntawd yog li no: Vajtswv pub txojsia ntev dhawv mus ibtxhis rau peb lawm, txojsia ntawd yog Vajtswv tus Tub ntag. Tus uas muaj Leej Tub, tus ntawd thiaj muaj txojsia; tus uas tsis muaj Leej Tub, tus ntawd tsis muaj txojsia. Kuv sau tej no tuaj rau nej cov uas ntseeg Vajtswv tus Tub kom nej paub hais tias nej twb muaj txojsia ntev dhawv mus ibtxhis lawm. Peb tsis ntshai mus cuag Vajtswv, rau qhov peb paub tseeb hais tias yog peb thov tej uas raws li Vajtswv lub siab nyiam, Vajtswv yeej yuav mloog peb tej lus thov. Yog peb cia siab hais tias Vajtswv hnov peb tej lus thov lawm, peb yeej paub hais tias Vajtswv yuav muab yam uas peb thov rau peb. Yog nej pom nej ib tug kwvtij ua txhaum uas tsis txaus tus ntawd raug kev puastsuaj, nej yuav tsum thov Vajtswv zam txim rau tus kwvtij ntawd. Qhov no hais txog tus uas ua txhaum tsis txaus raug kev puastsuaj xwb. Tiamsis yeej muaj qhov txhaum uas txaus raug kev puastsuaj thiab, kuv tsis tau hais kom nej thov Vajtswv zam txim rau tus uas ua txhaum li ntawd. Txhua yam uas neeg ua tsis ncaj puavleej yog kev txhaum huv tibsi, tiamsis tej kev txhaum ntawd muaj qee yam tsis txaus raug kev puastsuaj. Peb paub hais tias tus uas yog Vajtswv menyuam, tus ntawd yeej tsis nyiam ua txhaum, rau qhov Vajtswv tus Tub twb tsomkwm nws lawm, thiab dab Ntxwgnyoog yuav ua tsis tau phem rau nws. Peb paub hais tias peb yog Vajtswv cov menyuam thiab paub hais tias dab Ntxwgnyoog twb kav cov neeg uas nyob hauv ntiajteb no lawm. Peb paub hais tias Vajtswv tus Tub los hauv ntiajteb no, thiab nws pub tswvyim rau peb kom peb paub tus uas yog Vajtswv tiag. Peb nrog Vajtswv tus uas yog Vajtswv tiag sib raug zoo, rau qhov peb twb xub nrog Vajtswv tus Tub Yexus Khetos sib raug zoo lawm. Tus no yog tus Vajtswv tiag thiab yog txojsia ntev dhawv mus ibtxhis. Cov menyuam, nej yuav tsum ceevfaj tsis txhob pe dab pe mlom. Kuv uas yog ib tug Txwjlaug, kuv sau tsab ntawv no xa tuaj rau tus Pojniam uas raug xaiv lawm thiab nws cov menyuam uas kuv hlub. Tsis yog kuv ib leeg thiaj hlub koj xwb, tiamsis peb txhua tus uas paub qhov tseeb puavleej hlub koj, rau qhov peb twb khaws Vajtswv txojlus uas yog qhov tseeb ntawd rau hauv peb lub siab lawm, txojlus ntawd yuav nyob hauv peb lub siab mus ibtxhis. Thov Vajtswv tus uas yog peb Leej Txiv thiab Yexus Khetos tus uas yog Leej Txiv tus Tub pub txoj hlub, kev hmov tshua thiab kev thajyeeb rau peb; thov kom tej ntawd yog peb li los ntawm qhov tseeb thiab txojkev hlub. Thaum kuv pom koj cov menyuam qee leej ua lawv lub neej raws li qhov tseeb uas Leej Txiv qhia rau peb lawm, kuv zoo siab kawg li. Yog li ntawd, kuv thov ntuas koj hais tias peb ib leeg yuav tsum hlub ib leeg. Tej lus uas kuv sau rau koj no tsis yog tej lus tshiab, tiamsis kuv sau tej uas peb ibtxwm muaj thaum chivthawj los lawm xwb. Txojkev hlub uas kuv hais no lub ntsiab hais tias kom peb yuav tsum ua peb lub neej raws li Vajtswv hais. Tej lus uas Vajtswv hais, nej twb hnov thaum chivthawj los lawm, nws hais tias nej txhua yuav tsum niaj hnub sib hlub. Muaj ntau leej mus txhua nrho qhov txhia chaw hauv ntiajteb no dag ntxias sawvdaws; cov neeg ntawd yog cov uas tsis lees hais tias Yexus Khetos los yug ua neeg. Tus uas zoo li ntawd, nws yog neeg dag ntxias thiab nws yog Yexus Khetos tus yeebncuab. Yog li ntawd, nej yuav tsum ceevfaj tej haujlwm uas nej tau ua los lawm thiaj yuav tsis nkim nej lub zog, tiamsis nej yuav tau nej tej nqi zog tagnrho huv tibsi. Tus uas qhia tshaj tej lus uas Yexus Khetos qhia, tus ntawd yeej tsis paub Vajtswv. Tus uas qhia raws li Yexus Khetos tej lus, tus ntawd yeej muaj Leej Txiv thiab Leej Tub. Yog leejtwg tuaj xyuas nej thiab nws tsis qhia raws li Yexus Khetos tej lus, nej tsis txhob hu tus ntawd los hauv nej tsev thiab tsis txhob hais rau nws hais tias, “Thov kom koj tau zoo nyob kaj siab lug.” Yog nej hais li ntawd rau nws kuj ib yam li nej nrog tus ntawd ua txhaum. Muaj ntau zaj uas kuv xav qhia rau nej, tiamsis kuv tsis xav sau txhua zaj huv tibsi rau hauv ntawv xav tuaj rau nej; kuv cia siab hais tias nyaj kuv yuav tau tuaj xyuas nej thiab nrog nej tham tim ntsej tim muag, yog muaj li ntawd peb yuav zoo siab heev. Koj tus Vivncaus uas koj hlub cov menyuam hais noj qab nyob zoo tuaj rau koj thiab. Kuv uas yog ib tug txwjlaug, kuv sau tsab ntawv no tuaj rau Nkayus tus uas kuv hlub. Tus phoojywg uas kuv hlub, kuv thov Vajtswv pab kom koj muaj txhua yam thiab noj qab nyob zoo, ib yam li kuv paub hais tias koj yeej muaj kev kaj siab lug thiab tsis txob tsis txhawj dabtsi li. Muaj ob peb tug kwvtij tuaj qhia rau kuv hais tias koj muab siab rau ua raws li Vajtswv txojlus uas yog qhov tseeb, ib yam li koj ibtxwm ua los lawm; thaum kuv hnov lawv hais li ntawd, kuv zoo siab kawg li. Tsis muaj ib yam dabtsi ua rau kuv zoo siab tshaj qhov uas kuv hnov hais tias kuv cov menyuam ua lawv lub neej raws li qhov tseeb. Tus phoojywg uas kuv hlub, koj yog tus uas muab siab rau pab cov kwvtij ntseeg; tsis hais cov uas koj paub lossis cov uas koj tsis paub, koj yeej pab txhua tus huv tibsi. Lawv cov ntawd tuaj qhia rau cov ntseeg uas kuv nrog nyob hais tias koj yog tus uas muaj kev hlub. Thaum lawv yuav mus lwm qhov, thov koj pab lawv kom tsimnyog qhov uas lawv ua Vajtswv txoj haujlwm. Rau qhov thaum lawv cov ntawd mus ua Yexus Khetos txoj haujlwm, lawv yeej tsis yuav tej uas cov tsis ntseeg muab pab lawv li. Yog li ntawd peb cov uas ntseeg, peb yuav tsum pab lawv. Yog peb ua li ntawd thiaj yog peb nrog lawv qhia Vajtswv txojlus uas yog qhov tseeb. Kuv twb sau ib tsab ntawv me me xa mus rau cov ntseeg lawm; tiamsis Di-autefes tus uas ntshaw ua cov ntseeg tus thawj yeej tsis quavntsej tej lus uas kuv hais ntawd li. Yog li ntawd, thaum kuv tuaj txog kuv yuav nthuav txhua yam uas nws tau ua los lawm rau nej paub: Tej uas nws thuam peb ua dog ua dig thiab dag hais tias peb ua phem li ub li no! Tsis tas li ntawd xwb thaum cov kwvtij ntawd tuaj xyuas nws, nws tsis hu lawv los tsev thiab txwv tsis pub leejtwg hu lawv mus tsev; yog leejtwg hu nws tseem yuav muab tus ntawd ntiab tawm hauv pawg ntseeg mus thiab. Tus phoojywg uas kuv hlub, koj tsis txhob xyaum ua li cov neeg phem, tiamsis koj yuav tsum xyaum ua li cov neeg uas ua zoo. Tus uas ua zoo yog Vajtswv menyuam; tus uas ua phem yeej tsis paub Vajtswv li. Sawvdaws puavleej qhuas hais tias De-meti-us yog tus uas ua zoo, thiab nws ua nws lub neej raws li qhov tseeb. Peb puavleej ua taus timkhawv hais tias nws yeej ua zoo tiag. Nej yeej paub hais tias peb tsis dag nej, peb hais tseeb xwb. Kuv muaj ntau zaj uas kuv xav qhia rau nej, tiamsis kuv tsis xav sau txhua zaj huv tibsi rau hauv ntawv xa tuaj rau nej. Kuv cia siab hais tias tshuav tsis ntev no kuv yuav tuaj xyuas nej thiab peb yuav tau sib tham tim ntsej tim muag. Thov Vajtswv pab kom koj tau zoo nyob kaj siab lug. Cov ntseeg lawv puavleej hais noj qab nyob zoo rau koj. Thiab koj hais noj qab nyob zoo rau peb cov phoojywg txhua tus huv tibsi. Kuv yog Yexus Khetos tus tubtxib thiab yog Yakaunpaus tus kwv. Kuv sau tsab ntawv no tuaj rau nej txhua tus uas Vajtswv xaiv cia lawm, nej yog cov uas Vajtswv tus uas yog Leej Txiv hlub, thiab yog cov uas Yexus Khetos tsomkwm. Thov Vajtswv niaj hnub foom koob hmoov rau nej, hlub nej thiab pab kom nej tau zoo nyob kaj siab lug. Cov kwvtij uas kuv hlub, thaum kuv yuav sau tsav ntawv no kuv xav hais tias kuv yuav hais txog zaj uas Vajtswv twb pab peb dim peb lub txim lawm, tiamsis kuv ho xav hais tias kuv yuav tsum sau tuaj ntuas nej kom nej tawmtsam tsis txhob pub leejtwg rhuav txojkev ntseeg uas Vajtswv twb pub rau nws haivneeg lawm, rau qhov nws tsuas pub tib zaug xwb, nws tsis pub ntxiv lawm. Cov neeg uas tsis ntseeg Vajtswv muaj qee leej twb nyiag kev tuaj rau hauv peb cov lawm, lawv cov ntawd hloov tej lus uas hais tias Vajtswv hlub peb, kom lawv tau kev ua phem ua qias. Lawv tsis ntseeg Yexus Khetos tus uas yog peb tus Tswv uas kav peb. Vajtswv txojlus twb xub qhia tseg thaum ub los lawm hais tias lawv yuav raug txim. Nej yeej paub tej no huv tibsi lawm, tiamsis kuv xav kom nej nco ntsoov zaj uas tus Tswv coj cov Yixalayees khiav nram tebchaws Iziv los, thiab tom qab ntawd Vajtswv ua rau cov uas tsis ntseeg raug kev puastsuaj. Nej yuav tsum nco ntsoov cov timtswv ceebtsheej uas tsis txaus siab rau tej uas Vajtswv tu rau lawv kav; lawv tso lawv qhov chaw nyob tseg thiab khiav lawm. Vajtswv muab tej saw hlau uas tsis txawj xeb tsis txawj tu khi lawv cia rau hauv qhov uas tsaus ntuj nti mus txog Hnub uas Vajtswv txiav txim rau lawv. Nej yuav tsum nco ntsoov lub nroog Xaudoos thiab lub nroog Kaumaulas, thiab tej nroog uas nyob ibncig ob lub nroog ntawd. Cov neeg uas nyob hauv tej nroog ntawd lawv ua txhaum kev nkauj kev nraug thiab ua phem ua qias, lawv thiaj poob rau hauv cov nplaim taws uas cig tsis paub tuag mus ibtxhis li. Qhov uas lawv raug txim li ntawd, twb yog ntuas peb txhua tus kom peb paub ceevfaj. Cov neeg no lawv puavleej ua txhaum ib yam nkaus li ntawd, tej uas lawv ua yogtoog pom tej ntawd ua rau lawv ua txhaum rau lawv lub cev. Lawv saib tsis taus Vajtswv tus uas muaj hwjchim, thiab thuam cov uas muaj tshwjchim nyob saum ntuj. Txawm yog Mikhayees yog cov timtswv ceebtsheej tus thawj los nws twb tsis ua li ntawd. Thaum Mikhayees nrog dab Ntxwgnyoog sib cav txog Mauxes lub cev, Mikhayees twb tsis tau hais tej lus uas saib tsis taus dab Ntxwgnyoog. Nws tsuas hais tias, “Tus Tswv yog tus uas yuav cem koj!” Tiamsis cov neeg no lawv thuam tej uas lawv tsis totaub; lawv xav ib yam li tej tsiaj xav, tej uas lawv xav ntawd yeej yuav ua rau lawv raug kev puastsuaj. Lawv yuav raug kev txomnyem lauj! Lawv ua txhaum ib yam li Ka-ees ua. Lawv ua txhaum rau qhov lawv ntshaw nyiaj ib yam li Npala-as ntshaw. Lawv ntxeev siab rau Vajtswv ib yam li Kaulas, lawv yuav raug kev puastsuaj ib yam li Kaulas raug. Thaum cov neeg ntawd tuaj nrog nej noj mov ua ke lawv ua phem ua qias, qw ua nqaj ua nqug rhuav nej ntsejmuag kawg li. Lawv yog cov yug yaj uas lawv rov yug lawv xwb. Lawv zoo li tauv huab uas yuav los nag, tiamsis cua muab ntsawj mus lawm los tsis taus nag. Lawv zoo li tsob ntoo uas tsis txi txiv, txawm yog lub caij txi los tsis txi li, thiab zoo li tsob ntoo uas luag muab tej cag rho tawm huv tibsi qhuav tas lawm. Lawv zoo ib yam li tej dej hiavtxwv uas ntas rau ub rau no, sawvdaws yuav pom tej kev phem kev qias uas lawv ua tsis paub txajmuag ib yam li pom tej npuas dej ntxhee dawb vog saum nplaim dej. Lawv zoo li cov hnubqub uas nyob tsis tsheej ib qho chaw, Vajtswv twb tu ib qho chaw rau hauv lub qhov tob tob uas tsaus ntuj nti cia rau cov neeg ntawd nyob mus ibtxhis lawm. Suav txij thaum Adas los txog rau Enauj muaj xya tiam neeg, Enauj yog tus uas hais txog cov neeg ntawd puag ntxov los lawm hais tias, “Cia li saib tus Tswv cov timtswv uas dawbhuv muaj ntau txhiab leej yuav nrog nws los txiav txim rau sawvdaws, thiab rau txim rau txhua tus neeg txhaum uas tsis ntseeg Vajtswv raws li tej uas lawv tau ua los lawm, thiab tej lus uas lawv thuam Vajtswv!” Cov neeg ntawd lawv nyiam yws thiab nyiam iab liam lwm tus; lawv ua phem raws li lawv lub siab nyiam; lawv khavtheeb thiab qhuas lwm tus kom lawv tau zoo. Cov phoojywg, nej yuav tsum nco ntsoov tej lus uas yav tas los peb tus Tswv Yexus Khetos cov timthawj twb qhia rau nej lawm. Lawv qhia rau nej hais tias, “Thaum txog lub sijhawm kawg yuav muaj neeg ua saib tsis taus nej, lawv cov ntawd nyiam ua phem raws li lawv lub siab nyiam.” Cov neeg ntawd yog cov uas ua rau sawvdaws tsis sib haum, lawv lub siab phem kav lawv, tsis yog Vaj Ntsujplig kav lawv. Tiamsis cov phoojywg, nej yuav tsum muab siab rau ntseeg heev zuj zus ntxiv. Thaum nej thov Vajtswv nej yuav tsum cia siab hais tias Vaj Ntsujplig tus Dawbhuv uas muaj hwjchim yuav pab nej thov, thiab Vajtswv hlub nej kawg li, yog li ntawd nej cov uas tabtom tos txojsia ntev dhawv mus ibtxhis uas peb tus Tswv Yexus Khetos yuav muab pub dawb dawb rau nej, nej yuav tsum niaj hnub muab siab npuab Vajtswv. Nej yuav tsum ua siab ntev rau cov neeg uas tsis tshua paub Vajtswv pestsawg; Nej yuav tsum rub lawv kom lawv tawm tau hauv lub cubtawg los, nej yuav tsum hlub lwm tus thiab, tiamsis ntxub lawv tej ris tsho uas lawv hnav ua kev phem kev qias. Vajtswv tus uas muaj hwjchim yog tus uas saib xyuas nej kom nej tsis txhob yuam kev, thiab thaum ntawd nej yuav tsis muaj ib qhov txhaum thiab nej yuav zoo siab kawg nkaus li. Vajtswv tib leeg thiaj yog peb tus Cawmseej, rau qhov peb tus Tswv Yexus Khetos yog tus uas muaj tshwjchim ci ntsa iab, muaj koob meej, muaj zog loj zog nchav thiab muaj hwjchim loj kawg nkaus, txij thaum tsim ntuj tsim teb, niaj hnub nimno thiab mus ibtxhis tsis kawg. Amees. Phau ntawv no yog hais txog tej uas Yexus Khetos qhia rau Vajtswv cov tubtxib paub tej uas tshuav tsis ntev tom ntej no yuav muaj tshwm los. Vajtswv twb xub qhia tej ntawd rau Yexus Khetos lawm, Yexus Khetos thiaj txib nws ib tug timtswv los qhia tej ntawd rau Yauhas tus uas yog Yexus Khetos ib tug tubtxib, thiab Yauhas sau txhua yam uas nws pom huv tibsi rau hauv phau ntawv no. Tej ntawd yog Vajtswv tej lus thiab yog tej lus tseeb uas Yexus Khetos qhia rau Yauhas. Cov neeg uas nyeem phau ntawv no, cov neeg uas mloog tej lus uas Vajtswv qhia no, thiab ua raws li cov lus uas sau tseg rau hauv phau ntawv no, cov ntawd yuav tau nyob kaj siab lug, rau qhov twb yuav txog lub sijhawm uas tej no yuav muaj tshwm los. Kuv yog Yauhas, kuv sau tsab ntawv no xa tuaj rau xya pawg ntseeg uas nyob hauv lub xeev Axias: Thov Vajtswv foom koob hmoov rau nej thiab pab kom nej tau nyob kaj siab lug. Vajtswv tus uas nyob nimno, tus uas ibtxwm nyob thaum ub los lawm thiab yog tus uas yuav los yav tom ntej no; thov kom xya tus ntsujplig uas nyob ntawm Vajtswv lub zwmtxwv thiab Yexus Khetos tus uas ua timkhawv ncaj ncees, tus uas yog tus Tub hlob uas Vajtswv twb tsa sawv hauv qhov tuag rov qab los lawm, thiab yog tus uas kav tagnrho tej vajntxwv hauv ntiajteb no huv tibsi. Thov kom Yexus Khetos tus uas hlub peb thiab tuag theej peb lub txhoj, thiab nws pab peb kom peb dim peb tej kev txhaum, thiab nws tsa peb ua povthawj ua Vajtswv tus uas yog Yexus Khetos Leej Txiv tes haujlwm tau koob meej. Thov kom Yexus Khetos tau lub tshwjchim uas ci ntsa iab thiab lub hwjchim mus ibtxhis li! Amees. Nej saib, nws nrog huab nrog cua los! sawvdaws yuav pom nws, txawm yog cov neeg uas muab hmuv nkaug nws los lawv yuav pom nws thiab. Thaum nws los, txhua haivneeg uas nyob hauv qab ntuj no yuav quaj nyiav ntsoog qees. Yeej yuav muaj li ntawd tiag! Amees. Tus Tswv uas yog Vajtswv tus uas muaj hwjchim loj kawg nkaus hais tias, “Kuv yog Alafas thiab Aumenkas uas yog tus uas nyob nimno thiab yog tus uas ibtxwm nyob thaum ub los lawm thiab yog tus uas yuav los yav tom ntej no.” Kuv yog nej tus kwvtij uas hu ua Yauhas. Kuv twb nrog Yexus Khetos koom ib txojsia lawm, kuv raug kev txomnyem, kuv los ua Vajtswv haivneeg, thiab kuv ua siab ntev ib yam li nej, vim kuv qhia Vajtswv Txojlus thiab tej lus tseeb uas Yexus Khetos qhia rau kuv lawm, thiaj li muaj neeg ntes kuv coj mus kaw rau tim lub koog Povtxwv Pamaus. Hnub uas yog tus Tswv hnub, Vaj Ntsujplig los kav tagnrho kuv lub siab, kuv hnov ib lub suab hais nrov nrov rau kuv ib yam li lub suab xyu nrov tom kuv qab tuaj. Lub suab ntawd hais tias, “Koj yuav tsum sau tej uas koj pom huv tibsi tseg rau hauv ntawv thiab xa mus rau cov pawg ntseeg uas nyob hauv xya lub nroog no: Efexus, Xaminas, Penkamus, Thiyatilas, Xaladis, Filadefias thiab Laudikeyas.” Thaum kuv hnov lub suab ntawd kuv tig hlo mus saib, saib yog leejtwg hais rau kuv, kuv txawm pom xya tus ncej kub uas txawb teeb nyob ntawd. Nyob hauv nruab nrab xya tus ncej kub ntawd muaj ib tug zoo li neeg sawv hauv, nws hnav ib lub tsho ntev suab yi nram kotaw thiab nws sia ib txoj siv kub saum nws qhovtso. Nws cov plaubhau dawb ib yam li xov paj lossis ib yam li cov daus, thiab nws lub qhovmuag ci ib yam li nplaim taws; nws txhais kotaw ci ib yam li tej tooj dag uas luag twb muab nchuav thiab txhuam tau ci ci lawm, thiab nws lub suab nrov ib yam li dej tsaws tsag nrov. Nws txhais tes xis tuav rawv xya lub hnubqub, thiab muaj ib rab ntaj ob sab ntse tawm hauv nws qhovncauj tuaj. Nws lub ntsejmuag ci ib yam li lub hnub ci thaum tavsu. Thaum kuv pom dheev nws, kuv txawm cia li ntog kiag rau ntawm nws kotaw; kuv zoo ib yam li tus neeg uas tuag lawm. Nws txawm cev hlo nws txhais tes xis los tuav nkaus kuv, thiab nws hais tias, “Koj tsis txhob ntshai! Kuv yog lub hauvpaus thiab yog lub ntsis. Kuv yog tus uas muaj sia nyob! Kuv twb tuag lawm, tiamsis koj saib, nimno kuv muaj sia nyob mus ibtxhis li. Kuv yog tus uas kav txojkev tuag thiab tubtuag teb. Yog li ntawd, koj yuav tsum sau tej uas koj pom, tsis hais tej uas nimno koj pom lossis tej uas yuav muaj los yav tom ntej no. Kuv yuav txhais zaj uas tsis muaj neeg paub hais txog xya lub hnubqub uas koj pom nyob hauv kuv txhais tes xis, thiab hais txog xya tus ncej kub txawb teeb ntawd rau koj paub: xya lub hnubqub ntawd yog xya tus timtswv uas saib xya pawg ntseeg, thiab xya tus ncej kub txawb teeb yog xya pawg ntseeg. “Koj sau tej uas kuv yuav qhia rau koj no xa mus rau tus timtswv uas saib pawg ntseeg hauv lub nroog Efexus li no: “Tus uas tuav rawv xya lub hnubqub hauv nws txhais tes xis, thiab mus mus los los hauv nruab nrab xya tus ncej kub txawb teeb hais li no tias, Kuv twb paub txhua yam uas nej ua tas los lawm. Kuv paub hais tias nej ua haujlwm khwv khwv, thiab ua siab ntev ua. Kuv paub hais tias nej ua tsis taus siab ntev rau cov neeg uas ua phem lawm. Thiab nej twb sim cov neeg uas lawv hais tias lawv yog cov timthawj lawm saib lawv yog tiag los tsis yog, thiab nej paub hais tias lawv tsis yog cov timthawj, lawv yog cov neeg dag xwb. Nej cov uas ntseeg kuv, txawm yog nej raug kev txomnyem los nej tseem ua siab ntev tiv thiab tsis tso kuv tseg. Tiamsis tshuav ib qho uas kuv tsis qhuas nej: Yav tas los nej yeej hlub kuv, tiamsis nimno nej tsis hlub kuv lawm. Nej yuav tsum nco ntsoov hais tias nej twb yuam kev mus ua txhaum ntau kawg li lawm! Yog li ntawd, nej yuav tsum tso nej tej kev txhaum tseg thiab rov los mloog kuv lus li qub. Yog nej tsis tso nej tej kev txhaum tseg, kuv yuav los saib nej thiab muab nej tus ncej txawb teeb rho tawm ntawm nws qhov chaw mus. Tiamsis muaj ib qhov uas kuv qhuas nej, qhov ntawd yog nej ntxub tej uas cov neeg Nikaulaites ua ib yam li kuv ntxub. “Yog leejtwg muaj pobntseg, cia li mloog tej lus uas Vaj Ntsujplig qhia rau cov ntseeg! “Kuv yuav pub tus uas kovyeej mus noj tsob txiv ntoo uas cawm tau neeg txojsia uas nyob hauv Vajtswv lub Vaj. “Koj sau tej uas kuv yuav qhia rau koj no xa mus rau tus timtswv uas saib pawg ntseeg hauv lub nroog Xaminas li no: “Tus uas yog lub hauvpaus thiab yog lub ntsis, tus uas twb tuag thiab sawv hauv qhov tuag rov qab los lawm hais tias, Kuv pom nej raug kev txomnyem; kuv paub hais tias nej yog neeg pluag, tiamsis qhov tseeb nej yog neeg npluanuj! Kuv paub cov neeg siab phem uas hais lus phem tawmtsam nej, lawv hais tias lawv yog neeg Yudais, tiamsis lawv tsis yog; lawv cov ntawd puavleej yog cov uas dab Ntxwgnyoog kav! Nej tsis txhob ntshai qhov uas nej yuav raug kev txomnyem. Nej cia li ua tib zoo mloog kuv tej lus! Dab Ntxwgnyoog yuav ntes nej cov qee leej coj mus kaw rau hauv tsev lojcuj sim saib nej yuav ua li cas. Nej yuav raug kev txomnyem kaum hnub, tiamsis nej yuav tsum muab siab rau ntseeg mus txog hnub tuag tsis txhob tso kuv tseg, kuv thiaj yuav pub lub kausmom kub uas yog txojsia ua nqi zog rau nej. “Yog nej leejtwg muaj pobntseg, cia li mloog tej lus uas Vaj Ntsujplig qhia rau cov ntseeg! “Tus uas kovyeej yuav tsis raug txojkev tuag zaum ob. “Koj sau tej lus uas kuv yuav qhia rau koj no xa mus rau tus timtswv uas saib pawg ntseeg hauv lub nroog Penkamus li no: “Tus uas muaj rab ntaj ob sab ntse hais tias, Kuv yeej paub nej qhov chaw nyob, qhov chaw ntawd yog qhov chaw uas lawv ua ib lub zwmtxwv rau dab Ntxwgnyoog nyob, tiamsis nej tseem muab siab rau ntseeg kuv tsis tso kuv tseg. Txawm yog nej twb pom lawv muab Atipas tus uas ua timkhawv ncaj ncees tua rau ntawm qhov chaw uas dab Ntxwgnyoog nyob los nej tseem ntseeg nej li qub. Tiamsis tshuav ob peb qho uas kuv tsis qhuas nej: Rau qhov nej cov muaj qee leej xyaum ua raws li tej uas Npala-as qhia. Npala-as yog tus uas qhia rau Vajntxwv Npalaj hais tias, ‘Yog koj xav kom cov Yixalayees yuam kev ua txhaum, koj cia li hais kom lawv noj tej zaub mov uas luag muab fij rau tej dab tej mlom lawm thiab kom lawv ua kev nkauj kev nraug.’ Thiab txawm yog nej cov los twb muaj qee leej ua raws li cov neeg Nikaulaites tej lus qhia lawm thiab. Yog li ntawd, nej cia li tso plhuav nej tej kev txhaum tseg! Yog nej tsis tso, kuv yuav los saib nej sai sai, thiab kuv yuav muab rab ntaj uas tawm hauv kuv qhovncauj tuaj tua cov neeg ntawd povtseg. “Yog leejtwg muaj pobntseg, cia li mloog tej lus uas Vaj Ntsujplig qhia rau cov ntseeg! “Kuv yuav muab cov manas uas kuv twb muab zais cia lawm rau tus uas kovyeej noj. Thiab kuv yuav muab tej pobzeb dawb rau lawv txhua tus ib leeg ib lub thiab muaj ib lub npe tshiab sau rau ntawm lub pobzeb ntawd. Tsis muaj leejtwg paub tej npe ntawv ntawd li, tsuas yog tus uas tau lub pobzeb ntawd thiaj paub xwb. “Koj sau tej uas kuv yuav qhia rau koj no xa mus rau tus timtswv uas saib pawg ntseeg hauv lub nroog Thiyatilas li no: “Vajtswv tus Tub uas ob lub qhovmuag ci ib yam li nplaim taws thiab ob txhais kotaw ci ib yam li tej tooj dag uas luag twb muab txhuam ci ci lawm hais li no: Kuv paub tej uas nej niaj hnub ua. Kuv paub hais tias nej muaj lub siab hlub luag, nej muab siab rau ntseeg, nej rau siab ntso ua Vajtswv tes haujlwm, thiab nej ua taus siab ntev. Nimno nej muab siab rau ua Vajtswv tes haujlwm heev dua yav tas los lawm thiab. Tiamsis tshuav ib qho uas kuv tsis qhuas nej: Qhov ntawd yog nej cia tus pojniam uas hu ua Yexenpees qhia nej. Tus pojniam ntawd khav hais tias nws yog ib tug cev Vajtswv lus. Nws qhia thiab nws ntxias kuv cov tubtxib kom lawv ua kev nkauj kev nraug thiab kom lawv noj tej zaub mov uas luag twb muab fij rau tej mlom lawm. Kuv cia sijhawm rau nws tso nws tej kev txhaum tseg, tiamsis nws tsis kam tso tej kev nkauj kev nraug uas nws ua ntawd tseg li. Yog li ntawd, kuv yuav muab tus pojniam no pov rau saum lub lav mob, cov neeg uas nrog nws sib dee yuav nrog nws raug kev txomnyem heev kawg nkaus li. Yog lawv tsis muab tej kev phem uas lawv nrog tus pojniam ntawd ua tso tseg, ces kuv yuav ua li ntawd rau lawv tamsim no ntag, thiab kuv yuav muab tus pojniam ntawd cov menyuam tua povtseg; cov ntseeg uas nyob txhua qhov chaw thiaj yuav paub hais tias kuv yog tus uas paub qhov uas neeg lub siab xav li cas thiab nyiam li cas. Kuv yuav muab nqi zog rau nej txhua tus kom tsimnyog tej haujlwm uas nej tau ua los lawm. “Tiamsis nej cov uas nyob hauv lub nroog Thiyatilas muaj ibtxhia yeej tsis tau coj raws li tej lus qhia uas phem ntawd thiab tsis tau kawm tej uas luag hais tias, ‘tej no yog dab Ntxwgnyoog tej ntsiab lus uas tsis muaj neeg paub.’ Kuv qhia rau nej hais tias kuv yuav tsis muab lwm lub nra los ntxiv rau nej lub lawm. Tiamsis nej yuav tsum tuav tej uas nej muaj lawm ruaj ruaj mus txog hnub uas kuv rov qab los. “Yog leejtwg muaj pobntseg, cia li mloog tej lus uas Vaj Ntsujplig qhia rau cov ntseeg! “Koj sau tej uas kuv yuav qhia rau koj no xa mus rau tus timtswv uas saib pawg ntseeg hauv lub nroog Xaladis li no: “Tus uas muaj Vajtswv xya tus ntsujplig thiab muaj xya lub hnubqub, nws hais tias, kuv paub tej uas nej niaj hnub ua; kuv paub hais tias nej lub moo nto lug hais tias nej yog cov uas muaj sia, tiamsis qhov tseeb nej twb tuag lawm! Yog li ntawd, nej cia li tsim dheev los, thiab yam uas nej tseem tshuav tuag tsis tau tu siav nej yuav tsum txhawb kom rov muaj zog, rau qhov kuv pom hais tias tej uas nej ua lawm nej tseem ua tsis tau zoo raws li Vajtswv lub siab nyiam. Yog li ntawd, nej yuav tsum nco ntsoov tej uas nej hnov thiab nej kawm los lawm. Nej yuav tsum coj raws li tej ntawd thiab tso plhuav nej tej kev txhaum tseg. Yog nej tsis tsim dheev los kuv yuav los saib nej ib yam li tus tubsab tuaj; nej yuav tsis paub lub sijhawm uas kuv los. Nej cov uas nyob hauv lub nroog Xaladis tsuas muaj ob peb leeg thiaj tsis tau ua rau lawv tej ris tsho qias xwb; lawv cov ntawd yuav tau hnav cev ris tsho dawb thiab nrog kuv ua ke, rau qhov lawv yeej tsimnyog tau lawm. Tus uas kovyeej, nws yuav tau hnav cev ris tsho dawb; kuv yuav tsis rho nws lub npe tawm hauv phau ntawv uas sau cov neeg uas muaj sia ntev mus ibtxhis lawm tej npe. Thiab kuv yuav tabmeeg qhia rau kuv Txiv thiab rau nws cov timtswv hais tias tus ntawd yog kuv li. “Yog nej leejtwg muaj pobntseg, cia li mloog tej lus uas Vaj Ntsujplig qhia rau cov ntseeg! “Koj sau tej uas kuv yuav qhia rau koj no xa mus rau tus timtswv uas saib pawg ntseeg hauv lub nroog Filadefias li no: “Tus uas dawbhuv thiab ncaj ncees uas tuav Daviv tus yuamsij, yog nws qhib lawm, yeej tsis muaj leejtwg kaw tau, yog nws kaw lawm yeej tsis muaj leejtwg qhib tau nws hais tias, Kuv paub tej uas nej ua thiab paub hais tias nej tsis muaj zog pestsawg los nej tseem coj raws li tej lus uas kuv qhia thiab tsis tso kuv tseg. Kuv twb qhib lub qhovrooj rau ntawm nej xubntiag lawm, tsis muaj leejtwg yuav kaw tau. Nej ua tib zoo mloog kuv tej lus! Cov neeg uas yog dab Ntxwgnyoog cov, lawv dag hais tias lawv yog cov Yudais, tiamsis qhov tseeb lawv tsis yog; kuv yuav kom lawv los txhos caug rau ntawm nej kotaw pe nej. Lawv yuav paub hais tias kuv hlub nej. Rau qhov nej ua raws li tej lus uas kuv qhia hais tias nej yuav tsum ua siab ntev, kuv yuav tsomkwm nej tsis pub nej raug tej kev txomnyem uas yuav muaj los thoob plaws hauv qab ntuj no. Tej kev txomnyem ntawd yog tej uas yuav los sim neeg ntiajteb lub siab. Tshuav tsis ntev no kuv yuav los. Nej yuav tsum khaws tej uas nej muaj lawm cia zoo zoo, thiaj tsis muaj leejtwg txeeb tau nej lub kausmom kub. Kuv yuav tsa tus uas kovyeej ua tus ncej zeb nres kuv tus Vajtswv lub tuamtsev, thiab nws yuav nyob hauv mus ibtxhis li. Kuv yuav sau kuv tus Vajtswv lub npe thiab sau kuv tus Vajtswv lub nroog lub npe rau ntawm nws lub cev. Lub nroog ntawd yog lub nroog Yeluxalees tshiab uas yuav los ntawm kuv tus Vajtswv uas nyob saum ntuj ceebtsheej los. Kuv yuav sau kuv lub npe tshiab rau ntawm nws thiab. “Yog nej leejtwg muaj pobntseg, cia li mloog tej lus uas Vaj Ntsujplig qhia rau cov ntseeg! “Koj sau tej uas kuv yuav qhia rau koj no xa mus rau tus timtswv uas saib pawg ntseeg hauv lub nroog Laudikeyas li no: “Tus uas muaj lub npe hu ua Amees tus uas ncaj ncees thiab ua timkhawv tseeb, thiab yog ib puas tsav yam uas Vajtswv tsim los lawm lub hauvpaus. Kuv paub tej uas nej twb ua los lawm; kuv paub hais tias nej tsis kub tsis txias. Yog nej yuav kub cia li kub hlo, yog nej yuav txias cia li txias kiag. Tiamsis yog nej sov sem so xwb, tsis kub tsis txias, ces kuv yuav muab nej nti tawm hauv kuv lub qhovncauj mus! Nej hais tias, ‘Peb npluanuj, peb tsis pluag ib yam dabtsi li.’ Tiamsis nej tsis paub, nej twb tsis muaj ib yam dabtsi li! Nej pluag, nej liabqab thiab nej digmuag. Kuv hais rau nej hais tias nej cia li tuaj yuav kuv cov kub uas yog cov tseem kub, nej thiaj li npluanuj. Nej cia li tuaj yuav cev ris tsho dawb coj mus hnav npog nej lub cev uas liabqab, nej thiaj tsis txajmuag. Thiab nej cia li tuaj yuav tshuaj mus rau nej qhovmuag, nej thiaj li pom kev. Kuv yeej cem thiab ntuas txhua tus uas kuv hlub, yog li ntawd nej yuav tsum muab siab rau ntseeg thiab tso plhuav nej tej kev txhaum tseg. Nej sim mloog saib, kuv sawv sab qhovrooj nraud thiab khob; yog leejtwg hnov kuv khob thiab qhib qhovrooj rau kuv, kuv yuav los hauv tus ntawd lub tsev. Kuv yuav nrog nws noj mov thiab nws yuav nrog kuv noj mov. Kuv yuav pub tus uas kovyeej los nrog kuv zaum ntawm kuv lub zwmtxwv, ib yam li kuv Txiv kom kuv los nrog nws zaum ntawm nws lub zwmtxwv. “Yog nej leejtwg muaj pobntseg, cia li mloog tej lus uas Vaj Ntsujplig qhia rau cov ntseeg!” Tom qab ntawd kuv rov ua yogtoog pom dua ib zaj; kuv pom rooj ntug ceebtsheej qhib lug cia. Lub suab uas thawj zaug kuv hnov hais nrov nrov rau kuv ib yam li lub suab xyu, nimno kuv rov hnov lub suab ntawd hais rau kuv hais tias, “Koj cia li tuaj saum no, kuv yuav muab tej uas yav tom ntej no yuav muaj tshwm los rau koj saib.” Tamsim ntawd Vaj Ntsujplig txawm los kav hlo kuv lub siab, kuv pom ib lub zwmtxwv nyob saum ntuj ceebtsheej thiab muaj ib tug zaum saum lub zwmtxwv ntawd. Nws lub ntsejmuag ci ib yam li cov qe zeb muaj nqis yapes thiab kanelias, thiab muaj ib tug duab zaj sawv vij lub zwmtxwv. Tus duab zaj ntawd ntsuab ib yam li tej qe zeb muaj nqis uas hu ua emelas. Muaj nees nkaum plaub lub zwmtxwv nyob puagncig lub zwmtxwv ntawd, thiab muaj nees nkaum plaub tug txwjlaug uas hnav ris tsho dawb thiab ntoo kausmom kub zaum saum cov zwmtxwv ntawd. Muaj xob laim liab vog, xob quaj thiab muaj suab nrov nroo ntws ntawm lub zwmtxwv ntawd tuaj. Muaj xya tes tsau uas cig lam lug ntawm lub zwmtxwv hauv ntej. Xya tes tsau ntawd yog Vajtswv xya tus ntsujplig. Nyob ntawm lub zwmtxwv hauv ntej muaj ib qho zoo li hiavtxwv ci li iav pom kev tshab plaws. Muaj plaub tug qhelunpees sawv vij lub zwmtxwv; plaub tug qhelunpees ntawd muaj qhovmuag thoob plaws sab xubntiag thiab sab tom nraubqaum huv tibsi. Thawj tug zoo ib yam li tus tsov ntxhuav; tus ob zoo ib yam li tus heev nyuj; tus peb lub ntsejmuag zoo ib yam li neeg lub thiab tus plaub zoo ib yam li tus dav uas tabtom ya. Plaub tug qhelunpees ntawd ib tug muaj rau phab tis, rau phab tis ntawd muaj qhovmuag thoob plaws sab hauv thiab sab nraud huv tibsi. Plaub tug qhelunpees ntawd hu nkauj tas hnub tas hmo hais tias, “Tus Tswv uas yog Vajtswv tus uas muaj hwjchim loj kawg nkaus, yog tus dawbhuv, dawbhuv, dawbhuv, yog tus uas ibtxwm nyob thaum ub los lawm, yog tus uas nyob nimno thiab yog tus uas yuav los yav tom ntej.” Txhua zaus uas plaub tug qhelunpees ntawd hu nkauj qhuas tus uas muaj sia nyob mus ibtxhis uas zaum saum lub zwmtxwv thiab ua nws tsaug, ces nees nkaum plaub tug txwjlaug txawm txhos caug ntua pehawm tus uas muaj sia nyob mus ibtxhis uas zaum saum lub zwmtxwv, thiab lawv hle lawv tej kausmom kub tso rau ntawm lub zwmtxwv hauv ntej, thiab lawv hais tias, “Tus Tswv uas yog peb sawvdaws tus Vajtswv! Koj yog tus uas muaj hwjchim, tsimnyog peb sawvdaws hwm koj thiab ua rau koj tau koob meej. Rau qhov koj yog tus uas tsim ib puas tsav yam huv tibsi; koj pom zoo tsim tej ntawd thiab pub tej ntawd muaj sia nyob.” Kuv pom tus uas zaum saum lub zwmtxwv, nws txhais tes xis tuav rawv ib thooj ntawv; thooj ntawv ntawd muaj lus sau rau sab hauv thiab sab nraud huv tibsi, thiab muaj xya lub homthawj nias rau. Kuv pom ib tug timtswv ceebtsheej uas muaj hwjchim loj kawg nkaus, nws hais nrov nrov hais tias, “Leejtwg thiaj tsimnyog muab tej homthawj tev thiab muab thooj ntawv los nthuav saib?” Tiamsis luag nrhiav tsis tau ib tug uas yuav tsimnyog mus muab thooj ntawv los nthuav saib, tsis hais saum ntuj ceebtsheej lossis hauv ntiajteb no lossis hauv nruab tivtxwv los yeej nrhiav tsis tau ib tug li. Kuv txawm quaj dhev, rau qhov tsis muaj ib tug yuav tsimnyog muab thooj ntawv ntawd los nthuav saib. Thaum ntawd ib tug txwjlaug hais rau kuv hais tias, “Koj tsis txhob quaj. Koj saib! Xeem Yudas tus tsov ntxhuav uas yog Daviv cajces, nws twb kovyeej lawm; nws tsimnyog tev xya lub homthawj thiab nthuav thooj ntawv ntawd.” Ces kuv txawm pom ib tug menyuam Yaj sawv ze ntawm tus uas zaum saum lub zwmtxwv hauv ntej, plaub tug qhelunpees thiab cov txwjlaug puavleej sawv vij tus menyuam Yaj. Saib zoo li twb muaj neeg muab tus menyuam Yaj ntawd tua lawm. Tus menyuam Yaj ntawd muaj xya tus kub thiab muaj xya lub qhovmuag. Tej qhovmuag ntawd piv txog Vajtswv xya tus ntsujplig uas Vajtswv txib mus thoob plaws hauv ntiajteb no. Tus menyuam Yaj cev tes mus muab thooj ntawv ntawm tus uas zaum saum lub zwmtxwv sab tes xis. Thaum tus menyuam Yaj tabtom mus muab thooj ntawv, ces plaub tug qhelunpees thiab nees nkaum plaub tug txwjlaug txawm txhos caug ntua ntawm tus menyuam Yaj hauv ntej pehawm tus menyuam Yaj. Lawv cov ntawd ib leeg tuav rawv ib lub nkauj nogncas thiab ib leeg tuav rawv ib lub tais kub uas ntim hmoov tshuaj tsw qab puv nkaus. Cov hmoov tshuaj ntawd yog piv txog tej lus uas cov ntseeg thov Vajtswv. Lawv hu ib zaj nkauj tshiab hais tias, “Koj yog tus uas tsimnyog muab thooj ntawv ntawd thiab muab tej homthawj tev. Rau qhov twb muaj neeg muab koj tua lawm. Qhov uas koj tuag ntawd twb yog koj txhiv neeg coj los rau Vajtswv. Cov neeg uas koj txhiv ntawd tsis hais xeem twg lossis cov uas hais yam lus twg lossis haivneeg twg lossis nyob lub tebchaws twg puavleej yog koj txhiv los huv tibsi. Koj coj lawv los ua Vajtswv haivneeg thiab tsa lawv ua povthawj ua peb tus Vajtswv tes haujlwm. Thiab lawv cov ntawd yuav tau kav lub ntiajteb no.” Kuv rov qab saib dua ib zaug, kuv hnov cov timtswv ceebtsheej ntau txhiab thiab ntau plhom lub suab. Lawv sawv vij lub zwmtxwv, plaub tug qhelunpees thiab cov txwjlaug, lawv hu nkauj hais tias, “Tus menyuam Yaj uas neeg muab tua lawm, koj yog tus muaj hwjchim thiab yog tus uas npluanuj, yog tus uas muaj tswvyim thiab muaj zog. Tsimnyog peb hwm koj, ua rau koj tau koob meej!” Kuv hnov ib puas tsav yam uas muaj sia, tsis hais tej uas nyob saum ntuj, nyob hauv ntiajteb no, nyob hauv nruab tivtxwv thiab nyob hauv hiavtxwv hu nkauj hais tias, “Peb sawvdaws yuav tsum hwm, yuav tsum qhuas, yuav tsum pehawm thiab ua rau tus uas zaum saum lub zwmtxwv thiab tus menyuam Yaj tau koob meej mus ibtxhis li.” Plaub tug qhelunpees teb hais tias, “Amees!” Ces cov txwjlaug txawm txhos caug ntua pehawm tus uas zaum saum lub zwmtxwv thiab tus menyuam Yaj. Ces kuv txawm pom tus menyuam Yaj muab xya lub homthawj ntawd tev, thiab thaum nws tev thawj lub, kuv hnov ib tug ntawm plaub tug qhelunpees hais nrov nrov ib yam li xob nroo hais tias, “Cia li los!” Kuv ntsia dheev, kuv pom ib tug txiv nees dawb tawm plaws los. Tus uas caij tus txiv nees dawb ntawd, nws nqa ib rab hneevnti thiab nws ntoo ib lub kausmom kub. Nws caij nees tawm mus ib yam li tus uas kovyeej lawm, nws yuav mus tawmtsam kom yeej. Ces tus menyuam Yaj txawm muab lub homthawj ob tev; thaum nws muab tev lawm, kuv hnov tus qhelunpees uas yog tus ob hais tias, “Cia li los!” Ces txawm muaj ib tug txiv nees liab tawm plaws los. Luag muab ib rab ntaj loj loj rau tus uas caij tus txiv nees liab ntawd; nws muaj hwjchim ua rau lub ntiajteb ua tsov ua rog thiab sib ntaus sib tua. Ces tus menyuam Yaj txawm muab lub homthawj peb tev; thaum nws tev lawm, kuv hnov tus qhelunpees uas yog tus peb hais tias, “Cia li los!” Kuv saib dheev, kuv pom ib tug txiv nees dub tawm plaws los. Tus uas caij tus txiv nees dub ntawd txhais tes tuav rawv ib rab teev. Kuv hnov ib lub suab hais li neeg hais ntawm plaub tug qhelunpees ntawd tuaj hais tias, “Cov neeg uas ua luag zog, yog yuav txhuv mas ib hnub twg ib taig txhuv, yog yuav pias ces ib hnub peb taig pias; tiamsis tsis txhob muab cov roj txiv ntoo thiab cov cawv txiv hmab nchuav povtseg!” Tus menyuam Yaj txawm muab lub homthawj plaub tev; thaum nws muab tev lawm, kuv hnov tus qhelunpees uas yog tus plaub hais tias, “Cia li los!” Kuv saib dheev, kuv pom ib tug txiv nees txheeb tawm plaws los. Tus uas caij tus txiv nees txheeb ntawd lub npe hu ua Txojkev Tuag thiab tubtuag teb raws nws qab los. Nkawd muaj hwjchim tua cov neeg uas nyob hauv ntiajteb no tuag ib feem plaub, tsis hais tuag rau kev tsov kev rog, tuag rau kev tshaib kev nqhis, tuag rau kev mob kev nkeeg thiab raug tej tsiaj nyaum tom. Ces tus menyuam Yaj txawm muab lub homthawj tsib tev; thaum nws muab tev lawm, kuv pom ib cov ntsujplig nyob hauv lub qab rooj uas cia tej khoom fij rau Vajtswv. Cov ntsujplig ntawd yog cov neeg uas luag muab tua tuag tas lawm cov ntsujplig. Lawv raug tua rau qhov lawv qhia Vajtswv Txojlus thiab ua timkhawv ncaj ncees. Cov neeg ntawd cov ntsujplig hais nrov nrov hais tias, “Tus Tswv, koj yog tus muaj hwjchim loj kawg nkaus, yog tus dawbhuv thiab yog tus tseeb! Tshuav ntev li cas koj mam li txiav txim rau neeg ntiajteb thiab rau txim rau cov neeg uas muab peb lub cev tua povtseg?” Luag muab tsho dawb rau cov neeg uas raug tua ntawd ib leeg ib lub, thiab tus Tswv hais rau lawv hais tias kom lawv cia li so ntev mentsis tso. Thaum lawv tej phoojywg uas ua Vajtswv cov tubtxib thiab cov kwvtij uas yeej yuav raug txojkev tuag raug luag tua tas ib yam li lawv lawm, Vajtswv mam li txiav txim. Ces kuv txawm pom tus menyuam Yaj muab lub homthawj rau tev. Thaum nws tev lub ntiajteb ua zog koog. Lub hnub txawm tsaus nti dub nciab ib yam li tej ntaubmag dub, thiab lub hli txawm cia li liab ploog ib yam li ntshav. Tej hnubqub txawm poob zom zaws saum ntuj los rau hauv ntiajteb, ib yam li tej txiv ncuavpias uas tsis tau siav uas cua ntsawj poob. Lub ntuj txawm ploj zuj zus mus ib yam li luag dov thooj ntawv. Txhua lub roob thiab txhua lub koog povtxwv puavleej txav mus rau lwm qhov lawm. Tej vajntxwv uas kav ntiajteb, tej nomtswv, tej thawj tubrog, tej neeg npluanuj, tej neeg tseemceeb thiab cov uas ua qhev thiab cov uas tsis ua qhev, sawvdaws puavleej khiav mus nkaum rau hauv tej qhov tsua thiab hauv tej qab tsuas thiab saum tej roob. Lawv hais rau tej roob thiab tej pobzeb pobtsuas hais tias, “Cia li nphau los txhub peb thiab npog peb kom tus uas zaum saum lub zwmtxwv tsis txhob pom peb thiab kom tus menyuam Yaj tsis txhob rau txim tau rau peb! Rau qhov twb txog hnub uas tus Tswv thiab tus menyuam Yaj rau txim lawm, yog li ntawd tseem yuav muaj neeg tawv dhau thiab los?” Tom qab ntawd kuv pom plaub tug timtswv ceebtsheej sawv ntawm plaub ceg kaum ntuj thiab txwv tsis pub cua ntsawj plaub ceg kaum ntuj tuaj rau lub ntiajteb lossis tuaj rau dej hiavtxwv lossis tuaj rau tej xyoob ntoo. Thiab kuv pom dua ib tug timtswv ceebtsheej tawm tim sab hnubtuaj tuaj, nws nqa rawv Vajtswv tus uas muaj sia nyob lub homthawj. Nws hais nrov nrov rau plaub tug timtswv ceebtsheej uas Vajtswv txib los rhuav lub ntiajteb thiab hiavtxwv hais tias, “Nej tsis txhob rawm rhuav lub ntiajteb thiab dej hiavtxwv lossis tej xyoob ntoo; cia peb nias homthawj rau Vajtswv cov tubtxib txhua tus hauvpliaj tso nej mam li rhuav.” Thiab tus timtswv ceebtsheej ntawd hais rau kuv hais tias cov neeg uas muaj Vajtswv lub homthawj nias rau ntawm lawv hauvpliaj lawm muaj ib puas plaub caug plaub txhiab leej. Vajtswv xaiv cov neeg ntawd tawm hauv kaum ob xeem Yixalayees los. Nws xaiv xeem Yudas kaum ob txhiab leej, xeem Lunpees kaum ob txhiab leej, xeem Khas kaum ob txhiab leej, xeem Aseles kaum ob txhiab leej, xeem Nathalis kaum ob txhiab leej, xeem Manaxes kaum ob txhiab leej, xeem Xime-oos kaum ob txhiab leej, xeem Levis kaum ob txhiab leej, xeem Ixakhas kaum ob txhiab leej, xeem Xenpuloos kaum ob txhiab leej, xeem Yauxej kaum ob txhiab leej thiab xeem Npeenyamees kaum ob txhiab leej. Tom qab ntawd kuv ntsia dheev, kuv pom muaj neeg coob coob suav tsis txheeb li tuaj txhua lub tebchaws tuaj! tsis hais xeem twg, haivneeg twg thiab cov neeg uas hais yam lus twg los muaj; sawvdaws tuaj sawv ntawm hauv ntej lub zwmtxwv thiab tus menyuam Yaj. Lawv txhua tus puavleej hnav ib leeg ib cev ris tsho dawb, thiab lawv ib leeg tuav rawv ib daim nplooj toovlaj. Lawv hais nrov nrov hais tias, “Tus Vajtswv uas zaum saum lub zwmtxwv thiab tus menyuam Yaj twb txhiv peb dim lawm!” Cov timtswv ceebtsheej txhua tus sawv vij cov txwjlaug thiab plaub tug qhelunpees. Ces cov timtswv ceebtsheej txawm txhos caug ntua hauv av ntawm hauv ntej lub zwmtxwv thiab pehawm Vajtswv; lawv hais tias, “Amees! Vajtswv, koj yog tus uas muaj hwjchim, muaj tswvyim thiab muaj zog, tsimnyog peb ua koj tsaug, qhuas koj thiab ua rau koj tau koob meej mus ibtxhis li! Amees!” Cov txwjlaug ntawd muaj ib tug nug kuv hais tias, “Cov neeg uas hnav tsho dawb ntawd yog leejtwg thiab lawv tuaj qhov twg tuaj?” Kuv teb hais tias, “Kuv tsis paub. Koj thiaj paub xwb!” Tus txwjlaug ntawd qhia rau kuv hais tias, “Cov neeg ntawd yog cov uas twb tiv dhau tej kev tsimtxom uas loj heev los lawm. Lawv twb muab tus menyuam Yaj cov ntshav ntxhua lawv tej ris tsho thiab ntxuav lawv dawbhuv lawm. Yog li ntawd, lawv thiaj tau los sawv tabmeeg ntawm Vajtswv lub zwmtxwv pehawm Vajtswv tas hnub tas hmo hauv lub Tuamtsev. Tus uas zaum saum lub zwmtxwv yuav nrog lawv nyob thiab tsomkwm lawv. Lawv yuav tsis tshaib tsis nqhis; nag yuav tsis ntub thiab tshav ntuj yuav tsis kub lawv li lawm. Rau qhov tus menyuam Yaj uas sawv ntawm lub zwmtxwv yuav yug lawv thiab coj lawv mus haus tej qhovdej txhawv uas cawm neeg txojsia. Thiab Vajtswv yuav so lawv tej kua muag huv tibsi mus.” Thaum tus menyuam Yaj muab lub homthawj xya tev, ua ciav saum ntuj ceebtsheej txawm ntsiag to kwvlam li peb caug feeb. Kuv pom Vajtswv muab xya lub xyu rau xya tus timtswv uas sawv tabmeeg ntawm Vajtswv ib leeg ib lub. Muaj dua ib tug timtswv ceebtsheej nqa lub tais kub uas rau hmoov tshuaj tsw qab. Nws los sawv ntawm lub thaj uas luag cia tej khoom uas yuav muab fij rau Vajtswv, thiab Vajtswv muab ib cov hmoov tshuaj tsw qab ntau ntau rau tus timtswv ntawd coj mus ntxiv rau tej lus uas cov ntseeg thov Vajtswv thiab nqa mus rau saum lub thaj kub uas nyob ntawm hauv ntej lub zwmtxwv. Tus timtswv ntawd txawm muab cov hmoov tshuaj tsw qab ntawd hlawv. Cov pa tshuaj ntawd ncho lug ntawm nws txhais tes nrog tej lus uas cov ntseeg thov mus rau Vajtswv. Ces tus timtswv txawm muab tej hluavtaws uas nyob saum lub thaj kub los ntim puv nkaus rau lub tais uas rau hmoov tshuaj tsw qab, ces nws txawm muab lub tais hluavtaws ntawd pov rau hauv ntiajteb, ces xob txawm nroo thiab xob laim liab pesvog, muaj suab nrov qeeg nkaws thiab lub ntiajteb ua zog koog. Tom qab ntawd xya tus timtswv ceebtsheej uas nqa xya lub xyu txawm npaj yuav tshuab lawv cov xyu. Thaum thawj tus timtswv tshuab nws lub xyu, ces txawm muaj lawg thiab hluavtaws xyaw ntshav poob los rau hauv ntiajteb. Lub ntiajteb kub hnyiab tas ib feem peb, tej ntoo kub hnyiab tas ib feem peb thiab tej nroj tsuag kub hnyiab tas huv tibsi. Thaum tus timtswv ob tshuab nws lub xyu, txawm muaj ib yam zoo li ib lub roob loj loj tabtom kub hnyiab nphau los rau hauv hiavtxwv, ces dej hiavtxwv txawm txia ua ntshav tas ib feem peb. Txhua tsav yam tsiaj uas nyob hauv hiavtxwv tuag tas ib feem peb, thiab tej nkoj uas nyob hauv hiavtxwv puastsuaj tas ib feem peb. Thaum tus timtswv peb tshuab nws lub xyu, muaj ib lub hnubqub kub hnyiab cig liab ploog ib yam li tes tsau poob saum ntuj los npog tej dej ntws thiab tej qhovdej tas ib feem peb. (Lub hnubqub ntawd hu ua “Kev Iab.”) Ua rau tej dej iab tas ib feem peb, muaj neeg tuag coob heev, rau qhov lawv haus cov dej iab ntawd. Thaum tus timtswv plaub tshuab nws lub xyu, ces lub hnub txawm qauj tas ib feem peb, lub hli thiab cov hnubqub los puavleej qauj tas ib feem peb, nruab hnub tsis pom kev tas ib feem peb thiab hmo ntuj los tsis muaj qhov ci pom kev ib feem peb thiab. Ces kuv txawm ntsia dheev thiab pom ib tug dav ya saum nruab ntug. Tus dav ntawd quaj nrov nrov hais tias, “Kev txomnyem! Kev txomnyem! kev txomnyem! Thaum muaj dua peb tug timtswv ceebtsheej tshuab lawv tej xyu, mas tej neeg uas nyob hauv ntiajteb yuav raug puastsuaj!” Thaum tus timtswv ceebtsheej tsib tshuab nws lub xyu, kuv pom lub hnubqub uas twb poob saum ntuj los rau hauv ntiajteb lawm, luag muab ib tug yuamsij uas qhib lub qhov tob tob rau lub hnubqub ntawd. Lub hnubqub ntawd txawm mus qhib lub qhov tob tob; muaj pa ncho tawm hauv lub qhov ntawd tuaj ib yam li lub cubtawg uas cig hlob hlob ncho pa. Tej pa ntawd txawm tuaj mus laum nkaus lub hnub thiab lub ntuj tsaus ntuj nti tas huv tibsi. Muaj ib co kooj txig ya tawm hauv cov pa ncho ntawd tuaj rau saum npoo av, thiab luag pub cov kooj ntawd muaj taug ib yam li raubris teb. Tiamsis luag txwv tsis pub cov kooj ntawd noj tej xyoob ntoo thiab tej qoobloo. Luag tsuas pub cov kooj ntawd tsimtxom cov neeg uas tsis muaj Vajtswv lub homthawj nias rau ntawm lawv hauvpliaj xwb. Tiamsis luag txwv tsis pub cov kooj tua cov neeg uas raug tsimtxom ntawd, luag tsuas pub cov kooj tsimtxom tej neeg tsib lub hlis xwb. Qhov uas lawv raug tsimtxom li ntawd mob ib yam li raubris teb plev. Tsib lub hlis uas lawv raug tsimtxom ntawd, lawv nrhiav kev tuag, tiamsis lawv nrhiav tsis tau; lawv xav tuag, tiamsis lawv tuag tsis taus. Cov kooj ntawd zoo ib yam li tej nees uas luag twb muab eeb nog rau lawm yuav caij mus ntaus rog; muaj tej lub zoo li lub kausmom kub nyob saum cov kooj ntawd taubhau, thiab kooj lub ntsejmuag zoo li neeg lub. Thiab kooj tej plaubhau zoo li pojniam tej plaubhau, thiab kooj tej hniav zoo li hniav tsov ntxhuav. Thiab txhua tus kooj puavleej muaj tej daim zoo li hlau thaiv ntawm lawv hauvsiab. Kooj ya nrov li tej tsheb nees coob coob uas dhia mus rau tom tshavrog nrov. Kooj tus kotw muaj ple thiab txawj plev ib yam li raubris teb plev. Thiab tus kotw ntawd muaj taug tsimtxom neeg txog tsib lub hlis. Cov kooj ntawd muaj ib tug vajntxwv kav lawv, tus vajntxwv ntawd yog tus timtswv ceebtsheej uas saib lub qhov tob tob. Tus timtswv ntawd lub npe lus Henplais hu ua Anpadoos; thiab lus Kilis hu ua Apauliyoos (txhais hais tias “Tus uas rhuav kom puastsuaj”). Thawj zaug kev txomnyem twb dhau lawm, tiamsis tseem tshuav ob zaug kev txomnyem thiab. Thaum tus timtswv ceebtsheej rau tshuab nws lub xyu, kuv hnov ib lub suab hais ntawm lub thaj kub uas nyob ntawm Vajtswv hauv ntej plaub ceg kaum tuaj. Lub suab ntawd hais rau tus timtswv ceebtsheej rau uas nqa lub xyu hais tias, “Cia li muab plaub tug timtswv ceebtsheej uas raug khi rau nram ntug Dej Loj Efalates tso!” Thaum muab plaub tug timtswv ntawd tso lawm, Vajtswv txib lawv mus tua tej neeg ntiajteb tuag tas ib feem peb. Vajtswv npaj plaub tug timtswv ntawd kom lawv ua li ntawd rau xyoo ntawd, lub hlis ntawd, hnub ntawd thiab lub sijhawm ntawd. Luag qhia rau kuv hais tias cov tubrog uas caij nees muaj ob puas plhom leej. Thaum kuv tseem ua yogtoog ntawd, kuv pom cov nees thiab cov neeg uas caij nees; cov neeg ntawd, lawv ib leeg muaj ib daim hlau thaiv hauvsiab, daim hlau ntawd liab li nplaim taws, xiav ib yam li lub hlaws xafiles thiab daj li leejfaj. Cov nees ntawd lub taubhau zoo ib yam li tsov ntxhuav lub, muaj nplaim taws, muaj pa taws thiab muaj leejfaj tawm hauv cov nees ntawd lub qhovncauj los. Cov nplaim taws, pa taws thiab leejfaj uas tawm hauv cov nees ntawd lub qhovncauj los ua rau neeg ntiajteb tuag ib feem peb. Tej taug ntawd nyob hauv cov nees lub qhovncauj thiab nyob tom nees tus kotw. Tus kotw zoo li tus nab thiab muaj taubhau, cov nees ntawd siv lawv tus kotw tom neeg. Cov neeg uas tsis raug peb yam sub tawg sub ntsha ntawd thiab tsis tuag, lawv tsis kam muab tej uas lawv txhais tes ua los lawm tso povtseg. Lawv tseem teev dab, pe mlom kub, mlom nyiaj, mlom tooj, mlom pobzeb thiab mlom ntoo; tej mlom ntawd tsis pom kev, tsis hnov lus lossis tsis txawj mus kev, thiab lawv tsis tso kev sib ntaus sib tua, kev ua khawvkoob, kev ua nkauj ua nraug thiab kev ua tubsab tub nyiag tseg li. Tom qab ntawd kuv pom dua ib tug timtswv ceebtsheej uas muaj hwjchim loj kawg nkaus los saum ntuj los. Muaj ib tauv huab qhwv nws thiab muaj ib tug duab zaj vij nws lub taubhau; nws lub ntsejmuag ci ib yam li lub hnub, thiab nws ob txhais ceg zoo ib yam li tus nplaim taws uas cig ntswj pesyos. Nws txhais tes tuav rawv ib thooj ntawv me me uas twb muab nthuav lawm. Nws rhais nws sab taw xis mus tsuj hauv hiavtxwv thiab nws sab taw laug tsuj sau nruab nqhuab. Nws hais lus nrov ib yam li tsov ntxhuav nyooj. Thaum nws hais lus tagnrho, ces xob txawm nroo xya zaus teb. Thaum xob nroo xya zaus teb tas lawm kuv twb yuav luag sau, tiamsis kuv ho hnov ib lub suab hais saum ntuj tuaj rau kuv hais tias, “Koj cia li muab tej lus uas xob nroo xya zaus ntawd npog cia tsis txhob sau!” Kuv pom tus timtswv ceebtsheej uas ib sab taw tsuj hauv hiavtxwv thiab ib sab taw tsuj sau nruab nqhuab tsa nws sab tes xis rau saum ntuj, thiab nws tuav Vajtswv tus uas muaj sia nyob mus ibtxhis, tus uas tsim lub ntuj, lub ntiajteb, hiavtxwv thiab tsim ib puas tsav yam uas nyob saum ntuj thiab hauv ntiajteb no lub npe coglus hais tias, “Luag yuav tsis ncua sijhawm ntev lawm! Tiamsis thaum tus timtswv xya tshuab nws lub xyu, Vajtswv yuav ua Vajtswv tes haujlwm uas Vajtswv muab zais cia lawm kom tiav, raws li tej uas Vajtswv twb xub qhia rau nws cov tubtxib thiab cov uas cev Vajtswv lus lawm.” Tom qab ntawd kuv hnov lub suab uas thawj zaug hais rau kuv lawm rov hais rau kuv hais tias, “Koj cia li mus muab thooj ntawv me me uas twb muab nthuav lawm ntawm tus timtswv ceebtsheej uas ib sab taw tsuj hauv hiavtxwv thiab ib sab taw tsuj sau nruab nqhuab txhais tes.” Ces kuv txawm mus cuag tus timtswv ntawd thiab thov nws muab thooj ntawv me me ntawd rau kuv. Nws hais rau kuv hais tias, “Koj cia li muab thooj ntawv no noj; thaum koj nqos lawm yuav ua rau koj lub plab iab, tiamsis thaum nyob hauv koj lub qhovncauj mas yuav qab zib ib yam li zib ntab.” Kuv thiaj muab thooj ntawv me me ntawm tus timtswv txhais tes los noj, thaum tseem nyob ntawm kuv qhovncauj mas qab zib ib yam li zib ntab. Tiamsis thaum uas kuv nqos rau hauv plab lawm iab li tus timtswv hais tiag. Tom qab ntawd luag hais rau kuv hais tias, “Koj yuav tsum rov qab qhia Vajtswv Txojlus uas hais txog txhua haivneeg, txhua lub tebchaws, txhua yam lus thiab txhua tus vajntxwv dua ib zaug.” Tom qab ntawd luag muab ib tug pas ntsuas uas zoo li ib tug pas nrig rau kuv thiab hais rau kuv hais tias, “Koj cia li mus ntsuas lub tuamtsev, lub thaj thiab suav cov neeg uas tuaj pehawm Vajtswv hauv lub tuamtsev saib muaj pestsawg leej. Tiamsis koj tsis txhob ntsuas ibncig lub Tuamtsev sab nraud, rau qhov twb muab sab nraud rau cov neeg uas tsis ntseeg Vajtswv lawm, lawv yuav tuaj tsuj lub nroog Dawbhuv mus txog plaub caug ob lub hlis. Kuv yuav txib kuv ob tus timkhawv uas hnav ntaubtsaj mus qhia Vajtswv Txojlus ib txhiab ob puas rau caum hnub ntawd.” Ob tug timkhawv ntawd yog ob tsob ntoo roj thiab yog ob tug ncej txawb teeb uas nyob ntawm Vajtswv tus uas kav lub ntiajteb no lub xubntiag. Yog leejtwg yuav ua phem rau nkawd, ces nplaim taws yuav tawm hauv nkawd lub qhovncauj los kub cov uas ua yeebncuab rau nkawd. Yog leejtwg yuav ua limhiam rau nkawd, ces tus ntawd yuav raug kub hnyiab tuag. Ob tug timkhawv ntawd muaj hwjchim txwv tsis pub kom ntuj los nag rau lub sijhawm uas nkawd qhia Vajtswv Txojlus. Nkawd muaj hwjchim ua rau tej dej txia ua ntshav, thiab nkawd muaj hwjchim ua rau lub ntiajteb raug tej sub tawg sub ntsha: nkawd xav ua li ntawd pestsawg zaus los nkawd yeej ua tau huv tibsi. Thaum nkawd qhia tas lawm, tus tsiaj uas tawm hauv lub qhov tob tob los yuav los tawmtsam nkawd. Tus tsiaj ntawd yuav kovyeej nkawd thiab muab nkawd tua povtseg, thiab nws yuav muab nkawd ob lub cev tso rau ntawm ntug kev hauv lub nroog loj; lub nroog ntawd yog lub nroog uas luag muab nkawd tus Tswv ntsia rau saum ntoo khaublig. Sawvdaws txeev muab lub nroog ntawd piv rau lub nroog Xaudoos thiab lub tebchaws Iziv. Muaj neeg coob coob tuaj ntau lub tebchaws tuaj saib, tsis hais haivneeg twg, xeem twg, cov neeg uas hais yam lus twg los tuaj; sawvdaws puavleej tuaj saib nkawd ob lub cev tau peb hnub thiab ib tavsu. Lawv tsis pub leejtwg coj nkawd lub cev mus faus li. Thaum tej neeg ntiajteb pom hais tias nkawd tuag lawm lawv zoo siab kawg li. Lawv ua rooj noj rooj haus thiab muab khoom sib pub, rau qhov ob tug uas cev Vajtswv lus uas ua rau neeg ntiajteb raug kev txomnyem tuag lawm. Tiamsis thaum dhau peb hnub thiab ib tavsu ntawd lawm, Vajtswv rau siav rau pa rau nkawd ob lub cev, ces nkawd txawm ciaj thiab sawv tsees sawv ntsug; cov neeg uas pom nkawd sawv ntawd ntshai kawg li. Nkawd hnov ib lub suab hais nrov nrov saum ntuj tuaj rau nkawd hais tias, “Neb cia li los saum no!” Thaum cov neeg uas ntxub nkawd tseem saib ntsoov nkawd, ces muaj ib tauv huab los coj kiag nkawd mus rau saum ntuj lawm. Tamsim ntawd lub ntiajteb txawm qeeg ua zog koog; lub nroog ntawd raug puastsuaj tas ib feem kaum, neeg tuag txog xya txhiab leej. Cov neeg uas tsis tuag ntshai kawg li, thiab lawv qhuas Vajtswv tus uas muaj hwjchim loj kawg nkaus uas nyob saum ntuj ceebtsheej. Txojkev txomnyem zaum ob twb dhau lawm, tiamsis nej saib, tshuav tsis ntev txojkev txomnyem zaum peb yuav los! Thaum tus timtswv ceebtsheej uas yog tus xya tshuab nws lub xyu, txawm muaj ib lub suab hais nrov nrov saum ntuj tuaj hais tias, “Tus uas muaj hwjchim kav lub ntiajteb no, nws yog peb tus Tswv thiab yog tus Mexiyas, nws yuav kav mus ibtxhis li!” Thaum ntawd nees nkaum plaub tug txwjlaug uas zaum saum lawv cov zwmtxwv ntawm Vajtswv hauv ntej, lawv txawm txhos caug ntua pehawm Vajtswv; lawv hais tias, “Tus Tswv uas yog Vajtswv, koj yog tus uas muaj hwjchim loj kawg nkaus; tus uas nyob nimno thiab tus uas ibtxwm muaj nyob puag thaum ub los lawm! Peb ua koj tsaug, rau qhov koj siv koj lub hwjchim uas loj kawg nkaus thiab nimno koj tabtom yuav pib kav lub ntiajteb no! Cov neeg uas tsis ntseeg Vajtswv lawv chim heev, Rau qhov twb txog lub sijhawm uas koj rau txim lawm. Thiab twb txog lub sijhawm uas koj txiav txim rau cov neeg uas tuag lawm. Twb txog lub sijhawm uas koj yuav muab nqi zog rau koj cov cevlus lawm, thiab muab nqi zog rau txhua tus uas hwm koj, tsis hais tus hlob tus yau huv tibsi. Thiab twb txog lub sijhawm uas koj yuav rhuav cov neeg uas ua rau lub ntiajteb no puastsuaj kom lawv puastsuaj mus!” Thaum ntawd kuv pom lub Tuamtsev uas nyob saum ntuj lub qhovrooj qhib plho, lub Phijxab uas ntim Vajtswv tej lus cog tseg nyob hauv. Ces thaum ntawd xob laim liab pesvog thiab xob nroo nrov nroo ntws, muaj av qeeg thiab muaj lawg los hlob heev. Tom qab ntawd muaj ib yam txujci tseemceeb tshwm saum nruab ntug. Thiab muaj ib tug pojniam hnav lub hnub, nws tsuj nrees lub hli, thiab nws ntoo kaum ob lub hnubqub. Tus pojniam ntawd suab ib plab menyuam twb yuav txog caij yug; thaum nws mob plab yuav yug tus menyuam, nws quaj quaj. Muaj dua ib yam txujci tseemceeb tshwm saum nruab ntug thiab; yam ntawd yog ib tug zaj loj loj liab ploog nyob saud. Tus zaj ntawd muaj xya lub taubhau thiab muaj kaum tus kub, xya lub taubhau ntawd puavleej muaj kausmom kub looj huv tibsi. Zaj muab zaj tus kotw nplawm cov hnubqub saum nruab ntug poob tas ib feem peb. Nws sawv ntawm tus pojniam uas yuav yug menyuam hauv ntej, thiab nws tos rawv yuav noj tus menyuam uas yuav yug los ntawd. Tus pojniam ntawd yug tau ib tug metub. Tus metub ntawd yuav muab qws hlau los kav txhua haivneeg huv tibsi. Tiamsis twb muaj neeg tuaj txeeb tus metub ntawd coj mus rau Vajtswv tus uas zaum ntawm lub zwmtxwv lawm. Ces tus pojniam ntawd txawm khiav mus rau tom tiaj suabpuam thaj chaw uas Vajtswv npaj tseg rau nws lawm; Vajtswv yuav tsomkwm nws qhov ntawd mus txog ib txhiab ob puas rau caum hnub. Tom qab ntawd muaj kev tsov kev rog sib ntaus sib tua saum nruab ntug. Yog Mikhayees thiab Mikhayees cov timtswv nrog zaj sib tua. Zaj thiab zaj cov timtswv tuaj tua Mikhayees, tiamsis zaj tog tua tsis yeej, zaj thiab zaj cov timtswv thiaj tsis tau nyob saum ntuj lawm. Luag muab tus zaj uas loj loj thiab nws cov timtswv pov rau hauv ntiajteb. Tus zaj ntawd yog tus nab txwj nab laug thaum ub uas sawvdaws hu ua dab Ntxwgnyoog lossis hu ua Xatas tus uas dag ntxias neeg ntiajteb. Ces kuv hnov ib lub suab hais nrov nrov saum ntuj tuaj rau kuv hais tias, “Nimno Vajtswv twb cawm peb dim lawm! Nimno Vajtswv twb qhia rau sawvdaws pom lawm hais tias Vajtswv yog tus Vajntxwv uas muaj hwjchim! Thiab nimno tus Mexiyas uas Vajtswv txib los twb qhia rau sawvdaws pom nws lub hwjchim lawm! Rau qhov tus uas niaj hnub niaj hmo nkaug peb cov kwvtij ntseeg tabmeeg rau ntawm Vajtswv twb raug muab pov saum ntuj los lawm. Tus menyuam Yaj cov ntshav thiab Vajtswv Txojlus uas peb qhia twb ua rau lawv kovyeej tus uas nkaug lawv lawm. Txawm yog cov kwvtij ntawd yuav raug kev tuag los lawv tsis khuvxim lawv txojsia li. Yog li ntawd, lub ntuj thiab nej txhua tus uas nyob saum ntuj, nej cia li zoo siab hlo! Tiamsis ntiajteb thiab hiavtxwv yuav raug kev txomnyem heev, rau qhov dab Ntxwgnyoog twb los rau ntawm neb lawm. Dab Ntxwgnyoog chim kawg li, rau qhov nws paub hais tias nws yuav tsis tau nyob ntev lawm.” Thaum tus zaj ntawd nco dheev txog hais tias nws twb los rau hauv ntiajteb lawm, ces nws txawm caum tus pojniam uas yug tus metub ntawd qab. Tiamsis luag muab ob phab tis loj loj ib yam li tis dav npoj rau tus pojniam ntawd kom nws ya taus mus txog nws lub chaw uas nyob tom tiaj suabpuam. Luag yuav tsomkwm tus pojniam ntawd mus txog peb xyoos thiab rau lub hlis, tsis pub tus zaj ntawd ua phem tau rau nws. Ces tus zaj ntawd txawm txau dej tawm hauv nws lub qhovncauj los ib yam li ib tug dej loj loj ntws raws tus pojniam ntawd qab; zaj ua li ntawd kom thiaj kuav tau tus pojniam ntawd mus. Tiamsis av pab tus pojniam ntawd, av txawm cia li tawg pleb thiab qus cov dej uas tawm hauv tus zaj ntawd lub qhovncauj los tas lawm. Zaj chim rau tus pojniam ntawd heev, zaj thiaj mus tawmtsam tus pojniam ntawd cov xeebntxwv uas tseem muaj nyob. Cov xeebntxwv ntawd yog txhua tus uas ua raws li Vajtswv txoj kevcai thiab muab siab npuab Yexus tej lus qhia. Ces tus zaj txawm mus sawv ntawm ntug hiavtxwv. Tom qab ntawd kuv pom ib tug tsiaj tawm hauv hiavtxwv tuaj. Tus tsiaj ntawd muaj kaum tus kub thiab muaj xya lub taubhau; kaum tus kub ntawd puavleej ntoo kausmom kub huv tibsi, thiab xya lub taubhau ntawd txhua lub puavleej muaj ib lub npe phem kawg li uas yog thuam Vajtswv sau rau ntawd. Tus tsiaj uas kuv pom ntawd zoo ib yam li tus tsov pomtxwv, nws tej tes taw zoo li tes taw dais, nws lub qhovncauj zoo li tsov ntxhuav lub. Tus zaj ntawd muab hlo nws lub hwjchim, nws lub zog thiab nws lub zwmtxwv rau tus tsiaj ntawd. Saib zoo li luag twb muab tus tsiaj ntawd ib lub taubhau txiav tu lawm, tiamsis lub qhov txhab twb zoo lawm. Tej neeg uas nyob thoob plaws hauv qab ntuj no xav tsis thoob li, ces lawv txawm qaug siab rau tus zaj ntawd. Tej neeg puavleej tuaj pe tus zaj, rau qhov nws muab nws lub hwjchim rau tus tsiaj ntawd lawm. Thiab lawv tseem pe tus tsiaj ntawd, lawv hais tias, “Leejtwg yuav muaj hwjchim npaum li tus tsiaj no, thiab leejtwg yuav tawmtsam yeej nws.” Luag cia tus tsiaj ntawd hais tej lus phem txob thuam Vajtswv thiab cia tus tsiaj muaj hwjchim ua li ntawd mus txog plaub caug ob lub hlis. Tus tsiaj ntawd txawm pib cem Vajtswv; nws thuam Vajtswv lub npe, Vajtswv lub chaw nyob, thiab foom tsis zoo rau cov uas nyob saum ntuj ceebtsheej huv tibsi. Luag cia tus tsiaj ntawd tawmtsam Vajtswv haivneeg thiab luag cia nws kovyeej lawv. Luag tsa nws ua tus kav tagnrho txhua lub tebchaws, tsis hais haivneeg twg, xeem twg thiab cov neeg uas hais yam lus twg los nws kav huv tibsi. Tej neeg uas nyob hauv qab ntuj no sawvdaws puavleej yuav pe tus tsiaj ntawd. Tsuas yog tshwj cov neeg uas thaum tsis tau tsim ntuj tsim teb, luag twb sau lawv tej npe rau hauv phau ntawv uas sau cov neeg muaj txojsia ntev dhawv mus ibtxhis lawm tej npe. Phau ntawv ntawd yog tus menyuam Yaj uas twb raug luag muab tua lawm phau. Yog nej leejtwg muaj pobntseg, cia li khaws tej lus no cia! Tsis hais leejtwg los thaum txog hnub uas nws yuav raug luag ntes mus, luag yeej yuav ntes nws coj mus; thaum txog hnub uas nws raug luag muab ntaj tua, nws yeej yuav raug. Yog li ntawd, Vajtswv cov neeg yuav tau ua siab ntev thiab muab siab rau ntseeg. Thiab tom qab ntawd kuv pom muaj dua ib tug tsiaj tawm hauv av los. Nws muaj ob tug kub zoo li menyuam yaj tus, nws hais lus ib yam li tus zaj hais. Thaum nws los nws siv lub hwjchim loj uas thawj tug tsiaj muab rau nws. Nws yuam lub ntiajteb thiab tej neeg uas nyob hauv ntiajteb pe thawj tug tsiaj uas tej qhov txhab twb zoo tas lawm. Tus tsiaj uas yog tus ob no ua tau tej txujci loj uas sawvdaws xav tsis thoob li thiab; nws ua kom hluavtaws poob saum ntuj los rau hauv ntiajteb no tabmeeg sawvdaws. Nws ua tej txujci loj ntawd dag ntxias neeg ntiajteb. Luag pub nws ua tej txujci ntawd tabmeeg ntawm thawj tus tsiaj. Thiab luag yuam kom neeg ntiajteb puab ib tug mlom zoo li thawj tug tsiaj uas raug luag muab ntaj tua tiamsis ciaj sia rov los lawm ntawd. Luag cia tus tsiaj uas yog tus ob ntawd rau siav rau pa rau tus mlom uas muaj yam ntxwv zoo li thawj tus tsiaj, ces tus mlom ntawd txawm txawj hais lus thiab mus muab cov neeg uas tsis kam pe tus mlom ntawd tua povtseg. Tus tsiaj ob ntawd yuam tej neeg, tsis hais tus hlob tus yau, tus muaj tus pluag, tus ua qhev lossis tus tsis ua qhev, kom mus nias homthawj rau ntawm lawv sab tes xis lossis ntawm hauvpliaj. Lub homthawj ntawd yog tus tsiaj ntawd lub npe. Yog leejtwg tsis muaj lub homthawj ntawd lossis tsis muaj cov lej xamphaj uas qhia hais tias yog tus tsiaj ntawd lub npe, ces tus ntawd muas tsis tau lossis muag tsis tau ib yam dabtsi hlo li. Tus uas muaj tswvyim, nws yeej yuav paub hais tias tus tsiaj ntawd cov lej xamphaj yog li cas, rau qhov cov lej xamphaj ntawd yeej piv txog ib tug txivneej lub npe. Cov lej xamphaj ntawd yog rau pua rau caum rau. Tom qab ntawd kuv ntsia dheev, kuv pom tus menyuam Yaj sawv saum lub Roob Xi-oos; thiab pom ib puas plaub caug plaub txhiab leej uas muaj tus menyuam Yaj thiab nws Txiv lub npe nias rau ntawm lawv hauvpliaj, lawv nrog tus menyuam Yaj sawv ua ke. Kuv hnov ib lub suab hais saum ntuj tuaj nrov ib yam li lub suab dej tsaws tsag thiab nrov li xob nroo. Lub suab ntawd nrov ib yam li lub suab nkauj nogncas uas luag tabtom qoj. Cov neeg ib puas plaub caug plaub txhiab leej ntawd sawv tig xubntiag rau ntawm lub zwmtxwv thiab ntawm cov qhelunpees thiab cov txwjlaug; lawv hu ib zaj nkauj tshiab uas tsis muaj leejtwg kawm tau, tsuas yog cov uas Vajtswv twb txhiv tawm hauv ntiajteb lawm thiaj kawm tau xwb. Lawv yog cov uas ceev tau lawv lub cev kom huv, thiab lawv tsis tau nrog dua pojniam pw li; lawv yog nraugxwb. Lawv nrog nraim tus menyuam Yaj ua ke. Lawv yog cov uas Vajtswv twb xub txhiv tawm hauv txhua haivneeg los lawm, lawv yog thawj pab uas luag muab fij rau Vajtswv thiab rau tus menyuam Yaj. Cov neeg ntawd yog cov uas yeej tsis tau hais lus dag thiab tsis tau ua ib qhov txhaum li. Ces kuv txawm pom ib tug timtswv ceebtsheej ya sau nruab ntug, nws coj Txojmoo Zoo uas nyob mus ibtxhis los qhia rau tej neeg uas nyob thoob plaws hauv lub qab ntuj no, tsis hais haivneeg twg, xeem twg thiab cov neeg uas hais yam lus twg los nws qhia txhua tus huv tibsi. Nws hais nrov nrov hais tias, “Nej yuav tsum hwm Vajtswv thiab qhuas hais tias Vajtswv yog tus uas muaj hwjchim loj kawg nkaus! Rau qhov twb txog lub sijhawm uas Vajtswv yuav txiav txim rau txhua haivneeg hauv ntiajteb no lawm. Yog li ntawd, nej cia li txhos caug ntua pehawm tus Vajtswv uas yog tus tsim lub ntuj thiab lub ntiajteb, tsim hiavtxwv thiab tej dej cag huv tibsi!” Muaj dua ib tug timtswv ceebtsheej uas yog tus ob ya raws thawj tug timtswv qab los. Thaum nws tseem tabtom ya nws hais tias, “Lub nroog Npanpiloos uas loj tshaj plaws twb vau lawm! Lub nroog ntawd yuam txhua haivneeg kom sawvdaws haus cov cawv txiv hmab qab qab uas piv txog lub nroog ntawd tej kev phem kev qias!” Tus timtswv ceebtsheej uas yog tus peb ya raws tus ob qab los. Thaum nws tseem tabtom ya, nws hais nrov nrov hais tias, “Cov neeg uas pe tus tsiaj thiab tus mlom uas muaj yam ntxwv zoo li tus tsiaj ntawd, thiab muaj tus tsiaj ntawd lub cim nias rau ntawm nws hauvpliaj thiab ntawm nws txhais tes; lawv yuav tsum haus Vajtswv cov cawv txiv hmab uas yeej tsis muaj ib yam dabtsi tov li uas Vajtswv muab hliv rau hauv Vajtswv lub khob dej iab. Cov cawv txiv hmab ntawd piv txog qhov uas Vajtswv txiav txim rau lawv. Txhua tus uas haus yuav raug kev txomnyem hauv cov nplaim taws leejfaj tabmeeg cov timtswv ceebtsheej uas dawbhuv thiab tus menyuam Yaj. Cov pa taws uas tsimtxom lawv ntawd yuav ncho mus ibtxhis. Txhua tus uas pe tus tsiaj thiab tus mlom uas muaj yam ntxwv zoo li tus tsiaj ntawd thiab muaj lub cim uas qhia tus tsiaj ntawd lub npe nias rau lawv lawm, yuav nyob tsau tsawv hauv txojkev tsimtxom tas hnub tas hmo mus ibtxhis li.” Yog li ntawd, Vajtswv haivneeg yuav tsum ua siab ntev, Vajtswv cov neeg yog cov uas coj raws li Vajtswv txoj kevcai thiab muab siab npuab Yexus. Thiab kuv hnov ib lub suab hais saum ntuj tuaj rau kuv hais tias, “Koj cia li sau hais li no: Txij no mus cov neeg uas ua Vajtswv tes haujlwm uas raug luag muab tua lawm, lawv yuav tau nyob kaj siab lug!” Vaj Ntsujplig txawm teb hais tias, “Yeej yog li ntawd tiag! Lawv yuav tso lawv tej haujlwm khwv khwv tseg, rau qhov lawv yeej yuav tau nqi zog rau tej haujlwm uas lawv tau ua los lawm.” Kuv ntsia dheev kuv txawm pom ib tauv huab dawb dawb; muaj ib tug zoo li neeg zaum saum tauv huab ntawd, nws ntoo ib lub kausmom kub, nws txhais tes tuav rawv ib rab liag ntse ntse. Ces txawm muaj ib tug timtswv ceebtsheej tawm hauv lub tuamtsev tuaj, nws hais nrov nrov rau tus uas zaum saum tauv huab dawb hais tias, “Koj cia li muab koj rab liag hlais tej qoobloo uas nyob hauv ntiajteb, rau qhov tej qoobloo ntawd twb siav tas thiab twb txog caij hlais lawm!” Ces tus uas zaum saum tauv huab txawm cev nws rab liag los hlais tej qoobloo uas nyob hauv ntiajteb no tas huv tibsi. Kuv pom dua ib tug timtswv ceebtsheej tawm hauv lub tuamtsev uas nyob saum ntuj tuaj, nws tuav rawv ib rab liag ntse ntse thiab. Thiab muaj dua ib tug timtswv ceebtsheej uas saib hluavtaws, nws tawm ntawm lub thaj tuaj. Nws hais nrov nrov rau tus timtswv uas tuav rab liag hais tias, “Koj cia li muab koj rab liag hlais tej tauv txiv hmab uas nyob hauv ntiajteb, rau qhov tej txiv hmab ntawd twb siav zoo hlais lawm!” Tus timtswv ntawd txawm cev nws rab liag los rau hauv ntiajteb thiab hlais hlo tej tauv txiv hmab pov rau hauv lub qhov tsuam txiv hmab uas piv txog Vajtswv txojkev rau txim. Luag muab tej txiv hmab tsuam rau hauv lub qhov tsuam txiv hmab uas nyob ntawm ntug nroog, txawm muaj ntshav tawm hauv lub qhov ntawd ntws mus deb li peb puas nees nkaum kilumev kev thiab siab txij nees nploojpus. Tom qab ntawd kuv pom dua ib yam txujci tseemceeb tshwm saum nruab ntug ua rau kuv xav tsis thoob li. Kuv pom xya tus timtswv ceebtsheej nqa xya yam sub tawg sub ntsha uas yog Vajtswv txojkev txiav txim zaum kawg. Kuv pom ib yam zoo li hiavtxwv uas ci li iav uas muaj nplaim taws xyaw. Thiab kuv pom cov neeg uas tawmtsam yeej tus tsiaj thiab tus mlom uas muaj yam ntxwv zoo li tus tsiaj ntawd thiab kovyeej tus uas muaj cov lej xamphaj. Cov neeg ntawd sawv ntawm ntug hiavtxwv uas ci li iav, lawv ib leeg nqa ib lub nkauj nogncas uas yog Vajtswv muab rau lawv; lawv hu Mauxes tus uas yog Vajtswv tus tubtxib zaj nkauj thiab tus menyuam Yaj zaj nkauj hais tias, “Tus Tswv uas yog Vajtswv tus uas muaj hwjchim loj kawg nkaus, tej haujlwm uas koj ua puavleej tseemceeb thiab zoo tshaj plaws. Koj yog tus Vajntxwv uas kav tagnrho txhua lub tebchaws huv tibsi. Tej uas koj ua, koj ua ncaj ua ncees thiab raws li qhov tseeb! Tus Tswv, puas muaj leejtwg uas tsis ntshai koj? Puas muaj leejtwg uas tsis hwm koj? Rau qhov koj tib leeg thiaj yog tus uas dawbhuv. Txhua haivneeg yuav tuaj cuag koj thiab pehawm koj, rau qhov sawvdaws pom hais tias koj ua koj tes haujlwm ncaj ncees.” Tom qab ntawd kuv pom lub tuamtsev saum ntuj ceebtsheej lub qhovrooj qhib hlo, kuv pom lub Tsevntaub uas luag muab Vajtswv txojlus timkhawv tso rau hauv. Ces xya tus timtswv uas nqa xya yam sub tawg sub ntsha tawm hauv lub tuamtsev tuaj rau sab nraud, lawv ib leeg hnav ibce ris tsho ntaubmag dawb dawb thiab ib leeg sia ib txoj siv kub saum qhovtso. Plaub tug qhelunpees uas sawv vij Vajtswv lub zwmtxwv, muaj ib tug txawm muab xya lub tais kub cev rau xya tus timtswv ntawd. Xya lub tais kub ntawd ntim puv nkaus Vajtswv tus uas muaj sia nyob txojkev rau txim. Vajtswv lub tshwjchim uas ci ntsa iab thiab Vajtswv lub hwjchim ncho pa lug ib yam li pa taws puv nkaus hauv lub tuamtsev. Thaum xya yam sub tawg sub ntsha uas xya tus timtswv ntawd nqa los tseem tsis tau dua tas, tsis muaj leejtwg yuav mus tau rau hauv lub tuamtsev li. Kuv hnov ib lub suab hais nrov nrov hauv lub tuamtsev tuaj rau xya tus timtswv ceebtsheej ntawd hais tias, “Nej cia li mus muab xya lub tais uas ntim Vajtswv txojkev txiav txim hliv rau hauv ntiajteb!” Thawj tug timtswv ceebtsheej muab nws lub tais hliv rau hauv ntiajteb. Ces cov neeg uas muaj tus tsiaj thiab tus mlom uas muaj yam ntxwv zoo li tus tsiaj ntawd lub cim nias rau thiab pe tus tsiaj ntawd txawm mob rwj thoob plaws ibce huv tibsi. Tom qab ntawd tus timtswv ceebtsheej uas yog tus ob muab nws lub tais hliv rau hauv hiavtxwv. Ces dej txawm txia ua ntshav zoo li tej ntshav neeg tuag, thiab txhua yam muaj sia uas nyob hauv hiavtxwv puavleej tuag tas huv tibsi. Tus timtswv ceebtsheej uas yog tus peb muab nws lub tais hliv rau hauv txhua tus dej loj thiab txhua lub qhovdej txhawv, ces tej dej ntawd txawm txia ua ntshav tagnrho. Kuv hnov tus timtswv uas saib tej dej hais tias, “Tus Tswv uas Dawbhuv, koj yog tus muaj sia nyob thiab yog tus uas ibtxwm nyob thaum ub los, koj twb txiav txim ncaj rau tej ntawd lawm! Qhov uas koj muab ntshav rau lawv haus nyuam qhuav haum qhov uas lawv muab koj cov neeg thiab koj cov cevlus tua povtseg lawm!” Ces kuv hnov ib lub suab hais ntawm lub thaj fij tuaj hais tias, “Yog tiag, tus Tswv uas yog Vajtswv, koj yog tus uas muaj hwjchim loj kawg nkaus! Koj txiav txim ncaj ncees thiab raws li qhov tseeb!” Tom qab ntawd tus timtswv ceebtsheej uas yog tus plaub txawm muab nws lub tais hliv rau saum lub hnub, ces tej duab tshav ntuj cia li kub tej neeg ib yam li hluavtaws kub. Cov neeg uas raug tej duab tshav ntuj ntawd kub txawm cem Vajtswv tus uas muaj hwjchim loj dua tej sub tawg sub ntsha ntawd lub npe. Txawm yog lawv raug tshav ntuj kub los lawv tseem tsis tso lawv tej kev txhaum tseg thiab tsis hwm Vajtswv li. Tom qab ntawd tus timtswv ceebtsheej uas yog tus tsib txawm muab nws lub tais hliv rau saum tus tsiaj ntawd lub zwmtxwv. Ces lub tebchaws uas tus tsiaj ntawd kav txawm tsaus ntuj nti, thiab tej neeg puavleej tom nplaig ntxis, rau qhov mob lawv heev, lawv txawm cem Vajtswv tus uas nyob saum ntuj, rau qhov lawv tej rwj mob ncus nco. Txawm yog mob lawv npaum li ntawd los lawv yeej tsis tso lawv tej kev phem kev qias tseg li. Tom qab ntawd tus timtswv ceebtsheej uas yog tus rau muab nws lub tais hliv rau tus dej loj Efalates, ces tus dej ntawd txawm nqhuab kiag ua kev qhuav qhawv rau cov vajntxwv uas nyob sab hnubtuaj tau kev tuaj. Kuv txawm pom peb tug ntsujplig phem qias uas muaj yam ntxwv zoo li tus qav tawm hauv tus zaj, tus tsiaj thiab tus cevlus cuav lub qhovncauj los. Lawv yog cov ntsujplig ntawd cov dab uas ua tau tej txujci loj uas xav tsis thoob. Peb tug ntsujplig ntawd mus cuag txhua tus vajntxwv uas nyob hauv ntiajteb no thiab coj lawv tuaj ua ke ua rog rau hnub tseemceeb uas Vajtswv tus uas muaj hwjchim loj kawg nkaus teem cia lawm. “Nej cia li ua tib zoo mloog kuv tej lus! Kuv yuav los ib yam li tus tubsab tuaj! tus uas ceevfaj zov tos thiab txuag nws cev ris tsho kom zoo, nws yuav tau nyob kaj siab lug. Nws tsis liabqab, nws yuav muaj ntsejmuag mus rau ub rau no thiab tsis txajmuag rau leejtwg li!” Tom qab ntawd peb tug dab txawm coj cov vajntxwv tuaj nyob ua ke ntawm ib qhov chaw uas lus Henplais hu ua Amankedoos. Ces tus timtswv ceebtsheej uas yog tus xya mam muab nws lub tais hliv rau saum nruab ntug. Ces txawm muaj ib lub suab hais nrov nrov ntawm Vajtswv lub zwmtxwv uas nyob hauv lub tuamtsev tuaj hais tias, “Tiav lawm lauj!” Ces xob txawm laim liab pesvog, xob nroo nrov nroo ntws, thiab muaj av qeeg loj. Txij thaum tsim neeg los txog niaj hnub no yeej tsis tau muaj dua av qeeg loj li zaum no li! Lub nroog uas loj kawg nkaus tej av txawm tawg rhe ua peb feem, thiab tej nroog uas nyob hauv txhua lub tebchaws puavleej puastsuaj tas huv tibsi. Tej ntawd ua rau sawvdaws paub hais tias Vajtswv nco ntsoov lub nroog Npanpiloos uas loj kawg nkaus thiab muab Vajtswv khob cawv txiv hmab uas piv txog Vajtswv txojkev txiav txim rau lub nroog ntawd haus. Txhua lub koog povtxwv thiab txhua lub roob puavleej yaj thiab ploj tagnrho. Muaj tej lub lawg loj loj uas hnyav txog plaub caug tsib kilus poob saum ntuj los raug tej neeg. Sawvdaws txawm cem Vajtswv, rau qhov lawv raug tej sub tawg sub ntsha uas lawg ntaus; tej ntawd ua rau lawv raug kev txomnyem kawg li. Tom qab ntawd xya tus timtswv ceebtsheej uas nqa xya lub tais muaj ib tug txawm los hais rau kuv hais tias, “Koj cia li nrog kuv mus, kuv yuav coj koj mus saib tus niamntiav uas phem kawg nkaus saib nws yuav raug txim li cas. Tus niamntiav ntawd yog lub nroog loj uas ua rau ntawm ob peb ceg dej sib tshuam. Tej vajntxwv uas nyob hauv ntiajteb no puavleej nrog tus niamntiav uas phem kawg nkaus ntawd sib dee. Thiab tej neeg ntiajteb twb haus tej cawv txiv hmab uas yog tus pojniam ntawd tej kev phem kev qias qaug lawm.” Vaj Ntsujplig txawm los kav tagnrho kuv lub siab, ces tus timtswv ceebtsheej ntawd txawm coj kuv mus rau tom tiaj suabpuam. Thaum kuv mus txog tod kuv pom ib tug pojniam caij ib tug tsiaj liab ploog; tus tsiaj ntawd muaj ntau lub npe phem phem sau thoob plaws nws lub cev. Nws muaj xya lub taubhau thiab kaum tus kub. Tus pojniam ntawd hnav ib cev tsoos tsho xiav thiab liab ploog. Nws coj saw kub, coj tej qe zeb ci ci uas muaj nqis thiab coj tej hlaws thoob plaws ibce. Nws txhais tes tuav rawv ib lub tais kub uas ntim puv nkaus tej kev phem kev qias uas nws tau ua tas los lawm. Muaj ib lub npe sau rau ntawm tus pojniam ntawd lub hauvpliaj uas tsis muaj neeg paub lub ntsiab lus, lub npe ntawd sau hais tias, “Lub nroog Npanpiloos uas loj dua ntais, koj yog cov niamntiav thiab tej neeg ntiajteb uas ua phem ua qias leej niam.” Thiab kuv pom tus pojniam ntawd twb haus Vajtswv cov neeg cov ntshav thiab cov neeg uas raug luag tua cov ntshav qaug lawm, cov neeg ntawd yog cov uas muab siab npuab Yexus. Thaum kuv pom tus pojniam ntawd ua rau kuv xav tsis thoob li. Tus timtswv ntawd nug kuv hais tias, “Ua li cas koj thiaj xav tsis thoob? Kuv yuav qhia tus pojniam ntawd thiab tus tsiaj uas muaj xya lub taubhau thiab kaum tus kub uas tus pojniam ntawd caij lub ntsiab rau koj paub. Tus tsiaj ntawd yav tas los nws muaj sia nyob, tiamsis nimno nws twb tsis muaj sia lawm; nws yuav tawm hauv lub qhov tob tob los thiab nws yuav mus raug kev puastsuaj. Tej neeg ntiajteb uas tsis muaj npe sau thaum tsis tau tsim ntuj tsim teb rau hauv phau ntawv uas sau cov neeg muaj sia nyob mus ibtxhis lawm tej npe, thaum lawv pom tus tsiaj ntawd lawv yuav xav tsis thoob li, rau qhov yav tas los tus tsiaj ntawd muaj sia, tiamsis nimno tsis muaj lawm thiab nws tseem yuav rov tshwm los. “Tus uas muaj tswvyim, nws yeej yuav totaub zaj no. Tus tsiaj ntawd xya lub taubhau yog xya lub pov roob uas tus pojniam ntawd nyob, thiab xya lub pov roob ntawd yog xya tus vajntxwv. Muaj tsib tug vajntxwv twb poob hwjchim lawm, tshuav ib tug tseem kav tebchaws, thiab muaj ib tug tseem tsis tau los kav tebchaws; thaum nws los nws yuav kav tebchaws ib ntus xwb. Tus tsiaj uas yav tas los muaj sia, tiamsis nimno tsis muaj sia lawm yog ib tug vajntxwv uas yog tus yim uas nrog xya tus vajntxwv ntawd ua ib pab, thiab nws yuav mus raug kev puastsuaj. “Kaum tus kub uas koj pom ntawd yog kaum tus vajntxwv uas tseem tsis tau los ua vajntxwv, tiamsis lawv yuav muaj hwjchim ib yam li vajntxwv; lawv yuav nrog tus tsiaj ntawd kav tebchaws ib txoos teev xwb. Kaum tus vajntxwv ntawd puavleej koom ib lub siab, thiab lawv muab tej hwjchim uas lawv muaj tso rau tus tsiaj ntawd. Lawv yuav tawmtsam tus menyuam Yaj, tiamsis tus menyuam Yaj thiab cov neeg ncaj ncees uas tus menyuam yaj xaiv los ua nws cov thwjtim lawm yuav tawmtsam yeej cov vajntxwv ntawd, rau qhov tus menyuam Yaj yog tus Tswv ntawm txhua tus tswv thiab yog tus Vajntxwv ntawm txhua tus vajntxwv.” Tus timtswv ceebtsheej rov hais rau kuv hais tias, “Ob peb ceg dej uas koj pom tus niamntiav ntawd nyob rawv saud yog piv txog txhua pab neeg txhua xeem neeg thiab txhua haivneeg tsis hais cov uas hais yam lus twg huv tibsi. Kaum tus kub thiab niag tsiaj uas koj pom puavleej yuav ntxub tus niamntiav ntawd. Lawv yuav txeeb txhua yam uas nws muaj huv tibsi mus thiab cia nws nyob liabqab; lawv yuav noj nws cev nqaij thiab muab hluavtaws hlawv nws povtseg. Rau qhov Vajtswv tshoov lawv lub siab kom lawv xav ua raws li Vajtswv lub siab nyiam. Lawv koom ua ib lub siab muab tus tsiaj ntawd tsa ua tus uas kav lawv mus txog thaum muaj tiav raws li tej uas Vajtswv tau hais tseg lawm. “Tus niamntiav uas koj pom ntawd yog lub nroog loj dua ntais uas kav tagnrho tej vajntxwv uas nyob hauv ntiajteb no.” Tom qab ntawd kuv pom dua ib tug timtswv ceebtsheej los saum ntuj los. Nws muaj hwjchim thiab ci ntsa iab rau lub ntiajteb. Nws hais nrov nrov hais tias, “Lub nroog Npanpiloos uas loj dua ntais twb vau lawm! Nws twb vau lawm! Nimno tej dab thiab tej ntsujplig phem twb los nyob hauv lub nroog ntawd lawm; txhua yam noog uas phem thiab qias los nyob hauv lub nroog ntawd lawm thiab. Rau qhov lub nroog ntawd yog lub uas ce cawv txiv hmab los yuam rau txhua haivneeg haus. Cov cawv txiv hmab uas qab qab ntawd piv txog lub nroog ntawd tej kev phem kev qias. Tej vajntxwv uas nyob hauv ntiajteb no tuaj nrog nws sib dee, thiab tej tub lag tub luam uas nyob hauv ntiajteb npluanuj tas twb yog vim tej kev phem kev qias uas lub nroog ntawd ua tsis paub dhuav li!” Tom qab ntawd kuv rov hnov dua ib lub suab hais saum ntuj tuaj hais tias, “Kuv haivneeg, nej cia li tawm plaws hauv lub nroog ntawd mus! Nej tsis txhob nrog tus pojniam ntawd ua txhaum, nej thiaj li tsis nrog nws raug txim! Rau qhov nws tej kev txhaum twb tib mus nto ntuj lawm, thiab Vajtswv yeej nco ntsoov tej kev phem kev qias uas lub nroog ntawd niaj hnub ua. Nws ua li cas rau nej lawm, nej cia li ua li ntawd rov rau nws. Nej yuav tsum ua ntau tshaj ib npaug pauj tej uas nws tau ua rau nej lawm. Nws twb do cov tshuaj iab rau nej haus lawm, nej yuav tsum do cov tshuaj uas iab dua nws cov ib npaug rau nws haus. Nws zoo siab thiab npluanuj heev npaum li cas, nej cia li ua kom nws tau kev ntxhov siab thiab raug kev txomnyem heev npaum li ntawd. Rau qhov nws pheej xav hais tias, ‘Kuv zaum ntawm no, kuv twb zoo ib yam li tus poj vajntxwv lawm! Kuv tsis yog pojntsuam. Kuv yuav tsis raug kev txomnyem ib zaug li!’ Yog li ntawd, tib hnub xwb tej sub tawg sub ntsha yuav los raug nws; tsis hais kev mob kev nkeeg, kev ntxhov siab thiab kev tshaib kev nqhis puavleej yuav raug nws, thiab hluavtaws yuav kub nws tas huv tibsi. Rau qhov tus Tswv uas yog Vajtswv uas txiav txim rau lub nroog ntawd, nws yog tus uas muaj hwjchim loj kawg nkaus.” Tej vajntxwv hauv ntiajteb uas nrog lub nroog ntawd sib dee thiab ua kev phem kev qias, thaum lawv pom lub nroog kub hnyiab pa taws ncho auv niab, lawv yuav quaj nyiav ntsoog qees. Lawv tuaj deb deb saib, rau qhov lawv tsis xav pom lub nroog ntawd raug kev puastsuaj. Lawv seev hais tias, “Lub nroog Npanpiloos uas loj thiab nto moo, koj twb puastsuaj lawm lauj! Nyuam qhuav tib txoos teev xwb koj txawm cia li raug txim lawm!” Tej tub lag tub luam uas nyob hauv ntiajteb no los quaj nyiav ntsoog qees rau lub nroog ntawd, vim tsis muaj neeg tuaj yuav lawv tej khoom lawm; tsis muaj leejtwg yuav lawv tej nyiaj tej kub, tej qe zeb ci ci uas muaj nqis, tej hlaws, tej ntaubmag zoo zoo, ntaub xiav, ntaub tshwbkab, ntaub liab thiab tej ntoo uas muaj nqis, tej uas muab kaus ntxhw ua, tej uas muab tooj dag, muab hlau thiab muab hlaws txaij ua; tej roj ntoos tsw qab xeenamoos, tej hwjtxob, tej hmoov tshuaj tsw qab, tej tshuaj tsw qab mules, tej ntoo tsw qab, tej cawv txiv hmab, tej roj, tej hmoov nplej, tej hmoov pobkws, tej nyuj, tej yaj, tej nees, tej tsheb nees thiab tej tubqhe, txawm yog neeg txojsia los tsis muaj leejtwg xav yuav. Tej tub lag tub luam hais rau lub nroog ntawd hais tias, “Txhua tsav yam zoo uas koj ntshaw twb ploj tas lawm, koj tej qhov txhia chaw thiab tej nyiaj tej kub uas ci ntsa iab los puavleej poob tas. Koj yuav nrhiav tsis tau tej ntawd rov los dua ib zaug li lawm!” Tej tub lag tub luam uas ua luam npluanuj hauv lub nroog ntawd, lawv yuav tuaj deb deb saib, rau qhov lawv tsis xav pom lub nroog ntawd raug kev puastsuaj. Lawv yuav quaj nyiav ntsoog qees thiab seev zom zaws hais tias, “Lub nroog uas loj, koj twb puastsuaj tas lawm! Koj puastsuaj lawm lauj! Koj ibtxwm hnav tej tsoos tsho ntaub yajpwm, ntaub xiav, ntaub liab, koj coj saw nyiaj saw kub, coj tej qe zeb ci ci uas muaj nqis thiab coj hlaws thoob plaws ibce! Ua li cas tib txoos teev xwb koj tej kev npluanuj txawm cia li ploj ntais mus lawm!” Tej neeg tsav nkoj, tej neeg caij nkoj, tej neeg ua haujlwm hauv lub nkoj thiab tej neeg uas nrhiav noj hauv hiavtxwv txhua tus puavleej tuaj deb deb saib; thaum lawv pom lub nroog ntawd kub hnyiab pa ncho auv niab, lawv qw nrov nrov hais tias, “Ibtxwm yeej tsis muaj ib lub nroog luaj li lub no!” Lawv tsuab hmoov av rau saum lawv taubhau, lawv quaj nyiav ntsoog qees hais tias, “Lub nroog uas loj, koj puastsuaj lawm! Koj puastsuaj lawm lauj! Lub nroog no yog lub uas ua rau tej neeg muaj nkoj khiav mus mus los los hauv hiavtxwv npluanuj tas! Ua li cas tib txoos teev xwb txhua tsav yam uas koj muaj hauv lub nroog no txawm siv ploj tas huv tibsi lawm.” Lub ntuj, koj cia li zoo siab rau qhov lub nroog no twb puastsuaj tas lawm! Vajtswv cov neeg, cov timthawj thiab cov cev Vajtswv lus, cia li zoo sab! Rau qhov Vajtswv twb rau txim rau lub nroog uas tsimtxom nej lawm! Ces ib tug timtswv ceebtsheej uas muaj hwjchim txawm muab ib lub pobzeb uas luaj li ib txhib zeb pov rau hauv hiavtxwv, thiab nws hais tias, “Luag yuav muab lub nroog Npanpiloos uas loj dua ntais ntawd ua kom puastsuaj tas ib yam li luag muab lub pobzeb no ntsawm. Txij no mus yuav tsis muaj leejtwg pom lub nroog no li lawm. Yuav tsis muaj leejtwg hnov suab raj suab xyu thiab suab nkauj nogncas nrov hauv lub nroog no li lawm. Yuav tsis muaj leejtwg ua vaj ua tsev, nchuav tooj nchuav hlau thiab yuav tsis muaj suab zom zeb tuav cos nrov li lawm! Yuav tsis muaj leejtwg pom teeb cig hauv lub nroog no; thiab yuav tsis muaj leejtwg hnov nkauj nyab nraug vauv lub suab li lawm. Tej tub lag tub luam uas nyob hauv lub nroog no puavleej yog cov uas muaj tswvyim loj dua tej tub lag tub luam hauv ntiajteb no huv tibsi. Thiab lub nroog no tau ua khawvkoob dag ntxias txhua haivneeg hauv ntiajteb no kom qaug siab rau nws!” Lub nroog Npanpiloos raug txim, rau qhov nws muab cov uas cev Vajtswv lus thiab Vajtswv cov neeg uas nyob hauv ntiajteb no tua povtseg tas lawm. Tom qab ntawd kuv hnov ib lub suab nrov ib yam li ib pab neeg coob coob nyob saum ntuj lub suab hais zom zaws hais tias, “Cia li qhuas Vajtswv! Qhuas nws txojkev cawm dim, nws muaj tshwjchim ci ntsa iab thiab muaj hwjchim! Vajtswv txiav txim ncaj ncees thiab nws ua raws li qhov tseeb! Vajtswv rau txim rau tus niamntiav uas dag ntxias neeg ntiajteb ua phem ua qias. Vajtswv rau txim rau nws, rau qhov nws muab Vajtswv cov tubtxib tua povtseg tas lawm.” Lawv rov hais nrov nrov hais tias, “Cia li qhuas Vajtswv! Tej hluavtaws uas kub lub nroog loj ntawd yuav cig ua nplaim ntswj pesyos thiab ncho pa mus tas ibtxhis li!” Nees nkaum plaub tug txwjlaug thiab cov qhelunpees txawm txhos caug ntua pehawm Vajtswv tus uas zaum saum lub zwmtxwv. Lawv hais tias, “Amees! Cia li qhuas Vajtswv!” Tom qab ntawd muaj dua ib lub suab hais ntawm lub zwmtxwv tuaj hais tias, “Vajtswv cov tubtxib thiab nws cov neeg, tsis hais tus hlob tus yau uas hwm Vajtswv, cia li qhuas Vajtswv!” Ces kuv hnov ib lub suab nrov zom zaws ib yam li ib pab neeg coob coob hais lus thiab nrov ib yam li dej tsaws tsag hlob hlob thiab nrov ib yam li suab xob nroo. Lub suab ntawd hais tias, “Cia li qhuas Vajtswv! Rau qhov tus Tswv uas yog peb tug Vajtswv uas muaj hwjchim loj kawg nkaus, nws yog Vajntxwv! Peb cia li zoo siab thiab xyivfab hlo; peb cia li qhuas Vajtswv lub hwjchim uas loj kawg nkaus! Rau qhov twb txog lub sijhawm uas tus menyuam Yaj ua tshoob, thiab nws tus nkauj nyab twb tu cev txhij lawm. Luag muab ib cev tsoos tsho ntaubmag dawb rau tus nkauj nyab hnav.” (Cev ris tsho ntaubmag dawb yog piv txog tej haujlwm ncaj ncees uas Vajtswv cov neeg niaj hnub ua). Ces tus timtswv ceebtsheej hais rau kuv hais tias, “Koj cia li sau hais tias cov neeg uas tus menyuam Yaj caw mus nrog nws noj tshoob yog cov uas tau nyob kaj siab lug.” Thiab tus timtswv hais dua rau kuv hais tias, “Tej lus no yog Vajtswv tej lus tiag.” Kuv txawm txhos caug ntua ntawm tus timtswv ntawd kotaw yuav pe nws, tiamsis nws hais rau kuv hais tias, “Tsis txhob pe kuv! Kuv yog ib tug tubtxib ib yam li koj thiab ib yam li koj cov kwvtij txhua tus uas Yexus tau qhia rau lawv lawm xwb. Koj cia li pehawm Vajtswv xwb!” Rau qhov tej lus tseeb uas Yexus qhia rau sawvdaws paub yog tej uas Vajtswv qhia rau cov uas cev Vajtswv lus lawm. Tom qab ntawd kuv txawm pom rooj ntug ceebtsheej qhib, thiab kuv pom ib tug txiv nees dawb nyob ntawd. Tus uas caij tus txiv neeg dawb ntawd hu ua Ncaj thiab Tseeb; nws yog tus uas rau txim thiab yog tus uas ua tsov ua rog ncaj ncees. Nws ob lub qhovmuag ci ib yam li nplaim taws, thiab nws ntoo ntau lub kausmom kub. Muaj ib lub npe sau rau ntawm nws lub cev, tiamsis tsis muaj leejtwg paub lub npe ntawd, tsuas yog nws tib leeg thiaj paub xwb. Nws lub tsho ntev lo ntshav thoob plaws. Sawvdaws hu nws lub npe hais tias, “Vajtswv Txojlus.” Cov tubrog saum ntuj ceebtsheej raws nws qab los; lawv ib leeg caij ib tug txiv neeg dawb, thiab ib leeg hnav ib cev tsoos tsho ntaubmag dawb. Muaj ib rab ntaj ntse ntse tawm hauv nws lub qhovncauj los. Nws yuav muab rab ntaj ntawd tua txhua haivneeg thiab muab qws hlau kav lawv. Nws yuav muab cov txiv hmab uas nyob hauv lub qhov tsuam txiv hmab tsuam huv tibsi. Lub qhov tsuam txiv hmab piv txog Vajtswv tus uas muaj hwjchim loj kawg nkaus txojkev chim thiab txojkev rau txim. Muaj ib lub npe sau rau ntawm nws lub tsho ntev thiab ntawm nws ib sab ncejpuab hais tias, “Tus Vajntxwv ntawm txhua tus vajntxwv thiab tus Tswv ntawm txhua tus tswv.” Tom qab ntawd kuv pom dua ib tug timtswv ceebtsheej sawv saum lub hnub, nws hais nrov nrov rau tej noog uas ya saum nruab ntug hais tias, “Nej cia li sau nthwv tuaj noj Vajtswv rooj mov uas loj! Nej cia li tuaj thiab noj cov vajntxwv, cov thawjcoj, tej tubrog, tej nees thiab cov neeg uas caij nees tej nqaij, thiab noj txhua haivneeg, tsis hais cov uas ua qhev, cov uas tsis ua qhev thiab tsis hais tus hlob tus yau tej nqaij huv tibsi!” Kuv pom tus tsiaj thiab cov vajntxwv hauv ntiajteb thiab lawv tej tubrog tuaj ua ke yuav ua rog rau tus uas caij tus txiv neeg dawb thiab nws tej tubrog. Luag ntes tau tus tsiaj ntawd thiab ntes tau tus cevlus cuav uas dag hais tias nws yog ib tug uas cev Vajtswv lus. (Tus cevlus cuav ntawd yog tus uas ua tej txujci tabmeeg tus tsiaj ntawd dag ntxias cov neeg uas muaj tus tsiaj ntawd lub cim nias rau lawv lawm, thiab nws ntxias cov neeg uas pe tus mlom uas muaj yam ntxwv zoo li tus tsiaj ntawd.) Luag cia li muab tus tsiaj thiab tus cevlus cuav ntawd pov rau hauv cov nplaim taws leejfaj uas cig ntswj pesyos. Rab ntaj uas tawm hauv tus uas caij tus txiv neeg dawb ntawd lub qhovncauj los txawm tua tus tsiaj thiab tus cevlus ntawd tej tubrog tuag tas huv tibsi. Ces tej noog txawm sau nthwv tuaj muab cov neeg uas tuag ntawd tej cev dua pes rhe noj. Tom qab ntawd kuv pom ib tug timtswv ceebtsheej los saum ntuj los, nws coj tus yuamsij uas qhib lub qhov tob tob, thiab nws tuav ib txoj saw hlau loj loj. Nws muab tus zaj uas yog tus nab txwj nab laug uas sawvdaws hu ua dab Ntxwgnyoog lossis hu ua Xatas khi kiag cia ib txhiab xyoo. Tus timtswv ntawd muab tus zaj pov rhees rau hauv lub qhov tob tob. Nws muab ntsuasphoo xauv thiab nias homthawj rau kom tus zaj tsis tau kev los ntxias txhua haivneeg ib txhiab xyoo. Tom qab uas dhau ib txhiab xyoo lawm mam li tso tus zaj ntawd tawm los ib nyuag ntu. Tom qab ntawd kuv pom ntau lub zwmtxwv thiab pom cov neeg uas zaum saum cov zwmtxwv ntawd twb tau lub hwjchim ua cov txiav txim lawm. Thiab kuv pom cov neeg uas luag muab txiav cajdab tuag lawm cov ntsujplig. Lawv raug tua rau qhov lawv qhia tej lus tseeb uas Yexus qhia rau lawv thiab lawv qhia Vajtswv Txojlus. Lawv yeej tsis pe tus tsiaj thiab tus mlom uas muaj yam ntxwv zoo li tus tsiaj ntawd; lawv tsis muaj tus tsiaj ntawd lub cim nias rau ntawm lawv hauvpliaj lossis ntawm lawv txhais tes. Lawv nrog Yexus Khetos nyob thiab nrog nws kav ib txhiab xyoo. (Dua li tej, lawv yuav tsum tos kom dhau ib txhiab xyoo tso, lawv mam li sawv hauv qhov tuag rov los.) Cov neeg uas raug luag muab txiav cajdab yog thawj cov uas sawv hauv qhov tuag rov qab los. Thawj pab uas sawv hauv qhov tuag rov los no lawv tau nyob kaj siab lug. Txojkev tuag zaum ob tsis muaj hwjchim yuam tau lawv lawm. Lawv yuav ua Vajtswv thiab ua Yexus Khetos cov povthawj thiab lawv yuav nrog Yexus kav ib txhiab xyoo. Tom qab uas dhau ib txhiab xyoo lawm, luag mam li qhib lub qhov thiab tso dab Ntxwgnyoog tawm los; thaum nws tawm los nws yuav mus dag ntxias txhua haivneeg uas nyob plaub ceg kaum ntuj. Cov neeg ntawd hu ua Nkaus thiab Mankaus. Dab Ntxwgnyoog yuav sau txhua tus huv tibsi tuaj ua rog, cov neeg uas tuaj ntawd coob ib yam li tej suabzeb ntawm ntug hiavtxwv. Lawv yuav tuaj mus thoob plaws ntiajteb thiab puav Vajtswv cov neeg lub loog thiab lub nroog uas Vajtswv hlub. Tiamsis muaj hluavtaws poob saum ntuj los kub cov neeg ntawd tuag tas huv tibsi. Ces luag muab tus dab Ntxwgnyoog uas dag ntxias cov neeg ntawd pov rau hauv cov nplaim taws leejfaj uas cig tswj pesyos. Qhov chaw ntawd yog qhov chaw uas luag twb xub muab tus tsiaj thiab tus cevlus cuav pov rau hauv lawm. Lawv yuav raug kev tsimtxom tas hnub tas hmo mus ibtxhis li. Tom qab ntawd kuv pom Vajtswv lub zwmtxwv loj uas dawb paug thiab muaj ib tug zaum saum lub zwmtxwv ntawd. Lub ntiajteb thiab lub ntuj cia li ploj ntais ntawm nws xubntiag mus lawm. Thiab kuv pom cov neeg uas tuag lawm, tsis hais tus hlob tus yau, sawvdaws puavleej sawv ntawm tus uas zaum saum lub zwmtxwv hauv ntej. Luag muab tej phau ntawv los nthuav, thiab muab ib phau ntawv los nthuav saib, phau ntawd yog phau ntawv uas sau cov neeg uas muaj sia ntev mus ibtxhis lawm tej npe. Luag txiav txim rau cov neeg uas tuag lawm raws li lawv tes haujlwm uas twb muab sau cia rau hauv tej ntawv ntawd lawm. Dej hiavtxwv xa tej neeg uas tuag rau hauv hiavtxwv rov qab los. Txojkev tuag thiab tubtuag teb los xa cov neeg tuag lawm rov qab los ib yam nkaus. Luag txiav txim rau txhua tus raws li tes haujlwm uas lawv tau ua los lawm. Luag muab txojkev tuag thiab tubtuag teb pov rau hauv ntujtawg. (Lub ntujtawg ntawd yog txojkev tuag zaum ob.) Txhua tus uas tsis muaj npe sau rau hauv phau ntawv uas sau cov neeg uas muaj txojsia ntev mus ibtxhis lawm tej npe, luag muab cov neeg ntawd pov rau hauv ntujtawg. Tom qab ntawd kuv pom lub ntuj tshiab thiab lub ntiajteb tshiab. Lub ntuj qub thiab lub ntiajteb qub twb ploj tas lawm, thiab dej hiavtxwv los ploj tas ib yam nkaus. Thiab kuv pom lub nroog Dawbhuv uas yog lub nroog Yeluxalees tshiab los ntawm Vajtswv tus uas nyob saum ntuj ceebtsheej los. Vajtswv twb tu lub nroog ntawd txhij cia lawm ib yam li tus nkauj nyab tu cev tos tus nraug vauv. Kuv hnov ib lub suab hais nrov nrov ntawm Vajtswv lub zwmtxwv tuaj hais tias, “Nimno Vajtswv twb los nrog neeg nyob lawm! Nws yuav nrog lawv nyob, lawv yuav ua nws haivneeg thiab nws yuav nrog lawv nyob thiab yuav ua lawv tus Vajtswv. Nws yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawvdaws ibtxwm muaj los twb ploj tas lawm.” Tus uas zaum saum lub zwmtxwv hais rau kuv hais tias, “Nimno kuv yuav tsim dua ib puas tsav yam tshiab!” Thiab nws hais dua rau kuv hais tias, “Koj cia li sau tej lus no cia, rau qhov tej lus no yog lus tseeb thiab tso siab tau.” Thiab nws hais tias, “Tiav lawm! Kuv yog Alafas thiab yog Aumenkas, kuv yog lub hauvpaus thiab kuv yog lub ntsis. Kuv yuav pub cov dej uas haus muaj txojsia hauv lub qhovdej txhawv rau tus uas nqhis dej haus, kuv pub dawb dawb xwb tsis yuav nqi li. Kuv yuav ua txhua tus uas kovyeej lawm tus Vajtswv, thiab lawv yuav ua kuv cov tub. Tiamsis cov neeg siab yau, cov neeg ntxeev sab, cov neeg nyiam ua phem ua qias, cov neeg tua neeg, cov neeg ua kev nkauj kev nraug, cov neeg ua khawvkoob, cov neeg pe dab pe mlom thiab cov neeg dag, lawv txhua tus yuav poob rau hauv cov nplaim taws leejfaj uas cig ntswj pesyos uas yog txojkev tuag zaum ob. Qhov chaw ntawd yog qhov chaw uas twb xub tu tseg cia rau lawv lawm.” Xya tus timtswv ceebtsheej uas nqa xya lub tais uas rau xya yam sub tawg sub ntsha puv nkaus, ib tug los hais rau kuv hais tias, “Koj nrog kuv mus saib tus Nkauj Nyab uas yog tus menyuam Yaj tus pojniam.” Vaj Ntsujplig los kav tagnrho kuv lub siab, ces tus timtswv ntawd coj kuv nce mus saum ib lub ncov roob siab siab. Nws taw tes qhia lub nroog Yeluxalees rau kuv saib, yog lub nroog Dawbhuv uas tabtom los ntawm Vajtswv tus uas nyob saum ntuj los. Vajtswv lub tshwjchim ci ntsa iab hauv lub nroog ntawd tuaj. Lub nroog ntawd ci ntsa iab ib yam li lub qe zeb muaj nqis, zoo li qe zeb yapes uas pom kev tshab plaws ib yam li daim iav. Lub nroog ntawd muaj tus ntsa yeej loj loj thiab siab siab thaiv, muaj kaum ob lub roojvag thiab muaj kaum ob tug timtswv ceebtsheej ib tug zov ntawm ib lub roojvag. Luag sau cov Yixalayees kaum ob xeem tej npe rau ntawm cov roojvag ntawd. Ib sab ntsa yeej muaj peb lub roojvag: sab hnubtuaj muaj peb lub, sab qabteb muaj peb lub, sab qaumteb muaj peb lub thiab sab hnubpoob muaj peb lub. Luag muab kaum ob lub pobzeb uas muaj tus menyuam Yaj kaum ob tug timthawj npe sau rau, los tiag tus taw loog uas xov lub nroog ntawd. Tus timtswv uas hais lus rau kuv ntawd coj ib tug pas ntsuas uas yog kub, nws yuav ntsuas lub nroog, tej roojvag thiab tus ntsa yeej. Lub nroog ntawd ua xwmfab xwmmeem. Tus timtswv muab nws tus pas ntsuas lub nroog, qhov ntev muaj ob txhiab plaub puas kilumev, qhov dav thiab qhov siab ntev ib yam nkaus. Tus timtswv ntsuas tus ntsa yeej thiab, qhov siab muaj ib puas plaub caug plaub tshim raws li tej pas ntsuas uas neeg ibtxwm ntsuas. Tus ntsa yeej ntawd yog muab tej qe zeb yapes uas ci ci los ua, thiab lub nroog yog muab cov tseem kub uas pom kev tshab plaws li iav los ua. Tus taw tiag tus ntsa yeej yog muab pobzeb ua, thiab muab txhua yam qe zeb ci ci uas muaj nqis los lo rau kom tus ntsa yeej zoo nkauj. Thawj ntus taw ntsa yeej yog qe zeb yapes, ntu ob yog qe zeb xafiles, ntu peb yog qe zeb maulas, ntu plaub yog qe zeb emelas, ntu tsib yog qe zeb aunis, ntu rau yog qe zeb kanelias, ntu xya yog qe zeb khixaulais, ntu yim yog qe zeb npelis, ntu cuaj yog qe zeb taupas, ntu kaum yog qe zeb khixupas, ntu kaum ib yog qe zeb yaxees thiab ntu kaum ob yog qe zeb amethis. Kaum ob lub roojvag ntawd yog muab kaum ob lub hlawv muaj nqis ua. Tej kev uas nyob hauv lub nroog ntawd luag muab cov tseem kub uas pom kev tshaj plaws ib yam li iav los ua. Kuv tsis pom muaj ib lub tuamtsev nyob hauv lub nroog ntawd li, rau qhov tus Tswv uas yog Vajtswv tus uas muaj hwjchim loj kawg nkaus thiab tus menyuam Yaj yog lub tuamtsev ntag. Hauv lub nroog ntawd tsis muaj hnub lossis hli ci, rau qhov Vajtswv lub tshwjchim yeej ci ntsa iab tuaj rau hauv, thiab tus menyuam Yaj yog lub teeb uas ci rau sawvdaws pom kev. Txhua haivneeg yuav pom kev kaj nrig mus mus los los, thiab tej vajntxwv uas nyob hauv ntiajteb yuav nqa lawv tej nyiaj tej kub thiab tej qhov txhia chaw tuaj rau hauv lub nroog. Lub nroog ntawd tej roojvag qhib lug cia tsis kaw li, rau qhov nyob hauv lub nroog ntawd yeej tsis txawj tsaus ntuj. Txhua haivneeg yuav coj lawv tej koob meej thiab nqa tej meejmom tuaj rau hauv lub nroog. Tiamsis yuav tsis muaj tej kev phem kev qias, tej kev poob ntsejmuag lossis tej neeg dag nyob hauv lub nroog ntawd li; luag tsuas pub cov neeg uas muaj npe sau cia rau hauv tus menyuam Yaj phau ntawv uas sau cov neeg uas muaj txojsia ntev mus ibtxhis lawm tej npe mus nyob hauv lub nroog ntawd xwb. Tus timtswv ceebtsheej uas qhia tus dej cawm siav uas ci pom kev tshab plaws li daim iav rau kuv. Tus dej ntawd ntws saum Vajtswv thiab tus menyuam Yaj lub zwmtxwv los, thiab ntws taug txojkev hauv plawv nroog. Ob sab ntug Dej puavleej muaj tsob txiv ntoo cawm txojsia uas ib xyoos twg txi kaum ob phaum txiv, ib hlis twg txi ib phaum. Tsob ntoo ntawd tej nplooj yog hauv tshuaj kuab muaj tsuas uas kho tau txhua haivneeg. Yeej tsis muaj tej uas Vajtswv foom tsis zoo rau lawm nyob hauv lub nroog ntawd hlo li. Vajtswv thiab tus menyuam Yaj lub zwmtxwv yuav nyob hauv lub nroog ntawd, thiab nws cov tubtxib yuav pehawm nws. Lawv yuav pom nws lub ntsejmuag, thiab nws yuav sau nws lub npe rau ntawm lawv hauvpliaj. Yuav tsis muaj hmo ntuj li lawm, lawv yuav tsis taws teeb thiab tsis tas yuav muaj tshav ntuj, rau qhov tus Tswv uas yog Vajtswv yuav ci rau lawv pom kev, thiab lawv yuav ua vajntxwv kav lub nroog ntawd mus ibtxhis li. Tom qab ntawd tus timtswv hais rau kuv hais tias, “Tej lus no yog lus tseeb uas tso siab tau. Thiab tus Tswv uas yog Vajtswv tus uas muab nws tus Ntsujplig rau cov cev Vajtswv lus tau txib nws cov timtswv los qhia tej uas yuav muaj los sai sai yav tom ntej rau nws cov tubtxib paub.” Yexus hais tias, “Nej ua tib zoo mloog kuv tej lus! Kuv twb yuav los sai sai no! Tus uas ua raws li tej lus uas sau rau hauv phau ntawv no yog tus uas tau nyob kaj siab lug!” Kuv yog Yauhas, kuv tau hnov thiab kuv tau pom txhua tsav yam no. Thaum kuv hnov thiab kuv pom tas lawm, kuv txawm txhos caug ntua ntawm tus timtswv ceebtsheej uas qhia txhua yam rau kuv txhais kotaw thiab yuav pe nws. Tiamsis tus timtswv ntawd hais rau kuv hais tias, “Koj tsis txhob pe kuv! Kuv yog ib tug tubtxib ib yam li koj thiab ib yam li koj cov kwvtij uas ua cov cev Vajtswv lus, thiab ib yam li txhua tus uas ua raws li tej lus uas sau rau hauv phau ntawv no xwb. Koj cia li pehawm Vajtswv xwb!” Thiab tus timtswv hais rau kuv hais tias, “Koj tsis txhob muab tej uas Vajtswv qhia rau hauv phau ntawv no npog cia, rau qhov twb yuav txog lub sijhawm uas muaj tej ntawd. Tus uas ua phem yeej yuav ua phem mus li, tus uas ua qias yuav ua qias mus li; tus uas ua zoo yeej yuav ua zoo mus li, thiab tus uas dawbhuv yeej yuav dawbhuv mus li.” Yexus hais tias, “Nej ua tib zoo mloog kuv tej lus! Kuv twb yuav los sai sai no! Kuv yuav coj kuv tej nqi zog los, kuv yuav muab rau nej txhua tus raws li tes haujlwm uas nej tau ua los lawm. Kuv yog Alafas thiab Aumenkas, kuv yog lub hauvpaus thiab yog lub ntsis.” Cov uas ntxhua lawv tej tsoos tsho huv lawm, yog cov uas nyob kaj siab lug, lawv muaj feem mus noj cov txiv uas muaj txojsia thiab muaj feem mus ntawm cov roojvag mus rau hauv lub nroog. Tiamsis cov neeg uas ua phem ua qias, cov neeg ua khawvkoob, cov neeg uas ua kev nkauj kev nraug, cov neeg tua neeg, cov neeg pe mlom, cov neeg dag, tsis hais tej lus uas lawv hais thiab tej haujlwm uas lawv ua, txhua tus puavleej yuav tau nyob sab ntug nroog nraud xwb. “Kuv yog Yexus, kuv twb txib kuv tus timtswv los qhia tej no rau nej txhua tus hauv tej pawg ntseeg lawm. Kuv yog Daviv tus xeebntxwv; kuv yog lub hnubqub uas ci ci thaum yuav kaj ntug.” Vaj Ntsujplig thiab tus Nkauj Nyab hais tias, “Cia li los ntawm no!” Txhua tus uas hnov lo lus ntawd yuav tsum teb hais tias, “Cia li los ntawm no!” Tus uas nqhis dej cia li los ntawm no; tus uas xav haus cia li los txais cov dej cawm txojsia mus haus. Cov dej no yog pub dawb dawb xwb tsis yuav nqi. Kuv yog Yauhas, kuv ceebtoom rau txhua tus uas hnov tej lus uas Vajtswv qhia rau hauv phau ntawv li no: Yog leejtwg ntxiv ib lo lus rau tej uas sau tseg rau hauv phau ntawv no lawm, Vajtswv yuav muab tej sub tawg sub ntsha uas hais hauv phau ntawv no rau tus ntawd. Thiab yog leejtwg rho tej lus uas Vajtswv qhia rau hauv phau ntawv no ib los tawm, Vajtswv yuav tsis pub tsob txiv uas cawm txojsia uas yog nws feem rau nws noj, thiab Vajtswv yuav tsis pub lub chaw hauv lub nroog Dawbhuv rau nws nyob. Kuv twb hais txog tej ntawd rau hauv phau ntawv no lawm. Tus uas ua timkhawv txog tej no, nws hais tias, “Kuv twb yuav los sai sai no!” Thov kom muaj raws li ntawd. Tswv Yexus, thov koj cia li los! Thov tus Tswv Yexus foom koob hmoov rau nej txhua tus.