Chiv keeb thaum ub Vajtswv tsim lub ntuj thiab lub ntiajteb. Lub ntiajteb tseem tsis tau muaj tus yam ntxwv zoo li cas, thiab nyob do cuas thiab tsaus ntuj nti thoob plaws saum tej dej, thiab Vajtswv tus Ntsuj Plig yuj roos tag nrho saum tej dej ntawd. Mas Vajtswv hais tias, “Cia li muaj qhov kaj,” ces txawm muaj qhov kaj. Vajtswv pom tias qhov kaj ntawd zoo, txawm muab qhov kaj cais tawm hauv qhov tsaus ntuj. Vajtswv hu qhov kaj tias Nruab Hnub, thiab hu qhov tsaus ntuj tias, Hmo Ntuj. Ces txawm muaj tsaus ntuj thiab muaj kaj ntug, yog thawj hnub. Vajtswv hais tias, “Cia li muaj lub ntuj los nyob nruab nrab tej dej thiab cia lub ntuj cais dej cais nag nyias nyob nyias.” Vajtswv thiaj tsim lub ntuj thiab muab tej dej uas nyob hauv qab lub ntuj cais ntawm tej dej uas nyob saum lub ntuj. Ces txawm muaj li ntawd. Vajtswv thiaj hu lub ntuj ntawd ua Ntuj. Ces txawm muaj tsaus ntuj thiab muaj kaj ntug, yog hnub ob. Vajtswv hais tias, “Cia tej dej uas nyob hauv qab ntuj sau zog mus nyob rau ib qho, thiab nruab nqhuab tshwm tuaj.” Ces txawm muaj li ntawd. Vajtswv thiaj hu nruab nqhuab tias Ntiajteb, thiab hu tej dej uas sau zog ua ke tias Hiavtxwv. Mas Vajtswv pom tias zoo. Thiab Vajtswv hais tias, “Cia lub ntiajteb tuaj qoob loo nroj tsuag uas muaj noob thiab tuaj xyoob ntoo uas muaj txiv thiab muaj noob, nyias muaj raws li nyias yam rau saum lub ntiajteb.” Ces txawm muaj li ntawd. Lub ntiajteb txawm tuaj tej qoob loo nroj tsuag uas muaj noob nyias muaj raws li nyias yam, thiab tuaj tej ntoo uas txi txiv thiab muaj noob nyias muaj raws li nyias yam. Mas Vajtswv pom tias zoo. Ces txawm muaj tsaus ntuj thiab muaj kaj ntug, yog hnub peb. Vajtswv hais tias, “Cia li muaj tej lub ci ci rau saum nruab ntug cais nruab hnub thiab hmo ntuj, thiab cia tej lub ci ci ntawd qhia kom paub quas caij quas nyoog quas hnub quas hli quas niaj quas xyoo. Thiab cia tej lub ntawd ci rau saum nruab ntug pom kev rau hauv ntiajteb.” Ces txawm muaj li ntawd. Vajtswv tsim ob lub ci ci uas loj, lub loj kav nruab hnub, lub yau kav hmo ntuj. Thiab nws kuj tsim tej hnub qub. Vajtswv txawb tej uas ci no rau saum nruab ntug pom kev rau lub ntiajteb, thiab kav nruab hnub thiab hmo ntuj, thiab cais qhov kaj tawm hauv qhov tsaus ntuj. Mas Vajtswv pom tias zoo. Ces txawm muaj tsaus ntuj thiab muaj kaj ntug, yog hnub plaub. Vajtswv hais tias, “Cia nruab deg tshwm tej tsiaj ciaj sia coob kawg, thiab cia nas noog ya saum lub ntiajteb rau saum nruab ntug.” Vajtswv thiaj tsim tej tsiaj loj loj hauv hiavtxwv, thiab tsim txhua yam tsiaj ciaj sia coob coob uas ya laim txias hauv nruab deg, nyias muaj raws li nyias yam, thiab tsim txhua yam nas noog muaj tis nyias muaj raws li nyias yam. Mas Vajtswv pom tias zoo. Thiab Vajtswv foom hmoov zoo rau tej tsiaj ntawd hais tias, “Cia li muaj menyuam thiab huaj vam coob puv nkaus nruab hiavtxwv, thiab cia nas noog huaj vam coob rau saum lub ntiajteb.” Ces txawm muaj tsaus ntuj thiab muaj kaj ntug, yog hnub tsib. Vajtswv hais tias, “Cia lub ntiajteb tshwm tej tsiaj ciaj sia nyias muaj raws li nyias yam, yog tej tsiaj nyeg tej tsiaj nkag hauv av thiab tej tsiaj qus nyias muaj raws li nyias yam.” Ces txawm muaj li ntawd. Vajtswv thiaj tsim tej tsiaj qus rau hauv ntiajteb nyias muaj raws li nyias yam thiab tsim tej tsiaj nyeg nyias muaj raws li nyias yam, thiab tsim txhua yam tsiaj nkag hauv av nyias muaj raws li nyias yam. Mas Vajtswv pom tias zoo. Thiab Vajtswv hais tias, “Cia peb tsim neeg raws li peb tus yam ntxwv thiab zoo li peb. Cia lawv muaj hwjchim tswjhwm tej ntses hauv hiavtxwv thiab tej nas noog saum nruab ntug thiab tej tsiaj txhu thiab lub ntiajteb huvsi thiab txhua yam tsiaj uas nkag hauv lub ntiajteb.” Vajtswv thiaj tsim neeg raws li nws tus yam ntxwv, raws li Vajtswv tus yam ntxwv ntawd nws tsim neeg, nws tsim neeg kom muaj txivneej thiab pojniam. Vajtswv foom koob hmoov rau lawv, thiab hais rau lawv tias, “Cia li muaj tub ki huaj vam coob puv nkaus ntiajteb, thiab kav lub ntiajteb rau hauv nej xib teg, thiab muaj hwjchim tswjhwm tej ntses hauv hiavtxwv thiab tej nas noog saum nruab ntug thiab txhua yam tsiaj ciaj sia uas nkag hauv lub ntiajteb.” Thiab Vajtswv hais tias, “Kuv pub txhua yam qoob loo uas muaj noob uas nyob thoob plaws hauv lub ntiajteb thiab txhua yam ntoo uas txi txiv muaj noob rau nej. Nej yuav muab tej no los ua zaub mov noj. Thiab txhua yam tsiaj hauv ntiajteb thiab txhua yam nas noog saum nruab ntug thiab txhua yam uas nkag hauv ntiajteb, yog txhua yam ciaj sia uas ua pa nyob, kuv pub tej zaub mos ntsuab ntsuab huvsi rau lawv noj.” Ces txawm muaj li ntawd. Vajtswv saib txhua yam uas nws tau tsim ntawd mas pom tias zoo heev. Ces txawm muaj tsaus ntuj thiab muaj kaj ntug, yog hnub rau. Lub ntuj lub teb thiab ib puas tsav yam hauv qab ntuj tsim tiav tag li no. Hnub xya Vajtswv tej haujlwm twb tiav tag lawm, mas hnub xya ntawd nws so txhua yam haujlwm uas nws tau ua. Vajtswv foom koob hmoov rau hnub xya thiab muab tsa ua hnub uas dawb huv, rau qhov hnub ntawd Vajtswv so txhua yam haujlwm uas tau tsim ntuj tsim teb. Ntawm no mus yog hais txog qhov uas tsim lub ntuj thiab tsim lub ntiajteb. Hnub uas Vajtswv Yawmsaub tsim lub ntiajteb thiab lub ntuj, tej xyoob ntoo tsis tau muaj rau hauv ntiajteb thiab tej qoob loo tsis tau tuaj li, vim yog Vajtswv Yawmsaub tsis tau tso nag los rau saum lub ntiajteb thiab tsis muaj neeg ua liaj ua teb, tiamsis muaj dej txheem hauv ntiajteb tuaj ua rau av noo zaw thoob plaws. Thaum ntawd Vajtswv Yawmsaub muab hmoov av los puab tsim ua neeg, thiab tshuab pa ciaj sia rau hauv nws lub qhov ntswg, mas neeg thiaj li ciaj sia. Vajtswv Yawmsaub cog ib lub vaj rau ntawm Edee uas nyob sab hnub tuaj, mas nws muab tus neeg uas nws tau tsim tso nyob qhov ntawd. Thiab Vajtswv Yawmsaub ua kom txhua yam ntoo uas zoo saib zoo noj tawm hauv av tuaj. Hauv lub plawv vaj muaj ib tsob ntoo uas pub txojsia thiab ib tsob ntoo uas pub kom paub qhov zoo qhov phem. Muaj ib tug dej ntws ntawm Edee los ntxooj lub vaj, dhau ntawd lawm txawm faib ntws ua plaub tug. Tus ib npe hu ua Pisoo, yog tus dej uas ntws puag ncig Havila tebchaws, qhov ntawd muaj qhov kub. Cov kub ntawm lub tebchaws ntawd yog cov tseem kub. Thiab muaj cov roj ntoo tsw qab thiab tej qe zeb iav txho ci lam lug qhov ntawd. Tus dej ob hu ua Kihoo, yog tus dej uas ntws puag ncig Khuj tebchaws. Tus dej peb hu ua Thaiki, uas ntws mus rau Axilia tebchaws sab hnub tuaj. Tus dej plaub yog tus dej Yufeti. Vajtswv Yawmsaub muab tus neeg ntawd tso nyob hauv lub vaj Edee kom tu thiab saib lub vaj ntawd. Mas Vajtswv Yawmsaub nkaw lus rau tus neeg tias, “Txhua yam txiv ntoo hauv lub vaj no koj noj tau huvsi, tiamsis tsob ntoo uas pub kom paub qhov zoo qhov phem, koj tsis txhob noj cov txiv kiag li, yog hnub twg koj noj koj yuav tuag.” Vajtswv Yawmsaub hais tias, “Tsis tsim nyog cia tus neeg no nyob tib leeg. Kuv yuav tsim ib tug pab uas phim nws.” Vajtswv Yawmsaub thiaj li muab av los puab tsim txhua yam tsiaj hauv ntiajteb thiab txhua yam nas noog saum nruab ntug, coj los rau tus neeg ntawd, saib nws yuav tis npe hu li cas. Tus neeg tis npe rau tej tsiaj uas ciaj sia li cas, ces tej tsiaj ntawd kuj muaj npe li ntawd. Tus neeg ntawd tis npe rau tej tsiaj nyeg tsiaj qus huvsi thiab tej nas noog saum nruab ntug huvsi. Tiamsis tsis muaj ib tug pab uas phim tus neeg ntawd. Mas Vajtswv Yawmsaub thiaj ua rau tus neeg tsaug zog heev, thiab thaum nws tsaug zog lawm Vajtswv thiaj rho nws ib tug tav tawm los thiab ua rau lub qhov txhab nqawm zoo li qub. Tus tav uas Vajtswv Yawmsaub rho tawm hauv tus neeg ntawd los, Vajtswv muab tsim ua ib tug pojniam, thiab coj los rau tus txivneej ntawd. Tus txivneej thiaj hais tias, “No lauj, tej txha no tawm hauv kuv txha los, tej nqaij no tawm hauv kuv nqaij los. Yuav hu ua Pojniam, vim rhu nws tawm hauv Txivneej los.” Vim li no tus txivneej thiaj ncaim ntawm nws niam nws txiv thiab nrog nws tus pojniam tsheej xeeb ua ke mas ob tug koom ua ib lub cev. Tus txivneej thiab nws tus pojniam nyob liab qab tsis txaj muag. Tej tsiaj qus uas Vajtswv Yawmsaub tsim mas nab ntse dua huvsi. Nab thiaj nug tus pojniam ntawd tias, “Vajtswv hais tias tsis txhob noj txhua yam txiv ntoo hauv lub vaj no tiag lov?” Tus pojniam thiaj teb nab tias, “Wb noj tau tej txiv ntoo hauv lub vaj no huvsi, tiamsis Vajtswv hais tias, ‘Neb tsis txhob noj tsob txiv ntoo uas nyob hauv plawv vaj, thiab tsis txhob kov kiag li, tsam ces neb tuag.’ ” Nab txawm hais rau tus pojniam ntawd tias, “Neb yeej yuav tsis tuag li. Vajtswv hais li ntawd vim nws paub tias neb noj tsob txiv ntoo ntawd thaum twg ces neb lub qhov muag yuav pom tseeb thaum ntawd mas neb yuav zoo ib yam li Vajtswv, yog paub qhov zoo qhov phem.” Thaum tus pojniam ntawd pom tias tsob txiv ntoo ntawd ntxim noj thiab ntsia ntsoov liab siab kawg li, thiab pom tias tsob txiv ntoo ntxim ntshaw vim ua kom muaj tswvyim plab plaws, nws thiaj de los noj thiab cev rau nws tus txiv mas nws tus txiv kuj noj. Mas ob tug ob leeg lub qhov muag txawm pom tseeb tuaj, thiab ob tug xam pom tias ob tug nyob liab qab. Ob tug thiaj muab nplooj txiv cev los xaws ua tsoos hnav. Thaum tshav ntuj laj lawm ob tug txawm hnov Vajtswv Yawmsaub tuaj ncig rau hauv lub vaj, mas tus txiv thiab nws tus pojniam thiaj mus khiav nraim rau hauv cov ntoo hauv lub vaj kom dhau Vajtswv Yawmsaub lub xubntiag. Ces Vajtswv Yawmsaub hu tus txiv ntawd thiab hais rau nws tias, “Koj nyob qhovtwg?” Tus txiv teb tias, “Kuv hnov koj tuaj rau hauv lub vaj mas kuv ntshai vim yog kuv nyob liab qab, kuv thiaj mus khiav nraim lawm.” Vajtswv hais tias, “Leejtwg hais rau koj tias koj liab qab? Koj noj tsob txiv ntoo uas kuv txiv tsis pub koj noj lawm lov?” Tus txivneej hais tias, “Twb yog tus pojniam uas koj pub nrog kuv nyob ua ke muab tej txiv ntawd rau kuv mas kuv thiaj noj.” Vajtswv Yawmsaub hais rau tus pojniam tias, “Koj ua dabtsi li no?” Tus pojniam teb tias, “Nab ntxias kuv, kuv thiaj li noj.” Vajtswv Yawmsaub thiaj hais rau nab tias, “Vim qhov uas koj ua li no, koj yuav raug foom tsis zoo heev dua tej tsiaj nyeg tsiaj qus huvsi. Koj yuav xuas lub plab tshiav av, thiab yuav noj hmoov av mus tag koj sim neej. Kuv yuav ua rau koj thiab tus pojniam no ua yeeb ncuab, koj caj ces thiab tus pojniam caj ces yuav ua yeeb ncuab mus li. Tus pojniam caj ces yuav tsoo koj taubhau kom ntsoog, thiab koj yuav tom nws luj taws.” Vajtswv hais rau tus pojniam tias, “Kuv yuav tsav kev mob ntau rau koj rau thaum koj suab menyuam, koj yuav mob heev rau thaum koj yug menyuam, txawm li ntawd los koj tseem xav nrog koj tus txiv ua txij ua nkawm, thiab koj tus txiv yuav tswjhwm koj.” Vajtswv hais rau Adas tias, “Vim koj mloog koj tus pojniam lus es noj tsob txiv ntoo uas kuv hais tias, ‘Koj tsis txhob noj,’ mas tej av raug foom tsis zoo vim yog tim koj, koj yuav nrhiav noj khwv khwv li tag koj sim neej. Cov av yuav tuaj pos thiab tuaj nroj tsuag rau koj, thiab koj yuav noj tej qoob loo hauv daim teb. Koj yuav khwv nto hws lug thiaj tau noj mus txog thaum koj rov qab mus rau hauv av, vim yog tsim koj tawm hauv av los. Koj yog hmoov av, mas koj yuav rov mus ua hmoov av.” Adas hu nws tus pojniam lub npe tias Eva, vim nws yog ib tsoom neeg uas muaj txojsia nyob leej niam. Vajtswv Yawmsaub muab tawv tsiaj ua tsoos tsho rau Adas thiab nws tus pojniam thiab muab rau ob tug hnav. Mas Vajtswv Yawmsaub hais tias, “Saib maj, tus neeg ntawd los ua zoo li peb lawm thiab txawj paub qhov zoo qhov phem. Nimno tsis kheev nws cev tes de tsob txiv uas pub txojsia los noj es muaj txojsia ntev mus ib txhis tsis kawg.” Vim li no Vajtswv Yawmsaub thiaj ntiab nws tawm hauv lub vaj Edee mus ua liaj ua teb rau hauv cov av uas Vajtswv tsim nws tawm los. Vajtswv ntiab tus neeg ntawd tawm mus thiab tsa cov Khelunpee nyob ntawm lub vaj Edee sab hnub tuaj thiab tsa ib rab ntaj nplaim taws uas txawj tig rau txhua fab zov txojkev uas nkag rau ntawm tsob ntoo uas pub txojsia. Adas nrog nws tus pojniam Eva pw, mas Eva thiaj xeeb tub thiab yug tau tus tub Khayee. Eva hais tias, “Yawmsaub pab kuv yug tau ib tug tub.” Dhau ntawd Eva yug tau dua ib tug tub hu ua Anpee. Anpee yog neeg yug yaj, Khayee yog neeg ua teb. Muaj ib hnub Khayee coj tej qoob loo uas nws sau hauv nruab teb tuaj xyeem rau Yawmsaub, hos Anpee coj tej menyuam yaj uas yog thawj tug hauv nws pab yaj tuaj muab cov roj yaj ntawd xyeem. Mas Yawmsaub txaus siab rau Anpee thiab tej uas nws coj tuaj xyeem. Tiamsis Yawmsaub tsis txaus siab rau Khayee thiab tej uas nws coj tuaj xyeem ntawd. Khayee thiaj chim heev ua ntsej muag o wv. Yawmsaub thiaj nug Khayee tias, “Ua cas koj chim? Ua cas koj ntsej muag o wv? Yog koj ua zoo, kuv yuav txais koj los tsis yog? Yog koj ua tsis zoo, lub txim pliab lua zov ntawm qhov rooj xav tom koj, tiamsis koj yuav tsum kov yeej lub txim ntawd.” Khayee hais rau nws tus kwv Anpee tias, “Wb ua ke mus teb.” Thaum ob tug nyob hauv teb, Khayee txawm muab nws tus kwv Anpee ntaus raug ri tua pov tseg. Mas Yawmsaub nug Khayee tias, “Koj tus kwv Anpee dua twg lawm?” Khayee teb tias, “Kuv tsis paub, kuv nim yog tus uas zov kuv tus kwv lov?” Yawmsaub hais tias, “Koj ua li cas lawm? Koj tus kwv cov ntshav quaj qw hauv cov av tuaj txog kuv lawm. Nimno koj yuav raug foom tsis zoo ntawm cov av uas rua ncauj nqos koj tus kwv cov ntshav hauv koj txhais tes. Thaum koj ua teb cov av yuav tsis zoo qoob loo rau koj. Koj yuav khiav mus nyob tsis muaj vag tsis muaj tse rau hauv lub ntiajteb.” Khayee hais rau Yawmsaub tias, “Kuv lub txim hnyav dhau kuv ris tsis taus. Hnub no koj muab kuv ntiab tawm hauv cov av thiab dhau ntawm koj lub xubntiag mus. Kuv yuav khiav mus nyob tsis muaj vag tsis muaj tse rau hauv lub ntiajteb. Leejtwg ntsib kuv kuj yuav muab kuv tua pov tseg.” Mas Yawmsaub hais rau Khayee tias, “Tsis tau. Leejtwg tua Khayee mas yuav raug pauj xya npaug.” Thiab Yawmsaub ntaus cim rau Khayee lub cev xwv leejtwg ntsib nws los thiaj tsis muab nws tua. Khayee thiaj tawm hauv Yawmsaub lub xubntiag mus thiab nyob rau hauv tebchaws Nauj, uas nyob Edee sab hnub tuaj. Khayee nrog nws tus pojniam pw, mas nws thiaj xeeb tub thiab yug tau tus tub Enauj. Khayee rhawv ib lub moos thiab hu lub npe raws nws tus tub Enauj. Enauj yug tau Ilaj, thiab Ilaj yug tau Mehuya‑ee, thiab Mehuya‑ee yug tau Methusa‑ee, thiab Methusa‑ee yug tau Lame. Lame yuav ob tug pojniam, ib tug hu ua Ada, ib tug hu ua Xilas. Ada yug tau Yanpas. Yanpas yog cov uas nyob hauv tsev ntaub thiab yug tsiaj li yawg koob. Nws tus kwv yog Yunpas. Yunpas yog cov uas txawj ntaus nkauj nog ncas thiab tshuab raj sawvdaws li yawg koob. Xilas yug tau Thunpas Khayee, uas yog Kws tooj Kws hlau ntaus txhua yam cuab yeej siv. Thunpas Khayee muaj ib tug muam hu ua Na‑ama. Lame hais rau nws ob tug pojniam tias, “Ada thiab Xilas, cia li mloog kuv tej lus, Lame tej pojniam cia li mloog kuv hais, kuv tua ib tug txivneej vim nws ua raug kuv mob, yog tua ib tug hluas, vim nws ntaus kuv. Yog ua raug Khayee yuav ua pauj xya npaug, yog ua raug Lame yeej yuav ua pauj xya caum xya npaug.” Adas rov nrog nws tus pojniam pw, mas nws yug tau ib tug tub thiab tis npe hu ua Xej. Nws hais tias, “Vajtswv pub kuv muaj dua ib tug tub nyob Anpee chaw, rau qhov Khayee muab Anpee tua lawm.” Xej muaj ib tug tub mas tis npe hu ua Enaus. Lub sijhawm ntawd neeg pib tuav Yawmsaub lub npe thov. Ntawm no mus yog hais txog Adas caj ces. Thaum Vajtswv tsim neeg, nws tsim raws li Vajtswv tus yam ntxwv. Nws tsim kom muaj txivneej thiab pojniam, thiab foom koob hmoov rau lawv, thiab nws tis npe hu ua Neeg rau hnub uas nws tsim lawv. Thaum Adas muaj ib puas peb caug xyoo, nws muaj ib tug tub zoo li nws thiab raws li nws tus yam ntxwv, thiab tis npe hu ua Xej. Thaum Adas muaj tus tub Xej lawm nws nyob tau yim pua xyoo ntxiv, mas nws tseem muaj tub muaj ntxhais ntxiv. Adas li hnub nyoog huvsi muaj cuaj pua peb caug xyoo nws li tuag. Xej hnub nyoog muaj ib puas tsib xyoo li muaj tus tub Enaus. Thaum Xej muaj tus tub Enaus lawm nws tseem nyob tau yim pua xya xyoo, thiab muaj tub muaj ntxhais ntxiv. Xej li hnub nyoog huvsi muaj cuaj pua kaum ob xyoos nws li tuag. Enaus hnub nyoog muaj cuaj caum xyoo li muaj tus tub Khenas. Thaum Enaus muaj tus tub Khenas lawm nws tseem nyob tau yim pua kaum tsib xyoos, thiab muaj tub muaj ntxhais ntxiv. Enaus li hnub nyoog huvsi muaj cuaj pua tsib xyoo nws li tuag. Khenas hnub nyoog muaj xya caum xyoo li muaj tus tub Mahalalee. Thaum Khenas muaj tus tub Mahalalee lawm nws tseem nyob tau yim pua plaub caug xyoo, thiab muaj tub muaj ntxhais ntxiv. Khenas li hnub nyoog huvsi muaj cuaj pua kaum xyoo nws li tuag. Mahalalee hnub nyoog muaj rau caum tsib xyoos li muaj tus tub Yale. Thaum Mahalalee muaj tus tub Yale lawm nws tseem nyob tau yim pua peb caug xyoo, thiab muaj tub muaj ntxhais ntxiv. Mahalalee li hnub nyoog huvsi muaj yim pua cuaj caum tsib xyoos nws li tuag. Yale hnub nyoog muaj ib puas rau caum ob xyoos li muaj tus tub Enauj. Thaum Yale muaj tus tub Enauj lawm nws tseem nyob tau yim pua xyoo, thiab muaj tub muaj ntxhais ntxiv. Yale li hnub nyoog huvsi muaj cuaj pua rau caum ob xyoos nws li tuag. Enauj hnub nyoog muaj rau caum tsib xyoos li muaj tus tub Methuxela. Thaum Enauj muaj tus tub Methuxela lawm nws tseem nrog nraim Vajtswv tau peb puas xyoo, thiab muaj tub muaj ntxhais ntxiv. Enauj li hnub nyoog huvsi muaj peb puas rau caum tsib xyoos. Enauj nrog nraim Vajtswv mas cia li ploj ntais lawm rau qhov yog Vajtswv coj nws mus lawm. Methuxela hnub nyoog muaj ib puas yim caum xya xyoo li muaj tus tub Lame. Thaum Methuxela muaj tus tub Lame lawm nws tseem nyob tau xya pua yim caum ob xyoos, thiab muaj tub muaj ntxhais ntxiv. Methuxela li hnub nyoog huvsi muaj cuaj pua rau caum cuaj xyoos nws li tuag. Lame hnub nyoog muaj ib puas yim caum ob xyoos li muaj ib tug tub. Nws tis tus tub npe hu ua Nau‑a thiab nws hais tias, “Tus no yuav coj txojkev tau so ntawm peb tej haujlwm thiab tau so ntawm tej uas peb txhais tes ua khwv khwv li hauv cov av uas raug Yawmsaub foom tsis zoo lawm.” Thaum Lame muaj tus tub Nau‑a lawm nws tseem nyob tau tsib puas cuaj caum tsib xyoos, thiab muaj tub muaj ntxhais ntxiv. Lame li hnub nyoog huvsi muaj xya pua xya caum xya xyoo nws li tuag. Nau‑a hnub nyoog muaj tsib puas xyoo li muaj peb tug tub hu ua Xeeb thiab Has thiab Yafe. Thaum neeg huaj vam coob rau hauv lub ntiajteb thiab muaj ntxhais, mas Vajtswv cov tub pom tias neeg tej ntxhais zoo nkauj heev lawv txawm tuaj yuav cov uas lawv nyiam ua pojniam. Yawmsaub thiaj hais tias, “Kuv tus ntsuj plig yuav tsis nyob hauv neeg mus ib txhis, rau qhov neeg yog nqaij tawv, lawv hnub nyoog yuav nyob ib puas nees nkaum xyoo xwb.” Thaum ntawd thiab yav tom qab muaj cov neeg Nefili nyob hauv lub ntiajteb, yog thaum Vajtswv cov tub nrog neeg tej ntxhais pw es yug tau menyuam. Cov Nefili ntawd yog cov neeg siab loj siab tuab thiab muaj koob meej thaum ub. Yawmsaub pom tias neeg tej kev phem loj kawg rau hauv lub ntiajteb, thiab pom tias lawv tsuas yog pheej xav zaj phem rau hauv lub siab mus li xwb. Yawmsaub khuvxim qhov uas nws tau tsim neeg rau hauv lub ntiajteb, thiab nws tu siab heev. Yawmsaub thiaj hais tias, “Kuv yuav muab cov neeg uas kuv tau tsim los lawm ntxuav pov tseg hauv lub ntiajteb, tsis hais neeg thiab tsiaj txhu thiab tej tsiaj uas nkag hauv av thiab tej nas noog saum nruab ntug huvsi, rau qhov kuv tu siab qhov uas kuv tau tsim lawv los.” Tiamsis Nau‑a yog tus uas Yawmsaub txaus siab rau. Ntawm no mus yog Nau‑a caj ces. Nau‑a yog tus uas ncaj ncees thiab hauv nws tiam neej nws tib leeg ua zoo. Nau‑a nrog nraim Vajtswv. Nau‑a muaj peb tug tub, Xeeb, Has thiab Yafe. Vajtswv pom tias tag nrho lub ntiajteb phem tag huvsi thiab ua limhiam ntais ntuj puv nkaus ntiajteb. Vajtswv ntsia ntsoov lub ntiajteb mas pom tias phem kawg li, vim yog ib tsoom neeg ua lawv lub neej phem tag rau hauv lub ntiajteb. Vajtswv thiaj hais rau Nau‑a tias, “Kuv txiav txim siab lawm tias kuv yuav ua rau tej neeg puam tsuaj tag huvsi, vim yog muaj kev limhiam ntais ntuj puv nkaus lub ntiajteb vim yog tim neeg. Saib maj, kuv yuav ua kom lawv thiab lub ntiajteb puam tsuaj ua ke. Koj cia li muab ntoo thuv kaufaw ua ib lub nkoj. Thiab muab kem ua tej chav thiab muab roj ntoo luam sab hauv sab nraud huvsi. Koj ua lub nkoj raws li no, yog ntev peb puas tshim, dav tsib caug tshim, siab peb caug tshim. Tseg qiag ib zaj saum lub npoo nkoj siab li ib tshim, ua lub qhov rooj nkoj rau ib sab, thiab ua peb txheej, ua txheej ib, txheej ob, txheej peb. Rau qhov kuv yuav tso dej los nyab lub ntiajteb, yuav ua kom txhua yam uas ciaj sia ua pa puam tsuaj tag nrho huvsi hauv lub qab ntuj. Txhua yam uas nyob hauv lub ntiajteb yuav tuag tag huvsi. Tiamsis kuv yuav cog lus ruaj rau koj. Koj thiab koj pojniam koj tej tub tej nyab huvsi yuav nkag rau hauv lub nkoj. Coj txhua yam uas muaj txojsia ib yam ib nkawg ib tug maum ib tug txiv nkag rau hauv lub nkoj kom thiaj dim txojsia nrog koj nyob. Txhua yam noog raws li nws yam thiab txhua yam tsiaj raws li nws yam thiab txhua yam tsiaj uas nkag hauv av raws li nws yam, ib yam ib nkawg yuav los cuag koj kom thiaj dim txojsia. Koj yuav sau qoob loo mov noj txhua yam khaws cia rau koj thiab rau tej tsiaj txhu nas noog noj.” Nau‑a ua txhua yam raws li Vajtswv kom nws ua. Yawmsaub hais rau Nau‑a tias, “Koj tsev neeg huvsi cia li nkag tag nrho rau hauv lub nkoj, rau qhov tiam neeg no kuv pom tias koj ncaj ncees xwb. Coj tej tsiaj uas huv txhua yam nrog koj mus ib yam xya nkawm ib tug maum ib tug txiv, thiab coj tej tsiaj uas tsis huv ib yam ib nkawg ib tug maum ib tug txiv, thiab coj tej noog saum nruab ntug ib yam xya nkawm ib tug poj ib tug lau kom thiaj dim txojsia ua noob thoob ntiajteb. Tshuav xya hnub kuv yuav tso nag los rau hauv lub ntiajteb no plaub caug hnub plaub caug hmo, mas kuv yuav muab txhua yam ciaj sia uas kuv tau tsim los ntxuav pov tseg hauv lub ntiajteb.” Nau‑a ua txhua yam raws li Yawmsaub kom nws ua. Thaum dej los nyab lub ntiajteb Nau‑a hnub nyoog muaj rau pua xyoo. Nau‑a thiab nws pojniam thiab nws tej tub tej nyab ua ke mus rau hauv lub nkoj xwv thiaj dim dej nyab. Tej tsiaj uas huv thiab tej tsiaj uas qias thiab tej nas noog thiab txhua yam tsiaj uas nkag hauv av, kuj nrog Nau‑a nkag rau hauv lub nkoj, ua ib nkawg ib nkawg, ib tug maum thiab ib tug txiv, raws li Vajtswv tau hais rau Nau‑a. Thaum dhau xya hnub dej kuj los nyab lub ntiajteb. Thaum Nau‑a hnub nyoog muaj rau pua xyoo, lub ob hlis hnub tim kaum xya, mas hnub ntawd ntag dej txhawv hauv nruab tiv txwv huam tuaj rau txhua lub hauv dej, thiab rooj ntug qheb. Thiab nag los rau hauv lub ntiajteb plaub caug hnub plaub caug hmo. Tib hnub ntawd Nau‑a thiab nws cov tub, Xeeb thiab Has thiab Yafe thiab Nau‑a tus pojniam thiab nws peb tug nyab ua ke nkag rau hauv lub nkoj. Lawv thiab txhua yam tsiaj qus raws li nws yam, thiab tej tsiaj nyeg huvsi raws li nws yam thiab tej tsiaj huvsi uas nkag hauv av raws li nws yam thiab txhua yam noog huvsi raws li nws yam, yog txhua yam uas muaj tis huvsi nkag mus. Txhua yam uas ciaj sia ua pa nrog Nau‑a nkag mus rau hauv lub nkoj ua ib nkawg ib nkawg. Txhua yam tsiaj ntawd puavleej muaj tus maum thiab tus txiv nkag mus raws li Vajtswv hais. Mas Yawmsaub thiaj muab Nau‑a kaw rau hauv. Dej nyab ntiajteb tau plaub caug hnub, dej thiaj huam hlob ua rau lub nkoj ntab rau saum lub ntiajteb. Dej huam hlob zuj zus rau saum lub ntiajteb mas lub nkoj ntab saum nplaim dej. Dej huam hlob kawg li rau saum lub ntiajteb nyab kiag txhua lub roob siab hauv qab ntuj huvsi. Dej nyab dhau cov hauv roob siab rau saud kaum tsib tshim. Txhua yam uas ciaj sia nyob hauv ntiajteb, tsis hais nas noog, tsiaj nyeg tsiaj qus, txhua yam tsiaj me me ua npoj ntws hauv ntiajteb thiab txhua tus neeg tuag tag huvsi. Txhua yam tsiaj ciaj sia uas ua pa nyob nruab nqhuab kuj tuag tag huvsi. Vajtswv ntxuav txhua yam uas ciaj sia nyob hauv lub ntiajteb tsis hais neeg thiab tsiaj txhu thiab tej tsiaj uas nkag hauv av thiab tej nas noog saum nruab ntug, puavleej raug muab ntxuav du lug hauv lub ntiajteb. Tsuas yog tshuav Nau‑a thiab cov uas nrog nws nyob hauv lub nkoj xwb. Dej nyab ntiajteb tau ib puas tsib caug hnub. Vajtswv nco txog Nau‑a thiab tej tsiaj qus tsiaj nyeg huvsi uas nrog Nau‑a nyob hauv lub nkoj. Mas Vajtswv thiaj ua cua ntsawj rau saum lub ntiajteb dej thiaj nqeg. Tej qhov dej txhawv hauv nruab tiv txwv thiab tej rooj ntug kuj raug muab kaw, nag saum ntuj thiaj tu lawm. Dej thiaj nqeg saum lub ntiajteb zuj zus lawm. Thaum dhau ib puas tsib caug hnub lawm dej kuj nqeg lawm ntau. Hnub tim kaum xya lub xya hli lub nkoj los txawb rau saum tej roob Alalab. Dej nqeg zuj zus mus txog lub kaum hli. Hnub xiab ib lub kaum hli tej ncov roob kuj tshwm tuaj. Dhau plaub caug hnub lawm Nau‑a qheb lub qhov rais nkoj uas nws ua, nws tso ib tug uab lag tawm mus. Tus uab lag ntawd ya mus ya los mus txog thaum dej qhuav tag hauv lub ntiajteb. Nau‑a tso ib tug nquab taug ya mus, saib dej nqeg tag hauv lub ntiajteb los tsis tau. Tiamsis tus nquab taug nrhiav tsis tau chaw tsaws vim dej tseem nyab thoob ntiajteb, mas thiaj ya rov los rau ntawm Nau‑a hauv lub nkoj. Mas Nau‑a cev tes mus ntes tus nquab ntawd los rau hauv lub nkoj. Nau‑a tos dua xya hnub li tso tus nquab tawm hauv lub nkoj mus dua ib zaug. Thaum yuav tsaus ntuj tus nquab rov los rau ntawm Nau‑a, tus kaus ncauj kwv ib daim nplooj txiv aulib ntsuab ntsuab uas nyuam qhuav de los. Nau‑a thiaj paub tias dej nqeg tag hauv lub ntiajteb lawm. Nau‑a tos dua xya hnub li tso tus nquab tawm mus, mas tus nquab tsis rov los rau ntawm Nau‑a li lawm. Xyoo uas rau pua ib, lub ib hlis hnub xiab ib dej qhuav tag hauv lub ntiajteb, mas Nau‑a yaws tej vuas uas vov lub nkoj saib mas pom tias av qhuav lawm. Thaum txog hnub tim nees nkaum xya lub ob hlis lub ntiajteb qhuav tag lawm. Yawmsaub hais rau Nau‑a tias, “Koj thiab koj pojniam koj tej tub tej nyab huvsi cia li tawm hauv lub nkoj mus. Cia li coj txhua yam tsiaj ciaj sia uas nrog koj nyob tawm los, tsis hais nas noog tsiaj txhu thiab txhua yam tsiaj uas nkag hauv av, xwv thiaj tau yeej noob huaj vam coob rau hauv ntiajteb.” Nau‑a thiab nws tus pojniam thiab nws tej tub tej nyab txawm tawm los. Txhua yam tsiaj txhu thiab txhua yam tsiaj uas nkag hauv av thiab txhua yam noog, yog txhua yam tsiaj uas nkag thiab ya hauv lub ntiajteb, kuj tawm ib yam zuj zus hauv lub nkoj los. Nau‑a ua ib lub thaj rau Yawmsaub, mas muab tej tsiaj uas huv thiab tej noog uas huv qee tus los hlawv xyeem saum lub thaj ntawd. Thaum Yawmsaub hnov tej pa tsw qab uas hum nws lub siab mas nws hais hauv nws lub siab tias, “Kuv yuav tsis tsawm foom ntiajteb dua li lawm vim yog tim neeg, txawm yog neeg xav zaj phem rau hauv lub siab ib txwm thaum yau los kuj xij. Thiab kuv yuav tsis muab txhua yam uas ciaj sia ua kom puam tsuaj dua li lawm, ib yam li kuv tau ua los lawm. Thaum lub ntiajteb tseem muaj nyob, yuav muaj lub caij tseb lub caij sau, muaj lub caij txias lub caij sov, muaj lub caij ntuj no lub caij ntuj kub, muaj nruab hnub muaj hmo ntuj tsis tu ncua li.” Vajtswv foom koob hmoov rau Nau‑a thiab nws cov tub thiab hais rau lawv tias, “Cia li muaj tub ki huaj vam coob puv ntiajteb. Txhua yam tsiaj hauv ntiajteb thiab txhua yam noog saum nruab ntug thiab txhua yam tsiaj uas nkag hauv av thiab txhua yam ntses hauv hiavtxwv yuav ntshai nej heev. Kuv muab tej tsiaj ntawd huvsi cob rau hauv nej txhais tes. Txhua yam ciaj sia uas nkag thiab ya yuav ua nej zaub noj. Kuv pub txhua yam rau nej noj ib yam li kuv pub zaub ntsuab rau nej noj lawd. Tiamsis tsis txhob noj cov nqaij nrog cov ntshav uas yog nws txojsia. Cov ntshav uas yog nej txojsia kuv yuav tsob. Kuv yuav tsob ntawm txhua tus tsiaj thiab yuav tsob ntawm tej neeg. Kuv yuav tsob neeg txojsia ntawm nws txhua tus kwvtij. “Leejtwg tua neeg los ntshav, tus ntawd yuav raug neeg tua kom los ntshav ib yam nkaus, rau qhov Vajtswv tsim neeg zoo li nws tus yam ntxwv. Nej cia li muaj menyuam huaj vam coob, cia li muaj tub ki coob coob hauv lub ntiajteb thiab huaj vam coob.” Vajtswv hais rau Nau‑a thiab nws cov tub tias, “No 'ov, kuv cog lus ruaj rau nej thiab nej caj ces uas tshwm los rau yav tom qab thiab rau txhua yam ciaj sia uas nrog koj nyob hauv lub nkoj es tawm los rau hauv ntiajteb, tsis hais nas noog tsiaj nyeg tsiaj qus huvsi. Kuv cog lus ruaj rau nej tias kuv yuav tsis tso dej los nyab ua kom txhua yam uas ciaj sia puam tsuaj tag dua li lawm, thiab dej yuav tsis los nyab rhuav tshem lub ntiajteb dua li lawm.” Thiab Vajtswv hais tias, “No yog tus cim uas kuv cog lus rau nej thiab kuv, thiab txhua yam ciaj sia uas nrog nej nyob, mus rau txhua tiam. Kuv tsa kuv tus zaj sawv rau saum cov huab, mas tus zaj ntawd yuav ua tus cim uas kuv cog lus rau lub ntiajteb thiab kuv. Thaum kuv ua huab sawv rau saum lub ntiajteb thiab muaj tus zaj sawv hauv cov huab ntawd, kuv yuav nco txog tej lus cog tseg uas cog rau nej thiab kuv thiab txhua yam uas ciaj sia, mas dej yuav tsis los nyab ua kom txhua yam uas ciaj sia puam tsuaj dua li lawm Thaum tus zaj sawv saum cov huab, kuv yuav ntsia ntsoov tus zaj ntawd thiab nco txog tej lus cog tseg uas nyob ib txhis rau Vajtswv thiab txhua yam ciaj sia uas nyob hauv lub ntiajteb.” Vajtswv hais rau Nau‑a tias, “No lauj yog tus cim uas kuv cog lus cia rau kuv thiab txhua yam ciaj sia uas nyob hauv lub ntiajteb.” Nau‑a cov tub uas tawm hauv lub nkoj los yog Xeeb thiab Has thiab Yafe. Has yog Khana‑as li txiv. Peb tug no yog Nau‑a li tub. Neeg thiaj tshwm ntawm peb leeg no mus puv lub ntiajteb. Nau‑a yog neeg ua teb thiab nws yog thawj tug uas xub cog vaj txiv hmab. Nws haus cawv txiv hmab qaug mas mus pw liab qab hauv nws lub tsev ntaub. Mas Has uas yog Khana‑as txiv pom nws txiv liab qab tsuas txawm hais rau ob tug kwvtij uas nyob sab nraud. Ces Xeeb thiab Yafe thiaj muab ib daim pam tab khuam saum ob tug xub pwg, thaub qab mus npog leej txiv lub cev uas liab qab tsuas. Ob tug tsis tig xubntiag saib thiaj tsis pom leej txiv lub cev uas liab qab ntawd. Thaum Nau‑a zoo cawv tsim los thiab paub tias tus tub ntxawg ua li cas rau nws lawm, nws txawm hais tias, “Khana‑as raug foom tsis zoo, nws yuav ua nws cov kwvtij tus qhev uas qes kawg.” Nau‑a kuj hais tias, “Thov Yawmsaub uas yog kuv tus Vajtswv foom koob hmoov rau Xeeb. Thiab cia Khana‑as ua Xeeb li qhev lauj. Thov Vajtswv nthuav Yafe lub tebchaws kom dav thiab cia nws nyob hauv Xeeb tej tsev ntaub. Thiab cia Khana‑as ua Yafe qhev.” Txij thaum dej nyab ntiajteb los Nau‑a tseem nyob tau peb puas tsib caug xyoo. Nau‑a li hnub nyoog huvsi muaj cuaj pua tsib caug xyoo nws li tuag. Txij ntawm no mus yog Nau‑a cov tub li caj ces, yog Xeeb thiab Has thiab Yafe lawv tej tub ki uas dej nyab ntiajteb tag li yug los. Yafe li tub yog Kaumaw, Makau, Madai, Yavas, Thunpas, Mese thiab Thila. Kaumaw li tub yog Akhena thiab Lifa thiab Thaukama. Yavas li tub yog Elisas, Thasi, Khithi thiab Daudani. (Cov neeg no tej tub ki thiaj mus nyob thoob plaws tej tebchaws ntawm ntug hiavtxwv, nyias nyob nyias ib lub nyuag tebchaws, nyias hais nyias ib yam lus, nyias nrog nyias cum nyob, thiab nyias ua nyias ib haiv neeg.) Has li tub yog Khuj, Iyi, Phuj thiab Khana‑as. Khuj li tub yog Xenpa, Havila, Xatha, La‑ama thiab Xatheka. La‑ama li tub yog Senpa thiab Dedas. Khuj muaj ib tug tub hu ua Nilauj. Nilauj yog thawj tug uas muaj siab loj siab tuab hauv ntiajteb no. Nilauj yog tus Kws txawj tua nqaij kawg li tab meeg ntawm Yawmsaub xubntiag. Vim li no thiaj muaj paj lug hais tias, “Txawj tua nqaij zoo li Nilauj uas tua tab meeg ntawm Yawmsaub xubntiag.” Thawj lub tebchaws uas Nilauj kav yog lub moos Npanpee thiab lub moos Elej thiab lub moos Akhab. Txhua lub moos no nyob hauv Sina tebchaws. Nilauj tawm ntawm lub tebchaws ntawd mus rau Axilia tebchaws mas rhawv lub moos Ninave thiab lub moos Lehaunpau‑i thiab lub moos Khala thiab lub moos Lexee uas nyob ntawm lub moos Ninave thiab lub moos Khala ntu nruab nrab. Lub moos Khala ntawd loj kawg li. Iyi cov tub yog cov neeg no, yog cov Ludi, cov Anami, cov Lehanpi, cov Nathuhi, cov Paluxi thiab cov Khaluhi (cov neeg Filixatee yog tshwm ntawm cov Khaluhi los) thiab cov Khathauli. Khana‑as cov tub yog cov no, Xaidoo yog tus tub hlob, cov yau yog Hej, thiab cov Yenpu, cov Amaulai, cov Kawkasi, cov Hivai, cov Akhi, cov Xini, cov Alava, cov Xema thiab cov Hama. Yav tom qab no tej cum Khana‑as nyias txawm ncaim mus nyob nyias lawm. Cov Khana‑as li tebchaws yog txij ntua lub moos Xaidoo mus rau lub moos Kelas thiab txog ntua lub moos Kaxa thiab mus rau lub moos Xaudoo thiab Kaumaula thiab Ama thiab Xenpau‑i thiab txog ntua lub moos Lasa. Cov no yog Has li tub uas lawv nyias nrog nyias cum nyob, nyias hais nyias ib yam lus, nyias nyob nyias ib lub nyuag tebchaws, thiab nyias ua nyias ib haiv neeg. Xeeb uas yog Yafe tus tijlaug hlob kiag kuj muaj tub. Nws yog cov Enpaw sawvdaws tus yawg koob. Xeeb li tub yog Elas, Asu, Apasa, Lus thiab Alas. Alas li tub yog Us, Hoo, Kethaw thiab Mab. Apasa muaj ib tug tub hu ua Sela. Sela muaj ib tug tub hu ua Enpaw. Enpaw muaj ob tug tub, ib tug hu ua Pele vim yog thaum Pele ua neej nyob ntawd tej neeg txawm faib teb faib chaw. Pele tus kwv hu ua Yaujthas. Yaujthas cov tub yog cov no, yog Amauda, Seleb, Haxamave, Yela, Hadaulas, Uxas, Ntila, Aunpas, Anpima‑ee, Senpa, Aufi, Havila thiab Yaunpam. Cov neeg no puavleej yog Yaujthas li tub ki xeeb ntxwv. Lub tebchaws uas lawv nyob ntawd nyob txij ntua ntawm lub moos Mesas mus rau lub moos Xefa uas nyob saum tej roob sab hnub tuaj. Cov neeg no yog Xeeb li caj ces uas lawv nyias nrog nyias cum nyob, nyias hais nyias ib yam lus, nyias nyob nyias ib lub nyuag tebchaws, thiab nyias ua nyias ib haiv neeg. Cov neeg no yog Nau‑a cov tub li caj ces uas nyias nrog nyias cum nyob thiab nyias ua nyias ib haiv neeg. Txhua haiv neeg puavleej tshwm ntawm lawv los mus nyob puv ntiajteb tom qab uas dej nyab ntiajteb lawd. Tag nrho tej neeg hauv ntiajteb puavleej paub tib yam lus thiab siv tej lus ib yam nkaus. Thaum lawv tsiv mus rau sab hnub tuaj mas mus txog ib lub tiaj ntawm Sina tebchaws ces txawm ua vaj ua tsev nyob qhov ntawd. Lawv nyias taus nyias hais tias, “Peb cia li tuaj ua ke ua thwv cib muab hlawv kom tawv.” Lawv txawm muaj thwv cib siv ib yam li pob zeb, thiab muaj roj av nplaum siv ib yam li hmoov zeb sib. Lawv hais tias, “Cia li tuaj, peb rhawv ib lub nroog thiab ua ib tug pej thuam kom lub ntsis siab mus nto ntuj, thiab cia peb ua kom peb tau koob meej. Yog peb tsis ua li ntawd peb yuav khiav ri sua mus thoob ntiajteb.” Yawmsaub nqes los saib lub nroog ntawd thiab tus pej thuam uas neeg ua ntawd. Mas Yawmsaub hais tias, “Saib maj, cov neeg no yog tib haiv neeg thiab lawv sawvdaws hais tib yam lus. No yog qhov uas lawv nyuam qhuav pib ua xwb, mas nimno yog lawv xav ua ib yam dabtsi los lawv yeej ua kom tau xwb. Cia peb nqes mus ua kom lawv tej lus ntxhov tsis sib thooj kom ib leeg hais ib leeg thiaj tsis nkag siab.” Yawmsaub thiaj ua rau lawv tawg ri sua qhov ntawd mus thoob ntiajteb, lawv thiaj tso tseg tsis ua lub nroog ntawd lawm. Vim li no thiaj hu lub nroog ntawd ua Npanpee, vim qhov chaw ntawd Yawmsaub ua rau lawv tej lus ntxhov thoob ntiajteb. Thiab Yawmsaub ua rau lawv tawg ri sua qhov ntawd mus thoob ntiajteb. Ntawm no mus yog Xeeb caj ces. Dhau dej nyab ob xyoos, thaum Xeeb hnub nyoog muaj ib puas xyoo mas nws muaj tus tub Apasa. Thaum Xeeb muaj tus tub Apasa lawm, nws tseem nyob tau tsib puas xyoo thiab muaj tub muaj ntxhais ntxiv. Apasa hnub nyoog muaj peb caug tsib xyoos li muaj tus tub Sela. Thaum Apasa muaj tus tub Sela lawm, nws tseem nyob tau plaub puas peb xyoos thiab muaj tub muaj ntxhais ntxiv. Sela hnub nyoog muaj peb caug xyoo li muaj tus tub Enpaw. Thaum Sela muaj tus tub Enpaw lawm, nws tseem nyob tau plaub puas peb xyoos thiab muaj tub muaj ntxhais ntxiv. Enpaw hnub nyoog muaj peb caug plaub xyoos li muaj tus tub Pele. Thaum Enpaw muaj tus tub Pele lawm, nws tseem nyob tau plaub puas peb caug xyoo thiab muaj tub muaj ntxhais ntxiv. Pele hnub nyoog muaj peb caug xyoo li muaj tus tub Le‑u. Thaum Pele muaj tus tub Le‑u lawm, nws tseem nyob tau ob puas cuaj xyoos thiab muaj tub muaj ntxhais ntxiv. Le‑u hnub nyoog muaj peb caug ob xyoos li muaj tus tub Xelu. Thaum Le‑u muaj tus tub Xelu lawm, nws tseem nyob tau ob puas xya xyoo thiab muaj tub muaj ntxhais ntxiv. Xelu hnub nyoog muaj peb caug xyoo li muaj tus tub Nahau. Thaum Xelu muaj tus tub Nahau lawm, nws tseem nyob tau ob puas xyoo thiab muaj tub muaj ntxhais ntxiv. Nahau hnub nyoog muaj nees nkaum cuaj xyoos li muaj tus tub Thela. Thaum Nahau muaj tus tub Thela lawm, nws tseem nyob tau ib puas kaum cuaj xyoos thiab muaj tub muaj ntxhais ntxiv. Thela hnub nyoog muaj xya caum xyoo li muaj tus tub Aplas thiab Nahau thiab Halas. Ntawm no mus yog Thela caj ces. Thela muaj peb tug tub yog Aplas, Nahau thiab Halas. Halas tus tub yog Lauj. Halas tuag ua nws txiv Thela ntej rau hauv lub tebchaws uas yug nws, yog hauv cov Kheedia lub moos Aw. Aplas thiab Nahau kuj tau pojniam. Aplas pojniam hu ua Xalai, Nahau pojniam hu ua Meekha. Meekha yog Halas li ntxhais. Halas yog Meekha thiab Ixakha txiv. Xalai tsis xeeb tub mas tsis muaj menyuam. Thela coj nws tus tub Aplas thiab nws tus xeeb ntxwv Lauj uas yog Halas tus tub thiab Xalai uas yog nws tus nyab, uas yog nws tus tub Aplas pojniam, mas lawv tawm hauv cov Kheedia lub moos Aw yuav tsiv mus rau Khana‑as tebchaws. Tiamsis thaum lawv los txog ntawm lub moos Halas lawv txawm nyob qhov ntawd. Thela hnub nyoog muaj ob puas tsib xyoos, Thela txawm tuag rau hauv lub moos Halas lawm. Yawmsaub hais rau Aplas tias, “Koj cia li tawm hauv koj lub tebchaws thiab tawm hauv koj cov kwvtij thiab koj txiv lub tsev mus rau lub tebchaws uas kuv yuav qhia rau koj. Kuv yuav tsa koj ua ib haiv neeg loj thiab kuv yuav foom koob hmoov rau koj thiab ua rau koj lub npe nrov nto moo lug mus, mas koj yuav ua rau lwm tus tau koob hmoov. Kuv yuav foom koob hmoov rau cov uas foom koob hmoov rau koj. Kuv yuav tsawm foom cov uas foom koj tsis zoo. Ib tsoom neeg hauv lub ntiajteb yuav tau koob hmoov ntawm koj los.” Mas Aplas kuj mus raws li Yawmsaub tau hais rau nws. Lauj kuj nrog nws mus thiab. Thaum Aplas tawm hauv lub moos Halas mus nws hnub nyoog muaj xya caum tsib xyoos. Aplas coj nws tus pojniam Xalai thiab Lauj uas yog nws tus kwv li tub, thiab ib puas tsav yam uas lawv khwv tau thiab tej tub qhe uas lawv tau hauv lub moos Halas, mas lawv tsiv mus rau Khana‑as tebchaws. Thaum mus txog Khana‑as tebchaws lawm, Aplas txawm mus zuj zus txog lub chaw tseem ceeb ntawm lub moos Sekhee, yog mus txog tus ntoo xeeb ntawm Maule. Lub sijhawm ntawd cov Khana‑as nyob hauv lub tebchaws ntawd. Mas Yawmsaub los tshwm rau Aplas pom thiab hais tias, “Lub tebchaws no kuv yuav pub rau koj caj ces.” Aplas txawm ua ib lub thaj qhov ntawd rau Yawmsaub uas los tshwm rau nws pom. Nws tshais chaw qhov ntawd mus rau lub roob uas nyob lub moos Npe‑ee sab hnub tuaj ces txawm tsa tsev ntaub tsuam qhov ntawd, lub moos Npe‑ee nyob sab hnub poob, lub moos Ai nyob sab hnub tuaj. Nws txawm ua ib lub thaj rau Yawmsaub qhov ntawd thiab tuav Yawmsaub lub npe thov Yawmsaub. Aplas kuj tshais chaw mus zuj zus ib ntus ib ntus mus rau nram Neke. Muaj kev tshaib nqhis hauv lub tebchaws. Aplas txawm tsiv mus nyob ib ntus nram Iyi tebchaws, vim yog hauv Khana‑as tebchaws muaj kev tshaib nqhis heev. Thaum mus yuav txog Iyi tebchaws, Aplas hais rau nws tus pojniam Xalai tias, “Kuv paub tias koj yog ib tug pojniam zoo nkauj. Thaum cov neeg Iyi pom koj, lawv yuav hais tias, ‘Tus pojniam no yog yawg ntawd li pojniam,’ ces yuav muab kuv tua pov tseg yuav tseg koj nyob. Koj cia li hais tias koj yog kuv li muam xwv lawv thiaj ua zoo rau kuv vim yog muaj koj thiab lawv thiaj tseg kuv txojsia vim yog saib rau koj.” Thaum Aplas nkag mus txog hauv Iyi tebchaws lawm, cov Iyi pom tias tus pojniam zoo nkauj heev. Thaum Falau cov tub teg tub taws pom nws lawm, lawv txawm qhuas nws rau Falau. Lawv txawm coj Xalai mus rau hauv Falau lub tsev. Mas Falau ua zoo rau Aplas heev vim yog saib rau Xalai. Aplas thiaj tau yaj tau nyuj tau txiv nees luav, thiab tau tub qhe nkauj qhev thiab tej maum nees luav thiab tej ntxhuav. Tiamsis Yawmsaub ua mob phem loj los raug Falau thiab nws tsev neeg vim yog tim Xalai uas yog Aplas tus pojniam. Falau thiaj hu Aplas tuaj thiab hais tias, “Koj ua dabtsi li no rau kuv? Ua cas koj tsis hais tias tus pojniam no yog koj li pojniam? Ua cas koj hais tias nws yog koj li muam, kuv thiaj coj nws los ua kuv tus pojniam? Koj tus pojniam nyob no nawj, cia li coj nws mus thiab khiav tawm mus.” Falau hais txog Aplas rau nws cov tub teg tub taws mas lawv thiaj xa Aplas thiab nws tus pojniam thiab tej qhov txhia chaw uas nws muaj huvsi rov mus. Aplas thiab nws tus pojniam txawm tawm hauv Iyi tebchaws coj txhua yam uas nws muaj mus txog Neke. Lauj kuj nrog nws mus thiab. Aplas muaj tsiaj txhu thiab nyiaj thiab kub nplua mias. Nws tsiv ntawm Neke ib ntus zuj zus mus txog lub moos Npe‑ee, yog lub chaw uas yav dhau los nws tau tsa tsev ntaub rau ntu nruab nrab lub moos Npe‑ee thiab lub moos Ai, thiab yog lub chaw uas yav nram ntej nws tau ua lub thaj cia. Thiab Aplas tuav Yawmsaub lub npe thov qhov ntawd. Lauj uas nrog Aplas ua ke kuj muaj yaj muaj tshis thiab muaj nyuj tsheej pab thiab muaj tej tsev ntaub. Lub tebchaws yug tsis tau ob tug nyob ua ke vim ob tug muaj tsiaj txhu coob qhov txhia chaw ntau kawg li mas tebchaws tsis txaus ob tug nyob ua ke. Aplas cov tub qhe yug tsiaj thiab Lauj cov tub qhe yug tsiaj kuj sib cav sib ceg. Lub sijhawm ntawd cov Khana‑as thiab cov Pelixai tseem nyob hauv lub tebchaws ntawd. Aplas thiaj hais rau Lauj tias, “Tsis txhob cia wb sib cav sib ceg thiab tsis txhob cia koj cov tub qhe yug tsiaj thiab kuv cov tub qhe yug tsiaj sib cav sib ceg, rau qhov wb yog tej txiv tub. Lub tebchaws huvsi nyob ntawm koj xubntiag no. Koj cia li ncaim ntawm kuv mus. Yog koj mus rau sab laug kuv yuav mus rau sab xis, lossis yog koj mus rau sab xis kuv yuav mus rau sab laug.” Lauj tsa muag ntsia mas pom tias lub tiaj ntawm ntug dej Yaladee mus txog lub moos Xau‑a muaj dej zoo txhua qhov ib yam li Yawmsaub lub vaj thiab ib yam li Iyi tebchaws. No yog ua ntej uas Yawmsaub tsis tau ua kom lub moos Xaudoo thiab lub moos Kaumaula puam tsuaj. Lauj thiaj xaiv lub tiaj ntawm ntug dej Yaladee rau nws, thiab Lauj txawm mus rau sab hnub tuaj, ob tug thiaj sib ncaim. Aplas nyob hauv Khana‑as tebchaws hos Lauj mus nyob hauv tej moos nram tiaj, thiab nws tshais tsev ntaub mus nyob ze lub moos Xaudoo. Cov neeg hauv lub moos Xaudoo ua phem ua txhaum loj rau Yawmsaub. Thaum Lauj ncaim Aplas lawm, Yawmsaub hais rau Aplas tias, “Koj tsa muag ntsia ntawm qhov chaw uas koj nyob no mus rau sab ped sab nrad sab hnub tuaj sab hnub poob. Tag nrho lub tebchaws uas koj pom no kuv yuav muab pub rau koj thiab koj caj ces mus ib txhis. Kuv yuav ua kom koj caj ces coob yam li tej hmoov av, leejtwg suav txheeb tej hmoov av thiaj li suav txheeb koj caj ces. Koj cia li sawv tsees mus ncig kom thoob plaws lub tebchaws no rau sab ntev thiab sab dav huvsi, rau qhov kuv yuav muab lub tebchaws no rau koj.” Aplas thiaj tshais tsev ntaub los nyob ze cov ntoo xeeb ntawm Male uas nyob ntawm Heploo, thiab nws ua ib lub thaj rau Yawmsaub qhov ntawd. Thaum ntawd vajntxwv Alafee uas kav Sina, thiab vajntxwv Ali‑au uas kav lub moos Eelaxa thiab vajntxwv Khentaula‑aumaw uas kav lub moos Elas, thiab vajntxwv Thidas uas kav lub moos Kauyi, cov vajntxwv no ua rog rau vajntxwv Npela uas kav lub moos Xaudoo thiab vajntxwv Npisa uas kav lub moos Kaumaula thiab vajntxwv Sinaj uas kav lub moos Ama thiab vajntxwv Semenpaw uas kav lub moos Xenpau‑i thiab tus vajntxwv uas kav lub moos Npelas, uas yog lub moos Xau‑a. Cov vajntxwv no sau zog ua ke rau ntawm lub tiaj Xidi (uas yog Hiavtxwv Ntsev. ) Cov vajntxwv no tau zwm rau vajntxwv Khentaula‑aumaw tau kaum ob xyoo, tiamsis xyoo kaum peb lawv tau fav xeeb. Mas xyoo uas kaum plaub Khentaula‑aumaw thiab cov vajntxwv uas koom nws ntawd tuaj ua rog yeej cov neeg Lefa‑i ntawm lub moos Athalau Khana‑i, thiab cov neeg Xuxis ntawm lub moos Has, thiab cov Emi ntawm lub moos Savekhiliyatha‑i, thiab cov neeg Hauli pem tej roob Xe‑i mus txog lub moos Eepala uas nyob npuas tebchaws moj sab qhua. Mas lawv tig rov los txog lub moos Eemixafa uas yog lub moos Khade, lawv kov yeej cov Amalej lub tebchaws thiab kov yeej cov Amaulai uas nyob hauv lub moos Haxaxoothama. Mas Xaudoo tus vajntxwv thiab Kaumaula tus vajntxwv thiab Ama tus vajntxwv thiab Xenpau‑i tus vajntxwv thiab Npela uas yog Xau‑a tus vajntxwv kuj tawm mus rau ntawm lub tiaj Xidi ua rog rau vajntxwv Khentaula‑aumaw uas kav lub moos Elas thiab vajntxwv Thidas uas kav lub moos Kauyi thiab vajntxwv Alafee uas kav Sina, thiab vajntxwv Ali‑au uas kav lub moos Eelaxa, plaub tug vajntxwv ua rog rau tsib tug vajntxwv. Lub tiaj Xidi muaj qhov roj av nplaum thoob plaws, mas thaum Xaudoo tus vajntxwv thiab Kaumaula tus vajntxwv khiav los, muaj qee leej txawm poob rau hauv cov qhov roj ntawd, cov uas tshuav khiav tag rau pem tej roob. Cov yeeb ncuab thiaj tuaj muab lawv tej qhov txhia chaw mov noj hauv Xaudoo thiab Kaumaula huvsi sau zog mus lawm. Lawv kuj kuav kiag Lauj uas yog Aplas tus kwv li tub uas nyob hauv lub moos Xaudoo. Mas muaj ib tug dhia dim hauv tshav rog tuaj hais rau Aplas uas yog neeg Henplais paub. Aplas nyob ze Male cov ntoo xeeb. Male yog neeg Amaulai, nws kwvtij yog Ekhau thiab Anaw, lawv cov no nrog Aplas sib raug zoo. Thaum Aplas hnov tias nws tus kwvtij txheeb raug ntes coj mus lawm, ces nws txawm coj nws cov neeg uas yug hauv nws tsev uas nws qhia kom txawj ua rog peb puas kaum yim leej caum mus cuag ntawm lub moos Daj. Thaum tsaus ntuj Aplas thiaj faib nws cov tub rog ua tej pab tej pawg, nws thiab nws cov tub qhe thiaj txeem mus ntaus yeeb ncuab thiab muab caum mus txog lub moos Haunpa uas nyob ntawm lub nroog Damaxaka sab ped. Mas nws muab tau tej qhov txhia chaw huvsi rov los thiab coj tau Lauj uas yog nws tus kwv li tub thiab nws tej qhov txhia chaw thiab tej pojniam thiab nws cov neeg huvsi rov los. Thaum Aplas mus tua yeej Khentaula‑aumaw thiab cov vajntxwv uas koom nrog Khentaula‑aumaw rov qab los, mas tus vajntxwv hauv lub moos Xaudoo tawm tuaj tos Aplas ntawm lub hav Save (uas yog lub Hav Vajntxwv). Thiab Mekhixede uas yog vajntxwv hauv lub moos Xalee coj ncuav thiab cawv txiv hmab tuaj tos. Mekhixede yog Vajtswv uas loj dua ntais tus pov thawj, mas nws foom koob hmoov rau Aplas hais tias, “Thov Vajtswv uas loj dua ntais uas tsim lub ntuj thiab lub ntiajteb pub koob hmoov rau Aplas lauj. Qhuas Vajtswv tus loj dua ntais, uas muab koj cov yeeb ncuab rau hauv koj txhais tes.” Aplas txawm muab txhua yam uas nws coj los ntawd ib feem hauv kaum pub rau Mekhixede. Xaudoo tus vajntxwv hais rau Aplas tias, “Thov muab cov neeg rau kuv xwb, tej qhov txhia chaw koj cia li coj mus yuav.” Aplas hais rau Xaudoo tus vajntxwv tias, “Kuv twb tsa tes twv rau Vajtswv Yawmsaub tus loj dua ntais uas tsim ntuj tsim teb tias, kuv tsis yuav ib txoj xov lossis ib txoj hlua khau lossis ib yam dabtsi uas yog koj li, xwv koj thiaj hais tsis tau tias, Kuv txhawb Aplas nplua nuj. Kuv tsis yuav ib yam dabtsi li, tsuas yog yuav tej zaub mov uas kuv cov neeg tau noj lawm thiab cov neeg uas nrog kuv mus li feem xwb, yog Anaw, Ekhau thiab Male li feem. Cia lawv coj lawv li feem mus.” Dhau ntawd Aplas ua yog toog pom Yawmsaub hais rau nws tias, “Aplas, koj tsis txhob ntshai, kuv yog daim hlau uas thaiv koj, kuv yuav pub tshav ntuj ntau kawg rau koj.” Aplas nug tias, “Au Vajtswv Yawmsaub, koj yuav pub dabtsi rau kuv? Vim tias kuv tseem tsis tau muaj menyuam li, mas Eliyexaw uas yog neeg Damaxaka yuav ua tus uas saws kuv qub txeeg qub teg.” Thiab Aplas hais tias, “Koj tsis tau pub menyuam rau kuv, mas ib tug tub qhe uas yug hauv kuv tsev yuav ua tus saws kuv qub txeeg qub teg.” Mas Yawmsaub hais lus tuaj rau Aplas tias, “Tus kod tsis yog tus uas saws koj qub txeeg qub teg. Koj tus tub uas koj yug yuav ua tus uas saws ntag.” Yawmsaub txawm coj Aplas tawm rau sab nraud mas hais tias, “Cia li saib saum ntuj, yog koj suav txheeb tej hnub qub cia li suav mus.” Mas Yawmsaub hais rau nws tias, “Koj caj ces yuav coob ib yam nkaus li ntawd.” Aplas kuj ntseeg Yawmsaub. Yawmsaub suav tias qhov uas Aplas ntseeg ntawd yog txojkev ncaj ncees rau Aplas. Mas Yawmsaub hais rau Aplas tias, “Kuv yog Yawmsaub uas coj koj tawm hauv cov Kheedia lub moos Aw, thiaj li pub tau lub tebchaws no rau koj ua koj tug.” Aplas hais rau nws tias, “Au Vajtswv Yawmsaub kuv yuav ua li cas paub tias kuv yuav tau lub tebchaws no ua kuv tug?” Yawmsaub hais rau Aplas tias, “Cia li coj ib tug maum nyuj muaj peb xyoos, thiab ib tug maum tshis muaj peb xyoos thiab ib tug txiv yaj muaj peb xyoos, thiab ib tug nquab taug thiab ib tug rhaws nquab nyeg tuaj rau kuv.” Aplas thiaj coj tej tsiaj no tuaj, thiab muab cov tsiaj phua ua ob sab tso ua ob leej sib ncaj, tiamsis cov noog ntawd mas tsis phua. Thaum tej liaj dav ya los rau ntawm cov nqaij ntawd, Aplas muab ntiab khiav mus. Thaum hnub yuav poob qho, dab ntub txawm laum Aplas tsaug zog heev, txojkev ntshai thiab kev tsaus ntuj dub nciab los tsuam nws. Mas Yawmsaub hais rau Aplas tias, “Koj cia li paub tseeb tias koj caj ces yuav poob tebchaws mus nyob rau hauv lub tebchaws uas tsis yog lawv teb lawv chaw, thiab lawv yuav ua luag qhev thiab raug tsim txom plaub puas xyoo rau qhov ntawd. Tiamsis kuv yuav rau txim rau lub tebchaws uas lawv ua qhev ntawd, mas dhau ntawd lawv yuav tawm los muaj nyiaj txiag qhov txhia chaw ntau. Tiamsis koj mas koj yuav mus nrog koj tej poj koob yawm txwv nyob siab tus yees, koj yuav laus heev li tuag thiab muab log. Mas tiam uas plaub koj caj ces yuav rov los rau ntawm no, vim yog cov Amaulai tej kev phem kev qias tsis tau txaus.” Thaum hnub poob qho thiab tsaus ntuj dub lawm, txawm muaj ib cub hluavtaws pa ncho auv niab thiab ib teg tsau cig lam lug mus hauv nruab nrab ob leej nqaij ntawd. Hnub ntawd Yawmsaub cog lus rau Aplas tias, “Kuv muab lub tebchaws no rau koj caj ces, txij ntua tus dej Iyi mus txog tus dej loj uas yog tus dej Yufeti, uas yog cov Khenai, cov Khena, cov Khamaunai, cov Hithai, cov Pelixai, cov Lefa‑i, cov Amaulai, cov Khana‑as, cov Kawkasi thiab cov Yenpu li tebchaws.” Xalai uas yog Aplas tus pojniam tsis muaj menyuam rau Aplas. Xalai muaj ib tug nkauj qhev uas yog neeg Iyi hu ua Haka. Xalai thiaj hais rau Aplas tias, “Saib maj, Yawmsaub tsis pub kuv muaj menyuam. Koj cia li mus nrog kuv tus nkauj qhev pw, tej zaum nws yuav yug tau menyuam rau kuv.” Aplas kuj mloog Xalai lus. Thaum Aplas nyob hauv Khana‑as tebchaws tau kaum xyoo lawm, Aplas tus pojniam Xalai txawm muab nws tus nkauj qhev Haka uas yog neeg Iyi rau nws tus txiv Aplas yuav ua pojniam. Aplas nrog Haka pw, nws txawm xeeb tub. Thaum nws paub tias nws xeeb tub lawm nws txawm saib tsis taus Xalai. Xalai txawm hais rau Aplas tias, “Cia koj ris qhov uas kuv raug saib tsis taus no. Kuv muab kuv tus nkauj qhev rau hauv koj lub xubntiag, tiamsis thaum nws paub tias nws xeeb tub lawm nws txawm saib tsis taus kuv. Thov Yawmsaub txiav txim saib yog tim kuv los tim koj.” Aplas thiaj hais rau Xalai tias, “Koj tus nkauj qhev nyob hauv koj kev tswjhwm. Cia li ua rau nws raws li koj pom zoo.” Xalai thiaj tsim txom Haka, Haka thiaj khiav lawm. Yawmsaub tus tubtxib saum ntuj ntsib Haka hauv tebchaws moj sab qhua ntawm lub qhov dej uas nyob ntawm txojkev mus rau lub moos Su. Nws thiaj nug Haka tias, “Haka, Xalai tus nkauj qhev, koj tuaj qhovtwg tuaj thiab koj yuav mus qhovtwg?” Haka teb tias, “Kuv khiav kuv tus poj lospav Xalai.” Yawmsaub tus tubtxib saum ntuj hais rau nws tias, “Cia li rov qab mus cuag koj tus poj lospav thiab ua raws li nws tswjhwm.” Yawmsaub tus tubtxib kuj hais rau nws tias, “Kuv yuav pub koj caj ces huaj vam coob coob suav tsis txheeb.” Yawmsaub tus tubtxib hais rau Haka tias, “Koj twb xeeb menyuam lawm, koj yuav yug tau ib tug tub, thiab koj yuav hu tus tub ntawd lub npe tias Yisama‑ee, rau qhov Yawmsaub twb hnov txog koj txojkev txom nyem lawm. Nws yuav zoo ib yam li tus nees luav qus, nws txhais tes yuav tawm tsam sawvdaws, thiab ib tsoom sawvdaws txhais tes yuav tawm tsam nws. Nws yuav nyob ua yeeb ncuab rau nws cov kwvtij sawvdaws.” Haka thiaj tis npe rau Yawmsaub uas hais lus rau nws tias, “Koj yog tus Vajtswv uas pom,” rau qhov nws hais tias, “Kuv twb pom Vajtswv tiag tiag li mas tseem muaj txojsia nyob thiab lov?” Vim li no thiaj hu lub qhov dej ntawd tias Npe‑aw Lahailai, nyob ntawm lub moos Khade thiab lub moos Npele ntu nruab nrab. Haka yug ib tug tub rau Aplas. Mas Aplas tis nws tus tub uas Haka yug hu ua Yisama‑ee. Thaum Haka yug Yisama‑ee rau Aplas ntawd, Aplas hnub nyoog muaj yim caum rau xyoo. Thaum Aplas hnub nyoog muaj cuaj caum cuaj xyoos, Yawmsaub los tshwm rau Aplas thiab hais rau nws tias, “Kuv yog Vajtswv uas muaj hwjchim loj kawg nkaus. Cia li nrog nraim kuv thiab xyaum zoo kawg nkaus. Kuv yuav nrog koj sib cog lus, thiab kuv yuav ua rau koj caj ces huaj vam coob kawg nkaus.” Aplas txawm khwb nkaus rau hauv av, mas Vajtswv hais rau nws tias, “No yog kuv tej lus uas kuv cog rau koj, koj yuav ua ntau haiv neeg leej txiv. Koj lub npe yuav tsis hu ua Aplas li lawm, yuav hu ua Aplahas, vim kuv ua rau koj ua ntau haiv neeg leej txiv. Kuv yuav ua rau koj muaj tub ki xeeb ntxwv coob, thiab kuv yuav ua rau koj ua ntau haiv neeg thiab yuav muaj tej vajntxwv tshwm hauv koj los. Kuv yuav cog lus tseg ruaj rau kuv thiab koj thiab rau koj caj ces uas tshwm los txhua tiam tom qab, ua lo lus cog tseg uas nyob mus ib txhis, hais tias kuv yuav ua koj tus Vajtswv thiab ua koj caj ces uas tshwm los tom qab tus Vajtswv. Kuv yuav muab lub tebchaws Khana‑as uas koj ua qhua nyob no huvsi pub rau koj thiab pub rau koj caj ces uas tshwm los tom qab ua lawv tug mus ib txhis li. Thiab kuv yuav ua lawv tus Vajtswv.” Vajtswv hais rau Aplahas tias, “Hais txog koj, mas koj thiab koj caj ces uas tshwm los txhua tiam tom qab yuav tsum ua raws li kuv tej lus cog tseg. No yog kuv tej lus cog tseg rau kuv thiab koj thiab koj caj ces uas tshwm los tom qab mas nej yuav tsum ua raws li. Txhua tus txivneej hauv nej yuav tsum ua kevcai txiav. Nej yuav tsum ua kevcai txiav daim tawv chaw xis, ua lub hom thawj rau tej lus cog tseg rau kuv thiab nej. Nej cov tub uas hnub nyoog muaj yim hnub, yuav tsum muab ua kevcai txiav. Nej yuav ua li no rau cov txivneej txhua tus hauv nej haiv neeg txhua tiam mus li, tsis hais cov uas yug hauv nej tsev thiab cov uas nej muab nyiaj yuav lwm haiv neeg los uas tsis yog nej li menyuam. Cov uas yug hauv nej tsev thiab cov uas muab nyiaj yuav los yuav tsum ua kevcai txiav. Ua li no mas kuv tej lus cog tseg thiaj nyob hauv nej tej nqaij ua lo lus cog tseg mus ib txhis. Tus txivneej twg uas tsis tau ua kevcai txiav daim tawv chaw xis mas yuav raug muab rho tawm hauv nws haiv neeg, vim yog nws tau rhuav kuv tej lus cog tseg.” Thiab Vajtswv hais rau Aplahas tias, “Koj tus pojniam Xalai, koj tsis txhob hu nws ua Xalai, yuav hu ua Xala. Kuv yuav foom koob hmoov rau nws thiab tsis tag li ntawd xwb kuv yuav pub nws yug ib tug tub rau koj. Kuv yuav foom koob hmoov rau nws, nws yuav ua tej haiv neeg leej niam thiab tej vajntxwv yuav tshwm hauv nws los.” Aplahas txawm khwb nkaus rau hauv av luag thiab hais twjywm hauv lub siab tias, “Tus txivneej ib puas xyoo tseem muaj taus menyuam thiab lov? Xala muaj cuaj caum xyoo lawm tseem yug tau menyuam thiab lov?” Thiab Aplahas hais rau Vajtswv tias, “Au thov cia Yisama‑ee yog tus uas koj pom zoo.” Vajtswv hais tias, “Tsis yog li ntawd, koj tus pojniam Xala yuav yug ib tug tub rau koj thiab koj yuav tis npe hu ua Yiha. Kuv yuav cog lus tseg rau nws ua lo lus cog tseg mus ib txhis rau nws caj ces uas tshwm los tom qab. Hais txog Yisama‑ee, mas kuv twb hnov koj hais lawm. Kuv yuav foom koob hmoov rau nws thiab ua rau nws muaj tub ki thiab huaj vam coob coob. Nws yuav ua kaum ob tug thawj leej txiv thiab kuv yuav ua rau nws ua ib haiv neeg loj. Kuv yuav muab kuv tej lus cog tseg rau Yiha uas lwm xyoo lub caij no Xala yuav yug rau koj.” Thaum Vajtswv hais rau Aplahas tag lawm Vajtswv txawm rov qab ntawm nws mus lawm. Aplahas thiaj muab nws tus tub Yisama‑ee thiab txhua tus tub qhe uas yug hauv nws tsev thiab tej uas muab nyiaj yuav los, yog txhua tus txivneej hauv nws tsev, ua kevcai txiav daim tawv chaw xis rau hnub ntawd raws li Vajtswv hais rau nws. Aplahas hnub nyoog muaj cuaj caum cuaj xyoos rau thaum uas nws ua kevcai txiav daim tawv chaw xis. Nws tus tub Yisama‑ee hnub nyoog muaj kaum peb xyoos rau thaum nws ua kevcai txiav daim tawv chaw xis. Aplahas thiab nws tus tub Yisama‑ee ua kevcai txiav rau hnub ntawd ntag. Txhua tus txivneej hauv nws lub tsev, tsis hais cov uas yug hauv tsev thiab cov uas muab nyiaj yuav lwm haiv neeg los kuj nrog nws ib txhij ua kevcai txiav. Yawmsaub los tshwm rau Aplahas ntawm cov ntoo xeeb hauv Male, rau thaum Aplahas tseem zaum ntawm qhov rooj tsev ntaub thaum tshav ntuj kub heev. Nws tsa muag ntsia pom peb tug txivneej sawv tom nws hauv ntej. Thaum nws pom dheev lawv nws dhia loo ntawm qhov rooj mus tos lawv thiab pe rau hauv av, thiab hais tias, “Kuv tus tswv, yog koj txaus siab rau kuv, koj tsis txhob hla kiag ntawm koj tus qhev mus. Cia kuv coj mentsis dej tuaj rau nej ntxuav kotaw, thiab so hauv qab tus ntoo no. Vim nej twb tuaj txog nej tus qhev lawm, kuv yuav nqa mentsis zaub mov rau nej noj kom nej thiaj tau so los siav mam li mus.” Lawv teb hais tias, “Mus ua raws li koj hais.” Aplahas maj nroos nkag mus rau hauv tsev ntaub hais rau Xala tias, “Kavtsij mus muab peb xe‑a hmoov zoo zoo los zuaj ua ncuav.” Thiab Aplahas dhia loo mus rau hauv pab tsiaj, muab kiag ib tug thav nyuj mos zoo zoo cob rau tus tub qhe maj nroos ua zaub. Aplahas muab tej kua mis nyeem thiab nyuj mis thiab tej nqaij nyuj uas ua siav lawm los rau rau ntawm lawv xubntiag. Thaum lawv noj nws sawv ntsug ntawm lawv ib sab hauv tsob qab ntoo. Lawv nug nws tias, “Koj tus pojniam Xala nyob qhovtwg?” Nws teb tias, “Nyob hauv tsev ntaub.” Yawmsaub hais tias, “Lwm xyoo kuv yuav rov tuaj saib koj tiag tiag li, mas koj tus pojniam Xala yuav muaj ib tug tub.” Xala nyob ntawm lub qhov rooj tsev ntaub ncaj ntawm tus ntawd nrob qaum mloog thiab. Aplahas thiab Xala hnub nyoog nchav thiab laus heev lawm, Xala twb tseg tsis ua pojniam lawm. Xala thiaj luag twjywm hauv lub siab thiab hais tias, “Kuv laus lawm, kuv tus txiv kuj laus heev lawm, kuv tseem yuav zoo siab thiab lov?” Yawmsaub hais rau Aplahas tias, “Ua cas Xala luag thiab hais tias, ‘Kuv twb laus lawm, tseem yuav yug tau menyuam tiag tiag li lov?’ Muaj ib yam dabtsi uas Yawmsaub ua tsis tau lov? Txog sijhawm uas teem cia lawm kuv yuav rov tuaj cuag koj lwm xyoo, mas Xala yuav tau ib tug tub.” Tiamsis Xala tsis lees, nws hais tias, “Kuv tsis luag,” vim nws ntshai. Yawmsaub hais tias, “Tsis txhob dag, koj twb luag tiag tiag li.” Peb tus txivneej ntawd txawm tawm qhov ntawd mus, lawv mus saib lub moos Xaudoo. Aplahas nrog lawv mus xa lawv. Yawmsaub hais tias, “Kuv yuav npog tej uas kuv yuav ua tsis qhia rau Aplahas paub lov? Rau qhov Aplahas yuav ua ib haiv neeg uas loj thiab muaj zog heev, thiab ib tsoom tebchaws hauv ntiajteb yuav tau koob hmoov ntawm nws los. Kuv twb xaiv nws lawm kom nws thiaj qhuab qhia nws tej tub ki thiab nws caj ces uas tshwm los tom qab kom ua raws li Yawmsaub txojkev uas yog ua raug cai thiab ua ncaj ncees kom Yawmsaub thiaj li pub tej uas nws cog lus cia lawm rau Aplahas.” Yawmsaub hais tias, “Lub suab uas kom lub moos Xaudoo thiab lub moos Kaumaula nrov heev thiab lawv lub txim kuj loj heev, mas kuv yuav nqes mus xyuas lawv puas tau ua txhua yam txhaum raws li lub suab uas kom tuaj txog kuv ntawd. Yog tsis muaj kuv thiaj paub.” Cov txivneej ntawd txawm tawm qhov ntawd ncaj nraim mus rau lub moos Xaudoo, tiamsis Aplahas tseem sawv ntsug ntawm Yawmsaub lub xubntiag. Aplahas txawm txav los ze Yawmsaub thiab hais tias, “Koj yuav ua rau cov uas ncaj ncees nrog cov neeg phem puam tsuaj ua ke tiag li lov? Piv tias yog muaj tsib caug leej ncaj ncees nyob hauv lub moos ntawd, koj yuav ua rau lub moos ntawd puam tsuaj kiag lov? Koj yuav tsis tseg lub moos ntawd nyob vim yog saib rau tsib caug leej ncaj ncees uas nyob hauv li lov? Thov tsis txhob ua li ntawd kiag li lauj! Tsis txhob tua cov neeg ncaj ncees nrog cov neeg phem ua ke, tsis txhob ua rau cov ncaj ncees ib yam li ua rau cov neeg phem. Tsis txhob ua li ntawd lauj! Tus uas txiav txim tag nrho hauv lub ntiajteb yuav tsis ua ncaj lov?” Yawmsaub hais tias, “Yog kuv pom muaj tsib caug leej ncaj ncees nyob hauv lub moos Xaudoo, kuv yuav tseg lub moos ntawd huvsi nyob vim yog saib rau tsib caug leej ntawd.” Aplahas teb tias, “Txawm yog kuv tsuas yog hmoov av thiab hmoov tshauv xwb, los kuv tseem muaj ntsej muag nrog tus tswv txuas lus. Piv tias yog tsib caug leej ntawd poob tsib leeg lawm, koj tseem yuav ua rau lub moos huvsi puam tsuaj vim yog tu ncua tsib leeg ntawd lov?” Yawmsaub hais tias, “Yog kuv ntsib plaub caug tsib leeg uas ncaj ncees nyob hauv, kuv yuav tsis ua kom puam tsuaj.” Nws rov hais dua rau Yawmsaub tias, “Yog tias ntsib plaub caug leej nyob hauv nev?” Yawmsaub teb tias, “Vim yog saib rau plaub caug leej kuv yuav tsis ua kom puam tsuaj.” Aplahas thiaj hais tias, “Thov tus tswv tsis txhob chim, kuv yuav hais ntxiv. Yog tias ntsib peb caug leej nyob hauv nev?” Yawmsaub teb tias, “Yog kuv ntsib peb caug leej nyob hauv kuv yuav tsis ua kom puam tsuaj.” Aplahas hais tias, “Kuv tseem muaj ntsej muag nrog tus tswv txuas lus. Yog tias ntsib nees nkaum leej nyob hauv nev?” Yawmsaub teb tias, “Vim yog saib rau nees nkaum leej kuv yuav tsis ua kom lub moos ntawd puam tsuaj.” Mas Aplahas hais tias, “Thov tus tswv tsis txhob chim, kuv yuav hais dua ib zaug xwb. Yog tias ntsib kaum leej nyob hauv nev?” Yawmsaub teb tias, “Vim yog saib rau kaum leej, kuv yuav tsis ua kom lub moos puam tsuaj.” Thaum Yawmsaub nrog Aplahas sib txuas lus tag lawm, Yawmsaub kuj mus lawm, mas Aplahas thiaj rov qab mus rau nws lub chaw nyob lawm. Thaum yuav tsaus ntuj ob tug tubtxib saum ntuj mus txog lub moos Xaudoo, Lauj kuj zaum ntawm rooj loog lub moos Xaudoo. Thaum Lauj pom dheev ob tug, nws txawm sawv tsees mus hu ob tug, thiab pe ti nkaus hauv av. Nws hais tias, “Ob tug yawg hlob, kuv thov neb los so hauv kuv uas yog neb tus tub qhe lub tsev thiab ntxuav neb kotaw pw ib hmos, es tagkis neb li sawv ntxov taug kev mus.” Ob tug hais tias, “Tsis txhob ua li ntawd, ib lam pw ib hmos ntawm tshav puam no xwb.” Lauj txawm cheem ob tug heev heev, ob tug thiaj nrog Lauj mus thiab nkag rau hauv nws tsev. Nws npaj zaub mov thiab ci ncuav tsis xyaw keeb rau rau ob tug noj. Thaum tseem tsis tau pw, cov txivneej hauv lub moos Xaudoo ntawd tag nrho cov hluas cov laus txhua tus huvsi txawm tuaj vij nkaus Lauj lub tsev. Lawv hu Lauj hais tias, “Ob tug txivneej uas hmo no tuaj txog ntawm koj nyob qhovtwg? Cia li coj ob tug tawm tuaj rau peb, peb yuav deev ob tug.” Lauj tawm ntawm qhov rooj mus cuag lawv thiab muab qhov rooj kaw cia. Nws hais tias, “Kuv cov kwvtij, kuv thov nej tsis txhob ua phem li no. Kuv tseem muaj ob tug ntxhais tsis tau deev dua hluas nraug li. Cia kuv coj ob tug tawm tuaj rau nej, nej yuav ua li cas rau ob tug los kuj tau raws li nej lub siab nyiam. Tsis txhob ua li cas rau ob tug txivneej no rau qhov ob tug twb los nraim ntxoov ntxoo rau hauv kuv lub tsev lawm.” Tiamsis lawv teb tias, “Cia li khiav mus.” Thiab lawv hais tias, “Tus nyuag neeg no tsuas yog los dai peb xwb, nws tseem yuav ua tus txiav cai rau peb. Peb yuav ua tsis zoo rau koj heev dua li ua rau ob tug txivneej no.” Lawv txawm siv zog phoom Lauj thiab txav los ze yuav tsoo lub qhov rooj. Mas ob tug txivneej cev loo tes mus rub Lauj los rau hauv tsev thiab muab lub qhov rooj kaw. Ces ob tug txawm ua rau cov neeg uas nyob nraum qhov rooj ntawd dig muag tag, tsis hais tus hluas tus laus huvsi nyias taus nyias nrhiav tsis tau lub qhov rooj. Mas ob tug txivneej hais rau Lauj tias, “Hauv lub moos no koj puas muaj kwvtij neej tsa? Tsis hais tub, ntxhais, vauv lossis lwm tus uas yog koj li neeg hauv lub moos no, mas cia li coj tawm ntawm no mus huvsi. Wb twb yuav ua rau lub moos no puam tsuaj, vim lub suab uas kom cov neeg hauv lub moos no nrov heev kawg tuaj rau Yawmsaub, mas Yawmsaub thiaj txib wb tuaj ua kom lub moos no puam tsuaj.” Lauj thiaj tawm mus hais rau nws ob tug vauv uas tseem npaj yuav yuav nws ob tug ntxhais hais tias, “Cia li sawv tsees khiav tawm ntawm no mus, rau qhov Yawmsaub twb yuav ua rau lub moos no puam tsuaj.” Tiamsis ob tug vauv xav hais tias Lauj tso dag xwb. Thaum kaj ntug ob tug tubtxib saum ntuj txawm txhib Lauj tias, “Sawv tsees, coj koj pojniam thiab koj ob tug ntxhais uas nyob ntawm no tawm mus, tsam ces thaum rau txim rau lub moos no koj yuav puam tsuaj tag thiab.” Tiamsis Lauj tseem ua xyem xyav, mas ob tug tubtxib thiaj ntsiab nkaus Lauj thiab nws pojniam thiab nws ob tug ntxhais tes cab mus vim yog Yawmsaub khuvleej nws, ob tug thiaj coj nws tawm los rau nraum ntug moos. Thaum ob tug coj lawv tawm los lawm, ob tug hais tias, “Cia li khiav kom dim txojsia, tsis txhob tig saib qab lossis nres hauv lub tiaj no. Cia li khiav mus lawm pem roob tsam ces koj puam tsuaj tag.” Lauj hais rau ob tug tias, “Yawg hlob, tsis txhob ua li ntawd. Saib maj, koj twb txaus siab rau kuv uas yog koj tus tub qhe lawm thiab koj twb ua txojkev hlub uas loj kawg cawm kuv txojsia, tiamsis kuv khiav tsis taus mus rau pem roob tsam ces vij sub vij sw ntawd caum cuag ces kuv yuav tuag. Saib maj, lub moos tim nyob ze khiav taus mus txog, thiab yog lub moos me me. Thov cia kuv khiav mus rau tid, yog ib lub moos me me, kuv thiaj dim txojsia.” Ib tug tubtxib hais rau nws tias, “Kuv tso ncauj qhov no thiab, kuv yuav tsis ua rau lub moos uas koj hais ntawd puam tsuaj. Cia li maj nroos khiav mus rau qhov ntawd, rau qhov kuv ua tsis tau dabtsi mus txog thaum koj khiav mus txog qhov ntawd.” Vim li ntawd luag thiaj hu lub moos ntawd tias Xau‑a. Thaum Lauj los txog lub moos Xau‑a hnub tawm lawm. Mas Yawmsaub tso hluavtaws lawj faj ntawm Yawmsaub poob saum ntuj los rau lub moos Xaudoo thiab lub moos Kaumaula. Thiab nws rhuav tshem tej moos ntawd thiab lub tiaj huvsi thiab txhua tus uas nyob hauv tej moos thiab nroj tsuag qoob loo huvsi. Lauj tus pojniam uas ua Lauj qab tig saib tom qab, nws txawm txia kiag ua ib tug ncej ntsev lawm. Thaum tagkis sawv ntxov Aplahas tawm mus sawv ntawm lub chaw uas txeev sawv ntawm Yawmsaub xubntiag. Nws saib rau nram lub moos Xaudoo thiab lub moos Kaumaula thiab saib mus thoob plaws lub tiaj huvsi, ua ciav lub tebchaws muaj pa ncho lug yam nkaus li ib cub tawg hlob hlob ncho pa. Yog li ntawd thaum Vajtswv ua rau tej moos nram tiaj puam tsuaj tag, Vajtswv nco txog Aplahas, thiaj xa Lauj tawm khiav dim kev puam tsuaj, rau thaum Vajtswv muab tej moos uas Lauj nyob ua liamsim tag. Lauj thiab nws ob tug ntxhais tawm hauv lub moos Xau‑a mus nyob pem roob, rau qhov nws ntshai nyob hauv lub moos Xau‑a. Nws thiab ob tug ntxhais thiaj mus nyob hauv ib lub qhov tsua. Tus ntxhais hlob hais rau tus niam hluas tias, “Wb txiv laus lawm, thiab tsis muaj ib tug txivneej twg hauv lub ntiajteb yuav nrog wb pw ua ke raws li neeg ntiajteb ib txwm ua. Cia wb ua kom wb txiv haus cawv txiv hmab, ces wb yuav nrog nws pw, kom wb thiaj li muaj tub ki los ntawm wb txiv.” Ces hmo ntawd ob tug txawm kom leej txiv haus cawv txiv hmab, mas tus ntxhais hlob thiaj mus nrog leej txiv pw, leej txiv tsis paub tias tus ntxhais los pw thaum twg thiab sawv mus thaum twg lawm. Tagkis tus ntxhais hlob txawm hais rau tus niam hluas tias, “Nag hmo kuv twb mus nrog kuv txiv pw lawm. Cia hmo no wb ua kom nws haus cawv txiv hmab dua thiab, ces koj mus nrog nws pw, kom wb thiaj li muaj tub ki los ntawm wb txiv.” Ces ob tug txawm ua kom leej txiv haus cawv txiv hmab hmo ntawd thiab. Tus niam hluas thiaj mus nrog leej txiv pw, leej txiv tsis paub tias tus ntxhais los pw thaum twg thiab sawv mus thaum twg lawm. Yog li no Lauj ob tug ntxhais thiaj li xeeb menyuam ntawm ob tug txiv. Tus ntxhais hlob yug tau ib tug tub thiab tis npe hu ua Mau‑a. Nws ua cov Mau‑a uas nyob txog niaj hnub nimno tus yawg koob. Tus niam hluas kuj yug tau ib tug tub thiab tis npe hu ua Npee‑ami. Nws ua cov Asmoo uas nyob txog niaj hnub nimno tus yawg koob. Aplahas tsiv qhov ntawd mus rau nram Neke tebchaws mas nws mus tsuam chaw nyob ntawm lub moos Khade thiab lub moos Su ntu nruab nrab. Nws mus nyob hauv lub moos Kelas ib ntus. Aplahas hais txog nws tus pojniam Xala hais tias, “Yog kuv li muam.” Anpimelej uas ua vajntxwv kav lub moos Kelas thiaj li txib neeg mus coj Xala los. Ces hmo ntuj Vajtswv txawm tshwm rau Anpimelej ua npau suav pom mas nws hais tias, “Koj yuav tuag tiag tiag li vim tus pojniam uas koj coj los no twb yeej muaj txiv lawm.” Tiamsis Anpimelej tsis tau mus ze Xala li mas nws thiaj hais tias, “Au tus Tswv, koj txawm yuav muab haiv neeg uas tsis txhaum tua pov tseg thiab lov? Vim Aplahas civ hais tias, ‘Nws yog kuv li muam,’ thiab tus pojniam no kuj hais tias ‘Aplahas yog kuv li nus,’ qhov uas kuv ua no kuv lub siab yeej ua ncaj ua ncees thiab kuv txhais tes yeej tsis tau ua txhaum li.” Mas Vajtswv thiaj hais rau nws hauv zaj npau suav hais tias, “Kuv yeej paub tias qhov uas koj ua li ntawd koj kuj ua ncaj tiag, mas kuv thiaj tav tsis kheev koj ua txhaum rau kuv. Vim li no kuv thiaj tsis kheev koj kov tus pojniam no. Cia li muab tus pojniam no thim rov qab rau nws tus txiv, vim tus txivneej ntawd yog ib tug uas cev Vajtswv lus mas nws yuav thov Vajtswv pab koj kom koj thiaj ciaj sia nyob. Tiamsis yog koj tsis thim tus pojniam no rau nws, koj cia li paub tseeb tias koj thiab koj cov neeg sawvdaws yuav tuag.” Anpimelej sawv ntxov ntxov los hu nws cov nom tswv sawvdaws tuaj cuag nws mas nws qhia txhua yam no rau lawv mloog mas lawv ntshai kawg li. Anpimelej txawm hu Aplahas tuaj cuag nws mas hais rau Aplahas tias, “Koj ua dabtsi li no rau peb? Kuv tau ua txhaum li cas rau koj es koj yuav coj lub niag tuam txim loj li no los rau kuv thiab kuv lub tebchaws. Tej uas koj ua rau kuv no twb tsis tsim nyog ua kiag li.” Anpimelej hais rau Aplahas tias, “Koj xav li cas es koj ua li no.” Aplahas teb hais tias, “Kuv xav tias hauv lub tebchaws no tsis muaj leejtwg paub ntshai Vajtswv kiag li ces tsam luag muab kuv tua vim yog xav yuav kuv pojniam. Qhov tseeb nws yog kuv li muam tiag rau qhov nws nrog kuv koom txiv tsis koom niam xwb mas nws thiaj tau los ua kuv pojniam. Thaum Vajtswv kom kuv tawm hauv kuv niam kuv txiv lub tsev tsiv mus rau ub rau no kuv thiaj hais rau kuv pojniam tias, ‘Wb txawm mus txog qhovtwg los xij koj yuav tsum hais rau luag tias kuv yog koj li nus, mas thiaj yog koj hlub kuv.’ ” Ces Anpimelej txawm muab yaj muab nyuj muab tub qhe nkauj qhev pub rau Aplahas thiab muab Aplahas tus pojniam Xala thim rov qab rau Aplahas. Thiab Anpimelej hais tias, “Saib maj, kuv lub tebchaws nyob ntawm koj xubntiag no mas yog koj xav mus nyob rau thaj twg los kuj mus nyob tau raws li koj lub siab nyiam.” Thiab nws hais rau Xala tias, “Kuv muab ib txhiab sekhee nyiaj rau koj tus nus ntxuav koj tab meeg cov neeg uas nrog koj nyob sawvdaws mas koj kuj dawb huv fim taus ib tsoom lawm.” Ces Aplahas txawm thov Vajtswv mas Vajtswv thiaj kho Anpimelej thiab Anpimelej pojniam thiab tej nkauj qhev sawvdaws zoo, lawv thiaj muaj taus menyuam. Vim yog Anpimelej coj Aplahas tus pojniam Xala los li ntawd mas Vajtswv thiaj kaw cov pojniam uas nyob hauv vajntxwv tsev tej plab tsis pub xeeb tub. Yawmsaub foom koob hmoov rau Xala raws li nws twb hais tseg lawm, thiab Yawmsaub ua rau Xala raws li nws cog lus cia. Xala thiaj xeeb tub thiab yug tau ib tug tub rau Aplahas rau thaum Aplahas laus heev thiab yog lub sijhawm uas Vajtswv tau hais rau nws lawm. Aplahas tis npe rau tus tub uas Xala yug rau nws hu ua Yiha. Thiab Aplahas muab nws tus tub Yiha ua kevcai txiav rau thaum uas nws muaj yim hnub lawm, raws li Vajtswv tau kom nws ua. Aplahas muaj ib puas xyoo rau thaum yug Yiha rau nws. Mas Xala hais tias, “Vajtswv ua rau kuv luag zoo siab. Txhua tus uas tau hnov yuav nrog kuv luag thiab.” Thiab Xala hais tias, “Leejtwg yuav hais tau rau Aplahas tias Xala yuav pub mis rau menyuam noj? Tiamsis kuv yug tau ib tug tub rau nws rau thaum nws laus heev lawm.” Tus metub ntawd kuj hlob thiab tseg mis lawm. Aplahas npaj ib rooj noj loj rau hnub uas Yiha tseg mis. Tiamsis Xala pom Haka uas yog neeg Iyi tus tub uas yug rau Aplahas luag luag nws tus tub. Xala thiaj hais rau Aplahas tias, “Cia li muab tus nkauj qhev no thiab nws tus tub ntiab khiav mus, rau qhov tsis kheev tus nkauj qhev no tus tub nrog kuv tus tub Yiha txais qub txeeg qub teg.” Qhov no ua rau Aplahas nyuaj siab vim yog saib rau nws tus tub Yisama‑ee. Tiamsis Vajtswv hais rau Aplahas tias, “Tsis txhob nyuaj siab rau tus menyuam thiab koj tus nkauj qhev. Xala hais li cas rau koj cia li ua li ntawd, rau qhov koj caj ces yuav yog tshwm ntawm Yiha mus. Tus nkauj qhev tus tub ntawd kuv yuav pub ua tau ib haiv neeg thiab vim nws yog koj li noob.” Aplahas thiaj sawv ntxov tsees muab ncuav thiab ib hnab dej tsaws rau Haka ris saum xub pwg, thiab xa nws nrog tus menyuam ua ke tawm mus. Nws thiaj tawm mus thiab mus mus los los hauv tebchaws moj sab qhua Npe‑awsenpa. Thaum hnab dej ntawd tag lawm Haka txawm muab tus menyuam tso rau hauv qab ib tsob ntoo. Ces nws txawm mus zaum rau ib cag kwvlam deb li tua ib hnee, vim nws hais tias, “Kuv tsis xav pom kuv tus menyuam tu siav.” Thaum nws tseem zaum qhov ntawd, nws tsa suab quaj. Vajtswv hnov tus metub ntawd lub suab, mas Vajtswv tus tubtxib saum ntuj hu saum ntuj tuaj rau Haka tias, “Koj ua li cas lawm? Koj tsis txhob ntshai rau qhov Vajtswv twb hnov tus metub lub suab ntawm qhov chaw uas nws nyob lawm. Cia li sawv tsees mus tsa tus metub tuav rawv nws txhais tes, rau qhov kuv yuav pub kom nws ua ib haiv neeg loj.” Mas Vajtswv qheb Haka lub qhov muag nws txawm pom ib lub qhov dej. Nws thiaj mus ntim dej puv nkaus lub hnab thiab muab rau tus metub haus. Vajtswv nrog nraim tus metub nws thiaj kheev hlob. Nws nyob rau hauv tebchaws moj sab qhua thiab ua tus uas txawj tua hneev. Nws nyob hauv tebchaws moj sab qhua Palas. Nws niam yuav ib tug pojniam hauv Iyi tebchaws los rau nws. Thaum ntawd vajntxwv Anpimelej thiab Fikhau uas yog Anpimelej tus thawj tub rog hais rau Aplahas tias, “Vajtswv nrog nraim koj rau txhua yam uas koj ua. Vim li no mas nimno cia li tuav Vajtswv lub npe cog lus twv rau kuv ntawm no tias koj yuav tsis ntxeev ntxias kuv thiab kuv tej tub ki thiab kuv caj ces, thiab kuv tau ua zoo li cas rau koj lawm, koj yuav ua ib yam li ntawd rau kuv thiab rau lub tebchaws uas koj txeev ua qhua nyob no.” Aplahas thiaj hais tias, “Kuv cog lus twv li ntawd.” Thaum Aplahas yws rau Anpimelej hais txog lub qhov dej uas Anpimelej cov tub qhe muab txeeb lawm, Anpimelej hais tias, “Kuv tsis paub tias leejtwg ua li no. Koj tsis tau hais rau kuv, kuv yeej tsis tau hnov txog hnub no.” Aplahas thiaj coj yaj thiab nyuj tuaj pub rau Anpimelej, mas ob tug thiaj sib cog lus. Aplahas thiaj cais xya tus xyuas yaj tawm ntawm pab yaj. Anpimelej hais rau Aplahas tias, “Xya tus xyuas yaj uas koj muab cais rau ib cag ntawd yog dabtsi?” Aplahas hais tias, “Xya tus xyuas yaj ntawd, thov koj cia li txais ntawm kuv txhais tes, xwv koj thiaj ua tau timkhawv rau kuv tias kuv tau khawb lub qhov dej no.” Vim li no thiaj hu lub chaw ntawd tias Npe‑awsenpa rau qhov ob tog tau cog lus twv tseg qhov chaw ntawd. Ob tug thiaj cog lus tseg li ntawd rau ntawm Npe‑awsenpa. Mas Anpimelej thiab Fikhau uas yog tus thawj rog kuj rov qab mus rau hauv cov Filixatee lub tebchaws lawm. Aplahas cog ib tsob nyuag ntoo tamalis rau ntawm Npe‑awsenpa, thiab tuav Yawmsaub uas yog Vajtswv muaj txojsia nyob ib txhis lub npe thov qhov ntawd. Mas Aplahas ua qhua nyob hauv cov Filixatee lub tebchaws tau ntau hnub. Dhau ntawd los Vajtswv sim Aplahas lub siab mas hais rau nws tias, “Aplahas.” Aplahas teb tias, “Kuv nyob no 'os.” Vajtswv hais tias, “Cia li coj koj tus tub Yiha, yog koj tib tug tub uas koj hlub, mus rau Mauliya tebchaws thiab muab nws hlawv xyeem rau saum ib lub roob uas kuv yuav qhia koj.” Aplahas txawm sawv ntxov tsees nog eeb rau saum nees luav thiab coj nws ob tug tub qhe uas tseem hluas thiab nws tus tub Yiha nrog nws mus. Nws txiav taws siv hlawv xyeem, thiab taug kev mus rau lub chaw uas Vajtswv hais rau nws. Thaum mus tau peb hnub lawm Aplahas tsa muag ntsia pom lub chaw nyob deb deb. Aplahas thiaj hais rau ob tug tub qhe tias, “Neb nrog nees luav nyob ntawm no, kuv thiab kuv tus tub yuav mus rau tim ub, mus pe hawm Vajtswv tag, ib mam li rov los rau ntawm neb no.” Aplahas muab cov taws uas yuav siv hlawv xyeem ntawd rau nws tus tub Yiha kwv, thiab nws coj hluavtaws thiab riam hauv nws txhais tes. Ces ob tug thiaj ua ke mus. Yiha hais rau nws txiv Aplahas tias, “Txiv.” Aplahas teb tias, “Metub, koj hais dabtsi?” Yiha thiaj hais tias, “Muaj hluavtaws thiab muaj taws rauv tiamsis tus menyuam yaj uas yuav muab hlawv xyeem nyob qhovtwg?” Aplahas hais tias, “Metub, Vajtswv nws yuav npaj thiab pub tus menyuam yaj uas siv hlawv xyeem ntawd.” Mas ob tug thiaj ua ke taug kev mus. Thaum ob tug mus txog qhov chaw uas Vajtswv tau hais rau nws lawm, Aplahas txawm ua ib lub thaj rau qhov ntawd thiab muab cov taws tib twb zoo rau saud. Nws muab nws tus tub Yiha khi los tso rau saum cov taws saum lub thaj. Ces Aplahas txawm cev tes muab riam los yuav tua nws tus tub. Tiamsis Yawmsaub tus tubtxib saum ntuj hu saum ntuj tuaj rau nws thiab hais tias, “Aplahas, Aplahas.” Aplahas teb tias, “Kuv nyob no 'os.” Tus tubtxib saum ntuj hais tias, “Tsis txhob kov tus menyuam tub thiab tsis txhob ua li cas rau nws kiag li, rau qhov nimno kuv paub tseeb lawm tias koj hwm thiab paub ntshai Vajtswv vim qhov uas koj sev nyog muab koj tus tub, uas yog koj tib tug tub pub rau kuv.” Aplahas tsa muag ntsia ua ciav pom muaj ib tug txiv yaj nyob tom nws qab uas txwm kub khaub zig rau ib xyuv ntoo ntom ntom. Aplahas thiaj mus muab tus txiv yaj ntawd los xyeem ua kevcai hlawv xyeem theej nws tus tub chaw. Aplahas thiaj hu qhov chaw ntawd tias Yawmsaub yuav npaj thiab pub, yam li uas hais lus txog niaj hnub nimno tias “Yuav npaj thiab pub rau saum Yawmsaub lub roob.” Yawmsaub tus tubtxib saum ntuj hu saum ntuj tuaj rau Aplahas zaum ob, thiab hais tias, “Yawmsaub hais tias, Kuv tuav kuv lub npe cog lus ruaj tias, vim qhov uas koj ua li no es sev nyog koj tus tub, uas yog koj tib tug tub, mas kuv yeej yuav foom koob hmoov rau koj tiag tiag li, kuv yuav ua rau koj caj ces huaj vam coob heev yam li tej hnub qub saum ntuj thiab yam li tej xuab zeb ntawm ntug hiavtxwv. Koj caj ces yuav tau yeeb ncuab tej rooj loog ua lawv tug. Ib tsoom tebchaws hauv lub ntiajteb yuav tau koob hmoov ntawm koj caj ces, vim koj mloog kuv tej lus.” Aplahas thiaj rov qab mus ntsib nws ob tug tub qhe hluas, thiab lawv ua ke mus rau Npe‑awsenpa. Aplahas kuj nyob ntawm Npe‑awsenpa. Dhau ntawd los muaj neeg hais rau Aplahas tias, “Meekha yug tau menyuam rau koj tus kwv Nahau. Us yog tus hlob, Npub yog tus kwv, thiab muaj Khemu‑ee uas yog Alas txiv, thiab Khexe, Haxo, Pida, Yila thiab Npethu‑ee.” Npethu‑ee yog Lenpekha txiv. Meekha yug tau yim leej tub no rau Nahau uas yog Aplahas tus kwv. Tsis tag li ntawd Nahau tus niam yau uas npe hu ua Le‑uma yug tau Thenpa, Kahas, Thahas thiab Ma‑akha. Xala hnub nyoog nyob tau ib puas nees nkaum xya xyoo. Xala tuag hauv lub moos Khiliya Anpa (uas yog Heploo) hauv Khana‑as tebchaws. Aplahas pam Xala thiab quaj quaj nco nco Xala. Aplahas ho sawv ntawm Xala lub cev tuag mus hais rau cov neeg Hithai hais tias, “Kuv yog neeg lwm tebchaws los ua qhua nrog nej nyob. Thov nrog nej yuav ib thaj av rau kuv siv ua toj ntxas kom kuv thiaj tau chaw muab tus tuag mus foob kab kom ploj ntawm lub qhov muag mus.” Cov Hithai teb Aplahas tias, “Yawg hlob, thov koj mloog peb hais. Koj yog ib tug ua hlob hauv peb cov ntag. Cia koj coj koj tus tuag mus log rau hauv peb tej qhov ntxa lub uas zoo kawg nkaus. Tsis muaj leejtwg yuav tav tsis kheev koj muab koj tus tuag log rau hauv nws lub qhov ntxa ntawd.” Aplahas txawm sawv tsees los nyo hau pe cov Hithai uas nyob lub tebchaws ntawd, thiab nws hais rau lawv hais tias, “Yog nej kheev kuv log kuv tus tuag tiag, thov nej mloog kuv hais thiab pab nrog kuv thov Xauha tus tub Efoo muab nws lub qhov tsua Mapela uas nyob ntawm nws ntug teb rau kuv. Thov kom nws muab muag rau kuv tab meeg nej sawvdaws xubntiag kom txaus nkaus tus nqe, kuv thiaj muaj ib thaj av siv ua toj ntxas ua kuv tug.” Efoo kuj nrog cov Hithai zaum ua ke ntawd mas Efoo uas yog neeg Hithai thiaj teb Aplahas tab meeg cov Hithai sawvdaws uas tuaj nyob ua ke ntawm rooj loog hais tias, “Tsis txhob ua li, yawg hlob. Thov koj mloog kuv hais. Kuv yuav pub daim teb thiab lub qhov tsua uas nyob ntawm daim teb ntawd rau koj. Kuv pub rau koj tab meeg kuv cov neeg sawvdaws. Cia li coj koj tus tuag mus log rau hauv.” Aplahas rov nyo hau pe cov neeg tebchaws ntawd mas nws hais rau Efoo tab meeg cov neeg hauv lub tebchaws ntawd hnov tias, “Yog koj kheev, thov koj mloog kuv hais thiab. Kuv yuav them cov nqe teb ntawd rau koj, koj cia li txais ntawm kuv kom kuv thiaj tau chaw log tus tuag rau ntawd.” Efoo teb Aplahas tias, “Yawg hlob, thov koj mloog kuv hais. Daim teb mas tus nqe yog plaub puas sekhee nyiaj tiamsis koj thiab kuv mas tsis txhob xav li cas. Cia li coj koj tus tuag mus log rau hauv xwb.” Aplahas thiaj li nrog Efoo hais hum thiab Aplahas luj cov nyiaj txwm nkaus li tus nqe uas Efoo hais rau nws tab meeg cov Hithai hnov lawd, yog plaub puas sekhee txwm nkaus li uas tej tub lag tub luam luj rau ncua sijhawm ntawd. Efoo daim teb hauv Mapela uas nyob ntawm Male sab hnub tuaj mas nws muag tag nrho thaj teb thiab lub qhov tsua thiab tej xyoob ntoo uas nyob hauv thaj teb ntawd huvsi rau Aplahas yuav ua Aplahas tug tab meeg cov Hithai sawvdaws uas tuaj ua ke ntawm rooj loog xubntiag. Ces Aplahas txawm muab nws tus pojniam Xala log rau hauv lub qhov tsua ntawm thaj teb Mapela uas nyob ntawm Male sab hnub tuaj, uas yog Heploo, hauv Khana‑as tebchaws. Daim teb thiab lub qhov tsua ntawm daim teb ntawd mas cov Hithai muab muag kiag rau Aplahas yuav ua Aplahas tug mas Aplahas thiaj tau chaw log tuag. Nimno Aplahas laus heev, hnub nyoog nchav lawm. Thiab Yawmsaub tau foom koob hmoov rau Aplahas txhua yam. Aplahas hais rau nws tus tub qhe uas hnub nyoog laus dua tej hauv nws tsev, yog tus uas saib xyuas txhua yam uas Aplahas muaj, hais tias, “Muab koj txhais tes los tso rau hauv kuv txhais ncej qab. Mas kuv yuav kom koj tuav Yawmsaub uas yog Vajtswv kav saum ntuj thiab hauv lub ntiajteb lub npe cog lus twv tias, koj yuav tsis yuav cov neeg Khana‑as uas kuv nrog nyob no tej ntxhais ua kuv tus tub pojniam. Tiamsis koj yuav mus rau kuv lub qub tebchaws thiab rau kuv cov kwvtij, thiab yuav ib tug pojniam rau kuv tus tub Yiha.” Tus tub qhe hais rau nws tias, “Yog tus ntxhais tsis kam nrog kuv los rau lub tebchaws no, ces kuv yuav coj koj tus tub mus rau hauv lub tebchaws uas koj tsiv tawm los ntawd lov?” Aplahas hais rau nws tias, “Ceev faj tsis txhob coj kuv tus tub rov qab mus rau qhov ntawd. Yawmsaub uas yog Vajtswv saum ntuj, yog tus uas coj kuv tawm hauv kuv txiv tsev los thiab tawm hauv lub tebchaws uas yug kuv, thiab cog lus tseg ruaj rau kuv hais tias, ‘Kuv yuav pub lub tebchaws no rau koj caj ces,’ mas Vajtswv yuav tso nws tus tubtxib saum ntuj mus ua koj ntej, mas koj thiaj yuav yuav ib tug pojniam hauv lub tebchaws ntawd rau kuv tus tub. Yog tus pojniam tsis kam nrog koj los koj yuav dim tej lus uas cog twv rau kuv no. Tsuav yog koj tsis txhob coj kuv tus tub rov qab mus rau lub tebchaws ntawd xwb.” Tus tub qhe thiaj muab nws txhais tes tso rau hauv qab nws tus lospav Aplahas txhais ncej qab, thiab cog lus twv tias yuav ua raws li ntawd. Tus tub qhe txawm coj nws tus lospav kaum tus ntxhuav tawm mus, thiab coj ntau yam qhov txhia chaw tsim txiaj ntawm nws tus lospav mus. Nws taug kev mus rau Alas Nahala‑i tebchaws, mus txog Nahau lub moos. Nws ua kom cov ntxhuav txhos caug rau ntawm ntug qhov dej nraum lub moos, yog lub sijhawm yuav tsaus ntuj uas cov pojniam tawm tuaj ntaus dej. Nws hais tias, “Au Yawmsaub, uas yog kuv tus tswv Aplahas tus Vajtswv, thov koj coj kuv txoj hauv kev kom tiav rau hnub no, thiab qhia txojkev hlub uas ruaj khov rau kuv tus tswv Aplahas. Kuv tabtom sawv ntsug ntawm ntug qhov dej txhawv thiab cov neeg hauv lub moos tej ntxhais tabtom tawm tuaj ntaus dej. Tus ntxhais uas kuv hais rau nws tias, ‘Thov txo koj lub taub dej rau kuv haus,’ ces nws hais tias ‘Haus maj thiab kuv yuav ntaus dej rau koj cov ntxhuav haus huvsi,’ mas thov cia tus ntawd yog tus uas koj tau teem cia ua koj tus tub qhe Yiha tus pojniam. Yog li no kuv thiaj paub tseeb tias koj qhia koj txojkev hlub uas ruaj khov rau kuv tus tswv Aplahas.” Thaum nws hais lus tsis tau xaus, ua ciav Lenpekha uas yog Npethu‑ee tus ntxhais kwv nws lub taub dej saum xub pwg tawm tuaj. Npethu‑ee niam yog Meekha, txiv yog Nahau uas yog Aplahas tus kwv. Tus hluas nkauj ntawd zoo nkauj heev, yog ib tug ntxhais dawb huv tsis tau muaj ib tug deev li. Nws nqes mus rau ntawm lub qhov dej txhawv ntaus dej puv lub taub thiab nce rov los. Aplahas tus qhev dhia loo mus tos thiab hais tias, “Thov koj hliv mentsis dej hauv koj lub taub rau kuv haus.” Nws teb tias, “Yawg hlob, haus maj,” ces nws txawm txo plhuav nws lub taub dej cev rau haus. Thaum cev rau haus tag lawm, nws txawm hais tias, “Kuv yuav ntaus dej rau koj cov ntxhuav haus kom tsau huvsi.” Nws maj nroos hliv dej hauv nws lub taub rau hauv lub dab thiab dhia rov mus ntaus dej ntawm lub qhov dua, thiab nws ntaus dej rau cov ntxhuav haus huvsi. Aplahas tus qhev saib twjywm tus hluas nkauj ntawd xav paub tias Yawmsaub coj nws txojkev uas tuaj tiav lawm los tsis tau. Thaum cov ntxhuav haus dej tag lawm, tus yawg ntawd txawm muab ib lub khawb kub ntawm qhov ntswg hnyav ib nrab sekhee thiab ib nkawg tooj npab kub hnyav kaum sekhee rau Lenpekha coj ntawm txhais tes, thiab hais tias, “Thov qhia kuv saib koj yog leejtwg tus ntxhais. Hauv koj txiv tsev muaj chaw rau peb so los tsis muaj?” Nws teb tias, “Kuv yog Npethu‑ee li ntxhais, kuv yawg yog Nahau, kuv pog yog Meekha.” Thiab nws hais ntxiv tias, “Peb muaj quav nyab thiab mov noj txaus thiab muaj chaw so.” Tus yawg ntawd txawm nyo hau thiab pe Yawmsaub, thiab nws hais tias, “Qhuas Yawmsaub uas yog kuv tus tswv Aplahas tus Vajtswv, nws tsis tso nws txojkev hlub ruaj khov tseg thiab nws yeej ua raws li nws cog lus tseg rau kuv tus tswv. Kuv mas Yawmsaub tau coj kuv taug kev tuaj txog kuv tus tswv tsev kwvtij.” Mas tus hluas nkauj thiaj dhia mus hais rau nws niam tsev neeg paub txog tej no. Lenpekha muaj ib tug nus hu ua Lanpas. Lanpas thiaj dhia loo mus saib tug yawg ntawd tom qhov dej txhawv. Thaum nws pom lub khawb ntswg thiab tej tooj npab ntawm nws tus muam txhais tes thiab hnov tej lus uas nws tus muam Lenpekha hais tias tus yawg tau hais rau nws, Lanpas txawm mus saib tug yawg ntawd mas pom nws sawv ntsug ua ke nrog cov ntxhuav ntawm qhov dej. Nws hais tias, “Koj yog tus uas tau Yawmsaub li hmoov zoo, cia li los tsev. Koj nyob nraum no ua dabtsi? Kuv twb npaj vaj tse thiab npaj chaw rau koj cov ntxhuav lawm.” Tus yawg ntawd thiaj los rau hauv tsev, mas Lanpas daws tej ntxhuav thiab muab quav nyab thiab zaub rau cov ntxhuav noj, thiab muab dej rau nws thiab cov uas nrog nws tuaj ntxuav kotaw, thiab rau zaub mov rau tus yawg ntawd noj. Tiamsis nws hais tias, “Kuv yuav tsis noj mus txog thaum kuv hais tej lus uas kuv yuav hais tag tso.” Lanpas kuj hais tias, “Cia li hais.” Nws thiaj hais tias, “Kuv yog Aplahas li tub qhe. Yawmsaub tau foom koob hmoov rau kuv tus tswv ntau heev, thiab nws kuj vam meej. Yawmsaub pub tej niag pab yaj pab tshis tej pab nyuj, nyiaj thiab kub, tub qhe nkauj qhev, tej ntxhuav thiab nees luav rau nws. Xala uas yog kuv tus tswv tus pojniam yug tau ib tug tub rau nws thaum nws laus lawm, mas kuv tus tswv muab kiag txhua yam uas nws muaj rau nws tus tub. Kuv tus tswv kom kuv cog lus twv thiab hais tias, ‘Koj tsis txhob yuav cov neeg Khana‑as uas kuv nrog nyob no tej ntxhais ua kuv tus tub pojniam. Tiamsis koj yuav rov qab mus rau kuv txiv tsev neeg thiab rau kuv cov kwvtij, thiab yuav ib tug pojniam rau kuv tus tub.’ Kuv hais rau kuv tus tswv tias, ‘Tsam tus pojniam ntawd tsis kam nrog kuv los.’ Tiamsis nws hais rau kuv tias, ‘Yawmsaub uas kuv nrog nraim yuav tso nws tus tubtxib saum ntuj nrog koj mus thiab ua rau txojkev uas koj mus tiav. Koj yuav yuav tau pojniam ntawm kuv cov kwvtij thiab hauv kuv txiv lub tsev rau kuv tus tub. Thaum koj mus txog kuv cov kwvtij, koj thiaj dim tej lus uas koj cog twv rau kuv lawm. Yog lawv tsis yeem pub tus ntxhais ntawd rau koj, koj kuj yuav dim tej lus uas koj cog twv rau kuv.’ “Hnub no kuv tuaj txog ntawm lub qhov dej txhawv thiab hais tias, ‘Au Yawmsaub, uas yog kuv tus tswv Aplahas tus Vajtswv, thov koj coj kuv txoj hauv kev kom tiav nimno. Kuv tabtom sawv ntsug ntawm ntug qhov dej no, mas tus ntxhais uas tuaj ntaus dej uas kuv hais rau nws tias, “Thov muab mentsis dej ntawm koj lub taub rau kuv haus,” ces nws hais tias “Haus maj thiab kuv yuav ntaus dej rau koj cov ntxhuav haus,” mas thov cia tus ntawd yog tus uas Yawmsaub tau teem cia ua kuv tus tswv tus tub pojniam.’ “Thaum kuv hais hauv lub siab tsis tau tag, ua ciav Lenpekha kwv nws lub taub dej saum xub pwg tawm tuaj thiab nqes mus ntaus dej ntawm lub qhov dej txhawv. Kuv hais rau nws tias, ‘Thov mentsis dej rau kuv haus.’ Nws txawm maj nroos txo lub taub dej saum xub pwg los thiab hais tias, ‘Haus maj. Kuv tseem yuav muab dej rau koj cov ntxhuav haus thiab.’ Ces kuv txawm haus, thiab nws kuj ntaus dej rau cov ntxhuav haus thiab. Mas kuv thiaj nug nws tias, ‘Koj yog leejtwg li ntxhais?’ Nws teb tias, ‘Kuv yog Npethu‑ee li ntxhais, kuv yawg yog Nahau kuv pog yog Meekha.’ Kuv thiaj muab lub khawb khawm rau nws qhov ntswg thiab muab tooj npab rau nws coj ntawm txhais tes. Thiab kuv nyo hau pe Yawmsaub thiab qhuas Yawmsaub uas yog kuv tus tswv Aplahas tus Vajtswv, yog tus uas coj kuv taug txojkev uas raug lawm thiaj tau kuv tus tswv cov txheeb ze tus ntxhais rau nws tus tub. Nimno yog nej kam ua zoo ua ncaj rau kuv tus tswv, los thov hais rau kuv paub. Txawm tsis ua li ntawd los hais rau kuv paub, xwv kuv thiaj txawj mus rau sab xis lossis sab laug.” Lanpas thiab Npethu‑ee txawm teb tias, “Tej no yog los ntawm Yawmsaub los. Peb yuav hais siab hais qes rau koj tsis tau. Lenpekha twb nyob ntawm koj xubntiag no, cia li coj nws es mus, cia nws ua koj tus tswv tus tub li pojniam raws li Yawmsaub hais lawm.” Thaum Aplahas tus qhev tau hnov lawv tej lus lawm, nws txawm khoov ntshis hauv pem teb pe Yawmsaub. Nws rho tej saw nyiaj saw kub thiab tsoos tsho los muab rau Lenpekha. Nws tseem muab tej qhov txhia chaw tseem ceeb tsim txiaj rau tus nus thiab leej niam. Nws thiab cov neeg uas nrog nws tuaj thiaj noj thiaj haus thiab pw ib hmos ntawd. Thaum lawv sawv ntxov tsees, Aplahas tus qhev hais tias, “Thov tso kuv rov qab mus kom txog kuv tus tswv.” Tus nus thiab leej niam hais tias, “Cia peb tus ntxhais nrog peb nyob ib ntus, yam tsawg yog kaum hnub, nws li mus tau.” Tiamsis Aplahas tus qhev hais rau ob tug tias, “Tsis txhob cheem kuv, rau qhov Yawmsaub twb coj kuv txojkev tuaj tiav lawm. Thov cia kuv mus kuv thiaj tau rov mus txog kuv tus tswv.” Ob tug hais tias, “Cia ib hu tus ntxhais los nug saib.” Ob tug thiaj hu Lenpekha los, thiab hais rau nws tias, “Koj yuav nrog tus yawg no mus los tsis mus?” Nws teb tias, “Kuv mus thiab.” Lawv thiaj xa tus muam Lenpekha thiab tus nkauj qhev uas tu nws nrog Aplahas tus qhev thiab nws cov neeg mus. Lawv txawm foom koob hmoov rau Lenpekha hais tias, “Leej muam, thov koj tau ua qas txhiab qas vam neeg li niam. Thov kom koj caj ces tau yeeb ncuab lub rooj loog ua lawv tug.” Mas Lenpekha thiab nws cov nkauj qhev kuj sawv kev caij ntxhuav nrog Aplahas tus qhev mus. Tus qhev thiaj coj Lenpekha taug kev mus. Yiha twb tawm ntawm Npe‑aw Lahailai mus nyob nram Neke lawm. Thaum yuav tsaus ntuj Yiha tawm mus ncig ua si tom teb, nws tsa muag ntsia ua ciav pom ib pab ntxhuav taug kev los. Lenpekha tsa muag ntsia, mas thaum nws pom Yiha nws txawm nqes saum ntxhuav los, thiab hais rau Aplahas tus qhev tias, “Tus yawg tid uas tabtom taug kev tuaj ntsib peb yog leejtwg?” Tus qhev tias “Yog kuv tus tswv.” Lenpekha thiaj muab txoj phuam los npog nws ntsej muag. Aplahas tus qhev piav txhua yam uas nws ua lawm rau Yiha paub. Yiha txawm coj Lenpekha nkag rau hauv nws niam Xala lub tsev ntaub, thiab yuav Lenpekha ua nws pojniam, nws kuj nyiam Lenpekha. Nws niam txawm tuag lawm los Yiha thiaj rov zoo siab. Aplahas yuav dua ib tug pojniam npe hu ua Khethula. Nws yug tau cov tub no rau Aplahas, yog Xislas, Yaujsas, Medas, Midee, Isanpas thiab Su‑a. Yaujsas yog Senpa thiab Dedas txiv. Dedas li tub yog Asuli, Lethusi thiab Le‑umi. Midee cov tub yog Efa, Efaw, Hanau, Anpida thiab Eeda‑a. Cov no huvsi yog Khethula li tub ki xeeb ntxwv. Aplahas muab kiag nws lub cuab txhiaj cuab tam huvsi rau Yiha. Aplahas kuj muab qhov txhia chaw rau nws tej niam yau cov tub thiab. Thaum nws tseem ua neej nyob nws kom lawv ncaim nws tus tub Yiha mus rau sab hnub tuaj mus nyob rau hauv lub tebchaws uas nyob sab hnub tuaj. Aplahas li hnub nyoog huvsi muaj ib puas xya caum tsib xyoos. Aplahas tu siav rau thaum nws laus heev, hnub nyoog ntau heev lawm, mas nws mus nrog nws tej poj koob yawm txwv nyob. Yiha thiab Yisama‑ee uas yog nws li tub kuj muab nws log rau hauv lub qhov tsua Mapela uas nyob hauv Xauha tus tub Efoo uas yog neeg Hithai daim teb ntawm Male sab hnub tuaj, yog daim teb uas Aplahas yuav ntawm cov Hithai los. Lawv muab Aplahas log rau qhov ntawd nrog nws tus pojniam Xala ua ke. Thaum Aplahas tuag lawm, Vajtswv foom koob hmoov rau nws tus tub Yiha. Yiha nyob ntawm Npe‑awlahailai. Ntawm no mus yog Yisama‑ee caj ces, nws yog Aplahas tus tub uas Xala tus nkauj qhev Haka uas yog neeg Iyi yug rau Aplahas. No yog Yisama‑ee cov tub tej npe, raws tus hlob rau cov yau zuj zus mus. Yisama‑ee tus tub hlob yog Nenpayau, cov yau yog Kheda, Anpe‑ee, Mixa, Misama, Duma, Maxas, Hada, Thema, Yethu, Nafi thiab Khedema. Cov no yog Yisama‑ee cov tub thiab no yog lawv tej npe uas hu rau lawv tej zej zog thiab hu rau lawv tej chaw nyob, yog kaum ob tug thawj rau hauv lawv txhua xeem. Yisama‑ee li hnub nyoog huvsi muaj ib puas peb caug xya xyoo. Nws tu siav mus nrog nws tej poj koob yawm txwv nyob. Lawv cov ntawd nyob txij ntua lub moos Havila mus txog lub moos Su uas nyob ntawm Iyi ib sab mus rau Axilia tebchaws. Lawv nrog lawv cum nyob ua yeeb ncuab rau lawv cov kwvtij. Ntawm no mus yog Yiha uas yog Aplahas tus tub caj ces. Aplahas yog Yiha txiv. Yiha hnub nyoog muaj plaub caug xyoo nws li yuav tau Lenpekha ua pojniam, yog Npethu‑ee tus ntxhais uas yog neeg Alas nyob tebchaws Pada Alas, thiab yog Lanpas uas yog neeg Alas tus muam. Yiha thov Yawmsaub rau nws tus pojniam vim yog nws tsis xeeb tub. Yawmsaub pub raws li nws thov, nws tus pojniam Lenpekha thiaj xeeb tub. Menyuam kuj sib txiv hauv nws lub plab nws thiaj hais tias, “Yog zoo li no, kuv yuav muaj txojsia nyob ua dabtsi?” Lenpekha thiaj mus ua nug rau Yawmsaub. Yawmsaub hais rau nws tias, “Muaj ob lub tebchaws nyob hauv koj lub plab, ob haiv neeg uas koj yug ntawd yuav sib ncaim, ib tug yuav muaj zog heev dua ib tug, tus tij yuav ua tus kwv qhev.” Thaum txog caij uas Lenpekha yug menyuam lawm, ua ciav muaj ib nkawg menyuam ntxaib hauv nws lub plab. Yug thawj tug los yog ib tug menyuam liab tawv tuaj plaub thoob plaws ib ce yam nkaus li lub tsho plaub. Lawv thiaj tis lub npe hu ua Exau. Dhau ntawd yug tus kwv los, nws txhais tes tuav rawv Exau luj taws. Lawv thiaj tis npe hu ua Yakhauj. Thaum Lenpekha yug nkawm menyuam ntxaib ntawd, Yiha hnub nyoog muaj rau caum xyoo. Thaum ob tug metub hlob lawm, Exau yog ib tug txawj tua nqaij thiab yog ib tug nyob nruab nrag xwb, tiamsis Yakhauj mas yog tus uas nyob hauv tsev ntau ua siab tus yees. Yiha nyiam Exau vim nws pheej tau noj tej nqaij qus uas Exau tua tau los. Tiamsis Lenpekha nyiam Yakhauj. Muaj ib hnub thaum Yakhauj tabtom hau zaub, Exau rov tom hav zoov los tshaib plab heev. Exau hais rau Yakhauj tias, “Thov cia kuv noj cov taum liab ntawd ib txhia rau qhov kuv tshaib plab heev.” (Vim li ntawd thiaj muab nws hu ua Edoo. ) Yakhauj hais tias, “Muab koj feem uas ua tij muag rau kuv ua ntej tso.” Exau txawm hais tias, “Kuv twb yuav tuag, feem uas ua tij yuav muaj qabhau dabtsi rau kuv?” Yakhauj txawm hais tias, “Cog lus twv cia tso.” Exau txawm cog lus twv cia thiab muab nws feem uas ua tij muag rau Yakhauj. Yakhauj thiaj muab ncuav thiab cov taum liab uas hau tau lawm rau Exau noj. Thaum Exau noj thiab haus tag ces nws sawv taug kev lawm. Ua li no yog Exau saib tsis taus nws feem uas ua tij. Tom qab no tebchaws Khana‑as rov raug kev tshaib plab, ib yam li tiam uas thaum Aplahas tseem ua neej nyob, mas Yiha thiaj tsiv mus cuag cov Filixatee tus vajntxwv Anpimelej nram lub moos Kelas. Yawmsaub thiaj tshwm los rau Yiha pom thiab hais tias, “Tsis txhob mus nyob nram Iyi tebchaws, cia li nyob hauv lub tebchaws uas kuv qhia rau koj xwb. Nyob hauv lub tebchaws no ib ntus xwb, kuv thiaj li nrog koj nyob thiab foom koob hmoov rau koj. Kuv yuav muab tej tebchaws no huvsi pub rau koj thiab koj caj ces. Kuv yuav ua kom tej lus uas kuv twb cog tseg ruaj rau koj txiv Aplahas lawd tiav huvsi. Kuv yuav ua rau koj caj ces huaj vam coob yam li cov hnub qub saum nruab ntug thiab yuav muab tej tebchaws no huvsi pub rau lawv. Ib tsoom tebchaws hauv lub ntiajteb yuav tau koob hmoov ntawm koj caj ces los vim yog Aplahas mloog kuv lus thiab ua raws li kuv hais thiab tuav rawv kuv tej lus nkaw thiab kuv tej kab ke thiab kuv tej kevcai huvsi.” Yiha thiaj nyob ntawm Kelas. Thaum cov txivneej hauv lub moos ntawd nug txog nws tus pojniam nws txawm teb lawv tias, “Yog kuv li muam xwb,” rau qhov nws ntshai, nws tsis kam lees tias “Yog kuv pojniam.” Nws xav tias tsam cov txivneej ntawd ho muab nws tua vim yog lawv xav yuav Lenpekha rau qhov nws zoo nkauj kawg li. Thaum Yiha nyob qhov ntawd tau ntev loo mas cov Filixatee tus vajntxwv Anpimelej xauj qhov rais pom Yiha tawb tawb Lenpekha uas yog nws pojniam. Ces Anpimelej txawm hu Yiha tuaj cuag nws thiab hais tias, “Lenpekha twb yog koj li pojniam nev, ua cas koj dag hais tias, yog koj li muam no?” Yiha teb vajntxwv hais tias, “Rau qhov kuv xav tias tsam luag ho muab kuv tua vim xav yuav nws.” Anpimelej txawm hais tias, “Koj ua dabtsi li no rau peb 'os? Tsam muaj ib tug twg ho nkag kiag mus nrog koj pojniam pw ces kuj yog koj coj txim los rau peb.” Anpimelej thiaj hais tawv rau cov pejxeem sawvdaws tias, “Yog leejtwg ua li cas rau tus yawg no thiab nws tus pojniam mas yuav raug muab tua pov tseg xwb.” Yiha cog qoob cog loo hauv tebchaws ntawd mas xyoo ntawd nws sau tej qoob tau ib puas npaug los, vim yog Yawmsaub foom koob foom hmoov rau nws. Yiha muaj txiag vam meej zuj zus ciaj tuam lospav nplua nuj heev. Nws muaj tej niag pab tshis tej pab yaj tej pab nyuj thiab muaj tub mab tub qhe coob mas cov Filixatee khib siab heev rau nws. Cov Filixatee twb muab av txhub txhua lub qhov dej uas thaum ub nws txiv Aplahas tseem ua neej nyob es Aplahas tej tub qhe khawb cia lawd huvsi. Anpimelej txawm hais rau Yiha tias, “Koj cia li khiav ntawm peb mus vim koj muaj zog dua peb lawm.” Yiha thiaj tawm qhov ntawd khiav mus tsuam chaw nyob rau ntawm lub hav Kelas ces nws txawm nyob ntawd. Yiha thiaj muab tej qub qhov dej uas thaum ub nws txiv Aplahas tseem ua neej nyob es khawb cia lawd khawb dua, vim yog thaum Aplahas tuag lawd cov Filixatee muab tej qhov dej ntawd txhub tag lawm. Mas Yiha thiaj tis npe rau tej qhov dej ntawd raws li uas thaum nws txiv twb tis cia lawd. Thaum Yiha cov tub qhe khawb ntawm hav Kelas mas khawb tau ib lub qhov dej txhawv zoo heev. Tiamsis cov neeg Kelas uas yug tsiaj txawm nrog Yiha cov tub qhe yug tsiaj sib cav hais tias, “Lub qhov dej yog peb li hos.” Yiha thiaj tis npe rau lub qhov dej ntawd hu ua Exe vim lawv nrog nws sib cav. Lawv rov khawb dua ib lub qhov dej mas cov Kelas kuj nrog lawv sib cav txog lub qhov dej ntawd thiab. Yiha thiaj tis npe rau lub qhov dej ntawd hu ua Xina. Nws kuj tsiv tawm qhov ntawd mus khawb dua ib lub qhov dej mas tsis muaj neeg sib cav txog lub qhov dej ntawd, nws thiaj tis npe rau lub qhov dej ntawd hu ua Lehaunpau, mas nws hais tias, “Nimno Yawmsaub pub chaw rau peb nyob lawm mas peb yuav vam meej rau hauv lub tebchaws no lauj.” Yiha kuj tawm qhov ntawd mus rau pem Npe‑awsenpa. Hmo ntawd Yawmsaub tshwm los rau Yiha pom thiab hais rau nws tias, “Kuv yog koj txiv Aplahas tus Vajtswv, koj tsis txhob ntshai rau qhov kuv yeej nrog nraim koj nyob thiab kuv yuav foom koob hmoov rau koj thiab kuv yuav ua rau koj caj ces huaj vam coob vim yog kuv saib rau kuv tus tub qhe Aplahas.” Yiha txawm tib ib lub thaj rau qhov ntawd thiab nws tuav Yawmsaub lub npe thov Yawmsaub. Nws tsa tsev ntaub nyob qhov ntawd thiab nws cov tub qhe kuj khawb dua ib lub qhov dej rau ntawd thiab. Anpimelej thiab nws tus tim xyoob Ahuxa thiab nws tus thawj rog Fikhau txawm tawm hauv Kelas tuaj tsham Yiha. Yiha nug lawv hais tias, “Ua cas nej ho yuav tuaj tsham kuv? Nej twb ntxub ntxub kuv es muab kuv ntiab khiav tawm mus nev?” Lawv teb hais tias, “Peb pom tseeb tias Yawmsaub nrog nraim koj nyob peb thiaj hais tias, Cia peb thiab koj sib cog lus twv tseg thiab nrog koj cog lus sib raug zoo hais tias koj yuav tsis ua phem li cas rau peb yam li uas peb twb tsis ua ib nyuag qhov phem rau koj li, peb tsuas yog ua zoo rau koj xwb thiab peb xa koj mus zoo tso siab lug. Nimno Yawmsaub twb foom koob hmoov rau koj lawm.” Ces Yiha txawm pam ib tsum mov los rau lawv mas lawv thiaj noj thiaj haus. Tagkis tom qab lawv sawv ntxov ntxov los sib cog lus twv tseg tag Yiha li xa lawv mus, lawv thiaj mus ua tso siab lug. Tib hnub ntawd Yiha cov tub qhe los hais rau nws txog lub qhov dej uas lawv khawb tau lawm hais tias, “Peb ntsib dej lawm.” Yiha muab lub qhov dej ntawd tis npe hu ua Sinpa, mas thiaj hu lub moos ntawd ua Npe‑awsenpa txog niaj hnub nimno. Thaum Exau hnub nyoog muaj plaub caug xyoo nws yuav Npe‑awli uas yog neeg Hithai tus ntxhais Yudi ua pojniam, thiab nws yuav Eloo uas yog neeg Hithai tus ntxhais Npaxema ua pojniam. Cov nyab no ua rau Yiha thiab Lenpekha ob tug lub neej nyuaj siab kawg li. Thaum Yiha laus lawm qhov muag plooj tsis pom kev lawm, nws thiaj hu nws tus tub hlob Exau hais tias, “Tub 'e.” Exau teb tias, “Kuv nyob no 'os.” Yiha hais tias, “Nimno kuv laus laus li lawm. Kuv tsis paub hnub uas kuv yuav tuag. Koj cia li coj koj tej cuab yeej mus, coj koj raj xub thiab rab hneev tawm mus yos hav zoov tua nqaij los rau kuv. Cia li npaj ib pluag qab qab los rau kuv yam li kuv nyiam thiab coj los rau kuv noj, kuv thiaj foom koob hmoov rau koj ua ntej uas kuv tsis tau tuag.” Thaum Yiha hais tej lus ntawd rau nws tus tub Exau, Lenpekha kuj mloog twjywm thiab. Thaum Exau tawm mus tua nqaij tom hav zoov lawm, Lenpekha txawm hais rau nws tus tub Yakhauj tias, “Kuv hnov koj txiv hais rau koj tus tijlaug Exau tias, ‘Cia li coj nqaij qus los rau kuv thiab npaj ib pluag qab qab rau kuv noj, kuv thiaj foom koob hmoov rau koj tab meeg Yawmsaub lub xubntiag ua ntej uas kuv tsis tau tuag.’ Vim li no, kuv tub 'e, koj cia li ua raws nraim li uas kuv hais rau koj. Cia li mus tom pab tshis ntes ob tug menyuam tshis zoo zoo los rau kuv, kuv thiaj npaj tau tej zaub mov qab yam li koj txiv nyiam rau nws. Ces koj nqa mus rau koj txiv noj nws thiaj foom koob hmoov rau koj ua ntej uas nws tsis tau tuag.” Yakhauj thiaj hais rau nws niam Lenpekha tias, “Koj sim saib maj, kuv tus tijlaug Exau tuaj plaub thoob plaws ib ce, tiamsis kuv mas ib ce du lug xwb. Tsam ces kuv txiv cev tes xuas kuv, mas yuav zoo li kuv dag ntxias nws, ces nws yuav foom tsis zoo rau kuv tsis yog foom zoo.” Nws niam hais rau nws tias, “Tub 'e, cia qhov uas raug foom tsis zoo poob rau kuv ris. Tsuav yog koj ua raws li kuv hais thiab mus ntes menyuam tshis los rau kuv xwb.” Yakhauj txawm mus ntes coj los rau nws niam, nws niam thiaj npaj tej zaub mov qab yam li nws txiv nyiam. Ces Lenpekha txawm muab nws tus tub hlob Exau tej tsoos tsho uas zoo kawg hauv tsev pub rau nws tus tub yau Yakhauj hnav. Nws muab ob tug menyuam tshis ntawd li tawv los qhwv Yakhauj tes thiab lub caj dab uas du lug. Ces nws txawm muab tej zaub mov qab qab thiab ncuav uas nws npaj ntawd rau hauv nws tus tub Yakhauj txhais tes. Yakhauj thiaj nkag mus rau leej txiv thiab hais tias, “Kuv txiv.” Nws hais tias, “Tub 'e, kuv nyob ntawm no, koj yog leejtwg?” Yakhauj hais rau leej txiv tias, “Kuv yog koj tus tub hlob Exau. Kuv twb ua raws li uas koj hais rau kuv lawm. Cia li sawv los noj tej nqaij uas kuv mus tua tau los es koj foom koob hmoov rau kuv.” Yiha hais rau nws tus tub tias, “Tub 'e, ua cas koj nrhiav tau sai ua luaj?” Nws teb tias, “Vim yog Yawmsaub uas yog koj tus Vajtswv pub kuv tua tau.” Mas Yiha hais rau Yakhauj tias, “Tub 'e, txav los ze ze mas kuv yuav xuas koj xwv thiaj paub tias koj yog kuv tus tub Exau tiag los tsis yog.” Yakhauj txawm txav mus ze nws txiv Yiha. Yiha thiaj xuas nws lub cev thiab hais tias, “Lub suab yog Yakhauj tiamsis txhais tes yog Exau li.” Nws tsis paub Yakhauj lawm vim ob txhais tes muaj plaub yam nkaus li nws tus tijlaug Exau txhais tes. Nws thiaj foom koob hmoov rau Yakhauj. Nws nug tias, “Koj yog kuv tus tub Exau tiag lov?” Nws teb tias, “Yog lauj.” Leej txiv thiaj hais tias, “Koj coj zaub mov los rau kuv, kuv yuav noj tej nqaij uas kuv tus tub tua tau los thiab foom koob hmoov rau koj.” Yakhauj thiaj coj los rau nws, nws thiaj noj. Yakhauj coj cawv txiv hmab rau nws, nws kuj haus. Mas nws txiv Yiha thiaj hais rau nws tias, “Tub 'e, txav los ze thiab nwj kuv.” Nws thiaj txav los ze thiab nwj leej txiv. Leej txiv hnia tus ntxhiab ntawm nws lub tsho thiab foom koob hmoov rau nws, thiab hais tias, “Saib maj, kuv tub tus ntxhiab yog tej ntxhiab nruab liaj nruab teb uas Yawmsaub foom koob hmoov rau. Thov Vajtswv pub dej lwg saum ntuj los rau koj, thiab pub lub ntiajteb zoo qoob nplua mias, thiab pub qoob loo cawv txiv hmab ntau kawg rau koj. Thov kom ib tsoom neeg tu koj, thiab ib tsoom tebchaws pe koj. Cia koj ua tus kav koj cov kwvtij, cia koj niam tej tub pe koj. Thov kom txhua tus uas foom tsis zoo rau koj raug foom tsis zoo, thiab cia txhua tus uas foom koob hmoov rau koj tau hmoov zoo.” Thaum Yiha foom koob hmoov rau Yakhauj tag lawm thiab Yakhauj nyuam qhuav tawm plaws ntawm nws txiv xubntiag mus lawm, nws tus tijlaug Exau kuj tua tau nqaij rov los txog. Nws kuj npaj zaub mov qab qab coj los rau nws txiv, thiab nws hais rau leej txiv tias, “Thov txiv sawv los noj tej nqaij uas koj tus tub mus tua tau los, es foom koob hmoov rau kuv.” Nws txiv Yiha hais rau nws tias, “Koj yog leejtwg?” Nws teb tias, “Kuv yog koj tus tub, yog koj tus tub hlob Exau.” Mas Yiha ib ce tshee hnyo hais tias, “Es leejtwg mus tua nqaij coj los rau kuv no? Kuv nyuam qhuav noj tag nrho es koj los txog no, thiab kuv twb foom koob hmoov rau nws lawm lauj. Nws yuav tau koob hmoov tiag tiag li.” Thaum Exau hnov nws txiv tej lus ntawd, nws cia li quaj nrov nrov tu siab kawg, thiab hais rau leej txiv tias, “Txiv 'e, thov foom koob hmoov rau kuv, thov foom koob hmoov rau kuv thiab.” Tiamsis leej txiv hais tias, “Koj tus kwv uas lub siab dag tuaj thiab nws twb coj koj li koob hmoov mus tag lawm.” Exau hais tias, “Nws lub npe Yakhauj twb hu raug lawm los tsis yog? rau qhov nws twb dag kuv ob zaug lawm. Nws twb muab kuv li feem ua tij txeeb mus lawm, mas zaum no nws tseem txeeb txhav kuv li koob hmoov lawm thiab.” Thiab nws hais tias, “Koj tsis tseg ib txhia koob hmoov rau kuv li lov?” Yiha teb Exau tias, “Kuv tsa nws ua tus uas kav koj thiab muab nws cov kwvtij sawvdaws tu nws, thiab muab tej qoob loo thiab tej cawv txiv hmab yug nws lawm. Tub 'e, kuv yuav ua li cas rau koj lawm?” Exau hais rau leej txiv tias, “Txiv, koj muaj tib yam koob hmoov no xwb lov? Txiv 'e, thov foom koob hmoov rau kuv, thov foom koob hmoov rau kuv thiab.” Ces Exau txawm tsa suab hlo quaj. Nws txiv Yiha thiaj teb nws tias, “Koj yuav nyob deb ntawm tej qoob loo uas zoo nplua mias hauv lub ntiajteb thiab deb ntawm tej dej lwg saum ntuj. Koj yuav tuav rawv ntaj ua neej nyob, thiab koj yuav tu koj tus kwv, tiamsis thaum koj nti dim tau koj yuav muab nws tus quab ntawm koj caj qwb lov tseg.” Exau ntxub Yakhauj vim yog leej txiv foom koob hmoov rau Yakhauj, mas Exau hais tuj taws hauv lub siab tias, “Twb yuav txog hnub uas kuv txiv tag sim neej, mas hnub ntawd kuv yuav muab kuv tus kwv Yakhauj tua pov tseg.” Tiamsis tus tub hlob Exau tej lus ntawd nrov mus txog Lenpekha qhov ntsej, nws thiaj txib neeg mus hu nws tus tub yau Yakhauj los, mas hais rau Yakhauj tias, “Koj sim xav saib, koj tus tijlaug Exau npaj siab yuav muab koj tua pov tseg thiaj zoo nws lub siab. Vim li no, tub 'e, cia li mloog kuv hais. Cia li khiav mus cuag kuv tus nus Lanpas hauv lub moos Halas, thiab nrog nws nyob ib ntus mus txog thaum koj tus tijlaug lub siab npau nqeg tso, mus txog thaum koj tus tijlaug txojkev chim nqeg thiab nws tsis nco qab tej uas koj tau ua rau nws tso, ces kuv li tso neeg tuaj coj koj rov qab qhov ntawd los. Ua cas kuv yuav cia neb ob leeg ploj ua ib hnub ntawm kuv?” Lenpekha thiaj hais rau Yiha tias, “Kuv dhuav cov pojniam Hithai, tsis xav ua neej nyob lawm. Yog Yakhauj tseem yuav cov ntxhais Hithai zoo li cov pojniam hauv lub tebchaws no ua pojniam, ces kuv txojsia yuav muaj qabhau dabtsi rau kuv?” Yiha txawm hu Yakhauj los foom koob hmoov thiab nkaw lus rau nws tias, “Koj tsis txhob yuav cov ntxhais Khana‑as ua pojniam. Cia li sawv kev mus rau tebchaws Pada Alas, mus rau Npethu‑ee lub tsev, uas yog koj niam leej txiv, thiab yuav koj niam tus nus Lanpas ib tug ntxhais qhov ntawd ua pojniam. Thov Vajtswv uas muaj hwjchim loj kawg nkaus foom koob hmoov thiab pub kom koj muaj tub ki thiab huaj vam coob ua tau ib haiv neeg coob heev. Thov Vajtswv pub tej koob hmoov uas foom rau Aplahas lawm rau koj thiab koj tej tub ki xeeb ntxwv kom koj thiaj tau lub tebchaws uas koj ua qhua nyob no ua koj tug, yog lub tebchaws uas Vajtswv pub rau Aplahas.” Yiha kom Yakhauj mus li no, nws thiaj mus rau Pada Alas mus cuag nws tus dab laug Lanpas uas yog Npethu‑ee tus tub, yog Yakhauj thiab Exau ob tug niam Lenpekha tus nus uas yog neeg Alas. Exau pom tias Yiha foom koob hmoov rau Yakhauj thiab kom Yakhauj mus nrhiav pojniam rau Pada Alas tebchaws, thiab thaum Yiha foom koob hmoov rau Yakhauj ntawd nws nkaw lus hais tias, “Tsis txhob yuav cov ntxhais Khana‑as ua pojniam,” thiab Yakhauj mloog nws niam nws txiv los thiab mus rau Pada Alas tebchaws lawm. Thaum Exau pom tias nws txiv Yiha tsis txaus siab rau cov pojniam Khana‑as, ces nws txawm mus cuag Yisama‑ee uas yog Aplahas tus tub, thiab yuav Yisama‑ee tus ntxhais Mahala uas yog Nenpayau tus muam ua niam yau. Yakhauj tawm ntawm Npe‑awsenpa yuav mus rau lub moos Halas, nws mus txog ib qho chaw ces txawm so qhov ntawd ib hmos vim hnub poob qho lawm. Nws muab ib lub pob zeb qhov ntawd los rau ncoo pw qhov chaw ntawd. Mas nws ua npau suav pom ib tug ntaiv tuam hauv ntiajteb, lub hau ntaiv nto plaws saum ntuj. Ua ciav Vajtswv cov tubtxib saum ntuj tabtom nce nce nqes nqes tus ntaiv ntawd. Yawmsaub sawv ntsug dhau saum tus hau ntaiv thiab hais tias, “Kuv yog Yawmsaub uas yog koj yawg Aplahas tus Vajtswv thiab yog Yiha tus Vajtswv. Thaj chaw uas koj pw no kuv yuav muab rau koj thiab koj caj ces. Koj caj ces yuav coob yam li tej hmoov av saum lub ntiajteb, thiab koj yuav nthuav dav rau sab hnub poob sab hnub tuaj sab ped sab nrad, ib tsoom neeg hauv ntiajteb yuav tau koob hmoov ntawm koj thiab koj caj ces los. Kuv yuav nrog nraim koj thiab kuv yuav tsom kwm koj rau txhua txojkev uas koj mus thiab yuav coj koj rov qab los rau lub tebchaws no, vim kuv yuav tsis tso koj tseg mus txog thaum kuv tau ua tej uas kuv hais cia rau koj no lawm.” Yakhauj tsim los mas hais tias, “Yawmsaub yeej nyob ntawm no tiag tiag li, yog kuv tsis paub xwb.” Nws ntshai thiab hais tias, “Lub chaw no txaus ntshai heev kawg li lauj! Lub chaw no yeej yog Vajtswv lub tsev thiab yog lub rooj ntug ceeb tsheej.” Yakhauj thiaj sawv ntxov tsees muab lub pob zeb uas nws rau ncoo txhos ua ib tug ncej thiab hliv roj aulib rau saum lub hau ncej zeb ntawd. Nws hu qhov chaw ntawd ua Npe‑ee. Yav tom ntej lub moos ntawd hu ua Lu. Yakhauj yeem lus tseg tias, “Yog Vajtswv nrog nraim kuv thiab yuav tsom kwm kuv rau txojkev uas kuv mus no, thiab pub zaub mov rau kuv noj thiab pub ris tsho rau kuv hnav, xwv kuv thiaj rov los txog kuv txiv lub tsev kaj siab lug, mas Yawmsaub yuav yog kuv tus Vajtswv. Thiab lub pob zeb uas kuv muab txhos ua ib tug ncej cia no yuav ua Vajtswv lub tsev. Thiab txhua yam uas koj pub rau kuv, kuv yuav muab ib feem hauv kaum pub rov rau koj.” Yakhauj txawm taug kev mus txog cov neeg sab hnub tuaj lub tebchaws. Thaum nws tsa muag mas pom ib lub qhov dej nyob hauv ib daim teb, muaj peb pab yaj pw ib ncig ntawm lub qhov dej ntawd, vim yog tej pab yaj txeev haus dej ntawm lub qhov ntawd. Txhib zeb uas npog lub qhov dej ntawd kuj loj. Thaum cov pab yaj los txhij lawm, cov neeg yug yaj li muab txhib zeb ntawd dov ntawm lub qhov dej thiab ntaus dej rau tej yaj haus tag li muab txhib zeb npog lub qhov dej li qub cia. Yakhauj hais rau lawv tias, “Cov kwvtij, nej tuaj qhovtwg tuaj?” Lawv teb tias, “Peb tuaj lub moos Halas tuaj.” Yakhauj thiaj nug lawv tias, “Nej paub Lanpas uas yog Nahau tus tub los tsis paub?” Lawv teb tias, “Paub thiab.” Yakhauj hais rau lawv tias, “Lanpas nyob zoo lov?” Lawv teb tias, “Nws nyob zoo thiab sas. Ntawm ne, nws tus ntxhais Lachee tabtom raws pab yaj los.” Yakhauj thiaj hais tias, “Sijhawm no tseem ntxov tsis tau txog caij uas coj tej yaj los ua ke. Cia li ntaus dej rau cov yaj haus thiab coj mus noj zaub.” Tiamsis lawv teb tias, “Tsis tau, peb yuav tos txog thaum txhua pab yaj los txhij tso li muab txhib zeb uas npog lub qhov dej dov tawm es peb li ntaus dej rau cov yaj haus.” Thaum Yakhauj tseem nrog lawv hais lus ntawd, Lachee kuj raws nws txiv pab yaj los txog vim yog nws yug pab yaj ntawd. Thaum Yakhauj pom dheev Lachee uas yog nws niam tus nus Lanpas tus ntxhais thiab pom nws niam tus nus Lanpas cov yaj, nws txawm mus muab txhib zeb uas npog lub qhov dej dov tawm thiab ntaus dej rau nws niam tus nus Lanpas pab yaj haus. Yakhauj thiaj nwj Lachee thiab quaj quaj. Thiab Yakhauj hais rau Lachee tias nws yog Lachee txiv li txheeb ze, nws yog Lenpekha tus tub. Ces Lachee txawm dhia mus hais rau nws txiv paub. Thaum Lanpas hnov txog nws tus muam tus tub Yakhauj, nws txawm dhia mus puag nwj thiab coj Yakhauj los rau hauv nws lub tsev. Yakhauj piav txhua yam huvsi rau Lanpas mloog. Mas Lanpas hais rau nws tias, “Koj yeej yog kuv caj ces tiag tiag li.” Yakhauj thiaj nrog nws nyob tau ib lub hlis. Lanpas hais rau Yakhauj tias, “Koj txheeb ze kuv tiag tiag li, tsis tsim nyog cia koj ua kuv li haujlwm dawb dawb xwb. Cia li hais rau kuv paub saib koj yuav nqe zog li cas?” Lanpas muaj ob tug ntxhais, tus hlob hu ua Le‑a, tus yau hu ua Lachee. Le‑a lub qhov muag tsis cus pes tsawg, tiamsis Lachee mas lub cev ntaj ntsug zoo nkauj heev. Yakhauj nyiam Lachee, nws thiaj hais rau Lanpas tias, “Kuv yuav ua koj zog xya xyoo es yuav Lachee uas yog koj tus ntxhais yau ua pojniam.” Lanpas hais tias, “Cia kuv muab kuv tus ntxhais qua rau koj zoo dua li muab qua rau lwm tus. Koj cia li nrog kuv nyob lauj.” Yakhauj thiaj ua xya xyoo zog kom tau Lachee, nws saib mas yam li ob peb hnub xwb vim nws nyiam Lachee heev. Yakhauj thiaj hais rau Lanpas tias, “Thov muab pojniam rau kuv, kuv thiaj tau nrog nws pw ua ke vim kuv twb ua haujlwm puv rau koj lawm.” Lanpas thiaj hu kwvtij zej zog tuaj noj tshoob. Thaum tsaus ntuj Lanpas muab nws tus ntxhais Le‑a coj los rau Yakhauj, Yakhauj kuj nrog nws pw. Lanpas muab nws tus nkauj qhev Xilapa pub ua nws tus ntxhais Le‑a li nkauj qhev. Thaum kaj ntug Yakhauj pom ua ciav yog Le‑a, nws thiaj hais rau Lanpas tias, “Koj ua dabtsi li no rau kuv? Kuv ua koj zog yuav Lachee los tsis yog? Ua cas koj dag kuv li no?” Lanpas teb tias, “Hauv peb lub tebchaws no tsis muaj kevcai uas yuav muab tus niam hluas qua ua tus niam laus ntej. Cia koj yuav tus no puv xya hnub tso peb li muab tus ntawd qua rau koj es koj rov ua zog rau kuv xya xyoo ntxiv thiab.” Yakhauj ua li ntawd thiab nws nrog Le‑a nyob kom puv xya hnub. Ces Lanpas li muab nws tus ntxhais Lachee qua rau Yakhauj yuav. Lanpas muab nws tus nkauj qhev Npiha pub ua nws tus ntxhais Lachee li nkauj qhev. Yakhauj thiaj mus nrog Lachee pw. Nws nyiam Lachee heev dua Le‑a, thiab nws ua xya xyoo zog ntxiv rau Lanpas. Thaum Yawmsaub pom tias Yakhauj ntxub Le‑a, Yawmsaub thiaj li qheb Le‑a lub plab menyuam. Tiamsis Lachee xeeb tsis taus menyuam. Le‑a xeeb tub thiab yug tau ib tug tub, nws tis npe hu ua Lunpee rau qhov nws hais tias, “Vim yog Yawmsaub tsa muag ntsia kuv txojkev txom nyem nyuaj siab. Nimno kuv tus txiv yeej yuav nyiam kuv tiag tiag li.” Le‑a rov xeeb tub thiab yug tau dua ib tug tub, thiab hais tias, “Vim yog Yawmsaub hnov tias kuv raug ntxub, nws thiaj muab tus tub no rau kuv thiab.” Vim li no nws thiaj tis npe hu ua Xime‑oo Nws rov xeeb tub thiab yug tau dua ib tug tub thiab hais tias, “Zaum no kuv tus txiv yuav npuab kiag kuv vim kuv yug peb tug tub rau nws lawm.” Vim li no thiaj muab hu ua Levi. Nws rov qab xeeb tub thiab yug tau dua ib tug tub thiab hais tias, “Zaum no kuv yuav qhuas Yawmsaub.” Vim li no nws thiaj tis npe hu ua Yuda. Ces nws txawm tseg tsis muaj menyuam lawm. Thaum Lachee pom tias nws tsis muaj menyuam yug rau Yakhauj, nws kuj khib nws tus niam laus. Nws thiaj hais rau Yakhauj tias, “Koj cia li muab menyuam rau kuv, yog tsis tau kuv yuav tuag.” Yakhauj chim rau Lachee thiaj hais tias, “Kuv nyob Vajtswv chaw lov? Vajtswv yog tus uas tsis pub koj xeeb tub.” Lachee thiaj hais tias, “Kuv tus nkauj qhev Npiha nyob no. Koj cia li mus nrog nws pw, nws thiaj yug tau menyuam rau hauv kuv lub xubntiag, kuv thiaj li tau menyuam ntawm nws los.” Lachee thiaj muab nws tus nkauj qhev Npiha rau Yakhauj yuav ua pojniam, thiab Yakhauj mus nrog nws pw. Npiha txawm xeeb tub thiab yug tau ib tug tub rau Yakhauj. Mas Lachee hais tias, “Vajtswv tsa kuv cai thiab hnov kuv lub suab thov thiab pub ib tug tub rau kuv.” Vim li no nws thiaj tis npe hu ua Daj. Npiha uas yog Lachee tus nkauj qhev rov xeeb tub thiab yug tau dua ib tug tub rau Yakhauj. Lachee thiaj hais tias, “Kuv nrog tus niam laus sib ntsuas zog heev thiab kuv kov yeej lawm.” Vim li no nws thiaj tis npe hu ua Nathali. Thaum Le‑a pom tias nws tseg tsis muaj menyuam lawm, nws txawm muab nws tus nkauj qhev Xilapa rau Yakhauj yuav ua pojniam. Xilapa uas yog Le‑a tus nkauj qhev yug tau ib tug tub rau Yakhauj. Le‑a thiaj hais tias, “Kuv tau hmoov zoo.” Vim li no nws thiaj tis npe hu ua Kas. Xilapa uas yog Le‑a tus nkauj qhev rov yug dua ib tug tub rau Yakhauj. Le‑a kuj hais tias, “Kuv zoo siab lawm lauj. Rau qhov tej pojniam yuav hu kuv tias tus uas zoo siab.” Nws thiaj tis npe hu ua Asaw. Thaum lub caij hlais mog Lunpee mus tom teb thiaj de tau cov lws duda‑i los muab rau nws niam Le‑a. Lachee txawm hais rau Le‑a tias, “Thov muab koj tus tub cov lws duda‑i ib txhia rau kuv thiab.” Le‑a teb tias, “Koj twb txeeb kuv tus txiv mus lawm yog ib qho me me xwb lov? Koj tseem yuav lws kuv tus tub cov lws duda‑i thiab lov?” Lachee teb tias, “Hmo no kuv yuav cia kuv tus txiv nrog koj pw pauj koj tus tub cov lws duda‑i.” Thaum tsaus ntuj Yakhauj rov tom teb los, Le‑a txawm mus tos nws thiab hais tias, “Koj yuav tsum nrog kuv pw, rau qhov kuv twb muab kuv tus tub cov lws duda‑i ntiav koj hmo no lawm.” Hmo ntawd Yakhauj thiaj nrog nws pw. Vajtswv hnov Le‑a tej lus, nws thiaj xeeb tub thiab yug tau tus tub uas tsib rau Yakhauj. Le‑a hais tias, “Vajtswv pub cov nqe ntiav ntawd rau kuv vim kuv twb muab kuv tus nkauj qhev rau kuv tus txiv lawm.” Nws thiaj tis tus tub ntawd lub npe hu ua Ixakha. Le‑a rov xeeb dua tub thiab yug tau tus tub uas rau rau Yakhauj. Mas Le‑a hais tias, “Vajtswv twb pub yam uas zoo rau kuv lawm. Nimno kuv tus txiv yuav saib taus kuv vim kuv yug tau rau tus tub rau nws lawm.” Nws thiaj tis npe hu ua Xenpuloo. Dhau ntawd Le‑a yug tau ib tug ntxhais muab tis npe hu ua Dina. Vajtswv nco txog Lachee thiab hnov nws tej lus thov thiab qheb nws lub plab menyuam. Nws thiaj xeeb tub thiab yug tau ib tug tub thiab hais tias, “Vajtswv twb daws kuv txojkev txaj muag lawm.” Nws thiaj tis tus tub ntawd lub npe hu ua Yauxej, nws hais tias “Thov Yawmsaub tsav dua ib tug tub rau kuv thiab.” Thaum Lachee yug Yauxej lawm, Yakhauj txawm hais rau Lanpas tias, “Thov tso kuv mus kuv thiaj rov mus txog kuv qub teb qub chaw. Thov muab kuv cov pojniam menyuam rau kuv, kuv twb ua zog them rau koj lawm, thov tso kuv mus, rau qhov koj twb paub tej haujlwm uas kuv tau ua rau koj lawm.” Tiamsis Lanpas hais rau nws tias, “Thov cia kuv hais ib lo lus rau koj li no. Kuv saib yaig saib sij mas paub tias Yawmsaub foom koob hmoov rau kuv vim yog muaj koj. Koj cia li xam nqe zog es kuv yuav muab rau koj.” Yakhauj hais rau nws tias, “Kuv ua haujlwm rau koj li cas thiab kuv saib koj tej tsiaj zoo li cas, koj yeej paub lawm. Thaum kuv tsis tau los koj muaj tsawg, tiamsis nimno twb huaj vam coob kawg li. Kuv mus rau txojkev twg los Yawmsaub yeej foom koob hmoov rau koj. Tiamsis nimno yuav thaum twg kuv li yug tau kuv tsev neeg?” Lanpas thiaj nug tias, “Kuv yuav muab dabtsi rau koj?” Yakhauj teb tias, “Koj tsis txhob muab dabtsi rau kuv. Yog koj yeem ua li no rau kuv, kuv yuav yug thiab tsom kwm koj pab yaj pab tshis ntxiv mus. Hnub no cia kuv mus thoob plaws koj pab yaj pab tshis es rho txhua tus yaj uas txheeb thiab txaij tej teev thiab txhua tus menyuam yaj uas dub, thiab tej tshis uas txheeb thiab txaij tej teev tawm rau ib qho. Ces muab tej tsiaj no ua nqe zog rau kuv. Kuv txojkev ncaj yuav tshwm los rau yav tom qab rau hnub uas koj tuaj tshuaj tej uas muab ua nqe zog rau kuv. Yog koj ntsib tej tshis tus twg uas tsis txheeb thiab tsis txaij tej teev thiab tej menyuam yaj tus twg uas tsis dub hauv kuv pab, mas koj yuav suav tias yog kuv nyiag lawm.” Lanpas thiaj hais tias, “Zoo lauj, yuav li uas koj hais kod.” Tiamsis hnub ntawd Lanpas kuj muab tej txiv tshis uas txaij tej kab thiab txaij tej teev thiab txhua tus maum tshis uas txaij tej teev thiab txheeb, yog tej tshis uas muaj tej teev dawb, thiab txhua tus menyuam yaj uas dub rho tawm cob rau nws cov tub yug. Nws txawm coj cov tsiaj ntawd mus nrug deb ntawm Yakhauj peb hnub ke. Mas Yakhauj yug Lanpas tej pab yaj pab tshis uas tseem tshuav. Yakhauj txawm muab tej kav ntoo nyoos uas yog ntoo cev thiab ntoo txiv duaj deg thiab ntoo seb los laws tawv ua txaij tej kwb kab pom dawb paug. Nws muab tej kav ntoo uas nws muab laws ntawd tso rau hauv tej dab dej ntawm tej tsiaj xubntiag, yog lub chaw uas cov tsiaj los haus dej, vim tej tsiaj pheej tshov rau thaum los haus dej. Ces cov yaj cov tshis txawm tshov rau ntawm tej kav ntoo txaij ntawd, ces txawm yug tau tej menyuam uas txaij tej kab thiab tej teev thiab txheeb. Yakhauj thiaj muab tej menyuam yaj ntawd cais tso rau ib qho, thiab muab tej yaj tej tshis ntsia ntsoov rau Lanpas tej yaj tej tshis uas txaij tej kab thiab dub. Nws muab nws cov tsiaj tso rau ib qho, tsis xyaw Lanpas cov tsiaj. Thaum cov tsiaj uas zoo thiab khov kho tshov Yakhauj kuj muab cov kav ntoo txaij tso rau hauv cov dab dej rau cov tsiaj pom kom thiaj li tshov ntawm cov kav ntoo txaij ntawd. Tiamsis nws tsis muab cov kav ntoo txaij ntawd tso rau tej tsiaj uas tsis zoo tsis khov pom. Ua li no mas tej tsiaj tsis zoo tsis khov thiaj poob ua Lanpas li lawm, tiamsis tej tsiaj uas zoo thiab khov yog Yakhauj li. Ua li no Yakhauj thiaj li nplua nuj tuaj, muaj tej niag pab yaj pab tshis coob coob, thiab muaj tub qhe nkauj qhev, muaj ntxhuav muaj nees luav. Yakhauj hnov hais tias Lanpas cov tub yws yws tias, “Yakhauj txeeb peb txiv cuab txhiaj cuab tam ib puas tsav yam tag lawm, thiab tej uas nws muaj ntawd puavleej yog tau peb txiv li xwb.” Yakhauj pom tias Lanpas tsis txaus siab rau nws tsis thooj li yav thaum ub lawm. Yawmsaub txawm hais rau Yakhauj tias, “Cia li rov qab mus nyob koj tej poj koob yawm txwv lub tebchaws mus nrog koj kw koj tig nyob. Kuv yuav nrog nraim koj.” Yakhauj thiaj txib neeg mus hu Lachee thiab Le‑a tuaj tom tshav zaub uas nws yug yaj yug tshis. Mas nws hais rau ob tug tias, “Kuv pom tias neb txiv tsis txaus siab rau kuv tsis thooj li yav thaum ub lawm. Tiamsis kuv txiv tus Vajtswv yeej nrog nraim kuv nyob. Neb yeej paub tias kuv ua neb txiv li haujlwm kawg dag kawg zog li, los neb txiv tseem ntxias kuv, txauv kuv nqe zog kaum zaus lawm. Tiamsis Vajtswv tsis kheev nws ua tau ib yam phem li cas rau kuv. Txiv hais tias tej tsiaj uas txaij ua tej teev mas muab ua nqe zog rau kuv, ces txhua tus tsiaj txawm xya menyuam txaij ua tej teev tag li. Txiv ho hais tias tej tsiaj uas txaij ua tej kab mas muab ua nqe zog rau kuv ces txhua tus tsiaj txawm xya menyuam txaij ua tej kab tag huvsi. Tej no yeej yog Vajtswv rho koj txiv tej tsiaj los pub rau kuv ntag. Thaum lub caij uas tej tsiaj txhu tshov kuv ua npau suav pom tias tej txiv tshis uas tshov pab tshis ntawd ib txhia txaij ua tej kab ib txhia txaij ua tej teev ib txhia txheeb. Vajtswv tus tubtxib txawm hais rau kuv hauv zaj npau suav ntawd hais tias, ‘Yakhauj.’ Kuv teb tias, ‘Hav, kuv nyob no 'os.’ Nws hais tias, ‘Tsa muag ntsia txhua tus txiv tshis uas tshov pab tshis ntawd ib txhia txaij ua tej kab ib txhia txaij ua tej teev thiab ib txhia txheeb, rau qhov kuv twb pom txhua yam uas Lanpas ua rau koj lawm. Kuv yog tus Vajtswv ntawm Npe‑ee uas koj muab roj hliv ywg tus ncej zeb txhos cia thiab koj tau cog lus tseg rau kuv. Nimno koj cia li sawv tsees tawm hauv lub tebchaws no rov qab mus nyob rau lub tebchaws uas yug koj.’ ” Lachee thiab Le‑a ob tug teb tias, “Wb ciav tsis muaj feem tau wb txiv tej qub txeeg qub teg. Txiv kuj muab wb saib yam li yog lwm haiv neeg thiab xwb. Txiv twb muab wb muag thiab muab wb nqe noj tag. Ib puas tsav yam nplua mias uas Vajtswv rho ntawm txiv los ntawd yeej yog peb li thiab peb tej menyuam li. Nimno Vajtswv hais kom koj ua li cas kuj ua raws li ntawd.” Ces Yakhauj txawm sawv tsees muab nws tej pojniam menyuam caij ntxhuav, thiab raws nws tej tsiaj txhu huvsi ua nws ntej mus, yog tej qhov txhia chaw huvsi thiab nws tej tsiaj txhu uas nws tau hauv lub tebchaws Pada Alas rov qab mus rau nws txiv Yiha rau hauv tebchaws Khana‑as. Lub sijhawm ntawd Lanpas mus txiav plaub yaj lawm ces Lachee cia li nyiag kiag nws txiv cov dab mlom uas teev hauv tsev coj mus. Yakhauj kuj dag Lanpas uas yog neeg Alas, Yakhauj tsis qhia rau Lanpas paub tias nws yuav khiav li. Yakhauj txawm coj ib puas tsav yam qhov txhia chaw tag nrho khiav mus hla tus dej Yufeti ncaj nraim mus rau pem toj siab Kile‑a tebchaws. Twb tau peb hnub lawm li muaj neeg mus hais rau Lanpas paub tias Yakhauj khiav lawm. Lanpas thiaj coj kwvtij caum qab tau xya hnub li caum cuag Yakhauj pem tej toj roob Kile‑a tebchaws. Mas thaum hmo ntuj Vajtswv los hais rau Lanpas uas yog neeg Alas hauv npau suav hais tias, “Koj ceev faj zoo zoo tsis txhob mus hais dabtsi rau Yakhauj li, txawm yog lus zoo lus phem los tsis txhob hais li.” Yakhauj mus tsa tsev ntaub tsuam chaw so rau pem toj siab Kile‑a tebchaws mas Lanpas kuj caum cuag Yakhauj. Lanpas thiab nws cov kwvtij kuj tsuam chaw so rau ntawd thiab. Lanpas hais rau Yakhauj tias, “Koj ua dabtsi li no? Koj dag tau kuv lawm. Koj coj kuv tej ntxhais khiav yam nkaus li koj mus ntaus rog yeej es koj txeeb tau los. Ua cas koj nyiag kev khiav kuv li no thiab dag kuv tsis qhia kuv paub li? Yog kuv paub, kuv tseem yuav pab xa koj ua xyiv fab hlo, tseem yuav hu nkauj nrov seev yees thiab yuav npuaj nruas ntaus nkauj nog ncas xa koj thiab los sas. Ua li cas koj tsis kheev kuv nwj xa kuv tej tub tej ntxhais mus? Koj ua ruam kawg li. Kuv yeej muaj peevxwm ua phem tau rau nej. Tiamsis yog nag hmo nej txiv tus Vajtswv hais rau kuv tias, ‘Koj ceev faj zoo zoo tsis txhob mus hais dabtsi rau Yakhauj li, txawm yog lus zoo lus phem los tsis txhob hais li.’ Tej zaum qhov uas koj khiav yog koj nco txog vaj tse niam txiv heev, tiamsis ua cas koj tseem nyiag kuv tej dab mlom los lawm thiab nawj?” Yakhauj teb Lanpas hais tias, “Kuv ntshai vim kuv xav tias tsam koj ho txeeb kiag koj tej ntxhais rov qab. Yog koj pom koj tej dab mlom nyob hauv leejtwg tes ces tsis txhob tseg tus ntawd siav li. Txwm kav xawb tab meeg hauv peb cov kwvtij neej tsa, yog pom ib yam dabtsi uas yog koj li nyob ntawm kuv kuj cia li coj mus.” Yakhauj tsis paub tias Lachee twb nyiag tej dab mlom ntawd los. Lanpas txawm nkag rau hauv Yakhauj lub tsev ntaub thiab mus rau hauv Le‑a lub tsev ntaub thiab mus rau hauv ob tug nkauj qhev lub tsev ntaub los kuj tsis pom. Nws txawm tawm hauv Le‑a lub tsev ntaub mus nkag rau hauv Lachee lub tsev ntaub. Tiamsis Lachee twb muab tej dab mlom ntawd coj mus zais rau hauv lub eeb ntxhuav nws txawm zaum saud lawm. Mas Lanpas mus tshawb nrhiav txhua zog hauv Lachee lub tsev ntaub los kuj tsis pom li. Lachee txawm hais rau leej txiv hais tias, “Thov txiv tsis txhob chim siab. Kuv cev tsis huv kuv thiaj sawv tsis tau los fim txiv.” Ces Lanpas xawb tag los tsis pom nws tej dab mlom li. Yakhauj txawm chim heev nws thiaj cem Lanpas tias, “Kuv ua txhaum li cas? Kuv muaj txim li cas es koj yuav siv zog caum kuv qab ua luaj li? Txawm yog koj twb tshawb nrhiav hauv kuv tej nra huvsi lawm yog koj pom muaj dabtsi uas yog koj li? Cia li muab los txawb kiag rau ntawm no tab meeg peb cov kwvtij neej tsa ob tog es cia lawv txiav cai rau wb ob tog. Kuv nrog koj nyob tau nees nkaum xyoo lawm. Koj tej yaj tej tshis tsis muaj ib tug ho menyuam li, thiab koj tej txiv yaj kuv tsis tau noj ib tug li. Tej uas tsiaj qus tom lawd kuv kuj tsis coj los rau koj, kuv tseem nrhiav kuv los ntxiv rau xwb. Tej uas tub sab nyiag tsis hais nyiag nruab hnub nyiag hmo ntuj koj kuj muab xam huvsi rau kuv them. Kuv lub neej yeej zoo li no, nruab hnub kuv kuj tiv tshav ntuj kub hmo ntuj kuv kuj tiv no kuv twb pw tsis tsaug zog li. Kuv nrog koj tsev neeg nyob li no tau nees nkaum xyoo. Kuv ua koj zog kaum plaub xyoo yuav koj ob tug ntxhais thiab kuv ua koj zog rau xyoo yuav koj tej tsiaj txhu los koj tseem txauv kuv nqe zog kaum zaus. Yog kuv txiv tus Vajtswv uas yog Aplahas tus Vajtswv thiab yog tus uas kuv txiv Yiha hwm thiab ntshai, tsis tuaj kuv tog ces zaum no koj yeej yuav ua kom kuv mus tes dawb tes npliag xwb lauj. Yog Vajtswv pom kuv txojkev txom nyem lwj siab thiab pom tej haujlwm uas kuv ua, nag hmo Vajtswv thiaj li txwv koj.” Lanpas txawm teb Yakhauj tias, “Tej ntxhais no los yog kuv ntxhais, tej menyuam no los yog kuv menyuam, tej niag pab tsiaj no los yog kuv li, ib puas tsav yam uas nyob ntawm koj xubntiag no puavleej yog kuv li. Hnub no sub kuv nim ua tau li cas rau kuv tej ntxhais thiab tej menyuam uas lawv yug? Cia li txav los es wb sib cog lus cia xwv tej lus cog tseg ntawd thiaj ua tau timkhawv rau kuv thiab koj.” Yakhauj txawm muab ib txhib zeb los txhos ua ib tug ncej. Yakhauj hais rau nws cov kwvtij neej tsa tias “Khaws pob zeb los.” Lawv txawm khaws pob zeb los tib ua ib pawg. Ces lawv txawm noj ib tsum mov rau ntawm pawg pob zeb ntawd. Lanpas tis npe rau pawg pob zeb ntawd hais tias Yeka Xahadutha hos Yakhauj ho tis npe hais tias Kale‑e. Lanpas hais tias, “Hnub no pawg pob zeb no ua timkhawv rau koj thiab kuv.” Vim li no thiaj hu qhov chaw ntawd ua Kale‑e, thiab hu ua Mixapa, rau qhov Lanpas hais tias, “Txawm yog wb ob tog sib ncaim lawm los thov Yawmsaub zov rawv wb ob tog. Yog koj tsim txom kuv tej ntxhais lossis koj yuav dua niam yau, txawm yog tsis muaj leejtwg nrog wb ob tog nyob los koj nco ntsoov tias Vajtswv ua timkhawv rau koj thiab kuv.” Lanpas kuj hais rau Yakhauj tias, “Saib pawg pob zeb thiab tus ncej zeb uas wb muab txhos kem koj thiab kuv no nawj. Pawg pob zeb no ua timkhawv thiab tus ncej zeb ua timkhawv hais tias kuv yuav tsis hla pawg pob zeb no tuaj ua phem rau koj, thiab koj yuav tsis hla pawg pob zeb thiab tus ncej zeb no tuaj ua phem rau kuv. Cia Aplahas thiab Nahau ob tug tus Vajtswv uas yog ob tug txiv tus Vajtswv ua tus uas txiav cai rau wb.” Yakhauj kuj tuav tus Vajtswv uas nws txiv Yiha hwm thiab ntshai lub npe cog lus twv thiab. Yakhauj txawm tua tsiaj xyeem saum lub roob ntawd, thiab hu nws tej kwvtij neej tsa sawvdaws los noj ib tsum mov ua ke. Lawv noj mov nyob ib hmos saum lub roob ntawd. Lanpas sawv ntxov ntxov los nwj xa nws tej xeeb ntxwv thiab nws tej ntxhais mus thiab foom koob hmoov rau lawv tag ces nws txawm rov mus tsev lawm. Yakhauj txawm taug kev mus mas Vajtswv cov tubtxib saum ntuj los ntsib nws. Thaum Yakhauj pom lawv nws hais tias, “No yog Vajtswv pab tub rog.” Nws thiaj hu qhov chaw ntawd ua Mahana‑i. Yakhauj txib neeg tshaj xo ua nws ntej mus cuag nws tus tijlaug Exau hauv Xe‑i tebchaws uas yog Edoo tebchaws, Yakhauj hais rau lawv tias, “Cia li mus hais rau Exau uas ua hlob tias, ‘Koj tus qhev Yakhauj hais li no tias, Kuv nrog Lanpas nyob txog niaj hnub nimno. Kuv muaj nyuj muaj nees luav muaj tej pab yaj pab tshis muaj tub qhe nkauj qhev, mas kuv txib neeg tuaj sam hwm koj kom koj thiaj li txaus siab rau kuv.’ ” Cov uas tshaj xo ntawd rov los hais rau Yakhauj tias, “Peb mus cuag koj tus tijlaug Exau lawm, nws tabtom tuaj ntsib koj, thiab muaj plaub puas leej nrog nws tuaj.” Yakhauj ntshai thiab txhawj kawg li, thiaj muab cov neeg uas nrog nws thiab nws tej pab yaj pab tshis pab nyuj thiab tej ntxhuav faib ua ob pab. Nws xav tias, “Yog Exau tuaj muab ib pab ua puam tsuaj lawm, pab uas tseem tshuav yuav khiav dim.” Yakhauj thov Vajtswv hais tias, “Au kuv yawg Aplahas tus Vajtswv thiab kuv txiv Yiha tus Vajtswv, au Yawmsaub koj hais rau kuv tias, ‘Cia li rov qab mus rau koj teb koj chaw koj kw koj tig es kuv yuav ua zoo rau koj.’ Kuv tsis tsim nyog tau txojkev hlub uas ruaj khov thiab txojkev ncaj ncees uas koj tau ua tshwm rau koj tus qhev lawm ib nyuag qhov kiag li. Rau qhov tias kuv muaj tib tug pas nrig hla tus dej Yaladee mus xwb, mas nimno kuv muaj ob pab neeg. Thov koj cawm kuv dim hauv kuv tus tijlaug Exau txhais tes, vim kuv ntshai nws, tsam ces nws yuav muab kuv thiab pojniam menyuam tua pov tseg huvsi. Tiamsis koj twb hais cia lawm tias koj yuav ua zoo rau kuv thiab pab kom kuv caj ces zoo yam nkaus li tej xuab zeb ntawm ntug hiavtxwv suav tsis txheeb vim yog coob kawg.” Hmo ntawd Yakhauj so qhov ntawd, thiab xaiv nws tej qhov txhia chaw uas nws yuav pub ua tshav ntuj rau nws tus tijlaug Exau, yog ob puas tus maum tshis thiab nees nkaum tus txiv tshis, ob puas tus maum yaj thiab nees nkaum tus txiv yaj, peb caug tus maum ntxhuav thiab tej menyuam ntxhuav, plaub caug tus maum nyuj thiab kaum tus txiv nyuj, thiab nees nkaum tus maum nees luav thiab kaum tus txiv nees luav. Yakhauj muab cov no rau nws cov tub qhe saib kom ib pab nyob nrug deb ib pab, thiab hais rau nws cov tub qhe tias, “Cia li ua kuv ntej mus, thiab cia ib pab mus kom nrug deb zog ib pab.” Yakhauj hais rau tus tub qhe uas saib thawj pab tias, “Thaum kuv tus tijlaug Exau tuaj ntsib koj thiab nug koj tias, ‘Koj yog leejtwg li neeg? Koj mus qhovtwg? Thiab tej tsiaj txhu uas ua koj ntej ntawd yog leejtwg li?’ koj yuav tsum teb tias, ‘Tej no yog koj tus qhev Yakhauj li. Yog tej uas coj tuaj ua tshav ntuj pub rau Exau uas ua hlob. Thiab Yakhauj tseem raws peb qab los.’ ” Yakhauj hais rau tus uas saib pab ob thiab pab peb thiab txhua tus uas raws tej pab tsiaj tias, “Thaum nej ntsib Exau nej yuav hais ib yam nkaus li ntawd rau nws. Thiab nej yuav hais tias, ‘Thiab koj tus qhev Yakhauj tseem raws peb qab los.’ ” Vim yog Yakhauj xav tias, “Nyaj tej tsiaj uas kuv xa ua ntej mus ua tshav ntuj yuav tswj tau Exau kev npau taws, thiab thaum kuv mus pom nws tim ntsej tim muag nyaj nws yuav txais yuav kuv.” Yog li no nws thiaj muab tej tshav ntuj xa ua ntej mus, tiamsis hmo ntawd nws tus kheej nws tseem so qhov chaw ntawd. Hmo ntawd Yakhauj sawv tsees coj ob tug pojniam thiab ob tug nkauj qhev thiab kaum ib tug menyuam hla tus dej Yanpo. Yakhauj xa lawv hla tus dej mus thiab xa cuab txhiaj cuab tam huvsi hla mus. Yakhauj tib leeg tseem nyob qhov ntawd. Muaj ib tug txivneej nrog nws sib qhau ib hmos kaj ntug. Thaum tus yawg ntawd pom tias kov tsis yeej Yakhauj, nws txawm nias Yakhauj lub pob qej txha ntsag. Thaum Yakhauj nrog nws sib qhau Yakhauj lub pob qej txha thiaj txawv kiag. Tus yawg ntawd hais tias, “Cia li tso kuv mus rau qhov twb yuav kaj ntug.” Tiamsis Yakhauj hais tias, “Kuv yuav tsis tso koj mus txog thaum koj foom koob hmoov rau kuv tso.” Tus yawg ntawd hais rau nws tias, “Koj npe hu li cas?” Nws teb tias, “Kuv npe hu ua Yakhauj.” Tus yawg ntawd thiaj hais tias, “Yuav tsis hu koj ua Yakhauj lawm, yuav hu ua Yixayee rau qhov koj tau nrog Vajtswv thiab neeg sib ntsuas zog thiab kov yeej.” Yakhauj thiaj nug nws tias, “Thov koj qhia koj lub npe rau kuv.” Tus txivneej ntawd hais tias, “Ua cas koj nug kuv lub npe?” Ces nws txawm foom koob hmoov rau Yakhauj qhov ntawd. Yakhauj thiaj hu qhov chaw ntawd ua Peni‑ee thiab hais tias “Rau qhov kuv twb pom Vajtswv tim ntsej tim muag los nws tseem tseg kuv txojsia nyob.” Thaum Yakhauj hla Peni‑ee mus hnub tawm tuaj mas nws mus kev ceg tawv pluav vim yog nws ntsag txawv. Vim li no cov Yixayee thiaj tsis noj txoj leeg ntawm ntsag uas nyob ntawm pob qej txha txog niaj hnub nimno, vim yog Vajtswv nias ncaj txoj leeg ntawm Yakhauj lub pob qej txha ntsag. Yakhauj tsa muag ntsia mas pom Exau tuaj thiab muaj plaub puas leej nrog nws tuaj. Yakhauj thiaj muab cov menyuam faib nrog Le‑a thiab Lachee thiab ob tug nkauj qhev. Nws tso ob tug nkauj qhev thiab ob tug cov menyuam mus ua ntej, tso Le‑a thiab nws cov menyuam mus ua nruab nrab, cia Lachee thiab Yauxej mus tom qab kawg. Nws ua lawv ntej mus, khoov ntshis hauv av pe xya pes mus ti nkaus nws tus tijlaug. Exau dhia loo mus tos nws thiab puag nkaus khawm caj dab nwj, mas nyias taus nyias quaj. Thaum Exau tsa muag ntsia pom cov pojniam menyuam, nws thiaj nug tias, “Cov neeg uas nrog koj ua ke no yog leejtwg?” Yakhauj teb tias, “Yog cov menyuam uas Vajtswv zoo siab pub rau kuv uas yog koj tus tub qhe.” Ob tug nkauj qhev thiab ob tug cov menyuam thiaj txav los ze thiab pe. Le‑a thiab nws cov menyuam kuj txav los ze thiab pe. Thaum kawg Yauxej thiab Lachee txav los ze thiab pe. Exau hais tias, “Cov tsiaj txhu huvsi uas kuv ntsib ntawd yog muab ua dabtsi?” Yakhauj teb tias, “Yog muab pub rau koj kom koj txaus siab rau kuv.” Exau hais tias, “Tus kwv, kuv muaj txaus lawm, khaws koj li cia rau koj.” Yakhauj hais tias, “Tsis tau, yog koj txaus siab rau kuv, thov koj txais tej tshav ntuj ntawm kuv txhais tes, rau qhov kuv pom koj ntsej muag mas ib yam li kuv pom Vajtswv ntsej muag ntag vim koj hlub kuv thiab koj txais kuv zoo kawg. Kuv thov koj txais tej tshav ntuj uas kuv coj los rau koj, rau qhov Vajtswv hlub thiab ua zoo rau kuv, thiab kuv muaj txaus lawm.” Nws thov thov li no Exau thiaj txais lawm. Exau hais tias, “Peb cia li ua ke mus, kuv yuav coj koj kev.” Yakhauj teb nws tias, “Yawg hlob koj yeej paub tias kuv cov menyuam tsis muaj zog, thiab kuv tseem txhawj txog kuv tej pab yaj pab tshis thiab tej nyuj li menyuam uas tseem noj mis. Yog tseem raws ceev nrooj mus ib hnub thiab, tej tsiaj yuav tuag tag. Thov yawg hlob ua koj tus qhev ntej mus mas kuv maj mam raws koj qab los raws li tej tsiaj lub zog uas nyob ntawm kuv hauv ntej thiab raws li kuv cov menyuam lub zog, mus txog thaum kuv los cuag yawg hlob ntawm Xe‑i.” Exau thiaj hais tias, “Cia kuv tso kuv cov neeg nrog koj ua ke.” Tiamsis Yakhauj hais tias, “Tsis txog ua li ntawd. Thov koj txaus siab rau kuv xwb ces txaus lawm.” Mas hnub ntawd Exau kuj taug kev rov mus rau Xe‑i. Tiamsis Yakhauj mus txog ntawm Xukhau ces txawm ua vaj tse nyob ntawd thiab ua tsev pheeb suab rau nws tej tsiaj txhu. Vim li ntawd thiaj hu qhov chaw ntawd ua Xukhau. Yakhauj taug kev ntawm Pada Alas los txog lub moos Sekhee hauv Khana‑as tebchaws tsis raug ceeblaj dabtsi li. Nws thiaj tsa tsev ntaub ze ntawm lub moos Sekhee. Yakhauj yuav thaj av uas nws tsa tsev ntaub ntawm Hamau cov tub ib puas lub txiag. Hamau yog Sekhee txiv. Yakhauj tib ib lub thaj xyeem rau qhov ntawd, hu lub thaj ntawd ua Ee Elohe Yixayee. Yakhauj tus ntxhais Dina uas Le‑a yug tawm mus tsham cov pojniam uas nyob hauv tebchaws ntawd. Thaum Hamau uas yog neeg Hivai uas kav tebchaws ntawd tus tub Sekhee pom Dina ces nws txawm muab tus ntxhais yuam coj mus pw ua ke. Sekhee kuj tag siab kiag rau Yakhauj tus ntxhais Dina, nws nyiam heev thiab hais lus zoo kawg li rau Dina. Sekhee txawm hais rau nws txiv Hamau tias, “Thov pab yuav tus ntxhais ntawd ua kuv pojniam lauj.” Yakhauj hnov hais tias Sekhee muab nws tus ntxhais lub cev kov puas lawm tiamsis nws cov tub tseem yug tsiaj tom tshav zaub. Yakhauj thiaj nyob twjywm tos cia cov tub los tso. Hamau uas yog Sekhee txiv thiaj mus cuag Yakhauj mus nrog nws tham. Thaum Yakhauj cov tub hnov tej xov ntawd lawv txawm rov tom tshav zaub los. Lawv mob siab kawg thiab chim kawg li rau qhov uas Sekhee saib tsis taus cov Yixayee thiaj muab Yakhauj tus ntxhais yuam li ntawd, yeej tsis tsim nyog yuav ua li ntawd. Hamau txawm hais rau lawv tias, “Kuv tus tub Sekhee lub siab yeej dai qas dhuam rau koj tus ntxhais li. Thov muab tus ntxhais rau kuv tus tub yuav ua pojniam. Nej nrog peb ua tshoob ua kos, muab nej tej ntxhais qua rau peb thiab yuav peb tej ntxhais rau nej. Nej nrog peb nyob, peb yuav qheb tebchaws qas lug rau nej nyob. Cia li nyob ntawm no ua lag ua luam yuav liaj yuav teb ua vaj ua tsev.” Sekhee txawm hais rau Dina txiv thiab nws cov nus tias, “Tsa muag zaj saib kuv lauj. Nej yuav pes tsawg los kuv yeej yuav them xwb. Nej yuav hu nqe mis nqe hno li cas thiab tshav ntuj li cas los kuv yeej yuav muab rau nej raws li nej hais. Thov muab tus ntxhais qua rau kuv yuav xwb.” Vim yog Sekhee muab lawv tus muam Dina lub cev kov puas lawm Yakhauj cov tub thiaj dag Sekhee thiab nws txiv Hamau. Lawv teb tias, “Tsis tau li lauj! Peb qua tsis nyog tus muam rau tus neeg uas tsis tau ua kevcai txiav. Ua li mas yuav rhuav peb ntsej muag heev. Tsuav yog nej kam ua li uas peb hais es cia txhua tus txivneej ua kevcai txiav ib yam li peb thiab, ces peb yuav yeem muab qua rau koj. Peb thiaj yeem muab peb tej ntxhais qua rau nej thiab yuav nej tej ntxhais los rau peb mas peb yuav nrog nej nyob ua kiag ib haiv neeg. Tiamsis yog nej tsis mloog peb hais tsis kam ua kevcai txiav ces peb yuav coj peb tus muam khiav mus.” Lawv cov lus ntawd mas hum Hamau thiab nws tus tub Sekhee ob tug siab. Tus hluas ntawd tsis tos li, nws maj nroos ua kiag li lawv hais vim nws tag siab nrho rau Yakhauj tus ntxhais. Sekhee yog tus uas muaj meej nthawb dua txhua tus hauv nws txiv tsev neeg. Hamau thiab nws tus tub Sekhee thiaj tawm mus rau ntawm rooj loog hais rau cov txivneej hauv lub moos ntawd tias, “Cov txivneej no nrog peb sib raug zoo lawm. Cia lawv nyob hauv lub tebchaws no ua lag ua luam rau qhov lub tebchaws no dav txaus lawv nyob. Peb cia li yuav kiag lawv tej ntxhais los ua peb cov li pojniam thiab muab peb tej ntxhais qua rau lawv yuav. Qhov uas lawv yuav kam nrog peb nyob ua kiag ib haiv neeg mas yuav tsum ua li no xwb. Peb cov txivneej txhua tus yuav tsum ua kevcai txiav ib yam li lawv. Lawv tej niag pab tsiaj txhu thiab ib puas tsav yam uas lawv muaj thiab tej tsiaj uas siv ua haujlwm puav leej yuav yog peb li los sas. Cia peb ua raws li uas lawv hais no, lawv thiaj li kam nrog peb nyob.” Cov txivneej sawvdaws uas nyob hauv lub moos kuj pom zoo ua raws li Hamau thiab nws tus tub Sekhee hais. Mas cov txivneej hauv lub moos ntawd txhua tus txawm ua kevcai txiav. Lawv ua kevcai txiav tau peb hnub, thaum lawv tseem tabtom mob mob Yakhauj ob tug tub Xime‑oo thiab Levi uas yog Dina ob tug nus hlob txawm coj ntaj nyas mus rau hauv moos muab cov txivneej hauv moos txhua tus tua pov tseg. Ob tug xuas ntaj tua Hamau thiab nws tus tub Sekhee tuag mas coj Dina tawm hauv Sekhee lub tsev mus. Yakhauj cov tub pom cov txivneej uas tuag ntawd mas lawv cia li lws tej qhov txhia chaw hauv lub moos vim cov neeg hauv lub moos ntawd muab lawv tus muam lub cev kov puas lawm. Lawv txeeb kiag tej tshis tej yaj tej nyuj tej nees luav thiab ib puas tsav yam tsis hais hauv lub moos nruab liaj nruab teb coj huvsi mus, coj kiag nyiaj txiag cuab txhiaj cuab tam thiab ntes pojniam menyuam coj mus. Lawv sau ib puas tsav yam hauv vaj hauv tsev du lug li. Yakhauj txawm hais rau Xime‑oo thiab Levi tias, “Neb ua rau kuv tau kev kub ntxhov heev, neb ua rau cov neeg Khana‑as thiab cov neeg Pelixai uas nyob tebchaws no ntxub kuv. Peb tsawg tsawg li, yog lawv sau nthwv tuaj ntaus kuv ces kuv thiab kuv tsev neeg yeej yuav puam tsuaj tag xwb.” Tiamsis ob tug teb hais tias, “Luag muab peb tus muam ua cuag nkaus li tus poj muag cev tau thiab lov?” Vajtswv hais rau Yakhauj hais tias, “Cia li sawv tsees tsiv mus rau nram Npe‑ee mus nyob nrad es tib ib lub thaj rau tus Vajtswv uas thaum koj khiav koj tus tijlaug Exau es los tshwm rau koj pom.” Vim li ntawd Yakhauj thiaj hais rau nws tsev neeg thiab cov neeg uas nrog nws nyob ua ke sawvdaws hais tias, “Cia li muab lwm tebchaws tej dab uas nej coj tso pov tseg huvsi thiab ua kevcai ntxuav lub cev lub siab kom kaj kom huv thiab hloov tsoos tsho huvsi. Peb cia li mus lawm nram Npe‑ee mas kuv yuav tib ib lub thaj rau ntawd rau tus Vajtswv uas thaum kuv raug kev txom nyem es nws teb kuv thiab nrog nraim kuv nyob rau txhua qhov chaw uas kuv tau mus.” Lawv txawm muab lwm haiv neeg tej dab qhuas uas lawv coj thiab muab lawv tej kauj co uas lawv coj ntawm qhov ntsej huvsi rau Yakhauj, ces Yakhauj txawm muab faus rau hauv tsob qab ntoo xeeb uas nyob ze lub moos Sekhee. Thaum lawv tsiv mus ntawd mas Vajtswv ua rau tej zej zog thoob plaws hauv tebchaws ntawd ntshai kawg li, lawv thiaj tsis caum Yakhauj cov tub qab. Yakhauj thiab nws cov neeg sawvdaws los txog ntawm Lu (uas yog Npe‑ee) uas nyob hauv Khana‑as tebchaws. Yakhauj txawm tib ib lub thaj rau ntawd mas hu qhov chaw ntawd ua Eenpe‑ee, vim yog qhov chaw uas thaum Yakhauj khiav nws tus tijlaug es Vajtswv los tshwm rau nws pom. Tus nkauj qhev Denpaula uas tu Lenpekha hlob txawm tuag mas lawv muab nws log rau hauv tsob qab ntoo xeeb nram qab Npe‑ee, mas thiaj hu tsob ntoo ntawd ua Aloo Npakhu. Thaum Yakhauj tsiv ntawm Pada Alas rov los Vajtswv los tshwm rau Yakhauj dua ib zaug thiab foom koob hmoov rau nws. Vajtswv hais rau nws tias, “Koj npe hu ua Yakhauj tiamsis yuav tsis hu koj ua Yakhauj dua li lawm, yuav hu koj ua Yixayee.” Yog li no thiaj hu nws ua Yixayee. Thiab Vajtswv hais rau Yakhauj tias, “Kuv yog Vajtswv uas muaj hwjchim loj kawg nkaus. Koj cia li muaj tub ki huaj vam coob coob. Muaj ib haiv neeg yuav tshwm ntawm koj los thiab yuav muaj ntau haiv neeg tshwm ntawm koj los, yuav muaj tej vajntxwv tshwm ntawm koj los. Lub tebchaws uas kuv muab pub rau Aplahas thiab Yiha lawd kuv yeej yuav pub rau koj thiab pub rau koj caj ces mus li.” Vajtswv txawm tawm ntawm qhov chaw uas nrog Yakhauj tham mus lawm. Yakhauj txawm txhos ib tug ncej zeb cia rau ntawm qhov chaw uas Vajtswv nrog nws hais lus thiab nws muab cawv txiv hmab hliv ywg ua kevcai hliv xyeem rau saum tus ncej thiab muab roj hliv ywg tus ncej ntawd. Yakhauj hu qhov chaw uas Vajtswv nrog nws hais lus ntawd ua Npe‑ee. Lawv tsiv ntawm Npe‑ee mus tsis tau txog Efatha ces Lachee txawm mob plab heev thiab yug menyuam nyuaj heev. Thaum nws tabtom mob heev tus pojniam uas pab yug menyuam hais rau Lachee tias, “Koj tsis txhob ntshai, koj twb tau dua ib tug metub lawm.” Thaum nws yuav tu siav yuav tuag ntawd nws tis tus metub ntawd npe hu ua Npee‑auni tiamsis nws txiv tis npe hu ua Npeeyamee. Ces Lachee txawm tuag lawm, mas lawv muab nws log rau ntawm ntug kev uas mus rau nram lub zos Efatha (uas yog Npelehee). Yakhauj muab ib tug ncej zeb txhos rau ntawm lub ntxa. Tus ncej ntawm Lachee lub ntxa mas nyob los txog niaj hnub nimno. Yixayee kuj tsiv rau tom ntej, mus tsa tsev ntaub nyob dhau plaws lub chaw tsom faj Edaw. Thaum Yixayee nyob rau hauv lub tebchaws ntawd Lunpee txawm mus nrog nws txiv tus niam yau Npiha pw. Yixayee kuj hnov txog qhov ntawd thiab. Yakhauj muaj kaum ob tug tub. Le‑a cov tub yog Lunpee uas yog Yakhauj tus tub hlob, thiab Xime‑oo, Levi, Yuda, Ixakha, thiab Xenpuloo. Lachee cov tub yog Yauxej thiab Npeeyamee. Lachee tus nkauj qhev Npiha cov tub yog Daj thiab Nathali. Le‑a tus nkauj qhev Xilapa cov tub yog Kas thiab Asaw. Cov no yog Yakhauj cov tub uas yug ntawm Pada Alas. Yakhauj rov los cuag nws txiv Yiha ntawm Male uas ze lub moos Khiliya Anpa (uas yog Heploo) yog lub chaw uas thaum ub Aplahas thiab Yiha txeev ua qhua nyob. Yiha hnub nyoog muaj ib puas yim caum xyoo, nws txojsia li tu. Nws nyob laus nkoos txog caij txog nyoog li tuag mus nrog nws tej poj koob yawm txwv nyob. Nws ob tug tub Exau thiab Yakhauj thiaj coj nws mus log. Ntawm no yog Exau uas yog Edoo caj ces. Exau mus yuav cov Khana‑as tej ntxhais los ua pojniam. Nws yuav Eloo uas yog neeg Hithai tus ntxhais Ada thiab yuav Anas tus ntxhais Auhaulinpama, nws yawg yog Xinpe‑oo uas yog neeg Hivai, thiab nws yuav Yisama‑ee tus ntxhais Npaxema uas yog Nenpayau tus niam hluas. Ada yug tau Elifa rau Exau, Npaxema yug tau Le‑u‑ee, thiab Auhaulinpama yug tau Ye‑u thiab Yalas thiab Khaula. Cov no yog Exau cov tub uas yug hauv tebchaws Khana‑as. Exau coj nws cov pojniam thiab tej tub tej ntxhais thiab nws cov neeg sawvdaws thiab tej tsiaj txhu thiab tej tsiaj siv ua haujlwm thiab txhua yam uas nws khwv tau hauv Khana‑as tebchaws ncaim nws tus kwv Yakhauj tsiv mus deb rau lwm tebchaws lawm. Vim yog ob kwvtij muaj qhov txhia chaw ntau heev thiaj nyob tsis tau ua ke, vim lub tebchaws uas ob tug nyob ntawd nqaim tsis txaus lawv yug tsiaj txhu ua ke. Exau uas yog Edoo thiaj tsiv mus nyob rau pem tej toj roob Xe‑i tebchaws. Ntawm no yog Exau caj ces. Exau yog cov neeg Edoo lub keeb uas nyob pem toj siab Xe‑i tebchaws. Exau cov tub tej npe yog li no. Elifa yog Exau tus niam hlob Ada yug, thiab Le‑u‑ee yog Exau tus niam ob Npaxema yug. Elifa cov tub yog Themas, Auma, Xefau, Kathas thiab Khena. Exau tus tub Elifa tus niam yau Thina muaj ib tug tub hu ua Amalej. Cov no yog Exau tus niam hlob Ada li xeeb ntxwv. Le‑u‑ee cov tub yog Nahaj, Xelag, Sama thiab Mixa. Cov no yog Exau tus niam ob Npaxema li xeeb ntxwv. Exau tus niam peb Auhaulinpama uas yog Anas tus ntxhais thiab yog Xinpe‑oo tus xeeb ntxwv cov tub uas nws yug rau Exau yog Ye‑u thiab Yalas thiab Khaula. Ntawm no yog cov thawj coj hauv Exau tej caj ces. Exau tus tub hlob Elifa cov tub uas ua thawj coj yog Themas, Auma, Xefau, Khena, Khaula, Kathas thiab Amalej. Cov no yog Elifa cov tub uas ua thawj coj hauv Edoo tebchaws. Lawv yog Adas li xeeb ntxwv. Exau tus tub Le‑u‑ee cov tub uas ua thawj coj yog Nahaj, Xelag, Sama thiab Mixa. Cov no yog Le‑u‑ee cov tub uas ua thawj coj hauv Edoo tebchaws. Lawv yog Exau tus niam ob Npaxema li xeeb ntxwv. Exau tus niam peb Auhaulinpama cov tub uas ua thawj coj yog Ye‑u thiab Yalas thiab Khaula. Cov no yog Exau tus niam peb Auhaulinpama uas yog Anas tus ntxhais cov tub uas ua thawj coj hauv Edoo tebchaws. Cov neeg no yog Exau uas yog Edoo cov tub, thiab yog cov uas ua thawj coj. Ntawm no yog Xe‑i uas yog neeg Hauli cov tub uas nyob tebchaws ntawd, yog Lauthas, Saunpas, Xinpe‑oo, Anas, Disoo, Exaw thiab Disas. Cov no yog Xe‑i cov tub uas ua thawj coj hauv cov Hauli hauv Edoo tebchaws. Lauthas cov tub yog Hauli thiab Hemas. Thina yog Lauthas tus muam. Saunpas cov tub yog Avas, Manaha, Enpas, Sefau thiab Aunas. Xinpe‑oo cov tub yog Aiyag thiab Anas. Anas yog tus uas coj nws txiv Xinpe‑oo pab nees luav mus yug mas mus pom ib lub qhov dej kub dej npau hauv tebchaws moj sab qhua. Anas tus tub yog Disoo tus ntxhais yog Auhaulinpama. Disoo cov tub yog Hedas, Esanpas, Ithalas thiab Khelas. Exaw cov tub yog Npihas, Xavas thiab Akhav. Disas cov tub yog Us thiab Aslaj. Cov no yog cov uas ua thawj coj hauv cov Hauli, yog Lauthas, Saunpas, Xinpe‑oo, Anas, Disoo, Exaw thiab Disas. Cov no yog cov uas ua thawj coj hauv cov Hauli nyias ua nyias ib cum hauv Xe‑i tebchaws. Ntawm no yog cov vajntxwv uas kav hauv Edoo tebchaws yog kav ua ntej thaum ub uas cov Yixayee tsis tau muaj vajntxwv. Npe‑au tus tub Npela sawv los kav hauv Edoo. Nws lub moos hu ua Dihanpa. Thaum Npela tuag lawd Xelag tus tub Yaunpam uas yog neeg Npauxa sawv nws chaw ua vajntxwv kav. Thaum Yaunpam tuag lawd Husas uas yog neeg hauv tebchaws Themas sawv nws chaw ua vajntxwv kav. Thaum Husas tuag lawd Npeda tus tub Hada uas yog tus uas ntaus yeej cov Midee hauv Mau‑a tebchaws sawv nws chaw ua vajntxwv kav mas nws lub moos hu ua Avij. Thaum Hada tuag lawd Xasla uas yog neeg Malekha sawv nws chaw ua vajntxwv kav. Thaum Xasla tuag lawd Sa‑u uas yog neeg Lehaunpau uas nyob ntawm ntug dej Yufeti sawv nws chaw ua vajntxwv kav. Thaum Sa‑u tuag lawd Anpau tus tub Npa‑as Hanas sawv nws chaw ua vajntxwv kav. Thaum Anpau tus tub Npa‑as Hanas tuag lawd Hadaj sawv nws chaw ua vajntxwv kav. Nws lub moos hu ua Pa‑u, nws tus pojniam hu ua Mehethanpee, uas yog Maleb tus ntxhais. Maleb yog Mexaha li ntxhais. Cov no yog cov uas ua thawj coj hauv Exau caj ces uas nyias ua thawj coj hauv nyias cum nyias nyob nyias tebchaws tej npe, yog Thina, Ava, Yethe, Auhaulinpama, Ela, Pinoo, Khena, Themas, Mixas, Mati‑ee thiab Islas. Cov neeg no yog cov uas ua thawj coj hauv Edoo uas nyias nyob nyias thaj chaw hauv lub tebchaws uas yog lawv teej lawv tug. Tus Exau no yog cov neeg Edoo tus yawg koob. Yakhauj nyob hauv Khana‑as tebchaws uas nws txiv txeev ua qhua nyob. Ntawm no mus yog hais txog Yakhauj tsev neeg. Thaum Yauxej hnub nyoog muaj kaum xya xyoo nws nrog cov tijlaug yug yaj yug tshis. Nws nrog tus nkauj qhev Npiha thiab Xilapa cov tub nyob ua ke. Ob tug yog nws txiv li niam yau. Yauxej coj tej uas cov tijlaug ua tsis zoo los piav rau leej txiv mloog. Yixayee nyiam Yauxej heev dua nws cov menyuam huvsi, rau qhov Yauxej yug rau thaum leej txiv laus laus lawm. Yixayee ua ib lub tsho ntev muaj tes rau Yauxej. Thaum cov tijlaug pom tias leej txiv nyiam Yauxej heev dua lawv, ces lawv txawm ntxub Yauxej thiab tsis hais ib los zoo rau Yauxej kiag li. Yauxej ua ib zaj npau suav, thaum nws piav rau cov tijlaug mloog tag lawv yimhuab ntxub nws heev. Yauxej hais rau lawv tias, “Cia li mloog zaj npau suav uas kuv pom maj. Peb tabtom pav tes nplej tom teb, ua ciav kuv tes nplej sawv nres nroos hos nej cov tes nplej los nyob vij ib ncig kuv tes nplej thiab pe kuv tes nplej.” Cov tijlaug txawm nug Yauxej tias, “Koj yuav kav peb tiag tiag li lov? Koj yuav muaj hwjchim tswjhwm peb no lov?” Lawv yimhuab ntxub nws heev vim yog zaj npau suav thiab nws tej lus. Yauxej kuj rov ua dua ib zaj npau suav, thiab piav rau cov tijlaug mloog hais tias, “Kuv ua dua ib zaj npau suav, ua ciav pom lub hnub lub hli thiab kaum ib lub hnub qub tabtom pe kuv.” Thaum nws piav rau leej txiv thiab cov tijlaug mloog, leej txiv yws Yauxej tias, “Koj zaj npau suav uas koj pom kod yog li cas? Kuv thiab koj niam thiab koj cov kwvtij yuav los txhos caug hauv av pe koj no lov?” Nws cov tijlaug thiaj khib Yauxej hos leej txiv khaws zaj no cia twjywm rau hauv nruab siab. Cov tijlaug mus yug leej txiv tej yaj tej tshis ze ntawm lub moos Sekhee. Yixayee txawm hais rau Yauxej tias, “Koj cov tijlaug mus yug yaj yug tshis rau ntawm lub moos Sekhee los tsis yog? Los es kuv yuav txib koj mus saib lawv.” Yauxej teb tias, “Kuv kam mus.” Leej txiv txawm hais rau nws tias, “Mus saib koj cov tijlaug thiab tej yaj tej tshis saib nyob zoo li cas, es rov los hais rau kuv paub.” Leejtxiv txib nws tawm ntawm lub tiaj Heploo mus, nws thiaj mus rau lub moos Sekhee. Muaj ib tug yawg ntsib Yauxej mus mus los los tom tshav zaub, thiaj nug tias, “Koj nrhiav dabtsi?” Yauxej teb tias, “Kuv nrhiav kuv cov tijlaug. Thov qhia kuv saib lawv yug yaj yug tshis rau qhovtwg lawm.” Tus yawg ntawd hais tias, “Lawv twb mus lawm, rau qhov kuv hnov lawv sib tham tias, ‘Cia peb mus rau lub moos Dautha.’ ” Yauxej thiaj raws qab mus ntsib nws cov tijlaug ntawm lub moos Dautha. Thaum cov tijlaug pom Yauxej deb deb tuaj tsis tau txog, lawv txawm ntaus tswvyim yuav muab Yauxej tua pov tseg. Lawv hais tias, “Tus nyuag Kws npau suav tuaj ntawm no lawm lauj! Cia li los es peb muab nws tua thiab muab pov rau hauv ib lub qhov tob tob. Peb hais tias ib tug tsiaj nyaum muab nws tom noj lawm, es peb sim saib nws tej nyuag npau suav yuav tiav tau li cas.” Thaum Lunpee hnov tej lus ntawd, nws xav pab Yauxej dim hauv lawv txhais tes, nws thiaj hais tias, “Peb tsis txhob muab nws tua.” Lunpee kuj hais rau lawv tias, “Tsis txhob ua rau nws nqaij ntuag ntshav nrog, cia muab nws pov rau hauv lub qhov tob tob hauv tebchaws moj sab qhua no, tiamsis tsis txhob kov nws kiag li.” Nws hais li ntawd kom nws thiaj pab tau Yauxej dim hauv lawv txhais tes es yuav muab xa rov qab rau leej txiv. Thaum Yauxej tuaj txog ntawm cov tijlaug, lawv txawm muab nws lub tsho hle, yog lub tsho ntev muaj tes. Lawv muab nws pov rau hauv ib lub qhov, yog ib lub qhov dej qhuav. Thaum lawv tabtom noj mov lawv tsa muag ntsia pom ib pab neeg Yisama‑ee tuaj ntawm Kile‑a tuaj. Lawv xuas ntxhuav thauj roj ntoos thiab roj ntoos ua tshuaj thiab roj tsw qab taug kev mus lawm nram Iyi tebchaws. Ces Yuda txawm hais rau cov kwvtij tias, “Yog peb muab peb tus kwv tua thiab muab nws cov ntshav zais los peb yuav tau qabhau dabtsi? Cia peb muab nws muag rau cov neeg Yisama‑ee, peb tsis txhob kov nws kiag li rau qhov nws yog peb li kwv thiab nrog peb koom nqaij koom ntshav.” Cov kwvtij sawvdaws pom zoo li nws hais. Mas thaum cov tub luam Midee tuaj txog lawv txawm rho Yauxej hauv lub qhov los muag rau cov neeg Yisama‑ee nees nkaum sekhee nyiaj. Cov neeg Yisama‑ee txawm coj Yauxej mus rau Iyi tebchaws. Thaum Lunpee rov los txog ntawm lub qhov tsis pom Yauxej nyob hauv lub qhov lawm nws txawm dua rhe nws lub tsho, thiab rov mus rau ntawm nws cov kwv thiab hais tias, “Tus kwv ntawd ploj lawm, es kuv yuav ua li cas?” Ces lawv txawm muab Yauxej lub tsho los thiab tua ib tug tshis thiab muab lub tsho raus rau hauv cov ntshav ntawd. Lawv txawm xa lub tsho ntev uas muaj tes ntawd mus rau leej txiv thiab hais tias, “Peb pom lub tsho no. Koj sim saib yog koj tus tub li los tsis yog.” Leejtxiv paub lub tsho ntawd thiab hais tias, “Yog kuv tus tub lub tsho tiag, muaj ib tug tsiaj nyaum muab nws tom noj lawm lauj. Yauxej raug dua ua tej dwb daim tag lawm lauj!” Yakhauj dua rhe nws lub tsho muab khaub seev tsaj los hnav thiab quaj quaj nws tus tub tau ntau hnub. Mas nws tej tub tej ntxhais sawvdaws tuaj nplij nws lub siab, tiamsis nws tsis yuav lawv tej lus nplij li. Nws hais tias, “Tsis yuav li, kuv yuav quaj ntsuag mus rau hauv tub tuag teb kom ntsib kuv leej tub qhov ntawd.” Nws txiv quaj nws li no ntag. Lub sijhawm ntawd cov neeg Midee kuj muab Yauxej muag rau Pautifa hauv Iyi tebchaws. Nws yog Falau li ib tug thawj rog, yog tus thawj rog uas kav cov tub rog uas zov vajntxwv. Thaum ntawd Yuda ncaim nws cov kwvtij tsiv mus nrog ib tug neeg Adulas uas npe hu ua Hila nyob lawm. Yuda txawm pom cov Khana‑as ib tug ntxhais qhov ntawd. Tus ntxhais ntawd txiv hu ua Sua. Yuda txawm yuav tus ntxhais ntawd ua pojniam thiab mus nrog nws pw ua ke. Tus pojniam ntawd thiaj xeeb tub mas yug tau ib tug tub muab tis npe hu ua Ws. Nws rov qab xeeb tub mas yug tau ib tug tub muab tis npe hu ua Auna. Nws yug tau dua ib tug tub muab tis npe hu ua Sela. Thaum yug tus tub no yog nws nyob ntawm lub moos Khexib. Yuda thiaj yuav ib tug nyab hu ua Thama rau Ws uas yog nws tus tub hlob. Yawmsaub pom tias Ws uas yog Yuda tus tub hlob ua phem, Yawmsaub thiaj muab nws tua lawm. Yuda txawm hais rau Auna tias, “Koj cia li yuav koj niam tij raws li txoj kev txojcai es mus nrog nws pw kom thiaj muaj tub ki rau koj tus tijlaug thiab.” Auna paub hais tias nws cov noob yuav tsis ua nws caj ces ces nws nrog nws tus niam tij pw thaum twg los nws pheej muab cov noob ua poob rau pem teb. Nws txhob txwm ua li ntawd kom thiaj tsis muaj menyuam ua nws tus tijlaug feem. Yawmsaub pom tias qhov uas Auna ua li ntawd kuj yog ua txhaum mas Yawmsaub thiaj muab nws tua pov tseg lawm thiab. Ces Yuda txawm hais rau Thama uas yog nws tus nyab tias, “Koj cia li rov qab mus nyob ua poj ntsuam rau hauv koj txiv tsev mus txog thaum kuv tus tub Sela hlob tiav txiv tso,” vim Yuda ntshai tsam nws tus tub ntawd ho tuag li ob tug tijlaug thiab. Ces Thama thiaj rov qab mus nrog nws niam nws txiv nyob lawm. Nyob ntev loo ces Yuda tus pojniam uas yog Sua tus ntxhais txawm tuag lawm. Thaum Yuda rov zoo siab mentsis lawm nws txawm nrog nws tus phoojywg Hila uas yog neeg Adulas ua ke mus saib nws cov tub zog txiav plaub yaj pem lub zos Thinaj. Muaj neeg hais rau Thama tias, “Koj sim saib, koj txiv yawg tabtom tuaj mus txiav plaub yaj pem Thinaj.” Ces Thama txawm hloov kiag cev tsoos poj ntsuam cia txawm muab ib daim ntaub nyias nyias kauv kiag nws ntsej muag mus nyob ntawm kev tshuam uas yuav nkag rau hauv lub zos Ena‑i thiab yuav mus pem Thinaj, rau qhov nws yeej paub tias Sela hlob tiav txiv lawm los nws tseem tsis tau mus ua Sela pojniam. Thaum Yuda pom Thama mas xav hais tias yog ib tug poj muag cev xwb, vim yog Thama muab ib daim ntaub kauv ntsej muag lawm. Yuda thiaj txav zog mus hais rau nws tom ntug kev tias, “Los es kuv yuav nrog koj pw ua ke,” rau qhov nws twb tsis paub tias yog nws tus nyab. Thama txawm hais tias, “Yog koj nrog kuv pw saib koj yuav muab dabtsi rau kuv.” Yuda teb tias, “Kuv yuav xa kuv li ib tug menyuam tshis tuaj rau koj.” Thama txawm hais tias, “Muab ib yam dabtsi ua puav pheej cia mus txog thaum koj xa tus menyuam tshis tuaj puas tau?” Yuda txawm nug hais tias, “Yog li es koj xav yuav dabtsi los ua puav pheej cia?” Thama teb tias, “Thov muab lub nplhaib nrog saw uas koj siv txam txwm thiab koj tus pas nrig ua puav pheej cia.” Yuda kuj muab rau nws thiab mus nrog nws pw ces Thama txawm xeeb menyuam. Nws sawv tsees rov mus tsev muab daim ntaub kauv ntsej muag yaws kiag cia muab cev tsoos poj ntsuam los hnav kiag. Yuda muab tus menyuam tshis rau nws tus phoojywg uas yog neeg Adulas coj mus txhiv tej uas nws muab nias cia ntawm tus pojniam ntawd txhais tes los, tiamsis mus nrhiav tsis pom tus pojniam ntawd. Nws thiaj nug cov txivneej uas nyob qhov ntawd tias, “Tus poj muag cev uas nyob ntawm ntug kev hauv Ena‑i no mus dua twg lawm?” Lawv teb tias, “Ntawm no yeej tsis muaj ib tug poj muag cev li.” Yuda tus phoojywg thiaj rov mus hais rau Yuda tias, “Kuv nrhiav tsis pom li. Cov txivneej uas nyob ntawd hais tias yeej tsis muaj ib tug poj muag cev nyob ntawd li.” Yuda txawm hais tias, “Cia nws khaws tej qhov txhia chaw ntawd cia xwv luag thiaj tsis tau chaw luag wb. Kuv twb muab tus menyuam tshis no xa mus rau nws tiamsis koj nrhiav tsis tau nws xwb.” Kwvlam peb lub hlis tom qab muaj neeg hais rau Yuda tias, “Thama uas yog koj tus nyab mus ua poj muag cev muaj menyuam lawm.” Yuda thiaj hais tias, “Cia li coj nws tawm mus, muab nws hlawv pov tseg.” Thaum lawv tabtom coj Thama tawm mus, Thama txawm tso neeg mus hais rau txiv yawg hais tias, “Kuv plab menyuam no yog cov qhov txhia chaw no tus tswv li menyuam.” Thiab nws hais tias, “Thov koj sim ua tib zoo saib lub nplhaib nrog saw uas txam txwm thiab tus pas nrig no yog leejtwg li.” Yuda paub kiag tias yog nws li, nws thiaj hais tias, “Tus pojniam no ua ncaj dua kuv vim yog kuv tsis muab nws txis rau kuv tus tub Sela.” Yuda kuj tsis nrog Thama pw ua ke dua li lawm. Thaum txog caij yug menyuam ua ciav yog ib nkawg menyuam ntxaib nyob hauv plab. Thaum tabtom yug mas ib tug menyuam txawm cev tes tshwm los ua ntej. Tus pojniam uas pab yug menyuam muab ib txoj xov liab khi txhais tes mas hais tias, “Tus no xub yug.” Thaum uas tus menyuam ntawd nkaum tes lawm txawm yug tau dua ib tug ua ntej. Tus pojniam uas pab yug menyuam txawm qw hais tias, “Eb, txeem li cas los,” mas thiaj muab tis npe hu ua Peles. Dhau ntawd tus uas khi txoj xov liab ntawm txhais tes li yug los thiaj muab tis npe hu ua Xelag. Yauxej raug coj mus rau nram Iyi tebchaws lawm mas Pautifa uas yog neeg Iyi uas yog Falau li ib tug thawj rog, yog tus thawj rog uas kav cov tub rog uas zov vajntxwv, yuav Yauxej ntawm cov neeg Yisama‑ee uas coj nws tuaj. Yawmsaub nrog nraim Yauxej nyob, Yauxej tej haujlwm thiaj vam meej. Nws nyob hauv nws tus lospav uas yog neeg Iyi lub tsev. Tus lospav pom tias Yawmsaub nrog nraim Yauxej thiab pom tias Yawmsaub pub txhua yam uas Yauxej txhais tes ua vam meej tuaj. Yauxej yog tus uas tiam tus lospav, mas nws txaus siab rau Yauxej, nws thiaj tsa Yauxej ua tus uas saib xyuas tag nrho lub cuab lub yig thiab nws tej qhov txhia chaw huvsi. Txij thaum nws tsa Yauxej ua tus uas saib xyuas nws lub cuab lub yig thiab nws tej qhov txhia chaw huvsi, Yawmsaub kuj foom koob hmoov rau tus neeg Iyi ntawd tsev neeg vim yog saib rau Yauxej. Yawmsaub foom koob hmoov rau nws tej qhov txhia chaw huvsi hauv nws lub vaj lub tsev thiab hauv tej liaj teb. Nws muab txhua yam uas nws muaj tso rau Yauxej saib xyuas. Txij thaum muaj Yauxej lawm nws tsis txhawj txog ib yam dabtsi li tsuas yog pluas mov uas nws noj xwb. Yauxej yog ib tug ntsej muag zuag plias zoo nraug ntxiag. Nyob tsis ntev lospav tus pojniam pheej saib saib Yauxej ces txawm thab tias, “Cia li los nrog kuv pw.” Tiamsis Yauxej tsis kam txawm teb lospav tus pojniam tias, “Sim xav saib maj, thaum muaj kuv lawm, lospav kuj tsis txhawj txog ib yam dabtsi hauv lub vaj lub tsev li, nws muab txhua yam uas nws muaj tso plhuav rau hauv kuv txhais tes. Hauv lub tsev no nws kuj tsis ua loj dhau kuv, nws tsis tseg ib yam dabtsi uas tsis muab tso rau kuv li tsuas yog tseg koj tus kheej xwb vim koj yog nws tus pojniam. Kuv yuav ua qhov phem loj no thiab ua txhaum rau Vajtswv tau li cas?” Txawm yog nws thab Yauxej ib hnub tag ib hnub thiab, los Yauxej kuj tsis quav ntsej li tsis kam nrog nws pw thiab nrog nws nyob. Muaj ib hnub Yauxej nkag mus ua haujlwm hauv lub tsev, tsis muaj ib tug tub qhe nyob hauv tsev li. Tus pojniam ntawd txawm ntsiab nkaus Yauxej lub tsho thiab hais tias, “Los nrog kuv pw.” Yauxej txawm nti ua lub tsho hle kiag rau hauv tus pojniam ntawd txhais tes thiab khiav tawm rau nraum zoov lawm. Thaum tus pojniam pom tias Yauxej tso plhuav lub tsho tseg rau hauv nws txhais tes khiav rau nraum zoov lawm, nws txawm qw hu cov tub qhe uas zov tsev los hais tias, “Saib maj, lospav coj tus neeg Henplais los cia ua saib tsis taus peb. Nws nkag los yuav nrog kuv pw, tiamsis kuv qw nrov. Thaum nws hnov kuv lub suab qw nws txawm tso plhuav nws lub tsho tseg rau ntawm kuv khiav tawm rau nraum zoov lawm.” Ces tus pojniam ntawd txawm khaws lub tsho ntawd cia mus txog thaum nws tus txiv los tsev, ces nws txawm hais zaj ntawd rau nws tus txiv tias, “Tus tub qhe uas yog neeg Henplais uas koj coj los nrog peb nyob ntawd, nkag los saib tsis taus kuv. Thaum kuv tsa suab qw nrov, nws txawm tso plhuav lub tsho tseg rau ntawm kuv khiav tawm rau nraum zoov lawm.” Thaum tus lospav hnov tej lus uas tus pojniam hais rau nws tias, “Koj tus qhev ua li no rau kuv,” nws kuj npau taws heev. Tus lospav thiaj muab Yauxej kaw rau hauv lub nkuaj uas kaw cov neeg uas vajntxwv rau txim. Yauxej thiaj raug kaw rau qhov ntawd. Tiamsis Yawmsaub kuj nrog nraim Yauxej nyob thiab ua txojkev hlub uas ruaj khov tshwm los rau nws, thiab pub kom tus uas saib lub nkuaj txaus siab rau nws. Tus uas saib lub nkuaj thiaj muab cov uas raug kaw huvsi hauv lub nkuaj tso rau Yauxej saib xyuas. Tej haujlwm huvsi uas ua hauv lub nkuaj Yauxej yog tus uas yuav tsum saib. Mas tus uas saib lub nkuaj tsis saib tej haujlwm uas muab tso rau Yauxej saib xyuas lawm, vim yog Yawmsaub nrog nraim Yauxej nyob. Txhua yam haujlwm uas nws ua Yawmsaub kuj pub kom ua tau tiav zoo heev. Tsis ntev tom qab, tus uas thiab cawv txiv hmab rau vajntxwv Iyi thiab tus uas ua ncuav rau vajntxwv ua txhaum rau ob tug tus tswv uas yog vajntxwv Iyi. Mas Falau chim rau ob tug tub teg tub taws ntawd, yog tus thawj uas thiab cawv txiv hmab thiab tus thawj uas ua ncuav, thiaj muab ob tug kaw rau hauv tus thawj rog uas zov vajntxwv lub tsev, yog nyob hauv lub nkuaj uas kaw Yauxej thiab. Tus thawj rog uas kav cov tub rog zov vajntxwv muab ob tug rau Yauxej saib mas Yauxej ua koom tu ob tug. Ob tug raug kaw tau ib ntus. Muaj ib hmos ob tug puavleej ua npau suav, yog tus uas thiab cawv txiv hmab thiab tus uas ua ncuav rau vajntxwv Iyi, nyias ua nyias ib zaj npau suav, nyias zaj npau suav nyias muaj dua nyias ib lub ntsiab. Thaum kaj ntug Yauxej tuaj saib xyuas ob tug mas pom tias ob tug txhawj heev. Nws txawm nug Falau ob tug tub teg tub taws uas nrog nws raug kaw rau hauv nws tus lospav lub tsev tias, “Ua cas hnub no neb ntsej muag ntshaus ntshaus li?” Ob tug teb tias, “Wb ob leeg ua npau suav mas tsis muaj leejtwg txhais rau wb.” Yauxej hais rau ob tug tias, “Qhov uas txhais tau npau suav nyob ntawm Vajtswv los tsis yog? Thov neb piav rau kuv mloog saib.” Tus thawj uas thiab cawv txiv hmab txawm piav nws zaj npau suav rau Yauxej mloog hais tias, “Kuv ua npau suav pom ib tsob txiv hmab nyob ntawm kuv xubntiag. Tsob txiv hmab ntawd muaj peb tug ceg. Thaum ua cos paj mas txawm tawg paj thiab txi txiv hmab ua tej tauv siav tamsim ntawd. Mas Falau lub khob nyob hauv kuv txhais tes, kuv txawm de cov txiv hmab tso kua rau hauv Falau lub khob thiab thiab lub khob rau Falau.” Yauxej hais rau nws tias, “Zaj npau suav txhais li no. Peb tus ceg ntawd yog peb hnub. Tshuav peb hnub saum no Falau yuav tsa koj lub taubhau sawv thiab tsa koj los nyob koj lub qub chaw. Koj yuav rov tau thiab lub khob rau hauv Falau txhais tes yam li yav tag los lawm uas koj ua tus thiab cawv txiv hmab rau nws. Thaum koj tau zoo lawm, thov nco txog kuv, thiab thov koj hlub kuv es pab hais txog kuv zaj rau Falau xwv kuv thiaj tawm tau hauv lub tsev no. Qhov tseeb lawv nyiag kuv hauv cov Henplais lub tebchaws los. Thiab hauv lub tebchaws no los kuv kuj tsis tau ua txhaum dabtsi uas txaus muab kaw rau hauv lub nkuaj av no.” Thaum tus thawj uas ua ncuav pom tias tej lus uas txhais npau suav ntawd zoo, nws txawm hais rau Yauxej tias, “Kuv kuj ua npau suav pom muaj peb lub choo ncuav txawb saum kuv taubhau. Hauv lub choo uas txawb kiag txheej saud muaj ob peb yam ncuav ci uas yuav muab rau Falau, mas muaj noog tabtom noj tej ncuav hauv lub choo uas nyob saum kuv taubhau.” Yauxej thiaj teb nws tias, “Zaj npau suav txhais li no. Peb lub choo ntawd yog peb hnub. Tshuav peb hnub Falau yuav muab koj lub taubhau nqa kom nrug ntawm koj lub cev. Nws yuav muab koj lub cev dai rau ntawm ib tsob ntoo, mas noog yuav los noj koj cev nqaij.” Thaum puv peb hnub yog hnub uas yug Falau nws pam noj haus rau nws cov tub teg tub taws huvsi, ces txawm tso tus thawj uas thiab cawv txiv hmab thiab tus thawj uas ci ncuav los rau hauv nruab nrab nws cov tub teg tub taws huvsi. Falau pub tus thawj uas thiab cawv txiv hmab rov tau nyob lub qub chaw, nws rov thiab lub khob rau Falau txhais tes yam li qub. Hos Falau muab tus thawj uas ci ncuav dai caj dab tuag raws li Yauxej tau txhais zaj npau suav. Tiamsis tus thawj uas thiab cawv txiv hmab tsis nco txog Yauxej li, tsis nco qab li lawm. Dhau ntawd los tau ob xyoos Falau txawm ua npau suav tias nws sawv ntawm ntug dej Nai, ciav txawm muaj xya tus maum nyuj rog rog zoo zoo nkauj tawm hauv tus dej Nai los noj tej nplooj tauj deg. Ces txawm muaj dua xya tus maum nyuj yuag yuag tshuav pob txha xwb tawm hauv tus dej Nai raws qab los, los sawv ntawm cov maum nyuj uas rog rog ntawm ntug dej Nai. Cov maum nyuj uas yuag yuag tshuav pob txha txawm muab xya tus maum nyuj rog rog zoo nkauj ntawd noj tag. Ces Falau txawm tsim dheev los. Nws rov tsaug zog ua dua ib zaj npau suav pom ib tsob nplej muaj xya hnab zoo thiab puv heev. Ces txawm muaj xya hnab nplej npluag thiab qhuav qhawv tawm raws qab tuaj vim yog raug cua sab hnub tuaj. Tej hnab nplej npluag ntawd txawm muab xya hnab nplej uas puv zoo nqos huvsi lawm thiab. Ces Falau txawm tsim dheev, thiab paub tias yog ua npau suav. Thaum kaj ntug nws txhawj heev, nws txawm hais kom hu cov txiv neeb txiv yaig huvsi thiab cov uas txawj ntse huvsi hauv Iyi tebchaws tuaj cuag nws, mas Falau piav nws tej npau suav rau lawv mloog, tiamsis tsis muaj leejtwg txhais tau tej npau suav ntawd rau Falau li. Thaum ntawd tus thawj uas thiab cawv txiv hmab thiaj hais rau Falau tias, “Hnub no kuv nco dheev txog kuv tej kev txhaum. Falau, thaum koj chim rau koj cov tub qhe es muab kuv thiab tus thawj uas ci ncuav kaw rau hauv tus thawj rog uas zov vajntxwv lub tsev, muaj ib hmos wb ob leeg ua npau suav, kuv thiab nws nyias ua nyias ib zaj npau suav thiab nyias muaj nyias lub ntsiab. Muaj ib tug hluas Henplais, yog tus thawj rog uas zov vajntxwv tus qhev, raug kaw ua ke. Thaum wb ob leeg piav npau suav rau nws mloog, nws kuj txhais tau wb li npau suav lub ntsiab, raws li nyias ua nyias zaj npau suav. Nws txhais wb ob leeg tej npau suav li cas kuj muaj tseeb li ntawd. Kuv thiaj raug tsa rov ua tes haujlwm qub, tiamsis tus uas ci ncuav raug muab dai tuag lawm.” Falau thiaj hais kom hu Yauxej los, mas lawv thiaj maj nroos mus coj Yauxej tawm hauv lub nkuaj av los. Thaum Yauxej chais hwj txwv thiab hloov ris tsho lawm, nws txawm los cuag Falau. Falau hais rau Yauxej tias, “Kuv ua npau suav tsis muaj leejtwg txhais tau li. Kuv hnov tias thaum koj hnov zaj npau suav lawm, koj kuj txhais tau.” Yauxej teb Falau tias, “Qhov uas txhais npau suav tsis yog nyob ntawm kuv. Tiamsis Vajtswv yog tus uas yuav txhais lub ntsiab zoo rau Falau.” Falau thiaj hais rau Yauxej tias, “Hauv kuv zaj npau suav ntawd kuv sawv ntawm ntug dej Nai, mas pom xya tus maum nyuj rog rog zoo nkauj tawm hauv tus dej Nai los noj nplooj tauj deg. Ces txawm muaj dua xya tus maum nyuj yuag yuag tshuav pob txha tawm tom qab los, thoob Iyi tebchaws kuv tsis tau pom dua nyuj yuag li no. Cov maum nyuj yuag yuag tshuav pob txha ntawd txawm muab xya tus maum nyuj rog rog noj tag. Thaum noj tag lawm tsis muaj leejtwg yuav paub tias muab noj tag lawm rau qhov tseem yuag yuag li qub. Ces kuv txawm tsim dheev los. Kuv rov ua dua ib zaj npau suav pom ib tsob nplej muaj xya hnab zoo thiab puv zoo. Thiab muaj dua xya hnab nplej npluag qhuav qhawv nkig nkuav tawm raws qab tuaj vim yog raug cua sab hnub tuaj. Cov hnab nplej npluag ntawd txawm muab xya hnab nplej puv zoo ntawd nqos tag lawm. Kuv piav tej npau suav no rau cov txiv neeb txiv yaig mloog, tiamsis tsis muaj leejtwg txhais tau.” Yauxej txawm hais rau Falau tias, “Koj ob zaj npau suav yog tib zaj. Twb yog Vajtswv qhia rau Falau paub txog tej uas Vajtswv yuav ua. Xya tus maum nyuj uas zoo ntawd yog xya xyoo, thiab xya hnab nplej puv zoo ntawd kuj yog xya xyoo. Yeej yog tib zaj npau suav xwb. Xya tus maum nyuj yuag yuag tshuav pob txha uas tawm raws qab tuaj ntawd kuj yog xya xyoo, thiab xya hnab nplej npluag uas raug cua sab hnub tuaj ntsawj qhuav qhawv kuj yog xya xyoo uas raug kev tshaib nqhis. “Muaj tseeb raws li kuv hais rau Falau no, yog Vajtswv qhia rau Falau paub txog tej uas Vajtswv yuav ua. Yuav muaj mov noj nplua mias thoob plaws Iyi tebchaws xya xyoo. Dhau ntawd yuav raug kev tshaib nqhis xya xyoo, ua kom tsis nco tias txeev muaj noj nplua mias hauv Iyi tebchaws. Txojkev tshaib nqhis ntawd yuav rhuav tshem lub tebchaws, yuav tsis paub tej kev noj nplua mias vim tias tej kev tshaib nqhis uas yuav tshwm tuaj no yuav txom nyem kawg nkaus. Qhov uas Falau ua ob zaj npau suav no lub ntsiab txhais hais tias Vajtswv twb npaj tej no cia lawm, Vajtswv yuav ua kom tshwm los sai sai no. “Vim li no cia Falau xaiv ib tug uas txawj xav thiab muaj tswvyim, muab tsa ua tus saib xyuas tag nrho Iyi tebchaws. Cia Falau npaj ib co neeg ua tub teg tub taws saib thoob plaws lub tebchaws thiab sau tej qoob loo hauv Iyi tebchaws ib feem hauv tsib feem rau ncua sijhawm xya xyoo uas qoob loo zoo ntau nplua mias no cia. Mas cia cov neeg ntawd sau tej qoob loo hauv xya xyoo zoo zoo uas tabtom yuav los ntawd cia, thiab muab tej qoob loo ntawd khaws cia hauv Falau lub hwjchim rau hauv tej moos thiab muab ceev cia. Tej qoob loo no yuav muab khaws cia faj seeb rau xya xyoo uas yuav muaj kev tshaib nqhis tshwm los rau Iyi tebchaws. Ua li no mas lub tebchaws thiaj tsis raug kev tshaib nqhis puam tsuaj tag.” Falau thiab nws cov tub teg tub taws sawvdaws pom zoo li uas Yauxej hais. Falau thiaj hais rau nws cov tub teg tub taws tias, “Peb yuav nrhiav ib tug uas muaj Vajtswv tus Ntsuj Plig nrog nraim nws ib yam li tus no tau thiab lov?” Falau thiaj hais rau Yauxej tias, “Vim Vajtswv qhia zaj xwm txheej no huvsi rau koj, mas tsis muaj ib tug uas txawj xav thiab muaj tswvyim zoo li koj. Koj yuav saib xyuas tag nrho kuv lub vaj tse thiab kuv tej pejxeem sawvdaws yuav tsum ua raws li koj hais kom lawv ua. Yog hais txog kuv lub zwm txwv kuv thiaj ua loj dua koj xwb.” Falau hais rau Yauxej tias, “Kuv tsa koj ua tus uas kav tag nrho Iyi tebchaws.” Falau thiaj hle nws lub nplhaib ntaus cim ntawm nws txhais tes rau Yauxej coj thiab muab ris tsho ntaub mag zoo zoo rau Yauxej hnav thiab muab saw kub rau Yauxej coj ntawm caj dab. Thiab kom Yauxej caij vajntxwv lub tsheb uas ob. Muaj neeg qw ua nws ntej hais tias, “Cia li txhos caug.” Falau twb tsa nws kav tag nrho Iyi tebchaws li no. Tsis tag li ntawd xwb Falau kuj hais rau Yauxej tias, “Kuv yog Falau, tag nrho Iyi tebchaws yuav tsis muaj ib tug twg tsa tes tsa taw tau, yuav tsum yog koj tso ncauj tso.” Falau thiaj muab Yauxej tis npe hu ua Xafena Pane‑a, thiab nws muab tus pov thawj Pautifela hauv lub moos Oo tus ntxhais Axena rau Yauxej yuav ua pojniam. Yauxej thiaj tawm mus saib thoob plaws Iyi tebchaws. Thaum Yauxej pib ua haujlwm rau Falau uas ua vajntxwv hauv Iyi tebchaws ntawd nws hnub nyoog muaj peb caug xyoo. Yauxej txawm tawm ntawm Falau xubntiag mus mus los los thoob plaws Iyi tebchaws. Xya xyoo uas qoob zoo zoo ntawd tej teb tau qoob loo ntau nplua mias. Xya xyoo ntawd Yauxej sau tej qoob loo huvsi ntau nplua mias thoob plaws Iyi tebchaws, thiab muab khaws cia rau hauv tej moos. Tej qoob loo uas tau ntawm lub moos twg kuj muab khaws cia rau hauv lub moos ntawd. Yauxej sau tau qoob loo ntau nplua mias yam li tej xuab zeb ntawm ntug hiavtxwv, ntau heev thiaj tseg tsis suav lawm vim yog suav tsis txheeb. Thaum tsis tau txog xyoo uas tshaib nqhis, tus pov thawj Pautifela hauv lub moos Oo tus ntxhais Axena yug ob tug tub rau Yauxej. Yauxej tis npe rau tus hlob hu ua Manaxe rau qhov nws hais tias, “Vajtswv ua rau kuv tsis nco qab tej kev txom nyem huvsi thiab tsis nco qab kuv txiv tsev neeg sawvdaws.” Nws tis npe rau tus tub yau hu ua Efa‑i. “Vim Vajtswv pub kuv muaj tub ki huaj vam coob rau hauv lub tebchaws uas kuv raug txom nyem nyuaj siab.” Xya xyoo uas qoob loo zoo ntau nplua mias hauv Iyi tebchaws kuj dhau lawm. Xya xyoo uas muaj kev tshaib nqhis txawm pib tshwm los raws li Yauxej tau hais tseg lawm. Tej kev tshaib nqhis ntawd muaj thoob plaws rau hauv txhua lub tebchaws, tiamsis hauv Iyi tebchaws tseem muaj mov noj. Thaum Iyi tebchaws sawvdaws tshaib plab, tej pejxeem kuj qw hu rau Falau thov mov noj, mas Falau hais rau cov neeg Iyi sawvdaws tias, “Cia li mus cuag Yauxej, nws hais li cas, nej ua li ntawd.” Thaum kev tshaib nqhis muaj thoob plaws tebchaws, Yauxej txawm qheb txhua lub txhab muag qoob rau cov Iyi, vim muaj kev tshaib nqhis loj heev rau hauv Iyi tebchaws. Tsis yog li ntawd xwb, tag nrho lub ntiajteb kuj tuaj cuag Yauxej hauv Iyi tebchaws thiaj yuav tau qoob, rau qhov muaj kev tshaib nqhis loj heev thoob plaws lub ntiajteb. Thaum Yakhauj paub tias hauv Iyi tebchaws muaj mog thiab qeb, nws thiaj hais rau nws cov tub tias, “Ua cas nej nyob sib zooj li kod?” Nws thiaj hais tias, “Kuv hnov xov tias hauv Iyi tebchaws muaj mog thiab qeb. Cia li mus yuav mog thiab qeb qhov ntawd los rau peb kom peb thiaj li muaj txojsia nyob tsis tuag tshaib.” Yauxej kaum tus tijlaug thiaj li mus yuav mov noj hauv Iyi tebchaws. Tiamsis Yakhauj tsis tso Yauxej tus kwv Npeeyamee nrog cov tijlaug mus, nws ntshai tsam ces muaj xwm li cas rau Npeeyamee. Ua li no Yixayee cov tub thiaj li nrog luag tej ua ke mus yuav mog thiab qeb vim kev tshaib nqhis muaj thoob plaws Khana‑as tebchaws. Yauxej yog tus thawj uas kav lub tebchaws. Nws yog tus uas muag qoob loo rau tej pejxeem sawvdaws. Yauxej cov tijlaug kuj tuaj pe nws khwb ti nkaus av. Thaum Yauxej pom nws cov tijlaug nws kuj paub lawv tiamsis nws ua txuj tsis paub, mas hais nyaum nyaum rau lawv tias, “Nej tuaj qhovtwg tuaj?” Lawv teb tias, “Peb tuaj hauv Khana‑as tebchaws tuaj, yog peb tuaj yuav mov noj.” Yauxej yeej paub cov tijlaug, tiamsis cov tijlaug tsis paub nws li lawm. Yauxej nco txog zaj npau suav uas nws tau ua pom lawv, nws thiaj hais rau lawv tias, “Nej yog neeg tshuaj tebchaws, nej tuaj saib peb tebchaws qaug zog qhov twg xwb.” Lawv teb tias, “Yawg hlob, tsis yog li ntawd. Peb uas yog koj cov tub qhe tuaj yuav mov noj xwb. Peb sawvdaws koom tib leej txiv, peb yog neeg ncaj ncees, peb uas yog koj cov tub qhe tsis yog tuaj tshuaj tebchaws.” Yauxej hais rau lawv tias, “Tsis tseeb, yeej yog nej tuaj saib lub tebchaws qaug zog qhov twg xwb.” Lawv teb nws tias, “Peb uas yog koj cov tub qhe muaj kaum ob leeg kwvtij, koom tib leej txiv uas tseem nyob hauv Khana‑as tebchaws. Hnub no tus kwv ntxawg tseem nrog txiv nyob, hos muaj ib tug kwv tsis nyob lawm.” Yauxej hais rau lawv tias, “Qhov uas kuv hais tias nej tuaj tshuaj tebchaws ntawd muaj tseeb tiag. Kuv yuav sim nej li no. Muaj Falau uas muaj txojsia nyob pom, nej yuav tawm tsis tau ntawm qhov chaw no mus li, mus txog thaum nej tus kwv ntxawg tuaj txog ntawm no tso. Cia nej tso ib tug mus coj tus kwv ntxawg tuaj, tiamsis nej cov yuav nyob hauv tsev lojfaj xwv thiaj tshuaj tau nej tej lus saib nej hais tseeb los cuav. Yog tsis ua li ntawd, mas muaj Falau uas muaj txojsia nyob pom, nej yeej yog neeg tshuaj tebchaws xwb.” Yauxej txawm muab cov tijlaug kaw rau hauv lojfaj tau peb hnub. Hnub peb Yauxej hais rau lawv tias, “Ua li no mas nej thiaj dim txojsia, vim kuv paub ntshai Vajtswv. Yog tias nej yog neeg ncaj ncees tiag, mas cia nej ib tug nyob raug kaw rau hauv tsev lojfaj, es dua lwm tus cia li mus, es thauj mog thiab qeb mus rau nej tsev neeg uas tabtom tshaib plab tau noj, thiab coj nej tus kwv ntxawg tuaj cuag kuv. Yog ua li no kuv thiaj paub tias nej hais tseeb tiag, mas nej thiaj tsis tuag.” Lawv kuj ua li ntawd. Cov tijlaug sib yws hais tias, “Qhov tseeb peb tau ua txhaum rau peb tus kwv. Thaum peb pom nws raug txom nyem nyuaj siab nws thov thov peb los peb tsis mloog nws. Vim li no txojkev txom nyem no thiaj li poob rov los raug peb ntag lauj.” Lunpee hais rau lawv tias, “Kuv twb hais kom nej tsis txhob ua txhaum rau tus metub ntawd los tsis yog? Tiamsis nej tsis mloog kuv hais li. Yog li no peb thiaj tau ris nws cov ntshav lawm.” Lawv tsis paub tias Yauxej nkag siab lawv tej lus, rau qhov thaum lawv hais lus muaj ib tug txhais rau Yauxej. Yauxej txawm tawm mus quaj quaj, li rov los nrog lawv hais lus. Nws coj Xime‑oo mus khi kiag tab meeg ntawm lawv xubntiag. Yauxej hais kom ntim mog thiab qeb puv nkaus lawv tej seev thiab muab txhua tus tej nyiaj rov qab ntsaws rau hauv txhua tus lub seev, thiab ntim zaub mov rau lawv noj taug kev. Cov qhev kuj ua li ntawd. Cov tijlaug txawm nog nra tsaws rau nees luav thiab tawm mus. Thaum lawv mus txog chaw so, muaj ib tug qheb nws lub ncauj seev yuav muab qeb rau nws li nees luav noj, ua ciav pom nws cov nyiaj nyob hauv lub ncauj seev. Nws thiaj hais rau nws cov kwvtij tias, “Nej saib kuv cov nyiaj luag muab thim rov rau kuv lawm, nyob ntawm ncauj seev.” Cov kwvtij poob siab nthav, lawv sib nug ntshai tshee hnyo hais tias, “Vajtswv ua dabtsi li no rau peb?” Thaum lawv los cuag lawv txiv Yakhauj hauv Khana‑as tebchaws lawm, lawv piav txhua yam uas muaj tshwm los ntawd rau leej txiv mloog hais tias, “Tus yawg uas ua tus thawj kav lub tebchaws ntawd hais nyaum kawg rau peb, thiab hais tias peb yog neeg tshuaj tebchaws xwb. Tiamsis peb hais rau nws tias, ‘Peb yog neeg ncaj ncees, peb tsis yog tuaj tshuaj tebchaws. Peb muaj kaum ob leeg kwvtij koom tib leej txiv, tiamsis ib tug tsis nyob lawm thiab tus kwv ntxawg tseem nrog peb txiv nyob hauv Khana‑as tebchaws.’ Tus yawg uas kav lub tebchaws ntawd hais rau peb tias, ‘Ua li no kuv thiaj paub tias nej yog neeg ncaj ncees. Nej cia li tso ib tug kwvtij nrog kuv nyob es dua lwm tus cia li thauj mog thiab qeb mus rau nej tsev neeg uas tabtom tshaib plab tau noj, es cia li mus. Cia li coj nej tus kwv ntxawg tuaj cuag kuv, kuv thiaj paub tseeb tias nej yog neeg ncaj ncees tsis yog neeg tshuaj tebchaws, mas kuv mam li muab tus kwvtij no tso dim rau nej, thiab nej yuav tau ua lag ua luam hauv lub tebchaws no.’ ” Thaum lawv sawvdaws nchuav lawv tej seev, txhua tus kuj pom nyias hnab nyiaj nyob hauv nyias lub seev. Thaum lawv thiab leej txiv pom tej hnab nyiaj ntawd, lawv kuj poob siab nthav. Yakhauj uas yog lawv leej txiv hais rau lawv tias, “Nej ua rau kuv ncaim kuv tej menyuam. Yauxej kuj tsis nyob lawm, Xime‑oo kuj tsis nyob lawm, mas nimno tseem yuav coj Npeeyamee mus thiab. Kuv raug tej xwm txheej no huvsi lawm lauj!” Lunpee thiaj hais rau leej txiv tias, “Yog kuv tsis coj Npeeyamee rov los rau koj, koj cia li muab kuv ob tug tub tua pov tseg. Koj cia li muab Npeeyamee rau hauv kuv txhais tes, kuv yuav coj nws rov los rau koj kom tau.” Yakhauj hais tias, “Kuv tus tub yuav tsis nrog koj mus nram Iyi tebchaws, rau qhov nws tus tijlaug kuj tuag lawm, tsuas yog tshuav Npeeyamee tib leeg xwb. Yog nws raug xwm li cas rau thaum nws nrog nej taug kev mus, nej yuav ua rau kuv tus dawb hau no mus ua lwj siab kawg li rau hauv tub tuag teb.” Kev tshaib nqhis tseem muaj loj heev hauv lub tebchaws. Thaum Yakhauj tsev neeg noj tej mog thiab qeb uas lawv coj hauv Iyi tebchaws los tag lawm, leej txiv txawm hais rau lawv tias, “Cia li rov mus yuav mentsis mov los rau peb noj.” Tiamsis Yuda hais rau nws tias, “Tus nom ntawd hais tu nrho rau peb tias, ‘Yog nej tus kwv tsis nrog nej tuaj, ces nej yuav tsis pom kuv lub ntsej muag kiag li.’ Yog koj tso tus kwv nrog peb mus, peb mam li mus yuav mov noj los rau koj. Tiamsis yog koj tsis tso tus kwv mus, peb yuav tsis mus li, vim tus nom ntawd hais rau peb tias, ‘Yog nej tus kwv tsis nrog nej tuaj, ces nej yuav tsis pom kuv ntsej muag kiag li.’ ” Yixayee thiaj hais tias, “Ua cas nej ua tsis zoo rau kuv es tseem qhia rau tus yawg ntawd tias muaj dua ib tug kwv thiab no?” Lawv teb tias, “Tus yawg ntawd nug txhab nug txhua txog peb thiab peb cov kwvtij hais tias, ‘Nej txiv tseem muaj txojsia nyob lov? Nej muaj dua ib tug kwv lov?’ Peb thiaj teb raws li nws nug ntawd. Peb yuav ua cas paub tias yog nws yuav lem kom coj tus kwv mus no?” Yuda thiaj hais rau nws txiv Yixayee tias, “Tso tus me kwv nrog kuv mus, peb yuav sawv kev mus mas peb thiab koj thiab peb cov menyuam sawvdaws thiaj ciaj sia nyob tsis tuag tshaib. Kuv yuav muab kuv lub taubhau tiv tus kwv no, thiab kuv yuav ua tus uas qhwv kiag nws. Yog kuv tsis coj nws rov los rau koj thiab tsis cob nkaus rau ntawm koj xubntiag, ces cia kuv ris txojkev txhaum no mus ib txhis. Yog peb tsis tab kaum li no, ces peb twb mus ob tsav lawm lauj.” Lawv txiv Yixayee txawm hais rau lawv tias, “Cia nej ua li no. Muab tej qoob loo uas zoo kawg hauv lub tebchaws no ib yam mentsis ntim rau nej lub hnab coj mus ua tshav ntuj pub rau tus yawg nom ntawd, yog mentsis roj ntoo ua tshuaj, mentsis zib ntab, roj ntoo, roj tsw qab, noob txiv ntoo roj thiab noob txiv duaj. Thiab coj nyiaj ob npaug mus thiab. Coj tej nyiaj uas muab thim rau ntawm nej cov ncauj seev, tej zaum yog lawv tsis nco saib lawm xwb. Cia li sawv kev coj nej tus kwv mus cuag tus yawg nom ntawd. Thov Vajtswv uas muaj hwjchim loj kawg nkaus ua rau tus yawg ntawd khuvleej nej, xwv nws thiaj tso nej tus tijlaug thiab Npeeyamee rov los. Txawm yog kuv tej menyuam yuav ncaim kuv los xijpeem.” Lawv thiaj li coj tej tshav ntuj thiab nyiaj txiag ob npaug thiab Npeeyamee ua ke mus. Lawv sawv kev mus rau nram Iyi tebchaws thiab mus cuag Yauxej. Thaum Yauxej pom Npeeyamee nrog lawv tuaj nws txawm hais rau tus tub qhe uas saib tsev tias, “Cia li coj cov neeg no mus rau hauv tsev, thiab tua ib tug tsiaj thiab npaj rooj tos kom txhij, rau qhov cov neeg no yuav nrog kuv noj su.” Tus uas saib tsev ua raws li Yauxej hais, nws coj cov neeg ntawd mus rau hauv Yauxej tsev. Cov neeg ntawd kuj ntshai heev vim luag coj lawv mus rau hauv Yauxej tsev, lawv txawm sib tham hais tias, “Ntshai yog tim tej nyiaj uas zaum i muab thim rau hauv peb tej seev, lawv thiaj coj peb los rau hauv no, kom tus nom thiaj nrhiav tau sijhawm nplawm peb thiab ntes peb ua qhev thiab txeeb peb tej nees luav.” Lawv thiaj mus cuag tus uas saib Yauxej tsev thiab hais rau nws ntawm qhov rooj. Lawv hais tias, “Yawg hlob, thov koj mloog peb hais. Zaum i peb tuaj yuav mov noj, mas thaum peb mus txog chaw so peb qheb peb tej seev kuj pom txhua tus li nyiaj nyob hauv txhua tus lub ncauj seev, tej nyiaj ntawd nyob txhij zog tsis poob ib feeb li. Peb thiaj coj tej nyiaj ntawd rov tuaj. Peb tseem coj dua ib co nyiaj ntawm tes tuaj yuav mov mus noj thiab. Peb tsis paub li xyov leejtwg muab tej nyiaj ntawd ntim rov rau hauv tej seev.” Tus uas saib tsev txawm teb tias, “Tsis txhob txhawj, tsis txhob ntshai. Tej zaum yog nej tus Vajtswv thiab nej txiv tus Vajtswv muab tej nyiaj txiag rau hauv nej tej seev kaj. Nej cov nyiaj zaum ntawd kuv twb khaws lawm.” Ces nws txawm coj Xime‑oo los rau lawv. Thaum tus uas saib tsev coj lawv los rau hauv Yauxej lub tsev, nws muab dej rau lawv ntxuav kotaw thiab muab quav nyab rau nees luav noj. Lawv npaj tej tshav ntuj tos cev rau Yauxej rau thaum tav su nws yuav los, rau qhov lawv hnov tias lawv yuav noj mov ua ke qhov ntawd. Thaum Yauxej rov los tsev, lawv txawm coj tej tshav ntuj uas lawv npaj ntawd tuaj rau hauv tsev muab pub rau Yauxej thiab pe Yauxej ti nkaus av. Yauxej nug txog lawv kev noj qab nyob zoo thiab hais tias, “Leejtxiv laus laus uas nej hais txog ntawd nyob zoo thiab lov? Nws tseem muaj txojsia nyob lov?” Lawv teb tias, “Peb txiv uas yog koj tus qhev nyob zoo tseem muaj txojsia nyob.” Ces lawv txawm nyo hau pe dua ib zaug. Yauxej tsa muag ntsia pom nws tus kwv Npeeyamee uas nrog nws koom niam, thiab nug tias, “Tus no yog tus kwv ntxawg uas nej hais rau kuv lov? Metub, thov Vajtswv hlub koj.” Ces Yauxej txawm tawm plaws lawm, vim yog nws mob siab tus kwv heev tauv tsis taus kua muag nws thiaj mus rau hauv txaj thiab quaj. Yauxej txawm ntxuav muag tag rov los, ua siab tawv tawv hais tias, “Rau zaub rau mov.” Cov tub qhe rau ib rooj rau Yauxej tib leeg noj thiab rau ib rooj rau cov kwvtij noj, thiab rau dua ib lub rooj rau cov Iyi noj, rau qhov cov Iyi caiv tsis nrog cov Henplais koom rooj noj mov vim tias lawv suav tias yog kev qias vuab tsuab rau cov Iyi. Yauxej cov kwvtij nyob ntawm nws lub xubntiag, nyob zuj zus tus hlob uas muaj feem ua tij mus txog tus yau kawg. Lawv ib leeg saib ib leeg xav tsis thoob li. Cov tub qhe ntaus zaub mov ntawm Yauxej lub rooj rau cov kwvtij, tiamsis Npeeyamee li feem mas ntau dua cov tijlaug li tsib npaug. Lawv thiaj nrog Yauxej noj haus xyiv fab hlo. Yauxej hais rau tus saib nws lub tsev tias, “Cia li ntim mog thiab qeb kom puv cov neeg no tej seev npaum li uas lawv thauj taus, thiab muab lawv cov nyiaj ntsaws rau hauv lawv txhua tus lub ncauj seev, thiab muab kuv lub khob nyiaj ntsaws rau hauv tus kwv ntxawg lub seev ua ke nrog cov nyiaj yuav tej mog thiab qeb.” Nws txawm ua raws nraim li Yauxej hais. Thaum kaj ntug nws thiaj tso lawv cov neeg ntawd thiab tej nees luav rov mus tsev. Thaum lawv tawm hauv nroog mus tsis tau deb heev, Yauxej hais rau tus uas saib xyuas tsev tias, “Cia li sawv tsees mus caum cov neeg ntawd, thaum mus caum cuag, cia li nug tias, ‘Ua cas nej yuav ua kev phem pauj kev zoo? Ua cas nej nyiag kuv lub khob nyiaj los lawm? Lub khob ntawd yog kuv tus tswv lub khob haus thiab siv twv txog tom hauv ntej. Nej ua li no mas yog ua txhaum.’ ” Thaum nws caum cuag lawv nws hais tej lus ntawd rau lawv. Lawv txawm teb tias, “Yawg hlob ua cas koj hais li kod? Peb uas yog koj cov tub qhe peb yeej tsis tau ua li kod. Sim xav saib maj, cov nyiaj uas peb pom hauv peb tej ncauj seev, peb tseem coj hauv Khana‑as tebchaws rov qab tuaj rau koj. Peb yuav nyiag tej nyiaj tej kub hauv koj tus tswv lub tsev tau li cas? Yog koj pom lub khob ntawd nyob hauv peb cov uas yog koj tub qhe no leejtwg, koj kuj muab tus ntawd tua, thiab peb tseem yuav mus ua koj uas yog peb tus tswv li qhev thiab.” Nws hais tias, “Cia ua raws li uas nej hais. Yog kuv pom lub khob ntawd nyob ntawm leejtwg mas tus ntawd yuav tsum ua kuv li qhev, hos nej cov mas tsis txhaum.” Lawv sawvdaws maj nroos nyias tsaws nyias tej seev rau hauv pem teb, thiab qheb tej ncauj seev. Tus uas saib tsev thiaj tshawb saib tus tub hlob li mus txog ntua tus tub ntxawg li, mas pom lub khob nyob hauv Npeeyamee lub seev. Lawv txawm dua rhe lawv tej tsho thiab txhua tus tsaws tej nra rau nees luav thauj rov los rau hauv lub nroog. Thaum Yuda thiab cov kwvtij los txog Yauxej lub tsev, Yauxej tseem nyob hauv tsev. Lawv thiaj khwb nkaus rau hauv av ntawm Yauxej xubntiag. Yauxej thiaj hais rau lawv tias, “Nej ua dabtsi li no? Nej tsis paub tias neeg zoo li kuv no mas paub tau tej uas yuav muaj tshwm los rau tom hauv ntej lov?” Yuda teb tias, “Peb yuav teb li cas rau kuv tus tswv? Peb yuav hais li cas? Peb yuav hais daws peb zaj li cas? Vajtswv muab peb uas yog koj cov tub qhe tej kev txhaum nthuav los lawm. Yawg hlob, peb txhua tus thiab tus uas pom lub khob nyob hauv nws txhais tes yuav ua koj li qhev.” Tiamsis Yauxej hais tias, “Kuv yeej los yuav tsis ua li ntawd. Tsuas yog tus uas pom lub khob nyob hauv nws txhais tes ua kuv li qhev xwb. Tiamsis dua li nej cov mas cia li rov qab mus kom txog nej txiv yam kaj siab lug.” Yuda thiaj nkag mus cuag Yauxej hais tias, “Yawg hlob 'e, kuv uas yog koj tus tub qhe thov hais ib lus rau koj. Thov koj tsis txhob chim rau kuv uas yog koj tus tub qhe, rau qhov koj zoo tam li Falau ntag. Koj nug peb uas yog koj li tub qhe tias, ‘Nej tseem muaj txiv thiab muaj kwv thiab lov?’ Peb thiaj teb kuv tus tswv tias, ‘Peb muaj txiv, nws laus laus li lawm thiab muaj ib tug kwv yau uas yug rau thaum txiv laus lawm. Tus kwv yau ntawd tus tijlaug kuj tuag lawm, cov uas nrog nws koom niam tshuav nws ib leeg xwb. Txiv hlub tus ntawd heev.’ Koj txawm hais rau peb uas yog koj li tub qhe tias, ‘Coj tus kwv ntawd tuaj rau kuv saib ntawm no.’ Peb thiaj hais rau yawg hlob tias, ‘Tus tub hluas no yuav ncaim tsis tau leej txiv kiag li. Yog nws ncaim txiv mus lawm mas txiv yuav tuag xwb.’ Koj txawm hais rau peb uas yog koj li tub qhe tias, ‘Yog nej tus kwv ntxawg tsis nrog nej tuaj mas nej yuav tsis pom kuv lub ntsej muag dua li lawm.’ Thaum peb rov mus txog kuv txiv uas yog koj tus tub qhe lawm, peb kuj piav koj tej lus rau nws mloog. Mas thaum peb txiv hais tias, ‘Nej rov mus yuav mentsis mov rau peb noj,’ peb thiaj hais tias, ‘Peb mus tsis tau. Yog tus kwv ntxawg nrog peb mus, peb li mus, rau qhov peb yuav tsis pom tus yawg hlob ntawd lub ntsej muag kiag li yuav yog tus kwv ntxawg nrog peb mus xwb.’ Kuv txiv uas yog koj tus tub qhe thiaj hais rau peb tias, ‘Nej paub tias kuv tus pojniam yug tau ob tug tub rau kuv. Ib tug ncaim kuv lawm mas kuv xav tias tsiaj nyaum muab nws dua noj tag lawm, kuv tsis pom nws los txog niaj hnub nimno li. Yog nej tseem coj tus no ncaim kuv mus es yog nws raug xwm txheej li cas lawm, nej yuav ua rau kuv tus dawb hau no mus ua lwj siab kawg li rau hauv tub tuag teb.’ Vim li no yog kuv rov qab mus txog kuv txiv uas yog koj tus tub qhe es tus tub hluas no tsis nrog peb mus, mas thaum kuv txiv uas nws txojsia cog nkaus rau tus tub hluas no pom tias tus tub hluas no tsis nrog peb rov mus tsev, txiv yuav tuag. Peb uas yog koj li tub qhe yuav ua rau peb txiv tus dawb hau uas yog koj tus tub qhe mus rau hauv tub tuag teb ua lwj siab kawg li xwb. Kuv uas yog koj tus tub qhe qhwv kiag tus kwv no rau txiv hais tias, ‘Yog kuv tsis coj nws rov los rau koj, kuv yuav ris txojkev txhaum no rau ntawm koj xubntiag mus ib txhis li.’ Vim li no thov cia kuv uas yog koj tus tub qhe nyob tug tub hluas chaw ua koj li qhev es thov tso tus kwv nrog cov tijlaug mus. Yog tus tub hluas tsis nrog kuv ua ke, kuv yuav ua li cas rov mus cuag tau kuv txiv? Ntshai tsam yuav pom xwm txheej phem los raug kuv txiv.” Yauxej tauv tsis taus nws lub kua muag tab meeg cov neeg sawvdaws uas sawv vij vog nws, nws txawm nthe tias, “Kom txhua tus cia li tawm ntawm kuv mus,” thiaj tsis muaj leejtwg nyob ntawd rau thaum Yauxej qhia nws rau cov kwvtij paub. Mas Yauxej quaj nrov nrov ua rau cov Iyi hnov thiab Falau tsev neeg tau hnov. Yauxej hais rau nws cov kwvtij tias, “Kuv yog Yauxej. Kuv txiv tseem muaj txojsia nyob lov?” Tiamsis nws cov kwvtij ceeb nkaus tsis txawj teb li cas, vim paub tias yog Yauxej ntag. Yauxej thiaj hais rau nws cov kwvtij tias, “Txav los ze kuv maj.” Lawv kuj txav los ze. Yauxej thiaj hais tias, “Kuv yog Yauxej yog tus kwv uas nej muab muag los rau hauv Iyi tebchaws no. Tiamsis nimno tsis txhob poob siab tsis txhob chim rau nej tus kheej rau qhov uas muag kuv los rau ntawm no. Yog Vajtswv xa kuv ua nej ntej los kom thiaj cawm tau txojsia. Lub tebchaws twb tshaib nqhis tau ob xyoos lawm, tseem tshuav tsib xyoos ntxiv thiab uas yuav tsis laij teb tsis muaj qoob sau. Vajtswv xa kuv ua nej ntej los kom thiaj tuav tau nej tshuav nyob hauv ntiajteb thiab cawm tau nej cov neeg kom muaj txojsia nyob coob coob. Yog li no tsis yog nej xa kuv los rau ntawm no tiamsis yog Vajtswv xa kuv los. Vajtswv tsa kuv ua Falau txiv, thiab ua tus tswv uas saib xyuas Falau lub cuab huvsi thiab ua tus thawj kav Iyi tebchaws huvsi. “Nej cia li maj nroos mus cuag kuv txiv thiab hais rau nws tias, Koj tus tub Yauxej hais li no tias, ‘Vajtswv tsa kuv ua tus thawj kav tag nrho Iyi tebchaws lawm. Cia li tsiv los cuag kuv nram no, tsis txhob tos. Koj yuav tau nyob hauv Kausee thiab koj thiab koj cov menyuam thiab koj cov xeeb ntxwv thiab koj tej yaj tej tshis tej nyuj thiab txhua yam uas koj muaj huvsi yuav tau nyob ze kuv. Kuv yuav tu koj qhov ntawd rau qhov tseem yuav tshaib nqhis tsib xyoos ntxiv thiab. Tsis ua li no ces koj tsev neeg thiab txhua yam uas koj muaj yuav pluag tag.’ Nej thiab kuv tus kwv Npeeyamee lub qhov muag pom tias yog kuv lub qhov ncauj hais rau nej ntag. Nej cia li piav rau txiv mloog txog kuv lub meej mom huvsi hauv Iyi tebchaws, thiab txhua yam uas nej pom. Nej cia li maj nroos mus coj kuv txiv los rau nram no.” Yauxej khawm nws tus kwv Npeeyamee caj dab thiab quaj. Npeeyamee kuj khawm Yauxej caj dab quaj thiab. Yauxej nwj nws cov tijlaug sawvdaws thiab quaj. Dhau ntawd cov kwvtij nrog Yauxej sib tham. Thaum muaj xov hais mus rau hauv Falau lub vaj lub tsev tias, “Yauxej cov kwvtij tuaj,” Falau thiab nws cov tub teg tub taws kuj zoo siab heev. Falau hais rau Yauxej tias, “Hais rau koj cov kwvtij tias, ‘Nej ua li no, muab nra rau tsiaj thauj thiab rov mus rau Khana‑as tebchaws. Coj koj txiv thiab nej tsev neeg los cuag kuv, kuv yuav pub thaj av uas zoo kawg hauv Iyi tebchaws rau nej, thiab nej yuav tau noj tej uas zoo tshaj plaws hauv lub tebchaws no.’ Koj kuj hais rau lawv tias, ‘Ua li no, coj tsheb hauv Iyi tebchaws mus tos nej cov menyuam yaus thiab nej cov pojniam thiab coj nej txiv los. Tsis txhob khuvxim nej tej qhov txhia chaw pem, rau qhov tej uas zoo kawg hauv Iyi tebchaws yog nej li lawm.’ ” Yixayee cov tub kuj ua raws li ntawd. Yauxej npaj tsheb rau lawv raws li Falau hais thiab muab mov rau lawv noj taug kev. Nws muab tej tsoos tsho zoo zoo rau lawv ib leeg ib ce. Tiamsis nws muab peb puas sekhee nyiaj thiab tsib ce tsoos zoo zoo rau Npeeyamee. Yauxej xa tej no mus rau nws txiv, yog kaum tus nees luav thauj tej uas zoo kawg hauv Iyi tebchaws mus thiab kaum tus maum nees luav thauj mog thiab qeb thiab ncuav thiab zaub mov rau leej txiv noj taug kev. Nws txawm xa nws cov kwvtij mus, mas thaum lawv sawv kev mus, nws hais rau lawv tias, “Tsis txhob sib cav taug kev.” Cov kwvtij thiaj tawm hauv Iyi tebchaws mus rau Khana‑as tebchaws mus cuag leej txiv Yakhauj. Lawv hais rau nws tias, “Yauxej tseem muaj txojsia nyob. Nws yog tus thawj uas kav tag nrho Iyi tebchaws.” Yakhauj nyob hab nuv vim nws tsis ntseeg tej uas lawv hais. Thaum lawv piav tej lus uas Yauxej hais rau lawv huvsi rau leej txiv mloog thiab thaum Yakhauj pom tej tsheb uas Yauxej xa tuaj tos nws, nws thiaj zoo siab tuaj. Yixayee thiaj hais tias, “Kuv txaus siab lawm lauj. Kuv tus tub Yauxej tseem muaj txojsia nyob. Kuv yuav mus pom nws ua ntej uas kuv tuag.” Yixayee thiaj coj nws tej cuab txhiaj cuab tam huvsi taug kev mus. Thaum mus txog ntawm Npe‑awsenpa, nws kuj xyeem qhov txhia chaw rau nws txiv Yiha tus Vajtswv. Thaum tsaus ntuj Yixayee ua yog toog hnov Vajtswv hais lus rau nws tias, “Yakhauj, Yakhauj 'e.” Yakhauj teb tias, “Kuv nyob ntawm no 'os.” Vajtswv hais tias, “Kuv yog Vajtswv, yog koj txiv tus Vajtswv. Koj tsis txhob ntshai qhov uas mus rau nram Iyi tebchaws, rau qhov kuv yuav pub koj ua ib haiv neeg coob coob rau ntawd. Kuv yuav nrog koj mus rau Iyi tebchaws, thiab kuv yuav coj koj rov qab los dua ib zaug. Yauxej yuav muab nws txhais tes plhws koj ob lub qhov muag thaum koj tuag.” Yakhauj txawm tawm ntawm Npe‑awsenpa mus. Yixayee cov tub muab leej txiv Yakhauj thiab lawv tej menyuam yaus thiab lawv tej pojniam caij tej tsheb uas Falau xa tuaj tos lawv. Tag nrho Yakhauj thiab nws tej tub ki huvsi coj lawv tej tsiaj txhu cuab txhiaj cuab tam uas lawv muaj hauv Khana‑as tebchaws huvsi mus rau hauv Iyi tebchaws. Yakhauj coj nws cov tub thiab tej tub xeeb ntxwv nws cov ntxhais thiab tej ntxhais xeeb ntxwv nrog nws mus. Nws cov tub ki xeeb ntxwv huvsi nws coj nrog nws mus rau nram Iyi tebchaws. Cov no yog Yixayee tej tub ki xeeb ntxwv uas mus rau hauv Iyi tebchaws tej npe, yog Yakhauj thiab nws tej tub. Lunpee yog Yakhauj tus tub hlob. Lunpee cov tub yog Hanau, Palu, Hexaloo thiab Khami. Xime‑oo cov tub yog Yemu‑ee, Yami, Auha, Yakhi, Xauha thiab Sa‑u uas yog tus pojniam Khana‑as yug. Levi cov tub yog Kwsoo, Khauha, thiab Melali. Yuda cov tub yog Ws, Auna, Sela, Peles thiab Xelag, tiamsis Ws thiab Auna twb tuag rau tebchaws Khana‑as lawm. Peles cov tub yog Hexaloo thiab Hamu. Ixakha cov tub yog Thaula, Puva, Yasu, thiab Siloo. Xenpuloo cov tub yog Xeles, Eloo thiab Yale‑ee. Cov no yog cov tub uas Le‑a yug hauv tebchaws Pada Alas rau Yakhauj, thiab ib tug ntxhais hu ua Dina. Le‑a tej tub ki xeeb ntxwv huvsi muaj peb caug peb leeg. Kas cov tub yog Xifi‑oo, Hakiv, Suni, Exanpoo, Elis, Alaudi thiab Aleli. Asaw cov tub yog Ina, Isava, Isavi thiab Npeliya, thiab ib tug ntxhais hu ua Xelas. Npeliya cov tub yog Henpaw thiab Makhi‑ee. Cov no yog cov tub ki xeeb ntxwv uas Xilapa yug rau Yakhauj, huvsi muaj kaum rau leej. Xilapa yog tus nkauj qhev uas Lanpas muab pub rau nws tus ntxhais Le‑a. Yakhauj tus pojniam Lachee li tub yog Yauxej thiab Npeeyamee. Yauxej cov tub uas yug hauv Iyi tebchaws yog Manaxe thiab Efa‑i. Ob tug no yog tus pov thawj Pautifela uas nyob lub moos Oo tus ntxhais Axena yug. Npeeyamee cov tub yog Npela, Npekhaw, Asanpee, Kela, Na‑amas, Ehi, Laus, Mupi, Hupi thiab As. Cov no yog cov tub ki xeeb ntxwv uas Lachee yug rau Yakhauj mas huvsi muaj kaum plaub leeg. Daj tus tub yog Husi. Nathali cov tub yog Yaxe‑ee, Kuni, Yexaw thiab Silee. Cov no yog cov tub ki xeeb ntxwv uas Npiha yug rau Yakhauj, mas huvsi muaj xya leej. Npiha yog tus nkauj qhev uas Lanpas muab pub rau nws tus ntxhais Lachee. Yakhauj cov neeg uas yog nws cov tseem noob uas nrog nws mus rau hauv Iyi tebchaws tsis suav Yakhauj cov nyab mas huvsi muaj rau caum rau leej. Yauxej cov tub uas yug rau hauv Iyi tebchaws muaj ob leeg. Suav Yakhauj tsev neeg huvsi uas mus rau hauv Iyi tebchaws muaj xya caum leej. Yakhauj txib Yuda ua ntej mus qhia Yauxej tuaj ntsib lawv rau hauv Kausee. Mas lawv thiaj mus txog ntawm Kausee. Yauxej txawm caij tsheb mus ntsib nws txiv Yixayee ntawm Kausee. Thaum mus cuag leej txiv nws thiaj khawm nkaus leej txiv caj dab thiab quaj ntev ntev. Yixayee hais rau Yauxej tias, “Nimno kuv tuag los tau lawm lauj, rau qhov kuv twb pom koj lub ntsej muag lawm thiab paub tias koj tseem muaj txojsia nyob.” Yauxej hais rau nws cov kwvtij thiab nws txiv tsev neeg tias, “Kuv yuav mus cuag Falau thiab hais rau nws tias, ‘Kuv cov kwvtij thiab kuv txiv tsev neeg uas nyob hauv Khana‑as tebchaws los txog kuv lawm. Cov neeg ntawd yog neeg yug yaj yug tshis thiab yug nyuj. Lawv coj lawv tej yaj tej tshis tej nyuj thiab lawv cuab txhiaj cuab tam huvsi los lawm.’ Thaum Falau hu nej mus cuag thiab nug nej tias, ‘Nej ib txwm ua haujlwm dabtsi?’ nej yuav tsum hais tias, ‘Peb uas yog koj cov tub qhe yog neeg yug tsiaj txhu ib txwm thaum yau los txog niaj hnub nimno, ib yam li peb tej poj koob yawm txwv yeej los yug,’ xwv nej thiaj tau nyob hauv Kausee vim tias cov neeg Iyi ntxub txhua tus uas yug yaj yug tshis.” Yauxej mus cuag Falau thiab hais tias, “Kuv txiv thiab kuv cov kwvtij thiab lawv tej yaj tej tshis tej nyuj thiab lawv tej cuab txhiaj cuab tam huvsi los ntawm Khana‑as tebchaws los. Nimno lawv nyob hauv Kausee.” Yauxej xaiv cov kwvtij tsib leeg coj mus cuag Falau. Falau nug Yauxej cov kwvtij tias, “Nej ib txwm ua haujlwm dabtsi?” Lawv hais rau Falau tias, “Peb uas yog koj cov tub qhe yog neeg yug yaj yug tshis ib yam li peb tej poj koob yawm txwv.” Lawv hais rau Falau tias, “Peb los nyob ib ntus hauv lub tebchaws no los vim yog Khana‑as tebchaws tshaib nqhis heev tsis muaj tshav zaub rau peb yug tsiaj. Nimno thov koj cia peb uas yog koj cov tub qhe nyob hauv Kausee lauj.” Falau thiaj hais rau Yauxej tias, “Koj txiv thiab koj cov kwvtij los txog koj lawm. Lub tebchaws Iyi nyob ntawm koj xubntiag, cia koj txiv thiab koj cov kwvtij nyob ruaj rau thaj teb uas zoo kawg nkaus, cia lawv nyob hauv Kausee. Yog koj paub koj cov kwvtij tus twg muaj peevxwm, mas tsa tus ntawd saib xyuas kuv tej tsiaj txhu thiab.” Yauxej coj nws txiv Yakhauj mus cuag Falau, Yakhauj kuj foom koob hmoov rau Falau. Falau hais rau Yakhauj tias, “Koj hnub nyoog muaj pes tsawg xyoo lawm?” Yakhauj teb Falau tias, “Kuv ua neej nyob tsis ruaj chaw hauv lub ntiajteb no tau ib puas peb caug xyoo, kuv txojsia tsis ntev thiab txom txom nyem li, tsis ntev li kuv tej poj koob yawm txwv txojsia uas lawv ua neej nyob tsis ruaj chaw hauv lub ntiajteb no.” Yakhauj foom koob hmoov rau Falau tag ces thiaj tawm ntawm Falau lub xubntiag mus lawm. Yauxej txawm tu chaw rau nws txiv thiab nws cov kwvtij nyob, thiab muab tej teb uas zoo kawg nkaus hauv Iyi tebchaws ntawm lub moos Lamexe ua lawv tug raws li Falau hais. Yauxej muab zaub mov rau nws txiv thiab nws cov kwvtij thiab nws txiv tsev neeg sawvdaws tau noj raws li txhua yim muaj neeg coob los tsawg. Thaum ntawd tsis muaj mov noj thoob plaws lub tebchaws, vim kev tshaib nqhis loj heev ua rau Iyi tebchaws thiab Khana‑as tebchaws qhuav nkig nkuav qaug zog tag. Yauxej sau tej nyiaj txiag huvsi hauv Iyi tebchaws thiab Khana‑as tebchaws uas cov pejxeem coj tuaj yuav mog thiab qeb, thiab coj mus cia rau hauv Falau lub tsev. Thaum cov Iyi thiab cov Khana‑as tej nyiaj tag lawm, cov Iyi sawvdaws tuaj cuag Yauxej thiab hais tias, “Thov pub mov rau peb noj lauj. Koj yuav cia peb tuag tshaib rau ntawm koj xubntiag lov? Rau qhov peb tej nyiaj tag lawm.” Yauxej thiaj teb tias, “Yog nej tej nyiaj tag lawm, ces coj nej tej tsiaj txhu tuaj, kuv yuav muab mov pauv nej tej tsiaj.” Lawv thiaj coj lawv tej tsiaj txhu tuaj rau Yauxej, mas Yauxej muab mov pauv lawv tej nees tej yaj tej tshis tej nyuj tej nees luav. Xyoo ntawd nws muab mov pauv lawv tej tsiaj txhu huvsi. Dhau xyoo ntawd lawm xyoo tom qab lawv tuaj cuag nws thiab hais tias, “Peb thov hais tseeb rau koj ua hlob tias peb tej nyiaj los tag lawm, peb tej niag pab tsiaj txhu los poob ua koj li tag lawm. Tsis tshuav dabtsi ntawm koj xubntiag lawm, tsuas yog tshuav peb lub cev thiab peb tej liaj teb xwb. Koj yuav cia peb thiab peb tej liaj teb puam tsuaj rau ntawm koj xubntiag lov? Koj cia li muab mov noj pauv peb thiab peb tej liaj teb, peb thiab peb li liaj teb yuav ua Falau qhev. Thov muab noob qoob rau peb cog kom peb thiaj ciaj sia nyob tsis tuag thiab tej liaj teb thiaj tsis nyob do cuas cia.” Yauxej thiaj yuav tej liaj teb huvsi hauv Iyi rau Falau. Cov Iyi txhua tus muag lawv tej liaj teb vim yog kev tshaib nqhis loj heev, tej liaj teb thiaj poob ua Falau tug. Mas Yauxej thiaj muab Iyi cov pejxeem thoob plaws tebchaws ua qhev. Tsuas yog tseg cov pov thawj li liaj teb Yauxej thiaj tsis yuav xwb, rau qhov Falau npaj lawv li feem rau lawv lawm lawv thiaj tau noj. Yog li no lawv thiaj tsis tau muag lawv tej liaj teb. Yauxej hais rau cov pejxeem tias, “Saib maj, hnub no kuv twb yuav nej thiab nej tej liaj teb rau Falau lawm. Mas nimno kuv muab noob qoob rau nej coj mus cog rau hauv tej liaj teb. Thaum sau qoob loo lawm nej yuav muab ib feem hauv tsib pub rau Falau, muab plaub feem ua nej tug siv ua noob cog rau hauv nej tej liaj teb thiab ua mov rau nej thiab nej tsev neeg thiab nej tej menyuam tau noj.” Lawv hais tias, “Koj cawm tau peb txojsia lawm, thov koj uas yog peb tus tswv hlub peb es peb yuav ua Falau qhev.” Yauxej thiaj rhawv ib txoj kevcai hais txog tej liaj teb hauv Iyi tebchaws siv los txog niaj hnub nimno, yog hais tias Falau yuav tau qoob loo ib feem hauv tsib. Tsuas yog tshuav cov pov thawj tej liaj teb thiaj tsis poob ua Falau tug xwb. Cov Yixayee nyob hauv Iyi tebchaws ntawm Kausee li hais no. Lawv tau liaj tau teb ua lawv tug thiab muaj tub ki huaj vam coob heev. Yakhauj tseem muaj txojsia nyob hauv Iyi tebchaws tau kaum xya xyoo. Yakhauj li hnub nyoog huvsi muaj ib puas plaub caug xya xyoo. Thaum ze sijhawm uas Yixayee yuav tu siav, nws hu Yauxej los hais tias, “Yog koj hlub kuv, mas muab koj txhais tes tso rau hauv kuv txhais ncej qab es cog lus tias koj yuav ua zoo thiab ua ncaj rau kuv. Tsis txhob muab kuv log rau hauv Iyi tebchaws. Thaum kuv mus nrog kuv tej poj koob yawm txwv nyob lawm, koj cia li coj kuv tawm hauv Iyi tebchaws rov mus log rau qhov chaw uas log lawv.” Yauxej teb tias, “Kuv yuav ua raws li uas koj hais.” Yixayee txawm hais rau nws tias, “Cia li cog lus twv.” Yauxej kuj cog lus twv rau leej txiv. Ces Yixayee txawm nyo hau qhuas Vajtswv saum nws lub txaj pw. Dhau ntawd los muaj neeg hais rau Yauxej tias, “Koj txiv muaj mob.” Yauxej txawm coj nws ob tug tub yog Manaxe thiab Efa‑i nrog nws mus. Muaj neeg hais rau Yakhauj tias, “Koj tus tub Yauxej tuaj saib koj.” Yixayee thiaj siv zog sawv zaum saum txaj. Yakhauj thiaj hais rau Yauxej tias, “Vajtswv uas muaj hwjchim loj kawg nkaus tau tshwm rau kuv pom ntawm lub moos Lu hauv Khana‑as tebchaws thiab foom koob hmoov rau kuv, thiab hais rau kuv tias, ‘Kuv yuav ua rau koj muaj tub ki huaj vam coob coob, thiab kuv yuav ua rau koj ua ntau haiv neeg thiab yuav muab lub tebchaws no rau koj caj ces ua lawv tug mus ib txhis.’ Koj ob tug menyuam uas koj yug hauv Iyi tebchaws ua ntej uas kuv tsis tau los txog koj hauv Iyi tebchaws no kuj yog kuv li thiab. Efa‑i thiab Manaxe yuav ua kuv li menyuam, ib yam li Lunpee thiab Xime‑oo. Hos cov yau uas koj yug tom qab li yog koj li menyuam. Lawv yuav raug hu raws ob tug tijlaug lub xeem thiaj tau qub txeeg qub teg ntawm ob tug. Thaum kuv tawm ntawm Pada los, mas kuv nyuaj siab kawg rau qhov uas Lachee tuag rau thaum taug kev hauv Khana‑as tebchaws rau ntawm lub chaw uas los yuav txog Efatha. Mas kuv muab nws log rau ntawm ntug kev uas mus rau Efatha, uas yog Npelehee.” Thaum Yixayee pom Yauxej ob tug tub nws thiaj hais tias, “No yog leejtwg?” Yauxej teb nws tias, “No yog kuv ob tug tub uas Vajtswv pub rau kuv hauv lub tebchaws no.” Yixayee thiaj hais tias, “Thov koj coj ob tug los es kuv yuav foom koob hmoov rau ob tug.” Yixayee qhov muag pom kev tsis tseeb lawm vim nws laus heev, saib dabtsi los tsis tshua pom. Yauxej thiaj coj ob tug txav los ze Yixayee, mas nws nwj thiab puag ob tug. Yixayee hais rau Yauxej tias, “Kuv xav tias kuv yuav tsis pom koj lub ntsej muag li lawm. Tiamsis Vajtswv tseem pub kuv pom koj cov menyuam thiab.” Yauxej tsaws menyuam ntawm Yixayee hauv caug los thiab pe ua lub plhu ti nkaus av. Yauxej tuav ob tug tub tes mus ti nkaus leej txiv, nws sab tes xis tuav rawv Efa‑i mus rau Yixayee sab tes laug, nws sab tes laug tuav rawv Manaxe mus rau Yixayee sab tes xis. Tiamsis Yixayee xyab sab tes xis mus tso rau saum Efa‑i uas yog tus yau lub taubhau, thiab nws muab nws sab tes laug tso rau saum Manaxe taubhau, txawm yog Manaxe yog tus hlob los nws xyab tes sib ris li no. Mas Yixayee foom koob hmoov rau Yauxej tias, “Thov Vajtswv uas kuv yawg Aplahas thiab kuv txiv Yiha hwm thiab yog tus Vajtswv uas coj kuv txoj hauv kev ib sim neej los txog niaj hnub nimno, yog tus tubtxib uas pab kuv dim hauv txhua yam kev phem, thov tus Vajtswv ntawd foom koob hmoov rau ob tug tub no. Thov cia kuv lub npe thiab kuv yawg Aplahas thiab kuv txiv Yiha lub npe muaj nyob rau hauv lawv mus ib txhis. Thov cia ob tug huaj vam coob rau hauv lub ntiajteb.” Thaum Yauxej pom tias nws txiv muab txhais tes xis tso rau saum Efa‑i taubhau, nws tsis txaus siab, nws txawm ntsiab nkaus leej txiv txhais tes saum Efa‑i taubhau los tso rau saum Manaxe taubhau. Yauxej hais rau nws txiv tias, “Txiv, tsis yog ua li kod, tus no thiaj yog tus hlob, cia li muab koj txhais tes xis tso rau saum tus no taubhau.” Tiamsis leej txiv tsis kam, nws teb tias, “Kuv paub lawm. Tub, kuv paub lawm. Nws yuav ua ib haiv neeg thiab yuav ua loj. Txawm li cas los xij, tus kwv yuav ua loj dua tus tijlaug, thiab tus kwv caj ces yuav ua ntau haiv neeg.” Hnub ntawd Yixayee thiaj foom koob hmoov rau ob tug hais tias, “Cov Yixayee yuav tuav neb lub npe foom koob hmoov hais tias, Thov Vajtswv ua rau nej zoo ib yam li Efa‑i thiab Manaxe.” Raws li uas hais no Yixayee thiaj tsa Efa‑i ua loj dua Manaxe. Yixayee hais rau Yauxej tias, “Kuv twb yuav tuag, tiamsis Vajtswv yuav nrog nraim nej thiab yuav coj nej rov mus rau nej tej poj koob yawm txwv lub tebchaws. Thiab kuv muab ib thaj teb ntawm toj siab uas kuv xuas ntaj xuas hneev txeeb tau ntawm cov neeg Amaulai rau koj xwb tsis muab rau koj cov kwvtij.” Yakhauj hu nws cov tub los mas hais tias, “Nej cia li los txoos ua ke, kuv yuav hais tej uas yav tom hauv ntej yuav tshwm los rau nej. “Yakhauj cov tub 'e, cia li los ua ke mloog, cia li tig ntsej mloog nej txiv Yixayee tej lus. “Lunpee, koj yog kuv tus tub hlob, thiab yog kuv lub zog, thiab yog thawj yam ntawm kuv lub zog. Koj lub koob meej ncha dua luag thiab koj lub zog heev dua luag. Koj siab tsis ruaj khov yam nkaus li dej ntas, koj yuav tsis tau ua thawj, vim koj nkag mus rau hauv koj txiv lub txaj pw. Koj ua rau lub txaj ntawd qias tsis huv, koj nkag mus rau hauv kuv lub txaj pw. “Xime‑oo thiab Levi yog ob tug kwvtij. ob tug rab ntaj yog cuab yeej ua nruj ua tsiv. Kuv tus ntsuj plig 'e, tsis txhob nkag mus rau hauv ob tug lub chaw sablaj. Kuv lub siab 'e, tsis txhob mus nrog ob tug cov neeg koom. Vim yog ob tug chim ces txawm cia li tua neeg, thiab ob tug txiav leeg raws nyuj raws li ob tug lub siab. Thov cia ob tug txojkev chim raug foom tsis zoo, vim yog ob tug ua nruj ua tsiv. Cia ob tug txojkev npau taws raug foom tsis zoo vim yog ob tug nyaum heev. Kuv yuav muab ob tug cais tsis pub ua ke rau hauv Yakhauj, thiab ua rau ob tug tawg ua sab ua sua rau hauv Yixayee. “Yuda, koj cov kwvtij yuav qhuas koj, koj txhais tes yuav nias koj cov yeeb ncuab caj qwb, koj txiv cov tub y uav khoov ntshis pe koj. Yuda yog menyuam tsov ntxhuav. Tub, koj tawm ntawm tus qauv mus lawm. Nws yuav pliab lua pw khwb rwg yam li txiv tsov ntxhuav thiab zoo li maum tsov ntxhuav. Leejtwg yuav muaj cuabkav zes nws sawv? Tus cwj yuav tsis tu ncua ntawm Yuda, tus thawj kav tus pas nrig yuav tsis ploj ntawm nws kotaw mus li mus txog thaum tus uas muaj feem los txog, thiab ib tsoom neeg yuav mloog tus ntawd hais. Nws yuav muab nws tus nees luav khi rau ntawm tsob txiv hmab, thiab muab tus menyuam nees luav khi rau ntawm tsob txiv hmab uas zoo heev. Nws muab cawv txiv hmab ntxhua nws tej ris tsho, thiab muab kua txiv hmab uas liab ploog li ntshav ntxhua nws tsoos tsho. Nws lub qhov muag liab khiav rau cawv txiv hmab, nws kaus hniav dawb paug li kua mis. “Xenpuloo yuav nyob ntawm ntug hiavtxwv, nws yuav ua chaw nres nkoj, nws li ciam teb yuav npuas lub moos Xaidoo. “Ixakha yog tus nees luav uas muaj zog heev, nws pliab lua cug nws lub nra. Nws pom tias lub chaw so zoo, thiab lub tebchaws txaus siab, ces txawm cug xub pwg kwv, thiab yeem raug luag yuam ua qhev. “Daj yuav ua ib tug tu plaub rau nws haiv neeg, yog ib xeem hauv cov Yixayee. Daj yuav zoo li ib tug nab uas nyob ntawm ntug kev, yog ib tug nab muaj taug ntawm ntug kev uas tom nees luj taws ua rau tus uas caij poob ntxeev kiag. Au Yawmsaub, kuv tos ntsoov koj txojkev cawm dim. “Kas yuav muaj neeg lws nws, tiamsis nws rov caum qab mus lws tau lawv. “Asaw yuav muaj qoob loo nplua mias, nws yuav ua tej zaub mov uas vajntxwv noj. “Nathali yog ib tug maum muas lwj uas dhia ywj siab ywj ntsws, nws yug tau menyuam muas lwj zoo nkauj. “Yauxej yog ib tug ceg uas txi txiv ncw, yog tus ceg txi txiv uas nyob ntawm qhov dej txhawv, nws tej ceg nthuav mus hla ntsa loog. Cov tub rog tua hneev tua nws ua nruj ua tsiv, lawv tua hneev thiab ua nyaum kawg li rau nws. Tiamsis nws rab hneev tseem khov kho, thiab nws txhais npab tseem muaj zog, vim yog muaj Yakhauj tus Vajtswv uas muaj hwjchim txhais tes, thiab vim muaj tus yug yaj uas yog Yixayee lub Txhib Zeb lub npe, thiab vim muaj koj txiv tus Vajtswv uas yuav pab koj, yog Vajtswv tus muaj hwjchim loj kawg nkaus uas yuav foom koob hmoov rau koj, yog tej hmoov uas los saum ntuj los thiab tej hmoov uas los hauv nruab tiv txwv, thiab tej hmoov uas los ntawm cov kua mis thiab lub plab menyuam. Tej hmoov uas los ntawm koj txiv los mas loj dua tej hmoov uas los ntawm tej roob uas nyob ib txhis, thiab loj dua tej uas zoo nplua mias saum tej pov roob uas nyob mus ib txhis. Thov tej hmoov no los rau saum Yauxej lub taubhau thiab los rau saum tus uas raug ncaim cov kwvtij lub hauv pliaj. “Npeeyamee yog ib tug hma nyaum raws nqaij, thaum sawv ntxov nws noj tej uas tom tau lawm, thaum tsaus ntuj nws muab tej uas txeeb tau faib.” Cov no yog Yixayee kaum ob xeem. Tej lus no yog tej uas leej txiv hais rau lawv rau thaum foom koob hmoov rau lawv. Nws foom koob hmoov rau txhua tus raws li tsim nyog txhua tus tau. Yakhauj nkaw lus rau lawv tias, “Kuv yuav mus nrog kuv tej poj koob yawm txwv nyob, cia muab kuv log ua ke nrog kuv tej poj koob yawm txwv rau hauv lub qhov tsua uas nyob ntawm Efoo uas yog neeg Hithai daim teb. Yog lub qhov tsua uas nyob hauv daim teb ntawm Mapela uas nyob Male sab hnub tuaj hauv Khana‑as tebchaws. Lub qhov tsua thiab daim teb no Aplahas yuav ntawm Efoo uas yog neeg Hithai los ua nws tug cia ua toj ntxas. Qhov chaw ntawd lawv twb log Aplahas thiab Xala uas yog nws tus pojniam thiab lawv log Yiha thiab Lenpekha uas yog nws tus pojniam. Thiab tib qhov chaw ntawd kuv kuj log Le‑a. Daim teb thiab lub qhov tsua uas nyob hauv daim teb ntawd peb yuav ntawm cov neeg Hithai.” Thaum Yakhauj hais rau nws cov tub tag lawm, nws txawm nqa kiag nws txhais kotaw rau saum lub txaj ces tu siav nrho, mus nrog nws tej poj koob yawm txwv nyob. Yauxej puag nkaus nws txiv xubntiag quaj thiab nwj nws. Yauxej hais rau cov Kws tshuaj uas yog nws li tub teg tub taws kom muab tshuaj pleev thiab tsau nws txiv lub cev. Cov Kws tshuaj kuj ua li ntawd rau Yixayee lub cev tuag. Lawv ua tau plaub caug hnub vim qhov uas pleev thiab tsau tshuaj rau lub cev tuag siv sijhawm plaub caug hnub. Cov Iyi kuj quaj ntsuag Yixayee tau xya caum hnub. Thaum dhau lub sijhawm quaj ntsuag lawm, Yauxej hais rau Falau cov tub teg tub taws tias, “Yog nej txaus siab rau kuv, thov pab mus hais rau Falau li no, ‘Kuv txiv kom kuv cog lus twv cia hais tias, “Kuv twb yuav tuag, koj cia li coj kuv mus log rau hauv kuv lub qhov ntxa uas kuv khawb rau hauv Khana‑as tebchaws.” Yog li no thov koj tso kev rau kuv mus log kuv txiv, kuv li rov los.’ ” Falau teb tias, “Cia li coj koj txiv mus log raws li nws kom koj cog lus twv tseg lawm.” Yauxej thiaj coj nws txiv mus log, Falau cov tub teg tub taws huvsi yog cov kev txwj laus hauv Falau lub tsev thiab cov kev txwj laus hauv Iyi tebchaws sawvdaws nrog nws mus. Thiab Yauxej tsev neeg huvsi thiab nws cov kwvtij thiab nws txiv tsev neeg sawvdaws mus thiab, tseg lawv tej menyuam thiab tej yaj tej tshis tej nyuj nyob hauv Kausee. Thiab muaj tej tsheb ua rog thiab muaj cov uas caij nees nrog nws mus ua ib pab coob heev kawg li. Thaum lawv mus txog lub tshav ntaus qoob ntawm Atha uas nyob ntawm tus dej Yaladee sab hnub tuaj, lawv quaj quaj ntsuag lwj siab ntsuav qhov ntawd. Yauxej ua kevcai pam leej txiv qhov ntawd xya hnub. Thaum cov neeg Khana‑as uas nyob hauv lub tebchaws ntawd pom qhov uas pam tuag hauv lub tshav ntaus qoob ntawm Atha, lawv sib tham hais tias, “No yog cov Iyi li kev pam tuag lwj siab heev.” Vim li ntawd lawv thiaj hu qhov chaw ntawd ua Anpee Mila‑i, yog nyob ntawm tus dej Yaladee sab hnub tuaj. Yakhauj cov tub pam leej txiv raws li nws tau hais rau lawv. Nws cov tub coj nws mus rau Khana‑as tebchaws muab log rau hauv lub qhov tsua ntawm daim teb hauv Mapela uas nyob ntawm Male sab hnub tuaj. Lub qhov tsua thiab daim teb no Aplahas yuav ntawm Efoo uas yog neeg Hithai los ua nws tug cia ua toj ntxas. Thaum muab leej txiv log tag lawm, Yauxej thiab nws cov kwvtij thiab txhua tus uas nrog nws mus log leej txiv sawvdaws rov los rau Iyi tebchaws. Thaum Yauxej cov tijlaug pom tias leej txiv tuag lawm, lawv txawm sib tham hais tias, “Ntshai Yauxej yuav ntxub peb thiab yuav ua pauj txhua yam uas peb ua phem rau nws lawm.” Lawv thiaj li txib neeg mus hais rau Yauxej tias, “Thaum koj txiv tsis tau tuag nws hais cia li no tias, ‘Nej cia li hais rau Yauxej tias, Kuv thov kom koj zam koj cov tijlaug tej kev txhaum txim uas lawv ua phem rau koj.’ Mas nimno peb thov koj zam peb uas yog koj txiv tus Vajtswv cov tub qhe tej kev txhaum.” Thaum Yauxej hnov cov tijlaug tej lus no nws quaj quaj. Nws cov tijlaug thiaj ua ke tuaj khwb nkaus pe Yauxej hais tias, “Peb yog koj li tub qhe lauj!” Yauxej thiaj hais rau lawv tias, “Nej tsis txhob ntshai li, kuv nim yog Vajtswv lov? Nej xav ua phem rau kuv tiag, tiamsis Vajtswv muab ua kom tau qhov zoo los cawm tau neeg coob coob txojsia yam li uas niaj hnub nimno cawm tau lawm. Yog li no nej tsis txhob ntshai li, kuv yuav yug nej thiab nej cov menyuam.” Yauxej hais tej lus no nplij lawv lub siab thiaj li ua rau lawv sov siab lawm. Yauxej thiab nws txiv tsev neeg nyob hauv Iyi tebchaws. Yauxej hnub nyoog muaj ib puas kaum xyoo. Yauxej kuj pom Efa‑i li tub thiab xeeb leej xeeb ntxwv. Manaxe tus tub Makhi kuj yug menyuam rau saum Yauxej hauv caug. Yauxej hais rau nws cov kwvtij tias, “Kuv twb yuav tuag, tiamsis Vajtswv yuav los xyuas nej thiab yuav coj nej tawm hauv lub tebchaws no mus rau lub tebchaws uas Vajtswv cog lus rau Aplahas, Yiha thiab Yakhauj.” Yauxej kom Yixayee cov tub cog lus twv tseg hais tias, “Thaum Vajtswv los xyuas nej, nej yuav coj kuv cov pob txha nrog nej tawm hauv lub tebchaws no mus.” Yauxej tuag thaum nws hnub nyoog muaj ib puas kaum xyoo. Lawv muab tshuaj pleev thiab tsau nws lub cev tuag, tso rau hauv hleb khaws cia rau hauv Iyi tebchaws. Ntawm no mus yog Yixayee cov tub tej npe uas nyias coj nyias tsev neeg nrog Yakhauj tuaj nyob hauv Iyi tebchaws, yog Lunpee, Xime‑oo, Levi thiab Yuda, Ixakha, Xenpuloo thiab Npeeyamee, Daj thiab Nathali, Kas thiab Asaw. Yakhauj cov tub ki huvsi muaj xya caum leej. Yauxej ces yeej nyob hauv Iyi tebchaws lawm. Los rau tom qab Yauxej thiab nws cov kwvtij sawvdaws thiab tej neeg uas nyob tiam ntawd puavleej tuag tag lawm. Yixayee caj ces muaj tub ki coob thiab huaj vam coob heev. Lawv huaj vam coob thiab muaj zog heev nyob mus puv nkaus lub tebchaws. Muaj ib tug vajntxwv tshiab uas tsis paub Yauxej sawv los kav Iyi tebchaws. Vajntxwv hais rau nws cov pejxeem tias, “Saib maj, cov neeg Yixayee coob dhau thiab muaj zog dhau peb hwv lawm. Peb cia li ntaus tswvyim txov cov neeg no, tsam ces lawv huaj vam coob thiab yog muaj kev ua rog lawv yuav tuaj yeeb ncuab tos ua rog rau peb thiab khiav dim hauv lub tebchaws mus.” Yog li no lawv thiaj tsa ib co nom tswv los saib xyuas quab yuam cov Yixayee ua haujlwm hnyav. Cov Yixayee thiaj ua tej moos uas khaws qhov txhia chaw cia rau Falau, yog lub moos Pithoo thiab lub moos Lamexe. Lawv yimhuab raug quab yuam heev, lawv yimhuab huaj vam coob nyob nthuav dav zuj zus. Cov Iyi thiaj ntshai cov Yixayee heev. Lawv thiaj ua nruj ua tsiv yuam cov Yixayee ua haujlwm khwv. Lawv ua rau cov Yixayee lwj siab kawg vim tej haujlwm khwv heev, yog ua hmoov zeb sib thiab thwv cib thiab ua txhua yam haujlwm hauv tej liaj teb. Txhua yam uas cov Yixayee ua mas cov Iyi ua nruj ua tsiv yuam ua haujlwm khwv. Iyi tus vajntxwv hais rau ob tug pojniam uas pab cov Henplais yug menyuam, ib tug hu ua Sifa ib tug hu ua Pu‑a, hais tias, “Thaum neb mus pab cov Henplais tej pojniam yug menyuam, thiab pom lawv zaum saum txaj yug menyuam, yog yug tau tub ces muab tua pov tseg, yog yug tau ntxhais ces li tseg cia nyob.” Tiamsis ob tug pojniam uas pab yug menyuam ntawd paub ntshai Vajtswv thiaj tsis ua raws li vajntxwv Iyi hais, cov tub los kuj cia dim txojsia. Vajntxwv Iyi thiaj hu ob tug pojniam ntawd tuaj thiab hais tias, “Ua cas neb ua li no es tseem cia cov tub ciaj sia nyob thiab?” Ob tug pojniam ntawd teb Falau tias, “Vim yog cov pojniam Henplais tsis thooj li cov pojniam Iyi, lawv muaj muaj zog, tus uas pab tsis tau mus txog twb yug tau lawm.” Vajtswv ua zoo rau ob tug pojniam uas pab yug menyuam ntawd. Cov Yixayee thiaj li huaj vam coob thiab muaj zog heev. Vim ob tug pojniam uas pab yug menyuam paub ntshai Vajtswv, mas Vajtswv thiaj pub ob tug muaj menyuam. Falau thiaj hais rau nws cov pejxeem sawvdaws tias, “Txhua tus tub uas cov Henplais yug nej yuav tsum muab laim pov tseg rau hauv tus dej Nai, tseg txhua tus ntxhais ciaj sia nyob xwb.” Muaj ib tug tub xeem Levi, nws yuav ib tug ntxhais xeem Levi ua pojniam. Tus pojniam ntawd xeeb tub thiab yug tau ib tug tub. Thaum nws pom tias tus tub zoo nraug heev nws thiaj muab zais tau peb lub hlis. Thaum nws muab zais tsis tau ntxiv lawm, nws thiaj muab ib lub tawb tauj deg luam roj av thiab roj ntoo. Nws muab tus menyuam tso rau hauv tawb coj mus tso rau hauv nruab nrab cov pias iav ntawm ntug dej. Mas tus muam hlob sawv deb tsawv saib thiaj paub tias yuav muaj li cas tshwm rau nws. Mas Falau tus ntxhais nqes mus da dej thiab nws cov nkauj qhev mus ua si ntawm ntug dej. Falau tus ntxhais pom lub tawb nyob hauv plawv cov pias iav thiaj txib nws tus nkauj qhev mus muab lub tawb los. Thaum nws qheb lub tawb saib mas nws pom ib tug menyuam, ua ciav tus menyuam tabtom quaj. Ces nws txawm khuvleej tus menyuam ntawd thiab hais tias, “No yog cov neeg Henplais li menyuam.” Tus menyuam ntawd tus muam thiaj li hais rau Falau tus ntxhais tias, “Koj puas xav cia kuv mus hu ib tug pojniam hauv cov neeg Henplais tuaj tu tus menyuam no rau koj?” Falau tus ntxhais thiaj hais tias, “Cia li mus.” Tus muam ntawd thiaj li mus hu tus menyuam ntawd leej niam tuaj. Mas Falau tus ntxhais thiaj hais rau tus pojniam ntawd tias, “Koj coj tus menyuam no mus tu rau kuv, mas kuv yuav muab nqe zog rau koj.” Tus pojniam ntawd txawm coj tus menyuam mus tu lawm. Thaum tus menyuam hlob lawd, nws thiaj coj tus menyuam tuaj rau Falau tus ntxhais, mas tus menyuam ntawd ua Falau tus ntxhais li tub. Nws muab tis npe hu ua Mauxe rau qhov nws hais tias, “Vim yog kuv rho nws tawm hauv dej los.” Thaum Mauxe hlob lawm, muaj ib hnub Mauxe mus saib nws haiv neeg mas pom lawv ua haujlwm hnyav heev. Nws pom ib tug Iyi tabtom muab ib tug Henplais ntaus, yog nws haiv neeg ntag. Nws ntsia ib ncig mas tsis pom leejtwg, nws thiaj muab tus Iyi ntawd tua kiag, thiab muab zais rau hauv cov xuab zeb. Hnub tom qab, thaum Mauxe tawm mus, kuj pom ob tug Henplais sib ntaus thiab, nws thiaj hais rau tus uas ua txhaum tias, “Ua cas koj ntaus koj haiv neeg?” Nws teb tias, “Leejtwg tsa koj ua thawj kav peb thiab ua tus uas txiav txim rau peb? Koj npaj siab yuav tua kuv ib yam li koj tua tus Iyi thiab lov?” Mauxe txawm ntshai xav tias, “Zaj ntawd twb ncha mus thoob lawm lauj.” Thaum Falau hnov txog zaj ntawd, nws nrhiav kev muab Mauxe tua pov tseg. Tiamsis Mauxe tsiv ntawm Falau mus nyob rau hauv Midee tebchaws lawm. Nws mus zaum ntawm ib lub qhov dej. Cov Midee tus pov thawj muaj xya leej ntxhais. Cov ntxhais ntawd tuaj ntaus dej hliv rau hauv lub dab rau leej txiv tej yaj tej tshis haus. Ces txawm muaj ib co txivneej yug yaj yug tshis los ntiab cov ntxhais ntawd tsiv mus. Mas Mauxe sawv tsees pab cov ntxhais thiab ntaus dej rau lawv tej yaj tej tshis haus. Thaum lawv rov mus txog Le‑u‑ee uas yog lawv txiv, mas leej txiv nug tias, “Ua cas hnub no nej los tau ntxov?” Lawv teb tias, “Muaj ib tug neeg Iyi pab peb dim hauv cov neeg yug yaj txhais tes thiab tseem ntaus dej rau peb tej yaj tej tshis haus.” Leejtxiv hais rau lawv tias, “Tus yawg ntawd nyob qhovtwg? Ua cas nej muab nws tso tseg? Cia li mus hu nws los noj mov maj.” Mauxe kuj txaus siab nrog nws nyob, mas Le‑u‑ee muab tus ntxhais Xipaula qua rau Mauxe. Xipaula yug tau ib tug tub mas Mauxe muab tis npe hu ua Kawsoo, rau qhov nws hais tias, “Kuv yog ib tug uas ua qhua nyob rau hauv luag tebchaws.” Dhau ntau xyoo los rau yav tom qab, vajntxwv Iyi tuag lawm. Cov Yixayee quaj ntsaj laws hauv txojkev ua qhev, thiaj li quaj hu thov kev pab. Lawv lub suab quaj uas raug ua qhev no thiaj nrov mus txog Vajtswv. Vajtswv hnov lawv lub suab quaj ntsaj, thiab nws nco txog tej lus uas nws cog tseg rau Aplahas, Yiha thiab Yakhauj. Vajtswv ntsia ntsoov cov Yixayee thiab paub lawv lub neej zoo li cas. Mauxe yug nws yawm txiv Yethoo uas yog cov Midee tus pov thawj tej yaj tej tshis. Nws coj nws tej yaj tej tshis mus rau tebchaws moj sab qhua sab hnub poob mus txog lub roob Haule, uas yog Vajtswv lub roob. Yawmsaub tus tubtxib saum ntuj los tshwm hauv cov nplaim taws uas cig hauv ib tsob ntoo rau Mauxe pom. Mauxe saib mas pom tsob ntoo cig liab ploog tiamsis tsis kub hnyiab li. Mauxe thiaj hais tias, “Kuv yuav mus saib yam uas phimhwj no saib yog ua cas tsob ntoo tsis kub hnyiab li.” Thaum Yawmsaub pom nws txav los saib, Vajtswv txawm hu hauv tsob ntoo tuaj tias, “Mauxe, Mauxe 'e.” Mauxe teb tias, “Kuv nyob ntawm no 'os.” Vajtswv thiaj hais tias, “Tsis txhob txav los ze. Hle koj nkawm khau tseg vim tias qhov chaw uas koj sawv no yog lub chaw dawb huv.” Thiab Vajtswv hais rau nws tias, “Kuv yog koj txiv tus Vajtswv, yog Aplahas tus Vajtswv, yog Yiha tus Vajtswv thiab yog Yakhauj tus Vajtswv.” Mauxe pos nkaus ntsej muag vim yog nws ntshai tsis kav ntsia Vajtswv. Yawmsaub txawm hais tias, “Kuv twb pom kuv haiv neeg uas nyob hauv Iyi tebchaws txojkev txom nyem lwj siab lawm thiab twb hnov lawv lub suab quaj lawm vim yog raug cov uas saib xyuas lawv quab yuam ua haujlwm hnyav. Kuv paub lawv tej kev txom nyem. Kuv nqes los yuav cawm lawv dim hauv cov Iyi txhais tes thiab coj lawv tawm hauv lub tebchaws ntawd mus rau lub tebchaws uas zoo thiab dav, yog lub tebchaws uas muaj kua mis thiab zib ntab ntws nto, yog mus rau lub chaw uas cov Khana‑as, cov Hithai, cov Amaulai, cov Pelixai, cov Hivai thiab cov Yenpu nyob. Nimno cov Yixayee lub suab quaj tuaj txog kuv lawm, thiab kuv twb pom qhov uas cov Iyi quab yuam lawv lawm. Mas nimno kuv yuav txib koj mus cuag Falau xwv koj thiaj coj tau kuv haiv neeg uas yog Yixayee cov tub ki tawm hauv Iyi tebchaws mus.” Tiamsis Mauxe hais rau Vajtswv tias, “Kuv yog leejtwg es yuav mus cuag tau Falau thiab coj cov Yixayee tawm hauv Iyi tebchaws mus?” Vajtswv hais tias, “Kuv yuav nrog nraim koj. No yog tus txujci tseem ceeb uas qhia rau koj paub tias kuv txib koj mus, yog thaum koj coj cov pejxeem tawm hauv Iyi tebchaws mus lawm nej yuav los pe Vajtswv saum lub roob no.” Tiamsis Mauxe hais rau Vajtswv tias, “Yog kuv mus cuag cov Yixayee thiab hais rau lawv tias, ‘Nej tej poj koob yawm txwv tus Vajtswv txib kuv los cuag nej,’ thiab lawv nug kuv tias, ‘Nws lub npe hu li cas?’ mas kuv yuav teb lawv li cas?” Vajtswv hais rau Mauxe tias, “KUV YEEJ YOG KUV.” Thiab nws hais rau Mauxe tias, “Cia li hais rau cov Yixayee tias, ‘KUV YOG, yog tus uas txib kuv los cuag nej.’ ” Vajtswv hais dua rau Mauxe tias, “Koj cia li hais rau cov Yixayee li no tias, ‘Yawmsaub uas yog nej tej poj koob yawm txwv tus Vajtswv, yog Aplahas tus Vajtswv, yog Yiha tus Vajtswv thiab yog Yakhauj tus Vajtswv txib kuv los cuag nej.’ No yog kuv lub npe mus ib txhis, mas txhua tiam neeg yuav tsum nco hu li no mus. Koj cia li mus hu Yixayee cov kev txwj laus tuaj sablaj ua ke, thiab hais rau lawv tias, ‘Yawmsaub, uas yog nej tej poj koob yawm txwv tus Vajtswv, yog Aplahas, Yiha thiab Yakhauj tus Vajtswv tau tshwm rau kuv pom thiab hais tias, Kuv ntsia ntsoov nej thiab pom tej uas nej raug hauv Iyi tebchaws lawm. Kuv cog lus tseg tias kuv yuav coj nej tawm hauv Iyi tebchaws uas nej raug kev txom nyem lwj siab mus rau hauv cov Khana‑as, cov Hithai, cov Amaulai, cov Pelixai, cov Hivai, thiab cov Yenpu lub tebchaws uas muaj kua mis thiab zib ntab ntws nto.’ Lawv yuav mloog koj tej lus, mas koj thiab Yixayee cov kev txwj laus yuav mus cuag vajntxwv Iyi thiab hais rau nws tias, ‘Yawmsaub uas yog cov Henplais tus Vajtswv tau ntsib peb, mas nimno peb thov koj tso peb mus hauv tebchaws moj sab qhua peb hnub ke kom peb thiaj tau mus xyeem tsiaj rau Yawmsaub uas yog peb tus Vajtswv.’ Kuv yeej paub tias vajntxwv Iyi yuav tsis kheev nej mus yog nws tsis raug tus uas muaj hwjchim txhais tes yuam nws. Kuv yuav tsa kuv txhais tes ua txhua yam txujci phimhwj tshwm los ntaus Iyi tebchaws. Dhau ntawd Falau yuav tso nej mus. Kuv yuav ua kom cov Iyi hlub kuv haiv neeg no mas thaum nej tawm mus nej yuav tsis mus tes dawb tes npliag. Txhua tus pojniam yuav thov npauj nyiag npauj kub thiab tej tsoos tsho ntawm cov Iyi uas nrog lawv nyob ua ib zos thiab ntawm tej pojniam uas nrog lawv nyob ua ib tse, coj tej no mus rau nej tej tub tej ntxhais hnav. Ua li no nej thiaj lws tau cov Iyi tej qhov txhia chaw.” Mauxe teb tias, “Ntshai lawv yuav tsis ntseeg kuv thiab tsis quav ntsej tej uas kuv hais, rau qhov lawv yuav hais tias, ‘Yawmsaub tsis tau tshwm rau koj pom li.’ ” Yawmsaub txawm hais rau nws tias, “Dabtsi nyob hauv koj txhais tes?” Mauxe teb tias, “Ib tug pas nrig.” Yawmsaub hais tias, “Cia li muab pov rau hauv pem teb nawj.” Nws thiaj muab pov rau hauv pem teb, tus pas nrig ntawd txawm txia kiag ua ib tug nab, Mauxe txawm tig loo khiav tus nab. Tiamsis Yawmsaub hais rau Mauxe tias, “Cia li cev tes ntsiab nab tus kotw.” Mauxe thiaj cev tes ntsiab nkaus tus kotw txawm txia kiag rov ua tus pas nrig rau hauv nws txhais tes lawm. “Ua li no lawv thiaj ntseeg tias Yawmsaub uas yog lawv tej poj koob yawm txwv tus Vajtswv, yog Aplahas tus Vajtswv thiab Yiha tus Vajtswv thiab Yakhauj tus Vajtswv tshwm rau koj pom lawm tiag.” Yawmsaub hais dua rau Mauxe tias, “Cia li muab koj txhais tes ntxig rau hauv koj hauv siab.” Nws thiaj muab txhais tes ntxig rau hauv nws hauv siab. Thaum rho txhais tes los ua ciav nws txhais tes mob ruas dawb paug li daus xib daus npu. Yawmsaub hais tias, “Cia li muab txhais tes ntxig rov rau hauv koj hauv siab dua ib zaug.” Nws kuj muab nws txhais tes ntxig rau hauv nws hauv siab dua. Thaum nws rho tes los ua ciav txhais tes twb rov zoo kiag li nws lub cev huvsi. Yawmsaub hais tias, “Yog lawv tsis ntseeg koj thiab tsis quav ntsej tus txujci tseem ceeb zaum ib, nyaj lawv yuav ntseeg tus txujci tseem ceeb zaum ob. Yog lawv tseem tsis ntseeg ob zaug txujci tseem ceeb no thiab tsis quav ntsej koj tej lus, cia li nqa dej hauv tus dej Nai ib qho los hliv rau saum npoo av qhuav. Mas cov dej uas koj nqa hauv tus dej Nai los yuav txia ua ntshav rau saum npoo av qhuav ntawd.” Tiamsis Mauxe hais rau Yawmsaub tias, “Au tus Tswv, kuv ib txwm yeej tsis txawj hais lus tsis hais yav thaum ub los yog, tamsim no uas koj hais lus rau kuv uas yog koj tus qhev los yog, kuv yog ib tug uas ncauj lus tsawg hais tsis tau npliag.” Yawmsaub hais rau Mauxe tias, “Leejtwg tsim neeg lub qhov ncauj? Leejtwg ua rau neeg hais tsis tau lus thiab ua rau lag ntseg, thiab ua rau pom kev thiab ua rau dig muag? Kuv uas yog Yawmsaub ua los tsis yog? Yog li no cia li mus, kuv yuav nyob ntawm koj qhov ncauj thiab kuv yuav qhia los rau koj hais.” Tiamsis Mauxe hais tias, “Au tus Tswv, thov txib dua lwm tus mus lauj!” Mas Yawmsaub npau taws rau Mauxe thiab hais tias, “Koj tus tijlaug uas yog xeem Levi nev? Kuv paub tias nws txawj hais lus. Saib maj nws tabtom taug kev tuaj ntsib koj. Thaum nws pom koj nws yuav zoo siab heev. Koj yuav piav rau nws muab los rau nws hais. Kuv yuav nyob ntawm koj qhov ncauj thiab ntawm nws qhov ncauj, thiab kuv yuav qhia rau neb ob leeg paub tias yuav ua li cas. Nws yuav nyob koj chaw hais rau cov pejxeem, nws yuav ua koj lub qhov ncauj thiab koj yuav ua zoo li Vajtswv rau nws. Koj yuav tuav rawv tus pas nrig no siv ua txujci tseem ceeb.” Mauxe thiaj rov mus cuag nws yawm txiv Yethoo thiab hais tias, “Thov cia kuv rov qab mus xyuas kuv cov kwvtij hauv Iyi tebchaws saib lawv tseem muaj txojsia nyob los tsis muaj.” Yethoo hais rau Mauxe tias, “Cia li mus zoo nawj.” Yawmsaub hais rau Mauxe hauv Midee tebchaws tias, “Cia li rov mus nram Iyi tebchaws, rau qhov cov neeg uas nrhiav txov koj txojsia sawvdaws twb tuag tag lawm.” Mauxe thiaj muab nws pojniam thiab cov tub caij nees luav rov qab mus nram Iyi tebchaws. Mauxe tuav rawv Vajtswv tus pas nrig hauv nws txhais tes mus thiab. Yawmsaub hais rau Mauxe tias, “Thaum koj rov mus txog Iyi tebchaws, koj yuav tsum ua tib zoo ua tej txujci tseem ceeb huvsi uas kuv muab cob rau koj lawm tab meeg Falau. Tiamsis kuv yuav ua rau Falau lub siab tawv, nws yuav tsis kheev tso kuv cov neeg mus. Thiab koj yuav hais rau Falau tias, ‘Yawmsaub hais li no tias, Yixayee yog kuv tus tub hlob. Kuv hais rau koj tias, “Cia li tso kuv tus tub mus xwv nws thiaj tau kev pe hawm kuv.” Tiamsis koj tsis yeem tso nws mus, kuv thiaj yuav muab koj tus tub hlob tua pov tseg.’ ” Thaum Mauxe lawv so ntawm ib tog kev Yawmsaub los ntsib Mauxe yuav muab nws tua pov tseg. Mas Xipaula muab zeb hauvswm los hlais nws tus tub daim tawv noov mas coj mus tib txhuam Mauxe txhais kotaw, thiab hais tias, “Koj yog tus nraug vauv ntshav rau kuv tiag tiag li lawm.” Mas Vajtswv thiaj tsis tua nws. Tus pojniam tau hais tias “Koj yog tus nraug vauv ntshav” yog tim qhov uas ua kevcai txiav. Yawmsaub hais rau Aloo tias, “Cia li mus ntsib Mauxe tom tebchaws moj sab qhua.” Aloo txawm mus mas ntsib Mauxe ntawm Vajtswv lub roob thiab nwj nws. Mauxe thiaj piav tej lus uas Yawmsaub hais thiab txib nws mus huvsi rau Aloo mloog thiab hais txog tej txujci tseem ceeb huvsi uas Yawmsaub kom nws ua. Mauxe thiab Aloo txawm mus hu Yixayee cov kev txwj laus sawvdaws tuaj sablaj ua ke. Aloo thiaj hais tej lus uas Yawmsaub tau hais rau Mauxe lawm huvsi rau cov pejxeem mloog, thiab Mauxe ua tej txujci tseem ceeb tab meeg rau lawv saib. Cov pejxeem kuj ntseeg. Thaum lawv hnov tias Yawmsaub los xyuas cov Yixayee thiab pom lawv tej kev txom nyem lwj siab lawm, lawv kuj nyo hau pe hawm Yawmsaub. Dhau ntawd Mauxe thiab Aloo mus cuag Falau thiab hais tias, “Yawmsaub uas yog cov Yixayee tus Vajtswv hais li no tias, ‘Cia li tso kuv haiv neeg mus xwv lawv thiaj tau mus ua kevcai noj haus pe kuv hauv tebchaws moj sab qhua.’ ” Tiamsis Falau hais tias, “Tus Yawmsaub ntawd yog leejtwg es kuv yuav tsum mloog nws lus thiab tso cov Yixayee mus? Kuv tsis paub Yawmsaub, thiab kuv yeej yuav tsis tso cov Yixayee mus kiag li.” Ob tug txawm hais tias, “Cov Henplais tus Vajtswv los ntsib ib lawm. Thov cia peb mus rau hauv tebchaws moj sab qhua peb hnub ke kom thiaj tau tua tsiaj xyeem rau Yawmsaub uas yog peb tus Vajtswv. Yog tsis ua li ntawd Vajtswv yuav tso mob kis lossis hniav ntaj hniav riam los raug peb.” Iyi tus vajntxwv hais rau ob tug tias, “Mauxe thiab Aloo, ua cas neb yuav ua rau cov pejxeem tso lawv tej haujlwm tseg? Nej cia li rov qab mus ua nej tej haujlwm los maj.” Falau hais dua tias, “Saib maj, nimno cov pejxeem hauv lub tebchaws coob heev mas neb yuav ua rau lawv tso lawv tej haujlwm tseg.” Mas hnub ntawd Falau hais tawv rau cov nom tswv uas saib xyuas cov qhev thiab hais rau cov thawj coj ua haujlwm tias, “Txij hnub no mus nej tsis txhob pub tej quav nyab rau cov neeg ua thwv cib yam li yav tag los lawm. Cia lawv mus khaws lawv quav nyab. Tiamsis cov thwv cib mas yuav tsum kom lawv ua tau npaum li qub, tsis tseev kom ua tau tsawg kiag li. Vim lawv tub nkeeg, lawv thiaj quaj hais tias, ‘Thov cia peb mus xyeem tsiaj rau peb tus Vajtswv.’ Nej cia li yuam kom lawv ua haujlwm hnyav dua qub xwv lawv thiaj ua haujlwm khwv thiab tsis quav ntsej tej lus dag ntawd.” Cov nom tswv uas saib xyuas cov qhev thiab cov thawj coj ua haujlwm kuj mus hais rau cov pejxeem tias, “Falau hais li no tias, ‘Kuv yuav tsis pub quav nyab rau nej lawm. Nej mus khaws nej quav nyab raws li uas nrhiav tau. Tiamsis nej tej haujlwm yuav tsis tseev kom ua tau tsawg kiag li.’ ” Cov pejxeem thiaj mus ri sua thoob plaws Iyi tebchaws khaws tej hauv paus quav nyab. Cov nom tswv uas saib xyuas cov qhev kuj txhib hais tias “Nej yuav tsum ua kom ib hnub tau npaum li uas teem cia yam li thaum tseem muaj quav nyab.” Yixayee cov thawj coj ua haujlwm uas Falau cov nom tswv uas saib xyuas cov qhev tau tsa los saib xyuas lawv ntawd, kuj raug nplawm thiab raug nug tias, “Ua cas hnub no nej ua tsis tau thwv cib npaum li uas teem cia yam li yav tag los?” Yixayee cov thawj uas coj ua haujlwm thiaj tuaj quaj rau Falau tias, “Ua cas koj ua li no rau peb uas yog koj cov qhev? Lawv tsis pub quav nyab rau peb uas yog koj cov qhev, tiamsis lawv tseem hais tias, ‘Ua thwv cib los maj.’ Saib maj, peb uas yog koj cov qhev raug nplawm yog tim koj cov tub teg tub taws ua txhaum.” Falau hais tias, “Nej tub nkeeg, tub nkeeg tiag tiag li, nej thiaj hais tias, ‘Cia peb mus xyeem tsiaj rau Yawmsaub.’ Nej cia li mus ua haujlwm tamsim no. Yuav tsis pub quav nyab rau nej li lawm, tiamsis nej tseem yuav tsum ua kom tau thwv cib npaum nkaus li qub.” Yixayee cov thawj coj ua haujlwm thiaj pom tias lawv raug ceeblaj lawm rau qhov luag hais tias, “Tsis tseev ib hnub ntawd nej ua tau thwv cib tsawg dua li teem tseg.” Thaum lawv tawm hauv Falau los lawv ntsib Mauxe thiab Aloo tseem tos lawv. Lawv hais rau ob tug tias, “Thov Yawmsaub tshuaj saib neb thiab txiav txim rau neb, vim yog neb ua rau peb raug Falau thiab nws cov tub teg tub taws ntxub heev thiab neb muab ntaj muab riam rau hauv lawv txhais tes tua peb ntag.” Mauxe txawm rov mus cuag Yawmsaub hais tias, “Au tus Tswv, ua cas koj coj kev ceeblaj los rau haiv neeg no? Ua cas koj txib kuv los? Txij thaum kuv mus cuag Falau thiab tuav koj lub npe hais rau nws, Falau ua nruj ua tsiv rau haiv neeg no, thiab koj twb tsis cawm koj haiv neeg dim li.” Yawmsaub hais rau Mauxe tias, “Nimno koj yuav pom tej uas kuv yuav ua rau Falau. Vim kuv txhais tes uas muaj hwjchim Falau yuav tso kuv haiv neeg mus, yog kuv txhais tes uas muaj hwjchim ntag mas nws yuav ntiab lawv tawm hauv nws lub tebchaws mus.” Vajtswv hais dua rau Mauxe tias, “Kuv yog Yawmsaub. Kuv los tshwm rau Aplahas, Yiha thiab Yakhauj hauv lub npe uas hu tias Vajtswv uas muaj hwjchim loj kawg nkaus tiamsis tsis tau qhia lawv paub kuv hauv lub npe uas yog Yawmsaub. Dua ib qho kuv cog lus ruaj khov rau lawv tias kuv yuav muab lub tebchaws Khana‑as rau lawv, yog lub tebchaws uas lawv txeev ua qhua nyob hauv. Tsis tag li ntawd, kuv tau hnov cov Yixayee uas cov Iyi muab yuam ua qhev lub suab ntsaj laws lawm thiab kuv nco txog kuv tej lus cog tseg. Vim li no cia li hais rau cov Yixayee tias, ‘Kuv yog Yawmsaub, kuv yuav coj nej tawm hauv tej haujlwm hnyav uas cov Iyi yuam nej ua thiab kuv yuav cawm nej dim qhov uas ua lawv qhev, thiab kuv yuav tsa kiag kuv txhais tes thiab txiav txim loj kawg txhiv nej dim. Kuv yuav txais nej ua kuv haiv neeg thiab kuv yuav ua nej tus Vajtswv, mas nej yuav paub tias kuv yog Yawmsaub yog nej tus Vajtswv uas coj nej dim hauv tej haujlwm hnyav uas cov Iyi yuam nej ua. Kuv yuav coj nej mus rau hauv lub tebchaws uas kuv tau cog lus ruaj khov tias kuv yuav muab rau Aplahas, Yiha thiab Yakhauj. Kuv yuav muab rau nej ua nej teej nej tug. Kuv yog Yawmsaub.’ ” Mauxe thiaj coj tej lus no mus piav rau cov Yixayee mloog, tiamsis lawv tsis mloog Mauxe vim lawv siab ntsws puag tag thiab raug yuam ua qhev txom nyem kawg li. Yawmsaub hais rau Mauxe tias, “Cia li nkag mus hais rau Iyi tus vajntxwv Falau kom nws tso cov Yixayee tawm hauv nws lub tebchaws mus.” Tiamsis Mauxe hais rau Yawmsaub tias, “Cov Yixayee los kuj tsis mloog kuv hais, Falau yuav mloog kuv li cas? Kuv hais lus tsis npliag kiag li.” Yawmsaub thiaj hais rau Mauxe thiab Aloo kom hais rau cov Yixayee thiab Iyi tus vajntxwv Falau tias yog Yawmsaub hais kom ob tug coj cov Yixayee tawm hauv Iyi tebchaws mus. Ntawm no mus yog hais txog cov thawj hauv txhua xeem Yixayee. Yixayee tus tub hlob Lunpee cov tub yog Hanau, Palu, Hexaloo thiab Khami. Cov no yog xeem Lunpee tej cum. Xime‑oo cov tub yog Yemu‑ee, Yami, Auha, Yakhi, Xauha, thiab Sa‑u uas yog tus pojniam Khana‑as yug. Cov no yog xeem Xime‑oo tej cum. Ntawm no mus yog Levi cov tub ki tej npe raws li uas twb muab sau cia lawm, yog Kwsoo, Khauha thiab Melali. Levi hnub nyoog muaj ib puas peb caug xya xyoo li tuag. Kwsoo cov tub yog Lini thiab Sime‑i. Ob tug ntawd yog lawv ob cum ntawd lub hauv paus. Khauha cov tub yog Alav, Ixaha, Heploo thiab Uxi‑ee. Khauha hnub nyoog muaj ib puas peb caug peb xyoo li tuag. Melali cov tub yog Mali thiab Musi. Cov no yog xeem Levi tej cum raws li twb muab sau cia lawm. Alav yuav nws txiv tus muam Yaukhenpe ua pojniam mas yug tau Aloo thiab Mauxe. Alav hnub nyoog muaj ib puas peb caug xya xyoo li tuag. Ixaha cov tub yog Khaula, Nefe thiab Xikhi. Uxi‑ee cov tub yog Misa‑ee, Eexafa thiab Xithi. Aloo yuav Aminada tus ntxhais Elisenpa uas yog Nasoo tus muam ua pojniam, mas Elisenpa yug tau Nada, Anpihu, Ele‑axa thiab Ithama. Khaula cov tub yog Axi, Eekhana thiab Anpiyaxa. Cov no yog Khaula tej cum. Aloo tus tub Ele‑axa yuav Puti‑ee ib tug ntxhais ua pojniam mas yug tau Fineha. Cov neeg no yog xeem Levi tej cum li thawj. Aloo thiab Mauxe ob tug no ntag yog ob tug uas Yawmsaub hais tias, “Neb cia li coj cov Yixayee tawm hauv Iyi tebchaws mus raws li lawv tej pab tej pawg.” Ob tug no yog ob tug uas thov Iyi tus vajntxwv Falau txog qhov uas coj cov Yixayee tawm hauv Iyi tebchaws, yog tus Mauxe no thiab tus Aloo no ntag. Hnub uas Yawmsaub hais rau Mauxe hauv Iyi tebchaws ntawd, Yawmsaub hais rau nws tias, “Kuv yog Yawmsaub. Koj cia li hais txhua yam uas kuv qhia koj rau Iyi tus vajntxwv Falau mloog.” Tiamsis Mauxe hais rau Yawmsaub tias, “Kuv yeej hais lus tsis npliag, Falau yuav ua cas mloog kuv hais?” Yawmsaub hais rau Mauxe tias, “Ua li no nawj, kuv tsa koj ua zoo li Vajtswv rau Falau, mas koj tus tijlaug Aloo yuav ua tus uas cev koj li lus. Koj yuav tsum hais tej lus huvsi uas kuv hais rau koj mas koj tus tijlaug Aloo yuav hais rau Falau kom nws tso cov Yixayee tawm hauv nws lub tebchaws mus. Tiamsis kuv yuav ua rau Falau lub siab tawv. Txawm yog kuv ua kuv tej txujci tseem ceeb thiab txujci phimhwj tshwm rau hauv Iyi tebchaws ntau zuj zus, los Falau yuav tsis mloog neb hais. Mas kuv yuav tsa kuv txhais tes ntaus Iyi tebchaws thiab rau txim hnyav thiaj coj tau kuv cov neeg Yixayee tawm hauv Iyi tebchaws mus raws li lawv tej pab tej pawg. Cov Iyi yuav paub tias kuv yog Yawmsaub rau thaum kuv tsa kuv txhais tes tawm tsam Iyi tebchaws thiab coj cov Yixayee tawm hauv lawv mus.” Mauxe thiab Aloo ua raws li ntawd. Ob tug ua raws nraim li uas Yawmsaub hais. Thaum ob tug mus hais rau Falau, Mauxe hnub nyoog muaj yim caum xyoo, Aloo hnub nyoog muaj yim caum peb xyoo. Yawmsaub hais rau Mauxe thiab Aloo tias, “Thaum Falau hais rau neb tias, ‘Cia li ua txujci phimhwj rau kuv saib,’ mas koj cia li hais rau Aloo tias, ‘Muab tus pas nrig pov rau ntawm Falau xubntiag,’ tus pas nrig yuav txia kiag ua ib tug nab.” Mauxe thiab Aloo thiaj mus cuag Falau thiab ua raws nraim li Yawmsaub hais. Aloo muab nws tus pas nrig pov rhees rau ntawm Falau thiab nws cov tub teg tub taws xubntiag, mas tus pas nrig txia kiag ua ib tug nab. Falau txawm hu cov uas txawj ntse thiab cov uas txawj ua khawv koob yees siv tuaj. Lawv yog Iyi cov uas txawj ua yees siv mas lawv siv lawv tej khawv koob ua tau zoo ib yam li ntawd thiab. Thaum lawv nyias taus nyias pov pas nrig ces tej pas nrig ntawd kuj txia ua nab huvsi thiab, tiamsis Aloo tus pas nrig muab lawv cov pas nrig nqos tag huvsi lawm. Txawm li ntawd los Falau lub siab tseem tawv, tsis yeem mloog ob tug hais, ib yam li Yawmsaub hais cia lawd. Yawmsaub hais rau Mauxe tias, “Falau lub siab tawv, tsis kam tso cov Yixayee mus. Thaum sawv ntxov koj cia li mus cuag Falau rau thaum nws mus nram tus dej. Koj mus sawv ntawm ntug dej tos nws, tuav rawv tus pas nrig uas txia ua nab mus thiab. Koj yuav hais rau nws tias, ‘Yawmsaub uas yog cov Henplais tus Vajtswv txib kuv tuaj cuag koj hais tias, Cia li tso kuv haiv neeg mus xwv lawv thiaj tau mus pe hawm kuv hauv tebchaws moj sab qhua. Txog tav no koj kuj tsis mloog hais kiag li. Yawmsaub hais li no tias, Koj yuav paub tias kuv yog Yawmsaub rau qhov uas ua li no. Saib maj, kuv yuav xuas tus pas nrig uas nyob hauv kuv txhais tes nplawm tus dej Nai, mas dej yuav txia ua ntshav. Tej ntses hauv tus dej Nai yuav tuag thiab tus dej Nai yuav tsw lwj ntxiag thiab cov Iyi yuav haus tsis taus tus dej ntawd.’ ” Yawmsaub hais dua rau Mauxe tias, “Cia li hais rau Aloo tias, ‘Tuav koj tus pas nrig hauv koj txhais tes tsa rau saum tej dej hauv Iyi tebchaws tsis hais lawv tej niag dej, tej kwj deg, tej pas dej, tej qhov dej huvsi mas tej dej yuav txia ua ntshav. Yuav muaj ntshav thoob plaws Iyi tebchaws tsis hais hauv tej thoob ntoo thiab tej hub.’ ” Mauxe thiab Aloo kuj ua raws nraim li uas Yawmsaub hais. Nws tsa tus pas nrig nplawm tus dej Nai tab meeg Falau thiab nws cov tub teg tub taws, mas tej dej hauv tus dej Nai txia ua ntshav huvsi. Tej ntses hauv tus dej Nai kuj tuag. Tus dej Nai tsw lwj ntxiag cov Iyi thiaj haus tsis taus tus dej ntawd. Muaj ntshav thoob plaws Iyi tebchaws. Tiamsis Iyi cov uas txawj ua yees siv mas lawv siv lawv tej khawv koob ua tau ib yam li ntawd thiab. Tiamsis Falau lub siab tseem tawv, tsis yeem mloog ob tug hais, ib yam li Yawmsaub hais cia lawd. Falau tig hlo rov qab mus rau hauv tsev, tsis khaws tej xwm txheej no cia rau hauv lub siab. Cov Iyi sawvdaws thiaj khawb qhov dej raws ntug dej Nai nrhiav dej haus, rau qhov haus tsis taus tej dej hauv tus dej Nai. Suav txij Yawmsaub nplawm tus dej Nai tau xya hnub, Yawmsaub hais rau Mauxe tias, “Cia li nkag mus cuag Falau thiab hais rau nws tias, ‘Yawmsaub hais li no tias, Cia li tso kuv haiv neeg mus xwv lawv thiaj tau mus pe hawm kuv. Tiamsis yog koj tsis kam tso lawv mus, kuv yuav tso qav nce thoob plaws koj lub tebchaws ua rau koj raug txom nyem. Qav yuav puv nkaus tus dej Nai, thiab yuav nce los rau hauv koj lub vaj lub tsev, los rau hauv koj lub txaj thiab nce rau saum koj lub chaw pw, thiab los rau hauv koj cov tub teg tub taws thiab koj cov pejxeem tej tsev, thiab los rau hauv koj tej qhov cub qhov txos thiab los rau hauv koj tej phaj zuaj ncuav. Tej qav yuav nce koj thiab koj cov pejxeem thiab koj cov tub teg tub taws lub cev huvsi.’ ” Yawmsaub hais rau Mauxe tias, “Koj cia li hais rau Aloo tias, ‘Tsa koj txhais tes uas tuav tus pas nrig rau saum tej niag dej tej kwj deg tej pas dej ua kom tej qav nce los rau saum Iyi tebchaws.’ ” Aloo txawm tsa kiag tes rau saum tej dej hauv Iyi tebchaws, mas qav txawm nce los laum nkaus Iyi tebchaws. Tiamsis cov uas txawj ua yees siv mas lawv siv lawv tej khawv koob ua kom qav nce los rau saum Iyi tebchaws ib yam nkaus thiab. Falau txawm hu Mauxe thiab Aloo tuaj thiab hais tias, “Neb thov Yawmsaub coj tej qav no tawm ntawm kuv thiab kuv cov pejxeem mus, mas kuv yuav tso neb cov neeg mus xyeem tsiaj rau Yawmsaub.” Mauxe thiaj hais rau Falau tias, “Nyob ntawm koj pom zoo teem rau lub sijhawm twg rau kuv thov Yawmsaub pab koj thiab koj cov tub teg tub taws thiab koj cov pejxeem kom tej qav no puam tsuaj tag ntawm koj thiab koj tej vaj tse, tsuas yog tseg cov uas nyob hauv tus dej Nai xwb.” Falau teb tias, “Cia tagkis.” Mauxe thiaj hais tias, “Yuav muaj raws li koj hais mas koj thiaj paub tias tsis muaj ib tug twg zoo cuag li Yawmsaub uas yog peb tus Vajtswv. Tej qav yuav khiav ntawm koj thiab koj tej vaj tse thiab koj cov tub teg tub taws thiab koj cov pejxeem mus, tsuas yog tseg cov uas nyob hauv tus dej Nai xwb.” Mauxe thiab Aloo thiaj tawm ntawm Falau mus lawm. Mas Mauxe thov Yawmsaub txog tej qav uas Yawmsaub tso los rau Falau. Yawmsaub ua raws li Mauxe thov. Mas tej qav thiaj tuag tag rau hauv tej vaj tse thiab tej tshav puam thiab tom tej liaj teb. Lawv khaws tej qav tuag ntawd ua tej niag pawg, mas lub tebchaws tsw lwj ntxiag. Tiamsis thaum Falau pom tias tej kev txom nyem ntawd ploj lawm, nws txawm ua lub siab tawv tsis kam mloog Mauxe thiab Aloo hais, ib yam li Yawmsaub twb hais cia lawd. Yawmsaub hais rau Mauxe tias, “Cia li hais rau Aloo tias, ‘Tsa kiag koj tus pas nrig nplawm hmoov av kom txia ua yoov qaib thoob plaws Iyi tebchaws.’ ” Ob tug kuj ua li ntawd. Aloo tsa kiag nws txhais tes xuas nws tus pas nrig nplawm hmoov av, ces txawm muaj yoov qaib los ntsauv neeg thiab tej tsiaj txhu. Tej hmoov av huvsi txia ua yoov qaib thoob plaws Iyi tebchaws. Cov uas txawj ua yees siv kuj siv lawv tej khawv koob ua kom muaj yoov qaib tiamsis lawv ua tsis tau. Yoov qaib los ntsauv neeg thiab tej tsiaj txhu huvsi. Cov uas txawj ua yees siv thiaj hais rau Falau tias, “Tej no yog Vajtswv tus ntiv tes ua.” Tiamsis Falau lub siab tseem tawv tsis mloog lawv hais, ib yam li Yawmsaub twb hais cia lawd. Yawmsaub hais rau Mauxe tias, “Cia li sawv ntxov mus tos Falau rau thaum nws mus nram ntug dej mas hais rau nws tias, ‘Yawmsaub hais li no tias, Cia li tso kuv haiv neeg mus xwv lawv thiaj tau mus pe hawm kuv. Yog koj tsis tso kuv haiv neeg mus, mas kuv yuav tso tej pab yoov mos ntsuab los ntsauv koj thiab koj cov tub teg tub taws thiab koj cov pejxeem, thiab los rau hauv koj tej vaj tse. Hauv cov Iyi tej vaj tse thiab hauv tej av uas lawv nyob yuav muaj tej pab yoov mos ntsuab puv nkaus. Hnub ntawd kuv yuav cais Kausee tebchaws uas kuv haiv neeg nyob rau ib cag, tsis pub muaj tej pab yoov mos ntsuab rau hauv, kom koj thiaj paub tias kuv yog Yawmsaub uas nyob hauv nruab nrab lub tebchaws no. Kuv yuav cais kuv haiv neeg thiab koj cov neeg. Qhov txujci phimhwj no yuav tshwm rau tagkis.’ ” Yawmsaub kuj ua raws li ntawd. Ces txawm muaj yoov mos ntsuab coob kawg los rau hauv Falau lub vaj tse thiab los rau hauv nws cov tub teg tub taws tej vaj tse ua rau muaj kev liamsim thoob plaws Iyi tebchaws. Falau txawm hu Mauxe thiab Aloo tuaj thiab hais tias, “Cia li mus tua tsiaj xyeem rau neb tus Vajtswv rau hauv lub tebchaws no.” Tiamsis Mauxe teb tias, “Ua tsis tau li ntawd, rau qhov peb yuav muab tej tsiaj uas cov Iyi caiv tua xyeem rau Yawmsaub uas yog peb tus Vajtswv. Yog peb tua tej tsiaj xyeem tab meeg cov Iyi uas lawv caiv tias yog yam uas qias vuab tsuab, lawv yuav tsis xuas pob zeb ntaus peb lov? Peb yuav tsum mus rau hauv tebchaws moj sab qhua peb hnub ke tua tsiaj xyeem rau Yawmsaub uas yog peb tus Vajtswv raws li nws hais rau peb.” Falau thiaj hais tias, “Kuv yuav tso nej mus kom nej thiaj tau mus xyeem tsiaj rau Yawmsaub uas yog nej tus Vajtswv hauv tebchaws moj sab qhua, tiamsis tsis txhob mus deb deb. Koj cia li thov Vajtswv pab kuv.” Mauxe thiaj hais tias, “Thaum kuv tawm ntawm koj mus lawd kuv yuav thov Yawmsaub ua rau tej yoov mos ntsuab khiav ntawm koj thiab ntawm koj cov tub teg tub taws thiab ntawm koj cov pejxeem mus rau tagkis. Tiamsis koj tsis txhob ntxeev dua lus es tsis tso peb haiv neeg mus xyeem tsiaj rau Yawmsaub.” Mauxe txawm tawm ntawm Falau mus lawm, nws kuj thov Yawmsaub. Yawmsaub ua raws li Mauxe tej lus thov thiaj ua rau tej yoov mos ntsuab khiav ntawm Falau thiab ntawm nws cov tub teg tub taws thiab ntawm nws cov pejxeem mus, tsis tshuav ib tug li. Tiamsis zaum no Falau tseem ua lub siab tawv thiab, tsis kam tso cov Yixayee mus. Yawmsaub hais rau Mauxe tias, “Cia li nkag mus cuag Falau thiab hais rau nws tias, ‘Yawmsaub uas yog cov Henplais tus Vajtswv hais li no tias, “Koj cia li tso kuv haiv neeg mus kom lawv thiaj tau mus pe hawm kuv.” Tiamsis yog koj tsis kam tso lawv mus tseem tav lawv cia, mas Yawmsaub txhais tes yuav tso mob kis loj heev los rau nej tej tsiaj txhu hauv tej tshav zaub tsis hais nees nees luav ntxhuav nyuj yaj thiab tshis huvsi. Tiamsis Yawmsaub yuav cais cov Yixayee tej tsiaj txhu thiab cov Iyi tej tsiaj txhu, mas cov Yixayee tej tsiaj txhu yuav tsis tuag ib tug li.’ ” Yawmsaub teem sijhawm cia hais tias, “Tagkis Yawmsaub yuav ua tej no rau hauv lub tebchaws.” Mas hnub tom qab Yawmsaub txawm ua ntag. Cov Iyi tej tsiaj txhu tuag tag nrho huvsi, tiamsis cov Yixayee tej tsiaj txhu tsis tuag ib tug li. Falau thiaj txib neeg mus saib ua ciav cov Yixayee tej tsiaj txhu tsis tuag ib tug li. Tiamsis Falau lub siab tseem tawv heev, tsis kam tso cov Yixayee mus. Yawmsaub hais rau Mauxe thiab Aloo tias, “Cia li tsuab ob peb taus tes tshauv hauv qhov cub los, cia Mauxe muab w rau saum nruab ntug tab meeg Falau. Cov tshauv ntawd yuav txia ua hmoov av ya mus thoob plaws Iyi tebchaws, ua rau neeg thiab tsiaj txhu mob rwj ua kiav txhab thoob plaws Iyi tebchaws.” Ob tug thiaj tsuab tshauv hauv qhov cub mus sawv ntawm Falau xubntiag. Mauxe txawm muab cov tshauv ntawd w rau saum nruab ntug, mas cov tshauv ntawd ua rau neeg thiab tsiaj txhu mob rwj ua kiav txhab. Cov uas txawj ua yees siv kuj nyob tsis taus ntawm Mauxe xubntiag vim yog tim tej rwj, rau qhov lawv thiab cov Iyi sawvdaws mob rwj. Tiamsis Yawmsaub ua rau Falau lub siab tawv, tsis mloog ob tug hais, ib yam li Yawmsaub hais cia rau Mauxe lawd. Yawmsaub hais rau Mauxe tias, “Cia li sawv ntxov mus cuag Falau thiab hais rau nws tias, ‘Yawmsaub uas yog cov Henplais tus Vajtswv hais li no tias, Cia li tso kuv haiv neeg mus kom lawv thiaj tau mus pe hawm kuv. Mas zaum no kuv yuav tso kuv tej xwm txheej phem huvsi los raug koj thiab koj cov tub teg tub taws thiab koj cov pejxeem, xwv koj thiaj paub tias thoob plaws lub ntiajteb tsis muaj ib tug twg yuav zoo cuag li kuv. Yog kuv tsa kiag tes ua rau koj thiab koj cov pejxeem raug mob kis thiaj ua rau nej ploj ntais hauv lub ntiajteb, los kuv yeej ua tau. Tiamsis qhov uas kuv tseem tseg koj txojsia cia kuj yog kuv yuav ua kuv lub hwjchim tshwm rau koj pom xwv thiaj tshaj tawm kuv lub npe mus thoob ntiajteb. Koj tseem tsab ua loj tawm tsam kuv haiv neeg thiab tsis kam tso lawv mus. Saib nawj, tagkis lub sijhawm no kuv yuav tso lawg los hlob heev kawg. Txij thaum rhawv Iyi tebchaws los txog niaj hnub nimno tsis tau muaj dua ib zaug uas lawg hlob li no. Vim li no cia li hais kom coj koj tej nyuj thiab txhua yam uas koj muaj tom tej tshav zaub mus rau hauv tej chaw nraim, rau qhov lawg yuav los ntaus txhua tus neeg thiab txhua tus tsiaj txhu uas tseem nyob tom tshav zaub es tsis los rau hauv tej chaw nraim kom tuag tag huvsi.’ ” Falau cov tub teg tub taws uas ntshai Yawmsaub tej lus thiaj li kom lawv tej qhev thiab lawv tej tsiaj txhu maj los nraim hauv tsev. Tiamsis cov uas tsis quav ntsej Yawmsaub tej lus tseem tso lawv tej qhev thiab lawv tej tsiaj txhu nyob hauv tshav zaub. Yawmsaub hais rau Mauxe tias, “Cia li tsa tes rau saum ntuj, kom lawg thiaj li poob los thoob plaws Iyi tebchaws ntaus tej neeg thiab tsiaj txhu thiab ntaus tej txhiam liaj txhiam xwm hauv tej teb thoob plaws Iyi tebchaws.” Mauxe txawm tsa kiag nws tus pas nrig rau saum ntuj. Ces Yawmsaub txawm ua rau xob nroo nrov ntwg thiab los lawg, thiab nplaim taws liab pes vog los rau hauv av. Yawmsaub tso lawg los rau hauv Iyi tebchaws. Muaj lawg thiab nplaim taws laim pes lias hauv cov lawg ntawd tsis tu li. Los lawg hlob heev thoob plaws Iyi tebchaws, txij thaum muaj lub tebchaws los tsis txeev muaj hlob li ntawd ib zaug li. Lawg ntaus txhua yam uas nyob hauv tej tshav zaub thoob plaws Iyi tebchaws, tsis hais neeg thiab tsiaj txhu piam tag. Lawg ntaus tej zaub huvsi ntsoog tag thiab ntaus tej xyoob ntoo lov tag huvsi. Tsuas yog tshuav hauv Kausee uas cov Yixayee nyob thiaj tsis los lawg xwb. Falau thiaj hu Mauxe thiab Aloo tuaj thiab hais rau ob tug tias, “Zaum no kuv ua txhaum lawm tiag. Yawmsaub yeej ua raug lawm, kuv thiab kuv cov neeg ua txhaum. Thov koj thov Yawmsaub lauj! Kuv dhuav xob nroo thiab cov lawg no hwv lawm. Kuv yuav tso nej mus, tsis txog nej nyob no lawm.” Mauxe hais rau nws tias, “Thaum kuv tawm hauv lub nroog no lawm kuv yuav tsa tes thov Yawmsaub. Mas xob yuav ntsiag lawg yuav tu, kom koj thiaj paub tias lub ntiajteb yog Yawmsaub li. Tiamsis kuv paub tias koj thiab koj cov tub teg tub taws tseem tsis ntshai Vajtswv Yawmsaub li thiab.” Maj thiab qeb raug lawg puam tsuaj tag, rau qhov qeb tabtom txhawv thiab maj tabtom tawg paj. Tiamsis mog thiab txhuv daj tsis raug puam tsuaj rau qhov tseem tsis tau tuaj kaus. Mauxe txawm tawm ntawm Falau hauv lub nroog mus, nws kuj tsa kiag tes thov Yawmsaub. Xob txawm ntsiag, lawg thiab nag txawm tu tsis los rau hauv lub tebchaws lawm. Tiamsis thaum Falau pom tias nag thiab lawg tsis los xob tsis nroo lawm, nws thiab nws cov tub teg tub taws rov ua txhaum dua thiab ua lub siab tawv. Falau lub siab tawv tsis kam tso cov Yixayee mus ib yam li Yawmsaub hais cia rau Mauxe lawd. Yawmsaub hais rau Mauxe tias, “Cia li mus cuag Falau. Kuv ua Falau lub siab thiab nws cov tub teg tub taws lub siab tawv xwv kuv thiaj tau ua kuv tej txujci tseem ceeb no tshwm rau hauv lawv nruab nrab, mas koj thiaj tau piav rau koj tej tub ki xeeb ntxwv mloog txog qhov uas kuv tawb cov Iyi li cas thiab mloog txog tej txujci tseem ceeb uas kuv ua hauv lawv nruab nrab, kom nej thiaj paub tias kuv yog Yawmsaub.” Mauxe thiab Aloo nkag mus cuag Falau thiab hais rau nws tias, “Yawmsaub uas yog cov Henplais tus Vajtswv hais li no tias, ‘Koj yuav kwv yuav tawv tsis txo koj lub hwjchim rau ntawm kuv mus ntev li cas? Cia li tso kuv haiv neeg mus kom lawv thiaj tau mus pe hawm kuv. Yog koj tsis yeem tso kuv haiv neeg mus, mas tagkis kuv yuav coj kooj txig los rau hauv koj lub tebchaws. Tej kooj txig ntawd yuav laum nkaus lub tebchaws tsis pom av li. Tej uas tshuav tsis raug lawg ntaus, kooj txig yuav muab noj, thiab nej txhua tsob ntoo tom teb kooj yuav muab noj tag huvsi. Kooj yuav los puv nkaus koj tsev thiab puv nkaus koj cov tub teg tub taws thiab cov Iyi sawvdaws tej tsev. Txij thaum nej niam nej txiv nej pog nej yawg nyob lub tebchaws no los txog niaj hnub nimno lawv tsis txeev pom dua li no kiag li.’ ” Ces Mauxe txawm tig hlo tawm ntawm Falau mus lawm. Falau cov tub teg tub taws hais rau Falau tias, “Tus yawg no yuav ua hmab ua hlua cuab peb mus ntev li cas? Cia li tso cov neeg ntawd mus pe hawm Yawmsaub uas yog lawv tus Vajtswv los maj. Koj tseem tsis paub tias Iyi tebchaws puam tsuaj tag lawm lov?” Mauxe thiab Aloo thiaj raug coj tuaj cuag Falau dua, mas Falau hais rau ob tug tias, “Cia li mus pe hawm Yawmsaub uas yog nej tus Vajtswv. Tiamsis leejtwg yuav mus thiab?” Mauxe teb tias, “Peb yuav mus tag nrho cov laus cov hluas, peb yuav coj peb tej tub tej ntxhais thiab peb tej yaj tej tshis tej nyuj mus, rau qhov peb yuav ua kevcai noj haus xyeem rau Yawmsaub.” Falau hais rau ob tug tias, “Yog kuv kheev tso nej thiab nej cov menyuam mus, kuj cia Yawmsaub nrog nraim nej lauj! Nej ntaus tswvyim ua phem xwb. Kuv tsis kheev. Cia cov txivneej mus pe hawm Yawmsaub xwb, rau qhov nej yeej xav ua li ntawd.” Ces Falau txawm muab ob tug ntiab tawm ntawm nws mus lawm. Yawmsaub txawm hais rau Mauxe tias, “Cia li tsa koj txhais tes rau saum Iyi tebchaws kom tej kooj txig thiaj nqes los rau hauv Iyi tebchaws thiab noj tej zaub tej nroj tsuag huvsi uas tseem tshuav tsis raug lawg ntaus.” Mauxe thiaj tsa tus pas nrig rau saum Iyi tebchaws mas Yawmsaub ua kom cua ntsawj sab hnub tuaj los rau lub tebchaws ib hnub ib hmos mas tagkis sawv ntxov cua sab hnub tuaj ntsawj tau tej kooj txig tuaj lawm. Kooj txig nqes los puv nkaus Iyi tebchaws, tsaws thoob plaws Iyi tebchaws. Yav thaud tsis txeev muaj tej pab kooj txig coob npaum li zaum no, thiab yuav tsis muaj dua li lawm. Kooj laum nkaus lub tebchaws huvsi tsaus nti. Kooj noj tej zaub nroj tsuag thiab tej txiv ntoo huvsi uas lawg ntaus tsis tag. Tsis tshuav ib daim nplooj ntsuab kiag li tsis hais nplooj ntoo nplooj zaub hauv tej liaj teb thoob plaws Iyi tebchaws. Falau maj nroos hu Mauxe thiab Aloo tuaj thiab hais tias, “Kuv tau ua txhaum rau Yawmsaub uas yog nej tus Vajtswv thiab neb ob leeg lawm. Nimno thov koj zam txim rau kuv ib zaug thiab, thiab thov Yawmsaub uas yog nej tus Vajtswv muab txojkev tuag no rho mus.” Mauxe tawm ntawm Falau mus thiab thov Yawmsaub. Yawmsaub thiaj ua cua ntsawj hlob hlob sab hnub poob tuaj yaws kiag cov kooj ntawd mus rau hauv Hiavtxwv Liab, tsis tshuav ib tug nyob hauv Iyi tebchaws kiag li. Tiamsis Yawmsaub tseem ua rau Falau lub siab tawv, Falau tsis kam tso cov Yixayee mus. Yawmsaub hais rau Mauxe tias, “Cia li tsa koj txhais tes rau saum ntuj kom thiaj tsaus ntuj nti thoob plaws Iyi tebchaws, yuav tsaus tsaus xuas tes kov tau qhov tsaus ntawd.” Mauxe thiaj tsa nws txhais tes rau saum ntuj ces txawm tsaus ntuj nti dub nciab thoob plaws Iyi tebchaws tau peb hnub. Cov Iyi ib leeg ntsia tsis pom ib leeg tsis muaj ib tug sawv tau ntawm nws lub chaw tau peb hnub, tiamsis qhov chaw uas cov Yixayee sawvdaws nyob mas pom kev kaj lug. Falau thiaj hu Mauxe tuaj thiab hais tias, “Nej cia li mus pe hawm Yawmsaub lauj. Kheev nej tej menyuam nrog nej mus, tsuas yog tseg nej tej yaj tej tshis tej nyuj nyob xwb.” Tiamsis Mauxe hais tias, “Koj yuav tsum kheev peb coj tej tsiaj uas xyeem thiab tej uas hlawv xyeem mus thiab xwv peb thiaj tau xyeem rau Yawmsaub uas yog peb tus Vajtswv. Peb tej tsiaj txhu yuav tsum nrog peb mus thiab tsis tseg ib tug rau tes rau taw kiag li, rau qhov peb yuav tsum muab qee tus tsiaj hauv tej pab tsiaj ntawd xyeem pe hawm Yawmsaub uas yog peb tus Vajtswv. Peb twb tsis paub tias yuav muab tus tsiaj twg xyeem rau Yawmsaub yuav yog mus txog qhov chaw ntawd tso li paub.” Tiamsis Yawmsaub ua rau Falau lub siab tawv, Falau tsis kam tso lawv mus. Falau thiaj hais rau Mauxe tias, “Cia li khiav ntawm kuv xubntiag mus, ceev faj tib zoo tsis txhob tuaj pom kuv lub ntsej muag dua li lawm. Yog koj pom kuv ntsej muag hnub twg koj yuav tuag hnub ntawd.” Mauxe teb tias, “Ua li uas koj hais los maj. Kuv yuav tsis pom koj lub ntsej muag dua li lawm.” Yawmsaub hais rau Mauxe tias, “Tshuav ib zaug xwm txheej phem uas kuv yuav tso rau Falau thiab cov Iyi lawm xwb, dhau ntawd nws yuav tso nej tawm mus. Thaum nws tso nej tawm mus nws yuav ntiab kiag nej sawvdaws mus. Nimno koj cia li hais rau koj cov neeg kom txhua tus pojniam txivneej thov tej npauj nyiag npauj kub ntawm cov Iyi uas nrog lawv nyob koom zej koom zos.” Yawmsaub ua rau cov Iyi hlub nws haiv neeg. Thiab Falau cov tub teg tub taws thiab cov pejxeem hauv Iyi tebchaws pom tias Mauxe yog ib tug neeg tseem ceeb heev. Mauxe hais tias, “Yawmsaub hais li no tias, ‘Kwvlam ib tag hmo kuv yuav mus thoob plaws Iyi tebchaws, mas tej menyuam tub uas yog tus hlob tag nrho hauv Iyi tebchaws txij ntua Falau tus tub hlob uas nyob saum nws lub zwm txwv mus txog tus poj qhev uas zom zeb tus tub hlob thiab tag nrho rau tej tsiaj txhu thawj tug menyuam yuav tuag. Mas yuav muaj suab quaj qw nrov nrov thoob plaws Iyi tebchaws, ib txwm tsis tau txeev muaj dua li no thiab yuav tsis muaj dua li lawm. Tiamsis yuav tsis muaj ib tug dev tsem cov Yixayee thiab lawv tej tsiaj txhu kiag li, kom nej thiaj paub tias Yawmsaub cais cov Iyi thiab cov Yixayee.’ Mas koj cov tub teg tub taws sawvdaws no yuav tuaj cuag kuv thiab pe ntawm kuv xubntiag hais tias, ‘Koj thiab koj cov neeg sawvdaws cia li tawm mus.’ Dhau ntawd kuv li tawm mus.” Mauxe txawm tawm plaws ntawm Falau mus ua npau taws heev. Mas Yawmsaub hais rau Mauxe tias, “Falau yuav tsis mloog koj hais, xwv kuv thiaj tau ua txujci phimhwj tsav ntxiv rau hauv Iyi tebchaws thiab.” Mauxe thiab Aloo tau ua tej txujci phimhwj huvsi ntawd tab meeg Falau, thiab Yawmsaub ua rau Falau lub siab tawv, nws thiaj tsis kam tso cov Yixayee tawm hauv nws lub tebchaws mus. Yawmsaub hais rau Mauxe thiab Aloo hauv Iyi tebchaws tias, “Muab lub hli no ua lub ib hlis rau nej, yuav ua thawj lub hli rau xyoo tshiab rau nej. Cia li qhia rau ib tsoom Yixayee sawvdaws tias hnub xiab kaum lub hli no kom txhua tus txivneej muab ib tug menyuam yaj rau nws tsev neeg, ib yig ib tug. Yog yim twg neeg tsawg noj tsis tag ib tug menyuam yaj kuj koom nrog lwm yim uas nyob sib ti npaj raws li cov neeg muaj coob muaj tsawg thiab lawv yuav ntsuas saib lawv noj tag ntau los tsawg. Nej tus menyuam yaj yuav tsum yog ib tug txiv thiab tsis muaj chaw thuam li thiab hnub nyoog ib xyoos txawm yog menyuam yaj lossis menyuam tshis los kuj tau. Nej yuav muab yug cia txog hnub xiab kaum plaub lub hli no, mas thaum tsaus ntuj cov Yixayee sawvdaws yuav tua lawv tus menyuam yaj. Mas lawv yuav tsum muab cov ntshav pleev ob tug npuab rooj thiab saum hau qhov rooj rau lub tsev uas lawv noj ntawd. Hmo ntawd lawv yuav noj nqaij ci, ntxuag cov ncuav tsis xyaw keeb thiab ntxuag tej txuj lom iab. Tsis txhob noj nqaij nyoos thiab nqaij hau kiag li, cia li muab ci kiag ib tug kheej nrog taubhau thiab tes taw thiab plab hnyuv siab ntsws. Tsis txhob tseg ib qho seem txog kaj ntug. Tej uas tshuav rau kaj ntug yuav tsum muab hlawv pov tseg. Nej sawvdaws yuav noj li no, yuav sia siv khov kho ntawm duav thiab rau khau rawv ntawm taw thiab tuav rawv pas nrig ntawm tes. Nej yuav noj nrawm nroos. No yog Yawmsaub kevcai hla dhau. Rau qhov hmo ntawd kuv yuav hla mus hauv Iyi tebchaws mas kuv yuav tua txhua tus menyuam uas yog tus tub hlob hauv Iyi tebchaws huvsi, tsis hais neeg thiab tsiaj txhu. Thiab yuav rau txim rau Iyi tej dab huvsi. Kuv yog Yawmsaub. Cov ntshav uas nyob ntawm lub tsev uas nej nyob yuav ua chaw ntaus cim rau nej. Thaum kuv pom cov ntshav ntawd kuv yuav hla dhau nej mus, yuav tsis muaj xwm txheej phem tshwm los raug nej rau thaum kuv ntaus Iyi tebchaws. “Hnub no yuav ua hnub uas nej nco ntsoov thiab nej yuav nco muab hnub no ua kevcai noj haus hwm Yawmsaub. Nej yuav coj kevcai pam noj haus li no ib tiam dhau ib tiam mus ib txhis. Nej yuav noj ncuav tsis xyaw keeb kom puv xya hnub. Thawj hnub nej yuav muab tej keeb ncuav hauv nej tej tsev rho pov tseg huvsi. Yog leejtwg noj tej ncuav uas xyaw keeb hnub ib txog hnub xya mas yuav muab tus ntawd txiav tawm hauv cov Yixayee. Thawj hnub yuav tuaj txoos ua ke ua kevcai dawb huv thiab hnub uas xya kuj tuaj txoos ua ke ua kevcai dawb huv. Ob hnub ntawd tsis txhob ua haujlwm dabtsi kiag li tsuas yog ua pluas noj pluas haus xwb. “Nej yuav coj kevcai noj ncuav tsis xyaw keeb rau qhov hnub no ntag yog hnub uas kuv tau coj nej cov neeg tawm hauv Iyi tebchaws. Vim li no nej yuav nco muab hnub no los ua kevcai noj haus ib tiam dhau ib tiam mus ib txhis li. Lub ib hlis hnub xiab kaum plaub thaum tsaus ntuj nej yuav noj ncuav tsis xyaw keeb mus txog hnub tim nees nkaum ib thaum tsaus ntuj. Hauv xya hnub ntawd tsis kheev kom muaj ib qho keeb nyob hauv nej tej tsev kiag li. Yog leejtwg tuaj ua qhua nyob lossis yug hauv lub tebchaws kuj xij noj ncuav xyaw keeb mas tus ntawd yuav raug muab txiav tawm hauv cov Yixayee. Nej tsis txhob noj ib yam dabtsi uas xyaw keeb rau hauv txhua lub chaw uas nej nyob, yuav tsum noj tej ncuav uas tsis xyaw keeb xwb.” Ces Mauxe txawm hu Yixayee tej kev txwj laus sawvdaws tuaj ua ke thiab hais rau lawv tias, “Nej sawvdaws txhua yim cia li xaiv ib tug menyuam yaj los tua ua kevcai hla dhau. Muab ib re nplooj zaub txig theem raus cov ntshav uas nyob hauv lub phaj, coj mus pleev rau ob tug npuab rooj thiab saum hau qhov rooj. Tsis txhob kheev nej ib tug tawm hauv nws lub tsev txog kaj ntug. Rau qhov Yawmsaub yuav hla tuaj mus tua cov Iyi. Thaum Yawmsaub pom cov ntshav saum hau qhov rooj thiab ntawm ob tug npuab rooj, nws yuav hla lub qhov rooj ntawd mus, nws yuav tsis kheev tus uas tua nkag mus tua nej rau hauv nej lub tsev. Nej yuav coj txoj kevcai no rau nej thiab nej tej tub ki mus ib txhis. Thaum nej mus txog lub tebchaws uas Yawmsaub yuav pub rau nej raws li uas nws tau cog lus tseg lawm, nej yuav tsum coj txoj kevcai no. Thaum nej tej tub ki nug nej tias, ‘Txoj kevcai no lub ntsiab yog dabtsi?’ nej yuav teb tias, ‘Yog ua kevcai xyeem tsiaj hla dhau rau Yawmsaub, rau qhov Yawmsaub tau hla cov Yixayee tej tsev hauv Iyi tebchaws, rau thaum nws tua cov neeg Iyi, tiamsis tseg peb txhua tsev neeg.’ ” Cov pejxeem kuj nyo hau pe hawm Yawmsaub. Mas cov Yixayee kuj mus ua tej no raws li Yawmsaub tau hais rau Mauxe thiab Aloo lawd. Thaum ib tag hmo Yawmsaub tua tej tub hlob txhua tus hauv Iyi tebchaws, txij ntua Falau tus tub hlob uas nyob saum lub zwm txwv mus txog tus uas raug kaw hauv tsev lojfaj tus tub hlob, thiab tej tsiaj txhu thawj tug menyuam txhua tus. Mas Falau thiab nws cov tub teg tub taws sawvdaws thiab cov Iyi sawvdaws sawv tsaus ntuj nti los. Muaj suab quaj nyiav nrov thoob plaws Iyi tebchaws, vim yog tsis tshuav ib yig uas tsis muaj neeg tuag li. Falau thiaj hu Mauxe thiab Aloo tuaj cuag nws hmo ntawd thiab hais tias, “Neb thiab cov Yixayee cia li sawv tsees tsiv ntawm kuv haiv neeg mus lauj. Cia li mus pe hawm Yawmsaub raws li neb twb hais cia lawd. Cia li coj nej tej yaj tej tshis thiab nej tej nyuj mus raws li neb twb hais cia lawd. Thiab foom koob hmoov rau kuv.” Cov Iyi kuj txhib kom cov Yixayee khiav tawm hauv lawv lub tebchaws sai sai. Lawv hais tias, “Peb tuag tag lawm lauj!” Cov Yixayee thiaj muab khaubncaws qhwv tej hmoov uas tsis tau xyaw keeb thiab tej phaj uas zuaj ncuav kwv kiag saum xub pwg mus. Cov Yixayee twb ua raws li Mauxe tau hais lawd, yog thov tej npauj nyiag npauj kub thiab tej tsoos tsho ntawm cov Iyi. Thiab Yawmsaub ua rau cov Iyi hlub cov Yixayee, thiaj muab txhua yam uas cov Yixayee thov pub rau lawv. Ua li no lawv thiaj lws tau cov Iyi. Cov Yixayee sawv taw tawm ntawm lub moos Lamexe mus txog lub moos Xukhau. Suav cov txivneej kwvlam muaj 600,000 leej tsis suav cov pojniam menyuam. Muaj lwm haiv neeg coob coob nrog lawv mus thiab. Sawvdaws raws tsiaj txhu coob coob mus tsis hais yaj tshis thiab nyuj. Lawv muab tej hmoov uas zuaj lawm coj tawm hauv Iyi tebchaws mus ci ua ncuav tsis xyaw keeb. Lawv tsis xyaw keeb rau qhov lawv raug txhib tawm hauv Iyi tebchaws thiab tos tsis taus thiaj npaj tsis yeej zaub mov. Cov Yixayee nyob hauv Iyi tebchaws tau plaub puas peb caug xyoo. Thaum dhau plaub puas peb caug xyoo lawd, hnub ntawd ntag Yawmsaub haiv neeg sawvdaws tawm hauv Iyi tebchaws mus. Hmo ntawd yog hmo uas Yawmsaub zov rawv yuav coj lawv tawm hauv Iyi tebchaws. Yog li ntawd hmo ntawd kuj yog hmo uas cov Yixayee sawvdaws yuav zov rawv nco txog Yawmsaub ib tiam dhau ib tiam mus li. Yawmsaub hais rau Mauxe thiab Aloo tias, “Kevcai hla dhau yuav tsum ua li no. Tsis txhob kheev lwm haiv neeg noj li. Tiamsis tus qhev twg uas nej rho nyiaj yuav los thiab muab nws ua kevcai txiav lawm nws li noj tau. Lwm haiv neeg uas nrog nej nyob thiab tej tub zog mas tsis txhob cia noj. Yuav tsum noj hauv tsev xwb, tsis txhob coj tej nqaij ib qho tawm rau nraum zoov kiag li, thiab tsis txhob muab tej pob txha lov. Cov Yixayee sawvdaws yuav tsum ua txoj kevcai no. Thaum muaj lwm haiv neeg los nrog nej nyob thiab xav ua kevcai hla dhau xyeem rau Yawmsaub, kuj kom nws cov txivneej sawvdaws ua kevcai txiav tso, nws li tuaj ze thiab ua kevcai tau. Nws thiaj zoo ib yam li cov uas yug rau hauv lub tebchaws. Tiamsis cov uas tsis tau ua kevcai txiav mas tsis txhob noj kiag li. Cov Yixayee uas yug hauv lub tebchaws thiab lwm haiv neeg uas los nrog nej nyob yuav tsum coj txoj kevcai no ib yam nkaus.” Mas cov Yixayee sawvdaws kuj ua tej no raws li Yawmsaub tau hais rau Mauxe thiab Aloo lawm. Hnub ntawd ntag Yawmsaub coj cov Yixayee txhua xeem tawm hauv Iyi tebchaws mus raws li lawv tej pab tej pawg. Yawmsaub hais rau Mauxe tias, “Cia li muab txhua tus tub hlob pub ua kuv tug. Txhua tus Yixayee thawj plab menyuam tsis hais neeg lossis tsiaj txhu los yog puavleej yog kuv li.” Mauxe hais rau cov pejxeem tias, “Cia li nco txog hnub no uas nej tawm hauv Iyi tebchaws hauv txojkev ua qhev los, rau qhov Yawmsaub siv nws txhais tes uas muaj hwjchim coj nej tawm los. Mas tsis txhob noj tej ncuav xyaw keeb. Hnub no nej yuav tawm mus, yog lub hli Anpis. Thaum Yawmsaub coj nej mus txog cov Khana‑as, cov Hithai, cov Amaulai, cov Hivai thiab cov Yenpu lub tebchaws, yog lub tebchaws uas Yawmsaub cog lus ruaj rau nej tej poj koob yawm txwv tias yuav muab rau nej, yog lub tebchaws uas muaj kua mis thiab zib ntab ntws nto, mas nej yuav coj txoj kevcai no rau lub hli Anpis no. Yuav tsum noj ncuav tsis xyaw keeb xya hnub, mas hnub uas xya yuav ua kevcai noj haus xyeem rau Yawmsaub. Yuav noj ncuav tsis xyaw keeb kom puv xya hnub. Tsis txhob kheev kom muaj ib qho ncuav xyaw keeb nyob hauv nej lossis muaj ib qho keeb nyob hauv nej lub tebchaws kiag li. Hnub ntawd nej yuav tsum hais rau nej tej tub tias, ‘Qhov uas kuv ua li no yog vim tej xwm txheej uas Yawmsaub ua pab kuv rau thaum kuv tawm hauv Iyi tebchaws.’ Txoj kevcai no yuav zoo li lub hom thawj uas nyob hauv nej txhais tes thiab ua lub chaw nco rau ntawm nej hauv pliaj, kom Yawmsaub txoj kevcai thiaj nyob hauv nej qhov ncauj, rau qhov Yawmsaub siv nws txhais tes uas muaj hwjchim coj nej tawm hauv Iyi tebchaws los. Vim li no nej yuav tsum ua raws li tej kab ke no rau lub sijhawm uas teem cia rau txhua xyoo. “Thaum Yawmsaub coj nej mus txog cov Khana‑as lub tebchaws thiab muab lub tebchaws rau nej raws li nws cog lus tseg rau nej thiab nej tej poj koob yawm txwv lawd, mas txhua tus uas yug thawj plab los yuav muab cais pub ua Yawmsaub tug. Nej tej tsiaj txhu thawj tug menyuam uas yog txiv txhua tus yeej yog Yawmsaub li. Mas yuav muab ib tug menyuam yaj txhiv thawj tug menyuam nees luav. Yog tsis txhiv mas muab lov caj dab pov tseg. Nej yuav tsum txhiv neeg thawj tus tub hlob huvsi thiab. Yav tom hauv ntej thaum nej tej tub nug nej tias, ‘Ua cas yuav ua li no?’ cia li hais rau nws tias, ‘Yawmsaub siv nws txhais tes uas muaj hwjchim coj peb tawm hauv Iyi tebchaws hauv txojkev ua qhev los. Thaum Falau ua lub siab tawv tsis kheev tso peb mus, Yawmsaub thiaj tua txhua tus tub hlob hauv Iyi tebchaws tsis hais neeg thiab tsiaj txhu. Vim li no kuv thiaj muab thawj plab menyuam tsiaj uas yog txiv xyeem rau Yawmsaub tiamsis txhua tus tub hlob kuv muab txhiv cia.’ Txoj kevcai no yuav zoo li lub hom thawj uas nyob hauv nej txhais tes thiab ua lub chaw nco rau ntawm nej hauv pliaj, rau qhov Yawmsaub siv nws txhais tes uas muaj hwjchim coj peb tawm hauv Iyi tebchaws los.” Thaum Falau tso cov Yixayee tawm mus lawm, txawm yog txojkev hauv Filixatee tebchaws ze dua los Vajtswv tsis coj lawv taug txojkev ntawd, rau qhov Vajtswv hais tias, “Ntshai tsam thaum kuv haiv neeg ntsib kev ua rog lawv yuav ntxeev siab thim rov qab mus Iyi tebchaws.” Vajtswv thiaj coj lawv lug mus hauv tebchaws moj sab qhua rau Hiavtxwv Liab. Cov Yixayee tawm hauv Iyi tebchaws muaj cuab yeej ua rog txhij zog. Mauxe coj Yauxej cov pob txha mus thiab, vim yog Yauxej kom cov Yixayee cog lus ruaj hais tias, “Vajtswv yuav los saib nej, mas nej yuav tsum coj kuv cov pob txha tawm ntawm no mus thiab.” Lawv tawm ntawm Xukhau mus tsuam chaw rau ntawm Ethas uas npuas ntug tebchaws moj sab qhua. Thaum nruab hnub Yawmsaub nyob hauv ib tug ncej huab coj lawv kev, thaum hmo ntuj Yawmsaub nyob hauv ib tug ncej hluavtaws ci rau lawv pom kev, xwv lawv thiaj mus tau kev nruab hnub hmo ntuj. Tus ncej huab tuaj nruab hnub thiab tus ncej hluavtaws tuaj hmo ntuj tsis ncaim ntawm cov Yixayee hauv ntej kiag li. Yawmsaub hais rau Mauxe tias, “Cia li hais rau cov Yixayee kom thim rov qab mus tsuam chaw rau ntawm Pihahilau uas nyob ntawm Midoo thiab hiavtxwv ntu nruab nrab, uas nyob ntawm Npa‑as Xefoo ib sab. Mas tsuam chaw ze ntug hiavtxwv rau qhov ntawd. Rau qhov Falau yuav hais txog cov Yixayee tias, ‘Lawv mus khuab rau ntawm ntug nqhuab, tebchaws moj sab qhua thaiv lawv kev lawm.’ Mas kuv yuav ua rau Falau lub siab tawv, nws thiaj yuav raws qab tuaj, mas kuv yuav tau koob meej ntawm Falau thiab nws cov tub rog huvsi. Mas cov Iyi yuav paub tias kuv yog Yawmsaub.” Lawv thiaj ua raws li ntawd. Thaum muaj neeg hais rau vajntxwv Iyi tias cov Yixayee khiav tag mus lawm, Falau thiab nws cov tub teg tub taws txawm ntxeev siab rau qhov uas tso cov Yixayee mus, thiab hais tias, “Ua cas peb ua li no es thiaj tso cov Yixayee khiav tawm ntawm qhov uas ua peb qhev mus lawm?” Falau txawm npaj nws li tsheb ua rog thiab coj nws pab tub rog nrog nws mus. Nws coj rau pua lub tsheb ua rog uas zoo tshaj plaws thiab coj cov tsheb ua rog tag nrho hauv Iyi tebchaws mus, muaj thawj tub rog kav txhua lub tsheb huvsi. Yawmsaub ua rau Iyi tus vajntxwv Falau lub siab tawv, nws thiaj caum cov Yixayee uas twb khiav mus ua muaj plhus ntxias raws qab. Cov Iyi uas caum lawv mus yog tag nrho Falau tej nees thiab tsheb ua rog thiab nws tej tub rog caij nees thiab nws pab tub rog huvsi, mas lawv caum cuag cov Yixayee tseem tsuam chaw nyob ntawm ntug hiavtxwv ze Pihahilau uas nyob ntawm Npa‑as Xefoo ib sab. Thaum Falau tuaj ze, cov Yixayee tsa muag ntsia pom cov Iyi caum tuaj yuav cuag lawv mas lawv ntshai kawg li. Cov Yixayee thiaj quaj qw rau Yawmsaub. Lawv hais rau Mauxe tias, “Koj coj peb los tuag rau hauv tebchaws moj sab qhua vim tsis muaj qhov ntxa rau hauv Iyi tebchaws lov? Koj coj peb tawm hauv Iyi tebchaws los ua dabtsi? Peb twb hais rau koj hauv Iyi tebchaws lawm los tsis yog? ‘Tso peb nyob peb, cia peb ua cov Iyi qhev.’ Qhov uas ua cov Iyi qhev ntawd kuj zoo dua li uas los tuag rau hauv tebchaws moj sab qhua no.” Mauxe hais rau cov pejxeem tias, “Tsis txhob ntshai, ywj meem nyob ruaj, saib Yawmsaub txojkev cawm dim uas nws yuav ua rau nej pom hnub no. Cov Iyi uas hnub no nej pom, nej yuav tsis pom dua li lawm. Yawmsaub yuav nyob nej chaw ua rog, nej tsuas nyob twjywm xwb.” Yawmsaub hais rau Mauxe tias, “Ua cas koj quaj qw rau kuv? Koj cia li hais kom cov Yixayee mus lawm tom hauv ntej. Koj cia li tsa koj tus pas nrig, thiab tsa koj txhais tes rau saum hiavtxwv ua rau dej hiavtxwv faib rau ob sab, kom cov Yixayee thiaj mus tau saum cov av qhuav hauv nruab nrab hiavtxwv hla mus. Kuv yuav ua rau cov Iyi siab tawv kom lawv thiaj raws qab tuaj. Mas kuv yuav tau koob meej ntawm Falau thiab nws tej tub rog thiab nws tej tsheb nees thiab nws cov tub rog caij nees huvsi. Thaum kuv tau koob meej ntawm Falau thiab nws tej tsheb nees thiab nws cov tub rog caij nees, cov Iyi yuav paub tias kuv yog Yawmsaub.” Vajtswv tus tubtxib saum ntuj uas ua cov Yixayee ntej ntawd txawm rov mus nyob tom lawv qub qab, thiab tus ncej huab uas ua lawv ntej kuj rov mus nyob tom lawv qub qab, yog los nyob ntawm cov Iyi cov tub rog thiab cov Yixayee ntu nruab nrab. Tus ncej huab ua rau sab uas npuas cov Iyi tsaus ntuj ua rau sab uas npuas cov Yixayee pom kev, mas ib hmos kaj ntug ob tog tuaj tsis tau sib ze. Ces Mauxe txawm tsa nws txhais tes rau saum hiavtxwv mas Yawmsaub ua rau cua ntsawj hlob hlob sab hnub tuaj tuaj ntsawj dej hiavtxwv ib hmos ua rau hiavtxwv qhuav qhawv muab dej faib rau ob sab. Cov Yixayee thiaj mus taug kev qhuav qhawv hauv nruab nrab hiavtxwv, cov dej faib kiag rau sab xis thiab sab laug ua ntsa loog rau lawv. Cov Iyi kuj raws lawv qab rau hauv nruab nrab hiavtxwv, tag nrho Falau tej nees thiab tej tsheb ua rog thiab cov tub rog caij nees huvsi. Thaum yuav kaj ntug Yawmsaub tsa muag ntsia hauv tus ncej hluavtaws thiab tus ncej huab tuaj pom Iyi cov tub rog, mas nws ua rau cov Iyi ceeb zom zaws. Nws ua rau lawv tej log tsheb cam pes nkaus mus tsis tshua taus. Cov Iyi thiaj sib hais tias, “Peb cia li khiav ntawm cov Yixayee rov qab rau qhov Yawmsaub nyob lawv chaw ua rog rau cov Iyi.” Thaum ntawd Yawmsaub txawm hais rau Mauxe tias, “Cia li tsa koj txhais tes rau saum hiavtxwv ua rau cov dej hiavtxwv nphau rov los nyab cov Iyi thiab lawv tej tsheb ua rog thiab cov tub rog caij nees.” Mauxe txawm tsa tes rau saum hiavtxwv mas thaum kaj ntug dej hiavtxwv thiaj nphau los yam nkaus li qub. Cov Iyi khiav tej dej nphau ntawd tiamsis Yawmsaub muab cov Iyi xyeeb rau hauv nruab nrab hiavtxwv. Dej nphau rov los nyab kiag tej tsheb thiab cov tub rog caij nees thiab Falau cov tub rog huvsi uas caum lawv mus rau hauv hiavtxwv, tsis tshuav ib tug li. Tiamsis cov Yixayee taug kev qhuav qhawv hauv nruab nrab hiavtxwv, cov dej faib kiag rau sab xis thiab sab laug ua ntsa loog rau lawv. Yog li no hnub ntawd Yawmsaub cawm cov Yixayee dim hauv cov Iyi txhais tes, mas cov Yixayee pom cov Iyi tej cev tuag ntawm ntug hiavtxwv. Cov Yixayee pom tej haujlwm loj uas Yawmsaub tau ua rau cov Iyi, lawv kuj ntshai Yawmsaub thiab lawv ntseeg Yawmsaub thiab ntseeg nws tus qhev Mauxe. Thaum ntawd Mauxe thiab cov Yixayee hu zaj nkauj no rau Yawmsaub hais tias, “Kuv yuav hu nkauj qhuas Yawmsaub rau qhov nws twb kov yeej loj kawg nkaus, nws muab tej nees thiab tej tub rog caij nees laim kiag rau hauv hiavtxwv. Yawmsaub yog kuv lub zog thiab yog kuv zaj nkauj, thiab nws yog tus uas cawm kuv dim. Nws yog kuv tus Vajtswv ntag, kuv yuav qhuas nws, nws yog kuv txiv tus Vajtswv, kuv yuav qhuas ntxhias nws. Yawmsaub yog tus txawj ua rog, nws lub npe hu ua Yawmsaub. Yawmsaub muab Falau tej tsheb ua rog thiab nws tej tub rog laim kiag rau hauv hiavtxwv, nws cov thawj rog uas txawj heev kuj tog kiag rau hauv Hiavtxwv Liab. Dej nphau los nyab kiag lawv, lawv tog rau hauv qab thu yam li lub pob zeb. Au Yawmsaub, koj txhais tes xis muaj hwjchim loj kawg. Au Yawmsaub, koj txhais tes xis tsoo yeeb ncuab tawg ntsoog tag. Koj siv koj lub hwjchim meej mom loj kawg muab cov uas tawm tsam koj ntxeev kiag pov tseg, koj tso koj txojkev npau taws muab lawv hlawv kub hnyiab tag yam nkaus li quav nyab. Koj lub qhov ntswg ua pa ntsawj dej sawv siab zuj zus, tej dej sawv siab ua ib phab, tej dej hauv hiavtxwv kuj nkoog khov kho. Cov yeeb ncuab hais tias, ‘Kuv yuav raws qab, kuv yuav caum cuag, kuv yuav muab tej uas txeeb tau los faib. Kuv yuav ua txhua yam rau lawv raws li kuv lub siab xav kom pov khawv nkaus. Kuv yuav rho ntaj, kuv txhais tes yuav ua kom lawv puam tsuaj.’ Koj tshuab koj li cua ntsawj tuaj, dej hiavtxwv nyab kiag lawv. Lawv tog rau hauv cov dej uas nphau nyab kiag los ib yam li txhuas. “Au Yawmsaub, tej timtswv huvsi tus twg zoo cuag li koj? Tus twg zoo cuag li koj, uas dawb huv kawg nkaus, thiab muaj lub koob meej uas txaus hwm kawg, thiab ua tej txujci phimhwj? Koj tsa kiag koj txhais tes xis, lub ntiajteb kuj muab lawv nqos tag nrho. “Koj muaj txojkev hlub ruaj khov es coj haiv neeg uas koj txhiv dim lawm. Koj siv koj lub zog coj lawv txoj hauv kev mus txog koj lub chaw nyob uas dawb huv. Ib tsoom neeg tau hnov, mas lawv tshee hnyo. Cov neeg uas nyob hauv Filixatee tebchaws poob siab kawg. Nimno Edoo cov thawj kuj ntshai kawg, Mau‑a cov nom tswv kuj ntshai ib ce tshee hnyo, cov neeg hauv Khana‑as tebchaws sawvdaws siab ntsws yaj tag. Lawv raug kev txhawj kev ntshai ua siab puas tsus. Au Yawmsaub, vim yog koj txhais tes uas muaj hwjchim loj kawg, lawv thiaj li nyob twjywm tsis ua zog yam li pob zeb mus txog thaum koj haiv neeg hla dhau tag lawm, mus txog thaum cov neeg uas koj twb txhiv dim lawm hla dhau mus. Koj yuav coj lawv los thiab muab lawv txawb rau saum koj lub roob, au Yawmsaub, yog lub chaw uas koj ua cia rau koj nyob, thiab yog lub chaw pe hawm koj uas koj txhais tes tsim cia. Yawmsaub yuav kav mus ib txhis tsis kawg.” Thaum Falau tej nees thiab tej tsheb ua rog thiab nws tej tub rog caij nees nqes mus rau hauv hiavtxwv, Yawmsaub kuj ua kom dej hiavtxwv nphau los nyab kiag, tiamsis cov Yixayee mas taug kev qhuav qhawv hauv nruab nrab hiavtxwv. Aloo tus muam Mili‑as uas ua tus cev Vajtswv lus txawm coj ib lub nruas npuaj hauv nws txhais tes thiab cov pojniam sawvdaws npuaj nruas seev cev raws nws qab. Mili‑as hu nkauj rau lawv tias, “Cia li hu nkauj qhuas Yawmsaub rau qhov nws twb kov yeej loj kawg nkaus. Nws muab tej nees thiab tej tub rog caij nees laim kiag rau hauv hiavtxwv.” Dhau ntawd Mauxe coj cov Yixayee tawm ntawm Hiavtxwv Liab mus rau hauv tebchaws moj sab qhua Su. Lawv mus tau peb hnub ke hauv tebchaws moj sab qhua nrhiav tsis tau dej haus kiag li. Thaum lawv los txog ntawm Mala, lawv kuj haus tsis tau cov dej ntawm Mala rau qhov cov dej ntawd iab heev. Vim li no thiaj hu ua Mala. Cov pejxeem thiaj li yws yws Mauxe tias, “Peb yuav haus dabtsi?” Mauxe txawm tsa suab thov Yawmsaub. Yawmsaub thiaj qhia ib tog ntoo rau Mauxe pom, mas nws muab pov rau hauv dej, dej txawm qab lawm. Thaum nyob qhov chaw ntawd Yawmsaub thiaj qhia nws tej kab ke thiab nws tej kevcai rau lawv thiab sim lawv lub siab. Yawmsaub hais tias, “Yog nej ua tib zoo mloog Yawmsaub uas yog nej tus Vajtswv tej lus thiab ua tej uas hum nws lub siab, thiab tig ntsej mloog nws tej lus nkaw thiab ua raws li nws tej kab ke txhua qhov, mas tej mob nkeeg uas kuv ua rau cov Iyi ntawd kuv yuav tsis tso rau saum nej kiag li, rau qhov kuv yog Yawmsaub, yog tus uas kho nej.” Dhau ntawd lawv txawm los txog ntawm Elee uas muaj kaum ob lub qhov dej txhawv thiab muaj xya caum tsob toov laj. Lawv txawm tsuam chaw nyob ntawm cov qhov dej ntawd. Lawv sawv kev ntawm Elee mas hnub tim kaum tsib lub ob hlis suav txij thaum lawv tawm hauv Iyi tebchaws los, ib tsoom Yixayee sawvdaws los txog hauv tebchaws moj sab qhua Xis uas nyob ntawm Elee thiab Xinai ntu nruab nrab. Ib tsoom Yixayee sawvdaws yws yws Mauxe thiab Aloo hauv tebchaws moj sab qhua. Lawv hais rau ob tug tias, “Peb yeem tuag rau Yawmsaub tes hauv Iyi tebchaws rau thaum peb nyob ntawm tej laujkaub nqaij thiab noj tej zaub mov tsau npo zoo dua. Koj coj peb sawvdaws los yoo tshaib tuag tag rau hauv tebchaws moj sab qhua no xwb.” Mas Yawmsaub hais rau Mauxe tias, “Kuv yuav tso zaub mov saum ntuj los rau nej ib yam li tso nag los. Cov pejxeem yuav tsum niaj tagkis tawm mus khaws kom txaus noj ib hnub ntawd, kuv thiaj tau sim lawv lub siab saib lawv yuav ua raws li kuv tej lus los tsis ua. Hnub rau thaum lawv khaws tej uas yuav coj los tsev lawv yuav tsum khaws tshaj ib npaug rau saud li uas niaj hnub txeev khaws.” Mauxe thiab Aloo thiaj hais rau cov Yixayee sawvdaws tias, “Thaum tsaus ntuj nej yuav paub tias Yawmsaub yog tus uas coj nej tawm hauv Iyi tebchaws los. Thaum kaj ntug nej yuav pom Yawmsaub lub hwjchim ci ntsa iab, rau qhov Yawmsaub twb hnov tej lus uas nej yws nws lawm. Wb ob leeg yog leejtwg es nej yuav yws wb?” Mauxe hais tias, “Thaum yuav tsaus ntuj Yawmsaub yuav pub nqaij rau nej noj thiab thaum kaj ntug yuav pub mov rau nej noj tsau npo rau qhov nws twb hnov tej lus uas nej yws nws lawm. Wb ob leeg yog leejtwg? Nej tsis yws wb tiamsis yog nej yws Yawmsaub.” Mauxe hais rau Aloo tias, “Cia li hais rau ib tsoom Yixayee sawvdaws tias, ‘Txav los ze Yawmsaub, rau qhov nws twb hnov tej lus uas nej yws lawm.’ ” Thaum Aloo tabtom hais rau ib tsoom Yixayee sawvdaws mloog ntawd, lawv tsa muag ntsia rau tebchaws moj sab qhua mas pom Yawmsaub lub hwjchim ci ntsa iab tshwm rau hauv tus ncej huab. Yawmsaub hais rau Mauxe tias, “Kuv twb hnov tej lus uas cov Yixayee yws lawm. Cia li hais rau lawv tias, ‘Thaum tsaus ntuj zuag nej yuav tau nqaij noj, thiab thaum kaj ntug nej yuav tau mov noj tsau npo. Mas nej yuav paub tias kuv yog Yawmsaub uas yog nej tus Vajtswv.’ ” Thaum yuav tsaus ntuj tej pab noog ws ya los puv nkaus lawv tej chaw nyob, thiab thaum kaj ntug kuj muaj lwg ntsu ib ncig lawv tej chaw tsuam. Thaum tej lwg ntawd qhuav tag lawm kuj muaj tej nyuag nplai nyias nyias zoo li te nyob saum npoo av hauv tebchaws moj sab qhua. Thaum cov Yixayee pom mas lawv sib nug tias, “No yog dabtsi ne?” rau qhov lawv tsis paub tias yog dabtsi. Mauxe hais rau lawv tias, “No yog tej mov uas Yawmsaub pub rau nej noj. Yawmsaub kom nej ua li no. Nej txhua tus khaws npaum li uas txaus nej noj tsau, ib leeg khaws ib aumaw raws li muaj neeg coob los tsawg nyob hauv nws lub tsev ntaub.” Cov Yixayee ua raws li ntawd. Ib txhia khaws ntau ib txhia khaws tsawg. Tiamsis thaum lawv muab lub aumaw luj, tus uas khaws tau ntau kuj tsis muaj seem, tus uas khaws tau tsawg kuj muaj txaus. Txhua tus khaws npaum li uas txaus nws noj. Mauxe hais rau lawv tias, “Tsis pub leejtwg khaws ib qho cia rau tagkis.” Tiamsis lawv tsis mloog Mauxe hais. Muaj qee leej khaws ib qho cia rau tagkis, mas cov uas khaws ntawd kuj lwj kas thiab tsw lwj. Mauxe thiaj chim rau lawv. Lawv niaj tagkis nyias khaws txaus nyias noj tsau xwb. Thaum tshav ntuj kub tej mov uas lawv tsis khaws txawm yaj tag lawm. Thaum txog hnub rau lawv khaws ob npaug, ib leeg khaws ob aumaw. Thaum Yixayee cov thawj tuaj hais rau Mauxe paub, Mauxe hais rau lawv tias, “No yog tej uas Yawmsaub hais kom nej ua, ‘Tagkis yog hnub uas caiv so tiag tiag, yog hnub Xanpatau dawb huv rau Yawmsaub. Hnub no yuav ci dabtsi kuj cia li ci, yuav hau dabtsi kuj cia li hau, tej uas tshuav kuj khaws cia rau tagkis.’ ” Lawv khaws cia rau tagkis raws li Mauxe hais rau lawv, mas tej mov ntawd kuj zoo tsis lwj tsis ua kas. Mauxe hais tias, “Hnub no cia li noj tej mov ntawd, rau qhov hnub no yog Yawmsaub hnub Xanpatau. Hnub no nej yuav tsis pom tej mov ntawd tom tshav puam kiag li. Nej yuav khaws rau hnub xwb, mas hnub xya uas yog hnub Xanpatau yuav tsis muaj lawm.” Thaum txog hnub xya muaj qee leej mus khaws tiamsis nrhiav tsis muaj li. Yawmsaub hais rau Mauxe tias, “Nej yuav tsis kam ua raws li kuv tej lus nkaw thiab kuv tej kevcai ntev li cas? Saib maj, Yawmsaub twb muab hnub Xanpatau rau nej, vim li no hnub rau nws pub mov txaus nej noj ob hnub. Nej txhua tus yuav tsum so nyob hauv tsev, tsis kheev leejtwg tawm hauv nws lub tsev rau hnub xya.” Yog li no cov pejxeem thiaj li so rau hnub xya. Cov Yixayee hu cov mov ntawd ua mana. Tej lub dawb paug zoo li noob zaub txhwb qaib, thiab qab yam nkaus li tej ncuav nyias nyias uas xyaw zib ntab. Mauxe hais tias, “No yog tej uas Yawmsaub hais kom ua, ‘Luj ib aumaw mana muab khaws cia ib tiam dhau ib tiam mus li, kom lawv thiaj tau pom cov mov uas kuv yug nej hauv tebchaws moj sab qhua rau thaum kuv coj nej tawm hauv Iyi tebchaws los.’ ” Mauxe hais rau Aloo tias, “Muab ib lub me hub los ntim ib aumaw mana khaws cia rau ntawm Yawmsaub lub xubntiag ib tiam dhau ib tiam mus li.” Aloo thiaj muab cov mana ntawd tso rau ntawm lub phij xab uas muaj Yawmsaub tej lus, muab khaws cia raws li Yawmsaub hais rau Mauxe Cov Yixayee noj mana tau plaub caug xyoo los txog thaum lawv mus txog lub tebchaws uas nyob tau. Lawv noj mana los txog ntawm Khana‑as ciam teb. (Ib efa muaj kaum aumaw.) Ib tsoom Yixayee sawvdaws tshais chaw ntawm tebchaws moj sab qhua Xis mus ua ib ntus ib ntus raws li Yawmsaub hais. Lawv los tsuam chaw nyob rau ntawm Lefidee, tiamsis tsis muaj dej rau cov pejxeem haus. Vim li no lawv thiaj nrhiav txim rau Mauxe thiab hais rau nws tias, “Muab dej rau peb haus maj.” Mauxe hais rau lawv tias, “Nej nrhiav txim rau kuv ua dabtsi? Ua cas nej yuav sim Yawmsaub?” Tiamsis cov pejxeem nqhis dej heev ntawm lub chaw ntawd, lawv thiaj yws Mauxe tias, “Ua cas koj coj peb tawm hauv Iyi tebchaws los ua rau peb thiab peb tej menyuam thiab tej tsiaj txhu nqhis dej tuag?” Mauxe thiaj quaj thov Yawmsaub tias, “Kuv yuav ua li cas rau cov pejxeem no? Lawv twb yuav xuas pob zeb muab kuv ntaus tuag.” Yawmsaub hais rau Mauxe tias, “Cia li ua cov pejxeem ntej mus thiab coj Yixayee tej kev txwj laus qee leej nrog koj mus. Thiab tuav rawv tus pas nrig uas koj nplawm tus dej Nai mus thiab. Kuv yuav sawv tab meeg ntawm koj xubntiag saum phab zeb ntawm lub roob Haule. Koj cia li ntaus phab zeb, dej yuav txhawv los rau cov pejxeem haus.” Mauxe ua raws li ntawd tab meeg Yixayee cov kev txwj laus. Mauxe hu qhov chaw ntawd tias Maxa thiab Melinpa, vim yog cov Yixayee nrhiav txim rau nws thiab sim Yawmsaub hais tias, “Yawmsaub nrog peb nyob los tsis nyob lawm?” Thaum ntawd cov Amalej tuaj ua rog rau cov Yixayee ntawm Lefidee. Mauxe hais rau Yausua tias, “Cia li xaiv cov txivneej tawm mus ua rog rau cov Amalej. Tagkis kuv yuav sawv ntsug tuav rawv Vajtswv tus pas nrig hauv kuv txhais tes saum lub hauv roob.” Yausua kuj ua raws li Mauxe hais, nws mus ua rog rau cov Amalej. Mauxe thiab Aloo thiab Hawj kuj nce mus saum lub hauv roob. Mauxe tsa tes thaum twg, cov Yixayee kov yeej thaum ntawd, qhau tes thaum twg cov Amalej txawm kov yeej thaum ntawd. Tiamsis Mauxe tes tsaug leeg. Aloo thiab Hawj thiaj coj ib lub pob zeb los rau Mauxe zaum, mas ob tug thiaj pab tsa Mauxe ob txhais tes ib leeg ib sab, nws txhais tes thiaj tsa khov kho mus txog hnub poob qho. Yausua thiaj xuas ntaj tua yeej cov Amalej swb kiag. Yawmsaub hais rau Mauxe tias, “Cia li sau tej no rau hauv ntawv kom thiaj nco tau thiab piav rau Yausua mloog tias kuv yuav muab cov Amalej ntxuav kom ploj tag tsis muaj leejtwg nco tau lawv rau hauv qab ntuj no.” Mauxe thiaj ua ib lub thaj xyeem rau Yawmsaub thiab tis npe hu tias, Yawmsaub yog kuv tus chij, thiab nws hais tias, “Rau qhov muaj txhais tes tsa rau saum Yawmsaub lub zwm txwv. Mas Yawmsaub yuav ua rog rau cov Amalej ib tiam dhau ib tiam mus li.” Yethoo uas yog cov Midee tus pov thawj thiab yog Mauxe yawm txiv, tau hnov txog tej haujlwm uas Vajtswv ua pab Mauxe thiab pab Vajtswv haiv neeg Yixayee rau thaum Yawmsaub coj lawv tawm hauv Iyi tebchaws los. Mauxe yawm txiv Yethoo tau txais Mauxe tus pojniam Xipaula rau thaum Mauxe xa Xipaula mus, thiab nws ob tug tub. Ib tug hu ua Kawsoo (rau qhov nws hais tias, “Kuv yog ib tug uas ua qhua nyob rau hauv luag tebchaws.”) Thiab ib tug hu ua Eliyexaw (rau qhov nws hais tias, “Kuv txiv tus Vajtswv yog tus uas pab kuv thiab cawm kuv dim hauv Falau rab ntaj.”) Mauxe yawm txiv Yethoo coj Mauxe ob tug tub thiab Mauxe tus pojniam tuaj rau Mauxe hauv tebchaws moj sab qhua uas lawv tsuam chaw nyob ntawm Vajtswv lub roob. Nws txib neeg mus hais rau Mauxe tias, “Koj yawm txiv Yethoo coj koj pojniam thiab ob tug tub tuaj rau koj.” Mauxe thiaj tawm mus tos yawm txiv thiab pe thiab nwj nws. Ob tug sib tham txog kev noj qab nyob zoo thiab nkag los rau hauv tsev ntaub. Mauxe piav rau nws yawm txiv mloog txog txhua yam uas Yawmsaub ua rau Falau thiab ua rau cov Iyi vim yog saib rau cov Yixayee, thiab tej kev ceeblaj huvsi uas raug cov Yixayee ntawm ib tog kev thiab Yawmsaub tau cawm lawv dim li cas. Yethoo kuj zoo siab heev rau txhua yam zoo uas Yawmsaub tau ua pab cov Yixayee rau thaum nws cawm lawv dim hauv cov Iyi txhais tes. Yethoo thiaj hais tias, “Qhuas Yawmsaub uas tau cawm nej dim hauv cov Iyi txhais tes thiab hauv Falau txhais tes, yog cawm cov Yixayee sawvdaws dim hauv cov Iyi txhais tes. Nimno kuv paub tias Yawmsaub loj dhau tej timtswv huvsi, rau qhov nws ua tej no rau thaum cov Iyi tsuj yuam cov Yixayee ua khav ntxhias.” Mauxe yawm txiv Yethoo kuj muab tsiaj ua kevcai hlawv xyeem thiab tua tsiaj xyeem rau Vajtswv. Aloo thiab Yixayee cov kev txwj laus sawvdaws tuaj nrog Mauxe yawm txiv noj ib pluag mov ntawm Vajtswv xubntiag. Tagkis tom qab Mauxe zaum tu plaub rau cov pejxeem. Lawv sawv vij vog Mauxe thaum sawv ntxov mus txog tsaus ntuj. Thaum Mauxe yawm txiv pom txhua yam haujlwm uas Mauxe ua rau cov pejxeem ntawd, nws hais tias, “Koj ua dabtsi li no rau cov pejxeem? Ua cas koj tib leeg nyob tu plaub li no, thiab cov pejxeem sawvdaws yuav sawv vij koj tagkis txog tsaus ntuj?” Mauxe teb yawm txiv tias, “Yog cov pejxeem tuaj cuag kuv kom kuv ua nug rau Vajtswv. Thaum lawv muaj plaub muaj ntug lawv tuaj cuag kuv, kuv thiaj tu tau rau ob tog, thiab kuv qhia rau lawv paub txog Vajtswv tej kab ke thiab tej uas Vajtswv phua cai.” Mauxe yawm txiv thiaj hais rau nws tias, “Koj ua li no tsis zoo. Koj thiab cov pejxeem uas tuaj no yuav qaug zog tag rau qhov tej uas koj ua no hnyav dhau koj lub zog lawm, thiab koj tib leeg xwb ua tsis taus. Koj mloog kuv hais, kuv yuav taw qhia koj thiab thov Vajtswv nrog nraim koj. Koj ua tus uas sawv cev ntawm cov pejxeem rau Vajtswv, coj lawv tej plaub mus ua nug rau Vajtswv. Koj yuav qhuab qhia kom lawv paub tej kab ke thiab tej uas phua cai rau lawv, thiab qhia lawv paub ua lawv lub neej li cas thiab paub tej uas lawv yuav tsum ua. Tsis tag li ntawd xwb, koj cia li xaiv cov txivneej hauv cov Yixayee uas muaj peevxwm thiab paub ntshai Vajtswv thiab tso siab tau thiab ntxub noj nyiaj xiab. Tsa lawv cov no los ua cov uas kav pejxeem, kav ib txhiab leej thiab kav ib puas leej thiab kav tsib caug leej thiab kav kaum leej. Cia lawv tu cov pejxeem tej plaub txhua lub sijhawm. Tej tshaj plaub loj, cia lawv coj tuaj cuag koj, hos tej plaub me cia lawv tu lawv xwb. Ua li no thiaj yoojyim rau koj thiab lawv thiaj nrog koj ris lub nra hnyav. Yog koj ua li no thiab Vajtswv qhia koj ua, mas koj thiaj thev taus thiab cov pejxeem sawvdaws no thiaj tau rov mus tsev kaj siab lug.” Mauxe kuj mloog nws yawm txiv tej lus thiab ua raws li nws qhia txhua yam. Mauxe xaiv cov txivneej uas muaj peevxwm hauv cov Yixayee ua cov pejxeem li thawj, tsa kav ib txhiab leej kav ib puas leej kav tsib caug leej thiab kav kaum leej. Mas lawv cov no tu cov pejxeem tej plaub txhua lub sijhawm. Tej plaub uas ceeblaj lawv li coj mus cuag Mauxe, tej plaub me me lawv tu lawv xwb. Ces Mauxe txawm xa nws yawm txiv rov mus, yawm txiv thiaj rov qab mus rau nws lub tebchaws lawm. Lub peb hlis hnub xiab ib suav txij thaum cov Yixayee tawm hauv Iyi tebchaws los hnub ntawd lawv los txog hauv tebchaws moj sab qhua Xinai. Thaum lawv sawv kev tawm ntawm Lefidee lawv los txog hauv tebchaws moj sab qhua Xinai, lawv kuj tsuam chaw nyob hauv tebchaws moj sab qhua. Cov Yixayee tsuam chaw nyob ntawm taw roob Xinai. Mauxe nce mus cuag Vajtswv, mas Yawmsaub hu saum lub roob tuaj rau nws tias, “Cia li hais li no rau Yakhauj caj ces uas yog haiv neeg Yixayee tias, ‘Nej twb pom tej uas kuv ua rau cov Iyi lawm, thiab qhov uas kuv kwv kiag nej yam nkaus li tus dav kwv menyuam saum nws phab tis, thiab coj nej los cuag kuv. Nimno yog nej mloog kuv lus thiab ua raws li kuv tej lus cog tseg, mas nej yuav ua kuv teej kuv tug hauv ib tsoom neeg sawvdaws. Tag nrho lub ntiajteb huvsi yog kuv li, tiamsis nej yuav ua ib lub tebchaws pov thawj rau kuv thiab ua haiv neeg dawb huv.’ Koj yuav hais tej lus no rau cov Yixayee mloog.” Mauxe thiaj rov los hu cov kev txwj laus hauv cov pejxeem tuaj ua ke mas piav txhua lo lus uas Yawmsaub hais rau nws lawm rau lawv mloog. Mas cov pejxeem sawvdaws ib txhij teb hais tias, “Peb yuav ua txhua yam uas Yawmsaub hais ntawd.” Mauxe thiaj coj cov pejxeem tej lus mus hais rau Yawmsaub. Yawmsaub hais rau Mauxe tias, “Kuv yuav los rau ntawm koj hauv tauv huab uas tsaus nti, kom cov pejxeem thiaj li hnov thaum kuv hais lus rau koj, mas lawv thiaj li tso siab rau koj mus ib txhis.” Mauxe coj cov pejxeem tej lus mus hais rau Yawmsaub, mas Yawmsaub hais rau Mauxe tias, “Cia li mus thiab tu kom cov pejxeem dawb huv rau kuv rau hnub no thiab tagkis, thiab kom lawv ntxhua lawv tej tsoos tsho. Cia li npaj kom txhij rau hnub uas peb, rau qhov hnub uas peb ntawd Yawmsaub yuav nqes los rau saum lub roob Xinai tab meeg cov pejxeem sawvdaws. Koj yuav tsum kem ciam thaiv cov pejxeem nyob puag ncig lub roob, thiab hais tias, ‘Nej yuav tsum ceev faj tsis txhob nce mus rau saum lub roob thiab tsis txhob kov lub taw roob ntawd kiag li. Yog leejtwg kov lub roob ntawd, nws yuav raug muab tua pov tseg. Tsis txhob xuas tes kov tus ntawd kiag li, cia li xuas pob zeb ntaus nws tuag lossis xuas hneev tua nws. Tsis hais tsiaj txhu thiab neeg los xij, tsis txhob tseg ciaj sia kiag li.’ Thaum hnov raj kub yaj nrov ntev mas lawv mus tau rau saum lub roob.” Mauxe nqes saum roob los rau ntawm cov pejxeem, thiab tu kom cov pejxeem dawb huv rau Yawmsaub. Mas lawv ntxhua lawv tej tsoos tsho. Mauxe hais rau cov pejxeem tias, “Nej yuav npaj kom txhij rau hnub uas peb. Nej tsis txhob mus ze pojniam kiag li.” Thaum txog hnub peb thaum sawv ntxov kuj muaj xob nthe xob laim liab vog, thiab muaj huab tsaus nti saum lub roob, thiab muaj suab raj kub yaj nrov heev, ua rau cov pejxeem sawvdaws uas tsuam chaw nyob ntawd ntshai tshee hnyo. Mauxe thiaj coj cov pejxeem tawm hauv lub chaw nyob mus ntsib Vajtswv, lawv tuaj sawv ntsug ntawm taw roob. Muaj pa ncho laum nkaus lub roob Xinai rau qhov Yawmsaub nyob hauv cov nplaim taws nqes los. Muaj pa ncho hlob hlob ib yam li ib cub tawg loj, lub roob kuj ntseeg nkaws. Thaum raj kub yaj nrov heev zuj zus, Mauxe kuj hais thiab Vajtswv ua xob nthe teb nws. Yawmsaub nqes los rau saum lub ncov roob Xinai. Yawmsaub hu Mauxe nce mus rau saum lub ncov roob, mas Mauxe thiaj li nce mus. Yawmsaub hais rau Mauxe tias, “Cia li rov qab nqes mus ntuas cov pejxeem ntshai tsam lawv hla los txog ntawm Yawmsaub vim yog xav saib, ces lawv yuav puam tsuaj coob coob. Thiab cov pov thawj uas los ze Yawmsaub yuav tsum tu lawv tus kheej kom dawb huv rau Yawmsaub ntshai tsam Yawmsaub ua rau lawv puam tsuaj.” Mauxe hais rau Yawmsaub tias, “Cov pejxeem tuaj tsis tau rau ntawm lub roob Xinai rau qhov koj twb hais tawv rau peb tias, ‘Kem ciam puag ncig lub roob thiab tu kom lub roob dawb huv.’ ” Yawmsaub hais rau Mauxe tias, “Cia li nqes mus thiab coj Aloo nrog koj nce rov qab tuaj. Tiamsis tsis txhob kheev cov pov thawj thiab cov pejxeem hla tuaj txog ntawm Yawmsaub tsam ces nws ua rau lawv puam tsuaj.” Mauxe thiaj nqes rov mus hais rau cov pejxeem raws li ntawd. Vajtswv hais tej lus no huvsi tias, “Kuv yog Yawmsaub uas yog koj tus Vajtswv, uas coj koj tawm hauv Iyi tebchaws hauv txojkev ua qhev los. Koj tsis txhob muaj dua lwm tus vajtswv uas tsis yog kuv. “Koj tsis txhob ua dab mlom rau koj pe tsis hais tej uas muaj yam ntxwv zoo li tej uas nyob saum nruab ntug lossis tej uas nyob hauv ntiajteb lossis tej uas nyob hauv dej hauv nruab tiv txwv. Tsis txhob pe thiab tsis txhob ua koom tu tej dab mlom ntawd, rau qhov kuv yog Yawmsaub uas yog koj tus Vajtswv, yog tus Vajtswv uas khib xeeb heev, mas yuav rau txim rau leej txiv uas ntxub kuv thiab poob mus rau nws cov tub ki mus txog peb plaub tiam. Tiamsis kuv yuav ua txojkev hlub uas ruaj khov tshwm rau cov uas hlub kuv thiab ua raws li kuv tej kevcai ntau txhiab tiam neeg. “Tsis txhob lam hais saib tsis taus Yawmsaub uas yog koj tus Vajtswv lub npe, rau qhov tus uas lam hais saib tsis taus nws lub npe, mas Yawmsaub yuav tsis zam txim. “Koj yuav tsum nco ntsoov hwm hnub Xanpatau ua hnub uas dawb huv. Koj yuav tsum khwv thiab ua koj tej haujlwm huvsi rau hnub. Tiamsis hnub xya yog hnub Xanpatau uas caiv rau Yawmsaub uas yog koj tus Vajtswv. Hnub ntawd tsis txhob ua ib yam haujlwm dabtsi li, tsis hais koj tus kheej thiab koj tej tub tej ntxhais thiab koj cov tub qhe nkauj qhev thiab koj tej tsiaj txhu thiab lwm haiv neeg uas tuaj nyob hauv koj lub moos. Vim tias rau hnub xwb Yawmsaub tau tsim lub ntuj lub teb thiab hiavtxwv, thiab txhua yam uas muaj nyob rau hauv, mas hnub uas xya Yawmsaub so. Vim li no Yawmsaub thiaj foom koob hmoov rau hnub Xanpatau thiab muab hnub ntawd teem ua hnub uas dawb huv. “Koj yuav tsum hwm koj niam koj txiv kom koj thiaj muaj txojsia nyob ntev rau hauv lub tebchaws uas Yawmsaub uas yog koj tus Vajtswv pub rau koj. “Tsis txhob tua neeg. “Tsis txhob deev luag poj luag txiv. “Tsis txhob ua tub sab. “Tsis txhob ua cuav timkhawv iab hiam luag lwm tus. “Tsis txhob ua siab hlob xav tau luag vaj luag tsev, tsis txhob ua siab hlob xav tau luag tus pojniam thiab luag tus tub qhe nkauj qhev, luag tej nyuj tej nees luav lossis ib yam dabtsi uas yog luag li.” Thaum cov pejxeem sawvdaws hnov xob nthe pom xob laim liab vog thiab hnov lub suab raj kub yaj nrov thiab pom pa ncho hlob saum lub roob, lawv ntshai heev tshee hnyo. Lawv nyob deb deb thiab hais rau Mauxe tias, “Koj cia li hais rau peb xwb, peb yuav mloog. Tsis txhob cia Vajtswv hais rau peb tsam ces peb tuag.” Mauxe thiaj hais rau cov pejxeem tias, “Tsis txhob ntshai, rau qhov Vajtswv nqes los sim nej lub siab xwb, kom nej thiaj li paub ntshai nws tsis tu ncua li thiab nej thiaj tsis ua txhaum.” Cov pejxeem nyob deb deb tiamsis Mauxe txav mus ze qhov uas tsaus ntuj nti uas Vajtswv nyob. Yawmsaub hais rau Mauxe tias, “Cia li hais rau cov Yixayee li no tias, ‘Nej twb pom lawm tias kuv hais saum ntuj los rau nej. Nej muaj kuv lawm mas tsis txhob ua dab mlom nyiaj lossis dab mlom kub rau nej pe. Koj yuav tsum xuas av ua lub thaj xyeem rau kuv, thiab saum lub thaj ntawd koj yuav tsum muab koj tej yaj tej nyuj tua ua kevcai hlawv xyeem thiab ua kevcai xyeem sib raug zoo. Hauv txhua lub chaw uas kuv tu kom nco txog kuv lub npe, mas kuv yuav los ntsib koj thiab foom koob hmoov rau koj. Yog koj xuas pob zeb ua lub thaj xyeem rau kuv, tsis txhob muab tej pob zeb uas twb txhwm lawm los ua. Yog koj siv cuab yeej txhwm pob zeb mas koj ua rau lub thaj qias tsis huv lawm. Thiab tsis txhob nce tus ntaiv mus rau saum kuv lub thaj, kom luag thiaj tsis pom koj chaw txaj muag.’ ” “Ntawm no mus yog tej kevcai uas koj yuav tsum qhia rau lawv paub. Yog nej yuav ib tug neeg Henplais ua qhev, nws yuav ua koj qhev rau xyoo xwb, xyoo uas xya nws yuav dim tsis txog txhiv. Yog tus qhev ntawd los ib leeg xwb nws kuj dim ib leeg mus, yog nws muaj pojniam los thiab, tus pojniam kuj nrog nws dim thiab. Yog tus lospav yuav pojniam rau nws thiab yug tau tub lossis ntxhais, tus pojniam thiab cov menyuam ntawd tseem ua tus lospav li qhev, nws dim ib leeg xwb. Tiamsis yog tus qhev hais tseeb tias, ‘Kuv nyiam tus lospav thiab kuv pojniam menyuam, kuv tsis xav tawm mus nyob ywj pheej.’ Mas tus lospav yuav coj nws mus cuag Vajtswv, coj nws mus rau ntawm lub qhov rooj lossis ntawm ob tug npuab rooj, mas tus lospav yuav xuas koob laum nws taub ntsej qhov ntawd mas nws yuav ua tus lospav qhev mus tag nws sim neej. “Yog leejtwg muab nws tus ntxhais muag ua qhev, mas tus ntxhais ntawd yuav tsis dim yam li lwm tus tub qhe. Yog nws tsis hum tus lospav uas xaiv nws los ua niam yau lub siab, mas tus lospav yuav cia leej txiv txhiv nws. Tus lospav tsis muaj cai muab nws muag rau lwm haiv neeg, rau qhov nws ua tsis ncaj rau tus ntxhais ntawd. Yog tus lospav yuav tus ntxhais ntawd rau nws tus tub ua pojniam, nws yuav tsum ua zoo rau tus ntxhais ntawd ib yam li ua rau nws tej ntxhais. Yog nws yuav lwm tus los ua niam yau, nws yuav tsum pub niam hlob noj sib luag hnav sib luag thiab pw ua ke sib luag ib yam li qub. Yog nws tsis ua peb yam no mas tus ntxhais ntawd yuav dim dawb tsis txog muab nyiaj txhiv. “Leejtwg ntaus neeg tuag, mas nws yuav raug lub txim tuag. Tiamsis tsis yog nws txhob txwm tua, tiamsis yog Vajtswv cia tus ntawd tuag rau hauv nws txhais tes, mas kuv yuav npaj ib lub chaw cia rau nws khiav mus nyob. Tiamsis yog nws txhob txwm xav tswvyim phem mus ntaus neeg tuag, mas koj yuav muab nws rub ntawm kuv lub thaj mus, rau txim kom tuag. “Leejtwg ntaus nws niam nws txiv tus ntawd yuav raug txim tuag. “Leejtwg nyiag neeg mus muag lossis tseem cia nyob ntawm nws txhais tes kuj xij, nws yuav raug txim tuag. “Leejtwg cem foom nws niam nws txiv tsis zoo yuav raug txim tuag. “Yog muaj ob leeg sib cav sib ceg es ib tug xuas pob zeb ntaus lossis nkaug nrig raug ib tug, tiamsis tsis tuag tsuas yog mob pw hauv txaj xwb, yog tus uas raug mob ntawd sawv taus tuav tus pas nrig mus tau nraum zoov hauv tsev, mas tus uas ntaus ntawd kuj dim nws lub txim, tsuas yog nws yuav them tej nqe sijhawm uas raug mob, thiab tu tus mob ntawd kom zoo kiag. “Yog leejtwg xuas qws ntaus nws tej tub qhe nkauj qhev es tus qhev ntawd tuag, tus ntawd yuav tsum raug txiav txim. Yog tus qhev ntawd nyob tau ib hnub lossis ob hnub tus lospav yuav tsis raug txiav txim, rau qhov tus qhev ntawd yog nws teej tug. “Yog ob tug txivneej sib ntaus es ho ntaus raug ib tug pojniam uas suab menyuam ua rau nchuav menyuam tiamsis tus pojniam tsis muaj li cas, mas yuav nplua tus uas ntaus ntawd npaum li nws tus txiv hu nqe thiab nws yuav them npaum li cov uas tu plaub tu. Tiamsis yog puas xwm li cas, kuj yuav muab siav pauj siav, qhov muag pauj qhov muag, kaus hniav pauj kaus hniav, tes pauj tes, taw pauj taw, qhov kub hnyiab pauj qhov kub hnyiab, qhov txhab pauj qhov txhab, qhov doog pauj qhov doog. “Yog leejtwg ntaus nws tus tub qhe nkauj qhev qhov muag nws thiaj dig lawm, nws yuav tsum muab tus qhev ntawd tso dim dawb vim tim lub qhov muag dig lawm. Yog nws ntaus nws tus tub qhe nkauj qhev ua rau lov hniav, nws yuav tsum muab tus qhev ntawd tso dim dawb vim tim tus hniav ntawd lov lawm. “Yog nyuj nrau tus txivneej twg los tus pojniam twg tuag, yuav tsum muab pob zeb ntaus tus nyuj ntawd kom tuag, thiab tsis txhob noj cov nqaij nyuj kiag li. Tiamsis tus tswv nyuj ntawd tsis txhaum. Tiamsis yog tus nyuj ntawd twb txeev nrau lwm tus neeg lawm thiab muaj neeg tuaj qhia rau tus tswv paub lawm tiamsis tus tswv tsis muab kaw cia, tus nyuj thiaj li nrau pojniam lossis txivneej tuag, mas tus nyuj yuav tsum raug pob zeb ntaus tuag thiab tus tswv kuj yuav raug txim tuag. Yog luag hu nqe txhiv tus tswv nyuj, nws yuav tsum them nqe txhiv nws txojsia npaum li luag hu. Yog tus nyuj ntawd nrau leejtwg li tub los ntxhais kuj yuav txiav txim rau tus tswv raws li tib txoj kevcai no. Yog tus nyuj ntawd nrau ib tug tub qhe lossis nkauj qhev, tus tswv nyuj yuav them peb caug sekhee nyiaj rau tus lospav, thiab tus nyuj yuav raug pob zeb ntaus tuag. “Yog leejtwg qheb qhov cia lossis khawb qhov tsis muab faus, es nyuj lossis nees luav poob rau hauv, mas tus tswv uas khawb qhov yuav tsum them tus tsiaj ntawd nqe. Nws yuav them nqe rau tus tswv tsiaj, es nws yuav tus tsiaj tuag ntawd. “Yog leejtwg tus nyuj nrau lwm tus li nyuj tuag, yuav tsum muab tus nyuj uas nrau ntawd muag thiab muab cov nqe faib rau ob tog, thiab muab tus nyuj uas tuag faib rau ob tog thiab. Yog paub tias tus nyuj ntawd txeev nrau los lawm uas tus tswv tsis muab kaw, tus tswv nyuj yuav tsum them ib tug nyuj pauj tus nyuj uas tuag, es nws yuav tus nyuj uas tuag ntawd.” “Yog leejtwg nyiag nyuj lossis yaj mus tua lossis muab muag, nws yuav tsum them tsib tug nyuj pauj ib tug nyuj, thiab them plaub tug yaj pauj ib tug yaj. “Yog leejtwg pom tub sab tabtom tho qhov vaj qhov tsev es txawm ntaus tus tub sab ntawd tuag, mas nws yuav tsis muaj txim. Yog lub hnub tawm lawm tus uas ntaus ntawd yuav muaj lub txim uas tua neeg. “Tus tub sab yuav tsum them pauj. Yog nws tsis muaj dabtsi them, yuav tsum muab nws muag los them tej uas nws nyiag lawm. Yog nrhiav tau tej tsiaj uas nyiag hauv nws txhais tes tseem ciaj sia, tsis hais nyuj, nees luav los yaj, tub sab yuav them ob npaug. “Yog leejtwg tso tsiaj mus noj zaub hauv teb lossis hauv vaj txiv hmab, es nws cia tej tsiaj ntawd khiav los noj qoob loo hauv lwm tus li liaj teb, nws yuav tsum muab nws tej qoob loo uas zoo kawg hauv nws liaj teb thiab nws vaj txiv hmab coj mus them. “Yog leejtwg zes taws es kub rau tej xyuv pos kub mus kis rau luag tej pawg qoob thiab tej qoob uas tsis tau hlais thiab tej teb kub hnyiab tag, tus uas zes taws ntawd yuav tsum them puv npo rau luag. “Yog leejtwg muab nyiaj txiag qhov txhia chaw rau kwvtij zej zog khaws cia, es tej nyiaj txiag ntawd raug tub sab nyiag hauv tsev lawm, yog ntes tau tub sab, tub sab yuav them ob npaug Yog ntes tsis tau tub sab, tus tswv tsev yuav mus cuag Vajtswv, yuav tshuaj saib nws txhais tes tau nyiag tus kwvtij ntawd li qhov txhia chaw los tsis tau. “Txhua tshaj plaub uas muaj neeg tuaj hais, tsis hais nyuj, nees luav, yaj, los ris tsho lossis ib yam dabtsi uas ploj lawm, yog muaj ib tug tuaj hais tias, ‘Yam no yog kuv li,’ mas ob tog yuav coj tshaj plaub ntawd mus cuag Vajtswv. Vajtswv yuav txiav cai tias leejtwg txhaum mas tus ntawd yuav tsum them ob npaug. “Yog leejtwg muab nws li nees luav los nyuj los yaj lossis lwm yam tsiaj rau kwvtij zej zog saib, es tus tsiaj ntawd tuag lossis raug mob lossis muaj neeg muab raws mus lawm tsis muaj leejtwg pom, mas tus uas txais saib tug tsiaj ntawd yuav tsum twv rau tus tswv tsiaj tab meeg Yawmsaub xubntiag saib nws txhais tes tau nyiag tus kwvtij ntawd li qhov txhia chaw. Mas tus tswv tsiaj yuav tsum yeem thiab tus uas txais saib ntawd tsis txog them dabtsi li. Tiamsis yog tus tsiaj raug tub sab nyiag mas tus uas saib yuav tsum them rau tus tswv tsiaj. Yog tias raug tsiaj nyaum muab tom dua tag lawm mas nws yuav tsum coj lub cev tuag ntawd los rau tus tswv pom. Tus uas saib tsis txog them tus tsiaj uas raug muab dua tag lawm. “Yog leejtwg qev kwvtij zej zog li tsiaj txhu es tus tsiaj ntawd raug mob lossis tuag rau thaum tus tswv tsis nyob ntawd, tus uas qev yuav tsum them puv npo. Yog tus tswv nyob ntawd thiab, tus uas qev tsis txog them. Yog ntiav los siv kuj yuav them nqe ntiav xwb. “Yog leejtwg mus dag ntxias tus hluas nkauj uas tsis tau deev dua hluas nraug thiab tsis tau muaj leejtwg qhaib, thiab nrog tus ntxhais ntawd pw lawm, mas nws yuav tsum them cov nqe mis nqe hno thiab yuav tus ntxhais ntawd ua nws pojniam. Yog leej txiv tsis yeem muab tus ntxhais ntawd qua rau nws, tus uas dag ntawd yuav tsum them npaum li uas nqe mis nqe hno uas yuav tus ntxhais tsis tau deev dua hluas nraug. “Tus pojniam uas ua txiv neeb txiv yaig tsis txhob tseg nws muaj txojsia nyob. “Leejtwg deev tsiaj txhu yuav tsum raug txim tuag. “Leejtwg tua tsiaj xyeem rau tej timtswv uas tsis yog Yawmsaub yuav raug muab ua kom puam tsuaj tag. “Nej tsis txhob tsim txom thiab quab yuam lwm haiv neeg rau qhov nej txeev ua lwm haiv neeg nyob hauv Iyi tebchaws. Tsis txhob tsuj yuam tej poj ntsuam thiab tej menyuam ntsuag. Yog nej tsuj yuam lawv es lawv quaj thov txog kuv, kuv yeej yuav mloog lawv lub suab quaj, mas kuv txojkev npau taws yuav npau vog tuaj thiab kuv yuav xuas ntaj tua nej. Nej tej pojniam kuj yuav ua poj ntsuam thiab nej tej menyuam yuav ua menyuam tsis muaj txiv. “Yog nej muab nyiaj txais rau kuv haiv neeg tus twg uas pluag thiab nrog nej nyob, tsis txhob ua li tus uas muab tso txhawb thiab tsis txhob xam paj nyiag rau nws. Yog nej tau txais kwvtij zej zog lub tsho ntev yuam nqe rau nej, nej yuav xa lub tsho rov qab ua ntej uas hnub tsis tau poob qho, rau qhov nws muaj tib lub tsho ntawd hnav npog nws lub cev. Tsis ua li ntawd thaum nws mus pw nws yuav muaj dabtsi npua? Yog nws quaj thov txog kuv, kuv yuav mloog, rau qhov kuv muaj lub siab hlub khuvleej. “Nej tsis txhob thuam Vajtswv lossis tsawm foom cov uas kav nej cov neeg. “Tsis txhob sej ntev, cia li coj nej tej qoob loo zoo zoo thiab txhua yam kua txiv ntawm lub chaw tsuam tuaj xyeem rau Vajtswv. “Thiab yuav muab nej tus tub hlob pub rau kuv. Nej tej nyuj thiab nej tej yaj kuj ua ib yam li ntawd. Cia nrog leej niam nyob xya hnub. Mas hnub uas yim coj tuaj pub rau kuv. “Nej yuav ua neeg dawb huv rau kuv. Yog li no tej tsiaj uas raug tsiaj nyaum muab tom tuag tom tshav zaub nej tsis txhob noj, cia li muab pov tseg rau dev noj.” “Tsis txhob coj tej lus dag mus piav rau ub rau no. Tsis txhob nrog cov neeg phem koom siab ua cuav timkhawv. Tsis txhob raws cov neeg feem coob mus ua phem. Tsis txhob ua timkhawv raws kua cov neeg feem coob, yog ua li ntawd yuav tu plaub tsis ncaj. Thaum muaj plaub tsis txhob tuaj kiag tus neeg pluag tog. “Yog nej ntsib tej yeeb ncuab tus nyuj lossis tus nees luav khiav tuaj mas nej cia li muab xa rov qab mus rau tus tswv kom tau. Yog nej pom tus neeg uas ntxub nej tus nees luav ntog vim yog thauj nra hnyav mas tsis txhob cia ntog li ntawd, cia li pab muab tsa kom sawv. “Thaum muaj plaub mas tsis txhob tu tsis ncaj rau cov neeg pluag. Yog luag tuaj kom plaub tsis ncaj mas tsis txhob quav ntsej, tsis txhob muab tus uas tsis txhaum thiab ua ncaj tua pov tseg, rau qhov kuv yuav tsis zam txim rau cov neeg limhiam. Tsis txhob yuav tej nyiaj xiab vim yog tej nyiaj xiab yuav ua rau tej nom tswv dig muag thiab yuav muab tus uas muaj cai ntxeev ua swb cai. “Nej tsis txhob tsim txom lwm haiv neeg uas nrog nej nyob, rau qhov nej yeej paub lwm haiv neeg txojkev nyuaj siab lawm vim nej txeev ua lwm haiv neeg rau hauv Iyi tebchaws lawm. “Nej yuav cog qoob cog loo sau qoob sau loo hauv nej tej teb rau xyoo xwb, mas xyoo uas xya cia tej teb so muab tso tseg cia rau tej neeg pluag tau mus de los noj. Yog tseem tshuav seem kuj cia rau tej tsiaj qus noj. Nej tej vaj txiv hmab vaj txiv aulib kuj ua ib yam nkaus li ntawd thiab. “Nej ua nej tej haujlwm rau hnub xwb mas hnub uas xya nej yuav tsum so, nej tej nyuj tej nees luav thiaj tau so thiab nej tus nkauj qhev li tub thiab lwm haiv neeg uas nrog nej nyob thiaj li tau so los siav. Nej yuav tsum ceev faj coj txhua yam uas kuv twb qhia rau nej lawm huvsi. Tsis txhob tuav lwm tus dab lub npe kiag li. Tsis txhob tsa ncauj hais tej dab npe kiag li. “Ib xyoos nej yuav tsum ua peb zaug kevcai noj haus xyeem rau kuv. Nej yuav tsum nco ntsoov coj kevcai noj ncuav tsis xyaw keeb. Nej yuav tsum noj ncuav tsis xyaw keeb kom puv xya hnub. Nej yuav noj rau lub sijhawm uas teem cia hauv lub hli Anpis raws li kuv hais rau nej lawd, vim yog lub hli ntawd nej tawm hauv Iyi tebchaws los. Tsis txhob tuaj pe kuv tes dawb tes npliag. “Nej yuav tsum nco ntsoov ua kevcai rau thaum hlais qoob loo tag, yog xyeem thawj phaum qoob loo uas cog hauv nej tej teb los rau kuv. “Nej yuav tsum nco ntsoov ua kevcai sau qoob loo tag rau thaum lub qab xyoo yuav tag, yog thaum uas nej twb sau txhua yam qoob loo hauv teb los txog vaj txog tsev tiav tag lawm. Nej cov txivneej sawvdaws yuav tsum tuaj cuag Vajtswv Yawmsaub lub xubntiag ib xyoos peb zaug. “Tsis txhob muab cov ntshav tsiaj uas tua xyeem rau kuv xyeem nrog cov ncuav xyaw keeb ua ke. Tsis txhob tseg tus tsiaj uas tua xyeem rau kuv ntawd cov roj cia nyob mus txog kaj ntug. “Thawj phaum qoob loo uas nej sau hauv nej tej teb los mas coj tej uas zoo kawg nkaus tuaj xyeem rau hauv Yawmsaub uas yog nej tus Vajtswv lub tsev. “Tsis txhob muab tus maum tshis cov kua mis los hau nws tus menyuam. “Nej sim saib, kuv yuav txib ib tug tubtxib saum ntuj ua nej ntej tsom kwm nej taug kev thiab coj nej mus kom txog lub chaw uas kuv npaj tseg rau nej lawd. Yuav tsum muab siab rau mloog tus tubtxib ntawd hais thiab ua raws li nws tej lus. Tsis txhob tawv ncauj ntawm nws, rau qhov nws yuav tsis zam txim rau nej vim kuv nyob hauv nws. Yog nej muab siab rau mloog nws tej lus thiab ua txhua yam uas kuv hais rau nej, mas kuv yuav ua yeeb ncuab rau nej cov yeeb ncuab, thiab yuav tawm tsam cov uas tawm tsam nej. “Kuv tus tubtxib yuav ua nej ntej coj nej kev mus txog cov Amaulai, cov Hithai, cov Pelixai, cov Khana‑as, cov Hivai thiab cov Yenpu tej tebchaws, mas kuv yuav muab lawv cov neeg ntawd rhuav tshem huvsi mus. Tsis txhob pe tsis txhob teev lawv tej dab. Tsis txhob coj raws li lawv tej kevcai dab. Nej yuav tsum muab lawv tej dab mlom rhuav pov tseg thiab muab lawv tej ncej uas teev dab tsoo kom pob tag huvsi. Nej yuav tsum pe hawm Yawmsaub uas yog nej tus Vajtswv, kuv thiaj foom hmoov rau nej tej zaub mov thiab rau nej tej dej haus. Kuv yuav sau tej mob nkeeg hauv nej huvsi mus. Cov pojniam yuav tsis muaj ib tug nchuav menyuam, yuav tsis muaj ib tug uas mooj rau hauv nej lub tebchaws. Kuv yuav pub nej muaj txoj sia loj sia ntev. Kuv lub moo yuav ua nej ntej mus ua rau cov neeg sawvdaws uas nej yuav ntsib hauv lub tebchaws ntawd ntshai ras zom zaws thiab ua rau nej cov yeeb ncuab sawvdaws tig hlo khiav. Kuv yuav tso nkawj tso daiv ua nej ntej mus ntiab cov Hivai, cov Khana‑as thiab cov Hithai kom khiav ntawm nej hauv ntej mus. Kuv yuav tsis ua tib xyoo muab lawv ntiab khiav tawm tag tsam ces lub tebchaws ho fab qas hnyo thiab tej tsiaj qus huaj vam coob los txov nej. Kuv yuav ntiab kom lawv khiav zuj zus ntawm nej hauv ntej mus txog thaum uas nej huaj vam coob coob es nej txeeb kiag tau lub tebchaws ntawd ua nej tug. Kuv yuav tu ciam teb rau nej txij ntua ntawm Hiavtxwv Liab mus txog ntua cov Filixatee lub Hiavtxwv thiab txij ntua ntawm tebchaws moj sab qhua mus txog tus dej Yufeti. Kuv yuav muab cov neeg hauv lub tebchaws ntawd cob rau hauv nej txhais tes mas nej yuav muab lawv ntiab tau khiav ntawm nej hauv ntej mus. Koj tsis txhob nrog lawv lossis lawv tej dab sib cog lus dabtsi li. Tsis txhob kheev lawv nrog nej nyob hauv nej lub tebchaws kiag li ntshai tsam lawv yuav yaum kom nej mus ua txhaum rau kuv. Yog nej mus teev lawv tej dab mas qhov ntawd yeej yuav ua rooj hlua uas cuab nej ntag.” Yawmsaub hais rau Mauxe tias, “Koj thiab Aloo thiab Nada thiab Anpihu thiab Yixayee cov kev txwj laus xya caum leej cia li nce tuaj cuag Yawmsaub thiab nyob deb deb pe hawm nws. Cia Mauxe tib leeg txav los ze Yawmsaub xwb, dua li lwm tus mas tsis txhob txav los ze, thiab tsis txhob kheev cov pejxeem nrog Mauxe nce tuaj li.” Mauxe thiaj coj Yawmsaub tej lus thiab tej kevcai huvsi los qhia rau cov pejxeem paub. Cov pejxeem sawvdaws teb tib lub suab hais tias, “Txhua lo lus uas Yawmsaub hais ntawd peb yuav ua raws li.” Mauxe txawm muab Yawmsaub txhua lo lus sau cia. Nws sawv ntxov tsees tib ib lub thaj uas xyeem qhov txhia chaw rau ntawm taw roob thiab muab kaum ob tug ncej zeb los txhos raws li kaum ob xeem Yixayee. Nws txib cov tub hluas Yixayee mus muab tsiaj hlawv kheej xyeem thiab muab nyuj tua xyeem rau Yawmsaub ua kevcai sib raug zoo. Mauxe muab cov ntshav khaws cia ib nrab rau hauv tej phaj, thiab muab ib nrab nchos rau lub thaj. Nws muab phau ntawv uas sau Yawmsaub tej lus cog tseg nyeem rau cov pejxeem mloog. Cov pejxeem hais tias, “Txhua lo lus uas Yawmsaub hais ntawd peb yuav ua raws nraim, peb yuav mloog nws lus.” Mauxe muab cov ntshav nchos rau cov pejxeem thiab hais tias, “Cov ntshav no yog lub hom thawj uas nias rau tej lus cog tseg uas Yawmsaub ua rau nej raws li tej lus uas hais tag no huvsi.” Thaum ntawd Mauxe thiab Aloo thiab Nada thiab Anpihu thiab Yixayee cov kev txwj laus xya caum leej kuj nce mus, mas lawv pom Yixayee tus Vajtswv. Vajtswv lub chaw tiag taw yog ib daim txiag zeb zoo yam nkaus li qe zeb phaithu tsamxem, ntshiab yam nkaus li qab ntuj. Vajtswv tsis ua li cas rau Yixayee cov thawj, lawv tau pom Vajtswv thiab lawv tau noj haus. Yawmsaub hais rau Mauxe tias, “Cia li nce tuaj cuag kuv saum lub roob thiab nyob ntawd tos. Kuv yuav muab tej txiag zeb uas muaj kuv txoj kevcai thiab kuv tej lus uas kuv sau cia qhia lawv.” Mauxe thiaj sawv tsees nrog nws tus tub qhe Yausua nce mus saum Vajtswv lub roob. Thiab Mauxe hais rau cov kev txwj laus tias, “Nej nyob ntawm no tos txog thaum ib rov los txog nej. Aloo thiab Hawj nrog nej nyob. Leejtwg muaj plaub kuj mus cuag tau ob tug.” Ces Mauxe txawm nce mus saum lub roob lawm, muaj ib tauv huab los laum nkaus lub roob. Yawmsaub lub hwjchim ci ntsa iab los rau saum lub roob Xinai, mas tauv huab laum lub roob ntawd tau rau hnub. Hnub uas xya Yawmsaub hu hauv tauv huab tuaj rau Mauxe. Yawmsaub lub hwjchim ci ntsa iab tshwm rau cov Yixayee pom yam nkaus li nplaim taws kub ceev saum lub hauv roob. Mauxe nkag mus rau hauv tauv huab thiab nce mus rau saum lub roob. Mauxe nyob saum lub roob tau plaub caug hnub plaub caug hmo. Yawmsaub hais rau Mauxe tias, “Hais rau cov Yixayee coj qhov txhia chaw tuaj pub rau kuv. Koj cia li txais ntawm txhua tus uas zoo siab pub rau kuv. Cov qhov txhia chaw uas koj yuav txais ntawm lawv ntawd, yog kub thiab nyiaj thiab tooj liab, thiab xov xiav xov tsamxem xov liab thiab xov maj uas nkoov zoo zoo thiab plaub tshis, thiab cov tawv txiv yaj uas muab foo liab lawd, thiab cov tawv ntshuab hiavtxwv, thiab ntoo kub twg, thiab roj sam lub teeb, thiab tej txuj lom uas xyaw cov roj tsw qab siv ua kevcai tsa, thiab xyaw cov hmoov tshuaj tsw qab, thiab cov qe zeb iav txho ci lam lug thiab tej qe zeb hlaws muaj nqes uas muab xaws lo rau lub tsho efauj thiab lub awv. Kom lawv ua ib thaj chaw pe hawm kuv xwv kuv thiaj li nyob hauv lawv nruab nrab. Nej yuav tsum ua kuv lub tsev thiab ua tej twj uas siv rau hauv lub tsev raws li tus qauv uas kuv yuav qhia txhua yam rau koj huvsi. “Lawv yuav tsum muab ntoo kub twg ua lub phij xab, ntev ob tshim txhais, dav ib tshim txhais, thiab siab ib tshim txhais. Muab cov tseem kub luam tag nrho lub phij xab ntawd sab hauv sab nraud huvsi thiab muab kub ua ib tug caj ntswm puag ncig lub phij xab. Muab kub nchuav ua plaub lub ntsej tis rau plaub tug taw phij xab, yog ua ib sab ob lub ntsej. Muab ntoo kub twg ua ob tug las kwv thiab muab kub luam ob tug las ntawd huvsi, mas muab ntxig rau cov ntsej ntawm lub phij xab ob sab thiaj kwv tau lub phij xab ntawd. Cia ob tug las ntawd nyob hauv tsis txhob rho li. Cia li muab ob daim txiag zeb uas sau kuv tej lus uas kuv yuav muab rau koj tso rau hauv lub phij xab. “Muab cov tseem kub ua lub hau phij xab uas roos kev txhaum, ntev ob tshim txhais, dav ib tshim txhais. Muab kub ntaus ua ob tug Khelunpee txawb rau ob tog hau phij xab uas roos kev txhaum. Ua ob tug Khelunpee ntawd ib tug nyob ib tog hau phij xab lo xeeb keeb nkaus rau lub hau phij xab. Ua ob tug ntawd nthuav tis los roos saum lub hau phij xab, ob tug ntawd tig xubntiag ua ke, yog tig los saib lub hau phij xab uas roos kev txhaum. Muab ob daim txiag zeb uas sau kuv tej lus uas kuv yuav muab rau koj tso rau hauv lub phij xab thiab muab lub hau phij xab kaw rau. Kuv yuav nyob saum lub hau phij xab uas roos kev txhaum hauv nruab nrab ob tug Khelunpee uas nyob saum lub phij xab sib cog lus mas kuv yuav ntsib koj qhov ntawd thiab muab kuv tej kevcai txhua zaj rau koj coj mus qhia rau cov Yixayee. “Koj yuav muab ntoo kub twg ua ib lub rooj ntev ob tshim dav ib tshim thiab siab ib tshim txhais. Muab cov tseem kub luam lub rooj ntawd huvsi thiab muab kub ua ib tug caj ntswm puag ncig lub rooj ntawd. Ua ib daim txiag dav ib xib thaiv puag ncig lub npoo rooj thiab muab kub ua ib tug caj ntswm lo puag ncig daim txiag ntawd. Muab kub ua plaub lub ntsej tis rau plaub lub kaum rooj uas ncaj plaub tug ceg rooj. Muab cov ntsej ntawd lo ze ze daim txiag thiaj ntxig tau las kwv. Muab ntoo kub twg ua ob tug las kwv thiab muab kub luam ob tug las huvsi thiaj kwv tau lub rooj. Muab cov tseem kub ua tej tais pliab tais ntim rau hmoov tshuaj tsw qab, thiab tais phaj thiab tej pav lam hwj uas hliv cawv txiv hmab xyeem. Yuav tsum muab cov ncuav uas xyeem rau ntawm Yawmsaub xubntiag tso rau saum lub rooj rau ntawm kuv lub xubntiag mus li. “Koj yuav muab cov tseem kub ua ib tug kav teeb. Ntaus ua lub taw thiab tus ncej teeb, thiab ua cov tais zoo li paj thiab cov qia paj thiab cov nplai paj lo xeeb keeb nkaus rau tus kav teeb. Tus kav teeb no ncau ua rau ceg, ib sab ncau peb ceg. Txhua ceg muaj peb lub paj zoo li paj txiv duaj, txhua lub paj muaj lub qia paj thiab cov nplai paj rau rau ceg uas ncau ntawm tus kav teeb huvsi. Tus tseem kav teeb muaj plaub lub paj txiv duaj uas muaj lub qia paj thiab cov nplai paj huvsi. Rau ceg ntawd txhua nkawm ceg uas ncau ntawm tus kav teeb muaj ib lub qia paj nyob hauv qab. Cov qia paj ntawd thiab cov ceg teeb lo xeeb keeb nkaus rau tus kav teeb, yuav muab cov tseem kub ntaus ua xwb. Ua xya lub teeb thiab muab txawb saum xya ceg teeb ntawd es taws kom ci mus rau ntawm cov teeb ntawd sab xubntiag. Muab cov tseem kub ua rab txiab uas txiav teeb xeeb thiab ua lub phaj pliab uas rau txiab. Muab cov tseem kub hnyav ib tala ua lub teeb kub thiab tej twj uas siv ntawm lub teeb ntawd. Yuav tsum ceev faj ua txhua yam raws li tus qauv uas kuv hais rau koj saum lub roob.” “Thiab koj yuav muab kaum chaws ntaub mag ua Yawmsaub lub tsev ntaub, yuav muab xov maj uas nkoov zoo zoo thiab muab xov xiav xov tsamxem xov liab ntos ua, thiab kom cov Kws txawj ntos ua duab Khelunpee rau hauv. Ib chaws ntaub ntev nees nkaum yim tshim dav plaub tshim, txhua chaws ntaub dav ntev ib yam nkaus. Muab tsib chaws ntaub xaws ua ke ua ib daig, muab tsib chaws xaws ua ib daig. Muab cov ntaub xiav xaws ua ntsej rau daim ntug ntaub uas ib, thiab ua ntsej rau daim ntug ntaub uas ob ib yam nkaus. Ua tsib caug lub ntsej rau daim ntug ntaub uas ib, thiab ua tsib caug lub ntsej rau daim uas ob, sab npoo uas txuas ua ke kom sib ncaj nkaus, thiab muab kub los ua tsib caug lub khawb los khawm ob daig ntaub ntawd kom ua kiag ib daig ua Yawmsaub lub tsev. “Muab plaub tshis los ntos ua kaum ib chaws ntaub vov kiag Yawmsaub lub tsev, ib chaws ntaub ntev peb caug tshim dav plaub tshim, kaum ib chaws ntaub dav ntev ib yam nkaus. Muab tsib chaws ntaub xaws ua ke ua ib daig, muab rau chaws xaws ua ib daig mas daim uas rau muab quav rov rau saum qhov rooj lub tsev ntaub. Ua tsib caug lub ntsej rau daim ntug ntaub uas ib, thiab ua tsib caug lub ntsej rau daim ntug ntaub uas ob, thiab muab tooj liab ua tsib caug lub khawb los khawm ob daig ntaub ntawm cov ntsej kom ua kiag ib daig. Daim ntaub uas vov lub tsev es tshaj ib nrab daim ntawd, mas yuav muab tso dauv rau sab pem qaum tsev. Daim ntaub uas vov lub tsev ntaub mag ua tshaj rau ob sab, ib sab tshaj ib tshim thiaj li kauv tau lub tsev ob sab huvsi. Thiab yuav muab cov tawv txiv yaj uas foo liab lawd los ua ntaub vov lub tsev ntaub thiab muab cov tawv ntshuab hiavtxwv los ua ntaub vov txheej saud. “Muab ntoo kub twg los ua tab tsa xov kuv lub tsev. Cov tab ntawd ntev kaum tshim dav ib tshim txhais. Ib daim txiag tab mas thais ua ob tug taw thiaj txuas tau ua ke. Ua txhua daim txiag tab li no coj los ua kuv lub tsev. Ua nees nkaum daim txiag tab xov kuv lub tsev sab nrad, thiab muab nyiaj ua plaub caug tus taw tiag nees nkaum daim txiag tab li taw, ib daim txiag tab ntxig rau ob tug taw. Ua nees nkaum daim txiag tab xov kuv lub tsev sab ped, thiab muab nyiaj ua plaub caug tus taw tiag hauv taw, ib daim txiag tab ntxig rau hauv ob tug taw tiag. Ua rau daim txiag tab xov kuv lub tsev sab qaum tsev uas hnub poob. Ua ob daim txiag tab xov ob lub kaum tsev ntaub uas yog sab qaum tsev. Ob daim txiag tab ntawd mas hauv taw muab ib daim txawb qes mentsis rau sab nraud, saum hau txiag muab teem ti nkaus lub ntsej saud kawg. Ua li no rau ob lub kaum tsev ntaub. Sab hnub poob muaj yim daim txiag tab xov thiab muaj kaum rau tus taw nyiaj tiag hauv taw, ib daim txiag tab ntxig rau ob tug taw. “Muab ntoo kub twg ua tsib tug las tuav kuv lub tsev ib sab phab ntsa, thiab ua tsib tug las rau dua ib sab thiab ua tsib tug rau sab qaum tsev uas hnub poob. Tus las nruab nrab uas tuav cov txiag tab yuav ntev keev kiag txij ib lub kaum tsev txog ntua ib lub kaum tsev. Muab kub luam cov txiag tab ntawd thiab muab kub ua cov ntsej uas ntxig cov las ntawd, thiab muab kub luam cov las huvsi. Tsa kuv lub tsev ntawd raws li tus qauv uas kuv twb hais rau koj saum lub roob. “Muab xov xiav xov tsamxem xov liab thiab xov maj uas nkoov zoo zoo ua ib daim ntaub thaiv, thiab kom cov Kws txawj ntos ntos ua duab Khelunpee rau hauv. Muab daim ntaub no dai rau saum cov nqe lauj kub uas nyob ntawm plaub tug ncej ntoo kub twg uas muab kub luam rau thiab muab ntxig rau hauv plaub tug taw nyiaj tiag ncej. Mas muab daim ntaub cov ntsej khuam rau cov nqe lauj es muab lub phij xab sib cog lus tso rau chav hauv daim ntaub ntawd, mas daim ntaub ntawd yuav kem lub tsev ntaub chav uas dawb huv thiab chav uas dawb huv kawg nkaus. Muab lub hau phij xab uas roos kev txhaum kaw rau lub phij xab sib cog lus hauv lub chaw uas dawb huv kawg nkaus. Muab lub rooj txawb rau nraum daim ntaub sab ped, muab lub teeb xya ceg txawb rau sab nram ncaj ntawm lub rooj. “Muab xov xiav xov tsamxem xov liab thiab xov maj uas nkoov zoo zoo ua ib daim ntaub ua lub qhov rooj tsev ntaub, thiab ua paj ntaub rau. Muab ntoo kub twg ua tsib tug ncej thiab muab kub ua nqe lauj khuam daim ntaub ntawd, thiab muab tooj liab nchuav ua tsib tug taw tiag cov ncej ntawd.” “Koj yuav muab ntoo kub twg ua lub thaj uas hlawv qhov txhia chaw xyeem, ua dav xwm fab xwm meem, ntev tsib tshim, dav tsib tshim, siab peb tshim. Ua plaub tug kub rau saum plaub lub kaum thaj, yuav npawm keev kiag ntawm lub thaj los, thiab muab tooj liab luam lub thaj huvsi. Muab tooj liab ua txhua yam twj uas siv rau saum lub thaj, yuav ua tej duav hlau yawm tshauv, tej duav phuaj, tej phaj, tej hmuv chob nqaij, thiab ua tej yias rau ncaig taws. Muab kav tooj liab qhaib ua ib daim tsuav ntxaij rau lub thaj thiab muab tooj liab ua plaub lub ntsej tis rau plaub lub kaum tsuav ntxaij thiab muab tso rau hauv lub thaj hlauv kom dhau tus caj ntswm rau sab hauv txog ib nrab thaj. Muab ntoo kub twg ua cov las kwv lub thaj thiab muab tooj liab luam cov las ntawd. Muab cov las ntxig rau cov ntsej uas nyob ntawm lub thaj ob sab kwv. Muab txiag ua lub thaj ntawd tseg lub plawv thaj kom khoob. Ua lub thaj ntawd raws nraim li uas kuv qhia koj saum lub roob. “Yuav tsum tseg tshav puam ib ncig kuv lub tsev. Sab nram mas muab ib chaws ntaub uas muab xov maj uas nkoov zoo zoo ntos ua ntev ib puas tshim xov rau, thiab yuav nees nkaum tus ncej thiab yuav nees nkaum tus taw tooj liab tiag ncej thiab muab nyiaj ua nqe lauj rau cov ncej thiab ua thi rau saum cov hau ncej. Ua ib yam nkaus li ntawd rau sab ped. Muab ib chaws ntaub ntev ib puas tshim los xov rau thiab yuav nees nkaum tus ncej thiab nees nkaum tus taw tooj liab tiag cov ncej thiab muab nyiaj ua nqe lauj thiab ua thi rau saum cov hau ncej. Sab hnub poob mas muab ib chaws ntaub ntev tsib caug tshim xov rau thiab yuav kaum tus ncej thiab kaum tus taw tiag ncej. Sab ntawm rooj vag uas hnub tuaj mas ua dav tsib caug tshim. Chaws ntaub uas xov ib sab ntawm rooj vag mas dav kaum tsib tshim thiab yuav peb tug ncej thiab peb tug taw tiag ncej. Chaws ntaub uas xov dua ib sab ntawm rooj vag mas dav kaum tsib tshim thiab yuav peb tug ncej thiab peb tug taw tiag ncej. Muab xov xiav xov tsamxem xov liab thiab xov maj uas nkoov zoo zoo ua ib chaws ntaub ntev nees nkaum tshim ua lub rooj vag thiab ua paj rau hauv, thiab ua plaub tug ncej thiab plaub tug taw tiag ncej. Txhua tus ncej laj kab mas muab nyiaj los ua thi rau saum cov hau ncej huvsi thiab ua cov nqe lauj, thiab muab tooj liab ua taw tiag ncej huvsi. Lub laj kab qhov ntev ib puas tshim, qhov dav tsib caug tshim, qhov siab tsib tshim. Cov ntaub uas xov yuav tsum yog ntaub mag uas muab xov maj uas nkoov zoo zoo ntos ua thiab cov taw tiag ncej yog muab tooj liab ua. Tej twj uas siv hauv kuv lub tsev tag nrho thiab tej tswg uas txhos tsa lub tsev ntaub thiab txhos tuav lub laj kab yuav tsum yog xuas tooj liab ua. “Koj hais rau cov Yixayee kom muab cov roj aulib uas tsuam lim tau ntshiab ntshiab coj los sam lub teeb mas lub teeb thiaj li cig tsis tuag li. Aloo thiab nws cov tub yuav tsum tu lub teeb uas nyob hauv lub tsev ntaub sib ntsib chav nraum daim ntaub uas thaiv lub phij xab sib cog lus kom cig ib hmos kaj ntug li rau ntawm Yawmsaub xubntiag. No yog ib txoj kevcai ruaj khov uas cov Yixayee yuav tsum coj ib tiam dhau ib tiam mus ib txhis li.” “Cia li coj koj tus tijlaug Aloo thiab nws cov tub uas yog Nada, Anpihu, Ele‑axa thiab Ithama tawm hauv cov Yixayee tuaj cuag koj, lawv thiaj ua tau pov thawj ua kuv tes haujlwm. Mas koj yuav tsum xaws cev tsoos tsho meej mom dawb huv rau koj tus tijlaug Aloo hnav, nws thiaj tau koob meej thiab yuav zoo nkauj. Koj hais rau txhua tus uas muaj peevxwm uas kuv tau pub tswvyim rau kom lawv ua Aloo tej tsoos tsho meej mom es thiaj tau tsa Aloo ua pov thawj los ua kuv tes haujlwm. Lawv yuav tsum ua tej tsoos ntawd raws li no, yog ib lub awv, ib lub tsho efauj, ib lub tsho ntev, ib lub tsho uas ntos txaij ua qhov muag, thiab txoj phuam uas ntoo saum taubhau thiab ib txoj siv sia, mas lawv yuav ua tej tsoos meej mom dawb huv no rau koj tus tijlaug Aloo thiab nws cov tub hnav, es lawv thiaj tau ua pov thawj ua kuv tes haujlwm. Kom lawv muab cov xov kub thiab xov xiav xov tsamxem xov liab, thiab xov maj uas nkoov zoo zoo los ua. “Lawv yuav tsum muab cov xov kub thiab xov xiav xov tsamxem xov liab thiab cov xov maj uas nkoov zoo zoo ntos ua lub tsho efauj zoo nkauj txaij nraug zees. Ua ob pluaj ntaub khuam lub tsho efauj ntawm xub pwg muab teem rau ob sab xub pwg tsho. Txoj siv sia uas ntos zoo zoo uas muab xaws lo rau lub tsho efauj, yuav ua ib yam nkaus li lub tsho efauj. Muab cov xov kub thiab xov xiav xov tsamxem xov liab thiab cov xov maj uas nkoov zoo zoo ntos ua. Muab ob lub qe zeb iav txho ci lam lug txaug Yixayee cov tub li npe rau hauv, mas txaug zuj zus tus hlob li npe ua ntej mus txog tus yau, ib lub qe zeb mas txaug rau lub npe rau. Koj yuav txaug Yixayee cov tub li npe rau hauv ob lub qe zeb ntawd ib yam nkaus li txaug txwm, thiab muab xov kub qhaib ua ob lub tais kub txaij mos mos khawm ob lub qe zeb iav txho ci lam lug ntawd. Muab ob lub qe zeb no xaws lo nkaus rau pluaj ntaub uas khuam lub tsho efauj ntawm ob sab xub pwg, ua lub chaw uas nco ntsoov Yixayee cov tub, mas Aloo yuav kwv lawv cov npe rau saum nws ob sab xub pwg ntawm Yawmsaub xubntiag ua chaw nco ntsoov. Muab xov kub qhaib ua ob lub tais txaij mos mos. Muab cov tseem xov kub ntxias ua ob txoj saw thiab muab ob txoj saw khawm rau ob lub tais kub ntawd. “Koj yuav ua ib lub awv zoo nkauj txaij nraug zees uas siv txiav txim siab rau cov Yixayee. Muab xov kub thiab xov xiav xov tsamxem xov liab thiab cov xov maj uas nkoov zoo zoo ua ib yam nkaus li ua lub tsho efauj. Ua lub awv xwm fab dav ib dos ntev ib dos thiab sab hauv khoob ua ib lub hnab. Koj yuav muab qe zeb hlaws uas muaj nqes teem ua plaub leej rov ntav rau ntawm lub awv ntawd. Leej saum uas yog leej ib mas yog peb lub qe zeb, ib lub qe zeb liab tsim tseb, ib lub qe zeb daj pes lis, ib lub qe zeb ntsuab liab. Leej uas ob mas yog ib lub qe zeb ntsuab txho, ib lub qe zeb phaithu tsamxem, ib lub qe zeb hlaws iav. Leej uas peb mas yog ib lub qe zeb ntsuab xiav, ib lub qe zeb uas txho taws, ib lub qe zeb tsamxem zem ziv. Leej uas plaub mas yog ib lub qe zeb ntsuab pes xiab, ib lub qe zeb iav txho ci lam lug thiab ib lub qe zeb daj tshiab tshiab. Mas muab cov xov kub qhaib ua kaum ob lub tais kub txaij mos mos khawm cov qe zeb ntawd. Kaum ob lub qe zeb hlaws ntawd yuav tsum muaj Yixayee cov tub tej npe txaug rau hauv ib yam nkaus li txaug txwm, yuav tsum muaj kaum ob xeem ib xeem zuj zus li npe nyob rau hauv. Muab cov tseem xov kub ntswj ua ib txoj saw kheej zoo li txoj hlua tis rau lub awv. Muab kub ua ob lub ntsej mas muab tis rau ob lub kaum awv. Muab ob txoj qab saw kub los khawm rau ob lub ntsej ntawm ob lub kaum awv, thiab muab ob yav qab saw saum tis rau ob lub tais kub txaij mos mos uas muab lo rau lub tsho efauj ntawm ob sab xub pwg sab xubntiag. Muab kub ua ob lub ntsej tis rau ob lub kaum awv hauv qab sab hauv uas npuas lub tsho efauj. Muab kub ua ob lub ntsej tis rau ob pluaj ntaub ntawm xub pwg ntawm lub tsho efauj sab xubntiag ze kab lej leeg tsho ntawm txoj siv sia uas ntos zoo zoo sab saud. Mas lawv yuav muab xov xiav ntswj ua ob txoj hlua khi ob lub ntsej awv sab hauv rau ob lub ntsej ntawm lub tsho efauj, lub awv thiaj nyob sab saum txoj siv sia uas ntos zoo zoo uas sia ntawm duav thiaj tsis plam ntawm lub tsho efauj. Thaum Aloo nkag mus rau hauv lub chaw dawb huv nws thiaj muab Yixayee cov tub tej npe uas nyob ntawm lub awv uas siv txiav txim siab rau cov Yixayee los coj rau ntawm nws hauv siab ua lub chaw rau Yawmsaub nco ntsoov mus li. Koj yuav muab Uli thiab Thumi tso rau hauv lub awv, mas Uli thiab Thumi thiaj nyob ntawm Aloo hauv siab rau thaum nws mus rau ntawm Yawmsaub xubntiag. Aloo thiaj yuav ris qhov uas yuav txiav txim siab rau cov Yixayee rau ntawm nws hauv siab tab meeg Yawmsaub lub xubntiag mus li. “Koj yuav muab xov xiav ntos ua lub tsho ntev phim lub tsho efauj. Ua lub tsho looj thiab muab lub caj dab tsho ntawd foob zoo zoo thiaj tsis ntuag. Muab xov xiav xov tsamxem thiab xov liab ua tej lub zoo li txiv ntsiav kws thiab ua tej lub tswb kub los dai quas cov txiv ntsiav kws ntawm lub qab tsho ntev ntawd, dai ib lub tswb quas ib lub txiv ntsiav kws, dai li no thoob plaws lub qab tsho ntev. Thaum Aloo ua kuv li haujlwm mas nws yuav tsum hnav lub tsho no, thiab thaum nws mus rau ntawm Yawmsaub xubntiag hauv lub chaw dawb huv thiab thaum nws tawm rov los mas yuav hnov cov tswb ntawd nrov nws thiaj tsis tuag. “Muab cov tseem kub ua ib pluaj kub mas txaug npe ntawv rau hauv hais tias ‘Dawb huv rau Yawmsaub’ yam nkaus li luag txam txwm, thiab muab xov xiav ua hlua khi pluaj kub ntawd rau saum hau phuam sab ntawm hauv pliaj. Aloo yuav tsum coj pluaj kub ntawd rau ntawm nws hauv pliaj. Thaum cov Yixayee xyeem qhov txhia chaw ua kevcai dawb huv pub rau Yawmsaub es ua txhaum los Aloo yuav ris lawv tej kev txhaum. Aloo yuav tsum coj pluaj kub ntawd rau ntawm nws hauv pliaj mus li Yawmsaub thiaj lees yuav lawv. “Muab xov maj uas nkoov zoo zoo ntos ua lub tsho txaij ua qhov muag, thiab muab xov maj uas nkoov zoo zoo ntos ua phuam, thiab ntos txoj siv sia thiab ua paj rau. Ua cov tsho, cov siv sia thiab mom rau Aloo cov tub hnav, lawv thiaj tau koob meej thiab yuav zoo nkauj. Muab tej tsoos meej mom no ua rau koj tus tijlaug Aloo thiab nws cov tub hnav es muab roj hliv ywg ua kevcai xaiv tsa lawv thiab tu kom lawv dawb huv rau kuv lawv thiaj ua tau pov thawj ua kuv tes haujlwm. Muab ntaub mag xaws cov ris luv uas ceg txog ntawm ncej qab xwb rau lawv hnav thiaj npog tau lawv ceg ncau. Aloo thiab nws cov tub yuav tsum hnav cov ris no rau thaum uas mus rau hauv lub tsev ntaub sib ntsib, thiab thaum uas mus ua haujlwm ntawm lub thaj uas xyeem hauv lub chaw dawb huv kom thiaj tsis muaj txim, lawv thiaj tsis tuag. Qhov no yog txoj kevcai uas Aloo thiab nws caj ces yuav tsum coj mus ib txhiab ib txhis li.” “Koj yuav tsum ua li no thiaj muab Aloo lawv tu tau kom dawb huv rau kuv lawv thiaj ua tau pov thawj ua kuv tes haujlwm. Muab ib tug menyuam txiv nyuj thiab ob tug txiv yaj uas tsis muaj chaw thuam li, thiab muab cov ncuav tsis xyaw keeb thiab cov ncuav ntse roj tsis xyaw keeb thiab tej lub ncuav tsis xyaw keeb nyias nyias pleev roj. Yuav tsum muab cov hmoov mog zoo zoo ua cov ncuav no. Muab cov ncuav no tso rau hauv ib lub tawb coj ua ke nrog tus txiv nyuj thiab ob tug txiv yaj tuaj. Coj Aloo thiab nws cov tub tuaj rau ntawm lub qhov rooj tsev ntaub sib ntsib mas muab dej ntxuav lawv huv huv. Muab cev tsoos meej mom rau Aloo hnav, yog lub tsho, lub tsho ntev, lub tsho efauj thiab lub awv thiab muab txoj siv sia uas ntos zoo zoo sia lub tsho pov thawj rau ntawm duav. Muab phuam rau Aloo ntoo thiab muab pluaj kub uas dawb huv sia txoj phuam. Muab cov roj tsw qab uas siv ua kevcai tsa hliv rau saum Aloo taubhau thiaj tsa tau nws. Coj nws cov tub los es muab tej tsho meej mom rau lawv hnav thiab muab siv ua rau lawv sia thiab muab mom rau lawv ntoo. Lawv yuav ua pov thawj raws li kuv twb hais tseg lawd mus ib txhiab ib txhis li. Ua li no thiaj yog koj ua kevcai tsa Aloo thiab nws cov tub ua pov thawj. “Koj yuav tsum coj tus menyuam txiv nyuj tuaj rau ntawm lub tsev ntaub sib ntsib mas Aloo thiab nws cov tub yuav cev tes npuab rau saum tus txiv nyuj taubhau. Muab tus txiv nyuj ntawd tua ntawm Yawmsaub xubntiag ntawm lub qhov rooj tsev ntaub sib ntsib. Muab tus txiv nyuj cov ntshav ib qho los xuas ntiv tes pleev plaub tug kub ntawm plaub lub kaum thaj. Cov ntshav uas tshuav mas muab hliv puag ncig lub taw thaj ntawd. Muab cov hlab hluas roj uas lo plab hnyuv thiab lo cov siab thiab cov hlab hluas roj uas lo ob lub raum thiab ob lub raum huvsi hlawv rau saum lub thaj. Tiamsis tus txiv nyuj cov nqaij thiab daim tawv thiab cov quav mas coj mus hlawv pov tseg sab nraum ntug zos. Tej no yog ua kevcai xyeem daws txim. “Koj yuav tsum muab ib tug txiv yaj los mas Aloo thiab nws cov tub yuav cev tes npuab rau saum tus txiv yaj ntawd taubhau. Mas muab tus txiv yaj ntawd tua thiab muab cov ntshav nchos kom lo puag ncig lub thaj. Muab tus txiv yaj ntawd txiav ua tej ywb yav thiab muab tej plab hnyuv siab ntsws thiab tej tes taw ntxuav coj los tso ua ke rau ntawm cov nqaij thiab lub taubhau. Muab tus txiv yaj ntawd hlawv huvsi rau saum lub thaj ua kevcai hlawv xyeem rau Yawmsaub, ua tej uas muab hlawv kub hnyiab xyeem muaj pa tsw qab hum Yawmsaub lub siab. “Muab dua ib tug txiv yaj los mas Aloo thiab nws cov tub yuav cev tes npuab rau saum tus txiv yaj ntawd taubhau. Mas muab tus yaj ntawd tua thiab muab cov ntshav ib qho los pleev Aloo thiab nws cov tub sab taub ntsej xis thiab pleev tus taub teg xis thiab tus taub taw xis. Thiab muab cov ntshav uas tshuav nchos kom lo puag ncig lub thaj. Muab cov ntshav saum lub thaj ib qho thiab cov roj tsw qab siv ua kevcai tsa ib qho nchos rau Aloo thiab nws cev tsoos meej mom thiab nchos rau Aloo cov tub thiab rau lawv tej tsoos meej mom. Mas Aloo thiab nws cev tsoos meej mom thiab nws cov tub thiab lawv tej tsoos meej mom thiaj dawb huv. “Tus txiv yaj ntawd mas muab cov hlab hluas roj thiab tus kotw uas rog rog thiab cov hlab hluas roj uas lo plab hnyuv thiab lo cov siab thiab cov hlab hluas roj uas lo ob lub raum thiab ob lub raum, thiab sab ceg xis (vim tus txiv yaj ntawd yog siv ua kevcai tsa ua pov thawj), thiab rho ib lub ncuav thiab ib lub ncuav ntse roj thiab ib lub ncuav nyias nyias uas pleev roj hauv lub tawb uas muaj cov ncuav tsis xyaw keeb uas nyob ntawm Yawmsaub xubntiag, mas muab cov no huvsi tso rau hauv Aloo thiab Aloo cov tub txhais tes nqa mus cev tab meeg Yawmsaub ua kevcai cev xyeem. Mas koj ho txais ntawm Aloo lawv txhais tes coj los hlawv rau saum lub thaj ua ke nrog tus yaj uas hlawv huvsi xyeem lawd. Tej pa uas hlawv ntawd tsw qab hum Yawmsaub lub siab, yog yam uas muab hlawv kub hnyiab xyeem rau Yawmsaub. “Muab tus txiv yaj uas siv ua kevcai tsa Aloo ua pov thawj cov nqaij ntawm hauv nrob cev tab meeg Yawmsaub ua kevcai cev xyeem mas cov nqaij ntawd yuav muab ua koj feem. Tus txiv yaj uas siv ua kevcai tsa ua pov thawj cov nqaij ntawm hauv nrob uas cev thiab ib sab ceg uas cev xyeem rau Yawmsaub mas yuav tu kom dawb huv rau Yawmsaub, thiab muab ua Aloo thiab Aloo cov tub li feem. Ob qho nqaij no yog tej uas cov Yixayee yuav tseg ua Aloo thiab nws cov tub li feem mus ib txhis li. Thaum cov Yixayee tua tsiaj xyeem ua kevcai sib raug zoo lawv yuav tsum tseg ob qho nqaij no ua cov pov thawj li feem. Yog tej uas lawv muab pub rau Yawmsaub. “Aloo cev tsoos meej mom uas dawb huv mas muab rau nws cov tub hnav tau rau lub sijhawm uas ua kevcai muab roj hliv ywg tsa lawv ua pov thawj txhua tiam mus li. Tus uas sawv los ua pov thawj nyob leej txiv chaw ua kuv tes haujlwm hauv lub tsev ntaub sib ntsib chav dawb huv mas yuav hnav cev tsoos meej mom ntawd xya hnub. “Muab tus txiv yaj uas siv ua kevcai tsa ua pov thawj ntawd cov nqaij hau hauv ib qho chaw uas dawb huv ntawd. Mas Aloo thiab nws cov tub yuav noj tus txiv yaj ntawd cov nqaij thiab cov ncuav hauv lub tawb rau ntawm lub qhov rooj tsev ntaub sib ntsib sab nraud. Lawv yuav noj tej uas muab xyeem ntxuav kev txhaum txim es ua kevcai tsa lawv ua pov thawj dawb huv rau kuv. Lwm tus noj tsis tau vim tej ntawd yog yam uas dawb huv lawm. Yog cov nqaij cov ncuav uas siv ua kevcai tsa ua pov thawj ntawd noj tsis tag mas tagkis tom qab cia li muab hlawv huvsi tsis txhob noj li, vim yog yam uas dawb huv lawm. “Koj yuav tsum ua txhua yam kevcai rau Aloo thiab nws cov tub raws li kuv hais rau koj lawd. Qhov kevcai tsa lawv ua pov thawj no yuav ua xya hnub. Txhua hnub yuav muab ib tug txiv nyuj tua ua kevcai xyeem daws txim thiab ntxuav kev txhaum tseg. Thiab yuav ua kevcai xyeem daws txim rau thaum ntxuav tej kev txhaum kev qias saum lub thaj thiab yuav muab roj tsw qab hliv ywg lub thaj kom dawb huv rau kuv. Yuav ua kevcai ntxuav lub thaj ntawd xya hnub lub thaj thiaj dawb huv ua tau kuv tug, lub thaj thiaj dawb huv kawg nkaus mas yam uas mus nphav lub thaj ntawd yuav dawb huv. “Ntawm no mus yog tej uas nej yuav tsum muab xyeem saum lub thaj mus li, yuav niaj hnub muab ob tug menyuam yaj uas muaj ib xyoos xyeem mus li. Muab ib tug menyuam yaj tua xyeem rau thaum tagkis, muab ib tug xyeem rau thaum yuav tsaus ntuj. Thaum xyeem thawj tug mivnuas yaj, yuav muab ib feem kaum hauv ib efa hmoov mog zoo zoo thiab ib feem plaub hauv ib hee roj aulib uas tsuam lim tau zoo lawd ntse ua ke xyeem, thiab yuav muab ib feem plaub hauv ib hee cawv txiv hmab hliv ua kevcai hliv xyeem. Thaum yuav tsaus ntuj yuav muab dua ib tug menyuam yaj xyeem, kuj yuav muab hmoov mog ua ke ua kevcai xyeem qoob loo thiab muab cawv txiv hmab ua kevcai hliv xyeem ib yam nkaus li thaum tagkis, ua tej uas muab hlawv kub hnyiab xyeem muaj pa tsw qab hum Yawmsaub lub siab. Nej yuav ua kevcai hlawv xyeem li no ib tiam dhau ib tiam ib txhiab ib txhis mus li rau ntawm lub qhov rooj tsev ntaub sib ntsib tab meeg Yawmsaub. Kuv yuav los ntsib nej thiab nrog koj hais lus qhov ntawd. Kuv yuav los ntsib cov Yixayee rau lub chaw ntawd thiab kuv lub hwjchim ci ntsa iab yuav ua rau lub chaw ntawd dawb huv rau kuv. “Kuv yuav tu kom lub tsev ntaub sib ntsib thiab lub thaj dawb huv rau kuv thiab kuv yuav tsa Aloo thiab nws cov tub ua cov uas dawb huv rau kuv ua pov thawj ua kuv tes haujlwm. Kuv yuav nyob kiag hauv nruab nrab cov Yixayee thiab kuv yuav ua lawv tus Vajtswv. Mas lawv yuav paub tias kuv yog Yawmsaub, yog lawv tus Vajtswv. Kuv yog tus uas coj lawv tawm hauv Iyi tebchaws los kuv thiaj tau nrog nraim lawv nyob. Kuv yog Yawmsaub, yog lawv tus Vajtswv.” “Koj yuav tsum muab ntoo kub twg ua lub thaj hlawv hmoov tshuaj tsw qab. Ua dav xwm fab xwm meem ntev ib tshim dav ib tshim siab ob tshim. Cov kub ntawm kaum thaj mas ua keev kiag ntawm lub thaj los. Muab cov tseem kub luam kiag lub thaj sab saud thiab plaub fab thiab cov kub thaj huvsi thiab muab kub ua ib tug caj ntswm lo puag ncig lub thaj. Muab kub ua ob lub ntsej tis rau hauv tus qab caj ntswm ntawd ib lub ib sab kom sib ncaj mas yuav muab las ntxig rau ob lub ntsej ntawd kwv. Muab ntoo kub twg los ua ob tug las kwv thiab muab kub luam ob tug las ntawd. Muab lub thaj ntawd txawb rau nraum daim ntaub uas thaiv lub phij xab sib cog lus ncaj nkaus lub hau phij xab uas roos kev txhaum, yog lub chaw uas kuv yuav ntsib koj. “Aloo yuav mus hlawv hmoov tshuaj tsw qab saum lub thaj ntawd. Txhua tagkis uas nws mus tu lub teeb mas txawm hlawv hmoov tshuaj tsw qab thiab ntag. Thaum yuav tsaus ntuj uas Aloo taws lub teeb mas nws yuav hlawv hmoov tshuaj tsw qab saum lub thaj, thiaj muaj hmoov tshuaj tsw qab rau ntawm Yawmsaub xubntiag ib tiam dhau ib tiam ib txhiab ib txhis mus li. Tej hmoov tshuaj tsw qab uas tsis dawb huv mas tsis txhob muab hlawv rau saum lub thaj no. Tsis txhob ua kevcai hlawv huvsi xyeem rau saud tsis txhob ua kevcai xyeem qoob loo rau saud, tsis txhob muab cawv txiv hmab hliv ua kevcai xyeem rau saud. Aloo yuav ua kevcai ntxuav kev txhaum rau plaub tug kub ntawm lub thaj ntawd ib xyoos ib zaug. Nws yuav muab cov ntshav uas ua kevcai xyeem daws txim los ua kevcai ntxuav kev txhaum txim, ua kevcai ntxuav lub thaj ib xyoos ib zaug ib tiam dhau ib tiam mus li. Lub thaj no dawb huv kawg nkaus rau Yawmsaub.” Yawmsaub hais rau Mauxe tias, “Thaum koj txheeb npe thiab suav cov Yixayee mas lawv sawvdaws nyias taus nyias nqa nyiaj tuaj pub rau Yawmsaub ua nqe txhiv txojsia, lawv thiaj tsis raug xwm txheej phem rau thaum koj mus suav lawv. Txhua tus uas twb txheeb npe lawd mas yuav pub ib nrab sekhee nyiaj raws li tej nyiaj uas siv hauv lub chaw pe hawm Yawmsaub (ib sekhee muaj nees nkaum kela. ) Yuav tsum pub ib nrab sekhee ntawd rau Yawmsaub. Txhua tus uas tuaj txheeb npe cov uas hnub nyoog nees nkaum xyoo rov saud, yuav coj nyiaj tuaj pub rau Yawmsaub. Thaum nej sawvdaws coj nyiaj tuaj pub rau Yawmsaub ntxuav kev txhaum txhiv nej txojsia mas cov uas muaj tsis txhob pub dhau, cov uas pluag los tsis txhob pub tsawg dhau ib nrab sekhee. Koj yuav khaws cov nyiaj uas txhiv cov Yixayee txojsia coj los siv hauv lub tsev ntaub sib ntsib ua Yawmsaub tes haujlwm, kom Yawmsaub thiaj nco txog qhov uas cov Yixayee sawvdaws twb ntxuav kev txhaum txhiv txojsia lawm.” Yawmsaub hais rau Mauxe tias, “Koj muab tooj liab ua ib lub phaj thiab muab tooj liab ua lub chaw txawb lub phaj tooj liab ntawd ua chaw ntxuav. Muab txawb ntawm lub tsev ntaub sib ntsib thiab lub thaj kem nruab nrab, thiab nqa dej los rau hauv lub phaj, mas Aloo thiab nws cov tub yuav siv cov dej ntawd ntxuav tes ntxuav taw. Thaum lawv yuav nkag mus rau hauv lub tsev ntaub sib ntsib thiab thaum lawv mus ze lub thaj ua Yawmsaub tes haujlwm es muab qhov txhia chaw hlawv xyeem rau Yawmsaub mas lawv yuav tsum muab dej los ntxuav tsam ces lawv tuag. Lawv yuav tsum ntxuav tes ntxuav taw tsam ces lawv tuag. No yog txoj kevcai uas Aloo thiab nws cov tub caj ces yuav tsum coj txhua tiam mus ib txhiab ib txhis li.” Yawmsaub hais rau Mauxe tias, “Muab tej txuj lom zoo zoo li no, uas yog roj tsw qab hnyav tsib puas sekhee, hmoov ntoo tuv hnyav ib nrab (yog ob puas tsib caug sekhee) thiab tauj qaib tsw qab hnyav ob puas tsib caug sekhee, thiab hmoov xyab txob hnyav tsib puas sekhee hnyav raws li nyiaj sekhee uas lawv siv hauv lub chaw pe Yawmsaub, thiab muab ib hee roj aulib. Koj yuav muab tej no los tov ua ke ib yam li tus Kws txawj ua tshuaj tsw qab ua, thiaj tau cov roj uas dawb huv siv ua kevcai tsa. Cov roj no yog cov roj uas dawb huv siv hliv ywg ua kevcai tsa. Thiab muab cov roj tsw qab no ywg pleev lub tsev ntaub sib ntsib thiab lub phij xab sib cog lus, thiab lub rooj thiab tej twj siv saum lub rooj, thiab lub teeb kub thiab tej twj siv tu lub teeb, thiab lub thaj hlawv hmoov tshuaj tsw qab, thiab lub thaj uas hlawv qhov txhia chaw xyeem thiab tej twj uas siv ntawm lub thaj, thiab lub phaj thiab lub chaw uas txawb lub phaj. Yuav ua kevcai tu txhua yam no kom dawb huv rau kuv mas tej no thiaj dawb huv kawg nkaus li. Yog yam twg los nphav tej no mas yam ntawd kuj cia li dawb huv lawm. Koj yuav muab roj hliv ywg rau Aloo thiab nws cov tub ua kevcai tu kom lawv dawb huv rau kuv lawv thiaj ua tau pov thawj ua koom tu kuv. Koj hais rau cov Yixayee hais tias, ‘Cov roj no yog kuv li roj tsw qab dawb huv uas siv ua kevcai tsa ib tiam dhau ib tiam ib txhiab ib txhis li. Cov roj no tsis txhob muab hliv ywg rau tej pejxeem kiag li thiab tsis txhob muab ua dua ib co roj zoo li cov roj tsw qab no. Cov roj no dawb huv rau kuv mas nej yuav tsum muab saib ua yam uas dawb huv rau kuv xwb. Yog leejtwg ua ib co roj tsw qab zoo li no thiab muab cov roj no coj mus hliv ywg rau lwm tus uas tsis yog pov thawj mas tus ntawd yuav raug muab txiav tawm ntawm nws haiv neeg mus.’ ” Yawmsaub hais rau Mauxe tias, “Muab cov txuj lom tsw qab li no, uas yog kua mis roj nyab thiab ib qho nqaij qwj hiavtxwv thiab kua mis qej tsua thiab tej roj ntoos tsw qab zoo zoo sib npaug zos, coj los tov ua ke ua cov hmoov tshuaj tsw qab yam li tus Kws txawj tov ua tshuaj tsw qab, thiab rau mentsis ntsev thiaj zoo kawg nkaus thiab dawb huv. Muab ib co tuav ua hmoov coj mus txawb rau ntawm lub phij xab sib cog lus xubntiag hauv lub tsev ntaub sib ntsib uas yog lub chaw uas kuv yuav ntsib koj. Cov tshuaj tsw qab no yuav tsum muab saib ua yam uas dawb huv kawg nkaus li. Cov hmoov tshuaj tsw qab no uas koj muab tov raws li uas qhia no mas nej tus kheej tsis txhob siv li. Koj yuav suav tias yog yam uas dawb huv rau Yawmsaub lawm. Yog leejtwg ua ib co hmoov tshuaj tsw qab zoo li cov no los siv mas nws yuav raug muab txiav tawm ntawm nws haiv neeg mus.” Yawmsaub hais rau Mauxe tias, “Saib maj, kuv twb xaiv Ulis tus tub Npexalee uas yog Hawj tus xeeb ntxwv, yog xeem Yuda, thiab kuv twb pub Vaj Ntsuj Plig puv npo rau nws kom nws muaj lajlim tswvyim plab plaws thiab txawj ntse paub ua txhua tsav txhua yam, thiab txawj sau qauv thiab muab nyiaj muab kub muab tooj liab los ua tau txaij nraug zees, thiab txawj txua thiab txhum tej qe zeb hlaws uas muaj nqes es muab khawm lo rau lub me tais, txawj sais ntoo txaij zoo nkauj, nws txawj ua txhua yam. Saib maj, kuv twb xaiv Ahixama tus tub Auhaulia uas yog xeem Daj ua tus uas pab nws. Kuv kuj pub tswvyim peevxwm rau txhua tus Kws txawj, lawv thiaj ua tau txhua yam uas kuv twb hais rau koj lawd, yog lub tsev ntaub sib ntsib, lub phij xab sib cog lus thiab lub hau phij xab uas roos kev txhaum thiab txhua yam twj uas siv hauv lub tsev ntaub, yog lub rooj thiab tej twj siv saum lub rooj, lub teeb tseem kub thiab tej twj siv tu lub teeb, thiab lub thaj hlawv hmoov tshuaj tsw qab, thiab lub thaj uas hlawv qhov txhia chaw xyeem thiab tej twj uas siv saum lub thaj, thiab lub phaj ntxuav tes taw thiab lub chaw uas txawb lub phaj, thiab cev tsoos meej mom dawb huv uas ntos tau zoo zoo rau pov thawj Aloo hnav thiab tej tsoos meej mom uas Aloo cov tub hnav rau thaum lawv ua pov thawj ua kuv tes haujlwm, thiab cov roj tsw qab uas siv ua kevcai tsa thiab cov hmoov tshuaj tsw qab uas muab hlawv rau hauv lub chaw uas dawb huv. Tej no huvsi mas lawv yuav tsum ua txhua yam raws nraim li uas kuv twb hais rau koj lawd.” Yawmsaub hais rau Mauxe tias, “Koj cia li hais rau cov Yixayee tias, ‘Nej yuav tsum nco ntsoov so rau kuv hnub Xanpatau, vim tias qhov no yog lub hom thawj rau kuv thiab nej mus rau txhua tiam kom nej thiaj paub tias kuv uas yog Yawmsaub muab nej cais ua dawb huv. Nej yuav tsum nco ntsoov so rau hnub Xanpatau, vim tias yog hnub uas dawb huv rau nej. Leejtwg ua puas tsuas hnub ntawd nws yuav raug txim tuag. Yog leejtwg ua haujlwm rau hnub ntawd, nws yuav raug muab txiav tawm hauv nws haiv neeg. Cia li ua haujlwm rau hnub, tiamsis hnub xya yog hnub Xanpatau yog hnub uas caiv so tiag tiag li thiab yog hnub uas dawb huv rau Yawmsaub. Yog leejtwg ua haujlwm rau hnub Xanpatau yuav raug txim tuag. Yog li no cov Yixayee yuav tsum nco ntsoov so hnub Xanpatau. Lawv yuav hwm hnub ntawd mus rau txhua tiam ua lus cog tseg nyob mus ib txhis li. Yog lub hom thawj rau kuv thiab cov Yixayee mus ib txhis qhia hais tias Yawmsaub tsim lub ntuj lub ntiajteb tau rau hnub xwb tiav tag, mas hnub xya nws so tsis ua haujlwm thiab tau so los siav.’ ” Thaum nws hais rau Mauxe saum lub roob Xinai tag lawd nws muab ob daim txiag zeb uas Vajtswv xuas ntiv tes sau nws tej lus cog tseg rau hauv, pub rau Mauxe. Thaum cov pejxeem pom tias Mauxe nyob ntev heev tsis nqes saum roob los, lawv txawm ua ke tuaj hais rau Aloo tias, “Koj cia li sawv tsees ua tej dab mlom rau peb uas yuav coj peb kev mus. Tus Mauxe uas coj peb tawm hauv Iyi tebchaws los peb tsis paub xyov nws ua li cas lawm.” Mas Aloo hais rau lawv tias, “Cia li hle tej kauj co kub ntawm nej tej pojniam thiab nej tej tub tej ntxhais qhov ntsej coj tuaj rau kuv.” Cov pejxeem sawvdaws thiaj hle tej kauj co kub ntawm lawv qhov ntsej coj tuaj rau Aloo. Aloo tau tej kub ntawm lawv txhais tes ces nws txawm muab nchuav thiab siv cuab yeej txua ua ib tug thav nyuj. Mas lawv hais tias, “Cov Yixayee 'e, tej no yog nej tej dab uas coj nej tawm hauv Iyi tebchaws los.” Thaum Aloo pom li no nws txawm tib ib lub thaj xyeem rau ntawm tus dab mlom nyuj ntawd xubntiag. Mas Aloo tshaj tawm hais tias, “Tagkis yuav ua kevcai noj haus rau Yawmsaub.” Mas hnub tom qab lawv sawv ntxov mus tua tsiaj ua kevcai hlawv xyeem thiab coj tej tsiaj xyeem ua kevcai sib raug zoo. Cov pejxeem kuj zaum noj haus thiab sawv dhia ua lomzem. Yawmsaub hais rau Mauxe tias, “Koj cia li nqes mus, vim koj haiv neeg uas koj coj tawm hauv Iyi tebchaws los ntawd twb ua phem ua qias lawm. Lawv twb tig hlo ntawm txojkev uas kuv qhia rau lawv sai kawg li lawm. Lawv nchuav ib tug dab mlom thav nyuj rau lawv, thiab pe thiab tua tsiaj xyeem rau tus dab mlom ntawd thiab hais tias, ‘Cov Yixayee 'e, tej no yog nej tej dab uas coj nej tawm hauv Iyi tebchaws los.’ ” Yawmsaub hais rau Mauxe tias, “Kuv pom haiv neeg no lawm, lawv yeej yog haiv neeg uas tawv ncauj heev. Vim li no koj tsis txhob tav kuv, kom kuv txojkev npau taws thiaj tshwm plaws ua kom lawv puam tsuaj tag. Tiamsis kuv yuav tsa koj ua ib haiv neeg loj heev.” Mas Mauxe thov Yawmsaub uas yog nws tus Vajtswv tias, “Au Yawmsaub, ua cas koj npau taws heev rau koj haiv neeg uas koj siv koj lub hwjchim loj thiab siv koj txhais tes uas muaj zog coj tawm hauv Iyi tebchaws los? Ua cas yuav cia cov Iyi hais tias, ‘Vajtswv npaj yuav ua phem es coj lawv tawm mus thiaj muab lawv tua rau tom tej roob thiab muab lawv ua puam tsuaj tag hauv lub ntiajteb mus?’ Thov koj thim koj txojkev npau taws heev thiab hloov koj lub siab tsis txhob ua qhov phem no rau koj haiv neeg. Thov koj nco txog Aplahas, Yiha thiab Yixayee uas yog koj cov qhev. Koj tau cog lus ruaj khov rau lawv tias, ‘Kuv yuav ua rau nej caj ces huaj vam coob yam li tej hnub qub saum ntuj, thiab lub tebchaws no huvsi uas kuv cog lus cia lawd kuv yuav pub rau nej caj ces mas lawv yuav tau ua qub txeeg qub teg mus ib txhis li.’ ” Mas Yawmsaub thiaj hloov siab tsis ua tej xwm txheej phem raws li nws tau xav tseg tias nws yuav ua rau nws haiv neeg. Mauxe thiaj tig kiag nqes saum lub roob los, nws nqa ob daim txiag zeb uas sau Vajtswv tej lus rau ob sab huvsi los. Ob daim txiag zeb no yog Vajtswv ua thiab cov npe ntawv ntawd yog Vajtswv sais rau hauv daim txiag zeb. Thaum Yausua hnov cov pejxeem lub suab nrov ntshu nrooj nws txawm hais rau Mauxe tias, “Muaj suab nrov ua rog nram lub chaw nyob.” Tiamsis Mauxe hais tias, “Lub suab uas hnov ntawd tsis yog suab yeej rog thiab tsis yog suab swb rog, tiamsis yog suab qw ua lomzem xwb.” Thaum Mauxe los ze lub zos lawm thiab pom tus dab mlom thav nyuj thiab pom neeg seev cev, ces nws txawm npau taws heev, nws muab ob daim txiag zeb laim pov tseg tawg tag rau ntawm taw roob lawm. Nws muab tus dab mlom thav nyuj uas lawv ua ntawd hlawv thiab muab tuav ua hmoov w rau hauv dej thiab yuam cov Yixayee haus cov dej ntawd. Mauxe thiaj hais rau Aloo tias, “Cov pejxeem no ua li cas rau koj es koj thiaj coj lub txim loj li no los raug lawv?” Aloo teb tias, “Yawg hlob, tsis txhob npau taws kiag li. Koj yeej paub cov pejxeem no lawm, lawv seem lais mus rau txojkev phem xwb. Lawv hais rau kuv tias, ‘Cia li ua tej dab mlom rau peb uas yuav coj peb mus. Tus Mauxe uas coj peb tawm hauv Iyi tebchaws los peb tsis paub xyov nws ua li cas lawm.’ Kuv thiaj hais rau lawv tias, ‘Leejtwg muaj kauj co kub cia li hle los.’ Lawv thiaj muab rau kuv mas kuv muab pov rau hauv cub hluavtaws, ces txawm tshwm tus thav nyuj no tawm los.” Thaum Mauxe pom tias cov pejxeem lem kiag lawm, vim yog Aloo tso lawv lem lawm ua rau lawv raug lawv cov yeeb ncuab thuam luag, mas Mauxe sawv ntsug ntawm rooj vag hauv lub zos thiab hais tias, “Leejtwg nyob Yawmsaub tog? Cia li los ntawm kuv.” Mas Levi cov tub ki sawvdaws thiaj los rau ntawm Mauxe. Mauxe hais rau lawv tias, “Yawmsaub uas yog Yixayee tus Vajtswv hais li no tias, ‘Nej txhua tus cia li ris ntaj ntawm duav thiab mus mus los los ntawm txhua lub rooj vag hauv lub zos thiab txhua tus nyias tua nyias li kwvtij thiab nyias tua nyias li phoojywg thiab nyias tua nyias li kwvtij zej zog.’ ” Mas cov Levi kuj ua raws li Mauxe hais. Mas hnub ntawd cov pejxeem thiaj raug tua kwvlam peb txhiab leej. Mauxe hais tias, “Hnub no nej rov tsa nej ua cov uas ua Yawmsaub tes haujlwm, vim nej txhua tus nyias tawm tsam nyias tej tub thiab nyias tej kwvtij, hnub no Yawmsaub thiaj li foom koob hmoov rau nej.” Hnub tom qab Mauxe thiaj hais rau cov pejxeem tias, “Nej tau ua txhaum muaj txim loj heev. Mas nimno kuv yuav nce rov mus cuag Yawmsaub. Tej zaum kuv yuav ntxuav tau nej tej kev txhaum txim.” Mauxe thiaj rov mus cuag Yawmsaub thiab thov hais tias, “Cov pejxeem no ua txhaum txim loj kawg. Lawv ua tej dab mlom kub rau lawv. Tiamsis nimno thov koj zam lawv lub txim. Yog koj tsis kam, mas thov koj muab kuv lub npe rhuav tawm hauv koj phau ntawv uas koj sau cia.” Mas Yawmsaub hais rau Mauxe tias, “Leejtwg ua txhaum rau kuv, kuv yuav rhuav tus ntawd lub npe tawm hauv kuv phau ntawv. Koj cia li mus, coj cov pejxeem mus rau lub chaw uas kuv hais rau koj lawm. Kuv tus tubtxib saum ntuj yuav ua koj ntej mus. Txawm li ntawd los txog hnub uas kuv txiav txim kuv yuav rau txim rau lawv.” Mas Yawmsaub tso mob kis los raug cov pejxeem vim yog qhov uas lawv ua tus dab mlom thav nyuj, uas Aloo ua ntawd. Yawmsaub hais rau Mauxe tias, “Cia li mus, koj thiab cov pejxeem uas koj coj tawm hauv Iyi tebchaws los cia li tawm ntawm no mus rau lub tebchaws uas kuv cog lus ruaj khov rau Aplahas, Yiha thiab Yakhauj tias, ‘Kuv yuav pub lub tebchaws rau koj caj ces.’ Kuv yuav tso ib tug tubtxib saum ntuj ua koj ntej mus ntiab cov Khana‑as, cov Amaulai, cov Hithai, cov Pelixai, cov Hivai thiab cov Yenpu tawm qhov ntawd mus. Koj cia li mus kom txog lub tebchaws uas muaj kua mis thiab zib ntab ntws nto. Tiamsis kuv yuav tsis nrog koj mus ntshai tsam kuv yuav ua rau koj puam tsuaj tag ntawm ib tog kev, vim nej yog neeg tawv ncauj.” Thaum cov pejxeem hnov tej xov phem ntawd lawv quaj ntsuag thiab tsis muaj leejtwg coj saw nyiaj saw kub kiag li, rau qhov Yawmsaub hais rau Mauxe tias, “Koj cia li hais rau cov Yixayee tias, ‘Nej yog neeg tawv ncauj. Yog kuv nrog nej mus ib nyuag pliag xwb kuv muab nej ua puam tsuaj tag. Vim li no nej cia li hle nej tej saw nyiaj saw kub tseg thiab kuv yuav txiav txim siab saib kuv yuav ua li cas rau nej.’ ” Cov Yixayee thiaj li hle lawv tej saw nyiaj saw kub mas txij ntawm lub roob Haule lawv tsis coj li lawm. Mauxe pheej coj ib lub tsev ntaub mus tsa rau sab nraum ntug zos deb ntawm lub zos mas hu ua lub tsev ntaub sib ntsib. Mas txhua tus uas xav ua nug rau Yawmsaub kuj tawm mus rau ntawm lub tsev ntaub sib ntsib uas nyob nraum ntug zos. Mauxe tawm mus rau ntawm lub tsev ntaub thaum twg, cov pejxeem sawvdaws yuav sawv ntsug ntawm nyias lub qhov rooj tsev ntaub saib Mauxe mus txog thaum nws nkag rau hauv lub tsev ntaub. Thaum Mauxe nkag mus rau hauv lub tsev ntaub lawm, tus ncej huab kuj nqes los nyob ntawm lub tsev ntaub qhov rooj, mas Yawmsaub nrog Mauxe hais lus. Cov pejxeem sawvdaws pom tus ncej huab los nyob ntawm lub qhov rooj tsev ntaub thaum twg, mas sawvdaws txhua tus kuj sawv tsees hawm ntawm nyias lub qhov rooj tsev ntaub. Yawmsaub pheej nrog Mauxe sib tham tim ntsej tim muag yam li ob tug kwvluag sib tham. Ces Mauxe li rov qab los rau hauv lub zos, tiamsis tus tub hluas Yausua uas yog Noo tus tub thiab yog Mauxe tus tub qhe mas tsis tawm hauv lub tsev ntaub mus li. Mauxe hais rau Yawmsaub tias, “Koj tau hais rau kuv tias, ‘Cia li coj cov pejxeem no mus,’ tiamsis koj twb tsis qhia rau kuv paub tias koj yuav txib leejtwg nrog kuv mus. Txawm li ntawd los koj tseem hais tias, ‘Kuv paub koj zoo vim paub koj lub npe thiab koj yog tus uas txaus kuv siab.’ Yog koj txaus siab rau kuv tiag lawm, thov koj qhia koj txojkev rau kuv pom nimno xwv kuv thiaj paub koj thiab yuav txaus koj lub siab mus li. Thiab thov koj nco tias cov neeg no yog koj haiv neeg thiab.” Yawmsaub hais tias, “Kuv yuav nrog koj mus ntag thiab yuav pub kom koj tau so.” Mauxe thiaj hais rau nws tias, “Yog koj tsis nrog kuv mus, thov tsis txhob coj peb tawm ntawm no mus li. Yuav ua li cas thiaj paub tias kuv thiab koj cov neeg txaus koj lub siab? Kuj yog thaum koj nrog peb mus xwb kuv thiab koj cov neeg thiaj li txawv dua lwm haiv neeg huvsi uas nyob thoob plaws hauv lub ntiajteb los tsis yog?” Yawmsaub hais rau Mauxe tias, “Yam uas koj thov, kuv yuav ua raws li ntawd. Rau qhov koj txaus kuv lub siab thiab kuv paub koj lub npe zoo.” Mauxe thiaj hais tias, “Thov koj ua koj lub hwjchim ci ntsa iab tshwm rau kuv pom.” Yawmsaub thiaj teb tias, “Kuv yuav ua kuv txojkev zoo huvsi tshwm los hla ntawm koj xubntiag, thiab kuv yuav tshaj tawm kuv lub npe uas yog Yawmsaub rau ntawm koj xubntiag. Kuv xav khuvleej tus twg kuv yuav khuvleej tus ntawd, kuv xav tab ncuab tus twg kuv yuav tab ncuab tus ntawd.” Yawmsaub hais tias, “Tiamsis koj yuav pom tsis tau kuv lub ntsej muag, rau qhov tsis muaj leejtwg pom es tseem muaj txojsia nyob.” Mas Yawmsaub hais tias, “Saib maj, muaj ib qho chaw nyob ze kuv uas koj sawv tau saum lub pob zeb ntawd. Mas thaum kuv lub hwjchim ci ntsa iab tabtom hla mus kuv yuav muab koj zais rau hauv kem zeb mas kuv yuav xuas kuv txhais tes roos koj mus txog thaum kuv hla dhau lawm, kuv li rho kuv txhais tes mas koj yuav pom kuv nrob qaum tiamsis koj yuav tsis pom kuv lub ntsej muag.” Yawmsaub hais rau Mauxe tias, “Cia li txhwm dua ob daim txiag zeb zoo ib yam li thawj ob daim, mas kuv yuav sau tej lus uas nyob hauv ob daim qub uas koj ua tawg lawm rau hauv. Cia li npaj kom txhij rau tagkis mas sawv ntxov nce tuaj rau saum lub roob Xinai thiab tuaj cuag kuv saum lub ncov roob. Tsis txhob kheev leejtwg nrog koj tuaj thiab tsis kheev leejtwg tuaj nyob saum lub roob ib thaj twg kiag li. Tsis txhob kheev tej yaj tej tshis tej nyuj noj zaub ze ntawm lub roob no.” Mauxe thiaj txhwm ob daim txiag zeb zoo yam li thawj ob daim, thiab nws sawv ntxov nce mus rau saum lub roob Xinai raws li Yawmsaub hais rau nws, thiab nqa ob daim txiag zeb ntawm txhais tes mus. Mas Yawmsaub nyob hauv tauv huab nqes los thiab nrog Mauxe sawv ua ke thiab tshaj tawm Yawmsaub lub npe. Yawmsaub hla kiag ntawm Mauxe mus thiab tshaj tawm tias, “Yawmsaub, Yawmsaub, yog Vajtswv tus uas khuvleej thiab hlub, nws tsis chim sai, nws txojkev hlub uas ruaj khov thiab nws txojkev ua ncaj uas tso siab tau muaj nplua mias, nws txojkev hlub ruaj khov muaj rau neeg qas txhiab qas tiam, nws zam txim rau tej kev ua phem ua qias thiab kev fav xeeb thiab kev ua txhaum muaj txim. Tiamsis nws kuj tsis suav tias tsis txhaum, nws yuav rau leej txiv lub txim poob mus rau cov menyuam thiab cov xeeb ntxwv peb plaub tiam.” Mauxe txawm maj nroos nyo hau ti nkaus av pe hawm. Nws hais tias, “Au tus Tswv, yog kuv txaus koj lub siab, txawm yog haiv neeg no tawv ncauj los kuv thov koj nrog peb mus. Thiab thov koj zam peb tej kev txhaum thiab peb lub txim, thiab txais yuav peb ua koj teej koj tug.” Yawmsaub hais tias, “Ntawm no kuv cog lus rau koj. Kuv yuav ua txujci phimhwj tshwm tab meeg koj haiv neeg, yog tej txujci uas tsis tau ua dua rau hauv lub ntiajteb lossis ua rau hauv lub tebchaws twg kiag li. Ib tsoom neeg uas nyob puag ncig koj sawvdaws yuav pom Yawmsaub tes haujlwm, rau qhov tej uas kuv yuav ua rau koj ntawd yuav yog ib yam uas txaus ntshai kawg li. “Koj yuav tsum ua raws li tej uas hnub no kuv hais rau koj. Saib maj, kuv yuav ntiab cov Amaulai, cov Khana‑as, cov Hithai, cov Pelixai, cov Hivai thiab cov Yenpu khiav tawm ntawm koj xubntiag mus. Yuav tsum ceev faj tsis txhob nrog cov neeg hauv lub tebchaws uas koj yuav mus txog ntawd cog lus sib raug zoo, ntshai tsam yuav ua rooj hlua cuab koj. Nej yuav tsum rhuav lawv tej thaj teev dab pov tseg thiab tsoo lawv tej ncej tseem ceeb tawg tag thiab ntov lawv tej ncej dab Asela. Nej tsis txhob pe luag tej dab, rau qhov Yawmsaub uas muaj lub npe hu tias ‘Khib xeeb’ yog Vajtswv uas khib xeeb. Yog nej cog lus nrog cov neeg hauv lub tebchaws ntawd sib raug zoo mas ntshai tsam thaum lawv deev lawv tej dab thiab tua tsiaj xyeem rau tej dab ntawd ces lawv yuav hu nej mus nrog lawv koom, thiab nej yuav noj tej uas lawv muab xyeem rau tej dab ntawd, thiab nej yuav mus yuav lawv tej ntxhais los ua nej tej tub pojniam ces lawv tej ntxhais yuav mus deev lawv tej dab thiab yaum nej tej tub mus deev lawv tej dab thiab. “Nej tsis txhob nchuav dab mlom rau nej pe kiag li. “Nej yuav tsum nco ntsoov ua kevcai noj ncuav tsis xyaw keeb. Yuav noj ncuav tsis xyaw keeb kom puv xya hnub rau lub sijhawm uas teem cia hauv lub hli Anpis raws li kuv hais rau nej, rau qhov nej tawm hauv Iyi tebchaws los rau lub hli Anpis. “Thawj plab menyuam txhua tus yog kuv li, yog nej thawj tug menyuam tsiaj uas yog tus txiv huvsi, yog thawj tug menyuam nyuj menyuam yaj. Thawj tus menyuam nees luav mas nej yuav muab ib tug yaj txhiv. Yog nej tsis txhiv kuj muab lov caj dab pov tseg. Nej thawj tus tub hlob txhua tus kuj yuav tsum txhiv thiab. “Tsis txhob cia leejtwg tuaj cuag kuv tes dawb tes do. “Nej yuav tsum ua haujlwm rau hnub xwb, hnub uas xya yuav tsum so. Txawm yog lub caij laij teb caij sau qoob los yuav tsum so. “Yuav tsum nco ntsoov ua kevcai xya lub chib so uas sau thawj phaum mog, thiab nco ntsoov ua kevcai sau qoob thaum qab xyoo. “Nej cov txivneej sawvdaws yuav tsum tuaj ua ke rau ntawm Vajtswv Yawmsaub uas yog Yixayee tus Vajtswv lub xubntiag ib xyoos peb zaug. Kuv yuav ntiab lwm haiv neeg khiav tawm ntawm nej lub xubntiag mus thiab pub kom nej tau tebchaws dav zuj zus. Lub sijhawm uas nej mus cuag Yawmsaub uas yog nej tus Vajtswv ib xyoos peb zaug ntawd, yuav tsis muaj leejtwg xav txeeb nej lub tebchaws kiag li. “Tsis txhob muab tej tsiaj uas tua xyeem li ntshav xyeem nrog cov ncuav xyaw keeb ua ke. Tsis txhob tseg tus menyuam yaj uas muab ua kevcai hla dhau li nqaij cia nyob txog kaj ntug. “Thawj phaum qoob loo uas sau hauv teb los mas yuav coj tej uas zoo zoo tuaj rau hauv Yawmsaub uas yog nej tus Vajtswv lub tsev. “Tsis txhob muab tus maum tshis cov kua mis los hau nws tus menyuam.” Yawmsaub hais rau Mauxe tias, “Tej lus no muab sau cia. Kuv nrog koj thiab cov Yixayee cog lus cia raws li tej nqes no lawm.” Mauxe nrog Yawmsaub nyob qhov ntawd plaub caug hnub plaub caug hmo, nws tsis noj mov tsis haus dej li. Nws sau tej lus cog tseg rau hauv ob daim txiag zeb, yog kaum txoj kevcai. Mauxe nqes saum lub roob Xinai los, nws nqa ob daim txiag zeb uas sau Vajtswv tej lus ntawm nws txhais tes los. Lub sijhawm uas Mauxe nqes saum lub roob los nws tsis paub tias nws lub ntsej muag ci vim yog nws tau nrog Vajtswv hais lus lawm. Thaum Aloo thiab cov Yixayee sawvdaws ntsia Mauxe mas pom tias nws lub ntsej muag ci, lawv tsis kav txav los ze nws. Tiamsis Mauxe hu lawv los. Aloo thiab cov uas ua thawj hauv cov pejxeem sawvdaws thiaj rov los cuag Mauxe, thiab nws nrog lawv hais lus. Tom qab ntawd cov Yixayee sawvdaws txav los ze, thiab Mauxe thiaj qhia tej kevcai uas Yawmsaub tau hais rau nws saum lub roob Xinai txhua nqe rau lawv mloog. Thaum Mauxe hais rau lawv tag lawm, nws muab ntaub los kauv nws lub ntsej muag. Thaum twg Mauxe nkag mus rau ntawm Yawmsaub xubntiag nws kuj muab daim ntaub ntawd yaws mus txog thaum nws tawm los. Thaum nws tawm los thiab qhia tej uas Vajtswv kom nws hais rau cov Yixayee mloog, mas cov Yixayee ntsia Mauxe lub ntsej muag kuj pom Mauxe lub ntsej muag ci, ces Mauxe txawm muab ntaub kauv nws lub ntsej muag dua mus txog thaum nws nkag mus nrog Yawmsaub hais lus. Mauxe hu ib tsoom pejxeem Yixayee tuaj txoos ua ib ke thiab nws hais rau lawv tias, “Tej no yog tej uas Yawmsaub kom nej ua. Nej ua nej tej haujlwm rau hnub xwb. Hnub xya yog hnub uas caiv so tiag tiag, yog hnub Xanpatau uas dawb huv rau Yawmsaub. Yog leejtwg ua ib yam haujlwm rau hnub ntawd mas yuav raug muab tua pov tseg. Hnub Xanpatau tsis txhob rauv taws hauv nej tej tsev kiag li.” Mauxe hais rau cov Yixayee sawvdaws tias, “Yawmsaub kom nej ua li no, nej sawvdaws mus nqa tej uas nej muaj tuaj pub rau Yawmsaub. Leejtwg lub siab dav kuj coj nws tej qhov txhia chaw tuaj pub rau Yawmsaub, yog kub thiab nyiaj thiab tooj liab, thiab xov xiav xov tsamxem xov liab thiab xov maj uas nkoov zoo zoo thiab plaub tshis, thiab cov tawv txiv yaj uas muab foo liab lawd, thiab cov tawv ntshuab hiavtxwv, thiab ntoo kub twg, thiab roj sam lub teeb, thiab tej txuj lom uas xyaw cov roj tsw qab siv ua kevcai tsa, thiab xyaw cov hmoov tshuaj tsw qab, thiab cov qe zeb iav txho ci lam lug thiab tej qe zeb hlaws muaj nqes uas muab xaws lo rau lub tsho efauj thiab lub awv. “Cia txhua tus uas muaj tswvyim hauv nej cov tuaj ua txhua yam uas Yawmsaub kom nej ua, yog Yawmsaub lub tsev, uas yog lub tsev ntaub thiab daim ntaub uas vov txheej saud thiab cov khawb, cov txiag tab, cov las, cov ncej thiab cov taw tiag hauv taw, thiab lub phij xab thiab cov las kwv thiab lub hau phij xab roos kev txhaum thiab daim ntaub uas thaiv, thiab lub rooj, ob tug las kwv thiab tej twj uas siv saum lub rooj, thiab cov ncuav uas xyeem txawb rau ntawm Yawmsaub xubntiag, thiab tus kav teeb uas txawb teeb pom kev, tej twj uas siv tu lub teeb, cov teeb thiab cov roj sam teeb, thiab lub thaj hlawv hmoov tshuaj tsw qab xyeem thiab ob tug las kwv, thiab cov roj tsw qab siv ua kevcai tsa, thiab cov hmoov tshuaj tsw qab, thiab daim ntaub uas ua qhov rooj tsev ntaub, thiab lub thaj hlawv qhov txhia chaw xyeem, daim tsuav ntxaij tooj liab, cov las kwv thiab tej twj uas siv saum lub thaj, thiab lub phaj tooj liab thiab lub chaw txawb lub phaj, thiab cov ntaub xov laj kab, cov ncej, cov taw tiag ncej thiab daim ntaub ua rooj vag, thiab cov tswg uas txhos tsa Yawmsaub lub tsev thiab cov tswg uas txhos tuav laj kab thiab cov hlua, thiab tej tsoos meej mom uas ntos tau zoo zoo uas hnav rau lub sijhawm mus ua Vajtswv tes haujlwm hauv lub chaw dawb huv, yog cev tsoos meej mom dawb huv uas pov thawj Aloo hnav thiab tej tsoos meej mom uas nws cov tub hnav rau thaum lawv ua pov thawj li haujlwm.” Ces cov Yixayee sawvdaws txawm rov qab ntawm Mauxe mus. Txhua tus uas kub siab thiab zoo siab txawm nqa tej qhov txhia chaw tuaj pub rau Yawmsaub siv ua lub tsev ntaub sib ntsib thiab siv ua txhua yam haujlwm rau hauv, thiab ua tej tsoos meej mom dawb huv. Cov pojniam txivneej txhua tus uas zoo siab pub sawvdaws coj tej npauj kub, kauj co, tej nplhaib thiab tej tooj npab thiab tej saw kub tuaj. Txhua tus coj tej kub li no tuaj xyeem pub rau Yawmsaub. Mas txhua tus uas muaj xov xiav xov tsamxem xov liab thiab tej xov maj uas nkoov zoo zoo, thiab plaub tshis thiab tawv txiv yaj uas foo liab liab thiab cov tawv ntshuab hiavtxwv nqa tuaj pub. Txhua tus uas muaj nyiaj muaj tooj liab kuj coj tuaj pub rau Yawmsaub, thiab txhua tus uas muaj ntoo kub twg zoo siv kuj nqa tuaj pub. Cov pojniam sawvdaws uas txawj ua maj ua ntuag kuj coj tej xov maj xov ntuag uas xiav thiab tsamxem thiab liab thiab coj xov maj uas nkoov zoo zoo tuaj pub. Cov pojniam sawvdaws uas zoo siab thiab txawj saws plaub tshis kuj coj xov tshis tuaj pub. Cov thawj coj kuj coj tej qe zeb iav txho ci lam lug thiab tej qe zeb hlaws uas muaj nqes tuaj xaws lo rau lub tsho efauj thiab lub awv, thiab coj tej txuj lom thiab coj roj tuaj yog yuav siv sam teeb thiab siv ua cov roj tsw qab siv ua kevcai tsa thiab siv ua cov hmoov tshuaj tsw qab hlawv xyeem. Cov Yixayee cov pojniam txivneej sawvdaws uas kub siab pub qhov txhia chaw ua txhua yam haujlwm uas Yawmsaub kom Mauxe hais rau lawv ua lawd, kuj coj tuaj pub rau Yawmsaub raws li lawv zoo siab hlo pub. Mauxe hais rau cov Yixayee tias, “Saib maj, Yawmsaub twb xaiv Ulis tus tub Npexalee uas yog Hawj tus xeeb ntxwv, yog xeem Yuda, thiab Yawmsaub twb pub Vaj Ntsuj Plig puv npo rau nws kom nws muaj lajlim tswvyim plab plaws thiab txawj ntse paub ua txhua tsav txhua yam, thiab txawj sau qauv thiab muab nyiaj muab kub muab tooj liab los ua tau txaij nraug zees, thiab nws txawj npawm thiab txhum tej qe zeb hlaws muab khawm lo rau lub me tais, txawj sais ntoo txaij zoo nkauj, nws txawj ua txhua yam zoo zoo nkauj li. Yawmsaub kuj pub Npexalee thiab Auhaulia uas yog Ahixama tus tub yog xeem Daj ob tug muaj siab qhia lwm tus ua tau. Yawmsaub pub tswvyim peevxwm rau ob tug no, ob tug thiaj txawj ua tau txhua yam haujlwm uas cov tub txawg tub ntse ua. Ob tug txawj sau qauv zoo zoo li, txawj siv xov xiav xov tsamxem xov liab thiab xov maj uas nkoov zoo zoo ua paj ntaub, thiab ob tug txawj ua txhua tsav txhua yam thiab txawj xav sau qauv txaij nraug zees. Npexalee thiab Auhaulia thiab txhua tus muaj peevxwm uas Yawmsaub twb pub tswvyim plab plaws thiab kev txawj kom ua tau txhua yam haujlwm ua lub chaw pe hawm Yawmsaub mas sawvdaws yuav ua txhua yam raws li Yawmsaub twb hais tseg lawd.” Mauxe hu Npexalee thiab Auhaulia thiab sawvdaws uas muaj peevxwm ua, uas Yawmsaub twb pub tswvyim plab plaws rau lawv lawd, yog txhua tus uas kub siab ua haujlwm kom tuaj ua haujlwm. Lawv txais tej qhov txhia chaw ntawm Mauxe txhais tes, yog tej uas cov Yixayee zoo siab coj tuaj pub ua lub chaw pe Yawmsaub lawd. Cov pejxeem kuj niaj tagkis coj tej qhov txhia chaw uas lawv zoo siab pub tuaj pub. Cov neeg uas txawj ua txhua yam haujlwm hauv lub chaw pe Yawmsaub txawm tso haujlwm tseg, sawvdaws ua ke mus hais rau Mauxe tias, “Cov pejxeem coj qhov txhia chaw tuaj ntau dhau txhua yam haujlwm uas Yawmsaub kom peb ua lawm.” Mauxe thiaj tshaj tawm thoob plaws zej zog rau sawvdaws tias, “Pojniam txivneej tsis txhob coj qhov txhia chaw tuaj pub ua lub chaw pe Yawmsaub lawm.” Mas cov pejxeem thiaj tseg tsis coj tuaj pub lawm, vim cov uas muaj twb txaus ua txhua yam haujlwm thiab siv tsis tag. Cov uas txawj ua mas lawv muab kaum chaws ntaub mag ua Yawmsaub lub tsev, yog lawv muab cov xov maj uas nkoov zoo zoo thiab xov xiav xov tsamxem thiab xov liab ntos ua, thiab cov Kws txawj ntos ntos ua duab Khelunpee rau hauv, ib chaws ntaub ntev nees nkaum yim tshim dav plaub tshim, txhua chaws ntaub dav ntev ib yam nkaus. Nws muab tsib chaws ntaub xaws ua ke ua ib daig, muab tsib chaws xaws ua ib daig. Nws muab cov ntaub xiav xaws ua ntsej rau daim ntug ntaub uas ib, thiab ua ntsej rau daim ntug ntaub uas ob ib yam nkaus. Nws ua tsib caug lub ntsej rau daim ntug ntaub uas ib, thiab ua tsib caug lub ntsej rau daim uas ob, sab npoo uas txuas ua ke kom sib ncaj nkaus, thiab nws muab kub los ua tsib caug lub khawb los khawm ob daig ntaub ntawd kom ua kiag ib daig ua Yawmsaub lub tsev. Nws muab plaub tshis los ntos ua kaum ib chaws ntaub vov kiag Yawmsaub lub tsev, ib chaws ntaub ntev peb caug tshim dav plaub tshim, kaum ib chaws ntaub dav ntev ib yam nkaus. Nws muab tsib chaws ntaub xaws ua ke ua ib daig, muab rau chaws xaws ua ib daig. Nws ua tsib caug lub ntsej rau daim ntug ntaub uas ib, thiab ua tsib caug lub ntsej rau daim ntug ntaub uas ob, sab npoo ntaub uas txuas ua ke. Nws muab tooj liab ua tsib caug lub khawb thiaj khawm tau ob daig ntaub kom ua kiag ib daig. Nws muab cov tawv txiv yaj uas foo liab lawd los ua ntaub vov lub tsev ntaub thiab muab cov tawv ntshuab hiavtxwv los ua ntaub vov txheej saud. Nws muab ntoo kub twg los ua tab tsa xov Yawmsaub lub tsev. Cov tab ntawd ntev kaum tshim dav ib tshim txhais. Ib daim txiag tab mas nws thais ua ob tug taw thiaj txuas tau ua ke. Nws ua txhua daim txiag tab li no coj los ua Yawmsaub lub tsev. Nws ua nees nkaum daim txiag tab xov Yawmsaub lub tsev sab nrad, thiab muab nyiaj ua plaub caug tus taw tiag nees nkaum daim txiag tab li taw, ib daim txiag tab ntxig rau ob tug taw. Nws ua nees nkaum daim txiag tab xov Yawmsaub lub tsev sab ped, thiab ua plaub caug tus taw nyiaj tiag hauv taw, ib daim txiag tab ntxig rau ob tug taw tiag. Nws ua rau daim txiag tab xov Yawmsaub lub tsev sab qaum tsev uas hnub poob. Nws ua ob daim txiag tab xov ob lub kaum tsev ntaub uas yog sab qaum tsev. Ob daim txiag tab ntawd mas hauv taw lawv muab ib daim txawb qes mentsis rau sab nraud, saum hau txiag lawv muab teem ti nkaus lub ntsej saum kawg. Nws ua li no rau ob lub kaum tsev ntaub. Sab hnub poob muaj yim daim txiag tab xov thiab muaj kaum rau tus taw nyiaj, ib daim txiag tab ntxig rau ob tug taw. Nws muab ntoo kub twg ua tsib tug las tuav Yawmsaub lub tsev ib sab phab ntsa, thiab ua tsib tug las rau dua ib sab thiab ua tsib tug rau sab qaum tsev uas hnub poob. Nws ua tus las nruab nrab uas tuav cov txiag ntev keev kiag txij ib lub kaum tsev txog ntua ib lub kaum tsev. Nws muab kub luam cov txiag tab ntawd thiab muab kub ua cov ntsej uas ntxig cov las ntawd, thiab muab kub luam cov las huvsi. Nws muab xov xiav xov tsamxem xov liab thiab xov maj uas nkoov zoo zoo ua ib daim ntaub thaiv thiab cov Kws txawj ntos ntos ua duab Khelunpee rau hauv. Nws muab ntoo kub twg los ua plaub tug ncej thiab muab kub luam cov ncej huvsi. Nws muab kub ua nqe lauj thiab muab nyiaj nchuav ua plaub tug taw tiag cov ncej ntawd. Nws muab xov xiav xov tsamxem xov liab thiab xov maj uas nkoov zoo zoo ua ib daim ntaub ua lub qhov rooj tsev ntaub, thiab ua paj ntaub rau. Nws ua tsib tug ncej muaj nqe lauj dai daim ntaub ntawd. Nws muab kub ua ib lub tais khwb cov hau ncej thiab muab kub ua thi rau saum cov hau ncej thiab nws muab tooj liab ua tsib tug taw ncej tiag cov ncej ntawd. Npexalee muab ntoo kub twg ua lub phij xab, ntev ob tshim txhais, dav ib tshim txhais, thiab siab ib tshim txhais. Nws muab cov tseem kub luam tag nrho lub phij xab ntawd sab hauv sab nraud huvsi thiab muab kub ua ib tug caj ntswm puag ncig lub phij xab. Nws muab kub nchuav ua plaub lub ntsej tis rau plaub lub kaum phij xab, ua ib sab ob lub ntsej. Nws muab ntoo kub twg ua ob tug las kwv thiab muab kub luam ob tug las ntawd huvsi, mas muab ntxig rau cov ntsej ntawm lub phij xab ob sab thiaj kwv tau lub phij xab. Nws muab cov tseem kub ua lub hau phij xab uas roos kev txhaum, ntev ob tshim txhais, dav ib tshim txhais. Nws muab kub ntaus ua ob tug Khelunpee txawb rau ob tog hau phij xab. Nws ua ob tug Khelunpee ntawd ib tug nyob ib tog hau phij xab lo xeeb keeb nkaus rau lub hau phij xab uas roos kev txhaum. Ob tug ntawd nthuav tis los roos saum lub hau phij xab, ob tug ntawd tig xubntiag ua ke, yog tig los saib lub hau phij xab uas roos kev txhaum. Nws muab ntoo kub twg ua ib lub rooj ntev ob tshim dav ib tshim thiab siab ib tshim txhais. Nws muab cov tseem kub luam lub rooj ntawd huvsi thiab muab kub ua ib tug caj ntswm puag ncig lub rooj ntawd. Nws ua ib daim txiag dav ib xib thaiv puag ncig lub npoo rooj thiab muab kub ua ib tug caj ntswm lo puag ncig daim txiag ntawd. Nws muab kub nchuav ua plaub lub ntsej tis rau plaub lub kaum rooj uas ncaj plaub tug ceg rooj. Nws muab cov ntsej ntawd lo ze ze daim txiag thiaj ntxig tau las kwv. Nws muab ntoo kub twg ua ob tug las kwv lub rooj thiab muab kub luam ob tug las huvsi. Nws muab cov tseem kub ua tej twj uas siv saum lub rooj, yog tais pliab tais ntim rau hmoov tshuaj tsw qab, thiab tais phaj thiab tej pav lam hwj uas hliv cawv txiv hmab xyeem. Nws muab cov tseem kub ua tus kav teeb. Nws ntaus ua lub taw thiab tus ncej teeb thiab ua cov tais zoo li paj thiab cov qia paj thiab cov nplai paj lo xeeb keeb nkaus rau tus kav teeb. Tus kav teeb no ncau ua rau ceg, ib sab ncau peb ceg. Txhua ceg muaj peb lub paj zoo li paj txiv duaj, txhua lub paj muaj lub qia paj thiab cov nplai paj rau rau ceg uas ncau ntawm tus kav teeb huvsi. Tus tseem kav teeb muaj plaub lub paj txiv duaj uas muaj lub qia paj thiab cov nplai paj huvsi. Rau ceg ntawd txhua nkawm ceg uas ncau ntawm tus kav teeb muaj ib lub qia paj nyob hauv qab. Cov qia paj ntawd thiab cov ceg teeb lo xeeb keeb nkaus rau tus kav teeb, yog muab cov tseem kub ntaus ua. Nws muab cov tseem kub ua xya lub teeb uas txawb saum xya ceg teeb ntawd, thiab ua rab txiab uas txiav teeb xeeb thiab ua lub phaj pliab uas rau txiab. Nws muab cov tseem kub hnyav ib tala ua lub teeb kub thiab tej twj uas siv ntawm lub teeb ntawd. Nws muab ntoo kub twg ua lub thaj hlawv hmoov tshuaj tsw qab. Nws ua dav xwm fab xwm meem ntev ib tshim dav ib tshim siab ob tshim. Cov kub ntawm kaum thaj mas yog ua keev kiag ntawm lub thaj los. Nws muab cov tseem kub luam kiag lub thaj sab saud thiab plaub fab thiab cov kub thaj huvsi thiab muab kub ua ib tug caj ntswm lo puag ncig lub thaj. Nws muab kub ua ob lub ntsej tis rau hauv tus qab caj ntswm ntawd ib lub ib sab kom sib ncaj, mas thiaj ntxig tau las kwv mus. Nws muab ntoo kub twg los ua ob tug las kwv thiab muab kub luam ob tug las ntawd. Nws ua cov roj tsw qab dawb huv uas siv ua kevcai tsa thiab ua cov hmoov tshuaj tsw qab zoo zoo uas hlawv xyeem, ua tau zoo yam nkaus li tus Kws txawj ua tshuaj tsw qab ua. Nws muab ntoo kub twg ua lub thaj uas hlawv qhov txhia chaw xyeem. Nws ua dav xwm fab xwm meem, ntev tsib tshim, dav tsib tshim, siab peb tshim. Nws ua plaub tug kub rau saum plaub lub kaum thaj, nws npawm keev kiag ntawm lub thaj los, thiab muab tooj liab luam lub thaj huvsi. Nws muab tooj liab ua txhua yam twj uas siv rau saum lub thaj, yog tej duav hlau yawm tshauv, tej duav phuaj, tej phaj, tej hmuv chob nqaij, thiab ua tej yias rau ncaig taws. Nws muab kav tooj liab qhaib ua ib daim tsuav ntxaij tso rau hauv lub thaj hlauv rau sab hauv txog ib nrab thaj. Nws muab tooj liab nchuav ua plaub lub ntsej tis rau plaub lub kaum tsuav ntxaij ntxig las kwv. Nws muab ntoo kub twg ua cov las thiab muab tooj liab luam cov las ntawd. Nws ntxig cov las rau cov ntsej uas nyob ntawm lub thaj ob sab thiaj kwv tau nrog lawv mus. Nws muab txiag ua lub thaj ntawd tseg lub plawv thaj kom khoob. Nws muab tej tooj liab uas siv ua iav uas cov pojniam ua Yawmsaub li haujlwm ntawm lub qhov rooj tsev ntaub sib ntsib pub los ua lub phaj tooj liab thiab ua lub chaw tooj liab uas txawb lub phaj. Nws muab xov maj uas nkoov zoo zoo ntos ua ib chaws ntaub mag xov laj kab ib ncig lub tsev ntaub sib ntsib. Chaws ntaub uas xov sab nram ntev ib puas tshim, thiab muaj nees nkaum tus ncej thiab nees nkaum tus taw tooj liab tiag ncej mas cov nqe lauj ntawm cov ncej thiab cov thi rau saum cov hau ncej yog xuas nyiaj ua. Chaws ntaub uas xov sab ped mas ntev ib puas tshim thiab muaj nees nkaum tus ncej thiab nees nkaum tus taw tooj liab tiag cov ncej mas cov nqe lauj ntawm cov ncej thiab cov thi saum cov hau ncej yog xuas nyiaj ua. Chaws ntaub uas xov sab hnub poob mas ntev tsib caug tshim thiab muaj kaum tus ncej thiab kaum tus taw tiag ncej mas cov nqe lauj ntawm cov ncej thiab cov thi rau saum cov hau ncej yog xuas nyiaj ua. Sab ntawm rooj vag uas yog sab hnub tuaj mas kuj dav tsib caug tshim. Chaws ntaub uas xov ib sab ntawm rooj vag mas dav kaum tsib tshim, thiab muaj peb tug ncej thiab peb tug taw tiag ncej, thiab chaws ntaub uas xov dua ib sab ntawm rooj vag mas dav kaum tsib tshim thiab muaj peb tug ncej thiab peb tug taw tiag ncej. Cov ntaub uas xov thoob plaws lub laj kab mas yog muab cov xov maj uas nkoov zoo zoo ntos ua. Nws muab tooj liab ua cov taw tiag ncej, thiab muab nyiaj ua cov nqe lauj thiab ua thi rau saum cov hau ncej thiab muab nyiaj ua lub tais khwb hau ncej. Txhua tus ncej laj kab muaj thi nyiaj saum hau ncej huvsi. Nws muab xov xiav xov tsamxem xov liab thiab xov maj uas nkoov zoo zoo ua ib chaws ntaub coj los ua rooj vag thiab nws ua paj rau hauv. Chaws ntaub ntawd ntev nees nkaum tshim siab tsib tshim sib txig zos li chaws ntaub xov laj kab, muaj plaub tug ncej thiab plaub tug taw tooj liab tiag ncej. Cov nqe lauj ntawm cov ncej yog xuas nyiaj ua, thiab cov tais khwb hau ncej thiab cov thi saum cov ncej kuj yog xuas nyiaj ua. Cov tswg uas txhos tsa Yawmsaub lub tsev thiab cov tswg uas tuav lub laj kab ib ncig yog xuas tooj liab ua huvsi. No yog sau tej uas siv ua Yawmsaub lub tsev uas yog Yawmsaub lub tsev ntaub uas muaj lub phij xab sib cog lus saib siv npaum li cas. Mauxe kom cov Levi sau. Tus pov thawj Aloo tus tub Ithama ua tus thawj coj lawv. (Npexalee uas yog Ulis tus tub yog Hawj tus xeeb ntxwv yog xeem Yuda tau ua txhua yam raws li uas Yawmsaub hais rau Mauxe lawd. Auhaulia uas yog Ahixama tus tub yog xeem Daj nrog Npexalee ua haujlwm ua ke. Auhaulia txawj ua txhua yam huvsi, nws txawj sau qauv zoo zoo li thiab nws txawj ua ntaub ua xov ua paj ntaub zoo, nws muab xov xiav xov tsamxem xov liab thiab tej xov maj uas nkoov zoo zoo los ua.) Tej kub uas siv ua lub chaw pe Yawmsaub thiab txhua yam, yog cov kub uas lawv twb coj tuaj pub rau Yawmsaub, huvsi muaj 29 tala thiab 730 sekhee hnyav raws li siv hauv lub chaw pe Yawmsaub. Tej nyiaj uas thaum cov pejxeem txheeb npe es lawv them ntawd mas suav huvsi muaj 100 tala thiab 1,775 sekhee hnyav raws li lawv siv hauv lub chaw pe Yawmsaub, ib leeg them ib npekha uas yog ib nrab sekhee raws li siv hauv lub chaw pe Yawmsaub, yog sau ntawm txhua tus uas mus txheeb npe, suav txij li cov uas muaj nees nkaum xyoo rov saud xwb mas tau 603,550 leej. Ib puas tala nyiaj ntawd nws muab nchuav ua cov taw tiag hauv lub chaw pe Yawmsaub thiab ua cov taw tiag ncej rau daim ntaub thaiv, ib puas tala muab nchuav ua ib puas tus taw tiag, ib tala nchuav ua ib tug taw tiag. 1,775 shekhee nyiaj ntawd mas nws siv ua cov nqe lauj ntawm cov ncej thiab ua tais khwb cov hau ncej thiab ua thi rau saum hau ncej. Cov tooj liab uas lawv coj tuaj pub rau Yawmsaub mas huvsi muaj 70 tala thiab 2,400 sekhee. Cov tooj liab ntawd nws siv ua cov taw tiag ncej qhov rooj tsev ntaub sib ntsib thiab ua lub thaj hlawv qhov txhia chaw xyeem thiab ua daim tsuav ntxaij hauv lub thaj thiab ua txhua yam twj siv ntawm lub thaj, thiab ua cov taw tiag ncej rau cov ncej laj kab huvsi thiab rau cov ncej ntawm rooj vag, thiab ua cov tswg uas txhos tsa Yawmsaub lub tsev ntaub thiab cov tswg uas txhos tuav lub laj kab uas xov vij lub tsev ntaub. Lawv muab cov xov xiav xov tsamxem xov liab ntos zoo zoo ua tej tsoos uas hnav mus ua haujlwm hauv lub chaw dawb huv, thiab ua cev tsoos meej mom dawb huv rau Aloo, raws li Yawmsaub hais rau Mauxe. Lawv muab kub thiab xov xiav xov tsamxem xov liab thiab xov maj uas nkoov zoo zoo ua lub tsho efauj. Lawv ntaus tej daim kub nyias nyias muab txiav ua tej pluaj me me ntos nrog cov xov xiav xov tsamxem xov liab thiab cov xov maj uas nkoov zoo zoo, thiaj ua tau zoo nkauj txaij nraug zees. Lawv ua ob pluaj ntaub khuam lub tsho efauj ntawm xub pwg muab teem rau ob sab xub pwg tsho. Txoj siv sia uas ntos zoo zoo uas muab xaws lo rau lub tsho efauj, mas lawv ua ib yam nkaus li lub tsho efauj, yog lawv muab cov xov kub thiab xov xiav xov tsamxem xov liab thiab cov xov maj uas nkoov zoo zoo ntos ua, raws li uas Yawmsaub hais rau Mauxe. Lawv muab xov kub qhaib ua ob lub tais kub txaij mos mos khawm ob lub qe zeb iav txho ci lam lug, thiab lawv txaug Yixayee cov tub li npe rau hauv ob lub qe zeb iav ntawd ib yam nkaus li txaug txwm. Lawv muab xaws lo nkaus rau pluaj ntaub uas khuam lub tsho efauj ntawm ob sab xub pwg, ua lub chaw uas nco ntsoov Yixayee cov tub, raws li Yawmsaub hais rau Mauxe. Lawv ua ib lub awv zoo nkauj txaij nraug zees. Lawv muab xov kub thiab xov xiav xov tsamxem xov liab thiab cov xov maj uas nkoov zoo zoo ua ib yam nkaus li ua lub tsho efauj. Lub awv xwm fab dav ib dos ntev ib dos thiab sab hauv khoob ua ib lub hnab. Lawv muab kaum ob lub qe zeb hlaws uas muaj nqes teem ua plaub leej rov ntav rau ntawm lub awv ntawd. Leej saum uas yog leej ib mas yog peb lub qe zeb, ib lub qe zeb liab tsim tseb, ib lub qe zeb daj pes lis, ib lub qe zeb ntsuab liab. Leej uas ob mas yog ib lub qe zeb ntsuab txho, ib lub qe zeb phaithu tsamxem, ib lub qe zeb hlaws iav. Leej uas peb mas yog ib lub qe zeb ntsuab xiav, ib lub qe zeb uas txho taws, ib lub qe zeb tsamxem zem ziv. Leej uas plaub mas yog ib lub qe zeb ntsuab pes xiab, ib lub qe zeb iav txho ci lam lug thiab ib lub qe zeb daj tshiab tshiab. Mas muab cov tseem xov kub qhaib ua kaum ob lub tais kub txaij mos mos khawm cov qe zeb ntawd. Kaum ob lub qe zeb hlaws ntawd yuav muaj Yixayee cov tub tej npe txaug rau hauv ib yam nkaus li txaug txwm, muaj kaum ob xeem ib xeem zuj zus li npe nyob rau hauv. Lawv muab cov tseem xov kub ntswj ua ib txoj saw kheej zoo li txoj hlua tis rau lub awv. Lawv muab xov kub ua ob lub tais kub txaij mos mos thiab muab kub ua ob lub ntsej mas muab ob lub ntsej tis rau ob lub kaum awv. Lawv muab ob txoj qab saw kub los khawm rau ob lub ntsej ntawm ob lub kaum awv, thiab muab ob yav qab saw saum tis rau ob lub tais kub txaij mos mos uas muab lo rau lub tsho efauj ntawm ob sab xub pwg sab xubntiag. Lawv muab kub ua ob lub ntsej tis rau ob lub kaum awv hauv qab sab hauv uas npuas lub tsho efauj. Lawv muab kub ua ob lub ntsej tis rau ob pluaj ntaub ntawm xub pwg ntawm lub tsho efauj sab xubntiag ze kab lej leeg tsho ntawm txoj siv sia uas ntos zoo zoo sab saud. Lawv muab xov xiav ntswj ua ob txoj hlua khi ob lub ntsej awv sab hauv rau ob lub ntsej ntawm lub tsho efauj, lub awv thiaj nyob sab saum txoj siv sia uas ntos zoo zoo uas sia ntawm duav thiaj tsis plam ntawm lub tsho efauj, raws li Yawmsaub hais rau Mauxe. Lawv muab xov xiav ntos ua lub tsho ntev phim lub tsho efauj. Lawv ua lub tsho no yog lub tsho looj thiab lawv muab lub caj dab tsho ntawd foob zoo zoo thiaj tsis ntuag. Lub qab tsho ntawd mas lawv muab xov xiav xov tsamxem xov liab thiab cov xov maj uas nkoov zoo zoo qhaib ua tej lub zoo li txiv ntsiav kws dai rau, thiab lawv muab cov tseem kub ua tej lub tswb los dai quas cov txiv ntsiav kws thoob plaws ntawm lub qab tsho ntev ntawd, dai ib lub tswb quas ib lub txiv ntsiav kws, dai li no thoob plaws lub qab tsho ntev uas hnav ua Yawmsaub li haujlwm, raws li Yawmsaub hais rau Mauxe. Lawv muab cov xov maj uas nkoov zoo zoo ntos ua tsho rau Aloo thiab nws cov tub, thiab muab cov xov maj nkoov zoo zoo ua mom ua phuam, thiab ua ris luv, thiab muab cov xov maj nkoov zoo zoo thiab xov xiav xov tsamxem xov liab ntos txoj siv sia thiab ua paj rau thiab, raws li Yawmsaub hais rau Mauxe. Lawv muab cov tseem kub ntaus ua ib pluaj kub uas dawb huv thiab txaug npe ntawv rau hauv hais tias “Dawb huv rau Yawmsaub” yam nkaus li luag txam txwm, thiab muab xov xiav ua hlua khi pluaj kub ntawd rau saum hau phuam, raws li Yawmsaub hais rau Mauxe. Lawv ua Yawmsaub lub tsev uas yog lub tsev ntaub sib ntsib txhua yam tiav. Yawmsaub hais li cas rau Mauxe cov Yixayee kuj ua txhua yam tiav li ntawd. Lawv coj txhua yam uas ua Yawmsaub lub tsev los rau Mauxe, yog lub tsev ntaub thiab tej twj uas siv huvsi, tsis hais cov nqe lauj, cov txiag tab, cov las, cov ncej thiab cov taw tiag hauv taw, thiab cov tawv txiv yaj uas foo liab lawd thiab cov tawv ntshuab hiavtxwv uas vov lub tsev ntaub txheej saud thiab daim ntaub mag uas thaiv, thiab lub phij xab sib cog lus, cov las kwv thiab lub hau phij xab uas roos kev txhaum, thiab lub rooj thiab tej twj uas siv saum lub rooj thiab cov ncuav uas xyeem txawb rau ntawm Yawmsaub xubntiag, thiab tus kav teeb tseem kub thiab tej teeb uas nyob saum tus kav teeb, thiab txhua yam twj siv tu lub teeb thiab cov roj sam teeb, thiab lub thaj kub thiab cov roj tsw qab siv ua kevcai tsa thiab cov hmoov tshuaj tsw qab thiab daim ntaub uas ua qhov rooj tsev ntaub, thiab lub thaj tooj liab uas hlawv qhov txhia chaw xyeem thiab daim tsuav ntxaij tooj liab thiab cov las kwv thiab tej twj siv saum lub thaj, thiab lub phaj ntxuav tes taw thiab lub chaw txawb lub phaj, thiab cov ntaub xov laj kab, cov ncej, cov taw tiag ncej thiab daim ntaub ua rooj vag, cov hlua thiab cov tswg uas txhos tuav laj kab, thiab txhua yam twj uas siv ua haujlwm hauv Yawmsaub lub tsev uas yog lub tsev ntaub sib ntsib, thiab tej tsoos meej mom uas ntos tau zoo zoo uas hnav rau lub sijhawm mus ua Yawmsaub tes haujlwm hauv lub chaw dawb huv, yog cev tsoos meej mom dawb huv uas pov thawj Aloo hnav thiab tej tsoos meej mom uas nws cov tub hnav rau thaum ua pov thawj li haujlwm. Txhua yam uas Yawmsaub hais kom Mauxe ua lawd mas cov Yixayee kuj ua tiav huvsi. Mauxe mus tshuaj saib tej haujlwm txhua yam mas pom tias lawv ua raws nraim li uas Yawmsaub hais lawd ces Mauxe txawm foom koob hmoov rau lawv. Yawmsaub hais rau Mauxe tias, “Lub ib hlis ntuj hnub xiab ib koj cia li tsa kuv lub tsev uas yog lub tsev ntaub sib ntsib, thiab muab lub phij xab sib cog lus tso rau hauv lub tsev ntaub, thiab muab ib daim ntaub thaiv kem lub phij xab. Nqa lub rooj los txawb rau hauv, thiab muab tej twj uas siv txawb saum lub rooj nyias nyob nyias chaw, thiab nqa tus kav teeb los txawb rau thiab muab cov teeb txawb rau saud. Txawb lub thaj kub uas hlawv hmoov tshuaj tsw qab ncaj rau ntawm lub phij xab sib cog lus chav nraum no, thiab muab daim ntaub khuam ua qhov rooj rau kuv lub tsev ntaub. Teeb lub thaj uas hlawv qhov txhia chaw xyeem ncaj ntawm kuv lub tsev lub qhov rooj uas yog lub tsev ntaub sib ntsib sab nraud, thiab muab lub phaj ntxuav tes taw txawb rau ntawm lub tsev ntaub sib ntsib thiab lub thaj kem nruab nrab thiab nqa dej rau hauv lub phaj. Xov laj kab puag ncig lub tsev ntaub ntawd thiab muab daim ntaub khuam ua rooj vag. Muab cov roj tsw qab siv ua kevcai tsa hliv ywg kuv lub tsev thiab txhua yam uas nyob hauv, thiab ua kevcai tu kom kuv lub tsev thiab txhua yam ntawd dawb huv rau kuv mas lub chaw pe Yawmsaub thiaj dawb huv. Thiab muab cov roj ntawd hliv ywg lub thaj uas hlawv xyeem thiab tej twj uas siv ntawm lub thaj huvsi ua kevcai tu kom dawb huv rau kuv mas lub thaj ntawd thiaj dawb huv kawg nkaus. Thiab muab cov roj tsw qab ntawd hliv ywg lub phaj thiab lub chaw uas txawb lub phaj ua kevcai tu kom dawb huv rau kuv. “Coj Aloo thiab nws cov tub los rau ntawm lub qhov rooj tsev ntaub sib ntsib thiab muab dej ntxuav lawv. Muab cev tsoos meej mom uas dawb huv rau Aloo hnav, thiab muab cov roj tsw qab hliv ywg rau nws ua kevcai tu kom nws dawb huv rau kuv, mas nws thiaj ua tau pov thawj ua kuv tes haujlwm. Coj Aloo cov tub tuaj thiab muab tej tsoos meej mom rau lawv hnav. Muab cov roj tsw qab hliv ywg lawv ib yam nkaus li ywg rau lawv txiv, lawv thiaj ua tau pov thawj ua kuv tes haujlwm. Qhov uas muab roj hliv ywg ua kevcai tsa li ntawd ua rau lawv muaj feem ua pov thawj ib txhiab ib txhis ib tiam dhau ib tiam mus li.” Mauxe ua txhua yam raws li uas Yawmsaub hais. Xyoo ob lub ib hlis ntuj hnub xiab ib Mauxe txawm tsa Yawmsaub lub tsev ntaub. Mauxe tsa Yawmsaub lub tsev li no, nws teem cov taw tiag, thiab tsa cov txiag tab, thiab ntxig las rau cov txiag tab thiab tsa cov ncej. Nws muab chaws ntaub los vov Yawmsaub lub tsev thiab muab cov tawv vov lub tsev ntaub txheej saud raws li Yawmsaub hais rau nws. Nws muab ob daim txiag zeb uas sau Yawmsaub tej lus tso rau hauv lub phij xab thiab ntxig ob tug las kwv rau lub phij xab thiab muab lub hau uas roos kev txhaum kaw rau. Nws muab lub phij xab kwv los rau hauv Yawmsaub lub tsev thiab dai daim ntaub kem lub phij xab sib cog lus, raws li Yawmsaub hais rau Mauxe. Mauxe muab lub rooj txawb rau hauv lub tsev ntaub sib ntsib chav nraum daim ntaub thaiv sab ped, thiab muab cov ncuav tso rau saum lub rooj kom nyias nyob nyias chaw ntawm Yawmsaub xubntiag, raws li Yawmsaub hais rau nws. Mauxe muab tus kav teeb txawb rau hauv lub tsev ntaub sib ntsib sab nram ncaj nkaus lub rooj, thiab muab cov teeb txawb rau saud rau ntawm Yawmsaub xubntiag, raws li Yawmsaub hais rau nws. Mauxe muab lub thaj kub txawb rau hauv lub tsev ntaub sib ntsib ti nkaus daim ntaub thaiv chav nraum, mas nws hlawv tej hmoov tshuaj tsw qab rau saum lub thaj ntawd, raws li Yawmsaub hais rau nws. Mauxe muab daim ntaub khuam ua Yawmsaub lub tsev lub qhov rooj. Nws teeb lub thaj uas hlawv qhov txhia chaw xyeem sab nraud ncaj Yawmsaub lub tsev lub qhov rooj uas yog lub tsev ntaub sib ntsib. Nws muab qhov txhia chaw ua kevcai hlawv huvsi xyeem thiab ua kevcai xyeem qoob loo, raws li Yawmsaub hais rau nws. Mauxe muab lub phaj txawb cia rau ntawm lub tsev ntaub sib ntsib thiab lub thaj ntu nruab nrab, thiab nws muab dej rau hauv ua chaw ntxuav. Mauxe thiab Aloo thiab Aloo cov tub kuj siv cov dej hauv lub phaj ntawd ntxuav tes ntxuav taw. Thaum lawv yuav mus hauv lub tsev ntaub sib ntsib lossis mus ze lub thaj thaum twg lawv yuav tsum ntxuav tes ntxuav taw ua ntej, raws li Yawmsaub hais rau Mauxe lawd. Mauxe xov laj kab puag ncig Yawmsaub lub tsev thiab lub thaj, thiab nws muab daim ntaub khuam ua qhov rooj vag. Nws ua ib puas tsav yam ntawd tiav tag nrho huvsi. Lub sijhawm ntawd tus ncej huab los roos ti nkaus lub tsev ntaub sib ntsib thiab Yawmsaub lub hwjchim ci ntsa iab puv nkaus hauv Yawmsaub lub tsev. Mauxe nkag tsis tau rau hauv lub tsev ntaub sib ntsib vim tus ncej huab los roos ti nkaus lub tsev thiab Yawmsaub lub hwjchim ci ntsa iab puv nkaus hauv Yawmsaub lub tsev ntawd. Ncua sijhawm uas lawv pheej tsiv ntawd, yog tus ncej huab txav ntawm Yawmsaub lub tsev mus thaum twg ces cov Yixayee yuav tsum sawv kev tsiv mus thaum ntawd. Yog tus ncej huab tsis txav mus mas lawv kuj tsis tawm mus li, lawv tos mus txog hnub uas tus ncej huab txav mus tso. Ncua sijhawm uas lawv pheej tsiv ntawd, nruab hnub Yawmsaub tus ncej huab nyob saum Yawmsaub lub tsev, hmo ntuj tus ncej huab ntawd ci li nplaim taws tab meeg cov Yixayee sawvdaws pom. Yawmsaub hu Mauxe thiab hais rau nws ntawm lub tsev ntaub sib ntsib tias, “Cia li hais rau cov Yixayee tias, ‘Thaum nej cov leejtwg yuav coj qhov txhia chaw tuaj ua kevcai xyeem rau Yawmsaub, mas nej yuav coj nyuj lossis tshis lossis yaj tuaj xyeem. “ ‘Yog nws yuav muab nyuj ua kevcai hlawv huvsi xyeem mas nws yuav tsum muab ib tug txiv nyuj uas tsis muaj chaw thuam li, mas nws yuav coj tuaj xyeem rau ntawm lub qhov rooj tsev ntaub sib ntsib, kom Yawmsaub thiaj li txais yuav. Nws yuav tsum muab tes npuab rau saum tus tsiaj uas yuav muab hlawv huvsi xyeem ntawd lub taubhau, mas Yawmsaub thiaj txais yuav tus tsiaj ntawd ua qhov uas ntxuav nws kev txhaum txim. Nws yuav muab tus txiv nyuj ntawd tua rau ntawm Yawmsaub xubntiag, mas Aloo cov tub uas ua pov thawj yuav muab cov ntshav xyeem thiab muab nchos lo puag ncig lub thaj uas nyob ncaj ntawm lub qhov rooj tsev ntaub sib ntsib. Nws yuav muab tus tsiaj uas yuav hlawv huvsi xyeem ntawd daim tawv laws es muab cov nqaij txiav ua tej ywb yav. Mas Aloo cov tub uas ua pov thawj yuav rauv taws rau saum lub thaj thiab muab taws los tib rau saud. Aloo cov tub uas ua pov thawj yuav muab tej ywb yav nqaij ntawd thiab lub taubhau thiab cov roj tso tib zoo raws li kevcai rau saum cub tawg saum lub thaj. Tus tswv tsiaj yuav tsum muab dej ntxuav tej plab hnyuv thiab tej ceg huvsi, mas tus pov thawj yuav muab tej ntawd hlawv huvsi rau saum lub thaj. Qhov no yog ua kevcai hlawv huvsi xyeem, yog yam uas muab hlawv kub hnyiab xyeem ua kom muaj pa ncho tsw qab hum Yawmsaub lub siab. “ ‘Yog nws yuav muab yaj los tshis ua kevcai hlawv huvsi xyeem, mas nws yuav tsum muab tus txiv uas tsis muaj chaw thuam li. Nws yuav tsum muab tus tsiaj ntawd tua rau ntawm lub thaj sab ped rau ntawm Yawmsaub xubntiag, mas Aloo cov tub uas ua pov thawj yuav muab cov ntshav ntawd nchos lo puag ncig lub thaj. Nws yuav tsum muab tus tsiaj ntawd txiav ua tej ywb yav mas tus pov thawj yuav muab tej ywb yav nqaij thiab lub taubhau thiab cov roj tso tib zoo raws li kevcai rau saum cub tawg saum lub thaj. Tus tswv tsiaj yuav tsum muab dej ntxuav tej plab hnyuv thiab tej ceg huvsi, mas tus pov thawj yuav coj tej ntawd los hlawv huvsi rau saum lub thaj. Qhov no yog ua kevcai hlawv huvsi xyeem, yog yam uas muab hlawv kub hnyiab xyeem ua kom muaj pa ncho tsw qab hum Yawmsaub lub siab. “ ‘Yog nws yuav muab noog ua kevcai hlawv huvsi xyeem rau Yawmsaub, mas nws yuav tsum coj nquab taug lossis rhaws nquab nyeg tuaj xyeem. Tus pov thawj yuav coj tus noog ntawd los rau ntawm lub thaj, muab lub taubhau ntswj kom tu nrho, es coj kiag lub taubhau hlawv rau saum lub thaj mas cia cov ntshav nrog rau ntawm lub thaj ib sab, thiab nws yuav dua lub txia thiab dob cov plaub tseg rau ntawm lub thaj sab hnub tuaj uas nchuav pawg tshauv. Nws yuav muab ob sab kooj tis dua kom lub cev ntuag tiamsis tsis txhob muab rub tu. Mas tus pov thawj yuav muab tus noog ntawd hlawv rau saum cub tawg saum lub thaj. Qhov no yog ua kevcai hlawv huvsi xyeem, yog yam uas muab hlawv kub hnyiab xyeem ua kom muaj pa ncho tsw qab hum Yawmsaub lub siab.’ ” “ ‘Thaum leejtwg yuav coj qhov txhia chaw tuaj ua kevcai xyeem qoob loo rau Yawmsaub mas nws yuav tsum muab cov hmoov mog uas zoo zoo tuaj xyeem thiab hliv roj txiv aulib ywg cov hmoov mog thiab muab hmoov roj ntoos tsw qab tso rau saud mas coj tuaj rau Aloo cov tub uas ua pov thawj. Tus pov thawj yuav muab cov hmoov mog zoo zoo ntse roj ib taus tes thiab muab kiag cov roj ntoos tsw qab ntawd huvsi hlawv saum lub thaj ua chaw rau Yawmsaub nco ntsoov, yog yam uas muab hlawv kub hnyiab xyeem ua kom muaj pa ncho tsw qab hum Yawmsaub lub siab. Tej uas coj tuaj xyeem es tshuav seem ntawd puavleej yog Aloo thiab nws cov tub li feem, yog tej uas dawb huv kawg nkaus uas rho ntawm tej uas yuav muab hlawv kub hnyiab xyeem rau Yawmsaub los lawm. “ ‘Thaum koj coj ncuav cub tuaj ua kevcai xyeem qoob loo mas yuav coj cov ncuav uas tsis xyaw keeb uas muab cov hmoov mog zoo zoo ntse roj ua lossis tej ncuav nyias nyias uas tsis xyaw keeb uas pleev roj. Yog tias koj coj ncuav ci saum ntxaij hlau tuaj xyeem mas yuav muab cov hmoov mog zoo zoo ntse roj tsis xyaw keeb ua xwb. Koj yuav muab lub ncuav ntais ua tej dwb daim thiab ywg roj rau. No yog ua kevcai xyeem qoob loo. Yog tias koj coj ncuav kib hauv yias tuaj ua kevcai xyeem qoob loo, mas yuav muab cov hmoov mog zoo zoo ntse roj ua xwb. Yuav coj tej ncuav zoo li uas hais tag los no lawm tuaj ua kevcai xyeem qoob loo rau Yawmsaub. Thaum koj coj tuaj pub rau tus pov thawj lawd tus pov thawj yuav coj mus rau ntawm lub thaj. Mas tus pov thawj yuav rho ib qho uas ua lub chaw rau Yawmsaub nco ntsoov hauv tej uas coj tuaj ua kevcai xyeem qoob loo ntawd los coj mus hlawv rau saum lub thaj, yog yam uas muab hlawv kub hnyiab xyeem ua kom muaj pa ncho tsw qab hum Yawmsaub lub siab. Mas tej uas coj tuaj ua kevcai xyeem qoob loo es tshuav seem ntawd puavleej yog Aloo thiab nws cov tub li feem, yog tej uas dawb huv kawg nkaus uas rho ntawm tej uas yuav muab hlawv kub hnyiab xyeem rau Yawmsaub los. “ ‘Tej ncuav uas nej coj tuaj ua kevcai xyeem qoob loo rau Yawmsaub ntawd tsis txhob muab keeb los ua. Tsis txhob muab keeb lossis zib ntab hlawv xyeem rau Yawmsaub kiag li. Yog nej coj ob yam no tuaj ua thawj phaum qoob loo xyeem rau Yawmsaub kuj tau, tiamsis tsis txhob muab hlawv saum lub thaj ua kom muaj pa tsw qab hum Yawmsaub lub siab. Koj yuav tsum muab ntsev rau txhua lub ncuav uas koj coj tuaj ua kevcai xyeem qoob loo thiab. Koj tsis txhob tseg cov ntsev uas piv txog koj tus Vajtswv lo lus cog tseg tsis rau rau tej uas koj muab ua kevcai xyeem qoob loo. Koj yuav tsum muab ntsev rau rau txhua yam uas koj muab xyeem huvsi. “ ‘Yog koj muab thawj phaum qoob ua kevcai xyeem qoob loo rau Yawmsaub, mas koj yuav muab cov thawj hnab los qha kom qhuav mas muab tuav mos mos. Yuav muab roj ntse rau, thiab muab roj ntoos tsw qab tso rau saud yog ua kevcai xyeem qoob loo. Tus pov thawj yuav muab cov hmoov uas tuav mos mos thiab ntse roj ib qho thiab cov roj ntoos tsw qab huvsi hlawv ua chaw rau Yawmsaub nco ntsoov. Tej no yog yam uas muab hlawv kub hnyiab xyeem rau Yawmsaub.’ ” “ ‘Yog leejtwg muab ib tug nyuj ua kevcai xyeem sib raug zoo mas txawm yog muab txiv nyuj los maum nyuj nws yuav tsum muab tus tsiaj uas tsis muaj chaw thuam li xyeem rau ntawm Yawmsaub xubntiag. Nws yuav tsum muab tes npuab saum tus tsiaj uas yuav muab xyeem ntawd taubhau, thiab muab tua kiag rau ntawm lub qhov rooj tsev ntaub sib ntsib. Mas Aloo cov tub uas ua pov thawj yuav muab cov ntshav nchos lo puag ncig lub thaj. Tus tsiaj uas tua xyeem ua kevcai xyeem sib raug zoo ntawd, mas tej uas nws yuav muab hlawv kub hnyiab xyeem rau Yawmsaub yog tej no, yog cov hlab hluas roj hauv nrog cev thiab cov hlab hluas roj uas lo plab hnyuv huvsi, thiab ob lub raum thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los. Aloo cov tub yuav muab tej no hlawv saum lub thaj nrog tus tsiaj uas muab hlawv huvsi xyeem ua ke uas nyob saum cub tawg, yog yam uas muab hlawv kub hnyiab xyeem ua kom muaj pa ncho tsw qab hum Yawmsaub lub siab. “ ‘Yog nws muab yaj lossis tshis tua xyeem rau Yawmsaub ua kevcai xyeem sib raug zoo mas txawm yog txiv los maum, los nws yuav tsum muab tus uas tsis muaj chaw thuam li. Yog nws muab ib tug menyuam yaj xyeem mas nws yuav coj tuaj xyeem rau ntawm Yawmsaub xubntiag. Nws yuav tsum muab tes npuab saum tus tsiaj uas yuav muab xyeem ntawd taubhau, thiab muab tua kiag rau ntawm lub tsev ntaub sib ntsib. Mas Aloo cov tub yuav muab cov ntshav nchos lo puag ncig lub thaj. Tus tsiaj uas tua xyeem ua kevcai xyeem sib raug zoo ntawd, mas tej uas nws yuav muab hlawv kub hnyiab xyeem rau Yawmsaub yog tej no, yog cov hlab hluas roj thiab tus kotw rog rog uas muab txiav ti nkaus txha nrob qaum thiab cov hlab hluas roj hauv nrog cev thiab cov hlab hluas roj uas lo plab hnyuv huvsi, thiab ob lub raum thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los. Mas tus pov thawj yuav muab tej no hlawv rau saum lub thaj, yog tej zaub mov uas muab hlawv kub hnyiab xyeem rau Yawmsaub. “ ‘Yog nws muab ib tug tshis xyeem mas nws yuav tsum muab xyeem rau ntawm Yawmsaub xubntiag, thiab nws yuav muab tes npuab saum tus tshis ntawd taubhau, thiab muab tua kiag rau ntawm lub tsev ntaub sib ntsib. Mas Aloo cov tub yuav muab cov ntshav nchos lo puag ncig lub thaj. Tus tsiaj uas xyeem ntawd tej uas nws yuav muab hlawv kub hnyiab xyeem rau Yawmsaub yog tej no, cov hlab hluas roj hauv nrog cev thiab cov hlab hluas roj uas lo plab hnyuv huvsi, thiab ob lub raum thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los. Tus pov thawj yuav muab tej no hlawv rau saum lub thaj, yog tej zaub mov uas muab hlawv kub hnyiab xyeem, ua kom muaj pa tsw qab. Tej hlab hluas roj huvsi yog Yawmsaub li feem. “ ‘Nej yuav tsum coj tej kevcai no ib tiam dhau ib tiam mus ib txhiab ib txhis li rau txhua lub chaw uas nej mus nyob, nej tsis txhob noj tej hlab hluas roj thiab cov ntshav.’ ” Yawmsaub hais rau Mauxe tias, “Cia li hais rau cov Yixayee tias, ‘Yog leejtwg ua txhaum ib yam dabtsi uas Yawmsaub twb hais tias tsis txhob ua tiamsis tsis yog nws txhob txwm ua, mas yuav ua li no. “ ‘Yog tus uas raug muab roj hliv ywg tsa ua pov thawj hlob ua txhaum thiaj coj lub txim los puas tsuas cov pejxeem, vim yog nws ua txhaum mas nws yuav tsum muab ib tug thav txiv nyuj uas tsis muaj chaw thuam li xyeem rau Yawmsaub ua kevcai xyeem daws txim. Nws yuav tsum coj tus nyuj ntawd tuaj ntawm qhov rooj tsev ntaub sib ntsib rau ntawm Yawmsaub xubntiag, thiab nws yuav muab tes npuab rau saum tus nyuj ntawd taubhau thiab muab tua kiag rau ntawm Yawmsaub xubntiag. Tus uas raug tsa ua pov thawj hlob yuav muab cov ntshav nyuj ntawd ib qho coj los rau hauv lub tsev ntaub sib ntsib, mas nws yuav muab nws ntiv tes raus cov ntshav thiab nchos xya zaus ntawm Yawmsaub lub xubntiag rau ntawm daim ntaub uas thaiv chav dawb huv kawg nkaus chav nraum no. Tus pov thawj yuav muab cov ntshav ib qho los pleev cov kub saum lub thaj uas hlawv hmoov tshuaj tsw qab hauv lub tsev ntaub sib ntsib rau ntawm Yawmsaub xubntiag, thiab nws yuav muab cov ntshav nyuj uas tseem tshuav ntawd hliv rau ntawm taw thaj hlawv xyeem uas nyob ncaj ntawm qhov rooj tsev ntaub sib ntsib. “ ‘Nws yuav muab cov hlab hluas roj ntawm tus nyuj uas ua kevcai xyeem daws txim ntawd kaus huvsi, uas yog cov hlab hluas roj hauv nrog cev thiab cov hlab hluas roj uas lo plab hnyuv huvsi, thiab ob lub raum thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los, (ib yam nkaus li nws muab cov hlab hluas roj kaus hauv tus nyuj uas tua xyeem ua kevcai xyeem sib raug zoo). Tus pov thawj yuav muab tej no hlawv saum lub thaj uas hlawv xyeem. Tiamsis daim tawv nyuj thiab cov nqaij thiab lub taubhau tej ceg tej plab hnyuv thiab tej quav, tag nrho tus nyuj huvsi mas yuav coj tawm rau sab nraum ntug zos txog lub chaw dawb huv, uas yog lub chaw nchuav cov tshauv, mas yuav rauv taws rau saum cov tshauv ntawd muab tus tsiaj ntawd hlawv pov tseg huvsi rau qhov ntawd. “ ‘Yog ib tsoom pejxeem Yixayee sawvdaws tau ua tej yam txhaum tiamsis tsis yog lawv txhob txwm ua, lawv yeej tsis paub tias yog kev txhaum thiab lawv ua tej yam uas Yawmsaub twb hais tias tsis txhob ua, mas puavleej yog lawv ua txhaum muaj txim lawm. Thaum lawv paub tseeb tias tej uas lawv ua ntawd yog txhaum lawm mas lawv sawvdaws yuav muab ib tug thav txiv nyuj tuaj ua kevcai xyeem daws txim thiab coj tuaj rau ntawm lub tsev ntaub sib ntsib. Cov kev txwj laus yuav muab tes npuab saum tus nyuj ntawd taubhau rau ntawm Yawmsaub xubntiag, mas muab tus nyuj ntawd tua rau ntawm Yawmsaub xubntiag. Tus uas raug tsa ua pov thawj hlob yuav muab cov ntshav nyuj ntawd ib qho coj los rau hauv lub tsev ntaub sib ntsib, mas nws yuav muab nws ntiv tes raus cov ntshav thiab nchos xya zaus rau ntawm Yawmsaub xubntiag rau ntawm daim ntaub uas thaiv. Tus pov thawj yuav muab mentsis ntshav pleev cov kub saum lub thaj uas nyob hauv lub tsev ntaub sib ntsib rau ntawm Yawmsaub xubntiag, thiab nws yuav muab cov ntshav nyuj uas tseem tshuav ntawd hliv rau ntawm taw thaj hlawv xyeem uas nyob ncaj ntawm qhov rooj tsev ntaub sib ntsib. Thiab nws yuav muab cov hlab hluas roj kaus huvsi coj mus hlawv rau saum lub thaj. Nws yuav muab tus txiv nyuj no ua ib yam nkaus li uas nws twb muab tus txiv nyuj ua kevcai xyeem daws txim. Mas tus pov thawj yuav ua li no thiaj ntxuav tau tej pejxeem tej kev txhaum thiaj zam tau lawv lub txim. Mas tus pov thawj yuav coj tus nyuj tawm mus rau sab nraum ntug zos thiab muab hlawv huvsi yam li hlawv tus uas ua ntej lawd. Qhov no yog ua kevcai xyeem daws txim rau ib tsoom pejxeem. “ ‘Yog ib tug thawj tau ua tej yam txhaum tiamsis tsis yog nws txhob txwm ua thiab nws ua tej yam uas Yawmsaub uas yog nws tus Vajtswv twb hais tias tsis txhob ua, mas kuj yog nws ua txhaum muaj txim. Thaum nws paub tseeb tias tej uas nws ua ntawd yog txhaum lawm mas nws yuav tsum coj ib tug txiv tshis uas tsis muaj chaw thuam li tuaj ua kevcai xyeem daws txim. Nws yuav muab tes npuab saum tus tshis ntawd taubhau thiab muab tua ntawm qhov chaw uas tua tsiaj ua kevcai hlawv huvsi xyeem rau ntawm Yawmsaub xubntiag. No yog ua kevcai xyeem daws txim. “ ‘Tus pov thawj hlob yuav muab ntiv tes raus cov ntshav uas ua kevcai xyeem daws txim ntawd ib qho mus pleev cov kub saum lub thaj uas hlawv xyeem thiab muab cov ntshav uas tseem tshuav ntawd hliv rau ntawm lub taw thaj. Nws yuav muab cov hlab hluas roj hlawv huvsi saum lub thaj ib yam nkaus li uas hlawv cov hlab hluas roj ntawm tus tsiaj uas tua ua kevcai xyeem sib raug zoo. Mas tus pov thawj thiaj ntxuav tau tus ntawd tej kev txhaum thiaj zam tau nws lub txim. “ ‘Yog cov peejxeem leejtwg tau ua tej yam txhaum tiamsis tsis yog nws txhob txwm ua thiab nws ua tej yam uas Yawmsaub twb hais tias tsis txhob ua, mas kuj yog nws ua txhaum muaj txim. Thaum nws paub tseeb tias tej uas nws ua ntawd yog txhaum lawm mas nws yuav tsum coj ib tug maum tshis uas tsis muaj chaw thuam li tuaj xyeem daws lub txim uas nws tau ua ntawd. Nws yuav muab tes npuab saum tus tshis uas ua kevcai xyeem daws txim ntawd taubhau thiab muab tua rau ntawm qhov chaw uas tua tsiaj ua kevcai hlawv huvsi xyeem. Tus pov thawj yuav muab ntiv tes raus cov ntshav ntawd ib qho mus pleev cov kub saum lub thaj uas hlawv xyeem thiab muab cov ntshav uas tseem tshuav ntawd hliv rau ntawm lub taw thaj. Thiab nws yuav muab cov hlab hluas roj kaus huvsi yam nkaus li kaus cov hlab hluas roj ntawm tus tsiaj uas ua kevcai xyeem sib raug zoo, mas tus pov thawj yuav muab hlawv saum lub thaj ua kom muaj pa ncho tsw qab hum Yawmsaub lub siab. Mas tus pov thawj thiaj ntxuav tau tus ntawd tej kev txhaum thiaj zam tau nws lub txim. “ ‘Yog nws coj yaj tuaj ua kevcai xyeem daws txim mas nws yuav tsum coj ib tug maum yaj uas tsis muaj chaw thuam li, thiab nws yuav muab tes npuab saum tus yaj ntawd taubhau thiab muab tua ua kevcai xyeem daws txim rau ntawm qhov chaw uas tua tsiaj ua kevcai hlawv huvsi xyeem. Tus pov thawj yuav muab ntiv tes raus cov ntshav uas ua kevcai xyeem daws txim ntawd ib qho mus pleev cov kub saum lub thaj uas hlawv xyeem thiab muab cov ntshav uas tseem tshuav ntawd hliv rau ntawm lub taw thaj. Thiab nws yuav muab cov hlab hluas roj kaus huvsi yam nkaus li kaus cov hlab hluas roj ntawm tus yaj uas muab tua ua kevcai xyeem sib raug zoo. Nws yuav muab tej no hlawv saum lub thaj nrog tej qhov txhia chaw uas muab hlawv kub hnyiab xyeem rau Yawmsaub ua ke. Mas tus pov thawj yuav ua li no thiaj ntxuav tau tej kev txhaum uas tus ntawd tau ua lawd thiaj zam tau nws lub txim.’ ” “ ‘Yog leejtwg ua txhaum rau qhov uas thaum muaj plaub nws ua tau timkhawv vim yog nws twb pom los nws twb paub tiamsis thaum luag hu kom tuaj hais nws tsis yeem ua timkhawv, mas nws yuav tau ris lub txim. Lossis yog leejtwg nphav tej yam uas qias tsis huv tsis hais tej tsiaj qus lub cev tuag tej tsiaj nyeg lub cev tuag los tej tsiaj me me uas nkag hauv av lub cev tuag, txawm yog nws tsis paub los nws kuj qias tsis huv nws muaj txim lawm. Lossis yog nws nphav ib yam dabtsi uas qias tsis huv ntawm neeg, xws li yog tej uas ua rau neeg qias tsis huv, txawm yog nws tsis paub los thaum uas nws paub tseeb lawm kuj yog nws muaj txim. Lossis yog leejtwg lam cog lus twv tias yuav ua zoo lossis ua phem, nws lam twv raws li neeg pheej lam twv tiamsis nws tsis paub tseeb tias nws cog lus twv yuam kev lawm, mas thaum nws paub tseeb lawm kuj yog nws muaj txim. Thaum leejtwg tau ua tej kev txhaum uas hais los no lawm ib yam dabtsi mas nws yuav tsum lees tej kev txhaum uas nws tau ua lawd. Nws yuav tsum coj ib tug maum yaj lossis ib tug maum tshis tuaj ua kevcai ntxuav kev txaug kev txhaum rau tej kev txhaum uas nws tau ua lawd xyeem rau Yawmsaub ua kevcai xyeem daws txim. Tus pov thawj yuav ua li no thiaj ntxuav tau tus ntawd tej kev txhaum. “ ‘Yog nws yuav tsis taus ib tug yaj mas nws yuav tsum coj ob tug nquab taug lossis ob tug rhaws nquab nyeg tuaj rau Yawmsaub ua kevcai ntxuav kev txaug kev txhaum rau tej kev txhaum uas nws tau ua lawd, ib tug nquab ua kevcai xyeem daws txim, ib tug nquab ua kevcai hlawv huvsi xyeem. Nws yuav coj ob tug nquab no tuaj rau tus pov thawj. Tus pov thawj yuav muab ib tug nquab ua kevcai xyeem daws txim. Nws yuav muab tus nquab ntawd taubhau ntswj kom pluam kiag ntawm txha caj dab, thiab muab tus uas ua kevcai xyeem daws txim ntawd cov ntshav ib qho nchos kom lo lub thaj ib sab, thiab cov ntshav uas tseem tshuav mas cia nrog rau ntawm taw thaj. Qhov no yog ua kevcai xyeem daws txim. Mas nws yuav muab tus nquab uas ob ua kevcai hlawv huvsi xyeem raws li txoj kevcai, mas tus pov thawj thiaj ntxuav tau tus ntawd tej kev txhaum uas nws tau ua lawd thiaj zam tau nws lub txim. “ ‘Tiamsis yog nws yuav tsis taus ob tug nquab taug lossis ob tug rhaws nquab nyeg, mas nws yuav tsum coj ib feem kaum hauv ib efa hmoov mog zoo zoo tuaj xyeem daws lub txim uas nws tau ua lawd, tsis txhob rau roj thiab tsis txhob rau roj ntoos tsw qab vim yog ua kevcai xyeem daws txim. Nws yuav coj cov hmoov mog ntawd tuaj pub rau tus pov thawj mas tus pov thawj yuav tsuab cov hmoov ntawd ib taus tes ua lub chaw rau Yawmsaub nco ntsoov coj mus hlawv saum lub thaj rau saum tej uas muab hlawv kub hnyiab xyeem rau Yawmsaub. Qhov no yog ua kevcai xyeem daws txim. Tus pov thawj thiaj ntxuav tau tus ntawd kev txhaum tsis hais yam twg uas hais tag los no lawd mas thiaj zam tau nws lub txim. Cov hmoov uas tseem tshuav ntawd yuav muab ua tus pov thawj li feem ib yam li thaum ua kevcai xyeem qoob loo.’ ” Yawmsaub hais rau Mauxe tias, “Yog leejtwg ua tsis ncaj ua txhaum rau tej uas dawb huv rau Yawmsaub, tiamsis tsis yog nws txhob txwm ua, mas nws yuav tsum coj ib tug txiv yaj uas tsis muaj chaw thuam li tuaj rau Yawmsaub ua kevcai ntxuav kev txaug kev txhaum. Koj yuav tsum ntaus nqe rau tus txiv yaj ntawd raws li cov nyiaj sekhee uas siv hauv lub chaw pe Vajtswv, thiaj yog ua kevcai ntxuav kev txaug kev txhaum. Mas tus ntawd yuav pauj cov uas dawb huv lawd uas nws muab tsis txwm, thiab nws yuav ntxiv ib feem hauv tsib feem rov rau tus pov thawj. Mas tus pov thawj yuav muab tus txiv yaj uas ua kevcai ntxuav kev txaug kev txhaum ntawd xyeem ua kevcai ntxuav tus ntawd kev txhaum txim, thiaj zam tau nws lub txim. “Yog leejtwg ua txhaum ua tej yam uas Yawmsaub twb hais tias tsis txhob ua, txawm yog nws tsis paub tias txhaum, los yeej yog nws ua txhaum thiab nws yuav tau ris lub txim. Mas nws yuav tsum coj ib tug txiv yaj uas tsis muaj chaw thuam li tuaj mas koj yuav ntaus nqe raws li ntaus nqe rau tus tsiaj uas xyeem ua kevcai ntxuav kev txaug kev txhaum. Tus pov thawj thiaj ntxuav tau tus ntawd tej kev txhaum txim uas nws tsis paub es nws ua lawd, thiaj zam tau nws lub txim. No yog ua kevcai ntxuav kev txaug kev txhaum rau qhov uas tau ua txhaum rau Yawmsaub muaj txim lawm.” Yawmsaub hais rau Mauxe tias, “Yog leejtwg ua txhaum ua tsis ncaj rau Yawmsaub, yog nws dag kwvtij zej zog txog tej uas luag muab rau nws cia lossis tej uas luag muab rau nws qhwv, lossis ua tub sab lossis quab yuam kwvtij zej zog li qhov txhia chaw lawm, lossis khaws tau luag tej qhov txhia chaw uas ploj los kuj tsis lees li, tseem twv ntuj twv teb dag, lossis ua txhaum li lwm leej lwm tus ua, mas thaum leejtwg tau ua txhaum li no thiab muaj txim lawm, mas nws yuav tsum thim tej uas nws nyiag los lossis tej uas nws qaum tau los lossis tej uas luag muab rau nws cia, lossis tej uas luag li ploj nws khaws tau, thiab tej uas nws twv ntuj twv teb dag. Nws yuav tsum thim kom txwm nkaus li qub thiab ntxiv ib feem hauv tsib feem rau, muab kiag rau tus tswv rau hnub uas nws muab tsiaj xyeem ua kevcai ntxuav kev txaug kev txhaum. Tus ntawd yuav tsum coj ib tug txiv yaj uas tsis muaj chaw thuam li tuaj rau tus pov thawj muab xyeem rau Yawmsaub ua kevcai ntxuav kev txaug kev txhaum, thiab koj yuav ntaus nqe raws li ntaus nqe rau tus tsiaj uas xyeem ua kevcai ntxuav kev txaug kev txhaum. Mas tus pov thawj thiaj ntxuav tau tus ntawd tej kev txhaum rau ntawm Yawmsaub xubntiag thiaj zam tau txhua yam uas nws tau ua txhaum muaj txim lawd.” Yawmsaub hais rau Mauxe tias, “Koj cia li hais rau Aloo thiab nws cov tub tias, ‘No yog tej kab ke uas ua kevcai hlawv huvsi xyeem. Tej uas muab hlawv huvsi xyeem ntawd mas cia nyob saum cub tawg saum lub thaj ib hmo kaj ntug, thiab yuav tsum cia cov taws saum lub thaj cig tsis tuag li. Tus pov thawj yuav tsum hnav lub tsho ntaub mag thiab hnav lub ris ntaub mag mus yawm cov tshauv uas ua kevcai hlawv huvsi xyeem ntawd saum lub thaj los tso rau ntawm lub thaj ib sab. Nws yuav muab lub tsho ntawd hle rov hnav dua ib lub tsho mam li coj cov tshauv ntawd tawm mus sab nraum ntug zos rau lub chaw uas dawb huv. Yuav tsum kho taws saum lub thaj kom cig mus li tsis txhob cia hluavtaws tuag li. Tus pov thawj yuav niaj tagkis rauv taws rau saud thiab muab tej qhov txhia chaw uas ua kevcai hlawv huvsi xyeem ua tib zoo tso rau saud thiab muab cov hlab hluas roj ua kevcai xyeem sib raug zoo hlawv rau saud. Yuav tsum kho taws saum lub thaj kom cig mus li tsis txhob cia hluavtaws tuag li. “ ‘No yog tej kab ke uas ua kevcai xyeem qoob loo. Aloo cov tub yuav tsum muab tej uas ua kevcai ntawd xyeem rau ntawm Yawmsaub xubntiag ntawm lub thaj. Mas tus pov thawj yuav muab cov hmoov mog uas zoo zoo ntse roj ua kevcai xyeem qoob loo ntawd ib taus tes thiab muab kiag cov roj ntoos tsw qab uas nyob saud huvsi hlawv saum lub thaj ua chaw rau Yawmsaub nco ntsoov ua kom muaj pa ncho tsw qab hum Yawmsaub lub siab. Tej uas tseem tshuav mas Aloo thiab nws cov tub yuav noj, yuav noj cov hmoov ntawd tsis xyaw keeb, thiab yuav noj rau lub chaw dawb huv uas yog hauv lub loog tsev ntaub sib ntsib. Cov ncuav ci no tsis txhob xyaw keeb. Kuv twb muab tej no rho ntawm tej uas muab hlawv kub hnyiab xyeem rau kuv ua lawv li feem, yog yam uas dawb huv kawg nkaus ib yam li tej uas ua kevcai xyeem daws txim thiab xyeem ua kevcai ntxuav kev txaug kev txhaum. Aloo caj ces cov tub txhua tus noj tau tej no, yog lawv li feem ib tiam dhau ib tiam ib txhiab ib txhis mus li, rho ntawm tej uas muab hlawv kub hnyiab xyeem rau Yawmsaub los. Leejtwg kov raug tej no mas nws yuav dawb huv lawm.’ ” Yawmsaub hais rau Mauxe tias, “No yog tej uas Aloo thiab nws cov tub yuav muab xyeem rau Yawmsaub rau hnub uas muab roj hliv ywg tsa nws ua pov thawj, yog ib feem kaum hauv ib efa hmoov mog uas zoo zoo ua kevcai xyeem qoob loo uas lawv niaj hnub ua, muab ib nrab xyeem thaum tagkis, muab ib nrab xyeem thaum yuav tsaus ntuj. Muab roj ntse cov hmoov ntawd tov kom txhua thiab muab ci saum daim ntxais hlau. Muab ntais ua tej dwb daim, mas muab ua kevcai xyeem qoob loo, ua kom muaj pa ncho tsw qab hum Yawmsaub siab. Aloo tus tub uas raug tsa ua pov thawj hlob nyob nws chaw yuav muab tej no xyeem rau Yawmsaub mus ib txhis li, yuav muab tej no hlawv huvsi. Txhua yam uas tus pov thawj muab ua kevcai xyeem qoob loo mas yuav muab hlawv huvsi, tsis txhob noj li.” Yawmsaub hais rau Mauxe tias, “Cia li hais rau Aloo thiab nws cov tub tias, ‘No yog tej kab ke uas ua kevcai xyeem daws txim. Muab tus tsiaj uas ua kevcai xyeem daws txim tua rau ntawm Yawmsaub xubntiag ntawm tib qhov chaw uas tua tsiaj ua kevcai hlawv huvsi xyeem, no yog yam uas dawb huv kawg nkaus. Tus pov thawj uas muab tus tsiaj ntawd ua kevcai xyeem daws txim yuav noj tus tsiaj ntawd cov nqaij. Nws yuav noj rau lub chaw dawb huv uas yog hauv lub loog tsev ntaub sib ntsib. Yog yam twg nphav cov nqaij ntawd mas yam ntawd kuj dawb huv thiab. Thaum uas nchos cov ntshav yog cov ntshav lo lub tsho mas yuav muab lub tsho ntawd ntxhua ntawm lub chaw dawb huv. Muab lub laujkaub av uas hau cov nqaij ntawd tsoo pov tseg. Yog muab laujkaub tooj liab hau mas yuav muab txhuam thiab muab dej ntxuav kom huv huv. Txhua tus txivneej uas ua pov thawj noj tau cov nqaij ntawd, yog yam uas dawb huv kawg nkaus. Tus tsiaj uas tua ua kevcai xyeem daws txim uas tus pov thawj coj cov ntshav mus rau hauv lub tsev ntaub sib ntsib ua kevcai ntxuav kev txhaum txim hauv lub chaw uas dawb huv, mas tsis txhob noj cov nqaij ntawd li, yuav tsum muab hlawv huvsi.’ ” “ ‘No yog tej kab ke uas ua kevcai ntxuav kev txaug kev txhaum, yog yam uas dawb huv kawg nkaus. Yuav tsum muab tus tsiaj uas ua kevcai ntxuav kev txaug kev txhaum tua ntawm tib lub chaw uas tua tsiaj ua kevcai hlawv huvsi xyeem, thiab muab cov ntshav nchos rau saum lub thaj puag ncig lub thaj. Yuav muab cov hlab hluas roj huvsi xyeem thiab muab tus kotw rog rog thiab cov hlab hluas roj uas lo plab hnyuv thiab ob lub raum thiab cov hlab hluas roj ntawm lub duav thiab cov hlab hluas roj uas lo cov siab uas yuav muab kaus kiag nrog lub raum los. Tus pov thawj yuav muab tej no hlawv saum lub thaj yog yam uas muab hlawv kub hnyiab xyeem rau Yawmsaub. Qhov no yog ua kevcai ntxuav kev txaug kev txhaum. Txhua tus txivneej uas ua pov thawj noj tau cov nqaij ntawd, tiamsis yuav tsum noj ntawm lub chaw uas dawb huv, yog yam uas dawb huv kawg nkaus. “ ‘Tej kab ke uas ua kevcai ntxuav kev txaug kev txhaum thiab ua kevcai xyeem daws txim, kuj ua zoo ib yam nkaus. Tus pov thawj uas ua kevcai ntxuav kev txhaum txim ntawd yuav tau cov nqaij ntawd. Tus pov thawj twg uas muab leejtwg tus tsiaj ua kevcai hlawv huvsi xyeem, mas nws yeej tau tus tsiaj uas hlawv huvsi xyeem ntawd daim tawv ua nws tug. Txhua yam uas muab los ua kevcai xyeem qoob loo tsis hais ncuav cub ncuav kib ncuav ci saum ntxaij hlau los puavleej yog tus pov thawj uas ua kevcai xyeem ntawd li feem. Txhua yam uas muab los ua kevcai xyeem qoob loo uas muab ntse roj thiab tsis ntse los puavleej yog Aloo cov tub sawvdaws li feem sib npaug zos. “ ‘No yog tej kab ke uas yuav ua rau thaum leejtwg tua tsiaj xyeem rau Yawmsaub ua kevcai xyeem sib raug zoo. Yog nws muab tej no ua kevcai ua Yawmsaub tsaug nws yuav tsum coj cov ncuav tsis xyaw keeb uas ntse roj thiab cov ncuav nyias nyias tsis xyaw keeb uas pleev roj thiab cov ncuav uas muab cov hmoov mog uas zoo zoo ntse roj tov ua, nrog tus tsiaj uas ua kevcai xyeem ua tsaug tuaj ua ke tuaj. Nws yuav tsum coj cov ncuav uas xyaw keeb nrog tus tsiaj uas tua ua kevcai xyeem sib raug zoo thiab xyeem ua Yawmsaub tsaug ua ke tuaj xyeem. Nws yuav muab tej ncuav ib yam ib lub xyeem pub rau Yawmsaub. Mas tej no yog tus pov thawj li feem, yog tus pov thawj uas muab cov ntshav uas ua kevcai xyeem sib raug zoo nchos rau lub thaj. Tus tsiaj uas tua ua kevcai xyeem sib raug zoo thiab xyeem ua Yawmsaub tsaug cov nqaij mas yuav tsum noj kom tag rau hnub uas muab xyeem ntawd tsis txhob tseg ib qho txog kaj ntug. Yog nws muab ib tug tsiaj xyeem ua kevcai pauj tej uas nws fiv cia lawd lossis nws cia li zoo siab muab xyeem pub xwb, mas noj tau rau hnub uas muab xyeem ntawd, thiab hnub tom qab lawv tseem noj tau tej nqaij uas tshuav thiab. Tus tsiaj uas muab tua xyeem ntawd mas cov nqaij uas tseem tshuav txog hnub peb mas cia li muab hlawv huvsi tseg. Yog leejtwg noj tej nqaij uas tua ua kevcai xyeem sib raug zoo rau hnub peb mas Yawmsaub tsis txais yuav tus uas xyeem ntawd lawm, thiab tej uas nws ua kevcai xyeem ntawd tsis muaj qabhau rau tus tswv tsiaj lawm, tej ntawd kuj qias vuab tsuab lawm thiab. Tus uas noj tej nqaij ntawd yuav ris nws lub txim. “ ‘Cov nqaij uas nphav tej yam qias tsis huv mas tsis txhob noj, cia li muab hlawv huvsi tseg. Cov nqaij uas tseem huv mas txhua tus uas huv noj tau. Tiamsis yog leejtwg uas tseem qias tsis huv noj tej nqaij uas muab tua xyeem rau Yawmsaub ua kevcai sib raug zoo mas nws yuav raug muab txiav tawm hauv nws haiv neeg mus. Yog leejtwg mus kov raug tej yam uas qias tsis huv tsis hais yog neeg li los yog tsiaj txhu li lossis ib yam dabtsi uas qias vuab tsuab nws tseem los noj tej nqaij uas muab tua xyeem rau Yawmsaub ua kevcai sib raug zoo, mas tus ntawd yuav raug muab txiav tawm hauv nws haiv neeg mus.’ ” Yawmsaub hais rau Mauxe tias, “Koj cia li hais rau cov Yixayee tias, ‘Nej tsis txhob noj nyuj thiab yaj thiab tshis tej hlab hluas roj. Tej tsiaj uas cia li tuag thiab tej tsiaj uas tsiaj qus muab tom tuag tej hlab hluas roj mas coj mus siv ua lwm yam kuj tau tiamsis nej tsis txhob noj kiag li. Yog leejtwg noj tej tsiaj uas yuav muab hlawv kub hnyiab xyeem rau Yawmsaub tej hlab hluas roj mas nws yuav raug muab txiav tawm hauv nws haiv neeg mus. Thiab tsis txhob noj ntshav tsis hais ntshav noog ntshav tsiaj txhu dabtsi, nej txawm mus nyob qhovtwg los tsis txhob noj li. Yog leejtwg noj ntshav mas nws yuav raug muab txiav tawm hauv nws haiv neeg mus.’ ” Yawmsaub hais rau Mauxe tias, “Cia li hais rau cov Yixayee tias, ‘Yog leejtwg yuav muab tsiaj tua xyeem rau Yawmsaub ua kevcai xyeem sib raug zoo mas tus ntawd yuav tsum muab ib qho rho ntawm tus tsiaj uas tua ua kevcai xyeem sib raug zoo ntawd pub xyeem rau Yawmsaub. Mas nws yuav tsum coj ntawm nws txhais tes ib qho uas yuav muab hlawv kub hnyiab xyeem rau Yawmsaub. Nws yuav coj lub hauv nrob thiab cov hlab hluas roj ntawm lub hauv nrob tuaj pub ua kevcai cev xyeem rau Yawmsaub. Mas tus pov thawj yuav muab cov hlab hluas roj hlawv saum lub thaj tiamsis lub hauv nrob yuav ua Aloo thiab nws cov tub li feem. Tus tsiaj uas tua ua kevcai xyeem sib raug zoo ntawd mas sab ceg xis yuav rho rau tus pov thawj ua nws li feem. Aloo tus tub uas muab tus tsiaj uas ua kevcai xyeem sib raug zoo cov ntshav thiab cov hlab hluas roj xyeem ntawd, mas nws yuav tau sab ceg xis ua nws li feem. Rau qhov lub hauv nrob uas cev xyeem thiab sab ceg xis uas pub xyeem kuv twb muab rho ntawm cov Yixayee, yog rho ntawm tej uas lawv muab ua kevcai xyeem sib raug zoo lawd, mas kuv muab pub rau Aloo thiab nws cov tub. Lawv yuav tau tej no ntawm cov Yixayee mus ib txhis li.’ ” Tej no yog Aloo thiab nws cov tub li feem uas rho ntawm tej uas muab hlawv kub hnyiab xyeem rau Yawmsaub, yog muab pub rau lawv ua lawv tug rau hnub uas lawv raug tsa ua pov thawj ua Yawmsaub tes haujlwm. Hnub uas Aloo lawv raug hliv roj tsa ua pov thawj mas Yawmsaub kom cov Yixayee muab tej no rau Aloo lawv ua lawv li feem ib tiam dhau ib tiam mus ib txhis li. Tej no huvsi yog tej kab ke uas ua kevcai hlawv huvsi xyeem thiab ua kevcai xyeem qoob loo thiab ua kevcai xyeem daws txim thiab ua kevcai ntxuav kev txaug kev txhaum thiab ua kevcai tsa ua pov thawj thiab ua kevcai xyeem sib raug zoo. Tej no yog Yawmsaub hais rau Mauxe saum lub roob Xinai rau hnub uas Yawmsaub hais kom cov Yixayee coj qhov txhia chaw tuaj xyeem rau Yawmsaub hauv tebchaws moj sab qhua Xinai. Yawmsaub hais rau Mauxe tias, “Coj Aloo thiab nws cov tub tuaj thiab tej tsoos meej mom thiab cov roj uas siv ua kevcai tsa thiab tus txiv nyuj uas ua kevcai xyeem daws txim thiab ob tug txiv yaj thiab lub tawb ncuav uas tsis xyaw keeb, thiab hu tag nrho ib tsoom pejxeem tuaj ua ke rau ntawm lub qhov rooj tsev ntaub sib ntsib.” Mauxe kuj ua raws li Yawmsaub hais rau nws, ib tsoom pejxeem thiaj tuaj ua ke ntawm lub qhov rooj tsev ntaub sib ntsib. Mauxe hais rau cov pejxeem tias, “No yog tej uas Yawmsaub hais tias yuav tsum ua.” Mauxe txawm coj Aloo thiab nws cov tub tuaj mas muab dej ntxuav lawv. Nws muab lub tsho rau Aloo hnav, muab siv rau sia thiab muab lub tsho ntev rau hnav thiab muab lub tsho efauj rau hnav. Nws muab txoj siv sia uas ntos zoo zoo sia lub tsho efauj rau ntawm duav, thiaj khi tau lub tsho efauj. Mauxe muab lub awv rau Aloo coj thiab muab Uli thiab Thumi tso rau hauv lub awv. Thiab nws muab phuam rau Aloo ntoo thiab muab pluaj kub uas dawb huv los sia txoj phuam ntawm hauv pliaj, raws li Yawmsaub hais rau Mauxe lawd. Mauxe muab cov roj uas siv ua kevcai tsa los hliv ywg Yawmsaub lub tsev ntaub sib ntsib thiab txhua yam uas nyob hauv lub tsev thiaj ua tau kevcai tu kom dawb huv rau Yawmsaub. Thiab nws muab cov roj ib qho nchos rau saum lub thaj xya zaus, muab hliv ywg lub thaj thiab tej twj uas siv ntawm lub thaj huvsi thiab lub phaj thiab lub chaw uas txawb lub phaj thiaj ua tau kevcai tu kom dawb huv rau Yawmsaub. Nws muab cov roj uas siv ua kevcai tsa ib qho hliv ywg rau saum Aloo taubhau ua kevcai tsa tau nws thiab tu kom nws dawb huv rau Yawmsaub. Mauxe txawm coj Aloo cov tub los mas muab tej tsho rau lawv hnav, muab txoj siv rau lawv sia thiab muab phuam rau lawv ntoo, raws li Yawmsaub hais rau Mauxe lawd. Mauxe txawm coj tus txiv nyuj uas ua kevcai xyeem daws txim tuaj mas Aloo thiab nws cov tub muab tes npuab rau saum tus nyuj uas ua kevcai xyeem daws txim taubhau. Mauxe muab tus nyuj ntawd tua kiag thiab muab ntiv tes raus hauv cov ntshav ib qho los pleev cov kub thaj ua kevcai ntxuav lub thaj kom dawb huv thiab hliv cov ntshav uas tshuav rau lub taw thaj, mas thiaj tu kom dawb huv rau Yawmsaub thiab ua kevcai ntxuav lub thaj kev txhaum. Nws kuj muab cov hlab hluas roj uas lo plab hnyuv huvsi thiab cov hlab hluas roj uas lo cov siab thiab cov hlab hluas roj uas lo ob lub raum thiab ob lub raum huvsi los mas Mauxe muab hlawv rau saum lub thaj. Tiamsis tus nyuj thiab daim tawv thiab cov nqaij thiab tej quav nws muab hlawv huvsi rau sab nraum ntug zos, raws li Yawmsaub hais rau Mauxe lawd. Mauxe txawm coj tus txiv yaj uas ua kevcai hlawv huvsi xyeem tuaj, mas Aloo thiab nws cov tub muab tes npuab rau saum tus yaj ntawd taubhau. Mauxe kuj muab tus yaj ntawd tua kiag muab cov ntshav nchos lo puag ncig lub thaj. Nws muab tus txiv yaj ntawd txiav ua tej ywb yav thiab nws muab lub taubhau thiab tej ywb yav thiab cov hlab hluas roj hlawv huvsi. Thaum nws muab dej ntxuav tej plab hnyuv thiab tej ceg Mauxe kuj muab tus txiv yaj hlawv huvsi rau saum lub thaj ua kevcai hlawv huvsi xyeem ua kom muaj pa ncho tsw qab, yog yam uas muab hlawv kub hnyiab xyeem rau Yawmsaub, raws li Yawmsaub hais rau Mauxe lawd. Mauxe coj dua ib tug txiv yaj los yog tus yaj uas siv ua kevcai tsa pov thawj, mas Aloo thiab nws cov tub muab tes npuab rau saum tus txiv yaj ntawd taubhau. Mauxe muab tus yaj ntawd tua kiag mas muab cov ntshav ib qho los pleev Aloo sab taub ntsej xis thiab tus taub teg xis thiab tus taub taw xis. Mauxe kuj coj Aloo cov tub los mas nws muab cov ntshav ib qho los pleev lawv sab taub ntsej xis thiab tus taub teg xis thiab tus taub taw xis thiab nws muab cov ntshav nchos kom lo puag ncig lub thaj. Nws muab cov hlab hluas roj thiab tus kotw uas rog rog thiab cov hlab hluas roj uas lo plab hnyuv huvsi thiab cov hlab hluas roj uas lo cov siab thiab cov hlab hluas roj uas lo ob lub raum thiab ob lub raum, thiab sab ceg xis. Nws txawm rho ib lub ncuav uas tsis xyaw keeb thiab ib lub ncuav ntse roj thiab ib lub ncuav nyias nyias hauv lub tawb uas muaj cov ncuav tsis xyaw keeb uas nyob ntawm Yawmsaub xubntiag, tso rau saum cov hlab hluas roj thiab tso rau saum sab ceg xis. Nws muab cov no huvsi tso rau hauv Aloo thiab Aloo cov tub txhais tes nqa mus cev ua kevcai cev xyeem rau ntawm Yawmsaub xubntiag. Mauxe ho txais tej ntawm Aloo lawv txhais tes muab hlawv rau saum lub thaj ua ke nrog tus yaj uas hlawv huvsi xyeem lawd ua kevcai tsa ua pov thawj, ua kom muaj pa ncho tsw qab, yog yam uas muab hlawv kub hnyiab xyeem rau Yawmsaub. Mauxe muab lub hauv nrob ua kevcai cev xyeem rau ntawm Yawmsaub xubntiag. Lub hauv nrob no yog Mauxe li feem rho ntawm tus yaj uas ua kevcai tsa pov thawj los, raws li Yawmsaub hais rau Mauxe lawd. Mauxe coj cov roj uas siv ua kevcai tsa ib qho thiab cov ntshav saum lub thaj ib qho los nchos rau Aloo thiab Aloo cev tsoos meej mom thiab nchos rau Aloo cov tub thiab lawv tej tsoos meej mom. Mauxe ua li no thiaj tu tau Aloo thiab nws cev tsoos meej mom thiab Aloo cov tub thiab lawv tej tsoos meej mom kom dawb huv rau Yawmsaub. Mauxe hais rau Aloo thiab Aloo cov tub tias, “Muab cov nqaij ntawd hau ntawm lub qhov rooj tsev ntaub sib ntsib thiab noj qhov ntawd ntxuag cov ncuav hauv lub tawb uas xyeem ua kevcai tsa ua pov thawj, raws li kuv hais rau nej lawd tias Aloo thiab nws cov tub yuav tsum noj. Tej nqaij thiab tej ncuav uas noj tsis tag mas nej muab hlawv huvsi pov tseg. Xya hnub nej tsis txhob tawm ntawm lub qhov rooj tsev ntaub sib ntsib mus qhovtwg li mus txog hnub uas ua kevcai tsa nej ua pov thawj tiav tso. Txoj kevcai tsa nej ua pov thawj yuav ua xya hnub. Tej uas ua hnub no yog Yawmsaub hais kom ua los ntxuav nej li kev txhaum txim. Nej yuav tsum nyob ntawm lub qhov rooj tsev ntaub sib ntsib xya hnub nruab hnub hmo ntuj thiab ua tej uas Yawmsaub hais cia lawd tsam ces nej ho tuag, vim tej no yog Yawmsaub hais rau kuv ntag.” Aloo thiab nws cov tub kuj ua raws li Yawmsaub hais rau Mauxe lawd txhua yam huvsi. Hnub yim Mauxe hu Aloo thiab nws cov tub thiab cov Yixayee tej kev txwj laus tuaj, mas nws hais rau Aloo tias, “Coj ib tug thav txiv nyuj tuaj ua kevcai xyeem daws txim thiab ib tug txiv yaj ua kevcai hlawv huvsi xyeem, coj ob tug uas tsis muaj chaw thuam li tuaj xyeem rau ntawm Yawmsaub xubntiag. Thiab hais rau cov Yixayee tias, ‘Coj ib tug txiv tshis tuaj ua kevcai xyeem daws txim thiab coj ib tug menyuam nyuj thiab ib tug menyuam yaj uas hnub nyoog muaj ib xyoos thiab tsis muaj chaw thuam li tuaj ua kevcai hlawv huvsi xyeem, thiab coj ib tug txiv nyuj thiab ib tug txiv yaj tuaj tua xyeem ua kevcai xyeem sib raug zoo rau ntawm Yawmsaub xubntiag, thiab coj cov ncuav ntse roj ua kevcai xyeem qoob loo tuaj xyeem, vim hnub no Yawmsaub yuav tshwm rau nej pom.’ ” Lawv thiaj coj tej uas Mauxe hais ntawd tuaj rau ntawm lub tsev ntaub sib ntsib sab qhov rooj, ib tsoom pejxeem kuj txav los ze sawv ntsug rau ntawm Yawmsaub xubntiag. Mauxe txawm hais tias, “Tej no yog tej uas Yawmsaub hais kom nej ua, mas Yawmsaub lub hwjchim ci ntsa iab yuav tshwm los rau nej pom.” Ces Mauxe txawm hais rau Aloo tias, “Cia li txav mus ze ze lub thaj, muab tus tsiaj tua ua kevcai xyeem daws txim thiab ua kevcai hlawv huvsi xyeem ua koj li feem, thiab ua kevcai ntxuav koj thiab tej pejxeem kev txhaum txim, thiab coj cov pejxeem tus tsiaj los tua ua kevcai ntxuav lawv kev txhaum txim, raws li Yawmsaub hais lawd.” Aloo txawm txav mus ze lub thaj thiab tua tus menyuam nyuj uas ua kevcai xyeem daws nws li txim. Aloo cov tub nqa cov ntshav los cev rau Aloo ces Aloo muab ntiv tes raus cov ntshav mus pleev cov kub ntawm lub thaj, thiab muab cov ntshav uas tshuav hliv rau ntawm taw thaj. Mas cov hlab hluas roj thiab ob lub raum thiab cov hlab hluas roj uas lo cov siab ntawm tus tsiaj uas ua kevcai xyeem daws txim ntawd nws muab hlawv saum lub thaj, raws li Yawmsaub hais rau Mauxe lawd. Cov nqaij thiab daim tawv nws muab hlawv rau sab nraum ntug zos. Nws tua tus txiv yaj uas ua kevcai hlawv huvsi xyeem. Aloo cov tub nqa cov ntshav los rau Aloo mas nws muab cov ntshav nchos lo puag ncig lub thaj. Lawv kuj muab tus txiv yaj uas ua kevcai hlawv huvsi xyeem ntawd ib yav zuj zus cev rau Aloo thiab cev lub taubhau mas Aloo muab tej no hlawv rau saum lub thaj. Nws ntxuav tej plab hnyuv thiab tej ceg mas muab hlawv rau saum cov nqaij uas ua kevcai hlawv huvsi xyeem ntawd saum lub thaj. Aloo txawm coj cov pejxeem tus tsiaj los xyeem. Nws coj tus tshis uas ua kevcai xyeem daws cov pejxeem li txim, mas nws muab tua xyeem ua kevcai xyeem daws txim ib yam li thawj tug uas nws ua kevcai xyeem daws txim ntawd. Aloo coj tus tsiaj uas ua kevcai hlawv huvsi xyeem tuaj xyeem raws li txoj kevcai. Nws kuj coj tej hmoov uas ua kevcai xyeem qoob loo tuaj xyeem thiab tsuab ib taus tes hlawv rau saum lub thaj, yog ntxiv rau tej uas niaj tagkis ua kevcai hlawv huvsi xyeem. Aloo kuj tua tus txiv nyuj thiab tus txiv yaj, rau cov pejxeem ua kevcai xyeem sib raug zoo. Aloo cov tub nqa cov ntshav los cev rau Aloo mas nws muab cov ntshav nchos lo puag ncig lub thaj. Cov hlab hluas roj nyuj thiab cov hlab hluas roj yaj thiab tus kotw uas rog rog thiab cov hlab hluas roj uas lo plab hnyuv, thiab ob lub raum thiab cov hlab hluas roj uas lo cov siab, mas tej hlab hluas roj no lawv muab tso rau saum tej hauv nrob, mas Aloo muab cov hlab hluas roj ntawd hlawv rau saum lub thaj, tiamsis lub hauv nrob thiab sab ceg xis Aloo muab cev ua kevcai cev xyeem rau ntawm Yawmsaub xubntiag, raws li Mauxe hais cia lawd. Aloo txawm tsa tes kiag foom koob hmoov rau cov pejxeem, ces nws txawm nqes saum lub chaw uas nws ua kevcai xyeem daws txim thiab ua kevcai hlawv huvsi xyeem thiab ua kevcai xyeem sib raug zoo los. Ces Aloo thiab Mauxe txawm mus rau hauv lub tsev ntaub sib ntsib. Thaum ob tug tawm los ob tug foom koob hmoov rau cov pejxeem mas Yawmsaub lub hwjchim ci ntsa iab txawm tshwm los rau cov pejxeem sawvdaws pom. Nplaim taws txawm tawm ntawm Yawmsaub xubntiag los kub kiag tej tsiaj uas muab ua kevcai hlawv huvsi xyeem thiab cov hlab hluas roj saum lub thaj. Thaum cov pejxeem pom li no sawvdaws qw thiab khwb pes nkaus rau hauv pem teb. Aloo ob tug tub Nada thiab Anpihu nyias taus nyias nqa lub yias rau ncaig taws thiab yawm ncaig taws rau hauv thiab muab hmoov tshuaj tsw qab rau hauv, thiab ob tug muab tej hluavtaws ntawd uas tsis dawb huv siv hlawv xyeem rau ntawm Yawmsaub xubntiag, Yawmsaub tsis tau kom ob tug ua li ntawd. Nplaim taws txawm tawm plaws ntawm Yawmsaub xubntiag los kub kiag ob tug ces ob tug txawm tuag kiag rau ntawm Yawmsaub xubntiag. Mauxe txawm hais rau Aloo tias, “Qhov no Yawmsaub twb hais tseg lawm tias, “ ‘Kuv yuav ua rau neeg uas nyob ze kuv paub tias kuv yog tus uas dawb huv, kuv yuav tau koob meej tabmeeg ib tsoom neeg sawvdaws.’ ” Aloo cia li nyob twjywm. Mauxe hu Misa‑ee thiab Eexafa uas yog Aloo tus txiv ntxawm Uxi‑ee ob tug tub tuaj mas hais rau ob tug tias, “Cia li los muab neb kwv neb tij kwv ntawm lub chaw pe Yawmsaub no mus rau sab nraum ntug zos.” Ob tug txawm los muab ob tug tuag uas tseem hnav cev tsoos meej mom kwv kiag tawm mus rau sab nraum ntug zos, raws li Mauxe hais. Mauxe txawm hais rau Aloo thiab Ele‑axa thiab Ithama lawv peb txiv tub tias, “Tsis txhob cia nej plaubhau ntxhov hnyo thiab tsis txhob muab nej tej tsho dua, tsam ces nej ho tuag thiab Yawmsaub txojkev npau taws ho tshwm rau ib tsoom pejxeem sawvdaws. Tiamsis nej cov kwvtij uas yog cov Yixayee sawvdaws yuav quaj ntsuag ob tug uas Yawmsaub tso hluavtaws kub hnyiab tuag kuj tau. Nej tsis txhob tawm ntawm lub qhov rooj tsev ntaub sib ntsib mus qhovtwg li tsam ces nej ho tuag, vim Yawmsaub cov roj uas hliv tsa nej tseem nyob ntawm nej.” Mas lawv kuj ua raws li Mauxe hais. Yawmsaub hais rau Aloo tias, “Thaum koj lossis koj cov tub yuav mus rau hauv lub tsev ntaub sib ntsib mas tsis txhob haus cawv txiv hmab thiab haus cawv ntxwg kiag li tsam ces nej ho tuag. Tej no yog tej kevcai uas nej yuav tsum coj ib tiam dhau ib tiam ib txhiab ib txhis mus li. Koj yuav tsum muab tej qhov txhia chaw uas dawb huv cais tawm ntawm tej uas yog neeg li, thiab muab tej uas qias tsis huv cais tawm ntawm tej uas huv. Koj yuav tsum qhia cov Yixayee paub txog tej kevcai huvsi uas Yawmsaub kom Mauxe hais rau lawv lawd.” Mauxe hais rau Aloo thiab Ele‑axa thiab Ithama lawv peb txiv tub uas tseem nyob tias, “Muab tej qhov txhia chaw uas thaum ua kevcai xyeem qoob loo es tsis muab hlawv xyeem rau Yawmsaub los ua ncuav tsis xyaw keeb noj ntawm lub thaj ib sab, vim yog yam uas dawb huv kawg nkaus. Nej cia li noj rau ntawm lub chaw uas dawb huv rau qhov yog koj thiab koj cov tub li feem uas rho ntawm tej uas muab hlawv kub hnyiab xyeem rau Yawmsaub los, vim yog Yawmsaub hais li no rau kuv. Tiamsis lub hauv nrob uas muab cev xyeem thiab sab ceg uas muab pub xyeem lawd nej muab noj ntawm tej chaw uas tu kom huv huv qhov twg kuj tau, koj thiab koj tej tub tej ntxhais puavleej noj tau. Koj thiab koj tej tub ki yuav tau tej no ua nej li feem, yog rho ntawm tej uas cov Yixayee muab ua kevcai xyeem sib raug zoo los rau nej. Txhais ceg uas muab pub xyeem thiab lub hauv nrob uas muab cev xyeem mas yuav coj los xyeem ua ke nrog cov hlab hluas roj uas yuav muab hlawv kub hnyiab xyeem, thiab yuav muab cev rau ntawm Yawmsaub xubntiag ua kevcai cev xyeem. Tej no yog koj thiab koj cov tub ki li feem mus ib txhis li, raws li Yawmsaub hais lawd.” Mauxe ua tib zoo nug txog tus tshis uas muab ua kevcai xyeem daws txim mas nws paub tias twb muab tus tshis ntawd hlawv tag lawm, mas nws chim heev rau Ele‑axa thiab Ithama uas yog Aloo ob tug tub uas tseem tshuav nyob. Mauxe cem tias, “Ua cas neb tsis muab tus tsiaj uas muab ua kevcai xyeem daws txim ntawd noj ntawm thaj chaw pe Yawmsaub. Twb yog yam uas dawb huv kawg nkaus thiab yog yam uas twb muab rau neb kom thiaj coj tau cov pejxeem lub txim mus pov tseg, thiab thiaj ntxuav tau lawv tej kev txhaum txim rau ntawm Yawmsaub xubntiag. Cov ntshav tsiaj ntawd tsis tau coj mus rau hauv lub tsev ntaub chav dawb huv, thiaj tsim nyog neb yuav tsum noj rau ntawm thaj chaw pe Yawmsaub, raws li kuv hais lawd.” Aloo txawm hais rau Mauxe tias, “Saib maj, hnub no lawv muab tsiaj ua kevcai xyeem daws txim thiab ua kevcai hlawv huvsi xyeem rau ntawm Yawmsaub xubntiag, tiamsis kuv twb raug tej xwm zoo li no lawm. Yog hnub no kuv tau noj tej uas ua kevcai xyeem daws txim ces yuav hum Yawmsaub lub siab lov?” Thaum Mauxe hnov li no nws kuj txaus siab. Yawmsaub hais rau Mauxe thiab Aloo hais tias, “Cia li hais rau cov Yixayee tias, ‘Tej tsiaj ciaj sia hauv ntiajteb uas nej noj tau yog tej no. Txhua yam tsiaj muaj rau uas ncau ua ntiv thiab zom zaub mas nej noj tau. “ ‘Tej tsiaj uas zom zaub lossis rau ncau uas nej yuav tsum caiv tsis txhob noj mas yog tej no. Ntxhuav yog tsiaj zom zaub tiamsis rau tsis ncau mas yog tsiaj qias tsis huv rau nej, ntxim tsua yog tsiaj zom zaub tiamsis rau tsis ncau mas yog tsiaj qias tsis huv rau nej, luav yog tsiaj zom zaub tiamsis rau tsis ncau mas yog tsiaj qias tsis huv rau nej, npua yog tsiaj uas rau ncau ua ntiv tiamsis tsis zom zaub mas yog tsiaj qias tsis huv rau nej. Nej caiv tsis txhob noj cov tsiaj no li nqaij kiag li, thiab tsis txhob kov tej tsiaj no tej cev tuag vim yog yam uas qias tsis huv rau nej. “ ‘Tej tsiaj nruab deg uas hais no nej noj tau. Txhua yam tsiaj nruab deg uas muaj txoob muaj nplai txawm yog nyob hauv hav dej nyob hauv hiavtxwv los nej noj tau. Tej tsiaj nruab deg uas tsis muaj txoob tsis muaj nplai txawm yog tej tsiaj me me nruab deg thiab tej tsiaj ciaj sia nruab deg nyob hauv hiavtxwv lossis nyob hauv hav los puavleej yog tej tsiaj uas qias vuab tsuab rau nej. Tej tsiaj no yog tsiaj uas qias vuab tsuab rau nej mus li, nej yuav tsum caiv tsis txhob noj cov nqaij kiag li, thiab tej cev tuag los nej yuav saib tias yog yam uas qias vuab tsuab. Txhua yam hauv nruab deg uas tsis muaj txoob tsis muaj nplai kuj yog yam uas qias vuab tsuab rau nej. “ ‘Ntawm no mus yog tej nas noog uas nej yuav saib tias yog yam uas qias vuab tsuab mas nej yuav caiv tsis txhob noj vim yog qias vuab tsuab rau nej, yog dav dub, dav noj twm, dav txho, liaj tw ntev, liaj ntsuab, txhua yam dav liaj no, txhua yam uab lag, plas dawb, plas txaij, plas liab, liaj txho, txhua yam dav no, lib nyug loj, tooj twg lwg, lib nyug me, plas tauv lauv, plas me, dav dawb, os dej dawb, txhua yam qaib dej txho, noog pej thiab puav. “ ‘Tej nyuag kab nyuag kooj muaj tis uas muaj tes taw nkag yog tej uas qias vuab tsuab rau nej. Tej nyuag kab nyuag kooj muaj tis muaj tes taw nkag uas nej noj tau yog cov uas txawj quav ceg dhia caws qia hauv pem teb. Cov kab cov kooj no nej noj tau, kooj txig txhua yam, kooj tshuab txhua yam, kab ziam roj txhua yam, kooj ntsuab txhua yam. Tiamsis lwm yam kab kooj muaj tis muaj tes taw nkag tau mas yog tej uas qias vuab tsuab rau nej. “ ‘Tej no yuav ua rau nej qias tsis huv. Yog leejtwg kov raug tej nyuag kab nyuag kooj uas tuag mas yuav qias tsis huv mus txog tsaus ntuj. Leejtwg nqa tej kab kooj uas tuag ntawd mas nws yuav tsum ntxhua nws cev tsoos tsho thiab yuav qias tsis huv txog tsaus ntuj. Txhua yam tsiaj uas muaj rau tsis ncau ua ntiv thiab tsis zom zaub mas yog tsiaj qias tsis huv rau nej. Yog leejtwg kov raug tej tsiaj ntawd mas nws yuav qias tsis huv. Txhua yam tsiaj uas muaj plaub txhais tes taw mus kev mas yog yam uas qias tsis huv rau nej. Yog leejtwg kov raug tej tsiaj ntawd lub cev tuag mas nws yuav qias tsis huv txog tsaus ntuj. Leejtwg coj tej tsiaj ntawd lub cev tuag mus mas yuav tsum ntxhua nws cev tsoos tsho thiab nws yuav qias tsis huv txog tsaus ntuj. Tej tsiaj no qias tsis huv rau nej. “ ‘Tej tsiaj me me uas nkag hauv pem teb no mas cov uas qias tsis huv rau nej yog cov no, luj, nas tsuag, nab qa txaij txhua yam, quav toj quav taug, nab qa, nyeb, nab qa tsiav rog, thiab nab qa tsiav ci. Txhua yam tsiaj me me uas nkag no yog tej uas qias tsis huv rau nej. Yog tuag lawm es leejtwg kov raug mas nws yuav qias tsis huv txog tsaus ntuj. Thaum tej ntawd ib tug tuag poob rau saum yam twg mas yam ntawd kuj qias tsis huv lawm thiab, tsis hais tej twj siv uas muab ntoo ua lossis tej ris tsho lossis tawv tsiaj lossis seev tsaj lossis tej twj siv yam twg mas yuav tsum muab tej ntawd tsau dej. Tej ntawd yuav qias tsis huv txog tsaus ntuj mas thiaj rov huv. Yog tej tsiaj ntawd ib tug poob rau hauv tej twj taig av mas txhua yam uas nyob hauv tais ntawd kuj qias tsis huv lawm, ces cia li muab lub tais ntawd tsoo pov tseg. Yog muab tej dej hauv lub tais qias ntawd los ua poob rau tej zaub mov uas tseem zoo noj mas tej zaub mov kuj qias tsis huv lawm thiab. Thiab cov uas tseem zoo haus hauv lub tais uas qias li ntawd kuj qias tsis huv lawm. Yog tej tsiaj ntawd lub cev tuag ib nyuag qhov poob rau saum yam twg mas yam ntawd kuj qias tsis huv lawm, tsis hais qhov txos qhov co los yuav muab tsoo huvsi pov tseg vim qias tsis huv lawm, vim yog qias tsis huv rau nej. Txawm yog li ntawd los tej qhov dej txhawv lossis tej rhawv dej puavleej hauv, tiamsis yog leejtwg kov raug tej tsiaj tuag nws kuj qias tsis huv lawm. Yog tej tsiaj tuag ntawd ib nyuag qhov poob rau saum tej noob qoob uas yuav muab cog mas tej noob qoob ntawd tseem huv. Yog hliv dej rau cov noob qoob ntawd lawm es tsiaj lub cev tuag ib nyuag qhov poob rau saud lawm mas cov noob qoob ntawd kuj qias tsis huv rau nej. “ ‘Yog tej tsiaj uas nej noj nyog ib tug tuag ces tus uas kov tus tsiaj tuag ntawd yuav qias tsis huv txog tsaus ntuj. Thiab yog leejtwg noj tus tsiaj tuag ntawd mas nws yuav tsum ntxhua nws cev tsoos tsho thiab nws yuav qias tsis huv txog tsaus ntuj. Yog leejtwg coj tus tsiaj tuag ntawd mus nws kuj yuav tsum ntxhua nws cev tsoos tsho thiab nws yuav qias tsis huv txog tsaus ntuj. “ ‘Txhua yam tsiaj me me uas nkag hauv pem teb yog tej uas qias vuab tsuab, mas caiv tsis txhob noj. Yam uas muab lub plab tshiav av thiab tej uas muaj plaub txhais tes taw nkag thiab tej uas muaj ntau txhais tes taw, txhua yam tsiaj me me uas nkag hauv pem teb ntawd nej caiv tsis txhob noj vim yog tej uas qias vuab tsuab. Nej tsis txhob cia tej tsiaj me me uas nkag no puas tsuas nej ua rau nej qias tsis huv. Tsis txhob cia tej tsiaj ntawd ua rau nej qias tsis huv tsam ces nej tsis huv lawm. Kuv yog Yawmsaub uas yog nej tus Vajtswv, nej yuav tsum tu nej kom dawb huv rau kuv thiab ua neeg dawb huv, vim kuv yog tus dawb huv. Nej tsis txhob cia tej tsiaj me me uas nkag hauv pem teb ntawd ua rau nej qias tsis huv. Rau qhov kuv yog Yawmsaub uas coj nej tawm hauv Iyi tebchaws los kuv thiaj ua tau nej tus Vajtswv. Vim li no nej yuav tsum dawb huv rau qhov kuv dawb huv. “ ‘No yog tej kevcai uas hais txog tej tsiaj txhu nas noog thiab tej uas ciaj sia mus los hauv nruab deg, thiab txhua yam tsiaj me me uas nkag hauv pem teb, kom thiaj saib tshwm paub tej uas qias tsis huv thiab tej uas huv, thiab paub tej tsiaj ciaj sia uas noj tau thiab tej tsiaj ciaj sia uas caiv tsis noj.’ ” Yawmsaub hais rau Mauxe tias, “Cia li hais rau cov Yixayee tias, ‘Yog tus pojniam twg xeeb menyuam thiab yug tau ib tug tub, mas nws yuav qias tsis huv xya hnub ib yam nkaus li thaum nws ua pojniam thiab. Mas hnub uas yim muab tus metub ntawd ua kevcai txiav tawv noov. Ces leej niam yuav tos peb caug peb hnub ntxiv thiaj ua tau kevcai ntxuav nws lub cev uas los ntshav. Nws tsis txhob kov ib yam dabtsi uas dawb huv thiab tsis txhob mus rau hauv lub chaw pe Vajtswv mus txog thaum puv sijhawm uas nws ua kevcai ntxuav lub cev tso. Yog tus pojniam twg yug tau ntxhais ces nws yuav qias tsis huv ob lub chib so ib yam nkaus li thaum ua pojniam, thiab nws yuav tsum tos rau caum rau hnub ntxiv thiaj ua tau kevcai ntxuav nws lub cev uas los ntshav. “ ‘Thaum puv sijhawm uas ua kevcai ntxuav lawd, txawm yog yug tub yug ntxhais los nws yuav coj ib tug menyuam yaj hnub nyoog ib xyoos mus rau tus pov thawj ntawm qhov rooj tsev ntaub sib ntsib ua kevcai hlawv huvsi xyeem, thiab coj ib tug rhaws nquab nyeg lossis ib tug nquab taug mus ua kevcai xyeem daws txim. Mas tus pov thawj yuav muab xyeem rau ntawm Yawmsaub xubntiag thiab ua kevcai ntxuav nws kev qias kev txhaum mas nws lub cev uas los ntshav thiaj huv. No yog tej kevcai uas hais txog tus pojniam uas yug menyuam, tsis hais yug tub los ntxhais. Yog nws nrhiav tsis taus ib tug menyuam yaj, ces cia nws coj ob tug nquab taug lossis ob tug rhaws nquab nyeg muab ib tug ua kevcai hlawv huvsi xyeem, muab ib tug ua kevcai xyeem daws txim. Tus pov thawj yuav ua kevcai ntxuav nws kev qias kev txhaum mas nws thiaj li huv.’ ” Yawmsaub hais rau Mauxe thiab Aloo tias, “Yog leejtwg lub cev muaj ib qho uas o lossis tawm pob lossis txaij ntawm nws daim tawv nqaij uas txawj ua mob lig mob ruas ntawm daim tawv nqaij, mas coj tus ntawd mus cuag Aloo uas ua pov thawj lossis nws ib tug tub uas ua pov thawj. Tus pov thawj yuav tsum tshuaj saib qhov mob ntawm nws daim tawv nqaij, mas yog cov plaub ntawm qhov mob ntawd dawb thiab saib zoo li qhov mob ntawd twb txeem rau hauv cov nqaij lawm ces kuj yog mob lig mob ruas. Thaum tus pov thawj twb tshuaj saib nws lawd mas yuav tshaj tawm hais tias nws qias tsis huv. Yog qhov mob ntawm daim tawv dawb, thiab saib zoo li qhov mob tsis tau txeem rau hauv cov nqaij thiab cov plaub ntawm qhov mob kuj tsis dawb mas tus pov thawj yuav muab tus mob ntawd cais kaw cia xya hnub. Thaum puv xya hnub lawd tus pov thawj yuav tshuaj saib. Yog raws li nws pom mas qhov mob ntawd nyob li qub tsis huam loj rau ntawm daim tawv, mas tus pov thawj tseem yuav muab nws cais dua xya hnub thiab. Thaum puv xya hnub tus pov thawj yuav rov tshuaj saib dua ib zaug. Yog qhov mob ntawd tuag ntxhai tsis huam loj rau ntawm daim tawv nqaij lawm, mas tus pov thawj yuav tshaj tawm hais tias tus uas mob ntawd huv lawm, nws tus mob tsuas yog tawm pob xwb. Mas tus uas mob ntawd yuav ntxhua nws cev tsoos tsho nws thiaj li huv. Thaum nws twb mus cuag tus pov thawj tshuaj saib thiab tus pov thawj hais tias nws huv lawm, mas yog qhov mob tawm pob ntawd tseem huam loj ntawm nws daim tawv ces nws yuav tsum rov mus cuag tus pov thawj dua. Tus pov thawj yuav tshuaj saib, mas yog qhov mob tawm pob ntawd huam loj rau ntawm daim tawv lawm ces tus pov thawj yuav tshaj tawm hais tias nws qias tsis huv, yog mob lig mob ruas. “Yog leejtwg mob lig mob ruas mas yuav tsum coj tus ntawd mus cuag tus pov thawj. Tus pov thawj yuav tshuaj saib, thiab yog qhov mob ntawd o thiab dawb ntawm daim tawv, ua rau cov plaub ntawd dawb thiab ua kiav txhab tshiab rau ntawm qhov uas o ntawd, mas kuj yog ua mob lig mob ruas uas huam rau hauv daim tawv. Mas tus pov thawj kuj yuav tshaj tawm hais tias nws qias tsis huv. Tsis txog muab nws cais cia vim yog nws yeej qias tsis huv lawm. Yog qhov mob ntawd huam loj rau hauv daim tawv thiab raws li tus pov thawj pom huam thoob plaws ib ce tag nrho taubhau mus txog kotaw, ces tus pov thawj yuav tshuaj saib. Yog qhov mob twb huam thoob ib ce lawm mas nws yuav tshaj tawm hais tias tus ntawd kuj huv ntawm nws tus mob lawm, vim nws daim tawv dawb thoob plaws lawm, nws huv lawm. Tiamsis thaum muaj tej qhov kiav txhab tshiab tshwm los mas kuj yog nws qias tsis huv. Tus pov thawj yuav tshuaj saib tej qhov kiav txhab tshiab mas yuav tshaj tawm hais tias nws qias tsis huv lawm. Tej qhov kiav txhab tshiab kuj qias tsis huv vim yog mob lig mob ruas. Yog tej kiav txhab tshiab ntawd twb zoo du lug dawb dawb lawm, mas nws yuav mus cuag tus pov thawj, ces tus pov thawj yuav tshuaj saib nws. Yog qhov mob ntawd twb ntxeev ua dawb dawb lawm, mas tus pov thawj yuav tshaj tawm hais tias tus uas mob ntawd huv lawm, mas nws kuj huv lawm. “Yog leejtwg mob ib lub rwj ntawm nws daim tawv tiamsis twb zoo lawm, mas yog ntawm qhov mob rwj ntawd ho muaj qhov dawb dawb o o lossis liab dawb tshwm tuaj, mas nws yuav tsum mus cuag tus pov thawj saib. Ces tus pov thawj yuav tshuaj saib es yog nws saib zoo li qhov mob ntawd twb txeem rau hauv cov nqaij thiab cov plaub ntawm qhov mob dawb lawm, mas tus pov thawj yuav tshaj tawm hais tias nws qias tsis huv. Qhov mob ntawd yog mob lig mob ruas uas tshwm hauv lub rwj tuaj. Tiamsis yog tus pov thawj tshuaj saib qhov mob mas cov plaub tsis dawb thiab qhov mob tsis tau txeem rau hauv cov nqaij tsuas yog tuag ntxhai xwb, ces tus pov thawj yuav muab nws cais kaw cia xya hnub. Yog qhov mob ntawd huam loj rau ntawm daim tawv mas tus pov thawj yuav tshaj tawm hais tias nws qias tsis huv, yog mob lig mob ruas. Tiamsis yog qhov mob ntawd nyob li qub tsis huam kuj yog caws pliav rwj xwb ces tus pov thawj yuav tshaj tawm hais tias nws huv. “Yog lub cev ib qho raug hluavtaws kub es txawm muaj qhov liab dawb lossis qhov dawb dawb tshwm tuaj ntawm lub kiav txhab tshiab uas kub ntawd, ces tus pov thawj yuav tshuaj saib. Yog cov plaub hauv qhov mob ntawd dawb thiab saib zoo li qhov mob twb txeem rau hauv cov nqaij lawm mas yog mob lig tshwm ntawm qhov kiav txhab uas kub hnyiab tuaj, mas tus pov thawj yuav tshaj tawm hais tias nws qias tsis huv, yog mob lig mob ruas. “Tiamsis yog tus pov thawj tshuaj saib mas cov plaub hauv qhov mob tsis dawb thiab qhov mob tsis tau txeem rau hauv cov nqaij tsuas yog tuag ntxhai xwb, ces tus pov thawj yuav muab nws cais cia xya hnub. Thaum puv xya hnub lawd tus pov thawj yuav tshuaj saib. Yog qhov mob ntawd huam loj rau ntawm daim tawv mas tus pov thawj yuav tshaj tawm hais tias nws qias tsis huv, yog mob lig mob ruas. Tiamsis yog qhov mob ntawd nyob li qub tsis huam loj rau hauv daim tawv tsuas yog tuag ntxhai xwb, mas yog o vim hluavtaws kub xwb, ces tus pov thawj yuav tshaj tawm hais tias tus ntawd huv lawm, tsuas yog caws pliav uas hluavtaws kub xwb. “Thaum txivneej lossis pojniam twg muaj mob rau ntawm taubhau lossis ntawm pob tsaig, ces tus pov thawj yuav tshuaj saib qhov mob ntawd es yog saib zoo li qhov mob twb txeem rau hauv cov nqaij, thiab ntawm qhov mob cov plaub daj thiab sib sib li lawm, tus pov thawj yuav tshaj tawm hais tias nws qias tsis huv, rau qhov yog mob khaus, yog mob lig mob ruas rau saum taubhau lossis ntawm pob tsaig. Yog tus pov thawj tshuaj saib qhov mob khaus ntawd thiab saib zoo li qhov mob tsis tau txeem rau hauv cov nqaij thiab tsis muaj plaub dub, mas tus pov thawj yuav muab tus uas mob khaus ntawd cais cia xya hnub. “Thaum puv xya hnub lawd tus pov thawj yuav tshuaj saib qhov mob ntawd. Yog tias qhov khaus ntawd tsis huam loj thiab tsis muaj plaub daj thiab saib zoo li qhov mob khaus tsis tau txeem rau hauv cov nqaij, mas tus uas mob ntawd yuav tsum chais plaubhau chais hwj txwv tsuas tseg tsis txhob chais ntawm qhov uas khaus xwb. Mas tus pov thawj yuav muab tus uas mob khaus ntawd cais dua xya hnub. Thaum puv xya hnub tus pov thawj yuav tshuaj saib qhov uas khaus. Yog qhov khaus ntawd tsis huam loj ntawm daim tawv thiab saib zoo li qhov mob tsis tau txeem rau hauv cov nqaij, ces tus pov thawj yuav tshaj tawm hais tias nws huv. Mas tus uas mob ntawd yuav ntxhua nws cev tsoos tsho, nws thiaj li huv. Yog tus pov thawj twb hais tias tus ntawd huv lawm tiamsis qhov mob khaus ntawd tseem huam loj rau ntawm daim tawv, ces tus pov thawj yuav tsum tshuaj saib nws. Yog qhov mob khaus ntawd huam loj rau ntawm daim tawv, ces tsis txog yuav saib cov plaub daj los tsis daj lawm, nws yeej qias tsis huv lawm. Tiamsis yog raws li tus pov thawj pom mas qhov khaus ntawd nyob li qub, thiab muaj plaub dub tuaj ntawm qhov mob ntawd, mas qhov mob khaus ntawd zoo lawm, nws kuj huv lawm. Tus pov thawj yuav tshaj tawm hais tias tus ntawd huv. “Thaum tus txivneej lossis pojniam twg dawb tej teev ntawm daim tawv, tus pov thawj yuav tsum tshuaj saib. Yog tej teev ntawm daim tawv dawb txho xwb mas yog nyuj taug yaim tshwm ntawm daim tawv xwb, nws tseem huv. “Yog tus txivneej twg plaubhau hle ntawm taubhau lawm, nws ua neeg do hau xwb, nws tseem huv. Yog nws plaubhau ntawm hauv pliaj thiab ob sab xub ntsos hle, nws ua neeg do pliaj xwb, nws tseem huv. Yog saum tiaj taubhau do lossis saum hauv pliaj do muaj ib qho mob liab dawb, yog nws muaj mob lig mob ruas tshwm ntawm qhov uas nws do hau lossis do pliaj. Tus pov thawj yuav tshuaj saib nws. Yog qhov mob o ntawm qhov uas do hau lossis do pliaj ntawd liab dawb zoo yam nkaus li tej mob lig ntawm daim tawv, mas tus txivneej ntawd kuj mob lig mob ruas. Nws qias tsis huv lawm, mas tus pov thawj yuav tshaj tawm hais tias nws qias tsis huv. Nws tus mob nyob saum taubhau. “Tus uas mob lig mob ruas yuav tsum hnav tej tsoos tsho ntuag thiab tseg plaubhau ntev thiab nws yuav pos ncauj thiab qw hais tias ‘Qias tsis huv, qias tsis huv.’ Nws yuav qias tsis huv mus tag sijhawm uas nws muaj mob ntawd, nws qias tsis huv. Nws yuav tsum nyob nws ib leeg sab nraum ntug zos. “Thaum tej tsoos tsho tuaj pwm tsis hais ntaub plaub yaj lossis ntaub mag, yog nyob rau hauv cov xov nrog hlaub lossis xov txia uas ntos ntaub mag ntaub plaub yaj, lossis nyob hauv tej tawv tsiaj lossis hauv tej uas muab tawv tsiaj ua, yog tej tsoos tsho ntawd tuaj pwm ntsuab xem xiab lossis tuaj pwm liab tsim tseb, tsis hais nyob hauv cov xov nrog hlaub lossis xov txia, lossis nyob hauv tej tawv tsiaj lossis hauv tej uas muab tawv tsiaj ua, mas tej pwm ntawd kuj yog muaj kab mob, mas yuav coj mus rau tus pov thawj saib. Tus pov thawj yuav saib qhov uas tuaj pwm ntawd thiab muab cais cia xya hnub. Thaum puv xya hnub lawd, nws yuav tshuaj saib qhov uas tuaj pwm ntawd. Yog tej pwm ntawd huam rau hauv tej tsoos tsho, tsis hais hauv cov xov nrog hlaub los xov txia lossis hauv tej tawv tsiaj uas siv ua txhua yam, tej pwm ntawd muaj kab mob phem mas kuj yog qias tsis huv. Mas tus pov thawj yuav muab tej tsoos tsho ntawd hlawv pov tseg, tsis hais qhov mob nyob hauv xov nrog hlaub los xov txia lossis nyob hauv ntaub plaub yaj lossis ntaub mag lossis nyob hauv tej uas muab tawv tsiaj ua, vim tej pwm ntawd muaj kab mob phem, yuav tsum muab hlawv pov tseg. “Yog tus pov thawj tshuaj saib mas tej pwm ntawd tsis huam rau hauv tej tsoos tsho tsis hais cov xov nrog hlaub los xov txia lossis tej uas muab tawv tsiaj ua, mas tus pov thawj yuav kom nws muab lub uas tuaj pwm ntawd ntxhua thiab yuav muab cais cia dua xya hnub. Thaum ntxhua lawd tus pov thawj yuav tshuaj saib lub uas tuaj pwm ntawd. Yog qhov uas tuaj pwm ntawd tseem ntsuab liab li qub, txawm yog tsis huam los kuj qias tsis huv lawm, koj cia li muab hlawv pov tseg, tsis hais qhov uas tuaj pwm ntawd txawm nyob sab nraud sab hauv los xij. “Tiamsis yog tus pov thawj tshuaj saib thaum uas ntxhua lawd mas qhov uas tuaj pwm ntawd ploj zuj zus lawm, ces tus pov thawj yuav muab qhov tuaj pwm ntawd dua pov tseg ntawm cev tsoos tsho lossis tawv tsiaj lossis tej xov nrog hlaub los xov txia. Yog rov pom tias tej tsoos tsho tsis hais tej xov nrog hlaub los xov txia lossis tej uas muab tawv tsiaj ua tuaj pwm dua, mas kuj yog qhov mob huam. Koj yuav tsum muab tej uas tuaj pwm ntawd hlawv pov tseg. Yog tej tsoos tsho lossis cov xov nrog hlaub los xov txia lossis tej uas muab tawv tsiaj ua uas tuaj pwm es koj muab ntxhua ib zaug lawm mas tej pwm ploj lawm, ces rov muab ntxhua dua ib zaug thiab, thiaj li huv lawm.” No yog tej kevcai uas ntsig txog tej tsoos tsho tuaj pwm ua mob phem, tsis hais nyob hauv tej tsoos tsho ntaub plaub yaj lossis ntaub mag lossis nyob hauv cov xov nrog hlaub los xov txia lossis hauv tej uas muab tawv tsiaj ua, kom thiaj paub tshuaj saib yam twg huv yam twg qias tsis huv. Yawmsaub hais rau Mauxe tias, “Ntawm no mus yog txoj kevcai uas ua rau hnub uas ntxuav tus mob lig mob ruas kom huv. Yuav tsum coj nws mus cuag tus pov thawj. Tus pov thawj yuav tsum tawm rau sab nraum ntug zos thiab tshuaj tus mob. Yog tus uas mob lig mob ruas zoo lawm, tus pov thawj yuav hais kom coj ob tug noog ciaj uas huv thiab mentsis ntoo ciab thiab xov liab thiab nplooj zaub txig theem tuaj ua kevcai ntxuav tus mob. Tus pov thawj yuav hais kom tua ib tug noog rau saum lub tais av uas rau cov dej cag. Nws yuav muab tus noog uas tseem ciaj thiab ib daim nplais ntoo ciab thiab ib qais xov liab thiab ib re zaub txig theem raus ua ke rau hauv tus noog uas tua cov ntshav hauv lub tais uas muaj dej cag. Nws yuav muab cov ntshav nchos rau tus uas ua kevcai ntxuav mob lig mob ruas ntawd xya zaus mam li tshaj tawm tias tus ntawd huv lawm ces muab tus noog uas tseem ciaj tso ya mus rau hav nroj. Tus uas ua kevcai ntxuav yuav tsum ntxhua nws tej tsoos tsho thiab chais plaubhau thiab chais tej plaub ib ce huvsi thiab da dej ces nws li huv. Dhau ntawd nws li nkag tau rau hauv lub zos tiamsis nws yuav nyob nraum nws lub tsev ntaub xya hnub tso. Thaum puv xya hnub nws yuav rov chais plaubhau saum nws taubhau huvsi thiab chais hwj txwv chais plaub muag thiab tej plaub ib ce huvsi. Nws yuav ntxhua nws tej tsoos tsho thiab da dej nws li huv. “Mas hnub uas yim nws yuav tsum muab ob tug menyuam txiv yaj uas tsis muaj chaw thuam li thiab ib tug menyuam xyuas yaj hnub nyoog ib xyoos uas tsis muaj chaw thuam li, thiab muab peb feem kaum hauv ib efa hmoov mog zoo zoo ntse roj ua kevcai xyeem qoob loo, thiab ib nrab lib roj. Tus pov thawj yuav coj tus uas ua kevcai ntxuav thiab tej qhov txhia chaw no tuaj rau ntawm lub qhov rooj tsev ntaub sib ntsib muab tso rau ntawm Yawmsaub xubntiag. Tus pov thawj yuav coj ib tug menyuam txiv yaj thiab ib nrab lib roj tuaj ua kevcai ntxuav kev txaug kev txhaum thiab muab cev xyeem rau ntawm Yawmsaub xubntiag. Nws yuav tua tus menyuam yaj ntawd rau ntawm qhov chaw dawb huv uas lawv tua tej tsiaj uas xyeem ua kevcai daws txim thiab ua kevcai hlawv xyeem. Rau qhov tus tsiaj uas tua xyeem ua kevcai ntxuav kev txaug kev txhaum kuj zoo ib yam li tus tsiaj uas tua ua kevcai daws txim, yog tus pov thawj li feem thiab yog yam uas dawb huv kawg nkaus. Tus pov thawj yuav muab tus tsiaj uas xyeem ua kevcai ntxuav kev txaug kev txhaum ntawd li ntshav ib qho los, muab pleev tus uas ua kevcai ntxuav sab taub ntsej xis thiab pleev nws tus taub teg xis thiab tus taub taw xis. Tus pov thawj yuav muab ib nrab lib roj ntawd ib qho los hliv rau hauv nws lub xib teg sab laug thiab muab nws tus ntiv tes xis raus cov roj hauv nws lub xib teg laug los nchos rau ntawm Yawmsaub xubntiag xya zaus. Cov roj uas tseem tshuav hauv xib teg ntawd tus pov thawj yuav muab ib txhia los pleev tus uas ua kevcai ntxuav sab taub ntsej xis thiab pleev tus taub teg xis thiab tus taub taw xis pleev tsuam cov ntshav uas pleev ua kevcai ntxuav kev txaug kev txhaum. Cov roj uas tseem tshuav hauv tus pov thawj xib teg nws yuav muab pleev tus uas ua kevcai ntxuav taubhau. Tus pov thawj thiaj ua kevcai ntxuav kev txhaum txim rau tus ntawd rau ntawm Yawmsaub xubntiag. Tus pov thawj yuav muab tus tsiaj uas ua kevcai daws txim tua xyeem, kom thiaj ntxuav tau tus uas ua kevcai ntxuav ntawd tej kev txhaum txim. Dhau ntawd tus pov thawj yuav tua tus tsiaj uas ua kevcai hlawv xyeem. Tus pov thawj yuav muab tus tsiaj uas ua kevcai hlawv xyeem thiab tej hmoov uas ua kevcai xyeem qoob loo xyeem rau saum lub thaj. Tus pov thawj ua kevcai ntxuav tus ntawd tej kev txhaum li no tag, mas tus ntawd thiaj huv lawm. “Yog tus ntawd pluag nrhiav tsis tau npaum li ntawd, mas nws yuav coj ib tug menyuam txiv yaj ua kevcai ntxuav kev txaug kev txhaum tuaj cev xyeem thiaj ua tau kevcai ntxuav nws kev txhaum txim, thiab yuav coj ib feem kaum hauv ib efa hmoov mog zoo zoo ntse roj ua kevcai xyeem qoob loo thiab ib nrab lib roj, thiab ob tug nquab taug lossis ob tug rhaws nquab nyeg raws li uas nws nrhiav tau, muab ib tug ua kevcai daws txim, muab ib tug ua kevcai hlawv xyeem. Hnub uas yim nws yuav tsum coj tuaj rau tus pov thawj ua kevcai ntxuav nws ntawm lub qhov rooj tsev ntaub sib ntsib rau ntawm Yawmsaub xubntiag. Tus pov thawj yuav coj tus menyuam yaj uas xyeem ua kevcai ntxuav kev txaug kev txhaum thiab ib nrab lib roj los muab cev rau ntawm Yawmsaub xubntiag ua kevcai cev xyeem. Nws yuav tua tus menyuam yaj uas ua kevcai ntxuav kev txaug kev txhaum. Thiab tus pov thawj yuav muab tus tsiaj uas xyeem ua kevcai ntxuav kev txaug kev txhaum ntawd li ntshav ib qho los, muab pleev tus uas ua kevcai ntxuav ntawd sab taub ntsej xis thiab pleev nws tus taub teg xis thiab tus taub taw xis. Tus pov thawj yuav muab ib nrab roj ntawd ib qho los hliv rau hauv nws lub xib teg sab laug thiab xuas nws tus ntiv tes xis muab cov roj hauv nws lub xib teg laug ib qho nchos rau ntawm Yawmsaub xubntiag xya zaus. Cov roj uas nyob hauv xib teg tus pov thawj yuav muab ib txhia los pleev tus uas ua kevcai ntxuav sab taub ntsej xis thiab pleev tus taub teg xis thiab tus taub taw xis tsuam cov ntshav uas pleev ua kevcai ntxuav kev txaug kev txhaum. Cov roj uas tseem tshuav hauv tus pov thawj xib teg nws yuav muab pleev tus uas ua kevcai ntxuav taubhau, thiaj ua kevcai ntxuav kev txhaum kev qias rau tus ntawd rau ntawm Yawmsaub xubntiag. Mas nws yuav xyeem nquab taug lossis rhaws nquab nyeg raws li nws nrhiav tau, muab ib tug xyeem ua kevcai daws txim thiab ib tug ua kevcai hlawv xyeem nrog cov hmoov uas ua kevcai xyeem qoob loo. Mas tus pov thawj yuav ua kevcai ntxuav kev txhaum kev qias rau tus ntawd rau ntawm Yawmsaub xubntiag.” No yog txoj kevcai rau tus mob lig mob ruas uas nrhiav tsis taus qhov txhia chaw ua kevcai ntxuav nws kom huv. Yawmsaub hais rau Mauxe thiab Aloo tias, “Thaum nej mus rau hauv lub tebchaws Khana‑as uas kuv pub ua nej tug ntawd es kuv tso pwm rau hauv nej tej tsev hauv lub tebchaws uas yog nej teej nej tug ntawd, mas tus tswv tsev yuav tsum mus hais rau tus pov thawj tias, ‘Kuv pom ib yam kab mob pwm tshwm rau hauv kuv lub tsev.’ Mas ua ntej uas tus pov thawj yuav mus tshuaj saib tej kab mob pwm ntawd, nws yuav tsum hais kom muab tej qhov txhia chaw hauv tsev rho tawm huvsi, ntshai tsam ces txhua yam hauv tsev yuav raug tshaj tawm hais tias qias tsis huv. Ces tus pov thawj mam li nkag mus tshuaj saib hauv tsev, mas nws yuav tshuaj saib tej pwm ntawd. Yog tej pwm ntawd nyob ntawm tej phab ntsa txaij ua tej thaj ntsuab xem xiab lossis liab tsim tseb, thiab saib mas zoo li tej pwm txeem rau hauv phab ntsa lawm, ces tus pov thawj yuav tsum tawm rau ntawm qhov rooj muab lub tsev ntawd kaw xya hnub. Thaum puv xya hnub tus pov thawj yuav rov tuaj tshuaj saib. Yog tej pwm ntawd huam dav rau tej phab ntsa mas tus pov thawj yuav hais kom muab tej lub pob zeb uas muaj kab mob pwm ntawd rho coj mus pov tseg rau ntawm qhov chaw qias tsis huv nraum ntug moos, thiab hais kom txhuam lub tsev tej phab ntsa sab hauv thoob plaws. Tej hmoov zeb sib uas txhuam tau ntawd yuav muab nchuav pov tseg rau ntawm qhov chaw qias tsis huv nraum ntug moos. Ces yuav muab dua pob zeb los ntxiv rau tej lub pob zeb uas muab rho lawm, thiab muab dua hmoov zeb sib los luam lub tsev ntawd huvsi. “Thaum lawv twb muab tej lub pob zeb rho thiab txhuam tej phab ntsa tag thiab luam dua hmoov zeb sib tshiab lawm, mas yog tseem rov qab muaj pwm tshwm tuaj hauv lub tsev ntawd ces tus pov thawj yuav mus tshuaj saib. Yog tej pwm huam mus rau hauv lub tsev, mas tej pwm ntawd muaj kab mob pwm phem rau lub tsev, lub tsev ntawd qias tsis huv. Mas nws yuav kom muab lub tsev ntawd rhuav, thiab muab tej pob zeb tej ntoo tej hmoov zeb sib huvsi uas ua lub tsev ntawd thauj mus pov tseg rau ntawm qhov chaw qias tsis huv nraum ntug moos. Thiab yog leejtwg nkag mus rau hauv lub tsev uas muab kaw lawm mas tus ntawd yuav qias tsis huv mus txog tsaus ntuj. Leejtwg mus pw lossis mus noj mov rau hauv lub tsev ntawd mas tus ntawd yuav tsum ntxhua nws cev tsoos tsho. “Thaum muab hmoov zeb sib los luam tshiab lawd, yog tus pov thawj rov tuaj saib mas pom tias tej pwm tsis huam rau hauv tsev, ces tus pov thawj yuav tshaj tawm hais tias lub tsev ntawd huv lawm rau qhov tej pwm ntawd zoo ploj tag lawm. Qhov uas ua kevcai ntxuav lub tsev ntawd mas tus tswv tsev yuav tsum coj ob tug noog me thiab ib daim nplais ntoo ciab thiab ib qais xov liab thiab ib re zaub txig theem tuaj. Nws yuav muab ib tug noog tua rau saum lub tais av uas rau cov dej cag, thiab yuav muab nplais ntoo ciab thiab rev nplooj zaub txig theem thiab khawb xov liab thiab tus noog uas tseem ciaj raus ua ke rau hauv tus noog uas tua lawm cov ntshav thiab hauv cov dej cag ntawd coj los nchos rau lub tsev xya zaus. Nws yuav muab cov ntshav noog thiab dej cag thiab tus noog uas tseem ciaj thiab nplais ntoo ciab thiab rev nplooj zaub txig theem thiab khawb xov liab ua kevcai ntxuav lub tsev ntawd. Nws yuav muab tus noog uas tseem ciaj tso tawm hauv moos mus rau tom hav nroj. Ua li no nws thiaj ua tau kevcai ntxuav kev qias hauv lub tsev mas lub tsev ntawd thiaj li huv.” No yog tej kevcai ntsig txog txhua yam mob lig mob ruas, yog tej mob khaus, tej pwm uas muaj kab mob nyob hauv tej tsoos tsho, lossis nyob hauv tej tsev, tej mob o, mob tawm pob, tej mob txaij, kom thiaj paub hais tias thaum twg qias tsis huv thiab thaum twg huv lawm. No yog tej kevcai uas ntsig txog mob lig mob ruas thiab tuaj pwm. Yawmsaub hais rau Mauxe thiab Aloo tias, “Cia li hais rau cov Yixayee tias, ‘Thaum tus txivneej twg muaj tej yam kua ntws tawm hauv nws lub cev los, tej uas ntws tawm los ntawd kuj qias tsis huv. No yog hais txog qhov uas nws qias tsis huv rau thaum nws lub cev muaj kua ntws los. Txawm yog nws lub cev muaj kua ntws los lossis tej kua ntawd khuab rau hauv nws lub cev lawm los xij, tej no puavleej yog qias tsis huv rau nws. Txhua lub txaj pw uas tus muaj tej kua ntws los ntawd pw rau lawd mas kuj qias tsis huv. Txhua qhov chaw uas nws zaum lawd kuj qias tsis huv. Leejtwg kov raug nws lub txaj pw mas yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Leejtwg zaum raug lub chaw uas tus muaj tej kua ntws los zaum ua ntej lawm mas tus ntawd yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Leejtwg kov raug tus uas muaj tej kua ntws los lub cev mas nws yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Thiab yog tus uas muaj tej kua ntws los nto qaub ncaug lo tus uas tseem huv mas tus uas raug qaub ncaug lo ntawd yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Lub eeb twg uas tus muaj tej kua ntws los ntawd zaum mas kuj qias tsis huv. Leejtwg kov raug ib yam uas tus ntawd zaum lawd mas nws kuj yuav qias tsis huv txog tsaus ntuj. Thiab leejtwg nqa tej yam ntawd mas nws yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Tus uas muaj tej kua ntws los ntawd txhais tes uas tsis tau ntxuav kov raug leejtwg mas tus ntawd yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Tej tais av uas tus uas muaj tej kua ntws los ntawd kov raug lawd mas yuav muab tsoo pov tseg. Txhua yam twj taig uas yog ntoo kuj yuav muab dej ntxuav huvsi. “ ‘Thaum tus uas muaj tej kua ntws los qhov mob zoo tsis ntws lawm, nws yuav suav kom puv xya hnub li ua kevcai ntxuav. Nws yuav tsum ntxhua nws cev tsoos tsho thiab da dej cag nws thiaj li huv. Hnub uas yim nws yuav tsum coj ob tug nquab taug lossis ob tug rhaws nquab nyeg tuaj rau ntawm Yawmsaub xubntiag ntawm lub qhov rooj tsev ntaub sib ntsib, es muab rau tus pov thawj. Tus pov thawj yuav muab xyeem, muab ib tug ua kevcai xyeem daws txim, muab ib tug ua kevcai hlawv huvsi xyeem, thiab tus pov thawj yuav ua kevcai ntxuav tus ntawd kev qias rau ntawm Yawmsaub xubntiag vim nws muaj tej kua ntws los. “ ‘Yog tus txivneej twg cov kua chaw xis ntws los mas nws yuav tsum ntxuav ib ce huvsi thiab nws yuav qias tsis huv txog tsaus ntuj. Txhua daim tsoos tsho thiab txhua yam tawv tsiaj uas kua chaw xis ntws los lo mas yuav tsum muab ntxuav hauv dej, thiab tej ntawd yuav qias tsis huv txog tsaus ntuj. Yog txivneej nrog pojniam pw es kua chaw xis los mas ob leeg yuav tsum da dej thiab yuav qias tsis huv txog tsaus ntuj. “ ‘Thaum tus pojniam twg coj khaub ncaws uas yog ua pojniam txhua lub hli, nws yuav qias tsis huv xya hnub. Leejtwg kov raug nws tus ntawd kuj qias tsis huv txog tsaus ntuj. Thaum tus pojniam ntawd tseem qias tsis huv, yog nws pw lossis zaum ib yam dabtsi, tej ntawd kuj qias tsis huv. Leejtwg kov raug nws lub txaj pw mas yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Leejtwg kov raug ib yam uas nws zaum lawd mas tus ntawd yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. Txawm yog txaj pw lossis ib yam dabtsi uas tus pojniam ntawd zaum kuj xij, thaum leejtwg kov raug lawm mas tus ntawd yuav qias tsis huv txog tsaus ntuj. Yog tus txivneej twg nrog tus pojniam ntawd pw thiab nws qhov qias tsis huv yuav tsuas tus txivneej ntawd ces tus txivneej ntawd yuav qias tsis huv xya hnub, thiab txhua lub txaj uas nws mus pw yuav qias tsis huv. “ ‘Yog tus pojniam twg nchuav cev ntau ntau hnub uas tsis yog lub sijhawm uas nws ua pojniam txhua lub hli, lossis yog nws pheej nchuav cev dhau lub sijhawm uas nws ua pojniam, ces txhua hnub uas nws nchuav cev ntawd nws kuj qias tsis huv ib yam nkaus li lub sijhawm uas nws ua pojniam es qias tsis huv thiab. Thaum nws nchuav cev li ntawd mas txhua lub txaj uas nws pw thiab txhua qhov uas nws zaum kuj yuav qias tsis huv ib yam nkaus li thaum nws ua pojniam es tej ntawd qias tsis huv. Yog leejtwg kov raug tej yam no mas nws yuav qias tsis huv ces nws yuav tsum ntxhua nws cev tsoos tsho thiab da dej thiab nws yuav qias tsis huv txog tsaus ntuj. “ ‘Tiamsis yog qhov uas nws nchuav cev ntawd zoo lawm nws yuav suav kom puv xya hnub nws thiaj li huv. Hnub uas yim nws yuav tsum coj ob tug nquab taug lossis ob tug rhaws nquab nyeg tuaj rau tus pov thawj ntawm lub qhov rooj tsev ntaub sib ntsib. Tus pov thawj yuav muab xyeem, muab ib tug ua kevcai xyeem daws txim, muab ib tug ua kevcai hlawv huvsi xyeem, thiab tus pov thawj yuav ua kevcai ntxuav nws kev qias rau ntawm Yawmsaub xubntiag vim qhov uas nws nchuav cev qias tsis huv lawm. “ ‘Ua li no mas neb thiaj li cais tau cov Yixayee tawm ntawm tej uas ua rau lawv qias tsis huv, xwv lawv thiaj tsis tuag rau lawv tej kev qias rau thaum uas lawv ua qias puas tsuas kuv lub tsev ntaub uas nyob hauv lawv nruab nrab.’ ” No yog tej kevcai uas ntsig txog tej txivneej uas muaj kua ntws los thiab tej uas muaj kua chaw xis ntws los uas ua rau nws qias tsis huv, thiab ntsig txog tej pojniam uas ua mob pojniam. Tej no puavleej ntsig txog cov pojniam txivneej uas muaj kua ntws los thiab ntsig txog tus txivneej uas nrog tus pojniam uas qias tsis huv pw. Yawmsaub hais rau Mauxe tom qab uas Aloo ob tug tub txav los ze Yawmsaub es tuag lawm. Yawmsaub hais rau Mauxe tias, “Koj hais kom koj tus tijlaug Aloo tsis txhob nkag mus rau hauv lub chav uas dawb huv kawg nkaus uas muaj daim ntaub thaiv txhua lub sijhawm, yog mus rau ntawm lub hau phij xab uas roos kev txhaum tsam ces nws tuag, rau qhov kuv nyob hauv tauv huab tshwm rau saum lub hau phij xab ntawd. “Tiamsis Aloo yuav nkag tau rau hauv chav uas dawb huv kawg nkaus raws li no. Nws yuav muab ib tug thav txiv nyuj ua kevcai daws txim thiab muab ib tug txiv yaj ua kevcai hlawv xyeem. Nws yuav hnav lub tsho ntaub mag uas dawb huv thiab hnav ris ntaub mag, thiab sia siv ntaub mag thiab ntoo phuam ntaub mag. No yog tej tsoos meej mom dawb huv. Nws yuav tsum da dej li hnav. Thiab nws yuav muab ob tug txiv tshis ntawm ib tsoom Yixayee ua kevcai daws txim thiab muab ib tug txiv yaj ua kevcai hlawv xyeem. “Thiab Aloo yuav muab tus thav txiv nyuj xyeem ua kevcai daws nws tus kheej li txim thiab ntxuav nws thiab nws tsev neeg li kev txhaum txim. Mas nws yuav coj ob tug txiv tshis los tso rau ntawm lub qhov rooj tsev ntaub sib ntsib rau ntawm Yawmsaub xubntiag. Aloo yuav muab ob tug tshis ntawd rho ntawv, ib tug rho rau Yawmsaub ib tug rho rau Axaxee. Tus tshis uas rho tau rau Yawmsaub ntawd Aloo yuav coj los muab xyeem ua kevcai daws txim. Tiamsis tus tshis uas rho tau ntawv rau Axaxee ntawd yuav muab xyeem ciaj rau ntawm Yawmsaub xubntiag ua kevcai ntxuav kev txhaum, kom thiaj muab kev txhaum sau rau tus tshis ntawd xa mus rau tebchaws moj sab qhua pub rau Axaxee. “Aloo yuav coj tus thav txiv nyuj tuaj ua kevcai xyeem daws nws thiab nws tsev neeg li txim. Nws yuav muab tus txiv nyuj tua daws nws li txim. Nws yuav muab lub yias rau ncaig taws cig cig ntawm lub thaj uas nyob ntawm Yawmsaub xubntiag thiab ob taus tes hmoov tshuaj tsw qab uas tuav mos mos lawm los, coj mus rau chav sab hauv daim ntaub uas thaiv. Nws yuav muab cov hmoov tshuaj tsw qab ntawd hlawv rau ntawm Yawmsaub xubntiag mas cov pa tshuaj tsw qab yuav ncho auv lub hau uas roos kev txhaum uas nyob saum lub phij xab uas ntim Yawmsaub tej lus xwv nws thiaj tsis tuag. Nws yuav muab cov ntshav txiv nyuj ib qho los thiab xuas nws ntiv tes nchos rau ntawm lub hau phij xab uas roos kev txhaum sab xubntiag, thiab yuav xuas ntiv tes muab nchos rau lub hau phij xab sab tom hauv ntej xya zaus. “Thiab Aloo yuav tua tus tshis uas xyeem ua kevcai daws cov pejxeem li txim thiab yuav coj cov ntshav mus rau chav sab hauv daim ntaub uas thaiv, thiab muab cov ntshav tshis ua ib yam nkaus li cov ntshav txiv nyuj, yog muab nchos rau saum lub hau phij xab uas roos kev txhaum thiab muab nchos rau lub hau phij xab sab tom hauv ntej. Ua li no nws thiaj ua kevcai ntxuav tau tej kev qias tsis huv ntawm chav uas dawb huv kawg nkaus vim cov Yixayee tej kev qias tsis huv, thiab lawv tej kev fav xeeb thiab lawv tej kev txhaum huvsi. Nws yuav ua li no rau lub tsev ntaub sib ntsib uas nyob hauv nruab nrab cov neeg uas qias tsis huv. Tsis txhob kheev leejtwg nyob hauv lub tsev ntaub sib ntsib rau thaum Aloo nkag mus rau hauv chav uas dawb huv kawg nkaus es ua kevcai ntxuav tej kev qias tsis huv mus txog thaum nws ua kevcai ntxuav nws thiab nws tsev neeg thiab ib tsoom Yixayee sawvdaws li txim tag. Mas nws li tawm mus rau ntawm lub thaj uas nyob ntawm Yawmsaub xubntiag thiab ua kevcai ntxuav tej kev qias tsis huv rau lub thaj. Nws yuav muab ntshav txiv nyuj thiab ntshav tshis ib qho los pleev plaub tug kub uas nyob puag ncig ntawm lub thaj. Thiab nws yuav xuas ntiv tes nchos cov ntshav ib txhia rau lub thaj xya zaus, thiaj ua kevcai ntxuav tau lub thaj tu kom dawb huv ntawm cov Yixayee tej kev qias tsis huv. “Thaum nws ua kevcai ntxuav tej kev qias tsis huv rau chav uas dawb huv kawg nkaus thiab rau lub tsev ntaub sib ntsib thiab rau lub thaj tag lawm, nws yuav xyeem tus tshis uas tseem ciaj. Aloo yuav muab nws ob txhais tes tso rau saum tus tshis uas tseem ciaj lub taubhau, thiab yuav lees cov Yixayee sawvdaws tej kev phem kev qias thiab lawv tej kev fav xeeb huvsi thiab lawv tej kev txhaum huvsi, mas nws yuav muab tej ntawd huvsi tso rau saum tus tshis ntawd taubhau mas nws yuav kom tus uas npaj cia lawm xa tus tshis mus rau tom tebchaws moj sab qhua. Tus tshis yuav ris tej kev phem kev qias huvsi mus rau lub tebchaws uas tsis muaj neeg nyob. Ces tus uas xa yuav muab tus tshis tso rau hauv tebchaws moj sab qhua. “Ces Aloo li nkag rau hauv lub tsev ntaub sib ntsib thiab yuav hle tej tsoos ntaub mag uas nws hnav rau thaum uas mus rau chav uas dawb huv kawg nkaus, mas muab cia rau qhov ntawd. Thiab nws yuav da dej hauv ib lub chaw uas dawb huv thiab hnav nws cev tsoos tsho li tawm los. Nws yuav xyeem tej uas nws muab ua kevcai hlawv xyeem thiab tej uas cov pejxeem muab ua kevcai hlawv xyeem thiaj ua kevcai ntxuav nws tus kheej thiab cov pejxeem tej kev txhaum txim. Nws yuav muab tus tsiaj uas tua ua kevcai daws txim tej roj hlawv rau saum lub thaj. Tus uas xa tus tshis mus rau Axaxee ntawd yuav tsum ntxhua nws cev ris tsho thiab da dej, mas nws li los tau rau hauv lub zos. Yuav coj tus txiv nyuj thiab tus tshis uas xyeem ua kevcai daws txim uas Aloo coj cov ntshav los ua kevcai ntxuav kev qias tsis huv rau chav uas dawb huv kawg nkaus ntawd mus rau sab nraum ntug zos. Mas luag yuav muab tej tawv thiab tej nqaij thiab tej plab hnyuv hlawv kub hnyiab tag. Tus uas muab tej ntawd hlawv yuav ntxhua nws cev ris tsho thiab da dej nws li los tau rau hauv lub zos. “No yuav ua kevcai rau nej coj mus ib txhis li, hnub xiab kaum lub xya hli nej yuav tswj nej lub siab thiab tsis txhob ua ib yam haujlwm dabtsi, tsis hais nej cov uas yug hauv lub tebchaws thiab lwm haiv neeg uas nrog nej nyob. Rau qhov hnub no yog hnub uas ua kevcai ntxuav nej tej kev txhaum txim thiab ntxuav nej. Nej thiaj hauv ntawm nej tej kev txhaum huvsi rau ntawm Yawmsaub xubntiag. Hnub no yog ib hnub Xanpatau uas nej yuav tsum caiv so tiag tiag li. Nej yuav tsum tswj nej lub siab. No yog txoj kevcai uas nyob mus ib txhis. Tus pov thawj uas raug muab roj hliv ywg tsa ua dawb huv sawv nws txiv chaw ua pov thawj hlob nws yog tus uas yuav ua txoj kevcai ntxuav no thiab hnav tsoos tsho ntaub mag dawb huv. Nws yuav ua kevcai ntxuav kev qias tsis huv rau chav uas dawb huv kawg nkaus thiab yuav ua kevcai ntxuav rau lub tsev ntaub sib ntsib thiab lub thaj thiab yuav ua kevcai ntxuav cov pov thawj thiab ib tsoom pejxeem sawvdaws tej kev txhaum txim. “No yuav ua kevcai rau nej coj mus ib txhis kom ua kevcai ntxuav cov Yixayee ib xyoos ib zaug vim tim lawv tej kev txhaum huvsi.” Mauxe kuj ua raws li Yawmsaub hais rau nws. Yawmsaub hais rau Mauxe tias, “Cia li hais rau Aloo thiab nws cov tub thiab cov Yixayee sawvdaws tias, ‘Ntawm no yog tej uas Yawmsaub hais kom nej ua. Yog cov Yixayee leejtwg tua nyuj tua menyuam yaj tua tshis rau hauv lub zos lossis tua sab nraum ntug zos, tsis coj tuaj rau ntawm lub qhov rooj tsev ntaub sib ntsib es muab xyeem rau Yawmsaub ntawm Yawmsaub lub tsev ntaub, mas tus ntawd muaj txim vim nws ua ntshav los. Nws ua ntshav los mas yuav tsum muab nws txiav tawm hauv nws haiv neeg mus. Ua li no kom cov Yixayee thiaj li coj tej tsiaj uas lawv muab tua xyeem tom tej teb tuaj tua xyeem rau Yawmsaub es muab rau tus pov thawj ntawm lub qhov rooj tsev ntaub sib ntsib thiab muab tua xyeem rau Yawmsaub ua kevcai sib raug zoo. Mas tus pov thawj yuav muab cov ntshav ntawd nchos rau saum Yawmsaub lub thaj ntawm lub qhov rooj tsev ntaub sib ntsib thiab muab cov roj hlawv tsw qab kom hum Yawmsaub lub siab. Mas lawv thiaj tsis tua tsiaj xyeem rau tej dab tshis uas lawv deev ntawd. Qhov no yuav ua kevcai rau lawv txhua tiam mus ib txhis.’ “Thiab koj hais rau lawv tias, ‘Cov Yixayee lossis lwm haiv neeg uas nrog lawv nyob leejtwg muab tsiaj xyeem ua kevcai hlawv xyeem lossis muab tua xyeem, es nws tsis coj tus tsiaj ntawd tuaj rau ntawm lub qhov rooj tsev ntaub sib ntsib mam li xyeem rau Yawmsaub, mas muab nws txiav tawm hauv nws haiv neeg mus. “ ‘Cov Yixayee lossis lwm haiv neeg uas nrog lawv nyob leejtwg noj ntshav, kuv yuav tsom ntsoov tawm tsam tus uas noj ntshav ntawd thiab muab nws txiav tawm hauv nws haiv neeg mus. Rau qhov txhua yam uas ciaj sia txojsia yog nyob hauv cov ntshav. Kuv pub cov ntshav rau nej siv saum lub thaj ua kevcai ntxuav nej tus kheej kev txhaum, rau qhov cov ntshav yog yam uas ntxuav tau kev txhaum vim ntshav yog txojsia. Yog li no kuv thiaj hais rau cov Yixayee tias, “Tsis kheev nej cov leejtwg noj ntshav kiag li, thiab tsis kheev lwm haiv neeg uas nrog nej nyob leejtwg noj ntshav.” Cov Yixayee lossis lwm haiv neeg uas nrog lawv nyob leejtwg mus tua tsiaj qus lossis nas noog uas noj tau mas yuav tsum muab cov ntshav nchuav pov tseg thiab muab hmoov av faus. “ ‘Rau qhov txhua tus tsiaj txojsia puavleej yog nws cov ntshav. Vim li no kuv thiaj hais rau cov Yixayee tias, “Nej tsis txhob noj yam tsiaj twg tej ntshav kiag li, rau qhov txhua tus tsiaj txojsia yog nyob hauv cov ntshav. Leejtwg noj yuav raug muab txiav tawm mus.” Txhua tus uas yug hauv lub tebchaws lossis lwm haiv neeg uas noj tej tsiaj tuag lossis tej tsiaj uas lwm tus tsiaj tom tuag, mas nws yuav tsum ntxhua nws cev ris tsho thiab da dej thiab yuav qias tsis huv mus txog tsaus ntuj mam li huv. Yog nws tsis ntxhua nws cev ris tsho thiab da dej, mas nws yuav ris nws lub txim.’ ” Yawmsaub hais rau Mauxe tias, “Cia li hais rau cov Yixayee tias, ‘Kuv yog Yawmsaub uas yog nej tus Vajtswv. Nej tsis txhob ua raws li uas luag ua hauv Iyi tebchaws uas nej txeev nyob. Thiab nej tsis txhob ua raws li uas luag ua hauv Khana‑as tebchaws uas kuv tabtom coj nej mus nyob. Tsis txhob xyaum raws li lawv tej kab ke. Nej yuav tsum ua raws li kuv tej kevcai thiab tuav rawv kuv tej kab ke thiab ua raws nraim. Kuv yog Yawmsaub, yog nej tus Vajtswv. Vim li no nej yuav tsum tuav rawv kuv tej kab ke thiab kuv tej kevcai, yog ua raws nraim li ntawd neeg thiaj li muaj txojsia nyob tau. Kuv yog Yawmsaub. “ ‘Tsis txhob kheev leejtwg mus ze tej uas txheeb txheeb nws es thws nws qhov chaw txaj muag. Kuv yog Yawmsaub. Koj tsis txhob thws koj niam qhov chaw txaj muag vim yog thws koj txiv chaw txaj muag. Nws yog koj niam, koj tsis txhob thws nws qhov chaw txaj muag. Koj tsis txhob thws koj txiv tus pojniam qhov chaw txaj muag vim yog thws koj txiv chaw txaj muag. Koj tsis txhob thws koj tus muam qhov chaw txaj muag uas yog koj txiv li ntxhais lossis yog koj niam li ntxhais tsis hais tus uas yug hauv tsev lossis coj sab nraud los. Koj tsis txhob thws koj tus tub li ntxhais qhov chaw txaj muag lossis thws koj tus ntxhais li ntxhais qhov chaw txaj muag, vim lawv qhov chaw txaj muag kuj yog koj chaw txaj muag ntag. Koj tsis txhob thws koj niam tshiab li ntxhais qhov chaw txaj muag uas twb yog koj txiv yug, vim nws kuj yog koj li muam. Koj tsis txhob thws koj tug phauj qhov chaw txaj muag vim nws twb yog txheeb ze koj txiv. Koj tsis txhob thws koj niam tus niam hluas lossis tus niam laus qhov chaw txaj muag vim nws twb yog txheeb ze koj niam. “ ‘Koj tsis txhob thws koj tus txiv hlob lossis koj tus txiv ntxawm qhov chaw txaj muag es mus ze lawv pojniam vim twb yog koj niam hlob lossis koj li niam ntxawm. Koj tsis txhob thws koj tus nyab qhov chaw txaj muag vim nws twb yog koj tus tub pojniam, tsis txhob thws nws qhov chaw txaj muag kiag li. Koj tsis txhob thws koj tus niam tij lossis koj tus niam ntxawm qhov chaw txaj muag vim twb yog koj kw koj tig qhov chaw txaj muag. Koj tsis txhob thws ib tug pojniam qhov chaw txaj muag thiab thws nws tus ntxhais qhov chaw txaj muag, thiab tsis txhob thws nws tus tub li ntxhais qhov chaw txaj muag lossis thws nws tus ntxhais li ntxhais qhov chaw txaj muag vim lawv yog ib co txheeb ze, yog ua li ntawd mas phem kawg li. Koj tsis txhob thws koj pojniam tus niam laus lossis tus niam hluas qhov chaw txaj muag coj los sib tw rau thaum koj pojniam tseem muaj txojsia nyob. “ ‘Thaum tus pojniam twg tabtom ua pojniam uas nws qias tsis huv mas koj tsis txhob mus ze nws thws nws qhov chaw txaj muag. Koj tsis txhob mus nrog kwvtij zej zog tej pojniam pw, thiaj ua rau koj qias tsis huv. Koj tsis txhob muab koj tej menyuam hlawv xyeem rau dab Maulej es ua puas tsuas koj tus Vajtswv lub npe poob koob. Kuv yog Yawmsaub. Koj tsis txhob nrog tej txivneej pw ua niam txiv yam li tej pojniam, yog yam uas qias vuab tsuab kawg li. Koj tsis txhob nrog tej tsiaj txhu pw ua niam txiv ua rau koj qias tsis huv, thiab tej pojniam tsis txhob nrog tsiaj txhu pw ua niam txiv. Ua li no yog kev txhaum kev qias kawg li. “ ‘Nej tsis txhob ua tej kev phem kev qias no puas tsuas nej qias tsis huv, vim yog tej haiv neeg uas kuv tabtom ntiab khiav ntawm nej hauv ntej mus ua tej kev phem kev qias no puas tsuas lawv qias tsis huv. Mas lub tebchaws thiaj li qias tsis huv, kuv thiaj li rau txim rau lub tebchaws ntawd tej kev txhaum, lub tebchaws thiaj li muab cov neeg ntuav pov tseg. Mas nej yuav tsum tuav rawv kuv tej kab ke thiab kuv tej kevcai thiab tsis txhob ua tej kev qias vuab tsuab ntawd, tsis hais nej haiv neeg lossis lwm haiv neeg uas nrog nej nyob, rau qhov cov neeg hauv lub tebchaws no uas xub nyob ua nej ntej ua tej kev qias vuab tsuab no mas puas tsuas lub tebchaws qias tsis huv. Ntshai tsam nej ua puas tsuas lub tebchaws qias tsis huv es lub tebchaws yuav muab nej ntuav pov tseg ib yam li lub tebchaws twb muab haiv neeg uas xub nyob ua nej ntej ntuav pov tseg. Yog leejtwg ua tej kev qias vuab tsuab ntawd mas tus ntawd yuav raug muab txiav tawm hauv nws haiv neeg mus. Vim li no nej yuav tsum ua raws nraim li kuv hais, tsis txhob ua raws li tej kev li kev cai uas qias vuab tsuab no uas cov xub nyob ua nej ntej lawd ua, thiab tsis txhob ua tej yam no puas tsuas nej qias tsis huv. Kuv yog Yawmsaub yog nej tus Vajtswv.’ ” Yawmsaub hais rau Mauxe tias, “Cia li hais rau ib tsoom Yixayee sawvdaws tias, ‘Nej yuav tsum ua dawb huv, rau qhov kuv yog Yawmsaub uas yog nej tus Vajtswv yog tus dawb huv. “ ‘Nej txhua tus yuav tsum hwm niam hwm txiv thiab nco ntsoov so kuv hnub Xanpatau. Kuv yog Yawmsaub yog nej tus Vajtswv. “ ‘Tsis txhob tig rov mus pe tej dab mlom lossis nchuav dab mlom rau nej. Kuv yog Yawmsaub yog nej tus Vajtswv. “ ‘Thaum nej xyeem tsiaj rau Yawmsaub ua kevcai sib raug zoo, yuav tsum xyeem raws li kevcai kuv thiaj txais yuav. Nej yuav tsum noj tej uas nej xyeem ntawd rau hnub uas nej ua kevcai xyeem lossis rau hnub tom qab. Yog tshuav seem txog hnub peb cia li muab hlawv pov tseg. Yog muab tej uas xyeem ntawd noj rau hnub peb mas yog qias vuab tsuab lawm, kuv yuav tsis txais yuav. Txhua tus uas noj tej ntawd yuav ris nws lub txim, rau qhov nws ua rau tej uas dawb huv rau Yawmsaub qias puas tsuas lawm, mas tus ntawd yuav raug muab txiav tawm hauv nws haiv neeg mus. “ ‘Thaum nej mus hlais qoob hauv teb, tsis txhob hlais kom tag tej uas nyob ntawm ntug teb. Thaum hlais lawd tsis txhob xawb tej uas tseem tshuav. Tsis txhob de tej txiv hmab kom tag du lug, thiab tsis txhob khaws tej txiv hmab uas poob rau hauv nej lub vaj txiv hmab. Yuav tseg cia rau cov neeg pluag thiab lwm haiv neeg uas nrog nej nyob. Kuv yog Yawmsaub yog nej tus Vajtswv. “ ‘Nej tsis txhob ua tub sab, tsis txhob ntxo luag, tsis txhob sib dag kiag li. “ ‘Nej tsis txhob tuav kuv lub npe twv dag, yog ua li no ua puas tsuas nej tus Vajtswv lub npe. Kuv yog Yawmsaub. “ ‘Nej tsis txhob quab yuam kwvtij zej zog lossis lws nws. Tsis txhob sej tej tub zog nqe zog cia rau ntawm nej ib hmos txog kaj ntug. Tsis txhob tsawm foom tus uas lag ntseg lossis muab dabtsi cuab tus uas dig muag kev ua rau nws dawm. Nej yuav tsum paub ntshai thiab hwm nej tus Vajtswv. Kuv yog Yawmsaub. “ ‘Nej tsis txhob tu plaub tsis ncaj, tsis txhob tuaj tus pluag tog lossis saib tus uas ua loj ntsej muag, tiamsis nej yuav tsum tu plaub ncaj ncees rau kwvtij zej zog. Nej tsis txhob mus mus los los taug xaiv rau hauv nej haiv neeg thiab tsis txhob ua ib yam dabtsi txov lwm tus txojsia. Kuv yog Yawmsaub. “ ‘Nej tsis txhob ntxub luag lwm tus cia rau hauv nruab siab. Nej yuav tsum ntuas lwm tus uas ua txhaum xwv nej thiaj tsis muaj txim li nws. Nej tsis txhob ua phem pauj phem lossis cib nyeej rau nej haiv neeg mus li. Nej yuav tsum hlub kwvtij zej zog ib yam li nej hlub nej tus kheej. Kuv yog Yawmsaub. “ ‘Nej yuav tsum ua raws li kuv tej kevcai. Nej tsis txhob muab nej tej tsiaj ob yam tso taw ua ke. Nej tsis txhob tseb ob yam noob qoob sib xyaw rau hauv nej daim teb. Tsis txhob hnav tej tsoos uas muab ob yam ntaub los xaws ua ke. “ ‘Yog ib tug txivneej nrog tus nkauj qhev twg uas lwm tus tub qhaib lawm tiamsis tsis tau txhiv thiab tsis tau muab tso nyob ywj pheej pw ua ke, mas ob tug yuav raug txim tiamsis tsis raug txim tuag rau qhov tus nkauj qhev tsis tau nyob ywj pheej. Tus txivneej yuav tsum coj ib tug txiv tshis ua kevcai ntxuav nws kev txaug kev txhaum tuaj rau ntawm lub qhov rooj tsev ntaub sib ntsib xyeem rau Yawmsaub. Tus pov thawj yuav muab tus txiv tshis uas xyeem ua kevcai ntxuav kev txaug kev txhaum tua xyeem rau ntawm Yawmsaub xubntiag ntxuav tus ntawd tej kev txhaum uas nws ua lawm, mas thiaj zam tau nws lub txim ntawd. “ ‘Thaum nej txeem mus rau hauv lub tebchaws thiab cog tej txiv ntoo uas noj tau txhua yam, mas tej txiv uas tau ntawd yuav caiv. Nej yuav caiv tsis txhob noj tej txiv ntawd thawj peb xyoos kiag li. Mas xyoo uas plaub tej txiv ntawd huvsi yog yam uas dawb huv, yog yam uas muab xyeem qhuas Yawmsaub. Mas xyoo uas tsib nej li noj tau tej txiv ntawd. Ua li no tej txiv thiaj txi ncw heev rau nej. Kuv yog Yawmsaub yog nej tus Vajtswv. “ ‘Nej tsis txhob noj tej nqaij uas txheem ntshav. Nej tsis txhob ua neeb ua yaig ua khawv koob yees siv. Tsis txhob txiav cov plaubhau ntawm xub ntsos thiab tsis txhob txhij nej cov hwj txwv. Nej tsis txhob suam nej lub cev rau qhov uas muaj neeg tuag lossis txam cim dabtsi rau nej lub cev. Kuv yog Yawmsaub. “ ‘Tsis txhob muab nej tej ntxhais ua nkauj muag cev puas tsuas nws, tsam lub tebchaws yuav poob rau txojkev muag cev thiab yuav muaj kev phem kev qias puv nkaus lub tebchaws. Nej yuav tsum nco so rau kuv hnub Xanpatau thiab hwm qhov chaw uas pe hawm kuv. Kuv yog Yawmsaub. “ ‘Tsis txhob tig mus rau cov txiv neeb txiv yaig, tsis txhob mus nrhiav lawv ua rau nej qias tsis huv. Kuv yog Yawmsaub yog nej tus Vajtswv. “ ‘Nej yuav tsum sawv tsees saib taus tus uas dawb hau paug thiab hwm tus laus, thiab nej yuav tsum hwm thiab paub ntshai nej tus Vajtswv. Kuv yog Yawmsaub. “ ‘Thaum lwm haiv neeg nrog nej nyob hauv nej lub tebchaws, nej tsis txhob tsim txom lawv. Nej yuav suav tias lwm haiv neeg uas nrog nej nyob kuj zoo ib yam li yog nej haiv neeg, thiab nej yuav hlub lawv ib yam li nej hlub nej tus kheej, rau qhov nej txeev ua lwm haiv neeg nyob hauv Iyi tebchaws. Kuv yog Yawmsaub yog nej tus Vajtswv. “ ‘Nej tsis txhob ua txhaum qhov uas siv txoj hlua ntsuas thiab rab teev luj thiab lub thoob luj uas ntxo luag. Nej yuav tsum siv rab teev uas ncaj thiab lub thauj teev uas hum, thiab siv lub efa thiab lub hee uas hum. Kuv yog Yawmsaub yog nej tus Vajtswv uas coj nej tawm hauv Iyi tebchaws los. Nej yuav tsum tuav rawv kuv tej kab ke thiab kuv tej kevcai huvsi thiab ua raws nraim. Kuv yog Yawmsaub.’ ” Yawmsaub hais rau Mauxe tias, “Cia li hais rau cov Yixayee tias, ‘Cov Yixayee thiab lwm haiv neeg uas nrog cov Yixayee nyob leejtwg muab nws li menyuam tus twg cob rau dab Maulej, mas tus ntawd yuav raug muab tua pov tseg. Cov pejxeem yuav tsum xuas pob zeb ntaus nws kom tuag. Kuv yuav tsom ntsoov tawm tsam tus ntawd thiab yuav muab nws txiav tawm hauv nws haiv neeg mus, rau qhov nws tau muab nws li ib tug menyuam cob rau dab Maulej, ua rau qhov chaw uas pe kuv qias tsis huv thiab ua qias puas tsuas kuv lub npe uas dawb huv. Yog cov pejxeem tsis quav ntsej tus uas muab nws li menyuam cob rau dab Maulej ntawd es tsis muab nws tua pov tseg, mas kuv yuav tsom ntsoov tawm tsam tus ntawd thiab nws tsev neeg thiab muab lawv txiav tawm hauv lawv haiv neeg mus tsis hais nws thiab txhua tus uas raws nws qab mus deev dab Maulej. “ ‘Yog leejtwg tig mus nrhiav txiv neeb txiv yaig thiab ua poj muag cev rau lawv kuv yuav tsom ntsoov tawm tsam tus ntawd thiab muab nws txiav tawm hauv nws haiv neeg. Vim li no nej yuav tsum tu nej tus kheej kom dawb huv rau Vajtswv thiab ua neeg dawb huv, rau qhov kuv yog Yawmsaub yog nej tus Vajtswv. Nej yuav tsum tuav rawv kuv tej kab ke thiab ua raws nraim. Kuv yog Yawmsaub uas muab nej cais kom dawb huv. Txhua tus uas cem foom nws niam nws txiv yuav raug muab tua pov tseg. Nws tau cem foom nws niam nws txiv, mas qhov uas nws tuag ntawd nws ris nws ib leeg. “ ‘Yog leejtwg deev luag tej li pojniam, mas ob tug uas sib deev ntawd yuav raug muab tua pov tseg. Tus uas nrog nws txiv tus pojniam pw, kuj yog nws thws nws txiv qhov chaw txaj muag. Ob tug ntawd yuav raug muab tua pov tseg, mas qhov uas ob tug tuag ntawd ob tug ris ob tug. Yog leejtwg nrog nws tus nyab pw, mas ob tug ntawd yuav raug muab tua pov tseg. Ob tug ua dev mas qhov uas ob tug tuag ntawd ob tug ris ob tug. Yog ib tug txivneej deev ib tug txivneej yam li deev pojniam, mas ob tug tau ua qias vuab tsuab. Ob tug yuav raug muab tua pov tseg, mas qhov uas ob tug tuag ntawd ob tug ris ob tug. Yog leejtwg yuav tus ntxhais ua pojniam thiab tseem yuav leej niam ua pojniam, mas yog qhov phem. Mas lawv peb leeg yuav raug muab hlawv pov tseg, kom thiaj tsis muaj kev phem nyob hauv nej. Yog tus txivneej twg deev tsiaj txhu, tus ntawd yuav raug muab tua pov tseg thiab nej yuav muab tus tsiaj ntawd tua pov tseg. Yog tus pojniam twg txav ze ib tug tsiaj txhu thiab deev tus tsiaj ntawd, nej yuav muab tus pojniam thiab tus tsiaj ntawd tua pov tseg. Qhov uas ob tug tuag ntawd ob tug ris ob tug. “ ‘Yog leejtwg coj nws tus muam uas yog nws txiv li ntxhais lossis yog nws niam li ntxhais mus thws qhov chaw txaj muag saib thiab tus ntxhais pom nws qhov chaw txaj muag, kuj yog ua txaj muag heev. Ob tug yuav raug muab txiav tawm tab meeg ob tug haiv neeg. Nws tau thws nws tus muam qhov chaw txaj muag, nws yuav ris nws lub txim. Yog leejtwg nrog tus pojniam uas tseem ua pojniam pw thiab thws nws qhov chaw txaj muag, yog ob tug thws qhov chaw los ntshav. Ob tug yuav raug muab txiav tawm hauv ob tug haiv neeg. Nej tsis txhob thws nej niam li niam laus lossis niam hluas lossis nej txiv li muam qhov chaw txaj muag, vim yog thws tus uas txheeb nej qhov chaw txaj muag. Lawv yuav ris lawv lub txim. Yog leejtwg nrog nws tus yawg laus li pojniam pw, kuj yog nws thws yawg laus qhov chaw txaj muag. Ob tug yuav ris ob tug lub txim, ob tug yuav tuag tsis muaj menyuam. Yog leejtwg yuav nws tus tijlaug lossis tus kwv pojniam, kuj yog kev qias tsis huv. Nws tau thws nws kwvtij qhov chaw txaj muag, ob tug yuav tsis muaj menyuam. “ ‘Nej yuav tsum tuav rawv kuv tej kab ke huvsi thiab kuv tej kevcai huvsi thiab ua raws nraim, kom lub tebchaws uas kuv coj nej los nyob hauv thiaj tsis muab nej ntuav tawm. Nej tsis txhob ua raws li cov neeg uas kuv muab ntiab khiav tawm ntawm nej hauv ntej lawd tej kevcai. Vim tias lawv ua tej uas hais tag no, kuv thiaj ntxub lawv kawg li. Tiamsis kuv twb hais rau nej lawm tias, “Nej yuav tau lawv lub tebchaws ua qub txeeg qub teg, thiab kuv yuav muab ua nej teej nej tug, yog lub tebchaws uas muaj kua mis thiab zib ntab ntws nto.” Kuv yog Yawmsaub yog nej tus Vajtswv uas tau muab nej cais tawm hauv ib tsoom neeg los. “ ‘Vim li no nej yuav tsum cais tej tsiaj uas huv thiab tej tsiaj uas tsis huv, thiab cais tej noog uas tsis huv thiab tej noog uas huv. Nej tsis txhob ua rau nej qias vuab tsuab vim yog tim tej tsiaj twg lossis tej noog twg lossis ib yam dabtsi uas nkag hauv av uas kuv tau muab qhia cais rau nej lawm tias yog yam uas qias tsis huv. Nej yuav tsum dawb huv rau kuv, rau qhov kuv uas yog Yawmsaub yog tus dawb huv, thiab kuv tau muab nej cais tawm hauv ib tsoom neeg los kom nej thiaj li yog kuv tug. “ ‘Tus txivneej twg lossis tus pojniam twg uas ua txiv neeb txiv yaig mas yuav raug muab tua pov tseg. Yuav xuas pob zeb ntaus kom tuag, mas qhov uas lawv tuag ntawd lawv ris lawv.’ ” Yawmsaub hais rau Mauxe tias, “Cia li hais rau cov pov thawj uas yog Aloo tej tub tias, ‘Tsis txhob cia nej cov pov thawj ib tug twg ua puas tsuas nws rau qhov uas mus pam tus tuag hauv nws cov kwvtij, tsuas yog tej uas txheeb txheeb nws xwb, yog nws niam nws txiv nws tub nws ntxhais nws tij nws kwv lossis nws tus nkauj muam uas nrog nws nyob vim tsis muaj txiv mas tus pov thawj yeem cia nws qias tsis huv. Nws tsis txhob pam nws tej neej tsa es ua rau nws qias tsis huv, thiab ua puas tsuas nws poob koob. Cov pov thawj tsis txhob chais ib nyuag qhov plaubhau thiab tsis txhob txiav cov hwj txwv, thiab tsis txhob muab riam suam lub cev. Cov pov thawj yuav tsum ua neeg dawb huv rau lawv tus Vajtswv tsis txhob ua puas tsuas lawv tus Vajtswv lub npe poob koob, vim yog lawv muab qhov txhia chaw hlawv kub hnyiab xyeem rau Yawmsaub, yog tej zaub mov xyeem rau lawv tus Vajtswv. Vim li no lawv yuav tsum ua dawb huv. Cov pov thawj tsis txhob yuav tej poj muag cev lossis tej pojniam uas qias tsis huv lossis tej pojniam uas nrauj txiv rau qhov cov pov thawj yeej yog dawb huv rau lawv tus Vajtswv. Koj yuav tsum tu kom lawv dawb huv rau kuv vim lawv xyeem tej zaub mov rau koj tus Vajtswv. Koj yuav tsum pom tias lawv dawb huv, rau qhov kuv uas yog Yawmsaub kuj dawb huv, kuv yog tus uas tu kom nej dawb huv. Tus pov thawj twg tus nthxais mus ua poj muag cev ua rau nws qias tsis huv mas kuj yog ua puas tsuas leej txiv poob koob. Nws yuav raug muab hlawv pov tseg. “ ‘Tus pov thawj hlob uas raug muab roj hliv ywg saum nws taubhau tsa ua pov thawj hlob thiab yog tus uas raug muab tu kom dawb huv es hnav tau cev tsoos meej mom mas tsis txhob tseg plaubhau ntxhov ntxhov thiab tsis txhob dua nws lub tsho. Nws tsis txhob mus ze tus tuag, tsis txhob ua puas tsuas nws qias tsis huv txawm yog nws txiv nws niam tuag los xij. Nws tsis txhob tawm hauv lub chaw pe hawm Vajtswv mus thiab tsis txhob ua qias puas tsuas lub chaw pe hawm nws tus Vajtswv poob koob, rau qhov cov roj uas hliv tsa nws ua tus dawb huv rau nws tus Vajtswv tseem nyob ntawm nws. Kuv yog Yawmsaub. Nws yuav tsum yuav tus pojniam uas tsis tau deev dua hluas nraug. Nws tsis txhob yuav tej poj ntsuam, tej poj nrauj, tej pojniam uas qias tsis huv lossis tej poj muag cev. Nws yuav tsum yuav tus pojniam uas tsis tau deev dua hluas nraug hauv nws haiv neeg los ua pojniam, kom nws thiaj tsis ua qias puas tsuas nws tej menyuam poob koob rau hauv nws haiv neeg, rau qhov kuv yog Yawmsaub uas cais nws ua tus dawb huv.’ ” Yawmsaub hais rau Mauxe tias, “Cia li hais rau Aloo tias, ‘Koj caj ces mus ib tiam dhau ib tiam tsis txhob kheev ib tug uas lub cev muaj ib qho phem qhovtwg tuaj ze xyeem tej zaub mov rau nws tus Vajtswv, rau qhov tias tus uas muaj ib qho phem qhovtwg nkag tsis nyog mus ze lub thaj, tsis hais tus dig muag, lossis ceg tawv, lossis tus uas caws ntsej caws ntswg lossis tes taw ntev tsis sib txig, lossis caws tes caws taw, lossis khoov duav khoov pu, lossis tus uas cob pob lossis pom kev tsis zoo, lossis mob lig mob ruam los kua paug, lossis noob thoob tshaj. Tus pov thawj Aloo caj ces yog leejtwg uas lub cev phem ib qho qhovtwg tsis txhob kheev nws tuaj ze muab luag tej qhov txhia chaw hlawv xyeem rau Yawmsaub. Vim nws lub cev muaj ib qho phem, tsis txhob kheev nws tuaj ze xyeem tej zaub mov rau nws tus Vajtswv. Nws noj tau nws tus Vajtswv zaub mov tsis hais tej uas dawb huv kawg nkaus thiab tej uas dawb huv. Tiamsis nws tsis txhob tuaj ze daim ntaub uas thaiv thiab ze lub thaj rau qhov nws lub cev muaj ib qho phem, kom nws thiaj tsis ua puas tsuas qhov chaw uas pe kuv poob koob. Kuv yog Yawmsaub uas muab lub chaw ntawd cais kom dawb huv.’ ” Mauxe thiaj hais tej no rau Aloo thiab nws cov tub thiab cov Yixayee sawvdaws. Yawmsaub hais rau Mauxe tias, “Cia li hais rau Aloo thiab nws cov tub kom txav deb ntawm tej qhov txhia chaw dawb huv uas cov Yixayee muab pub kiag rau kuv ua kuv tug, kom lawv thiaj tsis ua puas tsuas kuv lub npe uas dawb huv poob koob. Kuv yog Yawmsaub. Cia li hais rau lawv tias, ‘Yog nej caj ces ib tiam dhau ib tiam mus li leejtwg mus ze tej qhov txhia chaw dawb huv uas cov Yixayee muab pub kiag rau kuv ua kuv tug rau thaum uas nws tseem qias tsis huv, mas nws yuav raug muab tshem tawm mus kom dhau kuv lub xubntiag. Kuv yog Yawmsaub. Yog Aloo caj ces ib tug twg ua mob lig mob ruas lossis muaj kua ntws los mas nws noj tsis nyog tej uas xyeem dawb huv ntawd, cia nws zoo huv tso. Yog leejtwg kov raug tej yam qias tsis huv vim tej ntawd twb nphav tej cev tuag lawm, lossis nws muaj kua chaw xis ntws los, lossis nws kov raug tej tsiaj me me uas nkag hauv pem teb, uas ua rau nws qias tsis huv, lossis nws kov raug tej neeg uas puas tsuas nws qias tsis huv, txawm yog yam uas qias tsis huv twg, los tus uas kov raug tej ntawd nws kuj yuav qias tsis huv mus txog tsaus ntuj. Nws noj tsis nyog tej uas xyeem dawb huv, nws yuav tsum da dej tso. Thaum hnub poob qho lawd nws thiaj li huv ces nws mam li noj tau tej uas xyeem dawb huv ntawd, rau qhov tej ntawd yog nws li zaub mov. Tej tsiaj uas nws tuag nws lossis raug ib tug tsiaj qus tom tuag mas nws tsis txhob noj li. Tej no yuav puas tsuas nws qias tsis huv. Kuv yog Yawmsaub. Vim li no cov pov thawj yuav tsum ua raws li uas kuv hais, tsam ces thaum lawv ua tej no lawv yuav raug txim thiab lawv yuav tuag vim lawv saib tsis taus kuv tej lus. Kuv yog Yawmsaub uas cais lawv ua cov uas dawb huv. “ ‘Tsuas yog cov pov thawj tsev neeg thiaj noj nyog tej uas xyeem dawb huv. Cov uas tuaj ua qhua rau hauv tus pov thawj tsev thiab tus pov thawj tej tub zog los noj tsis nyog tej uas dawb huv ntawd. Tiamsis yog tus pov thawj muab nyiaj yuav ib tug ua nws tus qhev mas tus qhev ntawd noj tau thiab cov qhev uas yug rau hauv tus pov thawj tsev kuj noj tau tej zaub mov ntawd. Yog pov thawj tej ntxhais mus yuav txiv rau cov uas tsis ua pov thawj mas nws kuj noj tsis nyog tej uas xyeem dawb huv ntawd. Tiamsis yog pov thawj tug ntxhais ntawd ua poj ntsuam lossis ua poj nrauj lawm thiab tsis muaj menyuam es rov los nyob hauv leej txiv tsev ib yam nkaus li thaum hluas nkauj, mas nws kuj noj tau leej txiv tej zaub mov ntawd. Tiamsis cov uas nyob sab nraud noj tsis nyog. Yog leejtwg tsis paub es nws tau noj tej uas xyeem dawb huv ntawd lawm mas nws yuav tsum pauj tej ntawd rov rau tus pov thawj thiab ntxiv ib feem hauv tsib rau nws. Cov pov thawj tsis txhob muab tej qhov txhia chaw dawb huv uas cov Yixayee muab xyeem rau Yawmsaub ntawd ua puas tsuas qias tsis huv, tsam ces ua rau cov Yixayee raug txim rau qhov uas cia lawv noj txhaum tej qhov txhia chaw uas xyeem dawb huv, rau qhov kuv yog Yawmsaub uas cais cov pov thawj ua cov uas dawb huv.’ ” Yawmsaub hais rau Mauxe tias, “Cia li hais rau Aloo thiab nws cov tub thiab cov Yixayee sawvdaws tias, ‘Thaum cov Yixayee lossis lwm haiv neeg uas nrog cov Yixayee nyob leejtwg muab qhov txhia chaw xyeem, txawm yog nws pauj tej uas nws fiv cia lawd lossis nws zoo siab muab xyeem pub xwb ua kevcai hlawv huvsi xyeem rau Yawmsaub, yog yuav ua kom Vajtswv txais yuav mas nej yuav tsum muab ib tug txiv tsiaj uas tsis muaj chaw thuam li xyeem, uas yog ib tug txiv nyuj lossis txiv yaj lossis txiv tshis. Nej tsis txhob muab tej uas muaj chaw thuam xyeem vim Yawmsaub tsis txais yuav. “ ‘Thaum leejtwg muab ib tug nyuj lossis yaj xyeem rau Yawmsaub ua kevcai xyeem sib raug zoo, yog nws pauj tej uas nws fiv cia lawd lossis nws zoo siab muab xyeem pub xwb, mas tus tsiaj ntawd yuav tsum yog ib tug zoo kawg thiab yuav tsum tsis txhob muaj chaw thuam kiag li, Vajtswv thiaj li txais yuav. Tej tsiaj uas dig muag lossis ceg tawv lossis muab txiav muab hlais lossis muaj kiav txhab ua kua paug lossis liam txwv lossis mob cos, nej tsis txhob muab xyeem rau Yawmsaub lossis muab hlawv kub hnyiab xyeem rau Yawmsaub saum lub thaj. Tej txiv nyuj lossis tej menyuam yaj uas lub cev hlob tsis sib luag ib ceg ntev ib ceg luv, mas nej muab xyeem tau li uas nej zoo siab muab pub xyeem, tiamsis yog muab xyeem pauj tej uas nej fiv cia lawd, mas Vajtswv tsis txais yuav. Tej tsiaj uas noob qes ntsoog lossis muab tsoo lossis muab dua lossis muab txiav nej tsis txhob muab xyeem rau Yawmsaub lossis tua xyeem rau hauv nej lub tebchaws. Tsis txhob muab tej tsiaj zoo li no uas nej tau ntawm lwm haiv neeg los xyeem ua zaub mov rau nej tus Vajtswv. Tej tsiaj ntawd muaj chaw thuam vim raug muab txiav muab hlais, ces Vajtswv tsis txais yuav.’ ” Yawmsaub hais rau Mauxe tias, “Thaum nyuj thiab yaj thiab tshis xya menyuam mas cia tus menyuam nrog niam nyob xya hnub. Txij hnub uas yim mus, mas yuav muab hlawv xyeem rau Yawmsaub los kuj tau lawm, Vajtswv txais yuav. Tus niam tsiaj ntawd tsis hais yog nyuj los yaj nej tsis txhob muab tua nrog tus menyuam ua ib hnub. Thaum nej tua tsiaj xyeem ua Yawmsaub tsaug, nej yuav tsum tua xyeem raws li kevcai Vajtswv thiaj txais yuav nej. Nej yuav tsum noj tej nqaij ntawd kom tag rau tib hnub ntawd, tsis txhob tseg ib yam cia txog kaj ntug. Kuv yog Yawmsaub. “Nej yuav tsum tuav rawv kuv tej lus nkaw thiab ua raws nraim. Kuv yog Yawmsaub. Nej tsis txhob ua puas tsuas kuv lub npe uas dawb huv poob koob. Kuv xav kom cov Yixayee sawvdaws hwm tias kuv dawb huv. Kuv yog Yawmsaub uas cais kom nej dawb huv. Kuv yog tus uas coj nej tawm hauv Iyi tebchaws los kuv thiaj tau ua nej tus Vajtswv. Kuv yog Yawmsaub.” Yawmsaub hais rau Mauxe tias, “Cia li hais rau cov Yixayee tias, ‘Yawmsaub tej kevcai uas teem tseg uas nej yuav tsum tshaj tawm tias yog lub sijhawm uas tuaj txoos ua ke ua kevcai dawb huv, yog tej kevcai uas kuv teem tseg mas yog li no. “ ‘Nej yuav tsum ua haujlwm rau hnub, mas hnub xya yog hnub Xanpatau uas caiv so tiag tiag li, yog hnub uas tuaj txoos ua ke ua kevcai dawb huv. Tsis txhob ua haujlwm kiag li, yog hnub Xanpatau uas so rau Yawmsaub rau hauv txhua lub chaw uas nej nyob. “ ‘Tej no yog tej kevcai uas Yawmsaub teem tseg, yog tej lub sijhawm uas tuaj txoos ua ke ua kevcai dawb huv. Nej yuav tsum tshaj tawm raws tej sijhawm uas teem cia. Hnub xiab kaum plaub lub ib hlis thaum yuav tsaus ntuj yuav ua Yawmsaub li kevcai Hla Dhau. Hnub xiab kaum tsib lub hli ntawd yuav ua kevcai noj ncuav tsis xyaw keeb rau Yawmsaub. Nej yuav noj ncuav tsis xyaw keeb xya hnub. Thawj hnub nej yuav tuaj txoos ua ke ua kevcai dawb huv. Nej tsis txhob ua ib yam haujlwm hnyav kiag li. Nej yuav muab tsiaj hlawv xyeem rau Yawmsaub xya hnub. Hnub uas xya yog hnub uas tuaj txoos ua ke ua kevcai dawb huv, nej tsis txhob ua ib yam haujlwm hnyav kiag li.’ ” Yawmsaub hais rau Mauxe tias, “Cia li hais rau cov Yixayee tias, ‘Thaum nej mus txog lub tebchaws uas kuv pub rau nej thiab nej sau tej qoob hauv lub tebchaws ntawd, nej yuav tsum coj ib teg qoob uas nej hlais thawj phaum tuaj rau tus pov thawj. Tus pov thawj yuav muab tes qoob ntawd cev xyeem rau Yawmsaub kom Yawmsaub thiaj li txais yuav nej. Nws yuav muab cev xyeem rau hnub tom qab hnub Xanpatau. Hnub uas nej ua kevcai cev xyeem tes qoob ntawd, nej yuav tsum coj ib tug menyuam txiv yaj hnub nyoog ib xyoos uas tsis muaj chaw thuam li tuaj ua kevcai hlawv xyeem rau Yawmsaub. Tej uas muab ua kevcai xyeem qoob loo ua ke yog muab ob feem kaum hauv ib efa hmoov mog zoo zoo ntse roj hlawv xyeem rau Yawmsaub ua kom muaj pa ncho tsw qab, thiab ib feem plaub hauv ib hee cawv txiv hmab ua kevcai hliv xyeem. Nej tsis txhob noj cov qoob tshiab tsis hais muab ua ncuav lossis muab kib los noj nyoos tos txog thaum uas coj tuaj ua kevcai li no xyeem rau nej tus Vajtswv tag tso. No yog txoj kevcai rau nej txhua tiam mus ib txhis rau hauv txhua lub chaw uas nej nyob. “ ‘Nej yuav tsum suav txij hnub tom qab hnub Xanpatau uas yog hnub nej coj thawj tes qoob tuaj cev xyeem kom puv xya lub chib so. Nej yuav suav tsib caug hnub mus txog hnub tom qab hnub Xanpatau uas xya, li muab tej mog tshiab tuaj ua kevcai xyeem qoob loo rau Yawmsaub. Nej yuav coj ob lub ncuav uas muab ob feem kaum hauv ib efa hmoov mog zoo zoo uas xyaw keeb ua tawm hauv nej lub chaw nyob tuaj cev xyeem ua thawj phaum qoob xyeem rau Yawmsaub. Nej yuav coj xya tus menyuam yaj uas hnub nyoog ib xyoos uas tsis muaj chaw thuam li thiab ib tug thav txiv nyuj thiab ob tug txiv yaj tuaj nrog cov ncuav xyeem ua ke. Tej no yog tej uas ua kevcai hlawv xyeem rau Yawmsaub thiab tej uas ua kevcai xyeem qoob loo thiab ua kevcai hliv xyeem, yog yam uas hlawv kub hnyiab xyeem ua kom muaj pa ncho tsw qab hum Yawmsaub lub siab. Nej yuav tsum xyeem ib tug txiv tshis ua kevcai daws txim thiab xyeem ob tug menyuam txiv yaj hnub nyoog ib xyoos ua kevcai sib raug zoo. Tus pov thawj yuav muab ob tug menyuam yaj nrog cov ncuav uas yog thawj phaum qoob cev xyeem ua ke ua kevcai cev xyeem rau Yawmsaub. Tej no yog tej uas dawb huv rau Yawmsaub muab ua pov thawj li feem. Tib hnub ntawd nej yuav tshaj tawm. Nej yuav tuaj txoos ua ke ua kevcai dawb huv, nej tsis txhob ua haujlwm hnyav kiag li. No yog tej kab ke rau nej txhua tiam mus ib txhis rau hauv txhua lub chaw uas nej nyob. “ ‘Thaum nej hlais tej qoob hauv teb, nej tsis txhob hlais kom tag tej uas nyob ntawm ntug teb, thiab thaum sau tag tsis txhob xawb tej uas tshuav. Yuav tseg cia rau cov neeg pluag thiab lwm haiv neeg uas nrog nej nyob. Kuv yog Yawmsaub yog nej tus Vajtswv.’ ” Yawmsaub hais rau Mauxe tias, “Cia li hais rau cov Yixayee tias, ‘Hnub xiab ib lub xya hli nej yuav tsum nco ntsoov caiv so tiag tiag li, yog hnub uas tshuab raj kub yaj tshaj tawm, yog hnub uas tuaj txoos ua ke ua kevcai dawb huv. Nej tsis txhob ua haujlwm hnyav, thiab nej yuav tsum coj tej uas hlawv xyeem tuaj xyeem rau Yawmsaub.’ ” Yawmsaub hais rau Mauxe tias, “Hnub xiab kaum lub xya hli no yog hnub uas ua kevcai ntxuav kev txhaum. Yuav ua hnub uas nej tuaj txoos ua ke ua kevcai dawb huv, thiab nej yuav tswj nej lub siab thiab coj tej uas hlawv xyeem tuaj xyeem rau Yawmsaub. Hnub ntawd nej tsis txhob ua haujlwm dabtsi li rau qhov yog hnub ntxuav kev txhaum, kom thiaj ntxuav tau nej tej kev txhaum rau ntawm nej tus Vajtswv Yawmsaub xubntiag. Hnub ntawd yog leejtwg tsis tswj nws lub siab tus ntawd yuav raug muab txiav tawm hauv nws haiv neeg. Thiab hnub ntawd yog leejtwg ua ib yam haujlwm dabtsi kuv yuav muab tus ntawd ua kom puam tsuaj hauv nws haiv neeg mus. Nej tsis txhob ua haujlwm kiag li. No yog tej kab ke rau nej txhua tiam mus ib txhis rau hauv txhua lub chaw uas nej nyob. Hnub ntawd yuav ua hnub Xanpatau uas caiv so tiag tiag, thiab nej yuav tswj nej lub siab. Thaum tsaus ntuj hnub xiab cuaj lub hlis ntawd nej yuav tuav rawv hnub Xanpatau mus txog hnub tom qab tsaus ntuj.” Yawmsaub hais rau Mauxe tias, “Cia li hais rau cov Yixayee tias, ‘Hnub xiab kaum tsib lub xya hli no yog kevcai nyob tsev pheeb suab rau Yawmsaub kom puv xya hnub. Thawj hnub yuav ua hnub uas tuaj txoos ua ke ua kevcai dawb huv. Nej tsis txhob ua haujlwm hnyav. Nej yuav coj tej uas hlawv xyeem tuaj xyeem rau Yawmsaub kom puv xya hnub. Hnub uas yim nej yuav tuaj txoos ua ke ua kevcai dawb huv thiab coj tej uas hlawv xyeem tuaj xyeem rau Yawmsaub. Yog tuaj txoos ua ke caiv so. Nej tsis txhob ua haujlwm hnyav kiag li. “ ‘Tej no yog Yawmsaub tej kevcai uas teem tseg uas nej yuav tsum tshaj tawm tias yog lub sijhawm uas tuaj txoos ua ke ua kevcai dawb huv, thiab yuav coj tej uas xyeem tuaj hlawv xyeem rau Yawmsaub, yog tej uas yuav ua kevcai hlawv huvsi xyeem thiab ua kevcai xyeem qoob loo, thiab tej tsiaj uas tua xyeem thiab tej uas muab hliv xyeem, txhua yam yuav tsum ua raws li sijhawm. Tej no yog ua tshaj tej uas ua rau Yawmsaub hnub Xanpatau thiab tshaj tej uas nej muab xyeem thiab tshaj txhua yam uas nej fiv cia lawd thiab tshaj tej uas nej zoo siab muab xyeem pub huvsi, uas nej pub xyeem rau Yawmsaub. “ ‘Thaum nej sau tej qoob loo hauv lub tebchaws tag lawm, mas hnub xiab kaum tsib lub xya hli, nej yuav ua qhov kevcai no rau Yawmsaub xya hnub. Thawj hnub yuav ua hnub uas caiv so tiag tiag, thiab hnub uas yim kuj yuav ua hnub uas caiv so tiag tiag thiab. Thawj hnub nej yuav de tej txiv ntoo zoo zoo thiab tej nplooj toov laj thiab tej rev nplooj ntoo thiab tej ceg ntoo lwg zaj tuaj. Nej yuav zoo siab xyiv fab xya hnub rau ntawm Yawmsaub uas yog nej tus Vajtswv xubntiag. Nej yuav tsum nco ntsoov ua qhov kevcai no ib xyoos xya hnub rau Yawmsaub. No yog tej kab ke rau nej txhua tiam mus ib txhis. Nej yuav tsum ua qhov kevcai no rau lub xya hli. Nej yuav nyob hauv tsev pheeb suab xya hnub. Txhua tus uas yog neeg Yixayee yuav tsum nyob hauv tsev pheeb suab, xwv nej txhua tiam thiaj paub tias thaum kuv coj cov Yixayee tawm hauv Iyi tebchaws los kuv ua rau lawv nyob hauv tsev pheeb suab. Kuv yog Yawmsaub yog nej tus Vajtswv.’ ” Ua li no Mauxe thiaj qhia rau cov Yixayee paub txog Yawmsaub tej kevcai uas teem tseg. Yawmsaub hais rau Mauxe tias, “Koj cia li hais rau cov Yixayee kom coj cov tseem roj uas tsuam ntawm txiv aulib tuaj rau koj sam lub teeb, xwv lub teeb thiaj cig mus li. Aloo yuav tsum tu lub teeb uas nyob hauv lub tsev ntaub sib ntsib ntawm daim ntaub thaiv lub phij xab uas muaj Vajtswv tej lus sab nraum no txij thaum tsaus ntuj mus txog kaj ntug tsis tu ncua li rau ntawm Yawmsaub xubntiag. No yog txoj kab ke rau nej txhua tiam mus ib txhis. Aloo yuav tu tej teeb uas nyob saum tus kav teeb uas tseem kub rau ntawm Yawmsaub xubntiag tsis tu ncua li. “Koj yuav muab cov hmoov mog zoo zoo ua kaum ob lub ncuav. Ib lub ncuav siv ob feem kaum hauv ib efa hmoov mog. Koj yuav txawb cov ncuav no rau saum lub rooj uas tseem kub ua ob leej, ib leej rau lub. Koj yuav muab cov roj ntoos tsw qab uas zoo zoo rau rau ob leej huvsi, kom thiaj nrog cov ncuav ua chaw rau Yawmsaub nco ntsoov thiab muab ua yam uas hlawv xyeem rau Yawmsaub. Txhua hnub Xanpatau Aloo yuav tsum muab txawb tsis tu ncua raws li kevcai ua cov Yixayee tug rau ntawm Yawmsaub xubntiag ua lo lus cog tseg mus ib txhis. Cov ncuav no yuav poob ua Aloo thiab nws cov tub li feem, mas lawv yuav noj rau hauv ib lub chaw uas dawb huv rau qhov yog yam uas dawb huv kawg nkaus rho ntawm tej uas muab hlawv kub hnyiab xyeem rau Yawmsaub los, yog lawv li feem mus ib txhis li.” Muaj ib tug yawg, nws niam yog neeg Yixayee nws txiv yog neeg Iyi, txawm mus tsham cov Yixayee, mas nws nrog ib tug yawg Yixayee sib cav sib ceg hauv lub zos. Tus yawg uas nws niam yog neeg Yixayee ntawd hais lus tuam mom cem foom Yawmsaub lub npe. Lawv thiaj coj nws tuaj rau Mauxe. Nws niam npe hu ua Selaumi uas yog Dinpli yog xeem Daj li ntxhais. Lawv thiaj muab tus yawg ntawd kaw cia tos txog thaum Yawmsaub qhia tej uas Yawmsaub lub siab xav rau lawv paub. Mas Yawmsaub hais rau Mauxe tias, “Cia li coj tus cem foom ntawd rau sab nraum ntug zos mas kom cov uas hnov nws cem foom sawvdaws muab tes npuab rau saum nws taubhau, mas ib tsoom pejxeem xuas pob zeb ntaus kom nws tuag. Koj cia li hais rau cov Yixayee tias, ‘Leejtwg cem foom nws tus Vajtswv nws yuav ris nws lub txim. Tus uas tuam mom Yawmsaub lub npe yuav raug muab tua pov tseg. Ib tsoom pejxeem yuav xuas pob zeb ntaus nws kom tuag. Lwm haiv neeg uas nrog nej nyob lossis cov Yixayee thaum tus twg tuam mom Yawmsaub lub npe nws yuav raug muab tua pov tseg. “ ‘Tus uas tua neeg kuj yuav raug muab tua pov tseg. Tus uas tua lwm tus li tsiaj txhu yuav tsum them siav pauj siav. Yog leejtwg ua rau nws kwvtij zej zog raug mob, kuj yuav ua rau nws ib yam nkaus li nws tau ua rau luag lawm, pob txha lov pauj pob txha lov, qhov muag pauj qhov muag, hniav pauj hniav. Nws ua rau luag raug mob li cas, nws yuav raug mob ib yam li ntawd. Tus uas tua lwm tus li tsiaj txhu yuav tsum them pauj. Tus uas tua neeg nws yuav tsum raug muab tua pov tseg. Nej yuav tsum siv tib txoj kevcai rau lwm haiv neeg uas nrog nej nyob thiab rau cov Yixayee, rau qhov kuv yog Yawmsaub yog nej tus Vajtswv.’ ” Mauxe thiaj hais li ntawd rau cov Yixayee, mas lawv thiaj coj tus uas cem foom ntawd tawm mus rau sab nraum ntug zos thiab xuas pob zeb ntaus nws kom tuag. Ua li no cov Yixayee thiaj ua raws li Yawmsaub hais rau Mauxe. Yawmsaub hais rau Mauxe saum lub roob Xinai tias, “Cia li hais rau cov Yixayee tias, ‘Thaum nej txeem mus rau hauv lub tebchaws uas kuv pub rau nej ntawd, mas cia lub tebchaws muaj xyoo Xanpatau uas so rau Yawmsaub. Nej yuav cog qoob cog loo rau nej tej teb rau xyoo thiab tav tej txiv hmab thiab sau qoob loo rau xyoo. Tiamsis xyoo uas xya mas cia ua xyoo Xanpatau uas lub tebchaws so tus tus, yog xyoo Xanpatau rau Yawmsaub. Nej tsis txhob cog qoob loo rau hauv nej tej teb, tsis txhob tav txiv hmab hauv nej tej vaj. Tej qoob loo uas nws tuaj nws nej tsis txhob hlais tsis txhob sau, tej txiv hmab uas nej tsis tau tav tsis tau tu nej tsis txhob de. Cia ua xyoo uas lub tebchaws so tus tus. Xyoo Xanpatau ntawd lub tebchaws tseem yuav tshwm tau qoob loo rau nej noj, pub rau nej thiab rau nej tej tub qhe nkauj qhev thiab rau nej tej tub zog thiab pub rau tej neeg lwm tebchaws uas nrog nej nyob. Thiab tej qoob loo uas tshwm hauv lub tebchaws huvsi mas pub rau nej tej tsiaj txhu thiab tej tsiaj qus noj.’ ” “ ‘Nej yuav tsum suav xya tus xya xyoo thiaj yog plaub caug cuaj xyoos rau nej. Nej yuav tshuab raj kub yaj nrov kom thoob tebchaws rau hnub xiab kaum lub xya hli, yuav tshuab raj kub yaj kom thoob tebchaws rau hnub uas ua kevcai ntxuav kev txhaum txim. Nej yuav tsum hwm xyoo uas tsib caug ntawd ua xyoo uas dawb huv thiab yuav tshaj tawm kev thaj yeeb rau ib tsoom neeg thoob nej lub tebchaws, ua xyoo Zoo Siab uas thim txhua yam rov qab. Nej txhua tus yuav tsum rov mus rau nws qub vaj qub tse thiab rov mus nrog nws cuab neeg nyob. Xyoo uas tsib caug ntawd yuav ua xyoo Zoo Siab rau nej. Xyoo ntawd nej tsis txhob cog qoob cog loo thiab tsis txhob hlais sau tej qoob loo uas nws tuaj nws, thiab tsis txhob de tej txiv hmab uas tsis tau tav ceg, vim xyoo ntawd yog xyoo Zoo Siab xyiv fab, yuav ua xyoo dawb huv rau nej. Nej tsuas noj tej qoob loo uas nws tuaj nws hauv tej liaj teb xwb. “ ‘Xyoo Zoo Siab no mas txhua tus yuav tsum rov mus txog nws qub vaj qub tse. Yog nej muag liaj muag teb rau kwvtij zej zog lossis yuav liaj teb ntawm kwvtij zej zog los mas ib leeg tsis txhob ntxo ib leeg. Nej yuav kwvtij zej zog liaj teb mas nej yuav ntaus nqe raws li cov niaj xyoo uas dhau xyoo Zoo Siab los lawm, thiab muag tau npaum li cov niaj xyoo uas tseem sau tau qoob loo. Yog tseem tshuav ntau xyoo kuj nce nqe siab zog, yog tshuav tsawg xyoo lawm kuj nqes nqe, vim nws muag raws li cov niaj xyoo uas sau tau qoob loo. Ib leeg tsis txhob ntxo ib leeg. Nej yuav tsum paub ntshai nej tus Vajtswv, vim kuv yog Yawmsaub yog nej tus Vajtswv. “ ‘Vim li no nej yuav ua raws li kuv tej kab ke thiab tuav rawv kuv txoj kevcai thiab ua raws nraim, nej thiaj li nyob tso siab lug hauv tebchaws. Lub tebchaws yuav tuaj qoob loo mas nej yuav tau noj tsau npo thiab nyob tso siab plhuav. Yog nej hais tias, “Yog tsis pub peb cog thiab sau qoob loo, ces xyoo uas xya peb yuav muab dabtsi los noj?” Kuv yuav tso hmoov zoo rau nej rau xyoo uas rau mas lub tebchaws yuav muaj qoob loo txaus peb xyoos. Thaum nej cog qoob loo rau xyoo uas yim, nej tseem noj tej qoob laus, mus txog xyoo uas cuaj thaum nej tau qoob loo tshiab los nej tseem noj tej qoob laus. Nej muab tej teb muag tuag tsis tau vim tej av ntawd yog kuv li, nej yog qhua tuaj qev nyob xwb. Thoob plaws hauv lub tebchaws uas nej nyob ntawd nej yuav pub kom txhiv tau tej qub av rov qab. “ ‘Yog nej tej kwvtij leejtwg ho pluag es nws muab nws thaj av ib qho muag mas nws tej txheeb kwvtij yuav tsum tuaj txhiv tej uas nws tau muab muag lawm. Yog leejtwg tsis muaj kwvtij txhiv tau rau nws, tiamsis los rau tom qab nws ho nplua nuj muaj nyiaj txiag txaus txhiv tau, mas cia nws suav saib muab daim av muag tau pes tsawg xyoo thiab xam cov nyiaj uas tsim nyog thim rov rau tus uas nws twb muag rau lawm, mas nws thiaj mus nyob tau rau hauv nws thaj av ntawd. Yog nws tsis muaj nyiaj txaus txhiv tau mas thaj av ntawd yuav nyob hauv tus uas yuav lawm txhais tes mus txog xyoo Zoo Siab uas thim txhua yam rov qab, mas nws li muab tso rov rau tus qub tswv rau xyoo Zoo Siab, mas tus qub tswv thiaj li rov nyob tau hauv nws thaj av. “ ‘Yog leejtwg muab lub tsev uas nyob hauv lub moos uas muaj ntsa loog muag, mas nws yuav txhiv tau rau thaum tsis tau dhau ib xyoos. Nws muaj feem txhiv tau rau thaum txwm nkaus xyoo. Yog txwm nkaus ib xyoos nws tsis txhiv ces cia muab kiag lub tsev uas nyob hauv lub moos uas muaj ntsa loog ntawd ua tus uas yuav li tug mus ib tiam dhau ib tiam mus li, txog xyoo Zoo Siab los tsis txog muab thim lawm. Tiamsis tej tsev hauv tej zej zog uas tsis muaj ntsa loog mas yuav suav zoo ib yam li tej liaj teb, uas txhiv tau rov qab thiab yuav muab tso rov qab rau xyoo Zoo Siab. Tiamsis cov Levi muaj feem txhiv tau tej tsev hauv tej moos uas yog lawv tug txhua lub sijhawm. Cov Levi tej tsev hauv lub moos uas nws muab muag mas lawv yuav txhiv tau. Txog xyoo Zoo Siab tus uas yuav lub tsev ntawd yuav muab tso rov ua nws tug, vim yog cov Levi tej tsev hauv cov Levi tej moos yog lawv teej lawv tug hauv cov Yixayee. Tiamsis tej moos ntawd li tshav yug tsiaj muag tsis tau vim tej ntawd yog cov Levi li tug ib txhiab ib txhis. “ ‘Yog nej tej kwvtij leejtwg ho pluag nrhiav tsis tau noj mas nej cia li yug nws, tiamsis nws nrog nej nyob ib yam li lwm haiv neeg thiab tej neeg uas los nrog nej nyob. Tsis txhob yuav paj nyiag ntawm nws thiab tsis txhob yuav tshaj thawj, yuav tsum paub ntshai nej tus Vajtswv xwv nej tej kwvtij thiaj li nrog taus nej nyob. Nej tsis txhob txais nyiaj rau nws es xam paj nyiag, lossis tsis txhob muag mov noj yuav tshaj thawj. Kuv yog Yawmsaub, yog nej tus Vajtswv uas coj nej tawm hauv Iyi tebchaws los xwv kuv thiaj muab lub tebchaws Khana‑as pub rau nej, kuv thiaj ua tau nej tus Vajtswv. “ ‘Yog nej tej kwvtij leejtwg uas nrog nej nyob ho pluag es nws muab nws tus kheej muag rau nej, mas nej tsis txhob kom nws ua haujlwm yam li tus qhev. Cia nws nrog nej nyob yam li tej tub zog lossis yam li tej neeg uas los nrog nej nyob. Cia nws ua haujlwm rau nej txog xyoo Zoo Siab uas thim txhua yam rov qab xwb, mas nws thiab nws tej menyuam cia li rov qab mus cuag nws kwv nws tij rov mus nyob nws tej poj koob yawm txwv qub txeeg qub teg. Rau qhov lawv kuj yog kuv cov qhev uas kuv coj tawm hauv Iyi tebchaws los, mas lawv tsis txhob muab lawv muag ua qhev. Nej tsis txhob quab yuam tsim txom lawv. Nej yuav tsum hwm thiab paub ntshai nej tus Vajtswv. “ ‘Tej tub qhe nkauj qhev uas nej muaj tau mas yuav yog nej yuav ntawm tej tebchaws uas nyob ib ncig nej. Nej kuj yuav tau ntawm lwm haiv neeg uas nrog nej nyob thiab yuav ntawm lawv tej neeg uas yug hauv nej lub tebchaws mas lawv yuav poob ua nej tug. Nej muab tej qhev ntawd ua ntawv kom poob ua nej tub ki li qhev ua lawv li tug mus ib txhis li kuj tau. Nej siv tau lawv ua qhev tiamsis nej tsis txhob quab yuam tsim txom nej cov kwvtij Yixayee. “ ‘Yog tias lwm haiv neeg lossis lwm tus uas nrog nej nyob nplua nuj tuaj thiab nej cov kwvtij uas nrog lawv nyob ho pluag es nws muab nws tus kheej muag rau lwm haiv neeg lossis lwm tus uas nrog nej nyob lossis rau lwm haiv neeg tej kwvtij, mas thaum uas nws muab nws tus kheej muag lawd nws kuj muaj feem txhiv tau rov qab. Nws kwv nws tij txhiv tau rov qab, lossis nws yawg laus nws txiv ntxawm lossis ob tug li tub, lossis nws tej kwvtij txheeb ze txhiv kuj tau, lossis yog nws muaj tuaj nws kuj txhiv tau nws tus kheej. Nws yuav nrog tus uas yuav nws xam saib xyoo uas nws muag nws tus kheej tshuav pes tsawg xyoo li txog xyoo Zoo Siab uas thim txhua yam rov qab. Tus nqe uas tso nws kom dim yuav suav raws li cov niaj xyoo ntawd, yuav xam nqe raws li nqe tub zog rau thaum nws nrog tus tswv nyob. Yog tseem tshuav ntau xyoo nws yuav tsum them rov qab kom txwm cov niaj xyoo uas tseem tshuav ntawd muab xam ua cov nqe uas txhiv nws. Yog tshuav tsis muaj tsawg xyoo yuav txog xyoo Zoo Siab mas kom tus uas muab nws muag nrog tus uas yuav nws xam raws li cov niaj xyoo uas nws tseem yuav ua haujlwm ntawd es them rov qab ua nqe txhiv nws. Cia nws zoo li tus uas ua zog ib xyoos xam ib xyoos nrog tus tswv nyob. Nej tsis txhob pub tus tswv quab yuam tsim txom nws. Yog nws tsis txhiv raws li uas hais no los kuj muab nws thiab nws tej menyuam tso kom dim rau xyoo Zoo Siab uas thim txhua yam rov qab, vim cov Yixayee yog kuv li tub qhe, lawv yog kuv cov tub qhe uas kuv coj tawm hauv Iyi tebchaws los. Kuv yog Yawmsaub, yog nej tus Vajtswv.’ ” “ ‘Nej tsis txhob ua dab mlom rau nej lossis txaug dab mlom txawb cia lossis txhos ncej teev dab lossis txaug dab mlom pob zeb rau hauv nej lub tebchaws rau nej pe, rau qhov kuv yog Yawmsaub yog nej tus Vajtswv. Nej yuav tsum nco so rau kuv hnub Xanpatau thiab saib taus lub chaw pe hawm kuv. Kuv yog Yawmsaub. “ ‘Yog nej ua lub neej raws li kuv tej kab ke thiab mloog kuv tej lus nkaw thiab ua raws nraim, kuv yuav pub nag los raws caij raws nyoog rau nej, thiab lub tebchaws yuav tau qoob thiab tej txiv ntoo hauv teb yuav txi txiv. Lub caij ntaus qoob yuav ntev mus txog lub caij de txiv hmab, thiab lub caij de txiv hmab yuav ntev mus txog lub caij cog qoob, thiab nej yuav tau zaub mov noj tsau npo thiab nyob tso siab lug hauv nej lub tebchaws. Kuv yuav pub kev kaj siab lug rau hauv lub tebchaws, nej yuav tau pw tsis muaj leejtwg ua rau nej ntshai. Kuv yuav tshem tej tsiaj nyaum tawm hauv lub tebchaws thiab hniav ntaj hniav riam yuav tsis hla nej lub tebchaws li lawm. Nej yuav ntiab nej tej yeeb ncuab khiav thiab lawv yuav ntog tuag hniav ntaj hniav riam tag rau ntawm nej xubntiag. Nej tsib lees yuav ntiab tau yeeb ncuab ib puas leej, thiab nej ib puas leej yuav ntiab tau ib vam leej. Nej tej yeeb ncuab yuav ntog tuag hniav ntaj hniav riam tag rau ntawm nej xubntiag. Kuv yuav ua zoo rau nej thiab pub nej muaj tub ki huaj vam coob, thiab kuv yuav tuav rawv tej lus uas kuv cog tseg rau nej. Nej yuav tau noj tej qoob uas sau los cia ntev ntev thiab nej yuav muab tej qoob qub theej thiaj tau chaw rau tej qoob tshiab. Thiab kuv yuav ua kuv lub chaw nyob rau hauv nej nruab nrab thiab kuv lub siab yuav tsis ntxub nej. Kuv yuav nrog nraim nej nyob thiab kuv yuav ua nej tus Vajtswv thiab nej yuav ua kuv haiv neeg. Kuv yog Yawmsaub yog nej tus Vajtswv uas coj nej tawm hauv Iyi tebchaws los kom nej thiaj tsis tau ua lawv qhev. Kuv muab nej tus quab lov pov tseg thiab ua rau nej mus tau kev yiag ntxiag. “ ‘Tiamsis yog nej tsis mloog kuv lus thiab tsis ua raws li tej lus nkaw no huvsi, yog nej tso kuv tej kab ke tseg thiab nej lub siab ntxub kuv tej kevcai nej thiaj tsis yeem ua raws li kuv tej lus nkaw huvsi thiab rhuav kuv tej lus cog tseg, mas kuv yuav ua li no rau nej. Kuv yuav tso kev txhawj kev ntshai, mob phem mob npaws los raug nej ua rau nej qhov muag daj tag thiab ua rau nej txojsia sem zuj zus. Nej yuav cog qoob do do xwb rau qhov nej tej yeeb ncuab yuav muab noj tag. Kuv yuav tsom ntsoov tawm tsam nej, nej yuav swb nej cov yeeb ncuab. Cov uas ntxub nej yuav tau kav nej, twb tsis muaj leejtwg caum nej los nej cia li khiav. Yog ua li no lawm, los nej tseem tsis mloog kuv lus, kuv yuav rov nplawm nej xya npaug dua thiab vim yog tim nej tej kev txhaum. Kuv yuav rhuav tshem nej lub hwjchim uas khav theeb, thiab kuv yuav ua rau nej lub ntuj zoo li hlau, thiab ua rau nej thaj av zoo li tooj liab. Nej yuav nkim zog do do xwb rau qhov nej lub tebchaws yuav tsis tau qoob thiab tej txiv ntoo hauv teb yuav tsis txi txiv. “ ‘Yog nej tseem tawm tsam kuv thiab tsis yeem mloog kuv lus, kuv yuav tso kev txom nyem los raug nej xya npaug raws li nej tej kev txhaum. Kuv yuav tso tsiaj qus los rau hauv nej mas yuav sau nej tej tub ki thiab tom nej tej tsiaj txhu thiab ua rau nej tshuav tsawg tsawg mas nej tej kev thiaj tsis muaj neeg taug. “ ‘Yog qhov uas nplawm no nej tseem tsis tig rov los cuag kuv, nej tseem ua lub neej tawm tsam kuv, mas kuv yuav tawm tsam nej thiab kuv tus kheej yuav nplawm nej xya npaug vim yog tim nej tej kev txhaum. Kuv yuav coj hniav ntaj hniav riam los rau saum nej, yuav pauj kuv tej lus cog tseg. Yog nej sau zog los rau hauv nej tej moos kuv yuav tso mob kis los raug nej thiab nej yuav raug muab cob rau hauv yeeb ncuab txhais tes. Thaum kuv txiav nej tej zaub mov tu nrho lawm, kaum tus pojniam yuav koom tib lub qhov cub ci ncuav thiab yuav muab ncuav luj zuj zus rau nej mas nej noj los yuav tsis tsau. “ ‘Yog ua li no lawm los nej tseem tsis mloog kuv lus, nej tseem ua lub neej tawm tsam kuv, kuv yuav tawm tsam nej npau taws heev, thiab kuv tus kheej yuav nplawm nej xya npaug vim yog tim nej tej kev txhaum. Nej yuav noj nej tej tub li nqaij, thiab noj nej tej ntxhais li nqaij. “ ‘Kuv yuav ua kom nej tej chaw siab teev dab puam tsuaj thiab rhuav nej tej thaj hlawv xyab thiab muab nej tej cev tuag pov rau saum nej tej dab mlom tuag siav. Mas kuv lub siab yuav ntxub nej. Kuv yuav ua rau nej tej moos raug muab tso tseg piam tag thiab ua rau nej tej chaw pe hawm nyob do cuas cia thiab kuv yuav tsis hnia tej pa tsw qab uas nej hlawv xyeem rau kuv lawm. Kuv yuav ua rau lub tebchaws liamsim tag mas nej cov yeeb ncuab uas tuaj nyob rau hauv yuav xav tsis thoob li. Kuv yuav ua rau nej khiav ri sua mus nyob rau hauv ib tsoom tebchaws, kuv yuav rho ntaj raws nej thiab nej lub tebchaws yuav nyob do cuas cia thiab nej tej moos yuav liamsim tag. “ ‘Lub sijhawm uas nej nyob hauv nej cov yeeb ncuab lub tebchaws, nej lub tebchaws yuav muaj Xanpatau tau so npaum li cov sijhawm uas nyob do cuas cia ntawd. Lub tebchaws yuav tau so thiab muaj Xanpatau. Lub tebchaws yuav tau so rau thaum nyob do cuas cia ntawd, yuav tau so tsis thooj li thaum nej tseem nyob hauv lub tebchaw es tsis pub so rau hnub Xanpatau. Nej cov uas tseem tshuav nyob kuv yuav ua rau lub siab ntshai rwg rau hauv cov yeeb ncuab lub tebchaws. Lub suab cua ntsawj nplooj qhuav ya xwb yuav ua rau lawv khiav, thiab lawv yuav khiav yam nkaus li khiav hniav ntaj hniav riam, twb tsis muaj leejtwg caum los lawv yuav ntog tag. Lawv ib leeg yuav dawm ib leeg ntog yam li khiav hniav ntaj hniav riam tiamsis twb tsis muaj leejtwg ntiab, thiab nej yuav tsis muaj zog tiv nej cov yeeb ncuab. Nej yuav tuag tag rau hauv ib tsoom tebchaws, thiab nej cov yeeb ncuab lub tebchaws yuav noj nej. Nej cov uas tseem tshuav nyob los yuav sem zuj zus rau hauv nej cov yeeb ncuab lub tebchaws vim yog tim lawv lub txim, thiab lawv yuav sem zuj zus vim yog tim lawv tej poj koob yawm txwv lub txim thiab. “ ‘Tiamsis yog lawv lees lawv lub txim thiab lees lawv tej poj koob yawm txwv lub txim uas lawv tau fav xeeb rau kuv thiab ua lub neej tawm tsam kuv, es kuv thiaj tawm tsam lawv thiab coj lawv los rau hauv lawv cov yeeb ncuab lub tebchaws, mas thaum lawv txo lawv lub siab phem siab tawv thiab raug lawv lub txim dhau lawm, kuv yuav nco txog kuv tej lus cog tseg rau Yakhauj thiab rau Yiha thiab rau Aplahas, thiab kuv yuav nco txog lub tebchaws ntawd. Tiamsis lub tebchaws yuav raug lawv muab tso tseg thiab yuav muaj Xanpatau tau so rau thaum uas nyob do cuas cia tsis muaj lawv cov neeg nyob hauv. Lawv yuav raug txim rau lawv tej kev txhaum kom tag rau qhov lawv tso kuv tej kevcai tseg thiab lawv lub siab ntxub kuv tej kab ke. Txawm yog li ntawd los xij, thaum lawv nyob hauv lawv cov yeeb ncuab lub tebchaws kuv yuav tsis tso lawv tseg thiab kuv yuav tsis ntxub lawv thiaj tsis muab lawv ua kom puam tsuaj tag nrho thiab tsis rhuav kuv tej lus uas cog tseg rau lawv, rau qhov kuv yog Yawmsaub yog lawv tus Vajtswv. Vim yog saib rau lawv kuv thiaj nco txog tej lus uas cog tseg rau lawv tej poj koob yawm txwv uas kuv coj tawm hauv Iyi tebchaws los tab meeg ib tsoom tebchaws, kom kuv thiaj li tau ua lawv tus Vajtswv. Kuv yog Yawmsaub.’ ” Tej no yog tej kab ke thiab tej kevcai thiab tej lus qhia uas Yawmsaub muab rau cov Yixayee saum lub roob Xinai uas nws qhia rau Mauxe. Yawmsaub hais rau Mauxe tias, “Cia li hais rau cov Yixayee tias, ‘Thaum leejtwg yeem lus tseem ceeb tias nws yuav pub kiag neeg rau Yawmsaub ua Yawmsaub tug, mas yuav xam nqe txhiv li no. Tus txivneej uas hnub nyoog muaj nees nkaum txog rau caum xyoo mas ntaus nqe tsib caug sekhee nyiaj, raws li sekhee uas siv hauv lub chaw pe Yawmsaub. Yog ib tug pojniam mas ntaus nqe peb caug sekhee nyiaj. Yog tus ntawd hnub nyoog muaj tsib xyoos txog nees nkaum xyoo, mas ntaus nqe rau tus tub nees nkaum sekhee nyiaj, thiab tus ntxhais kaum sekhee. Yog tus ntawd hnub nyoog muaj ib hlis txog tsib xyoo mas ntaus nqe rau tus tub tsib sekhee nyiaj thiab ntaus nqe rau tus ntxhais peb sekhee. Yog tus ntawd hnub nyoog muaj rau caum xyoo rov saud yuav ntaus nqe rau tus txivneej kaum tsib sekhee nyiaj thiab rau tus pojniam kaum sekhee. Yog leejtwg pluag pluag them tsis taus raws li nej ntaus nqe lawm, mas yuav coj tus neeg uas muab pub rau Yawmsaub ntawd tuaj cuag tus pov thawj mas tus pov thawj yuav ntaus nqe rau nws raws li tus uas yeem lus them taus. “ ‘Yog nws yeem pub ib yam tsiaj uas neeg txeev pub xyeem rau Yawmsaub, mas txhua yam uas nws muab pub rau Yawmsaub ntawd dawb huv lawm. Nws tsis txhob coj dabtsi tuaj pauv tuaj txauv, muab yam uas zoo pauv yam uas tsis zoo lossis muab yam uas tsis zoo pauv yam uas zoo. Yog nws muab tsiaj txauv li ntawd mas tus uas txauv thiab tus uas raug muab txauv kuj dawb huv ib yam nkaus. Yog nws pub ib tug tsiaj qias tsis huv uas yeej tsis yog yam tsiaj uas pub xyeem rau Yawmsaub, mas yuav coj tus tsiaj ntawd mus cuag tus pov thawj. Mas tus pov thawj yuav ntaus nqe raws li tus tsiaj zoo lossis tsiaj tsis zoo. Tus pov thawj ntaus nqe npaum li cas kuj cia yuav npaum li ntawd. Yog tus tswv xav txhiv tus tsiaj ntawd rov qab nws yuav tsum ntxiv ib feem hauv tsib rau tus nqe uas ntaus lawd. “ ‘Thaum leejtwg cais pub kiag nws lub tsev ua yam uas dawb huv rau Yawmsaub, mas tus pov thawj yuav ntaus nqe raws li lub tsev zoo lossis tsis zoo. Tus pov thawj ntaus nqe npaum li cas kuj cia yuav raws li ntawd. Yog tus uas pub kiag lub tsev ntawd xav txhiv lub tsev rov qab kuj cia nws ntxiv ib feem hauv tsib rau tus nqe uas ntaus lawd mas lub tsev thiaj rov ua nws tug. “ ‘Yog leejtwg muab nws ib thaj teb uas yog nws niam nws txiv qub txeeg qub teg cais pub rau Yawmsaub, mas yuav ntaus nqe rau daim teb ntawd raws li ntim taus noob qoob ntau los tsawg. Yog daim teb ntim tag ib haumaw cov noob qoob mas ntaus nqe tsib caug sekhee nyiaj. Yog nws pub daim teb rau xyoo Zoo Siab uas thim txhua yam rov qab kuj ntaus nqe txwm nkaus li nej hais. Yog nws pub daim teb tom qab xyoo Zoo Siab ntawd kuj cia tus pov thawj xam nqe raws li cov niaj xyoo uas tseem tshuav mus txog xyoo Zoo Siab tom ntej, mas yuav nqes nqe tsis yuav txwm li nej xub hais. Yog tus uas pub daim teb ntawd xav txhiv daim teb rov qab, nws yuav tsum ntxiv ib feem hauv tsib rau tus nqe uas ntaus lawd daim teb thiaj rov ua nws li. Yog nws tsis tau txhiv daim teb lossis yog nws muab daim teb muag rau lwm tus lawm, mas tsis pub nws txhiv li lawm. Daim teb ntawd mas thaum yuav muab tso dawb tseg rau xyoo Zoo Siab uas thim txhua yam rov qab, yuav muab ua daim teb uas dawb huv rau Yawmsaub, zoo li ib daig teb uas muab cais rau Yawmsaub lawm, tus pov thawj yuav ua tswv teb mus li. Yog nws muab daim teb uas nws yuav los cais pub rau Yawmsaub, tsis yog daim uas nws txiv qub txeeg qub teg, tus pov thawj yuav xam daim teb ntawd li nqe mus txog xyoo Zoo Siab, mas hnub ntawd tus tswv teb yuav tsum them nyiaj npaum li uas ntaus nqe cia ua yam uas dawb huv rau Yawmsaub. Thaum txog xyoo Zoo Siab daim teb ntawd poob rov rau tus qub tswv uas muag rau nws vim daim teb ntawd yog tus qub tswv li qub txeeg qub teg. Yuav tsum ntaus nqe rau txhua yam raws li nyiaj sekhee uas siv hauv lub chaw pe Yawmsaub. Nees nkaum kela muaj ib sekhee. “ ‘Thawj tus menyuam tsiaj txhu mas tsis txhob kheev leejtwg muab cais pub kiag rau Yawmsaub rau qhov thawj tug menyuam tsiaj yeej yog Yawmsaub li lawm, tsis hais nyuj los yaj los yeej yog Yawmsaub li. Yog nws pub ib tug tsiaj qias tsis huv ces kom nws them nyiaj yuav rov qab raws li tus nqe uas koj ntaus thiab ntxiv ib feem hauv tsib rau saud. Yog nws tsis txhiv mas muab tus tsiaj ntawd muag raws li tus nqe uas koj ntaus cia lawd. “ ‘Tiamsis yam twg uas yog nws li es nws muab pub kiag rau Yawmsaub lawm tsis hais neeg lossis tsiaj txhu lossis teb uas yog nws niam nws txiv qub txeeg qub teg, mas muag tsis tau thiab txhiv tsis tau li. Rau qhov txhua yam uas muab pub kiag ntawd yog yam uas dawb huv kawg nkaus rau Yawmsaub. Cov neeg uas raug muab cais pub rau Yawmsaub ua kom puam tsuaj tag, mas txhiv tsis tau kiag li, yuav tsum muab cov ntawd tua pov tseg. “ ‘Ib feem hauv kaum tag nrho uas tau hauv lub tebchaws, yog tej qoob loo thiab tej txiv hmab txiv ntoo puavleej yog Yawmsaub li, yog tej uas dawb huv rau Yawmsaub. Yog leejtwg xav txhiv ib feem kaum ntawd ib qho rov rau nws, nws yuav tsum ntxiv ib feem hauv tsib rov saud. Ib feem kaum uas tau hauv tej nyuj tej tshis tej yaj, uas yog ib tug hauv kaum tus uas chaws tus qhev yug tus pas nrig, mas yog tej tsiaj uas dawb huv rau Yawmsaub. Nws tsis txhob xaiv saib yog tus zoo los tsis zoo thiab tsis txhob muab txauv. Yog nws muab txauv mas tus uas coj tuaj txauv thiab tus uas raug muab txauv puavleej dawb huv huvsi lawm txhiv tsis tau.’ ” Tej no yog tej lus nkaw uas Yawmsaub cob rau Mauxe saum lub roob Xinai kom coj los rau cov Yixayee. Txij thaum lawv tawm hauv Iyi tebchaws los mas xyoo uas ob lub ob hlis hnub xiab ib Yawmsaub hais rau Mauxe hauv lub tsev ntaub sib ntsib ntawm tebchaws moj sab qhua Xinai hais tias, “Koj cia li muab ib tsoom pejxeem Yixayee sawvdaws nce npe raws li lawv tej cum thiab raws li lawv tej tsev neeg, suav cov txivneej txhua tus tej npe ib tug zuj zus. Koj thiab Aloo cia li suav cov Yixayee txhua tus uas hnub nyoog muaj nees nkaum xyoo rov saud uas ua tau tub rog, suav ib pab ib pab zuj zus. Yuav tsum muaj txivneej hauv txhua xeem los pab koj ib xeem ib tug, yog tus uas nyias ua thawj hauv nyias cum. Cov uas yuav pab koj tej npe yog li no, hauv xeem Lunpee yog Sede‑aw tus tub Elixu, hauv xeem Xime‑oo yog Xulisadai tus tub Selumi‑ee, hauv xeem Yuda yog Aminada tus tub Nasoo, hauv xeem Ixakha yog Xu‑a tus tub Nethanee, hauv xeem Xenpuloo yog Heloo tus tub Elia, hauv Yauxej cov tub mas yog hauv xeem Efa‑i yog Amihu tus tub Elisama thiab hauv xeem Manaxe yog Pedaxu tus tub Kamali‑ee, hauv xeem Npeeyamee yog Kide‑auni tus tub Anpidas, hauv xeem Daj yog Amisadai tus tub Ahiyexaw, hauv xeem Asaw yog Aukhas tus tub Paki‑ee, hauv xeem Kas yog De‑u‑ee tus tub Eliyaxa, hauv xeem Nathali yog Ena tus tub Ahila.” Cov no yog xaiv hauv cov pejxeem los, yog cov uas nyias ua hlob hauv nyias xeem thiab nyias ua thawj hauv nyias cum hauv cov Yixayee. Mauxe thiab Aloo coj cov neeg uas hais npe no los, mas lub ob hlis hnub xiab ib lawv hu cov pejxeem sawvdaws tuaj txoos ua ke, ces lawv nce npe raws li lawv tej cum raws li lawv tej tsev neeg, yog sau txhua tus uas hnub nyoog muaj nees nkaum xyoo rov saud tej npe ib leeg zuj zus, raws li Yawmsaub hais kom Mauxe ua lawd. Mauxe thiaj li suav lawv ntawm tebchaws moj sab qhua Xinai. Lunpee uas yog Yixayee tus tub hlob caj ces raws li lawv tej cum raws li lawv tej tsev neeg, raws li cov txivneej tej npe uas suav tau ib leeg zuj zus txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Lunpee muaj 46,500 leej. Xime‑oo caj ces raws li lawv tej cum raws li lawv tej tsev neeg, txhua tus uas lawv suav raws li cov txivneej tej npe uas suav tau ib leeg zuj zus, txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Xime‑oo muaj 59,300 leej. Kas caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Kas muaj 45,650 leej. Yuda caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Yuda muaj 74,600 leej. Ixakha caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Ixakha muaj 54,400 leej. Xenpuloo caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Xenpuloo muaj 57,400 leej. Yauxej caj ces uas yog Efa‑i caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Efa‑i muaj 40,500 leej. Manaxe caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Manaxe muaj 32,200 leej. Npeeyamee caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Npeeyamee muaj 35,400 leej. Daj caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Daj muaj 62,700 leej. Asaw caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Asaw muaj 41,500 leej. Nathali caj ces raws li lawv tej cum raws li lawv tej tsev neeg, raws li tej npe uas suav tau txhua tus uas hnub nyoog muaj nees nkaum xyoo rov saud uas ua tau tub rog, mas huvsi xeem Nathali muaj 53,400 leej. Cov neeg no yog cov uas Mauxe thiab Aloo thiab kaum ob tug uas ua hlob sawv cev txhua xeem hauv cov Yixayee tau suav cia. Yog li no cov Yixayee sawvdaws uas suav tau raws li lawv tej tsev neeg uas hnub nyoog muaj nees nkaum xyoo rov saud, yog txhua tus txivneej hauv cov Yixayee uas ua tau tub rog, mas huvsi muaj 603,550 leej. Tiamsis cov Levi tsis raug suav raws li lawv tej cum rau hauv. Rau qhov Yawmsaub hais rau Mauxe tias, “Xeem Levi mas koj tsis txhob suav thiab tsis txhob muab nce npe rau hauv cov Yixayee. Koj tsuas tsa cov Levi los saib Yawmsaub lub tsev ntaub uas muaj Yawmsaub tej lus thiab saib txhua yam twj uas siv thiab txhua yam uas nyob hauv lub tsev ntaub. Lawv yuav tsum phaj nqa Yawmsaub lub tsev ntaub thiab tej twj uas siv thiab tu thiab saib lub tsev ntaub thiab ua tsev ntaub nyob puag ncig Yawmsaub lub tsev ntaub. Thaum yuav tshais Yawmsaub lub tsev ntaub mus, cov Levi yuav muab lauj thiab thaum yuav tsa Yawmsaub lub tsev ntaub cov Levi yuav tsa. Yog lwm tus txav ze mas tus ntawd yuav raug muab tua. Cov Yixayee nyias yuav tsa nyias tsev ntaub nrog nyias cum nyob, nyias nyob nyias ib zog thiab nyias nyob ntawm nyias tus chij. Tiamsis cov Levi yuav tsa lawv li tsev ntaub nyob puag ncig Yawmsaub lub tsev ntaub uas muaj Yawmsaub tej lus, xwv txojkev chim thiaj tsis poob rau ib tsoom pejxeem Yixayee. Cov Levi yuav tu thiab saib Yawmsaub lub tsev ntaub uas muaj Yawmsaub tej lus.” Cov Yixayee kuj ua raws li ntawd. Lawv ua raws li uas Yawmsaub hais rau Mauxe lawd txhua yam huvsi. Yawmsaub hais rau Mauxe thiab Aloo tias, “Cov Yixayee yuav tsum tsa tsev ntaub nyias nyob raws nyias tus chij loj thiab nyob raws nyias xeem tus chij. Txhua lub tsev ntaub yuav tsum tig qhov rooj ncaj rau lub tsev ntaub sib ntsib.” Cov uas yuav tsa tsev ntaub rau sab hnub tuaj yog cov uas raws Yuda lub zos tus chij mas nyias nrog nyias pab nyob. Aminada tus tub Nasoo ua xeem Yuda tus thawj. Nws cov pejxeem uas suav cia no muaj 74,600 leej. Xeem Ixakha yuav tsa tsev ntaub nyob txuas mus, Xu‑a tus tub Nethanee ua xeem Ixakha tus thawj. Nws cov pejxeem uas suav cia no muaj 54,400 leej. Xeem Xenpuloo yuav nyob txuas mus, Heloo tus tub Elia ua xeem Xenpuloo tus thawj. Nws cov pejxeem uas suav cia no muaj 57,400 leej. Yuda lub zos mas suav txhua pab uas nyob hauv huvsi muaj 186,400 leej. Thaum sawv kev mus mas lawv yuav ua ntej mus. Lunpee lub zos tus chij yuav nyob rau sab nrad, mas nyias nrog nyias pab nyob. Sede‑aw tus tub Elixu ua xeem Lunpee tus thawj. Nws cov pejxeem uas suav cia no muaj 46,500 leej. Xeem Xime‑oo yuav tsa tsev ntaub nyob txuas mus, Xulisadai tus tub Selumi‑ee ua xeem Xime‑oo tus thawj. Nws cov pejxeem uas suav cia no muaj 59,300 leej. Xeem Kas yuav nyob txuas mus, Le‑u‑ee tus tub Eliyaxa ua xeem Kas tus thawj. Nws cov pejxeem uas suav cia no muaj 45,650 leej. Lunpee lub zos mas suav txhua pab uas nyob hauv huvsi muaj 151,450 leej. Thaum sawv kev mus mas lawv yuav ua pab uas ob. Cov Levi yuav phaj lub tsev ntaub sib ntsib raws lawv qab mus rau nruab nrab. Lawv nyias mus raws li nyias nyob, nyias raws nyias tus chij mus. Efa‑i lub zos tus chij yuav tsum nyob rau sab hnub poob mas nyias nrog nyias pab nyob, Amihu tus tub Elisama ua xeem Efa‑i tus thawj. Nws cov pejxeem uas suav cia no muaj 40,500 leej. Xeem Manaxe yuav nyob txuas mus, Pedaxu tus tub Kamali‑ee ua xeem Manaxe tus thawj. Nws cov pejxeem uas suav cia no muaj 32,200 leej. Xeem Npeeyamee yuav nyob txuas mus, Kide‑auni tus tub Anpidas ua xeem Npeeyamee tus thawj. Nws cov pejxeem uas suav cia no muaj 35,400 leej. Efa‑i lub zos mas suav txhua pab uas nyob hauv huvsi muaj 108,100 leej. Thaum sawv kev mus mas lawv yuav ua pab uas peb. Daj lub zos tus chij yuav nyob rau sab ped, mas nyias nrog nyias pab nyob, Amisadai tus tub Ahiyexaw ua xeem Daj tus thawj. Nws cov pejxeem uas suav cia no muaj 62,700 leej. Xeem Asaw yuav tsa tsev ntaub nyob txuas mus, Aukhas tus tub Paki‑ee ua xeem Asaw tus thawj. Nws cov pejxeem uas suav cia no muaj 41,500 leej. Xeem Nathali yuav nyob txuas mus, Ena tus tub Ahila ua xeem Nathali tus thawj. Nws cov pejxeem uas suav cia no muaj 53,400 leej. Daj lub zos mas suav huvsi muaj 157,600 leej. Thaum sawv kev mus lawv yuav ua pab uas mus tom qab kiag, nyias raws nyias tus chij mus. Cov neeg no yog cov Yixayee uas suav raws li tej xeem. Cov zos huvsi uas suav raws li tej pab muaj 603,550 leej. Tiamsis tsis suav cov Levi rau hauv cov Yixayee, raws li Yawmsaub hais rau Mauxe lawd. Cov Yixayee ua raws li ntawd. Lawv ua zos nyias nyob raws nyias tus chij thiab ho sawv kev mus nyias nrog nyias xeem nyias nrog nyias cum ua ke mus, raws li txhua yam uas Yawmsaub hais rau Mauxe lawd. Ntawm no mus yog Aloo thiab Mauxe caj ces, yog ncua sijhawm uas Yawmsaub nrog Mauxe hais lus saum lub roob Xinai. Aloo cov tub li npe muaj li no, Nada yog tus tub hlob, thiab Anpihu, Ele‑axa thiab Ithama. Cov no yog Aloo cov tub uas muab roj ywg tsa ua pov thawj tej npe, yog cov uas nws tsa los ua pov thawj li haujlwm. Tiamsis Nada thiab Anpihu tuag rau ntawm Yawmsaub lub xubntiag rau thaum uas ob tug muab tej hluavtaws uas tsis dawb huv coj los xyeem ntawm Yawmsaub xubntiag hauv tebchaws moj sab qhua Xinai, thiab ob tug kuj tsis muaj menyuam. Vim li no Ele‑axa thiab Ithama thiaj ua pov thawj tes haujlwm rau thaum Aloo uas yog ob tug txiv tseem muaj txojsia nyob. Yawmsaub hais rau Mauxe tias, “Cia li coj xeem Levi los ze thiab cia lawv nyob ntawm tus pov thawj Aloo xubntiag kom lawv pab Aloo ua haujlwm. Lawv yuav ua haujlwm pab Aloo thiab ua haujlwm rau cov pejxeem sawvdaws ntawm lub tsev ntaub sib ntsib rau thaum uas lawv ua koom ntawm Yawmsaub lub tsev ntaub. Lawv yuav tu thiab saib tej twj siv hauv lub tsev ntaub sib ntsib txhua yam huvsi thiab yuav ua haujlwm rau cov Yixayee rau thaum lawv pab ua koom ntawm Yawmsaub lub tsev ntaub. Cia li muab cov Levi pub rau Aloo thiab nws cov tub, lawv yog cov uas muab pub kiag rau Aloo hauv cov Yixayee. Cia li tsa Aloo thiab nws cov tub ua pov thawj tes haujlwm. Tiamsis yog lwm tus txav los ze mas nws yuav raug muab tua pov tseg.” Yawmsaub hais rau Mauxe tias, “Saib maj, kuv twb muab cov Levi rho hauv cov Yixayee los theej cov Yixayee txhua tus tub hlob uas yug hauv plab los. Cov Levi yuav tsum ua kuv tug. Rau qhov txhua tus tub hlob yeej yog kuv tug. Hnub uas kuv tau tua tej tub hlob huvsi hauv Iyi tebchaws ntawd kuv twb cais cov Yixayee txhua tus tub hlob tsis hais neeg li thiab tsiaj txhu li kom dawb huv rau kuv. Lawv yeej yuav ua kuv tug, kuv yog Yawmsaub.” Yawmsaub hais rau Mauxe hauv tebchaws moj sab qhua Xinai tias, “Cia li suav cov Levi raws li lawv tej cum thiab raws li lawv tej tsev neeg. Koj yuav tsum suav txhua tus txivneej uas hnub nyoog muaj ib hlis rov saud.” Mauxe kuj suav lawv raws li uas Yawmsaub hais kom nws ua. No yog Levi tej tub li npe, Kwsoo, Khauha thiab Melali. No yog Kwsoo tej tub li npe raws li lawv cum, yog Lini thiab Sime‑i. Khauha cov tub raws li lawv cum yog Alav, Ixaha, Heploo thiab Uxi‑ee. Melali cov tub raws li lawv cum yog Mali thiab Musi. Cov no yog cov Levi tsev neeg raws li lawv cum. Kwsoo ceg muaj cum Lini thiab cum Sime‑i, ob cum no yog Kwsoo ceg. Suav tag nrho cov txivneej uas hnub nyoog muaj ib hlis rov saud huvsi mas muaj 7,500 leej. Kwsoo ceg tej cum ntawd yuav tsa tsev ntaub rau ntawm Yawmsaub lub tsev ntaub sab hnub poob, mas La‑ee tus tub Eliyaxa ua Kwsoo ceg tus thawj. Tej uas Kwsoo ceg yuav tsum saib ntawm lub tsev ntaub sib ntsib yog Yawmsaub lub tsev ntaub, yog lub tsev ntaub thiab tej daim ntaub vov thiab daim ntaub ua qhov rooj tsev ntaub sib ntsib, thiab tej daim ntaub xov laj kab thiab daim ntaub ua rooj vag uas xov puag ncig Yawmsaub lub tsev ntaub thiab lub thaj, thiab tej hlua thiab txhua yam uas siv rau tej no. Khauha ceg muaj cum Alav thiab cum Ixaha thiab cum Heploo thiab cum Uxi‑ee. Cov cum no yog Khauha ceg. Suav tag nrho cov txivneej uas hnub nyoog muaj ib hlis rov saud huvsi mas muaj 8,600 leej uas saib haujlwm ntawm lub chaw pe Yawmsaub. Khauha cov tub li cum no yuav tsa tsev ntaub rau ntawm Yawmsaub lub tsev ntaub sab nrad, mas Uxi‑ee tus tub Elixafa ua Khauha ceg tej cum tus thawj. Tej uas lawv yuav tsum saib yog lub phij xab, lub rooj, lub teeb, ob lub thaj, tej twj siv uas cov pov thawj siv hauv lub tsev pe Yawmsaub thiab daim ntaub uas thaiv, thiab txhua yam uas siv rau tej no. Pov thawj Aloo tus tub Ele‑axa yuav ua tus thawj uas saib cov thawj hauv cov Levi ntawd thiab saib cov uas tu lub tsev pe Yawmsaub. Melali ceg muaj cum Mali thiab cum Musi, ob cum no yog Melali ceg. Suav cov txivneej tag nrho huvsi uas hnub nyoog muaj ib hlis rov saud huvsi mas muaj 6,200 leej. Anpiha‑i tus tub Xuli‑ee ua Melali ceg tej cum tus thawj. Lawv yuav tsa tsev ntaub rau ntawm Yawmsaub lub tsev ntaub sab ped. Tej haujlwm uas muab rau Melali ceg ua yog saib xyuas tej txiag tab ntawm Yawmsaub lub tsev ntaub, tej las, tej ncej, tej taw tiag ncej thiab tej cuab yeej cuab tam thiab txhua yam uas siv rau tej no, thiab tej ncej laj kab uas xov puag ncig, tej taw tiag ncej, tej tswg thiab tej hlua. Cov uas yuav tsa tsev ntaub ncaj rau ntawm Yawmsaub lub tsev ntaub lub qhov rooj uas yog sab hnub tuaj mas yog Mauxe thiab Aloo thiab Aloo cov tub. Lawv li haujlwm yog saib xyuas tej kevcai hauv lub tsev pe Yawmsaub, yog saib xyuas txhua yam haujlwm uas yuav ua rau cov Yixayee. Yog lwm tus txav los ze mas yuav raug muab tua pov tseg. Cov neeg uas suav rau hauv cov Levi uas Mauxe thiab Aloo tau suav raws li Yawmsaub hais mas cov txivneej raws li lawv tej tsev neeg txhua tus uas hnub nyoog muaj ib hlis rov saud huvsi muaj 22,000 leej. Yawmsaub hais rau Mauxe tias, “Cia li suav cov Yixayee tej tub hlob txhua tus uas hnub nyoog muaj ib hlis rov saud mas muab nce npe cia huvsi. Koj yuav tsum muab cov Levi rho los rau kuv theej cov Yixayee txhua tus tub hlob. Kuv yog Yawmsaub. Thiab yuav muab cov Levi tej tsiaj los theej cov Yixayee thawj tug menyuam tsiaj txhua tus huvsi.” Yog li no Mauxe thiaj suav cov Yixayee txhua tus tub hlob, raws li Yawmsaub kom Mauxe ua lawd. Cov tub hlob uas suav tau raws li tej npe uas hnub nyoog muaj ib hlis rov saud huvsi muaj 22,273 leeg. Yawmsaub hais rau Mauxe tias, “Cia li muab cov Levi los theej cov Yixayee tej tub hlob huvsi, thiab muab cov Levi tej tsiaj theej cov Yixayee tej tsiaj. Cov Levi yuav yog kuv tug, kuv yog Yawmsaub. Qhov uas yuav txhiv cov Yixayee tej tub hlob 273 leeg uas twb yog tshaj cov txivneej Levi lawm, mas yuav sau ib leeg tsib sekhee nyiaj raws li tej sekhee uas siv hauv lub chaw pe Yawmsaub, ib sekhee muaj nees nkaum kela, mas koj yuav sau tej nyiaj ntawd cia, muab cov nyiaj uas txhiv tej tub hlob uas tshaj ntawd pub rau Aloo thiab nws cov tub.” Mauxe thiaj sau tej nyiaj uas txhiv ntawm tej tub hlob uas tshaj cov uas cov Levi twb txhiv lawm, yog sau cov Yixayee tej tub hlob li nyiaj, mas huvsi muaj 1,365 sekhee nyiaj raws li tej sekhee uas siv hauv lub chaw pe Yawmsaub, thiab Mauxe muab cov nyiaj txhiv ntawd rau Aloo thiab Aloo cov tub raws li Yawmsaub tej lus uas nws kom Mauxe ua. Yawmsaub hais rau Mauxe thiab Aloo tias, “Cia li muab Khauha ceg uas yog xeem Levi nce npe raws li lawv tej cum thiab raws li lawv tej tsev neeg, nce npe cov uas hnub nyoog muaj peb caug xyoo txog tsib caug xyoo, uas txawj ua haujlwm es yuav ua tau haujlwm ntawm lub tsev ntaub sib ntsib. No yog tej haujlwm uas Khauha ceg ua ntawm lub tsev ntaub sib ntsib, yog saib tej yam uas dawb huv kawg nkaus. “Thaum yuav tshais chaw mus mas Aloo thiab nws cov tub yuav nkag mus mas yuav rho daim ntaub uas thaiv coj los kauv lub phij xab uas ntim Yawmsaub tej lus, thiab lawv yuav muab tawv ntshuab hiavtxwv kauv thiab muab ib daim ntaub xiav kauv tuaj txheej saud mas ntxig las kwv. Thiab lawv yuav muab ib daim ntaub xiav pua saum lub rooj uas txawb ncuav rau ntawm Yawmsaub xubntiag thiab muab tej tais pliab tais ntim uas rau hmoov tshuaj tsw qab, thiab tais phaj thiab tej lam hwj uas hliv cawv txiv hmab xyeem txawb rau saud, thiab muab cov ncuav uas niaj hnub xyeem ib txhis li tso rau saud, mas yuav muab ib daim ntaub liab los kauv thiab muab tawv ntshuab hiavtxwv los kauv rau saud thiab ntxig tej las kwv. Lawv yuav muab ib daim ntaub xiav los kauv tus kav teeb thiab tej teeb, tej rab txiab uas txiav teeb xeeb thiab tej phaj pliab thiab tej lam hwj roj sam teeb, thiab yuav muab tawv ntshuab hiavtxwv qhwv lub teeb thiab tej twj uas siv huvsi thiab muab txawb rau saum lub txaj kwv. Lawv yuav muab ib daim ntaub xiav kauv lub thaj kub thiab muab tawv ntshuab hiavtxwv los kauv es ntxig las kwv. Lawv yuav muab ib daim ntaub xiav qhwv tej twj uas siv ua haujlwm rau hauv lub tsev pe Yawmsaub huvsi thiab muab tawv ntshuab hiavtxwv los kauv thiab muab txawb rau saum lub txaj kwv. Lawv yuav muab cov tshauv ntawm lub thaj yawm pov tseg thiab muab ib daim ntaub tsamxem kauv lub thaj. Lawv yuav muab tej twj uas siv ntawm lub thaj txawb rau saud, yog tej uas siv ua haujlwm, yog tej yias rau ncaig taws, tej nqe lauj nqe nqaij, tej duav phuaj, thiab tej phaj, yog txhua yam twj uas siv ntawm lub thaj. Lawv yuav muab tawv ntshuab hiavtxwv los kauv huvsi thiab ntxig las kwv. Thaum Aloo thiab nws cov tub kauv lub tsev pe Yawmsaub thiab tej twj uas siv hauv lub tsev pe Yawmsaub huvsi tag lawd mas thaum uas lawv yuav sawv kev mus ces Khauha ceg yuav los kwv tej no, tiamsis lawv kov tsis nyog tej uas dawb huv no li nyob tsam ces lawv ho tuag. Tej no yog tej uas nyob hauv lub tsev ntaub sib ntsib mas Khauha ceg yuav tsum kwv. “Pov thawj Aloo tus tub Ele‑axa yuav tsum saib xyuas tej roj uas sam lub teeb thiab tej hmoov tshuaj tsw qab thiab tej uas niaj hnub xyeem ua kevcai xyeem qoob loo thiab tej roj uas siv ua kevcai, thiab nws yuav saib xyuas tag nrho Yawmsaub lub tsev ntaub thiab txhua yam uas nyob hauv, yog lub tsev pe Yawmsaub thiab tej twj uas siv rau hauv.” Yawmsaub hais rau Mauxe thiab Aloo tias, “Tsis txhob cia Khauha ceg tej cum raug kev puam tsuaj tag hauv cov Levi mus, tiamsis neb yuav tsum ua li no kom lawv thiaj muaj txojsia nyob thiab tsis tuag rau lub sijhawm uas lawv txav los ze tej qhov txhia chaw dawb huv kawg nkaus no. Aloo thiab nws cov tub yuav nkag mus feeb haujlwm feeb nra rau lawv, tiamsim tsis txhob kheev lawv nkag mus xauj tej uas dawb huv txawm yog tib ntsais muag xwb los lawv yuav tuag li.” Yawmsaub hais rau Mauxe tias, “Cia li suav Kwsoo ceg nce npe raws li lawv tej cum thiab raws li lawv tsev neeg. Koj yuav suav cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib. No yog Kwsoo ceg tej cum li haujlwm, yog pab teg pab taw thiab kwv nra. Lawv yuav thauj tej ntaub uas ua Yawmsaub lub tsev ntaub, thiab lub tsev ntaub sib ntsib thiab daim ntaub uas vov thiab daim tawv ntshuab hiavtxwv uas vov txheej saud thiab daim ntaub uas ua qhov rooj tsev ntaub sib ntsib, thiab tej ntaub uas xov laj kab puag ncig Yawmsaub lub tsev ntaub thiab lub thaj, thiab daim ntaub ua rooj vag, thiab tej hlua thiab tej twj uas siv huvsi. Lawv yuav ua txhua yam haujlwm uas ntsig txog tej no. Txhua yam haujlwm uas Kwsoo ceg ua mas Aloo thiab Aloo cov tub feeb rau lawv ua thiab lawv thauj. Koj yuav tsum qhia txhua yam uas yog lawv li feem thauj rau lawv thauj. No yog tej haujlwm uas Kwsoo ceg tej cum ua ntawm lub tsev ntaub sib ntsib. Pov thawj Aloo tus tub Ithama ua tus saib xyuas lawv tej haujlwm. “Cia li suav Melali ceg raws li lawv tej cum thiab raws li lawv tej tsev neeg. Koj yuav suav cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib. No yog tej uas lawv yuav tsum thauj, yog lawv tej haujlwm rau hauv lub tsev ntaub sib ntsib, mas yog tej txiag tab xov lub tsev ntaub, tej las, tej ncej thiab tej taw ncej, thiab tej ncej laj kab uas xov puag ncig thiab tej taw tiag ncej, tej tswg, tej hlua thiab tej twj siv thiab txhua yam uas siv. Koj yuav tsum feeb haujlwm qhia txhua yam rau lawv thauj. No yog tej haujlwm uas Melali ceg tej cum ua, yog txhua yam haujlwm uas lawv ua ntawm lub tsev ntaub sib ntsib, pov thawj Aloo tus tub Ithama yog tus uas kom ua tej haujlwm ntawd.” Mauxe thiab Aloo thiab cov uas ua hlob hauv cov pejxeem txawm suav Khauha ceg tej cum raws li lawv tej cum thiab raws li lawv tej tsev neeg, suav cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib, mas suav tej cum ntawd huvsi muaj 2,750 leej. No yog cov uas suav tau hauv Khauha ceg tej cum, yog txhua tus uas ua haujlwm ntawm lub tsev ntaub sib ntsib uas Mauxe thiab Aloo tau suav raws li Yawmsaub hais kom Mauxe ua lawd. Cov neeg hauv Kwsoo ceg raws li lawv tej cum thiab raws li lawv tej tsev neeg, cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib, mas suav raws li tej cum thiab raws li tej tsev neeg huvsi muaj 2,630 leej. No yog Kwsoo ceg tej cum, yog txhua tus uas ua haujlwm ntawm lub tsev ntaub sib ntsib uas Mauxe thiab Aloo tau suav raws li Yawmsaub hais kom Mauxe ua lawd. Cov neeg hauv Melali ceg raws li lawv tej cum thiab raws li lawv tej tsev neeg cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib, mas suav tej cum huvsi muaj 3,200 leej. No yog cov uas suav hauv Melali cov tub tej cum uas Mauxe thiab Aloo tau suav raws li Yawmsaub hais rau Mauxe lawd. Txhua tus uas suav tau hauv cov Levi, uas Mauxe thiab Aloo thiab cov uas ua hlob hauv cov Yixayee tau suav raws li tej cum thiab raws li tej tsev neeg, cov uas hnub nyoog muaj peb caug xyoo txog tsib caug xyoo, txhua tus uas txawj ua haujlwm es yuav ua tau haujlwm thiab kwv tau nra rau hauv lub tsev ntaub sib ntsib, mas cov uas suav tau ntawd muaj 8,580 leej. Lawv raug tsa ua haujlwm raws li Yawmsaub tau hais rau Mauxe lawd, txhua tus nyias ua nyias haujlwm thiab nyias kwv nyias nra. Yog li no Mauxe thiaj tau suav lawv raws li Yawmsaub hais kom Mauxe ua lawd. Yawmsaub hais rau Mauxe tias, “Cia li hais rau cov Yixayee kom lawv muab txhua tus uas mob lig mob ruas thiab txhua tus uas muaj kua ntws thiab txhua tus uas qias tsis huv vim kov tej cev tuag ntiab kom tawm hauv lub zos mus. Txawm yog txivneej pojniam los koj yuav muab ntiab kom tawm hauv lub zos mus, xwv thiaj tsis puas tsuas lawv lub zos uas kuv nyob hauv lawv nruab nrab qias tsis huv.” Cov Yixayee kuj ua li ntawd thiaj ntiab kom lawv tawm hauv lub zos mus. Yawmsaub hais li cas rau Mauxe cov Yixayee kuj ua raws nraim li ntawd. Yawmsaub hais rau Mauxe tias, “Cia li hais rau cov Yixayee tias, thaum txivneej los xij pojniam los xij ua txhaum ib yam dabtsi raws li neeg pheej ua, uas yog ua tsis ncaj rau Yawmsaub, mas nws ua txhaum muaj txim. Tus ntawd yuav tsum lees tej kev txhaum uas nws tau ua thiab nws yuav tsum thim kom txwm nkaus li qub thiab ntxiv ib feem tsib rau tus uas nws tau ua txhaum ntawd. Yog tus ntawd tsis muaj kwvtij uas yuav txais tej uas thim rov los ntawd, kuj muab tej uas thim ntawd xyeem rau Yawmsaub es pub rau tus pov thawj nrog tus txiv yaj uas ntxuav kev txhaum xyeem ua kevcai ntxuav nws kev txhaum ua ke. Txhua yam dawb huv uas cov Yixayee coj los xyeem es pub rau tus pov thawj mas yuav poob ua cov pov thawj li feem. Tej dawb huv uas cov pejxeem pub yog cov pejxeem li feem, tiamsis txhua yam uas lawv xyeem pub rau cov pov thawj lawm yog cov pov thawj li feem.” Yawmsaub hais rau Mauxe tias, “Cia li hais rau cov Yixayee tias, ‘Yog leejtwg tus pojniam yuam kev mus ua plees ua yi es muaj lwm tus txivneej tuaj nrog tus pojniam ntawd pw ua ke tiamsis tus txiv tsis pom, txawm yog nws ua phem ua qias lawm es tsis muaj leejtwg paub thiab tsis muaj leejtwg ua tau timkhawv vim ntes tsis tau ntawm chaw, ces lub niag siab khib los tshoov tus txiv nws thiaj li khib siab heev, nws tus pojniam ua txhaum thiab tsis ua los nws thiaj li khib, cia tus txiv ntawd coj nws tus pojniam mus cuag tus pov thawj thiab coj tej uas yuav xyeem ua kevcai rau nws pojniam mus thiab, yog ib feem kaum hauv ib efa hmoov qeb. Nws tsis txhob hliv roj thiab muab roj ntoos tsw qab tso rau saum cov hmoov ntawd vim yog tej uas ua kevcai xyeem qoob loo daws kev sib khib, yog xyeem ua kevcai nco kom nco tau tej kev txhaum. “ ‘Tus pov thawj yuav coj tus pojniam los nyob rau ntawm Yawmsaub xubntiag, mas tus pov thawj yuav muab cov dej dawb huv uas nyob hauv tais av thiab muab mentsis hmoov av hauv Yawmsaub lub tsev ntaub tso rau hauv cov dej ntawd. Tus pov thawj yuav coj tus pojniam los nyob ntawm Yawmsaub xubntiag thiab daws txoj hlua uas pav plaubhau thiab muab tej uas xyeem ua kevcai nco tso rau hauv tus pojniam ntawd txhais tes, yog tej uas ua kevcai xyeem qoob loo daws kev sib khib. Mas tus pov thawj yuav nqa cov dej iab dej daw uas tsawm foom ntawd hauv nws txhais tes. Thiab tus pov thawj yuav kom tus pojniam ntawd twv hais tias, “Yog tsis muaj tus txivneej twg nrog koj pw lossis koj tsis tau ntxeev siab mus ua phem ua qias rau thaum koj tseem nyob hauv koj tus txiv kev tswjhwm, kuj cia koj dim cov dej iab dej daw uas tsawm foom no. Tiamsis yog koj tau yuam kev rau thaum koj tseem nyob hauv koj tus txiv kev tswjhwm mus ua phem ua qias es muaj dua lwm tus uas tsis yog koj txiv nrog koj pw ua ke,” (mas cia tus pov thawj coj tus pojniam ntawd hais tej lus tsawm foom thiab hais rau tus pojniam tias) “Thov Yawmsaub ua kom koj raug lus tsawm foom thiab thov cia koj lub npe ua ib lo lus tsawm foom rau hauv koj haiv neeg rau thaum Yawmsaub ua rau koj ncej qab qhuav thiab ua rau koj lub plab zais. Thov kom cov dej uas tsawm foom no nkag rau hauv koj lub cev ua kom koj lub plab zais thiab ua rau koj ncej qab qhuav.” Mas tus pojniam ntawd yuav tsum hais tias “Amee, Amee.” “ ‘Mas tus pov thawj yuav sau tej lus tsawm foom no rau hauv ntawv thiab muab cov npe ntawv ntawd so ntxuav rau hauv tais dej iab dej daw, thiab kom tus pojniam ntawd haus cov dej iab dej daw uas tsawm foom mas cov dej uas tsawm foom ntawd yuav nkag rau hauv nws lub cev ua rau nws mob kawg li. Ces tus pov thawj yuav muab tej hmoov uas ua kevcai xyeem qoob loo daws kev sib khib hauv tus pojniam txhais tes cev xyeem ntawm Yawmsaub xubntiag thiab coj mus rau ntawm lub thaj. Tus pov thawj yuav tsuab ib taus hmoov uas xyeem ntawd ua lub chaw rau Yawmsaub nco ntsoov thiab muab hlawv rau saum lub thaj thiab kom tus pojniam haus cov dej ntawd. Thaum kom nws haus cov dej ntawd lawd, mas yog nws tau ua phem ua qias mus deev hluas nraug lawm mas cov dej uas tsawm foom ntawd yuav nkag rau hauv nws lub cev ua rau nws mob heev thiab nws lub plab yuav zais thiab nws ncej qab yuav qhuav. Ces tus pojniam lub npe yuav ua ib lo lus tsawm foom rau hauv nws haiv neeg. Tiamsis yog tus pojniam ntawd tsis tau ua phem ua qias nws yeej dawb huv mas nws yuav dim thiab yuav xeeb taus menyuam. “ ‘No yog tej kevcai ntsig txog kev sib khib, thaum tus pojniam tseem nyob hauv nws tus txiv kev tswjhwm es tau yuam kev ua phem ua qias, lossis thaum lub siab khib tshoov tus txiv, nws khib nws pojniam heev. Nws yuav coj nws tus pojniam nyob rau ntawm Yawmsaub xubntiag, mas tus pov thawj yuav ua rau tus pojniam raws li kevcai no txhua qhov huvsi. Tus txiv yuav dim kev txhaum tiamsis tus pojniam yuav ris nws lub txim.’ ” Yawmsaub hais rau Mauxe tias, “Koj cia li hais rau cov Yixayee tias, ‘Thaum tus txivneej twg lossis tus pojniam twg tau cog lus tawv tseg cia, yog cog lus ua Naxi muab nws tus kheej cais pub rau Yawmsaub, nws yuav tsum caiv cawv txiv hmab thiab cawv ntxwg. Nws tsis txhob haus tej dej qaub uas muab cawv txiv hmab lossis cawv ntxwg los ua, thiab tsis txhob haus kua txiv hmab lossis noj cov txiv hmab tsis hais cov nyoos los cov qhuav. Lub sijhawm uas nws muab nws tus kheej cais ntawd, nws tsis txhob noj tsob txiv hmab ib yam dabtsi, txawm yog lub noob txiv lossis daim tawv txiv kuj tsis txhob noj. “ ‘Lub sijhawm uas nws cog lus tseg cais nws tus kheej ntawd, tsis txhob kheev rab chais los nphav nws taubhau. Nws yuav tsum dawb huv mus txog thaum tag lub sijhawm uas teem cia cais nws tus kheej rau Yawmsaub. Nws yuav tsum tseg nws plaubhau ntev. “ ‘Lub sijhawm uas nws cais nws tus kheej rau Yawmsaub ntawd, nws tsis txhob mus ze tej cev tuag. Txawm yog nws niam nws txiv nws kwvtij nkauj muam tuag los nws tsis txhob ua rau nws qias tsis huv rau qhov lub cim uas nws muab nws cais rau Vajtswv nyob saum nws taubhau. Tag lub sijhawm uas nws cais nws tus kheej ntawd yog nws dawb huv rau Yawmsaub. “ ‘Yog muaj neeg cia li tuag kiag ze nws tamsid mas ua rau nws lub taubhau uas dawb huv lawm qias tsis huv, ces puv xya hnub nws yuav tsum chais nws taubhau rau hnub uas ua kevcai ntxuav. Hnub uas yim nws yuav coj ob tug nquab taug lossis ob tug rhaws nquab nyeg mus rau tus pov thawj ntawm lub qhov rooj tsev ntaub sib ntsib. Tus pov thawj yuav muab ib tug xyeem ua kevcai daws txim muab ib tug xyeem ua kevcai hlawv xyeem ntxuav kev txhaum rau qhov nws ua txhaum qhov uas nyob ze tus tuag. Thiab hnub ntawd nws yuav tsum tu nws lub taubhau kom dawb huv dua ib zaug. Thiab nws yuav rov muab nws tus kheej cais rau Yawmsaub kom tag lub sijhawm uas teem cia. Nws yuav coj ib tug menyuam txiv yaj hnub nyoog ib xyoos tuaj ua kevcai ntxuav kev txaug kev txhaum. Lub sijhawm ua ntej ntawd mas tsis xam lawm vim qhov uas nws cog lus cais nws tus kheej ntawd twb qias tsis huv lawm. “ ‘No yog tej kevcai uas thaum tus Naxi cais nws tus kheej puv sijhawm. Yuav tsum coj nws mus rau ntawm lub qhov rooj tsev ntaub sib ntsib. Nws yuav coj tej uas xyeem rau Yawmsaub tuaj, yog ib tug menyuam txiv yaj hnub nyoog ib xyoos uas tsis muaj chaw thuam ua kevcai hlawv xyeem thiab ib tug menyuam xyuas yaj hnub nyoog ib xyoos uas tsis muaj chaw thuam ua kevcai xyeem daws txim thiab ib tug txiv yaj uas tsis muaj chaw thuam ua kevcai xyeem sib raug zoo, thiab ib tawb ncuav tsis xyaw keeb uas muab cov hmoov mog zoo zoo ntse roj ua, thiab tej daim ncuav tsis xyaw keeb pleev roj thiab tej uas xyeem ua ke ua kevcai xyeem qoob loo thiab ua kevcai hliv xyeem. Mas tus pov thawj yuav coj tej no tuaj rau ntawm Yawmsaub xubntiag thiab yuav xyeem tus tsiaj uas ua kevcai daws txim thiab tus tsiaj uas ua kevcai hlawv xyeem. Nws yuav muab tus txiv yaj thiab lub tawb ncuav tsis xyaw keeb xyeem rau Yawmsaub ua kevcai sib raug zoo. Thiab tus pov thawj yuav muab tej uas ua kevcai xyeem qoob loo thiab tej uas ua kevcai hliv xyeem xyeem ua ke. “ ‘Mas tus uas ua Naxi yuav chais nws lub taubhau uas tu kom dawb huv ntawm qhov rooj tsev ntaub sib ntsib thiab yuav coj cov plaubhau ntawm nws lub taubhau uas dawb huv ntawd mus tso rau saum cub tawg uas nyob hauv qab tej uas xyeem ua kevcai sib raug zoo. Thaum tus uas ua Naxi chais cov plaubhau uas nws tu kom dawb huv lawm, tus pov thawj yuav coj tus txiv yaj ib ceg tes uas hau lawm nrog ib lub ncuav tsis xyaw keeb thiab ib daim ncuav tsis xyaw keeb hauv lub tawb los tso rau tus uas ua Naxi txhais tes. Mas tus pov thawj muab tej ntawd cev rau ntawm Yawmsaub xubntiag ua kevcai cev xyeem. Tej ntawd yog tus pov thawj li feem uas dawb huv ua ke nrog lub hauv nrob uas cev xyeem lawm thiab ceg qab uas xyeem lawm. Dhau no tus uas ua Naxi thiaj haus tau cawv. “ ‘No yog tej kevcai rau tus uas cog lus tseg ua Naxi. Tej uas nws muab xyeem rau Yawmsaub yuav tsum xyeem raws li tej uas teem rau tus uas cais nws tus kheej tiamsis yog xyeem tau ntau dua tej uas teem cia kuj tau. Nws yuav tsum xyeem raws li nws twb cog lus tseg. Ua li ntawd nws thiaj ua tau raws li txoj kevcai uas cais nws tus kheej ua Naxi.’ ” Yawmsaub hais rau Mauxe tias, “Cia li hais rau Aloo thiab nws cov tub tias, ‘Nej yuav tsum foom koob hmoov rau cov Yixayee li no. Nej yuav hais tias, “ ‘Thov Yawmsaub foom koob hmoov rau nej thiab tsom kav tsom kwm nej. Thov Yawmsaub lub ntsej muag ci ntsa iab rau nej thiab hlub nej. Thov Yawmsaub tsa qhov muag saib nej thiab pub kev kaj siab lug rau nej.’ “Ua li no lawv thiaj tuav kuv lub npe foom koob hmoov rau cov Yixayee mas kuv yuav foom koob hmoov rau lawv.” Hnub uas Mauxe tsa Yawmsaub lub tsev ntaub tiav thiab tau ua kevcai hliv roj ywg lub tsev ntaub thiab txhua yam uas nyob hauv, tu kom dawb huv, thiab tau hliv roj ywg lub thaj thiab tej twj uas siv huvsi tu kom dawb huv rau Yawmsaub lawm, mas cov uas ua hlob hauv cov Yixayee, yog tej tsev neeg tus thawj, yog cov uas ua hlob hauv tej xeem uas saib xyuas cov uas suav cia lawd, lawv coj qhov txhia chaw tuaj xyeem rau ntawm Yawmsaub xubntiag, yog rau lub tsheb nyuj uas muaj ntaub kauv thiab kaum ob tug nyuj, ob tug uas ua hlob coj ib lub tsheb thiab ib leeg coj ib tug nyuj tuaj xyeem rau ntawm Yawmsaub lub tsev ntaub. Yawmsaub hais rau Mauxe tias, “Cia li txais tej no ntawm lawv kom thiaj tau siv ua haujlwm ntawm lub tsev ntaub sib ntsib, thiab cia li muab rau cov Levi txhua tus raws li lawv tes haujlwm uas lawv ua.” Mauxe thiaj li txais tej tsheb nyuj thiab tej nyuj muab rau cov Levi. Nws muab ob lub tsheb thiab ob nkawm nyuj rau Kwsoo ceg raws li lawv tej haujlwm. Nws muab plaub lub tsheb thiab plaub nkawm nyuj rau Melali ceg raws li lawv tej haujlwm uas pov thawj Aloo tus tub Ithama qhia kom lawv ua. Tiamsis nws tsis muab dabtsi rau Khauha ceg vim lawv tej haujlwm yog tej yam uas dawb huv uas yuav tsum kwv xwb. Thiab cov uas ua hlob muab qhov txhia chaw xyeem ua kevcai pub lub thaj rau Yawmsaub rau hnub uas ua kevcai muab roj hliv ywg lub thaj ntawd. Cov uas ua hlob nyias taus nyias xyeem qhov txhia chaw ntawm lub thaj. Yawmsaub hais rau Mauxe tias, “Cov uas ua hlob ib leeg yuav tsum tuaj xyeem ib hnub ua kevcai pub lub thaj rau kuv.” Tus uas muab qhov txhia chaw xyeem thawj hnub yog Aminada tus tub Nasoo uas yog xeem Yuda. Yam uas nws muab xyeem yog muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Aminada tus tub Nasoo muab xyeem. Hnub uas ob Xu‑a tus tub Nethanee uas ua xeem Ixakha tus thawj muab qhov txhia chaw tuaj xyeem. Tej uas nws muab xyeem, yog muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Xu‑a tus tub Nethanee muab xyeem. Hnub uas peb Heloo tus tub Elia uas ua xeem Xenpuloo tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Heloo tus tub Elia muab xyeem. Hnub uas plaub Sede‑aw tus tub Elixu uas ua xeem Lunpee tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Sede‑aw tus tub Elixu muab xyeem. Hnub uas tsib Xulisadai tus tub Selumi‑ee uas ua xeem Xime‑oo tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Xulisadai tus tub Selumi‑ee muab xyeem. Hnub uas rau De‑u‑ee tus tub Eliyaxa uas ua xeem Kas tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas De‑u‑ee tus tub Eliyaxa muab xyeem. Hnub uas xya Amihu tus tub Elisama uas ua xeem Efa‑i tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Amihu tus tub Elisama muab xyeem. Hnub uas yim Pedaxu tus tub Kamali‑ee uas ua xeem Manaxe tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Pedaxu tus tub Kamali‑ee muab xyeem. Hnub uas cuaj Kide‑auni tus tub Anpidas uas ua xeem Npeeyamee tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Kide‑auni tus tub Anpidas muab xyeem. Hnub uas kaum Amisadai tus tub Ahiyexaw uas ua xeem Daj tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Amisadai tus tub Ahiyexaw muab xyeem. Hnub uas kaum ib Aukhas tus tub Paki‑ee uas ua xeem Asaw tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Aukhas tus tub Paki‑ee muab xyeem. Hnub uas kaum ob Ena tus tub Ahila uas ua xeem Nathali tus thawj muab tej no xyeem, muab ib lub tais pliab uas yog nyiaj hnyav 130 sekhee, ib lub phaj uas yog nyiaj hnyav 70 sekhee hnyav raws li tej sekhee uas siv hauv lub chaw pe Yawmsaub, ob lub puavleej muaj hmoov mog zoo zoo ntse roj puv nkaus hauv ua kevcai xyeem qoob loo, thiab muab ib lub tais uas yog kub hnyav kaum sekhee muaj cov hmoov tshuaj tsw qab puv nkaus hauv, thiab ib tug thav txiv nyuj thiab ib tug txiv yaj thiab ib tug menyuam txiv yaj uas hnub nyoog ib xyoos ua kevcai hlawv huvsi xyeem, ib tug txiv tshis ua kevcai xyeem daws txim, ob tug nyuj, tsib tug txiv yaj, tsib tug txiv tshis thiab tsib tug menyuam txiv yaj hnub nyoog ib xyoos tua ua kevcai xyeem sib raug zoo. Tej no yog tej uas Ena tus tub Ahila muab xyeem. No yog tej qhov txhia chaw uas cov ua thawj hauv cov Yixayee muab xyeem ua kevcai pub lub thaj rau Yawmsaub rau hnub uas ua kevcai muab roj hliv ywg lub thaj, mas yog li no, 12 lub tais pliab nyiaj, 12 lub phaj nyiaj, 12 ob lub tais kub, ib lub tais pliab nyiaj ntawd hnyav 130 sekhee, ib lub phaj nyiaj ntawd hnyav 70 sekhee, mas cov nyiaj uas ua tej twj siv no huvsi hnyav 2,400 sekhee raws li tej sekhee uas siv hauv lub chaw pe Yawmsaub, thiab 12 lub tais kub uas muaj tshuaj tsw qab puv nkaus hauv, mas ib lub hnyav 10 sekhee raws li tej sekhee uas siv hauv lub chaw pe Yawmsaub, mas cov kub uas ua tej tais no huvsi hnyav 120 sekhee. Tej tsiaj uas ua kevcai hlawv huvsi xyeem muaj 12 tus txiv nyuj thiab 12 tus txiv yaj thiab kaum ob tug menyuam txiv yaj hnub nyoog ib xyoos nrog cov uas ua kevcai xyeem qoob loo ua ke, thiab muaj 12 tus txiv tshis ua kevcai xyeem daws txim. Tej tsiaj uas tua ua kevcai xyeem sib raug zoo muaj 24 tus txiv nyuj, 60 tus txiv yaj, 60 tus txiv tshis thiab 60 tus menyuam txiv yaj uas hnub nyoog ib xyoos. Tej no yog tej uas muab xyeem ua kevcai pub lub thaj rau Yawmsaub rau thaum uas ua kevcai hliv roj tag lawd. Thaum Mauxe nkag mus rau hauv lub tsev ntaub sib ntsib thiab nrog Yawmsaub hais lus, mas nws hnov Yawmsaub lub suab hais hauv nruab nrab ob tug Khelunpee saum lub hau roos kev txhaum uas kaw lub phij xab uas ntim Yawmsaub tej lus. Mas Yawmsaub lub suab nrog nws hais lus. Yawmsaub hais rau Mauxe tias, “Cia li hais rau Aloo tias, ‘Thaum yuav txawb xya lub teeb mas txawb kom ci pom kev rau ntawm tus kav teeb sab xubntiag.’ ” Mas Aloo kuj ua raws li ntawd, nws txawb cov teeb kom ci pom kev rau ntawm tus kav teeb sab xubntiag raws li Yawmsaub hais rau Mauxe. Tus kav teeb ntawd ua zoo li no, yog muab kub ntaus ua lub taw thoob plaws txog ntua cov paj puavleej yog muab kub ntaus ua. Ua li no Mauxe thiaj ntaus tus kav teeb raws li tus qauv uas Yawmsaub qhia rau Mauxe. Yawmsaub hais rau Mauxe tias, “Cia li muab cov Levi rho tawm hauv cov Yixayee los thiab muab lawv ua kevcai ntxuav kom huv. Koj yuav tsum ua kevcai li no ntxuav lawv kom huv, muab cov dej uas ua kevcai ntxuav los nchos rau lawv. Kom lawv xuas chais chais plaub ib ce huvsi thiab ntxhua tej tsoos tsho ua kevcai ntxuav kom huv. Kom lawv muab ib tug thav txiv nyuj thiab cov hmoov mog zoo zoo ntse roj uas ua kevcai xyeem qoob loo, thiab koj yuav muab ib tug thav txiv nyuj uas ua kevcai xyeem daws txim. Thiab koj yuav coj cov Levi tuaj rau ntawm lub tsev ntaub sib ntsib thiab kom ib tsoom pejxeem Yixayee tuaj txoos ua ke. Thaum uas coj cov Levi tuaj nyob rau ntawm Yawmsaub xubntiag mas cov Yixayee yuav tsum muab tes npuab rau saum cov Levi, thiab Aloo yuav muab cov Levi xyeem rau Yawmsaub, yog yam uas rho hauv cov Yixayee cev xyeem kom lawv thiaj ua tau Yawmsaub tes haujlwm. Mas cov Levi yuav muab tes npuab saum ob tug txiv nyuj taubhau, ces koj muab ib tug los ua kevcai xyeem daws txim, thiab muab ib tug los ua kevcai hlawv huvsi xyeem rau Yawmsaub thiaj ntxuav tau cov Levi kev txhaum. Koj yuav kom cov Levi sawv ntsug ntawm Aloo thiab Aloo cov tub xubntiag thiab koj yuav muab lawv ua kevcai cev xyeem rau Yawmsaub. “Ua li no koj yuav muab cov Levi cais ntawm cov Yixayee mas cov Levi yuav yog kuv tug. Thaum koj twb ua kevcai ntxuav lawv kom huv thiab ua kevcai muab lawv cev xyeem rau Yawmsaub lawd, txij ntawd mus cov Levi yuav nkag mus ua haujlwm ntawm lub tsev ntaub sib ntsib, rau qhov lawv raug muab rho tawm hauv cov Yixayee los pub kiag rau kuv. Kuv muab lawv los ua kuv tug theej txhua tus menyuam uas yug hauv lub plab los, yog theej cov Yixayee txhua tus tub hlob, rau qhov cov Yixayee txhua tus tub hlob tsis hais menyuam neeg menyuam tsiaj txhu los puavleej yog kuv li. Hnub uas kuv tau tua tej tub hlob hauv Iyi tebchaws huvsi kuv cais kom lawv dawb huv rau kuv lawm. Kuv twb muab cov Levi los theej cov Yixayee txhua tus tub hlob lawm. Kuv twb muab cov Levi rho tawm hauv cov Yixayee los pub kiag rau Aloo thiab Aloo cov tub kom nyob cov Yixayee chaw ua haujlwm ntawm lub tsev ntaub sib ntsib thiab ntxuav cov Yixayee kev txhaum, kom thiaj tsis muaj vij sub vij sw los raug cov Yixayee rau thaum uas lawv tuaj ze lub chaw pe Yawmsaub.” Mauxe thiab Aloo thiab ib tsoom pejxeem Yixayee sawvdaws tau ua rau cov Levi li no. Raws li Yawmsaub hais kom Mauxe ua rau cov Levi mas cov Yixayee kuj ua raws nraim. Cov Levi kuj ua kevcai ntxuav kom huv thiab ntxhua lawv tej tsoos tsho mas Aloo ua kevcai muab lawv cev xyeem rau ntawm Yawmsaub xubntiag, thiab Aloo ua kevcai ntxuav lawv kev txhaum lawv thiaj li huv. Txij thaum ntawd los cov Levi thiaj li mus ua haujlwm ntawm lub tsev ntaub sib ntsib, yog pab Aloo thiab Aloo cov tub. Raws li Yawmsaub hais kom Mauxe ua rau cov Levi ces lawv thiaj ua tau li ntawd. Yawmsaub hais rau Mauxe tias, “No ntsig txog cov Levi, cov Levi uas hnub nyoog nees nkaum tsib xyoos rov saud yuav nkag mus ua haujlwm ntawm lub tsev ntaub sib ntsib. Thaum lawv hnub nyoog muaj tsib caug xyoo lawv yuav tsum so tsis txhob ua haujlwm lawm. Tiamsis lawv pab tau lawv cov kwvtij ua haujlwm ntawm lub tsev ntaub sib ntsib, tiamsis tsis txhob ua haujlwm li qub. Koj yuav ua li no rau thaum koj feeb haujlwm rau cov Levi ua.” Xyoo uas ob lub ib hlis suav txij thaum lawv tawm hauv Iyi tebchaws los, Yawmsaub hais rau Mauxe hauv tebchaws moj sab qhua Xinai tias, “Kom cov Yixayee ua txoj kevcai Hla Dhau raws li lub sijhawm uas teem cia. Lub hli no hnub xiab kaum plaub thaum yuav tsaus ntuj, nej yuav tsum ua kevcai Hla Dhau raws li lub sijhawm teem cia. Nej yuav tsum ua raws li tej kab ke thiab tej kevcai huvsi.” Mauxe thiaj hais kom cov Yixayee ua txoj kevcai Hla Dhau. Lawv thiaj ua txoj kevcai Hla Dhau rau lub ib hlis hnub xiab kaum plaub thaum tsaus ntuj ntawm tebchaws moj sab qhua Xinai. Tej uas Yawmsaub tau hais rau Mauxe, mas cov Yixayee kuj ua txhua yam huvsi. Muaj qee tus txivneej uas qias tsis huv vim yog kov tus tuag thiaj ua tsis tau kevcai Hla Dhau rau hnub ntawd, lawv thiaj tuaj cuag Mauxe thiab Aloo rau hnub ntawd. Lawv hais rau Mauxe tias, “Peb qias tsis huv vim yog peb kov tus tuag. Ua cas yuav txwv tsis kheev peb koom nrog cov Yixayee coj Yawmsaub tej qhov txhia chaw tuaj xyeem rau lub sijhawm uas teem tseg?” Mas Mauxe hais rau lawv tias, “Nyob twjywm tos, mus txog thaum kuv hnov saib Yawmsaub hais li cas txog nej.” Yawmsaub hais rau Mauxe tias, “Cia li hais rau cov Yixayee tias, ‘Yog nej cov leejtwg lossis nej cov caj ces leejtwg qias tsis huv vim yog kov tus tuag, lossis mus kev deb, tus ntawd kuj tseem yuav tsum ua kevcai Hla Dhau rau Yawmsaub. Cia lawv ua kevcai Hla Dhau rau lub ob hlis hnub xiab kaum plaub thaum tsaus ntuj. Lawv noj ncuav tsis xyaw keeb thiab noj txuj lom iab. Lawv tsis txhob tseg ib qho seem rau kaj ntug, thiab tsis txhob muab tus menyuam yaj ntawd ib tug pob txha lov li. Lawv yuav tsum coj raws li tej kab ke ua kevcai Hla Dhau txhua nqe huvsi. Tiamsis tus uas huv thiab tsis tau mus kev deb uas ho tseg tsis ua kevcai Hla Dhau mas muab nws txiav tawm hauv nws haiv neeg vim yog nws tsis coj Yawmsaub tej qhov txhia chaw tuaj xyeem raws li lub sijhawm uas teem tseg, mas nws yuav ris nws lub txim. Yog lwm haiv neeg los nrog nej nyob leejtwg thiab xav ua kevcai Hla Dhau rau Yawmsaub nws yuav tsum coj raws li tej kab ke thiab tej kevcai uas ua kevcai Hla Dhau. Nej yuav tsum muaj tib txoj kevcai rau lwm haiv neeg uas nrog nej nyob thiab rau haiv neeg Yixayee coj.’ ” Hnub uas tsa lub tsev ntaub, tauv huab los laum nkaus lub tsev ntaub, yog lub tsev ntaub uas muaj Yawmsaub tej lus nyob rau hauv. Thaum tsaus ntuj tauv huab uas nyob saum lub tsev ntaub ntawd zoo yam nkaus li nplaim hluavtaws mus txog kaj ntug. Muaj li no tsis tu ncua li. Nruab hnub tauv huab laum nkaus, hmo ntuj mas zoo li nplaim hluavtaws. Thaum twg tauv huab sawv saum lub tsev ntaub lawm, ces cov Yixayee kuj tshais chaw mus thaum ntawd. Tauv huab mus nqes los rau qhov twg cov Yixayee kuj tsuam chaw nyob rau qhov ntawd. Cov Yixayee kuj tshais chaw mus raws li Yawmsaub hais, thiab tsuam chaw nyob raws li Yawmsaub hais. Tauv huab nyob saum lub tsev ntaub ntev li cas, lawv kuj nyob hauv lub chaw ntev li ntawd. Txawm yog tauv huab nyob saum lub tsev ntaub ntau hnub los cov Yixayee kuj ua raws li uas Yawmsaub hais tsis tshais chaw mus li. Qee zaum tauv huab nyob saum lub tsev ntaub tsis muaj pes tsawg hnub, lawv kuj nyob hauv lub chaw raws li Yawmsaub hais, thiab tshais chaw mus raws li Yawmsaub hais. Qee zaum tauv huab nyob thaum tsaus ntuj txog kaj ntug xwb. Thaum kaj ntug tauv huab sawv mus lawm lawv kuj tshais chaw mus. Yog tauv huab nyob ib hnub ib hmos mas thaum tauv huab sawv mus lawm lawv kuj tshais chaw mus. Txawm yog tauv huab nyob saum lub tsev ntaub ob hnub lossis ib hlis lossis ntev dua, los cov Yixayee nyob hauv lub chaw ntev li ntawd tsis tshais chaw mus. Thaum tauv huab sawv mus lawv kuj tshais chaw mus thaum ntawd. Lawv tsuam chaw nyob raws li Yawmsaub hais, thiab lawv tshais chaw mus raws li Yawmsaub hais. Lawv ua raws li Yawmsaub tej lus nkaw, yog raws li tej lus uas Yawmsaub kom Mauxe hais. Yawmsaub hais rau Mauxe tias, “Muab nyiaj ntaus ua ob lub raj xyu mas siv hu cov pejxeem tuaj txoos ua ke thiab siv rau thaum tshais chaw tsiv mus. Thaum tshuab ob lub raj ntawd ua ke mas ib tsoom pejxeem sawvdaws yuav tsum tuaj txoos ua ke cuag koj rau ntawm txojkev uas nkag rau hauv lub tsev ntaub sib ntsib. Tiamsis yog tshuab tib lub raj xwb ces cov uas ua hlob uas yog txhua xeem Yixayee tus thawj yuav tsum tuaj cuag koj xwb. Thaum uas tshuab raj txhib mas cov zos uas nyob sab hnub tuaj yuav tsum sawv kev mus. Thaum tshuab raj txhib zaug ob ces cov zos uas nyob sab nrad yuav sawv kev mus. Thaum twg yuav kom sawv kev mus mas yuav tshuab raj txhib. Thaum twg yuav hu ib tsoom pejxeem tuaj txoos ua ke, kuj tshuab raj hu, tiamsis tsis txhob txhib. Aloo cov tub uas ua pov thawj yuav tshuab tej raj no. Ob lub raj no yog ib txoj kevcai rau nej coj ib tiam dhau ib tiam ib txhiab ib txhis mus li. Thiab thaum nej ua rog rau hauv nej lub tebchaws uas muaj yeeb ncuab tuaj quab yuam nej, kuj cia li tshuab raj txhib kom Yawmsaub uas yog nej tus Vajtswv thiaj li nco txog nej thiab cawm nej dim nej cov yeeb ncuab. Hnub uas nej muaj kev zoo siab xyiv fab thiab hnub uas teem ua kevcai noj haus thiab hnub uas hli xiab ib, mas nej yuav tshuab raj rau thaum ua kevcai hlawv huvsi xyeem thiab thaum tua tsiaj ua kevcai xyeem sib raug zoo thiaj ua rau nej tus Vajtswv nco txog nej. Kuv yog Yawmsaub yog nej tus Vajtswv.” Hnub tim nees nkaum lub ob hlis xyoo uas ob, tauv huab txawm sawv ntawm Yawmsaub lub tsev ntaub uas muaj Yawmsaub tej lus. Cov Yixayee kuj sawv kev mus ua ib ntus ib ntus tawm ntawm tebchaws moj sab qhua Xinai mus. Tauv huab ntawd los nres rau ntawm tebchaws moj sab qhua Palas. Lawv thiaj sawv kev mus raws li Yawmsaub kom Mauxe hais rau lawv yog tsiv thawj zaug. Xeem Yuda lub zos tus chij sawv kev mus ua ib pab ib pab ua ntej, Aminada tus tub Nasoo ua lawv tus thawj. Xu‑a tus tub Nethanee ua thawj coj xeem Ixakha, Heloo tus tub Elia ua thawj coj xeem Xenpuloo. Thaum lauj Yawmsaub lub tsev ntaub lawd mas Kwsoo ceg thiab Melali ceg uas muaj feem kwv Yawmsaub lub tsev ntaub sawv kev mus. Xeem Lunpee lub zos tus chij sawv kev mus ua ib pab ib pab, Sede‑aw tus tub Elixu ua lawv tus thawj. Xulisadai tus tub Selumi‑ee ua thawj coj xeem Xime‑oo, De‑u‑ee tus tub Eliyaxa ua thawj coj xeem Kas. Khauha ceg thiaj li sawv kev kwv txhua yam uas dawb huv mus. Thaum cov no tsis tau mus txog, cov ua ntej twb tsa tau Yawmsaub lub tsev ntaub lawm. Xeem Efa‑i lub zos tus chij sawv kev mus ua ib pab ib pab, Amihu tus tub Elisama ua lawv tus thawj, Pedaxu tus tub Kamali‑ee ua thawj coj xeem Manaxe, Kide‑auni tus tub Anpidas ua thawj coj xeem Npeeyamee. Xeem Daj lub zos tus chij thiaj li sawv kev mus ua ib pab ib pab, ua pab kawg tom qab faj seeb txhua pab uas mus ua ntej lawd. Amisadai tus tub Ahiyexaw ua lawv tus thawj. Aukhas tus tub Paki‑ee ua thawj coj xeem Asaw, Ena tus tub Ahila ua thawj coj xeem Nathali. Thaum cov Yixayee sawv kev tsiv mus mas lawv mus zuj zus ua ib pab ib pab raws li uas hais no. Mauxe hais rau nws yawm dab Haunpas uas yog Le‑u‑ee tus tub yog neeg Midee hais tias, “Peb sawv kev mus kom txog lub chaw uas Yawmsaub hais tias, nws yuav pub rau peb. Koj cia li nrog peb mus. Peb yuav ua zoo rau koj rau qhov Yawmsaub cog lus hais tias nws yuav pub yam uas zoo rau cov Yixayee.” Tiamsis nws teb Mauxe tias, “Kuv tsis mus, kuv yuav rov mus rau kuv teb kuv chaw rau kuv kwv kuv tij.” Mauxe hais tias, “Thov koj tsis txhob ncaim peb mus li. Koj yeej paub lawm tias peb yuav tsuam chaw nyob hauv tebchaws moj sab qhua rau qhovtwg mas koj yuav tau ua peb qhov ntsej qhov muag. Yog koj nrog peb mus Yawmsaub ua zoo li cas rau peb mas peb yuav ua zoo li ntawd rau koj.” Lawv thiaj sawv kev ntawm Yawmsaub lub roob mus tau peb hnub ke. Yawmsaub lub phij xab sib cog lus mus ua lawv ntej tau peb hnub, mus nrhiav chaw rau lawv tsuam. Thaum lawv tshais chaw sawv kev mus Yawmsaub tauv huab nyob rawv saum lawv tag hnub li. Lub phij xab sawv kev mus thaum twg mas Mauxe hais tias, “Au Yawmsaub, thov koj sawv tsees ua kom koj tej yeeb ncuab tawg khiav ua sab ua sua mus, ua kom koj tej tshawj chim khiav ntawm koj mus.” Thaum lub phij xab nyob tus chaw, Mauxe hais tias, “Au Yawmsaub, thov koj rov los nrog cov Yixayee uas coob suav tsis txheeb nyob.” Cov pejxeem yws lawv tej kev txom nyem rau Yawmsaub hnov. Thaum Yawmsaub hnov lawm nws txojkev npau taws kuj tshwm plaws rau lawv, Yawmsaub li hluavtaws los kub hauv lawv nruab nrab thiab hlawv lawv lub ntug zos kub hnyiab ib txhia lawm. Mas cov pejxeem quaj thov Mauxe, Mauxe thiaj thov Yawmsaub mas hluavtaws thiaj tuag. Lawv thiaj muab lub chaw ntawd hu ua Thanpela, vim yog Yawmsaub li hluavtaws los kub hauv lawv nruab nrab. Lwm haiv neeg uas nrog lawv los nqhis nqaij heev thiab cov Yixayee los quaj quaj yws tias, “Xav tau nqaij noj kawg li. Peb nco txog tej ntses uas peb txeev noj tim Iyi tebchaws tsis txog yuav li, thiab nco txog tej dib tej taub tej dos raj dos ntug thiab qej. Nimno peb qaug zog tag lawm thiab tsis muaj dabtsi rau peb saib tsuas yog cov mana no xwb.” Cov mana zoo yam li noob zaub txhwb qaib thiab saib zoo li roj ntoos tsw qab. Cov pejxeem mus khaws los zom lossis muab tuav hauv tais thiab muab rau hauv laujkaub hau ua ncuav, qab yam li ncuav kib roj. Thaum tsaus ntuj los lwg rau hauv lub zos cov mana kuj poob los thiab. Mauxe hnov cov pejxeem quaj thoob plaws txhua yim, nyias nyob ntawm nyias lub qhov rooj tsev ntaub. Yawmsaub npau taws vog, Mauxe kuj nyuaj siab heev. Mauxe thiaj hais rau Yawmsaub tias, “Ua cas koj ua rau koj tus tub qhe raug ceeblaj li no? Ua cas koj tsis txaus siab rau kuv es muab cov neeg no huvsi rau kuv ib leeg ris? Kuv xeeb cov neeg no rau hauv kuv lub plab lov? Kuv yug lawv los lov? Koj thiaj hais rau kuv tias, ‘Muab lawv puag rau hauv koj xubntiag ib yam li tus nkauj qhev puag tus menyuam mos liab, coj los rau hauv lub tebchaws uas Yawmsaub cog lus ruaj tias yuav pub rau lawv tej poj koob yawm txwv.’ Kuv yuav muab nqaij qhovtwg los pub rau cov neeg no sawvdaws noj? Lawv quaj rau kuv tias, ‘Thov muab nqaij rau peb noj.’ Kuv ib leeg tsis muaj peevxwm ris tau cov neeg no sawvdaws, yog lub nra uas hnyav dhau kuv. Yog koj yuav ua li no rau kuv, yog kuv txaus koj lub siab lawm thov koj cia li muab kuv tua tamsim no kom kuv thiaj tsis pom kuv txojkev txom nyem nyuaj siab.” Mas Yawmsaub hais rau Mauxe tias, “Cia li sau zog Yixayee cov kev txwj laus xya caum leej uas koj paub tias yog cov pejxeem li thawj thiab cov uas kav lawv, mas coj lawv tuaj rau ntawm lub qhov rooj tsev ntaub sib ntsib thiab cia lawv nrog koj sawv ua ke rau qhov ntawd. Kuv yuav nqes los nrog koj sib tham qhov ntawd thiab kuv yuav faib ntsuj plig uas nyob saum koj mus tso rau saum lawv, mas lawv yuav nrog koj ris cov neeg no xwv koj thiaj tsis tau ris ib leeg xwb. Thiab hais rau cov pejxeem tias, ‘Nej cia li tu nej kom dawb huv rau tagkis, nej yuav tau nqaij noj, rau qhov nej tau quaj rau Yawmsaub hnov hais tias, “Xav tau nqaij noj kawg li. Peb txeev noj qab nyob zoo heev dua li no hauv Iyi tebchaws.” Vim li no Yawmsaub yuav pub nqaij rau nej mas nej yuav tau noj. Nej yuav tsis noj ib hnub los ob hnub los tsib hnub los kaum hnub los nees nkaum hnub xwb, tiamsis nej yuav tau noj ib hlis txwm nkaus mus txog nqaij tawm hauv nej qhov ntswg los thiab nej dhuav kiag cov nqaij ntawd, rau qhov nej tau tso Yawmsaub tseg thiab quaj rau nws tias, Ua cas peb tawm hauv Iyi tebchaws los lawm?’ ” Mas Mauxe hais tias, “Cov neeg uas kuv nrog nyob no muaj 600,000 leej txivneej es koj hais tias koj yuav muab nqaij rau lawv noj kom txim ib lub hlis. Yuav muab tej pab yaj pab tshis paj nyuj tua txaus lawv noj lov? Lossis yuav sau zog tej ntses tag nrho hauv hiavtxwv los txaus rau lawv noj lov?” Yawmsaub hais rau Mauxe tias, “Yawmsaub txhais tes luv dhau lawm lov? Nimno koj yuav pom tias kuv tej lus yuav tiav rau koj los tsis tiav.” Mauxe thiaj tawm mus hais Yawmsaub tej lus rau cov pejxeem, thiab nws sau tau xya caum leej kev txwj laus hauv cov pejxeem tsa lawv los sawv vij lub tsev ntaub. Mas Yawmsaub nqes hauv tauv huab los hais rau Mauxe thiab faib ntsuj plig uas nyob saum Mauxe mus tso rau saum xya caum leej kev txwj laus ntawd. Thaum ntsuj plig nyob saum lawv lawm lawv txawm cev Vajtswv lus, tiamsis lawv tsis rov cev dua li lawm. Tseem tshuav ob tug nyob hauv lub zos, ib tug yog Eeda thiab ib tug yog Meda, ntsuj plig kuj los rau saum ob tug. Ob tug twb sau npe cia lawm uas tsis tau tuaj rau ntawm lub tsev ntaub, ob tug cia li cev Vajtswv lus rau hauv lub zos. Muaj ib tug hluas dhia tuaj hais rau Mauxe tias, “Eeda thiab Meda tabtom cev Vajtswv lus rau hauv lub zos.” Mas Yausua uas yog Noo tus tub uas ua tus pab Mauxe txij thaum hluas los hais rau Mauxe tias, “Kuv tus tswv Mauxe, cia li txwv ob tug los maj.” Tiamsis Mauxe hais rau nws tias, “Koj mob siab vim yog saib rau kuv lov? Kuv xav kom Yawmsaub haiv neeg txhua tus cev Vajtswv lus thiab xav kom Yawmsaub tso ntsuj plig rau saum lawv.” Mauxe thiab Yixayee cov kev txwj laus txawm rov mus rau hauv lub zos. Ces Yawmsaub txawm tso cua ntsawj hauv hiavtxwv xa noog ws tuaj poob rau ib ncig lawv lub zos txhua fab ib fab mus deb ib hnub ke thiab poob siab rau saum npoo av tuab li ob tshim. Hnub ntawd cov pejxeem mus khaws noog ws ib hnub ib hmos thiab hnub tom qab ib hnub. Tus uas khaws tau tsawg kawg mas khaws tau kaum haumaw. Lawv coj los ziab thoob plaws hauv lub zos. Thaum tej nqaij ntawd tseem nyob hauv lawv qhov ncauj thiab noj tsis tau tag, Yawmsaub txojkev chim tshwm plaws rau cov pejxeem, Yawmsaub thiaj tso mob phem loj tua lawv. Lawv thiaj hu lub chaw ntawd ua Khilau Hata‑ava rau qhov lawv log cov neeg uas nqhis nqaij tuag rau qhov ntawd. Cov pejxeem tshais chaw ntawm Khilau Hata‑ava mus txog Haxelau, thiab tsuam chaw nyob ntawm Haxelau. Mili‑as thiab Aloo thuam Mauxe vim yog tus poj Khuj uas Mauxe tau yuav, vim yog Mauxe tau yuav ib tug neeg Khuj ua pojniam. Ob tug thiaj hais tias, “Yawmsaub hais lus tuaj rau Mauxe tib leeg xwb lov? Yawmsaub tsis hais lus tuaj rau wb thiab lov?” Yawmsaub kuj hnov tej uas ob tug hais. Mauxe yog ib tug uas tsis muab hlob kiag li, nws txo hwjchim qes dhau tej neeg hauv qab ntuj huvsi. Tamsim ntawd Yawmsaub hais rau Mauxe thiab Aloo thiab Mili‑as tias, “Nej peb leeg cia li tawm tuaj rau ntawm lub tsev ntaub sib ntsib.” Lawv peb leeg thiaj tawm tuaj. Yawmsaub kuj nrog ncej huab los sawv ntawm lub qhov rooj tsev ntaub mas hu Aloo thiab Mili‑as. Ob tug thiaj txav los. Yawmsaub hais tias, “Cia li mloog kuv tej lus. Yog muaj ib tug cev kuv li lus hauv nej nruab nrab, kuj yog kuv uas yog Yawmsaub qhia rau tus ntawd ua yog toog pom thiab hais rau nws hauv npau suav. Tiamsis kuv tus tub qhe Mauxe mas tsis thooj li ntawd. Nws yog tus uas kuv muab kuv haiv neeg sawvdaws cob rau nws saib xyuas. Kuv nrog nws hais twb ncauj ntsees meej meej tsis yog ua paj lug ua piv lus hais, thiab nws pom Yawmsaub tus yam ntxwv. Ua li cas neb twb tsis ntshai li es yuav thuam kuv tus tub qhe Mauxe?” Yawmsaub npau taws heev rau ob tug, nws cia li mus lawm. Mas thaum tauv huab ntab plaws dhau lub tsev ntaub mus lawd, ua ciav Mili‑as cia li mob ruas dawb paug yam nkaus li daus xib daus npu. Aloo tig mus saib Mili‑as mas pom tias Mili‑as mob lig mob ruas lawm. Aloo thiaj hais rau Mauxe tias, “Yawg hlob, thov tsis txhob rau txim rau wb uas tau ua kev ruam kev txhaum txim no. Thov tsis txhob cia Mili‑as zoo yam li tus menyuam uas yug tau los yeej tuag lawd, nqaij ntsws tag ib nrab.” Mas Mauxe thiaj quaj thov Yawmsaub, “Au Vajtswv, thov koj kho nws.” Tiamsis Yawmsaub hais rau Mauxe tias, “Yog nws txiv nto qaub ncaug rau nws lub ntsej muag, mas nws yuav txaj muag xya hnub xwb. Muab nws kaw rau sab nraum ntug zos xya hnub mam li pub nws rov los tau.” Yog li no Mili‑as thiaj raug kaw rau sab nraum ntug zos xya hnub. Cov pejxeem kuj tsis sawv kev tsiv tawm mus txog thaum Mili‑as rov qab los. Dhau ntawd cov pejxeem sawv kev ntawm Haxelau mus tsuam chaw nyob tom tebchaws moj sab qhua Palas. Yawmsaub hais rau Mauxe tias, “Cia li xa neeg mus tshuaj saib Khana‑as tebchaws uas kuv pub rau cov Yixayee. Cia li xa txhua xeem ib xeem ib leeg, txhua tus yog ua thawj hauv nws xeem.” Mauxe thiaj txib lawv tawm hauv tebchaws moj sab qhua Palas mus raws li Yawmsaub hais, txhua tus yog ua thawj hauv cov Yixayee. Ntawm no mus yog lawv cov ntawd li npe. Xeem Lunpee yog Samu‑a uas yog Xakaw tus tub, xeem Xime‑oo yog Hauli tus tub Safa, xeem Yuda yog Yefune tus tub Khalej, xeem Ixakha yog Ikas uas yog Yauxej tus tub, xeem Efa‑i yog Noo tus tub Hause‑a, xeem Npeeyamee yog Lafu tus tub Pati, xeem Xenpuloo yog Xaudi tus tub Kadi‑ee, xeem Yauxej uas yog xeem Manaxe yog Xuxi tus tub Kadi, xeem Daj yog Kemali tus tub Ami‑ee, xeem Asaw yog Mikha‑ee tus tub Xethu, xeem Nathali yog Vauxi tus tub Nanpi, xeem Kas yog Makhis tus tub Ke‑u‑ee. Cov npe no yog cov neeg uas Mauxe txib mus tshuaj tebchaws. Mauxe tis npe rau Hause‑a uas yog Noo tus tub hu ua Yausua. Mauxe txib lawv mus tshuaj Khana‑as tebchaws thiab hais rau lawv tias, “Cia li mus pem Neke thiab nce mus rau pem toj siab, mus tshuaj saib lub tebchaws ntawd zoo li cas thiab saib cov neeg hauv lub tebchaws ntawd muaj zog los tsis muaj, muaj neeg coob los tsawg, thiab saib lub tebchaws uas lawv nyob ntawd zoo los phem, thiab saib lawv tej chaw nyob yog ua zej zog los yog ua moos muaj ntsa loog ruaj khov, thiab saib lub tebchaws zoo qoob loo los tsis zoo thiab muaj xyoob ntoo los tsis muaj. Nej cia li ua siab tuab thiab coj tej txiv ntoo hauv lub tebchaws ntawd ib txhia los.” Lub sijhawm ntawd yog lub caij uas thawj phaum txiv hmab siav. Lawv thiaj nce mus tshuaj tebchaws txij ntua ntawm tebchaws moj sab qhua Xee mus txog lub moos Lehau uas nyob ze txojkev uas mus rau lub moos Hama. Lawv nce mus txog Neke thiab mus txog lub moos Heploo. Ahimas thiab Sesai thiab Thamai uas yog Anaj cov caj ces nyob qhov ntawd. Lub moos Heploo no luag rhawv ua ntej lub moos Xau‑as hauv Iyi tebchaws xya xyoo. Lawv txawm mus txog lub hav Ekhau mas lawv txiav ib ceg txiv hmab uas muaj ib tauv txiv qhov ntawd, muab las ntxig rau ob leeg kwv los. Lawv coj txiv ntsiav kws thiab txiv cev ib txhia los. Lub chaw ntawd raug muab hu ua lub hav Ekhau vim cov Yixayee txiav tauv txiv hmab qhov ntawd los. Lawv mus tshuaj lub tebchaws tau plaub caug hnub li rov qab los. Lawv los txog ntawm Mauxe thiab Aloo thiab ib tsoom Yixayee sawvdaws hauv tebchaws moj sab qhua Palas ntawm lub moos Khade. Lawv piav rau ob tug thiab cov pejxeem sawvdaws mloog thiab muab tej txiv ntoo hauv lub tebchaws ntawd rau lawv saib. Lawv hais rau Mauxe tias, “Peb mus txog lub tebchaws uas koj txib peb mus, muaj kua mis thiab zib ntab ntws nto thiab no yog tej txiv ntoo hauv lub tebchaws ntawd. Tiamsis cov neeg hauv lub tebchaws ntawd muaj zog heev thiab lawv tej moos kuj loj thiab muaj ntsa loog ruaj khov. Dua li ntawd peb kuj pom Anaj tej caj ces nyob qhov ntawd. Cov Amalej nyob rau hauv Neke tebchaws, cov Hithai, cov Yenpu thiab cov Amaulai nyob pem toj siab. Cov Khana‑as nyob npuas ntug hiavtxwv thiab raws ntug dej Yaladee.” Tiamsis Khalej kom cov pejxeem nyob twjywm rau ntawm Mauxe xubntiag thiab hais tias, “Peb cia li nce mus txeeb tebchaws tamsim no, rau qhov peb yeej muaj peevxwm kov yeej tau.” Tiamsis cov txivneej uas nrog Khalej mus ntawd hais tias, “Peb tsis muaj peevxwm ntaus yeej cov neeg ntawd rau qhov lawv muaj zog heev dua peb.” Ces lawv txawm hais tsis zoo txog lub tebchaws uas lawv mus tshuaj ntawd rau cov Yixayee mloog hais tias, “Lub tebchaws uas peb mus tshuaj thoob plaws ntawd yog niag tebchaws noj cov neeg uas nyob hauv. Cov neeg uas peb pom ntawd sawvdaws puavleej siab heev. Peb pom cov Nefili kuj nyob qhov ntawd, cov neeg Anaj yog tshwm ntawm cov Nefili los. Peb saib mas peb zoo yam nkaus li tej nyuag kooj xwb, lawv kuj pom peb zoo li ntawd thiab.” Ces ib tsoom pejxeem txawm tsa suab qw nrov nrov, thiab hmo ntawd cov pejxeem quaj ib hmos. Cov Yixayee sawvdaws yws yws Mauxe thiab Aloo. Ib tsoom pejxeem sawvdaws hais rau ob tug tias, “Peb tuag rau hauv Iyi tebchaws lossis tuag hauv tebchaws moj sab qhua no kuj zoo dua. Ua cas Yawmsaub coj peb los tuag hniav ntaj hniav riam rau hauv lub tebchaws no? Peb tej pojniam menyuam yuav poob ua luag li. Peb rov mus rau Iyi tebchaws zoo dua lauj.” Lawv ib leeg hais rau ib leeg tias, “Cia peb xaiv ib tug ua thawj es rov qab mus rau Iyi tebchaws lauj.” Mauxe thiab Aloo cia li khwb nkaus ua lub plhu ti nkaus hauv av tab meeg cov Yixayee sawvdaws uas tuaj txoos ua ke. Mas Yausua uas yog Noo tus tub thiab Khalej uas yog Yefune tus tub uas nrog lawv mus tshuaj lub tebchaws ntawd txawm dua rhe ob tug lub tsho, thiab hais rau ib tsoom Yixayee sawvdaws tias, “Lub tebchaws uas peb mus tshuaj saib thoob plaws ntawd yog lub tebchaws uas zoo heev. Yog Yawmsaub txaus siab rau peb, nws yuav coj peb mus rau hauv lub tebchaws ntawd thiab muab pub rau peb, yog lub tebchaws uas muaj kua mis thiab zib ntab ntws nto. Tsuav yog nej tsis txhob fav xeeb rau Yawmsaub xwb, tsis txhob ntshai cov neeg hauv lub tebchaws ntawd, rau qhov lawv yog peb tej kua zaub. Lub hwjchim uas tsom kwm lawv twb raug muab rho lawm, Yawmsaub nrog nraim peb mas tsis txhob ntshai lawv li.” Tiamsis ib tsoom pejxeem sawvdaws hais zom zaws kom xuas pob zeb ntaus ob tug. Tamsim ntawd Yawmsaub lub hwjchim ci ntsa iab los tshwm rau ntawm lub tsev ntaub sib ntsib tab meeg cov Yixayee sawvdaws. Yawmsaub hais rau Mauxe tias, “Cov neeg no yuav saib tsis taus kuv ntev li cas? Txawm yog kuv twb ua txujci phimhwj ntau heev tshwm rau hauv lawv nruab nrab lawm los lawv tseem yuav tsis ntseeg kuv mus ntev li cas? Kuv yuav tso mob kis los tua lawv thiab tsis pub lawv tau kuv li qub txeeg qub teg, tiamsis kuv yuav tsa koj ua ib haiv neeg loj thiab muaj zog heev dua lawv.” Tiamsis Mauxe hais rau Yawmsaub tias, “Cov Iyi yuav hnov zaj no rau qhov koj lub hwjchim twb coj haiv neeg no tawm hauv lawv nruab nrab los, mas cov Iyi yuav piav zaj no rau cov neeg uas nyob hauv lub tebchaws no paub. Au Yawmsaub, lawv yeej hnov tias koj nrog nraim haiv neeg no. Au Yawmsaub, lawv hnov tias muaj neeg pom koj tim ntsej tim muag, thiab koj tauv huab nyob saum cov Yixayee thiab nruab hnub koj nyob hauv ncej huab hmo ntuj koj nyob hauv ncej hluavtaws mus ua lawv ntej. Nimno yog koj ua tib zaug tua haiv neeg no tuag tag nrho, tej tebchaws uas tau hnov koj lub moo yuav hais tias, ‘Twb yog Yawmsaub coj tsis tau haiv neeg no mus txog lub tebchaws uas nws cog lus ruaj tias nws yuav muab rau lawv, nws thiaj muab lawv tua pov tseg tag rau hauv tebchaws moj sab qhua.’ Nimno kuv thov koj, cia Yawmsaub lub hwjchim loj tshwm los yam li uas koj tau cog lus cia tias, ‘Yawmsaub tsis chim sai, nws txojkev hlub uas ruaj khov muaj nplua mias, nws zam txim rau tej kev ua phem ua qias thiab kev fav xeeb, tiamsis nws kuj tsis suav tias tsis txhaum, nws yuav rau leej txiv lub txim poob mus rau cov tub ki peb plaub tiam.’ Kuv thov koj zam txim rau haiv neeg no raws li koj txojkev hlub ruaj khov uas loj kawg thiab ib yam li koj twb zam txim rau haiv neeg no hauv Iyi tebchaws los txog niaj hnub nimno.” Mas Yawmsaub teb tias, “Kuv twb zam txim raws li koj tej lus thov lawm. Kuv hais tseeb, kuv yeej muaj txojsia nyob thiab Yawmsaub lub hwjchim ci ntsa iab yeej yuav puv nkaus lub ntiajteb, mas cov neeg uas twb pom kuv lub hwjchim ci ntsa iab thiab tej txujci phimhwj uas kuv tau ua hauv Iyi tebchaws thiab hauv tebchaws moj sab qhua los tseem sim kuv kaum zaus li no thiab tsis mloog kuv lus, mas yuav tsis muaj ib tug pom lub tebchaws uas kuv cog lus ruaj tias yuav muab pub rau lawv tej poj koob yawm txwv, thiab cov uas saib tsis taus kuv yuav tsis muaj ib tug pom lub tebchaws ntawd kiag li. Tiamsis kuv tus tub qhe Khalej, mas vim nws lub siab tsis thooj li lwm tus thiab nws npuab kuv kawg siab kawg ntsws, kuv yuav coj nws mus txog lub tebchaws uas nws twb mus los lawm, thiab nws caj ces yuav tau lub tebchaws ntawd ua lawv tug. Vim cov Amalej thiab cov Khana‑as nyob hauv tej hav hauv lub tebchaws ntawd, mas tagkis nej cia li tig hlo rov mus rau tebchaws moj sab qhua taug kev mus txog Hiavtxwv Liab.” Yawmsaub hais rau Mauxe thiab Aloo tias, “Haiv neeg phem no yuav yws kuv mus ntev li cas? Kuv twb hnov tej lus uas cov Yixayee yws, yog lawv yws kuv ntag. Koj cia li hais rau lawv tias, ‘Yawmsaub hais tias, Kuv yeej muaj txojsia nyob, tej uas kuv hnov nej hais, kuv yuav ua rau nej. Nej tej cev tuag yuav poob tag rau hauv tebchaws moj sab qhua no. Nej cov neeg sawvdaws uas muaj nees nkaum xyoo rov saud uas tau yws kuv, tsis muaj ib tug yuav mus txog lub tebchaws uas kuv cog lus ruaj tias yuav pub rau nej nyob, tsuas yog Khalej uas yog Yefune tus tub thiab Yausua uas yog Noo tus tub thiaj mus txog xwb. Nej cov menyuam yaus uas nej hais tias yuav poob ua luag li, kuv yuav coj lawv los txog hauv lub tebchaws thiab lawv yuav paub lub tebchaws uas nej saib tsis taus ntawd. Tiamsis nej mas nej tej cev tuag yuav poob rau hauv tebchaws mooj sab qhua no. Nej cov menyuam yuav yug tsiaj hauv tebchaws moj sab qhua plaub caug xyoo thiab lawv yuav raug txom nyem vim yog tim qhov uas nej tso kuv tseg, mus txog thaum nej tej cev tuag nyob txim rau hauv tebchaws moj sab qhua no. Npaum li lub sijhawm uas nej mus tshuaj lub tebchaws tau plaub caug hnub ntawd, nej yuav ris nej lub txim plaub caug xyoo, ib hnub ua ib xyoos, thiab nej yuav paub tias kuv tsis txaus siab rau nej.’ Kuv yog Yawmsaub tau hais cia li no. Kuv yeej yuav ua raws li no rau haiv neeg phem sawvdaws uas tuaj txoos ua ke koom siab tawm tsam kuv no. Lawv yuav ploj tag rau hauv tebchaws moj sab qhua no, lawv yuav tuag tag rau qhov ntawd.” Cov neeg uas Mauxe txib mus tshuaj tebchaws, yog cov uas rov los hais phem txog lub tebchaws ntawd ua rau ib tsoom pejxeem yws Mauxe, mas cov neeg uas hais phem txog lub tebchaws ntawd raug mob phem tuag tag rau ntawm Yawmsaub xubntiag. Tiamsis Yausua uas yog Noo tus tub thiab Khalej uas yog Yefune tus tub uas nrog lawv ua ib pab mus tshuaj tebchaws ntawd, tsis tuag. Mauxe hais tej lus no rau cov Yixayee sawvdaws mloog, mas cov pejxeem nyuaj siab thiab quaj heev kawg li. Mas lawv sawv ntxov tsees nce mus rau pem toj siab hais tias, “Saib maj, peb nyob no lawm, peb yuav nce mus rau lub chaw uas Yawmsaub cog lus cia, rau qhov peb tau ua txhaum lawm.” Tiamsis Mauxe hais tias, “Ua cas nej tsis ua raws li Yawmsaub hais? Qhov uas nej ua yuav tsis tiav. Tsis txhob nce mus tsam ces nej yuav tuag tag rau ntawm yeeb ncuab xubntiag, rau qhov Yawmsaub tsis nrog nraim nej. Cov Amalej thiab cov Khana‑as nyob ntawm nej hauv ntej, nej yuav tuag tag rau lawv hniav ntaj hniav riam. Vim nej tso Yawmsaub tseg, Yawmsaub yuav tsis nrog nraim nej lawm.” Txawm yog Yawmsaub lub phij xab sib cog lus thiab Mauxe tsis tawm hauv lub zos mus los lawv tseem yuam qhe nce mus pem toj siab. Cov Amalej thiab cov Khana‑as uas nyob pem toj siab nqes los ntaus yeej lawv thiab muab lawv ntiab mus txog lub moos Hauma. Yawmsaub hais rau Mauxe tias, “Koj cia li hais rau cov Yixayee tias, ‘Thaum nej txeem rau hauv lub tebchaws uas nej yuav nyob ntawd uas kuv pub rau nej, mas yog nej leejtwg yuav muab nyuj muab yaj muab tshis hlawv kub hnyiab xyeem ua kevcai hlawv huvsi xyeem lossis ua kevcai tua xyeem pauj tej uas nws fiv cia lawd lossis nws zoo siab pub xwb, lossis yog tej sijhawm uas teem rau nej ua kevcai noj haus, yog ua kom muaj pa tsw qab hum Yawmsaub lub siab, mas tus uas coj tuaj xyeem ntawd yuav tsum muab ib feem kaum hauv ib efa hmoov mog zoo zoo ntse ib feem plaub hauv ib hee roj ua kevcai xyeem qoob loo. Koj yuav npaj ib feem plaub hauv ib hee cawv txiv hmab ua kevcai hliv xyeem rau txhua tus menyuam yaj uas ua kevcai hlawv huvsi xyeem thiab ua kevcai tua xyeem. Tiamsis yog ib tug txiv yaj, mas koj yuav npaj ob feem kaum hauv ib efa hmoov mog zoo zoo ntse ib feem peb hauv ib hee roj ua kevcai xyeem qoob loo, thiab koj yuav muab ib feem peb hauv ib hee cawv txiv hmab ua kevcai hliv xyeem ua kom muaj pa tsw qab hum Yawmsaub lub siab. Thaum koj npaj txiv nyuj ua kevcai hlawv huvsi xyeem lossis ua kevcai tua xyeem uas yog pauj tej uas fiv cia lawd lossis ua kevcai sib raug zoo rau Yawmsaub, ces muab peb feem kaum hauv ib efa hmoov mog zoo zoo ntse ib nrab hee roj ua kevcai xyeem qoob loo, thiab koj yuav muab ib nrab hee cawv txiv hmab ua kevcai hliv xyeem ua tej uas hlawv kub hnyiab xyeem kom muaj pa tsw qab hum Yawmsaub lub siab. “ ‘Nej yuav tsum ua li no rau txhua tus txiv nyuj txiv yaj rau menyuam txiv yaj thiab menyuam txiv tshis huvsi. Yuav ua li no rau txhua tus tsiaj npaum li uas npaj tuaj. Cov Yixayee uas nyob txum tim txhua tus yuav tsum ua li uas hais tag no rau thaum muab tsiaj hlawv kub hnyiab xyeem kom muaj pa tsw qab hum Yawmsaub lub siab. Yog lwm haiv neeg uas nrog nej nyob lossis leejtwg uas nrog nej nyob ib txhiab ib txhis xav muab tsiaj hlawv kub hnyiab kom muaj pa tsw qab hum Yawmsaub lub siab, mas kom nws ua raws nraim li uas nej ua no. Yuav tsum muaj tib txoj kevcai no rau nej cov neeg thiab rau lwm haiv neeg uas nrog nej nyob, yog ib txoj kevcai uas yuav tsum coj ib tiam dhau ib tiam ib txhiab ib txhis mus li. Nej zoo li cas mas tus uas nrog nej nyob yuav zoo li ntawd rau ntawm Yawmsaub xubntiag. Yuav muaj tib txoj kevcai thiab tib txoj kab ke no rau nej thiab lwm haiv neeg uas nrog nej nyob.’ ” Yawmsaub hais rau Mauxe tias, “Cia li hais rau cov Yixayee tias, ‘Thaum nej txeem mus rau hauv lub tebchaws uas kuv yuav coj nej mus ntawd, thiab thaum nej tau noj tej zaub mov hauv lub tebchaws ntawd, nej yuav muab tej yam no xyeem rau Yawmsaub. Muab ib qho hmoov qeb hmoov mog uas tau ntawm thawj phaum qoob loo los ua ib lub ncuav mas muab xyeem ua yam uas tau hauv lub tshav ntaus qoob los. Yuav muab cov hmoov qeb hmoov mog uas tau ntawm thawj phaum qoob los xyeem rau Yawmsaub ib tiam dhau ib tiam mus ib txhis li. “ ‘Yog nej yuam kev tsis yog txhob txwm ua txhaum es tsis coj raws li tej lus nkaw huvsi uas Yawmsaub hais rau Mauxe, yog txhua yam uas Yawmsaub hais cia rau Mauxe kom nej ua, txij hnub uas Yawmsaub pub nws txoj kevcai ntawd rau nej coj ib tiam dhau ib tiam mus ib txhis li, mas yog tias ua txhaum uas tsis yog txhob txwm ua thiab cov pejxeem tsis paub, mas cov pejxeem sawvdaws yuav muab ib tug thav txiv nyuj ua kevcai hlawv huvsi xyeem kom muaj pa tsw qab uas hum Yawmsaub lub siab ua ke nrog tej uas ua kevcai xyeem qoob loo thiab tej uas ua kevcai hliv xyeem raws li kevcai, thiab muab ib tug txiv tshis ua kevcai xyeem daws txim. Tus pov thawj yuav ua kevcai ntxuav ib tsoom Yixayee sawvdaws kev txhaum, mas thiaj zam tau lawv lub txim vim lawv tsis yog txhob txwm ua txhaum thiab lawv twb coj tsiaj tuaj hlawv kub hnyiab xyeem rau Yawmsaub thiab muab xyeem ua kevcai daws txim rau ntawm Yawmsaub xubntiag lawm, vim yog lawv ua txhaum, mas thiaj zam tau ib tsoom Yixayee sawvdaws tej kev txhaum thiab zam tau lwm haiv neeg uas nrog lawv nyob, rau qhov ib tsoom neeg sawvdaws tau koom tes ua txhaum uas tsis yog txhob txwm ua lawm. “ ‘Yog muaj ib tug twg ua txhaum uas tsis yog txhob txwm ua, tus ntawd yuav tsum muab ib tug maum tshis hnub nyoog muaj ib xyoos ua kevcai daws txim. Tus pov thawj yuav ua kevcai ntxuav kev txhaum rau ntawm Yawmsaub xubntiag rau tus uas tau ua txhaum uas tsis yog nws txhob txwm ua, mas yuav ua kevcai ntxuav nws kev txhaum thiaj zam tau nws lub txim. Nej yuav muaj tib txoj kevcai no rau tus uas tsis yog txhob txwm ua txhaum tsis hais cov Yixayee uas nyob txum tim thiab lwm haiv neeg uas nrog nej nyob. Tiamsis yog leejtwg txhob txwm ua txhaum tsis hais cov uas nyob txum tim thiab lwm haiv neeg, kuj yog tus ntawd saib tsis taus Yawmsaub, mas tus ntawd yuav raug muab txiav tawm hauv nws haiv neeg mus. Vim nws tau saib tsis taus Yawmsaub tej lus thiab rhuav Yawmsaub tej kevcai, mas nws yuav raug muab txiav kiag tawm mus, nws yuav ris nws lub txim.’ ” Thaum cov Yixayee nyob hauv tebchaws moj sab qhua lawv pom ib tug mus khaws taws rau hnub Xanpatau. Cov uas pom nws khaws taws txawm coj nws los rau ntawm Mauxe thiab Aloo thiab cov pejxeem sawvdaws. Lawv thiaj muab tus ntawd kaw cia rau qhov tsis tau paub tseeb yuav ua li cas rau nws. Yawmsaub hais rau Mauxe tias, “Tus txivneej ntawd yeej yuav tsum tuag. Cov pejxeem sawvdaws cia li xuas pob zeb ntaus nws rau nraum ntug zos.” Cov pejxeem sawvdaws thiaj coj nws tawm mus rau nraum ntug zos thiab xuas pob zeb muab nws ntaus kom tuag raws li Yawmsaub hais rau Mauxe. Yawmsaub hais rau Mauxe tias, “Cia li hais rau cov Yixayee tias, ‘Nej yuav tsum ntxhoo tw rau ntawm tej kaum qab tsho mus ib txhiab ib txhis txhua tiam li. Muab ib txoj xov xiav tis rau txhua lub kaum tw tsho xwv nej thiaj pom cov tw ntawd es thiaj nco ntsoov Yawmsaub tej lus nkaw huvsi thiab ua raws li, kom nej thiaj tsis mus ua ib yam dabtsi phem uas nej lub siab nyiam thiab nej lub qhov muag pheej ntshaw. Nej thiaj li nco ntsoov thiab ua raws li kuv tej lus nkaw huvsi thiab ua neeg dawb huv rau nej tus Vajtswv. Kuv yog Yawmsaub, yog nej tus Vajtswv uas coj nej tawm hauv Iyi tebchaws los kom kuv thiaj tau ua nej tus Vajtswv. Kuv yog Yawmsaub uas yog nej tus Vajtswv.’ ” Khaula uas yog Ixaha tus tub, nws yawg yog Khauha, nws yawg koob yog Levi, thiab Dathas thiab Anpilas uas yog Elia li tub, thiab Oo uas yog Pelej tus tub, lawv peb leeg yog xeem Lunpee, mas lawv coj neeg mus sawv tawm tsam Mauxe. Lawv coj ib pab Yixayee muaj ob puas tsib caug leej uas ua cov pejxeem li thawj uas xaiv hauv cov pejxeem los thiab yog cov uas muaj npe. Lawv tuaj txoos ua ke tawm tsam Mauxe thiab Aloo thiab hais rau ob tug tias, “Neb ua dhau cai lawm. Rau qhov ib tsoom neeg kuj dawb huv txhua tus, thiab Yawmsaub nrog nraim lawv. Ua cas neb tsab ua loj dua Yawmsaub cov neeg.?” Thaum Mauxe hnov li ntawd, nws kuj khwb nkaus lub plhu ti nkaus av. Nws hais rau Khaula thiab pab neeg ntawd tias, “Tagkis sawv ntxov Yawmsaub yuav qhia kom pom tias leejtwg yog nws li thiab leejtwg yog tus dawb huv, mas yuav kheev cia tus ntawd txav los ze Yawmsaub. Tus uas Yawmsaub xaiv Yawmsaub yuav kheev txav los ze nws. Yuav tsum ua li no. Khaula thiab koj pab neeg, cia li muab tej yias rau ncaig taws los. Cia li rau ncaig taws rau hauv thiab muab hmoov tshuaj tsw qab tso rau saum cov ncaig taws rau ntawm Yawmsaub xubntiag rau tagkis. Tus uas Yawmsaub xaiv yuav yog tus uas dawb huv. Nej cov Levi ua dhau cai lawm.” Mauxe hais rau Khaula tias, “Nej cov Levi cia li tig ntsej mloog. Qhov uas cov Yixayee tus Vajtswv muab nej cais tawm hauv cov Yixayee los xwv thiaj coj tau nej los nyob ze nws thiab ua haujlwm hauv Yawmsaub lub tsev ntaub thiab sawv tab meeg ntawm ib tsoom neeg uas tuaj txoos ua ke thiab tu cov Yixayee, yog ib qho me me xwb lov? Nws coj koj thiab koj cov kwvtij sawvdaws uas yog xeem Levi los ze nws los nej tseem nrhiav qhov uas yuav ua pov thawj thiab lov? Qhov uas koj thiab koj pab neeg tuaj txoos ua ke kuj yog tawm tsam Yawmsaub. Aloo yog leejtwg es nej yuav yws nws?” Mauxe txib neeg mus hu Dathas thiab Anpilas uas yog Elia li tub tuaj, tiamsis ob tug hais tias, “Wb tsis tuaj. Qhov uas koj coj peb tawm hauv lub tebchaws uas muaj kua mis thiab zib ntab ntws nto los es yuav muab peb tua pov tseg rau hauv tebchaws moj sab qhua yog ib qho me me xwb lov? Los koj tseem tsa koj ua thawj kav peb thiab lov? Tsis tag li ntawd koj twb tsis coj peb mus rau hauv lub tebchaws uas muaj kua mis thiab zib ntab ntws nto thiab tsis pub teb lossis vaj txiv hmab rau peb ua qub txeeg qub teg. Koj tseem yuav muab cov neeg no lub qhov muag kaus pov tseg thiab lov? Wb tsis tuaj li.” Mauxe thiaj chim heev thiab hais rau Yawmsaub tias, “Thov tsis txhob txais yuav tej uas lawv hlawv xyeem. Kuv kuj tsis tau txeeb lawv ib tug nees luav los yuav thiab kuv tsis tau ua ib qho phem rau ib tug twg li.” Thiab Mauxe hais rau Khaula tias, “Tagkis koj thiab koj pab neeg cia li tuaj rau ntawm Yawmsaub xubntiag, koj tus kheej thiab koj pab neeg thiab Aloo tuaj. Cia txhua tus nyias muab nyias lub yias rau ncaig taws thiab tso hmoov tshuaj tsw qab rau hauv. Nej ob puas tsib caug leej txhua tus nyias coj nyias lub yias tuaj rau ntawm Yawmsaub xubntiag. Koj thiab Aloo nyias coj nyias lub yias tuaj thiab.” Yog li no txhua tus nyias muab nyias lub yias thiab tso ncaig taws thiab tso hmoov tshuaj tsw qab rau saum cov ncaig taws, thiab lawv nrog Mauxe thiab Aloo sawv ntawm txojkev uas nkag rau hauv lub tsev ntaub sib ntsib. Khaula sau zog nws pab neeg ua ke tawm tsam Mauxe thiab Aloo ob tug rau ntawm txojkev uas nkag mus rau hauv lub tsev ntaub sib ntsib. Mas Yawmsaub lub hwjchim ci ntsa iab tshwm plaws los rau ib tsoom neeg pom. Yawmsaub hais rau Mauxe thiab Aloo tias, “Cia li ncaim ntawm cov neeg no mus. Tib ntsais muag xwb kuv yuav muab lawv rhuav tshem huvsi.” Ob tug txawm khwb nkaus lub plhu ti nkaus av, thov hais tias, “Au Vajtswv, uas yog neeg sawvdaws tus ntsuj plig li Vajtswv, thaum ib tug ua txhaum xwb koj yuav cia li chim rau ib tsoom neeg sawvdaws lov?” Mas Yawmsaub hais rau Mauxe tias, “Cia li hais rau cov pejxeem tias, ‘Nej cia li khiav deb ntawm Khaula thiab Dathas thiab Anpilas tej tsev ntaub.’ ” Ces Mauxe txawm sawv tsees mus rau ntawm Dathas thiab Anpilas. Yixayee cov kev txwj laus kuj nrog nws mus. Mauxe thiaj hais rau cov pejxeem tias, “Nej cia li khiav deb ntawm cov neeg phem no tej tsev ntaub thiab txhob kov lawv ib yam dabtsi li tsam ces nej raug muab rhuav tshem vim tim lawv tej kev txhaum huvsi.” Cov pejxeem thiaj khiav deb ntawm Khaula thiab Dathas thiab Anpilas tej chaw nyob mas Dathas thiab Anpilas kuj nrog ob tug pojniam thiab tej tub thiab tej menyuam yaus tawm los sawv ntawm lawv qhov rooj tsev ntaub. Thiab Mauxe hais tias, “Ua li no nej thiaj paub tias Yawmsaub txib kuv los ua tej haujlwm no huvsi tsis yog kuv ua raws li kuv lub siab. Yog cov neeg no tuag yam li luag tsoom zeej sawvdaws lossis lub khuab raug lawv yam li luag tsoom zeej sawvdaws, kuj tsis yog Yawmsaub txib kuv los. Tiamsis yog Yawmsaub ua kom muaj ib yam tshiab tshwm los, thiab daim av rua ncauj nqos cov neeg no thiab lawv tej qhov txhia chaw huvsi mus, thiab lawv nqes ciaj sia kais rau hauv tub tuag teb, mas nej yuav paub tias cov neeg no tau saib tsis taus Yawmsaub.” Thaum nws hais tej lus no tag, thaj av uas lawv sawv saud txawm tu nrho. Daim av rua ncauj nqos kiag lawv thiab lawv tej tsev neeg thiab Khaula cov neeg sawvdaws thiab lawv tej qhov txhia chaw huvsi. Ua li no lawv thiab lawv tej qhov txhia chaw huvsi thiaj nqes ciaj sia kais rau hauv tub tuag teb. Daim av kaw nkaus lawv cia mas lawv thiaj puam tsuaj tag ploj hauv ib tsoom neeg. Cov Yixayee sawvdaws uas nyob ib ncig lawv hnov lawv lub suab qw ces txawm khiav mus, thiab hais tias, “Ntshai tsam lub ntiajteb yuav nqos peb thiab.” Mas hluavtaws tawm ntawm Yawmsaub los hlawv ob puas tsib caug leej uas tabtom hlawv hmoov tshuaj tsw qab xyeem ntawd. Yawmsaub hais rau Mauxe tias, “Cia li hais kom Ele‑axa uas yog pov thawj Aloo tus tub muab tej yias rau ncaig taws rho ntawm cov nplaim taws rau ib qho thiab muab cov ncaig taws rheeb nyias nyob nyias, rau qhov cov yias ntawd tseem dawb huv, yog cov yias uas cov neeg ntawd siv ua txhaum lawv thiaj tuag tag lawm. Thiab muab tej yias ntawd ntaus ua tej daim nyias nyias lo rau lub thaj xyeem, rau qhov twb muab cov yias ntawd xyeem rau Yawmsaub mas dawb huv lawm. Ua li no mas tej no yuav ua lub chaw ntaus cim rau cov Yixayee.” Pov thawj Ele‑axa thiaj muab cov yias tooj liab uas cov raug hluavtaws hlawv tau siv mus xyeem ntawd los ntaus ua tej daim lo rau lub thaj xyeem, ua lub chaw rau cov Yixayee nco ntsoov tias tus uas tsis yog Aloo caj ces mas tsis txhob txav ze hlawv hmoov tshuaj tsw qab xyeem rau ntawm Yawmsaub xubntiag tsam ces yuav zoo li Khaula thiab nws pab neeg, raws li Yawmsaub kom Mauxe hais rau Ele‑axa. Hnub tom qab ib tsoom pejxeem Yixayee sawvdaws yws Mauxe thiab Aloo tias, “Neb tua Yawmsaub cov neeg lawm.” Thaum cov pejxeem tuaj txoos ua ke tawm tsam Mauxe thiab Aloo, lawv tig ntiag rau lub tsev ntaub sib ntsib ua ciav tauv huab los laum nkaus lub tsev ntaub ntawd, thiab Yawmsaub lub hwjchim ci ntsa iab tshwm los. Mauxe thiab Aloo thiaj los rau ntawm lub tsev ntaub sib ntsib sab qhov rooj. Mas Yawmsaub hais rau Mauxe tias, “Cia li khiav tawm ntawm cov neeg no mus, tib ntsais muag xwb kuv yuav rhuav tshem lawv.” Ces ob tug txawm khwb nkaus lub plhu ti nkaus av. Mauxe thiaj hais rau Aloo tias, “Muab koj lub yias rau ncaig taws thiab muab hluavtaws ntawm lub thaj xyeem rau hauv thiab tso hmoov tshuaj tsw qab rau hauv thiab maj nroos coj mus rau ntawm cov pejxeem ua kevcai ntxuav lawv kev txhaum, rau qhov txojkev npau taws tawm ntawm Yawmsaub tuaj lawm, tej mob phem twb pib tshwm tuaj lawm.” Aloo thiaj muab lub yias ua raws li Mauxe hais thiab dhia mus rau hauv nruab nrab cov pejxeem. Mob phem twb tshwm tuaj rau cov pejxeem lawm, mas nws rau hmoov tshuaj tsw qab rau hauv lub yias thiab ua kevcai ntxuav cov pejxeem kev txhaum. Nws sawv hauv nruab nrab cov neeg ciaj thiab cov neeg tuag, mas tej mob phem ntawd thiaj ploj lawm. Cov neeg uas tuag tej mob phem ntawd muaj ib vam plaub txhiab xya pua leej, tsis suav cov uas nrog Khaula tuag. Thaum tej mob phem ntawd ploj lawm Aloo li rov mus cuag Mauxe rau ntawm txojkev uas nkag mus rau hauv lub tsev ntaub sib ntsib. Yawmsaub hais rau Mauxe tias, “Cia li hais rau cov Yixayee kom coj txhua xeem li pas nrig tuaj, yog txhua xeem tus thawj tug pas nrig, huvsi yog kaum ob tug. Cia li sau txhua tus tswv pas ntawd lub npe rau nws tus pas nrig. Sau Aloo lub npe rau xeem Levi tus pas nrig. Txhua xeem tus thawj yuav tsum muaj ib tug pas nrig. Koj yuav muab cov pas nrig ntawd tso rau hauv lub tsev ntaub sib ntsib rau ntawm lub phij xab uas rau Vajtswv tej lus sab xubntiag, yog lub chaw uas kuv ntsib nej. Tus uas kuv xaiv lawm nws tus pas nrig yuav hlav nplooj, ua li no kuv thiaj ua rau cov Yixayee lub suab yws uas lawv yws koj ntsiag mus.” Mauxe thiaj hais li no rau cov Yixayee mas lawv txhua xeem cov thawj txhua tus thiaj muab ib leeg ib tug pas nrig rau Mauxe, huvsi yog kaum ob tug pas nrig. Mas Aloo tus pas nrig kuj nyob hauv cov ntawd thiab. Mas Mauxe muab cov pas nrig ntawd tso rau ntawm Yawmsaub xubntiag hauv lub tsev ntaub uas muaj Vajtswv tej lus. Tagkis tom qab Mauxe nkag mus rau hauv lub tsev ntaub uas muaj Vajtswv tej lus, ua ciav Aloo tus pas nrig uas yog xeem Levi tus tau hlav nplooj ua cos tawg paj thiab txi txiv duaj deg siav lawm. Mauxe txawm coj tej pas nrig ntawd huvsi ntawm Yawmsaub lub xubntiag los rau cov Yixayee sawvdaws. Lawv tshuaj saib thiab nyias txais nyias tus pas nrig los. Yawmsaub hais rau Mauxe tias, “Cia li coj Aloo tus pas nrig rov mus tso rau ntawm lub phij xab uas muaj Vajtswv tej lus sab xubntiag, muab khaws cia ua lub cim rau cov uas fav xeeb, xwv koj thiaj tswj tau qhov uas lawv yws kuv lawv thiaj tsis tuag.” Mauxe kuj ua li ntawd. Yawmsaub hais kom nws ua li cas, nws kuj ua raws nraim li ntawd. Cov Yixayee hais rau Mauxe tias, “Saib maj, peb puam tsuaj, peb liamsim, peb sawvdaws liamsim tag lawm. Txhua tus uas txav los ze Yawmsaub lub tsev ntaub yuav tuag. Peb yuav tuag tag huvsi lov?” Yawmsaub hais rau Aloo tias, “Yog ua txhaum rau qhov chaw uas pe hawm kuv mas koj thiab koj cov tub thiab koj lub xeem yuav ris lub txim. Yog ua txhaum rau qhov uas koj ua pov thawj mas koj thiab koj cov tub yuav ris lub txim. Mas koj cia li coj koj cov kwvtij uas yog xeem Levi uas yog koj yawg koob lub xeem tuaj nrog koj koom ua ke xwv thiaj pab tau koj rau thaum koj thiab koj cov tub ua haujlwm ntawm lub tsev ntaub uas muaj Vajtswv tej lus. Lawv yuav ua num rau koj thiab ua txhua yam haujlwm rau ntawm lub tsev ntaub, tiamsis tsis txhob kheev lawv txav los ze tej twj uas siv hauv lub chaw pe hawm kuv thiab lub thaj xyeem tsam ces lawv thiab nej tuag. Lawv yuav tuaj koom nrog koj thiab lawv yuav saib xyuas lub tsev ntaub sib ntsib thiab tu txhua yam haujlwm rau lub tsev ntaub. Tiamsis dua lwm xeem mas tsis txhob kheev tuaj ze nej. “Nej yuav tsum saib thiab tu tej haujlwm ntawm lub chaw pe hawm kuv thiab tej haujlwm ntawm lub thaj xyeem xwv kuv txojkev npau taws thiaj tsis poob rau saum cov Yixayee dua li lawm. Kuv xaiv nej cov kwvtij Levi tawm hauv cov Yixayee los. Lawv raug muab xyeem rau Yawmsaub thiab muab pub rau nej ua tej haujlwm hauv lub tsev ntaub sib ntsib. Mas koj thiab koj cov tub yuav ua pov thawj xwb thiaj ua tau txhua yam haujlwm ntawm lub thaj xyeem thiab tej haujlwm ntawm daim ntaub thaiv sab hauv. Nej yuav tsum tu tej haujlwm no. Kuv pub qhov uas ua pov thawj rau nej, mas lwm tus uas txav los ze yuav raug muab tua pov tseg.” Mas Yawmsaub hais rau Aloo tias, “Thaum ua kevcai xyeem rau kuv mas tej uas tsis muab hlawv xyeem kuv muab ua koj tug, yog txhua yam dawb huv uas cov Yixayee coj tuaj xyeem. Kuv muab tej no tu rau koj thiab koj cov tub ua nej feem mus ib txhis. Tej uas dawb huv kawg nkaus uas tsis muab hlawv xyeem yog koj li tug. Txhua yam uas lawv muab xyeem tsis hais ua kevcai xyeem qoob loo, ua kevcai xyeem daws txim, ua kevcai ntxuav kev txaug kev txhaum uas lawv muab xyeem rau kuv, mas yog yam uas dawb huv kawg nkaus pub rau koj thiab koj cov tub. Koj yuav tsum noj tej no rau hauv ib qho chaw uas dawb huv kawg nkaus. Cov txivneej txhua tus noj tau. Yog yam uas dawb huv rau koj. Tej no mus kuj yog koj li thiab, yog tej uas cov Yixayee muab xyeem ua kevcai cev xyeem. Kuv muab tej no tu rau koj thiab koj tej tub thiab tej ntxhais ua lawv feem mus ib txhis. Koj tsev neeg txhua tus uas huv noj tau. Tej roj uas zoo kawg nkaus thiab tej cawv txiv hmab thiab tej qoob loo uas zoo kawg nkaus uas yog thawj phaum uas lawv coj tuaj xyeem rau Yawmsaub, kuv muab ua koj tug. Txhua yam txiv ntoo hauv lawv lub tebchaws uas siav thawj phaum es lawv coj tuaj xyeem rau Yawmsaub, kuj yog koj li. Koj tsev neeg txhua tus uas huv noj tau. Txhua yam hauv cov Yixayee uas raug muab cais pub rau kuv, kuj yog koj li. Txhua tus tub hlob uas yug hauv plab los tsis hais neeg li lossis tsiaj txhu li uas lawv muab xyeem rau Yawmsaub kuj yog koj li. Tiamsis koj yuav tsum txhiv neeg thawj tug menyuam thiab yuav tsum txhiv cov tsiaj txhu uas qias tsis huv thawj tug menyuam. Thaum menyuam neeg muaj ib hlis koj yuav tsum txhiv. Koj yuav tsum tu tus nqe txhiv ua tsib sekhee nyiaj, raws li sekhee uas siv hauv lub chaw pe Vajtswv, ib sekhee yog nees nkaum kela. Tiamsis thawj tug menyuam nyuj lossis yaj lossis tshis, koj tsis txhob muab txhiv, vim yog yam uas dawb huv. Koj yuav tsum muab cov ntshav nchos rau saum lub thaj thiab muab cov roj hlawv kub hnyiab xyeem kom muaj pa tsw qab hum Yawmsaub lub siab. Tiamsis cov nqaij yog koj li, ib yam li lub hauv nrob uas muab cev xyeem thiab txhais ncej qab xis uas yog koj li. Txhua yam dawb huv uas cov Yixayee coj tuaj xyeem rau Yawmsaub kuv muab tu rau koj thiab koj tej tub tej ntxhais uas nrog koj nyob ua nej feem mus ib txhis. No yog lo lus cog tseg ruaj khov rau koj thiab koj caj ces tab meeg Yawmsaub xubntiag mus ib txhis.” Yawmsaub hais rau Aloo tias, “Koj yuav tsis tau av ua qub txeeg qub teg rau hauv lub tebchaws no thiab koj yuav tsis nrog lawv muaj feem li. Kuv yog koj li feem thiab koj li qub txeeg qub teg rau hauv cov Yixayee. “Txhua yam uas cov Yixayee pub ib feem kaum rau kuv mas kuv muab ua qub txeeg qub teg rau cov Levi ntxiv tej dag num uas lawv ua, yog tej haujlwm uas lawv ua ntawm lub tsev ntaub sib ntsib. Txij no mus cov Yixayee yuav tsis tau txav ze lub tsev ntaub sib ntsib ntshai tsam lawv raug txim ces lawv tuag. Cov Levi yuav ua dag ua num ntawm lub tsev ntaub sib ntsib mas lawv yuav tau ris tej uas lawv ua txhaum, yog ib txoj kevcai uas nej yuav coj txhua tiam ib txhiab ib txhis mus li. Lawv yuav tsis muaj qub txeeg qub teg hauv cov Yixayee, rau qhov ib feem kaum uas cov Yixayee coj tuaj pub rau Yawmsaub mas kuv twb muab pub ua qub txeeg qub teg rau cov Levi lawm. Vim li no kuv thiaj hais txog lawv tias lawv yuav tsis nrog cov Yixayee tau qub txeeg qub teg.” Yawmsaub hais rau Mauxe tias, “Yog li no cia li hais rau cov Levi tias, ‘Thaum nej tau ib feem kaum ntawm cov Yixayee uas kuv muab ua qub txeeg qub teg rau nej mas nej yuav muab tej uas nej tau los ntawd rho ib feem kaum pub rov rau Yawmsaub. Tej uas nej pub ntawd kuj suav ib yam nkaus li tej uas tau hauv lub tshav ntaus qoob los, thiab tau ntawm lub rhawv tsuam kua txiv hmab los. Ua li no nej kuj yuav tsum muab tej uas rho ntawm txhua yam uas cov Yixayee pub ib feem kaum es nej tau txais lawd rho ib qho xyeem rau Yawmsaub, mas nej yuav muab tej uas xyeem rau Yawmsaub ntawd pub rau pov thawj Aloo. Txhua yam uas nej tau txais lawm mas tej uas nej yuav tsum muab pub rau Yawmsaub mas yuav tsum pub tej uas zoo kawg nkaus thiab tej uas dawb huv xwb.’ “Mas koj yuav hais rau lawv tias, ‘Thaum nej tau pub tej uas zoo kawg nkaus ntawd mas tej uas tshuav ntawd yuav suav ua cov Levi li feem yam nkaus li tej qoob uas tau hauv lub tshav ntaus qoob los thiab yam nkaus li tej kua txiv hmab uas tau ntawm lub rhawv tsuam los. Nej muab tej no noj rau lub chaw twg kuj tau, nej thiab nej tsev neeg noj tau, rau qhov yog tej uas ntxiv rau tej dag num uas nej ua ntawm lub tsev ntaub sib ntsib. Thaum nej muab yam uas zoo kawg nkaus pub lawm mas nej yuav tsis raug txim rau tej uas nej pub ntawd. Nej tsis txhob ua puas tsuas cov Yixayee tej qhov txhia chaw uas dawb huv tsam ces nej tuag.’ ” Yawmsaub hais rau Mauxe thiab Aloo tias, “Ntawm no mus yog ib txoj kevcai uas Yawmsaub kom ua. Cia li hais rau cov Yixayee kom coj ib tug maum nyuj liab uas tsis muaj chaw thuam li thiab tsis tau hai dua tsheb tuaj rau koj. Neb yuav muab tus nyuj ntawd rau pov thawj Ele‑axa, mas muab cab rau nraum ntug zos thiab muab tua kiag rau ntawm Ele‑axa xubntiag. Pov thawj Ele‑axa yuav muab nws ntiv tes raus cov ntshav nyuj nchos rau ntawm lub tsev ntaub sib ntsib sab hnub tuaj xya zaus. Lawv yuav muab tus maum nyuj hlawv tab meeg Ele‑axa, hlawv daim tawv tej nqaij tej ntshav tej quav huvsi. Tus pov thawj yuav muab mentsis ntoo ciab thiab zaub txig theem thiab xov liab pov rau hauv cub hluavtaws uas hlawv tus nyuj ntawd, mas tus pov thawj li ntxhua nws cev tsoos tsho thiab da dej mam li mus rau hauv lub zos. Tus pov thawj yuav qias tsis huv mus txog tsaus ntuj. Tus uas hlawv tus maum nyuj ntawd los yuav ntxhua nws cev tsoos tsho thiab da dej, nws yuav qias tsis huv mus txog tsaus ntuj. Ib tug txivneej uas huv yuav tsum mus yawm tej tshauv uas hlawv tus maum nyuj ntawd coj los rau lub chaw uas huv sab nraum ntug zos, mas muab cov tshauv ntawd khaws cia rau ib tsoom Yixayee sawvdaws siv ua dej ua kevcai ntxuav kev phem kev qias thiab ntxuav lub txim. Tus uas yawm cov tshauv uas hlawv tus maum nyuj ntawd yuav ntxhua nws cev tsoos tsho, nws yuav qias tsis huv mus txog tsaus ntuj. No yog ib txoj kevcai uas cov Yixayee thiab lwm haiv neeg uas nrog nej nyob yuav tsum coj mus ib txhiab ib txhis li. “Leejtwg kov tej cev tuag mas yuav qias tsis huv xya hnub. Hnub uas peb thiab hnub uas xya nws yuav muab cov dej ntawd los ua kevcai ntxuav nws thiaj li huv. Yog nws tsis ua kevcai ntxuav rau hnub peb thiab hnub xya nws yuav qias tsis huv. Leejtwg kov tej tuag, yog kov raug tej tuag lub cev es tsis ua kevcai ntxuav mas tus ntawd ua puas tsuas Yawmsaub lub tsev ntaub lawm, mas tus ntawd yuav raug muab txiav tawm hauv cov Yixayee mus, rau qhov nws tsis tau muab cov dej uas ua kevcai ntxuav kev phem kev qias los ntov nws, nws thiaj qias tsis huv, nws kev qias tseem lo nws. “Ntawm no mus yog tej kevcai uas yuav coj rau thaum ib tug tuag rau hauv lub tsev ntaub. Txhua tus uas nkag rau hauv tsev thiab txhua tus uas nyob hauv tsev yuav qias tsis huv xya hnub. Txhua lub twj taig uas tsis muaj hau vov kuj qias tsis huv. Yog leejtwg mus rau sab nraum ntug zos mus kov raug tej neeg uas raug ntaj tuag lossis tej cev tuag lossis pob txha neeg lossis qhov ntxa mas tus ntawd yuav qias tsis huv xya hnub. Tus uas qias tsis huv no mas yuav muab cov tshauv uas hlawv tus nyuj xyeem daws txim thiab muab dej cag hliv xyaw rau hauv lub phaj. Ib tug uas huv yuav muab ib re nplooj zaub txig theem raus cov dej ntawd nchos rau lub tsev ntaub thiab tej twj uas siv huvsi thiab nchos rau tej neeg uas nyob hauv thiab nchos rau tus uas mus kov pob txha lossis kov tus raug tua tuag lossis tej cev tuag lossis lub qhov ntxa. Tus uas huv ntawd yuav muab nchos rau tus uas qias tsis huv rau hnub uas peb thiab hnub uas xya. Ua li no mas hnub uas xya yuav ua kevcai ntxuav tus ntawd kom huv mas tus ntawd yuav ntxhua nws cev tsoos tsho thiab da dej, thaum tsaus ntuj nws thiaj li huv. “Tus uas qias tsis huv es tsis ua kevcai ntxuav mas tus ntawd yuav raug muab txiav tawm hauv ib tsoom Yixayee mus rau qhov nws ua puas tsuas lub chaw pe Yawmsaub. Vim nws tsis tau muab cov dej uas ua kevcai ntxuav kev phem kev qias los ntov nws, nws thiaj qias tsis huv. No yog ib txoj kevcai uas lawv yuav coj ib txhiab ib txhis mus li. Tus uas muab cov dej uas ua kevcai ntxuav kev qias ntawd nchos kuj yuav ntxhua nws cev tsoos tsho. Tus uas kov cov dej uas ntxuav kev qias ntawd nws kuj yuav qias tsis huv mus txog tsaus ntuj. Tus uas qias tsis huv kov raug yam twg mas yam ntawd kuj qias tsis huv. Thiab leejtwg kov raug yam ntawd nws kuj qias tsis huv mus txog tsaus ntuj thiab.” Ib tsoom Yixayee sawvdaws los txog tebchaws moj sab qhua Xee rau lub ib hlis, thiab lawv tsuam chaw nyob ntawm Khade. Ces Mili‑as txawm tuag thiab muab log rau qhov ntawd. Qhov chaw ntawd cov pejxeem tsis muaj dej haus, lawv thiaj tuaj txoos ua ke tawm tsam Mauxe thiab Aloo. Lawv nrog Mauxe sib cav hais tias, “Thaum peb cov kwvtij tuag tag rau ntawm Yawmsaub xubntiag, cia peb tuag thiab kuj zoo dua. Ua cas koj coj Yawmsaub cov neeg los rau hauv tebchaws moj sab qhua no es peb thiab peb tej tsiaj txhu yuav tuag tag rau ntawm no? Ua cas koj coj peb tawm hauv Iyi tebchaws, coj peb los rau lub chaw phem no? Tsis muaj qoob loo tsis muaj txiv cev tsis muaj txiv hmab tsis muaj txiv ntsiav kws thiab tsis muaj dej haus kiag li.” Ces Mauxe thiab Aloo txawm tawm ntawm cov pejxeem mus rau ntawm lub qhov rooj tsev ntaub sib ntsib thiab khwb nkaus rau hauv av. Yawmsaub lub hwjchim ci ntsa iab tshwm rau ob tug, mas Yawmsaub hais rau Mauxe tias, “Cia li coj tus pas nrig, thiab koj thiab koj tus tijlaug Aloo hu cov pejxeem tuaj ua ke. Neb cia li hais rau phab zeb tab meeg lawv kom txhawv dej los. Ua li no koj thiaj muab tau dej ntawm phab zeb los rau ib tsoom pejxeem thiab lawv tej tsiaj txhu haus.” Mauxe txawm coj tus pas nrig ntawm Yawmsaub xubntiag mus, raws li Yawmsaub tau hais rau nws. Mauxe thiab Aloo thiaj hu cov pejxeem tuaj ua ke rau ntawm phab zeb thiab Mauxe hais rau lawv tias, “Nej cov niag neeg fav xeeb, cia li tig ntsej mloog. Yuav cia wb ua dej txhawv hauv phab zeb no los rau nej lov?” Mauxe txawm tsa tes kiag xuas pas nrig ntaus phab zeb ntawd ob nplawg. Ces dej txawm txhawv los hlob hlob, mas cov pejxeem thiab lawv tej tsiaj txhu thiaj tau dej haus. Yawmsaub hais rau Mauxe thiab Aloo tias, “Vim neb tsis ntseeg kuv tsis hwm kuv ua tus dawb huv tab meeg cov Yixayee, vim li no neb yuav tsis tau coj cov pejxeem no mus rau hauv lub tebchaws uas kuv twb muab rau lawv lawm.” Cov dej ntawd yog cov dej Melinpa, yog qhov chaw uas lawv nrog Yawmsaub sib cav thiab Yawmsaub tau ua nws txojkev dawb huv tshwm rau hauv lawv nruab nrab. Mauxe tso neeg xa xov ntawm Khade mus hais rau Edoo tus vajntxwv tias, “Koj tus kwvtij Yixayee hais li no tias, Koj yeej paub txog tej kev txom nyem uas peb raug lawm. Peb tej poj koob yawm txwv tau tsiv mus rau Iyi tebchaws thiab peb nyob hauv Iyi tebchaws ntev heev. Cov Iyi tsim txom peb thiab peb tej poj koob yawm txwv. Mas thaum peb quaj rau Yawmsaub, nws kuj hnov peb lub suab thiab txib ib tug tubtxib saum ntuj los thiab nws coj peb tawm hauv Iyi tebchaws, mas nimno peb los nyob ntawm lub moos Khade uas npuas koj ciam teb. Thov cia peb hla koj lub tebchaws mus. Peb yuav tsis hla hauv koj tej liaj teb lossis hauv koj tej vaj txiv hmab, thiab peb yuav tsis haus koj tej qhov dej. Peb yuav taug Vajntxwv Txoj niag Kev Loj xwb, peb yuav tsis tig mus rau sab xis lossis mus rau sab laug, mus txog thaum peb hla dhau koj lub tebchaws.” Tiamsis Edoo tus vajntxwv hais rau Mauxe tias, “Koj hla tsis tau kiag li, yog koj tuaj kuv yuav xuas ntaj tiv koj.” Cov Yixayee hais rau Edoo tus vajntxwv tias, “Peb yuav taug txoj niag kev loj xwb. Yog peb haus koj cov dej, tsis hais peb thiab peb tej tsiaj txhu, peb yuav them nqe rau koj. Thov koj cia peb xuas kotaw hla mus, tsuas yog li no xwb.” Tiamsis nws teb tias, “Nej hla mus tsis tau li.” Cov Edoo txawm txhij tub rog coob muaj zog heev tuaj tawm tsam lawv. Yog li no Edoo thiaj tsis kheev Yixayee hla nws lub tebchaws, cov Yixayee thiaj lug ntawm nws mus lawm. Ib tsoom Yixayee sawvdaws thiaj tawm ntawm Khade los txog lub roob Hau. Ntawm lub roob Hau no Yawmsaub thiaj hais rau Mauxe thiab Aloo ntawm Edoo ciam teb tias, “Aloo yuav raug coj mus nrog nws tej poj koob yawm txwv nyob. Nws yuav tsis tau mus rau hauv lub tebchaws uas kuv muab rau cov Yixayee, rau qhov neb ob leeg fav xeeb tej lus uas kuv hais rau neb ntawm cov dej Melinpa. Cia li coj Aloo thiab nws tus tub Ele‑axa mus rau saum lub roob Hau. Mas hle Aloo cev tsoos muab rau nws tus tub Ele‑axa hnav. Aloo yuav raug coj mus nrog nws tej poj koob yawm txwv nyob, nws yuav tuag rau qhov ntawd.” Mauxe kuj ua raws Yawmsaub hais. Lawv thiaj nce mus rau saum lub roob Hau tab meeg cov pejxeem sawvdaws. Ces Mauxe txawm hle Aloo cev tsoos muab rau nws tus tub Ele‑axa hnav, ces Aloo txawm tu siav rau saum lub ncov roob ntawd lawm. Ces Mauxe thiab Ele‑axa thiaj nqes saum lub roob los. Thaum cov pejxeem sawvdaws pom tias Aloo tuag lawm, cov Yixayee sawvdaws quaj ntsuag Aloo tau peb caug hnub. Thaum cov Khana‑as tus vajntxwv uas kav lub moos Alaj uas nyob hauv Neke hnov tias cov Yixayee tabtom taug txojkev Athali los, nws txawm ua rog rau cov Yixayee thiab ntes tau qee leej coj mus lawm. Mas cov Yixayee cog lus rau Yawmsaub tias, “Yog koj muab cov neeg no rau hauv peb txhais tes mas peb yuav muab lawv tej moos ua kom puam tsuaj huvsi li.” Yawmsaub kuj mloog cov Yixayee lub suab thov, nws thiaj muab cov Khana‑as rau hauv lawv txhais tes. Lawv thiaj muab cov Khana‑as thiab lawv tej moos ua puam tsuaj tag huvsi, mas thiaj hu thaj chaw ntawd hu ua Hauma. Lawv tawm ntawm roob Hau taug txojkev uas mus rau Hiavtxwv Liab kom thiaj lug dhau Edoo tebchaws mus. Thaum lawv tabtom taug kev cov pejxeem ua tsis tau siab ntev. Cov pejxeem thiaj thuam yws Vajtswv thiab Mauxe hais tias, “Ua li cas neb yuav coj peb tawm hauv Iyi tebchaws los tuag rau hauv tebchaws moj sab qhua no? Vim tsis muaj mov noj tsis muaj dej haus, thiab peb dhuav tej zaub mov uas tsis muaj qabhau no hwv lawm.” Yawmsaub thiaj tso nab muaj taug heev los rau hauv cov Yixayee mas cov nab tom lawv, cov Yixayee thiaj tuag coob heev. Cov pejxeem thiaj tuaj cuag Mauxe thiab hais tias, “Peb tau ua txhaum vim peb tau thuam yws Yawmsaub thiab koj. Thov koj thov Yawmsaub muab cov nab no coj tawm ntawm peb mus.” Mauxe thiaj thov Yawmsaub pab cov pejxeem. Yawmsaub hais rau Mauxe tias, “Koj cia li ua ib tug nab muaj taug muab teem rau saum ib tug ncej. Txhua tus uas raug nab tom thaum lawv tsa muag ntsia tug nab ntawd mas lawv yuav ciaj sia nyob.” Ces Mauxe txawm muab tooj liab ua ib tug nab teem rau saum ib tug ncej. Yog leejtwg raug nab tom es nws tsa muag ntsia tug nab tooj ntawd nws thiaj muaj txojsia nyob. Cov Yixayee sawv kev mus tsuam chaw nyob rau ntawm Aunpau. Lawv ho sawv kev ntawm Aunpau mus tsuam chaw nyob rau ntawm Iye‑anpali hauv tebchaws moj sab qhua uas ncaj Mau‑a sab hnub tuaj. Lawv ho sawv kev qhov ntawd mus tsuam chaw nyob rau hauv lub hav Xelej. Lawv ho sawv kev qhov ntawd mus tsuam chaw nyob rau ntawm tus dej Anoo sab tid uas yog nyob hauv tebchaws moj sab qhua hauv cov Amaulai lub tebchaws, rau qhov tus dej Anoo yog Mau‑a tus ciam teb, yog nyob Mau‑a thiab Amaulai ntu nruab nrab. Vim li no hauv phau ntawv uas hais txog Yawmsaub ua rog thiaj muaj hais tias, “Vahe hauv Xufa, thiab tej kwj hav ntawm Anoo, thiab tej hauv hav mus txog ntua lub moos A thiab nthuav mus txog Mau‑a ciam teb.” Lawv tawm qhov ntawd mus txog Npe‑aw uas yog lub qhov dej uas Yawmsaub hais rau Mauxe tias, “Cia li sau cov pejxeem los ua ke, kuv yuav pub dej rau lawv.” Cov Yixayee thiaj hu zaj nkauj no hais tias, “Lub qhov dej cia li txhawv dej los, cia peb hu nkauj, yog lub qhov dej uas cov thawj khawb cia, yog lub uas cov uas ua hlob khawb tseg, lawv siv tej cwj nres thiab tej pas nrig.” Lawv ho tawm ntawm tebchaws moj sab qhua mus txog Mathana, thiab tawm ntawm Mathana mus txog Nahali‑ee, thiab tawm ntawm Nahali‑ee mus txog Npamauj, thiab tawm ntawm Npamauj mus txog lub hav hauv Mau‑a tebchaws ze hauv roob Pixaka uas ntsia ntsoov rau ntuj nrag teb do. Cov Yixayee txib neeg mus cuag Xihoo uas yog cov Amaulai tus vajntxwv mas hais tias, “Thov cia peb hla koj lub tebchaws mus. Peb yuav tsis nkag rau hauv koj tej liaj teb koj tej vaj txiv hmab, peb yuav tsis haus koj tej qhov dej. Peb yuav taug Vajntxwv Txoj niag Kev Loj mus kom dhau plaws koj lub tebchaws.” Tiamsis Xihoo tsis kheev cov Yixayee hla nws lub tebchaws. Nws txhij tub rog tuaj tawm tsam cov Yixayee hauv tebchaws moj sab qhua, nws tuaj nrog cov Yixayee ntaus rog ntawm Yahaj. Cov Yixayee xuas ntaj tua nws tuag thiab txeeb tau nws lub tebchaws txij ntua tus dej Anoo mus txog ntua dej Yanpo mus ti nkaus Asmoo ciam teb, vim Asmoo ciam teb ruaj khov. Cov Yixayee txeeb tau tej moos no huvsi thiab cov Yixayee mus nyob hauv cov Amaulai txhua lub moos thiab nyob hauv lub nroog Hesanpoo thiab nyob thoob plaws tej zej zog. Hesanpoo yog cov Amaulai tus vajntxwv Xihoo lub nroog loj. Nws yog tus uas ua rog rau cov Mau‑a tus vajntxwv uas kav ua nws ntej thiab nws txeeb tau Mau‑a tebchaws huvsi mus txog ntua tus dej Anoo. Vim li no cov uas txawj phim lus txiaj thiaj hais tias, “Cia li tuaj rau Hesanpoo, tuaj rhawv tuaj tsim kho Xihoo lub nroog, vim yog muaj hluavtaws tawm hauv Hesanpoo, muaj nplaim taws tawm hauv Xihoo lub nroog mus kub Mau‑a lub moos A thiab cov uas ua hlob hauv tej roob Anoo puam tsuaj tag. Mau‑a 'e, koj yuav raug txom nyem lauj, Khemauj cov neeg 'e, nej yuav raug puam tsuaj lauj! Khemauj tau ua rau nws tej tub khiav poob tebchaws tag, thiab ua rau nws tej ntxhais poob rau hauv Amaulai tus vajntxwv Xihoo tes. Peb twb tua lawv pov tseg huvsi. Hesanpoo puam tsuaj mus txog ntua Dinpoo. Peb rhuav tshem lawv mus txog ntua Naufa thiab txog ntua Medenpa. ” Yog li no cov Yixayee thiaj tau nyob hauv cov Amaulai lub tebchaws. Mas Mauxe txib neeg mus tshuaj lub moos Yaxaw, thiab lawv kuj txeeb tau tej zej zog ib ncig ntawd thiab muab cov Amaulai uas nyob hauv ntiab khiav mus. Lawv tig hlo taug txojkev uas mus pem Npasas mas Npasas tus vajntxwv Aus thiab nws cov pejxeem sawvdaws kuj tawm tuaj ua rog rau ntawm Ede‑i. Tiamsis Yawmsaub hais rau Mauxe tias, “Tsis txhob ntshai nws rau qhov kuv twb muab nws rau hauv koj txhais tes, muab kiag nws cov pejxeem thiab nws lub tebchaws huvsi, mas koj yuav ua rau nws ib yam nkaus li koj twb ua rau cov Amaulai tus vajntxwv Xihoo uas nyob hauv Hesanpoo.” Lawv thiaj li tua Aus thiab nws cov tub thiab nws cov pejxeem sawvdaws tsis tshuav ib tug li. Lawv thiaj txeeb kiag nws lub tebchaws. Cov Yixayee txawm tshais chaw mus tsuam chaw nyob hauv lub tiaj Mau‑a ntawm ntug dej Yaladee sab hnub tuaj uas ncaj lub moos Yelikhau. Npalaj uas yog Xipau tus tub kuj pom txhua yam uas cov Yixayee tau ua rau cov Amaulai. Cov Mau‑a ntshai haiv neeg ntawd heev kawg rau qhov lawv coob heev, cov Mau‑a ntshai cov Yixayee heev ua tshee hnyo. Cov Mau‑a thiaj hais rau Midee cov thawj tias, “Nimno pab niag neeg coob no yuav noj txhua yam ib ncig peb tag yam nkaus li nyuj noj zaub hauv teb.” Yog li no, Npalaj uas yog Xipau tus tub uas ua vajntxwv hauv Mau‑a tebchaws rau lub sijhawm ntawd, thiaj txib neeg mus hu Npala‑as uas yog Npe‑au tus tub ntawm lub moos Pethau uas nyob ze tus dej Yufeti hauv lub tebchaws uas yug nws hais tias, “Saib maj, ib haiv neeg tawm hauv Iyi tebchaws los, nkag puv nkaus lub ntiajteb lawm. Lawv tuaj nyob ti nkaus ntawm kuv lawm. Thov koj tuaj pab kuv tsawm foom haiv neeg ntawd, rau qhov lawv muaj zog heev dhau kuv. Tej zaum kuv yuav ntaus yeej lawv thiab ntiab tau lawv tawm hauv lub tebchaws mus. Kuv yeej paub tias koj foom koob hmoov rau tus twg tus ntawd yuav tau koob hmoov, thiab koj tsawm foom tus twg tus ntawd yuav raug tej lus foom tsis zoo ntawd.” Mau‑a cov thawj thiab Midee cov thawj thiaj coj ib co nqe ntiav tsawm foom mus. Lawv tuaj txog Npala‑as thiab hais Npalaj tej lus rau Npala‑as. Npala‑as hais rau lawv tias, “Hmo no nej pw ntawm no, mas Yawmsaub hais li cas rau kuv, kuv li coj tej lus ntawd los qhia rau nej.” Mau‑a cov thawj thiaj li nrog Npala‑as nyob ntawd. Mas Vajtswv los hais rau Npala‑as tias, “Cov neeg uas nrog koj nyob yog leejtwg?” Npala‑as teb Vajtswv tias, “Mau‑a tus vajntxwv Npalaj uas yog Xipau tus tubtxib lawv tuaj hais rau kuv tias, ‘Saib maj, ib haiv neeg tawm hauv Iyi tebchaws los, nkag puv nkaus lub ntiajteb lawm. Thov koj tuaj pab kuv tsawm foom haiv neeg ntawd. Tej zaum kuv yuav ntaus yeej lawv thiab ntiab tau lawv tawm hauv lub tebchaws mus.’ ” Vajtswv hais rau Npala‑as tias, “Koj tsis txhob nrog lawv mus. Tsis txhob tsawm foom cov neeg ntawd rau qhov kuv twb foom koob hmoov rau lawv lawm.” Tagkis sawv ntxov Npala‑as kuj sawv los hais rau Npalaj cov tim xyoob tias, “Nej cia li rov qab mus rau nej teb nej chaw, rau qhov Yawmsaub tsis kheev kuv nrog nej mus.” Yog li ntawd Mau‑a cov thawj thiaj sawv tsees rov mus cuag Npalaj thiab hais tias, “Npala‑as tsis kam nrog peb tuaj.” Npalaj thiaj txib dua ib co tim xyoob coob dua thiab muaj meej mom loj dua thawj pab rov qab mus. Lawv tuaj txog Npala‑as thiab hais rau nws tias, “Npalaj uas yog Xipau tus tub hais li no tias, ‘Tsis txhob cia muaj ib yam dabtsi tab kaum qhov uas koj tuaj cuag kuv. Kuv yeej yuav muab koj saib hlob, koj xav kom kuv ua dabtsi kuv yeej yuav ua li ntawd. Thov koj tuaj pab kuv tsawm foom haiv neeg ntawd.’ ” Tiamsis Npala‑as teb Npalaj cov tim xyoob tias, “Txawm yog Npalaj yuav muab nws lub tsev uas muaj nyiaj muaj kub puv nkaus rau kuv los kuv yuav ua tsis tau ib yam dabtsi dhau tej uas Yawmsaub uas yog kuv tus Vajtswv kom kuv ua, tsis hais loj los me. Thov nej pw ib hmos ntawm no tso xwv kuv thiaj li paub tias Yawmsaub hais dabtsi tsav ntxiv rau kuv.” Mas Vajtswv los hais rau Npala‑as hmo ntawd tias, “Yog cov neeg ntawd tuaj hu koj, koj cia li sawv tsees nrog lawv mus, tiamsis koj yuav tsum ua raws li uas kuv hais rau koj xwb.” Tagkis sawv ntxov Npala‑as thiaj sawv nog eeb rau nws tus nees luav nrog Mau‑a cov thawj mus. Tiamsis Vajtswv npau taws rau qhov uas Npala‑as mus, mas Yawmsaub tus tubtxib saum ntuj thiaj los sawv tav Npala‑as kev tawm tsam nws. Npala‑as caij nees luav thiab muaj ob tug tub qhe nrog nws mus. Thaum tus nees luav pom Yawmsaub tus tubtxib saum ntuj tuav rawv ntaj sawv hauv txojkev, nees luav txawm lug kiag rau tom ntug kev mus rau tom daim teb. Mas Npala‑as nplawm tus nees luav rov qab los taug txojkev. Ces Yawmsaub tus tubtxib saum ntuj txawm mus sawv rau ntu kev nqaim uas muaj ob sab ntsa loog xov tej vaj txiv hmab thaiv ob sab kev. Thaum tus nees luav pom Yawmsaub tus tubtxib saum ntuj, ces txawm zam mus ti nkaus ntsa loog tais Npala‑as txhais kotaw rau ntawm ntsa loog. Npala‑as kuj rov nplawm tus nees luav dua. Mas Yawmsaub tus tubtxib ho mus sawv rau tom hauv ntej uas kev nqaim heev tsis tau chaw zam rau sab xis los sab laug li. Thaum tus nees luav pom Yawmsaub tus tubtxib saum ntuj ces txawm txhos caug ntua, Npala‑as tseem caij sau nrob qaum. Npala‑as npau taws heev thiaj xuas nws tus pas nrig nplawm tus nees luav. Mas Yawmsaub qheb nees luav qhov ncauj, nees luav thiaj hais rau Npala‑as tias, “Kuv ua li cas rau koj es koj ntaus kuv peb zaug li no?” Npala‑as hais rau nees luav tias, “Vim koj txhob txwm zes kuv. Yog muaj ntaj nyob hauv kuv txhais tes nimno ces kuv twb muab koj tua kiag lawm.” Tus nees luav hais rau Npala‑as tias, “Kuv tsis yog koj tus nees luav uas koj niaj hnub caij tag koj sim neej los txog niaj hnub nimno lov? Kuv txeev ua li no rau koj lov?” Npala‑as teb tias, “Tsis txeev ua.” Ces tamsim ntawd Yawmsaub qheb Npala‑as lub qhov muag, nws thiaj pom Yawmsaub tus tubtxib saum ntuj tuav rawv ntaj sawv hauv txojkev. Npala‑as txawm nyo hau khwb nkaus hauv av. Yawmsaub tus tubtxib saum ntuj hais rau Npala‑as tias, “Ua cas koj ntaus koj tus nees luav peb zaug li no? Twb yog kuv tuaj tav koj vim koj tawv nyom kuv, taug txojkev no. Tus nees luav pom kuv mas lug kuv peb zaug. Yog nws tsis lug ntawm kuv ces puam tab kuv twb muab koj tua lawm es cia tus nees luav dim.” Ces Npala‑as txawm hais rau Yawmsaub tus tubtxib saum ntuj tias, “Kuv tau ua txhaum muaj txim lawm rau qhov kuv tsis paub tias koj sawv hauv txojkev tav kuv. Yog li ntawd, nimno yog koj tsis pom zoo ces kuv yuav rov qab mus.” Yawmsaub tus tubtxib saum ntuj hais rau Npala‑as tias, “Cia li nrog cov txivneej ntawd mus, tiamsis koj yuav tsum hais tej lus uas kuv kom koj hais xwb.” Npala‑as thiaj nrog Npalaj cov tim xyoob mus. Thaum Npalaj hnov tias Npala‑as tuaj lawm nws txawm mus tos Npala‑as rau ntawm Mau‑a lub moos uas ti nkaus ciam teb uas muaj tus dej Anoo ua ciam teb. Npalaj hais rau Npala‑as tias, “Kuv twb tso neeg tuaj hu koj los tsis yog? Ua cas koj tsis tuaj cuag kuv? Kuv tsis muaj peevxwm muab koj saib hlob lov?” Npala‑as hais rau Npalaj tias, “Kuv twb tuaj txog koj lawm nev. Nimno kuv yuav hais tau dabtsi? Kuv yuav tsum hais tej lus uas Vajtswv muab tso rau hauv kuv lub qhov ncauj xwb.” Ces Npala‑as txawm nrog Npalaj mus txog lub moos Khiliya Huxau. Ces Npalaj txawm muab nyuj thiab yaj tua xyeem thiab muab ib txhia rau Npala‑as thiab cov tim xyoob uas nrog nws ua ke. Hnub tom qab Npalaj kuj coj Npala‑as nce mus rau pem lub roob Npamau Npa‑as, nyob qhov chaw ntawd nws saib pom cov Yixayee ib txhia. Npala‑as hais rau Npalaj tias, “Koj cia li ua xya lub thaj xyeem rau kuv siv thiab npaj xya tus txiv nyuj xya tus txiv yaj rau kuv ntawm no.” Npalaj ua raws li Npala‑as hais, mas Npalaj thiab Npala‑as muab ib tug txiv nyuj nrog ib tug txiv yaj xyeem rau saum txhua lub thaj. Mas Npala‑as hais rau Npalaj tias, “Koj cia li mus sawv rau ntawm tej uas koj muab hlawv xyeem ib sab es kuv yuav mus. Tej zaum Yawmsaub yuav los ntsib kuv. Mas nws qhia yam twg rau kuv, kuv yuav hais rau koj.” Ces Npala‑as txawm nce mus rau saum lub ncov roob do hau. Vajtswv los ntsib Npala‑as thiab Npala‑as hais rau Vajtswv tias, “Kuv ua xya lub thaj xyeem thiab muab ib tug txiv nyuj thiab ib tug txiv yaj xyeem rau saum txhua lub thaj.” Yawmsaub muab lus rau hauv Npala‑as lub qhov ncauj thiab hais tias, “Cia li rov mus cuag Npalaj thiab hais tej lus no rau nws.” Npala‑as thiaj rov los cuag Npalaj, mas Npalaj thiab Mau‑a cov thawj tseem sawv ntsug ntawm tej uas muab hlawv xyeem ib sab. Npala‑as thiaj ua lus zaj lus zuag cev lus hais tias, “Npalaj tau coj kuv tuaj ntawm Alas tebchaws tuaj, Mau‑a tus vajntxwv coj kuv tuaj pem tej roob uas nyob sab hnub tuaj tuaj, ‘Cia li tuaj pab kuv tsawm foom Yakhauj thiab thuam Yixayee.’ Kuv yuav tsawm foom tus uas Vajtswv tsis foom tau li cas? Kuv yuav thuam tus uas Yawmsaub tsis thuam tau li cas? Kuv nyob saum roob tsuas pom lawv, kuv nyob saum ncov roob ntsia ntsoov lawv. Saib maj, ib haiv neeg nws nyob nws ib cag xwb, tsis suav rau hauv lwm haiv neeg. Leejtwg yuav suav txheeb tej hmoov av hauv Yakhauj lossis suav txheeb cov Yixayee ib feem hauv plaub? Thov cia kuv tuag yam li tus neeg ncaj ncees, thiab thov cia kuv lub neej thaum kawg zoo ib yam li lawv.” Ces Npalaj txawm hais rau Npala‑as tias, “Koj tau ua dabtsi rau kuv? Kuv hu koj tuaj tsawm foom kuv cov yeeb ncuab, tiamsis koj tsuas yog foom koob hmoov rau lawv xwb.” Npala‑as txawm teb tias, “Kuv yuav tsum ceev faj hais tej lus uas Yawmsaub muab rau hauv kuv lub qhov ncauj los tsis yog?” Mas Npalaj hais rau Npala‑as tias, “Koj nrog kuv mus dua ib qho chaw uas saib pom ntsoov lawv, tiamsis koj yuav pom lawv ib txhia xwb, yuav tsis pom tag nrho huvsi. Koj tuaj qhov chaw ntawd pab kuv tsawm foom lawv.” Ces Npalaj txawm coj Npala‑as mus txog Xaufi daim teb nce mus txog lub ncov roob Pixaka, mas nws tib xya lub thaj xyeem thiab muab ib tug txiv nyuj nrog ib tug txiv yaj tua xyeem rau saum txhua lub thaj. Npala‑as hais rau Npalaj tias, “Koj cia li sawv ntawm tej uas koj muab hlawv xyeem ntawd ib sab rau thaum kuv mus cuag Yawmsaub tim ub.” Mas Yawmsaub los ntsib Npala‑as thiab muab lus rau hauv Npala‑as lub qhov ncauj hais tias, “Cia li rov qab mus cuag Npalaj thiab hais tej lus no rau nws.” Npala‑as thiaj rov los cuag Npalaj, mas Npalaj thiab Mau‑a cov thawj tseem sawv ntsug ntawm tej uas muab hlawv xyeem ib sab. Npalaj thiaj nug nws hais tias, “Yawmsaub hais li cas?” Npala‑as thiaj ua lus zaj lus zuag cev lus hais tias, “Npalaj cia li sawv tsees tig ntsej mloog, Xipau tus tub 'e, cia li mloog kuv hais. Vajtswv tsis yog neeg uas yuav hais dag, nws tsis yog neeg li tub uas yuav ntxeev dua siab. Nws twb hais lawm, nws yuav tsis ua raws li ntawd lov? Nws twb cog lus tseg lawm, nws yuav tsis ua kom tiav lov? Vajtswv kom kuv foom koob hmoov. Nws twb foom koob hmoov lawm, kuv muab thim tsis tau. Tsis pom muaj kev txom nyem los rau Yakhauj, thiab tsis pom muaj kev ceeblaj los rau Yixayee. Yawmsaub uas yog lawv tus Vajtswv nrog nraim lawv, thiab muaj suab qw tias ib tug vajntxwv nyob hauv lawv. Vajtswv coj lawv tawm hauv Iyi tebchaws los, nws zoo yam nkaus li tus kub nyuj qus rau lawv. Tsis muaj kev tso dab tom Yakhauj, tsis muaj kev saib yaig saib sij txov Yixayee. Nimno luag yuav hais txog Yaukauj thiab Yixayee tias, ‘Saib Vajtswv tau ua li cas lawm.’ Saib maj, ib haiv neeg sawv tsees yam nkaus tus maum tsov ntxhuav, thiab sawv ntsug yam nkaus tus txiv tsov ntxhuav, tsis yeem pw mus txog thaum uas noj tus qauv, thiab haus tej uas nws tom tau li ntshav.” Ces Npalaj txawm hais rau Npala‑as tias, “Tsis txhob tsawm foom thiab tsis txhob foom koob hmoov rau lawv kiag li.” Mas Npal‑as teb Npalaj tias, “Kuv twb hais rau koj tias, Txhua yam uas Yawmsaub hais, kuv yuav tsum ua raws nraim, los tsis yog?” Npalaj txawm hais rau Npala‑as tias, “Cia li nrog kuv mus, kuv yuav coj koj mus dua ib qho chaw. Tej zaum Vajtswv yuav txaus siab cia koj tuaj qhov chaw ntawd pab kuv tsawm foom lawv.” Npalaj txawm coj Npala‑as mus txog lub ncov roob Pe‑au uas ntsia ntsoov rau ntuj nrag teb do. Npala‑as hais rau Npalaj tias, “Koj ua xya lub thaj xyeem rau kuv siv thiab npaj xya tus txiv nyuj xya tus txiv yaj rau kuv ntawm no.” Npalaj txawm ua raws li Npala‑as hais, mas muab ib tug txiv nyuj nrog ib tug txiv yaj xyeem rau saum txhua lub thaj. Thaum Npala‑as pom tias Yawmsaub txaus siab foom koob hmoov rau Yixayee, ces nws tsis mus saib yaig saib sij li yav tag los lawm, nws cia li ntsia ntsoov rau tebchaws moj sab qhua. Nws tsa muag ntsia pom cov Yixayee tsuam chaw nyob ib xeem nyob ua ib pawg. Mas Vajtswv tus Ntsuj Plig los kav nws lub siab, nws txawm ua lus zaj lus zuag cev lus hais tias, “No yog Npe‑au tus tub Npala‑as tej lus, yog tus uas lub qhov muag pom tseeb lawm tej lus, yog tus uas hnov Vajtswv tej lus li lus. Nws ua yog toog pom tus uas muaj hwjchim loj kawg nkaus, thiab nws ntog lawm tiamsis nws lub qhov muag pom tseeb. Yakauj 'e, koj tej tsev ntaub zoo nkauj kawg li lauj! Yixayee 'e, koj tej zej zog kuj zoo nkauj lauj!. Yam nkaus li tej hav uas nthuav dav, thiab zoo yam li lub vaj uas nyob ntawm ntug dej, thiab zoo yam li tej ntoo tsw qab uas Yawmsaub cog cia, thiab yam li tej ntoo ciab uas nyob ntawm ntug dej. Dej yuav ntws hauv lawv tej thoob los, lawv tej tub ki yuav muaj dej ntau. Lawv tus vajntxwv yuav loj dua vajntxwv Aka, thiab lawv lub tebchaws yuav vam meej. Vajtswv coj lawv tawm hauv Iyi tebchaws los, lawv zoo yam nkaus li tus kub nyuj qus. Lawv yuav noj tej tebchaws uas ua yeeb ncuab, thiab muab tej pob txha lov ua tej ywb yav, thiab tua xub chob luag. Lawv pliab lua pw yam li tus txiv tsov ntxhuav thiab yam li tus maum tsov ntxhuav. Leejtwg yuav kav tsa kom lawv sawv? Thov cia tus uas foom koob hmoov rau nej tau koob hmoov, thov cia tus uas tsawm foom nej raug tsawm foom.” Npalaj txawm npau taws rau Npala‑as, thiaj npuaj teg thiab hais rau Npala‑as tias, “Kuv hu koj tuaj tsawm foom kuv cov yeeb ncuab, tiamsis koj foom koob hmoov rau lawv peb zaug lawm. Koj cia li khiav rov mus rau koj vaj koj tsev. Kuv twb hais rau koj tias, Kuv yeej yuav muab koj saib hlob, tiamsis Yawmsaub tav tsis kheev koj tau lawm.” Ces Npala‑as hais rau Npalaj tias, “Kuv tsis tau hais rau koj cov tub xa xov li no lov? ‘Txawm yog Npalaj yuav muab nws lub tsev uas muaj nyiaj muaj kub puv nkaus rau kuv los kuv yuav ua tsis tau ib yam dabtsi dhau Yawmsaub tej lus, tsis hais ua zoo lossis ua phem raws li kuv lub siab. Yawmsaub hais li cas kuv tsuas hais li ntawd xwb.’ Nimno kuv yuav rov qab mus rau kuv cov neeg. Koj cia li los, kuv yuav qhia koj paub tias yav tom hauv ntej haiv neeg ntawd yuav ua li cas rau koj haiv neeg.” Nws txawm ua lus zaj lus zuag cev lus hais tias, “No yog Npe‑au tus tub Npala‑as tej lus, yog tus uas lub qhov muag pom tseeb lawm tej lus, yog tus uas hnov Vajtswv tej lus li lus thiab paub txog tus uas loj dua ntais lub tswvyim. Nws ua yog toog pom tus uas muaj hwjchim loj kawg nkaus, thiab nws ntog lawm, tiamsis nws lub qhov muag pom tseeb. Kuv pom lawv, tiamsis tsis yog tamsim no, kuv ntsia ntsoov lawv, tiamsis tsis yog lub sijhawm ze no. Ib lub hnub qub yuav tawm hauv Yakhauj los, ib tug cwj yuav tawm hauv Yixayee los, yuav tsoo Mau‑a lub hauv pliaj, thiab yuav rhuav tshem Sej caj ces sawvdaws. Edoo tebchaws yuav poob rau lwm tus, thiab Xe‑i uas ua yeeb ncuab rau cov Yixayee yuav poob rau lwm tus, tiamsis Yixayee yuav muaj zog heev zuj zus. Ib tug yuav tawm hauv Yakhauj los tswjhwm kav, thiab ua kom cov uas khiav dim hauv lub moos puam tsuaj tag.” Npala‑as tsa muag ntsia rau cov Amalej thiab ua lus zaj lus zuag cev lus hais tias, “Cov Amalej yog lub tebchaws uas ua thawj, tiamsis thaum kawg yuav raug puam tsuaj.” Thiab nws tsa muag ntsia cov Khenai thiab ua lus zaj lus zuag cev lus hais tias, “Koj lub chaw nyob ruaj khov thiab koj lub zes nyob hauv qhov zeb. Txawm li ntawd los cov Khenai yuav raug puam tsuaj tag, rau thaum cov Asu ntes nej.” Npala‑as kuj ua lus zaj lus zuag cev lus hais tias, “Au, thaum Vajtswv ua li no leejtwg yuav nyob tau? Tej nkoj deg yuav tuaj hauv lub moos Khithi tuaj thiab ntaus yeej Asu thiab Enpaw, tiamsis tej nkoj ntawd yuav raug puam tsuaj thiab.” Ces Npala‑as txawm sawv tsees rov mus rau nws vaj nws tsev. Thiab Npalaj kuj taug kev mus tsev thiab. Thaum cov Yixayee nyob ntawm Sithi, cov pejxeem txawm pib deev Mau‑a tej ntxhais. Cov ntxhais ntawd txawm yaum cov Yixayee mus nrog lawv xyeem qhov txhia chaw rau lawv tej dab, mas cov Yixayee thiaj nrog lawv noj haus thiab pe lawv tej dab. Ua li ntawd cov Yixayee thiaj ua koom tu dab Npa‑as ntawm Pe‑au. Yawmsaub txojkev npau taws thiaj tshwm plaws rau cov Yixayee. Yawmsaub hais rau Mauxe tias, “Cia li muab Yixayee cov thawj coj mus tua ziab tshav ntuj rau ntawm Yawmsaub xubntiag, kom Yawmsaub txojkev chim npau taws heev thiaj li thim ntawm cov Yixayee mus.” Mauxe thiaj hais rau cov Yixayee uas tu plaub tias, “Nej txhua tus cia li muab nej cov neeg uas ua koom tu dab Npa‑as ntawm Pe‑au tua pov tseg.” Ua ciav txawm muaj ib yawg Yixayee coj ib tug pojniam uas yog neeg Midee los rau hauv nws lub tsev tab meeg Mauxe thiab tab meeg ib tsoom Yixayee sawvdaws rau thaum lawv tabtom quaj ntawm lub qhov rooj tsev ntaub sib ntsib. Thaum Fineha uas yog Ele‑axa tus tub thiab yog tus pov thawj Aloo tus xeeb ntxwv pom li ntawd, nws txawm sawv tsees hauv cov pejxeem mus. Nws tuav rawv ib rab hmuv raws yawg Yixayee ntawd qab mus rau hauv lub tsev thiab tib nkaug hmuv tshab plaws tus yawg Yixayee thiab tus pojniam ntawd. Mas tej vij sub vij sw hauv cov Yixayee thiaj tu lawm. Txawm li cas kuj xij cov uas raug vij sub vij sw tuag muaj ob vam plaub txhiab leej. Yawmsaub hais rau Mauxe tias, “Fineha uas yog Ele‑axa tus tub thiab yog tus pov thawj Aloo tus xeeb ntxwv tau tswj kuv txojkev npau taws rau cov Yixayee, rau qhov nws khib xeeb ib yam li kuv khib xeeb cov pejxeem, kuv thiaj tsis muab lawv ua kom puam tsuaj rau thaum uas kuv khib xeeb. Yog li no cia li hais rau Fineha tias, ‘Kuv cog lus sib raug zoo rau nws. yog tej lus cog rau nws thiab nws caj ces uas yuav ua pov thawj mus ib txhis li, rau qhov nws khib xeeb rau nws tus Vajtswv thiab tau ntxuav tej kev txhaum hauv cov Yixayee.’ ” Tus yawg Yixayee uas raug tua ua ke nrog tus pojniam Midee ntawd npe hu ua Xili. Nws yog Xalu uas ua xeem Xime‑oo ib cum li thawj tug tub. Tus pojniam Midee uas raug tua ntawd npe hu ua Khoxapi. Nws yog Xuv uas ua cov Midee ib cum li thawj tug ntxhais. Yawmsaub hais rau Mauxe tias, “Cia li ua rau cov Midee raug txom nyem thiab ua kom lawv puam tsuaj. Rau qhov lawv tej tswvyim phem ua rau nej raug txom nyem rau thaum lawv ntxias nej ntawm Pe‑au uas yog tim tus muam Khoxapi uas yog cov Midee tus thawj li ntxhais uas raug tua rau hnub uas raug vij sub vij sw ntawm Pe‑au.” Thaum dhau tej xwm txheej kev ploj tuag ntawd lawd Yawmsaub hais rau Mauxe thiab Ele‑axa uas yog pov thawj Aloo tus tub tias, “Cia li muab cov Yixayee sawvdaws nce npe raws li lawv tsev neeg, cov uas hnub nyoog muaj nees nkaum xyoo rov saud, txhua tus hauv cov Yixayee uas ua tau tub rog.” Mauxe thiab pov thawj Ele‑axa thiaj hais rau lawv hauv lub tiaj Mau‑a ntawm ntug dej Yaladee uas ncaj lub moos Yelikhau hais tias, “Cia li muab cov neeg nce npe, cov uas hnub nyoog nees nkaum xyoo rov saud,” raws li Yawmsaub hais rau Mauxe. Cov Yixayee uas tawm hauv Iyi tebchaws los yog li no, Lunpee yog Yixayee tus tub hlob. Lunpee li tub yog Hanau thiab Hanau cum, Palu thiab Palu cum, Hexaloo thiab Hexaloo cum, Khami thiab Khami cum. Cov no yog tej cum hauv xeem Lunpee, huvsi muaj 43,730 leej. Palu tus tub yog Elia, Elia li tub yog Nemu‑ee, Dathas thiab Anpilas. Dathas thiab Anpilas no yog ob tug uas cov pejxeem xaiv los es nrog Khaula pab sawv tiv Mauxe thiab Aloo rau thaum uas lawv sawv tiv Yawmsaub, mas av thiaj li rua ncauj nqos ob tug thiab Khaula ua ke rau thaum uas pab ntawd tuag thiab thaum hluavtaws hlawv ob puas tsib caug leej tuag tag. Qhov uas lawv raug tua tuag ntawd yog qhuab ntuas sawvdaws. Tiamsis Khaula cov tub tuag tsis tag. Xime‑oo cov tub thiab lawv tej cum yog Nemu‑ee thiab Nemu‑ee cum, Yami thiab Yami cum, Yakhi thiab Yakhi cum, Xelag thiab Xelag cum, Sa‑u thiab Sa‑u cum. Cov no yog tej cum hauv xeem Xime‑oo, huvsi muaj 22,000 leej. Kas cov tub thiab lawv tej cum yog Xefoo thiab Xefoo cum, Hakiv thiab Hakiv cum, Suni thiab Suni cum, Auxani thiab Auxani cum, Elis thiab Elis cum, Alau thiab Alau cum, Aleli thiab Aleli cum. Cov no yog Kas li tub tej cum, huvsi muaj 40,500 leej. Yuda li tub yog Ws thiab Auna. Ws thiab Auna ob tug tuag hauv Khana‑as tebchaws lawm. Yuda cov tub thiab lawv tej cum yog Sela thiab Sela cum, Peles thiab Peles cum, Xelag thiab Xelag cum. Peles cov tub yog Hexaloo thiab Hexaloo cum, Hamu thiab Hamu cum. Cov no yog tej cum hauv xeem Yuda, huvsi muaj 76,500 leej. Ixakha li tub thiab lawv tej cum yog Thaula thiab Thaula cum, Puva thiab Puva cum, Yasu thiab Yasu cum, thiab Siloo thiab Siloo cum. Cov no yog tej cum hauv xeem Ixakha, huvsi muaj 64,300 leej. Xenpuloo li tub thiab lawv tej cum yog Xeles thiab Xeles cum, Eloo thiab Eloo cum thiab Yale‑ee thiab Yale‑ee cum. Cov no yog tej cum hauv xeem Xenpuloo, huvsi muaj 60,500 leej. Yauxej li tub thiab lawv tej cum yog Manaxe thiab Efa‑i. Manaxe li tub yog Makhi thiab Makhi cum (Makhi yog Kile‑a txiv), thiab Kile‑a thiab Kile‑a cum. Kile‑a cov tub yog Iyexaw thiab Iyexaw cum, Heleb thiab Heleb cum, Ali‑ee thiab Ali‑ee cum, Sekhee thiab Sekhee cum, Semida thiab Semida cum thiab Hefaw thiab Hefaw cum. Hefaw tus tub Xelaufeha tsis muaj tub muaj ntxhais xwb. Xelaufeha cov ntxhais yog Malas, Nau‑a, Haula, Meekha thiab Thilaxa. Cov no yog tej cum hauv xeem Manaxe, huvsi muaj 52,700 leej. No yog Efa‑i li tub thiab lawv tej cum. Suthela thiab Suthela cum, Npekhaw thiab Npekhaw cum thiab Thahas thiab Thahas cum. No yog Suthela li tub, Elaj thiab Elaj cum. Cov no yog Efa‑i li tub tej cum, huvsi muaj 32,500 leej. No yog Yauxej li tub thiab lawv tej cum. Npeeyamee li tub thiab lawv tej cum yog Npela thiab Npela cum, Asanpee thiab Asanpee cum, Ahilas thiab Ahilas cum, Sefufas thiab Sefufas cum thiab Hufas thiab Hufas cum. Npela li tub yog As thiab Na‑amas, yog As thiab As cum thiab Na‑amas thiab Na‑amas cum. Cov no yog Npeeyamee li tub thiab lawv tej cum, muaj 45,600 leej. No yog Daj tus tub thiab tus tub cum, yog Suhas thiab Suhas cum. Cov no yog xeem Daj thiab Daj tus tub cum, mas Suhas cum huvsi muaj 64,400 leej. Asaw cov tub thiab lawv tej cum yog Ina thiab Ina cum, Isavi thiab Isavi cum thiab Npeliya thiab Npeliya cum. Npeliya li tub yog Henpaw thiab Henpaw cum thiab Makhi‑ee thiab Makhi‑ee cum. Asaw tus ntxhais hu ua Xelag. Cov no yog Asaw li tub tej cum, huvsi muaj 53,400 leej. Nathali cov tub thiab lawv tej cum yog Yaxe‑ee thiab Yaxe‑ee cum, Kuni thiab Kuni cum, Yexaw thiab Yexaw cum thiab Silee thiab Silee cum. Cov no yog xeem Asaw thiab lawv tej cum, huvsi muaj 45,400 leej. Cov Yixayee uas suav cia no huvsi muaj 601,730 leej. Yawmsaub hais rau Mauxe tias, “Muab lub tebchaws faib ua qub txeeg qub teg rau cov Yixayee raws li tej npe uas suav cia. Xeem uas coob mas muab thaj uas dav ua lawv qub txeeg qub teg, xeem uas tsawg muab thaj uas nqaim ua lawv qub txeeg qub teg. Txhua xeem yuav tau qub txeeg qub teg npaum li lawv cov neeg. Muab lub tebchaws ua ntawv rho faib, mas raws li txhua xeem tej npe xeem lawv yuav tau qub txeeg qub teg. Rho ntawv faib tebchaws ua qub txeeg qub teg rau lawv raws li xeem coob xeem tsawg.” No yog cov Levi uas suav raws li lawv tej cum, Kwsoo thiab Kwsoo cum, Khauha thiab Khauha cum thiab Melali thiab Melali cum. No kuj yog tej cum hauv xeem Levi, Lini cum, Heploo cum, Mali cum, Musi cum thiab Khaula cum. Khauha yog Alav txiv. Alav tus pojniam yog Yaukhenpe, yog Levi tus ntxhais uas yug hauv Iyi tebchaws. Yaukhenpe thiab Alav li menyuam yog Aloo thiab Mauxe thiab ob tug tus muam hlob Mili‑as. Aloo li tub yog Nada, Anpihu, Ele‑axa thiab Ithama. Tiamsis Nada thiab Anpihu tuag rau thaum ob tug ua hluavtaws uas tsis dawb huv xyeem ntawm Yawmsaub xubntiag. Cov uas suav ntawd mas huvsi muaj 23,000 leej, yog txhua tus txivneej uas hnub nyoog muaj ib hlis rov saud, mas tsis muab lawv suav nrog cov Yixayee ua ke, rau qhov tsis muab qub txeeg qub teg hauv Yixayee rau lawv. Cov neeg no yog cov uas Mauxe thiab pov thawj Ele‑axa tau suav cia hauv lub tiaj Mau‑a ntawm ntug dej Yaladee ncaj lub moos Yelikhau. Cov Yixayee uas Mauxe thiab pov thawj Aloo tau suav hauv tebchaws moj sab qhua Xinai, mas tsis tshuav ib tug nyob hauv cov no li lawm, vim Yawmsaub twb hais txog lawv tias lawv yuav tuag tag rau hauv tebchaws moj sab qhua. Tsis muaj ib tug tshuav nyob li tsuas yog tshuav Yefune tus tub Khalej thiab Noo tus tub Yausua xwb. Xelaufeha cov ntxhais txav los. Xelaufeha yog Hefaw tus tub, Hefaw yog Kile‑a tus tub, Kile‑a yog Makhi tus tub, Makhi yog Manaxe tus tub, yog xeem Manaxe. Manaxe yog Yauxej tus tub. Cov ntxhais ntawd tej npe hu ua Malas, Nau‑a, Haula, Meekha thiab Thilaxa. Lawv tuaj sawv ntawm Mauxe thiab pov thawj Ele‑axa thiab cov uas ua hlob thiab cov pejxeem sawvdaws xubntiag rau ntawm lub qhov rooj tsev ntaub sib ntsib mas hais tias, “Peb txiv tuag hauv tebchaws moj sab qhua. Nws tsis yog nrog Khaula pab tawm tsam Yawmsaub, nws tuag nws lub txim xwb thiab nws tsis muaj tub. Ua cas nej yuav muab peb txiv lub npe rho tawm hauv nws cum lawm vim nws tsis muaj tub li? Thov pub peb nrog peb txiv tej kwvtij tau teb ua peb tug thiab.” Mauxe thiaj coj lawv zaj mus cuag Yawmsaub. Yawmsaub hais rau Mauxe tias, “Xelaufeha cov ntxhais hais raug lawm. Koj cia li pub kom lawv nrog lawv txiv tej kwvtij tau tebchaws ua qub txeeg qub teg ua lawv tug, thiab cia lawv txiv li qub txeeg qub teg poob ua lawv tug. Koj cia li hais rau cov Yixayee tias, ‘Yog ib tug txivneej twg tuag es nws tsis muaj tub kuj cia nws qub txeeg qub teg poob rau nws tus ntxhais. Yog nws tsis muaj ntxhais nej yuav muab nws qub txeeg qub teg rau nws tej txheeb kwvtij. Yog nws tsis muaj kwv tsis muaj tij thiab, kuj muab nws qub txeeg qub teg rau nws txiv tej kwvtij. Yog nws txiv tsis muaj kwvtij thiab, kuj muab nws qub txeeg qub teg rau tus uas txheeb txheeb hauv nws cum, mas tus ntawd yuav saws tau ua nws teej nws tug. No yog ib txojkev li kev cai rau cov Yixayee coj raws li Yawmsaub hais rau Mauxe lawd.’ ” Yawmsaub hais rau Mauxe tias, “Koj cia li nce mus saum lub roob Anpali no thiab saib mus rau lub tebchaws uas kuv muab rau cov Yixayee. Thaum koj pom lawd koj yuav tau mus nrog koj tej poj koob yawm txwv nyob yam nkaus li koj tus tijlaug Aloo twb mus lawm, rau qhov neb ob leeg tsis quav ntsej kuv tej lus hauv tebchaws moj sab qhua Xee rau thaum uas cov pejxeem cam thawj es neb twb tsis ua rau sawvdaws hwm kuv ua tus dawb huv rau ntawm dej txhawv tab meeg lawv.” (No yog cov dej Melinpa ntawm Khade hauv tebchaws moj sab qhua Xee.) Mauxe hais rau Yawmsaub tias, “Thov Yawmsaub uas yog Vajtswv uas kav neeg sawvdaws txojsia, tsa ib tug thawj los coj cov pejxeem no, yog ib tug uas yuav kav tau lawv thiab coj lawv tawm mus thiab nkag los, xwv Yawmsaub cov neeg thiaj li zoo tsis thooj li pab yaj uas tsis muaj tus tswv yug.” Yawmsaub hais rau Mauxe tias, “Cia li coj Noo tus tub Yausua uas muaj Vaj Ntsuj Plig nrog nraim nws tuaj thiab tsa tes npuab saum nws. Kom nws sawv ntawm pov thawj Ele‑axa thiab cov pejxeem sawvdaws xubntiag mas koj yuav ua kevcai tsa nws tab meeg sawvdaws. Koj yuav muab koj lub hwjchim ib txhia rau nws kom ib tsoom pejxeem Yixayee sawvdaws thiaj li mloog nws lus. Nws yuav sawv ntawm pov thawj Ele‑axa xubntiag mas Ele‑axa yuav siv Uli thiab Thumi ntawm Yawmsaub xubntiag saib Yawmsaub lub siab nyiam li cas. Nws thiab ib tsoom Yixayee sawvdaws yuav tawm mus thiab nkag los raws li tus pov thawj hais.” Mauxe ua raws nraim li uas Yawmsaub hais rau nws. Nws coj Yausua tuaj thiab kom nws sawv ntawm pov thawj Ele‑axa thiab cov pejxeem sawvdaws xubntiag, mas Mauxe tsa tes npuab saum Yausua thiab ua kevcai tsa nws raws li Yawmsaub hais kom Mauxe ua. Yawmsaub hais rau Mauxe tias, “Cia li hais rau cov Yixayee tias, ‘Tej uas muab xyeem rau kuv, yog tej zaub mov uas yog muab hlawv kub hnyiab xyeem kom muaj pa tsw qab hum kuv lub siab, mas nej yuav tsum mob siab xyeem rau kuv raws li tej sijhawm uas teem cia.’ Koj hais rau lawv tias, ‘Tej no yog tej uas yuav muab hlawv kub hnyiab xyeem rau Yawmsaub, yog ob tug menyuam txiv yaj uas muaj ib xyoos tsis muaj chaw thuam li uas yuav tsum niaj hnub xyeem mus li. Thaum tagkis nej yuav xyeem ib tug menyuam yaj, thaum yuav tsaus ntuj nej yuav xyeem dua ib tug. Thiab muab ib feem kaum hauv ib efa hmoov mog zoo zoo ntse ib feem plaub hauv ib hee roj uas tsuam tau zoo zoo xyeem ua kevcai xyeem qoob loo. No yog tej uas niaj hnub yuav ua kevcai hlawv huvsi xyeem mus li uas twb muab cob rau nej ntawm roob Xinai, kom muaj pa tsw qab hum Yawmsaub lub siab, ua yam uas hlawv kub hnyiab xyeem rau Yawmsaub. Tej uas yuav hliv xyeem mas muab ib feem plaub hauv ib hee cawv txiv hmab nrog ib tug menyuam yaj ua ke, muab cawv ntxwg hliv xyeem rau Yawmsaub rau hauv lub chaw uas dawb huv. Muab ib tug menyuam yaj xyeem rau thaum yuav tsaus ntuj, ib yam nkaus li uas muab xyeem thaum tagkis ua kevcai xyeem qoob loo thiab ua kevcai hliv cawv txiv hmab xyeem, yuav muab hlawv kub hnyiab xyeem kom muaj pa tsw qab hum Yawmsaub lub siab.’ ” “ ‘Hnub Xanpatau muab ob tug menyuam txiv yaj uas muaj ib xyoos tsis muaj chaw thuam li thiab ob feem kaum hauv ib efa hmoov mog zoo zoo ntse roj ua kevcai xyeem qoob loo nrog tej cawv txiv hmab uas hliv xyeem ua ke. No yog tej uas ua kevcai hlawv huvsi xyeem rau txhua hnub Xanpatau, yog ua los tsav rau tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li. “ ‘Txhua lub hli hnub xiab ib muab tej no ua kevcai hlawv huvsi xyeem rau Yawmsaub, yog ob tug thav txiv nyuj, ib tug txiv yaj, xya tus menyuam txiv yaj uas muaj ib xyoos tsis muaj chaw thuam li thiab muab peb feem kaum hauv ib efa hmoov mog zoo zoo ntse roj xyeem nrog ib tug txiv nyuj ua kevcai xyeem qoob loo, thiab ob feem kaum hauv ib efa hmoov mog zoo zoo ntse roj xyeem nrog ib tug txiv yaj, thiab ib feem kaum hauv ib efa hmoov mog zoo zoo ntse roj ua kevcai xyeem qoob loo xyeem nrog ib tug menyuam yaj ua ke, ua kevcai hlawv huvsi xyeem yog yam uas hlawv kub hnyiab xyeem kom muaj pa tsw qab hum Yawmsaub lub siab. Tej uas yuav muab hliv xyeem, ib tug txiv nyuj muab ib nrab hee cawv txiv hmab, ib tug txiv yaj mas muab ib feem peb hauv ib hee, ib tug menyuam yaj mas muab ib feem plaub hauv ib hee. No yog tej uas muab ua kevcai hlawv huvsi xyeem txhua lub hli hauv ib xyoos. Thiab yuav muab ib tug txiv tshis xyeem rau Yawmsaub ua kevcai xyeem daws txim, yuav muab xyeem tsav rau tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li.’ ” “ ‘Lub ib hlis hnub xiab kaum plaub yog Yawmsaub kevcai Hla Dhau. Hnub xiab kaum tsib lub hli no yog ua kevcai pam noj haus, mas yuav noj ncuav tsis xyaw keeb xya hnub. Thawj hnub nej yuav tuaj txoos ua ke ua kevcai dawb huv, nej tsis txhob ua ib yam haujlwm hnyav kiag li. Nej muab tej no hlawv kub hnyiab xyeem ua kevcai hlawv huvsi xyeem rau Yawmsaub, yog ob tug thav txiv nyuj, ib tug txiv yaj thiab xya tus menyuam txiv yaj uas muaj ib xyoos, yuav saib tib zoo tsis tseev muaj chaw thuam, thiab muab cov hmoov mog zoo zoo ntse roj ua kevcai xyeem qoob loo xyeem nrog cov tsiaj no, ib tug txiv nyuj mas muab peb feem kaum hauv ib efa, ib tug txiv yaj mas muab ob feem kaum hauv ib efa, thiab txhua tus menyuam yaj mas muab ib feem kaum hauv ib efa. Thiab yuav muab ib tug txiv tshis los ua kevcai xyeem daws txim, yog ntxuav nej kev txhaum. Nej yuav muab tej no xyeem tsav rau tej uas thaum tagkis nej muab ua kevcai hlawv xyeem, yog tej uas niaj hnub ua kevcai hlawv huvsi xyeem mus li. Nej yuav niaj hnub muab xyeem kom puv xya hnub, yog tej zaub mov uas hlawv kub hnyiab xyeem kom muaj pa tsw qab hum Yawmsaub lub siab. Yuav muab tej no xyeem tsav rau tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li. Hnub uas xya nej yuav tuaj txoos ua ke ua kevcai dawb huv, nej tsis txhob ua ib yam haujlwm hnyav kiag li.’ ” “ ‘Hnub uas nej xyeem thawj phaum qoob loo, thaum nej muab qoob tshiab xyeem rau Yawmsaub ua kevcai xyeem qoob loo, yog hnub uas nej ua kevcai xya lub chib so, mas nej yuav tuaj txoos ua ke ua kevcai dawb huv, nej tsis txhob ua ib yam haujlwm hnyav kiag li. Nej yuav muab tej no ua kevcai hlawv huvsi xyeem kom muaj pa tsw qab hum Yawmsaub lub siab, yog ob tug thav txiv nyuj, ib tug txiv yaj, xya tus menyuam txiv yaj uas muaj ib xyoos, thiab muab cov hmoov mog zoo zoo ntse roj ua kevcai xyeem qoob loo xyeem nrog cov tsiaj no, ib tug txiv nyuj mas muab peb feem kaum hauv ib efa, ib tug txiv yaj mas muab ob feem kaum hauv ib efa, thiab xya tus menyuam yaj mas ib tug muab ib feem kaum hauv ib efa, thiab ib tug txiv tshis ua kevcai ntxuav kev txhaum. Nej yuav muab tej no xyeem thiab tej cawv txiv hmab uas hliv xyeem tsav rau tej uas niaj hnub muab xyeem ua kevcai hlawv xyeem thiab ua kevcai xyeem qoob loo mus li. Yuav saib tib zoo tsis tseev muaj chaw thuam li.’ ” “ ‘Lub xya hli hnub xiab ib yuav tuaj txoos ua ke ua kevcai dawb huv, nej tsis txhob ua ib yam haujlwm hnyav li. Yog hnub uas nej tshuab raj kub yaj. Nej yuav muab tej no ua kevcai hlawv huvsi xyeem kom muaj pa tsw qab hum Yawmsaub lub siab, yog ib tug thav txiv nyuj, ib tug txiv yaj, xya tus menyuam txiv yaj uas muaj ib xyoos tsis muaj chaw thuam li, thiab muab cov hmoov mog zoo zoo ntse roj xyeem nrog cov tsiaj no, ib tug txiv nyuj mas muab peb feem kaum hauv ib efa, ib tug txiv yaj mas muab ob feem kaum hauv ib efa, thiab xya tus menyuam yaj mas ib tug muab ib feem kaum hauv ib efa thiab muab ib tug txiv tshis ua kevcai xyeem daws txim ntxuav nej kev txhaum. Yuav muab tej no xyeem tsav rau tej uas ua kevcai hlawv xyeem rau hnub hli xiab thiab tej uas ua kevcai xyeem qoob loo thiab tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li, raws li txoj kevcai, kom muaj pa tsw qab hum Yawmsaub lub siab, yog yam uas hlawv kub hnyiab xyeem rau Yawmsaub.’ ” “ ‘Lub xya hli hnub xiab kaum nej yuav tuaj txoos ua ke ua kevcai dawb huv thiab tswj nej lub siab tsis txhob ua ib yam haujlwm li. Nej yuav tsum muab tej no ua kevcai hlawv xyeem rau Yawmsaub kom muaj pa tsw qab hum Yawmsaub lub siab, yog ib tug thav txiv nyuj, ib tug txiv yaj, xya tus menyuam txiv yaj uas muaj ib xyoos tsis tseev muaj chaw thuam li, thiab muab cov hmoov mog zoo zoo ntse roj ua kevcai xyeem qoob loo xyeem nrog cov tsiaj no, ib tug txiv nyuj mas muab peb feem kaum hauv ib efa, ib tug txiv yaj mas muab ob feem kaum hauv ib efa, thiab xya tus menyuam yaj mas ib tug muab ib feem kaum hauv ib efa, thiab muab ib tug txiv tshis ua kevcai xyeem daws txim tsav rau tej uas xyeem ua kevcai xyeem daws txim ntxuav kev txhaum thiab tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li.’ ” “ ‘Lub xya hli hnub xiab kaum tsib yuav tuaj txoos ua ke ua kevcai dawb huv, nej tsis txhob ua ib yam haujlwm hnyav li, nej yuav ua kevcai noj haus xya hnub. Nej yuav muab tej no xyeem ua kevcai hlawv huvsi xyeem, yog yam uas hlawv kub hnyiab xyeem kom muaj pa tsw qab hum Yawmsaub lub siab, yog kaum peb tug thav txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis tseev muaj chaw thuam li, thiab muab cov hmoov mog zoo zoo ntse roj uas ua kevcai xyeem qoob loo xyeem ua ke nrog cov tsiaj no, kaum peb tug txiv nyuj mas ib tug muab peb feem kaum hauv ib efa, ob tug txiv yaj mas ib tug muab ob feem kaum hauv ib efa, kaum plaub tug menyuam yaj mas ib tug muab ib feem kaum hauv ib efa xyeem ua ke, thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. “ ‘Hnub uas ob mas xyeem kaum ob tug thav txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li, thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tsum xyeem, thiab muab ib tug txiv tshis ua kevcai xyeem daws txim tsav rau tej uas niaj hnub muab ua kevcai hlawv huvsi xyeem mus li thiab tej uas ua kevcai xyeem qoob loo thiab tej cawv txiv hmab uas hliv xyeem. “ ‘Hnub uas peb muab kaum ib tug txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li, thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tsum xyeem, thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. “ ‘Hnub uas plaub muab kaum tus txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li, thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tsum xyeem, thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. “ ‘Hnub uas tsib muab cuaj tug txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li, thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tsum xyeem, thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. “ ‘Hnub uas rau muab yim tus txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li, thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tsum xyeem, thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. “ ‘Hnub uas xya muab xya tus txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li, thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tsum xyeem, thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. “ ‘Hnub uas yim nej yuav tuaj txoos ua ke caiv so tiag tiag li, nej tsis txhob ua ib yam haujlwm hnyav li. Tiamsis nej yuav muab tej no ua kevcai hlawv huvsi xyeem yog yam uas hlawv kub hnyiab xyeem kom muaj pa tsw qab hum Yawmsaub lub siab, mas yog ib tug txiv nyuj, ib tug txiv yaj, xya tus menyuam txiv yaj uas muaj ib xyoos tsis muaj chaw thuam li, thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tus txiv nyuj thiab tus txiv yaj thiab tej menyuam yaj npaum li uas kevcai yuav tsum xyeem, thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. “ ‘Tej no nej yuav muab xyeem rau Yawmsaub rau tej kevcai noj haus raws tej sijhawm uas teem cia, yog xyeem tsav rau tej uas nej xyeem pauj tej uas nej fiv cia tseg rau Yawmsaub lawd thiab tej uas nej zoo siab muab xyeem pub xwb thiab tej uas ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem thiab tej uas ua kevcai xyeem sib raug zoo.’ ” Mas Mauxe hais rau cov Yixayee raws li uas Yawmsaub tau hais rau nws txhua yam. Mauxe hais rau cov thawj hauv txhua xeem Yixayee tias, “No yog tej uas Yawmsaub hais kom nej ua. Thaum leejtwg yeem cog lus tseg rau Yawmsaub lossis cog lus twv pav nws tus kheej ib yam dabtsi mas nws tsis txhob rhuav tej lus uas nws cog tseg ntawd, nws yuav tsum ua raws li nws lub qhov ncauj tau hais lawd huvsi. “Lossis thaum ib tug ntxhais hluas twg yeem cog lus tseg rau Yawmsaub thiab cog lus pav nws tus kheej rau thaum nws tseem ua hluas nkauj nyob hauv nws txiv tsev, thiab leej txiv kuj hnov tej lus uas nws yeem cog tseg thiab tej lus uas nws pav nws tus kheej, tiamsis leej txiv tsis hais li cas rau nws, kuj cia tej lus uas nws yeem ntawd nyob ruaj thiab cia tej lus uas nws cog lus pav nws tus kheej nyob ruaj. Tiamsis yog leej txiv tav nws rau hnub uas leej txiv hnov, mas tej lus uas nws yeem thiab tej lus uas nws cog lus pav nws tus kheej ntawd tsis yom ceev lawm. Yawmsaub yuav zam txim rau nws vim nws txiv twb tav nws lawm. “Tiamsis yog ib tug ntxhais hluas twg yeem cog lus tseg thiab tsis xav txhua es nws cia li cog lus pav nws tus kheej lawm, nws mam li mus yuav txiv lawm, mas nws tus txiv tau hnov tej ntawd, los hnub uas hnov ntawd nws tsis hais li cas rau nws tus pojniam, ces tej lus uas tus pojniam ntawd yeem tseg yuav nyob ruaj thiab tej lus uas nws cog lus pav nws tus kheej yuav nyob ruaj. Tiamsis yog hnub uas tus txiv hnov dheev tus txiv txawm tav ces kuj ua rau tej lus uas tus pojniam yeem lus ntawd thiab tej lus uas nws xav tsis txhua es cia li cog lus pav nws tus kheej ntawd tsis muaj qabhau lawm, mas Yawmsaub kuj yuav zam txim rau nws. Tiamsis tej lus uas tus poj ntsuam twg thiab tus poj nrauj twg yeem cog tseg thiab tej lus uas nws pav nws tus kheej mas tej lus ntawd yuav nyob ruaj. “Yog tus pojniam ntawd cog lus yeem tseg thiab cog lus twv pav nws tus kheej rau thaum nws tseem nrog nws tus txiv nyob, nws tus txiv hnov tiamsis tsis hais li cas thiab tsis tav nws mas nws tej lus yeem tseg ntawd yuav nyob ruaj thiab tej lus uas nws cog lus pav nws tus kheej yuav nyob ruaj. Tiamsis yog tus txiv muab tej lus ntawd rhuav kom tsis muaj qabhau lawm rau hnub uas nws hnov lawm ces txhua lo lus uas tawm hauv nws tus pojniam qhov ncauj yeem tseg thiab cog lus pav nws tus kheej tsis yom ceev lawm. Nws tus txiv twb muab rhuav tsis muaj qabhau lawm mas Yawmsaub kuj yuav zam txim rau nws. Tus pojniam txawm yeem cog lus tseg thiab cog lus pav nws tus kheej tswj yuam nws lub siab li cas lawm los nws tus txiv muaj cai muab ua kom ruaj khov lossis muab rhuav kom tsis muaj qabhau. Tiamsis yog nws tus txiv tsis hais li cas ib hnub dhau ib hnub li ces kuj yog nws ua rau tej lus uas nws tus pojniam yeem tseg thiab tej lus uas nws cog lus pav nws tus kheej ntawd yuav nyob ruaj, vim hnub uas nws twb hnov los nws twb tsis hais li cas. Tiamsis yog nws twb hnov ntev lawm nws mam li muab rhuav kom tsis muaj qabhau tom qab mas nws yuav ris nws tus pojniam lub txim.” Tej no yog tej kab ke uas Yawmsaub hais rau Mauxe, yog ntsig txog tus pojniam thiab tus txiv, thiab ntsig txog leej txiv thiab tus ntxhais rau thaum nws tseem ua ntxhais hluas nyob hauv leej txiv tsev. Yawmsaub hais rau Mauxe tias, “Cia li kom cov Yixayee mus ua pauj rau cov Midee, mas dhau ntawd koj yuav tau mus nrog koj tej poj koob yawm txwv nyob.” Mauxe thiaj hais rau cov pejxeem tias, “Nej muab cuab yeej ua rog rau nej cov txivneej ib txhia npaj mus ua rog rau cov Midee mas Yawmsaub yuav siv nej ua pauj rau cov Midee. Nej yuav xa cov Yixayee ib lub xeem ib txhiab leej mus ua rog.” Yog li no mas lawv thiaj txhij cov Yixayee uas suav qas txhiab leej ntawd, muaj ib lub xeem ib txhiab leej, huvsi muaj 12,000 leej uas muaj cuab yeej ua rog. Mauxe xa lawv mus ua rog ib xeem mas xa ib txhiab leej. Pov thawj Ele‑axa tus tub Fineha nrog lawv mus thiab coj tej twj uas siv hauv lub chaw pe Yawmsaub mus thiab coj tej raj xyu tshuab txhij rog. Lawv ua rog rau cov Midee raws li Yawmsaub hais rau Mauxe, thiab tua cov txivneej txhua tus huvsi pov tseg. Tej uas lawv tua ntawd lawv kuj tua tau cov Midee tej vajntxwv huvsi, yog Evi, Lekhee, Xuv, Hawj thiab Lenpa. Cov no yog cov Midee tsib tug vajntxwv. Thiab lawv xuas ntaj tua tau Npe‑au tus tub Npala‑as. Cov Yixayee ntes cov Midee tej pojniam thiab lawv tej menyuam coj los, thiab txeeb tej niag pab nyuj thiab tej niag pab yaj pab tshis thiab tej qhov txhia chaw huvsi coj los. Lawv hlawv tej lub moos uas cov Midee nyob thiab hlawv tej zej zog huvsi, thiab lawv sau txhua yam uas lawv lws thiab txhua yam uas lawv txeeb tau tsis hais neeg thiab tsiaj txhu coj huvsi mus. Lawv thiaj coj tej neeg uas ntes tau thiab tej uas lws tau thiab txeeb tau huvsi los rau Mauxe thiab pov thawj Ele‑axa thiab rau ib tsoom pejxeem Yixayee sawvdaws rau ntawm lub zos hauv lub tiaj Mau‑a ntawm ntug dej Yaladee uas ncaj lub moos Yelikhau. Mauxe thiab pov thawj Ele‑axa thiab txhua tus uas ua hlob hauv cov pejxeem tawm mus tos lawv nraum ntug zos. Mas Mauxe chim rau cov thawj rog uas kav ib txhiab leej thiab kav ib puas leej uas ua rog los ntawd. Mauxe hais rau lawv tias, “Nej tseg cov pojniam sawvdaws txojsia lov? Saib maj, cov pojniam no yog cov uas Npala‑as qhia kom lawv los ntxias tau cov Yixayee kom fav xeeb rau Yawmsaub ntawm Pe‑au, mas kev ploj kev tuag thiaj tshwm rau hauv Yawmsaub cov neeg. Yog li no cia li muab txhua tus menyuam tub tua huvsi thiab muab txhua tus pojniam uas nrog txivneej pw lawm tua huvsi, tiamsis tseg txhua tus ntxhais hluas uas tsis tau nrog txivneej pw ciaj sia rau nej. Nej cia li nyob sab nraum ntug zos xya hnub. Nej cov leejtwg tau tua neeg thiab nej leejtwg tau kov tej uas raug tua tuag, mas nej yuav tsum ua kevcai ntxuav nej thiab ntxuav tej neeg uas nej ntes coj los rau hnub uas peb thiab hnub uas xya. Nej yuav ua kevcai ntxuav txhua daim tsoos tsho thiab txhua yam uas muab tawv ua thiab txhua daim ntaub plaub tshis thiab txhua yam uas xuas ntoo ua huvsi.” Mas pov thawj Ele‑axa hais rau cov tub rog uas twb mus ua rog los hais tias, “No yog txoj kevcai uas Yawmsaub tau hais kom Mauxe ua. Tej kub, tej nyiaj, tej tooj liab, tej hlau, tej tooj dawb thiab tej txhuas, txhua yam uas thev taus hluavtaws, nej yuav tsum muab plhov hluavtaws thiaj li huv. Txawm li cas los yuav tsum muab cov dej uas ua kevcai ntxuav kev qias los ntxuav thiab. Txhua yam uas thev tsis taus hluavtaws nej yuav muab raus kiag cov dej ntawd. Hnub uas xya nej yuav ntxhua nej cev tsoos tsho nej thiaj li huv. Dhau ntawd nej thiaj li mus tau rau hauv lub zos.” Yawmsaub hais rau Mauxe tias, “Koj thiab pov thawj Ele‑axa thiab cov uas ua thawj hauv cov pejxeem txhua xeem cia li suav tej uas txeeb tau los tsis hais neeg thiab tsiaj txhu, thiab muab tej ntawd faib ua ob feem, ib feem rau cov tub rog uas mus ua rog thiab ib feem rau cov pejxeem. Thiab yuav rho ib feem ntawm cov tub rog uas mus ua rog li los pub rau Yawmsaub, yog rho ib feem hauv tsib puas los tsis hais neeg, nyuj, nees luav thiab yaj tshis huvsi, yog rho ntawm cov tub rog li feem xyeem pub rau Yawmsaub es muab rau pov thawj Ele‑axa yuav. Ntawm cov pejxeem li feem mas rho ib hauv tsib caug tsis hais neeg, nyuj, nees luav, yaj tshis, tej tsiaj txhu huvsi mas muab rau cov Levi uas saib xyuas Yawmsaub lub tsev ntaub.” Mas Mauxe thiab pov thawj Ele‑axa kuj ua raws nraim li uas Yawmsaub hais rau Mauxe. Tej qhov txhia chaw uas cov tub rog lws tau los mas cov uas tshuav yog npaum li no, 675,000 tus yaj, thiab 72,000 tus nyuj, 61,000 tus nees luav thiab 32,000 tus hluas nkauj uas tsis tau nrog txivneej pw dua. Cov tub rog uas tawm mus ua rog li feem yog 337,500 tus yaj, mas rho 675 tug yaj pub ua Yawmsaub li feem. Cov nyuj muaj 36,000 tus mas rho 72 tug ua Yawmsaub feem. Cov nees luav muaj 30,500 tus mas rho 61 tug ua Yawmsaub feem. Cov hluas nkauj muaj 16,000 mas rho 32 leeg ua Yawmsaub feem. Mauxe muab tej uas rho los xyeem pub rau Yawmsaub ntawd rau pov thawj Ele‑axa raws li Yawmsaub hais kom Mauxe ua. Cov pejxeem li feem uas faib ntawm cov tub rog uas mus ua rog los yog 337,500 tus yaj thiab 36,000 tus nyuj, thiab 30,500 tus nees luav, thiab 16,000 tus neeg. Cov pejxeem li feem Mauxe rho ib hauv tsib caug tsis hais neeg thiab tsiaj txhu pub rau cov Levi uas saib Yawmsaub lub tsev ntaub, raws li uas Yawmsaub hais kom Mauxe ua. Cov thawj rog uas kav ib txhiab leej thiab cov uas kav ib puas leej tuaj cuag Mauxe mas hais tias, “Peb uas yog koj cov tub qhe twb txheeb tej tub rog uas peb kav huvsi lawm, tsis muaj ib tug ploj li. Peb coj tej uas nyias taus nyias muab tau coj los pub rau Yawmsaub, yog tej uas xuas kub ua yog tooj tes tooj npab, nplhaib, kauj co thiab saw, kom thiaj li ntxuav tau peb kev txhaum ntawm Yawmsaub xubntiag.” Mauxe thiab pov thawj Ele‑axa thiaj li txais txhua yam uas xuas kub ua no ntawm cov tub rog. Tej kub uas Mauxe ob tug txais ntawm cov thawj rog uas kav ib txhiab leej thiab kav ib puas leej coj mus pub rau Yawmsaub ntawd mas hnyav 16,750 sekhee. (Cov tub rog ntawd nyias taus nyias muab tau yeeb ncuab tej qhov txhia chaw los.) Mauxe thiab pov thawj Ele‑axa txais tej kub ntawm cov thawj rog uas kav ib txhiab leej thiab kav ib puas leej coj los khaws cia rau hauv lub tsev ntaub sib ntsib ua lub chaw rau cov Yixayee nco txog qhov uas Yawmsaub pab cov Yixayee. Xeem Lunpee thiab xeem Kas muaj tsiaj txhu coob coob mas lawv pom tias Yaxaw tebchaws thiab Kile‑a tebchaws yog chaw zoo yug tsiaj txhu. Vim li ntawd xeem Kas thiab xeem Lunpee thiaj li tuaj cuag Mauxe thiab pov thawj Ele‑axa thiab cuag cov uas ua hlob hauv ib tsoom pejxeem mas hais tias, “Athalau, Dinpoo, Yaxaw, Nila, Hesanpoo, Ele‑ale, Xenpas, Nenpau thiab Npe‑oo, tej no yog lub tebchaws uas Yawmsaub twb kov yeej rau ntawm cov Yixayee lub xubntiag, yog chaw zoo yug tsiaj txhu, mas peb uas yog koj li tub qhe muaj tsiaj txhu.” Thiab lawv hais tias, “Yog tias koj txaus siab rau peb mas thov muab lub tebchaws no pub rau peb uas yog koj cov tub qhe ua peb li teej tug. Thov tsis txhob coj peb hla tus dej Yaladee mus.” Mauxe hais rau xeem Kas thiab xeem Lunpee tias, “Tsim nyog nej cov kwvtij mus ua rog es cia nej nyob nej twjywm ntawm no lov? Ua cas nej yuav ua rau cov Yixayee lub siab qaug zog tsis xav hla mus rau hauv lub tebchaws uas Yawmsaub pub rau lawv? Nej txiv twb ua li no rau thaum kuv txib lawv mus ntawm Khade Npania mus tshuaj lub tebchaws ntawd. Thaum lawv mus txog lub hav Ekhau thiab tau pom lub tebchaws ntawd lawm lawv kuj ua rau cov Yixayee lub siab qaug zog tag tsis xav txeem mus rau hauv lub tebchaws uas Yawmsaub twb pub rau lawv. Mas hnub ntawd Yawmsaub thiaj npau taws rau lawv, nws thiaj cog lus tawv hais tias, ‘Txhua tus uas tawm hauv Iyi tebchaws los uas hnub nyoog muaj nees nkaum xyoo rov saud mas tsis muaj ib tug uas yuav pom lub tebchaws uas kuv cog lus tseg tias kuv yuav pub rau Aplahas, Yiha thiab Yakhauj, rau qhov lawv tsis ua raws li kuv hais kawg siab kawg ntsws, tsuas yog Yefune uas yog cum Khena tus tub Khalej thiab Noo tus tub Yausua thiaj yuav pom xwb vim ob tug ua raws li Yawmsaub hais kawg siab kawg ntsws.’ Yawmsaub thiaj npau taws rau cov Yixayee nws thiaj ua rau lawv mus mus los los hauv tebchaws moj sab qhua tau plaub caug xyoos mus txog thaum lawv tiam neeg uas ua tej uas Yawmsaub pom tias phem ntawd puam tsuaj tag huvsi. Saib maj, nej tau hlob los nyob nej txiv chaw lawm ua ib pab noob menyuam txhaum thiab ua rau Yawmsaub yimhuab npau taws rau cov Yixayee. Yog nej fav xeeb tsis ua raws li nws hais nws yuav tso lawv tseg rau hauv tebchaws moj sab qhua dua ib zaug thiab mas nej yuav ua rau cov neeg no puam tsuaj tag huvsi.” Lawv txawm los cuag nws mas hais tias, “Peb yuav ua nkuaj rau peb tej yaj tej tshis nyob ntawm no, thiab ua vaj ua tsev ua moos rau peb cov menyuam nyob, tiamsis peb yuav coj cuab yeej ua rog thiab peb npaj txhij ua cov Yixayee ntej mus txog thaum uas coj lawv mus txog chaw. Peb tej menyuam yaus yuav nyob hauv tej moos uas muaj ntsa loog vim yog ntshai tej neeg uas nyob hauv lub tebchaws no. Peb yuav tsis rov qab mus tsev txog thaum uas cov Yixayee txhua tus tau teb tau chaw ua qub txeeg qub teg. Peb yuav tsis nrog lawv tau sab ntug dej Yaladee hnub poob tid ua qub txeeg qub teg, vim peb twb tau qub txeeg qub teg sab ntug dej Yaladee hnub tuaj tim no lawm.” Mauxe thiaj hais rau lawv tias, “Yog nej ua li no, yog nej coj cuab yeej ua rog mus ua rog tab meeg Yawmsaub, thiab nej txhua tus uas coj cuab yeej hla tus dej Yaladee tab meeg Yawmsaub mus txog thaum Yawmsaub ntiab nws cov yeeb ncuab khiav ntawm nws lub xubntiag mus tag, thiab lub tebchaws ntawd swb kiag rau ntawm Yawmsaub xubntiag lawm, mas nej mam li rov qab los nej thiaj li dim tej lus uas nej cog rau Yawmsaub thiab cov Yixayee. Lub tebchaws no yuav poob ua nej tug ua nej qub txeeg qub teg tab meeg Yawmsaub. Tiamsis yog nej tsis ua li no mas yeej yog nej ua txhaum rau Yawmsaub lawm ntag, nej cia li paub tseeb tias nej yuav raug nej lub txim. Cia li ua tej moos rau nej cov menyuam thiab ua nkuaj rau nej tej yaj tej tshis thiab ua raws li uas nej cog lus cia lawd.” Xeem Kas thiab xeem Lunpee hais rau Mauxe tias, “Yawg hlob, peb uas yog koj cov tub qhe yuav ua raws li uas koj hais kom peb ua. Peb cov menyuam yaus thiab peb cov pojniam thiab peb tej yaj tej tshis thiab peb tej tsiaj txhu huvsi yuav nyob tej moos hauv Kile‑a tebchaws no. Tiamsis peb uas yog koj cov tub qhe txhua tus txivneej yuav coj cuab yeej ua rog hla mus ua rog tab meeg Yawmsaub raws li uas koj hais kom peb ua.” Mauxe thiaj li hais txog ob xeem ntawd rau pov thawj Ele‑axa thiab Noo tus tub Yausua thiab txhua cum tus thawj hauv Yixayee cov xeem. Mauxe hais rau lawv tias, “Yog xeem Kas thiab xeem Lunpee txhua tus uas coj cuab yeej ua rog tab meeg Yawmsaub yuav nrog nej hla tus dej Yaladee mus es yog lub tebchaws swb nej lawm ces nej cia li muab lub tebchaws Kile‑a rau lawv ua lawv tug. Tiamsis yog lawv tsis coj cuab yeej nrog nej hla mus, lawv yuav nrog nej tau Khana‑as tebchaws ua lawv tug.” Xeem Kas thiab xeem Lunpee teb tias, “Yawmsaub hais rau peb uas yog koj cov tub qhe li cas ces peb yuav ua li ntawd. Peb yuav coj cuab yeej hla tab meeg Yawmsaub mus rau hauv Khana‑as tebchaws, tiamsis peb tej teb uas ua peb tug ua peb qub txeeg qub teg yuav nyob sab dej Yaladee tim no.” Mauxe thiaj muab tej tebchaws no rau xeem Kas thiab xeem Lunpee thiab rau Yauxej tus tub Manaxe xeem ib nrab, yog muab cov Amaulai tus vajntxwv Xihoo lub tebchaws thiab muab vajntxwv Aus lub tebchaws Npasas rau lawv, tag nrho tebchaws thiab tej moos thiab tej tebchaws uas nyob ib ncig, yog tej moos thoob plaws lub tebchaws ntawd huvsi. Mas xeem Kas thiaj li rhawv tej moos no, yog Dinpoo, Athalau, Alau‑aw, Athausofas, Yaxaw, Yaunpeha, Npenila thiab Npehala, yog tej moos uas muaj ntsa loog, thiab lawv ua nkuaj yaj nkuaj tshis. Xeem Lunpee rhawv tej moos no, yog Hesanpoo, Ele‑ale, Khiliyatha‑i, Nenpau thiab Npa‑as Me‑oo, (ob lub moos no yuav txauv dua npe tshiab) thiab Xima. Lawv txauv dua npe tshiab rau tej moos uas lawv rhawv ntawd. Manaxe tus tub Makhi cum mus txeeb tau tebchaws Kile‑a thiab ntiab cov Amaulai uas nyob ntawd khiav tag. Mauxe muab tebchaws Kile‑a rau Makhi uas yog Manaxe tus tub mas nws mus nyob rau hauv. Manaxe tus tub Ya‑i mus txeeb tau lawv tej zej zog thiaj li tis npe hu ua Havauya‑i. Naunpa mus txeeb tau Khenaj thiab tej zej zog ib ncig ntawd, thiaj tis npe hu ua Naunpa raws li nws lub npe. No yog tej ntu kev uas cov Yixayee mus thaum lawv tawm hauv Iyi tebchaws mus ua tej pab tej pawg li uas Mauxe thiab Aloo coj lawv. Mauxe tau sau txhua lub chaw uas lawv tawm mus ua ib ntus ib ntus raws li Yawmsaub hais kom mus. No yog tej ntu kev thiab tej chaw uas lawv tawm mus. Lawv sawv kev tawm hauv lub moos Lamexe mus yog lub ib hlis hnub xiab kaum tsib, yog hnub uas lawv ua kevcai Hla Dhau tag hnub tom qab, mas cov Yixayee tawm mus ua siab loj siab tuab tab meeg cov Iyi sawvdaws. Lub sijhawm ntawd cov Iyi tabtom pam tuag log lawv txhua tus tub hlob uas Yawmsaub muab tua hauv lawv nruab nrab. Yawmsaub kuj rau txim rau lawv tej dab. Yog li no cov Yixayee thiaj sawv kev tawm hauv Lamexe mus tsuam chaw nyob rau ntawm Xukhau. Lawv sawv kev tawm ntawm Xukhau mus tsuam chaw nyob rau ntawm Ethas uas nyob ntawm ntug tebchaws moj sab qhua. Lawv sawv kev tawm ntawm Ethas tig rov qab mus rau Pihahilau uas nyob Npa‑as Xefoo sab hnub tuaj thiab mus tsuam chaw nyob ze ntawm Midoo. Lawv sawv kev tawm ntawm Hahilau hla hauv nruab nrab hiavtxwv mus txog tebchaws moj sab qhua. Lawv mus hauv tebchaws moj sab qhua Ethas tau peb hnub mas mus tsuam chaw nyob rau ntawm Mala. Lawv sawv kev tawm ntawm Mala mus txog Elee. Ntawm Elee muaj kaum ob lub qhov dej txhawv thiab xya caum tsob toov laj mas lawv tsuam chaw nyob rau ntawd. Lawv sawv kev tawm ntawm Elee mus tsuam chaw nyob rau ntawm Hiavtxwv Liab. Lawv sawv kev tawm ntawm Hiavtxwv Liab mus tsuam chaw nyob rau hauv tebchaws moj sab qhua Xis. Lawv sawv kev tawm ntawm tebchaws moj sab qhua Xis mus tsuam chaw nyob rau ntawm Daukha. Lawv sawv kev tawm ntawm Daukha mus tsuam chaw nyob rau ntawm Aluj. Lawv sawv kev tawm ntawm Aluj mus tsuam chaw nyob rau ntawm Lefidee, qhov ntawd tsis muaj dej rau cov pejxeem haus. Lawv sawv kev tawm ntawm Lefidee mus tsuam chaw nyob rau ntawm tebchaws moj sab qhua Xinai. Lawv sawv kev tawm ntawm tebchaws moj sab qhua Xinai mus tsuam chaw nyob rau ntawm Khilau Hata‑ava. Lawv sawv kev tawm ntawm Khilau Hata‑ava mus tsuam chaw nyob rau ntawm Haxelau. Lawv sawv kev tawm ntawm Haxelau mus tsuam chaw nyob rau ntawm Lima. Lawv sawv kev tawm ntawm Lima mus tsuam chaw nyob rau ntawm Limoopele. Lawv sawv kev tawm ntawm Limoopele mus tsuam chaw nyob rau ntawm Lina. Lawv sawv kev tawm ntawm Lina mus tsuam chaw nyob rau ntawm Lixa. Lawv sawv kev tawm ntawm Lixa mus tsuam chaw nyob rau ntawm Kehelatha. Lawv sawv kev tawm ntawm Kehelatha mus tsuam chaw nyob rau ntawm lub roob Sefaw. Lawv sawv kev tawm ntawm lub roob Sefaw mus tsuam chaw nyob rau ntawm Halada. Lawv sawv kev tawm ntawm Halada mus tsuam chaw nyob rau ntawm Mahelau. Lawv sawv kev tawm ntawm Mahelau mus tsuam chaw nyob rau ntawm Thaha. Lawv sawv kev tawm ntawm Thaha mus tsuam chaw nyob rau ntawm Thela. Lawv sawv kev tawm ntawm Thela mus tsuam chaw nyob rau ntawm Mibkha. Lawv sawv kev tawm ntawm Mibkha mus tsuam chaw nyob rau ntawm Hamauna. Lawv sawv kev tawm ntawm Hamauna mus tsuam chaw nyob rau ntawm Mauxelau. Lawv sawv kev tawm ntawm Mauxelau mus tsuam chaw nyob rau ntawm Npene Ya‑akhas. Lawv sawv kev tawm ntawm Npene Ya‑akhaa mus tsuam chaw nyob rau ntawm Hauhakika. Lawv sawv kev tawm ntawm Hauhakika mus tsuam chaw nyob rau ntawm Yaunpatha. Lawv sawv kev tawm ntawm Yaunpatha mus tsuam chaw nyob rau ntawm Aplauna. Lawv sawv kev tawm ntawm Aplauna mus tsuam chaw nyob rau ntawm Exi‑oo Kenpaw. Lawv sawv kev tawm ntawm Exi‑oo Kenpaw mus tsuam chaw nyob rau ntawm tebchaws moj sab qhua Xee (uas yog Khade). Lawv sawv kev tawm ntawm Khade mus tsuam chaw nyob rau ntawm lub roob Hau uas nyob tebchaws Edoo ciam teb. Mas pov thawj Aloo nce saum lub roob Hau raws li Yawmsaub hais rau nws mas nws tuag rau ntawd lawm, yog lub tsib hlis hnub xiab ib xyoo plaub caug suav txij li hnub uas cov Yixayee tawm hauv Iyi tebchaws los. Thaum Aloo tuag rau saum lub roob Hau ntawd nws hnub nyoog muaj ib puas nees nkaum peb xyoos. Tus vajntxwv uas yog neeg Khana‑as uas kav lub moos Alaj uas nyob ntawm Neke hauv Khana‑as tebchaws hnov xov tias cov Yixayee taug kev tuaj. Lawv sawv kev tawm ntawm lub roob Hau mus tsuam chaw nyob rau ntawm Xamauna. Lawv sawv kev tawm ntawm Xamauna mus tsuam chaw nyob rau ntawm Punoo. Lawv sawv kev tawm ntawm Punoo mus tsuam chaw nyob rau ntawm Aunpau. Lawv sawv kev tawm ntawm Aunpau mus tsuam chaw nyob rau ntawm Iye‑anpali hauv tebchaws Mau‑a. Lawv sawv kev tawm ntawm Iye mus tsuam chaw nyob rau ntawm Dinpoo Kas. Lawv sawv kev tawm ntawm Dinpoo Kas mus tsuam chaw nyob rau ntawm Asmoo Dilatha‑i. Lawv sawv kev tawm ntawm Asmoo Dilatha‑i mus tsuam chaw nyob rau hauv tej roob Anpali ze ntawm Nenpau. Lawv sawv kev tawm ntawm tej roob Anpali mus tsuam chaw nyob rau hauv lub tiaj Mau‑a ntawm ntug dej Yaladee uas ncaj lub moos Yelikhau. Lawv tsuam chaw nyob ntawm ntug dej Yaladee txij ntua lub moos Npe Yesimau mus txog ntua Anpee Sithi hauv lub tiaj Mau‑a. Yawmsaub hais rau Mauxe hauv lub tiaj Mau‑a ntawm ntug dej Yaladee uas ncaj lub moos Yelikhau tias, “Cia li hais rau cov Yixayee tias, ‘Thaum nej hla tus dej Yaladee mus rau hauv Khana‑as tebchaws, nej yuav muab cov neeg hauv lub tebchaws ntawd txhua tus ntiab ntawm nej xubntiag mus, thiab muab lawv tej dab mlom uas txaug pob zeb ua thiab tej dab mlom uas lawv nchuav rhuav tshem kom puam tsuaj huvsi, thiab muab tej chaw siab teev dab tsoo puam tsuaj tag huvsi. Thiab nej yuav txeeb kav kiag lub tebchaws ntawd thiab mus nyob rau hauv rau qhov kuv twb muab lub tebchaws ntawd pub rau nej ua nej tug. Nej yuav muab lub tebchaws rho ntawv faib ua qub txeeg qub teg rau nej raws li nej tej xeem. Xeem twg coob kuj muab thaj uas dav rau xeem ntawd, xeem twg tsawg kuj muab thaj uas nqaim rau xeem ntawd. Leejtwg rho tau thaj teb twg kuj cia nws yuav thaj teb ntawd. Nej yuav tau qub txeeg qub teg hauv nej tej poj koob yawm txwv lub xeem. Tiamsis yog nej tsis muab cov neeg uas nyob hauv lub tebchaws ntawd ntiab khiav ntawm nej xubntiag mus mas cov uas nej tso tseg cia nyob ntawd yuav zoo yam nkaus li tus pos uas chob nej lub ntsiab muag lawm, thiab zoo li tej pos kaus ntsaj uas chob nej sab tav, thiab lawv yuav ua kev ceeblaj rau nej rau hauv lub tebchaws uas nej nyob ntawd. Mas kuv yuav ua rau nej ib yam nkaus li uas kuv twb xav hais tias kuv yuav ua rau lawv cov ntawd.’ ” Yawmsaub hais rau Mauxe tias, “Cia li hais rau cov Yixayee tias, ‘Thaum nej txeem mus rau hauv Khana‑as tebchaws (yog lub tebchaws uas yuav poob ua nej qub txeeg qub teg, yog tag nrho Khana‑as tebchaws huvsi), nej lub tebchaws sab nrad yog txij ntawm tebchaws moj sab qhua Xee raws Edoo ciam teb, thiab nej ciam teb sab nrad yog txij ntua Hiavtxwv Ntsev uas nyob sab hnub tuaj. Thiab nej ciam teb yuav lug lub dawm roob Akhanpi hla mus rau tebchaws moj sab qhua Xee mus txog ntua Khade Npania sab nrad, thiab mus txog Haxa‑ada hla mus txog Axamoo, thiab ciam teb yuav lug ntawm Axamoo mus txog tus dej Iyi mus kawg rau ntawm Hiavtxwv. “ ‘Nej ciam teb sab hnub poob yuav tau ntawm Hiavtxwv Loj thiab raws ntug hiavtxwv ntawd. No yog nej li ciam teb sab hnub poob. “ ‘No yog nej ciam teb sab ped, yog txij ntua Hiavtxwv Loj yuav ntsuas kom ncaj mus txog lub roob Hau. Txij ntawm lub roob Hau mas nej ntsuas kom ncaj mus txog txojkev uas mus rau lub moos Hama, thiab tus ciam teb sab no mus kawg rau ntawm Xente, thiab mus txog ntua Xifoo thiab mus kawg rau ntawm Haxa‑ena. No yog nej li ciam teb sab ped. “ ‘Nej yuav ntsuag ciam teb sab hnub tuaj txij ntua lub moos Haxa‑ena mus txog lub moos Sefas. Ciam teb ntawm Sefas nqes mus txog lub moos Linpla ntawm lub moos Ayi sab hnub tuaj, yuav nqes mus txog kaum Hiavtxwv Khinele thiab raws ntug hiavtxwv sab hnub tuaj, thiab taug tus dej Yaladee mus kawg rau ntawm Hiavtxwv Ntsev. No yog nej lub tebchaws thiab tus ciam teb uas vij puag ncig.’ ” Mauxe hais rau cov Yixayee tias, “No yog lub tebchaws uas nej yuav tau rho ntawv los ua qub txeeg qub teg uas Yawmsaub hais kom muab rau cuaj xeem thiab ib nrab xeem, rau qhov xeem Lunpee thiab lawv tej cum thiab xeem Kas thiab lawv tej cum twb tau lawv qub txeeg qub teg lawm, thiab xeem Manaxe ib nrab los kuj tau lawm thiab. Ob xeem thiab ib nrab xeem ntawd twb tau lawv qub txeeg qub teg sab ntug dej Yaladee tim ub uas ncaj lub moos Yelikhau sab hnub tuaj.” Yawmsaub hais rau Mauxe tias, “No yog cov uas yuav faib lub tebchaws ua qub txeeg qub teg rau nej, tej npe yog pov thawj Ele‑axa thiab Noo tus tub Yausua. Koj yuav tsa ib xeem ib tug uas ua hlob faib lub tebchaws ua qub txeeg qub teg. No yog cov uas ua hlob ntawd tej npe, xeem Yuda yog Yefune tus tub Khalej, xeem Xime‑oo yog Amihu tus tub Semu‑ee, xeem Npeeyamee yog Khiloo tus tub Elida. Tus uas ua hlob hauv xeem Daj yog Yauli tus tub Npukhi. Yauxej caj ces mas tus uas ua hlob hauv xeem Manaxe yog Efau tus tub Hani‑ee, thiab tus uas ua hlob hauv xeem Efa‑i yog Sithas tus tub Khemu‑ee. Xeem Xenpuloo tus uas ua hlob yog Pana tus tub Elixafa, xeem Ixakha tus uas ua hlob yog Asxa tus tub Pati‑ee, xeem Asaw tus uas ua hlob yog Selaumis tus tub Ahihu, xeem Nathali tus uas ua hlob yog Amihu tus tub Pedahee.” Cov neeg no yog cov uas Yawmsaub hais kom faib qub txeeg qub teg rau cov Yixayee hauv Khana‑as tebchaws. Yawmsaub hais rau Mauxe ntawm lub tiaj Mau‑a ntawm ntug dej Yaladee uas ncaj lub moos Yelikhau tias, “Cia li kom cov Yixayee muab tej qub txeeg qub teg uas lawv tau ua lawv tug lawm rho tej lub moos rau cov Levi nyob thiab pub tshav zaub ib ncig lub moos rau lawv. Cia tej moos ntawd ua lawv tug ua chaw rau lawv nyob thiab pub tshav zaub rau lawv tau yug nyuj yug yaj yug tshis yug tsiaj txhu huvsi. Tej tshav zaub ntawm lub moos uas nej yuav tu rau cov Levi ntawd mas tseg txij ntua lub ntsa loog mus dav li ib txhiab tshim puag ncig. Thiab koj yuav tsum ntsuas lub moos sab nraud kom dav ob txhiab tshim sab hnub tuaj, ob txhiab tshim sab nrad, ob txhiab tshim sab hnub poob thiab ob txhiab tshim sab ped, cia lub moos nyob hauv nruab nrab. No yog lawv tej moos li tshav zaub uas ua lawv tug. “Tej moos uas koj yuav pub rau cov Levi mas yuav pub rau lub moos ua moos cawm siav uas nej yuav kheev cia tus uas tua neeg khiav mus nyob, thiab yuav pub dua plaub caug ob lub moos rau cov Levi. Tej moos uas nej pub rau cov Levi huvsi yog plaub caug yim lub moos thiab muaj tshav zaub. Tej moos uas nej yuav muab rho hauv cov Yixayee li feem ntawd mas xeem uas coob nej kuj rho ntau, xeem uas tsawg kuj rho tsawg. Txhua xeem tau qub txeeg qub teg ntau thiab tsawg npaum li cas mas yuav pub tej moos rau cov Levi raws li lawv tau.” Yawmsaub hais rau Mauxe tias, “Cia li hais rau cov Yixayee tias, ‘Thaum nej hla tus dej Yaladee mus rau hauv Khana‑as tebchaws, mas nej yuav xaiv tej moos uas cawm siav rau nej, es yog leejtwg tau tua neeg tiamsis tsis yog txhob txwm tua ces thiaj li tau khiav mus rau hauv. Tej moos ntawd yuav ua tej moos cawm siav rau tus uas khiav tus rob caub, kom tus uas tua neeg ntawd thiaj tsis tuag ua ntej rau thaum uas nws tsis tau sawv tab meeg cov pejxeem rau ntawm lub rooj txiav txim. Tej moos uas nej tu ua moos cawm siav ntawd mas yog rau lub. Nej tu peb lub moos rau sab ntug dej Yaladee hnub tuaj thiab tu peb lub moos rau hauv Khana‑as tebchaws ua moos cawm siav. Rau lub moos ntawd yuav ua moos cawm siav rau cov Yixayee thiab rau lwm haiv neeg thiab rau tej neeg uas nrog lawv nyob, es yog leejtwg tau tua neeg tiamsis tsis yog txhob txwm tua ces thiaj li tau khiav mus rau hauv. “ ‘Yog leejtwg xuas tej twj siv uas yog hlau ntaus luag tuag, yeej yog nws tua neeg mas tus ntawd yuav raug muab tua pov tseg. Yog leejtwg txhais tes xuas ib lub pob zeb loj uas tua tau neeg tuag mus ntaus luag tuag, yeej yog nws tua neeg mas nws yuav raug muab tua pov tseg. Yog leejtwg txhais tes xuas tej cuab yeej ntoo uas tua tau neeg tuag ntaus luag tuag, yeej yog nws tua neeg mas tus ntawd yuav raug muab tua pov tseg. Cia tus uas rob caub tua tus ntawd ntag. Tus rob caub ntsib tug ntawd thaum twg mas yuav muab tua kiag pov tseg. Yog leejtwg ntxub luag es lam muab luag thawb lossis tos kev muab ib yam dabtsi laim raug kom tuag lossis ua tshawj chim es xuas nrig muab ntaus tuag, mas tus uas ntaus ntawd yuav raug muab tua pov tseg, yeej yog nws tua neeg. Thaum tus rob caub ntsib nws cia li muab nws tua kiag pov tseg. “ ‘Tiamsis yog nws tsis tau nrog luag ua tshawj chim es cia li thawb luag tamsid, lossis muab dabtsi laim raug luag tiamsis tsis yog txhob txwm tos kev, lossis xuas tej lub pob zeb uas tua tau neeg tuag tso mus raug luag tuag lawm vim yog nws tsis pom uas luag tuag lawm, tiamsis yeej tsis nrog tus ntawd ua yeeb ncuab thiab tsis yog nws txhob txwm xav ua phem, mas cov pejxeem yuav tsum tu plaub rau tus uas tua neeg thiab tus rob caub raws li txoj kevcai no. Cov pejxeem yuav pab tus uas tua ntawd kom dim ntawm tus rob caub txhais tes thiab yuav coj tus uas tua ntawd rov qab mus nyob hauv lub moos cawm siav uas nws tau khiav mus nyob ntawd. Cia nws nyob hauv mus txog thaum tus tuam pov thawj hlob uas raug muab cov roj dawb huv hliv tsa lawm tuag tso. Yog tus uas tua neeg ntawd tawm mus dhau lub moos cawm siav li kav xyuam uas nws khiav mus nyob hauv es yog tus rob caub ntsib nws dhau lub moos cawm siav li kav xyuam lawm ces tus rob caub muab nws tua pov tseg los tus rob caub tsis txhaum rau qhov uas tua ntawd. Rau qhov tus yawg ntawd yuav tsum nyob hauv lub moos cawm siav mus txog thaum tus tuam pov thawj hlob tuag. Thaum tus tuam pov thawj hlob tuag lawd tus uas tua neeg ntawd thiaj tau rov qab mus rau hauv nws teb nws chaw uas yog nws tug. “ ‘Tej no yog tej kab ke thiab tej kevcai uas nej yuav tsum coj ib tiam dhau ib tiam ib txhis li rau hauv txhua lub chaw uas nej nyob. Yog leejtwg tua lwm tus tuag mas tus uas tua ntawd yuav raug muab tua pov tseg raws li muaj timkhawv pom, tiamsis yog muaj tib leeg ua timkhawv xwb mas tsis txhob muab tus ntawd tua pov tseg. Dua li ntawd nej tsis txhob yuav tej nqe uas txhiv tus uas tua neeg uas ua txhaum txaus tuag li txojsia, nws yeej yuav raug muab tua xwb. Thiab nej tsis txhob yuav tej nqe txhiv tus uas khiav mus nyob hauv lub moos cawm siav tiamsis nws tau rov los nyob nws teb nws chaw ua ntej uas tus tuam pov thawj hlob tsis tau tuag. Ua li no nej thiaj tsis ua rau lub tebchaws uas nej nyob qias tsis huv, vim yog ntshav ua rau tebchaws qias tsis huv thiab tsis muaj ib yam dabtsi uas yuav ntxuav tau lub tebchaws uas ntshav los rau hauv lawd tsuas yog tus uas tua ntawd cov ntshav thiaj ntxuav tau xwb. Nej tsis txhob ua rau lub tebchaws uas nej nyob qias puas tsuas, yog lub chaw uas kuv nyob hauv nruab nrab rau qhov kuv yog Yawmsaub, kuv nyob hauv nruab nrab cov Yixayee.’ ” Cov thawj hauv tej tsev neeg hauv Kile‑a cum tuaj cuag Mauxe. Kile‑a txiv yog Makhi, Makhi txiv yog Manaxe uas yog Yauxej caj ces. Lawv hais rau Mauxe thiab cov uas ua hlob, yog cov uas ua thawj hauv txhua xeem Yixayee hais tias, “Yawmsaub tau kom koj uas yog peb tus tswv muab lub tebchaws rho ntawv faib ua qub txeeg qub teg rau cov Yixayee. Thiab Yawmsaub kom koj uas yog peb tus tswv muab Xelaufeha uas yog peb kwvtij li qub txeeg qub teg pub rau nws tej ntxhais. Tiamsis yog tej ntxhais ntawd yuav cov Yixayee lwm xeem tej tub mas lawv tej qub txeeg qub teg ntawd yuav raug muab rho tawm hauv peb tej poj koob yawm txwv qub txeeg qub teg mus tsav ntxiv rau lwm xeem li qub txeeg qub teg uas tej ntxhais mus yuav ntawd, mas thiaj yuav coj qub txeeg qub teg uas peb rho ntawv tau tawm hauv peb mus. Mas txog xyoo Zoo Siab uas thim txhua yam rov qab rau cov Yixayee, ces cov ntxhais ntawd tej qub txeeg qub teg yuav raug muab tsav rau hauv lwm xeem uas cov ntxhais mus yuav. Ces cov ntxhais ntawd li qub txeeg qub teg yuav raug muab rho tawm hauv peb xeem li qub txeeg qub teg mus lawm.” Mauxe thiaj hais rau cov Yixayee raws li Yawmsaub kom nws hais tias, “Yauxej cov tub xeem hais raug lawm. No yog tej uas Yawmsaub hais txog Xelaufeha tej ntxhais. Cia lawv yuav tus uas lawv txaus siab tiamsis yuav tsum yuav cov uas yog lawv txiv xeem. Mas cov Yixayee qub txeeg qub teg thiaj yuav tsis raug muab rho hauv ib xeem mus rau lwm xeem vim cov Yixayee txhua tus yuav tsum tuav rawv tej poj koob yawm txwv qub txeeg qub teg rau hauv nws xeem. Thiab tej ntxhais txhua tus hauv cov xeem Yixayee uas tau qub txeeg qub teg ua nws tug mas yuav tsum yuav txiv rau hauv nws txiv xeem xwb, xwv cov Yixayee txhua tus thiaj tuav tau nws tej poj koob yawm txwv qub txeeg qub teg cia ua nws tug. Ua li no thiaj tsis raug muab qub txeeg qub teg rho hauv ib xeem mus rau lwm xeem, rau qhov cov Yixayee txhua xeem nyias yuav tuav nyias qub txeeg qub teg cia.” Xelaufeha cov ntxhais ua raws li Yawmsaub hais rau Mauxe. Mas Malas, Thilaxa, Haula, Meekha thiab Nau‑a uas yog Xelaufeha cov ntxhais lawv yuav lawv txiv tej kwvtij li tub ua txiv xwb. Lawv yuav txiv hauv lawv xeem Manaxe uas yog Yauxej tus tub, mas lawv qub txeeg qub teg thiaj nyob hauv lawv txiv xeem mus li. Tej no yog tej lus nkaw thiab tej kab ke uas Yawmsaub hais kom Mauxe hais rau cov Yixayee ntawm lub tiaj Mau‑a ntawm ntug dej Yaladee uas ncaj lub moos Yelikhau. Tej lus no yog tej lus uas Mauxe hais rau ib tsoom Yixayee sawvdaws hauv tebchaws moj sab qhua ntawm dej Yaladee sab hnub tuaj, yog ntawm lub tiaj Alanpa ncaj lub moos Xus thiab nyob hauv nruab nrab cov moos no yog Palas, Thaufee, Lanpas, Haxelau thiab Dixaha. Txojkev ntawm Haule uas hla lub roob Xe‑i mus rau Khade Npania mas yog kaum ib hnub ke. Lub kaum ib hlis hnub xiab ib uas yog xyoo plaub caug Mauxe hais txhua txoj kevcai uas Yawmsaub hais rau Mauxe lawd rau cov Yixayee, yog hais tom qab uas nws twb kov yeej cov Amaulai tus vajntxwv Xihoo uas nyob hauv Hesanpoo thiab Npasas tus vajntxwv Aus uas nyob hauv Athalau thiab hauv Ede‑i. Mauxe pib piav txoj kevcai no hauv Mau‑a tebchaws ntawm tus dej Yaladee sab hnub tuaj hais tias, Yawmsaub uas yog peb tus Vajtswv twb hais rau peb ntawm Haule tias, “Nej so ntawm lub roob no ntev txaus lawm. Nej cia li tig hlo sawv kev mus pem toj siab Amaulai tebchaws thiab mus txog tej neeg uas nyob ze hauv Alanpa, yog tej uas nyob pem roob thiab ntawm tej pov roob Sefela thiab ntawm Neke thiab nyob ntawm ntug hiavtxwv thiab hauv Khana‑as tebchaws thiab Lenpanoo tebchaws mus txog ntua tus dej Yufeti. Saib maj, kuv muab lub tebchaws no tso rau ntawm nej xubntiag lawm. Nej cia li txeem mus txeeb lub tebchaws uas Yawmsaub cog lus ruaj khov rau nej tej poj koob yawm txwv, uas yog Aplahas, Yiha thiab Yakhauj hais tias yuav muab pub rau lawv thiab lawv caj ces.” Thaum ntawd kuv twb hais rau nej tias, “Kuv tib leeg xwb ris tsis taus nej. Yawmsaub uas yog nej tus Vajtswv pub nej huaj vam coob tuaj, mas sim saib, niaj hnub nimno nej coob npaum li tej hnub qub saum nruab ntug. Thov Yawmsaub uas yog nej tej poj koob yawm txwv tus Vajtswv pub kom nej huaj vam qas txhiab npaug thiab foom koob hmoov rau nej raws li nws twb cog lus tseg rau nej. Kuv tib leeg yuav ua li cas ris tau nej tej kev ceeblaj thiab tej nra thiab tej uas nej sib cav sib ceg? Cia li xaiv cov uas muaj tswvyim thiab txawj ntse thiab sawvdaws hwm hauv nej txhua xeem los es kuv yuav muab lawv tsa ua thawj coj rau nej.” Nej twb teb kuv tias, “Yam uas koj hais kod zoo lawm, tsim nyog peb ua.” Kuv thiaj muab cov thawj hauv nej txhua xeem uas muaj tswvyim thiab sawvdaws hwm tsa ua thawj coj rau nej kom ua tus kav ib txhiab, kav ib puas, kav tsib caug, kav kaum leej thiab ua nom tswv rau hauv nej txhua xeem. Thaum ntawd kuv twb hais rau cov uas tu nej plaub tias, “Nej yuav tsum tshuaj saib tej plaub ntug uas cov kwvtij muaj thiab tu tej plaub kom ncaj rau ob tog tsis hais kwvtij lossis lwm haiv neeg uas nrog nej nyob. Nej tsis txhob tuaj ib tog tu plaub, nej yuav tsum mloog tus yau thiab tus hlob hais ib yam nkaus. Nej tsis txhob ntshai neeg rau qhov tej kev tu plaub ntawd yog Vajtswv li. Tej plaub uas ceeblaj nej tu tsis tau ces cia li coj tuaj rau kuv, kuv mam li tshuaj saib.” Thaum ntawd kuv twb hais rau nej txog txhua yam uas nej yuav tsum ua. Peb thiaj tawm ntawm Haule mus dhau plaws lub niag tebchaws moj sab qhua dav heev uas txaus ntshai kawg uas nej twb pom ntawd, taug txojkev pem toj siab Amaulai tebchaws raws li uas Yawmsaub uas yog peb tus Vajtswv hais rau peb lawd, thiab peb los txog Khade Npania. Kuv twb hais rau nej tias, “Nej los txog toj siab Amaulai tebchaws lawm uas Yawmsaub uas yog peb tus Vajtswv pub rau peb. Saib maj, nej tus Vajtswv Yawmsaub twb muab lub tebchaws ntawd rau nej lawm. Cia li txeem mus txeeb ua nej tug raws li Yawmsaub uas yog nej tej poj koob yawm txwv tus Vajtswv hais cia lawd. Tsis txhob ntshai, tsis txhob poob siab li.” Nej sawvdaws txawm tuaj hais rau kuv tias, “Cia peb tso neeg ua peb ntej mus tshuaj lub tebchaws ntawd, es lawv li rov los qhia peb paub tej kev uas peb yuav mus thiab paub tej moos uas peb yuav mus ntawd.” Tej uas nej hais ntawd kuv kuj pom zoo, kuv thiaj xaiv kaum ob leeg hauv nej ib xeem ib leeg. Mas lawv cov ntawd thiaj sawv kev mus txog pem toj siab mus txog lub hav Ekhau mus tshuaj qhov ntawd. Lawv thiaj de tej txiv hmab txiv ntoo coj los rau peb thiab coj xov los rau peb hais tias, “Tej uas Yawmsaub uas yog peb tus Vajtswv pub rau peb mas yog ib lub tebchaws zoo heev.” Txawm yog li ntawd los nej tsis yeem txeem mus li. Tiamsis nej tseem tawv nyom Yawmsaub uas yog nej tus Vajtswv tej lus, thiab nej tseem yws yws hauv nej tej tsev ntaub hais tias, “Yog vim Yawmsaub ntxub peb Yawmsaub thiaj coj peb tawm hauv Iyi tebchaws los yuav muab peb cob rau hauv cov Amaulai txhais tes thiab muab peb ua kom puam tsuaj. Peb yuav txeem mus rau qhovtwg? Peb cov kwvtij ua rau peb siab ntsws yaj tag. Lawv hais tias, ‘Cov neeg ntawd muaj zog dua peb siab dua peb. Lawv tej moos kuj loj muaj ntsa loog siab nto ntuj, thiab peb tseem pom cov neeg Anaj nyob qhov ntawd thiab.’ ” Kuv txawm hais rau nej tias, “Tsis txhob ras tsis txhob ntshai lawv li. nej tus Vajtswv Yawmsaub ua nej ntej mus mas nws yuav ua rog pab nej ib yam li nws twb pab nej hauv Iyi tebchaws tab meeg nej lub qhov muag, thiab hauv tebchaws moj sab qhua, uas nej twb pom nej tus Vajtswv Yawmsaub muab nej puag ib yam li leej txiv puag nws tus menyuam tub, mus thoob txojkev uas nej mus ntawd mus txog thaum uas nej los txog ntawm no.” Txawm li cas los xij los nej pheej tsis ntseeg Yawmsaub uas yog nej tus Vajtswv uas ua nej ntej mus nrhiav chaw rau nej tsuam chaw nyob, hmo ntuj ua nplaim taws nruab hnub ua tauv huab qhia nej paub txojkev uas nej yuav tsum mus. Yawmsaub twb hnov nej tej lus mas nws thiaj npau taws thiab twv kiag tias, “Tiam neeg phem no yuav tsis muaj ib tug tau pom lub tebchaws zoo uas kuv cog lus ruaj khov tias yuav muab pub rau nej tej poj koob yawm txwv, tsuas yog Yefune tus tub Khalej thiaj pom xwb. Thiab kuv yuav pub lub tebchaws uas nws tau tsuj ntawd rau nws thiab nws tej tub ki, rau qhov nws ua raws li Yawmsaub lub siab nyiam kawg siab kawg ntsws.” Vim yog tim nej, Yawmsaub thiaj chim rau kuv thiab thiaj hais tias, “Koj yuav tsis tau mus rau hauv lub tebchaws ntawd thiab. Noo tus tub Yausua uas sawv koj ntiag yuav tau mus rau hauv. Cia li txhawb nws lub zog rau qhov nws yuav coj cov Yixayee mus tuav tau lub tebchaws ntawd ua qub txeeg qub teg. Thiab nej tej menyuam yaus uas nej hais tias yuav raug luag ntes coj mus thiab nej tej menyuam uas hnub no tsis paub qhov zoo qhov phem yuav tau txeem mus rau hauv. Kuv yuav pub lub tebchaws ntawd rau lawv mas lawv yuav tau los ua lawv tug. Tiamsis nej mas nej cia li tig hlo mus rau hauv tebchaws moj sab qhua taug txojkev uas mus rau Hiavtxwv Liab.” Ces nej txawm teb kuv tias, “Peb tau ua txhaum rau Yawmsaub lawm, peb yuav nce mus ua rog raws li Yawmsaub uas yog peb tus Vajtswv hais rau peb.” Nej cov txivneej sawvdaws thiaj li coj kiag cuab yeej ua rog thiab xav tias yuav yoojyim nce mus rau pem tebchaws toj siab. Yawmsaub hais rau kuv tias, “Cia li hais rau lawv tias, ‘Tsis txhob nce mus ua rog vim kuv tsis nyob hauv nej nruab nrab lawm tsam ces nej swb yeeb ncuab.’ ” Kuv thiaj hais li ntawd rau nej tiamsis nej tsis mloog thiab nej tawv nyom tej uas Yawmsaub hais kom nej ua. Nej lub siab khav theeb khav txiv mas nej nce mus pem toj siab. Mas cov Amaulai uas nyob pem toj siab ntawd tawm tuaj ntaus nej caum nej yam nkaus li xub ntab caum thiab ntaus nej swb kiag ntawm Xe‑i mus txog ntua Hauma. Ces nej ho los quaj rau ntawm Yawmsaub xubntiag, tiamsis Yawmsaub kuj tsis quav ntsej nej lub suab quaj thiab tsis tig ntsej mloog nej. Nej thiaj li nyob ntawm Khade tau ntau hnub ntev li uas nej nyob ntawd. Thaum ntawd peb thiaj li tig rov mus rau hauv tebchaws moj sab qhua taug txojkev uas mus rau Hiavtxwv Liab raws li Yawmsaub tau hais rau kuv lawd. Peb thiaj mus lug lub roob Xe‑i ntau hnub. Mas Yawmsaub thiaj hais rau kuv tias, “Nej twb lug tebchaws toj siab Xe‑i no ntev txaus lawm. Koj cia li tig hlo mus rau sab ped. Mas koj hais rau cov pejxeem tias, ‘Nej twb yuav hla nej cov kwvtij lub tebchaws uas yog Exau tej tub ki uas nyob hauv Xe‑i. Lawv yuav ntshai nej, vim li no nej yuav tsum ceev faj. Nej tsis txhob ua rog rau lawv vim kuv tsis pub lawv lub tebchaws rau nej, txawm yog ib nyuag qhov av dav li lub xib taws tsuj los kuv tsis pub rau nej, rau qhov kuv twb muab kiag lub roob Xe‑i ntawd pub rau Exau yuav ua nws tug lawm. Nej yuav tsum muab nyiaj yuav lawv li mov noj thiaj tau noj thiab muab nyiaj yuav lawv li dej thiaj tau dej haus.’ ” Yawmsaub uas yog nej tus Vajtswv twb foom koob hmoov rau txhua yam haujlwm uas nej txhais tes tau ua. Nws paub txojkev uas nej tau mus hauv lub niag tuam tebchaws moj sab qhua no. Tau plaub caug xyoo nej tus Vajtswv Yawmsaub twb nrog nej nyob mas nej twb tsis tu ncua ib yam dabtsi li. Mas peb cia li sawv kev mus lug kiag peb cov kwvtij uas yog Exau tej tub ki uas nyob hauv Xe‑i. Peb tawm ntawm txojkev Alanpa uas mus ntawm Elab thiab Exi‑oo Kenpaw, thiab peb lug taug txojkev uas mus rau tebchaws moj sab qhua Mau‑a. Mas Yawmsaub hais rau kuv tias, “Koj tsis txhob zes cov Mau‑a, tsis txhob ua rog rau lawv rau qhov kuv yeej yuav tsis muab lawv lub tebchaws ib nyuag qhov rau koj yuav ua koj tug vim kuv twb muab tebchaws A ntawd rau Lauj caj ces yuav ua lawv tug lawm.” (Lub tebchaws ntawd thaum ub cov neeg Emi nyob. Lawv yog cov neeg uas loj thiab coob heev thiab siab ib yam nkaus li cov neeg Anaj. Cov neeg no muaj dua ib lub npe hu ua Lefa‑i ib yam li hu cov Anaj, tiamsis cov Mau‑a hu lawv cov no ua Emi. Thaum ub cov Hauli kuj nyob hauv Xe‑i tiamsis Exau caj ces ntiab lawv khiav thiab muab lawv ua puam tsuaj tag thiab los nyob lawv lub chaw, ib yam nkaus li cov Yixayee ua rau lub tebchaws uas Yawmsaub pub rau lawv yuav ua lawv tug.) “Nimno koj cia li sawv kev hla lub hav dej Xelej.” Peb thiaj hla lub hav dej Xelej. Suav txij thaum peb tawm ntawm Khade Npania los txog thaum peb hla lub hav dej Xelej ntawd yog peb caug yim xyoo mus txog thaum cov txivneej uas ua tau rog hauv tiam neeg ntawd tuag tag huvsi rau hauv zos lawm, raws li Yawmsaub tau twv rau lawv lawm. Yeej yog Yawmsaub txhais tes tawm tsam lawv ua rau lawv puam tsuaj hauv zos tag mus txog thaum ua rau lawv ploj tag huvsi lawm. Thaum cov txivneej uas ua tau rog ntawd tuag ploj tag hauv cov pejxeem lawd, Yawmsaub thiaj hais rau kuv tias, “Hnub no koj yuav hla Mau‑a lub tebchaws ntawm A mus. Mas thaum koj mus txog cov Asmoo ciam teb, tsis txhob zes lawv tsis txhob ua rog rau lawv rau qhov kuv yeej yuav tsis muab cov Asmoo lub tebchaws ib nyuag qhov rau koj yuav ua koj tug vim yog kuv twb muab lub tebchaws no rau Lauj caj ces yuav ua lawv tug lawm.” (Luag suav tias lub tebchaws ntawd yog cov Lefa‑i li tebchaws. Yav thaum ub cov neeg Lefa‑i nyob qhov ntawd, tiamsis cov Asmoo hu cov Lefa‑i ua Xaxumi. Cov neeg ntawd loj thiab coob heev thiab siab ib yam nkaus li cov Anaj, tiamsis Yawmsaub tau muab lawv ua puam tsuaj tag rau ntawm cov Asmoo xubntiag mas cov Asmoo thiaj txeeb tau lawv lub tebchaws thiab los nyob lawv lub chaw, ib yam nkaus li Yawmsaub twb pab Exau caj ces uas nyob Xe‑i thaum Yawmsaub ua rau cov Hauli puam tsuaj tag ntawm lawv hauv ntej, mas Exau caj ces thiaj li txeeb tau cov Hauli tebchaws thiab los nyob lawv lub chaw los txog niaj hnub nimno. Cov neeg Avi uas nyob tej zej zog mus txog ntua Kaxa, mas cov neeg Khathauli uas tuaj Khathau tuaj kuj muab lawv ua puam tsuaj tag thiab los nyob lawv lub chaw.) “Koj cia li sawv kev mus hla tus dej Anoo. Saib maj, kuv twb muab Hesanpoo tus vajntxwv Xihoo uas yog neeg Amaulai thiab nws lub tebchaws rau hauv koj txhais tes lawm. Koj cia li pib txeeb lub tebchaws ntawd thiab ua rog rau nws. Hnub no kuv yuav pib ua rau ib tsoom neeg hauv qab ntuj no ras thiab ntshai nej. Lawv yuav hnov xov txog nej mas yuav ntshai tshee hnyo thiab txhawj kawg li.” Mas kuv thiaj li txib neeg xa xov hauv tebchaws moj sab qhua Khedemau mus cuag Hesanpoo tus vajntxwv Xihoo mus hais ib lo lus tshav ntuj rau nws tias, “Thov cia kuv hla koj lub tebchaws. Kuv yuav taug txoj niag kev hlob xwb tsis tig mus rau sab xis lossis sab laug li. Thov koj muag zaub mov rau kuv thiab yuav kuv tej nyiaj xwv kuv thiaj tau mov noj. Thov koj muag dej rau kuv thiab yuav kuv tej nyiaj xwv kuv thiaj tau dej haus. Thov koj cia kuv xuas kotaw hla koj lub tebchaws mus xwb, ib yam li Exau caj ces uas nyob hauv Xe‑i thiab ib yam li cov Mau‑a uas nyob hauv A tebchaws tau cia kuv hla lawv tebchaws lawm, mus txog thaum kuv hla tus dej Yaladee mus rau hauv lub tebchaws uas Yawmsaub uas yog peb tus Vajtswv pub rau peb.” Tiamsis Hesanpoo tus vajntxwv Xihoo tsis kheev cia peb hla nws lub tebchaws, rau qhov nej tus Vajtswv Yawmsaub tau ua rau nws siab loj siab tawv, kom thiaj muab tau nws rau hauv nej txhais tes yam li niaj hnub nimno. Mas Yawmsaub hais rau kuv tias, “Saib maj, kuv twb pib muab Xihoo thiab nws lub tebchaws rau koj lawm. Cia li nqes tes kiag mus txeeb lub tebchaws ntawd los nyob ua nej tug.” Mas Xihoo thiab nws cov tub rog sawvdaws txawm tuaj ua rog rau peb ntawm Yahaj. Mas Yawmsaub uas yog peb tus Vajtswv muab nws rau peb mas peb thiaj ntaus yeej nws thiab nws cov tub thiab nws cov neeg huvsi. Thaum ntawd peb thiaj txeeb tau nws tej moos huvsi thiab peb muab txhua lub moos ntawd ua kom puam tsuaj tag, muab cov txivneej cov pojniam cov menyuam ua puam tsuaj tag huvsi tsis tseg ib tug li. Tiamsis tej tsiaj txhu thiab tej qhov txhia chaw hauv tej moos uas peb ntaus tau ntawd peb coj los ua peb tug. Txij ntua lub moos Alau‑aw uas nyob ntug hav Anoo thiab txij ntua ntawm lub moos uas nyob hauv lub hav ntawd mus txog ntua lub moos Kile‑a, mas tsis muaj ib lub moos ruaj khov uas tiv tau peb. Yawmsaub uas yog peb tus Vajtswv twb muab huvsi rau hauv peb txhais tes lawm. Tiamsis nej tsis tau mus ze cov Asmoo lub tebchaws, nej tsis mus ze ntug dej Yanpo thiab tsis mus ze tej moos uas nyob pem toj siab thiab tsis mus rau tej chaw uas Yawmsaub uas yog peb tus Vajtswv txwv tsis pub peb mus. Peb txawm tig hlo taug txojkev uas mus pem Npasas mas Npasas tus vajntxwv Aus thiab nws cov tub rog sawvdaws kuj tawm tuaj ua rog rau peb ntawm Ede‑i. Tiamsis Yawmsaub hais rau kuv tias, “Tsis txhob ntshai nws rau qhov kuv twb muab nws thiab nws cov neeg sawvdaws thiab nws lub tebchaws huvsi rau hauv koj txhais tes, mas koj yuav ua rau nws ib yam nkaus li koj twb ua rau cov Amaulai tus vajntxwv Xihoo uas nyob hauv Hesanpoo lawd.” Yawmsaub uas yog peb tus Vajtswv thiaj muab Npasas tus vajntxwv Aus thiab nws cov neeg huvsi rau hauv peb txhais tes thiab peb muab lawv ntaus tua mus txog thaum tsis tshuav ib tug nyob li. Thaum ntawd peb txeeb tau nws tej moos huvsi tsis tshuav ib lub uas peb txeeb tsis tau ntawm lawv li. Huvsi yog rau caum lub moos, uas yog tag nrho Akau tebchaws uas yog lub tebchaws Npasas uas vajntxwv Aus kav. Tej moos no txhua lub muaj ntsa loog xov puag ncig siab siab, muaj rooj loog muaj las rooj huvsi thiab peb txeeb tau tej zej zog uas tsis muaj ntsa loog ntau ntau li. Peb muab lawv ua puam tsuaj tag huvsi ib yam nkaus peb ua rau Hesanpoo tus vajntxwv Xihoo. Peb muab txhua lub moos tej pojniam txivneej menyuam ua puam tsuaj tag huvsi. Tiamsis tej tsiaj txhu huvsi thiab tej qhov txhia chaw uas peb txeeb tau hauv tej moos ntawd peb coj los ua peb tug. Thaum ntawd peb txeeb tau lub tebchaws ntawm cov Amaulai ob tug vajntxwv txhais tes uas nyob ntug dej Yaladee sab hnub tuaj txij ntua ntawm lub hav Anoo mus txog lub roob Hawmoo. (Lub roob Hawmoo ntawd cov neeg Xaidoo hu ua Xili‑oo thiab cov Amaulai hu ua Xeni.) Peb txeeb tau txhua lub moos pem tej nras tiaj toj siab thiab Kile‑a tebchaws thiab Npasas tebchaws huvsi mus txog ntua Xalekha thiab Ede‑i uas yog tej moos uas Npasas tus vajntxwv Aus kav. (Npasas tus vajntxwv Aus yog neeg Lefa‑i uas tshuav nws tib leeg xwb. Nws lub txaj pw yog xuas hlau ua. Nws lub txaj ntawd tseem nyob hauv cov Asmoo lub moos Lanpa. Lub txaj ntawd ntev cuaj tshim dav plaub tshim raws li peb tej tshim nimno.) Lub tebchaws uas lub sijhawm ntawd peb txeeb tau ntawd txij ntawm Alau‑aw uas nyob ntawm ntug dej Anoo thiab tej toj siab hauv Kile‑a tebchaws ib nrab thiab tej moos uas nyob hauv, kuv muab rau xeem Lunpee thiab xeem Kas. Tebchaws Kile‑a uas tseem tshuav thiab Npasas tebchaws huvsi uas yog vajntxwv Aus kav, yog tag nrho Akau tebchaws, kuv muab rau ib nrab xeem Manaxe. (Tag nrho tebchaws Npasas ntawd txeev hu ua cov Lefa‑i li tebchaws. Ya‑i uas yog xeem Manaxe kuj txeeb tau Akau tebchaws huvsi mus txog ntua cov Kesu thiab cov Ma‑akha ciam teb, thiab nws hu tebchaws Npasas ntawd hu ua Havauya‑i raws li nws lub npe los txog niaj hnub nimno.) Kuv muab Kile‑a rau Makhi, mas kuv muab tej tebchaws no rau xeem Lunpee thiab xeem Kas, yog txij ntua Kile‑a mus txog lub hav Anoo, muab lub plawv hav Anoo ua ciam teb, mus txog ntua tus dej Yanpo uas yog cov Asmoo ciam teb. Thiab tag nrho Alanpa uas muaj tus dej Yaladee ua ciam teb thiab txij ntua ntawm Khinele mus txog ntua hiavtxwv Alanpa uas yog Hiavtxwv Ntsev, ntawm taw roob Pixaka uas nyob sab hnub tuaj. Thaum ntawd kuv twb hais rau nej tias, “Yawmsaub uas yog nej tus Vajtswv tau pub lub tebchaws no rau nej yuav ua nej tug. Nej cov txivneej txhua tus uas txawj ua rog yuav tsum nqa cuab yeej hla ua nej cov kwvtij Yixayee ntej mus. Tiamsis nej cov pojniam cov menyuam yaus thiab nej tej tsiaj txhu, uas kuv paub tias nej muaj tsiaj txhu coob, mas yuav nyob rau hauv tej moos uas kuv twb muab rau nej lawd, mus txog thaum uas Yawmsaub pub kom nej tej kwvtij tau so ib yam li nws twb pub rau nej tau so lawm, mus txog thaum lawv txeeb tau lub tebchaws uas Yawmsaub uas yog nej tus Vajtswv pub rau lawv sab dej Yaladee tim ub lawd, mas nej li rov qab los rau hauv nyias teb nyias chaw uas kuv twb muab rau nej lawd.” Thaum ntawd kuv twb hais rau Yausua tias, “Koj lub qhov muag twb pom txhua yam uas Yawmsaub uas yog nej tus Vajtswv tau ua rau ob tug vajntxwv no lawd. Yawmsaub yuav ua ib yam nkaus li ntawd rau txhua lub tebchaws uas nej yuav mus rau hauv. Nej tsis txhob ntshai lawv li rau qhov nej tus Vajtswv Yawmsaub yog tus uas yuav ua rog pab nej.” Thaum ntawd kuv thov thov Yawmsaub hais tias, “Au Vajtswv Yawmsaub, koj nyuam qhuav pib ua koj lub hwjchim thiab koj txhais tes uas muaj zog tshwm rau koj tus tub qhe pom. Muaj ib tug timtswv twg uas nyob saum ntuj lossis hauv ntiajteb no yuav ua tau tej haujlwm thiab tej txujci phimhwj uas koj ua tau? Thov koj pub kuv hla mus saib lub tebchaws zoo uas nyob sab dej Yaladee tim ub, saib tej toj siab uas zoo zoo thiab Lenpanoo.” Tiamsis Yawmsaub chim rau kuv vim yog tim nej, nws thiaj li tsis mloog kuv tej lus thov. Nws hais rau kuv tias, “Txaus lawm lauj! Koj tsis txhob hais txog zaj no rau kuv dua li lawm. Koj cia li nce mus rau saum lub ncov roob Pixaka es tsa qhov muag ntsia rau sab hnub poob sab ped sab nrad sab hnub tuaj, tsa qhov muag ntsia lub tebchaws ntawd xwb, rau qhov koj yuav hla tsis tau tus dej Yaladee no rau sab tid li. Koj cia li hais rau Yausua thiab txhawb nws lub zog thiab txhawb nws lub siab kom ruaj khov rau qhov nws yuav coj haiv neeg no hla mus thiab yuav coj lawv mus tuav lub tebchaws uas koj pom no ua lawv teej lawv tug.” Ces peb thiaj tsuam hauv lub hav uas ncaj lub moos Npepe‑au. Cov Yixayee 'e, nimno nej cia li mloog tej kab ke thiab tej kevcai uas kuv qhia rau nej thiab ua raws nraim, xwv nej thiaj ciaj sia nyob thiab txeem mus tau lub tebchaws uas nej tej poj koob yawm txwv tus Vajtswv Yawmsaub pub rau nej ua nej tug. Nej tsis txhob tsav ntxiv tej lus uas qhia nej thiab tsis txhob muab rho ib qho tseg, tiamsis nej yuav tsum tuav nej tus Vajtswv Yawmsaub tej lus nkaw uas kuv muab cob rau nej. Nej lub qhov muag twb pom tej uas Yawmsaub ua ntawm Npa‑as Pe‑au lawm. Nej tus Vajtswv Yawmsaub twb ua rau cov uas ua koom tu dab Npa‑as ntawm Pe‑au puam tsuaj tag hauv nej nruab nrab mus, tiamsis nej cov uas tuav rawv nej tus Vajtswv Yawmsaub ruaj ruaj txhua tus kuj muaj txojsia nyob txog hnub no. Saib maj, kuv twb qhia tej kab ke thiab tej kevcai rau nej raws li Yawmsaub uas yog kuv tus Vajtswv tau hais rau kuv lawm, kom nej thiaj ua raws li ntawd rau hauv lub tebchaws uas nej tabtom yuav txeem mus ua nej tug. Nej yuav tsum tuav rawv tej kevcai no thiab ua raws nraim. Qhov uas ua li no yuav qhia nej lub tswvyim thiab nej tej kev txawj ntse rau ib tsoom neeg paub. Thaum luag hnov txog tej kab ke huvsi no, luag yuav hais tias, “Haiv neeg loj no yeej yog haiv neeg uas muaj tswvyim thiab txawj ntse.” Puas muaj ib haiv neeg loj twg uas muaj timtswv nyob ze lawv yam li Yawmsaub uas yog peb tus Vajtswv nyob ze peb rau thaum peb thov nws? Puas muaj ib haiv neeg loj twg uas muaj tej kab ke thiab tej kevcai ncaj ncees yam li txoj kevcai no uas hnub no kuv muab cob rau nej? Nej yuav tsum ceev faj thiab ua tib zoo tswj nej lub siab, ntshai tsam nej tsis nco qab tej uas nej lub qhov muag twb pom ntawd thiab ntshai tsam tej ntawd ploj tag hauv nej lub siab mus ib sim neej. Nej yuav tsum qhia rau nej cov menyuam thiab nej tej xeeb ntxwv paub txog tej no tias, hnub uas nej sawv rau ntawm nej tus Vajtswv Yawmsaub xubntiag ntawm Haule, mas Yawmsaub hais rau kuv tias, “Cia li sau cov pejxeem tuaj ua ke rau ntawm kuv es kuv yuav cia lawv hnov kuv tej lus xwv lawv thiaj tau kawm hwm thiab paub ntshai kuv mus tag lawv sim neej uas lawv muaj txojsia nyob hauv ntiajteb, thiab lawv thiaj tau qhia lawv tej menyuam kom ua li ntawd.” Nej twb tuaj ze sawv ntawm taw roob thiab lub roob muaj nplaim taws cig nto ntuj, thiab muaj huab tsaus nti laum nkaus. Mas Yawmsaub hais hauv nplaim taws tuaj rau nej. Nej twb hnov nws lub suab hais lus kom tsis pom nws xyeem qhov muag, tsuas yog hnov lub suab xwb. Nws piav nws tej lus cog tseg rau nej, yog kaum txoj kevcai uas nws kom nej ua. Thiab nws muab sau rau hauv ob daim txiag zeb. Thaum ntawd, Yawmsaub hais kom kuv qhia tej kab ke thiab tej kevcai rau nej, xwv nej thiaj coj mus ua raws li ntawd rau hauv lub tebchaws uas nej tabtom hla mus txeeb ua nej tug. Hnub uas Yawmsaub hais hauv cov nplaim taws tuaj rau nej ntawm Haule, nej tsis pom nws xyeem qhov muag li. Yog li no nej yuav tsum ceev faj zoo, tsis txhob yuam kev mus ua dab mlom rau nej, tsis hais tus yam ntxwv zoo li pojniam lossis txivneej, lossis zoo li ib yam tsiaj hauv ntiajteb, lossis zoo li ib yam noog muaj tis ya saum nruab ntug, lossis zoo li ib yam tsiaj uas nkag hauv av, lossis zoo li ib yam ntses uas nyob hauv dej hauv nruab tiv txwv. Thaum nej tsa muag ntsia saum ntuj nej pom lub hnub lub hli thiab cov hnub qub thiab txhua yam saum nruab ntug, tsis txhob cia nej raug ntxias mus pe thiab ua koom tu tej ntawd, yog yam uas Yawmsaub uas yog nej tus Vajtswv pub rau ib tsoom neeg hauv qab ntuj no huvsi. Tiamsis Yawmsaub coj nej tawm hauv cub thee hlawv hlau, yog tawm hauv Iyi tebchaws los ua haiv neeg uas yog nws teej nws tug ib yam li niaj hnub nimno. Tsis tag li ntawd, vim yog tim nej Yawmsaub thiaj li chim siab rau kuv thiab cog lus tawv tias kuv yuav tsis tau hla tus dej Yaladee thiab kuv yuav tsis tau nkag mus rau hauv lub tebchaws zoo uas nej tus Vajtswv Yawmsaub pub ua qub txeeg qub teg rau nej. Kuv yuav tuag rau hauv lub tebchaws no. Kuv yuav tsis tau hla tus dej Yaladee, tiamsis nej yuav tau hla mus thiab txeeb lub tebchaws zoo ntawd ua nej tug. Nej yuav tsum ceev faj, nej yuav tsum pheej nco ntsoov nej tus Vajtswv Yawmsaub tej lus cog tseg uas nws cog rau nej thiab tsis txhob ua dab mlom uas zoo li ib yam dabtsi uas nej tus Vajtswv Yawmsaub txwv tsis pub nej ua. Rau qhov Yawmsaub uas yog nej tus Vajtswv yog nplaim taws kub ceev, nws yog Vajtswv uas khib xeeb. Thaum nej muaj tub ki muaj xeeb ntxwv thiab tau nyob hauv lub tebchaws ntawd ntev, yog nej yuam kev mus ua dab mlom uas muaj yam ntxwv zoo li ib yam dabtsi, thiab ua tej uas nej tus Vajtswv Yawmsaub pom tias phem thiaj zes ua rau nws chim, mas hnub no kuv thov lub ntuj lub teb ua timkhawv rau nej tias nej yuav puam tsuaj ploj tag sai sai hauv lub tebchaws uas nej tabtom yuav hla dej Yaladee mus txeeb ua nej tug ntawd. Nej yuav tsis tau nyob ntev rau hauv, nej yuav raug puam tsuaj tag huvsi. Yawmsaub yuav ua rau nej khiav ri sua mus rau hauv ib tsoom neeg, mas nej yuav tshuav tsawg tsawg rau hauv tej tebchaws uas Yawmsaub ntiab nej mus nyob ntawd. Mas nej yuav ua koom tu tej dab mlom uas yog ntoo yog pob zeb qhov ntawd, yog tej uas neeg txhais tes ua uas tsis txawj pom kev tsis txawj hnov lus tsis txawj noj tsis txawj hnia ntxhiab. Thaum nyob qhov ntawd nej yuav nrhiav Yawmsaub uas yog nej tus Vajtswv, yog nej rau siab nrhiav nws kawg siab kawg ntsws mas nej yuav ntsib nws. Thaum nej raug kev txom nyem lwj siab thiab tej xwm txheej no huvsi los raug nej rau yav tom hauv ntej, ces nej yuav rov los cuag Yawmsaub uas yog nej tus Vajtswv thiab yuav mloog nws lus. Rau qhov nej tus Vajtswv Yawmsaub yog tus Vajtswv uas khuvleej thiab yuav tsis muab nej tso tseg thiab tsis muab nej ua kom puam tsuaj. Nws pheej yuav nco ntsoov tej lus cog tseg uas nws tau cog ruaj khov rau nej tej poj koob yawm txwv. Cia li nug txog yav thaum ub uas nyob ua ntej nej, txij thaum uas Yawmsaub tsim neeg rau saum lub ntiajteb, thiab nug sab ntuj no mus txog sab ntuj tim ub, saib txeev muaj xwm txheej loj li no tshwm los los tsis muaj thiab txeev hnov dua los tsis hnov. Txeev muaj ib haiv neeg twg uas tau hnov timtswv lub suab hais hauv nplaim taws tuaj ib yam li nej tau hnov es tseem muaj txojsia nyob los tsis muaj? Txeev muaj tus timtswv twg tau yooj xeeb coj ib haiv neeg tawm hauv lwm haiv neeg los ua nws tug los tsis muaj? Nws sim neeg siab thiab ua tej txujci tseem ceeb thiab tej txujci phimhwj thiab ua rog thiab siv nws txhais tes uas muaj hwjchim thiab nws txhais npab uas tsa hlo, thiab ua kom muaj kev ntshai kawg, ib yam li nej tus Vajtswv Yawmsaub tau ua rau nej hauv Iyi tebchaws tab meeg nej. Qhov uas ua tej no tshwm rau nej pom ntawd twb yog ua rau nej paub tias Yawmsaub yog Vajtswv, dhau nws lawm tsis muaj dua lwm tus Vajtswv li. Nws pub nej tau hnov nws lub suab saum ntuj tuaj, kom nws thiaj qhuab qhia tau nej. Nws pub nej pom nws cov nplaim taws loj heev hauv lub ntiajteb thiab nej hnov nws tej lus hauv cov nplaim taws tuaj. Vim yog nws hlub nej tej poj koob yawm txwv thiab xaiv lawv tej caj ces, nws nrog nraim nej nyob thiab siv nws lub hwjchim loj coj nej tawm hauv Iyi tebchaws los, thiab ntiab tej haiv neeg uas loj dua thiab muaj zog heev dua nej khiav ntawm nej xubntiag mus, thiab coj nej nkag los thiab pub lawv lub tebchaws ua qub txeeg qub teg rau nej yam li niaj hnub nimno. Vim li no hnub no cia li paub thiab khaws cia hauv lub siab tias Yawmsaub yog Vajtswv uas nyob saum ntuj thiab nyob hauv ntiajteb, tsis muaj dua lwm tus li lawm. Yog li ntawd nej yuav tsum tuav rawv nws tej kab ke thiab nws tej lus nkaw uas hnub no kuv muab cob rau nej xwv thiab nej tej tub ki uas yug los tom qab thiaj noj qab nyob zoo thiab muaj txojsia ntev rau hauv lub tebchaws uas nej tus Vajtswv Yawmsaub pub rau nej mus ib txhis. Mauxe tu peb lub moos cia rau sab dej Yaladee hnub tuaj, es yog leejtwg tua neeg thiaj li tau khiav mus rau hauv, yog tus uas tua kwvtij zej zog tiamsis tsis yog txhob txwm tua thiab tsis tau ua tshawj chim dua li. Thaum uas khiav mus nyob rau hauv cov moos no lub twg lawm ces yuav dim txojsia. Xeem Lunpee lub moos cawm siav yog lub moos Npexaw uas nyob saum tej nras tiaj toj siab hauv tebchaws moj sab qhua, xeem Kas lub moos cawm siav yog lub moos Lamau hauv Kile‑a, thiab xeem Manaxe lub moos cawm siav yog Kaulas hauv Npasas. Ntawm no mus yog txoj kevcai uas Mauxe muab cob rau cov Yixayee coj. No yog tej lus cog tseg thiab tej kab ke thiab tej kevcai uas thaum cov Yixayee tawm hauv Iyi tebchaws los lawd Mauxe qhia rau lawv ntawm tus dej Yaladee sab hnub tuaj hauv lub hav uas ncaj lub moos Npepe‑au, yog cov Amaulai tus vajntxwv Xihoo hauv Hesanpoo lub tebchaws. Xihoo yog tus uas Mauxe thiab cov Yixayee ntaus yeej thaum lawv tawm hauv Iyi tebchaws los. Cov Yixayee txeeb tau nws lub tebchaws thiab txeeb tau Npasas tus vajntxwv Aus lub tebchaws, yog cov Amaulai ob tug vajntxwv uas nyob sab dej Yaladee hnub tuaj txij ntua lub moos Alau‑aw uas nyob ntug hav Anoo mus txog lub roob Xili‑oo (uas yog Hawmoo), thiab tag nrho Alanpa uas nyob ntawm dej Yaladee sab hnub tuaj mus txog ntua Hiavtxwv Alanpa, ntawm taw roob Pixaka. Mauxe txawm hu ib tsoom Yixayee sawvdaws tuaj ua ke thiab hais rau lawv tias, Cov Yixayee 'e, cia li tig ntsej mloog tej kab ke thiab tej kevcai uas hnub no kuv hais rau nej mloog, mas nej yuav tsum cim cia thiab ceev faj ua raws li. Yawmsaub uas yog peb tus Vajtswv tau cog lus rau peb ntawm Haule. Tsis yog Yawmsaub cog lus rau peb tej poj koob yawm txwv xwb, kuj yog nws cog lus rau peb thiab ntag, yog peb sawvdaws uas hnub no tseem ciaj sia nyob ntawm no ntag. Yawmsaub hais rau nej ntawm lub roob hauv cov nplaim taws tim ntsej tim muag. Mas thaum ntawd kuv nyob hauv nej nruab nrab thiab Yawmsaub, kuv thiaj piav Yawmsaub tej lus rau nej, rau qhov nej ntshai cov nplaim taws thiab tsis nce mus rau saum lub roob. Yawmsaub hais tias, “Kuv yog Yawmsaub uas yog koj tus Vajtswv uas coj koj tawm hauv Iyi tebchaws los tawm hauv txojkev ua qhev los. “Koj tsis txhob muaj dua lwm tus vajtswv uas tsis yog kuv. “Koj tsis txhob ua dab mlom los rau koj pe, tsis hais tej uas muaj yam ntxwv zoo li tej uas nyob saum nruab ntug lossis tej uas nyob hauv ntiajteb lossis tej uas nyob hauv dej hauv nruab tiv txwv. Tsis txhob pe thiab tsis txhob ua koom tu tej dab mlom ntawd rau qhov kuv yog Yawmsaub uas yog koj tus Vajtswv, yog tus Vajtswv uas khib xeeb heev, kuv yuav rau txim rau leej txiv uas ntxub kuv thiab poob mus rau nws cov tub ki mus txog peb plaub tiam. Tiamsis kuv yuav ua txojkev hlub uas ruaj khov tshwm rau cov uas npuab kuv thiab ua raws li kuv tej lus nkaw ntau txhiab tiam neeg. “Koj tsis txhob lam hais saib tsis taus Yawmsaub uas yog koj tus Vajtswv lub npe, rau qhov tus uas lam hais saib tsis taus nws lub npe, mas Yawmsaub yuav tsis zam txim. “Koj yuav tsum hwm hnub Xanpatau ua hnub uas dawb huv raws li Yawmsaub uas yog koj tus Vajtswv twb hais rau koj lawd. Koj yuav tsum khwv thiab ua koj tej haujlwm huvsi rau hnub, tiamsis hnub xya yog hnub Xanpatau uas caiv rau Yawmsaub uas yog koj tus Vajtswv. Hnub ntawd tsis txhob ua ib yam haujlwm dabtsi li, tsis hais koj tus kheej thiab koj tej tub tej ntxhais thiab koj cov tub qhe nkauj qhev thiab koj tej nyuj tej nees luav thiab koj tej tsiaj txhu txhua yam thiab lwm haiv neeg uas tuaj nyob hauv koj lub moos, koj tej tub qhe nkauj qhev thiaj tau so ib yam li koj so. Koj yuav tsum nco ntsoov tias koj txeev ua qhev hauv Iyi tebchaws mas nej tus Vajtswv Yawmsaub xuas nws txhais tes uas muaj hwjchim thiab txhais npab uas tsa hlo coj koj tawm qhov ntawd los. Yog li ntawd koj tus Vajtswv Yawmsaub hais kom koj nco ntsoov caiv hnub Xanpatau. “Koj yuav tsum hwm koj niam koj txiv raws li Yawmsaub uas yog koj tus Vajtswv tau hais rau koj lawd kom koj thiaj li muaj txojsia nyob ntev mas koj yuav noj qab nyob zoo rau hauv lub tebchaws uas koj tus Vajtswv Yawmsaub muab pub rau koj. “Tsis txhob tua neeg, “thiab tsis txhob deev luag poj luag txiv, “thiab tsis txhob ua tub sab, “thiab tsis txhob ua cuav timkhawv iab hiam luag lwm tus, “thiab tsis txhob ua siab hlob xav tau luag tus pojniam, tsis txhob xav tau luag vaj luag tsev luag tej liaj tej teb thiab luag tub qhe nkauj qhev luag tej nyuj tej nees luav lossis ib yam dabtsi uas yog luag li.” Tej lus no Yawmsaub twb hais nrov nrov rau nej sawvdaws ntawm lub roob, yog hais hauv cov nplaim taws thiab hauv tauv huab thiab hauv qhov tsaus ntuj tuaj. Mas nws tsis tsav ib lo lus ntxiv li. Nws muab sau rau hauv ob daim txiag zeb thiab muab pub rau kuv. Thaum nej hnov lub suab nrov hauv qhov tsaus ntuj tuaj thiab thaum lub roob tabtom cig plaws, nej txhua xeem tus thawj huvsi thiab cov kev txwj laus tuaj cuag kuv, mas nej hais rau kuv tias, “Saib maj, Yawmsaub uas yog peb tus Vajtswv tau ua nws lub hwjchim ci ntsa iab thiab nws tej haujlwm loj tshwm los rau peb pom, thiab peb tau hnov nws lub suab hauv cov nplaim taws. Hnub no peb tau pom Vajtswv nrog neeg hais lus los neeg tseem ciaj sia nyob tau. Yog li ntawd nimno peb tseem yuav tuag ua dabtsi? Cov nplaim taws loj no yuav hlawv peb. Yog peb tseem hnov Yawmsaub uas yog peb tus Vajtswv lub suab ib zaug ntxiv peb yeej yuav tuag, rau qhov ib tsoom neeg puas muaj leejtwg tau hnov Vajtswv uas muaj txojsia nyob lub suab hauv nplaim taws yam li uas peb tau hnov es tseem ciaj sia nyob tau? Koj cia li txav mus ze mloog txhua yam uas peb tus Vajtswv Yawmsaub yuav hais. Txhua yam uas peb tus Vajtswv Yawmsaub hais rau koj mas koj qhia rau peb mas peb yuav mloog thiab ua raws li ntawd.” Thaum nej hais li ntawd rau kuv Yawmsaub kuj hnov nej tej lus, mas Yawmsaub hais rau kuv tias, “Kuv twb hnov cov neeg no tej lus uas lawv hais rau koj lawm. Txhua yam uas lawv hais ntawd kuj zoo. Kuv xav kom lawv muaj lub siab zoo li no mus li, yog qhov uas hwm thiab paub ntshai kuv thiab tuav rawv kuv tej lus nkaw huvsi, mas lawv thiab lawv tej tub ki yuav noj qab nyob zoo ib txhiab ib txhis li. Cia li rov mus hais rau lawv tias, ‘Nej cia li rov mus rau hauv nej tej tsev ntaub.’ Tiamsis koj cia li sawv ntsug ze kuv ntawm no es kuv yuav qhia tej lus nkaw thiab tej kab ke thiab tej kevcai huvsi rau koj, mas koj yuav qhia rau lawv kom lawv ua raws li tej kevcai ntawd rau hauv lub tebchaws uas kuv pub rau lawv yuav ua lawv tug.” Nej yuav tsum ceev faj zoo ua raws nraim li uas nej tus Vajtswv Yawmsaub hais cia lawd, nej tsis txhob tig mus rau sab xis los sab laug li. Nej yuav ua nej lub neej raws nraim li txhua txojkev uas nej tus Vajtswv Yawmsaub tau hais kom nej ua xwv nej thiaj muaj txojsia nyob thiab nej thiaj noj qab nyob zoo thiab muaj txoj siav loj siav ntev nyob rau hauv lub tebchaws uas nej yuav tau ua nej tug ntawd. Ntawm no mus yog tej lus nkaw thiab tej kab ke thiab tej kevcai uas Yawmsaub uas yog nej tus Vajtswv hais kom kuv qhia nej, xwv nej thiaj tau ua raws li ntawd rau hauv lub tebchaws uas nej yuav hla mus txeeb ua nej tug, mas nej thiab nej tej menyuam xeeb ntxwv thiaj yuav hwm thiab paub ntshai Yawmsaub uas yog nej tus Vajtswv mus tag nej sim neej, yog qhov uas tuav rawv nws tej kab ke thiab tej lus nkaw uas kuv muab cob rau nej, kom nej thiaj muaj txojsia nyob ntev dhawv. Yixayee 'e, vim li no nej cia li tig ntsej mloog thiab ceev faj ua raws li ntawd, kom nej thiaj tau noj qab nyob zoo thiab huaj vam coob coob rau hauv lub tebchaws uas muaj kua mis thiab zib ntab ntws nto, raws li Yawmsaub uas yog nej tej poj koob yawm txwv tus Vajtswv tau cog lus rau nej. Cov Yixayee 'e, cia li tig ntsej mloog. Yawmsaub uas yog peb tus Vajtswv yog tib tug Yawmsaub xwb. Koj yuav tsum hlub Yawmsaub uas yog koj tus Vajtswv kawg siab kawg ntsws, thiab kawg dag kawg zog. Koj yuav khaws tej lus uas hnub no kuv qhia koj rau hauv koj lub siab, thiab koj yuav ua tib zoo qhia tej lus no rau koj tej menyuam, thiab hais txog tej lus no rau thaum koj nyob hauv tsev, thaum koj taug kev, thaum koj pw thiab thaum koj sawv. Muab tej lus no khi rau ntawm koj txhais tes ua lub chaw nco, thiab muab pav rau ntawm koj hauv pliaj, thiab muab sau rau ntawm tej npuab rooj hauv tsev thiab ntawm rooj loog. Thaum Yawmsaub uas yog koj tus Vajtswv coj koj mus txog lub tebchaws uas nws cog lus tseg ruaj khov rau koj tej poj koob yawm txwv, uas yog Aplahas, Yiha thiab Yakhauj, tias yuav pub rau koj, muaj tej moos loj thiab zoo uas koj tsis tau tsim li, muaj vaj tse muaj cuab txhiaj cuab tam zoo puv nkaus uas koj tsis tau npaj cia, thiab muaj tej pas dej uas koj tsis tau khawb, thiab muaj tej vaj txiv hmab thiab tej vaj txiv ntoo aulib uas koj tsis tau cog, mas thaum koj tau noj tsau npo, koj yuav tsum ceev faj pheej nco ntsoov Yawmsaub uas coj koj tawm hauv Iyi tebchaws hauv txojkev ua qhev los. Koj yuav tsum hwm thiab paub ntshai Yawmsaub uas yog koj tus Vajtswv. Koj yuav ua koom tu nws thiab tsuas tuav nws lub npe twv xwb. Nej tsis txhob raws ncuj nciav luag tej dab, yog lwm haiv neeg uas nyob ib ncig nej tej dab. Rau qhov Yawmsaub uas yog nej tus Vajtswv nrog nraim nej nyob yog tus Vajtswv uas khib xeeb, ntshai tsam nej tus Vajtswv Yawmsaub yuav npau taws rau nej thiab muab nej ua puam tsuaj ploj tag hauv ntiajteb. Nej tsis txhob sim Yawmsaub uas yog nej tus Vajtswv, ib yam li nej sim nws ntawm Maxa. Nej yuav tsum ua tib zoo tuav rawv nej tus Vajtswv Yawmsaub tej lus los nkaw thiab nws tej lus qhia thiab nws tej kab ke uas nws hais rau nej lawm. Koj yuav tsum ua tej uas Yawmsaub pom tias raug cai thiab zoo kom koj thiaj noj qab nyob zoo thiab txeem mus tau lub tebchaws zoo uas Yawmsaub cog lus ruaj khov yuav muab pub rau koj tej poj koob yawm txwv, thiab ntiab koj tej yeeb ncuab huvsi khiav ntawm koj xubntiag mus, raws li Yawmsaub tau cog lus cia lawd. Yav tom hauv ntej thaum koj tus tub nug tias, “Tej lus thiab tej kab ke thiab tej kevcai uas peb tus Vajtswv Yawmsaub hais rau koj lub ntsiab yog li cas?” mas koj yuav teb koj tus tub tias, “Peb ua Falau qhev hauv Iyi tebchaws, mas Yawmsaub siv nws txhais tes uas muaj hwjchim coj peb tawm hauv Iyi tebchaws los. Yawmsaub ua txujci tseem ceeb thiab txujci phimhwj uas loj thiab ntshai kawg tshwm los raug Iyi tebchaws thiab Falau thiab nws tsev neeg sawvdaws tab meeg peb. Mas Yawmsaub coj peb tawm qhov ntawd los, xwv nws thiaj coj peb los rau hauv lub tebchaws no thiab muab pub rau peb raws li nws twb cog lus ruaj khov tias yuav pub rau peb tej poj koob yawm txwv. Yawmsaub hais kom peb ua raws li tej kab ke no huvsi, yog hwm thiab paub ntshai Yawmsaub uas yog peb tus Vajtswv kom peb thiaj noj qab nyob zoo mus ib txhis thiab nws thiaj tsom kwm peb txojsia nyob yam li niaj hnub nimno. Yog peb ceev faj ua raws li tej lus nkaw no huvsi rau ntawm peb tus Vajtswv Yawmsaub xubntiag raws li nws twb muab cob rau peb, kuj yog txojkev ncaj ncees rau peb.” Thaum Yawmsaub uas yog nej tus Vajtswv coj nej mus rau hauv lub tebchaws uas nej tabtom mus txeeb ua nej tug thiab ntiab ntau haiv neeg khiav ntawm nej hauv ntej mus, yog cov Hithai, cov Kawkasi, cov Amaulai, cov Khana‑as, cov Pelixai, cov Hivai thiab cov Yenpu, yog xya haiv neeg uas loj dua thiab muaj zog dua nej, thiab thaum Yawmsaub uas yog nej tus Vajtswv muab lawv rau hauv nej txhais tes thiab nej ntaus yeej lawv, mas nej yuav tsum ua kom lawv puam tsuaj tag nrho huvsi. Tsis txhob nrog lawv sib cog lus dabtsi kiag li, tsis txhob khuvleej lawv. Tsis txhob nrog lawv ua tshoob ua kos, tsis txhob muab nej tej ntxhais qua rau lawv tej tub thiab tsis txhob yuav lawv tej ntxhais rau nej tej tub. Rau qhov lawv yuav ua rau nej tej tub tso kuv tseg mus ua koom tu luag tej dab. Mas Yawmsaub yuav npau taws rau nej thiab ua kom nej puam tsuaj sai sai. Tiamsis nej yuav tsum ua li no rau lawv. Nej yuav tsum rhuav lawv tej thaj teev dab thiab tsoo lawv tej ncej zeb thiab ntov lawv tej ncej dab Asela thiab muab lawv tej dab mlom hlawv pov tseg huvsi. Rau qhov nej yog haiv neeg uas dawb huv rau Yawmsaub uas yog nej tus Vajtswv. Nej tus Vajtswv Yawmsaub xaiv nej tawm hauv ib tsoom neeg uas nyob hauv ntiajteb los ua haiv neeg uas yog nws teej nws tug. Qhov uas Yawmsaub hlub nej thiab xaiv nej ntawd tsis yog vim nej muaj coob dua lwm haiv neeg. Hauv txhua haiv neeg nej yog haiv uas tsawg kawg nkaus. Tiamsis twb yog vim Yawmsaub hlub nej thiab nws tuav rawv tej lus uas nws cog tseg ruaj khov rau nej tej poj koob yawm txwv, nws thiaj siv nws txhais tes uas muaj hwjchim coj nej tawm los thiab txhiv nej dim hauv txojkev ua qhev, yog dim hauv Iyi tus vajntxwv Falau txhais tes. Vim li no cia li paub tseeb tias Yawmsaub uas yog nej tus Vajtswv yog Vajtswv ntag. Nws yog tus Vajtswv uas tso siab tau thiab tuav rawv nws tej lus cog tseg thiab nws txojkev hlub ruaj khov rau cov uas npuab nws thiab tuav rawv nws tej lus nkaw mus txog ib txhiab tiam, thiab tsom ntsoov ua pauj rau cov uas ntxub nws thiab ua kom lawv puam tsuaj. Nws yuav tsis sej qhov uas rau txim rau cov uas ntxub nws, nws yuav tsom ntsoov ua pauj rau lawv. Vim li no nej yuav tsum ceev faj ua raws li tej lus nkaw thiab tej kab ke thiab tej kevcai uas hnub no kuv hais rau nej. Vim yog nej mloog tej kevcai no thiab tuav rawv thiab ua raws li, Yawmsaub uas yog nej tus Vajtswv yuav tuav rawv nws tej lus cog tseg thiab txojkev hlub ruaj khov rau nej raws li nws cog lus tseg ruaj khov rau nej tej poj koob yawm txwv. Nws yuav hlub nej thiab foom koob hmoov rau nej thiab ua rau nej huaj vam coob tuaj. Nws yuav foom koob hmoov rau nej tej noob uas xeeb menyuam thiab nej tej qoob loo hauv liaj teb, nej tej cawv txiv hmab, nej tej roj, thiab tej noob yaj noob tshis noob nyuj kom huaj vam coob rau hauv lub tebchaws uas nws cog lus ruaj khov rau nej tej poj koob yawm txwv tias yuav pub rau nej. Nej yuav tau koob hmoov ntau dua txhua haiv neeg. Yuav tsis muaj ib tug txivneej lossis pojniam uas xeeb tsis taus menyuam lossis ib tug tsiaj txhu mooj li. Thiab Yawmsaub yuav tshem tej mob nkeeg huvsi tawm ntawm nej. Thiab tej mob phem hauv Iyi tebchaws uas nej paub ntawd, nws yuav tsis tso rau saum nej, tiamsis nws yuav tso rau saum txhua tus uas ntxub nej. Nej yuav tsum muab txhua haiv neeg uas nej tus Vajtswv Yawmsaub muab cob rau nej ua kom puam tsuaj. Nej lub qhov muag tsis txhob khuvleej lawv. Nej tsis txhob ua koom tu lawv tej dab, vim qhov uas ua li ntawd yuav ua voj hlua cuab nej. Yog nej xav hauv nej lub siab tias, “Tej haiv neeg ntawd loj dua peb, peb yuav txeeb tau lawv lub tebchaws li cas?” nej tsis txhob ntshai lawv li, nej cia li nco txog tej uas nej tus Vajtswv Yawmsaub ua rau Falau thiab cov Iyi huvsi lawd. Nej qhov muag twb pom qhov uas sim lawv loj kawg, yog qhov uas nej tus Vajtswv Yawmsaub tau siv tej txujci tseem ceeb phimhwj thiab nws txhais tes uas muaj hwjchim thiab nws txhais npab uas tsa hlo coj nej tawm los. Nej tus Vajtswv Yawmsaub yuav ua ib yam li ntawd rau txhua haiv neeg uas nej ntshai ntawd ntag. Tsis tag li ntawd nej tus Vajtswv Yawmsaub yuav tso nkawj tso daiv los rau hauv lawv nruab nrab mus txog thaum cov uas tseem tshuav thiab mus tsiv nraim nej raug puam tsuaj tag huvsi. Nej tsis txhob ua siab puas tsus ntshai lawv, rau qhov nej tus Vajtswv Yawmsaub nrog nraim nej, nws yog tus Vajtswv uas loj kawg thiab txaus ntshai. Nej tus Vajtswv Yawmsaub yuav rhuav tshem tej haiv neeg no ib zaug mentsis ib zaug mentsis ntawm nej hauv ntej mus, tiamsis nws tsis pub nej ua tib zaug rhuav tshem lawv, ntshai tsam tsiaj qus yuav huaj vam coob rau nej. Nej tus Vajtswv Yawmsaub yuav muab lawv rau nej thiab ua rau lawv ntxhov hnyo mus txog thaum puam tsuaj tag. Thiab nws yuav muab lawv tej vajntxwv cob rau hauv nej txhais tes, thiab nej yuav ua kom lawv tej npe ploj tag hauv lub qab ntuj. Yuav tsis muaj leejtwg tiv tau nej mus txog thaum nej ua rau lawv puam tsuaj tag. Nej yuav muab lawv tej dab mlom hlawv pov tseg. Nej tsis txhob ntshaw tej nyiaj tej kub uas luam tej dab mlom ntawd lossis coj mus ua nej tug tsam ces nej mag tej ntawd. Rau qhov tej ntawd yog tej uas qias vuab tsuab rau Yawmsaub uas yog nej tus Vajtswv. Nej tsis txhob coj tej uas qias vuab tsuab ntawd mus rau hauv nej lub tsev ntshai tsam nej yuav raug muab cais ua kom puam tsuaj yam li tej ntawd. Nej yuav tsum ntxub tej ntawd kawg nkaus vim yog tej uas muab cais ua kom puam tsuaj. Tej lus nkaw uas hnub no kuv muab cob rau nej, nej yuav tsum ceev faj ua raws nraim huvsi, xwv nej thiaj muaj txojsia thiab huaj vam coob thiab mus txeeb tau lub tebchaws uas Yawmsaub cog lus ruaj cia rau nej tej poj koob yawm txwv. Nej yuav tsum nco ntsoov txog tej kev uas nej tus Vajtswv Yawmsaub coj nej taug hauv tebchaws moj sab qhua tau plaub caug xyoo, kom nws thiaj txo tau nej lub hwjchim thiab sim saib nej lub siab zoo li cas saib nej yuav tuav rawv nws tej lus nkaw los tsis tuav. Yawmsaub txo nej lub hwjchim thiab cia nej tshaib thiab pub mana yug nej, yog tej mov uas nej thiab nej tej poj koob yawm txwv tsis tau paub dua li, nws thiaj ua rau nej paub tias tsis yog tib cov mov xwb yuav yug tau neeg txojsia, yog txhua lo lus uas tawm ntawm Yawmsaub qhov ncauj los thiaj yug tau. Lub sijhawm plaub caug xyoo ntawd nej tej tsoos tsho yeej tsis ntuag li, thiab nej tej kotaw kuj tsis o. Nej cia li paub hauv lub siab tias leej txiv nplawm qhuab qhia nws tus tub li cas, nej tus Vajtswv Yawmsaub nplawm qhuab qhia nej ib yam li ntawd. Vim li no nej yuav tsum tuav rawv nej tus Vajtswv Yawmsaub tej lus nkaw, yog qhov uas ua lub neej raws nraim nws txojkev thiab hwm thiab paub ntshai nws. Rau qhov Yawmsaub uas yog nej tus Vajtswv tabtom coj nej los rau hauv lub tebchaws uas zoo, yog lub tebchaws uas muaj hav dej, muaj qhov dej thiab muaj dej txhawv ntws hauv tej hav thiab pem tej roob, muaj mog muaj qeb, muaj txiv hmab txiv cev txiv ntsiav kws, thiab yog lub tebchaws uas muaj ntoo aulib thiab zib ntab, thiab yog lub tebchaws uas nej yuav tau noj tsis tshaib tsis nqhis, thiab nej yuav tsis tu ncua ib yam dabtsi li, thiab yog lub tebchaws uas tej pob zeb yog hlau thiab nej yuav khaws tau tooj liab ntawm tej roob. Nej yuav tau noj tsau npo, thiab nej yuav qhuas Yawmsaub uas yog nej tus Vajtswv txog lub tebchaws zoo uas nws muab pub rau nej ntawd. Koj yuav tsum ceev faj zoo pheej nco ntsoov Yawmsaub uas yog koj tus Vajtswv es tsis tuav nws tej lus nkaw thiab nws tej kevcai thiab nws tej kab ke uas hnub no kuv hais rau koj. Ntshai tsam thaum koj noj tsau npo thiab ua zoo vaj zoo tsev thiab tau nyob hauv lawm, thiab koj tej nyuj tej yaj tej tshis huaj vam coob thiab muaj nyiaj muaj kub ntau zuj zus thiab ib puas tsav yam uas koj muaj huam coob, mas thaum ntawd koj lub siab yuav khav theeb thiab koj yuav tsis nco qab koj tus Vajtswv Yawmsaub uas coj koj tawm hauv Iyi tebchaws hauv txojkev ua qhev los. Nws coj koj mus thoob plaws hauv lub tebchaws moj sab qhua uas loj thiab txaus ntshai kawg, uas muaj nab raj kub sai thiab raub ris teb, thiab yog lub tebchaws qhuav nkig nkuav tsis muaj dej. Nws pub dej tawm hauv phab zeb tawv tawv los rau koj haus, thiab pub cov mana uas koj tej poj koob yawm txwv tsis paub dua yug koj rau hauv tebchaws moj sab qhua, kom nws thiaj txo tau koj lub hwjchim thiab sim koj lub siab, mas thaum kawg koj thiaj tau noj qab nyob zoo. Koj yuav tsum ceev faj tsam ces koj hais tuj taws tias, “Yog kuv lub hwjchim thiab kuv txhais tes lub zog tau ua rau kuv tau tej cuab txhiaj cuab tam no.” Koj yuav tsum nco ntsoov Yawmsaub uas yog koj tus Vajtswv, rau qhov nws yog tus uas pub zog rau koj kom tau tej cuab txhiaj cuab tam no, xwv nws thiaj tuav rawv nws tej lus cog tseg uas nws cog ruaj khov rau koj tej poj koob yawm txwv, ib yam li niaj hnub nimno. Yog koj tsis nco qab koj tus Vajtswv Yawmsaub es mus raws ncuj nciav luag tej dab thiab ua koom tu thiab pe tej dab ntawd, hnub no kuv hais tseeb kiag rau nej tias nej yeej yuav puam tsuaj tiag tiag. Ib yam li tej haiv neeg uas Yawmsaub muab ua puam tsuaj tag rau ntawm nej xubntiag, nej yuav puam tsuaj tag ib yam nkaus li ntawd ntag, rau qhov nej tsis mloog nej tus Vajtswv Yawmsaub tej lus. Cov Yixayee 'e, cia li tig ntsej mloog. Hnub no nej yuav hla tus dej Yaladee mus txeeb lub tebchaws uas tej haiv neeg uas loj dua nej thiab muaj zog dua thiab lawv tej moos kuj loj muaj ntsa loog siab txij ntuj. Cov neeg ntawd loj thiab siab, yog Anaj caj ces uas nej twb paub thiab hnov luag hais tias, “Leejtwg yuav sawv tiv yeej Anaj caj ces?” Hnub no nej cia li paub tseeb tias tus uas mus ua nej ntej yam li nplaim taws kub ceev yeej yog Yawmsaub uas yog nej tus Vajtswv. Nws yuav ua kom lawv puam tsuaj thiab swb kiag nej, nej thiaj yuav ntiab tau lawv khiav mus ua rau lawv puam tsuaj sai kawg, yam li Yawmsaub tau cog lus rau nej lawd. Thaum Yawmsaub uas yog nej tus Vajtswv muab lawv ntiab tawm ntawm nej hauv ntej mus lawm, nej tsis txhob hais tuj taws tias, “Twb yog kuv ua ncaj ncees Yawmsaub thiaj coj kuv los txeeb tau lub tebchaws no ua kuv tug,” tiamsis qhov tseeb yog tim tej haiv neeg no ua phem Yawmsaub thiaj muab lawv ntiab tawm ntawm nej hauv ntej mus. Qhov uas nej mus txeeb tau lawv lub tebchaws ua nej tug, tsis yog vim nej ua ncaj ncees lossis nej lub siab ncaj, tiamsis vim yog tej haiv neeg no ua phem, nej tus Vajtswv Yawmsaub thiaj li muab lawv ntiab tawm ntawm nej xubntiag mus, thiab nws thiaj tuav rawv tej lus uas Yawmsaub tau cog tseg ruaj khov rau nej tej poj koob yawm txwv, uas yog Aplahas, Yiha thiab Yakhauj. Vim li no nej yuav tsum paub tseeb tias qhov uas Yawmsaub uas yog nej tus Vajtswv pub lub tebchaws zoo no rau nej txeeb tau ua nej tug ntawd tsis yog vim nej ua ncaj ncees, rau qhov nej kuj yog haiv neeg uas tawv ncauj. Nej cia li nco ntsoov thiab tsis txhob tsis nco qab tias nej tau ua li cas thiaj zes ua rau nej tus Vajtswv Yawmsaub npau taws rau hauv tebchaws moj sab qhua. Txij hnub uas nej tawm hauv Iyi tebchaws los txog lub chaw no nej pheej fav xeeb rau Yawmsaub. Txawm yog ntawm Haule los nej kuj zes ua rau Yawmsaub npau taws, thiab nws chim heev kawg li, nws twb yuav ua rau nej puam tsuaj. Thaum kuv nce mus saum lub roob yuav txais daim txiag zeb uas muaj tej lus cog tseg uas Yawmsaub cog rau nej, kuv nyob saum lub roob plaub caug hnub plaub caug hmo. Kuv tsis noj mov tsis haus dej li. Mas Yawmsaub muab ob daim txiag zeb uas Vajtswv xuas ntiv tes sau nws tej lus pub rau kuv. Hauv ob daim txiag zeb ntawd muaj tej lus huvsi uas Yawmsaub hais rau nej hauv cov nplaim taws saum lub roob rau hnub uas nej tuaj txoos ua ke. Thaum dhau plaub caug hnub plaub caug hmo lawm Yawmsaub muab ob daim txiag zeb uas muaj tej lus cog tseg pub rau kuv. Mas Yawmsaub hais rau kuv tias, “Cia li sawv tsees, nqes ntawm no mus tamsid, rau qhov koj haiv neeg uas koj coj tawm hauv Iyi tebchaws los yuam kev ua txhaum lawm. Lawv tig kiag ntawm txojkev uas kuv qhia rau lawv lawd sai kawg li. Lawv nchuav ib tug dab mlom rau lawv lawm.” Tsis tag li ntawd, Yawmsaub hais rau kuv tias, “Kuv pom haiv neeg no, mas saib maj, yog ib haiv neeg uas tawv ncauj. Tsis txhob tav kuv lawm, kuv yuav ua kom lawv puam tsuaj thiab muab lawv lub npe rhuav kom ploj hauv lub qab ntuj no mus. Kuv yuav tsa koj ua ib haiv neeg uas loj thiab muaj zog dua lawv.” Kuv thiaj tig kiag nqes saum lub roob los, muaj nplaim taws puv nkaus saum lub roob. Thiab ob daim txiag zeb uas muaj tej lus cog tseg nyob rawv hauv kuv txhais tes. Kuv tsa muag ntsia mas pom tias nej tau ua txhaum rau Yawmsaub uas yog nej tus Vajtswv lawm. Nej tau nchuav ib tug dab mlom thav nyuj rau nej, nej tau tig hlo ntawm txojkev uas Yawmsaub tau qhia nej lawd sai kawg. Kuv thiaj muab ob daim txiag zeb ntawm kuv txhais tes laim pov tseg tawg tag tab meeg nej. Ces kuv txawm khwb nkaus rau ntawm Yawmsaub xubntiag yam li thawj zaug tau plaub caug hnub plaub caug hmo. Kuv tsis noj mov tsis haus dej li, vim yog tim tej kev txhaum huvsi uas nej tau ua, yog tau ua phem tab meeg Yawmsaub zes ua kom nws chim. Kuv ntshai Yawmsaub txojkev chim thiab qhov uas nws tsis txaus siab heev rau nej, nws twb yuav ua kom nej puam tsuaj. Tiamsis zaum ntawd Yawmsaub kuj mloog kuv tej lus thov. Yawmsaub chim rau Aloo heev, twb yuav ua rau nws puam tsuaj. Thaum ntawd kuv kuj thov Yawmsaub txog Aloo thiab. Kuv thiaj muab yam uas txhaum loj ntawd, yog tus dab mlom thav nyuj uas nej ua ntawd, mas muab hlawv muab tsoo muab tuav mos mos ua hmoov, thiab kuv muab w rau hauv tus dej uas ntws pem lub roob los. Nej twb ua rau Yawmsaub npau taws ntawm Thanpela thiab ntawm Maxa thiab ntawm Khilau Hata‑ava. Thiab thaum Yawmsaub txib kom nej tawm ntawm Khade Npania mus hais tias, “Cia li mus txeeb lub tebchaws uas kuv muab rau nej,” los nej kuj fav xeeb tsis ua raws li nej tus Vajtswv Yawmsaub hais rau nej, thiab nej tsis tso siab rau nws thiab tsis mloog nws tej lus. Nej pheej fav xeeb rau Yawmsaub txij hnub uas kuv paub nej los li lawm. Kuv thiaj khwb nkaus rau ntawm Yawmsaub xubntiag tau plaub caug hnub plaub caug hmo ntawd rau qhov Yawmsaub hais tias nws yuav ua rau nej puam tsuaj. Kuv thiaj thov Yawmsaub hais tias, “Au Vajtswv Yawmsaub, thov tsis txhob ua rau koj haiv neeg uas yog koj qub txeeg qub teg puam tsuaj. Lawv yog cov uas koj tau siv koj lub hwjchim loj txhiv los thiab xuas koj txhais tes uas muaj zog coj tawm hauv Iyi tebchaws los. Thov koj nco txog koj cov tub qhe uas yog Aplahas, Yiha thiab Yakhauj. Thov tsis txhob saib rau qhov uas haiv neeg no tawv ncauj thiab lawv tej kev phem thiab lawv tej kev txhaum, tsam ces cov neeg hauv lub tebchaws uas koj coj peb tawm los ntawd yuav hais tias, ‘Vim yog Yawmsaub tsis muaj peevxwm coj lawv mus rau hauv lub tebchaws uas nws cog lus cia rau lawv lawd, thiab twb yog nws ntxub lawv, nws thiaj coj lawv los tua tag rau hauv tebchaws moj sab qhua.’ Lawv twb yog koj haiv neeg thiab yog koj qub txeeg qub teg uas koj siv koj lub hwjchim loj thiab koj txhais npab uas tsa hlo coj tawm los.” Thaum ntawd Yawmsaub hais rau kuv tias, “Koj cia li txua ob daim txiag zeb zoo ib yam li thawj ob daim thiab nce tuaj cuag kuv saum lub roob, thiab ua ib lub phij xab ntoo. Mas kuv yuav sau tej lus uas nyob hauv ob daim txiag zeb uas koj ua tawg lawd thiab koj yuav tsum muab ob daim txiag zeb ntawd khaws cia rau hauv lub phij xab.” Kuv thiaj muab ntoo kub twg los ua lub phij xab thiab txua ob daim txiag zeb zoo ib yam li thawj ob daim thiab nqa ob daim txiag zeb hauv kuv txhais tes nce mus saum lub roob. Mas Yawmsaub thiaj sau kaum txoj kevcai rau hauv ob daim txiag zeb yam li qub, yog tej lus uas Yawmsaub hais hauv cov nplaim taws saum lub roob rau nej rau hnub uas nej tuaj txoos ua ke. Mas Yawmsaub muab ob daim txiag zeb ntawd pub rau kuv. Ces kuv txawm tig kiag nqes saum lub roob los thiab muab ob daim txiag zeb ntawd khaws cia rau hauv lub phij xab uas kuv ua, mas ob daim txiag zeb kuj nyob rau hauv, raws li Yawmsaub hais cia rau kuv. (Cov Yixayee taug kev ntawm Npe‑awlauj Npene Ya‑akhas los txog Mauxela, mas Aloo txawm tuag thiab muab log rau qhov ntawd lawm. Ces nws tus tub Ele‑axa thiaj sawv nws chaw ua pov thawj. Lawv tshais chaw qhov ntawd los txog Kukauda, thiab tshais ntawm Kukauda los txog Yaunpatha uas yog lub tebchaws muaj hav dej ntau. Thaum ntawd Yawmsaub muab xeem Levi cais ua cov uas kwv Yawmsaub lub phij xab sib cog lus thiab nyob ntawm Yawmsaub xubntiag ua koom tu nws thiab tuav nws lub npe foom koob hmoov los txog niaj hnub nimno. Vim li no cov Levi thiaj tsis muaj feem nrog cov kwvtij tau lub tebchaws ua qub txeeg qub teg. Yawmsaub yog lawv li qub txeeg qub teg, raws li nej tus Vajtswv Yawmsaub hais rau lawv lawd.) Kuv nyob saum lub roob plaub caug hnub plaub caug hmo yam li thawj zaug, mas zaum ntawd Yawmsaub kuj mloog kuv tej lus thov thiab, Yawmsaub thiaj tsis xav ua kom nej puam tsuaj lawm. Yawmsaub hais rau kuv tias, “Cia li sawv tsees, coj cov pejxeem taug kev mus kom lawv thiaj mus txeeb tau lub tebchaws uas kuv cog lus ruaj cia rau lawv tej poj koob yawm txwv tias yuav pub rau lawv.” Cov Yixayee 'e, nimno Yawmsaub uas yog nej tus Vajtswv xav kom nej ua dabtsi? Nws xav kom nej hwm thiab paub ntshai Yawmsaub uas yog nej tus Vajtswv, thiab ua lub neej raws nraim nws tej txojkev huvsi, thiab hlub nws thiab ua koom tu Yawmsaub uas yog nej tus Vajtswv kawg nej lub siab lub ntsws, thiab tuav rawv Yawmsaub tej lus nkaw thiab tej kab ke uas hnub no kuv hais rau nej xwv nej thiaj noj qab nyob zoo. Saib maj, lub ntuj thiab lub ntuj uas siab kawg nkaus thiab lub ntiajteb thiab txhua yam uas nyob hauv puavleej yog nej tus Vajtswv Yawmsaub li. Txawm li ntawd los Yawmsaub tsom ntsoov hlub nej tej poj koob yawm txwv thiab xaiv lawv tej caj ces uas yog nej ua haiv neeg tseem ceeb dua ib tsoom neeg sawvdaws, yam li niaj hnub nimno. Vim li no nej cia li txiav nrho nej lub siab tsis txhob tawv ncauj dua li lawm. Rau qhov Yawmsaub uas yog nej tus Vajtswv yog ib tsoom timtswv tus Vajtswv, thiab yog cov uas muaj hwjchim tus tswv, nws yog tus Vajtswv uas loj kawg thiab muaj hwjchim thiab txaus ntshai kawg, nws tsis saib leejtwg ntsej muag, tsis yuav tej nyiaj xiab. Nws tu plaub ncaj rau cov menyuam uas tsis muaj txiv thiab cov poj ntsuam, thiab hlub lwm haiv neeg uas nrog nej nyob, nws pub zaub mov thiab ris tsho rau lawv. Vim li no nej yuav tsum hlub lwm haiv neeg rau qhov nej kuj txeev ua lwm haiv neeg rau hauv Iyi tebchaws. Nej yuav tsum hwm thiab paub ntshai Yawmsaub uas yog nej tus Vajtswv. Nej yuav tsum ua koom tu nws thiab nrog nws tsheej xeeb thiab tuav nws tib leeg lub npe twv. Nws yog tus uas nej yuav qhuas. Nws yog nej tus Vajtswv uas twb ua tej xwm txheej loj thiab txaus ntshai uas nej lub qhov muag twb pom no. Nej tej poj koob yawm txwv mus xya caum leej rau hauv Iyi tebchaws, tiamsis nimno nej tus Vajtswv Yawmsaub twb ua rau nej huaj vam coob yam li tej hnub qub saum ntuj. Vim li no nej yuav tsum hlub Yawmsaub uas yog nej tus Vajtswv thiab tuav rawv tej lus uas nws qhia thiab nws tej kab ke thiab nws tej kevcai thiab nws tej lus nkaw mus li. Hnub no nej yuav tsum nco ntsoov txog nej tus Vajtswv Yawmsaub txojkev nplawm qhuab qhia. Twb yog nej pom, tsis yog nej cov menyuam paub thiab pom. Nej cia li nco txog Yawmsaub uas loj kawg thiab nws txhais tes uas muaj hwjchim thiab nws txhais npab uas tsa hlo, thiab nco txog nws tej txujci phimhwj uas nws ua rau Iyi tus vajntxwv Falau thiab nws lub tebchaws huvsi, thiab tej uas nws ua rau Iyi pab tub rog thiab cov nees thiab lawv tej tsheb ua rog, thiab ua rau Hiavtxwv Liab nphau nyab kiag lawv rau thaum lawv raws caum nej, Yawmsaub thiaj ua rau lawv puam tsuaj txog niaj hnub nimno. Thiab nco txog tej uas nws ua rau nej hauv tebchaws moj sab qhua mus txog thaum nej los txog ntawm no, thiab tej uas nws ua rau Dathas thiab Anpilas uas yog Elia li tub thiab yog Lunpee li xeeb ntxwv, uas yog thaj av rua ncauj nqos kiag lawv thiab lawv tsev neeg thiab lawv tej tsev ntaub thiab txhua yam muaj txojsia uas nrog lawv nyob, tab meeg cov Yixayee sawvdaws. Nej lub qhov muag twb pom ntsoov tej xwm txheej loj uas Vajtswv ua no huvsi. Yog li no nej yuav tsum tuav rawv tej lus nkaw huvsi uas hnub no kuv cob rau nej, xwv nej thiaj li muaj zog thiab mus txeeb tau lub tebchaws uas nej tabtom hla mus tuav ua nej tug, thiab nej thiaj muaj txojsia nyob ntev rau hauv lub tebchaws uas Yawmsaub cog lus ruaj khov cia rau nej tej poj koob yawm txwv tias yuav pub rau lawv thiab lawv tej caj ces, yog lub tebchaws uas muaj kua mis thiab zib ntab ntws nto. Lub tebchaws uas nej yuav mus txeeb ntawd tsis thooj li Iyi tebchaws uas nej tawm los. Hauv Iyi tebchaws nej tseb noob thiab xuas kotaw tuam tshuab ntov dej yam li tej vaj zaub. Tiamsis lub tebchaws uas nej hla mus txeeb ua nej tug ntawd muaj roob muaj hav muaj dej nag saum ntuj los ntub, yog lub tebchaws uas nej tus Vajtswv Yawmsaub tsom kwm. Nej tus Vajtswv Yawmsaub lub qhov muag ntsia ntsoov lub tebchaws tsis tu ncua txij thaum hauv xyoo mus txog qab xyoo. Yog nej ua raws li tej lus nkaw uas hnub no kuv muab cob rau nej, uas yog hlub Yawmsaub uas yog nej tus Vajtswv thiab ua koom tu nws kawg nej lub siab lub ntsws, mas nws yuav pub nag los rau nej lub tebchaws raws caij raws nyoog, yog cov nag hauv xyoo nag qab xyoo kom nej thiaj li tau qoob loo thiab cawv txiv hmab thiab roj, thiab nws yuav pub nej tej tshav zaub muaj zaub rau nej tej tsiaj txhu noj, mas nej yuav tau noj tsau npo. Nej yuav tsum ceev faj tsis txhob cia nej lub siab raug ntxias tig kiag mus ua koom tu thiab pe luag tej dab. Yog nej ua li ntawd Yawmsaub txojkev npau taws yuav tshwm plaws rau nej. Nws yuav kaw lub ntuj tsis tso nag los thiab tej av yuav tsis tuaj qoob loo thiab nej yuav puam tsuaj ploj sai kawg li rau hauv lub tebchaws zoo uas Yawmsaub pub rau nej. Vim li no nej yuav tsum khaws tej lus uas kuv hais no rau hauv nej lub siab lub ntsws, thiab muab tej lus no khi rau ntawm nej txhais tes ua lub chaw nco, thiab muab pav rau ntawm nej hauv pliaj. Nej yuav qhia tej lus no rau nej tej menyuam, thiab hais txog tej lus no rau thaum nej nyob hauv tsev thaum nej taug kev thaum nej pw thiab thaum nej sawv, thiab muab sau rau ntawm tej npuab rooj hauv tsev thiab ntawm rooj loog, kom nej thiab nej tej tub ki thiaj muaj txojsia ntev rau hauv lub tebchaws uas Yawmsaub cog lus ruaj tias yuav pub rau nej tej poj koob yawm txwv, ntev li thaum lub ntuj tseem khwb lub ntiajteb. Yog nej ceev faj ua raws nraim tej lus nkaw no huvsi uas kuv cob rau nej, uas yog hlub Yawmsaub uas yog nej tus Vajtswv thiab ua nej lub neej raws nraim nws tej kev huvsi thiab tuav rawv nws, mas Yawmsaub yuav ntiab txhua haiv neeg no tawm ntawm nej hauv ntej mus, mas nej yuav txeeb tau tej haiv neeg uas loj dua nej thiab muaj zog dua nej lub tebchaws. Nej xib taws tsuj mus txog qhovtwg qhov ntawd yuav yog nej li. Nej li ciam teb yuav txij ntua tebchaws moj sab qhua mus txog Lenpanoo, thiab txij ntua tus niag dej Yufeti mus txog hiavtxwv sab hnub poob. Yuav tsis muaj leejtwg sawv tiv tau nej. Yawmsaub uas yog nej tus Vajtswv yuav ua kom thoob lub tebchaws uas nej yuav mus tsuj ntawd ntshai nej heev kawg li, raws li nws twb cog lus tseg rau nej. Saib maj, hnub no kuv coj tej lus foom koob hmoov thiab tej lus tsawm foom los txawb rau ntawm nej xubntiag. Yog nej ua raws li nej tus Vajtswv Yawmsaub tej lus nkaw uas hnub no kuv muab cob rau nej, mas nej yuav tau tej koob hmoov ntawd. Hos yog nej tsis ua raws li nej tus Vajtswv Yawmsaub tej lus nkaw es tig kiag ntawm txojkev uas hnub no kuv hais rau nej mus raws ncuj nciav luag tej dab uas nej tsis tau paub dua, nej yuav tau saws tej lus tsawm foom ntawd. Thaum Yawmsaub uas yog nej tus Vajtswv coj nej mus rau hauv lub tebchaws uas nej tabtom yuav mus txeeb ua nej tug ntawd, nej yuav tsum muab tej lus foom koob hmoov tshaj tawm rau saum lub roob Kelixi thiab muab tej lus tsawm foom tshaj tawm rau saum lub roob Enpas. Ob lub roob no nyob sab ntug dej Yaladee tim ub, yog nyob ntawm txojkev uas mus rau sab hnub poob hauv cov Khana‑as thaj tebchaws ntawm Alanpa, thiab ncaj lub moos Kilakas ze tej ntoo xeeb ntawm Maule. Nej yuav hla tus dej Yaladee mus txeeb tau lub tebchaws uas nej tus Vajtswv Yawmsaub pub rau nej, mas thaum nej txeeb tau thiab nyob rau hauv lawm, nej yuav tsum ceev faj ua raws li tej kab ke thiab tej kevcai huvsi uas hnub no kuv muab cob rau nej. Ntawm no mus yog tej kab ke thiab tej kevcai uas nej yuav tsum ceev faj ua raws nraim li rau hauv lub tebchaws uas Yawmsaub uas yog nej tej poj koob yawm txwv tus Vajtswv twb muab rau nej ua nej tug tag sim neej uas nej nyob ntiajteb no. Nej yuav tsum muab tej haiv neeg uas nej ntiab khiav ntawd tej chaw teev dab rhuav kom puam tsuaj huvsi, yog tej chaw uas nyob saum roob siab thiab saum tej pov roob thiab hauv txhua tsob qab ntoo ntsuab. Nej yuav tsum muab lawv tej thaj teev dab rhuav pov tseg thiab tsoo lawv tej ncej teev dab kom tawg ua tej dwb daim thiab hlawv lawv tej ncej dab Asela pov tseg. Nej yuav tsum muab tej dab mlom tsoo pov tseg thiab muab tej npe dab ntawd rhuav kom ploj qhov ntawd mus. Nej tsis txhob pe li ntawd rau Yawmsaub uas yog nej tus Vajtswv. Nej yuav tsum nrhiav ib qho chaw uas nej tus Vajtswv Yawmsaub yuav xaiv rau hauv nej txhua xeem rau nws lub npe thiab ua lub chaw rau nws nyob. Mas nej yuav mus qhov ntawd, thiab nej yuav muab tej uas ua kevcai hlawv huvsi xyeem thiab tej tsiaj uas tua xyeem, tej uas nej pub ib feem kaum, tej uas yuav muab cev xyeem, tej uas nej fiv cia yuav muab xyeem, tej uas nej zoo siab muab xyeem pub thiab thawj tug menyuam nyuj menyuam tshis menyuam yaj coj mus rau qhov ntawd. Nej thiab nej tsev neeg yuav noj qhov ntawd tab meeg nej tus Vajtswv Yawmsaub lub xubntiag thiab yuav zoo siab xyiv fab rau tej haujlwm uas nej ua huvsi, tej ntawd yog nej tus Vajtswv Yawmsaub foom koob hmoov rau nej. Nej tsis txhob ua raws li uas peb niaj hnub ua ntawm no, yog qhov uas sawvdaws nyias ua raws li nyias siab pom zoo xwb. Rau qhov nej tseem tsis tau mus txog lub chaw uas tau so thiab tsis tau mus txog tej qub txeeg qub teg uas nej tus Vajtswv Yawmsaub pub rau nej. Tiamsis thaum nej hla tus dej Yaladee mus nyob rau hauv lub tebchaws uas nej tus Vajtswv Yawmsaub pub ua qub txeeg qub teg rau nej thiab thaum nws pub nej tau so tsis ua rog rau nej tej yeeb ncuab uas nyob ib ncig nej, nej tau nyob kaj siab lug lawd, mas nej yuav coj txhua yam uas kuv hais rau nej lawd mus rau lub chaw uas nej tus Vajtswv Yawmsaub yuav xaiv cia rau nws lub npe nyob. Nej yuav coj tej uas yuav hlawv huvsi xyeem thiab tej uas yuav tua xyeem thiab tej uas nej pub ib feem kaum thiab tej uas nej cev xyeem thiab txhua yam uas nej fiv cia yuav muab xyeem pub rau Yawmsaub. Nej thiab nej tej tub tej ntxhais nej tej tub qhe nkauj qhev thiab cov Levi uas nyob hauv nej tej moos vim lawv tsis muaj feem nrog nej tau qub txeeg qub teg, los nej sawvdaws yuav zoo siab xyiv fab rau ntawm nej tus Vajtswv Yawmsaub lub xubntiag. Koj yuav ceev faj zoo tsis txhob muab tej uas yuav hlawv huvsi xyeem ntawd xyeem rau ntawm tej chaw uas koj siab nyiam. Koj yuav tsum muab xyeem rau hauv lub chaw uas Yawmsaub yuav xaiv rau hauv nej cov ib xeem. Koj yuav muab tej uas yuav hlawv huvsi xyeem ntawd xyeem rau qhov ntawd, thiab koj yuav ua txhua yam uas kuv hais rau koj lawd rau lub chaw ntawd. Txawm li cas los xij, koj yuav tua tsiaj txhu noj rau hauv koj tej moos lub twg kuj tau, tua npaum li uas koj siab nyiam raws li Yawmsaub uas yog koj tus Vajtswv tau foom koob hmoov rau koj. Tus neeg uas qias tsis huv thiab tus uas huv los kuj noj tau, ib yam nkaus li noj nqaij kauv seb noj nqaij muas lwj. Koj tsuas tseg tsis txhob noj ntshav tsiaj kiag li, koj yuav muab hliv pov tseg rau hauv av yam li hliv dej. Tej qoob loo tej cawv txiv hmab tej roj ib feem kaum, thiab thawj tug menyuam nyuj menyuam tshis menyuam yaj, thiab tej uas koj fiv cia yeem yuav muab xyeem, thiab tej uas koj zoo siab muab xyeem pub thiab tej uas koj cev xyeem, mas koj tsis txhob noj rau hauv koj lub moos. Tiamsis koj yuav tsum noj tej no rau ntawm koj tus Vajtswv Yawmsaub lub xubntiag rau hauv lub chaw uas koj tus Vajtswv Yawmsaub yuav xaiv cia, tag nrho koj thiab koj tej tub ki koj tej tub qhe nkauj qhev thiab cov Levi uas nyob hauv koj lub moos huvsi. Thiab koj yuav zoo siab xyiv fab rau txhua yam haujlwm uas koj ua rau ntawm koj tus Vajtswv Yawmsaub xubntiag. Koj yuav ceev faj tsis txhob tso cov Levi tseg rau thaum koj tseem nyob hauv koj lub tebchaws. Thaum Yawmsaub uas yog koj tus Vajtswv pub koj tau tebchaws dav zuj zus raws li nws cog lus tseg rau koj lawd thiab koj hais tias, “Kuv yuav noj nqaij,” vim yog koj nqhis nqaij tsiaj, koj yuav tau noj nqaij npaum li uas koj lub siab nyiam. Yog lub chaw uas koj tus Vajtswv Yawmsaub yuav xaiv cia rau nws lub npe nyob ntawd deb koj heev lawm ces koj cia li tua koj tej nyuj yaj tshis uas Yawmsaub pub rau koj, raws li kuv hais rau koj lawd. Koj cia li noj rau hauv koj lub moos npaum li uas koj lub siab nyiam. Koj noj tau ib yam li noj nqaij kauv seb thiab nqaij muas lwj. Tus neeg uas qias tsis huv thiab tus uas huv los noj tau. Koj yuav tsum ceev faj tsis txhob noj cov ntshav kiag li, rau qhov cov ntshav yog txojsia, mas koj tsis txhob noj txojsia nrog cov nqaij. Koj tsis txhob noj cov ntshav kiag li, koj yuav tsum muab hliv pov tseg rau hauv av yam li hliv dej. Koj tsis txhob noj cov ntshav kiag li kom koj thiab koj tej tub ki thiaj li noj qab nyob zoo vim yog qhov uas koj ua tej uas Yawmsaub pom tias raug cai. Tej yam dawb huv uas yuav tsum pub raws li kevcai thiab tej uas koj fiv cia yuav muab xyeem pub mas koj yuav coj mus rau lub chaw uas Yawmsaub yuav xaiv cia. Cov nqaij thiab cov ntshav uas ua kevcai hlawv huvsi xyeem mas yuav muab xyeem saum koj tus Vajtswv Yawmsaub lub thaj. Tiamsis tus tsiaj uas tua xyeem mas muab cov ntshav hliv rau saum koj tus Vajtswv Yawmsaub lub thaj, hos cov nqaij mas koj noj tau. Koj yuav tsum ceev faj ua raws li txhua lo lus uas kuv hais kom koj ua xwv koj thiab koj tej tub ki thiaj li noj qab nyob zoo mus ib txhis, vim yog qhov uas koj ua tej uas Yawmsaub uas yog koj tus Vajtswv pom tias zoo thiab raug cai. Yawmsaub uas yog koj tus Vajtswv yuav rhuav tshem tej haiv neeg uas koj yuav txeem mus muab ntiab khiav ntawd, mas thaum koj muab lawv ntiab khiav thiab mus nyob hauv lawv lub tebchaws lawm, thiab thaum lawv raug puam tsuaj tag lawd, koj yuav tsum ceev faj tsis txhob raug lawv ntxias ua raws li lawv, thiab tsis txhob nug txog lawv tej dab hais tias, “Haiv neeg ntawd ua koom tu lawv tej dab li cas nev? Kuv yuav ua koom ib yam li lawv.” Koj tsis txhob ua li ntawd rau koj tus Vajtswv Yawmsaub rau qhov txhua yam uas lawv ua koom tu lawv tej dab ntawd yog kev qias vuab tsuab uas Yawmsaub ntxub. Txawm yog lawv tej tub tej ntxhais los lawv kuj muab hlawv xyeem rau lawv tej dab thiab. Txhua yam uas kuv hais rau nej no nej yuav tsum ceev faj ua raws nraim. Nej tsis txhob tsav ib yam dabtsi rau thiab tsis txhob rho ib yam dabtsi tseg. Yog ib tug xibhwb cev Vajtswv lus lossis ib tug uas ua npau suav pom tom hauv ntej tshwm los rau hauv nej thiab qhia ib yam txujci tseem ceeb phimhwj rau koj, thiab yog txujci tseem ceeb phimhwj uas nws hais ntawd muaj tshwm los tiag tiag ces nws thiaj hais tias, “Cia peb pe hawm thiab ua koom tu luag tej dab,” uas koj tsis tau paub dua, mas koj tsis txhob ntseeg tus xibhwb cev lus lossis tus uas ua npau suav ntawd tej lus. Rau qhov nej tus Vajtswv Yawmsaub sim nej lub siab saib nej hlub nej tus Vajtswv Yawmsaub kawg nej lub siab lub ntsws los tsis hlub. Nej yuav tsum ua lub neej raws li Yawmsaub uas yog nej tus Vajtswv thiab hwm thiab paub ntshai nws thiab tuav rawv nws tej lus nkaw thiab mloog nws lus, thiab nej yuav tsum ua koom tu nws thiab nrog nws tsheej xeeb. Tus uas cev lus thiab tus uas ua npau suav ntawd yuav tsum raug muab tua pov tseg, vim yog nws qhia kom fav xeeb rau nej tus Vajtswv Yawmsaub uas coj nej tawm hauv Iyi tebchaws los thiab txhiv nej dim hauv txojkev ua qhev. Tus ntawd ua rau nej tig kiag ntawm txojkev uas nej tus Vajtswv Yawmsaub kom nej mus. Ua li no nej thiaj ntxuav tau tej kev phem no tawm hauv nej mus. Yog koj ib tug kwvtij uas nrog koj koom niam lossis koj li tub li ntxhais lossis koj tus pojniam ntawm koj xubntiag lossis koj tus kwvluag uas nrog koj koom ib lub siab yaum twjywm tias, “Cia peb mus ua koom tu luag tej dab,” uas koj thiab koj tej poj koob yawm txwv tsis tau paub dua, uas yog tej haiv neeg uas nyob ib ncig nej tej dab tsis hais deb los ze, txij ntua sab ntuj no mus txog sab ntuj kawg tim ub, los koj tsis txhob yeem swb nws thiab mloog nws hais, koj lub qhov muag tsis txhob khuvleej nws, tsis txhob tseg nws txojsia li, tsis txhob npog nws kiag li. Koj yuav tsum muab nws tua pov tseg. Koj yuav tsum nqes tes ua ntej rau txim tua nws, mas sawvdaws mam li nqes tes tom qab. Koj yuav tsum xuas pob zeb ntaus kom nws tuag, rau qhov nws yooj xeeb coj koj tawm hauv koj tus Vajtswv Yawmsaub uas coj nej tawm hauv Iyi tebchaws hauv txojkev ua qhev los. Mas cov Yixayee sawvdaws thiaj tau hnov thiab ntshai thiaj tsis ua tej kev phem no rau hauv nej nruab nrab dua li lawm. Yog koj hnov tias hauv nej tej moos uas nej tus Vajtswv Yawmsaub pub rau nej nyob lawd tsis hais lub twg muaj neeg phem qee leej tawm hauv nej mus ntxias cov neeg hauv lub moos ntawd hais tias, “Cia peb mus ua koom tu luag tej dab,” uas nej tsis tau paub dua, mas koj yuav tsum tshuaj thiab tshawb nrhiav thiab ua tib zoo nug. Yog muaj tseeb thiab pom tseeb tias tej uas qias vuab tsuab no tshwm rau hauv nej nruab nrab, mas koj yuav tsum xuas hniav ntaj muab cov neeg hauv lub moos ntawd tua. Koj yuav tsum xuas hniav ntaj ua kom puam tsuaj tu noob nrho tsis hais tej neeg thiab tej tsiaj txhu hauv lub moos huvsi. Koj yuav tsum sau cov neeg ntawd tej qhov txhia chaw huvsi tuaj tso ua ke hauv tshav puam thiab muab lub moos ntawd thiab tej qhov txhia chaw huvsi hlawv pov tseg thiaj yog hlawv huvsi xyeem rau Yawmsaub uas yog koj tus Vajtswv. Lub moos ntawd yuav nyob do cuas cia mus ib txhis, tsis txhob rov ua dua tshiab. Tsis txhob cia tej uas caiv ntawd ib yam dabtsi lo koj txhais tes, xwv Yawmsaub thiaj li thim nws txojkev npau taws heev thiab khuvleej thiab tab ncuab koj, thiab pub koj huaj vam coob, raws li nws cog lus ruaj khov cia rau koj tej poj koob yawm txwv lawm, vim nej mloog Yawmsaub uas yog nej tus Vajtswv tej lus, yog qhov uas tuav rawv nws tej lus nkaw huvsi uas hnub no kuv muab cob rau koj thiab ua tej uas koj tus Vajtswv Yawmsaub pom tias raug cai. Nej yog Yawmsaub uas yog nej tus Vajtswv li tub ki. Nej tsis txhob muab nej tej nqaij suam thiab tsis txhob chais cov plaubhau ntawm hauv pliaj rau thaum uas muaj neeg tuag. Rau qhov nej yog haiv neeg uas dawb huv rau Yawmsaub uas yog nej tus Vajtswv, thiab Yawmsaub tau xaiv nej tawm hauv ib tsoom neeg hauv qab ntuj no los ua haiv neeg uas yog nws teej nws tug. Koj tsis txhob noj tej yam uas qias vuab tsuab. Tej tsiaj uas noj tau yog cov no, yog nyuj, yaj, tshis, muas lwj, kauv seb, kauv liab, tshis qus, sai, nyuj qus dawb thiab yaj qus. Txhua yam tsiaj uas muaj rau uas rau ntshua ua ntiv thiab yog tsiaj uas zom zaub mas nej noj tau. Tej tsiaj uas zom zaub lossis rau ntshua uas nej caiv tsis txhob noj mas yog cov no, yog ntxhuav, luav, ntxim tsua vim cov tsiaj no zom zaub tiamsis rau tsis ntshua ua ntiv thiaj yog tej tsiaj uas qias tsis huv rau nej. Npua mas rau ntshua tiamsis tsis zom zaub ces kuj qias tsis huv rau nej. Nej tsis txhob noj tej tsiaj no li nqaij thiab tsis txhob kov lawv lub cev tuag kiag li. Tej tsiaj nruab deg uas nej noj tau yog cov no, yog cov uas muaj txoob muaj nplai nej noj tau huvsi, tiamsis cov uas tsis muaj txoob tsis muaj nplai nej tsis txhob noj, yog tej tsiaj uas qias tsis huv rau nej. Txhua yam noog uas huv mas nej noj tau, tiamsis cov noog uas nej caiv tsis txhob noj yog cov no, yog dav dub, dav noj twm, dav txho, liaj tw ntev, liaj ntsuab, txhua yam uas yog liaj yog dav, txhua yam uab lag, plas dawb, plas txaij, plas liab, liaj txho, txhua yam plas no, lib nyug loj, lib nyug me, plas tauv lauv, plas me, dav dawb, plas noj ntses, os dej dub, qaib dej txho thiab txhua yam uas zoo li no, noog pej thiab puav. Txhua yam kab muaj tis puavleej qias tsis huv rau nej, nej tsis txhob noj. Txhua yam muaj tis uas huv nej noj tau. Tej tsiaj uas nws tuag nws nej tsis txhob noj. Nej muab rau lwm haiv neeg uas nrog nej nyob hauv nej tej moos noj kuj tau lossis nej muab muag rau lwm haiv neeg kuj tau, rau qhov nej yog haiv neeg uas dawb huv rau Yawmsaub uas yog nej tus Vajtswv. Tsis txhob muab tus maum tshis cov kua mis los hau nws tus menyuam. Tej qoob loo uas koj niaj xyoo tau hauv tej teb mas koj yuav tsum rho ib feem kaum khaws cia. Mas tej uas koj rho ib feem kaum ntawm koj tej qoob loo thiab koj tej cawv txiv hmab thiab koj tej roj, thiab koj thawj tug menyuam nyuj menyuam tshis menyuam yaj mas koj yuav tsum noj rau ntawm koj tus Vajtswv Yawmsaub lub xubntiag rau hauv lub chaw uas nws yuav xaiv cia rau nws lub npe nyob, xwv koj thiaj li kawm paub ntshai thiab hwm Yawmsaub uas yog koj tus Vajtswv ib txhis mus li. Yog tias kev deb heev koj tsis muaj peevxwm coj tau ib feem kaum uas koj tus Vajtswv Yawmsaub foom koob hmoov rau koj ntawd mus rau lub chaw uas koj tus Vajtswv Yawmsaub xaiv cia rau nws lub npe nyob vim yog kev deb heev, ces koj cia li muab tej ntawd muag ntxeev ua nyiaj qhwv coj mus rau ntawm lub chaw uas koj tus Vajtswv Yawmsaub xaiv cia lawd, es muab tej nyiaj ntawd yuav tej uas koj lub siab nyiam, xws li yog nyuj yaj, cawv txiv hmab thiab cawv ntxwg thiab tej yam uas koj xav noj. Koj yuav noj haus qhov ntawd tab meeg Yawmsaub uas yog koj tus Vajtswv xubntiag, koj thiab koj tsev neeg yuav zoo siab xyiv fab. Koj tsis txhob tso cov Levi uas nyob hauv koj lub moos tseg vim yog lawv tsis muaj feem nrog koj tau qub txeeg qub teg. Thaum puv txhua peb xyoos koj yuav coj ib feem kaum ntawm txhua yam qoob loo uas koj tau xyoo ntawd huvsi tuaj khaws cia rau hauv koj lub moos. Mas cov Levi uas tsis muaj feem nrog koj tau qub txeeg qub teg thiab lwm haiv neeg uas nrog koj nyob thiab cov menyuam uas tsis muaj txiv thiab cov poj ntsuam uas nyob hauv koj lub moos thiaj tau tuaj noj tsau npo. Mas Yawmsaub uas yog koj tus Vajtswv thiaj li foom koob hmoov rau koj tej haujlwm txhua yam uas koj txhais tes ua. Puv txhua xya xyoo koj yuav tsum tso nuj nqes tseg. Koj yuav tso li no, tus uas luag tshuav nws nqe no yuav tso tej uas kwvtij zej zog qev txais lawm tseg, tsis txhob tsob kwvtij zej zog them rov rau nws, vim yog twb tshaj tawm lub caij uas Yawmsaub teem kom tso nuj nqes tseg lawm. Koj yuav tsob ntawm lwm haiv neeg them rov los kuj tau, tiamsis yog koj qev txais dabtsi rau koj cov kwvtij mas koj cia li tso tseg tsis txhob yuav. Mas yuav tsis muaj tej neeg pluag rau hauv nej rau qhov Yawmsaub yuav foom koob hmoov rau koj rau hauv lub tebchaws uas koj tus Vajtswv Yawmsaub muab rau koj ua qub txeeg qub teg ua koj tug, tsuav yog koj mloog Yawmsaub uas yog koj tus Vajtswv lus thiab ceev faj ua raws nraim li tej lus nkaw huvsi uas hnub no kuv cob rau koj no xwb. Vim yog koj tus Vajtswv Yawmsaub yuav foom koob hmoov rau koj raws li nws tau cog lus tseg rau koj, mas koj yuav muaj qev txais rau ntau haiv neeg, tiamsis koj yuav tsis qev txais luag li, koj yuav kav ntau haiv neeg tiamsis luag yuav tsis kav koj. Yog hauv nej muaj ib tug pluag uas yog koj li kwvtij tsis hais nyob lub moos twg hauv koj lub tebchaws uas koj tus Vajtswv Yawmsaub pub rau koj mas koj tsis txhob ua lub siab deb nkaum tes ntawm koj tus kwvtij uas pluag ntawd. Koj yuav cev tes rau nws thiab qev txais kom txaus li nws cheem tsum, qev txais dabtsi kuj tau. Koj yuav tsum ceev faj tib zoo tsis txhob cia koj lub siab xav phem hais tias, “Twb yuav txog xyoo xya uas yog xyoo tso nuj nqes tseg,” ces koj txawm khib tug kwvtij uas pluag ntawd es tsis kam muab dabtsi rau nws, ces nws yuav thov hais rau Yawmsaub mas lub txim yuav poob rau koj. Koj cia li zoo siab hlo muab rau nws thiab thaum muab lawd koj lub siab tsis txhob khuvxim. Yog koj ua li no koj tus Vajtswv Yawmsaub yuav foom koob hmoov rau koj tej haujlwm txhua yam thiab rau txhua yam uas koj ua. Rau qhov tej neeg pluag yuav ploj tsis tag hauv lub tebchaws no. Vim li no kuv thiaj hais rau koj tias, Koj yuav tsum cev tes ua siab dav rau koj cov kwvtij thiab rau cov uas raug txom nyem thiab cov pluag hauv koj lub tebchaws. Yog luag muab koj cov kwvtij Henplais tsis hais pojniam txivneej ib tug muag rov rau koj, mas koj cia nws ua haujlwm rau koj rau xyoo mas xyoo uas xya koj yuav muab nws tso mus. Thaum koj tso nws mus ntawd koj tsis txhob tso nws mus tes dawb tes npliag. Koj yuav tsum muaj lub siab dav muab koj tej yaj tej tshis muab koj tej qoob loo thiab koj tej cawv txiv hmab rau nws raws li uas koj tus Vajtswv Yawmsaub twb foom koob hmoov rau koj lawd. Koj yuav tsum nco ntsoov tias koj txeev ua luag qhev hauv Iyi tebchaws mas Yawmsaub uas yog koj tus Vajtswv tau txhiv koj los. Vim li no hnub no kuv thiaj hais kom koj ua tej no. Tiamsis yog tus qhev hais rau koj tias, “Kuv tsis tawm ntawm koj mus,” vim yog nws nyiam koj thiab koj tsev neeg rau qhov nws nrog koj nyob mas tau zoo, ces koj cia li xuas koob laum nws taub ntsej tshab plaws teem rau ntawm qhov rooj. Ua li no nws thiaj yuav ua koj qhev mus ib sim neej li. Koj yuav ua ib yam nkaus li no rau koj tus nkauj qhev thiab. Thaum koj tso ib tug qhev mus koj tsis txhob nyuaj siab, rau qhov nws ua koj li haujlwm rau xyoo ntawd nws tsuas yog tau ib nrab nqe zog xwb. Ua li no koj tus Vajtswv Yawmsaub thiaj yuav foom koob hmoov rau txhua yam uas koj ua. Thawj tus menyuam tsiaj uas yog txiv tsis hais menyuam nyuj menyuam tshis menyuam yaj koj yuav muab cais ua dawb huv rau Yawmsaub uas yog koj tus Vajtswv. Koj tsis txhob muab thawj tug menyuam nyuj ntawd siv ua haujlwm thiab tsis txhob txiav thawj tug menyuam yaj cov plaub. Koj thiab koj tsev neeg niaj xyoo yuav noj thawj tug menyuam tsiaj ntawd tab meeg Yawmsaub uas yog koj tus Vajtswv lub xubntiag rau hauv lub chaw uas Yawmsaub yuav xaiv cia. Tiamsis yog tus tsiaj ntawd muaj chaw thuam, yog dig muag ceg tawv lossis muaj ib qho phem heev mas koj tsis txhob tua xyeem rau Yawmsaub uas yog koj tus Vajtswv. Koj yuav tsum noj tus tsiaj ntawd rau hauv koj lub moos. Tus uas qias tsis huv thiab tus uas huv kuj noj tau ib yam nkaus li noj nqaij kauv seb noj nqaij muas lwj. Koj tsuas tseg tsis txhob noj cov ntshav xwb, koj cia li muab hliv pov tseg rau hauv av yam li hliv dej. Koj yuav nco lub hli Anpis thiab ua kevcai Hla Dhau rau Yawmsaub uas yog koj tus Vajtswv, rau qhov lub hli Anpis ntawd Yawmsaub uas yog koj tus Vajtswv tau coj koj tawm hauv Iyi tebchaws los hmo ntuj. Koj yuav muab tus tsiaj uas ua kevcai Hla Dhau xyeem rau Yawmsaub uas yog koj tus Vajtswv, yog yaj tshis lossis nyuj, rau hauv lub chaw uas Yawmsaub yuav xaiv cia rau nws lub npe nyob. Koj tsis txhob noj tej ncuav uas xyaw keeb ntxuag tus tsiaj ntawd. Koj yuav noj cov ncuav tsis xyaw keeb xya hnub, yog tej ncuav uas nco txog kev txom nyem vim yog koj maj maj khiav tawm hauv Iyi tebchaws, xwv koj thiaj li nco txog hnub uas koj tawm hauv Iyi tebchaws ntawd ib sim neej li. Hauv xya hnub ntawd tsis tseev kom muaj ib qho keeb ncuav hauv koj lub tebchaws kiag li. Tus tsiaj uas koj tua xyeem thawj hnub thaum yuav tsaus ntuj koj tsis txhob tseg ib qho nqaij cia ib hmos mus txog kaj ntug. Koj tsis txhob muab tus tsiaj uas ua kevcai Hla Dhau xyeem rau hauv koj tej moos uas koj tus Vajtswv Yawmsaub muab pub rau koj. Tiamsis koj yuav tsum muab tus tsiaj uas ua kevcai Hla Dhau xyeem rau hauv lub chaw uas koj tus Vajtswv Yawmsaub yuav xaiv cia rau nws lub npe nyob xwb. Koj yuav muab xyeem rau thaum yuav tsaus ntuj uas hnub poob qho lawd, yog lub sijhawm uas koj tawm hauv Iyi tebchaws. Koj yuav tsum muab ua kom siav mam li noj rau hauv lub chaw uas koj tus Vajtswv Yawmsaub yuav xaiv cia, mas tagkis tom qab koj rov mus rau hauv koj lub tsev ntaub. Koj yuav noj tej ncuav tsis xyaw keeb rau hnub mas hnub uas xya yuav tuaj txoos ua ke caiv so tiag tiag li rau Yawmsaub uas yog koj tus Vajtswv, thiab hnub ntawd koj tsis txhob ua ib yam haujlwm dabtsi li. Koj suav kom puv xya lub chib so, suav hnub uas koj pib xuas liag hlais qoob loo mus kom puv xya lub chib so. Hnub ntawd koj yuav tsum ua kevcai xya lub chib so xyeem rau Yawmsaub uas yog koj tus Vajtswv, yuav muab xyeem pub raws li koj zoo siab pub, npaum li uas koj tus Vajtswv Yawmsaub twb foom koob hmoov rau koj lawd. Koj yuav zoo siab xyiv fab rau ntawm koj tus Vajtswv Yawmsaub xubntiag, koj thiab koj tej tub tej ntxhais koj tej tub qhe nkauj qhev thiab cov Levi uas nyob hauv koj tej moos thiab lwm tus uas nrog koj nyob thiab cov menyuam uas tsis muaj txiv thiab cov poj ntsuam uas nrog koj nyob, nej sawvdaws yuav zoo siab xyiv fab rau hauv lub chaw uas koj tus Vajtswv Yawmsaub yuav xaiv cia rau nws lub npe nyob. Koj yuav tsum nco tias koj txeev ua qhev hauv Iyi tebchaws mas koj yuav ceev faj ua raws li tej kab ke no. Koj yuav ua kevcai nyob tsev pheeb suab xya hnub rau thaum koj sau qoob loo hauv tej tshav ntaus qeb ntaus mog los ncaws tsev tag thiab sau kua txiv hmab hauv tej chaw tsuam tag lawm. Koj yuav pam noj haus ua siab xyiv fab, koj thiab koj tej tub tej ntxhais koj tej tub qhe nkauj qhev thiab cov Levi thiab lwm haiv neeg thiab cov menyuam uas tsis muaj txiv thiab cov poj ntsuam uas nyob hauv koj tej moos yuav ua ke xyiv fab. Koj yuav ua qhov kevcai no xyeem rau Yawmsaub uas yog koj tus Vajtswv xya hnub rau hauv lub chaw uas koj tus Vajtswv Yawmsaub yuav xaiv cia, rau qhov koj tus Vajtswv Yawmsaub yuav foom koob hmoov rau koj tej qoob loo huvsi thiab rau txhua yam haujlwm uas koj txhais tes ua, xwv koj thiaj muaj kev zoo siab xyiv fab kawg. Ib xyoos mas nej cov txivneej sawvdaws yuav tsum tuaj rau ntawm nej tus Vajtswv Yawmsaub xubntiag peb zaug rau hauv lub chaw uas nws yuav xaiv cia, yog thaum ua kevcai noj ncuav tsis xyaw keeb thiab thaum ua kevcai xya lub chib so thiab thaum ua kevcai nyob tsev pheeb suab. Lawv tsis txhob tuaj cuag Yawmsaub tes dawb tes do. Txhua tus yuav xyeem pub raws li xyeem tau, npaum li tej koob hmoov uas nej tus Vajtswv Yawmsaub twb pub rau nws lawd. Koj yuav tsum tsa cov uas tu plaub thiab cov nom tswv rau hauv nej txhua lub moos uas nej tus Vajtswv Yawmsaub pub rau nej, tsa rau hauv txhua xeem, mas lawv yuav tu plaub ntug ncaj ncees rau cov pejxeem. Koj tsis txhob tu plaub tsis ncaj, tsis txhob tuaj leejtwg tog, tsis txhob yuav nyiaj xiab rau qhov tej nyiaj xiab ua rau tus uas txawj ntse dig muag thiab qhau tus uas muaj cai. Tu plaub mas koj yuav tsum tu ncaj tiag tiag li, kom koj thiaj li muaj txojsia nyob thiab thiaj tau lub tebchaws uas koj tus Vajtswv Yawmsaub muab pub rau koj ua qub txeeg qub teg. Koj tsis txhob cog ib tsob ntoo dabtsi los ua ncej dab Asela rau ntawm koj tus Vajtswv Yawmsaub lub thaj uas koj ua lawd ib sab. Koj tsis txhob txhos tej ncej teev dab, yog yam uas Yawmsaub uas yog koj tus Vajtswv ntxub. Koj tsis txhob coj tej txiv nyuj lossis tej yaj uas muaj chaw thuam ib qho twg tuaj xyeem rau Yawmsaub uas yog koj tus Vajtswv, rau qhov yog yam uas qias vuab tsuab rau koj tus Vajtswv Yawmsaub. Hauv nej tej moos uas nej tus Vajtswv Yawmsaub pub rau nej, yog muaj tus txivneej twg lossis tus pojniam twg ua tej uas nej tus Vajtswv Yawmsaub pom tias phem, uas tsis yog raws li Yawmsaub tej lus cog tseg, mas nws mus ua koom tu thiab pe luag tej dab lossis pe lub hnub lub hli lossis ib yam dabtsi uas nyob saum nruab ntug uas kuv tau txwv lawm, yog muaj neeg hais rau koj paub thiab koj hnov, mas koj yuav tsum ua tib zoo tshuaj saib. Yog muaj tseeb thiab pom tseeb tias cov Yixayee ib tug tau ua tej uas qias vuab tsuab ntawd, koj yuav tsum coj tus txivneej lossis tus pojniam uas ua tej kev phem ntawd los rau ntawm rooj loog, mas xuas pob zeb ntaus tus txivneej ntawd lossis tus pojniam ntawd kom tuag. Tus uas raug txim tuag yuav tsum muaj ob leeg los peb leeg ua timkhawv tias nws ua txhaum thiaj muab tua pov tseg tau. Yog muaj tib leeg ua timkhawv xwb mas tsis txhob muab nws tua pov tseg. Tus uas ua timkhawv yuav tsum nqes tes ntaus ua ntej, sawvdaws mam li nqes tes tom qab. Ua li no koj thiaj ntxuav tau tej kev phem no tawm hauv nej mus. Yog hauv nej tej moos muaj tshaj plaub twg uas koj ceeblaj tu, tsis hais plaub tua neeg plaub sib txeeb qhov txhia chaw lossis tej plaub sib ntaus, koj yuav tsum coj mus rau ntawm lub chaw uas koj tus Vajtswv Yawmsaub yuav xaiv cia, thiab mus cuag cov pov thawj uas yog xeem Levi thiab mus cuag tus uas tu plaub rau lub sijhawm ntawd. Koj yuav tsum nrog lawv sablaj mas lawv yuav qhia koj tu plaub. Mas koj yuav tsum ua raws li uas lawv hais rau koj ntawm lub chaw uas Yawmsaub yuav xaiv cia ntawd, thiab koj yuav tsum ceev faj ua raws li txhua yam uas lawv qhia. Koj yuav tsum ua raws li tej lus uas lawv qhia rau koj thiab raws li tej lus uas lawv qhia koj tu plaub. Koj tsis txhob muab tej lus uas lawv qhia koj tu plaub tso tseg, tsis txhob tig rau sab xis lossis rau sab laug. Yog leejtwg tawv ncauj tsis yeem mloog tus pov thawj uas nyob qhov ntawd ua koom tu koj tus Vajtswv Yawmsaub thiab tsis mloog tus tu plaub hais, mas nws yuav tuag. Ua li no koj thiaj ntxuav tau tej kev phem no tawm hauv cov Yixayee mus. Mas cov pejxeem sawvdaws thiaj tau hnov thiab ntshai thiab tsis tawv ncauj dua li lawm. Thaum koj los txog lub tebchaws uas koj tus Vajtswv Yawmsaub pub rau koj thiab koj txeeb tau thiab nyob hauv lawm, thiab koj hais tias, “Peb yuav tsa ib tug vajntxwv los kav peb ib yam li txhua haiv neeg uas nyob ib ncig peb,” koj yuav tsum tsa tus uas Yawmsaub uas yog koj tus Vajtswv xaiv cia ua vajntxwv kav nej. Koj yuav tsa koj cov kwvtij ib tug ua vajntxwv kav nej, koj tsis txhob tsa lwm haiv neeg uas tsis yog koj kwvtij kav nej. Tus vajntxwv ntawd tsis txhob muaj nees coob dhau thiab tsis txhob txib neeg mus yuav nees nram Iyi tebchaws los thiaj tau nees coob coob, rau qhov Yawmsaub tau hais rau nej tias, “Nej yuav tsis rov qab taug txojkev ntawd dua li lawm.” Nws tsis txhob muaj pojniam coob tsam nws lub siab tig ntawm Yawmsaub. Nws tsis txhob muaj nyiaj muaj kub ntau kawg ua nws li. Thaum nws nyob saum lub zwm txwv hauv lub tebchaws, nws yuav tsum muab phau kevcai no sau dua ib phau rau nws raws nraim li phau uas cov pov thawj uas yog xeem Levi khaws cia. Tus vajntxwv yuav tsum muaj phau kevcai ntawd thiab nyeem tsis tu ncua tag nws sim neej, kom nws thiaj kawm paub hwm thiab ntshai Yawmsaub uas yog nws tus Vajtswv, yog tuav rawv tej kevcai txhua nqe thiab tej kab ke no thiab ua raws nraim, kom nws lub siab thiaj tsis tsab ua loj siab dhau nws cov kwvtij thiab nws thiaj tsis tso tej lus nkaw no tseg tig mus rau sab xis lossis sab laug, nws thiab nws tej tub ki thiaj li kav tau nws lub tebchaws ntev hauv cov Yixayee. Cov Levi uas ua pov thawj yog xeem Levi huvsi yuav tsis muaj feem nrog cov Yixayee tau lub tebchaws ua qub txeeg qub teg. Lawv yuav tau noj tej uas muab hlawv xyeem rau Yawmsaub uas poob ua lawv tug. Lawv yuav tsis nrog lawv cov kwvtij muaj qub txeeg qub teg. Yawmsaub yog lawv li qub txeeg qub teg, raws li nws cog lus tseg rau lawv lawd. Thaum cov pejxeem coj tsiaj tuaj xyeem rau Yawmsaub tsis hais nyuj lossis yaj mas yuav tsum rho tej no ua cov pov thawj li feem, yog muab ceg pwg pu thiab cov nqaij ntawm ob sab plhu thiab lub plab rau tus pov thawj. Koj yuav muab thawj phaum qoob thiab cawv txiv hmab thiab roj thiab thawj phaum plaub yaj rau tus pov thawj. Rau qhov Yawmsaub uas yog koj tus Vajtswv tau xaiv Levi tawm hauv nej txhua xeem los sawv ntsug ua koom hauv Yawmsaub lub npe, tag nrho nws thiab nws caj ces mus ib txhis. Yog cov Levi leejtwg tawm ntawm lub moos twg uas nws nyob hauv cov Yixayee yuav tuaj rau lub chaw uas Yawmsaub yuav xaiv cia, nws kuj tuaj tau txhua lub sijhawm raws li nws xav tuaj, thiab nws yuav ua koom hauv nws tus Vajtswv Yawmsaub lub npe tau ib yam li nws cov kwvtij Levi sawvdaws uas sawv ntsug ua num rau ntawm Yawmsaub xubntiag. Nws yuav nrog lawv muaj feem tau noj sib npaug zos, tsis xam tej uas nws muag nws tej qhov txhia chaw es tau. Thaum koj mus rau hauv lub tebchaws uas koj tus Vajtswv Yawmsaub pub rau koj, koj tsis txhob xyaum ua tej kev qias vuab tsuab uas tej haiv neeg ntawd ua. Tsis txhob kheev koj cov ib tug twg muab nws tej tub tej ntxhais hlawv xyeem rau dab, tsis txhob kheev ib tug twg saib caij saib nyoog, saib yaig saib sij, ua txiv neeb thiab ntxooj dab, ua khawv koob, ua yees siv, lossis ua neeb hu tej tuag. Tus uas ua li no yog tus uas qias vuab tsuab rau Yawmsaub. Vim yog ua tej qias vuab tsuab no, koj tus Vajtswv Yawmsaub thiaj ntiab lawv khiav tawm ntawm koj hauv ntej mus. Koj yuav tsum ua tus uas tsis muaj chaw thuam li rau ntawm koj tus Vajtswv Yawmsaub xubntiag. Tej haiv neeg uas koj twb yuav muab ntiab kom khiav ntawd lawv ntseeg tej txiv neeb txiv yaig. Tiamsis koj li mas Yawmsaub uas yog koj tus Vajtswv tsis kheev koj ua li ntawd. Yawmsaub uas yog nej tus Vajtswv yuav tsa ib tug xibhwb cev lus zoo yam li kuv tshwm los hauv nej cov kwvtij, mas nej yuav tsum mloog nws lus. Yam li uas nej thov Yawmsaub uas yog nej tus Vajtswv ntawm Haule rau hnub uas nej tuaj txoos ua ke hais tias, “Tsis txhob cia peb tau hnov peb tus Vajtswv Yawmsaub lub suab lossis pom tej nplaim taws hlob kawg no dua li lawm tsam ces peb tuag.” Mas Yawmsaub hais rau kuv tias, “Qhov uas lawv hais li ntawd kuj zoo. Kuv yuav pub ib tug cev kuv li lus zoo ib yam li koj tshwm los hauv lawv cov kwvtij. Mas kuv yuav muab kuv tej lus rau hauv nws lub qhov ncauj, mas nws yuav hais txhua lo lus uas kuv kom nws hais ntawd rau lawv. Leejtwg tsis mloog kuv tej lus uas tus cev lus tuav kuv lub npe hais, kuv yuav rau txim rau tus ntawd. Tiamsis tus cev lus twg uas muaj cuabkav tuav kuv lub npe hais tej lus uas kuv tsis tau kom nws hais lossis tuav luag tej dab lub npe hais, mas tus uas cev lus ntawd yuav tuag.” Yog nej xav hauv lub siab tias, “Yuav ua li cas peb thiaj paub tej lus uas tsis yog Yawmsaub hais?” Yog thaum tus uas cev lus tuav Yawmsaub lub npe hais, yog tsis tshwm los muaj tseeb raws li nws hais, mas tej lus ntawd tsis yog Yawmsaub hais. Tus cev lus ntawd nws hais nws xwb, nej tsis txhob ntshai nws. Thaum Yawmsaub uas yog nej tus Vajtswv rhuav tshem tej haiv neeg hauv lub tebchaws uas nej tus Vajtswv Yawmsaub pub rau nej thiab nej txeeb lawv lub tebchaws thiab nej mus nyob rau hauv lawv tej moos thiab hauv lawv tej vaj tse, nej yuav tsum tseg peb lub moos cia rau hauv lub tebchaws uas nej tus Vajtswv Yawmsaub pub rau nej ua nej tug ntawd. Nej yuav npaj muaj kev mus rau hauv thiab muab lub tebchaws uas nej tus Vajtswv Yawmsaub pub rau nej ua nej tug ntawd faib ua peb feem, xwv tus uas tau tua neeg lawm thiaj khiav tau mus rau hauv lub moos ntawd. Ntawm no mus yog tej kevcai rau tus uas tua neeg es khiav mus cawm siav tau rau hauv tej moos ntawd. Yog leejtwg tsis yog txhob txwm tua kwvtij zej zog thiab tsis tau ua tshawj chim dua, piv li uas ob tug kwvtij zej zog mus txiav ntoo tom hav zoov mas thaum ib tug tsa taus ntov ntoo nws rab taus cia li hle mus raug nws tus kwvtij tuag lawm, mas tus ntawd khiav tau mus rau hauv tej moos cawm siav lub twg kuj tau. Yog txojkev uas mus rau lub moos cawm siav deb heev, ces tus uas rob caub yuav chim heev ces caum cuag tus uas tua neeg ntawd thiab muab nws tua pov tseg, txawm yog nws tsis muaj lub txim txog tuag rau qhov nws tsis tau ua tshawj chim dua rau nws tus kwvtij zej zog kuj xij. Vim li no kuv thiaj hais rau nej tias, Nej yuav tsum tseg peb lub moos cia. Yog Yawmsaub uas yog nej tus Vajtswv nthuav nej lub tebchaws kom dav raws li nws tau cog lus ruaj cia rau nej tej poj koob yawm txwv thiab muab lub tebchaws huvsi uas nws cog lus tias yuav pub rau nej tej poj koob yawm txwv pub rau nej, tsuav yog nej ceev faj tuav rawv tej lus nkaw no huvsi uas hnub no kuv muab cob rau nej, uas yog nej hlub Yawmsaub uas yog nej tus Vajtswv thiab ua lub neej raws li nws tej kev, mas nej yuav tsav dua peb lub moos cawm siav, xwv tus uas tsis txhaum thiaj li tsis tuag rau hauv nej lub tebchaws uas nej tus Vajtswv Yawmsaub pub rau nej ua qub txeeg qub teg, mas nej thiaj tsis tau ris nws cov ntshav. Tiamsis yog leejtwg ntxub nws tus kwvtij zej zog es mus zov kev muab tus kwvtij ntawd ntaus kom tuag, txawm yog tus uas tua ntawd khiav mus rau hauv tej moos cawm siav lub twg kuj xij, cov kev txwj laus hauv nws lub moos yuav txib neeg mus coj nws hauv lub moos cawm siav los mas muab cob rau tus rob caub mas nws yuav raug muab tua pov tseg. Nej lub qhov muag tsis txhob khuvleej tus ntawd li, nej yuav tsum ntxuav lub txim uas tua tus neeg tsis txhaum hauv cov Yixayee mus kom nej thiaj noj qab nyob zoo. Tej qub txeeg qub teg uas koj yuav tau hauv lub tebchaws uas koj tus Vajtswv Yawmsaub pub rau koj ua koj tug ntawd, mas koj tsis txhob txav tej ncej ciam teb uas thaum koj tej poj koob yawm txwv uas dua tag lawm txhos cia. Tib leeg xwb ua timkhawv tom tus uas ua txhaum mas tsis txaus, tsis hais ua txhaum ib yam kevcai dabtsi li. Yuav tsum muaj ob leeg los peb leeg ua timkhawv thiaj li ntseeg tau. Yog muaj timkhawv iab hiam leejtwg hais tias tau ua txhaum, mas ob tog uas ua plaub ntawd yuav tsum mus rau ntawm Yawmsaub xubntiag mus cuag cov pov thawj thiab cov uas tu plaub rau lub sijhawm ntawd. Cov uas tu plaub yuav tsum ua tib zoo tshuaj saib mas yog tus uas ua timkhawv ntawd iab hiam dag nws tus kwvtij zej zog xwb, mas yuav tsum ua rau tus uas ua cuav timkhawv ntawd ib yam li nws npaj siab yuav ua rau nws tus kwvtij zej zog. Ua li no nej thiaj ntxuav tau tej kev phem no tawm hauv nej mus. Lwm tus sawvdaws yuav tau hnov thiab ntshai, tsis ua phem li no rau hauv nej nruab nrab dua li lawm. Nej lub qhov muag tsis txhob khuvleej kiag li, yuav tsum muab siav pauj siav, qhov muag pauj qhov muag, kaus hniav pauj kaus hniav, tes pauj tes, taw pauj taw. Thaum nej mus ua rog rau yeeb ncuab yog nej pom nees thiab tsheb ua rog thiab tub rog coob dua nej mas nej tsis txhob ntshai lawv rau qhov nej tus Vajtswv Yawmsaub uas coj nej tawm hauv Iyi tebchaws los nrog nraim nej nyob. Thaum nej tuaj ze yuav ua rog, tus pov thawj yuav tawm tuaj hais rau cov pejxeem, mas yuav hais tias, “Cov Yixayee 'e, cia li tig ntsej mloog. Hnub no nej tuaj ze yuav ua rog rau nej cov yeeb ncuab, nej tsis txhob poob siab tsis txhob ntshai tsis txhob tshee tsis txhob ras, rau qhov Yawmsaub uas yog nej tus Vajtswv yog tus uas nrog nej mus ua rog rau nej cov yeeb ncuab pab nej kov yeej.” Mas cov thawj rog yuav hais rau cov pejxeem tias, “Leejtwg ua tau tsev tshiab tiamsis tseem tsis tau ua kevcai xyeem lub tsev ntawd? Mas cia tus ntawd rov qab mus tsev ntshai tsam nws ho tuag hauv tshav rog ces lwm tus yuav ua kevcai xyeem nws lub tsev. Thiab leejtwg cog vaj txiv hmab tiamsis tseem tsis tau noj cov txiv hmab ntawd? Mas cia tus ntawd rov qab mus tsev ntshai tsam nws ho tuag hauv tshav rog lawm ces lwm tus yuav noj nws cov txiv hmab. Thiab leejtwg qhaib tau pojniam cia lawm tiamsis tseem tsis tau yuav? Mas cia tus ntawd rov qab mus tsev ntshai tsam nws ho tuag hauv tshav rog ces lwm tus ho yuav lawm.” Cov thawj rog yuav hais dua rau cov pejxeem tias, “Muaj leejtwg ntshai thiab siab yau? Cia nws rov qab mus tsev ntshai tsam nws tej phoojywg siab ho yaj tag yam li nws.” Thaum cov thawj rog hais rau cov pejxeem tag lawd mas yuav tsa dua ib cov thawj kav tej pab tub rog. Thaum nej mus ze lub moos uas nej yuav ua rog ntawd mas nej yuav xub tshaj xo sib raug zoo ua ntej. Yog lawv teb lo lus nrog nej sib raug zoo thiab qheb rooj loog rau nej, ces nej cia li yuam cov neeg uas nej ntsib hauv lub moos ntawd ua haujlwm rau nej ua koom tu nej. Tiamsis yog lawv tsis yeem nrog nej sib raug zoo cia li ua rog rau nej, ces nej cia li vij nkaus ntaus lub moos ntawd. Thaum nej tus Vajtswv Yawmsaub muab lub moos ntawd rau hauv nej txhais tes lawd, nej cia li xuas ntaj tua txhua tus txivneej huvsi pov tseg. Tiamsis cov pojniam thiab cov menyuam thiab tej tsiaj txhu thiab ib puas tsav yam hauv lub moos ntawd uas nej txeeb tau huvsi nej cia li coj los ua nej tug. Nej yuav siv tej uas nej txeeb tau ntawm nej cov yeeb ncuab los uas nej tus Vajtswv Yawmsaub pub rau nej. Nej yuav tsum ua li no rau txhua lub moos uas nyob deb nej uas tsis yog lwm haiv neeg tej moos uas nyob ze ze no. Tiamsis lwm haiv neeg tej moos uas nej tus Vajtswv Yawmsaub muab pub ua qub txeeg qub teg rau nej mas nej tsis txhob tseg ib txojsia dabtsi uas ua pa tau kiag li. Cia li muab ua kom puam tsuaj tu noob nrho, yog cov Hithai, cov Amaulai, cov Khana‑as, cov Pelixai, cov Hivai, thiab cov Yenpu, raws li nej tus Vajtswv Yawmsaub hais kom nej ua, kom lawv thiaj tsis qhia nej ua tej kev qias vuab tsuab uas lawv ua koom tu lawv tej dab, nej thiaj tsis ua txhaum rau Yawmsaub uas yog nej tus Vajtswv. Thaum nej vij lub moos twg ntev thiab ua rog txeeb lub moos ntawd, tsis txhob xuas taus ntov tej ntoo ntawm lub moos ntawd, rau qhov nej yuav noj tej txiv ntoo ntawd mas tsis txhob muab ntov. Tej ntoo ntawd tsis yog neeg uas nej yuav vij ua rog rau. Tsuas yog ntov tej ntoo uas nej paub tias noj tsis tau pov tseg xwb, thiab coj los siv tib chaw vij lub moos uas nrog nej ua rog, mus txog thaum lub moos ntawd tawg. Hauv lub tebchaws uas koj tus Vajtswv Yawmsaub muab pub rau koj yuav ua koj tug ntawd, yog koj pom ib tug raug tua tuag rau hav zoov hav tsuag tiamsis tsis paub tias yog leejtwg tua, mas koj cov kev txwj laus thiab koj cov uas tu plaub yuav tsum tawm mus ntsuas saib tej moos uas nyob ze tus tuag ntawd nyob nrug deb li cas. Mas cov kev txwj laus uas nyob hauv lub moos uas ze tus tuag dua tej huvsi yuav muab ib tug maum nyuj uas tsis tau txeev siv li thiab tsis tau txeev hai dua tsheb. Cov kev txwj laus lub moos ntawd yuav coj tus maum nyuj ntawd mus rau hauv ib lub hav uas muaj dej ntws uas tsis tau muaj leejtwg laij dua thiab tsis tau cog qoob li, mas yuav muab tus maum nyuj ntawd lov caj dab rau hauv lub hav ntawd. Mas cov pov thawj uas yog Levi caj ces yuav tawm tuaj, vim Yawmsaub uas yog nej tus Vajtswv twb xaiv lawv ua nws tes haujlwm thiab tuav nws lub npe foom koob hmoov. Txhua yam kev sib cav sib ceg thiab kev sib ntaus sib tua tag rau ntawm cov pov thawj tu. Cov kev txwj laus txhua tus hauv lub moos uas nyob ze tus tuag ntawd yuav ntxuav tes rau saum tus maum nyuj uas muab lov caj dab rau ntawm lub hav ntawd, mas lawv yuav ua timkhawv hais tias, “Peb txhais tes tsis tau ua rau tus no nqaij ntuag ntshav nrog, thiab peb qhov muag tsis pom nws roj nws ntshav los. Au Yawmsaub, thov koj ntxuav koj cov neeg Yixayee uas koj twb txhiv dim lawd tej kev txhaum. Thov tsis txhob suav txim rau hauv koj cov neeg Yixayee rau qhov uas tus neeg tsis txhaum nqaij ntuag ntshav nrog. Thov zam lawv tej kev txhaum uas nqaij ntuag ntshav nrog.” Ua li no koj thiaj ntxuav tau tej kev txhaum uas tus neeg tsis txhaum ntawd nqaij ntuag ntshav nrog tawm hauv nej mus rau thaum uas koj ua tej uas Yawmsaub pom tias raug cai. Thaum nej mus ua rog rau nej tej yeeb ncuab mas Yawmsaub uas yog nej tus Vajtswv muab lawv rau hauv nej txhais tes lawm es nej ntes tau lawv, yog koj pom ib tug pojniam twg hauv cov uas koj ntes tau los ntawd zoo nkauj uas koj nyiam thiab xav yuav los ua koj pojniam, mas koj cia li coj tus pojniam ntawd los rau hauv koj tsev. Nws yuav tsum chais plaubhau thiab txiav rau tes, thiab hloov cev tsoos tsho uas nws hnav thaum koj ntes coj los ntawd, thiab nws yuav nyob hauv koj tsev quaj ntsuag nws niam nws txiv ib lub hlis. Dhau ntawd koj li mus nrog nws pw thiab ua tau nws li txiv thiab nws yuav ua koj li pojniam. Mas yog tom qab koj ho tsis txaus siab rau nws lawm ces cia li muab nws tso mus qhovtwg los tau raws li nws siab nyiam. Tsis txhob muab nws muag yuav nyiaj. Tsis txhob ua rau nws yam li ua rau tus qhev rau qhov koj twb ua rau nws poob koob lawm. Yog leejtwg muaj ob tug pojniam, nws hlub ib tug tseg ib tug, thiab ob tug pojniam ntawd tus uas nws hlub thiab tus uas nws tsis hlub kuj puavleej muaj menyuam, mas tus tub hlob yog tus pojniam uas nws tsis hlub li tub, ces yog txog hnub uas faib qub txeeg qub teg rau nws cov tub, nws tsis txhob ua rau tus pojniam uas nws hlub ntawd tus tub yam nkaus li yog tus tub hlob es tseg tus pojniam uas nws tsis hlub ntawd tus tub uas yeej yog tus hlob. Nws yuav tsum lees yuav tus pojniam uas nws tsis hlub ntawd tus tub ua tus hlob thiab faib txhua yam uas nws muaj ob npaug rau tus tub ntawd rau qhov nws yog leej txiv thawj lub zog mas feem uas yog tus tub hlob li yeej yog nws li. Yog leejtwg muaj ib tug tub tawv ncauj cov nyom, tsis mloog niam mloog txiv lus li, txawm yog niam txiv qhuab qhia thiab nplawm nws los nws tsis mloog, mas nws niam nws txiv yuav ntsiab nkaus nws coj mus rau tej kev txwj laus hauv nws lub moos ntawm rooj loog, yog lub moos uas nws nyob hauv. Mas niam txiv yuav hais rau tej kev txwj laus hauv nws lub moos tias, “Tus tub no tawv ncauj cov nyom, nws tsis mloog wb los li. Nws ua neeg vum loj vum khawb quav dej quav cawv.” Cov txivneej txhua tus hauv lub moos ntawd yuav xuas pob zeb muab tus ntawd ntaus kom tuag. Ua li no nej thiaj li rhuav tshem tau tej kev phem tawm plaws hauv nej mus, mas cov Yixayee sawvdaws yuav hnov thiab ntshai. Yog leejtwg tau ua txhaum muaj txim txaus tuag es nws raug muab tua tuag, thiab nej muab nws lub cev dai rau saum ntoo, mas tsis txhob cia nws lub cev tuag dai ib hmos rau saum tus ntoo. Nej cia li muab nws log rau tib hnub ntawd, vim yog tus uas raug muab dai rau saum ntoo ntawd kuj yog raug Vajtswv foom tsis zoo. Nej tsis txhob ua rau lub tebchaws uas nej tus Vajtswv Yawmsaub muab pub rau nej ua qub txeeg qub teg ntawd qias tsis huv. Yog koj pom kwvtij zej zog li nyuj lossis yaj yuam kev tuaj rau ntawm koj, koj tsis txhob nkaum tes nkoos tsis pab. Koj yuav tsum xa tej tsiaj ntawd rov qab mus rau tus tswv. Yog tus tswv nyob deb lossis koj tsis paub nws, koj yuav coj tus tsiaj ntawd los rau ntawm koj tsev, mas tus tsiaj yuav nrog koj nyob mus txog thaum tus tswv tuaj nrhiav tau mas koj yuav muab rau tus tswv. Koj yuav tsum ua ib yam nkaus li no, txawm yog nees luav lossis ris tsho lossis ib yam dabtsi uas luag ua ploj es koj pom. Tsis txhob nkaum tes nkoos tsis pab nws. Yog koj pom kwvtij zej zog li nees luav lossis nyuj ntog tom tej tog kev, koj tsis txhob nkaum tes nkoos. Koj yuav tsum pab muab tus tsiaj ntawd tsa kom sawv. Tej pojniam tsis txhob hnav tej txivneej li tsoos ib yam dabtsi kiag li. Tej txivneej tsis txhob hnav tej pojniam li tsoos. Yog leejtwg hnav li no mas kuj qias vuab tsuab rau Yawmsaub uas yog koj tus Vajtswv. Yog koj cia li mus pom zes noog nyob saum ntoo lossis hauv av muaj menyuam noog lossis qe thiab tus poj puag cov menyuam lossis puag cov qe ntawd, koj tsis txhob muab kiag tus poj thiab cov menyuam mus huvsi. Koj yuav tso tus poj noog mus tiamsis koj khaws cov menyuam mus tau, xwv koj thiaj noj qab nyob zoo thiab muaj txojsia nyob ntev. Thaum koj ua tsev tshiab, koj yuav tsum xov puag ncig txheej tsev las tshav saud mas yog muaj neeg poob saum lub tsev tuag lub tsev thiaj tsis ris tus uas tuag ntawd lub txim. Koj tsis txhob tseb ob yam noob ua ke rau hauv koj lub vaj txiv hmab. Yog ua li ntawd mas txhua yam uas koj tau hauv lub vaj ntawd yuav tsum muab kiag rau hauv qhov chaw uas pe hawm Vajtswv, tsis hais tej uas koj tseb ntawd thiab tej txiv hmab huvsi. Koj tsis txhob muab nyuj thiab nees luav los nruab koom khais laij teb. Koj tsis txhob hnav tej ntaub uas muab plaub yaj thiab xov maj ntos ua ke. Koj yuav tsum tis tw rau ntawm plaub lub kaum qab tsho ntev uas koj hnav. Yog leejtwg tau pojniam thiab nrog tus pojniam pw ho rov ntxub nws, thiab nrhiav lus hais tias tus pojniam ntawd xyaum tsis tsheej ua rau tus pojniam ntawd poob koob, nws hais tias, “Kuv yuav tus pojniam ntawd mas thaum kuv mus nrog nws pw mas pom tias nws tsis muaj yam uas ua chaw cim hais tias nws yog tus pojniam dawb huv,” mas tus ntxhais ntawd leej txiv thiab leej niam yuav coj yam uas ua chaw cim hais tias tus ntxhais ntawd dawb huv tuaj rau cov kev txwj laus hauv lub moos ntawd rau ntawm rooj loog. Tus ntxhais ntawd leej txiv yuav hais rau cov kev txwj laus tias, “Kuv muab kuv tus ntxhais qua rau tus yawg no ua pojniam kom nws ho rov ntxub. Tus yawg no nrhiav lus thuam hais tias nws tsis pom kuv tus ntxhais muaj yam uas ua chaw cim hais tias kuv tus ntxhais dawb huv. Yam no yog qhov uas ua tsoob zeej timkhawv hais tias kuv tus ntxhais dawb huv.” Ces nws yuav muab daim ntaub ntawd nthuav kiag rau cov kev txwj laus hauv lub moos ntawd saib. Mas cov kev txwj laus hauv lub moos yuav tsum muab tus txivneej ntawd nplawm, thiab muab nws nplua ib puas sekhee nyiaj thiab muab cov nyiaj ntawd rau tus ntxhais ntawd leej txiv, rau qhov nws ua rau cov Yixayee ib tug ntxhais poob koob. Tus ntxhais ntawd yuav rov mus ua nws pojniam, nws yuav nrauj tsis tau tus ntxhais ntawd mus tag sim neej. Tiamsis yog zaj ntawd muaj tseeb thiab nrhiav tsis tau yam uas ua chaw cim hais tias tus ntxhais ntawd dawb huv, mas lawv yuav coj tus ntxhais ntawd tawm rau nraum leej txiv lub qhov rooj. Mas cov txivneej hauv lub moos ntawd yuav xuas pob zeb muab tus ntxhais ntawd ntaus kom tuag, rau qhov nws tau ua yam uas rhuav ntsej muag kawg li rau hauv cov Yixayee, yog deev hluas nraug rau hauv leej txiv lub tsev. Ua li no nej thiaj ntxuav tau tej kev phem tawm hauv nej mus. Yog nej pom ib tug deev lwm tus li pojniam, ob tug uas sib deev ntawd yuav tsum raug muab tua pov tseg. Ua li no nej thiaj ntxuav tau tej kev phem tawm hauv cov Yixayee mus. Yog muaj ib tug ntxhais dawb huv uas lwm tus tub qhaib lawm es muaj ib tug txawm ntsib tug ntxhais ntawd hauv lub moos thiab nrog nws pw ua ke lawm, mas nej yuav tsum coj ob tug tawm rau nraum rooj loog thiab xuas pob zeb muab ob tug ntaus kom tuag, tus ntxhais ntawd los vim nws twb nyob hauv lub moos kuj tsis qw hu luag tuaj pab, tus txivneej los vim nws tau ua qias puas tsuas nws kwvtij zej zog li pojniam. Ua li no nej thiaj ntxuav tau tej kev phem tawm hauv nej mus. Tiamsis yog ib tug txivneej ntsib ib tug ntxhais uas lwm tus tub qhaib lawm tom hav zoov hav tsuag es cia li muab tus ntxhais ntawd txhom deev, mas tsuas yog muab tus txivneej uas txhom ntawd tua pov tseg xwb. Nej tsis txhob ua li cas rau tus ntxhais ntawd rau qhov nws tsis tau ua txhaum txaus tuag. Tshaj plaub no kuj zoo ib yam li tshaj plaub uas ib tug yawg ntaus nws ib tug kwvtij zej zog tuag. Rau qhov tus yawg ntawd ntsib tug ntxhais tom hav zoov hav tsuag, txawm yog tus ntxhais uas lwm tus tub qhaib lawm qw hu luag tuaj pab los tsis muaj leejtwg tuaj. Yog ib tug txivneej twg ntsib ib tug ntxhais dawb huv uas tsis muaj leejtwg qhaib es muab tus ntxhais ntawd txhom deev thiab muaj neeg pom, mas tus yawg uas txhom ntawd yuav tsum them tsib caug sekhee nyiaj rau tus ntxhais ntawd txiv thiab yuav tus ntxhais ntawd ua nws pojniam vim nws ua qias puas tsuas tus ntxhais ntawd lawm, mas nws yuav nrauj tsis tau tus ntxhais ntawd tag sim neej li. Tsis kheev leejtwg yuav nws txiv tus pojniam thiab tsis txhob thws nws txiv pojniam chaw txaj muag. Tus txivneej twg uas noob qes xaum lossis tus noov tu lawm tsis muaj feem koom nrog Yawmsaub cov neeg tuaj txoos ua ke. Tej menyuam tsaub tsis muaj feem koom nrog Yawmsaub cov neeg ua ke, tsis kheev lawv tej tub ki koom nrog Yawmsaub cov neeg ua ke mus txog kaum tiam. Cov Asmoo thiab cov Mau‑a tsis muaj feem koom nrog Yawmsaub cov neeg ua ke. Tsis kheev lawv caj ces koom nrog Yawmsaub cov neeg ua ke mus txog kaum tiam, rau qhov thaum uas nej khiav tawm hauv Iyi tebchaws los cov neeg no tsis nqa dej nqa mov tuaj tos nej ntawm tog kev. Lawv tseem ntiav Npe‑au tus tub Npala‑as tuaj ntawm Pethau hauv Mexauphautamia tebchaws tuaj foom nej. Txawm li cas los xij, nej tus Vajtswv Yawmsaub tsis mloog Npala‑as lus tiamsis nej tus Vajtswv Yawmsaub tseem muab tej lus foom ntawd ntxeev ua tej lus koob hmoov rau nej, vim yog nej tus Vajtswv Yawmsaub hlub nej. Nej tsis txhob nrog lawv sib raug zoo thiab txhawb lawv vam meej mus ib txhis. Nej tsis txhob ntxub cov Edoo rau qhov lawv yog nej li kwvtij. Nej tsis txhob ntxub cov Iyi rau qhov nej twb txeev mus nrog lawv nyob rau hauv lawv lub tebchaws. Lawv cov no tej menyuam mas tiam uas peb ces los koom tau nrog Yawmsaub cov neeg ua ke. Thaum nej tawm mus ua rog rau nej tej yeeb ncuab es nej tseem nyob hauv lub yeej, nej yuav tsum nyob deb txhua yam kev phem kev qias. Yog nej cov txivneej leejtwg qias tsis huv vim muaj kua chaw xis ntws los thaum hmo ntuj, nws yuav tsum tawm mus nyob sab nraum lub yeej nws tsis txhob los rau hauv lub yeej, tiamsis thaum yuav tsaus ntuj, nws yuav tsum da dej ces thaum hnub poob qho lawm nws los tau rau hauv lub yeej. Koj yuav tsum muaj ib lub chaw rau sab nraum lub yeej es koj mus plob sab rau ntawd. Hauv koj tej cuab yeej koj yuav tsum muaj ib rab taum txhob ntoo mas thaum uas koj zaum sab nraud lawd koj thiaj tau khawb qhov thiab tau faus quav. Rau qhov Yawmsaub uas yog koj tus Vajtswv nrog koj nyob hauv nruab nrab koj lub yeej kom thiaj tsom kwm tau koj thiab muab koj tej yeeb ncuab cob rau koj. Vim li no koj lub yeej yuav tsum dawb huv kom Vajtswv thiaj tsis pom tej uas tsis zoo saib nyob hauv koj, thiab thiaj tsis fee plhu kiag ntawm koj. Yog muaj tub qhe khiav ntawm tus lospav los nrog koj nyob mas tsis txhob muab tus qhev ntawd xa rov qab rau tus lospav. Koj cia nws nrog koj nyob hauv nej nruab nrab rau hauv lub chaw uas nws xaiv cia rau hauv nej tej moos qhov twg kuj tau raws li nws siab nyiam. Koj tsis txhob quab yuam tsim txom nws. Tsis txhob kheev Yixayee tej ntxhais ib tug twg ua poj muag cev xyeem rau dab. Tsis txhob kheev Yixayee cov tub ib tug twg ua txivneej muag cev xyeem rau dab. Koj tsis txhob coj tej nqe zog uas pojniam muag cev txivneej muag cev tuaj pub rau hauv koj tus Vajtswv Yawmsaub lub tsev pauj tej uas koj yeem lus tseg yuav pub, rau qhov ob yam no yog tej uas qias vuab tsuab rau koj tus Vajtswv Yawmsaub. Koj tsis txhob qev txais ib yam dabtsi rau kwvtij es yuav paj tsis hais nyiaj txiag, qoob loo los ib yam dabtsi uas luag qev es xam yuav paj. Koj muab qev txais rau lwm haiv neeg mas yuav paj kuj tau. Yog qev txais rau kwvtij mas tsis txhob yuav paj, xwv koj tus Vajtswv Yawmsaub thiaj li foom koob hmoov rau koj txhua yam uas koj ua rau hauv lub tebchaws uas koj mus txeeb ua koj tug. Thaum koj yeem lus yuav pub ib yam dabtsi rau Yawmsaub uas yog koj tus Vajtswv tsis txhob muab sej cia ntev, rau qhov koj tus Vajtswv Yawmsaub yuav tsob kom tau ntawm koj thiab koj yuav muaj txim. Yog koj tsis tau yeem lus koj kuj tsis muaj txim. Koj yuav tsum ceev faj ua raws li tej lus uas tawm hauv koj qhov ncauj los rau qhov yog koj zoo siab yeem pub rau koj tus Vajtswv Yawmsaub. Thaum koj mus txog hauv koj tej kwvtij zej zog vaj txiv hmab koj noj tau tej txiv hmab ntawd kom tsau npaum li uas koj xav noj, tiamsis tsis txhob muab ntim rau hauv koj lub kawm. Thaum koj mus rau hauv koj tej kwvtij zej zog daim teb qeb teb mog koj cev tes de hnab puav kuj tau, tiamsis koj tsis txhob rho liag hlais kwvtij zej zog tej qoob loo. Thaum tus txivneej twg yuav tau pojniam tiamsis tsis txaus siab rau tus pojniam vim yog paub tias nws poob koob lawm, mas tus txiv ua ntawv nrauj cev rau tus pojniam ntawd txhais tes thiab ntiab nws tawm hauv tsev mus mas nws thiaj li tawm mus. Yog tus pojniam ntawd ho mus yuav dua txiv thiab tus txiv tom qab ntawd tsis nyiam nws thiab ua ntawv nrauj cev rau nws txhais tes thiab ntiab nws tawm hauv tsev mus, lossis yog tus txiv ntawd tuag lawm kuj xij, mas tus qub txiv uas nrauj nws tawm mus ntawd rov yuav tsis tau tus pojniam uas qias tsis huv ntawd lawm, vim yog tej uas qias vuab tsuab rau Yawmsaub. Koj tsis txhob ua rau lub tebchaws uas koj tus Vajtswv Yawmsaub muab pub ua qub txeeg qub teg rau koj muaj txim. Thaum leejtwg nyuam qhuav yuav tau pojniam mas tsis txhob kheev tus ntawd mus ntaus rog lossis ua nom tswv li haujlwm. Cia nws nyob ib xyoos hauv tsev kom thiaj li ua rau nws tus pojniam uas nws yuav tau ntawd zoo siab. Tsis txhob kheev leejtwg muab luag hwm zeb los nias nqe cia tsis hais txhib txiv lossis txhib niam, rau qhov nws muab yam uas yug lawv txojsia los nias lawm. Yog leejtwg raug luag ntes vim yog nws nyiag ib tug kwvtij Yixayee coj mus ua qhev lossis coj mus muag mas tus tub sab ntawd yuav tsum raug muab tua. Ua li no nej thiaj li rhuav tshem tau tej kev phem tawm hauv nej mus. Nej yuav tsum ceev faj tej kev mob lig mob ruas, yuav tsum ceev faj ua txhua yam raws li cov Levi uas ua pov thawj qhia nej. Nej yuav tsum ceev faj ua raws li uas kuv twb hais rau lawv lawd. Nej cia li nco txog tej uas nej tus Vajtswv Yawmsaub tau ua rau Mili‑as thaum uas nej taug kev tawm hauv Iyi tebchaws los. Thaum koj muab ib yam dabtsi txais rau kwvtij zej zog, mas tsis txhob nkag mus rau hauv nws lub tsev thiab muab yam uas nws muab yuam nqe rau koj. Koj nyob sab nraud tos mas tus uas txais ntawd mam li coj yam uas muab yuam nqe ntawd tuaj rau koj. Yog nws pluag mas tsis txhob khaws yam uas nws muab yuam ntawd cia es txawm mus pw. Thaum hnub poob qho koj cia li muab lub tsho ntev thim rov rau nws, kom nws thiaj li tau hnav rau thaum uas pw thiab foom hmoov rau koj. Ua li no thiaj yog koj ua ncaj rau ntawm Yawmsaub uas yog koj tus Vajtswv xubntiag. Koj tsis txhob quab yuam tus tub zog uas pluag thiab txom nyem, tsis hais yog koj li kwvtij lossis lwm haiv neeg uas nyob hauv koj lub tebchaws rau hauv koj tej moos. Koj yuav tsum them hnub ntawd li nqe zog rau nws ua ntej hnub poob qho, rau qhov nws pluag thiab tos ntsoov tus nqe zog ntawd, tsam ces nws yuav yws koj rau Yawmsaub ces koj yuav muaj txim. Leejtxiv yuav tsis ris nws tej menyuam lub txim tuag, thiab tej menyuam yuav tsis ris leej txiv lub txim tuag. Cia txhua tus nyias ris nyias lub txim tuag. Koj tsis txhob yuam lwm haiv neeg uas nrog nej nyob thiab tej menyuam uas tsis muaj txiv txojcai thiab tsis txhob muab tej poj ntsuam li tsoos tsho coj los yuam nqe. Koj yuav tsum nco ntsoov tias nej txeev ua qhev nyob hauv Iyi tebchaws thiab Yawmsaub uas yog nej tus Vajtswv txhiv nej tawm qhov ntawd los. Vim li ntawd kuv thiaj hais kom koj ua li no. Thaum koj sau qoob, yog tshuav qee teg sau tsis txhua, koj tsis txhob rov qab mus sau dua. Cia li tseg cia rau lwm haiv neeg uas nrog nej nyob thiab tej menyuam uas tsis muaj txiv thiab tej poj ntsuam, xwv koj tus Vajtswv Yawmsaub thiaj li foom koob hmoov rau tej haujlwm uas koj txhais tes ua huvsi. Thaum koj nplawm txiv ntoo aulib, koj tsis txhob rov de zaum ob, yuav tseg cia rau lwm haiv neeg uas nrog nej nyob thiab tej menyuam uas tsis muaj txiv thiab tej poj ntsuam. Thaum de txiv hmab hauv nej tej vaj, tsis txhob rov mus xawb de dua, yuav tseg tej uas tshuav ntawd cia rau lwm haiv neeg uas nrog nej nyob thiab tej menyuam uas tsis muaj txiv thiab tej poj ntsuam. Koj yuav tsum nco ntsoov tias koj txeev ua qhev nyob hauv Iyi tebchaws. Vim li ntawd kuv thiaj hais kom koj ua li no. Thaum muaj ob leeg ua plaub mus txog tsev tu plaub, es cov tu plaub tu rau ob tug tias ib tug txhaum ib tug tsis txhaum, mas yog tus uas txhaum tsim nyog raug nplawm, tus tu plaub yuav kom nws pw mas tu kom nplawm npaum li nws kev txhaum tab meeg tus tu plaub. Yuav nplawm tau txog plaub caug nplawm, tsis txhob nplawm ntau dua ntawd, ntshai tsam ces nej yuav rhuav nws ntsej muag tab meeg sawvdaws. Thaum nyuj tabtom tsuj qeb tsuj mog nej tsis txhob muab tawb looj nyuj qhov ncauj. Yog muaj kwvtij nyob ua ke ib tug tuag lawm tsis tau muaj tub, tus uas tuag ntawd tus pojniam tawm mus yuav txiv sab nraud tsis tau. Nws tus txiv ib tug kwvtij yuav tsum yuav nws ua pojniam thiaj sawv nws tus txiv chaw. Mas thawj tug tub uas yug los yuav muab ua tus kwvtij uas tuag lawm li tub kom nws lub npe thiaj tsis ploj hauv cov Yixayee mus. Yog tus kwvtij ntawd tsis yeem yuav tus pojniam ntawd, mas tus pojniam ntawd yuav mus cuag cov kev txwj laus ntawm lub rooj loog thiab hais tias, “Kuv tus txiv tus kwvtij tsis yeem tuav nws tus kwvtij lub npe rau hauv cov Yixayee, nws tsis yeem sawv kuv tus txiv chaw.” Mas cov kev txwj laus hauv lub moos ntawd yuav hu tus yawg ntawd tuaj nrog lawv hais. Yog nws tseem ua tawv nkawv hais tias “Kuv tsis yeem yuav tus pojniam no,” ces tus pojniam ntawd yuav txav zog ze rau tus kwvtij ntawd tab meeg cov kev txwj laus chua kiag tus kwvtij ib sab khau thiab nto qaub ncaug rau tus kwvtij ntawd lub plhu thiab hais tias, “Tus uas tsis tuav nws tus kwvtij caj ces yeej raug li no.” Mas hauv cov Yixayee luag yuav hu tsev neeg no tias, Tsev neeg uas raug chua khau hle. Thaum ob tug txivneej sib ntaus es ib tug li pojniam txav ze mus pab nws tus txiv kom dim hauv tus uas ntaus ntawd txhais tes, nws cev tes loo mus chua tus txivneej tod chaw xis, mas nej muab tus pojniam ntawd txhais tes txiav pov tseg, tsis txhob khuvleej li. Koj tsis txhob muaj ob lub thauj teev tsis sib luag cia hauv lub hnab, ib lub hnyav ib lub sib. Koj tsis txhob muaj ob lub thoob tsis sib luag cia hauv koj lub tsev, ib lub loj ib lub yau. Koj yuav tsum muaj lub thauj teev uas hum thiab ncaj thiab muaj lub thoob uas hum thiab ncaj, xwv koj txojsia thiaj li ntev hauv lub tebchaws uas koj tus Vajtswv Yawmsaub muab pub rau koj. Rau qhov txhua tus uas ua li no, txhua tus uas ntxo luag noj li no yog neeg qias vuab tsuab rau koj tus Vajtswv Yawmsaub. Nco ntsoov txog tej uas thaum nej taug kev tawm hauv Iyi tebchaws los es cov Amalej ua rau nej. Lawv tuaj ntaus nej rau ntawm tog kev uas nej tsaug tsaug leeg txog siav thiab muab nej cov uas maj mam mus tom qab txiav tua pov tseg. Lawv tsis ntshai Vajtswv li. Vim li no thaum uas nej tus Vajtswv Yawmsaub pub nej tau so tsis ua rog rau tej yeeb ncuab uas nyob ib ncig nej hauv lub tebchaws uas nej tus Vajtswv Yawmsaub muab pub rau nej ua qub txeeg qub teg ua nej tug, ces nej cia li muab cov Amalej rhuav tshem kom ploj ntais hauv qab ntuj no kom tsis muaj leejtwg nco tau. Nej cia li nco ntsoov qhov no. Thaum koj mus rau hauv lub tebchaws uas koj tus Vajtswv Yawmsaub pub ua qub txeeg qub teg rau koj, thiab koj txeeb tau ua koj tug thiab nyob rau hauv lawm, koj yuav tsum muab txhua yam qoob thawj phaum uas koj sau tau hauv lub tebchaws uas koj tus Vajtswv Yawmsaub pub rau koj ib txhia tso rau hauv lub tawb coj mus rau ntawm lub chaw uas koj tus Vajtswv Yawmsaub yuav xaiv cia rau nws lub npe nyob. Koj yuav mus cuag tus pov thawj uas ua haujlwm rau lub sijhawm ntawd mas hais rau nws tias, “Hnub no kuv lees rau Yawmsaub uas yog koj tus Vajtswv hais tias kuv tau los nyob lub tebchaws uas Yawmsaub cog lus ruaj khov rau peb tej poj koob yawm txwv tias yuav pub rau peb.” Mas tus pov thawj yuav txais lub tawb ntawm koj txhais tes coj mus tso rau ntawm koj tus Vajtswv Yawmsaub lub thaj xyeem ib sab. Koj yuav tsum hais li no rau ntawm koj tus Vajtswv Yawmsaub xubntiag tias, “Kuv txiv yog neeg Alas uas mus mus los los, thiab thaum nws nqes mus nyob nram Iyi tebchaws nws muaj neeg tsawg tsawg xwb. Nyob qhov ntawd nws huaj vam ua ib haiv neeg loj thiab muaj zog thiab muaj neeg coob. Mas cov Iyi ua nruj ua tsiv rau peb thiab ua rau peb txom nyem nyuaj siab thiab quab yuam peb ua qhev khwv kawg nkaus. Mas peb thiaj quaj thov Yawmsaub uas yog peb tej poj koob yawm txwv tus Vajtswv, Yawmsaub thiaj hnov peb lub suab thov thiab pom peb tej kev txom nyem nyuaj siab, tej haujlwm khwv thiab tej uas peb raug quab yuam. Yawmsaub siv nws txhais tes uas muaj hwjchim thiab nws txhais npab uas tsa hlo thiab nws lub hwjchim uas ntshai heev thiab tej txujci tseem ceeb thiab txujci phimhwj coj peb tawm hauv Iyi tebchaws. Nws coj peb los txog ntawm no thiab pub lub tebchaws no rau peb, yog lub tebchaws uas muaj kua mis thiab zib ntab ntws nto. Au Yawmsaub, nimno kuv coj thawj phaum qoob loo hauv teb uas koj pub rau kuv tuaj.” Mas koj yuav muab cov qoob loo ntawd tso rau ntawm Yawmsaub uas yog koj tus Vajtswv xubntiag thiab pe hawm Yawmsaub uas yog koj tus Vajtswv. Koj thiab cov Levi thiab lwm haiv neeg uas nrog nej nyob cia li zoo siab xyiv fab rau txhua yam zoo uas koj tus Vajtswv Yawmsaub pub rau koj thiab koj tsev neeg. Thaum koj muab koj tej qoob loo thiab txiv ntoo ib feem kaum pub rau xyoo uas peb, yog xyoo uas pub ib feem kaum rau cov Levi thiab lwm haiv neeg uas nrog nej nyob thiab cov menyuam uas tsis muaj txiv thiab cov poj ntsuam xwv lawv thiaj li tau noj tsau npo rau hauv nej tej moos, mas koj li hais rau ntawm koj tus Vajtswv Yawmsaub xubntiag tias, “Kuv rho tej uas dawb huv tawm hauv kuv lub tsev los mas muab pub rau cov Levi thiab lwm haiv neeg uas nrog peb nyob thiab cov menyuam uas tsis muaj txiv thiab cov poj ntsuam raws li koj tej lus nkaw uas koj cob rau kuv txhua yam. Kuv tsis fav xeeb rau koj tej lus nkaw ib nqes kiag li thiab kuv pheej nco ntsoov. Thaum kuv pam tuag kuv tsis tau noj ib feem kaum ntawd thiab thaum kuv qias tsis huv kuv kuj tsis muab ib qho rho thiab kuv tsis tau muab ib qho rau tej tuag. Kuv mloog kuv tus Vajtswv Yawmsaub lus, kuv ua txhua yam raws li uas koj hais cia. Thov koj tsa qhov muag saum ntuj uas yog koj lub chaw nyob dawb huv saib tuaj thiab thov foom koob hmoov rau koj haiv neeg Yixayee thiab rau cov av uas koj pub rau peb raws li koj tau cog lus ruaj khov rau peb tej poj koob yawm txwv, yog lub tebchaws uas muaj kua mis thiab zib ntab ntws nto.” Hnub no Yawmsaub uas yog koj tus Vajtswv hais kom koj ua raws li tej kab ke thiab tej kevcai no. Mas koj yuav tsum ceev faj ua raws nraim kawg koj lub siab lub ntsws. Hnub no koj twb lees tias Yawmsaub yog koj tus Vajtswv thiab lees tias koj yuav xyaum koj lub neej raws li nws txojkev, thiab yuav tuav rawv nws tej kab ke thiab nws tej lus nkaw thiab nws tej kevcai thiab yuav mloog nws lus. Thiab hnub no Yawmsaub twb lees hais tias nej yog nws haiv neeg yog nws teej nws tug raws li nws cog lus cia rau nej, thiab hais tias nej yuav tsum tuav rawv nws tej lus nkaw huvsi. Nws yuav tsa kom nej siab dua txhua haiv neeg uas nws tau tsim los, nej yuav tau lo lus qhuas tau meej nthawb tau koob meej thiab nej yuav ua haiv neeg uas dawb huv rau Yawmsaub uas yog nej tus Vajtswv raws li nws hais cia lawd. Mauxe thiab Yixayee cov kev txwj laus hais rau cov pejxeem tias, “Nej yuav tsum tuav rawv tej lus nkaw huvsi uas hnub no kuv cob rau nej. Hnub uas nej yuav hla tus dej Yaladee mus rau hauv lub tebchaws uas nej tus Vajtswv Yawmsaub pub rau nej, nej yuav tsum teeb tej lub pob zeb loj loj muab hmoov zeb sib pleev, thiab sau tej kevcai no txhua nqe huvsi rau saum tej pob zeb ntawd rau thaum nej hla mus rau hauv lub tebchaws uas nej tus Vajtswv Yawmsaub pub rau nej, yog lub tebchaws uas muaj kua mis thiab zib ntab ntws nto, raws li Yawmsaub uas yog nej tej poj koob yawm txwv tus Vajtswv cog lus rau nej. Thaum nej hla tus dej Yaladee mus lawm, nej yuav tsum teeb tej pob zeb no rau saum lub roob Enpas raws li uas hnub no kuv hais rau nej, thiab nej yuav tsum muab hmoov zeb sib pleev. Thiab nej yuav tsum tib ib lub thaj xyeem rau Yawmsaub uas yog nej tus Vajtswv rau qhov ntawd, yog ib lub thaj pob zeb, tsis txhob siv twj hlau txaug tej pob zeb ntawd. Nej yuav muab tej pob zeb uas tsis tau muab txhwm muab npawm kiag li los tib ua lub thaj xyeem rau nej tus Vajtswv Yawmsaub, thiab nej yuav muab tsiaj hlawv xyeem saum lub thaj ntawd rau Yawmsaub uas yog nej tus Vajtswv. Nej yuav muab qhov txhia chaw xyeem ua kevcai sib raug zoo thiab noj rau qhov ntawd, thiab nej yuav zoo siab xyiv fab rau ntawm nej tus Vajtswv Yawmsaub lub xubntiag. Thiab nej yuav muab tej kevcai no huvsi sau meej meej rau saum cov pob zeb ntawd.” Mauxe thiab cov pov thawj uas yog xeem Levi hais rau cov Yixayee sawvdaws tias, “Cov Yixayee 'e, cia li nyob twjywm tig ntsej mloog. Hnub no nej tau ua Yawmsaub uas yog nej tus Vajtswv haiv neeg lawm. Vim li no nej yuav tsum mloog nej tus Vajtswv Yawmsaub lus, thiab tuav rawv nws tej lus nkaw thiab nws tej kab ke uas hnub no kuv hais rau nej.” Tib hnub ntawd Mauxe nkaw lus rau cov pejxeem tias, “Thaum nej hla tus dej Yaladee mus lawd, cov xeem no yuav mus sawv saum lub roob Kelixi hais tej lus foom koob hmoov rau cov pejxeem, yog Xime‑oo, Levi, Yuda, Ixakha, Yauxej thiab Npeeyamee. Thiab cov xeem no yuav mus sawv saum lub roob Enpas hais tej lus tsawm foom, yog Lunpee, Kas, Asaw, Xenpuloo, Daj thiab Nathali. “Cov Levi yuav piav nrov nrov rau ib tsoom Yixayee tias, “ ‘Leejtwg ua dab mlom tsis hais txua los lossis nchuav los, yog yam uas qias vuab tsuab rau Yawmsaub, thiab yog yam uas tus niag Kws txawj txhais tes ua tau los xwb, thiab muab teev nraim nkoos, mas tus ntawd raug foom tsis zoo.’ Mas cov pejxeem sawvdaws yuav teb hais tias, ‘Amee.’ “ ‘Leejtwg saib tsis taus nws niam nws txiv, mas tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg txav kwvtij zej zog ciam teb, tus ntawd yuav raug foom tsis zoo.’ Mas cov pejxeem sawvdaws yuav teb hais tias, ‘Amee.’ “ ‘Leejtwg dag cov dig muag mus yuam kev, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg yuam lwm haiv neeg uas nrog nej nyob thiab cov menyuam uas tsis muaj txiv thiab cov poj ntsuam txojcai, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg nrog nws txiv tus pojniam pw, yog nws thws nws txiv tus pojniam chaw txaj muag, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg deev tsiaj txhu yam twg kuj xij, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg nrog nws tus muam pw, yog nws txiv li ntxhais lossis nws niam li ntxhais kuj xij, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg nrog nws niam tais pw, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg nyiag tua neeg twjywm, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg yuav nyiaj ntiav es tua tus neeg uas tsis txhaum, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ “ ‘Leejtwg tsis tuav rawv tej kevcai no thiab tsis ua raws nraim, tus ntawd yuav raug foom tsis zoo.’ Mas cov pejxeem sawvdaws yuav hais tias, ‘Amee.’ ” Yog nej mloog nej tus Vajtswv Yawmsaub lus thiab ceev faj ua raws nraim nws tej lus nkaw huvsi uas hnub no kuv cob rau nej, mas Yawmsaub uas yog nej tus Vajtswv yuav tsa nej siab dua txhua haiv neeg hauv qab ntuj. Tej koob hmoov no yuav los txog nej thiab nrog nraim nej mus li, tsuav yog nej mloog Yawmsaub uas yog nej tus Vajtswv lus. Nej yuav tau koob hmoov hauv lub moos thiab tau koob hmoov hauv tej liaj teb. Nej tej noob uas xeeb menyuam thiab nej tej qoob loo hauv liaj teb thiab tej noob nyuj noob yaj yuav tau koob hmoov huaj vam coob. Nej lub tawb thiab nej tej phaj zuaj ncuav yuav tau hmoov zoo. Thaum nej nkag los yuav tau koob hmoov, thaum nej tawm mus nej yuav tau koob hmoov. Yawmsaub yuav ua rau tej yeeb ncuab uas tawm tsam nej swb nej. Lawv yuav tawm ib txojkev tuaj tawm tsam nej, tiamsis yuav khiav ntawm nej xubntiag ua xya txojkev rov qab. Yawmsaub yuav tso koob hmoov rau hauv nej lub txhab thiab txhua yam haujlwm uas nej ua. Nws yuav foom koob hmoov rau nej hauv lub tebchaws uas nej tus Vajtswv Yawmsaub pub rau nej. Yawmsaub yuav muab nej tsa ua haiv neeg uas dawb huv rau nws, yam li uas nws twb cog lus ruaj khov rau nej lawd, tsuav yog nej tuav rawv nej tus Vajtswv Yawmsaub tej lus nkaw thiab ua lub neej raws li nws txojkev. Txhua haiv neeg hauv ntiajteb yuav pom tias nej raug hu raws li Yawmsaub lub npe thiab lawv yuav ntshai nej. Yawmsaub yuav ua rau nej vam meej nplua mias kom nej muaj menyuam coob, nej tej tsiaj txhu yuav huaj vam coob, nej tej liaj teb yuav ntsu qoob rau hauv lub tebchaws uas Yawmsaub cog lus ruaj khov rau nej tej poj koob yawm txwv tias yuav pub rau nej. Yawmsaub yuav qheb nws lub txhab koob hmoov saum ntuj los rau nej thiab tso nag los raws lub caij lub nyoog thiab foom koob hmoov rau txhua yam haujlwm uas nej txhais tes ua. Nej yuav muab rau ntau lub tebchaws qev txais tiamsis nej yuav tsis qev txais lawv li. Yawmsaub yuav ua rau nej ua taubhau tsis yog ua kotw. Nws yuav tsa nej nyob lub rooj siab tsis yog nyob lub rooj qes, tsuav yog nej mloog Yawmsaub uas yog nej tus Vajtswv tej lus nkaw uas hnub no kuv cob rau nej thiab ceev faj ua raws nraim, thiab tsuav yog nej tsis tso tej lus uas hnub no kuv hais rau nej ib los tseg li, thiab tsis tig rau sab xis lossis sab laug mus raws ncuj nciav luag tej dab thiab ua koom tu. Tiamsis yog nej tsis mloog Yawmsaub uas yog nej tus Vajtswv tej lus thiab tsis ceev faj ua raws li Yawmsaub tej lus nkaw huvsi thiab nws tej kab ke uas hnub no kuv qhia rau nej mas txhua lo lus tsawm foom no yuav los raug nej thiab yuav caum cuag nej. Ces nej yuav raug lo lus tsawm foom rau hauv lub moos thiab nej yuav raug lo lus tsawm foom rau hauv tej liaj teb. Nej lub tawb thiab lub nej tej phaj zuaj ncuav yuav raug lo lus tsawm foom. Nej tej noob uas xeeb menyuam, thiab nej tej qoob loo hauv nej tej teb nej tej noob nyuj noob yaj yuav raug lo lus tsawm foom. Nej yuav raug lo lus tsawm foom rau thaum nej nkag los thiab nej yuav raug lo lus tsawm foom rau thaum nej tawm mus. Yawmsaub yuav tso tej lus tsawm foom, tej kev kub ntxhov kev poob thab los raug nej thiab txhua yam haujlwm uas nej ua mus txog thaum nej puam tsuaj ploj ntais tag, vim yog tej kev phem uas nej ua, yog qhov uas nej tso kuv tseg. Yawmsaub yuav ua rau tej mob phem los kis rau nej mus txog thaum nws muab nej rhuav tshem ploj tag rau hauv lub tebchaws uas nej mus txeeb ua nej tug. Yawmsaub yuav nplawm nej kom nej mob yuag zuj zus, muaj mob muaj nkeeg heev, muaj mob muaj paug, raug tshav kub, raug ntuj qhuav teb nkig nkuav, qoob loo tuag ntshav thiab raug kab mob. Tej no yuav raug nej mus txog thaum nej puam tsuaj tag. Lub ntuj saum nej taubhau yuav ua tooj liab, lub ntiajteb av uas nej tsuj yuav ua hlau. Yawmsaub yuav ua rau tej dej nag hauv nej lub tebchaws ua hmoov av mos mos mas yuav poob saum ntuj los rau nej mus txog thaum nej puam tsuaj tag. Yawmsaub yuav ua rau nej swb nej tej yeeb ncuab. Nej yuav tawm ua ib ke mus ntaus lawv, tiamsis nej yuav khiav lawv xya txojkev rov qab. Nej yuav ua lub chaw rau ib tsoom tebchaws hauv qab ntuj no ceeb thiab ntshai. Nej tej cev tuag yuav ua zaub mov rau txhua tus noog saum nruab ntug thiab tej tsiaj qus hauv ntiajteb noj. Thiab tsis muaj leejtwg yuav ntiab tej tsiaj ntawd mus. Yawmsaub yuav ua rau nej mob tej rwj Iyi thiab mob kiav txhab qawj thiab mob ua paug viag thiab mob khaus uas kho tsis tau li. Yawmsaub yuav nplawm nej kom vwm thiab dig muag thiab ntxhov siab hnyo, mas tav su nrig los nej yuav xuas dub yam nkaus li tej dig muag xuas hauv qhov tsaus ntuj. Nej yuav tsis vam meej rau hauv txhua yam uas nej ua. Nej yuav raug luag quab yuam tsim txom thiab raug luag huab lws tsis tu mus li, thiab yuav tsis muaj leejtwg pab nej li. Nej yuav qhaib pojniam cia los lwm tus txivneej yuav mus nrog pw. Nej ua tau tsev los yuav tsis tau nyob hauv lub tsev ntawd. Nej yuav cog vaj txiv hmab los nej yuav tsis tau tej txiv ntawd siv. Luag yuav tua nej tus nyuj tab meeg nej mas nej yuav tsis tau noj tej nqaij nyuj ntawd. Luag yuav txeeb nej tus nees luav mus tab meeg nej thiab luag yuav tsis xa rov qab rau nej. Nej tej yaj yuav raug coj mus pub rau nej tej yeeb ncuab, mas yuav tsis muaj leejtwg pab tau nej li. Nej tej tub tej ntxhais yuav raug coj mus pub rau lwm haiv neeg, mas nej lub qhov muag yuav saib ua tsaus muag ntais thiab nco nco ib hnub dhau ib hnub. Nej txhais tes lub zog yuav tsis muaj peevxwm tiv thaiv tau li. Ib haiv neeg uas nej tsis tau txeev paub dua yuav noj nej tej qoob loo hauv nej tej teb thiab noj nej tej dag tej zog. Thiab nej yuav raug luag tsuj thiab quab yuam tsim txom tsis tu mus li. Mas tej uas nej qhov muag pom ntawd thiaj yuav ua rau nej vwm qas les mus. Yawmsaub yuav nplawm nej kom mob rwj mob faj rau ntawm pob hauv caug thiab txhais ceg uas nej yuav kho tsis tau li, yuav ua rwj kiag hauv xib taws mus nto plaws tiaj taubhau. Yawmsaub yuav coj nej thiab nej tus vajntxwv uas nej tsa kav nej mus rau hauv lub tebchaws uas nej thiab nej tej poj koob yawm txwv tsis tau paub kiag li. Qhov ntawd nej yuav ua koom tu luag tej dab uas muab ntoo muab pob zeb ua. Nej yuav ua lub chaw rau luag ceeb thiab ntshai, thiab yuav ua paj lug rau luag hais, thiab yuav tiag luag ncauj luag lo rau hauv txhua haiv neeg uas Yawmsaub yuav coj nej mus ntawd. Nej yuav coj noob mus cog ntau rau hauv teb los yuav sau tau tsawg rov los, rau qhov kooj txig yuav muab noj tag. Nej yuav cog vaj txiv hmab thiab tu tej txiv ntawd los nej yuav tsis tau haus tej cawv txiv hmab thiab tsis tau de tej txiv, rau qhov kab yuav muab noj tag. Nej yuav muaj ntoo txiv aulib nyob thoob hauv nej lub tebchaws tiamsis nej yuav tsis tau tej roj txiv ntawd los pleev nej lub cev, rau qhov tej txiv aulib ntawd yuav zeeg tag. Nej yuav muaj tub muaj ntxhais tiamsis yuav tsis ua nej li, rau qhov lawv yuav raug luag ntes coj mus. Nej tej xyoob ntoo txhua yam thiab nej tej qoob loo hauv nej tej teb yuav ua kooj txig li tug. Lwm haiv neeg uas nrog nej nyob yuav vam meej zuj zus tuaj heev dua nej thiab nej yuav poob zuj zus mus. Luag yuav muaj qev txais rau nej tiamsis nej yuav tsis muaj qev txais rau luag. Luag yuav ua taubhau, nej yuav ua kotw. Txhua lo lus tsawm foom no yuav raug nej thiab yuav caum cuag nej thiab yuav ntes tau nej mus txog thaum uas nej puam tsuaj tag, vim yog nej tsis mloog Yawmsaub uas yog nej tus Vajtswv lus, tsis ua raws li nws tej lus nkaw thiab tej kab ke uas nws hais kom nej ua lawd. Tej no yuav ua txujci tseem ceeb thiab kev phimhwj rau nej thiab nej caj ces nco mus mus ib txhis. Vim thaum nej muaj ib puas tsav yam nplua mias lawm los nej tsis zoo siab xyiv fab ua koom tu Yawmsaub uas yog nej tus Vajtswv, vim li no nej thiaj yuav tu nej tej yeeb ncuab uas Yawmsaub yuav tso tuaj ntaus nej, nej yuav raug kev tshaib kev nqhis, tsis muaj hnav, thiab yuav tu ncua txhua yam. Yawmsaub yuav muab ib tug quab hlau rau nej kwv saum caj qwb mus txog thaum nws ua rau nej puam tsuaj tag. Yawmsaub yuav coj ib haiv neeg uas nyob deb deb tim qab ntuj kawg tuaj ntaus nej, yuav tuaj sai yam nkaus li dav ya tuaj, yog haiv neeg uas nej yeej tsis paub lawv tej lus, yog haiv neeg uas ntsej muag nyaum yuav tsis hwm cov laus tsis nyiam cov hluas thiab cov yau. Lawv yuav noj nej tej tsiaj txhu li menyuam thiab noj tej qoob loo hauv nej tej teb mus txog thaum nej puam tsuaj tag. Lawv yuav tsis tseg qoob loo, cawv txiv hmab thiab roj, tsis tseg menyuam nyuj menyuam yaj rau nej mus txog thaum lawv ua rau nej puam tsuaj tag. Lawv yuav muab nej vij puav cia rau hauv nej txhua lub moos mus txog thaum lawv ua rau tej ntsa loog siab thiab ruaj khov uas nej tso siab rau ntawd pob tag thoob nej lub tebchaws. Lawv yuav muab nej vij puav cia rau hauv nej txhua lub moos thoob lub tebchaws uas nej tus Vajtswv Yawmsaub twb muab rau nej lawm. Nej yuav noj nej tej menyuam uas nej yug, yog noj nej tej tub tej ntxhais uas nej tus Vajtswv Yawmsaub pub rau nej tej nqaij rau thaum uas nej tej yeeb ncuab vij puav nej cia thiab tsim txom nej. Ib tug txivneej uas siab dawb siab zoo xeeb huv tshaj plaws hauv nej cov los yuav tsis kam pub mov rau nws kwvtij, tsis pub rau nws tus pojniam ntawm nws xubntiag, tsis pub rau tus menyuam uas tseem ciaj nrog nws nyob noj. Nws thiaj tsis pub rau leejtwg tau noj nws tej menyuam li nqaij uas nws tabtom noj, vim nws tsis tshuav ib yam dabtsi li lawm rau thaum uas nej tej yeeb ncuab vij puav nej cia thiab tsim txom nej hauv nej txhua lub moos. Tus pojniam uas siab dawb siab zoo xeeb huv tshaj plaws hauv nej cov uas yeej tsis kam tsuj av li vim yog ib tug uas siab dawb siab zoo xeeb huv, los yuav tsis kam pub rau nws tus txiv ntawm nws xubntiag thiab tsis pub rau nws tus tub tus ntxhais noj lub tsho menyuam uas nws nyuam qhuav yug hauv ob ceg los thiab noj tej menyuam uas nws yug, rau qhov nws yuav muab noj twjywm vim yog tsis muaj ib yam dabtsi noj li rau thaum uas nej tej yeeb ncuab vij puav nej cia thiab tsim txom nej hauv nej tej lub moos. Yog nej tsis ceev faj ua raws li txhua lo lus hauv txoj kevcai no uas sau cia rau hauv phau ntawv no, yog nej tsis hwm tsis ntshai lub npe uas muaj koob meej thiab txaus ntshai no, yog Yawmsaub uas yog nej tus Vajtswv lub npe, mas Yawmsaub yuav coj tej kev ntxhov siab kev txom nyem uas tsis thooj li txeev muaj los rau nej thiab nej tej tub ki, yog kev ntxhov siab kev txom nyem loj heev muaj ntev heev thiab tej kev mob kev nkeeg phem phem uas muaj ntev heev. Thiab nws yuav rov coj dua tej kev mob phem hauv Iyi tebchaws uas nej ntshai huvsi los rau nej thiab tej mob ntawd yuav kis kiag rau nej. Txhua yam kev mob thiab txhua yam kev txom nyem uas tsis tau sau rau hauv phau ntawv kevcai no Yawmsaub yuav coj los rau nej mus txog thaum nej puam tsuaj tag. Txawm yog nej twb coob npaum li tej hnub qub saum nruab ntug lawm los nej yuav tshuav tsawg tsawg nyob xwb rau qhov nej tsis mloog Yawmsaub uas yog nej tus Vajtswv lus. Txawm yog Yawmsaub txaus siab ua zoo rau nej thiab ua kom nej huaj vam coob los Yawmsaub kuj yuav txaus siab coj kev puam tsuaj los rau nej thiab ua rau nej liamsim tag ib yam li ntawd. Nej yuav raug muab dob tawm hauv lub tebchaws uas nej tabtom mus txeeb ua nej tug ntawd. Mas Yawmsaub yuav ua rau nej tawg ua sab ua sua mus rau hauv txhua haiv neeg tag nrho sab ntuj no mus txog sab ntuj tim ub, mas hauv tej tebchaws ntawd nej yuav ua koom tu luag tej dab uas muab ntoo muab pob zeb ua, yog tej dab uas nej thiab nej tej poj koob yawm txwv tsis tau paub dua li. Thaum nej nrog cov neeg ntawd nyob nej yuav tsis tau nyob kaj siab lug, nej xib taws yuav tsis tau ib qho chaw so li. Yawmsaub yuav ua rau nej lub siab ntshai thiab tshee, nej yuav tsaus muag zuj zus mus thiab siab ntsws yaj tag. Nej lub neej yuav dai siav dhuam, nej yuav ntshai nruab hnub hmo ntuj tsis tso siab tias yuav muaj txojsia nyob. Thaum kaj ntug los nej yuav hais tias, “Kheev yog tsaus ntuj zoo dua,” thiab thaum tsaus ntuj los nej yuav hais tias, “Kheev yog kaj ntug zoo dua,” vim yog tej kev txhawj kev ntshai uas nej siab puas tsus, thiab tej uas nej qhov muag yuav pom ntawd. Yawmsaub yuav coj nej caij nkoj rov qab mus txog Iyi tebchaws, yog txojkev uas kuv twb cog lus tseg rau nej tias nej yuav tsis rov taug dua ib zaug li. Mus txog qhov ntawd lawm nej yuav yeem muab nej muag ua tub qhe nkauj qhev rau nej cov yeeb ncuab los twb tsis muaj leejtwg yuav nej. Ntawm no mus yog tej lus cog tseg uas Yawmsaub kom Mauxe hais rau cov Yixayee hauv Mau‑a tebchaws, tsav rau tej lus cog tseg uas nws twb hais rau lawv ntawm Haule. Mauxe hu cov Yixayee sawvdaws tuaj ua ke mas hais rau lawv tias, Nej lub qhov muag twb pom ntsoov txhua yam uas Yawmsaub ua hauv Iyi tebchaws uas yog ua rau Falau thiab nws cov tub teg tub taws thiab ua rau thoob plaws nws lub tebchaws huvsi, thiab nej twb pom tej uas nws ua sim lawv loj kawg thiab tej txujci tseem ceeb thiab tej kev phimhwj uas loj heev. Tiamsis los txog hnub no Yawmsaub tsis tau pub lub siab uas to taub thiab lub qhov muag uas pom kev thiab lub qhov ntsej uas hnov tau rau nej. Kuv coj nej hauv tebchaws moj sab qhua tau plaub caug xyoo. Nej tej ris tsho kuj tsis ntuag nej tej khau kuj tsis ntuag hle ntawm nej kotaw. Nej tsis tau noj ncuav tsis tau haus cawv txiv hmab thiab cawv ntxwg, xwv nej thiaj paub tias kuv yog Yawmsaub uas yog nej tus Vajtswv. Thaum nej los txog ntawm no, Hesanpoo tus vajntxwv Xihoo thiab Npasas tus vajntxwv Aus tawm tuaj ua rog rau peb, tiamsis peb kuj ua rau lawv swb kiag. Peb txeeb kiag lawv lub tebchaws thiab muab ua qub txeeg qub teg rau xeem Lunpee thiab xeem Kas thiab ib nrab xeem Manaxe. Vim li no nej yuav tsum ceev faj ua raws li tej lus cog tseg no kom nej thiaj vam meej rau txhua yam uas nej ua. Hnub no nej txhua tus sawv tab meeg ntawm Yawmsaub uas yog nej tus Vajtswv xubntiag, tsis hais txhua xeem cov thawj thiab nej cov kev txwj laus thiab cov uas kav nej thiab Yixayee cov txivneej sawvdaws, nej cov menyuam yaus, nej tej pojniam thiab lwm haiv neeg uas nrog nej nyob txiav taws kwv dej rau nej, xwv nej thiaj tau txais nej tus Vajtswv Yawmsaub tej lus cog tseg ruaj khov uas nej tus Vajtswv Yawmsaub nrog nej cog tseg hnub no, xwv hnub no nws thiaj muab nej tsa ua nws haiv neeg thiab nws yuav ua nej tus Vajtswv raws li nws cog lus tseg rau nej, thiab raws li nws cog lus ruaj khov rau nej tej poj koob yawm txwv yog Aplahas, Yiha thiab Yakhauj. Tej lus sib cog tseg ruaj khov no tsis yog kuv kom nej cov uas hnub no nrog peb sawv rau ntawm Yawmsaub xubntiag no ua xwb, kuv kuj kom cov uas hnub no tsis nrog peb nyob ua thiab. Nej yeej paub tias peb nyob li cas hauv Iyi tebchaws, thiab peb hla dhau tej tebchaws los txog ntawm no li cas. Thiab nej twb pom lawv li tej yam uas ntxim ntxub kawg, yog lawv tej dab mlom uas xuas ntoo xuas pob zeb xuas nyiaj xuas kub ua uas nyob hauv lawv nruab nrab. Yuav tsum ceev faj zoo tsam muaj tus txivneej twg lossis tus pojniam twg lossis tsev neeg twg lossis xeem twg uas lub siab fav ntawm Yawmsaub uas yog peb tus Vajtswv mus ua koom tu tej haiv neeg ntawd tej dab, ntshai tsam hauv nej muaj ib tug cag tuaj ntsuag uas muaj taug thiab iab iab. Thaum ib tug uas zoo li ntawd tau hnov tej lus sib cog tseg uas ruaj khov no, nws lub siab yuav xav tias, “Zoo xwb lauj! Txawm yog kuv ua raws li kuv lub siab tawv xwb los kuv yeej yuav tau zoo.” Qhov uas nws xav li no yog coj kev puam tsuaj los rau tej neeg zoo thiab tej neeg phem huvsi. Yawmsaub yuav tsis zam txim rau tus ntawd. Yawmsaub txojkev npau taws thiab txojkev khib xeeb yuav tshwm plaws kub tus ntawd thiab tej lus tsawm foom uas sau cia rau hauv phau no yuav raug nws, thiab Yawmsaub yuav rhuav nws lub npe kom ploj hauv lub qab ntuj mus. Yawmsaub yuav muab nws cais tawm hauv txhua xeem Yixayee kom raug kev puam tsuaj raws li tej lus tsawm foom huvsi hauv tej lus cog tseg uas sau cia rau hauv phau kevcai no. Nej tej tub ki uas yug tiam tom qab thiab lwm haiv neeg uas tuaj tebchaws deb deb tuaj yuav pom tej kev txom nyem nyuaj siab hauv lub tebchaws no thiab pom tej mob phem uas Yawmsaub tso kom muaj. Lawv yuav pom tag nrho lub tebchaws ua quav lawj faj thiab ua ntsev, nyob do cuas vim raug kub hnyiab, tsis muaj leejtwg cog tsis muaj ib yam dabtsi tuaj, nroj tsuag kuj tsis tuaj, raug muab rhuav pov tseg yam li Xaudoo thiab Kaumaula thiab lub moos Ama thiab lub moos Xenpau‑i uas Yawmsaub chim thiab npau taws nws muab rhuav pov tseg tag. Mas ib tsoom tebchaws sawvdaws yuav hais tias, “Ua cas Yawmsaub ua li ntawd rau lub tebchaws no? Nws chim siab loj li no yog vim li cas?” Mas luag yuav teb tias, “Yog vim lawv muab Yawmsaub uas yog lawv tej poj koob yawm txwv tus Vajtswv tej lus cog tseg tso pov tseg, yog tej lus uas thaum Yawmsaub coj lawv tawm hauv Iyi tebchaws los nws cog tseg rau lawv. Lawv cia li mus ua koom tu thiab pe hawm luag tej dab uas lawv tsis tau paub dua thiab tsis yog Yawmsaub muab rau lawv. Vim li ntawd Yawmsaub txojkev npau taws thiaj li tshwm plaws rau lub tebchaws no, thiaj coj txhua lo lus tsawm foom uas sau cia rau hauv phau no los raug. Yawmsaub muab lawv dob kiag cag tawm hauv lawv lub tebchaws ua npau taws thiab chim tsawv thiab muab laim kiag mus rau lwm lub tebchaws zoo li niaj hnub nimno.” Tej xwm uas tsis tau muab qhia tshwm los yeej yog peb tus Vajtswv Yawmsaub li, tiamsis tej xwm uas twb muab qhia tshwm los yog peb li thiab peb tej tub ki li mus ib txhis, xwv peb thiaj tau ua raws li tej kevcai no txhua nqe huvsi. Thaum txhua yam uas hais tag no, yog tej lus foom koob hmoov thiab tej lus tsawm foom uas kuv hais tab meeg nej no, los txog nej lawm, thiab nej nco txog tej no hauv txhua lub tebchaws uas nej tus Vajtswv Yawmsaub ntiab nej mus nyob, yog nej thiab nej cov menyuam rov los cuag nej tus Vajtswv Yawmsaub thiab mloog nws tej lus huvsi uas hnub no kuv hais rau nej kawg nej lub siab lub ntsws, mas nej tus Vajtswv Yawmsaub yuav pub nej vam meej li qub, thiab yuav khuvleej nej thiab qaws nej hauv txhua haiv neeg uas Yawmsaub ua rau nej khiav ri sua mus nyob lawm rov los. Yog nej muaj neeg uas raug muab ntiab mus nyob kawg nkaus qab ntuj, los nej tus Vajtswv Yawmsaub yuav qaws nej qhov ntawd coj nej rov qab los. Thiab nej tus Vajtswv Yawmsaub yuav coj nej los rau hauv lub tebchaws uas nej tej poj koob yawm txwv tau nyob ua lawv tug rov ua nej tug. Nws yuav pub kom nej vam meej thiab huaj vam coob heev dua nej tej poj koob yawm txwv. Thiab nej tus Vajtswv Yawmsaub yuav txiav kiag nej thiab nej tej tub ki lub siab tawv ncauj xwv nej thiaj hlub Yawmsaub kawg siab kawg ntsws thiab nej thiaj muaj txojsia nyob. Nej tus Vajtswv Yawmsaub yuav muab tej lus tsawm foom no tso los raug cov uas tawm tsam thiab ua yeeb ncuab tsim txom nej, thiab nej yuav rov mloog Yawmsaub lus thiab tuav rawv nws tej lus nkaw huvsi uas hnub no kuv cob rau nej. Nej tus Vajtswv Yawmsaub yuav ua rau nej vam meej nplua nuj heev kawg rau txhua yam haujlwm uas nej txhais tes ua, pub nej muaj menyuam coob, thiab nej tej tsiaj txhu huaj vam coob, thiab nej tej liaj teb yuav ntsu qoob, vim yog Yawmsaub yuav rov txaus siab ua rau nej vam meej ib yam li nws txaus siab rau nej tej poj koob yawm txwv, tsuav yog nej mloog Yawmsaub uas yog nej tus Vajtswv lus, thiab tuav rawv nws tej lus nkaw thiab nws tej kab ke uas sau rau hauv phau kevcai no, thiab tsuav yog nej tig kiag rov los cuag Yawmsaub uas yog nej tus Vajtswv kawg siab kawg ntsws xwb. Tej lus nkaw uas hnub no kuv muab cob rau nej no tsis yog yam uas ceeblaj dhau rau nej ua thiab tsis yog nyob deb ntawm nej. Txoj kevcai ntawd tsis yog nyob saum ntuj es nej yuav hais tias, “Leejtwg yuav nce mus muab saum ntuj los rau peb, peb thiaj tau hnov thiab ua raws li?” Thiab tsis yog nyob dhau hiavtxwv sab tim ub es nej yuav hais tias, “Leejtwg yuav hla mus muab los rau peb, peb thiaj tau hnov thiab ua raws li?” Tiamsis tej lus ntawd yeej nyob ze nej, nyob hauv nej lub qhov ncauj thiab nyob hauv nej lub siab, mas nej yeej ua raws li ntawd tau. Cia li ua tib zoo saib, hnub no kuv muab txojsia thiab yam uas zoo, thiab muab txojkev tuag thiab yam uas phem tso rau ntawm nej xubntiag. Yog nej mloog nej tus Vajtswv Yawmsaub tej lus nkaw uas hnub no kuv muab cob rau nej, yog qhov uas muab siab hlub Yawmsaub uas yog nej tus Vajtswv thiab ua nej lub neej raws li nws txojkev thiab tuav rawv nws tej lus nkaw thiab nws tej kab ke thiab nws tej kevcai, mas nej yuav muaj txojsia nyob thiab huaj vam coob, thiab nej tus Vajtswv Yawmsaub yuav foom koob hmoov rau nej rau hauv lub tebchaws uas nej txeem mus ntawd. Tiamsis yog nej lub siab fav kiag lawm thiab nej tsis yeem mloog lus es raug ntxias mus pe thiab ua koom tu luag tej dab, mas hnub no kuv qhia tseeb rau nej tias nej yuav puam tsuaj tag. Nej yuav tsis muaj txojsia nyob ntev rau hauv lub tebchaws uas nej tabtom hla tus dej Yaladee mus txeeb ntawd. Kuv thov lub ntuj lub teb ua timkhawv rau nej hnub no tias, kuv twb muab txojsia thiab txojkev tuag, muab koob hmoov thiab los tsawm foom tso rau ntawm nej xubntiag. Mas nej cia li xaiv yuav txojsia, kom nej thiab nej caj ces thiaj li muaj txojsia nyob, thiab nej hlub Yawmsaub uas yog nej tus Vajtswv thiab mloog nws lus thiab tuav rawv nws. Ua li no nej thiaj tau txojsia thiab nyob ntev, kom nej thiaj tau nyob rau hauv lub tebchaws uas Yawmsaub cog lus ruaj khov rau nej tej poj koob yawm txwv uas yog Aplahas, Yiha thiab Yakhauj tias yuav muab pub rau lawv. Mauxe tseem hais tej lus no rau cov Yixayee sawvdaws, thiab nws hais rau lawv tias, “Hnub no kuv hnub nyoog twb muaj ib puas nees nkaum xyoo lawm. Kuv yuav mus mus los los tsis taus lawm. Yawmsaub twb hais rau kuv tias, ‘Koj yuav tsis tau hla tus dej Yaladee no mus.’ Yawmsaub uas yog nej tus Vajtswv yuav hla ua nej ntej mus. Nws yuav ua rau tej haiv neeg ntawd puam tsuaj rau ntawm nej xubntiag nej thiaj txeeb tau lawv lub tebchaws. Mas Yausua yuav ua tus uas coj nej mus raws li Yawmsaub tau hais cia lawd. Yawmsaub yuav ua rau lawv ib yam li nws ua rau Xihoo thiab Aus uas yog cov Amaulai li vajntxwv thiab ib yam li ua rau ob tug lub tebchaws rau thaum Yawmsaub muab ob tug ua puam tsuaj. Yawmsaub yuav muab lawv cob rau nej mas nej yuav ua rau lawv raws tej lus nkaw uas kuv tau cob rau nej lawd huvsi. Cia li ua khov kho ua siab loj siab tuab, tsis txhob ras tsis txhob ntshai lawv li rau qhov Yawmsaub uas yog nej tus Vajtswv yeej nrog nej mus. Nws yuav tsis ncaim nej yuav tsis tso nej tseg.” Ces Mauxe txawm hu Yausua los thiab hais rau nws tab meeg cov Yixayee sawvdaws tias, “Cia li ua khov kho thiab ua siab loj siab tuab, rau qhov koj yog tus uas yuav nrog haiv neeg no txeem mus rau hauv lub tebchaws uas Yawmsaub cog lus ruaj rau lawv tej poj koob yawm txwv tias yuav pub rau lawv. Koj yuav ua rau lawv tau lub tebchaws ntawd ua lawv tug. Tus uas ua koj ntej yog Yawmsaub, nws yuav nrog nraim koj, nws yuav tsis ncaim koj thiab tsis tso koj tseg. Tsis txhob ntshai tsis txhob poob siab li.” Mauxe sau txoj kevcai no thiab muab rau cov pov thawj uas yog xeem Levi uas kwv Yawmsaub lub phij xab sib cog lus, thiab muab rau Yixayee cov kev txwj laus sawvdaws. Thiab Mauxe hais rau lawv tias, “Thaum puv xya xyoo uas teem ua xyoo uas tso nuj nqes tseg, ncaj lub sijhawm uas ua kevcai nyob tsev pheeb suab, mas thaum ib tsoom Yixayee tuaj rau ntawm Yawmsaub uas yog nej tus Vajtswv lub xubntiag ntawm lub chaw uas nws yuav xaiv cia, nej yuav nyeem txoj kevcai no rau cov Yixayee sawvdaws mloog. Cia li hu cov pejxeem tuaj txoos ua ke, pojniam txivneej menyuam yaus thiab lwm haiv neeg uas nyob hauv nej tej moos, kom lawv thiaj tau hnov thiab kawm paub ntshai thiab hwm Yawmsaub uas yog nej tus Vajtswv thiab ceev faj ua raws nraim li tej lus huvsi hauv txoj kevcai no, thiab lawv tej menyuam uas tsis tau paub dua thiaj tau hnov thiab kawm paub ntshai thiab hwm Yawmsaub uas yog nej tus Vajtswv tag lawv sim neej uas nyob rau hauv lub tebchaws uas nej tabtom yuav hla tus dej Yaladee mus txeeb ntawd.” Yawmsaub hais rau Mauxe tias, “Twb yuav txog hnub uas koj tuag lawm. Cia li hu Yausua tuaj mas neb ob leeg cia li los cuag kuv rau hauv lub tsev ntaub sib ntsib kuv thiaj tsa tau nws ua haujlwm.” Ces Mauxe thiab Yausua thiaj mus cuag Yawmsaub rau hauv lub tsev ntaub sib ntsib. Yawmsaub tshwm rau hauv tus ncej huab los rau hauv lub tsev ntaub, thiab tus ncej huab nyob ntawm lub qhov rooj tsev ntaub. Yawmsaub hais rau Mauxe tias, “Koj twb yuav qe muag mus nrog koj tej poj koob yawm txwv nyob. Mas haiv neeg no yuav cia li mus deev tej dab uas txawv txawv hauv lub tebchaws uas lawv mus nyob ntawd, thiab lawv yuav tso kuv tseg thiab rhuav kuv tej lus uas kuv nrog lawv sib cog lus. Ces hnub ntawd kuv yuav npau taws heev rau lawv, kuv yuav muab lawv tso tseg thiab kuv yuav fee plhu tsis ntsia lawv li lawm, mas lawv yuav raug puam tsuaj. Ntau yam kev phem kev txom nyem yuav los raug lawv. Hnub ntawd lawv yuav hais tias, ‘Tej kev phem no los raug peb vim yog peb tus Vajtswv tsis nrog peb nyob lawm los tsis yog?’ Hnub ntawd kuv yeej yuav fee plhu tsis ntsia lawv vim yog tej kev phem huvsi uas lawv tau ua, yog qhov uas lawv tig mus raws ncuj nciav luag tej dab. Nimno neb cia li sau zaj nkauj no thiab qhia rau cov Yixayee, muab tso rau hauv lawv lub qhov ncauj xwv zaj nkauj no thiaj ua timkhawv nrog kuv kom cov Yixayee. Thaum kuv coj lawv mus rau hauv lub tebchaws uas muaj kua mis thiab zib ntab ntws nto uas kuv tau cog lus ruaj tias kuv yuav pub rau lawv tej poj koob yawm txwv, thiab thaum lawv tau noj tsau npo thiab rog rog, mas lawv yuav tig mus ua koom tu luag tej dab thiab yuav saib tsis taus kuv thiab rhuav kuv tej lus cog tseg. Thaum ntau yam kev phem thiab kev txom nyem los raug lawv lawd, mas zaj nkauj no yuav ua timkhawv kom lawv, rau qhov zaj nkauj no yuav nyob ntawm lawv tej caj ces lub qhov ncauj pheej nco ntsoov mus li. Thaum kuv tsis tau coj lawv los rau hauv lub tebchaws uas kuv cog lus ruaj tias yuav pub rau lawv, kuv twb paub tej uas lawv npaj siab yuav ua lawm.” Mauxe thiaj sau zaj nkauj ntawd rau tib hnub ntawd thiab qhia rau cov Yixayee hu. Ces Yawmsaub txawm tsa Yausua uas yog Noo tus tub los ua haujlwm thiab hais tias, “Koj cia li ua khov kho thiab ua siab loj siab tuab. Koj yuav coj cov Yixayee mus rau hauv lub tebchaws uas kuv cog lus ruaj tias yuav pub rau lawv. Kuv yuav nrog koj nyob.” Thaum Mauxe sau tej kevcai no txhua nqe huvsi rau hauv phau ntawv tag lawm, nws thiaj hais rau cov Levi uas kwv lub phij xab sib cog lus tias, “Cia li muab phau ntawv kevcai no tso rau ntawm ib sab lub phij xab sib cog lus, kom thiaj ua timkhawv kom nej. Rau qhov kuv yeej paub tias nej fav xeeb thiab siab tawv li cas. Saib maj, thaum kuv tseem muaj txojsia nrog nej nyob los txog hnub no nej pheej fav xeeb rau Yawmsaub. Thaum kuv tuag lawm nej yeej yuav ua phem heev dua xwb lauj! Nej cia li hu cov kev txwj laus huvsi hauv nej txhua xeem thiab cov uas kav nej tuaj sablaj ua ke kom kuv thiaj tau hais tej lus no rau lawv mloog thiab hu lub ntuj lub teb ua timkhawv kom lawv. Kuv yeej paub tias thaum dua kuv lawm nej yuav ua phem ua qias tiag tiag li thiab fav kiag ntawm txojkev uas kuv twb qhia rau nej. Tom hauv ntej tej xwm txheej phem yuav poob los raug nej rau qhov nej ua tej uas Yawmsaub pom tias phem thiab tej uas nej txhais tes ua zes ua kom nws chim.” Mas Mauxe hais zaj nkauj no tag nrho rau ib tsoom Yixayee mloog. Lub ntuj 'e, cia li tig ntsej mloog kuv yuav hais, lub ntiajteb 'e, cia li mloog tej lus ntawm kuv lub qhov ncauj. Cia kuv tej lus qhuab qhia poob yam nkaus li nag los, cia kuv tej lus poob los yam li lwg nias, thiab yam nkaus li nag tshauv los rau saum tej nroj tsuag mos nyoos, thiab yam li tej pluav nag rau saum tej yub zaub. Rau qhov kuv yuav tshaj tawm Yawmsaub lub npe. Cia li qhuas ntxhias tias peb tus Vajtswv loj kawg nkaus. Nws yog txhib zeb, mas nws tes haujlwm zoo txhua fab, txhua yam uas nws ua kuj ncaj ncees. Vajtswv yog tus uas yeej tso siab tau, nws tsis ua ib qho txhaum li, nws txiav txim ncaj thiab ua raug cai xwb. Lawv ua phem ua qias rau Vajtswv, lawv ua tsis tau nws li menyuam lawm vim lawv muaj kev txaug kev txhaum. Lawv yog tiam neeg uas siab phem siab qias thiab siab nkhaus. Haiv neeg ruam, neeg tsis txawj xav 'e, nej ua pauj Yawmsaub tshav ntuj li no xwb lov? Yawmsaub tsis yog leej txiv uas tsim nej los lov, tsis yog tus uas tsim nej thiab yug nej kom hlob zoo lov? Cia li nco txog yav thaum ub, cia li xav txog tej hnub nyoog uas ntau tiam neeg dhau los lawd. Cia li nug nej txiv mas nws yuav qhia rau nej paub, cia li nug nej cov laus mas lawv yuav piav rau nej. Thaum tus uas loj dua ntais pub qub txeeg qub teg rau ib tsoom tebchaws, thaum nws muab cov neeg faib, nws tu ciam rau cov neeg raws li Yixayee cov tub. Rau qhov Yawmsaub li feem yog nws cov neeg, Yakhauj yog Yawmsaub li qub txeeg qub teg. Yawmsaub ntsib lawv hauv tebchaws moj sab qhua, hauv ntuj nrag teb do uas cua ntsawj vig voog. Nws thaiv ib ncig lawv thiab zov lawv tsom kwm lawv zoo yam nkaus li lawv yog nws lub ntsiab muag. Nws zoo yam nkaus li tus dav uas muab nws lub zes rhuav es yuj saum nws cov menyuam. Nws nthuav tis kiag cug cov menyuam kwv rau saum phab tis. Yawmsaub tib leeg coj lawv los, tsis muaj lwm lub tebchaws li dab nrog lawv nyob. Yawmsaub pub lawv caij sau tej chaw siab hauv ntiajteb, pub lawv noj tej qoob loo hauv liaj teb, pub lawv ntxais zib ntab ntawm tej pob tsuas, thiab noj roj ntawm tej roob pob zeb uas tawv tawv, thiab haus kua mis nyeem ntawm tej nyuj thiab kua mis ntawm tej tshis, thiab noj roj ntawm tej menyuam yaj thiab txiv yaj, thiab noj tej nyuj Npasas thiab tshis thiab tej mog uas zoo zoo. Nej tau haus tej txiv hmab li ntshav ua cawv. Yesulu rog tuaj ces kuj fav xeeb, nej rog heev, nqaij tuab, ceev nrees. Lawv muab Vajtswv uas tsim lawv tso tseg, thiab saib tsis taus txhib zeb uas cawm lawv dim. Lawv teev luag tej dab ua rau Yawmsaub khib, lawv ua tej kev qias vuab tsuab zes ua kom nws chim. Lawv tua tsiaj xyeem rau tej dab uas tsis yog Vajtswv, yog xyeem rau tej dab uas lawv tsis tau paub dua, thiab xyeem rau tej dab uas nyuam qhuav muaj nimno, yog tej uas nej tej poj koob yawm txwv tsis tau hwm thiab ntshai. Nej tsis nco txog txhib zeb uas yug nej los, nej tsis nco qab Vajtswv uas yug nej. Yawmsaub pom mas tsis yuav lawv lawm rau qhov nws tej tub tej ntxhais ua rau nws chim. Mas Yawmsaub thiaj hais tias, “Kuv yuav fee plhu ntawm lawv, kuv yuav tos saib thaum kawg lawv yuav zoo li cas, rau qhov lawv yog tiam neeg uas ua nkhib nkhaus, yog cov menyuam uas tsis xib rau kuv. Lawv twb teev tej uas tsis yog Vajtswv ua rau kuv khib, lawv twb muaj dab mlom zes kom kuv chim. Mas kuv yuav siv tej neeg uas tsis yog haiv neeg ua rau lawv khib, kuv yuav siv ib haiv neeg ruam ua rau lawv chim. Rau qhov kuv lub siab chim chim tawm hluavtaws kub mus txog ntua ti nkaus qab thu hauv tub tuag teb, thiab kub ntiajteb thiab tej qoob loo thiab kub tej lag zeb uas pua tiag tej roob. Kuv yuav sau xwm txheej phem rau saum lawv thiab tso kuv tej xub hneev los tua lawv. Lawv yuav tshaib tshaib yuag zuj zus, thiab lawv yuav puam tsuaj vim yog muaj mob kub heev thiab mob kis. Kuv yuav tso kaus hniav tsiaj nyaum los tom lawv thiab tso tej uas muaj taug nkag hauv av los tom lawv. Nraum tshav puam los hniav ntaj hniav riam yuav ua rau neeg ua ntsuag, hauv tsev los yuav muaj kev ntshai heev, ua rau cov tub hluas ntxhais hluas thiab cov menyuam uas tseem noj mis thiab cov laus uas dawb hau paug puam tsuaj. Kuv twb hais lawm tias, ‘Kuv yuav ua rau lawv tawg ri sua mus deb, yuav rhuav lawv lub npe ua kom tsis muaj leejtwg nco tau.’ Tiamsis kuv ntshai tsam tej yeeb ncuab thuam kuv, ntshai tsam tej yeeb ncuab ho xav yuam kev, tsam ces lawv ho hais tias, ‘Yog peb txhais tes kov yeej, tsis yog Yawmsaub ua txhua yam no.’ ” Lawv yog ib haiv neeg uas tsis paub qabhau, yog neeg tsis thoob tsib. Yog lawv ntse los lawv yuav nkag siab tej no thiab lawv yuav paub txog lawv lub neej thaum kawg. Ib leeg yuav ua li cas ntiab tau ib txhiab leej khiav, ob leeg yuav ua li cas ntiab tau ib vam leej khiav? Twb yog lawv txhib zeb twb muab lawv muag lawm thiab Yawmsaub twb tso lawv tseg lawm. Cov yeeb ncuab txhib zeb tsis thooj li peb txhib zeb, cov yeeb ncuab los yeej paub li ntawd. Lawv lub hauv paus txiv hmab yog ncau ntawm txij hmab Xaudoo, thiab tuaj hauv Kaumaula vaj txiv hmab tuaj. Lawv tej txiv hmab yog tshuaj lom, lawv tej tauv txiv hmab kuj iab kawg. Lawv tej cawv txiv hmab yog taug nab, yog nab raj kub sai li taug heev. “Kuv tsis tau muab qhov uas kuv yuav ua no khaws cia, thiab muab kaw ceev cia rau hauv kuv lub txhab lov? Qhov uas ua pauj thiab qhov uas teem txim yog kuv li feem tos cia txog thaum lawv plam kotaw, rau qhov hnub uas lawv yuav puam tsuaj twb los yuav txog, thiab lawv lub khuab twb yuav los raug lawv sai sai no.” Yawmsaub yuav feeb cai rau nws cov neeg, nws yuav khuvleej nws cov tub qhe rau thaum nws pom tias lawv zog tag lawm, thiab tsis muaj leejtwg tshuav nyob lawm tsis hais cov uas ua qhev thiab cov uas tsis ua qhev. Mas Yawmsaub yuav hais tias, “Lawv tej dab dua twg lawm, txhib zeb uas lawv nraim cev ntawd dua twg lawm? Yog cov uas noj tej tsiaj uas muab tua xyeem li roj thiab haus tej cawv txiv hmab uas lawv muab hliv xyeem. Cia tej dab ntawd sawv tsees los pab nej, cia lawv tsom kwm nej los maj. “Saib maj, kuv yeej yog tus ntawd ntag, dhau kuv lawm tsis muaj lwm tus Vajtswv. Kuv tua kom tuag thiab kuv tsa kom sawv, kuv ua kom mob kom to thiab kuv kho kom zoo, tsis muaj leejtwg yuav pab kom dim tau hauv kuv txhais tes. Kuv tsa tes rau saum ntuj twv hais tias, Kuv yeej muaj txojsia nyob ib txhis tsis kawg, thaum kuv hov kuv rab ntaj kom ntse ci nplas, thiab kuv txhais tes tuav rawv kev txiav txim, kuv yuav ua pauj rau kuv cov yeeb ncuab thiab ua pauj rau cov uas ntxub kuv. Kuv yuav ua rau kuv rab xub haus ntshav qaug thiab kuv rab ntaj yuav noj nqaij, yog cov uas raug tua tuag thiab cov uas raug ntes li ntshav uas los ntawm tej yeeb ncuab li taubhau.” Ib tsoom tebchaws 'e, cia li qhuas Yawmsaub cov neeg, rau qhov Yawmsaub yuav pauj nws cov tub qhe tej ntshav thiab ua pauj rau nws cov yeeb ncuab, thiab ntxuav nws cov neeg thiab lub tebchaws kev txhaum. Mauxe thiab Noo tus tub Yausua tuaj piav txhua lo lus hauv zaj nkauj no rau cov pejxeem lub qhov ntsej hnov. Thaum Mauxe piav txhua lo lus no rau cov Yixayee sawvdaws mloog tag lawd, nws kuj hais rau lawv tias, “Cia li khaws tej lus uas hnub no kuv hais kom nej ua rau nruab siab, xwv nej thiaj qhia tau rau nej tej tub ki kom lawv thiaj li paub ceev faj ua raws li tej lus hauv txoj kevcai no huvsi. Tej no tsis yog tej nyuag dog dig rau nej, tej no yeej yog nej txojsia ntag, thiab yog nej ua raws li tej no nej yuav muaj txoj siav loj siav ntev rau hauv lub tebchaws uas nej tabtom yuav hla tus dej Yaladee mus txeeb ua nej tug ntawd.” Hnub ntawd Yawmsaub hais rau Mauxe tias, “Koj cia li nce mus pem lub roob Anpali no mus kom txog lub roob Nenpau uas nyob hauv Mau‑a tebchaws uas ncaj lub moos Yelikhau es tsa muag ntsia lub tebchaws Khana‑as uas kuv muab pub rau cov Yixayee yuav ua lawv tug. Koj yuav tu siav rau saum lub roob uas koj nce mus ntawd es mus nrog koj tej poj koob yawm txwv nyob, ib yam nkaus li uas koj tus tijlaug Aloo tuag saum lub roob Hau es mus nrog nws tej poj koob yawm txwv nyob, vim yog neb ob leeg tsis ua ncaj rau kuv tab meeg cov Yixayee ntawm qhov dej Melinpa Khade hauv tebchaws moj sab qhua Xee. Neb tsis hwm kuv ua tus uas dawb huv rau hauv cov Yixayee. Vim li no koj yuav tuaj deb ntsia pom lub tebchaws tiamsis koj yuav tsis tau nkag mus rau hauv lub tebchaws uas kuv muab pub rau cov Yixayee.” Ntawm no mus yog Mauxe uas yog Vajtswv tus neeg tej lus foom koob hmoov rau cov Yixayee ua ntej uas nws tsis tau tuag. Nws hais tias, “Yawmsaub nqes saum lub roob Xinai los, nws tawm ntawm Xe‑i ci tuaj rau lawv, nws ci nplas saum lub roob Palas tuaj, nws nrog qas txhiab qas vam leej uas dawb huv tuaj, muaj nplaim taws ntawm nws sab tes xis. Nws yeej hlub nws haiv neeg. Nws cov neeg dawb huv, txhua tus nyob hauv nws txhais tes. Lawv pe ntawm koj kotaw thiab txais tej lus uas koj qhia. Mauxe muab txoj kevcai cob rau peb ua Yakhauj cov neeg qub txeeg qub teg. Yawmsaub thiaj ua vajntxwv hauv Yesulu rau thaum cov pejxeem cov thawj tuaj txoos ua ke thiab nrog cov Yixayee txhua xeem ua ke. “Thov cia Lunpee muaj txojsia nyob, tsis txhob tuag, tiamsis cia nws cov neeg muaj tsawg.” Mauxe hais txog Yuda li no tias, “Au Yawmsaub, thov mloog Yuda tej lus, thov coj nws rov los koom nws haiv neeg. Nws txhais tes tawm tsam pab nws tus kheej. Thov koj pab nws tawm tsam nws cov yeeb ncuab.” Mauxe hais txog Levi tias, “Yawmsaub, koj li Thumi thiab Uli nrog tus uas koj hlub nyob, yog tus uas koj twb muab sim ntawm Maxa lawm, thiab tus uas koj tawm tsam ntawm dej Melinpa. Nws hais rau nws niam nws txiv tias, ‘Kuv tsis quav ntsej lawv lawm.’ Nws tsis yuav nws cov kwvtij thiab tsis paub nws cov menyuam, rau qhov cov Levi ua raws li koj tej lus thiab tuav rawv koj tej lus cog tseg. Lawv yuav qhia koj tej kevcai rau Yakhauj, thiab qhia koj txoj kevcai rau Yixayee. Lawv yuav muab hmoov tshuaj tsw qab tso rau ntawm koj xubntiag, thiab muab tej uas hlawv huvsi xyeem tso rau saum koj lub thaj. Au Yawmsaub, thov foom koob hmoov rau nws tej qhov txhia chaw, thiab lees yuav tej haujlwm uas nws txhais tes ua. Thov koj tsoo nws cov yeeb ncuab lub duav, yog cov uas ntxub nws, ua kom sawv tsis taus dua li.” Mauxe hais txog Npeeyamee tias, “Tus uas Yawmsaub hlub nyob tso siab plhuav rau hauv nws. Yawmsaub tsom kwm nws tas hnub tas hmo, nws nyob saum Yawmsaub xub pwg.” Mauxe hais txog Yauxej tias, “Thov Yawmsaub foom koob hmoov rau nws lub tebchaws, cia nws tau dej lwg uas zoo kawg nkaus saum ntuj, thiab tau tej dej uas nyob hauv qab ntuj, thiab tau tej qoob loo zoo kawg nkaus ntawm lub hnub, thiab tau tej qoob loo nplua mias raws lub hli, thiab tau tej yam uas zoo kawg saum tej roob uas ib txwm muaj nyob, thiab tau tej uas zoo nplua mias saum tej ncov roob uas nyob mus ib txhis, thiab tau tej kev tsim txiaj hauv ntiajteb thiab txhua yam uas nyob hauv, thiab tau txojkev hlub ntawm tus uas nyob hauv tsob ntoo cig plaws ntawd. Thov kom tej koob hmoov no los rau saum Yauxej lub taubhau, thiab los rau saum tus uas ua nws cov kwvtij tus thawj lub tiaj taubhau. Nws yog thawj tug menyuam txiv nyuj uas muaj meej mom, nws txwm kub zoo yam li kub nyuj qus. Txwm kub ntawd yuav laub txhua haiv neeg mus txog qab ntuj kawg. Efa‑i qas vam leej kuj zoo li no, Manaxe qas txhiab leej kuj zoo ib yam nkaus.” Mauxe hais txog Xenpuloo tias, “Xenpuloo, cia li zoo siab xyiv fab rau thaum koj tawm mus, thiab Ixakha cia li zoo siab rau hauv koj lub tsev ntaub. Ob tug yuav hu neeg tuaj rau ntawm ob tug lub roob, thiab yuav xyeem tsiaj raug cai qhov ntawd. Ob tug rub tej uas zoo nplua mias hauv hiavtxwv los, thiab tau tej qhov txhia chaw tswm txiaj uas muab zais rau hauv xuab zeb.” Mauxe hais txog Kas tias, “Qhuas Vajtswv uas nthuav Kas lub tebchaws dav. Kas nyob zoo yam li tsov ntxhuav, dua luag npab dua luag tiaj taubhau. Nws xaiv lub tebchaws uas zoo kawg nkaus rau nws, vim yog qhov ntawd tseg cia rau tus thawj uas kav. Thaum pejxeem cov thawj tuaj txoos ua ke, nws ua raws li Yawmsaub txojkev ncaj ncees, thiab ua raws li tej kevcai uas muab rau cov Yixayee.” Mauxe hais txog Daj tias, “Daj yog ib tug menyuam tsov ntxhuav uas dhia caws qia hauv Npasas tebchaws tuaj.” Mauxe hais txog Nathali tias, “Nathali 'e, koj yog tus uas tau Yawmsaub txojkev hlub puv npo, thiab tau Yawmsaub li koob hmoov puv nkaus, cia li txeeb dej hiavtxwv thiab yav qab teb ua koj tug.” Mauxe hais txog Asaw tias, “Thov kom Asaw tau koob hmoov ntau dua cov tub huvsi, thov kom nws cov kwvtij hlub nws, thiab cia nws raus kotaw rau hauv thoob roj. Koj tej las rooj yog hlau thiab tooj liab, koj txojsia ntev li cas, koj lub zog yuav muaj ntev li ntawd.” “Yesulu 'e, tsis muaj leejtwg zoo cuag li Vajtswv. Nws taug txojkev saum ntuj los pab koj thiab muaj meej mom caij huab cua los. Vajtswv uas ib txwm muaj nyob yog nej lub chaw nyob, nws txhais npab uas nyob mus ib txhis cug rawv nej. Nws ntiab yeeb ncuab khiav ntawm nej xubntiag mus, thiab hais tias, ‘Ua kom puam tsuaj lauj!’ Ua li no Yixayee thiaj li nyob tso siab plhuav, Yakhauj caj ces kuj nyob thaj yeeb rau hauv lub tebchaws uas muaj qoob loo muaj cawv txiv hmab, thiab lub ntuj tso dej lwg nqes los. Yixayee 'e, nej tau hmoov zoo tiag tiag li. Leejtwg zoo thooj li nej, yog haiv neeg uas Yawmsaub cawm kom dim? Nws yog daim hlau uas pab nej, nws yog rab ntaj uas ua kom nej kov yeej. Nej cov yeeb ncuab yuav nkag tuaj hawm nej, nej yuav tsuj pes ntiag saum lawv tej chaw siab.” Mauxe nce ntawm lub tiaj Mau‑a mus rau saum lub roob Nenpau txog lub ncov roob Pixaka, uas nyob ncaj lub moos Yelikhau. Mas Yawmsaub qhia nws pom tag nrho lub tebchaws huvsi, yog Kile‑a mus txog lub moos Daj, thiab tag nrho Nathali thiab Efa‑i thiab Manaxe tebchaws, thiab tag nrho Yuda tebchaws mus txog hiavtxwv uas nyob sab hnub poob, thiab Neke thiab nras tiaj uas yog txij ntua Yelikhau uas yog lub moos toov laj mus txog lub moos Xau‑a. Mas Yawmsaub hais rau Mauxe tias, “No yog lub tebchaws uas kuv cog lus ruaj rau Aplahas, Yiha thiab Yakhauj tias, ‘Kuv yuav muab pub rau nej caj ces.’ Kuv pub koj lub qhov muag pom tiamsis koj yuav tsis tau hla mus rau hauv lub tebchaws ntawd.” Ces Yawmsaub tus qhev Mauxe thiaj li tuag rau qhov ntawd rau hauv Mau‑a tebchaws, raws li Yawmsaub tau hais lawd. Yawmsaub muab nws log rau hauv lub hav uas ncaj lub moos Npepe‑au hauv Mau‑a tebchaws. Mas los txog niaj hnub nimno tsis muaj leejtwg paub lub chaw uas log Mauxe. Thaum Mauxe tuag ntawd nws hnub nyoog muaj ib puas nees nkaum xyoo. Nws qhov muag tseem pom kev zoo, nws lub zog kuj tsis ntaug. Mas cov Yixayee quaj Mauxe tau peb caug hnub hauv lub tiaj Mau‑a, mam li tag lub sijhawm uas quaj ntsuag Mauxe. Yausua uas yog Noo tus tub muaj lajlim tswvyim plab plaws puv npo vim yog Mauxe twb tsa tes npuab saum nws lawm. Yog li ntawd cov Yixayee thiaj li mloog nws lus thiab ua raws li Yawmsaub hais rau Mauxe lawd. Txij hnub ntawd los tsis muaj ib tug xibhwb cev Vajtswv lus twg tshwm rau hauv cov Yixayee zoo ib yam li Mauxe uas Yawmsaub nrog nraim tim ntsej tim muag. Tsis muaj ib tug twg zoo li Mauxe uas ua tej txujci tseem ceeb thiab txujci phimhwj huvsi uas Yawmsaub txib nws ua rau hauv Iyi tebchaws rau Falau thiab nws cov tub teg tub taws sawvdaws thiab tag nrho nws lub tebchaws huvsi. Tsis muaj ib tug twg ua tau txhua yam haujlwm uas muaj hwjchim thiab txhua yam haujlwm loj uas txaus ntshai heev yam li Mauxe ua tab meeg cov Yixayee sawvdaws pom. Thaum Yawmsaub tus qhev Mauxe tuag lawm, Yawmsaub hais rau Noo tus tub Yausua uas pab Mauxe tias, “Kuv tus qhev Mauxe tuag lawm, mas nimno koj thiab haiv neeg no sawvdaws cia li sawv kev hla tus dej Yaladee no mus rau hauv lub tebchaws uas kuv muab pub rau cov Yixayee. Txhua thaj uas nej txhais kotaw mus tsuj kuv muab pub rau nej, raws li kuv tau cog lus rau Mauxe lawd. Txij ntawm tebchaws moj sab qhua mus rau lub roob Lenpanoo, thiab mus txog tus niag dej Yufeti, tag nrho cov Hithai lub tebchaws mus txog Hiavtxwv Loj sab hnub poob yuav ua nej li tebchaws. Tsis muaj leejtwg tawm tsam tau koj mus tag koj sim neej. Kuv nrog nraim Mauxe li cas kuv yuav nrog nraim koj li ntawd. Kuv yuav tsis ncaim koj, tsis tso koj tseg. Koj cia li ua khov kho thiab ua siab loj siab tuab, rau qhov koj yuav ua rau haiv neeg no tau lub tebchaws ntawd ua qub txeeg qub teg, yog lub tebchaws uas kuv cog lus ruaj rau lawv tej poj koob yawm txwv tias yuav pub rau lawv. Tsuav yog koj ua khov kho thiab ua siab loj siab tuab ceev faj ua raws li tej kevcai huvsi uas kuv tus qhev Mauxe tau hais rau koj lawm. Tsis txhob tig ntawm txoj kevcai no mus rau sab xis lossis sab laug kom koj mus rau qhovtwg koj thiaj ua tau txhua yam tiav zoo. Tsis txhob cia phau ntawv kevcai no ncaim ntawm koj lub qhov ncauj mus. Koj yuav tsum niaj hnub niaj hmo tshawb nrhiav kom koj thiaj paub ceev faj ua raws li txhua yam uas sau rau hauv thiab koj thiaj li vam meej thiab ua tau txhua yam tiav zoo. Kuv twb hais rau koj lawm los tsis yog? Cia li ua khov kho thiab ua siab loj siab tuab, tsis txhob ntshai tsis txhob poob siab kiag li, rau qhov koj mus rau qhovtwg Yawmsaub uas yog koj tus Vajtswv yeej nrog nraim koj.” Yausua hais rau cov thawj uas kav pejxeem tias, “Nej cia li mus hais rau cov pejxeem thoob plaws hauv lub zos tias, ‘Hwbxwm mov noj cia, peb hnub xwb nej yuav tau hla tus dej Yaladee no mus txeeb lub tebchaws uas nej tus Vajtswv Yawmsaub pub rau nej ua nej tug.’ ” Thiab Yausua hais rau xeem Lunpee thiab xeem Kas thiab ib nrab xeem Manaxe tias, “Nej cia li nco ntsoov tej lus uas Yawmsaub tus qhev Mauxe hais rau nej tias, ‘Yawmsaub uas yog nej tus Vajtswv tu chaw rau nej so thiab pub lub tebchaws no rau nej. ’ Cia nej cov pojniam menyuam yaus thiab nej tej tsiaj txhu nyob hauv lub tebchaws uas Mauxe muab rau nej uas yog ntawm tus dej Yaladee sab hnub tuaj. Tiamsis nej cov txivneej uas txawj ua rog sawvdaws yuav tsum tuav rawv cuab yeej ua rog hla ua nej cov kwvtij ntej mus pab lawv, mus txog thaum Yawmsaub pub chaw rau nej cov kwvtij so ib yam li pub rau nej lawd, thiab mus txog thaum lawv txeeb tau lub tebchaws uas nej tus Vajtswv Yawmsaub pub rau lawv. Ces nej li rov qab los nyob rau hauv lub tebchaws uas yog nej teej nej tug, yog lub tebchaws uas Yawmsaub tus qhev Mauxe muab rau nej ntawm tus dej Yaladee sab hnub tuaj.” Lawv teb Yausua tias, “Txhua yam uas koj hais rau peb, peb yuav ua, thiab koj kom peb mus qhovtwg peb kuj mus. Peb mloog Mauxe lus txhua yam li cas, peb yuav mloog koj lus ib yam li ntawd. Tsuas yog thov kom Yawmsaub uas yog koj tus Vajtswv nrog nraim koj ib yam li nrog nraim Mauxe xwb. Leejtwg tawv nyom koj tej lus tsis mloog tej lus uas koj hais txawm yog koj hais kom ua dabtsi kuj xij, tus ntawd yuav raug muab tua pov tseg. Koj cia li ua khov kho thiab ua siab loj siab tuab.” Mas Noo tus tub Yausua txib ob leeg tawm hauv lub moos Sithi twjywm mus tshuaj lub tebchaws, hais rau ob tug tias, “Mus tshuaj lub tebchaws ntawd ua tib zoo tshuaj lub moos Yelikhau.” Ob tug thiaj mus, nkag mus rau hauv ib tug poj muag cev uas hu ua Lahaj lub tsev thiab so qhov ntawd. Muaj neeg hais rau vajntxwv hauv lub moos Yelikhau tias, “Hmo no muaj cov txivneej Yixayee qee leej tuaj rau hauv no, yog tuaj tshuaj tebchaws.” Mas vajntxwv hauv lub moos Yelikhau txib neeg mus hais rau Lahaj tias, “Cia li coj cov txivneej uas tuaj nkag rau hauv koj lub tsev tawm los, vim lawv tuaj tshuaj peb lub tebchaws xwb.” Tiamsis tus pojniam ntawd muab ob tug txivneej ntawd zais lawm mas hais rau lawv tias, “Muaj txivneej tuaj nrhiav kuv tiag tiamsis xyov tuaj qhovtwg tuaj kuv tsis paub. Thaum tsaus ntuj zuag yuav kaw rooj loog lawv twb tawm mus lawm. Xyov lawv mus qhovtwg kuv tsis paub. Cia li maj nroos caum lawv qab mus nej thiaj caum cuag.” Tiamsis tus pojniam ntawd twb coj ob tug nce rau txheej tsev saud lawm thiab muab ob tug zais rau hauv cov teg qab maj uas nws muab tso saum tsev lawm. Lawv txawm caum ob tug qab mus txog ntawm lub chaw hla tus dej Yaladee. Thaum cov uas caum qab ntawd tawm mus lawm, luag txawm kaw rooj loog. Thaum ob tug tseem tsis tau pw, tus pojniam ntawd nce mus cuag ob tug rau txheej saud thiab hais rau ob tug tias, “Kuv paub tseeb tias Yawmsaub pub lub tebchaws no rau nej, thiab peb ntshai nej kawg nkaus li, thiab tag nrho tej neeg hauv lub tebchaws los ntshai nej ua siab ntsws yaj tag. Rau qhov peb twb hnov txog qhov uas Yawmsaub ua rau dej Hiavtxwv Liab qhuav rau ntawm nej xubntiag rau thaum nej tawm hauv Iyi tebchaws los, thiab hnov txog tej uas nej ua rau cov Amaulai ob tug vajntxwv uas nyob sab ntug dej Yaladee hnub tuaj, yog Xihoo thiab Aus uas nej muab ua puam tsuaj tag. Thaum peb hnov txog tej no peb lub siab yaj tag tamsim ntawd thiab tsis muaj ib tug muaj siab tuab li lawm vim yog tim nej. Nej tus Vajtswv Yawmsaub yeej yog tus Vajtswv uas kav saum ntuj thiab hauv ntiajteb. Mas nimno thov neb tuav Yawmsaub lub npe cog lus twv rau kuv tias kuv hlub neb li cas, neb yuav hlub kuv tsev neeg ib yam li ntawd, thiab muab ib yam dabtsi los ua puav pheej rau kuv tso siab tau. Thiab thov neb tseg kuv niam kuv txiv kuv tej neej nug tej niam hluas niam laus thiab lawv tsev neeg txhua tus cia thiab cawm peb dim txojkev tuag.” Ob tug teb tias, “Muab wb txojsia pauv nej txojsia lauj! Yog nej tsis qhia tej no rau leejtwg, wb yuav hlub thiab ua ncaj rau koj rau thaum Yawmsaub pub lub tebchaws no rau peb.” Ces tus pojniam ntawd txawm muab hlua tso dauv ntawm qhov rais rau ob tug nqes mus, rau qhov nws lub tsev koom kiag phab ntsa loog, nws nyob hauv lub ntsa loog ntag. Nws hais rau ob tug tias, “Cia li nce mus lawm pem roob tsam cov uas caum neb qab ho ntsib neb. Cia li mus tsiv nraim peb hnub txog thaum cov uas caum neb qab rov los tso neb mam li tawm mus.” Ob tug thiaj hais rau nws tias, “Wb yuav ua raws nraim li tej lus uas koj kom wb twv cia no. Thaum peb txeem los rau hauv lub tebchaws no, koj cia li muab txoj xov liab no khi rau ntawm lub qhov rais uas koj tso wb nqes ntawd. Thiab koj hu koj niam koj txiv koj tej neej nug thiab koj txiv tsev neeg sawvdaws tuaj nyob hauv koj tsev. Yog leejtwg tawm mus tom tej kev dhau nraum lub qhov rooj lawm, nws yuav ris nws cov ntshav, wb tsis txhaum. Tiamsis yog leejtwg tsa tes ntaus ib tug twg uas nrog koj nyob hauv tsev, mas wb yuav ris nws cov ntshav. Tiamsis yog koj qhia zaj no rau leejtwg lawm wb yuav dim tej lus uas koj kom wb twv no.” Tus pojniam ntawd hais tias, “Cia yuav raws li neb tej lus lauj!” Nws txawm xa ob tug mus, ob tug thiaj tawm mus lawm. Nws txawm muab txoj xov liab khi rau ntawm lub qhov rais. Ob tug tawm mus ces nce mus rau pem roob so tau peb hnub mus txog thaum cov uas caum ob tug rov qab los. Lawv xawb nrhiav taug kev txhua nrho kuj tsis pom. Ob tug thiaj nqes pem roob los thiab hla mus cuag Yausua uas yog Noo tus tub, thiab piav tej uas ob tug mus ntsib huvsi rau Yausua mloog. Ob tug hais rau Yausua tias, “Yawmsaub muab lub tebchaws ntawd huvsi cob rau hauv peb txhais tes tiag tiag li lawm. Dua li ntawd cov neeg uas nyob hauv lub tebchaws kuj ntshai peb ua siab ntsws yaj tag.” Yausua thiab cov Yixayee sawvdaws sawv ntxov tawm ntawm Sithi mus txog tus dej Yaladee mas lawv tsuam chaw nyob qhov ntawd ua ntej uas lawv yuav hla mus. Thaum dhau peb hnub lawd cov ua thawj ncig thoob plaws hauv lub yeej, thiab hais rau cov pejxeem tias, “Thaum nej pom cov pov thawj uas yog xeem Levi kwv nej tus Vajtswv Yawmsaub lub phij xab sib cog lus mus, nej cia li sawv kev raws lawv mus, nej thiaj pom qab kev mus, rau qhov nej tsis tau mus dua txojkev ntawd. Nej yuav ua qab deb ntawm lub phij xab kwvlam ob txhiab tshim, tsis txhob txav mus ze lub phij xab ntawd.” Yausua thiaj hais rau cov pejxeem tias, “Cia li tu kom nej dawb huv, rau qhov tagkis Yawmsaub yuav ua txujci phimhwj rau hauv nej nruab nrab.” Thiab Yausua hais rau cov pov thawj tias, “Cia li kwv lub phij xab sib cog lus ua cov pejxeem ntej mus.” Lawv txawm kwv lub phij xab sib cog lus mus ua cov pejxeem ntej. Yawmsaub hais rau Yausua tias, “Hnub no kuv yuav pib tsa koj ua loj rau hauv cov Yixayee sawvdaws kom lawv saib taus, kom lawv thiaj paub tias kuv nrog nraim Mauxe li cas kuv yuav nrog nraim koj li ntawd. Thiab koj cia li hais rau cov pov thawj uas kwv lub phij xab sib cog lus tias, ‘Thaum nej los txog ntawm ntug dej Yaladee, nej cia li sawv nres rau hauv nruab nrab tus dej Yaladee.’ ” Thiab Yausua hais rau cov Yixayee tias, “Cia li los ntawm no, thiab tig ntsej mloog Yawmsaub uas yog nej tus Vajtswv tej lus.” Yausua hais tias, “Vim tej no nej yuav paub tias Vajtswv uas muaj txojsia nyob yeej nrog nraim nej nyob, thiab nws yuav ntiab cov Khana‑as, cov Hithai, cov Hivai, cov Pelixai, cov Kawkasi, cov Amaulai thiab cov Yenpu tawm ntawm nej hauv ntej mus tiag tiag li. Saib maj, tus Tswv uas kav tag nrho lub qab ntuj no lub phij xab sib cog lus yuav ua nej ntej mus rau hauv tus dej Yaladee. Vim li no cia li xaiv kaum ob leeg tawm hauv kaum ob xeem Yixayee los, ib xeem ib leeg. Thaum cov pov thawj uas kwv Yawmsaub uas yog tus Tswv uas kav tag nrho lub qab ntuj lub phij xab lawv txhais xib taws nqes rau hauv tus dej Yaladee, ces tus dej Yaladee yuav tsis ntws los. Cov dej uas ntws sab ped los yuav tauv nkaus ua ib phab.” Thaum cov pejxeem tawm ntawm lawv lub chaw tsuam mus hla tus dej Yaladee, cov pov thawj kwv lub phij xab sib cog lus mus ua lawv ntej. Lub caij sau qoob ntawd tus dej Yaladee pheej nyab rau ob sab ntug. Thaum cov pov thawj uas kwv lub phij xab los txog ntawm ntug dej Yaladee thiab lawv txhais kotaw nqes rau hauv tus dej, mas cov dej uas ntws sab ped los txawm tauv nkaus ua ib phab ntawm lub moos Adas uas nyob ze lub moos Xalethas, hos cov dej sab nrad uas ntws mus rau Hiavtxwv Alanpa uas yog Hiavtxwv Ntsev tu nrho lawm. Mas cov Yixayee kuj hla ncaj ntawm lub moos Yelikhau. Lub sijhawm uas cov Yixayee sawvdaws hla kev qhuav qhawv mus, cov pov thawj uas kwv Yawmsaub lub phij xab sib cog lus kuj sawv nres av qhuav qhawv hauv nruab nrab tus dej Yaladee mus txog thaum cov pejxeem sawvdaws hla tus dej Yaladee dhau tag huvsi. Thaum cov pejxeem sawvdaws hla tus dej Yaladee tag lawm, Yawmsaub hais rau Yausua tias, “Cia li xaiv kaum ob leeg hauv cov Yixayee, ib xeem ib leeg, thiab hais kom lawv mus khaws kaum ob lub pob zeb hauv tus dej Yaladee no ncaj ntawm lub chaw uas cov pov thawj txhais kotaw tsuj, nqa los tso rau ntawm lub chaw uas hmo no nej pw.” Ces Yausua txawm hu kaum ob leeg uas nws twb tsa hauv cov Yixayee ib xeem ib leeg lawm tuaj, thiab Yausua hais rau lawv tias, “Nej cia li mus rau ntawm nej tus Vajtswv Yawmsaub lub phij xab hauv ntej hauv nruab nrab tus dej Yaladee thiab ib leeg kwv ib lub pob zeb ntawm xub pwg los raws li txhua xeem Yixayee, xwv tej no thiaj ua tau lub chaw cim rau nej. Lwm hnub thaum nej tej menyuam nug nej tias, ‘Tej pob zeb no lub ntsiab yog dabtsi?’ mas nej yuav teb tias tus dej Yaladee tu nrho tsis ntws rau ntawm Yawmsaub lub phij xab sib cog lus hauv ntej. Thaum lub phij xab ntawd hla tus dej Yaladee, tus dej cia li tu nrho. Tej pob zeb no yuav ua lub chaw rau cov Yixayee nco ntsoov mus ib txhis.” Cov Yixayee ntawd kuj ua raws li Yausua hais. Lawv thiaj khaws kaum ob lub pob zeb hauv nruab nrab tus dej Yaladee los raws li txhua xeem Yixayee, ib yam li Yawmsaub tau hais rau Yausua lawd. Lawv thiaj kwv los rau ntawm lawv lub chaw tsuam thiab muab tso rau qhov ntawd. Thiab Yausua ho muab dua kaum ob lub pob zeb tib rau hauv nruab nrab tus dej Yaladee ncaj qhov chaw uas cov pov thawj uas kwv lub phij xab sib cog lus tsuj. Tej pob zeb ntawd kuj nyob los txog niaj hnub nimno. Cov pov thawj uas kwv lub phij xab sawv nres hauv nruab nrab tus dej Yaladee mus txog thaum txhua yam tiav raws li Yawmsaub kom Yausua hais rau cov pejxeem ua thiab raws li txhua yam uas Mauxe tau hais rau Yausua. Cov pejxeem kuj maj nroos hla mus. Thaum cov pejxeem sawvdaws hla mus tag lawm, Yawmsaub lub phij xab thiab cov pov thawj li hla mus ua cov pejxeem ntej. Xeem Lunpee thiab xeem Kas thiab ib nrab xeem Manaxe tuav rawv cuab yeej ua rog hla ua cov Yixayee ntej mus, raws li Mauxe tau hais rau lawv lawd. Cov uas tuav rawv cuab yeej ua rog muaj kwvlam plaub vam leej hla mus tab meeg Yawmsaub lub xubntiag mus rau ntawm lub nras tiaj Yelikhau npaj txhij yuav ua rog. Hnub ntawd Yawmsaub tau tsa Yausua ua loj tab meeg cov Yixayee sawvdaws, lawv thiaj hwm nws tag nws sim neej ib yam li lawv tau hwm Mauxe. Yawmsaub hais rau Yausua tias, “Cia li hais kom cov pov thawj uas kwv lub phij xab uas ntim Vajtswv tej lus nce hauv tus dej Yaladee los.” Yausua thiaj hais rau cov pov thawj tias, “Cia li nce hauv tus dej Yaladee los.” Thaum cov pov thawj uas kwv Yawmsaub lub phij xab sib cog lus nce hauv tus dej Yaladee los, thiab thaum cov pov thawj txhais xib taws tsuj kiag saum nqhuab, cov dej Yaladee rov ntws los rau qhov qub thiab nyab kiag ob sab ntug li qub. Cov pejxeem hla tus dej Yaladee mus yog hnub xiab kaum lub ib hlis, thiab mus tsuam chaw rau ntawm Kilakas uas nyob Yelikhau ciam teb sab hnub tuaj. Kaum ob lub pob zeb uas lawv khaws hauv tus dej Yaladee ntawd Yausua kuj muab tib rau ntawm Kilakas. Nws hais rau cov Yixayee tias, “Lwm hnub thaum nej tej menyuam nug leej txiv hais tias, ‘Tej pob zeb no lub ntsiab yog dabtsi?’ mas nej yuav qhia rau nej tej menyuam paub tias, ‘Cov Yixayee taug kev qhuav qhawv hla tus dej Yaladee.’ Yawmsaub uas yog nej tus Vajtswv ua rau tus dej Yaladee qhuav qhawv rau nej mus txog thaum nej hla mus tag huvsi, ib yam li nej tus Vajtswv Yawmsaub tau ua rau dej Hiavtxwv Liab qhuav qhawv mus txog thaum peb hla mus tag huvsi, kom ib tsoom neeg thoob ntiajteb thiaj paub tias Yawmsaub txhais tes muaj hwjchim loj thiab nej thiaj hwm thiab paub ntshai Yawmsaub uas yog nej tus Vajtswv mus ib txhis.” Thaum cov Amaulai tej vajntxwv sawvdaws uas nyob ntawm tus dej Yaladee sab hnub poob thiab cov Khana‑as tej vajntxwv sawvdaws uas nyob ntawm ntug hiavtxwv tau hnov tias Yawmsaub ua rau tus dej Yaladee qhuav mus txog thaum cov Yixayee hla dhau huvsi, mas lawv lub siab ntshai yaj tag, thiab lawv tsis muaj siab ua dabtsi li lawm vim yog tim cov Yixayee. Thaum ntawd Yawmsaub hais rau Yausua tias, “Xuas zeb hauvswm ua riam es muab cov Yixayee ua kevcai txiav, yog zaum uas ob.” Yausua thiaj muab zeb hauvswm ua riam thiab muab cov Yixayee ua kevcai txiav ntawm Kinpe‑e Ha‑alalau. Qhov uas Yausua muab lawv ua kevcai txiav yog vim cov txivneej Yixayee uas txawj ua rog sawvdaws uas tawm hauv Iyi tebchaws los kuj tuag tag rau ntu uas lawv tawm hauv Iyi tebchaws los taug kev rau hauv tebchaws moj sab qhua lawm. Txawm yog cov uas tawm hauv Iyi tebchaws los ua kevcai txiav txhua tus lawm, los txhua tus uas yug taug kev hauv tebchaws moj sab qhua tom qab uas tawm hauv Iyi tebchaws los tsis tau ua kevcai txiav. Rau qhov cov Yixayee taug kev hauv tebchaws moj sab qhua tau plaub caug xyoo mus txog thaum cov uas txawj ua rog uas tawm hauv Iyi tebchaws los tuag tag huvsi lawm, vim lawv tsis mloog Yawmsaub lus. Yawmsaub tau cog lus twv rau lawv tias nws yuav tsis kheev lawv pom lub tebchaws uas Yawmsaub cog lus rau lawv tej poj koob yawm txwv tias yuav pub rau peb, yog lub tebchaws uas muaj kua mis thiab zib ntab ntws nto. Lawv cov menyuam uas Yawmsaub pub los nyob lawv lub chaw ntawd, Yausua kuj muab ua kevcai txiav, vim lawv tsis tau ua kevcai txiav rau thaum lawv taug kev los. Thaum muab cov txivneej sawvdaws ua kevcai txiav tag lawm, lawv kuj so hauv lub zos mus txog thaum lawv mob zoo tag. Yawmsaub hais rau Yausua tias, “Hnub no kuv muab qhov uas nej poob ntsej muag hauv Iyi tebchaws dov pov tseg lawm.” Yog li no thiaj hu lub chaw ntawd ua Kilakas txog niaj hnub nimno. Thaum cov Yixayee tseem tsuam chaw nyob ntawm Kilakas mas hnub xiab kaum plaub lub ib hlis thaum yuav tsaus ntuj lawv txawm ua kevcai Hla Dhau rau ntawm lub tiaj Yelikhau. Dhau hnub uas ua kevcai Hla Dhau hnub tom qab lawv txawm tau noj tej qoob loo hauv lub tebchaws ntawd, yog tej qoob uas muab kib thiab tej ncuav tsis xyaw keeb. Mas hnub tom qab thaum lawv tau noj tej qoob loo hauv lub tebchaws ntawd lawm cov mana txawm tu nrho, cov Yixayee tsis muaj mana dua li lawm. Xyoo ntawd lawv tau noj tej qoob loo hauv lub tebchaws Khana‑as. Thaum Yausua nyob ze ntawm lub moos Yelikhau nws tsa muag ntsia pom ib tug txivneej tuav rawv ntaj sawv nres tom nws hauv ntej. Yausua txawm txav mus cuag nws thiab hais rau nws tias, “Koj tuaj peb tog los tuaj yeeb ncuab tog?” Tus ntawd hais tias, “Tsis yog. Kuv tuaj no yog tuaj ua Yawmsaub pab tub rog tus thawj.” Ces Yausua txawm khwb nkaus rau hauv av pe hawm thiab hais tias, “Yawg hlob, koj yuav kom kuv uas yog koj tus qhev ua dabtsi?” Mas Yawmsaub tus thawj tub rog hais rau Yausua tias, “Cia li hle koj nkawm khau ntawm koj kotaw, rau qhov lub chaw uas koj sawv no yog lub chaw uas dawb huv.” Yausua kuj ua raws li ntawd. Vim cov Yixayee tuaj ze mas luag thiaj muab lub moos Yelikhau kaw ruaj ruaj li, tsis muaj leejtwg tawm tau thiab nkag los tau li. Yawmsaub hais rau Yausua tias, “Kuv muab lub moos Yelikhau thiab tus vajntxwv thiab tej tub rog uas siab loj siab tuab cob rau hauv koj txhais tes lawm. Koj thiab koj cov tub rog huvsi yuav tsum mus ncig lub moos ib hnub ib ncig. Nej mus ncig li no rau hnub. Yuav muaj xya tus pov thawj coj xya lub raj kub yaj ua lub phij xab ntej. Mas hnub uas xya nej yuav tsum mus xya ncig thiab cov pov thawj tshuab raj kub yaj. Thaum lawv tshuab raj ua lub suab ntev loo, thaum nej hnov lub suab raj ntawd, mas cov pejxeem sawvdaws yuav ib txhij qw nrov nrov, mas lub moos ntawd tej ntsa loog yuav pob tag nrho, cov pejxeem yuav ncaj nraim txeem plaws rau hauv lub moos.” Noo tus tub Yausua thiaj hu cov pov thawj tuaj thiab hais tias, “Nej cia li kwv lub phij xab sib cog lus mus thiab cia xya tus pov thawj coj xya lub raj kub yaj ua Yawmsaub lub phij xab ntej.” Thiab nws hais rau cov pejxeem tias, “Cia li tawm mus ncig lub moos ntawd, thiab cia cov tub rog uas coj cuab yeej mus ua Yawmsaub lub phij xab ntej.” Thaum Yausua hais rau cov pejxeem tag lawd, xya tus pov thawj uas coj xya lub raj kub yaj rau ntawm Yawmsaub xubntiag kuj mus thiab tshuab raj. Mas Yawmsaub lub phij xab sib cog lus mus ua lawv qab. Cov tub rog uas tuav cuab yeej mus ua cov pov thawj uas tshuab raj ntej, thiab pab tub rog faj seeb tom qab kuj mus raws qab lub phij xab. Cov uas tshuab raj kuj tshuab tsis tu li. Ces Yausua hais rau cov pejxeem tias, “Nej tsis txhob qw, tsis txhob kheev leejtwg hnov nej lub suab. Nej yuav qos ncauj tsis txhob hais ib lo lus li mus txog hnub uas kuv hais kom nej qw, nej mam li qw.” Nws txawm kom Yawmsaub lub phij xab mus ncig lub moos li no, yog mus ncig ib lwm. Ces lawv rov los rau hauv lub zos pw ib hmos hauv lub zos. Hnub tom qab Yausua sawv ntxov tsees, cov pov thawj kuj rov kwv Yawmsaub lub phij xab mus. Thiab xya tus pov thawj uas coj xya lub raj kub yaj mus ua Yawmsaub lub phij xab ntej thiab tshuab raj tsis tu li. Cov tub rog tuav cuab yeej kuj mus ua lawv ntej thiab cov tub rog uas faj seeb tom qab kuj raws qab Yawmsaub lub phij xab, thiab tshuab raj kub yaj tsis tu li. Hnub ob lawv kuj mus ncig lub moos ntawd ib lwm ces rov los rau hauv lub zos. Lawv ua li no tau rau hnub. Hnub uas xya lawv sawv ntxov kaj ntug txoog thiab mus ncig lub moos ntawd ib yam li txeev mus xya lwm. Tib hnub ntawd lawv ncig lub moos xya lwm xwb. Lwm uas xya thaum cov pov thawj tshuab raj ua suab ntev loo, Yausua hais rau cov pejxeem tias, “Cia li qw lauj! Rau qhov Yawmsaub muab lub moos no rau nej lawm. Lub moos thiab txhua yam huvsi hauv lub moos ntawd yuav muab cais rau Yawmsaub es muab ua kom puam tsuaj. Tsuas yog tseg tus poj muag cev Lahaj thiab txhua tus uas nyob hauv nws lub tsev dim txojsia xwb, rau qhov nws pab zais peb cov neeg uas tshuaj tebchaws. Tiamsis nej mas yuav tsum tsis txhob kov tej uas cais es yuav muab ua kom puam tsuaj ntawd. Yog nej khaws tej uas nej muab cais ntawd ib yam dabtsi yuav, ces nej yuav ua rau cov Yixayee lub zos raug puam tsuaj thiab coj kev txom nyem los. Tiamsis tej nyiaj tej kub thiab tej twj siv uas yog xuas tooj liab thiab hlau ua yog yam uas dawb huv rau Yawmsaub, mas yuav tsum coj mus cia rau hauv Yawmsaub lub txhab.” Yog li no cov pejxeem thiaj li qw thiab cov pov thawj tshuab raj. Thaum cov pejxeem hnov lub suab raj nrov ntev loo, lawv kuj qw nrov heev, lub ntsa loog thiaj li pob tag nrho, cov pejxeem txhua tus thiaj ncaj nraim txeem plaws rau hauv lub moos thiab txeeb kiag lub moos ntawd. Lawv xuas ntaj rhuav tshem txhua yam puam tsuaj tag nrho huvsi tsis hais pojniam txivneej, tej laus tej hluas, tej nyuj tej yaj tej nees luav huvsi. Yausua hais rau ob tug uas mus tshuaj tebchaws ntawd tias, “Neb cia li mus rau hauv tus poj muag cev lub tsev thiab coj tus pojniam ntawd thiab txhua tus uas txheeb ze nws tawm los raws li neb tau cog lus twv cia rau nws lawd” Ob tug hluas uas mus tshuaj tebchaws thiaj li nkag mus coj Lahaj thiab nws niam nws txiv thiab nws tej nus thiab txhua tus uas txheeb ze nws tawm los. Ob tug coj lawv mus nyob rau nraum cov Yixayee lub yeej. Lawv muab lub moos ntawd thiab txhua yam uas nyob hauv hlawv kub hnyiab tag huvsi, tsuas yog tseg tej nyiaj tej kub thiab tej twj siv uas xuas tooj liab thiab hlau ua. Lawv coj tej ntawd los cia rau hauv lub txhab uas nyob hauv Yawmsaub lub tsev. Tiamsis tus poj muag cev Lahaj thiab nws txiv tsev neeg thiab txhua tus uas txheeb ze nws, Yausua kuj tseg lawv dim txojsia mas nws nrog cov Yixayee nyob los txog niaj hnub nimno vim yog nws zais ob tug tshuaj tebchaws uas Yausua xa mus tshuaj lub moos Yelikhau. Thaum ntawd Yausua tsawm foom tej lus no cia tias, “Yog leejtwg sawv los tsim lub moos Yelikhau no dua tshiab nws yuav raug tsawm foom tab meeg Yawmsaub. Yog leejtwg ua tej taw ntsa loog, nws tus tub hlob yuav puam tsuaj. Yog leejtwg tsim tej rooj loog nws tus tub ntxawg yuav puam tsuaj.” Yog li no Yawmsaub thiaj li nrog nraim Yausua thiab Yausua lub koob meej nrov nto moo lug thoob lub tebchaws. Cov Yixayee tsis mloog lus rau tej uas muab cais rau Yawmsaub, vim yog Akhas tau muab tej uas muab cais lawm qee yam los yuav, mas Yawmsaub txojkev npau taws thiaj li tshwm plaws rau cov Yixayee. Akhas yog Khami tus tub, nws yawg yog Xadi, nws yawg koob yog Xelag, yog xeem Yuda. Yausua txib neeg tawm hauv Yelikhau mus rau lub moos Ai uas nyob ze Npe‑avee uas nyob ntawm lub moos Npe‑ee sab hnub tuaj thiab hais rau lawv tias, “Cia li mus tshuaj saib lub tebchaws ntawd.” Lawv thiaj mus tshuaj saib lub moos Ai. Lawv rov qab los hais rau Yausua tias, “Tsis tag txib cov pejxeem sawvdaws mus, tsuas yog tso ob txhiab peb txhiab leej mus ntaus lub moos Ai xwb. Tsis tag yuav cia cov pejxeem sawvdaws nkim zog mus qhov ntawd, rau qhov lawv muaj neeg tsawg tsawg xwb.” Yog li ntawd thiaj muaj kwvlam peb txhiab leej mus ntaus lub moos tiamsis lawv khiav tawg tag ntawm cov neeg Ai rov qab los. Cov neeg Ai muab lawv tua tuag kwvlam peb caug rau leej thiab muab lawv ntiab khiav ntawm rooj loog mus txog lub moos Senpali, thiab muab lawv tua taug kev nqes hav los. Cov Yixayee thiaj ntshai ua siab ntsws yaj tag yam li dej. Ces Yausua txawm dua rhe nws lub tsho khwb nkaus rau hauv av rau ntawm Yawmsaub lub phij xab mus txog tsaus ntuj thiab Yixayee cov kev txwj laus kuj ua ib yam li ntawd. Lawv tsuab hmoov av rau saum lawv taubhau. Yausua thiaj hais tias, “Au Vajtswv Yawmsaub, ua cas koj coj haiv neeg no hla tus dej Yaladee los es muab peb cob rau hauv cov Amaulai txhais tes ua kom puam tsuaj? Kheev yog peb txaus siab nyob sab ntug dej Yaladee hnub tuaj. Au tus Tswv, kuv yuav hais li cas lauj vim cov Yixayee twb tig kiag khiav yeeb ncuab los lawm? Cov Khana‑as thiab cov neeg uas nyob hauv lub tebchaws no sawvdaws yuav tau hnov thiab yuav tuaj vij nkaus peb thiab muab peb lub npe rhuav kom ploj ntais hauv ntiajteb. Mas koj yuav ua li cas rau koj lub npe uas loj kawg?” Yawmsaub hais rau Yausua tias, “Cia li sawv tsees. Ua li cas koj yuav khwb nkaus li kod? Cov Yixayee tau ua txhaum, lawv fav xeeb rau tej lus cog tseg uas kuv muab cob rau lawv. Lawv qee tej uas muab cais rau kuv, lawv nyiag thiab lawv dag, lawv muab khaws cia nrog lawv tej qhov txhia chaw ua ke. Vim li no cov Yixayee tiv tsis tau lawv tej yeeb ncuab lawv thiaj tig kiag khiav ntawm lawv tej yeeb ncuab los lawm, rau qhov lawv yog yam uas raug muab cais ua kom puam tsuaj lawm. Kuv yuav tsis nrog nej nyob li lawm, yuav yog nej muab tej uas muab cais rau kuv ntawd ua kom puam tsuaj ploj hauv nej mus tso. Cia li sawv tsees, tu kom cov pejxeem dawb huv thiab hais tias, ‘Nej cia li tu kom nej dawb huv rau tagkis, rau qhov Yawmsaub uas yog Yixayee tus Vajtswv hais li no tias, “Cov Yixayee 'e, muaj tej yam uas muab cais rau Yawmsaub nyob hauv nej cov, nej thiaj tiv tsis tau nej tej yeeb ncuab mus txog thaum nej muab tej uas muab cais rau kuv ntawd rho tawm hauv nej mus.” Tagkis kaj ntug nej tuaj zuj zus ua ib xeem ib xeem. Xeem twg uas Yawmsaub ntes tau kuj tuaj zuj zus ua ib cum ib cum. Cum twg uas Yawmsaub ntes tau kuj tuaj zuj zus ua ib yig ib yig. Thiab yim twg uas Yawmsaub ntes tau kuj tuaj zuj zus ua ib leeg ib leeg. Tus uas ntes tau, nws yog tus uas muaj tej uas muab cais rau Yawmsaub. Nws yuav raug muab hlawv pov tseg, yog nws tus kheej thiab txhua yam uas nws muaj vim nws fav xeeb rau Yawmsaub tej lus cog tseg thiab nws ua yam uas txaj muag kawg li rau hauv cov Yixayee.’ ” Yausua thiaj sawv ntxov tsees thiab coj cov Yixayee tuaj zuj zus ua ib xeem ib xeem, mas xeem Yuda raug ntes. Nws thiaj coj zuj zus ib cum ib cum hauv xeem Yuda tuaj, mas Xelag cum thiaj raug ntes. Nws thiaj coj Xelag cum tuaj zuj zus ua ib yig ib yig mas Xadi yim raug ntes. Nws coj Xadi yim tuaj zuj zus ib leeg ib leeg mas Akhas thiaj raug ntes. Akhas yog Khami tus tub, nws yawg yog Xadi nws yawg koob yog Xelag, yog xeem Yuda. Yausua thiaj hais rau Akhas tias, “Tub 'e, cia li ua rau Yawmsaub uas yog cov Yixayee tus Vajtswv tau koob meej thiab qhuas nws. Cia li qhia rau kuv saib koj tau ua dabtsi lawm, tsis txhob zais ntawm kuv kiag li.” Mas Akhas teb Yausua tias, “Muaj tseeb tiag kuv tau ua txhaum rau Yawmsaub uas yog cov Yixayee tus Vajtswv, kuv tau ua li no. Tej qhov txhia chaw uas txeeb tau ntawd kuv pom ib lub tsho ntev Sina zoo nkauj heev thiab ob puas sekhee nyiaj thiab ib daim kub hnyav tsib caug sekhee. Kuv ntshaw tej no kuv thiaj muab los. Saib maj, tej no muab zais rau hauv av hauv kuv lub qab tsev ntaub, cov nyiaj nyob kiag hauv qab.” Yausua txawm txib neeg mus saib mas lawv dhia mus txog hauv nws lub tsev ntaub mag pom tej no muab faus rau hauv nws lub qab tsev ntaub, cov nyiaj nyob kiag hauv qab. Lawv thiaj muab rho tawm hauv lub tsev ntaub coj mus rau Yausua thiab cov Yixayee sawvdaws, thiab lawv muab tso tab meeg ntawm Yawmsaub xubntiag. Ces Yausua thiab cov Yixayee sawvdaws txawm coj Akhas uas yog Xelag tus tub thiab cov nyiaj thiab lub tsho ntev thiab daim kub ntawd thiab nws tej tub tej ntxhais, tej nyuj tej nees luav tej yaj tej tshis thiab nws lub tsev ntaub thiab txhua yam uas nws muaj huvsi coj mus rau hauv lub Hav Akhauj. Mas Yausua hais tias, “Ua cas koj coj kev ceeblaj txom nyem los raug peb? Hnub no Yawmsaub coj kev ceeblaj txom nyem los txog koj.” Cov Yixayee sawvdaws thiaj xuas pob zeb ntaus nws tuag thiab xuas pob zeb ntaus nws tsev neeg tuag thiab muab lawv hlawv pov tseg, thiab khaws pob zeb tib ua ib pawg loj rau saum lawv nyob los txog niaj hnub nimno. Mas Yawmsaub thiaj thim nws txojkev npau taws heev. Vim li ntawd niaj hnub nimno luag tseem hu lub chaw ntawd tias Hav Akhauj. Yawmsaub hais rau Yausua tias, “Tsis txhob ntshai tsis txhob poob siab. Cia li coj cov tub rog huvsi nrog koj mus, cia li sawv tsees mus lawm pem lub moos Ai. Kuv twb muab lub moos Ai tus vajntxwv thiab nws cov pejxeem thiab nws lub moos thiab nws lub tebchaws rau hauv koj txhais tes lawm. Koj yuav tsum ua rau lub moos Ai thiab Ai tus vajntxwv ib yam nkaus li koj twb ua rau Yelikhau thiab Yelikhau tus vajntxwv lawd. Tej qhov txhia chaw uas nej txeeb tau los thiab tej tsiaj txhu nej cia li coj mus ua nej tug. Koj yuav npaj ib pab tub rog mus nraim cev rau sab ped nraum lub moos tos.” Yausua thiab cov tub rog sawvdaws txawm sawv tsees mus ntaus lub moos Ai. Yausua xaiv peb vam tus tub rog uas siab loj siab tuab kom lawv tawm mus hmo ntuj, mas nws hais rau lawv tias, “Ua li no 'ov, nej mus nraim cev ped nraum lub moos, tsis txhob nyob deb ntawm lub moos, tiamsis txhua tus npaj txhij tos. Mas kuv thiab cov tub rog sawvdaws uas nrog kuv ua ke yuav mus kom ze ntawm lub moos. Mas thaum lawv tawm tuaj ntaus peb yam li thawj zaug ces peb yuav thim loo khiav lawv. Lawv yuav tawm tuaj caum peb mus txog thaum peb ntxias lawv tawm tuaj dhau lub moos deb. Mas lawv yuav hais tias, ‘Cov Yixayee khiav peb yam li thawj zaug lawm.’ Peb yuav ua txuj khiav li no, ces nej cov uas nraim cev cia li sawv tsees los txeeb kiag lub moos ntawd, rau qhov Yawmsaub uas yog nej tus Vajtswv yuav muab lub moos rau hauv nej txhais tes. Thaum nej txeeb kiag tau lub moos ntawd lawd nej cia li muab hlawv, cia li ua raws li Yawmsaub hais. Kuv hais kom nej ua li no nawj.” Mas Yausua thiaj kom lawv tawm mus. Lawv kuj mus nraim cev rau ntawm Npe‑ee thiab Ai ntu nruab nrab, uas yog sab hnub poob ntawm lub moos Ai. Tiamsis hmo ntawd Yausua nrog cov pejxeem nyob ua ke. Yausua sawv ntxov los txhij tub rog thiab nws nrog Yixayee cov kev txwj laus coj cov tub rog mus pem lub moos Ai. Cov tub rog uas nrog nws mus sawvdaws txawm mus ze lub moos. Lawv tsuam chaw rau ntawm lub moos Ai sab ped, muaj ib lub hav quas lawv thiab lub moos Ai. Thiab nws faib kwvlam tsib txhiab leej tub rog kom lawv nraim cev rau ntawm lub moos Npe‑ee thiab lub moos Ai ntu nruab nrab ntawm lub moos Ai sab hnub poob. Lawv faib cov tub rog li no, pab tub rog uas coob nyob ntawm lub moos Ai sab ped thiab pab uas faj seeb tom qab nyob ntawm lub moos Ai sab hnub poob. Tiamsis hmo ntawd Yausua nyob hauv lub hav. Thaum lub moos Ai tus vajntxwv pom li ntawd mas nws thiab nws cov tub rog sawvdaws, uas yog cov txivneej hauv lub moos sawvdaws, sawv ntxov dhia mus ntaus cov Yixayee ntawm ntav toj Alanpa, tiamsis nws tsis paub tias muaj ib pab tub rog nraim cev tos ntaus nws nyob ntawm lub moos ib sab. Yausua thiab cov Yixayee sawvdaws ua txuj li uas swb lawv mas pheej khiav zuj zus mus rau pem tebchaws moj sab qhua. Lawv hu cov txivneej sawvdaws hauv lub moos Ai mus caum cov Yixayee, mas Yausua ntxias lawv caum nws mus deb zuj zus ntawm lub moos. Tsis tshuav ib tug txivneej uas nyob hauv lub moos Ai thiab lub moos Npe‑ee uas tsis caum cov Yixayee mus li. Lawv caum cov Yixayee mus, muab rooj loog qheb lug cia. Mas Yawmsaub hais rau Yausua tias, “Cia li taw rab hmuv hauv koj txhais tes rau tom lub moos Ai, rau qhov kuv yuav muab lub moos ntawd rau hauv koj txhais tes.” Ces Yausua txawm taw nkaus rab hmuv hauv nws txhais tes rau tom lub moos. Thaum Yausua taw kiag nws txhais tes mas cov tub rog uas nraim cev txawm sawv pes tsees ntawm lub chaw nraim thiab dhia nkag plaws rau hauv lub moos, txeeb kiag tau thiab muab lub moos ntawd hlawv kiag. Thaum cov neeg Ai tig saib qab ua ciav pom pa taws hauv lub moos ncho mus nto plaws saum ntuj, ces lawv tsis tau kev khiav mus qhovtwg li, rau qhov cov tub rog uas khiav mus rau tebchaws moj sab qhua kuj tig rov los tua cov neeg Ai uas caum qab. Thaum Yausua thiab cov Yixayee pom tias cov uas nraim cev twb txeeb tau lub moos lawm thiab pa taws kub lub moos ncho nto ntuj lawm, lawv kuj tig loo ntaus cov neeg Ai. Cov uas txeem rau hauv lub moos kuj tawm tuaj ntaus lawv, cov neeg Ai thiaj nyob rau hauv nruab nrab cov Yixayee, cov Yixayee nyob puag ncig sab ub sab no. Cov Yixayee ntaus ua lawv tsis tshuav ib tug ciaj thiab tsis tshuav ib tug khiav dim li. Tiamsis lawv ntes tau tus vajntxwv hauv lub moos Ai tseem ciaj coj los rau Yausua. Thaum cov Yixayee xuas ntaj tua cov neeg Ai uas caum lawv mus rau tom tebchaws moj sab qhua tuag tag huvsi tsis tshuav ib tug li, mas cov Yixayee sawvdaws rov mus rau hauv lub moos, es xuas ntaj tua lub moos ntawd. Txhua tus uas nyob hauv lub moos Ai tuag tag rau hnub ntawd suav txivneej thiab pojniam huvsi yog ib vam ob txhiab leej. Yausua tsis tau nkaum tes qhov uas nws taw rab hmuv ntawd mus txog thaum uas nws ua rau cov neeg hauv lub moos Ai puam tsuaj tag. Tej tsiaj txhu thiab tej qhov txhia chaw uas txeeb tau hauv lub moos ntawd los mas cov Yixayee coj los ua lawv tug raws li tej lus uas Yawmsaub hais rau Yausua. Ua li no Yausua thiaj muab lub moos Ai hlawv kub hnyiab tag ua tej niag pawg cia txog niaj hnub nimno. Thiab nws muab tus vajntxwv hauv lub moos Ai dai caj dab saum ntoo mus txog tsaus ntuj. Thaum hnub poob qho lawd Yausua hais kom lawv muab nws lub cev tuag txo saum ntoo coj mus pov tseg rau ntawm txojkev uas nkag rau hauv rooj loog, mas lawv muab pob zeb los tsuam ua ib pawg loj loj nyob txog niaj hnub nimno. Yausua txawm ua ib lub thaj xyeem rau Yawmsaub uas yog cov Yixayee tus Vajtswv saum lub roob Enpas, raws li Yawmsaub tus tub qhe Mauxe tau hais rau cov Yixayee. Nws ua lub thaj raws li uas sau cia rau hauv Mauxe phau ntawv kevcai hais tias, “Cia li muab tej pob zeb uas tsis tau muab txhwm muab npawm los ua xwb, yog tej pob zeb uas tsis tau raug hniav hlau hniav riam li.” Mas lawv muab tsiaj ua kevcai hlawv huvsi xyeem rau Yawmsaub saum lub thaj ntawd thiab tua tsiaj ua kevcai xyeem sib raug zoo. Thiab Yausua sau Mauxe txoj kevcai uas Mauxe twb sau cia lawd rau tej pob zeb ntawm lub thaj ntawd tab meeg cov Yixayee. Ib tsoom Yixayee sawvdaws, tsis hais lwm haiv neeg uas nrog lawv nyob thiab cov uas yug hauv cov Yixayee thiab cov kev txwj laus thiab cov nom tswv thiab cov uas tu plaub sawv ntsug ntawm lub phij xab ob sab, tab meeg cov Levi uas yog pov thawj kwv Yawmsaub lub phij xab sib cog lus. Ib nrab sawv ncaj ntawm lub roob Kelixi, ib nrab sawv ncaj ntawm lub roob Enpas, raws li Yawmsaub tus tub qhe Mauxe tau hais ua ntej kom cov Levi foom koob hmoov rau cov Yixayee. Dhau ntawd Yausua thiaj nyeem txoj kevcai no txhua lo lus huvsi rau lawv mloog, yog tej lus foom koob hmoov thiab tej lus tsawm foom, raws li txhua yam uas sau rau hauv phau ntawv kevcai. Tsis tshuav ib lo lus uas Mauxe tau hais cia es Yausua tsis muab nyeem tab meeg ib tsoom Yixayee sawvdaws thiab tej pojniam menyuam thiab lwm haiv neeg uas nrog lawv nyob mloog. Thaum txhua tus vajntxwv uas nyob sab dej Yaladee hnub poob, cov uas nyob pem toj siab thiab nyob hauv nruab tiag raws ntug Hiavtxwv Loj mus txog ntua Lenpanoo, yog cov Hithai, cov Amaulai, cov Khana‑as, cov Pelixai, cov Hivai thiab cov Yenpu tau hnov tej xov no lawv txawm ua ib lub siab sau tub rog tuaj ua rog rau Yausua thiab cov Yixayee. Tiamsis thaum cov neeg hauv lub moos Kinpe‑oo tau hnov xov txog tej uas Yausua ua rau lub moos Yelikhau thiab lub moos Ai, ces lawv txawm nrhiav tswvyim dag ntxias. Lawv mus npaj zaub mov thiab muab tej seev tsaj ntuag ntuag rau lawv tej nees luav thauj thiab npaj tej hnab tawv qub qub uas ntim cawv txiv hmab uas ntuag thiab muab ntxiv lawm, thiab lawv rau tej khau ntuag ntuag uas muab ntxiv lawm thiab hnav tej ris tsho khaub hlab thiab tej mov uas lawv ntim kuj qhuav thiab tuaj pwm lawm. Lawv tuaj cuag Yausua hauv lub yeej ntawm Kilakas mas hais rau nws thiab cov Yixayee tias, “Peb tuaj lub tebchaws uas deb kawg li tuaj, mas thov nej nrog peb cog lus sib raug zoo.” Tiamsis cov Yixayee hais rau cov Hivai ntawd tias, “Tej zaum nej nyob ze ze hauv peb cov no mas peb yuav ua li cas nrog nej sib cog lus tau?” Lawv hais rau Yausua tias, “Peb yog koj li tub qhe.” Yausua txawm hais rau lawv tias, “Nej yog leejtwg thiab nej tuaj qhovtwg tuaj?” Lawv teb nws tias, “Vim yog muaj Yawmsaub uas yog nej tus Vajtswv lub npe, peb cov uas yog koj li tub qhe thiaj li tuaj deb deb li tuaj. Peb twb hnov xov txog Yawmsaub thiab txog txhua yam uas nws ua hauv Iyi tebchaws, thiab txhua yam uas nws ua rau cov Amaulai ob tug vajntxwv uas nyob sab dej Yaladee hnub tuaj, yog Hesanpoo tus vajntxwv Xihoo thiab Npasas tus vajntxwv Aus uas nyob hauv Athalau. Peb cov kev txwj laus thiab cov uas nyob hauv peb lub tebchaws sawvdaws thiaj hais rau peb tias, ‘Cia li ntim su taug kev mus cuag lawv thiab hais rau lawv tias, “Peb yog nej li tub qhe, thov nej nrog peb cog lus sib raug zoo.” ’ Peb tej ncuav no mas hnub uas peb sawv kev tuaj peb ntim sov so coj tuaj noj taug kev, tiamsis nimno saib maj twb qhuav tuaj pwm tag lawm. Tej hnab no mas muab tej hnab tshiab tshiab ntim cawv txiv hmab tuaj, tiamsis saib maj twb to tag lawm. Tej ris tsho thiab tej khau kuj khaub hlab tag vim yog kev deb heev.” Cov Yixayee txawm noj lawv tsum mov ntawd, lawv tsis xub nug Yawmsaub tso. Thiab Yausua kuj nrog lawv cog lus sib raug zoo thiab cog lus tias yuav tseg lawv txojsia cia, thiab cov thawj hauv cov pejxeem kuj cog lus twv li ntawd rau lawv. Thaum uas cog lus li ntawd tau peb hnub lawd kuj hnov tias cov neeg ntawd twb nyob ze ze cov Yixayee thiab nyob hauv lawv nruab nrab. Cov Yixayee sawv kev mus tau peb hnub kuj mus txog lawv tej moos. Lawv tej moos yog Kinpe‑oo, Khefila, Npe‑awlau thiab Khiliya Ye‑ali. Cov Yixayee tsis tua lawv rau qhov cov thawj twb tuav Yawmsaub uas yog cov Yixayee tus Vajtswv lub npe cog lus twv lawm. Ib tsoom pejxeem sawvdaws thiaj yws yws cov thawj. Mas cov thawj sawvdaws thiaj hais rau cov pejxeem sawvdaws tias, “Peb twb tuav Yawmsaub uas yog cov Yixayee tus Vajtswv lub npe cog lus twv rau lawv lawm, mas peb kov tsis tau lawv li lawm. Peb yuav ua li no rau lawv, peb yuav tseg lawv txojsia cia ntshai tsam Yawmsaub chim rau peb vim yog peb tau cog lus twv rau lawv lawm.” Cov thawj thiaj hais rau lawv tias, “Cia li tseg lawv txojsia nyob.” Vim li ntawd cov Kinpe‑oo thiaj ua cov uas txiav taws kwv dej rau cov Yixayee, raws li cov thawj hais cia lawd. Yausua txawm hu cov Kinpe‑oo tuaj mas nws hais rau lawv tias, “Ua li cas nej twb nyob hauv peb nruab nrab los nej tseem tuaj dag peb tias nej nyob deb kawg? Vim li no nej raug lo lus foom tsis zoo lawm mas nej ib txhia yuav ua qhev txiav taws kwv dej rau kuv tus Vajtswv lub tsev ib txhis.” Lawv teb Yausua tias, “Vim yog luag qhia rau peb uas yog koj li tub qhe paub tseeb tias Yawmsaub uas yog koj tus Vajtswv tau hais rau Vajtswv tus tub qhe Mauxe kom muab lub tebchaws no huvsi rau koj, thiab muab lub tebchaws no tej neeg ua kom puam tsuaj tag. Vim li no peb thiaj ntshai heev tsam nej txov peb txojsia peb thiaj dag li no. Nimno peb nyob hauv koj xib teg lawm ces cia li ua rau peb raws li uas koj pom zoo thiab raug cai.” Yausua thiaj ua li ntawd rau lawv, cia lawv dim cov Yixayee txhais tes thiab tsis tua lawv. Mas hnub ntawd Yausua thiaj kom lawv ua cov uas txiav taws kwv dej rau cov Yixayee thiab rau Yawmsaub lub thaj los txog niaj hnub nimno rau hauv lub chaw uas Yawmsaub yuav xaiv cia. Thaum Yeluxalees tus vajntxwv Adaunixede hnov tias Yausua txeeb tau lub moos Ai thiab muab ua puam tsuaj tag, thiab ua rau lub moos Ai thiab ua rau Ai tus vajntxwv ib yam nkaus li nws tau ua rau lub moos Yelikhau thiab Yelikhau tus vajntxwv, thiab hnov tias cov neeg Kinpe‑oo tau nrog cov Yixayee sib raug zoo thiab nrog lawv nyob lawm, mas nws ntshai heev kawg rau qhov lub moos Kinpe‑oo yog lub niag moos loj ib yam li tej vajntxwv lub moos, tseem loj dua lub moos Ai thiab cov txivneej hauv lub moos ntawd puavleej muaj zog. Vim li no Yeluxalees tus vajntxwv Adaunixede thiaj hu Heploo tus vajntxwv Hauhas thiab Yamu tus vajntxwv Pilas thiab Lakhi tus vajntxwv Yafia thiab Eloos tus vajntxwv Denpi hais tias, “Thov nej tuaj cuag kuv thiab pab kuv ntaus lub moos Kinpe‑oo rau qhov lub moos ntawd twb nrog Yausua thiab cov Yixayee sib raug zoo lawm.” Mas cov Amaulai tsib tug vajntxwv ntawd, yog Yeluxalees tus vajntxwv, Heploo tus vajntxwv, Yamu tus vajntxwv, Lakhi tus vajntxwv thiab Eloos tus vajntxwv txawm txhij tub rog thiab coj lawv tej tub rog sawvdaws tawm mus ua yeej ua rog rau lub moos Kinpe‑oo. Cov neeg Kinpe‑oo thiaj xa xov tuaj hais rau Yausua hauv lub yeej ntawm Kilakas tias, “Thov koj tsis txhob nkaum tes ntawm koj cov tub qhe. Thov maj nroos tuaj pab kom peb dim, pab peb lauj! Rau qhov cov Amaulai tej vajntxwv uas nyob pem toj siab sawvdaws sau nthwv tuaj ntaus peb lawm.” Ces Yausua txawm tawm hauv Kilika mus, thiab nws cov tub rog sawvdaws nrog nws mus, yog cov tub rog uas siab loj siab tuab sawvdaws. Yawmsaub hais rau Yausua tias, “Tsis txhob ntshai lawv li rau qhov kuv twb muab lawv rau hauv koj txhais tes lawm, yuav tsis muaj ib tug sawv tiv tau koj li.” Yog li ntawd Yausua thiaj tawm ntawm Kilakas mus ib hmos mus ntaus kiag lawv. Yawmsaub ua rau lawv ntshai ras zom zaws ntawm cov Yixayee xubntiag, mas cov Yixayee tua lawv tuag coob kawg li ntawm Kinpe‑oo thiab caum lawv taug txojkev uas mus rau pem lub moos Npe Hauloo thiab caum tua lawv mus txog ntua lub moos Axekha thiab lub moos Makheda. Thaum lawv tabtom khiav cov Yixayee taug txojkev uas nqes mus rau Npe Hauloo ntawd Yawmsaub tso lawg loj loj poob saum ntuj los ntaus lawv mus txog ntua lub moos Axekha, lawv kuj tuag. Mas cov uas raug lawg ntaus tuag coob dua cov uas cov Yixayee xuas ntaj tua tuag. Hnub uas Yawmsaub muab cov Amaulai rau cov Yixayee ntawd mas Yausua hais rau Yawmsaub. Nws hais tab meeg cov Yixayee tias, “Lub hnub, cia li nres saum lub moos Kinpe‑oo, lub hli cia li nres saum lub hav Aiyaloo.” Lub hnub txawm nres thiab lub hli txawm nres mus txog thaum cov neeg ua pauj rau cov yeeb ncuab tag. Zaj no twb muab sau cia rau hauv phau ntawv Yasa. Lub hnub nres twjywm saum ntuj tsis poob raws li lub caij kwvlam tau ib hnub. Hnub uas Yawmsaub mloog neeg lus yam li hnub ntawd mas txawm yog thaum ub lossis los rau yav tom qab no los tsis muaj ib zaug li lawm, vim yog Yawmsaub ua rog pab cov Yixayee. Mas Yausua thiab cov Yixayee sawvdaws thiaj rov qab los txog lawv lub yeej ntawm Kilakas. Tsib tug vajntxwv ntawd mus tsiv nraim rau hauv lub qhov tsua ntawm Makheda. Yausua hnov tias muaj neeg pom tsib tug vajntxwv tsiv nraim hauv lub qhov tsua ntawm Makheda. Yausua thiaj hais tias, “Dov tej txhib zeb loj loj los txhaws lub rooj qhov tsua thiab tso tub rog zov. Tiamsis nej tsis txhob nyob twjywm ntawd, cia li caum nej cov yeeb ncuab qab mus tua cov tub rog uas faj tom qab, tsis txhob cia lawv rov nkag tau rau hauv lawv tej moos, rau qhov Yawmsaub uas yog nej tus Vajtswv twb muab lawv rau hauv nej txhais tes lawm.” Thaum Yausua thiab cov Yixayee tua cov neeg coob ntawd puam tsuaj tag lawd, thiab cov uas tshuav khiav dim rov qab los nkag rau hauv tej moos uas muaj ntsa loog lawd, mas cov tub rog sawvdaws kuj rov los kaj los huv los cuag Yausua hauv lub yeej ntawm Makheda. Tsis muaj ib tug yuav kav tsa ncauj hais txog cov Yixayee li. Mas Yausua hais tias, “Cia li qheb lub qhov tsua coj tsib tug vajntxwv ntawd tawm los rau kuv.” Lawv ua raws li nws hais thiaj coj tsib tug vajntxwv ntawd tawm hauv lub qhov tsua los cuag nws, yog Yeluxalees tus vajntxwv, Heploo tus vajntxwv, Yamu tus vajntxwv, Lakhi tus vajntxwv thiab Eloos tus vajntxwv. Thaum lawv coj cov vajntxwv ntawd los rau Yausua nws thiaj hu cov txivneej Yixayee sawvdaws thiab hais rau cov thawj rog uas nrog nws tawm mus ua rog tias, “Cia li txav los ze muab kotaw tsuj cov vajntxwv no caj dab.” Mas lawv kuj txav los ze xuas kotaw tsuj lawv caj dab. Thiab Yausua hais rau lawv tias, “Tsis txhob ntshai tsis txhob poob siab, cia li ua khov kho ua siab loj siab tuab rau qhov Yawmsaub yuav ua rau nej tej yeeb ncuab txhua tus uas nej mus ua rog zoo ib yam li no.” Dhau ntawd Yausua thiaj muab tsib tug vajntxwv ntawd ntaus tuag thiab muab dai rau saum tsib tug ntoo, muab dai rau saum mus txog tsaus ntuj. Thaum hnub poob qho lawd Yausua hais kom lawv mus txo cov cev tuag ntawd saum ntoo los pov tseg rau hauv lub qhov tsua uas cov vajntxwv ntawd mus tsiv nraim. Thiab lawv muab tej pob zeb loj loj los txhaws lub rooj qho cia nyob txog niaj hnub nimno. Hnub ntawd Yausua kuj txeeb tau lub moos Makheda thiab xuas ntaj tua lub moos ntawd thiab tua tus vajntxwv hauv lub moos ntawd. Nws muab txhua tus ua puam tsuaj tag nrho tsis tseg ib tug li. Nws ua rau Makheda tus vajntxwv ib yam li nws twb ua rau Yelikhau tus vajntxwv lawd. Yausua thiab cov Yixayee sawvdaws txawm tawm ntawm lub moos Makheda mus txog lub moos Lina thiab mus ua rog rau lub moos Lina. Yawmsaub muab lub moos ntawd thiab tus vajntxwv hauv lub moos ntawd rau cov Yixayee txhais tes, thiab Yausua xuas ntaj tua lub moos thiab tua txhua tus uas nyob hauv tsis tseg ib tug rau hauv lub moos li. Nws ua rau Lina tus vajntxwv ib yam li ua rau Yelikhau tus vajntxwv lawd. Yausua thiab cov Yixayee sawvdaws ho tawm ntawm lub moos Lina mus txog lub moos Lakhi mas vij lub moos ntawd thiab ua rog rau. Yawmsaub kuj muab lub moos Lakhi rau hauv cov Yixayee txhais tes, mas hnub uas ob Yausua txeeb tau lub moos ntawd thiab xuas ntaj tua lub moos thiab txhua tus uas nyob hauv ib yam li nws twb ua rau lub moos Lina lawd. Zaum ntawd Kexaw tus vajntxwv Haulas tuaj pab lub moos Lakhi, mas Yausua tua nws thiab nws cov neeg tuag tag tsis tseg ib tug li. Yausua thiab cov Yixayee sawvdaws txawm tawm ntawm lub moos Lakhi mus txog lub moos Eloos, mas vij lub moos ntawd thiab ua rog rau. Mas tib hnub ntawd lawv txeeb tau lub moos ntawd thiab xuas ntaj tua lub moos. Hnub ntawd Yausua muab txhua tus hauv lub moos ntawd ua puam tsuaj tag huvsi ib yam li nws twb ua rau lub moos Lakhi lawd. Yausua thiab cov Yixayee sawvdaws txawm tawm ntawm lub moos Eloos mus pem lub moos Heploo thiab lawv ua rog rau, thiab txeeb tau lub moos ntawd. Lawv xuas ntaj tua lub moos ntawd thiab tus vajntxwv thiab tej zej zog ib ncig thiab tua txhua tus huvsi tsis tseg ib tug li, ib yam li nws twb ua rau lub moos Eloos, thiab muab lub moos thiab txhua tus uas nyob hauv ua puam tsuaj tag huvsi. Yausua thiab cov Yixayee txawm tig los rau ntawm lub moos Denpi thiab ua rog rau. Lawv txeeb tau lub moos thiab tus vajntxwv thiab tej zej zog ib ncig huvsi. Lawv xuas ntaj tua cov ntawd tuag thiab ua rau txhua tus uas nyob hauv puam tsuaj tag huvsi tsis tseg ib tug li. Nws ua rau lub moos Denpi thiab Denpi tus vajntxwv ib yam li nws twb ua rau lub moos Heploo thiab lub moos Lina thiab Lina tus vajntxwv lawd. Yausua ntaus yeej lub tebchaws huvsi li uas hais no, yog tebchaws toj siab thiab Neke tebchaws thiab tej pov roob Sefela thiab tej ntav toj, thiab txhua tus vajntxwv uas nyob hauv tebchaws ntawd tsis tseg ib tug li. Nws ua rau txhua tus uas ciaj sia puam tsuaj tag raws li Yawmsaub uas yog cov Yixayee tus Vajtswv tau hais lawd. Yausua ntaus luag swb tag txij ntua Khade Npania mus txog lub moos Kaxa, thiab txij ntua tebchaws Kausee mus txog lub moos Kinpe‑oo. Yausua ua tib zaug txeeb tau cov vajntxwv no huvsi thiab lawv tej tebchaws, rau qhov Yawmsaub uas yog cov Yixayee tus Vajtswv tau pab cov Yixayee ua rog. Mas Yausua thiab cov Yixayee sawvdaws thiaj rov los rau lub yeej ntawm Kilakas. Thaum lub moos Haxau tus vajntxwv Yanpi tau hnov tej xov no nws txawm txib neeg mus hu lub moos Madoo tus vajntxwv Yaunpam, thiab lub moos Siloo tus vajntxwv thiab lub moos Asa tus vajntxwv, thiab hu cov vajntxwv uas nyob pem toj siab sab tebchaws ped thiab nyob hauv Alanpa ntawm Khinelau sab nrad, thiab hauv tej pov roob Sefela thiab hauv Nafaudau uas nyob sab hnub poob, thiab hu cov Khana‑as uas nyob sab hnub tuaj thiab sab hnub poob, thiab hu cov Amaulai, cov Hithai, cov Pelixai, cov Yenpu uas nyob pem toj siab thiab cov Hivai uas nyob ntawm taw roob Hawmoo hauv Mixapa tebchaws. Cov vajntxwv hauv tej moos ntawd kuj nrog lawv tej tub rog huvsi tawm tuaj coob kawg li, ua tej niag pab tub rog coob npaum li tej xuab zeb ntawm ntug hiavtxwv, muaj nees thiab tsheb nees ua rog coob kawg. Cov vajntxwv no sau zog ua ke tuaj ua yeej rau ntawm lub hav dej Meloo yuav ua rog rau cov Yixayee. Mas Yawmsaub hais rau Yausua tias, “Koj tsis txhob ntshai lawv li, rau qhov tagkis lub sijhawm no kuv yuav muab lawv tag nrho rau cov Yixayee, lawv yuav raug tua tuag huvsi. Koj yuav txiav lawv cov nees tej leeg raws thiab muab lawv tej tsheb nees ua rog hlawv huvsi.” Yausua thiab nws cov tub rog sawvdaws thiaj txeem plaws mus ntaus kiag lawv hauv lub hav Meloo. Yawmsaub muab lawv cob rau hauv cov Yixayee txhais tes. Cov Yixayee tua lawv thiab caum lawv mus txog ntua lub tuam nroog Xaidoo thiab txog Milefauma‑i, thiab caum lawv mus rau sab hnub tuaj mus txog lub hav Mixape, muab lawv tua tuag tag tsis tseg ib tug ciaj sia li. Yausua ua rau lawv raws nraim li uas Yawmsaub hais, nws txiav lawv cov nees tej leeg raws thiab hlawv tej tsheb ua rog. Thaum ntawd Yausua tig rov los txeeb lub moos Haxau thiab xuas ntaj tua tus vajntxwv hauv lub moos ntawd. Ua ntej ntawd Haxau ua thawj kav tag nrho tej tebchaws ntawd. Yausua lawv xuas ntaj tua txhua tus uas nyob hauv lub moos ntawd thiab ua kom puam tsuaj tag huvsi, tsis tshuav ib tug ciaj sia li, thiab nws muab lub moos Haxau hlawv pov tseg. Yausua txeeb tau cov vajntxwv ntawd tej moos huvsi thiab ntes tau cov vajntxwv ntawd huvsi, thiab xuas ntaj tua ua kom puam tsuaj tag huvsi raws li Mauxe uas yog Yawmsaub tus tub qhe hais cia lawd. Tiamsis tej moos uas nyob saum tej lub nyuag pov roob mas cov Yixayee tsis muab hlawv, Yausua tsuas hlawv lub moos Haxau xwb. Tej qhov txhia chaw uas txeeb tau huvsi ntawm tej moos ntawd thiab tej tsiaj txhu mas cov Yixayee kuj coj mus yuav ua lawv tug. Lawv xuas ntaj tua txhua tus neeg huvsi puam tsuaj tuag tag huvsi tsis tseg ib tug ciaj sia li. Yawmsaub hais li cas rau nws tus tub qhe Mauxe lawm Mauxe kuj hais li ntawd rau Yausua mas Yausua ua raws nraim. Nws tsis tseg ib yam dabtsi uas Yawmsaub hais rau Mauxe lawd tsis ua. Yausua txeeb tau lub tebchaws ntawd huvsi li uas hais no, yog tej toj siab thiab Neke thiab Kausee tebchaws huvsi, thiab tej pov roob Sefela thiab Alanpa thiab tej toj siab thiab tej nruab tiag hauv Yixayee, txij ntua ntawm roob Halab uas sawv ntawm Xe‑i mus txog ntua Npa‑as Kas hauv lub hav Lenpanoo ntawm taw roob Hawmoo. Yausua ntes txhua tus vajntxwv hauv tej tebchaws ntawd ntaus thiab tua pov tseg. Yausua ua rog rau tej vajntxwv ntawd txhua tus ntev loo. Tsis muaj ib lub moos uas yuav nrog cov Yixayee sib raug zoo, tsuas yog tshwj cov Hivai xwb uas nyob hauv lub moos Kinpe‑oo, dua li mas lawv ua rog ntaus tau huvsi los xwb. Vim yog Yawmsaub ua rau lawv lub siab tawv xwv lawv thiaj sawv los ua rog rau cov Yixayee mas thiaj raug ua kom puam tsuaj huvsi, tsis tau txais kev khuvleej, tiamsis raug muab ua puam tsuaj ntxuav du lug, raws li uas Yawmsaub hais rau Mauxe. Thaum ntawd Yausua tau tuaj muab cov Anaj uas nyob pem toj siab ntxuav pov tseg kom tawm hauv Heploo, Denpi thiab Anab thiab tawm hauv tej toj siab hauv Yuda thiab tej toj siab hauv Yixayee huvsi. Yausua muab tej neeg no thiab lawv tej moos ua puam tsuaj tag huvsi. Tsis tshuav ib tug neeg Anaj nyob hauv cov Yixayee lub tebchaws li, tsuas yog tshuav ib txhia nyob hauv Kaxa thiab Ka thiab Asadau. Ua li uas hais no Yausua txeeb tau lub tebchaws tag nrho raws li txhua lo lus uas Yawmsaub hais rau Mauxe. Thiab Yausua muab faib ua qub txeeg qub teg rau cov Yixayee raws li lawv txhua xeem li feem. Mas lub tebchaws ntawd thiaj so tsis ua rog lawm. No mus yog tej vajntxwv uas cov Yixayee kov yeej thiab txeeb tau lawv tej tebchaws uas nyob ntawm dej Yaladee sab tid uas yog sab hnub tuaj, yog txij ntua lub hav Anoo mus txog lub roob Hawmoo thiab tag nrho Alanpa sab hnub tuaj huvsi. Lawv ntaus yeej cov Amaulai tus vajntxwv Xihoo uas nyob hauv lub moos Hesanpoo. Nws kav txij ntua lub moos Alau‑aw uas nyob ntawm ntug hav Anoo thiab txij ntua lub plawv hav ntawd mus txog tus dej Yanpo uas yog cov Asmoo ciam teb, tej no yog Kile‑a tebchaws ib nrab, thiab kav Alanpa sab hnub tuaj mus txog ntua pem hiavtxwv Khinele thiab kav rau nram Npe Yesimau mus txog Hiavtxwv Alanpa uas yog Hiavtxwv Ntsev, rau sab nrad mus txog taw roob Pixaka. Thiab ntaus yeej Npasas tus vajntxwv Aus uas yog noob neeg Lefa‑i uas tshuav nyob hauv Athalau thiab Ede‑i. Aus kav lub roob Hawmoo thiab Xalekha thiab tag nrho Npasas tebchaws mus txog cov Kesu thiab cov Ma‑akha ciam teb, thiab kav Kile‑a tebchaws ib nrab mus txog Hesanpoo tus vajntxwv Xihoo ciam teb. Mauxe uas yog Yawmsaub tus tub qhe thiab cov Yixayee kov yeej ob tug vajntxwv no thiab Mauxe uas yog Yawmsaub tus tub qhe muab lub tebchaws no tu rau xeem Lunpee thiab xeem Kas thiab ib nrab xeem Manaxe yuav ua lawv teej lawv tug. No mus yog cov vajntxwv uas Yausua thiab cov Yixayee kov yeej sab dej Yaladee hnub poob txij ntua Npa‑as Kas hauv lub hav Lenpanoo mus txog lub roob Halab uas sawv ntawm tebchaws Xe‑i. (Yausua muab tej tebchaws no rau txhua xeem Yixayee yuav ua lawv tug raws li uas faib rau lawv, yog nyob pem tebchaws toj siab, thiab hauv tej pov roob Sefela, hauv Alanpa thiab hauv tej ntav toj, hauv tebchaws moj sab qhua thiab hauv Neke, uas yog cov Hithai, cov Amaulai, cov Khana‑as, cov Pelixai, cov Hivai thiab cov Yenpu li tebchaws.) Tej vajntxwv yog li no yog Yelikhau tus vajntxwv, Ai tus vajntxwv uas nyob ib sab ntawm Npe‑ee, Yeluxalees tus vajntxwv, Heploo tus vajntxwv, Yamu tus vajntxwv, Lakhi tus vajntxwv, Eloos tus vajntxwv, Kexaw tus vajntxwv, Denpi tus vajntxwv, Kedaw tus vajntxwv, Hauma tus vajntxwv, Alaj tus vajntxwv, Lina tus vajntxwv, Adulas tus vajntxwv, Makheda tus vajntxwv, Npe‑ee tus vajntxwv, Thapuva tus vajntxwv, Hefaw tus vajntxwv, Afe tus vajntxwv, Lasaloo tus vajntxwv, Madoo tus vajntxwv, Haxau tus vajntxwv, Siloomeloo tus vajntxwv, Asa tus vajntxwv, Tha‑ana tus vajntxwv, Mekidau tus vajntxwv, Khede tus vajntxwv, Yaune‑as tus vajntxwv hauv Khamee, Dau tus vajntxwv hauv Nafadau, Kauyi tus vajntxwv hauv Kilakas, thiab Thilaxa tus vajntxwv, huvsi yog peb caug ib tug vajntxwv. Thaum Yausua laus heev muaj hnub nyoog ntau lawm, Yawmsaub hais rau nws tias, “Koj laus heev muaj hnub nyoog ntau lawm, tiamsis tej tebchaws uas yuav txeeb tseem tshuav ntau. Tej tebchaws uas tseem tshuav yuav txeeb ntawd, yog Filixatee tebchaws huvsi thiab cov Kesu tebchaws huvsi. (Txij ntua Sihau uas nyob Iyi tebchaws sab hnub tuaj mus rau sab ped txog ntua Ekhoo ciam teb mas suav ua cov Khana‑as tebchaws. Muaj tsib tug vajntxwv kav cov Filixatee, yog tej vajntxwv uas nyob hauv lub moos Kaxa, lub moos Asadau, lub moos Akheloo, lub moos Ka thiab lub moos Ekhoo.) Thiab tshuav Avi tebchaws, thiab tej tebchaws uas nyob sab nrad, yog cov Khana‑as tebchaws huvsi thiab Me‑ala uas yog cov Xaidoo ib lub moos, mus txog lub moos Afe mus txog ntua cov Amaulai ciam teb, thiab cov Kenpas tebchaws thiab Lenpanoo tebchaws huvsi mus rau sab hnub tuaj, txij ntua lub moos Npa‑as Kas uas nyob ntawm taw roob Hawmoo txog ntua txojkev uas mus rau lub moos Hama, thiab cov uas nyob pem toj siab ntawm Lenpanoo tebchaws mus txog Milefauma‑i, uas puavleej yog neeg Xaidoo. Kuv yuav ua tus uas ntiab lawv sawvdaws tawm ntawm cov Yixayee hauv ntej mus. Tsuav yog koj faib lub tebchaws no ua qub txeeg qub teg rau cov Yixayee raws li uas kuv hais rau koj. Nimno cia li faib lub tebchaws no ua qub txeeg qub teg rau cuaj xeem thiab ib nrab xeem Manaxe.” Ib nrab xeem Manaxe thiab xeem Lunpee thiab xeem Kas twb tau qub txeeg qub teg uas Mauxe muab rau lawv sab dej Yaladee hnub tuaj. Tej uas Yawmsaub tus tub qhe Mauxe muab rau lawv yog txij ntua lub moos Alau‑aw uas nyob ntawm ntug hav Anoo thiab lub moos uas nyob hauv lub plawv hav thiab tej nras tiaj toj siab Medenpa huvsi txog ntua Dinpoo, thiab tej moos uas cov Amaulai tus vajntxwv Xihoo uas nyob hauv Hesanpoo kav huvsi mus txog ntua cov Asmoo ciam teb, thiab Kile‑a uas yog cov Kesu thiab cov Ma‑akha tebchaws, thiab lub roob Hawmoo huvsi thiab Npasas tebchaws huvsi mus txog ntua Xalekha, thiab lub tebchaws uas Npasas tus vajntxwv Aus uas nyob hauv Athalau thiab Ede‑i kav huvsi. Tshuav Aus tib leeg uas yog neeg Lefa‑i nyob xwb. Tej moos no Mauxe twb ntaus yeej thiab ntiab luag khiav tag lawm. Tiamsis cov Yixayee tsis tau ntiab cov Kesu thiab cov Ma‑akha khiav mus. Cov Kesu thiab cov Ma‑akha tseem nyob hauv cov Yixayee txog niaj hnub nimno. Tsuas yog tib xeem Levi Mauxe thiaj tsis tu tebchaws ua qub txeeg qub teg rau. Tej uas muab hlawv xyeem rau Yawmsaub uas yog cov Yixayee tus Vajtswv yog cov Levi li qub txeeg qub teg, raws li Yawmsaub hais rau lawv lawd. Mauxe muab qub txeeg qub teg rau xeem Lunpee raws li lawv tej cum. Ua li ntawd lawv lub tebchaws thiaj li yog txij ntua lub moos Alau‑aw uas nyob ntawm ntug hav Anoo thiab lub moos uas nyob hauv lub plawv hav ntawd thiab tej nras tiaj toj siab ntawm lub moos Medenpa huvsi, thiab lub moos Hesanpoo thiab Hesanpoo tej moos uas nyob tej nras tiaj toj siab, yog Dinpoo, Npamau Npa‑as, Npenpa‑as Me‑oo thiab Yahaj, Khedemau, Mefa‑a, Khiliyatha‑i, Xima, thiab Xelesaha uas nyob saum lub pov roob hauv lub hav ntawd, thiab Npepe‑au thiab tej ntav toj Pixaka thiab Npe Yesimau, yog tej moos uas nyob tej nras tiaj toj siab huvsi, yog tag nrho lub tebchaws uas cov Amaulai tus vajntxwv Xihoo hauv Hesanpoo kav. Mauxe ntaus yeej nws thiab Midee cov thawj uas zwm rau vajntxwv Xihoo, yog Evi, Lekhee, Xuv, Hawj thiab Lenpa, uas nyob hauv lub tebchaws ntawd. Cov Yixayee kuj xuas ntaj tua tau Npe‑au tus tub Npala‑as uas ua txiv neeb txiv yaig ua ke nrog cov uas lawv tua tau ntawd. Xeem Lunpee li tebchaws muaj tus dej Yaladee ua ciam teb. No yog tej moos thiab tej zej zog uas yog cov Lunpee thiab lawv tej cum li qub txeeg qub teg. Mauxe muab qub txeeg qub teg rau xeem Kas raws li lawv tej cum. Lawv lub tebchaws yog Yaxaw thiab tej moos hauv Kile‑a tebchaws huvsi, thiab cov Asmoo ib nrab tebchaws mus txog ntua Alau‑aw uas nyob lub moos Lanpa sab hnub tuaj, thiab txij ntua lub nroog Hesanpoo mus txog Lamamixape thiab Npethauni, thiab txij ntua Mahana‑i mus txog Denpi tebchaws, thiab hauv lub vuas hav muaj lub moos Npehalas, Npenila, Xukhau thiab Xafoo, yog tej tebchaws uas Hesanpoo tus vajntxwv Xihoo kav uas tseem tshuav tsis tau muab faib, muaj tus dej Yaladee ua ciam teb, mus txog ntua qab Hiavtxwv Khinele, uas yog sab dej Yaladee hnub tuaj. Tej no yog tej moos thiab tej zej zog uas yog xeem Kas thiab lawv tej cum li qub txeeg qub teg. Mauxe muab qub txeeg qub teg rau ib nrab xeem Manaxe, yog muab faib rau ib nrab xeem Manaxe raws li lawv tej cum. Lawv lub tebchaws yog txij ntua lub moos Mahana‑i tag nrho Npasas tebchaws uas yog lub tebchaws uas Npasas tus vajntxwv Aus kav huvsi, yog Ya‑i txhua lub moos uas nyob hauv Npasas mas huvsi yog rau caum lub moos, thiab Kile‑a ib nrab tebchaws thiab lub moos Athalau thiab lub moos Ede‑i uas yog vajntxwv Aus hauv Npasas kav. Cov moos no yog muab faib rau Manaxe tus tub Makhi cum, yog faib rau Makhi cum ib nrab xwb raws li lawv tej tsev neeg. Tej no yog tej qub txeeg qub teg uas Mauxe faib ntawm lub tiaj Mau‑a ntawm ntug dej Yaladee sab tim ub ntawm lub moos Yelikhau sab hnub tuaj. Mauxe tsis tu qub txeeg qub teg rau xeem Levi. Yawmsaub uas yog cov Yixayee tus Vajtswv yog lawv qub txeeg qub teg raws li Yawmsaub hais rau lawv lawd. No mus yog tej tebchaws uas cov Yixayee tau ua qub txeeg qub teg hauv Khana‑as tebchaws, uas yog pov thawj Ele‑axa thiab Noo tus tub Yausua thiab cov thawj hauv txhua xeem txhua cum Yixayee faib rau lawv. Tej qub txeeg qub teg no lawv muab ua ntawv rho faib rau cuaj xeem thiab ib nrab xeem, raws li Yawmsaub tau hais rau Mauxe lawd. Rau qhov Mauxe twb muab qub txeeg qub teg rau ob xeem thiab ib nrab xeem sab dej Yaladee hnub tuaj lawm. Tiamsis nws tsis muab qub txeeg qub teg rau cov Levi. Yauxej caj ces muaj ob xeem, yog xeem Manaxe thiab xeem Efa‑i. Tiamsis tsis faib tebchaws rau cov Levi, tsuas yog tau tej moos los nyob thiab tau tej tshav zaub ib ncig lub moos rau lawv tej tsiaj txhu thiab rau lawv tej cuab txhiaj cuab tam xwb. Cov Yixayee ua raws li Yawmsaub hais rau Mauxe mas lawv thiaj muab lub tebchaws faib. Thaum ntawd xeem Yuda tuaj cuag Yausua ntawm Kilakas, mas Yefune tus tub Khalej uas yog cum Khena hais rau Yausua tias, “Koj yeej paub txog tej uas Yawmsaub hais rau Mauxe uas yog Vajtswv tus neeg ntawm Khade Npania ntsig txog koj thiab kuv. Thaum uas Mauxe uas yog Yawmsaub tus tub qhe txib kuv tawm hauv Khade Npania mus tshuaj tebchaws, kuv hnub nyoog muaj plaub caug xyoo lawm, mas kuv tau coj xov los qhia rau nws raws li kuv pom tseeb. Tiamsis cov kwvtij uas nrog kuv ua ke mus ntawd tau ua rau cov pejxeem siab yaj tag. Tiamsis kuv ua raws li Yawmsaub uas yog kuv tus Vajtswv lub siab nyiam kawg siab kawg ntsws. Hnub ntawd Mauxe thiaj cog lus twv tseg tias, ‘Lub tebchaws uas koj txhais kotaw mus tsuj ntawd yeej yuav poob ua qub txeeg qub teg rau koj thiab koj tej tub ki mus ib txhis li, rau qhov koj tau ua raws li Yawmsaub uas yog kuv tus Vajtswv lub siab nyiam kawg siab kawg ntsws.’ Saib maj, ib yam li Yawmsaub tau hais tseg lawd nimno nws tseem pub kuv muaj txojsia nyob tau plaub caug tsib xyoo suav txij thaum nws hais li no rau Mauxe los, yog thaum cov Yixayee taug kev hauv tebchaws moj sab qhua. Hnub no kuv twb muaj hnub nyoog yim caum tsib xyoo lawm. Hnub no kuv tseem muaj zog ib yam nkaus li hnub uas Mauxe txib kuv mus. Kuv tseem muaj zog ua rog li qub thiab tseem muaj zog mus mus los los yam li thaum ub. Yog li no thov muab tej toj siab no uas Yawmsaub hais hnub ntawd rau kuv. Rau qhov hnub ntawd koj yeej hnov hais tias cov neeg Anaj nyob qhov ntawd, muaj tej moos loj uas muaj ntsa loog khov heev. Nyaj Yawmsaub yuav nrog nraim kuv thiab kuv yuav ntiab tau cov neeg ntawd tawm mus, raws li Yawmsaub hais tseg lawd.” Mas Yausua kuj foom koob hmoov rau nws, thiab muab Heploo rau Yefune tus tub Khalej yuav ua qub txeeg qub teg. Ces Heploo txawm poob ua qub txeeg qub teg rau Yefune tus tub Khalej uas yog cum Khena los txog niaj hnub nimno, rau qhov nws ua raws li Yawmsaub uas yog cov Yixayee tus Vajtswv lub siab nyiam kawg siab kawg ntsws. Lub moos Heploo ntawd yav thaum ub hu ua Khiliya Anpa. Tus Anpa no yog tus uas loj tshaj plaws cov neeg Anaj. Lub tebchaws thiaj li so tsis ua rog. Tej tebchaws uas faib rau xeem Yuda raws li lawv tej cum, mas sab nrad yog txog Edoo tebchaws ciam teb, mus txog tebchaws moj sab qhua Xee uas kawg nkaus rau sab nrad. Ciam teb sab nrad yog pib ntawm kaum hiavtxwv uas hlauv rau sab nram qab Hiavtxwv Ntsev, mus rau ntawm txojkev hla lub dawm roob Akhanpi sab nrad mus rau Xee, mus kiag rau Khade Npania sab nrad, mus txog lub moos Hexaloo, mus txog Adaj thiab nkhaus mus rau Khakha, hla mus txog Axamoo dhau plaws mus txog tus dej Iyi, taug dej mus kawg rau ntawm Hiavtxwv. Tej uas hais no yog nej tus ciam teb sab nrad. Ciam teb sab hnub tuaj yog txij ntua Hiavtxwv Ntsev mus txog ntua ntawm dej Yaladee tshuam hiavtxwv. Ciam teb sab ped txij ntua kaum hiavtxwv uas dej Yaladee tshuam, tus ciam teb mus txog ntua Npe Haula, hla lub moos Npe Alanpa sab ped, mas ciam teb mus txog ntua lub Pob Zeb Npauhas uas yog Lunpee tus tub. Thiab ciam teb mus txog Denpi txij ntua hav Akhauj, ncaj nraim rau sab ped nkhaus mus txog ntawm Kilakas uas ncaj txojkev hla lub dawm roob Adumi uas nyob ntawm lub hav sab nrad. Thiab ciam teb mus txog qhov dej txhawv Eeseme mus kawg rau ntawm Eelaukee. Ciam teb kuj taug lub hav Npeehinoo mus txog caj qaum roob sab nrad ntawm cov Yenpu lub moos (uas yog Yeluxalees). Ciam teb kuj mus txog lub ncov roob uas nyob hav Hinoo sab hnub poob uas nyob ntawm lub hauv hav Lefa‑i sab ped. Ciam teb kuj mus ntawm lub ncov roob ntawd mus txog lub hauv dej txhawv Nethau‑a, thiab txij ntawd mus txog ntua tej moos saum lub roob Efoo, thiab ciam teb kuj nkhaus mus txog Npa‑ala (uas yog Khiliya Ye‑ali), thiab ciam teb kuj nkhaus lug ntawm Npa‑ala sab hnub poob mus txog roob Xe‑i thiab hla mus txog lub roob Ye‑ali sab caj qaum roob ped (uas yog Khexaloo) nqes mus txog Npeseme thiab hla kiag Thinaj, thiab ciam teb kuj mus rau ntawm caj qaum roob uas nyob ntawm Ekoo sab ped thiab nkhaus mus txog Sikheloo thiab hla kiag mus txog lub roob Npa‑ala dhau plaws mus txog Yane‑ee. Ciam teb kuj los kawg ntawm Hiavtxwv. Ciam teb sab hnub poob yog raws ntug Hiavtxwv Loj. No yog tus ciam teb uas vij xeem Yuda thiab lawv tej cum. Raws li uas Yawmsaub hais rau Yausua lawd mas Yausua muab ib thaj teb hauv xeem Yuda rau Yefune tus tub Khalej, yog Khiliya Anpa uas yog Heploo (Anpa yog Anaj txiv). Khalej ntiab Anaj peb tug tub li caj ces khiav tawm qhov ntawd, yog Sesai thiab Ahimas thiab Thamai uas yog Anaj caj ces. Thiab nws nce qhov ntawd mus ua rog rau cov uas nyob hauv Denpi. Lub moos Denpi yav nram ntej hu ua Khiliya Xefaw. Khalej hais tias, “Leejtwg ntaus tau lub moos Khiliya Xefaw thiab txeeb tau lub moos ntawd mas kuv yuav muab kuv tus ntxhais Axav rau nws ua pojniam.” Mas Khena uas yog Khalej tus kwv tus tub Auni‑ee txeeb tau lub moos ntawd mas Khalej muab nws tus ntxhais Axav rau nws ua pojniam. Thaum sib yuav lawd Axav txawm taij nws tus txiv thov leej txiv pub ib daim teb. Thaum Axav nqes saum tus nees luav los mas Khalej nug tias, “Koj xav yuav dabtsi?” Axav teb tias, “Thov koj pub ib yam tshav ntuj rau kuv. Koj pub kuv mus nyob hauv tebchaws Neke, mas thov pub tej lub hauv dej txhawv thiab.” Khalej txawm muab lub hauv dej sab ped thiab lub hauv dej sab nrad rau nws. No mus yog xeem Yuda thiab lawv tej cum qub txeeg qub teg. Xeem Yuda tej moos uas nyob nram qab teb kawg uas npuas Edoo ciam teb muaj npe hu li no yog Khaxe‑ee, Edaw, Yaku, Khina, Dimauna, Adada, Khede, Haxau, Inas, Xi, Thelee, Npe‑alau, Haxauhadatha, Kheli‑au Hexaloo (uas yog lub moos Haxau), Amav, Sema, Maulada, Haxakada, Hesamoo, Npepele, Haxasu‑as, Npe‑awsenpa, Npixi‑authia, Npa‑ala, Iyee, Exee, Eethaula, Khexi, Hauma, Xilaj, Mamana, Xaxana, Lenpa‑au, Sihee, Ayi thiab Limoo. Huvsi muaj nees nkaum cuaj lub moos thiab tej zej zog ib ncig tej moos ntawd. Tej moos uas nyob saum tej pov roob Sefela, yog Etha‑oo, Xaula, Asana, Xanau‑a, Eekani, Thapuva, Enas, Yamu, Adulas, Xaukhau, Axekha, Sa‑ala‑i, Aditha‑i, Kedela thiab Kedelautha‑i. Huvsi muaj kaum plaub lub moos thiab tej zej zog ib ncig. Thiab Xenas, Hadaxa, Midakas, Dile‑a, Mixape, Yauthe‑ee, Lakhi, Npaukha, Eloos, Khanpoo, Lamas, Khili, Kedelau, Npedakoo, Na‑ama thiab Makheda. Huvsi muaj kaum rau lub moos thiab tej zej zog ib ncig. Thiab Lina, Ethaw, Asas, Itha, Asana, Nexi, Khe‑ila, Axij thiab Malesa. Huvsi muaj cuaj lub moos thiab tej zej zog ib ncig. Ekhoo thiab tej moos thiab tej zej zog uas nyob ib ncig lub moos ntawd, txij ntua Ekhoo mus txog Hiavtxwv txhua lub moos thiab tej zej zog uas nyob ze lub moos Asadau. Asadau thiab tej moos thiab tej zej zog uas nyob ib ncig lub moos ntawd. Kaxa thiab tej moos thiab tej zej zog ib ncig mus txog ntua tus dej Iyi thiab tej ntug Hiavtxwv Loj. Tej moos uas nyob pem toj siab, yog Sami, Yathi, Xaukhau, Dana, Khiliya Xana (uas yog lub moos Denpi), Anab, Ethemau, Ani, Kausee, Hauloo thiab Kilau. Huvsi muaj kaum ib lub moos thiab tej zej zog ib ncig. Thiab Alam, Duma, Esas, Yani, Npe Thapuva, Afekha, Hutha, Khiliya Anpa (uas yog lub moos Heploo) thiab Xi‑au. Huvsi muaj cuaj lub moos thiab tej zej zog ib ncig. Thiab Ma‑oo, Khamee, Xi, Yutha, Yile‑ee, Yaude‑as, Xanau‑a, Kha‑i, Kinpe‑a thiab Thinaj. Huvsi muaj kaum lub moos thiab tej zej zog ib ncig. Thiab Hahu, Npexuv, Kedau, Ma‑ala, Npe‑anau thiab Eethekhoo. Huvsi muaj rau lub moos thiab tej zej zog ib ncig. Thiab Khiliya Npa‑as (uas yog lub moos Khiliya Ye‑ali) thiab Lanpa, ob lub moos ntawd thiab tej zej zog ib ncig. Tej moos hauv tebchaws moj sab qhua yog Npe Alanpa, Midi, Xekhakha, Nisas uas yog lub moos Ntsev thiab Eekedi. Huvsi muaj rau lub moos thiab tej zej zog ib ncig. Cov neeg Yenpu uas nyob hauv Yeluxalees mas cov Yuda ntiab tsis tau lawv khiav mus. Yog li no cov Yenpu thiaj nyob hauv cov Yuda hauv Yeluxalees txog niaj hnub nimno. Tej teb uas faib rau Yauxej caj ces yog txij ntua tus dej Yaladee uas ze lub moos Yelikhau, ntawm qhov dej txhawv uas nyob ntawm Yelikhau sab hnub tuaj, mus rau hauv tebchaws moj sab qhua txij ntua Yelikhau mus rau pem toj siab Npe‑ee, mus ntawm Npe‑ee rau lub moos Lu, hla mus txog Athalau uas yog cov Akhi tebchaws, thiab nqes rau sab hnub poob txog cov Yafethi tebchaws, thiab mus txog lub moos Npe Hauloo nruab tiag, mus txog Kexaw mus kawg rau Hiavtxwv. Yauxej caj ces uas yog xeem Manaxe thiab xeem Efa‑i thiaj tau qub txeeg qub teg. Efa‑i thiab lawv tej cum li tebchaws yog li no. Lawv qub txeeg qub teg ciam teb sab hnub tuaj yog txij ntua lub moos Athalau‑adaj mus txog Npe Hauloo pem roob, thiab ciam teb ntev mus txog ntua Hiavtxwv, muaj lub moos Mimetha nyob sab ped. Ciam teb sab hnub tuaj nkhaus los rau ntawm lub moos Tha‑ana Silau, thiab hla lub moos no mus rau sab hnub tuaj txog lub moos Yanau‑a, thiab nqes ntawm Yanau‑a mus txog ntua lub moos Athalau thiab lub moos Na‑ala mus chwv rhuav lub moos Yelikhau mus kawg rau dej Yaladee. Ciam teb ntawm Thapuva mus rau sab hnub poob mus txog tus dej Khana mus kawg rau Hiavtxwv. No yog xeem Efa‑i thiab lawv tej cum li qub txeeg qub teg, thiab yog tej moos uas nyob hauv xeem Manaxe tebchaws uas muab faib rau xeem Efa‑i thiab tej zej zog ib ncig ntawm cov moos ntawd. Txawm li cas los xij, lawv tsis ntiab cov neeg Khana‑as uas nyob hauv lub moos Kexaw tawm mus. Ua li ntawd cov Khana‑as thiaj nrog cov Efa‑i nyob ua ke txog niaj hnub nimno, mas poob ua qhev thiab raug yuam ua haujlwm. Tej teb uas muab faib rau xeem Manaxe uas yog Yauxej tus tub hlob yog li no. Makhi uas yog Manaxe tus tub hlob thiab yog Kile‑a txiv, tau tebchaws Kile‑a thiab Npasas tebchaws, rau qhov nws txawj txawj ua rog. Manaxe thiab lawv tej cum uas tseem tshuav uas yuav faib teb rau yog cov no, Anpiyexaw, Heleb, Ali‑ee, Sekhee, Hefaw thiab Semida. Cov txivneej no yog Yauxej tus tub hlob Manaxe caj ces thiab lawv tej cum. Hefaw tus tub Xelaufeha muaj ntxhais xwb tsis muaj tub. Hefaw yog Kile‑a tus tub, Kile‑a yog Makhi tus tub, Makhi yog Manaxe tus tub. Xelaufeha cov ntxhais tej npe hu li no, Malas, Nau‑a, Haula, Meekha thiab Thilaxa. Lawv tuaj cuag pov thawj Ele‑axa thiab Noo tus tub Yausua thiab cov uas ua hlob mas lawv hais tias, “Yawmsaub twb hais kom Mauxe pub qub txeeg qub teg rau peb ib yam li pub rau peb cov kwvtij.” Ua li ntawd Yausua thiaj li muab qub txeeg qub teg rau lawv cov no ib yam li muab rau lawv txiv cov kwvtij raws li Yawmsaub hais lawd. Yog li no thiaj poob kaum tswv teb rau xeem Manaxe, tau tshaj cov teb uas nyob Kile‑a thiab Npasas ntawm dej Yaladee sab hnub tuaj, rau qhov Manaxe cov ntxhais twb nrog nws cov tub tau qub txeeg qub teg. Kile‑a tebchaws thiaj muab faib rau Manaxe cov xeeb ntxwv uas tsis tau muaj teb. Manaxe li teb txij ntua Asaw tebchaws mus txog Mimetha uas nyob ntawm lub moos Sekhee sab hnub tuaj, thiab ciam teb mus rau nram qab teb mus txog cov neeg Eethapuva. Tej teb ntawm Thapuva ua Manaxe tug tiamsis lub moos Thapuva uas nyob ntawm Manaxe ciam teb ua Efa‑i caj ces tug. Thiab ciam teb kuj nqes mus txog tus dej Khana. Tej moos uas nyob dhau tus dej rau sab nrad yog Manaxe li tebchaws tiamsis tej moos yog Efa‑i li tug. Thiab Manaxe ciam teb taug tus dej ntawd sab ped mus kawg rau ntawm Hiavtxwv. Lub tebchaws sab nrad yog Efa‑i, lub tebchaws sab ped yog Manaxe li, muaj Hiavtxwv ua ciam teb. Sab ped mus kawg rau ntawm Asaw tebchaws, thiab sab hnub tuaj kawg rau ntawm Ixakha tebchaws. Nyob hauv Ixakha thiab Asaw tebchaws Manaxe muaj tej moos no, Npesas thiab tej zej zog ib ncig ntawd, thiab lub moos Ile‑as thiab tej zej zog ib ncig ntawd, thiab cov neeg hauv lub moos Dau thiab tej zej zog ib ncig ntawd, thiab cov neeg hauv lub moos Eedau thiab tej zej zog ib ncig ntawd thiab cov neeg hauv lub moos Tha‑ana thiab tej zej zog ib ncig ntawd, thiab cov neeg hauv lub moos Mekidau (lub moos uas peb ntawd yog Nafadau.) Tiamsis cov Manaxe txeeb tsis tau tej moos ntawd ua lawv tug mas cov Khana‑as tseem tiv nyob hauv lub tebchaws ntawd. Tiamsis thaum cov Yixayee muaj zog lawm mas lawv yuam cov Khana‑as ua haujlwm, tiamsis tsis muab ntiab khiav tawm mus. Tiamsis xeem Yauxej hais rau Yausua tias, “Ua cas koj faib ib thaj ua ib feem ua qub txeeg qub teg rau peb xwb? Peb muaj coob coob rau qhov Yawmsaub foom koob hmoov rau peb los txog niaj hnub nimno.” Mas Yausua hais rau lawv tias, “Yog nej muaj coob coob mas nej cia li mus luaj teb pem tej hav zoov hauv Pelixai thiab Lefa‑i tebchaws, rau qhov Efa‑i tej toj siab nqaim tsis txaus nej nyob.” Xeem Yauxej thiaj hais tias, “Tej toj siab no tsis txaus peb cov, mas cov Khana‑as uas nyob nram nruab tiag muaj tsheb nees ua rog uas yog hlau, yog cov uas nyob hauv Npesas thiab tej zej zog ib ncig thiab hauv lub hav Yile‑ee.” Mas Yausua hais rau Yauxej caj ces uas yog Manaxe thiab Efa‑i tias, “Nej muaj coob coob thiab muaj zog heev, mas tsis yog nej yuav tau ib thaj xwb. Tej toj siab ntawd yuav ua nej li, txawm yog hav zoov los nej cia li mus luaj thiab txeeb ua nej tug tag nrho. Txawm yog cov Khana‑as muaj tsheb hlau ua rog thiab lawv muaj zog heev los nej yuav ntiab tau lawv khiav tawm mus.” Ib tsoom pejxeem Yixayee sawvdaws tuaj txoos ua ke ntawm Silau, thiab tsa lub tsev ntaub sib ntsib rau qhov ntawd. Lawv twb ntaus yeej lub tebchaws ntawd lawm. Tseem tshuav cov Yixayee xya lub xeem uas tsis tau faib qub txeeg qub teg rau. Mas Yausua thiaj hais rau cov Yixayee tias, “Nej yuav tos ntev li cas li mus txeeb tebchaws ua nej tug uas Yawmsaub uas yog nej tej poj koob yawm txwv tus Vajtswv twb muab rau nej lawm? Cia li xaiv ib lub xeem peb leeg mas kuv yuav txib lawv cov ntawd mus ncig kom thoob plaws hauv lub tebchaws, kom sau lub tebchaws saib zoo li cas thiaj txawj pub ua qub txeeg qub teg, lawv li rov los qhia rau kuv. Lawv yuav tsum muab faib ua xya feem. Cov Yuda yuav nyob hauv lawv tebchaws uas yog yav qab teb, thiab Yauxej caj ces yuav nyob hauv lawv tebchaws uas yog sab ped. Nej sau tej ciam teb hauv lub tebchaws ua xya feem mas coj tej uas nej sau ntawd los qhia rau kuv ntawm no, mas kuv yuav ua ntawv rho faib rau nej ntawm no rau ntawm peb tus Vajtswv Yawmsaub xubntiag. Cov Levi tsis muaj feem nrog nej tau. Lawv tej haujlwm uas ua Yawmsaub li pov thawj yog lawv li qub txeeg qub teg lawm. Xeem Kas thiab xeem Lunpee thiab ib nrab xeem Manaxe twb tau lawv qub txeeg qub teg sab dej Yaladee hnub tuaj uas Yawmsaub tus tub qhe Mauxe muab rau lawv lawm.” Lawv cov ntawd kuj sawv kev mus thiab Yausua hais rau cov uas yuav sau ciam teb ntawd tias, “Cia li mus ncig kom thoob plaws hauv lub tebchaws sau saib lub tebchaws zoo li cas mas rov los cuag kuv. Kuv yuav muab ua ntawv rho faib rau nej tab meeg Yawmsaub xubntiag ntawm Silau.” Yog li ntawd lawv thiaj mus thoob plaws hauv lub tebchaws thiab muab lub tebchaws thiab tej moos sau rau hauv ntawv faib ua xya feem, mas lawv rov los cuag Yausua hauv lub zos ntawm Silau. Mas Yausua muab ua ntawv rho rau lawv tab meeg Yawmsaub lub xubntiag ntawm Silau, thiab Yausua muab lub tebchaws faib rau cov Yixayee ntawm lub chaw ntawd, txhua xeem nyias muaj nyias feem. Rho ntawv rau xeem Npeeyamee thiab lawv tej cum, mas rho tau ntsuj tebchaws nyob ntawm xeem Yuda thiab xeem Yauxej ntu nruab nrab. Lawv ciam teb sab ped yog pib ntawm dej Yaladee mus txog lub caj qaum roob ntawm Yelikhau sab ped, hla kiag tebchaws toj siab rau sab hnub poob mus kawg rau ntawm tebchaws moj sab qhua Npe‑avee. Txuas qhov ntawd tus ciam teb mus rau sab nrad ncaj rau lub moos Lu (uas yog lub moos Npe‑ee) thiab mus rau lub caj qaum roob Lu, thiab ciam teb nqes mus txog Athalau‑adaj uas nyob pem roob uas nyob ntawm lub moos Npe Hauloo nruab tiag sab nrad. Ciam teb sab hnub poob kuj nkhaus mus rau sab nrad ntawm lub roob uas ncaj lub moos Npe Hauloo sab nrad mus kawg rau ntawm Khiliya Npa‑as (uas yog Khiliya Ye‑ali), yog xeem Yuda li ib lub moos. No yog ciam teb sab hnub poob. Ciam teb sab nrad pib ntawm lub moos Khiliya Ye‑ali mas qhov ntawd mus rau sab hnub poob mus txog lub hauv dej txhawv Nethau‑a. Ciam teb kuj nqes mus txog taw roob uas ntsia ntsoov lub hav Npeehinoo uas nyob lub hauv hav Lefa‑i sab ped, thiab raws lub hav Hinoo rau nram qab lub caj qaum roob uas yog cov Yenpu lub roob thiab nqes mus txog lub moos Eelaukee, thiab nkhaus mus rau sab ped mus txog Eeseme, thiab txuas ntawm mus txog lub moos Kelilau uas nyob ncaj txojkev uas hla lub dawm roob Adumi, thiab nqes mus rau lub Pob Zeb Npauhas uas yog Lunpee tus tub, thiab hla kiag mus rau lub caj qaum roob uas ncaj Npe Alanpa sab ped nqes mus txog Alanpa. Ciam teb kuj mus rau lub caj qaum roob Npe Haula sab ped, thiab ciam teb mus kawg rau ntawm kaum Hiavtxwv Ntsev sab ped, uas dej Yaladee tshuam nkaus. No yog ciam teb sab nrad. Dej Yaladee ua ciam teb sab hnub tuaj. No yog xeem Npeeyamee thiab lawv tej cum li qub txeeg qub teg, muaj ciam teb vij puag ncig raws li hais tag no. Xeem Npeeyamee thiab lawv tej cum tej moos yog Yelikhau, Npe Haula, Emekhexi, Npe Alanpa, Xemala‑i, Npe‑ee, Avi, Pala, Aufa, Khefa Lamauni, Aunis thiab Kenpa. Huvsi muaj kaum ob lub moos thiab tej zej zog ib ncig cov moos ntawd. Kinpe‑oo, Lama, Npe‑awlau, Mixape, Khefila, Mauxa, Lekhee, Ipe‑ee, Thalala, Xela, Ha‑ele, Yenpu (uas yog lub moos Yeluxalee), Kinpe‑a thiab Khiliya Ye‑ali. Huvsi muaj kaum plaub lub moos thiab tej zej zog ib ncig cov moos ntawd. No yog xeem Npeeyamee thiab lawv tej cum qub txeeg qub teg. Rho daim ntawv uas ob los mas yog xeem Xime‑oo thiab lawv tej cum li. Lawv qub txeeg qub teg kuj nyob xyaw hauv cov Yuda qub txeeg qub teg. Cov moos no yog lawv qub txeeg qub teg, yog Npe‑awsenpa, Senpa, Maulada, Haxasu‑as, Npalag, Exee, Eethaula, Npethu, Hauma, Xilaj, Npe Makhanpau, Haxaxuxa, Npe Lenpa‑au thiab Saluhee. Huvsi muaj kaum peb lub moos thiab tej zej zog ib ncig cov moos ntawd. Thiab lub moos Ayi, Limoo, Ethaw thiab Asas. Huvsi muaj plaub lub moos thiab tej zej zog ib ncig, thiab tej zej zog ib ncig cov moos ntawd dav mus txog lub moos Npa‑alab Npe‑aw thiab lub moos Lama uas nyob hauv Neke. Cov no yog xeem Xime‑oo thiab lawv tej cum li qub txeeg qub teg. Xeem Xime‑oo qub txeeg qub teg yog faib hauv Yuda tebchaws los rau lawv rau qhov xeem Yuda li tebchaws ntau tshaj lawv lawm, xeem Xime‑oo thiaj tau qub txeeg qub teg hauv cov Yuda tebchaws. Rho daim ntawv uas peb los mas yog xeem Xenpuloo thiab lawv tej cum li. Tej tebchaws uas poob ua cov Xenpuloo qub txeeg qub teg dav mus txog Xalib. Lawv ciam teb kuj mus rau sab hnub poob thiab mus txog Malala thiab los chwv rhuav Danpese, thiab mus txog ntua tus dej uas nyob ntawm Yaune‑as sab hnub tuaj. Ntawm Xalib tug ciam teb lem mus rau sab hnub tuaj uas ncaj qhov uas hnub tuaj, mus txog Khilauthanpau ciam teb, thiab mus txog Danpela, thiab nce mus txog Yafia, txuas qhov ntawd hla mus rau sab hnub tuaj, mus txog Kahefaw thiab Ekhaxi, mus txog Limoo mas nkhaus mus rau Ne‑a. Sab ped ciam teb nkhaus mus rau Hanathoo mus kawg rau ntawm lub hav Itha‑ee, thiab lub moos Khathas, Nahalas, Siloo, Idala thiab Npelehee, huvsi muaj kaum ob lub moos thiab tej zej zog ib ncig. No yog xeem Xenpuloo thiab lawv tej cum li qub txeeg qub teg, yog tej moos thiab tej zej zog ib ncig cov moos ntawd. Rho daim ntawv uas plaub los mas yog xeem Ixakha thiab lawv tej cum li. Lawv li tebchaws mas muaj cov moos li no nyob hauv, yog Yile‑ee, Khexulau, Sunee, Hafala‑i, Si‑oo, Anahala, Lanpi, Khisi‑oo, Enpes, Leme, Eekani, Eehada thiab Npepaxe. Ciam teb kuj chwv lub moos Thanpau, Sahaxuma thiab Npeseme mus kawg rau ntawm dej Yaladee, huvsi muaj kaum rau lub moos thiab tej zej zog ib ncig. No yog xeem Ixakha thiab lawv tej cum li qub txeeg qub teg, yog tej moos thiab tej zej zog ib ncig cov moos ntawd. Rho daim ntawv uas tsib los mas yog xeem Asaw thiab lawv tej cum li. Lawv li tebchaws mas muaj cov moos no nyob hauv, yog Heekha, Hali, Npethee, Asaj, Alamelej, Ama thiab Misas. Sab hnub poob tug ciam teb chwv roob Khamee thiab lub moos Sihaulina, thiab nkhaus mus rau sab hnub tuaj mus rau Npedakoo thiab koom Xenpuloo ciam teb thiab raws lub hav Itha‑ee mus rau sab ped txog Npe‑eme thiab Ne‑i‑ee, thiab dhau rau sab ped mus txog lub moos Khanpu, Enploo, Lehau, Hamoo thiab Khana, mus txog ntua lub niag nroog Xaidoo. Ciam teb kuj nkhaus kiag mus rau Lama mus txog lub nroog Thailab uas muaj ntsa loog khov kho, thiab ciam teb kuj nkhaus mus rau lub moos Hauxa mus kawg rau ntawm Hiavtxwv. Thiab muaj tej moos no yog Mahalab, Axij, Uma, Afe thiab Lehau, huvsi muaj nees nkaum ob lub moos thiab tej zej zog ib ncig. No yog xeem Asaw thiab lawv tej cum li qub txeeg qub teg, yog tej moos thiab tej zej zog ib ncig cov moos ntawd. Rho daim ntawv uas rau los mas yog Nathali li, yog xeem Nathali thiab lawv tej cum li. Lawv ciam teb pib ntawm Helej ntawm tsob ntoo qheb hauv Xanani mus rau Adaminekhe thiab Yane‑ee, mus txog ntua Lakhu, mus kawg rau ntawm dej Yaladee. Thiab ciam teb kuj lem mus rau sab hnub poob mus txog Anau Thanpau, dhau qhov ntawd mus txog Huko, mas sab qab teb yog koom Xenpuloo ciam teb thiab sab hnub poob koom Asaw ciam teb, thiab sab hnub tuaj yog tus dej Yaladee uas npuas Yuda. Lawv tej moos uas muaj ntsa loog yog tej no, Xidi, Xaw, Hama, Lakha, Khinele, Adama, Lama, Haxau, Khede, Ede‑i, Eehaxau, Yiloo, Mida‑ee, Haulee, Npe‑anav thiab Npeseme, huvsi muaj kaum cuaj lub moos thiab tej zej zog ib ncig. No yog xeem Nathali thiab lawv tej cum li qub txeeg qub teg, yog tej moos thiab tej zej zog ib ncig cov moos ntawd. Rho daim ntawv uas xya los mas yog xeem Daj thiab lawv tej cum li. Tej tebchaws uas yog lawv qub txeeg qub teg muaj tej moos no nyob hauv yog Xaula, Etha‑oo, Iseme, Sa‑alanpi, Aiyaloo, Ibla, Eloo, Thinaj, Ekhoo, Eethekhe, Kinpethoo, Npa‑alab, Yehuj, Npenenpela, Kalimoo, thiab Meyakhoo thiab Lakhoo thiab thaj teb uas ncaj lub moos Yaupa. Thaum xeem Daj lub tebchaws poob lawd, cov Daj mus ua rog rau lub moos Lesee. Lawv ntaus yeej thiab xuas ntaj tua lub moos ntawd thiab txeeb tau ua lawv tug thiab mus nyob rau hauv, mas lawv muab lub moos Lesee ntawd hu ua Daj raws li lawv tus yawg koob Daj. No yog xeem Daj thiab lawv tej cum li qub txeeg qub teg, yog tej moos thiab tej zej zog ib ncig cov moos ntawd. Thaum uas faib lub tebchaws ua qub txeeg qub teg txhua zog tag lawd cov Yixayee kuj muab qub txeeg qub teg hauv lawv faib rau Noo tus tub Yausua. Raws li Yawmsaub hais mas lawv muab lub moos uas nws thov rau nws, yog lub moos Thinaxela pem toj siab hauv Efa‑i tebchaws. Yausua muab lub moos ntawd ua dua tshiab thiab mus nyob rau hauv. Tej uas hais no yog pov thawj Ele‑axa thiab Noo tus tub Yausua thiab cov thawj hauv txhua cum txhua xeem Yixayee muab ua ntawv rho faib ua qub txeeg qub teg ntawm Silau tab meeg Yawmsaub xubntiag ntawm qhov rooj lub tsev ntaub sib ntsib. Ua li no lawv thiaj muab lub tebchaws faib tag lawm. Yawmsaub hais rau Yausua tias, “Cia li hais rau cov Yixayee tias, ‘Yuav tsum tu tej moos cawm siav uas kuv twb kom Mauxe hais rau koj lawd, xwv tus uas tua neeg uas tsis yog txhob txwm tua thiab tsis paub thiaj tau khiav mus rau hauv. Tej moos no yuav ua lub chaw rau nej cawm siav kom thiaj dim tus uas rob caub. Tus uas tua neeg ntawd yuav khiav mus rau cov moos ntawd ib lub thiab mus sawv ntawm txojkev uas nkag rau hauv lub rooj loog ntawd thiab piav nws zaj xwm txheej rau cov kev txwj laus hauv lub moos ntawd paub. Mas lawv yuav coj nws nkag mus rau hauv lub moos thiab tu chaw rau nws nyob mas tus ntawd yuav nrog lawv nyob. Yog tus rob caub caum mus txog los cov kev txwj laus yuav tsis muab tus uas tua neeg ntawd rau hauv tus rob caub txhais tes, rau qhov tus uas tua neeg ntawd tsis yog txhob txwm tua tsis tau ua dua yeeb ncuab li. Tus ntawd yuav nyob hauv lub moos ntawd mus txog thaum nws mus sawv hais plaub tab meeg ntawm cov pejxeem xubntiag tag thiab nyob txog thaum tus uas ua tuam pov thawj hlob lub sijhawm ntawd tuag lawm. Tus uas tua neeg ntawd li rov mus tau rau nws vaj nws tsev hauv nws lub moos uas nws khiav tuaj.’ ” Lawv thiaj tu lub moos Khede hauv Kalilais uas yog pem toj siab hauv Nathali tebchaws, thiab lub moos Sekhee pem toj siab hauv Efa‑i tebchaws, thiab lub moos Khiliya Anpa (uas yog lub moos Heploo) uas nyob pem toj siab hauv Yuda tebchaws. Sab dej Yaladee hnub tuaj uas ncaj lub moos Yelikhau lawv tu lub moos Npexaw hauv tebchaws moj sab qhua uas nyob tej nras tiaj toj siab hauv xeem Lunpee tebchaws, thiab lub moos Lamau hauv Kile‑a hauv xeem Kas tebchaws, thiab lub moos Kaulas hauv Npasas uas yog xeem Manaxe tebchaws. Tej moos no yog tej uas tu cia rau cov Yixayee sawvdaws thiab lwm haiv neeg uas nrog lawv nyob, xwv leejtwg tua neeg tiamsis tsis yog txhob txwm tua thiaj tau khiav mus rau hauv, kom thiaj tsis tuag rau tus rob caub txhais tes ua ntej uas tsis tau mus sawv hais plaub tab meeg cov pejxeem xubntiag. Thaum ntawd cov uas ua thawj hauv xeem Levi txhua cum tuaj cuag pov thawj Ele‑axa thiab Noo tus tub Yausua thiab cov uas ua thawj hauv txhua xeem txhua cum Yixayee, mas hais rau lawv ntawm Silau hauv Khana‑as tebchaws tias, “Yawmsaub twb hais rau Mauxe kom muab tej lub moos rau peb nyob thiab muab tej tshav zaub ib ncig rau peb yug tsiaj txhu.” Ua li no cov Yixayee thiaj li rho lawv qub txeeg qub teg tej lub moos uas yuav hais no thiab tej tshav zaub ib ncig cov moos ntawd pub rau cov Levi raws li Yawmsaub hais kom lawv ua. Rho tau ntawv los yog Khauha tej cum. Ua li no cov Levi uas yog pov thawj Aloo caj ces thiaj tau kaum peb lub moos uas rho hauv xeem Yuda thiab xeem Xime‑oo thiab xeem Npeeyamee los. Cov Khauha uas tseem tshuav rho ntawv tau kaum lub moos hauv xeem Efa‑i tej cum thiab xeem Daj thiab ib nrab xeem Manaxe. Cov Kwsoo rho ntawv tau kaum peb lub moos hauv xeem Ixakha tej cum thiab hauv xeem Asaw thiab xeem Nathali thiab ib nrab xeem Manaxe hauv Npasas tebchaws. Melali tej cum tau kaum ob lub moos hauv xeem Lunpee thiab xeem Kas thiab xeem Xenpuloo. Tej moos thiab tej tshav zaub ib ncig no cov Yixayee ua ntawv rho pub rau cov Levi raws li uas Yawmsaub kom Mauxe hais rau lawv lawd. Lawv muab tej moos uas yuav hais no hauv xeem Yuda thiab xeem Xime‑oo pub rau Aloo caj ces uas yog ib cum hauv cov Khauha uas yog xeem Levi, rau qhov lawv twb rho tau thawj daim ntawv lawm. Lawv muab lub moos Khiliya Anpa (Anpa yog Anaj txiv), uas yog lub moos Heploo uas nyob pem toj siab hauv Yuda tebchaws, thiab tej tshav zaub ib ncig lub moos ntawd. Tiamsis tej teb thiab tej zej zog uas nyob ib ncig lub moos mas twb muab rau Yefune tus tub Khalej yuav ua nws tug lawm. Lawv muab lub moos Heploo thiab tej tshav zaub ib ncig rau pov thawj Aloo caj ces. Heploo yog ib lub moos cawm siav rau tus uas tua neeg. Thiab lawv muab tej moos no thiab tej tshav zaub ib ncig cov moos no, yog lub moos Lina, thiab Yathi, Ethemau‑a, Hauloo, Denpi, Ayi, Yutha thiab Npeseme, huvsi yog cuaj lub moos hauv ob xeem no. Hauv xeem Npeeyamee yog muab tej moos no thiab tej tshav zaub ib ncig, yog Kinpe‑oo, Kenpa, Anathau thiab Amoos, huvsi yog plaub lub moos. Aloo caj ces uas ua pov thawj tej moos huvsi muaj kaum peb lub moos thiab tej tshav zaub ib ncig. Cov Khauha uas tseem tshuav uas yog Khauha tej cum hauv xeem Levi, lawv rho ntawv tau tej moos hauv xeem Efa‑i. Tej moos uas lawv muab yog lub moos Sekhee thiab tej tshav zaub ib ncig, uas yog ib lub moos cawm siav rau tus uas tua neeg, uas nyob pem toj siab Efa‑i tebchaws, thiab tej moos no thiab tej tshav zaub ib ncig, yog Kexaw, Kixa‑i thiab Npe Hauloo, huvsi yog plaub lub moos. Hauv xeem Daj yog muab tej moos no thiab tej tshav zaub ib ncig, yog Eethekhe, Kinpethoo, Aiyaloo thiab Kalimoo, huvsi yog plaub lub moos. Hauv ib nrab xeem Manaxe yog muab lub moos Tha‑ana thiab tej tshav zaub ib ncig, thiab Kalimoo thiab tej tshav zaub ib ncig, huvsi yog ob lub moos. Khauha tej cum uas tseem tshuav ntawd tej moos mas huvsi yog kaum lub moos thiab tej tshav zaub ib ncig. Tej lub moos uas muab rau Kwsoo caj ces uas yog ib cum hauv xeem Levi, mas hauv ib nrab xeem Manaxe yog muab lub moos Kaulas hauv Npasas thiab tej tshav zaub ib ncig, uas yog ib lub moos cawm siav rau tus uas tua neeg, thiab lub moos Npe‑ethela thiab tej tshav zaub ib ncig, huvsi yog ob lub moos. Hauv xeem Ixakha yog muab tej moos no thiab tej tshav zaub ib ncig, yog Khisi‑oo, Danpela, Yamu thiab Eekani, huvsi yog plaub lub moos. Hauv xeem Asaw yog muab tej moos no thiab tej tshav zaub ib ncig, yog Misas, Adoo, Heekha thiab Lehau, huvsi yog plaub lub moos. Hauv xeem Nathali yog muab lub moos Khede hauv Kalilais, uas yog ib lub moos cawm siav rau tus uas tua neeg, thiab lub moos Hamaudau thiab tej tshav zaub ib ncig, thiab Khathas thiab tej tshav zaub ib ncig, huvsi yog peb lub moos. Kwsoo tej cum tej moos mas huvsi muaj kaum peb lub moos thiab tej tshav zaub ib ncig. Tej moos uas muab rau cov Levi uas tseem tshuav, yog Melali tej cum, mas hauv xeem Xenpuloo yog muab tej moos no thiab tej tshav zaub ib ncig, yog Yaune‑as, Khatha, Dinas thiab Nahalas, huvsi yog plaub lub moos. Hauv xeem Lunpee yog muab tej moos no thiab tej tshav zaub ib ncig, yog Npexaw, Yahaj, Khedemau thiab Mefa‑a, huvsi plaub lub moos. Hauv xeem Kas yog muab lub moos Lamau hauv Kile‑a thiab tej tshav zaub ib ncig, uas yog ib lub moos cawm siav rau tus uas tua neeg, thiab muab tej moos no thiab tej tshav zaub ib ncig, yog Mahana‑i, Hesanpoo thiab Yaxaw, huvsi yog plaub lub moos. Tej moos uas muab rau cov Levi uas tseem tshuav, yog Melali tej cum, mas huvsi yog kaum ob lub moos. Levi tej moos uas nyob hauv cov Yixayee lub tebchaws uas yog lawv teej lawv tug huvsi yog plaub caug yim lub moos thiab tej tshav zaub ib ncig. Tej moos no puavleej muaj tshav zaub vij puag ncig txhua lub moos ib yam nkaus. Raws li uas hais los no Yawmsaub muab lub tebchaws uas Yawmsaub tau cog lus tseg tias yuav pub rau lawv tej poj koob yawm txwv huvsi pub rau cov Yixayee. Thaum lawv txeeb tau ua lawv tug lawd lawv cia li mus nyob kiag ruaj rau hauv. Yawmsaub pub lawv nyob ruaj nyob tus tau so rau txhua fab, yam li uas Yawmsaub tau cog lus tseg rau lawv tej poj koob yawm txwv. Tsis muaj ib tug yeeb ncuab tiv tau lawv li, rau qhov Yawmsaub twb muab lawv tej yeeb ncuab rau hauv lawv txhais tes huvsi lawm. Txhua yam zoo uas Yawmsaub tau cog lus tseg rau cov Yixayee tsis tshuav ib yam dabtsi uas tsis tau tiav, puavleej tiav tag huvsi lawm. Thaum ntawd Yausua hu xeem Lunpee thiab xeem Kas thiab ib nrab xeem Manaxe tuaj mas hais rau lawv tias, “Nej twb ua raws li Yawmsaub tus tub qhe Mauxe hais rau nej lawm thiab nej mloog kuv lus thiab ua txhua yam uas kuv hais kom nej ua. Ntev los txog niaj hnub nimno nej tsis tso nej cov kwvtij tseg, nej twb ceev faj ua raws li uas Yawmsaub uas yog nej tus Vajtswv hais rau nej. Nimno Yawmsaub uas yog nej tus Vajtswv twb pub nej cov kwvtij tau so lawm, raws li nws tau cog lus tseg rau lawv. Ces nej cia li rov qab mus tsev hauv lub tebchaws uas Yawmsaub tus tub qhe Mauxe muab pub rau nej ua nej teej nej tug sab dej Yaladee hnub tuaj. Nej yuav tsum ceev faj ua raws li tej lus nkaw thiab txoj kevcai uas Yawmsaub tus tub qhe Mauxe hais rau nej lawd. Nej yuav hlub Yawmsaub uas yog nej tus Vajtswv thiab ua nej lub neej raws li nws txhua txojkev huvsi, thiab tuav rawv nws tej lus nkaw thiab nrog nws tsheej xeeb, thiab ua koom tu nws kawg nej lub siab lub ntsws.” Yausua thiaj foom koob hmoov rau lawv thiab xa lawv mus ces lawv txawm rov mus lawv vaj lawv tsev. Ib nrab xeem Manaxe ntawd, Mauxe twb muab Npasas tebchaws rau lawv yuav ua lawv tug, tshuav ib nrab xeem ntawd mas Yausua pub lawv nrog lawv cov kwvtij tau teej tug sab dej Yaladee hnub poob. Thaum Yausua xa lawv mus tsev nws foom koob hmoov rau lawv, thiab hais rau lawv tias, “Cia li rov qab mus nyias vaj nyias tsev, coj tej cuab txhiaj cuab tam muaj nplua mias, tej niag pab tsiaj tej nyiaj thiab tej kub tej tooj liab tej hlau thiab tej tsoos tsho ntau ntau mus. Muab tej uas nej txeeb yeeb ncuab li los ntawd faib rau nej cov kwvtij neej tsa.” Cov Lunpee thiab cov Kas thiab ib nrab xeem Manaxe tau ncaim cov Yixayee ntawm Silau hauv Khana‑as tebchaws rov qab mus tsev rau hauv Kile‑a tebchaws, yog lub tebchaws uas lawv txeeb tau ua lawv tug raws li Yawmsaub kom Mauxe hais rau lawv lawd. Thaum lawv los txog ntawm ntug dej Yaladee uas nyob Khana‑as sab tebchaws, cov Lunpee thiab cov Kas thiab ib nrab xeem Manaxe txawm tib ib lub thaj xyeem rau ntawm dej Yaladee, yog ib lub thaj uas loj kawg li. Mas cov Yixayee hnov luag hais tias, “Saib maj, cov Lunpee thiab cov Kas thiab ib nrab xeem Manaxe ua tau ib lub thaj rau ntawm Khana‑as ciam teb uas ze ntug dej Yaladee sab uas yog Yixayee tebchaws.” Mas thaum cov Yixayee tau hnov li ntawd ib tsoom pejxeem Yixayee sawvdaws txawm sau zog ua ke rau ntawm Silau yuav mus ua rog rau lawv. Mas cov Yixayee thiaj txib pov thawj Ele‑axa tus tub Fineha mus cuag cov Lunpee thiab cov Kas thiab ib nrab xeem Manaxe hauv Kile‑a tebchaws, thiab kaum tus uas ua hlob, ib xeem ib tug uas puavleej yog tus thawj hauv txhua cum Yixayee nrog nws mus. Thaum lawv tuaj txog cov Lunpee thiab cov Kas thiab ib nrab xeem Manaxe hauv Kile‑a tebchaws lawv kuj hais rau cov ntawd tias, “Yawmsaub cov neeg sawvdaws hais li no tias, ‘Nej ua dabtsi li no? Nej fav xeeb rau cov Yixayee tus Vajtswv, es hnub no nej tso Yawmsaub tseg mus ua ib lub thaj rau nej xwb, yog hnub no nej tau sawv twv Yawmsaub lawm. Tej kev txhaum uas peb ua ntawm Pe‑au tseem tsis txaus thiab lov? Los txog niaj hnub nimno peb tseem ntxuav tsis tau kom peb huv huv li thiab tej kev txhaum ntawd ua kom vij sub vij sw poob rau Yawmsaub cov neeg xwb. Mas hnub no nej tseem yuav tso Yawmsaub tseg thiab lov? Hnub no yog nej sawv twv Yawmsaub mas tagkis nws yuav chim rau ib tsoom Yixayee sawvdaws. Yog nej lub tebchaws qias tsis huv nej cia li hla mus rau hauv Yawmsaub lub tebchaws uas muaj Yawmsaub lub tsev ntaub, los nrog peb tuav lub tebchaws ua teej ua tug. Tsis txhob sawv twv Yawmsaub thiab tsis txhob coj peb twv Yawmsaub es mus ua ib lub thaj rau nej uas tsis yog peb tus Vajtswv Yawmsaub lub thaj. Xelag tus tub Akhas twb ua tsis ncaj rau tej uas muab cais pub rau Yawmsaub los tsis yog? Mas Yawmsaub txojkev chim thiaj li poob rau saum cov Yixayee sawvdaws. Tsis yog nws tib leeg puam tsuaj rau nws lub txim xwb.’ ” Xeem Lunpee thiab xeem Kas thiab ib nrab xeem Manaxe txawm teb cov thawj hauv txhua cum Yixayee tias, “Tus uas muaj hwjchim loj kawg nkaus pom, yog Vajtswv uas yog Yawmsaub. Tus uas muaj hwjchim loj kawg nkaus pom, yog Vajtswv uas yog Yawmsaub ntag. Nws yeej paub thiab cia cov Yixayee paub thiab. Yog tias peb sawv twv thiab ua tsis ncaj rau Yawmsaub mas hnub no tsis txhob tseg peb txojsia li. Qhov uas peb ua lub thaj ntawd, mas yog peb tso Yawmsaub tseg thiab siv ua kevcai hlawv huvsi xyeem thiab ua kevcai xyeem qoob loo thiab ua kevcai xyeem sib raug zoo rau saum lub thaj ntawd, mas cia Yawmsaub rau txim ntag. Tsis yog li ntawd. Qhov uas peb ua li ntawd twb yog ntshai tsam lwm hnub nej tej tub ki yuav hais rau peb tej tub ki tias, ‘Nej muaj feem koom Yawmsaub uas yog cov Yixayee tus Vajtswv dabtsi? Rau qhov Yawmsaub twb muab tus dej Yaladee ua ciam teb quas peb thiab nej cov Lunpee thiab cov Kas lawm nev. Nej tsis muaj feem hauv Yawmsaub.’ Yog li ntawd peb ntshai tsam nej tej tub ki yuav ua rau peb tej tub ki tseg tsis pe hawm Yawmsaub. “Vim li no peb thiaj hais tias, ‘Cia peb ua lub thaj no, tsis yog ua los siv ua tej kevcai hlawv huvsi xyeem lossis tua tsiaj xyeem.’ Tiamsis yog peb ua los ua tsoob zeej timkhawv rau peb thiab nej, thiab rau lwm tiam uas dua peb lawm tias peb yeej yuav pe hawm Yawmsaub thiab ua tej kevcai hlawv huvsi xyeem thiab tua tsiaj xyeem thiab xyeem sib raug zoo rau ntawm Yawmsaub xubntiag, xwv nej tej tub ki thiaj hais tsis tau rau peb tej tub ki tom qab tias, ‘Nej tsis muaj feem hauv Yawmsaub.’ Peb xav tias yog muaj leejtwg hais li no rau peb lossis hais rau peb caj ces tom qab, peb kuj yuav hais tau tias, ‘Saib lub thaj no uas zoo yam li Yawmsaub lub thaj uas peb tej poj koob yawm txwv ua cia, tsis yog ua los siv ua kevcai hlawv huvsi xyeem lossis tua tsiaj xyeem, tiamsis yog ua los ua tsoob zeej timkhawv rau peb thiab nej xwb.’ Peb yeej tsis yog yuav sawv twv Yawmsaub tso Yawmsaub tseg hnub no es ua dua ib lub thaj los ua tej kevcai hlawv huvsi xyeem thiab xyeem qoob loo thiab tua tsiaj xyeem, uas tsis yog peb tus Vajtswv Yawmsaub lub thaj uas nyob ntawm Yawmsaub lub tsev ntaub.” Thaum pov thawj Fineha thiab cov ua hlob uas yog cov thawj hauv txhua cum Yixayee uas nrog nws nyob ua ke ntawd hnov tej lus uas cov Lunpee thiab cov Kas thiab cov Manaxe hais ntawd mas lawv kuj txaus siab heev. Pov thawj Ele‑axa tus tub Fineha hais rau cov Lunpee thiab cov Kas thiab cov Manaxe tias, “Hnub no peb paub tseeb tias Yawmsaub nyob hauv peb nruab nrab, vim yog nej kuj tsis fav xeeb rau Yawmsaub. Nimno nej tau pab cov Yixayee dim qhov uas Yawmsaub rau txim.” Pov thawj Ele‑axa tus tub Fineha thiab cov uas ua hlob kuj tawm ntawm cov Lunpee thiab cov Kas hauv Kile‑a tebchaws rov qab mus cuag cov Yixayee hauv Khana‑as tebchaws thiab qhia lawv paub. Tej lus uas lawv mus qhia ntawd txaus cov Yixayee siab thiab cov Yixayee kuj qhuas Vajtswv. Tsis muaj leejtwg yuav hais txog ua rog rau lawv thiab ua rau lub tebchaws uas cov Lunpee thiab cov Kas nyob lawd puam tsuaj li lawm. Cov Lunpee thiab cov Kas hu lub thaj ntawd tias “Lub thaj tsoob zeej timkhawv.” Lawv hais tias “Lub thaj ua tsoob zeej timkhawv rau peb ob tog tias Yawmsaub yog Vajtswv.” Los rau yav tom qab ntev loo thaum Yawmsaub pub cov Yixayee tau so tsis ua rog rau tej yeeb ncuab uas nyob ib ncig lawv, thiab Yausua hnub nyoog nchav thiab laus heev lawm, Yausua hu cov Yixayee sawvdaws, yog cov kev txwj laus thiab cov thawj, cov uas tu plaub thiab cov nom tswv sawvdaws tuaj thiab hais rau lawv tias, “Kuv hnub nyoog nchav thiab laus heev lawm. Nej twb pom txhua yam uas Yawmsaub uas yog nej tus Vajtswv tau ua rau tej haiv neeg no huvsi vim yog saib rau nej, rau qhov Yawmsaub uas yog nej tus Vajtswv tau ua rog pab nej. Saib maj, tej tebchaws uas tseem tshuav kuv twb muab faib ua qub txeeg qub teg rau nej tej xeem, ua ke rau tej tebchaws uas kuv twb kov yeej lawd, txij ntua tus dej Yaladee mus txog Hiavtxwv Loj sab hnub poob. Nej tus Vajtswv Yawmsaub yuav muab lawv thawb kom khiav ntawm nej hauv ntej mus thiab yuav ntiab lawv khiav dhau plaws ntawm nej lub qhov muag mus. Mas nej yuav txeeb tau lawv lub tebchaws ua nej tug raws li nej tus Vajtswv Yawmsaub cog lus rau nej. Vim li no nej cia li ua khov kho tuav rawv thiab ua raws nraim li txhua yam uas sau cia rau hauv Mauxe phau kevcai, tsis txhob tig rau sab xis lossis sab laug kiag li, xwv nej thiaj tsis nrog tej haiv neeg uas tshuav nyob hauv nej nruab nrab koom ua ke, lossis hais txog lawv tej dab lub npe thiab tuav lawv tej dab lub npe twv lossis ua koom tu thiab pe lawv tej dab ntawd. Tiamsis nej yuav tsum nrog Yawmsaub uas yog nej tus Vajtswv tsheej xeeb yam li nej ua los txog niaj hnub nimno. Rau qhov Yawmsaub ntiab tej haiv neeg uas loj thiab muaj zog dua nej khiav ntawm nej hauv ntej mus. Thiab tsis muaj leejtwg tiv tau nej los txog niaj hnub nimno. Nej ib leeg ntiab tau ib txhiab leej khiav, vim nej tus Vajtswv Yawmsaub pab nej ua rog, raws li nws cog lus cia lawd. Yog li no nej yuav tsum ceev faj tib zoo hlub Yawmsaub uas yog nej tus Vajtswv. Yog nej tig rov qab es mus koom tej haiv neeg uas tseem tshuav nyob rau hauv nej no, mus nrog lawv ua tshoob ua kos, thiab mus yuav lawv tej tub tej ntxhais, ces nej cia li paub tseeb tias, nej tus Vajtswv Yawmsaub yuav tsis ntiab tej haiv neeg ntawd khiav ntawm nej hauv ntej mus lawm. Lawv yuav ua rooj ntxiab rooj hlua cuab nej thiab yuav ua rab nplawm nplawm nej nrob qaum thiab ua pos chob nej qhov muag mus txog thaum nej puam tsuaj tag hauv lub tebchaws zoo no uas nej tus Vajtswv Yawmsaub pub rau nej lawm. “Nimno kuv tabtom yuav dua mus. Nej txhua tus lub siab thiab tus ntsuj plig yeej paub tias txhua yam zoo uas nej tus Vajtswv Yawmsaub cog lus rau nej tsis poob ib los li, yeej ua tiav txhua yam tsis muaj ib yam dabtsi uas tsis tau tiav. Txhua yam zoo uas nej tus Vajtswv Yawmsaub cog lus rau nej twb ua tiav rau nej li cas lawm, Yawmsaub yuav ua tej xwm txheej phem huvsi los txog nej tiav ib yam li ntawd mus txog thaum nws rhuav tshem nej ploj tag hauv lub tebchaws zoo no uas nej tus Vajtswv Yawmsaub muab pub rau nej. Yog nej fav xeeb rau nej tus Vajtswv Yawmsaub tej lus cog tseg uas nws muab cob rau nej es mus ua koom tu luag tej dab thiab pe tej dab ntawd, mas Yawmsaub txojkev npau taws yuav tshwm plaws rau nej mas nej yuav puam tsuaj sai kawg ploj tag hauv lub tebchaws zoo uas nws tau muab pub rau nej.” Mas Yausua sau zog txhua xeem Yixayee huvsi tuaj rau ntawm Sekhee, thiab hu Yixayee cov kev txwj laus thiab cov thawj thiab cov uas tu plaub thiab cov nom tswv tuaj, mas lawv kuj tuaj rau ntawm Vajtswv xubntiag. Mas Yausua hais rau ib tsoom pejxeem sawvdaws tias, “Yawmsaub uas yog cov Yixayee tus Vajtswv hais li no tias, ‘Yav thaum ub nej tej poj koob yawm txwv nyob ntawm ntug dej Yufeti sab hnub tuaj, yog Thela uas yog Aplahas thiab Nahau txiv, lawv yeej ua koom tu luag tej dab. Mas kuv coj nej txiv Aplahas tawm sab ntug dej Yufeti hnub tuaj los thiab coj nws los thoob plaws Khana‑as tebchaws thiab ua rau nws muaj tub ki coob coob. Kuv pub Yiha rau nws. Kuv pub Yakhauj thiab Exau rau Yiha. Kuv pub tej toj siab Xe‑i tebchaws rau Exau ua nws tug, tiamsis Yakhauj thiab nws cov menyuam tau mus rau nram Iyi tebchaws. Kuv txib Mauxe thiab Aloo los thiab kuv ua rau cov Iyi raug kev txom nyem vim tej uas kuv ua rau hauv lawv nruab nrab. Thiab yav tom qab kuv coj nej tawm los. Kuv coj nej tej poj koob yawm txwv tawm hauv Iyi tebchaws los mas nej los txog dej Hiavtxwv Liab. Cov Iyi tej tsheb ua rog thiab tej tub rog caij nees caum nej tej poj koob yawm txwv los txog dej Hiavtxwv Liab. Thaum lawv quaj thov Yawmsaub, mas nws kuj ua kom tsaus ntuj quas nej thiab cov Iyi, thiab nws ua rau dej hiavtxwv nyab kiag cov Iyi. Nej lub qhov muag yeej pom ntsoov tej uas kuv ua rau Iyi tebchaws. Thiab nej nyob hauv tebchaws moj sab qhua ntev. Mas kuv coj nej los rau hauv cov Amaulai lub tebchaws uas nyob sab ntug dej Yaladee hnub tuaj. Lawv ua rog rau nej mas kuv muab lawv cob rau hauv nej txhais tes thiab nej txeeb tau lawv lub tebchaws, thiab kuv muab lawv ua puam tsuaj tag rau ntawm nej hauv ntej. Thaum ntawd Xipaula tus tub Npalaj uas ua vajntxwv kav Mau‑a sawv tsees tawm tsam cov Yixayee. Npalaj txib neeg mus hu Npe‑au tus tub Npala‑as tuaj tsawm foom nej. Tiamsis kuv tsis quav ntsej Npala‑as, vim li ntawd nws thiaj foom koob hmoov rau nej xwb. Yog li no kuv thiaj li cawm nej dim hauv nws txhais tes. Nej hla tus dej Yaladee los rau ntawm lub moos Yelikhau, mas cov neeg Yelikhau tawm tsam nej. Cov Amaulai, cov Pelixai, cov Khana‑as, cov Hivai, cov Kawkasi, cov Hivai thiab cov Yenpu kuj tawm tsam nej, tiamsis kuv muab lawv cob rau hauv nej txhais tes. Kuv tso daiv tso nkawj ua nej ntej mus ntiab cov Amaulai ob tug vajntxwv khiav ntawm nej hauv ntej mus, tsis yog nej li ntaj li hneev ua tau. Kuv muab lub tebchaws uas nej tsis tau khwv rau hauv pub rau nej thiab pub tej moos uas nej tsis tau tsim rau nej mas nej tau mus nyob rau hauv. Nej tau noj tej vaj txiv hmab thiab tej vaj txiv aulib uas nej tsis tau cog.’ “Yog li no nimno nej cia li paub ntshai thiab hwm Yawmsaub thiab ua koom tu nws tuaj nruab siab tiag tiag mus li. Cia li muab tej dab uas nej tej poj koob yawm txwv txeev teev sab dej tim ub thiab hauv Iyi tebchaws tso pov tseg thiab ua koom tu Yawmsaub. Yog nej tsis kam ua koom tu Yawmsaub, hnub no nej cia li xaiv saib nej yuav ua koom tu tus twg, yuav ua koom tu tej dab uas nej tej poj koob yawm txwv txeev teev sab dej Yufeti tim ub, lossis ua koom tu cov Amaulai tej dab hauv lub tebchaws uas nej nyob no. Tiamsis kuv thiab kuv tsev neeg, peb yuav ua koom tu Yawmsaub.” Cov pejxeem teb tias, “Qhov uas peb yuav tso Yawmsaub tseg es mus ua koom tu luag tej dab, thov kom nyob deb ntawm peb, rau qhov Yawmsaub uas yog peb tus Vajtswv yog tus uas coj peb thiab peb tej poj koob yawm txwv tawm hauv Iyi tebchaws hauv txojkev ua qhev los, thiab yog tus uas ua tej txujci phimhwj rau peb pom thiab tsom kwm peb rau txhua txojkev uas peb taug thiab tsom kwm peb rau hauv txhua lub tebchaws uas peb hla mus. Thiab Yawmsaub ntiab tej neeg sawvdaws khiav ntawm peb hauv ntej huvsi mus, yog cov Amaulai uas nyob hauv lub tebchaws ntawd. Vim li no peb yuav ua koom tu Yawmsaub rau qhov nws yog peb tus Vajtswv.” Tiamsis Yausua hais rau cov pejxeem tias, “Nej ua koom tu Yawmsaub tsis tau li, rau qhov nws yog tus Vajtswv uas dawb huv. Nws yog tus Vajtswv uas khib xeeb nws yuav tsis zam nej tej kev fav xeeb thiab nej lub txim. Yog nej tso Yawmsaub tseg mus ua koom tu luag tej dab, nws yuav tig kiag los ua kev txom nyem ceeblaj raug nej thiab rhuav tshem nej, txawm yog nws txeev ua zoo rau nej kuj xij.” Cov pejxeem hais rau Yausua tias, “Tsis yog li ntawd, peb yeej yuav ua koom tu Yawmsaub.” Mas Yausua hais rau cov pejxeem tias, “Nej ua timkhawv rov rau nej hais tias nej xaiv yuav Yawmsaub thiab ua koom tu nws nav.” Lawv hais tias, “Peb ua tau timkhawv.” Yausua hais tias, “Yog li ntawd cia li muab luag tej dab mlom uas nyob hauv nej pov tseg thiab muab lub siab xib rau Yawmsaub uas yog Yixayee tus Vajtswv.” Mas cov pejxeem hais rau Yausua tias, “Peb yuav ua koom tu Yawmsaub uas yog peb tus Vajtswv thiab peb yuav mloog nws lus.” Yog li no Yausua thiaj kom cov pejxeem cog lus tseg rau hnub ntawd thiab nws muab tej kab ke thiab tej kevcai cob rau lawv ntawm lub moos Sekhee. Thiab Yausua sau tej lus no rau hauv Yawmsaub phau ntawv kevcai. Nws muab ib lub pob zeb loj teeb rau hauv tus qab ntoo qheb ntawm lub chaw pe hawm Yawmsaub. Thiab Yausua hais rau cov pejxeem sawvdaws tias, “Saib nawj, lub pob zeb no yuav ua timkhawv rau peb, rau qhov lub pob zeb no tau hnov tej lus huvsi uas Yawmsaub hais rau peb. Yog tias nej fav xeeb rau nej tus Vajtswv, lub pob zeb no thiaj ua timkhawv kom nej.” Ces Yausua txawm tso cov pejxeem nyias rov mus rau nyias thaj tebchaws uas yog lawv qub txeeg qub teg. Dhau ntawd Noo tus tub Yausua uas yog Yawmsaub tus qhev txawm tuag, nws hnub nyoog muaj ib puas kaum xyoo. Lawv muab nws log rau hauv nws thaj teb uas yog nws qub txeeg qub teg ntawm lub moos Thinaxela uas nyob pem toj siab Efa‑i tebchaws ntawm lub roob Ka‑a sab ped. Cov Yixayee ua koom tu Yawmsaub tag Yausua sim neej thiab tag cov kev txwj laus uas nyob ntev dhau Yausua sim neej thiab paub txog txhua yam uas Yawmsaub tau ua rau cov Yixayee. Yauxej cov pob txha uas cov Yixayee coj hauv Iyi tebchaws los ntawd lawv muab log rau hauv lub moos Sekhee, yog hauv thaj teb uas Yakhauj yuav ntawm Hamau cov tub ib puas lub txiag nyiaj. Hamau yog Sekhee txiv. Thaj teb ntawd poob ua Yauxej caj ces li qub txeeg qub teg. Aloo tus tub Ele‑axa kuj tuag, mas lawv muab nws log ntawm lub moos Kinpe‑a uas yog nws tus tub Fineha lub moos uas tau muab ua Fineha teej tug yog nyob pem toj siab Efa‑i tebchaws. Thaum uas Yausua tuag lawd cov Yixayee nug Yawmsaub tias, “Peb cov leejtwg yuav xub nce mus ua rog rau cov Khana‑as?” Yawmsaub hais tias, “Xeem Yuda yuav ua ntej. Saib maj, kuv twb muab lub tebchaws rau hauv lawv txhais tes lawm.” Mas xeem Yuda thiaj hais rau xeem Xime‑oo uas ua tij tias, “Cia li nrog peb mus rau hauv lub tebchaws uas muab tu rau peb lawm, peb thiaj ua tau rog rau cov Khana‑as, thiab peb yuav nrog nej mus ua rog rau hauv lub tebchaws uas muab tu rau nej lawd.” Xeem Xime‑oo kuj nrog lawv mus. Xeem Yuda thiaj li mus, mas Yawmsaub muab cov Khana‑as thiab cov Pelixai rau hauv lawv txhais tes mas lawv tua yeej ib vam leej ntawm Npexe. Lawv ntsib Adauninpexe ntawm Npexe mas ua rog rau nws. Lawv tua yeej cov Khana‑as thiab cov Pelixai. Adauninpexe khiav lawm tiamsis lawv caum ntes tau nws, mas muab nws ob tug taub teg thiab ob tug taub taw txiav pov tseg. Adauninpexe hais tias, “Muaj xya caum tus vajntxwv uas taub teg taub taw tu tag txeev khaws nyuag qub mov qub zaub hauv kuv qab rooj. Kuv ua li cas rau luag lawm Vajtswv kuj ua ib yam li ntawd pauj kuv.” Lawv coj nws los rau hauv Yeluxalees mas nws txawm tuag rau hauv lawm. Cov Yuda mus ua rog rau lub moos Yeluxalees thiab txeeb tau thiab xuas ntaj tua lub moos thiab muab hlawv huvsi. Dhau ntawd cov Yuda kuj nqes mus ua rog rau cov Khana‑as uas nyob pem toj siab hauv Neke thiab tej pov roob Sefela. Cov Yuda kuj mus ntaus cov Khana‑as uas nyob hauv lub moos Heploo (lub moos Heploo ntawd yav nram ntej hu ua Khiliya Anpa). Lawv tua tau Sesai thiab Ahimas thiab Thamai. Lawv tawm qhov ntawd mus ua rog rau cov uas nyob hauv lub moos Denpi. Denpi yav nram ntej hu ua Khiliya Xefaw. Khalej hais tias, “Leejtwg ntaus tau lub moos Khiliya Xefaw thiab txeeb tau mas kuv yuav muab kuv tus ntxhais Axav rau nws ua pojniam.” Mas Auni‑ee uas yog Khalej tus kwv Khena tus tub txeeb tau lub moos ntawd mas Khalej muab nws tus ntxhais Axav rau nws ua pojniam. Thaum sib yuav lawd Axav txawm taij nws tus txiv thov leej txiv pub ib daim teb. Thaum Axav nqes saum nws tus nees luav los mas Khalej nug tias, “Koj xav yuav dabtsi?” Axav teb tias, “Thov koj pub ib yam koob hmoov rau kuv. Koj pub kuv muaj teb hauv tebchaws Neke, mas thov pub tej lub hauv dej txhawv thiab.” Khalej txawm muab lub hauv dej sab ped thiab lub sab nram rau nws. Mauxe yawm txiv caj ces uas yog neeg Khenai nrog cov Yuda ua ke tawm ntawm lub moos toov laj nce mus rau tebchaws moj sab qhua Yuda uas nyob hauv Neke ze lub moos Alaj, mas lawv thiaj mus nrog cov qub neeg hauv tebchaws ntawd nyob ua ke. Xeem Yuda kuj nrog xeem Xime‑oo uas yog nws tij mus tua yeej cov Khana‑as uas nyob hauv lub moos Xefa thiab muab lub moos ntawd ua puam tsuaj huvsi, lawv thiaj hu lub moos ntawd tias Hauma. Xeem Yuda txeeb tau lub moos Kaxa thiab lub moos Akheloo thiab lub moos Ekhoo thiab cov moos ntawd li kav xyuam huvsi. Yawmsaub nrog nraim xeem Yuda, lawv thiaj txeeb tau tej tebchaws toj siab, tiamsis lawv ntiab tsis tau cov neeg nruab tiag, rau qhov cov nruab tiag muaj tsheb nees hlau ua rog. Lub moos Heploo lawv muab rau Khalej raws li Mauxe hais cia lawd. Khalej thiaj ntiab Anaj peb tug tub khiav mus. Tiamsis xeem Npeeyamee tsis ntiab cov Yenpu uas nyob hauv Yeluxalees khiav mus. Ua li no mas cov Yenpu thiaj li nrog cov Npeeyamee nyob ua ke hauv Yeluxalees los txog niaj hnub nimno. Yauxej caj ces mus ua rog rau lub moos Npe‑ee mas Yawmsaub nrog nraim lawv. Yauxej caj ces tso neeg mus tshuaj Npe‑ee (yav nram ntej lub moos no hu ua Lu). Mas cov neeg tshuaj xov pom ib tug txivneej tawm hauv lub moos tuaj, lawv txawm hais rau nws tias, “Thov qhia txojkev uas nkag rau hauv lub moos no rau peb, mas peb yuav ua zoo rau koj.” Nws kuj qhia kev nkag hauv lub moos rau lawv, mas lawv xuas ntaj tua lub moos ntawd huvsi, tiamsis lawv tso tus txivneej ntawd thiab nws tsev neeg sawvdaws dim. Tus txivneej ntawd thiaj mus nyob rau hauv cov Hithai lub tebchaws thiab ua ib lub moos, tis npe hu ua Lu, mas lub npe ntawd nyob txog niaj hnub nimno. Xeem Manaxe tsis ntiab cov neeg hauv tej moos no thiab tej zej zog ib ncig ntawd khiav, yog lub moos Npesas, Tha‑ana, Dau, Ile‑as thiab Mekidau. Cov Khana‑as tseem kwv tawv nyob hauv lub tebchaws ntawd. Mas thaum cov Yixayee muaj zog tuaj lawv kuj yuam cov Khana‑as ua haujlwm rau lawv, tiamsis tsis muab ntiab kom khiav tag nrho. Thiab xeem Efa‑i kuj tsis ntiab cov Khana‑as uas nyob hauv lub moos Kexaw tawm khiav. Cov Khana‑as tseem nrog lawv nyob ua ke hauv lub moos Kexaw. Xeem Xenpuloo tsis ntiab cov neeg hauv lub moos Khibloo thiab hauv Nahaloo khiav. Cov Khana‑as tseem nrog lawv nyob ua ke thiab raug quab yuam ua haujlwm. Xeem Asaw tsis ntiab cov neeg hauv lub moos Akhau thiab Xaidoo thiab Alab thiab Axij thiab Henpa thiab Afi thiab Lehau khiav. Cov Asaw nrog cov qub neeg Khana‑as nyob ua ke hauv lub tebchaws ntawd rau qhov lawv tsis muab ntiab khiav mus. Xeem Nathali tsis ntiab cov neeg hauv Npeseme thiab hauv Npe‑anav khiav. Lawv cia li nrog cov qub neeg Khana‑as nyob ua ke hauv lub tebchaws ntawd. Tiamsis cov neeg hauv ob lub moos ntawd kuj raug quab yuam ua haujlwm rau lawv. Cov Amaulai tiv thaiv xeem Daj rau pem toj siab tsis kheev lawv nqes los nram nruab tiag. Cov Amaulai kwv tawv nyob hauv lub moos Hahele thiab hauv Aiyaloo thiab hauv Sa‑anpi, tiamsis Yauxej caj ces txhais tes tsuj yuam lawv, thiaj quab yuam lawv ua haujlwm. Cov Amaulai ciam teb yog txij ntua txojkev uas hla lub dawm roob Akhanpi thiab txij ntua lub moos Xelaj los rau sab ped mus li. Yawmsaub tus tubtxib saum ntuj tawm ntawm lub moos Kilakas mus txog lub moos Npaukhi, mas hais tias, “Kuv coj nej tawm hauv Iyi tebchaws los thiab coj nej los rau hauv lub tebchaws uas kuv cog lus ruaj khov tias kuv yuav pub rau nej tej poj koob yawm txwv. Kuv hais tias, ‘Kuv yuav tsis rhuav tej lus uas kuv cog tseg rau nej ib zaug li, thiab nej yuav tsum tsis txhob nrog cov neeg hauv lub tebchaws no sib cog lus kiag li. Nej yuav tsum muab lawv tej thaj teev dab rhuav pov tseg huvsi.’ Tiamsis nej tsis mloog tej lus uas kuv hais. Nej ua dabtsi li no? Yog li no nimno kuv thiaj hais rau nej tias, kuv yuav tsis ntiab cov neeg ntawd khiav ntawm nej hauv ntej mus lawm. Lawv yuav ua yeeb ncuab rau nej thiab lawv tej dab yuav ua rooj hlua cuab nej.” Thaum Yawmsaub tus tubtxib saum ntuj hais tej lus no rau cov Yixayee tag lawd, cov pejxeem txawm tsa suab quaj. Lawv thiaj hu lub chaw ntawd tias Npaukhi thiab lawv tua tsiaj xyeem rau Yawmsaub qhov ntawd. Thaum Yausua tso cov pejxeem mus lawd, cov Yixayee nyias rov mus rau nyias thaj teb thiaj txeeb tau ua qub txeeg qub teg. Cov Yixayee ua koom tu Yawmsaub tag Yausua sim neej thiab tag cov kev txwj laus uas nyob ntev dhau Yausua sim neej thiab pom txhua yam haujlwm loj uas Yawmsaub tau ua rau cov Yixayee. Noo tus tub Yausua uas yog Yawmsaub tus qhev txawm tuag rau thaum hnub nyoog muaj ib puas kaum xyoo. Lawv muab nws log rau hauv nws thaj teb uas yog nws qub txeeg qub teg ntawm lub moos Thinahele uas nyob pem toj siab Efa‑i tebchaws ntawm lub roob Ka‑a sab ped. Cov neeg uas nyob tiam ntawd kuj dua tag mus nrog lawv tej poj koob yawm txwv nyob huvsi lawm, ho muaj dua ib tiam tshwm los uas tsis paub Yawmsaub thiab tsis paub tej uas Yawmsaub tau pab cov Yixayee lawd. Cov Yixayee kuj ua tej uas Yawmsaub pom tias phem thiab mus teev tej dab Npa‑as Lawv tso Yawmsaub tseg, yog lawv tej poj koob yawm txwv tus Vajtswv uas coj lawv tawm hauv Iyi tebchaws los. Lawv raws ncuj nciav luag tej dab uas yog cov neeg uas nyob ib ncig lawv tej dab, thiab pe tej dab ntawd mas ua rau Yawmsaub chim. Lawv tso Yawmsaub tseg mus ua koom tu tej dab Npa‑as thiab tej dab Athalau. Vim li no Yawmsaub thiaj npau taws rau cov Yixayee, nws thiaj muab lawv cob rau hauv cov uas lws lawv txhais tes thiab muab lawv muag rau hauv lawv cov yeeb ncuab uas nyob ib ncig, lawv thiaj li tiv tsis taus lawv cov yeeb ncuab dua li lawm. Lawv mus ntaus rog thaum twg los Yawmsaub txhais tes kuj tawm tsam lawv ua rau lawv swb kiag raws li Yawmsaub tau ntuas lawv thiab cog lus ruaj rau lawv lawm. Mas lawv raug kev ceeblaj txom nyem heev. Ces Yawmsaub txawm tsa kom muaj cov thawj uas cawm lawv dim ntawm cov uas lws lawv txhais tes. Los lawv kuj tsis mloog cov thawj ntawd tej lus. Lawv tseem mus deev luag tej dab thiab pe tej dab ntawd. Lawv tig hlo ntawm txojkev uas lawv tej poj koob yawm txwv taug sai kawg li lawm. Lawv tej poj koob yawm txwv ua raws li Yawmsaub txoj kevcai tiamsis lawv tsis ua raws li ntawd. Yawmsaub tsa kom muaj tus thawj thaum twg Yawmsaub kuj nrog nraim tus thawj ntawd, thiab cawm lawv dim hauv lawv cov yeeb ncuab txhais tes mus tag tus thawj ntawd sim neej. Vim yog lawv raug kev tsim txom raug kev quab yuam, lawv lub suab quaj qw ntsaj laws ua rau Yawmsaub khuvleej lawv. Tiamsis thaum tus thawj ntawd tag txojsia, lawv kuj tig hlo rov qab ua phem heev dua lawv tej poj koob yawm txwv, mus raws ncuj nciav luag tej dab thiab ua koom tu thiab pe tej dab ntawd. Lawv tsis tso ib yam kev phem twg uas lawv ua tseg lossis tso txojkev tawv ncauj tseg. Vim li no Yawmsaub txojkev npau taws thiaj tshwm plaws rau cov Yixayee thiab nws hais tias, “Vim haiv neeg no fav xeeb rau kuv tej lus cog tseg uas kuv cog rau lawv tej poj koob yawm txwv thiab vim lawv tsis mloog kuv tej lus, mas txij no mus kuv yuav tsis muab tej haiv neeg uas thaum Yausua tuag tseem tshuav nyob ntiab tawm ntawm nej hauv ntej mus, xwv kuv thiaj tau siv tej haiv neeg ntawd sim cov Yixayee saib lawv yuav ceev faj taug Yawmsaub txojkev ib yam li lawv tej poj koob yawm txwv los tsis taug.” Vim li no Yawmsaub thiaj tso tej neeg ntawd nyob, tsis ntiab lawv tawm mus sai sai, thiab tsis muab cob rau hauv Yausua txhais tes. No yog cov neeg uas Yawmsaub tseg cia tshuav nyob xwv thiaj tau sim txhua tus Yixayee uas tsis tau txeev paub ua rog hauv Khana‑as. Yawmsaub ua li no tsuas yog xav qhia kev ua rog rau cov Yixayee txhua tiam uas tsis tau txeev paub ua rog dua. Yog tshuav cov Filixatee tsib tug vajntxwv, thiab cov Khana‑as huvsi thiab cov Xaidoo thiab cov Hivai uas nyob saum lub roob Lenpanoo txij ntua lub roob Npa‑as Hawmoo mus txog txojkev uas mus rau hauv lub moos Hama. Cov neeg no tshuav nyob los sim cov Yixayee xwv thiaj paub tias cov Yixayee yuav mloog Yawmsaub tej lus nkaw uas Yawmsaub twb kom Mauxe hais rau lawv tej poj koob yawm txwv los tsis mloog. Yog li no cov Yixayee thiaj nyob txuam rau hauv cov Khana‑as, cov Hithai, cov Amaulai, cov Pelixai, cov Hivai thiab cov Yenpu. Lawv mus yuav cov neeg ntawd tej ntxhais ua pojniam thiab muab lawv tej ntxhais qua rau cov neeg ntawd tej tub, thiab ua koom tu lawv tej dab. Cov Yixayee ua tej uas Yawmsaub pom tias phem kawg li. Lawv tsis nco Yawmsaub uas yog lawv tus Vajtswv lawm, lawv mus teev tej dab Npa‑as thiab tej dab Asela. Vim li ntawd Yawmsaub txojkev npau taws thiaj tshwm plaws rau cov Yixayee, Yawmsaub thiaj muab lawv tso rau Kusa Lisatha‑i uas yog Alas Nahala‑i tebchaws tus vajntxwv. Cov Yixayee thiaj li zwm rau Kusa Lisatha‑i tau yim xyoo. Mas thaum cov Yixayee quaj thov Yawmsaub mas Yawmsaub thiaj tsa kom muaj ib tug pab cov Yixayee, yog Khalej tus kwv Khena tus tub Auni‑ee uas pab lawv dim. Yawmsaub tus Ntsuj Plig thiaj los kav nws lub siab thiab nws ua thawj kav cov Yixayee thiab nws tawm mus ua rog. Mas Yawmsaub muab Alas Nahala‑i tus vajntxwv Kusa Lisatha‑i rau hauv nws txhais tes, nws thiaj kov yeej Kusa Lisatha‑i. Ua li no lub tebchaws thiaj li so tsis ua rog tau plaub caug xyoo. Mas Khena tus tub Auni‑ee txawm tuag lawm. Cov Yixayee rov ua tej uas Yawmsaub pom tias phem kawg li, Yawmsaub thiaj cuab cov Mau‑a tus vajntxwv Eloos zog ntaus cov Yixayee, vim yog lawv twb ua tej uas Yawmsaub pom tias phem kawg li. Eloos thiaj hu cov Asmoo thiab cov Amalej tuaj ua ke mus ntaus yeej cov Yixayee thiab txeeb tau lub moos toov laj. Cov Yixayee thiaj li zwm rau Mau‑a tus vajntxwv Eloos tau kaum yim xyoo. Thaum cov Yixayee quaj thov Yawmsaub mas Yawmsaub kuj tsa muaj ib tug los pab lawv, yog Kela tus tub Ehuj, yog xeem Npeeyamee, yog ib tug xis sab tes laug. Cov Yixayee muab se rau nws xa mus rau Mau‑a tus vajntxwv Eloos. Ehuj ntaus ib rab ntaj ob sab ntse ntev ib tshim coj nrog cev muab ntxig raws sab ncej qab xis rau hauv lub ris. Nws txawm coj se mus cev rau Mau‑a tus vajntxwv Eloos. Eloos yog ib tug rog rog heev. Thaum Ehuj muab cov se cob tag lawm ces nws txawm kom cov uas kwv cov se ntawd rov qab. Mas nws tig rov qab ntawm cov dab mlom pob zeb uas lawv txaug uas nyob ze Kilakas rov los hais tias, “Au Vajntxwv, kuv muaj ib lo lus uas kuv yuav hais rau koj tib leeg paub xwb.” Vajntxwv thiaj hais kom nyob twjywm. Ces vajntxwv cov tub teg tub taws thiaj tawm mus lawm. Mas Ehuj nkag mus cuag vajntxwv rau thaum uas vajntxwv tib leeg zaum txheej saud hauv nws chav uas laj ntxiag. Mas Ehuj hais tias, “Kuv muaj Vajtswv tej lus uas kuv yuav hais rau koj.” Ces vajntxwv txawm sawv tsees. Ehuj thiaj xuas txhais tes laug rho kiag ntaj hauv sab ceg xis nkaug kiag Eloos plab. Rab ntaj ploj ntais tag nrho tus ko, tej pav ywj foob nkaus rab ntaj. Nws kuj tsis rho rab ntaj hauv Eloos lub plab los, tej quav zis tawm los xwb. Ces Ehuj txawm tawm rau nraum qab khav, nws muab chav tsev txheej saud qhov rooj kaw thiab muab ntsuas phoo xauv cia. Thaum Ehuj mus lawd vajntxwv cov tub teg tub taws los saib mas pom tias chav tsev txheej saum lub qhov rooj muab ntsas phoo xauv lawm, lawv kuj xav tias “Nyaj vajntxwv mus plob sab rau lub tsev dej hauv chav laj ntxiag lawm.” Lawv tos ntev xeeb txob lawm. Thaum nws tseem tsis qheb qhov rooj txheej saud li, lawv thiaj muab yuam sij los qheb ua ciav lawv tus vajntxwv twb tuag xyab luas saum lawj. Thaum uas lawv tseem tos tos ntawd Ehuj twb khiav dhau ntawm cov dab mlom pob zeb twb mus txog Xe‑ila lawm. Thaum nws los txog nws thiaj tshuab raj kub yaj hauv tebchaws toj siab Efa‑i, mas cov Yixayee kuj nrog nws nqes pem toj siab mus, nws coj lawv kev. Nws hais rau lawv tias, “Cia li raws kuv qab rau qhov Yawmsaub twb muab nej cov yeeb ncuab uas yog cov Mau‑a rau hauv nej txhais tes lawm.” Lawv thiaj nrog nws nqes mus txeeb tau tej chaw uas hla tau dej Yaladee, thaiv cov Mau‑a kev tsis pub ib tug hla tau li. Zaum ntawd lawv tua cov Mau‑a tuag kwvlam ib vam leej yog cov uas khov sim kho thiab muaj zog huvsi, tsis muaj ib tug khiav dim li. Cov Mau‑a thiaj swb thiab zwm rau cov Yixayee hnub ntawd. Mas lub tebchaws thiaj so tsis ua rog tau yim caum xyoo. Dhau Ehuj lawm mas muaj Anav tus tub Saka. Nws xuas tus hmuv raws nyuj tua cov Filixatee tuag rau pua leej. Nws kuj pab cov Yixayee dim thiab. Thaum Ehuj tuag lawd, cov Yixayee rov ua tej uas Yawmsaub pom tias phem. Yawmsaub thiaj muab lawv cob rau hauv cov Khana‑as tus vajntxwv Yanpi uas nyob lub moos Haxau txhais tes. Nws tus thawj rog hu ua Xixela uas nyob hauv lub moos Halause Hakau‑i. Cov Yixayee txawm quaj thov Yawmsaub pab, rau qhov vajntxwv Yanpi muaj cuaj pua lub tsheb hlau ua rog thiab ua nruj ua tsiv quab yuam cov Yixayee tau nees nkaum xyoo. Mas ib tug pojniam cev Vajtswv lus hu ua Denpaula, yog Lapidau li pojniam, nws ua thawj coj cov Yixayee lub sijhawm ntawd. Nws pheej nyob hauv tsob qab toov laj Denpaula uas nyob ntawm Lama thiab Npe‑ee ntu nruab nrab pem toj siab Efa‑i tebchaws, mas cov neeg Yixayee pheej tuaj cuag nws qhov ntawd kom nws tu lawv tej plaub. Denpaula txib neeg mus hu Npala uas yog Anpinau‑a tus tub tuaj ntawm Khede hauv Nathali tebchaws tuaj mas hais rau nws tias, “Yawmsaub uas yog cov Yixayee tus Vajtswv hais rau koj tias, ‘Cia li mus sau zog koj cov tub rog tuaj rau ntawm lub roob Thanpau. Cia li mus sau xeem Nathali thiab xeem Xenpuloo ib vam leej. Mas kuv yuav ntxias Xixela uas yog vajntxwv Yanpi tus thawj rog kom coj nws cov tub rog thiab nws cov tsheb ua rog tuaj ntsib koj ntawm tus dej Khisoo, thiab kuv yuav muab nws cob rau hauv koj txhais tes.’ ” Npala thiaj teb Denpaula tias, “Yog koj nrog kuv mus kuv thiaj li mus. Yog koj tsis nrog kuv mus, kuv kuj tsis mus.” Denpaula teb tias, “Kuv yeej yuav nrog koj mus tiag, tiamsis txojkev uas koj taug ntawd yuav tsis coj koj tau koob meej, rau qhov Yawmsaub yuav muab Xixela cob rau ib tug pojniam txhais tes.” Ces Denpaula txawm sawv tsees nrog Npala mus txog lub moos Khede. Npala thiaj hu xeem Xenpuloo thiab xeem Nathali tuaj rau ntawm Khede, mas muaj ib vam leej nrog Npala mus thiab Denpaula kuj nrog nws mus thiab. Henpaw uas yog neeg Khenai tau ncaim ntawm cov Khenai sawvdaws uas yog Mauxe yawm txiv Haunpas caj ces los tsa tsev ntaub nyob rau ntawm tus ntoo qheb hauv Xanani uas nyob ze lub moos Khede. Thaum muaj neeg mus hais rau Xixela tias Anpinau‑a tus tub Npala nce mus rau saum lub roob Thanpau lawm, Xixela txawm txhij nws cuaj pua lub tsheb hlau ua rog huvsi thiab tag nrho nws cov tub rog tuaj rau ntawm lub moos Halause Hakau‑i mus txog tus dej Khisoo. Denpaula hais rau Npala tias, “Cia li mus los maj, rau qhov hnub no yog hnub uas Yawmsaub muab Xixela rau hauv koj txhais tes. Yawmsaub twb ua koj ntej mus lawm nev.” Npala thiab nws cov tub rog ib vam leej thiaj nqes ntawm lub roob Thanpau mus. Yawmsaub ua rau Xixela thiab nws tej tsheb ua rog huvsi thiab nws pab tub rog huvsi tawg khiav swb kiag Npala tej hniav ntaj, ces Xixela txawm nqes saum nws lub tsheb ua rog xuas kotaw khiav lawm. Ces Npala txawm caum tej tsheb ua rog thiab cov tub rog mus txog Halause Hakau‑i. Mas Xixela pab tub rog raug hniav ntaj tuag tag tsis tshuav ib tug li. Tiamsis Xixela dhia khiav mus txog Ya‑ee uas yog Henpaw tus pojniam uas yog neeg Khenai lub tsev ntaub, rau qhov vajntxwv Yanpi hauv lub moos Haxau nrog Henpaw uas yog neeg Khenai tsev neeg sib raug zoo. Ya‑ee txawm tawm tuaj tos Xixela thiab hais tias, “Yawg hlob, cia li los tsev, cia li los so hauv kuv lub tsev, tsis txhob ntshai li.” Xixela thiaj nkag mus rau hauv nws lub tsev ntaub, thiab nws muab ib daim pam los vov Xixela. Xixela hais rau nws tias, “Thov mentsis dej rau kuv haus, rau qhov kuv nqhis dej heev.” Ya‑ee txawm qheb kiag ib lub hnab tawv kua mis hliv rau nws haus thiab muab daim pam vov nws. Xixela hais rau nws tias, “Thov koj mus sawv ntawm qhov rooj zov. Yog leejtwg tuaj nug tias, ‘Muaj leejtwg tuaj no los tsis muaj?’ Cia li teb tias, Tsis muaj.” Tiamsis Ya‑ee uas yog Henpaw tus pojniam muab ib tug tswg hlau uas rub tsev ntaub thiab tuav ib rab rauj nyas los muab tus tswg hlau twb nkaus Xixela xub ntsos npuj tshab plaws rau hauv av rau thaum nws tabtom tsaug zog heev rau qhov yog txog siav. Ces Xixela txawm tuag lawm. Thaum Npala caum Xixela tuaj txog, Ya‑ee tawm mus tos nws thiab hais rau nws tias, “Cia li los tsev, kuv yuav qhia koj pom tus uas koj tabtom nrhiav ntawd.” Npala kuj nkag los rau hauv nws lub tsev ntaub pom Xixela tuag xyab luas lawm, tus tswg tsev ntaub tseem ntsia ntsees xub ntsos. Hnub ntawd Yawmsaub thiaj ua rau cov Yixayee kov yeej Khana‑as tus vajntxwv Yanpi. Cov Yixayee txhais tes ua hnyav zuj zus rau Khana‑as tus vajntxwv Yanpi mus txog thaum lawv ua kom vajntxwv Yanpi puam tsuaj tag. Denpaula thiab Anpinau‑a tus tub Npala hu zaj nkauj rau hnub ntawd tias, “Cia li qhuas Yawmsaub, rau qhov Yixayee cov thawj xub nqes tes thiab cov pejxeem tau xyiv fab xyiv yeem pab. Au tej vajntxwv, cia li mloog. Tej thawj, cia li tig ntsej mloog. Kuv yuav hu nkauj rau Yawmsaub, kuv seev suab hu nkauj rau Yawmsaub uas yog Yixayee tus Vajtswv. “Au Yawmsaub, thaum koj tawm ntawm Xe‑i mus ua rog, thaum koj taug kev tawm Edoo tebchaws mus, lub ntiajteb kuj ua zog koog, lub ntuj tso nag los, tej huab tso tuam tsam nag los. Tej roob kuj ua zog koog rau ntawm Yawmsaub xubntiag, yog Xinai tus Vajtswv, yog Yawmsaub uas yog Yixayee tus Vajtswv. “Ntu uas Anav tus tub Saka nyob thiab ntu uas Ya‑ee nyob, tej kev loj tsis muaj neeg taug, cov uas mus mus los los tsuas taug me kev xwb. Tej tub qoob tub loos hauv Yixayee tebchaws kuj tseg tsis ua teb lawm, tsis ua mus txog thaum kuv, Denpaula sawv los kav, txog thaum kuv sawv los ua niam hauv Yixayee tebchaws. Thaum xaiv tej dab tshiab los teev kev ua rog kuj tuaj txog ntawm rooj loog. Yeej tsis pom ib daim hlau thaiv ua rog thiab ib rab hmuv rau hauv plaub vam tus tub rog hauv Yixayee li. Kuv lub siab dai qas dhuam Yixayee cov thawj, thiab cov pejxeem uas xyiv fab xyiv yeem mus pab. Cia li qhuas Yawmsaub. “Nej cov uas caij tej nees luav dawb, cov uas nyob saum ntaub pua eeb nees thiab cov uas xuas kotaw taug kev cia li hais zaj no. Cia li mloog zaj kwv txhiaj uas hais ntawm qhov dej. Lawv hais txog qhov uas Yawmsaub kov yeej, hais txog nws cov tub qoob tub loos Yixayee kov yeej. “Thaum ntawd Yawmsaub cov neeg kuj mus ua ib txwg ib txwg rau ntawm rooj loog. ‘Denpaula, cia li tsim los, tsim los. Cia li tsim los tsim los hu nkauj. Npala cia li sawv tsees, Anpinau‑a tus tub, cia li coj cov uas koj ntes tau mus.’ Thaum ntawd cov uas muaj meej uas tseem tshuav nyob nqes los, Yawmsaub cov pejxeem nqes los nrog kuv ua rog rau cov uas muaj zog heev. Cov uas cog cag rau hauv Amalej tau nqes pem Efa‑i los. Npeeyamee, lawv raws koj thiab koj cov kwvtij qab. Cov thawj nqes ntawm Makhi los thiab cov uas coj tus cwj thawj rog tawm hauv Xenpuloo los. Ixakha cov uas ua thawj kuj nrog Denpaula los, Ixakha kuj nrog Npala los. Lawv raws nws qab dhia mus rau hauv lub hav. Xeem Lunpee tej cum siab fab tsis txawj ua txoj twg. Ua li cas nej nyob ntawm nkuaj yaj tos, mloog lub suab raj uas tshuab rau yaj xwb? Xeem Lunpee tej cum siab fab tsis txawj ua txoj twg. Kile‑a kuj nyob sab dej Yaladee hnub tuaj. Daj nyob dabtsi ntawm lub nkoj txwg? Asaw nyob twjywm ntawm ntug hiavtxwv, nyob twjywm hauv tej tsev ntawm tshav nkoj. Xenpuloo yog cov uas zoo siab tso nyog txojsia mus pab. Nathali kuj ib yam nkaus rau hauv tej tshav rog pem toj siab. “Cov vajntxwv tuaj, lawv tuaj ua rog, cov Khana‑as tej vajntxwv ua rog ntawm Tha‑ana ntawm ntug dej Mekidau. Lawv tsis txeeb tej nyiaj txiag li. Tej hnub qub saum ntuj kuj ua rog, tej hnub qub kuj tuaj saum ntuj ua rog rau Xixela. Tus niag dej Khisoo kuav lawv mus, yog tus niag dej Khisoo uas hlob kawg li. Kuv lub siab, cia li muaj zog taug kev mus. Lub suab nees dhia rau nrov qas qees, yog cov nees dhia noj tuam pwm. Yawmsaub tus tubtxib saum ntuj hais tias, ‘Cia li tsawm foom Melau, cia li foom hnyav kawg rau cov neeg hauv lub moos ntawd vim yog lawv tsis tuaj pab Yawmsaub, tsis pab Yawmsaub ua rog rau cov uas muaj zog.’ “Cia Ya‑ee tau hmoov zoo tshaj plaws tej pojniam huvsi, nws yog Henpaw uas yog neeg Khenai tus pojniam. Cia nws tau hmoov zoo tshaj plaws tej pojniam uas nyob hauv tsev ntaub huvsi. Xixela thov dej haus, mas nws pub nyuj mis, nws muab kua mis nyeem rau hauv lub phaj uas yog cov thawj siv cev rau Xixela. Nws txawm cev tes muab tus tswg tsev ntaub thiab nws txhais tes xis tuav tus pam thawj uas cov ua haujlwm siv. Nws ntaus Xixela ib teg, nws tsoo Xixela taubhau, nws tsoo taubhau tawg tag, nws nkaug xub ntsos tshab plaws. Xixela ntog, nws vau hlo, nws xyab luas ntawm tus pojniam txhais kotaw, nws ntog qaug lias rau ntawm tus pojniam ntawd kotaw, nws vau hlo, nws ntog rau qhovtwg nws tuag qhov ntawd. “Leej niam saib qhov rais ntsoov, Xixela niam saib qhov rais ntsoov hais tias, ‘Ua cas nws tsheb ua rog yuav los qeeb ua luaj? Ua cas tej nees hai tsheb yuav los qeeb kawg?’ Tej pojniam uas ntse teb nws, lossis nws teb nws hais tias, ‘Yog lawv tseem tshawb nrhiav thiab faib tej qhov txhia chaw uas txeeb tau los kab, yog faib ib tug lossis ob tug hluas nkauj rau ib tug txivneej, thiab faib tej ntaub uas raus zoo zoo rau Xixela, thiab faib tej daim paj ntaub uas raus zoo zoo thiab tej daim paj ntaub zoo nkauj rau kuv qhwv ntawm caj dab, coj los ua lawv tug.’ “Au Yawmsaub, cia kom koj cov yeeb ncuab huvsi puam tsuaj ib yam nkaus li no. Cia tus uas nyiam koj zoo yam nkaus li lub hnub thaum uas tawm tuaj muaj hwjchim ci nplas.” Mas lub tebchaws thiaj tau so tsis ua rog plaub caug xyoo. Cov Yixayee ua tej uas Yawmsaub pom tias phem, mas Yawmsaub muab lawv cob rau hauv cov Midee txhais tes tau xya xyoo. Cov Midee txhais tes tsuj yuam cov Yixayee. Vim tim cov Midee mas cov Yixayee thiaj npaj chaw nraim cev rau pem tej roob thiab hauv tej qhov tsua thiab tej chaw uas ruaj khov. Cov Yixayee cog qoob thaum twg mas cov Midee thiab cov Amalej thiab cov neeg uas nyob sab hnub tuaj txawm tuaj ua rog rau lawv, thiab tuaj tsuam chaw nyob rau hauv lub tebchaws thiab muab lawv tej qoob loo ua puam tsuaj tag thoob plaws mus txog lub moos Kaxa tsis tseg ib yam dabtsi cia tau noj li tsis hais yaj nyuj nees luav huvsi. Luag coj kiag tsiaj txhu thiab lub tsev ntaub tuaj coob yam nkaus li tej pab kooj txig. Neeg thiab tej ntxhuav kuj coob suav tsis txheeb. Thaum luag tuaj luag ua rau lub tebchaws piam tag. Cov Yixayee thiaj poob qes kawg li vim yog tim cov Midee. Cov Yixayee thiaj quaj thov Yawmsaub pab. Thaum cov Yixayee quaj thov Yawmsaub vim yog tim cov Midee, Yawmsaub kuj txib ib tug xibhwb cev Vajtswv lus tuaj rau hauv cov Yixayee. Tus ntawd hais rau lawv tias, “Yawmsaub uas yog cov Yixayee tus Vajtswv hais li no tias, Kuv coj nej tawm hauv Iyi tebchaws los thiab coj nej tawm hauv txojkev ua qhev. Kuv cawm nej dim hauv cov Iyi txhais tes thiab dim hauv txhua tus uas tsim txom nej txhais tes thiab ntiab lawv khiav ntawm nej hauv ntej mus thiab muab lawv lub tebchaws rau nej. Thiab kuv twb hais rau nej tias, ‘Kuv yog Yawmsaub yog nej tus Vajtswv, nej tsis txhob pe hawm cov Amaulai tej dab hauv lub tebchaws uas nej mus nyob ntawd.’ Tiamsis nej tsis quav ntsej kuv tej lus.” Yawmsaub tus tubtxib saum ntuj tuaj zaum hauv Yau‑as tus qab ntoo qheb ntawm Aufa, Yau‑as yog Anpiyexaw cum. Yau‑as tus tub Kide‑oo tabtom ntaus mog hauv lub qhov tsuam kua txiv hmab kom cov Midee thiaj tsis pom. Yawmsaub tus tubtxib saum ntuj los tshwm rau Kide‑oo thiab hais rau nws tias, “Koj yog tus uas siab loj siab tuab, Yawmsaub nrog nraim koj.” Kide‑oo txawm hais rau nws tias, “Yawg hlob, thov nug koj, yog Yawmsaub nrog nraim peb lawm ua cas tej xwm txheej no tseem tshwm los raug peb thiab? Yawmsaub tej txujci phimhwj uas peb tej poj koob yawm txwv txeev piav rau peb mloog dua twg lawm? Lawv piav hais tias ‘Yawmsaub coj peb tawm hauv Iyi tebchaws los los tsis yog?’ Tiamsis nimno Yawmsaub tso peb tseg lawm thiab muab peb cob rau hauv cov Midee txhais tes.” Yawmsaub tig los hais rau nws tias, “Cia li siv koj lub zog loj no mus cawm cov Yixayee dim hauv cov Midee txhais tes. Yeej yog kuv txib koj mus.” Kide‑oo txawm hais tias, “Yawg hlob, kuv yuav cawm tau cov Yixayee dim li cas? Sim saib kuv cum yog cum uas qes kawg hauv xeem Manaxe thiab kuv tsev neeg kuv yog tus uas me dhau.” Yawmsaub hais rau nws tias, “Kuv yeej yuav nrog nraim koj mas koj yuav ntaus yeej kiag cov Midee yam nkaus li ntaus ib tug xwb.” Kide‑oo hais rau Yawmsaub tias, “Yog nimno koj txaus siab rau kuv, thov koj ua ib yam txujci tshwm qhia kuv paub tias tus uas nrog kuv hais lus no yog koj ntag. Thov koj tsis txhob tawm ntawm no mus, tos txog thaum kuv rov tuaj cuag koj thiab coj tej uas muab xyeem tuaj tso rau ntawm koj xubntiag.” Mas nws hais tias, “Kuv yuav tos txog thaum koj rov tuaj.” Kide‑oo txawm nkag rau hauv tsev npaj ib tug menyuam tshis thiab ib efa hmoov mog ua ncuav tsis xyaw keeb. Nws muab cov nqaij tso rau hauv lub choo thiab muab cov kua nqaij tso rau hauv lub laujkaub coj tuaj xyeem rau nws hauv tsob qab ntoo qheb. Vajtswv tus tubtxib saum ntuj hais rau Kide‑oo tias, “Cia li muab cov nqaij thiab cov ncuav tsis xyaw keeb tso rau saum lub pob zeb no thiab hliv cov kua nqaij ywg rau saud.” Kide‑oo kuj ua raws li ntawd. Ces Yawmsaub tus tubtxib txawm muab tus hau pas nrig hauv nws txhais tes cev mus twb rau cov nqaij thiab cov ncuav tsis xyaw keeb. Ces hluavtaws txawm cig plaws ntawm lub pob zeb kub tej nqaij thiab tej ncuav tsis xyaw keeb tag huvsi. Ces Yawmsaub tus tubtxib txawm ploj ntais ntawm nws qhov muag mus lawm. Kide‑oo thiaj paub tias yog Yawmsaub tus tubtxib saum ntuj tiag tiag li thiab Kide‑oo hais tias, “Au Vajtswv Yawmsaub nimno kuv tau pom koj tus tubtxib saum ntuj tim ntsej tim muag, yuav ua li cas lauj?” Tiamsis Yawmsaub hais rau Kide‑oo tias, “Koj tsuas muaj uas nyob kaj siab lug xwb. Koj tsis txhob ntshai, koj yuav tsis tuag.” Ces Kide‑oo txawm ua ib lub thaj rau Yawmsaub rau qhov ntawd thiab hu lub thaj ntawd tias Yawmsaub yog txojkev kaj siab lug. Niaj hnub nimno lub thaj ntawd tseem nyob ntawm Aufa uas yog Anpiyexaw cum li moos. Mas hmo ntawd Yawmsaub hais rau Kide‑oo tias, “Cia li muab koj txiv tus txiv nyuj uas ob hnub nyoog muaj xya xyoo los, es mus rhuav koj txiv lub thaj teev dab Npa‑as pov tseg thiab ntov tus ncej dab Asela uas nyob ntawm lub thaj ib sab pov tseg. Thiab ua ib lub thaj xyeem rau Yawmsaub uas yog koj tus Vajtswv rau saum lub chaw ruaj khov no, siv tej pob zeb los tib raws li kevcai, mas muab tus txiv nyuj uas ob ntawd tua ua kevcai hlawv xyeem, thiab muab tus ncej dab Asela uas koj ntov ntawd ua taws rauv hlawv ntag.” Kide‑oo txawm coj nws cov tub qhe kaum leej nrog nws mus ua raws li Yawmsaub hais rau nws, tiamsis vim Kide‑oo ntshai nws tsev neeg thiab ntshai cov neeg hauv lub moos ntawd nws thiaj tsis kav ua nruab hnub nws thiaj ua hmo ntuj. Hnub tom qab thaum cov neeg hauv lub moos sawv ntxov mas pom lub thaj teev dab Npa‑as pob tag thiab pom tias tus ncej dab Asela uas nyob ib sab raug muab ntov lawm thiab pom tias muab tus txiv nyuj uas ob xyeem rau saum lub thaj uas ua tshiab ntawd. Lawv txawm sib hais hais tias, “Leejtwg ua li no ne?” Thaum lawv tshuaj tau lawd lawv txawm hais tias, “Yog Yau‑as tus tub Kide‑oo ua tej no.” Ces cov neeg hauv lub moos txawm hais rau Yau‑as tias, “Cia li muab koj tus tub tuaj rau peb tua pov tseg, rau qhov nws rhuav lub thaj teev tus dab Npa‑as thiab ntov tus ncej dab Asela uas nyob ntawm ib sab lawm.” Tiamsis Yau‑as hais rau txhua tus uas tuaj tawm tsam nws hais tias, “Nej yuav nyob dab Npa‑as chaw tuaj tawm tsam lov? Nej yuav pab dab Npa‑as hais plaub lov? Leejtwg ua txiv lus pab dab Npa‑as hais, tus ntawd yuav raug muab tua thaum tsis tau kaj ntug. Yog dab Npa‑as yog ib tug vajtswv tiag kuj cia nws hais nws tshaj plaub, vim yog nws lub thaj raug luag rhuav pov tseg lawm.” Vim li no hnub ntawd lawv thiaj tis npe rau Kide‑oo hais tias Yelunpa‑as, lub ntsiab hais tias, “Cia Npa‑as nws hais nws li plaub,” vim yog Kide‑oo rhuav nws lub thaj. Mas cov Midee sawvdaws thiab cov Amalej sawvdaws thiab cov uas nyob sab hnub tuaj sau zog ua ke hla tus dej Yaladee tuaj tsuam chaw nyob ntawm lub hav Yile‑ee. Tiamsis Yawmsaub tus Ntsuj Plig los kav kiag Kide‑oo, nws txawm tshuab raj kub yaj hu Anpiyexaw cum nrog nws mus. Nws tso neeg mus hu thoob plaws Manaxe tebchaws kom tuaj nrog nws mus. Thiab nws tso neeg mus hu xeem Asaw xeem Xenpuloo thiab xeem Nathali, mas cov neeg no kuj tuaj nrog nws mus ua rog. Kide‑oo hais rau Vajtswv tias, “Yog koj yuav siv kuv txhais tes cawm cov Yixayee raws li koj hais ntawd, kuv muab cov plaub yaj tso rau ntawm tshav ntaus mog, mas yog lwg ntub cov plaub yaj xwb es cov av thoob plaws qhuav qhawv, mas kuv thiaj paub tias koj yuav siv kuv txhais tes cawm cov Yixayee raws li koj tau hais.” Kuj muaj li ntawd. Hnub tom qab thaum Kide‑oo sawv ntxov tsees thiab nws muab cov plaub yaj tso tau ib phaj dej lwg puv nkaus. Mas Kide‑oo hais rau Vajtswv tias, “Thov koj tsis txhob chim rau kuv, thov kuv hais dua ib zaug xwb. Thov cia kuv sim cov plaub yaj no dua ib zaug. Thov cia cov plaub yaj qhuav qhawv xwb, cia cov av ntub lwg thoob plaws.” Hmo ntawd Yawmsaub kuj ua raws li ntawd. Cov plaub yaj mas qhuav qhawv, hos tej av mas lwg ntub thoob plaws. Yelunpa‑as uas yog Kide‑oo thiab cov neeg sawvdaws uas nrog nws sawv ntxov mus ua yeej rau ntawm qhov dej txhawv Halau. Cov Midee lub yeej kuj nyob ntawm lawv sab ped hauv lub hav uas ze lub roob Maule. Yawmsaub hais rau Kide‑oo tias, “Cov neeg uas nrog koj mus no coob dhau uas kuv yuav muab cov Midee rau hauv lawv txhais tes, ntshai tsam cov Yixayee yuav khav theeb hais tias, ‘Yog peb txhais tes cawm tau peb dim.’ Yog li ntawd cia li tshaj tawm rau sawvdaws tias, ‘Leejtwg ntshai thiab tshee kuj cia tus ntawd tawm ntawm lub roob Kile‑a rov mus tsev.’ ” Mas muaj ob vam ob txhiab leej rov mus lawm, tshuav ib vam leej nyob xwb. Yawmsaub hais rau Kide‑oo tias, “Cov neeg tseem coob dhau. Cia li coj lawv nqes mus nram hav dej mas kuv yuav sim lawv rau koj qhov ntawd. Tus uas kuv hais rau koj tias, ‘Tus no nrog koj mus,’ mas tus ntawd yuav nrog koj mus. Tus uas kuv hais rau koj tias, ‘Tus no tsis txhob nrog koj mus,’ tus ntawd yuav tsum tsis txhob mus.” Nws thiaj coj cov neeg nqes mus nram hav dej. Yawmsaub hais rau Kide‑oo tias, “Txhua tus uas xuas nplaig yaim dej yam li dev muab cais rau ib qho. Txhua tus uas txhos caug ntua rua ncauj haus mas muab cais rau ib qho ib yam nkaus.” Cov uas xuas tes ntaus dej los yaim muaj peb puas leej, tiamsis dua li tej mas puavleej txhos caug rua ncauj haus. Yawmsaub hais rau Kide‑oo tias, “Kuv yuav siv peb puas leej uas yaim dej no cawm nej dim thiab muab cov Midee rau hauv koj txhais tes. Dua li cov mas cia li tso sawvdaws rov mus nyias vaj nyias tsev.” Cov uas nyob txawm khaws cov uas mus tsev tej mov noj thiab raj kub yaj cia. Dua li cov mas Kide‑oo hais kom sawvdaws nyias rov mus rau nyias vaj nyias tsev, tiamsis cia peb puas leej ntawd nrog Kide‑oo nyob. Cov Midee lub yeej nyob ntawm lawv lawm nram hav. Hmo ntawd Yawmsaub hais rau Kide‑oo tias, “Cia li sawv tsees mus ntaus lawv lub yeej, rau qhov kuv twb muab lawv rau hauv koj txhais tes lawm. Tiamsis yog koj ntshai mus ntaus mas koj cia li coj koj tus qhev Pula nrog koj mus kom txog lawv lub yeej. Koj yuav hnov lawv hais dabtsi mas dhau ntawd koj txhais tes yuav muaj zog mus ntaus lawv lub yeej.” Kide‑oo thiaj coj nws tus qhev Pula nrog nws mus txog ntawm cov tub rog uas zov khuav sab nraum lub yeej. Mas cov Midee thiab cov Amalej thiab cov neeg uas nyob sab hnub tuaj sawvdaws pw thoob plaws lub hav coob yam nkaus li tej niag pab kooj txig. Lawv tej ntxhuav kuj suav tsis txheeb, coob yam nkaus li tej xuab zeb ntawm ntug hiavtxwv. Thaum Kide‑oo ob tug tuaj txog muaj ib tug yawg txawm piav nws zaj npau suav rau ib tug mloog hais tias, “Kuv ua ib zaj npau suav pom ib lub ncuav qeb ntog los rau hauv cov Midee lub yeej, los txog ib lub tsev ntaub txawm raug ua rau lub tsev ntaub vau ntxeev zuav zog rau hauv av lawm.” Nws tus kwvluag txawm teb tias, “Tej no yeej yog Yau‑as tus tub Kide‑oo uas yog neeg Yixayee rab ntaj xwb lauj! Vajtswv twb muab cov Midee thiab tej pab tub rog huvsi cob rau hauv Kide‑oo txhais tes lawm.” Thaum Kide‑oo hnov ob tug piav zaj npau suav thiab lub ntsiab npau suav ntawd lawm, nws txawm pe hawm Yawmsaub, thiab rov mus rau hauv cov Yixayee lub yeej thiab hais tias, “Cia li sawv tsees, Yawmsaub twb muab Midee cov tub rog rau nej txhais tes lawm.” Kide‑oo thiaj muab peb puas leej ntawd faib ua peb pab, thiab muab ib leeg ib lub raj kub yaj thiab ib leeg ib lub hub av, muaj ib teg tsau nyob hauv txhua lub hub ntawd. Thiab nws hais rau lawv tias, “Nej ntsia ntsoov kuv thiab ua ib yam li kuv. Thaum kuv mus txog lawv lub yeej sab nraud, kuv ua li cas, nej ua ib yam li ntawd. Thaum kuv thiab pab uas nrog kuv ua ke tshuab raj kub yaj, nej cia li tshuab raj kub yaj puag ncig lawv lub yeej thiab qw hais tias, ‘Peb ua rau Yawmsaub thiab ua rau Kide‑oo.’ ” Kide‑oo thiab ib puas leej tub rog uas nrog nws thiaj tuaj txog sab nraum lawv lub yeej rau thaum ib tag hmo, cov Midee nyuam qhuav hloov cov neeg zov khuav. Kide‑oo lawv txawm tshuab raj kub yaj thiab tsoo tej hub av ntawm lawv txhais tes tawg. Peb pab tub rog txawm tshuab raj kub yaj thiab tsoo tej hub av tawg, lawv sab tes laug tuav teg tsau, sab tes xis tuav raj kub yaj yuav tshuab thiab lawv qw tias, “Yawmsaub rab ntaj thiab Kide‑oo rab ntaj tuaj lawm lauj!” Lawv nyias sawv nyias qhov chaw vij thoob plaws lub yeej ntawd, mas cov Midee pab tub rog sawvdaws qw ntsoog qees dhia khiav. Thaum peb puas leej ntawd tshuab raj kub yaj Yawmsaub ua rau Midee cov tub rog sawvdaws rov sib tua ib leeg tua ib leeg, mas lawv cov tub rog thiaj li khiav mus rau lub moos Xelela thiab mus txog Npesitha thiab mus txog Anpee Mehaula ciam teb uas nyob ze lub moos Thanpa. Cov Yixayee raug hu tawm hauv Nathali thiab Asaw thiab thoob plaws Manaxe tebchaws tuaj, mas lawv caum cov Midee qab mus. Kide‑oo txib neeg mus thoob plaws pem toj siab Efa‑i tebchaws hais tias, “Cia li nqes los ua rog rau cov Midee thiab txeeb txhua ntu dej ntiav mus txog ntua lub moos Npenpala thiab tus dej Yaladee huvsi.” Lawv kuj hu Efa‑i cov tub rog sawvdaws tuaj. Cov Efa‑i txeeb txhua ntu dej ntiav mus txog ntua lub moos Npenpala thiab tus dej Yaladee huvsi. Lawv ntes tau cov Midee ob tug thawj, yog Aulej thiab Xe‑ev. Lawv muab Aulej tua rau ntawm lub pob zeb Aulej thiab muab Xe‑ev tua rau ntawm lub qhov tsuam txiv hmab Xe‑ev, thiab caum cov Midee mus. Lawv coj Aulej lub taubhau thiab Xe‑ev lub taubhau los rau Kide‑oo ntawm tus dej Yaladee sab hnub tuaj. Cov Efa‑i txawm hais rau Kide‑oo tias, “Ua cas koj yuav ua siab deb rau peb? Thaum koj mus ntaus Midee ntawd koj tsis hu peb nrog koj mus thiab.” Thiab lawv cem nws heev. Mas nws hais rau lawv tias, “Tej uas kuv ua los lawd muab piv tsis tau rau tej uas nej ua. Tej nyuag tsuag txiv hmab uas Efa‑i xawb de tseem zoo dua tej txiv hmab uas Anpiyexaw de lawm los tsis yog? Vajtswv muab cov Midee ob tug thawj yog Aulej thiab Xe‑ev rau hauv nej txhais tes, ces kuv ua tau dabtsi uas yuav muab piv tau rau nej?” Thaum nws hais li no lawd, lawv lub siab chim thiaj li nqeg lawm. Kide‑oo thiab peb puas leej uas nrog nws kuj tuaj txog ntawm tus dej Yaladee thiab hla mus rau sab tid. Txawm yog lawv tsaug leeg heev los lawv tseem caum qab mus. Kide‑oo txawm hais rau cov neeg Xukhau tias, “Thov muab ncuav rau cov neeg uas nrog kuv ua ke no noj thiab, rau qhov lawv tsaug leeg heev thiab kuv tabtom caum ntes Xenpa thiab Xamuna uas yog cov Midee li vajntxwv.” Cov nom tswv hauv lub moos Xukhau teb tias, “Xenpa thiab Xamuna twb nyob hauv koj txhais tes lawm lov es peb yuav muab ncuav rau koj pab tub rog noj?” Kide‑oo thiaj hais tias, “Yog li ntawd, thaum Yawmsaub muab Xenpa thiab Xamuna rau hauv kuv txhais tes lawm, kuv yuav muab pos kaus ntsaj pos kaus ntsim hauv tebchaws moj sab qhua los nplawm nej lub cev.” Nws tawm qhov ntawd mus txog lub moos Penu‑ee thiab hais rau cov neeg qhov ntawd ib yam nkaus. Mas cov neeg Penu‑ee teb nws ib yam li cov neeg hauv lub moos Xukhau teb. Kide‑oo thiaj hais rau cov neeg Penu‑ee tias, “Thaum kuv rov qab los muaj kev noj qab nyob zoo kuv yuav muab lub chaw tsom faj no tsoo pov tseg.” Thaum ntawd Xenpa thiab Xamuna nrog ib vam tsib txhiab leej tub rog nyob hauv lub moos Khakhau, lawv yog cov tub rog sab hnub tuaj huvsi uas khiav dim los, rau qhov cov uas tuav ntaj tuag tag lawm 120,000 leej. Kide‑oo taug txojkev uas cov tub lag tub luam taug yog ntawm lub moos Naunpa thiab lub moos Yaunpeha sab hnub tuaj, mus ntaus cov tub rog ntawd rau thaum lawv tsis nco ceev faj zov kiag li. Xenpa thiab Xamuna thiaj khiav, mas Kide‑oo caum ntes tau Xenpa thiab Xamuna uas yog cov Midee li vajntxwv, thiab ua rau tej tub rog ntshai ras zom zaws. Thaum Yau‑as tus tub Kide‑oo mus ua rog rov qab los txog ntawm txojkev uas nce mus rau lub moos Hele, nws ntes tau ib tug tub hluas uas nyob hauv lub moos Xukhau thiab nug tus hluas ntawd. Tus hluas ntawd kuj sau cov nom tswv thiab cov kev txwj laus hauv Xukhau tej npe, huvsi tau xya caum xya leej rau Kide‑oo. Kide‑oo thiaj tuaj rau ntawm cov neeg hauv lub moos Xukhau thiab hais tias, “Nej cia li saib Xenpa thiab Xamuna uas yav nram ntej nej thuam kuv hais tias, ‘Xenpa thiab Xamuna nyob hauv koj txhais tes lawm lov es peb yuav muab ncuav rau koj cov tub rog uas tsaug leeg noj?’ ” Kide‑oo kuj ntes cov kev txwj laus hauv lub moos thiab xuas pos kaus ntsaj pos kaus ntsim qhuab qhia cov neeg Xukhau. Thiab nws muab lub chaw tsom faj ntawm lub moos Penu‑ee rhuav pov tseg thiab muab cov txivneej hauv lub moos ntawd tua pov tseg. Kide‑oo hais rau Xenpa thiab Xamuna tias, “Cov neeg uas neb muab tua ntawm roob Thanpau nev?” Ob tug teb tias, “Koj zoo li cas, lawv txhua tus kuj zoo ib yam li ntawd, lawv zoo li vajntxwv tej tub.” Nws hais tias, “Lawv yog kuv li kwvtij nrog kuv koom ib leeg niam. Muaj Yawmsaub uas muaj txojsia nyob pom, yog neb tau tseg lawv txojsia kuv yuav tsis muab neb tua pov tseg.” Ces nws hais rau nws tus tub hlob Yethaw tias, “Cia li sawv tsees muab ob tug ntawd tua pov tseg.” Tiamsis tus tub ntawd tsis rho ntaj vim yog nws ntshai rau qhov nws tseem hluas. Ces Xenpa thiab Xamuna txawm hais tias, “Koj cia li sawv tsees tua wb los maj! Tus neeg laus thiaj muaj zog ua tus neeg laus li haujlwm los sav.” Kide‑oo thiaj sawv tsees tua Xenpe thiab Xamuna pov tseg thiab daws tej npauj uas zoo li lub hli xiab ntawm ob tug tej ntxhuav los. Dhau ntawd cov Yixayee hais rau Kide‑oo tias, “Thov koj ua tus uas kav peb thiab koj tus tub thiab koj tus xeeb ntxwv kuj kav peb ntxiv mus, vim yog koj cawm tau peb dim hauv cov Midee txhais tes.” Kide‑oo teb lawv tias, “Kuv yuav tsis kav nej, thiab kuv tus tub yuav tsis kav nej. Yawmsaub yuav kav nej xwb.” Thiab Kide‑oo hais rau lawv tias, “Kuv thov ib yam ntawm nej xwb. Thov nej txhua tus muab tej kauj co uas nej txeeb tau los ntawd rau kuv xwb.” Cov Midee muaj kauj co kub vim lawv yog Yisama‑ee caj ces. Lawv kuj teb nws tias, “Peb yeej zoo siab muab.” Lawv txawm muab ntaub pua thiab txhua tus muab tej kauj co uas txeeb tau los ntawd tso rau hauv. Cov kauj co kub uas nws thov tau ntawd hnyav ib txhiab xya pua sekhee, dua li ntawd tseem muaj tej npauj uas zoo li lub hli xiab thiab tej saw thiab tej tsoos tsho tsamxem uas Midee ob tug vajntxwv hnav thiab tej saw uas dai ntawm lawv tej ntxhuav caj dab. Kide‑oo muab tej kub no ua ib lub efau khaws cia rau hauv nws lub moos Aufa. Ces cov Yixayee sawvdaws txawm mus pe hawm lub efau ntawd mas lub efau ntawd thiaj ua rooj hlua cuab Kide‑oo thiab nws caj ces. Cov Midee swb kiag cov Yixayee, tsa tsis tau taubhau dua li lawm. Thiab lub tebchaws kuj so tsis ua rog tau plaub caug xyoo mus txog thaum tag Kide‑oo sim neej. Yelunpa‑as uas yog Yau‑as tus tub kuj mus nyob hauv nws lub tsev. Kide‑oo muaj xya caum tus tub uas yog nws roj nws ntshav xeeb, vim yog nws muaj pojniam coob. Kide‑oo tus niam yau uas nyob hauv lub moos Sekhee kuj yug tau ib tug tub rau nws, nws tis npe hu ua Anpimelej. Yau‑as tus tub Kide‑oo hnub nyoog laus heev lawm li tuag. Lawv muab nws log rau hauv nws txiv Yau‑as lub qhov ntxa hauv lub moos Aufa uas yog Anpiyexaw cum li moos. Thaum Kide‑oo tuag lawd cov Yixayee txawm tig hlo mus deev tej dab Npa‑as thiab lawv teev Npa‑as Npeli ua lawv tus vajtswv. Cov Yixayee tsis nco txog Yawmsaub uas yog lawv tus Vajtswv uas cawm lawv dim hauv lawv cov yeeb ncuab txhais tes rau txhua fab. Lawv tsis hlub Yelunpa‑as tsev neeg uas yog Kide‑oo, tsis pauj Kide‑oo tej txiaj ntsig uas nws tau ua rau cov Yixayee. Yelunpa‑as tus tub Anpimelej txawm mus cuag nws niam cov neej tsa hauv lub moos Sekhee mas hais rau lawv thiab lawv cum sawvdaws tias, “Thov nej mus hais tej lus no rau cov neeg Sekhee sawvdaws hnov hais tias, ‘Yuav cia Yelunpa‑as xya caum tus tub kav nej thiaj zoo los yuav cia ib tug kav xwb thiaj zoo?’ Thov nej nco tias kuv yog nej nqaij xeeb tawv hlav.” Mas nws niam tej neej tsa thiaj hais tej lus no rau cov neeg Sekhee mloog. Ces lawv txawm qaug siab kiag tuaj Anpimelej tog, rau qhov lawv hais tias, “Nws twb txheeb ze peb.” Lawv thiaj muab xya caum daim nyiaj hauv lub tsev dab Npa‑as Npeli pub rau Anpimelej. Nws coj mus ntiav cov neeg loj leeb tsis tsheej haj tuaj nws tog. Nws txawm mus rau hauv nws txiv tsev hauv lub moos Aufa thiab tua nws cov kwvtij uas yog Yelunpa‑as xya caum tus tub rau saum tib daim lag zeb. Tsuas yog tshuav Yauthas uas yog Yelunpa‑as tus tub ntxawg xwb vim nws mus tsiv nraim lawm. Cov neeg Sekhee thiab cov neeg Npemilau sawvdaws sau zog tuaj ua ke. Lawv mus tsa Anpimelej ua vajntxwv rau ntawm tus ncej zeb uas nyob ntawm ib sab tus ntoo qheb hauv Sekhee. Thaum muaj neeg mus hais rau Yauthas paub mas nws kuj mus rau saum lub ncov roob Kelixi qw nrov nrov hais rau lawv tias, “Cov neeg Sekhee, nej cia li mloog kuv hais, xwv Vajtswv thiaj yuav mloog nej lub suab. Muaj ib zaug cov ntoo tau mus tsa ib tug ntoo ua vajntxwv kav lawv. Lawv hais rau tsob txiv aulib tias, ‘Koj cia li los ua vajntxwv kav peb.’ Tiamsis tsob txiv aulib teb lawv tias, ‘Yuav cia kuv muab kuv cov roj uas siv rau tej timtswv thiab neeg tau meej mom tso tseg es mus yoj yuj yeev saum tej ntoo huvsi lov?’ Mas cov ntoo ho hais rau tsob txiv cev tias, ‘Koj cia li los kav peb.’ Tiamsis tsob txiv cev teb lawv tias, ‘Yuav cia kuv muab kuv cov txiv qab zib zoo tso tseg es mus yoj yuj yeev saum tej ntoo huvsi lov?’ Cov ntoo ho hais rau tsob txiv hmab tias, ‘Koj cia li los kav peb.’ Tiamsis tsob txiv hmab teb tias, ‘Yuav cia kuv muab kuv cov cawv txiv hmab uas ua rau tej timtswv thiab neeg zoo siab tso tseg es mus yoj yuj yeev saum tej ntoo huvsi lov?’ Cov ntoo sawvdaws ho hais rau tsob pos tias, ‘Koj cia li los kav peb.’ Tsob pos hais rau cov ntoo ntawd tias, ‘Yog nej muaj siab yuav tsa kuv ua vajntxwv kav nej tiag tiag mas nej cia li los nyob hauv kuv tej qab ntxoov ntxoo. Yog tsis ua li ntawd mas cia hluavtaws tawm hauv tsob pos los kub cov ntoo ciab hauv Lenpanoo huvsi pov tseg.’ “Qhov uas nej tsa Anpimelej ua vajntxwv ntawd, yog nej ua tuaj nruab siab thiab ua ncaj ncees tiag, thiab yog nej tau ua zoo rau Yelunpa‑as tsev neeg thiab ua rau nws kom tsim nyog li uas nws tau ua zoo cia lawd, (rau qhov kuv txiv twb ua rog pab nej, tso nyog nws txojsia pab nej dim hauv cov Midee txhais tes. Tiamsis hnub no nej sawv twv kuv txiv tsev neeg, nej tua kuv txiv xya caum leej tub rau saum tib daim lag zeb thiab nej tsa kuv txiv tus niam nkauj qhev tus tub Anpimelej ua vajntxwv kav cov neeg Sekhee rau qhov yog nws txheeb ze nej) yog hnub no nej ua tuaj nruab siab thiab ua ncaj rau Yelunpa‑as thiab nws tsev neeg, kuj cia li zoo siab xyiv fab rau Anpimelej thiab cia nws zoo siab xyiv fab rau nej. Yog qhov uas nej ua li ntawd tsis ncaj mas cia hluavtaws tawm hauv Anpimelej los kub cov neeg Sekhee thiab cov neeg Npemilau pov tseg. Thiab cia hluavtaws tawm hauv cov Sekhee thiab cov Npemilau kub Anpimelej pov tseg.” Yauthas thiaj li khiav mus nyob rau ntawm Npe‑aw vim yog ntshai nws tijlaug Anpimelej. Anpimelej kav cov Yixayee tau peb xyoos. Yawmsaub tshoov siab rau Anpimelej thiab cov neeg Sekhee kom tsis sib hum. Cov Sekhee thiaj fav xeeb rau Anpimelej, thiaj ua pauj rau qhov uas lawv ua limhiam rau Yelunpa‑as xya caum leej tub, thiab lub txim uas tua cov neeg ntawd poob rau Anpimelej uas tua lawv thiab poob rau cov neeg Sekhee uas cuab zog rau Anpimelej tua nws cov kwvtij pov tseg. Cov Sekhee sawv twv Anpimelej thiab tso neeg mus zov kev saum lub ncov roob lws txhua tus uas taug txojkev ntawd. Txawm muaj neeg mus hais rau Anpimelej paub. Mas Enpe tus tub Ka‑a thiab nws cov kwvtij khiav mus nyob hauv lub moos Sekhee, mas cov neeg Sekhee tso siab rau nws. Lawv mus de txiv hmab coj los tsuj tsuam kua thiab pam noj haus rau hauv lawv lub tsev dab, lawv thiaj noj haus cem foom Anpimelej. Mas Enpe tus tub Ka‑a thiaj hais tias, “Anpimelej yog leejtwg thiab peb cov Sekhee ho yog leejtwg es yuav mus tu nws? Yelunpa‑as tus tub thiab Xenpu uas ua nws tim xyoob twb txeev ua num rau Sekhee txiv Hamau los tsis yog? Peb tseem yuav tu nws ua dabtsi? Yog cia kuv kav cov neeg no mas kuv yuav muab Anpimelej rhuav tseg. Kuv yuav twv ntxhias Anpimelej tias, ‘Koj cia li tsav ntxiv tub rog thiab tawm tuaj.’ ” Thaum tus tim xyoob Xenpu hauv lub moos Sekhee tau hnov tej lus uas Enpe tus tub Ka‑a hais nws chim heev. Nws thiaj tso neeg xa xov mus rau Anpimelej hauv lub moos Aluma hais tias, “Saib maj, Enpe tus tub Ka‑a thiab nws cov kwvtij tuaj rau hauv lub moos Sekhee mas tshum cov neeg Sekhee sawv twv koj. Mas koj thiab koj cov neeg cia li sawv tsees hmo ntuj mus zov tos tom teb. Mas tagkis thaum hnub pib tawm koj cia li sawv ntxov txeem plaws tuaj ntaus lub moos. Mas thaum Ka‑a thiab nws cov tub rog tawm tuaj tiv nej, koj cia li ntaus lawv raws li uas zoo sijhawm.” Anpimelej thiab cov neeg sawvdaws uas nrog nws thiaj li tuaj hmo ntuj, muab faib ua plaub pab zov ntaus lub moos Sekhee. Thaum Enpe tus tub Ka‑a tawm mus sawv ntawm txojkev uas nkag rau hauv rooj loog, mas Anpimelej thiab nws cov tub rog txawm sawv tsees ntawm lub chaw zov tuaj. Thaum Ka‑a pom cov neeg ntawd nws hais rau Xenpu tias, “Saib maj, muaj neeg nqes pem roob tuaj.” Xenpu teb nws tias, “Koj pom lub roob tus duab zoo li neeg kab.” Ka‑a rov hais dua tias, “Saib maj, muaj ib pab tub rog tabtom tawm tom plawv tuaj, thiab muaj ib pab tawm ntawm cov txiv neeb txiv yaig tus ntoo qheb tuaj thiab.” Xenpu thiaj hais rau Ka‑a tias, “Koj lub qhov ncauj dua twg lawm? Koj twb hais tias, ‘Anpimelej yog leejtwg es peb yuav tu nws?’ Cov neeg no twb yog cov uas koj saib tsis taus nev. Cia li tawm mus ua rog rau lawv.” Mas Ka‑a thiaj ua ntej coj cov neeg Sekhee mus nrog Anpimelej ua rog. Anpimelej muab Ka‑a ntiab khiav mus thiab muaj neeg raug mob ntog coob kawg taug kev los txog ntua rooj loog. Anpimelej kuj nyob hauv Aluma, mas Xenpu muab Ka‑a thiab nws cov kwvtij ntiab khiav mus, lawv thiaj nyob tsis tau hauv lub moos Sekhee lawm. Hnub tom qab muaj neeg hais rau Anpimelej tias cov neeg hauv moos tawm mus tom tej teb, ces nws txawm muab nws cov tub rog faib ua peb pab zov tom tej teb. Nws saib pom cov neeg tawm hauv lub moos tuaj ces nws txawm sawv tsees muab tua kiag tuag. Anpimelej thiab pab tub rog uas nrog nws txawm txeem plaws mus nyob ntawm rooj loog, mas ob pab tub rog uas nyob ib cag kuj dhia mus tua cov uas nyob tom tej teb tuag tag huvsi. Anpimelej tua lub moos ntawd ib hnub tsaus ntuj mas txeeb tau lub moos thiab tua cov pejxeem hauv lub moos ntawd tuag tag huvsi. Nws muab lub moos tsoo puam tsuaj tag thiab w ntsev rau hauv lub moos. Thaum cov neeg uas nyob ntawm lub chaw faj seeb hauv Sekhee tau hnov tej xwm no lawv khiav nkag rau hauv lub chaw ruaj khov uas yog tsev dab Eenpeli. Muaj neeg hais rau Anpimelej tias cov neeg uas nyob ntawm lub chaw faj seeb hauv Sekhee tau sau zog ua ke. Anpimelej thiaj coj nws cov neeg nce mus saum lub roob Xamoo, thiab Anpimelej coj taus mus txiav ib tsuag taws kwv rau saum xub pwg. Nws hais rau cov neeg uas nrog nws ua ke tias, “Nej pom kuv ua dabtsi nej kavtsij ua li ntawd thiab.” Yog li ntawd cov neeg sawvdaws thiaj txiav taws kwv raws Anpimelej qab mus tib ua ib pawg rau ntawm lub chaw ruaj khov ntawd, mas lawv rauv taws hlawv lub chaw ruaj khov, ces cov neeg uas nyob hauv lub chaw faj seeb ntawm Sekhee kuj tuag tag, pojniam txivneej huvsi kwvlam ib txhiab leej. Anpimelej txawm mus rau ntawm lub moos Thenpes, mus ua yeej vij lub moos thiab txeeb tau lub moos ntawd. Tiamsis muaj ib lub chaw faj seeb ruaj khov hauv lub moos ntawd, mas cov pejxeem pojniam txivneej huvsi thiaj khiav mus nkag rau hauv lub chaw faj seeb kaw qhov rooj. Lawv nce mus rau saum lub hauv chaw faj seeb. Anpimelej thiaj tuaj txog thiab ua rog rau lub chaw faj seeb ntawd. Nws mus ze lub qhov rooj yuav muab hluavtaws hlawv. Mas muaj ib tug pojniam muab txhib zeb txiv tso los tsoo Anpimelej taubhau ua nws taubhau tawg rhe. Nws thiaj qw ceev ceev rau tus hluas uas coj nws cuab yeej tias, “Rho kiag koj rab ntaj tua kuv, xwv luag thiaj tsis hais txog kuv tias yog ib tug pojniam tua tau kuv.” Tus hluas ntawd thiaj li nkaug nws tshab plaws nws thiaj tuag. Thaum cov Yixayee pom tias Anpimelej tuag lawm lawv nyias taus nyias rov qab mus tsev. Qhov no yog Vajtswv ua pauj rau tej kev phem uas Anpimelej ua rau nws txiv uas yog nws tua nws xya caum leej kwvtij. Vajtswv muab tej kev phem uas cov neeg Sekhee ua no coj rov los poob rau saum cov Sekhee taubhau, thiab tej lus uas Yelunpa‑as tus tub Yauthas foom kuj poob raug lawv. Dhau Anpimelej lawm muaj dua ib tug sawv los pab cov Yixayee dim yeeb ncuab, yog Pu‑a tus tub Thaula. Nws yog Daudau tus xeeb ntxwv yog xeem Ixakha nyob lub moos Sami pem toj siab Efa‑i tebchaws. Nws ua thawj kav cov Yixayee tau nees nkaum peb xyoos, nws li tuag mas lawv muab nws log rau hauv lub moos Sami. Dhau ntawd Ya‑i uas yog neeg Kile‑a ho sawv ua thawj kav cov Yixayee tau nees nkaum ob xyoos. Nws muaj peb caug tus tub uas caij peb caug tus nees luav. Lawv muaj peb caug lub moos hu ua Havauya‑i los txog niaj hnub nimno rau hauv Kile‑a tebchaws. Ya‑i tuag mas muab log rau hauv lub moos Khamoo. Cov Yixayee rov ua tej uas Yawmsaub pom tias phem. Lawv mus teev tej dab Npa‑as thiab tej dab Athalau, thiab Alas cov dab, Xaidoo cov dab, Mau‑a cov dab thiab cov Asmoo thiab cov Filixatee tej dab. Lawv tso Yawmsaub tseg tsis ua koom tu Yawmsaub. Mas Yawmsaub npau taws rau cov Yixayee, nws thiaj muab lawv tso rau hauv cov Asmoo thiab cov Filixatee txhais tes. Luag thiaj tsim txom quab yuam cov Yixayee rau xyoo ntawd. Luag quab yuam cov Yixayee uas nyob sab dej Yaladee hnub tuaj hauv cov Amaulai tebchaws uas yog Kile‑a tau kaum yim xyoo. Cov Asmoo kuj hla tus dej Yaladee mus ua rog rau cov Yuda thiab Npeeyamee thiab Efa‑i. Cov Yixayee thiaj raug kev txom nyem heev kawg li. Cov Yixayee thiaj quaj thov Yawmsaub tias, “Peb tau ua txhaum rau koj vim yog peb tau tso peb tus Vajtswv tseg mus ua koom tu tej dab Npa‑as.” Mas Yawmsaub hais rau cov Yixayee tias, “Kuv tsis tau pab nej dim hauv cov Iyi thiab cov Amaulai thiab cov Asmoo thiab cov Filixatee lov? Thiab cov Xaidoo, cov Amalej thiab cov Ma‑oo tau quab yuam nej mas nej tau quaj thov kuv, ces kuv twb pab nej dim hauv lawv txhais tes. Txawm yog li ntawd los nej tseem tso kuv tseg mus ua koom tu luag tej dab. Vim li no kuv yuav tsis pab nej dim dua li lawm. Cia li mus quaj thov tej dab uas nej xaiv los ntawd. Cia cov dab ntawd pab nej dim hauv nej tej kev txom nyem no.” Mas cov Yixayee hais rau Yawmsaub tias, “Peb tau ua txhaum lawm, thov koj ua rau peb raws li koj pom zoo. Peb thov koj pab peb dim hnub no xwb.” Ua li ntawd mas lawv thiaj muab lwm haiv neeg tej dab tso pov tseg los ua koom tu Yawmsaub. Mas Yawmsaub thiaj mob siab rau qhov uas cov Yixayee raug kev txom nyem lwj siab ntawd. Cov Asmoo thiaj li raug sau ua tub rog thiab ua lub yeej ua rog rau hauv Kile‑a. Cov Yixayee kuj sau zog tuaj ua ke ua yeej rau ntawm Mixapa. Cov neeg Kile‑a cov thawj hais tias, “Leejtwg ua thawj txeem mus ntaus cov Asmoo? Tus ntawd yuav tau ua cov neeg Kile‑a sawvdaws tus thawj.” Yetha uas yog neeg Kile‑a yog ib tug tub rog siab loj siab tuab. Nws niam yog ib tug poj muag cev, nws txiv yog Kile‑a. Kile‑a tus niam tsav cuab muaj ob peb tug tub. Thaum cov tub ntawd hlob lawm lawv txawm ntiab Yetha khiav mus thiab hais tias, “Koj yuav tsis muaj feem tau peb txiv li qub txeeg qub teg rau qhov koj yog dua ib tug niam yug.” Yetha txawm khiav ntawm cov kwvtij mus nyob hauv lub tebchaws Thauj. Cov neeg tsis tsheej haj tuaj koom nrog nws mus ua tub sab tub nyiag. Tom qab ntawd cov Asmoo ua rog rau cov Yixayee. Thaum cov Asmoo ua rog rau cov Yixayee ntawd, cov kev txwj laus hauv Kile‑a tebchaws txawm mus coj Yetha hauv Thauj tebchaws los. Lawv hais rau Yetha tias, “Cia li los ua peb tus thawj es peb yuav ua rog rau cov Asmoo.” Tiamsis Yetha hais rau Kile‑a cov kev txwj laus tias, “Nej ntxub kuv thiab ntiab kuv tawm hauv kuv txiv lub tsev los tsis yog? Ua cas nimno nej raug kev ceeblaj txom nyem nej ho tuaj nrhiav kuv thiab?” Kile‑a cov kev txwj laus hais rau Yetha tias, “Qhov uas peb tuaj cuag koj no kuj yog cheem tsum koj nrog peb mus ntaus cov Asmoo thiab mus ua peb tus thawj kav tag nrho cov Kile‑a huvsi.” Yetha thiaj hais rau Kile‑a cov kev txwj laus tias, “Yog nej coj kuv rov mus tsev mus ua rog rau cov Asmoo thiab yog Yawmsaub muab lawv cob rau hauv kuv txhais tes, mas kuv yuav ua nej tus thawj.” Kile‑a cov kev txwj laus hais rau Yetha tias, “Yawmsaub ua timkhawv rau peb, peb yeej yuav ua raws li koj hais.” Yetha thiaj nrog Kile‑a cov kev txwj laus mus mas cov pejxeem thiaj tsa nws ua tus thawj thiab ua tus kav hlo lawv. Yetha thiaj hais tej lus uas lawv hais hum huvsi ntawd tab meeg Yawmsaub ntawm lub moos Mixapa. Yetha thiaj tso neeg xa xov mus hais rau cov Asmoo tus vajntxwv tias, “Koj muaj plaub dabtsi rau kuv es koj yuav tuaj ua rog rau kuv lub tebchaws?” Cov Asmoo tus vajntxwv teb Yetha tej tub xa xov tias, “Vim yog thaum cov Yixayee tawm hauv Iyi tebchaws los lawv txeeb kuv lub tebchaws lawm txij ntua tus dej Anoo mus txog tus dej Yanpo thiab mus txog tus dej Yaladee. Nimno cia li thim lub tebchaws no zoo zoo rov los.” Yetha tso neeg xa xov rov mus cuag cov Asmoo tus vajntxwv dua, lawv hais tias, “Yetha hais li no tias, Cov Yixayee tsis tau txeeb Mau‑a lub tebchaws thiab cov Asmoo lub tebchaws li. Tiamsis thaum cov Yixayee tawm hauv Iyi tebchaws los, lawv taug kev hauv tebchaws moj sab qhua mus txog Hiavtxiv Liab thiab los txog ntawm Khade. Mas cov Yixayee tso neeg xa xov mus hais rau Edoo tus vajntxwv tias, ‘Thov koj kheev peb hla koj lub tebchaws mus,’ tiamsis Edoo tus vajntxwv tsis quav ntsej li. Lawv tso neeg mus thov Mau‑a tus vajntxwv ib yam li ntawd, los nws kuj tsis kheev. Yog li ntawd cov Yixayee thiaj nyob ntawm Khade. Ces lawv txawm mus hauv tebchaws moj sab qhua lug Edoo thiab Mau‑a lub tebchaws los txog ntawm Mau‑a lub tebchaws sab hnub tuaj thiab tsuam chaw nyob ntawm tus dej Anoo sab ped. Lawv twb tsis mus rau hauv Mau‑a tebchaws li, rau qhov tus dej Anoo twb ua ciam teb quas Mau‑a tebchaws lawm. Cov Yixayee thiaj tso neeg xa xov mus cuag cov Amaulai tus vajntxwv Xihoo hauv lub moos Hesanpoo. Cov Yixayee hais rau nws tias, ‘Thov cia peb hla koj lub tebchaws mus rau hauv peb lub tebchaws.’ Tiamsis Xihoo tsis tso siab cia cov Yixayee hla nws lub tebchaws, Xihoo txawm txhij nws cov neeg sawvdaws mus ua lub yeej rau ntawm Yahaj thiab ua rog rau cov Yixayee. Mas Yawmsaub uas yog cov Yixayee tus Vajtswv thiaj muab Xihoo thiab nws cov neeg huvsi rau hauv cov Yixayee txhais tes, nws thiaj sib lawm. Cov Yixayee thiaj txeeb kiag cov Amaulai uas nyob qhov ntawd lub tebchaws huvsi. Cov Yixayee txeeb kiag cov Amaulai lub tebchaws txij ntua tus dej Anoo mus txog tus dej Yanpo, thiab txij ntua lub tebchaws moj sab qhua mus txog tus dej Yaladee. “Yog li no Yawmsaub uas yog cov Yixayee tus Vajtswv thiaj ntiab cov Amaulai khiav tawm ntawm nws haiv neeg Yixayee hauv ntej mus. Mas koj txawm yuav muab ua koj tug lov? Koj tsis ceev tej uas koj tus dab Khemauj muab cob rau koj lov? Txhua thaj uas peb tus Vajtswv Yawmsaub ntiab luag tawm ntawm peb hauv ntej mus es pub rau peb, peb yuav ceev cia. Koj zoo dua Xipau tus tub Npalaj uas ua vajntxwv hauv Mau‑a tebchaws lov? Npalaj txeev nrog cov Yixayee sib ntsuas zog thiab ua rog rau lawv lov? Cov Yixayee twb nyob hauv lub moos Hesanpoo thiab ib ncig lub moos ntawd thiab nyob hauv lub moos Alau‑aw thiab ib ncig ntawd thiab nyob hauv txhua lub moos raws tus ntug dej Anoo tau peb puas xyoo, ua cas koj tsis txeeb rov qab thaum ntawd? Yog li no kuv tsis tau ua txhaum rau koj, koj yog tus ua txhaum rau kuv rau qhov uas ua rog rau kuv. Cia Yawmsaub uas yog tus txiav txim los tu plaub rau cov Yixayee thiab cov Asmoo hnub no.” Tiamsis cov Asmoo tus vajntxwv tsis mloog tej lus uas Yetha tso neeg mus hais ntawd. Mas Yawmsaub tus Ntsuj Plig los kav kiag Yetha, nws thiaj hla hlo Kile‑a thiab Manaxe tebchaws mus rau ntawm lub moos Mixapa hauv Kile‑a, thiab tawm ntawm Mixapa hauv Kile‑a mus txog cov Asmoo. Yetha thiaj fiv rau Yawmsaub hais tias, “Yog koj muab cov Asmoo rau hauv kuv txhais tes lawm, mas leejtwg uas tawm hauv kuv lub qhov rooj tuaj tos kuv rau thaum kuv kov yeej cov Asmoo rov qab los, tus ntawd yuav muab ua Yawmsaub li thiab kuv yuav muab nws ua kevcai hlawv xyeem.” Ces Yetha txawm hla mus ua rog rau cov Asmoo mas Yawmsaub muab lawv cob rau hauv nws txhais tes. Mas nws tua tau lawv txij ntua lub moos Alau‑aw mus yuav txog lub moos Minij, huvsi ntaus tau nees nkaum lub moos thiab mus txog ntua lub moos Anpee Khelamee, neeg tuag coob heev. Cov Asmoo thiaj swb kiag zwm rau cov Yixayee. Yetha txawm rov qab los tsev rau hauv Mixapa, ces nws tus ntxhais npuaj nruas seev cev tuaj tos nws. Nws li menyuam muaj tib tug ntxhais ntawd xwb tsis muaj dua lwm tus tub ntxhais kiag li. Thaum nws pom dheev tus ntxhais ntawd nws txawm dua rhe nws lub tsho thiab hais tias, “Au mivntxhais 'e, koj ua rau kuv txom nyem lauj! Koj ua rau kuv nyuaj siab heev kawg vim kuv tau tsa ncauj fiv rau Yawmsaub lawm, yuav thim tsis tau tej lus ntawd.” Nws thiaj hais rau leej txiv tias, “Txiv, yog koj tau tsa ncauj cog lus rau Yawmsaub li cas lawm, cia li ua rau kuv raws li koj cog lus ntawd, rau qhov Yawmsaub twb pauj cov Asmoo uas yog koj tej yeeb ncuab rau koj lawm.” Nws kuj hais rau leej txiv tias, “Kuv thov koj cia kuv ua li no xwb, thov tso kuv nyob kab ntsab ob lub hlis kuv thiaj tau mus mus los los rau pem roob thiab nrog kuv tej phoojywg quaj ntsuag txog kuv txojkev ua ntxhais nkauj xwb.” Leejtxiv teb tias, “Cia li mus.” Nws thiaj tso tus ntxhais mus ob lub hlis. Mas tus ntxhais thiab tej phoojywg thiaj tawm mus quaj ntsuag txog nws lub cev nkauj xwb rau pem roob. Thaum puv ob hlis lawd, nws thiaj rov los rau ntawm leej txiv, mas leej txiv kuj muab nws xyeem raws li nws tau cog lus tseg lawd. Nws yeej tsis tau nrog dua txivneej pw li. Qhov no thiaj ua ib txoj kevcai rau cov Yixayee, kom lawv tej ntxhais niaj xyoo quaj ntsuag txog Yetha uas yog neeg Kile‑a tus ntxhais ib xyoos mas plaub hnub. Cov neeg Efa‑i raug sau ua tub rog hla mus txog Xafoo mas lawv hais rau Yetha tias, “Ua cas koj hla mus ua rog rau cov Asmoo koj tsis hu peb nrog koj mus? Peb yuav muab koj vaj tse hlawv kom kub kiag koj thiab.” Yetha thiaj hais rau lawv tias, “Thaum kuv thiab kuv cov neeg tseem ua rog loj rau cov Asmoo, kuv hu kom nej tuaj pab tiamsis nej kuj tsis tuaj pab kuv dim hauv lawv txhais tes. Thaum kuv pom tias nej tsis pab kuv dim lawm kuv thiaj tso nyog kuv txojsia hla mus ua rog rau cov Asmoo, mas Yawmsaub tau muab lawv rau hauv kuv txhais tes. Vim li cas hnub no nej ho yuav tuaj ua rog rau kuv?” Yetha thiaj sau zog cov neeg Kile‑a ua rog rau cov Efa‑i. Cov Kile‑a kuj tua cov Efa‑i rau qhov cov Efa‑i hais tias, “Nej cov Kile‑a uas nyob hauv Efa‑i thiab Manaxe yog cov niag neeg uas tsiv tawm hauv Efa‑i lawm.” Cov Kile‑a kuj txeeb tau tej chaw uas hla tus dej Yaladee tag huvsi tsis kheev cov Efa‑i hla. Thaum cov Efa‑i tus twg khiav los hais tias, “Kuv thov hla dej mus,” mas cov Kile‑a nug tias, “Koj yog neeg Efa‑i los tsis yog?” Yog nws teb tias, “Tsis yog,” ces lawv hais tias, “Koj sim hais lo lus Sinpaulej saib.” Tus ntawd hais tias, “Xinpaulej” vim yog cov Efa‑i hais tsis tau lo lus no meej. Lawv txawm ntes kiag tus ntawd muab tua pov tseg rau ntawm tej chaw hla dej Yaladee. Thaum ntawd cov Efa‑i tuag plaub vam ob txhiab leej. Yetha ua thawj kav cov Yixayee tau rau xyoo. Yetha uas yog neeg Kile‑a li tuag mas muab nws log rau ib lub moos hauv Kile‑a tebchaws. Dhau Yetha lawd mas Ixas uas nyob hauv Npelehee ua thawj kav cov Yixayee. Nws muaj peb caug leej tub thiab peb caug leej ntxhais, nws muab qua rau lwm xeem thiab nws yuav lwm xeem peb caug leej ntxhais los rau nws cov tub. Nws kav cov Yixayee tau xya xyoo. Ixas li tuag mas muab nws log rau hauv Npelehee. Dhau Ixas lawd mas Eloo uas yog xeem Xenpuloo ua thawj kav cov Yixayee. Nws kav cov Yixayee tau kaum xyoo. Mas Eloo uas yog neeg Xenpuloo kuj tuag mas muab nws log rau hauv Aiyaloo hauv Xenpuloo tebchaws. Dhau Eloo lawd mas Hilee tus tub Adoo uas nyob hauv lub moos Pilathoo ua thawj kav cov Yixayee. Nws muaj plaub caug leej tub thiab muaj peb caug leej xeeb ntxwv caij xya caum tus nees luav. Nws kav cov Yixayee tau yim xyoo. Hilee tus tub Adoo uas nyob hauv Pilathoo kuj tuag mas muab nws log rau ntawm Pilathoo hauv Efa‑i tebchaws uas yog pem toj siab uas muaj cov Amalej nyob. Cov Yixayee rov qab ua tej uas Yawmsaub pom tias phem, mas Yawmsaub thiaj muab lawv cob rau hauv cov Filixatee txhais tes tau plaub caug xyoo. Muaj ib tug yawg yog xeem Daj nyob hauv lub moos Xaula, nws npe hu ua Manau‑a. Nws tus pojniam ib txwm tsis xeeb menyuam. Yawmsaub tus tubtxib saum ntuj los tshwm rau tus pojniam ntawd thiab hais rau nws tias, “Koj yeej ib txwm tsis xeeb menyuam, tiamsis koj yuav xeeb menyuam thiab yug ib tug tub. Vim li no koj yuav tsum ceev faj tsis txhob haus cawv txiv hmab thiab cawv ntxwg, thiab tsis txhob noj tej uas qias tsis huv, vim koj yuav xeeb menyuam thiab yug ib tug tub. Tsis txhob chais nws cov plaubhau rau qhov tus tub ntawd yuav muab cais ua Naxi pub rau Vajtswv txij thaum yug los li. Nws yuav pib cawm cov Yixayee dim hauv cov Filixatee txhais tes.” Tus pojniam ntawd txawm mus hais rau nws tus txiv tias, “Muaj Vajtswv ib tug neeg tuaj rau ntawm kuv, lub ntsej muag zoo yam nkaus li Vajtswv tus tubtxib saum ntuj, txaus ntshai kawg. Kuv twb tsis nug tias nws tuaj qhovtwg tuaj thiab nws kuj tsis qhia nws lub npe rau kuv. Tiamsis nws hais rau kuv tias, ‘Koj yuav xeeb menyuam thiab yug ib tug tub. Yog li no tsis txhob haus cawv txiv hmab thiab cawv ntxwg, thiab tsis txhob noj tej uas qias tsis huv, rau qhov tus tub ntawd yuav muab cais ua Naxi pub rau Vajtswv txij thaum yug los mus txog hnub tuag.’ ” Ces Manau‑a txawm thov Yawmsaub tias, “Au Yawmsaub, thov Vajtswv tus neeg uas koj txib los ntawd rov los tshwm rau wb ob leeg pom dua ib zaug, thiab qhia rau wb paub tias wb yuav ua li cas rau tus tub uas yuav yug los ntawd.” Vajtswv mloog Manau‑a tej lus thov thiab Vajtswv tus tubtxib saum ntuj los tshwm dua ib zaug rau tus pojniam ntawd rau thaum nws zaum tom teb, tiamsis nws tus txiv Manau‑a tsis nrog nws nyob ua ke. Nws thiaj dhia mus hais rau nws tus txiv tias, “Tus yawg uas hnub ntawd tuaj rau ntawm kuv kuj rov los tshwm rau kuv thiab.” Manau‑a thiaj li sawv tsees raws nws pojniam qab mus. Thaum nws mus txog tus yawg ntawd nws txawm hais tias, “Koj yog tus yawg uas hais cov lus rau tus pojniam no los tsis yog?” Tus ntawd teb tias, “Yog lauj.” Manau‑a thiaj hais tias, “Thaum muaj tseeb raws li koj tej lus lawm, tus tub ntawd lub neej yuav zoo li cas, thiab nws yuav tsum ua dabtsi?” Yawmsaub tus tubtxib saum ntuj thiaj hais rau Manau‑a tias, “Tus pojniam yuav tsum ceev faj ua txhua yam raws li kuv hais rau nws lawd. Nws tsis txhob noj ib yam dabtsi uas muab txiv hmab ua, tsis txhob haus cawv txiv hmab lossis cawv ntxwg, tsis txhob noj tej uas qias tsis huv. Nws yuav tsum ua raws nraim li txhua yam uas kuv hais rau nws lawd.” Manau‑a hais rau Yawmsaub tus tubtxib saum ntuj tias, “Thov koj tos ib pliag, wb ob leeg yuav npaj ib tug menyuam tshis rau koj.” Yawmsaub tus tubtxib saum ntuj txawm hais rau Manau‑a tias, “Txawm yog kom tos los kuv yuav tsis noj koj tej zaub mov. Tiamsis yog koj yuav npaj tej uas muab hlawv xyeem, koj cia li muab xyeem rau Yawmsaub.” Manau‑a tsis paub tias tus ntawd yog Yawmsaub tus tubtxib saum ntuj. Manau‑a thiaj hais rau Yawmsaub tus tubtxib saum ntuj tias, “Koj npe hu li cas? Thaum muaj tseeb raws li koj tej lus lawm, wb thiaj li txawj pub koob meej rau koj.” Yawmsaub tus tubtxib saum ntuj hais rau nws tias, “Nug kuv lub npe ua dabtsi? Kuv lub npe yog lub uas phimhwj kawg.” Manau‑a txawm muab tus menyuam tshis thiab tej qoob loo uas xyeem tuaj xyeem rau saum lub pob zeb rau Yawmsaub uas ua tej txujci phimhwj. Thaum nplaim taws cig plaws saum lub thaj mus rau saum ntuj, Yawmsaub tus tubtxib saum ntuj txawm nrog cov nplaim taws saum lub thaj nce mus rau thaum Manau‑a thiab nws tus pojniam ntsia ntsoov, ces ob tug txawm khwb nkaus ua lub plhu ti nkaus av. Yawmsaub tus tubtxib saum ntuj tsis los tshwm rau Manau‑a thiab nws tus pojniam dua li lawm. Manau‑a thiaj paub tias tus ntawd yog Yawmsaub tus tubtxib saum ntuj. Manau‑a txawm hais rau nws tus pojniam tias, “Ntshai wb yuav tuag xwb lauj, rau qhov wb tau pom Vajtswv lawm.” Tiamsis nws tus pojniam hais rau nws tias, “Yog Yawmsaub xav muab wb tua pov tseg, nws yuav tsis txais tej uas wb muab hlawv xyeem thiab tej qoob loo uas xyeem ntawm wb txhais tes, thiab yuav tsis qhia txhua yam no rau wb thiab piav tej zaj uas zoo li no rau wb.” Tus pojniam ntawd thiaj yug tau ib tug tub, muab tis npe hu ua Xaxoo. Tus tub ntawd kuj hlob zoo thiab Yawmsaub foom koob hmoov rau nws. Thiab Yawmsaub tus Ntsuj Plig pib txhawb nws lub siab ntawm Mahane Daj uas nyob ntawm Xaula thiab Etha‑oo ntu nruab nrab. Xaxoo mus nram lub moos Thinaj, mas pom ib tug hluas nkauj Filixatee hauv lub moos Thinaj ntawd. Ces nws txawm rov los hais rau nws niam nws txiv tias, “Kuv pom ib tug hluas nkauj Filixatee hauv lub moos Thinaj, neb mus yuav los ua kuv pojniam.” Tiamsis leej txiv thiab leej niam hais rau nws tias, “Koj cov neej tsa thiab tag nrho peb haiv neeg tsis muaj ib tug ntxhais hluas li lov es koj tseem mus yuav cov Filixatee uas tsis ua kevcai txiav tej ntxhais ua pojniam?” Tiamsis Xaxoo hais rau leej txiv tias, “Cia li mus yuav tus ntxhais ntawd rau kuv xwb, rau qhov kuv nyiam nws kawg nkaus li.” Leej txiv thiab leej niam tsis paub tias qhov no yog los ntawm Yawmsaub los, rau qhov Yawmsaub tabtom nrhiav kev ua rog rau cov Filixatee. Thaum ntawd cov Filixatee kav kiag cov Yixayee. Ces Xaxoo txawm nrog nws niam nws txiv mus nram Thinaj. Thaum nws tuaj txog tej vaj txiv hmab ntawm Thinaj ua ciav muaj ib tug thav tsov ntxhuav dhia nyooj laws los rau nws. Yawmsaub tus Ntsuj Plig txawm los kav kiag Xaxoo, nws thiaj muab tus tsov ntxhuav ntawd dua ua tej cwb ceg ib yam li dua menyuam tshis, nws twb tsis muaj cuab yeej dabtsi hauv nws txhais tes li. Tiamsis nws kuj tsis qhia rau nws niam nws txiv paub tias nws ua dabtsi lawm. Nws txawm mus nrog tus hluas nkauj ntawd tham, nws txaus siab rau tus hluas nkauj ntawd heev. Tsis ntev tom qab Xaxoo rov mus yuav tus hluas nkauj ntawd. Nws txawm mus xauj saib tug tsov ntxhuav lub cev tuag ntawd, ua ciav muaj ib xub ntab nyob hauv tus tsov ntxhuav lub cev twb muaj zib lawm. Nws txawm cev tes kaus cov zib ntab ntawd los noj taug kev mus. Nws los txog nws niam nws txiv nws txawm muab cev rau ob tug noj, tiamsis nws tsis qhia tias nws muab cov zib ntab ntawd hauv tus tsov ntxhuav lub cev tuag los. Nws txiv kuj mus rau nram tus hluas nkauj ntawd mas Xaxoo pam ib rooj mov qhov ntawd ib yam li tej hluas ib txwm ua. Thaum cov Filixatee pom nws lawd lawv coj peb caug leej tuaj ua qhua nrog nws nyob ua ke. Ces Xaxoo txawm hais rau lawv tias, “Cia kuv txhiaj ib nqes rau nej txhais. Yog nej txhais tau ua ntej xya hnub uas noj tshoob no, kuv yuav muab peb caug lub tsho ntaub mag thiab peb caug cev tsoos tsho ua zam rau nej. Yog nej txhais tsis tau, nej yuav tsum muab peb caug lub tsho ntaub mag thiab peb caug cev tsoos tsho ua zam rau kuv.” Lawv hais rau nws tias, “Cia li txhiaj rau peb txhais saib.” Ces Xaxoo hais rau lawv tias, “Muaj ib yam noj tau tawm hauv tus uas noj los. Muaj ib yam qab zib tawm hauv tus uas muaj zog los.” Tau peb hnub lawm, lawv txhais tsis tau zaj txhiaj txhais ntawd. Thaum txog hnub uas plaub lawv txawm mus hais rau Xaxoo tus pojniam tias, “Koj cia li ntxias koj tus txiv kom txhais zaj txhiaj txhais rau peb. Tsis ua li ntawd mas peb yuav muab hluavtaws hlawv koj thiab koj txiv tsev neeg pov tseg. Koj hu peb tuaj no yog hu kom peb tuaj raug kev pluag xwb lov?” Xaxoo tus pojniam mus quaj rau Xaxoo thiab hais tias, “Koj tsuas ntxub kuv xwb, koj yeej tsis hlub kuv. Koj txhiaj txhais rau kuv cov neej, koj kuj tsis txhais rau kuv mloog.” Xaxoo hais rau nws tias, “Kuv niam kuv txiv kuv twb tsis qhia li, yuav qhia koj tau li cas?” Nws quaj rau Xaxoo xya hnub uas noj tshoob ntawd, mas hnub uas xya Xaxoo thiaj txhais zaj txhiaj txhais ntawd rau nws mloog rau qhov nws txob Xaxoo heev hwv lawm. Ces nws txawm qhia tej lus uas txhais ntawd rau nws cov neej tsa. Ces hnub uas xya thaum hnub tsis tau poob qho cov neeg hauv lub moos ntawd thiaj hais rau Xaxoo tias, “Muaj yam twg qab zib dhau zib ntab? Muaj dabtsi muaj zog dua tsov ntxhuav?” Xaxoo thiaj hais rau lawv tias, “Yog nej tsis muab kuv niag maum nyuj mus laij nej yeej txhais tsis tau li.” Yawmsaub tus Ntsuj Plig los kav tag nrho Xaxoo, nws thiaj mus nram lub moos Akheloo mas tua cov txivneej hauv lub moos ntawd peb caug leej, txeeb kiag lawv li ib puas tsav yam huvsi thiab muab lawv tej tsoos tsho ua zam rau cov uas txhais tej lus txhiaj txhais ntawd. Ces nws thiaj li rov qab mus rau pem nws txiv lub tsev ua chim tsawv. Xaxoo tus pojniam ntawd mas luag muab qua rau nws tus phijlaj yuav lawm. Dhau ntawd thaum txog lub caij hlais mog, Xaxoo coj ib tug menyuam tshis mus saib nws tus pojniam. Nws hais tias, “Kuv yuav nkag mus rau hauv kuv tus pojniam lub txaj.” Tiamsis yawm txiv tsis kheev nws nkag mus. Yawm txiv hais tias, “Kuv xav tias koj ntxub nws kawg li kuv thiaj muab nws qua rau koj tus phijlaj lawm. Nws tus niam hluas tseem zoo nkauj dua nws los tsis yog? Cia koj yuav nws nyob tug niam laus chaw.” Xaxoo txawm hais rau lawv tias, “Zaum no kuv yuav ua phem rau cov Filixatee los kuv yeej tsis txhaum li lawm.” Xaxoo txawm tawm mus ntes peb puas tus hma coj los khi kotw sib txuas ua ib nkawg ib nkawg, muab ib teg tsau pav rau hauv txhua nkawm tus kotw sib txuas. Thaum nws zes taws rau teg tsau lawd nws kuj muab tso rau hauv cov Filixatee tej teb mog mas hluavtaws kub lawv tej mog uas hlais tau thiab tej mog uas tseem tsis tau hlais thiab kub tej vaj txiv hmab thiab tej teb txiv aulib. Cov Filixatee thiaj hais tias, “Leejtwg ua li no?” Lawv teb tias, “Yog Xaxoo uas yog ib tug hauv Thinaj tus vauv vim yog nws yawm txiv muab Xaxoo tus pojniam qua rau nws tus phijlaj lawm.” Cov Filixatee txawm tuaj muab Xaxoo tus pojniam thiab yawm txiv hlawv pov tseg huvsi. Xaxoo txawm hais rau lawv tias, “Yog nej ua li no lawm, kuv twv ntuj tias kuv yuav ua pauj rau nej, kuv li tseg.” Nws txawm ntaus lawv ua lwj ua liam ua rau lawv tuag coob kawg, ces nws txawm mus nyob hauv kem zeb Edas. Ces cov Filixatee txawm mus ua lub yeej hauv Yuda thiab mus ntaus lub moos Lehi. Cov neeg Yuda nug tias, “Nej tuaj ntaus peb ua dabtsi?” Cov Filixatee hais tias, “Peb tuaj ntes Xaxoo, ua rau nws ib yam li nws ua rau peb.” Cov neeg Yuda peb txhiab leej txawm mus rau ntawm kem zeb Edas thiab hais rau Xaxoo tias, “Koj tsis paub tias cov Filixatee yog cov uas kav peb lov? Koj ua dabtsi li no rau peb?” Xaxoo hais tias, “Lawv ua li cas rau kuv lawm, kuv thiaj ua li ntawd rau lawv.” Lawv thiaj hais rau nws tias, “Peb tuaj yuav muab koj khi coj mus cob rau hauv cov Filixatee txhais tes.” Xaxoo hais rau lawv tias, “Thov cog lus twv cia tias nej yuav tsis muab kuv tua.” Lawv hais rau nws tias, “Ua li los maj, peb tsuas khi koj coj mus cob rau hauv lawv txhais tes xwb, peb yuav tsis tua koj.” Lawv txawm muab ob txoj hlua tshiab khi Xaxoo coj hauv kem zeb ntawd los. Thaum nws mus txog lub moos Lehi, cov Filixatee qw zom zaws tuaj ntsib nws. Mas Yawmsaub tus Ntsuj Plig kav kiag Xaxoo ces tej hlua uas lawv khi nws txhais npab ntawd txawm zoo yam li txoj hlua maj uas kub hnyiab yaj pes ntshis ntawm nws txhais tes. Nws txawm pom ib daim puab tsaig nees luav nyoos nyoos ces nws cev tes khaws nkaus los ntaus cov Filixatee tuag ib txhiab leej. Mas Xaxoo hais tias, “Kuv xuas daim puab tsaig nees luav thiaj tuag sib tsub sib nias, kuv xuas daim puab tsaig nees luav tua tau ib txhiab leej.” Thaum nws hais li ntawd tag nws txawm muab daim puab tsaig ntawd laim pov tseg. Mas luag thiaj hu lub chaw ntawd tias Lamalehi. Xaxoo nqhis dej heev thiaj li hu thov Yawmsaub hais tias, “Koj pub koj tus qhev txhais tes kov yeej tau loj li no, es nimno kuv yuav nqhis dej tuag thiab poob rau hauv cov uas tsis ua kevcai txiav txhais tes lov?” Vajtswv txawm qheb kiag ib lub qhov ntawm lub moos Lehi mas dej txhawv los. Thaum Xaxoo haus dej tag nws rov qab muaj zog thiab nws txojsia loj tuaj. Vim li ntawd thiaj hu qhov chaw ntawd tias Eehakhau, tseem nyob ntawm Lehi txog niaj hnub nimno. Thaum cov Filixatee tseem kav ntawd, Xaxoo ua tus thawj coj cov Yixayee tau nees nkaum xyoo. Xaxoo mus rau hauv lub moos Kaxa mas pom ib tug poj muag cev ces txawm mus nrog pw ua ke. Muaj neeg mus hais rau cov neeg Kaxa tias, “Xaxoo tuaj rau hauv no lawm.” Lawv txawm vij lub tsev uas nws nyob thiab zov ntawm rooj loog ib hmos kaj ntug. Lawv nyob twjywm zov ib hmos thiab hais tias, “Peb tos txog kaj ntug li muab nws tua pov tseg.” Tiamsis Xaxoo pw txog ib tag hmo. Mas thaum ib tag hmo nws sawv tsees los rho kiag txhib qhov rooj loog thiab ob tug ncej rooj thiab tus las rooj kwv kiag saum xub pwg mus rau pem lub ncov roob uas nyob ncaj lub moos Heploo. Dhau los rau tom qab Xaxoo mus nyiam ib tug pojniam hauv lub hav Xaule npe hu ua Delila. Filixatee cov thawj mus hais rau tus pojniam ntawd tias, “Koj cia li ntxias kom Xaxoo qhia saib vim li cas nws muaj zog loj li ntawd thiab peb yuav ua li cas thiaj kov yeej nws thiab khi tau nws thiab txo tau nws lub zog, mas peb cov no ib leeg yuav muab ib txhiab ib puas lub txiag nyiaj rau koj.” Delila thiaj hais rau Xaxoo tias, “Thov koj qhia rau kuv saib vim li cas koj lub zog loj li ntawd thiab yuav ua li cas thiaj khi tau koj thiab txo tau koj lub zog.” Xaxoo hais rau nws tias, “Yog lawv muab xya txoj hlua hneev uas tseem nyoos tsis tau qhuav los khi kuv, mas kuv yuav tsis muaj zog, tsuas zoo li lwm tus txivneej xwb.” Filixatee cov thawj thiaj coj xya txoj hlua hneev uas tseem nyoos tsis tau qhuav tuaj rau Delila mas nws muab Xaxoo khi. Nws kuj npaj ib co neeg zov nyob dua ib chav tsev. Nws txawm hais rau Xaxoo tias, “Xaxoo, cov Filixatee tuaj lawm lauj!” Tiamsis Xaxoo rub tej hlua hneev tu ib yam li tej xov maj raug hluavtaws kub es tu. Yog li ntawd lawv kuj tsis paub tias vim li cas nws muaj zog. Delila txawm hais rau Xaxoo tias, “Saib nej, koj dag kuv koj qhia tsis tseeb rau kuv. Thov qhia kuv saib yuav ua li cas thiaj khi tau koj.” Xaxoo hais rau nws tias, “Yog lawv muab cov hlua tshiab uas tsis tau siv dua li khi kuv, ces kuv yuav tsis muaj zog, tsuas zoo li lwm tus txivneej xwb.” Delila txawm muab cov hlua tshiab los khi nws thiab hais rau nws tias, “Xaxoo, cov Filixatee tuaj lawm lauj!” Muaj ib co neeg zov nyob hauv lwm chav tsev. Xaxoo kuj rub tej hlua ntawd tu pes nrho ntawm nws txhais tes ib yam li tej xov xwb. Mas Delila hais rau Xaxoo tias, “Koj dag kuv los txog nimno li thiab qhia tsis tseeb rau kuv xwb. Cia li hais rau kuv saib yuav ua li cas thiaj khi tau koj.” Xaxoo hais rau nws tias, “Yog koj muab kuv xya qais plaubhau ntos ua txia rau hauv rab ntos thiab muab tus nqos npuaj kom ceev, ces kuv yuav tsis muaj zog, tsuas zoo li lwm tus txivneej xwb.” Yog li ntawd, thaum nws tsaug zog Delila muab nws xya qais plaubhau ntos ua txia rau hauv rab ntos thiab muab tus nqos npuaj kom ceev, thiab hais rau nws tias, “Xaxoo, cov Filixatee tuaj lawm lauj!” Nws txawm sawv tsees rub tus nqos thiab rab ntos thiab cov plaubhau uas ntos rau hauv cov hlaub lawm rho kiag mus. Mas Delila hais rau Xaxoo tias, “Ua cas koj lam hais tias koj hlub kuv, es koj lub siab twb tsis npuab kuv? Koj dag kuv peb zaug lawm, koj twb tsis qhia tseeb rau kuv tias vim li cas koj muaj zog loj li kod.” Thaum Delila txob txob hais tag hais thiab taij hnub tag hnub thiab, ces Xaxoo txawm dhuav siab yuav tuag. Nws txawm qhia kiag nws lub siab rau Delila huvsi hais tias, “Rab chais tsis txeev nphav kuv lub taubhau kiag li, rau qhov kuv raug muab cais ua Naxi pub rau Vajtswv txij thaum nruab thiab los lawm. Yog chais kuv cov plaubhau lawm kuv lub zog yuav tawm ntawm kuv mus thiab kuv yuav tsis muaj zog, tsuas zoo li lwm tus txivneej lawm xwb.” Thaum Delila pom tias nws qhia kiag lub siab huvsi lawm, ces Delila txawm txib neeg mus hu Filixatee cov thawj hais tias, “Cia li rov tuaj ib zaug xwb rau qhov nws qhia kiag lub siab rau kuv lawm.” Ces Filixatee cov thawj txawm tuaj rau ntawm Delila thiab coj nyiaj tuaj. Delila txawm kom Xaxoo pw tsaug zog rau saum nws ncej qab, thiab nws hu ib tug yawg tuaj chais Xaxoo xya qais plaubhau saum nws taubhau. Ces Delila txawm zes Xaxoo, ua ciav nws tsis muaj zog lawm. Delila txawm hais tias, “Xaxoo, cov Filixatee tuaj lawm lauj!” Xaxoo tsim dheev los hais tias, “Kuv yuav tawm plaws mus yam li txhua zaus thiab nti kom dim plaws.” Nws tsis paub tias Yawmsaub twb ncaim nws lawm. Cov Filixatee thiaj muab nws ntes thiab muab nws ob lub qhov muag kaus pov tseg, thiab coj nws mus rau nram lub moos Kaxa, lawv muab saw hlau tooj liab khi nws. Lawv kom nws zom zeb hauv lub tsev lojfaj. Txij thaum chais nws cov plaubhau lawd, nws cov plaubhau kuj pib tuaj ntev zuj zus. Filixatee cov thawj tuaj txoos ua ke yuav ua kevcai loj xyeem tsiaj rau lawv tus dab Dakoo, thiab ua kev lomzem zoo siab rau qhov lawv hais tias, “Peb tus dab muab peb tus yeeb ncuab Xaxoo rau hauv peb txhais tes lawm.” Thaum cov pejxeem pom Xaxoo lawv kuj qhuas lawv tus dab tias, “Peb tus dab muab tau peb tus yeeb ncuab uas rhuav tshem peb lub tebchaws rau hauv peb txhais tes, nws tua peb tuag coob kawg li lawm.” Thaum lawv ua lomzem zoo siab ntawd, lawv txawm hais tias, “Cia li hu Xaxoo los dhia ua si rau peb saib.” Lawv thiaj mus hu Xaxoo tawm hauv lub tsev lojfaj los, mas Xaxoo kuj los dhia ua si rau lawv saib. Lawv kom nws sawv hauv nruab nrab cov ncej tsev. Xaxoo hais rau tus menyuam tub uas tuav nws tes tias, “Thov coj kuv mus xuas tej ncej uas txheem lub tsev no, kuv thiaj tau chaw pheeb tej ncej ntawd.” Muaj pojniam txivneej puv nkaus lub tsev ntawd. Filixatee cov thawj sawvdaws kuj nyob qhov ntawd, thiab tseem muaj pojniam txivneej peb txhiab leej nyob txheej saud saib Xaxoo dhia ua si. Ces Xaxoo txawm quaj thov Yawmsaub tias, “Au Vajtswv Yawmsaub, thov nco txog kuv. Au Vajtswv, thov pub zog rau kuv zaum no tib zaug xwb es kuv yuav pauj cov Filixatee rau kuv ob lub qhov muag ib sab.” Xaxoo txawm tuav ob tug ncej hauv nruab nrab tsev uas txheem lub tsev ntawd thiab nthia tes rau ob tug ncej ntawd, txhais tes xis nthia ib tug txhais tes laug nthia ib tug. Thiab Xaxoo hais tias, “Thov cia kuv nrog cov Filixatee tuag lauj.” Ces nws txawm thawb kawg nkaus nws lub zog, mas lub tsev ntawd pob rhe los tais cov thawj thiab cov pejxeem uas nyob hauv lub tsev txhua tus huvsi. Yog li no cov neeg uas nws tua tuag rau thaum nws tuag no, coob dua li cov uas nws tua tuag rau thaum nws tseem muaj txojsia nyob. Ces nws cov kwvtij thiab nws tsev neeg sawvdaws tuaj coj nws lub cev tuag mus log rau hauv nws txiv Manau‑a lub qhov ntxa uas nyob ntawm lub moos Xaula thiab lub moos Etha‑oo ntu nruab nrab. Nws ua thawj kav cov Yixayee tau nees nkaum xyoo. Muaj ib tug yawg yog neeg pem toj siab Efa‑i tebchaws hu ua Mikha. Nws hais rau nws niam tias, “Ib txheeb ib puas daim nyiaj uas muaj neeg nyiag koj li thiab koj tau tsawm foom rau thiab kuv hnov lawd, mas cov nyiaj ntawd nyob ntawm kuv. Yog kuv muab lawm.” Nws niam txawm hais tias, “Thov Yawmsaub foom koob hmoov rau kuv tus tub.” Mikha thiaj muab ib txhiab ib puas daim nyiaj ntawd thim rau leej niam. Mas leej niam hais tias, “Cov nyiaj no kuv pub kiag rau Yawmsaub ua nws tug, mas kuv muab rau koj coj mus txaug ua dab mlom thiab nchuav ua dab mlom. Kuv thiaj muab rov rau koj.” Thaum Mikha thim cov nyiaj rov rau leej niam lawm leej niam txawm coj ob puas daim mus rau tus Kws nyiaj muab txaug ua dab mlom thiab nchuav ua dab mlom. Mas tej dab mlom ntawd nyob hauv Mikha tsev. Tus Mikha no muaj ib lub tsev dab thiab ua ib lub efauj thiab teev dab qhuas, thiab tsa nws ib tug tub ua pov thawj coj kevcai. Ncua sijhawm ntawd cov Yixayee tsis muaj vajntxwv mas txhua tus nyias ua raws li nyias pom zoo. Muaj ib tug hluas, yog xeem Levi yog neeg Npelehee, nws nyob hauv Npelehee hauv xeem Yuda tebchaws. Nws tawm hauv Npelehee uas nyob hauv Yuda tebchaws mus nrhiav chaw nyob. Thaum nws taug kev mus ntawd nws mus txog pem toj siab Efa‑i tebchaws thiab mus txog Mikha lub tsev. Mikha thiaj hais rau nws tias, “Koj tuaj qhovtwg tuaj?” Nws teb tias, “Kuv yog ib tug Levi uas nyob hauv moos Npelehee hauv Yuda tebchaws, kuv tuaj mus nrhiav chaw nyob.” Mikha txawm hais rau nws tias, “Cia li nrog kuv nyob, ua kuv txiv thiab ua ib tug pov thawj rau kuv mas ib xyoos kuv yuav muab kaum daim nyiaj rau koj thiab muab ib cev tsoos tsho thiab mov noj rau koj.” Tus Levi ntawd thiaj mus rau hauv tsev. Tus Levi kuj txaus siab nrog tus yawg ntawd nyob. Tus hluas ntawd kuj zoo tam Mikha ib tug tub ntag. Mikha kuj tsa tus Levi ntawd mas tus Levi thiaj ua nws tus pov thawj thiab nyob hauv nws tsev. Mikha hais tias, “Nimno kuv paub tseeb tias Yawmsaub yuav pub kuv noj qab nyob zoo rau qhov kuv muaj ib tug Levi ua pov thawj.” Ncua sijhawm ntawd cov Yixayee tsis muaj vajntxwv. Lub sijhawm ntawd xeem Daj tabtom nrhiav tebchaws rau lawv nyob ua lawv qub txeeg qub teg, rau qhov los txog thaum ntawd lawv tseem tsis tau nrog cov Yixayee tau qub txeeg qub teg. Mas cov Daj thiaj xa tsib tug txivneej uas siab tuab sawv cev lawv xeem tuaj hauv Xaula thiab Etha‑oo mus tshuaj tebchaws thiab saib tebchaws. Cov Daj hais rau lawv tias, “Nej cia li mus tshuaj saib tebchaws.” Lawv tuaj txog pem toj siab Efa‑i tebchaws, tuaj txog ntawm Mikha tsev mas so qhov ntawd. Thaum lawv tuaj ze ntawm Mikha tsev lawv cim tau tus hluas Levi ntawd lub suab, mas lawv thiaj nkag mus nug tias, “Leejtwg coj koj tuaj ntawm no thiab koj ua dabtsi ntawm no? Koj ua haujlwm dabtsi?” Nws teb lawv tias, “Mikha ua li ub li no rau kuv, nws ntiav kuv mas kuv thiaj ua nws tus pov thawj.” Lawv txawm hais rau nws tias, “Thov nug Vajtswv rau peb xwv peb thiaj paub tias qhov uas peb yuav mus no yuav zoo los tsis zoo.” Tus pov thawj txawm hais rau lawv tias, “Cia li tso siab lug mus. Yawmsaub lub qhov muag yeej ntsia ntsoov qhov uas nej mus ntawd.” Tsib tug txivneej ntawd thiaj li tawm mus txog lub moos La‑i, mas pom tias cov neeg hauv lub moos ntawd nyob tso siab lug zoo yam nkaus li cov neeg Xaidoo. Lawv nyob tus yees tsis txob tsis txhawj dabtsi, tsis tu ncua ib yam dabtsi hauv ntiajteb no li, lawv yog neeg muaj txiag. Lawv nyob deb ntawm cov Xaidoo thiab lawv tsis muaj kev ntsig txog lwm yam neeg. Thaum lawv rov los txog lawv tej kwvtij hauv Xaula thiab Etha‑oo, mas cov kwvtij nug lawv tias, “Nej mus pom zoo li cas?” Lawv teb tias, “Cia li sawv tsees, peb mus ua rog rau lawv rau qhov peb twb pom lub tebchaws ntawd lawm yog tebchaws zoo kawg li. Nej yuav tsis ua dabtsi li lov? Tsis txhob qeeb qeeb, cia li mus txeeb kiag lub tebchaws ntawd ua nej tug. Thaum uas nej mus txog yuav ntsib cov neeg uas tsis txob tsis txhawj dabtsi li. Lub tebchaws kuj dav, mas Vajtswv twb muab rau hauv nej txhais tes lawm, yog lub tebchaws uas tsis tu ncua ib yam dabtsi hauv ntiajteb no.” Mas xeem Daj rau pua tus txivneej muaj cuab yeej ua rog tawm hauv Xaula thiab Etha‑oo mus. Lawv mus ua yeej ntawm Khiliya Ye‑ali hauv Yuda tebchaws. Vim li no lawv thiaj hu qhov chaw ntawd hais tias Mahane Daj, los txog niaj hnub nimno. Lub yeej ntawd nyob ntawm Khiliya Ye‑ali sab hnub poob. Lawv kuj hla qhov ntawd mus rau pem toj siab Efa‑i tebchaws, mus txog Mikha tsev. Mas tsib tug txivneej uas twb mus tshuaj tebchaws ntawm lub moos La‑i lawd hais rau lawv tej kwvtij tias, “Nej puas paub tias hauv lub tsev no muaj ib lub efauj thiab dab qhuas thiab ib tug dab mlom uas txaug thiab ib tug dab mlom uas nchuav? Nej cia li xav saib nej yuav ua li cas.” Lawv thiaj nkag mus rau hauv tus Levi hluas ntawd lub tsev uas nyob ntawm Mikha tsev mas nug nws kev noj qab nyob zoo. Mas xeem Daj rau pua leej uas coj cuab yeej ua rog sawv ntawm rooj vag. Mas tsib tug uas mus tshuaj tebchaws ntawd kuj nkag mus muab tus dab mlom uas txaug thiab lub tsho efauj thiab tej dab qhuas thiab tus dab mlom uas nchuav ntawd. Mas tus pov thawj kuj sawv nrog rau pua tus txivneej uas coj cuab yeej ua rog sawv ntawm rooj vag ua ke. Thaum cov neeg no nkag mus rau hauv Mikha tsev muab tus dab mlom uas txaug thiab lub tsho efauj thiab tej dab qhuas thiab tus dab mlom uas nchuav ntawd los, tus pov thawj thiaj nug tias, “Nej ua dabtsi li no?” Lawv teb nws tias, “Ua twjywm, muab tes pos qhov ncauj es nrog peb mus, mus ua peb txiv thiab ua peb li pov thawj. Ua pov thawj rau ib tug txivneej tsev neeg zoo los ua pov thawj rau ib xeem ib cum hauv cov Yixayee zoo dua?” Mas tus pov thawj thiaj li zoo siab. Nws thiaj muab lub efauj thiab tej dab qhuas thiab tus dab mlom uas txaug coj nrog cov neeg ntawd mus. Lawv thiaj tig kiag ntawd mus, lawv tso lawv tej menyuam thiab tej tsiaj txhu mus ua ntej. Thaum lawv mus ntawd deb ntawm Mikha tsev lawd mas Mikha txawm hu cov neeg uas nyob ze nws tsev tuaj ua ke mas lawv caum cuag cov neeg Daj. Lawv qw hu cov Daj, mas cov Daj cia li tig hais rau Mikha tias, “Muaj li cas es koj yuav coj neeg coob ua luaj li no tuaj?” Nws teb tias, “Nej muab kuv tej dab mlom uas kuv ua thiab coj kuv tus pov thawj khiav mus lawm, es kuv tseem tshuav dabtsi thiab? Ua cas nej tseem nug kuv tias, ‘Yog ua li cas?’ ” Cov Daj thiaj hais rau nws tias, “Tsis txhob tsa koj lub suab rau peb hnov tsam ces tej neeg npau taws ces muab koj thiab koj tsev neeg ntaus tuag tag.” Cov Daj cia li taug kev mus lawm. Thaum Mikha pom tias lawv muaj zog dua, nws cia li tig kiag rov mus tsev lawm. Cov neeg Daj coj tej uas Mikha ua thiab Mikha tus pov thawj mus mas mus txog lub moos La‑i, uas cov neeg nyob siab tus yees tsis txob tsis txhawj dabtsi li. Lawv txawm xuas ntaj tua cov neeg ntawd huvsi thiab muab lawv lub moos hlawv pov tseg tag. Tsis muaj leejtwg tuaj pab cuam rau qhov lawv nyob deb lub moos Xaidoo thiab lawv tsis ntsig txog lwm tus. Lub moos La‑i nyob hauv lub hav ze lub moos Npelehau. Lawv muab lub moos ntawd ua dua tshiab rau lawv nyob. Lawv thiaj hu lub moos ntawd hu ua moos Daj raws li lawv yawg koob Daj uas yog Yixayee yug. Yav thaum ub lub moos ntawd hu ua La‑i. Cov Daj kuj muab tus dab mlom uas txaug txawb rau lawv teev. Mas Kawsoo tus tub Yaunathas uas yog Mauxe xeeb ntxwv thiab nws cov tub ua pov thawj rau xeem Daj mus txog lub sijhawm uas tebchaws poob. Lawv muab tus dab mlom txaug uas Mikha ua ntawd txawb teev mus tag lub sijhawm uas Vajtswv lub tsev nyob hauv Silau. Ncua sijhawm ntawd cov Yixayee tsis muaj vajntxwv, mas muaj ib tug Levi nyob pem toj siab Efa‑i tebchaws ceg uas deb kawg. Nws yuav tau ib tug hluas nkauj hauv Npelehee hauv Yuda tebchaws ua niam yau. Nws tus niam yau ntawd mus deev dua hluas nraug thiaj khiav tus txiv rov mus nrog leej txiv nyob hauv Npelehee hauv Yuda tebchaws, nyob tau plaub lub hlis. Nws tus txiv ho mus tos nws, mus ua tib zoo hais nws thiab yuav coj nws rov los. Nws coj ib tug tub qhe thiab ib nkawg nees luav nrog nws mus. Tus pojniam txawm coj tus txiv mus rau hauv yawm txiv tsev. Thaum yawm txiv pom nws, kuj zoo siab hlo hu los tsev. Nws yawm txiv uas yog tus ntxhais txiv cheem nws nyob mas nws thiaj nyob tau peb hnub. Lawv kuj noj haus thiab pw qhov ntawd. Mas hnub uas plaub lawv thiaj sawv ntxov los hwbxwm yuav mus, tiamsis tus ntxhais txiv hais rau tus vauv tias, “Cia li noj ib khaw mov thiaj muaj zog es kuv siab thiaj kheev koj mus.” Ob tug ntawd thiaj li rov zaum noj haus ua ke. Mas tus ntxhais txiv cheem tus ntawd tias, “Rov pw ib hmos es tham kom zoo siab tso.” Thaum tus vauv sawv tsees yuav mus yawm txiv cheem cheem mas nws rov pw qhov ntawd. Mas hnub uas tsib nws sawv ntxov yuav mus tiamsis tus ntxhais txiv hais tias, “Noj mov thiaj muaj zog, nyob ib chim hnub qaij tso.” Ob tug thiaj noj mov ua ke. Thaum tus yawg ntawd thiab nws tus niam yau thiab tus tub qhe sawv tsees yuav mus, yawm txiv uas yog tus ntxhais txiv hais rau nws tias, “Hnub qaij twb yuav tsaus ntuj, ces thov rov nyob ib hmos thiab. Twb yuav tag ib hnub ces pw no, cia li zoo siab xyiv fab, mas tagkis nej cia li sawv ntxov taug kev mus tsev.” Tiamsis tus yawg ntawd tsis yeem pw dua ib hmos lawm, nws cia li sawv tsees mus lawm. Lawv mus txog ncaj ntawm lub moos Yenpu (uas yog Yeluxalees). Nws muab ob tug nees luav nog eeb huvsi thiab nws tus niam yau kuj nrog nws mus thiab. Thaum lawv los yuav txog lub moos Yenpu mas twb yuav tsaus ntuj, tus tub qhe thiaj hais rau tus lospav tias, “Cia peb nkag mus so rau hauv cov Yenpu lub moos no thiab pw ib hmos hauv.” Tus lospav teb tias, “Peb txhob nkag mus rau hauv lwm haiv neeg lub moos uas tsis yog cov Yixayee li, peb yuav hla mus kom txog lub moos Kinpe‑a.” Nws thiaj hais rau tus tub qhe tias, “Cia peb mus kom ze Kinpe‑a lossis Lama es pw hauv tej chaw no ib qho.” Lawv thiaj hla kiag mus. Thaum lawv los ze Kinpe‑a uas yog xeem Npeeyamee lub moos mas hnub poob lawm. Lawv thiaj nkag mus yuav pw hauv Kinpe‑a. Nws thiaj mus zaum ntawm tshav puam hauv lub plawv moos vim yog tsis muaj leejtwg hu lawv mus pw hauv tsev. Thaum yuav tsaus ntuj muaj ib tug yawg laus mus teb los. Nws yog neeg pem toj siab Efa‑i tebchaws los nyob hauv lub moos Kinpe‑a, tiamsis cov neeg hauv lub moos ntawd, yog xeem Npeeyamee. Nws tsa muag ntsia mas pom cov qhua nyob ntawm tshav puam hauv lub moos, yawg laus ntawd thiaj hais tias, “Nej yuav mus qhovtwg, thiab nej tuaj qhovtwg tuaj?” Tus Levi teb tias, “Peb taug kev hauv Npelehee hauv Yuda tebchaws los yuav mus lawm pem toj siab Efa‑i ceg uas deb kawg, yog kuv tuaj pem tuaj kuv tau mus rau Npelehee hauv Yuda tebchaws, kuv yuav rov qab mus tsev. Tsis muaj leejtwg hu kuv mus so hauv lawv tsev. Quav nyab thiab zaub nees luav peb kuj muaj txhij thiab peb uas yog koj cov qhev muaj mov noj thiab cawv txiv hmab txaus rau kuv thiab tus pojniam no thiab tus hluas uas nrog wb tuaj no huvsi, tsis cheem tsum ib yam dabtsi li.” Tus yawg laus ntawd thiaj hais tias, “Thov cia nej nyob kaj siab lug. Kuv yuav pub txhua yam uas nej cheem tsum rau nej. Thov tsis txhob pw ib hmos ntawm tshav puam no.” Nws thiaj coj lawv los so hauv nws tsev, nws muab zaub rau nees luav noj thiab lawv ntxuav kotaw thiab noj haus. Thaum lawv tabtom nyob zoo siab hlo mas cov txivneej phem hauv lub moos ntawd txawm tuaj vij lub tsev tsoo qhov rooj qw hu tus yawg laus uas yog tus tswv tsev ntawd tias, “Cia li xa tus yawg uas tuaj rau hauv koj tsev tuaj rau peb deev.” Tus tswv tsev txawm mus hais rau lawv tias, “Cov kwvtij, tsis txhob ua li, tsis txhob ua phem li no, rau qhov tus yawg no los so hauv kuv tsev lawm. Tsis txhob ua phem ua qias li no. Kuv muaj ib tug ntxhais uas tsis tau deev dua hluas nraug li thiab muaj nws tus niam yau nyob no, kuv yuav coj tuaj rau nej nimno. Mas nej yuav yuam ob tug thiab ua li cas raws li nej lub siab nyiam los tau. Tiamsis tsis txhob ua phem ua qias rau tus txivneej no xwb.” Tiamsis cov neeg ntawd tsis mloog kiag li. Mas tus yawg ntawd thiaj muab nws tus niam yau thawb kiag mus rau lawv. Cov txivneej ntawd thiaj li yuam nws ua phem rau nws ib hmos kaj ntug. Thaum kaj ntug txoog lawv muab nws tso mus. Thaum pom kev tseeb tus pojniam los ntog vau hlo rau ntawm lub tsev uas tus txiv pw taw rooj mus txog hnub tawm. Tagkis tus txiv sawv los qheb qhov rooj yuav mus ua ciav nws tus niam yau pw xyab luas ntawd ob txhais tes xyab khaum ntawm taw rooj. Nws hais rau tus niam yau tias, “Cia li sawv tsees, peb yuav mus,” uas tsis hnov teb li. Nws txawm muab tus niam yau tsaws kiag rau saum tus nees luav, nws taug kev mus txog ntua tsev. Thaum nws mus rau hauv tsev lawd nws cia li muab riam txiav tus niam yau uas tuag ntawd ua kaum ob ya mas nws xa mus thoob plaws Yixayee tebchaws. Txhua tus uas pom kuj hais tias, “Tej xwm zoo li no tsis tau muaj dua li txij thaum cov Yixayee tawm hauv Iyi tebchaws los txog hnub no tsis muaj leejtwg txeev pom dua li. Cia li muab coj los xav thiab sablaj tib zoo es hais mus.” Ib tsoom Yixayee txij ntua Daj mus txog Npe‑awsenpa thiab cov hauv Kile‑a sawvdaws tawm tuaj txoos ua ke ua kiag ib lub siab tuaj rau ntawm Yawmsaub xubntiag hauv lub moos Mixapa. Thaum Vajtswv cov neeg tuaj sablaj ua ke mas cov thawj hauv txhua xeem Yixayee sawvdaws kuj tuaj koom thiab. Huvsi muaj 400,000 leej tub rog uas mus kotaw coj ntaj. (Thaum ntawd cov neeg Npeeyamee hnov tias cov Yixayee tuaj ua ke rau Mixapa.) Cov Yixayee hais tias, “Thov qhia rau peb saib zaj kev phem no tshwm xwm los li cas.” Tus Levi uas yog tus niam yau uas raug tua ntawd tus txiv hais tias, “Kuv thiab kuv tus niam yau los txog lub moos Kinpe‑a uas yog cov Npeeyamee lub moos, yog peb los pw ib hmos qhov ntawd. Thaum tsaus ntuj cov txivneej hauv lub moos Kinpe‑a txawm tuaj nrhiav kuv thiab vij nkaus lub tsev. Lawv yuav muab kuv tua pov tseg, mas lawv muab kuv tus niam yau yuam nws thiaj li tuag. Kuv coj kuv tus niam yau lub cev tuag mus txiav ua tej ywb yav xa mus thoob plaws lub tebchaws uas yog cov Yixayee qub txeeg qub teg, rau qhov lawv ua tej kev txaj muag tej kev qias vuab tsuab rau hauv cov Yixayee lawm. Saib lauj, nej cov neeg Yixayee sawvdaws pab sablaj ntawm no saib pom zoo yuav ua li cas.” Cov pejxeem txhua tus ib txhij sawv tsees hais tias, “Peb cov no tsis muaj ib tug yuav rov qab mus rau peb tej tsev ntaub thiab tsis muaj ib tug yuav mus rau peb vaj peb tsev. Peb yuav ua li no rau Kinpe‑a. Peb yuav rho ntawv mus ua rog rau lawv. Peb yuav rho cov Yixayee txhua xeem ib puas leej rho kaum leej, ib txhiab leej rho ib puas, ib vam leej rho ib txhiab kom mus nrhiav mov noj los rau cov tub rog, cov tub rog thiaj mus pauj tej kev phem kev qias uas cov neeg Kinpe‑a uas yog xeem Npeeyamee ua rau hauv cov Yixayee.” Cov Yixayee sawvdaws kuj sau nthwv ua ib lub siab mus ua rog rau lub moos ntawd. Txhua xeem Yixayee thiaj xa neeg mus hais thoob plaws xeem Npeeyamee tias, “Ua cas yuav muaj tej kev phem kev qias no tshwm rau hauv nej cov? Nej cia li muab cov txivneej phem hauv Kinpe‑a rau peb coj mus tua pov tseg mas peb yuav rhuav tshem tej kev phem kom tawm hauv cov Yixayee mus.” Tiamsis cov Npeeyamee tsis yeem mloog lawv cov kwvtij Yixayee hais. Cov Npeeyamee txawm tawm hauv lawv tej moos sau nthwv tuaj rau Kinpe‑a yuav ua rog rau cov Yixayee. Hnub ntawd cov Npeeyamee txhij tau cov tub rog coj ntaj hauv lawv tej moos huvsi tuaj yog ob vam rau txhiab leej nrog cov Kinpe‑a uas txhij tau xya pua leej tub rog uas txawj tshaj plaws. Cov tub rog huvsi no muaj xya pua leej uas xis sab laug uas txawj ua rog tshaj plaws. Cov no txhua tus txawj xuas hlua fiav pob zeb ntaus kom raug txoj plaubhau tsis npig li. Cov Yixayee uas coj ntaj tsis suav cov Npeeyamee mas txhij tau 400,000 leej, puavleej yog tub rog siab tuab. Cov Yixayee thiaj mus rau ntawm Npe‑ee mus nug Vajtswv tias, “Peb cov no leejtwg yuav ua ntej mus ntaus cov Npeeyamee?” Yawmsaub hais tias, “Cia Yuda mus ua ntej.” Tagkis cov Yixayee thiaj sawv ntxov mus ua yeej ntaus lub moos Kinpe‑a. Cov Yixayee tawm mus ua rog rau cov Npeeyamee, thiab cov Yixayee npaj tub rog ua tej pab tej pawg ntaus lawv ntawm Kinpe‑a. Hnub ntawd cov Npeeyamee tawm hauv lub moos Kinpe‑a tuaj tua cov Yixayee ntog tuag tag ob vam ob txhiab leej. Tiamsis cov Yixayee ho sib cuab zog thiab rov tso dua tub rog ua tej pab tej pawg rau tej chaw uas tso thawj hnub. Thiab cov Yixayee kuj mus quaj rau ntawm Yawmsaub xubntiag ib hnub tsaus ntuj. Lawv nug Yawmsaub tias, “Peb yuav rov txeem mus ntaus peb cov kwvtij Npeeyamee los tsis txhob mus?” Yawmsaub teb tias, “Mus ntaus lawv los maj.” Mas hnub uas ob cov Yixayee thiaj txeem mus ze ze cov Npeeyamee. Mas hnub ob ntawd cov Npeeyamee kuj tawm hauv Kinpe‑a tuaj tua cov Yixayee tuag tag ib vam yim txhiab leej, txhua tus puavleej yog tub rog coj ntaj. Yixayee cov tub rog sawvdaws thiaj li mus pem Npe‑ee lawv quaj quaj. Lawv zaum rau ntawm Yawmsaub xubntiag yoo mov ib hnub tsaus ntuj, thiab ua kevcai hlawv huvsi xyeem thiab ua kevcai xyeem sib raug zoo rau Yawmsaub. Cov Yixayee thiaj nug Yawmsaub. (Lub sijhawm ntawd Vajtswv lub phij xab sib cog lus nyob qhov ntawd. Mas Ele‑axa tus tub Fineha uas yog Aloo xeeb ntxwv ua haujlwm ntawm lub phij xab rau lub sijhawm ntawd.) Cov Yixayee nug tias, “Peb yuav rov qab mus ua rog rau peb cov kwvtij Npeeyamee dua ib zaug los peb yuav tso tseg?” Yawmsaub hais tias, “Cia li mus ntaus rau qhov tagkis kuv yuav muab lawv rau hauv nej txhais tes.” Yog li no cov Yixayee thiaj tso tub rog mus nraim cev zov puag ncig Kinpe‑a. Mas cov Yixayee thiaj rov mus ntaus cov Npeeyamee rau hnub uas peb thiab tso tub rog ua tej pab tej pawg tiv Kinpe‑a yam li thawj ob zaug. Cov Npeeyamee tawm tuaj ua rog rau cov Yixayee mas raug ntxias tawm mus deb lub moos. Lawv pib ntaus thiab tua cov Yixayee ib txhia yam li thawj ob zaug, yog taug txojkev uas mus pem Npe‑ee thiab txoj uas mus Kinpe‑a thiab tom tej hav nroj, tua tau cov Yixayee kwvlam peb caug leej. Cov Npeeyamee hais tias, “Lawv swb peb yam li thawj zaug lawm.” Tiamsis cov Yixayee hais tias, “Cia peb thim coj lawv tawm mus deb lub moos kom txog tej kev hlob.” Cov Yixayee sawvdaws kuj tawm hauv lawv tej chaw khiav mus ua tej pab tej pawg ntawm Npa‑as Thama, mas cov Yixayee uas nraim cev txawm sawv pes tsees hauv lawv tej chaw ntawm Kenpa sab hnub poob. Muaj ib vam tus tub rog Yixayee uas txawj tshaj plaws txawm txeem mus ntaus lub moos Kinpe‑a. Mas ua rog ceev heev, cov Npeeyamee tsis paub tias kev puam tsuaj twb tuaj ze lawv lawm. Yawmsaub ua rau cov Yixayee kov yeej cov Npeeyamee. Hnub ntawd cov Yixayee tua tau cov Npeeyamee tuag ob vam tsib txhiab ib puas leej, cov ntawd puavleej yog tub rog tuav ntaj. Yog li ntawd cov Npeeyamee thiaj pom tias lawv swb lawm. Cov Yixayee thim khiav cov Npeeyamee vim yog lawv tso siab rau cov uas nraim cev uas lawv tso mus zov lub moos Kinpe‑a. Cov uas nraim cev zov kuj sawv pes tsees txeem mus ntaus lub moos Kinpe‑a. Cov uas nraim cev ntawd tawm los xuas ntaj tua lub moos huvsi. Cov Yixayee nrog cov uas nraim cev teem hum tias thaum lawv ua pa taws ncho hlob hauv lub moos, mas cov Yixayee yuav tig rov los tua. Cov Npeeyamee pib tua tau cov Yixayee kwvlam peb caug leej ces txawm hais tias, “Lawv yuav tuag rau peb tes ib yam li thawj zaug thiab ntag.” Tiamsis thaum muaj pa taws ncho tshwm plaws hauv lub moos raws li uas teem cia ntawd, cov Npeeyamee tig los saib ua ciav lub moos twb cig pa ncho nto ntuj lawm. Cov Yixayee tig loo rov los, mas cov Npeeyamee kuj poob siab rau qhov lawv pom tias kev puam tsuaj los txog lawv lawm. Lawv thiaj tig hlo khiav cov Yixayee taug txojkev uas mus rau tebchaws moj sab qhua, tiamsis lawv khiav tsis dim kev ua rog, mas cov Yixayee uas tawm hauv tej moos tuaj kuj muab lawv tua rau hauv nruab nrab. Lawv muab cov Npeeyamee puav kev thiab caum tua mus rau ntawm tej chaw uas cov Npeeyamee so, mus ncaj lub moos Kinpe‑a sab hnub tuaj. Cov Npeeyamee tuag ib vam yim txhiab leej, puavleej yog cov tub rog uas siab loj siab tuab. Lawv kuj tig khiav mus rau tebchaws moj sab qhua mus txog lub pob tsuas Limoo. Cov Yixayee tua lawv tuag taug txojkev tsib txhiab leej thiab caum nrooj lawv mus txog ntua Kidoo mas tua tau ob txhiab leej. Npeeyamee cov tub rog siab loj siab tuab uas coj ntaj raug tuag tag rau hnub ntawd huvsi yog ob vam tsib txhiab leej. Tiamsis muaj rau pua leej tub rog tig khiav mus rau tebchaws moj sab qhua mus txog lub pob tsuas Limoo, mas lawv nyob ntawm lub pob tsuas Limoo tau plaub lub hlis. Cov Yixayee kuj rov mus ntaus cov Npeeyamee thiab xuas ntaj tua tej neeg thiab tej tsiaj txhu thiab txhua yam uas lawv pom. Thiab txhua lub moos uas lawv mus txog lawv muab hlawv huvsi pov tseg. Cov Yixayee tau cog lus twv ntawm Mixapa tias, “Peb cov tsis kheev leejtwg muab tej ntxhais qua rau cov Npeeyamee.” Cov pejxeem kuj tuaj rau ntawm Npe‑ee nyob ntawm Vajtswv xubntiag ib hnub tsaus ntuj lawv tsa suab quaj heev kawg li. Lawv hais tias, “Au Yawmsaub uas yog cov Yixayee tus Vajtswv, ua cas muaj tej xwm zoo li no tshwm los rau hauv cov Yixayee es hnub no yuav ploj ntais ib xeem Yixayee lawm?” Tagkis tom qab cov pejxeem sawv ntxov ua ib lub thaj thiab ua kevcai hlawv huvsi xyeem thiab ua kevcai xyeem sib raug zoo. Cov Yixayee txawm hais tias, “Cov xeem Yixayee leejtwg tsis tuaj sablaj rau ntawm Yawmsaub xubntiag nev?” Cov Yixayee twb cog lus twv tawv kawg li hais txog tus uas tsis tuaj sablaj rau ntawm Yawmsaub xubntiag hauv Mixapa tias, “Tus ntawd yuav tsum raug muab tua xwb.” Cov Yixayee khuvleej lawv tus kwv Npeeyamee lawv hais tias, “Hnub no ib lub xeem hauv cov Yixayee raug muab txiav pov tseg lawm. Peb yuav ua li cas nrhiav pojniam rau cov Npeeyamee uas tseem tshuav nyob, rau qhov peb twb tuav Yawmsaub lub npe cog lus twv lawm tias peb yuav tsis muab peb tej ntxhais qua rau lawv yuav ua pojniam?” Mas lawv hais tias, “Tshuav xeem twg hauv cov Yixayee uas tsis tuaj rau ntawm Yawmsaub xubntiag hauv Mixapa?” Yeej tsis muaj ib tug tuaj ntawm Yanpe Kile‑a tuaj nrog lawv koom hauv lub yeej. Rau qhov thaum lawv txheeb cov pejxeem yeej tsis pom muaj cov Yanpe Kile‑a ib tug nyob ntawd kiag li. Ua li ntawd cov pejxeem thiaj tso cov tub rog uas siab loj siab tuab ib vam ob txhiab leej mus rau Yanpe Kile‑a mas hais rau lawv tias, “Xuas ntaj tua cov uas nyob hauv Yanpe Kile‑a thiab tua cov pojniam thiab cov menyuam yaus. Nej yuav tsum ua li no, txhua tus txivneej thiab txhua tus pojniam uas twb nrog dua txivneej pw lawm mas muab tua pov tseg huvsi.” Hauv cov neeg Yanpe Kile‑a ntawd lawv pom muaj plaub puas tus nkauj xwb uas tsis tau nrog txivneej pw li, lawv thiaj coj cov nkauj xwb ntawd los rau lub yeej ntawm Silau hauv Khana‑as tebchaws. Cov pejxeem sawvdaws kuj xa xov mus rau cov Npeeyamee uas nyob ntawm lub pob tsuas Limoo thiab tshaj xo rau lawv tias rov sib raug zoo lawm. Thaum ntawd cov Npeeyamee thiaj rov los, mas cov Yixayee muab cov nkauj xwb uas lawv tseg txojsia hauv Yanpe Kile‑a rau lawv yuav, tiamsis tsis txaus. Cov pejxeem khuvleej cov Npeeyamee rau qhov Yawmsaub ua rau cov Yixayee ntais ib xeem lawm. Mas cov kev txwj laus hauv cov pejxeem thiaj hais tias, “Vim cov Npeeyamee tej pojniam raug puam tsuaj tag lawm peb yuav ua li cas nrhiav pojniam txhua rau cov uas tsis tau?” Lawv hais tias, “Cov Npeeyamee uas tseem tshuav yuav tsum muaj caj muaj ceg nyob kom thiaj li tsis muaj ib xeem hauv cov Yixayee raug muab ntxuav kom tu noob. Tiamsis peb muab tsis tau peb tej ntxhais qua rau lawv yuav rau qhov cov Yixayee tau cog lus twv tias, ‘Yog leejtwg muab tus ntxhais qua rau cov Npeeyamee yuav ua pojniam mas tus ntawd yuav raug lo lus foom tsis zoo.’ ” Lawv thiaj hais tias, “Txhua xyoo muaj kevcai pam noj haus xyeem rau Yawmsaub ntawm Silau, uas nyob ntawm Npe‑ee sab ped, yog ntawm txojkev mus Npe‑ee rau Sekhee sab hnub tuaj thiab nyob ntawm lub moos Lenpauna sab nrad.” Lawv thiaj hais rau cov Npeeyamee tias, “Mus tsiv nraim rau hauv tej vaj txiv hmab zov tos, mas saib, yog cov ntxhais hauv Silau tuaj nrog luag dhia seev cev, nej cia li tawm plaws hauv tej vaj txiv hmab los rub cov ntxhais hauv Silau ib leeg ib tug coj mus ua pojniam mas rov qab mus rau Npeeyamee tebchaws. Thaum tej ntxhais ntawd leej txiv lossis tej kwvtij tuaj yws rau peb mas peb yuav hais rau lawv tias, ‘Thov saib rau peb es cia lawv yuav, rau qhov thaum peb mus ua rog peb muab tsis tau pojniam txaus rau lawv txhua tus, thiab nej los nej kuj tsis muab rau lawv, yog nej muab los nej kuj txhaum.’ ” Cov Npeeyamee nyias taus nyias ua raws li lawv hais thiaj tau pojniam txhua, yog tau cov hluas nkauj dhia seev cev uas lawv mus rub. Lawv thiaj rov qab mus rau hauv lub tebchaws uas yog lawv qub txeeg qub teg, mus tsim kho tej moos thiab nyob rau hauv. Thaum ntawd cov Yixayee nyias thiaj rov qab mus rau hauv nyias cum nyias xeem nyias mus nyob nyias tebchaws uas yog nyias qub txeeg qub teg. Ncua sijhawm ntawd cov Yixayee tsis muaj vajntxwv, mas nyias ua raws li nyias pom zoo xwb. Thaum cov thawj tseem kav Yixayee tebchaws mas muaj kev tshaib nqhis hauv lub tebchaws ib zaug. Muaj ib tug yawg nyob hauv lub moos Npelehee hauv Yuda tebchaws txawm coj pojniam thiab ob tug tub tsiv mus nyob ib ntus rau hauv Mau‑a tebchaws. Tus yawg ntawd npe hu ua Elimelej, nws pojniam hu ua Na‑aumi, ob tug tub ib tug hu ua Maloo, ib tug hu ua Khili‑oo. Lawv yog neeg Efatha nyob hauv lub moos Npelehee hauv Yuda tebchaws. Lawv tsiv mus nyob hauv Mau‑a tebchaws. Ces Na‑aumi tus txiv Elimelej txawm tuag lawm tseg nws thiab nws ob tug tub. Ob tug tub ntawd kuj yuav tau Mau‑a cov ntxhais ua pojniam. Ib tug npe hu ua Aupa, ib tug hu ua Luv. Lawv nyob qhov ntawd tau kaum xyoo. Ces Maloo thiab Khili‑oo ob tug txawm tuag lawm, ces Na‑aumi thiaj nyob ua ntsos ua ntsuag tsis muaj txiv tsis muaj tub. Mas Na‑aumi thiab ob tug nyab npaj yuav sawv kev tawm hauv Mau‑a tebchaws rov qab, vim yog thaum tseem nyob hauv Mau‑a tebchaws nws hnov xov tias Yawmsaub los pab nws haiv neeg thiab pub lawv muaj mov noj lawm. Nws thiaj tawm hauv lub chaw nyob nrog ob tug nyab mus, lawv taug kev rov qab mus rau Yuda tebchaws. Na‑aumi txawm hais rau nws ob tug nyab tias, “Cia neb ob leeg nyias rov mus nrog nyias niam nyob. Thov Yawmsaub hlub neb ib yam li neb tau hlub cov uas tuag lawd thiab hlub kuv. Thov Yawmsaub pub kom neb tau nyob kaj siab lug nyias tau nyob hauv nyias tus txiv lub tsev.” Ces Na‑aumi txawm nwj ob tug nyab, lawv nyias taus nyias quaj. Ob tug hais rau Na‑aumi tias, “Tsis txhob ua li ntawd, wb yuav nrog koj mus rau koj haiv neeg.” Tiamsis Na‑aumi hais tias, “Ob tug nyab, cia li rov qab mus, neb yuav nrog kuv mus ua dabtsi? Kuv lub plab tseem yuav muaj tub rau neb yuav ua txiv thiab lov? Ob tug nyab 'e, rov qab mus tsev mog. Kuv laus heev dhau tsis yuav txiv lawm. Yog kuv xav tias kuv tseem muaj vam es txawm yog yuav txiv hmo no thiab muaj tub, los neb yuav tos mus txog thaum tej tub ntawd hlob thiab lov? Neb yuav tswj tau neb lub siab tsis yuav txiv lov? Tsis txhob ua li, ob tug me nyab, kuv raug kev lwj siab heev dua neb, vim yog Yawmsaub txhais tes tawm tsam kuv.” Ces lawv nyias taus nyias rov quaj. Ces Aupa txawm nwj leej niam thiab rov qab mus lawm, tiamsis Luv tseem dai lias leej niam. Na‑aumi hais rau Luv tias, “Saib maj, koj tus niam laus twb rov qab mus rau nws haiv neeg thiab nws tej dab lawm. Koj cia li raws koj tus niam laus rov qab mus mog.” Tiamsis Luv hais tias, “Tsis txhob hais kom kuv tso koj tseg ncaim koj rov qab mus. Koj mus qhovtwg los kuv yuav mus thiab, koj nyob qhovtwg los kuv yuav nyob qhov ntawd thiab, koj haiv neeg los yog kuv haiv neeg thiab, koj tus Vajtswv los yog kuv tus Vajtswv. Koj tuag qhovtwg kuv yuav tuag qhov ntawd thiab yuav muab kuv log rau qhov ntawd thiab. Yog txojkev tuag ua rau kuv ncaim koj los thov Yawmsaub rau txim rau kuv thiab rau hnyav dua.” Thaum Na‑aumi pom tias Luv muaj siab nrog nws mus tiag tiag li, nws txawm tsis hais dabtsi lawm. Ob tug thiaj li ua ke mus txog lub moos Npelehee. Thaum ob tug los txog Npelehee lawd cov kwvtij zej zog ras zom zaws rau ob tug. Tej pojniam sib hais tias, “Ntawd yog Na‑aumi lov?” Na‑aumi hais rau lawv tias, “Tsis txhob hu kuv ua Na‑aumi lawm, cia li hu kuv ua Mala rau qhov Vajtswv uas muaj hwjchim loj kawg nkaus ua rau kuv lwj siab kawg. Thaum kuv tawm hauv lub moos no mus kuv muaj txhua yam nplua mias, tiamsis Yawmsaub coj kuv rov qab los tes dawb tes npliag. Yawmsaub ua rau kuv txom nyem nyuaj siab thiab Vajtswv uas muaj hwjchim loj coj xwm txheej phem los raug kuv, nej tseem yuav hu kuv ua Na‑aumi dabtsi?” Yog li no Na‑aumi thiaj li tawm ntawm Mau‑a tebchaws los thiab Luv uas yog nws tus nyab thiab yog neeg Mau‑a kuj nrog nws los. Ob tug los txog lub moos Npelehee yog lub caij uas pib hlais qeb. Na‑aumi muaj ib tug kwvtij muaj txiag yog Elimelej cum ntag npe hu ua Npau‑a. Mas Luv uas yog neeg Mau‑a hais rau Na‑aumi tias, “Cia kuv mus teb mus xawb tej qeb raws qab tus uas zoo siab cia kuv xawb.” Na‑aumi hais rau nws tias, “Me nyab 'e, cia li mus.” Luv txawm tawm mus xawb raws qab cov uas hlais. Nws mus tau rau hauv Npau‑a daim teb, yog tus uas nrog Elimelej koom ib cum. Mas Npau‑a tuaj hauv Npelehee tuaj txog, nws hais rau cov uas hlais qeb tias, “Thov Yawmsaub nrog nraim nej nyob.” Lawv teb tias, “Thov Yawmsaub foom koob hmoov rau koj.” Npau‑a txawm nug tus tub zog uas coj zog hlais qeb ntawd tias, “Tus pojniam ntawd yog leejtwg li?” Tus tub zog uas coj zog hlais qeb teb tias, “Yog tus pojniam Mau‑a uas nrog Na‑aumi tawm hauv Mau‑a tebchaws rov los. Tus pojniam ntawd thov hais tias, ‘Cia kuv xawb thiab khaws raws qab cov uas hlais tej teg qeb.’ Nws thiaj tuaj xawb tagkis no los lawm tsuas yog so ib pliag hauv tsev teb xwb.” Ces Npau‑a txawm hais rau Luv tias, “Nyab 'e, cia li mloog kuv hais, tsis txhob mus xawb lwm tus li teb es tso daim no tseg. Cia li raws qab ti ti kuv tej nkauj qhev. Cia li ntsia ntsoov daim teb uas lawv hlais thiab raws lawv qab. Kuv twb hais rau cov tub hluas kom tsis txhob zes koj. Thaum koj nqhis dej kuj cia li mus haus dej hauv lub taub uas cov hluas ntim cia lawd.” Nws thiaj khwb nkaus hauv av pe Npau‑a thiab hais tias, “Kuv tsuas yog ib tug neeg lwm tebchaws xwb, ua li cas koj yuav hlub kuv thiab saib kuv zoo?” Npau‑a teb nws tias, “Muaj neeg piav rau kuv paub txog txhua yam uas koj tu koj niam pog txij thaum koj tus txiv tuag lawd thiab paub txog qhov uas koj tso koj niam koj txiv thiab lub tebchaws uas yug koj tseg es los nrog haiv neeg uas koj tsis tau paub dua nyob. Thov Yawmsaub pauj tej uas koj ua zoo rov rau koj thiab thov Yawmsaub uas yog cov Yixayee tus Vajtswv uas koj los cawm siav rau hauv nws phab tis pub koob hmoov nplua mias rau koj.” Luv thiaj teb tias, “Yawg hlob, thov koj hlub kuv mus li, rau qhov txawm yog kuv tsis yog koj li nkauj qhev los koj twb nplij tau kuv lub siab thiab hais tej lus zoo rau kuv.” Txog sijhawm noj mov Npau‑a kuj hais rau nws tias, “Los nrog peb noj thiab muab ncuav ntsw tej kua qaub noj.” Nws thiaj nrog cov uas hlais qeb zaum. Npau‑a cev tej qeb kib rau nws, nws noj tsau tseem tshuav seem. Thaum Luv sawv tsees mus xawb qeb, Npau‑a hais rau cov tub hluas tias, “Cia nws xawb raws tej teg qeb, tsis txhob cem nws. Thiab rho tej rev qeb tso rau nws khaws thiab, tsis txhob cem nws.” Luv thiaj xawb qeb mus txog tsaus ntuj. Nws muab tej uas xawb ntawd ntaus, tau kwvlam ib efa qeb. Nws ris cov qeb ntawd rov mus rau hauv lub moos, nws muab tej qeb uas nws xawb los ntawd rau nws niam pog saib thiab muab tej zaub mov uas nws noj tsis tag rau niam pog noj. Niam pog thiaj hais rau nws tias, “Hnub no koj mus xawb qeb qhovtwg? Koj ua haujlwm qhovtwg? Thov cia tus uas hlub koj tau koob hmoov.” Luv thiaj hais rau niam pog paub tias nws mus ua haujlwm hauv leejtwg daim teb thiab hais tias, “Tus yawg uas hnub no kuv mus ua haujlwm ntawd npe hu ua Npau‑a.” Na‑aumi hais rau tus nyab tias, “Thov Yawmsaub foom koob hmoov rau tus yawg ntawd. Yawmsaub txojkev hlub muaj tsis tu rau tus uas tseem muaj txojsia nyob thiab tus uas tuag lawd.” Na‑aumi hais rau Luv tias, “Tus yawg ntawd yog peb li kwvtij yog ib tug txheeb ze peb.” Luv uas yog neeg Mau‑a hais tias, “Thiab nws tseem hais rau kuv tias, ‘Koj raws qab xawb ti ti kuv cov qhev mus txog thaum lawv hlais kuv li qeb tag.’ ” Na‑aumi hais rau Luv uas yog nws tus nyab tias, “Nyab, qhov uas koj nrog nws tej nkauj qhev ua haujlwm zoo lawm, ntshai tsam koj mus rau hauv lwm tus li teb ces raug luag zes.” Vim li ntawd Luv thiaj raws ti ti Npau‑a cov nkauj qhev qab xawb qeb thiab mog mus txog thaum hlais qeb thiab hlais mog tag, thiab nrog nws niam pog nyob. Na‑aumi uas yog Luv niam pog hais rau nws tias, “Nyab, puas tsim nyog kuv nrhiav cuab nrhiav yig rau koj kom koj thiaj nyob kaj siab lug? Npau‑a uas koj mus nrog nws cov nkauj qhev ua ke ntawd yog peb li kwvtij txheeb. Hmo no nws tabtom ntxuaj qeb hauv lub tshav ntaus qeb. Koj cia li da dej pleev roj tsw qab thiab hnav cev tsoos uas zoo heev mus rau nram lub tshav ntaus qeb kom tsis txhob cia nws pom koj mus txog thaum nws noj mov haus dej tag tso. Thaum nws mus pw, ua tib zoo saib nws pw qhovtwg, mam li mus tshem daim pam ntawm nws kotaw thiab pw rau qhov ntawd. Ces nws yuav qhia rau koj tias koj yuav tsum ua dabtsi.” Luv teb tias, “Kuv yuav ua txhua yam uas koj hais.” Luv thiaj mus nram lub tshav ntaus qeb thiab ua raws li nws niam pog hais txhua yam. Thaum Npau‑a noj haus tsau zoo siab lawd, nws txawm mus pw ntawm pawg qeb ib sab. Ces Luv txawm nkag mus tshem daim pam ntawm nws kotaw thiab pw qhov ntawd. Thaum ib tag hmo, yawg ntawd ras dheev los tig cev ua ciav muaj ib tug pojniam pw ntawm nws kotaw. Nws thiaj nug tias, “Koj yog leejtwg?” Tus pojniam teb tias, “Kuv yog koj tus nkauj qhev Luv 'os. Thov koj yaws koj lub qab tsho ntev vov koj tus nkauj qhev rau qhov koj yog ib tug kwvtij txheeb.” Npau‑a thiaj hais tias, “Mentxhais 'e, thov Yawmsaub foom koob hmoov rau koj lauj. Koj txojkev hlub zaum no loj dua zaum ua ntej, rau qhov koj tsis mus nrhiav tej tub hluas tsis hais muaj los pluag. Mentxhais 'e, nimno tsis txhob ntshai, kuv yuav ua txhua yam raws li koj thov. Cov neeg hauv peb lub moos sawvdaws yeej paub tias koj yog ib tug pojniam uas zoo tsim txiaj. Thiab kuv los yeej yog kwvtij txheeb tiag, tiamsis tseem muaj dua ib tug kwvtij uas txheeb dua kuv. Hmo no koj cia li pw ntawm no. Tagkis kaj ntug yog tus ntawd lees ua kwvtij txheeb saws koj, kuj zoo, cia nws saws. Yog nws tsis yeem ua kwvtij txheeb saws koj, muaj Yawmsaub uas muaj txojsia nyob pom, kuv yuav lees ua kwvtij txheeb saws koj. Cia li pw ntawm no mus txog kaj ntug.” Luv thiaj pw ntawm nws kotaw mus txog kaj ntug, tiamsis nws sawv ntxov tsees thaum tsis tau pom kev zeem tau ntsej muag. Npau‑a hais tias, “Tsis txhob kheev leejtwg paub tias ib tug pojniam tuaj ntawm lub tshav ntaus qeb no.” Nws hais rau Luv tias, “Cia li muab koj daim ntaub kauv nthuav los.” Luv thiaj nthuav los, mas Npau‑a luj tau rau xe‑a qeb muab rau nws ris mus, nws txawm rov mus rau hauv lub moos lawm. Thaum Luv los txog, nws niam pog nug tias, “Me nyab, zoo li cas 'os?” Luv txawm piav txhua yam uas tus yawg ntawd ua rau nws rau leej niam mloog, hais tias, “Nws pub rau xe‑a qeb no rau kuv, nws hais tias, ‘Tsis txhob rov qab mus tes dawb tes do rau ntawm koj niam pog.’ ” Na‑aumi teb tias, “Me nyab, nyob twjywm tos mus txog thaum paub tias zaj no zoo li cas, rau qhov tus yawg ntawd yuav tsis so, nws yuav hais zaj no kom tiav rau hnub no.” Npau‑a mus zaum ntawm rooj loog. Mas tus kwvtij txheeb uas Npau‑a hais txog kuj taug kev tuaj. Npau‑a txawm hais tias, “Kwvtij, los zaum ntawm no.” Ces tus yawg ntawd txawm los zaum. Npau‑a thiaj mus hu cov kev txwj laus hauv lub moos ntawd kaum leej tuaj thiab hais tias, “Nej cia li zaum ntawm no.” Lawv txawm zaum. Nws txawm hais rau tus kwvtij uas txheeb ntawd tias, “Daim teb uas yog peb tus kwvtij Elimelej li mas Na‑aumi uas rov hauv Mau‑a tebchaws los yuav muab muag. Kuv xav tias kuv yuav hais rau koj paub, thiab thov kom koj yuav cia tab meeg cov neeg uas zaum ntawm no thiab tab meeg peb cov kev txwj laus. Yog koj yuav txhiv kuj cia li txhiv. Yog koj tsis txhiv kuj hais meej rau kuv paub, rau qhov dhau koj lawm tsis muaj leejtwg muaj feem txhiv tau, tsuas yog kuv thiaj muaj feem ua koj qab xwb.” Tus yawg ntawd hais tias, “Kuv yuav txhiv.” Ces Npau‑a txawm hais tias, “Hnub uas koj yuav daim teb ntawm Na‑aumi koj kuj tau Luv uas yog neeg Mau‑a uas ua poj ntsuam thiab, kom thiaj tuav tau tus uas tuag lawd lub npe cia rau hauv daim teb uas yog nws qub txeeg qub teg.” Tus kwvtij txheeb ntawd teb tias, “Kuv txhiv li ntawd tsis tau, yuav ua rau kuv qub txeeg qub teg poob mus. Koj cia li sawv kuv chaw mus txhiv, rau qhov kuv txhiv tsis tau.” No yog tej kevcai uas thaum ub cov Yixayee coj ntsig txog kev txhiv thiab kev pauv, thiaj ua tau timkhawv tias ob tog hais sib hum, tus uas tsis txhiv yuav hle khau cev rau tus uas txhiv. No yog kevcai ua timkhawv rau hauv cov Yixayee. Yog li no thaum tus kwvtij txheeb hais rau Npau‑a tias, “Koj cia li yuav koj,” nws thiaj hle nws ib sab khau. Ces Npau‑a txawm hais rau cov kev txwj laus thiab cov pejxeem sawvdaws tias, “Hnub no nej ua timkhawv pom tias kuv tau yuav Elimelej tej cuab txhiaj cuab tam thiab Khili‑oo thiab Maloo tej cuab txhiaj cuab tam huvsi ntawm Na‑aumi txhais tes lawm. Thiab kuv yuav Maloo tus pojniam Luv uas ua poj ntsuam thiab yog neeg Mau‑a los ua kuv pojniam kom thiaj tuav tau tus uas tuag lub npe cia rau hauv daim teb uas yog nws qub txeeg qub teg mus li, xwv tus uas tuag lub npe thiaj tsis raug muab txiav tu hauv nws cov kwvtij thiab tu hauv lub rooj loog uas yog nws lub moos. Hnub no nej ua timkhawv.” Ces cov pejxeem sawvdaws uas nyob ntawm rooj loog thiab cov kev txwj laus txawm hais tias, “Peb ua tau timkhawv. Thov Yawmsaub ua rau tus pojniam uas tabtom los rau hauv koj lub tsev zoo yam nkaus li Lachee thiab Le‑a, uas tsim haiv neeg Yixayee. Thov kom koj vam meej rau hauv Efatha thiab muaj koob meej rau hauv Npelehee. Thov kom cov menyuam uas Yawmsaub yuav pub rau tus pojniam hluas no ua koj li caj ces zoo yam nkaus li Peles caj ces uas Thama yug rau Yuda.” Yog li no Npau‑a thiaj li yuav Luv ua pojniam. Nws mus nrog Luv pw thiab Yawmsaub pub Luv xeeb tub yug tau ib tug tub. Tej pojniam hais rau Na‑aumi tias, “Qhuas Yawmsaub uas hnub no tsis tso koj tseg cia ua tus uas tsis muaj kwvtij txheeb. Thov cia tus metub no muaj koob meej nrov nto moo lug rau hauv cov Yixayee. Tus metub no yuav tsav koj txojsia thiab yug koj rau thaum koj laus. Rau qhov tus metub no yog tus nyab uas hlub koj yug, yog tus nyab uas tsim txiaj dua xya leej tub.” Ces Na‑aumi txawm muab tus metub ntawd puag rau hauv nws lub xubntiag thiab tu tus metub ntawd. Tej pojniam uas nyob ze ib ncig hais tias, “Yug tau ib tug tub rau Na‑aumi lawm.” Lawv tis npe rau tus metub ntawd hu ua Aunpe. Aunpe yog Yexi txiv, Yexi yog Davi txiv. Ntawm no mus yog Peles caj ces. Peles yog Hexaloo txiv, Hexaloo yog Las txiv, Las yog Aminada txiv, Aminada yog Nasoo txiv, Nasoo yog Xamoo txiv, Xamoo yog Npau‑a txiv, Npau‑a yog Aunpe txiv, Aunpe yog Yexi txiv, Yexi yog Davi txiv. Muaj ib tug yawg nyob hauv lub moos Lamatha‑i pem toj siab Efa‑i tebchaws, nws yog Xub cum. Nws npe hu ua Eekhana, nws txiv yog Yelauhas nws yawg yog Elihu nws yawg koob yog Thauhu thiab nws yawg suab yog Xub, yog xeem Efa‑i. Eekhana muaj ob tug pojniam. Ib tug hu ua Hana, ib tug hu ua Penina. Penina muaj menyuam hos Hana tsis muaj. Mas Eekhana pheej niaj xyoo tawm ntawm nws lub moos mus pe hawm thiab xyeem tsiaj rau Yawmsaub uas muaj hwjchim loj kawg nkaus hauv lub moos Silau. Eli ob tug tub uas yog Hauni thiab Fineha ua pov thawj ua Yawmsaub tej haujlwm qhov ntawd. Hnub uas Eekhana tua tsiaj xyeem rau Yawmsaub, nws kuj faib nqaij rau nws tus pojniam Penina thiab faib rau nws tej tub tej ntxhais huvsi. Thiab nws faib ob npaug rau Hana vim nws hlub Hana tiamsis Yawmsaub kaw Hana lub plab tsis pub muaj menyuam. Penina uas nrog Hana sib txeeb txiv pheej zes Hana ua rau nws chim, vim Yawmsaub kaw Hana lub plab tsis pub muaj menyuam. Pheej niaj xyoo muaj los li ntawd. Txhua zaus uas mus rau pem Yawmsaub lub tsev Penina kuj zes Hana. Vim li no Hana thiaj li quaj quaj tsis kam noj mov. Mas Eekhana uas yog nws tus txiv thiaj nug nws tias, “Hana, ua cas koj quaj? Ua cas koj tsis noj mov? Ua cas koj yuav nyuaj siab? Kuv zoo dua kaum leej tub rau koj kaj.” Thaum noj haus hauv lub moos Silau tag lawd, Hana txawm sawv tsees. Tus pov thawj Eli zaum saum lub rooj uas nyob ntawm lub qhov rooj hauv Yawmsaub lub tsev ib sab. Hana nyuaj siab kawg li, nws thov Yawmsaub thiab quaj quaj heev. Nws tau yeem lus hais tias, “Au Yawmsaub uas muaj hwjchim loj kawg nkaus, yog koj tsa qhov muag saib txog kuv uas yog koj tus nkauj qhev txojkev txom nyem nyuaj siab, thiab nco txog kuv thiab pheej nco ntsoov kuv uas yog koj tus nkauj qhev es pub ib tug tub rau kuv, mas kuv yuav pub nws rov rau Yawmsaub tag nws sim neej thiab tsis kheev rab chais nphav nws taubhau kiag li.” Thaum nws tseem tabtom thov Yawmsaub ntawd, Eli ntsia ntsoov nws lub qhov ncauj. Tiamsis Hana hais hauv lub siab tsuas yog nws qhov ncauj ua nkawv nkim xwb, tsis hnov nws lub suab. Vim li no Eli thiaj xav tias yog nws qaug cawv. Eli thiaj hais rau nws tias, “Koj yuav qaug mus ntev li cas? Cia li muab cawv tso tseg los maj.” Tiamsis Hana teb tias, “Yawg hlob, tsis yog li ntawd, kuv yog ib tug pojniam uas lwj siab kawg li. Kuv tsis tau haus cawv txiv hmab thiab cawv ntxwg kiag li, tiamsis kuv qheb kiag kuv lub siab qhia rau Yawmsaub. Tsis txhob xav hais tias kuv uas yog koj tus nkauj qhev yog ib tug pojniam tsis tsim txiaj. Qhov uas kuv hais li ntawd twb yog vim kuv muaj kev nyuaj siab thiab kev lwj siab kawg.” Ces Eli teb tias, “Koj cia li mus zoo kaj siab lug. Thov Yixayee tus Vajtswv ua raws li tej lus uas koj thov ntawd.” Mas Hana hais rau nws tias, “Thov koj hlub kuv uas yog koj tus nkauj qhev.” Ces Hana txawm tawm mus noj mov thiab nws lub ntsej muag tsis mluas lawm. Lawv sawv ntxov pe hawm Yawmsaub tag ces lawv txawm rov mus tsev rau hauv lub moos Lama lawm. Eekhana nrog nws tus pojniam Hana pw thiab Yawmsaub nco txog Hana. Mas thaum txog lub caij lawm Hana txawm xeeb tub thiab yug tau ib tug tub, thiab tis npe hu ua Xamuyee rau qhov nws hais tias, “Yog kuv thov tau ntawm Vajtswv.” Eekhana thiab nws tsev neeg sawvdaws mus xyeem tsiaj raws li niaj xyoo rau Yawmsaub thiab pauj tej uas nws fiv cia lawm. Tiamsis Hana tsis mus, rau qhov nws hais rau nws tus txiv tias, “Thaum tus metub tseg mis lawd kuv yuav coj nws mus kom nws thiaj mus nyob rau ntawm Yawmsaub xubntiag thiab nyob qhov ntawd mus li.” Eekhana uas yog nws tus txiv hais rau nws tias, “Cia li ua raws li koj pom zoo, es tos txog thaum uas muab tus metub cais mis tso. Tsuav yog thov Yawmsaub ua kom nws tej lus tiav xwb.” Hana thiaj nyob tsev tu nws tus tub mus txog thaum nws muab tus tub cais mis. Thaum nws muab tus tub cais mis lawd, nws txawm coj tus tub thiab ib tug txiv nyuj hnub nyoog peb xyoos thiab ib efa hmoov mog thiab ib hnab tawv cawv txiv hmab mus rau ntawm Yawmsaub lub tsev hauv lub moos Silau. Tus metub tseem yau thiab. Lawv tua tus txiv nyuj ntawd thiab coj tus metub mus cuag Eli. Mas Hana hais rau Eli tias, “Yawg hlob, koj muaj txojsia nyob pom, kuv yog tus pojniam uas sawv ntsug thov Yawmsaub ntawm no tab meeg koj. Kuv thov kom tau tus menyuam no, mas Yawmsaub pub raws li kuv tej lus thov rau kuv. Vim li no kuv thiaj muab nws qev rau Yawmsaub, muab nws pub rau Yawmsaub tag nws sim neej.” Ces Eekhana txawm pe hawm Yawmsaub qhov ntawd. Ces Hana txawm thov Yawmsaub hais tias, “Kuv lub siab xyiv fab rau hauv Yawmsaub, kuv tus kub kuj raug muab tsa rau lub chaw siab hauv Yawmsaub. Kuv lub qhov ncauj khav tau rau kuv cov yeeb ncuab, rau qhov kuv zoo siab rau koj txojkev cawm dim. “Tsis muaj leejtwg dawb huv li Yawmsaub, tsis muaj leejtwg zoo cuag li koj, tsis muaj ib txhib zeb twg zoo cuag li peb tus Vajtswv. Tsis txhob hais lus khav theeb dua li lawm, tsis txhob cia tej lus muab hlob tawm hauv lub qhov ncauj, rau qhov Yawmsaub yog tus Vajtswv uas paub txhua yam, thiab muab txhua yam haujlwm luj tshuaj saib. Cov uas muaj zog rab hneev raug muab lov lawm, cov uas tsaug leeg kuj tau lub zog los hnav lawm. Cov uas txeev noj tsau npo kuj tawm mus ua zog nrhiav noj, cov uas tshaib plab kuj tsis tshaib lawm. Tus uas ib txwm xeeb tsis taus menyuam kuj yug tau xya tus lawm, tiamsis tus uas muaj menyuam coob ua ntsoj ua ntsuag. Yawmsaub muab tua thiab pub txojsia, nws coj nqes mus rau hauv tub tuag teb thiab tsa kom sawv rov los. Yawmsaub ua kom pluag thiab ua kom muaj, nws muab txo kom qes thiab muab tsa kom sawv siab. Nws tsa cov uas pluag sawv hauv hmoov av los, nws muab cov uas raug txom nyem tsa sawv hauv qhov tshauv los, coj lawv los nrog cov thawj zaum ua ke, thiab tau lub rooj siab uas muaj koob meej ua lawv tug. Cov ncej uas txheem lub ntiajteb no yog Yawmsaub li, nws muab lub ntiajteb txawb rau saum cov ncej ntawd. “Nws yuav tsom kwm cov uas npuab nws, txhais kotaw, tiamsis cov neeg limhiam yuav nyob ntsiag to rau hauv qhov tsaus ntuj, rau qhov neeg siv nws lub zog xwb yuav kov tsis yeej. Yawmsaub cov yeeb ncuab yuav raug muab tsoo tawg ua tej dwb daim, nws yuav ua xob nthe saum ntuj tawm tsam lawv. Yawmsaub yuav txiav txim thoob plaws hauv lub qab ntuj no, nws yuav pub zog rau nws tus vajntxwv, thiab yuav tsa tus uas nws hliv roj tsa cia lawm tus kub nyob siab dua huvsi.” Ces Eekhana txawm rov qab mus tsev rau hauv lub moos Lama lawm. Ces tus metub ntawd ua koom tu Yawmsaub ntawm tus pov thawj Eli lub xubntiag. Eli ob tug tub yog neeg tsis tsheej haj tsis hwm Yawmsaub kiag li, thiab tsis quav ntsej tej kevcai uas cov pov thawj coj rau tej pejxeem. Thaum leejtwg coj tsiaj tuaj xyeem mas thaum tabtom hau nqaij tus pov thawj tug tub qhe yuav los tuav rawv rab hmuv uas muaj peb ceg. Nws yuav muab rab hmuv nkaug rau hauv lub yias lossis lub hwj lossis lub laujkaub loj lub laujkaub me. Txhua yam uas rab hmuv chob tau ntawd tus pov thawj yuav muab ua nws tug coj los noj. Eli ob tug tub ua li no rau txhua tus Yixayee uas tuaj rau hauv lub moos Silau. Tsis tag li ntawd xwb, ua ntej uas lawv tsis tau hlawv cov hlab hluas roj, tus pov thawj tug qhev pheej los hais rau tus uas muab xyeem ntawd tias, “Thov nqaij mus rau tus pov thawj kib. Nws tsis yuav tej nqaij uas koj hau nws yuav nqaij nyoos xwb.” Yog tus uas xyeem teb tias, “Thov cia lawv hlawv cov hlab hluas roj tso koj mam coj npaum li koj lub siab nyiam mus,” tus qhev yuav hais tias, “Tsis tau li, yuav tsum muab nimno xwb. Yog koj tsis muab los kuv yuav muab kuv mus.” Vim li no Yawmsaub thiaj pom tias ob tug tub hluas no lub txim loj kawg li rau qhov ob tug saib tsis taus tej uas muab xyeem rau Yawmsaub. Xamuyee tu ntawm Yawmsaub xubntiag, nws yog ib tug metub uas hnav ib lub tsho efauj ntaub mag. Nws niam niaj xyoo xaws ib lub tsho me me coj mus rau nws rau thaum nws nrog tus txiv mus xyeem tsiaj rau Yawmsaub. Mas Eli pheej foom koob hmoov rau Eekhana thiab nws tus pojniam tias, “Thov Yawmsaub pub tus pojniam no yug menyuam rau koj pauj tus uas nws thov es muab qev rau Yawmsaub lawm.” Ces ob tug li rov mus tsev. Yawmsaub los pab Hana, mas nws thiaj li xeeb menyuam yug tau peb tug tub thiab ob tug ntxhais. Tus metub Xamuyee kuj hlob zoo rau ntawm Yawmsaub lub xubntiag. Eli laus heev lawm thiab nws kuj hnov txog txhua yam uas nws ob tug tub ua rau cov Yixayee, thiab hnov txog qhov uas ob tug deev cov pojniam uas ua haujlwm ntawm lub rooj vag uas nkag mus rau hauv lub tsev ntaub sib ntsib. Mas nws hais rau ob tug tias, “Ua cas neb yuav ua li no? Kuv tau hnov cov pejxeem piav tej kev phem uas neb ua. Tub 'e, tsis txhob ua. Tej xov uas kuv hnov Yawmsaub cov neeg piav ncha lug ntawd mas tsis zoo kiag li. Yog neeg ua txhaum rau neeg, Vajtswv nyob nruab nrab tu. Tiamsis yog neeg ua txhaum rau Yawmsaub, leejtwg yuav thov tau?” Tiamsis ob tug tsis kam mloog leej txiv hais rau qhov tias Yawmsaub twb npaj siab muab ob tug tua pov tseg lawm. Tus metub Xamuyee kuj hlob zuj zus, Yawmsaub thiab neeg kuj txaus siab rau nws zuj zus. Thaum ntawd muaj Vajtswv li ib tug neeg tuaj hais rau Eli tias, “Yawmsaub hais li no tias, ‘Kuv twb qhia kuv rau koj yawg koob Aloo tsev neeg rau thaum lawv nyob hauv Iyi tebchaws uas lawv nyob hauv Falau kev tswjhwm. Kuv xaiv nws tawm hauv txhua xeem Yixayee los ua kuv li pov thawj mus ua haujlwm ntawm kuv lub thaj thiab hlawv hmoov tshuaj tsw qab thiab hnav lub tsho efauj rau ntawm kuv xubntiag. Kuv tau muab tej uas cov Yixayee muab hlawv xyeem rau kuv huvsi ua koj yawg koob caj ces li feem. Ua cas koj yuav saib tsis taus tej uas muab xyeem rau kuv thiab tej uas kuv hais kom muab pub rau kuv? Koj muab koj ob tug tub saib hlob dua kuv es muab txhua yam zoo kawg uas kuv haiv neeg Yixayee muab xyeem rau kuv txav kom nej rog rog.’ Vim li no Yawmsaub uas yog cov Yixayee tus Vajtswv thiaj hais tias, ‘Kuv twb cog lus tias koj tsev neeg thiab koj yawg koob caj ces yuav ua koom tu kuv mus ib txhis.’ Tiamsis nimno Yawmsaub tshaj tawm tias, ‘Tej uas kuv hais ntawd muab rhuav pov tseg lawm. Rau qhov cov uas muab kuv saib hlob kuv yuav muab lawv saib hlob, cov uas saib tsis taus kuv, kuv yuav saib tsis taus lawv. Saib maj, lub caij lub nyoog uas kuv yuav txiav koj lub zog thiab koj yawg koob caj ces lub zog pov tseg los yuav txog, xwv thiaj tsis muaj ib tug laus nyob hauv koj lub cuab. Koj yuav raug kev txom nyem nyuaj siab, saib liab muag khiav khib tej kev vam meej uas cov Yixayee tau lawd, thiab koj cuab neeg yuav tsis muaj ib tug nyob laus mus ib txhiab ib txhis li. Koj cov neeg uas kuv tseg txojsia nyob tsis muab txiav kom tu ntawm kuv lub thaj los yuav ua rau koj quaj quaj ua qhov muag tho ntshuv thiab ua rau koj lub siab ntxhov hnyo. Koj caj ces yav tom qab sawvdaws pheej yuav tuag rau thaum tseem hluas muaj zog npho. Tej uas yuav raug Hauni thiab Fineha uas yog koj ob tug tub, yog qhov uas ob tug yuav tuag rau ib hnub, mas tej no yuav qhia koj paub tias tej uas hais yog muaj tseeb. Kuv yuav tsa ib tug pov thawj uas lub siab xib rau kuv, uas yuav ua raws li tej uas kuv xav hauv kuv lub siab. Kuv yuav pub nws muaj ib ceg neeg ruaj khov, thiab nws yuav ua num rau ntawm tus uas kuv hliv roj tsa cia lawd lub xubntiag mus ib txhis. Thiab koj caj ces uas tseem tshuav nyob yuav thov tus ntawd ib lub txiag nyiaj lossis ib lub ncuav noj, thiab yuav hais tias, Thov koj tsa kuv ua tej haujlwm pov thawj kuv thiaj tau noj tej zaub mov mentsis thiab.’ ” Eli qhia tus metub Xamuyee ua koom tu Yawmsaub. Ncua sijhawm ntawd Yawmsaub tsis hais lus tuaj ntau pes tsawg, thiab tsis muaj yog toog ntau. Thaum ntawd Eli pw hauv nws lub txaj, nws lub qhov muag tsis tshua pom kev lawm. Vajtswv lub teeb tseem ci, thiab Xamuyee tseem pw hauv Yawmsaub lub tsev ntaub uas muaj Vajtswv lub phij xab. Yawmsaub hu tias, “Xamuyee, Xamuyee.” Mas Xamuyee teb tias, “Kuv nyob ntawm no 'os.” Nws txawm dhia mus hais rau Eli tias, “Kuv nyob no 'os, koj hu kuv.” Tiamsis Eli hais tias, “Kuv tsis tau hu koj. Cia li rov qab mus pw.” Xamuyee txawm rov mus pw. Yawmsaub rov hu dua tias, “Xamuyee.” Mas Xamuyee sawv tsees mus rau ntawm Eli thiab hais tias, “Kuv nyob no 'os, koj hu kuv.” Tiamsis Eli hais tias, “Metub, kuv tsis tau hu koj. Cia li rov qab mus pw.” Xamuyee tsis tau paub dua Yawmsaub thiab Yawmsaub tsis tau hais lus tuaj rau nws dua li. Mas Yawmsaub hu Xamuyee zaum peb. Nws sawv tsees mus rau ntawm Eli thiab hais tias, “Kuv nyob no 'os, koj hu kuv.” Ces Eli thiaj paub tias yog Yawmsaub hu tus metub ntawd. Yog li ntawd Eli thiaj hais rau Xamuyee tias, “Cia li rov qab mus pw. Yog nws rov hu koj, koj cia li teb tias, ‘Yawmsaub, thov koj cia li hais, kuv uas yog koj tus qhev tig ntsej mloog.’ ” Xamuyee txawm rov mus pw hauv nws lub chaw. Yawmsaub los sawv ntsug hu ib yam li uas dhau los hais tias, “Xamuyee, Xamuyee.” Mas Xamuyee hais tias, “Thov koj cia li hais, kuv uas yog koj tus qhev tig ntsej mloog.” Mas Yawmsaub hais rau Xamuyee tias, “Saib maj, kuv yuav ua ib yam tshwm rau hauv cov Yixayee, txhua tus uas tau hnov yuav rhiab ob sab pob ntseg huvsi. Hnub ntawd kuv yuav ua tej uas kuv hais txog Eli caj ces tiav rau Eli, txij thaum pib mus txog thaum kawg. Kuv twb hais rau nws tias kuv yuav txiav txim rau nws caj ces mus ib txhis, rau qhov nws twb paub lawm tias nws ob tug tub ua tej kev txhaum txim uas hais lus tuam mom Vajtswv los nws kuj tsis txwv. Vim li no kuv thiaj cog lus tawv rau Eli caj ces tias Eli caj ces lub txim ntawd txawm yog tua tsiaj xyeem thiab muab qhov txhia chaw xyeem los ntxuav tsis tau mus ib txhis li.” Xamuyee pw mus txog kaj ntug, nws li qheb Yawmsaub lub tsev ntaub tej qhov rooj. Xamuyee ntshai tsis kav hais zaj yog toog ntawd rau Eli. Tiamsis Eli hu Xamuyee los thiab hais tias, “Kuv tus tub Xamuyee 'e.” Xamuyee teb tias, “Kuv nyob no 'os.” Eli nug tias, “Zaj uas Yawmsaub hais rau koj yog dabtsi? Cia li hais rau kuv, tsis txhob zais kiag li. Yog koj zais zaj uas Yawmsaub qhia koj ntawd ib yam dabtsi tsis kam qhia kuv, thov Vajtswv rau txim rau koj thiab rau hnyav dua.” Yog li ntawd Xamuyee thiaj qhia txhua yam rau Eli tsis zais ib yam dabtsi li. Mas Eli hais tias, “Nws yog Yawmsaub, cia nws ua raws li nws pom zoo.” Xamuyee kuj loj hlob thiab Yawmsaub nrog nraim nws thiab tsis pub Xamuyee tej lus poob ib los kiag li. Cov Yixayee tag nrho txij ntua lub moos Daj mus txog lub moos Npe‑awsenpa puavleej paub tias Xamuyee raug muab tsa ua xibhwb cev Yawmsaub lus lawm. Thiab Yawmsaub tseem los tshwm rau ntawm Silau, rau qhov Yawmsaub hais lus tuaj rau Xamuyee qhia nws paub txog Yawmsaub ntawm lub moos Silau. Thiab Xamuyee tej lus nrov mus thoob plaws cov Yixayee sawvdaws. Thaum ntawd cov Yixayee txhij rog mus ua rog rau cov Filixatee. Lawv tsuam yeej rau ntawm Enpee‑exaw, cov Filixatee tsuam yeej rau ntawm Afe. Cov Filixatee npaj tub rog mus ntaus cov Yixayee, mas thaum ua rog heev zuj zus lawm cov Yixayee txawm swb cov Filixatee, lawv raug tua tuag hauv tshav rog kwvlam plaub txhiab leej. Thaum cov tub rog thim rov los rau hauv lub yeej Yixayee cov kev txwj laus hais tias, “Ua cas hnub no Yawmsaub ua rau peb swb cov Filixatee? Cia peb mus coj Yawmsaub lub phij xab sib cog lus hauv lub moos Silau tuaj kom Yawmsaub thiaj los rau hauv peb nruab nrab thiab cawm peb dim hauv peb cov yeeb ncuab txhais tes.” Lawv thiaj txib neeg mus coj Yawmsaub lub phij xab sib cog lus hauv lub moos Silau tuaj, yog Yawmsaub uas muaj hwjchim loj kawg nkaus uas nyob lub zwm txwv saum cov Khelunpee. Hauni thiab Fineha uas yog Eli ob tug tub kuj nrog nraim Vajtswv lub phij xab sib cog lus tuaj. Thaum Yawmsaub lub phij xab sib cog lus tuaj txog hauv lub yeej, cov Yixayee sawvdaws qw nrov nrov ua av ntseeg nkaws. Thaum cov Filixatee hnov lub suab qw nrov li ntawd lawv txawm hais tias, “Lub suab qw nrov nrov hauv cov Henplais lub yeej yog dabtsi?” Thaum lawv paub tias Yawmsaub lub phij xab tuaj rau hauv lub yeej lawm, cov Filixatee kuj ntshai rau qhov lawv hais tias, “Ib tug timtswv tuaj rau hauv lub yeej lawm.” Thiab lawv hais tias, “Peb raug kev txom nyem lauj! Rau qhov yav nram ntej tsis txeev muaj li no. Peb raug txom nyem lauj! Leejtwg yuav pab peb dim hauv tej timtswv loj ntawd lub hwjchim? Tej timtswv ntawd yog cov uas tso txhua yam vij sub vij sw raug cov Iyi hauv tebchaws moj sab qhua ntag. Cov Filixatee 'e, cia li ua siab tuab, cia li ua khov kho li tus txivneej yawg, xwv nej thiaj tsis ua cov Henplais li qhev ib yam li lawv ua nej li qhev. Cia li ua khov kho li tus txivneej yawg mus ntaus rog.” Cov Filixatee thiaj li txeem tuaj ntaus, ces cov Yixayee txawm swb lawm, nyias taus nyias khiav mus tsev. Thaum ntawd cov uas raug tua tuag coob kawg li, Yixayee cov tub rog tuag peb vam leej. Yawmsaub lub phij xab kuj raug luag txeeb tau coj mus lawm thiab Hauni thiab Fineha uas yog Eli ob tug tub kuj raug tua tuag. Tib hnub ntawd muaj ib tug yawg xeem Npeeyamee dhia hauv tshav rog los txog lub moos Silau, thiab nws muab ris tsho dua ntuag tag thiab tsuab av rau saum nws taubhau. Thaum nws los txog ntawd, Eli zaum saum nws lub rooj ntawm ntug kev tos saib kev ntsoov, rau qhov nws lub siab txhawj ntsuav txog Vajtswv lub phij xab. Thaum tus yawg ntawd los rau hauv lub moos thiab tshaj tej xov ntawd rau sawvdaws mloog, tag nrho cov neeg hauv lub moos quaj qw nrov. Thaum Eli hnov lub suab quaj qw ntawd, nws txawm nug tias, “Lub suab nrov ua nqaj ua nqug ntawd yog dabtsi?” Ces tus yawg ntawd txawm maj nroos los qhia rau Eli. Eli hnub nyoog muaj cuaj caum yim xyoo, nws qhov muag tsis pom kev lawm. Tus yawg ntawd hais rau Eli tias, “Kuv yog tus uas khiav hauv tshav rog los. Kuv khiav hauv tshav rog los hnub no ntag.” Eli hais rau nws tias, “Tub 'e, zoo li cas?” Tus uas xa xov ntawd teb tias, “Cov Yixayee khiav ntawm cov Filixatee tag lawm. Cov Yixayee raug tua tuag coob kawg li. Hauni thiab Fineha uas yog koj ob tug tub kuj raug tua tuag thiab Vajtswv lub phij xab kuj raug luag txeeb tau lawm.” Thaum nws hnov txog Vajtswv lub phij xab, Eli txawm ntxeev kiag saum lub rooj uas nws zaum ntawm ib sab rooj loog. Nws caj dab lov ntho ces nws tuag lawm, rau qhov nws laus heev thiab nws lub cev hnyav heev. Nws ua thawj kav cov Yixayee tau plaub caug xyoo lawm. Nws tus nyab Fineha cev hnyav twb yuav txog caij yug menyuam. Thaum nws hnov xov tias luag txeeb tau Vajtswv lub phij xab thiab paub tias nws txiv yawg thiab nws tus txiv tuag lawm, nws txawm mob plab yug menyuam, nws mob heev heev li. Thaum nws twb yuav tuag ntawd, cov pojniam uas tu nws hais rau nws tias, “Koj tsis txhob ntshai, koj twb yug tau ib tug metub lawm.” Tiamsis nws tsis teb, nws tsis quav ntsej li. Nws tis tus metub ntawd lub npe hu ua Ikhanpau, thiab hais tias, “Vajtswv lub hwjchim ci ntsa iab ncaim ntawm cov Yixayee mus lawm,” vim yog Vajtswv lub phij xab raug luag txeeb tau lawm thiab vim nws txiv yawg thiab nws tus txiv tuag lawm. Nws hais tias, “Vajtswv lub hwjchim ci ntsa iab ncaim hauv cov Yixayee mus lawm vim yog Vajtswv lub phij xab raug luag txeeb tau lawm.” Thaum cov Filixatee txeeb tau Vajtswv lub phij xab mus lawv kwv ntawm lub moos Epee‑exaw mus txog lub moos Asadau. Cov Filixatee coj Vajtswv lub phij xab mus rau hauv lub tsev teev dab Dakoo, muab txawb rau ntawm tus dab mlom Dakoo ib sab. Hnub tom qab thaum sawv ntxov cov neeg hauv Asadau pom ua ciav tus dab mlom Dakoo ntog rau hauv pem teb khwb ntawm Yawmsaub lub phij xab sab xubntiag. Lawv txawm muab tus dab mlom Dakoo tsa txawb rau lub qub chaw. Hnub tom qab thaum sawv ntxov lawv txawm pom ua ciav tus dab mlom Dakoo ntog rau hauv pem teb khwb ntawm Yawmsaub lub phij xab sab xubntiag, lub taubhau thiab ob txhais tes kuj lov dhia rau ntawm taw rooj, tshuav tus dab mlom Dakoo lub cev xwb. Vim li no dab Dakoo cov pov thawj thiab txhua tus uas nkag mus rau hauv lub tsev teev dab Dakoo thiaj tsis tsuj lub tsev teev dab Dakoo lub taw rooj hauv lub moos Asadau los txog niaj hnub nimno. Yawmsaub txhais tes ua hnyav heev rau cov neeg hauv Asadau. Nws ua rau lawv ntshai kawg thiab nplawm lawv ua rau lawv mob faj, tsis hais cov uas nyob hauv lub moos Asadau thiab cov uas nyob ib ncig. Thaum cov neeg hauv Asadau pom muaj li ntawd lawv txawm hais tias, “Tsis txhob cia cov Yixayee tus Vajtswv lub phij xab nyob hauv peb, rau qhov nws txhais tes ua hnyav heev rau peb thiab peb tus dab Dakoo.” Lawv thiaj tso neeg mus hu Filixatee cov thawj sawvdaws tuaj ua ke thiab hais tias, “Peb yuav ua li cas rau cov Yixayee tus Vajtswv lub phij xab?” Cov thawj teb tias, “Cia li coj cov Yixayee tus Vajtswv lub phij xab mus rau lub moos Ka.” Lawv thiaj coj Yixayee tus Vajtswv lub phij xab mus rau qhov ntawd. Tiamsis thaum lawv coj mus rau lub moos ntawd lawd, Yawmsaub txhais tes kuj tawm tsam lub moos ntawd ua rau lub moos ntawd ras zom zaws. Nws nplawm lub moos ntawd tag nrho tej laus tej hluas huvsi, ua rau lawv txhua tus mob faj. Lawv thiaj li xa Vajtswv lub phij xab mus rau lub moos Ekhoo. Thaum Vajtswv lub phij xab tuaj txog lub moos Ekhoo, cov neeg hauv Ekhoo qw hais tias, “Lawv coj cov Yixayee tus Vajtswv lub phij xab tuaj rau peb xwv thiaj tua tau peb thiab peb cov neeg pov tseg.” Vim li no lawv thiaj tso neeg mus hu tag nrho Filixatee cov thawj huvsi tuaj ua ke thiab hais tias, “Cia li xa cov Yixayee tus Vajtswv lub phij xab tawm mus. Cia lub phij xab ntawd rov qab mus rau nws lub qub chaw xwv lub phij xab ntawd thiaj tsis tua peb thiab peb cov neeg.” Thoob plaws lub moos ras ceeb zom zaws vim ntshai tuag. Thiab Vajtswv txhais tes kuj ua hnyav heev rau lawv qhov ntawd. Cov uas tsis tuag kuj mob faj, thiab lub moos ntawd tej suab quaj kuj nrov nto ntuj. Yawmsaub lub phij xab nyob hauv cov Filixatee tebchaws tau xya lub hli. Cov Filixatee txawm hu cov pov thawj thiab cov txiv neeb txiv yaig tuaj hais tias, “Peb yuav ua li cas rau Yawmsaub lub phij xab? Thov nrog peb xav saib peb yuav muab dabtsi xa nrog Yawmsaub lub phij xab mus rau lub qub chaw.” Lawv teb tias, “Yog nej yuav xa cov Yixayee tus Vajtswv lub phij xab mus, tsis txhob xa dawb dawb do do xwb, txawm li cas los yuav tsum xa tej uas ntxuav kev txhaum thiab. Mas nej tej mob thiaj li zoo thiab nej thiaj li paub tias yog tim li cas Vajtswv tsis tshem nws txhais tes saum nej mus.” Cov pejxeem hais tias, “Yuav muab dabtsi xa mus rau nws ua kevcai ntxuav kev txhaum?” Lawv teb tias, “Muab kub ua tsib lub faj kub thiab ua tsib tug tsuag kub, npaum li Filixatee cov thawj, rau qhov tib yam mob ntawd kis rau nej thiab nej cov thawj. Nej yuav tsum ua tej lub yam ntxwv zoo li cov faj uas nej mob thiab zoo li cov tsuag uas txov nej lub tebchaws piam tag, thiab ua rau cov Yixayee tus Vajtswv tau koob meej. Tej zaum nws yuav tshem nws txhais tes kom sib saum nej thiab nej tej dab thiab nej lub tebchaws. Ua cas nej yuav ua nej lub siab tawv yam nkaus li cov Iyi thiab Falau tau ua lawv lub siab tawv? Thaum Vajtswv ua tej xwm txheej hnyav los tawb lawv lawd, lawv li tso nws haiv neeg mus mas cov Yixayee thiaj tau tawm mus los tsis yog? Nimno cia li npaj ib lub tsheb nyuj tshiab tshiab los thiab muab ib nkawg maum nyuj coj menyuam uas tsis tau hai dua tsheb nruab rau lub tsheb ntawd, thiab muab ob tug menyuam cais ntawm leej niam coj mus tsev. Cia li muab Yawmsaub lub phij xab tso rau saum lub tsheb nyuj, thiab muab tej yam ntxwv uas nej muab kub ua ntxuav kev txhaum ntawd ntim rau dua ib lub phij xab muab txawb rau ntawm Yawmsaub lub phij xab ib sab, es tso nkawm nyuj hai lub tsheb mus. Thiab ua tib zoo saib, yog taug kev mus rau nws lub tebchaws mus rau lub moos Npeseme, yeej yog Yawmsaub ua tej xwm txheej phem loj no los raug peb ntag. Yog nyuj tsis mus li no, peb thiaj paub tias tsis yog Yawmsaub txhais tes nplawm peb, yeej yog tej khuab uas cia li tshwm los raug peb xwb.” Cov pejxeem kuj ua raws li ntawd, coj ib nkawg maum nyuj los nruab lub tsheb thiab muab ob tug menyuam kaw cia hauv tsev. Lawv muab Yawmsaub lub phij xab thiab lub phij xab uas rau cov tsuag kub thiab tej lub yam ntxwv zoo li cov faj uas lawv mob ntawd tso rau saum lub tsheb nyuj. Ob tug maum nyuj kuj taug kev ncaj nraim mus rau lub moos Npeseme, taug txoj niag kev nqov qas qaws tsis mus rau sab xis lossis sab laug li. Filixatee cov thawj kuj raws qab mus txog ntua lub moos Npeseme ciam teb. Cov neeg hauv lub moos Npeseme tabtom hlais mog hauv lub vuas hav. Thaum lawv tsa muag ntsia pom lub phij xab lawv kuj zoo siab xyiv fab heev. Lub tsheb nyuj txawm los rau hauv Yausua uas yog neeg Npeseme daim teb thiab nres qhov ntawd. Muaj ib lub pob zeb loj loj nyob qhov ntawd, lawv txawm muab lub tsheb nyuj phua ua taws rauv muab ob tug nyuj hlawv xyeem rau Yawmsaub. Cov Levi kuj txo Yawmsaub lub phij xab thiab lub phij xab nyob ib sab uas muaj tej yam ntxwv kub ntawd los txawb rau saum lub pob zeb loj ntawd. Mas cov neeg hauv Npeseme thiaj ua kevcai hlawv xyeem thiab tua tsiaj xyeem rau Yawmsaub hnub ntawd. Thaum Filixatee tsib tug thawj pom li ntawd lawd, hnub ntawd lawv txawm rov qab mus rau lub moos Ekhoo. No yog cov faj kub uas cov Filixatee xa mus xyeem rau Yawmsaub ntxuav kev txhaum, ib lub rau lub moos Asadau, ib lub rau lub moos Kaxa, ib lub rau lub moos Akheloo, ib lub rau lub moos Ka thiab ib lub rau lub moos Ekhoo. Cov tsuag kub kuj npaum li cov Filixatee tej moos uas tsib tug thawj ntawd kav, yog tej moos muaj ntsa loog thiab tej zej zog uas nyob ib ncig. Lub pob zeb loj uas lawv muab Yawmsaub lub phij xab txawb rau saum kuj ua timkhawv los txog niaj hnub nimno rau hauv Yausua uas yog neeg Npeseme daim teb. Yawmsaub tua cov neeg hauv Npeseme qee leej vim lawv xauj rau hauv Yawmsaub lub phij xab. Nws tua xya caum leej mas cov pejxeem quaj quaj ntsuag vim Yawmsaub tua cov neeg coob heev. Cov neeg hauv Npeseme txawm hais tias, “Leejtwg sawv taus rau ntawm Yawmsaub uas yog Vajtswv tus dawb huv lub xubntiag? Peb yuav xa nws mus rau qhovtwg kom nyob nrug deb ntawm peb?” Lawv thiaj xa xov mus rau cov neeg hauv lub moos Khiliya Ye‑ali hais tias, “Cov Filixatee twb thim Yawmsaub lub phij xab los lawm. Thov nej tuaj coj lub phij xab mus nrog nej nyob.” Cov neeg hauv Khiliya Ye‑ali thiaj tuaj coj Yawmsaub lub phij xab mus rau hauv Anpinada lub tsev nyob saum lub pov roob. Lawv kuj muab Ele‑axa uas yog nws tus tub tsa ua tus uas dawb huv los saib xyuas Yawmsaub lub phij xab. Suav txij hnub uas Yawmsaub lub phij xab nyob hauv Khiliya Ye‑ali kuj yog sijhawm ntev txog nees nkaum xyoo. Mas cov Yixayee sawvdaws quaj nrhiav Yawmsaub. Mas Xamuyee hais rau cov Yixayee sawvdaws tias, “Yog nej rov los cuag Yawmsaub kawg siab kawg ntsws, mas cia li muab lwm haiv neeg tej dab thiab tej dab mlom Athalau pov tseg ntawm nej mus, muab lub siab xib nkaus rau Yawmsaub thiab ua koom tu nws tib leeg xwb, nws thiaj yuav cawm nej dim hauv cov Filixatee txhais tes.” Cov Yixayee thiaj muab tej dab Npa‑as thiab tej dab Athalau pov tseg thiab ua koom tu Yawmsaub tib leeg xwb. Mas Xamuyee hais tias, “Cia cov Yixayee sawvdaws tuaj txoos ua ke rau ntawm lub moos Mixapa es kuv yuav thov Yawmsaub pab nej.” Lawv thiaj tuaj txoos ua ke rau ntawm Mixapa, thiab nqa dej los hliv xyeem rau ntawm Yawmsaub xubntiag thiab hnub ntawd lawv yoo mov thiab hais tias, “Peb tau ua txhaum muaj txim rau Yawmsaub lawm.” Mas Xamuyee nyob hauv lub moos Mixapa ua tus thawj kav cov Yixayee. Thaum cov Filixatee hnov tias cov Yixayee tuaj txoos ua ke hauv lub moos Mixapa, Filixatee cov thawj txawm tuaj ua rog rau cov Yixayee. Thaum cov Yixayee tau hnov li no lawv kuj ntshai cov Filixatee heev. Cov Yixayee thiaj hais rau Xamuyee tias, “Tsis txhob tseg qhov uas taij thov Yawmsaub uas yog peb tus Vajtswv rau peb xwv nws thiaj cawm peb dim hauv cov Filixatee txhais tes.” Xamuyee txawm muab ib tug menyuam yaj uas tseem noj mis los xyeem ua kevcai hlawv kheej xyeem rau Yawmsaub. Thiab Xamuyee taij thov Yawmsaub pab cov Yixayee, mas Yawmsaub kuj teb nws tej lus thov. Thaum Xamuyee tabtom ua kevcai hlawv xyeem ntawd cov Filixatee txawm tuaj ze ze yuav ua rog rau cov Yixayee. Tiamsis hnub ntawd Yawmsaub ua xob quaj nrov heev kawg tawm tsam cov Filixatee ua rau lawv ntshai yoob tag, lawv thiaj swb cov Yixayee lawm. Cov Yixayee thiaj tawm hauv Mixapa caum tua cov Filixatee mus dhau plaws lub moos Npekha. Mas Xamuyee muab ib lub pob zeb teeb rau ntawm lub moos Mixapa thiab lub moos See ntu nruab nrab, thiab tis npe hu ua Enpee‑exaw, rau qhov nws hais tias, “Yawmsaub tau pab peb los txog nimno.” Yog li no cov Filixatee thiaj swb tsis rov tuaj rau hauv Yixayee tebchaws dua li lawm. Yawmsaub txhais tes tawm tsam cov Filixatee mus tag Xamuyee sim neej. Tej moos uas cov Filixatee txeeb ntawm cov Yixayee lawm, kuj muab thim rau cov Yixayee txij ntua lub moos Ekhoo txog lub moos Ka. Cov Yixayee thiaj txeeb tau lawv tej tebchaws ntawm cov Filixatee txhais tes rov los. Thaum ntawd cov Yixayee thiab cov Amaulai kuj muaj kev thaj yeeb. Xamuyee ua thawj kav cov Yixayee mus tag nws sim neej. Nws niaj xyoo mus ncig lub tebchaws thoob plaws, mus txog lub moos Npe‑ee, Kilakas thiab Mixapa. Thiab nws tu cov Yixayee tej plaub hauv tej moos ntawd. Ces nws li rov qab mus rau hauv lub moos Lama rau qhov nws lub tsev nyob hauv lub moos ntawd. Nws kuj tu cov Yixayee tej plaub qhov ntawd thiab nws ua ib lub thaj xyeem rau Yawmsaub qhov ntawd. Thaum Xamuyee laus lawd nws tsa nws tej tub ua thawj kav cov Yixayee. Nws tus tub hlob hu ua Yau‑ee, tus tub yau hu ua Anpiya. Ob tug nyob hauv lub moos Npe‑awsenpa ua thawj kav. Tiamsis nws ob tug tub tsis ua lub neej raws li nws, ob tug lub siab qaug lais rau nyiaj txiag xwb. Ob tug yuav tej nyiaj xiab thiab tu plaub tsis ncaj. Mas Yixayee cov kev txwj laus sawvdaws ua ke tuaj cuag Xamuyee hauv lub moos Lama, thiab hais rau nws tias, “Sim xav saib, koj laus lawm, koj ob tug tub tsis taug koj txojkev. Nimno thov koj tsa ib tug vajntxwv kav peb ib yam li ib tsoom tebchaws sawvdaws.” Thaum lawv hais tias, “Thov tsa vajntxwv kav peb,” kuj ua rau Xamuyee tsis txaus siab. Xamuyee thiaj thov ua nug rau Yawmsaub, mas Yawmsaub hais rau Xamuyee tias, “Cia li mloog txhua yam uas cov pejxeem thov koj ntawd, rau qhov tsis yog lawv tso koj tseg, yog lawv tso kuv tseg tsis yuav kuv ua vajntxwv kav lawv. Tej uas lawv ua huvsi rau kuv txij hnub uas kuv coj lawv tawm hauv Iyi tebchaws los txog niaj hnub nimno, yog lawv tso kuv tseg mus ua koom tu luag tej dab, mas lawv kuj ua ib yam li ntawd rau koj. Vim li no cia li mloog lawv lub suab thov. Koj tsuas muaj uas qhuab ntuas lawv xwb thiab qhia lawv paub tias vajntxwv yuav muaj kov txwv kav lawv li cas.” Xamuyee thiaj muab Yawmsaub tej lus huvsi hais rau cov pejxeem uas thov kom nws tsa vajntxwv rau lawv. Nws hais tias, “No yog vajntxwv txojkev uas yuav kav nej. Nws yuav sau nej cov tub thiab tsa ua tub rog tsav nws tsheb ua rog thiab ua nws cov tub rog caij nees thiab dhia ua nws lub tsheb ua rog ntej. Nws yuav tsa lawv ua tus kav ib txhiab leej kav tsib caug leej, thiab yuav kom ib txhia laij nws tej teb thiab hlais nws tej qoob thiab ua nws tej cuab yeej ua rog thiab tej cuab yeej siv hauv nws tej tsheb ua rog. Nws yuav coj nej tej ntxhais mus tov tshuaj tsw qab thiab ua zaub mov thiab ci ncuav. Nws yuav muab nej tej teb nej tej vaj txiv hmab thiab tej vaj txiv aulib uas zoo kawg pub rau nws cov tub teg tub taws. Nws yuav sau nej tej qoob loo tej txiv hmab ib feem kaum pub rau nws cov thawj rog thiab nws cov tub teg tub taws. Nws yuav sau nej tej tub qhe nkauj qhev tej tsiaj txhu tej nees luav uas zoo coj mus ua nws li haujlwm. Nws yuav sau nej tej yaj tej tshis ib tug hauv kaum thiab nej yuav ua nws li qhev. Mas hnub ntawd nej yuav quaj thov kev pab vim yog tim nej tus vajntxwv uas nej xaiv los kav nej, tiamsis hnub ntawd Yawmsaub yuav tsis teb nej.” Tiamsis cov pejxeem tsis quav ntsej mloog Xamuyee tej lus, lawv hais tias, “Peb tsis mloog koj hais, peb yeej xav muaj vajntxwv kav peb xwb, kom peb thiaj zoo li ib tsoom tebchaws sawvdaws thiab peb tus vajntxwv yuav kav peb thiab coj peb hauv ntej mus ntaus rog.” Thaum Xamuyee hnov cov pejxeem tej lus huvsi lawm, nws kuj coj mus hais rau Yawmsaub. Ces Yawmsaub hais rau Xamuyee tias, “Cia li mloog tej lus uas lawv hais es tsa ib tug vajntxwv kav lawv.” Ces Xamuyee txawm hais rau cov Yixayee kom txhua tus cia li rov qab mus rau nyias vaj nyias tsev. Muaj ib tug yawg xeem Npeeyamee hu ua Khij, yog ib tug nplua nuj. Nws txiv yog Anpi‑ee, nws yawg yog Xelau nws yawg koob yog Npekhaula nws yawg suab yog Afiya, yog xeem Npeeyamee. Nws muaj ib tug tub hu ua Xa‑u, zoo nraug ntxiag hlob tiav txiv lawm, tsis muaj ib tug txivneej hauv cov Yixayee yuav zoo nraug dhau nws. Nws lub taubhau siab dhau plaws ib tsoom sawvdaws. Mas Khij uas yog Xa‑u txiv tej nees luav txawm ploj lawm, Khij thiaj hais rau Xa‑u tias, “Koj cia li coj ib tug tub qhe nrog koj mus nrhiav cov nees luav.” Ob tug txawm hla mus pem toj siab Efa‑i tebchaws thiab hla mus rau Salisa tebchaws, tiamsis ob tug nrhiav tsis pom cov nees luav. Ob tug txawm mus nrhiav hauv Sa‑ali tebchaws, tiamsis cov nees luav tsis nyob qhov ntawd thiab. Ob tug hla mus rau hauv Npeeyamee tebchaws kuj nrhiav tsis tau cov nees luav thiab. Thaum ob tug los txog hauv Xub tebchaws, Xa‑u txawm hais rau tus tub qhe uas nrog nws ua ke tias, “Wb cia li rov qab mus, ntshai tsam txiv tsis txhawj txog cov nees luav lawm nws yuav txhawj txog wb xwb.” Tiamsis tus tub qhe hais rau Xa‑u tias, “Tos ib pliag, muaj Vajtswv ib tug neeg nyob hauv lub moos no. Nws yog ib tug uas sawvdaws hwm heev, nws hais li cas lawm yeej muaj raws li nws hais. Cia wb mus rau hauv lub moos ntawd, tej zaum nws yuav qhia rau wb paub saib wb yuav mus txojkev twg.” Xa‑u txawm hais rau nws tus qhev tias, “Yog wb yuav mus wb yuav coj dabtsi mus pub rau tus yawg ntawd? Tej ncuav hauv wb tej hnab kuj tag lawm, wb tsis muaj ib yam tshav ntuj uas yuav coj mus pub rau Vajtswv tus neeg ntawd lawm. Wb ob leeg puas muaj dabtsi?” Tus tub qhe teb Xa‑u tias, “Kuv muaj ib lub nyiaj hnyav txog ib feem plaub hauv ib sekhee, kuv yuav muab rau Vajtswv tus neeg ntawd xwv nws thiaj qhia kev rau wb mus.” (Yav thaum ub yog cov Yixayee leejtwg mus ua nug rau Vajtswv, nws hais tias, “Cia peb mus cuag tus uas hais tej lus uas pom tom hauv ntej,” rau qhov tus uas niaj hnub nimno hu ua tus uas cev Vajtswv lus mas yav thaum ub hu ua tus uas hais pom tom hauv ntej.) Ces Xa‑u txawm hais rau nws tus tub qhe tias, “Koj hais yog qhov zoo, wb cia li mus.” Ob tug thiaj mus rau hauv lub moos uas Vajtswv tus neeg nyob. Thaum ob tug nce toj mus rau hauv lub moos ntawd, ob tug ntsib ib co ntxhais hluas tuaj ntaus dej, ces txawm nug lawv tias, “Tus uas hais pom tom hauv ntej nyob ntawm no los tsis nyob?” Lawv teb tias, “Nyob thiab. Saib maj, nws nyuam qhuav ua neb ntej mus dhau lawm. Cia li maj mus. Puam tab nws nyuam qhuav tuaj rau hauv lub moos, vim yog hnub no cov pejxeem yuav ua kevcai xyeem tsiaj rau saum lub chaw siab. Thaum neb mus rau hauv lub moos neb yuav ntsib nws ua ntej uas nws tsis tau nce mus noj mov ntawm lub chaw siab. Cov pejxeem yuav tsis noj mov mus txog thaum nws tuaj txog tso vim yog nws yuav tsum foom koob hmoov rau tej uas muab xyeem tso, mas cov qhua uas hu tuaj li noj mov. Cia li mus, neb yuav ntsib nws tamsim.” Ob tug txawm mus rau hauv lub moos. Thaum ob tug nkag mus mas ob tug pom Xamuyee tabtom tawm tuaj yuav mus rau lub chaw siab ntawd. Hnub uas Xa‑u tsis tau tuaj txog, Yawmsaub twb qhia rau Xamuyee tias, “Tagkis kwvlam lub sijhawm no kuv yuav xa ib tug txivneej uas nyob hauv Npeeyamee tebchaws tuaj. Koj yuav tsa nws ua thawj kav kuv haiv neeg Yixayee. Nws yuav cawm kuv haiv neeg dim hauv cov Filixatee txhais tes, rau qhov kuv twb pom kuv haiv neeg txojkev txom nyem lawm, lawv lub suab quaj thov twb tuaj txog kuv lawm.” Thaum Xamuyee pom dheev Xa‑u, Yawmsaub hais rau Xamuyee tias, “No yog tus txivneej uas twb hais rau koj lawd. Nws yog tus uas yuav kav kuv haiv neeg.” Ces Xa‑u txawm tuaj cuag Xamuyee ntawm rooj loog thiab hais tias, “Thov qhia rau kuv saib tus uas hais pom tom hauv ntej lub tsev nyob qhovtwg.” Xamuyee teb Xa‑u tias, “Kuv yog tus uas hais pom tom hauv ntej ntag. Cia li ua kuv ntej mus rau ntawm lub chaw siab rau qhov hnub no neb yuav nrog kuv noj mov ua ke, mas tagkis sawv ntxov kuv li kheev koj mus thiab kuv yuav qhia txhua yam uas koj nyuaj siab rau koj. Cov nees luav uas ploj tau peb hnub lawd koj tsis txhob txhawj vim yog lawv twb nrhiav tau lawm. Cov Yixayee sawvdaws ntshaw leejtwg? Tsis yog koj thiab koj txiv tsev neeg sawvdaws lov?” Xa‑u teb tias, “Kuv tsis yog xeem Npeeyamee lov? Yog lub xeem uas me dua cov Yixayee txhua xeem huvsi, thiab kuv tsev neeg kuj me dua txhua tsev neeg hauv xeem Npeeyamee. Ua cas koj yuav hais li kod rau kuv?” Ces Xamuyee txawm coj Xa‑u thiab nws tus tub qhe mus rau hauv chav tsev loj thiab kom nyob rau ntawm hau rooj uas npaj rau cov qhua nyob, muaj kwvlam peb caug leej. Xamuyee hais rau tus uas ua zaub tias, “Cia li nqa tej txhais nqaij uas kuv twb muab rau koj kom koj tshwj rau ib qho lawd los.” Tus uas ua zaub thiaj muab tej nqaij ceg qab thiab tej noob nqaig los rau rau ntawm Xa‑u xubntiag. Mas Xamuyee hais tias, “Saib maj, tej uas tshwj cia lawd muab rau rau ntawm koj xubntiag. Koj cia li noj vim yog muab khaws cia rau koj txog lub sijhawm lawm, kuv twb hu tej qhua tuaj tag lawm.” Hnub ntawd Xa‑u thiaj li nrog Xamuyee noj mov ua ke. Thaum lawv nqes ntawm lub chaw siab los rau hauv lub moos, Xamuyee nrog Xa‑u hais lus saum txheej tsev las tshav. Ob tug sawv ntxov thaum pom kev lawd, mas Xamuyee hu Xa‑u uas nyob saum txheej tsev las tshav tias, “Cia li sawv los es kuv yuav xa koj mus.” Xa‑u thiaj sawv los nrog Xamuyee tawm rau tom txojkev. Thaum lawv tabtom taug kev los txog ntawm ntug moos, Xamuyee txawm hais rau Xa‑u tias, “Cia li hais kom koj tus qhev ua ntej mus. Thaum tus qhev mus dhau lawd, koj cia li nres ntawm no ib pliag, xwv kuv thiaj qhia tau Vajtswv tej lus rau koj paub.” Ces Xamuyee txawm muab lub lam hwj roj aulib hliv rau saum Xa‑u taubhau thiab nwj nws thiab hais tias, “Yawmsaub tsa koj ua thawj kav nws haiv neeg Yixayee. [Koj yuav ua vajntxwv kav Yawmsaub haiv neeg thiab koj yuav cawm lawv dim hauv tej yeeb ncuab uas nyob ib ncig txhais tes. No yuav ua ib yam txujci uas Yawmsaub tsa koj ua thawj kav nws qub txeeg qub teg.] Hnub no thaum koj ncaim ntawm kuv mus lawd, koj yuav ntsib ob tug yawg ntawm Lachee lub ntxa hauv Npeeyamee tebchaws ntawm lub moos Xeexa, mas ob tug yuav hais rau koj tias, ‘Cov nees luav uas koj mus nrhiav mas twb nrhiav tau lawm. Nimno koj txiv tsis txhawj txog cov nees luav lawm, nws txhawj txog koj heev hais tias, “Kuv yuav nrhiav kuv tus tub li cas?” ’ Dhau qhov ntawd koj yuav mus txog tus ntoo xeeb ntawm Thanpau. Mas muaj peb tug txivneej tabtom mus pe hawm Vajtswv rau ntawm Npe‑ee yuav ntsib koj qhov ntawd, ib tug puag peb tug menyuam tshis thiab ib tug nqa peb lub ncuav thiab ib tug nqa ib hnab tawv cawv txiv hmab. Lawv yuav hu koj thiab muab ob lub ncuav rau koj, mas koj yuav txais ntawm lawv txhais tes. Dhau ntawd koj yuav los txog ntawm Kinpe‑a Elauhi uas muaj ib pab tub rog Filixatee nyob hauv. Thaum koj mus rau hauv lub moos ntawd koj yuav ntsib ib pab xibhwb cev Vajtswv lus nqes ntawm lub chaw siab los, lawv tabtom siv zog cev lus, muaj neeg ntaus nkauj nog ncas loj nkauj nog ncas me npuaj nruas tshuab raj ua lawv ntej tuaj. Mas Yawmsaub tus Ntsuj Plig yuav los kav tag nrho koj ces koj yuav nrog lawv cov ntawd siv zog cev Vajtswv lus ua ke thiab koj yuav hloov dua tsis yog tus qub lawm. Thaum tej txujci phimhwj no tshwm rau koj lawd, koj cia li ua txhua yam uas koj txhais tes ua tau, rau qhov Vajtswv nrog nraim koj. Koj cia li ua kuv ntej mus rau nram lub moos Kilakas. Mas kuv yuav los ntsib koj thiab kuv yuav muab tsiaj xyeem ua kevcai hlawv huvsi xyeem thiab ua kevcai xyeem sib raug zoo. Koj yuav nyob qhov ntawd tos xya hnub txog thaum kuv tuaj ntsib koj thiab kuv qhia koj paub tias koj yuav tsum ua dabtsi.” Thaum Xa‑u tig hlo ntawm Xamuyee mus lawd, Vajtswv pub dua ib lub siab rau nws, thiab tej txujci phimhwj no huvsi kuj tshwm los rau hnub ntawd. Thaum ob tug los txog Kinpe‑a, ua ciav muaj ib pab xibhwb cev Vajtswv lus ntsib Xa‑u. Mas Vajtswv tus Ntsuj Plig los kav tag nrho nws ces nws txawm nrog lawv cov ntawd ua ke cev Vajtswv lus. Thaum cov neeg uas paub nws pom nws nrog cov xibhwb ntawd cev Vajtswv lus ua ke, cov neeg ntawd txawm sib tham hais tias, “Muaj dabtsi tshwm rau Khij tus tub? Xa‑u ua ib tug xibhwb cev Vajtswv lus lawm thiab lov?” Muaj ib tug yawg uas nyob qhov ntawd teb tias, “Lawv cov uas cev Vajtswv lus ntawd txiv yog leejtwg?” Yog li no thiaj muaj paj lug hais tias, “Xa‑u yog ib tug cev Vajtswv lus lawm thiab lov?” Thaum Xa‑u kub siab lug cev Vajtswv lus tag lawd nws txawm los rau ntawm lub chaw siab. Xa‑u tus yawg laus nug Xa‑u thiab nws tus tub qhe tias, “Neb mus dabtsi los?” Xa‑u teb tias, “Wb mus nrhiav cov nees luav, thiab thaum wb pom tias wb nrhiav tsis tau nees luav lawm, wb txawm mus cuag Xamuyee.” Xa‑u tus yawg laus hais tias, “Xamuyee hais li cas rau neb, thov piav rau kuv mloog saib.” Xa‑u hais rau nws tus yawg laus tias, “Xamuyee hais meej rau wb tias twb nrhiav tau cov nees luav lawm.” Tiamsis tej uas Xamuyee hais txog kav lub tebchaws, nws tsis piav kiag li. Xamuyee hu cov Yixayee tuaj txoos ua ke rau hauv Mixapa rau ntawm Yawmsaub xubntiag. Mas nws hais rau cov Yixayee tias, “Yawmsaub uas yog Yixayee tus Vajtswv hais li no tias, ‘Kuv coj cov Yixayee tawm hauv Iyi tebchaws los thiab cawm lawv dim hauv cov Iyi txhais tes thiab dim hauv txhua lub tebchaws uas quab yuam lawv.’ Tiamsis hnub no nej tso nej tus Vajtswv tseg, yog tus uas cawm nej dim hauv nej txojkev txom nyem lwj siab thiab nej tej kev ceeblaj huvsi. Los nej hais tias, ‘Peb tsis mloog koj hais, thov koj tsa ib tug vajntxwv kav peb.’ Vim li no nimno nej cia li los rau ntawm Yawmsaub xubntiag los zuj zus ua ib xeem thiab ib cum.” Mas Xamuyee kuj coj txhua xeem los ze, mas rho ntawv tau xeem Npeeyamee. Nws thiaj coj xeem Npeeyamee los zuj zus ua ib cum ib cum mas rho tau Mati cum. Thaum kawg rho Khij tus tub Xa‑u. Tiamsis lawv nrhiav Xa‑u mas nrhiav tsis pom. Lawv thiaj rov nug Yawmsaub tias, “Tus yawg ntawd tuaj ntawm no los tsis tuaj?” Yawmsaub teb tias, “Saib maj, nws tsiv nraim hauv tej pawg nra uas thauj tuaj.” Lawv thiaj dhia mus coj nws qhov ntawd los. Thaum nws los sawv hauv nruab nrab cov pejxeem nws lub taubhau siab dhau plaws lawv txhua tus huvsi. Xamuyee thiaj hais rau cov pejxeem sawvdaws tias, “Nej pom tus uas Yawmsaub xaiv lawm lov? Tag nrho cov neeg tsis muaj ib tug zoo li nws.” Ces cov pejxeem sawvdaws qw nrov nrov hais tias, “Thov kom vajntxwv muaj txoj siav loj siav ntev.” Mas Xamuyee qhia rau cov pejxeem paub txog vajntxwv tes haujlwm thiab tej uas vajntxwv muaj cai ua, thiab muab sau cia rau hauv ntawv thiab muab khaws cia rau ntawm Yawmsaub xubntiag. Ces Xamuyee txawm hais kom cov pejxeem sawvdaws nyias rov mus nyias tsev. Xa‑u kuj rov qab mus rau nws vaj tse hauv Kinpe‑a, thiab muaj cov neeg siab loj siab tuab uas Vajtswv ua haujlwm rau hauv lub siab lawd kuj nrog nws mus. Tiamsis muaj cov neeg tsis tsheej haj qee leej hais tias, “Tus yawg no yuav cawm peb li cas?” Ces lawv txawm saib tsis taus Xa‑u thiab tsis coj tshav ntuj tuaj pub rau nws. Tiamsis Xa‑u kuj nyob twjywm tsis hais li cas. Naha uas yog neeg Asmoo txhij rog tuaj vij ntaus lub moos Yanpe Kile‑a. Cov neeg hauv lub moos Yanpe sawvdaws hais rau Naha tias, “Thov koj nrog peb sib cog lus mas peb yuav zwm rau koj.” Tiamsis Naha uas yog neeg Asmoo hais rau lawv tias, “Tsuav yog ua li no kuv thiaj kam nrog nej sib cog lus xwb. Kuv yuav kaus nej txhua tus sab qhov muag xis pov tseg thiaj ua rau cov Yixayee poob ntsej muag.” Cov kev txwj laus hauv lub moos Yanpe hais rau nws tias, “Thov zam sijhawm rau peb xya hnub xwv peb thiaj tso tub xa xov mus hais thoob plaws Yixayee tebchaws. Yog tsis muaj leejtwg cawm tau peb, peb yuav muab peb cob rau hauv koj txhais tes.” Thaum cov tub xa xov tuaj txog Kinpe‑a uas yog Xa‑u lub moos, lawv piav tej xwm ntawd rau cov pejxeem hnov, mas cov pejxeem sawvdaws kuj quaj nrov nrov. Thaum Xa‑u raws nyuj tom tshav zaub los, Xa‑u hais tias, “Cov pejxeem raug dabtsi es lawv quaj?” Lawv thiaj piav rau nws paub txog tej xov uas cov neeg hauv Yanpe tuaj hais. Thaum Xa‑u hnov tej lus ntawd lawd Vajtswv tus Ntsuj Plig los kav tag nrho Xa‑u, nws thiaj npau taws ceev. Nws muab kiag ib nkawg nyuj los txiav ua tej ywb yav muab rau cov tub xa xov xa mus thoob plaws Yixayee tebchaws hais tias, “Yog leejtwg tsis tuaj nrog Xa‑u thiab Xamuyee mus mas nws tej nyuj yuav raug li no.” Mas cov pejxeem sawvdaws kuj ntshai Yawmsaub heev, lawv thiaj tuaj ua kiag ib nqag. Thaum Xa‑u txhij lawv tuaj ua ke ntawm Npexe, suav Yixayee cov txivneej muaj 300,000 leej thiab suav Yuda cov txivneej muaj 30,000 leej. Lawv thiaj hais rau cov tub xa xov uas tuaj ntawd tias, “Nej cia li hais li no rau cov neeg hauv Yanpe Kile‑a tias, ‘Tagkis thaum tshav ntuj kub nej yuav txais kev cawm dim.’ ” Thaum cov tub xa xov rov los hais rau cov hauv Yanpe lawv kuj zoo siab xyiv fab. Yog li no cov hauv Yanpe hais rau Naha tias, “Tagkis peb yuav muab peb cob rau koj, koj cia li ua rau peb raws li koj pom zoo.” Tagkis tom qab Xa‑u muab nws cov neeg faib ua peb pab. Thaum kaj ntug txoog lawv txeem rau hauv cov Asmoo lub yeej tua cov Asmoo mus txog tav su. Cov uas dim tsis tuag kuj khiav ua sab ua sua tsis tshuav ob leeg nyob ua ke li. Ces cov pejxeem txawm hais rau Xamuyee tias, “Cov uas hais tias, ‘Xa‑u yuav kav peb lov?’ yog leejtwg? Cia li coj cov neeg ntawd tawm los, peb yuav muab tua pov tseg.” Tiamsis Xa‑u hais tias, “Hnub no tsis txhob cia leejtwg raug tua kiag li, rau qhov hnub no Yawmsaub tau cawm cov Yixayee dim.” Xamuyee thiaj hais rau cov pejxeem tias, “Peb cia li mus rau Kilakas thiab tsa kom muaj vajntxwv kav tebchaws dua ib zaug.” Cov pejxeem sawvdaws thiaj li mus rau lub moos Kilakas thiab lawv tsa Xa‑u ua vajntxwv rau ntawm Yawmsaub xubntiag hauv lub moos Kilakas. Lawv tua tsiaj xyeem rau Yawmsaub ua kevcai sib raug zoo, mas Xa‑u thiab cov Yixayee sawvdaws kuj zoo siab xyiv fab kawg rau qhov ntawd. Xamuyee hais rau ib tsoom Yixayee sawvdaws tias, “Kuv twb mloog txhua yam uas nej hais rau kuv thiab kuv twb tsa ib tug vajntxwv kav nej lawm. No nawj, muaj ib tug vajntxwv coj nej lawm. Kuv twb laus plaubhau dawb tag lawm, kuv tej tub kuj nrog nej nyob. Thiab kuv coj nej txij thaum hluas los txog niaj hnub nimno. Kuv nyob ntawm no, thov nej ua timkhawv kom kuv rau ntawm Yawmsaub xubntiag thiab rau ntawm tus uas Yawmsaub tsa ua vajntxwv lub xubntiag. Kuv tau txeeb leejtwg li nyuj leejtwg li nees luav? Kuv tau ntxias leejtwg li lossis tau quab yuam leejtwg? Kuv tau yuav nyiaj xiab ntawm leejtwg txhais tes ua rau kuv lub qhov muag dig? Nej cia li hais lus mas kuv yuav thim rov rau nej.” Lawv hais tias, “Koj tsis tau ntxias peb lossis quab yuam peb lossis txeeb ib yam dabtsi ntawm leejtwg txhais tes li.” Ces Xamuyee txawm hais rau lawv tias, “Yawmsaub thiab tus uas Yawmsaub tsa los kuj ua timkhawv rau nej hnub no tias nej tsis pom ib yam dabtsi nyob hauv kuv txhais tes.” Lawv hais tias, “Yawmsaub ua tau timkhawv.” Thiab Xamuyee hais rau cov pejxeem tias, “Yawmsaub yog tus uas tsa Mauxe thiab Aloo thiab coj nej tej poj koob yawm txwv tawm hauv Iyi tebchaws los. Yog li no nej cia li sawv twjywm es kuv yuav piav txog tej haujlwm huvsi uas Yawmsaub ua cawm nej thiab nej tej poj koob yawm txwv mas nej yuav paub nej tej kev txhaum rau ntawm Yawmsaub xubntiag. Thaum Yakhauj mus rau hauv Iyi tebchaws mas nej tej poj koob yawm txwv quaj thov Yawmsaub, Yawmsaub kuj txib Mauxe thiab Aloo coj lawv tawm hauv Iyi tebchaws thiab coj lawv los nyob ntawm no. Tiamsis lawv tsis nco qab Yawmsaub uas yog lawv tus Vajtswv lawm, Yawmsaub thiaj muab lawv cob rau hauv Xixela uas yog vajntxwv Yanpi hauv lub moos Haxau tus thawj rog txhais tes thiab cob rau hauv cov Filixatee txhais tes thiab muab cob rau hauv Mau‑a tus vajntxwv txhais tes. Mas cov neeg ntawd thiaj ua rog rau nej tej poj koob yawm txwv. Lawv quaj thov Yawmsaub tias, ‘Peb tau ua txhaum muaj txim lawm rau qhov peb tau tso Yawmsaub tseg mus ua koom tu tej dab Npa‑as thiab tej dab Athalau. Nimno thov koj cawm peb dim hauv peb cov yeeb ncuab txhais tes mas peb yuav ua koom tu koj.’ Ces Yawmsaub thiaj txib Yelunpa‑as thiab Npala thiab Yetha thiab Xamuyee los, thiab Yawmsaub cawm nej dim hauv nej cov yeeb ncuab rau txhua fab, mas nej thiaj tau nyob tso siab plhuav. Thaum nej pom Naha uas yog cov Asmoo tus vajntxwv tuaj ua rog rau nej, mas txawm yog nej tus Vajtswv Yawmsaub twb yog nej tus vajntxwv lawm los nej tseem hais rau kuv tias, ‘Peb tsis mloog koj hais, peb yuav muaj ib tug vajntxwv kav peb.’ Nimno cia li saib tug vajntxwv uas nej tau xaiv, yog tus uas nej thov. Saib maj, Yawmsaub twb tsa vajntxwv kav nej lawm. Yog nej yuav hwm thiab paub ntshai Yawmsaub thiab ua koom tu nws thiab mloog nws tej lus, thiab tsis txhob fav xeeb rau Yawmsaub tej lus nkaw, thiab yog nej thiab tus vajntxwv uas kav nej nrog nraim nej tus Vajtswv Yawmsaub, mas kuj yog qhov zoo. Tiamsis yog nej tsis mloog Yawmsaub tej lus thiab fav xeeb rau nws tej lus nkaw, ces nws txhais tes yuav tawm tsam nej ib yam li tawm tsam nej tej poj koob yawm txwv. Yog li no nimno nej cia li sawv twjywm tos saib tej xwm txheej loj uas Yawmsaub yuav ua tab meeg nej. Nimno yog lub caij hlais mog los tsis yog? Kuv yuav thov Yawmsaub ua xob quaj thiab tso nag los, mas nej yuav paub thiab pom tseeb tias nej txojkev limhiam uas nej ua rau ntawm Yawmsaub xubntiag loj kawg, yog qhov uas nej thov kom muaj ib tug vajntxwv kav nej.” Xamuyee txawm thov Yawmsaub mas Yawmsaub txawm ua xob quaj thiab los nag rau hnub ntawd. Cov pejxeem kuj ntshai Yawmsaub thiab Xamuyee heev kawg. Mas cov pejxeem sawvdaws hais rau Xamuyee tias, “Thov koj thov Yawmsaub uas yog koj tus Vajtswv rau peb uas yog koj cov tub qhe xwv peb thiaj tsis tuag, rau qhov peb muab txojkev phem no tsav ntxiv rau peb lub txim huvsi, vim peb tau thov kom muaj vajntxwv kav peb.” Mas Xamuyee hais rau cov pejxeem tias, “Tsis txhob ntshai. Nej tau ua tej kev phem no huvsi lawm tiag, tiamsis nej tsis txhob tso qhov uas nrog nraim Yawmsaub tseg, nej cia li ua koom tu Yawmsaub kawg siab kawg ntsws. Tsis txhob mus raws kua tej uas tsis muaj qabhau. Tej ntawd pab tsis tau nej thiab cawm tsis tau nej, vim tej ntawd tsis muaj qabhau kiag li. Rau qhov Yawmsaub saib rau nws lub npe uas loj kawg nws thiaj tsis muab nws haiv neeg tso pov tseg, vim Yawmsaub txaus siab coj nej los ua ib haiv neeg uas yog nws teej nws tug. Tsis tag li ntawd xwb, kuv tus kheej los thov kom kuv tsis txhob ua txhaum rau Yawmsaub rau qhov uas tseg tsis thov nws pab nej. Thiab kuv yuav qhia nej taug txojkev uas zoo thiab txojkev uas raug cai. Nej yuav tsum hwm thiab paub ntshai Yawmsaub xwb thiab muab lub siab xib ua koom tu nws kawg siab kawg ntsws. Cia li ua tib zoo xav txog tej haujlwm loj uas nws ua pab nej lawm. Yog nej tseem mus ua limhiam, nej yuav raug muab kuav pov tseg puam tsuaj tag, tsis hais nej thiab nej tus vajntxwv huvsi.” Thaum Xa‑u pib ua vajntxwv nws hnub nyoog muaj … xyoo, thiab nws kav cov Yixayee tau … xyoo. Xa‑u xaiv cov txivneej Yixayee tau peb txhiab leej, faib ob txhiab leej nrog nws nyob ntawm Mimaj thiab nyob pem toj siab ntawm Npe‑ee, ib txhiab leej nrog Yaunathas nyob ntawm lub moos Kinpe‑a hauv Npeeyamee tebchaws. Dua li ntawd nws kom cov pejxeem txhua tus nyias rov mus rau nyias vaj nyias tsev. Yaunathas ntaus yeej cov Filixatee pab tub rog uas zov hauv lub moos Kenpa swb lawm, mas cov Filixatee kuj hnov txog zaj ntawd. Ces Xa‑u txawm kom tshuab raj kub yaj thoob lub tebchaws thiab hais tias, “Cia cov Henplais sawvdaws tau hnov.” Cov Yixayee sawvdaws tau hnov xov tias Xa‑u twb ntaus yeej Filixatee ib pab tub rog lawm thiab hnov tias cov Filixatee ntxub cov Yixayee heev kawg li. Cov pejxeem thiaj raug hu tawm mus cuag Xa‑u rau ntawm Kilakas. Cov Filixatee kuj txhij tub rog tuaj ua rog rau cov Yixayee. Lawv muaj peb vam lub tsheb ua rog thiab rau txhiab tus tub rog caij nees thiab cov tub rog coob npaum li tej xuab zeb ntawm ntug hiavtxwv. Lawv tuaj ua yeej nyob rau ntawm Mimaj uas nyob Npe‑avee sab hnub tuaj. Thaum cov Yixayee pom tias lawv poob rau qhov chaw ti lawm, vim cov Filixatee ntaus lawv heev, lawv thiaj tsiv nraim rau hauv tej qhov tsua, hauv tej kem zeb, hauv tej qhov ntxa thiab hauv tej qhov dej, thiab muaj qee leej hla tus dej Yaladee khiav mus rau hauv Kas thiab Kile‑a tebchaws. Xa‑u tseem nyob hauv lub moos Kilakas thiab cov pejxeem sawvdaws kuj nrog nws nyob ua tshee hnyo. Xa‑u nyob tos xya hnub raws li lub sijhawm uas Xamuyee teem tseg, tiamsis Xamuyee tsis tuaj rau ntawm Kilakas, mas cov pejxeem tso Xa‑u tseg khiav ua sab ua sua tag lawm. Yog li ntawd Xa‑u thiaj hais tias, “Cia li coj tej tsiaj uas muab ua kevcai hlawv xyeem thiab tej uas ua kevcai xyeem sib raug zoo tuaj rau kuv.” Nws thiaj muab ua kevcai hlawv xyeem. Thaum nws muab ua kevcai hlawv xyeem tag lawd, ua ciav Xamuyee txawm tuaj txog. Xa‑u tawm mus tos thiab hu Xamuyee. Xamuyee nug tias, “Koj twb ua dabtsi lawm?” Xa‑u teb tias, “Thaum kuv pom cov pejxeem tso kuv tseg khiav ri sua mus lawm thiab koj kuj tsis tuaj raws li lub sijhawm uas teem cia, thiab cov Filixatee los twb txhij tub rog tuaj rau ntawm Mimaj lawm, mas kuv thiaj hais tias, ‘Nimno cov Filixatee yuav tuaj ntaus kuv ntawm Kilakas, thiab kuv twb tsis tau thov kom Yawmsaub hlub peb,’ kuv thiaj rov yuam kuv mus muab tej tsiaj ua kevcai hlawv xyeem.” Ces Xamuyee hais rau Xa‑u tias, “Koj ua tej uas ruam kawg li. Koj twb tsis ua raws tej lus uas koj tus Vajtswv Yawmsaub hais kom koj ua. Yog koj tau ua raws li mas Yawmsaub yeej yuav tsa koj thiab koj caj ces ua vajntxwv kav cov Yixayee mus ib txhis li. Tiamsis nimno koj thiab koj caj ces yuav tsis ua vajntxwv kav mus li. Yawmsaub twb nrhiav dua ib tug txivneej uas hum Yawmsaub lub siab lawm. Thiab Yawmsaub twb tsa tus ntawd ua thawj kav nws haiv neeg rau qhov koj tsis ua raws li Yawmsaub hais rau koj.” Ces Xamuyee txawm sawv tsees tawm ntawm Kilakas mus txog lub moos Kinpe‑a hauv Npeeyamee tebchaws. Mas Xa‑u suav cov neeg uas nrog nws ua ke muaj kwvlam rau pua leej. Xa‑u thiab nws tus tub Yaunathas thiab cov neeg uas nrog ob tug kuj nyob hauv lub moos Kenpa hauv Npeeyamee tebchaws. Tiamsis cov Filixatee tseem ua yeej nyob ntawm Mimaj. Muaj peb pab tub rog tawm hauv cov Filixatee lub yeej mus lws tebchaws, ib pab mus rau ntawm lub moos Aufa uas yog Su‑as tebchaws, ib pab mus rau lub moos Npe Hauloo, thiab ib pab mus rau ciam teb uas saib rau nram hav Xenpau‑i uas ncaj tebchaws moj sab qhua. Thaum ntawd lawv nrhiav thoob plaws hauv Yixayee tebchaws tsis muaj ib tug Kws hlau kiag li, rau qhov cov Filixatee hais tias, “Ntshai tsam cov Henplais yuav ntaus tau ntaj tau hmuv los siv.” Cov Yixayee sawvdaws mus ntiav cov Filixatee hov khais hov hlau hov taus hov liag. Nqe hov khais thiab hov hlau ib rab yog ib phee nqe hov taus thiab hov hmuv ib rab yog ib feem peb hauv ib sekhee. Vim li no thaum txog hnub ua rog thiaj nrhiav tsis tau ib rab ntaj ib rab hmuv hauv Xa‑u thiab Yaunathas cov tub rog txhais tes kiag li. Tsuas yog Xa‑u thiab nws tus tub Yaunathas thiaj muaj xwb. Mas cov Filixatee ib pab tub rog mus zov lub dawm uas hla mus rau lub moos Mimaj. Muaj ib hnub Yaunathas uas yog Xa‑u tus tub hais rau tus hluas uas nqa nws tej cuab yeej ua rog tias, “Wb cia li hla mus rau tim cov Filixatee pab tub rog uas zov kev.” Tiamsis nws tsis qhia rau nws txiv paub. Xa‑u tsuam chaw nyob ntawm ntug moos Kinpe‑a hauv tsob qab ntoo txiv ntsiav kws hauv lub moos Miloo. Cov neeg uas nrog Xa‑u nyob kwvlam muaj rau pua leej, thiab Ahiya uas coj lub efauj kuj nrog Xa‑u nyob. Ahiya txiv yog Ahithu uas yog Ikhanpau tus tijlaug, nws yawg yog Fineha, nws yawg koob yog Eli uas ua Yawmsaub tus pov thawj hauv lub moos Silau. Cov tub rog kuj tsis paub tias Yaunathas mus lawm. Lub dawm uas Yaunathas yuav hla mus rau cov Filixatee pab tub rog uas zov kev muaj ib ntxwj zeb zuag zuag nyob sab no hu ua Npauxe thiab ib ntxwj zeb nyob sab tid hu ua Xene. Ntxwj zeb sab ped tshwm ncaj ntawm Mimaj thiab ntxwj zeb sab nrad tshwm ncaj ntawm lub moos Kenpa. Yaunathas hais rau tus hluas uas nqa nws tej cuab yeej tias, “Wb cia li hla mus rau ntawm pab tub rog uas yog cov neeg tsis ua kevcai txiav. Tej zaum Yawmsaub yuav pab peb rau qhov tsis muaj ib yam dabtsi yuav tav tau qhov uas Yawmsaub cawm peb tsis hais nws siv neeg coob los tsawg.” Tus uas nqa nws tej cuab yeej teb nws tias, “Koj cia li ua txhua yam uas koj lub siab xav ua. Kuv nrog koj ua ke thiab koj lub siab xav li cas kuv lub siab kuj ua ib yam li ntawd.” Ces Yaunathas txawm hais tias, “Wb yuav hla mus rau ntawm cov neeg ntawd thiab tshwm rau lawv pom. Yog lawv hais rau wb tias, ‘Cia li nyob tos txog thaum peb tuaj txog neb,’ ces wb yuav nyob twjywm ntawm lub chaw thiab wb yuav tsis nce mus rau ntawm lawv. Yog lawv hais tias, ‘Cia li nce tuaj rau ntawm peb,’ ces wb yuav nce mus. Qhov uas lawv teb li ntawd yuav qhia rau wb paub tias Yawmsaub twb muab lawv cob rau hauv wb txhais tes lawm.” Ob tug thiaj tshwm rau cov Filixatee pab tub rog pom, mas cov Filixatee hais tias, “Saib nawj, cov Henplais tawm hauv qhov tsiv nraim tshwm tuaj lawm.” Ces cov tub rog uas zov kev ntawd txawm hu Yaunathas thiab tus uas nqa nws tej cuab yeej hais tias, “Cia li nce tuaj rau ntawm peb mas peb yuav qhia ib yam dabtsi rau neb.” Yaunathas txawm hais rau tus uas nqa nws tej cuab yeej tias, “Cia li raws kuv qab los, rau qhov Yawmsaub twb muab lawv cob rau hauv cov Yixayee txhais tes lawm.” Ces Yaunathas txawm nkag nce mus thiab tus uas nqa nws tej cuab yeej kuj raws nws qab mus. Cov neeg no thiaj li tuag rau ntawm Yaunathas txhais tes thiab tus uas nqa nws tej cuab yeej kuj tua lawv raws qab mus. Thawj zaug uas Yaunathas thiab tus uas nqa nws tej cuab yeej tua lawv ntawd mas tuag kwvlam nees nkaum leej. Thaj chaw uas lawv sib tua ntawd dav li ib nkawg nyuj laij teb ib tav su. Cov Filixatee sawvdaws ras zom zaws tsis hais hauv lub yeej thiab ib ncig lub yeej. Pab tub rog uas zov kev thiab cov tub rog uas mus lws tebchaws kuj ntshai tshee hnyo. Av kuj ntseeg nkaws, ua rau muaj kev ras zom zaws loj heev. Xa‑u cov tub rog uas faj xwm hauv lub moos Kinpe‑a hauv Npeeyamee tebchaws tsa muag ntsia ua ciav pom cov Filixatee coob coob ntawd dhia khiav ntxhov hnyo rau tom ub tom no. Ces Xa‑u txawm hais rau cov neeg uas nrog nws nyob tias, “Cia li suav saib leejtwg tawm ntawm peb mus lawm.” Thaum lawv suav saib ua ciav Yaunathas thiab tus uas nqa nws tej cuab yeej tsis nyob ntawd. Xa‑u txawm hais rau Ahiya tias, “Cia li coj Vajtswv lub phij xab los ntawm no,” rau qhov lub sijhawm ntawd Vajtswv lub phij xab nyob hauv cov Yixayee lawm. Thaum Xa‑u nrog tus pov thawj hais lus txawm muaj suab nrov heev zuj zus hauv cov Filixatee lub yeej. Xa‑u thiaj hais rau tus pov thawj tias, “Cia li nkaum tes, tsis txhob ua nug lawm.” Ces Xa‑u thiab nws cov tub rog txawm sau nthwv mus ntaus rog, ua ciav cov Filixatee rov sib tua ua ntxhov hnyo sib chab sib chaws. Cov Henplais uas twb mus nrog cov Filixatee nyob ua ntej los lawm thiab tuaj rau hauv lub yeej ntawd, kuj tig los koom nrog cov Yixayee uas yog Xa‑u thiab Yaunathas tog. Thaum cov Yixayee uas tsiv nraim rau pem toj siab Efa‑i tebchaws tau hnov tias cov Filixatee tabtom khiav, lawv kuj caum qab mus ua rog rau thiab. Hnub ntawd Yawmsaub cawm cov Yixayee li no. Lawv thiaj ntaus rog mus dhau plaws lub moos Npe‑avee. Hnub ntawd cov Yixayee raug kev ceeblaj heev vim yog Xa‑u twv tseg rau cov tub rog tias, “Leejtwg noj mov ua ntej hnub tsis tau poob qho thiab ua ntej uas kuv tsis tau ua pauj rau kuv cov yeeb ncuab tag, cia tus ntawd raug foom tsis zoo.” Vim li no cov tub rog tsis noj mov kiag li. Cov neeg sawvdaws mus rau hauv hav zoov mas muaj zib ntab nyob hauv pem teb. Thaum cov neeg mus rau hauv hav zoov lawm mas pom zib ntab tabtom nrog, tiamsis tsis muaj leejtwg cev tes muab los noj, vim yog ntshai tej lus uas twv tseg lawd. Tiamsis Yaunathas tsis hnov leej txiv tej lus uas nws twv rau cov pejxeem. Nws thiaj muab tus hau pas nrig uas nws coj tshum xub ntab cev tes muab cov zib los noj, ces nws qhov muag thiaj kaj tuaj. Muaj ib tug yawg hais tias, “Koj txiv twv tseg rau cov tub rog tias, ‘Hnub no leejtwg noj mov yuav raug foom tsis zoo.’ Cov neeg thiaj tsaug leeg heev.” Yaunathas thiaj hais tias, “Kuv txiv ua rau lub tebchaws raug kev ceeblaj. Sim saib kuv lub qhov muag twb kaj lawm vim kuv tau noj mentsis zib ntab. Yog hnub no cov neeg tau noj tej uas txeeb tau ntawm yeeb ncuab los mas yuav zoo dua ntau npaug, rau qhov nimno qhov uas tua cov Filixatee kuj tsis muaj ntau lawm.” Hnub ntawd lawv tua cov Filixatee ntawm Mimaj mus txog lub moos Aiyaloo. Mas cov tub rog tsaug leeg heev. Lawv thiaj dhia mus muab tej uas txeeb tau los, yog yaj thiab nyuj thiab menyuam nyuj coj los tua kiag rau hauv av, noj kiag nqaij thiab ntshav ua ke. Mas luag thiaj mus hais rau Xa‑u tias, “Cov neeg ua txhaum rau Yawmsaub vim yog noj kiag nqaij thiab ntshav.” Mas Xa‑u hais tias, “Nej ua neeg fav xeeb lawm. Cia li dov ib lub pob zeb loj los rau ntawm kuv no.” Thiab Xa‑u hais tias, “Cia li mus hais thoob plaws rau cov neeg tias, ‘Nej txhua tus yuav tsum coj nej tej nyuj tej yaj los tua rau saum lub pob zeb no noj. Tsis txhob ua txhaum rau Yawmsaub vim yog noj nqaij thiab ntshav.’ ” Mas hmo ntawd txhua tus coj lawv tej nyuj los tua rau qhov ntawd. Xa‑u ua ib lub thaj xyeem rau Yawmsaub. Yog thawj lub thaj uas nws ua rau Yawmsaub. Ces Xa‑u hais tias, “Peb cia li mus caum cov Filixatee hmo ntuj thiab txeeb lawv tej qhov txhia chaw ib hmos kaj ntug. Peb tsis txhob tseg ib tug dim siav li.” Cov neeg teb tias, “Cia li ua raws li koj pom zoo.” Tiamsis tus pov thawj hais tias, “Cia peb los ua nug rau Vajtswv ntawm no tso.” Ces Xa‑u thiaj nug Vajtswv tias, “Kuv yuav mus caum cov Filixatee los tsis txhob mus? Koj yuav muab lawv cob rau hauv cov Yixayee txhais tes los tsis muab?” Tiamsis hnub ntawd Vajtswv tsis teb Xa‑u. Xa‑u thiaj hais tias, “Nej sawvdaws uas yog cov thawj, cia li los ntawm no, nej cia li tshuaj saib yog vim li cas hnub no muaj lub txim no tshwm los. Muaj Yawmsaub tus uas cawm cov Yixayee muaj txojsia nyob pom, txawm yog txojkev txhaum nyob ntawm kuv tus tub Yaunathas los nws yeej yuav tuag xwb.” Tiamsis cov neeg sawvdaws ntawd tsis muaj ib tug teb nws li. Ces Xa‑u txawm hais rau cov Yixayee sawvdaws tias, “Cia nej tuaj ib tog, mas kuv thiab kuv tus tub Yaunathas tuaj ib tog.” Mas cov pejxeem hais rau Xa‑u tias, “Cia li ua raws li koj pom zoo.” Ua li ntawd Xa‑u thiaj thov hais tias, “Au Yawmsaub uas yog cov Yixayee tus Vajtswv, ua cas hnub no koj tsis teb kuv uas yog koj tus qhev? Yog lub txim nyob ntawm kuv thiab kuv tus tub Yaunathas, thov teb rau Uli, yog lub txim nyob ntawm cov Yixayee thov teb rau Thumi.” Ces Xa‑u thiab Yaunathas thiaj yog tog uas ua txhaum mas cov pejxeem dim. Ces Xa‑u thiaj hais tias, “Rov qab saib Uli thiab Thumi rau kuv thiab kuv tus tub Yaunathas.” Mas kev txhaum poob rau Yaunathas. Ces Xa‑u thiaj hais rau Yaunathas tias, “Koj tau ua dabtsi lawm? Cia li hais rau kuv saib.” Yaunathas thiaj hais tias, “Kuv tau sim noj mentsis zib ntab ntawm tus hau pas nrig hauv kuv txhais tes. Kuv nyob ntawm no, kuv yeem tuag.” Xa‑u thiaj hais tias, “Yog kuv tsis tua koj thov Vajtswv ua hnyav dua ntawd rau kuv. Yaunathas koj yuav tuag tiag tiag li.” Cov pejxeem hais rau Xa‑u tias, “Tsim nyog Yaunathas uas coj kev kov yeej loj kawg los rau cov Yixayee tuag lov? Tsis txhob ua li ntawd. Muaj Yawmsaub uas muaj txojsia nyob pom, tsis tseev nws ib txoj plaubhau poob rau hauv av li, vim hnub no nws tau koom nrog Vajtswv ua rog.” Cov pejxeem thiaj txhiv tau Yaunathas nws thiaj tsis tuag. Ces Xa‑u txawm tsis raws caum cov Filixatee lawm. Cov Filixatee rov mus rau lawv qub teb qub chaw. Thaum Xa‑u tau ua vajntxwv kav cov Yixayee, nws ua rog rau nws cov yeeb ncuab rau txhua fab, yog ua rog rau Mau‑a thiab Asmoo thiab Edoo thiab cov vajntxwv hauv Xaunpa tebchaws thiab cov Filixatee. Nws mus rau qhovtwg kuj ntaus yeej qhov ntawd. Nws muaj siab loj siab tuab ua rog thiab ntaus yeej cov Amalej thiab cawm cov Yixayee dim hauv cov uas tuaj lws lawv txhais tes. Xa‑u li tub yog Yaunathas, Isavi thiab Makhisuva. Nws ob tug ntxhais tus hlob hu ua Mela, tus yau hu ua Mikhas. Xa‑u tus pojniam hu ua Ahinau‑as, nws yog Ahima‑a tus ntxhais. Xa‑u tus thawj rog yog Anaw uas yog Naw tus tub, Naw yog Xa‑u yawg laus. Khij yog Xa‑u txiv, Naw yog Anaw txiv, Naw thiab Khij yog Anpi‑ee li tub. Xa‑u sim neej mas muaj kev ua rog rau cov Filixatee loj heev. Thaum Xa‑u pom leejtwg muaj zog thiab siab loj siab tuab nws coj los nrog nws nyob ua nws li tubtxib tub khai. Xamuyee hais rau Xa‑u tias, “Yawmsaub txib kuv tuaj tsa koj ua vajntxwv kav nws haiv neeg Yixayee. Vim li no nimno koj tig ntsej mloog Yawmsaub tej lus. Yawmsaub uas muaj hwjchim loj kawg nkaus hais li no tias, ‘Kuv yuav rau txim rau cov Amalej rau qhov uas thaum cov Yixayee tawm hauv Iyi tebchaws los lawv tav cov Yixayee kev. Koj cia li mus ntaus cov Amalej thiab muab txhua yam uas lawv muaj ua kom puam tsuaj tag huvsi. Tsis txhob tseg ib tug dim li, cia tua tag nrho tej pojniam txivneej, tej menyuam yaus tej menyuam noj mis thiab tej nyuj tej yaj tej ntxhuav thiab tej nees luav huvsi.’ ” Xa‑u thiaj hu cov pejxeem tuaj ua ke rau ntawm Thela‑i suav tag nrho cov tub rog muaj 200,000 leej thiab cov neeg Yuda 10,000 leej. Xa‑u lawv tuaj rau ntawm Amalej lub nroog thiab nyob hauv lub hav zov tos. Xa‑u hais rau cov Khenai tias, “Cia li tawm mus, cia li ncaim ntawm cov Amalej mus tsam ces kuv ua rau nej nrog lawv puam tsuaj tag. Rau qhov thaum cov Yixayee tawm hauv Iyi tebchaws los nej hlub lawv.” Yog li ntawd cov Khenai thiaj ncaim cov Amalej mus lawm. Xa‑u kuj ntaus cov Amalej swb txij ntua lub moos Havila mus txog lub moos Su uas nyob ntawm Iyi tebchaws sab hnub tuaj. Nws ntes tau cov Amalej tus vajntxwv Aka ciaj sia kais thiab xuas ntaj muab cov pejxeem tua puam tsuaj tag nrho huvsi. Tiamsis Xa‑u thiab nws cov neeg tseg Aka txojsia thiab tej tsiaj txhu uas zoo kawg, muaj yaj muaj nyuj, muaj tej tsiaj uas rog rog thiab muaj tej menyuam yaj thiab txhua yam uas zoo kawg. Lawv tsis kam muab ua kom puam tsuaj. Lawv tsuas yog muab txhua yam uas lawv tsis nyiam thiab tsis muaj qabhau ua kom puam tsuaj xwb. Mas Yawmsaub hais lus tuaj rau Xamuyee tias, “Kuv tu siab qhov uas kuv tsa Xa‑u ua vajntxwv, rau qhov nws tau tig ntawm kuv mus lawm tsis ua raws li kuv tej lus nkaw.” Mas Xamuyee kuj chim thiab quaj thov Yawmsaub ib hmos kaj ntug. Thaum tagkis Xamuyee sawv ntxov tsees yuav mus nrhiav Xa‑u. Muaj neeg hais rau Xamuyee tias, “Xa‑u tuaj rau ntawm lub moos Khamee thiab ua ib tug yam ntxwv cia ua lub chaw nco txog nws ces txawm hla dhau plaws mus rau lub moos Kilakas lawm.” Ces Xamuyee txawm tuaj cuag Xa‑u, ces Xa‑u hais rau Xamuyee tias, “Thov Yawmsaub foom koob hmoov rau koj. Kuv twb ua raws li Yawmsaub tej lus nkaw lawm.” Tiamsis Xamuyee hais tias, “Tej suab yaj quaj thiab tej suab nyuj nqov uas hnov ntawd yog dabtsi?” Xa‑u teb tias, “Yog lawv coj hauv cov Amalej los, rau qhov kuv cov neeg tseg tej yaj tej nyuj uas zoo kawg xyeem rau koj tus Vajtswv Yawmsaub, dua li ntawd peb twb muab ua puam tsuaj tag nrho huvsi lawm.” Ces Xamuyee txawm hais rau Xa‑u tias, “Tsum lauj! Kuv yuav hais rau koj paub tias nag hmo Yawmsaub hais li cas rau kuv.” Xa‑u teb tias, “Cia li hais maj.” Xamuyee thiaj hais tias, “Txawm yog koj saib koj zoo li ib tug me kawg, los koj twb yog tus thawj hauv txhua xeem Yixayee los tsis yog? Yawmsaub tsa koj ua vajntxwv kav cov Yixayee. Thiab Yawmsaub txib koj mus ua nws tej haujlwm thiab hais tias, ‘Cia li mus ua kom cov Amalej uas yog neeg muaj txim puam tsuaj tag nrho huvsi, thiab ua rog rau lawv mus txog thaum lawv ploj tag huvsi.’ Ua cas koj tsis mloog Yawmsaub tej lus? Ua cas koj mus txeeb tej qhov txhia chaw thiab ua tej uas Yawmsaub pom tias phem kawg li?” Xa‑u hais rau Xamuyee tias, “Kuv twb mloog Yawmsaub tej lus lawm. Kuv twb mus ua tej haujlwm uas Yawmsaub txib kuv mus, kuv ntes tau cov Amalej tus vajntxwv Aka coj los thiab kuv ua rau cov Amalej puam tsuaj tag huvsi. Tiamsis kuv cov neeg muab tej qhov txhia chaw, tej yaj tej nyuj uas zoo kawg uas muab cais ua kom puam tsuaj ntawd coj los xyeem rau koj tus Vajtswv Yawmsaub hauv lub moos Kilakas.” Ces Xamuyee hais tias, “Yawmsaub txaus siab rau tej uas hlawv xyeem thiab tej uas muab xyeem npaum li qhov uas mloog Yawmsaub lus lov? Sim xav saib maj, qhov uas mloog lus zoo dua tej uas muab xyeem thiab qhov uas tig ntsej mloog zoo dua li tej roj txiv yaj. Vim qhov uas fav xeeb kuj ib yam li lub txim uas saib sij saib yaig, thiab qhov uas tawv ncauj kuj zoo li lub txim phem uas pe dab. Vim koj tso Yawmsaub tej lus tseg Yawmsaub kuj tso koj tseg tsis yuav koj ua vajntxwv lawm.” Mas Xa‑u hais rau Xamuyee tias, “Kuv ua txhaum lawm. Kuv fav xeeb rau Yawmsaub tej lus nkaw thiab koj tej lus vim yog kuv ntshai cov pejxeem thiab mloog lawv tej lus. Yog li no thov koj zam kuv lub txim thiab nrog kuv rov qab mus, kom kuv thiaj tau pe hawm Yawmsaub.” Mas Xamuyee hais rau Xa‑u tias, “Kuv yuav tsis nrog koj rov qab mus, vim yog koj tso Yawmsaub tej lus tseg, mas Yawmsaub twb tso koj tseg tsis yuav koj ua vajntxwv kav cov Yixayee lawm.” Thaum Xamuyee tig hlo mus lawm Xa‑u thiaj tuav nkaus Xamuyee lub qab tsho ces lub tsho txawm ntuag. Ces Xamuyee hais rau nws tias, “Hnub no Yawmsaub muab cov Yixayee lub tebchaws dua rhe ntawm koj mus lawm thiab muab cob rau koj li ib tug kwvtij uas zoo dua koj. Tus uas yog cov Yixayee lub meej mom tsis txawj dag tsis txawj hloov siab. Nws tsis yog neeg es yuav hloov siab.” Xa‑u txawm hais tias, “Kuv tau ua txhaum muaj txim lawm. Nimno thov koj saib rau kuv tab meeg kuv cov neeg tej kev txwj laus thiab cov Yixayee. Thov nrog kuv rov qab kom kuv thiaj tau pe hawm Yawmsaub uas yog koj tus Vajtswv.” Mas Xamuyee thiaj nrog Xa‑u rov qab mus, Xa‑u thiaj tau pe hawm Yawmsaub. Mas Xamuyee hais tias, “Cia li coj cov Amalej tus vajntxwv Aka los rau kuv.” Ces Aka thiaj zoo siab hlo los rau ntawm nws. Aka hais tias, “Txojkev lwj siab txojkev tuag dhau tag lawm lauj!” Xamuyee hais tias, “Koj rab ntaj ua rau tej pojniam tsis muaj tub li cas, koj niam yuav nrog luag ib tsoom pojniam tsis muaj tub ib yam li ntawd thiab.” Ces Xamuyee txawm tsuav Aka ua tej ywb yav rau ntawm Yawmsaub xubntiag hauv lub moos Kilakas. Ces Xamuyee txawm mus rau ntawm lub moos Lama. Xa‑u txawm mus rau nws lub vaj lub tsev hauv Kinpe‑a uas yog Xa‑u lub moos. Ces Xamuyee tsis rov pom Xa‑u mus txog tag Xamuyee sim neej, mas Xamuyee nyuaj siab kawg rau Xa‑u. Yawmsaub tu siab qhov uas nws tau tsa Xa‑u ua vajntxwv kav cov Yixayee. Yawmsaub hais rau Xamuyee tias, “Koj yuav quaj Xa‑u mus ntev li cas, rau qhov kuv twb muab nws tso tseg tsis yuav nws ua vajntxwv kav cov Yixayee lawm? Cia li muab koj lub khob kub nyuj ntim roj aulib es sawv kev mus. Kuv yuav txib koj mus rau ntawm Yexi hauv lub moos Npelehee, rau qhov kuv twb xaiv nws cov tub ib tug ua vajntxwv lawm.” Xamuyee hais tias, “Kuv yuav ua li cas mus tau? Yog Xa‑u hnov nws yuav muab kuv tua pov tseg xwb.” Ces Yawmsaub hais tias, “Cia li coj ib tug maum nyuj mus thiab hais tias, ‘Kuv tuaj xyeem tsiaj rau Yawmsaub.’ Mas hu Yexi tuaj nrog koj ua kevcai xyeem tsiaj mas kuv yuav qhia rau koj paub tias koj yuav tsum ua dabtsi. Koj yuav hliv roj rau tus uas kuv qhia lub npe rau koj.” Xamuyee ua raws li Yawmsaub hais. Nws tuaj rau ntawm lub moos Npelehee. Cov kev txwj laus hauv lub moos ntawd tuaj cuag nws ua ib ce ntshai tshee hnyo thiab hais tias, “Koj tuaj ua qhov zoo lov?” Xamuyee teb tias, “Kuv tuaj ua qhov zoo, kuv tuaj xyeem tsiaj rau Yawmsaub. Cia li tu kom nej dawb huv thiab tuaj nrog kuv ua kevcai xyeem tsiaj.” Xamuyee kuj tu kom Yexi thiab nws cov tub dawb huv thiab hu lawv tuaj nrog nws ua kevcai xyeem tsiaj. Thaum lawv tuaj lawd nws ntsia ntsoov Elia xav hais tias, “Tus uas Yawmsaub tsa kuj tuaj rau ntawm Yawmsaub lub xubntiag lawm lauj.” Tiamsis Yawmsaub hais rau Xamuyee tias, “Tsis txhob saib rau nws lub cev thiab saib qhov uas nws siab, rau qhov kuv tsis yuav nws. Yawmsaub saib tsis thooj li neeg saib. Neeg saib lub cev sab nraud xwb, tiamsis Yawmsaub saib lub siab.” Ces Yexi txawm hu Anpinada los hla Xamuyee xubntiag. Xamuyee hais tias, “Yawmsaub tsis xaiv tus no.” Ces Yexi txawm kom Sama hla los mus. Mas Xamuyee kuj hais tias, “Yawmsaub tsis xaiv tus no.” Yexi kom xya leej tub hla mus ntawm Xamuyee xubntiag. Mas Xamuyee hais rau Yexi tias, “Yawmsaub tsis xaiv cov no.” Ces Xamuyee txawm hais rau Yexi tias, “Koj cov tub nyob txhij ntawm no lawm lov?” Yexi teb tias, “Tseem tshuav tus tub ntxawg, nws mus yug yaj lawm.” Mas Xamuyee hais rau Yexi tias, “Cia li txib neeg mus coj nws los. Peb yuav tsis zaum mus txog thaum nws los txog ntawm no.” Yexi kuj txib neeg mus coj nws los. Nws yog ib tug ntsej muag tshiab liab ploog lub cev ntaj ntsug zoo nraug ntxiag. Yawmsaub hais tias, “Cia li sawv tsees hliv roj rau tus ntawd, yog tus ntawd ntag.” Ces Xamuyee txawm muab lub khob kub nyuj roj los hliv ua kevcai tsa nws tab meeg cov tijlaug. Mas Yawmsaub tus Ntsuj Plig los nrog nraim Davi nyob txij hnub ntawd mus. Ces Xamuyee txawm sawv tsees rov qab mus rau hauv lub moos Lama lawm. Mas Yawmsaub tus Ntsuj Plig tawm hauv Xa‑u lawm, ces Yawmsaub cia ib tug plig phem los tsim txom Xa‑u. Xa‑u cov tub teg tub taws hais rau nws tias, “Sim saib, Yawmsaub cia ib tug plig phem los tsim txom koj lawm. Vajntxwv, thov koj txib koj cov tub qhe uas nyob ntawm koj xubntiag no mus nrhiav ib tug uas txawj ntaus nkauj nog ncas tuaj. Thaum twg Vajtswv cia tus plig phem tshoov koj lub siab, tus ntawd yuav ntaus nkauj nog ncas ces koj yuav zoo.” Xa‑u thiaj hais rau nws cov tub teg tub taws tias, “Cia li mus nrhiav ib tug yawg uas txawj ntaus nkauj nog ncas coj tuaj cuag kuv.” Cov tub hluas ntawd muaj ib tug hais tias, “Kuv pom Yexi hauv Npelehee ib tug tub txawj ntaus nkauj nog ncas. Nws siab loj siab tuab thiab txawj ua rog, hais lus zoo thiab ntsej muag zuag plias. Thiab Yawmsaub nrog nraim nws.” Xa‑u thiaj txib neeg mus hais rau Yexi tias, “Koj cia li tso koj tus tub Davi uas yug yaj tuaj cuag kuv.” Ces Yexi thiaj li muab ib tug nees luav thauj mov noj thiab ib hnab tawv cawv txiv hmab thiab ib tug menyuam tshis rau nws tus tub Davi coj mus pub rau Xa‑u. Davi kuj tuaj cuag Xa‑u thiab ua nws li haujlwm. Xa‑u hlub Davi heev, Davi kuj ua tus uas nqa Xa‑u tej cuab yeej ua rog. Xa‑u xa xov mus rau Yexi tias, “Cia li kheev Davi nyob ua kuv tes haujlwm, vim kuv txaus siab rau nws.” Thaum Vajtswv cia tus plig phem los tshoov Xa‑u lub siab thaum twg, Davi kuj khaws nkauj nog ncas los ntaus ces Xa‑u siab thiaj tus thiab zoo thiab tus plig phem thiaj khiav tawm ntawm nws mus lawm. Cov Filixatee txhij tub rog yuav tuaj ua rog, lawv tuaj txoos ua ke ntawm lub moos Xaukhau uas nyob hauv Yuda tebchaws. Lawv ua yeej rau ntawm Xaukhau thiab Axekha ntu nruab nrab ntawm Efedami. Mas Xa‑u thiab cov Yixayee txhij rog ua ke tuaj ua yeej rau hauv lub hav Ela, npaj chaw ua rog rau cov Filixatee. Cov Filixatee sawv rau saum ib lub roob, cov Yixayee sawv dua rau saum ib lub roob, muaj ib lub hav quas nruab nrab. Muaj ib tug yawg uas txawj ua rog heev tawm hauv cov Filixatee lub yeej tuaj npe hu ua Kaulia. Nws siab rau tshis thiab ib dos, nws yog neeg hauv lub moos Ka. Nws ntoo ib lub mom tooj liab saum nws taubhau thiab hnav lub tsho tooj liab hnyav tsib txhiab sekhee. Nws rau nrhoob tooj liab thiab khuam ib rab hmuv tooj liab ntawm xub pwg laim nkaus. Tus ko hmuv ntoo uas nws tuav loj li rab nqos ntos ntaub, lub hauv hmuv yog hlau hnyav rau pua sekhee. Tus tub rog uas tuav daim phiaj hlau thaiv nws mus ua nws ntej. Nws tuaj sawv qw rau Yixayee cov tub rog uas nyob ib kab sab tias, “Nej tawm tuaj nyob ib kab sab ua dabtsi li kod? Kuv yog neeg Filixatee los tsis yog? Nej yog Xa‑u cov qhev los tsis yog? Cia li xaiv ib tug nyob nej chaw nqes tuaj rau ntawm kuv no. Yog nws muaj peevxwm nrog kuv ua rog thiab tua tau kuv, peb cov yuav yeem ua nej qhev. Yog kuv kov yeej nws thiab tua tau nws, nej cov yuav tsum ua peb qhev thiab tu peb.” Thiab tus Filixatee ntawd hais tias, “Hnub no kuv twv ntxhias Yixayee cov tub rog xa ib tug tuaj mas wb yuav sib tua.” Thaum Xa‑u thiab cov Yixayee sawvdaws hnov tus Filixatee tej lus ntawd, lawv poob siab thiab ntshai kawg li. Mas Davi yog Yexi tus tub. Yexi yog neeg Efatha nyob hauv lub moos Npelehee hauv Yuda tebchaws, nws muaj yim tus tub. Thaum Xa‑u ua vajntxwv Yexi kuj laus heev hnub nyoog nchav lawm. Yexi peb tug tub hlob kuj nrog Xa‑u mus ua rog. Nws peb tug tub uas mus ua rog ntawd tus hlob npe hu ua Elia, tus ob hu ua Anpinada thiab tus peb hu ua Sama. Davi yog tus tub ntxawg. Peb tug tijlaug hlob kuj nrog Xa‑u mus lawm. Davi mus mus los los rau ntawm Xa‑u thiab yug nws txiv pab yaj ntawm Npelehee. Tus Filixatee ntawd tawm tuaj twv ntxhias thaum tagkis thiab thaum yuav tsaus ntuj tau plaub caug hnub. Yexi hais rau nws tus tub Davi tias, “Koj cia li coj cov qeb kib ib efa thiab kaum lub ncuav no kavtsij mus rau koj cov tijlaug hauv lub yeej. Thiab coj kaum thooj nyuj mis nkoog khov no mus rau lawv tus thawj rog uas kav ib txhiab leej. Saib koj cov tijlaug nyob zoo li cas thiab coj lawv li ib yam los rau kuv saib. Xa‑u thiab koj cov tijlaug thiab cov Yixayee sawvdaws nyob hauv lub hav Ela tabtom ua rog rau cov Filixatee.” Davi thiaj sawv ntxov tsees tso pab yaj tseg rau ib tug saib, thauj zaub mov mus raws li Yexi hais rau nws. Nws tuaj txog hauv lub yeej rau thaum pab tub rog tabtom tawm mus nyob ib kab sab rau ntawm chaw ua rog thiab qw ua tsuj ua tsaug. Cov Yixayee thiab cov Filixatee tawm tuaj yuav nqes tes ua rog, ob tog tub rog tuaj sawv saib ntswb ntsoov. Davi muab tej zaub mov tso rau tus uas saib zaub mov ces txawm dhia mus rau tom chaw ua rog nrog nws tijlaug tham. Thaum lawv tabtom hais lus tus yawg Filixatee uas hu ua Kaulia, uas yog neeg hauv lub moos Ka uas txawj ua rog heev txawm tawm hauv pab tub rog Filixatee uas sawv ua ib kab sab ntawd txav zog tuaj, thiab hais twv ntxhias yam li yav tag los lawd, mas Davi kuj hnov. Thaum cov Yixayee sawvdaws pom tus yawg ntawd lawv txawm khiav thim rov qab ntshai kawg li. Cov Yixayee sib tham hais tias, “Nej twb pom tus yawg uas tawm tuaj ntawd lawm lov? Nws tawm tuaj twv ntxhias cov Yixayee tiag tiag li. Yog leejtwg tua tau nws, vajntxwv yuav muab nyiaj txiag ntau nplua mias thiab muab vajntxwv tus ntxhais rau tus ntawd yuav, thiab pub kom nws txiv tsev neeg tsis txog them se rau hauv cov Yixayee.” Ces Davi txawm hais rau cov neeg uas nrog nws sawv ua ke ntawd tias, “Lawv yuav ua li cas rau tus uas tua tau tus Filixatee ntawd thiaj rhuav tau qhov uas nws ua rau cov Yixayee poob ntsej muag? Tus yawg Filixatee uas tsis ua kevcai txiav ntawd yog leejtwg es nws yuav hais twv ntxhias rau Vajtswv uas muaj txojsia nyob pab tub rog?” Cov pejxeem kuj teb nws ib yam nkaus tias, “Yog leejtwg tua tau tus yawg ntawd nws yuav tau raws li hais cia lawd.” Thaum Elia uas yog Davi tus tijlaug hlob hnov Davi hais rau cov neeg ntawd, Elia txawm npau taws rau Davi thiab hais tias, “Koj tuaj ua dabtsi? Koj tseg ob peb tug nyuag yaj rau leejtwg saib xyuas hauv tebchaws moj sab qhua? Kuv yeej paub koj tej nyuag kev khav theeb thiab tej kev phem hauv koj lub siab. Koj tsuas yog tuaj saib lawv sib tua xwb.” Davi txawm teb tias, “Kuv tau ua li cas maj? Kuv tsuas yog hais lo lus xwb.” Davi txawm tig mus hais dua rau lwm tus ib yam nkaus li ntawd. Tej neeg kuj teb ib yam li qub rau nws. Thaum lawv hnov Davi tej lus lawv txawm piav rau Xa‑u paub, Xa‑u thiaj txib neeg mus coj Davi los. Davi thiaj hais rau Xa‑u tias, “Tsis txhob cia leejtwg poob siab rau yawg ntawd kiag li. Kuv uas yog koj tus qhev yuav mus nrog tus Filixatee ntawd sib tua.” Mas Xa‑u hais rau Davi tias, “Koj tsis muaj peevxwm mus nrog tus Filixatee ntawd sib tua, rau qhov koj tseem yog menyuam hluas, tiamsis tus yawg ntawd yeej ua tub rog txij thaum hluas los lawm.” Tiamsis Davi hais rau Xa‑u tias, “Kuv uas yog koj tus qhev txeev yug kuv txiv tej yaj, mas thaum muaj tsov ntxhuav muaj dais tuaj tom menyuam yaj, kuv muab raws ntaus thiab cawm tus menyuam yaj ntawd dim hauv nws lub qhov ncauj los. Yog tsov tig kiag los tom kuv, kuv kuj ntsiab nkaus puab tsaig muab ntaus tuag kiag. Kuv uas yog koj tus qhev twb txeev tua tau tsov ntxhuav thiab dais los lawm. Mas tus Filixatee uas tsis ua kevcai txiav ntawd kuj yuav zoo li tej tsiaj ntawd rau qhov nws tau hais twv ntxhias Vajtswv uas muaj txojsia nyob cov tub rog.” Thiab Davi hais tias, “Yawmsaub uas cawm kuv dim hauv tsov ntxhuav tej rau tes rau taw thiab dim hauv dais tej rau tes rau taw, yuav cawm kuv dim hauv tus Filixatee ntawd txhais tes thiab.” Xa‑u txawm hais rau Davi tias, “Cia li mus, thov Yawmsaub nrog nraim koj.” Xa‑u txawm muab nws tej ris tsho ua rog rau Davi hnav thiab muab lub mom tooj liab rau Davi ntoo saum taubhau thiab muab lub tsho hlau rau Davi hnav. Davi muab Xa‑u rab ntaj los sia ris zawm lub tsho hlau rau ntawm duav, ces nws sim mus kev mas mus tsis taus rau qhov nws hnav tsis kam tej ntawd. Ces Davi txawm hais rau Xa‑u tias, “Kuv hnav tej no mus tsis taus, rau qhov kuv hnav tsis kam.” Ces Davi txawm muab hle. Nws tuav rawv nws tus pas nrig thiab xaiv tsib lub qe zeb kheej kheej hauv hav los ntim rau hauv nws lub hnab thoob puab uas nws khuam yug yaj. Nws nqa ib txoj hlua fiav ntaus qe zeb, nws nam zog mus ze tus Filixatee ntawd. Tus yawg Filixatee ntawd kuj nam zog tuaj ze Davi, tus uas tuav daim phiaj hlau thaiv kuj ua nws ntej. Thaum tus Filixatee tsa muag ntsia pom Davi nws kuj saib tsis taus Davi rau qhov Davi tsuas yog ib tug hluas ntsej muag tshiab liab ploog zoo nraug ntxiag xwb. Nws txawm hais rau Davi tias, “Kuv yog dev lov es koj yuav coj ib tug nyuag pas tuaj ntawm kuv?” Ces nws txawm tuav nws tej dab qhua lub npe tsawm foom Davi. Tus Filixatee hais rau Davi tias, “Cia li los rau ntawm kuv no. Kuv yuav muab koj tej nqaij rau tej liaj dav saum nruab ntug thiab tej tsiaj qus noj.” Ces Davi hais rau nws tias, “Koj coj ntaj coj hmuv thiab coj hmuv nkaug tuaj tawm tsam kuv. Tiamsis kuv tuav Yawmsaub uas muaj hwjchim loj kawg nkaus lub npe tuaj tawm tsam koj. Nws yog Yixayee pab tub rog tus Vajtswv uas koj twv ntxhias. Hnub no Yawmsaub yuav muab koj cob rau hauv kuv txhais tes, kuv yuav muab koj tua thiab muab koj lub taubhau txiav pov tseg. Hnub no kuv yuav muab Filixatee cov tub rog tej cev tuag rau tej liaj dav saum nruab ntug thiab tej tsiaj qus hauv ntiajteb noj, mas ib tsoom neeg hauv qab ntuj yuav paub tias muaj ib tug Vajtswv nyob hauv Yixayee, thiab tej neeg uas tuaj ua ke no huvsi yuav paub tias Yawmsaub tsis yog siv ntaj siv hmuv cawm neeg, rau qhov kev ua rog zaum no yog Yawmsaub ua, mas nws yuav muab nej cob rau hauv peb txhais tes.” Thaum tus Filixatee ntawd sawv tsees nam zog tuaj ze yuav ntaus Davi, Davi kuj dhia ceev nrooj mus rau ntawm lub chaw ua rog rau tus Filixatee ntawd. Davi cev tes rho kiag ib lub qe zeb hauv lub hnab los fiav ntawm txoj hlua ntaus raug tus Filixatee ntawd hauv pliaj. Lub qe zeb ntsia nkaus rau ntawm hauv pliaj ua rau nws ntog khwb nkaus rau hauv av. Yog li no Davi thiaj siv txoj hlua fiav thiab ib lub qe zeb xwb kov yeej tus Filixatee ntawd. Nws muab tus Filixatee ntaus thiab muab tua pov tseg. Davi tsis muaj ntaj hauv nws txhais tes li. Davi thiaj dhia mus sawv kiag saum tus ntawd lub cev tuag thiab rho kiag rab ntaj hauv tus Filixatee ntawd lub hnab los txiav lub taubhau tu nrho. Thaum cov Filixatee pom tus tub rog uas nyob lawv chaw ua rog tuag lawm, lawv thiaj tig kiag khiav. Cov Yixayee thiab cov Yuda txawm sawv tsees qw nrov mus raws caum cov Filixatee mus txog ntua lub moos Ka thiab txog lub rooj loog lub moos Ekhoo. Cov Filixatee uas raug mob thiaj ntog taug kev ntawm lub moos Sa‑ala‑i mus txog ntua lub moos Ka thiab lub moos Ekhoo. Mas cov Yixayee thiaj rov qab los tsis caum cov Filixatee lawm thiab mus lws tej qhov txhia chaw hauv lawv lub yeej. Davi kuj coj tus Filixatee ntawd lub taubhau mus rau hauv lub nroog Yeluxalees. Tiamsis tej cuab yeej mas Davi coj mus khaws rau hauv nws lub tsev ntaub. Thaum Xa‑u pom Davi tawm mus ntaus rog rau tus Filixatee ntawd, nws txawm hais rau Anaw uas yog nws tus thawj rog tias, “Anaw, tus hluas ntawd yog leejtwg li tub?” Anaw teb tias, “Vajntxwv uas muaj txojsia nyob, kuv yeej tsis paub thiab.” Vajntxwv txawm hais tias, “Cia li mus nug saib tug nyuag hluas ntawd yog leejtwg li tub.” Thaum Davi mus tua tus Filixatee rov los, Anaw coj nws mus cuag Xa‑u. Davi nqa rawv tus Filixatee ntawd lub taubhau mus thiab. Xa‑u thiaj nug tias, “Tub hluas 'e, koj yog leejtwg li tub?” Davi teb tias, “Kuv yog koj tus qhev Yexi tus tub, yog neeg hauv Npelehee.” Thaum Davi hais rau Xa‑u tag lawd, Yaunathas txawm nrog Davi koom ib lub siab thiab hlub Davi ib yam li nws hlub nws tus kheej. Ces hnub ntawd Xa‑u txawm kom Davi nrog nws nyob tsis kheev Davi rov qab mus rau nws txiv tsev. Mas Yaunathas nrog Davi cog lus sib raug zoo rau qhov nws hlub Davi ib yam li nws hlub nws tus kheej. Yaunathas hle nws lub tsho ntev pub rau Davi. Nws lub tsho hlau thiab nws rab ntaj rab hneev thiab txoj siv tawv los nws kuj pub rau Davi. Xa‑u txib Davi mus qhovtwg, los Davi kuj tawm mus ua haujlwm tiav log. Vim li no Xa‑u thiaj tsa Davi ua thawj kav cov tub rog. Tej uas Xa‑u ua ntawd mas cov pejxeem sawvdaws thiab Xa‑u cov tub teg tub taws puavleej pom zoo. Thaum Davi tua tau tus Filixatee ntawd lawm es cov tub rog sawvdaws rov los, cov pojniam hauv Yixayee txhua lub moos txawm tawm tuaj hu nkauj seev cev tos vajntxwv Xa‑u. Lawv npuaj nruas hu nkauj zoo siab xyiv fab thiab tshuab raj ntaus nkauj nog ncas. Thaum cov pojniam hu nkauj zoo siab xyiv fab ntawd lawv hu tias, “Xa‑u tua tau qas txhiab leej, Davi tua tau qas vam leej.” Xa‑u txawm chim heev, nws tsis txaus siab rau tej lus uas lawv hu ntawd. Nws hais tias, “Lawv suav qas vam leej rau Davi, tiamsis suav qas txhiab leej rau kuv xwb. Tseem tshuav dabtsi uas Davi yuav tau tsuas yog tshuav lub tebchaws xwb?” Ces txij hnub ntawd los Xa‑u txawm nyas nrhws Davi. Hnub tom qab Vajtswv cia ib tug plig phem los tshoov Xa‑u lub siab, ces Xa‑u txawm pib vwm rau hauv nws lub tsev rau thaum Davi tabtom ntaus nkauj nog ncas ib yam li nws niaj hnub ntaus. Xa‑u tuav rawv ib rab hmuv hauv nws txhais tes. Xa‑u txawm tib nkaug hmuv xav hais tias, “Kuv yuav nkaug Davi ntsia nkaus rau tim phab ntsa.” Tiamsis Davi maim dhau ob zaug. Xa‑u kuj ntshai Davi rau qhov Yawmsaub nrog nraim Davi tiamsis twb ncaim ntawm Xa‑u lawm. Yog li ntawd Xa‑u thiaj muab Davi raws tawm, muab Davi tsa ua thawj kav ib txhiab leej tub rog, Davi thiaj coj cov tub rog tawm mus thiab rov los. Davi ua dabtsi kuj ua tau tiav huvsi, rau qhov Yawmsaub nrog nraim nws. Thaum Xa‑u pom tias Davi ua tau haujlwm tiav zoo, nws kuj ntshai Davi. Tiamsis cov Yixayee thiab cov Yuda sawvdaws nyiam Davi rau qhov nws pheej coj lawv tawm mus ua rog thiab rov los. Ces Xa‑u hais rau Davi tias, “No yog kuv tus ntxhais hlob uas hu ua Mela. Kuv yuav muab nws qua rau koj yuav ua pojniam. Tsuav yog koj muaj lub siab tuab pab kuv thiab ua rog rau Yawmsaub cov yeeb ncuab xwb.” Rau qhov Xa‑u xav hais tias, “Tsis txhob cia kuv tsa kuv txhais tes ntaus nws, cia cov Filixatee ntaus nws.” Davi hais rau Xa‑u tias, “Hauv cov Yixayee kuv yog leejtwg thiab kuv cov kwvtij uas yog kuv txiv tsev neeg yog leejtwg es kuv yuav los ua tau vajntxwv li vauv?” Tiamsis thaum txog sijhawm uas Xa‑u yuav muab nws tus ntxhais Mela rau Davi, nws txawm muab qua kiag rau Adi‑ee uas yog neeg hauv lub moos Mehaula. Xa‑u tus ntxhais Mikhas kuj nyiam Davi. Muaj neeg mus hais rau Xa‑u paub, Xa‑u kuj txaus siab. Xa‑u xav hais tias, “Kuv yuav muab nws qua rau Davi xwv nws thiaj ua tau rooj hlua cuab Davi thiab cov Filixatee txhais tes thiaj li tawm tsam nws.” Yog li no Xa‑u thiaj hais rau Davi zaum ob tias, “Zaum no koj yuav ua kuv li vauv.” Xa‑u hais rau nws cov tub teg tub taws tias, “Nej hais twjywm rau Davi tias, ‘Saib maj, vajntxwv txaus siab rau koj thiab nws cov tub teg tub taws sawvdaws kuj nyiam koj. Nimno koj cia li kam ua vajntxwv li vauv los maj.’ ” Xa‑u cov tub teg tub taws hais tej lus ntawd rau Davi mloog. Davi txawm hais tias, “Nej pom tias qhov uas ua vajntxwv li vauv yog ib qho me me xwb lov? Kuv yog ib tug neeg pluag thiab tsis muaj koob meej dabtsi li.” Cov tub teg tub taws thiaj piav rau Xa‑u tias “Davi hais li ub li no.” Xa‑u thiaj hais tias, “Nej cia li hais rau Davi tias, ‘Vajntxwv tsis yuav nqe mis nqe hno dabtsi li tsuas yog yuav cov Filixatee ib puas daim tawv chaw xis xwv thiaj ua pauj tau rau vajntxwv cov yeeb ncuab.’ ” Xa‑u yeej xav hais tias yuav ua rau Davi tuag rau hauv cov Filixatee txhais tes. Thaum Xa‑u cov tub teg tub taws piav tej lus ntawd rau Davi mloog, mas Davi kuj txaus siab ua vajntxwv li vauv. Thaum tsis tau txog lub sijhawm uas teem cia, Davi thiab nws cov neeg txawm tawm mus tua cov Filixatee tau ob puas leej, mas Davi muab lawv tej daim tawv chaw xis npaum nkaus li uas hais tseg lawd coj los pub rau vajntxwv es yuav ua vajntxwv li vauv. Xa‑u thiaj muab nws tus ntxhais Mikhas qua rau Davi yuav ua pojniam. Thaum Xa‑u pom thiab paub tias Yawmsaub nrog nraim Davi thiab nws tus ntxhais Mikhas nyiam Davi, Xa‑u yimhuab ntshai Davi. Yog li ntawd Xa‑u ua yeeb ncuab rau Davi mus li. Filixatee cov thawj pheej tawm tuaj ua rog. Txhua zaus uas lawv tawm tuaj Davi kov yeej ntau dua Xa‑u cov thawj tub rog sawvdaws. Ces nws lub koob meej thiaj nrov ncha heev. Xa‑u hais rau nws tus tub Yaunathas thiab nws cov tub teg tub taws sawvdaws tias kom lawv muab Davi tua pov tseg. Tiamsis Xa‑u tus tub Yaunathas nyiam Davi heev. Yaunathas thiaj hais rau Davi tias, “Kuv txiv Xa‑u nrhiav kev tua koj pov tseg. Vim li no tagkis sawv ntxov koj yuav tsum ceev faj zoo, cia li mus tsiv nraim nyob twjywm. Mas kuv yuav mus sawv ntsug ze ze kuv txiv rau hauv daim teb uas koj mus tsiv nraim ntawd, thiab kuv yuav nrog kuv txiv tham txog koj. Yog kuv paub li cas kuv yuav qhia rau koj paub thiab.” Yaunathas qhuas Davi rau nws txiv Xa‑u mloog tias, “Vajntxwv, thov koj tsis txhob ua txhaum rau Davi uas yog koj tus qhev, rau qhov Davi tsis tau ua ib qho txhaum rau koj thiab tej haujlwm uas nws ua kuj muaj nuj nqes ntau kawg rau koj, vim nws sev nyog nws txojsia mus tua tus Filixatee ntawd thiab Yawmsaub pab cov Yixayee sawvdaws kov yeej loj kawg. Koj twb pom thiab koj tib zoo siab kawg li lawm. Ua cas koj yuav ua txhaum rau tus uas tsis tau ua txhaum es yuav tua Davi uas tsis to kev tua?” Xa‑u kuj mloog Yaunathas hais, Xa‑u thiaj twv tias, “Yawmsaub uas muaj txojsia nyob pom, Davi yuav tsis raug muab tua kiag li.” Ces Yaunathas txawm hu Davi thiab qhia txhua yam no rau nws paub, thiab Yaunathas coj Davi mus cuag Xa‑u, ces Davi thiaj tau los nrog Xa‑u nyob li qub. Rov muaj kev ua rog tuaj. Davi kuj tawm mus ua rog rau cov Filixatee thiab tua tuag coob heev, lawv thiaj tig khiav tag lawm. Vajtswv cia ib tug plig phem los tshoov Xa‑u lub siab rau thaum nws zaum hauv nws lub tsev thiab tuav rawv rab hmuv. Davi tabtom ntaus nkauj nog ncas. Xa‑u tib nkaug xav kom ntsia nkaus Davi rau ntawm phab ntsa, tiamsis Davi maim dhau lawm. Xa‑u rab hmuv thiaj rhais nrees ntawm phab ntsa. Mas Davi khiav dim hmo ntawd. Xa‑u tso neeg mus rau ntawm Davi lub tsev thiab zov tos yuav tua Davi rau thaum kaj ntug. Tiamsis Davi tus pojniam Mikhas hais rau Davi tias, “Yog hmo no koj tsis cawm koj txojsia tagkis koj yuav raug tua tuag xwb.” Mikhas txawm muab Davi tso nqes ntawm qhov rais nws thiaj khiav dim lawm. Mikhas muab ib tug dab mlom los tso pw rau saum lub txaj thiab muab lub tog rau ncoo plaub tshis tso rau ntawm taubhau thiab muab pam vov rau. Thaum Xa‑u tso neeg mus ntes Davi, Mikhas hais tias, “Nws muaj mob.” Ces Xa‑u txawm txib neeg mus xyuas Davi thiab hais tias, “Cia li nqa kiag nws lub txaj thiab nws tuaj cuag kuv xwv kuv thiaj muab nws tua tau pov tseg.” Thaum cov neeg nkag los xyuas ua ciav pom tus dab mlom pw saum lub txaj thiab lub tog rau ncoo plaub tshis nyob ntawm taubhau. Xa‑u thiaj hais rau Mikhas tias, “Ua cas koj yuav dag kuv es tso kuv tus yeeb ncuab dim mus lawm?” Mikhas teb Xa‑u tias, “Nws hais rau kuv tias, ‘Tso kuv mus, yuav cia kuv muab koj tua lov?’ ” Davi txawm khiav dim mus cuag Xamuyee hauv lub moos Lama thiab piav txhua yam uas Xa‑u tau ua rau nws rau Xamuyee mloog. Mas Xamuyee thiab Tavi mus nyob hauv lub zos Nayauj. Muaj neeg hais rau Xa‑u tias, “Davi nyob hauv lub zos Nayauj ntawm lub moos Lama.” Xa‑u txawm tso neeg mus ntes Davi. Thaum lawv mus pom ib pab xibhwb tabtom cev Vajtswv lus thiab Xamuyee sawv ntsug ua lawv tus thawj, Vajtswv tus Ntsuj Plig kuj los kav tag nrho cov uas Xa‑u tso tuaj ces lawv txawm cev Vajtswv lus thiab. Thaum muaj neeg hais rau Xa‑u, nws kuj tso dua ib pab mus, mas cov ntawd kuj cev Vajtswv lus thiab. Xa‑u kuj tso pab uas peb mus thiab lawv kuj cev Vajtswv lus lawm thiab. Ces Xa‑u cia li sawv kev mus rau ntawm Lama. Nws tuaj txog ntawm lub qhov dej loj hauv lub moos Xekhu mas nug tias, “Xamuyee thiab Davi nyob qhovtwg?” Muaj ib tug teb tias, “Ob tug nyob hauv lub zos Nayauj ntawm lub moos Lama.” Ces Xa‑u txawm tawm qhov ntawd mus rau hauv Nayauj ntawm lub moos Lama. Mas Vajtswv tus Ntsuj Plig los kav tag nrho nws lub siab, nws txawm cev Vajtswv lus taug kev mus txog Nayauj ntawm lub moos Lama. Nws hle nws tej ris tsho tseg thiab cev Vajtswv lus rau ntawm Xamuyee xubntiag thiab pw liab qab ib hnub ib hmos qhov ntawd. Vim li no luag thiaj hais tias, “Xa‑u yog ib tug xibhwb cev Vajtswv lus thiab lov?” Davi txawm khiav hauv Nayauj ntawm lub moos Lama los cuag Yaunathas hais tias, “Kuv tau ua li cas? Kuv tau ua txhaum dabtsi? Kuv tau ua txhaum muaj txim li cas rau koj txiv es nws yuav nrhiav txov kuv txojsia?” Yaunathas teb tias, “Tsis muaj li cas kiag li. Koj yuav tsis tuag kiag li. Kuv txiv tsis ua ib yam loj los me uas nws yuav tsis qhia rau kuv paub. Kuv txiv yuav ua cas zais zaj no tsis qhia rau kuv? Yeej tsis muaj li ntawd.” Tiamsis Davi twv tias, “Koj txiv yeej paub zoo tias, koj txaus siab rau kuv heev mas nws yuav xav tias, ‘Tsis txhob kheev Yaunathas paub zaj no kiag li tsam ces nws ntxhov siab.’ Muaj Yawmsaub uas muaj txojsia nyob pom thiab muaj koj uas muaj txojsia nyob pom, kuv mas tshuav ib qeb xwb ces mus txog qhov tuag.” Yaunathas thiaj hais rau Davi tias, “Koj hais li cas kuv yuav ua raws li ntawd rau koj.” Davi thiaj hais rau Yaunathas tias, “Tagkis yog hnub uas hli xiab, tsis tsim nyog kuv yuav tseg tsis koom noj vajntxwv lub rooj mov. Cia kuv mus tsiv nraim tom teb peb hnub txog hnub peb tsaus ntuj. Yog koj txiv pom tias kuv tsis tuaj, thov koj hais rau nws tias, ‘Davi twb thov kuv tso nws mus rau nws lub moos Npelehee lawm vim yog nws tsev neeg sawvdaws ua kevcai xyeem tsiaj txwm xyoo.’ Yog nws hais tias, ‘Zoo lauj,’ ces kuv uas yog koj tus qhev yuav tau zoo. Tiamsis yog nws chim, koj yuav paub tias nws yeej txiav txim siab ua phem rau kuv. Thov koj hlub es koj ua li no rau kuv uas yog koj tus qhev, rau qhov koj twb nrog kuv cog lus sib raug zoo tab meeg Yawmsaub lawm. Tiamsis yog kuv tau ua txhaum thov koj muab kuv tua pov tseg, ua cas koj tseem coj kuv mus cuag koj txiv?” Yaunathas hais tias, “Thov kom tsis txhob muaj li ntawd kiag li. Yog kuv paub tias kuv txiv txiav txim siab ua phem rau koj, kuv yuav tsis qhia koj lov?” Davi thiaj hais rau Yaunathas tias, “Yog koj txiv teb nyaum kawg leejtwg yuav qhia tau rau kuv?” Yaunathas hais rau Davi tias, “Cia wb mus rau tom teb.” Ob tug txawm mus rau tom teb. Mas Yaunathas hais rau Davi tias, “Muaj Yawmsaub uas yog cov Yixayee tus Vajtswv pom, tagkis lossis nagkis kwvlam lub sijhawm no, thaum kuv twb tshuaj saib kuv txiv lawm, yog nws lub siab zoo rau koj kuv yuav tsis tso neeg tuaj qhia rau koj paub tamsid lov? Tiamsis yog kuv txiv npaj siab ua phem rau koj, mas yog kuv tsis qhia rau koj thiab tsis xa koj mus kom tso siab plhuav, thov Yawmsaub ua ib yam li ntawd thiab hnyav dua rau kuv. Thov Yawmsaub nrog nraim koj yam li uas nws nrog nraim kuv txiv. Yog kuv tseem muaj txojsia nyob ntxiv mus thov koj hlub kuv ruaj khov ib yam li Yawmsaub txojkev hlub, xwv kuv thiaj tsis tuag. Thaum Yawmsaub rhuav tshem Davi cov yeeb ncuab tag nrho huvsi hauv qab ntuj lawm, thov tsis txhob txiav koj txojkev hlub uas ruaj khov ntawm kuv caj ces mus ib txhis.” Yaunathas thiaj nrog Davi caj ces cog lus sib raug zoo, hais tias “Thov Yawmsaub ua pauj rau Davi cov yeeb ncuab.” Thiab Yaunathas rov kom Davi cog lus dua ib zaug rau nws vim yog ob tug muaj kev sib hlub, rau qhov Yaunathas hlub Davi ib yam li nws hlub nws tus kheej. Ces Yaunathas txawm hais rau Davi tias, “Tagkis yog hnub hli xiab, lawv yuav pom tias koj tsis nyob koj lub rooj. Mas nagkis koj cia li mus rau nram lub chaw uas koj txeev nraim cev rau hnub uas pib muaj tej xwm txheej no, thiab nyob ntawm lub pob zeb Exees tos. Kuv yuav tua peb xub hneev rau ib sab ntawd ib yam li kuv tua phiaj. Kuv yuav txib ib tug metub hais tias, ‘Cia li mus nrhiav rab xub.’ Yog kuv hais rau tus metub ntawd tias, ‘Saib nawj, rab xub nyob sab tom no, cia li muab los,’ ces koj cia li rov los, rau qhov muaj Yawmsaub uas muaj txojsia nyob pom, koj kuj nyob tso siab plhuav, tsis muaj xwm txheej phem dabtsi. Tiamsis yog kuv hais rau tus metub ntawd tias, ‘Saib nawj, rab xub nyob tom koj hauv ntej ub,’ ces koj cia li khiav mus rau qhov Yawmsaub yog tus xa koj mus lawm. Qhov uas koj thiab kuv tau hais cia ntawd, mas muaj Yawmsaub ua timkhawv rau kuv thiab koj mus ib txhis.” Davi thiaj tsiv nraim tom teb. Thaum txog hnub hli xiab vajntxwv los nyob ntawm rooj mov. Vajntxwv nyob saum nws lub rooj uas npuas ntawm ib sab phab ntsa ib yam li nws txeev nyob. Yaunathas sawv ntsug thiab Anaw nyob ntawm Xa‑u ib sab. Tiamsis Davi lub rooj tsis muaj leejtwg nyob. Tiamsis hnub ntawd Xa‑u tsis hais dabtsi li, rau qhov nws xav tias, “Ntshai yog Davi khuam cheem tej yam lawm. Nws tsis dawb huv, nws yeej tsis dawb huv kab.” Tiamsis hnub tom qab uas hli xiab ob Davi lub rooj kuj tsis muaj leejtwg nyob. Ces Xa‑u txawm hais rau nws tus tub Yaunathas tias, “Ua cas nag thiab hnub no Yexi tus tub tsis tuaj noj mov?” Yaunathas txawm teb Xa‑u tias, “Davi thov thov kuv tso cai rau nws rov mus rau lub moos Npelehee. Nws hais tias, ‘Thov tso kuv mus, rau qhov kuv tsev neeg yuav ua kevcai xyeem tsiaj rau hauv lub moos, mas kuv tus tijlaug hais kom kuv mus nrog lawv koom kom tau. Yog koj txaus siab rau kuv thov tso kuv mus saib kuv cov tijlaug.’ Yog li ntawd nws thiaj tsis tau tuaj rau ntawm vajntxwv lub rooj mov no.” Ces Xa‑u txawm npau taws rau Yaunathas thiab hais rau nws tias, “Koj yog niag pojniam uas fav xeeb siab phem li tub, kuv tsis paub lov? Koj twb xaiv Yexi tus tub los rhuav koj ntsej muag thiab ua rau koj niam uas yug koj raug txaj muag. Thaum twg Yexi tus tub tseem muaj txojsia nyob hauv lub ntiajteb, ces koj thiab koj caj ces yuav tsis raug tsa ua vajntxwv nyob ruaj li. Vim li no cia li tso neeg mus coj nws tuaj cuag kuv, nws yeej yuav tuag xwb.” Mas Yaunathas teb nws txiv Xa‑u tias, “Ua cas Davi yuav tsum raug muab tua tuag? Nws tau ua li cas lawm?” Xa‑u txawm tib nkaug hmuv rau Yaunathas xav tua nws. Yog li ntawd Yaunathas thiaj paub tias nws txiv txiav txim siab tua Davi pov tseg lawm. Yaunathas thiaj sawv tsees ntawm rooj mov chim tsawv, thiab nws tsis noj dabtsi kiag li rau hnub xiab ob ntawd, rau qhov nws txhawj txog Davi vim nws txiv tau rhuav Davi ntsej muag. Thaum kaj ntug Yaunathas thiaj mus rau tom teb raws li teem rau Davi lawd, muaj ib tug metub nrog nws mus thiab. Nws hais rau tus metub ntawd tias, “Cia li dhia mus nrhiav rab xub uas kuv tua mus.” Thaum tus metub ntawd dhia mus lawd Yaunathas tua ib rab xub dhau rau tom nws hauv ntej. Thaum tus metub ntawd mus txog ntawm rab xub uas Yaunathas tua ntawd, Yaunathas qw rau tus metub hais tias, “Rab xub nyob dhau tom koj hauv ntej ub los tsis yog?” Thiab Yaunathas qw rau tus metub ntawd tias, “Cia li kavtsij, maj nroos mus tsis txhob tos.” Tus metub txawm khaws cov xub thiab rov los rau ntawm Yaunathas. Tus metub ntawd tsis paub dabtsi li tsuas yog Yaunathas thiab Davi paub xwb. Ces Yaunathas txawm muab nws tej cuab yeej rau tus metub ntawd thiab hais rau nws tias, “Cia li coj tej no mus rau hauv lub nroog.” Thaum tus metub ntawd mus lawm, Davi txawm tawm ntawm lub pob zeb sab nrad los khwb nkaus rau hauv av pe peb zaug. Ces ob tug sib nwj thiab quaj. Davi quaj heev kawg nkaus. Yaunathas hais rau Davi tias, “Cia li mus zoo rau qhov wb twb tuav Yawmsaub lub npe cog lus twv hais tias, Yawmsaub yuav ua timkhawv rau kuv thiab koj, thiab rau kuv caj ces thiab koj caj ces mus ib txhis.” Davi txawm sawv kev mus lawm. Yaunathas rov mus rau hauv lub nroog. Ces Davi txawm mus txog tus pov thawj Ahimelej hauv lub moos Nau. Mas Ahimelej tawm tuaj tos Davi ua tshee hnyo hais tias, “Ua cas koj yuav tib leeg tuaj xwb, tsis muaj leejtwg nrog koj tuaj?” Davi hais rau tus pov thawj Ahimelej tias, “Vajntxwv txib kuv tuaj ua ib yam haujlwm. Nws hais rau kuv tias, ‘Tsis txhob qhia zaj uas kuv txib koj mus ua ntawd thiab tej uas kuv muab cob rau koj lawd rau leejtwg paub li.’ Kuv twb teem cov tub hluas ntsib kuv dua rau ib qho chaw lawm. Nimno koj muaj dabtsi ntawm tes? Thov muab tsib lub ncuav lossis ib yam dabtsi uas koj muaj ntawm no rau kuv noj.” Tus pov thawj teb Davi tias, “Kuv tsis muaj cov ncuav uas niaj hnub noj, tsuas yog cov ncuav uas dawb huv xwb. Yuav yog koj cov hluas tsis nrog pojniam pw thiaj noj tau.” Davi teb tus pov thawj tias, “Qhov tseeb txhua zaus uas kuv tawm mus ua haujlwm tej pojniam yeej nyob deb ntawm peb. Txawm yog peb tawm mus ua tej haujlwm tsis tseem ceeb los tej tub hluas lub cev yeej dawb huv lawm. Mas hnub no lawv lub cev yimhuab dawb huv.” Yog li ntawd tus pov thawj thiaj muab cov ncuav dawb huv rau Davi, vim yog qhov ntawd tsis muaj lwm yam ncuav, tsuas yog cov ncuav uas xyeem txawb rau ntawm Yawmsaub lub xubntiag xwb, yog cov uas nyuam qhuav khaws ntawm Yawmsaub xubntiag los es yuav muab cov tshiab txawb rau tib hnub ntawd. Hnub ntawd muaj ib tug yawg yog Xa‑u li ib tug qhev nyob qhov ntawd, nws tuaj ua nug rau Yawmsaub. Nws npe hu ua Dau‑e, yog neeg Edoo, yog tus thawj uas yug Xa‑u pab yaj. Thiab Davi hais rau Ahimelej tias, “Koj muaj ib rab ntaj lossis hmuv ntawm koj txhais tes los tsis muaj? Rau qhov kuv tsis coj kuv rab ntaj lossis tej cuab yeej tuaj kiag li vim vajntxwv tej haujlwm yog haujlwm ceev.” Tus pov thawj hais tias, “Kaulia uas yog neeg Filixatee uas koj tua hauv lub hav Ela ntawd rab ntaj nyob ntawm no, tseem qhwv ntaub nrees nyob ntawm lub efauj sab nraud. Yog koj cheem tsum rab ntaj ntawd kuj coj mus, tsuas yog muaj tib rab ntaj ntawd xwb.” Mas Davi hais tias, “Tsis muaj ib rab ntaj zoo li rab no lawm. Thov muab rau kuv lauj.” Ces hnub ntawd Davi txawm sawv kev khiav Xa‑u mus cuag vajntxwv Akhij hauv lub moos Ka. Mas Akhij cov tub teg tub taws hais tias, “Tus yawg no tsis yog Davi uas ua vajntxwv kav lub tebchaws ntawd lov? Lawv tsis tau mus tos hu nkauj seev cev hais tias, ‘Xa‑u tua tau qas txhiab leej, Davi tua tau qas vam leej,’ lov?” Davi kuj khaws tej lus no rau hauv nws lub siab thiab ntshai vajntxwv Akhij hauv lub moos Ka kawg li. Nws thiaj txhob txwm ua ib tug niag tsis thooj li qub rau lawv pom, nws ua txuj ua ib tug neeg vwm. Nws lam sau kis kaj kis kua rau ntawm tej rooj loog, thiab ua qaub ncaug nrog zwg ntawm tej hwj txwv. Ces Akhij thiaj hais rau nws cov tub teg tub taws tias, “Saib maj, nej twb pom tias tus yawg no vwm, nej tseem coj nws tuaj cuag kuv ua dabtsi? Kuv tsis muaj neeg vwm lov es nej tseem yuav coj tus yawg no tuaj vwm rau ntawm kuv xubntiag? Tsim nyog tus yawg no tuaj rau hauv kuv lub vaj lub tsev lov?” Davi kuj khiav qhov ntawd mus nyob hauv lub qhov tsua Adulas. Thaum nws cov tijlaug thiab nws txiv tsev neeg sawvdaws tau hnov tej xov ntawd lawv kuj mus cuag nws qhov ntawd. Txhua tus uas raug kev txom nyem thiab txhua tus uas tshuav nuj tshuav nqe thiab txhua tus uas tsis txaus siab kuj sau zog tuaj nrog nws nyob. Nws ua lawv tus thawj. Muaj neeg tuaj nrog nws nyob kwvlam plaub puas leej. Davi kuj tawm qhov ntawd mus rau lub moos Mixape hauv Mau‑a tebchaws. Nws hais rau Mau‑a tus vajntxwv tias, “Thov cia kuv niam kuv txiv nrog koj nyob mus txog thaum kuv paub tias Vajtswv yuav ua li cas rau kuv.” Ces nws txawm tseg nws niam nws txiv nrog Mau‑a tus vajntxwv nyob mas ob tug nrog vajntxwv nyob mus tag sijhawm uas Davi nyob hauv lub chaw ruaj khov. Mas Kab uas yog xibhwb cev Vajtswv lus hais rau Davi tias, “Koj tsis txhob nyob hauv qhov chaw ruaj khov no koj cia li mus rau hauv Yuda tebchaws.” Davi thiaj tawm mus nyob lub hav zoov Helej. Xa‑u hnov tias muaj neeg pom Davi thiab cov neeg uas nrog Davi ua ke. Thaum ntawd Xa‑u zaum hauv lub moos Kinpe‑a hauv tsob qab ntoo tamalis saum lub pov roob tuav rawv rab hmuv, nws cov tub teg tub taws sawvdaws sawv vij vog nws. Xa‑u hais rau cov tub teg tub taws uas sawv vij vog nws tias, “Nej cov neeg Npeeyamee cia li mloog kuv hais. Yexi tus tub yuav muab teb thiab vaj txiv hmab rau nej txhua tus lov? Nws yuav tsa nej txhua tus ua thawj kav ib txhiab leej ib puas leej lov, nej sawvdaws txawm xav fav xeeb rau kuv? Thaum kuv tus tub nrog Yexi tus tub cog lus sib raug zoo ntawd tsis muaj leejtwg yuav qhia rau kuv paub li. Nej cov tsis muaj ib tug yuav hlub kuv li, thiab tsis qhia rau kuv paub tias kuv tus tub tshum kuv tus qhev tawm tsam kuv, tos nrhw kuv kev yam li niaj hnub nimno.” Dau‑e uas yog neeg Edoo uas sawv ze Xa‑u cov tub teg tub taws thiaj teb tias, “Kuv pom Yexi tus tub tuaj rau ntawm lub moos Nau tuaj cuag Ahithu tus tub Ahimelej, mas Ahimelej nug Yawmsaub rau nws thiab pub mov rau nws noj thiab pub Kaulia uas yog neeg Filixatee rab ntaj rau nws lawm.” Mas vajntxwv txawm tso neeg mus hu pov thawj Ahimelej uas yog Ahithu tus tub thiab nws txiv tsev neeg sawvdaws uas ua pov thawj hauv lub moos Nau kom tuaj, mas sawvdaws thiaj tuaj cuag vajntxwv. Mas Xa‑u hais tias, “Ahithu tus tub cia li mloog kuv hais.” Nws teb tias, “Kuv tus tswv kuv nyob ntawm no 'os.” Mas Xa‑u hais rau nws tias, “Ua cas koj yuav nrog Yexi tus tub fav xeeb rau kuv, rau qhov uas koj muab mov thiab ntaj rau nws thiab nug Vajtswv rau nws, mas nws thiaj tawm tsam kuv tos nrhw kuv yam li niaj hnub nimno.” Mas Ahimelej teb vajntxwv tias, “Tag nrho koj cov tub teg tub taws xwv nim muaj ib tug twg yuav npuab koj yam li koj tus vauv Davi uas ua thawj kav cov tub rog uas tsom kwm koj thiab muaj meej hauv koj vaj koj tsev. Hnub no yog thawj zaug uas kuv thov nug Yawmsaub rau nws lov? Tsis yog. Thov vajntxwv tsis txhob muab ib yam dabtsi los rau txim rau kuv uas yog koj tus qhev lossis rau kuv txiv tsev neeg. Rau qhov koj tus qhev yeej tsis paub zaj no ib nyuag qhov li tsis hais ntau los tsawg.” Vajntxwv hais rau Ahimelej tias, “Koj yuav tuag tiag tiag li, koj thiab koj txiv tsev neeg sawvdaws yuav tuag xwb.” Mas vajntxwv hais rau cov tub rog uas sawv vij vog nws tias, “Muab Yawmsaub cov pov thawj no tua pov tseg, rau qhov lawv txhais tes nrog Davi nyob, lawv yeej paub tias Davi khiav lawm uas lawv tsis qhia rau kuv paub.” Tiamsis cov tub teg tub taws tsis kam nqes tes tua Yawmsaub cov pov thawj Mas vajntxiv thiaj hais rau Dau‑e tias, “Koj cia li nqes tes tua cov pov thawj.” Mas Dau‑e uas yog neeg Edoo thiaj mus tua cov pov thawj mas hnub ntawd nws tua cov uas hnav lub tsho efauj ntaub mag yim caum tsib leeg. Nws xuas ntaj tua lub moos Nau uas yog cov pov thawj lub moos, tsis hais pojniam txivneej thiab tej menyuam yaus thiab menyuam uas noj mis thiab tej nyuj tej nees luav thiab tej yaj huvsi. Tiamsis Ahimelej ib tug tub uas yog Ahithu xeeb ntxwv hu ua Anpiyatha khiav dim thiab raws Davi qab mus. Mas Anpiyatha hais rau Davi tias, “Xa‑u muab Yawmsaub cov pov thawj tua tag lawm.” Davi hais rau Anpiyatha tias, “Hnub ntawd thaum Dau‑e uas yog neeg Edoo nyob qhov ntawd kuv yeej paub tias nws yuav qhia rau Xa‑u xwb xwb li. Yog tim kuv mas koj txiv tsev neeg sawvdaws thiaj li tuag. Cia li nrog kuv nyob tsis txhob ntshai li rau qhov yog tus uas xav tua koj los kuj xav tua kuv thiab. Koj cia li nrog kuv nyob thiaj li tso siab plhuav.” Lawv hais rau Davi tias, “Saib maj, cov Filixatee tabtom ua rog rau lub moos Khe‑ila thiab lws tej qoob loo uas ntaus tag rau hauv tshav lawm.” Davi txawm nug Yawmsaub tias, “Kuv yuav mus ntaus cov Filixatee ntawd los tsis mus?” Yawmsaub hais rau Davi tias, “Cia li mus ntaus cov Filixatee ntawd thiab pab cawm lub moos Khe‑ila kom dim.” Tiamsis Davi cov neeg hais rau Davi tias, “Peb nyob hauv Yuda no peb twb ntshai kawg li lawm. Yog peb tseem mus rau Khe‑ila es ua rog rau Filixatee cov tub rog thiab, mas peb yuav yimhuab ntshai heev kaj.” Ces Davi thiaj rov nug Yawmsaub dua mas Yawmsaub teb nws tias, “Cia li sawv tsees mus lawm nram Khe‑ila ntag, rau qhov kuv yuav muab cov Filixatee rau hauv koj txhais tes.” Mas Davi thiab nws cov neeg thiaj li mus nram Khe‑ila, mus ua rog rau cov Filixatee, txeeb lawv tej tsiaj txhu rov los thiab tua cov Filixatee tuag coob kawg li. Ua li no Davi thiaj pab tau cov neeg Khe‑ila dim. Mas thaum uas Ahimelej tus tub Anpiyatha khiav mus cuag Davi hauv lub moos Khe‑ila ntawd, nws nqa lub efauj mus thiab. Muaj neeg mus hais rau Xa‑u tias Davi tuaj rau ntawm Khe‑ila lawm, mas Xa‑u txawm hais tias, “Vajtswv muab nws rau hauv kuv txhais tes lawm, rau qhov nws twb nkag mus rau hauv lub moos uas muaj rooj loog thiab muaj las rooj kaw huvsi, kuj yog nws muab nws kaw cia rau hauv.” Xa‑u thiaj hu tag nrho nws cov tub rog tuaj mus ua rog, kom lawv mus nram Khe‑ila mus vij puav Davi thiab nws cov neeg. Davi paub tias Xa‑u ntaus tswvyim phem rau nws, nws thiaj hais rau pov thawj Anpiyatha tias, “Coj lub efauj los ntawm no.” Davi thiaj hais tias, “Au Yawmsaub uas yog cov Yixayee tus Vajtswv, kuv uas yog koj tub qhe tau hnov tseeb tias Xa‑u nrhiav kev tuaj rau Khe‑ila ua kom lub moos no puam tsuaj vim yog tim kuv. Mas cov neeg Khe‑ila yuav muab kuv cob rau hauv Xa‑u txhais tes lov? Xa‑u yuav tuaj raws li uas kuv uas yog koj tus tub qhe tau hnov lov? Au Yawmsaub uas yog cov Yixayee tus Vajtswv, thov koj hais rau kuv uas yog koj tus tub qhe paub lauj.” Mas Yawmsaub hais tias, “Nws yuav tuaj tiag.” Davi thiaj hais tias, “Cov neeg Khe‑ila yuav muab kuv thiab kuv cov neeg cob rau hauv Xa‑u txhais tes lov?” Mas Yawmsaub hais tias, “Lawv yuav muab nej cob rau tiag.” Mas Davi thiab nws cov neeg muaj kwvlam rau pua leej thiaj sawv tsees khiav tawm hauv Khe‑ila lawm lawv kuj mus li uas lawv mus tau. Thaum muaj neeg mus hais rau Xa‑u tias Davi twb khiav tawm hauv Khe‑ila lawm, Xa‑u kuj tseg tsis mus lawm. Davi nyob rau hauv tebchaws moj sab qhua hauv tej qhov chaw uas ruaj khov pem toj siab hauv tebchaws moj sab qhua Xi. Mas Xa‑u niaj hnub nrhiav Davi tiamsis Vajtswv tsis muab Davi rau hauv Xa‑u txhais tes. Thaum Davi pom tias Xa‑u tawm tuaj nrhiav txov nws txojsia, nws nyob hauv tebchaws moj sab qhua Xi ntawm Haulej. Mas Xa‑u tus tub Yaunathas sawv tsees mus cuag Davi ntawm Haulej thiab txhawb nws lub zog kom muaj zog rau hauv Vajtswv. Nws hais rau Davi tias, “Tsis txhob ntshai, kuv txiv Xa‑u txhais tes yuav ua tsis tau li cas rau koj. Koj yuav tau ua vajntxwv kav cov Yixayee, kuv yuav ua koj tus tim xyoob. Kuv txiv Xa‑u yeej paub li no lawm.” Yaunathas thiab Davi ob tug thiaj cog lus sib raug zoo tab meeg Yawmsaub. Davi tseem nyob ntawm Haulej, Yaunathas rov qab mus tsev. Cov neeg Xi mus hais rau Xa‑u ntawm Kinpe‑a tias, “Davi tsiv nraim rau hauv peb nruab nrab mus nyob hauv lub chaw ruaj khov ntawm Haulej, saum lub ncov roob Hakhila uas nyob nram qab moos Yesimoo los maj. Au vajntxwv, cia li tuaj raws li koj siab xav ces peb cov yuav muab nws cob rau hauv koj txhais tes ntag.” Mas Xa‑u hais tias, “Thov Yawmsaub foom koob hmoov rau nej rau qhov nej khuvleej kuv. Cia li mus tshuaj saib zoo zoo kom paub tias nws nyob qhov twg thiab leejtwg pom nws qhov ntawd, rau qhov muaj neeg hais rau kuv tias nws ntse heev. Vim li no ua tib zoo mus tshuaj saib txhua qhov uas nws nkaum li rov qab los qhia tseeb tseeb rau kuv. Mas kuv li nrog nej mus. Yog nws tseem nyob hauv lub tebchaws kuv yuav tshawb nrhiav nws hauv txhua cum Yuda.” Lawv thiaj sawv kev ua Xa‑u ntej mus rau nram Xi. Davi thiab nws cov neeg nyob hauv tebchaws moj sab qhua Ma‑oo uas nyob hauv Alanpa nram qab moos Yesimoo. Xa‑u thiab nws cov tub rog kuj mus nrhiav Davi. Muaj neeg qhia rau Davi, mas Davi thiaj khiav mus rau nram lub pob tsuas thiab nyob hauv tebchaws moj sab qhua Ma‑oo. Thaum Xa‑u hnov li ntawd nws thiaj caum Davi qab rau hauv tebchaws moj sab qhua Ma‑oo. Xa‑u mus txog ib sab roob, Davi thiab nws cov neeg mus dua rau ib sab roob. Davi kuj maj nroos khiav Xa‑u rau qhov Xa‑u thiab nws cov tub rog tuaj ze Davi thiab nws cov neeg lawm yuav ntes nws. Tiamsis muaj ib tug xa xov tuaj hais rau Xa‑u tias, “Cia li leej maj rov qab vim yog cov Filixatee txhij rog tuaj lws lub tebchaws lawm.” Xa‑u thiaj tseg tsis caum Davi rov qab mus ua rog rau cov Filixatee. Lawv thiaj hu qhov chaw ntawd hais tias Roob Zeb Ncaim Kev. Mas Davi thiaj tawm qhov ntawd mus nyob tej chaw ruaj khov hauv Eekedi. Thaum Xa‑u mus caum cov Filixatee rov qab los, muaj neeg hais rau nws tias, “Davi nyob hauv tebchaws moj sab qhua Eekedi.” Ces Xa‑u txawm xaiv peb txhiab leej tub rog hauv cov Yixayee sawvdaws coj mus nrhiav Davi thiab nws cov neeg rau ntawm Roob Tsuas Sai. Xa‑u tuaj txog ib lub nkuaj yaj ntawm ntug kev. Muaj ib lub qhov tsua nyob qhov ntawd ces Xa‑u txawm mus tawm rooj rau hauv. Davi thiab nws cov neeg kuj nyob hauv lub qhov tsua ntawd tom qhov kawg nkaus. Davi cov neeg hais rau Davi tias, “Hnub no yog hnub uas Yawmsaub hais rau koj tias, ‘Kuv muab koj tus yeeb ncuab cob rau hauv koj txhais tes, mas koj yuav ua rau nws raws li koj pom zoo.’ ” Mas Davi sawv nyas twjywm mus txiav Xa‑u lub qab tsho. Dhau ntawd Davi kuj tu siab rau qhov uas nws txiav Xa‑u lub qab tsho. Davi thiaj hais rau nws cov neeg tias, “Thov Yawmsaub tav tsis txhob kheev kuv tsa tes tawm tsam li no rau kuv tus tswv uas Yawmsaub tsa cia lawd, rau qhov nws yog tus uas Yawmsaub hliv roj tsa cia.” Davi kuj hais tej lus no cheem nws cov neeg, nws tsis kheev lawv ntaus Xa‑u. Xa‑u kuj sawv tsees tawm hauv qhov tsua taug kev mus lawm. Dhau ntawd Davi kuj sawv tsees tawm hauv qhov tsua mus thiab hu rau Xa‑u tias, “Au vajntxwv uas yog kuv tus tswv.” Thaum Xa‑u tig los ntsia, Davi txawm khoov ntshis rau hauv cov av pe. Davi hais rau Xa‑u tias, “Ua cas koj yuav mloog tej lus uas cov neeg hais tias, ‘Davi nrhiav kev yuav txov koj’? Saib maj, hnub no koj qhov muag twb pom tseeb lawm tias Yawmsaub muab koj cob rau hauv kuv txhais tes hauv lub qhov tsua no. Muaj qee leej hais kom kuv muab koj tua pov tseg, tiamsis kuv tseg koj txojsia cia. Kuv hais tias, ‘Kuv yuav tsis tsa tes tawm tsam kuv tus tswv, rau qhov nws yog tus uas Yawmsaub hliv roj tsa cia lawm.’ Kuv txiv, koj cia li saib koj lub qab tsho uas nyob hauv kuv txhais tes no. Qhov uas kuv txiav koj lub qab tsho tiamsis kuv tsis tua koj, mas koj cia li paub thiab pom tias kuv txhais tes tsis tau ua txhaum thiab tsis fav xeeb rau koj. Txawm yog koj caum kuv yuav txov kuv txojsia los kuv tsis tau ua txhaum rau koj. Thov Yawmsaub txiav txim rau kuv thiab koj saib leejtwg txhaum. Qhov uas koj ua txhaum rau kuv, thov Yawmsaub ua pauj rau koj. Kuv txhais tes yuav tsis ua ib yam dabtsi rau koj. Ib yam li tej poj koob yawm txwv hais paj lug tias, ‘Kev phem yeej tawm hauv neeg phem los,’ tiamsis kuv txhais tes yuav tsis ua ib yam dabtsi rau koj. Cov Yixayee tus vajntxwv tawm tuaj caum leejtwg? Koj tuaj caum leejtwg? Caum tus dev uas tuag lawd, caum tus dev mub xwb. Vim li no thov Yawmsaub tu plaub thiab txiav txim rau kuv thiab koj. Thov nws tshuaj saib thiab hais kuv tshaj plaub thiab cawm kuv dim hauv koj txhais tes.” Thaum Davi hais tej lus no rau Xa‑u tag lawd, Xa‑u hais tias, “Kuv tus tub Davi 'e, ntawm kod yog koj lub suab tiag lov?” Xa‑u txawm tsa suab hlo quaj. Nws hais rau Davi tias, “Koj ua ncaj dua kuv, vim koj ua qhov zoo pauj kuv, tiamsis kuv ua qhov phem pauj koj. Koj twb piav hnub no hais tias koj ua zoo li cas rau kuv, koj tsis tua kuv txojsia rau thaum Yawmsaub muab kuv cob rau hauv koj txhais tes. Yog leejtwg ntsib nws tus yeeb ncuab, nws yuav tso tus yeeb ncuab dim dawb tso siab plhuav lov? Yog li no thov Yawmsaub ua zoo rau koj pauj qhov uas hnub no koj tau ua zoo rau kuv. Nimno kuv paub tseeb tias koj yuav tau ua vajntxwv tiag tiag li thiab cov Yixayee lub tebchaws yuav raug muab rau hauv koj txhais tes kav mus li. Yog li no cia li tuav Yawmsaub lub npe cog lus twv rau kuv tias thaum kuv tuag lawd koj yuav tsis txiav kuv caj ces pov tseg thiab koj yuav tsis rhuav kuv lub npe kom ploj hauv kuv txiv caj ces.” Davi kuj cog lus twv rau Xa‑u li ntawd ces Xa‑u txawm rov mus tsev, tiamsis Davi thiab nws cov neeg nce mus rau hauv lub chaw ruaj khov. Ces Xamuyee txawm tuag. Cov Yixayee sawvdaws tuaj ua ke quaj ntsuag thiab muab nws log ntawm nws lub tsev hauv lub moos Lama. Davi txawm sawv kev mus rau nram tebchaws moj sab qhua Palas. Muaj ib tug yawg nyob hauv lub moos Ma‑oo muaj haujlwm ntawm lub moos Khamee. Tus yawg ntawd nplua nuj heev, nws muaj peb txhiab tus yaj thiab ib txhiab tus tshis. Nws tabtom txiav plaub yaj hauv Khamee. Tus yawg ntawd npe hu ua Nanpas, nws tus pojniam hu ua Anpikayi. Tus pojniam ntawd ntse heev thiab zoo nkauj, tiamsis tus txiv ntawd mas tsiv ncauj tsiv lus thiab cuaj khaum. Nws yog Khalej caj ces. Davi nyob hauv tebchaws moj sab qhua hnov tias Nanpas tabtom txiav plaub yaj. Davi thiaj txib kaum tus tub hluas thiab hais rau cov hluas ntawd tias, “Cia li mus rau hauv lub moos Khamee mus cuag Nanpas thiab coj kuv li lus mus hais rau nws. Nej cia li hais tej lus no rau nws tias, ‘Koj thiab koj tsev neeg tsuas muaj uas noj qab nyob zoo, txhua yam uas yog koj li tsuas muaj uas noj qab nyob zoo. Kuv hnov tias koj muaj neeg txiav plaub yaj. Koj cov neeg txiav plaub yaj nrog peb nyob, thiab peb tsis tau ua phem rau lawv li thiab lawv tsis tu ncua ib yam dabtsi rau thaum lawv nyob hauv Khamee. Koj nug koj cov hluas ntawd, lawv yuav qhia rau koj. Vim li no thov koj hlub kuv cov hluas rau qhov peb tuaj rau hnub uas pam noj pam haus. Thov koj pub tej uas koj muaj ntawm tes rau peb uas yog koj cov tub qhe thiab pub rau koj tus tub Davi.’ ” Thaum Davi cov tub hluas tuaj txog lawv kuj hais Davi cov lus ntawd rau Nanpas, ces lawv txawm nyob tos. Nanpas teb Davi cov hluas tias, “Davi yog leejtwg? Yexi tus tub yog leejtwg? Ntu no tej qhev khiav ntawm lawv tus lospav coob heev. Tsim nyog kuv yuav muab kuv tej ncuav tej dej thiab tej nqaij uas kuv tua rau kuv cov neeg txiav plaub yaj noj pub rau cov neeg uas tuaj qhovtwg tuaj kuv tsis paub lov?” Davi cov tub hluas txawm tig kiag rov los thiab piav tej ntawd huvsi rau Davi. Davi thiaj hais rau nws cov neeg tias, “Txhua tus cia li ris ntaj ntawm duav.” Ces txhua tus txawm ris ntaj. Davi kuj ris ntaj thiab. Muaj neeg nrog Davi mus kwvlam plaub puas leej, tseg ob puas leej zov tej nra. Muaj ib tug tub hluas mus hais rau Anpikayi uas yog Nanpas tus pojniam tias, “Saib nawj, Davi tso neeg xa xov hauv tebchaws moj sab qhua tuaj hais lus zoo rau peb tus lospav, tiamsis nws ua nyaum heev rau lawv. Cov neeg ntawd txeev ua zoo rau peb ntau heev. Peb tsis raug xwm txheej phem dabtsi li thiab peb tsis tu ncua ib yam dabtsi rau thaum peb nrog lawv nyob hauv tshav zaub. Lawv zoo yam nkaus li lub ntsa loog thaiv peb nruab hnub hmo ntuj tag txhua lub sijhawm uas peb nrog lawv nyob yug yaj. Nimno thov koj paub zaj no thiab xav saib koj yuav tsum ua li cas, rau qhov lawv yeej txiav txim siab yuav ua nruj ua tsiv rau peb tus lospav lawm thiab ua rau nws tsev neeg huvsi lawm. Peb tus lospav yog neeg tsiv ncauj tsiv lus leejtwg hais tsis tau li.” Ces Anpikayi txawm maj nroos muab ob puas lub ncuav thiab ob lub hnab tawv cawv txiv hmab thiab tsib tug yaj li nqaij uas npaj tau lawd thiab tsib xe‑a qeb kib thiab ib puas rev txiv hmab qhuav thiab ob puas daim ncuav txiv cev rau nees luav thauj. Nws hais rau nws cov tub qhe tias, “Cia li ua ntej mus kuv yuav raws nej qab.” Tiamsis nws tsis qhia rau nws tus txiv Nanpas paub. Thaum nws caij nees luav tuaj muaj ib lub roob thaiv lawm, Davi thiab nws cov neeg kuj taug kev tuaj mas Anpikayi ntsib nthav lawv. Davi twb hais cia lawm tias, “Kuv twb zov tus yawg ntawd txhua yam hauv tebchaws moj sab qhua dawb dawb xwb. Nws tej qhov txhia chaw tsis ploj ib yam dabtsi li, los nws tseem ua phem pauj kuv tej kev zoo. Yog tagkis sawv ntxov kuv tseem tseg nws cov neeg ib tug txivneej ciaj sia, kuj thov Vajtswv ua ib yam li ntawd thiab hnyav dua rau kuv.” Thaum Anpikayi pom dheev Davi, nws nqes plhuav saum nees luav los thiab pe khwb ti nkaus av rau ntawm Davi xubntiag. Nws pe ntawm Davi kotaw thiab hais tias, “Yawg hlob, lub txim no cia kuv ib leeg ris. Thov cia koj tus nkauj qhev piav rau koj mloog, thov koj mloog kuv uas yog koj tus nkauj qhev tej lus. Thov koj uas yog kuv tus tswv tsis txhob quav ntsej Nanpas uas tsiv ncauj tsiv lus ntawd. Nws phim nkaus nws lub npe uas hu ua Nanpas nws thiaj li ruam. Tiamsis kuv uas yog koj tus nkauj qhev tsis pom cov tub hluas uas koj txib tuaj ntawd. “Vim li no, yawg hlob, muaj Yawmsaub uas muaj txojsia nyob pom thiab muaj koj uas muaj txojsia nyob pom, Yawmsaub tswj tsis kheev koj ua txhaum uas tsa koj txhais tes ua pauj, ua rau lwm tus los ntshav, vim li no thov cia koj cov yeeb ncuab thiab cov uas nrhiav kev ua phem rau koj raug ib yam li Nanpas. Tej uas koj tus qhev coj tuaj pub rau koj uas yog kuv tus tswv no, thov muab rau cov hluas uas nrog koj ua ke. Thov zam txim rau koj tus qhev lauj. Yawmsaub yeej yuav ua kuv tus tswv caj ces kom nyob ruaj khov vim yog koj ua rog rau Yawmsaub tej yeeb ncuab, mas thaum koj tseem muaj txojsia nyob yuav nrhiav tsis tau ib qho kev txhaum nyob hauv koj. Yog muaj neeg sawv tsees caum txov koj txojsia los koj txojsia yuav raug muab khi nkaus nrog cov uas muaj txojsia nyob ua ke rau Yawmsaub uas yog koj tus Vajtswv tsom kwm. Tiamsis koj cov yeeb ncuab txojsia yuav raug muab laim pov tseg ib yam li lub qe zeb uas raug muab laim tawm hauv txoj hlua fiav. Thaum Yawmsaub ua raws li txhua yam zoo uas nws tau hais cia rau koj lawm thiab tsa koj ua tus thawj kav kiag cov Yixayee, yuav tsis muaj ib yam dabtsi ua rau kuv tus tswv ntxhov siab nyuaj siab rau qhov uas koj tau ua rau tej neeg tsis txhaum los ntshav thiab koj ua pauj koj ib leeg. Thaum Yawmsaub ua zoo rau kuv tus tswv lawd, thov koj nco txog kuv uas yog koj tus nkauj qhev thiab.” Davi thiaj hais rau Anpikayi tias, “Qhuas Yawmsaub uas yog cov Yixayee tus Vajtswv uas txib koj tuaj ntsib kuv hnub no. Thov cia koj txojkev ntse tau hmoov zoo thiab thov kom koj tus kheej tau koob hmoov rau qhov hnub no koj tau tswj tsis kheev kuv ua txhaum uas tsa kuv txhais tes ua pauj kuv ib leeg ua rau lwm tus los ntshav. Muaj Yawmsaub uas yog cov Yixayee tus Vajtswv muaj txojsia nyob pom, nws yog tus uas tswj kuv tsis pub kuv ua phem rau koj. Yog koj tsis tau maj nroos tuaj ntsib kuv, tagkis sawv ntxov yeej yuav tsis tshuav ib tug txivneej rau Nanpas kiag li.” Ces Davi txawm txais txhua yam uas Anpikayi coj tuaj thiab hais rau nws tias, “Cia li rov qab mus zoo rau koj vaj koj tsev lauj. Kuv twb mloog koj tej lus thiab kuv yuav ua raws li uas koj thov kuv.” Anpikayi txawm rov mus rau ntawm Nanpas, ua ciav nws tabtom noj haus loj hauv tsev yam nkaus li tej vajntxwv noj. Nanpas kuj zoo siab heev vim nws qaug cawv heev. Mas Anpikayi tsis hais dabtsi rau nws paub mus txog tagkis kaj ntug. Tagkis sawv ntxov thaum cawv txiv hmab xam tag hauv Nanpas lawm, nws tus pojniam li piav tej xwm txheej ntawd rau nws mloog, ces nws lub plawv cia li tsis ua haujlwm, nws zoo li lub pob zeb lawm. Nyob tau kwvlam kaum hnub Yawmsaub ua rau Nanpas tuag lawm. Thaum Davi hnov tias Nanpas tuag lawm nws txawm hais tias, “Qhuas Yawmsaub uas ua pauj rau qhov uas Nanpas saib tsis taus kuv, thiab tswj tsis kheev kuv ua phem. Yawmsaub pauj qhov uas Nanpas ua phem kom poob rov rau saum nws taubhau.” Ces Davi txawm tso neeg mus hais Anpikayi kom los ua nws li pojniam. Thaum Davi cov tub teg tub taws tuaj txog Anpikayi hauv lub moos Khamee, lawv hais rau nws tias, “Davi txib peb tuaj coj koj mus ua nws pojniam.” Anpikayi txawm sawv tsees khoov ntshis rau hauv av thiab hais tias, “Saib maj, kuv uas yog nej tus nkauj qhev zoo siab ua qhev ntxuav kuv tus tswv tej tub qhe kotaw.” Anpikayi kuj maj nroos sawv tsees caij ib tug nees luav thiab nws tsib tug nkauj qhev nrog Davi cov neeg mus thiaj tau mus ua Davi pojniam. Davi kuj yuav Ahinau‑as uas yog neeg hauv lub moos Yile‑ee thiab. Mas ob tug ua Davi pojniam. Xa‑u muab nws tus ntxhais Mikhas uas yog Davi pojniam qua ib tom rau La‑i tus tub Pati hauv lub moos Kali lawm. Cov neeg hauv lub moos Xi tuaj hais rau Xa‑u hauv lub moos Kinpe‑a tias, “Davi tsiv nraim saum lub roob Hakhila uas ncaj lub moos Yesimoo.” Ces Xa‑u txawm sawv tsees mus rau hauv tebchaws moj sab qhua Xi, thiab tej tub rog uas nws xaiv cia lawd peb txhiab leej nrog nws mus nrhiav Davi hauv tebchaws moj sab qhua Xi. Xa‑u ua yeej rau ntawm ntug kev saum lub roob Hakhila uas ncaj lub moos Yesimoo. Tiamsis Davi nyob hauv tebchaws moj sab qhua. Thaum nws paub tias Xa‑u tuaj nrhiav nws hauv tebchaws moj sab qhua, nws txawm tso neeg mus tshuaj saib thiaj paub tias Xa‑u tuaj lawm tiag. Ces Davi txawm sawv tsees mus rau ntawm lub chaw uas Xa‑u ua yeej nyob, thiab Davi pom lub chaw uas Xa‑u thiab tus thawj rog Anaw uas yog Naw tus tub pw. Xa‑u pw rau hauv plawv yeej thiab nws cov tub rog ua chaw nyob vij ib ncig nws. Mas Davi hais rau Ahimelej uas yog neeg Hithai thiab hais rau Anpisai uas yog Xeluya tus tub thiab yog Yau‑a tus kwv hais tias, “Leejtwg yuav nrog kuv nqes mus rau hauv Xa‑u lub yeej?” Mas Anpisai hais tias, “Kuv yuav nrog koj mus.” Ces hmo ntawd Davi thiab Anpisai txawm mus rau hauv Xa‑u cov tub rog. Ua ciav Xa‑u pw tsaug zog hauv lub plawv yeej, nws rab hmuv rhais rau hauv av ntawm nws taubhau. Anaw thiab cov tub rog pw vij puag ncig Xa‑u. Anpisai hais rau Davi tias, “Hnub no Yawmsaub muab koj tus yeeb ncuab cob rau hauv koj txhais tes lawm. Nimno cia kuv xuas hmuv nkaug ib hmuv teem nkaus rau hauv av xwb tsis txog nkaug ob zaug.” Tiamsis Davi hais rau Anpisai tias, “Tsis txhob txov nws kiag li, rau qhov leejtwg yuav tsa tes tawm tsam tus uas Yawmsaub hliv roj tsa cia lawd es tsis txhaum?” Thiab Davi hais tias, “Muaj Yawmsaub uas muaj txojsia nyob pom, Yawmsaub yeej yuav tua nws, lossis nws yuav tuag vim yog lub caij tuag lossis nws yuav mus ua rog li tuag. Thov Yawmsaub tav tsis txhob kheev kuv tsa tes tawm tsam tus uas Yawmsaub tsa cia lawd. Nimno cia li muab nws rab hmuv ntawm nws taubhau thiab lub taub dej es wb mus.” Davi txawm muab rab hmuv thiab lub taub dej ntawm Xa‑u taubhau ces ob tug txawm mus lawm tsis muaj leejtwg pom tsis muaj leejtwg paub li, tsis muaj ib tug tsim, rau qhov lawv txhua tus tsaug zog heev vim yog Yawmsaub ua rau lawv tuaj dab ntub heev. Ces Davi txawm hla mus rau sab tim ub, mus sawv saum lub ncov roob deb deb, muaj ib lub hav quas. Davi hu nrov nrov rau cov tub rog thiab rau Anaw uas yog Naw tus tub hais tias, “Anaw 'e, koj tsis teb lov?” Anaw teb tias, “Leejtwg hu vajntxwv ne?” Davi teb Anaw tias, “Koj tsis yog txivneej lov? Hauv cov Yixayee leejtwg zoo li koj? Ua cas koj tsis zov vajntxwv uas yog koj tus tswv tib zoo? Rau qhov muaj ib tug nkag mus yuav tua vajntxwv uas yog koj tus tswv. Qhov uas koj ua li no tsis zoo kiag li. Muaj Yawmsaub uas muaj txojsia nyob pom, koj mas tsim nyog tuag lauj vim koj tsis zov koj tus tswv tib zoo, yog tus uas Yawmsaub hliv roj tsa cia. Nimno tshuaj saib vajntxwv rab hmuv thiab lub taub dej ntawm nws taubhau dua twg lawm.” Xa‑u cim tau Davi lub suab nws thiaj hais tias, “Kuv tus tub Davi 'e, no yog koj lub suab ntag lov?” Davi teb tias, “Au vajntxwv uas yog kuv tus tswv, yog kuv lub suab ntag lauj.” Thiab nws hais tias, “Ua cas kuv tus tswv yuav caum kuv uas yog koj tus qhev? Kuv tau ua li cas? Kuv txhais tes tau ua txhaum dabtsi? Nimno thov vajntxwv uas yog kuv tus tswv mloog kuv uas yog koj tus qhev tej lus. Yog Yawmsaub tshum koj lub siab ua kom koj tawm tsam kuv, thov cia Yawmsaub txais yuav tej qhov txhia chaw uas muab xyeem. Tiamsis yog neeg tshum koj no ces thov cia lawv raug foom tsis zoo rau ntawm Yawmsaub xubntiag. Hnub no lawv tau ntiab kuv tawm kuv thiaj tsis muaj feem tau Yawmsaub qub txeeg qub teg thiab lawv hais tias, ‘Cia li mus ua koom tu luag tej dab.’ Vim li no nimno thov tsis txhob cia kuv tej ntshav poob deb ntawm Yawmsaub xubntiag. Cov Yixayee tus vajntxwv tawm tuaj nrhiav tib tug dev mub txojsia, yam li tus uas mus raws yij saum roob.” Ces Xa‑u hais tias, “Kuv tau ua txhaum lawm lauj. Kuv tus tub Davi, cia li rov qab los, kuv yuav tsis ua phem rau koj dua li lawm, rau qhov hnub no koj saib kuv txojsia tsim txiaj. Kuv ua zoo nkaus li tej neeg ruam xwb thiab ua txhaum loj kawg li.” Mas Davi teb tias, “Au vajntxwv, koj rab hmuv nyob ntawm no. Koj cia li txib ib tug hluas tuaj coj rov qab mus. Yawmsaub pub nqe zog rau txhua tus raws li lawv txojkev ncaj ncees thiab qhov uas lawv lub siab xib rau Yawmsaub. Hnub no Yawmsaub muab koj cob rau hauv kuv txhais tes lawm tiamsis kuv tsis tsa kuv txhais tes tawm tsam tus uas Yawmsaub hliv roj tsa cia lawd. Hnub no kuv saib koj txojsia tsim txiaj li cas, kuj thov Yawmsaub saib kuv txojsia tsim txiaj ib yam li ntawd, thiab thov Yawmsaub cawm kuv dim hauv txhua txojkev ceeblaj ntxhov siab.” Ces Xa‑u hais rau Davi tias, “Kuv tus tub Davi, thov Yawmsaub foom koob hmoov rau koj. Koj yuav ua tau ntau yam thiab ua kom tiav.” Davi txawm mus lawm, Xa‑u rov qab mus tsev. Davi xav hauv lub siab tias, “Muaj ib hnub twg ntshai kuv yuav tuag rau Xa‑u txhais tes xwb. Qhov zoo tshaj ces cia kuv khiav mus nyob hauv cov Filixatee tebchaws, Xa‑u thiaj tsis muaj siab nrhiav kuv hauv Yixayee tebchaws thiab kuv thiaj dim nws txhais tes.” Davi txawm sawv tsees coj rau pua leej uas nrog nws ua ke khiav hla mus cuag Ma‑au tus tub Akhij uas ua vajntxwv hauv lub moos Ka. Mas Davi thiab nws cov neeg uas nrog nws ua ke thiab lawv txhua tsev neeg kuj nrog Akhij nyob hauv lub moos Ka. Davi ob tug pojniam yog Ahinau‑as uas yog neeg Yile‑ee, thiab Anpikayi uas yog Nanpas hauv Khamee tus pojniam uas ua poj ntsuam lawm, mus thiab. Thaum muaj neeg mus hais rau Xa‑u tias Davi khiav mus rau lub moos Ka lawm, Xa‑u txawm tsis nrhiav Davi li lawm. Davi thiaj hais rau Akhij tias, “Yog koj txaus siab rau kuv mas thov koj muab ib qho chaw hauv tej zej zog rau kuv nyob. Ua cas yuav cia koj tus qhev nrog koj nyob hauv vajntxwv lub nroog no?” Ces hnub ntawd Akhij txawm muab lub moos Xilaj pub rau nws. Xilaj thiaj poob ua vajntxwv Yuda li moos los txog niaj hnub nimno. Lub sijhawm uas Davi mus nyob hauv cov Filixatee tebchaws ntawd yog ib xyoos thiab plaub lub hlis. Davi thiab nws cov neeg kuj mus ntaus cov neeg Kesu, cov neeg Kexaw thiab cov Amalej uas yog cov qub neeg uas ib txwm nyob hauv lub tebchaws ntawd, ntaus mus txog lub moos Su mus txog ntua Iyi tebchaws. Davi ntaus lub tebchaws ntawd tsis tseg tej txivneej tej pojniam ciaj sia li, thiab txeeb tej yaj tej nyuj tej nees luav tej ntxhuav tej tsoos tsho li rov los rau Akhij. Thaum Akhij nug tias “Hnub no koj mus lws leejtwg los?” Davi teb tias “Mus lws Neke uas yog Yuda li,” lossis “Mus lws Neke uas yog cov Yelame‑ee li,” lossis “Mus lws Neke uas yog cov Khenai li.” Davi yeej tsis tseg txivneej pojniam siav li tsis tso ib tug los rau hauv lub moos Ka li, nws xav tias, “Tsam ces lawv yuav hais txog peb cov tias Davi tau ua li ub li no.” No yog tej uas nws pheej ua tag lub sijhawm uas nws nyob hauv cov Filixatee tebchaws. Akhij tso siab rau Davi, nws xav tias, “Davi twb ua rau cov Yixayee uas yog nws haiv neeg ntxub nws kawg. Vim li no nws yuav ua tau kuv tus qhev ib sim neej.” Thaum ntawd cov Filixatee sau tub rog yuav mus ua rog rau cov Yixayee. Mas Akhij hais rau Davi tias, “Koj yuav tsum paub tias koj thiab koj cov neeg yuav tau nrog kuv tawm mus ua rog.” Davi hais rau Akhij tias, “Zoo kawg, koj yuav paub tias kuv uas yog koj tus qhev muaj peevxwm li cas.” Akhij hais rau Davi tias, “Zoo lawm, kuv yuav tsa koj ua tus uas hwj xwm kuv mus tag sim neej.” Xamuyee twb tuag lawm thiab cov Yixayee sawvdaws quaj ntsuag nws thiab muab nws log rau hauv Lama uas yog nws lub moos. Xa‑u twb rhuav tshem tej txiv neeb txiv yaig hauv lub tebchaws tag lawm. Cov Filixatee sau zog tuaj ua ke ua yeej ze ntawm lub moos Sunee. Mas Xa‑u txhij Yixayee cov tub rog sawvdaws tuaj ua yeej rau saum lub roob Kinpau‑a. Thaum Xa‑u pom Filixatee cov tub rog mas nws ntshai heev, nws lub siab tshee hnyo. Thaum Xa‑u ua nug rau Yawmsaub, Yawmsaub kuj tsis teb nws, tsis hais teb hauv npau suav lossis teb ntawm Uli lossis ntawm cov xibhwb cev Vajtswv lus. Xa‑u thiaj hais rau nws cov tub teg tub taws tias, “Cia li mus nrhiav ib tug pojniam uas txawj ua neeb es kuv yuav mus kom nws ua neeb saib.” Xa‑u cov tub teg tub taws hais tias, “Muaj ib tug pojniam ua txiv neeb hauv lub moos Eedau.” Xa‑u thiaj hloov nws tsoos tsho ua cuav tsab nrog ob tug txivneej mus. Lawv mus txog tus pojniam ntawd rau thaum tsaus ntuj, mas Xa‑u hais tias, “Thov ua neeb rau kuv es coj tus tuag uas kuv qhia npe rau koj los.” Tus pojniam ntawd teb Xa‑u tias, “Koj yeej paub tseeb lawm tias Xa‑u twb ua li cas, qhov uas nws rhuav tshem tej txiv neeb txiv yaig hauv lub tebchaws. Ua cas koj tseem tuaj ua ntxiab ua hlua cuab kuv txojsia?” Xa‑u tuav Yawmsaub lub npe twv tias, “Muaj Yawmsaub uas muaj txojsia nyob pom, koj yuav tsis raug txim rau qhov uas ua neeb no.” Tus pojniam ntawd thiaj hais tias, “Koj yuav kom kuv hu leejtwg los?” Xa‑u hais tias, “Hu Xamuyee los rau kuv.” Thaum tus pojniam ntawd pom dheev Xamuyee ces txawm qw nrov nrov thiab hais rau Xa‑u tias, “Ua cas koj dag kuv? Koj twb yog Xa‑u ntag.” Vajntxwv hais rau tus pojniam ntawd tias, “Tsis txhob ntshai li, koj pom dabtsi?” Tus pojniam hais rau Xa‑u tias, “Kuv pom ib tug timtswv sawv hauv nruab yeeb los.” Xa‑u nug tus pojniam hais tias, “Nws lub cev zoo li cas?” Tus pojniam ntawd teb tias, “Yog ib tug yawg laus hnav lub tsho ntev sawv los.” Xa‑u thiaj paub tias yog Xamuyee, nws txawm khoov ntshis pe rau hauv av. Xamuyee hais rau Xa‑u tias, “Koj hu kuv sawv los tab kaum ua dabtsi?” Xa‑u teb tias, “Kuv muaj kev nyuaj siab heev vim yog cov Filixatee ua rog rau kuv thiab Vajtswv tig kiag ntawm kuv mus lawm tsis teb kuv dua li lawm, tsis hais teb ntawm cov xibhwb cev Vajtswv lus lossis teb hauv tej npau suav. Yog li no kuv thiaj thov hu koj sawv los xwv koj thiaj qhia kuv paub tias kuv yuav tsum ua dabtsi.” Xamuyee hais tias, “Thaum Yawmsaub tig hlo ntawm koj thiab ua yeeb ncuab rau koj lawm, ua cas koj tseem tuaj nug kuv? Yawmsaub ua rau koj yam li uas nws twb kom kuv hais rau koj lawd. Yawmsaub muab lub tebchaws dua ntawm koj txhais tes thiab muab cob rau lwm tus kav yog Davi. Twb yog vim koj tsis mloog Yawmsaub tej lus thiab ua raws li uas nws npau taws rau cov Amalej, hnub no Yawmsaub thiaj ua tej no rau koj. Tsis tag li ntawd xwb Yawmsaub yuav muab koj thiab cov Yixayee huvsi cob rau hauv cov Filixatee txhais tes. Tagkis koj thiab koj cov tub yuav nrog kuv nyob, thiab Yawmsaub yuav muab Yixayee cov tub rog cob rau hauv cov Filixatee txhais tes.” Ces Xa‑u txawm ntog vau hlo xyab kiag rau hauv pem teb tamsim ntawd, nws ntshai kawg vim yog Xamuyee tej lus. Nws tsis muaj zog kiag li lawm rau qhov nws tsis tau noj mov ib hnub ib hmos lawm. Tus pojniam ntawd thiaj los rau ntawm Xa‑u. Thaum nws pom tias Xa‑u ntshai kawg nws hais rau Xa‑u tias, “Kuv uas yog koj tus nkauj qhev yeej mloog koj hais. Kuv sev nyog txojsia yeem ua raws li koj tej lus txhua yam. Vim li no thov koj mloog koj tus nkauj qhev hais. Cia kuv muab mentsis zaub mov rau koj, koj cia li noj thiaj muaj zog taug kev rov qab mus.” Xa‑u kuj tsis kam, nws hais tias, “Kuv tsis noj.” Tiamsis nws cov tub teg tub taws thiab tus pojniam ntawd txhob txhob nws, nws thiaj mloog lawv hais. Nws sawv los nyob saum lub txaj. Tus pojniam ntawd muaj ib tug menyuam nyuj rog rog nyob ntawm tsev nws txawm maj nroos muab tua. Nws muab hmoov mog los zuaj cub ua ncuav tsis xyaw keeb. Nws coj los rau rau Xa‑u thiab nws cov tub teg tub taws noj. Lawv noj tag ces txawm rov qab mus tsev hmo ntawd. Cov Filixatee txhij cov tub rog huvsi tuaj rau ntawm Afe, mas cov Yixayee ua yeej rau ntawm lub hauv dej txhawv ntawm lub moos Yile‑ee. Thaum Filixatee cov thawj coj tej pab tub rog uas ib puas leej ib txhiab leej hla mus mas Davi thiab nws cov neeg kuj ua pab tom qab uas nrog Akhij ua ke. Filixatee cov thawj rog hais tias, “Cov neeg Henplais tuaj ua dabtsi ntawm no?” Mas Akhij hais rau Filixatee cov thawj rog tias, “No yog Davi, uas yog cov Yixayee tus vajntxwv Xa‑u li ib tug tub teg tub taws, nws twb nrog kuv nyob tsheej xyoo lawm. Txij hnub uas nws khiav tuaj cuag kuv, kuv kuj tsis pom nws muaj ib qho txhaum li txog niaj hnub nimno.” Tiamsis Filixatee cov thawj rog chim rau vajntxwv mas lawv rov hais rau vajntxwv tias, “Cia li xa tus yawg no rov qab mus tsev. Cia nws rov mus nyob rau hauv lub moos uas koj tu rau nws. Tsis txhob kheev nws nrog peb mus ua rog ua ke tsam ces nws ua yeeb ncuab rau peb. Rau qhov nws yuav ua li cas rov mus nrog nws tus vajntxwv sib raug zoo tau? Sub tsis yog muab peb cov neeg no taubhau coj mus pauv lov? Tus yawg no twb yog Davi nev, yog tus uas lawv hu nkauj seev cev hais tias, ‘Xa‑u tua tau qas txhiab leej Davi tua tau qas vam leej.’ ” Akhij thiaj hu Davi los hais rau nws tias, “Muaj Yawmsaub uas muaj txojsia nyob pom, koj twb ua ncaj ua ncees los lawm. Yog ntawm kuv tug mas kuv pom zoo cia koj nrog kuv mus ua rog, rau qhov kuv tsis pom koj ua ib qho txhaum txij hnub uas koj los nrog kuv nyob txog niaj hnub nimno li. Tiamsis txawm li cas los xij cov thawj rog tsis nrog kuv pom koj zoo. Ua li no thov koj rov qab mus ua siab tus yees xwv thiaj tsis ua rau Filixatee cov thawj tsis txaus siab.” Mas Davi hais rau Akhij tias, “Kuv tau ua dabtsi? Txij hnub uas kuv los ua koj li haujlwm txog niaj hnub nimno koj pom kuv uas yog koj tus qhev ua ib yam dabtsi uas yuav tsis tsim nyog kuv mus ua rog rau koj tej yeeb ncuab? Koj yog kuv tus tswv thiab kuv tus vajntxwv.” Akhij teb Davi tias, “Kuv paub thiab kuv lub qhov muag pom koj tsis ua ib qho txhaum, koj zoo yam nkaus li Vajtswv ib tug tubtxib saum ntuj. Tiamsis Filixatee cov thawj rog hais tias, ‘Tsis txhob kheev nws nrog peb mus ua rog li.’ Ua li no koj thiab Xa‑u cov tub teg tub taws uas nrog koj tuaj cia li sawv ntxov, mas tagkis thaum pom kev ces cia li rov qab mus.” Davi txawm sawv ntxov nrog nws cov neeg rov qab mus rau cov Filixatee tebchaws. Tiamsis cov Filixatee mas nce mus pem Yile‑ee. Tau peb hnub Davi thiab nws cov neeg los txog ntawm Xilaj mas cov Amalej twb mus lws Neke thiab Xilaj lawm. Lawv kov yeej Xilaj thiab muab hlawv pov tseg, thiab ntes cov pojniam thiab txhua tus uas nyob hauv coj mus, ntes cov laus thiab cov menyuam huvsi. Lawv tsis tua ib tug pov tseg li, lawv muab kuav huvsi taug kev mus. Thaum Davi thiab nws cov neeg los txog ntawm lub moos mas pom lub moos ntawd kub hnyiab lawm, thiab lawv tej pojniam tej tub tej ntxhais kuj raug muab ntes coj tag lawm. Mas Davi thiab cov neeg uas nrog nws kuj tsa suab hlo quaj heev, quaj quaj qaug zog quaj tsis taus lawm. Davi ob tug pojniam kuj raug muab ntes mus, yog Ahinau‑as uas yog neeg Yile‑ee thiab yog Anpikayi uas yog Nanpas hauv Khamee tus pojniam uas ua poj ntsuam. Davi kuj nyuaj siab kawg li rau qhov cov pejxeem hais zom zaws tias xuas pob zeb muab nws ntaus. Lawv kuj mob siab kawg li rau lawv tej tub tej ntxhais. Mas Davi kuj cuab zog hauv Yawmsaub uas yog nws tus Vajtswv. Davi hais rau pov thawj Anpiyatha uas yog Ahimelej tus tub tias, “Coj lub efauj los rau kuv.” Anpiyatha kuj coj lub efauj los rau Davi. Davi txawm nug Yawmsaub tias, “Kuv yuav mus caum pab tub rog ntawd los tsis mus? Kuv yuav mus caum cuag lawv los tsis cuag?” Yawmsaub teb nws tias, “Cia li mus caum, koj yeej yuav caum cuag lawv thiab cawm tau lawv.” Davi thiab rau pua leej uas nrog nws thiaj sawv kev mus. Lawv mus txog lub hav Npexau, mas cov uas mus tsis taus so qhov ntawd. Davi thiab plaub puas leej caum mus. Ob puas leej uas qaug zog heev hla tsis taus lub hav Npexau cia li so qhov ntawd. Lawv ntsib ib tug neeg Iyi tom hav nroj, lawv thiaj coj nws los cuag Davi. Lawv pub ncuav rau nws noj thiab dej rau nws haus. Lawv muab ib lub ncuav txiv cev thiab ob re txiv hmab qhuav rau nws noj. Nws noj tag mas thiaj li muaj zog tuaj vim yog nws tsis tau mov noj tsis tau dej haus tau peb hnub peb hmo lawm. Mas Davi nug nws tias, “Koj yog leejtwg cov neeg? Koj tuaj qhovtwg tuaj?” Mas nws teb tias, “Kuv yog ib tug tub hluas Iyi, kuv ua ib tug neeg Amalej li qhev. Tau peb hnub lawm kuv muaj mob mas kuv tus lospav muab kuv tso pov tseg. Peb mus lws Neke tebchaws thaj uas yog cov Khelethi li thiab yog Yuda li thiab Neke uas yog Khalej li. Mas peb muab lub moos Xilaj hlawv pov tseg.” Davi hais rau nws tias, “Koj yuav coj kuv kev mus caum kom cuag pab tub rog no los tsis coj?” Nws teb tias, “Thov tuav Vajtswv lub npe cog lus twv rau kuv tias koj yuav tsis muab kuv tua pov tseg thiab tsis muab kuv cob rau hauv kuv tus lospav txhais tes, mas kuv yuav coj koj kev mus kom txog pab tub rog ntawd.” Thaum nws coj Davi kev mus txog mas pom lawv nyob puv nkaus ntawm tej tshav puam noj haus thiab dhia seev cev rau qhov uas lawv txeeb tau tej qhov txhia chaw hauv Filixatee tebchaws thiab hauv Yuda tebchaws los ntau kawg li. Mas Davi tua lawv thaum tsaus ntuj zuag ib hmos thiab ib hnub tsaus ntuj. Tsis muaj ib tug txivneej khiav dim li, tsuas yog plaub puas tus hluas uas caij ntxhuav thiaj khiav dim xwb. Davi thiaj tau tej qhov txhia chaw uas cov Amalej lws mus ntawd huvsi rov qab los thiab Davi cawm tau nws ob tug pojniam los. Tej uas lawv lws mus lawd tsis hais laus hluas metub mentxhais mas tsis poob ib yam dabtsi li, Davi muab tau huvsi rov los. Davi tseem ntes tau lawv tej niag pab tshis pab yaj thiab tej niag pab nyuj los. Cov pejxeem raws tej tsiaj ntawd ua Davi ntej mas lawv hais tias, “Tej no yog tej uas Davi txeeb tau los.” Davi txawm rov los txog ob puas leej uas qaug zog raws tsis cuag Davi es Davi muab tso tseg rau ntawm lub hav Npexau. Mas cov ntawd kuj tawm mus tos Davi thiab tos cov neeg uas nrog Davi ua ke. Thaum Davi los ze cov neeg ntawd nws hais lus zoo rau lawv. Cov neeg phem thiab cov neeg siab nqaim uas nrog Davi mus txawm hais tias, “Vim lawv cov no tsis nrog peb mus mas peb tsis pub tej qhov txhia chaw uas peb mus txeeb tau los rau lawv li, tsuas yog cia lawv nyias coj nyias tej pojniam menyuam mus xwb.” Tiamsis Davi hais tias, “Kuv cov kwvtij, nej tsis txhob ua li no rau tej uas Yawmsaub pub rau peb. Nws twb tsom kwm peb cia thiab muab pab tub rog uas tuaj ntaus peb rau hauv peb txhais tes lawm. Qhov no leejtwg yuav mloog nej lub suab? Cov uas nqes mus ntaus rog muaj feem tau li cas ces cov uas nyob zov nra kuj muaj feem tau sib npaug li ntawd thiab. Cia li muab faib sib npaug zos rau sawvdaws.” Txij hnub ntawd los Davi kuj muab qhov no rhawv ua ib txoj kab ke thiab ib txoj kevcai rau cov Yixayee coj los txog niaj hnub nimno. Thaum Davi los txog lub moos Xilaj lawd nws kuj xa tej uas nws txeeb tau ntawd ib qho mus rau nws tej phoojywg uas yog cov kev txwj laus hauv Yuda, thiab hais rau lawv tias, “No yog muab ib qho tshav ntuj rau nej, yog tej uas txeeb tau ntawm Yawmsaub cov yeeb ncuab los.” Nws muab rau cov uas nyob hauv Npe‑ee thiab cov uas nyob hauv Lamau hauv Neke, thiab cov uas nyob hauv Yathi, thiab Alau‑aw thiab Ximau thiab Ethemau‑a, thiab Lakhas, thiab cov uas nyob hauv Yelame‑ee cum tej moos thiab hauv cov Khenai tej moos, hauv Hauma thiab Npaulasas thiab Athaj, thiab hauv Heploo, yog muab rau txhua lub chaw uas Davi thiab nws cov neeg txeev mus mus los los rau hauv. Cov Filixatee tuaj ua rog rau cov Yixayee, mas cov Yixayee khiav cov Filixatee thiab raug tua tuag rau saum lub roob Kinpau‑a. Cov Filixatee caum cuag Xa‑u thiab nws cov tub. Cov Filixatee tua Yaunathas thiab Anpinada thiab Makhisuva, uas yog Xa‑u li tub tuag tag. Ua rog hnyav heev tuaj ti Xa‑u, cov tub rog tua hneev ntsib Xa‑u, txawm tua raug nws mob heev. Ces Xa‑u txawm hais rau tus uas nqa nws tej cuab yeej tias, “Cia li rho ntaj los nkaug kuv kom tshab plaws, ntshai tsam cov uas tsis ua kevcai txiav no tuaj nkaug kuv es saib tsis taus kuv.” Tiamsis tus uas nqa nws tej cuab yeej tsis kam nkaug vim yog ntshai heev. Ces Xa‑u txawm rho kiag nws rab ntaj los cuab es nws khwb nkaus chob kiag rab ntaj ntawd. Thaum tus uas nqa tej cuab yeej pom tias Xa‑u tuag lawm, nws kuj cuab nws rab ntaj khwb nkaus chob nws tuag ua ke thiab. Yog li no Xa‑u thiaj tuag thiab nws peb tug tub thiab tus uas nqa tej cuab yeej thiab Xa‑u cov neeg sawvdaws tuag tib hnub ntawd. Thaum cov Yixayee uas nyob lub hav sab tid thiab cov uas nyob ntawm tus dej Yaladee sab hnub tuaj pom Yixayee cov tub rog khiav thiab pom tias Xa‑u thiab nws cov tub tuag tag lawm, lawv txawm tso lawv tej moos tseg khiav tag, mas cov Filixatee los nyob rau hauv. Hnub tom qab thaum cov Filixatee tuaj khaws cov uas raug tua tuag tej cuab yeej mus yuav, lawv pom Xa‑u thiab nws peb tug tub tuag rau saum lub roob Kinpau‑a. Lawv txawm txiav Xa‑u lub taubhau thiab hle nws tej cuab yeej ua rog. Lawv tso neeg tshaj xo mus thoob plaws Filixatee tebchaws, coj xov zoo mus piav rau hauv lawv tej tsev teev dab thiab piav rau cov pejxeem. Lawv muab Xa‑u tej cuab yeej ua rog khaws cia rau hauv lub tsev teev dab Athalau. Lawv muab Xa‑u lub cev khi dai rau ntawm lub moos Npesas lub ntsa loog. Thaum cov neeg hauv lub moos Yanpe Kile‑a hnov tej uas cov Filixatee ua rau Xa‑u lub cev tuag, cov txivneej uas siab loj siab tuab sawvdaws txawm sawv tsees mus ib hmos kaj ntug mus daws Xa‑u lub cev tuag thiab nws peb tug tub lub cev tuag ntawm Npesas lub ntsa loog. Lawv coj los rau ntawm lub moos Yanpe muab hlawv qhov ntawd. Lawv coj cov pob txha mus log rau hauv tsob qab ntoo tamalis hauv lub moos Yanpe, thiab yoo mov tau xya hnub. Thaum Xa‑u tuag ntawd, Davi mus tua cov Amalej rov los thiab so hauv lub moos Xilaj tau ob hnub. Hnub uas peb txawm muaj ib tug yawg tuaj hauv Xa‑u lub yeej tuaj ris tsho ntuag tag thiab muaj hmoov av saum taubhau. Thaum nws tuaj txog Davi nws khwb ti nkaus av pe. Davi hais rau nws tias, “Koj tuaj qhovtwg tuaj?” Nws teb tias, “Kuv dim hauv cov Yixayee lub yeej tuaj.” Davi nug nws tias, “Qhia rau kuv saib, xwm txheej zoo li cas?” Nws teb tias, “Cov neeg khiav hauv tshav rog tag lawm, muaj neeg raug tua tuag coob kawg. Xa‑u thiab nws tus tub Yaunathas kuj tuag lawm.” Davi txawm hais rau tus tub hluas uas xa xov ntawd tias, “Koj paub li cas tias Xa‑u thiab nws tus tub Yaunathas tuag lawm?” Tus tub hluas uas xa xov ntawd teb tias, “Kuv cia li mus txog saum lub roob Kinpau‑a ua ciav Xa‑u chob nrees nws rab hmuv, thiab luag tej tsheb ua rog thiab tej tub rog caij nees tuaj yuav txog nws. Thaum nws tig los pom kuv nws txawm hu kuv. Kuv teb tias, ‘Kuv nyob ntawm no 'os.’ Nws nug kuv tias, ‘Koj yog leejtwg?’ Kuv teb tias, ‘Kuv yog neeg Amalej.’ Nws hais rau kuv tias, ‘Cia li los sawv ze thiab muab kuv tua. Kuv mob qhuav siab kawg tiamsis kuv txojsia tsis tau tu.’ Kuv thiaj txav mus ze muab nws tua tseg, rau qhov kuv yeej paub tseeb tias nws twb ntog lawm nws yuav tsis ciaj li. Kuv thiaj hle nws lub mom vajntxwv saum nws taubhau thiab nws li tooj npab ntawm txhais tes, kuv coj tuaj ntawm no muab rau koj uas yog kuv tus tswv.” Davi txawm dua rhe nws lub tsho thiab nws cov neeg sawvdaws kuj dua pes rhe tsho ib yam li ntawd. Lawv quaj ntsuag thiab yoo mov mus txog tsaus ntuj rau Xa‑u thiab nws tus tub Yaunathas thiab cov Yixayee vim yog lawv raug hniav ntaj tuag tag. Mas Davi hais rau tus hluas uas tuaj hais rau nws ntawd tias, “Koj tuaj qhovtwg tuaj?” Nws teb tias, “Kuv yog lwm haiv neeg li tub, yog neeg Amalej.” Davi hais rau nws tias, “Ua cas koj tsis ntshai qhov uas tsa tes tua tus uas Yawmsaub hliv roj tsa cia lawd?” Ces Davi txawm hu ib tug hluas los thiab hais tias, “Cia li mus muab nws tua pov tseg.” Ces nws txawm muab tus yawg ntawd tua pov tseg. Davi hais rau tus yawg ntawd tias, “Qhov uas koj tuag kod, koj ris koj cov ntshav, rau qhov koj lub qhov ncauj ua timkhawv tom koj hais tias, ‘Kuv tau tua tus uas Yawmsaub hliv roj tsa cia lawd.’ ” Davi kuj quaj ntsuag txog Xa‑u thiab nws tus tub Yaunathas raws li no. Nws hais kom qhia zaj quaj ntsuag no rau cov Yuda. Mas zaj quaj ntsuag no kuj muab sau cia rau hauv phau ntawv Yasa lawm. Davi hais tias, Yixayee 'e, nej lub koob meej raug muab tua pov tseg rau saum lub roob siab lawm. Tej txivneej uas siab tuab ntog tuag tag lawm lauj! Tsis txhob piav zaj no rau hauv lub moos Ka, tsis txhob tshaj tawm rau hauv lub moos Akheloo tej kev, ntshai tsam Filixatee tej ntxhais yuav zoo siab, thiab cov uas tsis ua kevcai txiav tej ntxhais yuav zoo siab xyiv fab. Kinpau‑a tej roob 'e, thov tsis txhob muaj lwg muaj nag rau saum nej, thiab tsis txhob cia tej teb tau qoob loo rau nej, rau qhov tus uas siab tuab daim phiaj hlau qias puas tsuas rau qhov ntawd lawm, yog Xa‑u daim phiaj hlau uas tsis muaj roj pleev dua li lawm. Yaunathas rab hneev tsis tig ntawm tej ntshav uas sib tua kiag li, tsis tig ntawm cov uas siab loj siab tuab tej nqaij, thiab Xa‑u rab ntaj kuj tsis rov los do. Xa‑u thiab Yaunathas, uas ntxim hlub thiab zoo kawg li, txawm yog nyob thiab tuag los tsis sib ncaim, ob tug nrawm dua tej dav, muaj zog dua li tej tsov ntxhuav. Yixayee cov ntxhais 'e, cia li quaj Xa‑u, yog tus uas muab tsoos tsho zoo nkauj tsamxem rau nej hnav, thiab muab tej npauj kub teem rau nej tej tsoos tsho. Cov uas siab loj siab tuab ntog tuag rau hauv tshav rog lawm lauj! Yaunathas kuj pw tuag rau saum nej lub roob siab. Kuv tijlaug Yaunathas 'e, kuv ntxhov siab kawg txog koj. Koj ua rau kuv kaj siab kawg. Qhov uas koj hlub kuv zoo tshaj plaws, zoo dua tej pojniam kev hlub. Cov uas siab loj siab tuab ntog tuag lawm lauj! Tej cuab yeej ua rog puam tsuaj tag lawm lauj! Dhau ntawd Davi nug Yawmsaub tias, “Kuv yuav nce mus rau hauv Yuda tej moos ib lub twg los tsis mus?” Yawmsaub hais rau nws tias, “Cia li nce mus.” Davi thiaj hais tias, “Kuv yuav mus rau lub twg?” Yawmsaub hais tias, “Mus rau lub moos Heploo.” Davi thiaj nce mus qhov ntawd thiab nws ob tug pojniam kuj nrog nws mus, yog Ahinau‑as uas yog neeg Yile‑ee thiab Anpikayi uas yog Nanpas hauv Khamee tus pojniam uas ua poj ntsuam lawm. Davi kuj coj cov neeg uas nrog nws ua ke mus thiab. Txhua tus kuj nyias coj nyias tsev neeg mus mas lawv nyob hauv tej zej zog ntawm Heploo. Cov neeg Yuda tuaj ua ke mas tsa Davi ua vajntxwv kav xeem Yuda rau qhov ntawd. Thaum muaj neeg hais rau Davi tias, “Cov neeg hauv Yanpe Kile‑a yog cov uas log Xa‑u,” mas Davi txib neeg mus hais rau cov neeg Yanpe Kile‑a tias, “Thov Yawmsaub foom koob hmoov rau nej rau qhov nej tau ua zoo ua ncaj ua ncees rau Xa‑u uas yog nej tus tswv es nej muab nws log. Mas thov Yawmsaub ua nws txojkev hlub uas ruaj khov thiab nws txojkev ncaj tshwm rau nej. Thiab kuv yuav ua zoo rau nej vim yog nej yog cov uas log Xa‑u. Vim li no nej txhais tes cia li muaj zog, cia li ua siab loj siab tuab, rau qhov nej tus tswv Xa‑u twb tuag lawm, mas xeem Yuda twb tsa kuv ua vajntxwv kav lawv lawm.” Mas Naw tus tub Anaw uas yog Xa‑u tus thawj kav tub rog tau coj Xa‑u tus tub Inpause hla mus rau lub moos Mahana‑i, thiab tsa nws ua vajntxwv kav Kile‑a thiab cov Asu thiab Yile‑ee thiab Efa‑i thiab Npeeyamee thiab Yixayee huvsi. Thaum Xa‑u tus tub Inpause pib kav cov Yixayee nws hnub nyoog muaj plaub caug xyoo. Nws kav tau ob xyoos tiamsis xeem Yuda nrog nraim Davi. Davi nyob hauv lub moos Heploo ua vajntxwv kav xeem Yuda tau xya xyoo thiab rau lub hli. Naw tus tub Anaw thiab Xa‑u tus tub Inpause cov tub teg tub taws tawm hauv Mahana‑i mus rau lub moos Kinpe‑oo. Thiab Xeluya tus tub Yau‑a thiab Davi cov tub teg tub taws kuj tawm mus ntsib lawv ntawm lub pas dej hauv lub moos Kinpe‑oo. Lawv zaum ntawm ntug pas dej, ib pab nyob ib sab pas dej. Anaw hais rau Yau‑a tias, “Cia cov hluas ob tog sawv sib ntaus rau peb saib.” Yau‑a hais tias, “Kom lawv sawv los maj.” Cov Npeeyamee uas yog Xa‑u tus tub Inpause tog kaum ob leeg, thiab Davi tog kaum ob leeg lawv sawv los sib ntaus. Nyias taus nyias ntsiab nkaus taubhau thiab xuas ntaj nyias nkaug nyias tus phab tav mas ob tog tuag tag huvsi li. Lawv thiaj hu lub chaw ntawd hu ua Heekha Haxuli uas nyob ntawm Kinpe‑oo. Kev ua rog hnub ntawd thiaj heev kawg li. Anaw thiab cov neeg Yixayee kuj swb Davi cov tub rog. Xeluya peb tug tub kuj nyob ntawd, yog Yau‑a, Anpisai thiab Axahee. Axahee mas dhia nrawm cuag nkaus kauv seb. Axahee caum Anaw qab, nws caum nws qab tsis tig rau sab xis sab laug li. Anaw tig los saib mas hais tias, “Koj yog Axahee lov?” Axahee teb tias, “Yog los maj.” Anaw hais rau nws tias, “Tig rau sab xis lossis sab laug mus ntes ib tug hluas es txeeb nws qhov txhia chaw mus.” Tiamsis Axahee tsis thim li, nws ywj caum Anaw qab xwb. Anaw thiaj hais dua rau Axahee tias, “Cia li tseg tsis txhob caum kuv. Yuav cia kuv ntaus koj kom ntog hauv pem teb ua dabtsi? Ces kuv yuav ua li cas tsa muag ntsia tau koj tus tijlaug Yau‑a?” Tiamsis nws tsis yeem tseg qhov uas caum Anaw. Vim li ntawd Anaw thiaj xuas qab hmuv nkaug rov tom qab thiaj chob nplho Axahee lub plab tshab plaws nrob qaum, nws thiaj ntog tuag rau qhov ntawd. Mas txhua tus uas tuaj rau ntawm lub chaw uas Axahee ntog tuag ntawd txawm nres twjywm rau ntawd. Tiamsis Yau‑a thiab Anpisai tseem caum Anaw qab mus. Thaum hnub poob qho lawv mus txog ntawm lub pov roob Asma uas nyob ncaj ntawm Kiya ntawm txojkev uas mus rau tebchaws moj sab qhua Kinpe‑oo. Cov Npeeyamee sau zog tuaj tom Anaw qab mus ua kiag ib pab tiv rau saum ib lub ncov roob. Anaw qw nrov rau Yau‑a tias, “Yuav cia hniav ntaj noj neeg mus li lov? Koj tsis paub tias thaum kawg yuav lwj siab no lov? Yuav ntev li cas es koj li hais koj cov neeg tseg tsis caum lawv cov kwvtij?” Yau‑a thiaj hais tias, “Muaj Vajtswv muaj txojsia nyob pom, yog koj tsis cheem mas yuav yog tagkis kaj ntug cov tub rog li tseg tsis caum lawv kwvtij.” Yau‑a thiaj tshuab raj kub yaj, cov neeg sawvdaws thiaj tseg tsis caum cov Yixayee thiab tsis ua rog dua li lawm. Mas hmo ntawd Anaw thiab nws cov neeg thiaj mus ib hmos kev hauv Alanpa. Lawv hla tus dej Yaladee thiab hla lub hav Npiloo li mus txog Mahana‑i. Yau‑a thiaj thim tsis caum Anaw. Mas thaum nws txheeb cov neeg sawvdaws los ua ke, Davi cov tub rog ploj lawm kaum cuaj leeg tsis suav Axahee. Tiamsis Davi cov tub rog tua cov Npeeyamee tuag lawm peb puas rau caum leej uas yog Anaw cov neeg. Lawv kwv Axahee mus log rau hauv nws txiv lub qhov ntxa hauv lub moos Npelehee. Yau‑a thiab nws cov neeg mus ib hmos kev mas thaum kaj ntug lawv thiaj mus txog lub moos Heploo. Xa‑u cov neeg thiab Davi cov neeg kuj ua rog ntev loo. Davi kuj kov yeej zuj zus, Xa‑u cov kuj qaug zog zuj zus. Davi cov tub uas yug hauv Heploo yog li no, tus tub hlob yog Asnoo, yog Ahinau‑as uas yog neeg Yile‑ee yug. Tus ob yog Khile‑a, yog Anpikayi uas yog Nanpas hauv Khamee tus pojniam uas ua poj ntsuam yug. Tus peb yog Axaloo, yog Ma‑akha uas yog cov Kesu tus vajntxwv Thamai tus ntxhais yug. Tus plaub yog Adauniya, yog Hakis yug. Tus tsib yog Sefathiya, yog Anpithas yug. Tus rau yog Ile‑as, yog Elag uas yog Davi tus pojniam yug. Cov tub no Davi yug hauv lub moos Heploo. Lub sijhawm uas Xa‑u cov neeg thiab Davi cov neeg tabtom ua rog, Anaw kuj tsab ua loj zuj zus rau hauv Xa‑u cov neeg. Xa‑u muaj ib tug hluas nkauj hu ua Lixapa, yog Aiyag tus ntxhais. Inpause txawm hais rau Anaw tias, “Ua cas koj mus nrog kuv txiv li hluas nkauj pw?” Mas Anaw chim heev rau Inpause lo lus ntawd, nws txawm hais tias, “Kuv yog Yuda li ib lub taubhau dev lov? Niaj hnub nimno kuv lub siab npuab koj txiv Xa‑u cov neeg thiab koj txiv kwvtij kwvluag, kuv tsis tau muab koj rau hauv Davi txhais tes. Tiamsis hnub no koj tseem yuav xeeb plaub ntawm tus pojniam no rau kuv. Yog kuv tseem tsis pab Davi kom tiav raws li Yawmsaub cog lus rau nws lawd, kuv thov Vajtswv rau txim rau kuv kom hnyav kawg. Kuv yuav muab lub tebchaws rho hauv Xa‑u cov neeg thiab kuv yuav tsa Davi lub zwm txwv rau saum cov Yixayee thiab cov Yuda txij ntua Daj mus txog ntua Npe‑awsenpa.” Mas Inpause teb tsis taus Anaw ib los li rau qhov nws ntshai Anaw. Anaw tso neeg xa xov mus hais rau Davi ntawm Heploo tias, “Lub tebchaws no yog leejtwg li? Koj nrog kuv cog lus sib raug zoo, mas kuv yuav tuaj koj tog, kuv yuav coj cov Yixayee huvsi los cob rau koj.” Davi hais tias, “Zoo kawg. Kuv yuav nrog koj cog lus. Kuv xav kom koj ua ib yam tso. Thaum koj yuav tuaj ntsib kuv tim ntsej tim muag, yog koj tsis coj Xa‑u tus ntxhais Mikhas tuaj rau kuv tso, mas koj yeej yuav tsis pom kuv.” Thiab Davi tso xov rau Xa‑u tus tub Inpause hais tias, “Muab kuv tus pojniam Mikhas rau kuv, nws yog tus uas kuv muab cov Filixatee ib puas daim tawv chaw xis qhaib lawm.” Inpause txawm kom neeg mus coj Mikhas ntawm nws tus txiv uas yog La‑i tus tub Pati‑ee los. Nws tus txiv kuj quaj raws quaj raws nws mus txog ntawm Npahuli. Anaw hais rau nws tias, “Cia li rov qab mus.” Nws thiaj rov qab mus lawm. Anaw txawm nrog Yixayee cov kev txwj laus sablaj hais tias, “Ntev los lawm nej yeej xav kom Davi ua vajntxwv kav nej. Mas nimno cia li ua kom tiav, rau qhov Yawmsaub twb cog lus cia rau Davi lawm tias, ‘Kuv yuav siv kuv tus qhev Davi txhais tes cawm kuv haiv neeg Yixayee dim hauv cov Filixatee txhais tes thiab dim hauv lawv cov yeeb ncuab sawvdaws txhais tes huvsi.’ ” Anaw kuj hais rau cov Npeeyamee thiab. Anaw txawm mus cuag Davi hauv lub moos Heploo qhia txhua yam uas cov Yixayee thiab xeem Npeeyamee sawvdaws pom zoo ua. Thaum Anaw nrog nees nkaum leej tuaj cuag Davi hauv lub moos Heploo, mas Davi pam noj haus rau Anaw thiab cov neeg uas nrog nws tuaj. Anaw hais rau Davi tias, “Kuv yuav sawv kev rov mus thiab kuv yuav sau zog cov Yixayee sawvdaws tuaj cuag vajntxwv uas yog kuv tus tswv, kom lawv thiaj tau nrog koj cog lus sib raug zoo thiab koj thiaj yuav kav tau txhua yam uas koj siab nyiam.” Davi thiaj tso Anaw rov qab. Anaw rov qab mus ua tso siab plhuav. Lub sijhawm ntawd Yau‑a thiab Davi cov tub rog mus lws luag thiab coj qhov txhia chaw ntau kawg li lus. Tiamsis Anaw twb tsis nrog Davi nyob ntawm Heploo lawm rau qhov Davi twb tso nws mus thiab nws twb mus ua tso siab plhuav lawm. Thaum Yau‑a thiab cov tub rog sawvdaws uas nrog nws los txog, muaj neeg hais rau Yau‑a tias, “Naw tus tub Anaw tuaj cuag vajntxwv mas vajntxwv twb tso nws rov qab mus lawm, nws mus ua tso siab plhuav.” Ces Yau‑a txawm mus hais rau vajntxwv tias, “Koj ua dabtsi li no? Koj sim saib, Anaw twb tuaj cuag koj. Ua cas koj cia li tso nws mus, nws thiaj mus lawm? Koj yeej paub tias Naw tus tub Anaw tuaj dag koj xwv thiaj paub tias koj tawm mus thiab nkag los li cas thiab paub txhua yam uas koj ua.” Thaum Yau‑a tawm ntawm Davi los nws txawm tso neeg xa xov mus caum Anaw. Lawv coj Anaw ntawm lub pas dej Xilas rov los. Davi kuj tsis paub qhov no li. Thaum Anaw rov los txog Heploo lawm Yau‑a txawm coj nws tib leeg nkag mus rau hauv plawv rooj loog kom thiaj tau nrog nws tib leeg tham xwb. Ces Yau‑a txawm nkaug Anaw plab qhov ntawd, Anaw thiaj tuag lawm, twb yog Yau‑a ua pauj rau qhov uas nws tus kwv Axahee tuag. Dhau ntawd thaum Davi paub li ntawd nws thiaj hais tias, “Kuv thiab kuv lub tebchaws yuav tsis ris lub txim uas Naw tus tub Anaw cov ntshav los no ib txhis tab meeg Yawmsaub xubntiag. Thov kom lub txim poob rau saum Yau‑a taubhau thiab poob rau saum nws txiv caj ces. Cia Yau‑a caj ces pheej yuav muaj tus uas muaj kua ntws los lossis muaj tus uas mob lig mob ruas lossis muaj tus uas nrig pas lossis muaj tus uas raug hniav ntaj tua lossis muaj tus uas tsis muaj mov noj.” Yau‑a thiab nws tus kwv Anpisai tua Anaw vim Anaw tau tua ob tug tus kwv Axahee rau ntawm tshav rog Kinpe‑oo lawm. Davi kuj hais rau Yau‑a thiab cov neeg sawvdaws uas nrog nws tias, “Cia li dua nej tej ris tsho thiab muab khaub seev tsaj los npua thiab quaj ntsuag mus ua Anaw lub cev tuag ntej.” Thiab vajntxwv Davi raws qab lub hleb. Lawv muab Anaw log rau ntawm Heploo. Vajntxwv kuj tsa suab quaj ntawm Anaw lub ntxa thiab cov pejxeem sawvdaws kuj quaj kawg li. Vajntxwv quaj ntsuag txog Anaw tias, “Tsim nyog Anaw yuav tuag ib yam nkaus li tus neeg ruam lov? Twb tsis muab koj txhais tes khi, twb tsis muab koj kotaw xauv ntsuas phoo, koj cia li ntog tuag yam nkaus li neeg ntog rau ntawm neeg limhiam xubntiag.” Mas cov pejxeem sawvdaws kuj rov quaj Anaw dua ib zaug. Cov pejxeem sawvdaws tuaj cheem kom Davi noj mov rau thaum tseem nruab hnub. Tiamsis Davi twv hais tias, “Yog kuv sim mentsis ncuav lossis ib yam dabtsi ua ntej uas hnub poob qho, mas cia Vajtswv rau txim rau kuv li ntawd hnyav dua thiab.” Cov pejxeem sawvdaws pom li ntawd mas kuj txaus siab. Txhua yam uas vajntxwv ua yeej los txaus cov pejxeem lub siab. Hnub ntawd cov pejxeem sawvdaws thiab cov Yixayee sawvdaws kuj nkag siab tias tsis yog vajntxwv muaj nplooj siab tua Naw tus tub Anaw. Vajntxwv hais rau nws cov tub teg tub taws tias, “Nej tsis paub lov, hnub no cov Yixayee ib tug thawj tseem ceeb tau tuag lawm? Txawm yog kuv raug tsa ua vajntxwv los hnub no kuv kuj qaug zog. Xeluya cov tub no hnyav dhau rau kuv lawm. Thov Yawmsaub ua pauj rau tus uas ua txhaum raws li nws kev txhaum.” Thaum Xa‑u tus tub Inpause hnov tias Anaw tuag rau hauv Heploo lawm nws qaug zog kiag lawm thiab cov Yixayee sawvdaws poob siab tag. Xa‑u tus tub muaj ob yawg ua thawj coj pab tub rog lws luag, ib tug hu ua Npa‑anas, ib tug hu ua Lekhaj. Ob tug yog Limoo li tub uas yog xeem Npeeyamee nyob hauv lub moos Npe‑awlau (rau qhov kuj muab Npe‑awlau suav ua Npeeyamee li moos. Cov neeg hauv Npe‑awlau tsiv mus rau lub moos Kitha‑i mas nyob qhov ntawd los txog niaj hnub nimno.) Xa‑u tus tub Yaunathas muaj ib tug tub mus tsis taus kev. Thaum uas muaj xov xwm hais txog Xa‑u thiab Yaunathas hauv Yile‑ee tuaj, tus menyuam no muaj tsib xyoos. Mas tus nkauj qhev uas tu nws muab puag coj khiav. Thaum nws maj khiav mus ntawd, tus menyuam txawm poob mas tuag ceg. Nws npe hu ua Mefinpause. Mas Limoo uas yog neeg Npe‑awlau ob tug tub uas yog Lekhaj thiab Npa‑anas txawm sawv kev mus. Thaum tshav ntuj kub lawv tuaj txog Inpause lub tsev, yog thaum tav su uas Inpause tseem pw so. Ces ob tug txawm nkag mus rau hauv tsev ua txuj yam li yuav mus nqa mentsis mog ces ob tug txawm nkaug kiag Inpause plab, ces Lekhaj thiab nws tijlaug Npa‑anas txawm khiav lawm. Thaum ob tug nkag mus rau hauv tsev Inpause pw hauv txaj, mas ob tug txawm ntaus nws thiab muab nws tua thiab txiav nws lub taubhau. Ob tug coj nws lub taubhau taug txojkev hauv Alanpa mus ib hmos kaj ntug. Ob tug coj Inpause lub taubhau mus pub rau Davi hauv lub moos Heploo thiab hais rau vajntxwv tias, “No yog koj tus yeeb ncuab Xa‑u tus tub Inpause lub taubhau, yog tus uas nrhiav txov koj txojsia. Hnub no Yawmsaub tau pab vajntxwv uas yog wb tus tswv ua pauj rau Xa‑u thiab nws tej tub ki.” Tiamsis Davi teb Lekhaj thiab nws tus tijlaug Npa‑anas uas yog Limoo uas yog neeg hauv Npe‑awlau ob tug tub tias, “Muaj Yawmsaub muaj txojsia nyob pom, yog tus uas cawm kuv dim hauv txhua txojkev txom nyem, thaum muaj ib tug hais rau kuv tias, ‘Xa‑u tuag lawm,’ nws xav tias yog nws coj xov zoo rau kuv, kuv muab nws ntes muab nws tua rau ntawm Xilaj lawm. No yog kuv muab nqe zog rau nws rau qhov uas nws coj tsab xov ntawd tuaj. Heev dua li ntawd, yog muaj neeg phem tua tus neeg ncaj ncees rau hauv nws lub tsev thiab saum nws lub txaj pw, kuv yuav tsis kom neb ris nws cov ntshav no lov, thiab yuav tsis muab neb ua puam tsuaj hauv ntiajteb no lov?” Davi txawm hais rau nws cov tub hluas, mas lawv muab ob tug tua, muab txiav tes txiav taw muab ob lub cev dai rau ntawm ntug pas dej ntawm Heploo. Tiamsis lawv muab Inpause lub taubhau coj mus log rau hauv Anaw lub qhov ntxa ntawm lub moos Heploo. Cov Yixayee txhua xeem tuaj cuag Davi hauv lub moos Heploo thiab hais tias, “Peb nrog koj koom nqaij koom txha. Thaum ub uas Xa‑u ua vajntxwv kav peb, koj yeej yog tus uas coj cov Yixayee tawm mus thiab coj rov qab los, thiab Yawmsaub hais rau koj tias, ‘Koj yuav ua tus yug yaj kav kuv haiv neeg Yixayee thiab koj yuav ua cov Yixayee tus thawj.’ ” Yog li ntawd Yixayee cov kev txwj laus sawvdaws thiaj tuaj cuag Davi hauv lub moos Heploo. Thiab vajntxwv Davi nrog lawv sib cog lus hauv lub moos Heploo rau ntawm Yawmsaub xubntiag, ces lawv txawm hliv roj tsa Davi ua vajntxwv kav cov Yixayee. Thaum Davi pib kav tebchaws nws hnub nyoog muaj peb caug xyoo thiab nws kav tau plaub caug xyoo. Nws nyob hauv Heploo kav cov Yuda tau xya xyoo rau lub hli, thiab nyob hauv Yeluxalees kav cov Yixayee thiab cov Yuda huvsi tau peb caug peb xyoos. Vajntxwv thiab nws cov tub rog mus rau lub nroog Yeluxalees ua rog rau cov Yenpu uas nyob hauv lub tebchaws ntawd. Cov Yenpu hais rau Davi tias, “Koj txeem tsis tau los rau hauv no, cov neeg dig muag ceg tawv kuj yuav tiv tau koj.” Lawv xav tias Davi yuav txeem los tsis tau li. Txawm li ntawd los Davi txeeb tau lub chaw ruaj khov Xi‑oo, uas yog Davi lub nroog. Hnub ntawd Davi hais tias, “Leejtwg yuav mus ntaus cov Yenpu cia tus ntawd nce taus tus kwj deg mus tua cov dig muag ceg tawv uas Davi lub siab ntxub kawg li.” Vim li ntawd luag thiaj hais tias, “Tsis txhob kheev cov dig muag ceg tawv nkag los rau hauv vajntxwv tsev.” Davi nyob kiag hauv lub chaw ruaj khov thiab hu lub chaw ntawd tias Davi lub nroog. Thiab Davi tsim lub nroog puag ncig txij ntua lub loog Milau mus rau sab hauv. Davi muaj hwjchim zuj zus vim yog Yawmsaub uas yog Vajtswv muaj hwjchim loj kawg nkaus nrog nraim nws. Vajntxwv Hilas hauv lub nroog Thailab tso neeg xa xov tuaj cuag Davi thiab xa ntoo ciab thiab cov Kws ntoo cov Kws txhwm pob zeb tuaj ua lub tsev rau Davi nyob. Davi paub tias Yawmsaub tau tsa nws ua vajntxwv ruaj khov kav cov Yixayee thiab ua rau nws lub tebchaws vam meej vim yog saib rau nws haiv neeg Yixayee. Thaum Davi tawm hauv lub moos Heploo los nyob rau hauv Yeluxalees nws yuav dua niam yau thiab coj tej hluas nkauj los kav, mas yug dua tub thiab ntxhais. Cov menyuam uas Davi yug hauv Yeluxalees li npe yog li no: Samu‑a, Saunpam, Nathas, Xalaumoo, Iha, Elisu‑a, Nefe, Yafia, Elisama, Eliyada thiab Elifele. Thaum cov Filixatee hnov tias Davi raug tsa ua vajntxwv kav cov Yixayee huvsi, cov Filixatee sawvdaws txawm nce tuaj nrhiav Davi. Tiamsis Davi hnov li ntawd nws txawm mus nyob rau hauv lub chaw ruaj khov. Cov Filixatee tuaj nyob thoob plaws hauv lub hav Lefa‑i. Davi txawm ua nug rau Yawmsaub tias, “Kuv yuav mus ntaus cov Filixatee lov? Koj yuav muab lawv rau hauv kuv txhais tes los tsis muab?” Yawmsaub teb Davi tias, “Cia li mus, kuv yeej yuav muab cov Filixatee rau hauv koj txhais tes.” Davi thiaj mus rau ntawm lub moos Npa‑as Pelaxi, mas Davi kov yeej cov Filixatee qhov ntawd. Nws hais tias, “Yawmsaub txeem plaws rau kuv cov yeeb ncuab yam li dej txeem plaws mus nyab.” Vim li ntawd lub chaw ntawd thiaj hu ua Npa‑as Pelaxi. Cov Filixatee thiaj muab lawv tej dab mlom tso tseg rau qhov ntawd. Davi thiab nws cov tub rog thiaj muab nqa mus lawm. Cov Filixatee rov qab tuaj dua mus nyob thoob plaws hauv lub hav Lefa‑i. Thaum Davi rov qab ua nug rau Yawmsaub dua ib zaug, Yawmsaub hais tias, “Koj tsis txhob ncaj mus, cia li lug mus tom lawv qub qab, ntaus lawv ncaj ntawm cov ntoo zaub kab. Thaum koj hnov suab nrov saum cov ntsis ntoo zaub kab yam li lub suab uas tub rog mus kev, koj cia li maj nroos mus, vim lub sijhawm ntawd Yawmsaub tau ua koj ntej mus ntaus Filixatee cov tub rog lawm.” Davi ua raws li Yawmsaub hais rau nws mas ntaus cov Filixatee txij ntua lub moos Kenpa mus txog ntua lub moos Kexaw. Davi rov txhij peb vam leej tub rog uas nws xaiv hauv cov Yixayee cia lawd. Thiab Davi nrog nws cov neeg sawvdaws sawv kev mus rau ntawm lub moos Npa‑aleyuda mus coj Vajtswv lub phij xab uas hu raws li Yawmsaub tus muaj hwjchim loj kawg nkaus lub npe uas nyob lub zwm txwv saum cov Khelunpee los. Lawv kuj muab ib lub tsheb nyuj tshiab thauj Vajtswv lub phij xab thiab coj tawm hauv Anpinada lub tsev uas nyob saum lub roob los. Uxa thiab Ahiyau uas yog Anpinada li tub tsav lub tsheb nyuj tshiab ntawd uas muaj Vajtswv lub phij xab, mas Ahiyau mus ua lub phij xab ntej. Davi thiab cov Yixayee sawvdaws kuj zoo siab xyiv fab rau ntawm Yawmsaub lub xubntiag kawg lawv lub dag lub zog, thiab hu nkauj ntaus nkauj nog ncas me thiab nkauj nog ncas loj thiab co tswb khob pab thiab npuaj nruas tooj liab. Thaum lawv los txog ntawm Nakhoo lub tshav ntaus qoob Uxa cev tes tuav nkaus Vajtswv lub phij xab rau qhov nyuj dawm. Mas Yawmsaub thiaj npau taws rau Uxa. Mas Vajtswv ntaus nws tuag vim yog nws cev tes tuav lub phij xab, ces nws txawm tuag rau ntawm Vajtswv lub phij xab ib sab. Davi chim rau qhov uas Yawmsaub txojkev npau taws tshwm plaws los rau Uxa, vim li ntawd thiaj hu lub chaw ntawd hu ua Pele‑uxa los txog niaj hnub nimno. Hnub ntawd Davi kuj ntshai Yawmsaub heev thiab nws hais tias, “Yawmsaub lub phij xab yuav los nrog kuv nyob tau li cas?” Davi thiaj tsis kam coj Yawmsaub lub phij xab mus rau hauv Davi lub nroog, tiamsis nws coj mus cia rau tom Aunpe Edoo uas yog neeg Ka lub tsev. Yawmsaub lub phij xab nyob hauv Aunpe Edoo uas yog neeg Ka lub tsev tau peb lub hlis, mas Yawmsaub foom koob hmoov rau Aunpe Edoo thiab nws tsev neeg sawvdaws. Muaj neeg hais rau vajntxwv Davi tias, “Yawmsaub foom koob hmoov rau Aunpe Edoo tsev neeg thiab txhua yam uas yog nws li, vim yog muaj Vajtswv lub phij xab.” Yog li ntawd Davi thiaj mus coj Vajtswv lub phij xab ntawm Aunpe Edoo tsev los rau hauv Davi lub nroog xyiv fab hlo. Thaum cov uas kwv Yawmsaub lub phij xab mus tau rau kauj ruam, Davi kuj tua ib tug nyuj thiab ib tug thav nyuj rog rog xyeem. Davi kuj dhia seev cev kawg nws lub dag lub zog rau ntawm Yawmsaub lub xubntiag. Thiab Davi hnav lub tsho efauj xwb. Yog li no Davi thiab ib tsoom Yixayee sawvdaws thiaj qw zoo siab xyiv fab tshuab raj kub yaj coj Yawmsaub lub phij xab los. Thaum Yawmsaub lub phij xab los rau hauv Davi lub nroog, Xa‑u tus ntxhais Mikhas xauj qhov rais pom vajntxwv Davi dhia paj paws ntsos seev cev rau ntawm Yawmsaub lub xubntiag, ces nws txawm xu siab rau Davi. Lawv coj Yawmsaub lub phij xab los txawb rau lub chaw hauv lub tsev ntaub uas Davi twb tsa cia lawd, thiab Davi kuj tua tsiaj ua kevcai hlawv xyeem thiab ua kevcai xyeem sib raug zoo rau ntawm Yawmsaub xubntiag. Thaum Davi ua kevcai hlawv xyeem thiab ua kevcai xyeem sib raug zoo tag lawd, nws txawm tuav Yawmsaub uas muaj hwjchim loj kawg nkaus lub npe foom koob hmoov rau cov pejxeem. Thiab nws muab ib leeg ib lub ncuav, ib leeg ib daim nqaij thiab ib lub ncuav txiv hmab qhuav pub rau ib tsoom Yixayee sawvdaws tsis hais pojniam txivneej. Ces lawv txawm nyias rov mus nyias tsev. Davi kuj rov mus foom koob hmoov rau nws tsev neeg. Tiamsis Mikhas uas yog Xa‑u tus ntxhais tawm tuaj tos Davi thiab hais tias, “Hnub no cov Yixayee tus vajntxwv tau koob meej loj kawg li lauj! Nws hle tej tsoos vajntxwv tab meeg nws cov tub teg tub taws tej nkauj qhev yam nkaus li tej neeg plhu tuab hle ris tsho tsis paub txaj muag li.” Mas Davi hais rau Mikhas tias, “Kuv ua li no hwm Yawmsaub uas xaiv kuv los nyob koj txiv chaw thiab nyob nws caj ces sawvdaws chaw tsa kuv ua thawj kav cov Yixayee uas yog Yawmsaub haiv neeg, mas kuv thiaj ua lomzem zoo siab xyiv fab rau ntawm Yawmsaub lub xubntiag. Kuv yuav txo kom kuv raug saib tsis taus heev dua li no thiab kuv yuav saib kuv qes dua thiab. Tiamsis cov nkauj qhev uas koj hais ntawd, lawv yuav muab kuv saib hlob.” Ces Xa‑u tus ntxhais Mikhas txawm tsis muaj menyuam tag sim neej li. Thaum vajntxwv nyob ruaj hauv nws lub vaj tse, thiab Yawmsaub ua rau nws cov yeeb ncuab uas nyob ib ncig tsis tuaj ua rog rau nws lawm, vajntxwv hais rau Nathas uas ua xibhwb cev Vajtswv lus tias, “Saib maj, kuv nyob hauv lub tsev uas xuas ntoo ciab ua hos Vajtswv lub phij xab nyob hauv lub tsev ntaub xwb.” Mas Nathas hais rau vajntxwv tias, “Koj cia li mus ua txhua yam uas koj lub siab xav ua, rau qhov Yawmsaub nrog nraim koj.” Tiamsis hmo ntawd Yawmsaub hais lus tuaj rau Nathas tias, “Cia li mus hais rau kuv tus qhev Davi tias, ‘Yawmsaub hais li no tias, Koj yuav ua ib lub tsev rau kuv nyob lov? Txij thaum kuv coj nej tawm hauv Iyi tebchaws los txog hnub no, kuv tsis txeev nyob hauv lub tsev, tiamsis kuv mus mus los los nyob hauv lub tsev ntaub xwb. Txhua qhov uas kuv nrog cov Yixayee sawvdaws mus mus los los, kuv puas tau hais ib lo lus rau cov Yixayee ib tug thawj twg uas kuv txib kom saib xyuas kuv haiv neeg Yixayee hais tias, “Ua cas nej tsis ua ib lub tsev ntoo ciab rau kuv?” ’ “Vim li no nimno koj cia li hais rau kuv tus qhev Davi tias, ‘Yawmsaub uas muaj hwjchim loj kawg nkaus hais li no tias, Kuv coj koj tawm hauv lub tshav zaub uas koj yug yaj los ua tus thawj kav kuv haiv neeg Yixayee. Koj mus qhovtwg los kuv nrog nraim koj qhov ntawd, thiab kuv rhuav tshem koj cov yeeb ncuab huvsi ntawm koj lub xubntiag mus. Kuv yuav pub kom koj muaj koob meej ib yam li tej uas muaj koob meej loj hauv ntiajteb no. Kuv yuav tu ib lub chaw cia rau kuv haiv neeg Yixayee nyob, thiab kuv yuav muab lawv cog cia nyob ruaj khov rau hauv lub chaw uas yog lawv tug, tsis muaj leejtwg yuav tuaj zes lawv. Tej neeg limhiam ntais ntuj yuav tsis tuaj tsim txom lawv dua li lawm yam li yav tag los txij thaum kuv tsa cov thawj kav kuv haiv neeg Yixayee. Kuv yuav ua rau koj tej yeeb ncuab sawvdaws tsis ua rog rau koj lawm. Dua li ntawd Yawmsaub hais rau koj tias Yawmsaub yuav pub kom koj muaj caj ces ua vaj mus li. Thaum koj hnub nyoog tag mus nrog koj tej poj koob yawm txwv nyob lawd, kuv yuav tsa ib tug tub uas koj yug los nyob koj chaw thiab kuv yuav tsa nws ua vajntxwv kav ruaj khov. Nws yog tus uas yuav ua lub tuam tsev rau kuv lub npe, thiab kuv yuav tsa nws lub zwm txwv nyob mus ib txhis. Kuv yuav ua nws leej txiv thiab nws yuav ua kuv tus tub. Thaum nws ua txhaum kuv yuav siv neeg rab nplawm qhuab qhia nws, thiab kuv yuav siv neeg nplawm nws. Tiamsis kuv yuav tsis muab kuv txojkev hlub uas ruaj khov rho ntawm nws mus yam li uas kuv tau rho ntawm Xa‑u uas kuv muab rhuav tshem ploj ntawm koj mus. Koj caj ces thiab qhov uas lawv ua vajntxwv yuav nyob ruaj khov rau ntawm kuv xubntiag mus ib txhis li. Koj lub zwm txwv yuav raug muab tsa nyob ruaj khov mus ib txhis.’ ” Nathas hais tej lus no huvsi rau Davi raws li tej uas nws ua yog toog. Ces vajntxwv Davi txawm nkag rau hauv lub tsev ntaub zaum ntawm Yawmsaub xubntiag mas hais tias, “Au Vajtswv Yawmsaub, kuv yog leejtwg, kuv caj ces yog leejtwg es koj coj kuv los txog txij no? Au Vajtswv Yawmsaub, tej no yog tej yam me me ntawm koj lub qhov muag xwb. Koj tseem hais tseg txog kuv uas yog koj tus qhev caj ces rau ntau xyoo tom hauv ntej. Au Vajtswv Yawmsaub koj tau qhia tej no rau neeg. Kuv Davi yuav hais dabtsi ntxiv rau koj thiab? Au Vajtswv Yawmsaub, koj yeej paub kuv uas yog koj tus qhev. Twb yog vim koj saib rau koj tej lus cog tseg thiab vim yog raws li koj lub siab nyiam koj thiaj ua tej haujlwm loj no huvsi thiab qhia rau koj tus qhev paub. Au Vajtswv Yawmsaub, koj loj kawg, tsis muaj leejtwg zoo cuag li koj. Dhau koj lawm yeej tsis muaj dua ib tug vajtswv txij li peb lub qhov ntsej tau hnov. Haiv neeg twg hauv lub ntiajteb no yuav zoo thooj li koj haiv neeg Yixayee, uas Vajtswv mus txhiv los ua nws haiv neeg thiab ua rau nws lub npe nto moo lug? Nws ua tej yam uas loj kawg thiab txaus ntshai rau lub tebchaws tab meeg lawv, yog nws haiv neeg uas nws txhiv tawm hauv Iyi tebchaws thiab hauv tej neeg tej dab los. Au Yawmsaub, koj tsim tsa koj haiv neeg Yixayee los ua koj li teej tug mus ib txhis li, thiab koj ua lawv tus Vajtswv. Au Vajtswv Yawmsaub, thov koj tuav tej lus uas koj hais txog kuv uas yog koj tus qhev thiab hais txog kuv caj ces nyob ruaj mus ib txhis, thiab thov koj ua raws li koj tau hais cia lawd. “Koj lub npe yuav raug qhuas mus ib txhis hais tias, ‘Yawmsaub uas muaj hwjchim loj kawg nkaus yog Vajtswv uas kav cov Yixayee,’ thiab Davi uas yog koj tus qhev caj ces yuav nyob ruaj khov ntawm koj lub xubntiag mus li. Au Yawmsaub uas muaj hwjchim loj kawg nkaus uas yog cov Yixayee tus Vajtswv, koj twb qhia rau kuv uas yog koj tus qhev paub tias, koj yuav tsim kuv kom muaj caj ces ua vaj mus li. Vim li no kuv uas yog koj tus qhev thiaj muaj cuabkav tsa ncauj thov koj. Au Vajtswv Yawmsaub, koj yeej yog Vajtswv, koj tej lus yeej yog lus tseeb, thiab koj tau cog tej lus zoo no rau koj tus qhev. Yog li no nimno thov koj txaus siab foom koob hmoov rau koj tus qhev caj ces kom nyob ruaj rau ntawm koj lub xubntiag mus ib txhis. Au Vajtswv Yawmsaub, koj twb hais cia li ntawd lawm, thiab koj tej koob hmoov yeej yuav muaj rau kuv uas yog koj tus qhev caj ces mus ib txhis.” Dhau ntawd Davi ntaus yeej cov Filixatee thiab tswjhwm lawv. Davi txeeb tau lub moos Methehama ntawm cov Filixatee txhais tes. Nws ntaus yeej cov Mau‑a thiab. Nws yuam lawv pw ua ib kab sab rau hauv pem teb mas xuas hlua ntsuas lawv, ntsuas ob hluas muab tua pov tseg, ntsuas ib hluas tseg cia. Cov Mau‑a kuj zwm rau Davi thiab coj qhov txhia chaw tuaj them se rau nws. Davi kuj ntaus yeej Lehau tus tub Hadadexaw uas ua vajntxwv hauv lub moos Xaunpa, yog thaum Hadadexaw mus txeeb cov tebchaws ntawm dej Yufeti rov qab. Davi txeeb tau cov tub rog caij nees ib txhiab xya pua leej thiab cov tub rog mus kotaw ob vam leej, thiab Davi txiav cov nees uas hai tsheb ua rog leeg raws huvsi, tseg kom txaus hai ib puas lub tsheb ua rog xwb. Thaum cov neeg Alas uas nyob hauv lub nroog Damaxaka tuaj pab Xaunpa tus vajntxwv Hadadexaw, mas Davi tua cov Alas ob vam ob txhiab leej. Davi tsa ib co tub rog zov kav cov Alas hauv lub nroog Damaxaka. Cov Alas zwm rau Davi thiab coj qhov txhia chaw tuaj them se rau nws. Yawmsaub pub Davi kov yeej rau txhua qhov uas nws mus. Thiab Davi txeeb tau daim phiaj kub uas thaiv hauv siab uas Hadadexaw cov tub teg tub taws coj, thiab coj mus rau lub nroog Yeluxalees. Thiab vajntxwv Davi txeeb tau tooj liab ntau ntau li ntawm lub moos Npetha thiab lub moos Npelauthai uas yog Hadadexaw tej moos. Thaum vajntxwv Thau‑i hauv lub moos Hama hnov tias Davi tau ntaus yeej Hadadexaw cov tub rog huvsi lawm, Thau‑i txawm txib nws tus tub Yaulas mus cuag vajntxwv Davi mus hais ib lo lus tshav ntuj zoo siab rau nws rau qhov uas Davi tau ua rog thiab ntaus yeej Hadadexaw lawm, rau qhov Hadadexaw pheej ua rog rau Thau‑i. Yaulas kuj coj tej qhov txhia chaw uas xuas nyiaj xuas kub xuas tooj liab ua, tuaj pub rau Davi. Vajntxwv Davi muab txhua yam no xyeem pub rau Yawmsaub, thiab muab tej nyiaj kub uas nws muab tau ntawm txhua haiv neeg uas nws kov yeej xyeem pub rau Yawmsaub, yog tej uas nws txeeb tau ntawm cov Edoo, cov Mau‑a, cov Asmoo, cov Filixatee, cov Amalej thiab tej uas nws txeeb tau ntawm Lehau tus tub Hadadexaw uas ua vajntxwv hauv Xaunpa. Thaum Davi mus tua cov Edoo tuag ib vam yim txhiab leej rau hauv lub Hav Ntsev rov los, ces nws lub moo txawm nrov nto moo lug. Nws tso tub rog zov kav thoob tebchaws Edoo, mas cov neeg Edoo sawvdaws zwm rau Davi. Yawmsaub pub Davi kov yeej rau txhua qhov uas nws mus. Mas Davi kav tag nrho cov Yixayee huvsi. Davi ua ncaj ua ncees thiab ua zoo rau nws cov pejxeem sawvdaws. Xeluya tus tub Yau‑a ua thawj kav tub rog. Ahilu tus tub Yehausafa ua tus uas sau ntawv keeb kwm. Ahithu tus tub Xadau thiab Anpiyatha tus tub Ahimelej ua pov thawj. Xelaya ua tus tub sau ntawv. Yehauyada tus tub Npenaya kav cov Khelethi thiab cov Pelethi. Thiab Davi cov tub ua pov thawj. Davi hais tias, “Xa‑u caj ces tshuav leejtwg rau kuv hlub vim yog saib rau Yaunathas los tsis tshuav?” Xa‑u tsev neeg muaj ib tug tub qhe hu ua Xinpa, ces lawv txawm hu nws tuaj cuag Davi, mas vajntxwv Davi nug nws tias, “Koj yog Xinpa lov?” Nws teb tias, “Kuv uas yog koj tus qhev yog lauj.” Vajntxwv hais rau nws tias, “Xa‑u caj ces tshuav leejtwg rau kuv hlub raws li Vajtswv txojkev hlub los tsis tshuav?” Xinpa teb vajntxwv tias, “Yaunathas tshuav ib tug tub, tuag taw thiab.” Vajntxwv nug nws tias, “Tus ntawd nyob qhovtwg?” Xinpa hais rau vajntxwv tias, “Tus ntawd nyob hauv Ami‑ee tus tub Makhi lub tsev hauv lub moos Laudenpa.” Ces vajntxwv txawm txib neeg mus coj tus ntawd hauv Ami‑ee tus tub Makhi lub tsev ntawm lub moos Laudenpa los. Ces Yaunathas tus tub Mefinpause uas yog Xa‑u tus xeeb ntxwv thiaj tau los cuag Davi, nws khwb nkaus pe Davi. Davi hais tias, “Mefinpause 'e.” Nws teb tias, “Yawg hlob, kuv yog koj tus qhev.” Davi hais rau nws tias, “Tsis txhob ntshai rau qhov kuv yuav hlub koj vim yog saib rau koj txiv Yaunathas, thiab kuv yuav muab koj yawg Xa‑u tej liaj teb huvsi thim rau koj, thiab koj yuav nrog kuv koom noj haus ua ke ntawm kuv rooj mov mus li.” Mefinpause txawm pe thiab hais tias, “Kuv uas yog koj tus qhev yog leejtwg es koj yuav tsa muag zaj saib tus dev tuag uas zoo li kuv no?” Vajntxwv hu Xinpa uas yog Xa‑u tus tub qhe tuaj thiab hais tias, “Txhua yam uas yog Xa‑u thiab nws tsev neeg li kuv muab cob rau koj tus tswv tus xeeb ntxwv lawm. Koj thiab koj cov tub ki thiab koj cov tub qhe yuav tsum ua nws tej teb rau nws, thiab sau tej qoob uas ua tau ntawd los rau koj tus tswv tus xeeb ntxwv tau noj. Tiamsis Mefinpause uas yog koj tus tswv tus xeeb ntxwv no yuav nrog kuv koom rooj noj ua ke.” Xinpa muaj kaum tsib tug tub thiab nees nkaum tus tub qhe. Xinpa txawm hais rau vajntxwv tias, “Kuv yuav ua txhua yam raws li uas vajntxwv hais rau kuv uas yog koj tus qhev.” Mefinpause thiaj nrog Davi koom rooj noj haus ua ke ib yam li yog vajntxwv tub. Mefinpause muaj ib tug metub yau hu ua Mikhas. Txhua tus uas nyob hauv Xinpa lub tsev puavleej ua Mefinpause li tub qhe. Mefinpause thiaj nyob hauv lub nroog Yeluxalees. Nws nrog vajntxwv koom ib lub rooj noj mov mus li. Nws ob txhais taw tuag tag huvsi. Dhau ntawd los cov Asmoo tus vajntxwv txawm tuag mas nws tus tub Hanu ua vajntxwv sawv nws txiv chaw. Davi txawm hais tias, “Kuv yuav ua ncaj ua zoo rau Naha tus tub Hanu ib yam li nws txiv tau ua ncaj ua zoo rau kuv.” Davi thiaj tso nws cov tub teg tub taws mus nplij Hanu siab vim nws txiv tuag lawm. Mas Davi cov tub teg tub taws thiaj mus rau hauv cov Asmoo tebchaws. Tiamsis cov Asmoo cov thawj hais rau Hanu uas ua lawv tus tswv tias, “Koj xav hais tias Davi xa neeg tuaj nplij koj ces yog nws hwm koj txiv no lov? Sub tsis yog Davi txib nws cov tub teg tub taws tuaj cuag koj es yuav saib thiab tshuaj saib thiab rhuav lub nroog.” Hanu txawm ntes Davi cov tub teg tub taws thiab muab hwj txwv chais ib nrab tseg ib nrab thiab muab lawv lub tsho txiav txij ntawm lub ntsag rau yav hauv pov tseg, thiab muab lawv tso mus. Thaum muaj neeg mus hais rau Davi paub mas nws txib neeg mus tos lawv rau qhov lawv raug kev txaj muag heev. Vajntxwv thiaj hais tias, “Nej cia li so ntawm lub moos Yelikhau mus txog thaum nej cov hwj txwv tuaj tso mam li los.” Thaum cov Asmoo pom tias lawv ua rau Davi ntxub lawv lawm, cov Asmoo txawm txib neeg mus ntiav cov neeg Alas hauv lub moos Npelehau thiab cov Alas hauv lub moos Xaunpa, yog tub rog mus kotaw huvsi ob vam leej, thiab ntiav tus vajntxwv hauv Ma‑akha uas muaj ib txhiab leej, thiab cov neeg hauv lub moos Thauj yog ib vam ob txhiab leej. Thaum Davi hnov tej no lawd nws txawm txib Yau‑a thiab cov tub rog siab tuab huvsi mus. Cov Asmoo kuj tawm tuaj npaj tub rog rau ntawm rooj loog. Cov Alas uas tuaj hauv lub moos Xaunpa thiab tuaj hauv lub moos Lehau, thiab cov neeg Thauj thiab cov neeg Ma‑akha, lawv nyob dua ib cag tom hav nroj. Thaum Yau‑a pom tias luag npaj tub rog rau tom nws hauv ntej thiab npaj tub rog rau tom nws qub qab, nws txawm xaiv pab tub rog Yixayee uas txawj tshaj plaws qee leej thiab tso lawv mus tiv cov Alas. Dua li cov nws muab cob rau nws tus kwv Anpisai kav thiab kom lawv npaj mus tiv cov Asmoo. Yau‑a hais tias, “Yog cov Alas muaj zog heev dhau kuv, koj cia li tuaj pab kuv, hos yog cov Asmoo muaj zog heev dhau koj mas kuv yuav tuaj pab koj. Cia li ua siab tuab, peb cia li ua siab loj yam li txivneej yawg pab peb haiv neeg thiab pab peb tus Vajtswv tej moos. Thov Yawmsaub ua raws li nws pom zoo.” Ua li ntawd mas Yau‑a thiab cov tub rog uas nrog nws thiaj li txeem mus ze ua rog rau cov Alas, mas cov Alas thiaj khiav thim zuj zus tom nws hauv ntej. Thaum cov Asmoo pom cov Alas khiav lawm ces lawv txawm khiav ntawm Anpisai hauv ntej ib yam nkaus nkag mus rau hauv lub nroog. Ces Yau‑a txawm tseg tsis ua rog rau cov Asmoo, cia li rov los rau Yeluxalees. Thaum cov Alas pom tias lawv swb cov Yixayee lawm lawv txawm mus sau zog los ua ke. Mas Hadadexaw txib neeg mus coj cov neeg Alas uas nyob sab dej Yufeti hnub tuaj tawm tuaj. Lawv tuaj rau ntawm Helas. Hadadexaw tus thawj rog Saunpa coj lawv kev. Thaum muaj neeg hais rau Davi paub mas nws sau zog cov Yixayee sawvdaws tuaj ua ke hla tus dej Yaladee tuaj txog ntawm Helas. Mas cov Alas npaj tub rog tiv Davi thiab ua rog rau nws. Cov Alas kuj thim khiav cov Yixayee mas Davi tua tau Alas cov tub rog hauv tsheb ua rog tuag xya pua leej thiab tua tau cov tub rog caij nees tuag plaub vam leej thiab tua tau lawv tus thawj rog Saunpa tuag rau qhov ntawd. Thaum cov vajntxwv uas zwm rau Hadadexaw pom tias lawv swb cov Yixayee lawm lawv kuj nrog cov Yixayee sib raug zoo thiab zwm rau cov Yixayee. Vim li no cov Alas thiaj ntshai tsis kav pab cov Asmoo dua li lawm. Thaum txog lub caij ntuj qhua yog lub caij uas tej vajntxwv pheej tawm mus ua rog, Davi txib Yau‑a thiab cov tub teg tub taws thiab Yixayee cov tub rog huvsi mus ntaus yeej cov Asmoo thiab vij lub nroog Lanpa cia. Tiamsis Davi nyob hauv lub nroog Yeluxalees xwb. Muaj ib hnub thaum yuav tsaus ntuj Davi sawv ntawm nws lub chaw pw nce mus rau saum vajntxwv lub tsev txheej tsev las tshav ncig ua si. Nws tsa muag ntsia pom ib tug pojniam da dej, tus pojniam ntawd zoo nkauj heev. Davi txib neeg mus nug txog tus pojniam ntawd. Muaj ib tug los hais tias, “Tus pojniam ntawd sub tsis yog Npasenpa uas yog Elias tus ntxhais uas yog Uliya uas yog neeg Hithai tus pojniam lov?” Ces Davi txawm txib tub xa xov mus coj tus pojniam ntawd tuaj. Tus pojniam txawm tuaj cuag Davi, Davi txawm nrog nws pw. Tus pojniam ntawd nyuam qhuav ua kevcai ntxuav nws lub cev uas ua pojniam tag. Ces tus pojniam ntawd txawm rov qab mus tsev. Tus pojniam ntawd txawm xeeb menyuam, nws thiaj txib neeg mus hais rau Davi paub hais tias, “Kuv xeeb menyuam lawm.” Davi thiaj xa xov mus hais rau Yau‑a tias, “Cia li tso Uliya uas yog neeg Hithai los cuag kuv.” Yau‑a thiaj tso Uliya los cuag Davi. Thaum Uliya los txog Davi nug tias Yau‑a nyob li cas, cov tub rog nyob li cas thiab kev ua rog kov yeej mus li cas lawm. Davi txawm hais rau Uliya tias, “Cia li mus rau hauv koj lub tsev thiab ntxuav koj kotaw.” Uliya txawm tawm hauv vajntxwv tsev mus thiab muaj neeg coj tej qhov txhia chaw uas vajntxwv pub raws qab mus rau nws. Tiamsis Uliya cia li nrog vajntxwv cov tub teg tub taws pw ntawm vajntxwv tsev lub rooj vag, twb tsis mus rau hauv nws lub tsev li. Muaj neeg hais rau Davi tias, “Uliya tsis mus rau hauv nws tsev li.” Davi txawm hais rau Uliya tias, “Koj twb mus kev deb deb los es ua cas koj tsis mus rau hauv koj tsev?” Uliya hais rau Davi tias, “Lub phij xab thiab cov Yixayee thiab cov Yuda nyob hauv lub tsev ntaub ua rog. Kuv tus tswv Yau‑a thiab koj cov tub teg tub taws kuj ua yeej nyob tom tshav rog es kuv yuav cia li mus tsev mus noj haus thiab nrog kuv tus pojniam pw tau lov? Koj muaj txojsia nyob thiab koj lub siab tseem ciaj sia pom, kuv yuav tsis ua li ntawd kiag li.” Davi txawm hais rau Uliya tias, “Hnub no cia li so ntawm no tagkis kuv li kheev koj mus.” Uliya thiaj nyob hauv Yeluxalees hnub ntawd thiab hnub tom qab. Davi hu nws los nws thiaj los noj los haus ntawm vajntxwv xubntiag, thiab vajntxwv muab nws txhaus kom qaug cawv. Hnub ntawd tsaus ntuj nws kuj mus nrog vajntxwv cov tub teg tub taws pw ntawm daim lev tsis mus rau hauv nws tsev li. Tagkis tom qab Davi thiaj sau ib tsab ntawv muab rau Uliya coj mus rau Yau‑a. Tsab ntawv ntawd hais tias, “Cia li tu kom Uliya ua pab uas ntaus ua ntej rau ntawm lub chaw uas lawv sib tua heev, thiab thim tub rog cia nws raug tua tuag.” Thaum Yau‑a tseem vij lub nroog nws tu kom Uliya mus ntaus ncaj qhov chaw uas nws paub tias muaj cov tub rog siab loj siab tuab. Ces cov neeg hauv lub nroog txawm tawm tuaj tiv Yau‑a, mas Davi cov tub teg tub taws muaj qee leej raug tua tuag. Uliya uas yog neeg Hithai kuj tuag thiab. Yau‑a txawm tso ib tug mus hais rau Davi paub txog kev sib tua zaum ntawd. Nws qhia tus xa xov tias, “Thaum koj piav qhov uas sib tua rau vajntxwv mloog tag lawm, yog vajntxwv npau taws thiab nws hais rau koj tias, ‘Ua cas nej yuav mus ntaus ze lub nroog ntawd ua luaj? Nej tsis paub tias luag yuav tua ntawm ntsa loog tuaj no lov? Leejtwg tua Anpimelej uas yog Yelunpese tus tub? Tsis yog ib tug pojniam muab txhib txiv zeb pov saum ntsa loog los raug nws tuag ntawm lub moos Thenpes lov? Ua cas nej yuav mus ze lub ntsa loog?’ ces koj cia li hais tias, ‘Vajntxwv tus tub qhe Uliya uas yog neeg Hithai kuj tuag lawm thiab.’ ” Tus uas xa xov txawm mus, nws hais rau Davi paub txog txhua yam uas Yau‑a txib nws los hais. Tus uas xa xov ntawd hais rau Davi tias, “Yeeb ncuab ua tau dua peb, lawv tawm tuaj tua peb sab nraud. Ces peb caum lawv mus txog ntua ntawm rooj loog. Ces cov tub rog kuj tua hneev saum ntsa loog tuaj rau koj cov tub rog. Mas koj cov tub teg tub taws qee leej tuag thiab koj tus qhev Uliya uas yog neeg Hithai kuj tuag thiab.” Davi txawm hais rau tus xa xov ntawd tias, “Koj cia li hais rau Yau‑a li no tias, ‘Tsis txhob nyuaj siab rau zaj no, rau qhov hniav ntaj yeej tua ib zaug tus ub ib zaug tus no. Cia li ua rog heev dua qub ntaus kom tau lub nroog ntawd.’ Koj txhawb nws lub zog thiab.” Thaum Uliya tus pojniam hnov tias nws tus txiv Uliya tuag lawm nws kuj quaj ntsuag nws tus txiv. Thaum dhau lub sijhawm quaj ntsuag lawm, Davi txawm txib neeg mus coj nws los rau hauv Davi lub tsev thiab ua Davi pojniam thiab yug ib tug tub rau Davi. Tiamsis Yawmsaub tsis txaus siab rau tej uas Davi ua ntawd. Yawmsaub txib Nathas mus cuag Davi. Nathas txawm mus txog Davi thiab hais tias, “Muaj ob tug txivneej nyob hauv ib lub moos, ib tug nplua nuj ib tug pluag. Tus nplua nuj muaj tshis muaj yaj muaj nyuj coob heev. Tus pluag tsis muaj dabtsi li tsuas muaj tib tug xyuas yaj uas nws yuav los xwb. Nws tu hlob thiab cia nrog nws thiab nws cov menyuam nyob ua ke, noj ua ke koom haus ib lub khob dej, pw hauv nws lub xubntiag, zoo yam nkaus li ib tug mentxhais rau nws. Tus nplua nuj ntawd muaj ib tug qhua tuaj tsham nws. Nws tsis kam muab nws tej yaj tej tshis tej nyuj los tua tiam tus qhua uas tuaj tsham ntawd, ces nws txawm muab tus pluag ntawd tus menyuam yaj los tua rau tus qhua uas tuaj tsham nws noj.” Ces Davi txawm npau taws rau tus nplua nuj ntawd heev thiab hais rau Nathas tias, “Yawmsaub muaj txojsia nyob pom, yuav tsum muab tus yawg uas ua li ntawd tua pov tseg. Thiab nws yuav thim tus menyuam yaj rov qab plaub npaug vim yog nws ua li no nws tsis muaj siab khuvleej li.” Nathas hais rau Davi tias, “Koj yog tus yawg ntawd ntag. Yawmsaub uas yog cov Yixayee tus Vajtswv hais li no tias, ‘Kuv twb tsa koj ua vajntxwv kav cov Yixayee thiab cawm koj dim hauv Xa‑u txhais tes. Kuv tau muab Xa‑u uas yog koj tus tswv tsev neeg rau koj thiab muab nws tej pojniam rau hauv koj lub xubntiag, thiab kuv muab cov Yixayee thiab cov Yuda huvsi rau koj. Yog npaum li no tseem tsawg lawm kuv yuav tsav ntxiv dua ib npaug thiab. Ua cas koj yuav saib tsis taus Yawmsaub tej lus es ua tej uas nws pom tias phem kawg? Koj xuas ntaj tua Uliya uas yog neeg Hithai thiab yuav nws tus pojniam los ua koj pojniam. Koj xuas cov Asmoo rab ntaj tua nws ntag. Vim li ntawd nimno hniav ntaj yuav tsis plam hauv koj caj ces kiag li vim yog koj saib tsis taus kuv thiab yuav Uliya uas yog neeg Hithai tus pojniam los ua koj pojniam.’ Yawmsaub hais li no tias, ‘Saib nawj, kuv yuav ua kom xwm txheej phem tshwm los hauv koj tsev neeg tawm tsam koj, thiab kuv yuav muab koj tej pojniam coj mus tab meeg koj thiab muab pub rau koj kwvtij zej zog, mas tus ntawd yuav nrog koj tej pojniam pw tab meeg nruab hnub. Koj ua tej kev txhaum ntawd zais ntshis tsis pub leejtwg pom, tiamsis kuv yuav ua tej no nruab hnub lug tab meeg rau cov Yixayee sawvdaws pom.’ ” Davi thiaj hais rau Nathas tias, “Kuv tau ua txhaum muaj txim rau Yawmsaub lawm.” Mas Nathas hais rau Davi tias, “Yawmsaub zam koj lub txim lawm, koj yuav tsis tuag. Txawm li cas kuj xij vim koj ua tej no saib tsis taus Yawmsaub heev kawg, mas tus menyuam uas yuav yug los ntawd yuav tuag.” Nathas txawm rov qab mus tsev lawm. Mas Yawmsaub ua rau tus menyuam uas Uliya tus pojniam yug rau Davi ntawd mob heev. Davi txawm taij thov Vajtswv pab tus menyuam ntawd. Davi yoo mov thiab pw ib hmos hauv av. Cov tub teg tub taws hauv vajntxwv tsev los rau ntawm nws yuav tsa nws sawv hauv av los. Tiamsis nws tsis kam thiab tsis nrog lawv noj mov li. Tau xya hnub tus menyuam ntawd txawm tuag lawm. Mas Davi cov tub teg tub taws ntshai tsis kav qhia rau nws paub tias tus menyuam tuag lawm, lawv sib tham hais tias, “Thaum tus menyuam ntawd tseem ciaj sia nyob peb hais rau Davi, Davi twb tsis mloog. Mas peb yuav ua li cas hais tau rau nws tias tus menyuam tuag lawm? Tsam ces nws ho ua li cas rau nws tus kheej.” Tiamsis thaum Davi pom cov tub teg tub taws sib ntxhi li ntawd, nws nkag siab tias tus menyuam tuag lawm. Davi thiaj hais rau nws cov tub teg tub taws tias, “Tus menyuam tuag lawm lov?” Lawv teb tias, “Tuag lawm lauj.” Ces Davi txawm sawv tsees hauv av los, da dej pleev roj hloov ris tsho thiab mus rau hauv Yawmsaub lub tsev pe hawm Yawmsaub. Nws mus rau hauv nws lub tsev thiab thaum nws hais kom lawv rau mov los, lawv kuj coj mov los rau rau ntawm nws xubntiag rau nws noj. Nws cov tub teg tub taws thiaj nug nws tias, “Ua cas koj ua li no? Koj yoo mov thiab quaj txog tus menyuam ntawd rau thaum nws tseem muaj txojsia nyob. Tiamsis thaum tus menyuam tuag lawd koj cia li sawv tsees los noj mov.” Davi hais tias, “Thaum tus menyuam tseem ciaj sia nyob kuv yoo mov thiab quaj, vim kuv xav tias leejtwg yuav paub xyov Yawmsaub yuav hlub kuv es pub tus menyuam ntawd muaj txojsia nyob. Tiamsis nimno nws twb tuag lawd es kuv yuav yoo mov ua dabtsi? Kuv yuav ua tau kom tus menyuam ciaj rov los lov? Kuv tsuas muaj uas yuav mus rau ntawm nws, nws yuav tsis rov los rau ntawm kuv.” Ces Davi txawm nplij nws tus pojniam Npasenpa lub siab, thiab nrog nws pw, ces nws txawm yug tau ib tug tub, mas Davi tis lub npe hu ua Xalaumoo. Yawmsaub hlub tus metub ntawd. Mas Yawmsaub hais lus tuaj rau Nathas uas ua xibhwb cev Vajtswv lus kom tis tus metub ntawd npe hu ua Yedidiya vim yog Yawmsaub hlub. Yau‑a ntaus cov Asmoo lub nroog Lanpa thiab txeeb tau lub chaw ruaj khov uas vajntxwv nyob. Yau‑a txawm tso neeg mus hais rau Davi tias, “Kuv tabtom ntaus lub nroog Lanpa thiab kuv txeeb tau lub qhov dej hauv lub nroog lawm. Nimno thov koj sau cov tub rog uas tseem tshuav es tuaj ua yeej vij ntaus lub nroog thiab txeeb kom tau, ntshai tsam kuv txeeb tau ces luag yuav hu lub nroog ntawd raws li kuv lub npe.” Davi thiaj li sau cov tub rog huvsi thiab mus rau ntawm Lanpa, nws ntaus thiab txeeb tau lub nroog ntawd. Nws hle lub mom kub ntawm lawv tus vajntxwv lub taubhau los, yog tseem kub hnyav ib tala thiab muaj ib lub qe zeb hlaws muaj nqes nyob rau hauv. Lawv muab lub mom kub ntawd rau Davi ntoo. Davi sau tau tej qhov txhia chaw uas txeeb tau hauv lub nroog ntawd ntau kawg li coj mus. Davi kuav cov neeg hauv lub nroog ntawd tawm los thiab yuam kom lawv xuas kaw xuas hlau xuas taus ua haujlwm thiab ua haujlwm ntawm lub chaw hlawv thwv cib. Nws ua ib yam li no rau cov Asmoo txhua lub moos huvsi. Ces Davi thiab cov tub rog sawvdaws rov mus rau hauv Yeluxalees. Davi tus tub Axaloo muaj ib tug muam zoo nkauj hu ua Thama. Nyob nyob Davi tus tub Asnoo txawm nyiam nws. Vim yog nws tus muam Thama no mas Asnoo thiaj lwj lwj siab ua mob kiag, rau qhov uas nws tsis tau deev dua hluas nraug li mas Asnoo yeej xav tias ua tsis tau li cas rau nws. Ces Asnoo muaj ib tug phoojywg hu ua Yaunada, yog Davi tus tijlaug Sime‑a li tub. Yaunada yog ib tug ntse. Nws txawm hais rau Asnoo tias, “Vajntxwv tus tub 'e, ua cas koj niaj tagkis ua ib tug niag nphob xuav ntsej muag ntshaus tag? Tsis qhia rau kuv paub li lov?” Asnoo teb nws tias, “Kuv nyiam Thama uas yog kuv tus tijlaug Axaloo tus muam.” Yaunada txawm hais rau nws tias, “Koj mus pw saum koj lub txaj ua txuj mob, mas thaum koj txiv tuaj saib koj, cia li hais rau nws tias, ‘Thov txib kuv tus muam tuaj muab mov rau kuv noj, kom nws tuaj ua mov ntawm kuv xubntiag xwv kuv thiaj li pom thiab tau noj ntawm nws txhais tes ntag.’ ” Asnoo txawm pw ua txuj mob. Thaum vajntxwv tuaj saib, Asnoo txawm hais rau vajntxwv tias, “Thov txib kuv tus muam Thama tuaj ua ob peb lub ncuav ntawm kuv xubntiag xwv kuv thiaj li tau noj ntawm nws txhais tes.” Davi thiaj txib neeg mus hais rau Thama hauv tsev tias, “Cia li mus ntawm koj tus nus Asnoo tsev mus ua mov rau nws noj.” Thama thiaj mus rau ntawm nws tus nus Asnoo tsev uas Asnoo pw ntawd. Nws kuj muab hmoov mog los zuaj ua ncuav ntawm Asnoo xubntiag thiab muab ci. Nws rho lub tais ci ncuav los nchuav txawb rau ntawm Asnoo xubntiag. Tiamsis Asnoo tsis kam noj. Asnoo hais tias, “Kom lwm tus tawm mus tso.” Txhua tus thiaj tawm mus lawm. Asnoo txawm hais rau Thama tias, “Cia li coj cov ncuav los rau hauv txaj kom kuv thiaj noj ntawm koj txhais tes.” Thama kuj coj cov ncuav uas nws ua ntawd mus rau hauv lub txaj muab rau nws tus nus Asnoo. Ces thaum nws coj cov ncuav los ze yuav muab rau Asnoo noj, Asnoo txawm ntsiab nkaus nws cia hais tias, “Leej muam, koj cia li los nrog kuv pw.” Nws teb Asnoo tias, “Leej nus, tsis tau li, tsis txhob yuam kuv li. Tej kev zoo li no yeej tsis tsim nyog ua hauv cov Yixayee. Tsis txhob ua tej kev phem kev qias li no kiag li. Thiab kuv los kuv yuav muab txojkev txaj muag no coj mus nraim rau qhovtwg? Thiab koj los koj yuav ua zoo li tus niag neeg ruam hauv cov Yixayee. Vim li no thov koj hais rau vajntxwv tso. Vajntxwv yuav tsis txwv es tsis pub kuv rau koj.” Tiamsis Asnoo tsis mloog nws hais li. Asnoo muaj zog heev dua nws thiaj muab nws yuam tau pw lawm. Dhau ntawd Asnoo txawm ntxub nws kawg li. Mas txojkev ntxub no loj dhau qhov uas thaum nws nyiam. Ces Asnoo txawm hais rau nws tias, “Cia li sawv khiav mus.” Tiamsis Thama hais rau nws tias, “Leej nus, tsis txhob ua li. Qhov uas koj muab kuv ntiab tawm no tseem txhaum loj dua li uas koj tau ua rau kuv lawd.” Tiamsis Asnoo tsis mloog nws hais li. Nws cia li hu tus hluas uas tu nws hais tias, “Cia li muab tus pojniam no ntiab kom tawm dhau ntawm kuv lub xubntiag mus, es muab qhov rooj kaw muab laj rau.” Thama hnav lub tsho ntev muaj tes, yam li vajntxwv tej ntxhais uas tsis tau deev dua hluas nraug ib txwm hnav. Tus tub teg tub taws ntawd txawm muab Thama ntiab tawm mus thiab muab qhov rooj laj rau. Thama muab tshauv tsuab rau saum nws taubhau thiab muab nws lub tsho ntev uas nws hnav dua rhe. Nws muab tes puab taubhau quaj taug kev mus. Nws tus nus Axaloo txawm hais rau nws tias, “Koj tus nus Asnoo nrog koj nyob lawm lov? Leej muam, ua twjywm. Nws yog koj li nus. Tsis txhob ntxhov siab rau qhov no.” Thama txawm nyob ua siab ntuag tag rau hauv nws tus nus Axaloo lub tsev. Thaum vajntxwv Davi paub txog zaj no huvsi nws chim heev. Tiamsis Axaloo tsis hais ib los li cas rau Asnoo li txawm yog zoo thiab phem, rau qhov Axaloo ntxub Asnoo kawg vim qhov uas yuam nws tus muam Thama. Tau ob xyoo tom qab Axaloo ntiav zog txiav plaub yaj ntawm Npa‑as Haxau uas nyob ze Efa‑i, mas Axaloo hu vajntxwv cov tub sawvdaws mus rau qhov ntawd. Axaloo mus hais rau vajntxwv tias, “Kuv uas yog koj tus qhev ntiav zog txiav plaub yaj mas thov vajntxwv thiab nws cov tub teg tub taws nrog kuv mus thiab.” Tiamsis vajntxwv hais rau Axaloo tias, “Tub, tsis txhob ua li ntawd, peb tsis txhob mus huvsi tsam ces peb ua nra hnyav rau koj.” Axaloo taij taij vajntxwv los nws tsis kam mus. Vajntxwv cia li foom koob hmoov rau nws xwb. Axaloo thiaj thov hais tias, “Yog koj tsis mus los thov tso kuv tus kwv Asnoo nrog peb mus.” Vajntxwv hais rau nws tias, “Ua li cas nws yuav tsum nrog koj mus?” Tiamsis Axaloo taij taij txog thaum vajntxwv kheev Asnoo thiab vajntxwv cov tub sawvdaws nrog nws mus. Mas Axaloo hais rau nws cov tub teg tub taws tias, “Tos ntsia ntsoov thaum twg Asnoo haus cawv zoo siab heev mas thaum kuv hais kom nej ntaus Asnoo ces nej cia li muab nws tua kiag. Tsis txhob ntshai li, yog kuv hais kom nej ua. Cia li ua siab loj siab tuab.” Mas Axaloo cov tub teg tub taws kuj ua rau Asnoo raws li Axaloo hais kom lawv ua. Mas vajntxwv cov tub sawvdaws cia li sawv pes tsees nyias caij nyias tus luj txwv khiav. Mas thaum cov tub ntawd tseem taug kev, Davi hnov xov tias, “Axaloo twb muab vajntxwv cov tub tua tuag tag huvsi tsis tshuav ib tug li.” Vajntxwv sawv tsees muab lub tsho dua rhe pw nthi hauv pem teb. Cov tub teg tub taws uas nyob ze Davi sawvdaws kuj muab tsho dua rhe. Tiamsis Davi tus tijlaug Sime‑a tus tub Yaunada hais tias, “Koj tsis txhob xav tias lawv tua koj cov tub tag huvsi lawm, tsuas yog Asnoo tib leeg tuag xwb. Qhov uas Axaloo hais kom ua li no nws twb npaj thaum Asnoo yuam nws tus muam Thama los lawm. Mas vajntxwv tsis txhob tu siab tsis txhob ntxhov siab, tsis txhob xav tias vajntxwv cov tub tuag tag huvsi lawm, tsuas yog Asnoo tib leeg tuag xwb.” Ces Axaloo txawm khiav lawm. Tus hluas uas fajxwm zov lub moos tsa muag ntsia mas pom neeg coob coob tabtom tuaj taug txojkev Haulana‑i ntawm ib sab roob los. Yaunada thiaj hais rau vajntxwv tias, “Saib maj, vajntxwv cov tub kuj los lawm. Yeej muaj tseeb li uas kuv uas yog koj tus qhev hais rau koj lawm.” Thaum nws hais lus xaus nkaus vajntxwv cov tub los txog tsa suab hlo quaj. Vajntxwv thiab nws cov tub teg tub taws sawvdaws kuj quaj lwj siab kawg. Axaloo khiav mus cuag Amihu tus tub Thamai uas ua vajntxwv hauv Kesu tebchaws. Davi kuj niaj hnub quaj nws tus tub. Axaloo kuj khiav mus rau Kesu tebchaws mus nyob hauv tau peb xyoos. Vajntxwv nco dai siab dhuam Axaloo. Davi lub siab uas nco Asnoo uas tuag lawd mas rov zoo zuj zus. Xeluya tus tub Yau‑a pom tias vajntxwv nco Axaloo heev ua dai siab dhuam. Yau‑a txawm tso neeg mus rau lub moos Thekhau‑a es coj ib tug pojniam ntse ntsuav los mas hais rau nws tias, “Koj ua txuj li tus uas quaj tej tuag thiab hnav lub tsho uas nco tuag. Tsis txhob pleev roj tsw qab, ua txuj yam li tus pojniam uas twb quaj tej tuag tau ntau hnub lawd, mas mus cuag vajntxwv, mus hais li no rau nws.” Mas Yau‑a qhia lus rau tus pojniam ntawd. Thaum tus pojniam hauv Thekhau‑a tuaj cuag vajntxwv nws txawm khwb ti nkaus av pe vajntxwv mas hais tias, “Au vajntxwv, thov pab kuv.” Vajntxwv hais rau nws tias, “Koj muaj teeb meem dabtsi?” Nws teb tias, “Kuv yog ib tug niag poj ntsuam, kuv tus txiv tuag lawm. Kuv uas yog koj tus nkauj qhev muaj ob tug tub sib ceg tom teb. Tsis muaj leejtwg pab cheem ob tug mas ib tug thiaj muab ib tug ntaus tuag lawm. Mas cov kwvtij sawvdaws tuaj nrhiav cai rau kuv uas yog koj tus nkauj qhev hais tias, ‘Muab tus uas tua nws tus tijlaug rau peb, kom peb thiaj muab nws tua tau pov tseg ua pauj qhov uas nws tua nws tijlaug ntawd. Mas lawv yuav muab tus uas yuav saws qub txeeg qub teg tua thiab.’ Txawm yam nkaus li yuav tua kuv lub ncaig taws uas tseem tshuav tsis pub kuv txiv muaj npe muaj keeb nyob ntiajteb no li lawm.” Vajntxwv thiaj hais rau tus pojniam ntawd tias, “Cia li rov mus tsev, kuv yeej yuav hais kom luag tu koj tshaj plaub.” Mas tus pojniam Thekhau‑a hais rau vajntxwv tias, “Vajntxwv uas yog kuv tus tswv, cia lub txim poob rau saum kuv thiab kuv txiv caj ces. Tiamsis vajntxwv thiab vajntxwv lub zwm txwv tsis txhob raug txim.” Vajntxwv hais tias, “Yog muaj leejtwg hais li cas rau koj, cia li coj tus ntawd tuaj cuag kuv, mas tus ntawd yuav tsis kov koj dua li lawm.” Tus pojniam ntawd txawm hais tias, “Thov vajntxwv tuav Yawmsaub uas yog koj tus Vajtswv lub npe cog lus twv, kom tus rob caub thiaj tsis tua dua li lawm, kuv tus tub thiaj tsis raug puam tsuaj.” Vajntxwv hais tias, “Yawmsaub muaj txojsia nyob pom, koj tus tub yuav tsis poob ib txoj plaubhau rau hauv av.” Mas tus pojniam ntawd hais tias, “Vajntxwv, thov cia kuv uas yog koj tus nkauj qhev hais ib lo lus rau vajntxwv uas yog kuv tus tswv.” Vajntxwv hais tias, “Hais maj.” Tus pojniam thiaj hais tias, “Ua li cas koj npaj ua li no rau Vajtswv haiv neeg? Qhov uas hais li no mas kuj yog koj hais koj qhov txhaum, rau qhov koj tsis coj tus uas koj muab ntiab khiav rov los rau hauv koj tsev. Mas peb sawvdaws yuav tuag tag yam nkaus li cov dej uas nchuav rau hauv pem teb yawm tsis tau rov los. Vajtswv tsis txov txojsia, tiamsis Vajtswv nrhiav kev rau tus uas raug muab ntiab khiav lawd tsis txhob raug muab pov tseg. Qhov uas kuv tuaj hais zaj no rau vajntxwv uas yog kuv tus tswv vim yog cov pejxeem hem kuv ntshai. Mas kuv uas yog koj tus nkauj qhev xav tias, ‘Kuv yuav mus hais vajntxwv, tej zaum vajntxwv yuav ua raws li vajntxwv tus qhev lo lus thov. Nyaj vajntxwv yuav mloog thiab cawm kuv uas yog vajntxwv tus qhev dim ntawm tus uas npaj siab muab kuv thiab kuv tus tub rhuav tshem kom tsis tau tej qub txeeg qub teg uas Vajtswv pub.’ Mas koj tus nkauj qhev xav tias, ‘Vajntxwv uas yog kuv tus tswv tej lus yuav ua rau kuv lub siab tus, rau qhov vajntxwv uas yog kuv tus tswv mas zoo yam nkaus li Vajtswv tus tubtxib saum ntuj, uas paub qhov phem qhov zoo. Thov Yawmsaub uas yog koj tus Vajtswv nrog koj nyob.’ ” Ces vajntxwv txawm teb tus pojniam ntawd tias, “Tej uas kuv yuav nug koj no koj tsis txhob zais nav.” Tus pojniam ntawd hais tias, “Thov vajntxwv uas yog kuv tus tswv hais maj.” Vajntxwv txawm hais tias, “Koj zaj no huvsi Yau‑a txhais tes txuam hauv los tsis txuam?” Tus pojniam teb tias, “Au vajntxwv uas yog kuv tus tswv, koj muaj txojsia nyob pom, tsis muaj leejtwg lug dhau vajntxwv tej lus rau sab xis los sab laug kiag li. Twb yog koj tus qhev Yau‑a kom kuv thov li no ntag. Nws yog tus uas qhia kuv uas yog koj tus nkauj qhev hais tej lus no. Yau‑a ua li no xwv thiaj li ntxeev tau tej xwm txheej no. Tiamsis kuv tus tswv muaj tswvyim cuag nkaus li Vajtswv tus tubtxib saum ntuj li tswvyim uas paub txhua yam hauv ntiajteb no.” Vajntxwv hais rau Yau‑a tias, “Kuv kheev ua raws li no. Cia li mus coj tus tub hluas Axaloo rov los.” Yau‑a kuj khoov ntshis rau hauv pem teb pe thiab foom koob hmoov rau vajntxwv. Yau‑a hais tias, “Vajntxwv uas yog kuv tus tswv, hnub no kuv uas yog koj tus qhev paub tias koj txaus siab rau kuv rau qhov uas koj pub raws li koj tus qhev lo lus thov.” Yau‑a thiaj sawv tsees mus rau Kesu tebchaws mus coj Axaloo rov qab los rau hauv Yeluxalees. Mas vajntxwv hais tias, “Kom nws nyob hauv nws lub tsev xwb, tsis txhob kheev nws los cuag kuv.” Axaloo kuj mus nyob hauv nws lub tsev, tawm tsis tau mus cuag vajntxwv li. Tag nrho hauv cov Yixayee tsis muaj ib tug twg uas luag yuav qhuas tias zoo nraug li Axaloo. Txij ntua ntawm xib taws mus thoob plaws saum tiaj taubhau nws tsis muaj ib qho phem li. Txhua xyoo thaum xyoo laus tag nws txiav ib zaug plaubhau vim nws cov plaubhau hnyav hwv lawm thiaj muab txiav. Thaum muab txiav lawd nws muab luj mas hnyav ob puas sekhee raws li tej vajntxwv rab teev. Axaloo yug tau peb tug tub thiab ib tug ntxhais hu ua Thama, yog ib tug ntxhais zoo zoo nkauj li. Axaloo nyob tau ob xyoos txwm nkaus hauv lub nroog Yeluxalees tsis tau cuag vajntxwv ib zaug li. Ces Axaloo txawm tso neeg mus hu Yau‑a tuaj xav txib Yau‑a mus cuag vajntxwv, tiamsis Yau‑a tsis kam tuaj. Nws rov tso dua neeg mus hu zaum ob los Yau‑a tsis kam tuaj. Axaloo txawm hais rau nws cov tub teg tub taws tias, “Yau‑a daim teb nyob npuas kuv daim, nws cov qeb tseem nyob hauv teb. Nej cia li mus muab hlawv.” Axaloo cov tub teg tub taws txawm mus hlawv daim teb ntawd. Yau‑a thiaj sawv tsees tuaj cuag Axaloo hauv nws lub tsev mas hais rau nws tias, “Ua li cas koj cov tub teg tub taws muab kuv daim teb hlawv.” Axaloo teb Yau‑a tias, “Kuv twb ua xov kom koj tuaj ntawm no es kuv yuav txib koj mus cuag vajntxwv mus nug hais tias, ‘Kom kuv los ntawm Kesu los ua dabtsi? Kuv nyob kuv tim Kesu kuj zoo dua.’ Thov cia kuv mus cuag vajntxwv nimno. Yog tias kuv muaj txim kuj cia nws muab kuv tua pov tseg.” Yau‑a thiaj mus cuag vajntxwv thiab hais tej no rau nws. Vajntxwv thiaj hu Axaloo tuaj. Axaloo thiaj tuaj cuag vajntxwv khoov ntshis ua lub plhu ti nkaus rau hauv av pe ntawm vajntxwv xubntiag, mas vajntxwv thiaj nwj Axaloo. Los rau tom qab no Axaloo yuav tau ib lub tsheb ua rog thiab nees thiab muaj tub teg tub taws tsib caug leej ua nws ntej. Axaloo pheej sawv ntxov mus sawv rau ntawm ntug kev ntawm rooj loog. Yog leejtwg muaj plaub yuav hais kom vajntxwv tu, Axaloo kuj hu tus ntawd hais tias, “Koj tuaj lub moos twg tuaj?” Thaum tus ntawd teb tias nws yog xeem ub xeem no hauv cov Yixayee, mas Axaloo txawm hais rau nws tias, “Tej lus uas koj tuaj thov kuj zoo thiab raug cai, tiamsis vajntxwv tsis tau tsa leejtwg ua tus uas mloog koj tej lus.” Thiab Axaloo hais ntxiv tias, “Kheev lam yog kuv tau ua tus tu plaub hauv lub tebchaws no. Mas thaum leejtwg muaj plaub muaj ntug tau tuaj cuag kuv mas kuv yuav tu ncaj ncees rau tus ntawd.” Thaum leejtwg tuaj ze yuav pe nws, nws cev tes kiag mus ntsiab tus ntawd cia thiab nwj. Axaloo ua li no rau txhua tus Yixayee uas tuaj thov vajntxwv tu plaub. Axaloo ua li no kom cov Yixayee qaug siab rau nws. Thaum dhau plaub xyoos lawd Axaloo hais rau vajntxwv tias, “Thov koj tso kev cia kuv mus rau hauv lub moos Heploo mus pauj tej uas kuv tau fiv cia rau Yawmsaub lawd. Kuv uas yog koj tus qhev twb cog lus fiv rau thaum kuv nyob hauv lub moos Kesu hauv Alas tebchaws lawm tias, ‘Yog Yawmsaub coj kuv los txog lub nroog Yeluxalees kuv yuav mus pe hawm Yawmsaub rau hauv lub moos Heploo.’ ” Vajntxwv teb nws tias, “Cia li mus zoo.” Ces nws txawm sawv tsees mus rau lub moos Heploo. Tiamsis Axaloo tso neeg xa xov twjywm mus thoob plaws txhua xeem Yixayee hais tias, “Thaum twg nej hnov lub suab raj kub yaj nej cia li qw hais tias, ‘Axaloo ua vajntxwv hauv lub moos Heploo.’ ” Muaj ob puas tus txivneej nrog Axaloo tawm hauv lub nroog Yeluxalees mus yog cov uas Axaloo caw mus, lawv mus dawb dawb do do xwb tsis paub dabtsi li. Thaum Axaloo tua tsiaj xyeem ntawd nws kuj txib neeg mus hu Ahithaufee uas yog neeg Kilau thiab yog Davi tus tub sablaj tuaj hauv nws lub moos Kilau tuaj. Qhov uas tuav tswvyim phem yuav fav xeeb ntawd loj zuj zus thiab cov neeg uas nrog Axaloo koom kuj coob zuj zus tuaj. Muaj ib tug tuaj cuag Davi hais rau nws tias, “Cov Yixayee twb qaug siab raws Axaloo qab lawm.” Ces Davi txawm hais rau nws cov tub teg tub taws sawvdaws uas nrog nws nyob hauv lub nroog Yeluxalees tias, “Cia li sawv tsees, peb cia li khiav mus. Tsis ua li ntawd ces peb yuav khiav tsis dim Axaloo. Peb cia li maj nroos mus sai sai tsam ces nws caum cuag peb thiab ua phem rau peb thiab xuas hniav ntaj hniav riam ntaus lub nroog no.” Vajntxwv cov tub teg tub taws hais rau nws tias, “Vajntxwv txiav txim siab ua li cas, peb uas yog koj cov tub qhe kuj npaj txhij yuav ua li ntawd.” Ces vajntxwv thiab nws tsev neeg sawvdaws ua ke tawm khiav mus tseg kaum tus hluas nkauj uas vajntxwv kav cia zov lub vaj lub tsev. Vajntxwv tawm mus thiab cov neeg sawvdaws raws nws qab mus. Lawv mus nres ntawm lub tsev uas kawg nkaus ntawm ntug nroog. Davi cov tub teg tub taws hla ua nws ntej mus. Thiab cov Khelethi thiab cov Pelethi sawvdaws thiab cov neeg Ka rau pua leej uas nrog Davi ua ke hauv lub moos Ka los kuj hla ua vajntxwv ntej mus. Vajntxwv hais rau Ithai uas yog neeg Ka tias, “Ua cas koj nrog peb mus? Koj cia li rov qab mus thiab nrog vajntxwv nyob, rau qhov koj yog lwm haiv neeg thiab yog ib tug uas poob tebchaws. Nag koj nyuam qhuav tuaj txog xwb, hnub no kuv yuav ua rau koj nrog peb mus mus los los lov, rau qhov kuv tsis paub tias yuav mus rau qhovtwg? Cia li rov qab mus thiab coj koj cov kwvtij mus thiab. Thov Yawmsaub ua nws txojkev hlub uas ruaj khov thiab nws txojkev ncaj uas tso siab tau tshwm los rau koj.” Tiamsis Ithai teb vajntxwv tias, “Muaj Yawmsaub uas muaj txojsia nyob pom, thiab muaj kuv tus vajntxwv uas muaj txojsia nyob pom, vajntxwv uas yog kuv tus tswv yuav nyob qhovtwg, txawm yog yuav tuag yuav ciaj, los kuv uas yog koj tus qhev yuav nyob qhov ntawd thiab.” Davi thiaj hais rau Ithai tias, “Cia li hla mus.” Ithai uas yog neeg Ka thiaj li mus nrog nws cov neeg sawvdaws thiab lawv cov menyuam sawvdaws ua ke. Thaum cov neeg sawvdaws tabtom hla mus cov neeg hauv lub tebchaws sawvdaws quaj nrov nrov. Vajntxwv hla lub hav Khiloo thiab cov neeg sawvdaws mus rau tom tebchaws moj sab qhua. Xadau thiab cov Levi sawvdaws kwv Vajtswv lub phij xab sib cog lus tuaj thiab. Lawv muab Vajtswv lub phij xab txo mus txog thaum cov neeg sawvdaws tawm hauv lub nroog tag. Ces vajntxwv txawm hais rau Xadau tias, “Cia li kwv Vajtswv lub phij xab rov mus rau hauv lub nroog. Yog Yawmsaub txaus siab rau kuv nws yuav coj kuv rov qab los thiab pub kuv pom lub phij xab thiab Yawmsaub lub chaw nyob. Tiamsis yog Yawmsaub hais tias, ‘Kuv tsis txaus siab rau koj,’ saib maj, kuv nyob ntawm no, cia Yawmsaub ua rau kuv raws li nws pom zoo.” Thiab vajntxwv hais rau tus pov thawj Xadau tias, “Koj yog tus uas pom tom hauv ntej lov? Koj thiab Anpiyatha thiab neb ob tug tub cia li rov qab mus zoo rau hauv lub nroog, yog koj tus tub Ahima‑a thiab Anpiyatha tus tub Yaunathas. Kuv yuav nyob ntawm lub chaw hla dej mus rau tebchaws moj sab qhua tos txog thaum koj li xov tuaj rau kuv paub.” Ces Xadau thiab Anpiyatha thiaj kwv Vajtswv lub phij xab rov qab mus cia rau hauv lub nroog Yeluxalees thiab ob tug nyob rau hauv. Davi nce taug txojkev mus rau saum lub roob txiv Aulib, nws quaj laug laws mus, muaj ntaub kauv taubhau tsis muaj khau rau. Cov neeg uas nrog nws ua ke sawvdaws kuj muab ntaub kauv taubhau taug kev quaj laug laws mus. Muaj neeg hais rau Davi tias, “Ahithaufee nrog Axaloo cov neeg fav xeeb ua ib nqag lawm thiab.” Mas Davi hais tias, “Au Yawmsaub, thov koj ua kom Ahithaufee tej lus sablaj tsis muaj tseeb tsis tau qabhau.” Thaum Davi tuaj txog lub ncov roob uas pe Vajtswv mas Husai uas yog Akhi cum txawm tuaj cuag nws, lub tsho ntuag tag thiab muaj hmoov av saum nws lub taubhau. Davi hais rau nws tias, “Yog koj nrog kuv mus koj yuav ua nra rau kuv xwb. Tiamsis yog koj rov qab mus rau hauv lub nroog thiab hais rau Axaloo tias, ‘Au vajntxwv, kuv yuav ua koj qhev. Yav tom ntej kuv ua koj txiv qhev li cas, kuv yuav ua koj qhev li ntawd.’ Ces koj yuav pab kuv ua rau Ahithaufee tej lus sablaj swb kiag. Xadau thiab Anpiyatha uas ua pov thawj kuj nrog koj nyob qhov ntawd. Txhua yam uas koj hnov hauv vajntxwv lub tsev koj cia li hais rau Xadau thiab Anpiyatha paub. Ob tug tej tub kuj nyob qhov ntawd thiab, yog Xadau tus tub Ahima‑a thiab Anpiyatha tus tub Yaunathas. Txhua yam uas koj hnov, cia li txib lawv tuaj hais rau kuv paub.” Ces Davi tus kwvluag Husai txawm rov los rau hauv lub nroog rau thaum Axaloo tabtom los rau hauv lub nroog Yeluxalees thiab. Thaum Davi mus dhau lub ncov roob mentsis lawd Xinpa uas yog Mefinpause tus tub qhe txawm tuaj cuag Davi, muaj ib nkawg nees luav nog eeb thiab thauj ob puas lub ncuav thiab ib puas tauv txiv hmab qhuav thiab ib puas lub txiv ntoo caij ntuj kub thiab ib hnab tawv cawv txiv hmab. Vajntxwv hais rau Xinpa tias, “Koj coj tej no tuaj ua dabtsi?” Xinpa teb tias, “Nkawm nees luav no muab rau koj tsev neeg caij, cov ncuav thiab cov txiv ntoo caij ntuj kub muab rau koj cov neeg noj, thiab cov cawv txiv hmab muab rau cov uas tsaug leeg hauv tebchaws moj sab qhua haus.” Vajntxwv hais rau nws tias, “Koj tus tswv Xa‑u tus xeeb ntxwv nyob qhovtwg?” Xinpa hais rau vajntxwv tias, “Nws nyob hauv Yeluxalees, rau qhov nws hais tias, ‘Hnub no cov Yixayee yuav muab kuv yawg lub tebchaws rov rau kuv kav.’ ” Vajntxwv txawm hais rau Xinpa tias, “Nimno Mefinpause li ib puas tsav yam poob ua koj li.” Xinpa hais tias, “Kuv pe koj ua koj tsuag. Vajntxwv uas yog kuv tus tswv, thov koj hlub kuv mus ib txhis.” Thaum vajntxwv Davi mus txog ntawm lub moos Npahuli, muaj ib tug yawg yog Xa‑u cuab neeg hu ua Sime‑i yog Kela li tub tawm tuaj cem foom taug kev tsis tu li, thiab laim pob zeb tuaj rau Davi thiab Davi cov tub teg tub taws sawvdaws. Davi cov neeg thiab cov tub rog siab loj siab tuab sawvdaws kuj nyob ntawm nws sab xis thiab sab laug. Sime‑i cem hais tias, “Niag neeg noj nyoog, niag neeg limhiam, cia li khiav mus, cia li khiav mus los maj! Yawmsaub pauj Xa‑u tsev neeg tej ntshav rau koj. Koj sawv nws chaw kav tiamsis Yawmsaub muab lub tebchaws rau koj tus tub Axaloo kav. Saib maj, kev puam tsuaj los raug koj lawm, vim koj yog neeg noj nyoog.” Anpisai uas yog Xeluya tus tub txawm hais rau vajntxwv tias, “Ua cas yuav cia tus dev tuag no cem foom vajntxwv uas yog kuv tus tswv? Thov cia kuv mus muab nws lub taubhau txiav pov tseg.” Tiamsis vajntxwv hais tias, “Xeluya ob tug tub 'e, kuv thab txog neb dabtsi? Yog tus ntawd cem foom vim Yawmsaub hais rau nws tias, ‘Cia li cem foom Davi,’ mas leejtwg yuav kav hais rau nws tias, ‘Ua cas koj ua li no?’ ” Davi hais rau Anpisai thiab nws cov tub teg tub taws sawvdaws tias, “Sim xav saib, kuv tus tub ntag los tseem nrhiav txov kuv txojsia, tus neeg Npeeyamee no yimhuab yuav ua li ntawd thiab. Cia nws nyob nws, cia nws cem foom nws, vim yog Yawmsaub hais rau nws lawm. Tej zaum Yawmsaub yuav tsa muag ntsia kuv txojkev txom nyem nyuaj siab thiab Yawmsaub yuav ua qhov zoo pauj qhov uas hnub no nws cem foom kuv.” Ces Davi thiab nws cov neeg pheej taug kev mus tiamsis Sime‑i mus raws qaum kev cem foom thiab laim pob zeb w hmoov av rau lawv. Vajntxwv thiab cov neeg uas nrog nws sawvdaws mus txog tus dej Yaladee txog siav kawg, thiaj li so qhov ntawd kom los siav. Axaloo thiab cov pejxeem sawvdaws uas yog cov Yixayee kuj los txog hauv lub nroog Yeluxalees, Ahithaufee kuj nrog lawv los thiab. Thaum Davi tus kwvluag Husai uas yog Akhi cum tuaj cuag Axaloo, Husai hais rau Axaloo tias, “Thov kom vajntxwv muaj txojsia loj siav ntev, thov cia vajntxwv muaj txojsia loj siav ntev.” Axaloo hais rau Husai tias, “No yog koj ua zoo rau koj tus kwvluag lov? Ua cas tsis nrog koj tus kwvluag mus?” Husai hais rau Axaloo tias, “Tsis yog li ntawd. Yawmsaub thiab cov pejxeem no thiab cov Yixayee sawvdaws xaiv tus twg, kuv yuav tuaj tus ntawd tog thiab kuv yuav nrog tus ntawd nyob. Dua ib qho tsim nyog kuv ua num rau tus twg? Tsis yog nws tus tub lov? Kuv twb ua num rau koj txiv li cas lawm, kuv yuav ua num rau koj ib yam li ntawd.” Axaloo hais rau Ahithaufee tias, “Thov koj qhia saib peb yuav ua li cas thiaj zoo.” Ahithaufee hais rau Axaloo tias, “Cia li mus nrog koj txiv cov hluas nkauj uas nws tseg cia zov tsev pw. Cov Yixayee sawvdaws yuav hnov tias koj muab koj tus kheej ua yam uas koj txiv ntxub kawg li mas cov neeg uas tuaj koj tog txhais tes yuav muaj zog heev.” Lawv thiaj nthuav tsev ntaub rau saum txheej tsev las tshav, mas Axaloo mus nrog nws txiv cov hluas nkauj pw tab meeg cov Yixayee sawvdaws. Lub sijhawm ntawd lawv saib Ahithaufee tej lus tseem ceeb zoo yam nkaus li Vajtswv hais ntag. Txawm yog Davi thiab Axaloo los kuj saib hlob Ahithaufee txhua lo lus taw qhia. Thiab Ahithaufee hais rau Axaloo tias, “Thov cia kuv xaiv ib vam ob txhiab tus tub rog es hmo no kuv sawv kev mus caum Davi. Kuv yuav mus caum cuag rau thaum nws txog siav heev thiab poob siab ua rau nws ntshai ras zom zaws, cov neeg uas nrog nws ua ke sawvdaws yuav khiav tag. Kuv yuav tua kiag vajntxwv tib leeg xwb, thiab kuv yuav coj cov pejxeem sawvdaws rov los rau koj. Thaum uas tua tau tib tug uas koj cheem tsum xwb, ces kuj tau cov pejxeem sawvdaws rov los lawm, thiab cov pejxeem sawvdaws yuav nyob kaj siab lug.” Cov lus no hum Axaloo thiab Yixayee cov kev txwj laus sawvdaws lub siab. Axaloo thiaj hais tias, “Cia li hu Husai uas yog Akhi cum los. Peb yuav mloog saib nws hais li cas.” Thaum Husai los cuag Axaloo, Axaloo hais rau nws tias, “Ahithaufee hais li no lawm. Tsim nyog ua raws li nws qhia los tsis tsim nyog ua? Yog tsis tsim nyog ua, koj cia li hais.” Husai hais rau Axaloo tias, “Tej uas Ahithaufee hais zaum no tsis zoo.” Husai hais ntxiv tias, “Koj yeej paub tias koj txiv thiab nws cov neeg yog tub rog siab tuab. Lawv tabtom npau taws heev yam li tus maum dais tom hav zoov uas luag coj cov menyuam mus lawm. Dua li ntawd koj txiv yog tus uas txawj ua rog heev thiab hmo ntuj nws yuav tsis nrog nws cov tub rog pw ua ke. Sim saib, tamsim no nws mus nraim rau hauv lub qhov lossis nyob dua rau ib qho lawm. Thaum koj cov tub rog mus ntaus rog thawj zaug es qee leej raug tuag, leejtwg hnov los yuav hais tias, ‘Axaloo cov tub rog raug tua tuag.’ Ces txawm yog cov tub rog uas siab tuab thiab lub siab zoo yam nkaus li tus tsov ntxhuav los yuav ntshai siab yaj tag, vim cov Yixayee sawvdaws yeej paub tias koj txiv yog tus uas muaj zog heev thiab nws cov tub rog kuj siab tuab. Kuv li lus qhia koj yog li no, koj sau cov Yixayee sawvdaws txij ntua lub moos Daj mus txog lub moos Npe‑awsenpa ua tau tub rog coob yam nkaus li tej xuab zeb ntawm ntug hiavtxwv mas koj ua tus uas kav cov tub rog mus ntag. Mas peb ntsib nws qhovtwg kuj xij, peb yuav nias ntho nws yam nkaus lwg los rau hauv av. Mas Davi thiab nws cov neeg yuav tsis tshuav ib tug li. Yog nws thim mus rau hauv lub moos twg, cov Yixayee sawvdaws yuav coj hlua mus rub lub moos ntawd rau hauv hav dej, ua kom tsis tshuav ib lub qe zeb nyob ntawm lub chaw kiag li.” Axaloo thiab cov Yixayee sawvdaws hais tias, “Tej lus uas Husai uas yog Akhi cum qhia zoo dua tej lus uas Ahithaufee qhia.” Yawmsaub twb npaj tseg ua kom tej lus zoo uas Ahithaufee qhia kov tsis yeej xwv Yawmsaub thiaj coj tau tej xwm txheej phem los raug Axaloo. Husai txawm hais rau Xadau thiab Anpiyatha uas ua pov thawj tias, “Ahithaufee tau qhia li ub li no rau Axaloo thiab Yixayee cov kev txwj laus, thiab kuv qhia li ub li no. Yog li ntawd cia li maj tso neeg mus hais rau Davi hais tias, ‘Hmo no nws tsis txhob so ntawm lub chaw uas hla dej mus rau tebchaws moj sab qhua, cia li hla kiag mus tsam ces vajntxwv thiab nws cov neeg sawvdaws yuav raug muab nqos kiag huvsi.’ ” Yaunathas thiab Ahima‑a tabtom tos ntawm lub qhov dej Eelaukee. Muaj ib tug nkauj qhev pheej mus qhia rau ob tug, ces ob tug thiaj mus hais rau Davi, rau qhov ob tug tsis kav mus rau hauv lub nroog rau leejtwg pom. Tiamsis muaj ib tug tub hluas pom ob tug ces txawm mus hais rau Axaloo. Ob tug thiaj maj nroos khiav mus txog ib tug yawg lub tsev hauv lub moos Npahuli. Yawg ntawd muaj ib lub qhov dej nyob ntawm tog tsev, ob tug txawm nqes mus nyob hauv lub qhov ntawd. Tus yawg ntawd pojniam txawm muab ntaub los npog lub ncauj qhov thiab muab qoob los ziab rau saud tsis muaj leejtwg paub li. Thaum Axaloo cov tub teg tub taws tuaj txog ntawm tus pojniam ntawd lub tsev, lawv txawm nug tias, “Ahima‑a thiab Yaunathas nyob qhovtwg?” Tus pojniam ntawd teb tias, “Ob tug hla dej mus dhau lawm.” Thaum lawv nrhiav tsis pom ob tug, lawv txawm rov mus rau hauv lub nroog Yeluxalees. Thaum cov neeg ntawd rov mus lawd, ob tug li tawm hauv lub qhov los thiab mus qhia rau vajntxwv Davi. Ob tug hais rau Davi tias, “Cia li sawv tsees maj nroos hla tus dej mus vim yog Ahithaufee twb qhia li ub li no txog koj.” Davi thiab nws cov neeg sawvdaws txawm sawv tsees hla tus dej Yaladee mus. Thaum kaj ntug ces tsis tshuav ib tug uas tsis tau hla tus dej Yaladee li. Thaum Ahithaufee pom tias lawv tsis ua raws li tej lus uas nws qhia, nws txawm nog eeb caij nees luav mus rau nws lub tsev uas nyob hauv nws lub moos lawm. Thaum nws tu nws lub cuab txhij lawm nws txawm mus dai caj dab tuag, lawv thiaj muab nws log rau hauv nws txiv lub qhov ntxa. Davi txawm mus txog lub moos Mahana‑i. Ces Axaloo thiab cov txivneej Yixayee sawvdaws txawm hla tus dej Yaladee mus. Axaloo twb tsa Amaxa ua thawj rog nyob Yau‑a chaw. Amaxa yog ib tug Yixayee hu ua Ithala li tub. Ithala yuav Anpikas uas yog Naha tus ntxhais thiab yog Xeluya uas yog Yau‑a niam tus niam hluas. Cov Yixayee thiab Axaloo ua yeej nyob hauv Kile‑a tebchaws. Thaum Davi tuaj txog ntawm lub moos Mahana‑i, mas Saunpi uas yog Naha tus tub uas yog neeg hauv lub moos Lanpa hauv Asmoo tebchaws, thiab Makhi uas yog Ami‑ee hauv lub moos Laudenpa tus tub, thiab Npaxilai uas yog neeg Kile‑a nyob hauv lub moos Laukeli, lawv coj tej txaj pw tej phaj tej laujkaub av, thiab tej mog tej qeb tej hmoov tej qeb kib tej taum lag taum pauv, thiab zib ntab thiab kua mis nyeem thiab tej yaj thiab tej thooj nyuj mis nkoog khov tuaj pub rau Davi thiab nws cov neeg noj. Lawv hais tias, “Cov neeg ntawd tshaib thiab tsaug leeg heev thiab nqhis dej rau hauv tebchaws moj sab qhua.” Davi txawm txheeb cov neeg uas nrog nws mus thiab tsa kom muaj thawj kav ib txhiab leej thiab kav ib puas leej. Davi xa nws cov tub rog tawm mus ua peb pab, Yau‑a kav ib pab, Anpisai uas yog Xeluya tus tub kav ib pab thiab Ithai uas yog neeg Ka kav ib pab. Vajntxwv hais rau nws cov tub rog tias, “Kuv yuav nrog nej mus thiab.” Tiamsis lawv hais tias, “Koj tsis txhob mus. Yog peb yuav khiav, yeeb ncuab yuav tsis quav ntsej peb. Yog peb tuag ib nrab lawm, los lawv yeej yuav tsis quav ntsej peb. Tiamsis koj muaj nqes npaum li peb ib vam leej. Koj nyob hauv lub moos xa neeg tuaj pab peb xwb mas zoo dua.” Vajntxwv hais rau lawv tias, “Nej pom zoo li cas kuv yuav ua raws li ntawd.” Vajntxwv thiaj sawv ntsug ntawm rooj loog ib sab saib thaum cov tub rog sawvdaws tawm tuaj mus ua tej pab ib puas leej tej pab ib txhiab leej. Vajntxwv hais rau Yau‑a thiab Anpisai thiab Ithai tias, “Saib rau kuv es tsis txhob ua hnyav rau tus tub hluas Axaloo ntawd.” Thaum vajntxwv hais txog Axaloo li no rau cov thawj rog sawvdaws, mas cov tub rog sawvdaws kuj puavleej hnov. Cov tub rog txawm tawm mus ua rog rau cov Yixayee, lawv sib ntaus sib tua rau hauv hav zoov Efa‑i. Cov Yixayee kuj swb Davi cov tub rog, mas hnub ntawd muaj neeg raug tua tuag coob kawg, tuag ob vam leej rau qhov ntawd. Kev ua rog nthuav dav mus thoob plaws lub tebchaws ntawd. Hnub ntawd hav zoov noj neeg coob dua hniav ntaj noj. Mas Axaloo cia li ntsib nthav Davi cov tub rog. Axaloo caij rawv luj txwv, mas thaum luj txwv dhia mus rau hauv tus qab ntoo qheb uas ntxhov ntxhov, Axaloo lub taubhau txawm khuab nkaus rau hauv tus ceg ntoo ceev ceev li. Thaum tus luj txwv uas nws caij dhia dhau lawm nws txawm dai vias ib nta ntoo. Muaj ib tug yawg los pom ces txawm mus hais rau Yau‑a tias, “Kuv pom Axaloo dai saum ib tug ntoo qheb.” Yau‑a hais rau tus uas hais rau nws ntawd tias, “Ua li cas no? Koj pom nws lawm lov? Ua cas koj tsis muab nws tua pov tseg rau qhov ntawd? Kuv yuav zoo siab muab kaum lub txiag nyiaj thiab ib txoj siv tawv rau koj.” Tiamsis tus yawg ntawd teb Yau‑a tias, “Txawm yog kuv txhais tes tau puag ib txhiab lub txiag nyiaj los kuv yuav tsis cev tes tawm tsam vajntxwv tus tub, rau qhov peb lub qhov ntsej tau hnov tej uas vajntxwv hais rau koj thiab Anpisai thiab Ithai lawm hais tias, ‘Nej saib rau kuv es tsom kwm tus tub hluas Axaloo ntawd.’ Yog kuv tsis mloog lus es txov nws txojsia lawm, yeej tsis muaj dabtsi yuav npog tau ntawm vajntxwv, ces koj yuav tsis quav ntsej pab kuv.” Yau‑a txawm hais tias, “Kuv yuav tsis nkim sijhawm rau koj li no.” Yau‑a txawm coj peb rab hmuv mus nkaug raug Axaloo lub plawv rau thaum nws tseem ciaj dai saum tus ntoo qheb. Kaum tus tub rog hluas uas nqa Yau‑a tej cuab yeej ua rog vij nkaus Axaloo thiab muab nws tua kiag. Yau‑a txawm tshuab raj kub yaj, mas cov tub rog thiaj rov qab tsis caum cov Yixayee lawm, vim yog Yau‑a tswj lawv cia. Lawv muab Axaloo lub cev tuag pov rau hauv ib lub qhov loj hauv hav zoov, thiab tib ib pawg pob zeb loj loj rau saud. Cov Yixayee sawvdaws nyias taus nyias khiav rov mus tsev tag lawm. Thaum Axaloo tseem ua neej nyob nws txhos ib tug ncej ua chaw nco txog nws rau hauv lub Hav Vajntxwv, vim nws hais tias, “Kuv tsis muaj tub uas yuav tuav kuv lub npe mus li.” Nws thiaj hu tus ncej ntawd raws li nws lub npe, luag thiaj hu tias tus ncej Axaloo los txog niaj hnub nimno. Xadau tus tub Ahima‑a hais tias, “Cia kuv dhia coj xov mus hais rau vajntxwv paub tias Yawmsaub cawm nws dim hauv nws cov yeeb ncuab txhais tes lawm.” Yau‑a hais rau nws tias, “Hnub no koj tsis txhob coj xov mus. Koj coj xov mus dua rau lwm hnub kuj tau, tiamsis hnub no koj tsis txhob coj xov mus rau qhov vajntxwv tus tub tuag lawm.” Yau‑a hais rau ib tug neeg Khuj tias, “Koj cia li coj xov mus hais rau vajntxwv raws li koj qhov muag pom.” Tus neeg Khuj ntawd kuj nyo hau pe Yau‑a thiab dhia mus. Xadau tus tub Ahima‑a txawm rov hais rau Yau‑a tias, “Txawm li cas kuj xij, thov cia kuv dhia raws tus neeg Khuj ntawd mus.” Yau‑a hais tias, “Metub, koj yuav dhia mus ua dabtsi, rau qhov koj yuav tsis tau nqe zog xa tsab xov no?” Nws hais tias, “Txawm li cas los xij kuv yuav dhia mus.” Yau‑a hais rau nws tias, “Dhia los maj.” Ces Ahima‑a txawm dhia taug txojkev nram tiaj mus, huas tau tus neeg Khuj ntej mus. Thaum ntawd Davi zaum ntawm ob txheej rooj loog ntu nruab nrab. Muaj ib tug faj xwm nce mus rau saum lub ntsa loog mus sawv txheej sab saum lub rooj loog. Thaum nws tsa muag ntsia pom ib tug yawg dhia tib leeg los. Tus faj xwm qw hais rau vajntxwv paub. Vajntxwv hais tias, “Yog tib leeg los xwb, yeej yog coj xov zoo los.” Tus yawg ntawd dhia los ze zuj zus. Tus faj xwm pom dua ib tug dhia los thiab. Tus faj xwm qw rau tus uas zov rooj loog tias, “Saib nawj, muaj dua ib tug dhia tib leeg los thiab.” Vajntxwv hais tias, “Yog nws coj xov zoo los thiab.” Tus faj xwm hais tias, “Kuv saib mas tus uas dhia ua ntej dhia zoo yam nkaus li Xadau tus tub Ahima‑a.” Vajntxwv hais tias, “Nws yog neeg zoo. Nws coj xov zoo los.” Ces Ahima‑a qw rau vajntxwv tias, “Zoo lauj!” Nws txawm khoov ntshis ua lub plhu ti nkaus av pe hais tias, “Qhuas Yawmsaub uas yog koj tus Vajtswv uas tau muab cov neeg fav xeeb uas tawm tsam kuv tus tswv cob rau hauv vajntxwv txhais tes lawm.” Vajntxwv hais tias, “Tus tub hluas Axaloo nyob zoo lov?” Ahima‑a teb tias, “Thaum Yau‑a txib kuv uas yog koj tus qhev los no, kuv pom muaj neeg coob vij vog uas tsis paub tias xyov yog dabtsi.” Vajntxwv hais tias, “Cia li los sawv ntawm no.” Nws txawm mus sawv ntsug twjywm. Ua ciav tus neeg Khuj ntawd txawm dhia los txog. Nws hais tias, “Muaj xov zoo hais rau vajntxwv uas yog kuv tus tswv, rau qhov hnub no Yawmsaub cawm koj dim hauv cov neeg sawvdaws uas sawv tawm tsam koj txhais tes lawm.” Vajntxwv nug tus neeg Khuj tias, “Tus tub hluas Axaloo nyob zoo lov?” Tus neeg Khuj teb tias, “Thov cia vajntxwv tej yeeb ncuab thiab txhua tus uas sawv tawm tsam vajntxwv uas yog kuv tus tswv zoo li tus tub hluas ntawd.” Vajntxwv nyuaj siab heev kawg, nws nce mus rau ib chav tsev uas nyob txheej saum lub rooj loog thiab quaj quaj. Thaum nws nce mus nws hais tias, “Au kuv tus tub Axaloo, kuv tus tub, kuv tus tub Axaloo 'e, kuv xav tuag this koj. Au Axaloo, kuv tus tub, kuv tus tub 'e.” Lawv mus hais rau Yau‑a tias, “Saib maj, vajntxwv quaj thiab quaj ntsuag Axaloo.” Vim li no hnub ntawd kev kov yeej thiaj ntxeev ua kev quaj ntsuag rau cov pejxeem sawvdaws, rau qhov hnub ntawd lawv hnov tias, vajntxwv quaj lwj siab rau nws tus tub. Hnub ntawd cov tub rog nyiag kev nkag los rau hauv lub moos yam nkaus li cov tub rog uas khiav rog thiab txaj muag kawg. Vajntxwv muab ntaub kauv nws lub ntsej muag thiab quaj nrov nrov hais tias, “Au kuv tus tub Axaloo, au Axaloo 'e, kuv tus tub, kuv tus tub 'e.” Yau‑a txawm los rau hauv vajntxwv tsev thiab hais tias, “Vajntxwv, hnub no koj ua rau koj cov tub teg tub taws sawvdaws uas cawm koj txojsia thiab cawm koj tej tub tej ntxhais thiab koj tej pojniam thiab tej hluas nkauj txojsia raug kev txaj muag, rau qhov koj hlub cov uas ntxub koj thiab koj ntxub cov uas hlub koj. Hnub no koj tau ua rau sawvdaws pom tseeb tias koj saib cov thawj rog thiab cov tub teg tub taws tsis muaj txiag muaj ntsig. Kuv paub tias yog hnub no Axaloo ciaj sia nyob es peb tuag tag huvsi lawm, koj yuav zoo siab. Vim li no koj cia li sawv tsees mus hais ib lo lus tshav ntuj rau koj cov tub teg tub taws, rau qhov kuv tuav Yawmsaub lub npe twv hais tias, yog koj tsis mus hais mas hmo no yuav tsis tshuav ib tug txivneej twg nrog koj nyob kiag li. Mas qhov no yuav phem rau koj heev dua li tej xwm txheej phem huvsi uas txeev los raug koj txij thaum koj yau los txog niaj hnub nimno.” Vajntxwv thiaj sawv tsees mus nyob ntawm rooj loog. Muaj neeg hais rau cov tub rog tias, “Saib maj, vajntxwv zaum ntawm rooj loog.” Cov tub rog sawvdaws thiaj mus rau ntawm vajntxwv. Cov Yixayee nyias khiav rau nyias vaj nyias tsev tag lawm. Cov pejxeem sawvdaws sib cav thoob plaws hauv txhua xeem Yixayee hais tias, “Vajntxwv tso peb dim hauv peb cov yeeb ncuab txhais tes thiab cawm peb dim hauv cov Filixatee txhais tes lawm. Nimno nws khiav Axaloo tawm hauv lub tebchaws mus lawm. Los Axaloo uas peb tsa ua vajntxwv kav peb kuj tuag hauv tshav rog lawm. Ua cas nej tsis hais dabtsi txog qhov uas yuav coj vajntxwv rov los li?” Vajntxwv Davi xa xov mus hais rau Xadau thiab Anpiyatha uas ua pov thawj hais tias, “Neb cia li hais rau Yuda cov kev txwj laus tias, ‘Ua cas nej yuav ua pab tom qab kawg uas coj vajntxwv rov los rau hauv lub vaj lub tsev? Cov Yixayee sawvdaws tej lus twb tuaj txog vajntxwv hauv nws lub chaw nyob lawm. Nej yog kuv li kwvtij txheeb, nrog kuv koom nqaij koom txhav. Ua cas nej yuav ua pab tom qab kawg uas coj vajntxwv rov los?’ Thiab hais rau Amaxa tias, ‘Koj tsis yog nrog kuv koom nqaij koom txhav lov? Yog koj tsis tau nyob Yau‑a chaw ua thawj kav kuv cov tub rog mas thov Vajtswv rau txim rau kuv hnyav dua.’ ” Amaxa kuj rub tau cov neeg Yuda sawvdaws lub siab koom kiag rau Davi. Lawv thiaj tso neeg mus hais rau vajntxwv tias, “Thov koj thiab koj cov tub teg tub taws sawvdaws rov los.” Vajntxwv thiaj li rov los rau ntawm tus dej Yaladee. Cov Yuda thiaj mus tos vajntxwv ntawm lub moos Kilakas yuav coj vajntxwv hla tus dej Yaladee. Sime‑i uas yog Kela tus tub yog xeem Npeeyamee nyob hauv lub moos Npahuli, maj nroos tuaj nrog cov Yuda tos vajntxwv Davi. Xeem Npeeyamee muaj ib txhiab leej nrog nws tuaj. Thiab Xinpa uas yog Xa‑u tsev neeg tus tub qhe thiab nws kaum tsib tug tub thiab nws nees nkaum tus tub qhe kuj maj nroos tuaj tos vajntxwv ntawm ntug dej Yaladee. Lawv hla tus dej mus coj vajntxwv tsev neeg hla dej los thiab ua txhua yam raws li vajntxwv lub siab xav. Kela tus tub Sime‑i khwb nkaus pe vajntxwv rau thaum vajntxwv yuav hla tus dej Yaladee, thiab nws hais rau vajntxwv tias, “Vajntxwv uas yog kuv tus tswv, thov koj zam kuv lub txim thiab tsis txhob nco tej kev txhaum uas kuv uas yog koj tus qhev tau ua rau hnub uas koj khiav tawm hauv Yeluxalees. Thov vajntxwv tsis txhob cim rau hauv lub siab. Kuv uas yog koj tus qhev yeej paub tias kuv ua txhaum lawm. Vim li no hnub no kuv thiaj ua Yauxej tej caj ces thawj pab uas tuaj tos vajntxwv uas yog kuv tus tswv.” Anpisai uas yog Xeluya tus tub txawm teb tias, “Tsis tsim nyog muab Sime‑i tua pov tseg lov vim nws tau tsawm foom tus uas Yawmsaub tsa cia lawd?” Tiamsis Davi hais tias, “Xeluya ob tug tub 'e, kuv thab txog neb dabtsi es hnub no neb yuav tuaj tawm tsam kuv? Hnub no tsim nyog muab leejtwg tua pov tseg lov? Hnub no kuv tsis paub tias kuv yog vajntxwv kav cov Yixayee lov?” Vajntxwv thiaj hais rau Sime‑i tias, “Koj yuav tsis tuag.” Thiab vajntxwv cog lus twv tseg rau nws. Mefinpause uas yog Xa‑u tus xeeb ntxwv kuj tuaj tos vajntxwv. Nws tsis tau tu txhais kotaw tsis ntsis hwj txwv thiab tsis tau ntxhua ris tsho txij hnub uas vajntxwv tawm khiav mus lawd los txog hnub uas vajntxwv rov los zoo. Thaum Mefinpause tawm hauv Yeluxalees mus tos vajntxwv, vajntxwv nug nws tias, “Mefinpause, ua cas koj tsis nrog kuv mus?” Nws teb tias, “Vajntxwv uas yog kuv tus tswv 'e, kuv tus tub qhe dag kuv. Kuv hais kom nws nog eeb rau ib tug nees luav rau kuv caij nrog koj mus, rau qhov kuv tuag taw. Nws muab kuv uas yog koj tus qhev hais dag rau vajntxwv uas yog kuv tus tswv. Tiamsis kuv tus vajntxwv zoo yam li Vajtswv tus tubtxib saum ntuj. Koj cia li ua raws li koj pom zoo rau kuv. Kuv txiv tsev neeg tsuas yog cov uas tsim nyog raug tua tuag rau ntawm vajntxwv uas yog kuv tus tswv lub xubntiag. Tiamsis koj tseem tsa kuv uas yog koj tus qhev nrog cov uas nrog koj koom rooj noj rooj haus ua ke. Kuv tseem muaj cai thov dabtsi ntawm vajntxwv?” Vajntxwv hais rau nws tias, “Tsis txog koj hais dabtsi ntxiv lawm. Kuv txiav txim siab lawm tias yuav muab tej teb faib rau Xinpa neb ob leeg.” Mefinpause hais rau vajntxwv tias, “Cia Xinpa yuav huvsi mus, vim vajntxwv uas yog kuv tus tswv twb rov los txog tsev tso siab plhuav lawm.” Npaxilai uas yog neeg Kile‑a kuj tuaj ntawm lub moos Laukeli nrog vajntxwv mus txog tus dej Yaladee thiab xa vajntxwv hla tus dej Yaladee mus. Npaxilai laus heev lawm, hnub nyoog muaj yim caum xyoo. Nws tau coj zaub mov tuaj pub rau vajntxwv rau thaum vajntxwv nyob ntawm lub moos Mahana‑i, rau qhov nws nplua nuj heev. Vajntxwv hais rau Npaxilai tias, “Cia li nrog kuv hla mus, kuv yuav yug koj nrog kuv nyob hauv lub nroog Yeluxalee.” Tiamsis Npaxilai hais rau vajntxwv tias, “Kuv yuav nyob pes tsawg xyoo ntxiv thiab, es kuv yuav nrog vajntxwv mus nyob hauv lub nroog Yeluxalees? Hnub no kuv hnub nyoog muaj yim caum xyoo lawm. Kuv tseem yuav paub qhov twg hum siab qhov twg tsis hum siab lov? Kuv uas yog koj tus tub qhe tseem yuav txawj sim noj saib yam twg qab yam twg tsis qab thiab lov? Kuv tseem yuav mloog tej tub tej ntxhais hu nkauj tau thiab lov? Ua cas tseem yuav cia kuv ua nra tsav ntxiv rau vajntxwv uas yog kuv tus tswv thiab nev? Kuv uas yog koj tus qhev yuav xa koj hla dej Yaladee mus mentsis xwb. Ua cas vajntxwv yuav pub tej tshav ntuj npaum li no diam pauj rau kuv? Thov cia kuv uas yog koj tus qhev rov qab mus es tuag rau hauv kuv lub moos ze kuv niam kuv txiv lub qhov ntxa. Tus no yog Khihas uas yog koj tus qhev, thov cia nws nrog vajntxwv uas yog kuv tus tswv mus, koj pub rau nws raws li koj pom zoo.” Vajntxwv teb tias, “Khihas yuav nrog kuv mus, kuv yuav pub rau nws raws li koj pom zoo. Thiab txhua yam uas koj xav kom kuv ua rau koj, kuv yuav ua raws li ntawd.” Ces cov neeg sawvdaws txawm hla tus dej Yaladee mus, vajntxwv kuj hla mus thiab. Vajntxwv nwj Npaxilai thiab foom koob hmoov rau nws, ces Npaxilai txawm rov qab mus nws vaj nws tsev lawm. Vajntxwv taug kev mus rau ntawm lub moos Kilakas, Khihas kuj nrog nws mus thiab. Cov Yuda huvsi thiab cov Yixayee ib nrab coj vajntxwv hla los. Ces cov Yixayee sawvdaws tuaj cuag vajntxwv thiab hais rau nws tias, “Ua cas peb cov kwvtij Yuda nyiag koj mus lawm thiab coj vajntxwv thiab nws tsev neeg thiab Davi cov tub rog sawvdaws hla tus dej Yaladee los lawm?” Cov Yuda thiaj teb cov Yixayee tias, “Rau qhov vajntxwv yog peb li kwvtij txheeb. Nej yuav chim txog qhov no ua dabtsi? Peb tau noj vajntxwv tej nyiaj txiag lawm lov? Nws tau pub tshav ntuj dabtsi rau peb lawm lov?” Cov Yixayee teb cov Yuda tias, “Peb muaj feem kaum npaug rau hauv vajntxwv, peb muaj feem ntau dua nej rau hauv Davi. Ua cas nej saib tsis taus peb li no? Peb yog cov uas xub hais txog qhov uas coj peb tus vajntxwv rov los los tsis yog?” Tiamsis cov Yuda li lus muaj ceem heev dua cov Yixayee li lus. Txawm cia li muaj ib niag neeg phem tsis zoo npe hu ua Senpa uas yog Npili uas yog xeem Npeeyamee tus tub. Nws tshuab raj kub yaj thiab hais tias, “Peb tsis muaj feem hauv Davi. Peb tsis muaj qub txeeg qub teg hauv Yexi tus tub. Cov Yixayee, sawvdaws nyias rov qab mus rau hauv nyias tsev ntaub.” Ua li no mas cov neeg Yixayee sawvdaws tawm ntawm Davi mus raws Senpa uas yog Npili tus tub. Tiamsis cov Yuda raws nraim lawv tus vajntxwv ntawm tus dej Yaladee mus txog lub nroog Yeluxalees. Davi kuj los txog nws lub tsev hauv Yeluxalees mas vajntxwv coj kaum tus hluas nkauj uas nws muab tseg cia zov nws lub tsev mus kaw cia rau hauv ib lub tsev tso tub rog zov huvsi. Nws pub rau noj rau haus tiamsis nws tsis mus nrog pw li. Cov pojniam ntawd raug muab kaw nyob yam nkaus li tej poj ntsuam mus txog hnub tuag li. Vajntxwv txawm hais rau Amaxa tias, “Cia li hu cov neeg Yuda kom tuaj txhij rau hauv peb hnub no, thiab koj los tuaj thiab.” Mas Amaxa mus hu cov Yuda, tiamsis nws ua qeeb qeeb twb dhau lub sijhawm uas teem cia lawm. Davi thiaj hais rau Anpisai tias, “Nimno Npili tus tub Senpa yuav ua phem rau peb heev dua li Axaloo ua. Cia li coj kuv cov tub teg tub taws mus caum nws tsam ces nws mus nyob rau hauv tej moos uas muaj ntsa loog lawm ces nws yuav khiav dim peb mus.” Yau‑a cov neeg thiab cov Khelethi thiab cov Pelethi thiab cov tub rog uas muaj zog huvsi nrog Anpisai mus. Lawv tawm hauv Yeluxalees caum Npili tus tub Senpa. Thaum lawv nyob ntawm lub pob tsuas loj uas nyob ntawm Kinpe‑oo mas Amaxa tuaj ntsib lawv. Yau‑a hnav cev tsoos tub rog uas sia txoj siv tawv ris hnab ntaj thiab rab ntaj rau ntawm duav. Thaum Yau‑a tuaj ze zog nws rab ntaj txawm cia li hlauv kiag. Yau‑a txawm hais rau Amaxa tias, “Tijlaug nyob zoo lov?” Yau‑a txawm xuas txhais tes xis ntsiab nkaus Amaxa hwj txwv yuav nwj. Tiamsis Amaxa tsis nco pom rab ntaj hauv Yau‑a txhais tes. Yau‑a txawm xuas ntaj nkaug Amaxa plab mas hnyuv hlauv kiag rau hauv av. Twb tsis txog nkaug zaum ob ces nws twb tuag lawm. Yau‑a thiab nws tus kwv Anpisai thiaj caum Npili tus tub Senpa mus. Yau‑a ib tug tub rog los sawv ze ntawm Amaxa mas hais tias, “Leejtwg pom zoo rau Yau‑a, leejtwg tuaj Davi tog, cia li nrog Yau‑a mus.” Amaxa lub cev tuag xyab luas tsau ntshav tsawv hauv txojkev. Tus tub rog ntawd pom tias cov neeg sawvdaws tuaj nres rau qhov ntawd. Nws kuj coj Amaxa lub cev tuag ntawm txojkev mus pov tseg rau tom teb thiab muab khaubncaws los npog rau. Thaum uas muab Amaxa lub cev tuag coj ntawm txojkev mus pov tseg lawm mas cov neeg sawvdaws kuj nrog Yau‑a mus caum Npili tus tub Senpa. Senpa hla cov xeem Yixayee sawvdaws mus txog lub moos Anpee hauv Npe Ma‑akha, mas Npili cum kuj tuaj ua ke nrog nws mus. Cov neeg uas nrog Yau‑a kuj tuaj vij nws hauv lub moos Anpee hauv Npe Ma‑akha. Lawv tsub av rau sab ntsa loog nraud mus nto plaws saum ntsa loog. Lawv tabtom tsoo tej ntsa loog kom pob. Ces txawm muaj ib tug pojniam ntse ntsuav qw hauv moos tuaj hais tias, “Thov mloog, thov mloog. Hais kom Yau‑a tuaj ntawm no, kuv yuav nrog nws hais lus.” Yau‑a thiaj li txav ze zog mas tus pojniam ntawd hais tias, “Koj yog Yau‑a lov?” Yau‑a teb tias, “Yog lauj.” Tus pojniam ntawd txawm hais tias, “Thov koj mloog kuv uas yog koj tus nkauj qhev li lus.” Yau‑a teb tias, “Kuv tabtom mloog los maj.” Tus pojniam thiaj hais tias, “Yav thaum ub lawv txeev hais tias, ‘Cia lawv mus sablaj rau ntawm Anpee,’ ces lawv thiaj hais hum qhov ntawd. Kuv yog ib tug uas nyiam kev thaj yeeb thiab kev ncaj ncees rau hauv cov Yixayee. Koj xav ua rau ib lub moos uas zoo li leej niam hauv cov Yixayee puam tsuaj. Ua li cas koj yuav muab Yawmsaub qub txeeg qub teg nqos tag huvsi?” Yau‑a teb tias, “Qhov uas kuv yuav nqos lossis ua rau puam tsuaj mas thov kom nyob deb ntawm kuv, nyob deb kuv heev hwv lauj! Qhov no tsis muaj tseeb. Muaj ib tug yawg nyob pem toj siab Efa‑i tebchaws, yog Npili tus tub Senpa, nws tau tsa nws txhais tes sawv twv rau vajntxwv Davi. Cia li muab kiag nws tib leeg rau kuv mas kuv yuav thim tub rog rov qab ntawm lub moos no.” Tus pojniam txawm hais rau Yau‑a tias, “Kuv yuav muab tus yawg ntawd lub taubhau laim saum ntsa loog tuaj rau koj.” Tus pojniam ntawd mus hais nws tej tswvyim rau cov pejxeem sawvdaws. Mas lawv txawm txiav Npili tus tub Senpa lub taubhau muab laim rau Yau‑a. Yau‑a thiaj tshuab raj kub yaj ces lawv txawm tawm ntawm lub moos ntawd nyias mus rau nyias vaj nyias tsev. Yau‑a kuj rov qab mus cuag vajntxwv hauv lub nroog Yeluxalees. Yau‑a yog tus uas kav tag nrho Yixayee cov tub rog sawvdaws, thiab Yehauyada tus tub Npenaya yog tus uas kav cov Khelethi thiab cov Pelethi. Adaulas yog tus uas saib cov uas raug yuam ua haujlwm. Ahilu tus tub Yehausafa yog tus uas sau ntawv keeb kwm. Seva yog tus tub sau ntawv. Xadau thiab Anpiyatha ua pov thawj. Ila uas yog Ya‑i cum kuj ua Davi tus pov thawj. Thaum uas Davi ua vajntxwv mas muaj kev tshaib plab tau peb xyoos, xyoo tag xyoo tuaj los kuj tshaib. Ces Davi txawm kub siab lug nrhiav Yawmsaub. Mas Yawmsaub hais tias, “Lub txim uas tua neeg poob rau saum Xa‑u thiab Xa‑u caj ces rau qhov nws muab cov Kinpe‑oo tua pov tseg.” Vajntxwv thiaj hu cov Kinpe‑oo tuaj hais rau lawv. Cov Kinpe‑oo ntawd tsis yog neeg Yixayee, lawv yog cov Amaulai uas tseem tshuav noob nyob. Txawm yog cov Yixayee tau cog lus twv hais tias yuav tseg lawv txojsia cia, los Xa‑u yooj xeeb lias nrhiav kev muab lawv tua pov tseg, vim yog nws mob siab cov Yixayee thiab cov Yuda. Davi hais rau cov Kinpe‑oo tias, “Kuv yuav ua dabtsi pab nej? Kuv yuav ua li cas thiaj ntxuav tau tej kev txhaum no tseg nej thiaj foom koob hmoov rau Yawmsaub qub txeeg qub teg?” Cov Kinpe‑oo hais rau nws tias, “Qhov uas Xa‑u thiab nws caj ces ua rau peb ntawd, mas tsis yog nyiaj thiab kub yuav ntxuav tau, thiab tsis yog peb yuav muab cov Yixayee ib tug twg tua pov tseg.” Vajntxwv thiaj hais tias, “Ces nej xav kom kuv ua dabtsi pab nej?” Lawv hais rau vajntxwv tias, “Tus yawg uas muab peb ntxuav pov tseg thiab ntaus tswvyim yuav muab peb ua kom puam tsuaj xwv thiaj ua rau peb tsis muaj chaw nyob hauv Yixayee tebchaws, mas thov muab tus ntawd xya leej tub rau peb es peb yuav coj mus dai caj dab tuag tab meeg Yawmsaub xubntiag rau ntawm Kinpe‑a uas yog Xa‑u lub moos, yog tus uas Yawmsaub xaiv tsa.” Mas vajntxwv hais tias, “Kuv yuav muab lawv cob rau nej.” Vajntxwv tseg Mefinpause uas yog Yaunathas tus tub txojsia yog Xa‑u tus xeeb ntxwv, vim yog Xa‑u tus tub Yaunathas thiab Davi tau tuav Yawmsaub lub npe cog lus twv cia lawm. Mas vajntxwv muab Aiyag tus ntxhais Lixapa ob tug tub uas yug rau Xa‑u, uas npe hu ua Amauni thiab Mefinpause, thiab muab Xa‑u tus ntxhais Mela tsib tug tub uas nws yug rau Npaxilai tus tub Adi‑ee uas yog neeg hauv Mehaula. Vajntxwv muab cov neeg no rau hauv cov Kinpe‑oo txhais tes. Lawv txawm muab cov no dai caj dab saum lub roob tab meeg Yawmsaub xubntiag, mas xya leej ntawd raug muab tua kiag ua ke rau thawj hnub uas lawv pib hlais qoob loo, rau thaum lawv pib hlais qeb. Mas Aiyag tus ntxhais Lixapa muab seev tsaj pua saum lub pob zeb rau nws nyob txij thaum pib hlais qoob loo mus txog dej nag nqes los ntub cov cev tuag ntawd. Nruab hnub nws tsis tseev noog saum nruab ntug los thos lawv, hmo ntuj nws tsis tseev tsiaj qus los kov. Thaum muaj neeg mus hais rau Davi tias Aiyag tus ntxhais Lixapa uas yog Xa‑u tus hluas nkauj tau ua li ntawd lawm, Davi kuj mus coj Xa‑u thiab Xa‑u tus tub Yaunathas cov pob txha ntawm cov neeg hauv Yanpe Kile‑a los. Cov neeg hauv Yanpe Kile‑a ntawd twb nyiag cov pob txha ntawd hauv lub tshav puam hauv lub moos Npesas uas cov Filixatee muab khuam cia rau hnub uas cov Filixatee tua Xa‑u saum lub roob Kinpau‑a. Mas vajntxwv coj Xa‑u thiab Xa‑u tus tub Yaunathas cov pob txha los, thiab lawv khaws cov neeg uas muab dai caj dab tuag ntawd cov pob txha. Mas lawv muab Xa‑u thiab Xa‑u tus tub Yaunathas cov pob txha log rau hauv Xa‑u leej txiv Khij lub qhov ntxa ntawm Xela hauv Npeeyamee tebchaws. Lawv kuj ua txhua yam uas vajntxwv hais kom lawv ua. Dhau ntawd Vajtswv kuj mloog tej lus uas lawv thov Vajtswv pab lub tebchaws ntawd. Cov Filixatee ua rog rau cov Yixayee dua ib zaug. Davi kuj nrog nws cov tub teg tub taws nqes mus ua rog rau cov Filixatee ces Davi txawm txog txog siav. Inpinpenau yog cov neeg loj loj siab siab li noob. Nws coj ib rab hmuv tooj liab hnyav peb puas sekhee thiab ris ib rab ntaj tshiab ntawm duav, xav tias nws yuav tua Davi. Tiamsis Xeluya tus tub Anpisai los pab Davi thiab ntaus tus Filixatee ntawd muab nws tua pov tseg. Mas Davi cov neeg thov hais tias, “Koj tsis txhob nrog peb tawm mus ua rog dua li lawm tsam ces cov Yixayee lub teeb tuag.” Dhau ntawd rov qab ua rog rau cov Filixatee ntawm lub moos Kaus. Zaum ntawd Xinpekhai uas yog Husa cum tua tau Xa uas yog cov neeg loj loj siab siab li noob. Thiab rov qab ua rog rau cov Filixatee ntawm lub moos Kaus. Ya‑ale Auleki tus tub Eehanas uas yog neeg Npelehee tua tau Kaulia uas yog neeg Ka. Nws rab hmuv tus ko luaj li rab nqos ntos ntaub. Thiab rov qab ua rog ntawm lub moos Ka, yog lub moos uas muaj ib tug txivneej loj kawg li, muaj rau tus ntiv tes thiab rau tus ntiv taw huvsi muaj nees nkaum plaub tug ntiv tes ntiv taw. Nws yog cov neeg loj loj siab siab li noob. Thaum nws twv ntxhias cov Yixayee mas Davi tus tijlaug Sime‑i tus tub Yaunathas kuj muab nws tua kiag. Plaub tug no yog cov neeg loj loj siab siab hauv lub moos Ka li noob. Lawv tuag tag rau Davi tes thiab tuag rau Davi cov tub teg tub taws tes. Hnub uas Yawmsaub cawm Davi dim hauv nws cov yeeb ncuab txhais tes huvsi thiab dim hauv Xa‑u txhais tes lawm, Davi thiaj hu zaj nkauj no rau Yawmsaub. Nws hais tias, “Yawmsaub yog kuv txhib zeb, yog kuv lub chaw ruaj khov, yog tus uas tso kuv dim, yog kuv tus Vajtswv, yog txhib zeb uas kuv los nraim cev, yog kuv daim phiaj hlau, yog txwm kub uas cawm kuv dim, yog kuv lub chaw ruaj khov, yog kuv lub chaw nraim cev, thiab yog kuv tus cawmseej. Koj cawm kuv dim tej neeg limhiam ntais ntuj. Kuv hu rau Yawmsaub tus uas tsim nyog qhuas, mas kuv thiaj dim hauv cov yeeb ncuab los. “Tej nthwv dej uas yog kev tuag vij nkaus kuv, txojkev puam tsuaj nyab kiag kuv, kuv mag txoj hlua uas cuab hauv tub tuag teb lawm, rooj ntxiab uas yog kev tuag nyob ntawm kuv xubntiag. Thaum kuv raug kev txom nyem kuv thov hu Yawmsaub, kuv thov kuv tus Vajtswv. Nws nyob hauv nws lub tuam tsev hnov kuv lub suab, kuv tej lus thov nrov mus txog nws qhov ntsej. “Lub ntiajteb ntseeg nkaws ua zog koog, tej lag zeb uas tiag lub ntuj kuj co nplawg ntia thiab ua zog kais vim yog Yawmsaub chim. Pa taws tawm hauv Yawmsaub qhov ntswg los, thiab tej nplaim taws kub ceev tawm ntawm nws qhov ncauj los, thee kuj cig plaws tawm los. Nws qheb rooj ntug nqes los, ntuj tsaus nti hauv nws qab kotaw. Nws caij ib tug Khelunpee thiab ya mus ya los, pom nws caij kooj tis cua los. Nws muab qhov tsaus ntuj los vij puag ncig nws, cov huab tsaus tsaus vim yog muaj dej ua lub kaus roos nws. Tej thee ci ua nplaim tawm hauv qhov kaj uas nyob ntawm nws xubntiag los. Yawmsaub ua xob nrov ntseeg nkaws saum ntuj, yog tus uas loj dua ntais ua suab nrov. Nws tua nws rab xob ua rau lawv khiav tag, nws tso xob laim ua rau lawv tawg ua sab ua sua mus. Mas thiaj li pom hiavtxwv ti nkaus qab thu, thiab pom tag nrho tej taw uas tiag lub ntiajteb no, rau thaum Yawmsaub cem thiab tshuab tej pa tawm hauv nws qhov ntswg los. “Yawmsaub cev tes saum ntuj tuaj ntsiab nkaus kuv, nws rub kuv tawm hauv cov dej tob tob. Nws cawm kuv dim kuv cov yeeb ncuab uas muaj zog thiab dim cov neeg uas ntxub kuv, rau qhov lawv muaj zog loj dua kuv. Hnub uas kuv raug kev txom nyem ceeblaj mas lawv cia li tuaj tawm tsam kuv, tiamsis Yawmsaub ua kuv lub chaw tiag taw. Nws coj kuv tawm mus nyob hauv lub chaw dav, nws tso kuv dim vim nws zoo siab xyiv fab rau kuv. “Yawmsaub pub hmoov zoo rau kuv raws li kuv txojkev ncaj ncees. Yawmsaub pauj rau kuv raws li kuv txhais tes dawb huv. Kuv taug nraim Yawmsaub txojkev thiab kuv tsis tau ua qhov phem es tso kuv tus Vajtswv tseg. Rau qhov nws tej kevcai huvsi nyob ntawm kuv xubntiag thiab kuv tsis tau tig ntawm nws tej kab ke kiag li. Kuv tsis muaj ib qho chaw thuam rau ntawm nws xubntiag, thiab kuv tswjhwm kuv tus kheej tsis ua txhaum. Vim li no Yawmsaub thiaj pauj rau kuv raws li kuv txojkev ncaj ncees, thiab raws li nws pom kuv txojkev dawb huv. “Yawmsaub, koj ua ncaj rau tus uas xib rau koj, koj ua koj txojkev zoo kawg nkaus tshwm rau tus uas tsis muaj chaw thuam li. Koj ua koj txojkev dawb huv tshwm rau tus uas ua dawb huv, koj ua txojkev nkhaus tshwm rau tus uas siab nkhaus. Koj tso cov neeg uas txo hwjchim dim, tiamsis koj tsom ntsoov ua rau cov uas khav theeb poob qes. Au Yawmsaub, koj yog kuv lub teeb, Yawmsaub ua rau kuv qhov tsaus ntuj pom kev. Yog koj pab, kuv yeej ntaus tau ib pab tub rog, yog kuv tus Vajtswv pab, kuv thiaj caws qia hla tau ntsa loog. Tus Vajtswv no, mas nws txojkev zoo kawg nkaus, Yawmsaub lo lus cog tseg yeej muaj tseeb. Nws yog daim phiaj hlau thaiv txhua tus uas tuaj cawm siav rau hauv nws. “Leejtwg yog Vajtswv, tsuas yog Yawmsaub xwb? Leejtwg ua txhib zeb, tsuas yog peb tus Vajtswv xwb? Vajtswv yog kuv lub chaw nraim cev uas ruaj khov, thiab ua rau txojkev uas kuv taug tso siab plhuav. Nws ua rau kuv txhais kotaw zoo yam nkaus li kotaw maum muas lwj, thiab nws tso kuv nyob tso siab plhuav saum tej roob siab. Nws cob kuv txhais tes kom txawj ua rog, kuv txhais npab thiaj rub tau hneev nti tooj liab. Koj pub daim phiaj hlau uas cawm dim rau kuv, thiab koj nqes los pab ua rau kuv hlob tuaj. Koj pub kuv taug txojkev dav thiab kuv txhais taw tsis plam. Kuv caum kuv cov yeeb ncuab thiab ua kom lawv puam tsuaj, kuv tsis thim rov qab mus txog thaum lawv puam tsuaj tag. Kuv rhuav tshem lawv, kuv ntaus lawv ntsoog tag lawv thiaj sawv tsis taus, lawv ntog rau ntawm kuv kotaw. Koj muab zog sia ntawm kuv duav mus ua rog. Koj ua rau kuv cov yeeb ncuab ntog khwb tag nrho ntawm kuv xubntiag. Koj ua rau kuv cov yeeb ncuab thim khiav tig nrob qaum rau kuv, thiab cov uas ntxub kuv mas kuv ua kom puam tsuaj tag. Lawv tsa muag ntsia los tsis muaj leejtwg cawm tau lawv dim, lawv hu thov Yawmsaub tiamsis nws tsis teb lawv. Kuv muab lawv tsoo mos nyoos yam li hmoov av, kuv muab lawv tsoo tawg tsuj yam li tej av nplaum ntawm ntug kev. “Koj cawm kuv dim qhov uas nrog tej neeg sib txeeb. Koj tuav rawv kuv ua ib tsoom tebchaws tus thawj, tej neeg uas kuv tsis tau paub dua los kuj zwm rau kuv. Lwm haiv neeg kuj tuaj pe khwb nkaus rau ntawm kuv. Thaum lawv tau hnov txog kuv lawv kuj mloog kuv lus. Lwm haiv neeg poob siab tag, thiab tawm hauv lawv lub chaw ruaj khov ua ib ce tshee hnyo los. “Yawmsaub yeej muaj txojsia nyob. Cia li qhuas kuv txhib zeb. Cia li txhawb nqa kuv tus Vajtswv uas yog txhib zeb uas cawm kuv dim, yog tus Vajtswv uas pab kuv ua pauj thiab coj tej neeg nyob rau hauv kuv qab kev tswjhwm, thiab cawm kuv dim ntawm kuv cov yeeb ncuab. Koj yog tus uas tsa kuv sawv siab dua cov uas tawm tsam kuv. Koj twb tso kuv dim ntawm cov neeg limhiam ntais ntuj. Au Yawmsaub, vim li no kuv thiaj qhuas ntxhias koj rau hauv ib tsoom tebchaws sawvdaws thiab hu nkauj qhuas koj lub npe. Yawmsaub pub kev kov yeej loj rau nws tus vajntxwv, nws ua nws txojkev hlub ruaj khov tshwm rau tus uas nws hliv roj tsa cia lawd, yog Davi thiab nws caj ces mus ib txhis.” No yog Davi tej lus uas hais thaum kawg, “No yog tej lus uas Yexi tus tub Davi tau hais, yog tus uas raug muab tsa ua tus hlob, yog tus uas Yakhauj tus Vajtswv hliv roj tsa, yog tus uas phim tej nkauj uas hu tau zoo kawg rau cov Yixayee. Yawmsaub tus Ntsuj Plig kom kuv hais, nws tej lus nyob ntawm kuv tus nplaig. Yixayee tus Vajtswv twb hais lawm, Yixayee Txhib Zeb twb hais rau kuv tias, ‘Thaum leejtwg kav neeg ncaj, yog qhov uas nws paub ntshai Vajtswv ua rau nws txawj kav, mas nws ci rau lawv zoo yam nkaus li qhov kaj thaum sawv ntxov, zoo yam li lub hnub ci rau tagkis tsis muaj huab, thiab yam li nag ua rau nroj tsuag tuaj ntsuab xiab saum npoo av.’ “Kuv caj ces nyob ruaj rau hauv Vajtswv los tsis yog? Rau qhov Vajtswv cog lus ib txhiab ib txhis rau kuv, thiab cog lus txhua yam muaj kab muaj ke ruaj khov. Nws yuav tsis ua rau qhov uas kuv dim kom tiav lov, thiab tsis pub kuv tau txhua yam uas kuv lub siab xav lov? Tiamsis cov uas tsis hwm Vajtswv yuav zoo yam nkaus li tej pos uas muab xyeeb pov tseg rau qhov yuav xuas tes khaws los tsis tau. Tus uas kov tej ntawd yuav xuas cuab yeej hlau lossis xuas tus ko hmuv thiab yuav muab hluavtaws hlawv kub hnyiab tag rau qhov ntawd.” No yog Davi cov tuam leem tej npe. Yause Npasenpe uas yog cum Thamauni yog tus thawj hauv pab peb tug tuam leem. Nws xuas hmuv mus ua ib zaug rog rau yim pua leej mas muab lawv tua tag huvsi. Peb tus tuam leem ntawd tus ob yog Daudau tus tub Ele‑axa uas yog Ahau‑a cum. Nws nrog Davi nyob rau thaum uas lawv twv cov Filixatee uas sau zog tuaj ua ke yuav ua rog qhov ntawd, mas cov Yixayee kuj thim rov qab. Ces Ele‑axa sawv ntawm nws lub chaw tua cov Filixatee mus txog thaum nws txhais tes loog tag lo rau nws rab ntaj. Hnub ntawd Yawmsaub ua kom kov yeej kiag. Cov tub rog kuj rov tuaj rau ntawm nws, tsuas yog tuaj daws tej qhov txhia chaw ntawm cov neeg uas muab tua tau lawd. Tus peb yog Sama uas yog Ake nyob hauv Hala tus tub. Cov Filixatee sau zog tuaj ua ke rau ntawm Lehi uas yog ib thaj teb uas muaj taum liab puv nkaus. Cov tub rog kuj thim khiav cov Filixatee lawm. Tiamsis Sama sawv khov kho hauv nruab nrab thaj teb ntawd zov rawv thaj teb ntawd thiab tua cov Filixatee. Mas Yawmsaub ua kom kov yeej kiag. Thaum lub caij sau qoob muaj peb leeg hauv peb caug tus thawj rog nqes mus cuag Davi hauv lub qhov tsua Adulas rau thaum cov Filixatee ib pab ua yeej hauv lub hav Lefa‑i. Thaum ntawd Davi nyob hauv lub chaw ruaj khov thiab cov Filixatee ib pab tub rog kuj nyob zov rawv hauv lub moos Npelehee. Mas Davi txawm hais seev yees tias, “Kheev muaj ib tug mus nqa tau cov dej hauv lub qhov dej uas nyob ntawm ib sab rooj loog Npelehee los rau kuv haus.” Mas peb tug tuam leem ntawd thiaj txeem plaws hauv cov Filixatee lub yeej mus ntaus tau dej hauv lub qhov dej ntawm Npelehee ib sab rooj loog coj los pub rau Davi. Tiamsis Davi tsis kam haus cov dej ntawd, nws muab hliv xyeem rau Yawmsaub, thiab hais tias, “Au Yawmsaub, thov tsis txhob cia kuv ua li no. Kuv yuav haus cov neeg uas sev nyog txojsia mus ntawd cov ntshav lov?” Ua li no nws thiaj tsis kam haus. Tej no yog tej uas peb tug tuam leem ntawd ua. Yau‑a tus kwv Anpisai uas yog Xeluya tus tub ua peb caug leej ntawd tus thawj. Nws xuas hmuv ua rog rau peb puas leej mas muab lawv tua tag huvsi mas thiaj tau koob meej ib yam li peb leeg ntawd. Nws yog tus uas muaj koob meej ntau dua peb caug leej ntawd. Nws ua tus thawj uas kav peb caug leej tiamsis tsis suav nws rau hauv peb leeg ntawd. Yehauyada tus tub Npenaya yog ib tug siab loj siab tuab hauv lub moos Khaxe‑ee, nws ua tej qhov haujlwm loj. Nws tau tua Mau‑a cov tub rog ob tug uas muaj zog kawg li. Thiab nws tau nqes rau hauv lub qhov mas tua tau ib tug tsov ntxhuav rau hnub uas los daus xib daus npu. Thiab nws tau tua ib tug neeg Iyi, yog ib tug uas zoo nraug kawg. Tus Iyi ntawd tuav rawv ib rab hmuv tiamsis Npenaya coj tus pas nrig mus rau ntawm tus Iyi xwb, ces txeeb tau tus Iyi rab hmuv ntawm nws tes muab nws rab hmuv rov nkaug tus Iyi tuag. Yehauyada tus tub Npenaya tau ua tej haujlwm no thiab tau koob meej ib yam nkaus li peb tug tuam leem ntawd. Nws muaj koob meej hauv peb caug leej ntawd tiamsis tsis suav nws rau hauv peb tug tuam leem ntawd. Davi kuj tsa nws ua tus thawj kav pab tub rog uas zov vajntxwv. Peb caug leej ntawd tej npe yog li no, Yau‑a tus kwv Axahee, Daudau tus tub Eehanas uas nyob hauv Npelehee, Sama hauv lub moos Falau, Elikha hauv moos Falau, Helexi uas yog Pati cum, Ikhe tus tub Ila hauv moos Thekhau‑a, Anpiyexaw hauv moos Anathau, Menpunai uas yog Husa cum, Xamoo hauv cum Ahau‑a, Mahalai hauv moos Nethaufa, Npa‑anas tus tub Hele hauv moos Nethaufa, Linpai tus tub Ithai hauv moos Kinpe‑a hauv Npeeyamee tebchaws, Npenaya hauv moos Pilathoo, Hidai uas nyob ntawm tus dej Ka‑a, Anpi Yanpoo uas yog Anpa cum, Amave hauv moos Npahuli, Eliyanpa hauv moos Sa‑anpoo, Yasee cov tub, Yaunathas, Sama hauv moos Hala, Sala tus tub Ahiyas hauv moos Hala, Ahanpai tus tub Elifele hauv moos Ma‑akha, Ahithaufee tus tub Elias hauv moos Kilau, Helau hauv moos Khamee, Palai hauv moos Anpa, Nathas tus tub Ikas hauv moos Xaunpa, Npani xeem Kas, Xeleb uas yog neeg Asmoo, Nahalai hauv moos Npe‑awlau uas kwv Xeluya tus tub Yau‑a tej cuab yeej ua rog, Ilas uas yog Ithala cum, Kale hauv cum Ithala, thiab Uliya uas yog neeg Hithai. Huvsi muaj peb caug xya leej. Yawmsaub chim rau cov Yixayee dua ib zaug, nws thiaj tshoov Davi lub siab kom tawm tsam lawv hais tias, “Cia li mus suav cov Yixayee thiab cov Yuda.” Vajntxwv thiaj hais rau Yau‑a thiab cov thawj uas kav cov tub rog tias, “Cia li mus suav thoob plaws txhua xeem Yixayee txij ntua lub moos Daj mus txog lub moos Npe‑awsenpa, kom kuv thiaj paub tias muaj neeg npaum li cas.” Ces Yau‑a hais rau vajntxwv tias, “Thov Yawmsaub uas yog koj tus Vajtswv pub kom cov pejxeem huaj vam coob ib puas npaug ntxiv rau cov uas muaj lawd, thiab thov kom vajntxwv uas yog kuv tus tswv lub qhov muag tau pom ntag. Tiamsis ua cas vajntxwv uas yog kuv tus tswv yuav xav ua li no?” Tiamsis vajntxwv tej lus kov yeej Yau‑a thiab cov thawj kav cov tub rog tej lus. Yau‑a thiab cov thawj kav tub rog thiaj tawm ntawm vajntxwv xubntiag mus suav cov Yixayee. Lawv hla tus dej Yaladee mus thiab tsuam chaw nyob ntawm lub moos Alau‑aw sab nrad uas nyob hauv nruab nrab tiaj thiab mus thoob plaws Kas tebchaws mus txog ntua lub moos Yaxaw. Lawv mus txog Kile‑a tebchaws thiab mus txog lub moos Thathi Hausi. Lawv mus txog lub moos Daj Ya‑as thiab tig mus txog lub moos Xaidoo. Lawv mus txog lub nroog Thailab uas muaj ntsa loog ruaj khov thiab mus txog cov Hivai thiab cov Khana‑as txhua lub moos. Thiab lawv mus rau nram Neke hauv Yuda tebchaws mus rau lub moos Npe‑awsenpa. Lawv mus tau cuaj lub hlis thiab nees nkaum hnub thiaj mus thoob plaws lub tebchaws lawm lawv li rov los rau hauv lub nroog Yeluxalees. Yau‑a thiaj qhia rau vajntxwv paub tias cov pejxeem uas nws mus suav ntawd muaj npaum li cas. Hauv Yixayee tebchaws huvsi muaj 800,000 tus txivneej uas muaj siab tuab ua tau tub rog thiab hauv Yuda tebchaws muaj 500,000 leej. Thaum suav cov pejxeem tag lawd Davi kuj ntxhov siab. Davi thiaj hais rau Yawmsaub tias, “Qhov uas kuv ua li no yog kuv tau ua txhaum loj kawg. Au Yawmsaub, nimno thov koj daws kuv uas yog koj tus qhev lub txim no tseg rau qhov kuv tau ua yam uas ruam tshaj plaws.” Tagkis tom qab thaum Davi sawv tsees Yawmsaub hais lus tuaj rau Kas uas ua xibhwb cev Vajtswv lus thiab yog Davi tus xibhwb uas hais lus pom tom hauv ntej hais tias, “Cia li mus hais rau Davi tias, ‘Yawmsaub hais li no tias, Kuv muab peb yam rau koj xaiv, saib koj yeem cia kuv ua yam twg rau koj.’ ” Kas thiaj mus cuag Davi thiab hais tej lus no rau nws tias, “Yuav cia lub tebchaws raug kev tshaib plab peb xyoos lov? Lossis yuav cia koj yuav khiav tshawj chim peb lub hlis lov? Lossis yuav cia mob kis los raug lub tebchaws peb hnub lov? Nimno koj cia li xav saib thiab txiav txim siab saib yuav cia kuv mus teb li cas rau Yawmsaub uas txib kuv tuaj.” Mas Davi hais rau Kas tias, “Kuv ntxhov siab heev, thov cia kuv poob rau hauv Yawmsaub txhais tes, rau qhov nws txojkev khuvleej loj kawg li, tiamsis thov tsis txhob cia kuv poob rau hauv neeg txhais tes.” Yog li ntawd Yawmsaub thiaj tso mob kis los raug Yixayee tebchaws txij tagkis ntawd mus tag lub sijhawm teem cia. Mas cov neeg uas tuag txij ntua lub moos Daj mus txog lub moos Npe‑awsenpa muaj xya vam leej. Thaum tus tubtxib saum ntuj tsa tes kiag rau saum lub nroog Yeluxalees yuav ua kom puam tsuaj, Yawmsaub hloov dua siab tsis tso tej mob kis ntawd lawm. Nws thiaj hais rau tus tubtxib saum ntuj uas tabtom ua kom cov pejxeem puam tsuaj tias, “Txaus lawm, cia li nkaum koj txhais tes tamsim no.” Mas Yawmsaub tus tubtxib saum ntuj sawv ntsug ntawm Alauna uas yog neeg Yenpu lub tshav ntaus qoob. Thaum Davi pom tus tubtxib saum ntuj uas tabtom tua cov pejxeem, nws hais rau Yawmsaub tias, “Kuv yog tus uas tau ua txhaum muaj txim thiab ua phem kawg li lawm. Tiamsis pab yaj no lawv tau ua dabtsi? Thov koj tsa koj txhais tes tawm tsam kuv thiab kuv tsev neeg xwb.” Hnub ntawd Kas tuaj cuag Davi thiab hais rau nws tias, “Cia li nce mus tib ib lub thaj xyeem rau Yawmsaub rau ntawm Alauna uas yog neeg Yenpu lub tshav ntaus qoob.” Davi thiaj li nce mus raws li Kas tej lus uas Yawmsaub hais. Thaum Alauna tsa muag ntsia mus nws pom vajntxwv thiab nws cov tub teg tub taws tabtom nce tuaj rau ntawm nws. Alauna thiaj tawm mus khoov ntshis pe vajntxwv ua lub plhu ti nkaus av. Alauna hais tias, “Vajntxwv, ua cas koj uas yog kuv tus tswv yuav tuaj rau ntawm kuv uas yog koj tus qhev?” Davi teb tias, “Kuv tuaj yuav koj lub tshav ntaus qoob coj los ua lub thaj xyeem rau Yawmsaub, xwv thiaj li tav tau tej mob phem no kom ploj ntawm cov pejxeem mus.” Alauna hais rau Davi tias, “Vajntxwv, thov koj uas yog kuv tus tswv cia li muab tej uas koj pom zoo los xyeem rau Yawmsaub. Ntawm no muaj nyuj siv hlawv xyeem, muaj tej thob log luam qoob thiab tej quab nyuj ua taws rauv. Au vajntxwv, tej no huvsi kuv muab pub rau koj.” Thiab Alauna hais rau vajntxwv tias, “Thov Yawmsaub uas yog koj tus Vajtswv txais yuav koj.” Tiamsis vajntxwv hais rau Alauna tias, “Ua tsis tau li ntawd, kuv yuav xuas nyiaj yuav ntawm koj. Kuv yuav muab tej uas kuv tsis tau them nqe ua kevcai hlawv xyeem rau kuv tus Vajtswv Yawmsaub tsis tau li.” Davi thiaj yuav lub tshav ntaus qoob thiab nyuj ua tsib caug sekhee nyiaj. Davi thiaj ua ib lub thaj xyeem rau Yawmsaub qhov ntawd thiab ua kevcai hlawv xyeem thiab ua kevcai xyeem sib raug zoo. Yawmsaub mloog tej lus uas Davi thov pab lub tebchaws ntawd ces tej mob phem txawm ploj hauv cov Yixayee lawm. Thaum vajntxwv Davi hnub nyoog nchav thiab laus heev lawd, txawm yog lawv muab pam los vov nws, los kuj tsis sov nws li. Yog li no nws cov tub teg tub taws thiaj hais rau Davi tias, “Vajntxwv, cia li nrhiav ib tug hluas nkauj dawb huv los rau koj uas yog peb tus tswv. Cia nws ua num rau koj thiab tu koj. Cia nws pw hauv koj lub xubntiag, xwv thiaj li sov vajntxwv uas yog peb tus tswv.” Lawv txawm mus nrhiav ib tug hluas nkauj uas zoo nkauj heev thoob plaws Yixayee tebchaws, mas nrhiav tau Anpisa uas yog neeg Sunee thiab coj nws los cuag vajntxwv. Tus hluas nkauj ntawd zoo nkauj heev, nws tu vajntxwv thiab ua num rau vajntxwv, tiamsis vajntxwv tsis tau deev nws. Adauniya uas yog Hakis li tub txeeb ua loj hais tias, “Kuv yuav ua vajntxwv.” Nws npaj tau tsheb ua rog thiab tub rog caij nees thiab muaj tub teg tub taws tsib caug leej dhia ua nws ntej. Nws txiv yeej tsis tau tav nws ib los hais tias, “Ua cas koj ua li ub li no?” Nws yog ib tug zoo nraug heev thiab yog Axaloo tus kwv ntag. Adauniya sablaj rau Yau‑a uas yog Xeluya tus tub thiab rau Anpiyatha uas ua pov thawj. Ob tug kuj koom nrog Adauniya thiab pab nws. Tiamsis tus pov thawj Xadau thiab Npenaya uas yog Yehauyada tus tub thiab Nathas uas ua xibhwb cev Vajtswv lus thiab Sime‑i thiab Le‑i thiab Davi cov tub rog siab loj siab tuab tsis koom nrog Adauniya. Adauniya muab yaj muab nyuj thiab tej tsiaj rog rog tua xyeem rau ntawm lub pob zeb Xaufele uas nyob ze lub qhov dej Eelaukee. Mas nws hu nws cov kwvtij sawvdaws, uas yog vajntxwv cov tub thiab cov neeg Yuda uas ua vajntxwv cov tub teg tub taws huvsi tuaj. Tiamsis nws tsis hu Nathas uas ua xibhwb cev Vajtswv lus thiab Npenaya thiab cov tub rog siab loj siab tuab thiab nws tus kwv Xalaumoo tuaj. Ces Nathas txawm hais rau Npasenpa uas yog Xalaumoo niam tias, “Koj tsis paub tsis tau hnov lov? Hakis tus tub Adauniya twb sawv ua vajntxwv kav lawm thiab Davi uas yog peb tus tswv kuj tsis paub kiag li. Vim li no thov cia kuv hais ib lo lus rau koj xwv koj thiaj cawm tau koj txojsia thiab koj tus tub Xalaumoo txojsia. Koj cia li mus cuag vajntxwv Davi tamsim no thiab hais rau nws tias, ‘Vajntxwv uas yog kuv tus tswv, koj twb cog lus twv rau kuv uas yog koj tus nkauj qhev hais tias thaum dua koj lawd kuv tus tub Xalaumoo yuav nyob koj chaw kav thiab yuav nyob saum koj lub zwm txwv los tsis yog? Ua cas Adauniya twb ua vajntxwv lawm?’ Thaum koj tseem tabtom hais rau vajntxwv ntawd, kuv yuav raws qab los thiab pab hais tib zaj ntawd.” Ces Npasenpa txawm mus cuag vajntxwv hauv nws lub txaj pw. Vajntxwv laus heev lawm thiab Anpisa uas yog neeg Sunee tabtom tu vajntxwv. Npasenpa khoov ntshis pe vajntxwv mas vajntxwv hais rau nws tias, “Koj xav yuav dabtsi?” Nws hais rau vajntxwv tias, “Kuv tus tswv, koj twb tuav Yawmsaub uas yog koj tus Vajtswv lub npe cog lus twv rau kuv uas yog koj tus nkauj qhev tias, thaum dua koj lawd kuv tus tub Xalaumoo yuav nyob koj chaw ua vajntxwv thiab nyob saum koj lub zwm txwv. Tiamsis nimno Adauniya twb ua vajntxwv lawm, mas vajntxwv uas yog kuv tus tswv, koj twb tsis paub li. Nws twb muab nyuj thiab tej tsiaj rog rog thiab tej yaj ntau kawg li tua xyeem, thiab hu vajntxwv tej tub sawvdaws thiab Anpiyatha uas ua pov thawj thiab Yau‑a uas ua thawj kav cov tub rog tuaj. Tiamsis nws tsis hu koj tus qhev Xalaumoo. Vajntxwv uas yog kuv tus tswv, nimno cov Yixayee ntsia ntsoov koj saib koj yuav hais rau lawv tias thaum dua koj lawd leejtwg yuav nyob saum kuv tus tswv lub zwm txwv. Yog koj tsis ua li ntawd yuav zoo li no. Thaum koj mus nrog koj tej poj koob yawm txwv nyob lawd kuv thiab kuv tus tub Xalaumoo wb yuav poob rau hauv qhov txhaum.” Thaum nws tseem tabtom hais rau vajntxwv ntawd, Nathas uas ua xibhwb cev Vajtswv lus txawm nkag los. Lawv hais rau vajntxwv tias, “Xibhwb Nathas uas cev Vajtswv lus nyob no.” Thaum Nathas los rau ntawm vajntxwv lub xubntiag nws txawm khoov ntshis ua lub plhu ti nkaus av pe vajntxwv. Nathas hais tias, “Vajntxwv uas yog kuv tus tswv, koj tau hais tias, thaum dua koj lawd Adauniya yuav nyob koj chaw kav thiab nyob saum koj lub zwm txwv lov? Hnub no nws twb mus muab nyuj thiab tej tsiaj rog rog thiab tej yaj ntau kawg tua xyeem, thiab hu vajntxwv tej tub sawvdaws thiab Yau‑a uas ua thawj kav cov tub rog thiab Anpiyatha uas ua pov thawj tuaj. Lawv tabtom noj haus rau ntawm nws lub xubntiag thiab hais tias, ‘Thov kom vajntxwv Adauniya muaj txojsia loj siav ntev.’ Tiamsis nws twb tsis hu kuv uas yog koj tus qhev thiab tus pov thawj Xadau thiab Npenaya uas yog Yehauyada tus tub thiab koj tus qhev Xalaumoo. Tej no yog vajntxwv uas yog kuv tus tswv kom ua lov, es koj tsis hais rau koj cov tub teg tub taws paub tias thaum dua koj lawd leejtwg yuav nyob saum koj lub zwm txwv?” Vajntxwv Davi txawm hais tias, “Cia li hu Npasenpa los cuag kuv.” Npasenpa thiaj los cuag vajntxwv thiab sawv rau ntawm vajntxwv xubntiag. Ces vajntxwv cog lus twv tias, “Muaj Yawmsaub uas muaj txojsia nyob pom, yog tus uas cawm kuv txojsia dim hauv txhua txojkev txom nyem ceeblaj, kuv twb tuav Yawmsaub uas yog cov Yixayee tus Vajtswv lub npe cog lus twv rau koj tias, ‘Thaum dua kuv lawd koj tus tub Xalaumoo yuav ua vajntxwv kav thiab yuav nyob kuv chaw saum kuv lub zwm txwv.’ Mas kuv yuav ua li ntawd rau hnub no ntag.” Ces Npasenpa txawm khoov ntshis ua lub plhu ti nkaus av pe vajntxwv thiab hais tias, “Thov vajntxwv Davi uas yog kuv tus tswv muaj txojsia nyob mus ib txhis.” Vajntxwv Davi hais tias, “Cia li hu tus pov thawj Xadau thiab Nathas uas cev Vajtswv lus thiab Npenaya uas yog Yehauyada tus tub tuaj cuag kuv.” Lawv txawm tuaj cuag vajntxwv. Mas vajntxwv hais rau lawv tias, “Cia li coj kuv cov tub teg tub taws mus thiab muab kuv tus luj txwv rau Xalaumoo caij thiab coj nws mus rau lub qhov dej Kihoo. Cia tus pov thawj Xadau thiab Nathas uas yog xibhwb cev Vajtswv lus hliv roj ywg tsa nws qhov ntawd ua vajntxwv kav cov Yixayee, thiab tshuab raj kub yaj qw hais tias, ‘Thov kom vajntxwv Xalaumoo muaj txojsia loj siav ntev.’ Ces nej li nrog nws nce los mas nws yuav nyob saum kuv lub zwm txwv, rau qhov nws yuav nyob kuv chaw ua vajntxwv. Kuv twb tsa nws ua tus uas kav cov Yixayee thiab cov Yuda huvsi lawm.” Ces Yehauyada tus tub Npenaya teb vajntxwv tias, “Amee! Vajntxwv uas yog kuv tus tswv, thov Yawmsaub uas yog koj tus Vajtswv pab kom muaj raws li ntawd. Yawmsaub nrog nraim vajntxwv uas yog kuv tus tswv nyob li cas, kuj thov kom nws nrog nraim Xalaumoo ib yam li ntawd, thiab thov pub kom nws lub zwm txwv loj dua li vajntxwv Davi uas yog kuv tus tswv lub.” Ces tus pov thawj Xadau thiab Nathas uas cev Vajtswv lus thiab Yehauyada tus tub Npenaya thiab cov Khelethi thiab cov Pelethi txawm nqes mus muab Xalaumoo caij vajntxwv Davi tus luj txwv thiab coj nws mus rau lub qhov dej Kihoo. Mas tus pov thawj Xadau coj lub khob kub nyuj uas ntim roj aulib hauv Yawmsaub lub tsev ntaub mus hliv ywg tsa Xalaumoo. Lawv tshuab raj kub yaj thiab ib tsoom pejxeem sawvdaws hais tias, “Thov kom vajntxwv Xalaumoo muaj txojsia loj siav ntev.” Cov pejxeem sawvdaws nrog nws nce mus tshuab raj qw zoo siab xyiv fab ua av ntseeg nkaws. Thaum Adauniya thiab cov uas nws hu tuaj koom sawvdaws noj mov tag lawv hnov lub suab ntawd. Thaum Yau‑a hnov lub suab raj kub yaj nws txawm hais tias, “Lub suab nrov ntsoog qees hauv lub nroog yog dabtsi ne?” Thaum nws tabtom hais lus ntawd, Yaunathas uas yog pov thawj Anpiyatha tus tub tuaj txog. Mas Adauniya hais tias, “Cia li los, koj yog neeg zoo, koj yeej coj xov zoo tuaj.” Yaunathas teb Adauniya tias, “Tsis yog li ntawd, rau qhov vajntxwv Davi uas yog peb tus tswv twb tsa Xalaumoo ua vajntxwv. Vajntxwv txib tus pov thawj Xadau thiab Nathas uas cev Vajtswv lus thiab Yehauyada tus tub Npenaya thiab cov Khelethi thiab cov Pelethi nrog Xalaumoo mus thiab lawv muab Xalaumoo caij vajntxwv tus luj txwv. Thiab tus pov thawj Xadau thiab Nathas uas ua xibhwb cev Vajtswv lus twb hliv roj tsa nws ua vajntxwv ntawm lub qhov dej Kihoo. Lawv nce qhov ntawd rov los muaj kev zoo siab xyiv fab, lub nroog thiaj muaj suab nrov ntsoog qees, yog lub suab uas nej hnov. Xalaumoo tau nyob saum vajntxwv lub zwm txwv lawm. Tsis tag li ntawd vajntxwv cov tub teg tub taws kuj mus foom koob hmoov rau vajntxwv Davi uas yog peb tus tswv hais tias, ‘Thov koj tus Vajtswv ua kom Xalaumoo lub npe nrov nto moo lug heev dua li koj lub, thiab ua kom Xalaumoo lub zwm txwv loj dua koj lub.’ Ces vajntxwv txawm nyo hau pe Yawmsaub saum nws lub txaj. Thiab vajntxwv hais tias, ‘Qhuas Yawmsaub uas yog cov Yixayee tus Vajtswv, uas tau pub kuv li tub ki ib tug los nyob saum kuv lub zwm txwv rau hnub no, rau kuv lub qhov muag tau pom lawm.’ ” Ces cov uas Adauniya hu tuaj koom sawvdaws kuj ntshai sawv pes tsees nyias mus nyias tag lawm. Mas Adauniya ntshai Xalaumoo heev, nws txawm sawv tsees mus tuav nkaus tej kub ntawm lub thaj xyeem. Muaj neeg mus hais rau Xalaumoo tias, “Saib maj, Adauniya ntshai vajntxwv Xalaumoo kawg. Nws mus tuav rawv tej kub ntawm lub thaj xyeem hais tias, ‘Thov vajntxwv Xalaumoo cog lus twv rau kuv ua ntej hais tias nws yuav tsis xuas ntaj tua kuv uas yog nws tus qhev.’ ” Xalaumoo hais tias, “Yog nws ua tau neeg zoo, nws ib txoj plaubhau yuav tsis poob rau hauv av li, tiamsis yog pom tias nws muaj qhov phem mas nws yuav tuag xwb.” Vajntxwv Xalaumoo txawm tso neeg mus coj nws nqes ntawm lub thaj los. Mas nws thiaj los pe vajntxwv Xalaumoo. Xalaumoo hais rau nws tias, “Cia li rov qab mus tsev.” Thaum ze lub sijhawm uas Davi yuav tag sim neej mas nws nkaw lus rau nws tus tub Xalaumoo tias, “Kuv tabtom yuav dua mus ib yam li ib tsoom neeg ntiajteb. Koj cia li ua khov kho yam li ib tug txivneej yawg, thiab tuav rawv tej lus uas koj tus Vajtswv Yawmsaub hais, ua lub neej raws li nws txojkev, thiab tuav rawv nws tej kab ke thiab nws tej lus nkaw thiab nws tej kevcai thiab nws tej lus qhia raws li uas twb muab sau cia rau hauv Mauxe phau kevcai, xwv koj thiaj li vam meej rau txhua yam haujlwm uas koj ua thiab rau txhua qhov uas koj mus, mas Yawmsaub thiaj ua raws li nws tej lus uas nws hais ntsig txog kuv tias, ‘Yog koj tej tub ki ceev faj rau txhua txojkev uas lawv ua thiab ua lawv lub neej xib rau ntawm kuv lub xubntiag kawg siab kawg ntsws, mas koj caj ces yuav tsis tu ncua tus txivneej uas nyob saum cov Yixayee lub zwm txwv.’ “Dua ib qho koj yeej paub tias Xeluya tus tub Yau‑a tau ua li cas rau kuv lawm. Koj paub tias nws ua li cas rau ob tug thawj uas kav Yixayee cov tub rog, yog ua rau Naw tus tub Anaw thiab ua rau Yethaw tus tub Amaxa uas nws cia li muab tua rau thaum lub tebchaws tus lawd, ua pauj tej ntshav uas los rau thaum uas tseem ua rog. Nws muab tej ntshav uas tsis txhaum ntawd ua tso rau saum nws txoj siv ntawm duav thiab tso rau saum nws txhais khau ntawm nws kotaw. Vim li no cia li ua raws li koj lub tswvyim pom zoo, tsis txhob cia nws tus dawb hau mus ua siab tus yees rau hauv tub tuag teb. Cia li ua zoo rau Npaxilai uas yog neeg Kile‑a cov tub, kheev lawv nrog koj koom rooj noj mov ua ke, rau qhov thaum uas kuv khiav koj tus tijlaug Axaloo mus lawv tau ua zoo kawg rau kuv ib yam li ntawd. Muaj Kela tus tub Sime‑i uas yog xeem Npeeyamee uas nyob hauv lub moos Npahuli kuj nrog koj nyob ua ke no. Hnub uas kuv mus rau lub moos Mahana‑i mas nws cem foom kuv tsis zoo heev kawg li, tiamsis thaum nws tuaj tos kuv ntawm ntug dej Yaladee, mas kuv tuav Yawmsaub lub npe cog lus twv rau nws tias, kuv yuav tsis xuas ntaj tua nws. Vim li ntawd koj tsis txhob suav tias nws tsis txhaum. Koj twb muaj tswvyim, koj kuj paub tias tsim nyog koj yuav ua li cas rau nws. Koj cia li coj nws lub taubhau dawb paug nrog nws cov ntshav nqes rau hauv tub tuag teb.” Ces Davi txawm tuag mus nrog nws tej poj koob yawm txwv nyob mas lawv muab nws log rau hauv Davi lub nroog. Lub sijhawm uas Davi kav cov Yixayee yog plaub caug xyoo. Nws nyob hauv Heploo kav tau xya xyoo, nyob hauv Yeluxalees kav tau peb caug peb xyoo. Xalaumoo thiaj sawv nyob nws txiv Davi lub zwm txwv, mas nws kav tau tebchaws ruaj khov. Hakis tus tub Adauniya tuaj cuag Npasenpa uas yog Xalaumoo niam. Mas Npasenpa nug nws tias, “Koj tuaj ua zoo lov?” Adauniya teb tias, “Kuv tuaj ua zoo xwb. Kuv muaj ib lo lus yuav hais rau koj.” Npasenpa hais tias, “Cia li hais maj.” Nws thiaj hais tias, “Koj yeej paub tias kuv thiaj yog tus uas yuav kav lub tebchaws, thiab tag nrho cov Yixayee sawvdaws yeej npaj siab tias kuv yuav tau kav. Txawm li cas los xij lub tebchaws poob los rau kuv tus kwv lawm, vim yog Yawmsaub pub rau nws kav. Mas nimno kuv tsuas thov ib yam xwb, thov koj tsis txhob xyeej txhem.” Npasenpa hais rau nws tias, “Cia li hais maj.” Adauniya thiaj hais tias, “Thov koj mus thov vajntxwv, nyaj nws yuav tsis xyeej txhem koj, yog thov nws muab Anpisa uas yog neeg hauv lub moos Sunee rau kuv yuav ua pojniam.” Npasenpa hais tias, “Zoo kawg, kuv yuav mus pab koj hais rau vajntxwv.” Npasenpa txawm mus cuag vajntxwv Xalaumoo pab Adauniya hais rau vajntxwv. Mas vajntxwv sawv tsees fim nws thiab nyo hau rau nws. Ces txawm rov zaum saum lub zwm txwv mas hais kom muab rooj rau vajntxwv niam nyob. Leej niam thiaj los nyob ntawm nws sab xis, mas hais tias, “Kuv yuav thov ib nyuag yam ntawm koj, koj tsis txhob xyeej txhem kuv.” Ces vajntxwv txawm hais tias, “Niam, thov maj, kuv yuav tsis xyeej txhem koj.” Leej niam thiaj hais tias, “Thov muab Anpisa uas yog neeg hauv Sunee rau koj tus tijlaug Adauniya yuav ua pojniam.” Vajntxwv Xalaumoo teb nws niam tias, “Ua cas koj yuav thov Anpisa uas yog neeg hauv Sunee rau Adauniya yuav? Cia li thov kiag lub tebchaws rau nws thiab los maj, rau qhov nws twb yog kuv li tijlaug thiab nws twb muaj tus pov thawj Anpiyatha thiab Xeluya tus tub Yau‑a tuaj nws tog.” Vajntxwv Xalaumoo txawm tuav Yawmsaub lub npe cog lus twv hais tias, “Yog tej lus no tsis ua rau Adauniya txojsia tu mas cia Vajtswv rau txim rau kuv hnyav dua li ntawd thiab. Vim li no, muaj Yawmsaub muaj txojsia nyob pom, Yawmsaub uas yog tus tsa kuv kom nyob ruaj khov thiab muab kuv txawb rau saum kuv txiv Davi lub zwm txwv, thiab pub kuv caj ces kav mus li, raws li Yawmsaub tau cog lus cia, mas Adauniya yeej yuav raug muab tua hnub no ntag.” Yog li ntawd vajntxwv Xalaumoo thiaj txib Yehauyada tus tub Npenaya mus muab Adauniya tua, nws thiaj tuag lawm. Vajntxwv hais rau tus pov thawj Anpiyatha tias, “Cia li mus rau lub moos Anathau mus nyob hauv koj daim teb, rau qhov koj mas tsim nyog tuag lawm. Tiamsis lub sijhawm no kuv tsis tua koj vim yog koj tau kwv Vajtswv Yawmsaub lub phij xab ua kuv txiv Davi ntej, thiab vim koj tau nrog kuv txiv raug txhua yam kev txom nyem ua ke.” Xalaumoo thiaj muab Anpiyatha raws tawm qhov uas ua Yawmsaub li pov thawj, thiaj tiav raws li Yawmsaub tej lus uas hais txog Eli caj ces hauv lub moos Silau. Thaum tej xov no nrov mus txog Yau‑a, txawm yog Yau‑a tsis tuaj Axaloo tog los nws tuaj Adauniya tog, mas Yau‑a thiaj khiav mus rau Yawmsaub lub tsev ntaub thiab mus tuav rawv cov kub ntawm lub thaj xyeem. Thaum uas muaj neeg mus hais rau vajntxwv Xalaumoo tias, “Yau‑a twb khiav mus rau ntawm Yawmsaub lub tsev ntaub lawm thiab nws nyob ntawm lub thaj xyeem ib sab,” mas Xalaumoo thiaj txib Yehauyada tus tub Npenaya mus, hais tias, “Cia li mus muab nws tua pov tseg.” Npenaya thiaj mus rau ntawm Yawmsaub lub tsev ntaub mas hais rau Yau‑a tias, “Vajntxwv kom koj cia li tawm los.” Yau‑a teb tias, “Kuv tsis tawm li, kuv yeem tuag ntawm no.” Ces Npenaya kuj coj xov mus hais rau vajntxwv tias, “Yau‑a hais li ntawd ntag, nws teb kuv li no ntag.” Vajntxwv teb nws tias, “Cia li ua raws li nws hais rau nws. Cia li muab nws tua thiab muab faus tseg. Ua li no xwv thiaj ntxuav tau lub txim uas Yau‑a tua tej neeg tsis txhaum tawm ntawm kuv thiab kuv txiv caj ces mus. Yawmsaub yuav coj qhov uas nws tua lwm tus los ntshav ntawd rov los poob rau saum nws taubhau, rau qhov nws tau xuas ntaj tua ob tug txivneej uas ncaj ncees dua thiab zoo dua nws, uas kuv txiv Davi kuj tsis paub li, yog Naw tus tub Anaw uas ua thawj kav cov tub rog Yixayee thiab Yethaw tus tub Amaxa uas ua thawj kav cov tub rog Yuda. Mas ob tug tuag no cov ntshav yuav poob rau saum Yau‑a thiab nws caj ces taubhau ib txhiab ib txhis, tiamsis Davi thiab nws tej tub ki thiab nws caj ces thiab nws lub zwm txwv Yawmsaub yuav pub kom nyob tus yees ib txhiab ib txhis.” Yehauyada tus tub Npenaya txawm mus tua Yau‑a tuag mas muab nws log rau ntawm nws lub tsev hauv tebchaws moj sab qhua. Vajntxwv Xalaumoo tsa Yehauyada tus tub Npenaya ua thawj kav tub rog nyob Yau‑a chaw, thiab vajntxwv tsa Xadau ua pov thawj nyob Anpiyatha chaw. Vajntxwv txib neeg mus hu Sime‑i tuaj mas hais rau nws tias, “Koj cia li ua tsev rau hauv Yeluxalees thiab nyob twjywm qhov ntawd, tsis txhob tawm mus qhovtwg li. Yog hnub twg koj tawm hla lub hav Khiloo ntawd mus, mas koj cia li paub tseeb tias koj yuav tuag. Qhov uas koj tuag ntawd koj yuav ris koj xwb.” Mas Sime‑i hais rau vajntxwv tias, “Qhov uas vajntxwv hais li no kuj zoo kawg. Vajntxwv uas yog kuv tus tswv hais li cas los kuv uas yog koj tus qhev yuav ua li ntawd.” Sime‑i thiaj li nyob hauv Yeluxalees tau ntev. Nyob tau peb xyoos mas Sime‑i ob tug qhev khiav mus cuag Ma‑akha tus tub Akhij uas ua vajntxwv hauv lub moos Ka. Mas thaum muaj neeg hais rau Sime‑i tias, “Koj ob tug qhev nyob hauv lub moos Ka,” Sime‑i txawm sawv tsees nog eeb rau saum nees luav mus cuag Akhij hauv lub moos Ka mus nrhiav nws ob tug qhev. Sime‑i tau mus coj nws ob tug qhev ntawm lub moos Ka los. Thaum muaj neeg hais rau Xalaumoo tias Sime‑i twb tawm hauv Yeluxalees mus txog lub moos Ka thiab rov qab los lawm, vajntxwv txawm txib neeg mus hu Sime‑i tuaj mas hais rau nws tias, “Kuv twb kom koj tuav Yawmsaub lub npe cog lus twv tseg thiab kuv nkaw lus rau koj tias, ‘Koj cia li paub tseeb tias hnub twg koj tawm mus tsis hais koj mus rau qhovtwg koj yuav tuag xwb.’ Mas koj twb teb kuv tias, ‘Tej lus uas koj hais no zoo kawg li, kuv yuav mloog koj lus.’ Ua li cas koj tsis ceev cov lus uas koj cog rau Yawmsaub lawm thiab tsis ceev tej lus uas kuv hais kom koj ua?” Vajntxwv rov hais dua rau Sime‑i tias, “Koj yeej paub tej kev phem uas koj ua rau kuv txiv Davi huvsi hauv koj lub siab lawm. Vim li no Yawmsaub yuav muab tej kev phem rov los pauj rau saum koj lub taubhau. Tiamsis vajntxwv Xalaumoo yuav tau hmoov zoo thiab Davi lub zwm txwv yuav nyob ruaj khov rau ntawm Yawmsaub xubntiag mus ib txhis.” Mas vajntxwv txawm hais rau Yehauyada tus tub Npenaya mas nws tawm mus muab Sime‑i tua pov tseg, Sime‑i thiaj li tuag. Ua li no lub tebchaws thiaj nyob ruaj khov rau hauv Xalaumoo txhais tes. Xalaumoo yuav Falau uas yog vajntxwv Iyi tus ntxhais ua pojniam thiaj tau nrog Falau tis nruab tis ze sib raug zoo. Nws thiaj coj Falau tus ntxhais los nyob rau hauv Davi lub nroog mus txog thaum ua nws lub tsev thiab ua Yawmsaub lub tuam tsev tiav thiab txhim lub ntsa loog xov lub nroog Yeluxalees tag huvsi. Cov pejxeem tseem tua tsiaj xyeem rau saum tej chaw siab vim yog tsis tau ua lub tuam tsev rau Yawmsaub lub npe. Xalaumoo hlub Yawmsaub thiab nws ua lub neej raws li nws txiv Davi tej kab ke tsuas yog nws tua tsiaj thiab hlawv hmoov tshuaj tsw qab xyeem rau saum tej chaw siab. Vajntxwv mus tua tsiaj xyeem rau ntawm lub moos Kinpe‑oo rau qhov lub chaw siab uas tseem ceeb nyob qhov ntawd. Xalaumoo tua ib txhiab tus tsiaj ua kevcai hlawv xyeem rau saum lub thaj ntawd. Hmo ntuj Yawmsaub los tshwm hauv npau suav rau Xalaumoo pom ntawm lub moos Kinpe‑oo. Vajtswv hais tias, “Koj xav kom kuv pub dabtsi rau koj, cia li thov.” Mas Xalaumoo hais tias, “Koj ua koj txojkev hlub ruaj khov uas loj kawg tshwm rau kuv txiv Davi uas yog koj tus qhev, rau qhov nws ua lub neej xib rau koj thiab ua ncaj ua ncees tab meeg koj thiab ua lub siab ncaj rau koj. Koj tuav rawv txojkev hlub ruaj khov uas loj kawg no rau nws thiab pub nws muaj ib tug tub nyob saum nws lub zwm txwv rau hnub no. Au Yawmsaub uas yog kuv tus Vajtswv, kuv txawm yog menyuam yaus los nimno koj pub kuv uas yog koj tus qhev sawv ua vajntxwv nyob kuv txiv Davi chaw. Kuv tsis paub tias kuv yuav coj li cas. Thiab koj tus qhev nyob rau hauv koj haiv neeg uas koj tau xaiv cia lawd, yog haiv neeg uas muaj zog thiab coob kawg suav tsis txheeb. Thov koj pub kev nkag siab rau kuv uas yog koj tus qhev kom kuv thiaj kav tau koj cov neeg thiab paub qhov zoo qhov phem, rau qhov leejtwg yuav kav tau koj haiv neeg uas coob heev no?” Xalaumoo thov li no mas kuj txaus tus Tswv lub siab. Mas Vajtswv hais rau nws tias, “Vim yog koj thov tej no koj tsis tau thov kom koj muaj txojsia nyob ntev thiab tsis thov nyiaj txiag rau koj thiab tsis thov kom koj cov yeeb ncuab txojsia tu, tiamsis koj thov kev nkag siab kom thiaj paub tias qhov twg yog qhov raug cai, vim li no kuv yuav ua raws li koj tej lus thov. Kuv yeej yuav pub lajlim tswvyim plab plaws thiab kev nkag siab rau koj, xwv thiaj tsis muaj leejtwg uas nyob ua koj ntej zoo cuag li koj thiab tsis muaj leejtwg uas tshwm los tom qab yuav zoo cuag li koj. Kuv tseem yuav pub tej uas koj tsis tau thov rau koj, yog nyiaj txiag thiab meej nthawb, mas tag koj sim neej thiaj yuav tsis muaj lwm tus vajntxwv piv tau rau koj. Thiab yog koj ua lub neej raws nraim kuv txojkev thiab tuav rawv kuv tej kab ke thiab kuv tej lus nkaw ib yam li koj txiv Davi tau ua lawd, kuv yuav pub koj lub hnub nyoog ntev mus.” Ces Xalaumoo txawm tsim los, ua ciav yog npau suav. Ces nws txawm los rau hauv lub nroog Yeluxalees thiab sawv ntsug ntawm Yawmsaub lub phij xab sib cog lus, thiab tua tsiaj ua kevcai hlawv xyeem thiab ua kevcai xyeem sib raug zoo, thiab pam ib rooj mov rau nws cov tub teg tub taws sawvdaws noj haus. Muaj ob tug poj muag cev tuaj cuag vajntxwv sawv ntsug ntawm vajntxwv xubntiag. Ib tug pojniam hais tias, “Au kuv tus vajntxwv, kuv thiab tus pojniam no nyob ua ke hauv ib lub tsev. Kuv yug tau ib tug menyuam rau thaum tus pojniam no tseem nyob hauv tsev thiab. Thaum kuv yug menyuam tau peb hnub lawd, tus pojniam no txawm yug menyuam thiab. Mas wb ob leeg nyob ua ke, tsis muaj lwm tus nrog wb nyob hauv lub tsev tsuas yog wb ob leeg nyob hauv lub tsev ntawd xwb. Thaum hmo ntuj tus pojniam no tus menyuam txawm tuag vim nws muab tais tuag. Mas thaum ib tag hmo kuv uas yog koj tus qhev tseem tsaug zog, nws txawm sawv los muab kuv tus tub ntawm kuv ib sab coj mus tso rau hauv nws xubntiag thiab muab nws tus tub uas tuag lawd tso rau hauv kuv xubntiag. Thaum tagkis kuv sawv los yuav muab mis rau kuv tus menyuam noj, ua ciav twb tuag lawm. Tagkis ntawd thaum kuv muab ua tib zoo saib, ua ciav tsis yog tus menyuam uas kuv yug.” Tiamsis tus pojniam uas nyob ntawd hais tias, “Tsis yog. Tus menyuam uas ciaj yog kuv li, tus menyuam uas tuag yog koj li.” Thawj tus pojniam hais tias, “Tsis yog. Tus menyuam uas tuag yog koj li, tus uas ciaj yog kuv li.” Ob tug ob leeg hais li no rau ntawm vajntxwv xubntiag. Ces vajntxwv txawm hais tias, “Ib tug hais tias, ‘Tus menyuam uas ciaj no yog kuv li, koj tus yog tus uas tuag lawd,’ dua ib tug kuj hais tias, ‘Tsis yog, koj tus menyuam tuag lawm, kuv tus yog tus uas ciaj.’ ” Thiab vajntxwv hais tias, “Cia li muab ib rab ntaj los rau kuv.” Lawv thiaj coj rab ntaj los tso rau ntawm vajntxwv xubntiag. Ces vajntxwv txawm hais tias, “Cia li muab tus menyuam uas ciaj ntawd phua ua ob sab, muab faib rau ob tug pojniam ntawd ib leeg ib sab.” Vim tus pojniam uas nws tus menyuam tseem ciaj ntawd mob siab nws tus tub, nws txawm hais rau vajntxwv tias, “Au kuv tus vajntxwv, cia li muab tus menyuam uas ciaj no rau tus pojniam ntawd. Txawm li cas los xij tsis txhob muab tus menyuam tua.” Tiamsis tus pojniam ntawd hais tias, “Tus menyuam ntawd tsis ua kuv li tsis ua koj li, cia li muab faib.” Ces vajntxwv txawm teb ob tug tias, “Cia li muab tus menyuam uas ciaj ntawd rau thawj tug pojniam, tsis txhob muab tua kiag li, nws yeej yog tus menyuam ntawd niam.” Cov Yixayee sawvdaws hnov txog qhov uas vajntxwv tu plaub ntawd. Lawv ntshai thiab hwm vajntxwv heev rau qhov lawv pom tias Vajtswv lub tswvyim nyob hauv nws, nws thiaj tu tau plaub ncaj. Vajntxwv Xalaumoo ua vajntxwv kav tag nrho cov Yixayee huvsi. Cov neeg no yog vajntxwv cov nom tswv uas ua hlob huvsi. Xadau tus tub Axaliya ua pov thawj. Sisa tus tub Elihaulej thiab tus tub Ahiya ua ob tug tub sau ntawv. Ahilu tus tub Yehausafa ua tus uas sau ntawv keeb kwm. Yehauyada tus tub Npenaya ua thawj kav tub rog. Xadau thiab Anpiyatha ua pov thawj. Nathas tus tub Axaliya ua tus thawj saib cov nom tswv. Nathas tus tub Xanpu ua pov thawj thiab yog vajntxwv phoojywg. Ahisa ua tus uas saib vajntxwv lub vaj lub tsev. Anpada tus tub Adaunilas ua tus uas kav cov tub zog uas raug yuam ua haujlwm. Xalaumoo muaj kaum ob tug nom tswv uas kav cov Yixayee huvsi thiab npaj zaub mov noj rau vajntxwv thiab vajntxwv tsev neeg. Ib xyoos ib tug nom npaj zaub mov noj ib lub hlis. No yog lawv cov npe, Npeehawj kav pem toj siab Efa‑i tebchaws. Npee Ntekhaw kav lub moos Makha thiab Sa‑anpi thiab Npeseme thiab Eloo Npehanas. Npee Hexe kav Alunpau, (Xaukhau thiab Hefaw lub tebchaws huvsi kuj zwm rau nws.) Npee Anpinada kav Nafadau huvsi, nws tau yuav Xalaumoo tus ntxhais Thafa ua pojniam. Ahilu tus tub Npa‑ana kav Tha‑ana thiab Mekidau thiab Npesas huvsi uas nyob ib sab ntawm Xalethas uas nyob ntawm Yile‑ee sab nrad, thiab txij ntua Npesas mus txog Anpee Mehaula thiab dhau plaws lub moos Yaume‑as. Npee Kenpaw kav Lamau Kile‑a, uas yog tej zej zog uas yog Manaxe tus tub Ya‑i li zej zog uas nyob hauv Kile‑a, thiab kav tag nrho lub xeev Akau uas nyob hauv Npasas tebchaws, huvsi muaj rau caum lub moos loj uas muaj ntsa loog thiab muaj tej las rooj loog tooj liab. Idau tus tub Ahinada kav Mahana‑i tebchaws. Ahima‑a kav Nathali tebchaws, nws tau yuav Xalaumoo tus ntxhais Npaxema ua pojniam. Husai tus tub Npa‑ana kav Asaw tebchaws thiab lub moos Npe‑alau. Palu‑a tus tub Yehausafa kav Ixakha tebchaws. Ela tus tub Sime‑i kav Npeeyamee tebchaws. Uli tus tub Kenpaw kav Kile‑a tebchaws, yog tebchaws uas thaum cov Amaulai tus vajntxwv Xihoo thiab Npasas tus vajntxwv Aus kav. Muaj tib tug nom tswv kav lub tebchaws no xwb. Cov Yixayee thiab cov Yuda muaj coob kawg cuag nkaus li tej xuab zeb ntawm ntug hiavtxwv. Lawv muaj noj muaj haus tau zoo nyob xyiv fab hlo. Xalaumoo kav tag nrho tej tebchaws txij ntua tus dej Yufeti mus txog ntua cov Filixatee lub tebchaws thiab mus txog ntua Iyi ciam teb. Lawv sawvdaws coj qhov txhia chaw tuaj them se rau Xalaumoo thiab zwm rau nws tag sim neej uas nws tseem muaj txojsia nyob. Xalaumoo tej zaub mov mas ib hnub yog cov hmoov mog zoo zoo peb caug khaula, cov hmoov mog ntxhib rau caum khaula, kaum tus nyuj rog rog hwv hauv nkuaj, nees nkaum tus nyuj tom tshav zaub, ib puas tus yaj. Dua li ntawd muaj muas lwj, kauv seb, kauv liab thiab qaib rog rog, rau qhov nws kav tag nrho tej tebchaws mus txog tus dej Yufeti sab hnub poob, txij ntua lub moos Thixa mus txog lub moos Kaxa, thiab nws kav tag nrho tej vajntxwv uas nyob dej Yufeti sab hnub poob huvsi. Vajntxwv nyob siab tus yees rau xwm fab puas meem. Cov Yuda thiab cov Yixayee nyob tso siab lug txij ntua lub moos Daj mus txog ntua lub moos Npe‑awsenpa, txhua tus nyias nyob nraim ntxoov ntxoo hauv nyias tej qab txiv hmab txiv cev tag Xalaumoo sim neej. Xalaumoo tseem muaj plaub vam lub nkuaj kaw plaub vam tus nees hai tsheb ua rog. Nws muaj cov tub rog caij nees ib vam ob txhiab leej. Cov nom tswv ntawd npaj zaub mov xa mus rau Xalaumoo thiab rau txhua tus uas los koom Xalaumoo lub rooj mov, nyias xa raws li nyias lub hli. Lawv tsis tseev ib yam dabtsi tu ncua li. Lawv xa qeb xa quav nyab tuaj rau tej nees hai tsheb thiab tej nees caij, lawv coj tuaj rau txhua lub chaw uas teem cia npaum li uas hais cia rau lawv lawd. Vajtswv pub lajlim tswvyim plab plaws kev txawj ntse rau Xalaumoo ntau kawg li thiab pub nws muaj tab fab thiab kev paub npaum nkaus li tej xuab zeb ntawm ntug hiavtxwv. Xalaumoo tej tswvyim plab plaws ntau dua cov neeg sab hnub tuaj tej tswvyim thiab ntau dua cov Iyi tej tswvyim huvsi. Nws muaj tswvyim thiab txawj ntse dua luag lwm tus huvsi, ntse dua Etha uas yog cum Exalas, thiab Hemas thiab Khakhau thiab Dada uas yog Mahoo cov tub. Nws lub moo nrov nto moo lug mus thoob plaws txhua lub tebchaws uas nyob ib ncig. Nws hais peb txhiab nqe paj lug thiab ib txhiab tsib zaj nkauj. Nws hais txog tej xyoob ntoo tag nrho tej ntoo ciab hauv Lenpanoo mus txog tej zaub txig theem uas tuaj ntawm tej ntsa loog. Nws kuj hais txog tej tsiaj qus tej nas noog thiab tej tsiaj uas nkag thiab tej ntses. Muaj neeg tuaj hauv txhua haiv neeg tuaj mloog Xalaumoo tej tswvyim, thiab tuaj ntawm txhua tus vajntxwv hauv ntiajteb no uas tau hnov moo txog Xalaumoo tej tswvyim. Thaum Hilas uas ua vajntxwv hauv lub nroog Thailab hnov tias lawv tau tsa Xalaumoo ua vajntxwv nyob leej txiv chaw, ces nws thiaj tso nws cov tub teg tub taws mus cuag Xalaumoo, rau qhov Hilas pheej nrog Davi ua phoojywg. Mas Xalaumoo xa xov rau Hilas tias, “Koj yeej paub tias kuv txiv Davi ua tsis tau lub tuam tsev rau nws tus Vajtswv Yawmsaub lub npe rau qhov muaj yeeb ncuab ua rog rau nws vij ib ncig nws, mus txog thaum Yawmsaub muab nws cov yeeb ncuab tso rau hauv nws qab xib taws. Nimno Yawmsaub uas yog kuv tus Vajtswv pub kuv tau so tsis ua rog rau txhua fab, tsis muaj yeeb ncuab thiab tsis muaj xwm txheej phem lawm. Yog li no kuv txiav txim siab yuav ua lub tuam tsev rau kuv tus Vajtswv Yawmsaub lub npe, raws li Yawmsaub tau hais rau kuv txiv Davi tias, ‘Koj tus tub uas kuv yuav muab tsa nyob koj chaw saum koj lub zwm txwv yuav ua lub tuam tsev rau kuv lub npe.’ Yog li no thov koj txib neeg mus txiav cov ntoo ciab hauv Lenpanoo rau kuv, thiab kuv cov tub teg tub taws yuav nrog koj cov tub teg tub taws ua haujlwm, thiab kuv yuav muab nqe zog rau koj cov tub teg tub taws raws li koj hais cia. Koj yeej paub tias hauv peb cov no tsis muaj leejtwg txawj txiav ntoo yam li cov neeg Xaidoo.” Thaum Hilas hnov Xalaumoo tej lus nws kuj zoo siab xyiv fab kawg thiab nws hais tias, “Hnub no qhuas Yawmsaub uas tau pub Davi muaj ib tug tub txawj ntse ua tus uas kav cov neeg coob no.” Thiab Hilas xa xov rov rau Xalaumoo hais tias, “Kuv twb tau hnov tej lus uas koj xa tuaj rau kuv lawm. Hais txog cov ntoo ciab thiab cov ntoo ciab nplooj suab mas kuv npaj txhij ua txhua yam uas koj xav kom kuv ua. Kuv cov tub teg tub taws yuav coj tej ntoo ntawd saum lub roob Lenpanoo los txog dej hiavtxwv. Kuv yuav muab ua phuaj xa hauv dej hiavtxwv mus txog qhov chaw uas koj teem cia, kuv li muab daws rau qhov ntawd, mas koj cia li tuaj coj mus. Thiab koj cia li npaj zaub mov xa tuaj rau kuv tsev neeg npaum li uas kuv xav yuav.” Hilas thiaj xa cov ntoo ciab thiab cov ntoo ciab nplooj suab rau Xalaumoo raws li nws xav tau, mas Xalaumoo muab ob vam khaula mog ua zaub mov rau Hilas tsev neeg thiab nees nkaum khaula roj aulib uas tsuam lim zoo zoo. Xalaumoo niaj xyoo pub npaum li no rau Hilas. Thiab Yawmsaub pub tswvyim rau Xalaumoo raws li nws cog lus cia. Mas Hilas thiab Xalaumoo kuj sib hum xeeb thiab ob tug cog lus sib raug zoo. Vajntxwv Xalaumoo sau cov txivneej hauv cov Yixayee sawvdaws ua tub zog raug yuam ua haujlwm tau peb vam leej. Nws txib lawv mus rau hauv Lenpanoo, ib vam leej ua ib pab txhua lub hli sib hloov ua haujlwm. Ib pab yuav nyob hauv Lenpanoo ib lub hlis rov los tsev ob lub hlis. Adaunilas yog tus uas coj cov tub zog. Xalaumoo kuj muaj xya vam leej ua cov uas kwv qhov txhia chaw, thiab yim vam leej ua cov uas txam pob zeb pem roob. Dua li no nws tseem muaj peb txhiab peb puas leej ua thawj uas saib xyuas tej haujlwm thiab kav cov neeg ua haujlwm. Lawv txam tej pob zeb loj uas muaj nqes coj los txhim pua tiag lub tuam tsev, raws li vajntxwv hais. Yog li no Xalaumoo cov Kws ua tsev thiab Hilas cov Kws ua tsev thiab cov neeg Kenpas thiaj li txam pob zeb thiab npaj tej ntoo thiab tej pob zeb uas ua lub tuam tsev. Xyoo uas plaub puas yim caum, yog suav txij thaum cov Yixayee tawm hauv Iyi tebchaws los, yog xyoo plaub uas Xalaumoo ua vajntxwv kav cov Yixayee, lub hli Xiv uas yog lub ob hlis, Xalaumoo pib ua Yawmsaub lub tuam tsev. Lub tuam tsev uas Xalaumoo ua rau Yawmsaub ntawd ntev rau caum tshim, dav nees nkaum tshim thiab siab peb caug tshim. Zaj qab khav uas yuav nkag rau hauv lub tuam tsev ntev nees nkaum tshim npaum li lub tuam tsev qhov uas dav thiab dav kaum tshim rau sab nraud. Nws kuj ua lub tuam tsev tej qhov rais som zuj zus sab hauv rau sab nraud. Nws ua tej chav npuas nkaus tej phab ntsa thoob plaws lub tuam tsev, yog thoob plaws chav dawb huv thiab chav uas dawb huv kawg nkaus huvsi. Chav uas nyob hauv qab kawg dav tsib tshim, chav uas nyob txheej nruab nrab dav rau tshim, chav uas nyob txheej peb dav xya tshim. Nws ua tej theem puag ncig lub tuam tsev txawb tej las thiaj tsis ntxig rau hauv phab ntsa tuam tsev. Thaum tabtom ua lub tuam tsev ntawd, lawv siv tej pob zeb uas twb txhwm ntawm lub chaw txam pob zeb lawd, kom thiaj tsis hnov tej suab rauj suab taus lossis suab cuab yeej hlau nrov rau hauv lub tuam tsev rau thaum ua lub tuam tsev. Lub qhov rooj uas nkag rau hauv txheej hauv qab nyob ntawm lub tuam tsev sab nrad, thiab muaj ntaiv nce mus rau txheej ob thiab nce ntawm txheej ob mus rau txheej peb. Nws thiaj ua lub tuam tsev tiav li no, thiab nws muab ntoo ciab ua las ua txiag vov. Nws txuas tej chav puag ncig lub tuam tsev ib txheej siab tsib tshim, thiab tej las uas txuas ntawm lub tuam tsev yog ntoo ciab. Yawmsaub hais lus tuaj rau Xalaumoo tias, “Hais txog lub tuam tsev uas koj ua no, yog koj ua koj lub neej raws nraim kuv tej kab ke thiab mloog kuv tej kevcai thiab tuav rawv kuv tej lus nkaw huvsi thiab ua raws li, mas kuv yeej yuav ua raws li kuv tej lus uas kuv hais txog koj uas kuv twb hais rau koj txiv Davi lawd. Thiab kuv yuav nyob hauv nruab nrab cov Yixayee thiab kuv yuav tsis tso kuv haiv neeg Yixayee tseg.” Xalaumoo thiaj ua lub tuam tsev thiab ua kom tiav li no. Tej phab ntsa tuam tsev sab hauv lub nrog nws muab txiag ntoo ciab xov. Txij ntua hauv taw mus nto plaws tej las uas vov nws muab ntoo xov sab nruab nrog huvsi. Thiab nws muab txiag ntoo ciab nplooj suab pua thoob plaws lub tuam tsev. Nws muab ntoo ciab kem nees nkaum tshim ua ib chav npuas rau sab qaum tsev xov hauv taw mus nto plaws tej las vov, thiab nws ua chav no ua chaw pe Vajtswv rau sab hauv, yog chav uas dawb huv kawg nkaus. Lub tuam tsev chav uas npuas lub chaw sab hauv uas pe Vajtswv ntev plaub caug tshim. Cov ntoo ciab uas xov hauv lub nrog tuam tsev muab sais zoo li tej lub taub iab thiab zoo li tej paj ntoo uas tawg nta lawm, puavleej yog ntoo ciab tsis pom tej phab ntsa pob zeb kiag li. Nws npaj chav sab hauv uas pe Vajtswv ntawd npuas rau sab qaum tsev kom thiaj tso tau Yawmsaub lub phij xab sib cog lus rau hauv. Chav sab hauv uas pe Vajtswv ntawd ntev nees nkaum tshim, dav nees nkaum tshim siab nees nkaum tshim. Nws muab cov tseem kub luam thoob plaws. Nws muab txiag ntoo ciab ntsia ib txheej rau lub thaj xyeem. Xalaumoo muab cov tseem kub luam lub nrog tuam tsev thiab dai tej txoj saw kub loj rau ntawm phab ntsa uas kem chav sab hauv uas pe Vajtswv, thiab muab kub luam lub nrog chav sab hauv thoob plaws. Nws muab kub luam thoob plaws lub nrog tuam tsev huvsi, thiaj ua lub tuam tsev ntawd tiav huvsi. Lub thaj xyeem uas yog chav hauv nws muab kub luam huvsi thiab. Nws muab ntoo aulib ua ob tug Khelunpee rau chav sab hauv uas pe Vajtswv, ib tug siab kaum tshim. Ob tug Khelunpee ntawd li kooj tis mas ib sab ntev tsib tshim sib txig zos. Ib sab ntsis kooj tis mus txog ntua ib sab li ntsis kooj tis muaj kaum tshim. Dua ib tug Khelunpee muaj kaum tshim thiab, ob tug Khelunpee sib luag ib yam nkaus thiab zoo ib yam. Ob tug Khelunpee ntawd puavleej siab kaum tshim ib yam nkaus. Nws muab ob tug Khelunpee ntawd txawb rau chav sab hauv uas npuas rau sab qaum tsev. Ob tug Khelunpee nthuav tis ib yam nkaus, ib tug li ntsis kooj tis nthuav mus ti nkaus ib sab phab ntsa, dua ib tug li ntsis kooj tis kuj nthuav mus ti nkaus dua rau ib sab phab ntsa. Ob sab ntsis tis nruab nrab tuaj sib cuag rau hauv nruab nrab lub tuam tsev. Nws muab kub luam ob tug Khelunpee huvsi. Vajntxwv muab tej phab ntsa tsev sab hauv lub nrog sais ua duab Khelunpee thiab ua tej tsob toov laj thiab tej paj ntoo uas tawg nta, rau chav hauv thiab chav nraud huvsi. Nws muab kub luam lub plag tse thoob plaws chav hauv thiab chav nraud huvsi. Nws xuas ntoo aulib ua ob txhib qhov rooj uas nkag rau lub chaw pe Vajtswv chav hauv, thiab ua ob tug npuab rooj ob sab thiab sab saud ua puam leej ua tsib fab. Nws muab ob txhib qhov rooj uas xuas ntoo aulib ua ntawd sais ua tej duab Khelunpee thiab ua tej tsob toov laj thiab ua tej paj ntoo uas tawg nta. Thiab muab kub luam ob txhib qhov rooj thiab luam tej duab Khelunpee thiab tej tsob toov laj ntawd huvsi. Nws xuas ntoo aulib ua ob tug npuab rooj ua plaub fab rau lub qhov rooj chav nraud. Nws muab cov ntoo ciab nplooj suab ua ob txhib qhov rooj, ib txhib qhov rooj mas muaj ob daim txiag txuas ua ke quav qheb tau, ib txhib qhov rooj muaj ob daim txiag. Nws kuj sais tej duab Khelunpee thiab tej tsob toov laj thiab tej paj ntoo uas tawg nta rau cov txhib qhov rooj ntawd, thiab muab kub luam tej uas sais ntawd zoo ib yam nkaus. Nws xuas cov pob zeb uas txhwm tib ua peb tshooj xov lub loog tshav puam sab hauv thiab tseem xov ib tshooj ntoo ciab rau saud. Xyoo uas plaub nws pib ua Vajtswv lub tuam tsev rau lub hli Xiv. Thiab xyoo uas kaum ib lub hli Npu uas yog lub yim hli mas ua lub tuam tsev tiav tag txhua yam huvsi thiab ua tiav raws li uas hom cia lawd huvsi. Vajntxwv ua xya xyoo li tau lub tuam tsev ntawd. Xalaumoo ua nws lub tsev tau kaum peb xyoos thiaj ua tau lub vaj lub tsev tiav txhua yam. Nws ua lub tsev Hav Zoov Lenpanoo, ntev ib puas tshim dav tsib caug tshim thiab siab peb caug tshim, thiab xuas ntoo ciab ua plaub leej ncej, thiab xuas ntoo ciab ua cov dau saum cov hau ncej. Txheej saud mas xuas ntoo ciab vov, yog vov saum plaub caug tsib chav uas nyob txheej saum cov hau ncej ib leej muaj kaum tsib chav. Muaj peb zaj qhov rais, peb zaj qhov rais ntawd nyob sib ncaj. Qhov rooj qhov rais huvsi ua dav xwm fab xwm meem, thiab cov qhov rais kuj nyob peb zaj nyob sib ncaj. Nws ua lub tsev Ncej Txhais Nrho, ntev tsib caug tshim dav peb caug tshim. Muaj ib chav muaj ncej nyob sab nraum qhov rooj uas muaj zaj qab khav. Nws ua lub tsev uas muaj lub zwm txwv uas nws tu plaub, yog lub tsev tu plaub. Nws xuas ntoo ciab xov txij ntawm taw ntsa tsev mus nto plaws rau tej las. Nws ua lub tsev rau nws nyob rau hauv lub tshav puam npuas nkaus lub tsev tu plaub sab nrad, ua zoo ib yam nkaus li tej. Xalaumoo kuj ua ib lub tsev zoo yam nkaus li no rau Falau tus ntxhais uas yuav los ua pojniam. Muaj tej pob zeb muaj nqes heev uas txhwm raws li ntsuas cia thiab xuas kaw kaw sab nraud thiab sab hauv los ua, txij ntawm hauv taw mus nto plaws ntsa, thiab txij ntawm Vajtswv lub tuam tsev mus txog lub tshav puam loj huvsi. Muab tej pob zeb loj uas muaj nqes tiag hauv taw, tej niag txhib zeb loj loj dav yim tshim thiab kaum tshim. Txheej saud mas muaj tej pob zeb muaj nqes uas txhwm los raws li ntsuas cia, thiab muab ntoo ciab ua. Lub tshav puam loj muab cov pob zeb uas txhwm xov peb tshooj mas xov ib tshooj ntoo ciab. Lub tshav puam sab hauv uas xov Yawmsaub lub tuam tsev thiab zaj qab khav kuj zoo ib yam nkaus. Vajntxwv Xalaumoo txib neeg mus coj Hilas hauv lub nroog Thailab tuaj. Hilas yog ib tug poj ntsuam uas yog xeem Nathali li tub. Nws txiv yog ib tug nyob hauv lub nroog Thailab, nws yog Kws ntaus tooj liab. Hilas muaj lajlim tswvyim plab plaws thiab txawj muab tooj liab ua txhua yam. Nws tuaj cuag vajntxwv Xalaumoo thiab ua vajntxwv tej haujlwm huvsi. Nws muab tooj liab nchuav ua ob tug ncej. Ib tug siab kaum yim tshim, ntsuas puag ncig muaj kaum ob tshim. Tus ncej uas ob kuj zoo ib yam nkaus. Nws muab tooj liab nchuav ua ob lub hau ncej uas yuav muab txawb rau saum ob tug ncej. Ob lub hau ncej puavleej siab tsib tshim. Muaj saw tooj liab qhaib ua qhov muag ntxaij rau saum cov hau ncej, ua xya lub rau ib lub hau ncej, ua dua xya lub rau ib lub hau ncej. Nws ua txiv ntsiav kws ob zaj puag ncig daim ntxais qhov muag thiaj vij tau ib lub hau ncej uas muab txawb rau saum cov ncej. Lub hau ncej uas ob nws kuj ua zoo ib yam nkaus. Tiamsis tej hau ncej uas nyob saum cov ncej hauv zaj qab khav, ua paj zoo li paj qos dej rau, yog siab plaub tshim. Tej hau ncej muab txawb saum ob tug ncej rau saum lub ntxheb uas nyob ntawm daim ntxais qhov muag, thiab muaj ob puas lub txiv ntsiav kws nyob ua ob zaj puag ncig cov hau ncej. Tus ncej uas ob kuj ib yam nkaus. Nws txhos ob tug ncej rau ntawm qab khav lub tuam tsev, ib tug rau sab nrad hu ua Yakhi, ib tug rau sab ped hu ua Npau‑a. Saum tej hau ncej mas muaj paj zoo li paj qos dej. Ob tug ncej thiaj ua tau tiav li no. Nws nchuav lub rhawv dej kheej kheej, ntsuas lub nrog saum ncauj dav kaum tshim siab tsib tshim thiab ntsuas puag ncig muaj peb caug tshim. Ntawm lub ncauj rhawv dej hauv qab muaj ib co taub iab puag ncig tag nrho peb caug tshim. Cov taub iab ntawd nyob ua ob zaj nchuav xeeb keeb nkaus rau lub rhawv dej. Lub rhawv dej txawb rau saum kaum ob tug nyuj, peb tug tig xubntiag rau sab ped, peb tug tig xubntiag rau sab hnub poob, peb tug tig xubntiag rau sab nrad thiab peb tug tig xubntiag rau sab hnub tuaj. Lawv muab lub rhawv dej txawb saum cov nyuj. Cov nyuj tig pobtw huvsi rau hauv nruab nrab. Lub rhawv dej ntawd tuab ib dos, ua lub npoo rhawv dej zoo li lub npoo tais, thiab ua zoo li lub paj qos dej, ntim dej tau ob txhiab npa dej. Nws muab tooj liab ua kaum lub nyuag tsheb thawb dej, ib lub ntev plaub tshim dav plaub tshim siab peb tshim. Nws ua lub tsheb li no, nws muab tooj liab ua txiag xov lub tsheb thiab ua ib pluaj puag ncig daim txiag ntawd lub ntug. Ib daim txiag uas muaj ntug ntawd mas nws sais duab tsov ntxhuav thiab nyuj thiab duab Khelunpee rau hauv. Thiab xuas rauj txaug sais sab npoo saum cov duab tsov ntxhuav thiab nyuj ntawd thiab sais sab npoo hauv ua txaij nraug zees. Ib lub tsheb muaj plaub lub log tsheb tooj liab thiab ib tug las tooj liab. Plaub lub kaum tsheb mas muaj plaub tug ncej tiag lub phaj dej. Cov ncej ntawd puavleej muab nchuav ua txaij nraug zees ntswj pes lees. Lub tais uas tiag lub phaj dej nyob siab saum lub tsheb ib tshim. Lub tais ntawd kheej kheej yam li ua lub qab txawb tais thiab tob ib tshim txhais. Lub ncauj tais ntawd ua tau txaij nraug zees. Daim txiag xov mas dav plaub fab xwm yeem tsis kheej. Plaub lub log tsheb nyob hauv daim qab txiag. Ob tug las tooj liab xeeb keeb nkaus rau log tsheb. Txhua lub log tsheb siab ib tshim ib dos. Cov log tsheb ntawd ua zoo nkaus li log tsheb ua rog, tej las thiab tej ntug kauj thiab tej tab thiab tej plov puavleej yog nchuav los. Ib lub tsheb muaj plaub tug ncej tiag lub phaj dej rau ntawm plaub lub kaum tsheb, tus ncej uas tiag ntawd xeeb keeb nkaus rau lub tsheb. Saum lub npoo tsheb muaj ib tug caj ntswm siab ib dos. Tus caj ntswm saum lub npoo tsheb thiab cov ncej tiag lub phaj dej thiab cov daim txiag mas lo xeeb keeb nkaus ua ke. Nws sais duab Khelunpee thiab tsov ntxhuav thiab tej tsob toov laj rau tej ncej tiag thiab rau tej daim txiag rau tej chaw seem thiab txhua yam sais ntswj ua txaij nraug zees. Nws ua kaum lub tsheb zoo ib yam li no. Nws nchuav txhua lub ib yam nkaus thiab loj sib luag zog thiab zoo ib yam nkaus. Nws muab tooj liab ua kaum lub phaj dej, ib lub phaj ntim tau plaub caug npa, ib lub phaj dav plaub tshim, ib lub tsheb muaj ib lub phaj dej. Nws muab cov tsheb txawb rau hauv lub tuam tsev, tsib lub rau sab nrad tsib lub rau sab ped. Nws muab lub niag rhawv dej loj txawb rau ntawm lub tuam tsev sab hnub tuaj uas npuas rau sab nrad. Hilas kuj ua tej laujkaub tej duav phuaj thiab tej phaj. Hilas thiaj ua tau txhua yam tiav uas nws ua rau hauv Yawmsaub lub tuam tsev rau vajntxwv Xalaumoo, yog tej no, ob tug ncej thiab ob lub tais uas txawb saum hau ncej saum cov ncej, thiab ob daim ntxais qhov muag uas kauv ob lub tais uas txawb saum hau ncej saum ob tug ncej, thiab plaub puas lub txiv ntsiav kws lo rau ob daim ntxais qhov muag ntawd. Ib daim ntxais qhov muag mas dai ob zaj txiv ntsiav kws xwv thiaj li nyob puag ncig ob lub tais hau ncej saum ob tug ncej, thiab kaum lub tsheb thawb dej thiab kaum lub phaj dej uas nyob saum cov tsheb, thiab ib lub niag rhawv dej thiab kaum ob tug nyuj uas txawb lub rhawv dej, thiab tej laujkaub thiab tej duav phuaj thiab tej phaj. Tej no huvsi uas Hilas tau ua rau vajntxwv Xalaumoo siv rau hauv Yawmsaub lub tuam tsev mas puavleej yog xuas tooj liab uas txhuam ci nplas lawm ua. Vajntxwv nchuav cov no ntawm lub hav Yaladee ntawm qhov av nplaum uas nyob lub moos Xukhau thiab lub moos Xalethas ntu nruab nrab. Xalaumoo twb tsis luj tej no rau qhov muaj ntau dhau hwv lawm, thiaj tsis paub tias tooj liab hnyav npaum li cas. Xalaumoo ua tau txhua yam twj uas siv rau hauv Yawmsaub lub tuam tsev, yog tej no, lub thaj kub thiab lub rooj kub uas txawb ncuav rau ntawm Yawmsaub xubntiag, thiab cov ncej txawb teeb uas xuas tseem kub ua muaj tsib tug nyob sab nrad tsib tug nyob sab ped nyob npuas chav uas dawb huv kawg nkaus, thiab cov paj ntoo thiab cov teeb thiab ciaj uas xuas kub ua, thiab cov tais thiab cov tais khwb teeb xeeb thiab cov phaj thiab cov tais uas rau cov hmoov tshuaj tsw qab thiab tej duav hlau yawm ncaig taws uas muab tseem kub ua, thiab cov ntsej kub uas tuav txhib qhov rooj kaw chav hauv uas yog chav dawb huv kawg nkaus thiab tuav txhib qhov rooj chav dawb huv ntawm lub tuam tsev. Txhua yam haujlwm uas vajntxwv Xalaumoo ua Yawmsaub lub tuam tsev thiaj tiav tag li no. Thiab Xalaumoo coj tej nyiaj tej kub thiab tej twj siv uas nws txiv Davi twb muab xyeem pub rau Vajtswv lawd los muab khaws cia rau hauv tej txhab hauv Yawmsaub lub tuam tsev. Mas Xalaumoo hu Yixayee cov kev txwj laus, yog txhua tus uas ua hlob hauv txhua xeem thiab txhua cum tus thawj tuaj txoos ua ke rau hauv Yeluxalees ntawm vajntxwv Xalaumoo lub xubntiag es yuav mus coj Yawmsaub lub phij xab sib cog lus tawm hauv Davi lub nroog uas yog lub roob Xi‑oo los. Mas tag nrho Yixayee cov txivneej tuaj txoos ua ke ntawm vajntxwv Xalaumoo lub xubntiag rau lub sijhawm uas ua kevcai pam noj haus rau lub hli Ethani uas yog lub xya hli. Cov Yixayee tej kev txwj laus sawvdaws tuaj txhij mas cov pov thawj txawm nqa lub phij xab. Lawv coj Yawmsaub lub phij xab thiab lub tsev ntaub sib ntsib thiab tej twj siv dawb huv huvsi uas nyob hauv lub tsev ntaub mus. Tej no cov pov thawj thiab cov Levi yog cov uas coj los. Vajntxwv Xalaumoo thiab ib tsoom Yixayee sawvdaws uas tuaj txoos ua ke rau ntawm nws xubntiag kuj nrog nws nyob ntawm lub phij xab thiab muab yaj muab nyuj coob kawg los tua xyeem suav tsis txheeb li. Cov pov thawj thiaj coj Yawmsaub lub phij xab sib cog lus mus rau ntawm lub chaw uas npaj cia hauv lub tuam tsev chav sab hauv uas yog chav dawb huv kawg nkaus, mas muab tso rau hauv ob tug Khelunpee qab phab kooj tis. Ob tug Khelunpee ntawd nthuav kooj tis rau saum lub chaw uas txawb lub phij xab mas thiaj roos lub phij xab thiab ob tug las kwv. Ob tug las ntawd ntev heev, mas yog nyob hauv chav dawb huv mas pom ob tug tw las tshwm hauv chav sab hauv tuaj, tiamsis yog nyob sab nraud mas tsis pom. Mas ob tug las ntawd tseem nyob qhov ntawd txog niaj hnub nimno. Tsis muaj dabtsi nyob hauv lub phij xab li tsuas yog muaj ob daim txiag zeb uas Mauxe muab tso rau hauv ntawm lub roob Haule uas yog lub chaw uas Yawmsaub nrog cov Yixayee sib cog lus tseg rau thaum lawv tawm hauv Iyi tebchaws los. Thaum cov pov thawj tawm hauv chav dawb huv los, ib tauv huab txawm los puv nkaus Yawmsaub lub tuam tsev. Mas cov pov thawj thiaj sawv ntsug ua haujlwm tsis tau vim tauv huab ntawd, rau qhov Yawmsaub lub hwjchim ci ntsa iab puv nkaus Yawmsaub lub tuam tsev. Ces Xalaumoo txawm hais tias, “Yawmsaub tau hais tias nws yuav nyob hauv qhov tsaus ntuj nti. Kuv tau ua lub tuam tsev zoo heev rau koj, yog lub chaw rau koj nyob mus ib txhis li.” Mas vajntxwv tig los foom koob hmoov rau ib tsoom Yixayee sawvdaws rau thaum lawv sawvdaws tseem sawv ntsug. Nws hais tias, “Cia li qhuas Yawmsaub uas yog cov Yixayee tus Vajtswv uas txhais tes ua tau tiav raws li tej lus uas cog tseg rau kuv txiv Davi lawd, hais tias, ‘Txij hnub uas kuv coj kuv haiv neeg Yixayee tawm hauv Iyi tebchaws los kuv tsis tau xaiv ib lub moos twg hauv cov xeem Yixayee sawvdaws cia ua lub tuam tsev rau kuv lub npe nyob, tiamsis kuv tau xaiv Davi ua tus kav kuv haiv neeg Yixayee.’ Kuv txiv Davi tau npaj siab cia tias yuav ua lub tuam tsev rau Yawmsaub uas yog Yixayee tus Vajtswv lub npe nyob. Tiamsis Yawmsaub hais rau kuv txiv Davi tias, ‘Qhov uas koj npaj siab yuav ua lub tuam tsev rau kuv lub npe nyob ntawd koj twb ua zoo lawm. Tiamsis koj tsis yog tus uas yuav ua lub tuam tsev. Koj tus tub uas yuav yug los yog tus uas yuav ua lub tuam tsev rau kuv lub npe nyob.’ Nimno Yawmsaub twb ua rau tej lus uas nws cog tseg ntawd tiav lawm. Rau qhov kuv tau sawv los nyob kuv txiv Davi chaw thiab nyob saum cov Yixayee lub zwm txwv raws li Yawmsaub tau cog lus tseg thiab kuv tau ua lub tuam tsev rau Yawmsaub uas yog cov Yixayee tus Vajtswv lub npe nyob. Thiab qhov ntawd kuv tau npaj chaw txawb lub phij xab uas ntim Yawmsaub tej lus cog tseg uas nws cog rau peb tej poj koob yawm txwv rau thaum nws coj lawv tawm hauv Iyi tebchaws los.” Mas Xalaumoo sawv ntsug ntawm Yawmsaub lub thaj xyeem sab xubntiag tab meeg ib tsoom Yixayee sawvdaws, thiab nws tsa kiag nws ob txhais tes rau saum ntuj, mas hais tias, “Au Yawmsaub uas yog Yixayee tus Vajtswv, yeej tsis muaj ib tug timtswv twg zoo cuag li koj tsis hais saum qaum ntuj thiab hauv ntiajteb. Koj ua raws li koj cog lus tseg thiab koj ua txojkev hlub uas ruaj khov tshwm rau koj cov qhev uas ua lawv lub neej raws li koj txojkev kawg siab kawg ntsws. Koj tau ua rau kuv txiv Davi uas yog koj tus qhev raws li tej lus uas koj twb cog tseg rau nws lawd. Koj lub qhov ncauj tau hais thiab koj txhais tes ua tiav rau hnub no. Au Yawmsaub uas yog Yixayee tus Vajtswv, yog li ntawd nimno thov koj ua raws li tej lus uas koj tau cog tseg rau kuv txiv Davi uas yog koj tus qhev hais tias, ‘Yog koj tej tub ki ceev faj rau txhua txojkev uas lawv ua thiab ua lawv lub neej raws li kuv txojkev ib yam li koj, mas tsis muaj ib hnub twg uas koj caj ces yuav tu ncua tus txivneej uas nyob saum cov Yixayee lub zwm txwv tab meeg kuv.’ Au Yixayee tus Vajtswv, tej lus uas koj tau hais tseg rau kuv txiv Davi uas yog koj tus qhev mas thov koj ua kom tiav. “Mas Vajtswv yuav nyob hauv lub ntiajteb lov? Saib maj, txawm yog saum nruab ntug thiab nruab ntug uas siab kawg nkaus los twb tsis txaus rau koj nyob. Mas lub tuam tsev uas kuv ua no yimhuab tsis txaus rau koj nyob. Thov koj saib rau koj tus qhev tej lus taij lus thov no. Au Yawmsaub uas yog kuv tus Vajtswv, thov koj mloog kuv lub suab thiab tej lus taij thov uas hnub no koj tus qhev thov ntawm koj xubntiag no, xwv koj lub qhov muag thiaj ntsia ntsoov lub tuam tsev no nruab hnub hmo ntuj, yog lub chaw uas koj hais tias, ‘Kuv lub npe yuav nyob qhov ntawd,’ koj thiaj li mloog tej lus thov uas koj tus qhev tig xubntiag rau lub chaw no thov. Thiab thov koj mloog koj tus qhev thiab koj haiv neeg Yixayee tej lus taij thov rau thaum lawv tig xubntiag rau lub chaw no thov. Koj nyob saum ntuj ceeb tsheej uas yog koj lub chaw nyob mas thov koj mloog. Thaum koj hnov lawd thov koj zam txim. “Yog leejtwg tau ua txhaum rau nws kwvtij zej zog es yuav tsum twv tsawm, thiab nws tuaj twv tsawm ntawm koj lub thaj xyeem hauv lub tuam tsev no, ces thov koj nyob saum ntuj mloog thiab thov koj tu. Thov koj txiav txim rau koj cov qhev ob tog, rau txim rau tus uas ua txhaum thiab coj tej uas nws ua ntawd rov poob rau saum nws taubhau. Thiab tus uas tsis txhaum mas thov koj tsa kom nws muaj cai pauj qhov uas nws ua ncaj ncees. “Thaum koj haiv neeg Yixayee swb lawv cov yeeb ncuab rau qhov lawv tau ua txhaum rau koj, mas yog lawv tig rov los cuag koj thiab lees yuav koj lub npe thiab taij thov koj hauv lub tuam tsev no, ces thov koj nyob saum ntuj mloog thiab zam koj haiv neeg Yixayee lub txim thiab coj lawv rov los rau hauv lub tebchaws uas koj tau pub rau lawv tej poj koob yawm txwv no. “Thaum rooj ntug kaw thiab tsis muaj nag los vim yog lawv tau ua txhaum rau koj, mas yog lawv tig xubntiag rau lub chaw no thov thiab lees yuav koj lub npe thiab tig ntawm lawv tej kev txhaum rau thaum koj tsim txom lawv, ces thov koj nyob saum ntuj mloog thiab thov koj zam koj cov qhev uas yog koj haiv neeg Yixayee lub txim. Thov koj qhia txojkev zoo uas tsim nyog lawv taug rau lawv, thiab thov koj pub nag los rau hauv koj lub tebchaws uas koj tau pub ua qub txeeg qub teg rau koj haiv neeg. “Yog lub tebchaws raug kev tshaib nqhis, yog muaj mob kis lossis qoob loo nce hmob lossis tuaj pwm lossis muaj kooj muaj kab ntsig, lossis lawv cov yeeb ncuab tuaj vij lawv hauv lub moos twg, mas txawm yog muaj kev mob phem yam twg los kev mob kev nkeeg yam twg tshwm tuaj, thiab txawm yog ib tug twg lossis koj haiv neeg Yixayee huvsi taij li cas thiab thov li cas vim qhov uas nyias paub nyias kev txom nyem thiab nyias tej kev nyuaj siab es tsa tes ncaj rau lub tuam tsev no, ces thov koj nyob saum ntuj uas yog koj lub chaw nyob mloog thiab zam txim thiab tu rau lawv thiab ua rau txhua tus uas koj twb paub hauv lawv lub siab, raws li lawv tau ua huvsi, rau qhov koj, tsuas yog koj tib leeg xwb thiaj paub hauv neeg lub siab huvsi, kom lawv thiaj hwm thiab paub ntshai koj txhua hnub txhua lub sijhawm uas lawv nyob hauv lub tebchaws uas koj tau pub rau peb tej poj koob yawm txwv. “Ib yam nkaus li ntawd, thaum lwm haiv neeg ib tug twg uas tsis yog koj haiv neeg Yixayee tuaj lwm lub tebchaws deb tuaj vim yog hnov txog koj lub npe, vim yog lawv hnov txog koj lub npe uas loj kawg thiab koj txhais tes uas muaj hwjchim thiab koj txhais npab uas tsa hlo, mas thaum lawv tuaj tig xubntiag rau lub tuam tsev no thov, ces thov koj nyob saum ntuj uas yog koj lub chaw nyob mloog thiab thov koj ua raws li txhua yam uas lwm haiv neeg tau thov rau koj, xwv txhua haiv neeg hauv ntiajteb thiaj paub koj lub npe thiab ntshai thiab hwm koj yam nkaus li koj haiv neeg Yixayee, thiab lawv thiaj paub tias lub tuam tsev uas kuv ua no lawv hu raws li koj lub npe. “Yog koj haiv neeg tawm mus ua rog rau lawv cov yeeb ncuab rau txojkev twg uas koj txib lawv mus, es lawv tig xubntiag thov ncaj rau lub nroog no uas koj tau xaiv cia thiab tig xubntiag thov ncaj rau lub tuam tsev uas kuv tau ua rau koj lub npe nyob, mas thov koj nyob saum ntuj mloog lawv tej lus taij lus thov thiab tuav lawv txojcai. “Yog lawv ua txhaum rau koj, vim tsis muaj ib tug twg uas tsis ua txhaum, es koj npau taws rau lawv, thiab muab lawv cob rau yeeb ncuab lawv thiaj raug ntes coj mus rau yeeb ncuab lub tebchaws tsis hais deb los ze, yog lawv lub siab xam pom lawv tej kev txhaum rau hauv lub tebchaws uas lawv raug ntes coj mus ntawd thiab ntxeev dua siab thiab taij thov koj hauv lub tebchaws uas lawv nyob ntawd hais tias, ‘Peb tau ua txhaum thiab ua tsis ncaj thiab ua phem kawg li,’ yog lawv ntxeev dua siab kawg siab kawg ntsws kawg tswvyim plab plaws hauv lub tebchaws uas lawv raug yeeb ncuab ntes coj mus nyob ntawd, thiab yog lawv tig xubntiag rau lawv lub tebchaws uas koj pub rau lawv tej poj koob yawm txwv thov koj thiab tig xubntiag rau lub nroog uas koj tau xaiv cia thiab lub tuam tsev uas kuv ua rau koj lub npe nyob no, mas thov koj nyob saum ntuj uas yog koj lub chaw nyob mloog lawv tej lus taij lus thov thiab tuav lawv txojcai. Thiab zam koj haiv neeg lub txim uas lawv tau ua txhaum rau koj, thiab zam lawv tej kev fav xeeb uas lawv tau tawm tsam koj, thiab pub cov uas ntes lawv coj mus ntawd khuvleej lawv, lawv thiaj tau txais kev khuvleej. Lawv yog koj haiv neeg thiab yog koj li qub txeeg qub teg uas koj coj tawm hauv Iyi tebchaws los, yog tawm hauv cub thee hlawv hlau los. “Thov tsa koj lub qhov muag saib rau koj tus tub qhe tej lus taij thov thiab saib rau koj haiv neeg Yixayee tej lus taij thov, es tig ntsej mloog rau thaum lawv hu thov koj. Au Vajtswv Yawmsaub, koj cais lawv tawm hauv ib tsoom neeg hauv ntiajteb los ua koj li qub txeeg qub teg raws li koj hais rau koj tus qhev Mauxe rau thaum koj coj peb tej poj koob yawm txwv tawm hauv Iyi tebchaws los.” Thaum Xalaumoo thov thiab hais tej lus taij no huvsi rau Yawmsaub tag lawd, nws txawm sawv tsees ntawm Yawmsaub lub thaj xyeem uas nws tau txhos caug thiab tsa tes thov rau saum ntuj. Nws sawv ntsug thiab foom koob hmoov rau ib tsoom Yixayee sawvdaws nrov nrov hais tias, “Qhuas Yawmsaub uas pub nws haiv neeg Yixayee tau so raws li nws cog lus cia txhua yam. Nws tej lus cog tseg zoo txhua lo uas nws kom nws tus qhev Mauxe hais ntawd tsis poob ib los li. Thov peb tus Vajtswv Yawmsaub nrog nraim peb ib yam li nws nrog nraim peb tej poj koob yawm txwv. Thov nws tsis txhob ncaim peb thiab tso peb tseg kiag li. Thov nws ua kom peb lub siab tig los cuag nws, peb thiaj ua peb lub neej raws li nws txojkev thiab tuav rawv nws tej lus nkaw thiab nws tej kab ke thiab nws tej kevcai uas nws hais cia rau peb tej poj koob yawm txwv. Thov cia kuv tej lus uas kuv taij thov ntawm Yawmsaub lub xubntiag no nyob ze peb tus Vajtswv Yawmsaub nruab hnub hmo ntuj. Thiab thov nws tuav kuv uas yog nws tus qhev txojcai thiab nws haiv neeg Yixayee txojcai kom ruaj khov, raws li niaj hnub cheem tsum, xwv ib tsoom neeg hauv ntiajteb thiaj paub tias Yawmsaub yog Vajtswv, tsis muaj dua lwm tus li lawm. Yog li no nej lub siab cia li xib kiag rau Yawmsaub uas yog peb tus Vajtswv, es ua nej lub neej raws li nws tej kab ke thiab tuav rawv nws tej lus nkaw ib yam li niaj hnub nimno nej ua.” Mas vajntxwv thiab cov Yixayee sawvdaws uas nrog nws ua ke tua tsiaj xyeem rau ntawm Yawmsaub lub xubntiag. Xalaumoo muab nyuj 22,000 tus thiab yaj 120,000 tus tua xyeem ua kevcai sib raug zoo rau Yawmsaub. Vajntxwv thiab cov pejxeem thiaj muab lub tuam tsev xyeem pub rau Yawmsaub li no. Tib hnub ntawd vajntxwv ua kevcai tu lub plawv tshav puam uas ncaj ntawm lub qhov rooj tuam tsev kom dawb huv. Mas nws muab tsiaj ua kevcai hlawv huvsi xyeem thiab muab tej uas ua kevcai xyeem qoob loo thiab muab cov hlab hluas roj ua kevcai xyeem sib raug zoo rau qhov ntawd, vim lub thaj tooj liab uas nyob ntawm Yawmsaub lub xubntiag tsis txaus tso tej uas ua kevcai hlawv huvsi xyeem thiab tej uas ua kevcai xyeem qoob loo thiab tej hlab hluas roj uas ua kevcai xyeem sib raug zoo. Zaum ntawd Xalaumoo thiab ib tsoom Yixayee sawvdaws ua kevcai pam noj haus xya hnub. Muaj neeg coob heev tuaj txoos ua ke txij ntua ntawm txojkev uas mus rau lub moos Hama mus txog ntua tus dej Iyi. Hnub uas yim nws tso cov pejxeem rov mus. Lawv foom koob hmoov rau vajntxwv thiab rov qab mus tsev. Lawv zoo siab thiab xyiv fab vim yog tej kev zoo uas Yawmsaub ua tshwm los rau nws tus qhev Davi thiab rau Yawmsaub haiv neeg Yixayee. Thaum Xalaumoo ua tau Yawmsaub lub tuam tsev thiab nws lub tsev thiab txhua yam uas nws xav ua tiav tag huvsi lawd, Yawmsaub los tshwm rau Xalaumoo zaum ob ib yam li Yawmsaub tau tshwm rau nws ntawm Kinpe‑oo. Mas Yawmsaub hais rau nws tias, “Kuv twb hnov tej lus uas koj thov koj taij kuv lawm. Kuv twb tu lub tsev uas koj ua no kom dawb huv lawm, thiab kuv yuav cia kuv lub npe nyob hauv mus ib txhiab ib txhis. Kuv lub qhov muag thiab kuv lub siab yuav nrog nraim lub chaw no mus ib txhis. Hais txog koj, yog koj ua koj lub neej ncaj thiab ua ncaj ncees tab meeg kuv ib yam nkaus li koj txiv Davi ua thiab ua txhua yam raws li uas kuv hais kom koj ua, thiab tuav rawv kuv tej kab ke thiab kuv tej kevcai, mas kuv yuav tsa koj lub zwm txwv rau saum cov Yixayee nyob ruaj mus ib txhiab ib txhis, ib yam li kuv tau cog lus tseg rau koj txiv Davi lawm hais tias, ‘Tsis muaj ib hnub twg uas koj caj ces yuav tu ncua tus txivneej uas nyob saum cov Yixayee lub zwm txwv.’ “Tiamsis yog nej tsis ua raws li kuv hais, tsis hais nej lossis nej cov tub ki tsis tuav rawv kuv tej lus nkaw thiab tej kab ke uas kuv twb qhia rau nej, es nej mus ua koom tu thiab pe luag tej dab, mas kuv yuav muab cov Yixayee rhuav tshem kom tawm hauv lub tebchaws uas kuv muab pub rau lawv mus, thiab kuv yuav muab lub tuam tsev uas kuv tu kom dawb huv rau kuv lub npe nyob lawd laim pov tseg kom ploj ntawm kuv lub qhov muag. Mas txhua haiv neeg yuav muab cov Yixayee ua paj lug hais thiab yuav tiag luag ncauj luag lo. Lub tuam tsev no yuav pob ua tej niag pawg cia. Txhua leej txhua tus uas taug kev yuav xav tsis thoob thiab lawv yuav thuam hais tias, ‘Ua cas Yawmsaub ua li ntawd rau lub tebchaws no thiab lub tuam tsev no?’ Ces luag yuav teb tias, ‘Vim yog lawv muab lawv tus Vajtswv Yawmsaub uas coj lawv tej poj koob yawm txwv tawm hauv Iyi tebchaws los tso pov tseg es mus tsawv nkaus luag tej dab los pe thiab ua koom tu. Vim li no Yawmsaub thiaj tso tej xwm txheej phem no huvsi los raug lawv.’ ” Ncua sijhawm nees nkaum xyoo Xalaumoo ua tau ob lub tsev, yog Yawmsaub lub tuam tsev thiab vajntxwv lub tsev. Hilas uas ua vajntxwv hauv lub nroog Thailab xa ntoo ciab thiab ntoo ciab nplooj suab thiab kub tuaj rau Xalaumoo npaum li uas Xalaumoo lub siab xav, mas vajntxwv Xalaumoo thiaj li muab nees nkaum lub moos hauv tebchaws Kalilais rau Hilas. Tiamsis thaum Hilas tawm hauv lub nroog Thailab mus xyuas tej moos uas Xalaumoo muab pub rau nws mas Hilas tsis txaus siab rau tej moos ntawd. Hilas thiaj hais tias, “Tus kwv 'e, tej moos uas koj muab pub rau kuv ntawd zoo li no xwb lov?” Luag thiaj hu cov moos ntawd tias tebchaws Khanpu los txog niaj hnub nimno. Hilas tau xa kub hnyav ib puas nees nkaum tala tuaj rau vajntxwv Xalaumoo. No mus yog hais txog tej tub zog uas vajntxwv Xalaumoo yuam kom ua Yawmsaub lub tuam tsev thiab ua vajntxwv lub tsev thiab ua lub loog Milau thiab ua lub ntsa loog Yeluxalees thiab muab lub moos Haxau thiab Mekidau thiab Kexaw ua dua tshiab. (Yav thaum ub Falau uas yog cov Iyi tus vajntxwv twb nce tuaj txeeb tau lub moos Kexaw thiab muab hlawv kub hnyiab tag thiab muab cov Khana‑as uas nyob hauv tua tuag tag ces nws txawm muab lub moos ntawd phij cuam rau nws tus ntxhais uas mus yuav Xalaumoo. Mas Xalaumoo thiaj muab Kexaw ua dua tshiab), thiab nws kho lub moos Npe Hauloo nruab tiag thiab ua lub moos Npa‑alab thiab lub moos Thama rau hauv tebchaws moj sab qhua hauv Yuda tebchaws, thiab ua txhua lub moos uas Xalaumoo khaws cuab txhiaj cuab tam cia rau hauv, thiab ua tej moos uas nws khaws tej tsheb nees ua rog rau hauv, thiab ua tej moos uas nws cov tub rog caij nees nyob, thiab ua txhua yam uas Xalaumoo xav kom ua rau hauv lub nroog Yeluxalees thiab hauv tebchaws Lenpanoo thiab thoob plaws tej tebchaws uas Xalaumoo kav. Cov Amaulai, cov Hithai, cov Pelixai, cov Hivai thiab cov Yenpu uas tseem tshuav nyob, uas tsis yog neeg Yixayee, mas cov neeg no li noob uas tshuav nyob hauv lub tebchaws uas cov Yixayee tsis muaj peevxwm muab ua puam tsuaj tag ces Xalaumoo yuam ua qhev los txog niaj hnub nimno. Tiamsis cov neeg Yixayee mas Xalaumoo tsis yuam ua qhev. Lawv ua vajntxwv cov tub rog thiab ua nws cov nom tswv thiab ua thawj kav tub rog huvsi thiab ua cov thawj rog thiab ua thawj kav cov tsheb nees ua rog thiab kav cov tub rog caij nees. Cov no yog cov nom tswv uas ua hlob saib xyuas Xalaumoo tej haujlwm, huvsi muaj tsib puas tsib caug leej ua cov uas saib cov neeg uas ua vajntxwv tej haujlwm no. Mas Falau tus ntxhais tawm hauv Davi lub nroog mus nyob ntawm lub tsev uas Xalaumoo ua rau nws. Mas Xalaumoo thiaj ua lub loog Milau. Ib xyoos Xalaumoo ua kevcai hlawv huvsi xyeem thiab ua kevcai xyeem sib raug zoo saum lub thaj uas nws ua rau Yawmsaub peb zaug, thiab hlawv hmoov tshuaj tsw qab rau ntawm Yawmsaub xubntiag. Nws ua Vajtswv lub tuam tsev tiav log li uas hais no. Vajntxwv Xalaumoo kuj ua ib co nkoj txwg rau ntawm Exi‑oo Kenpaw uas nyob ze Elau ntawm ntug dej Hiavtxwv Liab hauv tebchaws Edoo. Hilas xa ib pab neeg txawj tsav nkoj uas txeev mus hauv hiavtxwv tuaj nrog Xalaumoo cov tub nkoj ua ke. Lawv mus txog lub moos Aufi mus thauj tau kub hnyav plaub puas nees nkaum tala qhov ntawd los rau vajntxwv Xalaumoo. Thaum tus poj vaj uas kav Senpa tebchaws tau hnov txog Xalaumoo lub meej nthawb uas ntsig txog Yawmsaub lub npe, nws txawm tuaj thom Xalaumoo txog ntau yam uas ceeblaj teb tau. Nws coj ib pab tub teg tub taws coob coob nrog nws tuaj rau hauv Yeluxalees, thiab muaj ntxhuav thauj tej txuj lom thiab kub ntau kawg thiab tej qe zeb hlaws muaj nqes. Thaum nws tuaj cuag Xalaumoo lawd, nws thiaj piav txhua yam uas nyob hauv nws lub siab huvsi rau Xalaumoo. Mas Xalaumoo teb txhua yam uas nws nug tau huvsi tsis muaj ib yam uas vajntxwv yuav tsis paub thiab piav tsis tau rau nws li. Thaum tus poj vaj hauv Senpa pom Xalaumoo lub tswvyim huvsi thiab pom lub tsev uas nws tau ua, thiab pom tej zaub mov saum nws lub rooj thiab cov nom tswv uas nrog nws nyob thiab nws cov tub teg tub taws uas tu nws thiab tej cev ris tsho uas lawv hnav, thiab cov uas thiab cawv txiv hmab, thiab pom tej uas nws muab ua kevcai hlawv xyeem ntawm Yawmsaub lub tuam tsev, mas tus poj vaj ntawd tsis pom qab xav li lawm. Mas nws thiaj hais rau vajntxwv tias, “Tej xov uas kuv nyob hauv kuv lub tebchaws hnov hais txog koj tej haujlwm thiab koj lub tswvyim yeej los muaj tseeb tiag. Tiamsis kuv tsis ntseeg tej lus ntawd mus txog thaum kuv tau tuaj cuag thiab kuv lub qhov muag tau pom lawm. Saib maj, tej uas lawv hais rau kuv ntawd twb muaj tsis txog ib nrab. Koj lub tswvyim thiab koj tej kev vam meej ntawd yeej ntau dua tej uas kuv tau hnov lawd. Koj cov neeg tau hmoov zoo lauj! Koj cov tub teg tub taws uas ua haujlwm ntawm koj xubntiag ib txwm thiab hnov koj tej tswvyim plab plaws mas tau hmoov zoo lauj! Qhuas Yawmsaub uas yog koj tus Vajtswv uas txaus siab rau koj thiab tau tsa koj nyob saum cov Yixayee lub zwm txwv. Vim Yawmsaub hlub cov Yixayee mus ib txhis nws thiaj tsa koj ua vajntxwv kav lawv kom koj thiaj txiav txim ncaj thiab ua ncaj ncees.” Mas nws txawm muab kub hnyav ib puas nees nkaum tala thiab tej txuj lom ntau kawg thiab tej qe zeb hlaws muaj nqes rau vajntxwv. Tsis muaj dua txuj lom ntau li tej txuj lom uas tus poj vaj hauv Senpa muab rau vajntxwv Xalaumoo no. Dua li ntawd Hilas tej nkoj uas thauj kub hauv Aufi tuaj kuj thauj ntoo liab txiv khau tawv thiab tej qe zeb hlaws muaj nqes ntau kawg ntawm Aufi tuaj. Mas vajntxwv thiaj muab cov ntoo liab txiv khau tawv ua ncej rau Yawmsaub lub tuam tsev thiab rau vajntxwv lub tsev, thiab ua cov nkauj nog ncas me thiab cov nkauj nog ncas loj rau cov hu nkauj. Yeej tsis muaj tej ntoo liab txiv khau tawv ntau li no xa tuaj dua li lawm thiab tsis tau pom dua li los txog niaj hnub nimno. Vajntxwv Xalaumoo pub txhua yam rau tus poj vaj hauv Senpa raws li uas nws xav yuav thiab pub txhua yam uas nws thov thiab nws tseem pub tej uas nws muaj nplua mias ntxiv rau. Mas tus poj vaj thiab nws cov tub teg tub taws txawm rov qab mus rau nws lub tebchaws lawm. Ib xyoos twg mas Xalaumoo tau kub hnyav rau pua rau caum rau tala, tsis xam tej kub uas sau ntawm cov tub lag tub luam thiab tsis xam tej uas sau ntawm tej vajntxwv hauv Alanpia tebchaws sawvdaws thiab ntawm tej tim xyoob uas kav hauv lub tebchaws. Vajntxwv Xalaumoo muab kub ntaus ua ob puas daim phiaj loj thaiv, ib daim phiaj mas siv kub hnyav rau pua sekhee ua. Nws muab kub ntaus ua dua peb puas daim phiaj thaiv, ib daim phiaj siv kub hnyav peb mina. Vajntxwv muab cov phiaj kub ntawd khaws cia rau hauv lub tsev Hav Zoov Lenpanoo. Vajntxwv muab kaus ntxhw ua ib lub zwm txwv loj kawg li thiab muab cov tseem kub uas zoo kawg los luam. Lub zwm txwv ntawd muaj rau qeb ntai, lub zwm txwv sab nrob qaum kheej koov loo. Ob sab ntawm lub zwm txwv muaj ob lub chaw tso tes mas muaj ob tug tsov ntxhuav sawv ze ntawm ob lub chaw tso tes ntawd, thiab muaj kaum ob tug tsov ntxhuav txawb rau rau qeb ntai ntawd ob sab huvsi ib qeb ntai ib tug. Lub zwm txwv zoo li no mas tsis tau txeev ua dua rau lwm lub tebchaws li. Tej khob uas vajntxwv Xalaumoo siv haus dej mas puavleej xuas kub ua xwb, thiab tej twj siv hauv lub tsev Hav Zoov Lenpanoo huvsi puavleej yog xuas tseem kub ua xwb, tsis muaj ib yam uas xuas nyiaj ua li. Ncua sijhawm uas Xalaumoo nyob ntawd mas saib nyiaj yam li tsis muaj nqes li. Rau qhov vajntxwv muaj ib co nkoj txwg hauv lub moos Thasi nrog Hilas cov nkoj hla hiavtxwv ua ke. Peb xyoos mas Thasi cov nkoj yuav thauj kub thauj nyiaj thauj kaus ntxhw thauj liab thauj noog yaj yuam tuaj ib zaug. Yog li no mas vajntxwv Xalaumoo thiaj li muaj nyiaj txiag thiab muaj lajlim tswvyim plab plaws ntau dua txhua tus vajntxwv uas nyob hauv ntiajteb no. Tej neeg thoob ntiajteb xav tuaj cuag Xalaumoo xav hnov tej tswvyim plab plaws uas Vajtswv pub rau nws. Txhua tus kuj coj tshav ntuj tuaj pub yog tej uas xuas nyiaj xuas kub ua, tej tsoos tsho, tej cuab yeej ua rog, tej txuj lom, nees thiab luj txwv tuaj, niaj xyoo muaj li no. Xalaumoo sau tau tej tsheb nees ua rog thiab cov tub rog caij nees. Nws muaj tsheb nees ua rog ib txhiab plaub puas lub thiab muaj cov tub rog uas caij nees ib vam ob txhiab leej, uas nws kom ib txhia nyob rau hauv tej moos uas nws npaj rau tej tsheb nees ua rog thiab ib txhia nrog vajntxwv nyob hauv lub nroog Yeluxalees. Vajntxwv ua rau nyiaj muaj ntau rau hauv lub nroog Yeluxalees yam li tej pob zeb, thiab ua rau ntoo ciab muaj ntau yam nkaus li tej ntoo txiv cev hauv tej pov roob Sefela. Xalaumoo yuav nees hauv Iyi tebchaws thiab hauv Khu‑e tebchaws los. Vajntxwv cov tub luam mus yuav hauv Khu‑e tebchaws raws li tus nqe. Ib lub tsheb nees ua rog hauv Iyi tebchaws mas yuav rau pua sekhee nyiaj, ib tug nees hauv Iyi mas yuav ib puas tsib caug sekhee. Mas vajntxwv cov tub luam yuav xa tej no mus muag rau cov Hithai tej vajntxwv sawvdaws thiab cov Alas tej vajntxwv. Vajntxwv Xalaumoo nyiam lwm haiv neeg tej ntxhais ntau leej. Dhau Falau tus ntxhais lawm tseem muaj cov Mau‑a, cov Asmoo, cov Edoo, cov Xaidoo thiab cov Hithai tej ntxhais, yog tej haiv neeg uas Yawmsaub tau hais rau cov Yixayee tias, “Nej tsis txhob mus yuav lawv tej ntxhais thiab tsis txhob cia lawv yuav nej tej ntxhais, rau qhov lawv yuav haub ntxias nej lub siab mus ua koom tu lawv tej dab.” Xalaumoo nyiam lawv thiaj tsis tso lawv tseg. Nws yuav xya pua tus niam yau uas yog cov thawj li ntxhais thiab coj peb puas tus hluas nkauj los kav. Nws cov pojniam ntawd thiaj haub tau nws lub siab lawm. Thaum Xalaumoo laus lawd nws cov pojniam ntawd haub nws mus ua koom tu luag tej dab, thiab nws lub siab tsis xib rau Yawmsaub uas yog nws tus Vajtswv tsis thooj li nws txiv Davi lub siab lawm. Rau qhov Xalaumoo ua koom tu tus poj dab Athaule uas yog cov Xaidoo tus dab, thiab ua koom tu Mikhoo uas yog cov Asmoo tus dab qias vuab tsuab. Xalaumoo thiaj ua tej uas Yawmsaub pom tias phem kawg li tsis ua koom tu Yawmsaub kawg siab kawg ntsws yam li nws txiv Davi lawm. Xalaumoo ua tej chaw siab teev dab Khemauj uas yog cov Mau‑a tus dab qias vuab tsuab, thiab teev dab Maulej uas yog cov Asmoo tus dab qias vuab tsuab, rau saum lub roob uas nyob ntawm Yeluxalees sab hnub tuaj. Nws ua tej chaw teev dab rau nws cov pojniam uas yog lwm haiv neeg txhua tus, mas lawv hlawv xyab thiab tua tsiaj xyeem rau lawv tej dab. Ces Yawmsaub chim rau Xalaumoo vim nws lub siab fav hlo ntawm Yawmsaub uas yog cov Yixayee tus Vajtswv uas twb tshwm rau nws ob zaug lawm, thiab nkaw lus rau nws txog zaj no kom nws tsis txhob mus raws kua luag tej dab. Tiamsis Xalaumoo tsis ua raws li tej uas Yawmsaub qhia. Vim li no Yawmsaub thiaj hais rau Xalaumoo tias, “Vim koj lub siab xav li kod thiab koj tsis tuav rawv kuv tej lus cog tseg thiab kuv tej kab ke uas kuv hais cia rau koj, mas kuv yeej yuav muab lub tebchaws dua rhe ntawm koj thiab muab cob rau koj li ib tug tub teg tub taws kav. Txawm li ntawd los vim yog saib rau koj txiv Davi, kuv yuav tsis ua li ntawd rau thaum koj tseem ciaj sia nyob, kuv yuav dua rhe lub tebchaws ntawm koj tus tub txhais tes. Tiamsis kuv yuav tsis dua tag nrho lub tebchaws, kuv yuav tseg ib lub xeem pub rau koj tus tub vim yog saib rau kuv tus qhev Davi thiab saib rau lub nroog Yeluxalees uas kuv xaiv cia lawd.” Yawmsaub ua rau Hada uas yog neeg Edoo yog cov Edoo tej vajntxwv caj ces sawv tawm tsam Xalaumoo. Thaum Davi nyob hauv Edoo tebchaws mas Yau‑a uas ua thawj kav tub rog tau mus log cov uas raug tua tuag, nws txawm muab txhua tus txivneej hauv Edoo tua pov tseg. Yau‑a thiab cov Yixayee sawvdaws nyob hauv Edoo tau rau lub hli mus txog thaum muab cov txivneej hauv Edoo tua tag huvsi. Thaum ntawd Hada tseem yau mas nws nrog cov neeg Edoo qee leej uas yog nws txiv cov tub teg tub taws khiav mus rau hauv Iyi tebchaws. Lawv khiav tawm ntawm Midee los rau Palas mas coj ib txhia neeg hauv lub moos Palas nrog lawv khiav mus rau Iyi tebchaws, mus cuag cov Iyi tus vajntxwv Falau, mas vajntxwv pub ib lub tsev rau nws nyob thiab niaj hnub pub mov rau nws noj thiab pub teb rau nws. Hada ua tau hum Falau siab kawg li mas Falau thiaj muab nws tus pojniam Thapene tus niam hluas rau Hada yuav, yog Thapene uas ua poj vaj tus niam hluas ntag. Thapene tus niam hluas kuj yug tau ib tug tub hu ua Kenunpa rau Hada, mas poj vaj Thapene coj los tu hlob rau hauv Falau lub tsev mas Kenunpa thiaj nrog vajntxwv tej tub nyob hauv Falau lub tsev ua ke. Thaum Hada nyob hauv Iyi tebchaws hnov tias Davi tuag mus nrog nws tej poj koob yawm txwv nyob lawm thiab hnov tias Yau‑a uas ua thawj kav tub rog kuj tuag lawm mas Hada txawm hais rau Falau tias, “Thov koj cia kuv rov qab mus rau kuv teb kuv chaw.” Falau hais rau nws tias, “Koj nrog kuv nyob koj tu ncua ib yam dabtsi es nimno koj yuav nrhiav kev rov qab mus rau koj lub tebchaws?” Mas Hada teb rau nws tias, “Thov cia kuv mus xwb.” Vajtswv ua rau Eliyada tus tub Lexoo sawv twv Xalaumoo thiab. Lexoo yog vajntxwv Hadadexaw uas kav hauv lub moos Xaunpa ib tug tub qhe uas khiav lawm. Thaum Davi mus tua cov neeg hauv Xaunpa tag mas Lexoo cia li sau tau ib co neeg nrog nws thiab nws ua thawj coj lawv mus huab lws luag. Lawv mus txog lub nroog Damaxaka thiab nyob qhov ntawd mas lawv tsa nws ua vajntxwv kav lub nroog Damaxaka. Nws ua yeeb ncuab rau cov Yixayee tag Xalaumoo sim neej, nws ua phem rau cov Yixayee ib yam nkaus li Hada ua. Nws ntxub cov Yixayee, nws ua vajntxwv kav kiag Alas tebchaws. Yelaunpau‑as uas yog Nenpa tus tub yog xeem Efa‑i uas nyob hauv lub moos Xeleda, kuj tsa tes tawm tsam vajntxwv thiab. Nws yog Xalaumoo ib tug tub teg tub taws, nws niam hu ua Xelu‑a yog ib tug poj ntsuam. Qhov uas nws tsa tes tawm tsam vajntxwv yog vim li uas hais no. Xalaumoo ua lub loog Milau thiab txhaws lub qhov ntsa loog ntawm nws txiv Davi lub nroog. Yelaunpau‑as yog ib tug khov sim kho. Thaum Xalaumoo pom tias tus hluas ntawd nquag heev nws thiaj muab tsa ua tus saib xyuas cov tub zog sawvdaws uas nws yuam hauv Yauxej caj ces los ua haujlwm. Lub sijhawm ntawd Yelaunpau‑as tawm hauv Yeluxalees mus mas Ahiya uas yog xibhwb cev Vajtswv lus yog neeg Silau ntsib nws ntawm tog kev. Ahiya hnav ib lub tsho tshiab. Ob tug ob leeg nyob tom teb xwb. Ces Ahiya txawm muab nws lub tsho tshiab uas nws hnav ntawd dua ua kaum ob daim. Mas nws hais rau Yelaunpau‑as tias, “Koj cia li coj kaum daim mus, rau qhov Yawmsaub uas yog cov Yixayee tus Vajtawv hais li no tias, ‘Saib nawj, kuv tabtom yuav dua lub tebchaws ntawm Xalaumoo txhais tes thiab muab kaum lub xeem rau koj. Tiamsis nws tseem yuav muaj ib lub xeem xwb vim yog saib rau kuv tus qhev Davi thiab saib rau lub nroog Yeluxalees uas kuv xaiv hauv txhua xeem Yixayee los lawd. Twb yog vim nws tso kuv tseg mus pe hawm poj dab Athaule uas yog cov Xaidoo tus dab thiab pe Khemauj uas yog cov Mau‑a tus dab thiab pe Mikhoo uas yog cov Asmoo tus dab, thiab nws tsis ua raws li kuv txojkev, thiab tsis ua tej uas kuv pom tias zoo thiab tsis tuav rawv kuv tej kab ke thiab kuv tej kevcai, ib yam li nws txiv Davi tau ua lawd. “ ‘Txawm li ntawd los kuv yuav tsis muab nws lub tebchaws huvsi rho kiag ntawm nws txhais tes, tiamsis kuv yuav cia nws kav mus tag nws sim neej vim yog saib rau kuv tus qhev Davi uas kuv xaiv cia lawd yog tus uas tuav rawv kuv tej lus nkaw thiab kuv tej kab ke. Tiamsis kuv yuav rho lub tebchaws hauv nws tus tub txhais tes, thiab muab kaum lub xeem cob rau koj. Kuv tseem yuav muab ib xeem rau nws tus tub, xwv kuv tus qhev Davi thiaj muaj lub teeb rau ntawm kuv xubntiag rau hauv Yeluxalees tsis tu li, yog lub nroog uas kuv xaiv cia rau kuv lub npe nyob. Kuv yuav koj thiab koj yuav kav txhua yam raws li koj lub siab xav, thiab koj yuav ua vajntxwv kav cov Yixayee. “ ‘Yog koj mloog kuv tej lus uas kuv hais rau koj txhua yam thiab ua koj lub neej raws nraim kuv txojkev thiab ua tej uas kuv pom tias zoo es tuav rawv kuv tej kab ke thiab kuv tej lus nkaw ib yam li kuv tus qhev Davi tau ua, mas kuv yuav nrog nraim koj thiab tsa koj caj ces nyob ruaj khov ib yam li kuv tsa Davi caj ces, thiab kuv yuav muab cov Yixayee rau koj. Tim li no kuv yuav ua rau Davi caj ces raug kev nyuaj siab tiamsis tsis yog raug mus ib txhis.’ ” Xalaumoo thiaj nrhiav kev yuav muab Yelaunpau‑as tua, tiamsis Yelaunpau‑as khiav mus rau hauv Iyi tebchaws mus cuag Sisab uas yog Iyi tus vajntxwv, thiab nws nyob hauv Iyi tebchaws mus txog thaum Xalaumoo tuag. Lwm yam haujlwm uas Xalaumoo ua thiab txhua yam uas nws ua thiab nws lub tswvyim twb muab sau cia rau hauv phau ntawv uas sau Xalaumoo tej haujlwm. Xalaumoo nyob hauv Yeluxalees ua vajntxwv kav cov Yixayee huvsi tau plaub caug xyoo. Xalaumoo kuj tuag mus nrog nws tej poj koob yawm txwv nyob, thiab lawv muab nws log rau hauv nws txiv Davi lub nroog, ces nws tus tub Lehaunpau‑as ua vajntxwv kav nyob nws chaw. Lehaunpau‑as mus rau ntawm lub moos Sekhee, rau qhov cov Yixayee sawvdaws tau tuaj rau ntawm Sekhee es yuav tsa nws ua vajntxwv. Thaum Nenpa tus tub Yelaunpau‑as tau hnov xov, rau thaum nws tseem nyob hauv Iyi tebchaws uas nws tau khiav vajntxwv Xalaumoo mus nyob, mas Yelaunpau‑as txawm rov ntawm Iyi tebchaws los. Lawv txawm txib neeg mus hu nws, mas Yelaunpau‑as thiab ib tsoom Yixayee sawvdaws tuaj hais rau Lehaunpau‑as tias, “Koj txiv tau ua tus quab hnyav heev rau peb. Yog li ntawd nimno thov koj ua rau tej haujlwm hnyav uas koj txiv kom peb ua thiab nws tus quab hnyav uas nyob saum peb ntawd sib zog, mas peb yuav ua num rau koj.” Lehaunpau‑as hais rau lawv tias, “Cia li rov mus, es peb hnub li rov tuaj cuag kuv ib zaug thiab.” Cov pejxeem txawm rov mus lawm. Vajntxwv Lehaunpau‑as mus sablaj rau cov laus uas tu nws txiv Xalaumoo rau thaum nws txiv tseem muaj txojsia nyob hais tias, “Nej yuav qhia kuv teb li cas rau cov pejxeem no?” Mas lawv hais rau nws tias, “Yog hnub no koj yuav ua cov pejxeem no qhev thiab tu lawv thiab teb tej lus zoo rau lawv, mas lawv yuav ua koj cov qhev mus ib txhis li.” Tiamsis nws tsis quav ntsej tej lus uas cov laus qhia ntawd, nws txawm mus sablaj rau cov tub hluas uas nrog nws hlob ib phaum thiab ua haujlwm rau nws. Nws hais rau lawv tias, “Nej yuav qhia kom peb teb li cas rau cov pejxeem no uas tau hais rau kuv tias, ‘Thov koj ua rau tus quab uas koj txiv muab tso rau saum peb kom sib zog’?” Cov tub hluas uas nrog nws hlob ib phaum txawm hais rau nws tias, “Koj hais li no rau cov pejxeem uas hais rau koj tias, ‘Koj txiv tau ua rau peb tus quab hnyav, thov koj ua kom sib zog.’ Mas koj cia li hais rau lawv li no, ‘Kuv tus nyuag ntiv tes rwg qab tseem loj dua kuv txiv lub duav. Txawm yog kuv txiv tau tso tus quab hnyav rau saum nej los kuv yuav tsav ntxiv kom tus quab ntawd hnyav dua thiab. Kuv txiv xuas pas nplawm nej tiamsis kuv yuav xuas raub ris teb nplawm nej.’ ” Yelaunpau‑as thiab cov pejxeem sawvdaws thiaj rov tuaj cuag Lehaunpau‑as rau hnub peb raws li vajntxwv tau hais tias, “Rov qab tuaj cuag kuv rau hnub peb.” Mas vajntxwv teb nyaum kawg li rau cov pejxeem, nws tsis quav ntsej tej lus uas cov laus qhia rau nws. Nws hais rau lawv raws li cov tub hluas tau qhia rau nws hais tias, “Kuv txiv ua rau nej tus quab hnyav tiamsis kuv yuav tsav ntxiv kom tus quab ntawd hnyav dua thiab. Kuv txiv xuas pas nplawm nej xwb tiamsis kuv yuav xuas raub ris teb nplawm nej.” Vajntxwv thiaj tsis mloog cov pejxeem tej lus, rau qhov tej xwm txheej no yog los ntawm Yawmsaub xwv Yawmsaub thiaj ua tau tiav raws li tej lus uas nws tau txib Ahiya uas yog neeg hauv Silau hais rau Nenpa tus tub Yelaunpau‑as. Thaum cov Yixayee sawvdaws pom tias vajntxwv tsis mloog lawv tej lus, lawv thiaj teb vajntxwv tias, “Peb muaj feem dabtsi rau hauv Davi lawm? Peb tsis muaj qub txeeg qub teg hauv Yexi tus tub li lawm. Yixayee 'e, cia li rov mus rau hauv nej tej tsev ntaub. Au Davi, koj cia li saib xyuas koj caj ces xwb lauj!” Mas cov Yixayee sawvdaws txawm rov mus rau nyias vaj nyias tsev lawm. Mas Lehaunpau‑as tsuas kav cov Yixayee uas nyob rau hauv tej moos hauv Yuda tebchaws xwb. Mas vajntxwv Lehaunpau‑as txib Adaulas uas yog tus saib xyuas cov neeg raug yuam ua haujlwm mus xyuas cov Yixayee mas lawv sawvdaws xuas pob zeb ntaus nws tuag. Ces vajntxwv Lehaunpau‑as txawm maj nroos nce nws li tsheb nees ua rog khiav rov los rau hauv Yeluxalees. Yixayee thiaj li fav xeeb rau Davi caj ces los txog niaj hnub nimno. Thaum cov Yixayee sawvdaws tau hnov tias Yelaunpau‑as rov los lawm, lawv txawm txib neeg mus hu nws tuaj rau ntawm ib tsoom pejxeem sawvdaws thiab muab nws tsa ua vajntxwv. Tsis muaj leejtwg koom nrog Davi caj ces, tsuas yog xeem Yuda xwb. Thaum Lehaunpau‑as mus rau hauv Yeluxalees lawd nws txawm sau cov Yuda thiab xeem Npeeyamee sawvdaws tuaj ua ke, huvsi muaj 180,000 leej tub rog uas txawj tshaj plaws es yuav mus ua rog rau cov Yixayee thiab muab lub tebchaws rov los rau Lehaunpau‑as uas yog Xalaumoo tus tub kav. Tiamsis Vajtswv hais lus tuaj rau Semaya uas yog Vajtswv tus neeg tias, “Cia li hais rau Xalaumoo tus tub Lehaunpau‑as uas ua vajntxwv kav Yuda tebchaws thiab hais rau cov Yuda thiab cov Npeeyamee sawvdaws thiab hais rau cov pejxeem uas nrog lawv nyob tias, ‘Yawmsaub hais li no tias, Nej tsis txhob nce mus ua rog rau nej cov kwvtij Yixayee. Sawvdaws cia li rov mus nyias vaj nyias tsev, rau qhov tej xwm txheej no yog los ntawm kuv los.’ ” Yog li no lawv thiaj mloog Yawmsaub tej lus thiab rov mus nyias vaj nyias tsev raws li Yawmsaub hais. Mas Yelaunpau‑as muab lub moos Sekhee pem toj siab Efa‑i tebchaws ua dua tshiab thiab nws mus nyob qhov ntawd. Nws kuj tawm qhov ntawd mus muab lub moos Penu‑ee ua dua tshiab. Yelaunpau‑as xav hauv lub siab tias, “Ntshai tsam lub tebchaws yuav tig mus zwm rau Davi caj ces. Yog cov pejxeem no pheej mus xyeem tsiaj rau hauv Yawmsaub lub tuam tsev nram lub nroog Yeluxalees, ces cov pejxeem no lub siab yuav tig rov mus zwm rau lawv tus tswv uas yog Yuda tus vajntxwv Lehaunpau‑as, ces lawv yuav muab kuv tua pov tseg es rov qab mus zwm rau Yuda tus vajntxwv Lehaunpau‑as.” Yog li ntawd nws thiaj ntaus tswvyim thiab muab kub ua ob tug dab mlom thav nyuj. Nws thiaj hais rau cov pejxeem tias, “Qhov uas nej pheej nce mus rau lub nroog Yeluxalees txaus lawm. Cov Yixayee 'e, cia li saib nej tej timtswv no nawj, yog tej timtswv uas coj nej tawm hauv Iyi tebchaws los.” Nws muab ib tug txawb rau hauv lub moos Npe‑ee thiab ib tug txawb rau hauv lub moos Daj. Mas qhov no ua txhaum muaj txim vim yog cov pejxeem mus pe tus uas nyob ntawm Npe‑ee thiab mus pe tus uas nyob ntawm lub moos Daj. Yelaunpau‑as kuj ua tsev teev dab rau ntawm tej chaw siab, thiab nws tsa cov pejxeem uas tsis yog xeem Levi ua pov thawj. Thiab Yelaunpau‑as teem hnub tim kaum tsib lub yim hli ua kevcai noj haus ib yam li txoj kevcai noj haus hauv Yuda, thiab nws tua tsiaj xyeem rau saum lub thaj. Nws ua li no rau hauv lub moos Npe‑ee, yog xyeem tsiaj rau tej dab mlom thav nyuj uas nws ua ntawd. Nws tsa pov thawj ua haujlwm rau hauv tej chaw siab uas nws ua rau ntawm lub moos Npe‑ee. Nws nce mus rau ntawm lub thaj uas nws ua rau hauv lub moos Npe‑ee rau hnub tim kaum tsib lub yim hli, yog lub hli uas nws lub siab xav tseg teem cia. Thiab nws teem sijhawm ua kevcai noj haus rau cov Yixayee thiab nws nce mus hlawv hmoov tshuaj tsw qab xyeem rau ntawm lub thaj ntawd. Muaj Vajtswv ib tug neeg los tawm hauv Yuda raws li Yawmsaub txib, nws mus rau Npe‑ee. Yelaunpau‑as sawv ntsug ntawm lub thaj yuav hlawv cov hmoov tshuaj tsw qab. Tus xibhwb ntawd txawm qw foom lub thaj ntawd raws li Yawmsaub kom nws hais tias, “Lub thaj nis lub thaj, Yawmsaub hais li no tias, ‘Davi caj ces yuav yug ib tug tub hu ua Yauxiya. Nws yuav muab cov pov thawj uas ua haujlwm ntawm tej chaw siab teev dab es tseem los hlawv hmoov tshuaj tsw qab rau saum koj tua xyeem rau saum koj, thiab yuav hlawv neeg li pob txha saum koj.’ ” Nws kuj ua txujci tseem ceeb tshwm rau hnub ntawd, nws hais tias, “No yog txujci tseem ceeb uas Yawmsaub twb hais cia lawm, Saib maj, lub thaj no yuav raug muab ua pob tag, tej tshauv saum lub thaj no yuav raug muab nchuav tag.” Thaum vajntxwv hnov Vajtswv tus neeg hais tej lus foom lub thaj ntawm Npe‑ee ntawd, mas Yelaunpau‑as nkaum tes nkuav ntawm lub thaj tuaj hais tias, “Cia li muab nws ntes kiag cia.” Ces vajntxwv txhais tes uas xyab hlo tuaj ntawd txawm cia li qhuav qhawv mas nkaum tsis tau tes rov qab. Thiab lub thaj kuj pob rhe tej tshauv kuj nchuav saum lub thaj los, raws li tej txujci tseem ceeb uas Yawmsaub tau kom Vajtswv tus neeg hais ntag. Mas vajntxwv hais rau Vajtswv tus neeg ntawd tias, “Cia li thov Yawmsaub uas yog koj tus Vajtswv khuvleej kuv, thiab thov pab kom kuv txhais tes rov qab zoo li qub.” Mas Vajtswv tus neeg thiaj thov Yawmsaub mas vajntxwv txhais tes txawm rov qab muaj zog zoo kiag li qub. Vajntxwv txawm hais rau Vajtswv tus neeg tias, “Los hauv kuv lub tsev thiab nrog kuv noj mov, kuv yuav muab tshav ntuj rau koj.” Vajtswv tus neeg hais rau vajntxwv tias, “Txawm yog koj muab kiag koj cuab txhiaj cuab tam ib nrab rau kuv los kuv yuav tsis nrog koj mus, thiab kuv yuav tsis noj ib khaw mov lossis haus ib pas dej ntawm no li. Rau qhov Yawmsaub tej lus twb hais tuaj rau kuv tias, ‘Koj tsis txhob noj mov tsis txhob haus dej tsis txhob taug txoj qub kev uas koj tuaj rov qab.’ ” Nws txawm mus dua lwm txojkev lawm tsis rov taug txoj qub kev uas nws tuaj rau ntawm Npe‑ee. Muaj ib tug xibhwb cev Vajtswv lus laus laus li nyob hauv lub moos Npe‑ee. Mas nws cov tub txawm los hais txhua yam uas Vajtswv tus neeg tau ua ntawm Npe‑ee hnub ntawd rau nws mloog. Tej lus uas tus xibhwb ntawd hais rau vajntxwv lawv kuj piav huvsi rau leej txiv mloog. Mas leej txiv hais rau lawv tias, “Tus xibhwb ntawd mus txojkev twg lawm?” Ces cov tub txawm qhia txojkev uas Vajtswv tus neeg uas tuaj nram Yuda tuaj mus rau leej txiv. Ces nws txawm hais rau nws cov tub tias, “Cia li nog eeb nees luav rau kuv.” Lawv txawm nog eeb nees luav rau nws, nws thiaj caij. Nws mus caum cuag Vajtswv tus neeg zaum hauv ib tsob qab ntoo qheb, nws thiaj hais rau tus xibhwb tias, “Koj yog Vajtswv tus neeg uas tuaj nram Yuda tuaj lov?” Nws teb tias, “Yog lauj.” Ces tus xibhwb laus txawm hais rau nws tias, “Nrog kuv mus lawm tom kuv tsev mus noj mov.” Nws teb tias, “Kuv nrog koj mus tsis tau thiab mus so tsis tau hauv koj tsev. Kuv yuav tsis nrog koj noj mov lossis nrog koj haus dej ntawm no li. Rau qhov Yawmsaub tej lus hais tuaj rau kuv tias, ‘Koj tsis txhob noj mov tsis txhob haus dej qhov ntawd li thiab tsis txhob taug txoj qub kev uas koj tuaj rov qab.’ ” Tus xibhwb laus txawm hais rau nws tias, “Kuv kuj yog ib tug xibhwb cev Vajtswv lus ib yam li koj thiab. Muaj ib tug tubtxib saum ntuj hais Yawmsaub cov lus rau kuv tias, ‘Cia li coj nws rov los rau hauv koj tsev kom nws thiaj tau mov noj tau dej haus.’ ” Tiamsis yog nws dag xwb. Ces Vajtswv tus neeg thiaj nrog nws rov qab mus, tau mus noj mov thiab haus dej hauv nws tsev. Thaum ob tug tabtom nyob ntawm rooj mov mas Yawmsaub hais lus tuaj rau tus xibhwb laus uas coj nws rov los ntawd. Ces nws txawm qw rau Vajtswv tus neeg uas tuaj nram Yuda tuaj hais tias, “Yawmsaub hais li no tias, ‘Vim koj tsis mloog Yawmsaub tej lus thiab tsis ua raws li uas Yawmsaub uas yog koj tus Vajtswv hais kom koj ua, thiab vim koj tau rov los noj mov thiab haus dej rau lub chaw uas Yawmsaub hais rau koj tias tsis txhob noj mov tsis txhob haus dej li, ces koj lub cev tuag yuav mus tsis txog koj tej poj koob yawm txwv lub qhov ntxa.’ ” Ces thaum Vajtswv tus neeg noj mov thiab haus dej tag, tus xibhwb laus txawm nog eeb nees luav rau Vajtswv tus neeg uas nws coj los ntawd. Thaum tus xibhwb hluas ntawd mus, muaj ib tug tsov ntxhuav txawm tawm los ntsib nws ntawm tog kev mas muab nws tom tuag, muab nws lub cev tuag tso rau hauv txojkev mas tus nees luav sawv ntawm nws ib sab thiab tus tsov ntxhuav kuj sawv ntawm nws ib sab thiab. Muaj neeg dua kev pom lub cev tuag pov nrom nroo hauv txojkev thiab tus tsov ntxhuav sawv ib sab ntawm lub cev tuag. Ces lawv thiaj li los piav rau hauv lub moos uas tus xibhwb laus ntawd nyob. Mas thaum tus xibhwb laus uas coj nws rov los ntawd hnov txog zaj xwm txheej ntawd nws txawm hais tias, “Tus ntawd yog Vajtswv tus neeg uas tsis mloog Yawmsaub tej lus. Vim li ntawd Yawmsaub thiaj li muab nws rau tsov ntxhuav, tsov ntxhuav thiaj li muab nws dua muab nws tom tuag raws li tej lus uas Yawmsaub hais rau nws.” Ces nws thiaj hais rau nws cov tub tias, “Cia li nog eeb nees luav rau kuv.” Mas lawv thiaj nog eeb nees luav. Nws txawm mus mas pom lub cev tuag pov nrom nroo hauv txojkev thiab pom tus nees luav thiab tus tsov ntxhuav sawv ib sab ntawm lub cev tuag ntawd. Tus tsov ntxhuav kuj tsis noj lub cev tuag ntawd thiab tsis dua tus nees luav ntawd. Ces tus xibhwb laus txawm muab Vajtswv tus neeg lub cev tuag tsaws rau saum tus nees luav coj rov los rau hauv tus xibhwb laus lub moos, coj los pam thiab muab log. Nws muab lub cev tuag ntawd log rau lub chaw uas yuav log nws ntag, mas lawv quaj quaj hais tias, “Au kuv kwv kuv tij 'e.” Thaum muab log tag lawd nws thiaj hais rau nws cov tub tias, “Thaum kuv tuag nej muab kuv log rau hauv lub qhov ntxa uas log Vajtswv tus neeg no thiab muab kuv cov pob txha tso ti nkaus nws cov pob txha. Rau qhov tej lus uas Yawmsaub kom nws qw foom lub thaj ntawm Npe‑ee thiab foom tej tsev dab saum tej chaw siab huvsi uas nyob hauv Xamali tej moos, yeej yuav tiav xwb xwb li.” Dhau tej xwm txheej no lawm Yelaunpau‑as kuj tsis tso nws tej kev txhaum tseg li, nws tseem tsa cov pejxeem qee leej ua pov thawj rau ntawm tej chaw siab teev dab dua thiab. Leejtwg txaus siab ua nws kuj cia li muab tsa ua pov thawj rau ntawm tej chaw siab teev dab. Tej no yog Yelaunpau‑as caj ces tej kev txhaum uas ua rau lawv raug muab rhuav tshem ploj tag hauv ntiajteb no. Lub sijhawm ntawd Yelaunpau‑as tus tub Anpiya mob, mas Yelaunpau‑as txawm hais rau nws tus pojniam tias, “Koj cia li hloov tsoos tsho txhob kheev luag paub tias koj yog Yelaunpau‑as tus pojniam, es mus rau lub moos Silau rau qhov Ahiya uas ua xibhwb cev Vajtswv lus nyob qhov ntawd. Nws yog tus uas hais rau kuv tias kuv yuav ua vajntxwv kav cov neeg no. Koj cia li coj kaum lub ncuav thiab ib txhia ncuav qab zib thiab ib nyuag me hub zib ntab mus cuag nws. Nws yuav qhia rau koj paub tias tus tub yuav zoo li cas.” Yelaunpau‑as tus pojniam kuj ua raws li ntawd. Nws sawv tsees mus rau Silau mus txog Ahiya lub tsev. Ahiya tsis pom kev rau qhov nws laus laus, nws qhov muag pom tsis meej lawm. Yawmsaub hais rau Ahiya tias, “Saib maj, Yelaunpau‑as pojniam tabtom tuaj yuav nug koj txog nws tus tub, vim nws tus tub mob. Koj cia li hais li no rau nws.” Thaum Yelaunpau‑as pojniam mus txog, nws ua txuj yam li nws yog lwm tus li pojniam. Tiamsis thaum Ahiya hnov nws xib taws nrov tuaj txog ntawm qhov rooj Ahiya txawm hais tias, “Poj Yelaunpau‑as, cia li los tsev. Ua cas koj yuav ua txuj yam li yog lwm tus? Rau qhov kuv tau lo lus uas yuav hais tej xov poob siab rau koj. Cia li mus hais rau Yelaunpau‑as tias, Yawmsaub uas yog cov Yixayee tus Vajtswv hais li no tias, ‘Kuv twb tsa koj sawv hauv cov pejxeem los thiab pub koj ua thawj kav kuv cov neeg Yixayee. Kuv tau dua lub tebchaws ntawm Davi caj ces los pub rau koj. Txawm li ntawd los koj tsis zoo li kuv tus qhev Davi uas tuav rawv kuv tej lus nkaw thiab ua raws li kuv hais kawg siab kawg ntsws, thiab tsuas ua tej uas kuv pom raug cai xwb. Tiamsis koj tau ua phem heev dua lwm tus uas nyob ua koj ntej. Koj tau ua tej dab mlom thiab nchuav tej dab mlom, ua rau kuv chim kawg li, muab kuv laim kiag rau tom koj qub qab. Vim li no kuv yuav coj tej xwm txheej phem los rau saum Yelaunpau‑as caj ces, kuv yuav rhuav tshem txhua tus txivneej ntawm Yelaunpau‑as huvsi pov tseg tsis hais qhev thiab tej pejxeem hauv cov Yixayee, thiab yuav ntxuav kom Yelaunpau‑as caj ces tu noob nrho ib yam li luag hlawv tej quav tsiaj txhu kub hnyiab tag huvsi. Yelaunpau‑as cov neeg uas tuag rau hauv lub moos mas dev yuav noj. Cov uas tuag rau tom hav nroj mas tej liaj dav saum nruab ntug yuav noj, rau qhov Yawmsaub hais cia li no lawm.’ Koj cia li sawv rov qab mus tsev. Thaum koj mus txog ntua hauv koj lub moos mas tus tub yuav tu siav nrho. Mas cov Yixayee sawvdaws yuav quaj ntsuag nws thiab muab nws log. Rau qhov Yelaunpau‑as cov neeg mas nws tib leeg thiaj tuag muaj ntxa xwb, rau qhov hauv Yelaunpau‑as caj ces nws tib leeg ua tau tej yam uas hum Yawmsaub uas yog cov Yixayee tus Vajtswv lub siab. Yawmsaub tseem yuav tsa ib tug vajntxwv kav cov Yixayee uas yuav rhuav tshem Yelaunpau‑as caj ces hnub no ntag, hnub no ntag lauj. “Yawmsaub yuav ntaus cov Yixayee, mas lawv yuav zoo yam nkaus li tej tauj deg ua zog kais ntawm ntug dej. Nws yuav muab cov Yixayee dob kiag tawm hauv lub tebchaws zoo no uas nws twb muab pub rau lawv tej poj koob yawm txwv lawm, thiab muab lawv ntiab khiav ua sab ua sua dhau plaws mus rau sab dej Yufeti hnub tuaj, rau qhov lawv tau ua tej ncej dab Asela thiaj ua rau Yawmsaub chim. Nws yuav muab cov Yixayee tso tseg rau qhov Yelaunpau‑as ua txhaum thiab coj cov Yixayee ua txhaum.” Ces Yelaunpau‑as pojniam txawm sawv rov kiag mus mas los txog lub moos Thilaxa. Thaum nws los txog ntua nws lub taw rooj ces tus metub txawm tu siav nrho. Cov Yixayee sawvdaws muab nws log thiab quaj ntsuag nws, raws li Yawmsaub cov lus uas nws kom nws tus qhev Ahiya uas ua xibhwb cev Vajtswv lus hais lawd. Lwm yam haujlwm uas Yelaunpau‑as ua, tej uas nws mus ua rog thiab tej uas nws kav tebchaws mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Yelaunpau‑as kav tebchaws tau nees nkaum ob xyoos, mas nws li tuag mus nrog nws tej poj koob yawm txwv nyob. Nws tus tub Nada sawv nws chaw ua vajntxwv kav. Lehaunpau‑as uas yog Xalaumoo tus tub ua vajntxwv kav Yuda. Thaum Lehaunpau‑as pib ua vajntxwv kav tebchaws ntawd nws hnub nyoog muaj plaub caug ib xyoos. Nws nyob hauv Yeluxalees kav tau kaum xya xyoo, yog lub nroog uas Yawmsaub xaiv hauv txhua xeem Yixayee los cia ua lub chaw rau nws lub npe nyob. Lehaunpau‑as niam npe hu ua Na‑ama uas yog neeg Asmoo. Cov Yuda ua tej uas Yawmsaub pom tias phem, lawv tau ua txhaum ntau dua tej kev txhaum uas lawv tej poj koob yawm txwv ua zes rau Yawmsaub khib. Rau qhov lawv ua tej chaw siab teev dab thiab ua tej ncej dab thiab ua tej ncej dab Asela rau saum txhua lub pov roob thiab ua rau hauv txhua tus qab ntoo ntsuab. Thiab muaj cov txivneej muag cev ntawm tej tsev dab thoob lub tebchaws. Lawv ua kev qias vuab tsuab yam li lwm haiv neeg uas Yawmsaub twb ntiab tawm ntawm cov Yixayee hauv ntej mus lawm. Thaum Lehaunpau‑as ua vajntxwv tau tsib xyoos mas Sisab uas ua vajntxwv hauv Iyi tebchaws txawm tuaj ua rog rau lub nroog Yeluxalees. Nws muab tej nyiaj txiag qhov txhia chaw hauv Yawmsaub lub tuam tsev thiab hauv vajntxwv lub tsev lws huvsi coj mus. Nws kuj coj tej daim phiaj kub thaiv uas Xalaumoo ua huvsi mus. Mas vajntxwv Lehaunpau‑as ho muab tooj liab ua tej daim phiaj los siv nyob chaw thiab muab cov daim phiaj ntawd cob rau cov thawj rog uas zov vajntxwv lub qhov rooj. Txhua zaus uas vajntxwv mus rau hauv Yawmsaub lub tuam tsev cov tub rog kuj tuav cov daim phiaj ntawd tawm tuaj thiab coj rov qab mus khaws cia rau hauv lub tsev uas cov tub rog zov khuav nyob. Lwm yam haujlwm uas Lehaunpau‑as ua, txhua yam uas nws ua mas twb muab sau cia rau hauv phau ntawv uas hais txog cov Yuda tej vajntxwv li keeb kwm. Lehaunpau‑as thiab Yelaunpau‑as pheej sib ua rog tsis tu li. Lehaunpau‑as tuag mus nrog nws tej poj koob yawm txwv nyob. Lawv muab nws log nrog nws tej poj koob yawm txwv ua ke rau hauv Davi lub nroog. Nws niam npe hu ua Na‑ama uas yog neeg Asmoo. Mas nws tus tub Anpiya sawv nws chaw ua vajntxwv kav. Xyoo kaum yim uas Nenpa tus tub Yelaunpau‑as ua vajntxwv kav mas Anpiya pib kav Yuda tebchaws. Nws nyob hauv Yeluxalees kav tau peb xyoos. Nws niam npe hu ua Ma‑akha uas yog Anpisaloo tus ntxhais. Anpiya ua txhua yam kev txhaum ib yam li nws txiv tau ua. Nws lub siab tsis ncaj tsis dawb huv rau Yawmsaub uas yog nws tus Vajtswv, tsis thooj li Davi uas yog nws yawg koob lub siab. Txawm li cas los xij, yog saib rau Davi mas Yawmsaub uas yog nws tus Vajtswv thiaj li pub ib lub teeb rau Anpiya kom ci rau hauv Yeluxalees, nws thiaj tsa Anpiya ib tug tub sawv nws chaw ua vajntxwv thiab tsom kwm Yeluxalees nyob ruaj, vim yog Davi ua tej uas Yawmsaub pom tias zoo thiab tag nws sim neej nws tsis tseg ib yam uas Yawmsaub hais rau nws es nws yuav tsis ua li, tsuas yog qhov uas nws ua rau Uliya uas yog neeg Hithai xwb. Lehaunpau‑as caj ces thiab Yelaunpau‑as sib ua rog tsis tu mus tag Anpiya sim neej. Lwm yam haujlwm uas Anpiya ua thiab txhua yam uas nws ua mas twb muab sau cia rau hauv phau ntawv uas hais txog cov Yuda tej vajntxwv li keeb kwm. Anpiya thiab Yelaunpau‑as kuj sib ua rog. Anpiya tuag mus nrog nws tej poj koob yawm txwv nyob. Lawv muab nws log rau hauv Davi lub nroog, mas nws tus tub Axa sawv nws chaw ua vajntxwv kav. Xyoo nees nkaum uas Yelaunpau‑as ua vajntxwv kav Yixayee tebchaws mas Axa pib ua vajntxwv kav Yuda tebchaws. Nws nyob hauv Yeluxalees kav tau plaub caug ib xyoos. Nws niam npe hu ua Ma‑akha uas yog Anpisaloo tus ntxhais. Axa ua tej uas Yawmsaub pom tias zoo ib yam li nws yawg suab Davi tau ua. Nws muab cov txivneej muag cev ntawm tsev dab ntxuav pov tseg kom ploj hauv lub tebchaws mus thiab rhuav tshem tej dab mlom uas thaum ub nws tej poj koob yawm txwv tau ua cia lawm huvsi pov tseg. Thiab nws muab nws niam Ma‑akha hle tsis pub nyob lub rooj poj vaj lawm, vim yog nws tau ua ib tug dab mlom qias vuab tsuab los teev tus dab Asela. Thiab Axa muab nws niam tus dab mlom ntawd ntov pov tseg coj mus hlawv rau ntawm lub hav Khiloo, tiamsis tsis tau rhuav tshem tej chaw siab teev dab. Txawm li ntawd los nws lub siab yeej xib rau Yawmsaub mus tag sim neej uas ua vajntxwv. Nws muab tej nyiaj tej kub tej twj siv uas nws thiab nws txiv tau yeem lus xyeem rau Yawmsaub lawd coj los cia rau hauv Yawmsaub lub tuam tsev. Axa thiab Npa‑asa uas ua vajntxwv kav Yixayee tebchaws sib ua rog mus tag ob tug sim neej li. Cov Yixayee tus vajntxwv Npa‑asa mus ua rog rau cov Yuda. Nws ua lub moos Lama los tav kev kom tsis pub ib tug nkag mus cuag tau cov Yuda tus vajntxwv Axa thiab tsis pub ib tug tawm los tau. Ces Axa txawm muab tej nyiaj tej kub uas tseem tshuav hauv Yawmsaub lub tuam tsev thiab tej nyiaj txiag tej kub uas tseem tshuav hauv vajntxwv lub tsev rau nws cov tub teg tub taws, mas txib lawv coj mus cuag cov Alas tus vajntxwv Npeehada uas nyob hauv lub nroog Damaxaka. Nws yog Thalimoo tus tub, yog Hexi‑oo tus xeeb ntxwv. Lawv hais tias, “Thov koj nrog kuv cog lus sib raug zoo ib yam li kuv txiv thiab koj txiv txeev ua los lawd. Kuv xa cov nyiaj thiab kub no tuaj ua tshav ntuj pub rau koj es thov koj mus rhuav tej lus uas nrog Yixayee tus vajntxwv Npa‑asa cog lus sib raug zoo lawd tseg, xwv nws thiaj thim tub rog ntawm kuv mus.” Ces Npeehada kuj mloog vajntxwv Axa hais. Nws txawm tso thawj rog mus ntaus cov Yixayee tej moos, thiab lawv ntaus yeej lub moos Iyoo, Daj thiab Anpee Npema‑akha thiab tag nrho ib cheeb tsam Khinelau thiab tag nrho Nathali tebchaws. Thaum Npa‑asa hnov tej xwm ntawd nws txawm tseg tsis ua lub moos Lama, nws mus nyob rau hauv lub moos Thilaxa. Ces vajntxwv Axa txawm tshaj tawm rau cov Yuda sawvdaws tsis tseg ib tug li mas lawv mus muab tej pob zeb thiab tej ntoo uas Npa‑asa ua lub moos Lama ntawd coj mus. Vajntxwv Axa siv tej ntawd ua lub moos Kenpa hauv Npeeyamee tebchaws thiab lub moos Mixapa. Lwm yam haujlwm uas vajntxwv Axa ua, thiab nws lub hwjchim huvsi thiab txhua yam uas nws ua thiab tej moos uas nws ua lawd mas twb muab sau cia rau hauv phau ntawv uas hais txog cov Yuda tej vajntxwv li keeb kwm. Thaum nws laus lawd nws txawm mob txhais kotaw. Axa tuag mus nrog nws tej poj koob yawm txwv nyob. Lawv muab nws log rau hauv nws yawg suab Davi lub nroog, mas nws tus tub Yehausafa sawv nws chaw ua vajntxwv kav. Xyoos ob uas Axa ua vajntxwv kav Yuda mas Yelaunpau‑as tus tub Nada pib ua vajntxwv kav Yixayee, nws kav Yixayee tau ob xyoos. Nada ua tej uas Yawmsaub pom tias phem thiab nws taug nws txiv tus neev taw ua txhaum thiab coj cov Yixayee ua txhaum. Ahiya tus tub Npa‑asa uas yog xeem Ixakha ntaus tswvyim txov Nada. Mas Npa‑asa muab vajntxwv tua ntawm Kinpethoo uas yog cov Filixatee lub moos rau thaum Nada thiab cov Yixayee tabtom vij ntaus lub moos Kinpethoo. Ua li no mas xyoo peb uas Axa ua vajntxwv kav Yuda, Npa‑asa thiaj tua tau Nada thiab sawv nws chaw ua vajntxwv kav cov Yixayee. Thaum nws tau ua vajntxwv nws muab Yelaunpau‑as caj ces tua tag huvsi tsis tseg ib tug dim ciaj li. Nws muab ua puam tsuaj tag huvsi raws li tej lus uas Yawmsaub tau kom nws tus qhev Ahiya uas nyob hauv lub moos Silau hais cia lawd. Vim yog tim tej kev txhaum uas Yelaunpau‑as tau ua thiab nws tau coj cov Yixayee ua txhaum thiab tim qhov uas nws ua rau Yawmsaub uas yog cov Yixayee tus Vajtswv chim kawg. Lwm yam haujlwm uas Nada ua thiab txhua yam uas nws ua mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Axa thiab Npa‑asa uas ua Yixayee tus vajntxwv yeej ua rog mus tag ob tug sim neej. Xyoo peb uas Axa ua vajntxwv kav Yuda mas Ahiya tus tub Npa‑asa pib ua vajntxwv kav cov Yixayee sawvdaws, nws nyob hauv lub moos Thilaxa kav tau nees nkaum plaub xyoos. Nws ua tej uas Yawmsaub pom tias phem thiab taug nraim Yelaunpau‑as tus neev taw ua txhaum thiab coj cov Yixayee ua txhaum. Yawmsaub hais lus tuaj rau Hanani tus tub Yehu, yog hais tawm tsam Npa‑asa tias, “Kuv muab koj tsa sawv hauv cov hmoov av los ua thawj kav kuv cov neeg Yixayee, tiamsis koj taug nraim Yelaunpau‑as tus neev taw ua txhaum thiab tau coj kuv cov neeg Yixayee ua txhaum, mas lawv tej kev txhaum ua rau kuv chim kawg. Vim li no kuv yuav muab Npa‑asa thiab nws caj ces ntxuav kom tu noob nrho ua rau koj caj ces ib yam nkaus li Nenpa tus tub Yelaunpau‑as caj ces. Npa‑asa caj ces tus twg tuag rau hauv moos dev yuav noj, tus twg tuag tom hav nroj liaj dav saum nruab ntug yuav noj.” Lwm yam haujlwm uas Npa‑asa ua thiab txhua yam uas nws ua thiab nws lub hwjchim mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Npa‑asa tuag mus nrog nws tej poj koob yawm txwv nyob, lawv muab nws log rau hauv lub moos Thilaxa. Ces nws tus tub Ela sawv nws chaw ua vajntxwv kav. Thiab Yawmsaub hais lus tuaj rau Hanani tus tub Yehu uas yog xibhwb cev Vajtswv lus, yog hais txog Npa‑asa thiab nws caj ces, rau qhov txhua yam uas nws ua mas Yawmsaub pom tias phem. Nws tes haujlwm zoo ib yam li Yelaunpau‑as caj ces tes haujlwm, thiab vim nws tau muab Yelaunpau‑as caj ces ua puam tsuaj tag, mas ua rau Yawmsaub chim kawg. Xyoo nees nkaum rau uas Axa ua vajntxwv kav Yuda mas Npa‑asa tus tub Ela sawv kav Yixayee, nws nyob hauv lub moos Thilaxa kav tau ob xyoos. Xili uas yog vajntxwv ib tug thawj rog kav cov tsheb ua rog ib nrab tau ntaus tswvyim fav xeeb rau Ela. Mas Ela nyob hauv lub moos Thilaxa haus cawv hauv Alaxa lub tsev qaug heev. Alaxa yog tus uas kav vajntxwv lub vaj lub tsev hauv Thilaxa. Ces Xili txawm tuaj muab vajntxwv tua tuag, rau xyoo nees nkaum xya uas Axa ua vajntxwv kav cov Yuda. Ces Xili txawm sawv Ela chaw ua vajntxwv kav. Thaum Xili pib ua vajntxwv kav, thaum nws mus nyob saum lub zwm txwv mas nws muab Npa‑asa caj ces tua tag huvsi, nws tsis tseg Npa‑asa li ib tug kwvtij lossis ib tug kwvluag ciaj sia li. Xili muab Npa‑asa caj ces ua puam tsuaj tag huvsi raws li tej lus uas Yawmsaub tau txib Yehu uas ua xibhwb cev Vajtswv lus hais txog Npa‑asa lawd, vim yog tim tej kev txhaum uas Npa‑asa tau ua thiab nws tus tub Ela tau ua, thiab ob tug tau coj cov Yixayee ua txhaum, thiab tim ob tug tej dab mlom uas ua rau Yawmsaub uas yog cov Yixayee tus Vajtswv chim kawg. Lwm yam haujlwm uas Ela ua thiab txhua yam uas nws ua mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Xyoo nees nkaum xya uas Axa ua vajntxwv kav Yuda mas Xili ua vajntxwv kav tau xya hnub hauv lub moos Thilaxa. Mas thaum ntawd Yixayee cov tub rog tabtom vij ntaus lub moos Kinpethoo uas yog cov Filixatee ib lub moos. Mas cov tub rog hauv lub yeej ntawd hnov xov tias, “Xili tau fav xeeb thiab muab vajntxwv Ela tua lawm.” Ces cov Yixayee sawvdaws thiaj tsa Ooli uas ua thawj kav tub rog sawv ua vajntxwv kav cov Yixayee hnub ntawd rau hauv lub yeej. Ooli thiaj tawm ntawm Kinpethoo mus thiab cov Yixayee sawvdaws kuj nrog nws mus vij ntaus lub moos Thilaxa. Thaum Xili pom tias Ooli lawv txeeb tau lub moos lawm ces nws txawm nkag rau hauv lub chaw ruaj khov hauv nruab nrab vajntxwv lub tsev, ces nws txawm muab vajntxwv lub tsev ntawd hlawv, nws kub hnyiab tuag rau hauv lawm. Qhov uas nws tuag li ntawd yog vim tej kev txhaum uas nws ua, yog nws ua tej uas Yawmsaub pom tias phem thiab nws taug nraim Yelaunpau‑as tus neev taw ua txhaum thiab coj cov Yixayee ua txhaum. Lwm yam haujlwm uas Xili ua thiab qhov uas nws ntaus tswvyim fav xeeb twb muab sau cia rau hauv phau ntawv uas hais txog cov Yixayee tej vajntxwv li keeb kwm. Ces cov Yixayee txawm faib kiag ua ob pab, ib pab tuaj Kina tus tub Thini tog yuav tsa nws ua vajntxwv, ib pab tuaj Ooli tog. Tiamsis cov uas tuaj Ooli tog tua yeej cov uas tuaj Kina tus tub Thini tog mas Thini thiaj tuag lawm ces Ooli thiaj sawv kiag ua vajntxwv. Xyoo peb caug ib uas Axa ua vajntxwv kav Yuda mas Ooli pib ua vajntxwv kav Yixayee, nws kav tau kaum ob xyoos. Nws nyob hauv lub moos Thilaxa kav tau rau xyoo. Nws yuav lub roob Xamali ob tala nyiaj ntawm Semaw, thiab nws ua ntsa loog ruaj khov rau saum lub roob ntawd thiab muab ua ib lub nroog tis npe hu ua Xamali raws li lub roob ntawd tus tswv Semaw lub npe. Ooli tau ua tej uas Yawmsaub pom tias phem kawg li, nws ua phem heev dua tej vajntxwv uas nyob ua nws ntej. Rau qhov nws taug nraim Nenpa tus tub Yelaunpau‑as tus neev taw ua txhaum thiab coj cov Yixayee ua txhaum, yog lawv ua tej dab mlom thiaj ua rau Yawmsaub uas yog cov Yixayee tus Vajtswv chim kawg. Lwm yam haujlwm uas nws ua thiab tus peevxwm uas nws ua tau mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Ooli tuag mus nrog nws tej poj koob yawm txwv nyob. Lawv muab nws log rau hauv lub nroog Xamali, nws tus tub Ahaj sawv ua vajntxwv nyob nws chaw. Xyoo peb caug yim uas Axa ua vajntxwv kav Yuda mas Ooli tus tub Ahaj pib ua vajntxwv kav Yixayee, nws nyob hauv lub nroog Xamali kav tau nees nkaum ob xyoos. Ooli tus tub Ahaj kuj ua tej uas Yawmsaub pom tias phem heev dua li lwm tus vajntxwv uas nyob ua nws ntej thiab. Qhov uas Ahaj ua txhaum ib yam li Nenpa tus tub Yelaunpau‑as tseem yog qhov me xwb, qhov txhaum loj dua li ntawd yog nws mus yuav cov Xaidoo tus vajntxwv Enpa‑a tus ntxhais Yexenpee thiab mus pe teev dab Npa‑as. Nws ua ib lub thaj xyeem rau Npa‑as rau hauv lub tsev uas nws ua teev dab Npa‑as rau hauv lub nroog Xamali. Thiab Ahaj ua ib tug ncej dab Asela. Ahaj ua tej kev phem kev txhaum ua rau Yawmsaub uas yog cov Yixayee tus Vajtswv chim kawg, nws ua heev dua tej vajntxwv uas kav Yixayee nyob ua nws ntej ua. Lub sijhawm uas nws ua vajntxwv ntawd Hi‑ee uas yog neeg Npe‑ee rov ua lub moos Yelikhau dua. Thaum nws ua tej taw tiag lub moos ntawd nws tus tub hlob Anpilas thiaj tuag. Thaum nws ua tej rooj loog nws tus tub ntxawg Xeku thiaj tuag, raws li tej lus uas Yawmsaub txib Noo tus tub Yausua hais lawd. Eliya uas yog neeg Thinpi nyob hauv lub moos Thinpi hauv Kile‑a tebchaws hais rau Ahaj tias, “Muaj cov Yixayee tus Vajtswv Yawmsaub uas kuv ua koom tu muaj txojsia nyob pom, ob peb xyoos tom ntej no yeej yuav tsis muaj lwg tsis muaj nag los li tsuas yog kuv hais kom muaj ces thiaj muaj xwb.” Ces Yawmsaub hais lus tuaj rau Eliya tias, “Cia li tawm ntawm no mus rau sab hnub tuaj, mus nraim cev rau ntawm ntug dej Kheli uas nyob ntawm tus dej Yaladee sab hnub tuaj. Koj yuav haus tus dej ntawd thiab kuv twb hais kom cov uab lag tuaj yug koj qhov ntawd.” Ces Eliya txawm mus thiab ua raws li Yawmsaub hais. Nws mus nyob ntawm ntug dej Kheli uas nyob ntawm tus dej Yaladee sab hnub tuaj. Ces thaum tagkis thiab thaum tsaus ntuj uab lag txawm kwv ncuav thiab nqaij tuaj rau nws noj, thiab nws haus tus dej ntawd. Ces tsis ntev tus dej ntawd txawm qhuav vim yog nag tsis los rau hauv lub tebchaws li. Mas Yawmsaub hais lus tuaj rau Eliya tias, “Cia li sawv tsees mus rau lub moos Xalefa uas zwm rau lub moos Xaidoo thiab nyob qhov ntawd. Kuv twb hais kom ib tug poj ntsuam uas nyob qhov ntawd yug koj lawm.” Nws txawm sawv tsees mus rau lub moos Xalefa. Thaum nws mus txog ntawm rooj loog ua ciav ib tug poj ntsuam tabtom khaws taws. Nws txawm hais rau tus pojniam ntawd tias, “Thov koj nqa ib tais dej tuaj rau kuv, kuv thiaj li tau haus.” Thaum tus pojniam ntawd yuav mus nqa dej tuaj, nws txawm hu tus pojniam ntawd tias, “Thov coj ib qho ncuav hauv txhais tes tuaj rau kuv thiab.” Tus pojniam ntawd teb tias, “Muaj Yawmsaub uas yog koj tus Vajtswv muaj txojsia nyob pom, kuv tsis muaj ib lub ncuav dabtsi uas cub lawm, tsuas muaj ib taus tes hmoov hauv lub tais thiab mentsis roj hauv lub lam hwj xwb. Nimno kuv tabtom khaws mentsis taws no coj mus npaj rau kuv thiab kuv tus tub wb noj tag es yuav tuag.” Eliya txawm hais rau nws tias, “Koj tsis txhob ntshai, cia li mus ua raws li koj hais. Tiamsis koj cia li ua ib lub nyuag ncuav me me coj tuaj rau kuv tso, mam li ua rau koj thiab koj tus tub. Rau qhov Yawmsaub uas yog cov Yixayee tus Vajtswv hais li no tias, ‘Cov hmoov hauv lub tais yuav tsis tag, cov roj hauv lub lam hwj yuav tsis tu mus txog hnub uas Yawmsaub tso nag los rau hauv lub tebchaws.’ ” Tus pojniam ntawd txawm mus ua raws li Eliya hais. Mas Eliya thiab tus pojniam ntawd thiab nws tsev neeg kuj noj tau ntau hnub. Cov hmoov hauv lub tais kuj tsis tag, cov roj hauv lub lam hwj kuj tsis tu, raws li Yawmsaub tej lus uas nws hais rau Eliya. Dhau ntawd los tus pojniam uas yog tswv tsev ntawd tus tub txawm mob mas mob hnyav heev tsis muaj sia lawm. Nws txawm hais rau Eliya tias, “Au Vajtswv tus neeg, kuv thab txog koj dabtsi? Koj tuaj rau ntawm kuv ua kom nco txog kuv tej kev txhaum es ua rau kuv tus tub tuag.” Eliya hais rau nws tias, “Muab koj tus tub los rau kuv.” Nws txawm muab tus tub ntawd hauv tus pojniam xubntiag puag nkaus nce mus rau txheej tsev saud hauv lub txaj uas nws nyob, thiab muab tso pw rau saum nws lub txaj. Eliya thov hu Yawmsaub hais tias, “Au Yawmsaub uas yog kuv tus Vajtswv, koj coj tej xwm txheej phem los raug tus poj ntsuam uas kuv nrog nws nyob no es muab nws tus tub tua pov tseg lov?” Ces nws txawm pw tsuam tus menyuam ntawd peb zaug, thiab quaj thov Yawmsaub tias, “Au Yawmsaub uas yog kuv tus Vajtswv, thov tus menyuam no tus ntsuj plig rov los rau hauv nws.” Yawmsaub mloog Eliya tej lus thov, mas tus menyuam tus ntsug plig thiaj rov los rau hauv nws, nws thiaj rov ciaj sia. Ces Eliya txawm puag tus menyuam nqes txheej saud los rau hauv lub tsev thiab muab tus menyuam rau leej niam. Eliya hais tias, “Saib nawj, koj tus tub tseem muaj txojsia nyob.” Tus pojniam ntawd hais rau Eliya tias, “Nimno kuv paub tseeb tias koj yog Vajtswv tus neeg, thiab Yawmsaub tej lus uas nyob hauv koj lub qhov ncauj muaj tseeb.” Tau ntau hnub tom qab Yawmsaub hais lus tuaj rau Eliya rau xyoo uas peb tias, “Cia li mus tshwm plaws rau Ahaj pom koj, mas kuv yuav tso nag los rau hauv lub tebchaws.” Eliya kuj mus yuav tshwm rau Ahaj pom. Tej kev tshaib nqhis ntawd hnyav kawg rau hauv Xamali tebchaws. Ahaj txawm hu Aupadiya uas yog tus thawj saib vajntxwv tsev tuaj cuag nws. Aupadiya hwm Yawmsaub heev. Thaum Yexenpee tua Yawmsaub cov xibhwb cev lus, Aupadiya coj ib puas tus xibhwb mus zais rau hauv tej qhov tsua ib lub qhov tsua tsib caug leej, thiab muab ncuav muab dej yug lawv. Ahaj hais rau Aupadiya tias, “Cia li mus rau txhua lub qhov dej txhawv thiab txhua lub hav thoob plaws lub tebchaws. Tej zaum wb yuav nrhiav tau zaub los cawm tej nees tej luj txwv txojsia thiab tej tsiaj thiaj tsis tuag.” Yog li ntawd ob tug thiaj li muab lub tebchaws faib rau ob tug mus nrhiav. Ahaj thiaj mus dua ib txojkev, Aupadiya mus dua ib txojkev. Thaum Aupadiya tabtom taug kev mus, ua ciav Eliya tuaj ntsib nws. Aupadiya cim tau nws ces txawm khwb nkaus pe nws hais tias, “Kuv tus tswv Eliya, yog koj tiag lov?” Eliya teb tias, “Yog kuv ntag. Koj cia li mus hais rau koj tus tswv tias, ‘Eliya nyob ntawm no.’ ” Aupadiya hais tias, “Kuv ua txhaum dabtsi es koj yuav muab kuv uas yog koj tus qhev rau hauv Ahaj txhais tes rau nws tua pov tseg? Muaj koj tus Vajtswv Yawmsaub muaj txojsia nyob pom, tsis muaj ib haiv neeg lossis ib lub tebchaws twg uas kuv tus tswv tsis txib kuv mus txog. Thaum lawv hais tias, ‘Eliya tsis nyob ntawm no,’ mas Ahaj yuav kom haiv neeg ntawd lossis lub tebchaws ntawd cog lus twv tias lawv nrhiav tsis tau koj. Nimno koj tseem hais tias, ‘Cia li mus hais rau koj tus tswv tias, Eliya nyob ntawm no.’ Ces thaum kuv tawm ntawm koj mus lawd, Yawmsaub tus Ntsuj Plig yuav coj koj mus rau qhovtwg kuv tsis paub. Yog li ntawd, thaum kuv mus hais rau Ahaj es nws tuaj nrhiav tsis tau koj, ces nws yuav muab kuv tua pov tseg xwb, txawm yog kuv uas yog koj tus qhev tau hwm Yawmsaub txij thaum hluas los kuj xij. Tsis muaj leejtwg hais rau koj uas yog kuv tus tswv paub tias kuv tau ua dabtsi rau thaum Yexenpee tua Yawmsaub cov xibhwb uas cev lus lov? Kuv muab Yawmsaub cov xibhwb ntawd ib puas leej zais hauv tej qhov tsua ib lub qhov tsua tsib caug leej, thiab muab ncuav muab dej yug lawv. Nimno koj hais tias, ‘Cia li mus hais rau koj tus tswv tias, Eliya nyob ntawm no,’ ces vajntxwv yuav muab kuv tua pov tseg.” Mas Eliya hais tias, “Yawmsaub uas muaj hwjchim loj kawg nkaus uas kuv ua koom muaj txojsia nyob pom, hnub no kuv yeej yuav tshwm plaws rau Ahaj pom.” Aupadiya thiaj mus cuag Ahaj thiab qhia nws paub. Ces Ahaj txawm mus ntsib Eliya. Thaum Ahaj pom dheev Eliya, Ahaj hais rau nws tias, “No yog koj lov, tus uas ua ceeblaj rau cov Yixayee?” Mas Eliya teb tias, “Tsis yog kuv ua kev ceeblaj rau cov Yixayee, yog koj ua ntag thiab koj txiv tsev neeg ua, rau qhov nej tau tso Yawmsaub tej lus nkaw tseg mus raws kua tej dab Npa‑as. Vim li no koj cia li xa xov thiab sau cov Yixayee sawvdaws tuaj ua ke cuag kuv rau saum lub roob Khamee, thiab hu plaub puas tsib caug leej txiv neeb uas teev dab Npa‑as thiab plaub puas leej txiv neeb uas teev dab Asela tuaj, yog cov uas nrog Yexenpee koom rooj noj haus ua ke.” Ahaj txawm xa xov mus thoob plaws cov Yixayee sawvdaws thiab sau zog cov txiv neeb tuaj ua ke rau saum lub roob Khamee. Eliya txawm txav los ze rau ntawm cov pejxeem sawvdaws thiab hais tias, “Nej tseem yuav ua siab ywj fab ywj fwj rau ob tog mus ntev li cas? Yog Yawmsaub yog Vajtswv, cia li raws nws qab mus. Yog dab Npa‑as yog Vajtswv, cia li raws nws qab mus.” Cov pejxeem tsis teb nws ib los li. Ces Eliya txawm hais rau cov pejxeem tias, “Kuv mas tshuav kuv tib leeg yog Yawmsaub tus xibhwb cev lus xwb. Tiamsis Npa‑as cov txiv neeb muaj plaub puas tsib caug leej. Thov muab ob tug txiv nyuj rau peb. Cia lawv xaiv ib tug rau lawv, muab txiav ua tej ywb yav thiab muab tso rau saum cub tawg tiamsis tsis txhob rauv taws. Thiab kuv yuav npaj dua ib tug txiv nyuj tso rau saum cub tawg thiab tsis rauv taws. Nej cia li hu nej tus dab lub npe thov mas kuv yuav hu Yawmsaub lub npe thov. Saib tug twg tso hluavtaws los teb mas tus ntawd thiaj yog Vajtswv tiag.” Cov pejxeem sawvdaws teb tias, “Ua li uas hais kod zoo lawm.” Eliya hais rau dab Npa‑as cov txiv neeb tias, “Nej cia li xaiv ib tug txiv nyuj rau nej thiab npaj ua ntej rau qhov nej muaj coob leej. Nej cia li thov hu nej tus dab lub npe, tiamsis tsis txhob rauv taws.” Lawv txawm coj tus txiv nyuj uas muab rau lawv los thiab npaj thiab hu dab Npa‑as lub npe thaum sawv ntxov mus txog tav su thov hais tias, “Au Npa‑as, thov teb peb lauj!” Tiamsis tsis muaj ib lub suab tsis muaj leejtwg teb kiag li. Lawv dhia ua nchia taw puag ncig lub thaj uas lawv ua ntawd. Thaum tav su Eliya hais twm lawv tias, “Hu nrov nrov li, rau qhov nws yog ib tug timtswv. Tej zaum nws lub siab yuj mus rau lwm qhov lawm lossis nws mus tom hav nroj lossis mus kev deb lawm, lossis tej zaum nws tseem tsaug zog thiab nej yuav tsum tsa nws sawv.” Lawv kuj qw nrov nrov, thiab muab ntaj muab hmuv los suam lawv lub cev raws li lawv kevcai ua ntshav los liab pes vog lawv ib ce. Thaum dhau tav su lawd lawv qw vwm loj vwm leg mus txog lub sijhawm uas teem cia ua kevcai hlawv xyeem los tsis muaj ib lub suab tsis muaj leejtwg teb tsis muaj leejtwg quav ntsej li. Ces Eliya txawm hais rau cov pejxeem sawvdaws tias, “Cia li txav los ze kuv.” Cov pejxeem sawvdaws kuj txav los ze nws. Mas nws kho Yawmsaub lub thaj uas raug muab rhuav pob tag lawd. Eliya nqa kaum ob lub pob zeb los npaum li Yakhauj cov tub li xeem, yog tus uas Yawmsaub hais lus tuaj rau nws tias, “Koj npe yuav hu ua Yixayee,” thiab nws muab cov pob zeb ntawd los teeb ua lub thaj rau Yawmsaub lub npe. Nws khawb ib tug kwj vij lub thaj txaus ntim ob xe‑a noob qoob. Nws muab taws tso tib zoo thiab muab tus txiv nyuj txiav ua tej ywb yav thiab muab tso rau saum cov taws. Nws hais tias, “Cia li ntaus dej ntim rau plaub lub hub thiab muab hliv ywg rau saum tej uas yuav hlawv xyeem thiab saum cov taws.” Nws hais tias, “Cia li rov qab ywg zaum ob.” Lawv kuj ywg zaum ob. Nws hais tias, “Cia li ywg zaum peb.” Lawv kuj ywg zaum peb. Mas dej ntws nto puag ncig lub thaj thiab puv nkaus tus kwj. Thaum txog lub sijhawm uas teem cia ua kevcai hlawv xyeem, Eliya uas cev Vajtswv lus txav los ze thiab hais tias, “Au Yawmsaub uas yog Aplahas, Yiha thiab Yixayee tus Vajtswv, hnub no thov qhia sawvdaws paub tias koj yog Vajtswv hauv cov Yixayee thiab paub tias kuv yog koj tus tub qhe thiab kuv ua tej no huvsi raws li koj tej lus. Thov teb kuv, au Yawmsaub, thov teb kuv, xwv cov neeg no thiaj paub tias Yawmsaub koj yog Vajtswv thiab koj ua kom lawv lub siab tig rov los.” Ces Yawmsaub tso hluavtaws poob los kub tej uas muab ua kevcai hlawv xyeem thiab kub cov taws thiab tej pob zeb thiab tej hmoov av thiab ua cov dej hauv tus kwj qhuav tag. Thaum cov neeg sawvdaws pom tej ntawd, lawv kuj khwb pes nkaus thiab hais tias, “Yawmsaub nws yog Vajtswv, Yawmsaub nws yog Vajtswv tiag.” Thiab Eliya hais rau lawv tias, “Cia li ntes dab Npa‑as cov txiv neeb, tsis txhob cia ib tug khiav dim li.” Mas lawv ntes cov ntawd los, mas Eliya coj cov ntawd mus rau nram tus dej Khisoo thiab muab tua rau qhov ntawd. Eliya hais rau Ahaj tias, “Koj cia li mus noj mus haus rau qhov muaj suab tuam tsam nag los lawm.” Ahaj thiaj mus noj haus. Ces Eliya txawm nce mus rau saum lub ncov roob Khamee. Nws khoov ntshis rau hauv av lub plhu ti nkaus ob lub hauv caug. Thiab nws hais rau nws tus qhev tias, “Cia li sawv tsees saib mus rau nram hiavtxwv.” Nws thiaj sawv tsees mus saib thiab hais tias, “Tsis muaj dabtsi li.” Eliya hais tias, “Cia li rov mus saib dua xya zaus.” Thaum txog zaum xya tus qhev hais tias, “Saib nawj, muaj ib qho huab me me dav li lub xib teg tawm hauv hiavtxwv tuaj.” Mas Eliya hais tias, “Koj cia li mus hais rau Ahaj tias, ‘Koj cia li hwbxwm tsheb nees es rov mus tsev tsam ces nag los tav koj kev.’ ” Ib pliag ntshis xwb lub ntuj txawm tsaus ntais muaj huab thiab cua mas nag los hlob heev. Ahaj caij tsheb nees rov qab mus rau lub moos Yile‑ee. Yawmsaub txhais tes los rau saum Eliya, nws thiaj qaws kiag tsho rau ntawm duav thiab dhia huas Ahaj ntej xub mus txog ntawm rooj loog Yile‑ee. Ahaj txawm piav txhua yam uas Eliya ua thiab qhov uas nws xuas ntaj tua cov txiv neeb huvsi rau Yexenpee paub. Ces Yexenpee txawm tso ib tug xa xov mus hais rau Eliya tias, “Yog tagkis lub sijhawm no kuv tsis ua rau koj txojsia zoo ib yam li cov uas tu siav ntawd, kuj cia tej dab rau txim rau kuv thiab rau hnyav dua.” Ces Eliya ntshai heev, thiab sawv tsees khiav kom dim txojsia. Nws mus txog rau lub moos Npe‑awsenpa hauv Yuda tebchaws thiab tseg nws tus qhev nyob qhov ntawd. Tiamsis nws tib leeg khiav mus ib hnub ke hauv tebchaws moj sab qhua thiab mus zaum hauv ib tsob nyuag qab ntoo ntxhov thiab thov Yawmsaub cia nws tuag, hais tias, “Txaus kuv lawm lauj! Au Yawmsaub, nimno thov koj rho kuv txojsia mus, rau qhov kuv zoo tsis dua li kuv tej poj koob yawm txwv.” Ces nws txawm pw tsaug zog rau hauv tsob qab ntoo ntawd, ces txawm muaj ib tug tubtxib saum ntuj los kov nws thiab hais rau nws tias, “Cia li sawv tsees los noj mov.” Eliya tsa muag ntsia ua ciav pom muaj ib lub ncuav ci saum tej pob zeb uas kub lug thiab muaj ib lub nyuag hub dej txawb ncaj ntawm nws taubhau. Nws txawm noj thiab haus ces rov qab pw. Yawmsaub tus tubtxib saum ntuj kuj rov los dua zaum ob kov nws thiab hais tias, “Cia li sawv tsees los noj mov, koj thiaj li muaj zog taug txojkev uas koj mus.” Nws txawm sawv tsees los noj thiab haus tag mas cov mov ntawd pub nws muaj zog mus tau plaub caug hnub plaub caug hmo li txog Vajtswv lub roob Haule. Nws mus txog ib lub qhov tsua ces txawm mus so ib hmos rau hauv. Mas Yawmsaub hais lus tuaj rau nws, thiab hais rau nws tias, “Eliya, koj ua dabtsi ntawm no?” Eliya hais tias, “Kuv kub siab lug rau Vajtswv Yawmsaub uas muaj hwjchim loj kawg nkaus, vim cov Yixayee muab koj tej lus cog tseg tso tseg, thiab rhuav tej thaj uas xyeem rau koj pov tseg thiab xuas ntaj tua koj cov xibhwb cev lus. Tsuas tshuav kuv tib leeg xwb los lawv tseem nrhiav txov kuv txojsia thiab.” Mas Yawmsaub hais tias, “Cia li tawm mus sawv saum lub roob tab meeg Yawmsaub xubntiag, vim Yawmsaub yuav hla los mus.” Mas cua ntsawj hlob hlob thiab muaj zog heev ua rau tej roob tawg pleb zom zaws thiab tej pob zeb dhia dawb vog rau ntawm Yawmsaub xubntiag, tiamsis Yawmsaub tsis nyob hauv tej cua ntawd. Dhau tej cua ntawd lawm, av txawm qeeg ua zog koog, tiamsis Yawmsaub kuj tsis nyob hauv cov av qeeg ua zog koog ntawd. Dhau av qeeg ua zog koog lawm, kuj muaj hluavtaws, tiamsis Yawmsaub tsis nyob hauv cov hluavtaws ntawd. Dhau cov hluavtaws ntawd lawm muaj ib lub suab hais yau yau tuaj. Thaum Eliya hnov lawd, nws txawm muab nws lub tsho ntev kauv nws lub ntsej muag tawm mus sawv ntawm roob tsuas, ces txawm muaj ib lub suab hais tuaj rau nws tias, “Eliya, koj ua dabtsi ntawm no?” Nws teb tias, “Kuv kub siab lug rau Vajtswv Yawmsaub uas muaj hwjchim loj kawg nkaus, vim cov Yixayee muab koj tej lus cog tseg tso tseg, thiab rhuav tej thaj uas xyeem rau koj pov tseg thiab xuas ntaj tua koj cov xibhwb cev lus. Tsuas tshuav kuv tib leeg xwb los lawv tseem nrhiav txov kuv txojsia thiab.” Mas Yawmsaub hais rau nws tias, “Cia li rov qab taug koj txojkev mus rau hauv tebchaws moj sab qhua ntawm Damaxaka. Thaum koj mus txog lawd, koj cia li hliv roj tsa Haxa‑ee ua vajntxwv kav Alas tebchaws. Thiab koj yuav hliv roj tsa Yehu uas yog Nisi tus tub ua vajntxwv kav Yixayee tebchaws. Thiab tsa Elisa uas yog Safa tus tub uas yog neeg hauv lub moos Anpee Mehaula ua xibhwb cev Vajtswv lus nyob koj chaw. Mas tus uas dim Haxa‑ee rab ntaj Yehu yuav muab tua. Tus uas dim Yehu rab ntaj Elisa yuav muab tua. Tiamsis kuv yuav tseg xya txhiab leej hauv cov Yixayee cia, yog txhua lub hauv caug uas tsis tau pe dab Npa‑as thiab txhua lub qhov ncauj uas tsis tau nwj tus dab mlom ntawd.” Eliya txawm tawm qhov ntawd mus. Nws mus ntsib Elisa uas yog Safa tus tub tabtom laij teb, muaj kaum ib nkawg nyuj laij ua nws ntej, nws laij nkawm uas kaum ob. Eliya txawm hla los mus thiab muab nws lub tsho ntev coj mus khwb nkaus rau Elisa. Elisa txawm tso plhuav nkawm nyuj ntawd tseg dhia raws Eliya qab thiab hais tias, “Thov cia kuv mus nwj thiab fim ncaim kuv niam kuv txiv tso kuv li nrog koj mus.” Eliya hais rau nws tias, “Cia li mus. Kuv twb ua dabtsi rau koj lawm?” Ces Elisa txawm tso qhov uas nws raws Eliya qab ntawd rov los muab nws nkawm nyuj tua, muab rab quab rauv hau nqaij nyuj pub rau tej neeg noj. Ces nws txawm sawv tsees raws Eliya qab mus thiab tu Eliya. Cov Alas tus vajntxwv Npeehada sau nws cov tub rog huvsi tuaj ua ke. Muaj peb caug ob tug vajntxwv nrog nws mus thiab nws muaj nees thiab tsheb ua rog. Nws mus vij lub nroog Xamali thiab ua rog rau lub nroog ntawd. Nws tso tej tub tshaj xo mus rau hauv cov Yixayee tus vajntxwv Ahaj lub nroog mus hais rau vajntxwv tias, “Npeehada hais li no tias, ‘Koj tej nyiaj tej kub yog kuv li, koj tej pojniam thiab koj tej menyuam uas zoo kawg yog kuv li.’ ” Cov Yixayee tus vajntxwv teb tias, “Vajntxwv uas yog kuv tus tswv, yeej yog li uas koj hais ntag, kuv yeej yog koj li, tej uas kuv muaj yeej yog koj li.” Cov uas tshaj xo rov qab tuaj hais tias, “Npeehada hais li no tias, ‘Kuv twb xa xov rau koj tias koj cia li xa nyiaj xa kub xa koj pojniam menyuam mus rau kuv. Mas tagkis kwvlam lub sijhawm no kuv yuav xa kuv cov tub teg tub taws tuaj cuag koj. Lawv yuav tuaj xawb koj vaj koj tsev thiab xawb koj tej nom tswv tej vaj tse, mas tej uas koj nyiam lawv yuav txeeb coj huvsi mus.’ ” Ces Yixayee tus vajntxwv txawm hu cov kev txwj laus hauv lub tebchaws tuaj mas hais tias, “Sim saib, tus yawg ntawd nrhiav kev tuaj txob plaub rau peb. Nws tso neeg tuaj yuav muab kuv tej pojniam menyuam thiab kuv tej nyiaj tej kub los kuv tsis kwv tsis tawv li.” Mas cov kev txwj laus thiab cov pejxeem sawvdaws hais rau vajntxwv tias, “Tsis txhob mloog nws tsis txhob yeem li.” Nws thiaj hais rau Npeehada tej tub tshaj xo tias, “Nej cia li hais rau vajntxwv uas yog kuv tus tswv tias, ‘Txhua yam uas thawj zaug nws kom kuv uas yog nws tus qhev muab rau nws ntawd mas kuv muab tau rau nws, tiamsis tej lus uas nws hais zaum tom qab no mas kuv ua tsis tau.’ ” Mas cov tub tshaj xo rov mus hais rau Npeehada li ntawd. Mas Npeehada xa xov rov tuaj dua hais tias, “Yog cov hmoov av hauv Xamali no txaus cov neeg uas nrog kuv tuaj ib leeg tsuab ib taus tes mas thov cia tej dab ntuj dab teb rau txim rau kuv hnyav dua.” Mas cov Yixayee tus vajntxwv teb mus tias, “Cia li hais rau Npeehada tias, ‘Tus uas tseem tabtom muab cuab yeej ua rog hnav tsis txhob khav theeb yam li tus uas twb ua rog tiav es muab cuab yeej ua rog hle lawm.’ ” Npeehada hnov tej lus no rau thaum nws tabtom nrog cov vajntxwv haus cawv txiv hmab ua ke hauv lawv lub tsev ntaub, nws txawm txhib nws cov tub rog tias, “Cia li npaj kom txhij.” Mas lawv thiaj npaj txhij zog yuav ntaus lub nroog ntag. Muaj ib tug xibhwb cev Vajtswv lus tuaj cuag cov Yixayee tus vajntxwv Ahaj thiab hais tias, “Yawmsaub hais li no tias, ‘Koj pom cov tub rog coob li no los tsis pom? Saib maj, hnub no kuv yuav muab lawv rau hauv koj txhais tes, koj thiaj yuav paub tias kuv yog Yawmsaub.’ ” Mas Ahaj hais tias, “Leejtwg yuav mus ntaus?” Tus xibhwb hais tias, “Yawmsaub hais li no tias, ‘Cov thawj uas kav hauv txhua lub xeev li tub rog hluas yuav mus ntaus ua ntej.’ ” Ahaj hais tias, “Tog twg yuav nqes tes ua ntej?” Tus xibhwb teb tias, “Koj tog yuav nqes tes ua ntej.” Ahaj thiaj li txhij tau cov thawj uas kav hauv txhua lub xeev li tub rog hluas muaj ob puas peb caug ob leeg, thiab tom qab txhij tag nrho cov Yixayee li tub rog huvsi tau xya txhiab leej. Lawv tawm mus rau thaum tav su mas Npeehada thiab peb caug ob tug vajntxwv uas pab nws tabtom haus cawv qaug rau hauv tej tsev ntaub. Cov thawj hauv txhua lub xeev li tub rog hluas xub ua ntej mus. Npeehada kuj xa ib co mus tshuaj saib mas lawv rov qab los hais rau nws tias, “Muaj neeg tawm hauv Xamali tuaj lawm.” Nws hais tias, “Yog lawv tuaj dawb tuaj huv kuj muab lawv ntes ciaj cia. Yog lawv tuaj ua rog kuj muab lawv ntes ciaj cia thiab.” Mas cov thawj hauv txhua lub xeev li tub rog thiaj li tawm hauv lub nroog mus, thiab cov tub rog sawvdaws kuj tawm raws qab mus. Ib leeg tua ib tug yeeb ncuab ces cov Alas txawm thim khiav mas cov Yixayee caum lawv mus. Cov Alas tus vajntxwv Npeehada txawm caij nees nrog cov tub rog caij nees khiav mus lawm. Cov Yixayee tus vajntxwv tawm mus ntaus yeej cov nees thiab cov tsheb ua rog thiab tua tau cov Alas tuag coob kawg li. Mas tus xibhwb cev Vajtswv lus thiaj tuaj cuag cov Yixayee tus vajntxwv thiab hais rau nws tias, “Cia li rov qab mus tsev mus npaj zog thiab ntaus tswvyim zoo zoo saib yuav ua li cas, rau qhov thaum lub ntuj qhua vajntxwv Alas yuav rov qab tuaj ntaus nej dua thiab.” Alas cov tub teg tub taws hais rau vajntxwv tias, “Cov Yixayee tej timtswv yog tej timtswv nruab roob lawv thiaj muaj zog dua peb. Cia peb mus ntaus lawv rau nram tiaj mas peb yuav muaj zog dua lawv tiag tiag li. Koj cia li ua li no, muab cov vajntxwv hle huvsi es tsa cov thawj rog nyob lawv chaw. Koj cia li sau tub rog kom tau npaum li qub, thiab sau nees thiab tsheb ua rog ntxiv rau cov uas poob tag lawm, mas peb yuav mus ntaus lawv rau nram tiaj mas peb yeej yuav muaj zog dua lawv tiag tiag li.” Npeehada kuj mloog lawv lus thiab ua raws li lawv hais ntawd. Thaum txog lub caij ntuj qhua Npeehada thiaj li txhij cov Alas ua tub rog nce mus rau lub moos Afe yuav ua rog rau cov Yixayee. Mas cov Yixayee kuj raug sau ua tub rog thiab npaj mov noj mus ua rog rau cov Alas. Cov Yixayee ua yeej nyob yam li ob pab nyuag tshis tsawg tsawg ncaj ntawm cov Alas xubntiag, tiamsis cov Alas mas nyob puv nkaus tej nras tiaj ntawd. Vajtswv li ib tug neeg tuaj hais rau cov Yixayee tus vajntxwv tias, “Yawmsaub hais li no tias, ‘Cov Alas hais tias Yawmsaub yog timtswv nruab roob xwb nws tsis yog timtswv nruab tiag. Vim li no kuv yuav muab pab neeg coob coob ntawd rau hauv koj txhais tes, mas koj yuav paub tias kuv yog Yawmsaub.’ ” Mas lawv ob tog ua yeej nyob sib ncaj tau xya hnub, mas hnub uas xya thiaj li ua rog. Cov Yixayee tua cov Alas uas ua tub rog mus kotaw tuag 100,000 leej rau hnub ntawd. Cov uas tshuav kuj khiav mus rau hauv lub moos Afe, mas lub ntsa loog ntawd kuj pob tais tuag ob vam xya txhiab leej thiab. Npeehada kuj khiav mus thiab nws khiav mus nyob hauv ib chav tsev hauv lub plawv moos ntawd. Mas nws cov tub teg tub taws hais rau nws tias, “Peb hnov tias Yixayee tej vajntxwv yog cov uas muaj lub siab khuvleej. Cia peb muab khaub seev tsaj los sia thiab muab ib co hlua los rig peb taubhau ces peb tawm mus cuag cov Yixayee tus vajntxwv, tej zaum nws yuav tseg koj txojsia cia.” Lawv thiaj muab khaub seev tsaj los sia thiab muab hlua rig taubhau mas mus cuag cov Yixayee tus vajntxwv thiab hais tias, “Npeehada uas yog koj tus qhev hais tias, ‘Thov tseg kuv txojsia cia.’ ” Mas vajntxwv teb tias, “Nws tseem ciaj sia thiab lov? Nws yog kuv kwv kuv tij.” Cov neeg ntawd tabtom tos ntsoov saib Ahaj yuav teb li cas ces lawv txawm khaws vajntxwv cov lus ntawd mas teb nplawg ntia tias, “Yog li uas koj hais tiag, Npeehada yeej yog koj kwvtij.” Mas vajntxwv hais tias, “Mus coj nws tuaj.” Ces Npeehada txawm tawm tuaj cuag Ahaj, ces Ahaj txawm kom Npeehada nce mus rau hauv nws lub tsheb ua rog. Ces Npeehada hais rau Ahaj tias, “Tej moos uas kuv txiv txeeb tau ntawm koj txiv los ntawd kuv muab thim rov qab rau koj. Koj yuav ua tsev kiab tsev khw rau hauv lub nroog Damaxaka kuj tau ib yam li kuv txiv tau ua rau hauv lub nroog Xamali.” Mas Ahaj hais tias, “Yog koj cog lus tseg li no kuv yuav tso koj dim.” Ahaj thiaj nrog Npeehada sib cog lus thiab muab nws tso mus. Yawmsaub hais rau ib tug xibhwb cev Vajtswv lus kom nws hais rau tib pab xibhwb ntawd ib tug hais tias, “Thov koj ntaus kuv ib teg.” Tiamsis tus yawg ntawd tsis kam ntaus nws. Ces nws txawm hais rau tus yawg ntawd tias, “Vim koj tsis mloog Yawmsaub tej lus mas thaum koj ncaim ntawm kuv mus lawd ib tug tsov ntxhuav yuav tom koj tuag.” Thaum nws ncaim ntawm tus xibhwb ntawd mus lawd ib tug tsov ntxhuav txawm los muab nws tom tuag lawm. Mas tus xibhwb ntawd nrhiav tau dua ib tug yawg ces nws hais tias, “Thov koj ntaus kuv ib teg.” Tus yawg ntawd txawm muab tus xibhwb ntawd ntaus ntsuab ib qho. Tus xibhwb cev Vajtswv lus thiaj mus lawm, nws mus tos vajntxwv ntawm ntug kev. Nws muab ntaub qhwv nws lub qhov muag tsis muaj leejtwg paub nws lawm. Thaum vajntxwv taug kev los nws txawm qw rau vajntxwv tias, “Kuv uas yog koj tus qhev mus rau hauv tshav rog mas muaj ib tug tub rog tig rov los coj ib tug txivneej los rau kuv thiab hais rau kuv tias, ‘Zov tus yawg no cia zoo zoo. Yog nws dim tau li cas mus lawd mas yuav muab koj txojsia pauv nws txoj lossis koj yuav tsum them ib tala nyiaj. ’ Ces thaum kuv tseem tab kaum rau qhov ub qhov no nws txawm ploj lawm.” Cov Yixayee tus vajntxwv txawm hais rau nws tias, “Koj yuav raug txim yam nkaus li ntawd ntag. Rau qhov koj twb hais li ntawd lawm.” Ces tus xibhwb txawm daws kiag daim ntaub uas npog nws qhov muag, ces cov Yixayee tus vajntxwv thiaj cim tau tias nws yog ib tug xibhwb cev Vajtswv lus. Ces tus xibhwb thiaj hais rau nws tias, “Yawmsaub hais li no tias, ‘Vim koj tau tso tus yawg uas nyob hauv koj txhais tes mus lawm, yog tus uas kuv tu kom muab ua puam tsuaj, mas koj txojsia yuav pauv nws txojsia, thiab koj cov neeg yuav tuag theej nws cov neeg.’ ” Mas cov Yixayee tus vajntxwv mus rau hauv nws lub vaj lub tsev hauv Xamali nyuaj siab kawg chim ntsej muag tsaus nti. Los rau tom qab no Nanpau uas yog neeg Yile‑ee muaj ib lub vaj txiv hmab nyob hauv lub moos Yile‑ee npuas vajntxwv Ahaj uas kav Xamali lub tsev. Mas Ahaj hais rau Nanpau tias, “Muab koj lub vaj txiv hmab rau kuv, kuv thiaj tau ua vaj zaub vim yog nyob ze kuv lub tsev. Kuv yuav muab dua ib lub vaj txiv hmab uas zoo dua pauv koj lub vaj no, lossis yog koj pom zoo kuv yuav muab nyiaj yuav kom txaus lub vaj no tus nqe.” Tiamsis Nanpau hais rau Ahaj tias, “Thov Yawmsaub tav kuv tsis txhob muab kuv tej poj koob yawm txwv qub txeeg qub teg rau koj.” Ahaj thiaj rov los tsev nyuaj siab thiab chim ua ntsej muag tsaus nti rau tej lus uas Nanpau uas yog neeg Yile‑ee hais rau nws, vim Nanpau tau hais tias, “Kuv yuav tsis muab kuv tej poj koob yawm txwv qub txeeg qub teg rau koj.” Ces nws txawm pw rau saum txaj fee plhu kiag tsis yeem noj mov li. Mas nws tus pojniam Yexenpee los nug nws tias, “Ua cas koj yuav nyuaj siab ua luaj tsis kam noj mov li?” Ahaj teb nws tias, “Vim yog kuv hais rau Nanpau uas yog neeg Yile‑ee tias, ‘Muab koj lub vaj txiv hmab muag rau kuv, lossis yog koj pom zoo kuv yuav muab dua ib lub vaj txiv hmab pauv rau koj.’ Tiamsis nws teb tias, ‘Kuv yuav tsis muab kuv lub vaj txiv hmab rau koj li.’ ” Ces nws tus pojniam Yexenpee hais rau nws tias, “Koj yog tus uas kav cov Yixayee los sas. Cia li sawv tsees los noj mov thiab ua lub siab xyiv fab hlo. Kuv yuav muab Nanpau uas yog neeg Yile‑ee lub vaj txiv hmab rau koj.” Nws txawm sau tsab ntawv ua Ahaj lub npe txam Ahaj lub txwm xa mus rau cov kev txwj laus thiab cov uas ua hlob uas nrog Nanpau nyob tib lub moos. Yexenpee sau hauv ntawv hais tias, “Cia li tshaj tawm kom yoo mov thiab tsa Nanpau nyob saum lub rooj siab hauv nruab nrab cov pejxeem, thiab kom ob tug neeg phem los nyob ncaj ntawm nws xubntiag, thiab kom ob tug kom nws hais tias nws tau cem foom Vajtswv thiab vajntxwv. Ces muab nws coj tawm mus thiab xuas pob zeb muab nws ntaus kom tuag.” Ces cov neeg hauv lub moos uas Nanpau nyob ntawd, cov kev txwj laus thiab cov uas ua hlob txawm ua raws li Yexenpee hais mus rau lawv raws li tsab ntawv uas nws sau mus rau lawv. Lawv thiaj tshaj tawm kom yoo mov thiab tsa Nanpau nyob saum lub rooj siab hauv nruab nrab cov pejxeem. Ces ob tug neeg phem ntawd txawm tuaj nyob ncaj ntawm Nanpau xubntiag, ces ob tug neeg phem ntawd txawm kom Nanpau tab meeg cov pejxeem tias, “Nanpau tau cem foom Vajtswv thiab vajntxwv.” Ces lawv txawm coj Nanpau tawm mus rau sab nraum lub moos thiab xuas pob zeb ntaus nws tuag. Ces lawv txawm xa xov rau Yexenpee hais tias, “Nanpau raug xuas pob zeb ntaus, nws tuag lawm.” Thaum Yexenpee hnov tias Nanpau raug xuas pob zeb ntaus thiab tuag lawm, Yexenpee txawm hais rau Ahaj tias, “Cia li sawv tsees mus txeeb kiag Nanpau uas yog neeg Yile‑ee lub vaj txiv hmab uas tsis kheev muab muag rau koj, rau qhov Nanpau tsis nyob nws tuag lawm.” Thaum Ahaj hnov tias Nanpau tuag lawm, Ahaj txawm sawv tsees mus rau hauv Nanpau uas yog neeg Yile‑ee lub vaj txiv hmab es mus txeeb kiag ua nws tug. Yawmsaub txawm hais lus tuaj rau Eliya uas yog neeg Thinpi tias, “Koj cia li sawv tsees mus ntsib Yixayee tus vajntxwv Ahaj uas kav hauv lub nroog Xamali. Saib maj, nws nyob hauv Nanpau lub vaj txiv hmab uas nws txeeb kiag yuav ua nws tug. Koj hais rau nws tias, ‘Yawmsaub hais li no tias, Koj tau tua thiab tseem txeeb kiag lub vaj los ua koj tug thiab lov?’ Thiab koj cia li hais rau nws tias, ‘Yawmsaub hais li no tias, Lub chaw uas dev yaim Nanpau cov ntshav, dev kuj yuav yaim koj cov ntshav qhov ntawd thiab.’ ” Ahaj txawm hais rau Eliya tias, “Kuv tus yeeb ncuab 'e, koj ntsib tau kuv lawm lov?” Eliya teb tias, “Kuv ntsib koj lawm rau qhov koj muab koj tus kheej muag mus ua tej uas Yawmsaub pom tias phem kawg. ‘Saib nawj, kuv yuav coj xwm txheej phem los raug koj, thiab kuv yuav rhuav tshem koj pov tseg huvsi thiab yuav muab Ahaj cov txivneej txhua tus tua tag nrho nws tej qhev thiab nws tej neeg ua kom tu noob nrho hauv cov Yixayee mus. Thiab kuv yuav ua kom koj caj ces zoo ib yam li Nenpa tus tub Yelaunpau‑as caj ces thiab ib yam li Ahiya tus tub Npa‑asa caj ces, rau qhov koj zes ua rau kuv chim thiab koj tau coj cov Yixayee ua txhaum muaj txim.’ Thiab Yawmsaub hais txog Yexenpee hais tias, ‘Dev yuav noj Yexenpee rau hauv Yile‑ee.’ Ahaj cov neeg tus uas tuag rau hauv lub nroog mas dev yuav noj, tus uas tuag rau sab nraud mas liaj dav saum nruab ntug yuav noj.” Tsis muaj leejtwg muab nws tus kheej muag mus ua tej uas Yawmsaub pom tias phem kawg yam li Ahaj uas nws tus pojniam Yexenpee txhob nws ua. Ahaj ua tej uas qias vuab tsuab kawg li rau qhov uas raws ncuj nciav tej dab mlom ib yam li cov Amaulai uas Yawmsaub muab laim ploj ntais ntawm cov Yixayee xubntiag lawm. Thaum Ahaj hnov tej lus ntawd, nws txawm dua rhe nws lub tsho muab khaub seev tsaj los hnav, thiab yoo mov thiab hnav khaub seev tsaj mus pw, thiab mus mus los los dai hau vias. Thiab Yawmsaub hais lus tuaj rau Eliya uas yog neeg Thinpi tias, “Koj twb pom Ahaj txo nws lub hwjchim rau ntawm kuv xubntiag lawm lov? Vim nws twb txo nws lub hwjchim ntawm kuv xubntiag lawm, kuv yuav tsis tso xwm txheej phem los rau nws sim neej, tiamsis kuv yuav tso xwm txheej phem los raug nws caj ces rau thaum nws tus tub sim neej.” Alas tebchaws thiab Yixayee tebchaws tseg tsis ua rog tau peb xyoos. Tiamsis xyoo uas peb Yuda tus vajntxwv Yehausafa mus tsham Yixayee tus vajntxwv. Yixayee tus vajntxwv hais rau nws cov tub teg tub taws tias, “Nej puas paub tias lub moos Lamau Kile‑a yog peb li, es peb yuav nyob twjywm tsis mus txeeb ntawm Alas tus vajntxwv txhais tes rov los lov?” Ahaj hais rau Yehausafa tias, “Koj yuav nrog kuv mus ua rog rau lub moos Lamau Kile‑a los tsis mus?” Mas Yehausafa hais rau Yixayee tus vajntxwv tias, “Koj zoo li cas kuv zoo li ntawd, kuv cov neeg kuj yog koj li neeg thiab kuv cov nees yog koj li nees.” Yehausafa hais rau Yixayee tus vajntxwv tias, “Thov nug saib Yawmsaub hais li cas tso.” Ces Yixayee tus vajntxwv txawm hu cov xibhwb cev Vajtswv lus kwvlam plaub puas leej tuaj ua ke mas hais rau lawv tias, “Tsim nyog kuv mus ua rog rau lub moos Lamau Kile‑a los tsis txhob mus?” Mas lawv teb tias, “Mus los maj, rau qhov Yawmsaub yuav muab lub moos ntawd rau hauv vajntxwv txhais tes.” Tiamsis Yehausafa hais tias, “Muaj dua lwm tus xibhwb cev Vajtswv lus uas peb nug tau thiab los tsis muaj lawm?” Yixayee tus vajntxwv hais rau Yehausafa tias, “Tseem tshuav ib tug yawg uas peb yuav kom ua nug rau Yawmsaub tau thiab, yog Mikhaya uas yog Ilas tus tub. Tiamsis kuv ntxub nws rau qhov nws tsis txeev cev lus zoo ntsig txog kuv kiag li, tsuas yog cev lus phem xwb.” Ces Yehausafa hais rau vajntxwv tias, “Tsis txhob hais li kod.” Yixayee tus vajntxwv hu ib tug tub teg tub taws los thiab hais tias, “Cia li coj Ilas tus tub Mikhaya tuaj sai sai.” Yixayee tus vajntxwv thiab Yehausafa tabtom nyob saum ob tug lub zwm txwv thiab hnav tej tsoos meej mom rau ntawm lub tshav ntaus qoob uas nyob ntawm lub rooj loog Xamali thiab cov xibhwb cev Vajtswv lus sawvdaws tabtom cev lus ntawm ob tug xubntiag. Mas Xedekhiya uas yog Khena‑ana tus tub txawm muab kav hlau ua ib txwm kub rau nws thiab hais tias, “Yawmsaub hais li no tias, ‘Koj yuav siv txwm kub no nrau cov Alas mus txog thaum lawv puam tsuaj tag.’ ” Thiab cov uas cev lus sawvdaws kuj cev lus ib yam nkaus li ntawd hais tias, “Cia li mus rau lub moos Lamau Kile‑a, yuav kov yeej, rau qhov Yawmsaub yuav muab lub moos ntawd rau hauv vajntxwv txhais tes.” Mas tus tub teg tub taws uas mus hu Mikhaya txawm hais rau Mikhaya tias, “Saib maj, cov xibhwb cev lus sawvdaws ua ib lub suab hais yam uas zoo rau vajntxwv xwb. Koj cia li hais zoo ib yam li lawv hais thiab hais yam uas zoo xwb.” Tiamsis Mikhaya hais tias, “Yawmsaub muaj txojsia nyob pom, Yawmsaub hais li cas rau kuv, kuv yuav tsum hais li ntawd xwb.” Thaum nws tuaj cuag vajntxwv, vajntxwv hais rau nws tias, “Mikhaya, tsim nyog peb yuav mus ua rog rau Lamau Kile‑a los tsis txhob mus?” Mikhaya teb nws tias, “Cia li mus los maj, yuav kov yeej. Yawmsaub yuav muab lub moos ntawd rau hauv vajntxwv txhais tes.” Vajntxwv txawm hais rau nws tias, “Kuv twb kom koj cog lus twv pes tsawg zaus lawm tias koj yuav tsum tuav Yawmsaub lub npe hais qhov tseeb xwb xwb li?” Mikhaya thiaj hais tias, “Kuv pom cov Yixayee sawvdaws raug khiav ua sab ua sua saum tej roob yam nkaus li pab yaj uas tsis muaj tus tswv yug. Thiab Yawmsaub hais tias, ‘Cov neeg no tsis muaj tus tswv, cia lawv nyias rov mus zoo rau nyias vaj nyias tsev.’ ” Cov Yixayee tus vajntxwv thiaj hais rau Yehausafa tias, “Kuv twb hais rau koj tias nws yuav tsis cev lus zoo ntsig txog kuv no nev, tsuas yog cev lus phem xwb, los tsis yog?” Thiab Mikhaya hais tias, “Yog li no cia li tig ntsej mloog Yawmsaub tej lus. Kuv pom Yawmsaub nyob saum nws lub zwm txwv thiab ib tsoom neeg saum ntuj sawv ntawm nws sab xis thiab sab laug. Mas Yawmsaub hais tias, ‘Leejtwg yuav ntxias Ahaj kom nws mus ntog tuag rau ntawm lub moos Lamau Kile‑a?’ Ib tug hais li ub, ib tug hais li no. Muaj ib tug plig txawm txav los sawv ntsug ntawm Yawmsaub xubntiag hais tias, ‘Kuv yuav ntxias nws.’ Yawmsaub hais rau tus plig ntawd tias, ‘Koj yuav ua li cas?’ Nws teb tias, ‘Kuv yuav mus thiab kuv yuav ua ib tug plig dag rau hauv nws cov xibhwb uas cev lus lub qhov ncauj.’ Yawmsaub hais tias, ‘Koj yuav mus ntxias nws, thiab koj yuav ua tau kom tiav. Koj cia li mus ua.’ Vim li ntawd nimno Yawmsaub thiaj muab tus plig dag tso rau hauv koj cov xibhwb uas cev lus txhua tus lub qhov ncauj. Yawmsaub twb teem tej xwm txheej phem no los raug koj lawm.” Ces Khena‑ana tus tub Xedekhiya txawm txav los tib tawg ncuav Mikhaya sab plhu thiab hais tias, “Yawmsaub tus Ntsuj Plig tawm ntawm kuv taug txojkev twg mus hais rau koj?” Mas Mikhaya hais tias, “Saib maj, koj yuav paub rau hnub uas koj khiav mus nraim cev rau chav tsev hauv nruab nrab.” Yixayee tus vajntxwv hais tias, “Cia li ntes kiag Mikhaya, coj nws rov mus cob rau Asmoo uas ua tim xyoob kav lub nroog thiab cob rau Yau‑as uas yog vajntxwv tus tub, thiab hais tias, ‘Vajntxwv hais li no tias, Muab tus yawg no kaw nkuaj thiab tsuas yog muab ncuav thiab dej rau nws xwb mus txog thaum kuv rov los txog zoo.’ ” Mikhaya hais tias, “Yog koj tseem rov los txog zoo, ces tsis yog Yawmsaub kom kuv hais tej lus no.” Thiab nws hais tias, “Nej sawvdaws cia li mloog nawj!” Yixayee tus vajntxwv thiab Yuda tus vajntxwv Yehausafa txawm mus rau Lamau Kile‑a lawm. Yixayee tus vajntxwv hais rau Yehausafa tias, “Kuv yuav hloov tsoos tsho ua cuav tsab mus ntaus rog, tiamsis koj mas koj hnav koj cev tsoos tsho meej mom.” Yixayee tus vajntxwv txawm hloov tsoos tsho ua cuav tsab txeem mus ua rog. Cov Alas tus vajntxwv hais rau peb caug ob tug thawj rog uas kav nws tej tsheb ua rog tias, “Tsis txhob tua tej tub rog tsis hais loj thiab yau, tsuas yog tua cov Yixayee tus vajntxwv xwb.” Thaum cov thawj rog uas kav tej tsheb ua rog pom Yehausafa, lawv hais tias, “Yog Yixayee tus vajntxwv tiag tiag li.” Lawv txawm tig hlo mus tawm tsam nws. Mas Yehausafa qw nrov nrov. Thaum cov thawj rog uas kav tej tsheb ua rog pom tias tsis yog Yixayee tus vajntxwv, lawv thiaj tseg tsis caum nws lawm. Muaj ib tug yawg lam rub hneev nti kwv yees tua mus raug Yixayee tus vajntxwv nkag plaws lub tsho hlau ib kem ntawm hauv siab. Ahaj thiaj hais rau tus uas tsav nws lub tsheb ua rog tias, “Cia li tig rov qab, coj kuv tawm hauv tshav rog mus, rau qhov kuv raug mob lawm.” Hnub ntawd kev sib ntaus sib tua loj heev, vajntxwv thiaj pheeb hauv nws lub tsheb ua rog tig ntsia ntsoov rau cov Alas mus txog yuav tsaus ntuj nws txawm tuag lawm. Cov ntshav ntawm nws qhov txhab ntws los rau hauv lub dab tsheb ua rog. Kwvlam thaum hnub poob qho muaj suab qw nrov thoob plaws hauv pab tub rog hais tias, “Txhua tus nyias rov mus rau nyias lub moos thiab mus rau nyias teb nyias chaw.” Vajntxwv thiaj tuag li no, mas lawv coj nws los rau hauv lub nroog Xamali, thiab muab nws log rau hauv Xamali. Lawv muab nws lub tsheb ua rog ntxuav ntawm lub pas dej Xamali, mas dev los yaim vajntxwv cov ntshav, yog lub chaw uas cov poj muag cev da dej, raws li Yawmsaub tej lus uas nws hais cia lawd. Lwm yam haujlwm uas Ahaj ua thiab txhua yam uas nws ua thiab lub tsev kaus ntxhw uas nws ua thiab tej moos huvsi uas nws kho dua tshiab twb muab sau cia rau hauv phau ntawv uas hais txog cov Yixayee tej vajntxwv li keeb kwm. Ahaj thiaj tuag mus nrog nws tej poj koob yawm txwv nyob. Nws tus tub Ahaxiya sawv nws chaw ua vajntxwv kav. Xyoo plaub uas Ahaj ua vajntxwv kav Yixayee mas Axa tus tub Yehausafa pib ua vajntxwv kav Yuda. Thaum Yehausafa pib ua vajntxwv nws hnub nyoog muaj peb caug tsib xyoos, nws nyob hauv Yeluxalees kav tau nees nkaum tsib xyoos. Nws niam npe hu ua Axunpa uas yog Sihi tus ntxhais. Nws ua raws li nws txiv Axa txojkev rau txhua qhov tsis tig mus rau sab twg li. Nws ua tej uas Yawmsaub pom tias zoo. Tiamsis tej chaw siab teev dab tseem tsis tau muab rhuav pov tseg, cov pejxeem tseem xyeem tsiaj thiab hlawv hmoov xyab rau saum tej chaw siab ntawd. Yehausafa kuj nrog cov Yixayee tus vajntxwv sib raug zoo tsis ua rog. Lwm yam haujlwm uas Yehausafa ua thiab nws lub hwjchim thiab nws tej kev ua rog mas twb muab sau cia rau hauv phau ntawv uas hais txog cov Yuda tej vajntxwv li keeb kwm. Tej txivneej muag cev ntawm tsev dab dhau nws txiv lawm los tseem tshuav nyob nws kuj muab ntxuav tawm hauv lub tebchaws huvsi pov tseg. Tsis muaj vajntxwv kav Edoo tebchaws lawm, muaj ib tug tim xyoob kav. Yehausafa ua tau ib co nkoj txwg zoo li cov Thasi ua mas yuav mus thauj tej kub ntawm Aufi los. Tiamsis cov nkoj ntawd mus tsis txog rau qhov cov nkoj cia li tawg piam tag rau ntawm Exi‑oo Kenpaw lawm. Ahaj tus tub Ahaxiya hais rau Yehausafa tias, “Thov cia kuv cov tub qhe nrog koj cov tub qhe tsav nkoj mus.” Tiamsis Yehausafa tsis yeem. Ces Yehausafa txawm tuag mus nrog nws tej poj koob yawm txwv nyob. Lawv muab nws log nrog nws tej poj koob yawm txwv ua ke rau hauv nws yawg koob Davi lub nroog. Mas nws tus tub Yehaulas sawv nws chaw ua vajntxwv kav. Xyoo kaum xya uas Yehausafa kav Yuda mas Ahaj tus tub Ahaxiya pib ua vajntxwv kav Yixayee hauv Xamali, nws kav Yixayee tau ob xyoos. Nws ua tej uas Yawmsaub pom tias phem thiab nws taug nraim nws txiv thiab nws niam thiab nws yawg Yelaunpau‑as uas yog Nenpa tus tub tus neev taw ua txhaum thiab coj cov Yixayee ua txhaum. Ahaxiya ua koom tu dab Npa‑as thiab pe hawm tus dab ntawd, ua rau Yawmsaub uas yog cov Yixayee tus Vajtswv chim kawg ib yam li nws txiv ua thiab. Thaum Ahaj tuag lawd cov Mau‑a txawm fav xeeb rau cov Yixayee. Ahaxiya poob qhov rais saum nws lub tsev txheej ob hauv lub nroog Xamali mas nws mob. Nws thiaj txib cov tub tshaj xo mus mas hais rau lawv tias, “Nej cia li mus nug dab Npa‑axenpu uas yog cov neeg hauv lub moos Ekhoo tus dab tias, kuv tus mob yuav zoo los tsis zoo.” Mas Yawmsaub tus tubtxib saum ntuj hais rau Eliya uas nyob hauv Thinpi tias, “Cia li sawv tsees mus ntsib Xamali tus vajntxwv cov tub tshaj xo mas hais rau lawv tias, ‘Tsis muaj Vajtswv nyob hauv Yixayee tebchaws lov nej thiaj mus nug Npa‑axenpu uas yog cov neeg Ekhoo tus dab?’ Vim li no Yawmsaub hais tias, ‘Ahaxiya yuav tsis nqes saum lub txaj uas nws mus pw ntawd los li, nws yeej yuav tuag xwb.’ ” Ces Eliya txawm mus lawm. Cov tub tshaj xo thiaj rov los rau ntawm vajntxwv mas vajntxwv nug lawv tias, “Ua li cas nej cia li rov qab los?” Lawv hais rau nws tias, “Muaj ib tug yawg tuaj ntsib peb mas hais rau peb tias, ‘Nej cia li rov qab mus hais rau tus vajntxwv uas txib nej tuaj tias, Yawmsaub hais li no tias, Tsis muaj Vajtswv nyob hauv Yixayee tebchaws lawm koj thiaj txib neeg mus nug dab Npa‑axenpu uas yog cov Ekhoo tus dab lov? Vim li no koj yuav tsis nqes saum lub txaj uas koj mus pw ntawd, koj yeej yuav tuag xwb.’ ” Vajntxwv hais rau lawv tias, “Tus uas tuaj ntsib nej thiab hais tej lus no rau nej yog neeg zoo li cas?” Lawv teb nws tias, “Nws hnav lub tsho ntaub plaub thiab nws sia ib txoj siv tawv ntawm duav.” Mas vajntxwv hais tias, “Tus kod yog Eliya uas nyob hauv Thinpi ntag.” Vajntxwv txawm txib ib tug thawj rog coj tsib caug leej tub rog uas nws kav mus rau ntawm Eliya. Nws nce mus cuag Eliya uas zaum saum lub pov roob mas hais rau Eliya tias, “Vajtswv tus neeg 'e, vajntxwv hais tias, ‘Koj cia li nqes los.’ ” Tiamsis Eliya teb tus thawj rog ntawd tias, “Yog tias kuv yog Vajtswv li ib tug neeg tiag, thov kom hluavtaws poob saum ntuj los hlawv koj thiab koj tsib caug leej tub rog kub hnyiab tag.” Ces hluavtaws txawm poob saum ntuj los hlawv nws thiab nws tsib caug leej ntawd kub hnyiab tag huvsi. Vajntxwv rov txib dua ib tug thawj rog coj tsib caug leej tub rog uas nws kav rov mus hais rau Eliya. Nws nce mus hais rau Eliya tias, “Vajtswv tus neeg 'e, vajntxwv hais tias, ‘Koj cia li nqes los tamsim no.’ ” Tiamsis Eliya teb lawv tias, “Yog tias kuv yog Vajtswv li ib tug neeg tiag, thov kom hluavtaws poob saum ntuj los hlawv koj thiab koj tsib caug leej tub rog kub hnyiab tag.” Ces Vajtswv li hluavtaws txawm poob saum ntuj los hlawv nws thiab nws tsib caug leej ntawd kub hnyiab tag huvsi. Mas vajntxwv rov txib dua ib tug thawj rog coj tsib caug leej tub rog uas nws kav mus. Tus thawj rog uas peb kuj nce mus mas txhos caug ntua ntawm Eliya xubntiag thov thov hais tias, “Vajtswv tus neeg 'e, kuv thov koj tsa muag zaj saib kuv uas yog koj tus qhev txojsia thiab tsib caug leej no txojsia kom muaj nqes. Hluavtaws twb poob saum ntuj los kub ob tug thawj rog uas kav tsib caug leej uas tuaj ua ntej ntawd thiab ob tug cov tub rog tag lawm. Mas nimno thov koj tsa muag zaj saib kuv txojsia kom muaj nqes.” Ces Yawmsaub tus tubtxib saum ntuj txawm hais rau Eliya tias, “Cia li nqes nrog nws mus, tsis txhob ntshai nws.” Nws txawm sawv tsees nrog tus thawj rog mus cuag vajntxwv mas hais rau vajntxwv tias, “Yawmsaub hais li no tias, ‘Koj tau txib neeg mus nug dab Npa‑axenpu uas yog cov Ekhoo tus dab, mas yog vim tsis muaj Vajtswv hauv Yixayee tebchaws uas yuav mus nug tau lov? Vim li no koj yuav tsis nqes saum lub txaj uas koj mus pw kod los, koj yeej yuav tuag xwb.’ ” Ces nws txawm tuag raws li Yawmsaub tej lus uas Eliya hais ntawd. Ces Yaulas uas yog Ahaxiya tus kwv txawm sawv nws chaw ua vajntxwv kav, vim yog Ahaxiya tsis muaj tub. Thaum ntawd yog xyoo ob uas Yehausafa tus tub Yehaulas kav Yuda. Lwm yam haujlwm uas Ahaxiya ua mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Txog lub sijhawm uas Yawmsaub yuav siv khaub zeeg cua coj Eliya mus saum ntuj, Eliya thiab Elisa tabtom taug kev ntawm lub moos Kilakas mus. Mas Eliya hais rau Elisa tias, “Koj nyob ntawm no tos, rau qhov Yawmsaub txib kuv mus rau lub moos Npe‑ee.” Tiamsis Elisa hais tias, “Yawmsaub muaj txojsia nyob pom, thiab koj muaj txojsia nyob pom, kuv yeej yuav tsis ncaim koj kiag li.” Mas ob tug thiaj mus rau lub moos Npe‑ee. Pab xibhwb uas cev Vajtswv lus hauv Npe‑ee tawm tuaj cuag Elisa thiab hais rau nws tias, “Koj puas paub tias hnub no Yawmsaub yuav coj koj tus xibhwb ncaim koj mus?” Elisa teb tias, “Hawj, kuv paub lawm, ua twjywm.” Eliya hais rau Elisa tias, “Elisa, koj nyob ntawm no tos, rau qhov Yawmsaub txib kuv mus rau lub moos Yelikhau.” Tiamsis Elisa hais tias, “Yawmsaub muaj txojsia nyob pom, thiab koj muaj txojsia nyob pom, kuv yeej yuav tsis ncaim koj kiag li.” Mas ob tug thiaj mus txog lub moos Yelikhau. Pab xibhwb uas cev Vajtswv lus hauv Yelikhau txav los ze Elisa thiab hais rau nws tias, “Koj puas paub tias hnub no Yawmsaub yuav coj koj tus xibhwb ncaim koj mus?” Elisa teb tias, “Hawj, kuv paub lawm, ua twjywm.” Ces Eliya txawm hais rau Elisa tias, “Koj nyob ntawm no tos, rau qhov Yawmsaub txib kuv mus rau ntawm tus dej Yaladee.” Tiamsis Elisa hais tias, “Yawmsaub muaj txojsia nyob pom, thiab koj muaj txojsia nyob pom, kuv yeej yuav tsis ncaim koj kiag li.” Mas ob tug thiaj ua ke mus. Pab xibhwb uas cev Vajtswv lus muaj tsib caug leej kuj mus thiab. Lawv sawv kem deb zog ntawm ob tug, ob tug sawv rau ntawm tus dej Yaladee. Eliya muab nws lub tsho ntev los dov ua ib caj nplawm tus dej, dej txawm faib rau ob sab ob tug thiaj hla hauv cov av qhuav mus. Thaum ob tug hla dej mus lawd, Eliya hais rau Elisa tias, “Cia li thov yam uas kuv yuav ua rau koj ua ntej uas kuv yuav raug ncaim koj mus.” Elisa teb tias, “Thov cia kuv tau koj tus ntsuj plig ob npaug ua qub txeeg qub teg.” Eliya hais tias, “Koj thov tej uas nyuaj kawg. Yog koj pom ntsoov thaum kuv raug coj ncaim koj mus, yuav muaj li ntawd rau koj. Yog koj tsis pom, yuav tsis muaj li ntawd rau koj.” Thaum ob tug tseem sib tham taug kev mus, ua ciav muaj ib lub tsheb hluavtaws thiab nees hluavtaws los kem kiag ob tug. Mas Eliya txawm nyob hauv lub khaub zeeg cua nce mus saum ntuj lawm. Elisa pom ntsoov mas nws qw nrov hais tias, “Kuv txiv, kuv txiv. Koj yog cov Yixayee tej tsheb ua rog thiab cov tub rog caij nees.” Ces nws tsis pom Eliya dua li lawm, nws txawm muab nws lub tsho dua rhe ua ob sab. Nws khaws Eliya lub tsho ntev uas poob los ntawd thiab rov qab mus sawv ntawm ntug dej Yaladee. Nws muab Eliya lub tsho ntev uas poob los ntawd nplawm dej hais tias, “Yawmsaub uas yog Eliya tus Vajtswv nyob qhovtwg?” Thaum nws nplawm dej, dej txawm faib rau ob sab, Elisa thiaj hla mus. Thaum pab xibhwb cev Vajtswv lus uas nyob ntawm lub moos Yelikhau pom Elisa nyob ncaj ntawm lawv xubntiag, lawv txawm hais tias, “Eliya tus ntsuj plig nrog nraim Elisa lawm.” Ces lawv txawm tuaj tos nws thiab khoov ntshis pe rau hauv av ntawm nws xubntiag. Lawv hais rau nws tias, “Muaj tsib caug tus txivneej uas muaj zog nrog peb uas yog koj cov tub qhe nyob ua ke no. Cia lawv mus nrhiav koj tus xibhwb, tej zaum Yawmsaub tus Ntsuj Plig nqa nws mus tso rau saum ib lub roob lossis ib lub hav twg lawm.” Mas Elisa hais tias, “Tsis txhob txib lawv mus li.” Thaum lawv pheej taij nws heev ua rau nws txaj muag lawm, nws thiaj hais tias, “Txib mus maj.” Yog li ntawd lawv thiaj txib tsib caug leej mus. Lawv mus nrhiav Eliya tau peb hnub tsis pom li. Lawv rov los cuag Elisa rau thaum nws tseem tos hauv lub moos Yelikhau. Nws thiaj hais rau lawv tias, “Kuv twb hais rau nej lawm tias, tsis txhob mus, no nev?” Cov neeg hauv lub moos ntawd hais rau Elisa tias, “Lub moos no zoo nyob heev raws li koj uas yog peb tus tswv pom lawd, tiamsis cov dej tsis zoo siv pheej ua rau neeg nchuav menyuam.” Mas Elisa hais tias, “Cia li muab ib lub phaj tshiab tshiab los rau kuv thiab muab ntsev tso rau hauv.” Lawv txawm coj los rau nws. Nws thiaj mus rau ntawm lub qhov dej txhawv thiab muab cov ntsev pov rau hauv thiab hais tias, “Yawmsaub hais li no tias, ‘Kuv twb ua rau cov dej no zoo lawm. Txij no mus cov dej yuav tsis ua rau muaj kev tuag kev nchuav menyuam dua li lawm.’ ” Yog li ntawd cov dej thiaj zoo los txog niaj hnub nimno, raws li tej lus uas Elisa hais. Elisa tawm qhov ntawd mus rau lub moos Npe‑ee. Thaum nws tabtom taug kev mus, muaj ib cov menyuam tub tawm hauv lub moos tuaj thuam luag nws tias, “Yawg do hau, cia li khiav mus. Yawg do hau, cia li khiav mus.” Nws tig los ntsia ntsoov rau lawv thiab tuav Yawmsaub lub npe foom lawv. Ces txawm muaj ob tug maum dais tawm tom hav zoov los muab plaub caug ob leeg menyuam tub ntawd dua tag. Nws txawm taug kev mus rau saum lub roob Khamee mam li rov qab mus rau lub nroog Xamali. Xyoo kaum yim uas Yehausafa ua vajntxwv kav Yuda mas Ahaj tus tub Yaulas sawv ua vajntxwv kav cov Yixayee hauv lub nroog Xamali, nws kav tau kaum ob xyoos. Nws ua tej uas Yawmsaub pom tias phem tiamsis ua tsis thooj li nws niam nws txiv, rau qhov nws muab tus ncej dab Npa‑as uas nws txiv ua rhuav tshem pov tseg. Txawm yog li ntawd los nws tseem tuav rawv Nenpa tus tub Yelaunpau‑as tej kev txhaum uas coj cov Yixayee ua txhaum, mas Yaulas kuj tsis tso tej kev txhaum ntawd tseg. Cov Mau‑a tus vajntxwv Mesas yog ib tug yug yaj, mas nws yuav tsum pub 100,000 tus menyuam yaj thiab pub 100,000 tus txiv yaj li plaub rau Yixayee tus vajntxwv. Tiamsis thaum uas Ahaj tuag lawd Mau‑a tus vajntxwv txawm fav xeeb rau Yixayee tus vajntxwv. Vajntxwv Yaulas txawm tawm hauv lub nroog Xamali mus thiab txhij cov Yixayee sawvdaws ua tub rog. Nws xa xov mus hais rau Yehausafa uas ua vajntxwv kav Yuda tias, “Mau‑a tus vajntxwv tau fav xeeb rau kuv. Koj yuav nrog kuv mus ntaus cov Mau‑a los tsis mus?” Yehausafa hais tias, “Kuv yuav mus thiab. Kuv nrog koj koom ib lub siab, kuv cov neeg yog koj li neeg, thiab kuv cov nees yog koj li nees.” Thiab nws nug tias, “Peb yuav mus txojkev twg?” Yaulas teb tias, “Peb yuav mus hauv tebchaws moj sab qhua Edoo mus.” Yixayee tus vajntxwv thiaj li nrog Yuda tus vajntxwv thiab cov Edoo tus vajntxwv ua ke mus. Thaum lawv lug kev mus tau xya hnub lawm mas tsis muaj dej rau cov tub rog thiab cov tsiaj uas coj nrog lawv mus ntawd haus. Mas Yixayee tus vajntxwv hais tias, “Txom nyem kawg li lauj! Yawmsaub hu peb tug vajntxwv no tuaj es yuav muab peb rau hauv cov Mau‑a txhais tes.” Ces Yehausafa hais tias, “Nyob ntawm no muaj ib tug xibhwb cev Vajtswv lus uas peb yuav mus thov nug tau Yawmsaub los tsis muaj?” Mas Yixayee tus vajntxwv li ib tug tub teg tub taws teb tias, “Safa tus tub Elisa uas tu Eliya nyob ntawm no.” Ces Yehausafa txawm hais tias, “Nws yeej muaj Yawmsaub tej lus tiag tiag li.” Ces Yixayee tus vajntxwv thiab Yehausafa thiab Edoo tus vajntxwv txawm mus cuag nws. Elisa hais rau Yixayee tus vajntxwv tias, “Kuv thab txog koj dabtsi? Koj cia li mus nrhiav koj niam koj txiv tej xibhwb.” Tiamsis Yixayee tus vajntxwv hais rau nws tias, “Tsis tau li, rau qhov yog Yawmsaub hu peb peb leeg vajntxwv tuaj es yuav muab peb rau hauv cov Mau‑a txhais tes.” Elisa hais tias, “Muaj Yawmsaub uas muaj hwjchim loj kawg nkaus uas kuv pe hawm muaj txojsia nyob pom, yog kuv tsis hwm Yuda tus vajntxwv Yehausafa mas kuv yeej yuav tsis tsa muag ntsia koj lub ntsej muag thiab tsis ntsej koj kiag li. Cia li coj ib tug uas ntaus nkauj nog ncas tuaj.” Thaum tus ntawd ntaus nkauj nog ncas, mas Yawmsaub lub hwjchim los rau saum Elisa, mas Elisa hais tias, “Yawmsaub hais li no tias, ‘Kuv yuav ua kom lub hav qhuav no muaj pas dej puv nkaus.’ Rau qhov Yawmsaub hais li no tias, ‘Nej yuav tsis pom cua tsis pom nag los nej yuav pom lub hav qhuav no muaj dej puv nkaus, mas nej yuav tau haus thiab nej tej tsiaj txhu huvsi yuav tau haus.’ Tej no yog tej haujlwm uas Yawmsaub pom tias me me xwb. Yawmsaub kuj yuav muab cov Mau‑a rau hauv nej txhais tes. Nej yuav ntaus yeej txhua lub moos uas muaj ntsa loog thiab tej moos loj txhua lub, thiab ntov txhua tus ntoo uas zoo kom vau, thiab txhub txhua lub hauv dej pov tseg thiab muab pob zeb nchuav rau hauv txhua daim teb uas zoo kom puam tsuaj tag.” Mas nyob los rau tagkis tom qab kwvlam lub sijhawm uas ua kevcai hlawv xyeem ua ciav txawm muaj dej ntws ntawm tebchaws Edoo los ua rau lub tebchaws uas lawv nyob ntawd muaj dej puv nkaus. Thaum cov Mau‑a sawvdaws hnov tias cov vajntxwv ntawd tuaj ntaus lawv mas txhua tus txivneej uas txawj tuav cuab yeej tag nrho cov laus kawg nkaus thiab cov uas hnub nyoog yau kawg nkaus raug hu tuaj mus tiv ntawm tus ciam teb. Thaum tagkis uas lawv sawv mas lub hnub ci tuaj rau ntawm cov dej ces cov Mau‑a pom cov dej uas nyob ntawm lawv xubntiag liab zoo yam li ntshav. Ces lawv txawm hais tias, “Ntawd yog ntshav 'os. Cov vajntxwv ntawd sib ua rog thiab sib tua kab. Peb cov Mau‑a peb cia li mus lws lawv tej qhov txhia chaw.” Tiamsis thaum lawv mus txog ntawm cov Yixayee lub yeej mas cov Yixayee kuj sawv ua rog rau cov Mau‑a thiab ntiab lawv mus, cov Yixayee caum tua tau cov Mau‑a ntau kawg li. Thiab lawv muab tej moos rhuav pov tseg thiab sawvdaws nyias taus nyias laim pob zeb rau hauv txhua thaj teb uas zoo kom puv nkaus txhua thaj teb, thiab lawv txhub txhua lub hauv dej thiab ntov tej ntoo uas zoo txhua tus. Tshuav tej ntsa loog pob zeb nyob hauv Khihalexe xwb mas cov Yixayee uas txawj fiav qe zeb kuj vij ntaus lub moos ntawd. Thaum Mau‑a tus vajntxwv pom tias yuav kov tsis yeej, nws txawm coj xya pua leej tub rog uas tuav ntaj khiav hla Edoo tus vajntxwv cov tub rog, tiamsis hla tsis tau. Mas Mau‑a tus vajntxwv txawm muab kiag nws tus tub hlob uas yuav nyob nws chaw ua vajntxwv hlawv xyeem saum lub ntsa loog. Txojkev npau taws heev thiaj poob rau saum cov Yixayee mas lawv thiaj thim rov qab mus rau hauv lawv lub tebchaws lawm. Pab xibhwb cev Vajtswv lus ib tug li pojniam tuaj quaj rau Elisa tias, “Kuv tus txiv uas yog koj tus qhev tuag lawm. Koj kuj paub tias nws hwm thiab paub ntshai Yawmsaub, tiamsis tus uas peb tshuav nqe tuaj yuav coj kuv ob tug tub mus ua nws li qhev.” Elisa hais rau nws tias, “Koj xav kom kuv ua dabtsi? Cia li hais rau kuv, koj muaj dabtsi hauv koj lub tsev?” Nws teb tias, “Kuv uas yog koj tus nkauj qhev tsis muaj dabtsi hauv tsev tsuas yog muaj ib hwj roj xwb.” Ces Elisa hais tias, “Koj cia li mus qev koj tej kwvtij zej zog sawvdaws li hub khoom ntau ntau li los. Mas koj thiab koj cov tub mus rau hauv tsev thiab muab qhov rooj kaw, mas hliv cov roj rau hauv cov hub ntawd huvsi. Thaum lub hub twg puv muab txawb rau ib qho.” Tus pojniam ntawd thiaj rov mus thiab muab qhov rooj kaw nws thiab nws cov tub cia. Nws li tub cev hub rau nws mas nws hliv roj rau hauv. Thaum cov hub puv tag lawm, nws hais rau nws tus tub tias, “Cev dua ib lub hub rau kuv.” Nws teb leej niam tias, “Tsis tshuav hub lawm.” Ces roj txawm tu nrho tsis los lawm. Tus pojniam ntawd mus hais rau Vajtswv tus neeg paub, mas Elisa hais tias, “Koj mus muab cov roj ntawd muag thiab muab cov nyiaj ntawd them koj tej nuj nqes, es tshuav li cas ces koj thiab koj cov tub kuj siv tau yug nej lub neej.” Muaj ib hnub Elisa mus txog lub moos Sunee. Muaj ib tug pojniam nplua nuj nyob hauv txawm hu nws los noj mov. Yog li ntawd thaum nws taug txojkev ntawd thaum twg nws thiaj pheej mus noj mov qhov ntawd. Tus pojniam ntawd thiaj hais rau nws tus txiv tias, “Kuv pom tias tus yawg ntawd yog Vajtswv ib tug neeg dawb huv, nws pheej taug txojkev ntawm peb no. Cia wb ua ib chav tsev me me rau txheej tsev las tshav saud thiab muab txaj thiab rooj thiab rooj nyob thiab ib lub teeb txawb rau hauv mas nws tuaj rau ntawm wb thaum twg nws thiaj tau mus so rau hauv chav ntawd.” Muaj ib hnub Elisa kuj tuaj rau qhov ntawd thiab nws mus so hauv chav tsev ntawd. Nws hais rau nws tus qhev Kehaxi tias, “Hu tus pojniam uas yog neeg Sunee los.” Thaum mus hu nws, nws txawm los sawv rau ntawm Elisa xubntiag. Elisa hais rau Kehaxi tias, “Cia li hais rau tus pojniam ntawd tias, ‘Koj tau ua haujlwm khwv heev rau wb, mas wb yuav ua dabtsi pab koj? Koj xav kom wb hais ib lo lus rau vajntxwv lossis tus thawj tub rog pab koj lov?’ ” Nws teb tias, “Kuv nrog kuv cov kwvtij nyob ua ke.” Elisa thiaj hais tias, “Yog li ntawd yuav ua dabtsi pab nws?” Kehaxi teb tias, “Nws tsis muaj menyuam thiab nws tus txiv twb laus heev lawm.” Elisa hais tias, “Hu nws los.” Thaum mus hu nws, nws kuj los sawv ntawm qhov rooj. Elisa txawm hais tias, “Lwm xyoo lub caij no koj yuav tau puag ib tug metub.” Tus pojniam ntawd hais tias, “Vajtswv tus neeg, uas yog kuv tus tswv, tsis muaj li ntawd, tsis txhob dag koj tus nkauj qhev maj.” Ces tus pojniam ntawd txawm xeeb menyuam thiab xyoo tom qab lub caij ntawd nws txawm yug tau ib tug tub, raws li Elisa tau hais rau nws lawd. Thaum tus metub hlob lawd, muaj ib hnub nws txawm tawm mus rau nws txiv ntawm cov tub zog uas hlais qeb. Nws hais rau nws txiv tias, “Au, kuv taubhau, kuv taubhau!” Leejtxiv hais rau nws tus tub qhe tias, “Cia li puag nws mus rau leej niam.” Thaum tus tub qhe puag tus metub ntawd mus rau leej niam lawm, tus metub txawm nyob hauv leej niam lub xubntiag mus txog tav su ces txawm tuag lawm. Leej niam txawm nce mus muab tus metub pw rau saum Vajtswv tus neeg lub txaj, thiab muab qhov rooj kaw cia mas tawm mus. Nws hu nws tus txiv hais tias, “Cia li xa ib tug qhev thiab ib tug nees luav los rau kuv, kuv yuav maj mus cuag Vajtswv tus neeg li rov los.” Nws tus txiv hais tias, “Hnub no koj yuav mus cuag nws ua dabtsi? Twb tsis yog lub hli xiab thiab tsis yog hnub Xanpatau.” Nws tus pojniam teb tias, “Tsis ua li cas.” Ces nws txawm nog eeb rau tus nees luav thiab hais rau nws tus tub qhe tias, “Cia li txhib kom tus nees luav dhia nrawm nroos, tsis txhob maj mam kiag li tsuas yog kuv hais rau koj xwb.” Nws txawm sawv kev mus thiab mus txog Vajtswv tus neeg saum lub roob Khamee. Thaum Vajtswv tus neeg pom tus pojniam ntawd tuaj, nws txawm hais rau nws tus qhev Kehaxi tias, “Saib maj, tus pojniam hauv Sunee tuaj txog tim ub. Koj cia li dhia mus tos nws tamsim no thiab hais rau nws tias, ‘Koj nyob zoo lov? Koj tus txiv nyob zoo lov? Koj tus tub nyob zoo lov?’ ” Tus pojniam ntawd teb tias, “Nyob zoo thiab.” Thaum nws tuaj txog ntua Vajtswv tus neeg saum lub roob, nws txawm qawm nkaus Vajtswv tus neeg kotaw. Mas Kehaxi mus thawb tus pojniam ntawd tawm mus. Tiamsis Vajtswv tus neeg hais tias, “Cia nws nyob nws vim nws mob siab heev, thiab Yawmsaub muab zaj no zais lawm tsis qhia rau kuv paub.” Ces tus pojniam ntawd txawm hais tias, “Kuv tau thov ib tug metub ntawm koj uas yog kuv tus tswv lov? Kuv twb hais tias, ‘Tsis txhob dag kuv,’ no nev?” Elisa thiaj hais rau Kehaxi tias, “Cia li qaws koj lub tsho rau ntawm duav, thiab coj kuv tus pas nrig hauv koj txhais tes mus. Yog koj ntsib leejtwg tsis txhob hais lus rau nws, yog leejtwg hais lus rau koj los tsis txhob teb. Cia li muab kuv tus pas nrig tso rau saum tus menyuam ntawd lub plhu.” Tus menyuam ntawd leej niam hais tias, “Yawmsaub muaj txojsia nyob pom thiab koj muaj txojsia nyob pom, kuv yuav tsis tso koj nyob ntawm no.” Elisa thiaj sawv tsees raws nws qab mus. Kehaxi mus ua ntej thiab muab tus pas nrig tso rau saum tus menyuam ntawd lub plhu, tiamsis tsis hnov muaj suab thiab tsis pom muaj sia li. Yog li ntawd nws thiaj rov mus ntsib Elisa thiab hais rau nws tias, “Tus menyuam tsis tau tsim los.” Thaum Elisa tuaj rau hauv lub tsev ntawd, nws kuj pom tus menyuam tuag pw saum nws lub txaj. Nws txawm nkag mus rau hauv muab lub qhov rooj kaw ob tug nyob hauv xwb, thiab nws thov Yawmsaub. Ces nws txawm mus pw tsuam saum tus menyuam, qhov ncauj npuab qhov ncauj, qhov muag npuab qhov muag, tes npuab tes. Thaum nws pw xyab hlo tsuam rau saum tus menyuam ntawd, tus menyuam lub cev txawm sov tuaj. Elisa sawv ncig mus ncig los hauv lub tsev, thiab rov qab mus pw tsuam saum tus menyuam. Tus menyuam txawm txham xya zaus, thiab qheb lub qhov muag. Ces Elisa thiaj hu Kehaxi los thiab hais tias, “Cia li mus hu tus pojniam hauv Sunee no los.” Kehaxi txawm mus hu nws los. Thaum nws los txog rau ntawm Elisa lawm, Elisa hais tias, “Cia li puag koj tus tub mus.” Tus pojniam ntawd txawm los khwb nkaus rau ntawm Elisa kotaw pe ti nkaus av. Ces nws thiaj puag nws tus tub tawm mus lawm. Thaum Elisa rov los txog ntawm lub moos Kilakas mas lub tebchaws raug kev tshaib plab. Thaum pab xibhwb cev Vajtswv lus nrog nws nyob ua ke nws hais rau nws tus tub qhe tias, “Koj muab lub laujkaub loj los hau zaub rau cov xibhwb noj.” Ib tug hauv pab xibhwb ntawd mus de txuj lom tom teb mas pom ib tsob hmab taub qus nws txawm de tau ib tsuag txiv hmab taub qus coj los tsuav hau rau hauv laujkaub zaub, tsis paub xyov yog zaub dabtsi. Lawv ntaus zaub los rau cov neeg ntawd noj. Thaum lawv noj cov zaub ntawd, lawv qw nrov hais tias, “Au Vajtswv tus neeg, muaj kev tuag nyob hauv lub laujkaub no.” Lawv txawm noj tsis tau. Elisa hais tias, “Muab ib co hmoov mog los.” Nws txawm muab cov hmoov mog rau rau hauv lub laujkaub thiab hais tias, “Cia li ntaus rau cov neeg noj.” Tsis muaj mob nkeeg hauv lub laujkaub no lawm. Muaj ib tug yawg tuaj hauv lub moos Npa‑as Salisa tuaj, coj tej ncuav uas muab thawj phaum qoob ua tuaj pub rau Vajtswv tus neeg, yog nees nkaum lub ncuav qeb thiab tej hnab mog tshiab ntim seev tsaj. Ces Elisa hais tias, “Cia li muab rau cov neeg no noj.” Tiamsis Elisa tus qhev hais tias, “Kuv yuav muab tej no rau rau ib puas leej noj tau li cas?” Elisa rov hais tias, “Cia li muab rau cov neeg no noj los maj, rau qhov Yawmsaub hais li no tias, ‘Lawv yuav noj tsis tag tseem tshuav.’ ” Ces nws thiaj muab rau rau lawv noj. Lawv noj tsis tag tseem tshuav raws li Yawmsaub tej lus. Na‑amas uas yog vajntxwv Alas tus thawj rog, yog ib tug tseem ceeb rau vajntxwv thiab tus uas vajntxwv txaus siab heev, rau qhov Yawmsaub siv nws pab cov Alas kov yeej. Nws yog ib tug siab loj siab tuab, tiamsis nws mob lig mob ruas. Muaj ib zaug thaum cov Alas mus ntaus rog lawv ntes tau ib tug mentxhais hauv Yixayee tebchaws los, mas nws los ua Na‑amas tus pojniam li nkauj qhev. Tus nkauj qhev hais rau nws tus poj lospav tias, “Kuv xav kom kuv tus tswv mus nrog tus xibhwb cev Vajtswv lus nyob hauv lub nroog Xamali. Tus xibhwb yuav kho tau kuv tus tswv li mob ruas zoo.” Na‑amas txawm mus hais rau vajntxwv uas yog nws tus tswv tias, “Tus mentxhais uas coj hauv Yixayee tebchaws los hais li ntawd.” Alas tus vajntxwv hais tias, “Cia li mus, kuv yuav ua ib tsab ntawv mus rau Yixayee tus vajntxwv.” Ces Na‑amas txawm mus, nws thauj kaum tala nyiaj, thiab rau txhiab sekhee kub thiab kaum cev tsoos tsho ua zam mus. Thiab nws coj tsab ntawv mus rau Yixayee tus vajntxwv uas muaj ntsiab lus hais tias, “Thaum tsab ntawv no tuaj txog koj, thov koj paub tias kuv xa Na‑amas uas yog kuv li tub teg tub taws tuaj thov koj kho nws tus mob ruas kom zoo.” Thaum Yixayee tus vajntxwv nyeem tsab ntawv ntawd tag, nws txawm dua rhe nws lub tsho thiab hais tias, “Kuv yog Vajtswv uas yuav ua kom tuag thiab ua kom ciaj tau lov, es tus yawg no yuav xa xov tuaj kom kuv kho tus uas mob ruas no? Sim xav saib, nws nrhiav kev zes plaub xwb los sav.” Thaum Elisa uas yog Vajtswv tus neeg hnov tias Yixayee tus vajntxwv dua rhe nws lub tsho, ces nws txawm tso ib tug mus hais rau vajntxwv tias, “Ua cas koj yuav dua koj lub tsho? Thov cia tus yawg ntawd los cuag kuv, xwv nws thiaj paub tias muaj ib tug xibhwb cev Vajtswv lus nyob hauv Yixayee.” Ces Na‑amas thiab nws tej tsheb ua rog thiab tej nees thiaj los nres rau ntawm Elisa lub qhov rooj. Elisa txawm tso ib tug mus hais rau Na‑amas tias, “Cia li mus da tus dej Yaladee xya zaus sib law, ces koj lub cev yuav rov zoo li qub thiab koj lub cev yuav huv.” Tiamsis Na‑amas chim heev, nws tawm plaws mus hais tias, “Kuv xav tias nws yuav tawm tuaj cuag kuv thiab sawv ntsug tuav nws tus Vajtswv Yawmsaub lub npe yoj tes rau saum qhov mob thiab kho tej mob ruas kom zoo. Tus dej Anpana thiab tus dej Fapa uas nyob ntawm lub nroog Damaxaka tsis zoo dhau tej dej hauv Yixayee tebchaws huvsi lov? Kuv da tej dej ntawd kuv lub cev tseem huv tsis tau lov?” Ces nws txawm tig kiag mus ua npau taws vog. Tiamsis nws cov tub teg tub taws txav los ze thiab hais rau nws tias, “Yawg hlob, yog tus xibhwb cev lus ntawd hais kom koj ua ib yam uas loj heev, koj yuav tsis ua lov? Yog li ntawd thaum tus xibhwb ntawd hais rau koj tias, ‘Cia li mus da dej ces koj yuav huv,’ tseem tsis tsim nyog koj yimhuab ua lov?” Nws thiaj nqes mus raus rau hauv tus dej Yaladee xya zaus raws li Vajtswv tus neeg tej lus, mas nws cev nqaij rov zoo huv yam li qub zoo li ib tug menyuam mos tej nqaij. Ces nws thiab nws cov neeg sawvdaws txawm rov qab mus rau ntawm Vajtswv tus neeg. Nws los sawv ntawm Elisa xubntiag thiab hais tias, “Saib nawj, kuv paub tseeb tias thoob ntiajteb tsis muaj ib tug vajtswv tsuas yog muaj tus uas nyob hauv Yixayee tebchaws xwb. Yog li no thov koj txais ib qhov tshav ntuj ntawm kuv uas yog koj tus qhev txhais tes.” Mas Elisa hais tias, “Yawmsaub uas kuv ua koom tu muaj txojsia nyob pom, kuv yuav tsis txais ib yam dabtsi yuav kiag li.” Na‑amas tseem cheem cheem los Elisa tsis yuav. Ces Na‑amas thiaj hais tias, “Yog koj tsis yuav li, thov koj muab av txaus ob tug luj txwv thauj pub rau kuv uas yog koj tus qhev, rau qhov txij no mus kuv yuav tsis muab qhov txhia chaw xyeem lossis tua tsiaj xyeem rau tej dab ib tug twg li lawm tsuas yog xyeem rau Yawmsaub xwb. Qhov no thov Yawmsaub zam txim rau kuv uas yog koj tus qhev. Thaum kuv coj tus vajntxwv mus rau hauv lub tsev teev dab Limoo yuav pe tus dab ntawd es kuv tuav nws tes mus rau hauv thiab, thiab thaum kuv pe rau hauv lub tsev teev dab Limoo, thaum kuv pe ntawd thov Yawmsaub zam txim rau kuv uas yog koj tus qhev.” Elisa teb nws tias, “Cia li mus zoo.” Thaum Na‑amas tawm mus tsis tau deb pes tsawg, Elisa uas yog Vajtswv tus neeg tus qhev Kehaxi txawm xav tias, “Kuv tus tswv tso Na‑amas uas yog neeg Alas mus dawb mus do tsis kam yuav tej uas nws coj tuaj. Muaj Yawmsaub muaj txojsia nyob pom, kuv yuav dhia mus caum nws yuav ib txhia ntawm nws.” Ces Kehaxi txawm caum Na‑amas qab mus. Thaum Na‑amas pom tias muaj ib tug dhia caum nws qab tuaj nws txawm nqes saum lub tsheb ua rog los tos thiab hais tias, “Txhua yam nyob zoo lov?” Nws teb tias, “Txhua yam nyob zoo thiab. Kuv tus tswv txib kuv tuaj hais tias, ‘Muaj ob tug hluas hauv pab xibhwb cev Vajtswv lus pem toj siab Efa‑i tebchaws nyuam qhuav tuaj txog. Thov koj muab ib tala nyiaj thiab ob cev tsoos ua zam rau ob tug.’ ” Mas Na‑amas hais tias, “Thov yuav ob tala nyiaj.” Na‑amas cheem rau nws, thiaj muab ob tala nyiaj ntim rau hauv ob lub seev thiab muab ob cev tsoos tsho ua zam mas kom nws ob tug tub qhe kwv ua Kehaxi ntej mus. Thaum lawv los txog ntawm lub roob, Kehaxi txawm txais ntawm ob tug txhais tes coj mus cia rau hauv tsev, thiab tso ob tug rov mus, ob tug thiaj ncaim mus lawm. Nws txawm nkag rau hauv tsev nyob ntawm nws tus tswv xubntiag, mas Elisa hais rau nws tias, “Kehaxi, koj mus qhovtwg los?” Kehaxi teb tias, “Kuv uas yog koj tus qhev tsis tau mus qhovtwg.” Tiamsis Elisa hais rau nws tias, “Thaum tus yawg ntawd nqes saum nws lub tsheb ua rog los tos koj, kuv tus ntsuj plig tsis tau nrog koj mus thiab lov? Tamsim no yog lub sijhawm uas tsim nyog txais nyiaj tej tsoos tsho tej vaj txiv aulib vaj txiv hmab, tej yaj thiab nyuj, tub qhe thiab nkauj qhev lov? Yog li no Na‑amas tej mob ruas yuav kis rau koj thiab koj caj ces mus ib txhis.” Kehaxi txawm tawm ntawm Elisa mus mob ruas ib ce dawb paug li daus xib daus npu. Pab xibhwb uas cev Vajtswv lus hais rau Elisa tias, “Saib maj, lub chaw uas peb nyob es koj saib xyuas peb ntawd nqaim dhau tsis txaus peb nyob. Cia peb mus rau tom ntug dej Yaladee ib leeg txiav ib tog ntoo los ua chaw rau peb nyob.” Elisa hais tias, “Mus maj.” Muaj ib tug txawm hais tias, “Thov koj nrog peb uas yog koj cov tub qhe mus thiab.” Nws teb tias, “Kuv yuav mus.” Nws thiaj nrog lawv mus. Thaum lawv tuaj txog ntawm tus dej Yaladee, lawv txawm ntov ntoo. Thaum ib tug tabtom ntov ntoo, nws rab taus txawm hle poob rau hauv dej lawm, nws thiaj qw tias, “Au ceeblaj xwb lauj, yawg hlob. Rab taus ntawd kuv qev lawv li tuaj.” Vajtswv tus neeg hais tias, “Rab taus poob ncaj qhov twg?” Thaum tus ntawd taw qhia lub chaw rau nws lawd, nws thiaj txiav ib yav ntoo pov rau hauv lub chaw ntawd, ua rau rab taus hlau ntawd ntab plaws tuaj. Elisa hais tias, “Cia li ntsiab nkaus los.” Ces tus ntawd txawm cev tes mus ntsiab nkaus los. Thaum Alas tus vajntxwv ua rog rau cov Yixayee, nws nrog nws cov tub teg tub taws sablaj tias nws yuav ua yeej rau qhovtwg. Tiamsis Vajtswv tus neeg xa xov rau Yixayee tus vajntxwv tias, “Ceev faj tsis txhob hla mus ze lub chaw ntawd vim cov Alas tabtom tuaj rau qhov ntawd.” Ces Yixayee tus vajntxwv thiaj xa xov mus ceeb toom rau cov neeg uas nyob thaj chaw uas Vajtswv tus neeg hais ntawd. Elisa pheej qhia vajntxwv paub li no, vajntxwv thiaj ceev faj tau tsis yog ib ob zaug xwb. Alas tus vajntxwv ntxhov siab rau qhov no heev, nws thiaj hu nws cov tus tes twb taw tuaj thiab hais tias, “Nej yuav tsis qhia rau kuv tias peb tog leejtwg tuaj Yixayee tus vajntxwv tog lov?” Nws cov tub teg tub taws ib tug hais tias, “Au vajntxwv uas yog kuv tus tswv, tsis muaj leejtwg kiag li. Yeej yog Elisa uas yog xibhwb cev Vajtswv lus nyob hauv Yixayee tebchaws qhia tej lus uas koj hais hauv koj lub txaj pw rau Yixayee tus vajntxwv paub.” Vajntxwv thiaj hais tias, “Cia li mus nrhiav saib Elisa nyob qhov twg xwv kuv thiaj txib neeg mus ntes tau nws los.” Muaj neeg hais rau nws tias, “Elisa nyob hauv lub moos Dautha.” Vajntxwv thiaj xa ib pab tub rog coob coob muaj nees thiab tsheb nees ua rog mus. Lawv mus hmo ntuj thiab vij lub moos ntawd cia. Tagkis tom qab thaum Vajtswv tus neeg tus qhev sawv ntxov tsees thiab tawm mus, ua ciav pom ib pab tub rog muaj nees thiab tsheb nees ua rog vij nkaus lub moos lawm. Tus qhev hais tias, “Ceeblaj lauj, kuv tus tswv, peb yuav ua li cas?” Elisa teb tias, “Tsis txhob ntshai rau qhov cov uas tuaj peb tog coob dua cov uas tuaj lawv tog.” Ces Elisa txawm thov Yawmsaub tias, “Au Yawmsaub, thov koj qheb nws qhov muag nws thiaj li pom.” Yawmsaub thiaj qheb tug hluas ntawd qhov muag nws thiaj pom, ua ciav pem roob muaj nees muaj tsheb ua rog hluavtaws puv nkaus nyob vij puag ncig Elisa. Thaum cov Alas tuaj tawm tsam Elisa, nws thov Yawmsaub hais tias, “Thov koj ua rau cov neeg no qhov muag fam.” Yawmsaub thiaj ua rau lawv qhov muag fam raws li Elisa tej lus thov. Mas Elisa hais rau lawv tias, “Tsis yog txojkev no thiab tsis yog lub moos no. Nej raws kuv qab, kuv yuav coj nej mus txog tus uas nej nrhiav ntawd.” Ces nws txawm coj lawv mus rau hauv lub nroog Xamali. Thaum lawv los txog hauv nruab nrab nroog Xamali lawd, Elisa hais tias, “Au Yawmsaub, thov koj qheb cov neeg no qhov muag kom lawv rov pom kev.” Yawmsaub thiaj li qheb lawv qhov muag pom kev, ua ciav lawv nyob hauv nruab nrab nroog Xamali lawm. Thaum Yixayee tus vajntxwv pom lawv nws txawm hais rau Elisa tias, “Kuv txiv, kuv muab lawv tua lov? Kuv muab lawv tua pov tseg lov?” Nws teb tias, “Tsis txhob tua. Koj yuav tua cov neeg uas koj xuas ntaj xuas hneev ntes tau los lov? Cia li muab ncuav thiab dej rau lawv noj lawv haus, thiab tso lawv rov mus rau lawv tus tswv.” Vajntxwv txawm npaj ib rooj noj haus loj los yug lawv. Thaum lawv noj haus tag lawd, nws txawm tso lawv rov mus rau lawv tus tswv. Ces cov Alas thiaj tsis tuaj lws Yixayee tebchaws dua li lawm. Los rau tom qab no Npeehada uas yog Alas tus vajntxwv txhij nws cov tub rog huvsi tuaj vij lub nroog Xamali. Thaum lawv vij lub nroog Xamali ntawd, lub nroog raug kev tshaib plab heev kawg, mus txog thaum ib lub taubhau nees luav lawv muag txog yim caum sekhee nyiaj, thiab ib feem plaub hauv ib khab quav nquab lawv muag tsib sekhee. Thaum Yixayee tus vajntxwv taug saum ntsa loog, muaj ib tug pojniam qw thov nws hais tias, “Au vajntxwv uas yog kuv tus tswv, thov pab lauj.” Vajntxwv hais tias, “Yog Yawmsaub tsis pab koj, kuv yuav pab koj tau qhov twg los? Kuv pab los ntawm lub tshav ntaus qoob, lossis lub qhov tsuam txiv hmab lov?” Nws nug tus pojniam ntawd tias, “Koj muaj dabtsi?” Tus pojniam teb tias, “Tus pojniam no hais rau kuv tias, ‘Hnub no muab koj tus tub rau wb noj, mas tagkis wb li noj kuv tus tub.’ Wb thiaj muab kuv tus tub hau noj tag. Mas hnub tom qab kuv hais rau nws tias, ‘Muab koj tus tub rau wb noj,’ tiamsis tus pojniam ntawd muab nws tus tub zais lawm.” Thaum vajntxwv hnov tus pojniam ntawd tej lus nws txawm dua rhe nws lub tsho rau thaum nws tseem tabtom taug saum ntsa loog. Cov pejxeem saib pom ua ciav vajntxwv hnav khaub seev tsaj rau txheej sab hauv uas npuas lub cev. Mas vajntxwv hais tias, “Yog hnub no Safa tus tub Elisa lub taubhau tseem txuas nws lub xub pwg, kuj thov Vajtswv rau txim rau kuv thiab hnyav dua li ntawd.” Thaum ntawd Elisa zaum hauv nws lub tsev thiab cov kev txwj laus kuj nrog nws nyob ua ke. Vajntxwv txib ib tug tawm ntawm nws xubntiag mus, tiamsis thaum tus uas xa xov ntawd tuaj tsis tau txog, Elisa hais rau cov kev txwj laus tias, “Nej pom los tsis pom tus uas tua neeg no txib neeg tuaj txiav kuv lub taubhau? Thaum tus xa xov tuaj txog, nej cia li kaw qhov rooj thiab tuav ruaj ruaj, txhob pub nws nkag tau los tsev. Nws tus tswv txhais kotaw lub suab nrov raws qab tuaj lawm los tsis yog?” Thaum Elisa tabtom hais rau lawv ntawd, vajntxwv txawm tuaj txog ntua thiab hais tias, “Tej kev ceeblaj no yog los ntawm Yawmsaub los. Kuv tseem yuav tos Yawmsaub ua dabtsi?” Mas Elisa hais tias, “Cia li mloog Yawmsaub tej lus. Yawmsaub hais li no tias, ‘Tagkis lub sijhawm no cov hmoov mog zoo zoo ib xe‑a lawv yuav muag ib sekhee, ob xe‑a qeb muag ib sekhee ntawm lub rooj loog Xamali.’ ” Ces tus thawj rog uas nrog nraim vajntxwv txawm hais rau Vajtswv tus neeg tias, “Txawm yog Yawmsaub qheb qhov rais saum ntuj los tej no yuav muaj tau lov?” Mas Elisa hais tias, “Koj lub qhov muag yuav pom ntag tiamsis koj yuav tsis tau noj.” Muaj plaub tug yawg mob ruas nyob sab nraum rooj loog. Lawv sib tham tias, “Ua cas peb yuav zaum ntawm no mus txog thaum tuag? Yog peb hais tias, ‘Cia peb nkag mus rau hauv lub nroog,’ hauv lub nroog kuj tshaib plab, ces peb kuj yuav tuag rau hauv thiab xwb. Yog peb nyob ntawm no, peb kuj yuav tuag ib yam nkaus. Yog li ntawd peb cia li mus rau hauv cov Alas lub yeej. Yog lawv tseg peb txojsia peb kuj dim, yog lawv tua peb, peb kuj tuag thiab xwb.” Thaum tsaus ntuj zuag lawv thiaj mus rau hauv cov Alas lub yeej. Thaum lawv mus txog cov Alas lub ntug yeej, ua ciav tsis muaj ib tug neeg nyob kiag li, vim yog Yawmsaub ua rau Alas cov tub rog hnov ib lub suab tsheb ua rog suab nees yam li yog ib pab tub rog coob coob li suab nrov, lawv thiaj sib tham tias, “Saib maj, Yixayee tus vajntxwv tau ntiav cov Hithai tej vajntxwv thiab cov Iyi tej vajntxwv tuaj ua rog rau peb.” Lawv txawm khiav tag rau thaum tsaus ntuj zuag lawm, tseg lawv tej tsev ntaub tej nees tej nees luav thiab tseg lub yeej zoo li qub, cia li khiav kom dim siav xwb. Thaum cov mob ruas mus txog ntawm ntug yeej, lawv nkag mus rau hauv ib lub tsev ntaub mas noj thiab haus, thiab nqa tej nyiaj tej kub tej ris tsho coj mus zais cia. Lawv ho rov los nkag dua rau hauv ib lub tsev ntaub thiab nqa tej qhov txhia chaw coj mus zais cia. Ces lawv txawm sib tham tias, “Peb ua tsis raug cai lawm. Hnub no yog hnub uas muaj xov zoo. Yog peb nyob twjywm tos txog kaj ntug, lub txim yuav poob rau saum peb. Yog li no nimno peb cia li mus hais rau vajntxwv tsev neeg.” Lawv thiaj mus hu cov uas zov rooj loog thiab hais zaj ntawd rau lawv tias, “Peb los ntawm Alas lub yeej los, mas peb tsis pom muaj leejtwg thiab tsis hnov ib lub suab neeg li, tsuas yog pom tej nees thiab tej nees luav khi cia rau ntawd xwb, thiab tej tsev ntaub nyob zoo yam li qub.” Ces cov uas zov rooj loog thiaj qw hu mus, ces txawm muaj neeg hais mus rau vajntxwv tsev neeg paub. Vajntxwv txawm sawv tsees tsaus ntuj nti hais rau nws cov tub teg tub taws tias, “Kuv yuav hais rau nej paub tias cov Alas npaj tswvyim ua rog li cas rau peb. Lawv yeej paub tias peb tshaib heev, lawv thiaj tawm tsiv nraim rau nraum lub yeej thiab tom tej hav nroj, xav tias, ‘Thaum lawv tawm hauv lub nroog, peb yuav ntes kiag lawv thiab txeem mus rau hauv lub nroog.’ ” Nws cov tub teg tub taws ib tug hais tias, “Cov neeg uas tseem tshuav nyob hauv lub nroog no yuav zoo yam li cov Yixayee coob coob uas puam tsuaj lawm xwb, mas cia qee leej muab cov nees uas tseem tshuav tsib tug los, thiab peb cia li txib neeg mus tshuaj saib.” Lawv thiaj muab ob lub tsheb ua rog thiab nees los mas vajntxwv txawm tso lawv raws Alas cov tub rog qab mus hais tias, “Cia li mus tshuaj saib.” Lawv thiaj raws mus txog tus dej Yaladee, ua ciav thoob txojkev ntawd tsuas pom muaj ris tsho thiab tej twj siv uas cov Alas muab tso pov tseg rau thaum lawv maj nroos khiav. Cov uas mus tshuaj thiaj rov los qhia rau vajntxwv paub. Cov pejxeem thiaj tawm mus lws tej qhov txhia chaw hauv cov Alas lub yeej. Yog li ntawd thiaj muab cov hmoov mog zoo ib xe‑a muag ib sekhee, thiab ob xe‑a qeb muag ib sekhee raws li Yawmsaub tej lus. Vajntxwv tau tsa tus thawj rog uas nrog nraim vajntxwv ua tus uas zov rooj loog. Mas cov pejxeem muab nws tsuj ntog rau ntawm rooj loog nws thiaj tuag, raws li Vajtswv tus neeg tau hais rau thaum vajntxwv tuaj rau ntawm nws. Thaum Vajtswv tus neeg hais rau vajntxwv tias, “Ob xe‑a qeb muag ib sekhee, cov hmoov mog zoo ib xe‑a muag ib sekhee rau tagkis lub sijhawm no rau ntawm lub rooj loog Xamali,” tus thawj rog uas nrog nraim vajntxwv teb Vajtswv tus neeg hais tias, “Txawm yog Yawmsaub qheb qhov rais saum ntuj los tej no yuav muaj tau lov?” Thiab Elisa hais tias, “Koj lub qhov muag yuav pom ntag tiamsis koj yuav tsis tau noj.” Ces thiaj muaj raws li ntawd rau nws, yog cov pejxeem muab nws tsuj ntawm rooj loog nws thiaj tuag lawm. Yav thaum Elisa tau hais rau tus pojniam uas nws tsa tus tub ciaj rov los tias, “Koj thiab koj tsev neeg cia li tsiv mus nyob rau ib qho uas nej nyob tau, vim yog Yawmsaub yuav ua kom lub tebchaws no raug kev tshaib plab xya xyoo.” Tus pojniam ntawd thiaj li sawv tsees ua raws li Vajtswv tus neeg hais. Nws thiab nws tsev neeg mus nyob rau hauv Filixatee tebchaws tau xya xyoo. Thaum tag xya xyoo lawd tus pojniam ntawd kuj tawm hauv Filixatee tebchaws rov qab los thiab mus thov nws thaj av thiab nws lub tsev ntawm vajntxwv rov los. Thaum ntawd vajntxwv tabtom nrog Kehaxi uas yog Vajtswv tus neeg Elisa tus qhev sib tham hais tias, “Cia li qhia rau kuv paub txog tej haujlwm loj huvsi uas Elisa tau ua.” Mas thaum Kehaxi tabtom hais txog zaj uas Elisa tau tsa tus tuag ciaj rov qab los ces tus pojniam uas Elisa tau tsa tus metub ciaj rov los txawm tuaj thov nws lub tsev thiab nws thaj av ntawm vajntxwv. Ces Kehaxi txawm hais tias, “Vajntxwv uas yog kuv tus tswv, no yog tus pojniam ntawd ntag thiab no yog tus pojniam ntawd tus tub uas Elisa tau tsa ciaj rov qab los ntag.” Mas thaum vajntxwv nug tus pojniam ntawd nws kuj qhia zaj ntawd rau vajntxwv. Vajntxwv thiaj txib ib tug nom tswv pab tus pojniam ntawd, nws hais rau tus nom tias, “Cia li thim txhua yam uas yog tus pojniam no li, thiab tej qoob loo hauv thaj teb ntawd txij hnub uas nws tawm mus lawd los txog hnub no huvsi rov rau nws.” Elisa tuaj rau ntawm Damaxaka. Cov Alas tus vajntxwv Npeehada mob mas muaj neeg mus hais rau nws tias, “Vajtswv tus neeg tuaj rau ntawm no.” Vajntxwv hais rau Haxa‑ee tias, “Cia li coj qhov txhia chaw mus pub rau Vajtswv tus neeg kom nws nug Yawmsaub saib kuv yuav zoo tsis zoo.” Haxa‑ee thiaj li mus ntsib tug xibhwb ntawd thiab coj txhua yam qhov txhia chaw hauv lub nroog Damaxaka txaus plaub caug tus ntxhuav thauj mus pub rau nws. Thaum Haxa‑ee mus txog, nws mus sawv ntawm tus xibhwb xubntiag hais tias, “Koj tus tub Npeehada uas yog cov Alas tus vajntxwv txib kuv tuaj cuag koj tuaj nug koj tias nws tus mob yuav zoo los tsis zoo.” Mas Elisa hais rau nws tias, “Cia li mus hais rau nws tias, ‘Koj tus mob yuav zoo tag,’ tiamsis Yawmsaub twb qhia rau kuv tias nws yuav tuag tiag tiag.” Elisa kuj ntsia ntsoov Haxa‑ee ua rau Haxa‑ee txaj muag ces Vajtswv tus neeg txawm quaj. Mas Haxa‑ee txawm nug tias, “Yawg hlob, ua cas koj yuav quaj?” Nws teb tias, “Rau qhov kuv paub tej xwm txheej phem uas koj yuav ua rau cov Yixayee. Koj yuav muab hluavtaws hlawv lawv tej chaw ruaj khov thiab yuav xuas ntaj tua lawv tej tub hluas pov tseg thiab yuav muab lawv tej menyuam ntsawm tuag tag, thiab muab lawv tej pojniam uas suab menyuam tej plab phua.” Mas Haxa‑ee hais tias, “Kuv uas yog koj tus qhev tsuas zoo tam li ib tug dev xwb, kuv ho yog leejtwg es yuav ua tej xwm txheej uas loj li no?” Elisa teb tias, “Yawmsaub qhia rau kuv tias koj yuav ua vajntxwv kav cov Alas.” Ces Haxa‑ee txawm rov qab ntawm Elisa los rau ntawm nws tus tswv mas vajntxwv nug tias, “Elisa hais li cas rau koj?” Nws teb tias, “Elisa hais tias koj tus mob yeej yuav zoo.” Mas tagkis tom qab nws txawm muab ib daim pam raus dej coj los kauv vajntxwv lub ntsej muag mus txog thaum vajntxwv tuag. Mas Haxa‑ee thiaj sawv ua vajntxwv nyob nws chaw. Xyoo tsib uas Ahaj tus tub Yaulas ua vajntxwv kav Yixayee mas Yehausafa tus tub Yehaulas pib ua vajntxwv kav Yuda. Thaum Yehaulas pib ua vajntxwv kav ntawd nws muaj peb caug ob xyoos, nws nyob hauv Yeluxalees kav tau yim xyoo. Nws taug nraim cov Yixayee tej vajntxwv tus neev taw, yog ua raws li Ahaj caj ces, vim yog nws yuav Ahaj tus ntxhais ua pojniam. Tej uas nws ua mas Yawmsaub pom tias phem kawg li. Txawm li cas los Yawmsaub yeej tsis ua rau Yuda puam tsuaj tag vim yog saib rau nws tus qhev Davi rau qhov nws twb cog lus tseg rau Davi tias nws yuav pub ib lub teeb ci rau Davi thiab rau Davi caj ces mus ib txhis li. Ntu uas Yehaulas ua vajntxwv mas Edoo fav xeeb rau Yuda thiab tsa dua ib tug vajntxwv kav lawv. Mas Yehaulas thiaj coj nws tej tsheb ua rog huvsi hla mus txog ntua Xa‑i. Thaum hmo ntuj Yehaulas thiab nws cov thawj uas kav cov tsheb ua rog txawm ntaus cov Edoo uas vij nws, tiamsis nws cov tub rog cia li khiav mus tsev tag lawm. Cov Edoo thiaj fav xeeb tsis zwm rau cov Yuda los txog niaj hnub nimno. Thiab lub sijhawm ntawd lub moos Lina kuj fav xeeb rau Yuda. Lwm yam haujlwm uas Yehaulas ua thiab txhua yam uas nws ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Yehaulas kuj tuag mus nrog nws tej poj koob yawm txwv nyob. Lawv muab nws log nrog nws tej poj koob yawm txwv rau hauv Davi lub nroog, mas nws tus tub Ahaxiya sawv nws chaw ua vajntxwv kav. Xyoo kaum ob uas Ahaj tus tub Yaulas ua vajntxwv kav Yixayee mas Yuda tus vajntxwv Yehaulas tus tub Ahaxiya pib ua vajntxwv kav. Thaum Ahaxiya pib kav ntawd nws muaj nees nkaum ob xyoos, nws nyob hauv Yeluxalees kav tau ib xyoos. Nws niam npe hu ua Athaliya, yog cov Yixayee tus vajntxwv Ooli li xeeb ntxwv. Ahaxiya taug nraim Ahaj caj ces tus neev taw thiab ua tej uas Yawmsaub pom tias phem kawg ib yam li Ahaj caj ces ua, rau qhov nws yog Ahaj tus vauv li tub. Ahaxiya nrog Ahaj tus tub Yaulas mus ua rog rau cov Alas tus vajntxwv Haxa‑ee ntawm Lamau Kile‑a, mas cov Alas tua Yaulas raug mob. Yaulas txawm rov qab mus kho mob rau ntawm lub moos Yile‑ee, yog mus kho qhov mob uas nws raug cov Alas tua ntawm Lama rau thaum nws ua rog rau Alas tus vajntxwv Haxa‑ee. Mas Yehaulas tus tub Ahaxiya uas ua vajntxwv kav Yuda thiaj mus saib Ahaj tus tub Yaulas rau hauv lub moos Yile‑ee vim yog Yaulas raug mob. Elisa uas cev Vajtswv lus hu pab xibhwb uas cev Vajtswv lus ib tug los thiab hais rau nws tias, “Cia li qaws lub tsho rau ntawm duav thiab muab ib hwj roj coj mus rau ntawm lub moos Lamau Kile‑a. Thaum koj mus txog lawd, mas nrhiav Yehu uas yog Yehausafa tus tub thiab yog Nisi tus xeeb ntxwv. Cia li cuag nkaus nws thiab coj nws tawm ntawm nws cov phoojywg mus thiab coj nws mus rau chav tsev hauv nruab nrab. Mas muab hwj roj hliv ywg nws taubhau thiab hais tias, ‘Yawmsaub hais li no tias, Kuv tsa koj ua vajntxwv kav Yixayee.’ Ces cia li qheb kiag qhov rooj tawm khiav mus tsis txhob tos.” Tus hluas uas cev Vajtswv lus ntawd mus rau ntawm lub moos Lamau Kile‑a. Thaum nws mus txog ua ciav cov thawj uas kav tub rog tabtom sablaj, mas nws txawm hais tias, “Yawg hlob, kuv muaj xov yuav hais rau koj.” Yehu hais tias, “Hais rau peb cov leejtwg?” Nws teb tias, “Yawg hlob, hais rau koj ntag.” Ces Yehu txawm sawv tsees mus rau hauv tsev. Tus hluas ntawd txawm hliv roj rau saum Yehu taubhau thiab hais rau nws tias, “Yawmsaub uas yog cov Yixayee tus Vajtswv hais li no tias, ‘Kuv tsa koj ua vajntxwv kav Yawmsaub haiv neeg Yixayee. Koj yuav tsum muab koj tus tswv Ahaj caj ces ntxuav pov tseg, xwv kuv thiaj li pauj tau qhov uas Yexenpee muab kuv cov tub qhe uas cev kuv li lus thiab Yawmsaub cov tub qhe sawvdaws tej ntshav nchuav pov tseg. Ahaj caj ces huvsi yuav puam tsuaj tag. Kuv yuav txiav txhua tus txivneej tsis hais cov uas ua qhev thiab cov uas tsis ua qhev hauv cov Yixayee kom tu noob nrho ntawm Ahaj. Kuv yuav ua rau Ahaj caj ces ib yam li ua rau Nenpa tus tub Yelaunpau‑as caj ces thiab ib yam li ua rau Ahiya tus tub Npa‑asa caj ces. Thiab dev yuav noj Yexenpee rau hauv nws lub vaj ntawm lub moos Yile‑ee, thiab yuav tsis muaj leejtwg muab nws log.’ ” Ces tus hluas ntawd txawm qheb kiag qhov rooj tawm khiav mus lawm. Thaum Yehu tawm los rau ntawm nws tus tswv cov thawj rog, lawv txawm hais rau nws tias, “Txhua yam puavleej zoo lov? Tus neeg vwm ntawd tuaj cuag koj ua dabtsi?” Yehu hais tias, “Nej yeej paub tus yawg ntawd thiab paub tias nws hais lus zoo li cas.” Lawv teb tias, “Koj dag xwb, cia li qhia rau peb nimno.” Nws thiaj hais tias, “Tus ntawd hais li no rau kuv tias, ‘Yawmsaub hais li no tias, Kuv tsa koj ua vajntxwv kav cov Yixayee.’ ” Ces lawv txhua tus txawm hle pes kiag cov tsho ntev los pua cov qeb ntai uas do cuas rau Yehu nyob, thiab lawv tshuab raj kub yaj tshaj tawm tias, “Yehu ua vajntxwv lawm lauj!” Yog li no Yehu uas yog Yehausafa tus tub, uas yog Nisi li xeeb ntxwv, thiaj ntaus tswvyim tawm tsam Yaulas. (Lub sijhawm ntawd Yaulas thiab cov Yixayee sawvdaws twb tawm mus tiv thaiv Alas tus vajntxwv Haxa‑ee rau ntawm lub moos Lamau Kile‑a, tiamsis vajntxwv Yaulas rov los kho mob rau hauv lub moos Yile‑ee lawm vim yog cov Alas tua raug nws mob rau thaum nws ua rog rau cov Alas tus vajntxwv Haxa‑ee.) Yehu thiaj hais tias, “Yog nej xav li no, tsis txhob cia leejtwg nyiag kev tawm hauv lub moos no mus hais xov rau hauv lub moos Yile‑ee.” Ces Yehu txawm nce nws lub tsheb ua rog caij mus rau lub moos Yile‑ee, rau qhov Yaulas pw qhov ntawd. Thiab Yuda tus vajntxwv Ahaxiya tuaj saib Yaulas rau qhov ntawd. Tus faj xwm sawv saum lub moos Yile‑ee lub chaw tsom faj, pom Yehu pab neeg tuaj ces txawm hais tias, “Kuv pom ib pab neeg tuaj.” Yaulas hais tias, “Cia li txib ib tug tub rog caij nees mus cuag lawv nug lawv tias, ‘Nej tuaj txojkev thaj yeeb lov?’ ” Ib tug tub rog caij nees txawm mus ntsib Yehu thiab hais tias, “Vajntxwv hais li no tias, ‘Koj tuaj txojkev thaj yeeb lov?’ ” Yehu teb tias, “Koj ntsig txog kev thaj yeeb ua dabtsi? Koj cia li tig kiag caij nees raws kuv qab xwb.” Tus faj xwm ceeb toom tias, “Tus uas xa xov mus txog lawv lawm, tiamsis nws tsis rov los.” Vajntxwv thiaj txib dua ib tug tub rog caij nees mus. Tus ntawd mus txog lawv thiab hais tias, “Vajntxwv hais li no tias, ‘Nej tuaj txojkev thaj yeeb lov?’ ” Yehu teb tias, “Koj ntsig txog kev thaj yeeb ua dabtsi? Koj cia li tig kiag caij nees raws kuv qab.” Tus faj xwm ceeb toom dua ib zaug tias, “Tus ntawd mus txog lawv lawm, tiamsis nws tsis rov los. Thiab tus cujpwm tsav tsheb ntawd saib zoo yam li yog Nisi tus tub Yehu tus cujpwm, rau qhov tsav nrawm heev.” Yaulas hais tias, “Cia li npaj kom txhij.” Lawv txawm npaj Yaulas lub tsheb ua rog. Mas Yixayee tus vajntxwv Yaulas thiab Yuda tus vajntxwv Ahaxiya nyias caij nyias lub tsheb ua rog tawm mus ntsib Yehu ntawm Nanpau uas yog neeg Yile‑ee thaj teb. Mas thaum Yaulas pom Yehu, nws hais tias, “Yehu, muaj kev thaj yeeb lov?” Yehu teb tias, “Yuav muaj kev thaj yeeb tau li cas rau thaum koj niam Yexenpee tseem deev dab ua khawv koob yees siv ntau npaum li no?” Ces Yaulas txawm rub xauv nees tig kiag khiav thiab hais rau Ahaxiya tias, “Au Ahaxiya, lawv fav xeeb lawm lauj!” Ces Yehu txawm rub hneev nti kawg zog nkaus tua mus raug Yaulas ntawm ob lub xub pwg kem nruab nrab. Rab xub chob nplho nws lub plawv nws thiaj ntog vau hlo rau hauv nws lub tsheb ua rog. Yehu hais rau Npikha uas nqa nws tej cuab yeej tias, “Cia li nqa Yaulas lub cev mus pov rau hauv Nanpau uas yog neeg Yile‑ee thaj teb. Cia li nco ntsoov txog thaum wb caij nees raws nws txiv Ahaj qab mus, Yawmsaub hais tej lus no txog nws hais tias, ‘Kuv twb pom Nanpau thiab nws tej tub ki tej ntshav rau nag lawm. Kuv yuav ua pauj rau koj rau hauv thaj teb no ntag. Yawmsaub hais li no ntag.’ Yog li no cia li muab nws nqa pov rau hauv thaj teb no raws li Yawmsaub tej lus.” Thaum Yuda tus vajntxwv Ahaxiya pom li ntawd nws txawm khiav mus rau lub moos Npehakas. Ces Yehu txawm caum qab mus thiab hais tias, “Cia li tua nws thiab,” mas lawv txawm tua nws hauv lub tsheb ua rog rau ntawm ntu kev uas hla lub roob Ku uas ze ntawm Ile‑as. Mas nws txawm khiav txog lub moos Mekidau thiab tuag rau qhov ntawd lawm. Nws cov tub teg tub taws thiaj muab nws lub cev tuag rau tsheb ua rog thauj mus rau Yeluxalees thiab muab log rau hauv nws lub qhov ntxa nrog nws tej poj koob yawm txwv ua ke hauv Davi lub nroog. Xyoo kaum ib uas Ahaj tus tub Yaulas ua vajntxwv kav mas Ahaxiya pib ua vajntxwv kav Yuda. Thaum Yehu tuaj txog lub moos Yile‑ee, Yexenpee kuj hnov lawm. Nws thiaj pleev qhov muag kaim zoj zees thiab qaws plaubhau kom zoo nkauj xauj ntawm qhov rais mus. Thaum Yehu nkag rooj loog los Yexenpee txawm hais tias, “Koj uas tua koj tus tswv, koj uas zoo li Xili, koj tuaj ua kev thaj yeeb lov?” Yehu tsa muag ntsia rau saum qhov rais thiab hais tias, “Leejtwg tuaj kuv tog? Leejtwg ne?” Muaj ob peb tug nraug sam xauj saum qhov rais tuaj rau nws. Nws hais tias, “Cia li muab tus pojniam kod pov los.” Lawv txawm muab tus pojniam ntawd pov los. Nws tej ntshav ib txhia txaws lo ntsa loog thiab lo tej nees, mas tej nees tsuj kiag saum nws. Ces Yehu txawm nkag mus noj haus thiab hais tias, “Mus saib tug pojniam uas raug foom tsis zoo ntawd thiab coj mus log rau qhov nws yog vajntxwv li ntxhais.” Tiamsis thaum lawv mus muab nws log, lawv pom tias tshuav lub taubhau thiab tej tes taw xwb. Thaum lawv rov los hais rau Yehu, nws hais tias, “Tej no yog Yawmsaub tej lus uas nws kom nws tus qhev Eliya uas yog neeg hauv Thinpi hais tias, Dev yuav noj Yexenpee cev nqaij rau hauv Yile‑ee li kav xyuam, thiab Yexenpee lub cev tuag yuav zoo li tej quav tsiaj rau saum npoo av tom tej teb ntawm Yile‑ee li kav xyuam, tsis muaj leejtwg hais tau tias, ‘No yog Yexenpee.’ ” Ahaj muaj xya caum tus tub nyob hauv Xamali. Yehu txawm sau ib tsab ntawv xa mus rau Xamali xa mus rau cov nom tswv uas kav lub nroog thiab rau cov kev txwj laus thiab xa mus rau cov uas zov thiab tu Ahaj cov tub hais tias, “Vim yog vajntxwv cov tub nrog nej nyob thiab vim nej muaj tsheb ua rog muaj nees thiab nej nyob hauv lub nroog uas muaj ntsa loog thiab nej muaj cuab yeej ua rog mas thaum tsab ntawv no tuaj txog nej, nej cia li xaiv vajntxwv ib tug tub uas zoo kawg nkaus thiab tsim txiaj kawg nkaus tsa los ua vajntxwv sawv nws txiv chaw es tuaj ua rog pab nej tus vajntxwv caj ces.” Tiamsis lawv sawvdaws ntshai kawg li, lawv hais tias, “Sim saib, ob tug vajntxwv ntawd twb tiv tsis tau nws es peb yuav ua li cas tiv tau nws?” Tus uas tswjhwm vajntxwv lub vaj tse thiab tus uas kav lub nroog thiab cov kev txwj laus thiab cov uas zov thiab tu vajntxwv cov tub thiaj xa xov tuaj hais rau Yehu tias, “Peb yog koj li qhev thiab peb yuav ua txhua yam raws li uas koj hais. Peb yuav tsis tsa ib tug twg ua vajntxwv li. Koj cia li ua raws li koj pom zoo.” Mas Yehu sau dua ib tsab ntawv mus rau lawv hais tias, “Yog nej tuaj kuv tog thiab yog nej yuav mloog kuv hais, mas tagkis lub sijhawm no nej cia li coj nej tus vajntxwv cov tub li taubhau tuaj cuag kuv ntawm Yile‑ee.” Vajntxwv xya caum leej tub tseem nrog cov uas ua hlob hauv lub nroog nyob ua ke, yog cov uas tu cov tub ntawd hlob. Mas thaum Yehu tsab ntawv tuaj txog lawv, lawv cia li ntes vajntxwv xya caum leej tub muab tua ua ke huvsi, muab cov taubhau tso hauv tawb xa mus rau Yehu ntawm lub moos Yile‑ee. Thaum tus uas xa xov los hais rau Yehu tias, “Lawv coj vajntxwv xya caum leej tub li taubhau los lawm lauj.” Yehu hais tias, “Cia li muab cov taubhau tib ua ob pawg rau ntawm txojkev uas nkag rau hauv rooj loog.” Tagkis sawv ntxov Yehu txawm tawm mus sawv ntawd hais rau cov pejxeem sawvdaws tias, “Nej tsis txhaum, yog kuv fav xeeb rau kuv tus vajntxwv thiab muab nws tua pov tseg. Tiamsis leejtwg tua cov neeg no? Cia li paub tias tej lus uas Yawmsaub hais txog Ahaj caj ces yuav tsis poob ib los rau hauv av li. Rau qhov Yawmsaub ua raws li uas nws kom nws tus qhev Eliya hais.” Yehu thiaj li tua Ahaj caj ces uas tshuav nyob hauv Yile‑ee txhua tus, thiab tua nws cov uas ua hlob txhua tus thiab nws cov kwvluag thiab nws cov pov thawj, mas tsis tshuav ib tug dim li. Yehu txawm sawv kev mus rau lub nroog Xamali. Thaum nws nyob ntawm Npe‑ekhe uas yog cov neeg yug yaj lub zos, Yehu ntsib Yuda tus vajntxwv Ahaxiya cov kwvtij mas nug tias, “Nej yog leejtwg?” Lawv teb tias, “Peb yog Ahaxiya li kwvtij. Peb tuaj saib vajntxwv cov tub thiab saib vajntxwv niam cov tub.” Ces Yehu txawm hais tias, “Cia li ntes cov neeg ntawd.” Lawv cia li ntes cov neeg ntawd thiab muab tua rau ntawm lub qhov Npe‑ekhe, huvsi muaj plaub caug ob leeg tsis tseg ib tug li. Thaum Yehu tawm qhov ntawd mus mas nws ntsib Lekhaj tus tub Yehaunada tuaj cuag nws, mas Yehu kuj fim nws hais rau nws tias, “Koj lub siab xav ib yam li kuv lub siab thiab lov?” Yehaunada teb tias, “Xav ib yam nkaus.” Yehu hais tias, “Yog xav ib yam nkaus mas cev tes tuaj rau kuv.” Nws thiaj cev tes tuaj mas Yehu thiaj coj nws nce rau saum lub tsheb ua rog. Yehu hais tias, “Nrog kuv mus thiab saib kuv lub siab uas kub lug rau Yawmsaub.” Yehu thiaj cia Lekhaj nrog nws caij lub tsheb ua rog mus. Thaum Yehu mus txog ntawm Xamali nws thiaj muab Ahaj caj ces uas tseem tshuav hauv Xamali tua pov tseg, ua rau lawv puam tsuaj tag raws li tej lus uas Yawmsaub hais rau Eliya. Yehu txawm hu cov pejxeem sawvdaws tuaj txoos ua ke thiab hais rau lawv tias, “Ahaj pe hawm Npa‑as me me xwb tiamsis Yehu yuav pe hawm Npa‑as loj heev. Cia li hu cov txiv neeb uas cev dab Npa‑as li lus thiab cov uas pe dab Npa‑as thiab cov txiv neeb txiv yaig sawvdaws tuaj cuag kuv tsis txhob tseg ib tug li, rau qhov kuv yuav ua kevcai xyeem qhov txhia chaw loj kawg li rau dab Npa‑as. Yog leejtwg tsis tuaj mas yuav tsis muaj txojsia nyob.” Qhov tseeb twb yog Yehu ntxias kom tuaj xwv thiaj ua tau rau cov uas pe dab Npa‑as puam tsuaj. Thiab Yehu hais kom npaj tuaj txoos ua ke ua kevcai pe hawm Npa‑as. Lawv thiaj tshaj tawm hu kom tuaj txoos ua ke. Yehu thiaj txib neeg mus hu thoob plaws hauv cov Yixayee mas cov uas pe dab Npa‑as kuj tuaj tag nrho huvsi tsis tshuav ib tug li. Lawv kuj tuaj nkag mus rau hauv lub tsev teev dab Npa‑as, lub tsev teev dab Npa‑as puv nkaus txiv qev. Yehu hais rau tus uas saib tej tsoos tsho tias, “Cia li muab cov tsho rau txhua tus uas pe dab Npa‑as hnav.” Ces nws txawm coj tsho los pub rau sawvdaws hnav. Ces Yehu thiab Lekhaj tus tub Yehaunada txawm nkag rau hauv lub tsev teev dab Npa‑as mas hais rau cov uas pe dab Npa‑as tias, “Cia li txheeb saib puas muaj cov uas pe hawm Yawmsaub nyob hauv nej cov kod, tsuas yuav cov uas pe dab Npa‑as xwb.” Ob tug kuj nkag mus ua kevcai tua tsiaj xyeem thiab ua kevcai hlawv xyeem. Yehu twb tso yim caum leej nyob sab nraud lawm mas hais tias, “Yog leejtwg tso ib tug twg uas kuv muab rau hauv nej txhais tes lawd khiav dim mas tus ntawd yuav tuag theej tus ntawd.” Thaum Yehu ua kevcai hlawv xyeem tag Yehu hais rau cov tub rog uas zov Yehu thiab cov thawj rog tias, “Cia li nkag mus, muab lawv tua tsis txhob cia dim ib tug li.” Lawv txawm xuas ntaj tua cov neeg ntawd huvsi tag. Cov tub rog uas zov vajntxwv thiab cov thawj rog ntawd kuj muab cov cev tuag pov rau sab nraud, thiab lawv nkag mus rau chav tsev hauv nruab nrab. Lawv muab tus ncej teev dab hauv lub tsev dab Npa‑as rho los hlawv pov tseg. Thiab lawv muab tus ncej teev dab Npa‑as thiab lub tsev dab Npa‑as ua puam tsuaj tag huvsi mas muab ua lub tsev tso quav los txog niaj hnub nimno. Yehu muab dab Npa‑as ntxuav tawm tag hauv cov Yixayee li uas hais no. Tiamsis Yehu tsis tseg Nenpa tus tub Yelaunpau‑as tej kev txhaum uas coj cov Yixayee ua txhaum, yog ua tej dab mlom thav nyuj kub uas nyob hauv lub moos Npe‑ee thiab nyob hauv lub moos Daj. Mas Yawmsaub hais rau Yehu tias, “Vim yog koj tau ua zoo raws li kuv nyiam thiab raws li kuv pom zoo thiab tau ua rau Ahaj caj ces txhua yam raws li kuv lub siab xav, mas koj thiab koj caj ces yuav tau nyob saum cov Yixayee lub zwm txwv mus txog plaub tiam.” Tiamsis Yehu tsis ceev faj ua raws li Yawmsaub uas yog cov Yixayee tus Vajtswv txoj kevcai kom kawg siab kawg ntsws, nws tsis tseg Yelaunpau‑as tej kev txhaum uas coj cov Yixayee ua txhaum. Ncua sijhawm ntawd Yawmsaub txawm pib rho cov Yixayee tebchaws qee thaj zuj zus lawm. Haxa‑ee thiaj ntaus yeej Yixayee tebchaws rau txhua qhov, txij ntawm tus dej Yaladee sab hnub tuaj thoob plaws Kile‑a tebchaws, yog Kas thiab Lunpee thiab Manaxe tebchaws, yog txij ntua lub moos Alau‑aw uas nyob ntawm ntug dej Anoo uas yog Kile‑a thiab Npasas tebchaws. Lwm yam haujlwm uas Yehu ua thiab txhua yam uas nws ua thiab nws tus peevxwm huvsi mas twb muab sau cia rau hauv phau ntawv uas hais txog Yixayee tej vajntxwv li keeb kwm. Yehu txawm tuag mus nrog nws tej poj koob yawm txwv nyob, mas lawv muab nws log rau hauv lub nroog Xamali. Mas nws tus tub Yehau‑aha sawv nws chaw ua vajntxwv kav. Yehu nyob hauv Xamali kav Yixayee tau nees nkaum yim xyoo. Thaum Athaliya uas yog Ahaxiya niam pom tias nws tus tub tuag lawm ces nws txawm sawv tsees tua vajntxwv caj ces huvsi pov tseg. Tiamsis vajntxwv Yehaulas tus ntxhais Yehausenpa uas yog Ahaxiya tus muam tau coj Ahaxiya tus tub Yau‑as nyiag khiav tawm hauv vajntxwv cov tub uas yuav raug tua mus lawm. Nws muab Yau‑as thiab tus uas tu nws zais rau hauv ib lub txaj pw. Nws muab Yau‑as zais ntawm Athaliya li no, mas thiaj tsis raug tua. Yau‑as nrog nws nyob tau rau xyoo, tsiv nraim rau hauv Yawmsaub lub tuam tsev rau ncua sijhawm uas Athaliya kav lub tebchaws. Xyoo uas xya Yehauyada txib cov thawj rog uas kav cov Khali thiab cov tub rog uas zov vajntxwv, kom lawv tuaj cuag nws rau hauv Yawmsaub lub tuam tsev. Mas nws nrog lawv sib cog lus thiab kom lawv twv rau hauv vajntxwv lub tsev, mas nws thiaj coj vajntxwv tus tub los rau lawv pom. Mas nws hais rau lawv tias, “Nej yuav tsum ua li no. Thaum nej tuaj ua haujlwm rau hnub Xanpatau mas pab ib mus zov vajntxwv tsev, pab ob zov ntawm lub Rooj Loog Xuj thiab pab peb zov lub qhov rooj ntawm vajntxwv qaum tsev. Ob pab uas tau so rau hnub Xanpatau cia li tuaj zov Yawmsaub lub tuam tsev thiaj zov tau vajntxwv. Nej sawvdaws yuav vij vajntxwv thiab txhua tus nyias tuav rawv nyias cuab yeej. Yog leejtwg txav los ze nej, cia li muab tua kiag. Yuav tsum nrog nraim vajntxwv rau thaum nws tawm mus thiab nws nkag los.” Cov thawj rog kuj ua raws li tus pov thawj Yehauyada hais txhua yam. Nyias coj nyias cov tub rog tsis hais cov uas yuav nkag ua haujlwm rau hnub Xanpatau thiab cov uas yuav tawm ua haujlwm rau hnub Xianiaptau tuaj cuag tus pov thawj Yehauyada. Mas tus pov thawj muab vajntxwv Davi cov hmuv thiab cov phiaj hlau thaiv uas nyob hauv Yawmsaub lub tuam tsev rau cov thawj rog. Mas cov tub rog uas zov vajntxwv kuj tuav cuab yeej, txhua tus sawv nres nroos vij nkaus lub thaj uas xyeem thiab vij tus vajntxwv rau ntawm lub tuam tsev sab ped sab nrad huvsi. Ces Yehauyada coj vajntxwv tus tub tawm los thiab muab lub mom vajntxwv rau ntoo thiab muab daim ntawv ua vajntxwv rau nws thiab tshaj tawm tias nws ua vajntxwv thiab muab roj hliv ywg tsa nws. Lawv npuaj teg hais tias, “Thov kom vajntxwv muaj txojsia loj siav ntev.” Thaum Athaliya hnov tej suab uas cov tub rog uas zov vajntxwv thiab tej pejxeem qw nws txawm mus rau ntawm cov pejxeem hauv Yawmsaub lub tuam tsev. Thaum nws tsa muag ntsia nws pom tus vajntxwv sawv ntawm tus ncej raws li kevcai. Muaj cov thawj rog thiab cov uas tshuab raj xyu nyob ib sab ntawm vajntxwv, thiab cov pejxeem thoob tebchaws sawvdaws zoo siab xyiv fab thiab tshuab raj xyu. Mas Athaliya kuj dua rhe nws lub tsho qw hais tias, “Fav xeeb lauj, fav xeeb lauj!” Pov thawj Yehauyada txawm hais rau cov thawj rog uas kav cov tub rog hais tias, “Cia li coj Athaliya tawm hauv cov tub rog mus. Yog leejtwg raws nws qab mas xuas ntaj tua pov tseg.” Rau qhov tus pov thawj hais tias, “Tsis txhob tua nws rau hauv Yawmsaub lub tuam tsev.” Lawv thiaj ntes nws, mas nws taug txojkev uas nees nkag rau hauv vajntxwv lub tsev ces nws raug tua rau qhov ntawd lawm. Mas Yehauyada kom vajntxwv thiab cov pejxeem cog lus rau Yawmsaub tias lawv yuav ua Yawmsaub haiv neeg, thiab nws kom vajntxwv thiab cov pejxeem sib cog lus ua ke. Mas cov pejxeem thoob tebchaws sawvdaws mus rau ntawm lub tsev dab Npa‑as thiab muab lub tsev ntawd rhuav pov tseg. Lawv muab lub thaj thiab tej dab mlom Npa‑as tsoo ua tej dwb daim tag, thiab tua tus pov thawj Mathas uas teev dab Npa‑as rau ntawm tej thaj ib sab. Thiab tus pov thawj Yehauyada tso tub rog zov Yawmsaub lub tuam tsev. Nws coj cov thawj rog thiab cov Khali thiab cov tub rog uas zov vajntxwv thiab cov pejxeem sawvdaws, mas lawv coj vajntxwv nqes ntawm Yawmsaub lub tuam tsev taug txojkev nkag lub Rooj Loog Tub Rog Zov Vajntxwv mus txog vajntxwv lub tsev. Mas Yau‑as kuj mus nyob saum vajntxwv lub zwm txwv. Cov pejxeem thoob tebchaws sawvdaws zoo siab xyiv fab thiab lub nroog kuj nyob tus yees rau thaum Athaliya raug xuas ntaj tua rau ntawm vajntxwv lub tsev lawm. Thaum Yau‑as pib ua vajntxwv kav Yuda nws hnub nyoog muaj xya xyoo. Xyoo xya uas Yehu ua vajntxwv kav Yixayee mas Yau‑as pib ua vajntxwv kav, nws nyob hauv Yeluxalees kav tau plaub caug xyoo. Nws niam npe hu ua Xinpiya uas nyob hauv Npe‑awsenpa. Yau‑as ua tej uas Yawmsaub pom tias zoo tag nws sim neej vim yog tus pov thawj Yehauyada tau qhuab qhia nws. Txawm li cas los nws kuj tsis rhuav tej chaw siab teev dab, ces cov pejxeem tseem xyeem tsiaj rau dab thiab hlawv hmoov xyab rau saum tej chaw siab ntawd. Yau‑as hais rau cov pov thawj tias, “Cov nyiaj uas pub ua dawb huv uas coj tuaj rau hauv Yawmsaub lub tuam tsev huvsi, yog tej uas sau ntawm tej tibneeg, tsis hais tej nyiaj uas kom txhua tus them tuaj thiab tej nyiaj uas cov pejxeem zoo siab coj tuaj pub rau hauv Yawmsaub lub tuam tsev, mas cia cov pov thawj txais tej nyiaj ntawm txhua tus uas coj tuaj, thiab cia lawv muab coj los kho lub tuam tsev raws li lawv pom tias cheem tsum yuav kho.” Tiamsis xyoo nees nkaum peb uas Yau‑as ua vajntxwv kav mas cov pov thawj tsis tau kho lub tuam tsev kiag li. Vim li ntawd vajntxwv Yau‑as thiaj li hu pov thawj Yehauyada thiab cov pov thawj tuaj mas hais rau lawv tias, “Ua cas nej tsis kho lub tuam tsev? Txij hnub no mus tsis txhob txais tej nyiaj uas lawv cev rau nej, cia li xa tej nyiaj ntawd mus kho lub tuam tsev.” Cov pov thawj thiaj hais hum tias tsis txais nyiaj ntawm cov pejxeem dua li lawm thiab hais hum tias lawv tsis kho lub tuam tsev lawm. Mas pov thawj Yehauyada txawm coj ib lub phij xab tuaj, mas muab tho ib lub qho ntawm lub hau phij xab, thiab muab txawb rau ntawm lub thaj ib sab yog thaum yus yuav nkag hauv Yawmsaub lub tuam tsev sab xis. Mas cov pov thawj uas zov ntawm lub qhov rooj muab tej nyiaj uas coj tuaj rau hauv Yawmsaub lub tuam tsev tso rau hauv lub phij xab ntawd. Thaum lawv pom tias muaj nyiaj ntau hauv lub phij xab lawm mas tus uas sau ntawv rau vajntxwv thiab tus tuam pov thawj hlob li tuaj suav tej nyiaj ntawd thiab muab cov nyiaj uas muaj hauv Yawmsaub lub tuam tsev ntim hnab pav ncauj cia. Lawv muab cov nyiaj uas luj tag ntawd rau cov tub zog uas tu Yawmsaub lub tuam tsev txhais tes, lawv li them rau cov Kws ntoo thiab cov tub zog uas ua haujlwm kho Yawmsaub lub tuam tsev, thiab muab rau cov Kws txhwm pob zeb thiab cov Kws txam pob zeb, thiab siv yuav ntoo thiab tej pob zeb uas txhwm tau lawd los kho Yawmsaub lub tuam tsev thiab siv rau txhua yam haujlwm uas kho lub tuam tsev. Tiamsis tej nyiaj uas coj tuaj rau hauv Yawmsaub lub tuam tsev ntawd tsis tau muab siv ua tej tais nyiaj thiab tej tais khwb teeb xeeb thiab ua phaj ua raj xyu thiab tsis muab ua tej twj kub lossis tej twj nyiaj, rau qhov cov nyiaj ntawd lawv muab rau cov tub zog uas kho Yawmsaub lub tuam tsev xwb. Lawv tsis thov cov uas lawv muab nyiaj rau hauv txhais tes lawm sau cia saib siv nyiaj li cas rau cov tub zog, vim yog cov neeg ntawd ua ncaj ua ncees. Tiamsis cov nyiaj uas luag coj tuaj ua kevcai ntxuav kev txaug kev txhaum thiab cov nyiaj uas coj tuaj ua kevcai daws txim mas tsis muab rau hauv Yawmsaub lub tuam tsev. Cov nyiaj ntawd yog cov pov thawj li feem xwb. Lub sijhawm ntawd cov Alas tus vajntxwv Haxa‑ee nce mus ua rog rau lub moos Ka mas txeeb tau. Tiamsis thaum nws tig yuav mus ua rog rau Yeluxalees, Yuda tus vajntxwv Yau‑as txawm coj tej qhov txhia chaw uas Yuda tej vajntxwv, yog Yehausafa thiab Yehaulas thiab Ahaxiya uas yog nws tej poj koob yawm txwv, tau muab xyeem pub rau Yawmsaub lawm, thiab tej uas Yau‑as muab xyeem pub kiag thiab tej kub huvsi uas nyob hauv lub txhab hauv lub tuam tsev thiab hauv vajntxwv lub tsev huvsi xa kiag mus pub rau Alas tus vajntxwv Haxa‑ee. Ces Haxa‑ee thiaj thim tub rog ntawm Yeluxalees rov mus lawm. Lwm yam haujlwm uas Yau‑as ua thiab txhua yam uas nws ua mas twb muab sau cia rau hauv phau ntawv uas hais txog cov Yuda tej vajntxwv li keeb kwm. Yau‑as cov tub teg tub taws ntaus tswvyim fav xeeb rau Yau‑as mas muab nws tua rau ntawm lub loog Milau uas nyob ntawm txojkev uas mus Xeela. Yog Sime‑as tus tub Yauxakha thiab Saumaw tus tub Yehauxanpa uas ua vajntxwv li tub teg tub taws tua nws, nws thiaj tuag. Lawv muab nws log nrog nws tej poj koob yawm txwv ua ke hauv Davi lub nroog mas nws tus tub Amaxiya sawv nws chaw ua vajntxwv kav. Xyoo nees nkaum peb uas Ahaxiya tus tub Yau‑as ua vajntxwv kav Yuda mas Yehu tus tub Yehau‑aha pib ua vajntxwv kav Yixayee hauv lub nroog Xamali, nws kav tau kaum xya xyoo. Nws ua tej uas Yawmsaub pom tias phem thiab ua txhaum yam nkaus li Nenpa tus tub Yelaunpau‑as tej kev txhaum uas coj cov Yixayee ua txhaum. Yehau‑aha tsis tso tej kev txhaum ntawd tseg li. Mas Yawmsaub thiaj li npau taws rau cov Yixayee mas nws thiaj muab lawv rau hauv Alas tus vajntxwv Haxa‑ee txhais tes thiab rau hauv Haxa‑ee tus tub Npeehada txhais tes tsis tu li. Mas Yehau‑aha taij thov Yawmsaub ces Yawmsaub kuj mloog nws rau qhov Yawmsaub pom tej kev tsim txom uas Alas tus vajntxwv quab yuam lawv li cas. Vim li ntawd Yawmsaub thiaj tsa ib tug cawm cov Yixayee lawv thiaj dim hauv cov Alas txhais tes, cov Yixayee thiaj tau nyob hauv lawv tej vaj tse ib yam li qub. Txawm li ntawd los lawv kuj tsis tseg tej kev txhaum uas Yelaunpau‑as caj ces ua uas nws coj cov Yixayee ua txhaum thiab, lawv ua raws nraim tej kev txhaum no. Tej ncej teev dab Asela kuj tseem nyob hauv Xamali. Yehau‑aha tsis tshuav tub rog li lawm tsuas yog muaj tsib caug tus tub rog uas caij nees thiab kaum lub tsheb ua rog thiab ib vam tus tub rog mus kotaw, rau qhov Alas tus vajntxwv twb muab lawv ua puam tsuaj tag, ua rau lawv zoo yam nkaus li tej nyuag pluas plav uas ya thaum ntaus qoob loo. Lwm yam haujlwm uas Yehau‑aha ua thiab txhua yam uas nws ua thiab nws tus peevxwm mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Yehau‑aha txawm tuag mus nrog nws tej poj koob yawm txwv nyob, lawv muab nws log rau hauv Xamali. Mas nws tus tub Yehau‑a sawv nws chaw ua vajntxwv kav. Xyoo peb caug xya uas Yau‑as ua vajntxwv kav Yuda mas Yehau‑aha tus tub Yehau‑a pib ua vajntxwv kav Yixayee hauv Xamali, nws kav tau kaum rau xyoo. Nws ua tej uas Yawmsaub pom tias phem kawg li, nws tsis tseg Nenpa tus tub Yelaunpau‑as tej kev txhaum uas coj cov Yixayee ua txhaum, nws ua raws nraim tej kev txhaum ntawd. Lwm yam haujlwm uas Yehau‑a ua thiab txhua yam uas nws ua thiab nws lub zog uas nws ua rog rau Yuda tus vajntxwv Amaxiya mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Yehau‑a txawm tuag mus nrog nws tej poj koob yawm txwv nyob mas Yelaunpau‑as nyob saum nws lub zwm txwv. Lawv muab Yehau‑a log rau hauv Xamali nrog Yixayee tej vajntxwv ua ke. Thaum Elisa mob uas nws yuav tuag Yixayee tus vajntxwv Yehau‑a mus cuag nws thiab quaj quaj rau nws tias, “Kuv txiv, kuv txiv, koj yog Yixayee tej tsheb ua rog thiab yog cov tub rog caij nees.” Mas Elisa hais rau vajntxwv tias, “Cia li muab ib rab hneev nti thiab xub los.” Vajntxwv thiaj muab rab hneev nti thiab xub los. Mas Elisa hais rau Yixayee tus vajntxwv tias, “Cia li rub rab hneev nti.” Ces vajntxwv thiaj rub rab hneev nti mas Elisa muab tes tso rau saum vajntxwv txhais tes. Elisa hais tias, “Qhib qhov rais sab hnub tuaj.” Vajntxwv thiaj qheb kiag. Elisa txawm hais tias, “Cia li tua.” Vajntxwv kuj tua. Elisa hais tias, “Koj yog Yawmsaub rab xub uas kov yeej, yog rab xub uas kov yeej cov Alas, rau qhov koj yuav ua rog rau cov Alas ntawm Afe mus txog thaum koj ua rau lawv puam tsuaj tag.” Thiab Elisa hais tias, “Cia li muab cov xub los.” Nws kuj muab cov xub los. Elisa hais rau cov Yixayee tus vajntxwv tias, “Muab cov xub nplawm hauv av.” Vajntxwv txawm nplawm peb teg ces cia li lawm. Mas Vajtswv tus neeg chim rau vajntxwv thiab hais tias, “Tsim nyog koj ntaus tsib rau teg koj thiaj yuav ntaus yeej cov Alas ua kom lawv puam tsuaj tag. Tiamsis nimno koj tsuas ntaus yeej cov Alas peb zaug xwb.” Ces Elisa txawm tuag lawm mas lawv muab nws log. Mau‑a tej pab tub rog pheej tuaj lws lub tebchaws ntawd thaum lub caij ntuj qhua. Muaj ib zaug thaum lawv tabtom kwv ib yawg tuag mus log ces lawv pom dheev ib pab tub sab ces lawv txawm muab yawg tuag ntawd pov kiag rau hauv lub qhov uas log Elisa. Thaum yawg tuag ntawd mus nphav raug Elisa cov pob txha nws cia li ciaj sawv los nres nroos. Mas Alas tus vajntxwv Haxa‑eefqa tau tsim txom cov Yixayee tag Yehau‑aha sim neej. Tiamsis Yawmsaub hlub lawv khuvleej lawv thiab nws tig los saib lawv vim yog tej lus uas nws cog tseg rau Aplahas, Yiha thiab Yakhauj, thiab nws tsis ua rau lawv puam tsuaj thiab tsis tso lawv tseg ntawm nws xubntiag txog niaj hnub nimno. Thaum Alas tus vajntxwv Haxa‑ee tuag lawd nws tus tub Npeehada sawv nws chaw ua vajntxwv kav. Mas Yehau‑aha tus tub Yehau‑a txeeb tau tej moos ntawm Haxa‑ee tus tub Npeehada rov los, yog tej moos uas Haxa‑ee txeeb tau ntawm Yehau‑aha uas yog Yehau‑a txiv mus lawm. Yehau‑a ntaus yeej Npeehada peb zaug mas txeeb tau Yixayee tej moos rov qab los. Xyoo ob uas Yehau‑aha tus tub Yehau‑a ua vajntxwv kav Yixayee mas Yau‑as tus tub Amaxiya pib ua vajntxwv kav Yuda. Thaum nws pib ua vajntxwv kav nws hnub nyoog muaj nees nkaum tsib xyoos, nws nyob hauv Yeluxalees kav tau nees nkaum cuaj xyoo. Nws niam npe hu ua Yehau‑adi, yog neeg hauv Yeluxalees. Nws ua tej uas Yawmsaub pom tias zoo tiamsis zoo tsis thooj li nws yawg koob Davi. Nws ua txhua yam raws li uas nws txiv Yau‑as tau ua lawd. Tiamsis tej chaw siab teev dab ntawd nws tseem tsis tau muab rhuav pov tseg. Cov pejxeem tseem xyeem tsiaj thiab hlawv hmoov xyab rau saum tej chaw siab ntawd. Thaum nws muaj hwjchim kav lub tebchaws hauv nws txhais tes ruaj khov lawm nws txawm muab cov tub teg tub taws uas tua nws txiv tua pov tseg. Tiamsis nws tsis tau tua cov uas tua nws txiv cov menyuam, raws li uas muab sau cia rau hauv Mauxe phau ntawv kevcai uas Yawmsaub hais tias, “Leejtxiv yuav tsis ris nws tej menyuam lub txim tuag, thiab tej menyuam yuav tsis ris leej txiv lub txim tuag. Cia txhua tus nyias ris nyias lub txim tuag.” Ahaxiya muab cov Edoo tua ib vam leej rau hauv lub Hav Ntsev thiab mus ntaus thiab txeeb tau lub moos Xelaj thiaj hu lub moos ntawd ua Yauthe‑ee, yog lub npe uas hu los txog niaj hnub nimno. Thiab Amaxiya txib tub xa xov mus cuag Yehau‑a uas ua vajntxwv kav cov Yixayee, Yehau‑a txiv yog Yehau‑aha, nws yawg yog Yehu, mas hais tias, “Cia li tuaj, es wb yuav ua rog tim ntsej tim muag.” Mas Yixayee tus vajntxwv Yehau‑a xa xov mus rau Yuda tus vajntxwv Amaxiya hais tias, “Ib tsob pos pem lub roob Lenpanoo xa xov mus rau ib tsob ntoo ciab saum roob Lenpanoo hais tias, ‘Cia li muab koj tus ntxhais qua rau kuv tus tub.’ Ces muaj ib tug tsiaj qus nyob pem Lenpanoo txawm hla mus muab tsob pos ntawd tsuj pes kiag. Qhov tseeb yeej yog koj ntaus yeej cov Edoo koj lub siab thiaj khav theeb. Cia li txaus siab rau koj lub koob meej thiab nyob twjywm hauv tsev. Ua cas koj yuav tshum kom muaj kev kub ntxhov ua rau koj thiab cov Yuda raug kev puam tsuaj ua ke?” Tiamsis Amaxiya tsis mloog. Cov Yixayee tus vajntxwv Yehau‑a thiaj li mus mas nws thiab cov Yuda tus vajntxwv Amaxiya thiaj sib ntsib ua rog rau ntawm lub moos Npeseme hauv Yuda tebchaws. Cov Yuda txawm swb cov Yixayee, txhua tus thiaj tsiv rov mus nyias vaj nyias tsev. Cov Yixayee tus vajntxwv Yehau‑a kuj ntes cov Yuda tus vajntxwv Amaxiya uas yog Yau‑as tus tub thiab yog Ahaxiya tus xeeb ntxwv ntawm Npeseme. Nws tuaj rau ntawm Yeluxalees muab lub ntsa loog tsoo pob tag plaub puas tshim txij ntawm lub Rooj Loog Efa‑i mus txog ntua lub rooj loog ntawm lub kaum loog. Yehau‑a muab tej kub tej nyiaj huvsi thiab tej twj siv huvsi uas nyob hauv Yawmsaub lub tuam tsev thiab tej uas nyob hauv tej txhab nyiaj hauv vajntxwv tsev thiab yuam ib co neeg coj huvsi rov qab mus rau lub nroog Xamali. Lwm yam haujlwm uas Yehau‑a ua thiab nws tus peevxwm thiab qhov uas nws ua rog rau cov Yuda tus vajntxwv Amaxiya mas twb muab sau cia rau hauv phau ntawv uas hais txog Yixayee tej vajntxwv li keeb kwm. Yehau‑a tuag mus nrog nws tej poj koob yawm txwv nyob, lawv muab nws log nrog cov Yixayee tej vajntxwv hauv Xamali. Nws tus tub Yelaunpau‑as sawv nws chaw ua vajntxwv kav. Thaum Yehau‑aha tus tub Yehau‑a uas yog cov Yixayee tus vajntxwv tuag lawm, Yau‑as tus tub Amaxiya uas ua Yuda tus vajntxwv tseem nyob tau kaum tsib xyoos ntxiv thiab. Lwm yam haujlwm uas Amaxiya ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Ces cov pejxeem txawm ntaus tswvyim fav xeeb rau Amaxiya hauv Yeluxalees mas nws thiaj khiav mus rau lub moos Lakhi. Ces lawv tso neeg mus caum tau nws ntawm Lakhi mas muab nws tua qhov ntawd. Lawv muab nws lub cev tuag rau nees thauj los log rau hauv Yeluxalees nrog nws tej poj koob yawm txwv ua ke rau hauv Davi lub nroog. Cov pejxeem sawvdaws hauv Yuda txawm muab Axaliya uas hnub nyoog muaj kaum rau xyoo tsa ua vajntxwv nyob nws txiv Amaxiya chaw. Thaum vajntxwv Amaxiya tuag mus nrog nws tej poj koob yawm txwv nyob lawm mas Axaliya tsim kho lub moos Elab thiab rov muab rau Yuda kav. Xyoo kaum tsib uas Yau‑as tus tub Amaxiya ua vajntxwv kav Yuda mas Yehau‑a tus tub Yelaunpau‑as uas ua cov Yixayee tus vajntxwv pib kav hauv Xamali, nws kav tau plaub caug ib xyoos. Nws ua tej uas Yawmsaub pom tias phem kawg li, nws tsis tseg tej kev txhaum uas Nenpa tus tub Yelaunpau‑as ua thiab coj cov Yixayee ua txhaum. Nws ntaus tau cov Yixayee ciam teb rov los txij ntua ntawm txojkev uas mus rau lub moos Hama mus txog ntua dej hiavtxwv Alanpa, raws li Yawmsaub uas yog cov Yixayee tus Vajtswv tej lus uas nws txib nws tus qhev Yauna uas ua xibhwb cev Vajtswv lus qhia. Yauna yog Amithai tus tub uas nyob lub moos Kahefaw. Yawmsaub pom tias cov Yixayee raug kev txom nyem kawg li tsis hais tej uas ua qhev thiab tej uas tsis ua qhev huvsi thiab tsis muaj leejtwg pab tau cov Yixayee. Tiamsis Yawmsaub yeej tsis hais tias yuav muab cov Yixayee ntxuav kom tu noob nrho hauv qab ntuj, Yawmsaub thiaj siv Yehau‑a tus tub Yelaunpau‑as txhais tes pab lawv dim. Lwm yam haujlwm uas Yelaunpau‑as ua thiab txhua yam uas nws ua thiab nws tus peevxwm thiab nws ua rog li cas thiab nws ntaus tau Damaxaka thiab Hama uas txeev yog Yuda li rov los rau cov Yixayee mas twb muab sau cia rau hauv phau ntawv uas hais txog Yixayee tej vajntxwv li keeb kwm. Mas Yelaunpau‑as tuag mus nrog nws tej poj koob yawm txwv nyob uas yog Yixayee tej vajntxwv, mas nws tus tub Xekhaliya sawv nws chaw ua vajntxwv kav. Xyoo nees nkaum xya uas Yelaunpau‑as ua vajntxwv kav Yixayee mas Amaxiya tus tub Axaliya pib ua vajntxwv kav cov Yuda. Thaum nws pib kav nws hnub nyoog muaj kaum rau xyoo thiab nws nyob hauv Yeluxalees kav tau tsib caug ob xyoos. Nws niam npe hu ua Yekhauliya yog neeg hauv Yeluxalees. Axaliya ua tej uas Yawmsaub pom tias zoo, ib yam li txhua yam uas nws txiv Amaxiya tau ua lawd. Txawm li cas los tej chaw siab teev dab tseem tsis tau muab rhuav pov tseg. Cov pejxeem tseem xyeem tsiaj thiab hlawv hmoov xyab rau saum tej chaw siab ntawd. Mas Yawmsaub thiaj nplawm nws, nws thiaj mob lig mob ruas mus txog hnub uas nws tuag. Nws nyob nws dua ib lub tsev. Mas nws tus tub Yauthas kav kiag vajntxwv lub vaj tse thiab tswjhwm cov pejxeem hauv lub tebchaws. Lwm yam haujlwm uas Axaliya ua thiab txhua yam uas nws ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Mas Axaliya txawm tuag mus nrog nws tej poj koob yawm txwv nyob. Lawv muab nws log nrog nws tej poj koob yawm txwv ua ke rau hauv Davi lub nroog, mas nws tus tub Yauthas sawv nws chaw ua vajntxwv kav. Xyoo peb caug yim uas Axaliya ua vajntxwv kav Yuda mas Yelaunpau‑as tus tub Xekhaliya sawv ua vajntxwv kav cov Yixayee hauv Xamali tau rau lub hli. Nws ua tej uas Yawmsaub pom tias phem kawg li ib yam li nws tej poj koob yawm txwv tau ua. Nws tsis tseg tej kev txhaum uas Nenpa tus tub Yelaunpau‑as ua thiab coj cov Yixayee ua txhaum. Yanpe tus tub Salu ntaus tswvyim fav xeeb rau Xekhaliya mas muab nws tua tab meeg cov pejxeem, mas Salu sawv nws chaw ua vajntxwv kav. Lwm yam haujlwm uas Xekhaliya ua mas twb muab sau cia rau hauv phau ntawv uas hais txog Yixayee tej vajntxwv li keeb kwm. Tej xwm txheej no yog raws li tej lus uas Yawmsaub twb cog rau Yehu tias, “Koj cov tub ki yuav tau nyob saum Yixayee lub zwm txwv txog plaub tiam,” mas thiaj tiav zoo nkaus li ntawd ntag. Xyoo peb caug cuaj uas Uxiya ua vajntxwv kav Yuda mas Yanpe tus tub Salu pib ua vajntxwv kav cov Yixayee, nws nyob hauv Xamali kav tau ib hlis. Mas Kadi tus tub Menahee tawm hauv lub moos Thilaxa tuaj rau lub nroog Xamali. Nws ntaus Yanpe tus tub Salu hauv Xamali thiab muab tua tuag ces nws txawm sawv chaw ua vajntxwv kav. Lwm yam haujlwm uas Salu ua thiab qhov uas nws ntaus tswvyim fav xeeb mas twb muab sau cia rau hauv phau ntawv uas hais txog Yixayee tej vajntxwv li keeb kwm. Thaum ntawd Menahee kuj mus ntaus lws lub moos Thapuva thiab lub moos ntawd li kav xyuam txij ntawm lub moos Thilaxa mus ua rau puam tsuaj tag vim yog lawv tsis yeem zwm rau nws, thiab nws muab tej pojniam suab menyuam phua plab huvsi pov tseg. Xyoo peb caug cuaj uas Axaliya ua vajntxwv kav Yuda mas Kadi tus tub Menahee pib ua vajntxwv kav Yixayee, nws nyob hauv Xamali kav tau kaum xyoo. Nws ua tej uas Yawmsaub pom tias phem kawg li. Mus tag lub sijhawm uas nws ua vajntxwv nws tsis tseg txhua yam kev txhaum uas Nenpa tus tub Yelaunpau‑as ua thiab coj cov Yixayee ua txhaum. Cov Axilia tus vajntxwv Pu tuaj ntaus Yixayee tebchaws, mas Menahee muab ib txhiab tala nyiaj pub rau Pu kom thiaj pab tau Menahee kav tau lub tebchaws ruaj khov. Menahee muab cov nyiaj ntawm cov Yixayee los, yog yuam cov uas nplua nuj txhua tus ib leeg them tsib caug sekhee thiaj tau coj mus pub rau cov Axilia tus vajntxwv. Cov Axilia tus vajntxwv thiaj li thim tub rog rov qab thiaj tsis nyob ntev hauv lub tebchaws ntawd. Lwm yam haujlwm uas Menahee ua thiab txhua yam uas nws ua mas twb muab sau cia rau hauv phau ntawv uas hais txog Yixayee tej vajntxwv li keeb kwm. Menahee tuag mus nrog nws tej poj koob yawm txwv nyob mas nws tus tub Pekhahiya sawv nws chaw ua vajntxwv kav. Xyoo tsib caug uas Axaliya ua vajntxwv kav Yuda mas Menahee tus tub Pekhahiya pib ua vajntxwv kav Yixayee hauv Xamali mas nws kav tau ob xyoos. Nws ua tej uas Yawmsaub pom tias phem kawg li, nws tsis tseg tej kev txhaum uas Nenpa tus tub Yelaunpau‑as ua thiab coj cov Yixayee ua txhaum. Lemaliya tus tub Pekha uas yog vajntxwv ib tug thawj rog nrog cov neeg Kile‑a tsib caug leej ntaus tswvyim fav xeeb rau vajntxwv thiab muab nws thiab Akau thiab Ali‑e tua rau hauv Xamali rau ntawm lub chaw ruaj khov hauv vajntxwv lub tsev. Pekha thiaj tua Pekhahiya thiab sawv chaw ua vajntxwv kav. Lwm yam haujlwm uas Pekhahiya ua thiab txhua yam uas nws ua mas twb muab sau cia rau hauv phau ntawv uas hais txog Yixayee tej vajntxwv li keeb kwm. Xyoo tsib caug ob uas Axaliya ua vajntxwv kav Yuda mas Lemaliya tus tub Pekha pib ua vajntxwv kav Yixayee hauv Xamali mas nws kav tau nees nkaum xyoo. Nws ua tej uas Yawmsaub pom tias phem kawg li, nws tsis tseg tej kev txhaum uas Nenpa tus tub Yelaunpau‑as ua thiab coj cov Yixayee ua txhaum. Ncua sijhawm uas Pekha ua vajntxwv kav Yixayee mas cov Axilia tus vajntxwv Thilapilexaw tuaj txeeb lub moos Iyoo thiab Anpee Npema‑akha thiab Yanau‑a thiab Khede thiab Haxau, thiab Kile‑a tebchaws thiab Kalilais tebchaws thiab tag nrho Nathali tebchaws. Nws ntes thiab kuav kiag cov neeg no mus rau Axilia tebchaws Mas Ela tus tub Hause‑a kuj nrog luag ntaus tswvyim fav xeeb rau Lemaliya tus tub Pekha thiab muab nws ntaus tuag thiab sawv nws chaw ua vajntxwv kav rau xyoo nees nkaum uas Uxiya tus tub Yauthas ua vajntxwv kav Yuda. Lwm yam haujlwm uas Pekha ua thiab txhua yam uas nws ua mas twb muab sau cia rau hauv phau ntawv uas hais txog Yixayee tej vajntxwv li keeb kwm. Xyoo ob uas Lemaliya tus tub Pekha ua vajntxwv kav Yixayee mas Uxiya tus tub Yauthas pib ua vajntxwv kav cov Yuda. Thaum nws pib ua vajntxwv kav nws hnub nyoog muaj nees nkaum tsib xyoos mas nws nyob hauv Yeluxalees kav tau kaum rau xyoo. Nws niam npe hu ua Yelusa, yog Xadau tus ntxhais. Yauthas ua tej uas Yawmsaub pom tias zoo ib yam li txhua yam uas nws txiv Uxiya tau ua. Txawm li cas los tej chaw siab teev dab kuj tseem tsis tau muab rhuav pov tseg. Cov pejxeem tseem xyeem tsiaj thiab hlawv hmoov xyab rau saum tej chaw siab ntawd. Nws tsim kho Yawmsaub lub rooj loog tuam tsev sab ped. Lwm yam haujlwm uas Yauthas ua thiab txhua yam uas nws ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Lub sijhawm ntawd Yawmsaub pib txib Alas tus vajntxwv Lexi thiab Lemaliya tus tub Pekha mus ntaus Yuda. Yauthas tuag mus nrog nws tej poj koob yawm txwv nyob. Lawv muab nws log nrog nws tej poj koob yawm txwv ua ke hauv nws yawg koob Davi lub nroog, mas nws tus tub Aha sawv nws chaw ua vajntxwv kav. Xyoo kaum xya uas Lemaliya tus tub Pekha ua vajntxwv kav mas Yauthas tus tub Aha pib ua vajntxwv kav Yuda. Thaum Aha pib ua vajntxwv kav nws hnub nyoog muaj nees nkaum xyoo, nws nyob hauv Yeluxalees kav tau kaum rau xyoo. Nws ua tsis hum Yawmsaub uas yog nws tus Vajtswv lub siab, nws tsis ua raws li nws yawg koob Davi tau ua, tiamsis nws taug nraim Yixayee tej vajntxwv tus neev taw. Nws tseem muab nws tus tub hlawv xyeem rau dab ua raws li tej kevcai qias vuab tsuab uas lwm haiv neeg ua, yog cov uas Yawmsaub ntiab tawm ntawm cov Yixayee hauv ntej mus. Nws xyeem tsiaj thiab hlawv hmoov xyab rau saum tej chaw siab teev dab thiab rau saum tej pov roob thiab hauv txhua tsob qab ntoo ntsuab. Mas cov Alas tus vajntxwv Lexi thiab Lemaliya tus tub Pekha uas yog cov Yixayee tus vajntxwv nce mus ua rog rau Yeluxalees, mas lawv mus vij Aha tiamsis kov tsis yeej. Tib lub sijhawm ntawd cov Edoo tus vajntxwv ntaus tau lub moos Elab rov qab los, muab cov neeg Yuda ntiab tawm mus. Cov Edoo kuj los nyob ruaj rau hauv lub moos Elab los txog niaj hnub nimno. Aha txawm txib neeg mus cuag Thilapilexaw uas yog cov Axilia tus vajntxwv hais tias, “Kuv yog koj tus qhev thiab yog koj tus tub. Thov koj tuaj pab kuv dim hauv cov Alas tus vajntxwv txhais tes thiab dim hauv cov Yixayee tus vajntxwv txhais tes, lawv tabtom ua rog rau kuv.” Aha txawm muab tej nyiaj thiab tej kub uas nyob hauv Yawmsaub lub tuam tsev thiab nyob hauv tej txhab nyiaj hauv vajntxwv lub tsev xa mus ua tshav ntuj rau cov Axilia tus vajntxwv. Axilia tus vajntxwv kuj mloog tej lus uas Aha hais. Axilia tus vajntxwv thiaj li txhij tub rog mus ntaus Damaxaka mas txeeb tau lub nroog thiab kuav cov pejxeem hauv lub nroog ntawd mus rau lub moos Khi thiab muab Lexi tua pov tseg. Thaum vajntxwv Aha mus rau ntawm Damaxaka xav ntsib cov Axilia tus vajntxwv Thilapilexaw, nws pom lub thaj uas xyeem hauv Damaxaka. Ces vajntxwv Aha txawm sau ib tug qauv lub thaj ntawd thiab txhua yam uas yuav ua lub thaj ntawd xa mus rau pov thawj Uliya hauv Yeluxalees. Mas pov thawj Uliya thiaj ua lub thaj ntawd zoo raws li tus qauv uas vajntxwv Aha xa ntawm Damaxaka tuaj txhua yam. Pov thawj Uliya thiaj ua lub thaj ntawd kom tiav ua ntej uas vajntxwv Aha yuav rov ntawm Damaxaka los. Thaum vajntxwv rov ntawm Damaxaka los nws pom lub thaj ua tiav lawm nws txawm txav mus ze thiab nce rau saud thiab nws ua kevcai hlawv huvsi xyeem thiab ua kevcai xyeem qoob loo thiab muab cawv txiv hmab hliv xyeem thiab muab tus tsiaj uas xyeem ua kevcai sib raug zoo cov ntshav nchos rau saum lub thaj ntawd. Nws txawm muab lub thaj tooj liab uas nyob ntawm Yawmsaub xubntiag ntawm lub thaj tshiab thiab Yawmsaub lub tuam tsev ntu nruab nrab tshais ntawm lub chaw uas ncaj lub qhov rooj tuam tsev mus txawb rau ntawm lub thaj tshiab sab ped. Mas vajntxwv Aha hais rau pov thawj Uliya tias, “Saum lub thaj loj no mas koj ua kevcai hlawv xyeem rau thaum tagkis thiab ua kevcai xyeem qoob loo rau thaum yuav tsaus ntuj thiab hlawv tej uas vajntxwv muab xyeem thiab ua kevcai hlawv tej qoob loo uas vajntxwv muab xyeem nrog tej uas ib tsoom pejxeem muab ua kevcai hlawv huvsi xyeem thiab tej qoob loo uas lawv xyeem thiab tej cawv txiv hmab uas lawv hliv xyeem ua ke, thiab muab tej tsiaj uas hlawv huvsi xyeem ntawd thiab tej tsiaj uas tua xyeem cov ntshav huvsi nchos rau saum lub thaj. Tiamsis lub thaj tooj liab mas cia ua lub chaw rau kuv ua nug.” Uliya ua txhua yam no raws li vajntxwv Aha hais. Vajntxwv Aha muab tej txiag uas xov cov tsheb uas thawb dej rhuav huvsi tseg, thiab muab cov phaj dej rho mus. Thiab nws muab lub rhawv dej loj tshem saum cov nyuj tooj liab uas tiag lawm coj mus txawb rau hauv av mas muab pob zeb tiag hauv qab. Txojkev vov uas ua rau vajntxwv taug mus rau hauv lub tuam tsev rau hnub Xanpatau thiab lub rooj loog uas vajntxwv nkag mus rau hauv Yawmsaub lub tuam tsev mas Aha muab rhuav huvsi pov tseg vim yog nws saib rau cov Axilia tus vajntxwv. Lwm yam haujlwm uas Aha ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Mas Aha tuag mus nrog nws tej poj koob yawm txwv nyob. Lawv muab nws log nrog nws tej poj koob yawm txwv ua ke rau hauv Davi lub nroog, mas nws tus tub Hexekhiya sawv nws chaw ua vajntxwv kav. Xyoo kaum ob uas Aha ua vajntxwv kav Yuda tebchaws mas Hause‑a uas yog Ela tus tub pib ua vajntxwv hauv lub nroog Xamali kav Yixayee tebchaws, nws kav tau cuaj xyoo. Nws ua tej uas Yawmsaub pom tias phem kawg li, tiamsis tsis npaum li Yixayee tej vajntxwv uas kav ua nws ntej. Samanexaw uas yog Axilia tus vajntxwv tuaj ua rog rau Hause‑a, ces Hause‑a thiaj zwm rau nws thiab them se rau nws. Tiamsis Axilia tus vajntxwv pom tias Hause‑a fav xeeb, rau qhov nws tau txib neeg xa xov mus cuag Xau uas yog Iyi tus vajntxwv thiab tsis them se rau Axilia tus vajntxwv raws li niaj xyoo them. Vim li no Axilia tus vajntxwv thiaj ntes Hause‑a thiab muab nws kaw hauv tsev lojfaj. Ces Axilia tus vajntxwv txawm tso tub rog txeem tebchaws mus txog lub nroog Xamali. Nws muab lub nroog ntawd vij cia tau peb xyoos. Xyoo cuaj uas Hause‑a ua vajntxwv mas Axilia tus vajntxwv txeeb tau lub nroog Xamali, thiab kuav cov Yixayee mus rau hauv Axilia tebchaws coj mus nyob hauv lub moos Halam thiab ntawm ntug dej Hanpau uas yog tus dej hauv lub moos Kauxas, thiab hauv cov Midia tej moos. Qhov uas ua li no yog vim cov Yixayee tau ua txhaum rau Yawmsaub uas yog lawv tus Vajtswv, yog tus uas coj lawv tawm hauv Iyi tebchaws los tawm hauv Iyi tus vajntxwv Falau txhais tes los, los lawv tseem pe luag tej dab thiab ua lawv lub neej raws li tej neeg uas Yawmsaub ntiab tawm ntawm cov Yixayee hauv ntej mus tej kevcai thiab ua raws li tej kevcai uas Yixayee tej vajntxwv coj los. Cov Yixayee ua tej uas tsis raug cai nraim nkoos tawm tsam Yawmsaub uas yog lawv tus Vajtswv. Lawv ua tej chaw siab teev dab thoob txhua lub moos tag nrho tej moos uas muaj chaw tsom faj thiab tej moos uas muaj ntsa loog ruaj khov. Lawv txhos tej ncej dab thiab tej ncej dab Asela rau saum txhua lub pov roob thiab hauv txhua tus qab ntoo ntsuab. Lawv hlawv xyab rau tej chaw siab teev dab huvsi ntawd, yam li tej neeg uas Yawmsaub rhuav tshem ploj tag ntawm lawv hauv ntej lawm. Lawv ua tej kev phem kev qias ua rau Yawmsaub chim. Lawv ua koom tu tej dab mlom uas Yawmsaub twb hais rau lawv tias, “Nej tsis txhob ua tej no.” Yawmsaub txib txhua tus xibhwb cev Vajtswv lus thiab txhua tus uas hais pom tom hauv ntej qhuab ntuas Yuda thiab Yixayee, hais tias, “Cia li tig hlo ntawm nej tej kev phem thiab tuav rawv kuv tej lus nkaw thiab kuv tej kab ke raws li kuv txoj kevcai huvsi uas kuv hais rau nej tej poj koob yawm txwv thiab kuv tso kuv cov tub qhe uas cev kuv li lus hais rau nej.” Tiamsis lawv tsis mloog, lawv tawv ncauj ib yam li lawv tej poj koob yawm txwv uas tsis ntseeg Yawmsaub uas yog lawv tus Vajtswv. Lawv tsis yuav nws tej kab ke thiab nws tej lus cog tseg uas nws cog rau lawv tej poj koob yawm txwv thiab tej lus uas nws ntuas lawv. Lawv raws ncuj nciav tej dab mlom uas qhuav qhawv lawv thiaj qhuav qhawv thiab lawv ua raws li tej haiv neeg uas nyob ib ncig lawv, yog tej uas Yawmsaub twb hais kom lawv tsis txhob ua raws li ntawd. Thiab lawv tso lawv tus Vajtswv Yawmsaub tej lus nkaw huvsi pov tseg thiab nchuav ob tug dab mlom thav nyuj rau lawv pe. Lawv ua ib tug ncej dab Asela thiab lawv pe txhua yam uas nyob saum nruab ntug, thiab ua koom tu dab Npa‑as. Lawv muab tej tub tej ntxhais hlawv xyeem rau dab, thiab saib yaig saib sij thiab ua khawv koob yees siv, thiab muag lawv tus kheej mus ua tej uas Yawmsaub pom tias phem ua rau Yawmsaub chim. Vim li no Yawmsaub thiaj li chim rau cov Yixayee heev kawg thiab muab lawv ntiab tawm ntawm nws lub xubntiag mus, tsis tshuav ib tug kiag li tsuas yog tshuav xeem Yuda xwb. Yuda kuj tsis tuav rawv lawv tus Vajtswv Yawmsaub tej lus nkaw, lawv ua raws li tej kevcai uas cov Yixayee coj los. Mas Yawmsaub tsis yuav Yixayee caj ces huvsi thiab rau txim rau lawv thiab muab lawv cob rau hauv cov uas lws lawv txhais tes mus txog thaum nws muab lawv laim pov tseg ntawm nws lub xubntiag. Thaum Yawmsaub muab cov Yixayee dua rhe ntawm Davi caj ces lawd lawv tsa Yelaunpau‑as uas yog Nenpa tus tub ua vajntxwv, mas Yelaunpau‑as coj lawv ncaim ntawm Yawmsaub thiab ua rau lawv ua txhaum loj kawg. Cov Yixayee ua raws nraim li tej kev txhaum huvsi uas Yelaunpau‑as tau ua. Lawv tsis tso tej kev txhaum ntawd tseg li, mus txog thaum Yawmsaub muab lawv ntiab tawm ntawm nws lub xubntiag mus, raws li nws tau kom nws cov tub qhe uas cev nws lus txhua tus hais rau lawv lawd. Yog li no cov Yixayee thiaj raug kuav poob tebchaws mus rau hauv Axilia tebchaws los txog niaj hnub nimno. Axilia tus vajntxwv coj neeg hauv lub nroog Npanpiloo, lub moos Khutha, lub moos Ava, lub moos Hama thiab lub moos Xefava‑i mus nyob cov Yixayee chaw rau tej moos hauv Xamali tebchaws. Lawv thiaj txeeb tau Xamali tebchaws thiab mus nyob hauv Xamali tej moos. Txij thaum lawv pib los nyob ntawd lawv tsis hwm thiab tsis paub ntshai Yawmsaub. Vim li ntawd Yawmsaub thiaj tso tsov ntxhuav los rau hauv lawv nruab nrab thiab tom lawv tuag ib txhia. Thiaj muaj neeg mus hais rau Axilia tus vajntxwv tias, “Tej haiv neeg uas koj coj mus nyob rau hauv Xamali tej moos ntawd tsis paub tus timtswv hauv lub tebchaws ntawd txoj kevcai. Vim li ntawd tus timtswv thiaj tso tsov ntxhuav los hauv lawv nruab nrab thiab tom lawv tuag vim yog lawv tsis paub tus timtswv hauv lub tebchaws ntawd txoj kevcai.” Ces Axilia tus vajntxwv thiaj hais tias, “Cia li tso ib tug pov thawj hauv cov pov thawj uas nej ntes coj los ntawd rov qab mus. Cia nws mus nyob qhov ntawd thiab qhia tus timtswv hauv lub tebchaws ntawd txoj kevcai rau lawv.” Yog li ntawd ib tug pov thawj hauv cov uas raug kuav hauv Xamali los thiaj li tau rov los nyob hauv lub moos Npe‑ee thiab qhuab qhia lawv paub tias lawv yuav tsum pe hawm Yawmsaub li cas. Tiamsis txhua haiv neeg ntawd tseem ua lawv tej dab mlom thiab muab txawb rau hauv lub tsev teev dab ntawm tej chaw siab uas cov Xamali twb ua cia lawd, txhua haiv neeg nyias ua rau hauv lub moos uas nws nyob. Cov Npanpiloo ua tus dab mlom Xukhau Npenau, cov neeg Khutha ua tus dab mlom Nawkas, cov neeg Hama ua tus dab mlom Asima, cov neeg Ava ua tus dab mlom Niha thiab Thatha. Cov neeg Xefava‑i hlawv menyuam xyeem rau dab Alamelej thiab dab Anamelej, uas yog cov neeg Xefava‑i tej dab. Lawv kuj hwm thiab paub ntshai Yawmsaub thiab tsa lawv cov neeg leejtwg kuj xij ua pov thawj ua haujlwm ntawm tej chaw siab thiab tua tsiaj xyeem rau hauv tej tsev teev dab ntawm tej chaw siab ntawd. Lawv kuj hwm thiab paub ntshai Yawmsaub thiab tseem ua koom tu lawv tej dab, raws li lawv ib txwm ua hauv lawv qub teb qub chaw uas lawv raug coj los ntawd. Niaj hnub nimno lawv kuj ua ib yam li qub. Lawv tsis hwm tsis paub ntshai Yawmsaub thiab tsis ua raws li tej kab ke thiab tej kevcai thiab txoj kevcai thiab tej lus nkaw uas Yawmsaub muab cob rau Yakhauj caj ces uas Yawmsaub tis npe hu ua Yixayee. Yawmsaub nrog lawv sib cog lus thiab nkaw lus rau lawv tias, “Nej tsis txhob hwm luag tej dab, thiab tsis txhob pe thiab tsis txhob ua koom tu thiab tsis txhob muab qhov txhia chaw xyeem rau tej dab ntawd. Nej yuav tsum hwm thiab paub ntshai Yawmsaub uas siv nws lub hwjchim loj thiab nws txhais tes uas tsa hlo coj nej tawm hauv Iyi tebchaws los. Nej yuav tsum pe nws thiab tua tsiaj xyeem rau nws xwb. Tej kab ke thiab tej kevcai thiab txoj kevcai thiab tej lus nkaw uas nws sau cia rau nej, mas nej yuav tsum ceev faj ua raws nraim mus li. Nej tsis txhob hwm luag tej dab, thiab nej cia li pheej nco ntsoov tej lus uas kuv cog tseg rau nej. Nej tsis txhob hwm luag tej dab. Nej yuav tsum hwm thiab paub ntshai Yawmsaub uas yog nej tus Vajtswv, nws thiaj cawm nej dim hauv nej tej yeeb ncuab txhais tes huvsi.” Txawm li ntawd los lawv tseem tsis mloog, lawv tseem ua raws li lawv qhov qub. Tej haiv neeg no thiaj li pe hawm Yawmsaub thiab tseem ua koom tu tej dab mlom uas lawv txaug. Lawv tej menyuam thiab lawv tej xeeb ntxwv kuj ua ib yam li ntawd, raws li lawv tej poj koob yawm txwv tau ua los txog niaj hnub nimno. Xyoo peb uas Ela tus tub Hause‑a ua vajntxwv kav Yixayee tebchaws mas Aha tus tub Hexekhiya pib ua vajntxwv kav Yuda tebchaws. Thaum nws pib kav ntawd nws hnub nyoog muaj nees nkaum tsib xyoos. Nws nyob hauv Yeluxalees kav tau nees nkaum cuaj xyoo. Nws niam npe hu ua Anpi, uas yog Xekhaliya tus ntxhais. Vajntxwv ua tej uas Yawmsaub pom tias zoo, ib yam li nws yawg koob Davi tau ua lawd. Nws rhuav tshem tej chaw siab uas teev dab pov tseg thiab tsoo tej ncej dab thiab ntov tej ncej dab Asela pov tseg. Thiab nws tsoo tus nab tooj uas Mauxe ua ntawd tawg ua tej dwb daim, rau qhov cov Yixayee pheej hlawv hmoov tshuaj tsw qab rau tus nab ntawd los txog thaum ntawd. Lawv hu tus nab ntawd tias Nehuthas. Nws tso siab plhuav rau Yawmsaub uas yog Yixayee tus Vajtswv. Vim li ntawd tej vajntxwv uas kav Yuda los rau tom qab thiab tej vajntxwv uas kav ua nws ntej, tsis muaj ib tug zoo thooj li nws. Rau qhov nws tuav rawv Yawmsaub ruaj, nws tsis tso qhov uas ua raws li Yawmsaub qhia tseg li, nws tuav rawv tej lus nkaw uas Yawmsaub muab cob rau Mauxe. Thiab Yawmsaub nrog nraim nws, nws tawm mus rau qhovtwg nws kuj ua tau tiav zoo. Nws fav xeeb rau Axilia tus vajntxwv tsis yeem ua num rau lawm. Nws ntaus cov Filixatee mus txog ntua lub moos Kaxa thiab tej moos ib ncig tsis hais tej uas muaj chaw tsom faj thiab tej uas muaj ntsa loog ruaj khov. Xyoo plaub uas Hexekhiya ua vajntxwv kav, yog xyoo xya uas Ela tus tub Hause‑a kav Yixayee tebchaws mas Samanexaw uas yog Axilia tus vajntxwv txawm tuaj ua rog rau lub nroog Xamali thiab vij lub nroog cia. Vij tau peb xyoos mas txeeb tau lub nroog lawm. Xyoo rau uas Hexekhiya ua vajntxwv kav, yog xyoo cuaj uas Hause‑a ua vajntxwv kav Yixayee, lub nroog Xamali raug luag txeeb tau lawm. Axilia tus vajntxwv kuav cov Yixayee mus rau hauv Axilia tebchaws, coj mus nyob hauv lub moos Halam thiab ntawm ntug dej Hanpau uas yog tus dej hauv lub moos Kauxas, thiab hauv cov Midia tej moos, vim yog lawv tsis mloog Yawmsaub uas yog lawv tus Vajtswv tej lus. Lawv fav xeeb rau nws tej lus cog tseg, yog txhua yam uas Yawmsaub tus qhev Mauxe tau hais cia lawd, lawv tsis mloog thiab lawv tsis ua raws li ntawd. Xyoo kaum plaub uas Hexekhiya ua vajntxwv kav mas Axilia tus vajntxwv Xenakhawli tuaj ntaus Yuda txhua lub moos uas muaj ntsa loog ruaj khov mas txeeb tau huvsi. Yuda tus vajntxwv Hexekhiya tso neeg mus hais rau Axilia tus vajntxwv hauv lub moos Lakhi hais tias, “Kuv tau ua txhaum lawm, thov koj thim tub rog mus. Koj yuav nplua npaum twg los kuv yuav them.” Axilia tus vajntxwv hu peb puas tala nyiaj thiab peb caug tala kub rau Yuda tus vajntxwv Hexekhiya them. Mas Hexekhiya muab tag nrho tej nyiaj uas nyob hauv Yawmsaub lub tuam tsev thiab tej uas nyob hauv tej txhab nyiaj hauv vajntxwv tsev huvsi them rau nws. Zaum ntawd Hexekhiya tev tej kub uas luam ntawm tej txhib qhov rooj thiab tej npuab rooj ntawm Yawmsaub lub tuam tsev uas Yuda tus vajntxwv Hexekhiya muab luam rau lawd, muab cob rau Axilia tus vajntxwv. Axilia tus vajntxwv txib Thatha thiab Laxali thiab Lasakhe coj ib pab tub rog coob tawm ntawm lub moos Lakhi tuaj mus rau ntawm vajntxwv Hexekhiya hauv Yeluxalees. Lawv tuaj mus rau Yeluxalees. Thaum lawv tuaj txog lawv los sawv ntawm tus ciav dej uas tso dej tawm ntawm lub pas sab ped los, yog ntawm txojkev uas mus rau daim teb Ntxhua Xov. Thaum lawv hu vajntxwv, Hikhiya tus tub Eliyakhi uas yog tus saib xyuas vajntxwv lub tsev thiab Sena uas yog tus tub sau ntawv thiab Axas tus tub Yau‑av uas yog tus uas sau ntaub ntawv keeb kwm tuaj cuag lawv. Mas Lasakhe hais rau lawv tias, “Cia li hais rau Hexekhiya tias, ‘Tus huabtais loj uas yog Axilia tus vajntxwv hais tias, Koj tso siab rau dabtsi li kod? Koj xav tias nej tej nyuag lus sablaj xwb yog daim phiaj thiab hwjchim uas ua tau rog no lov? Nimno koj vam khom leejtwg es koj thiaj fav xeeb rau kuv? Koj sim xav saib, nimno koj vam khom Iyi uas yog tus pas nrig tauj deg uas lov lawm, yog leejtwg nrig yuav chob nws txhais tes. Iyi tus vajntxwv Falau zoo yam nkaus li ntawd rau txhua tus uas vam khom nws. Tiamsis yog koj hais rau kuv tias, “Peb tso siab rau Yawmsaub uas yog peb tus Vajtswv,” mas tus Vajtswv ntawd puas yog tus uas Hexekhiya muab tej chaw siab uas pe hawm nws thiab nws tej thaj xyeem rhuav pov tseg, thiab hais rau Yuda thiab Yeluxalees tias, “Nej yuav tsum pe Vajtswv ntawm lub thaj no hauv Yeluxalees xwb?” Cia li tuaj nrog kuv tus tswv uas yog Axilia tus vajntxwv cog lus tseg. Kuv yuav muab ob txhiab tus nees rau koj yog tias koj nrhiav tau neeg caij cov nees ntawd. Koj yuav ua li cas raws tau kuv tus tswv li ib tug thawj rog uas me dhau tej rau thaum koj tseem vam khom Iyi thiab lawv tej tsheb ua rog thiab tej tub rog caij nees? Tsis yog li ntawd xwb, qhov uas kuv tuaj ntaus lub chaw no ua kom puam tsuaj tsis yog Yawmsaub nrog nraim lov? Yawmsaub hais rau kuv tias, Cia li mus ntaus lub tebchaws no thiab ua kom puam tsuaj.’ ” Mas Hikhiya tus tub Eliyakhi thiab Sena thiab Yau‑av hais rau Lasakhe tias, “Thov koj hais ua lus Alas rau peb uas yog koj li tub qhe, peb yeej paub tej lus ntawd. Thov tsis txhob hais ua lus Yuda rau cov neeg uas nyob saum tej ntsa loog tau hnov.” Tiamsis Lasakhe hais tias, “Tsis yog kuv tus vajntxwv txib kuv tuaj hais tej lus no rau nej thiab nej tus vajntxwv xwb. Yeej yog hais rau cov uas nyob saum tej ntsa loog uas lawv twb yuav noj lawv tej quav thiab haus lawv tej zis thiab ntag.” Mas Lasakhe sawv ntsug qw ua lus Yuda nrov nrov hais tias, “Cia li mloog tus huabtais loj uas yog Axilia tus vajntxwv tej lus. Vajntxwv hais li no tias, ‘Tsis txhob cia Hexekhiya dag ntxias nej, vim nws tsis muaj peevxwm pab tau nej dim hauv kuv txhais tes. Tsis txhob cia Hexekhiya ua rau nej vam khom Yawmsaub rau tej lus uas hais tias, “Yawmsaub yuav pab peb dim tiag tiag li, lub nroog no yuav tsis poob rau hauv Axilia tus vajntxwv txhais tes.” Tsis txhob mloog Hexekhiya hais.’ Axilia tus vajntxwv hais li no tias, ‘Cia li nrog kuv sib raug zoo thiab tawm tuaj cuag kuv, mas nej txhua tus nyias yuav tau noj nyias tej txiv hmab txiv cev thiab txhua tus nyias yuav tau haus nyias tej qhov dej, mus txog thaum kuv rov tuaj coj nej mus rau lub tebchaws uas zoo ib yam li nej lub, yog lub tebchaws uas muaj qoob loo thiab cawv txiv hmab, yog lub tebchaws uas muaj mov noj thiab vaj txiv hmab, muaj txiv ntoo aulib thiab muaj zib ntab kom nej thiaj muaj txojsia nyob thiaj tsis tuag. Thiab tsis txhob mloog Hexekhiya tej lus uas nws yuav coj nej mus yuam kev hais tias, “Yawmsaub yuav cawm peb dim.” Puas muaj ib tug dab twg hauv ib tsoom tebchaws uas pab tau nws lub tebchaws dim hauv Axilia tus vajntxwv txhais tes? Lub moos Hama thiab lub moos Apa tej dab dua twg tag lawm? Lub moos Xefava‑i, lub moos Hena thiab lub moos Iva tej dab dua twg lawm? Tej dab ntawd pab tau Xamali dim hauv kuv txhais tes thiab lov? Ib tsoom tebchaws tej dab huvsi tsis muaj ib tug dab twg uas pab tau nws lub tebchaws dim hauv kuv txhais tes, mas Yawmsaub yuav cawm Yeluxalees dim hauv kuv txhais tes thiab lov?’ ” Tiamsis lawv ntsiag twjywm tsis teb ib los li rau qhov vajntxwv Hexekhiya twb qhia hais tias, “Tsis txhob teb ib los li.” Hikhiya tus tub Eliyakhi uas yog tus saib xyuas vajntxwv lub tsev thiab Sena uas yog tus tub sau ntawv thiab Axas tus tub Yau‑av uas yog tus uas sau ntawv keeb kwm, rov los cuag Hexekhiya ua ris tsho ntuag tag, thiab qhia Lasakhe tej lus rau vajntxwv. Thaum vajntxwv Hexekhiya hnov tej lus ntawd, nws txawm dua rhe nws lub tsho thiab muab khaub seev tsaj los hnav thiab mus rau hauv Yawmsaub lub tuam tsev. Mas nws txib Eliyakhi uas yog tus saib xyuas vajntxwv lub tsev thiab Sena uas yog tus tub sau ntawv thiab cov pov thawj laus hnav khaub seev tsaj mus cuag Amoj tus tub Yaxaya uas ua xibhwb cev Vajtswv lus. Lawv txawm hais rau nws tias, “Hexekhiya hais li no tias, ‘Hnub no yog hnub uas ntxhov siab thiab raug luag thuam poob ntsej muag. Tej menyuam tub txog caij yug lawm tiamsis tsis muaj zog ntsub. Tej zaum Yawmsaub uas yog koj tus Vajtswv twb hnov tej lus huvsi uas Axilia tus vajntxwv kom Lasakhe tuaj hais saib tsis taus Vajtswv uas muaj txojsia nyob, thiab Yawmsaub yuav rhuav tshem tej lus uas Yawmsaub uas yog koj tus Vajtswv tau hnov. Yog li ntawd thov koj thov Yawmsaub pab cov neeg uas tseem tshuav nyob no.’ ” Thaum vajntxwv Hexekhiya cov tim xyoob tuaj cuag Yaxaya, Yaxaya hais rau lawv tias, “Cia li hais rau nej tus vajntxwv tias, ‘Yawmsaub hais li no tias, Tsis txhob ntshai tej lus uas nej tau hnov ntawd, yog tej lus uas Axilia tus vajntxwv tej nom tswv thuam kuv. Saib maj, kuv yuav tshoov nws lub siab ua kom nws hnov lus huab lus cua mas nws yuav rov qab mus rau nws lub tebchaws. Thiab kuv yuav ua kom nws tuag hniav ntaj rau hauv nws lub tebchaws.’ ” Lasakhe thiaj rov qab mus mas ntsib Axilia tus vajntxwv ua rog rau lub moos Lina, rau qhov nws hnov tias vajntxwv twb tawm hauv Lakhi mus lawm. Thaum Axilia tus vajntxwv hnov xov hais tias Khuj tus vajntxwv Thihakha twb sawv kev tuaj ntaus nws lawm, nws txawm txib neeg xa xov rov mus hais rau Hexekhiya hais tias, “Nej yuav tsum hais li no rau Yuda tus vajntxwv Hexekhiya hais tias, ‘Tsis txhob cia koj tus Vajtswv uas koj vam khom ntawd dag hais tias Yeluxalees yuav tsis raug muab rau hauv Axilia tus vajntxwv txhais tes. Saib maj, nej twb hnov lawm tias Axilia tej vajntxwv twb ua li cas rau ib tsoom tebchaws huvsi lawm, twb ua rau tej tebchaws puam tsuaj tag huvsi. Koj nev, koj yuav tau kev dim lov? Ib tsoom tebchaws tej dab pab tau lawv dim lov? Twb yog tej tebchaws uas kuv tej poj koob yawm txwv muab ua puam tsuaj tag, yog lub moos Kauxas, lub moos Halas, lub moos Lexe thiab cov neeg Edee uas nyob hauv lub moos Thee‑axa. Tus vajntxwv hauv lub moos Hama thiab tus vajntxwv hauv Apa thiab tus vajntxwv hauv Xefava‑i, thiab tus vajntxwv hauv Hena thiab tus vajntxwv hauv Iva dua twg lawm?’ ” Hexekhiya txais tsab ntawv ntawm tus xa xov txhais tes thiab nyeem. Mas Hexekhiya thiaj mus rau hauv Yawmsaub lub tuam tsev, thiab muab tsab ntawv nthuav rau ntawm Yawmsaub lub xubntiag. Thiab Hexekhiya thov ntawm Yawmsaub xubntiag hais tias, “Au Yawmsaub uas yog Yixayee tus Vajtswv, uas nyob lub zwm txwv saum cov Khelunpee, koj tib leeg xwb thiaj yog ib tsoom tebchaws hauv qab ntuj tus Vajtswv, koj tau tsim lub ntuj thiab lub ntiajteb. Au Yawmsaub, thov tig pob ntseg mloog. Au Yawmsaub, thov tsa qhov muag saib, thiab thov koj mloog Xenakhawli tej lus huvsi uas nws xa tuaj thuam luag Vajtswv uas muaj txojsia nyob. Au Yawmsaub, yeej muaj tseeb li ntawd tiag, Axilia tej vajntxwv tau ua rau txhua haiv neeg thiab lawv lub tebchaws puam tsuaj tag, thiab muab lawv tej dab mlom pov rau hauv hluavtaws, vim tej ntawd yeej tsis yog timtswv, tsuas yog tej uas neeg txhais tes ua xwb, yog ntoo thiab pob zeb. Vim li ntawd tej ntawd thiaj raug muab ua puam tsuaj tag. Au Yawmsaub uas yog peb tus Vajtswv, nimno kuv thov koj cawm peb dim hauv nws txhais tes, xwv ib tsoom tebchaws hauv ntiajteb thiaj paub tias koj yog Yawmsaub koj tib leeg yog Vajtswv.” Mas Amoj tus tub Yaxaya hais mus rau Hexekhiya hais tias, “Yawmsaub uas yog Yixayee tus Vajtswv hais li no tias, Kuv twb hnov koj tej lus thov hais txog Xenakhawli uas yog Axilia tus vajntxwv lawm. Ntawm no mus yog tej lus uas Yawmsaub hais txog Xenakhawli. “ ‘Xi‑oo tus ntxhais dawb huv saib tsis taus koj luag koj, Yeluxalees tus ntxhais co hau nto luag raws koj qab. “ ‘Koj thuam thiab hais phem rau leejtwg? Koj tsa koj lub suab tawm tsam leejtwg thiab koj khav theeb zij ncaug ntxi muag rau leejtwg? Yog ua rau cov Yixayee tus Vajtswv uas dawb huv ntag. Koj muab lus rau koj cov neeg xa xov thuam luag tus Tswv, thiab koj tau khav tias, “Kuv muaj tsheb ua rog ntau heev, kuv nce mus saum tej roob siab, mus txog tej qhov uas deb kawg hauv Lenpanoo. Kuv twb muab nws tej ntoo ciab uas siab kawg ntov vau thiab ntov nws tej ntoo ciab nplooj suab uas zoo nkauj kawg. Kuv nkag mus rau hauv qhov uas deb kawg nkaus thiab mus txog lub hav zoo v uas tsaus kawg nkaus. Kuv khawb qhov dej thiab haus lwm tebchaws li dej, kuv txhais xib taws tsuj Iyi tej hav dej qhuav tag huvsi.” “ ‘Koj tsis tau hnov lov? Kuv twb npaj cia li ntawd ntev los lawm. Tej haujlwm uas kuv ua nimno kuv twb hom cia thaum ub los lawm, hais tias koj yuav ua rau tej moos uas muaj ntsa loog ruaj khov pob tag ua tej niag pawg. Tej neeg hauv tej moos ntawd qaug zog ntshaus ntsho poob siab tag thiab txaj muag heev, lawv zoo li tej zaub hauv teb thiab zoo li tej nroj mos mos, zoo li tej nroj uas tuaj saum ruv tsev uas cia li qhuav tag tsis hlob. “ ‘Kuv yeej paub qhov uas koj zaum thiab qhov uas koj tawm mus thiab nkag los, thiab qhov uas koj npau taws rau kuv. Vim koj tau npau taws rau kuv thiab kuv twb hnov qhov uas koj khav theeb, mas kuv yuav muab kuv tus nqe lauj chob koj lub qhov ntswg thiab muab kuv txoj xauv sam koj lub qhov ncauj, mas kuv yuav cab koj tig hlo rov qab taug txojkev uas koj tuaj mus.’ “No yog tej txujci uas qhia rau koj paub. Xyoo no koj yuav noj tej qoob loo uas nws tuaj nws. Xyoo ob koj yuav noj tej uas tuaj ntawm lub qub chaw. Mas xyoo peb cia li tseb thiab hlais thiab ua vaj txiv hmab thiab noj tej txiv ntawd. Yuda caj ces cov uas dim thiab tseem tshuav nyob yuav nrhau cag rau hauv thiab txi txiv rau saud. Vim tias muaj ib co uas tseem tshuav nyob yuav tawm hauv Yeluxalees mus, thiab muaj ib co uas dim yuav tawm hauv lub roob Xi‑oo mus. Yawmsaub uas muaj hwjchim loj kawg nkaus yuav kub siab lug ua tej no. “Vim li no Yawmsaub thiaj hais txog Axilia tus vajntxwv li no tias, Nws yuav tsis nkag los rau hauv lub nroog no thiab tsis tua xub hneev tuaj rau hauv, thiab tsis tuav daim hlau thaiv tuaj ze lub nroog thiab tsis tsub av ua chaw nce ntsa loog. Nws tuaj txojkev twg nws yuav rov txojkev ntawd mus, nws yuav tsis nkag rau hauv lub nroog no. Yawmsaub hais li no ntag. Kuv yuav tsom kwm lub nroog no cia kom dim, vim saib rau kuv thiab saib rau kuv tus tub qhe Davi.” Hmo ntawd Yawmsaub li tubtxib saum ntuj tawm mus tua Axilia cov tub rog hauv lawv lub yeej tuag 185,000 leej. Mas thaum sawv ntxov lawv sawv saib ua ciav cov ntawd twb tuag tag lawm. Ces Axilia tus vajntxwv Xenakhawli txawm cia li sawv tsees rov qab mus tsev, mus nyob hauv Ninave. Thaum nws tabtom pe hawm hauv lub tsev teev dab Nilau uas yog nws tus dab, nws ob tug tub Alamelej thiab Salexaw txawm xuas ntaj tua nws tuag. Ces ob tug khiav mus rau Alalab tebchaws lawm. Mas nws tus tub Exahadoo sawv kav nyob nws chaw. Lub sijhawm ntawd Hexekhiya mob hnyav heev twb yuav tuag. Mas Amoj tus tub Yaxaya uas yog xibhwb cev Vajtswv lus tuaj cuag nws thiab hais rau nws tias, “Yawmsaub hais li no tias, Koj cia li tu tej kev teb kev chaw kom zoo, koj yuav tuag koj yuav tsis nquag.” Mas Hexekhiya tig xubntiag rau tim phab ntsa thiab thov Yawmsaub hais tias, “Au Yawmsaub, kuv taij thov koj nco txog tias kuv ua lub neej xib rau koj rau ntawm koj lub xubntiag kawg siab kawg ntsws thiab tau ua tej uas koj pom tias zoo.” Ces Hexekhiya txawm quaj heev kawg. Thaum Yaxaya tsis tau tawm hauv lub tshav puam ntawm vajntxwv tsev, Yawmsaub hais lus tuaj rau nws tias, “Cia li rov qab mus hais rau Hexekhiya uas yog kuv haiv neeg tus thawj tias, ‘Koj yawg koob Davi tus Vajtswv Yawmsaub hais li no tias, Kuv twb hnov koj tej lus thov lawm, kuv twb pom koj tej kua muag lawm. Kuv yuav kho kom koj zoo mas hnub peb koj yuav tau mus rau hauv Yawmsaub lub tuam tsev. Kuv yuav txuas koj txojsia ntev kaum tsib xyoo ntxiv thiab. Kuv yuav cawm koj thiab lub nroog no dim ntawm Axilia tus vajntxwv txhais tes, thiab kuv yuav tsom kwm lub nroog no vim yog saib rau kuv thiab saib rau kuv tus qhev Davi.’ ” Mas Yaxaya hais tias, “Cia li coj ib lub ncuav txiv cev los, kom lawv muab lub ncuav ntawd npuab rau ntawm lub rwj kom nws thiaj li rov qab zoo.” Hexekhiya hais rau Yaxaya tias, “Yuav muaj ib yam dabtsi qhia kom paub tias Yawmsaub yuav kho kuv thiab peb hnub kuv yuav tau mus rau hauv Yawmsaub lub tuam tsev?” Yaxaya hais tias, “No yog yam txujci uas Yawmsaub ua rau koj paub tias nws yuav ua raws li nws twb cog lus lawm. Yuav cia tus duab hnub mus tom ntej kaum qeb los rov tom qab kaum qeb?” Hexekhiya teb tias, “Yoojyim ua rau tus duab hnub mus tom ntej kaum qeb. Yog li no thov cia tus duab thim rov qab kaum qeb.” Ces Yaxaya uas yog xibhwb cev Vajtswv lus taij thov Yawmsaub, mas Yawmsaub ua rau tus duab hnub thim rov qab kaum qeb uas tus duab twb mus dhau lawd ntawm lub chaw ntsuas uas Aha ua. Thaum ntawd Npaladas tus tub Melaudanpalada uas ua vajntxwv hauv Npanpiloo txib cov tim xyoob coj tsab ntawv thiab tshav ntuj mus pub rau Hexekhiya vim yog nws hnov xov tias Hexekhiya mob. Mas Hexekhiya zoo siab txais tos lawv thiab coj lawv mus saib nws tej txhab nyiaj huvsi, saib tej nyiaj, tej kub, tej txuj lom, tej roj tsim txiaj, thiab saib lub txhab uas rau cuab yeej ua rog, yog txhua yam uas nyob hauv nws tej txhab. Tsis tshuav ib yam hauv nws lub tsev thiab thoob plaws hauv nws lub tebchaws uas nws tsis tau muab qhia rau lawv saib li. Mas Yaxaya uas yog xibhwb cev Vajtswv lus tuaj cuag vajntxwv Hexekhiya, thiab hais rau nws tias, “Cov neeg no tuaj hais dabtsi? Thiab lawv tuaj qhovtwg tuaj cuag koj?” Hexekhiya teb tias, “Lawv tuaj deb deb li tuaj, yog tuaj Npanpiloo tebchaws tuaj.” Yaxaya nug tias, “Lawv pom dabtsi hauv koj lub vaj lub tsev?” Hexekhiya teb tias, “Lawv pom txhua yam hauv kuv lub vaj lub tsev, tsis tshuav ib yam dabtsi hauv kuv tej txhab uas kuv tsis tau muab qhia rau lawv saib li.” Ces Yaxaya txawm hais rau Hexekhiya tias, “Cia li mloog Yawmsaub tej lus. Saib maj, lub caij lub nyoog tabtom los txog lawm uas txhua tsav txhua yam hauv koj lub vaj lub tsev thiab tej uas koj tej poj koob yawm txwv khaws tau cia los txog hnub no yuav raug muab coj mus rau Npanpiloo, tsis tshuav ib yam dabtsi kiag li. Yawmsaub hais li no ntag. Thiab koj tej tub uas koj yug muaj qee leej yuav raug muab coj mus thiab lawv yuav ua nraug sam rau hauv vajntxwv Npanpiloo lub tsev.” Mas Hexekhiya hais rau Yaxaya tias, “Yawmsaub tej lus uas koj hais no kuj zoo.” Rau qhov nws xav hauv lub siab tias, “Yog muaj kev thaj yeeb thiab nyob kaj siab lug mus tag kuv sim neej, kuj yog zoo lawm los tsis yog?” Lwm yam haujlwm uas Hexekhiya ua, thiab nws tus peevxwm huvsi thiab qhov uas nws ua lub pas dej thiab tus ciav dej tso dej los rau hauv lub nroog mas twb muab sau cia rau hauv phau ntawv uas hais txog cov Yuda tej vajntxwv li keeb kwm. Ces Hexekhiya txawm tuag mus nrog nws tej poj koob yawm txwv nyob, mas nws tus tub Manaxe sawv kav nyob nws chaw. Thaum Manaxe pib ua vajntxwv nws hnub nyoog muaj kaum ob xyoos, nws nyob hauv Yeluxalees kav tau tsib caug tsib xyoos. Nws niam npe hu ua Hexinpa. Nws ua tej uas Yawmsaub pom tias phem kawg li, nws ua raws li tej kevcai qias vuab tsuab uas lwm haiv neeg ua, yog cov uas Yawmsaub ntiab tawm ntawm cov Yixayee hauv ntej mus. Nws rov ua tej chaw siab teev dab uas nws txiv Hexekhiya twb muab rhuav tag lawd, thiab nws ua tej thaj teev dab Npa‑as thiab ua ncej dab Asela, ib yam li cov Yixayee tus vajntxwv Ahaj tau ua. Nws pe hnub pe hli thiab tej hnub qub saum nruab ntug huvsi thiab ua koom tu tej ntawd. Nws ua tej thaj teev dab rau hauv Yawmsaub lub tuam tsev, uas yog lub chaw uas Yawmsaub twb hais tias, “Kuv yuav muab kuv lub npe cia rau hauv Yeluxalee.” Nws ua tej thaj xyeem rau lub hnub lub hli thiab tej hnub qub saum nruab ntug huvsi rau hauv ob lub tshav puam hauv Yawmsaub lub tuam tsev. Nws muab nws tus tub tua hlawv xyeem rau dab, thiab nws saib caij saib nyoog saib yaig saib sij thiab nws mus nug tej txiv neeb txiv yaig thiab tej uas muaj dab leej nkaub. Nws ua tej uas Yawmsaub pom tias phem kawg nkaus li zes ua rau Yawmsaub npau taws. Nws muab tus dab mlom Asela uas nws txaug txawb rau hauv lub tuam tsev uas Yawmsaub twb hais rau Davi thiab nws tus tub Xalaumoo lawm hais tias, “Lub tuam tsev no thiab lub nroog Yeluxalees uas kuv twb xaiv hauv txhua xeem Yixayee los mas kuv yuav cia kuv lub npe nyob hauv mus ib txhis. Kuv yuav tsis ua rau cov Yixayee txhais kotaw khiav tawm hauv lub tebchaws uas kuv twb muab rau lawv tej poj koob yawm txwv lawd dua li lawm, yog tias lawv ceev faj ua raws li txhua yam uas kuv hais kom lawv ua thiab ua raws li txoj kevcai huvsi uas kuv tus qhev Mauxe hais rau lawv.” Tiamsis lawv tsis mloog thiab Manaxe ntxias lawv mus ua phem heev dua tej haiv neeg uas Yawmsaub twb muab ua puam tsuaj tag rau ntawm lawv hauv ntej. Yawmsaub kom cov xibhwb cev Vajtswv lus uas yog nws cov tub qhe mus hais tias, “Vim yog Yuda tus vajntxwv Manaxe tau ua tej kev qias vuab tsuab thiab ua phem heev dua li cov Amaulai uas nyob ua nws ntej tau ua, thiab nws tej dab mlom ntawd tau ua rau cov Yuda ua txhaum, vim li no Yawmsaub uas yog cov Yixayee tus Vajtswv hais li no tias, ‘Kuv tabtom yuav coj kev puam tsuaj loj kawg li los rau Yeluxalees thiab Yuda mas txhua tus uas hnov yuav rhiab pob ntseg. Kuv yuav muab txoj hlua uas ntsuas lub nroog Xamali lawm los thiab siv lub qe hlau uas ntsuas Ahaj caj ces qhov uas ntseg los dai ntsuas lub nroog Yeluxalees. Thiab kuv yuav ntxuav Yeluxalees yam nkaus li ntxuav lub phaj thiab muab khwb. Kuv yuav muab kuv qub txeeg qub teg uas tseem tshuav laim pov tseg thiab muab lawv rau hauv lawv cov yeeb ncuab txhais tes. Lawv yuav raug luag txeeb thiab lws tag nrho huvsi vim lawv tau ua tej uas kuv pom tias phem kawg li thiab ua rau kuv npau taws txij hnub uas lawv tej poj koob yawm txwv tawm hauv Iyi tebchaws los txog niaj hnub nimno.’ ” Ntau dua li ntawd Manaxe tseem muab tej neeg uas tsis txhaum tua pov tseg coob kawg li rau hauv Yeluxalees ntshav liab vog puv nkaus rau txhua qhov. No yog tej kev txhaum uas loj tshaj qhov uas nws coj cov Yuda ua txhaum lawv thiaj ua tej uas Yawmsaub pom tias phem kawg li. Lwm yam haujlwm uas Manaxe ua thiab txhua yam uas nws ua thiab tej kev txhaum uas nws ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Manaxe txawm tuag mus nrog nws tej poj koob yawm txwv nyob. Lawv muab nws log rau hauv lub vaj uas nyob ntawm nws lub tsev yog lub vaj Usxa, mas nws tus tub Asmoo sawv nws chaw ua vajntxwv kav. Thaum Asmoo sawv ua vajntxwv kav nws hnub nyoog muaj nees nkaum ob xyoos, nws nyob hauv Yeluxalees kav tau ob xyoos. Nws niam npe hu ua Mesuleme, yog Haluj uas yog neeg hauv Yaunpa tus ntxhais. Nws ua tej uas Yawmsaub pom tias phem kawg li, ib yam nkaus li nws txiv Manaxe tau ua lawd. Nws taug nraim nws txiv tus neev taw. Nws ua koom tu tej dab mlom uas nws txiv teev thiab pe hawm tej mlom ntawd. Nws muab Yawmsaub uas yog nws tej poj koob yawm txwv tus Vajtswv tso tseg tsis taug Yawmsaub txojkev. Mas Asmoo cov tub teg tub taws ntaus tswvyim fav xeeb rau nws thiab muab nws tua rau hauv nws lub tsev. Tiamsis cov pejxeem muab txhua tus uas ntaus tswvyim fav xeeb rau vajntxwv Asmoo tua huvsi lawm, thiab cov pejxeem tsa nws tus tub Yauxiya ua vajntxwv nyob nws chaw. Lwm yam haujlwm uas Asmoo ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Lawv muab nws log rau hauv nws lub qhov ntxa uas nyob hauv lub vaj Usxa. Mas nws tus tub Yauxiya sawv nws chaw ua vajntxwv kav. Thaum Yauxiya pib ua vajntxwv kav nws hnub nyoog muaj yim xyoo, nws nyob hauv lub nroog Yeluxalees kav tau peb caug ib xyoos. Nws niam npe hu ua Yedida yog Adaya uas nyob hauv lub moos Npaukha li ntxhais. Nws ua tej uas Yawmsaub pom tias zoo, thiab nws taug nraim nws yawg koob Davi tus neev taw, nws tsis tig mus rau sab xis lossis sab laug. Xyoo kaum yim uas Yauxiya ua vajntxwv kav mas vajntxwv txib Safas uas yog tus tub sau ntawv, yog Axalisya tus tub uas yog Mesulas li xeeb ntxwv, mus rau hauv Yawmsaub lub tuam tsev, thiab hais rau nws tias, “Cia li mus cuag tus tuam pov thawj hlob Hikhiya kom nws mus suav cov nyiaj uas coj tuaj rau hauv Yawmsaub lub tuam tsev, yog tej nyiaj uas cov uas zov qhov rooj tau sau ntawm cov pejxeem. Mas muab rau hauv cov tub zog uas tu Yawmsaub lub tuam tsev txhais tes, es cia lawv them rau cov tub zog uas nyob ntawm Yawmsaub lub tuam tsev thiab kho lub tuam tsev, yog muab rau cov Kws ntoo, cov Kws ua tsev thiab cov Kws txhwm pob zeb, thiab siv yuav ntoo thiab tej pob zeb uas txhwm tau lawd los kho lub tuam tsev. Tsis tag lawv yuav sau ntawv hais txog tej nyiaj uas lawv tau txais lawd saib siv li cas, rau qhov lawv yeej ua ncaj.” Tus tuam pov thawj hlob Hikhiya hais rau Safas uas yog tus tub sau ntawv tias, “Kuv tshawb tau phau ntawv kevcai nyob hauv Yawmsaub lub tuam tsev.” Ces Hikhiya txawm muab phau ntawv ntawd rau Safas thiab nws muab nyeem. Ces Safas uas yog tus tub sau ntawv mus cuag vajntxwv thiab qhia rau vajntxwv tias, “Koj cov qhev twb nchuav tej nyiaj uas nyob hauv lub tuam tsev thiab muab cob rau hauv cov tub zog uas tu Yawmsaub lub tuam tsev txhais tes.” Mas Safas uas yog tus tub sau ntawv hais rau vajntxwv tias, “Tus pov thawj Hikhiya muab ib phau ntawv rau kuv.” Thiab Safas muab nyeem rau vajntxwv mloog. Thaum vajntxwv hnov tej lus hauv phau kevcai lawd, nws txawm dua rhe nws lub tsho. Thiab vajntxwv hais rau tus pov thawj Hikhiya thiab Ahikhas uas yog Safas tus tub thiab Anpau uas yog Mikhaya tus tub thiab Safas uas yog tus tub sau ntawv thiab Axaya uas yog vajntxwv tus tub tes taw hais tias, “Nej cia li mus ua nug rau Yawmsaub rau kuv thiab cov pejxeem thiab tag nrho cov Yuda huvsi hais txog tej lus hauv phau ntawv no uas tshawb tau lawm. Yawmsaub txojkev npau taws loj heev tshwm plaws los rau peb lawm rau qhov peb tej poj koob yawm txwv tsis mloog tej lus hauv phau ntawv no thiab tsis ua raws li txhua yam uas sau cia hais txog peb.” Ces tus pov thawj Hikhiya thiab Ahikhas thiab Anpau thiab Safas thiab Axaya txawm mus cuag tus pojniam xibhwb Huda uas cev Vajtswv lus uas yog Salu tus pojniam. Salu yog tus uas tu vajntxwv tej tsoos tsho thiab yog Thiva tus tub thiab yog Hahav tus xeeb ntxwv. Tus pojniam xibhwb ntawd nyob hauv Yeluxalees ceg kaum nroog uas ua tshiab, ces lawv txawm nrog nws tham. Tus pojniam ntawd hais rau lawv tias, “Yawmsaub uas yog cov Yixayee tus Vajtswv hais li no tias, Cia li hais rau tus uas txib nej tuaj cuag kuv tias, ‘Yawmsaub hais li no tias, Saib nawj, kuv yuav tso tej xwm txheej phem los raug lub chaw no thiab raug tej neeg uas nyob hauv raws li txhua lo lus hauv phau ntawv uas Yuda tus vajntxwv tau nyeem ntawd. Vim lawv twb tso kuv tseg thiab hlawv xyab xyeem rau luag tej dab thiaj ua rau kuv chim rau txhua yam uas lawv txhais tes ua, vim li no kuv txojkev chim yuav npau tshwm plaws rau lub chaw no yuav tav tsis tau li.’ Tiamsis Yuda tus vajntxwv uas txib nej tuaj ua nug rau Yawmsaub ntawd, nej cia li hais li no rau nws tias, ‘Yawmsaub uas yog cov Yixayee tus Vajtswv hais li no tias, Hais txog tej lus uas koj tau hnov ntawd, vim koj ntxeev dua siab thiab koj txo koj lub hwjchim rau ntawm Yawmsaub rau thaum koj hnov kuv hais li cas tawm tsam lub chaw no thiab cov neeg uas nyob hauv hais tias lawv yuav nyob do cuas thiab raug foom tsis zoo, thiab vim koj dua rhe koj lub tsho quaj rau ntawm kuv xubntiag, mas kuv kuj hnov lawm. Yawmsaub hais li no ntag. Vim li no, saib nawj, kuv yuav coj koj mus nrog koj tej poj koob yawm txwv nyob thiab mus rau hauv koj lub qhov ntxa ua siab tus yees, thiab koj lub qhov muag yuav tsis pom tej xwm txheej phem huvsi uas kuv yuav coj los raug lub chaw no.’ ” Lawv kuj coj tej lus ntawd los hais rau vajntxwv mloog. Ces vajntxwv txawm txib neeg mus hu kom Yuda thiab Yeluxalees cov kev txwj laus sawvdaws tuaj txoos ua ke ntawm nws. Mas vajntxwv mus rau hauv Yawmsaub lub tuam tsev. Cov Yuda huvsi thiab cov uas nyob hauv Yeluxalees sawvdaws thiab cov pov thawj thiab cov xibhwb cev Vajtswv lus, thiab cov pejxeem, cov hlob thiab cov yau sawvdaws nrog nws mus. Ces nws txawm nyeem tag nrho phau ntawv cog lus tseg uas tshawb tau hauv Yawmsaub lub tuam tsev los rau lawv mloog. Vajntxwv sawv ntsug ntawm tus ncej nrog Yawmsaub cog lus tias nws yuav ua lub neej raws nraim Yawmsaub thiab tuav rawv Yawmsaub tej lus nkaw thiab nws tej lus qhia thiab nws tej kab ke kawg siab kawg ntsws, yuav ua raws nraim li tej lus sib cog tseg uas sau cia rau hauv phau ntawv ntawd. Mas cov pejxeem sawvdaws kuj nrog nws koom cog lus li ntawd. Vajntxwv hais rau tus tuam pov thawj hlob Hikhiya thiab cov pov thawj yau thiab cov uas zov qhov rooj kom lawv coj tej twj huvsi uas siv rau dab Npa‑as thiab dab Asela thiab lub hnub lub hli thiab tej hnub qub saum nruab ntug huvsi tawm hauv Yawmsaub lub tuam tsev mus. Mas nws muab tej ntawd hlawv rau sab nraum lub nroog Yeluxulee rau hauv tej teb ntawm lub hav Khiloo, thiab muab tej tshauv uas hlawv ntawd coj mus rau ntawm lub moos Npe‑ee. Nws hle cov pov thawj teev dab uas Yuda tej vajntxwv tau muab tsa cia hlawv hmoov xyab xyeem rau ntawm tej chaw siab hauv Yuda tej moos thiab ib ncig lub nroog Yeluxalees, thiab hle cov uas hlawv hmoov xyab rau dab Npa‑as thiab lub hnub lub hli thiab tej hnub qub thiab txhua yam uas nyob saum nruab ntug. Nws muab tus ncej dab Asela rho tawm hauv Yawmsaub lub tuam tsev mus rau nraum lub nroog Yeluxalees txog lub hav Khiloo. Nws muab hlawv rau ntawm lub hav Khiloo muab tsoo ua hmoov thiab muab w rau saum cov pejxeem tej qhov ntxa. Nws rhuav tshem cov txivneej muag cev tej tsev hauv Yawmsaub lub tuam tsev uas yog lub chaw uas cov pojniam ntos ntaub rau dab Asela. Nws coj cov pov thawj huvsi tawm hauv Yuda tej moos mus thiab ua qias puas tsuas tej chaw siab uas cov pov thawj ntawd hlawv hmoov xyab txij ntawm lub moos Kenpa mus txog lub moos Npe‑awsenpa. Nws rhuav tshem tej chaw siab teev dab ntawm txojkev uas nkag lub rooj loog Yausua uas yog tus thawj kav lub nroog, uas nyob ntawm lub rooj loog loj sab laug. Tiamsis cov pov thawj uas ua haujlwm ntawm tej chaw siab ntawd tsis muaj feem nce mus rau ntawm Yawmsaub lub thaj xyeem hauv lub nroog Yeluxalees, lawv tsuas yog muaj feem nrog lawv cov kwvtij noj ncuav tsis xyaw keeb xwb. Nws ua qias puas tsuas lub chaw Thaufe uas nyob hauv lub hav Npeehinoo, kom thiaj tsis muaj leejtwg muab lawv tej tub tej ntxhais hlawv xyeem rau dab Maulej. Nws rhuav tshem tej nees uas Yuda tej vajntxwv muab xyeem rau lub hnub ntawm lub rooj loog uas nkag rau hauv Yawmsaub lub tuam tsev uas nyob ze ntawm tus nom Nathamele chav tsev uas nyob hauv lub loog tuam tsev. Nws kuj muab tej tsheb ua rog uas xyeem rau lub hnub hlawv pov tseg. Tej thaj uas Yuda tej vajntxwv ua rau saum Aha txheej tsev las tshav thiab tej thaj uas Manaxe ua rau hauv ob lub tshav puam hauv Yawmsaub lub tuam tsev, mas vajntxwv muab rhuav thiab tsoo ua tej dwb daim, thiab muab tej hmoov ntawd pov rau hauv lub hav Khiloo. Nws ua qias puas tsuas tej chaw siab teev dab uas nyob ntawm Yeluxalees sab hnub tuaj ntawm lub Roob Puam Tsuaj sab nrad, yog tej chaw uas cov Yixayee tus vajntxwv Xalaumoo ua cia rau dab Athaule uas yog cov neeg Xaidoo tus dab qias vuab tsuab, thiab ua rau dab Khemauj uas yog cov Mau‑a tus dab qias vuab tsuab, thiab ua rau dab Mikhoo uas yog cov Asmoo tus dab qias vuab tsuab. Nws muab tej ncej teev dab tsoo ua tej dwb daim thiab muab tej ncej dab Asela ntov pov tseg thiab muab pob txha neeg tuag nchuav puv nkaus tej chaw ntawd. Dua li ntawd, lub thaj ntawm lub moos Npe‑ee thiab lub chaw siab teev dab uas Nenpa tus tub Yelaunpau‑as ua thiab coj cov Yixayee mus ua txhaum, mas vajntxwv muab lub thaj thiab lub chaw siab ntawd rhuav pov tseg muab hlawv muab tsoo ua hmoov. Nws kuj hlawv tus ncej dab Asela. Thaum Yauxiya tig xubntiag saib nws pom tej qhov ntxa uas nyob saum lub roob ntawd. Nws hais kom rho tej pob txha hauv qhov ntxa los mas muab hlawv rau saum lub thaj ua kom qias puas tsuas raws li Yawmsaub tej lus uas Vajtswv tus neeg hais txog tom hauv ntej tias yuav muaj li ntawd. Thiab nws hais tias, “Tus ncej zeb uas kuv pom tim ub yog dabtsi?” Cov neeg hauv lub moos ntawd hais tias, “Yog lub qhov ntxa uas log Vajtswv tus neeg uas tuaj hauv Yuda tuaj hais tom hauv ntej txog tej no uas koj tau ua rau lub thaj ntawm Npe‑ee.” Vajntxwv txawm hais tias, “Cia nws nyob nws. Tsis txhob kheev leejtwg muab nws pob txha tshais chaw.” Lawv thiaj muab tso tseg nrog tus xibhwb uas tuaj Xamali tebchaws cov pob txha nyob ua ke. Yauxiya kuj rhuav tshem tej tsev dab huvsi saum tej chaw siab uas nyob hauv Xamali tej moos uas cov Yixayee tej vajntxwv tau ua cia uas ua rau Yawmsaub chim. Nws ua txhua yam rau tej chaw ntawd ib yam li nws tau ua rau ntawm Npe‑ee. Nws muab cov pov thawj sawvdaws uas ua haujlwm rau tej chaw siab ntawd tua rau saum tej thaj ntawd thiab hlawv tej pob txha rau saud. Ces nws txawm rov mus rau Yeluxalees lawm. Vajntxwv hais rau cov pejxeem sawvdaws tias, “Cia li ua kevcai Hla Dhau rau Yawmsaub uas yog nej tus Vajtswv, raws li uas sau cia rau hauv phau ntawv sib cog lus no.” Rau qhov lawv tsis tau ua txoj kevcai Hla Dhau no txij thaum cov thawj kav cov Yixayee los lossis ncua sijhawm uas muaj vajntxwv kav cov Yixayee thiab muaj vajntxwv kav cov Yuda. Xyoo kaum yim uas Yauxiya ua vajntxwv kav, lawv ua txoj kevcai Hla Dhau no rau hauv lub nroog Yeluxalees. Dua li ntawd, Yauxiya tseem rhuav tshem tej txiv neeb txiv yaig, tej uas txawj ua khawv koob yees siv, thiab tej dab qhuas, tej dab mlom thiab txhua yam qias vuab tsuab uas pom hauv Yuda tebchaws thiab hauv Yeluxalees, xwv nws thiaj li coj tau txoj kevcai txhua nqe uas sau cia rau hauv phau ntawv uas tus pov thawj Hikhiya tshawb tau hauv Yawmsaub lub tuam tsev kom tiav. Tej vajntxwv uas nyob ua ntej nws tsis muaj ib tug zoo li nws uas tig kiag los cuag Yawmsaub kawg siab kawg ntsws kawg dag kawg zog thiab ua raws li Mauxe txoj kevcai huvsi. Thiab tsis muaj ib tug uas sawv kav ua nws qab yuav zoo thooj li nws. Tiamsis Yawmsaub tseem tsis tso nws txojkev npau taws loj heev tseg. Nws txojkev chim tseem npau tshwm rau Yuda yog tim txhua yam uas Manaxe tau ua cia ua rau Yawmsaub chim. Thiab Yawmsaub hais tias, “Kuv yuav muab cov Yuda rhuav tshem kom ploj ntawm kuv lub qhov muag, ib yam li kuv rhuav tshem cov Yixayee. Thiab kuv yuav muab lub nroog no uas kuv xaiv cia lawm laim pov tseg, yog lub nroog Yeluxalees thiab lub tuam tsev uas kuv tau hais tias, ‘Kuv lub npe yuav nyob qhov ntawd mus ib txhis.’ ” Lwm yam haujlwm uas Yauxiya ua, thiab txhua yam uas nws ua twb muab sau cia rau hauv phau ntawv uas hais txog cov Yuda tej vajntxwv li keeb kwm. Lub sijhawm uas nws ua vajntxwv, Iyi tus vajntxwv Nekhau mus txog tus dej Yufeti mus pab Axilia tus vajntxwv. Ces Yauxiya txawm tawm mus ua rog rau nws. Thaum Falau Nekhau pom Yauxiya txawm muab nws tua rau lub tiaj Mekidau lawm. Mas nws cov tub teg tub taws muab tsheb ua rog thauj nws lub cev tuag ntawm Mekidau los rau hauv lub nroog Yeluxalees, thiab muab log rau hauv nws lub qhov ntxa. Mas cov pejxeem muab roj hliv ywg Yauxiya tus tub Yehau‑aha thiab tsa nws ua vajntxwv nyob nws txiv chaw. Thaum Yehau‑aha pib ua vajntxwv kav nws hnub nyoog muaj nees nkaum peb xyoos, nws nyob hauv Yeluxalees kav tau peb lub hlis. Nws niam npe hu ua Hamuthas, yog Yelemi uas yog neeg hauv Lina tus ntxhais. Nws ua tej uas Yawmsaub pom tias phem kawg li ib yam li txhua yam uas nws tej poj koob yawm txwv tau ua lawd. Mas Falau Nekhau muab nws ntes khi cia rau ntawm Linpla hauv Hama tebchaws tsis kheev Yehau‑aha ua vajntxwv kav Yeluxalees, thiab yuam Yuda them se ib puas tala nyiaj thiab ib tala kub. Mas Falau Nekhau tsa Yauxiya tus tub Eliyakhi ua vajntxwv nyob nws txiv Yauxiya chaw, mas muab nws tis dua npe hu ua Yehauyakhi. Falau coj Yehau‑aha mus rau Iyi tebchaws ces Yehau‑aha tuag qhov ntawd lawm. Mas Yehauyakhi muab nyiaj thiab kub rau Falau raws li Falau hais. Nws sau se hauv lub tebchaws thiab quab cov pejxeem muab nyiaj muab kub raws li txhua tus uas xam tau saib muaj los pluag xa mus rau Falau Nekhau. Thaum Yehauyakhi pib ua vajntxwv kav nws hnub nyoog muaj nees nkaum tsib xyoos, nws nyob hauv Yeluxalees kav tau kaum ib xyoos. Nws niam npe hu ua Xenpida, yog Pedaya uas yog neeg hauv Luma tus ntxhais. Nws ua tej uas Yawmsaub pom tias phem ib yam li txhua yam uas nws tej poj koob yawm txwv tau ua lawd. Thaum Yehauyakhi ua vajntxwv mas Nenpukhanexa uas ua vajntxwv hauv Npanpiloo tuaj ua rog, ces Yehauyakhi txawm zwm rau nws tau peb xyoos. Ces nws rov fav xeeb rau Nenpukhanexa. Mas Yawmsaub txib cov Kheedia thiab cov Alas thiab cov Mau‑a thiab cov Asmoo tej pab tub rog tuaj ntaus Yuda ua kom puam tsuaj raws li tej lus uas Yawmsaub kom nws cov tub qhe uas yog cov xibhwb cev Vajtswv lus hais lawd. Tej xwm txheej no yeej muaj rau Yuda vim yog Yawmsaub hais kom muaj, xwv Yawmsaub thiaj rho tau lawv tawm ntawm nws lub xubntiag mus vim yog tim txhua yam kev txhaum uas Manaxe ua, thiab tim qhov uas Manaxe tau tua tej neeg uas tsis txhaum tuag thiab ua rau tej neeg tsis txhaum cov ntshav los puv hauv Yeluxalees mas Yawmsaub tsis zam li. Lwm yam haujlwm uas Yehauyakhi ua thiab txhua yam uas nws ua mas twb muab sau cia rau hauv phau ntawv uas hais txog Yuda tej vajntxwv li keeb kwm. Yehauyakhi txawm tuag mus nrog nws tej poj koob yawm txwv nyob mas nws tus tub Yehauyakhee sawv nws chaw ua vajntxwv kav. Iyi tus vajntxwv tsis rov tawm hauv nws tebchaws tuaj li lawm, rau qhov Npanpiloo tus vajntxwv twb txeeb tau lub tebchaws uas Iyi tus vajntxwv kav txij ntua tus dej Iyi mus txog ntua tus dej Yufeti lawm. Thaum Yehauyakhee sawv ua vajntxwv nws hnub nyoog muaj kaum yim xyoo, nws nyob hauv Yeluxalees kav tau peb lub hlis. Nws niam npe hu ua Nehutha uas yog Eenathas uas nyob hauv Yeluxalees tus ntxhais. Yehauyakhee ua tej uas Yawmsaub pom tias phem kawg li ib yam li txhua yam uas nws txiv tau ua lawd. Lub sijhawm ntawd vajntxwv Nenpukhanexa hauv Npanpiloo cov tub teg tub taws tuaj ntaus Yeluxalees thiab vij lub nroog cia. Thiab vajntxwv Nenpukhanexa hauv Npanpiloo kuj tuaj rau ntawm Yeluxalees rau thaum nws cov tub teg tub taws tseem vij lub nroog. Mas cov Yuda tus vajntxwv Yehauyakhee muab nws tus kheej cob rau Npanpiloo tus vajntxwv, thiab muab nws niam nws cov tub teg tub taws thiab cov thawj thiab cov nom tswv hauv nws lub tsev huvsi cob rau thiab. Npanpiloo tus vajntxwv ntes nws coj nws mus rau xyoo yim uas Nenpukhanexa ua vajntxwv kav, thiab coj tej nyiaj txiag huvsi hauv Yawmsaub lub tuam tsev thiab hauv vajntxwv lub tsev mus, thiab muab tej twj siv uas yog kub uas Yixayee tus vajntxwv Xalaumoo tau ua rau hauv Yawmsaub lub tuam tsev tsoo huvsi, raws li Yawmsaub twb hais ua ntej lawd. Nws kuav kiag cov neeg hauv Yeluxalees huvsi mus, yog muab cov thawj txhua tus thiab cov tub rog siab loj siab tuab ntes coj mus, huvsi muaj ib vam leej, thiab coj cov uas txawj ua txhua yam haujlwm thiab cov Kws tooj Kws hlau mus huvsi, tsuas yog tseg cov pejxeem uas pluag kawg nyob xwb. Nws coj Yehauyakhee mus rau hauv Npanpiloo. Nws ntes vajntxwv niam thiab nws tej pojniam thiab nws cov tub teg tub taws thiab cov thawj hauv lub tebchaws coj tawm hauv Yeluxalees mus rau hauv Npanpiloo. Npanpiloo tus vajntxwv ntes cov tub rog uas siab loj siab tuab huvsi xya txhiab leej, thiab cov uas txawj ua txhua yam haujlwm thiab cov Kws tooj Kws hlau huvsi ib txhiab leej, kuav kiag mus rau hauv Npanpiloo, txhua tus muaj zog npho thiab zoo ua tub rog. Npanpiloo tus vajntxwv tsa Mathaniya uas yog Yehauyakhee tus txiv ntxawm ua vajntxwv nyob Yehauyakhee chaw, thiab tis dua npe hu ua Xedekhiya. Thaum Xedekhiya sawv ua vajntxwv kav nws hnub nyoog muaj nees nkaum ib xyoos, nws nyob hauv Yeluxalees kav tau kaum ib xyoos. Nws niam npe hu ua Hamuthas uas yog Yelemi uas nyob hauv lub moos Lina tus ntxhais. Nws ua tej uas Yawmsaub pom tias phem kawg li, ib yam li txhua yam uas Yehauyakhi tau ua lawd. Twb yog vim Yawmsaub chim li ntawd mas thaum kawg thiaj los txog qhov uas Yawmsaub muab Yeluxalees thiab Yuda laim kom ploj ntawm nws lub xubntiag mus. Mas Xedekhiya fav xeeb rau vajntxwv Npanpiloo. Xyoo cuaj uas vajntxwv Nenpukhanexa kav hauv Npanpiloo, hnub xiab kaum lub kaum hli, nws coj nws cov tub rog huvsi tuaj ua rog rau Yeluxalees thiab vij lub nroog cia. Lawv tsub av vij puag ncig lub nroog. Lub nroog thiaj raug vij mus txog xyoo kaum ib uas Xedekhiya ua vajntxwv. Hnub xiab cuaj lub plaub hlis muaj kev tshaib nqhis loj heev hauv lub nroog, tsis muaj zaub mov dabtsi li rau cov pejxeem noj. Lub ntsa loog thiaj raug tsoo pob ib qho. Txawm yog cov Kheedia nyob vij lub nroog los vajntxwv thiab cov tub rog sawvdaws khiav tawm hmo ntuj hla vajntxwv lub vaj tawm lub rooj loog taug txojkev uas muaj ob sab ntsa loog mus. Lawv txawm khiav yuav mus rau Alanpa. Tiamsis Kheedia cov tub rog caum vajntxwv qab thiab caum cuag nws rau ntawm lub tiaj Yelikhau, mas vajntxwv cov tub rog txawm khiav ua sab ua sua tag lawm. Lawv thiaj ntes tau vajntxwv thiab coj nws mus cuag Npanpiloo tus vajntxwv ntawm lub moos Linpla, mas vajntxwv Npanpiloo txiav txim rau nws. Lawv txawm tua Xedekhiya cov tub tab meeg nws ntsia ntsoov, thiab muab Xedekhiya ob lub qhov muag kaus pov tseg thiab muab saw hlau khi coj nws mus rau Npanpiloo. Hnub xiab xya lub tsib hlis, yog xyoo kaum cuaj uas Nenpukhanexa ua vajntxwv kav hauv Npanpiloo, mas Nenpuxaladas uas yog tus thawj rog uas zov vajntxwv, thiab yog Npanpiloo tus vajntxwv li ib tug tub teg tub taws, tau tuaj rau ntawm Yeluxalees. Nws muab Yawmsaub lub tuam tsev thiab vajntxwv lub tsev thiab tej tsev hauv Yeluxalees huvsi hlawv pov tseg. Nws hlawv tej tsev loj txhua lub kub hnyiab tag huvsi. Thiab cov tub rog Kheedia sawvdaws uas nrog tus thawj rog zov vajntxwv ua ke kuj tsoo tej ntsa loog Yeluxalees pob tag huvsi. Mas Nenpuxaladas uas yog tus thawj rog zov vajntxwv muab cov neeg uas tseem tshuav nyob hauv lub nroog thiab cov uas khiav mus zwm rau Npanpiloo tus vajntxwv thiab cov pejxeem sawvdaws kuav kiag tawm tebchaws mus lawm. Tiamsis tus thawj rog uas zov vajntxwv tseg cov neeg uas pluag pluag kawg hauv lub tebchaws ib txhia nyob tu vaj txiv hmab thiab laij teb. Tej ncej tooj liab uas nyob hauv Yawmsaub lub tuam tsev thiab tej tsheb thawb dej thiab lub rhawv dej tooj liab uas nyob hauv Yawmsaub lub tuam tsev, mas cov Kheedia muab tsoo ua tej dwb daim thiab coj tej tooj liab mus rau Npanpiloo. Lawv kuj coj tej laujkaub tej duav phuaj tej tais khwb teeb xeeb, thiab tej tais rau hmoov tshuaj tsw qab thiab tej twj taig tooj liab txhua yam uas siv hauv lub tuam tsev, thiab tej duav hlau yawm ncaig taws thiab tej phaj. Tej uas xuas kub ua mas tus thawj rog uas zov vajntxwv coj mus yuav ua kub, tej uas xuas nyiaj ua nws coj mus yuav ua nyiaj. Tej tooj liab uas ua ob tug ncej, thiab lub rhawv dej thiab tej tsheb thawb dej uas Xalaumoo ua cia rau hauv Yawmsaub lub tuam tsev, hnyav dhau luj tsis tag. Ib tug ncej siab kaum yim tshim, muaj lub hau ncej tooj liab txawb rau saud lub hau ncej siab peb tshim. Muaj ib daim ntxais qhov muag tooj liab thiab tej lub txiv ntsiav kws tooj liab, nyob puag ncig lub hau ncej. Tus ncej uas ob kuj zoo ib yam nkaus thiab muaj daim ntxais qhov muag. Tus thawj rog uas zov vajntxwv kuj ntes Xelaya uas yog tus tuam pov thawj hlob thiab Xefaniya uas yog pov thawj yau thiab peb tug uas zov qhov rooj tuam tsev. Ntawm lub nroog nws kuj ntes ib tug thawj rog uas saib xyuas cov tub rog thiab tsib tug uas ua vajntxwv lub chaw sablaj uas tseem nyob hauv lub nroog, thiab ntes tus tub sau ntawv ntawm tus thawj rog uas txhij tub rog thoob tebchaws, thiab ntes cov pejxeem rau caum leej uas tseem nyob hauv lub nroog. Nenpuxaladas uas ua tus thawj rog zov vajntxwv ntes cov neeg no coj los txog ntawm vajntxwv Npanpiloo hauv lub moos Linpla. Mas Npanpiloo tus vajntxwv muab lawv nplawm thiab muab lawv tua pov tseg rau ntawm lub moos Linpla hauv Hama tebchaws. Yuda thiaj raug muab ntes kuav tawm hauv nws lub tebchaws mus lawm. Nenpukhanexa tsa Kedaliya uas yog Ahikhas tus tub thiab yog Safas tus xeeb ntxwv ua tus kav cov neeg uas tseem tshuav nyob hauv lub tebchaws, yog cov uas Npanpiloo tus vajntxwv tseg cia nyob. Thaum cov thawj uas kav tub rog thiab lawv cov tub rog tau hnov tias Npanpiloo tus vajntxwv tsa Kedaliya ua tus kav tebchaws, lawv thiab lawv cov tub rog txawm tuaj cuag Kedaliya rau ntawm lub moos Mixapa. Lawv cov ntawd yog Nethaniya tus tub Yisama‑ee thiab Khale‑a tus tub Yauhanas, thiab Thahume tus tub Xelaya uas yog neeg hauv lub moos Nethaufa, thiab Ya‑axaniya uas yog neeg hauv Ma‑akha li tub. Mas Kedaliya cog lus twv rau lawv thiab lawv cov neeg hais tias, “Nej tsis txhob ntshai Kheedia cov tub teg tub taws. Cia li nyob hauv lub tebchaws no thiab tu vajntxwv Npanpiloo ces nej yuav tau noj qab nyob zoo.” Lub xya hli, Nethaniya tus tub Yisama‑ee uas yog Elisama tus xeeb ntxwv thiab yog keeb vajntxwv coj kaum leej nrog nws tuaj ntaus thiab tua Kedaliya thiab cov neeg Yuda thiab cov Kheedia uas nrog nws nyob ntawm Mixapa tuag tag. Ces cov pejxeem ntawd tag nrho cov uas ua hlob thiab cov yau sawvdaws thiab cov thawj rog sawv kev tsees mus rau Iyi tebchaws, rau qhov lawv ntshai cov Kheedia. Thaum Yuda tus vajntxwv Yehauyakhee poob tebchaws tau peb caug xya xyoo mas hnub tim nees nkaum tsib lub kaum ob hlis rau xyoo uas Evimelauda pib ua vajntxwv kav hauv Npanpiloo, Evimelauda zoo siab tso Yuda tus vajntxwv Yehauyakhee dim hauv tsev lojfaj. Nws hais zoo rau Yehauyakhee thiab pub nws nyob lub rooj siab dua tej vajntxwv uas nrog nws nyob hauv Npanpiloo txhua tus. Yehauyakhee txawm hle cev tsoos tsho raug txim, thiab nws niaj hnub tau nrog vajntxwv koom rooj noj mov mus tag sim neej. Vajntxwv pheej niaj hnub pub qhov txhia chaw tsis tu ncua rau Yehauyakhee mus tag Yehauyakhee sim neej. Adas, Xej, Enaus, Khenas, Mahalalee, Yale, Enauj, Methuxela, Lame, Nau‑a, Xeeb, Has, Yafe. Yafe cov tub yog Kaumaw, Makau, Madai, Yavas, Thunpas, Mese thiab Thila. Kaumaw cov tub yog Akhena, Difa thiab Thaukama. Yavas cov tub yog Elisas, Thasi, Khithi thiab Laudani. Has cov tub yog Khuj, Iyi, Phuj thiab Khana‑as. Khuj cov tub yog Xenpa, Havila, Xatha, La‑ama thiab Xathekha. La‑ama li tub yog Senpa thiab Dedas. Khuj yog Nilauj txiv. Nilauj yog thawj tug uas siab loj siab tuab hauv ntiajteb. Iyi yog cov neeg no lub keeb, yog cov Ludi, cov Anami, cov Lehanpi, cov Nathuhi, cov Paluxi, cov Khaluhi (cov neeg Filixatee yog tshwm ntawm cov Khaluhi los) thiab cov Khathauli. Khana‑as yog cov no lub keeb, Xaidoo uas yog nws tus tub hlob thiab Hej, thiab cov Yenpu, cov Amaulai, cov Kawkasi, cov Hivai, cov Akhi, cov Xini, cov Alava, cov Xemaw thiab cov Hama. Xeeb cov tub yog Elas, Asu, Apasa, Lus, Alas, Us, Hoo, Kethaw thiab Mese. Apasa yog Sela txiv. Sela yog Enpaw txiv. Enpaw muaj ob tug tub, ib tug hu ua Pele (rau qhov lub sijhawm uas Pele nyob ntawd tej neeg txawm faib teb faib chaw). Pele tus kwv hu ua Yaujthas. Yaujthas yog cov no txiv, Amauda, Seleb, Haxamave, Yela, Hadaulas, Uxas, Dila, Enpas, Anpima‑ee, Senpa, Aufi, Havila thiab Yaunpam. Cov no puavleej yog Yaujthas cov tub ki xeeb ntxwv. Xeeb, Apasa, Sela, Enpaw, Pele, Le‑u, Xelu, Nahau, Thela, Aplas uas yog Aplahas. Aplahas li tub yog Yiha thiab Yisama‑ee. Lawv tej caj ces yog li no, Nenpayau uas yog Yisama‑ee tus tub hlob thiab Kheda, Anpe‑ee, Mixas, Misama, Duma, Maxas, Hada, Thema, Yethu, Nafi thiab Khedema. Cov no yog Yisama‑ee cov tub. Khethula uas yog Aplahas tus niam yau cov tub yog li no, nws yug Xislas, Yaujsas, Medas, Midee, Isanpas thiab Su‑a. Yaujsas li tub yog Senpa thiab Dedas. Midee cov tub yog Efa, Efaw, Hanau, Anpida thiab Eeda‑a. Cov no puavleej yog Khethula caj ces. Aplahas yog Yiha txiv. Yiha li tub yog Exau thiab Yixayee. Exau cov tub yog Elifa, Le‑u‑ee, Ye‑u, Yala thiab Khaula. Elifa cov tub yog Themas, Auma, Xefi, Kathas, Khena, Thina thiab Amalej. Le‑u‑ee cov tub yog Nahaj, Xelag, Sama thiab Mixa. Xe‑i cov tub yog Lauthas, Saunpas, Xinpe‑oo, Anas, Disoo, Exaw thiab Disas. Lauthas li tub yog Hauli thiab Haumas. Lauthas tus muam yog Thina. Saunpas cov tub yog Aliyas, Manaha, Enpas, Sefi thiab Aunas. Xinpe‑oo cov tub yog Aiyag thiab Anas. Anas tus tub yog Disoo, Disoo cov tub yog Haslas, Esanpa, Ithala thiab Khelas. Exaw cov tub yog Npihas, Xavas thiab Ya‑akhas. Disas cov tub yog Us thiab Aslaj. Ntawm no yog cov vajntxwv uas kav hauv Edoo tebchaws yog kav ua ntej thaum ub uas cov Yixayee tsis tau muaj vajntxwv. Npe‑au tus tub Npela. Nws lub moos hu ua Dihanpa. Thaum Npela tuag lawd Xelag tus tub Yaunpam uas yog neeg hauv lub moos Npauxa sawv nws chaw ua vajntxwv kav. Thaum Yaunpam tuag lawd Husas uas nyob hauv cov neeg Themas tebchaws nyob nws chaw ua vajntxwv kav. Thaum Husas tuag lawd Npeda tus tub Hada uas yog tus uas ntaus yeej cov Midee hauv Mau‑a tebchaws sawv nws chaw ua vajntxwv kav, nws lub moos hu ua Avij. Thaum Hada tuag lawd Xasla uas yog neeg hauv Malekha sawv nws chaw ua vajntxwv kav. Thaum Xasla tuag lawd Sa‑u uas yog neeg hauv Lehaunpau uas nyob ntawm ntug dej Yufeti sawv nws chaw ua vajntxwv kav. Thaum Sa‑u tuag lawd Anpau tus tub Npa‑as Hanas sawv nws chaw ua vajntxwv kav. Thaum Npa‑as Hanas tuag lawd Hada sawv nws chaw ua vajntxwv kav. Nws lub moos hu ua Pa‑i, nws tus pojniam hu ua Mehethanpee, uas yog Maleb tus ntxhais. Maleb yog Mexaha li ntxhais. Mas Hada tuag lawm. Edoo cov thawj coj yog Thina, Aliya, Yethe, Auhaulinpama, Ela, Pinoo, Khena, Themas, Mixa, Madi‑ee thiab Islas. Cov no yog Edoo cov thawj coj. Yixayee cov tub yog li no, Lunpee, Xime‑oo, Levi, Yuda, Ixakha, Xenpuloo, Daj, Yauxej, Npeeyamee, Nathali, Kas thiab Asaw. Yuda cov tub yog Ws, Auna thiab Sela. Peb tus no yog Npasuva uas yog neeg Khana‑as yug rau nws. Yawmsaub pom tias Ws uas yog Yuda tus tub hlob phem kawg li, Yawmsaub thiaj muab nws tua lawm. Yuda tus nyab Thama yug Peles thiab Xelag rau nws. Yuda muaj tub huvsi tsib leeg. Peles cov tub yog Hexaloo thiab Hamu. Xelag cov tub yog Xili, Etha, Hemas, Khakhau thiab Dala, huvsi tsib leeg. Khami tus tub yog Akhas uas coj kev kub ntxhov los rau cov Yixayee vim nws muab tej qhov txhia chaw uas muab cais rau Vajtswv lawd los zais cia. Etha tus tub yog Axaliya. Hexaloo cov tub uas nws muaj yog li no, Yelame‑ee, Las thiab Khelunpai. Las yog Aminada txiv, Aminada yog Nasoo txiv, Nasoo yog tus thawj hauv Yuda cov tub. Nasoo yog Xama txiv, Xama yog Npau‑a txiv, Npau‑a yog Aunpe txiv, Aunpe yog Yexi txiv. Yexi cov tub mas Elia yog nws tub hlob, Anpinada yog tus ob, Sime‑a yog tus peb, Nethanee yog tus plaub, Ladai yog tus tsib, Auxee yog tus rau, Davi yog tus xya. Thiab lawv ob tug muam yog Xeluya thiab Anpikayi. Xeluya muaj peb tug tub, yog Anpisai, Yau‑a thiab Axahee. Anpikayi yug Amaxa. Amaxa txiv yog Yethaw uas yog neeg Yisama‑ee. Hexaloo tus tub Khalej ib tug pojniam yog Axunpa, ib tug yog Yeli‑au. Axunpa cov tub yog Yesaw, Saunpam thiab Adoo. Thaum Axunpa tuag lawm Khalej yuav Efatha uas yug Hawj rau nws. Hawj yog Uli txiv, Uli yog Npexalee txiv. Dhau ntawd thaum Hexaloo hnub nyoog muaj rau caum xyoo nws yuav Makhi uas yog Kile‑a txiv tus ntxhais ua pojniam mas yug tau Xeku rau Hexaloo. Xeku yog Ya‑i txiv, Ya‑i muaj nees nkaum peb lub moos hauv Kile‑a tebchaws. Tiamsis cov neeg Kesu thiab cov neeg Alas txeeb tau lub moos Havauya‑i thiab lub moos Khenaj thiab tej zej zog ib ncig, huvsi rau caum lub moos. Cov no huvsi yog Makhi uas yog Kile‑a txiv caj ces. Thaum Hexaloo tuag hauv lub moos Khalej Efatha lawm, Hexaloo tus pojniam Anpiya yug tau Asu uas yog Thekhau‑a txiv. Hexaloo tus tub hlob Yelame‑ee li tub yog li no, Las yog tus tub hlob, thiab Npuna, Aulee, Auxee thiab Ahiya. Yelame‑ee muaj dua ib tug pojniam lub npe hu ua Athala. Nws yog Aunas niam. Yelame‑ee tus tub hlob Las cov tub yog Ma‑as, Yami thiab Ekhaw. Aunas cov tub yog Samai thiab Yada. Samai cov tub yog Nada thiab Anpisu. Anpisu tus pojniam hu ua Anpiha‑i, mas nws yug tau Anpas thiab Mauli rau Anpisu. Nada cov tub yog Xele thiab Apa‑i. Thaum Xele tuag nws tsis muaj menyuam. Apa‑i tus tub yog Isi. Isi tus tub yog Sesas, Sesas tus tub yog Alai. Samai tus kwv Yada li tub yog Yethaw thiab Yaunathas, mas thaum Yethaw tuag nws tsis muaj menyuam. Yaunathas cov tub yog Pelej thiab Xaxa. Cov no yog Yelame‑ee caj ces. Sesas tsis muaj tub nws muaj ntxhais xwb. Sesas muaj ib tug qhev yog neeg Iyi hu ua Yaha. Sesas txawm muab nws tus ntxhais rau nws tus qhev Yaha yuav ua pojniam, mas yug tau Athai. Athai yog Nathas txiv, Nathas yog Xanpa txiv, Xanpa yog Efas txiv, Efas yog Aunpe txiv, Aunpe yog Yehu txiv, Yehu yog Axaliya txiv, Axaliya yog Helexi txiv, Helexi yog Ele‑axa txiv, Ele‑axa yog Xixamai txiv, Xixamai yog Salu txiv, Salu yog Yekhamiya txiv, Yekhamiya yog Elisama txiv. Yelame‑ee tus kwv Khalej li tub yog li no, nws tus tub hlob Mesa yog Xi txiv, Xi yog Malesa txiv, Malesa yog Heploo txiv. Heploo cov tub yog Khaula, Thapuva, Lekhee thiab Sema. Sema yog Lahas txiv, Lahas yog Yaukhe‑a txiv. Lekhee yog Samai txiv. Samai tus tub yog Ma‑oo, Ma‑oo yog Npexuv txiv. Khalej tus niam yau Efa yug Halas, Mauxa thiab Kaxe. Halas yog Kaxe txiv. Yadai cov tub yog Lekee, Yauthas, Kesas, Peleb, Efa thiab Sa‑a. Khalej tus niam yau Ma‑akha yug tau Senpaw thiab Thihana. Nws yug Sa‑a uas yog Mamana txiv, thiab Seva uas yog Manpena thiab Kinpe‑a txiv. Khalej tus ntxhais yog Axav. Cov no yog Khalej caj ces. Efatha tus tub hlob Hawj cov tub yog Saunpas uas yog Khiliya Ye‑ali txiv, Xama uas yog Npelehee txiv, thiab Hale uas yog Npe‑kadaw txiv. Khiliya Ye‑ali txiv Saunpas kuj muaj dua tub yog Falau‑e thiab cov Menuhau ib nrab. Khiliya Ye‑ali tej cum yog cum Ithala, cum Puthai, cum Suma thiab cum Mila. Ntawm cov cum no muaj cov neeg Xaula thiab cov neeg Etha‑oo tshwm los. Xama cov tub yog Npelehee, cov Nethaufa, Athau Npeyau‑a thiab cum Manaha ib nrab thiab cov Xaula. Cov no yog cov tub teev ntawv uas nyob hauv lub moos Yanpes tej cum, yog cum Thila, cum Sime‑as thiab cum Xukha. Cov no yog cov Khenai uas los ntawm Hama uas yog cov Lekhaj txiv. Davi cov tub uas yug rau hauv Heploo yog li no. Nws tus tub hlob yog Asnoo uas Ahinau‑as hauv Yile‑ee yug. Tus ob yog Daniyee uas Anpikayi hauv Khamee yug. Tus peb yog Axaloo. Nws niam yog Ma‑akha uas yog cov Kesu tus vajntxwv Thamai tus ntxhais. Tus plaub yog Adauniya. Nws niam yog Hakis. Tus tsib yog Sefathiya uas Anpithas yug. Tus rau yog Ile‑as uas Davi tus pojniam Elag yug. Rau tus no puavleej yug hauv lub moos Heploo. Davi nyob qhov ntawd kav tau xya xyoo thiab rau lub hli. Nws nyob hauv lub nroog Yeluxalees kav tau peb caug peb xyoos. Davi cov tub uas yug rau hauv Yeluxalees yog li no, Sime‑a, Saunpam, Nathas thiab Xalaumoo. Plaub tug no yog Ami‑ee tus ntxhais Npasuva yug. Thiab Iha, Elisama, Elifele, Nauka, Nefe, Yafia, Elisama, Eliyada, Elifele, huvsi yog cuaj leeg. Cov no puavleej yog Davi cov tub uas tsis suav nws cov hluas nkauj tej tub. Thiab Thama yog lawv li muam. Xalaumoo caj ces yog li no. Xalaumoo tus tub yog Lehaunpau‑as, Lehaunpau‑as tus tub yog Anpiya, Anpiya tus tub yog Axa, Axa tus tub yog Yehausafa, Yehausafa tus tub yog Yaulas, Yaulas tus tub yog Ahaxiya, Ahaxiya tus tub yog Yau‑as, Yau‑as tus tub yog Amaxiya, Amaxiya tus tub yog Axaliya, Axaliya tus tub yog Yauthas, Yauthas tus tub yog Aha, Aha tus tub yog Hexekhiya, Hexekhiya tus tub yog Manaxe, Manaxe tus tub yog Asmoo, Asmoo tus tub yog Yauxiya. Yauxiya cov tub mas tus hlob yog Yauhanas, tus ob yog Yehauyakhi, tus peb yog Xedekhiya, tus plaub yog Salu. Yehauyakhi caj ces yog li no, nws tus tub yog Yekhauniya, Yekhauniya tus tub yog Xedekhiya. Yekhauniya uas raug ntes coj mus li tub yog Se‑athi‑ee, Makhilas, Pedaya, Senaxa, Yekhamiya, Hausama thiab Nedanpiya. Pedaya cov tub yog Xelunpanpee thiab Sime‑i. Xelunpanpee cov tub yog Mesulas thiab Hananiya, thiab ob tug li muam hu ua Selaumi. Thiab Hasunpa, Auhee, Npelekhiya, Haxadiya thiab Yusahexe, huvsi tsib leeg. Hananiya cov tub yog Pelathiya thiab Yesaya. Yesaya tus tub yog Lefaya, Lefaya tus tub yog Alanas, Alanas tus tub yog Aunpadiya, Aunpadiya tus tub yog Sekhaniya. Sekhaniya tus tub yog Semaya. Semaya cov tub yog Hathu, Ikas, Npaliya, Ne‑aliya thiab Safa, huvsi rau leej. Ne‑aliya cov tub yog Eli‑aunai, Hikhiyas thiab Alikhas, huvsi peb tug. Eli‑aunai cov tub yog Haudaviya, Eliyasi, Pelaya, Akhu, Yauhanas, Delaya thiab Anani, huvsi xya leej. Yuda cov tub yog Peles, Hexaloo, Khami, Hawj thiab Saunpas. Saunpas tus tub Le‑aya yog Yahas txiv, Yahas yog Ahumai thiab Laha txiv. Cov no yog cov Xaula tej cum. Cov no yog Edas li tub, Yile‑ee, Isama thiab Inpa. Lawv tus muam hu ua Haxeleephauni. Penu‑ee yog Kedau txiv thiab Exaw yog Husa txiv. Cov no yog Hawj cov tub. Hawj yog Efatha tus tub hlob, Efatha yog tus uas rhawv lub moos Npelehee. Asu uas yog Thekhau‑a txiv muaj ob tug pojniam, yog Hela thiab Na‑ala. Na‑ala yug tau tub rau nws yog Ahuxa, Hefaw, Themeni thiab Ha‑ahathali. Cov no yog Na‑ala li tub. Hela cov tub yog Xeles, Ixaha thiab Ethanas. Khau yog Anuj thiab Xaunpenpa li txiv thiab yog Halu tus tub Ahahee tej cum lub keeb. Yanpes yog tus uas muaj meej nthawb dua nws cov kwvtij. Nws niam tis nws lub npe hu ua Yanpes hais tias, “Kuv yug nws mas mob heev.” Yanpes thov Yixayee tus Vajtswv tias, “Thov koj foom koob hmoov rau kuv thiab nthuav kuv tus ciam teb kom dav, thiab thov koj nrog nraim kuv thiab thov koj tsom kwm kuv kom dim tej kev phem kuv thiaj tsis raug mob.” Mas Vajtswv kuj pub raws li nws tau thov. Suha tus tijlaug Khelub yog Mehi txiv. Mehi yog Ethoo txiv. Ethoo yog Npelafa, Paxe‑a thiab Thehina txiv. Thehina yog Inaha txiv. Cov no yog cov neeg hauv lub moos Lekhas. Khena cov tub yog Auni‑ee thiab Xelaya. Auni‑ee cov tub yog Hathaj thiab Me‑aunauthai. Me‑aunauthai yog Aufa txiv, Xelaya yog Yau‑a txiv. Yau‑a yog cov Kehalasi txiv, lub npe hu ua Kehalasi rau qhov lawv sawvdaws yog cov niag Kws txawj ua haujlwm. Yefune tus tub Khalej cov tub yog Ilu, Ela thiab Na‑as. Ela li tub yog Khena. Yehalelee cov tub yog Xi, Xifa, Thiliya thiab Axalee. Exalas cov tub yog Yethaw, Melej, Efaw thiab Yaloo. Melej yuav Npithiya uas yog Falau tus ntxhais, nws xeeb tub thiab yug tau Mili‑as, Samai thiab Isanpa uas yog Ethemau‑a txiv. Thiab Melej yuav ib tug Yudai ua pojniam mas yug tau Yele uas yog Kedau txiv, thiab Henpaw uas yog Xaukhau txiv, thiab Yekhuthi‑ee uas yog Xanau‑a txiv. Haudiya tus pojniam uas yog Nahas tus muam li tub yug tau Khe‑ila uas yog neeg Kamai, thiab Ethemau‑a uas yog neeg Ma‑akha. Simoo cov tub yog Asnoo, Libna, Npeehanas thiab Thiloo. Isi cov tub yog Xauhe thiab Npeexauhe. Yuda tus tub Sela cov tub yog Ws uas yog Lekha txiv thiab La‑ada uas yog Malesa txiv, thiab tej yim Kws txawj ntos ntaub mag hauv lub moos Npe Anpe‑a, thiab Yaukhi thiab cov neeg hauv lub moos Khauxenpa thiab Yau‑as thiab Xalaj uas kav hauv Mau‑a tebchaws thiab lub moos Yasunpi Lehee. (Cov uas sau tag no twb muab sau cia rau thaum ub lawm). Cov no yog cov Kws puab laujkaub nyob hauv lub moos Netha‑i thiab Kedela. Lawv nrog vajntxwv nyob qhov ntawd ua vajntxwv tes haujlwm. Xime‑oo cov tub yog Nemu‑ee, Yami, Yali, Xelag, Sa‑u. Sa‑u tus tub yog Salu, Salu tus tub yog Mixas, Mixas tus tub yog Misama. Misama cov tub yog Hamu‑ee, Hamu‑ee tus tub yog Xakaw, Xakaw tus tub yog Sime‑i. Sime‑i muaj kaum rau leej tub thiab rau leej ntxhais. Tiamsis Sime‑i cov kwvtij tsis muaj menyuam coob, mas lawv tej cum thiaj tsis huaj vam coob li xeem Yuda. Lawv nyob hauv lub moos Npe‑awsenpa, Maulada, Haxasu‑as, Npiha, Exee, Thaulas, Npethu‑ee, Hauma, Xilaj, Npe Makhanpau, Haxaxuxi, Npenpili thiab Sa‑ala‑i. Tej moos no yog lawv li moos mus txog thaum Davi ua vajntxwv kav. Lawv tej zej zog yog Edas, Ayi, Limoo, Thaukhee thiab Asas, huvsi tsib lub moos, thiab tej zej zog uas nyob puag ncig tej moos ntawd mus txog ntua lub moos Npa‑as. Cov no yog lawv tej chaw nyob, thiab lawv muaj ntaub ntawv uas sau lawv tej yim li keeb kwm cia. Mesaunpa, Yalej, Yausa uas yog Amaxiya li tub, Yau‑ee, Yehu uas yog Yausinpiya tus tub, Yausinpiya yog Xelaya tus tub thiab yog Axi‑ee li xeeb ntxwv, Eli‑aunai, Ya‑akhaunpa, Yesauhaya, Axaya, Adi‑ee, Yeximi‑ee, Npenaya, thiab Sihi tus tub Xixas. Sihi yog Aloo tus tub, Aloo yog Yedaya tus tub, Yedaya yog Simi tus tub, Simi yog Semaya tus tub. Cov uas hais npe tag no ua thawj hauv lawv tej cum, thiab lawv tej ceg kuj huaj vam coob kawg li. Lawv tsiv mus rau ntawm txojkev uas nkag mus rau hauv lub moos Kedau, mus txog ntawm lub hav sab hnub tuaj mus nrhiav tshav zaub rau lawv tej yaj tej tshis noj. Lawv nrhiav tau lub tshav zaub zoo heev uas zoo yug yaj yug tshis, thiab lub tebchaws dav ntsiag to thiab tsis muaj kev kub ntxhov, rau qhov cov qub neeg uas nyob ua ntej yog Has caj ces. Cov uas muaj npe sau cia no tau los nyob rau lub sijhawm uas Hexekhiya ua vajntxwv kav Yuda, mas lawv ua rau cov qub neeg thiab cov neeg Me‑uni uas nyob qhov ntawd tej tsev ntaub puam tsuaj tag huvsi, thiab ntxuav kom lawv tu noob txog niaj hnub nimno. Mas lawv nyob cov qub neeg tej chaw, vim yog qhov ntawd muaj tshav zaub zoo yug lawv tej yaj tej tshis. Lawv cov ntawd tsib puas leej uas yog xeem Xime‑oo mus pem lub roob Xe‑i. Cov uas coj lawv yog Pelathiya, Ne‑aliya, Lefaya thiab Uxi‑ee uas yog Isi cov tub. Lawv ua kom cov neeg Amalej uas khiav dim es tseem tshuav nyob puam tsuaj tag, mas lawv nyob qhov ntawd txog niaj hnub nimno. No yog hais txog Lunpee uas yog Yixayee tus tub hlob cov tub. Txawm yog Lunpee yog tus tub hlob los vim qhov uas nws tau nrog nws txiv niam yau pw mas nws li feem uas ua tus tub hlob thiaj li muab rau Yixayee tus tub Yauxej ob tug tub. Yog li ntawd thiaj tsis sau Lunpee lub npe rau hauv phau ntawv uas sau keeb kwm raws li qhov uas nws yog tus tub hlob. Txawm yog Yuda muaj zog dhau nws tej kwvtij thiab muaj ib tug thawj kav tshwm ntawm nws los, los feem uas ua tub hlob yog Yauxej li lawm. Lunpee uas yog Yixayee tus tub hlob cov tub yog Hanau, Palu, Hexaloo thiab Khami. Yau‑ee cov tub yog Semaya uas yog Yau‑ee tus tub, Semaya tus tub yog Kau, Kau tus tub yog Sime‑i, Sime‑i tus tub yog Mikha, Mikha tus tub yog Le‑aya, Le‑aya tus tub yog Npa‑as, Npa‑as tus tub yog Npe‑ela, yog tus uas Axilia tus vajntxwv Thikapinexaw tau kuav coj mus nyob lwm tebchaws. Npe‑ela yog ib tug thawj hauv xeem Lunpee. Hauv phau ntawv uas sau lawv li keeb kwm, mas nws cov kwvtij raws li lawv tej cum yog li no. Tus thawj yog Ye‑i‑ee, thiab Xekhaliya, thiab Axaj tus tub Npela. Axaj yog Sema tus tub, Sema yog Yau‑ee tus tub. Lawv nyob hauv lub tebchaws Alau‑aw mus txog lub moos Nenpau thiab Npa‑as Me‑oo. Lawv kuj nyob sab hnub tuaj mus txog ntawm ntug ntuj nrag teb do uas nyob ntawm tus niag dej Yufeti sab tim no, rau qhov lawv tej tsiaj txhu huaj vam coob coob rau hauv tebchaws Kile‑a. Lub sijhawm uas Xa‑u ua vajntxwv kav lawv tau ua rog rau cov neeg Haka, mas cov Haka tuag rau lawv tes, mas lawv thiaj nyob hauv lawv tej tsev ntaub thoob plaws lub tebchaws uas nyob ntawm Kile‑a sab hnub tuaj. Kas cov tub ki nyob npuas nkaus xeem Lunpee hauv tebchaws Npasas mus txog lub moos Xalekha. Yau‑ee yog tus thawj, Safas yog tus ob, thiab muaj Yanai thiab Safa hauv Npasas. Thiab lawv cov kwvtij raws li lawv tej cum, yog Mikha‑ee, Mesulas, Senpa, Yaulai, Yakhas, Xi‑a thiab Enpaw, huvsi xya leej. Cov no yog Anpiha‑i cov tub. Anpiha‑i yog Huli tus tub, Huli yog Yalau‑a tus tub, Yalau‑a yog Kile‑a tus tub, Kile‑a yog Mikha‑ee tus tub, Mikha‑ee yog Yesisai tus tub, Yesisai yog Yadau tus tub, Yadau yog Npub tus tub. Ahi uas yog Adi‑ee tus tub thiab yog Kuni tus xeeb ntxwv yog tus thawj hauv lawv cum. Mas lawv nyob hauv Kile‑a thiab Npasas thiab hauv Npasas tej moos thiab tej tshav zaub huvsi thoob plaws hauv Saloo tebchaws. Cov no sawvdaws lawv tau nce npe raws li lawv caj ces li keeb kwm rau thaum Yauthas ua vajntxwv kav Yuda hos Yelaunpau‑as ua vajntxwv kav Yixayee. Xeem Lunpee thiab xeem Kas thiab ib nrab xeem Manaxe muaj tub rog siab loj siab tuab uas tuav daim phiaj hlau thiab rab ntaj thiab txawj tua hneev nti txawj ua rog 44,760 leej npaj txhij yuav ua rog. Lawv ua rog rau cov Haka, Yethu, Nafi thiab Nauda. Thaum Vajtswv pab lawv mas cov Haka thiab cov uas nrog cov Haka nyob poob rau hauv lawv txhais tes, vim lawv tau thov hu Vajtswv rau thaum lawv ua rog mas nws teb lawv tej lus thov rau qhov lawv tso siab rau nws. Lawv txeeb tau cov Haka tej tsiaj txhu mus, yog ntxhuav 50,000 tus, yaj 250,000 tus thiab nees luav 2,000 tus, thiab ntes tau neeg 100,000 leej. Cov Haka tuag coob rau qhov zaum rog no yog los ntawm Vajtswv los. Lawv nyob hauv cov Haka tej chaw mus txog thaum lawv poob tebchaws. Xeem Manaxe ib nrab nyob hauv lub tebchaws ntawd. Lawv muaj coob nyob txij ntua Npasas mus txog ntua lub moos Npa‑as Hawmoo thiab Xeni thiab lub roob Hawmoo. Cov thawj hauv lawv tej cum yog li no, yog Efaw, Isi, Eli‑ee, Axali‑ee, Yelemi, Haudaviya thiab Yadi‑ee. Lawv yog tub rog siab loj siab tuab, muaj suab muaj npe ua cov thawj hauv lawv tej cum. Tiamsis lawv fav xeeb rau lawv tej poj koob yawm txwv tus Vajtswv. Lawv mus deev cov neeg hauv lub tebchaws ntawd tej dab, yog cov neeg uas Vajtswv tau ua kom puam tsuaj tom lawv hauv ntej lawm. Yixayee tus Vajtswv thiaj tshoov cov Axilia tus vajntxwv Pu lub siab (Pu yog Axilia tus vajntxwv Thikapinexaw) mas nws thiaj muab xeem Lunpee, xeem Kas thiab ib nrab xeem Manaxe kuav mus thiab coj lawv mus rau lub moos Halam thiab Hanpau thiab Hala thiab mus txog tus dej Kauxas nyob txog niaj hnub nimno. Levi cov tub yog Kawsoo, Khauha thiab Melali. Khauha cov tub yog Alav, Ixaha, Heploo thiab Uxi‑ee. Alav li menyuam yog Aloo, Mauxe thiab Mili‑as. Aloo cov tub yog Nada, Anpihu, Ele‑axa thiab Ithama. Ele‑axa yog Fineha txiv, Fineha yog Anpisuva txiv. Anpisuva yog Npukhi txiv, Npukhi yog Uxi txiv, Uxi yog Xelahiya txiv, Xelahiya yog Melayau txiv, Melayau yog Amaliya txiv, Amaliya yog Ahithu txiv, Ahithu yog Xadau txiv, Xadau yog Ahima‑a txiv, Ahima‑a yog Axaliya txiv, Axaliya yog Yauhanas txiv, Yauhanas yog Axaliya txiv. Yauhanas yog tus uas ua pov thawj hauv Vajtswv lub tuam tsev uas Xalaumoo ua rau hauv Yeluxalees. Axaliya yog Amaliya txiv, Amaliya yog Ahithu txiv, Ahithu yog Xadau txiv, Xadau yog Salu txiv, Salu yog Hikhiya txiv, Hikhiya yog Axaliya txiv, Axaliya yog Xelaya txiv, Xelaya yog Yehauxada txiv. Yehauxada raug kuav mus poob tebchaws rau thaum Yawmsaub muab cov Yuda thiab Yeluxalees rau hauv Nenpukhanexa txhais tes kuav mus poob tebchaws. Levi cov tub yog Kawsoo, Khauha thiab Melali. No yog Kawsoo li tub tej npe, yog Lini thiab Sime‑i. Khauha cov tub yog Alav, Ixaha, Heploo thiab Uxi‑ee. Melali li tub yog Mali thiab Musi. Cov no yog Levi tej cum raws li lawv txiv tej npe. Ntawm Kawsoo caj ces los mus, Kawsoo tus tub yog Lini, Lini tus tub yog Yahas, Yahas tus tub yog Xima, Xima tus tub yog Yau‑av, Yau‑av tus tub yog Idau, Idau tus tub yog Xelag, Xelag tus tub yog Ye‑athelai. Ntawm Khauha caj ces los mus, Khauha tus tub yog Aminada, Aminada tus tub yog Khaula, Khaula tus tub yog Axi, Axi tus tub yog Eekhana, Eekhana tus tub yog Enpiyaxas, Enpiyaxas tus tub yog Axi, Axi tus tub yog Thaha, Thaha tus tub yog Uli‑ee, Uli‑ee tus tub yog Uxiya, Uxiya tus tub yog Sa‑u. Eekhana li tub yog Amaxai thiab Ahimau. Ahimau tus tub yog Eekhana, Eekhana tus tub yog Xaufai, Xaufai tus tub yog Nahaj, Nahaj tus tub yog Elia, Elia tus tub yog Yelauhas, Yelauhas tus tub yog Eekhana. Xamuyee cov tub yog, Yau‑ee uas yog tus tub hlob, tus ob yog Anpiya. Melali caj ces yog li no, Melali tub yog Mali, Mali tus tub yog Lini, Lini tus tub yog Sime‑i, Sime‑i tus tub yog Uxa, Uxa tus tub yog Sime‑a, Sime‑a tus tub yog Hakiya, Hakiya tus tub yog Axaya. Cov no yog cov uas Davi tsa ua cov uas saib xyuas tej haujlwm hu nkauj hauv Yawmsaub lub tuam tsev rau thaum uas lub phij xab sib cog lus tau nyob rau hauv lawm. Lawv li haujlwm yog hu nkauj rau ntawm qhov rooj Yawmsaub lub tsev ntaub sib ntsib mus txog thaum Xalaumoo ua tau Yawmsaub lub tuam tsev rau hauv Yeluxalees tiav, thiab lawv ua lawv tes haujlwm raws li uas teem cia. Cov uas tuaj ua Vajtswv tes haujlwm thiab lawv cov tub yog li no. Ntawm Khauha caj ces los mus yog Hemas uas yog tus hu nkauj. Hemas yog Yau‑ee tus tub, Yau‑ee yog Xamuyee tus tub, Xamuyee yog Eekhana tus tub, Eekhana yog Yelauhas tus tub, Yelauhas yog Eli‑ee tus tub, Eli‑ee yog Thau‑a tus tub, Thau‑a yog Xub tus tub, Xub yog Eekhana tus tub, Eekhana yog Maha tus tub, Maha yog Amaxai tus tub, Amaxai yog Eekhana tus tub, Eekhana yog Yau‑ee tus tub, Yau‑ee yog Axaliya tus tub, Axaliya yog Xefaniya tus tub, Xefaniya yog Thaha tus tub, Thaha yog Axi tus tub, Axi yog Enpiyaxas tus tub, Enpiyaxa yog Khaula tus tub, Khaula yog Ixaha tus tub, Ixaha yog Khauha tus tub, Khauha yog Levi tus tub, Levi yog Yixayee tus tub. Thiab Axas uas yog Hemas li kwvtij yog tus uas sawv ntawm Hemas sab tes xis, yog Axas uas yog Npelekhiya tus tub, Npelekhiya yog Sime‑a tus tub, Sime‑a yog Mikha‑ee tus tub, Mikha‑ee yog Npa‑axeya tus tub, Npa‑axeya yog Makhiya tus tub, Makhiya yog Ethani tus tub, Ethani yog Xelag tus tub, Xelag yog Adaya tus tub, Adaya yog Etha tus tub, Etha yog Xima tus tub, Xima yog Sime‑i tus tub, Sime‑i yog Yahas tus tub, Yahas yog Kawsoo tus tub, Kawsoo yog Levi tus tub. Ntawm Hemas sab tes laug mas yog Melali cov tub uas yog lawv cov kwvtij, yog Etha uas yog Khisi tus tub, Khisi yog Adi tus tub, Adi yog Malu tus tub, Malu yog Hasanpiya tus tub, Hasanpiya yog Amaxiya tus tub, Amaxiya yog Hikhiya tus tub, Hikhiya yog Axi tus tub, Axi yog Npani tus tub, Npani yog Semaw tus tub, Semaw yog Mali tus tub, Mali yog Musi tus tub, Musi yog Melali tus tub, Melali yog Levi tus tub. Cov Levi uas yog lawv cov kwvtij raug tsa ua txhua yam haujlwm hauv Vajtswv lub tuam tsev. Aloo thiab nws cov tub yog cov uas muab qhov txhia chaw xyeem tso saum lub thaj uas hlawv huvsi xyeem thiab saum lub thaj hmoov tshuaj tsw qab thiab ua txhua yam haujlwm hauv chav dawb huv kawg nkaus, thiab ua kevcai ntxuav kev txhaum rau cov Yixayee, raws li txhua yam uas Vajtswv tus qhev Mauxe tau hais kom lawv ua. Aloo cov tub yog li no, Aloo tus tub yog Ele‑axa, Ele‑axa tus tub yog Fineha, Fineha tus tub yog Anpisuva, Anpisuva tus tub yog Npukhi, Npukhi tus tub yog Uxi, Uxi tus tub yog Xelahiya, Xelahiya tus tub yog Melayau, Melayau tus tub yog Amaliya, Amaliya tus tub yog Ahithu, Ahithu tus tub yog Xadau, Xadau tus tub yog Ahima‑a. Lawv tej chaw nyob thiab lawv tej zej zog thiab lawv tej ciam teb yog li no. Aloo caj ces uas yog Khauha cum tau rho ntawv thawj daim, mas lawv tau lub moos Heploo hauv tebchaws Yuda thiab tej tshav zaub uas nyob puag ncig ntawd, tiamsis tej liaj teb thiab tej zej zog ntawm lub moos ntawd lawv muab rau Yefune tus tub Khalej. Tej moos cawm siav uas muab rau Aloo cov tub yog li no, yog lub moos Heploo, lub moos Lina thiab tej tshav zaub uas nyob puag ncig ntawd, thiab lub moos Yathi, lub moos Ethemau‑a thiab tej tshav zaub uas nyob puag ncig ntawd, lub moos Hilees thiab tej tshav zaub, lub moos Denpi thiab tej tshav zaub, lub moos Asas thiab tej tshav zaub, lub moos Npeseme thiab tej tshav zaub, thiab ntawm xeem Npeeyamee tebchaws muab lub moos Kenpa thiab tej tshav zaub, lub moos Alame thiab tej tshav zaub thiab lub moos Anathau thiab tej tshav zaub. Tej moos no uas muab faib rau lawv txhua cum nyob huvsi muaj kaum peb lub moos. Cum Khauha uas tseem tshuav rho tau ntawv txais kaum lub moos ntawm tej cum hauv ib nrab xeem Manaxe. Kawsoo caj ces rho tau kaum peb lub moos ntawm xeem Ixakha, xeem Asaw, xeem Nathali thiab xeem Manaxe hauv Npasas tebchaws raws li lawv tej cum. Melali caj ces rho tau kaum ob lub moos ntawm xeem Lunpee xeem Kas thiab xeem Xenpuloo raws li lawv tej cum. Ua li no cov Yixayee tau muab tej moos thiab tej tshav zaub rau cov Levi. Lawv kuj rho ntawv pub tej moos hauv xeem Yuda xeem Xime‑oo thiab xeem Npeeyamee raws li tej npe uas hais tag lawm thiab. Khauha caj ces muaj qee cum tau tej moos uas ua lawv feem ntawm xeem Efa‑i. Cov Yixayee muab tej moos cawm siav no rau lawv, yog lub moos Sekhee thiab tej tshav zaub uas nyob pem toj siab Efa‑i tebchaws, thiab lub moos Kexaw thiab tej tshav zaub, lub moos Yaume‑as thiab tej tshav zaub, lub moos Npe Hauloo thiab tej tshav zaub, lub moos Aiyaloo thiab tej tshav zaub, lub moos Kalimoo thiab tej tshav zaub. Mas ntawm ib nrab xeem Manaxe yog lub moos Anaw thiab tej tshav zaub, lub moos Npile‑as thiab tej tshav zaub, yog muab rau Khauha caj ces qee cum uas tseem tshuav. Ntawm ib nrab xeem Manaxe lawv muab lub moos Kaulas hauv Npasas tebchaws thiab tej tshav zaub thiab lub moos Athalau thiab tej tshav zaub rau Kawsoo caj ces. Ntawm xeem Ixakha lawv muab lub moos Khede thiab tej tshav zaub, lub moos Danpela thiab tej tshav zaub, lub moos Lamau thiab tej tshav zaub, lub moos Anee thiab tej tshav zaub. Ntawm xeem Asaw muab lub moos Masas thiab tej tshav zaub, lub moos Adoo thiab tej tshav zaub, lub moos Huko thiab tej tshav zaub, thiab lub moos Lehau thiab tej tshav zaub. Ntawm xeem Nathali muab lub moos Khede hauv Kalilais tebchaws thiab tej tshav zaub, lub moos Hamoo thiab tej tshav zaub thiab lub moos Khiliyatha‑i thiab tej tshav zaub. Cov Melali uas tseem tshuav tau ntawm xeem Xenpuloo yog lub moos Limaunau thiab tej tshav zaub, lub moos Thanpau thiab tej tshav zaub, thiab ntawm xeem Lunpee uas yog sab dej Yaladee tim ub ntawm lub moos Yelikhau uas yog sab hnub tuaj yog lub moos Npexaw uas nyob pem toj siab thiab tej tshav zaub, lub moos Yaxa thiab tej tshav zaub, lub moos Khedemau thiab tej tshav zaub, thiab lub moos Mefa‑a thiab tej tshav zaub. Ntawm xeem Kas yog lub moos Lamau hauv Kile‑a thiab tej tshav zaub, lub moos Mahana‑i thiab tej tshav zaub, lub moos Hesanpoo thiab tej tshav zaub thiab lub moos Yaxaw thiab tej tshav zaub. Ixakha cov tub yog Thaula, Pu‑a, Yasu thiab Siloo huvsi plaub leeg. Thaula cov tub yog Uxi, Lefaya, Yeli‑ee, Yamai, Ixas thiab Semu‑ee. Lawv ua thawj hauv lawv tej yim hauv Thaula cum, lawv caj ces yog tub rog siab loj siab tuab mas thaum Davi ua vajntxwv kav mas lawv muaj 22,600 leej. Uxi li tub yog Ilahiya. Ilahiya cov tub yog Mikha‑ee, Aunpadiya, Yau‑ee thiab Isiya, huvsi tsib leeg, puavleej ua cov thawj, thiab lawv cov no caj ces raws li tej yim muaj cov tub rog 36,000 leej rau qhov lawv muaj pojniam thiab menyuam coob. Tag nrho lawv cov kwvtij uas yog xeem Ixakha huvsi muaj cov tub rog siab loj siab tuab 87,000 leej raws li uas sau cia hauv lawv li keeb kwm. Npeeyamee cov tub yog Npela, Npekhaw thiab Yediya‑ee, huvsi peb leeg. Npela cov tub yog, Exanpoo, Uxi, Uxi‑ee, Yelimau thiab Ilis, huvsi tsib leeg. Lawv ua thawj hauv lawv tej cum, lawv yog cov tub rog siab loj siab tuab, mas raws li uas sau cia rau hauv lawv li keeb kwm muaj 22,034 leej. Npekhaw cov tub yog Xemila, Yau‑as, Eliyexaw, Eli‑aunai, Ooli, Yelemau, Anpiya, Anathau thiab Aleme, puavleej yog Npekhaw cov tub. Mas raws li lawv caj ces li keeb kwm uas sau cia, cov thawj hauv lawv tej cum uas ua tub rog siab loj siab tuab muaj 20,200 leej. Yediya‑ee li tub yog Npihas. Npihas cov tub yog Ye‑u, Npeeyamee, Ehuj, Khena‑ana, Xetha, Thasi thiab Ahisaha. Cov no puavleej yog Yediya‑ee cov tub mas suav raws li lawv cov thawj hauv tej cum uas ua tau tub rog siab loj siab tuab muaj 17,200 leej uas npaj txhij yuav mus ua rog. Supi thiab Hupi yog Ilab cov tub, Husi yog Ahaw tus tub. Nathali cov tub yog Yaxi‑ee, Kuni, Yexaw thiab Salu, yog Npiha cov tub ki. Manaxe tus tub yog Ali‑ee, uas yog nws tus niam yau neeg Alas yug. Nws tseem yug tau Makhi uas yog Kile‑a txiv thiab. Makhi nrhiav pojniam rau Hupi thiab Supi. Makhi tus muam hu ua Ma‑akha. Makhi muaj dua ib tug tub hu ua Xelaufeha. Mas Xelaufeha muaj ntxhais xwb. Ma‑akha uas yog Makhi li pojniam yug ib tug tub mas muab hu ua Pelev, mas Pelev tus kwv hu ua Sele. Sele cov tub yog Ulas thiab Lakhee. Ulas tus tub yog Npeda. Cov no yog Kile‑a cov tub. Kile‑a yog Makhi tus tub, Makhi yog Manaxe tus tub. Kile‑a tus muam Hamaulekhe yug tau Ihau, Anpiyexaw thiab Malas. Semida cov tub yog Ahi‑as, Sekhee, Likhi thiab Aniyas. Efa‑i cov tub yog Suthela, Suthela tus tub yog Npele, Npele tus tub yog Thaha, Thaha tus tub yog Ele‑ada, Ele‑ada tus tub yog Thaha, Thaha tus tub yog Xanpa, Xanpa tus tub yog Suthela. Thiab Efa‑i muaj Exaw thiab Ele‑a, mas cov neeg Ka uas yug hauv lub tebchaws ntawd tau muab tua lawm vim ob tug mus lws lawv tej tsiaj txhu. Efa‑i uas yog ob tug txiv tau quaj ntsuag ntau hnub, mas nws cov kwvtij tuaj nplij nws lub siab. Mas Efa‑i thiaj nrog nws pojniam pw nws thiaj xeeb menyuam thiab yug tau ib tug tub. Efa‑i muab hu ua Npeliya vim nws tsev neeg raug kev txom nyem. Efa‑i tus ntxhais hu ua Se‑ela. Se‑ela yog tus uas ua lub moos Npe Hauloo yog lub pem roob thiab lub nras tiaj thiab lub moos Uxeese‑ela. Efa‑i tus tub yog Lefa, Lefa tus tub yog Lese, Lese tus tub yog Thelas, Thelas tus tub yog Thahas, Thahas tus tub yog Ladas, Ladas tus tub yog Amihu, Amihu tus tub yog Elisama, Elisama tus tub yog Noo, Noo tus tub yog Yausua. Thaj av thiab tej zej zog uas yog lawv li yog Npe‑ee thiab tej zej zog ib ncig thiab lub moos Na‑alas uas nyob sab hnub tuaj thiab lub moos Kexaw thiab tej zej zog ib ncig uas nyob sab hnub poob, lub moos Sekhee thiab tej zej zog ib ncig, thiab lub moos Aya thiab tej zej zog ib ncig, thiab ntawm xeem Manaxe tus ciam teb yog lub moos Npesas thiab tej zej zog ib ncig, lub moos Tha‑ana thiab tej zej zog ib ncig, lub moos Mekidau thiab tej zej zog ib ncig, lub moos Dau thiab tej zej zog ib ncig. Yauxej uas yog Yixayee tus tub tej tub ki nyob tej moos ntawd. Asaw cov tub yog Ina, Isava, Isavi, Npeliya thiab Xelag uas yog lawv tus muam. Npeliya cov tub yog Henpaw thiab Makhi‑ee. Makhi‑ee yog Npixa‑i txiv. Henpaw cov menyuam yog Yafeb, Saumaw, Hauthas thiab Sua uas yog lawv tus muam. Yafeb cov tub yog Paxa, Npishas thiab Asava. Cov no yog Yafeb cov tub. Yafeb tus kwv Semaw cov tub yog Lauka, Yehunpa thiab Alas. Yafeb tus kwv Helee cov tub yog Xaufa, Ina, Sele thiab Amas. Xaufa cov tub yog Xu‑as, Hanefaw, Su‑as, Npeli, Ilag, Npexaw, Hauj, Sama, Sisa, Ithalas thiab Npe‑ela. Yethaw cov tub yog Yefune, Pixapa thiab Ala. Ula cov tub yog Asla, Hani‑ee thiab Lixia. Cov no puavleej yog cov thawj hauv tej cum xeem Asaw, lawv yog tub rog siab loj siab tuab uas txawj tshaj plaws, yog cov thawj tub rog. Raws li uas sau cia rau hauv lawv li ntawv keeb kwm es yuav mus ua tub rog, huvsi muaj 26,000 leej. Npeeyamee cov tub yog li no, Npela yog tus tub hlob, Asanpee yog tus ob, Ahala yog tus peb, Nauha yog tus plaub, Lafa yog tus tsib. Npela cov tub yog Adaj, Kela, Anpihuj, Anpisuva, Na‑amas, Ahau‑a, Kela, Sefufas thiab Hulas. Cov no yog Ehuj cov tub, lawv yog cov uas ua thawj hauv tej cum uas nyob hauv lub moos Kenpa es raug kuav mus nyob rau hauv lub moos Manaha, yog Na‑amas, Ahiya thiab Kela uas ua tus thawj coj lawv khiav mus. Kela yog Uxa thiab Ahihu txiv. Sahala‑i muaj tub rau hauv Mau‑a tebchaws tom qab uas nws twb nrauj Husi thiab Npa‑alaj uas yog nws ob tug pojniam lawm. Nws tus pojniam Haude yug tau cov tub no rau nws, yog Yaunpam, Xinpia, Mesas, Makhas, Ye‑us, Xakhia thiab Mima. Cov no yog nws cov tub, yog cov thawj hauv lawv tej cum. Nws tus pojniam Husi kuj yug tau Anpithu thiab Eepa‑as rau nws. Eepa‑as cov tub yog Enpaw, Misa thiab Seme. Seme yog tus uas ua lub moos Aunau thiab lub moos Lau thiab tej zej zog ib ncig, thiab Npeliya thiab Sema. Ob tug yog cov thawj hauv tej cum uas nyob hauv lub moos Aiyaloo, thiab yog cov uas ntiab cov neeg hauv lub moos Ka khiav mus lawm. Thiab Ahiyau, Sasa thiab Yelemau. Xenpadiya, Alaj, Edaw, Mikha‑ee, Isapa thiab Yauha yog Npeliya cov tub. Xenpadiya, Mesulas, Hikhi, Henpaw, Isamelai, Iliya thiab Yaunpam yog Eepa‑as cov tub. Yakhi, Xikhi, Xadi, Eli‑enai, Xilethai, Eli‑ee, Adaya, Npelaya thiab Sila yog Sime‑i cov tub. Isapas, Enpaw, Eli‑ee, Adoo, Xikhi, Hanas, Hananiya, Elas, Athauthiya, Ideya thiab Penu‑ee yog Sasa cov tub. Saselai, Sehaliya, Athaliya, Ya‑alesiya, Eliya thiab Xikhi yog Yelauhas cov tub. Cov no ua cov thawj hauv tej cum raws li lawv caj ces li keeb kwm, yog cov uas ua hlob. Cov no nyob hauv Yeluxalees. Ye‑i‑ee uas yog Kinpe‑oo txiv nyob hauv lub moos Kinpe‑oo. Nws pojniam hu ua Ma‑akha. Nws tus tub hlob hu ua Adoo, thiab muaj Xuv, Khij, Npa‑as, Nada, Kedau, Ahiyau, Xekhaw, thiab Milauj uas yog Sime‑a txiv. Cov no nyob npuas lawv cov kwvtij thiab nrog lawv nyob ua ke hauv Yeluxalees. Naw yog Khij txiv, Khij yog Xa‑u txiv, Xa‑u yog Yaunathas, Makhisuva, Anpinada thiab Esanpa‑as txiv. Yaunathas tus tub yog Melinpa‑as, Melinpa‑as yog Mikha txiv. Mikha cov tub yog Pithau, Mele, Thale‑a thiab Aha. Aha yog Yehau‑ada txiv, Yehau‑ada yog Aleme thiab Amave thiab Xili txiv. Xili yog Mauxa txiv. Mauxa yog Npine‑a txiv, Npine‑a tus tub yog Lafa, Lafa tus tub yog Ele‑axas, Ele‑axas tus tub yog Axee. Axee muaj rau tus tub, no yog nws cov tub li npe, yog Alikhas, Npaukhelu, Yisama‑ee, Se‑aliya, Aunpadiya thiab Hanas. Cov no puavleej yog Axee cov tub. Axee tus kwv Ese cov tub yog Ulas uas yog nws tus tub hlob, Ye‑u yog tus ob, Elifele yog tus peb. Ulas cov tub yog cov tub rog tua hneev nti siab loj siab tuab, muaj tub ki coob ib puas tsib caug leej. Cov no puavleej yog xeem Npeeyamee. Ua li ntawd ib tsoom Yixayee sawvdaws sau npe cia raws li lawv caj ces li keeb kwm thiab cov npe no tau muab sau rau hauv Yixayee tej vajntxwv phau ntawv keeb kwm lawm. Mas Yuda raug kuav coj mus nyob rau hauv tebchaws Npanpiloo vim lawv lub siab tsis xib rau Vajtswv lawm. Thawj pab uas rov qab los nyob hauv lawv tej vaj tse uas yog lawv tug hauv lawv tej moos yog cov pov thawj, cov Levi thiab cov qhev ua haujlwm hauv lub tuam tsev. Muaj qee leej hauv xeem Yuda xeem Npeeyamee xeem Efa‑i thiab xeem Manaxe nyob hauv Yeluxalees, yog Uthai uas yog Amihu tus tub, Amihu yog Ooli tus tub, Ooli yog Ili tus tub, Ili yog Npani tus tub, Npani yog Yuda tus tub Peles li ib ceg xeeb ntxwv. Ntawm cum Silau yog Axaya uas yog tub hlob thiab nws cov tub. Ntawm Xelag caj ces yog Ye‑u‑ee thiab nws cov kwvtij, muaj rau pua cuaj caum leej. Ntawm xeem Npeeyamee yog Mesulas tus tub Xalu, Mesulas yog Haudaviya tus tub, Haudaviya yog Haxenu‑a tus tub, thiab Yelauhas tus tub Ineya, thiab Uxi tus tub Ela uas yog Mikhi tus xeeb ntxwv, thiab Sefathiya tus tub Mesulas, Sefathiya yog Le‑u‑ee tus tub, Le‑u‑ee yog Iniya tus tub, thiab lawv cov kwvtij raws li lawv caj ces li keeb kwm uas sau cia, muaj cuaj pua tsib caug rau leej. Cov no sawvdaws yog cov uas ua thawj hauv tej cum raws li lawv tej cum. Hauv cov pov thawj yog Yedaya, Yehauyali, Yakhi, thiab Axaliya uas yog Hikhiya tus tub, Hikhiya yog Mesulas tus tub, Mesulas yog Xadau tus tub, Xadau yog Melayau tus tub, Melayau yog Ahithu tus tub uas yog tus thawj uas saib Vajtswv lub tuam tsev. Thiab Adaya uas yog Yelauhas tus tub, Yelauhas yog Pasaw tus tub, Pasaw yog Makhiya tus tub, thiab Ma‑axai uas yog Adi‑ee tus tub, Adi‑ee yog Yaxela tus tub, Yaxela yog Mesulas tus tub, Mesulas yog Mesilemi tus tub, Mesilemi yog Imaw tus tub, thiab lawv cov kwvtij uas ua thawj hauv lawv tej cum, huvsi muaj ib txhiab xya pua rau caum leej, yog cov uas txawj txawj ua haujlwm hauv Vajtswv lub tuam tsev. Hauv cov Levi muaj Semaya uas yog Hasus tus tub, Hasus yog Alikhas tus tub, Alikhas yog Hasanpiya tus tub, uas yog Melali caj ces. Thiab Npanpakha, Helev, Kalas thiab Mathaniya uas yog Mikha tus tub. Mikha yog Xikhi tus tub, Xikhi yog Axas tus tub. Thiab Aunpadiya uas yog Semaya tus tub. Semaya yog Kalas tus tub, Kalas yog Yeduthu tus tub, thiab Npelekhiya uas yog Axa tus tub. Axa yog Eekhana tus tub uas nyob hauv cov Nethaufa tej zos. Cov uas zov tej rooj loog yog Salu, Akhu, Thamoo, Ahimas thiab lawv cov kwvtij, Salu ua tus thawj. Los txog niaj hnub nimno lawv nyob ntawm lub Rooj Loog Vajntxwv sab hnub tuaj. Cov no yog cov Levi uas zov tej rooj loog. Salu yog Khaule tus tub, Khaule yog Enpiyaxas tus tub, Enpiyaxas yog Khaula tus tub, thiab nws cov kwvtij uas yog Khaula caj ces yog cov uas saib xyuas haujlwm thiab yog cov uas zov lub qhov rooj tuam tsev ib yam li lawv tej poj koob yawm txwv tau saib thiab zov Yawmsaub lub tsev ntaub lub qhov rooj. Ele‑axa tus tub Fineha yog tus uas kav lawv yav thaum ub, Yawmsaub nrog nraim nws nyob. Meselemiya tus tub Xekhaliya yog tus uas zov lub qhov rooj tsev ntaub sib ntsib. Cov uas raug xaiv ua cov uas zov tej rooj loog muaj ob puas kaum ob leeg. Lawv nce npe raws li lawv caj ces li keeb kwm thiab raws li tej zos uas lawv nyob. Davi thiab Xamuyee uas yog xibhwb hais pom tom hauv ntej tau tsa lawv ua tes haujlwm tseem ceeb no. Yog li ntawd lawv thiab lawv cov tub ki ua cov uas saib thiab zov tej rooj loog ntawm Yawmsaub lub tuam tsev uas yog lub tsev ntaub. Cov uas zov tej rooj loog nyob rau plaub fab, yog nyob sab hnub tuaj sab hnub poob sab ped thiab sab nrad. Thiab tej lub sijhawm lawv cov kwvtij uas nyob hauv lawv tej zej zog yuav tsum tuaj nrog lawv nyob xya hnub pab ua haujlwm. Plaub leeg uas ua thawj zov tej rooj loog uas yog cov Levi ntawd yog cov uas saib xyuas tej chav tsev thiab tej txhab nyiaj hauv Vajtswv lub tuam tsev. Lawv muaj chaw so puag ncig Vajtswv lub tuam tsev, rau qhov lawv tej haujlwm yog zov thiab lawv yuav tsum qheb txhua tagkis. Muaj qee leej yog cov uas saib thiab tu tej cuab yeej uas siv ua Vajtswv tes haujlwm, rau qhov lawv yuav tsum suav txhua zaus uas rho mus thiab coj rov los cia. Thiab muaj qee leej raug tsa ua cov uas saib xyuas txhua yam uas nyob hauv thiab saib xyuas tej cuab yeej uas dawb huv huvsi thiab saib tej hmoov mog zoo zoo thiab tej cawv txiv hmab thiab tej roj thiab tej hmoov tshuaj tsw qab thiab tej txuj lom. Thiab qee leej uas yog cov pov thawj li tub mas lawv tov tej txuj lom. Mathithiya uas yog ib tug Levi, yog Salu tus tub hlob, yog Khaula caj ces, nws li haujlwm yog saib xyuas cov uas ua tej ncuav pliab pliab. Thiab lawv cov kwvtij qee leej uas yog Khauha caj ces ua cov uas saib tej ncuav uas xyeem txawb rau ntawm Yawmsaub xubntiag, thiab lawv yuav tsum npaj ua txhua hnub Xanpatau. No yog cov hu nkauj uas yog cov thawj hauv xeem Levi tej cum. Lawv nyob hauv tej chav hauv Vajtswv lub tuam tsev thiab tsis ua lwm yam haujlwm rau qhov lawv li haujlwm yog nyob tos nruab hnub hmo ntuj. Cov no yog cov thawj hauv xeem Levi tej cum, raws li lawv caj ces li keeb kwm uas sau cia, lawv yog cov thawj coj uas nyob hauv Yeluxalees. Ye‑i‑ee uas yog Kinpe‑oo txiv nyob hauv lub moos Kinpe‑oo, nws pojniam hu ua Ma‑akha. Nws tus tub hlob hu ua Adoo, thiab muaj Xuv, Khij, Npa‑as, Naw, Nada, Kedau, Ahiyau, Xekhaliya thiab Milauj. Milauj yog Sime‑am txiv. Cov no nyob npuas lawv cov kwvtij thiab nrog lawv nyob ua ke hauv Yeluxalees. Naw yog Khij txiv, Khij yog Xa‑u txiv. Xa‑u yog Yaunathas, Makhisuva, Anpinada thiab Esanpa‑as txiv. Yaunathas tus tub yog Melinpa‑as, Melinpa‑as yog Mikha txiv. Mikha cov tub yog Pithau, Mele, Thale‑a thiab Aha. Aha yog Yala txiv, Yala yog Aleme thiab Amave thiab Xili txiv. Xili yog Mauxa txiv. Mauxa yog Npine‑a txiv, Npine‑a tus tub yog Lefaya. Lefaya tus tub yog Ele‑axas, Ele‑axas tus tub yog Axee. Axee muaj rau tus tub. No yog nws cov tub li npe, yog Axikhas, Npaukhelu, Yisama‑ee, Se‑aliya, Aunpadiya thiab Hanas. Cov no puavleej yog Axee cov tub. Cov Filixatee tuaj ua rog rau cov Yixayee, mas cov Yixayee khiav cov Filixatee thiab raug tua tuag rau saum lub roob Kinpau‑a. Cov Filixatee caum cuag Xa‑u thiab nws cov tub, mas cov Filixatee tua Yaunathas thiab Anpinada thiab Makhisuva uas yog Xa‑u li tub tuag tag. Ua rog hnyav heev tuaj ti Xa‑u, cov tub rog tua hneev ntsib Xa‑u, txawm tua raug nws mob heev. Ces Xa‑u txawm hais rau tus uas nqa nws tej cuab yeej tias, “Cia li rho ntaj los nkaug kuv kom tshab plaws, ntshai tsam cov uas tsis ua kevcai txiav no tuaj ua limhiam saib tsis taus kuv.” Tiamsis tus uas nqa tej cuab yeej tsis kam nkaug vim yog ntshai heev. Ces Xa‑u txawm rho kiag nws rab ntaj los cuab es nws khwb nkaus chob kiag rab ntaj ntawd. Thaum tus uas nqa tej cuab yeej pom tias Xa‑u tuag lawm, nws kuj cuab nws rab ntaj khwb nkaus chob nws tuag thiab. Yog li ntawd Xa‑u thiaj tuag thiab nws peb tug tub thiab nws cov neeg sawvdaws tuag huvsi ua ke. Thaum cov Yixayee sawvdaws uas nyob hauv lub hav pom tias cov tub rog khiav lawm thiab Xa‑u thiab Xa‑u cov tub tuag tag lawm, lawv txawm tso lawv tej moos tseg khiav tag, mas cov Filixatee los nyob rau hauv. Hnub tom qab thaum cov Filixatee tuaj mus khaws cov uas raug tua tuag tej cuab yeej mus yuav, lawv pom Xa‑u thiab Xa‑u cov tub tuag rau saum lub roob Kinpau‑a. Lawv kuj hle nws tej cuab yeej thiab coj nws lub taubhau thiab nws tej cuab yeej ua rog mus, thiab lawv tso neeg xa xov mus thoob Filixatee tebchaws coj xov zoo mus piav rau lawv tej dab mlom thiab piav rau cov pejxeem. Lawv muab Xa‑u tej cuab yeej ua rog khaws cia rau hauv lub tsev uas teev lawv tej dab, thiab muab nws taubhau dai rau hauv lub tsev teev dab Dakoo. Thaum cov neeg hauv lub moos Yanpe Kile‑a sawvdaws hnov txhua yam uas cov Filixatee ua rau Xa‑u lub cev tuag, cov txivneej uas siab loj siab tuab sawvdaws txawm sawv tsees mus ib hmos kaj ntug thiab coj Xa‑u thiab Xa‑u cov tub lub cev tuag los rau ntawm lub moos Yanpe. Lawv coj cov pob txha mus log rau hauv tsob qab ntoo qheb hauv lub moos Yanpe thiab yoo mov tau xya hnub. Xa‑u thiaj tuag vim yog nws lub siab tsis xib rau Vajtswv. Nws ua tsis ncaj rau Yawmsaub, rau qhov nws tsis tuav rawv Yawmsaub tej lus nkaw, thiab nws mus hais tus txiv neeb txiv yaig pab saib yaig, thiab nws tsis mus nug Yawmsaub saib yuav ua li cas. Yog li ntawd Yawmsaub thiaj muab nws tua thiab muab kiag lub tebchaws rau Yexi tus tub Davi kav. Ib tsoom Yixayee sawvdaws tuaj txoos ua ke tuaj cuag Davi hauv lub moos Heploo thiab hais tias, “Peb nrog koj koom nqaij koom txha. Thaum ub txawm yog Xa‑u ua vajntxwv kav los koj kuj yog tus uas coj cov Yixayee tawm mus thiab coj rov qab los, thiab Yawmsaub uas yog koj tus Vajtswv hais rau koj tias, ‘Koj yuav ua tus yug yaj kav kuv haiv neeg Yixayee thiab koj yuav ua kuv haiv neeg Yixayee tus thawj.’ ” Yog li ntawd Yixayee cov kev txwj laus sawvdaws thiaj tuaj cuag vajntxwv rau hauv lub moos Heploo, thiab Davi nrog lawv sib cog lus hauv lub moos Heploo rau ntawm Yawmsaub xubntiag, ces lawv txawm hliv roj tsa Davi ua vajntxwv kav cov Yixayee raws li tej lus uas Yawmsaub kom Xamuyee hais. Davi thiab ib tsoom Yixayee huvsi mus rau Yeluxalees uas yog lub moos Yenpu. Cov Yenpu uas yog cov qub neeg hauv tebchaws ntawd nyob qhov ntawd. Cov neeg hauv Yenpu hais rau Davi tias, “Koj yuav txeem tsis tau los rau hauv lub moos no.” Txawm li ntawd los Davi txeeb tau lub chaw ruaj khov Xi‑oo, uas yog Davi lub nroog. Davi hais tias, “Leejtwg xub ntaus cov neeg Yenpu ua ntej tus ntawd yuav tau ua tus hlob thiab ua tus thawj kav cov tub rog.” Ces Xeluya tus tub Yau‑a thiaj xub mus ntaus ua ntej mas nws thiaj tau ua tus hlob. Davi nyob kiag hauv lub chaw ruaj khov ntawd, mas thiaj hu ua Davi lub nroog. Thiab Davi tsim lub nroog puag ncig txij ntua lub loog Milau. Thiab Yau‑a kuj kho lwm qhov uas tseem tshuav hauv lub nroog ntawd. Davi muaj hwjchim zuj zus vim yog Yawmsaub uas muaj hwjchim loj kawg nkaus nrog nraim nws. No yog Davi cov tuam leem uas ua hlob, yog cov uas nrog ib tsoom Yixayee huvsi pab kom nws kav tau tebchaws, thiab tsa tau nws ua vajntxwv raws li Yawmsaub tej lus uas hais txog Yixayee. Txij no mus yog hais txog Davi cov tuam leem. Yasaunpe‑as uas yog cum Hamauni yog tus thawj hauv pab peb tug tuam leem. Nws xuas hmuv mus ua ib zaug rog rau peb puas leej mas muab lawv tua tag huvsi. Peb tug tuam leem ntawd tus ob yog Daudau tus tub Ele‑axa uas yog cum Ahau‑a. Nws nrog Davi nyob ntawm lub moos Padami rau thaum cov Filixatee sau zog tuaj ua rog qhov ntawd. Muaj ib thaj teb qeb mas cov Yixayee khiav cov Filixatee. Tiamsis nws sawv khov kho hauv nruab nrab thaj teb ntawd zov rawv thaj teb ntawd thiab tua cov Filixatee. Mas Yawmsaub tau pab lawv kov yeej kiag. Muaj peb leeg hauv pab peb caug tus thawj tub rog nqes mus cuag Davi ntawm daim txhib zeb hauv lub qhov tsua Adulas rau thaum Filixatee cov tub rog ua yeej hauv lub hav Lefa‑i. Thaum ntawd Davi nyob hauv lub chaw ruaj khov thiab cov Filixatee ib pab tub rog kuj nyob zov rawv hauv lub moos Npelehee. Mas Davi txawm hais seev yees tias, “Kheev muaj ib tug mus nqa tau cov dej hauv lub qhov dej uas nyob ntawm ib sab rooj loog Npelehee los rau kuv haus.” Mas peb tug tuam leem ntawd thiaj txeem plaws hauv cov Filixatee lub yeej mus ntaus tau dej hauv lub qhov dej ntawm Npelehee ib sab rooj loog coj los pub rau Davi. Tiamsis Davi tsis kam haus cov dej ntawd, nws muab hliv xyeem rau Yawmsaub, thiab hais tias, “Kuv twv kuv tus Vajtswv tias kuv yeej tsis xav kom lawv ua li ntawd. Kuv yuav haus cov neeg no cov ntshav lov? Rau qhov lawv sev nyog txojsia mus coj cov dej no los.” Ua li no nws thiaj tsis kam haus. Tej no yog tej uas peb tug tuam leem ntawd ua. Yau‑a tus kwv Anpisai ua peb caug leej ntawd tus thawj. Nws xuas hmuv ua rog rau peb puas leej mas muab lawv tua tag huvsi mas thiaj tau koob meej ib yam li peb leeg ntawd. Nws yog tus muaj koob meej ntau dua peb caug leej ntawd. Nws ua tus thawj kav peb caug leej tiamsis tsis suav nws rau hauv peb leeg ntawd. Yehauyada tus tub Npenaya yog ib tug siab loj siab tuab hauv lub moos Khaxe‑ee, nws ua tej haujlwm loj. Nws tau tua Mau‑a cov tub rog ob tug uas muaj zog kawg li. Thiab nws tau nqes rau hauv lub qhov mas tua tau ib tug tsov ntxhuav rau hnub uas los daus xib daus npu. Thiab nws tau tua ib tug neeg Iyi uas lub cev loj thiab siab tsib tshim. Tus Iyi ntawd tuav rawv rab hmuv loj li rab nqos, tiamsis Npenaya coj tus pas nrig mus rau ntawm tus Iyi xwb, ces txeeb tau tus Iyi rab hmuv ntawm nws tes los thiab muab nws rab hmuv rov nkaug tus Iyi tuag. Yehauyada tus tub Npenaya tau ua tej haujlwm no thiab tau koob meej ib yam nkaus li peb tug tuam leem ntawd. Nws muaj koob meej hauv peb caug leej ntawd tiamsis tsis suav nws rau hauv peb tug tuam leem ntawd. Davi kuj tsa nws ua tus thawj kav pab tub rog uas zov vajntxwv. Cov tuamleem hauv pab tub rog yog li no, yog Yau‑a tus kwv Axahee, Daudau tus tub Eehanas uas nyob hauv Npelehee, Samau hauv lub moos Falau, Helexi hauv lub moos Pelau, Ikhe tus tub Ila hauv moos Thekhau‑a, Anpiyexaw hauv moos Anathau, Xinpekhai uas yog Husa cum, Ilai hauv cum Ahau‑a, Mahalai hauv moos Nethaufa, Npa‑anas tus tub Heles hauv moos Nethaufa, Linpai tus tub Ithai hauv moos Kinpe‑a hauv Npeeyamee tebchaws, Npenaya hauv moos Pilathoo, Hulai uas nyob ntawm tus dej Ka‑a, Anpi‑ee hauv cum Anpa, Amave hauv moos Npahuli, Eliyanpa hauv moos Sa‑anpoo, Hasee hauv cum Kixau, Saki tus tub Yaunathas hauv moos Hala, Xakha tus tub Ahiyas hauv moos Hala, Aw tus tub Elifas, Hefaw hauv moos Mekhela, Ahiya hauv moos Pelau, Helau hauv moos Khamee, Exanpai tus tub Na‑alai, Nathas tus kwv Yau‑ee, Haki tus tub Miha, Xeleb uas yog neeg Asmoo, Nahalai hauv moos Npe‑awlau uas kwv Xeluya tus tub Yau‑a tej cuab yeej ua rog, Ila uas yog Ithala cum, Kale hauv cum Ithala, Uliya uas yog neeg Hithai, Alai tus tub Xanpa, Sixa tus tub Adina uas yog xeem Lunpee, yog ib tug thawj hauv xeem Lunpee thiab muaj peb caug leej nrog nws, Ma‑akha tus tub Hanas, Yausafa hauv cum Mine, Uxi‑a hauv moos Athalau, Hauthas ob tug tub Sama thiab Ye‑i‑ee hauv moos Alau‑aw, Sili tus tub Yediya‑ee, thiab nws tus kwv Yauha hauv moos Thixai, Eli‑ee hauv cum Mahavai, thiab Eena‑as ob tug tub Yelinpai thiab Yausaviya, thiab Ima uas yog neeg Mau‑a, Eli‑ee thiab Aunpe, thiab Ya‑axi‑ee hauv cum Mexaunpai. No yog cov txivneej uas tuaj cuag Davi ntawm Xilaj rau thaum nws mus qhovtwg tsis tshua tau rau qhov nws khiav Xa‑u uas yog Khij tus tub. Lawv yog cov siab loj siab tuab uas pab Davi ua rog. Lawv yog cov uas txawj tua hneev nti, lawv tua tau hneev nti thiab fiav ntaus qe zeb ob sab tes huvsi. Lawv yog xeem Npeeyamee, yog Xa‑u li kwvtij. Tus thawj yog Ahiyexaw, tus ob yog Yau‑as, mas ob tug yog Sema‑a hauv moos Kinpe‑a li tub, thiab Amave ob tug tub uas yog Yexi‑ee thiab Peleb. Thiab Npelakha thiab Yehu hauv moos Anathau, Isamaya hauv moos Kinpe‑oo, yog ib tug siab loj siab tuab hauv peb caug tus tuam leem thiab yog ib tug thawj uas kav peb caug leej ntawd. Thiab Yelemi, Yahaxi‑ee, Yauhanas, Yauxanpa hauv moos Kedela, Eluxai, Yelimau, Npe‑aliya, Semaliya, Sefathiya hauv cum Halub, Eekhana, Isiya, Axalee, Yau‑exaw thiab Yasaunpe‑as uas yog cum Khaula. Thiab Yelauhas hauv moos Kedau ob tug tub uas yog Yau‑ela thiab Xenpadiya. Muaj cov tub rog hauv xeem Kas khiav mus cuag Davi rau ntawm lub chaw ruaj khov hauv tebchaws moj sab qhua. Lawv yog cov uas siab loj siab tuab uas txawj ua rog, lawv txawj siv daim phiaj hlau thaiv hauv siab thiab siv hmuv. Lawv ntsej muag nyaum zoo li tsov ntxhuav thiab lawv dhia nrawm li kauv seb saum roob. Exaw yog tus thawj tus ob yog Aunpadiya, tus peb yog Elia, tus plaub yog Misamana, tus tsib yog Yelemi, tus rau yog Athai, tus xya yog Eli‑ee, tus yim yog Yauhanas, tus cuaj yog Eexanpa, tus kaum yog Yelemi, tus kaum ib yog Manpanai. Cov neeg Kas no ua cov thawj kav cov tub rog, tus yau muaj zog cuag li ib puas leej tub rog, tus loj muaj zog cuag li ib txhiab leej. Cov neeg no yog cov uas hla tus niag dej Yaladee rau thaum lub ib hlis, thaum uas dej nyab ob sab ntug huvsi, thiab ua rau cov uas nyob ntawm tej ntug hav sab hnub tuaj thiab sab hnub poob tawg khiav tag huvsi. Muaj cov txivneej qee leej hauv xeem Npeeyamee thiab xeem Yuda tuaj cuag Davi ntawm lub chaw ruaj khov. Davi txawm tawm mus tos txais lawv thiab hais rau lawv tias, “Yog nej tuaj ntaus phoojywg rau kuv es yuav pab kuv, kuv yuav nrog nej koom ua ib lub siab. Tiamsis yog nej tuaj es txawm yog kuv txhais tes tsis ua txhaum dabtsi los nej yuav muab kuv muag rau kuv cov yeeb ncuab, ces thov peb tej poj koob yawm txwv tus Vajtswv saib thiab txiav txim rau nej.” Vajtswv tus Ntsuj Plig txawm los kav Amaxai uas yog tus thawj hauv peb caug tus tuam leem lub siab mas nws hais tias, “Davi 'e, peb puavleej yog koj li, Yexi tus tub 'e, peb tuaj koj tog. Thov kom koj noj qab nyob zoo, thiab cov uas pab koj noj qab nyob zoo. Rau qhov koj tus Vajtswv yog tus pab koj.” Mas Davi thiaj txais yuav lawv thiab tsa lawv ua cov thawj kav nws cov tub rog. Muaj qee leej hauv xeem Manaxe kuj tau khiav mus tuaj Davi tog rau lub sijhawm uas Davi mus nrog cov Filixatee ua rog rau Xa‑u. Tiamsis Davi tsis pab cov Filixatee rau qhov Filixatee cov thawj tau sablaj thiab xa Davi rov qab. Lawv hais tias, “Tsam ces nws yuav khiav mus tuaj Xa‑u uas yog nws tus tswv tog mas peb yuav tuag tiag tiag li.” Thaum uas nws mus rau lub moos Xilaj mas cov txivneej hauv xeem Manaxe no khiav tuaj ua nws tog, yog Anas, Yauxanpa, Yediya‑ee, Mikha‑ee, Yauxanpa, Elihu thiab Xilethai, yog cov thawj kav ib txhiab leej tub rog hauv xeem Manaxe. Lawv pab Davi ntaus cov neeg uas tuaj lws tebchaws, rau qhov lawv sawvdaws yog tub rog uas siab loj siab tuab thiab ua cov thawj kav pab tub rog. Txhua txhia hnub muaj txivneej khiav los tuaj Davi tog yuav pab nws, mas nws pab tub rog thiaj li coob heev yam nkaus li Vajtswv pab tub rog. No mus yog tej pab tub rog uas coj cuab yeej ua rog uas khiav los cuag Davi rau ntawm lub moos Heploo es yuav muab lub tebchaws uas Xa‑u kav rau Davi, raws li tej lus uas Yawmsaub hais tseg. Xeem Yuda cov uas tuav phiaj hlau thiab hmuv muaj 6,800 leej tub rog uas coj cuab yeej ua rog. Xeem Xime‑oo cov uas siab loj siab tuab ua rog muaj 7,100 leej. Xeem Levi muaj 4,600 leej, thiab Yehauyada uas ua thawj coj hauv Aloo cum muaj neeg nrog nws 3,700 leej, thiab Xadau uas yog ib tug tub hluas siab loj siab tuab thiab nees nkaum ob tug thawj tub rog hauv nws cum. Xeem Npeeyamee uas yog Xa‑u li kwvtij muaj 3,000 leej. Yav dhau los cov no feem coob tau zwm rau Xa‑u caj ces. Xeem Efa‑i muaj 20,800 leej uas siab loj siab tuab, yog cov uas muaj suab muaj npe hauv lawv tej cum. Ib nrab xeem Manaxe muaj 18,000 leej, yog cov uas raug xaiv npe kom mus tsa Davi ua vajntxwv. Xeem Ixakha muaj cov uas tab fab dav paub caij paub nyoog paub tias Yixayee tsim nyog ua dabtsi, muaj cov ua thawj 200 leej thiab tej kwvtij huvsi uas lawv kav. Xeem Xenpuloo muaj 50,000 leej tub rog uas txeev ua rog dua lawd nqa txhua yam cuab yeej ua rog txhij zog ua rog, mas lawv ua ib lub siab yuav pab Davi. Xeem Nathali muaj cov uas ua thawj kav tub rog 1,000 leej thiab muaj 37,000 leej tub rog uas coj daim phiaj hlau thiab hmuv. Xeem Daj muaj 28,600 leej tub rog uas npaj txhij zog ua rog. Xeem Asaw muaj 40,000 leej tub rog uas txeev ua rog dua thiab npaj txhij zog ua rog. Xeem Lunpee thiab xeem Kas thiab ib nrab xeem Manaxe uas nyob sab ntug dej Yaladee hnub tuaj muaj 120,000 leej tub rog muaj txhua yam cuab yeej ua rog. Cov tub rog no huvsi npaj txhij ua rog tau tuaj rau ntawm Heploo, ua tib lub siab xav tseg tias yuav tsa Davi ua vajntxwv kav Yixayee huvsi. Cov pejxeem Yixayee uas tseem tshuav sawvdaws kuj ua tib lub siab yuav tsa Davi ua vajntxwv ib yam nkaus thiab. Lawv nrog Davi noj thiab haus qhov ntawd tau peb hnub, rau qhov lawv cov kwvtij tau npaj tseg rau lawv. Cov kwvtij zej zog uas nyob deb txog tebchaws Ixakha tebchaws Xenpuloo thiab tebchaws Nathali tau npaj zaub mov rau nees, luav, ntxhuav, luj txwv thiab nyuj thauj ntau kawg li tuaj. Muaj hmoov mog ntxhib, ncuav txiv cev, tej tauv txiv hmab qhuav thiab cawv txiv hmab, thiab roj thiab nyuj thiab yaj, rau qhov muaj kev zoo siab xyiv fab hauv Yixayee tebchaws. Davi nrog cov uas kav ib txhiab thiab cov uas kav ib puas thiab cov thawj txhua tus sablaj, mas Davi hais rau ib tsoom pejxeem Yixayee tias, “Yog nej sawvdaws pom zoo thiab yog raws li Yawmsaub uas yog peb tus Vajtswv lub siab nyiam, kom peb xa xov mus thoob plaws rau peb cov kwvtij uas tseem tshuav hauv tebchaws Yixayee huvsi thiab xa rau cov pov thawj thiab cov Levi uas nyob hauv tej moos uas muaj tshav zaub kom lawv tuaj txoos ua ke cuag peb ntawm no. Mas peb cia li coj peb tus Vajtswv lub phij xab rov qab los rau peb, rau qhov thaum Xa‑u ua vajntxwv mas peb tsis quav ntsej lawm.” Ib tsoom pejxeem sawvdaws kuj hais hum li ntawd, rau qhov yam ntawd cov pejxeem sawvdaws pom zoo. Yog li ntawd Davi thiaj hu cov pejxeem Yixayee huvsi uas nyob txij ntua ntawm tus dej Sihau hauv Iyi tebchaws mus txog ntawm txojkev uas mus rau lub moos Hama tuaj txoos ua ke es yuav mus coj Vajtswv lub phij xab ntawm lub moos Khile‑a Ye‑ali los. Davi thiab ib tsoom Yixayee huvsi mus rau ntawm lub moos Npa‑ala uas yog lub moos Khile‑a Ye‑ali hauv Yuda tebchaws es yuav coj Vajtswv lub phij xab uas hu raws li Yawmsaub lub npe uas nyob lub zwm txwv saum cov Khelunpee los. Lawv kuj muab ib lub tsheb nyuj tshiab thauj Vajtswv lub phij xab ntawm Anpinada lub tsev mus, mas Uxa thiab Ahiyau tsav lub tsheb ntawd. Davi thiab cov Yixayee sawvdaws kuj zoo siab xyiv fab rau ntawm Yawmsaub lub xubntiag kawg lawv lub dag lub zog, thiab hu nkauj ntaus nkauj nog ncas me nkauj nog ncas loj, ntaus nruas thiab npuaj nruas tooj liab thiab tshuab raj kub yaj. Thaum lawv los txog ntawm Khidoo lub tshav ntaus qoob Uxa cev tes tuav nkaus lub phij xab rau qhov nyuj dawm. Mas Yawmsaub thiaj npau taws rau Uxa thiab ntaus Uxa tuag vim yog nws cev tes tuav lub phij xab, ces nws txawm tuag rau ntawm Vajtswv xubntiag. Davi chim rau qhov Yawmsaub txojkev npau taws tshwm plaws los rau Uxa, vim li ntawd thiaj hu lub chaw ntawd hu ua Pele‑uxa los txog niaj hnub nimno. Hnub ntawd Davi kuj ntshai Vajtswv heev thiab nws hais tias, “Kuv yuav ua li cas coj tau Vajtswv lub phij xab rov mus rau kuv?” Davi txawm tsis coj lub phij xab rov mus rau hauv Davi lub nroog, tiamsis nws coj mus cia rau tom Aunpe Edoo uas yog neeg Ka lub tsev. Vajtswv lub phij xab nyob hauv Aunpe Edoo lub tsev tau peb lub hlis, mas Yawmsaub foom koob hmoov rau Aunpe Edoo tsev neeg thiab txhua yam uas nws muaj. Vajntxwv Hilas hauv lub nroog Thailab tso neeg xa xov tuaj cuag Davi thiab xa ntoo ciab thiab cov Kws txhwm pob zeb thiab cov Kws ntoo tuaj ua lub tsev rau Davi nyob. Davi paub tias Yawmsaub tau tsa nws ua vajntxwv ruaj khov kav cov Yixayee thiab ua rau nws lub tebchaws vam meej vim yog saib rau nws haiv neeg Yixayee. Davi yuav dua niam yau thiab coj tej hluas nkauj los kav rau hauv lub nroog Yeluxalees, thiab yug dua tub thiab ntxhais. Cov menyuam uas Davi yug hauv Yeluxalees li npe yog li no, yog Samu‑a, Saunpam, Nathas, Xalaumoo, Iha, Elisu‑a, Eepele, Nauka, Nefe, Yafia, Elisama, Npe‑eeyada thiab Elifele. Thaum cov Filixatee hnov tias Davi raug tsa ua vajntxwv kav cov Yixayee huvsi, cov Filixatee sawvdaws txawm nce tuaj nrhiav Davi. Davi hnov li ntawd nws txawm tawm mus tiv lawv. Cov Filixatee tau tuaj lws hauv lub hav Lefa‑i. Davi txawm ua nug rau Vajtswv tias, “Kuv yuav mus ntaus cov Filixatee lov? Koj yuav muab lawv rau hauv kuv txhais tes los tsis muab?” Yawmsaub teb Davi tias, “Cia li mus, kuv yeej yuav muab lawv rau hauv koj txhais tes.” Davi thiaj mus rau ntawm lub moos Npa‑as Pelaxi mas Davi kov yeej lawv qhov ntawd, thiab Davi hais tias, “Vajtswv siv kuv txhais tes txeem plaws rau kuv cov yeeb ncuab yam li dej txeem plaws mus nyab.” Vim li ntawd lub chaw ntawd thiaj hu ua Npa‑as Pelaxi. Lawv thiaj muab lawv tej dab mlom tso tseg rau qhov ntawd mas Davi hais kom muab tej dab mlom ntawd hlawv huvsi. Cov Filixatee rov qab tuaj dua lws hauv lub hav ntawd thiab. Thaum Davi rov qab ua nug rau Vajtswv dua ib zaug Vajtswv hais rau nws tias, “Koj tsis txhob ncaj mus, cia li lug mus ntaus lawv ncaj ntawm cov ntoo zaub kab. Thaum koj hnov suab nrov saum cov ntsis ntoo zaub kab yam li suab uas tub rog mus kev, koj cia li tawm mus ua rog, vim Vajtswv tau ua koj ntej tawm mus ntaus Filixatee cov tub rog lawm.” Davi ua raws li Vajtswv hais rau nws, mas ntaus cov Filixatee txij ntua lub moos Kinpe‑oo mus txog ntua lub moos Kexaw. Davi lub moo nrov nto moo mus thoob txhua lub tebchaws, thiab Yawmsaub ua rau txhua haiv neeg ntshai Davi. Davi ua vaj ua tsev rau nws hauv Davi lub nroog thiab npaj ib lub chaw rau Vajtswv lub phij xab thiab tsa ib lub tsev ntaub cia rau lub phij xab ntawd. Mas Davi hais tias, “Dhau cov Levi lawm mas lwm tus tsis txhob kwv Vajtswv lub phij xab rau qhov Yawmsaub xaiv lawv kwv Yawmsaub lub phij xab thiab ua koom tu nws mus ib txhis.” Davi txawm hu cov Yixayee sawvdaws tuaj txoos ua ke rau hauv Yeluxalees es yuav mus coj Yawmsaub lub phij xab los cia rau ntawm lub chaw uas Davi twb npaj tau lawm. Mas Davi thiaj sau Aloo cov tub thiab cov Levi, uas yog Khauha caj ces mas tau Uli‑ee ua tus thawj thiab nws cov kwvtij muaj ib puas nees nkaum leej. Melali caj ces tau Axaya ua tus thawj thiab nws cov kwvtij muaj ob puas nees nkaum leej. Kawsoo caj ces tau Yau‑ee ua tus thawj thiab nws cov kwvtij ib puas peb caug leej. Elixafa caj ces tau Semaya ua tus thawj thiab nws cov kwvtij ob puas leej. Heploo caj ces tau Eli‑ee ua tus thawj thiab nws cov kwvtij yim caum leej. Uxi‑ee caj ces tau Aminada ua tus thawj thiab nws cov kwvtij ib puas kaum ob leeg. Mas Davi hu Xadau thiab Anpiyatha uas ua pov thawj thiab cov Levi tuaj, yog Uli‑ee, Axaya, Yau‑ee, Semaya, Eli‑ee thiab Aminada, thiab hais rau lawv tias, “Nej yog Levi tej cum li thawj. Nej cia li ua kevcai tu nej thiab nej cov kwvtij kom dawb huv xwv nej thiaj mus coj tau Yawmsaub uas yog cov Yixayee tus Vajtswv lub phij xab los rau ntawm lub chaw uas kuv twb npaj tseg cia lawd. Twb yog vim thawj zaug ntawd nej tsis mus kwv mas Yawmsaub uas yog peb tus Vajtswv kev npau taws thiaj tshwm rau peb lawm, rau qhov peb tsis tu lub phij xab thiab tsis ua raws li kevcai.” Mas cov pov thawj thiab cov Levi thiaj tu lawv kom dawb huv kom thiaj mus coj tau Yawmsaub uas yog cov Yixayee tus Vajtswv lub phij xab los. Cov Levi thiaj tuav ob tug las kwv Vajtswv lub phij xab raws li tej lus uas Yawmsaub kom Mauxe hais rau lawv ua. Davi hais kom Levi cov thawj tsa lawv ib co kwvtij ua cov hu nkauj ntaus tej cuab yeej phim nkauj nrov, yog ntaus nkauj nog ncas me thiab nkauj nog ncas loj thiab npuaj nruas tooj liab, thiab ua suab zoo siab xyiv fab. Cov Levi thiaj tsa Yau‑ee tus tub Hemas, thiab nws cov kwvtij, yog Npelekhiya tus tub Axas, thiab ntawm Melali caj ces yog Khusaya tus tub Etha. Thiab lawv tau tsa lawv cov kwvtij los pab lawv yog Xelakhiya, Ya‑axi‑ee, Semilamau, Yehi‑ee, Uni, Elia, Npenaya, Ma‑axeya, Mathithiya, Elifelehu thiab Mineya, thiab tsa Aunpe Edoo thiab Ye‑i‑ee ua cov zov tej rooj loog. Cov hu nkauj mas Hemas, Axas thiab Etha yuav npuaj nruas tooj liab thiab. Cov uas yuav ntaus nkauj nog ncas loj raws li lub suab Alamau yog Xekhaliya, Axi‑ee, Semilamau, Yehi‑ee, Uni, Elia, Ma‑axeya thiab Npenaya. Cov uas yuav ntaus nkauj nog ncas me raws li lub suab Semini yog Mathithiya, Elifelehu, Mineya, Aunpe Edoo, Ye‑i‑ee thiab Axaxiya. Khenaniya uas yog cov Levi tus thawj coj hu nkauj ua tus thawj coj hu nkauj rau qhov nws nkag siab zoo. Npelekhiya thiab Eekhana ua cov zov qhov rooj chav tsev uas rau Vajtswv lub phij xab. Cov uas yuav tshuab raj xyu ua Vajtswv lub phij xab ntej yog Senpaniya, Yausafa, Nethanee, Amaxai, Xekhaliya, Npenaya thiab Eliyexaw uas ua pov thawj. Aunpe Edoo thiab Yehiya kuj ua cov zov qhov rooj chav tsev rau lub phij xab. Mas Davi thiab Yixayee cov kev txwj laus thiab cov thawj uas kav ib txhiab leej tub rog thiaj mus coj Yawmsaub lub phij xab sib cog lus ntawm Aunpe Edoo lub tsev xyiv fab hlo. Vim Vajtswv pab cov Levi uas kwv Yawmsaub lub phij xab sib cog lus, mas lawv thiaj muab xya tus txiv nyuj thiab xya tus txiv yaj tua xyeem rau Vajtswv. Davi hnav lub tsho ntaub mag zoo zoo thiab cov Levi huvsi uas kwv lub phij xab thiab cov hu nkauj thiab Khenaniya uas ua tus thawj coj hu nkauj puavleej hnav tsho ntaub mag. Thiab Davi hnav lub tsho ntaub mag efauj. Yog li no cov Yixayee sawvdaws coj Yawmsaub lub phij xab sib cog lus nce los thiab muaj suab qw suab raj kub yaj suab raj xyu thiab npuaj nruas tooj liab thiab ntaus nkauj nog ncas me thiab nkauj nog ncas loj ua nkauj nrov doog diaj. Mas thaum Yawmsaub lub phij xab sib cog lus los rau hauv Davi lub nroog lawd, Xa‑u tus ntxhais Mikhas xauj qhov rais pom vajntxwv Davi dhia seev cev thiab ua siab xyiv fab, nws txawm xu siab rau Davi. Lawv coj Vajtswv lub phij xab los txawb rau hauv lub tsev ntaub uas Davi twb tsa cia lawd. Lawv tua tsiaj ua kevcai hlawv xyeem thiab ua kevcai xyeem sib raug zoo rau ntawm Vajtswv xubntiag. Thaum Davi ua kevcai hlawv xyeem thiab ua kevcai xyeem sib raug zoo tag lawd, nws txawm tuav Yawmsaub lub npe foom koob hmoov rau cov pejxeem. Thiab nws muab ib leeg ib lub ncuav, ib leeg ib daim nqaij thiab ib lub ncuav txiv hmab qhuav pub rau ib tsoom Yixayee sawvdaws tsis hais pojniam txivneej. Thiab Davi tsa cov Levi qee leej ua num rau ntawm Yawmsaub lub phij xab, kom lawv thov thiab ua tsaug thiab qhuas Yawmsaub uas yog cov Yixayee tus Vajtswv. Axas ua tus thawj tus ob yog Xekhaliya, thiab muaj Ye‑i‑ee, Semilamau, Yehi‑ee, Mahathiya, Elia, Npenaya, Aunpe Edoo thiab Ye‑i‑ee ua cov ntaus nkauj nog ncas loj thiab nkauj nog ncas me. Axas yog tus uas npuaj nruas tooj liab, Npenaya thiab Yahaxi‑ee uas ua pov thawj ua tus tshuab raj xyu ntawm Vajtswv lub phij xab sib cog lus txhua txhia zaum mus li. Hnub ntawd yog thawj zaug uas Davi hais kom Axas thiab nws cov kwvtij hu nkauj ua tsaug rau Yawmsaub hais tias, Cia li ua Yawmsaub tsaug, cia li thov hu nws lub npe, cia li piav nws tes haujlwm rau txhua haiv neeg. Cia li hu nkauj rau nws, hu nkauj qhuas nws, cia li piav txog txhua yam haujlwm phimhwj uas nws ua. Cia li khav txog nws lub npe uas dawb huv, cia cov uas nrhiav Yawmsaub zoo siab xyiv fab. Cia li nrhiav Yawmsaub thiab nrhiav nws lub zog. Nrhiav nws lub xubntiag tsis tu li. Nws yog Yawmsaub, yog peb tus Vajtswv. Nws tej lus txiav txim muaj nyob thoob plaws hauv ntiajteb. Nws yeej nco ntsoov nws tej lus cog tseg mus ib txhis, yog tej lus uas nws qhia mus rau ib txhiab tiam neeg, yog tej lus uas nws cog tseg rau Aplahas, thiab yog tej uas nws yeem lus cog twv rau Yiha, yog tej uas Vajtswv cog lus ruaj nreeg cia rau Yakhauj ua kab ke, yog cog rau Yixayee ua lus cog tseg mus ib txhis, hais tias, “Kuv yuav pub lub tebchaws Khana‑as rau koj, ua nej qub txeeg qub teg mus li.” Thaum lawv tseem tsis muaj neeg coob, yeej yog tsawg tsawg li tiag, lawv tsuas yog los ua qhua nyob xwb, khiav mus khiav los rau haiv neeg ub rau haiv neeg no, rau lub tebchaws ub rau lub tebchaws no, Yawmsaub tsis kheev leejtwg quab yuam lawv, vim saib rau lawv nws thiaj txwv tej vajntxwv hais tias, “Tsis txhob kov tej uas kuv hliv roj tsa lawd thiab tsis txhob ua li cas rau kuv cov xibhwb cev kuv lus.” Tag nrho thoob qab ntuj cia li hu nkauj rau Yawmsaub, cia li piav nws txojkev cawm dim ib hnub dhau ib hnub. Cia li piav txog nws lub hwjchim ci ntsa iab rau hauv ib tsoom tebchaws, piav txog nws tej haujlwm phimhwj rau hauv ib tsoom neeg sawvdaws. Rau qhov Yawmsaub yog tus loj kawg thiab tsim nyog qhuas heev, nws txaus ntshai heev dua tej timtswv huvsi. Neeg tej timtswv huvsi puavleej yog dab mlom xwb, tiamsis Yawmsaub yog tus tsim lub ntuj. Koob meej thiab hwjchim meej mom nyob ntawm nws xubntiag, lub zog thiab kev xyiv fab nyob hauv nws lub chaw nyob. Txhua haiv neeg txhua xeem 'e, cia li qhuas Yawmsaub, cia li qhuas tias Yawmsaub muaj hwjchim ci ntsa iab thiab muaj zog. Cia li qhuas tias Yawmsaub lub npe muaj hwjchim ci ntsa iab uas tsim nyog qhuas kawg li, cia li coj tej uas xyeem tuaj rau ntawm nws xubntiag, cia li hnav tej tsoos uas dawb huv pe hawm Yawmsaub. Tag nrho lub ntiajteb, cia li tshee hnyo rau ntawm nws xubntiag. Lub ntiajteb yeej nyob ruaj khov yuav tsis ua zog kiag li. Lub ntuj cia li zoo siab, lub ntiajteb cia li xyiv fab. Cia li hais rau hauv ib tsoom tebchaws tias, “Yawmsaub ua vajntxwv kav.” Dej hiavtxwv thiab txhua yam uas nyob hauv cia li qw nrov ntsoog qees. Tej teb thiab txhua yam uas nyob hauv cia li qw zoo siab. Tej xyoob ntoo hauv hav zoov yuav hu nkauj xyiv fab rau ntawm Yawmsaub xubntiag, vim yog nws yuav los txiav txim rau ntiajteb. Cia li ua Yawmsaub tsaug vim nws zoo kawg. Nws txojkev hlub ruaj khov nyob mus ib txhis. Thiab nej cia li hais tias, “Au Vajtswv uas cawm peb dim, thov koj tso peb dim, thov qaws peb thiab cawm peb dim hauv txhua lub tebchaws rov los es peb yuav ua tsaug koj lub npe uas dawb huv thiab khav qhov uas peb qhuas koj. Cia li qhuas Yawmsaub uas yog Yixayee tus Vajtswv ib txwm thaum ub los mus ib txhis.” Mas cov pejxeem huvsi hais tias, “Amee” thiab qhuas Yawmsaub. Davi txawm cia Axas thiab nws cov kwvtij nyob ntawm Yawmsaub lub phij xab sib cog lus es ua haujlwm qhov ntawd mus raws li uas niaj hnub cheem tsum ua, thiab Aunpe Edoo thiab nws cov kwvtij rau caum yim leej kuj nyob ntawd. Yeduthu tus tub Aunpe Edoo thiab Hauxa ua cov zov tej rooj loog. Davi kom pov thawj Xadau thiab nws cov kwvtij uas ua pov thawj nyob ntawm Yawmsaub lub tsev ntaub uas nyob ntawm lub chaw siab pe Yawmsaub hauv lub moos Kinpe‑oo, es lawv yuav ua kevcai hlawv huvsi xyeem rau Yawmsaub saum lub thaj uas hlawv xyeem thaum tagkis thiab thaum yuav tsaus ntuj mus li, raws li uas twb sau cia huvsi rau hauv Yawmsaub tej kevcai uas tau hais rau cov Yixayee. Hemas thiab Yeduthu thiab cov uas raug xaiv npe nrog lawv nyob ntawd, yog cov uas yuav ua Yawmsaub tsaug rau qhov nws txojkev hlub ruaj khov nyob mus ib txhis tsis kawg. Hemas thiab Yeduthu muaj raj xyu thiab nruas npuaj tooj liab uas yuav ntaus, thiab muaj cuab yeej uas ntaus phim nkauj qhuas Yawmsaub. Yeduthu cov tub raug tsa ua cov zov tej rooj loog. Cov pejxeem sawvdaws txawm nyias rov mus rau nyias tsev, mas Davi kuj rov qab mus tsev thiab foom koob hmoov rau nws tsev neeg. Thaum Davi nyob ruaj hauv nws lub tsev Davi hais rau Nathas uas ua xibhwb cev Vajtswv lus tias, “Koj sim saib, kuv nyob hauv lub tsev uas xuas ntoo ciab ua, hos Yawmsaub lub phij xab sib cog lus nyob hauv lub tsev ntaub xwb.” Mas Nathas hais rau Davi tias, “Koj cia li mus ua txhua yam uas koj lub siab xav ua, rau qhov Vajtswv nrog nraim koj.” Tiamsis hmo ntawd Yawmsaub hais lus tuaj rau Nathas tias, “Cia li mus hais rau kuv tus qhev Davi tias, ‘Yawmsaub hais li no tias, Koj tsis txhob ua lub tuam tsev rau kuv nyob. Rau qhov txij thaum kuv coj cov Yixayee tawm los txog hnub no, kuv tsis txeev nyob hauv tsev, kuv tsuas yog tshais lub tsev ntaub rau tom ub tom no thiab tshais lub chaw nyob rau tom ub tom no. Txhua qhov uas kuv nrog cov Yixayee sawvdaws mus, kuv puas tau hais ib lo lus rau cov Yixayee ib tug thawj twg uas kuv txib kom saib xyuas kuv haiv neeg hais tias, “Ua cas nej tsis ua ib lub tsev ntoo ciab rau kuv?” ’ Vim li no nimno koj cia li hais rau kuv tus qhev Davi tias, ‘Yawmsaub uas muaj hwjchim loj kawg nkaus hais li no tias, Kuv coj koj tawm hauv lub tshav zaub uas koj yug yaj los ua tus thawj kav kuv haiv neeg Yixayee. Koj mus qhovtwg los kuv nrog nraim koj qhov ntawd, thiab kuv rhuav tshem koj cov yeeb ncuab huvsi ntawm koj lub xubntiag mus. Kuv yuav pub kom koj muaj koob meej ib yam li tej uas muaj koob meej loj hauv ntiajteb no. Kuv yuav tu ib lub chaw cia rau kuv haiv neeg Yixayee nyob, thiab kuv yuav muab lawv cog cia nyob ruaj khov rau hauv lub chaw uas yog lawv tug, tsis muaj leejtwg yuav tuaj zes lawv. Tej neeg limhiam ntais ntuj yuav tsis tuaj lws lawv dua li lawm yam li yav tag los, txij thaum kuv tsa cov thawj kav kuv haiv neeg Yixayee. Kuv yuav yuam koj cov yeeb ncuab huvsi kom swb kiag. Dua li ntawd mas kuv hais rau koj tias, Yawmsaub yuav pub kom koj muaj caj ces ua vaj mus li. Thaum koj hnub nyoog tag mus nrog koj tej poj koob yawm txwv nyob lawd, kuv yuav tsa ib tug tub uas koj yug los nyob koj chaw thiab kuv yuav tsa nws ua vajntxwv kav ruaj khov. Nws yog tus uas yuav ua lub tuam tsev rau kuv mas kuv yuav tsa nws lub zwm txwv nyob mus ib txhis. Kuv yuav ua nws leej txiv thiab nws yuav ua kuv tus tub. Kuv yuav tsis muab kuv txojkev hlub uas ruaj khov rho ntawm nws mus, yam li uas kuv tau rho ntawm tus uas nyob ua koj ntej. Kuv yuav tsa nws saib xyuas kuv cov neeg thiab kuv lub tebchaws mus ib txhis thiab nws lub zwm txwv yuav nyob ruaj khov mus ib txhis.’ ” Nathas hais tej lus no huvsi rau Davi raws li tej uas nws ua yog toog pom. Ces vajntxwv Davi txawm nkag rau hauv lub tsev ntaub zaum ntawm Yawmsaub xubntiag mas hais tias, “Au Vajtswv Yawmsaub, kuv yog leejtwg thiab kuv caj ces yog leejtwg es koj coj kuv los txog txij no? Au Vajtswv, tej no yog tej yam me me ntawm koj lub qhov muag xwb. Koj tseem hais tseg txog kuv uas yog koj tus qhev caj ces rau ntau xyoo tom hauv ntej. Au Vajtswv Yawmsaub, koj tseem pom tias kuv yog ib tug uas tsim txiaj kawg. Kuv Davi yuav hais dabtsi ntxiv rau koj txog qhov uas koj tau pub koob meej rau kuv uas yog koj tus qhev? Rau qhov koj yeej paub kuv uas yog koj tus qhev. Au Yawmsaub, vim koj saib rau koj tus qhev thiab vim yog raws li koj lub siab nyiam koj thiaj ua tej haujlwm loj no huvsi thiab qhia tej haujlwm loj no huvsi rau kuv paub. Au Yawmsaub, tsis muaj leejtwg zoo cuag li koj. Dhau koj lawm tsis muaj dua ib tug vajtswv txij li peb lub qhov ntsej tau hnov. Haiv neeg twg hauv lub ntiajteb no yuav zoo thooj li koj haiv neeg Yixayee uas Vajtswv koj mus txhiv los ua koj haiv neeg? Koj ua rau koj lub npe nto moo lug vim yog koj ua tej yam uas loj thiab txaus ntshai kawg thiaj ntiab tau tej haiv neeg kom khiav ntawm koj haiv neeg hauv ntej mus, yog koj haiv neeg uas koj txhiv ntawm Iyi tebchaws los. Thiab koj tsim tsa koj haiv neeg Yixayee los ua koj li teej tug mus ib txhis, thiab Yawmsaub koj tau ua lawv tus Vajtswv. “Au Yawmsaub, nimno thov kom koj tej lus uas koj hais tseg txog kuv uas yog koj tus qhev thiab hais txog kuv caj ces nyob ruaj mus ib txhis thiab thov koj ua raws li uas koj tau hais cia lawd. Koj lub npe yuav nyob ruaj khov thiab yuav raug qhuas mus ib txhis hais tias, ‘Yixayee tus Vajtswv Yawmsaub uas muaj hwjchim loj kawg nkaus nws yeej yog Yixayee tus Vajtswv ntag,’ thiab Davi uas yog koj tus qhev caj ces yuav nyob ruaj khov ntawm koj lub xubntiag mus li. Au kuv tus Vajtswv, koj twb qhia rau kuv uas yog koj tus qhev paub tias, koj yuav tsim kuv kom muaj caj ces ua vaj mus li. Vim li no kuv uas yog koj tus qhev thiaj li muaj cuabkav tsa ncauj thov koj. Au Yawmsaub, koj yeej los yog Vajtswv, thiab koj tau cog tej lus zoo no rau koj tus qhev. Yog li no nimno thov koj txaus siab foom koob hmoov rau koj tus qhev caj ces kom nyob ruaj rau ntawm koj lub xubntiag mus ib txhis. Au Yawmsaub, yam twg uas koj foom koob hmoov rau yam ntawd yeej tau txais koob hmoov ib txhis.” Dhau ntawd Davi ntaus yeej cov Filixatee thiab tswjhwm lawv. Davi txeeb tau lub moos Ka thiab tej zej zog ib ncig lub moos ntawm cov Filixatee txhais tes. Nws ntaus yeej cov Mau‑a mas cov Mau‑a kuj zwm rau Davi thiab coj qhov txhia chaw tuaj them se rau nws. Davi kuj ntaus yeej Hadadexaw uas ua vajntxwv hauv lub moos Xaunpa ncaj mus txog lub moos Hama, yog lub sijhawm uas Hadadexaw mus tsa cov tub rog zov ntawm tus niag dej Yufeti. Davi txeeb tau cov tsheb ua rog ntawm Hadadexaw ib txhiab lub thiab cov tub rog caij nees xya txhiab leej thiab cov tub rog mus kotaw ob vam leej, thiab Davi txiav cov nees uas hai tsheb ua rog leeg raws huvsi, tseg kom txaus hai ib puas lub tsheb ua rog xwb. Thaum cov neeg Alas uas nyob hauv lub nroog Damaxaka tuaj pab Xaunpa tus vajntxwv Hadadexaw, mas Davi tua cov Alas ob vam ob txhiab leej. Davi tsa ib co tub rog zov kav cov Alas hauv lub nroog Damaxaka. Cov Alas zwm rau Davi thiab coj qhov txhia chaw tuaj them se rau nws. Yawmsaub pub Davi kov yeej rau txhua qhov uas nws mus. Thiab Davi txeeb tau daim phiaj kub uas thaiv hauv siab uas Hadadexaw cov tub teg tub taws coj, thiab coj mus rau lub nroog Yeluxalees. Thiab Davi txeeb tau tooj liab ntau ntau li ntawm lub moos Thiha thiab lub moos Khu uas yog Hadadexaw tej moos. Mas Xalaumoo muab cov tooj liab ntawd ua lub rhawv dej tooj liab thiab cov ncej thiab tej twj siv uas yog tooj liab. Thaum vajntxwv Tho‑u hauv lub moos Hama hnov tias Davi tau ntaus yeej lub moos Xaunpa tus vajntxwv Hadadexaw cov tub rog huvsi lawm, Tho‑u txawm txib nws tus tub Hadaulas mus cuag vajntxwv Davi mus hais ib lo lus tshav ntuj zoo siab rau nws rau qhov uas Davi tau ua rog thiab kov yeej Hadadexaw lawm, rau qhov Hadadexaw pheej ua rog rau Tho‑u. Mas Tho‑u xa ntau yam uas xuas nyiaj xuas kub xuas tooj liab ua tuaj pub rau Davi. Vajntxwv Davi muab txhua yam no xyeem pub rau Yawmsaub, thiab muab tej nyiaj kub uas nws muab tau ntawm txhua haiv neeg uas nws kov yeej xyeem pub rau Yawmsaub, yog tej uas nws txeeb tau ntawm cov Edoo, cov Mau‑a, cov Asmoo, cov Filixatee thiab cov Amalej. Xeluya tus tub Anpisai mus tua cov Edoo tuag ib vam yim txhiab leej hauv lub hav Ntsev. Thiab nws tso tub rog zov kav tebchaws Edoo. Cov neeg Edoo sawvdaws thiaj zwm rau Davi. Yawmsaub pub Davi kov yeej rau txhua qhov uas nws mus. Mas Davi kav tag nrho cov Yixayee huvsi. Davi ua ncaj ua ncees thiab ua zoo rau nws cov pejxeem sawvdaws. Xeluya tus tub Yau‑a ua thawj kav tub rog. Ahilu tus tub Yehausafa ua tus uas sau ntawv keeb kwm. Ahithu tus tub Xadau thiab Anpiyatha tus tub Ahimelej ua pov thawj. Sasas ua tus tub sau ntawv. Yehauyada tus tub Npenaya kav cov Khelethi thiab cov Pelethi. Thiab Davi cov tub ua cov nom tswv loj uas ua vajntxwv tej haujlwm. Dhau ntawd los cov Asmoo tus vajntxwv Naha txawm tuag mas nws tus tub ua vajntxwv nyob nws chaw. Davi txawm hais tias, “Kuv yuav ua ncaj ua zoo rau Naha tus tub Hanu rau qhov nws txiv tau ua ncaj ua zoo rau kuv.” Davi thiaj tso cov tub xa xov mus nplij Hanu siab vim nws txiv tuag lawm. Mas Davi cov tub teg tub taws thiaj mus cuag Hanu hauv cov Asmoo tebchaws es yuav mus nplij nws siab. Tiamsis cov Asmoo cov thawj hais rau Hanu tias, “Koj xav hais tias Davi xa neeg tuaj nplij koj ces yog nws hwm koj txiv no lov? Sub tsis yog nws cov tub teg tub taws tuaj cuag koj es yuav saib thiab tshuaj saib thiab rhuav peb lub tebchaws.” Hanu txawm ntes Davi cov tub teg tub taws thiab muab lawv hwj txwv chais thiab muab lawv lub tsho txiav txij ntawm lub ntsag rau yav hauv pov tseg, thiab muab lawv tso mus, ces lawv txawm rov qab los. Thaum muaj neeg mus hais rau Davi paub txog cov neeg no mas nws thiaj txib neeg mus tos lawv rau qhov lawv raug kev txaj muag heev. Vajntxwv thiaj hais tias, “Nej cia li so ntawm lub moos Yelikhau mus txog thaum nej cov hwj txwv tuaj tso mam li los.” Thaum cov Asmoo paub tias lawv ua rau Davi ntxub lawv lawm, Hanu thiab cov Asmoo txawm xa ib txhiab tala nyiaj mus ntiav cov tsheb ua rog thiab cov tub rog caij nees ntawm Alasnahala‑i tebchaws thiab ntawm lub moos Alama‑akha thiab lub moos Xaunpa. Lawv ntiav cov tsheb ua rog peb vam ob txhiab lub thiab ntiav tus vajntxwv hauv lub moos Ma‑akha thiab nws cov tub rog, mas lawv tuaj ua yeej ze rau ntawm lub moos Medenpa. Thiab cov Asmoo txhij tub rog ntawm lawv tej moos tuaj ua ke es tuaj ua rog. Thaum Davi hnov tej no lawd nws txawm txib Yau‑a thiab cov tub rog siab tuab huvsi mus. Cov Asmoo kuj tawm tuaj npaj tub rog rau ntawm txojkev uas nkag rau hauv lub moos, thiab cov vajntxwv uas tuaj mas lawv nyob dua ib cag tom hav nroj. Thaum Yau‑a pom tias luag npaj tub rog rau tom nws hauv ntej thiab npaj tub rog rau tom nws qub qab, nws txawm xaiv pab tub rog Yixayee uas txawj tshaj plaws qee leej thiab tso lawv mus tiv cov Alas. Dua li cov nws muab cob rau nws tus kwv Anpisai kav mas cov no npaj mus tiv cov Asmoo. Yau‑a hais tias, “Yog cov Alas muaj zog heev dhau kuv, koj cia li tuaj pab kuv, hos yog cov Asmoo muaj zog heev dhau koj mas kuv yuav tuaj pab koj. Cia li ua siab tuab, peb cia li ua siab loj yam li txivneej yawg pab peb haiv neeg thiab pab peb tus Vajtswv tej moos. Thov Yawmsaub ua raws li nws pom zoo.” Ua li ntawd mas Yau‑a thiab cov tub rog uas nrog nws thiaj li txeem mus ze ua rog rau cov Alas, mas cov Alas thiaj khiav thim zuj zus tom nws hauv ntej. Thaum cov Asmoo pom cov Alas khiav lawm ces lawv txawm khiav ntawm Yau‑a tus kwv Anpisai hauv ntej ib yam nkaus thiab nkag mus rau hauv lub moos. Ces Yau‑a txawm rov qab los rau Yeluxalees. Thaum cov Alas pom tias lawv swb cov Yixayee lawm lawv txawm txib neeg mus coj cov neeg Alas uas nyob sab dej Yufeti hnub tuaj tawm tuaj. Hadadexaw tus thawj rog Saufa coj lawv kev. Thaum muaj neeg hais rau Davi paub mas nws sau zog cov Yixayee sawvdaws tuaj ua ke hla tus dej Yaladee mus cuag lawv thiab npaj tub rog tiv lawv. Thaum Davi npaj tub rog tiv cov Alas mas lawv kuj ua rog rau nws. Cov Alas kuj thim khiav cov Yixayee mas Davi tua tau Alas cov tub rog hauv tsheb ua rog tuag xya txhiab leej thiab tua tau cov tub rog mus kotaw tuag plaub vam leej thiab tua tau lawv tus thawj rog Saufa tuag thiab. Mas thaum Hadadexaw cov tub teg tub taws pom tias lawv swb cov Yixayee lawm lawv kuj nrog Davi sib raug zoo thiab zwm rau nws. Vim li no cov Alas thiaj tsis kam pab cov Asmoo dua li lawm. Thaum txog lub caij ntuj qhua uas yog lub caij uas tej vajntxwv pheej tawm mus ua rog, Yau‑a coj tub rog mus ntaus yeej cov Asmoo lub tebchaws, thiab vij lub nroog Lanpa cia. Tiamsis Davi nyob hauv Yeluxalees xwb. Mas Yau‑a ntaus tau lub nroog Lanpa thiab muab lub nroog ntawd ua puam tsuaj tag. Davi hle lub mom kub ntawm lawv tus vajntxwv lub taubhau los. Davi muab luj mas muaj kub hnyav ib tala thiab muaj ib lub qe zeb hlaws muaj nqes nyob rau hauv. Lawv muab lub mom kub ntawd rau Davi ntoo. Davi sau tej qhov txhia chaw uas txeeb tau hauv lub nroog ntawd ntau kawg li coj mus. Nws kuav cov neeg hauv lub nroog ntawd tawm los thiab yuam kom lawv xuas kaw xuas hlau xuas taus ua haujlwm. Davi ua ib yam li no rau cov Asmoo txhua lub moos huvsi. Ces Davi thiab cov tub rog sawvdaws rov mus rau hauv Yeluxalees. Dhau ntawd rov qab ua rog rau cov Filixatee ntawm lub moos Kexaw. Zaum ntawd Xinpekhai uas yog Husa cum tua tau Xipai uas yog neeg loj loj siab siab li noob. Mas cov Filixatee thiaj swb lawm. Thiab rov qab ua rog rau cov Filixatee. Mas zaum ntawd Ya‑i tus tub Eehanas tau tua Lami uas yog Kaulia uas yog neeg Ka tus kwv lawm. Lami rab hmuv tus ko luaj li rab nqos ntos ntaub. Thiab rov qab ua rog ntawm lub moos Ka, yog lub moos uas muaj ib tug txivneej loj kawg li, muaj rau tus ntiv tes thiab rau tus ntiv taw huvsi muaj nees nkaum plaub tug ntiv tes ntiv taw. Nws yog cov neeg loj loj siab siab li noob. Thaum nws twv ntxhias cov Yixayee mas Davi tus tijlaug Sime‑i tus tub Yaunathas kuj muab nws tua kiag. Cov neeg no yog cov neeg loj loj siab siab hauv lub moos Ka li noob. Lawv tuag tag rau Davi tes thiab tuag rau Davi cov tub teg tub taws tes. Xatas sawv tawm tsam cov Yixayee, thiab tshoov Davi siab kom nws suav cov Yixayee. Davi thiaj hais rau Yau‑a thiab cov thawj uas kav cov tub rog tias, “Cia li mus suav cov Yixayee txij ntawm lub moos Npe‑awsenpa mus txog lub moos Daj es rov qab los hais rau kuv kom kuv thiaj paub tias muaj neeg npaum li cas.” Ces Yau‑a hais tias, “Thov Yawmsaub pub kom nws haiv neeg huaj vam coob ib puas npaug ntxiv rau cov uas muaj lawd. Vajntxwv uas yog kuv tus tswv, haiv neeg no huvsi puavleej yog koj li pejxeem los tsis yog? Ua cas koj tseem xav ua li no? Ua cas koj yuav coj lub txim los rau cov Yixayee?” Tiamsis vajntxwv tej lus kov yeej Yau‑a tej lus, Yau‑a thiaj tawm mus thiab mus txhua nrho tebchaws Yixayee huvsi mas rov qab los rau hauv Yeluxalees. Yau‑a thiaj qhia rau Davi paub tias cov pejxeem uas nws mus suav ntawd muaj npaum li cas. Hauv Yixayee tebchaws huvsi muaj 1,00,100 leej txivneej uas ua tau tub rog thiab hauv Yuda tebchaws muaj 470,000 leej txivneej uas ua tau tub rog. Tiamsis thaum Yau‑a mus suav nws tsis suav xeem Levi thiab xeem Npeeyamee, rau qhov tej uas vajntxwv hais kom nws ua mas nws tsis nyiam kiag li. Yawmsaub tsis txaus siab rau zaj no mas nws rau txim rau cov Yixayee. Davi thiaj hais rau Yawmsaub tias, “Qhov uas kuv ua li no yog kuv tau ua txhaum loj kawg. Nimno thov koj daws kuv uas yog koj tus qhev lub txim no tseg rau qhov kuv tau ua yam uas ruam tshaj plaws.” Mas Yawmsaub hais rau Kas uas yog Davi tus xibhwb uas hais lus pom tom hauv ntej tias, “Cia li mus hais rau Davi hais tias, ‘Yawmsaub hais li no tias, Kuv muab peb yam rau koj xaiv, saib koj yeem cia kuv ua yam twg rau koj.’ ” Kas thiaj mus cuag Davi thiab hais rau nws tias, “Yawmsaub hais li no tias, ‘Koj cia li xaiv yuav ib yam uas koj lub siab nyiam, yog kev tshaib plab peb xyoos lossis raug koj cov tshawj chim ntaus kom puam tsuaj peb hlis es lawv xuas ntaj raws caum koj, lossis raug Yawmsaub rab ntaj peb hnub ua kev mob kis hauv lub tebchaws es Yawmsaub tus tubtxib saum ntuj ua kom puam tsuaj thoob plaws Yixayee tebchaws.’ Nimno koj cia li txiav txim siab saib yuav cia kuv mus teb li cas rau Yawmsaub uas txib kuv tuaj.” Mas Davi hais rau Kas tias, “Kuv ntxhov siab heev, thov cia kuv poob rau hauv Yawmsaub txhais tes, rau qhov nws txojkev khuvleej loj kawg li, tiamsis thov tsis txhob cia kuv poob rau hauv neeg txhais tes.” Yog li ntawd Yawmsaub thiaj tso mob kis los raug Yixayee tebchaws mas cov Yixayee tau tuag xya vam leej. Mas Vajtswv txib tug tubtxib saum ntuj mus rau Yeluxalees es yuav ua kom puam tsuaj. Tiamsis thaum nws yuav nqes tes ua kev puam tsuaj Yawmsaub tsa muag ntsia mas nws hloov dua siab tsis tso tej mob kis ntawd lawm. Nws thiaj hais rau tus tubtxib saum ntuj uas tabtom ua kom puam tsuaj tias, “Txaus lawm, cia li nkaum koj txhais tes tamsim no.” Mas Yawmsaub tus tubtxib saum ntuj sawv ntsug ntawm Aulanas uas yog neeg Yenpu lub tshav ntaus qoob. Davi tsa muag ntsia pom Yawmsaub tus tubtxib saum ntuj sawv saum ib nta ntuj thiab hauv nws txhais tes tuav rawv ib rab ntaj taw ntshis rau saum lub nroog Yeluxalees lawm. Davi thiab cov kev txwj laus hnav khaub seev tsaj khwb nkaus lub plhu ti nkaus av. Mas Davi hais rau Yawmsaub tias, “Yog kuv ib leeg xwb uas hais kom lawv txheeb cov neeg. Kuv yog tus uas tau ua txhaum muaj txim thiab ua phem kawg li lawm. Tiamsis pab yaj no lawv tau ua dabtsi? Au Yawmsaub uas yog kuv tus Vajtswv, thov koj tsa koj txhais tes tawm tsam kuv thiab kuv tsev neeg xwb, tiamsis thov tsis txhob kheev tus mob phem ntawd nyob saum koj haiv neeg.” Yawmsaub tus tubtxib saum ntuj kom Kas mus hais rau Davi tias kom Davi nce mus tib ib lub thaj xyeem rau Yawmsaub ntawm Aulanas uas yog neeg Yenpu lub tshav ntaus qoob. Davi thiaj nce mus raws li tej lus uas Kas hais, uas yog nws tuav Yawmsaub lub npe hais. Aulanas tabtom ntaus mog mas nws tig los pom tus tubtxib saum ntuj, mas nws plaub tug tub uas nrog nws nyob ntawd thiaj tsiv nraim. Thaum Davi tuaj txog ntawm Aulanas, Aulanas pom dheev Davi nws txawm tawm ntawm lub tshav ntaus qoob mus khoov ntshis pe Davi ua lub plhu ti nkaus av. Mas Davi hais rau Aulanas tias, “Thov muab lub tshav ntaus qoob rau kuv es kuv yuav tib ib lub thaj xyeem rau Yawmsaub rau ntawd. Thov muag rau kuv raws li txaus tus nqe xwv thiaj li tav tau tej mob phem no kom ploj ntawm cov pejxeem mus.” Mas Aulanas hais rau Davi tias, “Vajntxwv uas yog kuv tus tswv, thov cia li yuav dawb, thiab cia li ua raws li uas koj pom zoo. Kuv pub cov nyuj siv ua kevcai hlawv xyeem thiab tej thob log luam qoob ua taws rauv thiab cov mog ua kevcai xyeem qoob loo. Kuv thov pub huvsi rau koj.” Tiamsis vajntxwv Davi hais rau Aulanas tias, “Ua tsis tau li ntawd, kuv yuav them rau koj txaus li tus nqe. Kuv yuav tsis muab tej uas yog koj li xyeem rau Yawmsaub, lossis muab tej uas kuv tsis tau them nqe ua kevcai hlawv xyeem.” Davi thiaj them nqe rau Aulanas yog kub hnyav rau puas sekhee rau thaj chaw ntawd. Davi thiaj ua ib lub thaj xyeem rau Yawmsaub qhov ntawd thiab ua kevcai hlawv xyeem thiab ua kevcai xyeem sib raug zoo, thiab hu thov Yawmsaub lub npe. Mas Yawmsaub teb nws thiab tso hluavtaws saum ntuj los rau saum lub thaj hlawv xyeem. Yawmsaub txawm hais rau tus tubtxib saum ntuj ces nws muab nws rab ntaj ntsaws kiag rau hauv hnab. Lub sijhawm ntawd thaum Davi pom tias Yawmsaub teb nws ntawm Aulanas uas yog neeg Yenpu lub tshav ntaus qoob, mas nws thiaj ua kevcai xyeem rau Yawmsaub rau qhov ntawd. Rau qhov lub sijhawm ntawd Yawmsaub lub tsev ntaub uas Mauxe tau ua rau hauv tebchaws moj sab qhua thiab lub thaj uas hlawv qhov txhia chaw xyeem nyob rau ntawm lub chaw siab pe hawm Yawmsaub ntawm Kinpe‑oo. Tiamsis Davi mus ua nug rau Vajtswv qhov ntawd tsis tau vim nws ntshai Yawmsaub tus tubtxib saum ntuj rab ntaj. Mas Davi hais tias, “Ntawm no lauj yuav yog Vajtswv Yawmsaub lub tuam tsev, thiab ntawm no lauj yuav yog cov Yixayee lub thaj hlawv qhov txhia chaw xyeem.” Davi hais kom sau lwm haiv neeg uas nyob hauv Yixayee tebchaws tuaj ua ke, mas nws kom cov uas txawj txam pob zeb mus txhwm pob zeb npaj cia ua Vajtswv lub tuam tsev. Davi npaj hlau ntau kawg uas yuav siv ua cov ntsia hlau uas ntsia cov qhov rooj thiab ua daim hlau uas tuav qhov rooj, thiab npaj tooj liab ntau kawg luj tsis tag li, thiab ntoo ciab suav tsis tag, vim yog cov neeg Xaidoo thiab cov neeg Thailab coj cov ntoo ciab ntau kawg tuaj pub rau Davi. Davi hais tias, “Kuv tus tub Xalaumoo tseem yau thiab tsis tau txawj ua haujlwm, mas lub tuam tsev uas yuav ua rau Yawmsaub ntawd yuav tsum ua loj thiab zoo nkauj kawg, thiaj muaj suab muaj npe thiab muaj meej nthawb thoob plaws txhua lub tebchaws. Yog li ntawd kuv thiaj yuav npaj tseg cia.” Davi thiaj npaj txhua yam ntau kawg li cia ua ntej uas nws tuag. Mas Davi thiaj hu nws tus tub Xalaumoo los thiab hais kom nws ua lub tuam tsev rau Yawmsaub uas yog cov Yixayee tus Vajtswv. Davi hais rau Xalaumoo tias, “Metub, kuv lub siab xav ua lub tuam tsev rau Yawmsaub uas yog kuv tus Vajtswv lub npe nyob. Tiamsis Yawmsaub hais lus tuaj rau kuv tias, ‘Koj tau tua neeg coob thiab tau ua rog loj heev. Koj tsis txhob ua lub tuam tsev rau kuv lub npe nyob, rau qhov koj tau tua neeg ua rau ntshav los ntau kawg tab meeg kuv rau hauv av. Koj yuav yug tau ib tug tub, nws yuav ua tus uas nyob siab tus yees. Kuv yuav pub kom nws nyob kaj siab lug dhau nws tej yeeb ncuab huvsi, rau qhov yuav hu nws lub npe hu ua Xalaumoo. Thiab kuv yuav pub kom cov Yixayee nyob tus thiab tso siab lug rau ncua sijhawm uas nws ua vajntxwv kav. Nws yuav ua lub tuam tsev rau kuv lub npe nyob. Nws yuav ua kuv tus tub thiab kuv yuav ua nws txiv, thiab kuv yuav tsa nws lub zwm txwv nyob ruaj khov ua vajntxwv kav cov Yixayee ib txhis mus li.’ Kuv tus metub, nimno thov Yawmsaub nrog nraim koj nyob, xwv koj thiaj li ua tau Yawmsaub uas yog koj tus Vajtswv lub tuam tsev tiav raws li nws twb hais tseg txog koj. Kuv thov kom Yawmsaub pub kev txawj ntse thiab kev nkag siab es thaum nws tsa koj kav Yixayee kom koj thiaj ua tau raws li Yawmsaub uas yog koj tus Vajtswv txoj kevcai. Yog koj ceev faj ua raws li tej kab ke thiab tej kevcai uas Yawmsaub tau kom Mauxe hais rau cov Yixayee mas koj yuav ua txhua yam tiav. Cia li ua siab loj siab tuab nyob khov kho, tsis txhob ntshai thiab txhob poob siab. Mas kuv twb npaj qhov txhia chaw khwv kawg li cia ua Yawmsaub lub tuam tsev lawm, npaj tau kub hnyav 100,000 tala, nyiaj hnyav 1,000,000 tala, tooj liab thiab hlau luj tsis txheeb li rau qhov muaj ntau heev. Kuv twb npaj ntoo thiab pob zeb lawm, tiamsis koj yuav tsum ntxiv rau. Koj twb muaj tub zog coob kawg, muaj cov Kws txam pob zeb, cov Kws txhwm, cov Kws ntoo thiab cov Kws txawj ua txhua yam haujlwm suav tsis tag, cov Kws kub Kws nyiaj Kws tooj liab thiab Kws hlau. Cia li nqes tes ua. Thov Yawmsaub nrog nraim koj.” Davi hais kom Yixayee cov thawj sawvdaws pab nws tus tub Xalaumoo hais tias, “Yawmsaub uas yog nej tus Vajtswv twb nrog nraim nej nyob, thiab nws twb pub kom nej nyob tso siab lug rau txhua fab, rau qhov nws tau muab cov neeg uas nyob hauv lub tebchaws no rau hauv kuv txhais tes, mas lub tebchaws no thiaj nyob hauv Yawmsaub thiab nws haiv neeg qab hwjchim. Nimno nej cia li muab nej lub siab lub ntsws rau ntua nrhiav Yawmsaub uas yog nej tus Vajtswv. Cia li nqes tes kiag ua lub chaw pe Vajtswv Yawmsaub kom thiaj coj tau Yawmsaub lub phij xab sib cog lus thiab Vajtswv tej twj siv uas dawb huv los cia rau hauv lub tuam tsev uas ua rau Yawmsaub lub npe nyob.” Thaum Davi muaj hnub nyoog ntau thiab laus heev lawm nws tsa nws tus tub Xalaumoo ua vajntxwv kav Yixayee. Davi hu Yixayee cov thawj sawvdaws thiab cov pov thawj thiab cov Levi tuaj txoos ua ke. Cov Levi uas hnub nyoog muaj peb caug xyoo rov saud mas suav tau muaj peb vam yim txhiab leej. Davi hais tias, “Cov Levi no mas ob vam plaub txhiab leej yuav saib xyuas tej haujlwm hauv Yawmsaub lub tuam tsev thiab rau txhiab leej yuav ua cov nom tswv thiab cov tu plaub, thiab plaub txhiab leej yuav ua cov zov tej rooj loog, thiab plaub txhiab leej yuav hu nkauj qhuas Yawmsaub thiab siv tej cuab yeej phim nkauj uas kuv twb npaj tau cia qhuas Yawmsaub.” Mas Davi muab lawv faib ua peb pab raws li Levi peb tug tub, yog Kawsoo, Khauha thiab Melali. Kwsoo li tub yog Ladas thiab Sime‑i. Ladas muaj peb leeg tub yog Yehi‑ee uas ua tus thawj, thiab Xetha thiab Yau‑ee. Sime‑i muaj peb leeg tub yog Selaumau, Haxi‑ee thiab Halas. No yog cov ua thawj hauv cum Ladas tej yim. Sime‑i cov tub yog Yahas, Xina, Ye‑u thiab Npeliya. Cov no yog Sime‑i plaub leeg tub. Yahas ua tus thawj, Xixas ua tus ob. Tiamsis Ye‑u thiab Npeliya tsis muaj tub coob, yog li ntawd thiaj suav lawv ua tib yim. Khauha muaj plaub leeg tub, yog Alav, Ixaha, Heploo thiab Uxi‑ee. Alav cov tub yog Aloo thiab Mauxe. Aloo raug tsa ua tus uas muab tej qhov txhia chaw dawb huv kawg nkaus cais pub rau Yawmsaub, nws thiab nws cov tub yuav hlawv cov hmoov tshuaj tsw qab rau ntawm Yawmsaub xubntiag thiab ua koom tu nws thiab tuav nws lub npe foom koob hmoov mus ib txhis tsis kawg. Mauxe uas yog Vajtswv li neeg cov tub muab suav rau hauv xeem Levi. Mauxe ob tug tub yog Kawsoo thiab Eliyexaw. Kawsoo li tub yog Senpu‑ee uas ua tus thawj. Eliyexaw tus tub yog Lehanpiya uas ua tus thawj. Eliyexaw tsis muaj tub li lawm, tiamsis Lehanpiya muaj tub coob coob li. Ixaha tus tub yog Selaumi uas ua tus thawj. Heploo cov tub yog Yeliya uas ua tus thawj, Amaliya ua tus ob, Yahaxi‑ee ua tus peb thiab Yekhame‑as ua tus plaub. Uxi‑ee li tub yog Mikha uas ua tus thawj thiab Isiya ua tus ob. Melali cov tub yog Mali thiab Musi. Mali cov tub yog Ele‑axa thiab Khij. Ele‑axa tuag lawm tsis muaj tub tiamsis muaj ntxhais xwb. Khij cov tub yuav cov ntxhais ntawd uas yog lawv li muam. Musi muaj peb leeg tub yog Mali, Edaw thiab Yelemau. Cov no yog Levi li tub raws li lawv tej cum, thiab yog cov thawj hauv tej yim raws li lawv tau nce npe cia, yog cov uas tau txheeb npe thiab hnub nyoog muaj nees nkaum xyoo rov saud es yuav ua haujlwm hauv Yawmsaub lub tuam tsev. Rau qhov Davi hais tias, “Yawmsaub uas yog cov Yixayee tus Vajtswv tau pub kom nws haiv neeg nyob tso siab lug, thiab nws nyob hauv Yeluxalees mus ib txhis. Mas cov Levi tsis txog kwv lub tsev ntaub thiab tej twj uas siv ua num rau hauv li lawm.” Raws li Davi tau hais thaum kawg cov Levi uas hnub nyoog nees nkaum xyoo rov saud raug txheeb npe xwb. Tej haujlwm uas lawv yuav tsum ua yog pab Aloo cov tub ua tej haujlwm hauv Yawmsaub lub tuam tsev, thiab saib tej tshav puam thiab tej chav tsev, thiab tu tej twj siv dawb huv kom txhob qias tsis huv, thiab txhua yam haujlwm uas ua rau Vajtswv lub tuam tsev. Thiab lawv yuav pab npaj cov ncuav uas xyeem txawb rau ntawm Yawmsaub xubntiag, thiab cov hmoov mog uas ua kevcai xyeem qoob loo, thiab tej daim ncuav tsis xyaw keeb nyias nyias, thiab tej daim ncuav ci, thiab cov roj ntse qhov txhia chaw xyeem, thiab txhua yam uas siv ntsuas thiab luj. Txhua txhia tagkis mas lawv yuav sawv ua tsaug thiab qhuas Yawmsaub, thiab thaum yuav tsaus ntuj kuj ua ib yam nkaus li, thiab ua rau lub sijhawm uas ua kevcai hlawv huvsi xyeem rau Yawmsaub rau hnub Xanpatau thiab hnub hli xiab thiab hnub uas ua kevcai pam noj pam haus raws li txhua lub sijhawm uas teem cia, mas lawv yuav ua rau ntawm Yawmsaub xubntiag mus ib txhis li. Ua li ntawd mas lawv yuav saib thiab tu lub tsev ntaub sib ntsib thiab lub chaw pe Yawmsaub thiab pab Aloo cov tub uas yog lawv li kwvtij ua tej haujlwm hauv Yawmsaub lub tuam tsev. Aloo cov tub muab faib ua tej pab li no. Aloo cov tub yog Nada, Anpihu, Ele‑axa thiab Ithama. Tiamsis Nada thiab Anpihu ob tug tuag ua ntej ob tug txiv thiab tsis muaj menyuam, mas Ele‑axa thiab Ithama thiaj ua pov thawj. Xadau uas yog Ele‑axa caj ces thiab Ahimelej uas yog Ithama caj ces tau pab Davi faib lawv ua ib pab ib pab raws li tej haujlwm uas teem cia rau thaum ua Vajtswv tej haujlwm. Vim Ele‑axa caj ces muaj cov thawj coob dua Ithama caj ces mas Ele‑axa caj ces thiaj faib ua kaum rau pab, ib pab muaj ib tug thawj hauv txhua cum. Ithama caj ces faib ua yim pab. Lawv rho ntawv faib sawvdaws ib yam nkaus, rau qhov Ele‑axa caj ces thiab Ithama caj ces puavleej muaj cov uas ua haujlwm hauv lub chaw pe hawm Yawmsaub thiab muaj cov uas ua Vajtswv tej haujlwm ib yam. Mas Nethanee uas yog xeem Levi tus tub Semaya uas yog tus tub sau ntawv muab lawv tej npe sau cia tab meeg vajntxwv thiab cov thawj thiab pov thawj Xadau thiab Anpiyatha tus tub Ahimelej thiab cov thawj hauv tej cum pov thawj thiab cov Levi. Lawv rho ntawv ntawm Ele‑axa ib cum tag mas rho ntawv ntawm Ithama ib cum. Rho ntawv pab ib yog Yehauyali, pab ob yog Yedaya, pab peb yog Halee, pab plaub yog Xe‑auli, pab tsib yog Makhiya, pab rau yog Miyamee, pab xya yog Hakhau, pab yim yog Anpiya, pab cuaj yog Yesua, pab kaum yog Sekhaniya, pab kaum ib yog Eliyasi, pab kaum ob yog Yakhee, pab kaum peb yog Hupa, pab kaum plaub yog Yesenpe‑a, pab kaum tsib yog Npika, pab kaum rau yog Imaw, pab kaum xya yog Hexi, pab kaum yim yog Hapixe, pab kaum cuaj yog Pethahiya, pab nees nkaum yog Yehexakhee, pab nees nkaum ib yog Yakhi, pab nees nkaum ob yog Kamu, pab nees nkaum peb yog Delaya, pab nees nkaum plaub yog Ma‑axiya. Thaum lawv cov no mus rau hauv Yawmsaub lub tuam tsev ua tej haujlwm uas teem cia, mas lawv yuav tsum ua raws li tej kevcai uas lawv txiv Aloo tau teem cia rau lawv, yog raws li Yawmsaub uas yog Yixayee tus Vajtswv tau hais tseg rau Aloo. Levi caj ces uas tseem tshuav yog li no. Alav ceg yog Sunpa‑ee. Sunpa‑ee ceg yog Yedeya. Lehanpiya ceg yog Isiya uas ua tus thawj. Ixaha ceg yog Selaumau. Selaumau ceg yog Yahas. Heploo cov tub mas Yeliya yog tus thawj, Amaliya ua tus ob, Yahaxi‑ee ua tus peb, Yekhame‑as ua tus plaub. Uxi‑ee cov tub muaj Mikha. Mikha cov tub muaj Sami. Mikha tus kwv yog Isiya. Isiya cov tub muaj Xekhaliya. Melali cov tub yog Mali thiab Musi. Ya‑axiya cov tub muaj Npenau. Melali caj ces yog ntawm Ya‑axiya muaj Npenau, Sauhas, Xakaw thiab Inpli. Ntawm Mali muaj Ele‑axa uas tsis muaj tub. Khij cov tub muaj Yelame‑ee. Musi cov tub yog Mali, Edaw thiab Yelimau. Cov no yog Levi caj ces raws li lawv tej cum. Cov neeg no tsis hais cov uas ua thawj hauv tej cum thiab lawv cov kwv los huvsi rho ntawv, ib yam nkaus li lawv cov kwvtij uas yog Aloo cov tub tab meeg ntawm vajntxwv Davi thiab Xadau thiab Ahimelej thiab cov uas ua thawj hauv tej cum pov thawj thiab cov Levi xubntiag. Davi thiab cov thawj rog kuj tsa Axas thiab Hemas thiab Yeduthu cov tub qee leej cia ua cov uas yuav ntaus nkauj nog ncas me thiab nkauj nog ncas loj thiab npuaj nruas tooj liab cev Vajtswv lus. Cov uas ua haujlwm tej npe thiab tej haujlwm uas lawv yuav tsum ua yog li no. Axas cum muaj Axas cov tub, yog Xakaw, Yauxej, Nethaniya thiab Asalela. Axas ua tus thawj uas coj lawv thiab lawv cev Vajtswv lus raws li vajntxwv tu. Yeduthu cum muaj Yeduthu cov tub, yog Kedaliya, Xeli, Yesaya, Sime‑i, Hasanpiya thiab Mathithiya, huvsi rau leej. Yeduthu uas yog lawv txiv ua tus uas coj lawv ntaus nkauj nog ncas cev Vajtswv lus ua Yawmsaub tsaug thiab qhuas Yawmsaub. Hemas cum muaj Hemas cov tub, yog Npukhiya, Mathaniya, Uxi‑ee, Senpu‑ee thiab Yelimau. Hananiya, Hanani, Eliyatha, Kidathi thiab Laumathi‑exaw, Yaunpekhasa, Malauthi, Hauthi, Mahaxi‑au. Cov no puavleej yog Hemas li tub. Hemas yog tus xibhwb uas hais pom tom hauv ntej rau vajntxwv. Vajtswv tau cog lus tseg tias yuav pub Hemas muaj koob meej, rau qhov Vajtswv pub kaum plaub leeg tub thiab peb leeg ntxhais rau Hemas. Lawv txiv ua tus uas coj lawv sawvdaws ntaus tej cuab yeej phim nkauj hauv Yawmsaub lub tuam tsev, yog npuaj nruas tooj liab thiab ntaus nkauj nog ncas loj thiab nkauj nog ncas me, yog tej haujlwm uas lawv ua hauv Yawmsaub lub tuam tsev. Axas thiab Yeduthu thiab Hemas ua raws li vajntxwv kom lawv ua. Lawv thiab lawv cov kwvtij uas tau kawm hu nkauj rau Yawmsaub thiab txawj hu huvsi muaj ob puas yim caum yim leej. Lawv sawvdaws rho ntawv feeb tej haujlwm uas lawv yuav tsum ua, tsis hais tus hluas tus laus, cov xibhwb cov tub kawm kuj rho ntawv ib yam nkaus. Rho ntawv daim ib yog Yauxej uas yog cum Axas. Rho ntawv daim ob yog Kedaliya thiab nws cov kwvtij thiab nws cov tub, huvsi kaum ob leeg. Rho ntawv daim peb yog Xakhaw thiab nws cov tub thiab nws cov kwvtij, huvsi kaum ob leeg. Rho ntawv daim plaub yog Ixali thiab nws cov tub thiab nws cov kwvtij, huvsi kaum ob leeg. Rho ntawv daim tsib yog Nethaniya thiab nws cov tub thiab nws cov kwvtij, huvsi kaum ob leeg. Rho ntawv daim rau yog Npukhiya thiab nws cov tub thiab nws cov kwvtij, huvsi kaum ob leeg. Rho ntawv daim xya yog Yesalela thiab nws cov tub thiab nws cov kwvtij, huvsi kaum ob leeg. Rho ntawv daim yim yog Yesaya thiab nws cov tub thiab nws cov kwvtij, huvsi kaum ob leeg. Rho ntawv daim cuaj yog Mathaniya thiab nws cov tub thiab nws cov kwvtij, huvsi kaum ob leeg. Rho ntawv daim kaum yog Sime‑i thiab nws cov tub thiab nws cov kwvtij, huvsi kaum ob leeg. Rho ntawv daim kaum ib yog Axalee thiab nws cov tub thiab nws cov kwvtij, huvsi kaum ob leeg. Rho ntawv daim kaum ob yog Hasanpiya thiab nws cov tub thiab nws cov kwvtij, huvsi kaum ob leeg. Rho ntawv daim kaum peb yog Sunpa‑ee thiab nws cov tub thiab nws cov kwvtij, huvsi kaum ob leeg. Rho ntawv daim kaum plaub yog Mahathiya thiab nws cov tub thiab nws cov kwvtij, huvsi kaum ob leeg. Rho ntawv daim kaum tsib yog Yelemau thiab nws cov tub thiab nws cov kwvtij, huvsi kaum ob leeg. Rho ntawv daim kaum rau yog Hananiya thiab nws cov tub thiab nws cov kwvtij, huvsi kaum ob leeg. Rho ntawv daim kaum xya yog Yaunpekhasa thiab nws cov tub thiab nws cov kwvtij, huvsi kaum ob leeg. Rho ntawv daim kaum yim yog Hanani thiab nws cov tub thiab nws cov kwvtij, huvsi kaum ob leeg. Rho ntawv daim kaum cuaj yog Malauthi thiab nws cov tub thiab nws cov kwvtij, huvsi kaum ob leeg. Rho ntawv daim nees nkaum yog Eliyatha thiab nws cov tub thiab nws cov kwvtij, huvsi kaum ob leeg. Rho ntawv daim nees nkaum ib yog Hauthi thiab nws cov tub thiab nws cov kwvtij, huvsi kaum ob leeg. Rho ntawv daim nees nkaum ob yog Kidathi thiab nws cov tub thiab nws cov kwvtij, huvsi kaum ob leeg. Rho ntawv daim nees nkaum peb yog Mahaxi‑au thiab nws cov tub thiab nws cov kwvtij, huvsi kaum ob leeg. Rho ntawv daim nees nkaum plaub yog Laumathi‑exaw thiab nws cov tub thiab nws cov kwvtij, huvsi kaum ob leeg. Tej pab uas zov tej rooj loog yog li no. Khaula caj ces yog Khaule tus tub Meselemiya uas yog Axas cum. Meselemiya muaj tub, tus hlob yog Xekhaliya, tus ob yog Yediya‑ee, tus peb yog Xenpadiya, tus plaub yog Yani‑ee, tus tsib yog Elas, tus rau yog Yehauhanas, tus xya yog Eli‑ehaunai. Thiab Aunpe Edoo muaj tub, tus hlob yog Semaya, tus ob yog Yehauxanpa, tus peb yog Yau‑av, tus plaub yog Xakha, tus tsib yog Nethanee, tus rau yog Ami‑ee, tus xya yog Ixakha, tus yim yog Pe‑ulethai, rau qhov Vajtswv foom koob hmoov rau nws. Thiab nws tus tub Semaya kuj muaj tub uas ua thawj hauv tej yim, rau qhov lawv yog cov uas muaj peevxwm heev. Semaya cov tub yog Auni, Lefa‑ee, Aunpe thiab Eexanpa, thiab lawv cov kwvtij uas muaj peevxwm yog Elihu thiab Xemakhiya. Cov no huvsi yog Aunpe Edoo li tub ki xeeb ntxwv thiab nws cov kwvtij, yog cov uas muaj peevxwm txaus ua tau Vajtswv tes haujlwm. Aunpe Edoo cov no huvsi muaj rau caum ob leeg. Meselemiya muaj tub thiab kwvtij uas muaj peevxwm huvsi kaum yim leej. Hauxa uas yog Melali caj ces muaj tub, yog Sili uas ua tus thawj. Txawm yog nws tsis yog tus tub hlob los nws txiv tsa nws ua tus thawj. Hikhiya yog tus ob, Thenpaliya yog tus peb, Xekhaliya yog tus plaub. Hauxa cov tub thiab cov kwvtij huvsi muaj kaum peb leeg. Cov uas zov tej rooj loog no muab faib ua tej pab raws li lawv cov thawj coj mas muaj haujlwm uas lawv yuav tsum ua koom hauv Yawmsaub lub tuam tsev ib yam li lawv cov kwvtij. Lawv rho ntawv raws li lawv tej yim saib yim twg yuav nyob lub rooj loog twg, txawm yog yim muaj coob muaj tsawg los ib yam nkaus. Rho daim ntawv zov lub rooj loog sab hnub tuaj mas tau Selemiya. Lawv rho ntawv rau nws tus tub Xekhaliya uas muaj tswvyim thiab txawj ntse heev. Lawv rho tau rau nws zov sab ped. Aunpe Edoo rho tau daim ntawv zov lub rooj loog sab nrad mas nws cov tub rho tau daim ntawv zov lub txhab uas khaws qhov txhia chaw. Supi thiab Hauxa rho tau daim ntawv zov sab hnub poob ntawm lub Rooj Loog Salekhe ntawm txojkev uas nce toj. Lawv faib ua tej pab sib hloov zov raws li uas teem cia. Sab hnub tuaj muaj rau leej zov txhua hnub, sab ped muaj plaub leeg zov txhua hnub, sab nrad muaj plaub leeg zov txhua hnub, thiab ob nkawm zov lub txhab khaws qhov txhia chaw. Ntawm qab khav sab hnub poob mas muaj plaub leeg zov ntawm txojkev thiab ob leeg zov ntawm qab khav. Cov no yog tej pab uas zov tej rooj loog uas yog Khaula caj ces thiab Melali caj ces. Cov Levi mas Ahiya ua tus uas saib xyuas tej txhab nyiaj hauv Vajtswv lub tuam tsev thiab tej txhab rau qhov txhia chaw uas luag xyeem pub rau Vajtswv. Kwsoo caj ces uas yog Ladas cum mas cov thawj hauv tej cum yog Yehi‑eli, thiab Yehi‑eli cov tub uas yog Xetha thiab Xetha tus kwv Yau‑ee, lawv yog cov uas saib xyuas tej txhab nyiaj hauv Yawmsaub lub tuam tsev. Alav cum, Ixaha cum, Heploo cum thiab cum Uxi‑ee muaj Senpu‑ee uas yog Mauxe tus tub Kawsoo li caj ces, nws ua tus thawj saib xyuas tej txhab nyiaj. Thiab nws cov kwvtij yog li no, Eliyexaw caj ces yog Eliyexaw tus tub Lehanpiya, Lehanpiya tus tub Yesaya, Yesaya tus tub Yaulas, Yaulas tus tub Xikhi, thiab Xikhi tus tub Selaumau. Tus Selaumau no thiab nws cov kwvtij yog cov uas saib xyuas tej txhab nyiaj rau tej qhov txhia chaw uas xyeem pub rau Vajtswv huvsi uas vajntxwv Davi thiab cov thawj hauv tej cum thiab cov thawj kav ib txhiab leej, cov thawj kav ib puas leej thiab cov thawj kav cov tub rog tau xyeem pub rau Vajtswv. Tej qhov txhia chaw uas thaum lawv mus ua rog es txeeb tau los, lawv tau muab ib txhia pub tseg cia siv kho Yawmsaub lub tuam tsev. Thiab txhua yam uas Xamuyee uas hais pom tom hauv ntej thiab Khij tus tub Xa‑u thiab Naw tus tub Anaw thiab Xeluya tus tub Yau‑a tau xyeem pub rau Vajtswv mas Selaumau thiab nws cov kwvtij ua cov uas saib xyuas huvsi. Ntawm Ixaha cum mas Khenaniya thiab nws cov tub raug tsa ua haujlwm sab nraum Vajtswv lub tuam tsev rau cov Yixayee. Lawv ua cov nom tswv thiab cov tu plaub. Heploo cum mas Hasanpiya thiab nws cov kwvtij muaj ib txhiab xya pua leej uas muaj peevxwm ua cov uas saib thiab tu Yawmsaub tej haujlwm huvsi thiab saib xyuas vajntxwv tej haujlwm hauv Yixayee tebchaws txij ntua tus niag dej Yaladee mus rau sab hnub poob. Heploo cum mas muaj Yeliyas uas yog Heploo cum tus thawj raws li lawv keeb kwm caj ces uas sau cia. Xyoo plaub caug uas Davi ua vajntxwv kav, lawv tau tshuaj nrhiav mas ntsib cov txivneej Heploo uas muaj peevxwm heev hauv lub moos Yaxaw hauv tebchaws Kile‑a. Vajntxwv Davi tau tsa Yeliyas thiab nws cov kwvtij ob txhiab xya puas leej uas muaj peevxwm thiab ua cov thawj hauv tej yim ua cov uas saib xyuas xeem Lunpee thiab xeem Kas thiab ib nrab xeem Manaxe, txog txhua yam uas ntsig txog Vajtswv thiab saib xyuas vajntxwv tej haujlwm. No yog cov Yixayee tej npe, yog cov thawj hauv tej cum, cov thawj kav ib txhiab leej cov thawj kav ib puas leej thiab tej nom tswv uas pab vajntxwv tu haujlwm uas ntsig txog tej pab tub rog uas sib hloov zov tebchaws. Txhua txhia lub hli hauv ib xyoos mas ib lub hlis ib pab uas mus ua haujlwm muaj ob vam plaub txhiab leej. Pab ib zov lub ib hlis mas yog Xadi‑ee tus tub Yasaunpe‑as ua tus uas kav. Nws pab muaj ob vam plaub txhiab leej. Nws yog Peles caj ces thiab ua tus thawj kav cov thawj tub rog huvsi rau lub ib hlis. Daudai uas yog cum Ahau‑a ua tus uas kav pab uas zov lub ob hlis. Nws pab muaj ob vam plaub txhiab leej. Tus thawj uas kav pab peb rau lub peb hlis yog pov thawj Yehauyada tus tub Npenaya. Nws ua tus thawj thiab nws pab muaj ob vam plaub txhiab leej. Tus Npenaya no yog ib tug hauv pab peb caug tus tuam leem thiab nws yog tus thawj kav pab peb caug leej ntawd. Nws tus tub Amixanpa yog tus uas saib xyuas nws pab tub rog. Yau‑a tus kwv Axahee ua tus kav pab plaub rau lub plaub hlis. Thaum dua nws lawd nws tus tub Xenpadiya sawv nws chaw kav lawv. Nws pab muaj ob vam plaub txhiab leej. Tus thawj kav pab tsib rau lub tsib hlis yog Sahu uas yog Ixaha cum. Nws pab muaj ob vam plaub txhiab leej. Tus thawj kav pab rau rau lub rau hli yog Ila uas yog Ikhe hauv moos Thekhau‑a tus tub. Nws pab muaj ob vam plaub txhiab leej. Tus thawj kav pab xya rau lub xya hli yog Helexi uas yog neeg hauv moos Pelau yog xeem Efa‑i. Nws pab muaj ob vam plaub txhiab leej. Tus thawj kav pab yim rau lub yim hli yog Xinpekhai uas yog Husa cum hauv Xelag caj ces. Nws pab muaj ob vam plaub txhiab leej. Tus thawj kav pab cuaj rau lub cuaj hlis yog Anpiyexaw hauv lub moos Anathau yog xeem Npeeyamee. Nws pab muaj ob vam plaub txhiab leej. Tus thawj kav pab kaum rau lub kaum hli yog Mahalai hauv lub moos Nethaufa yog Xelag caj ces. Nws pab muaj ob vam plaub txhiab leej. Tus thawj kav pab kaum ib rau lub kaum ib hlis yog Npenaya hauv lub moos Pilathoo xeem Efa‑i. Nws pab muaj ob vam plaub txhiab leej. Tus thawj kav pab kaum ob rau lub kaum ob hlis yog Heedai hauv lub moos Nethaufa yog Auni‑ee caj ces. Nws pab muaj ob vam plaub txhiab leej. Cov thawj uas kav cov Yixayee txhua xeem yog li no. Xeem Lunpee yog Xikhi tus tub Eliyexaw ua tus thawj. Xeem Xime‑oo yog Ma‑akha tus tub Sefathiya. Xeem Levi yog Khemu‑ee tus tub Hasanpiya. Aloo caj ces yog Xadau. Xeem Yuda yog Elihu uas yog Davi ib tug tijlaug. Xeem Ixakha yog Mikha‑ee tus tub Ooli. Xeem Xenpuloo yog Aunpadiya tus tub Isamaya. Xeem Nathali yog Axali‑ee tus tub Yelemau. Xeem Efa‑i yog Axaxiya tus tub Hause‑a. Ib nrab xeem Manaxe yog Pedaya tus tub Yau‑ee. Ib nrab xeem Manaxe uas nyob hauv Kile‑a tebchaws yog Xekhaliya tus tub Idau. Xeem Npeeyamee yog Anaw tus tub Ya‑axi‑ee. Xeem Daj yog Yelauhas tus tub Axalee. Cov no yog Yixayee txhua xeem cov thawj. Cov uas hnub nyoog tsis tau txog nees nkaum xyoo mas Davi tsis txheeb npe, rau qhov Yawmsaub tau cog lus tseg hais tias yuav ua kom cov Yixayee muaj coob yam li cov hnub qub saum nruab ntug. Xeluya tus tub Yau‑a pib suav uas suav tsis tau tag. Mas kev npau taws kuj poob rau saum cov Yixayee vim qhov uas lawv suav ntawd, ces txawm tsis sau muaj npaum li cas cia rau hauv phau ntawv uas sau vajntxwv Davi li keeb kwm. Adi‑ee tus tub Amave ua tus uas saib xyuas vajntxwv tej txhab nyiaj, Uxiya tus tub Yaunathas ua tus saib xyuas tej txhab nyiaj hauv tej moos thiab hauv tej zej zog thiab hauv tej chaw zov khuav thoob tebchaws. Khelu tus tub Exali ua tus uas saib xyuas cov uas ua liaj ua teb. Sime‑i hauv lub moos Lama ua tus uas saib xyuas tej vaj txiv hmab. Xadi hauv lub moos Sefas ua tus uas saib xyuas tej vaj txiv hmab uas ua cawv txiv hmab uas yuav khaws cia. Npa‑as Hanas hauv lub moos Kedaw ua tus uas saib xyuas cov ntoo txiv aulib thiab cov ntoo txiv cev uas nyob ntawm tej pov roob Sefela. Yau‑as ua tus uas saib xyuas tej chaw khaws roj. Silai uas nyob hauv tebchaws Saloo ua tus uas saib xyuas tej pab nyuj uas nrhiav noj hauv Saloo. Alai tus tub Safa ua tus saib xyuas tej pab nyuj hauv tej nras tiaj. Aunpi uas yog neeg Isama‑ee ua tus uas saib xyuas cov ntxhuav. Yedeya hauv lub moos Melaunau ua tus uas saib xyuas cov nees luav. Yaxi uas yog neeg Haka ua tus saib xyuas tej pab yaj pab tshis. Cov no puavleej yog cov nom tswv uas saib xyuas txhua yam uas yog vajntxwv Davi li. Yaunathas uas yog Davi tus yawg laus ua lub chaw sablaj, yog tus uas muaj tab fab dav thiab yog tus tub sau ntawv. Nws thiab Hamauni tus tub Yehi‑ee ua cov uas tu vajntxwv cov tub. Ahithaufee ua vajntxwv lub chaw sablaj. Husai uas yog Akhi cum ua vajntxwv tus phoojywg. Thaum dhau Ahithaufee mas Npenaya tus tub Yehauyada thiab Anpiyatha ob tug sawv nws chaw ua haujlwm. Yau‑a ua tus thawj kav vajntxwv cov tub rog huvsi. Davi hu Yixayee cov nom tswv huvsi tuaj txoos ua ke rau hauv Yeluxalees, yog cov thawj hauv txhua xeem thiab cov thawj uas kav tej pab uas ua vajntxwv tej haujlwm, cov thawj kav ib txhiab leej thiab cov thawj kav ib puas leej, thiab cov nom tswv uas saib xyuas txhua yam uas yog vajntxwv li, thiab saib xyuas vajntxwv thiab vajntxwv cov tub tej pab tsiaj, thiab cov nom tswv uas ua haujlwm hauv vajntxwv lub tsev, thiab cov tuam leem thiab cov tub rog uas txeev ua rog lawd huvsi. Mas vajntxwv Davi sawv ntsug thiab hais tias, “Kuv cov kwvtij thiab kuv cov pejxeem, cia li mloog kuv hais. Kuv twb xav hauv siab tias yuav ua ib lub tuam tsev rau Yawmsaub lub phij xab sib cog lus nyob thiab ua lub tiag taw rau peb tus Vajtswv. Mas kuv twb npaj qhov txhia chaw uas yuav ua cia lawm. Tiamsis Vajtswv hais rau kuv tias, ‘Koj tsis txhob ua lub tuam tsev rau kuv lub npe nyob rau qhov koj yog ib tug tub rog thiab tau tua neeg ua rau ntshav los.’ Txawm yog li ntawd los Yawmsaub uas yog Yixayee tus Vajtswv tseem xaiv kuv ntawm kuv txiv tsev neeg huvsi los ua vajntxwv kav cov Yixayee mus ib txhis. Rau qhov Yawmsaub xaiv Yuda ua tus thawj thiab hauv xeem Yuda xaiv kuv txiv tsev neeg, thiab hauv kuv txiv cov tub Yawmsaub txaus siab rau kuv mas tsa kuv ua vajntxwv kav cov Yixayee huvsi. Thiab hauv kuv cov tub sawvdaws uas Yawmsaub twb pub rau kuv coob coob mas nws xaiv kuv tus tub Xalaumoo kom nyob saum lub zwm txwv kav Yixayee uas yog Yawmsaub lub tebchaws. Yawmsaub hais rau kuv tias, ‘Koj tus tub Xalaumoo yuav ua tus uas ua kuv lub tuam tsev thiab kuv tej tshav puam, rau qhov kuv xaiv nws ua kuv li tub thiab kuv yuav ua nws txiv. Yog tias nws muab siab rau tuav rawv kuv tej lus nkaw thiab kuv tej kevcai ib yam li niaj hnub no mas kuv yuav tsa nws ua vajntxwv kav ruaj khov mus ib txhis.’ Yog li ntawd tab meeg cov Yixayee sawvdaws, uas yog Yawmsaub haiv neeg, thiab tab meeg peb tus Vajtswv, cia li tshawb nrhiav thiab ua raws li Yawmsaub uas yog koj tus Vajtswv tej lus nkaw huvsi, xwv nej thiaj tau lub tebchaws uas zoo no ua nej tug thiab khaws cia ua qub txeeg qub teg rau nej cov tub ki yav tom qab mus ib txhiab ib txhis. “Kuv tus tub Xalaumoo 'e, koj cia li lees yuav koj txiv tus Vajtswv thiab cia li ua koom tu nws kawg siab kawg ntsws thiab txaus siab hlo, rau qhov Yawmsaub saib hauv txhua tus lub siab huvsi thiab nkag siab txhua yam uas yus npaj yuav ua thiab tej uas yus xav huvsi. Yog koj nrhiav nws koj yuav ntsib nws. Tiamsis yog koj tso nws tseg ces nws yuav muab koj laim pov tseg mus ib txhis. Ua li no koj cia li ceev faj mloog rau qhov Yawmsaub tau xaiv koj ua lub tuam tsev ua lub chaw pe hawm nws. Cia li ua khov kho thiab nqes tes ua.” Mas Davi thiaj muab tus qauv lub tuam tsev rau nws tus tub Xalaumoo, yog qauv zaj qab khav thiab qauv tej chav tsev thiab tej txhab nyiaj thiab tej chav txheej saud thiab tej chav sab hauv thiab lub chav uas rau lub phij xab uas roos kev txhaum. Thiab Davi muab tus qauv txhua yam uas Davi xav cia hauv nws lub siab, yog hais txog Yawmsaub lub tuam tsev tej tshav puam thiab tej chav puag ncig tej tshav puam, thiab Vajtswv lub tuam tsev tej txhab nyiaj thiab tej txhab uas rau txhua yam uas muab xyeem pub rau Vajtswv, thiab qhia txog qhov uas muab cov pov thawj thiab cov Levi faib ua tej pab thiab tej haujlwm uas yuav tsum ua huvsi hauv Yawmsaub lub tuam tsev, thiab tej twj uas siv ua haujlwm hauv Yawmsaub lub tuam tsev. Thiab Davi qhia tias yuav tsum siv kub npaum li cas ua txhua yam twj kub uas siv rau txhua yam haujlwm, thiab siv nyiaj npaum li cas ua tej twj nyiaj uas siv rau txhua yam haujlwm, siv kub hnyav npaum li cas ua tej ncej txawb teeb thiab tej teeb, siv kub hnyav npaum li cas ua tej kav teeb thiab tej teeb, siv nyiaj hnyav npaum li cas ua ib tug ncej txawb teeb thiab tej lub teeb uas txawb saum tus ncej ntawd, raws li uas yuav siv tej ncej txawb teeb ua haujlwm, thiab yuav siv kub npaum li cas ua txhua lub rooj uas rau cov ncuav uas xyeem txawb rau ntawm Yawmsaub xubntiag, thiab siv nyiaj hnyav npaum li cas ua tej rooj nyiaj, thiab siv cov tseem kub npaum li cas ua tej hmuv chob nqaij, tej phaj, tej tais, thiab yuav siv nyiaj thiab kub npaum li cas ua tej phaj nyiaj phaj kub, thiab siv cov tseem kub npaum li cas ua lub thaj hlawv hmoov tshuaj tsw qab, thiab qhia tus qauv ua lub tsheb nees kub rau ob tug Khelunpee uas nthuav kooj tis roos Yawmsaub lub phij xab sib cog lus. Davi hais tias, “Txhua yam no yog Yawmsaub qhia meej kom kuv sau hais txog txhua yam uas yuav tsum ua raws li tus qauv no.” Mas Davi hais rau nws tus tub Xalaumoo tias, “Cia li ua khov kho thiab ua siab tuab thiab nqes tes ua. Tsis txhob ntshai, tsis txhob poob siab, rau qhov Vajtswv Yawmsaub uas yog kuv tus Vajtswv nrog nraim koj. Nws yuav tsis ncaim koj thiab yuav tsis tso koj tseg mus txog thaum ua txhua yam haujlwm hauv Yawmsaub lub tuam tsev tiav tag lawm. Twb muaj tej pab pov thawj thiab cov Levi ua tej haujlwm txhua yam hauv Yawmsaub lub tuam tsev huvsi. Txhua tus uas txawj ua tej haujlwm txhua yam yuav zoo siab pab koj ua. Thiab tej nom tswv thiab tej pejxeem sawvdaws yuav ua raws li txhua yam uas koj txib lawv ua huvsi.” Vajntxwv Davi hais rau cov uas tuaj txoos ua ke ntawd tias, “Kuv tus tub Xalaumoo yog tib tug uas Vajtswv tau xaiv cia. Nws tseem hluas thiab tsis tshua txawj ua thiab tej haujlwm no mas loj heev, rau qhov lub niag tuam tsev no tsis yog ua rau neeg tiamsis yog ua rau Vajtswv Yawmsaub. Yog li ntawd kuv tau npaj tseg cia ua kuv tus Vajtswv lub tuam tsev raws li kuv muaj peevxwm npaj tau, yog kub rau tej uas xuas kub ua, nyiaj rau tej uas xuas nyiaj ua, tooj liab rau tej uas xuas tooj liab ua, hlau rau tej uas xuas hlau ua thiab ntoo rau tej uas xuas ntoo ua. Dhau ntawd mas tseem muaj tej qe zeb iav txho ci lam ntau ntau li thiab tej qe zeb hlaws uas yuav ua khawm, tej qe zeb hlaws dub txho txaij, tej qe zeb muaj nqes zoo nkauj txhua yam thiab pob zeb mos ntau kawg. Tsis tag li ntawd, tshaj tej uas kuv twb npaj cia rau lub tuam tsev dawb huv lawd kuv tseem muaj kub thiab nyiaj ua kuv tug, mas kuv pub kiag rau kuv tus Vajtswv lub tuam tsev rau qhov kuv kub siab lug rau Vajtswv lub tuam tsev ntawd. Tej uas kuv pub yog kub hnyav 3,000 tala, yog cov kub hauv lub tebchaws Aufi, thiab cov nyiaj uas twb nchuav tau lawm hnyav 7,000 tala uas yuav luam tej phab ntsa hauv lub tuam tsev, thiab kub rau tej uas yuav xuas kub ua thiab nyiaj rau tej uas yuav xuas nyiaj ua, rau tej haujlwm huvsi uas cov Kws txawj yuav ua. Yog li ntawd leejtwg zoo siab pub qhov txhia chaw thiab pub kiag nws tus kheej rau Yawmsaub hnub no?” Mas cov thawj hauv tej cum thiab cov thawj hauv txhua xeem thiab cov thawj kav ib txhiab leej thiab cov thawj kav ib puas leej thiab cov nom tswv uas saib xyuas vajntxwv tej haujlwm zoo siab hlo pub rau Vajtswv. Lawv pub ua tej haujlwm rau hauv Vajtswv lub tuam tsev li no, yog kub hnyav 5,000 tala thiab 10,000 dali, nyiaj hnyav 10,000 tala, tooj liab 18,000 tala thiab hlau 100,000 tala. Leejtwg muaj tej qe zeb hlaws muaj nqes mas muab pub rau hauv Yawmsaub lub tuam tsev lub txhab nyiaj, uas Yehi‑ee cum Kwsoo ua tus saib xyuas. Mas cov pejxeem zoo siab xyiv fab rau qhov lawv zoo siab hlo pub txhua yam no thiab lawv tau zoo siab pub ua lub siab dawb paug rau Yawmsaub. Vajntxwv Davi kuj zoo siab xyiv fab kawg li. Ua li ntawd mas Davi thiaj qhuas Yawmsaub tab meeg cov uas tuaj txoos ua ke ntawd thiab hais tias, “Au Yawmsaub uas yog peb yawg koob Yixayee tus Vajtswv, thov qhuas koj mus ib txhiab ib txhis mus tsis kawg li. Au Yawmsaub, koj yog tus loj kawg, koj muaj zog muaj hwjchim ci ntsa iab, koj yog tus kov yeej thiab muaj hwjchim meej mom. Rau qhov ib puas tsav yam uas nyob nruab ntug thiab nyob hauv ntiajteb yog koj tug. Au Yawmsaub, koj ua vajntxwv kav, thiab koj raug muab txhawb nqa ua ib puas tsav yam tus thawj. Kev nplua nuj thiab meej nthawb yog los ntawm koj los, koj yog tus kav txhua yam huvsi. Lub zog thiab hwjchim loj kawg nkaus nyob hauv koj txhais tes, thiab nyob ntawm koj txhais tes xis uas yuav tsa ua loj thiab pub zog rau sawvdaws. Peb tus Vajtswv, nimno peb ua koj tsaug thiab qhuas koj lub npe uas muaj hwjchim ci ntsa iab. “Tiamsis kuv yog leejtwg thiab kuv cov neeg yog leejtwg uas peb yuav muaj peevxwm pub tau rau koj ua lub siab dawb paug li no? Rau qhov txhua yam puavleej yog los ntawm koj los mas peb tau pub yam uas yog koj li rov rau koj xwb. Rau qhov ntawm koj xubntiag ces peb yog neeg lwm teb lwm chaw thiab yog neeg tuaj ua qhua nyob xwb ib yam nkaus li peb tej poj koob yawm txwv sawvdaws. Peb lub hnub nyoog nyob hauv ntiajteb no zoo yam li tus duab xwb thiab tsis muaj dabtsi nyob ruaj khov mus li. Au Yawmsaub uas yog peb tus Vajtswv, tej qhov txhia chaw ntau ntau no uas peb tau npaj cia ua lub tuam tsev rau koj lub npe dawb huv nyob mas puavleej yog los ntawm koj txhais tes los thiab yog koj tug huvsi. Kuv tus Vajtswv, kuv paub tseeb tias koj sim lub siab thiab koj txaus siab rau txojkev ncaj ncees. Mas kuv lub siab ncaj ncees thiab kuv pub tej yam no ua siab dawb paug rau koj, mas lub sijhawm no kuv kuj pom koj haiv neeg uas nyob ntawm no zoo siab hlo pub ua lub siab dawb paug rau koj. Au Yawmsaub uas yog peb yawg koob Aplahas, Yiha thiab Yixayee tus Vajtswv, thov koj pab kom koj haiv neeg lub siab ntshaw thiab xav ua li no mus ib txhis li, thiab thov koj ua rau lawv lub siab xib rau koj. Thov koj pab kuv tus tub Xalaumoo kom tuav rawv koj tej lus nkaw thiab koj tej lus qhia thiab koj tej kab ke kawg siab kawg ntsws, thiab ua raws li txhua yam huvsi mas nws thiaj ua tau lub niag tuam tsev uas kuv twb npaj tseg lawm.” Mas Davi hais rau cov uas tuaj txoos ua ke tias, “Cia li qhuas Yawmsaub uas yog nej tus Vajtswv.” Mas cov neeg sawvdaws qhuas Yawmsaub uas yog lawv tej poj koob yawm txwv tus Vajtswv, thiab lawv nyo hau pe hawm Yawmsaub thiab khoov ntshis pe vajntxwv. Hnub tom qab lawv tua tsiaj xyeem rau Yawmsaub, thiab ua kevcai hlawv huvsi xyeem rau Yawmsaub. Lawv xyeem ib txhiab tus txiv nyuj, ib txhiab tus txiv yaj, ib txhiab tus menyuam yaj nrog cov cawv txiv hmab uas hliv xyeem, thiab ua kevcai xyeem ntau ntau li ua cov Yixayee sawvdaws li feem. Mas hnub ntawd lawv tau noj tau haus ua xyiv fab hlo rau ntawm Yawmsaub xubntiag. Mas lawv rov qab ua kevcai zaum ob tsa Davi tus tub Xalaumoo ua vajntxwv, lawv hliv roj tsa nws ua tus thawj rau ntawm Yawmsaub xubntiag, thiab tsa Xadau ua pov thawj. Mas Xalaumoo zaum saum lub zwm txwv uas yog Yawmsaub tsa, ua vajntxwv nyob nws txiv Davi chaw. Mas nws vam meej tuaj thiab cov Yixayee sawvdaws kuj mloog nws lus. Tag nrho cov thawj thiab cov tub rog siab loj siab tuab thiab vajntxwv Davi cov tub sawvdaws yeem lus tias yuav zwm rau vajntxwv Xalaumoo. Mas Yawmsaub pub kom Xalaumoo muaj koob meej nto moo lug tab meeg cov Yixayee sawvdaws thiab pub kom nws ua vajntxwv muaj hwjchim meej mom ntau dua tej vajntxwv uas kav cov Yixayee ua nws ntej. Yexi tus tub Davi ua vajntxwv kav cov Yixayee sawvdaws. Nws ua vajntxwv kav cov Yixayee tau plaub caug xyoo. Nws nyob hauv lub moos Heploo kav tau xya xyoo thiab nyob hauv Yeluxalees kav tau peb caug peb xyoos. Mas nws thiaj tuag rau thaum laus heev thiab hnub nyoog nchav, nws nplua nuj heev thiab muaj meej nthawb. Mas nws tus tub Xalaumoo sawv nws chaw ua vajntxwv kav. Tej haujlwm uas vajntxwv Davi ua txij thaum pib mus txog thaum kawg mas twb muab sau cia rau hauv phau ntawv keeb kwm uas Xamuyee tus uas hais pom tom hauv ntej tau sau thiab nyob hauv phau ntawv keeb kwm uas Nathas uas yog xibhwb cev Vajtswv lus tau sau thiab hauv phau ntawv keeb kwm uas Kas tus uas hais pom tom hauv ntej tau sau. Puavleej hais txog txhua yam uas Davi kav thiab nws tus peevxwm thiab tej xwm uas tshwm rau nws thiab rau cov Yixayee thiab tshwm rau txhua lub tebchaws hauv ntiajteb. Davi tus tub Xalaumoo tau kav nws lub tebchaws nyob ruaj, thiab Yawmsaub uas yog nws tus Vajtswv tau nrog nraim nws thiab tsa nws ua loj kawg nkaus. Xalaumoo hais rau cov Yixayee sawvdaws thiab cov thawj rog kav ib txhiab leej kav ib puas leej thiab cov tu plaub thiab Yixayee cov thawj sawvdaws, thiab cov thawj hauv txhua cum. Xalaumoo thiab ib tsoom pejxeem uas nrog nws nyob nce mus rau lub chaw siab uas pe Vajtswv hauv lub moos Kinpe‑oo, rau qhov Vajtswv lub tsev ntaub sib ntsib uas Yawmsaub tus qhev Mauxe tau ua hauv tebchaws moj sab qhua nyob qhov ntawd. Davi tau coj Vajtswv lub phij xab ntawm Kile‑a Ye‑ali los txog lub chaw uas Davi tau npaj cia lawm, rau qhov nws tau tsa ib lub tsev ntaub rau lub phij xab ntawd rau hauv Yeluxalees. Tsis tag li ntawd lub thaj tooj liab xyeem uas Npexalee uas yog Uli tus tub thiab yog Hawj tus xeeb ntxwv tau ua ntawd kuj nyob ntawm Yawmsaub lub tsev ntaub hauv lub moos Kinpe‑oo. Mas Xalaumoo thiab cov pejxeem nrhiav Yawmsaub qhov ntawd. Xalaumoo mus rau ntawm lub thaj tooj liab rau ntawm Yawmsaub xubntiag uas nyob ntawm lub tsev ntaub sib ntsib thiab tua ib txhiab tus tsiaj ua kevcai hlawv huvsi xyeem rau saum lub thaj ntawd. Hmo ntawd Vajtswv tshwm rau Xalaumoo pom thiab hais rau nws tias, “Koj xav kom kuv pub dabtsi rau koj, cia li thov.” Mas Xalaumoo hais rau Vajtswv tias, “Koj ua koj txojkev hlub ruaj khov uas loj kawg tshwm rau kuv txiv Davi uas yog koj tus qhev, thiab koj tau tsa kuv ua vajntxwv nyob nws chaw. Au Vajtswv Yawmsaub, thov cia tej lus uas koj cog tseg rau kuv txiv Davi tiav rau nimno, rau qhov koj twb tsa kuv ua vajntxwv kav ib haiv neeg uas coob npaum li cov hmoov av hauv ntiajteb. Thov pub tswvyim plab plaws thiab kev txawj ntse rau kuv, kuv thiaj coj tau haiv neeg no, rau qhov leejtwg yuav kav tau koj haiv neeg uas coob heev no?” Vajtswv teb Xalaumoo tias, “Vim koj lub siab xav tau tej ntawd, thiab koj tsis tau thov nyiaj txiag qhov txhia chaw, meej nthawb lossis thov kom cov uas ntxub koj txojsia tu thiab tsis tau thov kom koj muaj txojsia nyob ntev, tiamsis koj tau thov tswvyim plab plaws thiab kev txawj ntse rau koj kom txawj kav kuv haiv neeg uas kuv tau tsa koj ua vajntxwv kav lawv, mas kuv thiaj pub lajlim tswvyim plab plaws thiab kev txawj ntse rau koj. Kuv tseem yuav pub nyiaj txiag, qhov txhia chaw thiab meej nthawb ntau rau koj. Tej vajntxwv uas nyob ua koj ntej yeej tsis tau muaj li thiab cov uas nyob ua koj qab yuav tsis muaj npaum li koj.” Xalaumoo thiaj tawm ntawm lub tsev ntaub sib ntsib ntawm lub chaw siab pe Vajtswv hauv Kinpe‑oo mus rau Yeluxalees. Mas nws ua vajntxwv kav Yixayee. Xalaumoo sau tau tej tsheb nees ua rog thiab cov tub rog caij nees. Nws muaj tsheb nees ua rog ib txhiab plaub puas lub thiab muaj cov tub rog uas caij nees ib vam ob txhiab leej uas nws kom ib txhia nyob rau hauv tej moos uas nws npaj rau tej tsheb nees ua rog thiab ib txhia nrog vajntxwv nyob hauv lub nroog Yeluxalees. Vajntxwv ua rau nyiaj thiab kub muaj ntau rau hauv lub nroog Yeluxalees yam li pob zeb, thiab ua rau ntoo ciab muaj ntau yam nkaus li tej ntoo txiv cev hauv tej pov roob Sefela. Xalaumoo yuav nees hauv Iyi tebchaws thiab hauv Khu‑e tebchaws los, mas vajntxwv cov tub luam txais yuav hauv Khu‑e tebchaws raws li tus nqe. Ib lub tsheb nees ua rog hauv Iyi tebchaws mas lawv yuav rau pua sekhee nyiaj, ib tug nees mas lawv yuav ib puas tsib caug sekhee. Mas lawv xa tej no mus muag rau cov Hithai tej vajntxwv sawvdaws thiab cov Alas tej vajntxwv. Xalaumoo txiav txim siab yuav ua lub tuam tsev rau Yawmsaub lub npe thiab ua ib lub tsev vajntxwv rau nws. Mas Xalaumoo txib xya vam leej ua cov uas kwv qhov txhia chaw thiab yim vam leej ua cov uas txam pob zeb pem tej roob thiab peb txhiab rau pua leej ua cov uas saib xyuas lawv. Xalaumoo xa xov mus rau Hulas uas ua vajntxwv kav lub nroog Thailab tias, “Koj tau pab kuv txiv Davi yog xa ntoo ciab tuaj rau nws ua lub tsev rau nws nyob lawm mas thov koj ua ib yam li ntawd rau kuv thiab. Nimno kuv tabtom yuav ua lub tuam tsev rau kuv tus Vajtswv Yawmsaub lub npe, thiab yuav muab xyeem pub kiag ua lub chaw hlawv hmoov tshuaj tsw qab ntawm nws xubntiag thiab ua chaw txawb cov ncuav uas xyeem rau ntawm nws xubntiag ib txhis thiab ua kevcai hlawv huvsi xyeem rau thaum tagkis thiab thaum yuav tsaus ntuj thiab rau hnub Xanpatau thiab rau hnub hli xiab thiab rau tej kevcai pam noj pam haus uas teem cia rau Yawmsaub uas yog peb tus Vajtswv raws li uas hais tseg rau cov Yixayee ib txhiab ib txhis. Lub tuam tsev uas kuv yuav ua ntawd mas loj heev rau qhov peb tus Vajtswv loj dua tej timtswv huvsi. Tiamsis leejtwg yuav muaj peevxwm ua tau lub tuam tsev rau nws nyob, rau qhov saum nruab ntug uas siab kawg nkaus los twb tsis txaus rau nws nyob? Kuv yog leejtwg es yuav ua lub tuam tsev rau nws nyob tau, tsuas yog ua lub chaw hlawv tej hmoov tshuaj tsw qab xyeem rau ntawm nws xubntiag xwb? Yog li ntawd nimno thov koj xa ib tug txivneej uas txawj ua Kws kub Kws nyiaj Kws tooj liab thiab Kws hlau thiab txawj ntos ntaub tsamxem thiab liab thiab xiav, thiab yog tus Kws txawj txaug, kom nws thiaj nrog kuv cov neeg uas ua Kws ua haujlwm hauv Yuda thiab hauv Yeluxalees, uas kuv txiv Davi nrhiav cia lawd. Thov koj xa cov ntoo ciab thiab cov ntoo ciab nplooj suab thiab cov ntoo liab ntawm roob Lenpanoo tuaj rau kuv, rau qhov kuv paub tias koj cov neeg txawj txiav ntoo hauv Lenpanoo. Mas kuv cov tub teg tub taws yuav nrog koj cov tub teg tub taws ua haujlwm, es npaj ntoo rau kuv ntau kawg li, rau qhov lub tuam tsev uas kuv yuav ua no mas yuav ua loj kawg thiab zoo nkauj kawg li. Kuv yuav muab cov mog uas zom tau lawm ob vam khaula, cov qeb ob vam khaula, cawv txiv hmab ob vam npa, thiab roj aulib ob vam npa rau koj cov tub teg tub taws uas txiav ntoo ntawd.” Mas Hulas uas ua vajntxwv kav lub nroog Thailab ua ntawv teb tuaj rau Xalaumoo tias, “Twb yog vim Yawmsaub hlub nws haiv neeg nws thiaj tsa koj ua vajntxwv kav lawv.” Hulas kuj hais tias, “Qhuas Yawmsaub uas yog cov Yixayee tus Vajtswv, tus uas tsim lub ntuj thiab lub teb, yog tus uas pub ib tug tub uas txawj ntse rau vajntxwv Davi, muaj lajlim tswvyim plab plaws thiab muaj kev nkag siab, yog tus uas yuav ua lub tuam tsev rau Yawmsaub thiab ib lub tsev vajntxwv rau nws. “Nimno kuv xa ib tug Kws uas txawj thiab nkag siab zoo tuaj rau koj, yog Hulas‑anpi, nws niam yog neeg xeem Daj nws txiv yog neeg hauv lub nroog Thailab. Nws txawj ua Kws kub Kws nyiaj Kws tooj liab Kws hlau txawj txaug pob zeb thiab ua Kws ntoo thiab txawj ntos ntaub tsamxem thiab xiav thiab liab thiab ntos tau ntaub mag zoo zoo, thiab txawj txaug txhua yam thiab ua raws li tej qauv txaij nraug zees uas muab rau nws ua. Nws yuav nrog koj cov Kws ua haujlwm uas koj txiv Davi uas yog kuv tus tswv tau nrhiav cia lawm ua haujlwm ua ke. Yog li ntawd mas cov mog cov qeb cov roj cov cawv txiv hmab uas koj hais txog ntawd koj cia li xa tuaj rau peb uas yog koj cov qhev. Mas peb yuav txiav cov ntoo ntawm Lenpanoo npaum li uas koj cheem tsum yuav thiab peb yuav muab ua phuaj es xa hauv dej hiavtxwv mus rau ntawm lub moos Yaupa, es koj thiaj coj tau mus rau ntawm Yeluxalee.” Mas Xalaumoo thiaj txheeb lwm haiv neeg uas nyob hauv Yixayee tebchaws tej npe huvsi ib yam li nws txiv Davi tau txheeb ib zaug lawm. Mas txheeb tau muaj 153,600 leej. Nws txib xya vam leej ua cov uas kwv qhov txhia chaw, yim vam leej ua cov uas txam pob zeb pem roob thiab peb txhiab rau pua leej ua cov uas saib thiab txhib cov neeg ntawd ua haujlwm. Xalaumoo pib ua Yawmsaub lub tuam tsev rau hauv Yeluxalees saum lub roob Mauliya uas Yawmsaub tau tshwm rau nws txiv Davi pom, ncaj ntawm lub chaw uas Davi tau teem cia, yog ntawm Aulanas uas yog neeg Yenpu lub tshav ntaus qoob. Nws pib nqes tes ua rau lub ob hlis xyoo plaub uas nws ua vajntxwv kav. Xalaumoo ua Vajtswv lub tuam tsev dav thiab ntev li no, yog ntev rau caum tshim thiab dav nees nkaum tshim, raws tej tshim uas siv thaum ub. Zaj qab khav uas yuav nkag rau hauv lub tuam tsev ntev nees nkaum tshim npaum li lub tuam tsev qhov uas dav, siab nees nkaum tshim. Hauv lub nrog tsev nws muab tseem kub luam thoob plaws. Phab ntsa lub tuam tsev sab hauv lub nrog tsev nws muab cov ntoo ciab nplooj suab xov thiab muab kub zoo zoo luam thiab sais ua tej tsob toov laj thiab cov saw txaij nraug zees rau ntawd. Nws muab cov qe zeb hlaws muaj nqes los teem cia rau hauv lub tuam tsev. Cov kub yog cov kub ntawm lub moos Pava‑i. Nws thiaj muab kub luam lub tuam tsev, yog luam tej las tej taw rooj tej phab ntsa thiab cov qhov rooj huvsi thiab txaug duab Khelunpee rau ntawm tej phab ntsa. Nws ua chav dawb huv kawg nkaus, qhov ntev thiab qhov dav yog nees nkaum tshim xwm fab dav li lub tuam tsev. Nws muab kub zoo zoo hnyav rau pua tala los luam rau. Cov ntsia hlau kub hnyav tsib caug sekhee. Thiab nws muab kub luam tej chav txheej saud. Hauv chav dawb huv kawg nkaus ntawd nws muab ntoo ua ob tug Khelunpee thiab muab kub luam. Ob tug Khelunpee nthuav kooj tis dav nees nkaum tshim. Ib tug ib sab kooj tis ntev tsib tshim ti nkaus ib sab phab ntsa tuam tsev, thiab ib sab ntev tsib tshim tuaj twb nkaus ib tug Khelunpee sab kooj tis. Tus Khelunpee no ib sab kooj tis kuj ntev tsib tshim ti nkaus ib sab phab ntsa tuam tsev thiab, ib sab kooj tis ntev tsib tshim kuj txuas nkaus thawj tug Khelunpee sab kooj tis thiab. Ob tug Khelunpee no li kooj tis nthuav dav nees nkaum tshim. Ob tug sawv ntsug tig xubntiag mus rau tom chav dawb huv. Nws muab ntaub xiav thiab tsamxem thiab liab thiab ntaub mag zoo zoo ua daim ntaub thaiv thiab ua paj ntaub duab Khelunpee rau ntawm daim ntaub ntawd. Nws ua ob tug ncej rau ntawm lub qhov rooj tuam tsev siab peb caug tsib tshim thiab ua ob lub hau ncej siab tsib tshim txawb rau saum ob tug ncej. Nws ua cov saw zoo li cov saw khuam caj dab lo rau saum cov hau ncej thiab nws ua ib puas lub txiv ntsiav kws dai rau ntawm cov saw ntawd. Nws txhos ob tug ncej rau ob sab qhov rooj tuam tsev, ib tug nyob sab ped ib tug nyob sab nrad. Nws tis npe rau tus uas nyob sab nrad hu ua Yakhi, tus uas nyob sab ped nws hu ua Npau‑a. Nws muab tooj liab ua ib lub thaj xyeem qhov txhia chaw ntev nees nkaum tshim, dav nees nkaum tshim siab kaum tshim. Nws nchuav ib lub rhawv dej kheej kheej ntsuas lub nrog saum ncauj dav kaum tshim siab tsib tshim thiab ntsuas puag ncig muaj peb caug tshim. Ntawm lub ncauj rhawv dej hauv qab muaj ib co duab nyuj nyob puag ncig tag nrho peb caug tshim. Cov nyuj ntawd nyob ua ob zaj nchuav xeeb keeb nkaus rau lub rhawv dej. Lub rhawv dej txawb rau saum kaum ob tug nyuj, peb tug tig xubntiag rau sab ped, peb tug tig xubntiag rau sab hnub poob, peb tug tig xubntiag rau sab nrad thiab peb tug tig xubntiag rau sab hnub tuaj. Lawv muab lub rhawv dej txawb saum cov nyuj. Cov nyuj tig pobtw huvsi rau hauv nruab nrab. Lub rhawv dej ntawd tuab ib dos, ua lub npoo rhawv dej zoo li lub npoo tais, thiab ua zoo li lub paj qos dej, ntim tau peb txhiab npa dej. Thiab nws ua kaum lub phaj dej cia ntxuav qhov txhia chaw, thiab muab tsib lub txawb rau lub tuam tsev sab nrad thiab tsib lub txawb rau sab ped. Lawv yuav siv cov phaj dej no ntxuav tej uas muab ua kevcai hlawv huvsi xyeem, tiamsis lub rhawv dej loj mas cia rau cov pov thawj siv xwb. Nws muab kub ua kaum tus ncej txawb teeb raws li tau hais tseg, thiab nws muab txawb rau hauv lub tuam tsev, tsib tug txawb rau sab nrad tsib tug txawb rau sab ped. Nws ua kaum lub rooj thiab muab txawb rau hauv lub tuam tsev, txawb tsib lub rau sab nrad tsib lub rau sab ped, thiab nws muab kub ua ib puas lub phaj. Nws ua lub tshav puam rau cov pov thawj, thiab lub tshav puam loj thiab ua rooj loog rau cov tshav puam ntawd thiab muab tooj liab luam cov rooj loog ntawd. Nws muab lub niag rhawv dej loj txawb rau ntawm lub tuam tsev sab hnub tuaj uas npuas rau sab nrad. Hulas kuj tau ua tej laujkaub tej duav phuaj thiab tej phaj. Hulas thiaj ua tau txhua yam tiav rau hauv Vajtswv lub tuam tsev rau vajntxwv Xalaumoo, yog tej no, ob tug ncej thiab ob lub tais uas txawb saum hau ncej saum ob tug ncej, thiab ob daim ntxais qhov muag uas kauv ob lub tais hau ncej saum ob tug ncej, thiab plaub puas lub txiv ntsiav kws lo rau ob daim ntxais qhov muag ntawd. Ib daim ntxais qhov muag mas dai ob zaj txiv ntsiav kws xwv thiaj li nyob puag ncig ob lub tais uas txawb saum hau ncej saum ob tug ncej, Nws ua cov tsheb thawb dej thiab cov phaj dej uas nyob saum cov tsheb, thiab ib lub niag rhawv dej thiab kaum ob tug nyuj uas txawb lub rhawv dej. Tej laujkaub thiab tej duav phuaj thiab cov hmuv chob nqaij thiab tej twj siv huvsi no mas Hulas‑anpi muab tooj liab uas txhuam ci nplas lawm ua pub rau vajntxwv Xalaumoo siv hauv Yawmsaub lub tuam tsev. Vajntxwv nchuav cov no ntawm lub hav Yaladee ntawm qhov av nplaum uas nyob lub moos Xukhau thiab lub moos Xeleda ntu nruab nrab. Xalaumoo ua txhua yam no ntau kawg li mas thiaj tsis paub tias cov tooj liab hnyav npaum li cas. Xalaumoo ua tau txhua yam twj uas siv hauv Vajtswv lub tuam tsev, yog tej no, lub thaj kub thiab cov rooj uas txawb ncuav ntawm Yawmsaub xubntiag, thiab cov ncej txawb teeb thiab tej teeb uas xuas tseem kub ua uas yuav ci npuas chav tsev uas dawb huv kawg nkaus raws li uas hais tseg, thiab cov paj ntoo thiab cov teeb thiab ciaj uas xuas cov tseem kub ua, thiab cov tais khwb teeb xeeb thiab cov phaj, thiab cov tais uas rau cov hmoov tshuaj tsw qab thiab tej duav hlau yawm ncaig taws uas muab tseem kub ua, thiab cov ntsej tuav txhib qhov rooj kaw chav dawb huv kawg nkaus thiab tuav txhib qhov rooj chav dawb huv mas puavleej muab kub ua. Txhua yam haujlwm uas vajntxwv Xalaumoo ua Yawmsaub lub tuam tsev thiaj tiav tag li no. Thiab Xalaumoo coj tej nyiaj tej kub thiab tej twj siv huvsi uas nws txiv Davi twb muab xyeem pub rau Vajtswv lawd los muab khaws cia rau hauv tej txhab nyiaj hauv Vajtswv lub tuam tsev. Mas Xalaumoo hu Yixayee cov kev txwj laus, yog txhua tus uas ua hlob hauv txhua xeem thiab txhua cum tus thawj tuaj txoos ua ke rau hauv Yeluxalees es yuav mus coj Yawmsaub lub phij xab sib cog lus tawm hauv Davi lub nroog uas yog lub roob Xi‑oo los. Mas tag nrho Yixayee cov txivneej tuaj txoos ua ke ntawm vajntxwv xubntiag rau lub sijhawm uas ua kevcai pam noj haus rau lub xya hli. Cov Yixayee tej kev txwj laus sawvdaws tuaj txhij mas cov Levi txawm nqa lub phij xab. Lawv coj lub phij xab thiab lub tsev ntaub sib ntsib thiab tej twj siv dawb huv huvsi uas nyob hauv lub tsev ntaub mus. Tej no cov pov thawj thiab cov Levi yog cov uas coj los. Vajntxwv Xalaumoo thiab ib tsoom Yixayee sawvdaws uas tuaj txoos ua ke rau ntawm nws xubntiag nyob ntawm lub phij xab thiab muab yaj muab nyuj coob kawg los tua xyeem suav tsis txheeb li. Cov pov thawj thiaj coj Yawmsaub lub phij xab sib cog lus mus rau ntawm lub chaw uas npaj cia hauv lub tuam tsev chav sab hauv uas yog chav dawb huv kawg nkaus, mas muab tso rau hauv ob tug Khelunpee qab phab kooj tis. Ob tug Khelunpee ntawd nthuav kooj tis rau saum lub chaw uas txawb lub phij xab mas thiaj roos lub phij xab thiab ob tug las kwv. Ob tug las ntawd ntev heev, mas yog nyob hauv chav dawb huv mas pom ob tug tw las tshwm hauv chav sab hauv tuaj, tiamsis yog nyob sab nraud mas tsis pom. Mas ob tug las ntawd tseem nyob qhov ntawd txog niaj hnub nimno. Tsis muaj dabtsi nyob hauv lub phij xab li tsuas yog ob daim txiag zeb uas Mauxe muab tso rau hauv ntawm lub roob Haule uas yog lub chaw uas Yawmsaub nrog cov Yixayee sib cog lus tseg rau thaum lawv tawm hauv Iyi tebchaws los. Dhau ntawd cov pov thawj tawm hauv chav dawb huv los. Cov pov thawj uas nyob qhov ntawd sawvdaws tau tu lawv tus kheej kom dawb huv lawm, lawv tsis xam tias yog hnub uas pab twg ua haujlwm. Cov Levi uas yog cov hu nkauj sawvdaws, yog Axas, Hemas thiab Yeduthu thiab lawv cov tub thiab lawv cov kwvtij hnav tsoos tsho ntaub mag zoo zoo tau npuaj nruas tooj liab ntaus nkauj nog ncas me thiab ntaus nkauj nog ncas loj sawv ntsug ntawm lub thaj sab hnub tuaj thiab muaj cov pov thawj uas tshuab raj xyu ib puas nees nkaum leej. Cov tshuab raj thiab cov hu nkauj yuav tsum tsa suab nrov ib txhij qhuas thiab ua Yawmsaub tsaug. Mas thaum lawv tsa suab nrov nrog suab raj thiab suab nruas npuaj tooj liab thiab lwm yam suab phim nkauj, ces lawv qhuas Yawmsaub hais tias, “Yawmsaub yog tus zoo, nws txojkev hlub ruaj khov nyob mus ib txhis tsis kawg,” mas ib tauv huab txawm los puv nkaus Yawmsaub lub tuam tsev. Mas cov pov thawj thiaj sawv ntsug ua haujlwm tsis tau vim tauv huab ntawd, rau qhov Yawmsaub lub hwjchim ci ntsa iab puv nkaus Vajtswv lub tuam tsev. Ces Xalaumoo txawm hais tias, “Yawmsaub tau hais tias nws yuav nyob hauv qhov tsaus ntuj nti. Kuv tau ua lub tuam tsev zoo heev rau koj, yog lub chaw rau koj nyob mus ib txhis li.” Mas vajntxwv tig los foom koob hmoov rau ib tsoom Yixayee sawvdaws rau thaum lawv sawvdaws tseem sawv ntsug. Nws hais tias, “Cia li qhuas Yawmsaub uas yog cov Yixayee tus Vajtswv uas txhais tes ua tau tiav raws li tej lus uas cog tseg rau kuv txiv Davi lawd, hais tias, ‘Txij hnub uas kuv coj kuv haiv neeg tawm hauv Iyi tebchaws los kuv tsis tau xaiv ib lub moos twg hauv cov xeem Yixayee sawvdaws cia ua lub tuam tsev rau kuv lub npe nyob, thiab kuv tsis tau xaiv ib tug txivneej twg los ua tus thawj kav kuv haiv neeg Yixayee. Tiamsis nimno kuv tau xaiv Yeluxalees ua chaw rau kuv lub npe nyob thiab kuv tau xaiv Davi ua tus kav kuv haiv neeg Yixayee.’ Kuv txiv Davi tau npaj siab cia tias yuav ua lub tuam tsev rau Yawmsaub uas yog Yixayee tus Vajtswv lub npe nyob. Tiamsis Yawmsaub hais rau kuv txiv Davi tias, ‘Qhov uas koj npaj siab yuav ua lub tuam tsev rau kuv lub npe nyob ntawd koj twb ua zoo lawm. Tiamsis koj tsis yog tus uas yuav ua lub tuam tsev. Koj tus tub uas yuav yug los yog tus uas yuav ua lub tuam tsev rau kuv lub npe nyob.’ Nimno Yawmsaub twb ua rau tej lus uas nws cog tseg ntawd tiav lawm. Rau qhov kuv tau sawv los nyob kuv txiv Davi chaw thiab nyob saum cov Yixayee lub zwm txwv raws li Yawmsaub tau cog lus tseg thiab kuv tau ua lub tuam tsev rau Yawmsaub uas yog cov Yixayee tus Vajtswv lub npe nyob. Thiab qhov ntawd kuv tau tso lub phij xab uas ntim Yawmsaub tej lus uas nws cog tseg rau cov Yixayee.” Mas Xalaumoo sawv ntsug ntawm Yawmsaub lub thaj xyeem sab xubntiag tab meeg ib tsoom Yixayee sawvdaws, thiab nws tsa hlo nws ob txhais tes. Xalaumoo tau muab tooj liab ua ib lub sam thiaj ntev tsib tshim dav tsib tshim siab peb tshim thiab tau muab txawb rau hauv lub tshav puam mas nws nyob saud. Nws txhos caug tab meeg ib tsoom Yixayee sawvdaws thiab tsa tes rau saum ntuj mas hais tias, “Au Yawmsaub uas yog Yixayee tus Vajtswv, yeej tsis muaj ib tug timtswv twg zoo cuag li koj tsis hais saum qaum ntuj thiab hauv ntiajteb. Koj ua raws li koj cog lus tseg thiab koj ua txojkev hlub uas ruaj khov tshwm rau koj cov qhev uas ua lawv lub neej raws li koj txojkev kawg siab kawg ntsws. Koj tau ua rau kuv txiv Davi uas yog koj tus qhev raws li tej lus uas koj twb cog tseg rau nws lawd. Koj lub qhov ncauj tau hais thiab koj txhais tes ua tiav rau hnub no. Au Yawmsaub uas yog Yixayee tus Vajtswv, yog li ntawd nimno thov koj ua raws li tej lus uas koj tau cog tseg rau kuv txiv Davi uas yog koj tus qhev hais tias, ‘Yog koj tej tub ki ceev faj rau txhua txojkev uas lawv ua thiab coj raws li kuv txoj kevcai ib yam li koj, mas tsis muaj ib hnub twg uas koj caj ces yuav tu ncua tus txivneej uas nyob saum cov Yixayee lub zwm txwv tab meeg kuv.’ Au Yawmsaub uas yog Yixayee tus Vajtswv, tej lus uas koj tau hais tseg rau kuv txiv Davi uas yog koj tus qhev mas thov koj ua kom tiav. “Mas Vajtswv yuav nrog neeg nyob hauv lub ntiajteb lov? Saib maj, txawm yog saum nruab ntug thiab nruab ntug uas siab kawg nkaus los twb tsis txaus rau koj nyob. Mas lub tuam tsev uas kuv ua no yimhuab tsis txaus rau koj nyob. Thov koj saib rau koj tus qhev tej lus taij lus thov no. Au Yawmsaub uas yog kuv tus Vajtswv, thov koj mloog kuv lub suab thiab tej lus taij thov uas koj tus qhev thov ntawm koj xubntiag no, xwv koj lub qhov muag thiaj ntsia ntsoov lub tuam tsev no nruab hnub hmo ntuj, yog lub chaw uas koj cog tseg tias koj yuav tso koj lub npe nyob hauv, koj thiaj li mloog tej lus thov uas koj tus qhev tig xubntiag rau lub chaw no thov. Thiab thov koj mloog koj tus qhev thiab koj haiv neeg Yixayee tej lus taij thov rau thaum lawv tig xubntiag rau lub chaw no thov. Koj nyob saum ntuj ceeb tsheej uas yog koj lub chaw nyob mas thov koj mloog. Thaum koj hnov lawd thov koj zam txim. “Yog leejtwg tau ua txhaum rau nws kwvtij zej zog es yuav tsum twv tsawm, thiab nws tuaj twv tsawm ntawm koj lub thaj xyeem hauv lub tuam tsev no, mas thov koj nyob saum ntuj mloog thiab thov koj tu. Thov koj txiav txim rau koj cov qhev ob tog, rau txim rau tus uas ua txhaum thiab coj tej uas nws ua ntawd rov poob rau saum nws taubhau. Thiab tus uas tsis txhaum mas thov koj tsa kom nws muaj cai pauj qhov uas nws ua ncaj ncees. “Yog koj haiv neeg Yixayee swb lawv cov yeeb ncuab rau qhov lawv tau ua txhaum rau koj, mas yog lawv tig rov los cuag koj thiab lees yuav koj lub npe thiab taij thov koj hauv lub tuam tsev no, ces thov koj nyob saum ntuj mloog thiab zam koj haiv neeg Yixayee lub txim thiab coj lawv rov los rau hauv lub tebchaws uas koj tau pub rau lawv thiab lawv tej poj koob yawm txwv. “Thaum rooj ntug kaw thiab tsis muaj nag los vim yog lawv tau ua txhaum rau koj, mas yog lawv tig xubntiag rau lub chaw no thov thiab lees yuav koj lub npe thiab tig ntawm lawv tej kev txhaum rau thaum koj tsim txom lawv, ces thov koj nyob saum ntuj mloog thiab thov koj zam koj cov qhev uas yog koj haiv neeg Yixayee lub txim. Thov koj qhia txojkev zoo uas tsim nyog lawv taug rau lawv, thiab thov koj pub nag los rau hauv koj lub tebchaws uas koj tau pub ua qub txeeg qub teg rau koj haiv neeg. “Yog lub tebchaws raug kev tshaib nqhis, yog muaj mob kis lossis qoob loo nce hmob lossis tuaj pwm lossis muaj kooj muaj kab ntsig, lossis lawv cov yeeb ncuab tuaj vij lawv hauv lub moos twg, mas txawm yog muaj kev mob phem yam twg los kev mob kev nkeeg yam twg tshwm tuaj, thiab txawm yog ib tug twg lossis koj haiv neeg Yixayee huvsi taij li cas thiab thov li cas vim qhov uas nyias paub nyias kev txom nyem thiab nyias tej kev nyuaj siab es tsa tes ncaj rau lub tuam tsev no, ces thov koj nyob saum ntuj uas yog koj lub chaw nyob mloog thiab zam txim thiab ua rau txhua tus uas koj twb paub hauv lawv lub siab, raws li lawv tau ua huvsi, rau qhov koj, tsuas yog koj tib leeg xwb thiaj paub hauv neeg lub siab huvsi, kom lawv thiaj hwm thiab paub ntshai koj thiab ua lawv lub neej raws li koj txojkev txhua hnub txhua lub sijhawm uas lawv nyob hauv lub tebchaws uas koj tau pub rau peb tej poj koob yawm txwv. “Ib yam nkaus li ntawd, thaum lwm haiv neeg ib tug twg uas tsis yog koj haiv neeg Yixayee tuaj lwm lub tebchaws deb tuaj vim yog hnov txog koj lub npe thiab koj txhais tes uas muaj hwjchim thiab koj txhais npab uas tsa hlo, mas thaum nws tuaj tig xubntiag rau lub tuam tsev no thov, ces thov koj nyob saum ntuj uas yog koj lub chaw nyob mloog thiab thov koj ua raws li txhua yam uas lwm haiv neeg tau thov rau koj, xwv txhua haiv neeg hauv ntiajteb thiaj paub koj lub npe thiab ntshai thiab hwm koj yam nkaus li koj haiv neeg Yixayee, thiab lawv thiaj paub tias lub tuam tsev uas kuv tau ua no lawv hu raws li koj lub npe. “Yog koj haiv neeg tawm mus ua rog rau lawv cov yeeb ncuab rau txojkev twg uas koj txib lawv mus, es lawv tig xubntiag thov ncaj rau lub nroog no uas koj tau xaiv cia thiab tig xubntiag thov ncaj rau lub tuam tsev uas kuv tau ua rau koj lub npe nyob, mas thov koj nyob saum ntuj mloog lawv tej lus taij lus thov thiab tuav lawv txojcai. “Yog lawv ua txhaum rau koj, vim tsis muaj ib tug twg uas tsis ua txhaum, es koj npau taws rau lawv, thiab muab lawv cob rau yeeb ncuab lawv thiaj raug ntes coj mus rau yeeb ncuab lub tebchaws tsis hais deb los ze, yog lawv lub siab xam pom lawv tej kev txhaum rau hauv lub tebchaws uas lawv raug ntes coj mus ntawd thiab ntxeev dua siab thiab taij thov koj hauv lub tebchaws uas lawv nyob ntawd hais tias, ‘Peb tau ua txhaum thiab ua tsis ncaj thiab ua phem kawg li,’ yog lawv ntxeev dua siab kawg siab kawg ntsws kawg tswvyim plab plaws hauv lub tebchaws uas lawv raug yeeb ncuab ntes coj mus nyob ntawd, thiab yog lawv tig xubntiag rau lawv lub tebchaws uas koj pub rau lawv tej poj koob yawm txwv thov koj thiab tig xubntiag rau lub nroog uas koj tau xaiv cia thiab lub tuam tsev uas kuv tau ua rau koj lub npe nyob no, mas thov koj nyob saum ntuj uas yog koj lub chaw nyob mloog lawv tej lus taij lus thov thiab tuav lawv txojcai thiab zam koj haiv neeg lub txim uas lawv tau ua txhaum rau koj. Au kuv tus Vajtswv, nimno thov koj tsa koj lub qhov muag saib thiab thov koj tig ntsej mloog tej lus uas thov ntawm lub chaw no. “Au Vajtswv Yawmsaub, thov koj sawv tsees los rau hauv koj lub chaw so, koj thiab koj lub phij xab uas muaj koj lub hwjchim. Au Vajtswv Yawmsaub, thov kom koj txojkev cawm dim nyob ntawm koj cov pov thawj, thiab cia koj cov neeg uas dawb huv zoo siab xyiv fab rau qhov koj ua zoo rau lawv. Au Vajtswv Yawmsaub, thov tsis txhob tso tus uas koj hliv roj tsa lawd pov tseg. Thov koj nco ntsoov koj txojkev hlub ruaj khov uas koj muab rau koj tus qhev Davi.” Thaum Xalaumoo thov tag txawm muaj hluavtaws poob saum ntuj los kub tej qhov txhia chaw uas ua kevcai hlawv huvsi xyeem thiab tej tsiaj uas muab tua xyeem mas Yawmsaub lub hwjchim ci ntsa iab puv nkaus lub tuam tsev. Cov pov thawj mus rau hauv Yawmsaub lub tuam tsev tsis tau rau qhov Yawmsaub lub hwjchim ci ntsa iab puv nkaus nws lub tuam tsev. Thaum cov Yixayee sawvdaws pom hluavtaws nqes los thiab pom Yawmsaub lub hwjchim ci ntsa iab saum lub tuam tsev, lawv khoov ntshis ua plhu ti nkaus cov lag zeb uas pua hauv av, thiab lawv pe hawm Yawmsaub thiab ua nws tsaug hais tias, “Yawmsaub yog tus zoo, nws txojkev hlub ruaj khov nyob mus ib txhis tsis kawg.” Mas vajntxwv thiab cov pejxeem sawvdaws tua tsiaj xyeem rau ntawm Yawmsaub xubntiag. Vajntxwv Xalaumoo muab nyuj 22,000 tus thiab yaj 120,000 tus tua xyeem. Vajntxwv thiab cov pejxeem sawvdaws thiaj muab lub tuam tsev xyeem pub rau Vajtswv li no. Cov pov thawj nyias sawv ntawm nyias lub chaw thiab cov Levi kuj sawv ntsug tuav tej cuab yeej phim nkauj rau Yawmsaub uas vajntxwv Davi tau npaj cia ua Yawmsaub tsaug uas siv rau thaum Davi qhuas Vajtswv hais tias, “Yawmsaub txojkev hlub ruaj khov nyob mus ib txhis tsis kawg.” Cov pov thawj tshuab raj nyob ncaj ntawm cov Levi xubntiag. Thiab cov Yixayee sawvdaws sawv ntsug. Mas Xalaumoo ua kevcai tu lub plawv tshav puam uas ncaj ntawm lub qhov rooj tuam tsev kom dawb huv. Nws muab tsiaj ua kevcai hlawv huvsi xyeem thiab muab cov hlab hluas roj hlawv ua kevcai xyeem sib raug zoo rau qhov ntawd, vim lub thaj tooj liab uas Xalaumoo tau ua lawm tsis txaus tso tej uas ua kevcai hlawv huvsi xyeem thiab tej uas ua kevcai xyeem qoob loo thiab tej hlab hluas roj. Zaum ntawd Xalaumoo thiab ib tsoom Yixayee sawvdaws ua kevcai pam noj haus xya hnub. Muaj neeg coob heev tuaj txoos ua ke txij ntua ntawm txojkev uas mus rau lub moos Hama mus txog ntua tus dej Iyi. Mas hnub uas yim lawv tuaj txoos ua ke caiv so rau qhov lawv twb ua kevcai xyeem pub lub thaj rau Vajtswv tau xya hnub thiab ua kevcai pam noj haus xya hnub lawm. Hnub tim nees nkaum peb lub xya hli mas Xalaumoo tso cov pejxeem rov mus tsev. Lawv zoo siab thiab siab xyiv fab vim yog tej kev zoo uas Yawmsaub ua tshwm los rau Davi thiab Xalaumoo thiab rau Yawmsaub haiv neeg Yixayee. Xalaumoo ua tau Yawmsaub lub tuam tsev thiab nws lub tsev tiav tag li no. Txhua yam uas Xalaumoo tau xav tseg tias yuav ua Yawmsaub lub tuam tsev thiab nws lub tsev mas nws ua tau tiav huvsi lawm. Mas Yawmsaub los tshwm rau Xalaumoo thaum hmo ntuj thiab hais rau nws tias, “Kuv twb hnov koj tej lus thov lawm thiab kuv tau xaiv lub chaw no ua lub tsev uas tua tsiaj xyeem rau kuv. Thaum kuv kaw rooj ntug tsis pub kom nag los, lossis kuv hais kom kooj txig los txom fav lub tebchaws lossis tso mob kis los rau hauv kuv haiv neeg, mas yog kuv haiv neeg uas luag hu raws li kuv lub npe txo hwjchim thiab taij thov thiab nrhiav kuv thiab tig ntawm lawv tej kev txhaum kuv yuav nyob saum ntuj mloog thiab yuav zam lawv lub txim thiab yuav kho lawv lub tebchaws kom zoo. Kuv yuav tsa muag ntsia thiab tig ntsej mloog tej lus uas lawv thov ntawm lub chaw no. Rau qhov nimno kuv tau xaiv thiab tu lub tuam tsev no kom dawb huv kom kuv lub npe thiaj nyob hauv ib txhiab ib txhis. Kuv lub qhov muag thiab kuv lub siab yuav nrog nraim lub chaw no mus ib txhis. Hais txog koj, yog koj ua koj lub neej tab meeg kuv ib yam nkaus li koj txiv Davi ua thiab ua txhua yam raws li uas kuv hais kom koj ua, thiab tuav rawv kuv tej kab ke thiab kuv tej kevcai,, mas kuv yuav tsa koj lub zwm txwv nyob ruaj khov raws li kuv tau cog lus tseg rau koj txiv Davi lawm tias, ‘Tsis muaj ib hnub twg uas koj caj ces yuav tu ncua tus txivneej ua vajntxwv kav cov Yixayee li.’ “Tiamsis yog nej thim thiab muab kuv tej kab ke thiab kuv tej lus nkaw uas kuv tau cob rau nej tso tseg, es nej mus ua koom tu thiab pe luag tej dab, mas kuv yuav muab nej rho kiag tawm ntawm lub tebchaws uas kuv tau muab rau nej, thiab kuv yuav muab lub tuam tsev uas kuv tu kom dawb huv rau kuv lub npe nyob lawd laim pov tseg kom ploj ntawm kuv qhov muag. Kuv yuav muab lub tuam tsev ua paj lug rau txhua haiv neeg hais tiag luag ncauj luag lo. Lub tuam tsev no uas zoo nkauj kawg mas txhua tus uas taug kev yuav xav tsis thoob thiab hais tias, ‘Ua cas Yawmsaub ua li ntawd rau lub tebchaws no thiab lub tuam tsev no?’ Ces luag yuav teb tias, ‘Vim yog lawv muab Yawmsaub uas yog lawv tej poj koob yawm txwv tus Vajtswv uas coj lawv tawm hauv Iyi tebchaws los tso pov tseg, es mus tsawv nkaus luag tej dab los pe thiab ua koom tu. Vim li no Yawmsaub thiaj coj tej xwm txheej phem no huvsi los raug lawv.’ ” Xalaumoo siv sijhawm nees nkaum xyoo ua tau Yawmsaub lub tuam tsev thiab ua tau nws lub tsev, mas Xalaumoo mam li kho tej moos uas Hulas tau pub rau nws thiab kom cov Yixayee mus nyob rau hauv. Xalaumoo mus rau lub moos Hamaxaunpa thiab txeeb tau lub moos ntawd. Nws kho lub moos Thamau hauv tebchaws moj sab qhua thiab kho tej moos khaws cuab txhiaj cuab tam cia rau hauv Hama. Nws kho lub moos Npe Hauloo pem roob thiab lub moos Npe Hauloo nruab tiag, ua ob lub moos ruaj khov muaj ntsa loog muaj qhov rooj thiab muaj las rooj. Thiab ua lub moos Npa‑alab thiab ua txhua lub moos uas nws khaws cuab txhiaj cuab tam cia rau hauv, thiab ua tej moos uas nws khaws tej tsheb nees ua rog rau hauv, thiab ua tej moos uas nws cov tub rog caij nees nyob, thiab ua txhua yam uas Xalaumoo xav kom ua rau hauv lub nroog Yeluxalees thiab hauv tebchaws Lenpanoo thiab thoob plaws tej tebchaws uas Xalaumoo kav. Cov Hithai, cov Amaulai, cov Pelixai, cov Hivai thiab cov Yenpu uas tseem tshuav nyob, uas tsis yog neeg Yixayee, mas cov neeg no li noob uas tshuav nyob hauv lub tebchaws uas cov Yixayee tsis tau muab ua puam tsuaj tag ces Xalaumoo yuam ua qhev los txog niaj hnub nimno. Tiamsis cov neeg Yixayee mas Xalaumoo tsis yuam ua qhev. Lawv ua vajntxwv cov tub rog thiab ua nws cov nom tswv thiab ua thawj kav cov tsheb nees ua rog thiab ua nws cov tub rog uas caij nees. Cov no yog vajntxwv Xalaumoo cov nom tswv uas ua hlob huvsi muaj ob puas tsib caug leej, yog cov uas saib cov pejxeem. Xalaumoo coj Falau tus ntxhais ntawm Davi lub nroog mus rau lub tsev uas nws tau ua rau Falau tus ntxhais nyob, vim nws hais tias, “Kuv tus pojniam tsis tsim nyog nyob hauv Yixayee tus vajntxwv Davi lub tsev, rau qhov txhua qhov chaw uas Yawmsaub lub phij xab tau nyob hauv yog tej chaw uas dawb huv lawm.” Xalaumoo ua kevcai hlawv huvsi xyeem rau Yawmsaub saum Yawmsaub lub thaj uas nws tau ua rau ntawm zaj qab khav ntawm lub tuam tsev. Nws pheej xyeem raws li Mauxe tau hais tseg kom xyeem rau hnub Xanpatau thiab hnub hli xiab thiab tej kevcai uas ib xyoo ua peb zaug, yog kevcai noj ncuav tsis xyaw keeb, kevcai xya lub chib so thiab kevcai nyob tsev pheeb suab. Raws li nws txiv Davi tau qhia tseg lawm mas nws thiaj tsa cov pov thawj ua tej pab ua Vajtswv tes haujlwm, thiab tsa cov Levi kom ua lawv tes haujlwm hu nkauj qhuas thiab pab cov pov thawj ua haujlwm raws li uas niaj hnub twb teem cia lawm, thiab tsa cov uas zov tej rooj loog ua tej pab mus zov txhua lub rooj loog. Rau qhov Davi uas yog Vajtswv tus qhev tau hais tseg li ntawd. Lawv thiaj ua txhua yam raws li uas vajntxwv tau hais kom cov pov thawj thiab cov Levi ua uas ntsig txog txhua yam thiab ntsig txog tej txhab nyiaj huvsi. Xalaumoo thiaj ua tau txhua yam tiav tag txij hnub uas pib ua Yawmsaub lub tuam tsev txog hnub uas ua tau tiav. Yog li no Yawmsaub lub tuam tsev thiaj li tiav tag huvsi. Xalaumoo txawm mus rau lub moos Exi‑oo Kenpaw thiab lub moos Elau ntawm ntug dej Hiavtxwv Liab hauv tebchaws Edoo. Hulas txib nws cov tub teg tub taws xa nkoj txwg thiab cov uas txawj tsav nkoj txwg mus rau Xalaumoo, mas lawv thiaj nrog Xalaumoo cov tub nkoj mus txog lub moos Aufi mus thauj tau kub hnyav plaub puas tsib caug tala qhov ntawd los rau vajntxwv Xalaumoo. Thaum tus poj vaj uas kav Senpa tebchaws tau hnov txog Xalaumoo lub meej nthawb, nws txawm tuaj rau Yeluxalees thom Xalaumoo txog ntau yam uas ceeblaj teb tau. Nws coj ib pab tub teg tub taws coob coob nrog nws tuaj, thiab muaj ntxhuav thauj tej txuj lom thiab kub ntau kawg thiab tej qe zeb hlaws muaj nqes. Thaum nws tuaj cuag Xalaumoo lawd, nws thiaj piav txhua yam uas nyob hauv nws lub siab huvsi rau Xalaumoo. Mas Xalaumoo teb txhua yam uas nws nug tau huvsi tsis muaj ib yam uas Xalaumoo yuav tsis paub thiab piav tsis tau rau nws li. Thaum tus poj vaj hauv Senpa pom Xalaumoo lub tswvyim thiab pom lub tsev uas nws tau ua, thiab pom tej zaub mov saum nws lub rooj thiab cov nom tswv uas nrog nws nyob thiab nws cov tub teg tub taws uas tu nws thiab tej cev ris tsho uas lawv hnav, thiab cov uas thiab cawv txiv hmab thiab lawv cev ris tsho, thiab pom tej uas nws muab ua kevcai hlawv xyeem ntawm Yawmsaub lub tuam tsev, mas tus poj vaj ntawd tsis pom qab xav li lawm. Mas nws thiaj hais rau vajntxwv tias, “Tej xov uas kuv nyob hauv kuv lub tebchaws hnov uas hais txog koj tej haujlwm thiab koj lub tswvyim yeej los muaj tseeb tiag. Tiamsis kuv tsis ntseeg tej lus ntawd mus txog thaum kuv tau tuaj cuag thiab kuv lub qhov muag tau pom lawm. Saib maj, tej uas lawv piav koj lub tswvyim loj kawg rau kuv hnov ntawd twb tsis muaj txog ib nrab. Koj tseem zoo tshaj tej lus uas kuv tau hnov lawd. Koj cov neeg tau hmoov zoo lauj! Koj cov tub teg tub taws uas ua haujlwm ntawm koj xubntiag ib txwm thiab hnov koj tej tswvyim plab plaws mas tau hmoov zoo lauj! Qhuas Yawmsaub uas yog koj tus Vajtswv uas txaus siab rau koj thiab tsa koj nyob saum nws lub zwm txwv ua vajntxwv rau Yawmsaub uas yog koj tus Vajtswv. Vim koj tus Vajtswv hlub cov Yixayee thiab xav tias yuav tsa lawv nyob ruaj khov mus ib txhis li, mas nws thiaj tsa koj ua vajntxwv kav lawv kom koj thiaj txiav txim ncaj thiab ua ncaj ncees.” Mas nws txawm muab kub hnyav ib puas nees nkaus tala thiab tej txuj lom ntau kawg thiab tej qe zeb hlaws muaj nqes rau vajntxwv. Tsis muaj txuj lom zoo cuag tej txuj lom uas tus poj vaj hauv Senpa muab rau vajntxwv Xalaumoo no. Dua li ntawd Hulas cov neeg thiab Xalaumoo cov neeg uas thauj kub ntawm lub moos Aufi tuaj, kuj thauj ntoo liab txiv khau tawv thiab tej qe zeb hlaws muaj nqes tuaj thiab. Mas vajntxwv thiaj muab cov ntoo liab txiv khau tawv ua cov ntaiv hauv Yawmsaub lub tuam tsev thiab hauv vajntxwv lub tsev, thiab ua cov nkauj nog ncas me thiab cov nkauj nog ncas loj rau cov hu nkauj. Yeej tsis tau pom dua tej yam uas zoo li ntawd hauv tebchaws Yuda. Vajntxwv Xalaumoo pub txhua yam rau tus poj vaj hauv Senpa raws li uas nws xav yuav thiab raws li nws thov, thiab ntau dhau tej uas nws coj tuaj pub rau vajntxwv. Mas nws thiab nws cov tub teg tub taws txawm rov qab mus rau nws lub tebchaws lawm. Ib xyoos twg mas Xalaumoo tau kub hnyav rau pua rau caum rau tala, tsis xam tej kub uas cov tub lag tub luam coj tuaj, thiab tej vajntxwv uas kav Alanpia tebchaws thiab tej tim xyoob uas kav hauv lub tebchaws coj kub thiab nyiaj tuaj rau Xalaumoo. Vajntxwv Xalaumoo muab kub ntaus ua ob puas daim phiaj loj thaiv, ib daim phiaj mas siv kub hnyav rau pua sekhee ua. Nws muab kub ntaus ua dua peb puas daim phiaj thaiv, ib daim phiaj siv kub hnyav peb puas sekhee. Vajntxwv muab cov phiaj kub ntawd khaws cia hauv lub tsev Hav Zoov Lenpanoo. Vajntxwv muab kaus ntxhw ua ib lub zwm txwv loj kawg li thiab muab cov tseem kub los luam. Lub zwm txwv ntawd muaj rau qeb ntai thiab lub chaw tiag taw yog xuas kub ua lo nkaus rau lub zwm txwv, mas ob sab ntawm lub zwm txwv muaj ob lub chaw tso tes mas muaj ob tug tsov ntxhuav sawv ze ntawm ob lub chaw tso tes ntawd, thiab muaj kaum ob tug tsov ntxhuav txawb rau rau qeb ntai ntawd ob sab huvsi ib qeb ntai ib tug. Lub zwm txwv zoo li no mas tsis tau txeev ua dua rau lwm lub tebchaws li. Tej khob uas vajntxwv Xalaumoo siv haus dej mas puavleej xuas kub ua xwb, thiab tej twj siv hauv lub tsev Hav Zoov Lenpanoo huvsi puavleej yog xuas tseem kub ua xwb. Ncua sijhawm uas Xalaumoo nyob mas saib nyiaj yam li tsis muaj nqes dabtsi li. Rau qhov vajntxwv tej nkoj txwg nrog Hulas cov neeg mus rau lub moos Thasi. Mas Thasi cov nkoj yuav thauj kub thauj nyiaj thauj kaus ntxhw thauj liab thauj noog yaj yuam peb xyoos tuaj ib zaug. Yog li no mas vajntxwv Xalaumoo thiaj li muaj nyiaj txiag thiab muaj lajlim tswvyim plab plaws ntau dua txhua tus vajntxwv uas nyob hauv ntiajteb no. Txhua tus vajntxwv thoob ntiajteb xav tuaj cuag Xalaumoo xav hnov nws tej tswvyim plab plaws uas Vajtswv pub rau nws. Txhua tus kuj coj tshav ntuj tuaj pub yog tej uas xuas nyiaj xuas kub ua, tej tsoos tsho, tej cuab yeej ua rog, tej txuj lom, nees thiab luj txwv tuaj, niaj xyoo muaj li no. Xalaumoo muaj plaub txhiab kem nkuaj rau nees thiab rau cov tsheb nees ua rog thiab muaj tub rog caij nees ib vam ob txhiab leej uas nws kom ib txhia nyob rau hauv tej moos uas nws npaj rau tej tsheb nees ua rog thiab ib txhia nrog vajntxwv nyob hauv lub nroog Yeluxalees. Xalaumoo kav tej vajntxwv huvsi txij ntua tus niag dej Yufeti mus txog Filixatee tebchaws thiab txog ntawm tebchaws Iyi ciam teb. Vajntxwv saib nyiaj tsis muaj nqes rau hauv lub nroog Yeluxalees yam li tej pob zeb, thiab ua rau ntoo ciab muaj ntau yam nkaus li tej ntoo txiv cev hauv tej pov roob Sefela. Thiab lawv yuav nees hauv Iyi tebchaws thiab hauv txhua lub tebchaws los rau Xalaumoo. Lwm yam haujlwm uas Xalaumoo ua thiab txhua yam uas nws ua txij thaum pib mus txog thaum kawg twb muab sau cia rau hauv Nathas uas ua xibhwb cev Vajtswv lus phau ntawv keeb kwm, thiab hauv phau ntawv uas sau Vajtswv tej lus uas Ahiya uas yog neeg hauv Silau hais, thiab hauv phau ntawv uas sau tej lus uas Idau tus uas hais tom hauv ntej ua yog toog pom ntsig txog Nenpa tus tub Yelaunpau‑as. Xalaumoo nyob hauv Yeluxalees ua vajntxwv kav cov Yixayee huvsi tau plaub caug xyoo. Xalaumoo kuj tuag mus nrog nws tej poj koob yawm txwv nyob, thiab lawv muab nws log rau hauv nws txiv Davi lub nroog, ces nws tus tub Lehaunpau‑as ua vajntxwv kav nyob nws chaw. Lehaunpau‑as mus rau ntawm lub moos Sekhee, rau qhov cov Yixayee sawvdaws tau tuaj rau ntawm Sekhee es yuav tsa nws ua vajntxwv. Thaum Nenpa tus tub Yelaunpau‑as tau hnov xov, rau thaum nws tseem nyob hauv Iyi tebchaws uas nws tau khiav vajntxwv Xalaumoo mus nyob, mas Yelaunpau‑as txawm rov ntawm Iyi tebchaws los. Lawv txawm txib neeg mus hu nws, mas Yelaunpau‑as thiab ib tsoom Yixayee sawvdaws tuaj hais rau Lehaunpau‑as tias, “Koj txiv tau ua tus quab hnyav heev rau peb. Yog li ntawd nimno thov koj ua rau tej haujlwm hnyav uas koj txiv kom peb ua thiab nws tus quab hnyav uas nyob saum peb ntawd sib zog, mas peb yuav ua nuam rau koj.” Lehaunpau‑as hais rau lawv tias, “Peb hnub saum no nej rov tuaj cuag kuv ib zaug thiab.” Cov pejxeem txawm rov mus lawm. Vajntxwv Lehaunpau‑as mus sablaj rau cov laus uas tu nws txiv Xalaumoo rau thaum nws txiv tseem muaj txojsia nyob hais tias, “Nej yuav qhia kuv teb li cas rau cov pejxeem no?” Mas lawv hais rau nws tias, “Yog koj hlub cov pejxeem no thiab ua tej uas hum lawv siab thiab teb tej lus zoo rau lawv, mas lawv yuav ua koj cov qhev mus ib txhis li.” Tiamsis nws tsis quav ntsej tej lus uas cov laus qhia ntawd, nws txawm mus sablaj rau cov tub hluas uas nrog nws hlob ib phaum thiab ua haujlwm rau nws. Nws hais rau lawv tias, “Nej yuav qhia kom peb teb li cas rau cov pejxeem no uas tau hais rau kuv tias, ‘Thov koj ua rau tus quab uas koj txiv muab tso rau saum peb kom sib zog?’ ” Cov tub hluas uas nrog nws hlob ib phaum txawm hais rau nws tias, “Koj hais li no rau cov pejxeem uas hais rau koj tias, ‘Koj txiv tau ua rau peb tus quab hnyav, thov koj ua kom sib zog.’ Mas koj cia li hais rau lawv li no, ‘Kuv tus nyuag ntiv tes rwg qab tseem loj dua kuv txiv lub duav. Txawm yog kuv txiv tau tso tus quab hnyav rau saum nej los kuv yuav tsav ntxiv kom tus quab ntawd hnyav dua thiab. Kuv txiv xuas pas nplawm nej tiamsis kuv yuav xuas raub ris teb nplawm nej.’ ” Yelaunpau‑as thiab cov pejxeem sawvdaws thiaj tuaj cuag Lehaunpau‑as rau hnub peb raws li vajntxwv tau hais tias, “Rov qab tuaj cuag kuv rau hnub peb.” Mas vajntxwv teb nyaum kawg li rau lawv, nws tsis quav ntsej tej lus uas cov laus qhia rau nws. Vajntxwv Lehaunpau‑as hais rau lawv raws li cov tub hluas tau qhia rau nws hais tias, “Kuv txiv ua rau nej tus quab hnyav tiamsis kuv yuav tsav ntxiv kom tus quab ntawd hnyav dua thiab. Kuv txiv xuas pas nplawm nej tiamsis kuv yuav xuas raub ris teb nplawm nej.” Vajntxwv thiaj tsis mloog cov pejxeem tej lus, rau qhov tej xwm txheej no yog los ntawm Vajtswv xwv Yawmsaub thiaj ua tau tiav raws li tej lus uas nws tau txib Ahiya uas yog neeg hauv Silau hais rau Nenpa tus tub Yelaunpau‑as. Thaum cov Yixayee sawvdaws pom tias vajntxwv tsis mloog lawv tej lus, lawv thiaj teb vajntxwv tias, “Peb muaj feem dabtsi rau hauv Davi lawm? Peb tsis muaj qub txeeg qub teg hauv Yexi tus tub li lawm. Yixayee 'e, nyias rov mus rau nyias lub tsev ntaub. Au Davi, koj cia li saib xyuas koj caj ces xwb lauj!” Mas cov Yixayee sawvdaws txawm rov mus rau nyias vaj nyias tsev lawm. Mas Lehaunpau‑as tsuas kav cov Yixayee uas nyob rau hauv tej moos hauv Yuda tebchaws xwb. Mas vajntxwv Lehaunpau‑as txib Hadaulas uas yog tus saib xyuas cov neeg raug yuam ua haujlwm mus xyuas cov Yixayee mas lawv xuas pob zeb ntaus nws tuag. Ces vajntxwv Lehaunpau‑as txawm maj nce nws li tsheb ua rog khiav mus rau hauv Yeluxalees. Yixayee thiaj li fav xeeb rau Davi caj ces los txog niaj hnub nimno. Thaum Lehaunpau‑as mus rau hauv Yeluxalees lawd nws txawm sau cov Yuda thiab xeem Npeeyamee sawvdaws tuaj ua ke, huvsi muaj 180,000 leej tub rog uas txawj tshaj plaws es yuav mus ua rog rau Yixayee thiab muab tebchaws rov los rau Lehaunpau‑as kav. Tiamsis Vajtswv hais lus tuaj rau Semaya uas yog Vajtswv tus neeg tias, “Cia li hais rau Xalaumoo tus tub Lehaunpau‑as uas ua vajntxwv kav Yuda thiab hais rau cov Yixayee huvsi hauv Yuda thiab Npeeyamee tebchaws tias, ‘Yawmsaub hais li no tias, Nej tsis txhob nce mus ua rog rau nej cov kwvtij. Sawvdaws cia li rov mus nyias vaj nyias tsev, rau qhov tej xwm txheej no yog los ntawm kuv los.’ ” Yog li no lawv thiaj mloog Yawmsaub tej lus thiab rov mus, tsis tau mus ua rog rau Yelaunpau‑as. Lehaunpau‑as nyob hauv Yeluxalees thiab nws ua tej moos rau hauv Yuda tebchaws tiv thaiv yeeb ncuab. Nws kho tej moos no yog Npelehee, Edas, Thekhau‑a, Npexuv, Xaukhau, Adulas, Ka, Malesa, Xi, Adaula‑i, Lakhi, Axekha, Xaula, Aiyaloo thiab Heploo, yog tej moos uas muaj ntsa loog nyob hauv Yuda thiab Npeeyamee tebchaws. Nws ua rau tej moos uas muaj ntsa loog ntawd khov kho thiab tsa kom muaj cov thawj tub rog nyob hauv, thiab muab zaub mov, roj thiab cawv txiv hmab khaws cia rau hauv. Nws khaws tej daim phiaj hlau thaiv thiab tej hmuv cia rau hauv tej moos ntawd huvsi, thiab ua rau tej moos ntawd ruaj khov. Mas nws thiaj kav tau Yuda thiab Npeeyamee cia. Cov pov thawj thiab cov Levi uas nyob lawv tej chaw txhua qhov hauv Yixayee tebchaws tuaj Lehaunpau‑as tog. Cov Levi tso lawv tej tshav zaub thiab lawv tej vaj tse tseg thiab cia li mus nram Yuda tebchaws thiab Yeluxalees, vim yog Yelaunpau‑as thiab nws cov tub ntiab lawv tawm qhov uas ua Yawmsaub li pov thawj, thiab tsa dua ib co pov thawj teev dab ntawm tej chaw siab thiab teev dab tshis thiab teev tej dab mlom thav nyuj uas nws ua. Ces cov uas muab siab rau nrhiav Yawmsaub uas yog cov Yixayee tus Vajtswv kuj raws cov Levi qab tawm hauv Yixayee txhua xeem mus rau nram Yeluxalees xwv thiaj tau tua tsiaj xyeem rau Yawmsaub uas yog lawv tej poj koob yawm txwv tus Vajtswv. Lawv tau ua rau Yuda tebchaws muaj zog thiab lawv txhawb Xalaumoo tus tub Lehaunpau‑as nyob ruaj khov tau peb xyoos, rau qhov lawv ua lub neej raws nraim li Davi thiab Xalaumoo tau peb xyoos. Lehaunpau‑as yuav Mahala uas yog Davi tus tub Yelimau li ntxhais ua pojniam. Mahala niam yog Anpiha‑i uas yog Yexi tus tub Elia li ntxhais. Nws yug tau cov tub no rau Lehaunpau‑as, yog Ye‑u, Semaliya thiab Xahas. Los rau tom qab Lehaunpau‑as yuav Axaloo tus ntxhais Ma‑akha ua pojniam mas yug tau Anpiya, Athai, Xixas thiab Selaumi. Lehaunpau‑as nyiam Axaloo tus ntxhais Ma‑akha heev dua nws cov pojniam thiab cov hluas nkauj uas nws kav huvsi. Nws yuav kaum yim tus pojniam thiab kav rau caum tus hluas nkauj, muaj nees nkaum yim tus tub muaj rau caum tus ntxhais. Lehaunpau‑as tsa Anpiya uas yog Ma‑akha tus tub ua thawj hauv nws cov kwvtij rau qhov nws npaj siab yuav tsa tus tub ntawd ua vajntxwv. Nws muaj tswvyim tu txhua yam thiab muab nws cov tub faib mus nyob thoob plaws Yuda tebchaws thiab Npeeyamee tebchaws nyob rau hauv txhua lub moos uas muaj ntsa loog. Nws pub zaub mov nplua mias rau lawv thiab yuav ntau tus pojniam rau lawv. Thaum Lehaunpau‑as ua vajntxwv kav lub tebchaws ruaj khov thiab muaj zog lawm, nws txawm tso Yawmsaub txoj kevcai tseg, thiab cov Yixayee sawvdaws kuj muab tso tseg ib yam nkaus. Xyoo tsib uas Lehaunpau‑as ua vajntxwv kav mas Sisab uas ua vajntxwv hauv Iyi tebchaws txawm tuaj ua rog rau lub nroog Yeluxalees, vim yog lawv tso Yawmsaub tseg, muaj tsheb nees ua rog ib txhiab ob puas lub thiab tub rog caij nees rau vam leej. Thiab cov tub rog uas nrog nws tuaj nram Iyi tuaj suav tsis txheeb, yog cov Linpia, cov Xukhi‑i thiab cov neeg Khuj. Nws txeeb tau Yuda tej moos uas muaj ntsa loog tag thiab tuaj rau ntawm Yeluxalees. mas Semaya uas yog xibhwb cev Vajtswv lus tuaj cuag Lehaunpau‑as thiab Yuda cov thawj uas tuaj txoos ua ke rau hauv Yeluxalees vim yog ntshai Sisab thiab hais rau lawv tias, “Yawmsaub hais li no tias, ‘Nej tau tso kuv tseg, kuv thiaj tso nej tseg rau hauv Sisab txhais tes.’ ” Ces Yixayee cov thawj thiab vajntxwv thiaj li txo hwjchim thiab hais tias, “Yawmsaub ua ncaj ncees.” Thaum Yawmsaub pom tias lawv txo hwjchim, Yawmsaub hais lus tuaj rau Semaya tias, “Lawv txo hwjchim lawm, kuv yuav tsis ua kom lawv puam tsuaj tiamsis kuv yuav pab lawv dim ib qho xwb mas kuv tsis siv Sisab txhais tes nchuav kuv txojkev npau taws rau saum Yeluxalees. Txawm li cas los lawv tseem yuav ua Sisab li qhev kom lawv thiaj li paub tias qhov uas tu kuv thiab tu tej vajntxwv hauv ib tsoom tebchaws txawv li cas.” Iyi tus vajntxwv Sisab txawm nce tuaj ua rog rau Yeluxalees. Nws muab tej nyiaj txiag qhov txhia chaw hauv Yawmsaub lub tuam tsev thiab hauv vajntxwv lub tsev lws huvsi coj mus. Nws kuj coj tej daim phiaj kub thaiv uas Xalaumoo ua huvsi mus. Mas vajntxwv Lehaunpau‑as ho muab tooj liab ua tej daim phiaj los siv hloov chaw thiab muab cov daim phiaj ntawd cob rau cov thawj rog uas zov vajntxwv lub qhov rooj. Txhua zaus uas vajntxwv mus rau hauv Yawmsaub lub tuam tsev cov tub rog kuj tuav cov daim phiaj ntawd tawm tuaj thiab coj rov qab mus khaws cia rau hauv lub tsev uas cov tub rog zov khuav nyob. Thaum Lehaunpau‑as txo hwjchim lawm, Yawmsaub txojkev npau taws kuj thim rov qab tsis ua kom puam tsuaj tag huvsi, thiab Yuda tseem nyob zoo. Vajntxwv Lehaunpau‑as thiaj nyob ruaj rau hauv Yeluxalees thiab tseem kav tebchaws mus. Thaum Lehaunpau‑as sawv ua vajntxwv kav nws hnub nyoog muaj plaub caug ib xyoos. Nws nyob hauv Yeluxalees kav tau kaum xya xyoo, yog lub nroog uas Yawmsaub xaiv hauv txhua xeem Yixayee cia ua lub chaw rau nws lub npe nyob. Nws niam npe hu ua Na‑ama uas yog neeg Asmoo. Nws tau ua tej uas phem rau qhov nws tsis muab siab rau nrhiav Yawmsaub. Lehaunpau‑as tej haujlwm txij thaum pib mus txog thaum kawg mas twb muab sau cia rau hauv Semaya uas yog xibhwb cev Vajtswv lus thiab Idau uas hais pom tom hauv ntej phau ntawv keeb kwm. Lehaunpau‑as thiab Yelaunpau‑as pheej sib ua rog tsis tu li. Lehaunpau‑as tuag mus nrog nws tej poj koob yawm txwv nyob. Lawv muab nws log rau hauv Davi lub nroog. Mas nws tus tub Anpiya sawv nws chaw ua vajntxwv kav. Xyoo kaum yim uas Yelaunpau‑as ua vajntxwv kav mas Anpiya pib ua vajntxwv kav Yuda tebchaws. Nws nyob hauv Yeluxalees kav tau peb xyoos. Nws niam npe hu ua Mikhaya uas yog Uli‑ee uas nyob hauv Kinpe‑a li ntxhais. Anpiya thiab Yelaunpau‑as pheej sib ua rog. Anpiya coj ib pab tub rog siab loj siab tuab, muaj 400,000 leej uas txawj tshaj plaws tawm mus ua rog. Yelaunpau‑as npaj nws cov tub rog mus ua rog rau Anpiya, muaj 800,000 leej tub rog uas muaj zog thiab txawj tshaj plaws. Anpiya txawm sawv ntsug saum lub roob Xemala‑i uas nyob pem toj siab Efa‑i tebchaws thiab hais tias, “Yelaunpau‑as thiab cov Yixayee sawvdaws 'e, cia li tig ntsej mloog kuv hais. Nej tseem tsis paub tias Yawmsaub uas yog Yixayee tus Vajtswv tau cog lus ruaj khov tias yuav pub Davi thiab nws caj ces ua vajntxwv kav Yixayee tebchaws mus ib txhis lov? Txawm li ntawd los Nenpa tus tub Yelaunpau‑as uas yog Davi tus tub Xalaumoo li ib tug tub teg tub taws tseem fav xeeb sawv twv nws tus tswv. Muaj neeg loj leeb tsis tsheej haj tuaj koom nrog Yelaunpau‑as fav xeeb rau Xalaumoo tus tub Lehaunpau‑as rau thaum Lehaunpau‑as tseem hluas lub siab ywj fab ywj fwj thiaj tiv tsis tau lawv. “Nimno nej xav tias yuav tawm tsam Yawmsaub lub tebchaws uas nyob hauv Davi caj ces txhais tes, rau qhov nej yog pab uas coob kawg thiab muaj tej dab mlom thav nyuj kub uas Yelaunpau‑as nchuav rau nej. Nej tsis tau ntiab Yawmsaub cov pov thawj uas yog Aloo caj ces thiab cov Levi khiav lov, thiab tsa pov thawj rau nej ib yam li neeg lwm lub tebchaws? Leejtwg coj ib tug thav txiv nyuj thiab xya tus txiv yaj tuaj ua kevcai tu kom nws tus kheej dawb huv thiaj tau ua pov thawj ua haujlwm rau tej uas tsis yog Vajtswv. Tiamsis peb cov, Yawmsaub yog peb tus Vajtswv thiab peb tsis tau tso nws tseg. Peb muaj pov thawj uas yog Aloo caj ces ua koom tu Yawmsaub thiab muaj cov Levi pab lawv ua haujlwm. Lawv niaj tagkis thiab niaj hmo muab tsiaj ua kevcai hlawv xyeem thiab hlawv hmoov tshuaj tsw qab thiab muab cov ncuav txawb rau saum lub rooj dawb huv ntawm Yawmsaub xubntiag thiab tu lub teeb kub kom tej teeb cig rau txhua hmo. Peb tuav rawv Yawmsaub uas yog peb tus Vajtswv tej lus nkaw, tiamsis nej twb tso nws tseg lawm. Saib maj, Vajtswv nrog nraim peb coj peb lub hauv ntej, thiab nws cov pov thawj muaj raj xyu tshuab txhib ua rog rau nej. Yixayee caj ces 'e, tsis txhob tawm tsam Yawmsaub uas yog nej tej poj koob yawm txwv tus Vajtswv, rau qhov nej yuav kov tsis yeej.” Yelaunpau‑as tau tso ib txhia tub rog lug mus zov cov Yuda qub qab. Yog li no nws cov tub rog thiaj nyob ntawm cov Yuda hauv ntej thiab zov tom lawv qub qab. Thaum cov Yuda tsa muag ntsia ua ciav kev ua rog nyob ntawm lawv hauv ntej thiab nyob tom lawv qub qab. Lawv txawm hu thov Yawmsaub thiab cov pov thawj tshuab raj xyu. Cov Yuda txawm qw lub suab ua rog nrov. Thaum cov Yuda qw nrov, Vajtswv ua rau Yelaunpau‑as thiab cov Yixayee sawvdaws swb kiag Anpiya thiab cov Yuda. Cov Yixayee thiaj khiav cov Yuda thiab Vajtswv muab lawv cob rau hauv cov Yuda txhais tes. Anpiya thiab nws cov tub rog kuj tua cov Yixayee tuag coob kawg, cov Yixayee tuag 500,000 leej tub rog uas txawj tshaj plaws. Yog li no cov Yixayee thiaj swb kiag zaum ntawd thiab cov Yuda kov yeej, rau qhov lawv vam khom Yawmsaub uas yog lawv tej poj koob yawm txwv tus Vajtswv. Thiab Anpiya raws caum Yelaunpau‑as thiab txeeb tau tej moos no ntawm nws, yog lub moos Npe‑ee, lub moos Yesana, lub moos Efoo, thiab tej zej zog uas nyob ib ncig tej moos ntawd. Yelaunpau‑as tsis rov muaj hwjchim li qub tag Anpiya sim neej. Thiab Yawmsaub ntaus Yelaunpau‑as, nws thiaj tuag lawm. Tiamsis Anpiya muaj hwjchim loj zuj zus. Nws yuav kaum plaub tug pojniam thiab muaj nees nkaum ob tug tub muaj kaum rau tus ntxhais. Lwm yam haujlwm uas Anpiya ua, tej uas nws ua thiab tej uas nws hais twb muab sau cia rau hauv Idau uas yog xibhwb cev Vajtswv lus phau ntawv lawm. Anpiya txawm tuag mus nrog nws tej poj koob yawm txwv nyob, lawv muab nws log rau hauv Davi lub nroog. Nws tus tub Axa sawv nws chaw ua vajntxwv kav. Thaum Axa ua vajntxwv lub tebchaws so tsis ua rog tau kaum xyoo. Axa ua tej uas Yawmsaub uas yog nws tus Vajtswv pom tias zoo thiab raug cai. Nws rhuav tshem tej thaj teev lwm haiv neeg tej dab thiab tej chaw siab, thiab tsoo tej ncej teev dab thiab ntov tej ncej dab Asela pov tseg, thiab hais kom cov Yuda nrhiav Yawmsaub uas yog lawv tej poj koob yawm txwv tus Vajtswv, thiab tuav rawv nws txoj kevcai thiab nws tej lus nkaw. Thiab nws rhuav tshem tej chaw siab teev dab thiab tej thaj hlawv hmoov xyab hauv Yuda txhua lub moos pov tseg. Mas nws thiaj kav lub tebchaws nyob tus yees. Nws tsim ntsa loog rau tej moos hauv Yuda tebchaws, rau qhov lub tebchaws nyob tus yees. Nws tsis tau ua rog rau ncua sijhawm ntawd, vim yog Yawmsaub pub nws tau so tsis ua rog. Nws hais rau cov Yuda tias, “Cia peb tsim kho tej moos no, xov ntsa loog thiab ua chaw tsom faj thiab ua rooj loog thiab las rooj. Lub tebchaws tseem yog peb li vim yog peb tau nrhiav Yawmsaub uas yog peb tus Vajtswv. Peb tau nrhiav nws, nws thiaj pub peb tau so tus yees rau txhua fab.” Lawv thiaj li tsim tej ntawd thiab vam meej tuaj. Axa muaj tub rog hauv Yuda tebchaws 300,000 leej tuav rawv daim phiaj hlau loj thiab hmuv, thiab muaj tub rog hauv Npeeyamee tebchaws 280,000 leej tuav rawv phiaj hlau thiab txawj tua hneev, puavleej yog tub rog siab loj siab tuab. Xelag uas yog neeg Khuj kuj tuaj ua rog rau lawv, nws muaj tub rog 1,000,000 leej thiab tsheb nees ua rog peb puas lub tuaj rau ntawm lub moos Malesa. Axa txawm mus ua rog rau nws mas lawv ob tog npaj chaw ua rog rau hauv lub hav Xefatha ntawm lub moos Melesa. Mas Axa thov hu Yawmsaub uas yog nws tus Vajtswv tias, “Au Yawmsaub, tsis muaj leejtwg pab tau yam li koj hauv txojkev ua rog uas ib tog muaj zog ib tog tsis muaj zog. Au Yawmsaub uas yog peb tus Vajtswv, thov koj pab peb rau qhov peb vam khom koj thiab peb tuaj tawm tsam haiv neeg coob heev no hauv koj lub npe. Au Yawmsaub, koj yog peb tus Vajtswv, thov tsis txhob cia neeg kov yeej koj.” Yawmsaub thiaj ua rau cov neeg Khuj swb Axa thiab cov Yuda, cov neeg Khuj thiaj khiav mus lawm. Axa thiab nws cov tub rog raws caum lawv mus txog lub moos Kelas, mas cov neeg Khuj raug tua tuag tag tsis tshuav ib tug ciaj li, rau qhov lawv tawg swb kiag Yawmsaub thiab nws pab tub rog. Cov Yuda txeeb tau lawv tej qhov txhia chaw ntau kawg li coj mus. Lawv kuj ntaus txhua lub moos uas nyob ib ncig ntawm Kelas rau qhov Yawmsaub ua rau luag ntshai kawg li. Lawv lws txhua lub moos ntawd rau qhov muaj ntau yam uas txeeb tau hauv tej moos ntawd. Lawv ntaus tej neeg yug tsiaj tej tsev ntaub thiab coj tej yaj tej ntxhuav coob kawg li mus. Ces lawv txawm rov los rau hauv Yeluxalees lawm. Vajtswv tus Ntsuj Plig los nyob hauv Axaliya uas yog Aude tus tub, nws txawm tawm mus ntsib Axa thiab hais rau nws tias, “Axa thiab cov Yuda thiab cov Npeeyamee sawvdaws, cia li mloog kuv hais. Yawmsaub nrog nraim nej rau thaum nej nrog nraim nws. Yog nej nrhiav nws nej yuav ntsib nws, tiamsis yog nej tso nws tseg nws yuav tso nej tseg. Ntev los lawm cov Yixayee tsis yuav tus Vajtswv uas tseeb thiab tsis muaj ib tug pov thawj uas txawj qhia thiab tsis muaj txoj kevcai. Tiamsis thaum lawv raug kev txom nyem nyuaj siab lawv tig los rau ntawm Yawmsaub uas yog cov Yixayee tus Vajtswv, lawv nrhiav nws thiab ntsib nws. Lub sijhawm ntawd cov uas tawm mus thiab cov uas nkag los yeej tsis tau txojkev kaj siab li rau qhov muaj kev kub ntxhov ntau heev rau cov neeg sawvdaws uas nyob hauv tej tebchaws Lawv tawg ua sab ua sua, ib lub tebchaws tawm tsam ib lub tebchaws, ib lub moos tawm tsam ib lub moos, vim yog Vajtswv tso txhua yam kev txom nyem nyuaj siab los raug lawv. Tiamsis nej, mas cia li ua siab tuab. Tsis txhob cia nej txhais tes tsaug leeg, rau qhov tej haujlwm uas nej ua nej yuav tau nqe zog.” Thaum Axa hnov tej lus uas Aude tus tub Axaliya cev rau nws lawd, nws txawm muaj siab loj siab tuab thiab muab tej dab mlom uas qias vuab tsuab thoob plaws Yuda tebchaws thiab Npeeyamee tebchaws thiab hauv tej moos uas nws txeeb tau pem toj siab Efa‑i tebchaws rhuav pov tseg huvsi, thiab nws kho Yawmsaub lub thaj uas nyob ntawm qab khav uas mus rau hauv Yawmsaub lub tuam tsev. Thiab nws sau kiag cov Yuda thiab cov Npeeyamee sawvdaws thiab cov Efa‑i, cov Manaxe thiab cov Xime‑oo uas tuaj nrog lawv nyob, vim yog muaj neeg coob coob tsiv hauv Yixayee tebchaws tuaj rau ntawm nws rau thaum lawv pom tias Yawmsaub uas yog nws tus Vajtswv nrog nraim nws. Lawv tuaj txoos ua ke rau hauv Yeluxalees rau lub peb hlis xyoo kaum tsib uas Axa ua vajntxwv kav. Hnub ntawd lawv muab tej tsiaj uas txeeb tau los rho ib txhia los xyeem rau Yawmsaub, yog xya pua tus nyuj thiab xya txhiab tus yaj. Thiab lawv cog lus tseg tias lawv yuav nrhiav Yawmsaub uas yog lawv tej poj koob yawm txwv tus Vajtswv kawg siab kawg ntsws, thiab hais tias leejtwg tsis yeem nrhiav Yawmsaub uas yog cov Yixayee tus Vajtswv mas tus ntawd yuav raug muab tua tuag, tsis hais menyuam neeg laus pojniam txivneej huvsi. Lawv tsa suab nrov cog lus twv rau Yawmsaub thiab qw nrov nrov thiab tshuab raj xyu thiab raj kub yaj. Cov Yuda sawvdaws zoo siab xyiv fab rau tej lus cog tseg ntawd rau qhov lawv tau cog lus twv kawg siab kawg ntsws thiab nrhiav Yawmsaub kawg lawv lub siab ntshaw thiab lawv kuj ntsib nws, thiab Yawmsaub pub lawv tau so tus yees rau txhua fab. Txawm yog nws niam Ma‑akha los vajntxwv Axa muab hle tsis pub nyob lub rooj poj vaj lawm, rau qhov nws niam tau ua ib tug dab mlom qias vuab tsuab los teev tus dab Asela. Thiab Axa muab nws niam tus dab mlom ntawd ntov tsoo coj mus hlawv pov tseg rau ntawm lub hav Khiloo, tiamsis tsis tau rhuav tshem tej chaw siab teev dab hauv cov Yixayee. Txawm li ntawd los nws lub siab tsis muaj ib qho chaw thuam li mus tag nws sim neej uas ua vajntxwv. Nws muab tej nyiaj tej kub tej twj siv uas nws thiab nws txiv tau yeem lus xyeem lawd coj los cia rau hauv Vajtswv lub tuam tsev. Mas tsis muaj kev ua rog mus txog xyoo peb caug tsib uas Axa ua vajntxwv kav. Xyoo peb caug rau uas Axa ua vajntxwv kav mas cov Yixayee tus vajntxwv Npa‑asa tuaj ua rog rau cov Yuda. Nws ua lub moos Lama los tav kev tsis pub ib tug nkag mus cuag tau cov Yuda tus vajntxwv Axa thiab tsis pub ib tug tawm tau. Ces Axa txawm muab tej nyiaj tej kub hauv tej txhab Yawmsaub lub tuam tsev thiab hauv vajntxwv lub tsev ib txhia xa mus rau Alas tus vajntxwv Npeehada uas nyob hauv lub nroog Damaxaka, thiab hais tias, “Thov koj nrog kuv cog lus sib raug zoo ib yam li kuv txiv thiab koj txiv txeev ua los lawd. Kuv xa cov nyiaj thiab kub no tuaj rau koj es thov koj mus rhuav tej lus uas nrog Yixayee tus vajntxwv Npa‑asa cog lus sib raug zoo lawd tseg, xwv nws thiaj thim tub rog ntawm kuv mus.” Ces Npeehada kuj mloog vajntxwv Axa hais. Nws txawm tso thawj tub rog mus ntaus Yixayee tej moos, mas lawv ntaus yeej lub moos Iyoo, Daj, Anpeema‑i, thiab tej moos uas khaws qhov txhia chaw cia hauv Nathali tebchaws huvsi. Thaum Npa‑asa hnov tej xwm ntawd, nws txawm tseg tsis ua lub moos Lama thiab tso nws tes haujlwm tseg. Ces vajntxwv Axa txawm coj cov Yuda sawvdaws mus muab tej pob zeb thiab tej ntoo uas Npa‑asa ua lub moos Lama ntawd coj los tsim kho lub moos Kenpa thiab Mixapa. Thaum ntawd Hanani uas hais pom tom hauv ntej tuaj cuag Yuda tus vajntxwv Axa thiab hais rau nws tias, “Vim koj vam khom Alas tus vajntxwv tsis vam khom Yawmsaub uas yog koj tus Vajtswv, yog li no Alas tus vajntxwv cov tub rog thiaj dim hauv koj txhais tes lawm. Cov neeg Khuj thiab cov neeg Linpia tsis yog pab tub rog uas coob kawg muaj tsheb ua rog thiab tub rog caij nees coob kawg lov? Txawm li cas los vim koj vam khom Yawmsaub, nws thiaj muab lawv rau hauv koj txhais tes. Rau qhov Yawmsaub mus mus los los qhov muag ntsia ntsoov thoob plaws lub ntiajteb kom thiaj ua nws lub hwjchim tshwm los pab cov uas lub siab xib rau nws. Qhov no koj ua ruam kawg li, rau qhov txij no mus koj yuav muaj kev ua rog.” Ces Axa txawm chim rau tus uas hais pom tom hauv ntej ntawd thiaj muab nws ntes kaw rau hauv tsev lojfaj, rau qhov nws npau taws heev rau qhov uas tus xibhwb hais li ntawd. Axa kuj tsim txom cov pejxeem qee leej heev rau lub sijhawm ntawd. Axa tej haujlwm txij thaum pib mus txog thaum kawg mas twb muab sau cia rau hauv phau ntawv uas hais txog Yuda thiab Yixayee tej vajntxwv. Xyoo peb caug cuaj uas Axa ua vajntxwv kav, nws txawm mob nws txhais kotaw, mas nws tus mob loj heev tuaj. Txawm yog nws mob los nws kuj tsis nrhiav Yawmsaub nws nrhiav tej Kws tshuaj pab xwb. Axa txawm tuag mus nrog nws tej poj koob yawm txwv nyob, nws tuag rau thaum nws ua vajntxwv kav tau plaub caug ib xyoos. Lawv muab nws log rau hauv lub qhov ntxa uas nws tho rau nws hauv Davi lub nroog. Lawv muab nws lub cev tuag tso rau saum lub txaj uas pleev cov tshuaj tsw qab puv nkaus uas yog tus Kws tov tshuaj twb tov cia lawd. Thiab lawv rauv ib cub tawg loj heev ua koob meej rau nws. Axa tus tub Yehausafa sawv nws chaw ua vajntxwv kav Yuda thiab cuab zog npaj tawm tsam cov Yixayee. Nws xa tub rog nyob rau hauv Yuda txhua lub moos uas muaj ntsa loog thiab tsa tub rog mus zov thoob plaws Yuda tebchaws thiab hauv Efa‑i tej moos uas nws txiv Axa twb txeeb tau lawd. Yawmsaub nrog nraim Yehausafa nyob rau qhov Yehausafa taug nraim nws txiv txojkev uas thaum nws txiv pib ua vajntxwv, nws tsis nrhiav teev tej dab Npa‑as, nws nrhiav Vajtswv uas yog nws txiv tus Vajtswv thiab ua lub neej raws li Vajtswv tej lus nkaw, nws tsis ua raws li cov Yixayee ua. Vim li no Yawmsaub thiaj pub nws kav tau lub tebchaws nyob ruaj khov. Mas tag nrho cov Yuda coj tshav ntuj tuaj pub rau Yehausafa, nws thiaj nplua nuj heev thiab muaj koob meej. Nws muaj siab loj siab tuab ua raws li Yawmsaub txojkev. Thiab nws rhuav tshem tej chaw siab uas teev dab thiab tej ncej dab Asela hauv Yuda tebchaws mus. Xyoo peb uas nws ua vajntxwv kav, nws txib nws cov thawj uas yog Npeeha‑i, Aunpadiya, Xekhaliya, Nethanee thiab Mikhaya mus qhia rau hauv Yuda tej moos. Thiab cov Levi no kuj nrog lawv mus, yog Semaya, Nethaniya, Xenpadiya, Axahee, Semilamau, Yehaunathas, Adauniya, Thaunpiya thiab Thau‑adauniya thiab nrog cov Levi no ua ke yog Elisama thiab Yehaulas uas ua pov thawj. Lawv coj Yawmsaub phau ntawv kevcai mus qhuab qhia thoob plaws Yuda tebchaws. Lawv mus txhua nrho Yuda tej moos thiab qhia cov pejxeem. Yawmsaub ua rau txhua lub tebchaws uas nyob ib ncig Yuda ntshai heev, lawv thiaj tsis tuaj ua rog rau Yehausafa. Cov Filixatee qee leej coj tshav ntuj tuaj pub rau Yehausafa thiab coj nyiaj tuaj them se rau nws. Cov Alam kuj coj xya txhiab xya pua tus txiv yaj thiab xya txhiab xya pua tus txiv tshis tuaj pub rau nws. Yehausafa thiaj vam meej heev zuj zus tuaj. Nws tsim tej chaw ruaj khov thiab tej moos khaws qhov txhia chaw hauv Yuda tebchaws, thiab nws khaws qhov txhia chaw ntau kawg cia rau hauv Yuda tej moos. Nws muaj cov tub rog uas siab loj siab tuab nyob hauv Yeluxalees. Ntawm no mus yog txheeb cov tub rog raws li lawv xeem. Xeem Yuda cov thawj uas kav ib txhiab leej ib tug yog Anas uas ua thawj kav 300,000 leej tub rog uas siab loj siab tuab, tus ob yog Yehauhanas uas ua tus thawj kav 280,000 leej, tus peb yog Xikhi tus tub Amasiya uas yeem ua koom tu Yawmsaub, nws kav 200,000 leej tub rog uas siab loj siab tuab. Xeem Npeeyamee muaj Eliyada uas yog tub rog siab loj siab tuab kav 200,000 leej tub rog uas muaj hneev thiab daim phiaj hlau thaiv. Tus ob yog Yehauxanpa uas kav 180,000 leej uas muaj cuab yeej ua rog. Cov no tu vajntxwv tsis suav rau cov tub rog uas vajntxwv txib mus nyob rau hauv tej moos uas muaj ntsa loog thoob Yuda tebchaws lawd. Yehausafa nplua nuj thiab muaj koob meej heev thiab nws nrog Ahaj tis nruab tis ze. Ntau xyoo tom qab Yehausafa mus tsham Ahaj hauv lub nroog Xamali. Ahaj tua yaj tua nyuj ntau kawg tiam Yehausafa thiab cov neeg uas nrog nws mus, thiab yaum kom nws nrog Ahaj ua rog rau lub moos Lamau Kile‑a. Cov Yixayee tus vajntxwv Ahaj hais rau Yuda tus vajntxwv Yehausafa tias, “Koj yuav nrog kuv mus rau lub moos Lamau Kile‑a los tsis mus?” Yehausafa teb tias, “Koj zoo li cas kuv zoo li ntawd thiab kuv cov neeg kuj yog koj li neeg. Peb yuav nrog koj mus ua rog.” Yehausafa hais rau Yixayee tus vajntxwv tias, “Thov nug saib Yawmsaub hais li cas tso.” Ces Yixayee tus vajntxwv txawm hu cov xibhwb cev Vajtswv lus plaub puas leej tuaj ua ke mas hais rau lawv tias, “Tsim nyog peb mus ua rog rau lub moos Lamau Kile‑a los tsis txhob mus?” Mas lawv teb tias, “Mus los maj, rau qhov Vajtswv yuav muab lub moos ntawd rau hauv vajntxwv txhais tes.” Tiamsis Yehausafa hais tias, “Muaj dua lwm tus xibhwb cev Vajtswv lus uas peb nug tau thiab los tsis muaj lawm?” Yixayee tus vajntxwv hais rau Yehausafa tias, “Tseem tshuav ib tug yawg uas peb yuav kom ua nug rau Yawmsaub tau thiab, yog Mikhaya uas yog Ilas tus tub. Tiamsis kuv ntxub nws rau qhov nws tsis txeev cev lus zoo ntsig txog kuv, tsuas yog pheej cev lus phem xwb.” Ces Yehausafa hais rau vajntxwv tias, “Tsis txhob hais li kod.” Yixayee tus vajntxwv hu ib tug tub teg tub taws los thiab hais tias, “Cia li coj Ilas tus tub Mikhaya tuaj sai sai.” Yixayee tus vajntxwv thiab Yehausafa tabtom nyob saum ob tug lub zwm txwv thiab hnav tej tsoos meej mom rau ntawm lub tshav ntaus qoob uas nyob ntawm lub rooj loog Xamali thiab cov xibhwb cev Vajtswv lus sawvdaws tabtom cev lus ntawm ob tug xubntiag. Mas Xedekhiya uas yog Khena‑ana tus tub txawm muab kav hlau ua ib txwm kub rau nws thiab hais tias, “Yawmsaub hais li no tias, ‘Koj yuav siv txwm kub no nrau cov Alas mus txog thaum lawv puam tsuaj tag.’ ” Thiab cov uas cev lus sawvdaws kuj cev lus ib yam nkaus li ntawd hais tias, “Cia li mus rau lub moos Lamau Kile‑a, thiab kov yeej, rau qhov Yawmsaub yuav muab lub moos ntawd rau hauv vajntxwv txhais tes.” Mas tus tub teg tub taws uas mus hu Mikhaya txawm hais rau Mikhaya tias, “Saib maj, cov xibhwb cev lus sawvdaws ua ib lub suab hais yam uas zoo rau vajntxwv xwb. Koj cia li hais zoo ib yam li lawv hais thiab hais yam uas zoo xwb.” Tiamsis Mikhaya hais tias, “Yawmsaub muaj txojsia nyob pom, kuv tus Vajtswv hais li cas rau kuv, kuv yuav tsum hais li ntawd xwb.” Thaum nws tuaj cuag vajntxwv, vajntxwv hais rau nws tias, “Mikhaya, tsim nyog peb yuav mus ua rog rau Lamau Kile‑a los tsis txhob mus?” Mikhaya teb nws tias, “Cia li mus los maj thiab kov yeej. Yawmsaub yuav muab lub moos ntawd rau hauv vajntxwv txhais tes.” Vajntxwv txawm hais rau nws tias, “Kuv twb kom koj cog lus twv pes tsawg zaus lawm tias koj yuav tsum tuav Yawmsaub lub npe hais qhov tseeb xwb xwb li?” Mikhaya thiaj hais tias, “Kuv pom cov Yixayee sawvdaws raug khiav ua sab ua sua saum tej roob yam nkaus li pab yaj uas tsis muaj tus tswv yug. Thiab Yawmsaub hais tias, ‘Cov neeg no tsis muaj tus tswv, cia lawv nyias rov mus zoo rau nyias vaj nyias tsev.’ ” Cov Yixayee tus vajntxwv thiaj hais rau Yehausafa tias, “Kuv twb hais rau koj tias nws yuav tsis cev lus zoo ntsig txog kuv, tsuas yog cev lus phem xwb, los tsis yog?” Thiab Mikhaya hais tias, “Yog li no cia li tig ntsej mloog Yawmsaub tej lus. Kuv pom Yawmsaub nyob saum nws lub zwm txwv thiab ib tsoom neeg saum ntuj sawv ntawm nws sab xis thiab sab laug. Mas Yawmsaub hais tias, ‘Leejtwg yuav ntxias Ahaj kom nws mus ntog tuag rau ntawm lub moos Lamau Kile‑a?’ Ib tug hais li ub, ib tug hais li no. Muaj ib tug plig txawm txav los sawv ntsug ntawm Yawmsaub xubntiag hais tias, ‘Kuv yuav ntxias nws.’ Yawmsaub hais rau tus plig ntawd tias, ‘Koj yuav ua li cas?’ Nws teb tias, ‘Kuv yuav mus thiab kuv yuav ua ib tug plig dag rau hauv nws cov xibhwb uas cev lus lub qhov ncauj.’ Yawmsaub hais tias, ‘Koj mus ntxias nws, thiab koj yuav ua tau kom tiav. Koj cia li mus ua.’ Vim li ntawd nimno Yawmsaub thiaj muab tus plig dag tso rau hauv koj cov xibhwb uas cev lus txhua tus lub qhov ncauj. Yawmsaub twb teem tej xwm txheej phem no los raug koj lawm.” Ces Xedekhiya uas yog Khena‑ana tus tub txawm txav los tib tawg ncuav Mikhaya sab plhu thiab hais tias, “Yawmsaub tus Ntsuj Plig tawm ntawm kuv taug txojkev twg mus hais rau koj?” Mas Mikhaya hais tias, “Saib maj, koj yuav paub rau hnub uas koj khiav mus nraim cev rau chav tsev hauv nruab nrab.” Yixayee tus vajntxwv hais tias, “Cia li ntes kiag Mikhaya, coj nws rov mus cob rau Asmoo uas ua tim xyoob kav lub nroog thiab cob rau Yau‑as uas yog vajntxwv tus tub, thiab hais tias, ‘Vajntxwv hais li no tias, Muab tus yawg no kaw nkuaj thiab tsuas yog muab ncuav thiab dej rau nws xwb mus txog thaum kuv rov los txog zoo.’ ” Mikhaya hais tias, “Yog koj tseem rov los txog zoo, ces tsis yog Yawmsaub kom kuv hais tej lus no.” Thiab nws hais tias, “Nej sawvdaws cia li mloog nawj!” Yixayee tus vajntxwv thiab Yuda tus vajntxwv Yehausafa txawm mus rau Lamau Kile‑a lawm. Yixayee tus vajntxwv hais rau Yehausafa tias, “Kuv yuav hloov tsoos tsho ua cuav tsab mus ntaus rog, tiamsis koj mas koj hnav koj cev tsoos tsho meej mom.” Yixayee tus vajntxwv txawm hloov tsoos tsho ua cuav tsab txeem mus ua rog. Cov Alas tus vajntxwv hais rau cov thawj rog uas kav nws tej tsheb ua rog tias, “Tsis txhob tua tej tub rog tsis hais loj thiab yau, tsuas yog tua cov Yixayee tus vajntxwv xwb.” Thaum cov thawj rog uas kav tej tsheb ua rog pom Yehausafa, lawv hais tias, “Yog Yixayee tus vajntxwv.” Lawv txawm tig kiag mus tawm tsam nws. Mas Yehausafa qw nrov nrov, mas Yawmsaub pab nws. Vajtswv thiaj ua rau lawv tso nws tseg. Thaum cov thawj rog uas kav tej tsheb ua rog pom tias tsis yog Yixayee tus vajntxwv, lawv thiaj tseg tsis caum nws lawm. Muaj ib tug yawg lam rub hneev nti kwv yees tua mus raug Yixayee tus vajntxwv nkag plaws lub tsho hlau ib kem ntawm hauv siab. Ahaj thiaj hais rau tus uas tsav nws lub tsheb ua rog tias, “Cia li tig rov qab, coj kuv tawm hauv tshav rog mus, rau qhov kuv raug mob lawm.” Hnub ntawd kev sib ntaus sib tua loj heev, vajntxwv thiaj pheeb hauv nws lub tsheb ua rog tig ntsia ntsoov rau cov Alas mus txog yuav tsaus ntuj. Thaum hnub poob qho nws txawm tuag lawm. Cov Yuda tus vajntxwv Yehausafa rov qab mus txog nws tsev hauv Yeluxalees zoo. Hanani tus tub Yehu uas ua xibhwb hais pom tom hauv ntej txawm tawm mus ntsib vajntxwv Yehausafa thiab hais rau nws tias, “Tsim nyog koj pab cov neeg phem thiab hlub cov uas ntxub Yawmsaub lov? Vim li no, Yawmsaub txojkev npau taws poob rau saum koj lawm. Txawm li cas kuj xij, koj muaj ib qhov zoo vim yog koj rhuav tshem tej ncej dab Asela tawm hauv lub tebchaws no thiab rau siab nrhiav Vajtswv.” Yehausafa nyob hauv Yeluxalees, thiab tawm mus xyuas tej pejxeem txij ntawm lub moos Npe‑awsenpa mus txog pem toj siab Efa‑i tebchaws dua ib zaug, thiab coj lawv rov los cuag Yawmsaub uas yog lawv tej poj koob yawm txwv tus Vajtswv. Nws tsa cov uas tu plaub rau hauv Yuda tej moos uas muaj ntsa loog txhua lub thoob plaws lub tebchaws, thiab hais rau cov uas tu plaub ntawd tias, “Cia li ua tib zoo xav txog tej uas nej yuav ua, rau qhov tsis yog nej tu plaub kom hum neeg, tiamsis nej tu kom hum Yawmsaub xwb, Yawmsaub nrog nraim nej tu plaub. Yog li no nej yuav tsum paub ntshai Yawmsaub, thiab ceev faj tej uas nej ua, rau qhov Yawmsaub uas yog peb tus Vajtswv tsis ntxeev cai thiab tsis saib leejtwg ntsej muag thiab tsis yuav nyiaj xiab.” Tsis tag li ntawd xwb Yehausafa tsa cov Levi thiab cov pov thawj qee leej thiab Yixayee cov thawj hauv txhua xeem hauv Yeluxalees ua cov uas tu tej plaub uas ntsig txog Yawmsaub kevcai thiab tu tej plaub ntug uas hais tsis hum. Lawv ua haujlwm rau hauv Yeluxalees xwb. Thiab nws nkaw lus rau lawv tias, “Nej yuav tsum paub ntshai Yawmsaub ua tej haujlwm no. Nej yuav tsum mob siab ua kom kawg nej lub siab lub ntsws txhob tso tseg. Thaum nej cov kwvtij uas nyob hauv lawv tej moos coj lawv tej plaub tuaj txog nej tsis hais kev sib tua lossis plaub ua txhaum txoj kevcai thiab tej lus nkaw thiab tej kab ke thiab tej kevcai twg kuj xij mas nej yuav tsum qhuab ntuas lawv kom lawv tsis txhob ua txhaum rau Yawmsaub, mas Yawmsaub txojkev npau taws thiaj tsis poob rau saum nej thiab nej cov kwvtij. Nej yuav tsum ua li no nej thiaj tsis muaj txim. Tus pov thawj hlob Amaliya kuj kav nej rau hauv txhua yam uas ntsig txog Yawmsaub, thiab Yisama‑ee tus tub Xenpadiya uas ua thawj hauv xeem Yuda kuj kav nej rau txhua yam uas ntsig txog vajntxwv, thiab cov Levi yuav ua tub teg tub taws pab nej. Nej cia li ua siab loj siab tuab ua haujlwm. Thov Yawmsaub nrog nraim tus uas ua ncaj.” Los rau tom qab no cov Mau‑a thiab cov Asmoo nrog cov Me‑uni qee leej tuaj ua rog rau Yehausafa. Muaj neeg tuaj hais rau Yehausafa tias, “Muaj ib pab tub rog coob coob tuaj ntawm Edoo tebchaws yog tuaj hiavtxwv sab tim ub tuaj tawm tsam koj. Saib maj, lawv tuaj txog Haxaxoo Thama lawm.” (Haxaxoo Thama yog Eekedi.) Ces Yehausafa txawm ntshai heev thiab nws mob siab nrhiav Yawmsaub thiab tshaj tawm thoob plaws Yuda tebchaws kom yoo mov. Mas cov Yuda tuaj txoos ua ke nrhiav kev pab ntawm Yawmsaub. Lawv tuaj hauv Yuda txhua lub moos tuaj ua nug rau Yawmsaub. Mas Yehausafa sawv ntsug ntawm cov Yuda thiab cov neeg Yeluxalees uas tuaj txoos ua ke ntawd hauv Yawmsaub lub tuam tsev ntawm lub tshav puam tshiab, thiab nws hais tias, “Au Yawmsaub uas yog peb tej poj koob yawm txwv tus Vajtswv, koj tsis yog Vajtswv uas nyob saum ntuj lov? Koj tsis kav tag nrho txhua haiv neeg tej tebchaws lov? Koj txhais tes muaj hwjchim thiab muaj zog, thiaj tsis muaj leejtwg tawm tsam tau koj. Au peb tus Vajtswv, koj tsis tau ntiab cov neeg hauv lub tebchaws no khiav tawm ntawm koj haiv neeg Yixayee xubntiag lov, thiab muab lub tebchaws rau koj tus kwvluag Aplahas caj ces mus ib txhis? Lawv tau nyob rau hauv thiab tau ua lub chaw rau koj lub npe nyob, thiab hais tias, ‘Yog muaj xwm txheej phem tshwm tuaj rau peb, tsis hais hniav ntaj, kev teem txim, mob kis thiab kev tshaib plab los yog, peb yuav sawv ntsug ntawm lub tuam tsev no rau ntawm koj xubntiag, vim koj lub npe nyob hauv lub tuam tsev no, thiab peb yuav nyob hauv kev txom nyem nyuaj siab no quaj thov koj, mas koj yuav mloog thiab cawm kom dim.’ Nimno cov Asmoo thiab cov Mau‑a thiab cov uas nyob saum lub roob Xe‑i, yog tej tebchaws uas koj tsis kheev cov Yixayee txeem mus rau hauv rau thaum lawv tawm hauv Iyi tebchaws los, mas lawv thiaj lug tsis ua kom puam tsuaj, saib maj, lawv cov ntawd ua pauj rau peb li no. Lawv tuaj ntiab peb tawm hauv lub tebchaws uas koj muab ua qub txeeg qub teg rau peb. Au peb tus Vajtswv, koj yuav tsis rau txim rau lawv lov? Rau qhov peb tsis muaj hwjchim uas yuav tiv thaiv tau pab tub rog coob coob uas tuaj ua rog rau peb no. Peb tsis pom qab yuav ua li cas, peb lub qhov muag ntsia ntsoov rau koj xwb.” Thaum ntawd Yuda cov txivneej sawvdaws thiab lawv tej pojniam thiab tej menyuam yaus menyuam mos kuj sawv ntawm Yawmsaub xubntiag. Mas Yawmsaub tus Ntsuj Plig los rau hauv Xekhaliya tus tub Yahaxi‑ee rau thaum nws nyob hauv ib tsoom neeg ntawd. Nws yawg yog Npenaya, nws yawg koob yog Ye‑i‑ee, nws yawg suab yog Mathaniya, yog xeem Levi, yog Axas cum. Yahaxi‑ee hais tias, “Cov Yuda sawvdaws thiab cov uas nyob hauv Yeluxalees, thiab vajntxwv Yehausafa, nej cia li mloog. Yawmsaub hais li no rau nej tias, Tsis txhob ntshai, tsis txhob poob siab rau pab tub rog coob coob ntawd, rau qhov kev ua rog tsis yog nej li tiamsis yog Yawmsaub li. Tagkis nej cia li nqes mus ua rog rau lawv. Lawv yuav nce taug txojkev ntawm lub moos Xib tuaj. Nej yuav ntsib lawv ntawm lub hauv hav hauv tebchaws moj sab qhua Yelu‑ee. Zaum rog no tsis txog nej yuav tawm tsam li. Yuda thiab Yeluxalees 'e, cia li npaj txhij rau ntawm lub chaw ua rog, sawv twjywm, thiab saib Yawmsaub kov yeej rau nej. Tsis txhob ntshai, tsis txhob poob siab. Tagkis cia li mus tawm tsam lawv, thiab Yawmsaub yuav nrog nraim nej.” Ces Yehausafa txawm nyo hau ua lub plhu ti nkaus hauv av thiab cov Yuda sawvdaws thiab cov neeg Yeluxalees cia li khwb nkaus ntawm Yawmsaub xubntiag pe hawm Yawmsaub. Ces cov Levi uas yog Khauha caj ces thiab Khaula caj ces thiaj li sawv tsees tsa suab nrov qhuas Yawmsaub uas yog cov Yixayee tus Vajtswv. Tagkis tom qab lawv sawv ntxov mus rau hauv tebchaws moj sab qhua Thekhau‑a. Thaum lawv tawm mus Yehausafa sawv ntsug hais tias, “Cov Yuda thiab cov uas nyob hauv Yeluxalees cia li mloog kuv hais. Cia li ntseeg Yawmsaub uas yog nej tus Vajtswv mas nej yuav nyob ruaj khov. Cia li ntseeg Yawmsaub cov neeg uas cev lus mas nej yuav ua tau kom tiav.” Thaum nws sablaj rau cov pejxeem lawm, nws tsa cov uas yuav hu nkauj rau Yawmsaub thiab hnav tej tsoos tsho muaj meej mom dawb huv qhuas Yawmsaub, thiab mus ua cov tub rog ntej hu tias, “Cia li ua Yawmsaub tsaug, rau qhov nws txojkev hlub ruaj khov nyob mus ib txhis.” Thaum lawv pib hu nkauj thiab qhuas, Yawmsaub npaj cov uas zov kev tos tawm tsam cov Asmoo, thiab cov Mau‑a thiab cov uas nyob saum lub roob Xe‑i uas tau tuaj ua rog rau cov Yuda, luag thiaj li swb tawg khiav tag lawm. Rau qhov cov Asmoo thiab cov Mau‑a sawv tsees tawm tsam cov pem roob Xe‑i, ua rau lawv puam tsuaj tag. Thaum lawv ua rau cov Xe‑i puam tsuaj tag, lawv sawvdaws kuj rov sib tua ua rau lawv puam tsuaj tag thiab. Thaum cov Yuda nce mus rau saum lub chaw tsom faj uas saib rau tebchaws moj sab qhua, lawv ntsia mus rau pab tub rog coob heev ntawd, ua ciav pom cev tuag pawg lug rau hauv av, tsis tshuav ib tug dim li. Thaum Yehausafa thiab nws cov tub rog tuaj khaws luag tej qhov txhia chaw, mas lawv pom tej tsiaj coob kawg thiab tej cuab yeej thiab tsoos tsho thiab tej yam uas muaj nqes, lawv khaws mus txog thaum ris tsis taus lawm. Lawv khaws tej uas txeeb tau ntawd tau peb hnub vim yog muaj ntau kawg li. Hnub uas plaub lawv tuaj txoos ua ke rau hauv lub hav Npelakha, thiab qhuas Yawmsaub qhov ntawd. Vim li no thiaj hu lub chaw ntawd tias lub hav Npelakha los txog niaj hnub nimno. Ces Yehausafa txawm coj cov Yuda thiab cov Yeluxalees txhua tus rov los rau hauv Yeluxalees zoo siab xyiv fab, rau qhov Yawmsaub ua rau lawv zoo siab xyiv fab vim yeeb ncuab swb tag lawm. Lawv thiaj muaj suab nkauj nog ncas me suab nkauj nog ncas loj thiab suab raj xyu rov los rau hauv Yeluxalees thiab los rau ntawm Yawmsaub lub tuam tsev. Ib tsoom tebchaws sawvdaws ntshai Vajtswv rau thaum lawv hnov tias Yawmsaub tawm tsam Yixayee cov yeeb ncuab. Yehausafa lub tebchaws thiaj li nyob tus yees, rau qhov nws tus Vajtswv pub nws so tsis ua rog rau txhua fab. Yehausafa ua vajntxwv kav Yuda li no. Thaum nws pib ua vajntxwv kav nws hnub nyoog muaj peb caug tsib xyoos, nws nyob hauv Yeluxalees kav tau nees nkaum tsib xyoos. Nws niam npe hu ua Axunpa uas yog Sihi tus ntxhais. Nws taug nraim nws txiv Axa tus neev taw, tsis tig mus rau sab twg li. Nws ua tej uas Yawmsaub pom tias zoo. Tiamsis tej chaw siab teev dab tseem tsis tau muab rhuav pov tseg, cov pejxeem tseem tsis tau rau siab npuab lawv tej poj koob yawm txwv tus Vajtswv. Lwm yam haujlwm uas Yehausafa ua txij thaum pib mus txog thaum kawg mas twb muab sau cia rau hauv Hanani tus tub Yehu phau ntawv keeb kwm, uas sau ua ke rau hauv phau ntawv uas hais txog cov Yixayee tej vajntxwv. Los rau tom qab no cov Yuda tus vajntxwv Yehausafa nrog cov Yixayee tus vajntxwv Ahaxiya uas ua phem kawg sib raug zoo. Nws koom nrog ua tej nkoj txwg uas yuav mus rau lub moos Thasi, ob tug ua tej nkoj ntawd hauv lub moos Exi‑oo Kenpaw. Mas Eliyexaw uas yog Daudavahu tus tub hauv lub moos Malesa cev Vajtswv lus rau Yehausafa tias, “Vim yog koj koom nrog Ahaxiya ua haujlwm, Yawmsaub yuav ua rau tej uas koj ua puam tsuaj.” Mas tej nkoj ntawd thiaj tawg piam tag mus tsis txog lub moos Thasi. Yehausafa kuj tuag mus nrog nws tej poj koob yawm txwv nyob, thiab lawv muab nws log nrog nws tej poj koob yawm txwv ua ke rau hauv Davi lub nroog mas nws tus tub Yehaulas sawv nws chaw ua vajntxwv kav. Yehaulas cov kwv uas yog Yehausafa cov tub yog Axaliya, Yehi‑ee, Xekhaliya, Axaliya, Mikha‑ee thiab Sefathiya. Cov no yog Yuda tus vajntxwv Yehausafa li tub. Lawv txiv pub tej qhov txhia chaw uas xuas nyiaj xuas kub ua thiab tej uas muaj nqes heev, thiab pub tej moos hauv Yuda uas muaj ntsa loog rau lawv. Tiamsis nws pub lub tebchaws rau Yehaulas kav rau qhov nws yog tus tub hlob. Thaum Yehaulas sawv los nyob saum nws txiv lub zwm txwv thiab ua vajntxwv ruaj khov lawm, nws xuas ntaj tua nws cov kwv huvsi thiab tua Yuda cov thawj qee leej pov tseg. Thaum Yehaulas pib ua vajntxwv kav nws hnub nyoog muaj peb caug ob xyoos, nws nyob hauv Yeluxalees kav tau yim xyoo. Nws taug nraim cov Yixayee tej vajntxwv tus neev taw, yog ua raws li Ahaj caj ces, vim yog nws yuav Ahaj tus ntxhais ua pojniam. Tej uas nws ua mas Yawmsaub pom tias phem. Txawm li cas los Yawmsaub yeej tsis ua rau Davi caj ces puam tsuaj tag vim yog tej lus uas nws nrog Davi cog tseg, thiab vim nws twb cog lus tseg tias nws yuav pub ib lub teeb ci rau Davi thiab rau Davi caj ces mus ib txhis. Ntu uas Yehaulas ua vajntxwv mas Edoo fav xeeb rau Yuda thiab tsa dua ib tug vajntxwv kav lawv. Mas Yehaulas thiaj coj nws cov thawj rog thiab nws tej tsheb ua rog huvsi ua ke hla mus. Thaum hmo ntuj nws txawm mus ntaus cov Edoo uas tuaj vij nws thiab nws cov thawj uas kav nws tej tsheb ua rog. Cov Edoo thiaj fav xeeb tsis zwm rau cov Yuda los txog niaj hnub nimno. Thiab lub sijhawm ntawd lub moos Lina kuj fav xeeb tsis zwm rau Yehaulas lawm, rau qhov nws tau tso Yawmsaub uas yog nws tej poj koob yawm txwv tus Vajtswv tseg. Dua li ntawd nws tseem ua tej chaw siab teev dab rau saum Yuda tej roob, thiab coj cov neeg hauv Yeluxalees tso Yawmsaub tseg thiab ua rau cov Yuda yuam kev lawm. Mas muaj ib tsab ntawv tuaj ntawm Eliya uas ua xibhwb cev Vajtswv lus tuaj hais tias, “Yawmsaub uas yog koj yawg koob Davi tus Vajtswv hais li no tias, ‘Vim yog koj tsis tau ua raws nraim li koj txiv Yehausafa txojkev thiab tsis ua raws li Yuda tus vajntxwv Axa txojkev, tiamsis koj taug nraim Yixayee tej vajntxwv tus neev taw thiab coj cov Yuda thiab cov neeg hauv Yeluxalees tso Yawmsaub tseg ib yam li Ahaj caj ces coj cov Yixayee tso Yawmsaub tseg, thiab vim koj tau tua koj cov kwv uas yog koj txiv caj ces thiab lawv zoo dua koj, saib maj, Yawmsaub yuav tso tej mob phem loj los raug koj cov neeg thiab koj cov menyuam thiab koj tej pojniam thiab koj tej qhov txhia chaw huvsi. Thiab koj yuav mob hnyav heev mob koj tej plab tej hnyuv mus txog tej plab hnyuv tawm los hnub tag hnub thiab tsis txawj zoo.’ ” Yawmsaub ua rau cov Filixatee thiab cov Alam uas nyob ze cov neeg Khuj chim rau Yehaulas. Ces lawv thiaj tuaj ua rog rau Yuda thiab txeem mus rau hauv lub tebchaws, mas txeeb tej qhov txhia chaw hauv vajntxwv tsev huvsi thauj mus thiab coj nws tej tub tej pojniam mus tsis tshuav tub nrog nws nyob tsuas yog tshuav Ahaxiya uas yog tus tub ntxawg xwb. Thaum dhau tej xwm txheej ntawd lawm, Yawmsaub ua rau Yehaulas tej plab hnyuv mob kho tsis tau li. Dhau ob xyoos tom qab, nws tej plab hnyuv tawm los tag vim tim tus mob ntawd, ces nws txawm tuag khwv khwv li. Nws cov pejxeem tsis rauv ib cub tawg loj heev ua koob meej rau nws ib yam li lawv rauv rau nws tej poj koob yawm txwv. Thaum Yehaulas pib kav nws muaj peb caug ob xyoos, nws ua vajntxwv kav hauv Yeluxalees tau yim xyoo. Nws tuag tsis muaj leejtwg nco li. Lawv muab nws log rau hauv Davi lub nroog tiamsis tsis yog log rau hauv vajntxwv tej qhov ntxa. Cov neeg hauv Yeluxalees tsa Yehaulas tus tub ntxawg Ahaxiya ua vajntxwv nyob nws txiv chaw, rau qhov nws cov tijlaug sawvdaws raug ib pab tub rog uas nrog cov Alam tuaj rau hauv lub yeej muab tua tuag tag. Yog li ntawd Yehaulas tus tub Ahaxiya thiaj ua tus kav Yuda. Thaum Ahaxiya pib ua vajntxwv kav ntawd nws muaj nees nkaum ob xyoos, nws nyob hauv Yeluxalees kav tau ib xyoos. Nws niam npe hu ua Athaliya, yog Ooli li xeeb ntxwv. Ahaxiya taug nraim Ahaj caj ces tus neev taw, rau qhov nws niam yog tus uas taw qhia nws ua phem. Nws ua tej uas Yawmsaub pom tias phem kawg ib yam li Ahaj caj ces ua, rau qhov thaum nws txiv tuag lawd lawv cov ntawd ua nws lub chaw sablaj thiaj ua rau nws raug kev puam tsuaj. Nws ua raws li uas lawv qhia nws thiaj nrog Ahaj tus tub Yaulas mus ua rog rau cov Alas tus vajntxwv Haxa‑ee ntawm Lamau Kile‑a, mas cov Alas tua raug Yaulas mob. Yaulas txawm rov qab mus kho mob rau ntawm lub moos Yile‑ee, yog mus kho qhov mob uas nws raug ntawm Lama rau thaum uas nws ua rog rau cov Alas tus vajntxwv Haxa‑ee. Mas Yehaulas tus tub Ahaxiya uas ua vajntxwv kav Yuda thiaj mus saib Ahaj tus tub Yaulas rau hauv lub moos Yile‑ee vim yog Yaulas raug mob. Vajtswv siv lub sijhawm uas Ahaxiya mus saib Yaulas ntawd txov kom nws puam tsuaj. Thaum nws mus ntawd nws nrog Yaulas mus ntsib Nisi tus tub Yehu, uas Yawmsaub twb hliv roj ywg tsa cia ua tus txov Ahaj caj ces. Thaum Yehu tabtom rau txim rau Ahaj caj ces, nws ntsib Yuda cov thawj thiab Ahaxiya cov tijlaug li tub uas ua num rau Ahaxiya, ces nws txawm muab lawv tua pov tseg tag. Nws kuj nrhiav Ahaxiya. Mas Ahaxiya raug ntes rau hauv lub nroog Xamali uas nws tsiv nraim, thiab raug coj los rau ntawm Yehu thiab raug muab tua pov tseg. Lawv muab nws log rau qhov lawv hais tias, “Nws yog Yehausafa uas nrhiav Yawmsaub kawg siab kawg ntsws tus xeeb ntxwv.” Ahaxiya caj ces tsis muaj ib tug yuav sawv tau los ua vajntxwv kav lub tebchaws lawm. Thaum Athaliya uas yog Ahaxiya niam pom tias nws tus tub tuag lawm ces nws txawm sawv tsees tua Yuda tej vajntxwv caj ces huvsi pov tseg. Tiamsis vajntxwv Yehaulas tus ntxhais Yehausenpa tau coj Ahaxiya tus tub Yau‑as nyiag khiav tawm hauv vajntxwv cov tub uas yuav raug tua mus lawm. Nws muab Yau‑as thiab tus uas tu nws zais rau hauv ib lub txaj pw. Yehaulas tus ntxhais Yehausenpa uas yog Ahaxiya tus muam thiab yog tus pov thawj Yehauyada tus pojniam thiaj muab Yau‑as zais ntawm Athaliya li no, xwv Athaliya thiaj tua tsis tau nws. Yau‑as tsiv nraim rau hauv Vajtswv lub tuam tsev nrog lawv nyob tau rau xyoo, rau ncua sijhawm uas Athaliya kav lub tebchaws. Xyoo uas xya Yehauyada muaj siab tuab thiab nrog cov thawj rog uas kav ib puas leej sib cog lus, yog Axaliya tus tub Yelauhas, Yehauhanas tus tub Yisama‑ee, Aunpe tus tub Axaliya, Adaya tus tub Ma‑axeya thiab Xikhi tus tub Elisafa. Lawv mus thoob plaws Yuda tebchaws thiab sau cov Levi hauv Yuda txhua lub moos thiab cov thawj hauv Yixayee tej cum tuaj, mas lawv tuaj rau hauv Yeluxalees. Lawv sawvdaws uas tuaj txoos ua ke ntawd cog lus rau vajntxwv hauv Vajtswv lub tuam tsev. Yehauyada hais rau lawv tias, “Saib maj, no yog vajntxwv tus tub. Cia nws ua vajntxwv kav raws li uas Yawmsaub hais cia txog Davi cov tub. Nej yuav tsum ua li no. Nej cov pov thawj thiab cov Levi uas tuaj ua haujlwm rau hnub Xanpatau, mas muab faib ua peb feem, ib feem yuav nyob zov tej rooj loog, ib feem yuav zov ntawm vajntxwv lub tsev thiab ib feem yuav zov ntawm lub Rooj Loog Muaj Taw Tiag. Cov pejxeem sawvdaws yuav tsum tuaj nyob rau hauv tej tshav puam ntawm Yawmsaub lub tuam tsev. Tsis txhob kheev leejtwg nkag mus rau hauv Yawmsaub lub tuam tsev tsuas yog cia cov pov thawj thiab cov Levi uas ua haujlwm nkag xwb. Lawv nkag tau xwb vim lawv yog cov dawb huv tiamsis cov pejxeem sawvdaws yuav tsum ua raws li Yawmsaub hais. Cov Levi yuav tsum nyob vij vajntxwv, txhua tus nyias tuav rawv nyias cuab yeej. Leejtwg nkag rau hauv lub tuam tsev yuav raug muab tua. Nej yuav tsum nrog nraim vajntxwv rau thaum nws nkag los thiab tawm mus.” Cov Levi thiab cov Yuda sawvdaws ua raws li tus pov thawj Yehauyada hais rau lawv txhua yam, nyias coj nyias cov tub rog tuaj tsis hais cov uas tawm haujlwm rau hnub Xanpatau thiab cov uas yuav nkag mus ua haujlwm rau hnub Xanpatau, rau qhov tus pov thawj Yehauyada tsis kheev ib pab twg tawm haujlwm li. Mas tus pov thawj Yehauyada muab vajntxwv Davi cov hmuv thiab cov phiaj hlau thaiv tsis hais daim me daim loj uas nyob hauv Vajtswv lub tuam tsev rau cov thawj rog. Nws tsa cov pejxeem sawvdaws ua cov uas zov vajntxwv, txhua tus tuav rawv nyias li cuab yeej nyob vij nkaus lub thaj thiab vij Yawmsaub lub tuam tsev sab ped sab nrad huvsi. Ces nws txawm coj vajntxwv tus tub tawm los thiab muab lub mom vajntxwv ua rau ntoo thiab muab Vajtswv tej kevcai rau nws thiab lawv tshaj tawm tias nws ua vajntxwv. Yehauyada thiab nws cov tub muab roj hliv ywg tsa nws, thiab lawv hais tias, “Thov kom vajntxwv muaj txojsia loj siav ntev.” Thaum Athaliya hnov cov pejxeem lub suab dhia thiab qhuas vajntxwv nws txawm mus rau ntawm cov pejxeem hauv Yawmsaub lub tuam tsev. Thaum nws tsa muag ntsia nws pom tus vajntxwv sawv ntawm tus ncej uas nyob ib sab qhov rooj tuam tsev, thiab muaj cov thawj rog thiab cov uas tshuab raj xyu nyob ib sab ntawm vajntxwv, thiab cov pejxeem thoob tebchaws sawvdaws zoo siab xyiv fab thiab tshuab raj xyu, thiab cov tub hu nkauj muaj suab cuab yeej phim nkauj coj sawvdaws hu zoo siab xyiv fab. Mas Athaliya kuj dua rhe nws lub tsho qw hais tias, “Fav xeeb lauj, fav xeeb lauj!” Pov thawj Yehauyada txawm coj cov thawj rog uas kav cov tub rog tawm los thiab hais rau lawv tias, “Cia li coj Athaliya tawm hauv cov tub rog mus. Yog leejtwg raws nws qab mas xuas ntaj tua pov tseg.” Rau qhov tus pov thawj hais tias, “Tsis txhob tua nws rau hauv Yawmsaub lub tuam tsev.” Lawv thiaj ntes nws, mas nws taug txojkev mus rau hauv Rooj Loog Nees ntawm vajntxwv lub tsev ces lawv muab nws tua rau qhov ntawd lawm. Mas Yehauyada kom cov pejxeem sawvdaws thiab tus vajntxwv nrog nws cog lus tseg tias lawv yuav ua Yawmsaub haiv neeg. Mas cov pejxeem sawvdaws mus rau ntawm lub tsev dab Npa‑as thiab muab lub tsev ntawd rhuav pov tseg. Lawv muab lub thaj thiab tej dab mlom Npa‑as tsoo ua tej dwb daim tag, thiab tua tus pov thawj Mathas uas teev dab Npa‑as rau ntawm tej thaj ib sab. Qhov uas zov Yawmsaub lub tuam tsev Yehauyada muab tso rau cov pov thawj uas yog xeem Levi thiab rau cov Levi uas Davi tau tsa cia kom saib Yawmsaub lub tuam tsev thiab tua tsiaj hlawv xyeem rau Yawmsaub raws li uas sau cia rau hauv Mauxe txoj kevcai, thiab lawv yuav hu nkauj zoo siab xyiv fab raws li Davi tu cia. Nws tso cov uas zov tej rooj loog kom zov tej rooj loog hauv Yawmsaub lub tuam tsev xwv thiaj tsis muaj ib tug uas tsis huv qhov twg nkag tau mus rau hauv. Nws coj cov thawj rog, thiab cov uas ua hlob thiab cov uas kav pejxeem thiab cov pejxeem sawvdaws nrog nws mus mas lawv coj tus vajntxwv nqes ntawm Yawmsaub lub tuam tsev taug txojkev hauv lub rooj loog sab ped mus rau hauv vajntxwv lub tsev. Thiab lawv muab nws txawb zaum rau saum vajntxwv lub zwm txwv. Cov pejxeem thoob tebchaws sawvdaws zoo siab xyiv fab thiab lub nroog kuj nyob tus yees rau thaum Athaliya raug xuas ntaj tua lawm. Thaum Yau‑as pib ua vajntxwv kav nws hnub nyoog muaj xya xyoo, nws nyob hauv Yeluxalees kav tau plaub caug xyoos. Nws niam npe hu ua Xinpiya uas nyob hauv Npe‑awsenpa. Yau‑as ua tej uas Yawmsaub pom tias zoo mus tag pov thawj Yehauyada sim neej. Yehauyada nrhiav ob tug pojniam rau Yau‑as, thiab nws muaj tub muaj ntxhais. Los rau tom qab no Yau‑as txiav txim siab yuav tsim kho Yawmsaub lub tuam tsev. Nws hu cov pov thawj thiab cov Levi tuaj ua ke thiab hais rau lawv tias, “Nej cia li mus thoob plaws Yuda tej moos thiab sau nyiaj ntawm cov Yixayee sawvdaws kho Yawmsaub lub tuam tsev ib xyoos zuj zus mus, thiab maj nroos ua tej haujlwm no.” Tiamsis cov Levi tsis maj ua. Mas vajntxwv thiaj hu Yehauyada uas ua pov thawj hlob tuaj thiab hais rau nws tias, “Ua cas koj tsis hais kom cov Levi coj cov nyiaj se ntawm cov Yuda thiab hauv Yeluxalees tuaj, yog cov se uas Yawmsaub tus qhev Mauxe tau hais cia kom ib tsoom Yixayee coj tuaj rau lub tsev ntaub uas muaj Vajtswv tej lus?” Rau qhov tus niag pojniam phem Athaliya cov tub txeem mus rau hauv Vajtswv lub tuam tsev thiab tseem siv tej uas pub kiag rau Vajtswv lawd ua koom tu tej dab Np‑a lawm. Vajntxwv thiaj hais kom lawv ua ib lub phij xab thiab muab txawb rau ntawm lub rooj loog ntawm Yawmsaub lub tuam tsev. Thiab muaj lus tshaj tawm mus thoob plaws Yuda thiab Yeluxalees kom coj tej se uas Yawmsaub tus qhev Mauxe hais cia hauv tebchaws moj sab qhua tuaj pub rau Yawmsaub. Cov thawj sawvdaws thiab cov pejxeem sawvdaws kuj zoo siab xyiv fab thiab coj lawv tej se tuaj tso rau hauv lub phij xab puv nkaus. Thaum cov Levi coj lub phij xab tuaj rau vajntxwv cov tub teg tub taws, thiab lawv pom tias muaj nyiaj ntau hauv lub phij xab, mas vajntxwv tus tub sau ntawv thiab tus tuam pov thawj hlob tus tub qhe tuaj muab cov nyiaj nchuav los thiab coj lub phij xab rov qab mus txawb rau lub qub chaw. Lawv niaj hnub ua li no mas khaws tau nyiaj ntau heev. Vajntxwv thiab Yehauyada muab cov nyiaj ntawd rau cov uas saib xyuas tej haujlwm hauv Yawmsaub lub tuam tsev, lawv ntiav tej Kws zeb Kws ntoo kho Yawmsaub lub tuam tsev kom zoo li qub, thiab ntiav tej Kws tooj Kws hlau kho Yawmsaub lub tuam tsev. Mas cov tub zog kuj rau siab ua haujlwm thiab lawv kuj kho tau zoo zuj zus, lawv kho tau Yawmsaub lub tuam tsev zoo ib yam li qub thiab ua tau ruaj khov dua. Thaum lawv ua tiav lawd, lawv coj tej nyiaj uas tseem tshuav los rau ntawm vajntxwv thiab Yehauyada xubntiag. Lawv muab tej nyiaj ntawd ua tej twj uas siv ntawm Yawmsaub lub tuam tsev, tsis hais tej uas siv ua koom tu Yawmsaub thiab siv ua kevcai hlawv xyeem, thiab tej phaj tej tais nyiaj tais kub. Lawv ua kevcai hlawv xyeem rau hauv Yawmsaub lub tuam tsev tsis tu ncua li mus tag Yehauyada sim neej. Yehauyada laus heev thiab hnub nyoog nchav ces txawm tuag lawm. Thaum nws tuag nws hnub nyoog muaj ib puas peb caug xyoo. Lawv muab nws log rau hauv Davi lub nroog ua ke nrog cov vajntxwv rau qhov nws tau ua zoo rau Vajtswv thiab Vajtswv lub tuam tsev hauv cov Yixayee. Thaum Yehauyada tuag lawd, Yuda cov thawj txawm tuaj cuag vajntxwv thiab hawm nws, ces vajntxwv txawm mloog lawv tej lus. Lawv txawm tso Yawmsaub uas yog lawv tej poj koob yawm txwv tus Vajtswv lub tuam tsev tseg thiab mus ua koom tu tej dab Asela thiab tej dab mlom. Mas Yawmsaub txojkev npau taws thiaj los raug cov Yuda thiab Yeluxalees vim yog lawv lub txim no. Tiamsis Yawmsaub tseem txib cov xibhwb cev nws li lus rau hauv lawv xwv thiaj coj tau lawv rov los cuag Yawmsaub. Cov xibhwb ntawd ua timkhawv tawm tsam lawv, tiamsis lawv tsis quav ntsej. Mas Vajtswv tus Ntsuj Plig los kav tag nrho Xekhaliya uas yog pov thawj Yehauyada tus tub, ces nws txawm sawv rau lub chaw siab hauv cov pejxeem thiab hais rau lawv tias, “Vajtswv hais li no tias, ‘Ua cas nej yuav tawv Yawmsaub tej lus nkaw, nej thiaj tsis vam meej? Vim nej tso Yawmsaub tseg nws thiaj tso nej tseg lawm.’ ” Tiamsis lawv ntaus tswvyim ua phem rau nws, thiab xuas pob zeb muab nws ntaus tuag rau hauv Yawmsaub lub tuam tsev lub tshav puam raws li vajntxwv kom lawv ua. Vajntxwv Yau‑as thiaj tsis nco txog qhov uas Yehauyada uas yog Xekhaliya txiv tau hlub Yau‑as lawm, tiamsis Yau‑as ho muab Yehauyada tus tub tua pov tseg. Thaum Xekhaliya yuav tuag nws hais tias, “Thov Yawmsaub tsa muag ntsia thiab ua pauj.” Thaum lub qab xyoo Alas cov tub rog kuj tuaj ua rog rau Yau‑as. Lawv tuaj txog hauv Yuda thiab hauv Yeluxalees, thiab ua kom cov thawj hauv cov pejxeem puam tsuaj tag, thiab xa tej uas lawv txeeb tau huvsi rau tus vajntxwv hauv lub nroog Damaxaka. Txawm yog Alas cov tub rog tuaj tsis coob los Yawmsaub muab Yuda pab tub rog uas coob heev cob rau hauv lawv txhais tes, vim yog cov Yuda tso Yawmsaub uas yog lawv tej poj koob yawm txwv tus Vajtswv tseg. Yog li no cov Alas thiaj rau txim rau Yau‑as. Thaum lawv rov mus lawd lawv tseg Yau‑as nyob raug mob hnyav heev. Nws cov tub teg tub taws ntaus tswvyim ua phem rau nws, yog tim tus pov thawj Yehauyada tus tub cov ntshav, thiab muab Yau‑as tua rau saum nws lub txaj pw. Nws thiaj tuag li no thiab lawv muab nws log rau hauv Davi lub nroog, tiamsis tsis yog log rau hauv vajntxwv tej qhov ntxa. Cov neeg uas ntaus tswvyim rau vajntxwv ntawd, ib tug yog Xanpa uas yog tus pojniam Asmoo Sime‑as li tub, thiab ib tug yog Yehauxanpa uas yog tus pojniam Mau‑a Silib tug tub. Tej xwm txheej ntsig txog vajntxwv tej tub thiab tej lus ntau yam uas xibhwb cev tawm tsam nws thiab tej uas tsim kho Vajtswv lub tuam tsev, twb muab sau cia rau hauv tej ntawv uas hais txog tej vajntxwv phau ntawv keeb kwm. Nws tus tub Amaxiya sawv nws chaw ua vajntxwv kav. Thaum Amaxiya pib ua vajntxwv kav nws hnub nyoog muaj nees nkaum tsib xyoos, nws nyob hauv Yeluxalees kav tau nees nkaum cuaj xyoo. Nws niam npe hu ua Yehau‑adas, yog neeg hauv Yeluxalees. Nws ua tej uas Yawmsaub pom tias zoo tiamsis tsis yog muaj siab dawb paug ua. Thaum nws muaj hwjchim kav lub tebchaws hauv nws txhais tes ruaj khov lawm nws txawm muab cov tub teg tub taws uas tua nws txiv tua pov tseg. Tiamsis nws tsis tau tua lawv tej tub, raws li uas muaj sau cia rau hauv Mauxe phau ntawv kevcai uas Yawmsaub hais tias, “Leejtxiv yuav tsis ris nws tej menyuam lub txim tuag, thiab tej menyuam yuav tsis ris leej txiv lub txim tuag. Cia txhua tus nyias ris nyias lub txim tuag.” Amaxiya hu cov Yuda tuaj txoos ua ke, thiab tsa cov thawj uas kav ib txhiab leej thiab kav ib puas leej rau hauv nyias cum tag nrho cov Yuda thiab cov Npeeyamee huvsi. Nws suav cov uas muaj nees nkaum xyoo rov saud, mas pom tias yog cov tub rog uas txawj tshaj plaws thiab npaj txhij ua rog thiab tuav rawv hmuv thiab daim phiaj hlau mas muaj 300,000 leej. Dua li ntawd nws muab ib puas tala nyiaj ntiav cov tub rog Yixayee siab loj siab tuab 100,000 leej. Tiamsis Vajtswv li ib tug neeg tuaj cuag nws thiab hais tias, “Au vajntxwv, koj tsis txhob cia Yixayee pab tub rog nrog koj mus, rau qhov Yawmsaub tsis nrog nraim cov Yixayee, nws yeej tsis nrog cov neeg Efa‑i sawvdaws no lawm. Tiamsis yog koj xav tias qhov uas ua li no yuav ua rau koj muaj zog ua rog, mas Vajtswv yuav ua rau koj puam tsuaj tag rau hauv koj cov yeeb ncuab txhais tes. Rau qhov Vajtswv muaj hwjchim pab kom kov yeej lossis ua kom puam tsuaj.” Ces Amaxiya hais rau Vajtswv tus neeg tias, “Kuv yuav ua li cas rau ib puas tala nyiaj uas kuv muab rau cov Yixayee pab tub rog lawm?” Vajtswv tus neeg teb tias, “Yawmsaub muaj peevxwm yuav muab ntau dua li ntawd pub rau koj.” Ces Amaxiya txawm tso cov tub rog uas tuaj pem Efa‑i tebchaws tuaj rov qab mus tsev. Lawv thiaj chim heev rau cov Yuda thiab rov qab mus tsev ua npau taws kawg. Ces Amaxiya muaj siab tuab thiab coj nws cov tub rog tawm mus rau lub hav Ntsev mas ntaus cov Xe‑i tuag ib vam leej. Cov Yuda ntes tau dua ib vam leej ciaj coj mus rau saum lub roob tsuas mas muab lawv pov poob saum hauv tsua los. Lawv sawvdaws poob los ntsawm ntuag ua tej dwb daim. Tiamsis cov tub rog uas Amaxiya muab tso rov mus tsis cia lawv nrog nws mus ua rog ntawd, txawm mus ntaus Yuda tej moos txij ntua Xamali mus txog lub moos Npe Hauloo, thiab tua cov pejxeem tuag peb txhiab leej thiab lws tau tej qhov txhia chaw ntau kawg. Thaum Amaxiya mus tua cov Edoo rov los, nws txawm coj cov neeg Xe‑i tej dab mlom los teev ua nws li dab, thiab nws pe hawm thiab xyeem qhov txhia chaw rau tej dab mlom ntawd. Vim li ntawd Yawmsaub thiaj chim rau Amaxiya thiab txib ib tug xibhwb cev lus tuaj cuag nws hais rau nws tias, “Ua cas koj nrhiav lwm haiv neeg tej dab uas tsis txawj pab lawv haiv neeg dim hauv koj txhais tes?” Thaum tus xibhwb tabtom hais, vajntxwv hais rau nws tias, “Peb tau tsa koj ua vajntxwv lub chaw sablaj lov? Tsis txhob hais ntxiv. Ua cas koj yuav yeem tuag?” Tus xibhwb cev Vajtswv lus txawm tseg thiab hais tias, “Kuv paub tias Yawmsaub txiav txim siab yuav ua rau koj puam tsuaj rau qhov koj tau ua tej no thiab tsis mloog tej lus uas kuv hais.” Cov Yuda tus vajntxwv Amaxiya sablaj mas txib neeg mus cuag Yehau‑a uas ua vajntxwv kav Yixayee, Yehau‑a txiv yog Yehau‑aha, nws yawg yog Yehu, mas hais tias, “Cia li tuaj, es wb yuav ua rog tim ntsej tim muag.” Mas Yehau‑a uas ua vajntxwv kav Yixayee xa xov mus rau Amaxiya uas ua vajntxwv kav Yuda hais tias, “Ib tsob pos pem lub roob Lenpanoo xa xov mus rau ib tsob ntoo ciab saum roob Lenpanoo hais tias, ‘Cia li muab koj tus ntxhais qua rau kuv tus tub.’ Ces muaj ib tug tsiaj qus nyob pem Lenpanoo txawm hla mus muab tsob pos ntawd tsuj pes kiag. Koj hais tias, ‘Saib maj, kuv twb ntaus yeej cov Edoo lawm,’ mas koj lub siab thiaj tsab ua loj khav theeb li no. Cia li nyob twjywm hauv tsev nawj. Ua cas koj yuav tshum kom muaj kev kub ntxhov ua rau koj thiab cov Yuda puam tsuaj ua ke?” Tiamsis Amaxiya tsis mloog, vim tej no yog Vajtswv ua kom thiaj muab tau lawv cob rau hauv yeeb ncuab txhais tes rau qhov lawv mus nrhiav Edoo tej dab. Cov Yixayee tus vajntxwv Yehau‑a thiaj li mus mas nws thiab cov Yuda tus vajntxwv Amaxiya thiaj sib ntsib ua rog rau ntawm lub moos Npeseme hauv Yuda tebchaws. Cov Yuda txawm swb cov Yixayee, txhua tus thiaj khiav rov mus rau hauv nyias vaj nyias tsev. Cov Yixayee tus vajntxwv Yehau‑a kuj ntes cov Yuda tus vajntxwv Amaxiya uas yog Yau‑as tus tub thiab yog Ahaxiya tus xeeb ntxwv ntawm Npeseme, mas coj nws mus rau ntawm Yeluxalees thiab muab lub ntsa loog tsoo pob tag plaub puas tshim txij ntua lub Rooj Loog Efa‑i mus txog ntua lub rooj loog ntawm lub kaum loog. Yehau‑a muab tej kub tej nyiaj huvsi thiab tej twj siv huvsi uas nyob hauv Vajtswv lub tuam tsev thiab ntes tau Aunpe Edoo. Nws kuj muab tej uas nyob hauv tej txhab nyiaj hauv vajntxwv tsev thiab yuam ib co neeg coj huvsi rov qab mus rau lub nroog Xamali. Thaum Yehau‑aha tus tub Yehau‑a uas yog cov Yixayee tus vajntxwv tuag lawm, Yau‑as tus tub Amaxiya uas ua Yuda tus vajntxwv tseem nyob tau kaum tsib xyoos ntxiv thiab. Lwm yam uas Amaxiya ua txij thaum pib mus txog thaum kawg twb muab sau cia rau hauv phau ntawv uas hais txog Yuda thiab Yixayee tej vajntxwv. Txij thaum Amaxiya tso Yawmsaub tseg cov pejxeem txawm ntaus tswvyim fav xeeb rau nws hauv Yeluxalees mas nws thiaj khiav mus rau lub moos Lakhi. Ces lawv tso neeg mus caum tau nws ntawm Lakhi mas muab nws tua qhov ntawd. Lawv muab nws lub cev tuag rau nees thauj los log nrog nws tej poj koob yawm txwv ua ke rau hauv Davi lub nroog. Cov pejxeem sawvdaws hauv Yuda txawm muab Uxiya uas hnub nyoog muaj kaum rau xyoo tsa ua vajntxwv nyob nws txiv Amaxiya chaw. Thaum vajntxwv Amaxiya tuag mus nrog nws tej poj koob yawm txwv nyob mas Uxiya tsim kho lub moos Elau thiab rov muab rau Yuda kav. Thaum Uxiya pib kav nws hnub nyoog muaj kaum rau xyoo thiab nws nyob hauv Yeluxlee kav tau tsib caug ob xyoos. Nws niam npe hu ua Yekhauliya yog neeg hauv Yeluxalees. Nws ua tej uas Yawmsaub pom tias zoo, ib yam li txhua yam uas nws txiv Amaxiya tau ua lawd. Nws rau siab ntso nrhiav Vajtswv tag Xekhaliya sim neej uas qhia nws paub ntshai Vajtswv. Thiab ncua sijhawm uas nws nrhiav Yawmsaub, mas Vajtswv pub nws vam meej. Nws tawm mus ua rog rau cov Filixatee mas tsoo lub moos Ka thiab lub moos Yane thiab lub moos Asadau tej ntsa loog pob tag. Thiab nws tsim muaj moos rau hauv Asadau li kav xyuam thiab rau lwm qhov hauv Filixatee tebchaws. Vajtswv pab nws ua rog ntaus cov Filixatee thiab cov Alam uas nyob hauv thaj nyuag tebchaws Kunpa‑as, thiab ntaus cov Me‑uni. Cov Asmoo kuj them se rau Uxiya mas nws lub koob meej thiaj nrov nto moo mus txog Iyi ciam teb, rau qhov nws muaj zog heev. Dua li ntawd Uxiya tseem tsim tej chaw tsom faj hauv Yeluxalees rau ntawm lub rooj loog ntawm lub kaum loog thiab lub Rooj Loog Hav thiab rau ntawm lub kaum ntsa loog, thiab ua kom ruaj khov. Thiab nws tsim tej chaw tsom faj rau hauv tebchaws moj sab qhua, thiab khawb ntau lub pas dej rau ntawm tej pov roob Sefela thiab rau hauv nruab tiag vim nws muaj tsiaj txhu coob, thiab nws muaj cov neeg ua teb thiab cov uas tu txiv hmab pem tej roob thiab rau hauv tej teb uas qoob zoo, vim nws nyiam ua teb. Dua li ntawd Uxiya muaj tej pab tub rog uas npaj txhij ua rog muab faib ua tej pab raws li Ye‑i‑ee uas yog tus tub sau ntawv thiab tus thawj rog Ma‑axeya tau txheeb cia, raws li vajntxwv tus tub teg tub taws Hananiya qhia. Cov thawj hauv txhua cum uas kav cov tub rog siab loj siab tuab huvsi muaj ob txhiab rau pua leej. Cov no ua thawj kav 307,500 leej tub rog uas muaj zog ua tau rog uas yuav pab tau vajntxwv tawm tsam yeeb ncuab. Thiab Uxiya npaj daim hlau thaiv thiab hmuv thiab mom hlau thiab tsho hlau thiab rab hneev thiab qe zeb uas yuav fiav ntawm txoj hlua. Hauv Yeluxalees nws muab tej qhaub uas tej Kws txawj ua nruab rau saum tej chaw tsom faj thiab ntawm tej kaum loog cia thiaj tau tua rab xub thiab qe zeb loj. Nws lub koob meej nrov nto moo mus deb, vim yog nws tau txais kev pab phimhwj kawg mus txog thaum nws muaj zog heev. Tiamsis thaum nws muaj zog lawd nws txawm ua lub siab khav theeb thiaj li ua rau nws raug kev puam tsuaj. Nws ua tsis ncaj rau Yawmsaub uas yog nws tus Vajtswv. Nws nkag mus hlawv hmoov tshuaj tsw qab rau saum lub thaj uas hlawv tshuaj tsw qab hauv Yawmsaub lub tuam tsev. Mas tus pov thawj Axaliya thiab Yawmsaub cov pov thawj yim caum leej uas siab loj siab tuab raws vajntxwv mus rau hauv. Lawv tav vajntxwv Uxiya thiab hais rau nws tias, “Uxiya, tsis yog koj li haujlwm mus hlawv tshuaj tsw qab xyeem rau Yawmsaub, yog cov pov thawj uas yog Aloo caj ces uas twb tu kom dawb huv lawd li haujlwm hlawv tshuaj tsw qab. Koj cia li tawm hauv lub chaw pe Vajtswv no mus, rau qhov koj ua txhaum lawm, thiab koj yuav tsis tau koob meej dabtsi ntawm Vajtswv Yawmsaub li.” Ces Uxiya txawm chim kawg. Nws tseem tuav rawv lub yias rau ncaig taws hauv nws txhais tes yuav hlawv tshuaj tsw qab, ces thaum nws chim rau cov pov thawj ntawd mob lig mob ruas txawm tshwm plaws rau ntawm nws hauv pliaj tab meeg cov pov thawj ntawm lub thaj hlawv tshuaj tsw qab ib sab hauv Yawmsaub lub tuam tsev. Tus pov thawj hlob Axaliya thiab cov pov thawj sawvdaws ntsia ntsoov Uxiya, ua ciav nws mob ruas rau ntawm nws hauv pliaj. Ces lawv txawm muab nws thawb tawm mus sai sai. Thiab nws maj nroos tawm mus rau qhov Yawmsaub nplawm nws lawm. Ces vajntxwv Uxiya txawm mob ruas mus txog hnub uas nws tuag. Vim yog nws mob ruas nws thiaj nyob nws ib lub tsev vim nws raug muab txiav tawm hauv Yawmsaub lub tuam tsev. Nws tus tub Yauthas ua tus uas saib xyuas vajntxwv lub tsev thiab kav cov pejxeem. Lwm yam haujlwm uas Uxiya ua txij thaum pib mus txog thaum kawg mas Amoj tus tub Yaxaya uas yog xibhwb cev Vajtswv lus twb muab sau cia lawm. Uxiya thiaj li tuag mus nrog nws tej poj koob yawm txwv nyob mas lawv muab nws log ze nws tej poj koob yawm txwv rau hauv thaj teb uas yog vajntxwv li, rau qhov lawv hais tias, “Nws yog ib tug mob ruas.” Mas nws tus tub Yauthas sawv nws chaw ua vajntxwv kav. Thaum Yauthas pib ua vajntxwv kav nws hnub nyoog muaj nees nkaum tsib xyoos, nws nyob hauv Yeluxalees kav tau kaum rau xyoo. Nws niam npe hu ua Yelusa, yog Xadau tus ntxhais. Yauthas ua tej uas Yawmsaub pom tias zoo ib yam li txhua yam uas nws txiv Uxiya tau ua, tsuas yog tseg tsis nkag mus rau hauv Yawmsaub lub tuam tsev xwb. Tiamsis cov pejxeem tseem pheej ua tej kev phem kev qias. Nws tsim kho Yawmsaub lub rooj loog tuam tsev sab ped, thiab tsim kho lub ntsa loog ntawm Aufee ntau heev. Dua li ntawd nws tsim tej moos pem toj siab hauv Yuda tebchaws thiab ua tej chaw zov khuav thiab tej chaw tsom faj rau hauv tej hav zoov. Nws mus ua rog ntaus yeej cov Asmoo tus vajntxwv. Mas xyoo ntawd cov Asmoo pub ib puas tala nyiaj thiab ib vam khaula mog thiab ib vam khaula qeb rau nws. Xyoo ob thiab xyoo peb cov Asmoo kuj them ib yam nkaus li no. Yauthas thiaj muaj zog tuaj rau qhov nws ua lub neej raws nraim li nws tus Vajtswv Yawmsaub txojkev. Lwm yam haujlwm uas Yauthas ua thiab nws tej kev ua rog huvsi thiab nws lub neej, twb muab sau cia hauv phau ntawv uas hais txog Yixayee thiab Yuda tej vajntxwv. Thaum nws pib ua vajntxwv kav nws hnub nyoog muaj nees nkaum tsib xyoos, nws nyob hauv Yeluxalees kav tau kaum rau xyoo. Yauthas tuag mus nrog nws tej poj koob yawm txwv nyob. Lawv muab nws log rau hauv Davi lub nroog, mas nws tus tub Aha sawv nws chaw ua vajntxwv kav. Thaum Aha pib ua vajntxwv kav nws hnub nyoog muaj nees nkaum xyoo, nws nyob hauv Yeluxalees kav tau kaum rau xyoo. Nws ua tej uas tsis hum Yawmsaub lub siab, nws tsis ua raws li nws yawg koob Davi tau ua, tiamsis nws taug nraim Yixayee tej vajntxwv tus neev taw. Nws kuj nchuav tej dab mlom los teev dab Npa‑as thiab. Nws hlawv xyab rau hauv lub hav Npeehinoo, thiab muab nws tej tub hlawv xyeem rau dab ua raws li tej kevcai qias vuab tsuab uas lwm haiv neeg ua, yog cov uas Yawmsaub ntiab tawm ntawm cov Yixayee hauv ntej mus. Nws xyeem tsiaj thiab hlawv hmoov xyab rau saum tej chaw siab teev dab thiab rau saum tej pov roob thiab hauv txhua tsob qab ntoo ntsuab. Vim li no Yawmsaub uas yog nws tus Vajtswv thiaj muab nws cob rau hauv cov Alas tus vajntxwv txhais tes, uas ntaus yeej Aha thiab ntes tau cov pejxeem coob coob coj mus rau hauv lub nroog Damaxaka. Thiab Aha raug muab cob rau hauv cov Yixayee tus vajntxwv txhais tes, uas kov yeej nws thiab tua neeg coob heev. Pekha uas yog Lemaliya tus tub tua cov Yuda tuag 120,000 leej rau tib hnub, puavleej yog cov uas siab loj siab tuab, vim yog lawv twb tso Yawmsaub uas yog lawv tej poj koob yawm txwv tus Vajtswv tseg lawm. Xikhi uas yog neeg Efa‑i muaj zog heev muab vajntxwv tus tub Ma‑axeya thiab Alikhas uas yog tus saib xyuas vajntxwv lub tsev thiab Eekhana uas yog vajntxwv tus tim xyoob tua pov tseg. Cov Yixayee ntes lawv cov kwvtij 200,000 leej, muaj pojniam muaj tub muaj ntxhais, thiab lws tau qhov txhia chaw ntau coj los rau hauv lub nroog Xamali. Muaj ib tug xibhwb cev Yawmsaub lus nyob ntawd hu ua Aude. Nws txawm tuaj ntsib cov tub rog uas rov los rau hauv Xamali thiab hais rau lawv tias, “Saib maj, Yawmsaub uas yog nej tej poj koob yawm txwv tus Vajtswv chim rau cov Yuda, nws thiaj muab lawv cob rau hauv nej txhais tes, tiamsis qhov uas nej muab lawv tua ua npau taws vog twb nrov mus txog saum ntuj lawm. Thiab nimno nej tseem yuav quab yuam cov Yuda thiab cov Yeluxalees tsis hais pojniam txivneej kom ua nej qhev. Nej tsis ua txhaum muaj txim rau Yawmsaub uas yog nej tus Vajtswv lov? Nimno cia li mloog kuv hais. Cia li xa nej cov kwvtij uas nej ntes tau no rov qab mus, rau qhov Yawmsaub txojkev npau taws nyob rawv saum nej lawm.” Muaj qee leej uas ua thawj hauv cov Efa‑i, yog Yauhanas tus tub Axaliya thiab Mesilemau tus tub Npelekhiya, thiab Salu tus tub Yehikhiya, thiab Halai tus tub Amaxa, mas lawv sawv tav cov uas mus ua rog los, thiab hais rau lawv tias, “Nej tsis txhob coj cov uas nej ntes tau, los rau hauv no, rau qhov nej yuav coj lub txim uas ua txhaum rau Yawmsaub los raug peb, tsav rau lub txim thiab tej kev txhaum uas nimno peb twb muaj lawm. Rau qhov peb lub txim kuj loj kawg lawm, thiab Yawmsaub txojkev npau taws heev twb muaj rau cov Yixayee lawm.” Yog li ntawd cov tub rog thiaj li tso cov neeg uas ntes tau thiab tej qhov txhia chaw uas lws tau los ntawd tseg rau ntawm cov thawj thiab cov pejxeem sawvdaws xubntiag. Mas cov txivneej uas twb hais npe lawd, txawm sawv pes tsees muab tej ris tsho uas lws tau los ntawd cev rau txhua tus uas lawv ntes los es tsis muaj ris tsho hnav. Lawv muab ua rau cov ntawd hnav thiab muab khau rau lawv rau thiab npaj zaub mov thiab dej haus rau lawv thiab muab roj pleev lawv tej mob. Thiab muab cov uas tsis muaj zog caij nees luav xa lawv rov mus cuag lawv cov kwvtij hauv lub moos Yelikhau, uas yog lub moos toov laj. Ces lawv li rov qab los rau ntawm lub nroog Xamali. Thaum ntawd vajntxwv Aha txib neeg mus thov Axilia tus vajntxwv pab nws, rau qhov cov Edoo rov txeem tuaj rau hauv lub tebchaws dua ib zaug thiab kov yeej cov Yuda thiab ntes ib txhia coj mus lawm. Cov Filixatee kuj txeem mus ua rog rau tej moos ntawm tej pov roob Sefela thiab hauv Neke hauv Yuda tebchaws, thiab txeeb tau lub moos Npeseme, Aiyaloo thiab Kedelau, thiab txeeb tau lub moos Xaukhau, Thinaj thiab Kixau thiab tej zej zog ib ncig tej moos ntawd. Thiab lawv los nyob rau hauv. Yawmsaub ua rau cov Yuda poob qes vim yog tim Aha uas yog Yuda tus vajntxwv, vim yog Aha rhuav tej kevcai hauv Yuda thiab tsis muab lub siab xib rau Yawmsaub. Axilia tus vajntxwv Thikapinexaw txawm tuaj tawm tsam nws thiab ua rau Aha raug txom nyem tsis yog tuaj txhawb nws lub zog. Rau qhov Aha muab tej qhov txhia chaw hauv Yawmsaub lub tuam tsev thiab hauv vajntxwv tsev thiab hauv cov thawj tej tsev, them se rau Axilia tus vajntxwv. Qhov uas nws ua li ntawd tsis pab nws kiag li. Thaum tus vajntxwv Aha no raug kev txom nyem ntawd nws yimhuab fav xeeb rau Yawmsaub. Nws tua tsiaj xyeem rau lub nroog Damaxaka tej dab uas ua rau nws swb, thiab hais tias, “Vim cov Alas tej vajntxwv li dab tau pab lawv lawm, kuv yuav tua tsiaj xyeem rau tej dab ntawd kom pab kuv thiab.” Tiamsis tej dab ntawd ua rau nws thiab cov Yixayee sawvdaws puam tsuaj xwb. Thiab Aha sau zog tej twj siv hauv Vajtswv lub tuam tsev thiab muab txiav ua tej dwb daim, thiab muab Vajtswv lub tuam tsev tej qhov rooj kaw cia thiab nws ua tej thaj xyeem dab rau nws siv rau txhua qhov hauv lub nroog Yeluxalees. Nws ua tej chaw siab rau hauv Yuda txhua lub moos hlawv tsiaj xyeem rau luag tej dab, zes ua rau Yawmsaub uas yog nws tej poj koob yawm txwv tus Vajtswv chim. Lwm yam haujlwm uas Aha ua thiab nws lub neej huvsi txij thaum pib mus txog thaum kawg twb muab sau cia rau hauv phau ntawv uas hais txog Yuda thiab Yixayee tej vajntxwv. Aha tuag mus nrog nws tej poj koob yawm txwv nyob, mas lawv muab nws log rau hauv lub nroog Yeluxalees, rau qhov lawv tsis muab log rau hauv tej qhov ntxa uas log Yixayee tej vajntxwv. Nws tus tub Hexekhiya sawv nws chaw ua vajntxwv kav. Thaum Hexekhiya hnub nyoog muaj nees nkaum tsib xyoos nws pib ua vajntxwv kav, nws nyob hauv Yeluxalees kav tau nees nkaum cuaj xyoo. Nws niam npe hu ua Anpiya, uas yog Xekhaliya tus ntxhais. Nws ua tej uas Yawmsaub pom tias zoo, ib yam li nws yawg koob Davi tau ua lawd. Thawj xyoo uas nws ua vajntxwv kav mas thawj lub hli nws qheb Yawmsaub lub tuam tsev tej qhov rooj thiab tsim kho tej qhov rooj ntawd. Nws coj cov pov thawj thiab cov Levi nkag los, thiab sau lawv tuaj txoos ua ke rau ntawm lub tshav puam sab hnub tuaj, thiab nws hais rau lawv tias, “Cov Levi, cia li mloog kuv hais. Cia li tu nej tus kheej kom dawb huv thiab tu Yawmsaub uas yog nej tej poj koob yawm txwv tus Vajtswv lub tuam tsev kom dawb huv, thiab muab tej uas qias tsis huv rho tawm hauv lub chaw dawb huv mus. Rau qhov peb tej poj koob yawm txwv fav xeeb thiab ua tej uas Yawmsaub uas yog peb tus Vajtswv pom tias phem kawg. Lawv twb tso nws tseg thiab fee plhu ntawm Yawmsaub lub chaw nyob thiab tig nrob qaum rau. Lawv kuj kaw tej qhov rooj ntawm qab khav tuam tsev thiab tua tej teeb thiab tsis hlawv hmoov tshuaj tsw qab thiab tsis muab tsiaj hlawv xyeem rau Yixayee tus Vajtswv hauv lub chaw dawb huv. Vim li no Yawmsaub txojkev npau taws thiaj los raug cov Yuda thiab Yeluxalees, thiab Yawmsaub ua rau lawv ua lub chaw rau luag ceeb thiab ntshai heev thiab ua rau luag xav tsis thoob thiab ua rau luag thuam luag raws li nej lub qhov muag tau pom lawd. Vim yog tim li no peb tej poj koob yawm txwv thiaj li tuag hniav ntaj hniav riam tag, thiab peb tej tub tej ntxhais thiab peb tej pojniam thiaj raug luag ntes coj mus lawm. Nimno kuv muaj lub siab yuav nrog Yawmsaub uas yog cov Yixayee tus Vajtswv cog lus kom nws txojkev npau taws heev thiaj li thim ntawm peb mus. Kuv cov menyuam 'e, tsis txhob nyob twjywm, rau qhov Yawmsaub twb xaiv nej kom sawv nres nroos rau ntawm Yawmsaub xubntiag ua koom tu nws thiab ua nws tej haujlwm thiab hlawv tshuaj tsw qab rau nws.” Ces cov Levi thiaj li sawv tsees, Khauha caj ces yog Amaxai tus tub Maha, thiab Axaliya tus tub Yau‑ee. Thiab Melali caj ces yog Adi tus tub Khij, thiab Yehalelee tus tub Axaliya. Thiab Kwsoo caj ces yog Xima tus tub Yau‑av thiab Yau‑av tus tub Edee. Elixafa caj ces yog Sili thiab Ye‑u‑ee, thiab Axas caj ces yog Xekhaliya thiab Mathaniya, thiab Hemas caj ces yog Yehu‑ee thiab Sime‑i, thiab Yeduthu caj ces yog Semaya thiab Uxi‑ee. Lawv thiaj sau zog lawv cov kwvtij thiab tu lawv tus kheej kom dawb huv thiab nkag mus rau hauv raws li vajntxwv tau hais rau lawv kom ntxuav lub tuam tsev raws li Yawmsaub tej lus. Cov pov thawj nkag mus rau hauv Yawmsaub lub tuam tsev rau chav sab hauv thiaj ua kevcai ntxuav kom dawb huv, thiab lawv rho txhua yam qias tsis huv uas lawv pom nyob hauv Yawmsaub lub tuam tsev tawm los rau sab nraum lub tshav puam tuam tsev. Mas cov Levi muab tej ntawd nqa mus pov tseg rau hauv lub hav Khiloo. Lawv pib ua kevcai ntxuav rau hnub xiab ib thawj lub hli, ces hnub xiab yim lub hli ntawd lawv ntxuav los txog ntawm Yawmsaub lub qab khav. Ces lawv txawm ntxuav Yawmsaub lub tuam tsev kom dawb huv tau yim hnub, mas hnub tim kaum rau thawj lub hli ntawd lawv ua tag. Mas lawv mus cuag vajntxwv Hexekhiya thiab hais tias, “Peb ua kevcai ntxuav Yawmsaub lub tuam tsev huvsi tiav tag lawm, tag nrho lub thaj hlawv xyeem thiab tej twj uas siv ntawm lub thaj huvsi thiab lub rooj uas txawb cov ncuav xyeem thiab tej twj uas siv ntawm lub rooj ntawd. Tej twj siv huvsi uas vajntxwv Aha muab rho pov tseg rau lub sijhawm uas nws ua vajntxwv thiab fav xeeb rau Yawmsaub, mas peb twb npaj txhij thiab ua kevcai ntxuav kom dawb huv lawm. Saib nawj, tej no nyob ntawm Yawmsaub lub thaj xyeem.” Ces vajntxwv Hexekhiya txawm sawv ntxov tsees sau zog cov nom tswv hauv lub nroog ua ke mus rau hauv Yawmsaub lub tuam tsev. Lawv coj xya tus txiv nyuj thiab xya tus txiv yaj thiab xya tus menyuam yaj thiab xya tus txiv tshis ua kevcai xyeem daws lub tebchaws thiab lub chaw pe Vajtswv thiab cov Yuda li txim. Thiab Hexekhiya hais rau cov pov thawj uas yog Aloo caj ces kom muab tej no xyeem rau saum Yawmsaub lub thaj. Lawv thiaj tua tej txiv nyuj mas cov pov thawj cug tej ntshav mus nchos rau lub thaj xyeem. Lawv kuj tua tej txiv yaj thiab muab tej ntshav nchos rau lub thaj, thiab lawv tua cov menyuam yaj thiab muab tej ntshav nchos rau lub thaj. Cov txiv tshis uas ua kevcai daws txim ntawd lawv coj los rau ntawm vajntxwv thiab cov pejxeem uas tuaj txoos ua ke, mas cov pejxeem muab tes npuab rau saum cov tshis ntawd. Ces cov pov thawj muab cov tshis ntawd tua thiab muab cov ntshav xyeem ua kevcai daws txim rau saum lub thaj kom thiaj ntxuav tau cov Yixayee sawvdaws tej kev txhaum txim. Rau qhov vajntxwv hais kom ua kevcai hlawv xyeem thiab ua kevcai daws txim rau cov Yixayee sawvdaws. Nws kom cov Levi nyob rawv hauv Yawmsaub lub tuam tsev muaj nruas npuaj tooj liab thiab nkauj nog ncas loj thiab nkauj nog ncas me raws li tej kevcai uas Davi thiab Kas uas hais pom tom hauv ntej thiab Nathas uas cev Vajtswv lus tau hais cia, rau qhov tej kevcai no yog Yawmsaub kom nws cov xibhwb cev lus hais. Cov Levi sawv ntsug tuav rawv tej cuab yeej phim nkauj uas Davi npaj cia, thiab cov pov thawj tuav rawv raj xyu. Mas Hexekhiya hais kom hlawv tej uas muab xyeem rau saum lub thaj. Thaum pib ua kevcai hlawv xyeem kuj pib hu nkauj rau Yawmsaub, thiab muaj tej suab raj thiab tej suab cuab yeej phim nkauj uas cov Yixayee tus vajntxwv Davi npaj cia lawd. Ib tsoom pejxeem sawvdaws kuj pe hawm, thiab cov tub hu nkauj kuj hu, cov tshuab raj kuj tshuab. Lawv ua li no mus txog thaum ua kevcai hlawv xyeem tag. Thaum ua kevcai xyeem tag lawm, vajntxwv thiab txhua tus uas nrog vajntxwv nyob ua ke kuj khoov ntshis pe hawm. Mas vajntxwv Hexekhiya thiab cov thawj hais kom cov Levi hu nkauj qhuas Yawmsaub raws li tej lus uas Davi thiab xibhwb Axas uas hais pom tom hauv ntej twb sau cia lawm. Lawv hu nkauj qhuas zoo siab xyiv fab, thiab khoov ntshis pe hawm. Mas Hexekhiya hais tias, “Nej twb tu nej tus kheej kom dawb huv rau Yawmsaub lawm. Cia li txav los ze thiab coj tej tsiaj uas yuav tua xyeem thiab tej uas yuav xyeem ua Yawmsaub tsaug los rau hauv Yawmsaub lub tuam tsev.” Ib tsoom pejxeem kuj coj tsiaj los tua xyeem thiab xyeem ua tsaug. Txhua tus uas zoo siab pub kuj coj tej uas ua kevcai hlawv xyeem tuaj. Cov tsiaj uas tej pejxeem coj tuaj ua kevcai hlawv xyeem yog xya caum tus txiv nyuj thiab ib puas tus txiv yaj thiab ob puas tus menyuam yaj, tej no huvsi yog ua kevcai hlawv xyeem rau Yawmsaub. Thiab tej tsiaj uas coj tuaj xyeem muaj rau pua tus txiv nyuj thiab peb txhiab tus yaj. Tiamsis cov pov thawj muaj tsawg dhau laws tsis yeej cov tawv tsiaj uas hlawv xyeem ntawd, mas lawv cov kwvtij Levi pab lawv ua tej haujlwm tiav mus txog thaum lwm tus pov thawj tu lawv tus kheej kom dawb huv, rau qhov cov Levi rau siab tu lawv tus kheej kom dawb huv heev dua cov pov thawj. Dua li tej uas muab hlawv xyeem ntau kawg ntawd, tseem muaj tej hlab hluas roj uas ua kevcai xyeem sib raug zoo thiab tej cawv txiv hmab uas muab hliv xyeem ua ke nrog tej uas hlawv xyeem. Ua li no tej haujlwm uas ua rau hauv Yawmsaub lub tuam tsev thiaj rov qab muaj li qub. Hexekhiya thiab cov pejxeem sawvdaws zoo siab xyiv fab rau tej uas Vajtswv tau ua rau cov pejxeem rau qhov tej no tshwm sim los sai kawg. Hexekhiya hais mus rau cov Yixayee thiab cov Yuda sawvdaws, thiab sau ntawv mus rau cov Efa‑i thiab cov Manaxe kom lawv sawvdaws tuaj rau Yawmsaub lub tuam tsev hauv Yeluxalees mas yuav ua kevcai Hla Dhau xyeem rau Yawmsaub uas yog cov Yixayee tus Vajtswv. Vajntxwv thiab nws cov thawj thiab cov pejxeem hauv Yeluxalees twb sablaj cia yuav ua kevcai Hla Dhau rau lub ob hlis, rau qhov lawv ua zaum kevcai ntawd tsis yeej raws li sijhawm uas teem cia, vim yog cov pov thawj tsis tau tu lawv kom dawb huv txaus npaum li uas ua tau haujlwm, thiab cov pejxeem kuj tsis tau tuaj txoos ua ke txhij rau hauv Yeluxalees. Mas tej uas lawv txiav txim siab ua ntawd vajntxwv thiab ib tsoom pejxeem sawvdaws pom zoo. Lawv thiaj hais hum tias yuav tshaj tawm thoob plaws Yixayee tebchaws txij ntawm lub moos Npe‑awsenpa mus txog lub moos Daj, kom cov pejxeem yuav tsum tuaj ua kevcai Hla Dhau xyeem rau Yawmsaub uas yog cov Yixayee tus Vajtswv rau hauv Yeluxalees, rau qhov cov uas ua kevcai Hla Dhau raws li uas teem cia tsis muaj coob. Yog li ntawd thiaj muaj neeg xa xov mus thoob plaws Yixayee thiab Yuda tebchaws raws li vajntxwv hais, nqa cov ntawv uas vajntxwv thiab nws cov thawj sau, hais tias, “Neeg Yixayee 'e, cia li rov los cuag Yawmsaub uas yog Aplahas, Yiha, thiab Yixayee tus Vajtswv, xwv nws thiaj rov tig los cuag nej cov uas tseem tshuav nyob, yog cov uas dim ntawm Axilia tej vajntxwv txhais tes. Tsis txhob zoo thooj li nej tej poj koob yawm txwv thiab nej tej kwvtij uas fav xeeb rau Yawmsaub uas yog lawv tej poj koob yawm txwv tus Vajtswv, Yawmsaub thiaj ua rau lawv piam tag li uas nej pom ntsoov. Nimno nej tsis txhob tawv ncauj yam li nej tej poj koob yawm txwv. Cia li muab nej tus kheej cob rau Vajtswv thiab tuaj rau ntawm qhov chaw uas pe Vajtswv uas nws twb tu kom dawb huv cia mus ib txhis, thiab ua koom tu Yawmsaub uas yog nej tus Vajtswv, xwv nws txojkev chim npau taws heev thiaj li thim ntawm nej mus. Yog nej rov los cuag Yawmsaub, nej cov kwvtij thiab nej cov menyuam yuav tau txais txojkev khuvleej ntawm cov uas ntes lawv coj mus, thiab yuav tau rov los rau hauv lub tebchaws no dua thiab. Yawmsaub uas yog nej tus Vajtswv yog tus uas hlub thiab khuvleej. Yog nej rov los cuag nws, nws yuav tsis fee plhu ntawm nej.” Cov uas xa ntawv thiaj mus ib lub moos dhau ib lub moos thoob plaws Efa‑i thiab Manaxe tebchaws thiab mus txog ntua Xenpuloo tebchaws. Tiamsis tej neeg ntawd thuam luag lawv thiab saib tsis taus lawv. Tsuas yog cov neeg Asaw thiab Manaxe thiab Xenpuloo qee leej thiaj txo hwjchim thiab tuaj rau hauv Yeluxalees xwb. Vajtswv txhais tes kuj nyob rawv saum cov Yuda ua rau lawv koom ib lub siab ua raws li tej lus uas Yawmsaub kom vajntxwv thiab cov thawj hais. Cov pejxeem ntau leej tuaj ua ke ua kevcai noj ncuav tsis xyaw keeb rau hauv Yeluxalees rau lub ob hlis, lawv tuaj txoos ua ke coob kawg li. Lawv nqes tes rhuav tej thaj xyeem dab uas nyob hauv Yeluxalees, thiab lawv muab tej thaj hlawv xyab nqa mus pov rau hauv lub hav Khiloo. Lawv tua tej menyuam yaj uas ua kevcai Hla Dhau rau hnub xiab kaum plaub lub ob hlis. Cov pov thawj thiab cov Levi kuj txaj muag, lawv thiaj tu lawv tus kheej kom dawb huv thiab coj tej uas ua kevcai hlawv xyeem tuaj rau hauv Yawmsaub lub tuam tsev. Lawv thiaj mus nyob rau lawv tej chaw uas teem cia raws li Vajtswv tus neeg Mauxe txoj kevcai. Cov pov thawj thiaj li txais tej ntshav ntawm cov Levi txhais tes coj mus nchos. Cov pejxeem uas tuaj txoos ua ke ntawd muaj coob leej uas tsis tau tu lawv tus kheej kom dawb huv. Vim li no cov Levi yuav tsum tua txhua tus uas tseem qias tsis huv tus menyuam yaj uas ua kevcai Hla Dhau, xwv thiaj ua tau tus menyuam yaj dawb huv rau Yawmsaub. Txawm yog cov pejxeem coob ntawd muaj cov uas tuaj Efa‑i, Manaxe, Ixakha thiab Xenpuloo tebchaws tuaj coob heev uas tsis tau tu lawv tus kheej kom dawb huv, los lawv tseem noj pluas mov kevcai Hla Dhau ntawd mas txhaum tsis raws li tu tseg. Hexekhiya thiaj thov Yawmsaub pab lawv hais tias, “Thov Yawmsaub uas zoo kawg nkaus zam txim rau txhua tus uas muaj siab nrhiav Vajtswv, uas yog Yawmsaub uas yog lawv tej poj koob yawm txwv tus Vajtswv, txawm yog lawv tsis dawb huv raws li lub chaw pe Vajtswv tej kab ke kuj xij.” Yawmsaub kuj mloog Hexekhiya tej lus thov thiab kho cov pejxeem. Cov Yixayee uas tuaj rau hauv Yeluxalees tau ua kevcai noj ncuav tsis xyaw keeb zoo siab xyiv fab heev tau xya hnub, thiab cov Levi thiab cov pov thawj kuj niaj hnub qhuas Yawmsaub. Lawv hu nkauj qhuas Yawmsaub muaj cuab yeej phim suab nkauj nrov xyeem rau Yawmsaub. Thiab Hexekhiya hais lus txhawb cov Levi sawvdaws uas txawj txawj ua haujlwm ua koom tu Yawmsaub. Cov pejxeem thiaj noj mov kevcai ntawd tau xya hnub thiab tua tsiaj ua kevcai xyeem sib raug zoo thiab ua Yawmsaub uas yog lawv tej poj koob yawm txwv tus Vajtswv tsaug. Mas ib tsoom pejxeem sawvdaws hais hum yuav ua kevcai ntawd dua xya hnub thiab. Ces lawv txawm ua kevcai zoo siab xyiv fab xya hnub ntxiv. Yuda tus vajntxwv Hexekhiya pub ib txhiab tus txiv nyuj thiab xya txhiab tus yaj rau cov pejxeem ua kevcai xyeem, thiab cov thawj kuj pub ib txhiab tus txiv nyuj thiab ib vam tus yaj rau cov pejxeem. Thiab cov pov thawj kuj tu lawv tus kheej kom dawb huv coob kawg. Ib tsoom neeg Yuda thiab cov Levi thiab cov pov thawj thiab ib tsoom neeg uas tuaj Yixayee tebchaws tuaj thiab lwm haiv neeg uas tuaj Yixayee tebchaws tuaj thiab lwm haiv neeg uas nyob hauv Yuda tebchaws, sawvdaws zoo siab xyiv fab. Yog li no thiaj muaj kev xyiv fab loj kawg rau hauv Yeluxalees. Txij thaum Davi tus tub Xalaumoo ua vajntxwv kav Yixayee tsis txeev muaj li zaum no rau hauv Yeluxalees. Mas cov pov thawj thiab cov Levi sawv ntsug foom koob hmoov rau cov pejxeem. Yawmsaub kuj hnov lawv lub suab, thiab lawv tej lus thov kuj mus txog Yawmsaub lub chaw nyob dawb huv saum ntuj. Thaum tej no tiav tag huvsi cov Yixayee sawvdaws uas tuaj rau hauv Yeluxalees tawm mus rau Yuda tej moos thiab tsoo tej ncej teev dab ua tej dwb daim thiab ntov tej ncej dab Asela vau tag, thiab tsoo tej chaw siab teev dab thiab tej thaj thoob plaws Yuda thiab Npeeyamee thiab Efa‑i thiab Manaxe tebchaws pob tag, mus txog thaum ua rau txhua yam puam tsuaj tag. Cov Yixayee sawvdaws li rov mus rau lawv tej moos nyias mus txog nyias vaj nyias tsev. Hexekhiya faib cov pov thawj thiab cov Levi ua tej pab tej pawg, nyias nrog nyias pab raws li tej haujlwm uas cov pov thawj thiab cov Levi ua, yog ua kevcai hlawv xyeem thiab ua kevcai xyeem sib raug zoo thiab ua haujlwm ntawm Yawmsaub lub chaw nyob tej rooj loog thiab ua tsaug thiab qhuas Vajtswv. Vajntxwv pub nws li qhov txhia chaw ua tej uas ua kevcai hlawv xyeem thaum tagkis thiab thaum yuav tsaus ntuj thiab hlawv rau hnub Xanpatau thiab hnub hli xiab thiab hlawv rau tej kevcai uas teem cia, raws li uas sau cia rau hauv Yawmsaub txoj kevcai. Nws hais rau cov pejxeem uas nyob hauv Yeluxalees kom pub cov pov thawj thiab cov Levi li feem raws li uas teem cia lawd rau lawv, xwv lawv thiaj rau siab ua haujlwm raws li Yawmsaub txoj kevcai qhia. Thaum nws tej lus nrov ncha mus, cov Yixayee kuj pub tej uas hais no ntau kawg li, yog thawj phaum qoob thiab cawv txiv hmab, roj, zib ntab thiab txhua yam uas tau hauv teb ntau kawg li, thiab coj ib feem kaum hauv txhua yam tuaj ntau nplua mias. Cov Yixayee thiab cov Yuda uas nyob hauv Yuda tej moos kuj coj ib feem kaum hauv tej nyuj tej yaj thiab hauv tej uas muab pub kiag cais ua yam uas dawb huv rau Yawmsaub uas yog lawv tus Vajtswv, mas khaws tau tej niag pawg. Lawv cuab sau ua tej pawg thaum lub peb hlis mus txog lub xya hli li tiav tag. Thaum Hexekhiya thiab cov thawj tuaj pom tej pawg ntawd lawv kuj qhuas Yawmsaub thiab foom koob hmoov rau Yawmsaub haiv neeg Yixayee. Hexekhiya thiaj nug cov pov thawj thiab cov Levi txog tej niag pawg ntawd. Tus tuam pov thawj hlob Axaliya uas yog Xadau caj ces teb nws tias, “Txij thaum lawv coj tej qhov txhia chaw pub rau hauv Yawmsaub lub tuam tsev mas peb tau noj tsau npo thiab tseem muaj seem ntau, vim yog Yawmsaub foom koob hmoov rau nws cov neeg, peb thiaj tshuav seem ntau npaum li no.” Ces Hexekhiya txawm hais kom lawv npaj tej chav hauv Yawmsaub lub tuam tsev. Lawv thiaj npaj chaw. Thiab lawv kuj ua ncaj ncees sau tej uas sawvdaws pub thiab tej uas yog ib feem kaum thiab tej uas pub kiag ua yam uas dawb huv los rau hauv. Tus thawj uas saib xyuas tej ntawd yog Khaunaniya uas yog ib tug Levi, thiab nws tus kwv Sime‑i ua tus pab nws. Vajntxwv Hexekhiya thiab Axaliya uas yog tus thawj hauv Vajtswv lub tuam tsev tsa Yehi‑ee, Axaxiya, Nahaj, Axahee, Yelimau, Yauxanpa, Eli‑ee, Imakhiya, Maha thiab Npenaya saib xyuas haujlwm pab Khaunaniya thiab nws tus kwv Sime‑i. Ina tus tub Khaule uas yog ib tug Levi thiab zov lub rooj loog sab hnub tuaj, ua tus uas saib xyuas tej uas luag zoo siab coj tuaj pub rau Vajtswv, thiab faib tej uas muab pub rau Yawmsaub thiab tej uas xyeem dawb huv kawg nkaus. Mas hauv cov pov thawj tej moos Edee, Meeyamee, Yesua, Semaya, Amaliya thiab Sekhaniya ua ncaj ncees pab Khaule faib rau lawv cov kwvtij tus hlob tus yau sib npaug zos raws li lawv tej pab tej pawg. Lawv faib rau cov txivneej uas hnub nyoog peb xyoos rov saud txhua tus uas nkag rau hauv Yawmsaub lub tuam tsev raws li lawv pawg muaj haujlwm ua rau hnub ntawd, yog mus ua haujlwm raws li lawv pawg li feem ua, tsuas yog tseg tsis faib rau cov uas nce npe rau hauv lawv tej cum. Cov pov thawj nce npe ua pab ua pawg raws li lawv tej cum, cov Levi uas hnub nyoog nees nkaum xyoo rov saud kuj nce npe raws lawv tej haujlwm thiab raws li lawv tej pab tej pawg. Cov pov thawj mas lawv tej menyuam yaus lawv tej pojniam tej tub tej ntxhais tag nrho lawv cov neeg sawvdaws kuj nce npe ua ke, rau qhov cov pov thawj mob siab tswj lawv tus kheej kom dawb huv mus li. Hais txog Aloo caj ces uas ua pov thawj uas nyob hauv tej zej zog ib ncig tej moos, mas muaj cov txivneej hauv txhua lub moos uas muaj npe ua tus faib qhov txhia chaw rau txhua tus txivneej uas yog cov pov thawj li neeg thiab faib rau txhua tus Levi uas nce npe lawd. Hexekhiya ua li no thoob plaws Yuda tebchaws, thiab nws ua yam uas zoo thiab raug cai thiab ncaj ncees rau ntawm Yawmsaub uas yog nws tus Vajtswv xubntiag. Thiab txhua yam haujlwm uas nws ua pab Vajtswv tej haujlwm hauv lub tuam tsev thiab qhov uas ua raws li txoj kevcai thiab Vajtswv tej lus nkaw, uas yog nrhiav nws tus Vajtswv, nws ua kawg siab kawg ntsws, nws thiaj vam meej. Thaum dhau tej xwm txheej no thiab tej haujlwm uas Hexikhiya mob siab ua no lawd, Axilia tus vajntxwv Xenakhawli txawm tuaj ua rog rau Yuda thiab tsuam chaw vij tej moos uas muaj ntsa loog, npaj siab yuav txeeb kom tau. Thaum Hexekhiya pom tias Xenakhawli tuaj yuav ua rog rau Yeluxalees, nws txawm nrog nws cov thawj rog thiab cov tub rog siab loj siab tuab ntaus tswvyim txhub tej qhov dej txhawv uas nyob ib ncig lub nroog, mas lawv kuj pab nws ua. Cov pejxeem sau zog coob coob tuaj, mas lawv txhub txhua lub qhov dej txhawv thiab txhub lub hauv dej uas ntws hla lub tebchaws. Lawv hais tias, “Ua cas yuav cia Axilia tej vajntxwv tuaj ntsib tej dej uas ntau li no?” Hexekhiya rau siab ntso ua tej ntsa loog uas pob tag dua tshiab thiab ua tej chaw tsom faj saum ntsa loog, thiab tseem ua dua ib txheej ntsa loog rau sab nraud, thiab nws ua lub loog Milau hauv Davi lub nroog khov dua. Nws kuj ua tej cuab yeej ua rog thiab tej daim hlau thaiv ntau kawg. Nws tsa cov thawj rog saib xyuas cov pejxeem thiab sau lawv los ua ke rau hauv lub tshav puam ntawm rooj loog los rau nws thiab hais lus txhawb lawv lub siab hais tias, “Cia li ua khov kho thiab ua siab loj siab tuab. Tsis txhob ntshai tsis txhob poob siab rau Axilia tus vajntxwv thiab tej pab tub rog coob coob uas nrog nws tuaj ntawd, rau qhov tus uas nrog peb loj dua tus uas nrog nws. Nws tsuas yog muaj txhais npab nqaij tawv xwb tiamsis peb muaj Yawmsaub uas yog peb tus Vajtswv nrog nraim peb uas pab peb thiab nyob peb chaw ua rog.” Hexekhiya tej lus thiaj txhawb tau cov pejxeem lub zog. Dhau ntawd thaum Axilia tus vajntxwv Xenakhawli thiab nws cov tub rog huvsi tseem tabtom vij lub moos Lakhi, mas nws tso nws cov tub teg tub taws mus rau lub nroog Yeluxalees mus cuag Yuda tus vajntxwv Hexekhiya thiab cuag cov neeg Yuda sawvdaws uas nyob hauv Yeluxalees, hais tias, “Axilia tus vajntxwv Xenakhawli hais li no tias, Nej vam khom dabtsi es nej yuav nyob hauv Yeluxalees thev qhov uas raug vij li no? Thaum Hexekhiya hais rau nej tias, ‘Yawmsaub uas yog peb tus Vajtswv yuav cawm peb dim hauv Axilia tus vajntxwv txhais tes,’ tsis yog Hexekhiya coj nej yuam kev mus tuag tshaib tuag nqhis lov? Tus Hexikhiya no nws tsis yog tus uas rhuav tshem Vajtswv tej chaw siab thiab tej thaj uas xyeem rau Vajtswv lov? Thiab hais rau cov Yuda thiab cov hauv Yeluxalees tias, ‘Nej yuav tsum pe rau tib lub thaj thiab hlawv xyeem rau lub thaj ntawd xwb.’ Nej tsis paub tias kuv thiab kuv tej poj koob yawm txwv twb ua li cas rau txhua haiv neeg hauv lwm tebchaws lawm lov? Cov neeg hauv tej tebchaws ntawd li dab pab cawm tau lawv tej tebchaws dim hauv kuv txhais tes lov? Tej dab huvsi hauv tej tebchaws uas kuv tej poj koob yawm txwv muab ua puam tsuaj tag nrho muaj ib tug dab twg uas pab tau nws cov neeg dim hauv kuv txhais tes? Mas nej tus Vajtswv tseem yuav pab tau nej dim hauv kuv txhais tes lov? Vim li no tsis txhob cia Hexekhiya dag ntxias nej lossis coj nej yuam kev, tsis txhob ntseeg nws, rau qhov tsis muaj ib tug dab hauv haiv neeg twg thiab lub tebchaws twg uas cawm tau nws haiv neeg dim hauv kuv txhais tes lossis hauv kuv tej poj koob yawm txwv txhais tes. Nej tus Vajtswv yimhuab tsis txawj pab nej dim hauv kuv txhais tes li lauj!” Xenakhawli cov tub teg tub taws tseem thuam Vajtswv Yawmsaub thiab Hexekhiya uas yog Vajtswv tus tub qhe ntau dua li no. Thiab Xenakhawli tseem sau ntawv hais saib tsis taus Yawmsaub uas yog cov Yixayee tus Vajtswv thiab thuam hais tias, “Cov neeg hauv ib tsoom tebchaws li dab pab tsis tau lawv haiv neeg dim hauv kuv txhais tes li cas, Hexekhiya tus Vajtswv kuj yuav pab tsis tau nws haiv neeg dim hauv kuv txhais tes li ntawd thiab.” Ces lawv txawm qw tej lus ntawd nrov nrov ua lus Yuda rau cov neeg Yeluxalees uas nyob saum lub ntsa loog hnov es kom lawv ntshai thiab poob siab heev xwv thiaj li txeeb tau lub nroog ntawd. Lawv hais txog Yeluxalees tus Vajtswv ib yam li lawv hais txog ib tsoom neeg hauv ntiajteb tej dab uas yog neeg txhais tes ua. Ces vajntxwv Hexekhiya thiab Amoj tus tub Yaxaya uas yog xibhwb cev Vajtswv lus txawm quaj thov txog zaj no rau saum ntuj. Yawmsaub thiaj txib ib tug tubtxib saum ntuj los mas nws tua cov tub rog siab loj siab tuab thiab cov thawj tub rog thiab cov uas kav tej pab tub rog huvsi tuag tag rau hauv vajntxwv Axilia lub yeej. Yog li no Xenakhawli thiaj li rov qab mus rau nws lub tebchaws yam poob ntsej muag kawg. Thaum nws mus rau hauv lub tsev uas teev nws tus dab nws cov tub qee leej xuas ntaj muab nws tua rau qhov ntawd. Yawmsaub thiaj cawm Hexekhiya thiab cov uas nyob hauv Yeluxalees dim hauv Axilia tus vajntxwv Xenakhawli txhais tes thiab hauv nws tej yeeb ncuab sawvdaws txhais tes li no. Yawmsaub pub lawv tau so tsis ua rog rau txhua fab. Neeg coob coj qhov txhia chaw tuaj rau hauv Yeluxalees pub rau Yawmsaub thiab coj tej uas tsim txiaj tuaj pub rau Yuda tus vajntxwv Hexekhiya, Hexekhiya thiaj tau koob meej tab meeg ib tsoom tebchaws sawvdaws txij thaum ntawd los. Lub sijhawm ntawd Hexekhiya mob hnyav heev twb yuav tuag, mas nws thov Yawmsaub. Yawmsaub kuj teb nws thiab ua ib yam txujci phimhwj tshwm rau nws. Tiamsis Hexekhiya tsis nco tej txiaj ntsig uas Yawmsaub pab nws, vim yog nws lub siab khav theeb. Vim li no txojkev npau taws thiaj los raug nws thiab cov Yuda thiab Yeluxalees. Ces Hexekhiya txawm txo nws lub siab khav theeb ntawd thiab cov neeg uas nyob hauv Yeluxalees kuj ua ib yam li nws, ces Yawmsaub txojkev npau taws thiaj tsis los raug lawv rau hauv Hexekhiya sim neej. Hexekhiya muaj nyiaj txiag ntau kawg thiab muaj koob meej loj, mas nws ua tej txhab nyiaj rau nws rau nyiaj rau kub, rau tej qe zeb hlaws muaj nqes, rau txuj lom, rau tej daim phiaj hlau thaiv thiab tej twj siv tsim txiaj txhua yam. Thiab nws ua txhab rau qoob, rau cawv txiv hmab thiab roj, thiab ua nkuaj rau txhua yam tsiaj txhu thiab nkuaj yaj. Thiab nws tsim tej moos rau nws thiab nws muaj tej pab yaj tej pab tshis tej pab nyuj ntau nplua mias, vim yog Vajtswv pub cuab txhiaj cuab tam rau nws ntau heev. Tus vajntxwv Hexekhiya no yog tus uas cais lub hauv dej Kihoo sab ped kom ntws mus rau Davi lub nroog sab hnub poob. Hexekhiya vam meej rau nws tej haujlwm huvsi. Thaum cov thawj hauv lub nroog Npanpiloo txib neeg tuaj nug txog tej txujci phimhwj uas tshwm rau hauv lub tebchaws, mas Vajtswv muab nws tso nyob kab ntsab xwv thiaj sim tau nws thiab paub txhua yam uas nyob hauv nws lub siab. Lwm yam haujlwm uas Hexekhiya ua thiab tej yam zoo uas nws ua, twb muab sau cia rau hauv tej zaj yog toog uas Amoj tus tub Yaxaya uas yog xibhwb cev Vajtswv lus hais nyob rau hauv phau ntawv uas hais txog Yuda thiab Yixayee tej vajntxwv. Ces Hexekhiya txawm tuag mus nrog nws tej poj koob yawm txwv nyob. Lawv muab nws log rau saum caj qaum roob uas yog Davi caj ces li toj ntxa. Tag nrho cov Yuda thiab cov uas nyob hauv Yeluxalees sawvdaws tuaj pam nws lub ntees loj kawg hwm nws. Mas nws tus tub Manaxe sawv nws chaw ua vajntxwv kav. Thaum Manaxe pib ua vajntxwv nws hnub nyoog muaj kaum ob xyoos, nws nyob hauv Yeluxalees kav tau tsib caug tsib xyoos. Nws ua tej uas Yawmsaub pom tias phem kawg li, nws ua raws li tej kevcai qias vuab tsuab uas lwm haiv neeg ua, yog cov uas Yawmsaub ntiab tawm ntawm cov Yixayee hauv ntej mus. Nws rov ua tej chaw siab teev dab uas nws txiv Hexekhiya twb muab rhuav tag lawd, thiab nws ua tej thaj teev dab Npa‑as thiab ua tej ncej dab Asela, thiab nws pe hnub pe hli thiab tej hnub qub saum nruab ntug huvsi thiab ua koom tu tej ntawd. Nws ua tej thaj teev dab rau hauv Yawmsaub lub tuam tsev, uas yog lub chaw uas Yawmsaub twb hais tias, “Kuv lub npe yuav nyob rau hauv Yeluxalees mus ib txhis.” Nws ua tej thaj xyeem rau hnub hli tej hnub qub saum nruab ntug huvsi rau hauv ob lub tshav puam hauv Yawmsaub lub tuam tsev. Nws muab nws tej tub tua hlawv xyeem rau dab rau hauv lub hav Npeehinoo, thiab nws saib caij saib nyoog saib yaig saib sij thiab ua khawv koob yees siv, nws mus nug tej txiv neeb txiv yaig thiab tej uas muaj dab leej nkaub. Nws ua tej uas Yawmsaub pom tias phem kawg nkaus li zes ua rau Yawmsaub npau taws. Tus dab mlom uas nws txaug nws kuj muab txawb rau hauv Vajtswv lub tuam tsev uas Vajtswv twb hais rau Davi thiab nws tus tub Xalaumoo lawm hais tias, “Lub tuam tsev no thiab lub nroog Yeluxalees uas kuv twb xaiv hauv txhua xeem Yixayee los mas kuv yuav cia kuv lub npe nyob hauv mus ib txhis. Kuv yuav tsis rho cov Yixayee txhais kotaw tawm hauv lub tebchaws uas kuv tu tseg rau nej tej poj koob yawm txwv lawd dua li lawm, yog tias lawv ceev faj ua txhua yam uas kuv hais rau lawv, yog txoj kevcai huvsi thiab tej kab ke thiab tej kevcai uas kuv tau kom Mauxe hais rau lawv.” Manaxe ntxias cov Yuda thiab cov uas nyob hauv Yeluxalees yuam kev, lawv thiaj ua phem heev dua tej haiv neeg uas Yawmsaub twb muab ua puam tsuaj tag rau ntawm lawv hauv ntej. Yawmsaub hais rau Manaxe thiab nws cov pejxeem tiamsis lawv tsis mloog. Vim li no Yawmsaub thiaj coj cov thawj rog uas kav Axilia tus vajntxwv cov tub rog tuaj tawm tsam lawv. Lawv xuas nqe lauj cab Manaxe mus thiab muab saw tooj liab khi nws thiab coj nws mus rau Npanpiloo. Thaum Manaxe raug kev txom nyem heev nws thov Yawmsaub uas yog nws tus Vajtswv khuvleej nws thiab nws txo nws lub hwjchim qes kawg rau ntawm nws tej poj koob yawm txwv tus Vajtswv. Nws thov Vajtswv mas Vajtswv txais nws tej lus thiab mloog nws tej lus thov, thiab coj nws rov los rau hauv Yeluxalees rov kav nws lub tebchaws. Thaum ntawd Manaxe paub tias Yawmsaub yog Vajtswv tiag. Los rau tom qab nws tsim lub ntsa loog txheej sab nraud rau Davi lub nroog rau hauv lub hav sab dej Kihoo uas hnub poob mus txog ntawm txojkev nkag rau hauv lub Rooj Loog Ntses, thiab mus rau ib sab lub pov roob Aufee. Nws xov lub ntsa loog siab heev. Nws xa cov thawj uas kav cov tub rog mus nyob rau hauv Yuda txhua lub moos uas muaj ntsa loog. Nws muab lwm haiv neeg tej dab thiab tus dab mlom rho hauv Yawmsaub lub tuam tsev mus thiab muab tej thaj huvsi uas nws ua rau saum lub roob uas muaj Yawmsaub lub tuam tsev thiab tej uas ua rau hauv Yeluxalees rho pov tseg rau sab nraum lub nroog. Thiab nws kho Yawmsaub lub thaj thiab ua kevcai xyeem sib raug zoo thiab xyeem ua tsaug rau saum lub thaj ntawd. Nws kuj hais kom cov Yuda ua koom tu Yawmsaub uas yog cov Yixayee tus Vajtswv. Txawm li ntawd los cov pejxeem tseem xyeem tsiaj rau ntawm tej chaw siab tiamsis yog xyeem rau Yawmsaub uas yog lawv tus Vajtswv xwb. Lwm yam haujlwm uas Manaxe ua thiab nws tej lus thov Vajtswv thiab tej lus uas cov xibhwb uas hais pom tom hauv ntej tau tuav Yawmsaub uas yog cov Yixayee tus Vajtswv lub npe hais rau nws, mas twb muab sau cia rau hauv phau ntawv uas hais txog cov Yixayee tej vajntxwv li keeb kwm. Nws tej lus thov thiab qhov uas Vajtswv txais nws tej lus thov, thiab nws tej kev txhaum huvsi thiab nws tej kev fav xeeb, thiab thaj chaw uas nws ua tej chaw siab teev dab thiab txhos tej ncej dab Asela thiab tej dab mlom ua ntej uas tsis tau txo hwjchim, kuj twb muab sau cia rau hauv phau ntawv keeb kwm uas cov xibhwb hais pom tom hauv ntej sau cia. Manaxe txawm tuag mus nrog nws tej poj koob yawm txwv nyob. Lawv muab nws log rau hauv nws lub tsev, mas nws tus tub Asmoo sawv nws chaw ua vajntxwv kav. Thaum Asmoo sawv ua vajntxwv kav nws hnub nyoog muaj nees nkaum ob xyoos, nws nyob hauv Yeluxalees kav tau ob xyoos. Nws ua tej uas Yawmsaub pom tias phem kawg li, ib yam nkaus li nws txiv Manaxe tau ua lawd. Asmoo tua tsiaj xyeem rau tej dab mlom huvsi uas nws txiv Manaxe ua cia thiab ua koom tu tej dab mlom ntawd. Nws tsis txo nws lub hwjchim rau ntawm Yawmsaub yam li nws txiv Manaxe tau txo. Tus Asmoo no ua txhaum muaj txim ntau zuj zus. Nws cov tub teg tub taws ntaus tswvyim fav xeeb rau nws thiab muab nws tua rau hauv nws lub tsev. Tiamsis cov pejxeem muab txhua tus uas ntaus tswvyim fav xeeb rau vajntxwv Asmoo tua huvsi lawm, thiab cov pejxeem tsa nws tus tub Yauxiya ua vajntxwv nyob nws chaw. Thaum Yauxiya pib ua vajntxwv kav nws hnub nyoog muaj yim xyoo, nws nyob hauv lub nroog Yeluxalees kav tau peb caug ib xyoos. Nws ua tej uas Yawmsaub pom tias zoo, thiab nws taug nraim nws yawg koob Davi tus neev taw, nws tsis tig mus rau sab xis lossis sab laug. Xyoo yim uas nws ua vajntxwv, yog thaum nws tseem yau, nws pib nrhiav nws yawg koob Davi tus Vajtswv. Xyoo kaum ob uas nws ua vajntxwv nws pib rhuav tshem tej chaw siab teev dab thiab tej ncej dab Asela thiab tej dab mlom uas txaug thiab nchuav hauv Yuda tebchaws thiab hauv Yeluxalees. Lawv tsoo tej thaj teev dab Npa‑as tab meeg ntawm nws xubntiag, thiab nws ntov lub txee uas hlawv xyab saum lub thaj pov tseg thiab nws tsoo tej ncej dab Asela thiab tej dab mlom uas txaug thiab nchuav tawg tag thiab muab tsoo ua hmoov coj mus w rau saum cov neeg uas xyeem tsiaj rau tej dab mlom ntawd tej qhov ntxa. Nws kuj muab cov pov thawj tej pob txha hlawv rau saum lawv tej thaj, thiaj ntxuav tau Yuda thiab Yeluxalees. Tej moos hauv Manaxe thiab Efa‑i thiab Xime‑oo thiab mus txog ntua Nathali, thiab tej uas pob tag ib ncig tej moos ntawd, nws kuj rhuav tshem tej thaj thiab tsoo tej ncej dab Asela thiab tej dab mlom ua hmoov, thiab ntov tej thaj hlawv xyab huvsi vau tag thoob plaws Yixayee tebchaws, ces nws li rov qab los rau hauv Yeluxalees. Xyoo kaum yim uas nws ua vajntxwv, thaum nws ntxuav lub tebchaws thiab lub tuam tsev, nws txib Safas uas yog Axalisya tus tub thiab Ma‑axeya uas yog tus thawj kav lub nroog, thiab Yau‑aha tus tub Yau‑av uas yog tus uas sau ntawv keeb kwm, mus kho Yawmsaub uas yog nws tus Vajtswv lub tuam tsev. Lawv tuaj cuag tus tuam pov thawj hlob Hikhiya thiab muab tej nyiaj uas cov pejxeem coj tuaj rau hauv Yawmsaub lub tuam tsev cob rau nws, yog tej nyiaj uas cov Levi uas zov qhov rooj sau ntawm cov Manaxe thiab cov Efa‑i thiab ntawm cov Yixayee uas tseem tshuav nyob thiab ntawm cov Yuda thiab cov Npeeyamee sawvdaws thiab ntawm cov uas nyob hauv Yeluxalees. Lawv muab nyiaj rau cov tub zog uas tu Yawmsaub lub tuam tsev. Cov tub zog uas ua haujlwm hauv Yawmsaub lub tuam tsev muab siv kho lub tuam tsev kom zoo li qub. Lawv muab rau cov Kws ntoo thiab cov Kws ua tsev tau siv yuav tej pob zeb uas txhwm thiab tej las ntoo uas ua qhab thiab dau rau tej chav tsev uas Yuda tej vajntxwv muab tso pob tag lawm. Cov neeg muaj lub siab dawb paug ua haujlwm. Cov uas saib xyuas lawv yog Yahas thiab Aunpadiya uas yog xeem Levi yog Melali caj ces, thiab Xekhaliya thiab Mesulas uas yog Khauha caj ces. Cov Levi txhua tus uas txawj ntaus tej cuab yeej phim suab nkauj, ua cov uas saib xyuas cov neeg kwv nra thiab qhia txhua yam haujlwm rau cov tub zog sawvdaws ua. Cov Levi qee leej ua cov uas sau ntawv thiab cov uas tu haujlwm thiab cov uas zov tej rooj loog. Thaum lawv nqa tej nyiaj uas coj tuaj rau hauv Yawmsaub lub tuam tsev lawm tawm los, tus pov thawj Hikhiya nrhiav tau phau kevcai uas Yawmsaub kom Mauxe qhia. Mas Hikhiya hais rau Safas uas yog tus tub sau ntawv tias, “Kuv tshawb tau phau ntawv kevcai nyob hauv Yawmsaub lub tuam tsev.” Ces Hikhiya txawm muab phau ntawv ntawd rau Safas. Safas coj phau ntawv ntawd mus cev rau vajntxwv thiab qhia tej haujlwm rau vajntxwv tias, “Txhua yam uas muab cob rau koj cov tub qhe ntawd lawv tabtom ua. Lawv nchuav tej nyiaj uas nyob hauv Yawmsaub lub tuam tsev thiab muab cob rau hauv cov uas tu haujlwm thiab cov tub zog txhais tes.” Mas Safas uas yog tus tub sau ntawv hais rau vajntxwv tias, “Tus pov thawj Hikhiya muab ib phau ntawv rau kuv.” Thiab Safas muab nyeem rau vajntxwv mloog. Thaum vajntxwv hnov tej lus hauv txoj kevcai ntawd lawd, nws txawm dua rhe nws lub tsho. Thiab vajntxwv hais rau tus pov thawj Hikhiya thiab Ahikhas uas yog Safas tus tub thiab Adoo uas yog Mikha tus tub thiab Safas uas yog tus tub sau ntawv thiab Axaya uas yog vajntxwv tus tub teg tub taws hais tias, “Nej cia li mus ua nug rau Yawmsaub rau kuv thiab rau cov uas tseem tshuav nyob hauv Yixayee thiab Yuda hais txog tej lus hauv phau ntawv no uas tshawb tau lawm. Yawmsaub txojkev npau taws uas nchuav los raug peb ntawd loj heev vim yog peb tej poj koob yawm txwv tsis tuav rawv Yawmsaub tej lus thiab tsis ua raws li txhua yam uas sau cia rau hauv phau ntawv no.” Ces Hikhiya thiab cov uas vajntxwv txib mus txawm mus cuag tus pojniam xibhwb Huda uas cev Vajtswv lus uas yog Salu tus pojniam. Salu yog tus uas tu vajntxwv tej tsoos tsho thiab yog Thauha tus tub thiab yog Halaj tus xeeb ntxwv. Tus pojniam xibhwb ntawd nyob hauv Yeluxalees ceg kaum nroog uas ua tshiab, ces lawv txawm hais zaj ntawd rau nws. Tus pojniam ntawd hais rau lawv tias, “Yawmsaub uas yog cov Yixayee tus Vajtswv hais li no tias, Cia li hais rau tus uas txib nej tuaj cuag kuv tias, ‘Yawmsaub hais li no tias, Saib nawj, kuv yuav tso tej xwm txheej phem los raug lub chaw no thiab raug tej neeg uas nyob hauv raws li txhua lo lus tsawm foom uas sau cia rau hauv phau ntawv uas tau muab nyeem rau Yuda tus vajntxwv ntawd. Vim lawv twb tso kuv tseg thiab hlawv xyab xyeem rau luag tej dab thiaj ua rau kuv chim rau txhua yam uas lawv txhais tes ua, vim li no kuv txojkev chim yuav npau tshwm plaws rau lub chaw no yuav tav tsis tau li.’ Tiamsis Yuda tus vajntxwv uas txib nej tuaj ua nug rau Yawmsaub ntawd, nej cia li hais li no rau nws tias, ‘Yawmsaub uas yog cov Yixayee tus Vajtswv hais li no tias, Hais txog tej lus uas koj tau hnov ntawd, vim koj ntxeev dua siab thiab koj txo koj lub hwjchim rau ntawm Vajtswv rau thaum koj hnov nws hais li cas tawm tsam lub chaw no thiab cov neeg uas nyob hauv, thiab vim koj tau txo koj tus kheej rau ntawm kuv thiab dua rhe koj lub tsho quaj rau ntawm kuv xubntiag, mas kuv kuj hnov lawm. Yawmsaub hais li no ntag. Vim li no, saib nawj, kuv yuav coj koj mus nrog koj tej poj koob yawm txwv nyob thiab mus rau hauv koj lub qhov ntxa ua siab tus yees, thiab koj lub qhov muag yuav tsis pom tej xwm txheej phem huvsi uas kuv yuav coj los raug lub chaw no thiab cov neeg uas nyob hauv.’ ” Lawv kuj coj tej lus ntawd los hais rau vajntxwv mloog. Ces vajntxwv txawm hais kom sau zog Yuda thiab Yeluxalees cov kev txwj laus sawvdaws tuaj. Mas vajntxwv mus rau hauv Yawmsaub lub tuam tsev. Cov Yuda huvsi thiab cov uas nyob hauv Yeluxalees thiab cov pov thawj thiab cov Levi, thiab cov pejxeem, cov hlob thiab cov yau sawvdaws nrog nws mus. Ces nws txawm nyeem tag nrho phau ntawv cog lus tseg uas tshawb tau hauv Yawmsaub lub tuam tsev los rau lawv mloog. Vajntxwv sawv ntsug ntawm nws lub chaw nrog Yawmsaub cog lus tias nws yuav ua lub neej raws nraim Yawmsaub thiab tuav rawv nws tej lus nkaw thiab nws tej lus qhia thiab nws tej kab ke kawg siab kawg ntsws, yuav ua raws nraim li tej lus sib cog tseg uas sau cia rau hauv phau ntawv ntawd. Thiab vajntxwv kom cov uas tuaj rau hauv Yeluxalees thiab cov Npeeyamee koom nrog cog tej lus no. Cov neeg Yeluxalees kuj ua raws li Vajtswv tej lus cog tseg, uas yog lawv tej poj koob yawm txwv tus Vajtswv. Thiab Yauxiya muab tej uas qias vuab tsuab huvsi rho tawm hauv tej chaw uas cov Yixayee nyob mus, thiab ua rau sawvdaws uas nyob hauv Yixayee tebchaws ua koom tu Yawmsaub uas yog lawv tus Vajtswv. Lawv tsis tso Yawmsaub uas yog lawv tej poj koob yawm txwv tus Vajtswv tseg mus tag Yauxiya sim neej. Yauxiya ua kevcai Hla Dhau hauv Yeluxalees rau Yawmsaub. Lawv tua tej menyuam yaj ua kevcai hla dhau rau hnub xiab kaum plaub lub ib hlis. Nws tsa cov pov thawj nyias ua nyias tej haujlwm thiab txhawb lawv lub zog ua haujlwm rau hauv Yawmsaub lub tuam tsev. Nws hais rau cov Levi uas ua tus qhia cov Yixayee sawvdaws thiab twb tu lawv tus kheej kom dawb huv rau Yawmsaub lawd tias, “Muab lub phij xab uas dawb huv cia rau hauv lub tuam tsev uas Davi tus tub Xalaumoo uas yog cov Yixayee tus vajntxwv ua cia. Nej tsis txhob muab kwv dua li lawm. Nimno cia li ua koom tu Yawmsaub uas yog nej tus Vajtswv thiab ua koom tu nws cov neeg Yixayee. Cia li npaj nej cov neeg nyias nyob nyias pab hauv nyias cum raws li Yixayee tus vajntxwv Davi tau sau qhia cia thiab raws li nws tus tub Xalaumoo tau sau qhia cia lawd. Thiab sawv ntsug rau hauv lub chaw dawb huv ntawm cov pejxeem uas muab faib ua tej cum, thiab cia cov Levi ib feem pab dua ib pawg. Thiab tua tus yaj ua kevcai hla dhau thiab tu nej tus kheej kom dawb huv thiab npaj txhua yam rau nej cov kwvtij xwv thiaj ua tau raws li tej lus uas Yawmsaub kom Mauxe hais.” Yauxiya pub menyuam yaj menyuam tshis huvsi peb vam tus thiab peb txhiab tus txiv nyuj rau cov pejxeem uas tuaj ua kevcai ntawd sawvdaws ua kevai Hla Dhau. Tej no yeej yog vajntxwv li. Thiab nws cov thawj kuj zoo siab pub rau cov pejxeem thiab rau cov pov thawj thiab cov Levi. Hikhiya thiab Xekhaliya thiab Yehi‑ee uas ua thawj saib xyuas Vajtswv lub tuam tsev kuj pub menyuam yaj menyuam tshis ob txhiab rau pua tus thiab peb puas tus txiv nyuj rau cov pov thawj ua kevcai Hla Dhau. Khaunaniya thiab nws ob tug kwvtij yog Semaya thiab Nethanee, thiab Hasanpiya thiab Ye‑i‑ee thiab Yauxanpa, uas yog cov Levi li thawj, kuj pub menyuam yaj menyuam tshis tsib txhiab tus thiab tsib puas tus txiv nyuj rau cov Levi ua kevcai Hla Dhau. Thaum npaj txhua yam txhij lawm, cov pov thawj sawv ntsug rau ntawm lawv lub chaw, thiab cov Levi nyob ua tej pawg raws li vajntxwv tau hais cia lawd. Ces lawv txawm tua tej menyuam yaj ua kevcai Hla Dhau, mas cov pov thawj coj cov ntshav ntawm lawv mus nchos, hos cov Levi laws tej tsiaj ntawd. Lawv kuj muab tej uas yuav hlawv xyeem rho cia rau ib cag xwv thiaj tau faib rau cov pejxeem tej pawg uas muab faib raws li lawv cum rau lawv coj mus xyeem rau Yawmsaub, raws li muab sau cia rau hauv Mauxe phau kevcai. Lawv muab tej txiv nyuj ua ib yam nkaus li ntawd. Lawv muab tej yaj uas ua kevcai Hla Dhau ci raws li kevcai. Lawv muab tej uas xyeem dawb huv hau rau hauv laujkaub me thiab laujkaub loj thiab yias thawj tsheb, thiab coj sai sai mus rau cov pejxeem sawvdaws. Dhau ntawd lawv mam li npaj rau lawv tus kheej thiab rau cov pov thawj, rau qhov cov pov thawj uas yog Aloo caj ces tseem ua haujlwm ua kevcai hlawv huvsi xyeem thiab hlawv tej hlab hluas roj xyeem mus txog tsaus ntuj. Cov Levi thiaj npaj rau lawv tus kheej thiab rau cov pov thawj uas yog Aloo caj ces li no. Cov tub hu nkauj uas yog Axas caj ces kuj nyob rau ntawm lawv lub chaw raws li Davi thiab Axas thiab Hemas thiab Yeduthu uas yog vajntxwv tus xibhwb uas hais pom tom hauv ntej tau hais cia lawd. Cov uas zov tej rooj loog nyias zov nyias lub rooj loog, tsis txog lawv tso haujlwm tseg rau qhov lawv cov kwvtij Levi twb npaj rau lawv lawm. Lawv thiaj npaj txhua yam ua koom tu Yawmsaub rau hnub ntawd li no xwv thiaj ua tau kevcai Hla Dhau thiab xyeem tej uas hlawv huvsi xyeem rau saum Yawmsaub lub thaj raws li vajntxwv Yauxiya hais. Cov Yixayee uas nyob ntawd kuj ua kevcai Hla Dhau rau hnub ntawd thiab ua kevcai noj ncuav tsis xyaw keeb xya hnub. Txij thaum Xamuyee uas yog xibhwb cev Vajtswv lus nyob tsis txeev muaj ib zaug kevcai Hla Dhau rau hauv cov Yixayee zoo yam li no. Yixayee tej vajntxwv tsis muaj ib tug twg uas coj kevcai Hla Dhau zoo yam li Yauxiya thiab cov pov thawj thiab cov Levi thiab cov Yuda thiab cov Yixayee uas tuaj ua ke sawvdaws thiab cov uas nyob hauv Yeluxalees coj li zaum no. Lawv ua kevcai Hla Dhau no rau xyoo kaum yim uas Yauxiya ua vajntxwv kav. Los rau tom qab, thaum Yauxiya kho tej kevcai uas siv hauv lub tuam tsev tiav lawd, Iyi tus vajntxwv Nekhau mus ua rog rau ntawm lub moos Kakhemi ntawm tus dej Yufeti ces Yauxiya txawm tawm mus ua rog rau nws. Tiamsis Nekhau txib neeg mus hais rau Yauxiya tias, “Cov Yuda tus vajntxwv, kuv thiab koj muaj caub dabtsi? Hnub no kuv tsis tau tuaj ua rog rau koj, kuv tuaj ua rog rau cov uas nrog kuv ua rog xwb, thiab Vajtswv tau hais kom kuv cia li maj nroos. Koj tsis txhob tawm tsam Vajtswv uas nrog nraim kuv tsam ces nws ua rau koj puam tsuaj.” Txawm li ntawd los Yauxiya kuj tsis thim ntawm Nekhau mus, nws tseem hloov tsoos tsho ua cuav tsab mus tawm tsam Nekhau. Nws tsis mloog Nekhau tej lus uas tawm hauv Vajtswv lub qhov ncauj los, nws cia li ua rog rau Nekhau hauv lub tiaj Mekidau. Mas cov uas tua hneev thiaj tua raug vajntxwv Yauxiya. Vajntxwv thiaj hais rau nws cov tub teg tub taws tias, “Cia li coj kuv rov mus rau qhov kuv raug mob sab heev lawm.” Nws cov tub teg tub taws txawm muab nws rho hauv nws lub tsheb ua rog los thiab muab nws lub tsheb uas ob thauj nws los rau hauv Yeluxalees. Nws txawm tuag lawm mas lawv muab nws log rau hauv nws tej poj koob yawm txwv tej qhov ntxa. Cov Yuda thiab cov Yeluxalees sawvdaws quaj ntsuag txog Yauxiya. Yelemi kuj hais tej lus quaj ntsuag txog Yauxiya thiab. Tej tub tej ntxhais hu nkauj sawvdaws kuj hu zaj nkauj quaj ntsuag txog Yauxiya los txog niaj hnub nimno. Lawv muab tej zaj no ua ib txoj kevcai rau cov Yixayee coj thiab muab sau cia rau hauv phau ntawv Quaj Ntsuag. Lwm yam haujlwm uas Yauxiya ua thiab tej haujlwm zoo uas nws ua raws li uas sau cia rau hauv Yawmsaub phau kevcai, thiab nws tej haujlwm txij thaum pib mus txog thaum kawg twb muab sau cia rau hauv phau ntawv uas hais txog Yixayee thiab Yuda tej vajntxwv. Cov pejxeem muab Yauxiya tus tub Yehau‑aha tsa ua vajntxwv sawv nws txiv chaw nyob hauv Yeluxalees kav. Thaum Yehau‑aha pib ua vajntxwv kav nws hnub nyoog muaj nees nkaum peb xyoos, nws nyob hauv Yeluxalees kav tau peb lub hlis. Ces Iyi tus vajntxwv muab nws hle tawm hauv Yeluxalees, thiab yuam kom lub tebchaws them se ib puas tala nyiaj thiab ib tala kub. Iyi tus vajntxwv tsa Eliyakhi uas yog Yehau‑aha tus kwv ua vajntxwv kav Yuda thiab Yeluxalees, thiab tis dua lub npe hu ua Yehauyakhi. Tiamsis Nekhau ntes Yehau‑aha uas yog tus tijlaug coj mus rau hauv Iyi tebchaws. Thaum Yehauyakhi pib ua vajntxwv kav nws hnub nyoog muaj nees nkaum tsib xyoos, nws nyob hauv Yeluxalees kav tau kaum ib xyoos. Nws ua tej uas nws tus Vajtswv Yawmsaub pom tias phem kawg. Nenpukhanexa uas ua vajntxwv hauv Npanpiloo tuaj ua rog rau nws thiab muab saw hlau khi nws coj mus rau Npanpiloo. Nenpukhanexa kuj coj tej twj siv hauv Yawmsaub lub tuam tsev ib txhia mus rau hauv Npanpiloo thiab muab cia rau hauv nws lub tsev hauv Npanpiloo. Lwm yam haujlwm uas Yehauyakhi ua thiab tej yam qias vuab tsuab uas nws ua thiab nws tej kev txhaum twb muab sau cia rau hauv phau ntawv uas hais txog Yixayee thiab Yuda tej vajntxwv. Mas nws tus tub Yehauyakhee sawv nws chaw ua vajntxwv kav. Thaum Yehauyakhee pib ua vajntxwv kav nws hnub nyoog muaj kaum yim xyoo, nws nyob hauv Yeluxalees kav tau peb lub hlis thiab kaum hnub. Nws ua tej uas Yawmsaub pom tias phem kawg. Thaum lub caij ntuj qhua vajntxwv Nenpukhanexa txib neeg tuaj coj nws mus rau hauv Npanpiloo thiab coj tej twj siv tsim txiaj hauv Yawmsaub lub tuam tsev mus, thiab tsa Yehauyakhee tus kwv Xedekhiya ua vajntxwv kav Yuda thiab Yeluxalees. Thaum Xedekhiya pib ua vajntxwv kav nws hnub nyoog muaj nees nkaum ib xyoos, nws nyob hauv Yeluxalees kav tau kaum ib xyoos. Nws ua tej uas nws tus Vajtswv Yawmsaub pom tias phem kawg. Nws tsis txo nws lub hwjchim rau ntawm xibhwb Yelemi uas cev tej lus uas Yawmsaub hais rau nws. Xedekhiya kuj fav xeeb rau vajntxwv Nenpukhanexa uas twb kom Xedekhiya tuav Vajtswv lub npe cog lus twv nrog nws sib raug zoo lawm. Xedekhiya tawv ncauj thiab ua lub siab tawv tsis tig rov los cuag Yawmsaub uas yog Yixayee tus Vajtswv. Txhua tus pov thawj uas ua thawj thiab cov pejxeem kuj tawv nyom heev, lawv ua raws li txhua yam kev qias vuab tsuab uas lwm haiv neeg ua, thiab lawv ua qias tsis huv puas tsuas Yawmsaub lub tuam tsev hauv Yeluxalees uas Yawmsaub twb muab tu kom dawb huv lawd. Yawmsaub uas yog lawv tej poj koob yawm txwv tus Vajtswv txib nws cov tub qhe hais lus tuaj rau lawv tsis tu ncua li, vim nws khuvleej nws haiv neeg thiab lub chaw uas nws nyob. Tiamsis lawv pheej luag Vajtswv cov tub qhe thiab saib tsis taus Vajtswv tej lus thiab thuam luag cov xibhwb cev Vajtswv lus, mus txog thaum Yawmsaub txojkev npau taws tshwm plaws rau nws haiv neeg kho tsis tau li. Yawmsaub coj cov Kheedia tus vajntxwv tuaj tawm tsam lawv, mas nws xuas ntaj tua lawv tej tub hluas rau hauv lub chaw pe hawm Vajtswv. Nws tsis khuvleej tej tub hluas ntxhais hluas tej poj koob yawm txwv thiab cov uas hnub nyoog nchav, nws muab lawv sawvdaws cob rau hauv Nenpukhanexa txhais tes. Tej twj uas siv hauv Vajtswv lub tuam tsev, tsis hais lub loj lub yau, thiab tej nyiaj txiag uas nyob hauv Yawmsaub lub tuam tsev thiab vajntxwv thiab nws cov thawj sawvdaws tej nyiaj txiag cuab txhiaj cuab tam, nws coj huvsi mus rau hauv Npanpiloo. Thiab lawv muab Vajtswv lub tuam tsev hlawv thiab tsoo Yeluxalees lub ntsa loog pob tag thiab hlawv vajntxwv tej tsev kub hnyiab tag thiab ua rau txhua yam muaj nqes uas nyob hauv puam tsuaj tag. Cov uas dim hniav ntaj nws kuj ntes coj mus poob tebchaws rau hauv Npanpiloo, thiab lawv ua nws thiab nws cov tub li qhev mus txog thaum cov Pawxia txeeb tau tebchaws kav, xwv tej lus uas Yawmsaub tau kom Yelemi lub qhov ncauj hais lawd thiaj tiav, mus txog thaum lub tebchaws tau so txwm nkaus xyoo Xanpatau. Txhua hnub uas raug muab tso tseg nyob do cuas cia ntawd lub tebchaws tau so kom tiav raws li uas teem tseg xya caum xyoo. Thawj xyoo uas vajntxwv Xailab kav Pawxia tebchaws, mas Yawmsaub tshoov Pawxia tus vajntxwv Xailab lub siab, xwv thiaj ua kom tiav raws li tej lus uas Yawmsaub kom Yelemi lub qhov ncauj hais, Xailab thiaj tshaj tawm thoob plaws nws lub tebchaws thiab muab sau cia hais tias, “Pawxia tus vajntxwv Xailab hais li no. Yawmsaub uas yog Vajtswv ntuj tau pub ib tsoom tebchaws huvsi hauv lub ntiajteb rau kuv, thiab nws hais kom kuv ua lub tuam tsev rau nws rau hauv lub nroog Yeluxalees uas nyob hauv Yuda tebchaws. Nej cov muaj leejtwg yog nws haiv neeg, thov Yawmsaub uas yog nws tus Vajtswv nrog nraim tus ntawd nyob. Cia tus ntawd cia li rov mus.” Thawj xyoo uas vajntxwv Xailab kav Pawxia tebchaws, mas Yawmsaub tshoov Pawxia tus vajntxwv Xailab lub siab, xwv thiaj ua kom tiav raws li tej lus uas Yawmsaub kom Yelemi lub qhov ncauj hais, Xailab thiaj tshaj tawm thoob plaws nws lub tebchaws thiab muab sau cia hais tias, “Pawxia tus vajntxwv Xailab hais li no. Yawmsaub uas yog Vajtswv ntuj tau pub ib tsoom tebchaws huvsi hauv lub ntiajteb rau kuv, thiab nws hais kom kuv ua lub tuam tsev rau nws rau hauv lub nroog Yeluxalees uas nyob hauv Yuda tebchaws. Nej cov muaj leejtwg yog nws haiv neeg, thov nws tus Vajtswv nrog nraim tus ntawd nyob. Nws cia li rov mus rau Yeluxalees uas nyob hauv Yuda tebchaws thiab rov tsim kho Yawmsaub uas yog cov Yixayee tus Vajtswv lub tuam tsev dua tshiab, Yawmsaub yog tus Vajtswv uas nyob hauv Yeluxalees. Thiab txhua tus uas tshuav nyob tsis hais nyob rau qhovtwg los cia cov neeg uas lawv nrog nyob ntawd pab nyiaj thiab kub thiab qhov txhia chaw thiab tsiaj txhu, muab tshaj tej uas zoo siab pub xyeem rau Vajtswv lub tuam tsev uas nyob hauv Yeluxalee.” Ces xeem Yuda thiab xeem Npeeyamee cov thawj hauv txhua cum thiab cov pov thawj thiab cov Levi, yog txhua tus uas Vajtswv tus Ntsuj Plig tau tshoov lub siab, thiaj npaj yuav mus ua Yawmsaub lub tuam tsev rau hauv Yeluxalees dua tshiab. Mas txhua tus uas nrog lawv nyob ua ke pab tej twj siv nyiaj thiab kub thiab qhov txhia chaw thiab tsiaj txhu thiab tej yam muaj nqes, tshaj tej uas zoo siab muab xyeem pub. Tej twj siv hauv Yawmsaub lub tuam tsev uas Nenpukhanexa twb coj hauv Yeluxalees mus cia rau hauv nws lub tsev uas teev dab, mas vajntxwv Xailab muab rho tawm los. Pawxia tus vajntxwv muab tej ntawd rho los cob rau Mileda uas yog tus ceev nyiaj, mas Mileda thiaj muab suav rau Senpaxa uas yog Yuda ib tug thawj. Tej ntawd muaj npaum li no. Peb caug lub tais kub, ib txhiab lub tais nyiaj, nees nkaum cuaj lub phaj, peb caug lub phaj kub, plaub puas kaum lub phaj nyiaj thiab lwm yam tais phaj ib txhiab lub. Tej twj taig uas muab kub muab nyiaj ua huvsi muaj tsib txhiab plaub puas lub. Tej no huvsi Senpaxa coj los rau thaum uas coj cov uas poob tebchaws hauv Npanpiloo rov los txog hauv Yeluxalees. Ntawm no mus yog cov pejxeem hauv Yuda tebchaws uas vajntxwv Nenpukhanexa uas nyob hauv Npanpiloo tau ntes coj mus poob tebchaws rau Npanpiloo es tau rov qab los. Lawv rov qab los rau hauv Yeluxalees thiab Yuda, nyias rov los nyob rau nyias lub moos. Lawv nrog Xelunpanpee, Yesua, Nehemi, Xelaya, Le‑elaya, Maudekhai, Npisas, Mipa, Npivai, Lehoo thiab Npa‑anas los ua ke. Cov pejxeem Yixayee muaj npaum li no. Palau caj ces muaj 2,172 leeg. Sefathiya caj ces muaj 372 leeg. Asla caj ces muaj 775 leeg. Paha Mau‑a caj ces uas yog Yesua thiab Yau‑a caj ces muaj 2,812 leeg. Elas caj ces muaj 1,254 leeg. Xathu caj ces muaj 945 leeg. Xakhai caj ces muaj 760 leej. Npani caj ces muaj 642 leeg. Npenpai caj ces muaj 623 leeg. Axaka caj ces muaj 1,222 leeg. Adaunikhas caj ces muaj 666 leej. Npivai caj ces muaj 2,056 leej. Adee caj ces muaj 454 leeg. Athaw caj ces uas yog Hexekhiya cum muaj 98 leej. Npexai caj ces muaj 323 leeg. Yaula caj ces muaj 112 leeg. Hasu caj ces muaj 223 leeg. Kinpa caj ces muaj 95 leeg. Cov neeg Npelehee muaj 123 leeg. Cov neeg Nethaufa muaj 56 leej. Cov neeg Anathau muaj 128 leej. Cov neeg Amave muaj 42 leeg. Cov neeg Khiliya‑ali, cov neeg Khefila thiab cov neeg Npe‑awlau muaj 743 leeg. Cov neeg Lama thiab cov neeg Kenpa muaj 621 leeg. Cov neeg Mima muaj 122 leeg. Cov neeg Npe‑ee thiab cov neeg Ai muaj 223 leeg. Cov neeg Nenpau muaj 52 leeg. Cov neeg Manpi muaj 156 leej. Muaj dua ib lub moos Elas cov neeg muaj 1,254 leeg. Cov neeg Halee muaj 320 leej. Cov neeg Lau, cov neeg Hadi thiab cov neeg Aunau muaj 725 leeg. Cov neeg Yelikhau muaj 345 leeg. Cov neeg Xena‑a muaj 3,630 leej. Cov pov thawj muaj li no. Yedaya caj ces uas yog Yesua cum muaj 973 leeg. Imaw caj ces muaj 1,052 leeg. Pasaw caj ces muaj 1,247 leej. Halee caj ces muaj 1,017 leej. Cov Levi muaj li no. Yesua thiab Khami‑ee caj ces uas yog Haudaviya ob tug tub cum muaj 74 leeg. Cov hu nkauj muaj li no. Axas caj ces muaj 128 leej. Cov uas zov tej rooj loog caj ces yog li no. Salu caj ces, Athaw caj ces, Thamoo caj ces, Akhu caj ces, Hathitha caj ces thiab Saunpai caj ces huvsi muaj 139 leej. Cov tub teg tub taws uas ua haujlwm hauv lub tuam tsev muaj li no. Xiha caj ces, Haxufa caj ces, Thanpa‑au caj ces, Khelau caj ces, Xi‑aha caj ces, Phadoo caj ces, Lenpana caj ces, Hakanpa caj ces, Akhu caj ces, Hakas caj ces, Salai caj ces, Hanas caj ces, Kidee caj ces, Kaha caj ces, Le‑aya caj ces, Lexi caj ces, Nekhauda caj ces, Kaxas caj ces, Uxa caj ces, Paxe‑a caj ces, Npexai caj ces, Axana caj ces, Me‑uni caj ces, Nefixi caj ces, Npanpu caj ces, Hakhufa caj ces, Hahu caj ces, Npaluj caj ces, Mehinta caj ces, Hasa caj ces, Npakau caj ces, Xixela caj ces, Thema caj ces, Nexiya caj ces thiab Hathifa caj ces. Xalaumoo cov tub teg tub taws caj ces muaj li no, yog Xauthai caj ces, Haxaufele caj ces, Peluda caj ces, Ya‑ala caj ces, Dakhoo caj ces, Kidee caj ces, Sefathiya caj ces, Hathi caj ces, Paukhele Haxanpa‑i caj ces, Ami caj ces. Cov tub teg tub taws uas ua haujlwm ntawm lub tuam tsev huvsi thiab Xalaumoo cov tub teg tub taws li caj ces huvsi muaj 392 leeg. Cov no mus yog cov uas nyob ntawm Theemela, Theehasa, Khelu, Adas thiab Imaw tuaj tiamsis lawv paub tsis tseeb tias lawv caj ces thiab lawv keeb kwm yog neeg Yixayee los tsis yog. Yog Delaya caj ces, Thaunpia caj ces thiab Nekhauda caj ces muaj 652 leeg. Thiab cov pov thawj li caj ces muaj li no, yog Hanpaya caj ces, Hakhau caj ces thiab Npaxilai caj ces. (Npaxilai tus pojniam yog Npaxilai uas yog neeg Kile‑a tus ntxhais, nws thiaj tau lub npe hu li ntawd.) Cov neeg no nrhiav lawv lub npe hauv tej ntawv uas nce npe raws li keeb kwm tiamsis nrhiav tsis tau. Lawv thiaj raug suav ua cov neeg qias tsis huv thiab raug txiav tawm ua tsis tau pov thawj. Tus tswv xeev hais kom lawv tsis txhob noj tej zaub mov uas dawb huv kawg nkaus mus txog thaum muaj ib tug pov thawj saib Uli thiab Thumi tso. Ib tsoom pejxeem huvsi muaj 42,360 leej, cov tub qhe nkauj qhev uas lawv tsis suav muaj 7,337 leej, thiab lawv muaj cov tub ntxhais uas hu nkauj 200 leej. Lawv muaj nees 736 tus, muaj luj txwv 245 tus, muaj ntxhuav 435 tus, thiab nees luav 6,720 tus. Thaum lawv los txog ntawm Yawmsaub lub tuam tsev uas nyob hauv Yeluxalees, cov thawj hauv tej cum muaj qee leej lawv zoo siab pub xyeem rau hauv Vajtswv lub tuam tsev es siv ua lub tuam tsev rau hauv qhov qub chaw. Lawv xyeem raws li lawv muaj rau hauv lub txhab nyiaj, yog 61,000 dali kub, 5,000 mina nyiaj, thiab 100 cev tsoos pov thawj. Cov pov thawj, cov Levi thiab cov pejxeem ib txhia [nyob hauv Yeluxalees thiab ib ncig sab nraud] thiab cov hu nkauj, cov zov tej rooj loog thiab cov tub teg tub taws uas ua haujlwm rau lub tuam tsev nyob hauv lawv tej moos, thiab cov Yixayee sawvdaws nyob hauv lawv tej moos. Thaum txog lub xya hli cov Yixayee los nyob rau hauv lawv tej moos lawm, mas cov pejxeem sawvdaws tuaj txoos ua ke rau hauv Yeluxalees. Ces Yauxada tus tub Yesua thiab nws cov kwvtij uas ua pov thawj, thiab Se‑athi‑ee tus tub Xelunpanpee thiab nws cov kwvtij, lawv sawvdaws nqes tes ua Yixayee tus Vajtswv lub thaj xwv thiaj tau ua kevcai hlawv xyeem rau saum raws li sau cia rau hauv Vajtswv tus neeg Mauxe txoj kevcai. Lawv ua lub thaj rau saum lub qub chaw, vim yog lawv ntshai tej neeg uas nyob ib ncig, thiab lawv ua kevcai hlawv xyeem thaum tagkis thiab thaum yuav tsaus ntuj rau saum lub thaj ntawd rau Yawmsaub. Lawv ua kevcai nyob tsev pheeb suab raws li uas sau cia lawd, thiab niaj hnub tua tsiaj ua kevcai hlawv xyeem npaum li uas hais cia rau hauv txoj kevcai uas niaj hnub yuav tsum ua. Dhau ntawd lawv kuj xyeem tej uas niaj hnub ua kevcai hlawv xyeem mus li, thiab tej uas xyeem rau hnub hli xiab thiab xyeem rau txhua lub sijhawm uas Yawmsaub teem tseg, thiab lawv xyeem tej uas txhua tus zoo siab pub rau Yawmsaub. Lawv pib ua kevcai hlawv xyeem rau Yawmsaub txij hnub xiab ib lub xya hli. Tiamsis lawv tsis tau tiag tej taw uas ua Yawmsaub lub tuam tsev. Lawv muab nyiaj rau cov Kws txhwm zeb thiab cov Kws ntoo, thiab muab zaub mov thiab dej haus thiab roj rau cov neeg Xaidoo thiab Thailab kom lawv coj ntoo ciab hauv Lenpanoo mus txog ntawm hiavtxwv thiab xa mus txog lub moos Yaupa raws li Pawxia tus vajntxwv Xailab tso cai rau lawv lawd. Thaum lawv rov los rau hauv Yeluxalees lawd mas xyoo uas ob lub ob hlis Se‑athi‑ee tus tub Xelunpanpee thiab Yauxada tus tub Yesua thiab ob tug cov kwvtij uas yog cov pov thawj thiab cov Levi, thiab txhua tus uas poob tebchaws es rov los rau hauv Yeluxalees, pib ua lub tuam tsev. Lawv tsa cov Levi uas hnub nyoog nees nkaum xyoo rov saud saib xyuas tej haujlwm ua Yawmsaub lub tuam tsev. Yesua thiab nws cov tub thiab nws cov kwvtij thiab Khami‑ee thiab nws cov tub uas yog Haudaviya caj ces, thiab Henada cov tub thiab lawv cov tub thiab lawv cov kwvtij uas yog cov Levi sib koom saib xyuas tej tub zog uas ua Vajtswv lub tuam tsev. Thaum cov Kws ua tsev tiag tej taw rau Yawmsaub lub tuam tsev, mas cov pov thawj hnav tsoos meej mom tawm los tuav rawv raj xyu thiab cov Levi uas yog Axas caj ces tuav rawv nruas npuaj tooj liab tawm los qhuas Yawmsaub raws li cov Yixayee tus vajntxwv Davi tu tseg. Mas lawv hu nkauj sib quas qhuas thiab ua Yawmsaub tsaug hais tias, “Nws yog tus zoo, nws txojkev hlub uas ruaj khov nyob mus ib txhis rau cov Yixayee.” Cov pejxeem sawvdaws kuj tsa suab hu nrov nrov rau thaum lawv qhuas Yawmsaub rau qhov twb tiag Yawmsaub lub tuam tsev tej taw tiav lawm. Tiamsis cov pov thawj thiab cov Levi uas ua thawj hauv tej cum, yog cov laus uas twb pom lub tuam tsev qub lawm mas thaum lawv pom luag tabtom ua tej taw tiag lub tuam tsev tshiab no lawv kuj quaj nrov heev, tiamsis tseem muaj ntau leej hu zoo siab xyiv fab. Cov pejxeem thiaj tsis paub tias qhov twg yog suab zoo siab xyiv fab qhov twg yog suab quaj, vim yog cov pejxeem qw nrov heev thiab tej suab ntawd nrov mus deb kawg. Thaum Yuda thiab Npeeyamee cov yeeb ncuab hnov tias cov uas poob tebchaws rov qab los tabtom ua lub tuam tsev rau Yawmsaub uas yog cov Yixayee tus Vajtswv, lawv txawm tuaj cuag Xelunpanpee thiab cov uas ua thawj hauv txhua cum thiab hais rau lawv tias, “Cia peb nrog nej ua thiab, rau qhov peb yeej pe hawm nej tus Vajtswv ib yam li nej, thiab txij thaum Axilia tus vajntxwv Exahadoo coj peb los nyob ntawm no peb twb xyeem tsiaj rau Vajtswv los li lawm.” Tiamsis Xelunpanpee thiab Yesua thiab lwm tus uas ua thawj hauv Yixayee txhua cum hais rau lawv tias, “Nej tsis muaj feem nrog peb ua lub tuam tsev rau peb tus Vajtswv. Cia peb ua peb rau Yawmsaub uas yog cov Yixayee tus Vajtswv, raws li Pawxia tus vajntxwv Xailab hais cia rau peb lawd.” Cov neeg uas nyob hauv lub tebchaws ntawd ua rau cov Yuda qaug zog thiab ua rau lawv ntshai qhov uas ua lub tuam tsev, thiab tseem ntiav neeg mus tshum khuam cheem kom ua tsis tau raws li cov Yuda npaj siab cia lawd mus tag Pawxia tus vajntxwv Xailab sim neej mus txog thaum Dali‑a ua vajntxwv kav Pawxia tebchaws. Thaum Xawxi pib ua vajntxwv kav, lawv tseem sau ntawv mus kom cov Yuda thiab cov hauv Yeluxalees. Thaum Athaxawxi ua vajntxwv kav, mas Npilas thiab Mileda thiab Thanpe‑ee thiab lawv pab sawvdaws sau ntawv mus rau Athaxawxi uas ua vajntxwv kav Pawxia tebchaws. Tsab ntawv ntawd lawv sau npe ntawv Alas thiab hais ua lus Alas. Lehoo uas ua thawj thiab Sisai uas yog tus tub sau ntawv sau tsab ntawv kom Yeluxalees xa mus rau vajntxwv Athaxawxi li no. Ces Lehoo uas ua thawj thiab Sisai uas yog tus tub sau ntawv thiab lwm tus uas koom nrog ob tug, yog cov uas tu plaub, cov uas kav tej moos thiab cov nom tswv, lawv yog cov Pawxia thiab cov neeg Elej thiab cov Npanpiloo thiab cov neeg Xuxa uas yog neeg Elas, thiab lwm haiv neeg uas tus thawj Aunapa uas muaj koob meej xa tuaj nyob hauv Xamali tej moos thiab lwm qhov hauv lub xeev uas nyob sab dej Yufeti hnub poob, lawv sawvdaws koom sau tsab ntawv no. Tsab ntawv uas lawv sau ntawd hais li no: “Hwm txog vajntxwv Athaxawxi. Koj cov tub qhe uas yog cov neeg nyob sab dej Yufeti hnub poob xa lus noj qab nyob zoo txog koj. Thov hais rau vajntxwv paub tias, cov Yudai uas los ntawm koj los txog peb tau mus rau hauv Yeluxalees. Lawv tabtom tsim lub nroog uas pheej fav xeeb thiab phem kawg ntawd dua tshiab. Lawv tabtom kho tej ntsa loog thiab tsim kho tej taw tiag. Nimno thov vajntxwv paub hais tias, yog ua tau lub nroog no dua tshiab thiab ua tej ntsa loog tiav, lawv yuav tsis them se qoob loo se lag luam se liaj teb, ces vajntxwv tej nyiaj yuav tsawg zuj zus. Vim peb tau noj koj li roj li ntsev mas tsis tsim nyog peb pom koj poob koob. Vim li no peb thiaj xa lus tuaj hais rau vajntxwv, thov koj tshawb nrhiav tau phau ntawv keeb kwm uas koj tej poj koob yawm txwv sau cia. Koj yuav pom hauv phau ntawv keeb kwm ntawd thiab paub tias lub nroog no yog lub nroog uas pheej fav xeeb thiab tsim kev kub ntxhov rau tej vajntxwv thiab rau tej xeev, thiab txij yav thaum ub los pheej muaj kev ntaus tswvyim fav xeeb tshwm los rau hauv. Vim li no lub nroog no thiaj raug muab tso tseg piam tag. Peb thov qhia rau vajntxwv paub tias, yog tsim lub nroog no dua tshiab thiab ua tej ntsa loog tiav mas koj yuav tsis muaj feem ib yam dabtsi rau hauv lub xeev uas nyob sab ntug dej hnub poob.” Vajntxwv xa ntawv teb mus hais tias, “Nyob zoo txog tus thawj Lehoo thiab Sisai uas yog tus tub sau ntawv thiab lwm tus uas koom nrog ob tug uas nyob hauv lub xeev Xamali thiab nyob lwm qhov hauv lub xeev sab dej Yufeti hnub poob. Tsab ntawv uas nej xa tuaj rau peb, twb muab nyeem thiab txhais rau kuv mloog. Thiab kuv twb hais kom mus tshawb nrhiav, mas thiaj pom tias lub nroog no txij thaum ub los pheej sawv tiv tej vajntxwv thiab muaj kev fav xeeb muaj kev tuav tswvyim phem tshwm hauv lub nroog no los. Txeev muaj tej vajntxwv uas muaj hwjchim kav Yeluxalees. Lawv kav tag nrho lub xeev sab dej Yufeti hnub poob, thiab luag them se qoob loo se lag luam se liaj teb rau lawv. Vim li no nej cia li hais kom cov neeg ntawd tseg tsis txhob ua haujlwm, thiab tsis txhob ua lub nroog no dua tshiab mus txog thaum kuv tso cai tso. Nej cia li ceev faj tsis txhob muab qhov no sej cia. Ua cas nej yuav cia tej xwm txheej phem no nthuav loj zuj zus ua rau vajntxwv poob koob?” Mas thaum nyeem vajntxwv Athaxawxi tsab ntawv rau Lehoo thiab Sisai uas ua tus tub sau ntawv thiab cov uas koom nrog ob tug mloog, ces lawv maj nroos mus cuag cov Yudai hauv Yeluxalees thiab siv hwjchim siv zog yuam kom lawv tseg tsis txhob ua haujlwm lawm. Ces lawv thiaj tseg tsis ua Vajtswv lub tuam tsev uas nyob hauv Yeluxalees. Lawv tseg tsis ua mus txog xyoo ob uas Dali‑a ua vajntxwv kav Pawxia tebchaws. Hakai thiab Idau tus tub Xekhaliya uas yog xibhwb cev lus tau tuav Vajtswv uas kav cov Yixayee lub npe cev lus rau cov Yudai uas nyob hauv Yuda thiab hauv Yeluxalees. Ces Se‑athi‑ee tus tub Xelunpanpee thiab Yauxada tus tub Yesua thiaj sawv tsees rov ua Vajtswv lub tuam tsev hauv Yeluxalees dua tshiab. Thiab cov xibhwb cev Vajtswv lus kuj pab ob tug. Thaum ntawd Thathenai uas yog tus tswv xeev sab dej Yufeti hnub poob thiab Setha‑Npauxenai thiab cov uas koom nrog ob tug tuaj hais rau cov Yudai tias, “Leejtwg tso cai rau nej ua lub tuam tsev no thiab tsim kho kom tiav?” Thiab lawv kuj nug hais tias, “Cov uas tabtom ua lub tuam tsev no li npe hu li cas?” Tiamsis lawv tus Vajtswv lub qhov muag ntsia ntsoov Yudai cov kev txwj laus, mas luag thiaj tav tsis tau lawv mus txog thaum luag qhia zaj no rau Dali‑a paub thiab muaj lus teb hauv ntawv txog zaj no rov tuaj. No yog tej lus hauv ntawv uas Thathenai uas yog tus tswv xeev sab dej Yufeti hnub poob thiab Setha‑Npauxenai thiab cov uas koom nrog ob tug uas yog cov thawj uas kav tej moos hauv lub xeev sab dej Yufeti hnub poob xa mus rau vajntxwv Dali‑a. Lawv xa tsab ntawv mus rau nws hais li no tias, “Thov kom vajntxwv Dali‑a noj qab nyob zoo. Thov hais rau vajntxwv paub tias peb tau mus rau hauv lub xeev Yuda, thiab mus rau ntawm Vajtswv uas loj kawg lub tuam tsev, uas tabtom muab tej txhib zeb los tsim kho thiab muab ntoo los ntsia rau tej phab ntsa. Lawv rau siab ntso ua haujlwm thiab lawv txhais tes ua tau sai. Peb nug cov kev txwj laus ntawd tias, ‘Leejtwg tso cai rau nej ua lub tuam tsev no thiab tsim kho kom tiav?’ Thiab peb kuj nug lawv tej npe lawm thiaj qhia tau rau koj paub, peb thiaj sau lawv cov uas ua thawj tej npe cia. “No yog tej lus uas lawv teb peb, ‘Peb yog Vajtswv uas kav saum ntuj thiab ntiajteb li tub qhe. Peb tabtom ua lub tuam tsev uas ua tau ntau xyoo lawd dua tshiab, yog cov Yixayee tus vajntxwv uas loj kawg ua thiab ua kom tiav. Tiamsis vim peb tej poj koob yawm txwv ua rau Vajtswv ntuj chim nws thiaj muab lawv cob rau hauv Npanpiloo tus vajntxwv Nenpukhanexa uas yog neeg Kheedia txhais tes, yog tus uas rhuav tshem lub tuam tsev no thiab kuav cov pejxeem mus rau Npanpiloo tebchaws. Txawm li ntawd los xyoo uas Xailab ua vajntxwv kav Npanpiloo, vajntxwv Xailab twb tso cai kom rov ua Vajtswv lub tuam tsev no dua tshiab. Thiab tej twj siv uas yog kub thiab nyiaj hauv Vajtswv lub tuam tsev, uas Nenpukhanexa twb rho tawm hauv lub tuam tsev uas nyob hauv Yeluxalees thiab coj mus cia rau hauv lub tsev dab uas nyob hauv Npanpiloo, mas vajntxwv Xailab muab tej no rho tawm hauv lub tsev dab uas nyob hauv Npanpiloo thiab muab cob rau ib tug uas npe hu ua Senpaxa uas vajntxwv muab tsa ua tus kav lub xeev. Xailab hais rau nws tias, “Cia li coj tej twj siv no mus khaws cia rau lub tuam tsev hauv Yeluxalees, thiab ua Vajtswv lub tuam tsev dua tshiab rau hauv qhov qub chaw.” Mas tus Senpaxa no thiaj tau los thiab ua tej taw tiag Vajtswv lub tuam tsev uas nyob hauv Yeluxalees. Txij thaum ntawd los txog nimno mas tseem tabtom ua xwb tsis tau tiav.’ Vim li no, yog vajntxwv pom zoo, mas cia tshawb nrhiav tej ntawv keeb kwm hauv Npanpiloo saib vajntxwv Xailab puas tau tso cai kom tsim kho Vajtswv lub tuam tsev no hauv Yeluxalees dua tshiab. Thov vajntxwv hais rau peb paub tias vajntxwv pom zoo li cas txog zaj no.” Ces vajntxwv Dali‑a txawm tso cai kom tshawb nrhiav hauv lub tsev uas khaws tej ntawv keeb kwm hauv lub nroog Npanpiloo. Hauv lub nroog Enpathana uas yog lub nroog loj hauv lub xeev Midia mas lawv nrhiav tau ib thooj ntawv uas muaj tej lus no sau cia hais tias, “Tej lus tso cai. “Thawj xyoo uas Xailab ua vajntxwv, Xailab tso cai hais tias, ‘Hais txog Vajtswv lub tuam tsev hauv Yeluxalees, mas cia lawv tsim lub tuam tsev dua tshiab, yog lub chaw uas lawv xyeem qhov txhia chaw thiab coj tsiaj tuaj ua kevcai hlawv xyeem. Yuav tsum ua lub tuam tsev siab rau caum tshim dav rau caum tshim. Yuav tib txhib zeb peb txheej li ua ib txheej ntoo, thiab muab nyiaj hauv vajntxwv lub txhab los them tej nqe ntawd. Tej twj siv uas yog kub thiab nyiaj hauv Vajtswv lub tuam tsev uas Nenpukhanexa coj tawm hauv lub tuam tsev hauv Yeluxalees los rau hauv Npanpiloo lawd, mas muab thim coj rov qab mus rau lub tuam tsev uas nyob hauv Yeluxalees, thiab muab txawb cia rau tej qub chaw. Nej yuav tsum muab khaws cia rau hauv Vajtswv lub tuam tsev.’ “Yog li no, Thathenai uas kav lub xeev sab dej Yufeti hnub poob thiab Setha‑Npauxenai thiab cov uas yog cov kav tej moos hauv lub xeev sab dej Yufeti hnub poob uas koom nrog neb, nej cia li txav deb. Cia tej haujlwm uas ua Vajtswv lub tuam tsev no ua mus. Cia cov Yudai tus thawj thiab cov Yudai cov kev txwj laus ua Vajtswv lub tuam tsev no dua tshiab rau lub qub chaw. Dua li ntawd kuv tso cai txog tej uas nej yuav tsum ua pab Yudai cov kev txwj laus ua Vajtswv lub tuam tsev no dua tshiab. Yuav them nqe ua tsev rau cov neeg no kom txwm nkaus tsis txhob sej li. Yuav muab tej nyiaj hauv vajntxwv lub txhab uas sau se hauv lub xeev sab dej Yufeti hnub poob los them. Thiab yog lawv cheem tsum dabtsi, tsis hais thav txiv nyuj, txiv tshis lossis tej yaj ua kevcai hlawv xyeem rau Vajtswv Ntuj, thiab mog, ntsev, cawv txiv hmab lossis roj raws li uas cov pov thawj hauv Yeluxalees thov, mas niaj hnub pub rau lawv tsis txhob tu ncua, xwv lawv thiaj li tau tsiaj xyeem kom hum Vajtswv Ntuj lub siab thiab lawv thov Vajtswv pab vajntxwv thiab nws tej tub txojsia. Thiab kuv tso cai hais tias yog leejtwg hloov tej uas tshaj tawm no, kuj yuav rho ib tug ntoo tawm hauv nws lub tsev thiab muab nws chob rau tus ntoo ntawd thiab nws lub tsev yuav ua ib pawg tshwj xuam. Thov cia Vajtswv uas ua rau nws lub npe nyob qhov ntawd rhuav tshem tus vajntxwv twg lossis haiv neeg twg uas cev tes hloov tej nqes hais no lossis ua rau Vajtswv lub tuam tsev hauv Yeluxalees puam tsuaj. Kuv yog Dali‑a tso txojcai li no. Nej yuav tsum rau siab ntso ua tej no.” Thathenai uas kav lub xeev sab dej Yufeti hnub poob thiab Setha‑Npauxenai thiab cov uas koom nrog ob tug kuj rau siab ntso ua tej uas vajntxwv Dali‑a hais. Mas Yudai cov kev txwj laus kuj ua lub tuam tsev sai zuj zus, vim xibhwb Hakai thiab Xekhaliya uas yog Idau tus tub cev Vajtswv lus rau lawv. Lawv thiaj ua tau tiav raws li Yixayee tus Vajtswv hais kom lawv ua thiab raws li Pawxia tej vajntxwv uas yog Xailab thiab Dali‑a thiab Athaxawxi tso cai rau lawv ua. Lub tuam tsev no ua tiav rau lub hli Adas hnub xiab peb rau xyoo rau uas Dali‑a ua vajntxwv kav. Mas cov Yixayee thiab cov pov thawj thiab cov Levi thiab lwm tus uas raug kuav mus poob tebchaws rov los, ua kevcai zoo siab xyiv fab xyeem pub lub tuam tsev no rau Vajtswv. Thaum lawv ua kevcai xyeem pub lub tuam tsev no rau Vajtswv lawv xyeem ib puas tus txiv nyuj, ob puas tus txiv yaj, plaub puas tus menyuam yaj thiab muab kaum ob tug txiv tshis los ua kevcai xyeem daws cov Yixayee lub txim, raws li cov Yixayee tej xeem. Thiab lawv tu cov pov thawj nyob ua pab ua pawg thiab tu cov Levi ua pab ua pawg ua koom tu Vajtswv hauv Yeluxalees raws li uas sau cia rau hauv Mauxe phau ntawv. Hnub xiab kaum plaub lub ib hlis cov uas poob tebchaws rov los kuj ua kevcai Hla Dhau. Cov pov thawj thiab cov Levi twb ua kevcai tu lawv tus kheej kom dawb huv txhij lawm, lawv thiaj tua tej menyuam yaj ua kevcai Hla Dhau rau cov uas poob tebchaws rov los sawvdaws thiab rau lawv cov kwvtij uas ua pov thawj thiab rau lawv tus kheej. Cov Yixayee uas poob tebchaws rov los thiab txhua tus uas koom nrog lawv thiab cais ntawm lwm haiv neeg tej kev qias vuab tsuab es yuav pe hawm Yawmsaub uas yog cov Yixayee tus Vajtswv kuj tau noj kevcai Hla Dhau. Thiab lawv ua kevcai Noj Ncuav tsis Xyaw Keeb xya hnub zoo siab xyiv fab, vim yog Yawmsaub ua rau lawv zoo siab xyiv fab thiab hloov Axilia tus vajntxwv lub siab tig los thiaj pab lawv tej haujlwm uas ua Vajtswv lub tuam tsev uas yog Yixayee tus Vajtswv. Los rau tom qab no thaum Athaxawxi ua vajntxwv kav Pawxia tebchaws, mas muaj ib tug hu ua Exala. Nws yog Xelaya li tub, Xelaya yog Axaliya tub, Axaliya yog Hikhiya tub, Hikhiya yog Salu tub, Salu yog Xadau tub, Xadau yog Ahithu tub, Ahithu yog Amaliya tub, Amaliya yog Axaliya tub, Axaliya yog Melayau tub, Melayau yog Xelahiya tub, Xelahiya yog Uxi tub, Uxi yog Npukhi tub, Npukhi yog Anpisuva tub, Anpisuva yog Fineha tub, Fineha yog Ele‑axa tub, Ele‑axa yog tus tuam pov thawj hlob Aloo tus tub. Tus Exala no tawm hauv Npanpiloo tebchaws los. Nws yog ib tug xibhwb uas paub Mauxe txoj kevcai uas Yixayee tus Vajtswv Yawmsaub pub rau lawv. Thiab vajntxwv pub txhua yam raws li Exala thov vim yog nws tus Vajtswv Yawmsaub txhais tes roos rawv nws. Muaj cov Yixayee qee leej thiab cov pov thawj thiab cov Levi qee leej thiab cov tub hu nkauj thiab cov zov tej rooj loog thiab cov uas ua haujlwm hauv lub tuam tsev kuj tau nrog nws los rau hauv Yeluxalees rau xyoo xya uas Athaxawxi ua vajntxwv. Exala los txog hauv Yeluxalees rau lub tsib hlis rau xyoo xya uas vajntxwv kav. Hnub xiab ib lub ib hlis nws sawv kev tawm hauv Npanpiloo tebchaws, mas hnub xiab ib lub tsib hlis nws los txog hauv Yeluxalees, vim yog nws tus Vajtswv txhais tes zoo roos rawv nws. Exala yog tus rau siab ntso kawm Yawmsaub txoj kevcai thiab ua raws nraim, thiab qhia Yawmsaub tej kab ke thiab tej kevcai rau cov Yixayee. No yog tej lus hauv tsab ntawv uas vajntxwv Athaxawxi muab rau tus pov thawj Exala, uas yog tus xibhwb kawm paub txog Yawmsaub tej lus nkaw thiab tej kab ke uas muab rau cov Yixayee. “Athaxawxi uas yog tus tuam vajntxwv sau rau tus pov thawj Exala uas yog xibhwb paub Vajtswv Ntuj txoj kevcai. Nimno kuv tso cai tias cov pejxeem Yixayee leejtwg lossis lawv cov pov thawj thiab cov Levi uas nyob hauv kuv lub tebchaws leejtwg xav mus rau Yeluxalees kuj nrog koj mus tau. Rau qhov vajntxwv thiab nws xya tus tim xyoob txib koj mus tshuaj saib Yuda thiab Yeluxalees txog qhov uas ua raws li koj tus Vajtswv txoj kevcai uas nyob hauv koj txhais tes ntawd, thiab coj tej nyiaj tej kub uas vajntxwv thiab nws cov tim xyoob zoo siab pub rau Yixayee tus Vajtswv uas muaj chaw nyob hauv Yeluxalees mus, thiab coj tej nyiaj tej kub huvsi uas koj sau tau hauv lub xeev Npanpiloo thiab tej uas cov pejxeem thiab cov pov thawj zoo siab pub, yog tej uas lawv zoo siab yeem lus yuav pub rau lawv tus Vajtswv lub tuam tsev uas nyob hauv Yeluxalees. Tej nyiaj no koj yuav tsum rau siab ntso yuav tej txiv nyuj tej txiv yaj thiab tej menyuam yaj thiab tej uas ua kevcai xyeem qoob loo thiab tej uas hliv xyeem ua ke, mas koj yuav tsum muab tej no xyeem rau saum lub thaj ntawm Vajtswv lub tuam tsev hauv Yeluxalees. Tej nyiaj tej kub uas tseem tshuav koj thiab koj cov kwvtij pom zoo ua yam twg kuj ua tau raws li koj tus Vajtswv lub siab nyiam. Tej twj siv uas muab cob rau koj siv ua haujlwm rau koj tus Vajtswv lub tuam tsev, koj yuav tsum cob rau ntawm Yeluxalees tus Vajtswv lub xubntiag. Yog cheem tsum yam twg ntxiv rau koj tus Vajtswv lub tuam tsev uas koj yuav tsum nrhiav, cia li muab nyiaj hauv vajntxwv lub txhab mus yuav. “Thiab kuv uas yog vajntxwv Athaxawxi tso cai mus rau txhua tus uas saib txhab nyiaj hauv lub xeev sab dej Yufeti hnub poob hais tias yam twg uas tus pov thawj Exala uas yog xibhwb qhia Vajtswv Ntuj txoj kevcai thov ntawm nej, nej cia li ua tib zoo pub rau nws, txog li ib puas tala nyiaj thiab ib puas khaula mog, ib puas npa cawv txiv hmab thiab ib puas npa roj, thiab ntsev mas pub tsis txhob xam tias npaum twg. Yam twg uas Vajtswv Ntuj hais lawd, kuj ua raws li ntawd puv npo rau Vajtswv Ntuj lub tuam tsev, xwv Vajtswv txojkev npau taws thiaj tsis tshwm rau vajntxwv thiab nws tej tub lub tebchaws. Kuv kuj qhia rau nej tias tsis raug cai uas yuav sau se qoob loo se lag luam se liaj teb ntawm cov pov thawj thiab cov Levi thiab cov tub hu nkauj thiab cov uas zov tej rooj loog thiab cov tub teg tub taws uas ua haujlwm hauv lub tuam tsev thiab lwm tus uas ua haujlwm hauv Vajtswv lub tuam tsev no ib tug li. “Exala, koj cia li siv koj tus Vajtswv lub tswvyim uas nyob hauv koj txhais tes tsa cov nom tswv thiab cov uas tu plaub rau cov pejxeem sawvdaws uas nyob hauv lub xeev sab dej Yufeti hnub poob, yog txhua tus uas paub koj tus Vajtswv txoj kevcai. Cov uas tsis tau paub nej yuav tsum qhia. Yog leejtwg tsis mloog koj tus Vajtswv txoj kevcai thiab vajntxwv txoj kevcai, mas cia li txiav txim nruj rau tus ntawd, yog txim tuag lossis ntiab tawm tebchaws lossis txeeb kiag nws cuab txhiaj cuab tam lossis muab kaw kuj tau.” Qhuas Yawmsaub uas yog peb tej poj koob yawm txwv tus Vajtswv, yog tus uas muab tej kev txawj no rau hauv vajntxwv lub siab kom nws tsim kho Vajtswv lub tuam tsev hauv Yeluxalees kom tau koob meej, thiab ua rau vajntxwv thiab nws cov tim xyoob thiab nws cov thawj uas muaj hwjchim loj sawvdaws muab kuv saib hlob. Kuv thiaj muaj siab tuab vim yog kuv tus Vajtswv Yawmsaub txhais tes roos rawv kuv, kuv thiaj sau tau Yixayee cov thawj nrog kuv mus. Ntawm no mus yog cov uas ua thawj hauv lawv tej cum thiab yog tej npe hauv lawv caj ces uas nrog kuv tawm hauv Npanpiloo tebchaws mus rau thaum Athaxawxi ua vajntxwv kav. Fineha caj ces yog Kawsoo, Ithama caj ces yog Daniyee, Davi caj ces yog Hathu, puavleej yog Sekhaniya caj ces. Palau caj ces yog Xekhaliya thiab cov txivneej uas nce npe nrog nws muaj 150 leej. Pahamau‑a caj ces yog Eli‑ehaunai uas yog Xelahiya tus tub thiab cov txivneej uas nrog nws muaj 200 leej. Xathu caj ces yog Sekhaniya uas yog Yahaxi‑ee tus tub thiab cov txivneej uas nrog nws muaj 300 leej. Adee caj ces yog Enpe, uas yog Yaunathas tus tub, thiab cov txivneej uas nrog nws muaj 50 leej. Elas caj ces yog Yesaya, uas yog Athaliya tus tub, thiab cov txivneej uas nrog nws muaj 70 leej. Sefathiya caj ces yog Xenpadiya uas yog Mikha‑ee tus tub, thiab cov txivneej uas nrog nws muaj 80 leej. Yau‑a caj ces yog Aunpadiya uas yog Yehi‑ee tus tub, thiab cov txivneej uas nrog nws muaj 218 leej. Npani caj ces yog Selaumi uas yog Yauxifiya tus tub, thiab cov txivneej uas nrog nws muaj 160 leej. Npenpai caj ces yog Xekhaliya uas yog Npenpai tus tub, thiab cov txivneej uas nrog nws muaj 28 leej. Axaka caj ces yog Yauhanas uas yog Hakhathas tus tub, thiab cov txivneej uas nrog nws muaj 110 leej. Adaunikhas caj ces cov uas tuaj tom qab muaj cov npe li no, yog Elifele, Ye‑u‑ee thiab Semaya thiab cov txivneej uas nrog lawv muaj 60 leej. Npivai caj ces yog Uthai thiab Xakaw thiab cov txivneej uas nrog ob tug muaj 70 leej. Kuv sau lawv los ua ke rau ntawm tus dej uas ntws mus rau tus niag dej Ahava, peb tsuam chaw so qhov ntawd peb hnub. Thaum kuv tshuaj saib cov pejxeem thiab cov pov thawj kuv pom tias tsis muaj cov Levi li. Kuv thiaj hais kom mus hu Eliyexaw, Ali‑ee, Semaya, Eenathas, Yali, Eenathas, Nathas, Xekhaliya thiab Mesulas, no yog cov thawj thiab hu Yauyali thiab Eenathas yog ob tug uas txawj ntse, thiab kuv xa lawv mus cuag Idau uas yog tus thawj ntawm lub chaw hu ua Khaxifia. Kuv qhia lawv hais rau Idau thiab nws cov kwvtij ntawm Khaxifia uas muaj feem ua tub teg tub taws ntawm lub tuam tsev, kom xa cov uas ua haujlwm hauv peb tus Vajtswv lub tuam tsev tuaj cuag peb. Yog muaj peb tus Vajtswv txhais tes uas zoo roos rawv peb, lawv thiaj tau coj ib tug uas xyuam xim tuaj rau peb, yog Selenpiya, thiab nws cov tub thiab nws cov kwvtij huvsi 18 leej. Lawv yog Mali caj ces, Mali yog Levi tus tub thiab yog Yixayee tus xeeb ntxwv. Thiab Hasanpiya thiab Yesaya uas yog Melali caj ces thiab ob tug cov kwvtij thiab cov tub huvsi muaj 20 leej. Thiab cov tub teg tub taws uas ua haujlwm ntawm lub tuam tsev raws li Davi thiab nws cov nom tswv tau tu cia kom pab cov Levi, muaj 220 leej, cov no muaj npe sau cia huvsi. Mas kuv tshaj tawm kom yoo mov rau ntawm tus dej Ahava kom peb thiaj tau txo peb tus kheej rau ntawm peb tus Vajtswv thiab thov nws pab peb thiab peb tej menyuam thiab peb tej cuab txhiaj cuab tam huvsi taug kev tso siab lug. Kuv txaj muag thov ib pab tub rog thiab tej tub rog caij nees ntawm vajntxwv kom tiv thaiv yeeb ncuab taug kev. Rau qhov peb twb hais rau vajntxwv lawm tias, “Peb tus Vajtswv txhais tes roos rawv yuav ua zoo rau cov uas nrhiav nws, tiamsis nws txojkev npau taws uas muaj hwjchim loj yuav tawm tsam txhua tus uas tso nws tseg.” Peb thiaj li yoo mov thiab taij thov peb tus Vajtswv txog qhov no mas nws mloog peb lub suab taij thov. Kuv xaiv tsa cov pov thawj hlob kaum ob leeg, yog Selenpiya, Hasanpiya thiab ob tug cov kwvtij kaum leej. Thiab kuv muab tej nyiaj tej kub thiab tej twj siv uas vajntxwv thiab nws cov tim xyoob thiab nws cov thawj thiab cov Yixayee sawvdaws uas nyob ntawd tau pub xyeem ua peb tus Vajtswv lub tuam tsev los luj rau lawv. Kuv luj cob rau lawv txhais tes rau pua tsib caug tala nyiaj thiab tej twj siv nyiaj uas muaj nqes ib puas tala thiab kub ib puas tala, thiab nees nkaum lub phaj kub uas muaj nqes ib txhiab dali thiab ob lub tais tseem tooj liab ci zoo nkauj uas muaj nqes npaum li kub. Thiab kuv hais rau lawv tias, “Nej sawvdaws yog cov dawb huv rau Yawmsaub thiab tej twj siv kuj dawb huv. Tej nyiaj thiab tej kub ntawd yog tej uas zoo siab muab xyeem pub rau Yawmsaub, uas yog nej tej poj koob yawm txwv tus Vajtswv. Yuav tsum ceev cia mus txog thaum uas nej muab luj rau ntawm cov pov thawj hlob thiab cov Levi thiab cov thawj hauv txhua cum Yixayee hauv tej chav tsev ntawm Yawmsaub lub tuam tsev hauv Yeluxalee.” Cov pov thawj thiab cov Levi thiaj txais tej nyiaj thiab tej kub uas luj ntawd thiab tej twj siv es coj mus rau ntawm Yeluxalees mus rau hauv peb tus Vajtswv lub tuam tsev. Hnub xiab kaum ob lub ib hlis peb tawm ntawm tus dej Ahava yuav mus rau Yeluxalees. Mas peb tus Vajtswv txhais tes roos rawv peb thiab nws cawm kom peb dim tej yeeb ncuab txhais tes thiab tej uas zov ntawm tej tog kev. Peb los txog Yeluxalees thiab so peb hnub qhov ntawd. Hnub uas plaub muab tej nyiaj tej kub thiab tej twj siv los luj hauv peb tus Vajtswv lub tuam tsev cob rau tus pov thawj Melemau uas yog Uliyas tus tub txhais tes, thiab cov uas nrog nws nyob ntawd yog Fineha tus tub Ele‑axa, thiab yog Yesua tus tub Yauxanpa thiab Npinu‑i tus tub Nau‑adiya, ob tug yog cov Levi. Lawv luj thiab suav txhua yam thiab muab sau txhua yam cia tias hnyav npaum li cas. Hnub ntawd cov uas raug ntes coj mus es rov los, yog cov uas poob tebchaws rov los, lawv ua kevcai hlawv huvsi xyeem rau Yixayee tus Vajtswv. Lawv muab kaum ob tug txiv nyuj xyeem ua cov Yixayee sawvdaws li feem, thiab cuaj caum rau tus txiv yaj, thiab xya caum xya tus menyuam yaj, thiab lawv kuj muab kaum ob tug txiv tshis ua kevcai xyeem daws txim. Cov no huvsi ua kevcai hlawv xyeem rau Yawmsaub. Lawv kuj muab tsab ntawv uas muaj vajntxwv tej lus nkaw rau cov thawj uas vajntxwv tsa kav tebchaws thiab rau cov uas kav lub xeev sab dej Yufeti hnub poob, mas cov nom tswv thiaj pab cov pejxeem thiab pab Vajtswv lub tuam tsev. Thaum dhau tej haujlwm no lawm, cov thawj los cuag kuv thiab hais tias, “Cov neeg Yixayee thiab cov pov thawj thiab cov Levi tsis tau muab lawv cais ntawm tej neeg hauv lwm lub tebchaws thiab ntawm tej neeg ntawd tej kev qias vuab tsuab, yog ntawm cov Khana‑as, cov Hithai, cov Pelixai, cov Yenpu, cov Asmoo, cov Mau‑a, cov Iyi thiab cov Amaulai. Rau qhov lawv yuav tej neeg ntawd tej ntxhais los ua lawv pojniam thiab ua lawv tej tub pojniam. Yog li no haiv neeg uas dawb huv no thiaj li txuam tsoov tag rau hauv tej tebchaws ntawd cov neeg. Qhov uas fav xeeb no, cov nom tswv thiab cov thawj txhais tes coj kev ua ntej.” Thaum kuv hnov li no kuv thiaj dua rhe kuv lub tsho thiab lub tsho ntev, thiab dob kuv tej plaubhau thiab tej hwj txwv, thiab kuv zaum poob siab tag. Ces txhua tus uas paub ntshai Yixayee tus Vajtswv tej lus tuaj nyob vij kuv vim yog tim cov uas poob tebchaws rov qab los tej kev fav xeeb, mas kuv zaum poob siab tag mus txog lub sijhawm uas ua kevcai xyeem thaum yuav tsaus ntuj. Lub sijhawm uas ua kevcai xyeem thaum yuav tsaus ntuj kuv sawv tsees ntawm qhov uas yoo mov uas muab lub tsho thiab lub tsho ntev dua tag, thiab kuv txhos caug ntua tsa tes rau Yawmsaub uas yog kuv tus Vajtswv, thiab hais tias, “Au kuv tus Vajtswv, kuv poob ntsej muag thiab txaj muag tsa lub ntsej muag saib rau koj uas yog kuv tus Vajtswv, rau qhov peb tej kev txhaum siab dhau peb lub taubhau thiab peb lub txim nce mus nto saum ntuj. Peb ua txhaum muaj txim loj txij thaum peb tej poj koob yawm txwv los txog niaj hnub nimno. Vim peb ua txhaum, mas peb thiab peb tej vajntxwv thiab peb cov pov thawj thiaj raug muab cob rau hauv lwm tebchaws tej vajntxwv txhais tes, thiab cob rau hniav ntaj thiab raug ntes raug lws thiab poob ntsej muag kawg yam li niaj hnub nimno. Tiamsis nimno Yawmsaub uas yog peb tus Vajtswv ua nws txojkev hlub tshwm los ib nyuag ntu, nws thiaj tseg peb ib txhia tshuav nyob thiab pub peb nyob ruaj hauv nws lub chaw dawb huv, xwv Vajtswv thiaj ua rau peb qhov muag kaj tuaj thiab pub rau peb rov muaj zog mentsis hauv txojkev ua qhev tuaj. Peb yeej raug ua qhev, tiamsis peb tus Vajtswv tsis muab peb pov tseg rau hauv txojkev ua qhev mus li. Nws ua nws txojkev hlub tshwm rau peb tab meeg Pawxia tej vajntxwv, thiab pub peb rov muaj zog tsim tsa peb tus Vajtswv lub tuam tsev thiab kho tej uas pob tag thiab pub muaj ntsa loog tiv thaiv peb hauv Yuda thiab Yeluxalees. “Au peb tus Vajtswv, dhau tej no lawm nimno peb yuav hais li cas? Vim yog peb tau tso koj tej lus nkaw tseg lawm, yog tej lus uas koj tau kom koj cov tub qhe uas cev koj lus hais tias, ‘Lub tebchaws uas nej tabtom txeem mus ua nej tug ntawd yog lub tebchaws uas qias tsis huv vim tej kev qias puas tsuas uas cov neeg hauv lub tebchaws ua. Tej kev qias vuab tsuab uas lawv ua puv nkaus sab no mus thoob plaws rau sab tim ub ua rau lub tebchaws qias tsis huv lawm. Yog li no nej tsis txhob muab nej tej ntxhais qua rau lawv tej tub, tsis txhob yuav lawv tej ntxhais rau nej tej tub, thiab tsis txhob nrog lawv sib raug zoo thiab txhawb lawv vam meej, xwv nej thiaj yuav muaj zog thiab noj tej qoob loo zoo zoo hauv lub tebchaws no thiab muab lub tebchaws ua qub txeeg qub teg rau nej cov menyuam mus ib txhis.’ Txawm yog txhua yam uas peb raug yog tim peb tej kev phem loj thiab peb lub txim loj kawg los peb tus Vajtswv tseem rau txim rau peb sib dua lub txim uas tsim nyog peb raug, thiab tau pub peb ib cov tshuav nyob yam li no. Mas peb tseem yuav rhuav koj tej lus nkaw dua thiab nrog cov neeg uas ua tej kev qias vuab tsuab no sib yuav lov? Koj yuav tsis chim rau peb mus txog thaum koj ua rau peb puam tsuaj tag tsis tshuav ib tug nyob thiab tsis muaj ib tug dim li lov? Au Yawmsaub uas yog cov Yixayee tus Vajtswv, koj yog tus ncaj ncees. Peb ib co tshuav nyob thiab dim los txog niaj hnub nimno. Saib maj, tsis muaj ib tug muaj txim uas nyob tau ntawm koj lub xubntiag los peb tseem muaj txim nyob ntawm koj xubntiag.” Thaum Exala thov thiab lees lub txim quaj thiab ntog rau ntawm Vajtswv lub tuam tsev, muaj cov pejxeem coob coob tsis hais pojniam txivneej thiab menyuam tuaj hauv cov Yixayee tuaj rau ntawm nws. Lawv kuj quaj mob siab kawg. Mas Yehi‑ee tus tub Sekhaniya uas yog Elas caj ces hais rau Exala tias, “Peb tau fav xeeb rau peb tus Vajtswv lawm thiab yuav lwm haiv neeg hauv lub tebchaws no tej ntxhais. Txawm yog muaj li no los nimno cov Yixayee tseem muaj chaw vam. Vim li no cia peb cog lus rau peb tus Vajtswv tias peb yuav nrauj tej pojniam no huvsi thiab tej menyuam uas lawv yug, raws li yawg hlob koj thiab cov uas paub ntshai peb tus Vajtswv tej lus nkaw taw qhia. Cia ua raws li txoj kevcai lauj. Cia li sawv tsees ua vim yog koj li haujlwm, peb nrog koj koom tes, cia li ua khov kho thiab ua mus.” Ces Exala txawm sawv tsees thiab kom cov pov thawj hlob thiab cov Levi thiab cov Yixayee sawvdaws cog lus twv tias lawv yuav ua raws li tau hais tseg lawm. Lawv txawm cog lus twv. Ces Exala txawm txav ntawm Vajtswv lub tuam tsev mus rau hauv Eliyasi tus tub Yehauhanas chav. Thaum nws los rau hauv lawm, nws tsis noj ncuav tsis haus dej rau qhov nws quaj txog qhov uas cov uas poob tebchaws rov los ntawd fav xeeb. Muaj lus tshaj tawm mus thoob plaws Yuda thiab Yeluxalees rau cov uas poob tebchaws rov los sawvdaws kom tuaj txoos ua ke rau hauv Yeluxalees. Yog leejtwg tsis tuaj rau peb hnub ntawd raws li cov thawj thiab cov kev txwj laus hais mas yuav txeeb nws cuab txhiaj cuab tam huvsi thiab tus ntawd yuav raug muab txiav tawm hauv cov uas poob tebchaws rov los mus. Yuda thiab Npeeyamee cov txivneej sawvdaws tuaj txoos ua ke rau hauv Yeluxalees rau peb hnub ntawd, yog lub cuaj hlis hnub tim nees nkaum. Cov pejxeem sawvdaws zaum rau hauv lub tshav puam hauv Vajtswv lub tuam tsev. Lawv tshee hnyo rau zaj no thiab qhov uas nag los hlob heev. Mas tus pov thawj Exala sawv tsees hais rau lawv tias, “Nej tau fav xeeb thiab yuav lwm haiv neeg tej ntxhais ua pojniam, nej thiaj li tsav cov Yixayee lub txim loj tuaj. Nimno nej cia li lees txim rau Yawmsaub uas yog nej tej poj koob yawm txwv tus Vajtswv thiab ua raws li nws lub siab nyiam. Cia li cais nej tawm hauv lwm haiv neeg hauv lub tebchaws no thiab tawm hauv cov pojniam uas yog lwm haiv neeg.” Ib tsoom pejxeem sawvdaws teb suab nrov hais tias, “Yog li koj hais, peb yuav ua raws li koj hais ntag. Tiamsis cov pejxeem coob heev thiab yog lub caij nag los heev, peb nyob tsis taus ntawm tshav puam no. Yuav tu kom tiav rau ib hnub ob hnub no tsis tau, vim peb twb ua txhaum zaj no ntau heev lawm. Thov cia peb cov thawj nyob cov pejxeem chaw tu zaj no, thiab cia txhua tus uas nyob hauv peb tej moos uas tau yuav lwm haiv neeg ua pojniam tuaj raws li uas teem cia rau lawv, thiab cov kev txwj laus thiab cov uas tu plaub hauv txhua lub moos nrog lawv tuaj ua ke mus txog thaum uas peb tus Vajtswv txojkev npau taws heev thim ntawm peb mus lawd.” Tsuas yog Axahee tus tub Yaunathas thiab Thiva tus tub Yaxeya tawm tsam zaj no xwb, thiab Mesulas thiab Sanpethai uas yog ib tug Levi tuaj ob tug tog. Cov uas poob tebchaws rov los kuj ua raws li ntawd. Mas tus pov thawj Exala xaiv tsa cov thawj hauv txhua cum ib cum ib tug yog txhua tus uas twb hais npe lawm. Mas hnub xiab ib lub kaum hli lawv zaum tshuaj saib zaj no, mas thaum txog hnub xiab ib lub ib hlis lawv tshuaj saib txhua tus txivneej uas yuav lwm haiv neeg ua pojniam lawd tiav. Cov pov thawj caj ces uas yuav lwm haiv neeg muaj li no. Yauxada tus tub Yesua caj ces thiab nws cov kwvtij yog Ma‑axeya, Eliyexaw, Yali thiab Kedaliya. Lawv cog lus tias lawv yuav nrauj lawv tej pojniam tseg thiab lawv muab ib tug txiv yaj ua kevcai ntxuav lawv kev txaug kev txhaum. Imaw caj ces yog Hanani thiab Xenpadiya. Halee caj ces yog Ma‑axeya, Eliya, Semaya, Yehi‑ee, thiab Uxiya. Pasaw caj ces yog Eli‑aunai, Ma‑axeya, Yisama‑ee, Nethanee, Yauxanpa thiab Elaxa. Cov Levi yog Yauxanpa, Sime‑i, Khelaya (uas yog Khelitha), Pethahiya, Yuda thiab Eliyexaw. Cov uas hu nkauj yog Eliyasi. Cov zov tej rooj loog yog Salu, Thelee thiab Uli. Thiab cov Yixayee mas Palau caj ces yog Lamiya, Ixiya, Makhiya, Miyamee, Ele‑axa, Makhiya thiab Npenaya. Elas caj ces yog Mathaniya, Xekhaliya, Yehi‑ee, Adi, Yelemau thiab Eliya. Xathu caj ces yog Eli‑aunai, Eliyasi, Mathaniya, Yelemau, Xanpa thiab Axixa. Npenpai caj ces yog Yehauhanas, Hananiya, Xanpai thiab Athalai. Npani caj ces yog Mesulas, Malu, Adaya, Yasu, Se‑as thiab Yelemau. Paha Mau‑a caj ces yog Ana, Khela, Npenaya, Ma‑axeya, Mathaniya, Npexalee, Npinu‑i thiab Manaxe. Halee caj ces yog Eliyexaw, Isiya, Makhiya, Semaya, Sime‑oo, Npeeyamee, Malu thiab Semaliya. Hasu caj ces yog Mathenai, Mathathia, Xanpa, Elifele, Yelemai, Manaxe thiab Sime‑i. Npani caj ces yog Ma‑adai, Alav, U‑ee, Npenaya, Npedeya, Kheluhi, Vaniya, Melemau, Eliyasi, Mathaniya, Mathenai thiab Ya‑axu. Npinu‑i caj ces yog Sime‑i, Selemiya, Nathas, Adaya, Manadenpai, Sasai, Salai, Axalee, Selemiya, Semaliya, Salu, Amaliya thiab Yauxej. Nenpau caj ces yog Ye‑i‑ee, Mathithiya, Xanpa, Xenpina, Yadai, Yau‑ee thiab Npenaya. Cov neeg no sawvdaws yuav lwm haiv neeg tej ntxhais ua pojniam, mas lawv muab tej pojniam menyuam ntawd nrauj huvsi. No yog Nehemi uas yog Hakhaliya tus tub tej lus. Lub hli Khile xyoo nees nkaum thaum kuv nyob hauv lub nroog loj Xuxa, mas Hanani uas yog kuv ib tug kwvtij nrog cov txivneej qee leej tuaj hauv Yuda tuaj. Kuv thiaj nug lawv txog cov Yudai uas poob tebchaws rov los es tseem muaj txojsia nyob thiab nug txog lub nroog Yeluxalees. Lawv hais rau kuv tias, “Cov uas poob tebchaws dim los es tseem muaj txojsia nyob hauv lub xeev ntawd raug kev txom nyem thiab txaj muag kawg. Yeluxalees lub ntsa loog pob tag thiab tej rooj loog kub hnyiab puam tsuaj tag.” Thaum kuv hnov tej lus no kuv txawm zaum quaj thiab quaj nyuaj siab ntau hnub thiab kuv yoo mov thiab thov Vajtswv Ntuj tsis tu li. Thiab kuv hais tias, “Au Yawmsaub uas yog Vajtswv Ntuj loj kawg nkaus thiab txaus ntshai, koj yog tus uas tuav rawv tej lus cog tseg thiab txojkev hlub ruaj khov rau cov uas hlub koj thiab ua raws li koj tej lus nkaw. Mas thov koj tig ntsej mloog thiab thov tsa qhov muag saib, thiab mloog koj tus tub qhe tej lus thov uas nimno kuv thov koj nruab hnub hmo ntuj pab koj haiv neeg Yixayee uas yog koj cov tub qhe. Kuv lees cov Yixayee lub txim uas peb tau ua txhaum rau koj. Kuv thiab kuv txiv caj ces tau ua txhaum lawm ntag. Peb tau ua phem ua qias rau koj loj kawg li thiab tsis tuav rawv tej lus nkaw thiab tej kab ke thiab tej kevcai uas koj muab cob rau koj tus qhev Mauxe. Thov koj nco txog tej lus uas koj twb hais rau koj tus qhev Mauxe tias, ‘Yog nej fav xeeb rau kuv, kuv yuav ua rau nej tawg khiav ri sua mus rau hauv ib tsoom neeg, tiamsis yog nej rov los cuag kuv thiab tuav rawv kuv tej lus nkaw thiab ua raws nraim, mas txawm yog cov uas tawg ri sua mus rau qab ntuj kawg los kuv yuav qaws lawv qhov ntawd los thiab coj lawv los rau lub chaw uas kuv twb xaiv cia rau kuv lub npe nyob lawm.’ Lawv yeej yog koj cov tub qhe thiab yog koj haiv neeg uas koj siv koj lub hwjchim loj kawg thiab koj txhais tes uas muaj zog txhiv los lawm. Au tus Tswv, thov koj tig ntsej mloog koj tus tub qhe tej lus thov thiab mloog koj cov tub qhe uas zoo siab paub ntshai koj lub npe tej lus thov, es pub rau kuv uas yog koj tus qhev ua txhua yam kom tiav rau hnub no thiab thov ua kom vajntxwv hlub kuv.” Thaum ntawd kuv ua tus uas thiab khob cawv txiv hmab rau vajntxwv. Thaum lub hli Nixa yog xyoo nees nkaum uas Athaxawxi ua vajntxwv, thaum muab cawv txiv hmab txawb rau ntawm nws lub xubntiag, kuv thiab cawv txiv hmab cev rau vajntxwv. Ua ntej ntawd kuv tsis txeev ua ntsej muag mluas mlob rau ntawm nws xubntiag li. Ces vajntxwv hais rau kuv tias, “Koj twb tsis muaj mob, ua cas koj mluas mlob? Qhov uas koj mluas mlob tsuas yog koj ntxhov siab xwb kaj.” Ces kuv ntshai heev, kuv thiaj hais rau vajntxwv tias, “Thov kom vajntxwv muaj txojsia nyob mus ib txhis. Ua cas kuv yuav tsis mluas mlob rau thaum lub nroog uas log kuv tej poj koob yawm txwv raug muab tso tseg nyob do cuas thiab tej rooj loog kuj raug hluavtaws kub puam tsuaj tag?” Ces vajntxwv txawm hais rau kuv tias, “Koj xav thov dabtsi?” Kuv txawm thov Vajtswv ntuj. Thiab kuv teb vajntxwv tias, “Vajntxwv, yog koj pom zoo, thiab koj txaus siab rau kuv uas yog koj tus tub qhe, mas thov koj tso kuv mus rau hauv Yuda tebchaws mus rau hauv lub nroog uas log kuv tej poj koob yawm txwv, xwv kuv thiaj tau tsim kho lub nroog ntawd dua tshiab.” Ces vajntxwv hais rau kuv rau thaum poj vaj nyob ntawm vajntxwv ib sab hais tias, “Koj yuav mus ntev li cas, thaum twg koj li rov los?” Yog li no vajntxwv thiaj txaus siab tso kuv mus. Ces kuv thiaj teem sijhawm. Thiab kuv hais rau vajntxwv tias, “Yog vajntxwv pom zoo, thov ua ntawv rau kuv coj mus rau cov thawj uas kav lub xeev sab dej Yufeti hnub poob xwv lawv thiaj tso cai rau kuv hla zuj zus mus txog Yuda tebchaws. Thiab thov ua ntawv hais rau Axas uas kav vajntxwv lub hav zoov kom nws muab ntoo rau kuv ua tej npuab rooj rau lub chaw ruaj khov ntawm lub tuam tsev thiab ua lub nroog tej ntsa loog thiab kho lub tsev uas kuv yuav mus nyob.” Vajntxwv thiaj pub txhua yam uas kuv thov rau kuv vim yog Vajtswv txhais tes zoo roos rawv kuv. Ces kuv thiaj los txog cov thawj uas kav lub xeev sab dej Yufeti hnub poob thiab muab tej ntawv uas vajntxwv sau rau lawv. Vajntxwv kuj txib cov thawj tub rog thiab cov tub rog caij nees nrog kuv mus. Thaum Xanpala uas yog neeg Hauloo thiab tus nom tswv Thaunpia uas yog neeg Asmoo hnov zaj no, mas ob tug tsis txaus siab heev rau qhov uas muaj ib tug tuaj pab cov Yixayee kom tau zoo. Kuv thiaj los txog Yeluxalees thiab so tau peb hnub. Ces kuv txawm sawv tsaus ntuj nti coj qee leej nrog kuv mus. Kuv tsis qhia rau leejtwg paub tias kuv tus Vajtswv tau muab dabtsi rau hauv kuv lub siab kom pab Yeluxalees. Kuv tsis muaj dua lwm tus tsiaj tsuas muaj tus uas kuv caij xwb. Thaum tsaus ntuj nti kuv tawm Rooj Loog Hav mus txog lub Qhov Dej Zaj thiab mus txog Rooj Loog Tshwj Xuam. Kuv tshuaj saib Yeluxalees tej ntsa loog uas pob tag thiab tej rooj loog uas raug hluavtaws kub puam tsuaj tag. Ces kuv txawm hla mus rau Rooj Loog Dej Txhawv thiab mus txog vajntxwv lub pas dej, tiamsis tsis tau kev rau tus tsiaj uas kuv caij hla mus. Kuv thiaj mus tsaus ntuj nti hauv lub hav tshuaj saib lub ntsa loog, thiab tig rov los nkag Rooj Loog Hav thiaj rov los tsev. Cov nom tswv kuj tsis paub tias kuv mus qhovtwg lossis kuv mus ua dabtsi. Kuv tsis tau qhia rau cov Yudai, tsis hais cov pov thawj thiab cov uas ua hlob thiab cov thawj thiab lwm tus uas yuav ua tej haujlwm ntawd. Ces kuv txawm hais rau lawv tias, “Nej kuj pom tias peb poob rau hauv txojkev txom nyem li cas lawm, vim yog qhov uas lub nroog Yeluxalees pob tag thiab tej rooj loog kub hnyiab tag. Cia li tuaj es peb ua lub ntsa loog Yeluxalees dua tshiab xwv peb thiaj tsis raug txaj muag.” Thiab kuv hais rau lawv paub txog qhov uas kuv tus Vajtswv txhais tes roos rawv kuv ua zoo rau kuv thiab paub txog tej lus uas vajntxwv tau hais rau kuv. Mas lawv hais tias, “Peb cia li nqes tes ua dua tshiab.” Lawv thiaj koom siab nqes tes ua yam uas zoo ntawd. Thaum Xanpala uas yog neeg Hauloo thiab tus nom tswv Thaunpia uas yog neeg Asmoo thiab Kesee uas yog neeg Alam hnov zaj no, lawv thuam luag saib tsis taus peb thiab hais tias, “Nej ua dabtsi li no? Nej fav xeeb rau vajntxwv lov?” Mas kuv teb lawv tias, “Vajtswv Ntuj yuav pab kom peb ua kom tiav. Peb cov uas yog nws cov tub qhe yuav nqes tes ua. Tiamsis nej tsis muaj feem tsis muaj cai tsis muaj ib yam dabtsi uas nrog Yeluxalees koom kiag li.” Dhau ntawd tus tuam pov thawj hlob Eliyasi nrog nws cov kwvtij uas yog pov thawj nqes tes ua lub Rooj Loog Yaj. Lawv ua kevcai tu kom dawb huv thiab muab txhib qhov rooj nruab rau. Lawv ua kevcai tu kom dawb huv mus txog lub chaw tsom faj uas hu ua Ib Puas, thiab mus txog lub chaw tsom faj Hananee. Txuas ntawm lawv mus yog cov neeg Yelikhau ua, thiab ntu txuas ntxiv mus yog Ili tus tub Xakaw ua. Haxena‑i caj ces ua lub Rooj Loog Ntses. Lawv ua tej npuab rooj thiab nruab txhib qhov rooj rau thiab ua tej ntsia rooj thiab tej las rooj. Ntu txuas ntawm lawv mus yog Uliya tus tub Melemau uas yog Hakhau tus xeeb ntxwv kho. Ntu txuas ntawm lawv mus yog Npelekhiya tus tub Mesulas uas yog Mesexanpee tus xeeb ntxwv kho. Ntu txuas ntawm lawv mus yog Npa‑ana tus tub Xadau kho. Ntu txuas ntawm lawv mus yog cov neeg Thekhau‑a kho, tiamsis lawv cov uas ua hlob tsis yeem siv lawv lub dag lub zog ua tej haujlwm uas tus tswv feeb rau lawv. Paxe‑a tus tub Yauyada thiab Npexaudeya tus tub Mesulas kho lub Rooj Loog Qub. Ob tug ua tej npuab rooj thiab nruab txhib qhov rooj rau thiab ua tej ntsia rooj thiab tej las rooj. Ntu txuas ntawm ob tug mus yog Melathiya uas yog neeg Kinpe‑oo thiab Yadoo uas yog neeg Melaunau, thiab cov neeg hauv lub moos Kinpe‑oo thiab hauv lub moos Mixapa kho. Cov no nyob hauv tus tswv xeev sab dej Yufeti hnub poob qab kev tswjhwm. Ntu txuas ntawm lawv mus yog Hahaya tus tub Uxi‑ee uas yog Kws ntaus kub kho. Ntu txuas ntawm nws mus yog Hananiya uas yog Kws tov tshuaj tsw qab kho. Ob tug ntawd kho Yeluxalees mus txog ntawm ntu Ntsa Loog Tuab. Ntu txuas ntawm ob tug mus yog Hawj tus tub Lefaya uas kav Yeluxalees ib nrab kho. Ntu txuas ntawm lawv mus yog Haluma tus tub Yedaya kho ncaj ntawm nws lub tsev, thiab ntu txuas ntawm nws mus yog Hasaneya tus tub Hathu kho. Halee tus tub Makhiya thiab Pahamau‑a tus tub Hasus kho dua ib ntus ntxiv thiab kho lub Chaw Tsom Faj Qhov Txos. Ntu txuas ntawm lawv mus yog Halauhe tus tub Salu uas kav Yeluxalees ib nrab kho, yog nws thiab nws tej ntxhais kho. Hanu thiab cov neeg hauv lub moos Xanau‑a kho lub Rooj Loog Hav. Lawv ua dua tshiab thiab nruab txhib qhov rooj rau thiab ua tej ntsia rooj thiab tej las rooj, thiab kho lub ntsa loog ib txhiab tshim mus txog lub Rooj Loog Tshwj Xuam. Lekhaj tus tub Makhiya uas kav ib cheeb tsam Npe Hakhelee kho lub Rooj Loog Tshwj Xuam. Nws ua dua tshiab thiab nruab txhib qhov rooj rau thiab ua tej ntsia rooj thiab tej las rooj. Khauhauxe tus tub Salu uas kav ib cheeb tsam Mixapa kho lub Rooj Loog Dej Txhawv. Nws ua dua tshiab thiab muab vov thiab nruab txhib qhov rooj rau thiab ua tej ntsia rooj thiab tej las rooj. Thiab nws ua lub ntsa loog ntawm Pas Dej Sela uas npuas vajntxwv lub vaj mus txog ntawm tus ntaiv uas nqes saum Davi lub nroog los. Ntu txuas ntawm nws mus yog Axanpu tus tub Nehemi uas kav ib cheeb tsam Npexuv ib nrab kho mus txog ncaj Davi lub qhov ntxa thiab txog pas dej uas luag khawb thiab txog lub tsev uas cov tub rog siab loj siab tuab nyob. Ntu txuas ntawm nws mus cov Levi kho, yog Npani tus tub Lehoo kho thiab ntu txuas ntawm nws mus yog Hasanpiya uas kav ib cheeb tsam Khe‑ila ib nrab kho nws feem. Ntu txuas ntawm nws mus lawv cov kwvtij kho yog Henada tus tub Npavai uas kav ib cheeb tsam Khe‑ila ib nrab. Ntu txuas ntawm nws mus yog Yesua tus tub Exaw uas kav lub moos Mixapa kho dua ib ntus ncaj ntawm txojkev uas nce mus rau lub txhab cuab yeej uas nyob ntawm lub Ntsa Loog Nkhaus. Ntu txuas ntawm nws mus yog Xanpai tus tub Npalu kho dua ib ntus ntxiv txij ntua lub Ntsa Loog Nkhaus mus txog tus tuam pov thawj hlob Eliyasi lub qhov rooj. Ntu txuas ntawm nws mus yog Uliya tus tub Melemau uas yog Hakhau tus xeeb ntxwv kho dua ib ntus txij ntua Eliyasi lub qhov rooj mus txog tom nws lub tsev kawg. Ntu txuas ntawm nws mus yog cov pov thawj uas nyob nram tiaj kho. Ntu txuas ntawm lawv mus yog Npeeyamee thiab Hasus kho ncaj ntawm ob tug tsev. Ntu txuas ntawm ob tug mus yog Ma‑axeya tus tub Axaliya uas yog Ananiya tus xeeb ntxwv kho ncaj ntawm nws tsev. Ntu txuas ntawm nws mus yog Henada tus tub Npinu‑i kho dua ib ntus txij ntua Axaliya tsev mus txog lub Ntsa Loog Nkhaus thiab txog ntawm lub Kaum loog. Uxai tus tub Palas kho ncaj ntawm lub Ntsa Loog Nkhaus thiab lub chaw tsom faj uas thauv rau sab nraud ntawm vajntxwv lub tsev sab ped ze ntawm cov tub rog uas zov vajntxwv lub loog. Ntu txuas ntawm nws mus yog Palau tus tub Pedaya, thiab cov uas ua haujlwm hauv Vajtswv lub tuam tsev uas nyob ntawm Aufee kho mus txog ncaj lub Rooj Loog Dej sab hnub tuaj thiab txog lub chaw tsom faj uas thauv rau sab nraud. Ntu txuas ntawm lawv mus yog cov neeg Thekhau‑a kho dua ib ntus ncaj ntawm lub chaw tsom faj loj uas thauv rau sab nraud mus txog lub ntsa loog ntawm Aufee. Cov pov thawj kho ntawm lub Rooj Loog Nees mus rau sab ped, nyias kho ncaj ntawm nyias lub tsev. Ntu txuas ntawm lawv mus yog Imaw tus tub Xadau kho ncaj ntawm nws tsev. Ntu txuas ntawm nws mus yog Sekhaniya tus tub Semaya uas yog tus zov Rooj Loog Sab Hnub Tuaj kho. Ntu txuas ntawm nws mus yog Selemiya tus tub Hananiya thiab Hanu uas yog Xalaj tus tub uas ho kho dua ib ntus. Ntu txuas ntawm nws mus yog Npelekhiya tus tub Mesulas kho ncaj ntawm nws chav tsev. Ntu txuas ntawm nws mus yog Makhiya yog dua ib tug Kws ntaus kub kho mus txog ntawm lub tsev uas cov uas ua haujlwm hauv lub tuam tsev thiab cov tub luam nyob, ncaj ntawm lub Rooj Loog Txheeb Tub Rog thiab mus txog chav tsev sab saud uas nyob ntawm kaum loog. Thiab ntu nruab nrab chav tsev sab saud ntawm kaum loog mus txog lub Rooj Loog Yaj, yog cov Kws ntaus kub thiab cov tub luam kho. Thaum Xanpala hnov tias peb tabtom ua lub ntsa loog, nws txawm chim npau taws heev, nws thiaj thuam luag cov Yudai. Nws hais tab meeg nws cov kwvtij thiab tab meeg cov tub rog Xamali tias, “Cov Yudai uas tsis muaj zog no ua dabtsi li ntawd nev? Lawv yuav kho dua tshiab lov? Lawv yuav tua tsiaj xyeem no lov? Lawv yuav ua ib hnub kom tiav no lov? Lawv yuav muab tej pob zeb uas hlawv pob tag ua tej niag pawg tshwj xuam rov qab los siv dua no lov?” Thaunpia uas yog neeg Asmoo nyob ib sab ntawm nws thiab hais tias, “Lub ntsa loog pob zeb uas lawv tabtom ua ntawd, yog ib tug hma dhia rau saud xwb, ces yuav ua rau pob tag.” Au peb tus Vajtswv thov koj tig ntsej mloog, rau qhov peb raug saib tsis taus. Thov tig lawv lub suab thuam lub suab luag rov mus poob rau saum lawv lub taubhau, thiab thov cia lawv raug luag lws rau hauv lub tebchaws uas lawv raug ntes coj mus nyob. Thov tsis txhob npog lawv tej kev txhaum cia thiab tsis txhob rhuav lawv lub txim kom ploj ntawm koj lub qhov muag mus, rau qhov lawv tau thuam luag rhuav cov uas ua ntsa loog no ntsej muag. Peb thiaj ua lub ntsa loog mas lub ntsa loog twb tuaj sib txuas tag siab txog ib nrab lawm rau qhov yog cov pejxeem rau siab ua haujlwm. Tiamsis thaum Xanpala thiab Thaunpia thiab cov Alam thiab cov Asmoo thiab cov neeg hauv Asadau hnov tias qhov uas tsim kho Yeluxalees tej ntsa loog tabtom ua tiav zuj zus, thiab tej qhov uas pob tabtom muab txhaws, lawv txawm chim heev. Lawv txawm ntaus tswvyim yuav tuaj ua rog rau Yeluxalees thiab ua kom muaj kev kub ntxhov rau hauv Yeluxalees. Peb thiaj thov peb tus Vajtswv thiab tso neeg zov tiv thaiv lawv nruab hnub hmo ntuj. Tiamsis cov neeg Yuda hais tias, “Cov uas kwv nra lub zog ntaug zuj zus lawm, thiab muaj tej pawg tshwj xuam ntau heev. Peb kho tsis taus lub ntsa loog lawm.” Thiab tej yeeb ncuab tseem hais tias, “Lawv yuav tsis paub tsis pom peb mus txog thaum peb txeem plaws rau hauv lawv thiab muab lawv tua thiab txwv nkaus lawv tej haujlwm.” Ces cov Yudai uas nyob ze lawv tuaj hais rau peb kaum zaus tias, “Lawv yuav sawv hauv lawv txhua lub chaw nyob tuaj ua rog rau peb.” Kuv thiaj tsa ib cov neeg nyob rau tej chaw uas qes kawg sab hauv lub ntsa loog raws li lawv tej cum tuav rawv ntaj thiab hmuv thiab hneev zov. Kuv ntsia ntsoov thiab sawv tsees hais rau cov uas ua hlob thiab cov thawj thiab cov pejxeem sawvdaws tias, “Nej tsis txhob ntshai lawv. Cia li nco ntsoov txog tus Tswv uas yog tus loj kawg thiab txaus ntshai es tiv thaiv pab nej cov kwvtij, nej tej tub tej ntxhais, nej tej pojniam thiab nej tej vaj tse.” Thaum peb cov yeeb ncuab hnov tias peb twb paub lawv lub tswvyim lawm thiab Vajtswv twb rhuav tej uas lawv ntaus tswvyim lawm, mas peb sawvdaws thiaj nyias rov los ua nyias tej haujlwm ntawm ntsa loog. Txij hnub ntawd los kuv cov neeg ib nrab ua ntsa loog ib nrab tuav rawv hmuv thiab daim phiaj hlau thaiv thiab hneev thiab lub tsho hlau. Cov thawj kuj sawv tom qab cov Yuda sawvdaws uas ua ntsa loog. Cov uas kwv nra txhua tus ib txhais tes ua haujlwm ib txhais tes tuav rawv cuab yeej ua rog. Txhua tus uas ua ntsa loog kuj ris rawv ntaj ntawm duav rau thaum tabtom ua. Tus uas tshuab raj kub yaj kuj sawv ntawm kuv ib sab. Kuv hais rau cov uas ua hlob thiab cov thawj thiab cov pejxeem sawvdaws tias, “Peb tej haujlwm kuj loj thiab nthuav dav heev, thiab peb nyob saum lub ntsa loog ib leeg nrug deb ib leeg. Thaum nej hnov lub suab raj kub yaj nrov qhovtwg tuaj, nej cia li dhia los pab peb qhov ntawd. Peb tus Vajtswv yuav ua rog pab peb.” Peb thiaj ua haujlwm li no, peb ib nrab tuav rawv hmuv thaum kaj ntug txoog mus txog thaum cov hnub qub tawm. Thaum ntawd kuv kuj hais rau cov pejxeem tias, “Cia cov txivneej txhua tus thiab lawv tej tub qhe pw hmo ntuj hauv Yeluxalees kom lawv thiaj zov tau lub nroog rau peb hmo ntuj thiab ua haujlwm nruab hnub.” Kuv thiab kuv cov kwvtij thiab kuv cov neeg thiab cov uas nrog kuv zov, tsis muaj leejtwg hle tsoos tsho, txhua tus nyias tuav rawv nyias tej cuab yeej. Cov pejxeem thiab lawv tej pojniam qw ntshu nrooj yws lawv cov kwvtij Yudai. Muaj neeg hais tias, “Peb tsev neeg coob muaj tub muaj ntxhais. Peb cheem tsum tau qoob peb thiaj tau noj thiaj muaj txojsia nyob tau.” Thiab muaj neeg hais tias, “Peb yuav tsum muab peb tej teb, peb tej vaj txiv hmab thiab peb tej vaj tse coj mus yuam thiaj tau qoob vim yog muaj kev tshaib nqhis heev.” Thiab muaj neeg hais tias, “Peb twb muab peb tej teb thiab peb tej vaj txiv hmab coj mus yuam nyiaj los them se rau vajntxwv lawm. Peb lub cev nqaij kuj zoo ib yam li peb cov kwvtij, peb tej menyuam kuj zoo ib yam li lawv li, los peb tseem yuav tsum muab peb tej tub tej ntxhais coj mus ua qhev, thiab peb tej ntxhais qee leej raug ua qhev lawm. Tiamsis peb pab tsis tau vim peb tej teb thiab tej vaj txiv hmab nyob rau hauv luag tes lawm.” Thaum uas kuv hnov lawv tej suab qw thiab lawv tej lus lawm mas kuv chim heev. Kuv muab tej no xav txhij xav txhua thiab kuv coj mus kom rau cov uas ua hlob thiab cov thawj. Kuv hais rau lawv tias, “Nej txhua tus sau paj nyiag ntawm nej cov kwvtij.” Thiab kuv hu cov pejxeem coob tuaj txoos ua ke tawm tsam lawv. Thiab kuv hais rau lawv tias, “Peb twb txhiv peb cov kwvtij Yudai uas raug muab muag rau lwm lub tebchaws los npaum li uas peb muaj peevxwm ua tau, tiamsis nej tseem rov muab nej cov kwvtij muag, lawv thiaj raug muab muag rau peb ntag.” Lawv kuj nyob ntsiag to teb tsis tau ib los li. Kuv thiaj hais tias, “Tej uas nej ua ntawd tsis zoo. Tsis tsim nyog nej ua lub neej paub ntshai peb tus Vajtswv lov? Ib tsoom tebchaws uas yog peb cov yeeb ncuab thiaj tsis muaj chaw thuam luag peb. Dua li ntawd kuv thiab kuv cov kwvtij thiab kuv cov tub qhe thiaj muab nyiaj thiab qoob txais rau lawv. Cia peb tseg tsis txhob sau paj nyiag. Hnub no cia li muab lawv tej teb, tej vaj txiv hmab, tej teb txiv aulib thiab lawv tej vaj tse thiab tej paj nyiag thiab tej qoob tej cawv txiv hmab thiab tej roj uas nej sau tshaj thim rov rau lawv.” Mas lawv teb tias, “Peb yuav thim tej ntawd rov qab thiab yuav tsis sau ib yam dabtsi ntawm lawv lawm. Peb yuav ua raws li uas koj hais.” Ces kuv thiaj hu cov pov thawj los thiab kom cov neeg ntawd cog lus twv tias lawv yuav ua raws li uas lawv cog lus tseg lawd. Kuv thiaj li nchos kuv lub tsho thiab hais tias, “Ib yam nkaus li no, yog leejtwg tsis ua raws li uas cog lus tseg no, thov Vajtswv muab nws nchos tawm hauv nws lub tsev thiab hauv nws tej haujlwm, nws thiaj yuav raug muab nchos tawm mus tes dawb tes do.” Mas cov neeg uas tuaj txoos ua ke ntawd sawvdaws teb tias, “Amee,” thiab qhuas Yawmsaub. Thiab cov neeg kuj ua raws li uas lawv cog lus cia. Dua li ntawd txij thaum kuv raug tsa ua tus uas kav Yuda tebchaws, yog txij xyoo nees nkaum mus txog xyoo peb caug ob uas Athaxawxi ua vajntxwv mas huvsi yog kaum ob xyoos, mas kuv thiab kuv cov kwvtij tsis tau noj tej zaub mov uas yog tus tswv xeev li feem. Cov tswv xeev uas ua kuv ntej tau quab yuam cov pejxeem hnyav heev thiab tseem kom lawv them plaub caug sekhee nyiaj tsav rau tej zaub mov thiab cawv txiv hmab ntawd. Txawm yog lawv cov tub teg tub taws los kuj tsab ua loj rau cov pejxeem thiab. Tiamsis kuv tsis tau ua li ntawd vim kuv hwm thiab paub ntshai Vajtswv. Kuv tseem ua tej haujlwm uas ua lub ntsa loog no, thiab kuv tsis tau ib thaj av kiag li, thiab kuv cov tub qhe sawvdaws tuaj ua ke ua ntsa loog thiab. Dua li ntawd kuv tseem muaj ib puas tsib caug leej nrog kuv noj ua ke, yog cov Yudai thiab cov nom tswv, yog tsav rau cov uas tuaj hauv tej tebchaws uas nyob ib ncig peb tuaj nrog peb nyob. Tej uas npaj rau peb noj mas ib hnub yog ib tug nyuj thiab rau tus yaj uas zoo kawg. Thiab luag npaj qaib rau kuv, thiab npaj hnab cawv txiv ntau heev kaum hnub ib zaug. Txawm yog muaj npaum li no los kuv yeej tsis tau sau tej zaub mov uas yog tus tswv xeev li feem, vim qhov uas ua koom li no twb hnyav rau cov pejxeem no lawm. Au kuv tus Vajtswv, thov koj nco txog txhua yam uas kuv tau ua pab cov neeg no kom kuv thiaj tau qhov zoo. Thaum muaj neeg mus hais rau Xanpala thiab Thaunpia thiab Kesee, uas yog neeg Alam, thiab lwm tus uas ua yeeb ncuab rau peb paub tias kuv tau ua lub ntsa loog thiab kho tej qhov uas pob tiav lawm (lub sijhawm ntawd kuv tsis tau nruab txhib qhov rooj rau ntawm rooj loog), mas Xanpala thiab Kesee txib neeg tuaj hais rau kuv tias, “Thov koj tuaj ntsib peb rau hauv ib lub zos ntawm lub tiaj Aunau.” Twb yog lawv ntaus tswvyim yuav ua phem rau kuv ntag. Kuv thiaj txib neeg mus hais rau lawv tias, “Kuv tabtom ua haujlwm tseem ceeb kawg, tuaj tsis tau. Ua cas peb yuav tso haujlwm tseg rau thaum kuv tawm mus cuag nej?” Mas lawv tseem txib neeg tuaj hais rau kuv li no plaub zaug, kuv kuj teb lawv ib yam nkaus thiab. Zaum tsib Xanpala txib nws ib tug tub teg tub taws tuaj cuag kuv ib yam li qub thiab coj ib tsab ntawv qheb lug tuaj. Hauv tsab ntawv sau hais tias, “Muaj xov hauv ib tsoom neeg thiab Kesee kuj hais tias, koj thiab cov Yudai npaj siab yuav fav xeeb. Yog li no koj thiaj ua lub ntsa loog, thiab koj xav ua lawv tus vajntxwv raws li tej xov no. Thiab koj twb tsa cov xibhwb cev Vajtswv lus tshaj tawm txog koj rau hauv Yeluxalees tias, ‘Muaj ib tug vajntxwv hauv Yuda lawm.’ Nimno yuav hais tej lus no mus rau vajntxwv paub. Vim li no thov koj tuaj es wb sablaj ua ke.” Mas kuv thiaj tso neeg mus hais rau nws tias, “Yam uas koj hais kod kuv yeej tsis tau ua li, koj xav tswvyim raws li koj lub siab xwb.” Rau qhov lawv sawvdaws xav hem kom peb ntshai, thiab xav tias peb txhais tes yuav tso haujlwm tseg thiab tej haujlwm yuav tsis tiav. Au Vajtswv, nimno thov koj txhawb kuv txhais tes lub zog. Kuv txawm mus rau hauv Delaya tus tub Semaya lub tsev, nws yog Mehethanpee tus xeeb ntxwv, nws pheej nyob hauv tsev xwb, mas Semaya hais tias, “Cia wb mus sib ntsib rau hauv Vajtswv lub tuam tsev chav uas pe Vajtswv, thiab cia wb muab qhov rooj tuam tsev kaw, rau qhov lawv yuav tuaj tua koj, thaum tsaus ntuj lawv yuav tuaj tua koj pov tseg.” Tiamsis kuv hais tias, “Neeg zoo li kuv yuav txaus khiav lov? Thiab neeg zoo li kuv yuav nkag mus rau hauv lub tuam tsev thiaj cawm tau siav lov? Kuv tsis mus.” Mas kuv nkag siab thiab pom tias, tsis yog Vajtswv txib nws tuaj tiamsis yog nws cev lus tawm tsam kuv vim Thaunpia thiab Xanpala tau ntiav nws lawm. Ob tug ntiav nws tuaj xav tias yuav ua rau kuv ntshai thiab kuv yuav ua li ntawd thiaj ua txhaum muaj txim, mas lawv thiaj li coj tau kuv lub npe mus xyav xwv lawv thiaj thuam luag tau kuv. Au kuv tus Vajtswv, thov koj nco txog Thaunpia thiab Xanpala raws li tej uas ob tug ua no, thiab nco txog Nau‑adiya uas yog tus pojniam xibhwb cev Vajtswv lus thiab lwm tus uas cev Vajtswv lus uas xav ua kom kuv ntshai. Lub ntsa loog thiaj tiav rau hnub tim nees nkaum tsib lub hli Elu, huvsi peb ua tsib caug ob hnub. Thaum peb cov yeeb ncuab sawvdaws tau hnov, ib tsoom tebchaws uas nyob ib ncig peb kuj ntshai thiab poob ntsej muag tag, rau qhov lawv pom tias tej haujlwm no ua tau tiav vim yog muaj peb tus Vajtswv pab peb. Dua li ntawd lub sijhawm ntawd cov uas ua hlob hauv Yuda kuj xa ntau tsab ntawv mus rau Thaunpia, thiab Thaunpia tej ntawv kuj tuaj txog lawv. Rau qhov cov Yuda muaj ntau leej nrog Thaunpia cog lus sib raug zoo vim nws yog Asla tus tub Sekhaniya li vauv, thiab nws tus tub Yehauhanas tau yuav Npelekhiya tus tub Mesulas li ntxhais ua pojniam. Lawv hais txog tej qhov zoo uas Thaunpia ua rau kuv mloog thiab coj kuv tej lus mus qhia rau nws. Mas Thaunpia xa ntawv tuaj hem ua kom kuv ntshai. Thaum ua lub ntsa loog tiav thiab thaum kuv nruab txhib qhov rooj loog thiab tsa cov uas zov tej rooj loog, thiab cov tub hu nkauj thiab cov Levi lawm, kuv tsa kuv tus kwvtij Hanani ua tus uas kav lub nroog Yeluxalees nrog Hananiya uas zov lub chaw tsom faj ua ke, rau qhov Hanani ua ncaj thiab paub ntshai Vajtswv heev dua lwm tus. Kuv hais rau ob tug tias, “Tsis txhob qheb tej rooj loog Yeluxalees mus txog thaum tshav ntuj kub tso, thiab thaum cov uas zov tej rooj loog tseem nyob ntawd, cia lawv muab tej rooj loog kaw thiab muab laj rau. Thiab tsa cov neeg hauv Yeluxalees ua cov uas zov, ib txhia nyob ntawm nws lub chaw zov thiab ib txhia zov ncaj ntawm nws lub tsev.” Lub nroog ntawd loj thiab dav tiamsis cov neeg uas nyob hauv tsawg tsawg thiab tsis tau ua tsev kiag li. Kuv tus Vajtswv qhia kuv lub siab kom hu cov uas ua hlob thiab cov thawj thiab cov pejxeem tuaj txoos ua ke yuav nce npe raws li lawv tej keeb kwm. Thiab kuv nrhiav tau ib phau ntawv keeb kwm uas sau cov uas xub los ua ntej lawm mas kuv pom sau li no. Ntawm no mus yog cov pejxeem hauv Yuda tebchaws uas vajntxwv Nenpukhanexa hauv Npanpiloo tau ntes coj mus poob tebchaws rau Npanpiloo es tau rov qab los. Lawv rov qab los rau hauv Yeluxalees thiab Yuda, nyias rov los nyob rau nyias lub moos. Lawv nrog Xelunpanpee, Yesua, Nehemi, Axaliya, La‑amiya, Nahamani, Maudekhai, Npisas, Mixapele, Npivai, Nehu thiab Npa‑anas los. Cov pejxeem Yixayee muaj npaum li no. Palau caj ces 2,172 leeg. Sefathiya caj ces 372 leeg. Asla caj ces 652 leeg. Paha Mau‑a caj ces yog Yesua thiab Yau‑a cum 2,818 leej. Elas caj ces 1,254 leeg. Xathu caj ces 845 leeg. Xakhai caj ces 760 leej. Npinu‑i caj ces 648 leej. Npenpai caj ces 628 leej. Axaka caj ces 2,322 leeg. Adaunikhas caj ces 667 leej. Npivai caj ces 2,067 leej. Adee caj ces 655 leeg. Athaw caj ces uas yog Hexekhiya cum 98 leej. Hasu caj ces 328 leej. Npexai caj ces 324 leeg. Hali caj ces 112 leeg. Kinpe‑oo caj ces 95 leeg. Cov neeg Npehelee thiab cov Nethaufa 188 leej. Cov neeg Anathau 128 leej. Cov neeg Npe Amave 42 leeg. Cov neeg Khiliya Ye‑ali, cov Kefila thiab cov Npe‑awlau 743 leeg. Cov neeg Lama thiab cov Kenpa 621 leeg. Cov neeg Mima 122 leeg. Cov neeg Npe‑ee thiab cov Ai 123 leeg. Muaj dua ib lub moos Nenpau muaj 52 leeg. Muaj dua ib lub moos Elas muaj 1,254 leeg. Cov neeg Halee muaj 320 leej. Cov neeg Yelikhau muaj 345 leeg. Cov neeg Lau, cov neeg Hati thiab cov neeg Aunau muaj 721 leeg. Cov neeg Xena‑a muaj 3,930. Cov pov thawj yog li no. Yedaya caj ces uas yog Yesua cum muaj 973 leeg. Imaw caj ces muaj 1.052 leeg. Pasaw caj ces muaj 1,247 leej. Halee caj ces muaj 1,017 leej. Cov Levi muaj li no. Yesua caj ces uas yog Khami‑ee thiab Haudaviya cum muaj 74 leeg. Cov hu nkauj muaj li no. Axas caj ces muaj 148 leej. Cov uas zov tej rooj loog li caj ces muaj li no. Salu caj ces, Athaw caj ces, Thamoo caj ces, Akhu caj ces, Hathitha caj ces thiab Saunpai caj ces muaj 138 leej. Cov tub teg tub taws uas ua haujlwm hauv lub tuam tsev muaj li no. Xiha caj ces, Haxufa caj ces, Thanpa‑au caj ces, Khelau caj ces, Xi‑a caj ces, Phadoo caj ces, Lenpana caj ces, Hakanpa caj ces, Samai caj ces, Hanas caj ces, Kidee caj ces, Kaha caj ces, Le‑aya caj ces, Lexi caj ces, Nekhauda caj ces, Kaxas caj ces, Usxa caj ces, Paxe‑a caj ces, Npexai caj ces, Me‑uni caj ces, Nefusexi caj ces, Npanpu caj ces, Hakufa caj ces, Hahu caj ces, Npali caj ces, Mehida caj ces, Hasa caj ces, Npakhau caj ces, Xixela caj ces, Thema caj ces, Nexiya caj ces thiab Hathifa caj ces. Vajntxwv Xalaumoo cov tub teg tub taws caj ces muaj li no. Xauthai caj ces, Xaufele caj ces, Pelida caj ces, Ya‑ala caj ces, Dakhoo caj ces, Kidee caj ces, Sefathiya caj ces, Hathi caj ces, Paukhele Haxanpa‑i caj ces, Asmoo caj ces. Cov tub teg tub taws uas ua haujlwm hauv lub tuam tsev thiab vajntxwv Xalaumoo cov tub teg tub taws li caj ces huvsi muaj 392 leeg. Cov no mus yog cov uas nyob ntawm Theemela, Theehasa, Khelu, Adoo thiab Imaw tuaj tiamsis lawv paub tsis tseeb tias lawv caj ces thiab lawv keeb kwm yog neeg Yixayee los tsis yog. Yog Delaya caj ces, Thaunpia caj ces thiab Nekhauda caj ces muaj 642 leeg. Thiab cov pov thawj muaj li no. Haunpaya caj ces, Hakhau caj ces thiab Npaxilai caj ces. (Npaxilai tus pojniam yog Npaxilai uas yog neeg Kile‑a tus ntxhais, nws thiaj tau lub npe hu li ntawd.) Cov neeg no nrhiav lawv lub npe hauv tej ntawv uas nce npe raws li keeb kwm tiamsis nrhiav tsis tau. Lawv thiaj raug suav ua cov neeg qias tsis huv thiab raug txiav tawm ua tsis tau pov thawj. Tus tswv xeev hais rau lawv tias tsis txhob noj tej zaub mov uas dawb huv kawg nkaus mus txog thaum muaj ib tug pov thawj saib Uli thiab Thumi tso. Ib tsoom pejxeem huvsi muaj 42,360 leej, cov tub qhe nkauj qhev uas lawv tsis suav muaj 7,337 leej, thiab lawv muaj cov tub ntxhais uas hu nkauj 245 leeg. Lawv muaj nees 736 tus, muaj luj txwv 245 tus, muaj ntxhuav 435 tus, thiab nees luav 6,720 tus. Cov thawj hauv tej cum muaj qee leej pub nyiaj ua tej haujlwm ntawd. Tus tswv xeev pub rau hauv lub txhab nyiaj, yog 1,000 dali kub thiab 50 lub phaj thiab 530 cev tsoos tsho pov thawj. Thiab cov thawj hauv tej cum muaj qee leej pub rau hauv lub txhab nyiaj uas siv ua haujlwm, yog 20,000 dali kub thiab 2,200 mina nyiaj. Dua li tej pejxeem mas pub yog 20,000 dali kub, 2,000 mina nyiaj, thiab 67 cev tsoos tsho pov thawj. Yog li ntawd cov pov thawj, cov Levi, cov uas zov tej rooj loog, cov hu nkauj, cov pejxeem qee leej, cov tub teg tub taws uas ua haujlwm hauv lub tuam tsev thiab cov Yixayee sawvdaws nyob hauv lawv tej moos. Thaum txog lub xya hlis uas cov Yixayee nyob hauv lawv tej moos, mas cov pejxeem sawvdaws tuaj txoos ua ke txhij zog rau hauv lub tshav puam ntawm Rooj Loog Dej thiab lawv hais kom xibhwb Exala coj Mauxe phau ntawv kevcai uas Yawmsaub hais rau cov Yixayee tuaj. Hnub xiab ib lub xya hli tus pov thawj Exala kuj coj phau ntawv kevcai tuaj rau ntawm cov pejxeem uas tuaj txoos ua ke, yog cov pojniam txivneej thiab txhua tus uas mloog nkag siab tau. Mas nws tig xubntiag rau lub tshav puam ntawm Rooj Loog Dej nyeem tagkis sawv ntxov mus txog tav su rau cov pojniam txivneej thiab txhua tus uas nkag siab tau mloog. Cov pejxeem sawvdaws kuj tig ntsej zoo zoo mloog phau ntawv kevcai ntawd. Xibhwb Exala sawv ntsug saum lub sam thiaj ntoo uas lawv ua siv rau qhov kev no. Cov uas sawv ntawm nws sab xis yog Mathithiya, Sema, Anaya, Uliya, Hikhiya thiab Ma‑axeya, cov uas nyob ntawm nws sab laug yog Pedaya, Misa‑ee, Makhiya, Hasu, Hanpadana, Xekhaliya thiab Mesulas. Exala nthuav phau ntawv tab meeg cov pejxeem sawvdaws rau qhov nws nyob siab dua lawv. Thaum nws nthuav phau ntawv cov pejxeem sawvdaws kuj sawv ntsug. Exala qhuas Yawmsaub uas yog Vajtswv loj kawg, mas cov pejxeem sawvdaws tsa tes teb hais tias, “Amee, amee.” Lawv nyo hau khoov ntshis ua plhu ti nkaus av pe hawm Yawmsaub. Yesua, Npani, Selenpiya, Yami, Akhu, Sanpethai, Haudiya, Ma‑axeya, Khelitha, Axaliya, Yauxanpa, Hanas thiab Pelaya uas puavleej yog cov Levi kuj pab cov pejxeem nkag siab txoj kevcai, cov pejxeem kuj nyob twjywm lawv qhov chaw. Thiab lawv nyeem phau ntawv uas yog Vajtswv txoj kevcai meej meej, thiab txhais lub ntsiab cov pejxeem thiaj nkag siab tej lus uas nyeem ntawd. Nehemi uas yog tus tswv xeev thiab xibhwb Exala uas ua pov thawj thiab cov Levi uas qhia cov pejxeem hais rau cov pejxeem sawvdaws tias, “Hnub no yog hnub dawb huv rau Yawmsaub uas yog nej tus Vajtswv. Nej tsis txhob quaj ntsuag tsis txhob quaj.” Rau qhov ib tsoom pejxeem sawvdaws quaj rau thaum lawv hnov tej lus hauv phau kevcai ntawd. Nehemi hais rau lawv tias, “Cia li mus noj tej nqaij tej qhauv thiab haus cawv txiv hmab qab zib, thiab muab ib txhia cev rau cov uas tsis tau npaj noj, rau qhov hnub no yog hnub dawb huv rau peb tus Tswv. Nej tsis txhob ntxhov siab kiag li, vim qhov uas zoo siab xyiv fab rau Yawmsaub yog nej lub zog.” Cov Levi thiaj ua rau ib tsoom pejxeem nyob ntsiag to hais tias, “Nyob twjywm rau qhov hnub no yog hnub dawb huv. Tsis txhob ntxhov siab kiag li.” Ces cov pejxeem sawvdaws thiaj mus noj haus thiab muab ib txhia cev rau luag thiab ua zoo siab xyiv fab kawg, rau qhov lawv nkag siab tej lus uas piav rau lawv mloog ntawd. Hnub uas ob, cov thawj hauv txhua cum thiab cov pov thawj thiab cov Levi tuaj kawm tej lus hauv txoj kevcai ntawm xibhwb Exala. Mas lawv pom txoj kevcai sau cia hais tias Yawmsaub tau kom Mauxe hais tias cov Yixayee yuav tsum nyob hauv tsev pheeb suab rau thaum ua kevcai noj haus rau lub xya hli, thiab lawv yuav tsum tshaj tawm thiab piav rau hauv lawv tej moos txhua lub thiab hauv Yeluxalees tias, “Cia li tawm mus rau pem roob coj tej ceg txiv aulib thiab ceg txiv aulib qus thiab ceg txiv ntoo roj thiab nplooj kuj yem thiab lwm yam nplooj ntoo los ua tsev pheeb suab, raws li tau sau cia lawd.” Cov pejxeem thiaj tawm mus coj tej ceg nplooj los thiab ua tsev pheeb suab rau lawv nyob rau saum lawv txheej tsev las tshav thiab ntawm lawv tej tog tsev thiab rau ntawm Vajtswv lub tuam tsev tej tshav puam thiab rau hauv lub tshav puam ntawm Rooj Loog Dej thiab hauv lub tshav puam ntawm Rooj Loog Efa‑i. Ib tsoom pejxeem sawvdaws uas poob tebchaws rov los kuj ua tsev pheeb suab thiab nyob hauv. Txij thaum Noo tus tub Yausua nyob txog hnub ntawd cov Yixayee tsis tau ua ib zaug li. Lawv zoo siab xyiv fab kawg. Thiab Exala niaj hnub nyeem Vajtswv phau kevcai txij thawj hnub mus txog hnub kawg. Lawv ua kevcai li no tau xya hnub, mas hnub uas yim lawv tuaj txoos ua ke caiv so tiag tiag, raws li uas hais cia. Hnub tim nees nkaum plaub lub hli no cov Yixayee tuaj txoos ua ke coj kevcai yoo mov thiab hnav khaub seev tsaj thiab tsuab av rau saum taubhau. Thiab cov Yixayee cais lawv tawm hauv lwm haiv neeg sawvdaws thiab sawv lees lawv lub txim thiab lees lawv tej poj koob yawm txwv tej kev txhaum. Lawv sawv ntawm lawv lub chaw thiab nyeem Yawmsaub uas yog lawv tus Vajtswv phau kevcai ntev txog peb teev. Lawv lees txim thiab pe hawm Yawmsaub uas yog lawv tus Vajtswv peb teev ntxiv. Yesua, Npani, Khami‑ee, Senpaniya, Npuni, Selenpiya, Npani thiab Khenani sawv ntawm cov Levi tus ntaiv qw nrov nrov rau Yawmsaub uas yog lawv tus Vajtswv. Mas cov Levi yog Yesua, Khami‑ee, Npani, Hasaneya, Selenpiya, Haudiya, Senpaniya thiab Pethahiya hais tias, “Cia li sawv tsees qhuas Yawmsaub uas yog nej tus Vajtswv txij thaum ub los mus ib txhis tsis kawg. Cia li qhuas Vajtswv lub npe uas muaj koob meej loj kawg, yog lub npe uas nyob siab kawg uas tsis muaj leejtwg qhuas thiab ua tsaug txaus. “Koj tib leeg xwb thiaj yog Yawmsaub. Koj tsim lub ntuj uas siab kawg nkaus thiab ib puas tsav yam uas nyob saum nruab ntug, koj tsim lub ntiajteb thiab txhua yam uas nyob hauv, thiab tsim dej hiavtxwv thiab txhua yam uas nyob hauv dej. Koj pub txojsia rau tej no huvsi, thiab ib puas tsav yam uas nyob saum nruab ntug pe hawm koj. Koj yog Yawmsaub yog tus Vajtswv uas xaiv Aplas thiab coj nws tawm hauv lub moos Aw uas nyob hauv tebchaws Kheedia los thiab tis nws lub npe hu ua Aplahas. Thiab koj pom tias nws lub siab xib rau koj, thiab koj nrog nws sib cog lus tias koj yuav muab cov Khana‑as, cov Hithai, cov Amaulai, cov Pelixai, cov Yenpu thiab cov Kawkasi lub tebchaws rau nws caj ces, thiab koj tau ua rau koj tej lus cog tseg tiav rau qhov koj ncaj ncees. “Koj tsa muag ntsia peb tej poj koob yawm txwv tej kev txom nyem hauv Iyi tebchaws thiab mloog lawv lub suab quaj ntawm Hiavtxwv Liab, thiab koj ua tej txujci tseem ceeb thiab txujci phimhwj tawm tsam Falau thiab nws cov tub teg tub taws huvsi thiab nws cov pejxeem hauv nws lub tebchaws huvsi, rau qhov koj paub tias lawv khav ntxhias tsim txom peb tej poj koob yawm txwv, mas koj lub npe thiaj nrov nto moo lug los txog niaj hnub nimno. Koj faib dej hiavtxwv rau ntawm lawv xubntiag lawv thiaj li tau mus saum tej av qhuav hauv nruab nrab hiavtxwv, thiab koj muab cov uas caum lawv laim rau hauv nruab tiv txwv ib yam li laim pob zeb rau hauv hiavtxwv uas tob kawg. Nruab hnub koj muab tus ncej huab los coj lawv, hmo ntuj koj muab tus ncej hluavtaws ci rau lawv pom txojkev uas lawv yuav mus. Koj nqes los rau saum lub roob Xinai thiab hais saum ntuj los rau lawv thiab pub tej kevcai ncaj thiab txoj kevcai tseeb, thiab tej kab ke thiab tej lus nkaw uas zoo rau lawv. Thiab koj qhia lawv paub txog koj hnub Xanpatau uas dawb huv thiab kom Mauxe uas yog koj tus qhev muab tej lus nkaw thiab tej kab ke thiab txoj kevcai qhia rau lawv. Koj pub mov saum ntuj los rau thaum lawv tshaib plab thiab muab dej txhawv hauv phab zeb rau thaum lawv nqhis, thiab koj hais kom lawv mus txeeb lub tebchaws uas koj twb cog lus ruaj tias yuav pub rau lawv. “Tiamsis lawv thiab peb tej poj koob yawm txwv khav theeb thiab tawv ncauj tsis mloog koj tej lus nkaw. Lawv tsis kam mloog lus thiab tsis nco tej txujci phimhwj uas koj ua tshwm rau hauv lawv nruab nrab. Lawv tawv ncauj thiab tsa ib tug thawj coj lawv rov qab mus ua qhev rau hauv Iyi tebchaws. Tiamsis koj yog Vajtswv uas muaj siab zam txim, muaj siab hlub thiab khuvleej, tsis chim sai thiab koj txojkev hlub uas ruaj khov muaj nplua mias, thiab koj tsis muab lawv tso pov tseg. Txawm yog lawv tau nchuav ib tug dab mlom thav nyuj rau lawv thiab hais tias, ‘No yog nej tus Vajtswv uas coj nej tawm hauv Iyi tebchaws los,’ thiab ua tej uas tuam mom kawg, los vim yog koj txojkev hlub loj koj thiaj tsis tso lawv tseg rau hauv tebchaws moj sab qhua. Tus ncej huab uas coj lawv nruab hnub thiab tus ncej hluavtaws uas ci hmo ntuj rau lawv pom txojkev uas lawv yuav mus thiaj tsis ncaim lawv. Koj pub koj tus Ntsuj Plig zoo qhuab qhia lawv, thiab tsis tav koj cov mana tu ntawm lawv lub qhov ncauj, thiab pub dej rau thaum lawv nqhis. Koj yug lawv hauv tebchaws moj sab qhua tau plaub caug xyoo thiab lawv tsis tu ncua ib yam dabtsi. Lawv tej ris tsho kuj tsis ntuag lawv tej kotaw kuj tsis o. Thiab koj muab tej tebchaws thiab tej haiv neeg rau lawv, thiab tu ciam teb rau lawv, lawv thiaj txeeb tau vajntxwv Xihoo hauv lub moos Hesanpoo tebchaws thiab vajntxwv Aus lub tebchaws Npasas. Koj ua rau lawv caj ces huaj vam coob yam li cov hnub qub saum nruab ntug, thiab koj coj lawv mus rau hauv lub tebchaws uas koj hais kom lawv tej poj koob yawm txwv txeem mus txeeb ntawd. Lawv caj ces thiaj li txeem mus txeeb tau lub tebchaws ntawd. Koj yuam ntiag cov Khana‑as uas nyob hauv lub tebchaws ntawd rau tom lawv hauv ntej thiab muab cov neeg thiab lawv tej vajntxwv thiab tej pejxeem hauv lub tebchaws ntawd cob rau hauv lawv txhais tes, lawv thiaj ua tau rau cov neeg ntawd raws li lawv lub siab xav. Lawv thiaj txeeb tau tej moos uas muaj ntsa loog thiab lub tebchaws uas zoo qoob thiab txeeb tau luag tej vaj tse uas muaj cuab txhiaj cuab tam zoo puv nkaus, thiab tej pas dej uas khawb cia lawd thiab tej vaj txiv hmab, tej teb txiv aulib thiab tej txiv ntoo ntau kawg. Lawv thiaj tau noj tsau npo rog nthaws, thiab lawv zoo siab xyiv fab rau tej hmoov zoo uas koj pub. “Txawm li ntawd los lawv tseem tsis mloog lus thiab fav xeeb rau koj thiab muab koj txoj kevcai laim tseg rau tom qub qab thiab tua koj cov xibhwb cev lus uas pheej qhuab ntuas kom lawv rov los cuag koj, thiab lawv ua tuam mom koj loj heev. Yog li ntawd koj thiaj muab lawv tso rau hauv lawv cov yeeb ncuab txhais tes uas ua rau lawv raug txom nyem. Mas lub sijhawm uas lawv raug txom nyem ntawd lawv quaj hu koj mas koj nyob saum ntuj hnov lawv hu, thiab koj pub cov uas cawm lawv dim yeeb ncuab txhais tes raws li koj txojkev hlub uas loj kawg. Tiamsis thaum lawv nyob tiaj tus lawm lawv rov ua tej uas koj pom tias phem, koj thiaj muab lawv tso rau hauv cov yeeb ncuab txhais tes, yeeb ncuab thiaj kav lawv. Txawm li ntawd los thaum lawv tig los quaj rau koj, koj nyob saum ntuj hnov, thiab koj kuj cawm lawv dim ntau zaus raws li koj txojkev hlub. Thiab koj qhuab ntuas lawv xwv thiaj li tig tau lawv rov los cuag koj txoj kevcai. Los lawv tseem ua lub neej khav theeb tsis mloog koj tej lus nkaw, thiaj tau ua txhaum rau koj tej kevcai uas yog leejtwg ua raws li nws yuav muaj txojsia nyob. Thiab lawv tseem tig nrob qaum rau koj tawv nyom tsis mloog lus. Koj ua siab ntev thev lawv ntau xyoo, thiab koj pub koj tus Ntsuj Plij rau cov xibhwb cev koj tej lus qhuab ntuas lawv los lawv kuj tsis tig ntsej mloog. Vim li no koj thiaj muab lawv cob rau hauv lwm haiv neeg hauv ib tsoom tebchaws txhais tes. Txawm li ntawd los vim yog koj txojkev hlub uas loj kawg koj tsis ua rau lawv puam tsuaj tag huvsi thiab tsis tso lawv tseg, vim koj yog tus Vajtswv uas hlub thiab khuvleej. “Au peb tus Vajtswv, koj yog tus Vajtswv uas loj kawg thiab muaj hwjchim thiab txaus ntshai, koj tuav rawv tej lus cog tseg thiab txojkev hlub uas ruaj khov. Mas thov koj tsis txhob suav tias peb tej kev txom nyem no huvsi yog ib qhov me me uas raug peb thiab peb tej vajntxwv, thiab raug peb cov thawj thiab peb cov pov thawj thiab peb cov xibhwb cev koj tej lus, thiab peb tej poj koob yawm txwv thiab koj haiv neeg huvsi, txij thaum vajntxwv Axilia los txog hnub no. Mas txhua yam uas raug peb no koj ua ncaj ua ncees, rau qhov koj pheej ua ncaj raws li koj cog lus tseg tiamsis peb pheej ua limhiam xwb. Peb tej vajntxwv, peb cov thawj, peb cov pov thawj thiab peb tej poj koob yawm txwv tsis tuav rawv koj txoj kevcai thiab tsis mloog koj tej lus nkaw thiab tej lus uas koj qhuab ntuas lawv. Txawm yog lawv nyob hauv lawv lub tebchaws, thiab koj tau pub koob hmoov ntau rau lawv thiab koj muab lub tebchaws uas dav thiab zoo ua qoob pub rau lawv los lawv tsis ua koom tu koj thiab lawv tsis tso lawv tej kev limhiam tseg. Saib maj, hnub no peb ua qhev, kuj yog ua qhev rau hauv lub tebchaws uas koj pub rau peb tej poj koob yawm txwv kom lawv thiaj tau noj tej txiv ntoo thiab txhua yam zoo hauv lub tebchaws. Thiab tej qoob loo ntau kawg ntawd kuj poob ua tej vajntxwv tug, yog tej vajntxwv uas koj tsa los kav peb vim yog tim peb tej kev txhaum. Lawv muaj hwjchim kav peb lub cev thiab peb tej tsiaj txhu raws li lawv lub siab nyiam peb thiaj li raug txom nyem loj kawg. “Yog tim li no peb thiaj cog lus ruaj khov thiab muab sau cia. Peb cov thawj thiab peb cov Levi thiab peb cov pov thawj ntaus lawv lub cim nias cia.” Cov uas ntaus cim rau yog Hakhaliya tus tub Nehemi uas yog tus tswv xeev, thiab Xedekhiya, Xelaya, Axaliya, Yelemi, Pasaw, Amaliya, Makhiya, Hathu, Senpaniya, Malu, Halee, Melemau, Aunpadiya, Daniyee, Kinethoo, Npalu, Mesulas, Anpiya, Miyamee, Ma‑axiya, Npikai, Semaya. Cov no yog cov pov thawj. Thiab cov Levi yog Axaniya tus tub Yesua, Henada caj ces Npinu‑i, thiab yog Khami‑ee. Thiab Levi cov kwvtij yog, Senpaniya, Haudiya, Khelitha, Pelaya, Hanas, Mikha, Lehau, Hasanpiya, Xakaw, Selenpiya, Senpaniya, Haudiya, Npani, thiab Npeninu. Cov uas ua thawj hauv cov pejxeem, yog Palau, Paha Mau‑a, Elas, Xathu, Npani, Npuni, Axaka, Npenpai, Adauniya, Npivai, Adee, Athaw, Hexekhiya, Axu, Haudiya, Hasu, Npexai, Hali, Anathau, Npenpai, Mapia, Mesulas, Hexi, Mesexanpee, Xadau, Yadu‑a, Pelathiya, Hanas, Anaya, Hause‑a, Hananiya, Hasus, Halauhe, Piha, Saunpe, Lehoo, Hasana, Ma‑axeya, Ahi‑a, Hanas, Ana, Malu, Halee, Npa‑anas. “Dua li cov pejxeem uas hais tag lawd, mas cov pov thawj, cov Levi, cov uas zov tej rooj loog, cov hu nkauj, cov tub teg tub taws uas ua haujlwm ntawm lub tuam tsev thiab txhua tus uas nws muab nws tus kheej cais tawm hauv lwm haiv neeg hauv ib tsoom tebchaws los coj Vajtswv txoj kevcai, thiab tag nrho lawv cov pojniam thiab lawv tej tub tej ntxhais, yog sawvdaws uas txawj to taub thiab paub qabhau, kuj nrog lawv cov kwvtij thiab lawv cov uas ua hlob koom ua ke muab tej lus tsawm foom pav lawv tus kheej thiab cog lus twv tias lawv sawvdaws yuav ua lawv lub neej raws li Vajtswv txoj kevcai uas Vajtswv tus tub qhe Mauxe tau muab cob rau peb, thiab yuav coj thiab ua raws li Yawmsaub uas yog peb tus tswv tej lus nkaw thiab nws tej kevcai thiab nws tej kab ke huvsi. Mas peb yuav tsis muab peb tej ntxhais qua rau lwm haiv neeg hauv lub tebchaws no thiab tsis yuav lawv tej ntxhais los rau peb tej tub. Yog hnub Xanpatau tej neeg hauv lub tebchaws no coj qhov txhia chaw thiab yam qoob loo twg tuaj muag, peb tsis yuav rau hnub Xanpatau lossis hnub uas dawb huv. Thiab peb yuav tsis sau qoob loo rau xyoo uas xya thiab tsis sau tej nuj nqes txhua yam. “Thiab peb tu cia rau peb tias, ib xyoos peb yuav them ib feem peb hauv ib shekhee los siv rau hauv peb tus Vajtswv lub tuam tsev, coj los ua nqe rau cov ncuav uas txawb xyeem, thiab ua nqe rau tej uas niaj hnub ua kevcai xyeem qoob loo thiab rau tej uas niaj hnub ua kevcai hlawv huvsi xyeem mus li, thiab rau tej hnub Xanpatau, tej hnub hli xiab, thiab tej kevcai noj haus uas teem cia, thiab ua nqe rau tej uas dawb huv, thiab rau tej uas ua kevcai xyeem daws txim ntxuav cov Yixayee tej kev txhaum, thiab rau txhua yam haujlwm ntawm peb tus Vajtswv lub tuam tsev. Peb tau ua ntawv rho thiab, yog cov pov thawj, cov Levi, thiab cov pejxeem sawvdaws, yuav coj taws los rau hauv peb tus Vajtswv lub tuam tsev raws li peb tej cum thiab raws li tej sijhawm uas niaj xyoo teem cia, xwv thiaj tau rauv rau saum peb tus Vajtswv Yawmsaub lub thaj raws li uas sau cia rau hauv txoj kevcai. “Peb tu cia rau peb tias niaj xyoo peb yuav coj thawj phaum qoob hauv peb daim teb thiab txhua yam txiv ntoo thawj phaum tuaj rau hauv Yawmsaub lub tuam tsev. Thiab peb yuav coj peb thawj tus tub hlob thiab peb thawj tug menyuam tsiaj txhu, yog nyuj yog yaj yog tshis, tuaj rau hauv peb tus Vajtswv lub tuam tsev rau cov pov thawj uas ua haujlwm hauv peb tus Vajtswv lub tuam tsev, raws li uas sau cia rau hauv txoj kevcai Thiab peb yuav coj peb thawj phaum hmoov qeb hmoov mog, thiab tej uas peb yuav muab pub, yog txhua yam txiv ntoo thiab cawv txiv hmab thiab roj, tuaj rau cov pov thawj muab tso rau hauv tej txhab hauv peb tus Vajtswv lub tuam tsev. Thiab peb yuav muab ib feem kaum hauv peb daim teb rau cov Levi, vim cov Levi yog cov uas sau ib feem kaum ntawm peb txhua lub moos. Mas tus pov thawj, uas yog Aloo caj ces, yuav nrog cov Levi nyob thaum cov Levi tau txais ib feem kaum ntawd, thiab cov Levi kuj yuav muab ib feem kaum rho hauv ib feem kaum ntawd coj mus cia rau tej chav hauv peb tus Vajtswv lub tuam tsev uas yog lub txhab. Cov pejxeem Yixayee thiab Levi caj ces yuav tsum coj tej qoob loo, cawv txiv hmab tshiab thiab roj uas pub, tuaj cia rau hauv tej chav tsev uas khaws tej twj siv ntawm lub chaw pe Vajtswv, yog lub chaw uas cov pov thawj uas ua haujlwm thiab cov zov tej rooj loog thiab cov hu nkauj nyob. Peb yuav tsis muab peb tus Vajtswv lub tuam tsev tso tseg li.” Cov thawj uas kav cov pejxeem nyob hauv Yeluxalees lawm. Cov pejxeem rho ntawv cia ib feem kaum mus nyob hauv Yeluxalees uas yog lub nroog dawb huv, tseg cuaj feem cia nyob rau hauv lwm lub moos. Thiab cov pejxeem foom hmoov rau txhua tus uas yeem mus nyob hauv Yeluxalees. Ntawm no mus yog cov thawj hauv lub xeev Yuda uas mus nyob rau hauv Yeluxalees tej npe. Tiamsis hauv Yuda tej moos mas sawvdaws nyias nyob nyias vaj nyias tsev, yog cov Yixayee, cov pov thawj, cov Levi, cov tub teg tub taws uas ua haujlwm ntawm lub tuam tsev, thiab Xalaumoo cov tub teg tub taws li caj ces. Cov Yuda thiab cov Npeeyamee muaj qee leej kuj nyob hauv Yeluxalees. Yuda caj ces yog li no, Athaya yog Uxiya tus tub, Uxiya yog Xekhaliya tus tub, Xekhaliya yog Amaliya tus tub, Amaliya yog Sefathiya tus tub, Sefathiya yog Mahalalee tus tub, lawv yog Peles caj ces. Thiab Ma‑axeya uas yog Npalu tus tub, Npalu yog Khauhauxe tus tub, Khauhauxe yog Haxaya tus tub, Haxaya yog Adaya tus tub, Adaya yog Yauyali tus tub, Yauyali yog Xekhaliya tus tub, Xekhaliya yog tus neeg Silau tus tub. Peles caj ces uas nyob hauv Yeluxalees huvsi muaj 468 leej siab loj siab tuab. Npeeyamee caj ces yog li no, Xalu yog Mesulas tus tub, Mesulas yog Yau‑e tus tub, Yau‑e yog Pedaya tus tub, Pedaya yog Khaulaya tus tub, Khaulaya yog Ma‑axeya tus tub, Ma‑axeya yog Ithi‑ee tus tub, Ithi‑ee yog Yesaya tus tub. Thiab nws cov kwvtij Kanpai thiab Xaslai, huvsi muaj 928 leej. Yau‑ee uas yog Xikhi tus tub yog tus uas saib xyuas lawv, thiab Yuda uas yog Haxenu‑a tus tub yog tus thawj uas ob uas saib xyuas lub nroog. Cov pov thawj yog Yedaya uas yog Yauyali tus tub, thiab Yakhi, thiab Xelaya uas yog Hikhiya tus tub, Hikhiya yog Mesulas tus tub, Mesulas yog Xadau tus tub, Xadau yog Melayau tus tub, Melayau yog Ahithu uas saib xyuas Vajtswv lub tuam tsev tus tub, thiab lawv cov kwvtij uas ua haujlwm ntawm lub tuam tsev, huvsi muaj 822 leeg. Thiab muaj Adaya uas yog Yelauhas tus tub, Yelauhas yog Pelaliya tus tub, Pelaliya yog Axi tus tub, Axi yog Xekhaliya tus tub, Xekhaliya yog Pasaw tus tub, Pasaw yog Makhiya tus tub, thiab nws cov kwvtij, uas ua thawj hauv lawv cum, huvsi 242 leeg. Thiab muaj Amasai uas yog Axalee tus tub, Axalee yog Axai tus tub, Axai yog Mesilemau tus tub, Mesilemau yog Imaw tus tub, thiab lawv cov kwvtij uas yog neeg muaj zog siab loj siab tuab, huvsi muaj 128 leej. Tus uas saib xyuas lawv yog Xadi‑ee uas yog Hakedauli tus tub. Cov Levi yog Semaya uas yog Hasus tus tub, Hasus yog Alikhas tus tub, Alikhas yog Hasanpiya tus tub, Hasanpiya yog Npuni tus tub. Thiab muaj Sanpethai thiab Yauxanpa uas yog cov Levi li thawj uas saib xyuas tej haujlwm ib ncig nraum Vajtswv lub tuam tsev, thiab muaj Mathaniya uas yog Mikha tus tub, Mikha yog Xadi tus tub, Xadi yog Axas tus tub, Axas yog tus uas coj hu nkauj thov ua Vajtswv tsaug. Thiab yog Npanpukhiya uas yog tus thawj uas ob hauv nws cov kwvtij. Thiab yog Apada uas yog Samu‑a tus tub, Samu‑a yog Kalas tus tub, Kalas yog Yeduthu tus tub. Cov Levi hauv lub nroog dawb huv sawvdaws muaj 284 leeg. Cov uas zov tej rooj loog yog Akhu, Thamoo thiab ob tug cov kwvtij uas zov ntawm tej rooj loog huvsi muaj 172 leeg. Cov Yixayee thiab cov pov thawj thiab cov Levi uas tsis hais rau hauv no sawvdaws nyob hauv Yuda txhua lub moos, lawv txhua tus nyias nyob hauv nyias qub txeeg qub teg. Tiamsis cov tub teg tub taws uas ua haujlwm ntawm lub tuam tsev nyob saum lub roob Aufee, mas Xiha thiab Kipa kav lawv. Tus uas saib cov Levi hauv Yeluxalees yog Uxi uas yog Npani tus tub, Npani yog Hasanpiya tus tub, Hasanpiya yog Mathaniya tus tub, Mathaniya yog Mikha tus tub, Mikha yog Axas caj ces uas yog cov hu nkauj rau thaum ua kevcai hauv Vajtswv lub tuam tsev. Rau qhov vajntxwv nkaw lus li no txog lawv thiab muab nqe rau lawv raws li uas niaj hnub cheem tsum. Thiab Mesexanpee tus tub Pethahiya uas yog Yuda tus tub Xelag caj ces ua vajntxwv tim xyoob saib txhua yam haujlwm uas ntsig txog cov pejxeem. Tej zej zog thiab tej teb uas nyob ib ncig, mas cov pejxeem Yuda qee leej nyob hauv Khiliya Anpa thiab tej zej zog uas nyob ib ncig lub moos ntawd, thiab hauv Dinpoo thiab tej zej zog uas nyob ib ncig, thiab hauv Yekhaxe‑ee thiab tej zej zog uas nyob ib ncig, thiab hauv Yesua thiab hauv Maulada thiab hauv Npe‑pele, hauv Haxasu‑as, hauv Npe‑awsenpa, thiab tej zej zog uas nyob ib ncig lub moos ntawd, hauv Xilaj, hauv Mekhauna thiab tej zej zog uas nyob ib ncig lub moos ntawd, hauv Eelimoo, hauv Xaula, hauv Yamu, hauv Xanau‑a, hauv Adulas thiab tej zej zog uas nyob ib ncig tej moos ntawd, thiab hauv Lakhi thiab tej teb ntawm lub moos ntawd, thiab hauv Axekha thiab tej zej zog uas nyob ib ncig lub moos ntawd. Lawv txawm ua zos nyob txij Npe‑awsenpa mus txog lub hav Hinoo. Cov pejxeem Npeeyamee kuj nyob ntu txuas ntawm Kenpa mus, yog hauv Mimaj, Aiya, Npe‑ee thiab tej zej zog uas nyob ib ncig lub moos ntawd, ntawm Anathau, Nau, Ananiya, Haxau, Lama, Kitha‑i, Hadi, Xenpau‑i, Nenpala, Lau thiab Aunau, yog cov Kws txawj txhua yam lub hav. Thiab cov Levi qee pab uas nyob hauv Yuda kuj mus nrog cov Npeeyamee nyob. Ntawm no mus yog cov pov thawj thiab cov Levi uas nrog Se‑athi‑ee tus tub Xelunpanpee thiab Yesua los, yog Xelaya, Yelemi, Exala Amaliya, Malu, Hathu, Sekhaniya, Lehoo, Melemau, Idau, Kinethau‑i, Anpiya, Miyamee, Ma‑adiya, Npika, Semaya, Yauyali, Yedaya, Xalu, Amauj, Hikhiya thiab Yedaya. Cov no ua cov pov thawj thiab lawv cov kwvtij li thawj rau ntu uas Yesua nyob. Cov Levi mas yog Yesua, Npinu‑i, Khami‑ee, Selenpiya, Yuda thiab Mathaniya uas yog tus uas nrog nws cov kwvtij coj hu nkauj ua tsaug. Thiab lawv cov kwvtij Npanpukhiya thiab Unau sawv sib ncaj hu nkauj teb. Yesua yog Yauyakhi txiv, Yauyakhi yog Eliyasi txiv, Eliyasi yog Yauyada txiv, Yauyada yog Yaunathas txiv, Yaunathas yog Yadu‑a txiv. Ntu uas Yauyakhi ua vajntxwv mas cov pov thawj uas ua tej cum li thawj muaj li no: Xelaya cum yog Melaya, Yelemi cum yog Hananiya, Exala cum yog Mesulas, Amaliya cum yog Yehauhanas, Malu cum yog Yaunathas, Senpaniya cum yog Yauxej, Halee cum yog Ana, Melayau cum yog Heekhai, Idau cum yog Xekhaliya, Kinethoo cum yog Mesulas, Anpiya cum yog Xikhi, Meeyamee thiab Mau‑adiya cum yog Pitai, Npika cum yog Samu‑a, Semaya cum yog Yehaunathas, Yauyali cum yog Mathenai, Yedaya cum yog Uxi, Xaslai cum yog Khalai, Amauj cum yog Enpaw, Hikhiya cum yog Hasanpiya, Yedaya cum yog Nethanee. Cov Levi uas nyob thaum Eliyasi, Yauyada, Yauhanas thiab Yadu‑a nyob, cov thawj hauv lawv txhua cum tej npe twb muab sau cia, thiab cov uas ua pov thawj mus txog thaum Dali‑a ua vajntxwv kav Pawxia kuj muab sau cia lawm thiab. Levi caj ces cov uas ua thawj hauv txhua cum twb muab sau cia rau hauv phau ntawv keeb kwm mus txog thaum Yauhanas uas yog Eliyasi tus tub nyob. Levi cov thawj yog Hasanpiya, Selenpiya thiab Khami‑ee tus tub Yesua, thiab lawv cov kwvtij sawv tig xubntiag sib ncaj lawv hu nkauj qhuas thiab ua tsaug, ib pab hu ib pab teb raws li Vajtswv tus neeg Davi tej kevcai. Mathaniya, Npanpukhiya, Aunpadiya, Mesulas, Thamoo thiab Akhu yog cov uas zov qhov rooj sawv zov ntawm tej rooj txhab. Cov no nyob rau ntu uas Yauyakhi uas yog Yesua tus tub thiab yog Yauxada tus xeeb ntxwv nyob, thiab rau ntu uas Nehemi uas ua tus tswv xeev thiab xibhwb Exala uas ua pov thawj nyob. Thaum ua kevcai muab lub ntsa loog Yeluxalees xyeem rau Vajtswv mas lawv nrhiav cov Levi hauv lawv tej chaw nyob txhua qhov es yuav coj los rau hauv Yeluxalees thiaj ua tau kevcai xyeem zoo siab xyiv fab thiab hu nkauj thiab ua tsaug, npuaj nruas tooj liab thiab ntaus nkauj nog ncas loj thiab nkauj nog ncas me. Cov uas hu nkauj tej caj ces sau zog hauv lawv tej chaw uas nyob ib ncig Yeluxalees thiab hauv Nethaufa tej zej zog tuaj, thiab tuaj hauv Npe Kilakas thiab hauv ib cheeb tsam Kenpa thiab Amave tuaj rau qhov cov uas hu nkauj ua zej zog nyob ib ncig lub nroog Yeluxalees. Cov pov thawj thiab cov Levi ua kevcai ntxuav lawv tus kheej kom dawb huv thiab ntxuav cov pejxeem thiab tej rooj loog thiab lub ntsa loog kom dawb huv. Ces kuv txawm coj Yuda cov thawj nce rau saum lub ntsa loog thiab faib ua ob pab coob hais lus ua tsaug thiab mus ua ib kab sab. Ib pab taug saum ntsa loog mus rau sab xis mus txog lub Rooj Loog Tshwj Xuam, mas cov uas raws lawv qab yog Hausaya thiab Yuda cov thawj ib nrab, thiab Axaliya, Exala, Mesulas, Yuda, Npeeyamee, Semaya thiab Yelemi, thiab cov pov thawj caj ces qee leej uas coj raj xyu yog Xekhaliya uas yog Yaunathas tus tub, Yaunathas yog Semaya tus tub, Semaya yog Mathaniya tus tub, Mathaniya yog Mikhaya tus tub, Mikhaya yog Xakaw tus tub, Xakaw yog Axas tus tub, thiab Xekhaliya cov kwvtij yog Semaya, Axalee, Milalai, Kilalai, Ma‑ai, Nethanee, Yuda thiab Hanani, lawv coj Vajtswv tus neeg Davi tej cuab yeej phim nkauj, thiab xibhwb Exala mus ua lawv ntej. Ntawm lub Rooj Loog Dej Txhawv mas lawv ncaj nraim mus nce tus ntaiv uas mus rau Davi lub nroog taug txojkev uas nce saum ntsa loog ntawm Davi lub loog tsev sab ped, thiab mus rau ntawm lub Rooj Loog Dej uas nyob sab hnub tuaj. Pab ob uas hu nkauj ua tsaug taug saum ntsa loog mus rau sab laug thiab kuv nrog cov pejxeem ib nrab ua ke raws lawv qab mus rau ntawm lub chaw tsom faj Qhov Txos sab ped mus txog ntu Ntsa Loog Tuab, thiab mus rau ntawm lub Rooj Loog Efa‑i sab ped rau ntawm lub Rooj Loog Qub thiab mus rau lub Rooj Loog Ntses, mus rau lub chaw tsom faj Hananee thiab lub chaw tsom faj uas hu ua Ib Puas mus txog lub Rooj Loog Yaj mas mus nres rau ntawm lub Rooj Loog Zov Khuav. Ob pab uas ua Vajtswv tsaug tau los sawv ua ke rau hauv Vajtswv lub tuam tsev, kuv thiab cov thawj ib nrab uas nrog kuv ua ke. Thiab cov pov thawj uas coj raj xyu yog Eliyakhi, Ma‑axeya, Meeyamee, Mikhaya, Eli‑aunai, Xekhaliya thiab Hananiya, thiab Ma‑axeya, Semaya, Ele‑axa, Uxi, Yehauhanas, Makhiya, Elas thiab Exaw kuj mus rau hauv. Thiab cov hu nkauj kuj hu nkauj, Yelahiya ua tus coj lawv. Mas hnub ntawd lawv ua kevcai xyeem ntau kawg li thiab zoo siab xyiv fab rau qhov Vajtswv ua rau lawv zoo siab xyiv fab kawg nkaus. Cov pojniam thiab cov menyuam kuj zoo siab xyiv fab thiab Yeluxalees txojkev xyiv fab nrov ncha mus deb kawg li. Hnub ntawd lawv tsa cov uas los saib xyuas tej txhab rau tej uas coj tuaj xyeem thiab thawj phaum qoob loo thiab ib feem kaum, thiab yuav sau tej feem uas txoj kevcai tu rau cov pov thawj thiab cov Levi los cia rau hauv, yog sau hauv tej teb ntawm txhua lub moos, rau qhov cov Yuda zoo siab rau cov pov thawj thiab cov Levi uas ua tej haujlwm ntawd. Lawv ua tej haujlwm uas yog ua koom tu lawv tus Vajtswv thiab ua kevcai ntxuav kom dawb huv, thiab cov hu nkauj thiab cov uas zov tej rooj loog kuj ua koom ib yam li ntawd, raws li Davi thiab nws tus tub Xalaumoo hais cia lawd. Rau qhov lub sijhawm thaum ub uas Davi thiab Axas nyob mas muaj ib tug thawj coj hu nkauj thiab muaj tej zaj nkauj qhuas thiab ua tsaug rau Vajtswv. Ncua sijhawm uas Xelunpanpee thiab Nehemi nyob cov Yixayee niaj hnub faib cov hu nkauj thiab cov zov tej rooj loog li feem rau lawv, thiab rho cov Levi li feem rau ib cag. Cov Levi kuj rho Aloo caj ces li feem rau ib cag. Hnub ntawd lawv nyeem Mauxe phau ntawv rau cov pejxeem mloog mas lawv pom qhov uas sau cia hais tias, tsis txhob kheev cov Asmoo thiab cov Mau‑a koom nrog Vajtswv haiv neeg mus ib txhis, rau qhov lawv tsis tau muab mov thiab dej los tos txais cov Yixayee tiamsis lawv tseem ntiav Npala‑as tuaj tsawm foom cov Yixayee. Tiamsis peb tus Vajtswv muab tej lus foom ntawd ntxeev ua koob hmoov. Thaum cov pejxeem hnov txoj kevcai ntawd lawv txawm muab txhua tus uas yog lwm haiv neeg li keeb cais tawm hauv cov Yixayee. Ua ntej no tus pov thawj Eliyasi uas tau raug tsa ua tus uas saib xyuas tej chav hauv peb tus Vajtswv lub tuam tsev thiab nrog Thaunpia ua phoojywg, tau tu ib chav dav rau Thaunpia, yog chav uas txeev siv khaws tej uas ua kevcai xyeem qoob loo, roj ntoos tsw qab, tej twj siv thiab ib feem kaum uas yog qoob, cawv txiv hmab tshiab thiab roj uas lawv pub raws li txoj kevcai rau cov Levi thiab cov hu nkauj thiab cov uas zov tej rooj loog, thiab tej uas pub rau cov pov thawj. Thaum uas muaj tej xwm txheej no kuv tsis nyob hauv Yeluxalees rau qhov xyoo peb caug ob uas Athaxawxi ua vajntxwv hauv Npanpiloo, kuv mus cuag vajntxwv. Nyob ntev loo kuv li thov vajntxwv cia kuv rov los. Kuv thiaj rov los rau hauv Yeluxalees mas kuv li paub tej kev phem uas Eliyasi tau ua pab Thaunpia, yog qhov uas tu ib chav ntawm lub tshav puam Vajtswv lub tuam tsev rau nws. Kuv thiaj chim heev thiab kuv muab Thaunpia tej cuab txhiaj cuab tam rho hauv chav tsev ntawd laim pov tseg huvsi. Thiab kuv hais kom ua kevcai ntxuav chav ntawd thiab kuv coj tej twj siv hauv Vajtswv lub tuam tsev, thiab tej uas siv ua kevcai xyeem qoob loo thiab cov roj ntoos tsw qab rov los cia rau hauv tej qub chaw. Thiab kuv kuj hnov tias cov Levi li feem mas lawv tsis muab rau cov Levi. Vim li no cov Levi thiab cov hu nkauj uas ua haujlwm thiaj nyias tsiv mus rau hauv nyias tej teb lawm. Kuv thiaj yws cov thawj thiab hais tias, “Ua cas muab Vajtswv lub tuam tsev tso tseg?” Kuv thiaj qaws lawv rov los thiab tsa lawv rov ua lawv tes haujlwm dua. Mas cov Yuda sawvdaws coj ib feem kaum uas yog qoob, cawv txiv hmab tshiab thiab roj tuaj tso rau hauv tej txhab. Thiab kuv tsa neeg saib xyuas tej txhab ntawd, yog pov thawj Selemiya, xibhwb Xadau thiab Pedaya uas yog ib tug Levi thiab tsa Xakaw tus tub Hanas uas yog Mathaniya tus xeeb ntxwv ua tus uas pab lawv, rau qhov suav hais tias lawv yog cov uas tso siab tau. Lawv li haujlwm yog faib rau lawv cov kwvtij. Au kuv tus Vajtswv, thov koj nco txog kuv rau zaj no thiab thov tsis txhob rhuav tej haujlwm zoo uas kuv tau ua rau kuv tus Vajtswv lub tuam tsev thiab tej uas ua pab txojkev uas ua koom tu Vajtswv. Thaum ntawd hauv Yuda kuv pom neeg tsuam kua txiv hmab rau hnub Xanpatau thiab sau tej niag pawg qoob rau nees luav thauj thiab thauj cawv txiv hmab tej txiv hmab txiv cev thiab txhua yam nra coj los rau hauv Yeluxalees rau hnub Xanpatau. Kuv thiaj li ntuas lawv rau hnub uas lawv muag zaub mov ntawd. Thiab cov neeg Thailab uas nyob hauv lub nroog coj ntses thiab txhua yam lus muag rau hnub Xanpatau rau cov pejxeem Yuda thiab hauv Yeluxalees. Ces kuv thiaj hais hnyav rau cov uas ua hlob hauv Yuda thiab hais rau lawv tias, “Nej ua phem dabtsi li no, ua qias puas tsuas hnub Xanpatau? Nej tej poj koob yawm txwv tsis tau ua li no lov? Peb tus Vajtswv tsis tau coj tej xwm txheej phem no huvsi los raug peb thiab lub nroog no lov, es nej tseem yuav coj txojkev npau taws heev dua li ntawd los raug cov Yixayee vim yog nej ua qias puas tsuas hnub Xanpatau?” Hmo uas yuav txog hnub Xanpatau thaum yuav tsaus ntuj kuv hais kom kaw tej rooj loog tsis txhob qheb mus txog dhau hnub Xanpatau tso, thiab kuv tsa kuv cov tub teg tub taws qee leej saib xyuas tej rooj loog thiaj txwv tsis kheev thauj ib yam nra dabtsi los rau hauv rau hnub Xanpatau. Mas cov tub luam thiab cov uas coj txhua yam tuaj muag thiaj pw ib hmo sab nraum lub nroog Yeluxalees ib ob zaug. Kuv ntuas lawv thiab hais rau lawv tias, “Ua cas nej tuaj pw sab nraum lub ntsa loog? Yog nej tseem tuaj dua thiab, kuv yuav ntes nej.” Txij thaum ntawd los lawv tsis tuaj rau hnub Xanpatau dua li lawm. Thiab kuv hais kom cov Levi tu lawv tus kheej kom dawb huv thiab tuaj zov tej rooj loog, thiaj li ua tau kom hnub Xanpatau dawb huv. Au kuv tus Vajtswv, thov koj nco txog kuv rau zaj no thiab thov koj tseg kuv txojsia cia raws li koj txojkev hlub loj kawg uas ruaj khov. Thaum ntawd kuv kuj pom cov Yudai uas yuav cov neeg Asadau, Asmoo thiab Mau‑a tej ntxhais ua pojniam, thiab lawv tej menyuam ib nrab hais lus Asadau, lawv hais tsis tau lus Yuda tsuas yog nyias hais nyias yam lus xwb. Kuv thiaj cem lawv thiab foom lawv thiab ntaus lawv qee leej thiab dob lawv plaubhau pov tseg, thiab kuv kom lawv tuav Vajtswv lub npe cog lus twv. Kuv hais tias, “Nej tsis txhob muab nej tej ntxhais qua rau lawv tej tub, thiab tsis txhob yuav lawv tej ntxhais rau nej tej tub lossis nej tus kheej. Cov Yixayee tus vajntxwv Xalaumoo tsis tau ua txhaum rau qhov uas nws yuav pojniam li no lov? Hauv ib tsoom tebchaws tsis muaj ib tug vajntxwv twg zoo cuag li nws thiab nws tus Vajtswv kuj hlub nws, Vajtswv pub nws ua vajntxwv kav cov Yixayee huvsi. Txawm li ntawd los tej pojniam uas yog lwm haiv neeg tseem ua rau nws ua txhaum. Tseem tsim nyog peb yuav mloog nej thiab ua tej kev phem loj no huvsi thiab fav xeeb rau peb tus Vajtswv es mus yuav lwm haiv neeg tej ntxhais los ua pojniam lov?” Tus tuam pov thawj hlob Eliyasi tus tub Yehauyada muaj ib tug tub uas ua Xanpala uas yog neeg Hauloo li vauv, vim li no kuv thiaj muab nws ntiab khiav ntawm kuv mus. Au kuv tus Vajtswv, thov koj nco txog lawv rau qhov lawv tau ua qias puas tsuas qhov uas ua pov thawj thiab ua qias puas tsuas tej lus uas koj cog tseg rau cov pov thawj thiab cov Levi. Kuv thiaj muab txhua yam uas yog lwm haiv neeg li ntxuav ntawm lawv mus li no. Thiab kuv tu haujlwm rau cov pov thawj thiab cov Levi, nyias ua nyias feem. Thiab kuv teem kom coj taws tuaj pub raws li sijhawm uas teem cia lawd thiab coj thawj phaum qoob loo tuaj. Au kuv tus Vajtswv, thov nco txog kuv thiab hlub kuv. Tej xwm txheej no muaj rau thaum Ahaxu‑ela ua vajntxwv, yog tus Ahaxu‑ela uas kav txij ntua Idia tebchaws mus txog ntua Khuj tebchaws, huvsi yog ib puas nees nkaum xya lub xeev. Thaum ntawd vajntxwv Ahaxu‑ela nyob hauv lub nroog loj Xuxa kav. Xyoo peb uas nws ua vajntxwv nws pam ib zaug noj haus rau nws cov thawj thiab nws cov tub teg tub taws huvsi, mas cov thawj rog hauv Pawxia thiab Midia tebchaws thiab cov uas ua hlob thiab cov thawj uas kav txhua lub xeev kuj tuaj nrog nws koom ua ke. Nws qhia nws tej nyiaj txiag ntau kawg hauv tej tebchaws uas nws kav thiab nws lub meej mom thiab nws lub hwjchim tau ntau hnub mus txog thaum tau ib puas yim caum hnub. Thaum dhau lub sijhawm ntawd lawm, vajntxwv pam noj haus rau txhua tus uas nyob hauv lub nroog Xuxa, tsis hais tus ua loj ua yau sawvdaws noj tau xya hnub hauv lub tshav puam ntawm lub vaj uas nyob hauv vajntxwv lub tsev. Muaj ntaub pag dawb ntaub xiav tis rau txoj hlua maj thiab txoj hlua ntaub tsamxem dai rau tej ntsej nyiaj ntawm tej ncej zeb mos, thiab muaj tej rooj kub rooj nyiaj nyob saum lub plag tsev tshav puam uas pua tej txiag zeb liab tsim tseb, tej txiag zeb mos, tej plhaub qwj thiab tej qe zeb hlaws sib quas. Thiab muab cawv txiv hmab hliv rau hauv ntau yam khob kub thiab hliv vajntxwv tej cawv txiv hmab nplua mias raws li vajntxwv lub siab dav. Lawv haus raws li txoj kevcai tsis txwv tsis yuam rau qhov vajntxwv hais kom cov tub qhe sawvdaws hauv vajntxwv lub tsev muab rau txhua tus haus raws li lub siab nyiam. Poj vajntxwv Vasati kuj pam noj haus rau cov niam tsev noj rau hauv vajntxwv Ahaxu‑ela lub tsev thiab. Hnub uas xya thaum vajntxwv haus cawv txiv hmab zoo siab lawm nws txawm hais rau Mehumas, Npixatha, Hanpauna, Npixatha, Anpatha, Xethias thiab Khaka, uas yog xya tus nraug sam uas tu vajntxwv Ahaxu‑ela, kom mus coj poj vaj Vasati ntoo mom poj vaj los cuag vajntxwv xwv nws thiaj qhia tau qhov uas poj vaj zoo nkauj ci nplas rau cov pejxeem thiab cov thawj saib, vim poj vaj zoo nkauj heev. Tiamsis poj vaj Vasati tsis kam los raws li vajntxwv txib cov nraug sam mus hais rau nws. Mas qhov no ua rau vajntxwv npau taws heev, nws chim rau hauv lub siab kawg li. Vajntxwv txawm hu cov uas txawj ntse paub caij paub nyoog tuaj, rau qhov no yog txojkev uas vajntxwv pheej nrog cov uas paub cai thiab txawj tu plaub sawvdaws sablaj, yog cov uas yau vajntxwv, yog Khasena, Setha, Amatha, Thasi, Mele, Maxena thiab Memukhas. No yog Pawxia thiab Midia tebchaws xya tus thawj uas pheej los cuag tau vajntxwv thiab yog cov thawj hauv vajntxwv lub tebchaws. Vajntxwv hais tias, “Raws li txoj kevcai yuav ua li cas rau poj vaj Vasati rau qhov nws tsis ua raws li vajntxwv Ahaxu‑ela kom cov nraug sam hais rau nws?” Ces Memukhas txawm hais tab meeg rau vajntxwv thiab cov thawj tias, “Poj vaj tsis yog ua txhaum rau vajntxwv xwb tiamsis yog ua txhaum rau cov thawj sawvdaws thiab cov pejxeem sawvdaws uas nyob hauv txhua lub xeev uas vajntxwv Ahaxu‑ela kav, vim tej uas poj vaj ua no yuav paub thoob plaws rau hauv ib tsoom pojniam, ua rau lawv saib tsis taus lawv tej txiv. Rau qhov lawv yuav hais tias, ‘Vajntxwv Ahaxu‑ela hais kom coj poj vaj Vasati los cuag nws tiamsis poj vaj kuj tsis los.’ Mas hnub no vajntxwv cov thawj hauv Pawxia thiab hauv Midia tej pojniam txhua tus uas hnov txog tej uas poj vaj ua no lawm yuav piav rau vajntxwv cov thawj sawvdaws paub mas yuav ua rau muaj kev saib tsis taus thiab kev npau taws heev. Yog vajntxwv pom zoo, mas cia vajntxwv tawm ib tsab kevcai thiab muab sau tseg rau hauv Pawxia thiab Midia tej kevcai kom thiaj thim tsis tau tej lus, hais tias Vasati yuav los cuag tsis tau vajntxwv Ahaxu‑ela dua li lawm. Thiab cia vajntxwv muab lub rooj uas ua poj vaj pub rau lwm tus uas zoo dua nws. Thaum tshaj tawm vajntxwv tej lus no thoob plaws vajntxwv lub tebchaws uas dav thiab loj no, mas ib tsoom pojniam thiaj li hwm lawv tus txiv, tsis hais tus ua loj ua yau.” Tej lus taw qhia no txaus vajntxwv thiab cov thawj sawvdaws lub siab, vajntxwv thiaj ua raws li Memukhas tej lus. Vajntxwv thiaj xa tsab ntawv tseb mus thoob plaws txhua lub xeev uas nws kav ua txhua lub xeev li npe ntawv thiab txhua haiv neeg li lus, hais kom txhua tus txivneej ua tus tswv uas tswjhwm nws tsev neeg thiab hais nws yam lus. Dhau tej xwm txheej no lawd, thaum vajntxwv Ahaxu‑ela txojkev npau taws nqeg lawm, nws nco txog Vasati thiab tej uas Vasati tau ua thiab tej lus tawv uas tshaj tawm hais txog Vasati. Cov tub teg tub taws uas tu vajntxwv txawm hais tias, “Cia li nrhiav tej hluas nkauj dawb huv uas zoo nkauj los rau vajntxwv. Thiab cia vajntxwv tsa cov nom tswv hauv txhua lub xeev uas nws kav kom coj cov hluas nkauj dawb huv uas zoo nkauj ntawd sawvdaws los rau hauv lub tsev pojniam hauv lub nroog Xuxa. Thiab muab cob rau vajntxwv tus nraug sam Hekai uas saib cov pojniam uas saib xyuas tej ntxhais ntawd. Thiab muab tshuaj rau cov ntxhais ntawd pleev. Yog tus ntxhais twg txaus vajntxwv lub siab, cia tus ntawd ua poj vaj nyob Vasati chaw.” Qhov no hum vajntxwv lub siab, vajntxwv thiaj ua li ntawd. Muaj ib tug Yudai nyob hauv lub nroog Xuxa npe hu ua Maudekhai. Nws txiv yog Ya‑i, nws yawg yog Sime‑i, nws yawg koob yog Khij, yog xeem Npeeyamee, yog cov uas vajntxwv Nenpukhanexa hauv Npanpiloo kuav nrog Yuda tus vajntxwv Yekhauniya tawm hauv Yeluxalees los. Maudekhai tu Hadaxa, uas yog Exathaw, yog nws li ntxhais kwvtij, rau qhov nws tsis muaj niam txiv lawm. Tus ntxhais no lub cev ntaj ntsug zoo nkauj, mas thaum nws niam txiv tuag lawd, Maudekhai coj nws los tu ua ntxhais. Mas thaum vajntxwv tej lus thiab nws txoj kevcai tshaj tawm lawm, thiab thaum lawv coj tej ntxhais hluas coob los rau hauv lub nroog Xuxa muab cob rau Hekai saib xyuas, Exathaw kuj raug coj los rau hauv vajntxwv lub tsev thiab muab cob rau Hekai uas saib xyuas cov pojniam thiab. Tus ntxhais ntawd txaus Hekai lub siab thiab ntxim hlub, Hekai thiaj maj nroos muab tshuaj rau Exathaw pleev thiab tu tej zaub mov zoo rau nws noj thiab pub xya tus nkauj qhev uas xaiv hauv vajntxwv lub tsev rau nws thiab muab nws thiab nws cov nkauj qhev tshais mus nyob lub chaw uas zoo kawg nkaus hauv lub tsev pojniam. Exathaw tsis qhia tias nws yog haiv neeg twg thiab yog leejtwg tsev neeg, vim yog Maudekhai txwv tsis kheev nws qhia rau leejtwg paub. Maudekhai niaj hnub hla tuaj mus nraum lub tshav puam ntawm lub tsev pojniam, mloog xov saib Exathaw zoo li cas thiab muaj dabtsi tshwm rau nws. Cov hluas nkauj txhua tus yuav tsum nyob raws li tej kevcai uas teem cia rau cov pojniam kaum ob lub hlis tso li mus cuag tau vajntxwv Ahaxu‑ela. No yog lub sijhawm uas teem cia rau lawv tu cev kom zoo nkauj, muab rau lub hli pleev roj tsw qab thiab rau lub hli pleev txuj lom thiab tshuaj tsw qab. Thaum tus hluas nkauj mus cuag vajntxwv li no nws xav coj dabtsi ntawm vajntxwv lub tsev pojniam mus lawv kuj muab rau nws coj. Nws mus cuag vajntxwv thaum hmo, mas thaum tagkis nws rov los rau hauv lub tsev pojniam uas ob muab cob rau vajntxwv tus nraug sam Sa‑aka saib, yog tus uas saib xyuas cov hluas nkauj uas vajntxwv kav. Nws tsis tau rov los cuag vajntxwv dua li lawm yuav yog vajntxwv txaus siab rau nws thiab hu nws lub npe nws thiaj tau los. Thaum txog lub sijhawm uas Anpiha‑i tus ntxhais Exathaw uas Anpiha‑i tus kwvtij Maudekhai sau los ua ntxhais mus cuag vajntxwv, Exathaw tsis thov ib yam dabtsi tsuas yog tej uas vajntxwv tus nraug sam Hekai uas saib xyuas cov pojniam qhia nws xwb. Txhua tus uas pom Exathaw kuj txaus siab rau nws. Thaum lawv coj Exathaw mus cuag vajntxwv Ahaxu‑ela rau hauv vajntxwv lub tsev yog xyoo xya uas nws ua vajntxwv lub kaum hli uas yog lub hli Thenpe. Vajntxwv nyiam Exathaw heev dua tej pojniam huvsi thiab Exathaw tau vajntxwv txojkev hlub txojkev txaus siab heev dua lwm tus hluas nkauj dawb huv huvsi, nws thiaj muab lub mom poj vaj rau Exathaw ntoo saum taubhau thiab tsa nws ua poj vaj nyob Vasati chaw. Mas vajntxwv pam noj haus loj rau nws cov thawj thiab nws cov tub teg tub taws sawvdaws, yog noj Exathaw rooj mov. Vajntxwv kuj so tsis sau se ntawm txhua lub xeev ib ntus, thiab nws ua siab dav pub tshav ntuj raws li uas tsim nyog vajntxwv pub. Thaum sau cov hluas nkauj dawb huv rov tuaj zaum ob, Maudekhai zaum ntawm vajntxwv lub rooj loog. Exathaw tsis tau qhia nws tsev neeg thiab nws haiv neeg rau leejtwg paub, raws li Maudekhai txwv nws cia, rau qhov Exathaw mloog Maudekhai lus ib yam nkaus li thaum Maudekhai tu nws. Lub sijhawm ntawd Maudekhai pheej zaum ntawm vajntxwv lub rooj loog, mas Npitha thiab Thele uas yog vajntxwv ob tug nraug sam uas zov qhov rooj txawm chim thiab nrhiav kev yuav txov vajntxwv Ahaxu‑ela. Mas Maudekhai hnov zaj no, nws thiaj qhia rau poj vaj Exathaw, Exathaw thiaj tuav txog Maudekhai lub npe qhia rau vajntxwv. Thaum muab zaj no tshuaj saib mas pom tias muaj tseeb, ces ob tug ntawd txawm raug muab dai caj dab tuag lawm. Luag twb muab zaj no sau cia rau hauv phau ntawv keeb kwm tab meeg vajntxwv. Dhau tej xwm txheej no lawm, vajntxwv Ahaxu‑ela muab Hamedatha tus tub Hamas uas yog neeg Aka tsa ua loj tuaj, thiab muab koob meej rau thiab muab nws lub rooj txawb kom nyob siab dhau cov thawj uas nrog nws nyob sawvdaws. Vajntxwv cov tub teg tub taws uas nyob ntawm vajntxwv lub rooj loog sawvdaws txhos caug hawm Hamas, vim yog vajntxwv hais kom hawm nws li ntawd. Tiamsis Maudekhai tsis txhos caug lossis hawm Hamas. Vajntxwv cov tub teg tub taws ntawm vajntxwv lub rooj loog hais rau Maudekhai tias, “Ua cas koj tsis ua raws li vajntxwv hais?” Lawv pheej niaj hnub hais rau Maudekhai los nws kuj tsis mloog lawv hais, lawv txawm mus hais rau Hamas, saib Maudekhai tej lus yuav kov yeej los tsis yeej vim yog nws hais tias nws yog neeg Yudai. Thaum Hamas pom tias Maudekhai tsis txhos caug thiab tsis pe nws, Hamas txawm npau taws heev. Tiamsis nws pom tias qhov uas ntes Maudekhai ib leeg xwb tsis txaus nws siab. Vim muaj neeg hais rau nws tias Maudekhai haiv neeg yog haiv twg, Hamas thiaj nrhiav kev txov cov Yudai sawvdaws uas yog Maudekhai haiv neeg, thoob plaws lub tebchaws uas Ahaxu‑ela kav. Xyoo kaum ob uas Ahaxu‑ela ua vajntxwv mas lub ib hlis uas yog lub hli Nixa lawv khov kuam Pulee tab meeg Hamas saib hnub twg thiab lub hli twg zoo tua cov Yudai, mas saib tau hnub kaum peb lub kaum ob hlis uas yog lub hli Adas. Ces Hamas txawm hais rau vajntxwv Ahaxu‑ela tias, “Muaj ib haiv neeg nyob thoob plaws txhua qhov thiab faib mus nyob txuam rau hauv tej neeg hauv txhua lub xeev uas koj kav. Lawv tej kevcai txawv ib tsoom neeg sawvdaws tej kevcai, thiab lawv tsis ua raws li vajntxwv tej kevcai, qhov uas tso lawv nyob li no tsis muaj qabhau dabtsi rau vajntxwv li. Yog vajntxwv pom zoo, thov tso cai kom muab cov neeg no ua puam tsuaj tag, mas kuv yuav pub ib vam tala nyiaj rau hauv vajntxwv tej txhab nyiaj es muab rau cov uas ua vajntxwv haujlwm.” Vajntxwv txawm hle nws lub nplhaib txam txwm ntawm nws txhais tes muab rau Hamedatha tus tub Hamas uas yog neeg Aka thiab yog cov Yudai tus yeeb ncuab. Vajntxwv hais rau Hamas tias, “Kuv muab cov neeg ntawd thiab lawv tej nyiaj txiag cob nkaus rau koj, koj ua rau lawv raws li koj pom zoo.” Mas hu vajntxwv cov tub sau ntawv tuaj rau hnub xiab kaum peb lub ib hlis, mas lawv sau tsab kevcai raws li uas Hamas hais txhua yam xa mus rau cov thawj uas vajntxwv tsa kav tebchaws thiab rau cov uas kav txhua lub xeev huvsi thiab mus rau txhua haiv neeg cov thawj, yog xa mus rau txhua lub xeev, ua txhua lub xeev li npe ntawv thiab txhua haiv neeg li lus, sau ua vajntxwv Ahaxu‑ela npe thiab ntaus cim uas yog vajntxwv lub nplhaib txam txwm rau. Muaj neeg xa tej ntawv no mus tseb rau txhua lub xeev uas vajntxwv kav kom tua ntxuav cov Yudai tej laus tej hluas pojniam thiab menyuam sawvdaws tag nrho rau ib hnub, yog hnub xiab kaum peb lub kaum ob hlis uas yog lub hli Adas, thiab txeeb kiag lawv cuab txhiaj cuab tam huvsi. Tsab kevcai no yuav muab tshaj tawm rau hauv txhua lub xeev kom ib tsoom neeg sawvdaws npaj txhij rau hnub ntawd. Cov neeg xa xov ntawd maj nroos mus raws li vajntxwv hais, thiab tsab kevcai kuj tshaj tawm rau hauv lub nroog Xuxa. Vajntxwv thiab Hamas zaum haus cawv txiv hmab, tiamsis lub nroog Xuxa kub ntxhov heev. Thaum Maudekhai paub txhua yam uas twb ua los lawd, nws txawm dua rhe nws lub tsho hnav khaub seev tsaj pleev tshauv tawm mus rau hauv plawv lub nroog, nws quaj nrov lwj siab kawg. Nws mus rau ntawm txojkev uas yuav nkag rau hauv vajntxwv lub rooj loog, rau qhov tsis muaj leejtwg hnav khaub seev tsaj nkag tau rau hauv vajntxwv lub rooj loog. Thiab hauv txhua lub xeev uas vajntxwv tej lus thiab nws tsab kevcai mus txog muaj kev ntxhov siab loj heev rau hauv cov Yudai. Lawv yoo mov thiab quaj thiab quaj ntsuag thiab muaj neeg coob coob hnav khaub seev tsaj pw da pleev tshauv. Thaum Exathaw cov nkauj qhev thiab nws cov nraug sam los qhia rau nws paub, poj vaj kuj ntxhov siab heev. Nws thiaj xa ris tsho rau Maudekhai hnav xwv nws thiaj hloov tej khaub seev tsaj tseg, tiamsis nws tsis kam txais tej ris tsho ntawd. Ces Exathaw txawm hu vajntxwv ib tug nraug sam Hatha uas raug tsa tu Exathaw tuaj, thiab hais kom Hatha mus nug Maudekhai saib yog muaj dabtsi thiab yog ua cas. Hatha txawm mus cuag Maudekhai ntawm lub tshav puam hauv lub nroog uas nyob ntawm vajntxwv lub rooj loog sab nraud. Maudekhai kuj piav txhua yam uas muaj tshwm los rau Hatha mloog, thiab qhia txog tej nyiaj uas Hamas yeem lus pub rau hauv vajntxwv tej txhab muaj npaum li cas thiaj ua tau cov Yudai puam tsuaj. Maudekhai tseem muab tsab ntawv kevcai uas tshaj tawm hauv Xuxa kom muab cov Yudai ua puam tsuaj rau Hatha coj mus rau Exathaw saib thiab qhia lub ntsiab rau nws thiab hais kom Exathaw mus cuag vajntxwv thiab thov vajntxwv thiab taij thov nws saib rau Exathaw haiv neeg. Hatha thiaj rov mus qhia tej uas Maudekhai hais ntawd rau Exathaw mloog. Mas Exathaw thiaj hais rau Hatha kom xa xov rau Maudekhai tias, “Vajntxwv cov tub teg tub taws sawvdaws thiab cov pejxeem hauv vajntxwv tej xeev yeej paub tias yog tus txivneej twg lossis tus pojniam twg lam nkag mus cuag vajntxwv rau hauv lub tshav puam sab hauv uas tsis yog vajntxwv hu kom mus cuag, kuj muaj tib txoj kevcai nkaus xwb. Sawvdaws yuav raug muab tua pov tseg tsuas yog tseg tus uas vajntxwv cev nws tus cwj kub tos txais ces tus ntawd thiaj li tsis tuag xwb. Kuv los tsis raug hu mus cuag vajntxwv tau peb caug hnub lawm.” Lawv thiaj los hais rau Maudekhai paub txog tej uas Exathaw hais ntawd. Maudekhai thiaj hais kom lawv rov mus teb Exathaw tias, “Tsis txhob xav tias koj nyob hauv vajntxwv lub tsev koj yuav dim zoo dua cov Yudai huvsi. Yog lub sijhawm no koj nyob twjywm yuav muaj kev pab thiab kev cawm dim ntawm lwm qhov tuaj rau cov Yudai, tiamsis koj thiab koj txiv tsev neeg yuav raug puam tsuaj. Leejtwg yuav paub tias qhov uas koj tau los ua poj vaj no tej zaum twb yog koj yuav pab tau rau lub sijhawm zoo li no?” Ces Exathaw hais kom lawv mus hais rau Maudekhai tias, “Cia li mus, sau zog cov Yudai huvsi hauv lub nroog Xuxa uas nrhiav tau thiab yoo mov thov pab kuv, tsis txhob noj tsis txhob haus peb hnub nruab hnub hmo ntuj. Kuv thiab kuv cov nkauj qhev kuj yuav yoo mov ib yam nkaus li koj thiab. Mas kuv yuav nkag mus cuag vajntxwv, txawm yog txhaum kevcai kuj xij. Yog kuv raug puam tsuaj, kuj cia kuv puam tsuaj.” Maudekhai thiaj rov mus ua txhua yam raws li Exathaw hais rau nws. Mas hnub uas peb Exathaw hnav nws cev tsoos poj vaj thiab mus sawv hauv vajntxwv lub tsev ntawm lub tshav puam sab hauv ncaj ntawm chav uas vajntxwv nyob. Vajntxwv zaum saum nws lub zwm txwv hauv vajtntxiv lub tsev ncaj ntawm txojkev uas nkag los. Thaum vajntxwv pom poj vaj Exathaw sawv ntsug hauv lub tshav puam, nws kuj txaus siab rau Exathaw thiab cev nws tus cwj kub uas nyob hauv nws txhais tes rau Exathaw. Exathaw txawm txav los kov tus hauv cwj. Vajntxwv hais rau nws tias, “Poj vaj Exathaw, muaj dabtsi? Koj thov yam twg? Kuv yuav pub rau koj, txawm yog pub kuv lub tebchaws ib nrab kuj tau.” Exathaw thiaj hais tias, “Yog txaus vajntxwv lub siab, hmo no thov vajntxwv thiab Hamas los noj pluas mov uas kuv npaj rau vajntxwv lawd.” Ces vajntxwv txawm hais tias, “Coj Hamas kavtsij tuaj, wb yuav ua raws li Exathaw lub siab xav.” Vajntxwv thiab Hamas thiaj mus rau ntawm rooj mov uas Exathaw npaj cia. Thaum lawv tabtom haus cawv txiv hmab, vajntxwv hais rau Exathaw tias, “Koj thov dabtsi? Kuv yuav pub rau koj. Txawm yog yuav kuv lub tebchaws ib nrab los kuj tau.” Mas Exathaw hais tias, “Kuv tej lus taij thiab kuv tej lus thov yog li no. Yog vajntxwv hlub kuv thiab txaus siab pub raws li kuv tej lus taij thiab kuv tej lus thov no kom tiav, mas tagkis thov vajntxwv thiab Hamas rov los noj pluas mov uas kuv yuav npaj rau neb thiab, mas tagkis kuv li ua raws li vajntxwv hais.” Mas hnub ntawd Hamas tawm mus zoo siab xyiv fab kawg li. Tiamsis thaum Hamas pom Maudekhai ntawm vajntxwv lub rooj loog nws tsis sawv lossis tsis ntshai Hamas ua tshee hnyo, Hamas kuj npau taws heev rau Maudekhai. Txawm li ntawd los Hamas ua ib siab nyiaj rov mus tsev. Nws txib neeg mus coj nws cov phoojywg thiab nws tus pojniam Xelev los. Hamas khav txog nws tej nyiaj txiag nplua mias thiab piav txog nws muaj pes tsawg leej tub thiab tej koob meej uas vajntxwv pub rau nws thiab piav txog qhov uas vajntxwv tsa nws ua loj dua cov thawj thiab vajntxwv cov tub teg tub taws huvsi. Thiab Hamas hais ntxiv tias, “Txawm yog poj vaj Exathaw los twb tsis hu leejtwg mus nrog vajntxwv noj pluas mov uas nws npaj, tsuas yog hu kuv xwb. Thiab tagkis nws tseem hu kuv thiab vajntxwv rov mus dua. Tiamsis tej no tsis muaj qabhau rau kuv li, rau ncua sijhawm uas kuv tseem pom Maudekhai uas yog neeg Yudai zaum ntawm vajntxwv lub rooj loog.” Nws tus pojniam Xelev thiab nws cov phoojywg sawvdaws hais rau nws tias, “Cia li mus txhos ib tug ncej uas dai neeg siab tsib caug tshim, es tagkis sawv ntxov kuj thov vajntxwv kom muab Maudekhai dai caj dab rau tus ncej ntawd tso li mus nrog vajntxwv noj haus zoo siab hlo.” Tej lus no hum Hamas lub siab heev nws thiaj hais kom ua tus ncej dai caj dab ntawd. Hmo ntawd vajntxwv pw tsis tsaug zog, nws thiaj hais kom muab phau ntawv keeb kwm uas sau tej xwm txheej uas txaus nco cia los, lawv thiaj muab nyeem rau vajntxwv mloog. Mas pom muaj sau cia hais tias Maudekhai tau qhia tias Npithana thiab Thele uas yog vajntxwv ob tug nraug sam uas zov qhov rooj tau nrhiav kev yuav txov vajntxwv Ahaxu‑ela txojsia. Vajntxwv hais tias, “Qhov uas Maudekhai qhia zaj no mas tau muab koob meej thiab meej mom li cas rau nws lawm?” Cov tub teg tub taws uas tu vajntxwv hais tias, “Tsis tau muab dabtsi li lauj.” Vajntxwv hais tias, “Leejtwg nyob hauv lub tshav puam?” Thaum ntawd Hamas nyuam qhuav tuaj txog lub tshav puam sab nraud hauv vajntxwv lub tsev yuav hais rau vajntxwv txog qhov uas yuav muab Maudekhai dai caj dab rau saum tus ncej uas nws twb npaj rau Maudekhai lawd. Vajntxwv cov tub teg tub taws hais rau vajntxwv tias, “Hamas nyob qhov ntawd, nws sawv ntsug hauv lub tshav puam.” Vajntxwv thiaj hais tias, “Kom nws los ntawm no.” Hamas thiaj los mas vajntxwv hais rau nws tias, “Yog vajntxwv txaus siab muab koob meej rau ib tug twg, tsim nyog ua li cas rau tus ntawd?” Mas Hamas xav hauv lub siab tias, “Vajntxwv yuav txaus siab pub koob meej rau leejtwg ntau dua li kuv?” Ces Hamas txawm hais rau vajntxwv tias, “Yog yuav muab koob meej rau tus uas vajntxwv txaus siab pub ntawd, mas cia muab cev tsoos tsho vajntxwv uas vajntxwv hnav thiab tus nees uas vajntxwv caij uas muaj lub mom vajntxwv ntawm taubhau, mas muab cev tsoos vajntxwv thiab tus nees cob rau vajntxwv li ib tug thawj uas loj kawg. Kom nws ua tsoos tsho rau tus uas vajntxwv txaus siab pub koob meej rau hnav thiab cab nees rau tus yawg ntawd caij mus rau hauv lub tshav puam hauv lub nroog thiab qw ua ntej hais tias, ‘Tus uas vajntxwv txaus siab pub koob meej rau yog pub li no.’ ” Vajntxwv txawm hais rau Hamas tias, “Cia li maj nroos mus ua, muab cev tsoos tsho thiab nees raws li koj hais es muab rau Maudekhai uas yog neeg Yudai uas nyob ntawm vajntxwv lub rooj loog. Tsis txhob tseg tej uas koj hais lawm ib yam li.” Hamas txawm coj cev tsoos tsho thiab tus nees los, ua rau Maudekhai hnav thiab kom nws caij tus nees mus rau hauv lub tshaj puam hauv lub nroog thiab qw hais tias, “Tus uas vajntxwv txaus siab pub koob meej rau yog pub li no.” Ces Maudekhai rov los rau ntawm vajntxwv lub rooj loog ces Hamas txawm maj nroos rov qab mus tsev kauv taubhau thiab quaj yws. Nws piav txhua yam uas tshwm los rau nws lawd rau nws tus pojniam Xelev thiab nws cov phoojywg sawvdaws mloog. Nws cov phoojywg uas ntse thiab nws tus pojniam hais rau nws tias, “Koj pib vau rau ntawm Maudekhai lawm, vim nws yog neeg Yudai ces koj yuav kov tsis yeej nws, koj yuav ntog rau ntawm nws tiag tiag li.” Thaum lawv tabtom nrog Hamas hais lus, vajntxwv cov nraug sam txawm tuaj coj Hamas maj nroos mus noj pluas mov uas Exathaw npaj ntawd. Vajntxwv thiab Hamas txawm mus nrog poj vaj Exathaw noj pluas mov. Hnub uas ob thaum lawv tabtom haus cawv txiv hmab, vajntxwv rov hais rau Exathaw tias, “Poj vaj Exathaw, koj tej lus taij yog dabtsi? Kuv yuav pub rau koj. Thiab koj tej lus thov yog dabtsi? Txawm yog yuav kuv lub tebchaws ib nrab los kuj tau.” Ces poj vaj Exathaw thiaj teb tias, “Au vajntxwv, yog kuv txaus koj lub siab thiab yog koj pom zoo, ces thov pub kuv thiab kuv haiv neeg muaj txojsia nyob raws li kuv tej lus thov. Rau qhov kuv thiab kuv haiv neeg twb raug muab muag ua kom puam tsuaj raug muab tua thiab raug muab ntxuav kom tu noob nrho lawm. Yog peb tsuas raug muab muag ua tub qhe nkauj qhev xwb kuv kuj thev taus cia twjywm, vim tej kev txom nyem ntawd tsis txaus ua rau koj nyuaj siab.” Vajntxwv Ahaxu‑ela hais rau poj vaj Exathaw tias, “Tus ntawd yog leejtwg thiab nyob qhovtwg es yuav muaj cuabkav ua tau li ntawd?” Mas Exathaw hais tias, “Tus tshawj chim thiab tus yeeb ncuab ntawd yog tus Hamas phem no ntag.” Hamas kuj ntshai kawg ntawm vajntxwv thiab poj vaj xubntiag. Vajntxwv txawm sawv tsees ntawm rooj mov mus ua npau taws vog rau hauv lub vaj ntawm vajntxwv lub tsev, tiamsis Hamas tseem nyob thov nws txojsia ntawm poj vaj Exathaw, rau qhov nws pom tias vajntxwv npaj tseg ua phem rau nws lawm. Thaum vajntxwv rov hauv lub vaj los rau hauv chav uas lawv haus cawv txiv hmab ntawd, Hamas tabtom pe khwb rwg ntxi saum lub rooj uas Exathaw zaum. Vajntxwv thiaj hais tias, “Nws tseem yuav yuam poj vaj tab meeg kuv hauv kuv lub tsev thiab lov?” Thaum vajntxwv lo lus tu nrho ntawm nws qhov ncauj, lawv txawm muab ntaub kauv kiag Hamas lub ntsej muag. Hanpauna uas yog ib tug nraug sam tu vajntxwv txawm hais tias, “Tus ncej siab tsib caug tshim uas Hamas npaj cia dai Maudekhai caj dab tseem nyob hauv Hamas tsev, Maudekhai yog tus uas qhia kom cawm vajntxwv txojsia.” Vajntxwv txawm hais tias, “Cia li muab Hamas dai rau saum tus ncej ntawd.” Lawv thiaj muab Hamas dai rau saum tus ncej uas nws npaj cia dai Maudekhai. Ces vajntxwv txojkev npau taws thiaj li nqeg lawm. Hnub ntawd vajntxwv Ahaxu‑ela muab kiag Hamas uas yog cov Yudai tus yeeb ncuab lub tsev rau poj vaj Exathaw. Maudekhai thiaj mus cuag tau vajntxwv, vim yog Exathaw qhia tias Maudekhai txheeb ze nws li cas. Mas vajntxwv hle nws lub nplhaib txam txwm uas nws muab ntawm Hamas los cob rau Maudekhai. Exathaw kuj tsa Maudekhai ua tus uas kav kiag Hamas lub vaj tse. Thiab Exathaw hais dua rau vajntxwv. Nws khwb nkaus rau ntawm vajntxwv kotaw thiab thov vajntxwv ua kua muag nrog ntsuav thov kom muab Hamas uas yog neeg Aka tej tswvyim phem uas txov cov Yudai rhuav pov tseg. Vajntxwv txawm cev nws tus cwj kub rau Exathaw, Exathaw thiaj sawv tsees los sawv ntsug rau ntawm vajntxwv xubntiag. Nws hais tias, “Vajntxwv, yog txaus koj siab thiab koj hlub kuv, thiab yog tias koj pom zoo thiab yog kuv txaus koj lub siab, mas thov koj sau ib tsab ntawv tso cai mus rhuav tej lus hauv tsab ntawv uas Hamedatha tus tub Hamas uas yog neeg Aka tau xav phem es sau mus txov cov Yudai uas nyob hauv vajntxwv txhua lub xeev. Kuv yuav ua li cas nyiaj taus saib txojkev puam tsuaj uas yuav los raug kuv haiv neeg? Kuv yuav ua li cas nyiaj taus saib qhov uas kuv cov kwvtij raug kev liamsim?” Ces vajntxwv Ahaxu‑ela txawm hais rau poj vaj Exathaw thiab Maudekhai uas yog neeg Yudai tias, “Saib maj, kuv twb muab Hamas lub vaj tse rau Exathaw lawm thiab lawv twb muab nws dai caj dab rau saum tus ncej lawm vim yog qhov uas nws yuav txov cov Yudai. Koj cia li sau dua ib tsab ntawv ua kuv lub npe ntsig txog cov Yudai raws li koj pom zoo thiab muab vajntxwv lub nplhaib txam txwm ntaus cim rau, vim tias tsab kevcai uas sau ua kuv lub npe thiab muab lub nplhaib txam txwm ntaus rau lawm mas thim tsis tau.” Ces thaum ntawd vajntxwv txawm hu cov tub sau ntawv tuaj, yog hnub tim nees nkaum peb lub peb hlis uas yog lub hli Xiva. Mas lawv sau ib tsab kevcai raws li txhua yam uas Maudekhai hais txog cov Yudai xa mus rau cov uas kav tebchaws thiab rau cov thawj thiab cov uas kav txhua lub xeev, txij ntua Idia tebchaws mus txog Khuj tebchaws, huvsi ib puas nees nkaum xya lub xeev ua txhua lub xeev li npe ntawv thiab txhua haiv neeg li lus, thiab xa mus rau cov Yudai ua lawv li npe ntawv thiab lawv li lus. Lawv sau ua vajntxwv Ahaxu‑ela lub npe thiab muab vajntxwv lub nplhaib txam txwm ntaus cim rau, thiab muab rau cov tub xa xov uas caij nees nrawm, yog cov nees uas siv ua vajntxwv tej haujlwm thiab yug rau hauv vajntxwv lub nkuaj nees. Cov lus hauv tsab ntawv no vajntxwv tso cai kom cov Yudai uas nyob hauv txhua lub moos tuaj txoos ua ke tiv thaiv tsom kwm lawv txojsia cia, thiab yog pab tub rog twg hauv haiv neeg twg thiab hauv lub xeev twg tuaj ntaus lawv thiab lawv tej pojniam menyuam mas lawv cia li ua kom puam tsuaj thiab tua thiab rhuav tshem, thiab tso cai kom mus lws cov uas tuaj ntaus lawv cuab txhiaj cuab tam. Tib hnub ntawd ua kom thoob plaws vajntxwv Ahaxu‑ela txhua lub xeev, yog hnub xiab kaum peb lub kaum ob hlis uas yog lub hli Adas. Tsab ntawv uas sau ntawd yuav muab xa mus ua kevcai rau hauv txhua lub xeev thiab muab tshaj tawm rau txhua haiv neeg paub. Cov Yudai yuav tsum npaj txhij rau hnub ntawd ua pauj rau lawv cov yeeb ncuab. Cov tub xa xov txawm caij tej nees nrawm uas siv ua vajntxwv li haujlwm maj nroos dhia tawm mus raws li vajntxwv txhib, thiab tsab kevcai ntawd kuj muab tshaj tawm hauv lub nroog Xuxa thiab. Ces Maudekhai tawm ntawm vajntxwv lub xubntiag mus hnav tsoos tsho vajntxwv xiav thiab dawb, thiab ntoo mom kub loj thiab hnav lub tsho ntev ntaub mag tsamxem zoo heev, mas cov neeg hauv lub nroog Xuxa kuj qw zoo siab xyiv fab. Cov Yudai nyob kaj siab lug muaj kev zoo siab kev xyiv fab thiab muaj koob meej. Hauv txhua lub xeev thiab hauv txhua lub moos tsis hais qhov twg uas vajntxwv tsab kevcai mus txog muaj kev zoo siab kev xyiv fab rau hauv cov Yudai, muaj kev pam noj haus zoo siab xyiv fab. Muaj lwm haiv neeg coob coob hauv lub tebchaws lees hais tias lawv yog neeg Yudai vim yog lawv ntshai cov Yudai. Lub kaum ob hlis uas yog lub hli Adas, hnub xiab kaum peb lub hli ntawd, thaum lawv yuav ua raws li vajntxwv tej lus nkaw thiab tsab kevcai ntawd, hnub ntawd ntag Yudai cov yeeb ncuab vam tias lawv yuav kov yeej tiamsis ho raug muab hloov ua hnub uas cov Yudai kov yeej lawv cov tshawj chim. Cov Yudai thiaj tuaj txoos ua ke rau hauv lawv tej moos thoob plaws vajntxwv Ahaxu‑ela txhua lub xeev xwv thiaj tua tau cov uas nrhiav kev txov lawv. Tsis muaj ib tug tiv tua tau lawv, rau qhov txhua haiv neeg ntshai lawv heev. Cov thawj hauv tej xeev sawvdaws yog cov uas kav tebchaws thiab cov uas kav tej xeev thiab vajntxwv cov tub teg tub taws kuj pab cov Yudai, rau qhov lawv ntshai Maudekhai heev. Maudekhai tau ua loj rau hauv vajntxwv lub tsev, thiab nws lub koob meej nrov nto moo mus thoob plaws txhua lub xeev, rau qhov tus yawg Maudekhai ntawd muaj hwjchim loj zuj zus. Cov Yudai thiaj xuas ntaj tua yeej lawv cov yeeb ncuab sawvdaws thiab ua kom puam tsuaj thiab ua raws li lawv lub siab rau cov uas ntxub lawv. Hauv lub nroog Xuxa cov Yudai tua thiab ua kom puam tsuaj tsib puas leej, thiab tua tau Pasadatha thiab Dafoo thiab Apatha thiab Paulatha thiab Adaliya thiab Alidatha thiab Pamatha thiab Alixai thiab Alidai thiab Vaixatha. Kaum leej no yog Hamedatha tus tub Hamas uas ua cov Yudai tus yeeb ncuab cov tub, tiamsis lawv tsis lws tej qhov txhia chaw. Hnub ntawd muaj neeg qhia tias pes tsawg leej raug tua tuag hauv lub nroog Xuxa rau vajntxwv paub. Vajntxwv hais rau poj vaj Exathaw tias, “Hauv lub nroog Xuxa cov Yudai twb tua tsib puas leej thiab tua Hamas kaum leej tub. Dua li vajntxwv lwm lub xeev xyov lawv ua li cas lawm. Nimno koj tseem muaj tej lus taij thov dabtsi? Kuv yuav pub rau koj. Koj tej lus thov ntxiv muaj dabtsi? Kuv yuav ua kom tiav.” Exathaw hais tias, “Yog txaus koj lub siab, thov cia cov Yudai uas nyob hauv lub nroog Xuxa ua ib yam li tsab kevcai uas ua hnub no rau tagkis ib hnub thiab. Thiab thov muab Hamas kaum leej tub dai rau saum tus ncej dai caj dab.” Vajntxwv kuj hais kom ua li ntawd. Muab kevcai tshaj tawm rau hauv Xuxa thiab Hamas kaum leej tub raug muab dai rau saum tus ncej dai caj dab. Cov Yudai uas nyob hauv Xuxa tuaj txoos ua ke rau hnub xiab kaum plaub lub hli Adas thiab tua cov neeg hauv Xuxa peb puas leej tiamsis lawv tsis lws tej qhov txhia chaw. Cov Yudai uas nyob hauv vajntxwv lwm lub xeev kuj tuaj txoos ua ke tiv thaiv lawv txojsia thiab dim ntawm lawv cov yeeb ncuab. Lawv tua cov uas ntxub lawv tuag xya vam tsib txeeb leej tiamsis lawv tsis lws tej qhov txhia chaw. Tej no muaj tshwm rau hnub xiab kaum peb lub hli Adas, hnub xiab kaum plaub lawv so thiab muab ua hnub noj haus zoo siab xyiv fab. Mas cov Yudai uas nyob hauv lub nroog Xuxa tuaj txoos ua ke rau hnub xiab kaum peb thiab kaum plaub, thiab so rau hnub xiab kaum tsib, thiab muab ua hnub uas noj haus zoo siab xyiv fab. Vim li no cov Yudai uas nyob hauv tej zej zog thiab lwm lub moos thiaj caiv hnub xiab kaum plaub lub hli Adas ua hnub uas noj haus zoo siab xyiv fab thiab ua hnub koob tsheej uas ib leeg pub tshav ntuj rau ib leeg. Maudekhai sau tej no cia thiab xa ntawv mus rau cov Yudai sawvdaws uas nyob thoob plaws vajntxwv Ahaxu‑ela txhua lub xeev tsis hais ze los deb, hais kom lawv caiv hnub xiab kaum plaub thiab kaum tsib lub hli Adas rau txhua xyoo mus li, ua hnub uas cov Yudai dim lawv cov yeeb ncuab thiab ua lub hli uas muab kev txhawj xeeb ntxeev ua kev zoo siab thiab muab kev quaj ntsuag ntxeev ua kev luag zoo siab, thiab kom lawv muab ua hnub uas noj haus zoo siab xyiv fab thiab ua hnub uas ib leeg pub tshav ntuj rau ib leeg thiab pub tshav ntuj rau tej pluag. Cov Yudai thiaj hais hum ua raws li uas lawv pib ua los lawd thiab ua raws li Maudekhai sau mus rau lawv. Hamedatha tus tub Hamas uas yog neeg Aka ua yeeb ncuab rau cov Yudai sawvdaws tau ntaus tswvyim phem thiab khov kuam Pulee ua rau lawv liamsim puam tsuaj tag. Tiamsis thaum Exathaw mus cuag vajntxwv, vajntxwv thiaj sau ntawv hais kom tej tswvyim phem uas Hamas npaj ua rau cov Yudai rov los poob rau saum Hamas lub taubhau, thiab cia nws thiab nws cov tub raug muab dai rau saum tus ncej dai caj dab. Vim li ntawd thiaj hu ob peb hnub ntawd hu ua Pulee, raws li lo lus khov kuam Pulee. Vim yog txhua yam uas sau rau tsab ntawv no thiab txhua yam uas cov Yudai raug no thiab txhua yam uas tshwm los rau lawv, cov Yudai thiaj teem tseg tias lawv thiab lawv caj ces thiab cov uas nrog lawv koom yuav tsum caiv ob hnub no raws li uas sau cia thiab raws li sijhawm uas teem rau txhua xyoo mus tsis tu ncua li. Thiab txhua yim hauv txhua lub xeev thiab hauv txhua lub moos yuav nco ntsoov ob hnub no thiab caiv mus tag txhua txhia tiam, mas cov Yudai yuav ua hnub kevcai Pulee tsis txhob tso tseg li thiab lawv tej caj ces yuav tsum pheej nco ntsoov ob hnub no. Mas poj vaj Exathaw uas yog Anpiha‑i tus ntxhais, thiab Maudekhai uas yog neeg Yudai sau dua ib tsab ntawv yom ceev tsab ntawv uas ob uas hais txog kevcai Pulee no. Thiab xa tsab ntawv ntawd mus rau cov Yudai sawvdaws uas nyob thoob plaws ib puas nees nkaum xya lub xeev uas vajntxwv Ahaxu‑ela kav foom hmoov kom noj qab nyob zoo, thiab hais kom ua hnub kevcai Pulee raws li sijhawm uas teem cia raws li Maudekhai uas yog neeg Yudai thiab poj vaj Exathaw tau nkaw lus rau cov Yudai, ib yam li lawv twb teem cia rau lawv tus kheej thiab lawv caj ces rau thaum lawv yoo mov thiab thaum lawv quaj ntsuag. Poj vaj Exathaw tsa tej kevcai ua Pulee no thiab muab sau cia rau hauv ntawv. Vajntxwv Ahaxu‑ela yuam kom thoob plaws lub tebchaws thiab tej tebchaws ntawm ntug hiavtxwv them se. Txhua yam haujlwm uas vajntxwv lub zog thiab lub hwjchim ua, thiab Maudekhai lub meej mom siab uas vajntxwv pub rau nws twb muab sau cia rau hauv phau ntawv keeb kwm uas hais txog Midia thiab Pawxia tej vajntxwv. Maudekhai uas yog neeg Yudai nyob lub rooj uas qes ntawm vajntxwv Ahaxu‑ela xwb, thiab nws ua loj rau hauv cov Yudai thiab nws ua tau hum nws ib tsoom kwvtij uas coob kawg lub siab, rau qhov nws nrhiav kev noj qab nyob zoo rau nws haiv neeg thiab txawj hais kom nws haiv neeg sawvdaws tau nyob kaj siab lug. Muaj ib tug yawg nyob hauv Us tebchaws npe hu ua Yauj. Nws yog ib tug neeg zoo tsis muaj chaw thuam li thiab ua ncaj ncees, yog ib tug uas hwm thiab paub ntshai Vajtswv thiab tseg tsis ua txojkev phem kiag li. Nws muaj xya leej tub thiab peb leeg ntxhais. Nws muaj xya txhiab tus yaj, peb txhiab tus ntxhuav, tsib puas nkawm nyuj thiab tsib puas tus maum nees luav thiab muaj tub qhe coob heev. Tus yawg no thiaj yog tus loj kawg nkaus hauv cov neeg sawvdaws uas nyob sab hnub tuaj. Nws cov tub pheej npaj ib pluag noj rau hauv nyias lub tsev raws li hnub uas nyias teem tseg. Lawv kuj hu peb tug muam tuaj nrog lawv noj lawv haus thiab. Thaum lawv noj haus puv ib ncig lawm, Yauj yuav kom lawv ua kevcai tu lawv tus kheej kom dawb huv, thiab nws yuav sawv ntxov ntxov tua tsiaj hlawv xyeem ua cov menyuam feem ib leeg ib tug, rau qhov Yauj hais tias, “Tej zaum kuv cov menyuam tau ua txhaum thiab tsawm foom Vajtswv hauv lawv lub siab.” Yauj thiaj ua li no tsis tu ncua li. Muaj ib hnub Vajtswv cov tubtxib saum ntuj los cuag Yawmsaub, Xatas kuj nrog lawv los thiab. Yawmsaub hais rau Xatas tias, “Koj mus dabtsi los?” Xatas teb Yawmsaub tias, “Mus mus los los saum lub ntiajteb thiab ncig thoob lub ntiajteb los.” Mas Yawmsaub hais rau Xatas tias, “Koj twb tshuaj saib Yauj uas yog kuv tus qhev los tsis tau? Tag nrho lub ntiajteb tsis muaj leejtwg zoo cuag li nws, nws yog tus neeg zoo tsis muaj chaw thuam li thiab ua ncaj ncees, nws hwm thiab paub ntshai Vajtswv thiab tseg tsis ua txojkev phem.” Xatas thiaj teb Yawmsaub tias, “Yauj hwm thiab paub ntshai koj dawb dawb xwb lov? Koj tsis tau xov laj kab puag ncig nws thiab nws tsev neeg thiab txhua yam uas nws muaj lov? Koj twb foom koob hmoov rau tej haujlwm uas nws txhais tes ua thiab nws tej tsiaj txhu huaj vam coob kawg rau hauv lub tebchaws. Nimno cia li cev kiag koj txhais tes thiab kov txhua yam uas nws muaj, mas nws yeej yuav tsawm foom koj tab meeg koj.” Yawmsaub hais rau Xatas tias, “Saib nawj, txhua yam uas nws muaj nyob hauv koj lub hwjchim, tiamsis tsis txhob cev tes kov Yauj.” Xatas txawm tawm ntawm Yawmsaub xubntiag mus lawm. Muaj ib hnub thaum Yauj tej tub tej ntxhais tabtom noj mov thiab haus cawv txiv hmab hauv lawv tus tijlaug hlob lub tsev, txawm muaj ib tug xa xov los hais rau Yauj tias, “Cov nyuj tabtom laij teb thiab cov nees luav tabtom noj zaub ntawm ib sab, mas cov neeg Xenpa txawm tuaj ntaus raws cov tsiaj ntawd mus thiab xuas ntaj tua cov tub qhe tuag tag, kuv tib leeg khiav dim los hais rau koj xwb.” Thaum nws tabtom hais txawm muaj dua ib tug los hais tias, “Vajtswv li hluavtaws poob saum ntuj los kub cov yaj thiab cov tub qhe puam tsuaj tag huvsi lawm, kuv tib leeg khiav dim los hais rau koj xwb.” Thaum tus ntawd tabtom hais txawm muaj dua ib tug los hais tias, “Cov neeg Kheedia ua peb pab tuaj lws kiag cov ntxhuav mus thiab xuas ntaj tua cov tub qhe tuag tag, kuv tib leeg khiav dim los hais rau koj xwb.” Thaum tus ntawd tabtom hais txawm muaj dua ib tug los hais tias, “Koj cov tub ntxhais tabtom noj mov thiab haus cawv txiv hmab hauv lawv tus tijlaug hlob lub tsev, txawm muaj cua daj cua dub hlob kawg ntsawj hauv tebchaws moj sab qhua tuaj nplawm lub tsev plaub fab ua rau lub tsev vau tsuam tej tub ntxhais mas lawv tuag tag, kuv tib leeg khiav dim los hais rau koj xwb.” Ces Yauj txawm sawv tsees dua rhe nws lub tsho ntev chais plaubhau thiab khwb nkaus rau hauv av pe hawm, thiab nws hais tias, “Kuv tawm hauv kuv niam lub plab los liab qab tsuas, ces kuv yuav rov qab mus liab qab tsuas. Yawmsaub pub thiab Yawmsaub coj mus lawm. Cia li qhuas Yawmsaub lub npe.” Tej xwm txheej no huvsi Yauj tsis ua txhaum lossis hais tias Vajtswv ua txhaum. Nyob muaj ib hnub cov tubtxib saum ntuj los cuag Yawmsaub, Xatas kuj nrog lawv los rau ntawm Yawmsaub xubntiag thiab. Yawmsaub hais rau Xatas tias, “Koj mus dabtsi los?” Xatas teb Yawmsaub tias, “Kuv mus mus los los saum lub ntiajteb thiab ncig thoob lub ntiajteb los.” Mas Yawmsaub hais rau Xatas tias, “Koj twb tshuaj saib Yauj uas yog kuv tus qhev los tsis tau? Tag nrho lub ntiajteb tsis muaj leejtwg zoo cuag li nws, nws yog tus neeg zoo tsis muaj chaw thuam li thiab ua ncaj ncees, nws hwm thiab paub ntshai Vajtswv thiab tseg tsis ua txojkev phem. Txawm yog koj tshum kom kuv tawm tsam nws ua kom nws puam tsuaj twb tsis tim li cas, los nws kuj tseem tuav rawv nws txojkev ncaj ncees.” Mas Xatas teb Yawmsaub tias, “Tawv nqaij pauv tawv nqaij. Neeg yeem muab txhua yam uas nws muaj pauv nws txojsia. Nimno koj cia li cev tes kov nws tej pob txha thiab nws cev nqaij, mas nws yuav tsawm foom koj tab meeg koj.” Yawmsaub hais rau Xatas tias, “Saib nawj, nws nyob hauv koj lub hwjchim, tsuas yog tseg nws txojsia xwb.” Xatas txawm tawm ntawm Yawmsaub xubntiag mus lawm, thiab ua rau Yauj mob rwj ua kiav txhab txij ntawm nws xib taws nto plaws saum tiaj taubhau. Yauj muab tej txhais laujkaub av los kuam nws lub cev thiab nws zaum hauv cub tshau. Mas nws tus pojniam hais rau nws tias, “Koj tseem tuav rawv koj txojkev ncaj ncees lov? Cia li tsawm foom Vajtswv thiab tuag los maj.” Yauj hais rau nws tias, “Koj hais lus yam li tej pojniam ruam hais. Peb yuav txais tej uas zoo ntawm Vajtswv txhais tes xwb es tsis txais tej uas tsis zoo thiab lov?” Tej xwm txheej no huvsi Yauj lub qhov ncauj tsis hais ib los txhaum li. Thaum Elifa uas yog neeg Themas, thiab Npida uas yog neeg Su‑a thiab Xaufa uas yog neeg Na‑ama, uas yog Yauj peb tug kwvluag tau hnov txog tej xwm txheej phem uas los raug Yauj huvsi, lawv nyias tawm hauv nyias lub tsev sib teem caij tuaj hlub Yauj thiab nplij nws lub siab. Thaum lawv tuaj deb deb pom nws lawv cim tsis tau nws. Lawv tsa suab quaj qw thiab dua rhe lawv lub tsho thiab tsuab hmoov av w ntawm lawv taubhau rau saum nruab ntug. Lawv nrog Yauj zaum hauv av tau xya hnub xya hmo, tsis muaj ib tug hais ib lo lus rau nws, rau qhov lawv pom tias nws tej kev txom nyem ntawd loj kawg li. Dhau ntawd los Yauj qheb ncauj cem foom hnub uas yug nws. Yauj hais tias, “Thov kom hnub uas yug kuv puam tsuaj, thiab hmo uas hais tias, ‘Xeeb ib tug tub lawm,’ puam tsuaj. Hnub ntawd thov cia tsaus ntuj nti, thov Vajtswv uas nyob saum ntuj tsis txhob nrhiav hnub ntawd, thov kom qhov kaj tsis txhob ci rau hnub ntawd. Thov duab tsaus thiab txojkev tsaus ntuj nti txeeb hnub ntawd cia, thov cia huab laum nkaus hnub ntawd, thov cia tej uas tsaus dub nciab ua rau hnub ntawd ntshai kawg. Hmo ntawd thov cia qhov uas tsaus ntuj nti txeeb kiag, thov tsis txhob cia hmo ntawd muaj feem ua ib hnub rau lub xyoo, thov tsis txhob cia hmo ntawd raug suav rau hauv lub hli kiag li. Thov cia hmo ntawd mooj, thov tsis txhob cia hnov suab qw zoo siab rau hmo ntawd kiag li. Thov cov uas txawj tsawm foom kuj tsawm foom hnub ntawd thiab, yog cov uas txawj txheev Leviathas. Thov cia tej hnub qub uas ci thaum yuav kaj ntug tsaus mus, thov cia hmo ntawd vam qhov pom kev los kuj tsis pom, thov tsis txhob cia pom tus duab kaj zuj zus thaum tagkis, rau qhov hmo ntawd tsis kaw kuv niam lub plab, lossis tsis muab txojkev txom nyem zais ntawm kuv lub qhov muag. “Ua cas kuv tsis tuag rau thaum nyuam qhuav yug? Ua cas kuv tsis tu siav rau thaum kuv tawm hauv plab los? Ua cas lub hauv caug yuav txais kuv cia? Ua cas muaj lub txiv mis rau kuv ntxais? Yog tsis muaj ces kuv twb pw ntsiag to lawm, kuv twb tsaug zog thiab twb tau so nrog tej vajntxwv thiab tej tub sablaj hauv ntiajteb ua ke, yog cov uas tsim tej uas pob tag dua tshiab rau lawv, thiab nrog cov thawj uas muaj kub, thiab muab nyiaj ntim puv tsev ua ke. Ua cas kuv tsis zoo li tus menyuam nchuav uas muab zais cia, yam li tej menyuam uas tsis txeev pom qhov kaj? Qhov chaw ntawd tej neeg phem tsis ntxhov siab lawm, thiab qhov chaw ntawd tus uas txog siav tau so. Qhov chaw ntawd cov uas raug kaw nyob ua ke tau zoo, lawv tsis hnov tus coj zog lub suab. Tus hlob tus yau kuj nyob qhov ntawd, tej qhev kuj dim ntawm tus lospav lawm. “Ua cas tus uas raug txom nyem tseem pom duab tshav ntuj, thiab tus uas lwj siab tseem muaj txojsia nyob? Nws tos ntsoov txojkev tuag los txojkev tuag tsis los, nws khawb nrhiav txojkev tuag heev dua li khawb nrhiav tej nyiaj uas muab zais lawd. Nws zoo siab kawg thiab xyiv fab rau thaum nws ntsib lub qhov ntxa. Ua cas yuav pub txojkev kaj rau tus uas tws kev lawm, yog tus uas Vajtswv xov laj kab thaiv cia lawm? Kuv muab qhov uas huas pa laws ua mov noj, thiab qhov uas kuv ntsaj laws kuj nchuav yam li dej los, rau qhov yam uas kuv ntshai kuj los raug kuv, thiab yam uas kuv ntshai rwg kuj poob rau saum kuv. Kuv tsis zoo siab li thiab kuv nyob tsis tus, kuv tsis tau so, kev txom nyem los raug kuv lawm.” Mas Elifa uas yog neeg Themas teb tias, “Yog leejtwg muaj siab tuab hais rau koj, koj yuav tu siab tsis tu? Txawm li ntawd los leejtwg yuav tswj tau tsis hais? Saib maj, koj twb qhuab qhia neeg coob kawg li lawm, thiab koj twb txhawb tus uas txhais tes tsaug leeg muaj zog tuaj. Koj tej lus hwj tau tus uas tabtom dawm ntog, thiab koj ua rau lub hauv caug uas tsaug leeg nyob ruaj. Tiamsis nimno los txog koj lawm thiab koj kuj poob siab, kev txom nyem los raug koj, koj kuj nyuaj siab kawg. Qhov uas koj hwm thiab paub ntshai Vajtswv yog koj kev tso siab los tsis yog? Thiab qhov uas koj xyaum zoo kawg nkaus yog koj kev vam los tsis yog? “Sim xav saib, tus uas tsis txhaum txeev puam tsuaj lov? Lossis tus uas ncaj ncees raug muab txiav pov tseg lov? Raws li kuv pom, cov uas laij txojkev ua txhaum thiab tseb txojkev ceeblaj kuj tau sau li ntawd. Vajtswv tej pa ua rau lawv puam tsuaj, thiab nws txojkev chim tshuab ua kom lawv tu noob nrho. Tus tsov ntxhuav lub suab nyooj thiab lub suab nyaum kuj ploj lawm, thiab tus thav tsov ntxhuav kaus hniav kuj lov tag lawm. Tus tsov ntxhuav uas muaj zog puam tsuaj vim tom tsis tau nqaij noj, thiab tus maum tsov ntxhuav tej menyuam khiav ua sab ua sua. “Muaj ib lo lus hais twjywm tuaj txog kuv, kuv lub qhov ntsej tau hnov lub suab sib ntxhi lo lus ntawd. Tej npau suav uas kuv pom hmo ntuj rau thaum neeg tsaug zog ceev, mas txojkev ntshai thiab txojkev tshee los raug kuv, ua rau kuv tej pob txha tshee dua rhe. Muaj ib nthwv cua tuaj ntxiag rau kuv lub plhu, ua rau kuv tej plaub ib ce xob tag. Nthwv cua ntawd tus lawm, tiamsis kuv xam tsis pom xyov zoo li cas. Muaj ib yam nyob ntawm kuv qhov muag. Txhua yam nyob ntsiag to kuv mam li hnov ib lub suab hais tias, ‘Neeg uas txawj tuag ua tau ncaj ncees rau ntawm Vajtswv lub xubntiag lov? Neeg yuav dawb huv tau rau ntawm tus uas tsim nws lub xubntiag lov? Txawm yog nws cov tub qhe los nws twb tsis tso siab rau, nws cov tubtxib saum ntuj los nws tseem suav tias lawv muaj kev txhaum. Cov uas lub cev yog av nws yimhuab suav tias txhaum heev dua, yog cov uas tiag taw rau hauv tej hmoov av, yog cov uas raug zuaj yam li tus kab npauj. Thaum hnub tawm mus txog hnub poob xwb lawv puam tsuaj tag, lawv ploj mus ib txhis tsis muaj leejtwg quav ntsej. Yog txoj hlua rub tsev ntaub raug muab rho lawm, lawv yuav tsis tuag lov? Yeej yog lawv tsis muaj tswvyim.’ Cia li tsa suab hu nimno. Muaj leejtwg yuav teb koj? Koj yuav tig mus cuag tus timtswv twg? Txojkev chim siab yuav tua tus uas ruam, txojkev sib khib yuav tua tus uas tsis thoob tsib. Kuv txeev pom tus ruam ntsia cag tob, tiamsis tamsim ntawd kuv tsawm foom nws lub chaw nyob. Nws tej tub nyob deb lub chaw tso siab plhuav, lawv raug quab yuam ntawm rooj loog uas tu plaub, tsis muaj leejtwg cawm lawv dim. Tej uas tus ruam hlais mas cov neeg tshaib muab noj lawm, txawm yog tej uas tuaj hauv cov pos los lawv muab rho mus lawm, thiab cov neeg nqhis dej raws nws tej nyiaj txiag ua txog siav qhe. Txojkev txom nyem nyuaj siab tsis yog tawm hauv hmoov av los, thiab txojkev ceeblaj tsis yog ua kaus tawm hauv av tuaj. Neeg yug los yeej yuav raug kev ceeblaj, yam li lub txim taws uas yeej ya rau saud. “Kuv tus kheej mas kuv yuav nrhiav Vajtswv, thiab muab kuv tej teeb meem tso rau Vajtswv, nws yog tus uas ua tej haujlwm loj uas paub tsis tag, thiab ua tej txujci phimhwj uas suav tsis txheeb. Nws pub nag los rau saum lub ntiajteb, thiab tso dej los rau saum tej liaj teb. Nws muab cov neeg qes tsa rau saum lub chaw siab, thiab muab cov neeg quaj ntsuag tsa rau saum lub chaw tso siab plhuav. Nws tav cov neeg ntse tej tswvyim phem, kom lawv txhais tes ua tsis tau dabtsi kom tiav. Nws siv cov neeg muaj tswvyim txojkev ntse rov ntes lawv, thiab ua rau cov neeg siab nkhaus tej tswvyim ploj ntais sai kawg. Lawv ntsib txojkev tsaus ntuj nti rau thaum nruab hnub, thiab thaum tav su los lawv xuas ib yam li hmo ntuj. Vajtswv cawm cov neeg pluag dim lub qhov ncauj hniav ntaj, thiab cawm cov uas txom nyem dim hauv cov uas muaj zog txhais tes. Cov pluag thiaj li muaj vam, thiab txojkev tu plaub tsis ncaj kaw nws lub qhov ncauj. “Saib maj, tus neeg twg uas Vajtswv ntuas kuj tau koob hmoov, yog li no tsis txhob saib tsis taus qhov uas tus muaj hwjchim loj kawg nkaus nplawm qhuab qhia. Nws ua kom mob, tiamsis nws yuav qhwv lub qhov txhab. Nws nplawm tiamsis nws txhais tes yuav kho. Nws yuav cawm koj dim hauv rau yam kev ceeblaj, hauv xya yam yuav tsis muaj xwm txheej phem los raug koj. Thaum muaj kev tshaib nqhis nws yuav txhiv koj dim hauv txojkev tuag, thaum ua rog nws yuav cawm koj dim hniav ntaj hniav riam. Yuav muab koj zais ntawm tus nplaig uas xyav tsis zoo, thiab koj yuav tsis ntshai thaum kev puam tsuaj los txog. Koj yuav luag txojkev puam tsuaj thiab txojkev tshaib nqhis, thiab koj yuav tsis ntshai tej tsiaj qus hauv lub ntiajteb. Koj yuav nrog tej pob zeb hauv daim teb sib raug zoo, thiab tej tsiaj qus yuav nrog koj nyob zoo zoo. Koj yuav paub tias koj lub tsev ntaub nyob tso siab plhuav, koj tshuaj saib koj lub nkuaj yaj yuav tsis ploj ib tug li. Koj yuav paub tias koj caj ces yuav coob kawg, thiab koj tej tub ki yuav zoo yam nkaus li tej nroj tsuag hauv ntiajteb. Koj yuav los rau hauv koj lub qhov ntxa rau thaum koj laus heev lawm, yam li tej tes qoob uas coj los rau hauv tshav ntaus qoob raws li lub caij lub nyoog. Tej no yog tej uas peb tau tshuaj saib los, muaj tseeb. Cia li mloog thiab kawm paub thiaj muaj qabhau rau koj.” Mas Yauj teb tias, “Au, kuv xav muab kuv tej kev ntxhov siab luj, thiab muab kuv tej kev txom nyem huvsi tso rau saum rab teev. Mas yuav hnyav dua tej xuab zeb hauv hiavtxwv, vim li no kuv tej lus thiaj tawm ua kub lug. Vim tus uas muaj hwjchim loj kawg nkaus rab xub chob kuv, kuv tus plig haus tej kua xub tshuaj, txojkev ntshai uas tuaj ntawm Vajtswv npaj txhij tuaj tawm tsam kuv. Nees luav qus yuav quaj rau thaum nws muaj zaub noj lov? Txiv nyuj yuav nqov rau saum nws pawg zaub lov? Yuav noj zaub tsuag tsis rau ntsev tau lov? Thiab txiv thwj ywg cov kua mis qab li cas? Tej yam ntawd kuv lub siab tsis xav kov kiag li, txhua yam zaub mov ntawd kuv dhuav tag. “Au, kuv xav tau raws li kuv thov, thiab xav kom Vajtswv pub raws li uas kuv lub siab ntshaw. thiab xav tias Vajtswv txaus siab muab kuv zuaj, thiab tsis txhob nkaum tes rau qhov uas muab kuv txiav pov tseg. Qhov no yuav nplij tau kuv lub siab, txawm yog kuv mob tsis tu li los kuv yuav zoo siab kawg, rau qhov kuv tsis tau kwv tawv tus uas Dawb huv tej lus. Kuv muaj zog li cas es kuv yuav tsum tos? Thiab kuv qhov kawg yog dabtsi es kuv yuav tsum ua siab ntev thev? Kuv lub zog zoo li tej pob zeb lov, kuv tej nqaij yog nqaij tooj liab lov? Kuv tus kheej pab tsis tau kuv, txhua txojkev pab khiav ntawm kuv lawm. “Leejtwg tav txojkev hlub ntawm tus kwvluag, kuj yog tso qhov uas hwm thiab ntshai tus uas muaj hwjchim loj kawg nkaus tseg. Kuv cov kwvtij pheej ntxeev ntxias yam li lub hav dej, yam li lub hav dej uas qhuav zuj zus, uas tsaus nti vim yog dej nkoog khov thiab tej daus xib daus npu npog txheej saud. Thaum tshav ntuj kub kuj yaj tag, thaum tshav ntuj kub heev kuj ploj tag ntawm lub chaw lawm. Cov tub lag tub luam uas taug kev kuj tig lug ntawm lawv txojkev, lawv mus rau tej ntuj nrag teb do thiab puam tsuaj tag. Cov neeg uas taug kev ntawm Thema tuaj nrhiav, cov tub lag tub luam uas taug kev ntawm lub moos Senpa muaj chaw vam. Lawv plam vim yog lawv vam ntsoov, lawv tuaj txog qhov ntawd mas lawv nyuaj siab heev. Nimno nej zoo ib yam li ntawd rau kuv, nej pom kuv tej kev txom nyem mas nej ntshai. Kuv puas tau hais tias, ‘Thov pub mentsis tshav ntuj rau kuv,’ lossis ‘Thov nej li nyiaj rau kuv coj mus xiab luag,’ lossis ‘Thov cawm kuv dim hauv yeeb ncuab txhais tes,’ lossis ‘Thov txhiv kuv dim hauv tus uas quab yuam kuv txhais tes,’ lov? “Qhia kuv maj, kuv thiaj nyob twjywm, thov qhia rau kuv to taub kuv ua txhaum qhov twg. Lo lus hais ncaj muaj hwjchim heev, tiamsis nej lo lus ntuas yog ntuas dabtsi? Nej xav tias nej qhuab ntuas kuv tej lus thiab saib tus uas tsis muaj chaw vam tej lus zoo li cua xwb lov? Nej yeej yuav rho ntawv thiaj tau tus menyuam ntsuag uas tsis muaj txiv, thiab yuav muab nej tus kwvluag ntaus nqe muag los sav. “Nimno thov nej tsa muag ntsia kuv, rau qhov tsis yog kuv tab meeg dag nej. Thov nej xav dua tshiab tsis txhob ua tsis ncaj. Thov ntxeev dua siab, kuv tseem ua raug cai. Kuv tus nplaig hais ib yam dabtsi tsis ncaj lov? Kuv tus nplaig tsis txawj sim paub kev txom nyem lov? Neeg tsis ua haujlwm khwv khwv hauv ntiajteb no lov? Thiab lawv lub neej zoo tsis thooj li cov uas ua zog lov? Ib yam li tus qhev tos nrhw duab tsaus ntuj, thiab yam li tus tub zog uas tos rawv cov nqe zog, ib yam li ntawd kuv li feem yog nyob ntau lub hli qhuav qhawv, thiab tej uas faib rau kuv yog hmo ntuj raug kev txhawj xeeb ntxhov siab. Thaum kuv pw kuv hais tias, ‘Thaum twg kuv li sawv?’ Tiamsis hmo ntuj kuj ntev, kuv ntxeev mus ntxeev los txog kaj ntug. Kuv tej nqaij muaj kas lwj thiab lo hmoov av, kuv daim tawv tu pleb pluav thiab rov ua kua paug. Kuv lub hnub nyoog sai dhau tus nqos uas tabtom ntos ntaub, mas thaum kawg kuj tsis muaj chaw vam. “Vajtswv, thov nco tias kuv txojsia tsuas ntev li ua ib pas cua xwb, kuv lub qhov muag yuav tsis pom qhov zoo dua li lawm. Tus uas lub qhov muag pom kuv yuav tsis pom kuv dua li lawm, thaum koj lub qhov muag saib ntsoov kuv los twb dua kuv lawm. Tej huab yaj xam tag li cas, tus uas mus rau hauv tub tuag teb yeej tsis rov los ib yam li ntawd. Nws tsis rov mus rau hauv nws lub tsev dua li lawm, thiab nws lub chaw nyob los tsis paub nws li lawm. “Vim li no kuv thiaj tsis tswj kuv lub qhov ncauj, kuv tus ntsuj plig txom nyem lwj siab kuv thiaj hais, iab kuv lub siab kawg kuv thiaj yws. Kuv yog hiavtxwv lossis yog ib tug zaj koj thiaj zov kuv lov? Thaum kuv hais tias, ‘Kuv lub txaj yuav nplij kuv lub siab, kuv lub chaw pw yuav pab kuv txojkev txom nyem kom yau zuj zus,’ los koj ua rau kuv ua npau suav ntshai heev, thiab ua rau kuv ua yog toog ua rau kuv ntshai, kuv thiaj xaiv qhov uas raug zawm caj dab tuag, zoo dua li tshuav tej pob txha no. Kuv ntxub kuv txojsia lawm, kuv tsis xav nyob mus ib txhis. Thov tso cia kuv nyob kuv ib leeg vim kuv lub hnub nyoog ntev li ua ib pas cua xwb. Neeg yog dabtsi es koj yuav suav tias tseem ceeb heev, thiab koj yuav mob siab lawv, thiab niaj tagkis tuaj xyuas lawv, thiab sim lawv txhua lub sijhawm? Koj yuav tsis fee plhu ntawm kuv ib nyuag pliag thiab tsis tso kuv nyob kuv ib leeg ntev li uas kuv nqos ib pa qaub ncaug lov? Au koj uas yog tus uas zov neeg, yog kuv ua txhaum kuv tau ua li cas rau koj lawm? Ua cas koj muab kuv ua daim phiaj rau koj? Ua cas kuv ua lub nra hnyav rau koj lawm? Ua cas koj tsis zam kuv tej kev fav xeeb thiab tsis daws kuv lub txim mus pov tseg? Rau qhov nimno kuv yuav pw rau hauv av, koj yuav nrhiav kuv tiamsis tsis muaj kuv lawm.” Ces Npida uas yog neeg Su‑a teb tias, “Koj yuav yws li no ntev li cas thiab tej lus uas tawm hauv koj lub qhov ncauj yuav ua cua daj cua dub ntev li cas? Vajtswv ntxeev txojkev ua ncaj lov? Tus uas muaj hwjchim loj kawg nkaus qhau cai lov? Yog koj li menyuam ua txhaum rau Vajtswv nws thiaj rau txim rau lawv raws li lawv tej kev fav xeeb. Yog koj nrhiav Vajtswv thiab taij thov tus uas muaj hwjchim loj kawg nkaus, yog koj dawb huv thiab siab ncaj mas nws yuav sawv tsees pab koj, thiab yuav thim lub chaw uas yog koj teej koj tug rov rau koj. Txawm yog thaum chiv thawj koj me me xwb, los thaum kawg koj yuav ua loj kawg. Kuv thov kom koj nug txog yav thaum ub, thiab xav saib tej poj koob yawm txwv nrhiav tau yam twg, rau qhov peb nyuam qhuav yug nag hmo xwb mas tsis paub dabtsi li, vim peb lub caij lub nyoog saum lub ntiajteb yog tus duab xwb. Lawv yuav tsis qhuab qhia koj thiab tsis hais rau koj lov, thiab tsis hais tej uas lawv nkag siab rau koj lov? Tauj deg yuav tuaj rau hauv qhov uas tsis muaj pas iav tau lov? Pias iav yuav hlob zoo rau hauv qhov tsis muaj dej tau lov? Thaum txhawv lawm tsis tau muab txiav, los twb qhuav nkig nkuav ua ntej dua lwm yam ntoo. Txhua tus uas tsis nco Vajtswv lawd kuj zoo li ntawd ntag. Cov uas tsis hwm Vajtswv lawv lub chaw vam yuav puam tsuaj tag. Yam uas lawv tso siab rau kuj lov ntho lawm, thiab tej uas lawv cia siab rau yog sab kab laug tsov. Yog lawv pheeb tej sab kab laug tsov tej sab ntawd tu, lawv tuav tej sab ntawd tiamsis tej sab ntawd tsis ruaj. Lawv zoo li tsob ntoo uas muaj dej yug rau thaum tshav ntuj kub, thiab lawv tej ntsuag hlav mus puv nkaus lawv lub vaj. Lawv tej cag kuj nrhau mus tuav tej pob zeb, thiab ntsia mus rau hauv tej kem pob zeb. Yog tsob ntoo raug muab ua puam tsuaj tag ntawm nws lub chaw, lub chaw ntawd yuav tsis lees paub nws thiab hais tias, ‘Kuv tsis txeev pom dua koj.’ Saib maj, no yog lawv txojkev xyiv fab, thiab lwm tus yuav ua kaus tawm hauv av tuaj. “Vajtswv yeej yuav tsis tso tus neeg zoo tseg, lossis tuav tus neeg ua phem tes. Nws tseem yuav pub koj lub qhov ncauj luag puv nkaus, thiab ua rau koj daim tawv ncauj qw zoo siab. Cov uas ntxub koj yuav raug txaj muag, thiab cov neeg phem lub tsev ntaub yuav tsis muaj dua li lawm.” Yauj teb tias, “Qhov tseeb kuv paub tias yog li ntawd, tiamsis neeg yuav ua ncaj rau ntawm Vajtswv xubntiag tau li cas? Yog leejtwg xav nrog Vajtswv sib cam, mas ib txhiab zaug los nws twb teb tsis tau Vajtswv ib zaug. Vajtswv lub siab ntse, thiab nws muaj zog heev, leejtwg txeev tawm tsam nws thiab kov yeej? Nws yog tus uas muab tej roob txav los tej roob kuj tsis paub, rau thaum nws muab tej roob ntxeev ua chim tsawv. Nws co lub ntiajteb txav ntawm lub qub chaw, thiab tej ncej uas txawb lub ntiajteb kuj ua zog kais. Nws nkaw lus rau lub hnub mas lub hnub tsis tawm tuaj, nws thaiv tej hnub qub tsis pub ci tuaj. Nws tib leeg nthuav lub ntuj, thiab tsuj tej nthwv dej hauv hiavtxwv. Nws tsim hnub qub Khais thiab hnub qub Poj Sua Kwv Ntas thiab hnub qub Txhiaj Txiv Mim thiab tej hnub qub sab nrad. Nws ua tej haujlwm loj uas tsis txawj nkag siab tau, thiab tej txujci phimhwj suav tsis txheeb. Ua ciav, nws hla kuv mus lawm, kuv twb tsis pom nws, nws mus dhau lawm, kuv twb xam tsis pom nws. Saib maj, nws txeeb kiag mus lawm, leejtwg yuav txwv tau? Leejtwg yuav hais rau nws tias, ‘Koj ua dabtsi li kod?’ “Vajtswv yuav tsis thim nws txojkev chim. Tus zaj laug Lahaj cov qhev khwb nkaus hauv nws xib taws. Mas kuv yuav teb tau Vajtswv li cas, yuav xaiv lo lus twg los cam nws? Txawm yog kuv tsis txhaum, kuv kuj teb tsis tau nws, kuv yuav thov tus yeej kom khuvleej kuv xwb. Yog kuv hu nws tuaj thiab nws teb kuv, los kuv tsis ntseeg tias nws yuav mloog kuv lus, rau qhov nws siv cua daj cua dub zuaj kuv, txawm yog tsis tim li cas los nws ua rau kuv mob hnyav zuj zus tuaj. Nws tsis pub kuv ua tau pa li, tsuas yog tsav kev lwj siab puv nkaus rau kuv xwb. Yog muaj kev sib ntsuas zog, kuj saib Vajtswv maj. Yog ua plaub ntug leejtwg yuav teem tau nws tuaj? Txawm yog kuv tsis txhaum, los kuv lub qhov ncauj yuav hais kuv qhov txhaum, Txawm yog kuv zoo kawg, nws yuav tshuaj tau tias kuv tsis ncaj. Kuv zoo tsis muaj chaw thuam li, kuv tsis mob siab kuv tus kheej, kuv ntxub kuv txojsia. Sawvdaws zoo ib yam nkaus, vim li ntawd kuv thiaj hais tias, ‘Nws ua rau cov neeg zoo thiab cov neeg limhiam puam tsuaj huvsi.’ Thaum tej vij sub vij sw coj kev tuag los tamsid, nws kuj thuam luag cov uas tsis txhaum tej kev txom nyem. Lub ntiajteb muab cob rau hauv cov neeg limhiam txhais tes. Nws npog cov uas tu plaub hauv lub ntiajteb lub qhov muag. Tsis yog nws es yog leejtwg? “Kuv li hnub nyoog mus sai dhau cov uas txawj dhia, mus dhau plaws lawm tsis pom ib qhov zoo kiag li. Hnub nyoog dhau plaws yam li lub nkoj uas xuas pias iav ua, yam nkaus li tus dav ya uas ntsaub ntsuav los rau tus qauv. Yog kuv hais tias, ‘Kuv yuav tsis nco qab kuv txojkev quaj txom nyem, thiab kuv yuav tso kuv lub ntsej muag mluas mlob tseg thiab xyiv fab,’ kuv kuj ntshai kuv tej kev txom nyem huvsi, rau qhov kuv paub tias koj yuav tsis suav hais tias kuv tsis txhaum. Kuv yeej yuav raug rau txim, mas kuv yuav siv zog do do ua dabtsi? Yog kuv muab daus xib daus npu los ntxuav kuv, thiab muab kua tshuaj los ntxuav kuv txhais tes, los koj tseem yuav muab kuv raus rau hauv lub qhov dej qias, thiab kuv tej ris tsho yuav ntxub kuv. Vajtswv tsis yog neeg zoo li kuv uas kuv yuav teb nws, thiab tuaj nrog nws ua plaub. Tsis muaj ib tug uas nyob nruab nrab wb ob tog, ua tus uas cheem tau wb ob leeg. Thov nws tshem nws tus nplawm ntawm kuv mus, thiab thov qhov uas ntshai rwg nws tsis txhob ua rau kuv ntshai. Mas kuv yuav hais thiab thiaj tsis ntshai nws, rau qhov nimno kuv lub siab ua tsis tau li ntawd. Kuv ntxub kuv txojsia, kuv yuav tsis tswj kuv tej lus yws li, kuv yuav hais kuv tej kev lwj siab. Kuv yuav hais rau Vajtswv tias, Tsis txhob rau txim rau kuv, thov koj qhia kuv paub tias ua cas koj tawm tsam kuv. Koj pom zoo quab yuam kuv thiab saib tsis taus tej uas yog koj txhais tes ua lov, thiab pom zoo rau cov neeg phem tej tswvyim lov? Koj muaj qhov muag yam li neeg xwb lov? Koj pom yam li neeg pom lov? Koj hnub nyoog zoo ib yam li neeg hnub nyoog lov, thiab koj tej xyoo zoo ib yam li neeg xyoo xwb lov? Es koj yuav tshawb nrhiav kuv tej kev txhaum thiab nrhiav kuv lub txim. Koj yeej paub tias kuv tsis txhaum thiab tsis muaj leejtwg cawm kuv dim ntawm koj txhais tes. Koj txhais tes puab thiab tsim kuv, tiamsis nimno koj tig rov qab muab kuv ua puam tsuaj. Thov koj nco tias koj puab kuv yam li puab av nplaum, mas koj yuav tso kuv rov mus ua hmoov av dua lov? Koj tsis tau muab kuv nchuav los yam li cov kua mis lov, thiab tsis ua rau kuv khov yam li cov nyuj mis nkoog khov lov? Koj muab nqaij thiab tawv los qhwv kuv, thiab koj muab pob txha thiab leeg txuas ua kuv lub cev. Koj pub txojsia thiab txojkev hlub uas ruaj khov rau kuv, thiab saib xyuas tsom kwm kuv tus ntsuj plig cia. Tiamsis tej yam no koj muab zais cia rau hauv koj lub siab, kuv paub tias yeej yog raws li koj lub siab. Yog kuv ua txhaum koj yeej ntsia ntsoov kuv, thiab tsis tso kuv dim kuv txojkev txhaum li. Yog kuv ua phem, kuv yeej yuav raug kev txom nyem. Tiamsis yog kuv ncaj ncees kuv tseem tsa tsis taus kuv lub taubhau, rau qhov kuv raug txaj muag kawg thiab ntsia ntsoov kuv tej kev txom nyem nyuaj siab. Thiab yog kuv tsa kuv taubhau, koj yuav caum kuv yam li tsov ntxhuav, thiab rov ua txujci phimhwj dua tawm tsam kuv. Koj nrhiav timkhawv tshiab tom kuv dua, thiab tsav koj txojkev chim rau kuv heev dua, thiab koj coj tub rog tshiab tuaj tawm tsam kuv. “Ua cas koj tso kuv tawm hauv lub plab los? Kheev yog kuv tuag ua ntej uas luag yuav pom kuv, thiab zoo yam li kuv tsis tau yug los thiab twb raug coj hauv plab mus txog lub qhov ntxa lawm. Kuv lub caij lub nyoog tsawg tsawg li los tsis yog? Thov cia kuv nyob kuv ib leeg xwv kuv thiaj zoo siab mentsis, ua ntej uas kuv tsis tau mus rau lub chaw uas kuv tsis rov los li lawm, yog mus rau lub tebchaws uas muaj duab tsaus thiab tsaus ntuj nti, yog lub tebchaws tsaus dub nciab ntxhov hnyo, uas qhov kaj kuj zoo yam nkaus li qhov tsaus.” Ces Xaufa uas yog neeg Na‑ama txawm teb tias, “Tsim nyog mloog tej lus ntau ntau es tsis teb lov? Thiab tsa tus uas hais ntau ntau cai lov? Tsim nyog koj tej lus uas tsis muaj qabhau ua rau neeg nyob ntsiag to lov, thiab thaum koj thuam luag yuav tsis muaj leejtwg ua kom koj txaj muag lov? Rau qhov koj hais tias, ‘Kuv tej lus qhia dawb huv, thiab kuv yog tus uas Vajtswv pom tias huv siab.’ Au, kuv xav kom Vajtswv hais, thiab qheb nws lub qhov ncauj hais rau koj, thiab xav kom nws qhia tus tswvyim uas muab zais cia lawd rau koj, rau qhov tswvyim muaj ntau fab. Cia li paub tias Vajtswv rau txim rau koj tsawg dua tej uas tsim nyog koj raug. “Koj tshawb nrhiav tau tej uas nyob tob rau hauv Vajtswv lov? Koj tshawb nrhiav tau tus uas muaj hwjchim loj kawg nkaus lub siab tag nrho huvsi lov? Tej ntawd siab dhau lub ntuj mas koj yuav ua tau dabtsi? Tej ntawd tob dhau hauv tub tuag teb mas koj yuav paub tau li cas? Muab ntsuas kuj ntev dhau lub ntiajteb, thiab dav dhau dej hiavtxwv. Yog nws hla mus thiab muab ib tug kaw nkuaj, thiab hu los txiav txim rau, leejtwg yuav tav tau nws? Rau qhov nws paub cov neeg tsis muaj qabhau, thaum nws pom tej kev txhaum nws yuav tsis ua tib zoo tshuaj saib lov? Tiamsis tus neeg ruam yuav txawj ntse, tsuas yog thaum nees luav qus yug tau menyuam yog neeg. “Yog koj npaj koj lub siab ncaj, koj yuav xyab koj txhais tes mus rau nws. Yog muaj kev txhaum txim nyob hauv koj txhais tes cia li muab pov tseg deb deb, thiab tsis txhob cia tej kev phem nyob hauv koj lub tsev ntaub. Mas koj yuav tsa koj lub ntsej muag tsis muaj chaw thuam tiag tiag li, koj yuav nyob tso siab plhuav thiab tsis ntshai. Koj yuav tsis nco qab koj tej kev txom nyem, koj yuav cim tau yam li tej dej uas twb ntws dhau mus lawm. Mas koj lub neej yuav kaj lug heev dua thaum tav su, koj lub neej uas tsaus ntuj nti yuav kaj yam li thaum tagkis. Koj yuav tso siab plhuav vim muaj chaw vam, koj yuav tshuaj saib puag ncig thiab so tso siab lug. Koj yuav pw thiab yuav tsis muaj leejtwg ua rau koj ntshai, yuav muaj neeg coob tuaj thov koj tsa muag zaj saib lawv. Tiamsis cov neeg limhiam lub qhov muag yuav tsaus mus, thiab txojkev dim yuav ploj ntais ntawm lawv lawm, lawv txojkev vam yog qhov uas lawv tu siav xwb.” Mas Yauj teb tias, “Qhov tseeb nej yeej yog neeg tseem ceeb, thiab tej tswvyim yuav nrog nej tuag mus. Kuv yeej to taub ib yam li nej thiab kuv tsis qes dua nej. Tej nyuag zoo li no leejtwg yuav tsis paub? Kuv ua lub chaw rau kuv cov phoojywg luag. Kuv txeev thov Vajtswv mas nws teb kuv, kuv ua tus ncaj ncees thiab tsis muaj chaw thuam los kuv tseem ua lub chaw rau luag thuam luag. Tus uas noj qab nyob zoo lub siab saib tsis taus lub khuab phem, uas yeej muaj rau cov uas txhais kotaw plam. Cov tub sab tej tsev ntaub nyob siab tus yees, thiab cov uas zes Vajtswv kuj nyob tso siab plhuav, yog cov uas lawv tus vajtswv nyob hauv lawv txhais tes. “Cia li nug tej tsiaj txhu mas tej tsiaj yuav qhuab qhia koj, cia li nug tej nas noog saum nruab ntug, tej noog yuav qhia koj. Lossis nug lub ntiajteb mas ntiajteb yuav qhuab qhia koj, thiab tej ntses hauv hiavtxwv yuav piav rau koj. Txhua yam no muaj yam twg uas tsis paub tias yog Yawmsaub txhais tes tau ua tej no? Txhua yam uas ciaj sia mas lawv txojsia nyob hauv Vajtswv txhais tes, thiab neeg sawvdaws tej pa huvsi kuj nyob hauv. Lub qhov ntsej tsis tau sim tej lus ib yam li tus nplaig sim tej zaub mov lov? Tswvyim nrog cov neeg laus nyob, thiab kev nkag siab nrog cov uas hnub nyoog nchav nyob. Tswvyim thiab hwjchim yeej nrog nraim Vajtswv, nws txawj taw qhia thiab muaj kev nkag siab. Yog nws muab rhuav lawm, tsis muaj leejtwg tsim tau dua tshiab, yog nws muab leejtwg kaw lawm, tsis muaj leejtwg tso tau. Yog nws txwv dej mas dej yuav qhuav, yog nws tso dej tawm mus, dej kuj nyab ntiajteb. Lub zog thiab tswvyim nrog nraim nws, tus uas raug dag ntxias thiab tus uas dag puavleej yog nws li. Nws coj cov uas ua chaw sablaj mus nyob do cuas, thiab ua rau cov uas tu plaub ruam mus. Nws daws tej saw hlau uas vajntxwv khi luag, thiab ua siv rau tej vajntxwv sia ntawm duav. Nws coj cov povthawj mus nyob do cuas, thiab muab cov uas muaj hwjchim laim pov tseg. Nws ua rau cov uas luag tso siab tau nyob ntsiag to, thiab nws muab cov kev txwj laus tej kev txawj ntse rho mus. Nws rhuav tshem cov uas ua thawj lub meej mom, thiab nws daws cov uas muaj zog txoj siv tawv. Nws coj tej uas nyob tob tawm hauv qhov tsaus ntuj los, thiab coj txojkev tsaus ntuj nti los rau hauv txojkev kaj. Nws ua tau rau tej tebchaws loj tuaj thiab muab ua kom puam tsuaj. Nws nthuav tej tebchaws dav tuaj thiab ua rau lawv tawg ua sab ua sua. Nws rho txojkev txawj ntse tawm ntawm cov uas ua hlob hauv ntiajteb mus, thiab ua kom lawv mus mus los los hauv tebchaws moj sab qhua uas tsis muaj kev taug. Lawv xuas dub hauv qhov tsaus ntuj tsis muaj qhov kaj li, thiab nws ua kom lawv ntog nuj nuag yam li tus uas qaug cawv. Saib maj, kuv lub qhov muag twb pom tej no huvsi lawm, kuv lub qhov ntsej tau hnov thiab nkag siab tej no lawm. Tej yam uas nej paub kuv kuj paub thiab, kuv tsis qes dua nej. Tiamsis kuv xav hais rau tus uas muaj hwjchim loj kawg nkaus, thiab kuv xav nrog Vajtswv hais plaub. Nej mas tsuas yog muab tej lus dag los npog nej xwb, nej sawvdaws yog cov Kws tshuaj uas tsis txawj kho. Au, xav kom nej nyob twjywm, mas qhov uas nyob twjywm ntawd yuav yog nej lub tswvyim. “Nimno nej cia li mloog kuv tej lus hais plaub, thiab mloog tej lus uas kuv lub qhov ncauj taij thov. Nej hais lus dag pab Vajtswv thiab hais lus ntxias pab nws lov? Nej yuav tuaj nws tog, thiab nej yuav pab Vajtswv hais lov? Thaum nws nrhiav xawb tau nej, nej yuav tau zoo lov? Lossis nej yuav dag tau nws yam li dag neeg lov? Yog nej tuaj nws tog twjywm, nws yuav cem nej tiag tiag li. Nws lub hwjchim meej mom yuav tsis ua rau nej ntshai kawg lov, thiab qhov uas ntshai rwg nws yuav tsis poob rau saum nej lov? Nej tej paj lug yog tshauv xwb, thiab nej tej cuab yeej tiv thaiv yog muab av nplaum ua xwb. “Cia li nyob twjywm, kuv yuav hais, thiab yuav muaj dabtsi tshwm los raug kuv kuj xij. Ua cas kuv yuav tsum sev nyog kuv cev nqaij, thiab pheej hmoo ua kuv lub neej? Saib maj, nws yuav muab kuv tua, kuv tsis muaj vam li lawm, tiamsis kuv tseem yuav hais daws kuv zaj ntawm nws xubntiag. Qhov no yuav ua txojkev dim rau kuv, tus uas tsis hwm Vajtswv mas yuav tsis tau los rau ntawm nws xubntiag. Cia li ua tib zoo mloog kuv tej lus thiab cia kuv tej lus nyob hauv nej lub qhov ntsej. Kuv twb npaj hais kuv tshaj plaub lawm, kuv paub tias kuv yuav muaj cai. Leejtwg yuav nrog kuv kom plaub? Yog muaj mas kuv yuav nyob twjywm thiab tuag. Thov pub ob yam rau kuv, mas kuv yuav tsis tsiv nraim ntawm koj lub xubntiag. Thov koj nkaum tes deb ntawm kuv, thiab txhob cia qhov uas ntshai rwg koj ua rau kuv ntshai. Cia koj hu mas kuv yuav teb lossis cia kuv hais mas koj teb rau kuv. Kuv tej kev txhaum thiab kuv lub txim muaj npaum twg? Thov qhia rau kuv paub kuv tej kev fav xeeb thiab kuv lub txim. Ua cas koj fee plhu lawm thiab suav tias kuv yog koj li yeeb ncuab? Koj yuav ua rau daim nplooj ntoo uas raug cua ntsawj ntshai thiab yuav raws tej quav nyab qhuav lov? Koj muab tej uas lwj siab sau cia tawm tsam kuv, thiab ua rau kuv tau lub txim uas thaum tseem hluas kuv ua. Koj muab kuv txhais kotaw tso rau hauv rab cuab, thiab ntsia ntsoov kuv txhua txoj hauv kev, thiab koj tu ciam rau kuv xib taws tsuj. Neeg sem zuj zus li tej yam uas lwj, thiab yam li tej tsoos tsho uas kab ntsaum noj. Neeg uas yug ntawm pojniam los mas txojsia tsis ntev, thiab tsuas yog muaj kev ceeblaj txom nyem xwb. Nws tawm los yam li lub paj ntoo thiab tuag tshav lawm, nws ploj ntais yam li tus duab ntxoov ntxoo thiab tsis nyob mus li. Vajtswv, koj yuav tsa muag ntsia cov neeg zoo li ntawd thiab coj nws los rau koj txiav txim lov? Leejtwg yuav coj yam uas huv tawm ntawm qhov tsis huv tau? Tsis muaj leejtwg kiag li. Nws lub hnub nyoog raug muab teem cia lawm, thiab nws li txhua lub hli nyob ntawm koj, thiab koj tu ciam rau nws tsis kheev nws hla dhau mus. Thov koj fee plhu ntawm nws mus thiab muab nws tso tseg, xwv nws thiaj zoo siab rau nws sim neej yam li tus tub zog. “Rau qhov tus ntoo los tseem muaj vam, yog raug muab ntov lawm tseem hlav ntsuag tuaj, thiab tej ntsuag mos yuav muaj tsis tu ncua. Txawm yog tej cag laus rau hauv av, thiab lub hauv paus tuag rau hauv av lawm, los thaum hnov pa dej pa nag yuav tawg cos, thiab hlav ntsuag tuaj yam li tsob ntoo mos. Tiamsis neeg tuag thiab ntog lawm, neeg tu siav lawm nws nyob qhovtwg? Dej qhuav hauv lub pas li cas, thiab tej niag dej nqeg zuj zus qhuav tag li cas, ib yam li ntawd, neeg pw mas yuav tsis sawv los li, mus txog thaum lub ntuj tsis muaj lawm, nws kuj tsis tsim los, tsa tsis tau nws sawv li. Au kuv xav kom koj muab kuv zais rau hauv tub tuag teb, xav kom koj muab kuv npog cia mus txog thaum koj tsis npau taws lawm, thiab xav kom koj teem lub sijhawm rau kuv thiab nco txog kuv. Yog neeg tuag lawm nws yuav rov muaj txojsia lov? Txhua hnub uas kuv khwv li no kuv yuav tos nrhw mus txog thaum koj tso kuv dim. Koj yuav hu thiab kuv yuav teb koj, koj yuav xav tau tus uas koj txhais tes tsim. Thaum ntawd koj yuav suav kuv txhua kauj ruam, tiamsis koj yuav tsis ntsia ntsoov kuv qhov txhaum. Kuv tej kev fav xeeb yuav raug muab kaw cia rau hauv lub hnab, thiab koj yuav muab kuv tej kev txhaum txim npog cia. “Tej roob nphau pob tag, tej txhib zeb raug muab txav mus rau lwm qhov, dej ntws tej pob zeb yaig zuj zus, dej ntsawj kuav tej hmoov av mus, mas koj rhuav tshem neeg txojkev vam ib yam li ntawd. Koj kov yeej nws mus li nws thiaj dua tag lawm, koj hloov nws lub ntsej muag thiab xa nws mus. Nws tej tub tau koob meej los nws tsis paub, lawv poob qes los nws tsis pom. Nws tsuas yog hnov nws lub cev mob, thiab nws quaj ntsuag rau nws tus kheej.” Mas Elifa uas yog neeg Themas teb tias “Tsim nyog tus uas muaj tswvyim yuav teb tej lus huab lus cua, thiab ntim tej cua sab hnub tuaj puv nkaus nws lub cev lov? Tsim nyog nws yuav cav tej lus uas tsis muaj qabhau, thiab tej lus uas tsis muaj nqes lov? Koj tseem rhuav tshem qhov uas hwm thiab paub ntshai Vajtswv tseg, thiab tav qhov uas tshawb nrhiav Vajtswv los sas. Koj tej kev txhaum qhia koj lub qhov ncauj, thiab koj xaiv tej neeg ntse tus nplaig hais. Koj lub qhov ncauj hais tias koj txhaum, tsis yog kuv hais, thiab koj daim tawv ncauj tom koj tus kheej. Koj yog thawj tug neeg uas yug los lov? Lossis koj yug ua ntej tej pov roob lov? Hauv Vajtswv lub rooj sablaj koj nyob ntawd mloog lov? Thiab koj suav tias koj tib leeg xwb thiaj muaj tswvyim lov? Koj paub dabtsi uas peb tsis paub? Koj nkag siab dabtsi uas peb tsis nkag siab? Hauv peb cov muaj cov uas hnub nyoog nchav thiab dawb hau, yog cov uas laus dua koj txiv. Koj pom tias tej lus uas Vajtswv nplij siab thiab tej lus hais mos hais muag rau koj me dhau rau koj lov? Ua li cas koj lub siab coj koj mus yuam kev, thiab ua cas koj lub qhov muag liab khiav, es koj ntxeev siab tawm tsam Vajtswv thiab cia tej lus no tawm hauv koj lub qhov ncauj los? Neeg yog dabtsi, lawv thiaj dawb huv tau? Tus uas yug ntawm pojniam los yog dabtsi, nws thiaj ncaj ncees tau? Saib maj, Vajtswv tsis tso siab rau nws cov tubtxib saum ntuj uas dawb huv, thiab nws lub qhov muag pom lub ntuj kuj tsis huv. Tus uas qias vuab tsuab thiab ua phem ua qias, tus uas haus kev txhaum ib yam li haus dej yimhuab tsis huv siab. “Mloog kuv hais, kuv yuav qhia rau koj, kuv yuav hais tej uas kuv pom, yog tej uas cov neeg uas muaj tswvyim tau hais lus, thiab lawv tej poj koob yawm txwv tsis tau muab zais cia. Muab lub tebchaws pub rau lawv tib co xwb, tsis muaj lwm haiv neeg tuaj hla hauv lawv kiag li. Tus neeg limhiam yuav raug txom nyem mus tag lawv sim neej, yog tag txhua xyoo uas tu rau tus uas quab yuam tsim txom luag. Lub suab uas txaus ntshai nyob hauv nws lub qhov ntsej, tub sab yuav tuaj lws rau thaum tus ntawd vam meej. Nws tsis ntseeg tias nws yuav rov tawm tau hauv txojkev tsaus ntuj los, mas twb teem cia rau nws tuag hniav ntaj. Nws mus mus los los nrhiav mov noj hais tias, ‘Nyob qhovtwg nev?’ Nws paub tias hnub tsaus ntuj nyob ti nkaus nws. Kev txom nyem nyuaj siab thiab kev lwj siab ua rau nws ntshai, thiab kov yeej nws yam li tus vajntxwv npaj txhij ua rog. Twb yog vim nws tsa tes tawm tsam Vajtswv, thiab khav ntxhias twv tus uas muaj hwjchim loj kawg nkaus, nws ua siab tawv dhia mus tawm tsam Vajtswv thiab coj daim hlau tiv thaiv uas tuab. Vim nws noj zoo zoo nws lub plhu thiaj rog tuaj, thiab sau zog pav ywj rau ntawm nws lub duav, nws thiaj yuav nyob hauv tej moos uas raug puam tsuaj lawd, nyob hauv tej tsev uas tsis tsim nyog neeg nyob, uas twb teem tseg cia kom pob tag ua tej niag pawg. Nws yuav tsis nplua nuj thiab tej nyiaj txiag yuav nyob tsis ruaj, thiab nws tej cuab txhiaj cuab tam yuav tsis tsav rau hauv lub tebchaws. Nws yuav khiav tsis dim qhov tsaus ntuj, nplaim taws yuav plhov nws tej ntsuag qhuav lawm, thiab tej pa ntawm Vajtswv qhov ncauj yuav ntsawj nws mus. Tsis txhob cia nws ntxias nws tus kheej es tso siab rau tej uas tsis muaj qabhau, vim nws yuav tau tej uas tsis muaj qabhau los pauj rau nws. Nws yuav tau tus nqe zog ntawd txwm nkaus ua ntej lub sijhawm, thiab nws tej ceg yuav tsis ntsuab. Nws yuav zoo li tsob txiv hmab uas tej txiv nyoos cia li zeeg, thiab zoo li tsob txiv aulib uas paj cia li zeeg. Pab niag neeg uas tsis hwm Vajtswv yuav tsis xeeb menyuam, thiab hluavtaws yuav hlawv cov uas noj nyiaj xiab tej tsev ntaub. Lawv xeeb kev txhaum thiab yug tau kev phem los, thiab lawv lub siab npaj tej kev dag ntxias.” Mas Yauj teb tias, “Kuv twb txeev hnov tej zaj li no los lawm ntau. Nej txhua tus yog cov uas nplij ua rau kuv ntxhov siab xwb. Tej lus huab los cua no yuav tag thaum twg? Muaj dabtsi tshum kom koj teb li no? Yog nej raug li kuv mas kuv kuj hais tau ib yam li nej hais thiab. Kuv kuj txawj txuas lus hais tawm tsam nej thiab co taubhau thuam nej thiab. Kuv lub qhov ncauj yuav hais txhawb tau nej lub zog, thiab kuv tus nplaig tej lus zoo yuav pab kho tau nej tej mob zoo mentsis. “Yog kuv hais kuj pab tsis tau kuv tej mob zoo mentsis li, thiab yog kuv nyob twjywm los yuav pab tau npaum twg? Vajtswv, qhov tseeb nimno koj ua rau kuv txog siav heev, koj ua rau kuv cov neeg raug kev liamsim. Thiab koj ua rau kuv sem zuj zus, yog ua timkhawv tias kuv txhaum, thiab qhov uas kuv yuag yuag sawv tawm tsam kuv, kuj yog ua timkhawv tab meeg rov tom kuv. Nws muab kuv dua ua npau taws vog thiab nws ntxub kuv, nws zim hniav zog rau kuv, kuv tus yeeb ncuab saib ua qhov muag qauj les rau kuv. Luag rua ncauj hnyos kuv, lawv ntaus kuv sab plhu saib tsis taus kuv, lawv sau zog ua ke tuaj tawm tsam kuv. Vajtswv muab kuv cob rau cov neeg uas tsis hwm nws, thiab muab kuv laim rau hauv cov neeg limhiam txhais tes. Kuv nyob zoo mas Vajtswv muab kuv lov pes ntho, nws ntsiab nkaus kuv caj dab muab kuv ntsawm tawg ua tej dwb daim. Nws muab kuv tsa ua daim phiaj rau nws, nws cov uas txawj tua hneev vij nkaus kuv. Nws rab xub chob nkaus kuv lub raum tsis khuvleej li, nws muab kuv tej kua tsib hliv rau hauv av. Nws tuaj tua kuv ib zaug tag ib zaug thiab, nws dhia tuaj ntaus kuv yam li tub rog. Kuv muab khaub seev tsaj los xaws rau kuv daim tawv nqaij, thiab muab kuv lub zog txo rau hauv av. Kuv quaj plhu liab tag, tsaus ntuj nti rau kuv lub qhov muag, txawm yog kuv txhais tes tsis tau ua limhiam ntais ntuj rau leejtwg, thiab kuv tej lus thov kuj dawb huv los xij. “Lub ntiajteb 'e, tsis txhob npog kuv tej ntshav, thiab tsis txhob cia kuv lub suab quaj tau chaw so. Saib maj, nimno kuv tus timkhawv nyob saum ntuj, thiab tus uas qhwv kuv nyob qhov chaw siab. Kuv cov kwvluag thuam kuv, kuv quaj kua muag los tag rau Vajtswv. Thov tus timkhawv ntawd tuav kuv txojcai rau Vajtswv, yam li tej neeg ua rau lawv tus kwvluag, rau qhov tshuav tsis muaj tsawg xyoo kuv yuav tau taug txojkev uas kuv tsis rov los lawm. Kuv tus ntsuj plig ploj tag, kuv lub caij lub nyoog kuj kawg kuv lub qhov ntxa twb txhij lawm. Tseeb tiag cov neeg thuam luag nyob puag ncig kuv, thiab kuv lub qhov muag saib ntsoov qhov uas lawv thuam kuv. “Vajtswv, thov koj them cov nqe ua pov thawj qhwv kuv rau koj. Muaj dua ib tug twg uas yuav ua pov thawj qhwv kuv tau? Vim koj kaw lawv lub siab ua rau lawv tsis nkag siab, yog li no koj thiaj tsis cia lawv kov yeej. Tus uas kom nws cov phoojywg, xwv thiaj tau nqe zog, nws tej menyuam lub qhov muag yuav tsis pom kev. “Vajtswv muab kuv tiag luag ncauj luag lo, thiab luag nto qaub ncaug rau kuv lub plhu. Qhov uas kuv lwj siab ua rau kuv tsaus muag ntais, thiab kuv lub cev huvsi zoo li tus duab xwb. Tus neeg ncaj ncees poob siab nthav txog zaj no, thiab tus uas tsis txhaum sawv twv cov uas tsis hwm Vajtswv. Tus ncaj ncees tseem tuav rawv nws txojkev, thiab tus uas txhais tes huv muaj zog zuj zus tuaj. Tiamsis nej mas txhua tus cia li rov tuaj dua ib zaug, mas kuv yuav tsis pom nej cov ib tug twg muaj tswvyim li. Kuv lub caij lub nyoog kuj dua lawm, kuv tej haujlwm uas kuv npaj cia kuj raug muab rhuav tag, yog tej uas kuv lub siab ntshaw. Lawv muab hmo ntuj ua nruab hnub, txawm yog nyob qhov tsaus los lawv hais tias, ‘Qhov kaj nyob ze lawm.’ Yog kuv tos nrhw tub tuag teb ua kuv lub tsev, yog kuv nthuav kuv lub chaw pw mus rau hauv qhov tsaus ntuj, thiab yog kuv hais rau lub qhov tuag tias, ‘Koj yog kuv txiv,’ thiab hais rau cov kas tias, ‘Yog kuv niam thiab kuv li muam,’ ces kuv txojkev vam nyob rau qhovtwg lawm? Leejtwg yuav pom kuv qhov chaw vam? Txojkev vam ntawd yuav nqes mus rau lub qhov rooj hauv tub tuag teb thiab lov? Kuv txojkev vam thiab kuv yuav mus ua ke rau hauv hmoov av lov?” Npida uas yog neeg Su‑a teb tias, “Nej yuav nrhiav tej lus hais ntev li cas? Cia li tshuaj saib es peb yuav hais. Ua li cas nej yuav suav tias peb yog tsiaj txhu? Ua li cas nej saib peb yog neeg ruam? Koj muab koj tus kheej dua ua chim tsawv, mas lub ntiajteb yuav raug muab tso tseg vim yog saib rau koj lov, thiab tej txhib zeb yuav raug muab txav dua rau ib qho lov? “Tus neeg limhiam lub teeb yuav raug muab tua, thiab nws cov nplaim taws yuav tsis ci lawm. Qhov kaj hauv nws tsev ntaub yuav tsaus mus, thiab lub teeb uas nyob saum nws yuav tuag. Nws txhais kauj ruam uas muaj zog yuav luv zuj zus, thiab nws tej tswvyim yuav muab nws laim ntog tag. Nws txhais kotaw coj nws mus mag rooj hlua, thiab nws poob rau hauv lub qhov taub. Rooj ntxiab yuav tais nws kotaw, lub voj hlua yuav soo nws cia. Rooj hlua taw yuav cuab nws rau hauv av, thiab yuav cuab hlua kais rau hauv nws txojkev. Tej uas txaus ntshai nyob puag ncig ua rau nws ntshai heev. thiab raws ti nkaus nws luj taws. Nws qaug zog vim yog tshaib plab, thiab vij sub vij sw tos rawv nws dawm. Kab mob noj nws daim tawv nqaij, thiab kev tuag noj zuj zus nws tes nws taw. Nws raug rho tawm hauv lub tsev ntaub uas nws tso siab, raug coj mus rau tus vajntxwv uas txaus ntshai heev. Tej uas yog nws li tsis nyob hauv nws lub tsev ntaub lawm, muaj hluavtaws lawj faj nyob puv nkaus hauv nws lub chaw nyob. Nws tej cag qhuav rau hauv lawm thiab nws tej ceg saud kuj tuag tshav. Nco tsis txog nws hauv lub ntiajteb lawm thiab tsis nco nws lub npe hauv tej kev lawm. Nws raug muab thawb hauv qhov kaj mus rau hauv qhov tsaus ntuj, thiab raug muab ntiab tawm hauv lub ntiajteb. Nws tsis muaj tub tsis muaj ki rau hauv nws haiv neeg, thiab tsis muaj ib tug uas dim siav hauv tej chaw uas nws nyob. Cov uas nyob sab hnub poob kuj poob siab nthav rau hnub uas nws tuag, thiab cov uas nyob sab hnub tuaj kuj ntshai heev. Cov uas tsis hwm Vajtswv tej chaw nyob zoo li no ntag, tus uas tsis paub Vajtswv mas nws lub neej yuav zoo li no.” Mas Yauj teb tias, “Nej yuav tsim txom kuv lub siab thiab nej tej lus muab kuv zuaj ntev li cas? Nej twb hais saib tsis taus kuv kaum zaus lawm. Qhov uas nej ua txhaum rau kuv nej tsis txaj muag lov? Txawm yog kuv yuam kev ua txhaum tiag, los txojkev txhaum nyob ntawm kuv. Yog nej tsab ua loj saib tsis taus kuv tiag, thiab ntxab ntxawm qhov uas kuv poob qes los nkaug kuv, cia li paub tseeb tias Vajtswv qhau kuv cai, thiab nthuav nws lub vas vij kuv. Saib maj, kuv qw hu tias, ‘Raug tsim txom heev,’ tiamsis tsis muaj leejtwg teb, Kuv hu nrov, tiamsis tsis muaj leejtwg tu plaub ncaj. Nws xov laj kab thaiv kuv lawm kuv thiaj hla mus tsis tau, thiab nws ua rau kuv txojkev tsaus ntuj nti. Nws hle kuv lub meej mom, thiab hle lub mom muaj meej saum kuv taubhau. Nws rhuav tshem kuv rau txhua fab, kuv thiaj ploj tag, thiab nws dob kuv txojkev vam ib yam nkaus li dob tsob ntoo. Nws txojkev npau taws tshwm plaws rau kuv, thiab nws muab kuv suav tias yog nws li yeeb ncuab. Nws cov tub rog tuaj txhij, lawv tib chaw vij ntaus kuv, thiab lawv ua yeej vij kuv lub tsev ntaub. “Nws ua rau kuv tej kwvtij txav deb kuv, thiab cov uas txeev paub kuv kuj zoo li lwm haiv neeg lawm. Kuv cov txheeb ze thiab kuv tej kwvluag zoo kuj tso kuv tseg lawm. Tej qhua hauv kuv tsev tsis nco qab kuv lawm, kuv tej nkauj qhev suav tias kuv yog neeg lwm tebchaws, lawv saib kuv zoo li lwm haiv neeg. Kuv hu kuv tus qhev, tiamsis nws tsis teb kuv, kuv yuav tsum tsa kuv lub qhov ncauj taij thov nws. Kuv ua pa tsw ntxhiab rau kuv tus pojniam, kuv ntxim ntxub rau kuv niam tej tub. Txawm yog tej menyuam yaus los saib tsis taus kuv, thaum kuv sawv tsees lawv kuj thuam luag kuv. Kuv tej kwvluag sawvdaws ntxub kuv, thiab cov uas kuv nyiam kuj tig hlo ntawm kuv lawm. Kuv tej pob txha lo kuv daim tawv nqaij, kuv dim plaws txoj nyuag siav xwb. Au kuv tej kwvluag 'e, thov khuvleej kuv, thov khuvleej kuv lauj, vim Vajtswv txhais tes kov kuv. Ua cas nej caum kuv yam li Vajtswv caum? Ua cas nej tseem tsis qhuav siab rau kuv? “Kuv xav kom muab kuv tej lus khaws cia, kuv xav kom muab sau rau hauv ntawv. Kuv xav kom muab cwjmem hlau thiab txhuas los txam rau hauv phab zeb kom nyob mus ib txhis. Kuv paub tseeb tias tus uas txhiv kuv muaj txojsia nyob, mas thaum kawg nws yuav sawv nres nroos hauv lub ntiajteb. Thaum kuv daim tawv nqaij raug puam tsuaj li no lawm, los kuv lub cev nqaij tseem yuav pom Vajtswv, yog tus uas kuv tus kheej yuav pom ntag, kuv lub qhov muag yuav pom tsis yog lwm tus pom. Kuv lub siab tsis muaj zog lawm. Yog nej hais tias, ‘Peb yuav caum nws li cas?’ thiab hais tias, ‘Tej uas nws raug no yog tim nws,’ mas nej cia li ntshai hniav ntaj, rau qhov txojkev npau taws coj hniav ntaj los txiav txim, kom nej thiaj paub tias muaj kev txiav txim tiag.” Xaufa uas yog neeg Na‑ama teb tias, “Vim li no kuv txojkev xav kom kuv teb, vim kuv lub siab kub lug. Kuv hnov tej lus thuam uas saib tsis taus kuv, mas kuv txojkev nkag siab kom kuv teb. Koj tsis paub tej no lov? Txij thaum ub los, txij thaum muab neeg tso rau saum lub ntiajteb, tus neeg limhiam lub suab xyiv fab luv luv li, thiab tus uas tsis hwm Vajtswv tej kev zoo siab tsuas yog ib pliag xwb. Txawm yog nws siab mus nto ntuj, thiab nws taubhau mus txog saum cov huab, los nws yuav puam tsuaj mus ib txhis yam li nws cov quav, cov uas txeev pom nws yuav hais tias, ‘Nws nyob qhovtwg?’ Nws yuav ya mus yam li zaj npau suav, thiab yuav tsis ntsib li lawm, nws yuav raug muab raws mus yam li zaj yog toog hmo ntuj. Lub qhov muag uas tau pom nws yuav tsis pom nws dua li lawm, thiab nws lub chaw yuav tsis pom nws dua li lawm. Nws tej menyuam yuav nrhiav kev hlub ntawm cov neeg pluag, thiab nws txhais tes yuav thim nws tej nyiaj txiag rov rau lawv. Nws tej pob txha tseem muaj cov hluas li zog puv npo, los lub zog ntawd yuav nrog nws pw rau hauv hmoov av. “Txawm yog txojkev limhiam yuav qab zib hauv nws lub qhov ncauj, thiab nws muab zais rau hauv nws tus qab nplaig, txawm yog nws tsis xav muab tso tseg thiab muab npuav rau hauv nws lub qhov ncauj, los tej zaub mov ntawd yuav hloov iab tag rau hauv nws lub plab, yam li taug nab rau hauv nws. Nws yuav ntuav tej nyiaj txiag uas nws tau nqos lawd tawm rov los, Vajtswv muab tej ntawd rho tawm hauv nws plab los. Nws yuav ntxais tej taug nab, nab raj kub sai tus nplaig yuav tom nws tuag. Nws yuav tsis pom tej hav dej, yog tej hav dej uas muaj zib ntab thiab kua mis nyeem ntws nto. Nws yuav thim tej uas nws khwv tau thiab nws yuav tsis tau muab nqos, nws yuav tsis muaj kev xyiv fab ntawm tej tshaj thawj uas nws ua lag ua luam, rau qhov nws muab cov pluag zuaj thiab muab tso tseg, nws txeeb tej vaj tse uas nws tsis tau ua. “Vim nws txojkev ntshaw noj tsis paub tsau li, nws yuav tsis tau yam uas txaus nws lub siab cia kiag li. Thaum nws noj lawd tsis tshuav ib yam dabtsi li, yog li no nws txojkev vam meej yuav nyob tsis ntev. Thaum nws tau noj tsau npo nws yuav poob rau hauv txojkev ceeblaj, txojkev txom nyem lwj siab tus hwjchim huvsi yuav raug nws. Thaum nws tabtom noj puv lub plab lawm, Vajtswv yuav xa txojkev npau taws heev los txog nws thiab muab nchuav ua zaub mov rau nws noj. Nws yuav khiav ntawm tej cuab yeej hlau mus, mas rab xub hneev tooj liab yuav chob nws tshab plaws. Ib tug rho rab xub hauv nws lub cev los, lub hauv xub ci nplas tawm hauv nws cov kua tsib los, thiab txojkev ntshai heev los raug nws. Txojkev tsaus ntuj nti npaj rau nws tej nyiaj txiag, cub hluavtaws uas tsis muaj leejtwg ntxuaj yuav nqos kiag nws, yam uas tshuav hauv nws lub tsev ntaub yuav raug kub du lug. Lub ntuj yuav qhia nws qhov txhaum, lub ntiajteb yuav sawv tawm tsam nws. Nws tej cuab txhiaj cuab tam hauv nws tsev yuav raug coj mus, yuav raug kuav kiag mus rau hnub uas Vajtswv npau taws. No yog tus neeg limhiam li feem ntawm Vajtswv thiab yog tej uas Vajtswv tu ua qub txeeg qub teg rau nws lawm.” Mas Yauj teb tias, “Thov ua tib zoo mloog kuv tej lus, thiab cia tej lus no nplij nej lub siab. Thov ua siab thev, kuv yuav hais, thiab thaum kuv hais lawd, nej kuj thuam luag mus. Kuv tus no cav neeg lov? Ua cas tsis tsim nyog kuv ua siab heev? Cia li ntsia ntsoov kuv thiab poob siab nthav, nej cia li muab tes pos nej qhov ncauj. Thaum kuv nco txog zaj no kuv kuj poob siab nthav, thiab kuv ib ce tshee hnyo. Ua cas cov neeg limhiam tseem muaj txojsia nyob, thiab nyob mus txog thaum laus heev thiab muaj hwjchim loj zuj zus? Lawv tej menyuam nyob ruaj khov rau ntawm lawv xubntiag, thiab lawv caj ces kuj nyob ntawm lawv lub qhov muag. Lawv tej vaj tse kuj nyob tso siab plhuav tsis ntshai li, thiab Vajtswv rab nplawm tsis raug lawv. Lawv tej txiv nyuj muaj noob yug tsis tu ncua, lawv tej maum nyuj yug menyuam thiab tsis ho kiag li. Lawv xa tej menyuam yaus tawm mus yam li pab yaj pab tshis, thiab lawv tej menyuam seev cev dhia. Lawv hu nkauj nrog suab nruas npuaj thiab suab nkauj nog ncas, thiab lawv xyiv fab nrog lub suab raj. Lawv vam meej tag lawv sim neej, thiab lawv mus rau hauv tub tuag teb ua siab tus yees. Lawv hais rau Vajtswv tias, ‘Thov koj ncaim peb mus. Peb tsis xav paub koj txojkev. Tus uas muaj hwjchim loj kawg nkaus yog leejtwg es peb yuav ua koom tu nws? Yog peb thov nws peb yuav tau qabhau dabtsi?’ Saib maj, lawv txojkev vam meej tsis yog nyob hauv lawv txhais tes lov? Cov neeg limhiam tej lus sablaj nyob deb ntawm kuv. “Cov neeg limhiam lub teeb tuag pes tsawg zaus? Vij sub vij sw kuj raug lawv pes tsawg zaus? Vajtswv kuj ua npau taws vog tso mob los rau lawv pes tsawg zaus? Lawv zoo yam li cov quav nyab uas cua ntsawj ya ua ntej, thiab zoo li cov npluag uas cua ntsawj ya pes tsawg zaus? Nej hais tias, ‘Vajtswv khaws lawv lub txim cia raug lawv tej tub.’ Thov nws ua pauj rau leej txiv ntag lawv thiaj paub. Cia lawv lub qhov muag pom lawv tej kev puam tsuaj, thiab cia lawv haus tus uas muaj hwjchim loj kawg nkaus txojkev npau taws. Lawv mob siab dabtsi txog lawv caj ces uas yuav tshwm raws lawv qab los, rau thaum lawv lub hnub nyoog raug muab txiav tu lawm? Yuav muaj leejtwg txawj qhia Vajtswv, vim nws tseem yog tus uas txiav txim rau cov uas nyob lub rooj siab tshaj plaws? Ib tug tuag thaum tseem muaj zog ho, thiab nyob zoo thiab nyob tso siab plhuav, nws lub cev rog puv npo thiab nws tej hlwb txha tseem nyoos. Muaj dua ib tug tuag rau thaum nws lwj siab, tsis txeev sim ib yam uas zoo li. Ob tug puavleej pw rau hauv hmoov av ib yam nkaus, thiab kas kuj laum nkaus ob tug. “Kuv yeej paub tej uas nej xav, thiab tej tswvyim phem uas nej yuav ua txhaum rau kuv. Nej hais tias, ‘Tus thawj lub vaj tse nyob qhovtwg? Lub tsev ntaub uas cov neeg limhiam nyob, nyob rau qhovtwg?’ Nej tsis tau nug cov uas tsham tebchaws thiab nej tsis yuav tej uas lawv piav qhia lov? Lawv hais tias hnub uas rau vij sub vij sw tus neeg limhiam pheej dim, thiab nws pheej dim rau hnub uas Vajtswv npau taws. Leejtwg qhia nws lub neej rau nws, thiab leejtwg ua pauj nws rau tej uas nws tau ua lawd? Thaum neeg kwv nws mus rau tom lub qhov ntxa, kuj muaj neeg zov ntawm nws lub qhov ntxa. Mas tej av hauv lub hav kuj tsis hnyav rau saum nws, sawvdaws raws nws qab, thaiab muaj neeg ua nws ntej mus suav tsis txheeb. Mas ua cas nej yuav muab tej yam qhuav qhawv li no nplij kuv lub siab? Nej tej lus teb tsis tshuav dabtsi lawm tsuas yog dag xwb.” Mas Elifa uas yog neeg Themas teb tias, “Neeg muaj qabhau rau Vajtswv tau lov? Leejtwg ntse kuj tsuas muaj qabhau rau nws tus kheej xwb. Yog koj ua neeg ncaj ncees yuav txaus tus uas muaj hwjchim loj kawg nkaus lub siab lov? Yog koj ua neeg zoo kawg yuav muaj qabhau dabtsi rau nws? Vim koj hwm thiab paub ntshai nws, nws thiaj qhuab ntuas koj, thiab ua plaub rau koj lov? Koj tej kev limhiam loj kawg los tsis yog? Koj li kev txhaum tsis muaj chaw kawg. Vim koj qaum dawb dawb tej uas kwvtij coj tuaj yuam nqe rau koj, thiab koj txhav tus uas tsis muaj hnav tej tsoos tsho. Koj tsis pub dej rau tus uas txog siav haus, thiab nkaum tes tsis pub ncuav rau tus uas tshaib noj. Tus uas muaj hwjchim txeeb tau liaj teb ua nws tug, thiab tus uas muaj ntsej muag kuj tau mus nyob rau hauv. Koj ntiab cov poj ntsuam rov mus tes dawb tes npliag, thiab ua rau cov menyuam uas tsis muaj txiv txhais npab lov. Vim li no thiaj muaj hlua cuab puag ncig koj, thiab txojkev ntshai tshwm plaws los raug koj. tsaus ntuj nti rau koj, koj thiaj tsis pom dabtsi li, thiab dej nyab laum nkaus koj. “Vajtswv tsis nyob qhov chaw siab saum ntuj lov? Saib tej hnub qub uas nyob siab kawg, nyob siab tiag tiag li. Vim li no koj thiaj hais tias, ‘Vajtswv paub dabtsi? Nws yuav txiav txim rau hauv qhov tsaus ntuj tau thiab lov? Muaj huab laum nkaus thaiv nws, mas nws thiaj saib tsis pom, rau thaum nws mus kev saum qaum ntuj.’ Koj yuav taug txoj qub kev uas tej neeg limhiam txeev taug ntawd lov? Lawv raug ntes mus ua ntej uas tsis tau txog lawv lub sijhawm, dej kuav kiag lawv lub chaw tiag taw mus. Lawv hais rau Vajtswv tias, ‘Thov koj ncaim peb mus,’ thiab hais tias, ‘Tus uas muaj hwjchim loj kawg nkaus yuav ua tau dabtsi rau peb?’ Tiamsis nws twb pub tej uas zoo puv nkaus lawv lub vaj lub tsev. Cov neeg limhiam tej lus sablaj nyob deb ntawm kuv. Cov neeg ncaj ncees pom mas zoo siab, cov uas tsis txhaum luag saib tsis taus lawv hais tias, ‘Peb cov yeeb ncuab raug muab txiav tu nrho lawm, lawv tshuav yam twg hluavtaws kuj muab kub tag lawm.’ “Koj cia li nrog Vajtswv sib raug zoo thiab nyob hum xeeb, ua li no mas yam uas zoo yuav los txog koj. Cia li txais tej lus qhuab qhia ntawm nws lub qhov ncauj, thiab khaws nws tej lus cia rau hauv koj lub siab. Yog koj rov los cuag tus uas muaj hwjchim loj kawg nkaus thiab txo koj lub hwjchim, thiab yog koj muab txojkev tsis ncaj ncees tso tseg deb ntawm koj lub tsev ntaub, yog koj muab koj cov kub tso rau hauv av, thiab muab tej kub hauv lub moos Aufi cia rau hauv nruab nrab tej pob zeb hauv lub hav dej, yog koj cia tus uas muaj hwjchim loj kawg nkaus los ua koj li kub thiab ua koj tej nyiaj uas tsim txiaj, mas koj yuav zoo siab rau tus uas muaj hwjchim loj kawg nkaus, thiab koj yuav tsa muag ntsia Vajtswv. Koj yuav thov nws mas nws yuav mloog koj, thiab koj yuav pauj tej uas koj cog lus fiv rau nws. Koj yuav txiav txim siab ua yam twg mas yam ntawd yuav tiav, thiab yuav muaj duab kaj ci rau koj txojkev. Thaum Vajtswv txo neeg tus hwjchim koj hais tias yog vim tus ntawd khav, tiamsis nws yeej cawm tus uas txo hwjchim kom dim. Nws yuav cawm tus uas tsis txhaum, mas koj yuav tau txais kev cawm dim vim koj txhais tes huv.” Mas Yauj teb tias, “Hnub no kuv yws tej lus iab lus daw, txawm yog kuv ntsaj li ntawd los Vajtswv txhais tes tseem hnyav rau saum kuv. Kuv xav paub tias kuv yuav ntsib nws qhovtwg, xwv kuv thiaj los txog ntawm nws lub zwm txwv. Kuv yuav cev kuv tshaj plaub rau ntawm nws xubntiag, thiab ntim lus puv ncauj nrog nws sib cav. Kuv xav paub tias nws yuav teb kuv li cas, thiab to taub tej uas nws hais rau kuv. Nws yuav siv nws lub hwjchim loj cav kuv lov? Tsis yog, nws yuav mloog kuv hais. Qhov chaw ntawd, tus neeg ncaj ncees yuav nrog nws sib cav tau, mas tus uas tu plaub rau kuv yuav tso kuv dim mus ib txhis. “Saib maj, kuv mus rau tom hauv ntej los nws tsis nyob qhov ntawd, thiab mus rau tom qub qabkuj saib tsis pom nws. Thaum nws ua haujlwm rau sab laug kuv kuj tsis pom nws, thaum nws tig rau sab xis los kuv nrhiav tsis pom nws. Nws paub txojkev uas kuv mus. Thaum nws muab kuv sim lawd kuv yuav tawm los zoo li cov tseem kub. Kuv txhais kotaw tsuj raws nraim nws tus neev taw, kuv taug nraim nws txojkev thiab tsis tig lug mus rau sab twg li. Kuv tsis ncaim ntawm tej kevcai uas nws daim tawv ncauj hais tseg, kuv khaws tej lus uas tawm ntawm nws lub qhov ncauj los cia rau hauv kuv lub siab. Nws yeej tsis txawv txav thiab leejtwg yuav ua rau nws ntxeev siab tau? Nws xav ua yam twg nws kuj ua yam ntawd. Nws yuav ua tej uas nws tu tseg rau kuv lawd kom tiav, thiab nws twb npaj ntau yam li ntawd rau hauv lub siab lawm. Vim li no kuv thiaj ntshai heev rau ntawm nws lub xubntiag. Thaum kuv tshuaj saib lawm kuv ntshai nws ua siab puas tsus. Vajtswv ua rau kuv lub siab tsis muaj zog, tus uas muaj hwjchim loj kawg nkaus tau ua rau kuv ntshai. Tiamsis qhov tsaus ntuj tsis tau muab kuv txiav tu, thiab qhov tsaus ntuj nti tseem laum nkaus kuv lub ntsej muag cia. Ua cas tus uas muaj hwjchim loj kawg nkaus muab lub sijhawm uas teem cia zais? Ua cas cov uas paub nws tsis pom hnub uas nws teem cia kiag li? Muaj neeg txav ciam teb, lawv txeeb tej pab yaj pab tshis coj mus yug. Lawv raws cov menyuam ntsuag tej nees luav mus, lawv muab cov poj ntsuam li nyuj coj mus yuam nqe. Lawv muab tej neeg txom nyem thawb rau tom ntug kev, tej neeg pluag hauv ntiajteb sawvdaws tsiv nraim tag. Saib maj, yam nkaus li cov nees luav qus nyob hauv tebchaws ntuj nrag teb do, cov neeg pluag tawm mus nrhiav noj khwv khwv, mas tebchaws moj sab qhua muab zaub mov rau lawv tej menyuam noj. Lawv mus xawb tej qoob loo hauv luag tej teb, thiab xawb de cov neeg limhiam tej vaj txiv hmab. Lawv pw liab qab tsis muaj ris tsho ib hmo kaj ntug, thiab tsis muaj pam vov tiv no. Lawv ntub tej nag pem roob, thiab khawm pob zeb vim tsis muaj chaw roos. Muaj neeg txeeb tej menyuam uas tsis muaj txiv hauv niam xubntiag, thiab muab cov neeg pluag tej menyuam mos mus yuam nqe. Lawv thiaj mus liab qab tsuas tsis muaj ris tsho, lawv kwv tej teg qoob mus los tseem tshaib plab. Lawv ua roj hauv cov neeg limhiam tej ntoo txiv aulib, lawv tabtom tsuam kua txiv hmab hauv lub qhov tsuam los lawv tseem yoo nqhis. Cov uas tabtom yuav tuag quaj ntsaj hauv lub moos tuaj, thiab cov uas raug mob tug ntsuj plig thov kev pab, tiamsis Vajtswv tsis quav ntsej lawv tej lus thov. “Muaj cov uas fav xeeb rau qhov kaj, yog cov uas tsis paub txojkev kaj thiab tsis nyob hauv txojkev kaj ntawd. Tus tua neeg sawv tsees hmo ntuj mus tua cov neeg pluag thiab cov neeg txom nyem, thaum tsaus ntuj nws zoo yam nkaus li tub sab. Tus neeg ua nkauj ua nraug lub qhov muag tos lub sijhawm tsaus ntuj zuag, hais tias, ‘Tsis muaj leejtwg lub qhov muag pom kuv,’ thiab nws npog nws lub ntsej muag. Thaum tsaus ntuj lawv khawb qhov mus rau hauv lub tsev, nruab hnub lawv tsiv nraim, lawv tsis paub qhov kaj. Qhov tsaus ntuj nti zoo yam li kaj ntug rau lawv txhua tus vim yog lawv txeev nrog qhov tsaus ntuj nti tej kev ntshai koom ua ke. Lawv ntab nplos saum nplaim dej, lawv li feem hauv lub tebchaws raug muab tsawm foom tsis zoo, luag tsis tig ntiag mus rau hauv lawv tej vaj txiv hmab lawm. Lub caij qhuav thiab tshav ntuj kub rub daus xib daus npu mus tag li cas, ces tub tuag teb kuj rub cov uas ua txhaum loj mus ib yam li ntawd. Lub plab menyuam tsis nco qab lawv, kas yuav noj lawv qab qab, yuav tsis muaj leejtwg nco txog lawv li lawm. Txojkev limhiam lov ntho yam nkaus li tus ntoo. “Lawv quab yuam tus pojniam uas xeeb tsis taus menyuam, thiab tsis ua ib yam zoo rau tus poj ntsuam. Tiamsis Vajtswv lub hwjchim rub cov uas muaj zog txojsia mus, txawm yog lawv sawv tsees tau los lawv tsis muaj chaw vam lawm. Vajtswv pub txojkev tso siab rau lawv, lawv thiaj tau chaw vam khom, thiab nws lub qhov muag ntsia ntsoov lawv lub neej. Lawv raug muab tsa ua loj ib nyuag pliag xwb kuj ploj tag lawm, lawv tuag tshav qhuav tag zoo li luag lwm tus, lawv raug muab txiav yam li tej thawj hnab qoob. Yog tsis muaj li ntawd leejtwg yuav tshuaj tau tias kuv dag thiab qhia tau tias tej uas kuv hais ntawd tsis muaj qabhau?” Npida uas yog neeg Su‑a teb tias, “Vajtswv muaj hwjchim kav thiab ua kom ntshai, nws tswj tau saum ntuj uas siab kawg nyob sib hum xeeb. Nws cov tub rog mas suav txheeb lov? Nws tsis tso nws txojkev kaj los rau leejtwg? Neeg yuav ua ncaj ncees tau rau ntawm Vajtswv xubntiag li cas? Tus uas yug ntawm pojniam los yuav dawb huv tau li cas? Saib maj, txawm yog lub hli ci tsis tshiab thiab tej hnub qub kuj tsis huv rau ntawm Vajtswv lub qhov muag mas neeg uas tsuas yog vaim xwb, yimhuab tsis huv, thiab neeg tej tub uas tsuas yog kas xwb, kuj tsis huv.” Mas Yauj teb tias, “Koj nim pab tau tus uas tsis muaj zog los cas! Koj nim pab tau tus uas txhais npab tsis muaj zog los cas! Koj nim txawj qhia tus uas tsis muaj tswvyim thiab txawj ua ncauj ua lus hais kev txawj ntse los cas! Leejtwg pab koj hais tej lus no, thiab leejtwg tus ntsuj plig tawm hauv koj los? “Cov uas nyob hauv tub tuag teb ntseeg nkaws, tej dej hauv tiv txwv thiab cov uas nyob hauv kuj ntshai. Tub tuag teb qheb lug rau ntawm Vajtswv lub qhov muag, thiab lub chaw puam tsuaj tsis muaj dabtsi npog. Nws nthuav lub ntuj sab ped rau saud uas nyob do cuas, thiab muab lub ntiajteb dai rau lub chaw uas nyob khoob ntshuv. Nws muab dej qhwv cia hauv nws cov huab uas tsaus nti, mas cov huab ntawd yeej tsis tawg li. Nws roos nws lub zwm txwv, thiab nthuav nws cov huab los thaiv cia. Nws sau lub npoo ntiajteb rau saum nplaim dej, yog tus ciam uas quas qhov kaj thiab qhov tsaus. Tej ncej txheem lub ntuj kuj ua zog kais, thiab poob siab rau thaum nws cem. Nws siv nws lub hwjchim tswj hiavtxwv nyob tus yees, nws siv lub tswvyim ntaus tus zaj Lahaj. Nws tshuab pa ua rau lub ntuj kaj lug, nws txhais tes nkaug tus zaj uas txawj txawj khiav. Tej no tsuas yog nws tej haujlwm sab nraum phij sam xwb, peb hnov txog nws yog lub suab sib ntxhi me me xwb. Leejtwg yuav nkag siab nws tus hwjchim uas nrov tej niag nthwv?” Mas Yauj rov hais lus zaj lus zuag tias, “Vajtswv yeej muaj txojsia nyob pom, nws yog tus uas qhau kuv cai, tus uas muaj hwjchim loj kawg nkaus yog tus uas ua rau kuv lwj siab. Thaum kuv tseem ua tau pa, thiab Vajtswv tseem pub pa rau hauv kuv lub qhov ntswg, mas kuv daim tawv ncauj yuav tsis hais tej lus dag, thiab kuv tus nplaig yuav tsis hais tej lus ntxias. Kuv yuav tsis lees tias nej hais tseeb kiag li, thiab kuv yuav tsis tso kuv lub siab ncaj tseg mus txog thaum kuv tuag. Kuv yuav tuav rawv kuv txojkev ncaj ncees cia, tsis tso tseg li, kuv lub siab tsis thuam kuv mus tag kuv sim neej. “Thov cia kuv cov yeeb ncuab raug ib yam li cov neeg limhiam thiab thov cia tus uas sawv twv kuv raug ib yam li cov neeg tsis ncaj. Tus uas tsis hwm Vajtswv muaj chaw vam dabtsi rau thaum Vajtswv muab nws txiav pov tseg, thiab thaum Vajtswv muab nws txojsia rho lawm? Vajtswv yuav mloog nws lub suab quaj hu rau thaum nws raug kev ceeblaj txom nyem lov? Nws yuav zoo siab rau tus uas muaj hwjchim loj kawg nkaus lov? Nws yuav quaj thov Vajtswv txhua lub sijhawm lov? Kuv yuav qhia nej paub txog Vajtswv txhais tes, kuv yuav tsis npog tej uas tus uas muaj hwjchim loj kawg nkaus yuav ua. Saib maj, nej txhua tus tub pom lawm, ua cas nej yuav tsis paub qabhau kiag li? “No yog tus neeg limhiam li feem ntawm Vajtswv, thiab yog tus uas quab yuam luag li qub txeeg qub teg uas txais ntawm tus muaj hwjchim loj kawg nkaus. Yog nws li menyuam huaj vam coob los yuav raug hniav ntaj xwb, thiab nws tej tub ki yuav nrhiav tsis txaus noj. Cov uas tshuav dim los mob kis yuav muab lawv log, thiab lawv tej poj ntsuam yuav tsis quaj ntsuag. Txawm yog nws yuav sau tau nyiaj ntau yam li tej hmoov av, thiab tib tej niag pawg tsoos tsho cia yam li tej niag pawg av, nws yuav tib cia los cov neeg ua ncaj yuav hnav, thiab cov uas tsis txhaum yuav muab tej nyiaj faib. Lub tsev uas nws ua zoo li lub lws kab npauj npaim, thiab zoo li lub tsev pheeb suab uas tus zov khuav ua. Thaum nws mus pw nws muaj nyiaj txiag, tiamsis nws yuav tsis rov mus pw li ntawd dua li lawm. Nws qheb qhov muag mas nws tej nyiaj txiag tsis muaj tag lawm. Txojkev txhawj kev ntshai los raug nws zoo li dej nyab. Thaum hmo ntuj cua daj cua dub qhwv kiag nws mus lawm. Cov cua sab hnub tuaj muab nws nqa, ces nws thiaj ploj lawm, cua kuav kiag nws tawm ntawm nws lub chaw mus. Cov cua muab nws laim pov tseg tsis khuvleej, nws dhia khiav kiag ntawm cua lub hwjchim sai kawg. Cua npuaj teg thuam nws, thiab luag ntiab nws tawm hauv nws lub chaw mus.” “Yeej muaj lub qhov khawb nyiaj, thiab muaj lub chaw uas nchuav cov tseem kub. Luag muab hlau hauv av los, thiab nchuav tooj liab ntawm tej pob zeb los. Neeg rhuav tshem qhov tsaus ntuj, thiab mus nrhiav rau qhov uas deb kawg, nrhiav tej pob zeb hauv qhov tsaus dub nciab. Lawv khawb qhov tob, deb ntawm qhov chaw uas neeg nyob, cov uas mus mus los los tsis nco qab lawv lawm. Lawv tso hlua dai fiav mus fiav los deb ntawm cov neeg. Cov av kuj tshwm zaub mov tawm los, tiamsis hauv qab mas cov av raug hluavtaws kub tawg tag. Tej pob zeb uas nyob hauv muaj cov qe zeb tsamxem phaithu, thiab tej hmoov av muaj kub. “Txojkev ntawd tsis muaj dav paub, thiab liaj lub qhov muag tsis tau pom li. Tej tsiaj qus uas siab loj tsis tau tsuj qhov chaw ntawd, tsov ntxhuav yeej tsis tau hla qhov ntawd. “Neeg xuas tes tsoo tej pob zeb tawv, thiab muab tej roob dob kiag cag pob tag. Lawv khawb kwj rau hauv tej phab zeb, thiab lawv lub qhov muag pom txhua yam uas tsim txiaj. Lawv nrhiav tau tej qhov dej txhawv, thiab tej uas muab zais cia, lawv rho tawm los rau qhov kaj. “Tiamsis yuav ntsib tau tswvyim rau qhovtwg? Thiab kev nkag siab lub chaw nyob qhovtwg? Neeg tsis paub tswvyim tus nqe, thiab nrhiav tsis tau hauv cov neeg ciaj lub tebchaws. Nruab tiv txwv hais tias, ‘Ntawm kuv tsis muaj,’ thiab hiavtxwv hais tias, ‘Tsis nrog kuv nyob.’ Txawm yog muab kub yuav los tsis tau, thiab luj nyiaj kom npaum li tus nqe kuj tsis tau. Txawm yog muab cov kub hauv lub moos Aufi ntaus nqe kuj tsis tau, muab cov qe zeb iav txho ci lam thiab qe zeb phaithu pauv kuj tsis tau. Piv tsis tau rau cov kub thiab daim iav tsim txiaj, thiab muab tej npauj tseem kub los pauv tsis tau. Tsis txhob muab tej paj zeb hauv hiavtxwv thiab qe zeb iav los piv kiag li, tswvyim tus nqe tseem siab dua cov qe qwj muaj nqes. Piv tsis tau rau cov qe zeb daj pes lis hauv Khuj tebchaws, thiab muab cov tseem kub ntaus nqe rau los tsis tau. “Yog li ntawd, tswvyim los qhovtwg los? Thiab kev nkag siab nyob qhovtwg? Yog muab zais ntawm txhua yam uas ciaj sia lub qhov muag thiab zais ntawm cov noog saum nruab ntug. Lub qhov puam tsuaj thiab txojkev tuag hais tias, ‘Wb ob leeg lub qhov ntsej tau hnov tus tswvyim lub moo nto moo lawm.’ “Vajtswv yeej paub txojkev mus txog lub tswvyim, thiab yeej paub tswvyim lub chaw nyob, rau qhov nws saib pom mus kawg nkaus lub ntiajteb, thiab pom txhua yam tag nrho hauv lub qab ntuj. Thaum nws teem kom cua hnyav npaum li cas, thiab muab cov dej luj cia, thiab thaum nws tsa kevcai rau nag los, thiab tsim txojkev rau xob laim tua, mas nws tsa muag ntsia tug tswvyim thiab qhia, thiab tsa lub tswvyim cia thiab tshuaj saib. Nws hais rau neeg tias, ‘Saib maj, qhov uas hwm thiab paub ntshai tus Tswv yog lub tswvyim, thiab qhov uas tig hlo ntawm txojkev phem kuj yog kev nkag siab.’ ” Mas Yauj rov hais lus zaj lus zuag tias, “Au kuv xav nyob ib yam li yav thaum ub, yam li ntu uas Vajtswv tsom kwm kuv, thaum nws lub teeb tseem ci saum kuv lub taubhau, thiab kuv taug txojkev tsaus ntuj hauv nws tus duab kaj, ib yam li thaum kuv tseem hluas ntxhias, thiab thaum Vajtswv ua tus kwvluag tsom kwm kuv lub tsev ntaub, thiab thaum tus uas muaj hwjchim loj kawg nkaus tseem nrog nraim kuv, thiab kuv cov menyuam tseem nyob vij vog kuv, thiab thaum muaj kua mis ntws los n txuav kuv kotaw, thiab lub zeb zom roj ntws lug rau kuv. Thaum kuv tawm mus rau ntawm rooj loog, thiab thaum kuv zaum saum kuv lub rooj hauv lub tshav puam, mas tej hluas pom kuv, lawv kuj txav kev, tej poj koob yawm txwv kuj sawv tsees nres. Cov uas ua thawj tseg tsis hais lus, muab tes pos lub qhov ncauj cia. Cov uas ua hlob lub suab ntsiag to, thiab lawv tus nplaig lo nkaus qab yiag. Thaum lub qhov ntsej hnov lawd, lawv hais tias kuv tau hmoov zoo, thiab thaum lub qhov muag pom, lawv kuj qhuas kuv, vim yog kuv cawm cov neeg pluag uas quaj thov, thiab cawm cov menyuam tsis muaj txiv uas tsis muaj leejtwg pab. Cov uas twb yuav puam tsuaj kuj foom hmoov zoo rau kuv, thiab kuv ua rau cov poj ntsuam lub siab hu nkauj xyiv fab. Kuv muab txojkev ncaj ncees los hnav qhwv kuv cia, qhov uas kuv ua raug cai zoo nkaus li lub tsho ntev thiab zoo li txoj phuam ntoo saum taubhau. Kuv ua ntsiab muag rau cov uas dig muag, thiab ua kotaw rau cov uas ceg tawv. Kuv ua cov neeg pluag leej txiv, thiab kuv tshuaj saib tus uas kuv tsis tau paub dua tshaj plaub. Kuv lov tus uas tsis ncaj tej los yuaj, thiab ua rau tus qauv plam ntawm nws cov kaus hniav. Mas kuv xav tias, ‘Kuv yuav tuag rau hauv kuv lub zes, thiab kuv yuav tsav kuv lub caij lub nyoog kom ntau yam li tej xuab zeb. Kuv tej cag yuav nrhau mus txog dej, kuv tej ceg yuav ntsu lwg ib hmos kaj ntug. Kuv lub koob meej yuav nyob tshiab khiv mus li, thiab kuv rab hneev yuav tshiab khiv hauv kuv txhais tes.’ “Neeg mloog kuv hais thiab tos rawv, thiab nyob twjywm mloog tej lus uas kuv qhia. Thaum kuv hais tag lawd lawv tsis hais dua li lawm, thiab kuv tej lus nrog ntsuav rau saum lawv. Lawv tos rawv kuv yam li tos nag, lawv rua ncauj tos yam li tos nag hauv xyoo. Thaum lawv tsis muaj chaw vam lawm, kuv ua ntsej muag luag ntxhi rau lawv, thiab kuv lub ntsej muag tsis ua rau lawv poob siab. Kuv xaiv txojkev rau lawv thiab zaum ua lawv tus thawj, thiab kuv zoo li tus vajntxwv nyob hauv nruab nrab nws cov tub rog, thiab yam li tus uas nplij cov uas quaj ntsuag lub siab. Tiamsis nimno lawv cov uas yau kuv thuam luag kuv, kuv tsis kheev lawv cov ntawd leej txiv nrog cov dev nyob zov kuv pab yaj pab tshis. Kuv yuav tau dabtsi zoo ntawm lawv txhais tes? Lawv yog cov uas twb qaug zog tag lawm. Lawv txom nyem thiab tshaib plab heev, lawv noj cov av qhuav hauv tebchaws moj sab qhua. Lawv de tej nroj tsuag thiab nplooj ntoo, thiab dob tej cag tauj cag nqeeb los noj. Lawv raug muab ntiab tawm hauv cov neeg mus, muaj neeg qw caum lawv ib yam li qw tub sab. Lawv yuav tsum mus nyob hauv tej khuab ha, thiab hauv tej qhov av qhov zeb. Lawv hee li nees luav hauv tej tsob nyuag ntoo tuaj, lawv sib txiv nyob hauv tej qab zaub kig. Lawv yog neeg ruam neeg poob koob, lawv raug muab ntiab tawm hauv lub tebchaws mus. “Nimno lawv muab kuv ua zaj nkauj hu thuam luag, thiab kuv tiag lawv ncauj lawv lo. Lawv ntxub thiab txav deb ntawm kuv. Thaum lawv pom kuv lawv nto qaub ncaug rau kuv tamsid, rau qhov Vajtswv tso kuv txoj hlua hneev taug thiab txo kuv lub hwjchim, lawv tsis tswj lawv lub siab tab meeg kuv kiag li. Cov neeg plhob luj lam tam sawv ntawm kuv sab xis, lawv ntiab kuv khiav, lawv tsub kev puam tsuaj vij tawm tsam kuv. Lawv rhuav kuv txojkev pob tag, lawv tseem tsav kev txom nyem rau kuv, tsis muaj leejtwg pab kiag li. Lawv tuaj yam li nkag hauv tej ntu ntsa loog uas pob tag tuaj, lawv txeem plaws tuaj rau thaum lub loog tabtom pob. Tej kev txhawj kev ntshai los raug kuv, kuv lub koob meej raug muab raws yam li cua ntsawj, thiab kuv li kev vam meej ploj tag yam li tej huab. “Nimno kuv tus ntsuj plig ploj zuj zus mus, lub sijhawm txom nyem nyuaj siab twb ntes tau kuv lawm. Hmo ntuj ua rau kuv tej pob txha mob lwj ntsuav, thiab tej mob kis noj kuv ntawd tsis so li. Vajtswv ua nruj ua tsiv ntsiab nkaus kuv lub tsho, nws tuav rawv kuv caj dab tsho. Nws muab kuv laim rau hauv pas av, kuv zoo yam nkaus li tej hmoov av thiab hmoov tshauv. Kuv quaj thov koj los koj tsis teb kuv, kuv sawv tsees los koj tsis quav ntsej kuv li. Koj ua nyaum rau kuv, koj txhais tes uas muaj hwjchim tsim txom kuv. Koj tsa kuv sawv rau saum cov cua thiab muab kuv caij cua, thiab cia cua daj cua dub ntsawj kuv rau tom ub tom no. Kuv yeej paub tias koj yuav coj kuv mus txog qhov tuag, thiab mus txog lub chaw uas teem cia rau cov neeg ciaj sawvdaws. “Yeej tsis muaj leejtwg yuav tsa tes ntaus tus uas pob tag ua tej niag pawg cia, rau thaum nws raug tej xwm txheej phem es thov luag pab. Thaum muaj ib tug raug txom nyem kuv tsis tau quaj lov? Thaum muaj ib tug pluag kuv tsis tau nyuaj siab lov? Tiamsis thaum kuv nrhiav yam uas zoo, mas tau yam uas phem, thiab thaum kuv tos qhov kaj, mas tau qhov tsaus ntuj. Kuv lub siab ntxhov heev nyob tsis tus li, lub sijhawm raug txom nyem nyuaj siab los txog kuv. Kuv lub ntsej muag dub nciab tiamsis tsis yog tshav ntuj ziab, kuv sawv ntsug hauv ib tsoom neeg thiab thov kev pab. Kuv nrog hma liab ua kwvtij, thiab nrog noog ntxhuav ua kwvluag. Kuv tej tawv nqaij dub thiab hle tawv lawm, kuv tej pob txha kub heev. Kuv lub suab nkauj nog ncas thiaj ntxeev ua lub suab quaj ntsuag, thiab kuv lub suab raj ntxeev ua lub suab quaj. Kuv twb cog lus rau kuv lub qhov muag lawm, mas kuv yuav ntsia ntsoov tej hluas nkauj dawb huv tau li cas? Dabtsi yog kuv li feem ntawm Vajtswv uas nyob saum ntuj, dabtsi yog kuv li qub txeeg qub teg ntawm tus uas muaj hwjchim loj kawg nkaus uas nyob saum lub chaw siab? Vij sub vij sw yuav tsis poob rau saum cov neeg tsis ncaj ncees lov, thiab kev puam tsuaj yuav tsis poob rau saum cov uas ua txhaum lov? Vajtswv tsis pom txojkev uas kuv mus thiab tsis suav kuv txhua kauj ruam lov? “Yog kuv taug txojkev cuav, thiab kuv txhais kotaw maj nroos mus dag, kuj thov cia muab kuv luj rau saum rab teev uas hum txiaj, thiab thov Vajtswv paub kuv lub siab dawb paug. Yog kuv txhais kotaw tig tawm hauv txojkev lawm, thiab kuv lub siab mus raws li kuv qhov muag pom, thiab yog muaj ib qhov uas tsis huv lo kuv txhais tes, kuj thov cia kuv tseb es lwm tus tau noj, thiab cia tej uas kuv cog raug muab dob kiag cag pov tseg. “Yog kuv lub siab raug ntxias mus deev tej pojniam, thiab kuv tau zov tos ntawm kuv kwvtij zej zog lub qhov rooj, kuj cia kuv tus pojniam zom hmoov rau lwm tus, thiab cia lwm tus pw tsuam nws. Tej no kuj yog kev txhaum uas phem kawg, thiab yog kev txhaum uas cov tu plaub yuav tsum txiav txim rau, qhov ntawd yog hluavtaws yuav kub mus txog ntua lub chaw puam tsuaj, thiab yuav kub kiag kuv tej cag tej txiv huvsi. “Yog kuv tsis quav ntsej kuv tej tub qhe nkauj qhev tej lus rau thaum lawv muaj xaiv muaj lus tuaj hais rau kuv, mas thaum Vajtswv sawv tsees kuv yuav ua tau li cas? Thaum nws nug zaj ntawd, kuv yuav teb nws li cas? Tus uas tsim kuv rau hauv lub plab tsis tau tsim lawv thiab lov? Tsis yog tib tug tsim peb rau hauv plab menyuam lov? “Yog kuv tau tav yam twg uas tej neeg pluag xav yuav, lossis ua rau cov poj ntsuam lub qhov muag saib do xwb, lossis kuv tib leeg noj kuv tej mov, es tus menyuam uas tsis muaj txiv tsis tau noj, (txij thaum kuv yau los kuv yug nws ib yam nkaus li kuv yog nws txiv, thiab kuv yeej taw qhia cov poj ntsuam txij thaum kuv yug hauv niam plab los) thiab yog kuv pom ib tug twg puam tsuaj vim tsis muaj ris tsho, lossis pom ib yawg twg pluag tsis muaj ris tsho hnav, yog nws lub siab tsis tau foom hmoov zoo rau kuv, thiab nws tsis tau hnav kuv tej tsoos plaub yaj sov, yog kuv tsa tes kov tej menyuam uas tsis muaj txiv, vim yog kuv paub tias cov uas nyob ntawm rooj loog yuav tuaj kuv tog, ces thov cia kuv daim txha duav pu pluam ntawm kuv xub pwg, thiab kuv txhais npab pluam ntawm lub pob qej txha. Kuv ntshai tej xwm txheej phem ntawm Vajtswv, thiab vim nws lub hwjchim meej mom kuv ua tsis tau tej ntawd kiag li. “Yog kuv muab tej kub ua yam uas kuv tso siab, lossis hu tej tseem kub tias yog kuv lub chaw vam khom, yog kuv zoo siab vim kuv tej nyiaj txiag ntau kawg, lossis vim kuv txhais tes muab tau ntau kawg los, yog kuv saib rau lub hnub uas ci tuaj, thiab saib lub hli uas mus kev zoo nkauj kawg, es kuv lub siab raug ntxias twjywm mus pe, thiab kuv lub qhov ncauj nwj kuv txhais tes pe, tej no yog kev txhaum uas cov tu plaub yuav tsum txiav txim, rau qhov yog kuv fav xeeb rau Vajtswv uas nyob saum ntuj. “Yog kuv zoo siab rau thaum tus uas ntxub kuv raug puam tsuaj, lossis xyiv fab rau thaum nws raug xwm txheej phem, (kuv tsis tau cia kuv lub qhov ncauj ua txhaum, es tsawm foom nws txojsia,) thiab yog cov neeg hauv kuv lub tsev ntaub tsis tau hais tias, ‘Leejtwg tsis tau noj nws li nqaij tsau?’ rau qhov tej qhua tsis tau pw nraum tej ntug kev, kuv qheb qhov rooj los rau cov neeg dua kev, thiab yog kuv muab kuv tej kev fav xeeb npog ib yam li lwm tus, lossis muab kuv lub txim zais rau hauv lub xubntiag, vim yog kuv pheej ntshai ib tsoom neeg heev, thiab ntshai kuv cov neeg saib tsis taus kuv, kuv thiaj nyob twjywm tsis tawm dhau kuv lub qhov rooj mus, mas kuv xav kom muaj ib tug mloog kuv hais. No yog kuv txhais tes sau. Thov kom tus uas muaj hwjchim loj kawg nkaus teb kuv. Kuv xav tau tej lus kom kuv hauv daim ntawv uas tus yeej kom sau. Kuv yuav muab kwv kiag saum xub pwg mus, kuv yuav muab khi cia yam li lub mom kub. Kuv yuav qhia kuv txhua kauj ruam rau nws, kuv yuav mus cuag nws yam li ib tug thawj mus. “Yog kuv daim teb quaj kom kuv, thiab cov hniav khais uas laij teb ntawd ib txhij quaj, yog kuv noj tej qoob ntawd tsis them nqe li, thiab ua rau tej qub tswv teb ntawd tuag, kuj thov cia pos tuaj nyob tej mog chaw, thiab nroj pias dab tuaj nyob qeb chaw.” Yauj li lus tag li no. Yog li ntawm peb tug yawg ntawd thiaj tseg tsis teb Yauj lawm, rau qhov Yauj pom tias nws ncaj ncees. Ces Elihu uas yog Npalakhee tus tub yog neeg Npub thiab yog Las cum txawm chim. Nws chim rau Yauj vim Yauj hais tias Yauj ncaj ncees tsis yog Vajtswv ncaj. Nws kuj chim rau Yauj peb tug kwvluag rau qhov txawm yog lawv teb tsis tau Yauj los lawv tseem hais tias Yauj txhaum. Elihu tos nrhw yuav hais rau Yauj rau qhov lawv peb leeg ntawd laus dua nws. Thaum Elihu pom tias lawv lub ncauj tsis muaj lus teb lawm nws thiaj chim. Mas Npalakhee tus tub Elihu uas yog neeg Npub teb tias, “Kuv tseem yau thiab nej hnub nyoog nchav lawm, vim li no kuv thiaj ua siab yau thiab ntshai hais tej uas kuv xam pom rau nej. Kuv hais tias, ‘Cia cov uas muaj hnub nyoog hais, thiab cia cov uas nyob ntau xyoo qhia tswvyim.’ Qhov tseeb yog tus ntsuj plig uas nyob hauv neeg, yog tus uas muaj hwjchim loj kawg nkaus tej pa, ua rau neeg nkag siab. Tsis yog cov laus xwb thiaj muaj tswvyim, lossis cov uas hnub nyoog nchav thiaj nkag siab qhov uas raug cai. Vim li no kuv thiaj hais tias, ‘Thov mloog kuv hais, thov cia kuv hais tej uas kuv xam pom.’ “Kuv tos rawv mloog nej tej lus thiab mloog nej tej lus txawj ntse, rau thaum nej nrhiav saib yuav hais dabtsi. Kuv ua tib zoo mloog nej hais, tsis muaj ib tug tav tau Yauj li, nej cov tsis muaj leejtwg teb tau Yauj tej lus. Ceev faj tsis txhob hais tias, ‘Peb twb ntsib tswvyim lawm, Vajtswv yuav kov yeej Yauj, tsis yog neeg.’ Yauj tsis tau hais nws tej lus rau kuv, mas kuv yuav tsis muab nej tej lus teb Yauj. “Lawv poob siab tag tsis teb dua li lawm, lawv tsis muaj ib lo lus hais li lawm. Mas kuv yuav tos lov vim lawv tsis hais thiab lawv sawv qhov ntawd tsis teb li? Mas kuv yuav teb kuv tej lus, kuv yuav hais tej uas kuv xam pom, rau qhov kuv muaj lus puv nkaus qhov ncauj, tiamsis kuv lub siab tseem tswj kuv cia. Kuv lub siab zoo li cawv txiv hmab uas tsis muaj chaw tshwm chim, ib yam li lub hnab tawv cawv txiv hmab tshiab uas twb yuav tawg. Kuv yuav tsum hais, thiaj li tshwm chim zoo mentsis, kuv yuav tsum qheb kuv daim tawv ncauj teb. Kuv yuav tsis hais saib leejtwg ntsej muag li, lossis yuav tsis hais lus mos lus muag qhuas leejtwg, rau qhov kuv tsis txawj hais lus mos lus muag qhuas, yog ua li ntawd tus uas tsim kuv yuav rhuav tshem kuv. Yauj 'e, nimno thov mloog kuv hais, thiab mloog kuv tej lus huvsi. Saib maj, kuv rua ncauj, mas kuv tus nplaig hauv kuv qhov ncauj kuj hais. Kuv tej lus qhia tej kev ncaj ncees hauv kuv lub siab tshwm los, thiab kuv lub qhov ncauj paub dabtsi kuj hais tseeb kiag. Vajtswv tus Ntsuj Plig tsim kuv, thiab tus uas muaj hwjchim loj kawg nkaus tej pa ua rau kuv ciaj sia. Yog koj teb tau kuv kuj teb los maj, cia li npaj koj tej lus rau ntawm kuv xubntiag thiab sawv tsees maj. Saib maj, kuv nyob ib yam li koj rau ntawm Vajtswv xubntiag. kuv kuj yog muab ib thooj av nplaum puab los xwb. Koj tsis txhob ntshai kuv es ua rau koj poob siab, kuv yuav tsis yuam koj kom hnyav dhau. “Tseeb tiag, koj hais rau kuv mloog, thiab kuv hnov koj tej lus. Koj hais tias, ‘Kuv ua huv, tsis tau fav xeeb kiag li, kuv dawb huv, tsis muaj kev phem kev qias nyob hauv kuv kiag li. Saib maj, Vajtswv ua plaub rau kuv, nws suav hais tias kuv yog nws li yeeb ncuab. Nws muab kuv txhais kotaw ntxig rau rab cuab, thiab zov rawv kuv txhua txojkev.’ “Saib maj, zaj no koj ua tsis raug cai. Kuv yuav teb koj. Vajtswv loj dua neeg. Ua cas koj yuav cam nws hais tias, ‘Vajtswv tsis teb neeg tej lus li’? Rau qhov Vajtswv ua ib fab ob fab los hais, los neeg tsis nkag siab. Thaum neeg pw hmo ntuj tsaug zog ceev lawv ua npau suav thiab ua yog toog saum lawv lub txaj pw, mas thaum ntawd Vajtswv qheb neeg lub qhov ntsej hnov, thiab nws tej lus qhuab ntuas ua rau lawv ntshai, xwv Vajtswv thiaj ua kom neeg tig ntawm tej uas lawv ua rov los, thiab txiav neeg txojkev khav theeb pov tseg. Nws tav lawv tus ntsuj plig ntawm lub qhov tuag, thiab tav lawv txojsia tsis raug hniav ntaj ua kom puam tsuaj. Neeg raug kev mob nkeeg nplawm qhuab qhia rau saum nws lub txaj pw, thiab nws tej pob txha mob heev kuj nplawm nws tsis tu ncua li. Nws txojsia thiaj li dhuav zaub mov, thiab nws lub siab kuj dhuav tej zaub mov uas qab qab. Nws cev nqaij sem zuj zus saib tsis pom li, nws tej pob txha uas txeev saib tsis pom kuj tshwm tuaj. Nws tus ntsuj plig mus ze rau hauv lub qhov tuag, thiab nws txojsia mus ze cov uas coj kev tuag los. Yog muaj ib tug tubtxib saum ntuj los pab nws, yog ib tug hauv ib txhiab leej uas ua tus nyob nruab nrab es yuav qhia qhov uas raug cai rau neeg, yog tus tubtxib saum ntuj ntawd khuvleej nws thiab hais tias, ‘Thov tso nws dim qhov uas mus rau hauv lub qhov tuag, vim kuv nrhiav tau nqe txhiv lawm. Thov cia nws tej nqaij mos zoo li tej menyuam mos cev nqaij, thiab cia nws rov qab muaj zog yam li thaum tseem hluas.’ mas neeg yuav thov Vajtswv thiab Vajtswv lees yuav nws, thiab nws yuav los cuag Vajtswv lub xubntiag xyiv fab hlo. Thiab Vajtswv yuav pub nws rov ua tus ncaj ncees. Mas nws yuav hu nkauj tab meeg ib tsoom neeg tias, ‘Kuv tau ua txhaum lawm thiab muab qhov zoo ntxeev ua qhov phem, los kuv tsis raug txim li uas tsim nyog kuv raug. Vajtswv txhiv kuv tus ntsuj plig dim qhov uas mus rau hauv lub qhov tuag mas kuv txojsia yuav pom txojkev kaj.’ “Saib maj, Vajtswv tau ua tej no huvsi rau neeg ob zaug peb zaug, kom thiaj coj tau lawv tus ntsuj plig tawm hauv lub qhov tuag, qhov kaj uas pub txojsia thiaj ci rau lawv. Yauj 'e, cia li ua tib zoo mloog kuv hais, nyob twjywm mas kuv yuav hais. Yog koj muaj dabtsi hais, kuj teb kuv, cia li hais rau qhov kuv xav tsa koj txojcai. Yog koj tsis muaj lus hais, kuj cia li mloog kuv hais, nyob twjywm mas kuv yuav qhia tswvyim rau koj.” Mas Elihu hais tias, “Nej cov uas muaj tswvyim cia li mloog kuv tej lus, nej cov uas txawj ntse, cia li tig ntsej mloog kuv hais. Lub qhov ntsej sim mloog tej lus, ib yam li lub qhov ncauj sim zaub mov. Thov cia peb xaiv yam uas raug, cia peb kawm hauv peb covsaib yam twg zoo, rau qhov Yauj hais tias, ‘Kuv tsis tau ua txhaum, tiamsis Vajtswv qhau kuv cai lawm. Txawm yog kuv ua raug cai los kuv raug muab suav ua neeg dag, txawm yog kuv tsis tau fav xeeb los kuv tej kiav txhab kho tsis zoo.’ Leejtwg yuav zoo li Yauj? Nws haus txojkev thuam luag ib yam li haus dej, nws nrog tej neeg phem koom ua ke, thiab nrog cov neeg limhiam mus ua ke. Vim nws hais tias, ‘Qhov uas neeg zoo siab rau hauv Vajtswv tsis muaj qabhau dabtsi rau lawv.’ “Vim li no, nej cov uas txawj nkag siab, cia li mloog kuv hais, tsis muaj ib zaug Vajtswv yuav ua limhiam kiag li, thiab tus uas muaj hwjchim loj kawg nkaus yuav ua txhaum. Vajtswv yuav pauj rau neeg raws li lawv tau ua lawd, thiab Vajtswv yuav ua rau lawv raug raws li lawv lub neej. Qhov tseeb, Vajtswv yeej yuav tsis ua limhiam, thiab tus uas muaj hwjchim loj kawg nkaus yuav tsis qhau txojcai. Leejtwg tsa Vajtswv kav lub qab ntuj, lossis leejtwg muab lub ntiajteb huvsi cob rau Vajtswv? Yog Vajtswv rho nws tus ntsuj plig rov qab, thiab sau zog nws tej pa rov qab rau nws, ces txhua tus cev nqaij yuav puam tsuaj tag huvsi, thiab neeg yuav rov qab mus ua hmoov av xwb. “Yog koj txawj ntse, cia li mloog tej no, cia li mloog kuv tej lus. Tsim nyog cia tus uas ntxub qhov uas tu plaub ncaj ua tus kav lov? Koj yuav rau txim rau tus uas ncaj ncees thiab muaj hwjchim lov? Nws yog tus uas hais rau vajntxwv tias, ‘Koj tsis muaj nqes dabtsi,’ thiab hais rau cov uas ua hlob tias, ‘Koj yog neeg limhiam,’ yog tus uas tsis saib cov thawj ntsej muag lossis saib hlob cov nplua nuj heev dua cov pluag, rau qhov cov neeg no huvsi yog Vajtswv txhais tes tsim. Ib pliag ntshis xwb lawv kuj tuag tag, thaum ib tag hmo tej neeg tshee hnyo thiab tag sim neej lawm, thiab cov uas muaj hwjchim kuj raug coj mus lawm, tsis yog neeg txhais tes ua. “Vajtswv lub qhov muag ntsia ntsoov neeg txojkev, thiab nws pom lawv txhua kauj ruam. Tsis muaj duab tsaus lossis qhov tsaus ntuj nti uas cov neeg phem yuav tsiv nraim tau. Vajtswv tsis teem caij rau leejtwg mus cuag Vajtswv txais kev txiav txim. Vajtswv rhuav tshem cov uas muaj hwjchim tsis txog tshuaj saib, thiab tsa lwm tus los nyob lawv chaw. Nws paub lawv tej haujlwm lawm thiaj li muab lawv xyeeb kiag tseg thaum hmo ntuj, lawv thiaj ntsoog tag. Vajtswv ntaus lawv tab meeg neeg vim yog lawv tej kev limhiam, rau qhov lawv tig hlo ntawm Vajtswv lawm, thiab tsis quav ntsej nws txojkev kiag li. Vim li no lawv thiaj ua rau tej pluag lub suab quaj nrov tuaj txog Vajtswv, mas nws kuj mloog cov uas txom nyem nyuaj siab lub suab. Thaum Vajtswv nyob twjywm leejtwg yuav rau txim tau rau nws? Thaum nws fee plhu lawd leejtwg yuav pom tau nws? Vajtswv yeej saib neeg thiab tej tebchaws xwv tus uas tsis hwm Vajtswv thiaj tsis tau kav thiab tsis cuab qhov taub rau cov pejxeem. “Muaj leejtwg hais rau Vajtswv tias, ‘Kuv raug nplawm lawm, kuv yuav tsis ua txhaum ntxiv lawm, thov qhia tej uas kuv tsis pom rau kuv, yog kuv tau ua txhaum txim, kuv yuav tsis ua ntxiv lawm’? Vim koj tsis kam txais tej uas Vajtswv ua mas Vajtswv yuav ua rau koj raws li koj lub siab xav lov? Koj yuav tsum xaiv, tsis yog kuv xaiv. Yog li no koj paub li cas cia li hais mus. Cov uas txawj ntse yuav hais rau kuv thiab tus muaj tswvyim uas mloog kuv hais yuav hais tias, ‘Yauj hais yam li tsis paub qabhau, nws tej lus tsis muaj lub ntsiab li.’ Xav cia Yauj raug sim siab mus txog thaum kawg, rau qhov nws tej lus teb zoo yam nkaus li tej neeg limhiam tej lus. Yauj muab qhov uas fav xeeb tsav rau nws lub txim, nws npuaj teg thuam luag rau hauv peb nruab nrab, thiab ua ncauj ntau tawm tsam Vajtswv.” Elihu hais ntxiv tias, “Koj xav tias qhov no raug cai lov? Koj hais tias, ‘Kuv ua ncaj ncees tab meeg Vajtswv.’ Qhov uas koj nug tias, ‘Kuv yuav tau qabhau dabtsi? Kuv tau dabtsi zoo tshaj qhov uas kuv ua txhaum?’ kuv yuav teb koj thiab koj cov phoojywg. Cia li tsa muag ntsia saum nruab ntug, thiab saib tej huab uas nyob siab dua koj. Yog koj ua txhaum koj tau ua li cas rau Vajtswv? Yog koj tej kev fav xeeb nthuav loj tuaj, koj yuav ua tau li cas rau Vajtswv? Yog koj ua ncaj ncees, koj pub dabtsi rau Vajtswv, thiab Vajtswv tau txais dabtsi ntawm koj txhais tes? Koj tej kev limhiam kuj yog ua rau neeg zoo yam li koj, thiab koj txojkev ncaj ncees kuj yog muaj qabhau rau neeg. “Yog tim raug kev quab yuam ntau heev, neeg thiaj quaj hu, lawv quaj thov kev pab vim yog tus uas muaj hwjchim txhais tes. Tiamsis tsis muaj ib tug hais tias, ‘Vajtswv uas tsim kuv nyob qhovtwg? Yog tus uas pub lub suab hu nkauj thaum hmo ntuj, thiab yog tus uas qhia peb ntau dua qhia tsiaj txhu hauv lub ntiajteb thiab ua rau peb ntse dua tej noog saum nruab ntug.’ Lawv quaj hu qhov ntawd vim yog tim cov neeg phem tej kev khav theeb. tiamsis Vajtswv tsis teb Vajtswv yeej tsis mloog tej suab uas tsis muaj qabhau, thiab tus uas muaj hwjchim loj kawg nkaus yeej tsis quav ntsej li. Nws yimhuab tsis mloog koj rau thaum koj hais tias koj tsis pom nws, thiab hais tias tshaj plaub nyob ntawm nws xubntiag thiab koj tos rawv nws. Vim nimno Vajtswv txojkev chim tsis tau rau txim, thiab nws tsis quav ntsej tej kev fav xeeb pes tsawg, mas Yauj thiaj qheb ncauj hais tej lus tsis muaj qabhau, thiab ua ncauj ntau hais tej lus tsis paub tab.” Mas Elihu rov hais ntxiv tias, “Thov ua siab ntev rau kuv mentsis thiab kuv yuav qhia koj, vim kuv muaj tej yam uas yuav nyob Vajtswv chaw hais rau koj. Kuv yuav coj txojkev paub uas nyob deb los, thiab tsa tus uas tsim kuv txojcai. Qhov tseeb, kuv tej lus tsis yog dag, tus uas paub ib puas tsav yam huvsi nrog koj nyob no. “Saib maj, Vajtswv muaj hwjchim thiab tsis tau saib tsis taus leejtwg, nws muaj hwjchim nkag siab zoo heev. Nws tsis tsom kwm cov neeg limhiam txojsia, tiamsis nws tsa cov uas raug txom nyem txojcai. Nws tsis tau fee plhu ntawm cov uas ncaj ncees, tiamsis nws tsa lawv nrog cov vajntxwv nyob saum lub zwm txwv mus ib txhis, thiab lawv tau nyob saum lub chaw siab. Yog lawv raug saw hlau khi, thiab mag kev txom nyem txoj hlua, nws kuj qhia lawv tej haujlwm thiab lawv tej kev fav xeeb rau lawv tias, lawv tau ua neeg khav theeb. Nws qheb lawv lub qhov ntsej mloog tej lus qhuab qhia, thiab qhia kom lawv tig ntawm lawv tej kev txhaum txim rov los. Yog lawv mloog lus thiab ua koom tu nws, lawv yuav nyob txwm nkaus lawv lub hnub nyoog vam meej, thiab nyob txwm nkaus lawv lub xyoo kaj siab lug. Tiamsis yog lawv tsis mloog lus lawv yuav raug hniav ntaj puam tsuaj, thiab tuag tag vim yog tsis muaj kev paub. “Cov uas tsis hwm Vajtswv kuj khaws kev chim cia, thaum nws muab lawv khi, lawv tsis thov kev pab. Lawv tuag thaum tseem hluas, thiab lawv txojsia tag rau hauv plawv cov txivneej muag cev ntawm tej tsev dab. Vajtswv siv txojkev txom nyem cawm tus uas txom nyem nyuaj siab, thiab siv txojkev ceeblaj qheb nws qhov ntsej. Nws yaum koj tawm hauv txojkev ntxhov siab los rau hauv lub chaw dav uas tsis muaj chaw ti, thiab tej uas tso rau saum koj lub rooj mov yog tej uas rog nthaws. “Koj raug lub txim uas cov neeg phem raug pov khawv nkaus, txojkev txiav txim uas ncaj los caum ntes tau koj. Cia li ceev faj tsam ces txojkev npau taws ntxias kom koj thuam luag, thiab txhob cia tej nyiaj xiab ua rau koj yuam kev. Koj tej nyiaj txiag yuav pab tau koj dim txojkev ntxhov siab lov? Lossis koj lub zog huvsi yuav pab koj tau lov? Tsis txhob ntshaw kom tsaus ntuj, rau thaum neeg raug muab txiav ntawm lawv lub chaw nyob. Ceev faj zoo, tsis txhob tig mus nrhiav txojkev txhaum txim, vim koj xaiv yam no heev dua xaiv kev txom nyem nyuaj siab. Saib maj, Vajtswv uas muaj hwjchim loj kawg nkaus nyob lub chaw siab, leejtwg yuav txawj qhuab qhia li nws? Leejtwg yog tus uas qhia kev rau nws? Lossis leejtwg yuav hais tau tias, ‘Koj ua txhaum lawm’? “Cia li nco ntsoov qhuas nws tes haujlwm, uas neeg tau hu nkauj txog ntawd lawm. Neeg sawvdaws yeej ntsia ntsoov tej ntawd, thiab neeg yeej tuaj deb pom. Saib maj, Vajtswv loj kawg, peb tsis txawj paub nws, nws lub hnub nyoog los yog yam uas tsis paub suav li. Nws rub tej ncos dej mus rau saud muab tso hauv cov huab ua nag los, mas tej huab muab hliv los, thiaj li los ntau kawg rau neeg. Muaj leejtwg txawj nkag siab qhov uas tej huab nthuav dav, thiab qhov uas muaj suab xob nthe hauv Vajtswv lub chaw nyob lov? Saib maj, nws tso xob laim laim puag ncig nws, thiab nws npog thoob plaws hauv qab thu hiavtxwv. Nws muab tej no los txiav txim rau ib tsoom neeg, nws pub kom muaj zaub mov noj nplua mias. Nws txhais tes tuav rawv xob laim, thiab nws txib mus tua tej qhov uas nws twb hom tseg lawm. Lub suab xob nthe yog ceeb toom tias nag xob nag cua yuav los, thiab tej tsiaj txhu kuj qhia tias nag yuav los. Tej no ua rau kuv lub siab tshee hnyo, thiab ua kom ceeb poob plig tag li. Cia li mloog Vajtswv lub suab uas nroo ntws thiab lub suab nrov vig voog uas tawm hauv nws lub qhov ncauj los. Nws tso kom mus thoob plaws txhua ceg kaum ntuj, thiab tso nws tej xob laim mus thoob plaws hauv lub ntiajteb. Nws lub suab nrov ntwg raws qab mus, thiab nws siv nws lub suab uas zoo tshaj nroo nrov ntwg, nws yeej tsis tav xob laim rau thaum hnov nws lub suab nthe. Vajtswv ua nws lub suab nroo ntwg phimhwj kawg li, thiab nws ua tej haujlwm loj uas peb tsis txawj nkag siab. Nws hais rau tej daus xib daus npu tias, ‘Cia li los rau saum lub ntiajteb,’ thiab hais rau tej nag tshauv tias, ‘Cia li los tej niag pluav hlob hlob.’ Vajtswv tav neeg txhua tus txhais tes, kom txhua tus uas nws tsim los thiaj li kawm paub nws tej haujlwm. Thaum ntawd tej tsiaj qus mus nkaum rau hauv lawv lub zes, thiab so hauv lawv tej qhov tsua. Cua daj cua dub tawm hauv nws lub chaw tuaj, cov cua no kuj ntsawj tuaj. Vajtswv ua pa tawm ua dej lawg, thiab tej hav dej kuj nkoog khov tag. Nws muab dej nag rau tej huab tsaus nti thauj, thiab ua xob laim laim liab vog hauv tej huab tuaj. Tej huab tig mus raws li Vajtswv coj, ua txhua yam uas Vajtswv hais kom tiav thoob plaws rau hauv lub ntiajteb. Nws ua tej no tshwm los nplawm qhuab qhia kuj yog, lossis pab nws lub tebchaws kuj yog, lossis qhia nws txojkev hlub ruaj khov kuj yog. “Yauj 'e, cia li mloog tej no, cia li nyob twjywm tshuaj saib tej haujlwm phimhwj uas Vajtswv ua. Koj paub tias Vajtswv qhia li cas rau tej huab thiab ua li cas xob laim thiaj ci nplas hauv nws tej huab tuaj lov? Koj paub tias yog li cas huab yuav ya tau rau saum ntuj lov? Yog tej haujlwm phimhwj uas tus muaj kev txawj ntse tshaj plaws ua. Koj lub cev kub lug hauv koj tej ris tsho, rau thaum lub ntiajteb nyob ntsiag to vim yog raug cov cua uas ntsawj sab nrad tuaj. Koj txawj nthuav lub ntuj yam li Vajtswv ua kom tawv yam li tej tooj liab uas nchuav siv ua iav tau lov? Cia li qhia peb saib peb yuav hais li cas rau Vajtswv, vim tsaus ntuj lawm peb npaj tsis tau peb tej lus. Puas yuav hais tau rau nws tias kuv xav hais lus lov? Txeev muaj leejtwg xav tias nws xav raug kev puam tsuaj lov? Neeg saib tsis tau qhov kaj rau thaum lub hnub ci nplas saum ntuj, yog thaum cua ntsawj ua rau lub ntuj kaj nrig. Thaum tej kub tus duab ci nplas sab ped tuaj, Vajtswv hnav hwjchim meej mom uas txaus ntshai kawg. Tus uas muaj hwjchim loj kawg nkaus mas peb ntsib tsis tau nws, nws muaj hwjchim loj heev thiab nws txiav txim ncaj, nws txojkev ncaj ncees muaj loj kawg nws thiaj tsis quab yuam leejtwg li. Vim li no neeg thiaj hwm thiab ntshai nws. Vajtswv yeej tsis quav ntsej tus uas nws xam pom tias nws muaj tswvyim.” Mas Yawmsaub teb hauv cua daj cua dub tuaj rau Yauj tias, “Leejtwg hais tej lus uas tsis muaj qabhau tshum tej uas kuv npaj tseg lawd tsaus ntuj nti lawm? Cia li sia siv khov kho yam li ib tug txivneej yawg, kuv yuav nug koj, koj yuav tsum teb kuv. “Thaum kuv pua daim uas tiag lub ntiajteb koj nyob qhovtwg? Yog koj nkag siab, cia li qhia rau kuv. Leejtwg yog tus hom tias lub ntiajteb yuav tsim loj li cas? Koj yeej paub tiag los maj! Leejtwg muab hlua ntsuas lub ntiajteb? Daim taw tiag lub ntiajteb txawb rau saum dabtsi? Leejtwg pua thawj daim lag zeb tsim lub ntiajteb, rau thaum cov hnub qub ci hu nkauj qhuas thaum kaj ntug txoog, thiab cov tubtxib saum ntuj sawvdaws qw zoo siab xyiv fab? “Leejtwg muab qhov rooj thaiv dej hiavtxwv cia, rau thaum dej tshwm plaws hauv ntiajteb lub plab los? Yog thaum kuv tsim huab ua tsoos tsho rau hiavtxwv hnav, thiab muab qhov tsaus ntuj nti ua daim ntaub qhwv hiavtxwv, thiab tu ciam rau dej nyob thiab ua qhov rooj ua las tav rau, thiab hais tias, ‘Koj mus tau deb npaum li no xwb, tsis txhob mus dhau ciam, koj tej nthwv dej uas khav ntxhias tsuas ntas txij li no xwb.’ “Txij thaum yug koj los koj tau qhia kev rau qhov kaj thaum tagkis, thiab ua rau kaj ntug paub nws lub chaw nyob lov, xwv nws thiaj tuav rawv npoo ntiajteb, thiab thawv cov neeg limhiam tawm hauv lub ntiajteb mus? Lub ntiajteb raug hloov yam li cov av nplaum uas ntaus cim rau, thiab pom txhua yam meej yam li tej tsoos tsho. Cov neeg limhiam qhov kaj raug muab txeeb ntawm lawv lawm, thiab lawv txhais npab uas tsa hlo raug muab lov lawm. “Koj nkag txog hauv qhov uas dej hiavtxwv txhawv los, lossis mus rau hauv tej chaw nraim nkoos hauv nruab tiv txwv lawm lov? Lub qhov rooj kev tuag raug muab qhia rau koj pom lov, lossis koj pom qhov tsaus ntuj nti lub rooj qho lawm lov? Koj twb paub lub ntiajteb loj thiab dav li cas lawm lov? Yog koj paub tej no huvsi lawm, cia li hais. “Txojkev uas mus txog qhov kaj lub tsev nyob rau qhovtwg, thiab qhov tsaus ntuj lub chaw nyob, nyob rau qhovtwg xwv koj thiaj coj tau qhov kaj qhov tsaus ntuj mus rau hauv nws lub chaw, thiab paub txojkev uas mus rau nws lub tsev? Nyaj koj paub rau qhov twb yug koj lawm, thiab koj li hnub nyoog twb ntau kawg lawm. “Koj twb mus rau hauv tej txhab uas rau daus xib daus npu, lossis pom tej txhab uas rau dej lawg lawm lov? Tej ntawd yog kuv npaj cia rau thaum uas raug ceeblaj, thiab hnub uas sib tua thiab ua rog. Txojkev uas mus rau lub chaw faib qhov kaj tawm los, thiab lub chaw uas cua sab hnub tuaj tawm mus rau saum lub ntiajteb nyob qhovtwg? “Leejtwg rhawv kwj rau tej nthwv nag los, thiab rhawv kev rau xob tua, kom thiaj tso nag los rau saum lub tebchaws uas tsis muaj neeg nyob, thiab los rau saum lub tebchaws ntuj nrag teb do uas tsis muaj leejtwg nyob, kom lub tebchaws uas raug muab tso tseg nyob do cuas thiaj li tsau npo, thiab ua rau lub tebchaws tuaj nroj tsuag? “Nag muaj txiv thiab lov? Leejtwg yug tau dej lwg los? Dej lawg tawm hauv leejtwg lub plab menyuam los, thiab leejtwg yug tau tej te uas poob saum ntuj los, ua rau dej tawv li pob zeb, thiab nplaim dej hiavtxwv nkoog khov? “Koj khi tau tej hnub qub Txhiaj Txiv Mim ua ib ntsau, lossis daws tau txoj hlua khi hnub qub Poj Sua Kwv Ntas lov? Koj coj tau tej hnub qub mus los raws li nws lub caij lub nyoog, lossis coj tau hnub qub Khais thiab nws cov menyuam kev lov? Koj paub tej kevcai uas kav lub ntuj lov? Koj tsa tau lub ntuj kav lub ntiajteb lov? “Koj tsa tau suab hu mus txog tej huab, ua kom nag los hlob nyab laum nkaus koj lov? Koj txib tau xob laim tawm mus lov? Thiab xob laim hais rau koj tias, ‘Peb nyob ntawm no,’ lov? Leejtwg pub tswvyim rau os dej dawb, lossis qhia rau tus lau qaib to taub? Leejtwg muaj tswvyim suav tau tej huab? Leejtwg yuav nchuav tau lub hnab dej saum ntuj los, rau thaum tej hmoov av ntws los ua ib pawg, thiab tej pob av sib tuav ruaj? “Koj tom tau nqaij rau tsov ntxhuav noj, thiab pub tau rau tej thav tsov ntxhuav noj tsau lov, rau thaum tsov pw pliab lua rau hauv nws lub qhov tsua, lossis pw zov rau hauv lub chaw nraim? Leejtwg npaj nqaij rau uab lag noj, rau thaum nws menyuam quaj rau Vajtswv, thiab thaum mus mus los los vim yog tshaib plab? “Koj paub tias sai yug menyuam thaum twg, thiab koj ntsia ntsoov maum muas lwj yug menyuam lov? Koj suav tau nws suab menyuam tsawg lub hli, thiab koj paub lub sijhawm uas nws xya menyuam lov, yog thaum nws pw nthi xya menyuam, thiab xya tau tus menyuam mos? Tej menyuam muaj zog tuaj thiab hlob rau tom hav zoov, ces txawm tawm mus lawm tsis rov los li. “Leejtwg tso tus nees luav qus nyob kab ntsab? Leejtwg daws hlua tso tus nees luav mus? Kuv muab lub tebchaws moj sab qhua rau nws nyob, thiab muab thaj av ntsev rau nws nkaum. Nws thuam luag tej suab nrov ntshu hauv lub moos, nws tsis hnov tus uas caij lub suab qw. Nws mus mus los los saum tej roob uas yog nws lub tshav zaub, nws nrhiav txhua yam zaub ntsuab ntsuab noj. “Nyuj qus kam ua koj qhev lov? Nws yuav zov ntawm koj lub dab zaub ib hmos lov? Koj muab hlua khi nyuj qus laij teb tau lov? Nws yuav hai lob phuaj hauv lub hav raws koj qab lov? Koj yuav vam nws vim nws muaj zog heev, thiab muab koj tej haujlwm tso rau nws ua lov? Koj vam tias nws yuav rov los, thiab thauj koj tej qoob los rau hauv lub tshav ntaus no lov? “Noog ntxhuav phab tis ntxuaj zoo siab hlo, tiamsis nws phab tis thiab cov plaub zoo li os dej dub lov? Nws tseg nws tej qe rau hauv av, cia av puag kom sov, tsis nco tias tej zaum ib txhais kotaw yuav tsuj kom tawg, thiab tej tsiaj qus yuav tsuj. Nws ua nruj ua tsiv rau nws cov menyuam yam li tsis yog nws li, nws nkim nws lub zog nteg qe xwb nws tsis mob siab, vim yog Vajtswv ua rau nws tsis muaj tswvyim, thiab tsis pub ib qho kev txawj ntse rau nws. Thaum nws siv zog dhia khiav, nws thuam luag tus nees thiab tus uas caij nees. “Koj pub zog rau nees lov? Koj cog txoob rau saum nees caj dab lov? Koj ua rau nws dhia caws qia yam li kooj txig lov? Nws lub suab tshuab khav ntxhias txaus ntshai heev. Nws txauj tes hauv lub hav thiab xyiv fab hlo rau nws lub zog, nws tawm mus ua rog rau cov uas tuav cuab yeej ua rog. Nws thuam luag txojkev ntshai thiab tsis poob siab li, nws tsis thim khiav hniav ntaj. Raj xub nrov zeev saum nws, thiab rab hmuv nkaug thiab rab hmuv laim ci nplas. Nws dhia nrawm mus thiab npau taws ceev nyaum kawg li, thaum hnov dheev lub suab raj kub yaj nws nyob tsis tswm li. Thaum tshuab raj kub yaj nrov nws hee laws, nws hnov ntxhiab ua rog deb deb, thiab hnov tej thawj rog lub suab txhib thiab lub suab qw. “Koj lub tswvyim ua rau liaj txawj ya tshoom siab, thiab nthuav nws phab tis mus rau sab nrad lov? Tus dav ya siab siab raws li koj hais thiab ua lub zes rau tej chaw siab lov? Nws nyob ntawm qab tsuas, thiab ua zes rau saum hauv tsua uas ruaj khov. Nws nyob qhov ntawd nuam saib tej tsiaj uas yuav tom, nws lub qhov muag pom tsiaj deb deb li. Nws tej menyuam haus ntshav, tsiaj raug tua tuag rau qhovtwg, nws kuj nyob qhov ntawd.” Yawmsaub hais rau Yauj tias, “Tus uas pheej yws yuav cav tus uas muaj hwjchim loj kawg nkaus lov? Tus uas cav Vajtswv cia nws teb.” Mas Yauj teb Yawmsaub tias, “Kuv mas kuv yog neeg tsis tsim txiaj. Kuv yuav teb koj tau li cas? Kuv muab tes pos qhov ncauj. Kuv twb hais ib zaug lawm, kuv yuav tsis teb, kuv twb hais ob zaug lawm, kuv yuav tsis hais ntxiv.” Mas Yawmsaub hais hauv cua daj cua dub tuaj rau Yauj tias, “Cia li sia siv khov kho yam li ib tug txivneej yawg, kuv yuav nug koj, koj yuav qhia kuv. Koj yuav hais tias kuv ua tsis raug cai lov? Koj yuav rau txim tias kuv txhaum xwv koj thiaj tsis txhaum lov? Koj muaj txhais npab zoo ib yam li Vajtswv lov? Thiab koj txawj ua suab nrov ntseeg nkaws ib yam li nws ua lov? Cia li muab meej mom thiab hwjchim los hnav, thiab muab koob meej thiab hwjchim ci ntsa iab los qhwv koj lub cev. Muab koj txojkev npau uas puv phwj yos nchuav los, cia li ntsia ntsoov txhua tus uas khav theeb thiab muab txo kom poob qes. Cia li saib txhua tus uas khav theeb thiab muab rub kom poob los, thiab tsuj pes ntiag cov neeg limhiam rau ntawm lub chaw uas lawv sawv ntawd. Muab lawv txhua tus zais ua ke rau hauv tej hmoov av, muab lawv lub ntsej muag khi cia rau hauv nruab yeeb. Ces kuv thiaj lees rau koj tias yog koj txhais tes xis pab tau koj kov yeej. “Saib Npehemau nawj, nws kuj yog kuv tsim ib yam li tsim koj. Nws noj zaub yam li nyuj. Saib nws lub zog ntawm nws lub duav, thiab saib tug hwjchim hauv tej leeg ntawm nws lub plab. Nws ua kom nws kotw tawv li ntoo ciab, thiab tej leeg ntawm nws ncej qab sib txuas zoo. Nws tej pob txha zoo li tej kav tooj liab, nws txhais kotaw zoo yam li tej yas hlau. Nws yog tus tsiaj tseem ceeb tshaj uas Vajtswv tsim los, tsuas yog tus uas tsim nws thiaj coj tau ntaj rau nws. Tej roob hlav zaub rau nws noj, yog lub chaw uas txhua yam tsiaj qus nyob ua si. Nws pw hauv tsob qab ntoo ntxhov thiab hauv hav tauj deg thiab hauv pas hawv. Tsob ntoo ntxhov ua duab ntxoov ntxoo rau nws, tej ntoo lwg zaj ntawm ntug dej nyob vij nws. Dej ntsawj ceev npaum twg nws kuj tsis ntshai, txawm yog dej Yaladee huam hlob ntsawj nws qhov ncauj los nws tso siab plhuav. Leejtwg yuav muab nqe lauj nqe tau nws? lossis ua hlua cuab tau nws lub txiv ntswg? Koj xuas nuv ntses chob rub tau Leviathas los, lossis muab hlua khi tau nws tus nplaig lov? Koj muab hlua chaws tau nws qhov ntswg, lossis muab nqe lauj nqe tau nws puab tsaig lov? Nws yuav taij thov koj ntau lov? Nws yuav hais lus mos lus muag rau koj lov? Nws yuav nrog koj sib cog lus es koj thiaj yuav nws ua koj tus qhev mus ib txhis lov? Koj yuav nrog nws ua si yam li ib tug noog, lossis koj yuav muab hlua khi cab mus rau koj tej ntxhais hluas saib lov? Tub luam yuav tuaj hais nqe yuav nws lov? Lawv yuav muab nws faib rau tej tub lag tub luam lov? Koj xuas hmuv nkaug tau nws daim tawv, lossis xuas hmuv nkaug chob tau nws taubhau lov? Cev tes ntsiab nws saib, xav txog qhov uas sib ntsuas zog mas koj yuav tsis rov qab ua dua. Qhov uas yuav ntes nws yog vam do xwb. Thaum pom dheev nws neeg yuav poob siab nthav. Tsis muaj leejtwg nyaum txaus uas kav zes nws. Mas leejtwg yuav sawv tiv tau kuv? Leejtwg pub tau dabtsi rau kuv uas kuv yuav tsum pauj nws? Txhua yam uas nyob hauv qab ntuj no huvsi kuj yog kuv li. “Kuv yuav tsis tseg qhov uas hais txog nws tej tes taw, thiab nws lub zog uas loj thiab nws lub cev uas zoo nkauj. Leejtwg yuav laws tau nws daim tawv sab nraud? Leejtwg yuav nkaug tau to nws lub tsho hlau ob txheej? Leejtwg yuav qheb tau nws lub puab tsaig uas muaj kaus hniav puag ncig txaus ntshai kawg? Nws lub nrob qaum muaj tej phiaj hlau thaiv ua ib kab sab lo ntom nti yam li nias cim rau. Tej nplai ntawd nyob tuab ntws, cua ntsawj twb nkag tsis tau rau hauv. Tej nplai ntawd sib lo nkaus, ib nplai tshooj ib nplai, muab txav tsis tau li. Nws txham mas muaj duab ci lam lug, nws lub qhov muag ci yam li tus duab ci thaum kaj ntug. Tes tsau cig tawm hauv nws lub qhov ncauj los, txim taws tawm liab vog los. Pa ncho tawm hauv nws lub qhov ntswg, yam nkaus li lub laujkaub uas npau saum cub tawg tauj deg. Nws li pa rauv thee cig, nplaim taws tawm hauv nws lub qhov ncauj los. Nws lub caj dab khov muaj zog heev, ntshai rwg rau ntawm nws xubntiag. Nws tej tawv plab tuab npawv sib tais ob peb txheej, tawv nkawv txav tsis tau li. Nws lub siab tawv yam li pob zeb, thiab tawv li txhib niag zeb. Thaum nws tshwm plaws tuaj, tus uas muaj hwjchim kuj ntshai, thaum nws nplawm dej txaws txua lawv poob siab nthav. Txawm yog hniav ntaj raug nws los tsis to, txawm yog hmuv nkaug hmuv laim thiab xub vos los tsis to li. Nws saib hlau zoo yam li quav nyab, thiab tooj liab zoo yam li ntoo po. Rab xub kuj raws tsis tau nws khiav, lub qe zeb uas fiav ntawm txoj hlua kuj zoo li quav nyab. Rab qws ntaus kuj zoo li quav nyab xwb, nws thuam luag rab hmuv uas nkaug tuaj lub suab ya. Nws lub qab plab ntse yam li tej txhais laujkaub tawg, nws nkag hauv cov av nplaum zoo li lub thob log luam qoob. Nws ua rau dej hauv qab thu npau li lub laujkaub dej npau, nws ua rau hiavtxwv npau li lub hwj roj tsw qab. Dej txaws dawb vog ib kab raws nws qab, ua rau luag xav hais tias dej hiavtxwv dawb hau. Saum lub ntiajteb tsis muaj ib yam dabtsi zoo thooj li nws, nws yog tus uas tsim tau los tiamsis tsis paub ntshai dabtsi li. Nws saib tsis taus txhua yam uas nyob siab, nws ua vajntxwv kav txhua yam uas khav ntxhias.” Mas Yauj teb Yawmsaub tias, “Kuv paub tias koj ua tau txhua yam, thiab tej uas koj xav tseg lawd tsis muaj ib qhov yuav ua tsis tiav. Koj hais tias, ‘Leejtwg tsis paub qabhau es muab tej uas kuv npaj tseg lawd zais?’ Kuv thiaj hais txog tej uas kuv tsis nkag siab, yog tej phimhwj uas kuv tsis paub. Koj hais tias, ‘Mloog maj, kuv yuav hais, kuv yuav nug koj, koj yuav qhia kuv.’ Kuv lub qhov ntsej txeev hnov txog koj, tiamsis nimno kuv lub qhov muag pom kiag koj ntag. Vim li no kuv thiaj ntxub kuv tus kheej, thiab kuv nyob hauv tej hmoov av thiab tej pluav tshauv ntxeev dua siab.” Thaum Yawmsaub hais tej lus no rau Yauj tag lawm, Yawmsaub hais rau Elifa uas yog neeg Themas tias, “Kuv npau taws rau koj thiab koj ob tug kwvluag, rau qhov thaum nej hais txog kuv nej hais tsis raug raws li kuv tus qhev Yauj hais. Vim li no nej cia li coj xya tus txiv nyuj thiab xya tus txiv yaj mus cuag kuv tus qhev Yauj, thiab muab ua kevcai hlawv xyeem ua nej li feem, mas kuv tus qhev Yauj yuav thov kuv pab nej. Kuv yuav txais nws tej lus thov kuv thiaj tsis rau txim rau nej raws li nej txojkev ruam, rau qhov nej hais txog kuv nej hais tsis raug li kuv tus qhev Yauj hais.” Mas Elifa uas yog neeg Themas thiab Npida uas yog neeg Su‑a thiab Xaufa uas yog neeg Na‑ama thiaj mus ua raws li Yawmsaub hais, mas Yawmsaub thiaj txais Yauj tej lus thov. Thaum Yauj thov Yawmsaub pab nws cov kwvluag tag lawm, Yawmsaub pub Yauj rov tau lub neej zoo. Yawmsaub pub Yauj muaj ntau dua qub ob npaug. Mas nws tej kwvtij nkauj muam thiab txhua tus uas paub nws los lawd kuj tuaj cuag nws thiab nrog nws noj mov hauv nws lub tsev. Mas lawv mob siab nws thiab nplij nws txog tej xwm txheej phem huvsi uas Yawmsaub coj los raug nws. Thiab txhua tus ib leeg pub ib daim nyiaj thiab ib leeg pub ib lub nplhaib kub rau nws. Yawmsaub foom koob hmoov rau Yauj lub neej yav kawg ntau dua li yav tag los. Mas nws muaj ib vam plaub txhiab tus yaj, rau txhiab tus ntxhuav, ib txhiab nkawm txiv nyuj, thiab ib txhiab tus maum nees luav. Nws muaj xya tus tub thiab peb tug ntxhais. Nws hu thawj tug ntxhais ua Yemima, thiab hu tus ob ua Khexiya, thiab hu tus peb ua Kheleehapu. Tag nrho lub tebchaws ntawd tsis muaj ib tug pojniam twg yuav zoo nkauj cuag li Yauj cov ntxhais. Lawv txiv muab qub txeeg qub teg faib rau lawv ib yam li faib rau cov nus. Dhau ntawd los Yauj tseem muaj txojsia nyob tau ib puas plaub caug xyoo ntxiv, mas nws pom nws tej tub thiab tej xeeb leej xeeb ntxwv plaub tiam neeg. Yauj tuag rau thaum hnub nyoog nchav thiab laus heev lawm. Tus uas tau nyob kaj siab lug, yog tus uas tsis taug txojkev uas cov neeg limhiam qhia, thiab tsis nrog cov neeg muaj txim sawv ua ke, thiab tsis nrog cov neeg uas nyiam thuam luag zaum ua ke. Qhov uas ua rau nws zoo siab yog Yawmsaub txoj kevcai, nws tshawb nrhiav Yawmsaub txoj kevcai nruab hnub hmo ntuj. Nws zoo yam li tus ntoo uas cog rau ntawm ntug dej, txi txiv raws caij raws nyoog, cov nplooj tsis tuag tshav tsis qhuav. Txhua yam uas nws ua nws vam meej. Cov neeg limhiam tsis thooj li ntawd, lawv zoo yam li tej npluag qoob uas cua ntsawj ya mus. Cov neeg limhiam yuav nyob tsis tau rau thaum raug kev teem txim, cov neeg muaj txim yuav tsis nrog cov neeg ncaj ncees sawv ntsug ua ke. Rau qhov Yawmsaub ntsia ntsoov cov neeg ncaj ncees txojkev, tiamsis cov neeg limhiam txojkev yuav puam tsuaj. Vim li cas ib tsoom tebchaws ntaus tswvyim fav xeeb, thiab tej neeg yuav ntaus tswvyim phem qhuav qhuav? Tej vajntxwv hauv lub ntiajteb npaj sawv twv, cov uas ua thawj tuav tswvyim ua ke tawm tsam Yawmsaub thiab tus uas raug hliv roj tsa. “Cia peb ua kom txoj saw hlau uas ob tug khi peb tu nrho, thiab muab txoj hlua uas ob tug zawm peb laim pov tseg.” Tus uas nyob lub zwm txwv saum ntuj luag lawv, Yawmsaub thuam luag lawv cov ntawd. Nws hais rau lawv ua npau taws vog, nws chim heev ua rau lawv ntshai thiab hais tias, “Kuv twb tsa kuv tus vajntxwv nyob rau saum Xi‑oo, uas yog kuv lub roob dawb huv.” Kuv yuav hais txog Yawmsaub tej lus, nws hais rau kuv tias, “Koj yog kuv tus tub, hnub no kuv yug tau koj lawm. Cia li thov kuv mas kuv yuav muab ib tsoom tebchaws ua qub txeeg qub teg rau koj, thiab muab tag nrho lub ntiajteb ua koj teej koj tug. Koj yuav xuas qws hlau ntaus lawv tawg, thiab ntsawm lawv tawg tag ua tej dwb daim yam li tej laujkaub av.” Vim li no tej vajntxwv 'e, nej cia li ntse, tej thawj uas kav ntiajteb 'e, nej cia li mloog lus qhuab ntuas. Cia li paub ntshai thiab ua koom tu Yawmsaub, cia li ntshai tshee hnyo. Cia li pe hawm nws ntshai tsam nws chim ces nej puam tsuaj rau hauv nej txojkev, rau qhov nws txojkev npau taws tshwm plaws sai kawg. Txhua tus uas los cawm siav rau hauv nws yuav tau nyob kaj siab lug. Au Yawmsaub, kuv cov tshawj chim coob kawg li lauj! Muaj neeg coob sawv twv kuv. Ntau leej tabtom piav txog kuv tias, “Tsis muaj txojkev pab hauv Vajtswv.” Au Yawmsaub, koj yog daim phiaj hlau uas thaiv puag ncig kuv, koj yog kuv lub meej mom thiab tsa kuv lub taubhau cia. Kuv tsa suab thov Yawmsaub, mas nws teb kuv ntawm nws lub roob uas dawb huv tuaj. Kuv mus pw thiab tsaug zog, kuv tsim dheev los vim yog Yawmsaub tsom kwm kuv. Kuv tsis ntshai ntau vam leej neeg uas tawm tsam kuv vij puag ncig kuv. Au Yawmsaub, thov sawv tsees. Au kuv tus Vajtswv, thov cawm kuv dim. Koj ntaus kuv cov yeeb ncuab sawvdaws sab plhu, thiab koj lov cov neeg limhiam kaus hniav. Kev dim nyob ntawm Yawmsaub. Thov koj foom koob hmoov rau koj cov neeg. Au Vajtswv uas tuav kuv txojcai, thaum kuv hu thov koj thov koj teb. Thaum kuv tws kev, koj qheb kev rau kuv. Thov koj hlub kuv, thov mloog kuv tej lus thov. Cov neeg 'e, nej yuav ua rau kuv poob koob meej mus ntev li cas? Nej yuav nyiam tej lus tsis tseem ceeb thiab xav tswvyim dag mus ntev li cas? Cia li paub tseeb tias Yawmsaub twb cais cov neeg uas hwm nws cia ua nws tug. Thaum kuv hu thov Yawmsaub nws kuj mloog. Thaum nej chim tsis txhob ua txhaum. Thaum nej pw saum txaj, cia li tshuaj saib nej lub siab thiab nyob twjywm. Cia li muab qhov txhia chaw xyeem raws li kevcai, thiab tso siab rau Yawmsaub. Muaj neeg coob coob hais tias, “Peb xav pom tej yam uas zoo.” Au Yawmsaub, thov koj lub ntsej muag ci ntsa iab rau peb. Koj tau pub kev xyiv fab rau hauv kuv lub siab ntau dua li uas thaum lawv tau qoob thiab cawv txiv hmab ntau nplua mias. Kuv yuav qhau cev pw tsaug zog siab tus yees, vim yog Yawmsaub koj tib leeg thiaj pub tau kuv nyob tso siab lug. Au Yawmsaub, thov koj tig ntsej mloog kuv tej lus, thov mloog kuv lub suab quaj suab ntsaj. Kuv tus vajntxwv thiab kuv tus Vajtswv, thov mloog kuv lub suab quaj hu, rau qhov kuv thov koj xwb. Au Yawmsaub, tagkis sawv ntxov koj yeej mloog kuv lub suab thov, tagkis sawv ntxov kuv tsa kuv lub suab thov thiab tos ntsoov. Koj tsis yog tus Vajtswv uas zoo siab rau txojkev limhiam, txojkev phem nrog koj nyob tsis tau li. Tej neeg khav theeb sawv tsis tau ntawm koj lub qhov muag, koj ntxub txhua tus uas ua phem. Koj muab cov uas hais lus dag ua kom puam tsuaj. Yawmsaub ntxub ntxaug neeg noj nyoog thiab cov uas dag ntxias. Vim yog koj txojkev hlub ruaj khov muaj ntau nplua mias, kuv thiaj nkag tau rau hauv koj lub tsev. Kuv yuav pe hawm ncaj rau koj lub tuam tsev uas dawb huv, vim kuv hwm thiab paub ntshai koj. Au Yawmsaub, thov koj coj kuv taug koj txojkev ncaj ncees. Vim yog kuv muaj yeeb ncuab, thov koj ua koj txojkev ncaj rau kuv. Lawv lub qhov ncauj tsis muaj ib lo lus tseeb, lawv lub siab tsuas yog xav ua kom puam tsuaj xwb, lawv lub caj pas yog lub qhov ntxa uas qheb lug, lawv tus nplaig hais lus qab rog qab ntse xwb. Au Vajtswv, thov cia lawv ris lawv lub txim, cia lawv ntog rau hauv lawv tej tswvyim phem. Vim tej kev txhaum uas lawv ua ntau kawg li, thov muab lawv laim pov tseg, rau qhov lawv twb fav xeeb rau koj lawm. Thov cia txhua tus uas cawm siav rau hauv koj tau siab xyiv fab, cia lawv hu nkauj zoo siab xyiv fab tsis tu li. Thov koj tsom kav tsom kwm lawv, kom cov uas nyiam koj lub npe thiaj xyiv fab rau hauv koj. Au Yawmsaub, koj foom koob hmoov rau tus uas ncaj ncees, koj muab koj txojkev hlub roos nws ib yam nkaus li daim phiaj hlau thaiv. Au Yawmsaub, thaum koj chim thov koj tsis txhob cem kuv, thaum koj npau taws tsis txhob nplawm kuv. Au Yawmsaub, thov hlub kuv rau qhov kuv qaug zog zuj zus. Au Yawmsaub, thov kho kuv rau qhov kuv tej pob txha tsaug tsaug poob nthav, thiab kuv lub siab txhawj xeeb heev. Au Yawmsaub, koj tseem yuav tos ntev li cas? Au Yawmsaub, thov koj tig los cawm kuv txojsia. Vim yog koj txojkev hlub uas ruaj khov mas thov cawm kuv dim. Thaum tuag lawd tsis muaj kev nco txog koj lawm. Nyob hauv tub tuag teb leejtwg yuav qhuas tau koj lawm? Kuv quaj ntsuag txog siav heev lawm, kuv niaj hmo los kua muag nyab kuv lub txaj pw, kuv quaj quaj ua rau kuv lub chaw pw ntub tag. Vim yog kev lwj siab kuv qhov muag thiaj plooj tag lawm, vim kuv cov tshawj chim huvsi kuv qhov muag thiaj dig zuj zus lawm. Nej cov neeg ua phem sawvdaws, cia li ncaim kuv mus, rau qhov Yawmsaub twb mloog kuv lub suab quaj lawm. Yawmsaub twb hnov kuv lub suab taij thov, Yawmsaub txais kuv tej lus thov lawm. Kuv cov yeeb ncuab sawvdaws yuav tau txaj muag thiab yuav poob siab nthav, lawv yuav thim rov qab thiab tib ntsais muag xwb yuav raug kev txaj muag. Au Yawmsaub, kuv tus Vajtswv, kuv cawm siav rau hauv koj. Thov tso kuv dim txhua tus uas raws caum kuv, thiab cawm kuv, tsam ces lawv muab kuv dua yam li tsov ntxhuav dua, thiab muab kuv cab mus tsis muaj leejtwg cawm kuv dim. Au Yawmsaub, kuv tus Vajtswv, yog kuv tau ua li no, yog kuv txhais tes tau ua txhaum, yog kuv tau ua phem pauj kuv tej kwvluag qhov zoo, lossis yog kuv cia li lam lws kuv cov yeeb ncuab, ces cia kuv cov yeeb ncuab caum cuag thiab ntes tau kuv, thiab cia lawv tsuj kuv txojsia rau hauv nruab av, thiab muab kuv tus ntsuj plig tso rau hauv cov hmoov av. Au Yawmsaub, thov sawv tsees ua npau taws vog, thov cia li sawv tiv kuv cov yeeb ncuab txojkev chim. Au kuv tus Vajtswv, thov cia li tsim dheev los, koj twb teem sijhawm txiav txim lawm. Cia ib tsoom neeg sawvdaws tuaj txoos ua ke nyob puag ncig koj, thiab thov koj zaum rau qhov siab saum cov neeg ntawd. Yawmsaub txiav txim rau ib tsoom neeg. Au Yawmsaub, thov koj txiav txim rau kuv raws li kuv txojkev ncaj ncees thiab raws li kuv lub siab dawb paug. Au Vajtswv uas yog tus ncaj ncees, thiab yog tus uas tshuaj neeg txojkev xav thiab neeg lub siab, thov kom tej kev phem uas cov neeg limhiam ua ploj tag nrho, thiab thov tsa cov neeg ncaj ncees kom nyob ruaj khov. Kuv daim phiaj thaiv yog Vajtswv, uas cawm cov uas siab ncaj kom dim. Vajtswv yog tus uas txiav txim ncaj ncees, thiab yog tus Vajtswv uas niaj hnub chim rau cov neeg txhaum. Yog ib tug twg tsis ntxeev dua siab tshiab, Vajtswv yuav hov nws rab ntaj. Nws twb sam rab hneev nti rawv loo cia lawm. Nws twb npaj nws tej cuab yeej uas tua neeg txhij lawm, nws ua nws tej xub hneev nti muaj nplaim taws. Saib maj, tus neeg limhiam xeeb txojkev phem, thiab suab txojkev limhiam hauv lub plab thiab yug tau tej kev dag. Nws khawb qhov taub, nws kuj poob rau hauv tej qhov uas nws khawb ntawd. Nws txojkev limhiam rov los raug nws taubhau, nws txojkev ntais ntuj poob los rau saum nws tiaj taubhau. Kuv yuav ua Yawmsaub tsaug vim nws kev ncaj ncees, thiab kuv yuav hu nkauj qhuas Yawmsaub uas Loj Dua Ntais lub npe. Au Yawmsaub uas yog peb tus tswv, koj lub npe muaj hwjchim meej mom loj kawg thoob ntiajteb lawm lauj! Koj lub hwjchim ci ntsa iab saum ntuj twb tau lo lus qhuas ntawm cov menyuam yaus thiab cov menyuam mos lub qhov ncauj. Koj tsim lub chaw thaiv koj cov yeeb ncuab, thiab tswj kuv cov tshawj chim thiab cov uas ua pauj rau kuv. Thaum kuv tsa muag ntsia saum ntuj uas yog koj txhais tes tsim, yog lub hli thiab tej hnub qub uas koj teeb cia lawd, mas neeg yog dabtsi es koj nco txog lawv, thiab neeg tus tub yog dabtsi es koj mob siab nws? Koj tau tsim nws qes dua Vajtswv mentsis, thiab koj muab meej mom thiab koob meej ua mom kub rau nws ntoo. Koj muab hwjchim rau nws tswjhwm txhua yam uas koj txhais tes tsim, koj muab txhua yam tso rau hauv nws qab xib taws, yog txhua tus yaj txhua tus nyuj huvsi thiab tej tsiaj qus, tej nas noog saum nruab ntug, thiab tej ntses hauv hiavtxwv, thiab txhua yam uas mus los hauv hiavtxwv. Au Yawmsaub uas yog peb tus Tswv, koj lub npe muaj hwjchim meej mom loj kawg thoob ntiajteb lawm lauj! Kuv yuav ua Yawmsaub tsaug kawg kuv lub siab, kuv yuav hais txog koj tej haujlwm phimhwj huvsi. Kuv yuav zoo siab thiab xyiv fab rau hauv koj. Au Vajtswv uas Loj Dua Ntais, kuv yuav hu nkauj qhuas koj lub npe. Thaum kuv cov yeeb ncuab thim rov qab, lawv dawm thiab puam tsuaj tab meeg ntawm koj xubntiag, rau qhov koj tuav kuv txojcai uas ncaj, koj nyob saum lub zwm txwv txiav txim ncaj ncees. Koj twb cem ib tsoom tebchaws, koj twb muab cov neeg limhiam ua kom puam tsuaj, koj twb muab lawv tej npe rhuav tseg ib txhis tsis kawg. Tej yeeb ncuab puam tsuaj ploj tag mus ib txhis li, lawv tej moos koj muab dob kiag pov tseg, thiab tsis muaj leejtwg nco txog lawv li lawm. Yawmsaub nyob saum lub zwm txwv kav mus ib txhis li, nws tau tsa nws lub zwm txwv los txiav txim. Nws txiav txim ncaj ncees rau lub ntiajteb, nws txiav txim ncaj rau ib tsoom neeg. Yawmsaub yog lub chaw ruaj khov rau cov neeg uas raug quab yuam, yog lub chaw ruaj khov rau lub sijhawm uas raug ceeblaj. Au Yawmsaub, cov uas paub koj lub npe kuj tso siab rau koj, vim koj tsis tso cov neeg uas nrhiav koj pov tseg li. Cia li hu nkauj qhuas Yawmsaub uas nyob hauv Xi‑oo, cia li piav txog nws tej haujlwm rau hauv ib tsoom neeg. Nws yog tus rob caub thiab nco txog lawv, nws pheej nco ntsoov tus uas raug txom nyem nyuaj siab lub suab hu. Au Yawmsaub, thov koj hlub kuv. Thov tsa qhov muag saib cov uas ntxub kuv tsim txom kuv li cas. Koj tsa kuv sawv ntawm lub qhov rooj kev tuag rov los, kom kuv thiaj piav txog txhua yam uas tsim nyog qhuas koj, thiab kuv thiaj zoo siab xyiv fab rau koj txojkev cawm dim rau ntawm Xi‑oo tus ntxhais rooj loog. Ib tsoom tebchaws poob rau hauv lub qhov taub uas lawv khawb cia, thiab lawv txhais kotaw mag rooj hlua uas lawv cuab cia. Yawmsaub twb qhia nws rau peb paub, nws twb txiav txim lawm. Cov neeg limhiam twb mag tej uas lawv txhais tes ua. Cov neeg phem yuav mus rau hauv tub tuag teb, yog txhua haiv neeg uas tsis nco qab Vajtswv. Vajtswv yuav nco ntsoov cov neeg txom nyem mus li, thiab cov neeg pluag txojkev vam yuav tsis plam mus ib txhis. Au Yawmsaub, thov koj cia li sawv tsees, tsis txhob cia neeg kov yeej, cia li txiav txim rau ib tsoom tebchaws tab meeg ntawm koj xubntiag. Au Yawmsaub, cia li ua kom lawv ntshai, thiab ua kom ib tsoom tebchaws paub tias lawv tsuas yog neeg xwb. Au Yawmsaub, ua cas koj yuav nyob deb heev? Ua cas koj tsiv nraim thaum peb raug kev ceeblaj? Tus neeg limhiam khav ntxhias raws caum cov pluag. Thov cia nws rov mag tej tswvyim phem uas nws npaj rau luag. Tus neeg limhiam khav txog tej uas nws lub siab ntshaw, tus neeg siab hlob cem foom thiab thuam Yawmsaub. Tus neeg limhiam lub siab khav theeb tsis nrhiav Vajtswv, nws tsuas xav hais tias, “Tsis muaj Vajtswv li.” Nws tej haujlwm vam meej rau txhua lub sijhawm. Koj txojkev txiav txim nyob siab dhau, nws lub qhov muag tsis pom li, nws tsuas yog thuam luag nws cov tshawj chim sawvdaws. Nws xav hauv lub siab tias, “Yuav tsis muaj dabtsi ua rau kuv ua zog kais. Mus tag txhua tiam kuv yuav tsis raug kev ceeblaj txom nyem li.” Tej lus tsawm foom, tej lus dag ntxias thiab tej lus quab yuam puv nkaus nws lub qhov ncauj, tej kev limhiam thiab tej kev txhaum nyob ntawm nws tus nplaig. Nws zov kev tos hauv tej zej zog, thiab nraim cev tua tej neeg tsis txhaum. Nws lub qhov muag ntshis chiv cov uas tsis muaj chaw vam khom. Nws tsiv nraim tos ib yam li tsov ntxhuav nyob hauv lub chaw nraim, nws zov tos thiaj ntes tau cov neeg pluag, nws xuas lub vas cuab tau cov neeg txom nyem rub mus. Cov uas tsis muaj chaw vam khom raug tsuj yuam thiab ntog, lawv ntog vim nws muaj zog. Nws xav hauv lub siab tias, “Vajtswv tsis nco qab lawm, nws fee plhu lawm thiab yuav tsis pom kiag li.” Au Yawmsaub, cia li sawv tsees, au Vajtswv, cia li tsa koj txhais tes, thov tsis txhob tsis nco qab tus uas raug kev txom nyem nyuaj siab. Ua cas tus neeg phem thuam Vajtswv, thiab hais hauv lub siab tias, “Koj yuav tsis tsob ntawm kuv”? Koj kuj pom ntag thiab yeej ntsia ntsoov tej kev txom nyem thiab tej kev kub ntxhov, xwv koj thiaj tuav rawv tau rau hauv koj txhais tes. Tus uas tsis muaj chaw vam khom muab nws tus kheej cob rau koj. Koj yog tus uas pab cov menyuam ntsuag tsis muaj txiv. Thov koj lov tus neeg limhiam thiab tus uas ua phem txhais npab, thiab tshawb tej kev limhiam uas lawv ua tawm los kom tag huvsi. Yawmsaub yog vajntxwv uas nyob mus ib txhis tsis kawg. Lwm haiv neeg yuav puam tsuaj tag hauv nws lub tebchaws mus. Au Yawmsaub, koj yuav mob siab rau cov neeg uas tsis muab hlob txojkev ntshaw, koj yuav txhawb lawv lub siab lub zog thiab tig ntsej mloog lawv tej lus, thiaj tsa tau cov menyuam uas tsis muaj txiv thiab cov uas raug quab yuam txojcai, kom tej neeg ntiajteb thiaj tsis ua rau lawv ntshai dua li lawm. Kuv mus cawm siav rau hauv Yawmsaub. Ua li cas nej tseem hais rau kuv tias, “Cia li khiav mus rau pem tej roob yam li tej nas noog, rau qhov tias cov neeg phem twb sam hneev nti thiab nruab xub rau ntawm txoj hlua lawm, lawv mus zov hauv qhov tsaus ntuj tua cov neeg uas siab ncaj. Yog tej kevcai puam tsuaj tag lawm mas cov neeg ncaj ncees yuav ua tau dabtsi?” Yawmsaub nyob hauv nws lub tuam tsev uas dawb huv, Yawmsaub lub zwm txwv nyob saum ntuj ceeb tsheej. Nws lub qhov muag saib ib tsoom neeg thiab nws lub ntsiab muag tshuaj lawv. Yawmsaub tshuaj saib cov uas ncaj ncees thiab cov uas limhiam. Nws lub siab ntxub cov uas nyiam ua limhiam ntais ntuj. Nws yuav nchuav cub thee uas cig plaws thiab tej lawj faj rau saum cov neeg limhiam. Thiab tu cov cua uas kub kub cia ua lub khuab rau lawv. Rau qhov Yawmsaub yog tus ncaj ncees, mas nws nyiam tej haujlwm uas ncaj ncees. Cov neeg ncaj yuav tau pom Yawmsaub tim ntsej tim muag. Au Yawmsaub, thov koj pab, vim tsis tshuav cov neeg uas hwm koj lawm, thiab cov uas xib rau koj ploj tag hauv ib tsoom neeg lawm Txhua tus dag kwvtij zej zog, lawv ncauj qab rog nplaig qab ntse thiab muaj ob lub siab. Thov Yawmsaub txiav txhua tus lub qhov ncauj qab rog, thiab tus nplaig khav theeb heev ntawd pov tseg, yog cov uas hais tias, “Peb tus nplaig yuav kov yeej xwb, peb lub qhov ncauj yog peb li. Leejtwg yuav kav tau peb?” Yawmsaub hais tias, “Kuv yuav sawv tsees tamsim no, rau qhov tus pluag raug quab yuam thiab tus txom nyem quaj ntsaj laws. Kuv yuav tso lawv rau hauv qhov chaw uas nyob tso siab plhuav uas lawv ntshaw mus nyob.” Yawmsaub tej lus cog tseg yog tej lus uas dawb huv, zoo li cov tseem nyiaj uas muab hlawv hauv cub thee uas nyob hauv pem teb, yog cov tseem nyiaj uas muab nchuav xya zaus. Au Yawmsaub, thov koj tsom kwm peb, thov tiv thaiv kom peb dim cov neeg tiam no. Cov neeg phem ncig mus ncig los ntawm peb txhua fab, rau thaum ib tsoom neeg qhuas ntxhias kev phem kev qias. Au Yawmsaub, tseem tshuav ntev li cas? Koj yuav tsis nco qab kuv mus ib txhis li lov? Koj yuav fee plhu ntawm kuv ntev li cas? Kuv lub siab pheej yuav xav txog tej no, thiab yuav niaj hnub lwj siab mus ntev li cas? Kuv tus yeeb ncuab yuav kov yeej kuv mus ntev li cas? Au kuv tus Vajtswv Yawmsaub, thov koj tshuaj saib thiab teb kuv lauj. Thov koj pub kuv lub qhov muag rov pom kev, ntshai tsam kuv cia li tsaug zog rau hauv txojkev tuag, thiab kuv tus yeeb ncuab yuav hais tias, “Kuv kov yeej nws lawm,” thiab kuv cov tshawj chim yuav zoo siab xyiv fab vim kuv ua zog kais lawm. Tiamsis kuv tso siab rau koj txojkev hlub uas ruaj khov, kuv lub siab xyiv fab qhov uas koj cawm kuv dim. Kuv yuav hu nkauj qhuas Yawmsaub, vim yog nws ua zoo kawg rau kuv. Cov neeg ruam xav hauv lub siab tias, “Tsis muaj Vajtswv.” Lawv lub siab phem kawg li thiab lawv ua tej uas qias vuab tsuab, tsis muaj ib tug ua zoo li. Yawmsaub saib saum ntuj tuaj rau neeg ntiajteb, saib puas yuav muaj ib tug twg uas ntse thiab nrhiav Vajtswv. Lawv txhua tus yuam kev tag, thiab lawv lub siab phem tag huvsi ib yam nkaus, tsis muaj ib tug ua zoo, tsis muaj kiag li. Txhua tus uas ua phem tsis paub lov, yog cov uas noj kuv haiv neeg yam li noj ncuav, thiab tsis taij thov Yawmsaub? Lawv yuav ntshai kawg ua siab puas tsus, rau qhov Vajtswv nrog nraim cov neeg uas ncaj ncees nyob. Nej npaj rhuav tshem cov neeg pluag daim hom phiaj, tiamsis Yawmsaub ua lawv lub chaw cawm siav. Xav kom muaj kev cawm dim tshwm hauv Xi‑oo tuaj rau cov Yixayee. Thaum Yawmsaub pub nws haiv neeg rov vam meej li qub, Yakhauj yuav xyiv fab, Yixayee yuav zoo siab. Au Yawmsaub, leejtwg yuav nyob hauv koj lub tsev ntaub? Leejtwg yuav mus nyob saum koj lub roob dawb huv? Yog tus uas ua lub neej tsis muaj chaw thuam thiab ua raug cai, thiab hais lus tseeb tuaj nruab siab. Nws tsis siv nws tus nplaig xyav luag, nws tsis ua phem rau nws tej phoojywg, thiab tsis thuam kwvtij zej zog. Nws lub qhov muag saib tsis taus tus uas ua phem ua qias, nws muab koob meej rau tus uas paub ntshai Yawmsaub. Yog nws cog lus twv lawm txawm yog yuav poob dabtsi kuj xij nws tsis hloov lus li. Nws tsis tsub paj nyiag rau cov uas qev txais, nws tsis yuav nyiaj xiab nias tus uas tsis txhaum cai. Tus uas ua tej no yuav nyob ruaj, tsis ua zog mus ib txhis. Au Vajtswv, thov koj tsom kwm kuv cia, rau qhov kuv los cawm siav rau hauv koj. Kuv hais rau Yawmsaub tias, “Koj yog kuv tus Tswv, dhau koj lawm kuv tsis muaj ib yam dabtsi uas zoo li.” Cov neeg dawb huv hauv lub tebchaws yog cov uas tsim txiaj, yog cov uas kuv zoo siab hlo rau lawv. Cov uas xaiv lwm tus timtswv, yuav muaj kev lwj siab ntau zuj zus. Kuv yuav tsis hliv ntshav xyeem rau tej timtswv ntawd, kuv daim tawv ncauj yuav tsis tuav tej timtswv ntawd lub npe. Yawmsaub yog kuv teej kuv tug thiab yog lub khob uas kuv yuav haus. Koj tuav rawv tej uas yog kuv feem cia. Kuv ciam teb raug rau thaj uas zoo kawg, kuv tau tej qub txeeg qub teg uas zoo heev kawg. Kuv qhuas Yawmsaub uas taw qhia kuv. tsaus ntuj kuv lub siab kuj qhuab ntuas kuv. Kuv muab Yawmsaub tso rau ntawm kuv lub hauv ntej tsis tu li. Vim nws nyob ntawm kuv sab xis kuv thiaj tsis ua zog. Vim li ntawd kuv lub siab thiaj xyiv fab thiab kuv tus ntsuj plig zoo siab, kuv lub cev thiaj li nyob tso siab plhuav. Rau qhov koj tsis tau muab kuv cob rau hauv tub tuag teb, lossis cia tus uas hwm koj pom lub qhov tuag. Koj qhia txojkev uas tau txojsia rau kuv paub, muaj kev zoo siab xyiv fab puv npo rau ntawm koj lub xubntiag, muaj kev zoo siab mus ib txhis nyob hauv koj txhais tes xis. Au Yawmsaub, thov tig ntsej mloog tej uas kuv teev lus ncaj ncees, thiab mloog kuv lub suab hu. Thov tig ntsej mloog kuv lub qhov ncauj lo lus thov uas tsis muaj ib lus dag li. Thov koj tu kom kuv ua tus uas muaj cai, thov koj tsa muag ntsia qhov uas ncaj ncees. Yog koj tshuaj saib kuv lub siab thiab tuaj saib kuv hmo ntuj, yog koj sim kuv lawd koj yuav tsis pom ib qho phem nyob hauv kuv li, kuv lub qhov ncauj kuj tsis hais ib los txhaum. Tej haujlwm uas neeg ua mas vim muaj koj tej lus uas tawm hauv koj qhov ncauj los kuv thiaj tsis ua raws li cov neeg limhiam ntais ntuj ua. Kuv txhais kotaw thiaj li taug nraim koj txojkev, kuv txhais kotaw tsis plam li. Au Vajtswv, kuv thov hu koj, rau qhov koj yuav teb kuv tej lus thov. Thov tig ntsej mloog kuv, mloog kuv tej lus thov. Thov koj ua koj txojkev hlub ruaj khov uas phimhwj kawg tshwm los. Koj yog tus uas cawm cov neeg uas nrhiav chaw cawm siav ntawm lawv tej yeeb ncuab rau ntawm koj sab xis. Thov tsom kwm kuv yam nkaus li tsom kwm lub ntsiab muag, thov nthuav koj li kooj tis roos kuv, kom dim tau cov neeg limhiam uas ua kom kuv puam tsuaj thiab dim tau kuv tej yeeb ncuab uas vij kuv xav tua kuv. Lawv tsis muaj lub siab khuvleej, lawv lub qhov ncauj hais lus khav theeb xwb. Lawv taug kuv neev taw, nimno lawv vij puag ncig kuv lawm, lawv soj kuv xav muab kuv pov rau hauv av. Lawv zoo yam nkaus li tus tsov ntxhuav uas xav xav dua nqaij, zoo yam nkaus li tus thav tsov ntxhuav uas zov kev tos tom. Au Yawmsaub, cia li sawv tsees, tawm tsam lawv, muab lawv qhau. Thov koj siv koj rab ntaj tso kuv txojsia dim ntawm cov neeg limhiam. Au Yawmsaub, thov koj txhais tes cawm kuv dim ntawm cov neeg uas lawv li feem yog nyob hauv ntiajteb no xwb. Thov cia lawv tej plab saws tej uas koj tau khaws cia rau lawv lawd kom puv nkaus, thov kom lawv tej tub ki tau saws ntau tshaj plaws thiab tseem tshuav rau lawv tej menyuam yaus saws thiab. Kuv tus kheej mas kuv yuav pom koj lub ntsej muag vim kuv txojkev ncaj ncees, thaum kuv tsim los kuv yuav txaus siab rau qhov uas pom koj tus yam ntxwv lawm. Au Yawmsaub uas yog kuv tus zog, kuv hlub koj. Yawmsaub yog kuv txhib zeb, yog kuv lub chaw ruaj khov yog tus uas tso kuv dim, yog kuv tus Vajtswv, yog txhib zeb uas kuv los nraim cev, yog kuv daim phiaj hlau, yog txwm kub uas cawm kuv dim, yog kuv lub chaw ruaj khov. Kuv hu rau Yawmsaub tus uas tsim nyog qhuas, mas kuv thiaj dim hauv cov yeeb ncuab los. Txoj hlua uas yog kev tuag vij nkaus kuv, txojkev puam tsuaj nyab kiag kuv, kuv mag txoj hlua uas cuab hauv tub tuag teb lawm, rooj ntxiab uas yog kev tuag nyob ntawm kuv xubntiag. Thaum kuv raug kev txom nyem kuv thov hu Yawmsaub, kuv quaj thov kuv tus Vajtswv pab kuv. Nws nyob hauv nws lub tuam tsev hnov kuv lub suab, kuv tej lus thov nrov mus txog nws qhov ntsej. Lub ntiajteb ntseeg nkaws ua zog koog, tej lag zeb uas tiag tej roob kuj co nplawg ntia thiab ua zog kais vim yog Yawmsaub chim. Pa taws tawm hauv Yawmsaub qhov ntswg los, thiab tej nplaim taws kub ceev tawm ntawm nws qhov ncauj los, thee kuj cig plaws tawm los. Nws qheb rooj ntug nqes los, ntuj tsaus nti hauv nws qab kotaw. Nws caij ib tug Khelunpee thiab ya mus ya los. Nws siv cua ua kooj tis los sai sai. Nws muab qhov tsaus ntuj los vij puag ncig nws, cov huab tsaus tsaus vim yog muaj dej ua lub kaus roos nws. Muaj lawg thiab thee ci ci tawm hauv qhov kaj uas nyob ntawm nws xubntiag mus tshab plaws cov huab mus. Yawmsaub ua xob nrov ntseeg nkaws saum ntuj, tus uas Loj Dua Ntais ua suab nrov. Nws tua nws rab xub ua rau lawv khiav tag, nws tso xob laim ntiab lawv khiav tawg ua sab ua sua mus. Mas thiaj li pom hiavtxwv ti nkaus qab thu, thiab pom tag nrho tej taw uas tiag lub ntiajteb no, rau thaum Yawmsaub koj cem thiab tshuab tej pa tawm hauv koj qhov ntswg los. Yawmsaub cev tes saum ntuj tuaj ntsiab nkaus kuv, nws rub kuv tawm hauv cov dej tob tob los. Nws cawm kuv dim kuv cov yeeb ncuab uas muaj zog thiab dim cov neeg uas ntxub kuv rau qhov lawv muaj zog loj dua kuv. Hnub uas kuv raug kev txom nyem ceeblaj mas lawv cia li tuaj tawm tsam kuv, tiamsis Yawmsaub ua kuv lub chaw tiag taw. Nws coj kuv tawm mus nyob hauv lub chaw dav, nws tso kuv dim vim nws zoo siab xyiv fab rau kuv. Yawmsaub pub hmoov zoo rau kuv raws li kuv txojkev ncaj ncees. Yawmsaub pauj rau kuv raws li kuv txhais tes dawb huv. Kuv taug nraim Yawmsaub txojkev thiab kuv tsis tau ua qhov phem es tso kuv tus Vajtswv tseg. Rau qhov nws tej kevcai huvsi nyob ntawm kuv xubntiag thiab kuv tsis tau muab nws tej kab ke tso tseg li. Kuv tsis muaj ib qho chaw thuam rau ntawm nws xubntiag, thiab kuv tswjhwm kuv tus kheej tsis ua txhaum. Vim li no Yawmsaub thiaj pauj rau kuv raws li kuv txojkev ncaj ncees, thiab raws li nws pom kuv txhais tes dawb huv. Yawmsaub, koj ua ncaj rau tus uas xib rau koj, koj ua koj txojkev zoo kawg nkaus tshwm rau tus uas tsis muaj chaw thuam li. Koj ua koj txojkev dawb huv tshwm rau tus uas ua dawb huv, koj ua txojkev nkhaus tshwm rau tus uas siab nkhaus. Koj tso cov neeg uas txo hwjchim dim, tiamsis koj tsom ntsoov ua rau cov uas khav theeb poob qes. Koj yog tus uas taws kuv lub teeb. Yawmsaub uas yog kuv tus Vajtswv ua rau kuv qhov tsaus ntuj pom kev. Yog koj pab, kuv yeej ntaus tau ib pab tub rog, yog kuv tus Vajtswv pab kuv thiaj caws qia hla tau ntsa loog. Tus Vajtswv no, mas nws txojkev zoo kawg nkaus, Yawmsaub lo lus cog tseg yeej muaj tseeb. Nws yog daim phiaj hlau thaiv txhua tus uas tuaj cawm siav rau hauv nws. Leejtwg yog Vajtswv, tsuas yog Yawmsaub xwb? Leejtwg ua txhib zeb, tsuas yog peb tus Vajtswv xwb? Vajtswv yog tus uas muab zog rau kuv hnav thiab ua rau txojkev uas kuv taug tso siab plhuav. Nws ua rau kuv txhais kotaw zoo yam nkaus li kotaw maum muas lwj, thiab nws tso kuv nyob tso siab plhuav saum tej roob siab. Nws cob kuv txhais tes kom txawj ua rog, kuv txhais npab thiaj rub tau hneev nti tooj liab. Koj pub daim phiaj hlau uas yog txojkev cawm dim rau kuv, thiab koj txhais tes xis tuav rawv kuv, thiab koj nqes los pab ua rau kuv hlob tuaj. Koj pub kuv taug txojkev dav thiab kuv txhais taw tsis plam. Kuv raws cuag kuv cov yeeb ncuab, kuv tsis thim rov qab mus txog thaum muab lawv ua puam tsuaj tag. Kuv ntaus lawv ntsoog tag lawv thiaj sawv tsis taus, lawv ntog rau ntawm kuv kotaw. Koj muab zog sia rau ntawm kuv duav mus ua rog. Koj ua rau kuv cov yeeb ncuab ntog khwb tag nrho ntawm kuv xubntiag. Koj ua rau kuv cov yeeb ncuab thim khiav tig nrob qaum rau kuv, thiab cov uas ntxub kuv mas kuv ua kom puam tsuaj tag. Lawv thov kom pab los tsis muaj leejtwg cawm tau lawv dim, lawv hu thov Yawmsaub tiamsis nws tsis teb lawv. Kuv muab lawv tsoo mos nyoos yam li hmoov av rau cua ntsawj, kuv muab lawv laim pov tseg yam li tej av nplaum ntawm ntug kev. Koj cawm kuv dim qhov uas nrog tej neeg sib txeeb. Koj tsa kuv ua ib tsoom neeg tus thawj, tej neeg uas kuv tsis tau paub dua los kuj zwm rau kuv. Thaum lawv tau hnov txog kuv lawv kuj mloog kuv lus, lwm haiv neeg kuj tuaj pe khwb nkaus rau ntawm kuv. Lwm haiv neeg poob siab tag, thiab tawm hauv lawv lub chaw ruaj khov ua ib ce tshee hnyo los. Yawmsaub yeej muaj txojsia nyob. Cia li qhuas kuv txhib zeb, cia li txhawb nqa tus Vajtswv uas cawm kuv dim, yog tus Vajtswv uas pab kuv ua pauj thiab yuam tej neeg nyob rau hauv kuv qab kev tswjhwm, thiab cawm kuv dim ntawm kuv cov yeeb ncuab. Koj yog tus uas tsa kuv sawv siab dua cov uas tawm tsam kuv. Koj twb tso kuv dim ntawm cov neeg limhiam ntais ntuj. Au Yawmsaub, vim li no kuv thiaj qhuas ntxhias koj rau hauv ib tsoom tebchaws, thiab hu nkauj qhuas koj lub npe. Yawmsaub pub kev kov yeej loj rau nws tus vajntxwv, nws ua nws txojkev hlub ruaj khov tshwm rau tus uas nws hliv roj tsa cia lawd, yog Davi thiab nws caj ces mus ib txhis. Lub ntuj qhia Vajtswv tus hwjchim ci ntsa iab tshwm los, lub qab ntuj qhia kom pom tej haujlwm uas nws txhais tes ua. Ib hnub hais lus ntau qhia rau ib hnub paub, ib hmos piav qhov uas paub Vajtswv rau ib hmos. Tsis muaj suab nrov, kuj tsis muaj lus hais, tsis muaj leejtwg mloog ntuj lub suab, tiamsis lub suab ntuj twb nrov ncha mus thoob lub ntiajteb lawm, thiab tej lus kuj mus kawg qab ntuj. Vajtswv tsa ib lub tsev rau lub hnub nyob qhov ntawd, lub hnub tawm tuaj yam li tus nraug vauv tawm hauv nws chav tsev los, thiab dhia mus taug nws txojkev mus zoo siab xyiv fab hlo yam li tus hluas uas muaj zog. Lub hnub tawm ib sab qab ntuj kawg mus txog rau ib sab qab ntuj kawg, tsis muaj ib yam dabtsi yuav nraim tau qhov uas lub hnub kub. Yawmsaub txoj kevcai zoo txhua fab, txhawb tau tus ntsuj plig, Yawmsaub tej lus qhia tso siab tau, ua rau tus uas tsis paub tab muaj tswvyim. Yawmsaub txojkev tswjhwm raug cai, ua rau lub siab xyiv fab, Yawmsaub tej lus nkaw dawb huv, ua rau lub qhov muag pom kev tseeb. Qhov uas hwm thiab paub ntshai Yawmsaub yog qhov uas zoo tshaj, nyob ruaj mus ib txhis. Yawmsaub tej kevcai muaj tseeb thiab ncaj ncees kawg nkaus. Tej kevcai ntxim ntshaw heev dua li kub, heev dua li tej tseem kub ntau, qab zib dua zib ntab, qab zib dua tej zib ntab uas nrog ntawm lub tsev ntab los, thiab yog tej uas qhuab ntuas koj tus qhev. Qhov uas tuav rawv tej lus no kuj tau yeeb koob loj kawg. Tiamsis leejtwg yuav pom nws txojkev txhaum? Thov koj ntxuav kuv tej kev txhaum uas kuv tsis paub. Thov koj tswj koj tus qhev kom tsis txhob mom sim ua txhaum, thov tsis txhob cia txojkev txhaum ntawd yuam tau kuv, kuv thiaj tsis muaj chaw thuam thiab dim txojkev txhaum loj. Au Yawmsaub uas yog kuv txhib zeb thiab yog tus uas txhiv kuv, thov cia tej lus hauv kuv lub qhov ncauj thiab tej kev xav hauv kuv lub siab yog tej uas koj pom zoo. Thov Yawmsaub teb koj rau hnub uas raug ceeblaj. Thov Yakhauj tus Vajtswv lub npe tsom kav tsom kwm koj. Thov nws tso kev pab tawm hauv lub tuam tsev tuaj pab koj, thiab tso nws kev txhawb zog tawm hauv Xi‑oo tuaj. Thov nws nco txog tej uas koj muab xyeem huvsi thiab txaus siab rau tej uas koj muab hlawv xyeem. Thov Yawmsaub pub rau koj raws li koj lub siab ntshaw, thiab ua rau tej uas koj xav tseg lawm tiav huvsi. Mas peb thiaj tau tsa suab qw xyiv fab rau qhov uas koj kov yeej, thiab tuav peb tus Vajtswv lub npe tsa peb tej chij. Thov Yawmsaub pub kom koj lo lus thov tiav huvsi. Nimno kuv paub tseeb tias Yawmsaub yuav pab tus uas nws hliv roj tsa lawd, Yawmsaub nyob qhov chaw dawb huv saum ntuj ceeb tsheej teb nws, thiab nws txhais tes xis yuav pab nws kov yeej loj kawg li. Ib txhia khav txog tsheb ua rog, ib txhia khav txog nees, tiamsis peb li peb khav txog Yawmsaub uas yog peb tus Vajtswv lub npe. Lawv yuav dawm ntog, tiamsis peb yuav sawv tsees nyob ruaj nreeg. Au Yawmsaub, thov koj pab vajntxwv kov yeej. Thov koj pab peb rau thaum peb thov. Au Yawmsaub, vajntxwv xyiv fab rau lub zog uas koj pub, nws zoo siab xyiv fab heev rau qhov uas koj pab. Koj pub raws li nws lub siab ntshaw, thiab tsis nkaum tes rau tej uas nws lub qhov ncauj thov. Rau qhov koj coj koob hmoov zoo los ntsib nws, koj muab lub mom vajntxwv uas tseem kub rau nws ntoo saum taubhau. Nws thov txojsia mas koj kuj pub rau nws, tau siav loj siav ntev mus ib txhis tsis kawg. Nws lub koob meej loj vim yog koj pab, koj pub nws muaj meej nthawb thiab hwjchim meej mom. Koj yeej pub kom nws tau koob hmoov mus ib txhis, thiab pub rau nws tau zoo siab xyiv fab vim koj nrog nraim nws. Vajntxwv tso siab rau Yawmsaub. Vim muaj tus uas Loj Dua Ntais txojkev hlub ruaj khov mas vajntxwv yuav nyob ruaj tsis ua zog. Vajntxwv, koj txhais tes yuav ntes tau koj cov yeeb ncuab huvsi, koj txhais tes xis yuav ntes tau cov uas ntxub koj. Thaum koj tshwm plaws los koj yuav ua rau lawv kub hnyiab cuag li nyob hauv qhov txos. Yawmsaub yuav nqos kiag lawv ua npau taws vog, thiab hluavtaws yuav hlawv lawv puam tsuaj tag. Koj yuav ua rau lawv tej tub ki puam tsuaj tag hauv ntiajteb thiab muab lawv caj ces ua tu noob nrho hauv ib tsoom neeg. Txawm yog lawv ntaus tswvyim phem rau koj thiab lawv xav tej zaj phem los lawv yuav ua tsis tau kom tiav. Rau qhov koj yuav ua rau lawv khiav mus, koj yuav twb hneev ncaj nkaus rau lawv ntsej muag. Au Yawmsaub, peb txhawb nqa koj lub zog, peb yuav hu nkauj thiab qhuas koj lub hwjchim. Au kuv tus Vajtswv, kuv tus Vajtswv 'e, ua cas koj tso kuv tseg lawm? Ua cas koj nyob deb tsis pab kuv, tsis mloog tej lus uas kuv quaj ntsaj laws? Au kuv tus Vajtswv, nruab hnub kuv quaj thov koj, koj kuj tsis teb, hmo ntuj kuv thov los tsis tau lub siab tus li. Txawm li cas los koj yog tus dawb huv, koj ua vajntxwv nyob saum cov Yixayee lo lus qhuas. Peb tej poj koob yawm txwv tso siab rau koj, lawv tso siab mas koj tso lawv dim. Lawv quaj thov koj, lawv thiaj tau txais kev cawm dim, lawv tso siab rau koj, lawv thiaj tsis plam tej uas lawv vam. Kuv yog ib tug kas xwb, tsis yog neeg, tej neeg ntxub kuv, ib tsoom pejxeem kuj saib tsis taus kuv. Txhua tus uas pom kuv thuam luag kuv, zij ncaug co hau nto rau kuv hais tias, “Nws muab nws tus kheej cob rau Yawmsaub, cia Yawmsaub pab nws dim los maj. Cia Yawmsaub cawm nws rau qhov Yawmsaub txaus siab rau nws.” Txawm li ntawd, los koj yog tus uas coj kuv tawm hauv niam lub plab los, thiab pub kuv nyob tso siab plhuav rau hauv niam lub xubntiag. Txij thaum yug los kuv yeej vam koj, koj yog kuv tus Vajtswv txij thaum kuv nyob hauv nruab thiab. Thov koj tsis txhob nyob deb ntawm kuv, vim yog kev ceeblaj nyob ze kuv thiab tsis muaj leejtwg pab kiag li. Muaj txiv nyuj coob vij kuv, yog cov txiv nyuj muaj zog hauv Npasas nyob puag ncig kuv. Lawv rua ncauj loj rau kuv yam nkaus li tsov ntxhuav tom dua nyooj laws. Kuv raug muab nchuav yam li dej, kuv tej pob txha huvsi kuj pluam tag. Kuv lub siab zoo li ciab ntab yaj tag rau hauv kuv hauv siab. Kuv lub zog sem tag qhuav yam li tej txhais laujkaub av. Kuv tus nplaig lo rau ntawm txha puab tsaig lawm. Koj muab kuv tso rau hauv tej hmoov av uas yog txojkev tuag. Yeej muaj dev vij vog kuv, ib pab neeg phem nyob vij kuv, lawv nkaug kuv xib teg thiab kuv xib taws. Kuv suav tau kuv tej pob txha huvsi. Lawv saib ntsia ntsoov thiab hnyos luag kuv. Lawv muab kuv tej ris tsho faib, kuv lub tsho lawv muab ua ntawv rho. Au Yawmsaub, thov koj tsis txhob nyob deb, au koj uas pab kuv, thov maj nroos tuaj pab kuv lauj! Thov cawm kuv tus ntsuj plig dim hniav ntaj, thiab cawm kuv txojsia dim ntawm tej dev lub zog. Thov cawm kuv dim hauv tsov ntxhuav lub qhov ncauj, thiab cawm kuv dim ntawm cov txiv nyuj qus tej kub. Kuv yuav hais txog koj lub npe rau kuv cov kwvtij paub. Kuv yuav qhuas koj rau thaum ib tsoom neeg tuaj txoos ua ke. Nej cov uas paub ntshai Yawmsaub, cia li qhuas nws. Yakhauj caj ces sawvdaws, nej cia li ua rau nws tau koob meej. Yixayee caj ces sawvdaws, nej cia li hwm nws. Rau qhov nws tsis tau saib tsis taus thiab ntxub cov uas txom nyem tej kev nyuaj siab. Nws tsis fee plhu ntawm lawv thiab thaum lawv quaj thov nws, nws kuj hnov. Kuv tej lus qhuas koj rau thaum cov neeg coob coob tuaj txoos ua ke kuj yog koj pub. Kuv yuav pauj tej uas yeem lus lawd tab meeg cov uas paub ntshai koj. Cov neeg raug txom nyem nyuaj siab yuav tau noj tsau npo. Cov uas nrhiav Yawmsaub yuav tau qhuas nws. Thov cia nej kaj siab lug mus ib txhis. Thoob plaws hauv lub ntiajteb yuav nco ntsoov thiab tig los rau ntawm Yawmsaub, thiab txhua haiv neeg hauv ib tsoom tebchaws yuav pe hawm rau ntawm nws lub xubntiag. Rau qhov Yawmsaub muaj hwjchim tswjhwm, thiab nws kav ib tsoom tebchaws. Cov neeg khav theeb hauv lub ntiajteb sawvdaws yuav pe nws. Cov uas mus rau hauv qhov tuag sawvdaws yuav pe hawm nws, lawv yog cov uas tuav tsis tau txojsia nyob lawm. Cov neeg uas yuav tshwm los yav tom qab yuav ua koom tu nws. Tej neeg yuav hais txog tus Tswv rau tiam neeg tom qab mloog, thiab tshaj tawm nws txojkev cawm dim rau cov neeg uas tsis tau yug los paub tias nws ua nws tej haujlwm ntawd lawm. Yawmsaub yug kuv yam li yug yaj, kuv yuav tsis tu pluas. Nws pub kuv pw hauv lub tshav zaub mos ntsuab ntsuab, nws coj kuv mus rau ntawm ntug dej uas nyob ntsiag to. Nws txhawb kuv tus ntsuj plig rov muaj zog, nws coj kuv taug txojkev ncaj ncees vim yog saib rau nws lub npe. Txawm yog kuv mus hauv lub hav tsaus ntuj nti uas yog txojkev tuag, los kuv tsis ntshai xwm txheej phem dabtsi, vim koj nrog nraim kuv. Koj tus pas nrig thiab koj tus cwj nplij kuv lub siab. Koj npaj lub rooj mov rau kuv tab meeg kuv cov yeeb ncuab. Koj hliv roj foom hmoov rau saum kuv taubhau, kuv lub khob puv phwj yos. Txojkev zoo thiab txojkev hlub yeej yuav nrog nraim kuv mus tag kuv sim neej. Kuv yuav nyob hauv Yawmsaub lub tuam tsev mus ib txhis. Lub ntiajteb thiab txhua yam uas nyob hauv yog Yawmsaub li, tag nrho lub qab ntuj thiab txhua tus uas nyob hauv yog nws li. Nws tsim lub ntiajteb rau saum dej hiavtxwv, thiab muab txawb rau saum cov dej. Leejtwg yuav nce mus rau saum Yawmsaub lub roob? Thiab leejtwg yuav sawv rau hauv nws lub chaw dawb huv? Yog tus uas txhais tes huv thiab lub siab dawb huv, tsis tso siab rau tej cuav timtswv, thiab tsis cog lus dag. Nws yuav tau Yawmsaub li koob hmoov, thiab Vajtswv uas cawm nws dim yuav tsa nws cai. Cov uas zoo li no yog cov neeg uas nrhiav Yawmsaub, uas yog nrhiav Yakhauj tus Vajtswv lub ntsej muag. Tej rooj loog 'e, cia li tsa nej lub taubhau sawv, tej txhib qhov rooj uas nyob ib txwm 'e, cia li sawv, kom tus vajntxwv uas muaj hwjchim ci ntsa iab thiaj tau nkag los. Tus vajntxwv uas muaj hwjchim ci ntsa iab yog leejtwg? Twb yog Yawmsaub uas muaj zog thiab muaj hwjchim loj, thiab yog Yawmsaub uas muaj hwjchim ua rog. Tej rooj loog 'e, cia li tsa nej lub taubhau sawv, tej txhib qhov rooj uas nyob ib txwm 'e, cia li sawv, kom tus vajntxwv uas muaj hwjchim ci ntsa iab thiaj tau nkag los. Tus vajntxwv uas muaj hwjchim ci ntsa iab yog leejtwg? Yog Yawmsaub uas muaj hwjchim loj kawg nkaus, nws yog tus vajntxwv uas muaj hwjchim ci ntsa iab. Au Yawmsaub, kuv muab kiag kuv lub siab rau koj. Au kuv tus Vajtswv, kuv tso siab rau koj. Thov tsis txhob cia kuv raug txaj muag, tsis txhob cia kuv cov yeeb ncuab hnyos luag kuv. Thov tsis txhob cia ib tug twg uas tos rawv koj raug txaj muag kiag li. Cia cov uas mom sim fav xeeb rau koj poob ntsej muag. Au Yawmsaub, thov ua rau kuv paub koj txojkev, thov qhia koj tej kev rau kuv paub taug. Thov koj coj kuv taug koj txojkev tseeb thiab qhuab qhia kuv vim koj yog tus Vajtswv uas cawm kuv dim. Kuv tos rawv koj tas hnub tas hmo. Au Yawmsaub, thov koj nco txog koj txojkev khuvleej thiab koj txojkev hlub uas ruaj khov, vim yog tej no twb muaj thaum ub los lawm. Thov tsis txhob nco txog tej kev txhaum thiab tej kev fav xeeb uas thaum kuv tseem hluas es kuv ua. Au Yawmsaub, vim koj txojkev hlub uas ruaj khov thiab koj txojkev zoo, thov nco txog kuv. Yawmsaub yog tus uas zoo kawg thiab ncaj ncees, nws thiaj qhuab qhia nws txojkev rau cov neeg txhaum. Nws coj tus uas txo hwjchim mus qhov uas raug cai, thiab qhia nws txojkev rau tus txo lub siab qes qes. Yawmsaub tej kev huvsi yog txojkev hlub uas ruaj khov thiab tso siab tau, rau txhua tus uas tuav rawv nws tej lus cog tseg thiab nws tej lus qhia. Au Yawmsaub, thov koj saib rau koj lub npe es zam kuv lub txim rau qhov lub txim ntawd loj heev. Leejtwg yog tus uas hwm thiab paub ntshai Yawmsaub? Yawmsaub yuav qhuab qhia tus ntawd rau hauv txojkev uas tsim nyog nws xaiv. Nws yuav tau nyob vam meej heev, thiab nws tej tub ki yuav tau lub tebchaws ua lawv teej lawv tug. Yawmsaub yuav nrog cov uas paub ntshai nws ua phoojywg, thiab nws qhia nws tej lus cog tseg rau lawv paub. Kuv lub qhov muag pheej ntsia ntsoov rau Yawmsaub, rau qhov nws rho kuv txhais kotaw dim hauv txoj hlua cuab. Thov koj tig hlub kuv, rau qhov kuv nyob twm kawv thiab raug kev txom nyem nyuaj siab. Thov pab kuv tej kev nyuaj siab kom ploj mus, coj kuv tawm hauv txojkev ntxhov siab los. Thov tshuaj saib kuv tej kev txom nyem thiab kev ceeblaj, thiab daws kuv lub txim huvsi pov tseg. Thov tshuaj saib kuv cov tshawj chim muaj coob npaum twg, thiab lawv ntxub kuv heev npaum li cas. Thov tsom kwm kuv txojsia thiab cawm kuv, tsis txhob cia kuv raug txaj muag vim yog kuv cawm siav rau hauv koj. Thov txojkev dawb huv thiab txojkev ncaj ncees tuav kuv cia, vim kuv tos rawv koj. Au Vajtswv, thov txhiv cov Yixayee dim lawv tej kev ceeblaj huvsi. Au Yawmsaub, thov koj tsa kuv cai rau qhov kuv ua lub neej siab dawb paug. Kuv yeej tso siab rau Yawmsaub tsis ua zog li. Au Yawmsaub, thov koj tshuaj saib kuv thiab sim kuv, thov koj tshuaj saib kuv lub siab thiab tej uas kuv xav. Koj txojkev hlub ruaj khov nyob ntawm kuv qhov muag, thiab kuv ua kuv lub neej xib rau koj. Kuv tsis nrog cov neeg dag zaum ua ke, kuv tsis nrog cov neeg ncauj lus zoo siab phem koom ib lub siab. Kuv tsis nyiam nrog cov neeg uas ua phem nyob ua ke, thiab kuv tsis nrog cov neeg limhiam zaum ua ke. Au Yawmsaub, kuv tsis txhaum, kuv ntxuav tes thiab mus ncig koj lub thaj, thiab hu nkauj ua koj tsaug thiab piav txog koj txhua yam haujlwm phimhwj uas koj tau ua. Au Yawmsaub, kuv nyiam lub tsev uas koj nyob, thiab lub chaw uas koj lub hwjchim ci ntsa iab nyob hauv. Thov tsis txhob muab kuv rhuav tshem nrog cov neeg muaj txim, thiab tsis txhob muab kuv txojsia txov nrog cov neeg noj nyoog, lawv yog cov neeg uas npaj txhais tes mus ua phem, thiab lawv txhais tes xis puv nkaus tej nyiaj xiab. Kuv mas kuv ua lub neej siab dawb paug, thov txhiv kuv dim thiab hlub kuv. Kuv txhais kotaw tsuj saum lub chaw tiaj, kuv yuav qhuas Yawmsaub rau thaum cov neeg coob coob tuaj txoos ua ke. Yawmsaub yog kuv txojkev kaj thiab kuv txojkev cawm dim, mas kuv yuav ntshai leejtwg? Yawmsaub yog kuv lub chaw ruaj khov uas kuv cawm siav, kuv tseem yuav ntshai leejtwg? Thaum cov neeg phem uas yog kuv cov yeeb ncuab thiab kuv cov tshawj chim, tuaj ntaus kuv yuav noj kuv tej nqaij mas lawv yuav dawm ntog. Txawm yog ib pab tub rog ua yeej tawm tsam kuv, los kuv lub siab yuav tsis ntshai li. Txawm yog kev ua rog sawv rau kuv, los kuv tseem muaj siab tuab. Kuv thov ib yam ntawm Yawmsaub xwb, yog yam uas kuv pheej nrhiav, yog qhov uas kuv yuav tau nyob hauv Yawmsaub lub tuam tsev tag kuv sim neej, kom kuv thiaj ntsia ntsoov Yawmsaub tus duab ci zoo nkauj kawg, thiab ua nug rau hauv nws lub tuam tsev. Nws yuav muab kuv zais rau hauv nws lub chaw nraim rau hnub uas raug kev ceeblaj, nws yuav muab kuv nraim rau hauv nws lub tsev ntaub tus duab ntxoov ntxoo, nws yuav muab kuv txawb rau lub chaw siab saum lub pob zeb. Nimno kuv lub taubhau yuav raug muab tsa siab dua kuv tej yeeb ncuab uas nyob ib ncig. Kuv yuav xyeem tsiaj rau hauv nws lub tsev ntaub thiab qw zoo siab, kuv yuav hu nkauj qhuas thiab ua lub suab xyiv fab rau Yawmsaub. Au Yawmsaub, thov mloog thaum kuv quaj hu, thov hlub kuv thiab teb kuv. Kuv lub siab hais tias, “Cia li nrhiav nws lub ntsej muag.” Yawmsaub, kuv nrhiav koj lub ntsej muag ntag. Tsis txhob fee plhu ntawm kuv. Tsis txhob ntiab npau vog raws koj tus qhev tawm mus, koj yog tus uas txeev pab kuv. Au Vajtswv uas cawm kuv dim, tsis txhob laim kuv pov tseg, tsis txhob tso kuv tseg. Txawm yog kuv niam kuv txiv tso kuv tseg, los Yawmsaub tseem yuav qaws kuv cia. Au Yawmsaub, thov qhia koj txojkev rau kuv, thiab coj kuv taug txojkev tiaj tus vim kuv muaj yeeb ncuab. Tsis txhob tso kuv rau kuv cov tshawj chim ua raws li lawv lub siab nyiam, rau qhov tej cuav timkhawv sawv tsees tawm tsam kuv, thiab lawv ua pa tawm los ua limhiam ntais ntuj rau kuv. Kuv ntseeg tias kuv yuav pom Yawmsaub txojkev zoo thaum kuv tseem muaj txojsia nyob. Cia li tos rawv Yawmsaub. Cia li ua khov kho thiab ua koj lub siab tuab. Cia li tos rawv Yawmsaub lauj! Au Yawmsaub, kuv thov hu koj. Kuv lub txhib zeb, thov tsis txhob lag ntseg rau kuv. Yog koj tsis teb kuv ces kuv yuav zoo yam nkaus li cov neeg uas mus rau hauv tub tuag teb. Thov mloog kuv lub suab taij thov rau thaum kuv thov koj pab thiab rau thaum kuv tsa kuv txhais tes tuaj rau koj lub tuam tsev chav uas dawb huv kawg nkaus. Thov tsis txhob muab kuv sau zog nrog cov neeg limhiam mus, lawv yog cov ua phem uas ncauj lus zoo rau kwvtij zej zog tiamsis lub siab npaj ua kev limhiam. Thov ua pauj rau lawv raws li lawv tau ua, raws li lawv tej kev phem. Thov ua pauj rau lawv raws li lawv txhais tes ua, thiab pauj rau lawv raws li tsim nyog pauj. Vim lawv tsis quav ntsej tej haujlwm uas Yawmsaub ua thiab tej uas nws txhais tes ua, mas nws yuav muab lawv tsoo kom ntog thiab tsis tsa lawv rov sawv li lawm. Cia li qhuas Yawmsaub, rau qhov nws mloog kuv lub suab taij thov. Yawmsaub yog kuv lub zog thiab kuv daim phiaj hlau thaiv, kuv tso siab rau nws, kuv thiaj tau kev pab, kuv zoo siab xyiv fab kawg li thiab kuv hu nkauj ua nws tsaug. Yawmsaub yog nws haiv neeg lub zog, yog lub chaw cawm siav rau tus uas nws hliv roj tsa lawd. Thov cawm koj haiv neeg kom dim, thiab foom koob hmoov rau koj qub txeeg qub teg. Thov yug lawv ib yam li yug yaj thiab qaws lawv puag mus ib txhis. Cov timtswv saum ntuj 'e, cia li qhuas Yawmsaub, cia li qhuas tias Yawmsaub muaj hwjchim ci ntsa iab thiab muaj zog. Cia li qhuas tias Yawmsaub lub npe muaj hwjchim ci ntsa iab, cia li hnav tej tsoos dawb huv pe hawm Yawmsaub. Yawmsaub lub suab nrov saum tej dej hiavtxwv, Vajtswv uas muaj hwjchim ci ntsa iab lub suab nroo ntws, Yawmsaub lub suab nrov thoob plaws saum tej dej hiavtxwv. Yawmsaub lub suab muaj hwjchim loj heev, Yawmsaub lub suab nrov ntxhe ntws. Yawmsaub lub suab lov tej ntoo ciab, Yawmsaub yeej lov tej ntoo ciab pem roob Lenpanoo. Nws ua rau lub roob Lenpanoo dhia caws qia yam nkaus li menyuam nyuj, thiab ua rau lub roob Xili‑oo dhia caws qia yam nkaus li menyuam nyuj qus. Yawmsaub lub suab ua hluavtaws tawm ci nplas. Yawmsaub lub suab co tebchaws moj sab qhua ntseeg nkaws, Yawmsaub co tebchaws moj sab qhua Khade yoj yuj yees. Yawmsaub lub suab ua rau tej ntoo qheb yuj rawv nris thiab muab tej nplooj ntoo hauv hav zoov zaws zeeg tag huvsi. Mas sawvdaws qw hauv Yawmsaub lub tuam tsev tias, “Qhuas Yawmsaub.” Yawmsaub nyob lub zwm txwv kav saum cov dej nyab, Yawmsaub nyob saum lub zwm txiv ua vajntxwv kav mus ib txhis. Thov Yawmsaub pub zog rau nws haiv neeg, thov Yawmsaub foom koob hmoov rau nws haiv neeg kom nyob thaj yeeb. Au Yawmsaub, kuv yuav qhuas ntxhias koj vim yog koj rub kuv tawm los thiab koj tsis kheev kuv cov tshawj chim luag kuv. Au Yawmsaub, kuv tus Vajtswv, kuv tau hu thov koj pab kuv, mas koj tau kho kuv zoo. Au Yawmsaub, koj tau coj kuv tus ntsuj plig tawm hauv tub tuag teb los. Kuv twb yuav mus rau hauv qhov tuag tiamsis koj tau cawm kuv txojsia rov los. Yawmsaub cov neeg uas dawb huv 'e, nej cia li hu nkauj qhuas nws, thiab cia li ua tsaug nws lub npe uas dawb huv. Qhov uas Yawmsaub chim mas yog ib vuag dua xwb, qhov uas nws ua zoo mas muaj mus ib sim neej. Kev quaj los kua muag mas muaj ib hmo kaj ntug tiamsis thaum sawv ntxov yuav muaj kev xyiv fab. Kuv tus kheej mas thaum kuv nyob kaj siab lug kuv hais tias, “Kuv yuav tsis ua zog kiag li.” Au Yawmsaub, koj ua zoo rau kuv. Koj tsa kuv nyob ruaj yam li lub roob khov kho. Thaum koj fee plhu ntawm kuv lawm mas kuv thiaj poob siab. Au Yawmsaub, kuv thov hu koj. Kuv tsa suab taij Yawmsaub tias, “Yog kuv tuag lawd, yog kuv mus rau hauv tub tuag teb lawm, mas koj yuav tau dabtsi? Tej hmoov av yuav qhuas koj thiab piav txog koj txojkev ncaj uas tso siab tau lov? Au Yawmsaub, thov tig ntsej mloog thiab hlub kuv. Au Yawmsaub, thov koj ua tus uas pab kuv.” Koj muab kuv kev quaj ntsuag ntxeev ua kev dhia seev cev. Koj muab kuv tej khaub seev tsaj hle thiab muab kev zoo siab xyiv fab rau kuv hnav, kuv tus ntsuj plig thiaj tau qhuas koj thiab tsis txhob nyob twjywm. Au Yawmsaub, kuv tus Vajtswv, kuv yuav ua koj tsaug mus ib txhis. Au Yawmsaub, kuv los cawm siav rau hauv koj. Thov tsis txhob cia kuv raug txaj muag kiag li, cia li cawm kuv dim vim koj ncaj ncees. Thov tig ntsej mloog kuv, cia li cawm kuv kom dim sai kawg nkaus. Thov koj ua txhib zeb uas kuv nraim cev, yog lub chaw ruaj khov uas cawm kuv dim. Koj yeej yog kuv txhib zeb thiab kuv lub chaw ruaj khov ntag, thov saib rau koj lub npe es coj kuv thiab qhia kev rau kuv. Thov tsis txhob cia kuv mag rooj hlua uas cuab kuv, rau qhov koj yog kuv lub chaw cawm siav. Kuv muab kuv tus ntsuj plig cob rau hauv koj txhais tes. Au Yawmsaub koj yog tus Vajtswv tseeb uas tso siab tau, koj txhiv kuv dim lawm. Kuv ntxub cov uas hwm tej dab mlom uas tsis muaj qabhau, kuv tso siab rau Yawmsaub. Kuv yuav zoo siab xyiv fab rau koj txojkev hlub uas ruaj khov, vim koj pom kuv txojkev txom nyem nyuaj siab, thiab koj paub kuv txojkev ceeblaj, thiab koj tsis muab kuv cob rau hauv yeeb ncuab txhais tes, koj muab kuv txhais kotaw txawb rau lub chaw dav. Au Yawmsaub, thov koj hlub kuv, vim kuv tabtom raug kev txom nyem nyuaj siab, kuv lub qhov muag plooj tag vim kuv lwj siab, kuv tus ntsuj plig thiab kuv lub cev kuj qaug zog. Kuv txojsia yau zuj zus vim kuv txhawj xeeb lwj siab, thiab kuv lub niaj lub xyoos tsawg zuj zus vim kuv ntsaj laws. Kuv lub zog ploj zuj zus vim kuv txhawj xeeb, thiab kuv tej pob txha sem zuj zus mus. Kuv cov tshawj chim sawvdaws saib tsis taus kuv, kuv ua lub chaw rau kwvtij zej zog ceeb thiab ntshai, kuv ua lub chaw rau kuv tej phoojywg ntshai siab puas tsus. Cov uas pom kuv tom kev cia li khiav. Lawv tsis nco kuv yam li tus uas twb tuag lawd, kuv zoo yam nkaus li lub tais uas tawg lawm. Kuv hnov neeg coob sib ntxhi txog kuv. Muaj kev txhawj kev ntshai rau txhua fab. Lawv tuav tswvyim tawm tsam kuv, lawv ntaus tswvyim txov kuv txojsia. Au Yawmsaub, kuv tso siab rau koj, kuv hais tias, “Koj yog kuv tus Vajtswv.” Kuv lub caij lub nyoog nyob hauv koj txhais tes, thov koj cawm kuv dim hauv kuv cov yeeb ncuab thiab cov uas tsim txom kuv txhais tes. Thov koj lub ntsej muag ci rau saum koj tus qhev. Vim koj muaj txojkev hlub uas ruaj khov, thov cawm kuv dim. Au Yawmsaub, thov tsis txhob cia kuv raug txaj muag, vim kuv tau quaj thov koj. Thov cia cov neeg phem raug txaj muag, thov cia lawv lub suab ntsiag to mus rau hauv tub tuag teb. Thov muab daim tawv ncauj uas dag xaws, yog lub ncauj uas pheej hais lus tuam mom khav theeb, thiab khav txiv saib tsis taus tus ncaj ncees. Koj txojkev zoo muaj ntau kawg li lauj! Koj npaj cia rau cov uas paub ntshai koj, thiab muab rau cov uas cawm siav rau hauv koj tab meeg ib tsoom neeg. Koj muab lawv zais rau hauv lub chaw nraim hauv koj lub xubntiag kom dim neeg tej tswvyim phem. Koj tuav rawv lawv nyob tso siab plhuav rau hauv koj qab tus duab ntxoov ntxoo, kom dim tus nplaig uas sib cav sib ceg. Qhuas Yawmsaub, rau qhov nws ua nws txojkev hlub uas ruaj khov tshwm los rau kuv phimhwj kawg rau thaum kuv raug vij yam li lub moos uas raug yeeb ncuab vij. Kuv poob siab nthav hais tias, “Kuv raug muab ntiab tawm hauv koj lub qhov muag lawm.” Tiamsis koj tseem hnov kuv tej lus taij thov, rau thaum kuv quaj hu thov koj pab. Yawmsaub cov neeg uas dawb huv sawvdaws 'e, cia li muab siab npuab nws. Yawmsaub tsom kwm cov uas xib rau nws, tiamsis nws ua pauj rau cov uas tsab ua loj pov khawv nkaus. Nej sawvdaws uas tos rawv Yawmsaub, cia li ua khov kho thiab ua siab loj siab tuab nawj! Tus uas tau kev zam txim tau nyob kaj siab lug, yog tus uas nws tej kev txhaum raug muab faus lawm. Tus uas Yawmsaub tsis suav nws tej kev txhaum kuj tau nyob kaj siab lug, yog tus uas tsis muaj kev dag ntxias hauv nws lub siab. Thaum kuv tsis tau lees txim, kuv lub cev sem zuj zus mus, vim yog kuv ntsaj laws tas hnub tas hmo. Koj txhais tes hnyav rau saum kuv nruab hnub hmo ntuj, kuv lub zog kuj qhuav tag yam li raug tshav ntuj kub thaum ntuj qhua. Kuv txawm lees kuv lub txim rau koj, kuv tsis npog kuv tej kev phem kev qias cia. Kuv hais tias, “Kuv yuav lees kuv tej kev fav xeeb rau Yawmsaub,” mas koj thiaj zam kuv tej kev txhaum txim. Vim li no cia txhua tus uas hwm koj thov koj rau thaum tseem ntsib tau koj. Thaum dej nyab heev, kev txom nyem yuav los tsis txog tus ntawd. Koj yog kuv lub chaw nraim cev, koj tsom kwm tsis pub kuv raug kev ceeblaj, koj muab zaj nkauj uas qhuas tias kuv dim lawm los qhwv nkaus kuv. Kuv yuav coj thiab qhia koj txog txojkev uas tsim nyog koj taug. Kuv yuav ntsia ntsoov koj taw qhia koj. Koj tsis txhob ua li tus nees thiab tus luj txwv uas tsis txawj nkag siab, uas yuav tsum khi looj thawb thiab sam xauv, yog tsis ua li ntawd nws yuav tsis nrog koj mus. Tus neeg limhiam raug kev txom nyem ntau heev, tiamsis txojkev hlub uas ruaj khov xov vij tus uas tso siab rau Yawmsaub. Nej cov uas ncaj ncees 'e, cia li zoo siab thiab xyiv fab rau Yawmsaub, nej cov uas lub siab ncaj 'e, txhua tus cia li qw zoo siab. Nej cov uas ncaj ncees 'e, cia li zoo siab rau Yawmsaub, Tsim nyog cov uas lub siab ncaj qhuas nws. Cia li ntaus nkauj nog ncas me qhuas Yawmsaub, cia li ntaus nkauj nog ncas loj hu suab zoo rau nws. Cia li hu zaj nkauj tshiab qhuas nws, cia li ntaus nkauj nog ncas zoo zoo thiab qw nrov, rau qhov Yawmsaub tej lus ncaj ncees, thiab txhua yam haujlwm uas nws ua tso siab tau. Nws nyiam txojkev ncaj ncees thiab qhov uas ua ncaj, Yawmsaub txojkev hlub uas ruaj khov puv nkaus lub ntiajteb. Yawmsaub hais lus xwb tsim tau lub ntuj, thiab tej pa uas tawm hauv nws qhov ncauj tsim txhua yam saum nruab ntug. Nws sau zog tej dej hiavtxwv los ntim ua ib hnab, thiab khaws dej hauv nruab tiv txwv cia rau hauv lub txhab. Cia lub ntiajteb huvsi paub ntshai Yawmsaub, cia ib tsoom neeg thoob qab ntuj hwm nws heev. Nws hais xwb, ces lub ntiajteb cia li muaj, nws hais lus xwb, txawm tshwm los. Yawmsaub muab tej uas ib tsoom tebchaws xav cia rhuav pov tseg, nws ua rau tej uas ib tsoom neeg npaj cia ua tsis tau kom tiav. Tej uas Yawmsaub npaj cia yuav nyob mus ib txhis, tej uas nws xav cia hauv lub siab yuav nyob mus rau txhua tiam neeg. Lub tebchaws uas lawv tus Vajtswv yog Yawmsaub yuav tau nyob kaj siab lug. Lawv yog haiv neeg uas Yawmsaub xaiv cia ua nws li qub txeeg qub teg. Yawmsaub nyob saum ntuj ntsia ntsoov tuaj, nws saib pom ib tsoom neeg. Nws nyob saum nws lub zwm txwv ntsia ntsoov rau txhua tus uas nyob hauv lub ntiajteb. Nws yog tus uas tsim lawv txhua tus lub siab, thiab tshuaj saib txhua yam uas lawv ua huvsi. Tus vajntxwv yuav dim tsis yog vim nws muaj tub rog coob, tus tub rog yuav dim tsis yog vim nws muaj zog heev. Qhov uas vam tias tus nees ua rog yuav pab kov yeej tsis muaj qabhau, nees lub zog loj kuj pab tsis tau kom dim. Yawmsaub lub qhov muag saib ntsoov cov uas paub ntshai nws, thiab cov uas vam ntsoov nws txojkev hlub uas ruaj khov, mas nws yuav cawm lawv tus ntsuj plig dim hauv txojkev tuag, thiab pub lawv muaj txojsia nyob rau thaum muaj kev tshaib nqhis. Peb tus ntsuj plig tos rawv Yawmsaub, nws yog txojkev pab peb thiab yog daim phiaj hlau thaiv peb. Peb zoo siab xyiv fab rau nws, rau qhov peb vam khom nws lub npe uas dawb huv. Au Yawmsaub, thov koj txojkev hlub uas ruaj khov nrog nraim peb, raws li peb muaj siab vam rau hauv koj. Kuv yuav qhuas Yawmsaub txhua lub sijhawm, lo lus qhuas nws yuav nyob hauv kuv lub qhov ncauj tsis tu ncua. Kuv tus ntsuj plig khav txog Yawmsaub. Cia cov uas raug kev txom nyem tau hnov thiab zoo siab. Cia li nrog kuv qhuas Yawmsaub lub koob meej, peb cia li ua ke txhawb nqa nws lub npe. Kuv twb nrhiav Yawmsaub thiab nws kuj teb kuv, nws cawm kuv dim hauv kuv tej kev ntshai huvsi. Cov uas ntsia ntsoov nws yuav xyiv fab hlo, lawv yuav tsis raug txaj muag. Tus nyuag neeg txom nyem no quaj thov, Yawmsaub kuj mloog thiab cawm nws dim nws tej kev ceeblaj huvsi. Yawmsaub tus tubtxib saum ntuj zov vij rawv cov uas paub ntshai Yawmsaub, thiab cawm kom lawv dim. Cia li sim saib thiab pom tias Yawmsaub zoo kawg li. Tus uas cawm siav rau hauv nws kuj tau nyob kaj siab lug. Yawmsaub cov neeg dawb huv 'e, nej cia li paub ntshai nws, rau qhov cov uas paub ntshai nws yuav tsis tu pluas. Cov tsov ntxhuav mos tseem tu pluas thiab tshaib plab, tiamsis cov uas nrhiav Yawmsaub tsis tu ncua ib yam zoo kiag li. Kuv cov tub 'e, cia li los mloog kuv hais, kuv yuav qhia nej txog qhov uas hwm thiab paub ntshai Yawmsaub. Leejtwg xav tau txojsia thiab ntshaw hnub nyoog ntev, kom nws thiaj tau tej yam uas zoo? Nej yuav tsum tswj nej tus nplaig tsis txhob hais lus phem, thiab tswj nej daim tawv ncauj tsis txhob hais tej lus dag. Cia li tsiv txojkev phem thiab ua qhov uas zoo, nrhiav kev hum xeeb thiab caum kom cuag. Yawmsaub tsa qhov muag ntsia ntsoov cov uas ncaj ncees, thiab tig ntsej mloog lawv tej lus quaj thov. Yawmsaub tsom ntsoov tawm tsam cov neeg ua phem, nws yuav muab lawv txiav pov tseg tsis muaj leejtwg nco txog lawv hauv lub ntiajteb. Thaum cov uas ncaj ncees quaj thov, Yawmsaub kuj mloog, thiab cawm lawv dim lawv tej kev ceeblaj huvsi. Yawmsaub nyob ze tus uas lwj siab, thiab cawm cov uas tsis muaj chaw vam. Cov uas ncaj ncees muaj ntau yam kev txom nyem nyuaj siab, tiamsis Yawmsaub kuj cawm lawv dim huvsi. Nws tsom kwm lawv tej pob txha huvsi, tsis lov ib tug li Kev phem yuav tua cov neeg limhiam, thiab cov uas ntxub cov ncaj ncees yuav raug teem txim. Yawmsaub txhiv nws cov qhev txojsia, cov uas los cawm siav rau hauv nws tsis muaj ib tug raug txim li. Au Yawmsaub, thov koj tawm tsam cov uas tawm tsam kuv, thov ua rog rau cov uas ua rog rau kuv. Cia li tuav daim phiaj hlau me thiab daim loj, cia li sawv tsees pab kuv. Cia li rho kiag rab hmuv nkaug thiab rab hmuv laim tiv cov uas caum kuv. Thov koj hais rau kuv tus ntsuj plig tias, “Kuv yog tus uas yuav cawm koj dim.” Cov uas nrhiav kev txov kuv txojsia mas thov cia lawv raug txaj muag thiab raug saib tsis taus. Cov uas xav tswvyim phem tawm tsam kuv, mas thov cia lawv raug ntiab rov qab mus ua siab ruam puas ntsoog tag. Thov cia lawv zoo yam nkaus tej npluag uas cua ntsawj, cia Yawmsaub tus tubtxib saum ntuj ntiab lawv mus. Thov cia lawv txojkev tsaus ntuj thiab nplua, cia Yawmsaub tus tubtxib saum ntuj ntiab lawv khiav mus. Twb tsis tim li cas los lawv cuab hlua rau kuv, twb tsis tim li cas los lawv khawb qhov taub cuab txov kuv txojsia. Thov kom lawv raug tej kev puam tsuaj uas lawv xav tsis txog, thiab thov cia lawv mag rooj hlua uas lawv cuab, cia lawv mag kom puam tsuaj tag. Mas kuv tus ntsuj plig yuav xyiv fab rau hauv Yawmsaub, kuv yuav zoo siab xyiv fab kawg li rau qhov uas nws tso kuv dim. Kuv tej pob txha huvsi yuav hais tias, “Au Yawmsaub, leejtwg zoo cuag li koj? Koj yog tus uas tso cov neeg tsis muaj zog dim ntawm tus uas muaj zog dua lawv, thiab cawm cov uas tsis muaj zog thiab txom nyem dim ntawm tus uas lws lawv.” Muaj cuav timkhawv phem sawv tsees, lawv nug kuv txog tej uas kuv tsis paub. Lawv ua qhov phem pauj tej uas kuv ua zoo, kuv lub siab lwj tag. Tiamsis thaum lawv mob mas kuv hnav khaub seev tsaj thiab tswj kuv lub siab yoo mov, kuv hnyo taubhau qes qes thov Vajtswv, ib yam nkaus li kuv quaj ntsuag rau kuv ib tug kwvluag lossis rau ib tug kwvtij. Kuv mus kev yam nkaus li tus uas quaj ntsuag rau leej niam, kuv quaj dai hau vias. Tiamsis yog kuv dawm mas lawv tuaj txoos ua ke zoo siab kawg, lawv sau zog ua ke tuaj tawm tsam kuv. Tej neeg loj leeb uas kuv tsis tau paub dua li los kuj cem kuv tsis tu li. Lawv luag kuv heev kawg hais lus phem rau kuv, lawv zim hniav zog rau kuv. Au Yawmsaub, koj yuav tsa muag ntsia xwb mus ntev li cas? Thov cawm kuv dim hauv lawv tej kev limhiam ntais ntuj, thov cawm kuv txojsia dim hauv cov tsov ntxhuav. Mas kuv yuav ua koj tsaug rau thaum tsoom zeej sawvdaws tuaj txoos ua ke, kuv yuav qhuas koj hauv nruab nrab cov neeg coob coob ntawd. Cov uas kuv tsis tau ua txhaum rau los cia li ua kuv cov tshawj chim, thov tsis txhob kheev lawv zoo siab luag kuv. Thov tsis txhob kheev cov uas lam ntxub kuv do do zij ncaug ntxi muag rau kuv. Rau qhov lawv tsis hais tej lus hum xeeb, lawv tsuas xav tej lus dag xyav cov uas nyob tus yees hauv lub tebchaws. Lawv rua ncauj loj kawg li rau kuv, lawv nkaug hnyos hais tias, “Peb twb pom ntawm qhov muag lawm.” Au Yawmsaub, koj twb pom lawm, thov tsis txhob nyob twjywm. Au tus Tswv, thov tsis txhob nyob deb ntawm kuv. Au kuv tus Vajtswv uas yog kuv tus Tswv, thov tsim dheev, cia li kub siab lug tuav kuv txojcai thiab hais kuv tshaj plaub. Au Yawmsaub, kuv tus Vajtswv, thov tsa kuv cai raws li koj kev ncaj ncees. Thov tsis txhob cia lawv zoo siab luag kuv. Tsis txhob cia lawv hais hauv lub siab tias, “Peb tau raws li peb lub siab nyiam lawm.” Tsis txhob kheev lawv hais tias, “Peb twb muab nws nqos lawm.” Thov ua rau cov uas zoo siab luag kuv tej kev txom nyem raug txaj muag thiab lub siab ruam puas ntsoog tag. Thov cia cov uas tsab ua loj tawm tsam kuv tau poob ntsej muag thiab raug saib tsis taus. Cia cov uas xav pom kuv muaj cai qw zoo siab thiab cia lawv zoo siab xyiv fab thiab hais tsis tu li tias, “Yawmsaub loj kawg nkaus, nws txaus siab rau thaum nws tus tub qhe noj qab nyob zoo.” Mas kuv tus nplaig yuav piav txog koj txojkev ncaj ncees thiab yuav qhuas koj ib hnub tsaus ntuj. Txojkev txhaum hais tob tob rau hauv tus neeg limhiam lub siab, nws tsis paub ntshai Vajtswv kiag li. Nws rov qhuas nws tus kheej tias nws tej kev txhaum tsis muaj leejtwg pom tsis muaj leejtwg ntxub. Nws qhov ncauj hais tej lus phem tej lus dag. Nws tseg kiag txojkev xyaum txawj xyaum ntse thiab tsis ua qhov zoo. Thaum nws pw, nws tsuas yog ntaus tswvyim phem xwb. Nws npaj ua qhov uas tsis zoo xwb, nws tsis tso txojkev phem tseg. Au Yawmsaub, koj txojkev hlub ruaj khov siab mus nto ntuj, koj txojkev ncaj uas tso siab tau siab mus nto tej huab. Koj txojkev ncaj ncees zoo yam li Vajtswv tej roob, qhov uas koj txiav txim ncaj yam li dej hiavtxwv. Au Yawmsaub, koj tsom kwm neeg thiab tsiaj txhu. Au Vajtswv, koj txojkev hlub ruaj khov mas tsim txiaj kawg nkaus. Ib tsoom neeg mus cawm siav rau hauv koj qab phab tis tus duab ntxoov ntxoo. Lawv noj tej uas muaj nplua mias hauv koj lub tsev tsau npo, thiab koj pub lawv tau haus tus niag dej uas pub koj txojkev zoo txojkev xyiv fab. Rau qhov txoj hauv paus siav nyob ntawm koj, peb pom txojkev kaj vim peb nyob hauv koj qhov kaj. Thov koj ua koj txojkev hlub ruaj khov tshwm rau cov uas paub koj tsis tu li, thiab ua koj txojkev cawm dim rau cov uas siab ncaj siab ncees. Thov tsis txhob kheev cov neeg khav theeb txhais kotaw tsuj kuv, thiab tsis txhob kheev cov neeg limhiam txhais tes ntiab tau kuv khiav. Saib maj, cov neeg phem twb ntog lawm, lawv raug laim pov tseg sawv tsis taus li lawm. Koj tsis txhob ntxhov siab txog qhov uas neeg ua limhiam, tsis txhob khib cov neeg uas ua txhaum. Tsis ntev lawv yuav ploj qhuav tag yam li tej nyom, thiab qhuav sem zuj zus yam li tej nroj tsuag. Cia li tso siab rau Yawmsaub thiab ua qhov zoo, koj thiaj tau nyob hauv lub tebchaws thiab ua lub neej tso siab plhuav. Cia li zoo siab xyiv fab rau hauv Yawmsaub, mas nws yuav pub tej uas koj lub siab ntshaw rau koj. Cia li muab koj txojkev rau Yawmsaub coj, tso siab plhuav rau nws, nws yuav ua kom tiav. Nws yuav ua rau koj txojkev ncaj ci kaj lug, thiab ua rau koj txojcai ci yam li thaum tav su. Cia li nyob twjywm ntawm Yawmsaub xubntiag thiab ua siab ntev tos rawv nws, tsis txhob ntxhov siab txog tus uas vam meej raws li nws txojkev, lossis ntxhov siab txog tus uas ua nws tej tswvyim phem tiav. Cia li tswj koj txojkev chim thiab tso koj txojkev npau taws tseg. Tsis txhob ntxhov siab tsam ces muaj uas ua phem lawm xwb. Rau qhov cov neeg limhiam yuav raug muab txiav tawm mus, tiamsis cov uas tos rawv Yawmsaub yuav tau lub tebchaws ua lawv teej lawv tug. Tshuav tsis ntev cov neeg limhiam yuav tsis muaj nyob lawm, txawm yog nrhiav ntawm lawv lub chaw nyob zoo zoo los tsis pom lawv nyob qhov ntawd lawm. Tiamsis cov uas txo hwjchim yuav tau lub tebchaws ua lawv teej lawv tug, thiab lawv yuav zoo siab xyiv fab rau qhov uas lawv vam meej nplua mias. Cov neeg limhiam ntaus tswvyim ua phem rau tus ncaj ncees, thiab zim hniav zog rau nws. Tiamsis tus Tswv thuam luag cov neeg limhiam, rau qhov nws pom ntsoov lawv lub caij lub nyoog tabtom los. Cov neeg limhiam rho ntaj thiab nta hneev, txov cov neeg pluag thiab cov neeg txom nyem, thiab tua cov neeg uas ua lub neej ncaj ncees. Lawv rab ntaj yuav rov chob lawv lub siab, lawv rab hneev yuav lov. Tej nyuag me me uas tus ncaj ncees muaj, kuj zoo dua tej uas cov neeg limhiam coob coob muaj nplua mias. Cov neeg limhiam txhais npab yuav lov, tiamsis Yawmsaub tuav rawv cov uas ncaj ncees. Yawmsaub paub cov uas tsis muaj chaw thuam lub caij lub nyoog, thiab lawv tej qub txeeg qub teg yuav nyob mus ib txhis. Lawv yuav tsis txaj muag rau hnub uas muaj xwm txheej phem, hnub uas tshaib nqhis lawv tseem muaj nplua mias. Tiamsis cov neeg limhiam yuav puam tsuaj. Yawmsaub cov yeeb ncuab zoo li tej paj zoo nkauj hauv tshav zaub, lawv yuav ploj mus, lawv ploj mus yam li tej pa ncho. Cov neeg limhiam qev txais kuj tsis them, tiamsis cov neeg ncaj ncees lub siab dav muab pub dawb. Cov uas Yawmsaub foom koob hmoov rau yuav tau lub tebchaws ua lawv tug, tiamsis cov uas raug nws foom yuav raug muab txiav tawm mus. Yog Yawmsaub txaus siab rau tus neeg twg lub neej, nws kuj ua rau tus ntawd txhais kotaw nyob ruaj. Txawm yog tus ntawd dawm, los nws yuav tsis ntog kiag li, rau qhov Yawmsaub txhais tes hwj nws lawm. Kuv txeev hluas, nimno laus lawm, kuv ciav tsis tau pom ib tug ncaj ncees raug muab tso tseg, lossis pom nws tej tub ki thov khawv. Nws ua siab dav muab pub thiab qev txais rau luag, thiab nws tej tub ki yog koob hmoov. Cia li khiav txojkev phem thiab ua qhov uas zoo, mas koj yuav nyob mus ib txhis. Yawmsaub nyiam qhov uas ua ncaj, nws yuav tsis tso nws cov neeg dawb huv tseg. Cov neeg ncaj ncees yuav raug muab tsom kwm cia mus ib txhis, tiamsis cov neeg limhiam tej tub ki yuav raug muab txiav pov tseg. Cov ncaj ncees yuav tau lub tebchaws ua lawv teej lawv tug, thiab tau nyob rau hauv mus ib txhis. Tus ncaj ncees lub qhov ncauj nthuav tswvyim tawm los, nws tus nplaig hais tej lus raug cai. Nws tus Vajtswv txoj kevcai nyob hauv nws lub siab, thiab nws txhais kotaw tsis plam. Cov neeg limhiam soj nraim tus neeg ncaj ncees, thiab nrhiav kev yuav muab nws tua pov tseg. Tiamsis Yawmsaub yuav tsis tso nws tseg rau hauv lawv txhais tes, lossis cia nws raug txiav txim rau thaum tu plaub. Cia li tos rawv Yawmsaub thiab tuav rawv nws txojkev, mas nws yuav tsa koj kom tau lub tebchaws ua koj tug. Koj yuav pom cov neeg limhiam raug puam tsuaj. Kuv pom ib tug neeg limhiam muaj hwjchim quab yuam thiab siab yam li tej ntoo ciab hauv Lenpanoo. Kuv hla mus dua ib zaug, ua ciav tsis muaj nws lawm, kuv nrhiav nws los tsis pom nws lawm. Cia li tshuaj saib tus uas tsis muaj chaw thuam, thiab ntsia ntsoov tus uas lub siab ncaj, vim tus uas nyob siab tus yees muaj caj ces. Tiamsis tus uas fav xeeb yuav raug puam tsuaj huvsi. Cov uas limhiam caj ces yuav raug muab txiav pov tseg. Cov neeg ncaj ncees txojkev dim yog los ntawm Yawmsaub los, nws yog lawv lub chaw cawm siav rau thaum lawv raug ceeblaj. Yawmsaub pab lawv thiab cawm lawv dim, nws pab lawv dim cov neeg limhiam. Nws cawm lawv dim vim lawv los cawm siav rau hauv nws. Au Yawmsaub, thaum koj chim thov koj tsis txhob cem kuv, thaum koj npau taws tsis txhob nplawm kuv. Rau qhov koj rab xub twb txeem rau hauv kuv, koj txhais tes twb poob rau saum kuv. Vim yog koj chim kuv lub cev thiaj nyob tsis tus, vim yog kuv ua txhaum kuv tej pob txha thiaj mob ntsoog qees. Kuv tej kev txhaum nyab dhau kuv taubhau lawm, yog lub nra uas hnyav dhau kuv lub zog. Vim yog kuv ruam kuv tej kiav txhab thiaj lwj zuj zus tuaj thiab tsw, kuv khoov thiab pau heev, kuv taug kev quaj qas ntsuav ib hnub tsaus ntuj. Kuv lub duav kub lug, thiab kuv lub cev nyob tsis tus. Kuv lub cev ntshaus tag kuv ib ce ntsoog tag, kuv ntsaj laws vim yog siab fab tag. Au tus Tswv, tej uas kuv xav xav yuav koj yeej paub huvsi, qhov uas kuv quaj quaj seev seev koj yeej hnov huvsi. Kuv lub plawv dhia thiab kuv lub zog ploj tag, thiab kuv qhov muag pom kev tsis meej lawm. Kuv tej kwvluag phoojywg sawv deb deb ntawm kuv txojkev mob nkeeg, thiab kuv kwvtij neej tsa los kuj sawv deb ntawm kuv thiab. Cov neeg uas nrhiav txov kuv txojsia twb npaj cuab ntxiab cuab hlua rau kuv, cov neeg uas xav ua rau kuv mob pheej hais txog qhov uas ua kom puam tsuaj, thiab xav txog qhov uas yuav sawv twv kuv ib hnub tsaus ntuj. Tiamsis kuv ua yam li tus lag ntseg tsis hnov, kuv ua yam li tus ruam tsis qheb ncauj hais li. Kuv zoo yam nkaus li tus uas tsis hnov lus, thiab zoo li tus uas lub qhov ncauj tsis muaj lus cem. Au Yawmsaub, kuv tos rawv koj. Au tus Tswv uas yog kuv tus Vajtswv, koj yog tus uas yuav teb kuv. Kuv thov hais tias, “Thov tsis txhob cia lawv zoo siab luag hnyos kuv, yog cov uas khav rau thaum kuv plam taw.” Rau qhov kuv twb yuav ntog thiab kuv muaj mob tsis tu li. Kuv lees kuv lub txim, kuv ntxhov siab rau kuv tej kev txhaum. Cov uas lam ua kuv cov tshawj chim do do xwb muaj zog npho, thiab cov uas kuv tsis tau ua txhaum rau los ntxub kuv kuj muaj coob kawg li. Cov uas ua phem pauj kuv tej kev zoo kuj tawm tsam kuv, vim yog kuv ua qhov zoo. Au Yawmsaub, thov tsis txhob tso kuv tseg. Au kuv tus Vajtswv, thov tsis txhob nyob deb ntawm kuv. Au tus Tswv uas yog kuv lub chaw cawm dim, cia li maj nroos los pab kuv. Kuv hais tias, “Kuv yuav ceev faj xyaum zoo kom kuv tus nplaig thiaj tsis hais txhaum. Kuv yuav pos ncauj nkaus rau thaum cov neeg limhiam nyob ntawm kuv xubntiag.” Kuv nyob ntsiag to tsis hais lus li, kuv nyob twjywm los tsis zoo. Kuv lub siab ntxhov heev zuj zus tuaj, kuv lub siab kub lug li. Thaum kuv tseem tabtom xav mas hluavtaws kuj cig hauv lub siab, ces kuv tus nplaig txawm hais tias, “Au Yawmsaub, thov qhia rau kuv paub txog kuv lub neej thaum kawg, thiab kuv lub hnub nyoog yuav nyob ntev li cas, thiab qhia kuv paub tias kuv txojsia yuav luv li cas. Koj yeej ua rau kuv txojsia nyob ntev ob peb dos xwb, koj saib kuv lub hnub nyoog zoo li ib ntsais muag xwb. Txhua tus txojsia yeej nyob ntev li ua ib pas xwb. Neeg mus mus los los yam li tus duab ntxoo xwb, lawv khwv ntxhov siab do do xwb. Neeg sau nyiaj txiag ua tej niag pawg tiamsis tsis paub leejtwg yuav khaws mus. “Au tus Tswv, kuv tseem tos dabtsi? Kuv tsuas yog vam ntawm koj xwb. Thov koj tso kuv dim kuv tej kev fav xeeb huvsi. Tsis txhob cia kuv raug tej neeg ruam thuam. Kuv yog neeg ruam kuv tsis rua ncauj li rau qhov koj yog tus uas ua tej no. Thov rho koj rab nplawm ntawm kuv mus, koj txhais tes nplawm kuv ua rau kuv tsaug ib ce kawg li. Thaum koj cem neeg tej kev txhaum thiab nplawm lawv, koj muab tej uas lawv nyiam ua kom puam tsuaj tag yam li tej kab npauj ua. Neeg txhua tus txojsia zoo li ua ib pas cua xwb. “Au Yawmsaub, thov mloog kuv tej lus thov, thov tig ntsej mloog kuv lub suab quaj, thov koj tsis txhob fee plhu ntawm kuv lub kua muag. Rau qhov kuv yog koj ib tug qhua uas tuaj ib vuag xwb, kuv yog ib tug uas los dai koj ib yam li kuv tej poj koob yawm txwv txhua tus. Thov koj fee plhu ntawm kuv, kuv thiaj li tau kev xyiv fab ua ntej uas kuv tsis tau ncaim mus es kuv txojsia tu nrho.” Kuv ua siab ntev tos rawv Yawmsaub, nws tig los mloog kuv tej lus thov. Nws rub kuv tawm hauv lub qhov uas ntshai kawg, yog tawm hauv lub pas av, thiab muab kuv txhais kotaw txawb rau saum lub pob zeb, ua rau kuv xib taws nyob ruaj khov. Nws muab zaj nkauj tshiab tso rau hauv kuv lub qhov ncauj, yog zaj qhuas peb tus Vajtswv. Neeg coob coob yuav pom thiab ntshai, thiab yuav tso siab rau Yawmsaub. Tus uas tso siab rau Yawmsaub kuj nyob kaj siab lug, yog tus uas tsis tig mus nrhiav cov neeg khav theeb lossis nrhiav cov uas yuam kev mus pe dab. Au kuv tus Vajtswv Yawmsaub, koj tau ua ntau yam phimhwj thiab npaj tseg ntau yam rau peb, tsis muaj leejtwg zoo cuag li koj. Yog kuv yuav piav thiab hais txog tej ntawd mas muaj ntau dhau suav tsis txheeb. Koj tsis xav yuav tej tsiaj thiab tej qhov txhia chaw uas muab xyeem, tiamsis koj twb qheb kuv qhov ntsej hnov koj tej lus. Qhov uas tua tsiaj hlawv xyeem thiab xyeem daws txim koj tsis tau tsob. Kuv hais tias, “Kuv nyob no, hauv thooj ntawv kuj sau txog kuv. Au kuv tus Vajtswv, kuv nyiam ua raws li koj lub siab nyiam, koj txoj kevcai nyob hauv kuv lub siab.” Kuv twb hais txoj xov zoo txog txojkev cawm dim rau thaum cov neeg coob coob tuaj txoos ua ke. Au Yawmsaub, koj yeej paub tseeb tias kuv tsis kaw kuv lub qhov ncauj cia kiag li. Kuv tsis tau zais koj txojkev ncaj ncees cia rau hauv kuv lub siab, kuv twb hais txog koj txojkev ncaj uas tso siab tau thiab qhov uas koj cawm dim. Kuv tsis tau npog koj txojkev hlub uas ruaj khov thiab koj txojkev ncaj uas tso siab tau rau thaum cov neeg coob coob tuaj txoos ua ke. Au Yawmsaub, thov tsis txhob tso qhov uas koj khuvleej kuv tseg, thov koj txojkev hlub uas ruaj khov thiab koj txojkev ncaj uas tso siab tau tsom kwm kuv mus ib txhis. Tej xwm txheej phem vij kuv ntau kawg suav tsis txheeb. Kuv tej kev txhaum raws cuag kuv ua rau kuv tsis pom kev li, muaj ntau dua kuv tej plaubhau saum kuv taubhau. Kuv lub siab yaj tag. Au Yawmsaub, thov koj txaus siab cawm kuv dim, au Yawmsaub, thov maj nroos tuaj pab kuv lauj! Thov cia txhua tus uas tsom ntsoov txov kuv txojsia raug txaj muag thiab lub siab ruam puas ntsoog tag. Thov cia cov uas xav ua rau kuv raug mob raug raws thim rov qab mus thiab poob ntsej muag. Thov cia cov uas luag hnyos kuv poob siab nthav vim lawv raug txaj muag, Thov cia txhua tus uas nrhiav koj xyiv fab thiab zoo siab rau hauv koj. Thov cia cov uas nyiam koj txojkev cawm dim hais tsis tu tias, “Yawmsaub loj kawg nkaus.” Kuv mas pluag thiab txom nyem, tiamsis tus Tswv tseem mob siab kuv. Au kuv tus Vajtswv, koj yog tus uas pab kuv thiab cawm kuv dim, thov tsis txhob tos ntev. Tus uas mob siab cov neeg pluag kuj nyob kaj siab lug, Yawmsaub cawm tus ntawd rau hnub uas raug ceeblaj. Yawmsaub tsom kwm nws thiab tuav nws txojsia nyob, nws raug hu tias yog tus uas tau nyob kaj siab lug hauv lub tebchaws. Koj yuav tsis muab nws cob rau yeeb ncuab ua raws li lawv lub siab nyiam. Thaum nws raug mob pw saum lub txaj Yawmsaub tuav nws. Thaum nws mob koj kho nws tej mob zoo huvsi. Kuv mas kuv hais tias, “Au Yawmsaub, thov koj hlub kuv, thov kho kuv, vim yog kuv tau ua txhaum rau koj.” Kuv cov yeeb ncuab hais phem txog kuv tias, “Thaum twg nws li tuag thiab nws lub npe puam tsuaj mus?” Thaum ib tug twg tuaj tsham kuv, nws hais lus dag xwb, tiamsis nws lub siab khaws tej lus phem cia. Thaum nws tawm mus nws coj kuv lub moo mus xyav rau txhua qhov. Txhua tus uas ntxub kuv lawv ntxhi tuj taws txog kuv, lawv xav phem rau kuv. Lawv hais tias, “Muaj ib tug mob phem los raug nws lawm, nws yuav tsis sawv hauv nws lub chaw pw li lawm.” Txawm yog kuv tus kwvluag zoo uas kuv tso siab rau thiab nrog kuv noj ua ke, los yuav tsa luj taws tuam kuv. Au Yawmsaub, thov koj hlub kuv, thov tsa kuv sawv kom kuv thiaj ua pauj rau lawv. Yog li no kuv thiaj paub tias koj txaus siab rau kuv, yog qhov uas kuv cov yeeb ncuab kov tsis yeej kuv. Koj tuav kuv cia vim yog kuv lub siab ncaj, thiab muab kuv txawb rau ntawm koj lub xubntiag mus ib txhis. Cia li qhuas Yawmsaub uas yog cov Yixayee tus Vajtswv, ib txwm thaum ub los thiab mus ib txhis tsis kawg. Amee! Amee! Muas lwj liab siab tsuas rau lub hav uas muaj dej ntws nto li cas, au Vajtswv, kuv tus ntsuj plig kuj liab siab tsuas rau koj ib yam li ntawd. Kuv tus ntsuj plig nqhis Vajtswv, yog tus Vajtswv uas muaj txojsia nyob. Yuav thaum twg kuv li tuaj pom Vajtswv lub ntsej muag? Kuv tej kua muag ua kuv li zaub mov nruab hnub hmo ntuj, rau thaum neeg thom kuv tsis tu hais tias, “Koj tus Vajtswv nyob qhovtwg?” Thaum kuv quaj kev txom nyem hauv lub siab tawm los kuv nco txog tej no, yog kuv txeev nrog cov pejxeem ua ke thiab coj lawv mus ua ib pab rau hauv Vajtswv lub tuam tsev, muaj suab qw zoo siab thiab suab nkauj ua tsaug, yog ib tsoom pejxeem coob tuaj ua ke ua kevcai. Kuv tus ntsuj plig 'e, ua cas koj qaug zog tag li no, ua cas koj ntxhov siab tag rau hauv kuv lub cev? Cia li muaj siab vam rau Vajtswv, rau qhov kuv yuav qhuas nws dua. Nws yog tus uas pab kuv thiab yog kuv tus Vajtswv. Kuv tus ntsuj plig qaug zog tag rau hauv kuv, vim li no kuv thiaj nco txog koj hauv lub tebchaws ntawm tus dej Yaladee thiab lub roob Hawmoo thiab lub pov roob Mibxa. Muaj suab dej tsaws tsua nrov voog, yog dej tob hu dej tob, koj tej niag nthwv dej huvsi nphau nyab kiag kuv lawm. Nruab hnub Yawmsaub hais kom nws txojkev hlub uas ruaj khov tshwm los rau kuv, hmo ntuj nws zaj nkauj nrog nraim kuv, yog tej lus thov Vajtswv uas pub txojsia rau kuv. Kuv hais rau Vajtswv uas yog kuv txhib zeb hais tias, “Ua cas koj tsis nco qab kuv lawm? Ua cas kuv yuav mus quaj qas ntsuav vim yog yeeb ncuab quab yuam kuv?” Kuv cov tshawj chim thuam luag kuv, mob yam nkaus tej pob txha ntsoog tag, rau thaum lawv thom kuv tsis tu hais tias, “Koj tus Vajtswv nyob qhovtwg?” Kuv tus ntsuj plig 'e, ua cas koj qaug zog tag li no, ua cas koj ntxhov siab tag rau hauv kuv lub cev? Cia li muaj siab vam rau ntawm Vajtswv, rau qhov kuv yuav qhuas nws dua. Nws yog tus uas pab kuv thiab yog kuv tus Vajtswv. Au Vajtswv, thov koj tsa kuv cai, thiab hais kuv tshaj plaub ntawm cov neeg tsis hwm koj. Thov koj cawm kuv dim ntawm cov neeg dag thiab cov neeg tsis ncaj. Koj yog tus Vajtswv uas yog kuv lub chaw cawm siav, ua cas koj tso kuv tseg lawm? Ua cas kuv yuav mus quaj qas ntsuav vim yog yeeb ncuab quab yuam kuv? Thov koj tso koj txojkev kaj thiab txojkev tseeb los, thov cia ob txog ntawd coj kuv mus, thiab coj kuv mus txog koj lub roob dawb huv thiab koj lub chaw nyob. Mas kuv yuav mus rau ntawm Vajtswv lub thaj xyeem, mus txog Vajtswv uas yog kuv lub chaw zoo siab xyiv fab kawg nkaus. Au Vajtswv, kuv tus Vajtswv 'e, kuv yuav ntaus nkauj nog ncas qhuas koj. Kuv tus ntsuj plig 'e, ua cas koj qaug zog tag li no, ua cas koj ntxhov siab tag rau hauv kuv lub cev? Cia li muaj siab vam rau Vajtswv, rau qhov kuv yuav qhuas nws dua. Nws yog tus uas pab kuv thiab yog kuv tus Vajtswv. Au Vajtswv, peb lub qhov ntsej tau hnov thiab peb tej poj koob yawm txwv tau piav txog tej haujlwm uas koj tau ua rau thaum lawv sim neej yav thaum ub. Koj txhais tes tau ntiab tej tebchaws khiav mus, hos koj cog peb tej poj koob yawm txwv nyob. Koj ua rau ib tsoom neeg raug kev txom nyem, hos koj muab peb tej poj koob yawm txwv tso nyob ywj pheej. Tsis yog lawv tej ntaj pab lawv txeeb tau lub tebchaws ntawd, thiab tsis yog lawv txhais tes kov yeej, tiamsis yog koj txhais tes xis thiab koj txhais npab thiab qhov uas koj tsa qhov muag saib lawv rau qhov koj txaus siab rau lawv. Koj yog kuv tus vajntxwv thiab kuv tus Vajtswv uas hais tseg kom Yakhauj kov yeej. Vim yog muaj koj peb thiaj li thawb tau peb cov tshawj chim, vim muaj koj lub npe peb thiaj li tsuj tau cov uas tawm tsam peb, rau qhov kuv tsis tso siab rau kuv rab hneev nti, thiab kuv rab ntaj los cawm tsis tau kuv. Tiamsis koj tau cawm peb dim ntawm peb cov tshawj chim thiab ua rau cov uas ntxub peb raug txaj muag. Peb khav txog Vajtswv tsis tu li, thiab peb yuav ua tsaug rau koj lub npe ib txhis mus li. Los koj tseem tso peb tseg thiab ua rau peb poob qes, thiab tsis tau tawm nrog peb cov tub rog mus. Koj ua rau peb thim ntawm peb cov tshawj chim rov qab, thiab peb tej yeeb ncuab txeeb tau peb tej qhov txhia chaw mus lawm. Koj ua rau peb zoo yam nkaus li tej yaj uas yuav coj mus tua, thiab ua rau peb tawg ua sab ua sua mus rau ib tsoom tebchaws. Koj muab koj haiv neeg muag pheejyim kawg li, koj tsis tau tshaj thawj li. Koj ua rau peb raug luag zej zog thuam, ua rau peb raug cov uas nyob ib ncig luag thiab saib tsis taus peb. Thiab ua rau peb mus tiag luag ncauj luag lo rau hauv ib tsoom tebchaws, thiab ua lub chaw rau ib tsoom neeg luag. Kuv poob ntsej muag tas hnub tas hmo, thiab kev txaj muag npog nkaus kuv lub ntsej muag, vim yog raug tej lus uas luag thuam luag thiab saib tsis taus, vim yog cov yeeb ncuab thiab cov uas cib nyeej. Txawm yog peb pheej nco ntsoov koj thiab tsis tau rhuav koj tej lus cog tseg, los txhua yam no los raug peb. Peb lub siab kuj tsis fav xeeb peb txhais kotaw kuj tsis ncaim ntawm koj txojkev, los koj cia peb ntsoog tag rau hauv hma tej chaw nyob, thiab muab txojkev tsaus ntuj los npog peb. Yog peb pheej tsis nco ntsoov peb tus Vajtswv lub npe thiab tsa tes rau luag tej dab, ces Vajtswv txawm tsis paub qhov no lawm lov? Rau qhov nws yeej paub tej uas peb xav twjywm hauv lub siab. Vim tim koj peb thiaj raug muab tua tas hnub tas hmo, thiab raug muab suav yam li cov yaj uas coj mus tua. Au tus Tswv, cia li sawv tsees, ua cas koj tseem pw tsaug zog? Cia li tsim dheev. Tsis txhob muab peb tso tseg ib txhis. Ua li cas koj yuav fee plhu ntawm peb? Ua cas koj yuav tsis nco qab qhov uas peb raug kev txom nyem raug quab yuam? Peb tus ntsuj plig khoov mus ti nkaus av, peb lub cev pua lua rau hauv pem teb. Thov koj cia li sawv tsees los pab peb, thov txhiv peb dim vim yog saib rau koj txojkev hlub uas ruaj khov. Kuv lub siab muaj tej lus zoo puv phwj yos, kuv yuav hu tej nkauj sib phim rau vajntxwv. Kuv tus nplaig zoo yam nkaus li tus Kws txawj sau ntawv tus cwjmem. Koj zoo nraug tshaj ib tsoom neeg huvsi. Tej lus koob hmoov ntws tawm hauv koj daim tawv ncauj los, vim Vajtswv tau foom koob hmoov rau koj ib txwm los. Vajntxwv uas muaj hwjchim loj kawg 'e, cia li ris rab ntaj rau ntawm duav. Koj yog tus uas muaj meej nthawb thiab muaj hwjchim meej mom. Koj uas muaj hwjchim meej mom cia li caij nees tawm mus kov yeej, es pab tau txojkev tseeb thiab tuav tau txojcai. Thov kom koj txhais tes xis ua tau tej yam uas txaus ntshai tshwm los. Koj rab xub ntse chob vajntxwv tej yeeb ncuab lub siab, ib tsoom neeg ntog rau ntawm koj xubntiag. Koj lub zwm txwv uas Vajtswv pub rau koj muaj nyob mus ib txhis tsis kawg. Koj tuav tus cwj ua vajntxwv kav ncaj kav ncees. Koj nyiam txojkev ncaj ncees, koj ntxub txojkev limhiam. Vim li no Vajtswv, koj tus Vajtswv tau muab cov roj uas ua kom zoo siab xyiv fab hliv tsa koj loj dua koj cov kwvluag. Koj tej tsoos tsho tsw qab zib ntxiag yog muaj roj tsw qab thiab roj ntoo alau‑es thiab hmoov xyab txob pleev rau lawm. Hauv koj lub tsev uas xuas kaus ntxhw ua luag ntaus nkauj nog ncas ua rau koj zoo siab. Tej vajntxwv li ntxhais kuj nrog cov pojniam uas tu koj ua haujlwm ua ke, poj vajntxwv coj tej kub hauv lub moos Aufi sawv ntawm koj sab xis. Mentxhais 'e, cia li mloog, cia li ua tib zoo xav thiab tig koj lub qhov ntsej mloog. Cia li tsis nco ntsoov koj haiv neeg thiab koj txiv tsev neeg. Mas vajntxwv yuav nyiam koj lub cev uas zoo nkauj. Vim nws yog koj tus tswv koj yuav tsum hwm nws. Cov neeg hauv Thailab yuav coj tshav ntuj tuaj rau koj, thiab cov pejxeem uas nplua nuj kawg yuav coj txhua yam nyiaj txiag tuaj sam hwm koj. Vajntxwv tus nkauj nyab hnav tej tsoos tsho uas muaj xov kub ntos hauv lub txaj. Lawv coj nws hnav lub tsho uas txaij nraug zees mus cuag vajntxwv, thiab coj cov hluas nkauj dawb huv uas ua luag nrog nws ua ke, coj lawv mus ua zoo siab xyiv fab kawg li, mus rau hauv vajntxwv lub tsev. Au vajntxwv, koj tej tub yuav nyob koj tej poj koob yawm txwv lub chaw, koj yuav tsa lawv ua thawj kav thoob plaws lub ntiajteb. Kuv yuav ua rau koj lub npe raug luag txhawb nqa rau hauv txhua tiam neeg mus li. Mas ib tsoom neeg yuav qhuas koj mus ib txhiab ib txhis li. Vajtswv yog peb lub chaw cawm siav thiab yog peb lub zog, yog tus uas pab rau txhua lub sijhawm uas raug ceeblaj. Vim li ntawd peb thiaj tsis ntshai txawm yog lub ntiajteb yuav ntxeev, thiab tej roob yuav nphau rau hauv hiavtxwv, txawm yog dej hiavtxwv nphau pes nthwv hiab nrov ntseeg nkaws, thiab tej roob ua zog kais vim tej niag nthwv dej ntsawj kuj xij. Muaj ib tug niag dej ntws ua rau Vajtswv lub nroog zoo siab, yog tus uas Loj Dua Ntais lub chaw nyob uas dawb huv. Vajtswv nyob hauv nruab nrab lub nroog mas lub nroog yuav tsis ua zog, thaum kaj ntug Vajtswv yuav pab nws. Ib tsoom neeg kuj ntxhov hnyo thiab ib tsoom tebchaws ntseeg nkaws ntog tag. Vajtswv tsa suab hlo mas lub ntiajteb yaj ntshis. Yawmsaub uas muaj hwjchim loj kawg nkaus nrog nraim peb, Yakhauj tus Vajtswv yog peb lub chaw cawm siav. Cia li los, los saib Yawmsaub tej haujlwm, saib nws ua rau lub ntiajteb nyob do cuas li cas. Nws ua rau kev ua rog tiaj tus mus thoob qab ntuj kawg. Nws lov rab hneev thiab tsoo tej hmuv tawg thiab hlawv tej daim phiaj thaiv. “Cia li nyob twjywm thiab paub tias kuv yog Vajtswv. Ib tsoom tebchaws txhawb nqa kuv, thoob ntiajteb qhuas kuv.” Yawmsaub uas muaj hwjchim loj kawg nkaus nrog nraim peb, Yakhauj tus Vajtswv yog peb lub chaw cawm siav. Ib tsoom neeg 'e, cia li npuaj teg, qw hu nkauj zoo siab xyiv fab nrov nrov rau Vajtswv. Yawmsaub yog tus loj dua ntais, yog tus uas txaus ntshai, yog tus vajntxwv loj uas kav tag nrho lub ntiajteb. Nws ua kom tej neeg los nyob rau hauv peb kev tswjhwm, thiab ua kom tej tebchaws nyob rau hauv peb qab xib taws. Nws xaiv qub txeeg qub teg rau peb, yog yam uas Yakhauj uas Vajtswv hlub khav ntxhias. Vajtswv nce mus muaj suab qw nrov, Yawmsaub nce mus muaj suab raj kub yaj. Cia li hu nkauj qhuas Vajtswv, cia li hu nkauj qhuas los maj. Cia li hu nkauj qhuas peb tus vajntxwv, cia li hu nkauj qhuas los maj. Rau qhov Vajtswv yog tus vajntxwv uas kav tag nrho lub ntiajteb. Cia li hu nkauj zoo siab qhuas nws. Vajtswv kav hlo ib tsoom tebchaws, Vajtswv nyob saum nws lub zwm txwv uas dawb huv. Tej thawj hauv ib tsoom neeg tuaj txoos ua ke ua Aplahas tus Vajtswv haiv neeg. Tej daim phiaj thaiv lub ntiajteb yog Vajtswv li. Nws yog tus uas raug muab txhawb nqa siab kawg nkaus. Yawmsaub yog tus loj kawg tsim nyog yuav qhuas nws kawg rau hauv peb tus Vajtswv lub nroog, yog Yawmsaub lub roob dawb huv uas siab thiab zoo nkauj kawg, ua rau thoob ntiajteb xyiv fab hlo, yog lub roob Xi‑oo uas nyob tom hauv ntej, yog tus tuam vajntxwv lub nroog. Hauv tej chaw ruaj khov hauv lub nroog ntawd, mas Vajtswv qhia tias nws yog lub chaw tiv thaiv uas ruaj khov. Saib maj, tej vajntxwv sau zog ua ke, lawv ua ib pab tuaj ua rog. Mas thaum lawv pom dheev lub nroog ntawd lawv kuj poob siab nthav, lawv ntshai kawg ras khiav tag. Lawv ntshai ib ce tshee hnyo thiab lwj siab kawg yam nkaus li tus pojniam uas mob plab heev, thiab yam li thaum cua ntsawj sab hnub tuaj nplawm Thasi tej nkoj txwg puam tsuaj tag. Peb tau hnov li cas peb kuj pom muaj li ntawd rau hauv Yawmsaub uas muaj hwjchim loj kawg nkaus lub nroog, uas yog peb tus Vajtswv lub nroog uas Vajtswv tsa kom nyob ruaj mus ib txhis. Au Vajtswv, peb xav txog koj txojkev hlub uas ruaj khov rau hauv koj lub tuam tsev. Au Vajtswv, lo lus qhuas koj muaj mus thoob plaws qab ntuj ib yam li koj lub npe nrov nto moo mus. Koj txhais tes xis puv nkaus txojkev ncaj ncees. Cia lub roob Xi‑oo zoo siab, cia Yuda tej ntxhais xyiv fab vim yog koj txiav txim ncaj. Nej cia li mus ncig lub nroog Xi‑oo, mus puag ncig kiag, thiab suav tej chaw tsom faj. Ua tib zoo saib tej ntsa loog thiab tshuaj saib tej chaw ruaj khov, kom nej thiaj hais tau rau lwm tiam paub tias, no yog Vajtswv, yog peb tus Vajtswv ib txhiab ib txhis thiab nws yuav coj peb kev mus ib txhis li. Ib tsoom neeg 'e, cia li mloog tej lus no. Txhua tus uas nyob hauv qab ntuj, cia li tig ntsej mloog, tsis hais cov yau cov hlob cov muaj cov pluag huvsi. Kuv lub qhov ncauj yuav hais tej lus uas muaj tswvyim, thiab kuv lub siab yuav xav txog kev txawj ntse. Kuv yuav tig ntsej mloog tej paj lug, kuv yuav ntaus nkauj nog ncas txhais tej txhiaj txhais. Ua cas kuv yuav ntshai rau thaum raug kev ceeblaj txom nyem, thiab thaum cov neeg txhaum uas tsim txom kuv nyob vij kuv, yog cov neeg uas tso siab rau lawv tej nyiaj txiag, thiab khav txog qhov uas lawv muaj txiag nplua mias? Tsis muaj leejtwg txhiv tau nws tus kheej, thiab them taus nws txojsia li nqe rau Vajtswv. Rau qhov tias tus nqe uas txhiv tau txojsia ntawd kim heev, npaum twg los kuj tsis txaus uas yuav cia nws muaj txojsia nyob mus ib txhis, thiab tsis pom qhov tuag. Nws yuav pom tias tus uas txawj ntse los kuj yuav tuag, tus neeg ruam thiab tus tsis paub qabhau los kuj yuav puam tsuaj ib yam nkaus, yuav tseg lawv tej nyiaj txiag cia rau lwm tus. Txawm yog lawv txeev hu lawv thaj av raws li lawv tej npe, los lawv lub qhov ntxa yeej yog lawv lub vaj tse mus ib txhis, yog lawv li chaw nyob mus tag txhua tiam. Neeg lub meej mom pab tsis tau nws ciaj sia nyob, lawv kuj zoo yam nkaus li tej tsiaj txhu uas yuav puam tsuaj xwb. No yog txojkev uas cov uas tso siab rau lawv tus kheej yuav taug, no yog cov uas txaus siab rau lawv tej lus lub khuab thaum kawg. Lawv raug teem mus rau hauv tub tuag teb yam li tej yaj. Tus yug yaj uas coj lawv yog txojkev tuag, lawv nqes ncaj nraim rau hauv qhov ntxa, lawv lub cev yuav lwj tag. Tub tuag teb yog lawv lub tsev nyob. Tiamsis Vajtswv yuav txhiv kuv tus ntsuj plig dim hauv tub tuag teb qab hwjchim, rau qhov Vajtswv yuav txais kuv. Nej tsis txhob ntshai rau thaum leejtwg nplua nuj tuaj, thiab thaum nws vaj tse muaj koob meej zuj zus tuaj, rau qhov thaum nws tuag nws tsis coj dabtsi mus, nws tej koob meej tsis nrog nws nqes mus. Txawm yog thaum nws tseem muaj txojsia nyob nws suav tias nws tau zoo, thiab txawm yog luag qhuas nws thaum nws vam meej, los nws tseem yuav mus nrog nws tej poj koob yawm txwv nyob uas yuav tsis rov pom dua qhov kaj kiag li. Neeg lub meej mom pab tsis tau nws ciaj sia nyob, lawv kuj zoo yam nkaus li tej tsiaj txhu uas yuav puam tsuaj. Tus muaj hwjchim loj uas yog Vajtswv Yawmsaub hais, thiab hu lub ntiajteb txij sab hnub tuaj mus txog sab hnub poob. Vajtswv ci hauv lub nroog Xi‑oo tuaj, yog lub nroog uas zoo nkauj kawg nkaus. Peb tus Vajtswv tuaj, nws tsis tau nyob ntsiag to. Muaj nplaim taws kub ceev mus ua nws ntej, muaj cua daj cua dub ntsawj hlob vij puag ncig nws. Nws hu lub ntuj saum ub thiab lub ntiajteb tuaj, nws thiaj txiav txim rau nws haiv neeg hais tias, “Cia li sau zog cov uas muab siab npuab kuv los cuag kuv, yog cov uas muab tsiaj xyeem cog lus rau kuv.” Lub ntuj qhia Vajtswv txojkev ncaj ncees, rau qhov Vajtswv yog tus uas txiav txim ntag. “Kuv haiv neeg 'e, cia li tig ntsej mloog, kuv yuav hais, Yixayee 'e, kuv yuav ua timkhawv kom nej. Kuv yog Vajtswv, yog nej tus Vajtswv. Kuv tsis ntuas nej txog qhov uas nej muab tsiaj xyeem. Tej uas nej muab hlawv xyeem nyob ntawm kuv lub xubntiag tsis tu li. Kuv tsis cheem tsum ib tug txiv nyuj ntawm nej lub tsev, lossis ib tug txiv tshis ntawm nej lub nkuaj kiag li. Rau qhov txhua tus tsiaj qus hauv hav zoov, thiab tej tsiaj txhu saum qas txhiab lub roob yog kuv li. Kuv paub txhua tus noog saum tej roob, thiab txhua tus tsiaj uas nkag hauv tshav zaub yog kuv li. Yog kuv tshaib kuv yuav tsis hais nej, rau qhov lub ntiajteb thiab txhua yam uas nyob hauv yog kuv li. Kuv noj tej nqaij txiv nyuj thiab haus ntshav tshis lov? Cia li coj tej lus ua tsaug tuaj xyeem rau Vajtswv, thiab pauj tej uas nej yeem lus rau tus uas Loj Dua Ntais. Cia li hu thov kuv rau hnub uas raug ceeblaj, kuv yuav cawm nej dim thiab nej yuav ua rau kuv tau koob meej.” Tiamsis Vajtswv hais rau cov neeg limhiam tias, “Koj muaj feem dabtsi cim kuv tej kab ke, lossis koj daim tawv ncauj hais kuv tej lus cog tseg? Rau qhov nej ntxub tej lus qhuab qhia, thiab muab kuv tej lus laim rau tom nej qub qab. Yog nej pom tub sab nej cia li nrog lawv ua ke, thiab mus koom nrog cov neeg ua nkauj ua nraug ua ke. Nej qheb kiag nej lub ncauj hais lus phem, thiab tej lus dag ntxias lo rawv nej tus nplaig. Nej zaum iab hiam nej tej kwvtij, nej tseem xyav nej tej kwvtij uas koom niam. Nej twb ua tej no los kuv nyob twjywm ces nej xav tias kuv zoo ib yam li nej. Tiamsis nimno kuv ntuas nej thiab hais nej qhov txhaum. Nej cov uas tsis nco qab Vajtswv, cia li tshuaj saib zaj no. Yog tsis ua li no kuv yuav muab nej dua, yuav tsis muaj ib tug twg pab tau nej dim. Tus uas coj tej lus ua tsaug tuaj xyeem kuj yog ua rau kuv tau ntsej muag. Kuv yuav ua Vajtswv txojkev cawm dim tshwm rau tus uas tu nws lub neej raug cai.” Au Vajtswv, thov koj khuvleej kuv raws li koj txojkev hlub uas ruaj khov, thov tshem kuv tej kev fav xeeb kom ploj mus raws li koj txojkev khuvleej uas muaj nplua mias. Thov ntxuav kuv tej kev phem kev qias ploj tag, thiab ntxuav kom kuv dawb huv tsis muaj txim. Kuv paub kuv txojkev fav xeeb, thiab kuv lub txim nyob rawv ntawm kuv xubntiag. Kuv tau ua txhaum rau koj, yog ua rau koj tib leeg xwb, thiab ua tau tej uas koj pom tias phem kawg, koj thiaj txiav txim raug cai, thiab qhov uas koj rau txim tsis muaj chaw thuam li. Saib maj, kuv yeej yug los hauv txojkev txhaum, thiab kuv niam xeeb kuv hauv txojkev txhaum txim. Koj yeej xav yuav qhov tseeb hauv nruab siab, vim li no thov koj qhia tswvyim rau hauv kuv lub siab. Thov muab zaub txig theem ua kevcai ntxuav kuv, kuv thiaj li huv, thov ntxuav kuv, kuv thiaj li dawb dua daus xib daus npu. Thov cia kuv hnov txojkev xyiv fab kev zoo siab, thov cia kuv tej pob txha uas koj tsoo ntsoog lawd rov xyiv fab. Thov fee plhu ntawm kuv lub txim, thiab tshem kuv tej kev txhaum txim huvsi mus. Au Vajtswv, thov koj tsim lub siab dawb huv rau hauv kuv, thiab pub lub siab tshiab ruaj khov rau kuv. Tsis txhob muab kuv laim pov tseg ntawm koj lub xubntiag mus, thiab tsis txhob coj koj tus Ntsuj Plig uas dawb huv ncaim kuv mus. Thov pub txojkev xyiv fab uas koj cawm kuv dim rov rau kuv, thiab thov pub kuv muaj lub siab npuab koj mus li. Mas kuv yuav qhia cov uas fav xeeb paub koj txojkev, thiab cov neeg muaj txim yuav rov los cuag koj. Au Vajtswv koj yog tus Vajtswv uas cawm kuv dim, thov koj cawm kuv dim qhov uas ua rau luag los ntshav, mas kuv tus nplaig yuav hu nkauj txog qhov uas koj cawm dim. Au tus Tswv, thov koj qheb kuv lub qhov ncauj, mas kuv daim tawv ncauj thiaj hais tej lus uas qhuas koj. Koj tsis zoo siab rau tej tsiaj uas muab xyeem. Txawm yog kuv ua kevcai hlawv xyeem los koj tsis txaus siab yuav. Tej uas muab xyeem es Vajtswv txaus siab yuav yog lub siab mos siab muag. Au Vajtswv, koj yuav tsis fee plhu ntawm lub siab mos siab muag uas lees txim tiag tiag. Thov koj ua zoo rau Xi‑oo raws li koj lub siab nyiam, thov rov ua ntsa loog thaiv Yeluxalees. Mas koj yuav zoo siab rau tej tsiaj uas muab xyeem raug kev raug cai, yog tej uas tua xyeem thiab tej uas muab hlawv kheej xyeem. Mas yuav muab txiv nyuj xyeem rau saum koj lub thaj. Niag neeg muaj hwjchim 'e, ua cas koj yuav khav qhov uas koj ua phem? Vajtswv txojkev hlub yeej muaj tas hnub tas hmo. Niag neeg dag 'e, koj ntaus tswvyim ua kom puam tsuaj, koj tus nplaig ntse ib yam li hniav chais ntse. Koj nyiam kev phem heev dua kev zoo, koj nyiam kev dag heev dua hais tseeb. Tus niag nplaig dag 'e, koj nyiam hais txhua lo lus uas ua kom puam tsuaj xwb. Tiamsis Vajtswv yuav muab koj tsoo kom puam tsuaj mus ib txhis, nws yuav ntsiab nkaus koj chua koj tawm hauv koj lub tsev mus, nws yuav muab koj dob hauv cov neeg ciaj lub tebchaws mus. Cov neeg ncaj ncees yuav pom thiab yuav ntshai, thiab yuav luag nws hais tias, “Sim saib tus uas tsis kheev cia Vajtswv ua nws lub chaw cawm siav, nws tso siab rau nws tej kev muaj txiag nplua nuj, thiab muab qhov uas ua limhiam los txhawb nws lub zog.” Kuv mas zoo yam nkaus li tsob txiv aulib ntsuab ntsuab nyob hauv Vajtswv lub tsev, kuv tso siab rau Vajtswv txojkev hlub uas ruaj khov mus ib txhiab ib txhis. Kuv yuav ua koj tsaug ib txhis li rau tej uas koj tau ua los lawm, kuv yuav tshaj tawm koj lub npe tab meeg cov uas hwm koj rau qhov koj lub npe zoo kawg. Cov neeg ruam xav hauv lub siab tias, “Tsis muaj Vajtswv.” Lawv lub siab phem kawg li thiab lawv ua tej kev txhaum uas qias vuab tsuab. Tsis muaj ib tug twg ua zoo kiag li. Vajtswv saib saum ntuj tuaj rau neeg ntiajteb, saib yuav muaj ib tug twg uas ntse thiab nrhiav Vajtswv. Lawv txhua tus kuj poob ntawm Vajtswv lawm, thiab lawv lub siab phem tag huvsi ib yam nkaus. Tsis muaj ib tug ua zoo, tsis muaj kiag li. Cov uas ua phem tsis paub li lov, yog cov uas noj kuv haiv neeg yam li noj ncuav, thiab tsis taij thov Vajtswv li? Lawv yuav nyob ntshai kawg ua siab puas tsus, ntshai heev dua li uas lawv txeev ntshai, rau qhov Vajtswv ua rau cov neeg uas tuaj ntaus nej tej pob txha dhia ri sua. Nej ua rau lawv raug txaj muag rau qhov Vajtswv twb tso lawv tseg lawm. Xav kom muaj kev cawm dim tshwm hauv Xi‑oo tuaj rau cov Yixayee. Thaum Vajtswv pub nws haiv neeg rov vam meej li qub, Yakhauj yuav xyiv fab, Yixayee yuav zoo siab. Au Vajtswv, thov koj lub npe cawm kuv dim, thov koj lub hwjchim tsa kuv muaj cai. Au Vajtswv, thov koj mloog kuv lub suab thov, thov tig ntsej mloog kuv tej lus ntawm kuv lub qhov ncauj. Vim yog cov neeg khav theeb twb sawv tawm tsam kuv, cov neeg ua nruj ua tsiv nrhiav txov kuv txojsia, lawv tsis cia Vajtswv nyob ntawm lawv lub xubntiag. Vajtswv yeej yog tus uas pab kuv, Tus Tswv yog tus uas tsom kwm kuv txojsia. Nws yuav muab tej kev phem rov pauj rau kuv cov yeeb ncuab. Thov koj uas ua ncaj ncees ua kom lawv puam tsuaj. Kuv yuav xyeem qhov txhia chaw raws li kuv zoo siab pub rau koj. Au Yawmsaub, kuv yuav ua tsaug koj lub npe rau qhov yog lub npe zoo kawg. Koj twb cawm kuv dim txhua txojkev ceeblaj huvsi, thiab kuv lub qhov muag twb pom kuv cov yeeb ncuab swb lawm. Au Vajtswv, thov koj tig ntsej mloog kuv tej lus thov, thov tsis txhob fee qhov uas kuv taij thov. Thov koj tsa qhov ntsej mloog thiab teb kuv. Kuv yeej zeem kuv tej kev txom nyem lawm lauj, Kuv ntxhov siab kawg rau yeeb ncuab lub suab, rau qhov uas cov neeg limhiam tsim txom kuv. Lawv coj kev ceeblaj txom nyem los rau kuv, lawv khaws tej kev ntxub kuv chim rau nruab siab mus li. Kuv lub siab lwj ntsuav, qhov uas ntshai txojkev tuag poob los tsuam kuv. Txojkev ntshai ua ib ce tshee hnyo kuj los raug kuv, thiab txojkev ceeb thiab ntshai nyab kiag kuv. Mas kuv hais tias, “Kuv xav xav muaj tis yam li nquab thiaj li ya tau khiav mus nyob tus yees. Kuv yeej yuav khiav mus deb deb, kuv yuav mus so hauv tebchaws moj sab qhua. Kuv yuav maj mus nrhiav chaw nraim cev mus nraim tej niag cua daj cua dub uas hlob hlob.” Au tus Tswv, thov ua kom lawv ntxhov tag thiab ua kom lawv hais lus tsis sib paub, rau qhov kuv pom kev limhiam ntais ntuj thiab kev sib ntaus sib tua hauv lub nroog thiab mus saum ntsa loog puag ncig lub nroog nruab hnub hmo ntuj. Tej kev phem thiab tej kev ceeblaj txom nyem muaj nyob hauv lub nroog, txojkev puam tsuaj muaj nyob hauv nruab nrab. Tej kev quab yuam kev ntxo luag los noj los haus muaj hauv tej kiab khw tsis tu li. Tsis yog yeeb ncuab luag kuv xwb, ces kuv twb thev taus. Tsis yog cov uas tawm tsam kuv khav theeb rau kuv xwb, ces kuv twb tau chaw nraim, tiamsis twb yog koj uas yog tus uas nrog kuv nyob sib luag sawv sib txig, ua kuv phoojywg kwvluag ntag. Wb txeev sib tham qhia siab kiag, wb yeej koom ua ib lub siab mus rau hauv Vajtswv lub tuam tsev. Thov txojkev tuag los rau lawv cov ntawd, cia lawv nqes ciaj sia kais rau hauv tub tuag teb, vim yog txojkev phem nyob hauv lawv lub tsev thiab nyob hauv lawv lub siab. Tiamsis kuv hu thov Vajtswv mas Yawmsaub yuav cawm kuv dim. Kuv tsa suab ntsaj suab yws thaum sawv ntxov thaum tav su thiab thaum tsaus ntuj, mas nws yuav mloog kuv lub suab. Nws yuav tso kuv tus ntsuj plig dim tso siab lug ntawm qhov uas kuv ua rog, vim yog muaj neeg coob coob sawv nres nroos ua rog rau kuv. Vajtswv uas nyob saum lub zwm txwv kav ib txwm thaum ub los yeej yuav mloog kuv tej lus thov thiab yuav muab lawv txo, vim yog lawv tsis ntxeev dua siab thiab tsis hwm tsis paub ntshai Vajtswv. Kuv tus kwvluag tsa tes ntaus nws tej phoojywg, nws rhuav nws tej lus cog tseg. Nws tej lus npliag heev dua li roj mis tiamsis kev ua rog nyob hauv nws lub siab, nws tej lus mos lus muag heev dua li roj tiamsis tej lus ntawd yog rab ntaj uas rho kiag los. Cia li muab koj lub nra tso plhuav rau Yawmsaub, mas nws yuav tuav rawv koj, nws yuav tsis cia cov neeg ncaj ncees ua zog kais. Au Vajtswv, koj yuav muab cov neeg phem laim pov tseg rau hauv lub niag qhov uas tob kawg. Cov niag neeg noj nyoog thiab fav xeeb yuav tsis muaj txojsia nyob txog ib nrab ntawm lawv lub hnub nyoog. Kuv mas kuv yuav tso siab rau koj. Au Vajtswv, thov hlub kuv vim yog muaj neeg tsuj kuv, cov uas ua rog rau kuv quab yuam kuv tas hnub tas hmo. Kuv cov yeeb ncuab muab kuv tsuj ib hnub tsaus ntuj li, vim yog muaj neeg coob coob ua rog rau kuv khav ntxhias. Thaum kuv ntshai kuv tso siab rau koj, kuv tso siab rau Vajtswv uas kuv qhuas nws tej lus, kuv tso siab rau Vajtswv tsis ntshai li. Tej neeg nqaij tawv yuav ua tau li cas rau kuv? Lawv nrhiav kev ua tsis zoo rau kuv tej haujlwm tas hnub tas hmo li, lawv tsuas yog xav txog tej kev phem uas yuav ua rau kuv xwb. Lawv sau zog ua ke tsiv nraim tos kuv, lawv soj kuv qab taug kuv lw, lawv xav txov kuv txojsia. Thov ua pauj rau lawv vim yog lawv ua txhaum. Au Vajtswv, thov koj npau taws es muab cov neeg ntawd ntaus kom ntog tag. Koj twb suav kuv tej kev ntxhov siab, thiab khaws kuv tej kua muag rau hauv koj lub thauv, thiab muab sau huvsi cia rau hauv koj phau ntawv lawm. Hnub uas kuv thov koj mas koj yuav ua rau kuv cov yeeb ncuab thim rov qab. Kuv paub tseeb tias yuav muaj li no vim Vajtswv tuaj kuv tog. Kuv tso siab rau Vajtswv uas kuv qhuas nws tej lus, kuv tso siab rau Yawmsaub uas kuv qhuas nws tej lus, kuv tso siab rau Vajtswv tsis ntshai li. Tej neeg yuav ua tau li cas rau kuv? Au Vajtswv, kuv yuav tsum pauj tej uas kuv yeem lus tseg rau koj lawm, kuv yuav xyeem qhov txhia chaw rau koj ua koj tsaug. Rau qhov koj tau tso kuv tus ntsuj plig dim txojkev tuag, koj yeej pab kuv txhais kotaw dim qhov uas ntog, kom kuv thiaj ua tau lub neej ntawm Vajtswv xubntiag taug txojkev kaj uas pub txojsia. Au Vajtswv, thov koj khuvleej kuv, thov khuvleej kuv, rau qhov kuv tus ntsuj plig los cawm siav rau hauv koj. Kuv los cawm siav rau hauv koj phab tis tus duab ntxoov ntxoo mus txog thaum tej kev puam tsuaj dhau tag lawd. Kuv quaj thov Vajtswv uas Loj Dua Ntais, yog tus Vajtswv uas ua txhua yam tiav rau kuv. Nws yuav tso kev dim saum ntuj los cawm kuv, nws yuav ua rau cov uas tsuj yuam kuv raug txaj muag. Vajtswv yuav tso nws txojkev hlub ruaj khov thiab nws txojkev ncaj uas tso siab tau los. Kuv pw hauv nruab nrab cov tsov ntxhuav uas huas qas ntshis noj neeg. Lawv tej kaus hniav yog tej hmuv thiab tej xub, lawv tus nplaig yog rab ntaj uas ntse. Au Vajtswv, thov cia koj raug txhawb nqa siab dhau lub ntuj, thov koj lub hwjchim uas ci ntsa iab nthuav thoob plaws ntiajteb. Lawv cuab hlua rau kuv txhais kotaw, kuv tus ntsuj plig ntshai khoov ntshis. Lawv khawb qhov taub cuab kuv kev tiamsis lawv rov poob rau hauv lub qhov ntawd. Au Vajtswv, kuv lub siab ruaj khov, kuv lub siab ruaj khov tiag. Kuv yuav hu nkauj, kuv lub siab yuav seev suab hu nkauj. Kuv lub siab cia li tsim dheev. Nkauj nog ncas loj thiab nkauj nog ncas me 'e, cia li tsim dheev. Kuv yuav tsa kom kaj ntug tsim dheev los. Au tus Tswv, kuv yuav ua koj tsaug rau hauv ib tsoom neeg, kuv yuav hu nkauj qhuas koj rau hauv ib tsoom tebchaws. Koj txojkev hlub uas ruaj khov loj kawg mus nto ntuj, thiab koj txojkev ncaj uas tso siab tau siab mus txog cov huab. Au Vajtswv, thov cia koj raug txhawb nqa siab dhau lub ntuj, thov koj lub hwjchim uas ci ntsa iab nthuav thoob plaws ntiajteb. Nej cov nom tswv, nej hais ncaj hais ncees lov? Nej tu plaub rau neeg ntiajteb ncaj lov? Tsis yog li ntawd, nej lub siab npaj tej tswvyim phem, nej txhais tes tseb kev limhiam ntais ntuj rau saum ntiajteb. Cov neeg limhiam yuam kev txij thaum nruab thiab los lawm, txij hnub uas yug lawv los yeej ua txhaum yog hais lus dag. Lawv muaj taug yam nkaus li taug nab, yam nkaus li nab raj kub sai lag ntseg uas ntsaws qhov ntsej, thiaj tsis hnov tus uas yug nab lub suab thiab tsis mloog tus uas ua khawv koob rau nab. Au Vajtswv, thov tsoo lawv cov hniav kom lov, Au Yawmsaub, thov rho tsov ntxhuav mos tej los yuaj pov tseg. Thov kom lawv ploj ntais mus yam li dej ntws, cia lawv zoo li tej nyom uas muab tsuj qhuav tag ntawm txojkev. Thov cia lawv zoo li cov npluag uas yaj ua kua nplaum tag, thiab zoo li tej menyuam uas pob es tsis pom lub hnub. Thov rhuav tshem lawv sai dua li lub laujkaub hnov kub saum cov nplaim taws liab thiab ntsuab. Cov neeg ncaj ncees yuav zoo siab rau thaum pom Vajtswv ua pauj. Lawv yuav muab tej neeg phem cov ntshav los ntxuav kotaw. Neeg yuav hais tias, “Yeej muaj nqe zog rau cov neeg ncaj ncees tiag tiag li lauj, yeej muaj Vajtswv uas txiav txim rau ntiajteb.” Au kuv tus Vajtswv, thov tso kuv dim ntawm kuv cov yeeb ncuab, thov tsom kwm kuv ntawm cov uas sawv tawm tsam kuv. Thov tso kuv dim ntawm cov neeg ua phem, thiab thov cawm kuv dim ntawm cov neeg noj nyoog. Saib maj, lawv zov kev tos nrhw kuv txojsia, cov neeg nyaum sau tuaj ua ke tawm tsam kuv. Au Yawmsaub, tsis yog kuv ua txhaum muaj txim, thiab tsis yog kuv yuam kev es lawv dhia mus npaj txhij. Thov koj cia li sawv tsees tuaj pab kuv thiab tsa qhov muag saib. Vajtswv Yawmsaub uas muaj hwjchim loj kawg nkaus koj yog cov Yixayee tus Vajtswv. Cia li tsim dheev los teem txim rau ib tsoom tebchaws, thov tsis txhob khuvleej cov uas fav xeeb thiab xav tswvyim phem ib tug li. Lawv niaj hmo rov los tsem yam li dev thiab ncig mus thoob plaws lub nroog. Lawv nyob qhov ntawd, lawv ncauj ntsa zaj, thiab rab ntaj nyob ntawm lawv daim tawv ncauj, lawv xav tias tsis muaj leejtwg yuav mloog lawv hais. Au Yawmsaub, koj luag lawv, koj thuam ib tsoom tebchaws sawvdaws. Koj uas yog kuv lub zog, kuv yuav nyob tos nrhw koj, rau qhov Vajtswv koj yog kuv lub chaw ruaj khov. Kuv tus Vajtswv uas muaj kev hlub ruaj khov yuav ntsib kuv, kuv tus Vajtswv yuav pub kom kuv pom kuv cov yeeb ncuab swb kiag. Au tus Tswv uas yog daim phiaj thaiv peb, tsis txhob tua lawv pov tseg tsam ces kuv cov neeg tsis nco qab. Cia koj lub hwjchim ua rau lawv ua zog koog thiab ntog vau hlo. Vim yog lawv qhov ncauj muaj txim thiab lawv daim tawv ncauj hais tej lus txhaum, cia lawv mag qhov uas lawv khav theeb. Vim yog lawv tej lus tsawm foom thiab lawv tej lus dag, cia li ua npau taws vog muab lawv ua kom puam tsuaj, ua rau lawv ploj tag tsis tshuav ib tug li, mas neeg thoob qab ntuj thiaj paub tias Vajtswv kav Yakhauj. Lawv niaj hmo rov los tsem yam li dev thiab ncig mus thoob plaws lub nroog. Lawv ncig mus nrhiav ncauj noj, yog noj tsis tsau ces txawm nyooj. Tiamsis kuv yuav hu nkauj txog koj lub hwjchim. Thaum tagkis kuv yuav hu nkauj txog koj txojkev hlub uas ruaj khov, rau qhov koj tau ua kuv lub chaw ruaj khov thiab ua lub chaw cawm siav rau thaum kuv raug kev txom nyem. Tus uas yog kuv lub zog, kuv yuav hu nkauj qhuas koj. Au Vajtswv, koj yog kuv lub chaw ruaj khov, thiab koj yog tus Vajtswv uas hlub kuv tsis tu li. Au Vajtswv, koj tau muab peb tso tseg thiab muab peb tej chaw tiv thaiv tsoo pob tag. Koj tau chim rau peb, tiamsis thov koj pub peb rov zoo li qub. Koj tau ua rau lub tebchaws ua zog koog thiab ua rau av tu pes nrees. Thov koj kho tej kab uas tawg pleb ntawd rau qhov av ua yoj yuj yees. Koj tau ua rau koj haiv neeg raug kev txom nyem heev, koj tau muab cawv txiv hmab rau peb haus ua rau peb qaug qas nuag. Koj tsa tus chij rau cov uas hwm thiab ntshai koj, kom lawv thiaj khiav xub hneev mus rau ntawm tus chij ntawd. Thov koj txhais tes xis pab kom kov yeej thiab thov koj teb peb, kom cov uas koj hlub thiaj li tau dim. Vajtswv hais ntawm lub chaw pe hawm nws tias, “Kuv yuav zoo siab hlo muab lub moos Sekhee faib thiab muab lub hav Xukhau faib. Kile‑a tebchaws yog kuv tug, Manaxe tebchaws yog kuv li, Efa‑i tebchaws yog kuv lub mom hlau, Yuda tebchaws yog kuv tus cwj nrig, Mau‑a tebchaws yog lub phaj dej uas kuv ntxuav cev, kuv laim kuv txhais khau rau saum Edoo tebchaws, kuv qw lub suab uas kov yeej rau saum Filixatee tebchaws.” Leejtwg yuav coj kuv mus rau hauv lub moos uas muaj ntsa loog thaiv? Leejtwg yuav coj kuv mus rau hauv Edoo? Au Vajtswv, koj muab peb tso tseg lawm lov? Au Vajtswv, koj tsis nrog peb cov tub rog tawm mus lov? Thov koj pab peb tiv cov tshawj chim, rau qhov neeg pab mas tsis tau qabhau kiag li. Yog peb nrog Vajtswv mas peb yuav kov yeej. Nws yog tus uas yuav tsuj pes ntiag peb cov tshawj chim. Au Vajtswv, thov mloog kuv lub suab hu, thov koj tig ntsej mloog kuv tej lus thov. Kuv tsa suab thov koj tim qab ntug tuaj rau thaum kuv siab yaj tag. Thov coj kuv los txog txhib zeb uas siab dua kuv, rau qhov koj yog kuv lub chaw cawm siav, koj yog lub chaw ruaj khov siab siab uas tiv tau yeeb ncuab. Kuv thov nyob hauv koj lub tsev ntaub mus ib txhis, thov cia kuv nyob tso siab plhuav rau hauv koj qab phab tis tus duab ntxoov ntxoo. Au Vajtswv, koj twb hnov tej lus uas kuv yeem tseg rau koj, koj tau muab cov uas hwm thiab ntshai koj lub npe li qub txeeg qub teg pub rau kuv. Thov txuas vajntxwv txojsia, thov pub kom nws lub niaj xyoo nyob txog txhua tiam neeg. Thov cia nws nyob saum lub zwm txwv tab meeg Vajtswv mus ib txhis, thov cia txojkev hlub uas ruaj khov thiab txojkev ncaj uas tso siab tau tsom kwm nws. Mas kuv thiaj yuav hu nkauj qhuas koj lub npe tsis tu li, rau thaum kuv niaj hnub pauj tej uas kuv tau yeem tseg lawm. Kuv tus ntsuj plig nyob twjywm tos Vajtswv ib leeg, kuv txojkev dim los ntawm nws los xwb. Nws tib leeg yog kuv txhib zeb thiab kuv txojkev cawm dim, thiab yog lub chaw ruaj khov, kuv thiaj tsis ua zog. Nej txhua tus yuav koom ntaus ib leeg ntev li cas ua rau nws ntog yam li lub ntsa loog uas pheeb zuav thiab yam li lub laj kab uas twb yuav vau? Lawv xav muab nws thawb poob ntawm lub meej mom. Lawv zoo siab rau tej kev dag, lawv lub ncauj foom hmoov, tiamsis lawv lub siab tsawm foom. Kuv tus ntsuj plig nyob twjywm tos Vajtswv ib leeg, vim kuv txojkev vam los ntawm nws los. Nws tib leeg yog kuv txhib zeb thiab yog kuv txojkev cawm dim, thiab yog kuv lub chaw ruaj khov, kuv thiaj tsis ua zog. Kuv txojkev cawm dim thiab kuv lub koob meej nyob ntawm Vajtswv, Vajtswv yog kuv txhib zeb loj thiab yog kuv lub chaw cawm siav. Cov pejxeem 'e, cia li tso siab rau Vajtswv txhua lub sijhawm, cia li qhia tej uas nyob hauv nej lub siab rau nws. Vajtswv yog peb lub chaw cawm siav. Cov neeg ua yau tsuas yog ib pas cua xwb, cov neeg ua loj kuj yog ib vuag dua xwb. Thaum muab luj puavleej sib dhau, muab ob leeg ua ke tseem sib dhau ib pas cua. Tsis txhob tso siab qhov uas quab yuam luag, tsis txhob vam do qhov uas lws luag. Yog muaj nyiaj txiag ntau zuj zus, tsis txhob tso siab rau tej nyiaj ntawd. Vajtswv tau hais ib zaug, kuv tau hnov ob zaug lawm tias lub hwjchim yog Vajtswv li. Au tus Tswv, txojkev hlub ruaj khov yog koj li, vim koj ua pauj rau neeg raws li tej uas lawv ua. Au Vajtswv, koj yog kuv tus Vajtswv, kuv nrhiav koj, kuv tus ntsuj plig nqhis nrhiav koj. Kuv lub cev qaug zog tag xav tau koj, yam li cov av uas qhuav nkig nkuav tsis muaj dej. Kuv txeev pom koj hauv lub chaw pe koj, thiab pom ntsoov koj lub hwjchim loj thiab lub hwjchim ci ntsa iab. Vim koj txojkev hlub uas ruaj khov zoo dua txojsia, mas kuv daim tawv ncauj yuav qhuas koj. Kuv yuav qhuas koj tag kuv txojsia, kuv yuav tsa kuv txhais tes thov rau koj lub npe. Kuv tus ntsuj plig tsau npo yam li noj zoo nqaij zoo qhauv, thiab kuv daim tawv ncauj yuav qhuas koj xyiv fab hlo. Thaum kuv pw saum txaj kuv xav txog koj, thiab kuv tshawb nrhiav koj ib hmos kaj ntug. Vim koj yog tus uas pab kuv, kuv nyob hauv koj phab tis tus duab ntxoov ntxoo hu nkauj xyiv fab hlo. Kuv tus ntsuj plig tuav rawv koj, koj txhais tes xis hwj kuv cia. Cov uas nrhiav txov kuv txojsia, yuav nqes mus rau hauv qhov uas tob kawg hauv ntiajteb. Lawv yuav raug muab cob rau hniav ntaj hniav riam, lawv yuav ua qauv rau hma noj. Tiamsis vajntxwv yuav xyiv fab rau hauv Vajtswv. Txhua tus uas tuav Vajtswv lub npe twv yuav qhuas ntxhias nws, vim cov neeg dag lub qhov ncauj raug muab kaw lawm. Au Vajtswv, thov koj mloog kuv lub suab yws, thov tsom kwm kuv txojsia ntawm cov yeeb ncuab uas txaus ntshai kawg li. Thov muab kuv nraim kom dhau cov neeg limhiam tej tswvyim phem, thiab nraim kom dhau cov neeg ua phem tej tswvyim. Lawv hov lawv tus nplaig zoo yam nkaus li hov ntaj, thiab muab tej lus nyaum tso yam nkaus li nruab xub tshuaj lawm, Lawv nyob hauv lub chaw zov kev tua rau cov neeg tsis txhaum, lawv tua tamsid tsis ntshai leejtwg li. Lawv tuav rawv lawv lub tswvyim phem ruaj ruaj li, lawv hais txog qhov uas muab voj hlua cuab twjywm, lawv xav tias, “Leejtwg pom tau peb?” Lawv npaj tswvyim phem hais tias, “Peb tau xav tswvyim ntse kawg li.” Tej uas neeg xav thiab tej uas nyob hauv lawv lub siab yeej tob kawg li. Tiamsis Vajtswv yuav xuas hneev tua lawv mas lawv yuav raug mob tamsid. Vim yog tim lawv tus nplaig nws yuav ua rau lawv puam tsuaj. Txhua tus uas pom lawv yuav luag co hau nco. Mas sawvdaws yuav ntshai, lawv yuav piav txog Vajtswv tej haujlwm, thiab ua tib zoo xav txog tej uas Vajtswv tau ua lawd. Cia cov neeg ncaj ncees zoo siab xyiv fab rau hauv Yawmsaub, thiab cawm siav rau hauv nws. Cia txhua tus uas siab ncaj qhuas nws. Au Vajtswv, tsim nyog qhuas koj rau hauv Xi‑oo, thiab yuav muab tej uas yeem lus rau koj, vim koj yog tus uas mloog tej lus thov. Ib tsoom neeg sawvdaws yuav tuaj cuag koj vim yog tim lawv lub txim. Thaum peb tej kev fav xeeb kov yeej peb lawm, koj kuj zam txim rau peb. Tus uas koj xaiv thiab coj los nyob ze, yog nws nyob hauv koj tej tshav puam. kuj kaj siab lug, Peb yuav tsau npo tej uas zoo hauv koj lub tsev, yog koj lub tuam tsev uas dawb huv. Au Vajtswv uas yog peb txojkev dim, koj teb peb thiab ua tej haujlwm uas txaus ntshai kawg cawm peb. Koj yog tus uas thoob lub qab ntuj kawg thiab hiavtxwv uas nyob deb kawg vam khom. Koj yog tus uas siv koj lub zog tsa tej roob nyob ruaj, thiab muab koj lub hwjchim los hnav. Koj tswj dej hiavtxwv lub suab nrov thiab tswj tej niag nthwv dej hiavtxwv lub suab nrov vig voog, thiab tswj ib tsoom neeg tej suab nrov ua nqaj ua nqug. Cov uas nyob ntawm ciam ntiajteb uas deb kawg kuj ntshai koj tej txujci phimhwj. Koj ua rau lub chaw uas hnub tawm thiab lub chaw uas hnub poob qw zoo siab xyiv fab. Koj tuaj saib thiab ywg dej rau lub ntiajteb, koj ua rau muaj txhua yam nplua mias. Vajtswv tej hav dej muaj dej puv nkaus, koj pub muaj qoob loo raws li koj twb npaj cia lawd. Koj ywg dej rau tej hniav khais ntau nplua mias, thiab ua rau tej caj av tiaj tag, thiab tso nag los av noo zaw, thiab foom koob hmoov kom tawg paj txi txiv. Ib xyoos koj foom hmoov kom tau qoob ntau nplua mias, koj lub tsheb tso tej uas zoo poob los ntau kawg. Tej tshav zaub hauv tebchaws moj sab qhua kuj mos nyoos, tej pov roob muab kev zoo siab xyiv fab los hnav, tej nras tiaj muaj tej niag pab tshis pab yaj laum nkaus, hauv tej ntsaw ha muaj qoob loo zoo puv nkaus, tej no qw hu nkauj ua ke xyiv fab kawg. Thoob lub ntiajteb 'e, cia li tsa suab qw xyiv fab rau Vajtswv, cia li hu nkauj hais txog nws lub npe uas muaj hwjchim ci ntsa iab, cia li tsa suab qhuas nws kawg nkaus li. Cia li hais rau Vajtswv tias, “Koj tes haujlwm txaus ntshai kawg li. Koj lub hwjchim loj kawg nkaus ua rau koj cov yeeb ncuab pe khwb nkaus rau ntawm koj xubntiag. Thoob lub ntiajteb pe hawm koj, lawv hu nkauj qhuas koj, lawv hu nkauj qhuas koj lub npe.” Cia li los saib tej uas Vajtswv tau ua. Tej haujlwm uas Vajtswv ua rau hauv neeg nruab nrab mas txaus ntshai kawg li. Nws muab dej hiavtxwv hloov ua nruab nqhuab, neeg xuas kotaw hla kiag lub hav dej. Qhov ntawd peb zoo siab xyiv fab rau Vajtswv, uas muaj hwjchim kav mus ib txhis, nws yog tus uas lub qhov muag ntsia ntsoov ib tsoom tebchaws. Tsis txhob cia cov uas fav xeeb tsab nws tus kheej ua loj. Ib tsoom neeg 'e, cia li qhuas peb tus Vajtswv, cia li ua kom hnov lub suab qhuas nws. Nws yog tus uas tuav peb kom muaj txojsia nyob hauv cov neeg ciaj thiab tsis pub peb txhais kotaw plam. Au Vajtswv, koj tau sim peb, koj sim peb yam nkaus li sim nyiaj. Koj tau coj peb los rau hauv phob tsig, koj tau muab kev txom nyem rau peb ris. Koj tau cia neeg caij nees tsuj peb taubhau, peb tau kwm hav hluav taws kwm hav dej, tiamsis nimno koj coj peb los txog qhov chaw uas muaj nplua mias. Kuv yuav coj tej qhov txhia chaw uas hlawv xyeem tuaj rau hauv koj lub tuam tsev, kuv yuav muab tej uas kuv yeem lus tseg lawm rau koj, raws li kuv daim tawv ncauj tau hais cia thiab kuv lub qhov ncauj tau cog lus rau thaum kuv raug kev ceeblaj txom nyem. Kuv yuav muab tej tsiaj uas rog rog ua kevcai hlawv xyeem, thiab muab txiv yaj hlawv xyeem pa nchos ua ke. Kuv yuav muab txiv nyuj txiv tshis xyeem. Nej txhua tus uas hwm thiab paub ntshai Vajtswv, cia li los mloog. Kuv yuav hais txog tej uas Vajtswv tau ua pab kuv. Kuv tsa suab quaj nrov thov nws thiab kuv tus nplaig qhuas ntxhias nws. Yog kuv tseem khaws tej kev txhaum rau hauv kuv lub siab, tus Tswv yuav tsis mloog kuv tej lus. Tiamsis Vajtswv yeej mloog lawm tiag, nws twb tig ntsej mloog kuv lub suab thov. Qhuas Vajtswv, rau qhov nws tsis tso kuv tej lus thov tseg thiab tsis muab nws txojkev hlub uas ruaj khov rho ntawm kuv mus. Thov Vajtswv hlub peb thiab foom koob hmoov rau peb, thiab ua nws lub ntsej muag ci ntsa iab tuaj rau peb, kom tag nrho lub ntiajteb thiaj paub koj txojkev, thiab ib tsoom tebchaws sawvdaws paub koj txojkev cawm dim. Au Vajtswv, thov cia ib tsoom neeg qhuas koj, cia txhua haiv neeg qhuas koj. Cia ib tsoom tebchaws zoo siab thiab hu nkauj xyiv fab, vim koj txiav txim ncaj rau ib tsoom neeg, thiab coj ib tsoom tebchaws hauv ntiajteb. Au Vajtswv, thov cia ib tsoom neeg qhuas koj, cia txhua haiv neeg qhuas koj. Lub ntiajteb tau qoob loo lawm, thiab Vajtswv, peb tus Vajtswv, foom koob hmoov rau peb. Vajtswv foom koob hmoov rau peb lawm, cia thoob plaws lub qab ntuj kawg hwm thiab paub ntshai nws. Thov Vajtswv sawv tsees, thov cia nws cov yeeb ncuab khiav tawg ua sab ua sua, thov cia cov uas ntxub nws khiav ntawm nws hauv ntej mus. Tej pa ncho raug raws ya tag mus li cas, thov koj muab lawv ntiab khiav tag ib yam li ntawd. Ciab ntab yaj ntshis rau ntawm hluavtaws li cas, kuj thov cia cov neeg limhiam puam tsuaj ntawm Vajtswv lub xubntiag li ntawd. Thov cia cov neeg ncaj ncees xyiv fab, cia lawv zoo siab xyiv fab rau ntawm Vajtswv xubntiag, cia lawv qw zoo siab hlo. Cia li hu nkauj rau Vajtswv, cia li hu nkauj qhuas nws lub npe, cia li tsa suab hu nkauj rau tus uas caij huab. Nws lub npe yog Yawmsaub, cia li qw zoo siab hlo rau ntawm nws xubntiag. Vajtswv uas nyob hauv nws lub chaw dawb huv nws ua cov menyuam uas tsis muaj txiv leej txiv, thiab tuav cov poj ntsuam txojcai. Vajtswv pub cov uas tsis muaj vag muaj tse tau vaj tau tsev nyob, nws tso cov uas raug kaw tawm los nyob kaj siab hlo, tiamsis cov uas fav xeeb nyob hauv lub tebchaws uas qhuav nkig nkuav. Au Vajtswv, thaum koj coj koj haiv neeg mus, thaum koj mus hauv tebchaws moj sab qhua, lub ntiajteb ntseeg nkaws, lub ntuj tso nag los tab meeg Vajtswv xubntiag, yog Vajtswv ntawm lub roob Xinai, uas yog Yixayee tus Vajtswv. Au Vajtswv, koj tso nag los heev thoob plaws. Thaum koj qub txeeg qub teg qaug zog, koj txhawb kom rov muaj zog. Koj pab yaj los nyob rau hauv. Au Vajtswv, vim koj ua zoo koj thiaj pub rau cov uas txom nyem. Tus Tswv hais nws tej lus, mas cov uas coj xov zoo coob kawg li, hais tias, “Tej vajntxwv thiab lawv tej tub rog khiav lawm, lawv khiav tag lawm.” Cov pojniam uas nyob hauv tsev kuj muab tej qhov txhia chaw uas txeeb tau los faib. Txawm yog nej cov uas pw hauv nruab nrab tej nkuaj yaj, los nej tau moj zeej nquab taug uas kooj tis luam nyiaj, plaub tis luam tseem kub. Thaum tus uas muaj hwjchim loj kawg nkaus ua rau tej vajntxwv khiav ua sab ua sua, mas daus xib daus npu tau los rau saum lub roob Xamoo. Lub roob uas muaj hwjchim loj hauv Npasas 'e, lub roob uas muaj ntau lub ncov hauv Npasas tebchaws 'e, lub roob uas muaj ntau lub ncov 'e, ua li cas koj yuav saib ua khib siab tsawv rau lub roob uas Vajtswv xaiv cia ua nws lub chaw nyob, uas yog lub chaw uas Yawmsaub yuav nyob mus ib txhis? Tus Tswv tuaj ntawm Xinai tuaj rau hauv lub chaw dawb huv muaj tsheb ua rog khov kho qas txhiab qas vam lub nrog nws ua ke. Koj nce rau saum lub roob siab, coj cov uas ntes tau nrog koj mus thiab txais tej tshav ntuj ntawm tej neeg, txawm yog cov uas fav xeeb los kuj pub thiab, kom koj uas yog Vajtswv Yawmsaub thiaj los nyob qhov ntawd. Cia li qhuas tus Tswv uas niaj hnub ris peb lub nra. Vajtswv yog peb txojkev cawm dim. Peb tus Vajtswv yog tus Vajtswv uas cawm dim. Qhov uas dim kev tuag nyob ntawm Vajtswv Yawmsaub. Vajtswv yuav tsoo nws cov yeeb ncuab lub taubhau kom tawg, yog cov uas taug txojkev txhaum lub tiaj taubhau uas muaj plaubhau ntev. Yawmsaub hais tias, “Kuv yuav coj lawv rov ntawm Npasas los, kuv yuav coj lawv tawm hauv qab hiavtxwv los, kom nej txhais kotaw thiaj tau kwm lawv cov ntshav thiab nej cov dev tus nplaig thiaj tau yaim tej tshawj chim cov ntshav.” Au Vajtswv, koj cov neeg ua tsheej ib pab tshwm plaws tuaj lawm, yog kuv tus Vajtswv uas yog kuv tus vajntxwv pab neeg, nkag rau hauv qhov chaw uas pe hawm koj. Cov uas hu nkauj mus ua ntej, cov uas ntaus nkauj nog ncas ua tom qab kawg, cov hluas nkauj npuaj nruas ntxhias tuaj nruab nrab. Nej uas yog Yixayee cov noob 'e, cia li qhuas Vajtswv, cia li qhuas Yawmsaub rau thaum cov neeg coob coob tuaj txoos ua ke. Xeem Npeeyamee uas yog pab tsawg dua tej mus ua ntej, Yuda cov thawj uas nyob ua tej pab coob coob thiab Xenpuloo cov thawj thiab Nathali cov thawj mus raws qab. Au Vajtswv, thov koj npaj koj lub hwjchim los. Au Vajtswv, thov koj ua koj lub zog tshwm los ib yam li koj twb ua pab peb los lawm. Vim yog muaj koj lub tuam tsev hauv Yeluxalees mas tej vajntxwv thiaj coj tshav ntuj tuaj pub rau koj. Thov koj txwv tej tsiaj qus uas nyob hauv tej hav tauj deg, yog pab txiv nyuj thiab cov menyuam nyuj uas yog ib tsoom neeg, mus txog thaum lawv txo hwjchim es coj nyiaj daim tuaj pub rau koj. Thov koj ua rau cov neeg uas nyiam ua rog khiav ua sab ua sua tag. Thov cia lawv coj tej tooj liab hauv Iyi tebchaws los, cia Khuj tebchaws maj tsa tes rau Vajtswv. Ib tsoom tebchaws hauv ntiajteb 'e, cia li hu nkauj rau Vajtswv, cia li hu nkauj qhuas tus Tswv, yog tus uas caij cov huab saum ntuj uas yeej nyob ib txhiab ib txhis los. Mloog maj, nws xa nws lub suab tawm mus, yog lub suab uas muaj hwjchim loj. Cia li qhuas tias Vajtswv muaj hwjchim, nws hwjchim meej mom nyob saum cov Yixayee, nws lub hwjchim nyob saum nruab ntug. Vajtswv nyob hauv lub chaw uas pe nws mas txaus ntshai kawg, nws yog cov Yixayee tus Vajtswv, nws pub nws lub zog thiab nws lub hwjchim rau nws haiv neeg. Cia li qhuas Vajtswv. Au Vajtswv, thov cawm kuv dim, rau qhov dej nyab nto kuv caj dab lawm. Kuv zom rau hauv lub pas hav iav tob tob tsis muaj dabtsi tiag taw. Kuv los rau hauv qhov uas dej tob mas dej ntws los nyab kiag kuv. Kuv quaj quaj qaug zog tag, kuv caj pas qhuav tag, kuv qhov muag tsaus muag tag vim kuv tos rawv kuv tus Vajtswv. Cov neeg uas lam ntxub kuv do do mas muaj ntau dua kuv cov plaubhau saum taubhau. Cov neeg uas xav txov kuv muaj hwjchim heev, lawv lam ua yeeb ncuab rau kuv do do li. Nimno kuv yuav tsum thim tej uas kuv tsis tau nyiag mus thiab lov? Au Vajtswv, koj yeej paub tias kuv yuam kev, tej kev txhaum uas kuv ua zais tsis tau ntawm koj. Au Vajtswv Yawmsaub uas muaj hwjchim loj kawg nkaus, thov tsis txhob cia cov uas vam khom koj raug txaj muag vim tim kuv. Au Yixayee tus Vajtswv, thov tsis txhob cia cov uas nrhiav koj poob ntsej muag vim tim kuv. Vim saib rau koj mas kuv thiaj raug thuam thiab kev txaj muag npog nkaus kuv lub ntsej muag. Kuv raug ua ib tug qhua txawv ntsej muag rau kuv cov kwvtij, thiab ua lwm haiv neeg rau kuv niam cov tub. Kuv kub siab lug rau koj lub tuam tsev kawg dag kawg zog mas tej lus uas luag thuam koj thiaj poob rau saum kuv. Thaum kuv txo lub siab yoo mov mas kuv thiaj raug luag thuam luag. Thaum kuv muab khaub seev tsaj los hnav kuv tiag luag ncauj luag lo. Cov uas nyob ntawm rooj loog kuj hais txog kuv, cov uas quav dej quav cawv phim nkauj hu txog kuv. Au Yawmsaub, kuv tus kheej mas kuv thov koj. Au Vajtswv, lub sijhawm uas txaus koj siab, thov koj teb kuv vim koj txojkev hlub ruaj khov muaj nplua mias. thiab muab koj txojkev cawm dim uas tso siab tau pab kuv. Thov cawm kuv dim hauv lub pas iav uas zom, thov tso kuv dim ntawm kuv cov yeeb ncuab thiab dim hauv tej dej tob tob. Thov tsis txhob cia dej ntws nyab kiag kuv, thov tsis txhob cia qhov dej tob nqos kuv, tsis txhob cia kev tuag tib khaw kuv. Au Yawmsaub, thov koj teb kuv rau qhov koj txojkev hlub uas ruaj khov zoo kawg. Vim koj txojkev khuvleej muaj nplua mias thov tig los rau kuv. Koj tsis txhob fee plhu ntawm koj tus qhev. Kuv raug txom nyem lwj siab, thov kavtsij teb kuv. Thov los ze kuv, thov txhiv kuv dim, thov tso kuv dim vim kuv muaj yeeb ncuab. Koj yeej paub tej uas luag thuam kuv, thiab paub kuv kev txaj muag thiab kev poob ntsej muag. Koj yeej paub kuv cov tshawj chim huvsi lawm. Kuv raug luag thuam ua rau kuv lub siab lwj tag kuv thiaj poob siab nthav. Kuv nrhiav ib tug khuvleej tiamsis tsis muaj li, kuv nrhiav ib tug nplij kuv tiamsis nrhiav tsis ntsib. Lawv muab tshuaj iab ua mov rau kuv noj, thaum kuv nqhis dej lawv muab kua qaub rau kuv haus. Thov cia lawv lub rooj noj ua yej ua ntxiab cuab lawv, cia lawv tej kev noj haus xyeem rau Vajtswv ua qhov taub cuab lawv. Thov kom lawv lub qhov muag tsaus, lawv thiaj tsis pom kev, thiab ua kom lawv lub duav sav mus li. Thov nchuav koj txojkev npau taws rau saum lawv thiab muab koj txojkev chim uas kub kawg caum kom cuag lawv. Cia lawv lub yeej nyob do cuas, tsis txhob tseg leejtwg nyob hauv lawv tej tsev ntaub. Lawv tsim txom tus uas raug koj nplawm, lawv pheej piav txog tus uas koj ua kom mob lawd tej kev txom nyem. Thov koj rau txim rau lawv rau tag los rau thiab, thov koj tsis txhob zam lawv lub txim li. Thov muab lawv npe rhuav hauv phau ntawv uas sau cov neeg ciaj tej npe mus, tsis txhob muab lawv nce npe rau hauv cov neeg ncaj ncees. Kuv raug kev txom nyem thiab raug mob. Au Vajtswv, thov koj cawm kuv thiab muab kuv txawb rau lub chaw siab. Kuv yuav hu nkauj qhuas Vajtswv lub npe, kuv yuav ua nws tsaug qhuas nws lub koob meej. Tej no yuav txaus Yawmsaub lub siab heev dua li tua nyuj lossis xyeem tag nrho txiv nyuj kub thiab rau huvsi. Cia cov uas raug quab yuam pom thiab zoo siab. Nej cov uas nrhiav Vajtswv, cia nej lub siab rov muaj zog, rau qhov Yawmsaub mloog cov neeg txom nyem, thiab nco ntsoov nws cov neeg uas raug kaw. Lub ntuj lub teb thiab dej hiavtxwv thiab txhua yam uas mus mus los los rau hauv cia li qhuas nws. Rau qhov Vajtswv yuav cawm Xi‑oo kom dim, thiab yuav tsim Yuda tej moos dua tshiab, mas nws cov neeg yuav tau nyob rau hauv ua lawv teej lawv tug, nws cov qhev tej tub ki yuav tau ua qub txeeg qub teg, thiab cov uas nyiam Vajtswv lub npe yuav nyob rau hauv. Au Vajtswv, thov koj txaus siab cawm kuv dim, au Yawmsaub, thov maj nroos tuaj pab kuv lauj! Thov cia cov uas xav txov kuv txojsia raug txaj muag thiab lub siab ruam puas ntsoog tag. Thov cia cov uas xav ua rau kuv mob raug raws thim rov qab thiab poob ntsej muag. Thov cia cov uas luag hnyos kuv poob siab nthav vim lawv raug txaj muag. Thov cia txhua tus uas nrhiav koj xyiv fab thiab zoo siab rau hauv koj. Thov cia cov uas nyiam koj txojkev cawm dim hais tsis tu tias, “Vajtswv loj kawg nkaus.” Kuv yog tus pluag thiab txom nyem. Au Vajtswv, thov leej maj tuaj cuag kuv. Koj yog tus uas pab kuv thiab cawm kuv dim. Au Yawmsaub, tsis txhob tos ntev. Au Yawmsaub, kuv los cawm siav rau hauv koj. Thov tsis txhob cia kuv raug txaj muag kiag li. Vim koj ncaj ncees, thov koj pab thiab cawm kuv. Thov tig ntsej mloog kuv thiab cawm kuv dim Thov koj ua txhib zeb uas kuv nraim cev, yog lub chaw ruaj khov uas cawm kuv dim, rau qhov koj yog kuv txhib zeb thiab kuv lub chaw ruaj khov. Au kuv tus Vajtswv, thov cawm kuv dim hauv cov neeg limhiam txhais tes, dim hauv cov neeg tsis ncaj thiab neeg nyaum lub xib teg. Au Vajtswv Yawmsaub, koj yog kuv lub chaw vam, koj yog kuv lub chaw tso siab txij thaum yau los. Txij thaum yug kuv los kuv yeej vam koj, koj yog tus uas coj kuv tawm hauv niam lub plab los. Kuv yeej qhuas koj tsis tu ncua li. Kuv ua txujci rau neeg coob coob phimhwj, tiamsis koj yog kuv lub chaw cawm siav uas ruaj khov. Tej lus qhuas koj puv nkaus kuv lub qhov ncauj, thiab ua rau koj tau koob meej ib hnub tsaus ntuj. Thaum kuv laus lawd thov tsis txhob muab kuv laim tseg, thaum kuv lub zog tag lawm thov tsis txhob tso kuv tseg. Kuv cov yeeb ncuab pheej hais txog kuv, cov uas tos nrhw txov kuv txojsia pheej ntaus tswvyim, thiab hais tias, “Vajtswv tso nws tseg lawm. Cia li raws mus ntes nws, rau qhov tsis muaj leejtwg yuav pab nws dim.” Au Vajtswv, tsis txhob nyob deb kuv, au kuv tus Vajtswv, thov maj nroos tuaj pab kuv. Thov cia cov uas tawm tsam kuv raug txaj muag thiab raug puam tsuaj. Thov cia cov uas nrhiav kev ua phem rau kuv raug thuam raug luag poob ntsej muag kawg. Tiamsis kuv yuav muaj siab vam mus tsis tu li, kuv tseem yuav qhuas koj heev zuj zus. Kuv lub qhov ncauj yuav piav txog koj tej haujlwm ncaj ncees, yuav hais txog tej haujlwm uas koj cawm kuv dim ib hnub tsaus ntuj, txawm yog tej haujlwm ntawd ntau kawg kuv paub tsis tag kuj xij. Kuv yuav coj Vajtswv Yawmsaub tej haujlwm uas muaj hwjchim mus thiab, kuv yuav qhuas koj txojkev ncaj ncees uas yog koj tib leeg li. Au Vajtswv, koj twb qhia kuv txij thaum yau los, thiab kuv tseem piav koj tej haujlwm phimhwj. Txawm yog txog thaum kuv laus heev plaubhau dawb paug kuj xij, au Vajtswv, koj tsis txhob tso kuv tseg, mus txog thaum kuv piav koj tus hwjchim rau txhua tiam uas yuav los, thiab piav koj lub zog rau tej uas tseem yuav yug los. Au Vajtswv, koj txojkev ncaj ncees mus txog saum ntuj uas siab kawg. Au Vajtswv, koj yog tus uas ua tej haujlwm loj, leejtwg yuav zoo cuag li koj? Koj yog tus uas ua rau kuv ntsib kev ceeblaj txom nyem ntau heev, mas koj yuav ua rau kuv rov muaj zog, thiab yuav coj kuv tawm lub qhov tob tob hauv ntiajteb rov los. Koj yuav pub koob meej tsav rau kuv, thiab rov nplij kuv. Au kuv tus Vajtswv, kuv yuav ntaus nkauj nog ncas loj qhuas koj txojkev ncaj uas tso siab tau. Au Yixayee tus Tswv uas Dawb Huv, kuv yuav ntaus nkauj nog ncas me hu nkauj qhuas koj. Kuv daim tawv ncauj yuav qw xyiv fab hlo rau thaum kuv hu nkauj qhuas koj. Kuv tus ntsuj plig uas koj cawm dim yuav hu thiab. Kuv tus nplaig yuav hais txog koj txojkev pab uas ncaj ncees tas hnub tas hmo, rau qhov cov uas nrhiav kev ua phem rau kuv raug txaj muag thiab poob ntsej muag lawm. Au Vajtswv, thov koj pub koj txojkev uas tu plaub ncaj rau vajntxwv, thiab pub koj txojkev ncaj ncees rau nws. Thov cia nws ua ncaj kav koj cov neeg thiab tu plaub ncaj rau koj cov neeg uas pluag. Cia tej roob tshwm kev vam meej rau cov pejxeem thiab tej pov roob tshwm txojkev ncaj ncees. Thov kom vajntxwv hais cov pejxeem uas pluag tej plaub, thiab cawm cov neeg txom nyem kom dim, thiab tsoo cov uas quab yuam luag. Thov kom nws muaj txojsia nyob ntev ib yam li lub hnub thiab ib yam li lub hli, ib tiam dhau ib tiam mus li. Thov kom nws zoo yam nkaus li nag uas los rau saum tej nroj tsuag uas nyuam qhuav txiav, thiab zoo yam li pluav nag uas los ntub lub ntiajteb. Thaum nws tseem nyob, thov kom txojkev ncaj ncees vam meej tuaj thiab kev siab tus muaj nplua mias mus txog thaum lub hli tsis muaj lawm. Thov kom nws kav tag nrho ntawm hiavtxwv sab hnub tuaj mus txog hiavtxwv sab hnub poob, thiab ntawm tus dej Yufeti mus txog qab ntuj kawg. Cia cov neeg uas nyob hauv ntuj nrag teb do pe rau ntawm nws xubntiag, thiab cia nws cov yeeb ncuab yaim hmoov av. Cia lub nroog Thasi thiab tej koog povtxwv tej vajntxwv them se rau nws. Cia Senpa thiab Xenpa tej vajntxwv coj qhov txhia chaw tuaj pub. Thov kom ib tsoom vajntxwv sawvdaws pe nws, thiab ib tsoom tebchaws sawvdaws ua koom tu nws. Rau qhov nws tso cov neeg txom nyem dim rau thaum lawv thov, yog cov neeg pluag thiab yog cov uas tsis muaj leejtwg pab. Nws khuvleej cov neeg tsis muaj zog thiab cov uas txom nyem, thiab cawm cov neeg txom nyem txojsia. Nws txhiv lawv txojsia ntawm txojkev raug quab yuam thiab raug ua nruj ua tsiv. Nws saib lawv cov ntshav tsim txiaj. Thov cia nws muaj txojsia nyob ntev, thov cia luag coj tej kub hauv moos Senpa tuaj pub rau nws. Cia luag thov Vajtswv pab nws tsis tu li thiab thov Vajtswv foom koob hmoov rau nws tas hnub tas hmo. Thov kom muaj qoob loo nplua mias hauv lub tebchaws, cia txhua lub roob muaj qoob loo zoo rawv ntwb nri, thov kom ntsu qoob yam li lub roob Lenpanoo. Thiab cia cov neeg hauv tej moos huaj vam coob yam nkaus li tej nroj tsuag tom teb. Thov kom nws lub npe nyob mus ib txhis, thov kom nws lub koob meej nyob mus ntev yam nkaus li lub hnub. Vim yog muaj nws, thov cia neeg tau koob hmoov. Ib tsoom tebchaws yuav hu tias nws yog tus tau koob hmoov. Qhuas Yawmsaub uas yog Yixayee tus Vajtswv, yog tus uas tib leeg xwb thiaj ua tau txujci phimhwj. Qhuas nws lub npe uas muaj hwjchim ci ntsa iab mus ib txhis. Thov nws lub hwjchim ci ntsa iab puv nkaus hauv ntiajteb huvsi. Amee thiab Amee. Yexi tus tub Davi tej lus thov tag li no. Vajtswv yeej ua zoo rau cov Yixayee tiag tiag li, yog ua zoo rau cov uas lub siab dawb huv. Kuv mas kuv txhais kotaw twb yuav dawm, kuv txhais kotaw twb yuav plam tib tiag, vim yog kuv khib cov uas khav theeb, rau thaum kuv pom cov neeg phem vam meej. Lawv tsis muaj mob kiag li, lawv lub cev nyob zoo thiab muaj zog ho. Lawv tsis raug ceeblaj li lwm tus, lawv tsis raug xwm txheej phem li lwm tus. Vim li no lawv thiaj muab qhov uas khav theeb los ua saw coj, lawv muab qhov uas ua nruj ua tsiv los ua tsoos tsho hnav. Lawv rog rog qhov muag qe tauv, tej tswvyim phem phwj hauv lawv lub siab los. Lawv thuam luag thiab hais tej lus uas xav ua phem, lawv tsab ua loj hem tias yuav quab yuam. Lawv tsa ncauj tawm tsam lub ntuj, lawv tus nplaig kuj taug xaiv thoob ntiajteb. Vajtswv cov pejxeem thiaj tig raws lawv qab, thiab yuav lawv tej lus ib yam li haus dej ntau heev. Lawv hais tias, “Vajtswv yuav paub tau li cas? Tus uas Loj Dua Ntais txawj paub lov?” Saib maj, cov neeg phem zoo li no ntag, lawv pheej noj qab nyob zoo thiab vam meej tuaj. Kuv tu kuv lub siab dawb huv, thiab ntxuav kuv txhais tes tsis ua txhaum do do xwb. Kuv raug tej xwm txheej phem ib hnub tsaus ntuj, thiab raug muab nplawm txhua tagkis. Yog kuv tau hais tias, “Kuv yuav hais li ntawd,” kuj yog kuv fav xeeb rau koj cov menyuam. Tiamsis thaum kuv xav tias kuv yuav nkag siab zaj no li cas, kuv pom tias yog tes haujlwm uas khwv kawg, txog thaum kuv nkag mus rau hauv lub chaw pe Vajtswv, kuv thiaj tshuaj pom lawv txojkev qhov kawg. Qhov tseeb koj yeej muab lawv tso rau hauv txojkev uas nplua, koj ua rau lawv ntog puam tsuaj tag. Ib pliag ntshis xwb lawv raug puam tsuaj, lawv raug txojkev ntshai muab ntxuav tu noob nrho mus lawm lauj! Au tus Tswv, thaum koj tsim dheev los, koj tsis nco qab lawv tus duab lawm, ib yam li zaj npau suav rau thaum yus tsim dheev los. Thaum kuv tus ntsuj plig yws thiab chim, thaum chob txog kuv lub siab, kuv txawm ruam tsis paub dabtsi li, kuv zoo li ib tug tsiaj txhu rau koj. Txawm li cas los kuv pheej nrog nraim koj, koj tuav rawv kuv txhais tes xis cia. Koj tej lus taw qhia coj kuv txoj hauv kev, thiab yav tom qab koj yuav coj kuv kom tau koob meej. Dhau koj lawm kuv muaj leejtwg saum ntuj ceeb tsheej? Dhau koj lawm kuv tsis ntshaw ib yam dabtis hauv lub ntiajteb. Kuv lub cev thiab lub siab yuav qaug zog mus, tiamsis Vajtswv yog kuv lub siab lub zog, thiab yog kuv teej kuv tug mus ib txhis. Vim tias cov uas nyob deb koj yuav puam tsuaj, koj ua rau cov uas tsis muab siab npuab koj ploj mus. Kuv mas qhov uas kuv nyob ze Vajtswv yog qhov zoo. Kuv muab Vajtswv Yawmsaub ua kuv lub chaw cawm siav, kom kuv thiaj tau piav txog koj tej haujlwm huvsi. Au Vajtswv, ua cas koj muab peb laim pov tseg ib txhis? Ua cas koj yuav npau taws vog rau cov yaj uas nyob hauv koj tshav zaub? Thov nco txog koj cov neeg uas koj tau thaum ub los lawm, lawv yog cov uas koj twb txhiv los ua ib haiv neeg ua koj qub txeeg qub teg. Thov nco txog lub roob Xi‑oo uas yog lub chaw uas koj txeev nyob. Thov koj txhais kotaw mus ncig lub chaw uas pob tag ib txhis. Yeeb ncuab tau muab txhua yam hauv lub chaw pe Vajtswv ua puam tsuaj tag. Koj cov tshawj chim qw zoo siab hauv nruab nrab koj lub tsev dawb huv, lawv tau tsa lawv tus chij rau hauv. Saib mas lawv zoo yam nkaus li cov uas tsa taus yuav ntov tsob ntoo lawm. Tej txiag ntoo uas muab sais zoo nkauj lawv kuj xuas taus xuas rauj tsoo pob tag huvsi. Lawv muab hluavtaws hlawv lub chaw pe koj kub hnyiab tag rau hauv av, lawv ua rau lub chaw uas koj lub npe nyob qias tsis huv. Lawv lub siab xav tias, “Peb yuav kov yeej hlo luag huvsi.” Lawv muab Vajtswv tej chaw dawb huv txhua lub hauv lub tebchaws hlawv huvsi. Peb tsis pom txujci phimhwj dabtsi li, tsis muaj ib tug xibhwb cev Vajtswv lus lawm, peb cov tsis muaj leejtwg paub xyov ntev li cas. Au Vajtswv, cov tshawj chim yuav luag koj ntev li cas? Yeeb ncuab yuav thuam koj lub npe mus ib txhis li lov? Ua cas koj yuav nkaum koj txhais tes? Cia li xyab koj txhais tes xis ntawm koj lub cev tuaj ua kom lawv puam tsuaj. Txawm li ntawd los Vajtswv uas yog kuv tus vajntxwv muaj nyob thaum ub los lawm, nws twb coj txojkev cawm dim rau hauv lub ntiajteb lawm. Koj siv koj lub hwjchim cais dej hiavtxwv. Koj tsoo tej zaj taubhau hauv dej hiavtxwv. Koj tsoo zaj Leviathas cov taubhau thiab muab nws rau tej tsiaj qus hauv tebchaws moj sab qhua noj. Koj qheb hauv dej hauv hav. Koj ua rau tej dej cag uas ntws ib txhis qhuav tag. Nruab hnub los yog koj li, hmo ntuj los yog koj li. Koj tsim lub hli thiab tsim lub hnub nyob ruaj chaw. Koj tu ciam huvsi rau lub ntiajteb nyob. Koj tsim muaj caij kub caij no. Au Yawmsaub, thov nco txog qhov no tias cov yeeb ncuab tau luag koj thiab cov neeg ruam tau hais lus phem li cas rau koj lub npe. Tsis txhob muab tus nquab taug cwb rau tsiaj qus, thov koj pheej nco ntsoov koj cov neeg pluag txojsia mus ib txhis. Thov saib rau koj tej lus cog tseg, rau qhov tej chaw tsaus ntuj hauv lub tebchaws mas txojkev ua nruj ua tsiv muaj nyob puv nkaus. Thov nco ntsoov cov uas raug luag tsuj tau txaj muag. Cia cov neeg pluag thiab cov txom nyem qhuas koj lub npe. Au Vajtswv, cia li sawv tsees, hais koj tshaj plaub. Thov nco ntsoov tias cov neeg ruam luag koj tas hnub tas hmo li cas. Tsis txhob tsis nco qab koj cov tshawj chim lub suab nrov, yog lub suab ua nqaj ua nqug uas cov tawm tsam koj pheej qw tsis tu li. Au Vajtswv, peb ua koj tsaug, peb ua koj tsaug. Koj lub npe nyob ze. Peb piav koj tej haujlwm uas phimhwj. Koj hais tias, “Txog lub sijhawm uas kuv teem cia lawm kuv yuav txiav txim ncaj ncees. Thaum lub ntiajteb thiab txhua tus uas nyob hauv ntseeg nkaws, kuv yog tus uas tuav lub ntiajteb tej ncej kom nyob ruaj khov. Kuv hais rau cov uas khav theeb tias, ‘Tsis txhob khav theeb,’ thiab hais rau cov neeg limhiam tias, ‘Tsis txhob tsa koj txwm kub, tsis txhob tsa koj tus kub kom siab thiab tsis txhob khav theeb hais lus tuam mom.’ ” Qhov uas tsa ua loj tsis yog tshwm sab hnub tuaj los lossis tawm sab hnub poob tuaj, thiab tsis yog tshwm hauv tebchaws moj sab qhua los, tiamsis yog Vajtswv yog tus txiav txim, nws txo ib tug qes, tsa ib tug siab. Rau qhov hauv Yawmsaub txhais tes muaj ib lub khob muaj cov cawv txiv hmab uas sib tim npau npuas vog puv nkaus. Nws yuav muab cov cawv ntawd hliv rau lawv haus mas tej neeg limhiam hauv ntiajteb sawvdaws yuav haus tag nrho lub khob ntawd. Tiamsis kuv yuav zoo siab xyiv fab mus ib txhis, kuv yuav hu nkauj qhuas Yakhauj tus Vajtswv. Nws yuav muab cov neeg limhiam tus kub txiav pov tseg, hos cov neeg ncaj ncees tus kub mas yuav raug muab tsa kom siab. Hauv Yuda puavleej paub Vajtswv, Vajtswv lub npe nrov nto moo thoob hauv Yixayee. Vajtswv lub chaw nyob yog hauv Xalee, nws lub tsev nyob yog hauv Xi‑oo. Nws nyob qhov ntawd muab rab xub uas ci nplas thiab tej daim phiaj hlau thiab tej ntaj thiab tej cuab yeej ua rog lov pes ntho pov tseg. Koj lub hwjchim ci ntsa iab, koj lub hwjchim meej mom siab dua tej roob uas nyob mus ib txhis. Tej neeg siab loj siab tuab raug muab lws lawm, lawv tsaug zog mus ib txhis. Cov tub rog sawvdaws siv tsis tau lawv txais tes lawm. Au Yakhauj tus Vajtswv, thaum koj cem lawv mas cov nees thiab cov uas caij nees yoob tuag tag. Koj yog tus uas txaus ntshai kawg. Thaum koj chim leejtwg yuav sawv tau ntawm koj xubntiag? Koj nyob saum ntuj muab kev txiav txim tshaj tawm, mas lub ntiajteb ntshai thiab nyob twjywm, rau thaum Vajtswv sawv tsees teem txim cawm cov neeg sawvdaws uas raug quab yuam hauv ntiajteb kom dim. Neeg tej kev chim ua rau luag qhuas koj ntau dua, cov uas dim tej kev chim ntawd, koj yuav muab sia kiag rau ntawm duav. Cia li yeem lus rau Yawmsaub uas yog nej tus Vajtswv thiab ua raws li tej lus yeem tseg ntawd. Cia cov uas nyob vij puag ncig nws coj qhov txhia chaw tuaj pub rau nws, yog tus uas tsim nyog ntshai thiab hwm, thiab yog tus uas txo cov thawj tej hwjchim, yog tus uas tej vajntxwv hauv ntiajteb ntshai kawg. Kuv quaj thov Vajtswv, kuv tsa suab thov nrov rau Vajtswv xwv nws thiaj li mloog kuv. Hnub uas kuv raug txom nyem ceeblaj kuv nrhiav tus Tswv, thaum hmo ntuj kuv tsa tes thov tsis tsaug leeg li, los tsis muaj ib yam dabtsi nplij kuv lub siab li. Kuv xav txog Vajtswv mas kuv kuj seev yees. Kuv tshawb nrhiav mas kuv siab ntsws yaj tag. Koj tuav rawv kuv daim tawv muag tsis kheev kom qe muag. Kuv ntxhov siab kawg hais tsis tau ib los li. Kuv xav txog yav thaum ub, kuv nco txog tej xyoo thaum ub. Kuv lub siab hais lus tuj taws hmo ntuj, kuv tshawb nrhiav thiab kuv tus ntsuj plig nug hais tias, “Tus Tswv yuav muab peb tso tseg mus ib txhis lov? Nws yuav tsis txaus siab rau peb dua li lawm lov? Nws txojkev hlub uas ruaj khov q2 tu ncua mus ib txhis li lov? Nws lo lus cog tseg tag tsis muaj rau txhua tiam lawm lov? Vajtswv tsis nco qab hlub peb lawm lov? Vim nws chim nws thiaj tsis khuvleej peb lawm lov?” Kuv thiaj hais tias, “Qhov uas kuv raug mob twb yog Vajtswv uas Loj Dua Ntais txhais tes tsis thooj li qub lawm.” Kuv yuav nco txog Yawmsaub tej haujlwm, kuv yuav nco txog tej yam phimhwj uas koj tau ua yav thaum ub lawm. Kuv yuav tshawb nrhiav txhua yam uas koj tau ua los lawm thiab xav txog koj tej haujlwm uas muaj hwjchim. Au Vajtswv, koj txojkev thiaj li dawb huv xwb. Muaj tus timtswv twg uas yuav loj cuag li peb tus Vajtswv? Koj yog tus Vajtswv uas ua tej haujlwm phimhwj, thiab qhia koj lub hwjchim tshwm hauv nruab nrab ib tsoom neeg. Koj txhais npab uas muaj zog tau txhiv koj haiv neeg, uas yog Yakhauj thiab Yauxej caj ces. Au Vajtswv, thaum dej pom koj, thaum tej dej pom koj dej kuj ntshai kawg, hauv qab thu kuj ntseeg ua zog kais. Tej huab tso nag los, lub ntuj nrov nroo ntws, koj tej xob ci nplas rau txhua fab. Koj tej xob tua nrov ntwg hauv tej khaub zeeg cua, koj tej xob laim ci nplas rau hauv lub qab ntuj. Lub ntiajteb tsees ua zog kais. Koj txoj niag kev mus hauv hiavtxwv, koj taug kev hauv dej hiavtxwv loj, los tsis muaj leejtwg pom koj tus neev taw. Koj siv Mauxe thiab Aloo txhais tes coj koj haiv neeg yam nkaus li coj pab yaj. Kuv cov neeg 'e, cia li tig ntsej mloog kuv tej lus qhia, nej cia li tig ntsej mloog tej lus ntawm kuv qhov ncauj. Kuv yuav rua ncauj hais paj lug, kuv yuav hais tej lus uas muab npog cia yav thaum ub lawm, yog hais txog tej uas peb tau hnov tau paub uas peb tej poj koob yawm txwv tau hais rau peb. Peb yuav tsis muab zais tsis qhia rau lawv tej tub ki, peb yuav piav rau txhua tiam uas tabtom los kom paub txog Yawmsaub tej haujlwm uas tsim nyog qhuas thiab nws lub hwjchim, thiab tej txujci phimhwj uas nws tau ua. Nws tau tsim tsa tej kab ke rau hauv Yakhauj thiab rhawv kevcai rau hauv Yixayee, yog tej uas nws hais kom peb tej poj koob yawm txwv qhia rau lawv tej tub ki, kom lwm tiam thiaj li paub txog tej no, yog lawv tej tub ki uas tseem tsis tau yug los, mas lawv yuav sawv qhia rau lawv tej menyuam thiab, kom lawv thiaj muaj siab vam rau hauv Vajtswv thiab pheej nco ntsoov Vajtswv tej haujlwm thiab tuav rawv nws tej lus nkaw, thiaj tsis ua raws li lawv tej poj koob yawm txwv uas yog tiam uas tawv ncauj thiab fav xeeb, yog tiam uas siab tsis ruaj khov, thiab tsis muaj lub siab xib rau Vajtswv. Cov neeg Efa‑i coj hneev nti thim ntawm tshav rog rov qab rau hnub uas ua rog. Lawv tsis tuav Vajtswv tej lus cog tseg thiab tsis kam ua raws li Vajtswv txoj kevcai. Lawv tsis nco txog tej uas Vajtswv twb ua los lawm thiab nco tsis txog tej txujci phimhwj uas nws ua tshwm rau lawv. Nws twb ua tej haujlwm phimhwj rau lawv tej poj koob yawm txwv lub qhov muag pom ntsoov hauv Iyi tebchaws thiab hauv tej liaj teb Xau‑as. Nws muab dej hiavtxwv faib kiag rau ob sab cia lawv hla hauv nruab nrab mus, nws ua rau dej tauv rau ob sab yam li ntsa loog. Nruab hnub nws muab tauv huab coj lawv hmo ntuj nws ua nplaim taws ci coj lawv ib hmos kaj ntug. Nws phua tej pob zeb hauv tebchaws moj sab qhua thiab pub dej rau lawv haus ntau kawg li yam nkaus li txhawv hauv qhov tob los. Nws ua dej txhawv hauv phab zeb los, nws ua dej ntws los yam nkaus li ib tug niag dej. Los lawv tseem yimhuab ua txhaum rau nws, lawv fav xeeb rau Vajtswv uas Loj Dua Ntais hauv ntuj nrag teb do. Lawv txhob txwm sim Vajtswv, lawv thiaj kom Vajtswv pub tej uas lawv nqhis rau lawv noj. Lawv cem yws Vajtswv tias, “Vajtswv yuav npaj tau rooj mov rau peb noj hauv tebchaws moj sab qhua no lov? Vajtswv ntaus phab zeb ua rau dej txhawv los thiab dej ntws los nyab kiag ntug. Nws yuav muab tau mov tau nqaij rau nws haiv neeg noj thiab lov?” Vim li ntawd, thaum Yawmsaub hnov lawm nws npau taws kawg li, mas muaj hluavtaws tshwm plaws rau Yakhauj, thiab nws chim loj zuj zus rau Yixayee, rau qhov lawv tsis ntseeg Vajtswv thiab tsis tso siab rau nws lub hwjchim uas cawm tau kom dim. Txawm li cas los nws tseem hais tau lub ntuj thiab qheb tau rooj ntug. Nws tso mana los rau lawv noj nws pub tej mov saum ntuj los rau lawv. Neeg tau noj tej tubtxib saum ntuj tej mov, Vajtswv pub mov rau lawv noj nplua mias. Nws ua rau cua sab hnub tuaj ntsawj rau saum ntuj thiab nws siv nws lub hwjchim coj tej cua uas nyob sab nrad ntsawj tuaj. Nws tso nqaij los rau lawv yam nkaus li tej hmoov av, yog cov noog ya los coob npaum li tej xuab zeb hauv hiavtxwv. Nws tso poob los rau hauv lawv nruab nrab lub zos, poob rau ib ncig lawv tej chaw nyob. Lawv tau noj tsau npo, vim yog Vajtswv pub tej uas lawv nqhis rau lawv. Ua ntej uas lawv tsis tau zoo nqhis, thaum uas nqaij tseem nyob hauv lawv qhov ncauj, Vajtswv txojkev npau taws tshwm rau lawv, nws tua lawv cov neeg uas muaj zog heev dua luag pov tseg, yog nws muab cov neeg uas zoo tshaj hauv cov Yixayee pov tseg. Txawm yog muaj tej xwm no huvsi los lawv tseem ua txhaum. Txawm yog nws ua tej haujlwm phimhwj los lawv tsis ntseeg. Nws thiaj ua rau lawv lub hnub nyoog ploj tag yam nkaus li ua pa xwb, thiab ua rau lawv lub niaj lub xyoos ploj ntais ua rau lawv ntshai kawg li. Thaum nws tua lawv, lawv kuj los nrhiav nws, lawv li ntxeev dua siab thiab kub siab lug nrhiav Vajtswv. Lawv li nco txog hais tias Vajtswv yog lawv txhib zeb, Vajtswv uas Loj Dua Ntais yog tus uas txhiv lawv dim. Tiamsis lawv lub ncauj hais lus qab zib rau Vajtswv, thiab lawv tus nplaig dag nws xwb. Lawv tsis ruaj siab rau nws, lawv tsis tuav rawv Vajtswv tej lus cog tseg. Txawm li ntawd los nws tseem khuvleej lawv, nws zam lawv tej kev txhaum thiab tsis ua kom lawv puam tsuaj tag. Vajtswv tswj nrees nws txojkev chim cia, nws tsis khawb nws txojkev npau taws huvsi los. Nws nco ntsoov tias lawv tsuas yog neeg nqaij tawv xwb, lawv yog cua uas ntsawj mus lawm tsis rov los dua li lawm. Lawv fav xeeb rau Vajtswv hauv tebchaws moj sab qhua ntau zaus, thiab ua rau nws tu siab hauv ntuj nrag teb do. Lawv tseem pheej rov sim Vajtswv siab thiab ua rau tus Dawb Huv hauv cov Yixayee chim heev. Lawv tsis nco txog Vajtswv lub hwjchim, thiab tsis nco txog hnub uas Vajtswv txhiv lawv dim hauv cov tshawj chim los, rau thaum nws ua tej txujci phimhwj rau hauv Iyi tebchaws thiab ua nws tej txujci phimhwj rau hauv tej liaj teb Xau‑as. Nws muab lawv tej hav dej ntxeev ua ntshav tag, lawv thiaj haus tsis tau lawv tej hav dej. Nws tso tej niag pab yoov mos ntsuab los rau hauv lawv los txov lawv, thiab tso qav los ua kom lawv puam tsuaj. Nws tso kab los txov lawv tej qoob, tso kooj txig los noj lawv tej dag zog. Nws tso lawg los ntaus lawv tej txiv hmab puam tsuaj, thiab tso te los tua lawv tej ntoo txiv cev. Lawv tej nyuj raug lawg ntaus tuag tag, lawv tej niag pab yaj pab tshis raug xob tua. Nws tso nws txojkev chim heev rau saum lawv, yog kev npau taws kev chim thiab kev txom nyem, yog pab tubtxib saum ntuj uas ua kom puam tsuaj. Nws qheb kev rau nws txojkev chim, nws tsis tseg lawv ciaj sia li, nws muab lawv txojsia cob nkaus rau tej mob phem. Nws muab tej tub hlob hauv Iyi tebchaws tua huvsi, yog lawv thawj lub zog uas nyob hauv Has tej tsev ntaub. Vajtswv coj nws haiv neeg tawm los ib yam li coj yaj, thiab coj lawv mus hauv tebchaws moj sab qhua yam li pab yaj pab tshis. Nws coj lawv mus tso siab plhuav lawv thiaj tsis ntshai. Tiamsis dej hiavtxwv nyab kiag lawv tej yeeb ncuab. Nws coj lawv los rau hauv nws lub tebchaws uas dawb huv, los txog lub roob uas nws txhais tes xis txeeb tau. Nws muab lwm haiv neeg ntiab tawm ntawm lawv hauv ntej mus. Nws muab lub tebchaws faib ua qub txeeg qub teg rau lawv, thiab cia txhua xeem Yixayee nyob hauv lwm haiv neeg tej tsev ntaub. Los lawv tseem sim thiab fav xeeb rau Vajtswv uas Loj Dua Ntais, thiab tsis ua raws li nws tej lus. Lawv tig rov qab thiab fav xeeb ib yam nkaus li lawv tej poj koob yawm txwv. Lawv lem qas cees yam nkaus li rab hneev nti uas siv tsis tau. Rau qhov lawv ua tej chaw siab teev dab zes Vajtswv npau taws, lawv txaug tej dab mlom los ua rau Vajtswv khib. Thaum Vajtswv tau hnov mas nws thiaj npau taws kawg thiab nws muab Yixayee tso plhuav tseg. Nws tseg kiag nws lub chaw nyob hauv Silau, yog lub tsev ntaub uas nws nyob hauv nruab nrab neeg. Nws thiaj muab lub phij xab uas yog Vajtswv lub hwjchim rau yeeb ncuab coj mus, yog muab nws lub hwjchim ci ntsa iab rau hauv cov tshawj chim txhais tes. Nws muab nws haiv neeg cob rau hniav ntaj thiab nws npau taws heev rau nws qub txeeg qub teg. Hluavtaws rhuav tshem lawv tej tub hluas tag thiab lawv tej ntxhais hluas tsis hnov suab nkauj ua tshoob. Lawv cov pov thawj raug ntaj tua tuag tag, cov pov thawj tej pojniam tsis pam tsis quaj li. Mas tus Tswv thiaj sawv tsees yam nkaus li tsim nruab dab ntub los, yam nkaus li ib tug txivneej muaj zog qw nrov vim yog haus cawv txiv hmab. Nws ntaus nws cov yeeb ncuab thim kiag thiab ua rau lawv txaj muag ib txhis li. Nws tsis lees yuav Yauxej caj ces thiab tsis xaiv xeem Efa‑i. Nws xaiv xeem Yuda thiab lub roob Xi‑oo uas nws hlub. Nws ua lub chaw uas pe nws zoo yam li saum ntuj thiab zoo yam nkaus li lub ntiajteb uas nws tsim cia nyob mus ib txhis. Vajtswv xaiv nws tus qhev Davi thiab coj nws tawm hauv nkuaj yaj los, yog coj nws tawm hauv qhov uas yug cov maum yaj uas muaj menyuam mos los ua tus tswv yug yaj, yug Yakhauj uas yog Vajtswv haiv neeg, yog yug Yixayee uas yog Vajtswv qub txeeg qub teg. Davi ua lub siab ncaj yug lawv, nws txhais tes uas txawj coj tau lawv. Au Vajtswv, lwm haiv neeg tau txeem mus rau hauv koj qub txeeg qub teg, lawv tau ua rau koj lub tuam tsev uas dawb huv qias tsis huv, lawv tau muab Yeluxalees ua pob tag. Lawv muab koj cov qhev tej cev tuag rau tej liaj dav saum nruab ntug noj, thiab muab koj cov neeg uas dawb huv tej nqaij rau tej tsiaj qus hauv ntiajteb noj. Lawv muab tej neeg no cov ntshav nchuav los yam li dej puag ncig Yeluxalees, thiab tsis tshuav leejtwg muab lawv log. Peb raug tej neeg zej zog thuam luag, thiab raug tej neeg uas nyob ib ncig peb luag thiab saib tsis taus. Au Yawmsaub, yuav ntev li cas? Koj yuav chim mus ib txhis li lov? Koj txojkev khib yuav hlawv yam li hluavtaws kub mus li lov? Thov koj muab koj txojkev chim nchuav rau saum cov neeg uas tsis paub koj, thiab rau saum tej tebchaws uas tsis tuav koj lub npe thov. Vim yog lawv tau rhuav tshem Yakhauj thiab muab nws tej chaw nyob tso tseg piam tag. Thov tsis txhob muab peb tej poj koob yawm txwv tej kev txhaum coj los rau txim rau peb. Thov koj khuvleej peb sai sai no vim peb poob qes kawg li. Au Vajtswv uas yog peb txojkev cawm dim, thov pab peb lauj, vim yog saib rau koj lub npe uas muaj hwjchim ci ntsa iab. Thov cawm peb thiab zam peb lub txim vim yog saib rau koj lub npe. Ua cas ib tsoom tebchaws yuav hais tias, “Lawv tus Vajtswv nyob qhovtwg?” Thov kom ib tsoom tebchaws paub tab meeg peb lub qhov muag tias yog koj ua pauj koj cov qhev tej ntshav uas ntws los. Thov kom cov uas raug ntes lub suab quaj nrov tuaj txog ntawm koj xubntiag. Thov koj siv koj lub hwjchim loj tuav cov raug txim tuag txojsia. Au tus Tswv, thov pauj tej uas cov uas nyob ib ncig peb thuam luag koj xya npaug rau ntawm lawv lub xubntiag. Peb uas yog koj haiv neeg, yog koj pab yaj uas nyob hauv koj lub tshav zaub yuav ua koj tsaug ib txhis, peb yuav qhuas koj ib tiam dhau ib tiam mus li. Au Yixayee tus tswv yug yaj, koj coj Yauxej ib yam li coj pab yaj, thov koj tig ntsej mloog. Koj nyob lub zwm txwv saum cov Khelunpee, thov koj tsom tus duab ci tuaj tab meeg Efa‑i thiab Npeeyamee thiab Manaxe. Thov tsa koj lub hwjchim sawv thiab los cawm peb dim. Au Vajtswv, thov koj pab peb rov zoo li qub, cia koj lub ntsej muag ci rau peb xwv peb thiaj li dim. Au Vajtswv Yawmsaub uas muaj hwjchim loj kawg nkaus, koj yuav chim rau koj haiv neeg tej lus thov ntev li cas? Koj twb muab kua muag ua zaub mov rau lawv noj, thiab muab kua muag rau lawv haus txaus nkaus. Koj ua rau cov uas nyob ib ncig peb nrog peb sib txeeb tebchaws, thiab peb cov yeeb ncuab luag peb. Au Vajtswv uas muaj hwjchim loj kawg nkaus, thov koj pab peb rov zoo li qub, cia koj lub ntsej muag ci rau peb xwv peb thiaj li dim. Koj coj ib tsob txiv hmab tawm hauv Iyi tebchaws los, koj ntiab lwm haiv neeg tawm mus thiab muab tsob txiv hmab ntawd cog rau hauv. Koj nthua thaj teb du lug, tsob txiv hmab ntsia cag tob thiab nthuav mus thoob lub tebchaws. Nws tej duab ntxoov ntxoo roos tej roob, nws tej ceg ntxoov tej ntoo ciab uas loj kawg. Nws tej ceg nthuav mus txog Hiavtxwv, thiab tej ntsuag hlav huam mus txog tus dej Yufeti. Ua cas koj tsoo nws tej ntsa loog pob tag, txhua tus uas dua kev thiaj li de nws tej txiv? Npua teb tom hav zoov los tsuj nws, txhua yam tsiaj tom teb kuj los noj tag. Au Vajtswv uas muaj hwjchim loj kawg nkaus, thov tig rov qab los lauj! Thov saib saum ntuj tuaj pom, thov mob siab tsob txiv hmab no, yog tsob uas koj txhais tes xis cog cia thiab yog tus ceg uas koj ua kom hlob zoo rau koj. Lawv muab hluavtaws hlawv tsob txiv hmab ntawd thiab muab ntov vau lawm. Thov cia lawv puam tsuaj rau thaum koj ntsia ntsoov thiab ntuas lawv. Thov cia koj txhais tes nyob saum tus uas nyob ntawm koj sab tes xis, yog neeg tus tub uas koj ua kom ruaj khov rau koj. Mas peb yuav tsis tig ntawm koj mus dua li lawm. Thov koj pub peb muaj txojsia nyob, peb yuav thov hu koj lub npe. Au Vajtswv Yawmsaub uas muaj hwjchim loj kawg nkaus, thov koj pab peb rov zoo li qub, cia koj lub ntsej muag ci rau peb kom peb thiaj li dim. Cia li hu nkauj nrov rau Vajtswv uas yog peb lub zog, cia li qw zoo siab xyiv fab rau Yakhauj tus Vajtswv. Cia li tsa suab hu nkauj ntaus nruas npuaj thiab ntaus nkauj nog ncas me uas lub suab zoo mloog thiab nkauj nog ncas loj. Cia li tshuab raj kub yaj rau hnub hli xiab thiab hnub hli nra, thiab hnub uas peb ua kevcai pam noj pam haus. Rau qhov yog kab ke uas cov Yixayee yuav tsum coj, yog Yakhauj tus Vajtswv txoj kevcai. Nws muab tej lus no ua kab ke rau Yauxej coj rau thaum Vajtswv mus tawm tsam Iyi tebchaws. Kuv hnov ib lub suab uas kuv tsis tau txeev paub dua hais tias, “Kuv txo lub nra ntawm lawv xub pwg, thiab daws lub tawb ntawm lawv txhais tes. Thaum koj raug txom nyem koj hu mas kuv tso koj dim, kuv nyob hauv tauv huab uas xob nroo teb koj, kuv sim koj ntawm dej Melinpa. Kuv haiv neeg 'e, cia li mloog, kuv yuav qhuab ntuas nej. Cov Yixayee 'e, xav kom nej mloog kuv hais. Nej tsis txhob teev luag tej dab rau hauv nej nruab nrab, thiab tsis txhob pe luag lwm haiv neeg tej dab qhuas. Kuv yog Yawmsaub, yog nej tus Vajtswv uas coj nej tawm hauv Iyi tebchaws los. Cia li rua nej lub qhov ncauj kom loj es kuv yuav ntsaws kom nej noj tsau. “Tiamsis kuv haiv neeg tsis mloog kuv lus, cov Yixayee tsis txais yuav kuv. Kuv thiaj cia lawv ua raws li lawv lub siab tawv thiab ua raws li uas lawv xav cia. Kuv xav kom kuv haiv neeg mloog kuv hais, xav kom Yixayee taug kuv tej kev. Mas kuv yuav ua rau lawv cov yeeb ncuab swb sai sai, kuv yuav tsa tes tawm tsam lawv cov tshawj chim. Cov neeg uas ntxub Yawmsaub yuav pw lua ntawm nws xubntiag, lawv yuav raug txim mus ib txhis li. Kuv yuav muab cov mog uas zoo kawg rau nej noj thiab pub cov zib ntab ntawm tej qab tsuas rau nej kom txaus nkaus nej lub siab.” Vajtswv los zaum hauv nruab nrab ib tsoom tubtxib saum ntuj, nws nyob hauv nruab nrab tej timtswv txiav txim hais tias, “Nej yuav tu plaub tsis ncaj, thiab tuaj tus neeg limhiam tog ntev li cas? Cia li tu plaub ncaj rau cov uas tsis muaj zog thiab cov uas tsis muaj txiv, thiab tsa cov txom nyem thiab cov tu pluas txojcai. Cia li cawm cov uas qaug zog thiab cov txom nyem kom dim, cia li pab lawv dim hauv cov neeg limhiam txhais tes. Lawv tsis paub thiab tsis nkag siab, lawv taug txojkev tsaus ntuj nti, tej taw tiag lub ntiajteb ua zog kais huvsi. Kuv hais tias, ‘Nej yog timtswv, nej puavleej yog tus uas Loj Dua Ntais li tub.’ Txawm li ntawd los nej yuav tuag yam li neeg, thiab ntog vau hlo yam li ib tug thawj coj ntog.” Au Vajtswv, thov sawv tsees txiav txim rau lub ntiajteb, rau qhov ib tsoom tebchaws puavleej yog koj li. Au Vajtswv, thov tsis txhob nyob twjywm. Au Vajtswv, tsis txhob nyob ntsiag to es tsis quav ntsej. Saib maj, koj cov yeeb ncuab twb ua zom zaws, cov uas ntxub koj los kuj tsa taubhau nplawg ntia. Lawv xav tswvyim ntse kawg li yuav tawm tsam koj haiv neeg, lawv ntaus tswvyim yuav tiv cov uas koj tsom kwm. Lawv hais tias, “Cia li los, peb muab haiv neeg ntawd ntxuav kom tu noob nrho. Tsis txhob tseg Yixayee lub npe cia rau leejtwg nco tau kiag li.” Lawv koom ib lub siab ntaus tswvyim phem. Lawv sib cog lus tawm tsam koj, yog cov neeg Edoo thiab cov neeg Isama‑ee thiab cov Mau‑a, cov Haka, cov Kenpas, cov Asmoo thiab cov Amalej, cov Filixatee thiab cov neeg uas nyob hauv lub nroog Thailab. Axilia kuj tuaj nrog koom tes thiab, lawv ua Lauj cov tub ki li tes taw uas muaj zog. Thov koj ua rau lawv yam nkaus li koj ua rau cov Midee, thiab yam nkaus li ua rau Xixela thiab Yanpi ntawm tus dej Khisoo. Lawv raug muab ua kom puam tsuaj tag ntawm lub moos Eedau, thiab ua luaj ua chiv tag rau hauv av lawm. Thov koj ua rau lawv cov uas ua hlob zoo yam nkaus li Aulej thiab Xe‑ev, thiab ua rau lawv cov thawj sawvdaws zoo yam nkaus li Xenpa thiab Xamuna, yog cov uas hais tias, “Cia peb txeeb Vajtswv tej tshav zaub ua peb tug.” Au kuv tus Vajtswv, thov ua rau lawv zoo yam nkaus li cov hmoov av uas cua ntsawj ya kaj niab, zoo yam nkaus li tej npluag uas cua ntsawj ya tag. Hluavtaws kub tej hav zoov li cas thiab nplaim taws kub tej toj roob hauv pes cig li cas, thov koj tso cua daj cua dub los raws lawv ib yam nkaus li ntawd, thiab tso koj tej khaub zeeg cua los ua rau lawv ntshai kawg. Au Yawmsaub, thov ua rau lawv poob ntsej muag xwv lawv thiaj li los nrhiav koj lub npe. Thov kom lawv raug txaj muag thiab poob siab mus ib txhis. Thov ua kom lawv poob ntsej muag puam tsuaj tag. Thov ua kom lawv paub tias koj tib leeg xwb uas npe hu ua Yawmsaub thiaj yog tus Vajtswv Loj Dua Ntais uas kav tag nrho thoob ntiajteb. Au Yawmsaub uas muaj hwjchim loj kawg nkaus, koj lub chaw nyob yog lub chaw uas nyiam kawg li. Kuv tus ntsuj plig ntshaw thiab xav txog Yawmsaub lub tuam tsev, kuv lub siab lub cev hu nkauj xyiv fab rau Vajtswv uas muaj txojsia nyob. Au Yawmsaub uas muaj hwjchim loj kawg nkaus, uas yog kuv tus vajntxwv thiab kuv tus Vajtswv, txawm yog noog tsev los nrhiav tau chaw nyob, thiab luv kuj nrhiav tau chaw ua zes rau nws nteg qe rau ntawm koj lub thaj. Cov uas nyob hauv koj lub tuam tsev tau nyob kaj siab lug, lawv hu nkauj qhuas koj tsis tu ncua li. Cov uas lawv lub zog nyob hauv koj tau nyob kaj siab lug, hauv lawv lub siab yog txoj niag kev uas mus rau Xi‑oo. Thaum lawv hla lub hav Npakha mus, lawv ua kom dej txhawv, cov nag hauv xyoo ua kom tau koob hmoov. Lawv mus pheej muaj zog tsav ntxiv, lawv yuav pom tej timtswv tus Vajtswv nyob hauv Xi‑oo. Au Vajtswv Yawmsaub uas muaj hwjchim loj kawg nkaus, thov mloog kuv tej lus, au Yakhauj tus Vajtswv, thov tig ntsej mloog. Au Vajtswv, thov saib daim phiaj hlau uas thaiv peb, thov tsa muag ntsia tus uas koj hliv roj tsa cia lawd lub ntsej muag. Nyob ib hnub hauv koj tej tshav puam tuam tsev, zoo dua li nyob lwm qhov ib txhiab hnub. Kuv xav ua tus uas zov kuv tus Vajtswv lub qhov rooj tuam tsev, zoo dua li nyob hauv cov neeg limhiam lub tsev ntaub. Vajtswv Yawmsaub yog lub hnub thiab daim phiaj hlau thaiv. Nws pub txojkev hlub thiab koob meej rau peb. Yawmsaub tsis tseg ib yam zoo uas tsis pub rau cov neeg ncaj. Au Yawmsaub uas muaj hwjchim loj kawg nkaus, tus uas tso siab rau koj tau nyob kaj siab lug. Au Yawmsaub, koj twb hlub koj lub tebchaws, koj twb pub Yakhauj rov tau vam meej li qub. Koj twb zam koj cov neeg tej kev txhaum, thiab daws lawv lub txim huvsi. Koj twb thim koj tej kev npau taws huvsi rov qab, koj twb tig kiag ntawm koj txojkev chim uas kub heev. Au Vajtswv uas cawm peb dim, thov pab peb rov zoo li qub, thov koj tso qhov uas koj chim rau peb tseg. Koj yuav chim rau peb mus ib txhis lov? Koj yuav cia koj txojkev chim nyob mus rau txhua tiam lov? Koj yuav tsis pub peb lub neej rov zoo li qub lov, xwv koj cov neeg thiaj tau kev xyiv fab rau hauv koj? Au Yawmsaub, thov ua koj txojkev hlub uas ruaj khov tshwm los rau peb, thiab thov pub koj txojkev dim rau peb. Thov cia kuv tau hnov tej lus uas Vajtswv Yawmsaub hais, rau qhov nws hais txojkev kaj siab lug rau nws haiv neeg, uas yog nws cov neeg dawb huv. Tsis txhob cia lawv tig rov mus rau txojkev ruam. Nws txojkev cawm dim yeej los ze cov uas hwm thiab paub ntshai nws, nws lub hwjchim ci ntsa iab thiaj nyob hauv peb lub tebchaws. Txojkev hlub ruaj khov thiab txojkev ncaj uas tso siab tau yuav sib ntsib, txojkev ncaj ncees thiab txojkev kaj siab lug yuav sib nwj. Txojkev ua ncaj yuav tawm hauv av tuaj, txojkev ncaj ncees yuav saib saum ntuj tuaj. Yawmsaub yeej yuav pub tej uas zoo, mas peb lub tebchaws yuav tau qoob loo nplua mias. Txojkev ncaj ncees yuav mus ua nws ntej, thiab npaj kev rau nws kotaw taug. Au Yawmsaub, thov tig ntsej mloog thiab teb kuv, rau qhov kuv pluag thiab txom nyem. Thov tsom kwm kuv txojsia cia rau qhov kuv hwm koj. Thov cawm koj tus qhev uas tso siab rau koj. Koj yog kuv tus Vajtswv. Au tus Tswv, thov koj hlub kuv rau qhov kuv quaj thov koj tas hnub tas hmo. Au tus Tswv, thov pub kom koj tus tub qhe zoo siab rau qhov kuv muab kiag kuv lub siab rau koj. Au tus Tswv, koj yog tus uas zoo kawg thiab zam txim, koj txojkev hlub muaj nplua mias rau cov uas hu thov koj. Au Yawmsaub, thov tig ntsej mloog kuv tej lus thov, thov mloog kuv lub suab taij thov. Hnub kuv raug txom nyem ceeblaj kuv thov hu koj vim koj yeej yuav teb kuv. Au tus Tswv, dhau koj lawm tsis muaj ib tug timtswv twg yuav zoo cuag li koj, thiab tsis muaj ib teg haujlwm twg uas yuav zoo cuag li koj tes haujlwm. Au tus Tswv, txhua haiv neeg uas koj tau tsim los yuav tuaj pe rau ntawm koj xubntiag, thiab yuav qhuas koj lub npe kom tau koob meej. Rau qhov koj loj kawg thiab ua tes haujlwm phimhwj kawg, koj tib leeg thiaj yog Vajtswv. Au Yawmsaub, thov koj qhia koj txojkev rau kuv xwv kuv thiaj ua tau raws li koj txojkev tseeb, thov pab kom kuv ua kiag ib siab paub ntshai koj lub npe. Au tus Tswv uas yog kuv tus Vajtswv, kuv yuav ua koj tsaug kawg kuv lub siab thiab kuv yuav qhuas koj lub npe kom tau koob meej mus ib txhis. Rau qhov koj txojkev hlub uas ruaj khov loj kawg rau kuv, thiab koj tau tso kuv tus ntsuj plig dim lub qhov tob tob hauv tub tuag teb los. Au Vajtswv, cov neeg khav theeb tau sawv tsees tiv kuv, ib pab neeg uas ua nruj ua tsiv nrhiav txov kuv txojsia, lawv tsis quav ntsej koj thiab. Au tus Tswv, koj yog tus Vajtswv uas khuvleej thiab hlub, koj tsis chim sai, koj txojkev hlub uas ruaj khov thiab koj txojkev ncaj uas tso siab tau muaj nplua mias. Thov tig khuvleej kuv, thov pub zog rau koj tus qhev, thiab cawm koj tus nkauj qhev tus tub. Thov ua ib yam txujci qhia koj txojkev hlub rau kuv, kom cov uas ntxub kuv thiaj pom thiab raug txaj muag, vim Yawmsaub, koj tau pab kuv thiab nplij kuv lub siab. Lub nroog uas Yawmsaub tsim nyob saum lub roob dawb huv. Yawmsaub nyiam Xi‑oo tej rooj loog heev dua li tej chaw uas Yakhauj cov neeg nyob txhua qhov huvsi. Vajtswv lub nroog 'e, tej neeg hais tej lus qhuas koj kawg li. Hauv cov uas paub kuv, kuv yuav suav Lahaj thiab Npanpiloo. Filixatee tebchaws thiab lub nroog Thailab thiab Khuj tebchaws, mas kuv yuav suav tias, “Cov no kuj yug rau hauv Xi‑oo.” Luag yuav hais txog Xi‑oo tias, “Tus no thiab tus ntawd yug hauv lub nroog ntawd.” Vajtswv uas Loj Dua Ntais yuav tsa kom lub nroog ntawd ruaj khov. Thaum Yawmsaub sau ib tsoom neeg tej npe cia, nws suav tias, “Tus no yug qhov ntawd.” Cov uas hu nkauj thiab cov uas dhia seev cev sawvdaws hais tias, “Peb txhua lub hauv dej txhawv hauv koj los.” Au Yawmsaub, tus Vajtswv uas cawm kuv dim, nruab hnub kuv thov koj pab hmo ntuj kuv quaj hu rau ntawm koj xubntiag. Cia kuv tej lus thov tuaj txog ntawm koj xubntiag, thov tig ntsej mloog kuv lub suab thov. Rau qhov kuv tus ntsuj plig raug txom nyem ceeblaj kawg nkaus thiab kuv txojsia twb mus yuav txog tub tuag teb. Kuv raug muab xam nrog cov neeg uas twb yuav mus rau hauv qhov tuag. Kuv yog ib tug uas tsis muaj zog kiag li, zoo yam nkaus li tus uas luag muab tso tseg rau hauv cov neeg tuag, yam nkaus li cov uas raug tua tuag nyob hauv lub qhov ntxa, yog cov uas koj tsis nco txog lawm vim yog lawv raug txiav ntawm koj txhais tes lawm. Koj muab kuv tso tob tob rau hauv qhov tuag, yog lub qhov uas tob tob thiab tsaus ntuj nti. Koj txojkev npau taws hnyav kawg rau saum kuv, thiab koj muab koj tej niag nthwv dej huvsi nphau los nyab kuv. Koj tau ua rau kuv tej kwvluag tso kuv tseg, koj tau muab kuv ua yam uas lawv ceeb thiab ntshai. Kuv raug muab kaw kuv thiaj dim tsis tau li. Kuv qhov muag tsis pom kev tag vim yog kuv quaj lwj siab. Au Yawmsaub, kuv niaj hnub thov hu koj, kuv cev tes rau koj. Koj yuav ua txujci phimhwj rau cov uas tuag lov? Cov uas nyob hauv tub tuag teb yuav sawv tsees qhuas koj lov? Lawv yuav piav koj txojkev hlub uas ruaj khov rau hauv qhov ntxa lov, thiab piav koj txojkev ncaj uas tso siab tau rau hauv Anpadoo lov? Nyob hauv qhov tsaus ntuj lawv yuav paub koj tej txujci phimhwj lov, nyob lub chaw uas tsis nco qab dabtsi li, lawv yuav paub koj txojkev cawm dim lov? Au Yawmsaub, kuv quaj thov koj, thaum tagkis kuv lub suab thov tuaj cuag koj. Au Yawmsaub, ua cas koj muab kuv tso pov tseg? Ua li cas koj yuav fee plhu ntawm kuv lawm? Txij thaum kuv tseem hluas los kuv raug txom nyem nyuaj siab thiab nyob ze txojkev tuag, kuv thev tej kev ntshai kawg uas koj ua rau kuv, kuv tsis txawj ua li cas lawm. Koj txojkev npau taws nyab kiag kuv, tej kev ntshai kawg uas koj ntaus kuv ua rau kuv puam tsuaj. Tej kev ntshai ntawd nyob vij puag ncig kuv zoo yam nkaus li dej nyab tas hnub tas hmo, mas nyab kiag kuv tag nrho. Koj tau ua rau cov uas hlub kuv thiab kuv cov phoojywg ncaim ntawm kuv, kuv muab qhov tsaus ntuj los ua kuv phoojywg xwb. Au Yawmsaub, kuv yuav hu nkauj txog koj txojkev hlub ruaj khov mus ib txhis. Kuv lub qhov ncauj yuav piav txog koj txojkev ncaj uas tso siab tau rau txhua tiam neeg. Kuv hais tias koj txojkev hlub uas ruaj khov yuav nyob mus ib txhis, koj tsa koj txojkev ncaj nyob ruaj rau saum ntuj. Koj hais tias, “Kuv cog lus rau tus uas kuv xaiv cia lawm, kuv tau yeem lus rau kuv tus qhev Davi tias, ‘Kuv yuav tsa koj caj ces nyob mus ib txhis thiab kuv yuav ua rau koj lub zwm txwv nyob ruaj mus txhua tiam neeg.’ ” Au Yawmsaub, cia lub ntuj qhuas koj tes haujlwm phimhwj, thiab qhuas koj txojkev ncaj rau thaum cov neeg dawb huv tuaj txoos ua ke. Rau qhov saum ntuj leejtwg yuav piv tau zoo li Yawmsaub? Hauv ib tsoom neeg qaum ntuj leejtwg zoo cuag li Yawmsaub? Koj yog tus Vajtswv uas cov neeg dawb huv ntshai rau thaum tuaj sablaj ua ke, thiab yog tus uas txaus ntshai kawg heev dua tej uas nyob ib ncig ntawm koj. Au Vajtswv Yawmsaub uas muaj hwjchim loj kawg nkaus, leejtwg muaj hwjchim loj ib yam li koj? Au Yawmsaub, koj txojkev ncaj uas tso siab tau nyob puag ncig koj. Koj tswj rawv tej nthwv dej ntas hauv hiavtxwv. Thaum tej nthwv dej ntas siab siab koj kuj tswj kom nyob ntsiag to. Koj tsoo tus niag zaj Lahaj yam nkaus li ib tug uas raug tua, koj siv koj txhais tes uas muaj hwjchim ua rau koj cov yeeb ncuab khiav tawg tag. Lub ntuj yog koj li, lub ntiajteb yog koj li. Koj tau tsim lub ntiajteb thiab txhua yam uas nyob hauv. Sab ped thiab sab nrad los yog koj tsim. Lub roob Thanpau thiab lub roob Hawmoo qhuas koj lub npe xyiv fab hlo. Koj txhais npab muaj hwjchim thiab koj txhais tes uas muaj zog thiab koj txhais tes xis raug muab tsa siab siab li. Txojkev ncaj ncees thiab qhov uas txiav txim ncaj yog lub taw tiag koj lub zwm txwv, txojkev hlub ruaj khov thiab txojkev ncaj uas tso siab tau mus ua koj ntej. Au Yawmsaub, cov neeg uas paub qw zoo siab rau koj tau nyob kaj siab lug, yog cov uas taug kev hauv qhov kaj uas tawm ntawm koj xubntiag los. Lawv zoo siab xyiv fab hauv koj lub npe ib hnub tsaus ntuj, thiab lawv qhuas ntxhias koj txojkev ncaj ncees. Koj yog lawv lub zog uas muaj hwjchim ci ntsa iab. Vim koj hlub peb mas koj thiaj tsa peb txwm kub kom siab, rau qhov peb daim phiaj hlau uas thaiv yog Yawmsaub li, peb tus vajntxwv yog Yixayee tus Vajtswv uas dawb huv li. Yav thaum ub koj tau hais hauv zaj yog toog rau tus uas lub siab xib rau koj tias, “Kuv tau pab ib tug uas siab loj siab tuab, kuv tau tsa ib tug uas kuv xaiv hauv cov pejxeem los kom nyob lub chaw siab. Kuv tau nrhiav kuv tus qhev Davi thiab muab kuv cov roj uas dawb huv hliv tsa nws. Kuv txhais tes thiaj nrog nraim nws mus ib txhis, thiab kuv txhais npab yuav pub zog rau nws. Yeeb ncuab yuav ntxias tsis tau nws, cov neeg limhiam yuav quab yuam tsis tau nws. Kuv yuav tsoo nws cov tshawj chim rau ntawm nws xubntiag, thiab kuv yuav ntaus cov uas ntxub nws kom tuag. Kuv txojkev ncaj uas tso siab tau thiab kuv txojkev hlub uas ruaj khov yuav nrog nraim nws. Vim nws tuav kuv lub npe nws txwm kub yuav raug muab tsa kom siab. Kuv yuav tsa nws txhais tes rau saum dej hiavtxwv thiab tsa nws txhais tes xis rau saum tej hav dej. Mas nws yuav hu thov kuv tias, ‘Koj yog kuv leej txiv, yog kuv tus Vajtswv thiab yog txhib zeb uas cawm kuv dim.’ Thiab kuv yuav tsa nws ua tus tub hlob, ua tus vajntxwv loj dhau tej vajntxwv hauv ntiajteb huvsi. Kuv yuav muab kuv txojkev hlub ruaj khov cob rau nws mus ib txhis, thiab tej lus uas kuv cog tseg rau nws yuav nyob ruaj khov. Kuv yuav tsa nws caj ces kom nyob mus ib txhis, thiab tsa nws lub zwm txwv nyob ntev li uas lub ntuj nyob. Yog nws tej tub ki tso kuv txoj kevcai tseg thiab tsis ua raws li kuv tej kevcai, yog lawv ua txhaum kuv tej kab ke thiab tsis tuav rawv kuv tej lus nkaw, mas kuv yuav xuas nplawm rau txim rau lawv tej kev fav xeeb, thiab xuas nplawm kav theej rau txim rau lawv tej kev txhaum. Tiamsis kuv yuav tsis rho kuv txojkev hlub uas ruaj khov ntawm nws los, thiab tsis tso kuv txojkev ncaj uas tso siab tau tseg. Kuv yuav tsis rhuav kuv tej lus cog tseg thiab tsis hloov tej lus uas tawm hauv kuv daim tawv ncauj lawm. Kuv tuav kuv txojkev dawb huv yeem lus ruaj cia. Kuv yuav tsis dag Davi. Nws caj ces yuav nyob mus ib txhis, nws lub zwm txwv yuav nyob ntev li lub hnub rau ntawm kuv xubntiag. Yuav tsa nws nyob mus ib txhis yam li lub hli uas ua timkhawv tseeb saum nruab ntug.” Tiamsis nimno koj muab nws pov tseg thiab tsis yuav lawm, koj npau taws rau tus uas koj hliv roj tsa lawd. Koj tau rhuav tej lus uas koj cog tseg rau koj tus qhev, koj tau ua rau nws lub mom kub puas tsuas rau hauv cov hmoov av. Koj muab nws tej ntsa loog huvsi tsoo tawg ua tej lub qhov, koj muab nws tej chaw ruaj khov tsoo pob tag. Txhua tus uas dua kev mus kuj lws nws, tej neeg zej zog kuj thuam luag nws. Koj tsa nws cov tshawj chim txhais tes xis siab, koj ua rau nws cov yeeb ncuab sawvdaws zoo siab xyiv fab. Koj tig hniav ntaj rau nws thiab tsis pab nws nyob ruaj khov hauv lub tshav rog. Koj rho tus cwj ntawm nws txhais tes mus, thiab muab nws lub zwm txwv laim rau hauv pem teb. Koj muab nws lub hnub nyoog hluas txiav luv, koj muab kev txaj muag npog nkaus nws lub ntsej muag. Au Yawmsaub, yuav ntev li cas? Koj yuav tsiv nraim mus ib txhis lov? Koj txojkev npau taws yuav kub yam nkaus li hluavtaws ntev li cas? Thov koj nco txog kuv sim neej uas ib vuag dua xwb. Koj tau tsim ib tsoom neeg los nyob dawb nyob do xwb. Muaj ib tug neeg twg uas yuav muaj txojsia nyob mus li tsis txawj tuag? Leejtwg yuav cawm tau nws tus ntsuj plig dim hauv tub tuag teb lub hwjchim? Au tus Tswv, koj txojkev hlub ruaj khov thaum ub dua twg lawm? Koj tau cog tseg tias yuav pub rau Davi raws li koj txojkev ncaj uas tso siab tau. Au tus Tswv, thov koj nco txog qhov uas koj tus qhev raug luag saib tsis taus li cas, thiab qhov uas kuv ris ib tsoom neeg tej lus thuam rau nruab siab li cas. Au Yawmsaub, koj cov yeeb ncuab thuam luag kuv, lawv luag tus uas koj hliv roj tsa lawd txhua kauj ruam. Qhuas Yawmsaub mus ib txhis. Amee thiab Amee. Au tus Tswv, koj yeej yog peb lub chaw nyob txhua tiam los li. Ua ntej uas toj roob hauv pes tsis tau tshwm los, thiab koj tsis tau tsim lub ntiajteb thiab lub qab ntuj, koj yeej yog Vajtswv ib txwm thaum ub los mus ib txhis tsis kawg. Koj ua rau neeg rov ua hmoov av, thiab hais tias, “Neeg tej tub ki 'e, cia li rov qab lauj!” Ib txhiab xyoo koj saib zoo li nag hmo uas dhau los lawm xwb, lossis zoo li ib lub caij ib txoog teev thaum tsaus ntuj. Koj muab neeg kuav kiag mus, lawv zoo li zaj npau suav, zoo li tej nroj tsuag uas tagkis nyuam qhuav tuaj, thaum tagkis kuj hlob mos nyoos, thaum tsaus ntuj kuj tuag tshav ntsws lawm. Peb raug koj txojkev chim ntxuav pov tseg, koj txojkev npau taws ua rau peb ntshai poob siab nthav. Koj muab peb tej kev txhaum txawb rau ntawm koj lub xubntiag, tej kev txhaum uas peb ua nraim nkoos koj muab txawb rau qhov pom kev tab meeg koj. Peb lub hnub nyoog ploj zuj zus tag rau hauv koj txojkev npau taws, peb lub niaj lub xyoo kawg zuj zus yam li xyu ib pas xwb. Peb hnub nyoog tsuas yog xya caum xyoo xwb, lossis nyob ntawm peb lub zog kuj txog yim caum xyoo. Tiamsis sim neej nyob ntawd tsuas yog muaj haujlwm khwv thiab kev ceeblaj, tsis ntev kuj ploj tag thiab peb kuj dua lawm. Leejtwg paub koj txojkev chim lub hwjchim? Koj txojkev npau taws npaum li uas peb paub ntshai koj. Thov koj qhia kom peb paub suav peb txhua hnub, xwv peb lub siab thiaj muaj tswvyim. Au Yawmsaub, thov koj rov los. Tseem tshuav ntev li cas? Thov koj khuvleej koj cov tub qhe. Thov pub kom thaum tagkis peb tsau npo koj txojkev hlub uas ruaj khov, kom peb thiaj zoo siab thiab xyiv fab tag peb sim neej. Thov pub kev xyiv fab rau peb ntau hnub npaum li uas koj cia peb raug txom nyem, thiab ntau xyoo npaum li uas peb ntsib xwm txheej phem. Thov ua koj tej haujlwm tshwm rau koj cov tub qhe pom, thiab pub koj lub hwjchim loj kawg tshwm rau lawv tej tub ki pom. Thov tus Tswv uas yog peb tus Vajtswv txojkev hlub los rau saum peb, thov tuav tej uas peb txhais tes ua nyob ruaj rau peb, thov tuav tej uas peb txhais tes ua kom nyob ruaj lauj! Tus uas nyob hauv tus Loj Dua Ntais lub xubntiag, tus uas nyob rau hauv tus uas muaj hwjchim loj kawg tus duab ntxoov ntxoo, yuav hais rau Yawmsaub tias, “Koj yog kuv lub chaw cawm siav thiab yog kuv lub chaw ruaj khov, yog kuv tus Vajtswv uas kuv tso siab plhuav.” Nws yuav tso koj dim hauv tus uas cuab noog rooj hlua, thiab hauv tej mob kis hnyav heev. Nws phab tis yuav roos koj thiab koj yuav cawm siav rau hauv nws qab phab tis. Nws txojkev ncaj uas tso siab tau yog daim phiaj hlau thiab ntsa loog thaiv. Koj yuav tsis ntshai txojkev txhawj xeeb hmo ntuj, thiab tsis ntshai rab xub vos uas ya tuaj nruab hnub, lossis tej mob kis uas raws tuaj thaum tsaus ntuj, lossis tej mob phem uas ua kom puam tsuaj thaum tav su. Qos txhiab leej yuav ntog tuag rau ntawm koj ib sab, qas vam leej yuav ntog tuag rau ntawm koj sab tes xis, los tej xwm txheej phem ntawd yuav tsis los ze koj. Koj lub qhov muag yuav pom ntsoov xwb, koj yuav pom qhov uas ua pauj rau cov neeg limhiam. Vim koj muab Yawmsaub ua koj lub chaw cawm siav, yog muab tus uas Loj Dua Ntais ua koj lub chaw nyob, yuav tsis muaj ib yam xwm txheej phem poob los raug koj, thiab yuav tsis muaj vij sub vij sw los ze koj lub tsev ntaub. Nws yuav muab koj cob rau nws cov tubtxib saum ntuj kom lawv tsom kwm koj txhua txojkev. Lawv txhais tes yuav hwj koj, kom koj kotaw thiaj tsis ntsawm pob zeb. Koj yuav tsuj tsov ntxhuav thiab nab raj kub sai, koj yuav tsuj pes ntiag thav tsov ntxhuav thiab nab. “Vim yog nws hlub kuv, kuv yuav tso nws dim. Kuv yuav tsom kwm nws cia vim nws lees yuav kuv lub npe. Thaum nws hu thov kuv, kuv yuav teb nws. Kuv yuav nrog nraim nws nyob rau thaum nws raug kev ceeblaj, kuv yuav cawm nws dim thiab pub koob meej rau nws. Kuv yuav pub txojsia ntev rau nws kom txaus nkaus nws lub siab, thiab ua txojkev cawm dim tshwm rau nws.” Qhov uas zoo mas yuav ua Yawmsaub tsaug, thiab hu nkauj qhuas koj lub npe, koj uas yog tus Vajtswv Loj Dua Ntais, thiab piav koj txojkev hlub uas ruaj khov rau thaum sawv ntxov, thiab piav koj txojkev ncaj uas tso siab tau rau thaum tsaus ntuj, nrog suab nkauj nog ncas loj thiab nkauj nog ncas me, thiab nrog suab nkauj nog ncas phim suab nkauj. Au Yawmsaub, koj tes haujlwm loj ua rau kuv zoo siab heev, vim tej haujlwm uas koj txhais tes ua kuv thiaj hu nkauj xyiv fab hlo. Au Yawmsaub, koj tes haujlwm loj kawg nkaus, tej uas koj xav mas nyob tob kawg li. Tus neeg tsis thoob tsib yuav tsis paub, tus neeg ruam yuav tsis nkag siab tias, txawm yog tej neeg limhiam hlob mos nyoos li tej nroj tsuag, thiab tej neeg ua phem sawvdaws kuj vam meej, los lawv yeej yuav raug puam tsuaj mus ib txhis. Au Yawmsaub, koj nyob lub chaw siab mus ib txhis. Au Yawmsaub, vim li no koj cov yeeb ncuab, koj cov yeeb ncuab yeej yuav puam tsuaj, cov neeg ua phem sawvdaws yuav tawg khiav tag. Tiamsis koj tsa kuv txwm kub ib yam li nyuj qus, koj muab cov roj tshiab hliv rau saum kuv. Kuv lub qhov muag twb pom kuv cov yeeb ncuab swb tag, kuv lub qhov ntsej twb hnov cov neeg phem uas tawm tsam kuv lub suab quaj swb tag. Cov neeg ncaj ncees hlob mos nyoos yam nkaus li tsob toov laj, thiab hlob sai yam nkaus li tsob ntoo ciab hauv Lenpanoo. Lawv raug muab cog rau hauv Yawmsaub lub tuam tsev, thiab kheev hlob rau hauv peb tus Vajtswv tej tshav puam tuam tsev. Thaum lawv laus laus lawm los lawv tseem txi txiv, thiab muaj dej yug thiab ntsuab tsaus nti mus ib txhis, kom thiaj qhia tias Yawmsaub ncaj ncees. Nws yog kuv txhib zeb thiab tsis ua ib qho tsis ncaj kiag li. Yawmsaub ua vajntxwv kav, nws muab hwjchim meej mom los hnav, Yawmsaub muab lub zog los sia ntawm duav. Lub ntiajteb nyob ruaj khov tsis ua zog li. Koj lub zwm txwv twb muab tsa cia txij thaum ub los lawm, koj yeej nyob ib txwm thaum ub los li. Au Yawmsaub, dej hiavtxwv tsa suab nrov, yog tej dej hauv nruab tiv txwv, tej niag nthwv dej tsa suab nrov ceev kawg. Yawmsaub uas nyob chaw siab muaj hwjchim loj, muaj hwjchim heev dua tej dej nrov vig voog, heev dua tej niag nthwv dej hiavtxwv ntas. Koj tej kevcai muaj tseeb tiag, Au Yawmsaub, txojkev dawb huv tsim nyog nyob hauv koj lub tuam tsev mus ib txhis. Au Yawmsaub, yog tus Vajtswv uas ua pauj, au Vajtswv tus uas ua pauj, thov koj tshwm plaws los. Au tus uas txiav txim rau ntiajteb, thov koj sawv tsees, ua rau cov neeg khav theeb tau saws raws li tsim nyog saws. Au Yawmsaub, cov neeg limhiam yuav zoo siab mus ntev li cas, cov neeg phem yuav xyiv fab ntev li cas? Lawv hais lus khav theeb heev, cov neeg ua phem sawvdaws khav theeb. Au Yawmsaub, lawv tsuj yuam koj haiv neeg thiab tsim txom koj qub txeeg qub teg. Lawv tua tej poj ntsuam thiab lwm haiv neeg uas nrog lawv nyob, thiab lawv tua tej menyuam ntsuag uas tsis muaj txiv. Thiab lawv tseem hais tias, “Yawmsaub tsis pom li, Yakhauj tus Vajtswv tsis paub li.” Cov neeg uas ruam dhau luag lwm tus 'e, cia li to taub. Cov neeg tsis thoob tsib 'e, thaum twg nej li ntse? Tus uas tsim qhov ntsej nws tseem tsis hnov thiab lov? Tus uas tsim qhov muag nws tseem tsis pom thiab lov? Tus uas nplawm txhua haiv neeg nws yuav tsis txiav txim lov? Tus uas qhia neeg nws tseem tsis txawj tsis ntse lov? Yawmsaub yeej paub tej uas neeg xav, tej ntawd tsuas yog ua pa xwb. Au Yawmsaub, tus uas koj nplawm thiab qhuab qhia kuj tau nyob kaj siab lug, yog tus uas koj muab koj txoj kevcai qhia rau, nws thiaj tau dim qhov uas raug txom nyem ceeblaj mus txog thaum khawb tau qhov taub cuab cov neeg limhiam. Rau qhov Yawmsaub yeej yuav tsis ncaim nws haiv neeg, nws yuav tsis tso nws qub txeeg qub teg tseg. Qhov uas txiav txim yuav rov txiav raws li txojkev ncaj ncees, mas cov neeg siab ncaj yuav raws txojkev txiav txim ncaj. Leejtwg sawv tsees pab kuv tawm tsam cov neeg limhiam? Leejtwg yuav tuaj kuv tog tiv cov neeg ua phem? Yog Yawmsaub tsis pab kuv ces kuv tus ntsuj plig twb mus nyob hauv qhov chaw ntsiag to lawm. Thaum kuv xav tias, “Kuv plam kotaw lawm,” au Yawmsaub, koj txojkev hlub uas ruaj khov tuav kuv cia. Thaum kuv lub siab muaj kev txhawj xeeb ntau, koj kuj nplij kuv lub siab kom xyiv fab. Cov thawj kav uas limhiam yuav nrog koj ua kwvluag tau lov, yog cov uas siv tej kab ke mus ua phem? Lawv sib koom tes xav txov cov neeg ncaj ncees txojsia, thiab muab cov neeg tsis txhaum rau txim tuag. Yawmsaub yog kuv lub chaw ruaj khov, kuv tus Vajtswv yog txhib zeb uas kuv nraim cev. Nws yuav coj lawv tej kev txhaum rov los rau saum lawv, thiab yuav muab lawv ntxuav pov tseg vim yog tim lawv tej kev limhiam. Yawmsaub uas yog peb tus Vajtswv yuav muab lawv ntxuav pov tseg. Cia li los, peb cia li hu nkauj qhuas Yawmsaub, peb cia li ua suab xyiv fab rau txhib zeb uas cawm peb dim. Peb cia li los rau ntawm nws lub xubntiag ua nws tsaug, peb cia li ua lub suab xyiv fab hu nkauj qhuas nws. Rau qhov Yawmsaub yog tus Vajtswv uas loj kawg, thiab yog tus vajntxwv uas loj tshaj plaws tej timtswv huvsi. Tej qhov uas tob kawg hauv ntiajteb nyob hauv nws xib teg, tej roob uas siab kawg kuj yog nws li. Nruab deg kuj yog nws li vim yog nws tsim, nruab nqhuab yog nws txhais tes puab. Cia li los, peb cia li pe hawm nws, peb cia li txhos caug rau ntawm Yawmsaub uas tsim peb lub xubntiag. Nws yog peb tus Vajtswv, peb yog nws cov pejxeem hauv nws lub tshav zaub, thiab yog nws pab yaj hauv nws txhais tes. Hnub no xav kom nej mloog nws lub suab. Nej tsis txhob ua lub siab tawv yam li nej tej poj koob yawm txwv ua ntawm Melinpa, yam li hnub uas nyob ntawm Maxa hauv tebchaws moj sab qhua. Txawm yog nej tej poj koob yawm txwv twb pom kuv tej haujlwm lawm, los lawv tseem sim kuv, thiab tshuaj saib kuv. Kuv ntxub tiam neeg ntawd tau plaub caug xyoo, thiab hais tias, “Lawv yog cov neeg uas lub siab pheej yuam kev, thiab lawv tsis quav ntsej kuv txojkev.” Vim li ntawd kuv thiaj cog lus twv chim tsawv tias, “Lawv yuav tsis tau nkag mus rau hauv lub chaw uas kuv pub lawv so kiag li.” Cia li hu zaj nkauj tshiab rau Yawmsaub, tag nrho lub ntiajteb, cia li hu nkauj rau Yawmsaub. Cia li hu nkauj rau Yawmsaub, cia li qhuas nws lub npe, cia li piav nws txojkev cawm dim ib hnub dhau ib hnub. Cia li piav txog nws lub hwjchim ci ntsa iab rau hauv ib tsoom tebchaws, piav txog nws tej haujlwm phimhwj rau hauv ib tsoom neeg sawvdaws. Rau qhov Yawmsaub yog tus loj kawg thiab tsim nyog qhuas heev, nws txaus ntshai heev dua tej timtswv huvsi. Neeg tej timtswv huvsi puavleej yog dab mlom xwb, tiamsis Yawmsaub yog tus tsim lub ntuj. Koob meej thiab hwjchim meej mom nyob ntawm nws xubntiag, lub zog thiab qhov uas zoo nkauj nyob hauv lub chaw pe hawm nws. Txhua haiv neeg txhua xeem 'e, cia li qhuas Yawmsaub, cia li qhuas tias Yawmsaub muaj hwjchim ci ntsa iab thiab muaj zog. Cia li qhuas tias Yawmsaub lub npe muaj hwjchim ci ntsa iab uas tsim nyog qhuas kawg li, cia li coj tej uas xyeem tuaj rau hauv nws tej tshav puam tuam tsev. Cia li hnav tej tsoos uas dawb huv pe hawm Yawmsaub, tag nrho lub ntiajteb, cia li tshee hnyo r au ntawm nws xubntiag. Cia li hais rau hauv ib tsoom tebchaws tias, “Yawmsaub ua vajntxwv kav. Lub ntiajteb yeej nyob ruaj khov tsis ua zog kiag li. Nws yuav txiav txim ncaj rau ib tsoom neeg.” Lub ntuj cia li zoo siab, lub ntiajteb cia li xyiv fab, dej hiavtxwv thiab txhua yam uas nyob hauv, cia li qw nrov ntsoog qees. Tej teb thiab txhua yam uas nyob hauv cia li qw zoo siab. Tej xyoob ntoo huvsi hauv hav zoov yuav hu nkauj xyiv fab, rau ntawm Yawmsaub xubntiag vim yog nws yuav los, nws yuav los txiav txim rau lub ntiajteb. Nws yuav txiav txim ncaj ncees rau lub ntiajteb, thiab ib tsoom neeg raws li nws txojkev tseeb. Yawmsaub ua vajntxwv kav. Cia ntiajteb xyiv fab, cia tej tebchaws uas coob kawg ntawm ntug hiavtxwv zoo siab. Muaj huab thiab muaj qhov tsaus ntuj nti nyob vij nws, txojkev ncaj ncees thiab qhov uas txiav txim ncaj yog lub taw tiag nws lub zwm txwv. Muaj hluavtaws cig ua nws ntej thiab hlawv nws tej yeeb ncuab uas nyob ib ncig. Nws tej xob laim ci nplas thoob qab ntuj, lub ntiajteb pom thiab ntseeg nkaws. Tej roob yaj pes ntshis li ciab ntab rau ntawm Yawmsaub xubntiag, rau ntawm tus Tswv uas kav tag nrho lub ntiajteb lub xubntiag. Lub ntuj tshaj tawm nws txojkev ncaj ncees thiab ib tsoom neeg sawvdaws pom nws lub hwjchim ci ntsa iab. Txhua tus uas pe dab mlom raug txaj muag, yog cov uas khav txog lawv tej dab uas tsis muaj qabhau. Tej timtswv huvsi pe ntawm nws xubntiag. Xi‑oo tau hnov mas zoo siab, thiab Yuda tej ntxhais xyiv fab, vim yog Vajtswv koj los txiav txim. Au Yawmsaub, koj yog tus Loj Dua Ntais saum lub ntiajteb huvsi, koj siab dhau tej timtswv huvsi ntau npaug. Yawmsaub hlub cov uas ntxub kev phem, nws tsom kwm nws cov neeg dawb huv txojsia, nws cawm lawv dim hauv cov neeg limhiam txhais tes. Txojkev kaj ci rau cov neeg ncaj ncees, thiab txojkev xyiv fab muaj rau cov neeg siab ncaj. Nej cov uas ncaj ncees, cia li zoo siab rau hauv Yawmsaub, thiab ua tsaug nws lub npe uas dawb huv. Cia li hu zaj nkauj tshiab rau Yawmsaub, rau qhov nws tau ua tej uas phimhwj kawg. Nws tau siv nws txhais tes xis thiab nws txhais npab uas dawb huv kov yeej. Yawmsaub qhia nws txojkev kov yeej rau sawvdaws paub, thiab ua nws txojkev cawm dim tshwm tab meeg ib tsoom tebchaws pom. Nws nco txog nws txojkev hlub uas ruaj khov thiab nws txojkev ncaj uas tso siab tau uas nws ua tshwm rau cov Yixayee. Thoob qab ntuj kawg puavleej tau pom peb tus Vajtswv txojkev kov yeej. Thoob lub ntiajteb 'e, cia li tsa suab xyiv fab rau Yawmsaub, cia li tsa suab hu nkauj xyiv fab thiab qhuas nws. Cia li ntaus nkauj nog ncas hu nkauj qhuas Yawmsaub, cia li ntaus nkauj nog ncas thiab seev suab. Cia li tshuab raj xyu tshuab raj kub yaj ua lub suab xyiv fab rau ntawm Yawmsaub uas yog vajntxwv xubntiag. Cia dej hiavtxwv thiab txhua yam uas nyob puv nkaus hauv qw suab nrov ntshu nrooj, cia lub ntiajteb thiab txhua yam uas nyob hauv qw. Cia tej niag dej npuaj teg, cia tej pov roob hu nkauj ua ke xyiv fab, rau ntawm Yawmsaub xubntiag, rau qhov nws los txiav txim rau lub ntiajteb. Nws yuav txiav txim ncaj ncees rau lub ntiajteb thiab txiav txim ncaj rau ib tsoom neeg. Yawmsaub ua vajntxwv kav. Cia ib tsoom neeg tshee hnyo. Nws nyob saum lub zwm txwv rau saum tej Khelunpee. Cia lub ntiajteb ntseeg ua zog kais. Yawmsaub loj kawg nkaus nyob hauv Xi‑oo, nws siab dhau ib tsoom neeg huvsi. Cia lawv qhuas koj lub npe uas loj kawg thiab txaus ntshai. Nws yog tus dawb huv. Vajntxwv uas muaj hwjchim loj kawg, koj uas nyiam kev txiav txim ncaj, koj tsa txojkev ncaj kom nyob ruaj, koj txiav txim ncaj thiab ua ncaj ncees rau hauv Yakhauj caj ces. Cia li qhuas ntxhias Yawmsaub uas yog peb tus Vajtswv, cia li pe hawm nws rau ntawm nws lub rooj tiag taw. Nws yog tus dawb huv. Mauxe thiab Aloo nyob rau hauv Yawmsaub cov pov thawj, Xamuyee kuj nyob hauv cov uas tuav Yawmsaub lub npe thov. Lawv quaj thov rau Yawmsaub mas nws teb lawv. Nws hais hauv ncej huab tuaj rau lawv, lawv kuj tuav rawv nws tej lus thiab tej kab ke uas nws qhia rau lawv. Au Yawmsaub uas yog peb tus Vajtswv, koj teb lawv, koj yog tus Vajtswv uas zam txim rau lawv, thiab koj tseem ua pauj rau lawv tej kev txhaum. Cia li qhuas ntxhias Yawmsaub uas yog peb tus Vajtswv, thiab pe hawm nws rau ntawm nws lub roob uas dawb huv, rau qhov Yawmsaub uas yog peb tus Vajtswv yog tus dawb huv. Tag nrho lub ntiajteb, cia li tsa suab qw xyiv fab rau Yawmsaub. Cia li zoo siab ua koom tu Yawmsaub. Cia li hu nkauj los rau ntawm nws xubntiag. Cia li paub tias Yawmsaub yog Vajtswv, nws yog tus uas tsim peb, peb yog nws li, peb yog nws haiv neeg, thiab yog pab yaj hauv nws lub tshav zaub. Cia li ua nws tsaug nkag nws lub rooj loog mus rau hauv, cia li hu nkauj qhuas nkag mus rau hauv nws tej tshav puam tuam tsev. Cia li ua nws tsaug, cia li qhuas nws lub npe. Yawmsaub zoo kawg nkaus, nws txojkev hlub ruaj khov nyob mus ib txhis, thiab nws txojkev ncaj uas tso siab tau nyob mus rau txhua tiam. Kuv yuav hu nkauj txog qhov uas kuv hlub koj thiab qhov uas kuv txiav txim ncaj. Au Yawmsaub, kuv yuav hu nkauj rau koj. Kuv yuav rau siab ntso ua kuv lub neej kom tsis muaj chaw thuam li. Thaum twg koj yuav los cuag kuv? Kuv yuav ua lub siab dawb paug rau hauv kuv lub tsev. Kuv yuav tsis kheev ib yam phem twg tshwm los rau ntawm kuv lub qhov muag. Kuv ntxub cov neeg fav xeeb tej haujlwm, lawv tej haujlwm yuav tsis kis kuv kiag li. Kuv yuav tsis ua siab nkhaus, kuv yuav tsis ntsig txog txojkev phem kiag li. Tus uas pheej nyiag xyav kwvtij zej zog mas kuv yuav muab rhuav tshem. Tus uas muab hlob thiab siab khav theeb mas kuv tsis yuav kiag li. Kuv yuav tsa muag zaj saib cov uas siab xib rau Vajtswv hauv lub tebchaws xwv lawv thiaj nrog kuv nyob tau. Tus uas ua lub neej tsis muaj chaw thuam thiaj tau los ua num rau kuv. Tus uas dag ntxias yuav tsis tau nyob hauv kuv lub tsev. Tus uas rua ncauj hais lus dag yuav tsis nyob ruaj ntawm kuv xubntiag. Txhua tagkis kuv yuav muab cov neeg limhiam sawvdaws hauv lub tebchaws ua kom puam tsuaj tag, thiab txiav cov neeg ua phem sawvdaws tawm ntawm Yawmsaub lub nroog. Au Yawmsaub, thov mloog kuv tej lus thov, thov cia kuv lub suab quaj tuaj txog koj. Thov tsis txhob fee plhu ntawm kuv rau hnub uas kuv raug kev nyuaj siab. Thov tig ntsej mloog kuv, thov teb kuv sai sai rau hnub uas kuv quaj thov koj. Kuv hnub nyoog ploj yam li pa ncho, kuv tej pob txha kub yam li cub tawg. Kuv lub siab raug muab nias thiab qhuav tag zoo li tej nroj tsuag, kuv tsis nco noj mov kiag li. Vim yog kuv lub suab ntsaj laws, kuv tej daim tawv thiaj lo rau kuv tej pob txha. Kuv zoo li ib tug liaj uas nyob hauv tebchaws moj sab qhua, thiab zoo li ib tug plas uas nyob hauv tej chaw do cuas. Kuv pw tsis tsaug zog, kuv zoo li tus noog uas nyob twm kawv saum ruv tsev. Kuv tej yeeb ncuab thuam luag kuv tas hnub tas hmo, cov uas tuam mom kuv tuav kuv lub npe tsawm foom. Kuv noj tshauv ib yam li noj mov, kuv haus dej ntxuag kua muag, vim yog koj txojkev chim kev npau taws. Koj muab kuv tsa sawv los thiab muab kuv laim pov tseg. Kuv lub hnub nyoog zoo yam nkaus li tus duab ntxoov ntxoo rau thaum yuav tsaus ntuj, kuv qhuav zuj zus yam li tej nroj tsuag. Au Yawmsaub, koj nyob saum lub zim txwv mus ib txhis, koj lub npe nyob mus rau txhua tiam. Koj yuav sawv tsees khuvleej Xi‑oo, vim yog txog lub sijhawm uas yuav hlub nws, lub sijhawm uas teem cia los txog lawm. Koj cov qhev nyiam nws tej pob zeb heev, thiab khuvleej nws tej hmoov av. Ib tsoom tebchaws yuav ntshai Yawmsaub lub npe, thiab txhua tus vajntxwv hauv ntiajteb yuav ntshai koj lub hwjchim ci ntsa iab. Rau qhov Yawmsaub yuav tsim Xi‑oo dua tshiab, nws yuav ua nws lub hwjchim ci ntsa iab tshwm rau sawvdaws pom. Nws yuav saib hlob cov pluag uas tsis muaj ib yam dabtsi tej lus thov, thiab yuav tsis tso lawv tej lus taij thov pov tseg. Cia li muab zaj no sau tseg cia rau tiam tom qab uas yuav los, kom tej neeg uas tseed tsis tau yug los thiaj tau qhuas Yawmsaub. Nws nyob saum nws lub chaw siab uas dawb huv saib tuaj, Yawmsaub saib saum ntuj tuaj rau lub ntiajteb, nws thiaj hnov tau tej neeg uas raug muab kaw lub suab ntsaj, thiab tso tau cov uas raug txim tuag kom dim. Neeg thiaj piav Yawmsaub lub npe rau hauv Xi‑oo, thiab qhuas nws rau hauv Yeluxalees, rau thaum ib tsoom neeg thiab ib tsoom tebchaws tuaj txoos ua ke pe hawm Yawmsaub. Nws lov kuv lub zog ntawm ib tog kev, thiab txiav kuv lub hnub nyoog kom luv. Kuv hais tias, “Au kuv tus Vajtswv, thov tsis txhob coj kuv mus rau thaum kuv hnub nyoog tseed nyob ib nrab neej. Koj lub hnub nyoog nyob ib tiam dhau ib tiam mus ib txhis.” Thaum ub koj tiag taw rau lub ntiajteb, thiab lub ntuj yog koj txhais tes ua. Tej ntawd yuav puam tsuaj tag, tiamsis koj nyob ruaj mus, tej ntawd yuav txawj qub yam li tej tsoos tsho. Koj muab tej ntawd hloov yam li tej tsoos tsho, mas tej ntawd yuav txawj ploj mus. Tiamsis koj tseed zoo li qub, thiab koj lub niaj lub xyoo tsis txawj kawg. Koj cov qhev tej tub ki yuav nyob ruaj, thiab koj yuav tsa lawv caj ces nyob rau ntawm koj xubntiag. Kuv tus ntsuj plig 'e, cia li qhuas Yawmsaub, kuv lub siab lub ntsws, cia li qhuas nws lub npe uas dawb huv. Kuv tus ntsuj plig 'e, cia li qhuas Yawmsaub, thiab pheej nco ntsoov nws tej txiaj ntsig huvsi. Nws yog tus uas zam koj tej kev txhaum huvsi, thiab kho koj tej mob kom zoo huvsi. Nws txhiv koj txojsia dim hauv qhov tuag, thiab muab txojkev hlub uas ruaj khov thiab txojkev khuvleej rau koj ntoo. Nws pub tej yam zoo txaus nkaus koj lub siab mus tag koj sim neej, koj thiaj rov muaj lub neej hluas zoo li tus dav. Yawmsaub tsa txhua tus uas raug quab yuam txojcai, thiab tu plaub ncaj rau lawv. Nws qhia nws tej kev rau Mauxe paub, thiab qhia nws tej haujlwm rau cov Yixayee pom. Yawmsaub muaj siab khuvleej thiab muaj kev hlub, nws tsis chim sai, nws muaj txojkev hlub ruaj khov nplua mias, Nws yuav tsis cem mus li, nws yuav tsis chim mus ib txhis. Nws tsis ua rau peb raws li peb lub txim, lossis ua pauj rau peb raws li peb tej kev txhaum. Lub ntuj nyob siab saum lub ntiajteb npaum li cas, nws txojkev hlub ruaj khov muaj rau cov uas paub ntshai nws siab npaum li ntawd. Hnub tuaj nyob deb hnub poob npaum li cas, nws daws peb tej kev fav xeeb pov tseg deb npaum li ntawd. Leejtxiv khuvleej nws tej menyuam li cas, Yawmsaub khuvleej cov uas hwm thiab paub ntshai nws ib yam li ntawd. Rau qhov nws paub tias peb raug tsim los li cas, nws nco ntsoov tias peb yog hmoov av xwb. Neeg lub hnub nyoog zoo ib yam li tej nroj tsuag, uas tuaj hlob mos nyoos zoo li tej paj nroj hauv teb. Cua ntsawj dhau lawm ces txawm ploj tag, nws lub chaw twb tsis paub nws lawm. Tiamsis Yawmsaub txojkev hlub ruaj khov muaj nyob ib txhis thaum ub los tsis txawj kawg rau cov uas hwm thiab paub ntshai nws, thiab nws txojkev ncaj ncees muaj rau lawv tej xeeb ntxwv mus li, yog cov uas tuav rawv nws tej lus cog tseg thiab nco ntsoov ua raws li nws tej lus nkaw. Yawmsaub tsa nws lub zwm txwv nyob ruaj saum ntuj, nws ua vajntxwv kav txhua yam huvsi. Nej cov uas yog nws cov tub txib saum ntuj 'e, nej cov uas saib loj siab tuab thiab ua raws li nws tej lus, thiab mloog nws lub suab uas nws hais, nej cia li qhuas Yawmsaub. Nws cov neeg sawvdaws 'e, nej cov uas ua koom tu nws thiab ua raws li nws lub siab, cia li qhuas Yawmsaub. Txhua yam uas nws tsim los lawd thoob txhua qhov uas nws kav, cia li qhuas Yawmsaub. Kuv tus ntsuj plig 'e, cia li qhuas Yawmsaub. Kuv tus ntsuj plig 'e, cia li qhuas Yawmsaub. Au kuv tus Vajtswv Yawmsaub, koj loj kawg nkaus. Koj muab koob meej thiab hwjchim meej mom los hnav. Koj muab qhov kaj los npua ib yam li hnav tsho, koj nthuav lub ntuj ib yam li nthuav lub tsev ntaub. Koj khaum las ua koj lub chaw nyob rau txheej saum cov dej nag, koj muab huab ua tsheb rau koj caij, koj caij tej cua li kooj tis. Koj txib tej cua ua koj li tub xa xov, koj siv tej nplaim taws ci laim lias ua koj cov qhev. Koj txawb lub ntiajteb rau saum tej taw tiag, thiaj tsis ua zog ib txhis li. Koj muab dej tob tob los laum nkaus nws yam li hnav tsoos, tej dej nyob saum tej roob. Thaum koj nthe nqho, dej cia li ntws ceev, thaum hnov koj lub suab xob nthe, dej cia li khiav. Tej dej ntws saum tej roob nqes los rau tej hav, mus rau lub chaw uas koj tu cia rau dej teev. Koj tu ciam tsis kheev dej hla dhau, kom thiaj tsis nyab saum lub ntiajteb dua li lawm. Koj ua hauv dej txhawv ntws rau hauv tej hav, tej dej thiaj ntws raws tej kwj ha, pub rau tej tsiaj qus huvsi hauv hav zoov tau haus, tej nees luav qus kuj tau haus daws nqhis. Ntawm tej ntug dej tej noog saum nruab ntug tau ua zes nyob, thiab quaj zom zaws saum tej ceg ntoo. Koj nyob saum koj tej chaw siab ywg dej rau saum tej roob, lub ntiajteb thiaj tsau npo tej haujlwm uas koj ua. Koj ua rau nroj tsuag tuaj rau tej tsiaj txhu tau noj, thiab ua tej zaub tuaj rau neeg tu kom lawv thiaj ua tau zaub noj tuaj hauv lub ntiajteb, thiab ua tau cawv txiv hmab uas ua rau neeg zoo siab, thiab ua tau roj aulib uas ua rau lawv ntsej muag ci, thiab ua tej ncuav uas txhawb neeg lub siab muaj zog. Yawmsaub tej ntoo tau dej tsau npo, yog cov ntoo ciab hauv Lenpanoo uas nws cog cia. Tej noog ua zes rau saum tej ntoo ntawd, tej os dej ua chaw nyob rau saum tej ntoo thuv. Tej roob siab yog sai li chaw nyob, tej roob tsuas yog tej ntxim tsua li chaw nkaum. Koj tsim lub hli los suav caij suav nyoog. Lub hnub kuj paub lub sijhawm uas yuav poob qho. Koj ua rau muaj qhov tsaus thiab yog hmo ntuj, mas tej tsiaj qus huvsi hauv hav zoov nkag tawm tuaj. Tej thav tsov ntxhuav nyooj laws nrhiav nqaij tom, thiab nrhiav noj ntawm Vajtswv. Thaum hnub tawm lawv kuj mus lawm, mus pw rau hauv lawv tej chaw nkaum. Neeg kuj tawm mus ua haujlwm, mus ua haujlwm khwv txog tsaus ntuj. Au Yawmsaub, tej uas koj ua los lawd ntau kawg nkaus li. Koj muaj tswvyim tsim tej ntawd huvsi. Lub ntiajteb puv nkaus tej uas koj tsim. Tim ub muaj hiavtxwv loj thiab dav, muaj tsiaj nruab deg ya laim pes txias suav tsis txheeb nyob hauv, muaj tej tsiaj loj tsiaj me huvsi. Tej nkoj txwg mus los saum nplaim dej, thiab muaj niag tsiaj Leviathas uas koj tsim cia kom ua si qhov ntawd. Tej tsiaj ntawd huvsi tsa muag saib koj, vam koj pub lawv tau noj raws sijhawm. Thaum koj pub lawd lawv kuj khaws cia, thaum koj cev tes, lawv kuj tau noj tej uas zoo tsau npo. Thaum koj fee plhu lawd, lawv kuj poob siab nthav, thaum koj muab lawv tej pa rho lawm, lawv kuj tuag thiab rov mus ua hmoov av. Thaum koj tso koj tus ntsuj plig mus, lawv kuj raug muab tsim, thiab koj tsim txhua yam saum lub ntiajteb dua tshiab. Thov Yawmsaub lub hwjchim ci ntsa iab nyob mus ib txhis, thov Yawmsaub zoo siab xyiv fab rau tej uas nws tsim los. Thaum nws tsa muag ntsia lub ntiajteb, lub ntiajteb kuj ntseeg nkaws, nws kov tej roob, tej roob kuj ncho pa tuaj. Kuv muaj txojsia nyob ntev li cas, kuv yuav hu nkauj rau Yawmsaub mus li, kuv yuav hu nkauj qhuas kuv tus Vajtswv rau thaum kuv tseem ciaj sia nyob. Thov cia tej uas kuv xav no hum nws lub siab, rau qhov kuv xyiv fab rau hauv Yawmsaub. Thov cia cov neeg muaj txim raug muab ntxuav tseg hauv lub ntiajteb, thov cia tej neeg limhiam ploj tag mus. Kuv tus ntsuj plig 'e, cia li qhuas Yawmsaub, cia li qhuas Yawmsaub lauj! Cia li ua Yawmsaub tsaug, cia li thov hu nws lub npe, cia li piav nws tes haujlwm rau txhua haiv neeg. Cia li hu nkauj rau nws, hu nkauj qhuas nws, cia li piav txog txhua yam haujlwm phimhwj uas nws ua. Cia li khav txog nws lub npe uas dawb huv, cia cov uas nrhiav Yawmsaub zoo siab xyiv fab. Cia li nrhiav Yawmsaub thiab nrhiav nws lub zog. Nrhiav nws lub xubntiag tsis tu li. Nws yog Yawmsaub, yog peb tus Vajtswv. Nws tej lus txiav txim muaj nyob thoob plaws hauv ntiajteb. Nws yeej nco ntsoov nws tej lus cog tseg mus ib txhis, yog tej lus uas nws qhia mus rau ib txhiab tiam neeg, yog tej lus uas nws cog tseg rau Aplahas, thiab yog tej uas nws yeem lus cog twv rau Yiha, yog tej uas Vajtswv cog lus ruaj nreeg cia rau Yakhauj ua kab ke, yog cog rau Yixayee ua lus cog tseg mus ib txhis, hais tias, “Kuv yuav pub lub tebchaws Khana‑as rau koj, ua nej qub txeeg qub teg mus li.” Thaum lawv tseem tsis muaj neeg coob, yeej yog tsawg tsawg li tiag, lawv tsuas yog los ua qhua nyob xwb, tsiv mus tsiv los rau haiv neeg ub rau haiv neeg no, rau lub tebchaws ub rau lub tebchaws no. Yawmsaub tsis kheev leejtwg quab yuam lawv, vim saib rau lawv nws thiaj txwv tej vajntxwv hais tias, “Tsis txhob kov tej uas kuv hliv roj tsa lawd thiab tsis txhob ua li cas rau kuv cov xibhwb cev kuv lus.” Thaum Vajtswv ua kom muaj kev tshaib nqhis los rau lub tebchaws, thiab ua lawv tej mov noj tsis muaj tag, nws txib ib tug txivneej ua lawv ntej mus, yog Yauxej uas raug muab muag ua qhev. Nws txhais kotaw raug saw hlau khi mob hloov ntshav, nws lub caj dab raug ib rab cuab hlau. Yawmsaub tej lus tau sim nws mus txog thaum tej uas nws hais txog tshwm tiav tag. Vajntxwv Iyi txib neeg mus tso nws dim, tus uas kav ib tsoom neeg tso nws dim nyob ywj pheej. Vajntxwv tsa nws ua tus nom loj uas saib xyuas vajntxwv lub tsev, thiab ua tus uas kav vajntxwv txhua tsav txhua yam, xwv nws thiaj qhia tau vajntxwv cov thawj raws li nws lub siab nyiam thiab qhia kev txawj ntse rau vajntxwv cov kev txwj laus. Mas Yixayee thiaj tau los rau hauv Iyi tebchaws, Yakhauj thiaj tau los ua qhua nyob hauv Has lub tebchaws. Yawmsaub ua rau nws haiv neeg huaj vam coob, thiab pub lawv muaj zog heev dua lawv tej tshawj chim. Nws ua rau cov Iyi lub siab tig rov ntxub Vajtswv haiv neeg, thiab ua rau lawv siv tswvyim phem rau Vajtswv cov tub qhe. Nws txib Mauxe uas yog nws tus qhev thiab Aloo uas Vajtswv xaiv cia. Ob tug ua Vajtswv tej txujci tseem ceeb tshwm rau hauv lawv, thiab ua txujci phimhwj rau hauv Has lub tebchaws. Nws tso qhov tsaus ntuj los ua rau lub tebchaws tsaus ntuj nti. Lawv tawv nyom Vajtswv tej lus. Nws thiaj muab lawv tej dej txia ua ntshav, thiab ua rau lawv tej ntses tuag tag. Qav nce tuaj coob coob puv nkaus lub tebchaws, muaj kiag rau hauv vajntxwv txhua chav tsev. Nws hais mas yoov mos ntsuab kuj ya tsaus nti los, thiab muaj yoov qaib thoob plaws hauv lawv lub tebchaws. Nws tso lawg nyob nag chaw los rau lawv, thiab ua xob laim ci nplas thoob plaws hauv lawv lub tebchaws. Nws nplawm lawv tej txiv hmab txiv cev, thiab nplawm lawv tej ntoo hauv lub tebchaws lov tag. Nws hais xwb mas kooj txig ya tuaj, kooj tshuab ya tuaj coob suav tsis txheeb li, tuaj noj tej zaub thiab nroj tsuag hauv lub tebchaws tag nrho, thiab noj tej qoob loo hauv tej teb. Nws muab lawv tej tub hlob tua huvsi hauv lawv lub tebchaws, uas yog lawv thawj lub zog. Nws coj cov Yixayee tawm mus, lawv coj tau nyiaj tau kub mus. Tsis muaj ib tug hauv lawv xeem dawm kev li. Thaum lawv ncaim mus lawm cov Iyi kuj zoo siab heev, vim yog lawv ntshai rwg cov Yixayee. Nws muab tauv huab los roos lawv thiab nws muab hluavtaws ci rau lawv pom kev hmo ntuj. Lawv thov mas Vajtswv coj noog ws los thiab pub mov saum ntuj nplua mias rau lawv noj. Nws qheb qhov zeb mas dej txhawv ntws los, ntws mus rau hauv ntuj nrag teb do ib yam nkaus li ib tug niag dej, vim nws nco txog nws tej lus cog tseg uas dawb huv thiab nws tus qhev Aplahas. Vajtswv thiaj li coj nws haiv neeg tawm mus ua xyiv fab hlo, coj cov uas nws xaiv cia lawd mus hu nkauj laws. Nws muab lwm haiv neeg tej tebchaws pub rau lawv, lawv tau tej uas luag khwv tseg ua lawv tug, xwv lawv thiaj li tuav rawv nws tej kab ke thiab ua raws li nws txoj kevcai. Cia li qhuas Yawmsaub. Cia li qhuas Yawmsaub. Cia li ua Yawmsaub tsaug, vim nws zoo kawg. Nws txojkev hlub ruaj khov nyob mus ib txhis. Leejtwg yuav piav tag Yawmsaub tej haujlwm phimhwj thiab qhia nws tej haujlwm huvsi uas tsim nyog qhuas? Cov uas tuav rawv kev txiav txim ncaj thiab ua ncaj ncees txhua lub sijhawm, kuj tau nyob kaj siab lug. Au Yawmsaub, thaum koj hlub koj haiv neeg, thov nco txog kuv. Thaum koj tso lawv dim, thov pab kuv thiab, kom kuv thiaj li pom cov neeg uas koj xaiv cia lawd kev vam meej, kom kuv thiaj tau nrog koj lub tebchaws zoo siab xyiv fab, thiab nrog cov uas yog koj qub txeeg qub teg khav tau. Peb thiab peb tej poj koob yawm txwv tau ua txhaum muaj txim lawm, peb tau ua txhaum, peb tau ua phem. Thaum peb tej poj koob yawm txwv nyob hauv Iyi tebchaws lawv tsis quav ntsej koj tej haujlwm phimhwj, lawv tsis nco txog koj txojkev hlub ruaj khov uas muaj nplua mias, lawv tseem fav xeeb rau tus Loj Dua Ntais ntawm hiavtxwv uas yog Hiavtxwv Liab. Txawm li cas los nws tseem cawm lawv dim vim yog saib rau nws lub npe, kom nws thiaj qhia tau nws tus hwjchim uas loj kawg nkaus rau lawv paub. Nws nthe nqho mas dej Hiavtxwv Liab cia li qhuav qhawv, nws coj lawv hla hauv qab thu yam nkaus li hla ntuj nrag teb do. Nws thiaj cawm lawv dim hauv cov tshawj chim txhais tes, thiab tso lawv dim ntawm lawv cov yeeb ncuab txhais tes. Dej nyab kiag cov uas tawm tsam lawv, tsis tshuav ib tug li. Lub sijhawm ntawd lawv ntseeg Yawmsaub tej lus, lawv hu nkauj qhuas nws. Tiamsis tsis ntev lawv kuj tsis nco qab nws tej haujlwm lawm, lawv tsis tos saib nws yuav taw qhia li cas. Nyob hauv tebchaws moj sab qhua mas lawv nqhis heev, lawv thiaj sim Vajtswv hauv ntuj nrag teb do. Nws pub raws li lawv thov tiamsis nws kuj tso mob phem los raug lawv. Thaum cov neeg hauv lub zos khib Mauxe thiab Aloo uas yog Yawmsaub tus qhev dawb huv, ces av cia li to qhov ntuj nqos kiag Dathas thiab txhub Anpilas pab neeg huvsi. Hluavtaws kuj poob los rau saum lawv cov ntawd kub kiag cov neeg limhiam huvsi. Cov Yixayee ua ib tug dab mlom thav nyuj ntawm Haule thiab pe tus dab mlom uas lawv nchuav ntawd. Lawv muab Vajtswv lub hwjchim ci ntsa iab pauv tus dab mlom txiv nyuj uas yog tsiaj noj zaub. Lawv tsis nco qab Vajtswv uas yog lawv tus cawmseej, uas tau ua tej haujlwm loj heev rau hauv Iyi tebchaws, thiab ua tej haujlwm phimhwj hauv Has lub tebchaws thiab tej uas txaus ntshai kawg ntawm Hiavtxwv Liab. Vim li no nws thiaj hais tias nws yuav muab lawv ua kom puam tsuaj, tsuas yog muaj Mauxe uas Vajtswv tau xaiv cia lawd sawv los tiv thaiv ntawm Vajtswv xubntiag thiaj li tav tau Vajtswv txojkev npau taws tsis ua kom puam tsuaj xwb. Dhau ntawd lawv kuj saib tsis taus lub tebchaws uas zoo ua noj, lawv tsis ntseeg tej lus uas Vajtswv cog tseg. Lawv yws tuj taws hauv lawv tej tsev ntaub, lawv tsis mloog Yawmsaub lub suab. Vim li no Yawmsaub thiaj li tsa tes thiab cog lus twv rau lawv tias nws yuav ua rau lawv tuag tag rau hauv tebchaws moj sab qhua, thiab ua rau lawv caj ces tawg ri ua sab ua sua mus rau hauv txhua haiv neeg, thiab ntiab lawv mus nyob thoob plaws txhua lub tebchaws. Lawv kuj mus zwm rau tus dab Npa‑as ntawm Pe‑au, thiab noj tej uas muab xyeem rau tej dab mlom uas tsis muaj sia. Tej uas lawv ua ntawd zes ua rau Yawmsaub chim heev, thiaj muaj mob phem tshwm los raug lawv. Mas Fineha thiaj sawv tsees cheem, mas tej mob ntawd thiaj tsis muaj ntxiv lawm. Tej uas nws ua ntawd Vajtswv suav tias yog kev ncaj ncees rau Fineha, ib tiam dhau ib tiam mus ib txhiab ib txhis. Lawv ua rau Vajtswv chim ntawm dej Melinpa, mas qhov uas lawv ua li ntawd puas tsuas Mauxe, vim yog lawv ua rau Mauxe nyuaj siab nws thiaj li ua ncauj sai lawm. Lawv tsis muab lwm haiv neeg ua kom puam tsuaj raws li Vajtswv hais kom lawv ua tiamsis lawv mus nrog lwm haiv neeg nyob sib xyaw thiab xyaum ua raws li luag ua. Lawv ua koom tu luag tej dab mlom uas ua yej ua ntxiab cuab lawv. Lawv tua lawv tej tub tej ntxhais xyeem rau dab. Lawv muab cov uas tsis txhaum tej ntshav nchuav, yog lawv tej tub tej ntxhais li ntshav uas lawv muab tua xyeem rau Khana‑as tej dab mlom. Ntshav thiaj puas tsuas lub tebchaws qias tsis huv lawm. Qhov uas lawv ua li ntawd ua rau lawv qias tsis huv, lawv ua li ntawd mas lawv zoo ib yam li poj muag cev. Yawmsaub thiaj li npau taws rau nws haiv neeg, thiab ntxub nws qub txeeg qub teg. Nws thiaj muab lawv rau hauv ib tsoom tebchaws txhais tes mas tej neeg uas ntxub lawv thiaj kav lawv. Lawv cov yeeb ncuab quab yuam lawv thiab lawv poob rau hauv luag kev tswjhwm. Yawmsaub tso lawv dim ntau zaus tiamsis lawv pheej txhob txwm fav xeeb, lawv poob qes kawg li vim yog lawv ua txhaum. Txawm li cas los thaum Vajtswv hnov lawv lub suab quaj thov nws saib rau lawv tej kev txom nyem nyuaj siab. Yog saib rau lawv, Vajtswv thiaj nco txog nws tej lus cog tseg, thiab vim nws txojkev hlub ruaj khov uas muaj nplua mias, nws thiaj rov khuvleej lawv. Nws ua rau txhua tus uas ntes lawv cia li khuvleej lawv. Au Yawmsaub uas yog peb tus Vajtswv, thov koj cawm peb dim lauj, thov qaws peb hauv txhua lub tebchaws rov los es peb yuav ua tsaug koj lub npe uas dawb huv thiab khav qhov uas peb qhuas koj. Cia li qhuas Yawmsaub uas yog Yixayee tus Vajtswv ib txwm thaum ub los mus ib txhis li. Cia ib tsoom neeg hais tias “Amee.” Cia li qhuas Yawmsaub. Cia li ua Yawmsaub tsaug, vim nws zoo kawg, nws txojkev hlub ruaj khov nyob mus ib txhis. Cia cov uas Yawmsaub txhiv dim lawd hais li ntawd, yog cov uas nws txhiv dim hauv yeeb ncuab txhais tes los thiab sau tawm hauv tej tebchaws sab hnub tuaj sab hnub poob, sab ped sab nrad huvsi los ua ke. Muaj ib txhia mus mus los los hauv ntuj nrag teb do, nrhiav tsis tau kev mus rau hauv lub moos twg uas lawv nyob tau. Lawv tshaib plab nqhis dej, lawv tus ntsuj plig qaug zog tag rau hauv lawv. Thaum lawv raug ceeblaj lawv quaj thov Yawmsaub, nws kuj tso lawv dim lawv tej kev txom nyem nyuaj siab. Nws coj lawv taug txojkev ncaj, mus txog ib lub moos uas lawv nyob tau. Cia lawv ua Yawmsaub tsaug vim nws txojkev hlub ruaj khov thiab nws tej haujlwm phimhwj uas nws ua pab ib tsoom neeg. Tus uas nqhis, nws kuj pub kom txaus, tus uas tshaib, nws kuj pub tej yam zoo kom tsau. Ib txhia nyob hauv qhov tsaus ntuj thiab qhov tsaus dub nciab, yog cov uas raug kaw txom nyem thiab raug saw hlau khi, vim lawv fav xeeb Vajtswv tej lus, thiab saib tsis taus tus uas Loj Dua Ntais tej lus qhia. Vajtswv ua rau lawv lub siab qaug zog vim ua haujlwm hnyav, lawv ntog tag tsis muaj leejtwg pab. Thaum lawv raug ceeblaj lawv quaj thov Yawmsaub, nws kuj tso lawv dim lawv tej kev txom nyem nyuaj siab. Nws coj lawv tawm hauv qhov tsaus dub nciab thiab qhov tsaus ntuj nti los. thiab muab tej saw uas khi lawv tu pov tseg. Cia lawv ua Yawmsaub tsaug vim nws txojkev hlub ruaj khov thiab nws tej haujlwm phimhwj uas nws ua pab ib tsoom neeg. Nws tsoo tej qhov rooj tooj liab, thiab txiav tej las hlau pov tseg. Ib txhia kuj ruam vim lawv tej kev txhaum txim. Vim tim lawv tej kev txhaum lawv thiaj raug txom nyem. Lawv ntxub txhua yam zaub mov, lawv mus ze lub qhov rooj kev tuag. Thaum lawv raug ceeblaj lawv quaj thov Yawmsaub, nws kuj tso lawv dim lawv tej kev txom nyem nyuaj siab. Nws xa nws tej lus mus thiab kho lawv tej mob thiab tso lawv dim kev puam tsuaj. Cia lawv ua Yawmsaub tsaug vim nws txojkev hlub ruaj khov thiab nws tej haujlwm phimhwj uas nws ua pab ib tsoom neeg. Cia lawv ua kevcai xyeem ua nws tsaug, thiab hu nkauj xyiv fab piav txog tej uas nws ua los lawd. Ib txhia kuj caij nkoj mus hauv hiavtxwv, nrhiav noj hauv dej hiavtxwv uas loj. Lawv pom tej uas Yawmsaub ua yog nws tej haujlwm phimhwj hauv hiavtxwv uas tob. Nws hais lus thiab ua kom muaj cua daj cua dub ntsawj, ua rau dej hiavtxwv ntas tej niag nthwv. Cov neeg ntawd nce mus nto ntuj thiab poob rau hauv qhov uas tob heev. Lawv lub siab ntsws yaj tag rau tej xwm txheej phem uas lawv raug. Lawv ntog yoj yuj yees ua pig ua poog yam li qaug cawv, thiab kawg tswvyim lawm. Mas thaum lawv raug ceeblaj lawv quaj thov Yawmsaub, nws kuj cawm lawv dim lawv tej kev txom nyem nyuaj siab. Nws ua rau cua daj cua dub tu, thiab tej nthwv dej hiavtxwv kuj tus lawm. Lawv txawm zoo siab vim yog lawv nyob tus yees lawm, nws kuj coj lawv los rau lub chaw uas lawv xav mus. Cia lawv ua Yawmsaub tsaug vim nws txojkev hlub ruaj khov thiab nws tej haujlwm phimhwj uas nws ua pab ib tsoom neeg. Cia lawv qhuas ntxhias nws rau hauv ib tsoom neeg uas tuaj txoos ua ke, thiab qhuas nws rau hauv cov kev txwj laus uas tuaj sablaj. Nws muab tej niag dej ntxeev ua ntuj nrag teb do, thiab tej qhov dej txhawv ntxeev ua av qhuav nkig nkuav, thiab muab lub tebchaws uas qoob loo zoo ntxeev ua chaw do cuas thiab daw ntsev vim tim cov neeg uas nyob lub tebchaws ntawd kev limhiam. Nws muab ntuj nrag teb do ntxeev ua pas dej, thiab tebchaws qhuav nkig nkuav ntxeev ua qhov dej txhawv. Nws pub cov neeg tshaib tau nyob qhov ntawd, mas lawv tsim tsa lub moos ua lawv lub chaw nyob. Lawv tseb noob rau hauv teb thiab cog vaj txiv hmab, mas tau qoob ntsu heev. Nws foom koob hmoov rau lawv, lawv thiaj li huaj vam coob, thiab nws tsis cia lawv tej tsiaj txhu tsawg zuj zus. Thaum lawv raug luag muab rhuav tsawg zuj zus thiab raug kev quab yuam, raug tej kev ceeblaj thiab raug tej kev nyuaj siab ua rau lawv poob qes, mas Vajtswv saib tsis taus cov uas ua thawj, thiab ua rau cov thawj ntawd mus mus los los hauv tej chaw do cuas uas tsis muaj kev taug. Tiamsis nws tsa cov pluag sawv hauv qhov txom nyem los, thiab ua rau lawv tej tub ki huaj vam coob yam li tej pab yaj. Cov neeg ncaj ncees pom mas zoo siab, thiab cov neeg limhiam sawvdaws kaw qhov ncauj. Leejtwg txawj ntse, cia nws ua tib zoo mloog tej no, cia neeg xav txog Yawmsaub txojkev hlub uas ruaj khov. Au Vajtswv, kuv lub siab nyob ruaj khov, kuv lub siab ruaj khov tiag. Kuv yuav hu nkauj, kuv lub siab yuav seev suab hu nkauj. Nkauj nog ncas loj thiab nkauj nog ncas me 'e, cia li tsim dheev, kuv yuav tsa kom kaj ntug tsim dheev los. Au Yawmsaub, kuv yuav ua koj tsaug rau hauv ib tsoom neeg, kuv yuav hu nkauj qhuas koj rau hauv ib tsoom tebchaws. Vim yog koj txojkev hlub uas ruaj khov siab dhau qaum ntuj, thiab koj txojkev ncaj uas tso siab tau siab mus txog cov huab. Au Vajtswv thov cia koj raug txhawb nqa siab dhau lub ntuj, thov koj lub hwjchim uas ci ntsa iab nthuav thoob plaws ntiajteb. Thov koj txhais tes xis pab thiab thov koj teb kuv xwv cov uas koj hlub thiaj li tau dim. Vajtswv hais ntawm lub chaw pe hawm nws tias, “Kuv yuav zoo siab hlo muab lub moos Sekhee faib thiab muab lub hav Xukhau faib. Kile‑a tebchaws yog kuv tug, Manaxe tebchaws yog kuv li, Efa‑i tebchaws yog kuv lub mom hlau, Yuda tebchaws yog kuv tus cwj nrig, Mau‑a tebchaws yog lub phaj dej uas kuv ntxuav cev, kuv laim kuv txhais khau rau saum Edoo tebchaws, kuv qw lub suab uas kov yeej rau saum Filixatee tebchaws.” Leejtwg yuav coj kuv mus rau hauv lub moos uas muaj ntsa loog thaiv? Leejtwg yuav coj kuv mus rau hauv Edoo? Au Vajtswv, koj muab peb tso tseg lawm lov? Au Vajtswv, koj tsis nrog peb cov tub rog tawm mus lov? Thov koj pab peb tiv cov tshawj chim, rau qhov neeg pab mas tsis tau qabhau kiag li. Yog peb nrog Vajtswv mas peb yuav kov yeej, nws yog tus uas yuav tsuj pes ntiag peb cov tshawj chim. Au Vajtswv, tus uas kuv qhuas, thov koj tsis txhob cia li nyob ntsiag to. Vim yog cov neeg limhiam uas dag ntxias rua ncauj tawm tsam kuv, thiab tus nplaig txawj dag iab hiam kuv. Lawv hais tej lus ntxub ntxaug vij vog kuv, thiab kuv twb tsis txhaum los lawv lam nkaug kuv. Lawv kom kuv pauj qhov uas kuv hlub lawv, thiab kuv tsuas muaj uas thov Vajtswv xwb. Lawv ua phem pauj tej uas kuv ua zoo rau lawv, lawv muab txojkev ntxub ntxaug los pauj kuv tej kev hlub. Thov nrhiav ib tug neeg phem tom nws, thiab cia ib tug nyob ntawm nws sab xis kom nws. Thaum uas hais plaub, thov kom nws yog tus uas txhaum, thiab cia nws tej lus thov Vajtswv kuj txhaum thiab. Thov cia nws lub caij nyoog ua neej nyob tsis ntev, thov kom muaj dua ib tug los nyob nws chaw ua haujlwm. Thov cia nws tej menyuam ua ntsuag nos thiab nws tus pojniam ua poj ntsuam. Cia nws tej menyuam ua loj leeb thov khawv, thov cia lawv raug muab ntiab tawm hauv tej qab zeb qab ca uas lawv nkaum mus. Thov cia tus uas nws tshuav nqe tuaj sau kiag nws tej qhov txhia chaw huvsi mus, thov cia luag tej tuaj lws tej uas nws khwv tau huvsi mus. Thov kom tsis txhob muaj ib tug hlub nws, thiab tsis txhob muaj ib tug khuvleej nws tej menyuam ntsuag nos. Thov cia nws caj ces raug txiav tu noob, thov cia tiam tom qab nws tej npe ploj mus li. Thov kom Yawmsaub nco ntsoov nws tej poj koob yawm txwv tej kev txhaum txim, thiab thov tsis txhob ntxuav nws niam lub txim. Thov cia lub txim txhaum ntawd nyob ntawm Yawmsaub lub xubntiag mus li, thov Yawmsaub ua kom tsis txhob muaj leejtwg nco txog lawv tej npe hauv ntiajteb mus li. Tus ntawd tsis nco qhov uas nws yuav hlub luag li, tsuas yog tsim txom tej neeg pluag thiab txom nyem thiab lwj siab mus txog tuag li. Nws nyiam foom tsis zoo rau luag, cia nws raug foom tsis zoo thiab. Nws tsis nyiam foom koob hmoov rau luag, mas cia tej koob hmoov nyob deb ntawm nws. Nws muab tej lus cem foom los hnav ib yam li hnav tsoos tsho, cia tej lus cem foom thawm rau hauv nws lub cev yam nkaus li dej, thiab thawm rau hauv nws tej txha yam nkaus li roj. Thov kom tej lus foom phem zoo yam li cev tsoos tsho uas qhwv nkaus nws lub cev, thiab zoo li txoj siv uas niaj hnub sia zawm lub cev. Thov Yawmsaub muab tej lus cem foom no pauj rau cov uas kom kuv, yog cov uas hais lus phem tawm tsam kuv. Au Yawmsaub uas yog kuv tus Tswv, thov koj saib rau koj lub npe es pab kuv. Vim koj txojkev hlub ruaj khov zoo kawg nkaus, thov cawm kuv dim. Kuv pluag thiab txom nyem, thiab kuv nyob lwj siab ntsuav. Kuv tabtom yuav dua mus yam nkaus li duab ntxoov ntxoo thaum yuav tsaus ntuj, kuv raug muab xyeeb yam nkaus li tus kooj. Kuv lub hauv caug tsis muaj zog vim yog yoo mov, kuv lub cev kuj yuag sem tag lawm. Kuv raug cov uas kom kuv thuam, thaum luag pom kuv, luag luag co hau nto. Au Yawmsaub uas yog kuv tus Vajtswv, thov pab kuv, thov cawm kom kuv dim, raws li koj txojkev hlub uas ruaj khov. Thov ua kom luag paub tias tej no yog koj txhais tes ua. Au Yawmsaub, tej no yeej yog koj ua tiag. Cia lawv foom tsis zoo, tiamsis thov koj foom koob hmoov rau kuv. Cia cov uas tawm tsam kuv poob ntsej muag, thov pub koj tus tub qhe zoo siab. Thov cia txojkev txaj muag qhwv nkaus cov uas kom kuv, thiab cia txojkev poob ntsej muag npog nkaus lawv yam li hnav lub tsho ntev. Kuv yuav tsa ncauj ua Yawmsaub tsaug kawg nkaus, kuv yuav qhuas nws rau hauv ib zeej tsoom uas tuaj txoos ua ke. Rau qhov Yawmsaub nyob rawv ntawm tus uas txom nyem sab xis, kom thiaj cawm tau nws dim ntawm cov uas rau txim tuag rau nws. Yawmsaub hais rau kuv tus tswv tias, “Cia li zaum ntawm kuv sab xis, mus txog thaum kuv muab koj cov yeeb ncuab ua koj lub rooj tiag taw.” Yawmsaub yuav ua rau koj tus cwj uas muaj hwjchim kav hauv Xi‑oo mus dav zuj zus. Cia li ua vajntxwv kav koj cov tshawj chim. Koj cov neeg yuav yeem pub lawv tus kheej rau hnub uas koj coj koj cov tub rog mus rau saum tej roob uas dawb huv. Koj cov tub hluas yuav los cuag koj, ib yam li dej lwg tawm hauv kaj ntug lub plab los. Yawmsaub twb cog lus tawv lawm, nws yuav tsis hloov dua siab li. “Koj ua pov thawj mus ib txhis ib yam li Mekhixede.” Tus Tswv nyob ntawm koj sab tes xis, nws yuav tsoo tej vajntxwv tawg tag rau hnub uas nws npau taws. Nws yuav txiav txim rau ib tsoom tebchaws ua kom muaj cev tuag puv tag, nws yuav tsoo cov uas ua thawj thoob ntiajteb piam tag. Vajntxwv yuav haus tus dej uas ntws raws ntug kev, yog li ntawd nws yuav tsa nws lub taubhau sawv siab. Cia li qhuas Yawmsaub. Kuv yuav ua Yawmsaub tsaug kawg kuv lub siab rau hauv ib tsoom neeg ncaj ncees uas tuaj txoos ua ke. Tej haujlwm uas Yawmsaub ua mas loj kawg li, txhua tus uas txaus siab rau tej haujlwm ntawd yuav kawm thiab xav txog. Yawmsaub tej haujlwm mas muaj koob meej thiab hwjchim meej mom, thiab nws txojkev ncaj ncees nyob ruaj khov mus ib txhis. Nws ua kom nco ntsoov nws tej haujlwm phimhwj, Yawmsaub muaj lub siab hlub siab khuvleej. Nws pub zaub mov rau cov uas hwm thiab paub ntshai nws, nws pheej nco ntsoov nws tej lus cog tseg. Nws twb ua nws lub hwjchim tshwm hauv nws tes haujlwm rau nws cov neeg pom, yog qhov uas nws muab lwm haiv neeg li tebchaws los ua lawv tug. Yawmsaub tes haujlwm mas ncaj ncees thiab muaj tseeb, txhua yam uas nws qhia peb ua mas tso siab tau. Tej lus qhia ntawd nyob ruaj khov mus ib txhis tsis kawg. Tej lus ntawd mas nws qhia tseeb thiab qhia ncaj. Nws txhiv nws haiv neeg dim, nws hais kom tej lus uas nws cog tseg nyob ruaj khov mus ib txhis. Nws lub npe mas dawb huv thiab txaus ntshai kawg. Qhov uas hwm thiab paub ntshai Yawmsaub mas yog lub hauv paus tswvyim. Cov uas xyaum raws nraim li ntawd yuav nkag siab zoo. Nws yuav tau lo lus qhuas ib txhis tsis kawg. Cia li qhuas Yawmsaub. Tus uas hwm thiab paub ntshai Yawmsaub tau nyob kaj siab lug, yog tus uas zoo siab kawg rau Yawmsaub tej lus nkaw. Nws tej tub ki yuav muaj hwjchim rau hauv lub tebchaws. Tus uas ncaj ncees li caj ces yuav tau koob hmoov. Nyiaj txiag thiab kev nplua nuj nyob hauv nws lub tsev, nws txojkev ncaj ncees yuav nyob mus ib txhis. Qhov kaj ci hauv qhov tsaus ntuj tshwm los rau tus uas siab ncaj, yog tshwm rau tus uas muaj siab hlub siab khuvleej thiab ncaj ncees. Tus uas ua lub siab dav thiab qev rau luag, thiab ua txhua yam raug cai mas nws yuav tau nyob zoo. Tus uas ncaj ncees yuav nyob ruaj nreeg, neeg yuav nco txog nws mus ib txhis. Nws tsis ntshai tej xov xwm phem, nws lub siab tseem ruaj khov tso siab rau Yawmsaub. Nws lub siab tawv qhawv nws tsis ntshai li, mas thaum kawg nws yuav pom nws cov yeeb ncuab swb lawm. Nws zoo siab faib rau luag thiab pub rau tej pluag, nws txojkev ncaj ncees yuav nyob mus ib txhis, nws txwm kub yuav muaj koob meej loj. Cov neeg limhiam pom kuj chim, lawv zim hniav zog thiab cia li ploj tag lawm, tej uas lawv xav tseg kuj ua tsis tiav. Cia li qhuas Yawmsaub. Yawmsaub cov tub qhe 'e, cia li qhuas nws, cia li qhuas Yawmsaub lub npe. Cia li qhuas Yawmsaub lub npe txij nimno mus ib txhis tsis kawg. Txij ntua hnub tuaj mus txog hnub poob, tsim nyog qhuas Yawmsaub lub npe. Yawmsaub nyob siab dhau ib tsoom tebchaws sawvdaws, nws lub hwjchim ci ntsa iab dua lub ntuj. Leejtwg zoo cuag li peb tus Vajtswv Yawmsaub uas nyob lub zwm txwv saum ntuj? Nws nyob saum saib tuaj rau lub ntuj thiab lub ntiajteb. Nws tsa cov neeg pluag sawv hauv cov hmoov av los, thiab tsa cov neeg txom nyem sawv hauv qhov tshauv los, pub lawv tau nrog cov neeg muaj meej zaum ua ke, yog cov uas ua thawj hauv Yawmsaub haiv neeg. Nws pub rau tus pojniam uas ib txwm muaj tsis taus menyuam muaj vaj muaj tsev, thiab pub nws muaj menyuam thiaj zoo siab xyiv fab. Cia li qhuas Yawmsaub los maj. Thaum cov Yixayee tawm hauv Iyi tebchaws, yog Yakhauj caj ces uas tawm hauv lwm haiv neeg uas hais lwm yam lus, Yuda thiaj li ua lub chaw pe hawm Yawmsaub, thiab Yixayee yog lub tebchaws uas Yawmsaub kav. Dej hiavtxwv pom mas cia li khiav, dej Yaladee cia li ntws rov qab. Tej roob dhia paj paws yam li tej txiv yaj, thiab tej pov roob dhia paj paws li menyuam yaj. Dej hiavtxwv 'e, ua cas koj cia li khiav? Dej Yaladee 'e, ua cas koj cia li ntws rov qab? Tej roob 'e, ua cas nej dhia paj paws yam li tej txiv yaj? Tej pov roob 'e, ua cas nej dhia paj paws li menyuam yaj? Lub ntiajteb 'e, cia li tshee hnyo rau ntawm Yawmsaub lub xubntiag, tshee rau ntawm Yakhauj tus Vajtswv xubntiag, yog tus uas muab tej pob zeb ua pas dej, thiab muab tej pob zeb tawv tawv ua dej txhawv. Au Yawmsaub, cia koj tib leeg lub npe tau koob meej, tsis yog muab rau peb, tsis yog muab rau peb, vim koj muaj txojkev hlub uas ruaj khov thiab muaj txojkev ncaj uas tso siab tau. Ua cas ib tsoom tebchaws yuav hais tias, “Lawv tus Vajtswv nyob qhovtwg?” Peb tus Vajtswv nyob saum ntuj, nws ua txhua yam raws li nws lub siab nyiam. Lawv tej dab mlom yog nyiaj thiab kub, yog neeg txhais tes ua. Tej dab mlom ntawd muaj qhov ncauj los hais tsis tau lus, muaj qhov muag los tsis pom kev, muaj qhov ntsej los tsis hnov lus, muaj qhov ntswg los tsis hnov ntxhiab, muaj tes los tsis txawj xuas, muaj kotaw los mus tsis tau kev, thiab tsis txawj ua suab hauv caj pas. Cov uas ua tej dab mlom ntawd kuj zoo ib yam li tej dab mlom ntawd, thiab cov uas vam khom tej dab mlom ntawd kuj zoo ib yam nkaus. Cov Yixayee 'e, cia li tso siab rau Yawmsaub. Nws yog tus uas pab thiab yog daim phiaj hlau thaiv lawv. Aloo caj ces 'e, cia li tso siab rau Yawmsaub. Nws yog tus uas pab thiab yog daim phiaj hlau thaiv lawv. Nej cov uas hwm thiab paub ntshai Yawmsaub, cia li tso siab rau Yawmsaub. Nws yog tus uas pab thiab yog daim phiaj hlau thaiv lawv. Yawmsaub nco ntsoov peb, nws yuav foom koob hmoov rau peb. Nws yuav foom koob hmoov rau Yixayee caj ces, nws yuav foom koob hmoov rau Aloo caj ces. Nws yuav foom koob hmoov rau cov uas hwm thiab paub ntshai Yawmsaub, tsis hais cov hlob cov yau huvsi. Thov Yawmsaub pub rau nej huaj vam coob, tsis hais nej thiab nej cov tub ki huvsi. Thov Yawmsaub uas tsim lub ntuj lub teb nchuav koob hmoov los rau nej. Lub ntuj yog Yawmsaub li, tiamsis lub ntiajteb nws pub rau ib tsoom neeg. Cov uas tuag lawm tsis txawj qhuas Yawmsaub, thiab cov uas nqes mus rau qhov chaw ntsiag to kuj ib yam nkaus. Tiamsis peb yuav qhuas Yawmsaub, txij nimno mus ib txhis tsis kawg. Cia li qhuas Yawmsaub lauj! Kuv lub siab npuab Yawmsaub vim nws hnov kuv lub suab thiab kuv tej lus thov. Vim nws tig ntsej mloog kuv, kuv thiaj yuav thov nws tag kuv sim neej. Txojkev tuag rooj hlua cuab vij puag ncig kuv, tub tuag teb txojkev mob ntes kuv cia, kuv raug kev txom nyem nyuaj siab thiab kev lwj siab. Kuv thiaj thov hu Yawmsaub lub npe tias, “Au Yawmsaub, thov koj cawm kuv txojsia dim.” Yawmsaub muaj siab hlub thiab ncaj ncees, peb tus Vajtswv muaj siab khuvleej. Yawmsaub tuav tus uas tsis paub qabhau cia, thaum kuv poob thab, nws cawm kuv dim. Kuv tus ntsuj plig 'e, cia li rov qab mus rau ntawm koj lub chaw so, rau qhov Yawmsaub ua zoo kawg rau koj. Vajtswv, koj tso kuv tus ntsuj plig dim txojkev tuag, thiab tso kuv lub qhov muag dim tej kua muag, thiab pab kuv txhais kotaw dim qhov uas dawm. Kuv ua kuv lub neej tab meeg Yawmsaub rau hauv cov neeg ciaj lub tebchaws. Txawm yog kuv hais tias, “Kuv raug kev txom nyem loj heev,” los kuv tseem ntseeg. Thaum kuv poob siab kuv hais tias, “Neeg sawvdaws dag ntxias xwb.” Kuv yuav muab dabtsi rau Yawmsaub pauj qhov uas nws ua zoo ntau kawg rau kuv? Kuv yuav nqa lub tais xyeem ua tsaug rau txojkev dim, thiab tuav Yawmsaub lub npe thov. Kuv yuav pauj tej uas kuv yeem lus tseg rau Yawmsaub, tab meeg nws haiv neeg sawvdaws. Yawmsaub cov neeg uas dawb huv ib tug tuag, yog ib qho loj rau ntawm Yawmsaub lub qhov muag. Au Yawmsaub, kuv yog koj tus tub qhe, kuv yog koj tus tub qhe, yog koj tus nkauj qhev tus tub. Koj twb daws txoj saw hlau khi kuv lawm. Kuv yuav ua kevcai xyeem ua tsaug koj, thiab tuav Yawmsaub lub npe thov. Kuv yuav pauj tej uas kuv yeem lus tseg rau Yawmsaub, tab meeg nws haiv neeg sawvdaws, rau hauv Yawmsaub tej tshav puam tuam tsev, hauv nruab nrab koj, Yeluxalees. Cia li qhuas Yawmsaub. Ib tsoom tebchaws sawvdaws, cia li qhuas Yawmsaub, ib tsoom neeg sawvdaws, cia li qhuas ntxhias nws. Rau qhov nws txojkev hlub ruaj khov uas tshwm rau peb loj kawg, Yawmsaub txojkev ncaj uas tso siab tau nyob mus ib txhis. Cia li qhuas Yawmsaub. Cia li ua Yawmsaub tsaug, vim nws zoo kawg nkaus. Nws txojkev hlub uas ruaj khov nyob mus ib txhis. Cia cov Yixayee hais tias, “Nws txojkev hlub uas ruaj khov nyob mus ib txhis.” Cia Aloo caj ces hais tias, “Nws txojkev hlub uas ruaj khov nyob mus ib txhis.” Cia cov uas hwm thiab paub ntshai Yawmsaub hais tias, “Nws txojkev hlub uas ruaj khov nyob mus ib txhis.” Thaum kuv raug kev txom nyem, kuv thov hu Yawmsaub, mas Yawmsaub kuj teb thiab tso kuv dim. Muaj Yawmsaub tuaj kuv tog, kuv tsis ntshai li. Neeg yuav ua li cas tau rau kuv? Yawmsaub tuaj kuv tog ua tus uas pab kuv, mas kuv yuav pom cov neeg uas ntxub kuv swb kiag. Mus cawm siav hauv Yawmsaub zoo dua li uas tso siab rau neeg. Mus cawm siav hauv Yawmsaub zoo dua li uas tso siab rau cov thawj coj. Txhua lub tebchaws tuaj vij nkaus kuv, kuv tuav Yawmsaub lub npe txiav lawv pov tseg. Lawv vij nkaus kuv, vij puag ncig kuv, kuv tuav Yawmsaub lub npe txiav lawv pov tseg. Lawv vij nkaus kuv yam li xub ntab, lawv kub hnyiab ploj tag yam nkaus li hlawv tsob pos. Kuv tuav Yawmsaub lub npe txiav lawv pov tseg. Lawv tawm tsam nias qees tuaj, kuv twb yuav swb, tiamsis Yawmsaub pab kuv. Yawmsaub yog kuv lub zog thiab yog kuv zaj nkauj. Yawmsaub yog kuv txojkev dim. Cia li mloog lub suab nkauj uas kov yeej hauv cov neeg ncaj ncees tej tsev ntaub hais tias, “Yawmsaub txhais tes xis ua tej haujlwm loj kawg li. Yawmsaub tsa nws txhais tes xis siab siab, Yawmsaub txhais tes xis ua tej haujlwm loj kawg li.” Kuv yuav tsis tuag, kuv yuav ciaj sia nyob, thiab piav tej uas Yawmsaub twb ua lawm. Yawmsaub qhuab qhia nplawm kuv heev, tiamsis nws tsis muab kuv tso rau hauv txojkev tuag. Thov qheb lub qhov rooj ncaj ncees rau kuv, kuv thiaj nkag tau lub qhov rooj ntawd mus, thiab ua Yawmsaub tsaug. No yog Yawmsaub lub qhov rooj. Tus ncaj ncees yuav nkag lub qhov rooj no mus. Kuv ua koj tsaug vim yog koj teb kuv thiab cawm kuv dim. Lub pob zeb uas cov Kws ua tsev muab xyeeb tseg lawm twb muab los teeb ua thawj lub rau ntawm kaum tsev lawm. Tej no yog Yawmsaub ua, yog yam phimhwj uas peb qhov muag pom. Hnub no yog hnub uas Yawmsaub tsim, cia peb zoo siab xyiv fab rau hnub ntawd. Au Yawmsaub, thov cawm peb dim. Au Yawmsaub, thov pab kom peb ua tau txhua yam tiav. Tus uas tuaj hauv Yawmsaub lub npe tau nyob kaj siab lug. Peb nyob hauv Yawmsaub lub tuam tsev foom koob hmoov rau nej. Yawmsaub yog Vajtswv, nws pub txojkev kaj rau peb. Cia li tuav tej rev nplooj ntoo mus txog cov kub ntawm lub thaj xyeem. Koj yog kuv tus Vajtswv, mas kuv yuav ua koj tsaug. Koj yog kuv tus Vajtswv, kuv yuav qhuas ntxhias koj. Cia li ua Yawmsaub tsaug vim nws yog tus zoo kawg nkaus. Nws txojkev hlub uas ruaj khov nyob mus ib txhis. Cov neeg uas lawv lub neej tsis muaj chaw thuam kuj tau nyob kaj siab lug, yog cov uas ua lub neej raws li Yawmsaub txoj kevcai. Cov uas tuav rawv Yawmsaub tej lus qhia kuj tau nyob kaj siab lug, yog cov uas nrhiav Yawmsaub kawg siab kawg ntsws. Lawv tsis ua txhaum, tiamsis lawv taug nraim Yawmsaub txojkev. Koj rhawv koj tej kev tswjhwm rau peb kom peb coj nruj li ntawd. Thov cia kuv lub neej uas ua raws li koj tej kab ke ruaj khov mus li, kuv thiaj li tsis raug txaj muag vim yog kuv qhov muag saib ntsoov koj tej lus nkaw huvsi. Thaum uas kuv kawm paub koj phua cai ncaj ncees lawm kuv ua lub siab dawb paug qhuas koj. Kuv yuav coj raws li koj tej kab ke. Thov tsis txhob muab kuv tso plhuav tseg. Yuav ua li cas tus tub hluas thiaj ua tau nws lub neej dawb huv? Yog yuav tsum ceev faj coj raws li koj txoj lus. Kuv nrhiav koj kawg kuv lub siab, thov tsis txhob cia kuv yuam kev ntawm koj tej lus nkaw. Kuv khaws nkaus koj tej lus rau hauv kuv lub siab, kuv thiaj tsis ua txhaum rau koj. Au Yawmsaub, kuv qhuas koj, thov koj qhia koj tej kab ke rau kuv. Kuv daim tawv ncauj yuav piav txog tej lus phua cai uas tawm hauv koj lub qhov ncauj los huvsi. Kuv zoo siab rau koj tej lus qhia npaum nkaus li zoo siab rau txhua yam kev nplua nuj. Kuv tshawb nrhiav koj tej kev tswjhwm, thiab kuv lub qhov muag ntsia ntsoov koj txojkev. Kuv zoo siab rau koj tej kab ke, kuv pheej yuav nco ntsoov koj txoj lus. Thov koj ua zoo rau koj tus tub qhe, xwv kuv thiaj li muaj txojsia nyob thiab coj raws li koj tej lus. Thov qheb kuv qhov muag kom kuv thiaj li pom tej txujci phimhwj hauv koj txoj kevcai. Kuv ua neej nyob ib nyuag ntu hauv ntiajteb no, thov tsis txhob muab koj tej lus nkaw zais tsis qhia kuv. Kuv lub siab nqhis koj tej lus phua cai qhuav siab qhawv txhua lub sijhawm. Koj cem cov uas khav theeb, yog cov uas raug foom tsis zoo, yog cov uas yuam kev ntawm koj tej lus nkaw. Thov koj rho tej lus cem thiab tej lus saib tsis taus kuv mus, rau qhov kuv yeej coj raws nraim li koj tej lus qhia. Txawm yog cov thawj sablaj ntaus tswvyim tawm tsam kuv, los koj tus tub qhe tsuas muaj uas tshawb nrhiav koj tej kab ke. Koj tej lus qhia ua rau kuv zoo siab xyiv fab, thiab tej lus ntawd yog kuv lub chaw sablaj. Kuv tus ntsuj plig nyob kiag rau hauv hmoov av, thov koj txuas kuv txojsia raws li koj tej lus cog tseg. Thaum kuv qhia kuv lub neej rau koj mas koj kuj teb kuv. Thov koj qhia koj tej kab ke rau kuv. Thov qhia kom kuv nkag siab koj tej kev tswjhwm. Kuv yuav tshawb nrhiav kawm koj tej haujlwm phimhwj. Kuv muaj kev txhawj xeeb siab ntsws yaj tag, thov txhawb kuv lub zog raws li koj tej lus cog tseg. Thov pab kom kuv tsis txhob ua neeg dag, thov koj hlub kuv, qhia koj txoj kevcai rau kuv. Kuv twb xaiv qhov uas xib rau koj, kuv muab koj tej lus phua cai txawb rau ntawm kuv xubntiag. Au Yawmsaub, kuv yeej tuav rawv koj tej lus qhia, tsis txhob cia kuv raug txaj muag. Kuv yuav maj nroos ua raws li koj tej lus nkaw, vim yog koj pub kuv nkag siab ntau zuj zus. Au Yawmsaub, thov koj qhia koj tej kab ke rau kuv, kuv yuav coj raws nraim li ntawd mus txog thaum kawg. Thov qhia kom kuv nkag siab, kuv thiaj li coj raws nraim li koj txoj kevcai, kuv yuav xyaum ua raws li ntawd kawg kuv lub siab. Thov koj coj kuv mus raws li koj tej lus nkaw, rau qhov kuv zoo siab xyiv fab rau txojkev ntawd. Thov tswj kuv lub siab rau koj tej lus qhia, tsis txhob cia qaug rau kev nplua nuj. Thov koj tig kuv qhov muag kom tsis txhob saib rau tej yam uas tsis tseem ceeb, thiab thov koj tuav kuv txojsia rau hauv koj txojkev. Thov koj tuav rawv koj tej lus cog tseg rau koj tus tub qhe, yog tej lus uas koj cog rau cov uas hwm thiab paub ntshai koj. Thov koj muab tej lus thuam luag uas kuv ntshai rhuav tshem mus, rau qhov koj tej lus phua cai zoo kawg nkaus. Kuv nco nco koj tej kev tswjhwm. Vim koj yog tus ncaj ncees mas thov tuav kuv txojsia. Au Yawmsaub, thov koj ua koj txojkev hlub uas ruaj khov tshwm tuaj rau kuv, yog qhov uas koj cawm dim raws li koj cog lus tseg. Mas kuv thiaj li muaj lus teb rau cov uas thuam luag kuv, vim kuv tso siab rau koj tej lus. Thov koj tsis txhob muab koj tej lus tseeb rho kiag ntawm kuv lub qhov ncauj mus, rau qhov kuv yeej vam tej lus uas koj phua cai. Kuv yuav tuav rawv koj txoj kevcai mus ib txhis tsis kawg. Kuv yuav ua neej nyob ywj pheej vim yog kuv tshawb nrhiav koj tej kev tswjhwm. Kuv yuav piav koj tej lus qhia rau tej vajntxwv mloog, kuv yuav tsis raug txaj muag li. Rau qhov kuv yeej zoo siab heev rau koj tej lus nkaw uas kuv nyiam. Kuv hwm koj tej lus nkaw uas kuv nyiam, thiab kuv yuav tshawb nrhiav koj tej kab ke. Thov nco ntsoov tej lus uas koj cog tseg rau koj tus tub qhe, tej lus ntawd yeej ua rau kuv muaj siab vam. Thaum kuv raug kev txom nyem, yam uas nplij kuv lub siab yog koj tej lus cog tseg uas pub txojsia rau kuv. Cov neeg uas tsis hwm Vajtswv thuam luag kuv heev, los kuv tsis tig ntawm koj txoj kevcai. Au Yawmsaub, thaum kuv xav txog tej lus uas koj phua cai thaum ub, mas tej lus ntawd nplij tau kuv lub siab. Kuv chim siab heev kawg li vim tej neeg limhiam muab koj txoj kevcai tso tseg. Koj tej kab ke yog tej nkauj uas kuv hu rau thaum kuv ua qhua nyob hauv ntiajteb. Au Yawmsaub, thaum tsaus ntuj nti los kuv nco txog koj lub npe, thiab tuav rawv koj txoj kevcai. Kuv tau nyob kaj siab lug vim yog kuv coj raws li koj tej kev tswjhwm. Yawmsaub yog kuv tug, kuv cog lus tseg hais tias kuv yuav ua raws li koj tej lus. Kuv thov kawg siab kawg ntsws kom koj hlub kuv, thov koj khuvleej kuv raws li tej lus uas koj cog tseg. Thaum kuv xav txog tej uas kuv ua, kuv thiaj li tig hlo ua raws li koj tej lus qhia. Kuv maj nroos ua raws li koj tej lus nkaw, kuv tsis tos li lawm. Txawm yog kuv mag cov neeg limhiam txoj hlua cuab, los kuv pheej yuav nco ntsoov koj txoj kevcai. Thaum ib tag hmo los kuv sawv los qhuas koj, vim yog tej lus uas koj phua cai ncaj ncees. Kuv nrog txhua tus uas hwm thiab paub ntshai koj ua phoojywg, yog cov uas coj raws li koj tej kev tswjhwm. Au Yawmsaub, koj txojkev hlub uas ruaj khov puv nkaus lub ntiajteb, thov qhia koj tej kab ke rau kuv. Au Yawmsaub, koj tau ua zoo rau koj tus tub qhe, raws li koj tej lus cog tseg. Thov qhia tswvyim thiab kev txawj ntse rau kuv, vim yog kuv tso siab rau koj tej lus nkaw. Ua ntej uas kuv tsis tau raug kev txom nyem kuv yuam kev ua txhaum, tiamsis nimno kuv ua raws li koj tej lus. Koj yog tus zoo kawg thiab ua zoo, thov qhia koj tej kab ke rau kuv. Cov neeg uas tsis hwm koj lam iab hiam kuv, tiamsis kuv coj raws li koj tej kev tswjhwm kawg kuv lub siab. Lawv lub siab ruam puas ntsoog, tiamsis kuv zoo siab xyiv fab rau koj txoj kevcai. Qhov uas kuv raug txom nyem kuj zoo lawm, kuv thiaj kawm paub koj tej kab ke. Txoj kevcai uas tawm hauv koj lub qhov ncauj los mas zoo rau kuv ntau dua nyiaj thiab kub qas txhiab daim. Koj txhais tes tau tsim thiab puab kuv. Thov pub kuv nkag siab kuv thiaj kawm paub koj tej lus nkaw. Cov uas hwm thiab paub ntshai koj yuav pom kuv thiab zoo siab, vim yog kuv muaj siab vam koj tej lus. Au Yawmsaub, kuv paub tias qhov uas koj phua cai yeej raug lawm, thiab paub tias thaum koj cia kuv raug kev txom nyem koj yeej ua ncaj ncees. Thov cia koj txojkev hlub uas ruaj khov nplij kuv lub siab, raws li koj cog tseg rau koj tus tub qhe. Thov khuvleej kuv xwv kuv thiaj li ciaj sia nyob. Koj txoj kevcai ua rau kuv zoo siab xyiv fab. Thov ua kom cov neeg uas tsis hwm koj raug txaj muag, vim yog lawv lam iab hiam kom kuv, tiamsis kuv li mas kuv yuav tshawb nrhiav koj tej kev tswjhwm. Thov pub cov uas hwm thiab paub ntshai koj tig los rau ntawm kuv, xwv lawv thiaj li paub koj tej lus qhia. Thov cia kuv lub siab dawb huv coj raws li koj tej kab ke, kuv thiaj tsis raug txaj muag. Kuv nyob qhuav siab qhawv tos koj txojkev cawm dim, kuv vam ntsoov koj tej lus. Kuv lub qhov muag plooj nplas vim yog tos koj tej lus cog tseg, kuv nug hais tias, “Thaum twg koj li nplij kuv lub siab?” Vim kuv zoo nkaus li lub hnab tawv ntim cawv txiv hmab uas raug pa hluavtaws txhawb lawm, los kuv pheej nco ntsoov koj tej kab ke. Koj tus tub qhe yuav tsum ua siab ntev tos ntev li cas? Thaum twg koj li txiav txim rau cov neeg uas tsim txom kuv? Cov neeg uas tsis hwm koj khawb qhov taub cuab kuv, yeej yog cov uas tsis coj raws li koj txoj kevcai. Koj tej lus nkaw mas tso siab tau txhua lo huvsi. Lawv lam iab hiam tsim txom kuv. Thov koj pab kuv lauj! Lawv twb txov yuav tau kuv txojsia hauv ntiajteb, tiamsis kuv tsis tso koj tej kev tswjhwm tseg. Thov tuav kuv txojsia cia vim koj txojkev hlub uas ruaj khov, kom kuv thiaj tuav rawv tej lus qhia uas koj lub qhov ncauj hais. Au Yawmsaub, koj txojlus yeej nyob ruaj nreeg saum ntuj mus ib txhis. Koj txojkev ncaj uas tso siab tau yeej muaj nyob mus rau txhua tiam neeg. Koj txawb lub ntiajteb no cia mas thiaj nyob ruaj khov. Tej ntawd nyob ruaj khov txog niaj hnub no vim koj hais kom muaj li ntawd, rau qhov txhua yam puav leej yog koj li tub qhe. Yog koj txoj kevcai tsis ua rau kuv zoo siab xyiv fab, ces kuv tej kev txom nyem twb ua rau kuv puam tsuaj lawm. Kuv yuav nco ntsoov koj tej kev tswjhwm, vim koj tej kev tswjhwm tuav tau kuv txojsia. Kuv yog koj li, thov cawm kom kuv dim, vim kuv nrhiav koj tej kev tswjhwm. Cov neeg phem zov kev txov kuv, tiamsis kuv ua tib zoo saib koj tej lus qhia. Kuv txeev pom tias ib puas tsav yam muaj lub chaw kawg, tiamsis koj tej lus nkaw dav tsis muaj chaw kawg. Kuv nyiam koj txoj kevcai kawg nkaus, yog tej lus uas kuv tshawb nrhiav tas hnub tas hmo. Koj tej lus nkaw ua rau kuv txawj ntse dua kuv tej yeeb ncuab, vim koj tej lus nrog nraim kuv txhua lub sijhawm. Kuv muaj kev nkag siab ntau dua cov uas qhia kuv sawvdaws, rau qhov koj tej lus qhia yog tej uas kuv tshawb nrhiav. Kuv nkag siab ntau dua cov laus vim yog kuv tuav rawv koj tej kev tswjhwm. Kuv tswj kuv txhais kotaw tsis kam mus ua txhua yam kev phem, kom kuv thiaj tuav rawv koj tej lus. Kuv tsis tau tig ntawm koj tej lus phua cai rau qhov koj twb qhia kuv lawm. Koj tej lus kuv sim noj lawm qab zib heev, qab zib dhau zib ntab hauv kuv qhov ncauj. Koj tej kev tswjhwm ua rau kuv txawj nkag siab, vim li ntawd kuv thiaj ntxub txhua yam kev phem kev dag. Koj tej lus yog lub teeb rau kuv txhais kotaw thiab yog qhov kaj rau kuv txojkev. Kuv yuav tuav rawv tej lus uas kuv cog tseg ruaj cia rau koj hais tias, kuv yuav ua raws li koj tej lus phua cai uas ncaj ncees. Au Yawmsaub, kuv txom nyem nyuaj siab heev kawg, thov koj tuav kuv txojsia raws li koj tej lus cog tseg. Au Yawmsaub, thov koj lees yuav kuv tej lus qhuas uas kuv xyeem rau koj, thiab thov qhia koj tej lus phua cai rau kuv. Kuv niaj hnub tso nyog kuv txojsia tseg, los kuv pheej nco ntsoov koj txoj kevcai. Cov neeg limhiam cuab hlua rau kuv tiamsis kuv tsis yuam kev ntawm koj tej kev tswjhwm. Koj tej lus qhia mas kuv txais yuav ua qub txeeg qub teg mus ib txhis, tej lus ntawd ua rau kuv siab xyiv fab. Kuv tswj kuv lub siab kom ua raws li koj tej kab ke mus ib txhis txog tag sim neej. Kuv ntxub cov uas muaj ob lub siab, tiamsis kuv nyiam koj txoj kevcai. Koj yog kuv lub chaw nraim cev thiab yog kuv daim hlau tiv thaiv kuv, kuv vam ntsoov koj tej lus cog tseg. Cov niag neeg ua phem, nej cia li khiav mus, xwv kuv thiaj tuav rawv tau kuv tus Vajtswv tej lus nkaw. Thov koj tsom kwm kuv raws li koj tej lus cog tseg kuv thiaj li ciaj sia, thiab tsis txhob cia kuv poob ntsej muag rau tej uas kuv vam. Thov koj hwj kuv cia, kom kuv thiaj nyob tso siab plhuav, thiab yuav hwm koj tej kab ke mus ib txhis. Koj yuav tsis quav ntsej cov uas yuam kev ntawm koj tej kab ke, lawv tej kev ntxeev ntxias yuav tsis muaj qabhau kiag li. Koj saib cov neeg limhiam huvsi hauv ntiajteb zoo li tej quav tooj quav hlau, vim li no kuv thiaj li nyiam koj tej lus qhia. Kuv ib ce tshee hnyo vim yog kuv ntshai koj, thiab ntshai koj tej lus txiav txim. Kuv twb ua ncaj thiab ua raug cai lawm, thov tsis txhob tso kuv tseg rau cov uas quab yuam kuv. Thov koj lees hais tias koj yuav pab koj tus tub qhe kom tau zoo, thov tsis txhob cia cov uas tsis hwm koj quab yuam kuv. Kuv lub qhov muag plooj nplas vim yog tos koj txojkev cawm dim, thiab tos koj ua koj tej lus cog tseg ncaj ncees kom tiav. Thov koj pub rau koj tus tub qhe raws li koj txojkev hlub uas ruaj khov, thiab thov qhia koj tej kab ke rau kuv. Kuv yog koj tus tub qhe. Thov koj pub kom kuv nkag siab, kom kuv thiaj li paub koj tej lus qhia. Twb txog lub sijhawm uas Yawmsaub txiav txim lawm, vim lawv twb muab koj txoj kevcai rhuav lawm. Vim li ntawd kuv nyiam koj tej lus nkaw heev dua kub heev dua tej tseem kub. Vim li ntawd kuv thiaj siv koj tej kev tswjhwm huvsi coj kuv txoj hauv kev, kuv ntxub txhua yam kev dag ntxias. Koj tej lus qhia tseem ceeb kawg li, kuv lub siab thiaj tuav rawv tej lus ntawd. Qhov uas nthuav koj tej lus ua rau pom kev kaj lug, thiab pub kev nkag siab rau cov uas tsis thoob tsib. Kuv txog siav rua ncauj tsuas vim nqhis koj tej lus nkaw heev. Thov koj tig los rau kuv thiab hlub kuv ib yam li koj txeev ua rau cov uas nyiam koj lub npe. Thov koj pub kom kuv kotaw nyob ruaj nreeg raws li koj tej lus cog tseg, thov tsis txhob kheev ib yam kev txhaum twg kov yeej kuv. Thov txhiv kuv dim tej uas neeg quab yuam kuv, kom kuv thiaj tuav rawv koj tej kev tswjhwm. Thov koj lub ntsej muag ci ntsa iab rau koj tus tub qhe, thiab thov qhia koj tej kab ke rau kuv. Kuv kua muag ntws lug li dej ntws vim yog neeg tsis tuav rawv koj txoj kevcai. Au Yawmsaub, koj yog tus ncaj ncees, koj yeej txiav txim raug kev raug cai. Koj yeej tu koj tej lus qhia ncaj ncees thiab tso siab tau huvsi. Kuv lub siab kub lug cuag hluavtaws hlawv vim kuv cov tshawj chim tsis nco qab koj tej lus lawm. Koj tej lus cog tseg twb muab sim zoo zoo li lawm, koj tus tub qhe nyiam tej lus ntawd. Kuv yog ib tug tsis tseem ceeb thiab luag saib tsis taus, tiamsis kuv pheej nco ntsoov koj tej kev tswjhwm. Koj txojkev ncaj ncees yeej yuav ncaj ncees mus ib txhis, thiab koj txoj kevcai yog txoj tseeb. Kev txom nyem thiab kev lwj siab los raug kuv, tiamsis koj tej lus nkaw ua rau kuv zoo siab xyiv fab. Koj tej lus qhia ncaj ncees mus ib txhis, thov pub kuv nkag siab kuv thiaj li ciaj sia nyob. Kuv taij thov koj kawg kuv lub siab. Au Yawmsaub, thov koj teb kuv, kuv yuav ua raws li koj tej kab ke. Kuv quaj thov koj, thov cawm kom kuv dim, xwv kuv thiaj ua tau raws li koj tej lus qhia. Kuv sawv thaum tsis tau kaj ntug thov koj pab kuv, kuv vam ntsoov koj tej lus. Kuv yeej pw tsis tsaug zog ib hmos kaj ntug li, kom kuv thiaj tshawb nrhiav tau koj tej lus cog tseg. Thov koj mloog kuv lub suab raws li koj txojkev hlub uas ruaj khov. Au Yawmsaub, thov koj tuav kuv txojsia raws li koj txojkev ua ncaj ua ncees. Cov neeg uas ntaus tswvyim phem xav tsim txom kuv, lawv twb tuaj ze lawm, lawv yeej nyob deb ntawm koj txoj kevcai. Au Yawmsaub, koj nyob ze kuv, thiab koj tej lus nkaw puavleej muaj tseeb. Kuv twb kawm paub ntawm koj tej lus qhia ntev los lawm tias koj tsim koj tej lus qhia kom nyob mus ib txhis. Thov tsa muag ntsia kuv tej kev txom nyem, thiab tso kuv dim, vim kuv yeej nco ntsoov koj txoj kevcai. Thov pab hais kuv tshaj plaub thiab txhiv kuv dim, thov tuav kuv txojsia raws li koj tej lus cog tseg. Cov neeg limhiam yeej tsis dim vim yog lawv tsis nrhiav koj tej kab ke. Au Yawmsaub, koj txojkev khuvleej loj kawg nkaus, thov tuav kuv txojsia raws li koj txiav txim ncaj ncees. Cov uas tsim txom kuv thiab tawm tsam kuv muaj coob kawg li, los kuv tsis lug koj tej lus qhia li. Kuv tsa muag ntsia cov neeg fav xeeb mas kuv ntxub kawg li, rau qhov lawv tsis tuav rawv koj tej lus nkaw. Thov koj tshuaj saib kuv nyiam koj tej kev tswjhwm npaum li cas, thov koj tuav kuv txojsia raws li koj txojkev hlub uas ruaj khov. Lub ntsiab loj hauv koj tej lus yog kev tseeb, thiab koj tej lus phua cai ncaj ncees txhua lo yuav nyob mus ib txhis li. Kuv tsis tau ua txhaum los cov thawj cia li tsim txom kuv, tiamsis kuv lub siab tseem hwm thiab ntshai koj tej lus. Kuv zoo siab xyiv fab rau koj tej lus yam nkaus li tus uas tau tej txhab nyiaj. Kuv ntxub thiab dhuav tej lus dag, tiamsis kuv nyiam koj txoj kevcai. Kuv qhuas koj ib hnub xya zaus vim koj tej lus phua cai ncaj ncees. Cov uas nyiam koj txoj kevcai tau zoo nyob kaj siab lug, tsis muaj ib yam dabtsi dawm tes dawm taw. Au Yawmsaub, kuv vam ntsoov koj txojkev cawm dim, thiab kuv ua raws li koj tej lus nkaw. Kuv lub siab tuav rawv koj tej lus qhia, kuv nyiam koj tej lus ntawd heev kawg li. Kuv tuav rawv koj tej kev tswjhwm thiab koj tej lus qhia rau qhov kuv txhua txojkev nyob ntawm koj lub xubntiag. Au Yawmsaub, thov cia kuv lub suab thov nce tuaj txog koj xubntiag, thov pub kuv nkag siab raws li koj tej lus cog tseg. Thov kuv tej lus taij nce tuaj txog koj xubntiag, thov cawm kuv raws li koj tej lus cog tseg. Kuv daim tawv ncauj yuav qhuas koj tsis tu, vim koj twb qhia koj tej kab ke rau kuv. Kuv tus nplaig yuav hu nkauj txog koj tej lus, vim koj tej lus nkaw puavleej ncaj ncees. Thov koj txhais tes npaj rawv uas yuav pab kuv, vim kuv twb xaiv coj raws li koj tej kev tswjhwm. Au Yawmsaub, kuv ntshaw koj txojkev cawm dim, thiab zoo siab xyiv fab rau koj txoj kevcai. Thov pub kuv muaj txojsia nyob xwv kuv thiaj qhuas tau koj, thiab cia koj tej lus phua cai pab kuv. Kuv yuam kev ib yam li tus yaj uas ploj lawm, thov tuaj nrhiav koj tus tub qhe, rau qhov kuv pheej nco ntsoov koj tej lus nkaw. Thaum kuv raug kev nyuaj siab kuv thov hu Yawmsaub, nws kuj teb kuv. “Au Yawmsaub, thov tso kuv dim daim tawv ncauj dag thiab tus nplaig dag ntxias.” Tus nplaig dag ntxias 'e, yuav ua dabtsi rau koj, thiab yuav tsav dabtsi ntxiv rau koj? Yog muab tub rog rab xub hneev uas ntse, thiab muab ntoo ua thee cig plaws rau koj. Kuv raug txom nyem lauj, zoo li kuv nrog cov neeg Mese nyob, thiab nyob hauv cov neeg Kheda tej tsev ntaub. Kuv nrog cov neeg uas ntxub kev thaj yeeb nyob, ntev dhau lawm. Kuv nyiam kev thaj yeeb, tiamsis thaum kuv hais, lawv tseem txhob kev ua rog. Kuv tsa muag ntsia saum tej roob. Txojkev pab kuv yuav tuaj qhovtwg tuaj? Txojkev pab kuv tuaj ntawm Yawmsaub tuaj, yog tus uas tsim ntuj tsim teb. Nws yuav tsis kheev koj txhais kotaw plam, tus uas tsom kwm koj yuav tsis tsaug zog li. Saib maj, tus uas tsom kwm cov Yixayee yuav tsis ncaws dab ntub lossis tsaug zog li. Yawmsaub yog tus uas tsom kwm koj, Yawmsaub yog tus duab ntxoov ntxoo ntawm koj sab tes xis. Nruab hnub lub hnub yuav tsis ua phem rau koj, hmo ntuj lub hli yuav tsis ua li cas rau koj. Yawmsaub yuav tsom kwm koj ntawm txhua yam kev phem, nws yuav tsom kwm koj txojsia. Yawmsaub yuav tsom kwm koj tawm mus thiab koj rov los txij nimno mus ib txhis tsis kawg. Kuv zoo siab rau thaum lawv hais rau kuv tias, “Cia peb mus rau hauv Yawmsaub lub tuam tsev.” Yeluxalees 'e, peb txhais kotaw tseem sawv ntsug hauv koj tej rooj loog. Yeluxalees raug rhawv ua lub nroog uas ruaj khov nyob ntom nti. Yog lub chaw uas txhua lub xeem nce mus rau hauv, yog Yawmsaub txhua lub xeem, raws li uas tu cia rau cov Yixayee kom ua tsaug rau Yawmsaub lub npe. Tej zwm txwv uas tu plaub kuj muab txawb rau hauv, yog Davi caj ces tej zwm txwv. Cia li thov kev kaj siab lug rau Yeluxalees tias, “Thov cia cov uas nyiam koj vam meej. Thov kev kaj siab lug muaj nyob hauv koj tej ntsa loog, thiab kev tso siab plhuav nyob hauv koj tej chaw tsom faj.” Vim saib rau kuv tej kwvtij kwvluag kuv yuav hais tias, “Thov kev kaj siab lug muaj nyob hauv koj.” Vim saib rau peb tus Vajtswv Yawmsaub lub tuam tsev, kuv yuav nrhiav kev zoo rau koj. Au Yawmsaub uas nyob lub zwm txwv saum ntuj, kuv tsa qhov muag saib koj. Tus tub qhe ntsia ntsoov tos tus lospav li cas thiab tus nkauj qhev ntsia ntsoov tos tus poj lospav li cas, peb qhov muag ntsia ntsoov tos Yawmsaub uas yog peb tus Vajtswv ib yam li ntawd mus txog thaum nws khuvleej peb. Au Yawmsaub, thov koj khuvleej peb, thov koj khuvleej peb lauj, rau qhov peb raug luag saib tsis taus heev dhau lawm. Peb dhuav siab qhov uas cov neeg tau zoo thuam luag peb ntev los lawm, yog qhov uas cov khav theeb saib tsis taus peb. Yog Yawmsaub tsis tuaj peb tog, cia cov Yixayee hais li no, yog Yawmsaub tsis tuaj peb tog rau thaum luag sawv tsees tawm tsam peb, mas luag yuav muab peb nqos kiag ciaj rau thaum luag npau taws rau peb heev. Mas dej yuav nyab kuav peb mus, tej nthwv dej yuav ntws saum peb. Tej dej nphau pes nphwv yuav los nyab kiag peb. Qhuas Vajtswv uas tsis muab peb ua qauv tiag luag kaus hniav. Peb dim yam nkaus li tus noog dim rooj hlua cuab, rooj hlua tu nrho peb thiaj khiav dim plaws. Txojkev pab peb nyob hauv Yawmsaub lub npe, yog tus uas tsim ntuj tsim teb. Cov uas tso siab plhuav rau Yawmsaub kuj zoo li lub roob Xi‑oo uas tsis ua zog li, yuav nyob mus ib txhis. Tej roob nyob vij lub nroog Yeluxalees li cas, Yawmsaub kuj nyob vij nws haiv neeg ib yam li ntawd txij hnub no mus ib txhis tsis kawg. Cov neeg phem tus cwj yuav tsis kav lub tebchaws uas muab pub rau cov neeg ncaj ncees lawm, xwv cov neeg ncaj ncees thiaj tsis cev txhais tes mus ua txhaum. Au Yawmsaub, thov koj ua zoo rau cov neeg zoo thiab rau cov uas lub siab ncaj. Tiamsis cov neeg uas tig rau txojkev nkhaus, Yawmsaub yuav coj lawv nrog cov neeg ua phem ua ke. Thov pub cov Yixayee nyob kaj siab lug. Thaum Yawmsaub pub Xi‑oo rov vam meej li qub, peb kuj zoo li tej neeg ua npau suav. Peb lub qhov ncauj luag puv npo, peb tus nplaig qw zoo siab xyiv fab, mas luag hais rau hauv ib tsoom tebchaws tias, “Yawmsaub ua tej haujlwm loj kawg rau lawv.” Yawmsaub twb ua haujlwm loj kawg rau peb lawm, peb thiaj zoo siab xyiv fab. Au Yawmsaub, thov pub peb rov vam meej li qub, yam li tej hav dej hauv Neke. Thov cia cov uas tseb noob los kua muag, tau sau qoob qw zoo siab xyiv fab. Tus uas nqa noob tawm mus tseb nrog suab quaj, yuav tau sau nws tej qoob los tsev nrog suab qw xyiv fab. Yog Yawmsaub tsis ua tsev, cov uas ua tsev kuj txog siav do xwb. Yog Yawmsaub tsis tsom kwm lub nroog, tus faj xwm kuj zov do xwb. Qhov uas koj sawv ntxov ntxov pw lig lig, ua haujlwm khwv huas qas ntshis kev noj kev haus tsis muaj qabhau. Rau qhov Yawmsaub yeej pub rau tus uas nws hlub pw tsaug zog zoo. Tej tub ki yog qub txeeg qub teg ntawm Yawmsaub, tej menyuam uas yug hauv lub plab los yog tshav ntuj. Tej tub uas yug thaum leej txiv tseem hluas kuj zoo yam nkaus li rab xub hauv tus tub rog txhais tes. Tus yawg twg muaj xub hneev puv lub raj, kuj kaj siab lug. Thaum nrog nws cov yeeb ncuab ua plaub ntawm rooj loog, nws yuav tsis txaj muag. Txhua tus uas hwm thiab paub ntshai Yawmsaub kuj yuav tau nyob kaj siab lug, yog cov uas taug nws txojkev. Koj yuav tau noj tej uas koj txhais tes khwv tau, koj yuav tau zoo thiab yuav vam meej. Koj tus pojniam yuav zoo yam li tsob txiv hmab uas txi ncw ncw nyob hauv koj lub tsev, koj cov menyuam yuav zoo nkaus li tej ntsuag ntoo aulib nyob puag ncig koj lub rooj mov. Yog li no nawj, tus uas hwm thiab paub ntshai Yawmsaub yuav tau nyob kaj siab lug ib yam li ntawd. Thov Yawmsaub foom koob hmoov rau koj ntawm Xi‑oo. Thov cia koj pom lub nroog Yeluxalees vam meej tag koj sim neej. Thov cia koj pom koj tej xeeb leej xeeb ntxwv. Thov pub cov Yixayee nyob kaj siab lug. Lawv twb tsim txom kuv heev thaum yau los, cia cov Yixayee hais li no, lawv twb tsim txom kuv heev thaum yau los, tiamsis lawv kuj kov tsis yeej kuv. Cov uas laij teb kuj laij sau kuv nrob qaum, lawv laij tej niag kab ntev ntev. Yawmsaub yog tus ncaj ncees, nws muab cov neeg phem tej hlua uas khi kuv txiav pov tseg. Thov kom cov uas ntxub Xi‑oo poob ntsej muag thiab tig rov qab. Thov kom lawv zoo yam nkaus li tej nroj uas tuaj saum ruv tsev es qhuav tag tsis hlob. Luag yuav tsis hlais tuav ntawm tes, luag yuav tsis pav ua ib tsuag rau ntawm ntiag. Thiab cia cov uas dua kev tsis txhob hais tias, “Thov Yawmsaub foom koob hmoov rau nej. Peb tuav Yawmsaub lub npe foom koob hmoov rau nej.” Au Yawmsaub, kuv nyob qhov tob tob quaj hu koj. Au tus Tswv, thov mloog kuv lub suab. Thov koj tig ntsej ua tib zoo mloog kuv lub suab taij thov. Au Yawmsaub, yog koj cim tej kev txhaum txim cia, au tus Tswv, leejtwg yuav sawv nres nroos tau? Tiamsis koj yog tus uas zam txim kom sawvdaws thiaj hwm thiab paub ntshai koj. Kuv tos rawv Yawmsaub, kuv tus ntsuj plig tos ntsoov, thiab kuv vam ntsoov nws tej lus. Kuv tus ntsuj plig tos rawv Yawmsaub heev dua tus faj xwm tos kaj ntug, heev dua tus faj xwm tos rawv kaj ntug. Yixayee 'e, cia li muaj siab vam rau hauv Yawmsaub. vim Yawmsaub muaj txojkev hlub ruaj khov, thiab muaj kev txhiv puv npo. Nws yuav txhiv cov Yixayee dim lawv tej kev txhaum txim huvsi. Au Yawmsaub, kuv lub siab tsis tau muab hlob thiab kuv lub qhov muag tsis tau saib ua khav theeb ntsuav. Kuv tsis ntsig txog tej uas loj dhau kuv tus peevxwm thiab tsis ntsig txog tej yam loj thiab phimhwj uas kuv tsis to taub. Kuv tswj kuv lub siab kom nyob twjywm, yam nkaus li tus menyuam uas tseg mis nyob twjywm hauv leej niam lub xubntiag. Kuv lub siab nyob twjywm yam nkaus li tus menyuam tseg mis lawm. Yixayee 'e, cia li vam ntsoov Yawmsaub txij nimno mus ib txhis. Au Yawmsaub, thov saib rau Davi, thov nco txog tej kev ceeblaj txom nyem huvsi uas nws raug. Nws cog lus twv rau Yawmsaub, thiab yeem lus tseg rau Yakhauj tus Vajtswv uas muaj hwjchim loj kawg hais tias, “Kuv yuav tsis nkag mus rau hauv kuv lub tsev lossis nkag rau hauv kuv lub txaj pw. Kuv yuav tsis kheev kuv lub qhov muag tsaug zog, lossis kuv daim tawv muag qe, mus txog thaum kuv nrhiav tau lub chaw rau Yawmsaub nyob, yog lub chaw rau Yakhauj tus Vajtswv uas muaj hwjchim loj kawg nyob.” Peb twb hnov txog tej no hauv lub moos Efatha, peb twb ntsib tej no ntawm lub moos Ya‑a tej teb. “Cia peb mus rau ntawm Yawmsaub lub chaw nyob, peb pe hawm rau ntawm nws lub rooj tiag taw. Au Yawmsaub, thov sawv tsees mus rau ntawm koj lub chaw nyob, tsis hais koj thiab lub phij xab uas qhia koj lub hwjchim. Thov cia cov pov thawj muab txojkev ncaj ncees los hnav, thov cia koj cov neeg uas dawb huv qw zoo siab xyiv fab.” Vim yog saib rau koj tus qhev Davi, thov tsis txhob muab tus uas koj hliv roj tsa lawd tso tseg. Yawmsaub cog lus tawv rau Davi, yog tej lus uas tsis muab rhuav li hais tias, “Kuv yuav tsa ib tug tub uas koj yug los nyob saum koj lub zwm txwv. Yog koj cov tub tuav rawv kuv tej lus cog tseg thiab tej uas kuv qhia lawv, mas lawv cov tub kuj yuav tau nyob saum koj lub zwm txwv mus ib txhis.” Yawmsaub twb xaiv Xi‑oo lawm, nws xav muab ua nws lub chaw nyob, thiab hais tias, “No yog kuv lub chaw nyob mus ib txhis, kuv yuav nyob ntawm no vim kuv twb xav li ntawd lawm. Kuv yuav foom koob hmoov ntau nplua mias rau lub nroog no tej kev noj haus, kuv yuav pub nws cov neeg pluag tau noj tsau npo. Kuv yuav muab txojkev cawm dim rau nws cov pov thawj hnav, nws cov neeg dawb huv yuav qw zoo siab xyiv fab. Qhov chaw ntawd kuv yuav pub kom muaj ib tug kub tuaj rau Davi, kuv twb npaj ib lub teeb rau tus uas kuv hliv roj tsa lawm. Kuv yuav muab txojkev txaj muag rau nws cov yeeb ncuab hnav, tiamsis nws lub mom kub yuav ci nplas rau saum nws taubhau.” Qhov uas kwvtij nyob ua ke sib hum xeeb mas kuj yog qhov zoo thiab kaj siab kawg li. Zoo ib yam nkaus li cov roj muaj nqes uas nyob saum Aloo taubhau es ntws los ntub nws tej hwj txwv thiab ntws los txog nws caj dab tsho. Zoo ib yam li tej dej lwg saum lub roob Hawmoo uas poob los saum Xi‑oo tej roob, vim yog Yawmsaub yuav foom koob hmoov tawm qhov ntawd mus, yog pub txojsia ntev mus ib txhis. Cia li los qhuas Yawmsaub, nej cov uas yog Yawmsaub tub qhe sawvdaws, uas hmo ntuj los sawv ntsug hauv Yawmsaub lub tuam tsev. Cia li tsa nej txais tes ncaj rau lub chaw dawb huv thiab qhuas Yawmsaub. Thov Yawmsaub foom koob hmoov rau nej ntawm Xi‑oo, yog tus uas tsim ntuj tsim teb. Cia li qhuas Yawmsaub, cia li qhuas Yawmsaub lub npe, nej uas yog Yawmsaub cov tub qhe cia li qhuas nws, yog nej cov uas sawv ntsug hauv Yawmsaub lub tuam tsev, yog cov uas sawv ntsug hauv peb tus Vajtswv tej tshav puam tuam tsev. Cia li qhuas Yawmsaub vim Yawmsaub yog tus zoo kawg nkaus. Cia li hu nkauj qhuas nws lub npe vim nws yog tus muaj lub siab hlub. Yawmsaub xaiv Yakhauj cia rau Yawmsaub, thiab xaiv Yixayee ua nws teej nws tug. Rau qhov kuv paub tias Yawmsaub yog tus loj kawg, thiab paub tias peb tus Tswv loj dua tej timtswv huvsi. Yawmsaub xav ua dabtsi, nws kuj ua yam ntawd, tsis hais saum ntuj thiab hauv ntiajteb thiab hauv hiavtxwv thiab hauv nruab tiv txwv. Yawmsaub yog tus uas ua rau tej huab sawv tim qab ntuj kawg tuaj thiab ua muaj xob laim rau thaum nag los, thiab coj cua tawm hauv nws lub txhab cua los. Yawmsaub yog tus uas tua Iyi cov tub hlob, tsis hais neeg thiab tsiaj txhu. Iyi 'e, hauv nej Yawmsaub tau ua tej txujci tseem ceeb thiab txujci phimhwj los tawm tsam Falau thiab nws cov tub teg tub taws sawvdaws. Nws ntaus yeej ntau haiv neeg, thiab tua tau tej vajntxwv uas muaj hwjchim heev, yog cov Amaulai tus vajntxwv Xihoo, thiab Npasas tus vajntxwv Aus, thiab cov Khana‑as tej vajntxwv huvsi. Thiab pub lawv tebchaws ua qub txeeg qub teg, yog pub ua qub txeeg qub teg rau nws haiv neeg Yixayee. Au Yawmsaub, koj lub npe nyob mus ib txhis. Au Yawmsaub, koj lub npe uas nto moo lug yuav nyob rau txhua tiam neeg, rau qhov Yawmsaub yuav tsa nws haiv neeg txojcai, thiab yuav khuvleej nws cov tub qhe. Ib tsoom tebchaws tej dab mlom yog nyiaj thiab kub uas neeg txhais tes ua. Tej dab mlom ntawd muaj qhov ncauj los hais tsis tau lus, muaj qhov muag los tsis pom kev, muaj qhov ntsej los tsis hnov lus, thiab twb tsis muaj pa hauv lub qhov ncauj. Cov uas ua tej dab mlom ntawd kuj zoo ib yam nkaus li tej dab mlom ntawd, cov uas vam khom tej dab mlom ntawd kuj zoo ib yam nkaus. Ib tsoom Yixayee 'e, nej cia li qhuas Yawmsaub, Aloo caj ces 'e, nej cia li qhuas Yawmsaub. Levi caj ces 'e, nej cia li qhuas Yawmsaub, nej cov uas hwm thiab paub ntshai Yawmsaub, cia li qhuas Yawmsaub. Cia li qhuas Yawmsaub hauv Xi‑oo, tus uas nyob hauv Yeluxalees. Cia li qhuas Yawmsaub. Cia li ua Yawmsaub tsaug, rau qhov nws yog tus zoo kawg. Vim nws txojkev hlub uas ruaj khov nyob mus ib txhis. Cia li ua ib tsoom timtswv tus Vajtswv tsaug. Vim nws txojkev hlub uas ruaj khov nyob mus ib txhis. Cia li ua cov uas muaj hwjchim tus Tswv tsaug. Vim nws txojkev hlub uas ruaj khov nyob mus ib txhis. Nws tib leeg ua tau tej txujci phimhwj. Vim nws txojkev hlub uas ruaj khov nyob mus ib txhis. Nws muaj tswvyim tsim nruab ntug. Vim nws txojkev hlub uas ruaj khov nyob mus ib txhis. Nws nthuav lub ntiajteb rau saum nplaim dej. Vim nws txojkev hlub uas ruaj khov nyob mus ib txhis. Nws tsim lub hnub lub hli ci. Vim nws txojkev hlub uas ruaj khov nyob mus ib txhis. Nws tsim lub hnub kav nruab hnub. Vim nws txojkev hlub uas ruaj khov nyob mus ib txhis. Nws tsim lub hli thiab cov hnub qub kav hmo ntuj. Vim nws txojkev hlub uas ruaj khov nyob mus ib txhis. Nws tua cov Iyi tej tub hlob. Vim nws txojkev hlub uas ruaj khov nyob mus ib txhis. Nws coj cov Yixayee tawm hauv lawv mus. Vim nws txojkev hlub uas ruaj khov nyob mus ib txhis. Yog nws txhais tes uas muaj hwjchim thiab nws txhais npab uas tsa hlo. Vim nws txojkev hlub uas ruaj khov nyob mus ib txhis. Nws muab dej Hiavtxwv Liab faib kiag. Vim nws txojkev hlub uas ruaj khov nyob mus ib txhis. Nws coj cov Yixayee hla hauv nruab nrab hiavtxwv mus. Vim nws txojkev hlub uas ruaj khov nyob mus ib txhis. Nws muab Falau thiab nws cov tub rog xyeeb kiag rau hauv Hiavtxwv Liab. Vim nws txojkev hlub uas ruaj khov nyob mus ib txhis. Nws coj nws haiv neeg hla dhau tebchaws moj sab qhua. Vim nws txojkev hlub uas ruaj khov nyob mus ib txhis. Nws ntaus yeej tej vajntxwv uas muaj hwjchim. Vim nws txojkev hlub uas ruaj khov nyob mus ib txhis. Thiab tua tau tej vajntxwv uas muaj koob meej nto moo lug, Vim nws txojkev hlub uas ruaj khov nyob mus ib txhis. Yog cov Amaulai tus vajntxwv Xihoo, Vim nws txojkev hlub uas ruaj khov nyob mus ib txhis. Thiab Npasas tus vajntxwv Aus. Vim nws txojkev hlub uas ruaj khov nyob mus ib txhis. Nws muab lawv tej tebchaws ua qub txeeg qub teg, Vim nws txojkev hlub uas ruaj khov nyob mus ib txhis. Yog pub ua qub txeeg qub teg rau cov Yixayee uas yog nws tub qhe. Vim nws txojkev hlub uas ruaj khov nyob mus ib txhis. Twb yog nws nco ntsoov txog peb rau thaum peb poob qes txom nyem ntsuav. Vim nws txojkev hlub uas ruaj khov nyob mus ib txhis. Thiab nws cawm peb dim hauv peb cov tshawj chim. Vim nws txojkev hlub uas ruaj khov nyob mus ib txhis. Nws pub zaub pub mov rau txhua yam uas ciaj sia tau noj. Vim nws txojkev hlub uas ruaj khov nyob mus ib txhis. Nej cia li ua Vajtswv Ntuj tsaug. Vim nws txojkev hlub uas ruaj khov nyob mus ib txhis. Peb zaum ntawm tej ntug dej hauv Npanpiloo, thiab quaj ntsuag rau thaum peb nco txog Xi‑oo. Peb muab peb tej nkauj nog ncas khuam rau saum tsob ntoo lwg zaj uas nyob qhov ntawd. Mas qhov ntawd, cov uas ntes peb kom peb hu nkauj, thiab cov uas tsim txom peb kom peb luag xyiv fab, lawv hais tias, “Cia li hu ib zaj nkauj Xi‑oo rau peb mloog.” Peb yuav hu Yawmsaub tej nkauj tau li cas rau hauv lwm tebchaws? Yeluxalees 'e, yog kuv tsis nco qab koj, thov cia kuv txhais tes xis tsis txhob nco qab tej uas kuv txawj. Yog kuv tsis nco txog koj, thiab yog kuv tsis muab Yeluxalees ua loj dua kuv tej kev xyiv fab huvsi, thov cia kuv tus nplaig lo kuv lub qab yiag. Au Yawmsaub, thov nco tej uas cov Edoo ua rau hnub uas Yeluxalees tawg. Lawv hais tias, “Cia li rhuav kom puam tsuaj, cia li rhuav kom puam tsuaj pob tag ti nkaus taw.” Npanpiloo tus ntxhais 'e, koj yuav raug muab ua kom puam tsuaj lauj! Tus uas ua pauj rau koj npaum li uas koj tau ua rau peb, yuav tau nyob kaj siab lug. Tus uas muab nej tej menyuam mos laim mus ntsawm pob zeb, yuav tau nyob kaj siab lug. Au Yawmsaub, kuv ua koj tsaug kawg kuv lub siab, kuv hu nkauj qhuas koj tab meeg ib tsoom timtswv. Kuv pe ncaj tuaj rau koj lub tuam tsev uas dawb huv, thiab ua tsaug koj lub npe vim koj txojkev hlub uas ruaj khov, thiab koj txojkev ncaj uas tso siab tau. Rau qhov koj txhawb nqa koj lub npe, thiab koj tej lus siab dua txhua yam huvsi. Hnub uas kuv hu thov, koj kuj teb kuv, koj pub kom kuv tus ntsuj plig muaj zog zuj zus tuaj. Au Yawmsaub, ib tsoom vajntxwv sawvdaws hauv ntiajteb yuav qhuas koj, rau qhov lawv hnov tej lus uas tawm hauv koj lub qhov ncauj los. Lawv yuav hu nkauj txog Yawmsaub tej haujlwm, vim Yawmsaub lub hwjchim ci ntsa iab loj heev. Txawm yog Yawmsaub siab kawg nkaus los nws tseem xam pom cov uas qes kawg, txawm yog nws nyob deb los nws yeej paub cov neeg khav theeb. Txawm yog kuv taug kev hauv nruab nrab tej kev ceeblaj, los koj tuav rawv kuv txojsia cia. Koj tsa tes hlo tiv thaiv kuv tej yeeb ncuab txojkev npau taws. Koj txhais tes xis tso kuv dim. Yawmsaub yuav ua raws li nws lub siab xav tseg kom tiav rau kuv. Au Yawmsaub, koj txojkev hlub ruaj khov nyob mus ib txhis. Thov tsis txhob tso koj tes haujlwm tseg. Au Yawmsaub, koj twb tshuaj saib kuv, thiab paub kuv zoo. Thaum kuv zaum thiab sawv ntsug, los koj kuj paub. txawm yog koj nyob deb koj yeej paub tej uas kuv xav. Koj ntsia ntsoov thaum kuv taug kev thiab thaum kuv so, koj yeej paub kuv txhua txojkev huvsi. Au Yawmsaub, ua ntej uas kuv tus nplaig tsis tau hais, koj twb paub tag huvsi lawm. Koj thaiv tom kuv hauv ntej thiab tom kuv qub qab, thiab muab koj txhais tes roos kuv. Tej kev paub li no kuv phimhwj kawg, nyob siab kawg kuv ncav tsis txog. Kuv yuav tsiv nraim koj tus Ntsuj Plig rau qhovtwg? Kuv yuav khiav rau qhovtwg thiaj dhau koj lub xubntiag? Yog kuv nce mus rau saum ntuj, koj kuj nyob qhov ntawd, yog kuv mus pw rau hauv tub tuag teb, koj kuj nyob qhov ntawd. Txawm yog kuv muaj tis ya yam li tus duab kaj ntug thiab mus nyob tim ntug hiavtxwv uas deb kawg nkaus, los qhov chaw ntawd koj txhais tes tseem coj kuv, thiab koj txhais tes xis tseem tuav rawv kuv cia. Yog kuv hais tias, “Thov cia qhov tsaus roos kuv, thiab cia qhov kaj uas nyob ib ncig kuv ntxeev ua hmo ntuj,” mas txawm yog tsaus ntuj los tsis tsaus rau koj, hmo ntuj kuj ci ib yam li nruab hnub, qhov tsaus kuj zoo ib yam li qhov kaj rau koj. Rau qhov koj tsim txhua yam hauv kuv lub nrog cev, thiab koj muab kuv txuas rau hauv kuv niam lub plab. Kuv qhuas koj vim koj tsim kuv phimhwj kawg thiab xav tsis thoob. Koj tes haujlwm mas phimhwj. Koj paub kuv zoo heev. Thaum kuv raug tsim nyob hauv qhov nraim nkoos, thiab muab kuv tej pob txha sib txuas ua ke hauv lub ntiajteb qhov uas tob heev, kuv lub cev ntaj ntsug muab zais tsis tau ib qho ntawm koj kiag li. Koj lub qhov muag pom kuv rau thaum tsis tau xeeb rau hauv nruab thiab. Txhua hnub uas teem cia rau kuv kuj sau cia rau hauv koj phau ntawv, ua ntej uas tsis tau muaj txhua hnub ntawd los. Au Vajtswv, tej uas koj xav cia tsim txiaj kawg nkaus rau kuv, muab sau zog ua ke kuj ntau kawg li lauj! Yog kuv yuav suav, mas muaj ntau dua tej xuab zeb. Thaum kuv tsim dheev los, kuv tseem nrog nraim koj. Au Vajtswv, kuv xav kom koj tua cov neeg limhiam tseg, thiab xav kom cov neeg noj nyoog ncaim ntawm kuv mus, yog cov uas npaj ua phem hais tawm tsam koj, yog cov uas tsab ua loj tawm tsam koj es yuav ua phem. Au Yawmsaub, kuv tsis ntxub cov uas ntxub koj lov? Kuv tsis dhuav cov uas sawv tawm tsam koj lov? Kuv ntxub lawv heev kawg nkaus, thiab suav tias lawv yog kuv li yeeb ncuab. Au Vajtswv, thov koj tshuaj saib kuv thiab paub kuv lub siab. Thov sim kuv thiab paub tej uas kuv xav. Thiab saib muaj yam kev phem twg nyob hauv kuv los tsis muaj, thiab coj kuv taug txojkev uas nyob mus ib txhis. Au Yawmsaub, thov cawm kuv dim ntawm cov neeg ua phem, thov tiv thaiv kuv ntawm cov neeg ua nruj ua tsiv, yog cov uas xav tswvyim hauv lub siab ua phem, thiab pheej tshum kom muaj kev ua rog. Lawv ua lawv tus nplaig ntse ib yam li nplaig nab, thiab lawv daim tawv ncauj muaj taug ib yam li taug nab raj kub sai. Au Yawmsaub, thov tsom kwm kuv kom dim ntawm cov neeg limhiam txhais tes, thov tiv thaiv kuv ntawm cov neeg ua nruj ua tsiv uas ntaus tswvyim chua kuv kotaw. Cov neeg khav theeb caws yej caws ntxiab tos kuv, thiab cuab tsig cuab hlua rau kuv. Kuv txojkev mas lawv cuab hmab cuab hlua tos. Kuv hais rau Yawmsaub tias, “Koj yog kuv tus Vajtswv.” Au Yawmsaub, thov koj tig ntsej mloog kuv lub suab taij thov koj. Au Yawmsaub uas yog kuv tus Tswv, yog tus uas muaj zog cawm kuv dim, koj roos kuv lub taubhau thaum uas ntaus rog. Au Yawmsaub, thov tsis txhob kheev cov neeg limhiam ua tau raws li lawv lub siab xav, tsis txhob kheev lawv tej tswvyim phem tiav. Cov uas nyob vij ib ncig kuv tsa lawv lub taubhau siab. Thov cia lawv raug tej lus phem uas lawv daim tawv ncauj hais. Thov kom cov ncaig taws uas kub heev poob raug lawv, thov cia lawv raug pov rau hauv hluavtaws thiab poob rau hauv qhov ntuj tsis txhob kheev lawv tawm los li. Thov tsis txhob cia cov uas iab hiam luag nyob ruaj hauv lub tebchaws, thov cia txojkev phem raws caum tau tej neeg ua nruj ua tsiv. Kuv paub tias Yawmsaub tuav cov neeg txom nyem nyuaj siab txojcai, thiab tu plaub ncaj pab cov pluag. Yeej muaj tseeb, cov neeg ncaj ncees yuav ua tsaug koj lub npe, cov neeg siab ncaj yuav tau nyob ntawm koj xubntiag. Au Yawmsaub, kuv taij thov koj, thov koj teb kuv sai sai. Thov koj tig ntsej mloog kuv lub suab rau thaum uas kuv thov hu koj. Thov cia kuv tej lus thov zoo yam nkaus li cov tshuaj tsw qab rau ntawm koj lub xubntiag, thiab qhov uas kuv tsa tes thov zoo yam nkaus li tej uas muab xyeem thaum yuav tsaus ntuj. Au Yawmsaub, thov koj zov kuv lub qhov ncauj, thov zov kuv daim tawv ncauj. Thov tsis txhob cia kuv lub siab qaug mus rau txojkev phem twg li, tsis txhob cia kuv nrog cov neeg limhiam ua ib nqag xav ua kev phem kev qias, tsis txhob cia kuv nrog lawv noj nqaij noj hno. Thov cia tus ncaj ncees ntaus thiab ntuas kuv vim yog nws hlub. Tsis txhob cia cov neeg limhiam tej roj pleev kuv lub taubhau, vim yog kuv pheej thov Yawmsaub tawm tsam lawv tej kev phem. Thaum cov neeg uas txiav txim raug muab pov rau hauv qab tsuas, mas ib tsoom neeg yuav paub tias kuv tej lus muaj tseeb. Lub pob zeb tawg ri sua saum npoo av li cas, lawv tej pob txha yuav ri sua tom tej toj ntxas li ntawd. Au Vajtswv Yawmsaub, kuv lub qhov muag ntsia ntsoov koj, kuv cawm siav rau hauv koj, koj tsis txhob cia kuv txojsia tu. Thov koj pab kom kuv tsis txhob mag rooj nta uas luag cuab kuv, thiab tsis txhob mag rooj ntxiab uas tej neeg phem cuab kuv. Thov cia cov neeg limhiam mag lawv rooj hlua huvsi, es cia kuv dim. Kuv tsa ncauj thov Yawmsaub, kuv tsa suab taij thov Yawmsaub pab. Kuv quaj yws kuv tej kev nyuaj siab rau ntawm nws xubntiag, kuv qhia kuv tej kev txom nyem rau nws. Thaum kuv siab ntsws yaj tag, koj paub kuv txojkev. Txojkev uas kuv yuav mus, luag cuab hmab cuab hlua rau kuv. Thov koj tsa muag ntsia ntawm kuv sab xis vim tsis muaj leejtwg tsom kwm kuv li lawm. Kuv tsis muaj lub chaw cawm siav lawm, tsis muaj leejtwg mob siab kuv. Au Yawmsaub, kuv tsa ncauj thov koj, kuv hais tias, “Koj yog kuv lub chaw cawm siav. Thaum kuv tseem ciaj sia nyob, koj yeej yog kuv tug.” Thov koj mloog kuv lub suab thov, vim kuv poob qes kawg li. Thov cawm kuv dim ntawm cov uas tsim txom kuv, rau qhov lawv muaj zog heev dhau kuv. Thov tso kuv tawm hauv tsev lojfaj kom kuv thiaj li ua tsaug koj lub npe. Cov neeg ncaj ncees yuav nyob vij vog kuv, vim yog koj ua zoo heev rau kuv. Au Yawmsaub, thov koj mloog kuv tej lus thov, thov koj tig ntsej mloog tej lus uas kuv taij thov koj. Thov koj teb kuv raws li koj txojkev ncaj uas tso siab tau thiab raws li koj txojkev ncaj ncees. Thov tsis txhob txiav txim rau koj tus tub qhe, vim tsis muaj ib tug neeg ciaj uas ncaj ncees ntawm koj lub xubntiag. Kuv tus yeeb ncuab caum cuag kuv, nws muab kuv mos ntho rau hauv av, nws muab kuv nyob rau hauv qhov chaw tsaus ntuj nti, zoo ib yam li tus uas twb tuag ntev lawm. Vim li ntawd kuv tus ntsuj plig qaug zog tag, kuv poob siab ntshai kawg li. Kuv nco txog yav thaum ub, kuv tshawb nrhiav txhua yam uas koj tau ua lawm, kuv xav txog tej uas koj txhais tes tau ua. Kuv cev tes ncuv rau koj, kuv tus ntsuj plig nqhis nrhiav koj ib yam li thaj av uas qhuav nkig nkuav. Au Yawmsaub, thov maj nroos teb kuv, kuv tus ntsuj plig yaj tag. Thov tsis txhob fee plhu ntawm kuv, tsam ces kuv zoo li cov neeg uas mus rau hauv tub tuag teb. Thaum kaj ntug thov cia kuv hnov txog koj txojkev hlub uas ruaj khov, vim yog kuv muab kiag kuv lub siab rau koj. Thov qhia txojkev uas yuav tsum mus rau kuv, rau qhov kuv yeej muab kuv lub siab tag nrho rau koj. Au Yawmsaub, thov cawm kuv dim ntawm kuv cov yeeb ncuab, kuv tau tsiv nraim rau hauv koj. Thov qhia kuv paub ua raws li koj lub siab nyiam, rau qhov koj yog kuv tus Vajtswv. Thov koj tus Ntsuj Plig uas zoo coj kuv taug txojkev tiaj kev tus. Au Yawmsaub, vim yog saib rau koj lub npe, thov koj tuav kuv txojsia cia. Koj yog tus ncaj ncees, thov koj coj kuv tawm hauv tej kev ceeblaj los. Vim koj txojkev hlub uas ruaj khov, thov koj muab kuv cov yeeb ncuab rhuav pov tseg, thiab thov muab txhua tus uas tawm tsam kuv ua kom puam tsuaj tag, rau qhov kuv yog koj tus tub qhe. Cia li qhuas Yawmsaub uas yog txhib zeb uas tiv thaiv kuv, yog tus uas muab kuv txhais tes xyaum ua rog, thiab muab kuv ntiv tes xyaum sib ntaus sib tua. Nws yog txojkev hlub uas ruaj khov thiab yog kuv lub chaw nraim cev uas khov kho, nws yog kuv lub chaw uas ruaj khov, yog tus uas tso kuv dim, nws yog daim hlau uas tiv thaiv kuv, yog tus uas kuv nraim cev rau hauv. Nws muab ib tsoom neeg txo rau kuv tswjhwm. Au Yawmsaub, neeg yog dabtsi es koj yuav mob siab lawv? Neeg tej tub ki yog dabtsi es koj yuav nco txog lawv? Neeg tsuas zoo li ib pas cua xwb, thiab nws lub caij nyoog tsuas zoo li tus duab ntxoov ntxoo uas hla dhau plaws mus. Au Yawmsaub, thov koj qheb kiag koj lub rooj ntug thiab nqes los, thov koj kov tej toj roob hauv pes ua kom tawm pa ncho lug. Thov tso xob laim los ua kom cov yeeb ncuab tawg ri sua mus, thov koj tua rab xub ua rau lawv tawg khiav tag. Thov koj cev tes saum ntuj tuaj, thov cawm kuv thiab npo kuv dim hauv cov dej tob tob, thiab dim hauv lwm haiv neeg txhais tes. Lawv lub qhov ncauj txawj dag, lawv tsa txhais tes xis twv los kuj yog dag. Au Vajtswv, kuv yuav hu zaj nkauj tshiab qhuas koj, kuv yuav ntaus lub nkauj nog ncas kaum txoj xov qhuas koj. Koj yog tus uas pab tej vajntxwv kov yeej, thiab yog tus uas cawm koj tus tub qhe Davi dim. Thov koj cawm kuv dim rab ntaj noj nyoog thiab tso kuv dim hauv lwm haiv neeg txhais tes. Lawv lub qhov ncauj txawj dag, lawv tsa txhais tes xis twv los kuj yog dag. Thaum peb cov tub tseem hluas, thov kom lawv zoo li tsob ntoo uas twb loj txaus lawm, thiab thov kom peb cov ntxhais zoo yam nkaus li tus ncej ntawm kaum tsev uas txaug ua vajntxwv lub tsev. Thov kom peb tej txhab puv thiab muaj txhua yam qoob nyob hauv. Thov kom peb tej yaj muaj menyuam qas txhiab qas vam tus rau hauv peb tej tshav zaub. Thov kom peb tej tsiaj txhu muaj zes coob coob, thov kom tsis txhob muaj leejtwg txeem mus rau hauv thiab tsis muaj leejtwg tawm khiav mus, thiab thov kom tsis txhob muaj suab quaj lwj siab hauv peb tej kev. Haiv neeg uas tau koob hmoov li no yuav tau nyob kaj siab lug, haiv neeg uas lawv tus Vajtswv yog Yawmsaub yuav tau nyob kaj siab lug. Kuv yuav qhuas ntxhias koj uas yog kuv tus Vajtswv thiab kuv tus vajntxwv, thiab qhuas koj lub npe mus ib txhis tsis kawg. Kuv yuav niaj hnub qhuas koj, thiab qhuas koj lub npe mus ib txhis tsis kawg. Yawmsaub loj kawg nkaus, tsim nyog qhuas nws heev kawg. Qhov uas nws loj ntawd mas paub tsis tag. Ib tiam yuav qhuas koj tes haujlwm rau ib tiam mloog, thiab yuav piav koj tej haujlwm uas muaj hwjchim. Lawv yuav hais txog koj lub hwjchim ci ntsa iab thiab koj lub meej mom, thiab kuv yuav tshawb nrhiav koj tej haujlwm phimhwj. Neeg yuav piav txog koj tej haujlwm txaus ntshai lub hwjchim, thiab kuv yuav piav txog qhov uas koj loj kawg. Lawv yuav piav txog koj txojkev zoo nplua mias lub koob meej, lawv yuav hu nkauj txog koj txojkev ncaj ncees. Yawmsaub muaj siab hlub thiab siab khuvleej, nws tsis chim sai thiab muaj txojkev hlub ruaj khov nplua mias. Yawmsaub ua zoo rau txhua tus, nws tab ncuab txhua yam uas nws tsim. Au Yawmsaub, txhua yam uas koj tsim los yuav ua koj tsaug, thiab koj cov neeg dawb huv sawvdaws yuav qhuas koj. Lawv yuav hais txog koj lub meej mom uas koj ua vajntxwv kav, thiab piav txog koj lub hwjchim, kom neeg tej tub thiaj paub txog koj tej haujlwm uas muaj hwjchim thiab koj lub meej mom uas ua vajntxwv kav. Koj lub tebchaws nyob mus ib txhis tsis kawg, koj ua vajntxwv kav mus txhua tiam neeg. Yawmsaub ua ncaj raws li txhua lo lus uas nws twb hais tseg lawm, thiab hlub txhua yam uas nws ua huvsi. Yawmsaub hwj txhua tus uas yuav ntog, thiab tsa txhua tus uas poob thab sawv. Txhua tus lub qhov muag ntsia ntsoov koj, thiab koj pub zaub mov rau lawv raws sijhawm. Koj cev tes, koj pub rau txhua yam uas ciaj sia tau noj npaum li uas lawv xav noj. Yawmsaub ua ncaj ua ncees rau hauv txhua txojkev, thiab hlub txhua yam uas nws ua huvsi. Yawmsaub nyob ze txhua tus uas thov hu nws, yog txhua tus uas muaj siab thov tiag. Nws pub rau txhua tus uas hwm thiab paub ntshai nws raws li lawv lub siab xav, thiab nws mloog lawv lub suab quaj thov thiab cawm lawv dim. Yawmsaub tsom kwm txhua tus uas hlub nws, tiamsis nws yuav ua kom cov uas limhiam sawvdaws puam tsuaj. Kuv lub qhov ncauj yuav qhuas Yawmsaub, cia txhua yam uas ciaj sia qhuas nws lub npe uas dawb huv mus ib txhis tsis kawg. Cia li qhuas Yawmsaub. Kuv tus ntsuj plig 'e, cia li qhuas Yawmsaub lauj! Kuv yuav qhuas Yawmsaub tag kuv sim neej, kuv yuav hu nkauj qhuas kuv tus Vajtswv rau thaum kuv tseem muaj txojsia nyob. Tsis txhob tso siab rau cov thawj, lawv yog neeg xwb, tsis txawj pab. Thaum lawv tsis ua pa lawm lawv kuj rov qab mus rau hauv av, tib hnub ntawd tej uas lawv npaj tseg lawd kuj puam tsuaj tag. Tus uas Yakhauj tus Vajtswv pab, thiab nws lub chaw vam nyob hauv nws tus Vajtswv Yawmsaub, tus ntawd tau nyob kaj siab lug. Vajtswv yog tus uas tsim ntuj tsim teb thiab dej hiavtxwv thiab txhua yam uas nyob hauv, nws yeej ua raws li nws tej lus cog tseg mus ib txhis. Nws tu plaub ncaj rau cov uas raug quab yuam, nws pub zaub mov rau cov uas tshaib plab noj. Yawmsaub tso cov uas raug kaw dim. Yawmsaub qheb cov uas dig muag lub qhov muag. Yawmsaub tsa cov uas poob thab sawv los. Yawmsaub hlub cov uas ncaj ncees. Yawmsaub tsom kwm lwm haiv neeg uas nrog nej nyob, nws hwj cov poj ntsuam thiab cov menyuam ntsuag uas tsis muaj txiv, tiamsis nws ua rau cov neeg limhiam tej kev puam tsuaj mus. Yawmsaub yuav ua vajntxwv mus ib txhis, Xi‑oo 'e, koj tus Vajtswv yuav kav txhua tiam mus li. Cia li qhuas Yawmsaub. Cia li qhuas Yawmsaub. Qhov uas hu nkauj qhuas peb tus Vajtswv yog qhov uas zoo, qhov uas hu nkauj qhuas nws yog yam uas peb zoo siab ua thiab tsim nyog peb ua. Yawmsaub rov qab rhawv lub nroog Yeluxalees, thiab nws qaws cov Yixayee uas tawg ua sab ua sua rov qab los. Nws kho cov neeg lwj siab thiab qhwv lawv tej qhov txhab. Nws kom tseg tias yuav tsum muaj pes tsawg lub hnub qub thiab tis npe rau txhua lub huvsi. Peb tus Tswv loj kawg thiab muaj hwjchim kawg nkaus, tsis muaj leejtwg yuav ntsuas tau nws lub tswvyim. Yawmsaub tsa cov uas raug tsuj yuam sawv, nws yuav qhau cov neeg limhiam rau hauv av. Cia li hu nkauj ua Yawmsaub tsaug, cia li ntaus nkauj nog ncas qhuas peb tus Vajtswv. Nws tso huab laum nruab ntug, nws npaj nag cia rau lub ntiajteb, nws ua kom tuaj nyom rau saum tej roob. Nws pub zaub rau tej tsiaj txhu noj thiab pub rau tej menyuam uab lag uas quaj tau noj. Tsis yog nws zoo siab rau tej nees lub zog, thiab tsis yog nws zoo siab rau neeg txhais ceg uas dhia. Tiamsis Yawmsaub zoo siab rau cov uas hwm thiab paub ntshai nws thiab cov uas vam khom rau nws txojkev hlub uas ruaj khov. Yeluxalees 'e, cia li qhuas Yawmsaub, Xi‑oo 'e, cia li qhuas koj tus Vajtswv, vim nws tuav koj tej rooj loog ruaj khov kho, nws foom koob hmoov rau tej tub ki uas nyob hauv koj. Nws kuj pub kev thaj yeeb rau hauv koj lub tebchaws, nws pub koj tau noj tej mog zoo zoo tsau npo. Nws xa nws tej lus tuaj rau lub ntiajteb, nws tej lus nthuav mus sai kawg. Nws tso daus xib daus npu los yam li plaub yaj, nws tso te los dawb vog li hmoov tshauv. Nws tso lawg los yam li qe zeb. Leejtwg yuav thev taus qhov uas nws ua kom no txias heev ntawd? Nws tso lus plhuav, ua rau tej ntawd yaj tag, nws tso nws li cua ntsawj ua tej dej ntws kiag mus. Nws qhia nws tej lus rau Yakhauj, thiab qhia nws tej kab ke thiab kevcai rau Yixayee. Nws yeej tsis tau qhia tej kevcai no rau lwm haiv neeg, lawv tsis paub nws tej kevcai. Cia li qhuas Yawmsaub. Cia li qhuas Yawmsaub. Cia li qhuas Yawmsaub saum ntuj. Cia li qhuas nws saum tej chaw siab. Nws cov tubtxib saum ntuj sawvdaws, cia li qhuas nws, nws cov tub rog sawvdaws, cia li qhuas nws lauj! Lub hnub lub hli, cia li qhuas nws, tej hnub qub uas ci, nej txhua lub cia li qhuas nws. Lub ntuj uas siab kawg nkaus, thiab cov dej uas nyob saum ntuj, nej cia li qhuas nws. Cia tej ntawd qhuas Yawmsaub lub npe, vim yog nws hais xwb, tej ntawd cia li muaj tshwm los. Nws muab lawv txawb cia mus ib txhis tsis kawg, nws rhawv kevcai rau lawv tsis kheev lawv hla dhau. Cia li qhuas Yawmsaub hauv lub ntiajteb, tsis hais tej tsiaj uas loj kawg hauv hiavtxwv thiab tej dej nruab tiv txwv, xob laim thiab lawg, daus xib daus npu thiab huab, thiab cua daj cua dub uas ua raws li nws hais, tej roob thiab tej pov roob huvsi, tej txiv ntoo thiab tej ntoo ciab huvsi, tej tsiaj qus thiab tej tsiaj nyeg huvsi, tej tsiaj uas nkag hauv av thiab tej nas noog uas ya saum nruab ntug, tej vajntxwv hauv lub ntiajteb thiab ib tsoom neeg sawvdaws, cov uas ua thawj thiab cov uas kav hauv lub ntiajteb sawvdaws, cov tub hluas ntxhais hluas, cov laus thiab cov menyuam yaus. Cia lawv sawvdaws qhuas Yawmsaub lub npe, rau qhov nws tib leeg lub npe nyob siab dua luag tej, nws lub hwjchim ci ntsa iab nyob siab dua lub ntiajteb thiab lub ntuj. Nws tsa kom muaj ib tug kub rau nws haiv neeg, yog tus uas nws cov neeg dawb huv sawvdaws qhuas, yog tus uas cov Yixayee uas nyob ze nws qhuas. Cia li qhuas Yawmsaub. Cia li qhuas Yawmsaub. Cia li hu zaj nkauj tshiab rau Yawmsaub, thaum cov uas siab xib rau Vajtswv tuaj txoos ua ke cia li qhuas nws. Cia cov Yixayee zoo siab rau tus uas tsim lawv, cia Xi‑oo tej tub ki xyiv fab rau lawv tus vajntxwv. Cia lawv hu nkauj seev cev qhuas nws lub npe, cia lawv ntaus nkauj nog ncas thiab ntaus nruas seev suab qhuas nws. Rau qhov Yawmsaub zoo siab rau nws haiv neeg, nws pub cov uas txo hwjchim tau txojkev kov yeej ua mom rau lawv ntoo. Cia cov uas siab xib rau Vajtswv zoo siab hlo rau qhov uas kov yeej, thiab cia lawv hu nkauj xyiv fab hlo rau hauv lawv tej txaj pw. Cia lawv lub caj pas hu nrov qhuas Vajtswv, cia lawv tuav rawv rab ntaj ob sab ntse hauv lawv txhais tes, xwv thiaj ua pauj rau ib tsoom tebchaws thiab rau txim rau ib tsoom neeg, thiab muab saw hlau khi lawv tej vajntxwv, thiab muab rab cuab hlau cuab lawv tej thawj, thiab rau txim rau lawv raws li Yawmsaub twb sau tseg cia lawm. No yog tej koob meej uas muab rau nws cov neeg uas siab xib rau nws sawvdaws. Cia li qhuas Yawmsaub. Cia li qhuas Yawmsaub. Cia li qhuas Vajtswv rau hauv qhov chaw uas pe nws, cia li qhuas nws hauv nws lub chaw uas muaj hwjchim saum ntuj. Cia li qhuas nws vim nws tej haujlwm muaj hwjchim, cia li qhuas nws vim nws loj tshaj plaws. Cia li tshuab raj kub yaj ua suab qhuas nws, cia li ntaus nkauj nog ncas me thiab nkauj nog ncas loj qhuas nws. Cia li dhia seev cev npuaj nruas qhuas nws, cia li tshiav nkauj nog ncas thiab tshuab raj nplaim qhuas nws. Cia li npuaj nruas tooj liab nrov ntxhe ntxhias, cia li npuaj nruas tooj liab nrov doog diaj qhuas nws. Txhua yam uas ciaj sia cia li qhuas Yawmsaub. Cia li qhuas Yawmsaub lauj! Cov lus no yog Davi tus tub Xalaumoo uas yog cov Yixayee tus vajntxwv li paj lug ua kom tau tswvyim thiab paub kevcai ua neej, thiab to taub tej lus txawj ntse, khaws tej lus qhuab qhia uas qhia kev thoob tsib to nrog thiab kev txiav txim ncaj thiab kev ua ncaj thiab qhov uas ua ncaj nruab nrab, muab txojkev thoob tsib to nrog rau tus uas tsis paub qabhau, muab kev txawj ntse thiab kev paub txhij paub txhua rau tus hluas. Tus txawj ntse tau hnov thiab tsav kev paub rau nws, thiab tus uas thoob tsib to nrog yuav tau peevxwm ua haujlwm, kom thiaj nkag siab paj lug piv lus, thiab nkag siab cov txawj ntse tej lus thiab tej txhiaj txhais. Qhov uas hwm thiab paub ntshai Yawmsaub yog lub hauv paus txawj ntse, tus ruam yeej saib tsis taus tswvyim thiab tej lus qhuab qhia. Kuv tub 'e, cia li mloog koj txiv tej lus qhuab qhia, thiab tsis txhob muab koj niam tej lus qhia tso tseg, rau qhov tej lus ntawd yog lub mom paj ntoos zoo nkauj saum koj taubhau thiab yog tej saw nyiaj ntawm koj caj dab. Kuv tub 'e, yog tej neeg muaj txim ntxias koj, tsis txhob yeem mus. Yog lawv hais tias, “Nrog peb mus, cia peb mus zov kev tos tua neeg, cia peb mus zov kev tos tus uas tsis ua txhaum muab ntaus ua si. Cia peb muab nws nqos ciaj yam li tub tuag teb, thiab nqos kheej ib yam li lawv cov uas nqes rau hauv qhov tuag. Peb yuav tau tej qhov txhia chaw tsim txiaj txhua yam, peb yuav muab tej uas peb txeeb tau los ntim puv nkaus hauv peb tej tsev. Koj cia li nrog peb koom, peb sawvdaws yuav koom ib lub hnab nyiaj.” Kuv tub 'e, tsis txhob nrog lawv mus, yuav tsum tswj koj txhais kotaw ntawm lawv txojkev, rau qhov lawv txhais kotaw dhia mus ua phem, thiab lawv maj nroos mus txov luag los ntshav. Cuab vas rau noog pom yeej tsis tau qabhau. Tiamsis cov neeg no nyas zov tos lawv tus kheej li ntshav, thiab zov kev txov lawv txojsia. Txhua tus uas ua nruj ua tsiv es tau nyiaj txiag yeej yuav zoo li no, tej nyiaj txiag ntawd yuav rov txov lawv txojsia. Tswvyim hu nrov nrov ntawm tej kev, nws tsa suab hu ntawm tshav puam. Nws tuaj saum tej ntsa loog hu thiab piav ntawm rooj loog uas nkag rau hauv lub nroog, hais tias “Nej cov uas tsis thoob tsib 'e, nej yuav nyiam txojkev tsis thoob tsib mus ntev li cas? Thiab cov uas thuam luag yuav zoo siab thuam mus ntev li cas? Thiab cov uas ruam yuav ntxub kev txawj ntse ntev li cas? Nej cia li tig pob ntseg mloog kuv tej lus qhuab ntuas. Saib maj, kuv yuav nchuav tej uas kuv xav hauv lub siab rau nej, kuv yuav muab kuv tej lus qhia tseeb rau nej. Kuv twb hu los nej tsis yeem mloog, kuv twb cev tes los tsis muaj leejtwg quav ntsej, thiab nej tsis yeem txais yuav kuv tej lus taw qhia, thiab tsis yeem yuav kuv tej lus qhuab ntuas kiag li. Vim li no kuv yuav luag qhov uas nej raug kev puam tsuaj, thiab kuv yuav luag rau thaum uas nej ntshai ras zom zaws, thiab thaum kev ntshai ras los raug nej zoo yam nkaus li cua daj cua dub, thiab kev puam tsuaj los raug nej yam li khaub zeeg cua, thiab thaum kev txom nyem kev nyuaj siab los raug nej. Mas lawv yuav thov kuv los kuv yuav tsis teb. Lawv yuav siv zog nrhiav kuv tiamsis nrhiav tsis tau. Vim lawv ntxub kev txawj ntse thiab tsis xaiv yuav qhov uas hwm thiab paub ntshai Yawmsaub, thiab lawv tsis yuav kuv tej lus taw qhia kiag li thiab saib tsis taus kuv tej lus qhuab ntuas huvsi, vim li no lawv yuav saws raws li tej uas lawv ua, thiab lawv tej tswvyim ua phem rau luag yuav rov raug lawv pov khawv nkaus. Cov neeg tsis thoob tsib raug tua vim yog lawv tsis quav ntsej tej lus qhia, thiab cov neeg ruam raug puam tsuaj vim yog ua lag ua ta. Tiamsis tus uas mloog kuv yuav nyob tso siab plhuav, thiab yuav nyob kaj siab lug tsis txhawj tsis ntshai ib yam kev phem kiag li.” Kuv tub 'e, yog koj khaws kuv tej lus cia thiab muab kuv tej lus nkaw ceev rau hauv koj lub siab, thiab yog koj tig ntsej ncuv mloog lub tswvyim thiab tig lub siab los nrhiav kev to taub, yog koj hu nrhiav kev txawj ntse thiab tsa ncauj thov kev nkag siab, yog koj nrhiav tswvyim ib yam li nrhiav tej nyiaj, thiab nrhiav ib yam li nrhiav tej nyiaj txiag uas muab zais cia lawm, yog koj ua li no koj yuav to taub qhov uas hwm thiab paub ntshai Yawmsaub thiab txawj paub txog Vajtswv. Rau qhov Yawmsaub yog tus uas pub tswvyim, tej kev txawj ntse thiab tej kev nkag siab yog tawm hauv Yawmsaub qhov ncauj los. Nws ceev lub tswvyim cia rau cov uas siab ncaj, nws yog daim hlau tiv thaiv cov uas ua neej dawb huv. Nws ceev txojkev ua ncaj ua ncees thiab nws tsom kwm nws cov neeg dawb huv. Mas koj yuav paub txojkev ncaj ncees thiab kev txiav txim ncaj thiab ua ncaj nruab nrab thiab paub ua qhov zoo rau txhua fab. Tswvyim yuav nkag rau hauv koj lub siab, thiab kev txawj ntse yuav ua kom koj tus ntsuj plig xyiv fab. Kev txawj ntse yuav tsom kwm koj, thiab kev to taub yuav tiv thaiv koj, thiab yuav pab koj dim txojkev ua phem, thiab dim cov neeg ntxeev xaiv. Lawv tso txojkev ncaj ncees tseg, taug txojkev tsaus ntuj. Lawv yeej zoo siab ua phem thiab nyiam tej kev phem ntxeev ntxias, yog cov uas taug txojkev nkhaus, lawv yog neeg siab nkhaus xwb. Koj yuav dim ntawm tus pojniam plhu tuab, yog tus nkauj cuav zej cuav zos uas hais lus qab rog qab ntse, nws muab nws tus txiv uas thaum hluas nkauj nws yuav tso pov tseg, thiab tsis nco txog tej lus uas nws cog tseg rau nws tus Vajtswv lawm. Nws lub tsev yuav coj mus txog txojkev tuag, nws tej txujci yuav coj mus rau hauv tub tuag teb. Cov uas mus cuag nws tsis muaj ib tug rov qab los li, tsis muaj ib tug uas yuav rov los taug tau txojkev uas ciaj sia. Yog li ntawd koj yuav tsum taug cov neeg zoo txojkev, thiab coj raws li cov neeg ncaj ncees tus cujpwm, rau qhov cov uas siab ncaj yuav tau nyob hauv lub tebchaws, thiab cov uas ua siab dawb paug yuav tau nyob ruaj rau hauv. Tiamsis cov neeg limhiam yuav raug muab txiav tu hauv lub tebchaws, thiab cov neeg ntxeev ntxias yuav raug muab dob kiag cag. Kuv tub 'e, tsis txhob tsis nco qab kuv tej lus qhia, koj lub siab yij meem nco ntsoov kuv tej lus nkaw, rau qhov tej no yuav pub koj nyob ntev niaj ntau xyoo, thiab pub koj vam meej nyob kaj siab lug. Koj tsis txhob muab txojkev hlub thiab txojkev ua ncaj tso tseg. Cia li muab khi rau ntawm koj caj dab thiab muab sau cia rau hauv koj lub siab. Luag thiaj li saib taus koj thiab koj yuav tau koob meej zoo ntawm Vajtswv thiab neeg. Koj cia li tso siab plhuav rau Yawmsaub kawg siab kawg ntsws, koj tsis txhob vam khom koj li kev txawj ntse. Cia li lees yuav nws rau txhua txojkev uas koj mus, mas nws yuav pub koj taug txojkev ncaj. Tsis txhob xav hais tias koj txawj ntse. Cia li hwm thiab paub ntshai Yawmsaub thiab tig hlo ntawm txojkev phem. Qhov uas koj ua li no yuav ua rau koj lub cev nyob zoo thiab ua koj tej pob txha sib qas las. Cia li hwm Yawmsaub thiab muab koj tej qhov txhia chaw xyeem rau nws, thiab muab thawj phaum qoob loo txhua yam pub rau nws, mas koj lub txhab yuav puv nkaus, thiab kua txiv hmab yuav puv koj lub rhawv phwj yos. Kuv tub 'e, tsis txhob saib tsis taus Yawmsaub tej lus qhuab qhia, thiab tsis txhob dhuav nws tej lus ntuas, rau qhov Yawmsaub qhuab ntuas tus uas nws hlub, ib yam li leej txiv qhuab ntuas tus tub uas nws zoo siab rau. Tus uas nrhiav tau tswvyim thiab txawj nkag siab mas kaj siab lug, rau qhov tswvyim muaj nqes dua nyiaj txiag thiab muaj tshaj thawj dua kub. Tswvyim tsim txiaj dua npauj nyiaj npauj kub, thiab txhua yam uas koj ntshaw tsis muaj ib yam zoo cuag li tswvyim. Tswvyim sab tes xis tuav txojsia ntev, sab tes laug tuav kev muaj txiag thiab koob meej. Tswvyim txojkev yog txoj uas tshav ntuj nrig, thiab nws txhua txojkev yog kev sib hum xeeb. Tswvyim yog tsob ntoo uas pub txojsia rau cov uas tuav rawv nws, cov uas tuav rawv tswvyim cia ruaj, luag yuav hu tias kaj siab lug. Yawmsaub siv tswvyim tsim ntiajteb, thiab siv kev nkag siab nthuav lub ntuj. Nws siv nws kev txawj ntse ua kom dej txhawv hauv nruab tiv txwv los, thiab ua kom huab tso dej lwg los. Kuv tub 'e, koj cia li ceev lub tswvyim thiab kev txawj ntse, tsis txhob cia ob yam no khiav dhau ntawm koj lub qhov muag mus. Ob yam no yuav ua txojsia rau koj thiab yuav yog tej saw kub ntawm koj caj dab. Ces koj yuav ua koj lub neej tso siab plhuav thiab tsis dawm tes dawm taw. Yog koj zaum, los koj tsis ntshai dabtsi, thaum koj pw los yuav tsaug zog zoo siab tus yees. Koj tsis txhob ntshai tej uas ua rau koj ceeb uas tshwm plaws los tamsid, thiab tsis txhob ntshai tej kev puam tsuaj uas tej neeg limhiam raug, rau qhov Yawmsaub yuav yog koj lub chaw vam khom, nws yuav tiv thaiv tsis kheev koj txhais kotaw mag rooj hlua. Koj cia li ua zoo rau cov uas tsim nyog tau qhov zoo rau txhua lub sijhawm uas koj ua tau. Yog kwvtij zej zog cheem tsum ib yam dabtsi uas koj muaj, mas tsis txhob hais tias, “Koj rov qab mus tagkis rov tuaj es kuv li muab.” Tsis txhob ntaus tswvyim ua phem rau tej kwvtij zej zog uas nyob ze koj thiab tso siab rau koj. Yog luag tsis tau ua phem rau koj mas tsis txhob lam nrog luag sib cav sib ceg. Tsis txhob khib tug neeg ua limhiam ntais ntuj, thiab tsis xaiv taug nws tej kev txoj twg kiag li, rau qhov Yawmsaub ntxub tus neeg siab nkhaus, tiamsis nws nrog tus uas ua ncaj ncees sib raug zoo. Lo lus uas Yawmsaub foom tsis zoo yuav poob rau saum tej neeg limhiam lub tsev, tiamsis nws yuav foom koob hmoov rau tej neeg ncaj ncees lub chaw nyob. Nws yuav luag tej neeg uas luag lwm tus, tiamsis nws yuav hlub tej uas txo hwjchim. Tus neeg txawj ntse yuav tau koob meej, tiamsis tus neeg ruam yuav poob ntsej muag. Kuv cov tub 'e, nej cia li mloog nej txiv tej lus qhuab qhia, thiab ua tib zoo mloog, nej thiaj li txawj ntse. Tej lus uas kuv qhuab qhia nej zoo heev, tsis txhob muab kuv tej lus pov tseg. Thaum kuv tseem yau uas nrog kuv txiv nyob, thiab yog tib tug tub mos uas nyob hauv kuv niam lub qhov muag, mas kuv txiv qhia kuv thiab hais rau kuv tias, “Koj cia li tuav rawv kuv tej lus rau hauv koj lub siab, ua raws li kuv tej lus nkaw thiaj muaj txojsia nyob. Cia li nrhiav kom tau tswvyim thiab kev txawj ntse, thiab pheej nco ntsoov, tsis txhob tig ntawm tej lus uas kuv lub qhov ncauj hais. Tsis txhob muab tswvyim tso pov tseg, mas nws yuav tsom kwm koj, cia li nyiam nws, mas nws yuav tiv thaiv koj. Lub hauv paus uas muaj tswvyim yog li no, yuav tsum nrhiav kom tau tswvyim, txawm yog koj khaws tau dabtsi kuj xij, koj yuav tsum khaws kom tau kev txawj ntse. Yuav tsum hwm tswvyim heev, mas nws yuav txhawb nqa koj. Yog koj puag rawv tswvyim, nws yuav pub koob meej rau koj. Nws yuav muab lub mom paj muaj meej ua rau koj ntoo, thiab yuav muab lub mom kub zoo nkauj rau koj.” Kuv tub 'e, cia li mloog thiab khaws kuv tej lus cia, kom koj txojsia thiaj li nyob ntev niaj ntau xyoo. Kuv twb qhia tswvyim txojkev rau koj, kuv twb coj koj ua lub siab ncaj. Thaum koj taug kev yuav tsis muaj dabtsi thaiv koj kev, thaum koj dhia koj yuav tsis dawm. Cia li tuav rawv tej lus qhuab qhia ua neej, tsis txhob muab tso tseg, cia li muab tej lus qhia ceev cia rau qhov tej lus ntawd yog koj txojsia. Koj tsis txhob nkag mus rau hauv tej neeg limhiam txojkev, tsis txhob taug cov neeg phem txojkev. Yuav tsum lug kev tsis txhob taug txoj ntawd, cia li lug mus kom dhau. Cov neeg phem yog tsis tau ua txhaum mas pw tsis tsaug zog, yog lawv tsis tau ua rau leejtwg dawm ntog mas lawv tsis tuaj dab ntub. Lawv tej mov noj yog qhov uas lawv ua limhiam, lawv tej cawv txiv hmab haus yog qhov uas lawv ua nruj ua tsiv. Tiamsis cov ncaj ncees txojkev mas zoo yam nkaus li tus duab tshav ntuj uas ci zuj zus thaum tagkis mus txog thaum tshav ntuj kub lawm. Cov neeg limhiam txojkev mas tsaus ntuj nti, lawv tsis paub tias lawv dawm dabtsi. Kuv tub 'e, ua tib zoo mloog kuv tej lus, tig koj lub qhov ntsej mloog tej uas kuv hais. Koj tsis txhob cia kuv tej lus khiav dhau ntawm koj lub qhov muag mus, koj yuav tsum khaws cia rau hauv koj lub siab, rau qhov kuv tej lus yog txojsia rau tus uas nrhiav tau, thiab ua rau tus ntawd lub cev nyob zoo huvsi. Koj yuav tsum ua tib zoo tswj koj lub siab rau txhua fab rau qhov txojsia txhawv tawm hauv lub siab los. Cia li muab koj tus nplaig nkhaus pov tseg, thiab muab tej lus dag tshem deb ntawm koj lub qhov ncauj. Cia koj lub qhov muag ntsia ncaj nraim rau tom hauv ntej, thiab cia koj tsom ntsoov koj lub hauv ntej ntsia xwb. Koj yuav tsum ntsia ntsoov txojkev uas koj txhais taw taug, koj txhua txojkev thiaj li ruaj. Tsis txhob tig rau sab xis lossis tig rau sab laug, cia koj txhais kotaw tig hlo ntawm txojkev ua phem. Kuv tub 'e, ua tib zoo mloog kuv tej tswvyim, thiab tig koj lub qhov ntsej mloog kuv tej kev txawj ntse, kom koj thiaj li khaws tau txojkev txawj ntse cia, thiab koj lub qhov ncauj yuav tuav txojkev paub. Tus pojniam plhu tuab daim tawv ncauj qab zib ib yam li zib ntab, nws tej lus npliag dhau roj. Thaum kawg nws yuav iab li tsib dais thiab yuav ntse yam li rab ntaj ob sab ntse. Nws tshais ruam mus rau hauv txojkev tuag, nws txhais kotaw taug txojkev uas mus rau hauv tub tuag teb. Nws tsis quav ntsej taug txojkev uas tau txojsia, nws twb yuam kev lawm los nws twb tsis paub li. Kuv cov tub 'e, nimno nej cia li mloog kuv hais, tsis txhob tig ntawm tej lus uas kuv lub qhov ncauj hais. Koj yuav tsum lug kev deb ntawm tus pojniam ntawd, thiab tsis txhob mus ze nws lub qhov rooj, tsam ces koj muab koj lub koob meej rau lwm tus lawm, thiab muab koj txojsia rau cov neeg uas tsis khuvleej, thiab lwm haiv neeg yuav noj koj tej nyiaj txiag tsau npo, thiab tej uas koj khwv tau yuav poob rau lwm haiv neeg tej vaj tse. Thaum koj lub neej kawg koj yuav ntsaj laws, yog thaum koj lub cev nqaij daim tawv raug muab rhuav tshem tag, thiab koj yuav seev hais tias, “Yog thaud kuv ntxub tej lus qhuab qhia thiab kuv lub siab saib tsis taus tej lus qhuab ntuas. Kuv tsis mloog kuv cov xibhwb hais thiab tsis tig pob ntseg mloog cov uas qhuab qhia kuv. Kuv twb yuav puam tsuaj tag hauv ib tsoom neeg uas tuaj txoos ua ke.” Yuav tsum haus dej hauv koj lub thoob xwb, yog cov dej uas txhawv hauv koj lub qhov dej los. Tsim nyog cia koj lub qhov dej ntws tawm rau nraum tog vaj tog tsev, thiab koj cov dej ntws taug tej kev lov? Cia cov dej ntawd ua koj tib leeg feem, tsis txhob muab rau luag lwm tus. Yuav tsum cia koj lub qhov dej txhawv tau koob hmoov, thiab cia li zoo siab rau tus pojniam uas thaum koj hluas koj tau lawm. Nws zoo nkauj yam li tus xyuas muas lwj thiab cev yiag ntxiag zoo li tus xyuas kauv. Cia nws lub xubntiag ua rau koj zoo siab kawg txhua lub sijhawm, thiab cia koj qaug siab rau nws txojkev hlub kev nyiam tsis tu li. Kuv tub 'e, ua li cas koj yuav qaug siab rau tus pojniam plhu tuab, thiab puag tus nkauj cuav zej cuav zos lub xubntiag? Rau qhov Yawmsaub pom ntsoov neeg tej kev, thiab nws ntsia ntsoov txhua txojkev uas lawv mus. Tej kev txhaum uas cov neeg limhiam ua, rov cuab mag nws, thiab nws mag nws lub txim rooj hlua. Nws tuag vim yog nws tsis tswj nws lub siab, vim yog nws ruam kawg li nws thiaj yuam kev. Kuv tub 'e, yog koj ua tus qhwv kwvtij zej zog thiab tau cog lus tseg rau lwm tus lawm, yog koj mag khi vim yog tim koj daim tawv ncauj, thiab yog koj mag hlua vim tim koj lub ncauj tej lus, kuv tus tub 'e, koj yuav tsum ua li no thiaj pab tau koj dim, rau qhov koj poob rau hauv kwvtij zej zog txhais tes lawm. Cia li maj nroos mus thov nws. Tsis txhob ua ntsej muag lag dig, tsis txhob qe muag nti. Koj cia li khiav kom dim ib yam li tus kauv seb khiav dim tus uas tua nqaij, thiab ib yam li tus noog nti dim hauv tus uas cuab txhais tes. Niag neeg tub nkeeg 'e, koj cia li mus saib ntsaum cia li ua tib zoo saib ntsaum nyob tau li cas, koj thiaj li txawj ntse. Ntsaum twb tsis muaj thawj coj, tsis muaj nom tswv, tsis muaj tus kav, los lub caij ntuj qhua ntsaum tseem txawj npaj zaub mov cia, thiab lub caij sau qoob ntsaum txawj sau los cia. Neeg tub nkeeg 'e, koj yuav pw ntev li cas? Thaum twg koj li sawv hauv nruab dab ntub los? Tsaug ib nyuag tsig zog, ib nyuag qe muag, khawm tes so ib pliag, mas txojkev pluag yuav los txog koj yam nkaus li tub sab tuaj lws, thiab kev txom nyem yuav los yam nkaus li tus coj ntaj coj riam tuaj lws. Tus neeg tsis tsim txiaj, yog neeg limhiam, dag taug zej taug zos, nws zij ncaug ntxi muag, nws ua tes ua taw ntxias, nws taw tes nki, nws lub siab nkhaus xav tswvyim ua phem, nws pheej tshum kom muaj kev tsis sib hum. Vim li no vij sub vij sw yuav los raug nws sai sai, ib pliag ntshis xwb yuav raug kev puas ntsoog kho tsis tau. Muaj rau yam uas Yawmsaub ntxub, yog muaj xya yam uas nws ntxub kawg li, yog li no qhov muag qauj luj les, nplaig dag, thiab txhais tes uas tua tus neeg tsis txhaum, lub siab uas ntaus tswvyim ua limhiam, txhais kotaw uas maj nroos mus ua phem, tus cuav timkhawv uas ua pa xwb los puavleej yog dag, thiab tus uas tshum ua rau kwvtij tsis sib hum. Kuv tub 'e, cia li tuav rawv koj txiv tej lus nkaw thiab tsis txhob muab koj niam tej lus qhia pov tseg. Muab tej lus ntawd khi rau koj lub siab mus ib txhis, muab khi rau ntawm koj caj dab. Thaum koj mus kev tej lus ntawd yuav coj koj, thaum koj pw tej lus ntawd yuav tsom kwm koj, thiab thaum koj sawv tej lus ntawd yuav qhia koj. Rau qhov tej lus nkaw ntawd yog lub teeb ci thiab tej lus qhia ntawd yog qhov kaj, thiab tej lus qhuab ntuas yog qhia koj paub ua neej, xwv thiaj tiv thaiv koj ntawm tus pojniam phem thiab tiv thaiv ntawm tus pojniam taug zej taug zos ncauj qab zib nplaig qab ntse. Koj tsis txhob qaug siab rau qhov uas nws zoo nkauj, tsis txhob cia nws txiav muag ntxias tau koj. Ib lub ncuav xwb ntiav tau tus poj muag cev, tiamsis qhov uas mus nrog luag tus pojniam pw mas yuav txov koj txojsia. Ib tug txivneej yuav puag nplaim taws rau ntawm nws hauv siab es nws lub tsho tsis kub hnyiab tau thiab lov? Lossis ib tug txivneej yuav tsuj saum cov ncaig taws uas kub heev es nws txhais kotaw tsis kub hnyiab tau thiab lov? Tus uas mus nrog luag pojniam pw kuj zoo ib yam li ntawd. Tsis muaj ib tug twg uas kov luag tus pojniam es yuav tsis raug txim. Yog tub sab nyiag los noj vim nws tshaib heev mas tsis muaj leejtwg thuam nws. Yog ntes tau mas nws yuav them xya npaug, nws yuav muab tej qhov txhia chaw hauv nws tsev huvsi them. Tus uas ntxias luag pojniam yeej yog tsis thoob tsib, tus uas ua li ntawd kuj yog nws rov rhuav nws ua kom puam tsuaj. Nws yuav raug luag nplawm thiab poob ntsej muag, ntxuav tsis tau nws qhov txaj muag ploj li. Qhov uas khib xeeb ua rau neeg npau taws kawg nkaus, mas hnub uas nws ua pauj nws tsis tswj nws lub zog li. Nws yuav tsis kam yuav ib qho nyiaj sam hwm li, txawm yog yeem muab ntau los nws yeej tsis yib. Kuv tub 'e, koj cia li khaws kuv tej lus cia, thiab muab tej uas kuv qhia ceev rau hauv koj lub siab. Cia li tuav rawv kuv tej lus nkaw thiaj muaj txojsia nyob, cia li tuav kuv tej lus qhia cia zoo cuag nkaus li koj tsom kwm koj lub ntsiab muag. Muab khi rau ntawm koj ntiv tes, thiab muab sau cia rau hauv koj lub siab. Cia li hais rau tswvyim tias, “Koj yog kuv tus muam hlob,” thiab hu kev txawj ntse tias yog koj tus kwvluag zoo, xwv lub tswvyim ntawd thiaj tsom kwm koj dim tus pojniam plhu tuab, yog tus nkauj cuav zej cuav zos ncauj qab zib nplaig qab ntse. Kuv nyob hauv kuv tsev ntawm qhov rais xauj cov kem qhov rais mus rau sab nraud. Kuv pom cov neeg ruam. Kuv ntsia ntsoov cov tub hluas ntawd mas muaj ib tug tsis thoob tsib to nrog taug kev tuaj ze ntawm kev tshuam uas tus pojniam ntawd nyob, thiab taug txoj uas mus rau hauv tus pojniam ntawd tsev, yog lub sijhawm yuav tsaus ntuj thiab tsaus ntuj zuag, thiab thaum tsaus ntuj ntais dub dub li lawm. Ua ciav, muaj ib tug pojniam ntsib nws hnav tsoos yam nkaus li tus poj muag cev, nws lub siab ntxeev ntxias. Nws muaj plhus ntxiag tawv ncauj cov nyom, nws kotaw nyob tsis tswm hauv tsev li, ib pliag nyob tom kev ib pliag nyob tom tshav puam, nws tos nrhw txhua txoj hauv kev. Nws khawm nkaus tus hluas ntawd thiab muab nwj kiag, nws hais rau tus hluas tsis paub txaj muag li hais tias, “Kuv tua tsiaj xyeem, thiab hnub no kuv pauj yeem lawm. Kuv thiaj li tawm tuaj nrhiav koj, muaj siab nrhiav mas kuv ntsib koj lawm. Kuv twb muab ntaub pua kuv lub txaj pw du lug lawm, yog muab cov ntaub mag Iyi uas txaij nraug zees zoo nkauj pua. Kuv twb muab roj tsw qab thiab roj ntoo alau‑es thiab hmoov ntoo tuv txhawb kuv lub txaj tsw qab ntxiag li. Mus cia wb pw ua ke pov khawv ib hmos kaj ntug, cia wb ua kom txaus siab txaus ntsws ntawm txojkev sib nyiam, rau qhov kuv tus txiv tsis nyob tsev, nws mus kev deb li lawm. Nws coj ib hnab nyiaj mus lawm, hli nra nws li rov qab los.” Tus pojniam ntawd ua lus mos lus muag haub ntxias tus hluas ntawd, nws tej lus qab zib yuam tau tus tub hluas. Nws thiaj raws nraim tus pojniam ntawd mus tamsid,yam nkaus li tus txiv nyuj uas mus rau lub chaw tua, yam nkaus li tus muas lwj dhia mus mag hlua, mus txog thaum luag rab xub chob nkaus rau nruab plawv. Yam li tus noog dhia mus mag tsig, tus hluas ntawd tsis paub tias twb mus txog qhov chaw tuag lawm. Kuv cov tub 'e, nej cia li mloog kuv hais, ua tib zoo mloog tej lus uas kuv qhov ncauj hais. Tsis txhob qaug siab raws tus pojniam ntawd, thiab tsis txhob tig mus taug nws txojkev, rau qhov nws twb txov tau ntau tus lawm, cov uas nws muab tua pov tseg coob kawg li. Nws lub tsev yog txojkev uas mus rau hauv tub tuag teb, thiab yog txoj uas nqes mus rau hauv qhov ntxa. Cia li mloog tswvyim lub suab hu. Kev txawj ntse tsis tsa lub suab hu lov? Tswvyim sawv saum qhov chaw siab ntawm ntug kev, thiab ntawm tej kev tshuam. Tswvyim nyob ntawm ib sab rooj loog uas nkag mus rau hauv lub nroog hu nrov nrov hais tias, “Neeg 'e, kuv hu nej, kuv tsa suab hu ib tsoom neeg. Nej cov neeg tsis thoob tsib 'e, cia li kawm kom paub qabhau, nej cov neeg ruam 'e, cia li kawm kom nkag siab. Cia li mloog los maj, rau qhov kuv yuav hais txog tej uas zoo tshaj plaws, thiab tej uas raug cai yuav tawm hauv kuv daim tawv ncauj los, rau qhov kuv lub qhov ncauj yuav hais qhov tseeb xwb, kuv daim tawv ncauj ntxub tej kev limhiam kawg li. Txhua lo lus uas kuv lub qhov ncauj hais puavleej yog lus ncaj ncees, tsis muaj ib los dag thiab ib los nkhaus li. Tus uas txawj to taub yuav pom tias kuv tej lus puavleej ncaj, tus uas kawm kev txawj ntse yuav pom tias kuv tej lus raug cai lawm. Cia li khaws kuv tej lus qhuab qhia zoo dua li khaws nyiaj, cia li khaws kev txawj ntse zoo dua li khaws cov tseem kub, rau qhov tswvyim zoo dua li npauj nyiaj npauj kub, thiab txhua yam uas koj ntshaw tsis muaj ib yam zoo cuag li tswvyim. “Kuv yog tswvyim, kuv muaj tab fab, thiab kuv nrhiav tau kev txawj ntse thiab paub txhij paub txhua. Qhov uas hwm thiab paub ntshai Yawmsaub yog ntxub txojkev phem. Kuv ntxub kev khav theeb kev muab hlob, kev phem kev qias thiab lub ncauj ntxeev xaiv. Kuv yog lub chaw sablaj ntxig nug thiab muaj tswvyim, kuv thoob tsib to nrog thiab muaj zog. Vim muaj kuv, tej vajntxwv thiaj kav tau tebchaws, thiab tej nom tswv thiaj rhawv tau kevcai ncaj ncees. Vim yog muaj kuv, cov thawj thiaj kav tau tebchaws, thiab cov uas muaj meej mom thiaj kav tau thoob ntiajteb. Kuv hlub cov uas muab siab npuab kuv, thiab cov uas siv zog nrhiav kuv kuj ntsib kuv. Kev muaj txiag thiab koob meej, thiab nyiaj qab nas toos qab pha thiab kev vam meej nrog nraim kuv. Tej txiaj ntsig uas koj tau ntawm kuv zoo dua kub, zoo dua cov tseem kub, tej uas koj tau ntawm kuv zoo dua cov tseem nyiaj. Kuv taug txojkev ncaj ncees thiab mus raws li txojkev ua ncaj. Kuv pub nyiaj txiag rau cov uas muab siab npuab kuv, thiab pub kom lawv lub txhab nyiaj puv nkaus. “Thawj txog haujlwm uas Yawmsaub ua yog nws tau tsim kuv, kuv yog thawj yam uas thaum ub nws tsim. Nws tsim kuv thaum ub los lawm, thaum chiv keeb nws tsim kuv ua ntej uas tsis tau muaj lub ntiajteb. Thaum tsis tau muaj dej hiavtxwv twb yug kuv lawm, yog thaum tsis tau muaj tej qhov dej uas txhawv ntau. Ua ntej uas tsis tau tsim tej roob thiab ua ntej uas tsis tau muaj tej pov roob, twb yug kuv lawm, yog thaum Yawmsaub tsis tau tsim lub ntiajteb thiab tej liaj teb, thiab tsis tau tsim tej av hauv ntiajteb. Thaum nws tsim lub ntuj kom nyob ruaj, thiab thaum nws kuam ib tug ciam rau dej hiavtxwv, kuv yeej nyob qhov ntawd lawm, yog thaum nws tsim lub ntuj kom ruaj khov, thiab thaum nws ua kom dej txhawv hauv nruab tiv txwv los, yog thaum nws kem ciam rau dej hiavtxwv, dej thiaj tsis nyab dhau qhov uas nws tso cai, thiab thaum nws ntsuas pua daim lag zeb tiag lub ntiajteb. Kuv nyob ntawm Yawmsaub ib sab, ib yam nkaus li tus Kws ua tsev kuv ua rau nws muaj kev zoo siab txhua hnub, kuv xyiv fab rau ntawm nws xubntiag tsis tu li. Kuv xyiv fab rau lub ntiajteb uas yog nws li thiab xyiv fab rau ib tsoom neeg. “Kuv cov tub 'e nej cia li mloog kuv hais. Cov uas tuav rawv kuv txojkev yuav tau nyob kaj siab lug. Cia li mloog lus qhuab qhia, cia li txawj ntse, thiab tsis txhob tso tej lus qhia pov tseg. Tus uas mloog kuv hais yuav tau nyob kaj siab lug, yog tus uas niaj hnub zov tos ntawm kuv lub rooj loog, thiab tos ntawm kuv ib sab qhov rooj. Tus uas nrhiav tau kuv kuj nrhiav tau txojsia, thiab tau kev hlub ntawm Yawmsaub. Tiamsis tus uas plam kuv lawm, nws ua rau nws mob xwb, txhua tus uas ntxub kuv kuj yog nyiam kev ploj kev tuag.” Tswvyim twb ua nws lub tsev, nws tsa xya tus ncej. Nws twb tua nws tej tsiaj thiab twb tov cawv txiv hmab lawm thiab twb rau zaub mov rau saum rooj lawm. Nws txib nws cov nkauj qhev mus tuaj saum tej chaw siab hauv lub nroog hu nrov hais tias, “Leejtwg ruam kawg cia li nkag los rau ntawm no.” Tswvyim hais rau cov tsis thoob tsib hais tias, “Cia li los, nrog kuv noj mov thiab haus cov cawv txiv hmab uas kuv muab tov lawm. Cia li muab txojkev ruam pov tseg thiaj muaj txojsia nyob, cia li taug txojkev txawj ntse.” Tus uas ntuas tej neeg thuam luag, yuav raug cem, tus uas qhuab ntuas tej neeg limhiam, yuav raug lo lus phem. Tsis txhob qhuab ntuas tus uas thuam luag vim nws yuav ntxub koj, qhuab ntuas tus txawj ntse mas nws yuav nyiam koj. Yog qhuab qhia tus uas txawj ntse mas nws yuav ntse tuaj, yog qhia tus ncaj ncees mas nws yuav kawm paub ntau dua tuaj. Qhov uas hwm thiab paub ntshai Yawmsaub yog lub hauv paus tswvyim, qhov uas paub Vajtswv tus dawb huv yog kev txawj ntse. Vim yog muaj tswvyim, yuav muaj lub caij nyoog ntxiv rau koj, thiab yuav tsav koj nyob ntev niaj ntau xyoo. Yog koj ntse mas kuj yog koj ntse pab koj, yog koj thuam luag koj yuav thev koj ib leeg xwb. Txojkev ruam zoo yam nkaus li tus pojniam ncauj ntau, nws tawv ncauj cov nyom tsis paub txaj muag. Nws zaum ntawm nws lub qhov rooj thiab nyob saum tej chaw siab hauv lub nroog. Nws hu rau cov uas dua kev tuaj mus, yog cov uas luag taug luag kev xwb, hu hais tias, “Leejtwg ruam kawg cia li nkag los rau ntawm no.” Nws hais rau cov uas tsis thoob tsib hais tias, “Tej dej uas mus nyiag los haus qab zib, thiab cov mov uas noj nraim nkoos kuj qab heev.” Tiamsis lawv tsis paub tias muaj neeg tuag hauv qhov chaw ntawd, thiab nws cov qhua twb poob tob kawg rau hauv tub tuag teb lawm. Xalaumoo tej paj lug. Tus tub ntse ua rau leej txiv zoo siab, tus tub ruam ua rau leej niam nyuaj siab. Tej nyiaj txiag uas ua limhiam tau los tsis muaj nuj nqes, tiamsis txojkev ncaj ncees cawm kom dim kev tuag. Yawmsaub tsis cia cov neeg ncaj ncees tshaib, tiamsis nws tsis pub cov neeg limhiam tau raws li uas lawv ntshaw. Txhais tes tub nkeeg yuav pluag, txhais tes nquag yuav ua rau nplua nuj. Tus tub uas sau qoob loo rau lub caij ntuj qhua mas nws paub tab, tiamsis tus tub uas tsaug zog lub caij sau qoob yuav coj kev txaj muag los. Tej koob hmoov yuav los rau saum cov neeg ncaj ncees taubhau, tiamsis cov neeg limhiam lub qhov ncauj npog txojkev ua nruj ua tsiv. Qhov uas nco txog cov neeg ncaj ncees yog tau koob hmoov, tiamsis cov neeg limhiam lub suab lub npe yuav lwj tag. Tus uas lub siab muaj tswvyim nws yuav muab tej lus nkaw saib hlob, tiamsis tus uas ruam ncauj ntau yuav raug kev puam tsuaj. Tus uas ua lub siab dawb paug yuav nyob ruaj khov, tiamsis tus uas coj nkhaus sawvdaws yeej yuav paub. Tus uas zij ncaug ntxi muag kuj ua kom muaj kev ntxhov, tiamsis tus uas muaj cuabkav ntuas ua kom nyob sib hum xeeb. Cov uas ncaj ncees lub qhov ncauj yog lub qhov dej txhawv uas pub txojsia, tiamsis tus neeg limhiam lub qhov ncauj npog txojkev ua nruj ua tsiv. Txojkev sib ntxub tshum kom muaj kev sib cav sib ceg, tiamsis txojkev hlub yuav tswj tau txhua yam kev txhaum. Yuav tau tswvyim ntawm tus uas thoob tsib to nrog daim tawv ncauj, tiamsis rab nplawm yuav ntaus tus uas tsis thoob tsib nrob qaum. Cov uas muaj tswvyim yuav khaws kev txawj ntse cia, tiamsis qhov uas tus ruam ntau ncauj coj kev puam tsuaj los ze. Tus nplua nuj tej nyiaj txiag yog nws lub nroog ruaj khov, tiamsis tus pluag txojkev pluag yog nws txojkev puam tsuaj. Cov neeg ncaj ncees tej nqe zog yuav coj mus tau txojsia, cov neeg limhiam tej nqe zog yuav coj mus saws lub txim. Tus uas mloog lus qhuab qhia kuj nyob hauv txojkev uas tau txojsia, tiamsis tus uas tsis lees yuav tej lus qhuab ntuas yuav yuam kev. Tus uas zais nws tej kev ntxub rau hauv nruab siab, nws daim tawv ncauj dag, thiab tus uas iab hiam luag yog tus neeg ruam. Yog ntau ncauj yeej yuav muaj kev txhaum, tiamsis tus uas tswj nws daim tawv ncauj mas nws paub tab. Tus uas ncaj ncees tus nplaig yog cov tseem nyiaj, tus neeg limhiam lub siab tsis muaj nuj nqes kiag li. Tus uas ncaj ncees daim tawv ncauj yug tau neeg coob coob, tiamsis tus uas ruam tuag vim tsis thoob tsib. Yawmsaub tej koob hmoov ua kom nplua nuj, nws tsis ntxiv kev nyuaj siab rau. Qhov uas ua txhaum ua qias mas tus ruam saib yog kev lomzem xwb, qhov uas muaj tswvyim xyaum zoo mas ua rau tus uas thoob tsib to nrog zoo siab. Yam uas tus neeg limhiam ntshai yeej yuav los raug nws, yam uas tus ncaj ncees ntshaw Vajtswv yeej yuav pub. Thaum cua daj cua dub ntsawj tuaj tus neeg limhiam ploj tag lawm, tiamsis tus uas ncaj ncees nyob ruaj khov mus ib txhis. Tej kua qaub rhiab hniav li cas thiab tej pa taws ncho qhov muag li cas, ces tus tub nkeeg yuav zoo ib yam li ntawd rau tus uas txib nws. Qhov uas hwm thiab paub ntshai Yawmsaub yuav txuas txojsia ntev mus, tiamsis tus neeg limhiam lub niaj lub xyoo yuav tsis ntev. Qhov uas cov ncaj ncees vam yuav tiav rau txojkev zoo siab xyiv fab, tiamsis qhov uas cov neeg limhiam vam yuav ploj tag mus. Yawmsaub yog lub chaw ruaj khov rau tus uas siab ncaj, tiamsis nws yuav rhuav tshem cov uas ua phem. Cov uas ncaj ncees yuav tsis raug muab rho pov tseg, tiamsis tus uas ua limhiam yuav tsis tau nyob hauv lub tebchaws. Tus neeg ncaj ncees lub qhov ncauj nthuav tswvyim tawm los, tiamsis tus nplaig ntxeev ntxias yuav raug muab txiav pov tseg. Tus neeg ncaj ncees daim tawv ncauj paub tej lus uas hum luag, tiamsis tus neeg limhiam lub qhov ncauj tsuas paub tej lus ntxeev ntxias xwb. Rab teev uas ntxo luag Yawmsaub ntxub kawg li, tiamsis lub thauj teev uas hum ua rau nws zoo siab. Thaum khav theeb lawm yuav raug poob ntsej muag, tiamsis tswvyim yuav nrog nraim tus uas tsis muab hlob. Tus uas ncaj ncees txojkev ua ncaj yuav coj nws lub hauv ntej, tiamsis tus neeg ntxeev ntxias txojkev nkhib nkhaus yuav rov ua rau nws puam tsuaj. Tej nyiaj txiag tsis muaj qabhau rau hnub uas Yawmsaub npau taws, tiamsis txojkev ncaj ncees cawm kom dim kev tuag. Tus uas tsis muaj chaw thuam, nws txojkev ncaj ncees yuav coj nws kev ncaj nraim, tiamsis tus neeg limhiam yuav ntog vau hlo rau hauv nws txojkev ua limhiam. Tus ncaj ncees txojkev ua ncaj yuav pab nws dim, tiamsis tus neeg ntxeev ntxias txojkev ntshaw yuav rov ntes tau nws. Thaum tus neeg limhiam tuag, nws txojkev vam kuj ploj tag, tus uas tsis hwm Vajtswv tej uas nws xav tau kuj ploj ntais lawm. Tus uas ncaj ncees tau kev dim qhov txom nyem, tiamsis tus neeg limhiam yuav nyob nws chaw raug txom nyem. Tus uas tsis hwm Vajtswv nws lub qhov ncauj ua rau kwvtij zej zog puam tsuaj, tiamsis tus uas ncaj ncees kev txawj ntse pab tau nws dim. Thaum cov uas ncaj ncees noj qab nyob zoo mas lub nroog kuj xyiv fab, thaum cov neeg limhiam puam tsuaj tag kuj muaj suab qw zoo siab. Tej koob hmoov uas cov neeg ncaj ncees tau, ua rau lub nroog vam meej tuaj, tiamsis cov neeg limhiam lub qhov ncauj ua rau lub nroog puam tsuaj. Tus uas saib tsis taus kwvtij zej zog yog tus uas tsis thoob tsib, tiamsis tus uas paub qabhau mas nyob twjywm. Tus uas cuav zos taug xaiv pheej qhia tej uas muab npog cia tshwm los, tiamsis tus uas tso siab tau mas yeej npog tau tej ntawd cia. Qhovtwg tsis muaj tus txawj coj tej pejxeem yuav ntog tag, tiamsis qhov uas muaj ntau leej ua chaw sablaj yeej yuav nyob thaj yeeb. Tus uas qhwv lwm tus yuav raug kev ntxhov siab, tiamsis tus uas tsis kam qhwv lwm tus yuav nyob kaj siab lug. Tus pojniam uas paub cai yeej tau koob meej, tiamsis tus txivneej siab heev yuav tau nyiaj txiag. Tus uas hlub luag yuav rov ua rau nws tau zoo, tiamsis tus uas nyaum yuav rov ua rau nws mob. Tus neeg limhiam tau cov nqe zog uas dag nws xwb, tiamsis tus uas tseb txojkev ncaj ncees yuav tau tej nqe zog uas tseeb. Tus uas khov kho hauv txojkev ncaj ncees yuav muaj txojsia nyob, tiamsis tus uas raws ncuj nciav txojkev phem yuav tuag. Cov neeg uas lub siab nkhaus, Yawmsaub ntxub kawg li, tiamsis cov uas tsis muaj chaw thuam li ua rau Yawmsaub zoo siab. Cia li paub tseeb tias tus neeg phem yuav tsis dim kev teem txim, tiamsis tus uas ncaj ncees yuav tau kev cawm dim. Tus pojniam zoo nkauj uas tsis paub cai zoo li lub nplhaib kub uas npua coj ntawm qhov ntswg. Qhov uas cov neeg ncaj ncees ntshaw coj mus tau qhov zoo xwb, tiamsis qhov uas cov neeg limhiam vam coj mus txog Vajtswv kev npau taws. Tus uas zoo siab pub dawb nws nplua nuj zuj zus, tus uas tsis kam pub yam uas nws pub tau, nws kuj pluag zuj zus. Tus uas lub siab dav pub tau yeej yuav nplua nuj, tus uas muab dej rau luag haus, luag kuj yuav pub dej rau nws. Neeg cem foom tus uas tuav nqe qoob loo tsis muag, tiamsis tus uas cia li muag, yuav tau hmoov zoo rau saum nws lub taubhau. Tus uas siv zog nrhiav qhov zoo yeej yuav ua rau luag txaus siab rau nws, tiamsis kev phem yuav raug tus uas nrhiav qhov phem. Tus uas tso siab rau nws tej nyiaj txiag yuav ntog ploj tag, tiamsis tus uas ncaj ncees yuav hlob zoo yam nkaus li tej nplooj ntoo ntsuab. Tus uas tsim kev kub ntxhov rau nws tsev neeg, mas thaum kawg nws yuav tau cua ua qub txeeg qub teg xwb, thiab tus ruam yuav ua tus ntse qhev. Tus uas ncaj ncees tej haujlwm yog tsob ntoo uas pub txojsia, tiamsis qhov uas tawv nyom txoj kevcai yeej yog txov txojsia. Yog cov neeg ncaj ncees tau tej uas tsim nyog tau hauv ntiajteb no, mas cov neeg limhiam thiab muaj txim yimhuab yuav raug teem txim. Tus uas nyiam tej lus qhuab qhia kuj yog nyiam kev txawj ntse, tus uas ntxub tej lus qhuab ntuas yog tus ruam. Yawmsaub txaus siab rau tus neeg zoo, tiamsis tus uas ntaus tswvyim phem mas Yawmsaub yuav rau txim. Txojkev limhiam ua tsis tau rau neeg nyob ruaj nreeg, tiamsis cov uas ncaj ncees yuav cog cag tob dob tsis tau li. Pojniam zoo mas yog tus txiv lub mom kub, tiamsis tus pojniam rhuav plhu zoo yam li tus kab mob uas ua rau nws txiv tej pob txha lwj. Tus neeg ncaj ncees tej kev xav kuj ncaj, tiamsis tus neeg limhiam tej lus taw qhia yog lus ntxeev ntxias. Tus neeg limhiam tej lus nyas nrhw ua kom los ntshav, tiamsis tus uas ncaj ncees lub qhov ncauj pab neeg dim. Tus neeg limhiam raug rhuav tshem ploj tag lawm, tiamsis tus neeg ncaj ncees lub tsev yuav nyob ruaj. Neeg yuav raug luag qhuas npaum li uas nws muaj tab fab, tiamsis tus neeg siab nkhaus yuav raug luag saib tsis taus. Tus uas luag saib tsis taus los tseem muaj tub qhe, kuj zoo dua tus uas tsab ua loj tiamsis tsis muaj noj. Tus neeg ncaj ncees yeej hlub nws cov tsiaj txhu, tiamsis tus neeg limhiam kev khuvleej yog ua nyaum heev. Tus neeg uas laij teb yuav muaj mov noj ntau, tiamsis tus uas ua tej haujlwm tsis muaj qabhau yeej yog tsis thoob tsib. Tus neeg limhiam ntshaw tej uas ua phem es tau los, tiamsis tus neeg ncaj ncees yuav cog cag ruaj khov. Tus neeg phem rov mag tej lus txhaum uas nws daim tawv ncauj hais, tiamsis tus neeg ncaj ncees khiav dim tej kev ceeblaj. Tej lus uas yus hais ua rau yus tau tej yam zoo tsau npo, thiab tej haujlwm uas yus txhais tes ua rov los pauj rau yus. Tus neeg ruam pom tias nws txojkev raug cai lawm, tiamsis tus uas txawj ntse mloog tej lus taw qhia. Yuav paub tus neeg ruam kev chim siab tamsid, tiamsis tus neeg ntse mas tsis quav ntsej qhov uas luag saib tsis taus nws. Tus uas hais tseeb nws ua timkhawv ncaj, tiamsis tus cuav timkhawv mas hais lus dag ntxias. Tus neeg ncauj sai tej lus mas zoo yam nkaus li rab ntaj chob, tiamsis tus neeg ntse tus nplaig yog tshuaj kho zoo. Daim tawv ncauj uas hais tseeb yuav nyob ib txhis, tus nplaig txawj dag nyob ib ntsais muag xwb. Txojkev dag ntxias nyob hauv cov neeg uas ntaus tswvyim ua phem lub siab, tiamsis cov uas npaj kom sawvdaws nyob sib hum tau siab xyiv fab. Tsis muaj vij sub vij sw dabtsi poob rau saum cov neeg ncaj ncees, tiamsis cov neeg limhiam tsuas saws tej kev ceeblaj pov khawv nkaus xwb. Yawmsaub ntxub daim tawv ncauj txawj dag kawg li, tiamsis cov uas xyaum ua ncaj ua rau nws zoo siab. Tus uas paub tab yeej muab nws kev txawj ntse npog cia, tiamsis tus uas ruam tshaj tawm nws txojkev ruam. Txhais tes nquag yuav tau kav, tiamsis tus tub nkeeg yuav raug muab quab yuam ua haujlwm. Kev ntxhov siab ua rau neeg poob siab, tiamsis lo lus zoo ua rau nws xyiv fab. Tus neeg ncaj ncees tig ntawm txojkev phem, tiamsis cov neeg limhiam txojkev coj lawv mus yuam kev. Tus tub nkeeg yuav cev tes muab tsis tau los noj, tiamsis tus neeg nquag yuav tau tej nyiaj txiag uas muaj nqes. Txojkev ncaj ncees yog txojkev tau txojsia, tiamsis txojkev txhaum coj mus txog qhov tuag. Tus tub uas ntse mloog nws leej txiv tej lus qhia, tiamsis tus uas thuam luag tsis mloog tej lus qhuab ntuas. Tus neeg zoo tau noj tej uas nws lub qhov ncauj hais zoo, tiamsis tus neeg ntxeev ntxias ntshaw ua limhiam ntais ntuj. Tus uas tswj tau nws lub qhov ncauj tuav tau nws txojsia, tiamsis tus uas qheb daim tawv ncauj rua tsuas kuj raug kev puam tsuaj. Tus tub nkeeg tus ntsuj plig nqhis nqhis los kuj tsis tau dabtsi li, tiamsis tus nquag tus ntsuj plig puv ntoob. Tus ncaj ncees ntxub kev dag, tiamsis tus neeg limhiam ua tej uas txaj muag thiab poob koob meej. Txojkev ncaj ncees tsom kwm tus uas ua ncaj, tiamsis lub txim ua rau neeg limhiam puam tsuaj. Ib txhia ua txuj nplua nuj tiamsis tsis muaj dabtsi li, ib txhia ua txuj pluag tiamsis muaj nyiaj txiag ntau kawg li. Nqe txhiv neeg txojsia yog tej nyiaj txiag uas nws muaj, tiamsis tsis muaj leejtwg hem tus neeg pluag. Tus uas ncaj ncees lub teeb ci zoo siab xyiv fab, tiamsis tus neeg limhiam lub teeb yuav raug muab tua. Qhov uas muab hlob tsuas yog ua kom muaj kev sib cav sib ceg xwb, tiamsis tswvyim nrog cov uas mloog tej lus taw qhia. Tej nyiaj txiag uas ua ib pas xwb twb tau, los yuav nqeg zuj zus tag, tiamsis tus uas mav khwv tau yuav tsav kom tau ntau. Qhov uas tsis tau raws li lub siab vam kuj mob siab, tiamsis qhov uas tau raws li lub siab xav kuj yog tsob ntoo uas pub txojsia. Tus uas saib tsis taus tej lus qhuab qhia nws coj kev puam tsuaj los rau nws, tiamsis tus uas hwm tej kevcai yuav tau yeeb koob. Tej lus uas cov neeg txawj ntse qhia yog lub qhov dej txhawv uas pub txojsia, kom thiaj lug dhau txojkev tuag lub voj hlua. Tus uas tab fab zoo mas luag hwm, tiamsis tus neeg tsis ncaj txojkev ua rau nws puam tsuaj. Tus neeg uas paub qabhau nws ua txhua yam raws li kev txawj ntse, tiamsis tus neeg ruam tsuas qhia nws txojkev ruam xwb. Tus tub tshaj xo uas tsis ncaj ua rau neeg poob rau hauv kev kub ntxhov, tiamsis tus tub tshaj xo uas ncaj coj tshuaj tuaj kho. Kev pluag kev txaj muag los raug tus uas tsis quav ntsej tej lus qhuab qhia, tiamsis tus uas mloog tej lus qhuab ntuas tau koob meej. Yog tau raws li uas yus ntshaw mas qab zib kawg rau yus tus ntsuj plig, tiamsis tus neeg ruam ntxub qhov uas tso kev phem tseg kawg li. Tus uas nrog nraim tus txawj ntse nws kuj yuav txawj ntse, tiamsis tus uas nrog cov neeg ruam ua phoojywg yuav raug kev liamsim. Lub khuab phem raws cuag cov muaj txim, tiamsis kev vam meej poob rau cov ncaj ncees. Tus neeg zoo tseg qub txeeg qub teg rau nws tub ki xeeb ntxwv, tiamsis tus neeg muaj txim tej nyiaj txiag yuav khaws tseg cia rau tus ncaj ncees. Tus neeg pluag tej teb uas muab tso tseg tseem yuav tau qoob loo ntau, tiamsis qhov uas tu plaub tsis ncaj yuav muab txeeb kiag mus. Tus uas tsis siv rab nplawm kuj yog ntxub nws tus tub, tus uas hlub nws tus tub yeej yuav ua tib zoo nplawm qhuab qhia. Tus uas ncaj ncees yuav noj txaus siab txaus ntsws, tiamsis neeg limhiam lub plab tshaib tshaib. Tswvyim ua nws lub tsev, tiamsis txojkev ruam txhais tes muab nws lub tsev rhuav pov tseg. Tus uas taug txojkev ncaj hwm thiab paub ntshai Yawmsaub, tiamsis tus uas taug txojkev nkhaus yog saib tsis taus Yawmsaub. Hauv neeg ruam lub qhov ncauj muaj rab nplawm rau nws lub nrob qaum, tus neeg ntse daim tawv ncauj yuav tiv thaiv tau nws. Qhovtwg tsis muaj txiv nyuj, qhov ntawd tsis muaj qoob, tiamsis tej qoob loo ntau tau ntawm nyuj lub zog. Tus timkhawv ncaj tsis hais dag, tiamsis tus timkhawv cuav ua pa puavleej yog dag. Tus uas muab hlob yeej nrhiav tsis tau tswvyim li, tiamsis tus uas nkag siab mas yoojyim kawm tau kev txawj ntse. Cia li khiav ntawm tus neeg ruam lub xubntiag mus vim tias koj yuav tsis tau tej lus txawj ntse qhov ntawd. Tus paub tab lub tswvyim qhia nws paub ua neej, tiamsis tus neeg ruam txojkev ruam dag ntxias nws. Neeg ruam luag qhov uas ua kevcai xyeem daws txim, tiamsis Vajtswv txaus siab rau cov uas ncaj ncees. Nyias lub siab paub nyias txojkev lwj siab, thiab tsis muaj lwm tus los nrog nws zoo siab. Tus neeg limhiam lub tsev yuav raug puam tsuaj, tiamsis tus uas ncaj ncees lub tsev ntaub yuav vam meej. Muaj ib txojkev uas neeg pom tias zoo, tiamsis txojkev ntawd qhov kawg yog kev tuag. Lub ntsej muag luag los lub siab tseem txhawj quaj, qhov uas siab xyiv fab, thaum kawg yog kev quaj ntsuag. Tus neeg siab nkhaus yuav tau saws tej uas nws ua phem puv npo, neeg zoo yuav tau saws tej uas nws ua zoo. Tus neeg tsis thoob tsib ntseeg txhua yam, tiamsis tus uas paub qabhau ua tib zoo saib nws taug txojkev twg. Tus uas muaj tswvyim ceev faj thiab tig hlo ntawm txojkev phem, tiamsis tus neeg ruam tsis txawj tswj, nws lam tau lam ua. Tus neeg npau ceev mas ua tej uas ruam kawg li, tiamsis tus uas ntse ua siab ntev. Cov uas tsis thoob tsib tau txojkev ruam, cov uas paub qabhau tau txojkev txawj ntse ua lub mom kub. Cov neeg phem pe cov neeg zoo, cov neeg limhiam pe ntawm cov uas ncaj ncees lub qhov rooj. Tus neeg pluag mas kwvtij zej zog los kuj ntxub, tiamsis tus nplua nuj muaj phoojywg coob heev. Tus uas saib tsis taus kwvtij zej zog kuj muaj txim, tiamsis tus uas hlub cov pluag kuj tau hmoov zoo. Cov uas ntaus tswvyim phem tsis txhaum lov? Cov uas ntaus tswvyim zoo kuj tau qhov zoo thiab luag tso siab rau lawv. Muaj tshaj thawj rau txhua yam haujlwm uas ua, tiamsis lub ncauj hais do xwb ua rau pluag. Tej nyiaj txiag yog cov uas txawj ntse lub mom kub, tiamsis txojkev ruam yog cov uas ruam txoj saw ntawm caj dab. Tus timkhawv uas ncaj pab cawm txojsia, tiamsis tus hais tsis ncaj yog ntxias luag nce nthab. Qhov uas hwm thiab paub ntshai Yawmsaub ua rau yus nyob tso siab plhuav, yus cov menyuam kuj tau lub chaw mus cawm siav. Qhov uas hwm thiab paub ntshai Yawmsaub yog lub qhov dej txhawv uas pub txojsia, kom thiaj lug dhau txojkev tuag lub voj hlua. Tej pejxeem coob coob yog vajntxwv li meej mom, yog tsis muaj pejxeem vajntxwv kuj puam tsuaj tag. Tus uas tsis chim sai kuj yog tus thoob tsib to nrog, tiamsis tus uas npau taws sai kuj yog txhawb txojkev ruam. Lub siab uas nyob tus kuj yog pub txojsia rau lub cev, tiamsis lub siab uas kub ntxhov hnyo ua rau pob txha po. Tus uas quab yuam tus pluag kuj saib tsis taus Vajtswv uas yog tus tsim, tiamsis tus uas hlub cov uas txom nyem kuj ua rau Vajtswv tau koob meej. Tus neeg limhiam ntog vim tej kev phem uas nws ua, tiamsis tus ncaj ncees kuj tau lub chaw cawm siav vim nws ua ncaj. Tswvyim nyob hauv tus uas thoob tsib to nrog lub siab, tiamsis neeg ruam lub siab tsis pom tswvyim kiag li. Kev ncaj ncees txhawb nqa lub tebchaws, tiamsis kev txhaum ua rau lub tebchaws poob ntsej muag. Cov tub qhe uas ua haujlwm ntse ntswb ntsuav ua rau vajntxwv txaus siab, tiamsis vajntxwv npau taws rau tus uas ua tej kev txaj muag. Lo lus teb mos muag pab kom kev npau taws ploj tag, tiamsis lo lus nruj lus tsiv zes kom chim. Tus muaj tswvyim tus nplaig nthuav kev txawj ntse tuaj, tiamsis tus ruam lub qhov ncauj nchuav kev ruam tawm los. Yawmsaub lub qhov muag ntsia ntsoov txhua qhov, thiab zov rawv cov neeg phem thiab cov neeg zoo. Tus nplaig uas hais lus zoo kuj yog tsob ntoo uas pub txojsia, tiamsis tus nplaig ntxeev ntxias ua rau lub siab lwj tag. Tus uas ruam saib tsis taus leej txiv tej lus qhuab qhia, tiamsis tus uas mloog tej lus qhuab ntuas yog tus paub tab. Tus ncaj ncees lub tsev muaj nyiaj txiag ntau, tiamsis cov neeg limhiam tej nyiaj txiag coj kev ceeblaj los. Cov muaj tswvyim daim tawv ncauj nthuav kev txawj ntse, tiamsis cov ruam lub siab tsis ua li ntawd. Tej uas cov neeg limhiam muab xyeem mas Yawmsaub ntxub kawg li, tiamsis nws zoo siab rau cov ncaj ncees tej lus thov. Cov neeg limhiam txojkev mas Yawmsaub ntxub kawg li, tiamsis nws hlub tus uas ua raws li txojkev ncaj ncees. Tus uas tso txojkev zoo tseg yuav raug nplawm qhuab qhia hnyav, tus uas ntxub tej lus qhuab ntuas yuav tuag. Tub tuag teb thiab qhov puam tsuaj, nthuav kiag rau Yawmsaub pom, yog li no nws yimhuab pom hauv neeg lub siab thiab. Tus uas muab hlob tsis nyiam luag qhuab ntuas, nws tsis mus nrhiav tus muaj tswvyim. Lub siab zoo mas ua rau lub ntsej muag luag, tiamsis kev tu siab ua rau tus ntsuj plig yaj tag. Tus uas paub qabhau lub siab nrhiav kev txawj ntse, tiamsis tus ruam lub qhov ncauj noj txojkev ruam. Cov neeg uas raug kev txom nyem lub niaj xyoo puavleej phem, tiamsis cov uas lub siab xyiv fab muaj kev pam noj pam haus tsis tu li. Muaj nyiaj txiag tsawg los hwm thiab paub ntshai Yawmsaub, kuj zoo dua li uas muaj tej niag txhab nyiaj los tseem muaj kev ceeblaj nrog nraim. Noj zaub tsuag nyob sib hlub zoo dua noj nyuj rog nyob sib ntxub. Tus uas lub siab kub tshum kom muaj lus sib cav sib ceg, tiamsis tus uas tsis chim sai tswj tau kev sib cav sib ceg kom tus. Tus neeg tub nkeeg txojkev mas muaj pos tuaj puv nkaus, tiamsis tus ncaj ncees txojkev yog txoj niag kev tiaj. Tus tub uas muaj tswvyim ua rau leej txiv zoo siab, tiamsis tus uas ruam saib tsis taus leej niam. Txojkev ruam ua rau tus uas tsis thoob tsib zoo siab xyiv fab, tiamsis tus uas paub qabhau kuj taug txojkev ncaj. Yog tsis muaj chaw sablaj haujlwm yuav plam, tiamsis yog muaj ntau leej taw qhia mas haujlwm tiav. Yog teb tau raug mas ua rau yus zoo siab, thiab ib lo lus uas hais raug qhov cheem tsum mas zoo tshaj plaws li. Tus muaj tswvyim txojkev coj nce mus txog txojsia, lawv thiaj tsis poob rau hauv tub tuag teb. Yawmsaub rhuav tshem tus neeg khav theeb lub tsev, tiamsis nws tsom kwm tus poj ntsuam li ciam teb. Tej uas cov neeg limhiam xav mas Yawmsaub ntxub kawg li, tiamsis cov neeg dawb huv tej lus txaus nws lub siab. Tus uas nrhiav nyiaj txiag ntawm tej kev tsis ncaj kuj ua rau nws tsev neeg raug kev ceeblaj, tiamsis tus uas ntxub tej nyiaj xiab yuav tau txojsia. Tus ncaj ncees lub siab xav saib yuav teb li cas, tiamsis tus neeg limhiam lub qhov ncauj nchuav nthwv kev phem tawm los. Yawmsaub nyob deb ntawm cov neeg limhiam, tiamsis nws hnov cov ncaj ncees tej lus thov. Ntsej muag luag ntxhi ua rau yus zoo siab, tej xov zoo ua rau tej txha sib qas las. Tus uas lub qhov ntsej mloog tej lus qhuab qhia zoo yuav nrog nraim cov uas muaj tswvyim nyob ua ke. Tus uas tsis quav ntsej tej lus qhuab qhia kuj yog nws rov saib tsis taus nws, tiamsis tus uas mloog tej lus qhuab ntuas kuj tau kev txawj ntse. Qhov uas hwm thiab paub ntshai Yawmsaub yog qhov kawm paub tswvyim, xub txo hwjchim mam li tau koob meej. Neeg hom haujlwm cia rau hauv nruab siab, tiamsis Yawmsaub pub lo lus teb rau tus nplaig. Neeg kuj pom tias txhua yam uas lawv ua puavleej dawb huv, tiamsis Yawmsaub tshuaj hauv lub siab. Cia li muab koj tej haujlwm tso rau Yawmsaub, mas tej uas koj hom tseg cia yuav tiav. Yawmsaub tsim txhua yam nyias muaj nyias hom phiaj, txawm yog cov neeg limhiam los nws tsim los rau hnub puam tsuaj. Txhua tus uas khav theeb mas Yawmsaub ntxub kawg li, cia li paub tseeb tias lawv yeej yuav tsis dim kev teem txim. Vim yus xib rau Yawmsaub thiab tso siab plhuav, nws thiaj ntxuav yus lub txim pov tseg, thiab vim hwm thiab paub ntshai Yawmsaub yus thiaj lug dhau kev phem. Thaum neeg ua hum Yawmsaub lub siab, txawm yog lawv tej yeeb ncuab los Yawmsaub ua kom rov nrog lawv sib raug zoo. Ua ncaj ncees es tau tsawg tsawg kuj zoo dua li ua tsis ncaj es tau nyiaj txiag ntau ntau. Neeg lub siab npaj txojkev rau nws taug, tiamsis Yawmsaub coj nws txhais kotaw. Yawmsaub pub lo lus txiav txim rau vajntxwv lub qhov ncauj, vajntxwv thiaj txiav txim tsis txhaum. Rab teev thiab lub phaj teev uas hum txiaj yog Yawmsaub li, thiab cov thauj teev huvsi hauv lub hnab kuj yog Yawmsaub ua. Qhov uas ua phem mas tej vajntxwv ntxub kawg li, rau qhov kev ncaj ncees ua rau lub zwm txwv nyob ruaj khov. Daim tawv ncauj uas hais lus ncaj ua rau vajntxwv zoo siab, thiab nws nyiam tus uas hais lus tseeb. Vajntxwv kev npau taws mas yog tus tub tshaj xo kev ploj tuag, tiamsis tus muaj tswvyim yuav tswj tau. Thaum vajntxwv ntsej muag luag neeg ciaj sia, thiab qhov uas vajntxwv txaus siab zoo yam nkaus li tej huab uas tso nag tshiab los. Tau tswvyim kuj zoo heev dua li tau kub, thiab xaiv yuav kev txawj ntse zoo dua li yuav nyiaj. Cov uas ncaj ncees txojkev mas ncaim ntawm txojkev phem, tus uas ceev faj nws txojkev kuj yog tuav tau nws txojsia. Kev khav theeb yuav coj mus raug puam tsuaj, thiab lub siab muab hlob yuav coj mus kom ntog. Tus uas txo hwjchim nrog tej pluag nyob zoo dua li nrog cov neeg khav theeb faib tej qhov txhia chaw uas txeeb tau los. Tus uas mloog tej lus qhia yuav vam meej, thiab tus uas tso siab rau Yawmsaub yuav nyob kaj siab lug. Tus uas lub siab ntse yuav hu tau tias yog tus thoob tsib to nrog, thiab ncauj lus zoo mas rub tau neeg lub siab zuj zus. Tswvyim yog lub qhov dej txhawv uas pub txojsia rau tus uas muaj tswvyim, tiamsis txojkev ruam rau txim rau cov neeg ruam. Tus uas muaj tswvyim lub siab ua rau nws tej lus txawj ntse, thiab tsav hwjchim rau nws daim tawv ncauj rub tau neeg lub siab. Ncauj lus zoo mas zoo yam nkaus li zib ntab, thiab qab zib rau lub siab thiab pub lub cev noj qab nyob zoo. Muaj ib txojkev uas neeg pom tias zoo, tiamsis txojkev ntawd qhov kawg yog kev tuag. Qhov uas tus tub zog tshaib nqhis ua rau nws nrhiav haujlwm ua, nws lub qhov ncauj txhib kom nws ua. Tus neeg tsis tsim txiaj ntaus tswvyim ua phem, nws tej lus zoo yam nkaus li hluavtaws kub. Tus neeg siab nkhaus tshum kom muaj kev sib cav sib ceg, thiab tus lis xaiv ua rau tej phoojywg tawg. Tus neeg ua nruj ua tsiv ntxias kwvtij zej zog, thiab coj lawv taug txojkev tsis zoo. Tus uas zij ncaug ntxi muag ntaus tswvyim ntxeev ntxias, tus uas zim hniav zog yeej coj kom ua phem. Taubhau uas dawb hau paug yog lub mom kub uas muaj meej, tus uas coj lub neej ncaj ncees yuav tau lub mom ntawd. Tus uas tsis chim sai zoo dua li tus uas muaj zog heev, thiab tus uas tswj tau nws lub siab zoo dua li tus uas ntaus tau ib lub nroog. Neeg rho ntawv saib tom hauv ntej yuav zoo li cas, tiamsis Yawmsaub yog tus uas txiav txim siab rau txhua yam. Noj ib qho mov qhuav los nyob kaj siab kuj zoo dua li lub tsev uas noj nqaij noj hno los muaj kev sib cav sib ceg. Tus qhev uas ua haujlwm ntse ntsuav yuav tswj tau tus tub uas rhuav ntsej muag, thiab nws yuav muaj feem nrog cov tub tau qub txeeg qub teg. Lub yeej vub siv nchuav cov tseem nyiaj, lub cub thee siv nchuav cov tseem kub, tiamsis Yawmsaub sim neeg lub siab. Tus uas ua phem mloog daim tawv ncauj uas limhiam tej lus, thiab tus neeg dag ua tib zoo mloog tus nplaig uas ntxeev ntxias. Tus uas thuam cov neeg pluag kuj yog saib tsis taus Yawmsaub uas yog tus tsim, tus uas thaum lwm tus raug ceeblaj los tseem zoo siab kuj yuav tsis dim kev teem txim. Tej xeeb ntxwv yog tej poj koob yawm txwv lub mom kub, thiab leej txiv yog cov tub lub koob meej. Tus neeg ruam tsis phim hais tej lus zaj lus zuag, thiab tej lus dag yeej tsis phim cov uas muaj meej mom. Nyiaj xiab mas tus muab pom tias zoo yam nkaus li tej pov hum uas muaj hwjchim, nws mus rau qhov twg los nws vam meej. Tus uas zam txim rau luag kuj yog nrhiav kev sib raug zoo, tiamsis tus uas pheej rov dig tej qub los kuj yog rhuav kev ua phoojywg. Tej lus qhuab ntuas nkag rau hauv tus neeg thoob tsib tob dua li uas nplawm tus ruam ib puas nplawg. Tus neeg phem nrhiav kev fav xeeb, tiamsis yuav muaj ib tug tub tshaj xo nyaum mus tiv nws. Mus ntsib ib tug maum dais uas cov menyuam ploj lawm zoo dua li uas ntsib ib tug neeg ruam uas ua tej haujlwm ruam. Yog leejtwg ua phem pauj zoo, kev phem yuav tsis tawm hauv nws lub tsev mus. Thaum pib sib cav sib ceg kuj zoo yam nkaus li tso lub pas dej nqeg, yog li ntawd cia li tseg ua ntej uas kev sib ceg sib ntaus tawm tuaj. Tus uas tso tej neeg txhaum dim thiab tus uas rau txim rau cov uas tsis txhaum, mas ob tug uas ua li no Yawmsaub ntxub kawg li. Ua cas tus neeg ruam yuav rho nyiaj hauv nws txhais tes yuav tswvyim rau thaum uas nws tsis txawj xav dabtsi? Tej phoojywg kuj muaj kev sib hlub txhua lub sijhawm, thiab tej kwvtij kuj yug los sib pab rau thaum muaj kev txom nyem. Tus neeg tsis thoob tsib thiaj nrog luag cog lus, thiab qhwv kwvtij zej zog. Tus uas nyiam kev txhaum kuj nyiam kev sib cav sib ceg, tus uas ua lub qhov rooj siab siab kuj yog nrhiav kev puam tsuaj. Tus uas lub siab nkhaus yuav tsis vam meej, tus nplaig ntxeev xaiv poob rau qhov txom nyem. Leejtxiv uas muaj tub tsis thoob tsib kuj muaj kev txhawj xeeb, thiab leej txiv uas muaj tub ruam tsis muaj ntsej muag luag. Lub siab xyiv fab yog cov tshuaj zoo, tiamsis kev poob siab ua rau pob txha qhuav. Tus neeg limhiam txais tej nyiaj xiab ntawm luag lub hnab tsho los qhau txojcai. Tus uas thoob tsib to nrog tob, mas ntsia ntsoov rau tswvyim, tiamsis tus ruam lub qhov muag nuam rau qab ntuj kawg. Tus tub ruam ua rau leej txiv txhawj qas ntsuav thiab ua rau leej niam uas yug lwj siab. Qhov uas muab tus ncaj ncees nplua kuj tsis zoo, qhov uas muab tus uas zoo nplawm kuj txhaum. Tus uas tswj tau nws tej lus kuj yog nws txawj ntse, tus uas muaj lub siab ntev kuj thoob tsib to nrog. Tus ruam ua twjywm kuj suav tias muaj tswvyim, thaum nws qos nws daim tawv ncauj kuj suav tias nws txawj xav. Tus uas tawm mus ua twm zeej twm kawv ua raws li nws lub siab xwb, thiab tawm tsam sawvdaws tej tswvyim zoo. Tus ruam tsis zoo siab rau txojkev thoob tsib to nrog, tsuas yog zoo siab rau qhov uas nws nthuav nws tej kev xav xwb. Thaum tej kev limhiam los txog, kev saib tsis taus kuj los thiab, thaum poob koob kuj raug txaj muag thiab. Tej lus uas neeg lub qhov ncauj hais yog dej tob. Lub qhov dej txhawv uas pub tswvyim, yog tus dej ntsawj ceev. Qhov uas tsa tus neeg txhaum cai mas tsis zoo, thiab qhov uas tu tsis ncaj rau tus tsis txhaum kuj tsis zoo. Tus neeg ruam daim tawv ncauj coj kev sib cav sib ceg los, thiab nws lub qhov ncauj kuj hu rab nplawm los. Tus ruam lub qhov ncauj ua rau nws puam tsuaj, thiab nws daim tawv ncauj kuj ua hlua cuab nws. Tus txom xaiv tej lus mas zoo yam nkaus li tej zaub mov qab uas nkag kiag mus rau hauv plab. Tus nkeeg ua haujlwm kuj nrog tus uas ua kom puam tsuaj ua kwvtij. Yawmsaub lub npe yog lub chaw tsom faj uas ruaj khov, tus ncaj ncees dhia mus rau hauv thiab nyob tso siab plhuav. Tus nplua nuj tej nyiaj txiag yog nws lub nroog uas ruaj khov, thiab nws xam pom tias zoo yam nkaus li lub ntsa loog siab siab. Ua ntej uas tsis tau raug kev puam tsuaj neeg lub siab kuj khav theeb. Xub txo hwjchim mam li tau koob meej. Yog leejtwg teb ua ntej uas nws tsis tau hnov kuj yog nws txojkev ruam thiab kev txaj muag. Neeg lub siab thev taus kev mob nkeeg, tiamsis leejtwg thev taus txojkev lwj siab? Lub siab uas txawj xav yeej tau kev txawj ntse, thiab tus uas muaj tswvyim lub qhov ntsej nrhiav kev txawj ntse. Pub ib yam dabtsi rau luag kuj yog qheb kev rau yus thiab coj yus mus cuag cov uas ua hlob. Tus uas xub piav nws tshaj plaub ua ntej mas saib zoo li muaj cai, mus txog thaum tus uas nrog nws ua plaub tuaj tshawb nws lub keeb. Qhov uas rho ntawv mas ua kom tseg tsis sib cav sib ceg, thiab txiav txim rau ob tog neeg loj uas ua plaub. Tus kwvtij uas tau txais kev pab mas zoo li lub nroog ruaj khov, thiab kev sib cav sib ceg mas zoo li tus las rooj uas kaw lub chaw tsom faj ruaj khov. Lub qhov ncauj ua rau lub plab tsau, tej uas daim tawv ncauj hais ua rau yus txaus siab. Kev ciaj kev tuag nyob ntawm tus nplaig li hwjchim, cov uas nyiam siv tus nplaig rau zaj twg yuav tau saws li ntawd. Tus uas yuav tau pojniam kuj yog tau yam uas zoo, thiab tau kev hlub ntawm Yawmsaub. Tus uas pluag tsuas yog taij thov xwb, tiamsis cov nplua nuj teb lub suab nchav. Muaj tej tus phoojywg ua txuj nrog yus ua phoojywg, tiamsis muaj ib tug phoojywg uas sib raug zoo heev dua tej kwvtij txheeb. Tus neeg pluag uas taug txojkev ncaj ncees kuj zoo dua tus neeg ruam uas hais lus ntxeev ntxias. Tus uas kub siab lug tiamsis tsis muaj kev txawj ntse kuj tsis zoo, thiab tus uas ua kotaw sai kuj pheej yuam kev. Thaum leejtwg txojkev ruam coj kev puam tsuaj los raug nws, nws kuj chim siab npau rau Yawmsaub. Tej nyiaj txiag rub kom tau phoojywg coob, tiamsis tus pluag raug phoojywg muab tso tseg. Tus cuav timkhawv yuav tsis dim qhov uas raug txim, tus uas pheej dag xwb yuav tsis dim. Muaj neeg coob nrhiav kev hlub ntawm tus uas muaj meej, thiab txhua tus kuj nrog tus uas pub tau rau lawv ua phoojywg. Tus neeg pluag tej kwvtij kuj ntxub nws, mas nws tej phoojywg yeej los yuav khiav deb ntawm nws. Nws hais lus rau lawv los tsis muaj leejtwg mloog li. Tus uas tau tswvyim kuj yog hlub nws tus kheej, tus uas khaws kev txawj ntse cia yuav vam meej. Tus cuav timkhawv yuav tsis dim qhov uas raug txim, tus uas pheej dag xwb yuav puam tsuaj. Tus neeg ruam tsis phim yuav siv nplua mias, yimhuab tsis tsim nyog tus qhev kav cov thawj uas muaj meej. Qhov uas thoob tsib to nrog ua rau neeg tsis chim sai, thiab qhov uas nws tsis quav ntsej tej uas luag ua txhaum rau nws, kuj yog meej mom rau nws. Qhov uas vajntxwv npau taws zoo yam nkaus li tsov ntxhuav lub suab nyooj, tiamsis nws txojkev hlub zoo yam nkaus li tej dej lwg saum tej nyom. Tus tub ruam yog kev plag kev pluag rau leej txiv, tus pojniam tsawm taus zoo yam nkaus li nag los nrog tuj tauv tsis tu. Tej vaj tse thiab nyiaj txiag yog qub txeeg qub teg uas tau ntawm leej txiv los, tiamsis tus pojniam uas thoob tsib to nrog yog tau ntawm Yawmsaub los. Txojkev tub nkeeg ua rau tsaug zog ceev, thiab tus tub nkeeg yuav raug kev tshaib. Tus uas tuav txoj kevcai kuj tuav tau nws txojsia, tus uas saib tsis taus tej lus qhia yuav tuag. Tus uas pub rau cov pluag kuj yog qev rau Yawmsaub, mas Yawmsaub yuav pauj tej uas nws pub. Cia li nplawm qhuab qhia koj tus tub rau thaum tseem muaj siab vam, tsis txhob txiav txim siab cia nws mus puam tsuaj. Tus uas npau taws ceev kuj yuav raug txim, yog koj pab nws ib zaug lawm los kuj yuav rov pab dua thiab. Cia li mloog tej lus taw qhia thiab khaws tej lus qhuab qhia, koj thiaj tau tswvyim rau tom hauv ntej. Neeg lub siab npaj haujlwm cia ntau yam, tiamsis tej uas Yawmsaub npaj cia thiaj li tiav. Yam uas ntshaw hauv lwm tus yog kev sib hlub, tus uas pluag kuj zoo dua tus uas dag. Qhov uas hwm thiab paub ntshai Yawmsaub coj mus txog txojsia, thiab tus uas tau lawd kuj nyob txaus siab hlo, tsis muaj kev phem los raug nws. Tus tub nkeeg muab txhais tes tsau rau hauv lub phaj thiab twb tsis yeem tsa txhais tes ntaus mov los rau lub qhov ncauj. Cia li nplawm tus uas muab hlob mas tus uas tsis paub qabhau thiaj li kawm tau kev paub tab. Cia li qhuab ntuas tus uas thoob tsib to nrog nws thiaj li tau kev txawj ntse. Tus uas ua nruj ua tsiv rau nws txiv thiab ntiab nws niam khiav, yog tus tub uas tsim kev txaj muag thiab raug luag thuam. Kuv tub 'e, yog koj tso tej lus qhuab qhia tseg mas koj yuav yuam kev ntawm tej lus uas tswvyim qhia. Tus timkhawv uas tsis tseeb kuj luag qhov uas tu plaub ncaj, thiab neeg limhiam lub qhov ncauj noj nqos tej kev txhaum txim. Kev rau txim twb npaj txhij rau cov uas muab hlob, thiab rab nplawm npaj rau cov neeg ruam nrob qaum. Cawv txiv hmab ua kom thuam luag, thiab cawv ua kom sib ntaus, leejtwg cia cawv coj nws mus yuam kev kuj tsis muaj tswvyim. Qhov uas vajntxwv npau taws ceev kuj zoo yam nkaus li tsov ntxhuav lub suab nyooj, tus uas zes kom vajntxwv npau kuj yog sev tau nws txojsia. Qhov uas zam dhau ntawm kev sib cav sib ceg kuj tau koob meej, tiamsis txhua tus neeg ruam yeej sib cav sib ceg. Tus tub nkeeg tsis laij liag rau lub caij laij, mas txog lub caij hlais nws yuav mus nrhiav qoob tiamsis tsis tau dabtsi li. Tej uas neeg xav tseg cia hauv nruab siab mas zoo yam nkaus li dej tob, tiamsis tus uas thoob tsib to nrog thiaj ntaus tau los. Muaj neeg coob khav txog lawv kev sib hlub, tiamsis leejtwg nrhiav tau ib tug ncaj uas tso siab tau? Tus ncaj ncees uas taug txojkev ua ncaj ua ncees, mas nws cov tub yuav tau nyob kaj siab lug rau yav tom qab. Vajntxwv uas nyob saum lub zwm txwv tu plaub nws yeej yuav tsoov txhua yam kev phem uas nws pom tawm mus. Leejtwg yuav hais tau tias, “Kuv twb ua kuv lub siab dawb siab huv lawm, kuv twb dawb huv tsis muaj txim”? Lub thauj teev uas tsis hum txiaj thiab lub thoob luj uas tsis hum, mas Yawmsaub ntxub ob yam no kawg li. Txawm yog tej menyuam yaus los qhov uas nws ua kuj qhia lub neej rau luag paub tias tej uas nws ua yog dawb huv thiab raug cai los tsis yog. Lub qhov ntsej uas hnov lus thiab lub qhov muag uas pom kev puavleej yog Yawmsaub tsim. Tsis txhob nyiam tsaug zog tsam ces koj pluag, cia li qheb koj lub qhov muag koj thiaj tau noj tsau. Tus uas rho nyiaj yuav kuj hais tias, “Tsis zoo, tsis zoo,” tiamsis thaum nws coj dhau lawm nws kuj khav. Kub thiab qe zeb hlaws muaj nqes mas muaj ntau kawg li, tiamsis daim tawv ncauj uas hais lus txawj ntse kuj yog lub qe zeb hlaws uas tsim txiaj tshaj plaws. Cia li txais lub tsho ntawm tus uas muab qhwv lwm tus li nuj nqes, thiab cia li khaws tej tiv thawj uas nws muab qhwv lwm tus. Tej zaub mov uas dag tau los mas noj qab kawg li, tiamsis tom qab tsig zeb yuav puv nkaus lub qhov ncauj. Tej hom phiaj haujlwm yuav tsum yog sablaj dav thiaj tiav, mus ntaus rog yuav tsum muaj cov txawj ntse qhia. Tus uas cuav zos taug xaiv kuj yog thws lub qe rau luag, yog li ntawd tsis txhob nrog tus ntau ncauj ua ke. Yog leejtwg cem foom nws niam lossis nws txiv, nws lub teeb yuav tuag nto tsaus ntuj nti. Tej qub txeeg qub teg uas tau sai thaum ntxov, mas thaum kawg kuj ploj tsis tau hmoov. Tsis txhob hais tias, “Kuv yuav pauj qhov uas luag ua phem,” cia tos Yawmsaub mas nws yuav pab koj. Lub thauj teev uas tsis hum txiaj mas Yawmsaub ntxub kawg li, rab teev uas ntxo kuj phem. Neeg txhais kotaw yog Yawmsaub coj, mas neeg yuav nkag siab tau neeg txojkev li cas? Yog leejtwg lam hais ua dog ua dig tias, “No yog yam dawb huv rau Yawmsaub,” kuj yog nws rov cuab mag nws, vim yog thaum xav tau txhua, twb cog lus tag lawm. Tus vajntxwv uas muaj tswvyim tsoov cov neeg limhiam thiab tsuj pes ntiag lawv yam li tsheb tsuj qoob. Lub siab uas paub qhov phem qhov zoo yog Yawmsaub lub teeb ci thoob plaws rau hauv neeg lub siab lub ntsws. Txojkev hlub thiab txojkev ua ncaj, tuav tau vajntxwv cia, thiab txojkev ncaj ncees txhawb nqa nws lub zwm txwv. Cov tub hluas lub koob meej yog qhov uas nws muaj zog, tiamsis cov laus lub moo zoo yog qhov uas lawv nyob dawb hau paug. Qhov uas muab nplawm kom to kuj yog txhuam tej kev phem tseg, qhov uas muab ntaus kuj yog ntxuav lub siab lub ntsws kom huv. Vajntxwv lub siab yog tus niag dej uas nyob hauv Yawmsaub txhais tes, Yawmsaub muab nws lub siab tig raws li Yawmsaub pom zoo. Neeg pom tias txhua yam uas lawv ua puavleej zoo, tiamsis Yawmsaub tshuaj hauv lub siab. Qhov uas ua ncaj ncees thiab txiav txim ncaj, hum Yawmsaub lub siab heev dua li muab qhov txhia chaw xyeem. Lub qhov muag khav theeb thiab lub siab muab hlob, uas yog cov neeg limhiam lub teeb mas puavleej txhaum. Tus neeg nquag tej hom phiaj yeej coj kom nws muaj nplua mias, tiamsis txhua tus uas maj ua dog ua dig yeej tu pluas xwb. Tej niag txhab nyiaj uas tus nplaig dag tau mas yog tej pa ncho uas nyob ib vuag dua xwb thiab yog txojkev tuag rooj hlua. Cov limhiam txojkev ua nruj ua tsiv yuav kuav lawv mus vim yog lawv tsis yeem ua ncaj rau luag. Cov neeg muaj txim txojkev yeej nkhaus, tiamsis tej uas cov neeg dawb huv ua kuj raug cai. Nyob saum ru tsev zoo dua li nrog tus pojniam tsawm taus nyob hauv tsev. Tus neeg limhiam lub siab ntshaw ua phem, nws tsis khuvleej nws tej kwvtij zej zog. Thaum tej neeg muab hlob raug txim mas cov neeg tsis thoob tsib kuj ntse tuaj, thaum tus uas muaj tswvyim raug luag qhuab qhia, nws kuj tau kev txawj ntse. Vajtswv uas ncaj ncees ua tib zoo saib cov neeg limhiam lub tsev, nws muab cov neeg limhiam laim pov tseg puam tsuaj tag. Tus uas ntsaws qhov ntsej tsis mloog tus pluag lub suab hu, nws yuav hu tsis muaj leejtwg hnov thiab. Ua twjywm pub tshav ntuj rau tus uas chim mas kev chim yuav ploj, muab nyiaj xiab ntsaws rau hauv xubntiag mas kev npau taws yuav ploj. Thaum tu plaub ncaj kuj ua rau cov uas ncaj ncees zoo siab, tiamsis ua rau cov uas ua phem poob siab nthav. Tus uas lug txojkev thoob tsib to nrog, yuav mus nrog cov neeg tuag nyob ua ke. Tus uas nyiam kev lomzem yuav pluag, tus uas nyiam cawv txiv hmab thiab cov roj muaj nqes yuav tsis nplua nuj. Cov neeg limhiam yuav ua nqe txhiv cov neeg ncaj ncees, tus neeg tsis ncaj yuav theej tus ncaj chaw. Nyob tebchaws moj sab qhua mas zoo dua li nrog tus pojniam tsawm taus yws taus nyob ua ke. Tej cuab txhiaj cuab tam muaj nqes nyob hauv tus uas muaj tswvyim lub tsev, tiamsis tus ruam nws noj nws li tag huvsi. Tus uas raws ncuj nciav txojkev ncaj ncees thiab txojkev hlub yuav tau txojsia thiab koob meej thiab yuav vam meej. Tus uas muaj tswvyim nce mus ntaus tau cov neeg uas muaj zog lub nroog, thiab rhuav lub chaw ruaj khov uas lawv tso siab pob tag. Tus uas tswj tau nws lub qhov ncauj thiab nws tus nplaig kuj tsom kwm tau nws dim tej kev ceeblaj. Tus uas tsab ua loj thiab khav theeb npe hu ua tus muab hlob, mas nws xyaum khav theeb tsis yuav kev yuav cai. Tus tub nkeeg txojkev ntshaw yuav rov tua nws, vim yog nws txhais tes tsis kam ua haujlwm. Tus uas ua siab hlob kuj ua siab hlob ib hnub tsaus ntuj, tiamsis tus ncaj ncees mas pheej pub tsis nkaum tes li. Tej uas cov neeg limhiam muab xyeem mas Yawmsaub ntxub kawg li, thaum lawv coj tuaj ntawm lub siab uas xav ua phem mas Yawmsaub yimhuab ntxub. Tus cuav timkhawv yuav puam tsuaj, tiamsis tej lus uas tus mloog lus hais yuav nyob mus. Tus uas limhiam nws ua nws lub plhu tuab kawg li, tiamsis tus ncaj ncees nws ua tib zoo saib nws txojkev. Tsis muaj lub tswvyim twg thiab kev txawj ntse thiab tej lus taw qhia twg uas kov yeej tau Yawmsaub. Npaj nees txhij rau hnub uas ua rog lawm, tiamsis qhov uas kov yeej nyob ntawm Yawmsaub. Tsim nyog xaiv yuav lub koob meej zoo heev dua li xaiv nyiaj txiag ntau, thiab xaiv qhov uas luag saib taus yus zoo dua li tau nyiaj thiab kub. Txawm yog tus pluag thiab tus nplua nuj los qhov uas sib thooj puavleej yog Yawmsaub tsim. Tus uas paub tab pom xwm txheej phem ces nws khiav nraim lawm, tiamsis tus tsis thoob tsib tseem phoom qas qees mus thiaj raug ceeblaj. Tus nqe zog uas txo hwjchim thiab hwm thiab paub ntshai Yawmsaub yog kev muaj txiag thiab koob meej thiab txojsia. Tej pos thiab rooj hlua cuab nyob hauv tus neeg siab nkhaus txojkev, tus uas ceev faj nws lub neej yuav nyob deb tej no. Cia li cob qhia menyuam taug txojkev uas tsim nyog nws mus, mas thaum nws hlob lawd nws thiaj tsis ncaim ntawm txojkev ntawd. Tus nplua nuj yuav kav tus pluag, thiab tus uas qev luag li ces yog ua luag qhev. Tus tseb txojkev tsis ncaj yuav saws txojkev liamsim, thiab nws txojkev npau taws tus pas yuav ploj mus. Tus uas lub siab dav yuav tau koob hmoov, rau qhov nws faib nws tej zaub mov noj rau cov uas pluag. Cia li ntiab tus uas pheej thuam luag khiav mus, thiaj tsis muaj lus sib cav, mas kev sib cav sib ceg thiab lus iab hiam thiaj ploj tag. Tus uas nyiam lub siab dawb huv thiab tus uas hais lus mos lus muag yuav tau nrog vajntxwv ua kwvluag. Yawmsaub lub qhov muag zov rawv txojkev txawj ntse, tiamsis nws rhuav cov neeg ntxeev ntxias tej lus pov tseg. Tus tub nkeeg hais tias, “Muaj tsov ntxhuav nyob sab nraud. Kuv yuav raug tsov tom ntawm txojkev.” Tus pojniam plhu tuab lub qhov ncauj yog ib lub qhov tob tob, tus uas Yawmsaub chim yuav poob rau hauv lub qhov ntawd. Txojkev ruam yeej nyob hauv menyuam lub siab, tiamsis rab nplawm qhuab qhia yuav raws txojkev ruam khiav deb ntawm nws. Tus uas quab yuam tej pluag thiaj tau nyiaj txiag ntau thiab pub rau cov uas nplua nuj mas nws yuav rov pluag xwb. Tig koj lub qhov ntsej mloog cov uas muaj tswvyim tej lus, thiab kawm kom paub kuv tej lus qhuab qhia. Yog koj khaws tej lus no cia hauv nruab siab thiab txhua lo no nyob txhij ntawm koj daim tawv ncauj, mas yuav ua rau koj zoo siab. Koj los maj, kuv twb qhia rau koj paub hnub no kom koj thiaj li tso siab rau Yawmsaub. Kuv twb sau peb caug nqe rau koj, yog lus qhuab ntuas thiab kev txawj ntse, kom thiaj qhia rau koj paub tias yam twg raug thiab yam twg tseeb, thiab koj thiaj teb tau tej lus tseeb rau cov uas txib koj mus. Tsis txhob lws tus neeg pluag rau qhov nws pluag heev, tsis txhob quab yuam cov uas raug kev txom nyem ntawm rooj loog uas tu plaub, rau qhov Yawmsaub yuav sawv lawv chaw hais plaub, thiab yuav txeeb txojsia ntawm cov uas txeeb lawv li lawm. Tsis txhob nrog tus uas chim taus ua phoojywg, thiab tsis txhob nrog tus uas npau sai ua ke, tsam koj kawm tau nws zaj ces koj nrog nws ua ib nqag mus mag ntxiab. Koj tsis txhob ua tus uas qhwv luag thiab nrog luag cog lus ris luag nuj luag nqe. Yog koj tsis muaj dabtsi them luag, ua li cas koj ho cia luag coj koj lub txaj pw mus lawm? Tsis txhob txav tej qub ciam uas thaud koj tej poj koob yawm txwv txhos cia. Koj pom tus uas txawj txawj ua haujlwm los tsis pom? Nws yuav tau mus nyob ntawm tej vajntxwv xubntiag, tsis yog nyob ntawm cov uas tsis muaj meej. Thaum koj zaum nrog ib tug nom tswv noj mov ua ke, koj yuav tsum ua tib zoo saib dabtsi nyob ntawm koj xubntiag. Yog koj qab los heev, koj cia li muab rab riam kem koj caj dab. Tsis txhob ntshaw noj nws tej zaub mov qab qab, vim tias tej zaub mov ntawd yuav ntxias tau koj. Tsis txhob khwv dhau huas nyiaj txiag xwb, yuav tsum ntse tsis txhob huas li ntawd. Thaum koj lub qhov muag ntsia ntsoov tej ntawd, kuj ploj ntais lawm. Tamsim ntawd tej nyiaj txiag ntawd yeej muaj kooj tis ya mus rau saum nruab ntug yam nkaus li dav npoj. Tsis txhob noj tus neeg cuaj khaum li zaub mov, tsis txhob ntshaw noj nws tej zaub mov qab qab, rau qhov nws zoo yam nkaus li tus uas pheej xam nqe tej zaub mov ntawd hauv lub siab. Nws txhob koj tias, “Noj tiag haus tiag,” tiamsis nws lub siab tsis hais li ntawd. Koj yuav ntuav tej zaub mov uas koj tau noj ntawd, thiab yuav nkim koj tej lus mos lus muag. Tsis txhob hais rau tej ruam tau hnov, vim lawv yuav saib tsis taus koj tej lus uas muaj tswvyim. Tsis txhob txav tej qub ciam, thiab tsis txhob nam tej menyuam ntsuag li teb, rau qhov tus uas cawm lawv muaj zog heev, nws yuav tuaj lawv tog hais plaub tawm tsam koj. Cia li muab siab rau khaws tej lus qhuab qhia, thiab tig koj lub qhov ntsej mloog tej lus txawj ntse. Tsis txhob tseg qhov uas nplawm qhuab qhia menyuam, yog siv rab nplawm nplawm, nws yuav tsis tuag. Yog koj siv rab nplawm nplawm nws, koj yuav pab tau nws txojsia dim hauv tub tuag teb. Kuv tub 'e, yog koj lub siab ntse, kuv kuj yuav zoo siab thiab. Kuv tus ntsuj plig yuav xyiv fab rau thaum uas koj daim tawv ncauj hais tej lus uas raug cai. Tsis txhob cia koj lub siab khib cov uas muaj txim, tiamsis yuav tsum ua koj lub neej hwm thiab paub ntshai Yawmsaub tas hnub tas hmo li. Yog koj ua li ntawd koj lub hauv ntej yuav zoo thiab koj yuav tsis plam tej uas koj vam. Kuv tub 'e, cia li mloog thiab cia li ntse, thiab coj koj lub siab taug txojkev ncaj ntawd. Tsis txhob mus nrog cov neeg qaug cawv nyob ua ke, thiab tsis txhob nrog cov uas hu dab noj nqaij nyob ua ke. Rau qhov cov uas qaug cawv thiab cov uas hu dab yuav raug txojkev pluag, thiab txojkev tsaug zog ncaws nruj nris yuav muab tej khaub hlab rau lawv hnav. Cia li mloog koj txiv uas yug koj, thiab tsis txhob saib tsis taus koj niam thaum nws laus. Cia li yuav qhov tseeb tsis txhob muab muag, cia li yuav tswvyim thiab tej lus qhuab qhia thiab kev thoob tsib to nrog. Tus neeg ncaj ncees leej txiv yuav zoo siab xyiv fab kawg, tus uas yug tau tus tub ntse yuav zoo siab rau tus tub. Koj cia li ua kom koj niam koj txiv zoo siab, cia li ua kom tus uas yug koj zoo siab xyiv fab. Kuv tub 'e, cia li muab koj lub siab rau kuv, thiab cia koj lub qhov muag saib kuv txojkev. Tus poj muag cev yog lub qhov tob, thiab tus nkauj cuav zej cuav zos yog lub qhov dej uas nqaim. Tus pojniam ntawd zov tos yam nkaus li tub sab, thiab ua kom muaj neeg tsis ncaj coob zuj zus. Leejtwg muaj kev txom nyem? Leejtwg lwj siab ntsuav? Leejtwg muaj kev sib cav sib ceg? Leejtwg yws li ub li no? Leejtwg raug mob raug to uas tsis paub yog tim li cas? Leejtwg qhov muag liab khiav? Yog cov uas zaum tsau tsawv lav cawv, thiab xyaum haus tej cawv txiv hmab uas twb muab tov sib xyaw lawm. Tsis txhob saib cov cawv txiv hmab uas kua liab ploog thiab lam thab hauv lub khob thiab yoojyim nqos. Thaum kawg cov cawv txiv hmab yuav tom ib yam li nab tom, thiab ncaws ib yam li tus nab muaj taug. Koj lub qhov muag yuav pom tej yam txawv txawv thiab koj lub siab yuav hais tej lus plhom moj qas ntsuav. Koj yuav zoo yam li tus uas pw hauv lub nkoj hauv nruab nrab hiavtxwv, yuav zoo yam nkaus li tus uas pw saum tus ncej dai daim ntaub nkoj. Koj yuav hais tias, “Lawv ntaus kuv los tsis mob, lawv tsoo kuv los kuv tsis hnov. Kuv yuav tsim thaum twg? Kuv yuav nrhiav los haus dua.” Tsis txhob khib cov neeg phem, tsis txhob ntshaw nrog lawv nyob ua ke, rau qhov lawv lub siab ntaus tswvyim ua nruj ua tsiv, thiab lawv daim tawv ncauj hais tej lus uas yuav mus ua phem. Siv tswvyim thiaj ua tau lub tsev, thiab muaj kev thoob tsib to nrog ua lub tsev nyob ruaj khov. Thiab muaj kev txawj ntse thiaj ua rau tej chav tsev muaj cuab txhiaj cuab tam zoo zoo nkauj puv nkaus. Tus uas muaj tswvyim muaj zog heev, tus uas txawj ntse kuj muaj zog tuaj. Yog muaj cov txawj ntse qhia mas koj thiaj nqes tes ua rog tau, thiab muaj ntau leej ua chaw sablaj koj thiaj kov yeej. Tswvyim nyob siab dhau tus ruam, ntawm lub rooj loog nws tsis rua qhov ncauj hais. Tus uas ntaus tswvyim ua phem luag yuav hu tias tus thab plaub. Qhov uas ntaus tswvyim ua tej yam ruam kuj txhaum, thiab tus uas thuam luag yog tus uas neeg ntxub kawg. Yog koj poob siab nthav rau hnub uas koj raug ceeblaj, koj kuj tsis muaj zog. Cia li cawm cov uas raug cab mus tua kom dim, cia li pab tus uas raug cab nrhaj nrhuj nrheev mus tua kom dim. Yog koj hais tias, “Peb tsis paub zaj no li,” mas Vajtswv uas tshuaj saib lub siab yuav tsis pom lov? Tus uas zov rawv koj tus ntsuj plig tsis paub thiab lov? Nws yuav tsis pauj rau neeg raws li lawv tau ua los lawm lov? Kuv tub 'e, cia li noj zib ntab vim yog yam uas zoo, thiab zib ntab uas nrog ntawm lub tsev ntab kuj qab zib heev. Yuav tsum paub tias tswvyim zoo ib yam li ntawd rau koj tus ntsuj plig, yog koj tau tswvyim, koj lub hauv ntej yuav zoo thiab koj yuav tsis plam tej uas koj vam. Tsis txhob zov tos nrhw ib yam li tej neeg limhiam uas yuav lws tus ncaj ncees lub tsev, tsis txhob ua nruj ua tsiv rau nws lub tsev, rau qhov tus ncaj ncees txawm ntog xya zaus los tseem sawv los thiab, tiamsis tus neeg limhiam raug vij sub vij sw muab ntxuav pov tseg. Tsis txhob zoo siab xyiv fab rau thaum koj tus yeeb ncuab ntog, thiab tsis txhob zoo siab rau thaum nws dawm, ntshai tsam Yawmsaub pom ces yuav tsis txaus siab thiab nws yuav thim qhov uas nws npau taws rau koj tus yeeb ncuab. Koj tsis txhob nyuaj siab rau tej neeg uas ua phem thiab tsis txhob khib cov uas ua limhiam, rau qhov tus neeg phem tsis muaj lub hauv ntej zoo, thiab tus neeg limhiam lub teeb yuav raug muab tua. Kuv tub 'e, cia li hwm thiab paub ntshai Yawmsaub thiab vajntxwv, tsis txhob nrog tej neeg uas fav xeeb ua ib lub siab, rau qhov ob tug yuav ua vij sub vij sw tshwm los sai sai, mas leejtwg yuav paub tej kev puam tsuaj uas ob tug ua? Tej lus no yog cov uas muaj tswvyim hais. Qhov uas saib dej ua ntu saib neeg ua plhu mas tsis zoo li. Tus uas hais rau tus neeg limhiam tias, “Koj tsis txhaum,” mas yuav raug tej pejxeem cem foom thiab raug tej tebchaws ntxub. Tiamsis cov uas qhuab ntuas tus neeg limhiam yuav tau nyob kaj siab thiab yuav tau koob hmoov. Tus uas teb lo lus tseeb mas zoo li nwj daim tawv ncauj. Cia li npaj koj tej haujlwm sab nraud thiab ua txhua yam kom txhij hauv koj daim teb, dhau ntawd kuj ua koj lub tsev. Tsis txhob lam ua timkhawv tom koj kwvtij zej zog uas tsis tau ua txhaum, thiab koj daim tawv ncauj tsis txhob dag. Tsis txhob hais tias, “Kuv yuav ua rau nws yam li nws tau ua rau kuv lawm, kuv yuav ua pauj tej uas nws twb ua lawm.” Kuv hla hauv tus tub nkeeg daim teb thiab tus tsis thoob tsib lub vaj txiv hmab, ua ciav pos tuaj puv nkaus, nroj tsuag tuaj ntom qas nti, thiab tej ntsa laj kab pob zeb pob tag. Kuv pom thiab ua tib zoo xav, kuv ntsia ntsoov mas kuv thiaj tau kev qhuab qhia. Tsaug ib nyuag tsig zog, ib nyuag qe muag, khawm tes so ib pliag, mas txojkev pluag yuav los txog koj yam nkaus li tub sab tuaj lws, thiab kev txom nyem yuav los yam nkaus li tus coj ntaj coj riam tuaj lws. Ntawm no yog Xalaumoo tej paj lug uas Yuda tus vajntxwv Hexekhiya cov tub teg tub taws sau cia. Qhov uas Vajtswv muaj koob meej yog qhov uas nws npog ntau yam cia, tiamsis qhov uas tej vajntxwv tau koob meej yog qhov uas lawv tshawb tau ntau yam tshwm los. Lub ntuj nyob siab li cas thiab lub ntiajteb nyob tob li cas, kuj tshawb tsis tau tej vajntxwv lub siab tag ib yam li ntawd. Cia li muab tej quav nyiaj nchuav kom tawm mus, mas thiaj tau cov tseem nyiaj rau tus Kws ua tais. Cia li muab cov neeg limhiam raws tawm ntawm tus vajntxwv xubntiag mus, nws lub zwm txwv thiaj yuav nyob ncaj ncees mus li. Tsis txhob mus sawv tsab ua loj rau ntawm vajntxwv xubntiag thiab tsis txhob mus sawv ntawm cov uas ua hlob lub chaw, Qhov uas luag hais tias, “Nce los rau ntawm no,” zoo dua li raug muab raws nqes rau lub rooj qes tab meeg cov thawj. Yam uas koj pom tsis txhob maj mus ua timkhawv rau hauv tsev tu plaub tsam muaj dua lwm tus ua rau koj poob ntsej muag mas thaum kawg koj yuav ua li cas? Cia li nrog tus uas muaj plaub rau koj hais kom hum, tsis txhob nthuav nws lub qe rau lwm tus, tsam lwm tus tau hnov ces koj raug txaj muag thiab luag yuav xyav koj lub moo tsis zoo mus li. Hais tej lus zoo rau lub sijhawm uas cheem tsum hais, mas zoo yam nkaus li lub txiv duaj kub uas nyob hauv lub tais nyiaj. Tus uas txawj ntse ntuas tus uas tig ntsej mloog mas zoo yam nkaus li nplhaib kub saw kub. Daus xib daus npu laj ntxiag rau lub caij sau qoob li cas, mas tus tub tshaj xo uas ncaj zoo li ntawd rau cov uas txib nws mus, nws ua rau cov uas txib nws mus kaj siab. Tus uas khav hais tias nws yuav pub yam ub yam no tiamsis kuj tsis pub, mas zoo yam nkaus li tej huab cua uas tsis muaj nag. Qhov uas ua siab ntev yuav haub tau nom tswv, thiab tus nplaig uas hais lus mos lus muag yuav txo tau lub siab tawv. Yog koj pom zib ntab cia li noj kom txaus nkaus xwb, tsam koj tsau dhau ces ntuav. Koj txhais kotaw uas mus cov zos hauv luag tej tsev mas tsawg mus ib ntswv, tsam ces luag dhuav thiab ntxub koj. Tus uas ua cuav timkhawv tom kwvtij zej zog kuj zoo yam nkaus li tus qws lossis rab ntaj lossis rab xub uas ntse. Qhov uas tso siab rau ib tug uas tsis ncaj thaum uas koj raug txom nyem, kuj zoo yam nkaus li tus hniav uas mob thiab txhais kotaw uas ceg tawv. Tus uas hu nkauj rau tus uas lwj siab mloog mas zoo yam nkaus li tus uas hle nws cev tsoos tsho rau hnub uas no, thiab zoo yam nkaus li muab kua qaub hliv rau lub kiav txhab. Yog koj tus yeeb ncuab tshaib plab ces muab mov rau nws noj, yog nws nqhis dej cia li muab rau nws haus, rau qhov koj yuav rauv ib cub thee cig plaws rau saum nws taubhau, mas Yawmsaub yuav muab nqe zog rau koj. Cua ntsawj sab ped tuaj coj nag los li cas, tus nplaig uas taug xaiv kuj coj lub ntsej muag chim los ib yam li ntawd. Nyob saum ru tsev zoo dua li nrog tus pojniam tsawm taus nyob hauv tsev. Tej xov zoo uas tuaj tebchaws deb tuaj kuj zoo yam nkaus li khob dej txiag rau tus uas nqhis. Tus ncaj ncees uas swb tug neeg limhiam zoo yam nkaus li lub hauv dej muaj av lossis lub qhov dej qias. Qhov uas noj zib ntab ntau kuj tsis zoo, yog li ntawd yuav tsis txhob hais tej lus qhuas ntau dhau. Tus uas tswj tsis tau nws lub siab, kuj yam nkaus li lub nroog uas pob tag tsis muaj ntsa loog. Lub koob meej muab rau tus uas ruam kuj tsis phim yam nkaus li daus xib daus npu los rau lub caij ntuj kub thiab nag los rau lub caij sau qoob. Yog yus tsis tau ua txhaum mas tej lus foom tsis zoo yuav tsis raug ib yam li tus noog piv uas ya mus ya los thiab yam li tus luv uas ya tsis tsaws. Rab nplawm siv nplawm nees, txoj xauv siv sam nees luav, mas rab nplawm siv nplawm tus ruam nrob qaum. Tsis txhob teb tus ruam raws li nws txojkev ruam tsam ces koj ho zoo nkaus li nws lawm. Cia li teb tus ruam raws li nws txojkev ruam, tsam ces nws pom tias nws ntse lawm. Tus uas tso tus neeg ruam xa xov kuj yog nws txiav nws kotaw pov tseg thiab haus kev iab kev khwv. Tej paj lug uas nyob hauv tus ruam lub qhov ncauj zoo ib yam nkaus li txhais kotaw uas lov dai vias siv tsis tau. Tus uas muab koob meej rau tus uas ruam zoo ib yam nkaus li nws muab lub qe zeb hlaws khi rau ntawm txoj roj hmab. Tej paj lug uas nyob hauv tus ruam lub qhov ncauj zoo ib yam nkaus li tus pos uas nyob hauv tus qaug cawv txhais tes. Tus uas ntiav tus neeg ruam lossis tus uas qaug cawv uas dua kev, kuj zoo ib yam li tus uas tua hneev ywj tua raug txhua leej txhua tus. Tus ruam uas ua qhov ruam tag los ua thiab, kuj zoo ib yam nkaus li tus dev uas rov noj nws cov ntuav. Koj pom tus uas nws xav hais tias nws ntse los tsis pom? Tseem muaj vam tus uas ruam heev dua li tus ntawd. Tus tub nkeeg hais tias, “Muaj tsov ntxhuav nyob tom kev. Muaj tsov ntxhuav nyob ntawm ntug moos.” Lub qhov rooj qoj tau mus los ntawm tus npuab rooj li cas, tus tub nkeeg kuj ntxeev luj luam saum nws lub txaj pw ib yam li ntawd. Tus tub nkeeg muab txhais tes tsau rau hauv lub phaj, nws nqa txhais tes rau ntawm qhov ncauj txog siav kawg. Tus uas tub nkeeg pom tias nws ntse dua xya leej uas teb tau tej lus thoob tsib to nrog. Tus uas ntxig ceg rau hauv luag tej lus sib cav sib ceg uas tsis thab raug nws, kuj zoo ib yam li tus uas ntsiab tus dev uas dhia hla mus nplooj ntseg. Yog taws tag lawm hluavtaws kuj tuag, thiab yog tsis muaj neeg lis xaiv kuj tseg tsis muaj lus sib cav sib ceg. Thee ua rau cub tawg ciaj ncaig vog, thiab taws ua rau nplaim taws ci li cas, tus uas pheej sib cav sib ceg tshum kom muaj lus sib cav sib ceg ib yam li ntawd. Tus lig xaiv tej lus zoo yam nkaus tej zaub mov qab qab, uas nkag kiag mus rau hauv plab. Daim tawv ncauj npliag lub siab phem kuj zoo yam nkaus li cov kua tshuaj uas muab luam rau lub tais av. Tus uas ntxub luag mas nws daim tawv ncuaj zais lus, thiab nws cib nyeej rau nruab siab. Thaum nws hais lus mos lus muag tsis txhob ntseeg nws rau qhov ib puas tsav yam txojkev ntxub ntxaug nyob hauv nws lub siab. Txawm yog nws muaj tswvyim npog nws txojkev ntxub ntxaug cia los nws txojkev limhiam yuav tshwm plaws los rau ib tsoom neeg pom. Tus uas khawb qhov taub cuab luag, nws yuav poob rau hauv lub qhov ntawd, tus uas dov pob zeb los nws yuav raug pob zeb tais. Tus nplaig uas dag, ntxub tus uas nws rhuav tshem, thiab lub ncauj qab rog qab ntse coj kev puam tsuaj los ze. Tsis txhob khav txog tagkis rau qhov koj tsis paub tias ib hnub yuav muaj xwm txheej dabtsi tshwm los. Cia lwm tus qhuas koj, tsis txhob cia koj lub qhov ncauj rov qhuas koj. Cia luag qhuas, tsis txhob cia koj daim tawv ncauj qhuas. Pob zeb kuj hnyav thiab xuab zeb kuj hnyav, qhov uas tus neeg ruam pheej zes luag tseem hnyav dua ob yam no huvsi. Kev npau taws kuj ua nruj ua tsiv, kev chim kuj nyab kiag, tiamsis leejtwg thev tau kev khib siab? Raug luag ntuas tab meeg kuj zoo dua li luag hlub yus twjywm xwb. Phoojywg ntaus yus kuj tso siab tau, tiamsis yeeb ncuab mas nwj ntau dhau. Tus uas noj tsau lawm, zib ntab nws kuj dhuav, tiamsis tus uas tshaib mas txhua yam uas iab kuj qab zib. Tus uas khiav tawm ntawm nws lub tsev mus, kuj zoo li tus noog uas khiav tawm hauv lub zes mus. Roj thiab tshuaj tsw qab ua rau zoo siab, tiamsis phoojywg lo lus ntuas uas qab zib ua rau lub siab kaj. Tsis txhob tso koj tej kwvluag thiab koj txiv tej kwvluag tseg. Hnub uas koj raug ceeblaj tsis txhob mus rau koj tej kwvtij tsev. Tej phoojywg uas nyob ze zoo dua tej kwvtij uas nyob deb. Kuv tub 'e, cia li ntse thiab ua rau kuv zoo siab, xwv kuv thiaj li teb tau cov neeg uas thuam kuv. Tus uas paub tab pom xwm txheej phem ces nws tsiv nraim lawm, tiamsis tus tsis thoob tsib tseem phoom qas qees mus thiaj raug ceeblaj. Cia li txais lub tsho ntawm tus uas muab qhwv lwm tus li nuj nqes, thiab cia li khaws tej tiv thawj uas nws muab qhwv lwm tus. Tus uas sawv ntxov tsaus ntuj nti mus foom koob hmoov nrov nrov rau kwvtij zej zog, luag yuav suav tias tej lus ntawd yog foom tsis zoo. Los nag tshauv ib hnub dej nrog tuj tauv tsis tu li cas, tus pojniam tsawm taus zoo ib yam li ntawd. Qhov uas cheem nws kuj ib yam li cheem cua xwb, lossis zoo ib yam li txhais tes xis tuav tsis tau roj. Muab hlau txhuam tau hlau ntse, neeg ib leeg kuj qhia tau ib leeg kom ntse. Tus uas tu tej txiv cev kuj yuav tau noj cov txiv ntawd, tus qhev uas tu nws tus lospav zoo yuav tau koob meej. Neeg pom neeg lub plhu hauv dej li cas, mas saib tej uas neeg xav kuj pom tias neeg lub siab zoo li cas. Tub tuag teb thiab qhov puam tsuaj txhaws tsis paub puv li, thiab tej uas neeg lub qhov muag ntshaw kuj tsis txawj txaus. Lub yeej vub siv nchuav cov tseem nyiaj, lub cub thee siv nchuav cov tseem kub, tej lus qhuas yog sim neeg lub siab. Txawm yog muab tus neeg ruam tuav xyaw qoob rau hauv qhov cos los nws txojkev ruam tsis tawm mus. Koj yuav tsum paub koj pab tshis pab yaj nyob zoo li cas, thiab ua tib zoo saib koj pab nyuj, rau qhov tej txhab nyiaj yuav tsis nyob mus ib txhis, thiab lub mom vajntxwv yuav tsis nyob rau txhua tiam neeg. Thaum hlais tej nroj uas qhuav tag lawm mas hlav dua zaub tshiab tuaj, thiab thaum sau tej zaub pem roob tag lawm, mas koj yuav tau tsho hnav ntawm menyuam yaj thiab yuav tau nqe yuav teb ntawm tshis. Yuav muaj kua mis tshis txaus ua zaub mov rau koj thiab koj tsev neeg tau noj, thiab yug tau koj tej nkauj qhev. Cov neeg limhiam cia li khiav, twb tsis muaj leejtwg caum, tiamsis cov ncaj ncees muaj lub siab tuab ib yam li tsov ntxhuav. Thaum muaj kev fav xeeb rau hauv lub tebchaws mas muaj ntau leej sawv kav, tiamsis muaj tus uas thoob tsib thiab txawj ntse mas lub tebchaws yuav nyob ruaj nreeg ntev. Tus neeg pluag uas quab yuam cov pluag zoo yam nkaus li pluav nag uas hlob kawg ua rau qoob loo piam tag. Cov uas muab txoj kevcai tso tseg yeej qhuas cov neeg limhiam, tiamsis cov uas tuav rawv txoj kevcai kuj tawm tsam lawv. Cov neeg phem tsis to taub txojkev ua ncaj, tiamsis cov uas nrhiav Yawmsaub mas to taub huvsi. Tus neeg pluag uas taug txojkev ncaj ncees kuj zoo dua tus neeg nplua nuj uas ua nkhib nkhaus. Tus uas tuav rawv txoj kevcai yog tus tub uas ntse, tiamsis tus uas nrog tus neeg tsis tsheej haj ua phoojywg ua rau leej txiv poob ntsej muag. Tus uas sau paj nyiag ntau thiab nrhiav nyiaj los tsav rau nws txhab nyiaj, tsuas yog nws khaws cia rau lwm tus tau hlub tej pluag xwb. Yog leejtwg tsis quav ntsej txoj kevcai, mas nws tej lus thov yog yam uas Yawmsaub ntxub xwb. Tus uas coj tus ncaj ncees yuam kev taug txojkev phem, nws yuav poob rau hauv nws lub qhov taub. Tiamsis tus uas tsis tau ua txhaum yuav tau tej qub txeeg qub teg uas zoo. Tus uas nplua nuj nws pom tias nws txawj ntse, tiamsis tus pluag uas thoob tsib to nrog yeej paub tus nplua nuj zoo li cas. Thaum tus ncaj ncees kov yeej, muaj kev zoo siab xyiv fab ntau heev, tiamsis thaum tus neeg limhiam tau hwjchim tej neeg kuj mus tsiv nraim. Tus uas npog nws tej kev txhaum cia yuav tsis vam meej, tiamsis tus uas lees lub txim thiab tso tej kev txhaum tseg yuav tau kev khuvleej. Tus uas hwm thiab paub ntshai Yawmsaub tsis tu li yuav tau nyob kaj siab lug, tiamsis tus uas ua lub siab tawv yuav poob rau hauv vij sub vij sw. Tus thawj coj limhiam uas kav tej neeg pluag kuj zoo yam nkaus li tus tsov ntxhuav nyooj laws lossis yam li tus dais uas dhia los tom. Tus thawj coj uas tsis thoob tsib to nrog kuj quab yuam nyaum heev, tiamsis tus uas ntxub tej uas tau ntawm kev ua tsis ncaj nws lub niaj lub xyoo yuav ntev mus. Leejtwg tua lwm tus es muaj vij sub vij sw lawm mas cia nws khiav mus tag sim neej tsis txhob kheev leejtwg pab nws. Tus uas ua lub neej ncaj yuav tau kev cawm dim, tiamsis tus uas ua nkhib nkhaus yuav poob qhov taub. Tus uas laij liag yuav muaj mov noj ntau, tiamsis tus uas ua tej haujlwm tsis muaj qabhau yuav pluag heev. Tus uas ua ncaj yuav tau hmoov zoo ntau, tiamsis tus uas maj nplua nuj yuav tsis dim kev teem txim. Qhov uas saib dej ua ntu saib neeg ua plhu mas tsis zoo, tiamsis tau ib pluag mov xwb ces yeej yuav ua tsis ncaj. Tus uas qia dub maj nroos nrhiav nyiaj txiag, tiamsis nws tsis paub tias kev txom nyem yuav los raug nws. Tus uas qhuab ntuas luag mas luag yuav rov hlub nws heev dua tus uas lub qhov ncauj qab zib nplaig qab ntse. Tus uas nyiag nws niam nws txiv tej qhov txhia chaw los tseem hais tias, “Tsis txhaum,” kuj yog nws nrog tus uas ua kev puam tsuaj ua phoojywg. Tus uas siab hlob tshum kom muaj kev sib cav sib ceg, tiamsis tus uas tso siab rau Yawmsaub yuav vam meej. Tus uas tso siab rau tej uas nws xav kuj yog ruam, tiamsis tus uas ua raws li tswvyim yuav tau kev cawm dim. Tus uas pub rau tej pluag nws yuav tsis tu pluas, tiamsis tus uas qe muag nti tsis hlub tej pluag yuav raug foom tsis zoo heev kawg. Thaum cov neeg limhiam tau hwjchim tej neeg kuj mus tsiv nraim, tiamsis thaum lawv puam tsuaj tag lawm, cov uas ncaj ncees yuav huaj vam coob tuaj. Tus uas pheej raug qhuab ntuas los tseem tawv ncauj cov nyom tsis mloog, mas ib pliag ntshis xwb yuav raug kev puas ntsoog kho tsis tau. Thaum cov ncaj ncees tau hwjchim tej pejxeem xyiv fab, tiamsis thaum cov neeg limhiam tau kav, tej pejxeem kuj ntsaj laws. Tus uas nyiam tswvyim kuj ua rau leej txiv zoo siab, tiamsis tus uas pheej ntiav poj muag cev kuj yog muab nws tej nyiaj txiag nchuav pov tseg xwb. Tus vajntxwv uas kav ncaj coj lub tebchaws nyob ruaj, tus uas quab yuam sau nyiaj txiag kuj ua rau lub tebchaws puam tsuaj. Tus uas ncauj qab zib nplaig qab ntse rau kwvtij zej zog kuj yog nws cuab hlua rov mag nws kotaw. Tus neeg phem nws mag nws li kev txhaum txoj hlua, tiamsis tus ncaj ncees hu nkauj xyiv fab hlo. Tus ncaj ncees paub tus pluag txojcai, tiamsis tus limhiam tsis nkag siab tej no. Cov uas pheej thuam lwm tus ua rau lub nroog kub hnyiab, tiamsis cov uas txawj ntse tswj kom tej kev npau taws ploj mus. Yog tus ntse nrog tus ruam sib cav sib ceg, tus ruam tsuas muaj uas npau taws thiab luag xwb, thiab tsis muaj kev tus li. Cov uas noj nyoog kuj ntxub tus uas dawb huv, thiab nrhiav ntshi txov cov ncaj ncees txojsia. Tus uas ruam yeej ua nws kev chim tshwm tag nrho los, tiamsis tus txawj ntse tswj tau nws txojkev npau cia twjywm. Yog tus thawj ntseeg tej lus dag, mas nws cov tub teg tub taws yuav limhiam tag huvsi. Tus uas pluag thiab tus uas quab yuam qhov uas sib thooj yog qhov uas Yawmsaub pub qhov kaj rau ob tug qhov muag ib yam nkaus. Yog vajntxwv tu plaub ncaj rau cov pluag, mas nws lub zwm txwv yuav nyob ruaj khov ib txhis. Rab nplawm thiab lo lus qhuab ntuas pub tswvyim, tiamsis tus menyuam uas muab tso ywj siab coj kev txaj muag rau leej niam. Thaum cov neeg limhiam tau hwjchim tuav haujlwm, muaj tej kev fav xeeb loj zuj zus, tiamsis cov ncaj ncees yuav pom ntsoov lawv raug kev puam tsuaj. Cia li nplawm qhuab qhia koj tus tub nws thiaj ua rau koj nyob siab tus yees thiab ua rau koj zoo siab. Qhovtwg tsis muaj kev qhia Vajtswv tej lus, mas tej pejxeem kuj tseg tsis tswj lub siab, tiamsis tus uas tuav rawv txoj kevcai mas tau nyob kaj siab lug. Yog tsuas xuas ncauj hais xwb mas cob qhia tsis tau tus tub qhe, txawm yog nws nkag siab los nws kuj tsis quav ntsej. Koj pom tus ncauj sai los tsis pom? Tseem muaj vam tus uas ruam heev dua li tus ntawd. Tus uas hlub nws tus tub qhe heev txij thaum yau los, mas thaum kawg yuav pom tias tus tub qhe yuav tau nws tej qub txeeg qub teg. Tus uas npau taws pheej tshum kom muaj lus sib cav sib ceg, thiab tus uas chim taus kuj ua hauv paus fav xeeb loj. Kev khav theeb yuav ua rau tus khav theeb poob qes, tiamsis tus uas txo hwjchim yuav tau koob meej. Tus uas nrog tub sab koom tes kuj yog nws ntxub nws txojsia, nws tau hnov tej lus twv tsawm los nws tsis hais dabtsi li. Qhov uas ntshai neeg yuav ua rooj hlua rov cuab yus, tiamsis tus uas tso siab rau Yawmsaub kuj nyob tso siab plhuav. Neeg coob nrhiav kev ua kom tus thawj coj hlub lawv, tiamsis Yawmsaub yog tus uas txiav txim ncaj rau neeg. Tus tsis ncaj mas cov ncaj ncees kuj ntxub kawg li, tiamsis tus ua ncaj mas cov limhiam kuj ntxub kawg li. Yakhe tus tub Aku uas nyob hauv lub moos Maxas tej lus. Aku hais rau Ithi‑ee, nws hais rau Ithi‑ee thiab Ukhas tias, “Qhov tseeb kuv ruam dhau uas yuav ua tau neeg, kuv tsis paub tab li tej neeg. Kuv tsis tau kawm paub tswvyim, thiab tsis paub Vajtswv tus uas dawb huv. Leejtwg tau nce mus rau saum ntuj kag thiab nqes rov los? Leejtwg muab tau cua los tuav rau hauv xib teg? Leejtwg muab ntaub qhwv tau dej cia? Leejtwg tu ciam rau lub ntiajteb nyob? Nws lub npe hu li cas, thiab nws tus tub npe hu li cas? Nej yeej los paub. “Muab Vajtswv txhua lo lus tshuaj saib mas pom tias muaj tseeb tiag, Vajtswv yog daim hlau thaiv cov uas mus nraim cev rau hauv nws. Tsis txhob ntxiv ib lo lus rau hauv nws tej lus, ntshai tsam nws yuav ntuas koj thiab luag yuav pom tias koj yog tus dag. Vajtswv, kuv thov ob yam ntawm koj, thov pub rau kuv ua ntej uas kuv tsis tau tuag. Thov muab tej lus tsis muaj tseeb thiab tej lus dag ntiab khiav deb ntawm kuv, thov tsis txhob cia kuv pluag thiab tsis txhob cia kuv nplua nuj, thov pub rau kuv noj kom txaus nkaus xwb, tsam kuv noj tsau ces tsis lees yuav koj thiab hais tias, ‘Yawmsaub yog leejtwg?’ lossis tsam kuv pluag thiab ua tub sab thiab ua puas tsuas kuv tus Vajtswv lub npe. “Tsis txhob thuam tus tub qhe rau tus lospav mloog, tsam tus tub qhe foom koj ces koj yuav raug txim. Muaj tej tus foom tsis zoo rau nws txiv, thiab tsis foom koob hmoov rau nws niam. Muaj tej tus nws xam pom tias nws dawb huv, tiamsis kuj tsis tau ntxuav kev phem kev qias pov tseg. Muaj tej tus mas nws taubhau siab, thiab lub qhov muag saib tsis taus lwm tus. Muaj tej tus nws kaus hniav yog hniav ntaj, thiab nws hniav yog hniav riam, mas nws yuav noj cov pluag kom tag hauv ntiajteb thiab cov neeg txom nyem kom ploj tag hauv ib tsoom neeg. “Npliaj hiab muaj ob tug menyuam yog maum, pheej qw hais tias, ‘Pub, pub.’ Muaj peb yam pheej tsis tsau, muaj plaub yam tsis hais ib zaug tias, ‘Txaus lawm,’ yog li no, tub tuag teb thiab tus pojniam mooj, thiab lub ntiajteb pheej nqhis dej, thiab hluavtaws tsis hais ib zaug tias, ‘Txaus lawm.’ “Lub qhov muag uas thuam leej txiv thiab saib tsis taus leej niam thiab tsis mloog lus, yuav raug uab lag uas nyob hauv hav tho thiab raug dav noj twm noj. Muaj peb yam uas kuv phimhwj kawg, muaj plaub yam uas kuv tsis nkag siab, yog li no, qhov uas tus dav ya saum nruab ntug, thiab qhov uas nab ntaug saum pob zeb, thiab qhov uas lub nkoj mus rau hauv nruab nrab hiavtxwv, thiab qhov uas hluas nkauj hluas nraug sib nyiam. “Tus pojniam uas mus deev luag txiv ua lub neej zoo li no, nws noj tag so qhov ncauj ces nws hais tias, ‘Kuv tsis tau ua txhaum dabtsi li.’ Muaj peb yam uas ua rau lub ntiajteb ntseeg nkaws, muaj plaub yam uas lub ntiajteb thev tsis taus, yog li no, tus qhev tau ua vajntxwv, thiab tus ruam tau noj tsau npo, thiab tus pojniam uas tsis muaj leejtwg nyiam tau txiv, thiab tus nkauj qhev tau nyob nws tus poj lospav chaw. “Muaj plaub yam hauv ntiajteb no uas me kawg tiamsis muaj tswvyim tshaj plaws, yog li no, ntsaum yog ib co uas tsis muaj zog tiamsis thaum lub caij sau qoob ntsaum kuj npaj tej uas noj khaws cia, ntxim tsua kuj yog ib co uas tsis muaj zog los nws ua zes rau hauv tej kem zeb, kooj txig tsis muaj vajntxwv los nws tseem mus tau ua ib kab sab, quav toj quav taug koj ntes tau hauv koj txhais tes los nws tseem tau nyob hauv vajntxwv tsev. “Muaj peb yam uas txawj mus kev zoo nkauj, muaj plaub yam uas txawj tshais ruam zoo saib, yog li no, tsov ntxhuav uas yog tus tsiaj uas muaj zog tshaj plaws thiab tsis thim khiav ntawm lwm yam li, tus lau qaib cooj uas mus kev khov kho, thiab tus txiv tshis, thiab tus vajntxwv uas mus kev ua cov pejxeem ntej qas ntxhia. “Yog koj tsis paub tab es koj tsab ua loj lossis yog koj ntaus tswvyim ua phem, cia li muab koj txhais tes pos koj lub qhov ncauj. Yog tso kua mis txhia tau kua mis nyeem, yog tso qhov ntswg thiaj tau ntshav, thiab yog tshum kom chim thiaj tau kev sib cav sib ceg.” No yog Lemu‑ee uas yog vajntxwv hauv lub moos Maxas tej lus uas nws niam qhia rau nws. “Kuv tub 'e, kuv tus tub uas kuv yug, au kuv tus tub uas kuv cog lus tseg, tsis txhob nkim koj lub zog rau ntau tus pojniam, tsis txhob muab koj tus kheej rau cov uas txov tau vajntxwv puam tsuaj. Au Lemu‑ee, tsis tsim nyog li, tsis tsim nyog uas vajntxwv yuav haus cawv txiv hmab, lossis cov thawj kav ntshaw haus cawv ntxwg, tsam lawv haus ces lawv ho tsis nco qab tej lus uas nyob hauv txoj kevcai, thiab qhau txhua tus uas raug kev txom nyem txojcai. Cia li muab cawv ntxwg rau tus uas tabtom puam tsuaj, thiab muab cawv txiv hmab rau cov uas nyuaj siab kawg. Cia lawv haus lawv thiaj tsis nco qab lawv txojkev pluag, thiab tsis nco lawv txojkev iab kev khwv dua li lawm. Koj cia li rua ncauj pab cov uas tsis txawj hais lus hais lawv tej plaub, thiab pab hais txhua tus uas raug luag tso tseg lawm txojcai. Cia li rua ncauj tu plaub ncaj ncees, thiab tuav cov uas pluag thiab txom nyem txojcai.” Tus pojniam uas zoo mas leejtwg nrhiav tau? Nws tsim txiaj dua tej npauj nyiaj npauj kub. Tus txiv tso siab plhuav rau nws, thiab nws yuav tsis tu ncua ib yam dabtsi li. Nws ua zoo rau tus txiv, tsis ua phem ib sim neej li. Nws nrhiav plaub yaj thiab xov maj, nws siv nws txhais tes rau siab ntso ua haujlwm. Nws zoo yam nkaus li tub lag tub luam lub nkoj txwg, nws coj nws tej zaub mov deb deb li los. Nws sawv ntxov thaum tsaus ntuj nti thiab npaj zaub mov rau nws tsev neeg noj, thiab tu haujlwm rau nws tej nkauj qhev ua. Nws ua tib zoo saib tej liaj teb mas rho nyiaj yuav cia, nws siv tej nyiaj txiag uas nws khwv tau cog txiv hmab. Nws sia siv khov kho kom muaj zog npho, nws tes txawj tes nquag. Nws pom ntsoov nws kev lag luam muaj tshaj thawj. Hmo ntuj los nws taws teeb ua haujlwm. Nws txhais tes saws ntuag tshuab ntuag qaiv ntxaiv. Nws siab dav pab tej pluag, nws cev tes pab cov txom nyem. Nws tsis ntshai daus xib daus npu los txog nws tsev neeg rau qhov nws tsev neeg txhua tus tub muaj tsoos tsho sov lawm. Nws ntos ntaub pua nws chaw pw, nws hnav tej tsoos tsho ntaub mag uas zoo zoo thiab ntaub tsamxem. Nws tus txiv yog tus uas sawvdaws paub zoo ntawm rooj loog rau thaum nrog ib tsoom kev txwj laus sablaj. Nws muab tej ntaub mag xaws tsoos tsho muag thiab xa tej siv sia rau tub luam. Nws lub zog thiab nws tej kev zoo yog lub zam uas nws hnav, nws luag tej xwm txheej uas yuav tshwm los tom hauv ntej. Nws lub ncauj hais lus ntse ntsuav, nws tus nplaig qhia luag ntawm txojkev hlub. Nws ua tib zoo tu nws tsev neeg, nws tsis nyob nkaum tes nkoos. Nws tej menyuam kuj qhuas nws nco nws txiaj ntsig, nws tus txiv kuj qhuas nws hais tias, “Tej pojniam ntau leej ua zoo kawg, tiamsis koj yog tus zoo tshaj dua lawv huvsi.” Ncauj lus zoo yog dag ntxias xwb, thiab qhov zoo nkauj tsis muaj qabhau, tiamsis tus pojniam uas hwm thiab paub ntshai Yawmsaub mas tsim nyog qhuas. Cia li muab nqe zog rau tej haujlwm uas nws txhais tes ua, thiab cia sawvdaws qhuas nws ntawm rooj loog vim nws tes haujlwm zoo. Tub Laj Lim tej lus qhia, yog Davi tus tub uas ua vajntxwv hauv Yeluxalees. Tub Laj Lim hais tias, “Qhuav qhawv, qhuav qhawv. Txhua yam qhuav qhawv xwb.” Neeg tau dabtsi ntawm tej haujlwm uas nws siv zog hauv lub qab hnub? Ib tiam dua tag mus, ib tiam tshwm tuaj, tiamsis lub ntiajteb nyob ruaj mus ib txhis. Lub hnub tawm tuaj thiab lub hnub poob qho, thiab nrawm nroos mus rau qhov uas nws tawm tuaj. Cua ntsawj rau sab nrad, thiab tig rov rau sab ped, ntsawj mus ntsawj los, ntsawj qhov qub chaw. Tej dej huvsi ntws rau hauv hiavtxwv tiamsis hiavtxwv kuj tsis puv, dej ntws qhovtwg los kuj ntws rov rau qhov ntawd. Txhua yam ua rau yug dhuav tag, tsis txawj hais li, lub qhov muag saib tsis txawj txaus, lub qhov ntsej mloog tsis txawj puv. Yam uas muaj tshwm los lawm kuj yog yam uas yuav tshwm los dua thiab, yam uas ua tag los lawm kuj yog yam uas yuav ua dua thiab. Tsis muaj ib yam tshwm tshiab rau hauv lub qab hnub. Muaj ib yam twg uas luag hais tau tias, “Saib maj, no yog ib yam tshiab.”? Yam ntawd twb xub muaj ua ntej thaum ub uas tsis tau muaj peb. Tsis nco txog tej neeg thaum ub, thiab yuav tsis cim ntsoov tej neeg uas yuav tshwm los rau hauv cov neeg uas tshwm los yav tom qab. Kuv uas yog tub Laj Lim txeev ua vajntxwv hauv Yeluxalees kav cov Yixayee. Kuv siv kuv lub tswvyim rau siab nrhiav thiab tshuaj txhua yam uas ua hauv lub qab ntuj. Yam uas Vajtswv muab rau neeg ua yog yam uas nyuaj kawg. Kuv pom txhua yam uas lawv ua hauv lub qab hnub, saib maj txhua yam kuj qhuav qhawv haus cua xwb. Yam uas nkhaus muab ua tsis tau kom yiag, thiab yam uas tu ncua lawm muab suav kom txwm kuj tsis tau. Kuv xav hauv kuv lub siab tias, “Kuv tau tswvyim ntau heev, ntau dua lwm tus uas kav Yeluxalees ua kuv ntej. Kuv lub siab kuj kawm paub tswvyim thiab kev txawj ntse heev.” Kuv rau siab kawm paub tswvyim thiab paub txojkev ruam thiab kev tsis thoob tsib. Kuv xam pom tias tej no kuj tsuas yog haus cua xwb. Muaj tswvyim ntau kuj muaj kev txhawj xeeb ntau, thiab tus uas tsav kev paub ntau zuj zus kuj tsav kev nyuaj siab ntau. Kuv xav hais tias, “Cia kuv sim kev lomzem, cia li ua lomzem zoo siab mus.” Tiamsis saib maj, tej no kuj yog qhuav qhawv thiab xwb. Kuv hais txog qhov uas luag luag tias, “Yog ruam xwb,” thiab hais txog qhov uas ua lomzem tias, “Muaj qabhau dabtsi?” Kuv lub siab tshawb nrhiav saib ua li cas cawv txiv hmab thiaj ua rau kuv zoo siab, (yog kuv lub siab tseem siv tswvyim coj kuv), thiab saib yuav ua li cas tuav tau txojkev ruam, mus txog thaum kuv pom tias yam twg zoo rau tej neeg ua hauv lub qab ntuj rau tej sijhawm tsawg tsawg uas lawv muaj txojsia nyob. Kuv ua tes haujlwm loj heev, kuv ua tej tsev thiab cog tej vaj txiv hmab rau kuv. Kuv ua tej lub vaj thiab tej tshav puam uas nyob ua si, thiab cog txhua yam txiv ntoo rau hauv. Kuv ua tej pas dej rau kuv siv ntov dej rau tej txiv ntoo uas tabtom hlob. Kuv yuav tub qhe nkauj qhev thiab muaj tej qhev uas yug los hauv kuv tsev. Kuv muaj tej pab nyuj pab tshis pab yaj ntau kawg, coob dua tej neeg uas nyob ua kuv ntej hauv Yeluxalees. Kuv khaws nyiaj thiab kub cia thiab khaws tej nyiaj txiag ntawm tej vajntxwv thiab hauv lwm tebchaws cia. Kuv muaj tej tub ntxhais uas txawj hu nkauj, thiab muaj ntau tus niam yau uas ntxim txivneej lub siab. Kuv thiaj ua loj, ua loj dua txhua tus uas nyob ua kuv ntej hauv Yeluxalees. Thiab kuv lub tswvyim tseem nrog nraim kuv. Kuv lub qhov muag ntshaw dabtsi kuv yeej yuav kom tau, kuv tsis tswj kuv lub siab ntawm tej kev lomzem kiag li, rau qhov kuv lub siab ntsib tau kev zoo siab hauv tej haujlwm uas kuv ua, thiab tej no yog tej tshaj thawj ntawm kuv tes haujlwm. Mas kuv xav txog txhua yam uas kuv txhais tes tau ua thiab kuv tej kev khwv uas kuv siv siav siv zog ua, saib maj, txhua yam kuj qhuav qhawv haus cua xwb, thiab tsis tau qabhau dabtsi li hauv lub qab hnub. Mas kuv tshuaj saib tswvyim thiab txojkev ruam thiab kev tsis thoob tsib. Tus uas tshwm los ua vajntxwv qab yuav ua tau dabtsi? Nws kuj tsuas ua tau tej uas txeev ua tau los lawm xwb. Kuv pom tias tswvyim zoo dua txojkev tsis thoob tsib, ib yam li qhov kaj zoo dua li qhov tsaus ntuj. Tus uas muaj tswvyim muaj qhov muag hauv nws taubhau, tiamsis tus uas tsis thoob tsib taug txojkev tsaus ntuj. Txawm li ntawd los kuv pom tias lawv sawvdaws yuav raug lub khuab ib yam nkaus. Kuv thiaj xav hauv lub siab tias, “Cov neeg tsis thoob tsib raug lub khuab zoo li cas kuv kuj raug lub khuab ib yam li ntawd. Yog li ntawd kuv muaj tswvyim ntau kawg ua dabtsi?” Kuv thiaj xav tias tej tswvyim kuj qhuav qhawv xwb. Tsis muaj leejtwg nco txog tus uas muaj tswvyim thiab tus uas tsis thoob tsib ib yam nkaus mus li, vim tom hauv ntej mus yeej yuav tsis nco txog lawv sawvdaws li. Tus uas muaj tswvyim los kuj tuag ib yam nkaus li tus uas tsis thoob tsib tuag thiab xwb. Kuv thiaj ntxub txojsia, rau qhov tej haujlwm uas ua rau hauv lub qab hnub ua rau kuv nyuaj siab ntxhov siab, vim yog txhua yam tsuas yog qhuav qhawv haus cua xwb. Kuv ntxub tej haujlwm uas kuv siv siav siv zog ua huvsi hauv lub qab hnub, rau qhov kuv yeej yuav tsum tseg tej haujlwm ntawd cia rau tus uas tshwm los ua kuv qab. Mas leejtwg yuav paub tias tus uas tshwm los ntawd yuav ua neeg ntse los ruam? Txawm li cas los nws yeej yuav tau tej haujlwm huvsi uas kuv tau siv siav siv zog ua thiab siv kuv lub tswvyim ua hauv lub qab hnub. No kuj yog qhuav qhawv xwb. Kuv thiaj li rov poob siab tag kawg tswvyim rau tej haujlwm huvsi uas kuv siv siav siv zog ua hauv lub qab hnub, vim yog muaj tej tus uas siv tswvyim thiab kev txawj ntse thiab siv nws tus taw tes ua haujlwm khwv los kuj yuav tsum tso tej haujlwm ntawd tseg rau lwm tus uas tsis tau nqes dag nqes zog ua yuav. No kuj yog qhuav qhawv xwb thiab phem kawg li. Neeg tau dabtsi ntawm tej haujlwm huvsi uas lawv siv siav siv zog ua txhawj qas ntsuav rau hauv lub qab hnub? Vim tias lawv tsuas yog tiv mob tiv ntsaj tas niaj tas xyoo, thiab lawv tej haujlwm kuj ua rau lawv nyuaj siab ntxhov siab. Txawm yog ntuj teb tag hmo los lawv lub siab kuj tsis so. No kuj yog qhuav qhawv xwb. Neeg lub neej tsis muaj ib yam dabtsi zoo dua li qhov uas noj thiab haus thiab tau kev zoo siab ntawm tej haujlwm uas nws ua. Kuv pom tias tej no kuj yog los ntawm Vajtswv txhais tes los. Yog tsis muaj Vajtswv lawm leejtwg yuav noj tau thiab tau txojkev zoo siab? Rau qhov Vajtswv pub tswvyim thiab kev txawj ntse thiab kev zoo siab rau tus uas hum nws siab. Tiamsis tus uas ua txhaum muaj txim Vajtswv muab haujlwm rau nws ua, tsuas yog sau thiab khaws cia rau tus uas hum Vajtswv lub siab. No kuj yog qhuav qhawv thiab haus cua xwb. Muaj caij muaj nyoog rau txhua yam, muaj sijhawm rau txhua yam uas tshwm los hauv lub qab ntuj. Muaj caij yug thiab muaj caij tuag, muaj caij cog thiab caij dob yam uas cog. Muaj caij muab tua thiab muaj caij kho kom zoo, muaj caij rhuav thiab muaj caij tsim dua tshiab. Muaj caij quaj thiab muaj caij luag, muaj caij quaj ntsuag thiab muaj caij seev cev zoo siab. Muaj caij muab pob zeb laim pov tseg thiab muaj caij sau los ua ke, muaj caij sib puag thiab muaj caij tso tseg tsis puag. Muaj caij nrhiav thiab muaj caij ua kom ploj, muaj caij khaws cia thiab muaj caij tso pov tseg. Muaj caij muab dua, thiab muaj caij muab xaws, muaj caij nyob twjywm thiab muaj caij hais lus. Muaj caij hlub thiab muaj caij ntxub, muaj caij ua rog thiab muaj caij nyob tiaj tus. Tus uas ua haujlwm tau dabtsi ntawm nws tes haujlwm? Kuv pom tej haujlwm uas Vajtswv muab rau neeg ua. Vajtswv ua rau ib puas tsav yam zoo nkauj raws li nws lub caij lub nyoog. Nws muab qhov uas nyob mus ib txhis tsis kawg tso rau hauv neeg lub siab, tiamsis neeg tseem tsis txawj tshawb nrhiav tej uas Vajtswv ua thaum chiv keeb chiv thawj mus txog thaum kawg. Kuv paub lawm tias tsis muaj ib yam dabtsi zoo dua li qhov uas neeg kaj siab thiab xyiv fab tag lawv sim neej. Thiab paub tias qhov uas muaj noj muaj haus thiab tau kev zoo siab ntawm tej haujlwm huvsi uas ua, yog yam uas Vajtswv pub rau neeg. Kuv paub tias txhua yam uas Vajtswv ua nyob ruaj mus ib txhis, thiab muab ib yam dabtsi tsav ntxiv rau hauv kuj tsis tau, thiab muab ib yam dabtsi rho tawm mus kuj tsis tau. Vajtswv tau ua li ntawd kom neeg thiaj li hwm thiab paub ntshai nws. Yam uas nimno muaj kuj yog yam uas twb muaj tshwm los ua ntej lawm. Yam uas yuav muaj tshwm los kuj yog yam uas twb muaj tshwm los lawm. Thiab Vajtswv tshawb nrhiav yam uas twb dua tag lawm. Tsis tag li ntawd xwb, hauv lub qab hnub kuv tseem pom tias hauv lub chaw uas txiav txim ncaj tseem muaj kev ua phem, thiab hauv lub chaw uas ua ncaj ncees tseem muaj kev ua phem thiab. Kuv thiaj xav hauv kuv lub siab tias, “Vajtswv yuav txiav txim rau cov uas ncaj ncees thiab cov uas ua phem, rau qhov nws twb teem sijhawm rau txhua yam thiab rau txhua tes haujlwm lawm.” Hais txog neeg mas kuv xav hauv kuv lub siab tias, “Vajtswv tabtom sim lawv kom thiaj qhia lawv paub tias lawv tsuas yog tsiaj txhu xwb. Rau qhov neeg tej khuab thiab tsiaj txhu tej khuab kuj zoo ib yam nkaus. Ob co no puavleej txawj tuag ib yam nkaus. Ob co no yeej ua pa ib yam nkaus, thiab neeg tsis muaj ib yam dabtsi zoo dhau tej tsiaj txhu. Vim yog txhua yam qhuav qhawv xwb. Txhua tus puavleej mus rau tib lub chaw. Txhua tus puavleej yog tshwm ntawm hmoov av los thiab txhua tus yuav rov mus ua hmoov av. Leejtwg yuav paub tias neeg tus ntsuj plig mus rau saum ntuj thiab tsiaj txhu tus plig nqes mus rau hauv av los tsis mus?” Kuv thiaj pom tias tsis muaj ib yam dabtsi zoo dua qhov uas nws zoo siab rau tej haujlwm uas nws ua vim yog nws li ntiag. Leejtwg yuav qhia tau rau nws paub tias dabtsi yuav tshwm los ua nws qab? Thiab kuv pom tej kev tsim txom huvsi uas muaj hauv lub qab hnub. Mas saib maj, tej kua muag uas raug tsim txom, tsis muaj leejtwg nplij lawv lub siab. Hwjchim nyob ntawm cov uas tsim txom, tsis muaj leejtwg nplij cov uas raug tsim txom. Mas kuv xav tias cov uas tuag tag lawm muaj hmoo dua cov uas tseem muaj txojsia nyob. Tiamsis tus uas tsis tau yug los thiab tsis tau pom tej kev phem uas muaj hauv lub qab hnub kuj zoo dua ob co neeg no. Thiab kuv pom tias tej haujlwm huvsi uas neeg siv siav siv zog ua thiab qhov uas tes taw txawj ua txhua yam haujlwm yog los ntawm txojkev sib khib. No kuj yog qhuav qhawv thiab haus cua xwb. Tus neeg tsis thoob tsib nkaum tes nkoos, thiab noj nws cev nqaij. Ib taus tes kev siab tus tseem zoo dua ob taus tes puv nkaus tej haujlwm uas siv siav siv zog ua thiab haus cua. Kuv pom dua ib yam qhuav qhawv hauv lub qab hnub, yog qhov uas ib tug nyob tib leeg tsis muaj tub ki tsis muaj kwvtij, tiamsis nws siv siav siv zog ua haujlwm tsis so kiag li, thiab nws tej nyiaj txiag tsis txawj txaus nws lub qhov muag, nws tsis xav hais tias, “Kuv siv siav siv zog ua haujlwm thiab yoo kev lomzem rau leejtwg?” No kuj yog qhuav qhawv thiab yog kev nyuaj siab xwb. Ob leeg zoo dua ib leeg, rau qhov ob leeg yuav tau nqe zog zoo ntawm tej haujlwm uas ob tug ua. Rau qhov yog ib tug ntog yuav muaj ib tug tsa kom nws sawv. Tiamsis tus uas nyob tib leeg thaum nws ntog lawm tsis muaj leejtwg tsa nws sawv, yuav raug txom nyem lauj! Dua ib qho, yog ob leeg pw ua ke kuj sov. Tiamsis yog pw ib leeg yuav sov tau li cas? Txawm yog ib leeg ntaus yeej lwm tus, los ob leeg yeej yuav ntaus yeej xwb xwb li. Ib txoj hlua peb ntswg yeej tsis tu sai. Tus hluas pluag uas muaj tswvyim kuj zoo dua tus vajntxwv laus ruam uas cob qhia tsis tau lawm, nws tawm hauv tsev lojfaj los sawv ua vajntxwv lossis yug los ua neeg pluag hauv nws lub tebchaws kuj xij. Kuv pom tej neeg sawvdaws uas muaj txojsia nyob thiab mus mus los los hauv lub qab hnub raws tus hluas uas sawv nyob tug vajntxwv chaw. Tej neeg sawvdaws uas nws kav muaj coob suav tsis txheeb. Tiamsis cov uas yug los tom qab yuav tsis zoo siab rau nws. No yog qhuav qhawv thiab haus cua xwb. Koj yuav tsum ceev faj koj txhais kotaw rau thaum koj mus rau hauv Vajtswv lub tuam tsev. Txav ze tig ntsej mloog zoo dua cov uas tsis thoob tsib coj tsiaj tuaj xyeem, tiamsis lawv tsis paub tias lawv tabtom ua phem. Koj lub ncauj tsis txhob lam tau lam hais, tsis txhob ua lub siab sai mus cog lus rau ntawm Vajtswv xubntiag, rau qhov Vajtswv nyob saum ntuj kag, koj nyob hauv ntiajteb. Yog li no koj yuav tsum hais lus tsawg. Muaj kev txhawj ntau, kuj ua npau suav ntau, muaj tus uas tsis thoob tsib kuj muaj lus ntau. Thaum koj fiv li cas rau Vajtswv, koj tsis txhob cia ntev li pauj, rau qhov Vajtswv tsis txaus siab rau cov uas tsis thoob tsib. Koj cia li pauj raws li koj fiv. Qhov uas koj tsis txhob fiv kuj zoo dua li qhov uas koj fiv es tsis pauj. Tsis txhob cia koj lub qhov ncauj coj koj mus ua txhaum, thiab tsis txhob hais rau Vajtswv tus tub xa xov tias, “Kuv fiv yuam kev.” Ua cas yuav cia Vajtswv chim rau tej lus uas koj hais thiab rhuav tshem tej uas koj txhais tes ua? Thaum ua npau suav ntau kuj hais tej lus qhuav qhawv ntau. Tiamsis koj cia li hwm thiab paub ntshai Vajtswv. Yog koj pom tus pluag hauv lub moos twg raug tsim txom thiab pom qhov uas luag txiav txim tsis ncaj qhau nws txojcai, koj tsis txhob xav tsis thoob rau qhov no. Tseem muaj ib tug nom tswv qeb siab kav tus nom tswv ntawd, thiab tseem tshuav cov nom tswv qeb siab dua kav cov nom tswv ntawd. Txawm yog li ntawd los lawv cov ntawd tseem tau tshaj thawj hauv lub tebchaws, thiab tej liaj teb yuav tsum muaj vajntxwv kav. Tus uas nyiam nyiaj muaj npaum twg yeej tsis txaus nws lub siab, tus uas nyiam nyiaj txiag kuj tsis txaus siab rau tej uas tau lawm. No kuj yog qhuav qhawv xwb. Thaum muaj qhov txhia chaw ntau zuj zus, cov uas noj kuj coob zuj zus. Tej qhov txhia chaw ntawd tus tswv tau dabtsi, tsuas yog nws qhov muag pom ib pliag xwb? Tej tub zog tau noj ntau thiab tsawg los kuj pw tsaug zog zoo, siab tus yees, tiamsis qhov uas tus nplua nuj muaj nplua mias kuj tsis ua rau nws tsaug zog zoo. Hauv qab lub hnub kuv pom ib yam phem uas tsis zoo kuv lub siab, yog qhov uas tej nyiaj txiag uas tus tswv khaws cia tseem rov ua phem rau nws. Tej nyiaj txiag ntawd ploj tag rau qhov uas nqes peev rau yam uas tsis zoo. Nws muaj tus tub tiamsis tsis muaj ib yam dabtsi hauv nws txhais tes pub rau nws tus tub. Nws yug hauv niam lub plab los liab qab li cas, nws yeej yuav rov qab mus liab qab li ntawd, thiab nws yuav coj tsis tau ib yam dabtsi uas nws khwv tau hauv nws txhais tes mus. No kuj yog ib yam phem uas tsis zoo kuv siab, yog qhov uas nws yug los zoo li cas nws yuav rov mus ib yam li ntawd. Nws tau qabhau dabtsi, qhov uas nws siv siav siv zog thiaj tau cua xwb? Nws noj nyob hauv qhov tsaus ntuj tag nws sim neej, nws muaj kev nyuaj siab kawg, muaj mob muaj nkeeg thiab muaj kev chim. Saib maj, qhov uas kuv pom zoo thiab tsim nyog yog qhov uas noj thiab haus thiab tau kev zoo siab ntawm tej haujlwm huvsi uas yus siv siav siv zog ua hauv lub qab hnub, rau tej sijhawm tsawg tsawg uas yus muaj txojsia nyob uas Vajtswv pub rau yus, vim tej no yog nws li ntiag. Qhov uas txhua tus uas Vajtswv pub nyiaj txiag thiab qhov txhia chaw thiab pub kom nws zoo siab rau tej ntawd, thiab qhov uas lees yuav nws li ntiag tug thiab zoo siab rau tej haujlwm uas nws ua, no yog Vajtswv pub ntag. Nws thiaj tsis tshua txhawj txog lub caij lub nyoog uas nws muaj txojsia nyob, rau qhov Vajtswv pub kom nws lub siab tsuas xav txog qhov uas zoo siab xyiv fab. Kuv pom muaj ib yam phem nyob hauv lub qab hnub, yam ntawd hnyav kawg rau neeg, yog tus neeg uas Vajtswv muab nyiaj txiag, qhov txhia chaw thiab meej mom pub rau nws thiaj tau txhua yam uas nws ntshaw tsis tu ncua ib yam kiag li, tiamsis Vajtswv tsis pub nws tau siv tej ntawd, tiamsis luag lwm tus yuav tau siv. No kuj yog qhuav qhawv, yog kev nyuaj siab loj kawg. Txawm yog leejtwg muaj ib puas tus menyuam thiab nyob ntau xyoo, nws lub caij lub nyoog uas nws muaj txojsia nyob ntev, tiamsis nws tsis muaj kev zoo siab ntawm tej yam uas zoo thiab nws tuag tsis muaj ntees, los kuv hais tias tus menyuam uas nchuav lawm tseem zoo dua tus ntawd. Rau qhov tus menyuam ntawd yug los qhuav qhawv thiab tuag rau hauv qhov tsaus ntuj, thiab nws lub npe yeej muab npog rau hauv qhov tsaus ntuj lawm, thiab yeej tsis tau pom lub hnub thiab tseem tsis tau paub ib yam dabtsi li. Tus menyuam no tau so siab tus yees ntau dua tus ntawd. Txawm yog nws ua neej nyob ib txhiab xyoo thiab tseem ntxiv ib npaug rau los tsis tau ib yam dabtsi uas zoo. Txhua tus tsis yog nqes mus rau hauv tib qhov chaw lov? Neeg tej haujlwm huvsi puavleej yog ua rau lub qhov ncauj xwb, txawm yog li ntawd los lawv tsis txawj tsau li. Tus uas muaj tswvyim tau dabtsi zoo dua tus uas tsis thoob tsib? Tus pluag uas paub xyaum zoo rau ntawm cov uas muaj txojsia nyob xubntiag tau dabtsi thiab? Pom ntawm lub qhov muag zoo dua li uas pheej ntshaw thiab mus nrhiav. No kuj yog qhuav qhawv thiab haus cua xwb. Yam uas muaj nimno kuj yog yam uas teem cia lawm, thiab kuj paub tias neeg yog dabtsi thiab lawv kuj tsis txawj nrog tus uas muaj hwjchim loj dua lawv sib cam. Yim hais ntau kuj yimhuab qhuav qhawv ntau, mas yuav muaj qabhau dabtsi rau neeg? Thaum neeg tseem muaj txojsia nyob lub caij lub nyoog tsawg tsawg uas qhuav qhawv thiab dhau plaws yam li tus duab, leejtwg paub tias yam twg zoo rau neeg? Leejtwg hais tau rau neeg tias yam twg yuav tshwm los tom qab nws hauv lub qab hnub? Lub koob meej zoo mas zoo dua tej roj tsw qab uas muaj nqes. Hnub uas tuag zoo dua hnub uas yug. Mus rau hauv lub tsev uas quaj ntsuag zoo dua mus rau hauv lub tsev noj nqaij noj hno, vim tias qhov no yog qhov kawg rau neeg txhua tus huvsi, mas cov uas tseem ua neej nyob yuav khaws tej no rau hauv lub siab. Nyob mluas mlob zoo dua li luag luag, vim tias lub ntsej muag mluas mlob ua rau lub siab xyiv fab. Tus uas muaj tswvyim lub siab yeej nyob hauv lub tsev uas quaj ntsuag, tus uas tsis thoob tsib lub siab yeej nyob hauv lub tsev uas ua lomzem. Mloog tus muaj tswvyim lo lus qhuab ntuas zoo dua mloog tus ruam hu nkauj. Hlawv tej pos tawg hauv qab laujkaub li cas, tus ruam lub suab luag kuj ib yam li ntawd. No kuj yog qhuav qhawv xwb. Kev quab yuam tsim txom ua rau tus uas muaj tswvyim ruam lawm. Tej nyiaj xiab ua rau lub siab ntxeev phem tag lawm. Qhov uas xaus zoo dua li qhov uas pib. Ua lub siab ntev zoo dua li lub siab khav theeb. Tsis txhob chim sai, tsuas yog tus tsis thoob tsib thiaj khaws qhov chim rau hauv lub siab mus li. Tsis txhob nug tias, “Ua cas yav thaum ub zoo dua li nimno?” Qhov uas nug li ntawd yog tsis muaj tswvyim thiaj nug. Tswvyim zoo yam nkaus li tej qub txeeg qub teg thiab muaj qabhau rau tus uas pom lub hnub. Tswvyim tiv thaiv tau ib yam li nyiaj txiag tiv thaiv. Kev txawj ntse tus nqe yog qhov uas tswvyim tuav tau tus uas txawj ntse txojsia. Cia li tshuaj saib Vajtswv tes haujlwm. Yam uas Vajtswv ua nkhaus lawd leejtwg yuav muab yeb kom yiag tau? Thaum muaj kev vam meej cia li zoo siab xyiv fab, thaum muaj kev txom nyem, cia li ua tib zoo xav. Ob yam no puavleej yog Vajtswv ua, neeg thiaj tsis txawj paub tias yuav muaj dabtsi tshwm los rau yav tom qab uas dua lawv. Thaum kuv ua neej nyob qhuav qhawv kuv tau pom txhua yam. Muaj cov ncaj ncees, txawm yog nws ua ncaj ncees los nws tseem tuag, thiab muaj cov neeg phem, txawm yog nws ua phem los nws ho muaj txojsia nyob ntev. Tsis txhob ua neeg ncaj dhau, thiab tsis txhob ua tus ntse dhau. Ua cas koj yuav ua rau koj puam tsuaj? Tsis txhob ua phem ntau dhau, thiab tsis txhob ua neeg ruam. Ua cas koj yuav tuag ua ntej uas tsis tau txog koj caij? Qhov uas zoo yog qhov uas koj tuav rawv yam no cia, thiab tsis txhob nkaum tes kom plam yam tod. Tus uas hwm thiab paub ntshai Vajtswv yuav zam dhau txhua yam ntawd. Tswvyim pub zog rau tus uas txawj ntse ntau dua li kaum leej uas kav lub nroog. Yeej tsis muaj ib tug ncaj ncees hauv lub ntiajteb uas ua qhov zoo xwb xwb li tsis ua txhaum kiag li. Tsis txhob quav ntsej mloog txhua lo lus uas luag hais, tsam ces koj ho tau hnov koj tus tub qhe foom cem koj, rau qhov koj lub siab yeej paub tias muaj ntau zaus koj tau foom cem lwm tus ib yam nkaus. Kuv twb siv kuv lub tswvyim sim tej no lawm. Kuv hais tias, “Kuv yuav tau tswvyim,” tiamsis tswvyim nyob deb kuv. Tej uas muaj lawm kuj nyob deb heev, tej uas tob kuj nyob tob dhau. Leejtwg yuav tshawb tau tawm los? Kuv thiaj tig kuv lub siab los kawm paub thiab tshawb nrhiav tswvyim thiab txhua yam lub keeb, thiab kawm paub tias txojkev ua phem yog txojkev tsis thoob tsib thiab txojkev tsis thoob tsib yog txojkev ruam. Kuv ntsib dua ib yam uas lwj siab heev dhau txojkev tuag, yog tus pojniam uas lub siab zoo li lub qhov taub thiab rooj hlua cuab, nws txhais tes yog txoj saw hlau. Tus uas ua hum Vajtswv lub siab thiaj dim ntawm tus pojniam ntawd, tiamsis tus uas ua txhaum muaj txim yuav raug nws ntes. Tub Laj Lim hais tias, “Saib maj, kuv ntsib zoo li no, yog kuv muab ib zaj los txuas rau ib zaj xwv thiaj nrhiav tau lub keeb, yog yam uas kuv lub siab nrhiav tag los nrhiav thiab tiamsis kuv nrhiav tsis tau. Ib txhiab leej neeg tsuas nrhiav tau ib tug txivneej zoo xwb, tiamsis twb nrhiav tsis tau ib tug pojniam zoo. Saib maj, kuv tsuas ntsib yam no xwb, yog qhov uas Vajtswv tsim neeg kom ua ncaj ncees, tiamsis lawv nrhiav kev ua phem xwb.” Leejtwg yuav zoo cuag li tus uas muaj tswvyim? Leejtwg yuav paub txhua yam lub ntsiab? Neeg lub tswvyim ua rau nws lub ntsej muag ci luag ntxhi, thiab ua rau nws lub plhu uas tuab hloov dua tshiab. Cia li ua raws li vajntxwv hais, vim yog tej lus tseem ceeb uas koj tau cog lus tseg lawm. Tsis txhob maj tawm ntawm vajntxwv lub xubntiag. Thaum muaj xwm txheej tsis zoo, tsis txhob tawv ncauj, rau qhov vajntxwv yeej ua txhua yam raws li nws lub siab nyiam. Vajntxwv tej lus muaj hwjchim, mas leejtwg yuav nug tau vajntxwv tias, “Koj ua dabtsi li no?” Tus uas ua raws li vajntxwv hais yuav tsis raug ceeblaj, thiab tus uas muaj tswvyim lub siab yuav paub lub caij thiab paub kev ua haujlwm. Txawm yog neeg txojkev ceeblaj ua lub nra hnyav rau lawv, los txhua yam nyias muaj nyias caij thiab nyias muaj nyias kev ua haujlwm. Rau qhov lawv tsis paub tias dabtsi yuav tshwm los, thiab leejtwg yuav hais rau lawv tias yam ntawd yuav tshwm los li cas? Tsis muaj leejtwg yuav tav tau nws tus ntsuj plig, lossis muaj hwjchim kav hnub uas tuag. Nyob hauv tshav rog tsis pub leejtwg tawm tub rog. Txojkev ua phem yeej tsis tso tus uas raug muab cob rau hauv txojkev phem lawm. Txhua yam no kuv twb pom rau thaum kuv tabtom kub siab lug rau txhua yam uas neeg ua hauv lub qab hnub, yog qhov uas ib tug muaj hwjchim kav ib tug, ua rau nws raug txom nyem. Kuv pom lawv log cov neeg phem uas txeev mus los ntawm lub chaw dawb huv, thiab luag qhuas lawv rau hauv lub moos uas cov neeg phem ntawd ua phem ntag. No yog qhuav qhawv xwb. Vim tias qhov uas txiav txim rau tej kev phem luag tsis txiav txim sai sai, mas tej neeg lub siab thiaj li huas qas ntshis mus ua phem. Txawm yog cov neeg muaj txim ua phem ib puas zaus thiab lawv tseem muaj txojsia nyob, los kuv yeej paub tias cov uas hwm thiab paub ntshai Vajtswv yuav tau zoo vim lawv paub ntshai rau ntawm nws lub xubntiag. Tiamsis tus neeg phem yuav tsis tau zoo, nws lub hnub nyoog zoo yam nkaus li tus duab yuav tsis nyob ntev, rau qhov nws tsis paub ntshai rau ntawm Vajtswv lub xubntiag. Tseem tshuav ib yam qhuav qhawv uas ua hauv lub ntiajteb, yog qhov uas muaj cov ncaj ncees saws cov tsis ncaj lub khuab, thiab muaj cov neeg phem saws cov uas ncaj ncees lub khuab. Kuv hais tias qhov no kuj yog qhuav qhawv xwb. Kuv pom zoo cia nrhiav kev zoo siab xyiv fab rau hauv peb lub neej, rau qhov hauv lub qab hnub neeg tsis muaj ib yam dabtsi zoo dua qhov uas noj haus thiab muaj kev zoo siab xyiv fab. Vim tias qhov uas zoo siab xyiv fab yuav nrog nraim nws hauv nws tej haujlwm tag nws sim neej uas Vajtswv pub rau nws hauv lub qab hnub. Thaum kuv kub siab lug xav paub txog tswvyim thiab tej haujlwm uas ua hauv lub ntiajteb, thiab qhov uas lawv nyiaj dab ntub tag hnub tag hmo, kuv thiaj pom Vajtswv tes haujlwm huvsi, thiab pom tias neeg tsis nkag siab rau tej haujlwm uas ua rau hauv lub qab hnub. Neeg siv zog tshawb nrhiav npaum li cas, kuj nrhiav tsis tau. Txawm yog tus uas muaj tswvyim xav tias nws nkag siab, los nws kuj nrhiav tsis tau. Kuv khaws tej no huvsi rau hauv lub siab coj los tshuaj saib. Tus uas ncaj ncees thiab tus uas muaj tswvyim thiab lawv tej haujlwm huvsi kuj nyob hauv Vajtswv txhais tes. Txawm yog ntxim hlub lossis ntxim ntxub kuj xij, neeg yeej tsis paub, txhua yam kuj nyob tom lawv hauv ntej. Ib lub khuab poob rau sawvdaws ib yam nkaus, poob rau cov uas ncaj ncees thiab cov uas tsis ncaj, poob rau cov uas zoo thiab cov uas phem, poob rau cov uas dawb huv thiab cov uas qias, poob rau cov muab tsiaj xyeem thiab cov uas tsis xyeem. Poob rau cov neeg zoo li cas, kuj poob rau cov neeg muaj txim li ntawd, poob rau cov uas cog lus twv li cas, kuj poob rau cov uas tsis cog lus twv li ntawd. Txhua yam uas tshwm los hauv lub qab hnub mas no yog ib yam phem, yog qhov uas ib lub khuab poob rau saum sawvdaws. Neeg lub siab kuj puv nkaus kev phem, thiab thaum lawv tseem muaj txojsia nyob txojkev ruam nyob hauv lawv lub siab. Dhau ntawd lawv kuj mus nyob hauv tub tuag teb. Tiamsis tus uas nrog nraim cov uas muaj txojsia ua ke kuj muaj lub siab vam, vim tias tus dev uas ciaj tseem zoo dua li tus tsov ntxhuav uas tuag lawm. Cov uas tseem ciaj yeej paub tias lawv yuav tuag, tiamsis cov uas tuag lawm tsis paub dabtsi li lawm, thiab lawv yuav tsis tau nqe zog dua li lawm, yuav tsis muaj leejtwg nco txog lawv. Qhov uas nws hlub thiab ntxub thiab khib twb ploj tag lawm, thiab tej uas ua hauv lub qab hnub lawv tsis muaj feem koom ua ke dua li lawm. Cia li mus, mus noj koj tej zaub mov zoo siab xyiv fab, thiab mus haus koj tej cawv txiv hmab ua zoo siab hlo, vim tias Vajtswv yeej txaus siab rau tej uas koj ua ntawd. Cia koj tej tsoos tsho dawb paug huvsi txhua lub sijhawm, thiab muab roj ntaus plaubhau tsis tu ncua. Koj cia li zoo siab xyiv fab rau koj tus pojniam uas koj hlub mus tag koj sib neej qhuav qhawv uas Vajtswv pub rau koj hauv lub qab hnub, vim tias tej no yog koj li feem hauv koj lub neej thiab hauv tej haujlwm uas koj siv dag siv zog ua hauv lub qab hnub. Koj txhais tes ua yam haujlwm dabtsi koj cia li ua yam haujlwm ntawd kawg koj lub dag lub zog, rau qhov hauv tub tuag teb uas koj yuav mus ntawd tsis muaj haujlwm thiab tsis muaj kev xav, tsis muaj kev txawj ntse thiab tsis muaj tswvyim. Kuv pom dua ib yam hauv lub qab hnub, qhov uas sib tw dhia yeej tsis nyob ntawm tus uas nrawm, qhov uas kov yeej kev ua rog tsis nyob ntawm tus uas muaj zog, qhov uas muaj noj tsis nyob ntawm tus uas muaj tswvyim, qhov uas nplua nuj tsis nyob ntawm tus uas thoob tsib to nrog, qhov uas tau meej mom tsis nyob ntawm tus uas txawj ntse. Tiamsis txhua tus yuav tau raws li q2 nws txoj hmoov phem lossis hmoov zoo thiab raws li nws lub caij lub nyoog. Rau qhov neeg yeej tsis paub nws lub caij lub nyoog. Ntses mag lub vas thiab noog mag tsig li cas, mas neeg kuj mag ib yam li ntawd rau thaum lub caij lub nyoog phem los raug kiag lawv tamsid. Kuv pom lub tswvyim no hauv lub qab hnub mas kuv xam pom tias yog yam loj kawg. Muaj ib lub moos me me uas muaj neeg nyob tsawg tsawg. Mas muaj ib tug vajntxwv loj tuaj ntaus thiab vij lub moos ntawd, nws tib chaw ruaj khov vij ntaus lub moos ntawd. Tiamsis hauv lub moos ntawd muaj ib tug pluag pluag uas muaj tswvyim, mas tus yawg ntawd siv nws lub tswvyim cawm tau lub moos ntawd. Txawm yog li ntawd los tsis muaj ib tug nco txog tus yawg pluag no li. Mas kuv thiaj hais tias tswvyim zoo dua lub zog loj, txawm yog luag saib tsis taus tus pluag ntawd lub tswvyim thiab tsis quav ntsej nws tej lus kuj xij. Tus muaj tswvyim tej lus uas yus hnov hais twjywm, mas zoo dua tus thawj hais lus nrov nrov rau cov neeg ruam mloog. Tswvyim zoo dua tej cuab yeej ua rog, tiamsis ib tug neeg txhaum muaj txim ua rau ntau yam kev zoo piam tag. Yoov tuag ua rau tej roj tsw qab tsw ntxhiab lawm, txojkev ruam mentsis xwb hnyav dua lub tswvyim thiab lub koob meej. Tus uas muaj tswvyim lub siab coj nws mus rau sab xis, tiamsis tus ruam lub siab coj nws mus rau sab laug. Thaum tus neeg ruam taug kev, nws yeej tsis paub qabhau, nws tus cujpwm ua rau sawvdaws pom tias nws yog tus ruam. Yog tus thawj npau taws rau koj, koj tsis txhob tawm ntawm koj lub chaw mus, vim qhov uas ua siab ntev yuav ua rau nws zam txim tau. Muaj ib yam phem uas kuv pom hauv lub qab hnub, yog tej kev txhaum uas tus thawj ua. Tsa tus ruam nyob lub rooj siab, qhau tus nplua nuj nyob lub rooj qes. Kuv pom tej qhev caij nees, thiab pom tej thawj mus kotaw yam li tej qhev. Leejtwg khawb qhov cia, nws yuav poob rau hauv qhov ntawd, leejtwg tho phab ntsa nkag rau hauv, nab yuav tom nws. Leejtwg txam pob zeb, pob zeb yuav raug tus ntawd mob, leejtwg phua ntoo, ntoo yuav ua rau nws raug ceeblaj. Yog taus npub lawm, tsis muab hov kom ntse, yus yuav tsum siv zog heev dua, tiamsis tswvyim yuav pab ua tau kom tiav. Yog nab tom ua ntej uas tsis tau muab cob kom seej, tus uas cob nab tsis muaj qabhau dabtsi. Tus uas muaj tswvyim lub qhov ncauj tej lus ua kom nws tau koob hmoov, tus uas ruam tus nplaig yuav rov ua rau nws puam tsuaj. Nws pib hais tej lus tsis thoob tsib tawm hauv lub qhov ncauj los, mas thaum kawg yuav hais tej lus uas ruam phem kawg li. Tus ruam ncauj ntau hais tsis txawj tag li. Neeg tsis paub tias yuav tshwm xwm dabtsi los. Leejtwg yuav hais tau tias thaum dua nws lawm yuav muaj dabtsi tshwm los? Tus ruam tej haujlwm ua rau nws txog siav, nws tsis paub txojkev uas nkag mus rau hauv lub nroog. Lub tebchaws 'e, koj yuav raug txom nyem rau thaum koj tus vajntxwv yog menyuam yaus, thiab koj cov thawj pam noj pam haus ua lomzem rau thaum tagkis. Lub tebchaws 'e, koj yuav tau hmoov zoo rau thaum koj tus vajntxwv yog keeb vaj, thiab koj cov thawj noj haus raws sijhawm xwv thiaj muaj zog tsis yog qaug dej qaug cawv. Vim yog tub nkeeg ru tsev thiaj lov pob tag, thiab vim yog tub nkeeg puag tes puag taw, lub tsev thiaj xau qas ntsuav. Zaub mov ua rau muaj kev lomzem zoo siab, cawv txiv hmab ua rau lub neej xyiv fab, nyiaj txiag ua rau muaj txhua yam. Tsis txhob cem foom vajntxwv, txawm yog hauv koj lub siab los tsis txhob cem, thiab tsis txhob cem foom cov nplua nuj hauv koj lub txaj pw, tsam ces ib tug noog saum nruab ntug ho coj koj tej lus mus, lossis tus uas muaj kooj tis yuav piav koj zaj. Cia li muab koj lub ncuav pov rau hauv dej, rau qhov dhau ntau hnub koj yuav rov pom thiab. Cia li muab nyiaj txiag qhov txhia chaw faib rau xya qhov lossis yim qhov kuj tau, rau qhov koj tsis paub tias yuav muaj yam phem twg tshwm los rau hauv ntiajteb. Yog cov huab muaj nag puv nkaus, kuj yuav tso los rau hauv ntiajteb, yog ntoo vau rau sab ped los sab nrad, yog vau rau qhovtwg yeej yuav nyob qhov ntawd. Tus uas tshuaj saib tej cua nws yuav tsis tseb noob, tus uas saib tej huab nws yuav tsis sau qoob. Koj tsis paub tias cua ntsawj mus rau qhovtwg, thiab tsis paub tias tus ntsuj plig los rau hauv tej pob txha uas nyob hauv lub plab menyuam tau li cas, mas koj kuj tsis paub txog Vajtswv uas tsim txhua yam huvsi tes haujlwm. Thaum tagkis cia li tseb koj tej noob, thiab thaum tsaus ntuj tsis txhob nkaum tes, rau qhov koj tsis paub tias yam twg yuav vam meej, yog yam no los yam tod, lossis ob yam puavleej yuav vam meej ib yam nkaus. Qhov kaj yog qhov uas zoo siab, thiab qhov uas lub qhov muag pom lub hnub yog qhov uas zoo siab xyiv fab. Yog leejtwg muaj txojsia nyob ntau xyoo, cia nws zoo siab xyiv fab rau txhua xyoo ntawd huvsi. Tiamsis cia nws nco txog tias qhov tsaus ntuj yuav nyob mus ntau hnub. Txhua yam uas yuav tshwm los kuj yog qhuav qhawv xwb. Tus hluas 'e, koj cia li zoo siab rau thaum koj tseem hluas, thiab cia koj lub siab ua rau koj xyiv fab rau thaum koj tseem hluas. Koj cia li ua koj lub neej raws li koj lub siab ntshaw thiab raws li koj lub qhov muag pom zoo. Tiamsis cia li paub tias vim yog txhua yam uas koj ua no Vajtswv yuav txiav txim rau koj. Cia li muab txojkev txhawj xeeb txiav tu nrho hauv koj lub siab, thiab rho tej kev mob hauv koj lub cev mus, vim qhov uas hluas thiab pib nto hluas ntawd kuj yog qhuav qhawv xwb. Thaum koj tseem hluas koj cia li nco txog tus uas tsim koj ua ntej uas kev txom nyem nyuaj siab tsis tau los txog, thiab lub niaj lub xyoo tsis tau los txog uas koj yuav hais tias, “Kuv tsis muaj kev zoo siab xyiv fab rau lub niaj lub xyoo ntawd li,” yog ua ntej uas lub hnub thiab kev kaj thiab lub hli thiab tej hnub qub tsis tau tsaus, yog thaum nag los lawm los huab tseem tsaus nti, thiab cov faj xwm uas zov tsev tshee, thiab cov uas muaj zog khoov khoov, thiab cov uas zom zeb tsis tau tso tseg vim yog tshuav neeg tsawg, thiab cov uas xauj ntawm qhov rais tsis tshua pom kev lawm, thiab thaum tej qhov rooj uas tawm rau ntawm txojkev kaw tag, thiab lub suab zom zeb ntsiag to, thiab suab nag suab noog ua rau neeg tsim dheev thiab suab nkauj kuj ntsiag zuj zus, thiab lawv ntshai nyob saum tej chaw siab, thiab muaj tej uas ntshai kawg nyob tom tej kev. Yog thaum tej txiv daw tawg paj thiab kooj ntsuab txav zuj zuav thiab txojkev ntshaw kuj ploj tag lawm, vim yog neeg tabtom mus rau lub chaw uas nws nyob mus ib txhiab ib txhis, thiab cov uas quaj ntsuag mus mus los los hauv tej kev. Yog ua ntej uas saw nyiaj tsis tau tu, thiab lub phaj kub tsis tau tawg thiab lub hub dej tsis tau tawg rau ntawm qhov dej txhawv, thiab lub log uas kiv ntaus dej tsis tau lov, thiab ua ntej uas hmoov av rov mus ua av li qub thiab ntsuj plig rov mus cuag Vajtswv uas pub nws tuaj. Tub Laj Lim hais tias, “Qhuav qhawv, qhuav qhawv, txhua yam qhuav qhawv xwb.” Tsis yog tub Laj Lim muaj tswvyim xwb, nws tseem qhia kev txawj ntse rau cov pejxeem thiab nws tshuaj saib thiab tshawb nrhiav thiab muab tej paj lug tib ua ib qeb zuj zus. Xibhwb ua tib zoo nrhiav tej lus uas zoo mloog, thiab nws sau tej lus tseeb ncaj nraim. Cov neeg muaj tswvyim tej lus zoo yam nkaus li tus hmuv uas ntse zuag plias. Tej lus uas ib tug yug yaj hais tau muab sau zog cia ua ke lawm, zoo yam nkaus li tej ntsia hlau uas muab ntsia ruaj khov. Kuv tus tub, cia li ceev faj tej lus uas hais ntxiv rau cov lus no. Qhov uas sau ua ntawv ntau yuav muaj tsis txawj kawg li, thiab kawm ntau kuj ua kom txog siav. Zaj no twb xaus lawm, twb hnov huvsi lawm. Cia li hwm thiab paub ntshai Vajtswv thiab tuav rawv nws tej lus nkaw, vim qhov no yog txhua yam uas neeg yuav tsum ua. Vajtswv yuav muab txhua yam haujlwm thiab tej uas ua nraim nkoos los txiav txim tsis hais zoo lossis phem. Xalaumoo tej nkauj uas zoo tshaj plaws. Kuv xav kom nws nwj kuv, nwj kiag ntawm nws lub qhov ncauj. Rau qhov koj txojkev hlub zoo dua li cawv txiv hmab. Koj cov roj pleev tsw qab ntxiag, koj lub moo nto lug yam nkaus li hwj roj tsw qab uas muab hliv nthwv. Vim li no tej hluas nkauj thiaj nyiam koj. Thov coj kuv mus, cia wb maj nroos mus. Kuv tus vajntxwv kuj coj kuv mus rau hauv nws lub txaj pw. Peb yuav zoo siab xyiv fab kawg rau koj. Peb yuav qhuas koj txojkev hlub heev dua li cawv txiv hmab. Qhov uas tej hluas nkauj nyiam koj yeej yog txaus nyiam lawm. Yeluxalees tej ntxhais 'e, kuv mas yog tawv dub tiamsis zoo nkauj, kuv dub yam li cov Kheda lub tsev ntaub, zoo nkauj yam li Xalaumoo tej ntaub tsuj ntaub npuag. Tsis txhob saib tsis taus kuv rau qhov kuv dub doog vim yog tshav ntuj ziab kuv. Kuv niam cov tub chim rau kuv, lawv txib kuv kom tu tej vaj txiv hmab, tiamsis kuv lub vaj mas kuv tsis tu li. Tus uas kuv lub siab nyiam, thov qhia rau kuv tias koj coj pab yaj mus yug rau qhovtwg, thaum tav su koj coj pab yaj mus pw so rau qhovtwg? Ua li cas kuv yuav tsum muab ntaub npog ntsej muag mus nrhiav hauv koj tej phoojywg pab yaj? Au tus uas zoo nkauj tshaj plaws tej pojniam huvsi, koj tsis paub mas koj cia li taug tej neev yaj thiab coj koj tej menyuam tshis mus yug ze cov uas yug yaj tej tsev pheeb suab. Tus uas kuv nyiam, kuv muab koj piv zoo yam nkaus li tus maum nees uas hai Falau lub tsheb. Koj ob sab plhu zoo nkauj phim nyog dai tej saws nyiaj, koj lub caj dab zoo nkauj phim nyog tej hlaws ci. Peb yuav ua tej saw kub uas lo npauj nyiag rau koj coj. Thaum vajntxwv zaum ntawm lub rooj, kuv tej roj tsw qab kuj tsw mus thoob plaws. Tus uas kuv ntxim siab yog kuv hwj roj tsw qab uas nyob ntawm kuv ob lub mis. Tus uas kuv ntxim siab yog kuv rev paj ntoo tsw qab uas tawg hauv lub vaj txiv hmab Eekedi. Tus uas kuv nyiam, ua cas koj zoo nkauj ua luaj? Koj zoo nkauj kawg, koj ob lub qhov muag zoo tam tus nquab taug. Tus uas kuv ntxim siab, ua cas koj zoo nraug ua luaj? Koj ua rau kuv zoo siab tiag tiag li. Wb ob leeg lub chaw pw ntsuab tsaus nti, wb ob leeg lub tsev tej dau yog ntoo ciab, tej qhab yog ntoo thuv. Kuv yog ib lub nyuag paj sua hauv nras tiaj Saloo thiab yog ib lub nyuag paj lilij ntawm hav dej. Lub paj lilij hauv thaj pos zoo nkauj li cas, tus uas kuv nyiam kuj zoo ib yam li ntawd hauv nruab nrab ib tsoom hluas nkauj. Tsob txiv duaj nyob hauv nruab nrab tej hav zoov zoo li cas, tus uas ntxim kuv siab zoo ib yam li ntawd hauv nruab nrab ib tsoom hluas nraug. Kuv zoo siab kawg nyob hauv nws tus qab duab ntxoov ntxoo, thiab nws tej txiv kuv tau sim noj mas qab zib. Nws coj kuv mus rau hauv lub chaw uas noj haus, nws tus chij uas dai saum kuv yog txojkev hlub. Thov muab txiv hmab qhuav rau kuv noj txhawb kuv lub zog thiab muab txiv duaj rau kuv noj kom kuv sov siab vim yog kuv nyiam nws qhuav siab qhawv. Thov cia nws txhais tes laug rau kuv ncoo, thiab nws txhais tes xis puag kuv. Yeluxalees tej ntxhais 'e, thov nej twv rau tej kauv seb thiab tej xyuas muas lwj hais tias nej yuav tsis tshum tsis tsa kom wb txojkev sib hlub tsim ras mus txog thaum txaus siab tso. No ne yog tus uas kuv ntxim siab lub suab. Saib maj, nws tuaj lawm, nws dhia caw qia ntsos pem roob tuaj, nws caws qia hla saum tej pov roob tuaj. Tus uas kuv ntxim siab zoo yam nkaus li tus kauv seb, lossis yam li tus thav muas lwj. Saib maj, nws sawv ntsug sab nraum peb phab ntsa tsev, nws xauj ntawm qhov rais tuaj, nws xauj hauv tej kem tab hlau. Tus uas kuv ntxim siab tsa ncauj hais rau kuv tias, Tus uas kuv nyiam 'e, koj cia li sawv tsees, kuv tus zoo nkauj 'e, cia li tuaj. Vim tias ntuj no kuj dhau lawm, thiab nag kuj tu lawm. Tej paj ntoo tabtom tawg saum lub ntiajteb, lub caij hu nkauj los txog lawm, thiab hnov nquab taug lub suab quaj thoob peb lub tebchaws. Tej txiv cev tabtom txi txiv, thiab tej txiv hmab kuj tawg paj, tsw qab zib ntxiag. Tus uas kuv nyiam 'e, koj cia li sawv tsees, kuv tus zoo nkauj 'e, cia li tuaj. Kuv tus poj nquab 'e, uas nyob hauv kem zeb, uas nkaum hauv kem tsua, thov cia kuv pom koj ntsej muag thiab hnov koj lub suab, vim koj lub suab qab zib thiab koj ntsej muag zoo nkauj kawg. Wb cia li ntes tej hma thiab tej hma me me uas txov tej vaj txiv hmab rau qhov wb lub vaj txiv hmab tawg paj lawm. Tus uas ntxim kuv siab yog kuv teej kuv tug, thiab kuv yog nws teej tug. Nws yug nws pab yaj hauv tej paj lilij. Tus uas ntxim kuv siab, koj cia li nrog kuv nyob mus txog thaum cua ntsawj sawv ntxov thiab duab tsaus ntuj ploj lawm, ua zoo yam nkaus li tus kauv seb thiab tus thav muas lwj saum lub roob Npethaw. Thaum tsaus ntuj uas kuv pw saum txaj, kuv nrhiav tus uas kuv lub siab nyiam, kuv nrhiav nws tiamsis nrhiav tsis tau. Kuv yuav sawv tsees mus thoob plaws hauv lub nroog, mus hauv tej kev thiab hauv tej tshav puam, kuv yuav nrhiav tus uas kuv lub siab nyiam. Kuv nrhiav nws tiamsis nrhiav tsis tau. Cov uas faj xwm ntsib kuv rau thaum lawv tabtom taug kev hauv lub nroog. Kuv nug lawv tias, “Nej pom tus uas kuv lub siab nyiam los tsis pom?” Thaum kuv hla dhau lawv mentsis lawm, kuv ntsib nws, yog tus uas kuv lub siab nyiam. Kuv ntsiab nkaus nws tsis kam tso nws mus li, mus txog thaum kuv coj nws los rau hauv kuv niam lub tsev, thiab nkag rau hauv tus uas xeeb kuv lub txaj. Yeluxalees tej ntxhais 'e, thov nej twv rau tej kauv seb thiab tej xyuas muas lwj hais tias nej yuav tsis tshum tsis tsa kom wb txojkev sib hlub tsim ras mus txog thaum txaus siab tso. Leejtwg tawm hauv tebchaws moj sab qhua tuaj zoo yam li ib nthwv pa ncho uas muaj roj tsw qab thiab roj ntoos tsw qab tsw ntxiag tuaj, yog txhua yam hmoov tsw qab uas tub lag tub luam xa tuaj? Saib maj, yog Xalaumoo lub zwm txwv. Muaj rau caum leej tub rog uas siab tuab vij vog, yog Yixayee cov tub rog uas siab loj siab tuab. Lawv coj ntaj thiab lawv txawj ntaus rog, lawv txhua tus ris ntaj ntawm duav faj seeb xwm txheej thaum tsaus ntuj. Vajntxwv Xalaumoo muab tej ntoo pem Lenpanoo ua lub zwm txwv. Nws muab nyiaj ua ncej zwm txwv, thiab muab kub ua daim txiag pheeb thiab muab ntaub tsamxem pua daim txiag rooj nyob. Lub zwm txwv sab hauv yog Yeluxalees tej ntxhais muab tawv tsiaj ua. Xi‑oo tej ntxhais 'e, cia li tawm mus saib vajntxwv Xalaumoo, nws ntoo lub mom kub uas nws niam muab looj rau nws taubhau rau hnub uas nws ua tshoob, yog hnub uas nws zoo siab xyiv fab kawg. Tus uas kuv nyiam, koj zoo nkauj kawg, koj zoo nkauj tiag tiag li. Koj ob lub qhov muag uas nyob hauv daim qab ntaub kauv zoo tam tus nquab taug. Koj plaubhau npws qas loo yam li pab tshis uas nqes pem ntav roob Kile‑a los. Koj cov hniav zoo tam pab yaj uas nyuam qhuav muab plaub txiav tag thiab muab ntxuav tag. Txhua tus muaj menyuam ntxaib thiab tsis muaj ib tug uas sem menyuam li. Koj daim tawv ncauj liab ploog li xov liab, koj lub qhov ncauj zoo nkauj kawg, koj ob sab plhu uas nyob hauv daim qab ntaub kauv, zoo yam nkaus li lub txiv ntsiav kws phua ob sab. Koj lub caj dab zoo tam Davi lub tsev zov khuav uas ua los khaws tej cuab yeej ua rog, sab nraud dai ib txhiab daim hlau thaiv, txhua daim ntawd yog cov tub rog siab tuab li. Koj ob lub mis zoo yam nkaus li ob tug menyuam kauv seb ntxaib, uas noj zaub hauv tej paj lilij. Kuv yuav mus pem roob roj tsw qab thiab mus pem pov roob roj ntoos tsw qab mus txog thaum cua ntsawj sawv ntxov thiab duab tsaus ntuj ploj lawm. Tus uas kuv nyiam, koj lub cev ntaj ntsug zoo nkauj kawg, tsis muaj ib qho phem li. Kuv tus nkauj nyab, cia li tawm hauv Lenpanoo nrog kuv mus, cia li tawm hauv Lenpanoo nrog kuv mus ov, cia li nqes saum hau roob Amana, thiab saum hau roob Xeni thiab roob Hawmoo, thiab tawm hauv lub qhov tsov ntxhuav, thiab lub roob tsov pom txwv. Kuv tus muam npaws, kuv tus nkauj nyab, koj lws kiag kuv nplooj siab lawm, thiab koj tib laj muam rau kuv xwb rub kiag kuv lub siab, koj tib txoj saws xwb rub tau kuv lawm. Kuv tus muam npaws, kuv tus nkauj nyab, ua cas koj txojkev hlub qab zib ua luaj? Koj txojkev nyiam qab dua cawv txiv hmab, thiab tej tshuaj uas koj pleev tsw qab dua li tej hmoov tshuaj tsw qab huvsi. Kuv tus nkauj nyab, koj daim tawv ncauj nrog zib ntab, zib ntab thiab kua mis nyob hauv koj tus qab nplaig. Koj cev tsoos tsho tsw qab ntxiag yam li Lenpanoo. Kuv tus muam npaws, kuv tus nkauj nyab yog lub vaj uas muab kaw cia, yog lub vaj uas muab txwv cia, yog lub qhov dej txhawv uas muab kaw cia lawm. Koj yog lub vaj txiv ntsiav kws thiab muaj lwm yam txiv ntoo uas zoo zoo puv nkaus, muaj tej paj ntoo tsw qab thiab ntoo roj tsw qab, Muaj ntoo roj tsw qab, thiab qhiav daj, tauj qaib, ntoo tuv, thiab lwm yam ntoo uas ua tshuaj tsw qab, roj tsw qab thiab roj ntoo alau‑es thiab txhua yam txuj lom. Koj yog lub qhov dej uas txhawv hauv vaj, yog lub hauv dej cag, thiab yog tej dej ntws pem Lenpanoo los. Tej cua ntsawj sab ped tuaj 'e, cia li sawv tsees, tej cua ntsawj sab nrad 'e, cia li ntsawj tuaj. Cia li ntsawj rau kuv lub vaj kom tej pa tsw qab hauv lub vaj thiaj li tsw thoob plaws mus. Thov cia tus uas kuv ntxim siab nkag los rau hauv nws lub vaj thiab noj tej txiv ntoo uas zoo tshaj plaws. Kuv tus muam npaws, kuv tus nkauj nyab, kuv los rau hauv kuv lub vaj lawm nav. Kuv sau zog kuv tej roj tsw qab thiab tej txuj lom, kuv noj kuv li tsev ntab thiab zib ntab, kuv haus kuv li cawv txiv hmab thiab kuv li kua mis. Ob tug kwvluag 'e, neb cia li noj cia li haus, ob tug uas sib nyiam 'e, neb cia li haus kom pov khawv nkaus. Kuv tsaug zog lawm tiamsis lub siab ras dhuj dheev. Kuv hnov tus uas kuv ntxim siab khob hu hais tias, “Leej muam npaws, tus uas kuv nyiam, kuv tus nquab taug, kuv tus uas zoo nkauj tshaj plaws, qheb qhov rooj rau kuv, rau qhov kuv lub taubhau ntub lwg ntsuav, thiab kuv tej plaubhau ntub nag tshauv tsaus ntuj nti.” Kuv twb hle tsho lawm, ua li cas tseem yuav kom kuv rov muab los hnav? Kuv twb ntxuav kotaw lawm, ua li cas yuav kom kuv rov muab ua khub dua thiab? Tus uas kuv ntxim siab cev nws txhais tes ntawm qhov rooj los, kuv lub siab qaug lias rau nws. Kuv sawv tsees mus qheb qhov rooj rau tus uas ntxim kuv siab, kuv txhais tes lo roj tsw qab nrog tawv, kuv cov ntiv tes kuj nrog roj tsw qab rau thaum kuv tuav tus las rooj. Kuv qheb qhov rooj rau tus uas ntxim kuv siab, tiamsis tus uas ntxim kuv siab tig kiag rov qab lawm. Thaum nws hais lus rau kuv xwb, kuv yeej poob siab lawm. Kuv nrhiav nws tiamsis nrhiav tsis pom, kuv hu nws los nws tsis teb li. Cov uas faj xwm ntsib kuv rau thaum lawv tabtom taug kev hauv lub nroog. Lawv txawm ntaus kuv, muab kuv ntaus mob thiab to, lawv txeeb kuv daim ntaub kauv lawm, yog lawv cov uas zov ntsa loog. Yeluxalees tej ntxhais 'e, thov nej cog lus cia tias yog nej ntsib kuv tus uas ntxim siab nej yuav hais rau nws tias kuv nyiam nws mob kuv siab kawg. Tus uas zoo nkauj tshaj plaws ib tsoom hluas nkauj huvsi 'e, tus uas ntxim koj siab zoo dua li luag lwm tus lov? Tus uas ntxim koj siab zoo dua li luag lwm tus npaum li cas es koj yuav kom peb cog lus li ntawd? Tus uas kuv ntxim siab zoo nraug plhu tshiab liab ploog, ib vam leej nws yog tus zoo tshaj plaws. Nws cov plaubhau yog tseem kub, nws cov plaubhau caws vos, thiab dub yam li uab lag. Nws qhov muag zoo tam tus nquab taug uas nyob ntawm ntug hav dej da kua mis, zoo yam nkaus li qe zeb hlaws khawm rau hauv lub tais. Nws ob lub plhu zoo yam nkaus li thaj uas cog txuj lom tsw qab ntxiag thoob plaws. Nws daim tawv ncauj zoo yam nkaus li tej paj lilij uas roj tsw qab nrog ntsuj ntsuav. Nws txhais npab ntug ntoob, yog npab kub uas muaj tej qe zeb hlaws muaj nqes ntsia lo rau. Nws lub cev zoo yam li kaus ntxhw uas muab qe zeb phaithu tsamxem teem rau. Nws txhais ceg yog ncej zeb dawb uas txawb saum lub taw kub. Nws lub cev ntaj ntsug zoo yam nkaus li Lenpanoo, zoo nraug li tej ntoo ciab. Tej lus uas nws hais qab zib kawg, nws lub zeej txhiaj ntxim nyiam kawg nkaus li. Yeluxalees tej ntxhais 'e, no yog tus uas kuv ntxim siab thiab yog kuv tus phoojywg. Tus uas zoo nkauj tshaj plaws ib tsoom hluas nkauj huvsi 'e, tus uas ntxim koj siab mus rau twg lawm? Tus uas ntxim koj siab mus txojkev twg lawm? Peb yuav nrog koj mus nrhiav. Tus uas kuv ntxim siab mus nram nws lub vaj, thiab mus rau thaj uas cog txuj lom, xwv nws thiaj yug tau nws pab yaj hauv lub vaj, thiab de tej paj lilij. Tus uas ntxim kuv siab yog kuv teej kuv tug, thiab kuv yog nws teej tug. Nws yug nws pab yaj hauv tej paj lilij. Tus uas kuv nyiam, koj zoo nkauj yam li lub moos Thilaxa, thiab zoo nkauj yam li lub nroog Yeluxalees, koj zoo thiab txaus hwm yam nkaus li pab tub rog uas muaj chij. Koj cia li tig koj qhov muag rau ib qho vim yog koj qhov muag ua rau kuv nyob tsw qab. Koj plaubhau npws qas loo yam li pab tshis uas nqes pem ntav roob Kile‑a los. Koj cov hniav zoo tam pab yaj uas nyuam qhuav muab plaub txiav tag thiab muab ntxuav tag. Txhua tus muaj menyuam ntxaib thiab tsis muaj ib tug uas sem menyuam li. Koj ob sab plhu uas nyob hauv daim qab ntaub kauv, tshiab liab ploog li txiv ntsiav kws phua ob sab. Muaj rau caum tus poj vaj thiab yim caum tus niam yau thiab hluas nkauj coob suav tsis txheeb. Kuv tus nquab taug, kuv tus uas zoo nkauj tshaj plaws, muaj tib tug xwb, nws niam xam pom nws ib leeg xwb, tus uas yug nws hlub nws nyiam nws heev. Tej hluas nkauj pom nws mas hu nws tias tus muaj hmoov. Tej poj vaj thiab tej niam yau kuj qhuas nws. Tus no yog leejtwg? Nws tsa qhov muag saib kaj zuj zus yam li tagkis, zoo nkauj yam li lub hli, ci yam li lub hnub, thiab txaus hwm yam nkaus li pab tub rog uas muaj chij. Kuv nqes mus rau hauv lub vaj txiv qab rog, kuv saib tej ntsuag ntoo hauv hav thiab saib tej txiv hmab ua cos paj los tsis tau thiab txiv ntsiav kws tawg paj los tsis tau. Thaum kuv twb tsis tau faj, tej uas kuv xav ua rau kuv lub siab yuj plaws mus nrog nws nyob ua ke hauv nws lub tsheb lawm. Tus hluas nkauj Sulee 'e, rov los, rov los. Koj cia li rov los, rov los peb thiaj tau pom koj qhuas koj. Ua li cas nej yuav saib tug hluas nkauj Sulee, ib yam li saib luag seev cev hauv Manaha‑i? Tus hluas nkauj uas zoo li poj vaj 'e, koj kotaw uas rau khau paj zoo nkauj ua luaj li. Koj ob txhais ncej qab kheej qas lam li lub pov hum uas tus Kws twb txhuam tau lawm. Koj lub ntaws yog lub phaj uas ntim cawv txiv hmab uas tov lawm tsis tu li. Koj lub plab yog ib pawg mog muaj tej paj lilij nyob ib ncig. Koj ob lub mis zoo yam nkaus li ob tug menyuam kauv seb ntxaib. Koj lub caj dab zoo yam nkaus li lub chaw tsom faj uas muab kaus ntxhw ua. Koj ob lub qhov muag zoo yam nkaus tej pas dej hauv lub moos Hesanpoo uas nyob ntawm rooj loog Npalanpi. Koj caj ntswm zoo yam li lub chaw tsom faj hauv Lenpanoo uas saib rau nram lub nroog Damaxaka. Koj lub taubhau zoo yam nkaus li lub hauv roob Khamee, koj cov plaubhau npws loo zoo yam nkaus li cov xov tsamxem, ua rau koj tus vajntxwv siab qaug lias. Tus uas kuv nyiam 'e, tus hluas nkauj uas txaus kuv lub siab, koj zoo nkauj thiab raug muag kawg li. Koj cev yiag ntxiag yam tsob toov laj thiab koj ob lub mis zoo yam nkaus li ob tauv txiv toov laj. Kuv xav tias kuv yuav daum tsob toov laj ntawd, kuv yuav tuav rawv tauv txiv ntawd cia. Thov cia koj ob lub mis zoo nkaus li tauv txiv hmab, thiab thov cia koj tej pa tsw qab yam li txiv duaj, thiab thov cia qhov uas koj nwj zoo yam li tej tseem cawv txiv hmab uas haus ntaug qas lees, ntws rau tej tawv ncauj thiab kaus hniav. Kuv yog tus uas ntxim kuv siab li teej tug, thiab nws yeej ntshaw tau kuv kawg li. Tus uas kuv ntxim siab, cia li los maj, cia wb ua ke mus tom teb, wb mus so hauv tej zej zog. Cia wb sawv ntxov mus tom vaj txiv hmab, wb mus saib tej txiv hmab ua cos paj los tsis tau, saib tej txiv twb nra paj los tsis tau thiab saib tej txiv ntsiav kws tawg paj los tsis tau. Kuv yuav pub kuv txojkev nyiam rau koj qhov ntawd. Tus uas kuv ntxim siab 'e, cov txiv lws duda‑i tsw qab ntxiag thoob plaws, thiab ntawm wb ob leeg qhov rooj muaj txhua yam txiv ntoo qab qab, muaj cov txiv qub thiab txiv tshiab uas kuv de cia rau koj. Kuv xav kom koj zoo li kuv tus nus uas tau ntxais kuv niam lub mis. Thaum kuv ntsib koj tom tshav puam kuv yuav nwj tau koj los thiaj tsis muaj leejtwg saib tsis taus kuv. Ces kuv yuav coj koj mus rau hauv kuv niam lub tsev nkag rau hauv tus uas xeeb kuv lub txaj. Kuv yuav pub cov cawv txiv hmab tsau tshuaj rau koj haus, thiab haus kuv li kua txiv ntsiav kws. Thov cia nws txhais tes laug rau kuv ncoo, thiab nws txhais tes xis puag kuv. Yeluxalees tej ntxhais 'e, kuv thov nej cog lus tias nej yuav tsis tshum tsis tsa kom wb txojkev sib hlub tsim ras mus txog thaum txaus siab tso. Tus uas tawm hauv tebchaws moj sab qhua tuaj yog leejtwg, uas dai qawm qas lias nrog tus uas nws ntxim siab tuaj? Kuv tsa koj sawv hauv tsob qab txiv duaj, qhov ntawd yog lub chaw uas koj niam xeeb koj, yog lub chaw uas koj niam mob plab yug koj. Cia muab kuv nias ua lub cim rau hauv koj lub siab, thiab muab kuv ua lub tooj npab puav pheej ntawm koj txhais npab. Rau qhov txojkev hlub ruaj khov yam li txojkev tuag, txojkev sib hlub heev muaj zog yam li tub tuag teb. Txojkev hlub tej txim taws ci heev, nws tej nplaim taws kub muaj ceem heev. Dej ntau npaum twg los tua tsis tau txojkev hlub, tej hav dej los nyab tsis tau txojkev hlub tuag. Yog leejtwg xav muab nws tej nyiaj txiag hauv nws vaj nws tsev tag nrho pauv txojkev hlub, luag yuav saib tsis taus nws heev kawg li. Peb muaj ib tug muam yau, nws ob lub mis tseem tsis tau o. Mas hnub uas luag tuaj thov yuav nws, peb yuav ua li cas rau peb tus muam? Yog nws yog lub ntsa loog peb yuav muab nyiaj ua lub hau ntsa loog rau nws. Yog nws yog qhov rooj peb yuav muab txiag ntoo ciab los ntsia thaiv nws. Kuv yog lub ntsa loog, kuv ob lub mis zoo yam nkaus li ob lub tsev zov khuav saum ntsa loog. Vim li no tus uas kuv ntxim siab pom tias kuv zoo li tus uas yuav coj kev kaj siab lug rau nws. Xalaumoo muaj ib lub vaj txiv hmab nyob ntawm Npa‑as Hamoo. Nws muab lub vaj txiv hmab ntawd qev rau cov uas tu lub vaj, txhua tus yuav tsum xa nyiaj ib leeg ib txhiab lub txiag ua nqe qev teb. Kuv lub vaj txiv hmab yeej yog kuv li, nyob ntawm kuv lub xubntiag. Au Xalaumoo, ib txhiab lub txiag ntawd koj cia li coj mus, cov uas tu vaj txiv hmab ntawd kuj coj ib leeg ob puas mus. Koj uas nyob hauv lub vaj, kuv cov phoojywg tos rawv koj lub suab. Thov cia kuv hnov koj lub suab. Tus uas kuv ntxim siab, kavtsij los. Cia li ua zoo yam nkaus li tus kauv seb thiab tus thav muas lwj uas nyob saum lub roob txuj lom tshuaj tsw qab. No yog Yaxaya uas yog Amoj tus tub ua yog toog pom txog Yuda thiab Yeluxalees rau ncua sijhawm uas Uxiya thiab Yauthas thiab Aha thiab Hexekhiya ua vajntxwv kav Yuda tebchaws. Lub ntuj 'e, cia li mloog, lub ntiajteb 'e cia li tig ntsej mloog, rau qhov Yawmsaub tau hais lus tias, “Kuv tau tu menyuam thiab pub kom hlob, tiamsis lawv tau fav xeeb rau kuv lawm. Nyuj kuj paub nyuj tus tswv, thiab nees luav kuj paub tus tswv lub dab zaub, tiamsis cov Yixayee tsis paub, kuv haiv neeg tsis nkag siab.” Lub tebchaws uas muaj txim 'e, nej yog haiv neeg ris lub txim loj, yog cov neeg phem li noob, yog cov tub ki uas ua kev phem kev qias. Lawv twb tso Yawmsaub tseg, lawv saib tsis taus tus uas Dawb Huv hauv cov Yixayee, lawv tig nrob qaum rau nws lawm. Ua cas nej tseem xav raug nplawm ntxiv thiab? Ua cas nej tseem fav xeeb mus li? Nej lub taubhau mob thoob tag, nej lub siab kuj qaug zog tag. Txij ntua ntawm xib taws mus thoob plaws saum taubhau, tsis muaj ib qho zoo kiag li tsuas yog dhoog ntsuab tag thiab ua kiav txhab kua paug thiab ntshav txia txev, tsis tau muab tso kua paug tawm thiab tsis qhwv li lossis muab roj pleev kom nqeg. Nej lub tebchaws raug muab tso tseg nyob do cuas, nej tej moos kuj raug hluavtaws kub, lwm haiv neeg muab nej lub tebchaws ua puam tsuaj tab meeg nej, thiaj li nyob do cuas yam li raug lwm haiv neeg muab ua piam tag. Xi‑oo tus ntxhais kuj raug muab tso tseg ib yam lub tsev pheeb suab hauv lub vaj txiv hmab, thiab yam li lub tsev pheeb suab hauv daim teb dib, zoo li lub moos uas raug muab vij cia. Yog Yawmsaub uas muaj hwjchim loj kawg tsis tseg peb ib txhia cia, ces peb kuj yuav zoo ib yam li lub moos Xaudoo thiab zoo li lub moos Kaumaula. Nej cov uas kav lub moos Xaudoo, cia li mloog Yawmsaub tej lus. Nej cov neeg hauv lub moos Kaumaula, cia li tig ntsej mloog peb tus Vajtswv tej lus qhia. Yawmsaub hais tias, “Tej qhov txhia chaw uas nej xyeem ntau kawg ntawd muaj nuj nqes dabtsi rau kuv? Kuv dhuav tej txiv yaj uas muab ua kevcai hlawv xyeem, thiab tej hlab hluas roj ntawm tej tsiaj uas hwv rog rog lawm. Kuv tsis zoo siab rau tej txiv nyuj li ntshav thiab tej menyuam yaj thiab tej txiv tshis li ntshav. Thaum nej tuaj rau ntawm kuv xubntiag leejtwg kom nej tsuj mus tsuj los hauv kuv lub tuam tsev li no? Tsis txhob coj tej uas tsis muaj qabhau tuaj xyeem dua li lawm, tej hmoov tshuaj tsw qab yog yam uas kuv ntxub kawg. Hnub hli xiab thiab hnub Xanpatau thiab qhov uas nej hu kom tuaj txoos ua ke, mas kuv thev tsis taus tej kev txhaum uas nej tuaj txoos ua ke caiv so ntawd. Kuv lub siab ntxub tej kevcai hnub hli xiab thiab nej tej kevcai uas teem cia, tej ntawd ua lub nra hnyav rau kuv ris dhuav heev lawm. Thaum nej tsa tes thov, kuv yuav fee plhu ntawm nej, txawm yog nej yuav thov ntau ntau, kuv yuav tsis mloog. Nej txhais tes lo ntshav tag. Cia li ntxuav nej lub cev, cia li tu nej lub cev kom huv, cia li rho nej tej kev phem tawm mus dhau kuv lub qhov muag, cia li tseg tsis txhob ua phem, cia li kawm paub ua zoo, cia li txiav txim ncaj, cia li tso tus uas raug quab yuam dim, cia li tuav cov menyuam ntsuag tsis muaj txiv txojcai, thiab pab tus poj ntsuam hais plaub.” Yawmsaub hais tias, “Cia li tuaj, peb sib cam txog tej no. Txawm yog nej lub txim liab ploog los yuav dawb li daus xib daus npu, txawm yog liab ploog li ntshav, los yuav dawb li plaub yaj. Yog nej kam thiab mloog lus, nej yuav tau noj tej yam zoo hauv lub tebchaws. Tiamsis yog nej tsis kam thiab fav xeeb, nej yuav raug hniav ntaj puam tsuaj tag, rau qhov Yawmsaub lub qhov ncauj twb hais cia lawm.” Lub nroog uas txeev xib rau Vajtswv ntxeev ua poj muag cev lawm lauj! Nws txeev tu plaub ncaj xwb xwb li. Txojkev ncaj ncees txeev nyob hauv nws, tiamsis nimno tsuas muaj cov uas tua neeg nyob xwb. Koj tej nyiaj ntxeev ua quav nyiaj tag lawm, koj tej cawv txiv hmab xyaw dej lawm. Koj cov thawj ua cov uas fav xeeb thiab nrog tub sab ua phoojywg lawm. Txhua tus nyiam nyiaj xiab thiab nrhiav nrhw tej uas luag pub. Lawv tsis tuav tej menyuam ntsuag tsis muaj txiv txojcai, thiab lawv tsis txais tej poj ntsuam tshaj plaub hais. Vim li no, tug Tswv uas yog Yawmsaub muaj hwjchim loj kawg, yog Yixayee tus Vajtswv uas loj dua ntais, thiaj hais tias, “Saib maj, kuv yuav nchuav kuv txojkev npau taws rau saum kuv cov yeeb ncuab, thiab ua pauj rau kuv cov tshawj chim. Kuv yuav tig kuv txhais tes tawm tsam koj, thiab kuv yuav muab koj nchuav hauv lub yeej vub kom cov quav nyiaj tawm mus, thiab rho tej uas txuam hauv nej tawm mus. Kuv yuav pub koj muaj cov uas tu plaub zoo li yav thaum ub, thiab pub tus uas ua chaw sablaj zoo yam li qub rau nej. Dhau ntawd mus luag yuav hu koj tias l ub nroog ncaj ncees, thiab lub nroog uas xib rau Vajtswv.” Vajtswv txiav txim ncaj thiaj li txhiv Xi‑oo, thiab nws txojkev ncaj ncee txhiv cov neeg hauv Xi‑oo uas ntxeev dua siab. Tiamsis cov uas fav xeeb thiab cov uas muaj txim yuav raug puam tsuaj huvsi, thiab cov uas tso Yawmsaub tseg yuav raug muab ntxuav pov tseg. “Nej yuav txaj muag rau tsob ntoo xeeb uas nej nyiam ntawd, thiab nej plhu yuav liab rau lub vaj uas nej xaiv cia. Nej yuav zoo yam li tsob ntoo qheb uas nplooj qhuav tag, thiab zoo li lub vaj uas tsis muaj dej. Tus uas muaj zog yuav zoo li qhov nyuag ntoo zes taws, thiab nws tej haujlwm zoo li lub nyuag txim taws, ob yam no puavleej yuav kub hnyiab tag huvsi, tsis muaj leejtwg tua tau li.” No yog tej uas Yawmsaub qhia rau Yaxaya uas yog Amoj tus tub pom txog Yuda thiab lub nroog Yeluxalees. Yav tom hauv ntej yuav muaj li no, lub roob uas muaj Yawmsaub lub tuam tsev yuav raug muab tsa ua lub roob uas siab dhau thiab yuav raug txhawb nqa siab dua tej pov roob, thiab txhua lub tebchaws yuav sau nthwv tuaj rau saum lub roob ntawd. Ntau haiv neeg yuav tuaj hais tias, “Cia li los, cia peb nce mus saum Yawmsaub lub roob, mus rau hauv Yakhauj tus Vajtswv lub tuam tsev, mas nws yuav qhia nws txojkev rau peb kom peb thiaj taug tau nws txojkev.” Rau qhov txoj kevcai yuav tawm hauv Xi‑oo tuaj thiab Yawmsaub txojlus yuav tawm hauv Yeluxalees tuaj. Nws yuav phua cai rau txhua lub tebchaws, thiab nws yuav tu plaub rau ntau haiv neeg kom sib hum. Lawv yuav muab lawv tej ntaj riam ntaus ua khais laij teb, thiab muab lawv tej hmuv ntaus ua liag. Ib lub tebchaws yuav tsis rho ntaj ua tsov ua rog rau ib lub tebchaws, lawv yuav tsis kawm txujci ua tsov ua rog dua li lawm. Yakhauj caj ces 'e, cia li los, cia peb taug Yawmsaub txojkev kaj. Yawmsaub, koj tau tso koj haiv neeg tseg, yog Yakhauj caj ces, rau qhov lawv ua neeb saib yaig puv nkaus tebchaws raws li cov neeg uas nyob sab hnub tuaj, thiab lawv saib sij saib nyoog ib yam li cov neeg Filixatee, thiab nrog lwm haiv neeg cog lus sib raug zoo. Lawv lub tebchaws muaj nyiaj muaj kub puv nkaus, thiab lawv tej nyiaj txiag tsis txawj tag li. Lawv lub tebchaws muaj nees puv nkaus, thiab lawv tej tsheb nees ua rog muaj ntau siv tsis tag. Lawv lub tebchaws muaj dab mlom puv nkaus, lawv pe hawm tej uas lawv txhais tes ua thiab pe tej uas lawv ntiv tes ua. Mas neeg thiaj raug txo hwjchim thiab poob qes kawg. Tsis txhob zam lawv lub txim. Cia li nkag rau hauv tej qab zeb qab ca, thiab mus tsiv nraim rau tej qhov av, khiav kom dim Yawmsaub txojkev chim thiab khiav kom dhau Yawmsaub lub hwjchim meej mom uas ci ntsa iab. Cov uas yoj cev yuj yees khav theeb yuav poob qes, thiab cov uas muab hlob yuav raug muab rhuav. Yawmsaub tib leeg xwb thiaj raug qhuas ntxhias rau hnub ntawd. Yawmsaub uas muaj hwjchim loj kawg nkaus teem ib hnub cia rau txhua yam uas khav theeb thiab muab hlob, thiab rau txhua yam uas tsab ua loj thiab tsa hau siab, thiab rau txhua tsob ntoo ciab hauv Lenpanoo uas siab siab thiab tsa hau siab, thiab rau txhua tsob ntoo qheb hauv Npasas, thiab rau txhua lub roob siab thiab txhua lub pov roob uas tsa hau siab, thiab rau txhua lub chaw tsom faj uas nyob siab, thiab rau txhua lub ntsa loog uas txhim zeb khov kho, thiab rau Thasi txhua lub nkoj txwg thiab rau txhua lub nkoj uas zoo nkauj. Qhov uas neeg khav theeb yuav raug muab rhuav thiab qhov uas neeg muab hlob yuav raug txo qes. Yawmsaub tib leeg xwb thiaj raug qhuas ntxhias rau hnub ntawd. Tej dab mlom yuav ploj ntais tsis muaj li lawm. Thiab neeg yuav nkag qhov zeb qhov tsua thiab tej qhov av, kom dim Yawmsaub txojkev chim thiab dhau ntawm Yawmsaub lub hwjchim meej mom uas ci ntsa iab, rau thaum nws sawv tsees co lub ntiajteb ua zog kais. Mas hnub ntawd tej neeg yuav muab tej dab mlom nyiaj dab mlom kub uas lawv ua rau lawv pe laim pov tseg rau nas kauv thiab puav. Lawv yuav nkag rau hauv tej qhov tsua thiab nkag rau hauv tej kem zeb, kom dim Yawmsaub txojkev chim thiab dhau ntawm Yawmsaub lub hwjchim meej mom uas ci ntsa iab, rau thaum nws sawv tsees co lub ntiajteb ua zog kais. Tsis txhob quav ntsej tej neeg. Lawv lub qhov ntswg ua pa ib vuag dua xwb. Lawv tsim txiaj tus dabtsi? Saib maj, tug Tswv uas yog Yawmsaub tus muaj hwjchim loj kawg nkaus, tabtom tshem tus ncej thiab tus las uas txheem lub nroog Yeluxalees thiab Yuda mus, yog nws tshem tus ncej uas yog tej mov noj tag nrho huvsi thiab tus ncej uas yog tej dej haus tag nrho huvsi, thiab tus uas siab loj siab tuab thiab tus tub rog, tus uas tu plaub, thiab tus uas cev Vajtswv lus, tus uas saib sij saib yaig, tus kev txwj laus, tus thawj uas kav tsib caug leej thiab tus uas muaj meej mom, tus uas ua chaw sablaj, tus uas txawj ua yees siv, tus uas txawj ua khawv koob. Kuv yuav tsa tej menyuam yaus ua lawv li thawj, thiab tej menyuam mos yuav kav lawv. Thiab tej pejxeem ib leeg yuav quab yuam ib leeg, txhua tus yuav quab yuam nws tus phoojywg, thiab txhua tus quab yuam nws kwvtij zej zog. Tej menyuam yuav tsis hwm tej poj koob yawm txwv, thiab tus neeg tsis tsim txiaj kuj tsis hwm tus uas muaj koob meej. Yuav muaj ib tug mus tuav nkaus nws ib tug kwvtij hauv nws leej txiv lub tsev hais tias, “Koj muaj lub tsho ntev, ces koj yuav ua peb cov tus thawj, thiab koj yuav kav tej niag pawg thwv cib uas pob tag no.” Mas hnub ntawd nws yuav hais tias, “Kuv tsis yeem ua tus uas kho. Hauv kuv tsev kuj tsis muaj mov noj thiab tsis muaj tsho ntev. Koj tsis txhob tsa kuv ua tus uas coj tej pejxeem.” Yeluxalees kuj dawm thiab Yuda kuj ntog, vim yog lawv tej lus thiab lawv tej haujlwm tawm tsam Yawmsaub, fav xeeb rau nws lub ntsej muag uas ci ntsa iab. Qhov uas lawv tu plaub tsis ncaj rov ua timkhawv tom lawv, lawv piav lawv qhov txhaum ib yam li lub moos Xaudoo, lawv tsis npog li. Lawv yuav raug txim lauj vim lawv coj tej xwm txheej phem los rau lawv tus kheej. Cia li hais rau cov uas ncaj ncees tias lawv yuav nyob kaj siab lug, vim lawv yuav tau saws raws li lawv twb ua lawm. Cov neeg limhiam yuav raug txom nyem lauj! Vij sub vij sw yuav poob rau saum lawv. Lawv txhais tes tau ua yam twg lawv yuav raug yam ntawd. Kuv cov neeg mas tej menyuam yaus quab yuam lawv thiab cov pojniam kav lawv. Kuv haiv neeg 'e, nej cov thawj coj nej yuam kev, thiab ua rau nej tsis pom qab mus txoj twg. Yawmsaub los tu plaub ntug, nws sawv tsees txiav txim rau tej neeg. Yawmsaub txiav txim rau cov kev txwj laus thiab cov uas ua thawj hauv nws haiv neeg hais tias, “Nej yog cov uas tau noj lub vaj txiv hmab tag lawm, thiab tej qhov txhia chaw uas nej txeeb ntawm cov pluag los kuj nyob puv nkaus hauv nej tsev. Qhov uas nej muab kuv haiv neeg tsuam kom txia roj thiab tsuj pes ntiag tej neeg pluag ntsej muag, nej ua dabtsi li ntawd?” Vajtswv Yawmsaub uas muaj hwjchim loj kawg nkaus hais li no ntag. Yawmsaub hais tias, “Vim Xi‑oo cov ntxhais khav theeb mus kev tsa ntswg ncuv, ua qhov muag cu ciav tsis paub txaj muag, mus kev ua plhom moj ntsuav kauj ruam mos nyoos, tswb nyiaj nrov ziag hauv kotaw, Yawmsaub yuav ua kom Xi‑oo tej ntxhais taubhau ua kiav txhab qawj, thiab ua rau lawv plaubhau hle tag do hau cuas.” Hnub ntawd Vajtswv yuav muab lawv tej tsoos ua zam sau mus, yog tooj taw, hlaws rig taubhau, xauv caj dab uas zoo li thaum lub hli xiab, khawb nyiaj, tooj tes, pluaj ntaub rig caj dab, phuam, tooj npab, siv sia, lub hum roj tsw qab, thiab tej pov hum, lub nplhaib txam txwm ntawm ntiv tes, thiab lub khawb qhov ntswg, lub tsho tsuj tseeb, tsho ntev, daim ntaub kauv thiab hnab nyiaj, cev tsoos tsho ntaub nyias, cev tsoos tsho ntaub mag, hauv phuam saum taubhau thiab ntaub kauv taubhau. Tej roj tsw qab yuav tsis muaj, tsuas muaj tus ntxhiab tsw lwj xwb. Tsis muaj siv sia tsuas muaj hlua sia xwb, tsis muaj plaubhau los ntxias kom zoo nkauj tsuas muaj do hau cuas xwb, tsis muaj tsoos tsho zoo hnav tsuas muaj khaub seev tsaj hnav xwb, tsis muaj qhov zoo nkauj lawm, tsuas muaj poob ntsej muag xwb. Nej cov txivneej yuav raug ntaj tuag tag, nej cov tub rog uas siab loj siab tuab yuav tuag tag hauv tshav rog. Xi‑oo tej rooj loog yuav quaj ntsuag thiab quaj lwj siab ntsuav, Xi‑oo yuav nyob do cuas thiab zaum hauv av. Hnub ntawd xya tus pojniam yuav txeeb ib tug txivneej thiab hais tias, “Peb yuav nrhiav peb noj, thiab peb yuav nrhiav peb hnav, tsuas yog cia luag hu peb puas koj lub npe xwb. Thov koj muab peb txojkev txaj muag tshem.” Hnub ntawd Yawmsaub tus ceg yuav zoo nkauj thiab ci ntsa iab, thiab tej qoob loo hauv lub tebchaws ntawd yuav ua rau cov Yixayee uas dim txojsia nyob khav ntxhias thiab tau koob meej. Cov uas tshuav hauv Xi‑oo thiab cov uas tseem nyob hauv Yeluxalees kuj yuav hu tias dawb huv, yog txhua tus uas sau npe cia tias yuav muaj txojsia hauv Yeluxalees. Yawmsaub yuav ntxuav Xi‑oo tej ntxhais kev phem kev qias mus, thiab yuav siv nws lub hwjchim txiav txim thiab hwjchim hlawv ntxuav Yeluxalees tej ntshav uas los khub hauv lub nroog mus. Yawmsaub yuav tsim ib tauv huab rau thaum nruab hnub thiab ib twv pa ncho thiab nplaim taws ci rau thaum hmo ntuj kom nyob thoob plaws rau saum lub roob Xi‑oo thiab nyob saum ib tsoom neeg uas tuaj txoos ua ke. Yuav muaj daim vuas uas vov tau roos lub hwjchim ci ntsa iab thoob plaws huvsi. Yuav ua ntxoov ntxoo roos tshav ntuj kub thaum nruab hnub, thiab ua lub chaw nraim cev thiab nraim cua daj cua dub thiab nag. Cia kuv hu nkauj rau tus uas kuv nyiam, yog zaj nkauj hais txog nws lub vaj txiv hmab. Tus uas kuv nyiam muaj lub vaj txiv hmab nyob saum lub roob uas av zoo heev. Nws ncaws thiab khaws tej pob zeb huvsi thiab cog tej txiv hmab uas zoo kawg rau hauv, nws ua tsev zov rau hauv nruab nrab thiab txaug ib lub qhov zeb los tsuam kua txiv hmab hauv lub vaj. Nws vam tias yuav txi cov txiv hmab nyeg tiamsis txi cov txiv hmab qus xwb. Nimno nej cov uas nyob hauv Yeluxalees thiab nej cov neeg Yuda 'e, thov nej cia li txiav txim rau kuv thiab kuv lub vaj txiv hmab. Tseem tshuav dabtsi uas kuv tsis tau ua rau kuv lub vaj txiv hmab? Thaum kuv twb vam tias yuav txi cov txiv hmab nyeg, ua li cas tsuas txi cov txiv hmab qus xwb? Nimno kuv yuav hais rau nej paub tias kuv yuav ua li cas rau kuv lub vaj txiv hmab. Kuv yuav rhuav tej laj kab pos pov tseg, mas tsiaj txhu yuav muab noj tag, thiab kuv yuav muab ntsa vaj tsoo pob tag mas lub vaj yuav raug muab tsuj liamsim tag. Kuv yuav ua kom lub vaj nyob do cuas cia, tsis muaj leejtwg yuav tav tej ceg thiab npoog av rau, mas yuav tuaj pos kaus ntsaj pos kaus ntsim. Kuv yuav txwv tej huab kom tsis txhob tso nag los rau hauv. Rau qhov Yawmsaub uas muaj hwjchim loj kawg nkaus lub vaj txiv hmab yog cov Yixayee, thiab cov ntoo uas Yawmsaub txaus siab rau yog cov neeg Yuda, thiab nws vam tias lawv yuav ua ncaj ua ncees, tiamsis ua ciav lawv tsuas yog ua nqaij ntuag ntshav nrog, nws vam tias yuav muaj kev ncaj ncees tiamsis ua ciav tsuas muaj suab hu kom mus pab. Nej cov uas ua tsev ib lub txuas rau ib lub thiab ua teb ib daim txuas rau ib daim tsis tshuav av seem li lawm, nej yuav raug txom nyem lauj! Nej yuav nyob ua twm zeej twm kawv hauv lub tebchaws xwb. Yawmsaub uas muaj hwjchim loj kawg nkaus tau hais tawv tawv rau kuv hnov tias, “Muaj tseeb tiag tiag li, yuav muaj ntau lub tsev nyob do cuas cia, tej lub tsev loj zoo nkauj yuav tsis muaj neeg nyob hauv, rau qhov ib daim teb txiv hmab uas txaus kaum nkawm nyuj laij ib hnub tsuas yog tau ib npa kua txiv hmab xwb, thiab cog ib haumaw noob tsuas yog sau tau ib efa xwb.” Cov uas sawv ntxov tsaus ntuj nti mus huas cawv thiab nyob haus txog ib tag hmo qaug cawv plhu liab ploog yuav raug txom nyem lauj! Thaum lawv noj haus lawv muaj nkauj nog ncas me nkauj nog ncas loj, muaj nruas npuaj thiab raj ntsaws thiab muaj cawv, tiamsis lawv tsis quav ntsej Yawmsaub tej haujlwm thiab tsis xav txog tej uas nws txhais tes ua. Vim li no kuv haiv neeg thiaj li poob tebchaws vim yog tsis paub kuv, lawv cov uas muaj meej kuj tuag tshaib, ib tsoom pejxeem kuj nqhis qhuav siab qhawv. Vim li no tub tuag teb tshaib nqhis zuj zus, rua ncauj loj tshaj plaws, mas Yeluxalees cov uas muaj meej thiab ib tsoom pejxeem nqes rau hauv, yog cov neeg hauv lub nroog thiab cov uas zoo siab xyiv fab ua lomzem rau hauv. Neeg yuav poob qes thiab yuav raug txo hwjchim, thiab cov uas khav theeb yuav raug txo kom qes. Tiamsis Yawmsaub uas muaj hwjchim loj kawg nkaus yuav raug qhuas ntxhias vim yog nws txiav txim ncaj, Vajtswv tus uas dawb huv kuj qhia nws kev dawb huv tshwm los vim yog nws ua ncaj ncees. Menyuam yaj yuav nrhiav noj qhov ntawd ib yam li yog nws lub tshav zaub, thiab tej tsiaj uas rog thiab tej menyuam tshis yuav nrhiav noj hauv tej chaw uas pob tag. Cov uas siv tej lus dag hai kev phem los, thiab hai lub txim los yam nkaus li xuas hlua hai tsheb nyuj, yuav raug txom nyem lauj! Lawv hais tias, “Cia Vajtswv maj nroos, cia nws kavtsij ua nws tej haujlwm kom peb thiaj tau pom. Cia tej uas Yixayee tug Tswv uas Dawb Huv tau npaj tseg lawm los ze, thov kom los, kom peb thiaj tau paub.” Cov uas hu qhov phem ua qhov zoo, thiab hu qhov zoo ua qhov phem, thiab muab qhov tsaus ntuj ua qhov kaj thiab muab qhov kaj ua qhov tsaus, thiab muab qhov iab ua qhov qab zib thiab muab qhov qab zib ua qhov iab, yuav raug txom nyem lauj! Cov uas nws xam pom tias nws ntse, thiab cov uas nws pom tias nws paub qabhau yuav raug txom nyem lauj! Cov uas haus cawv ua tau thiab cov uas siab loj muab cawv sib tov haus, yuav raug txom nyem lauj! Lawv yuav nyiaj xiab lawv thiaj tso tus uas ua txhaum dim, thiab qhau tus uas tsis ua txhaum txojcai. Vim li no, nplaim taws kub tej quav nyab yaj ntshis li cas, thiab tej nroj qhuav kub tag li cas, mas lawv tej cag yuav lwj tag ib yam li ntawd thiab lawv tej paj yuav ya tag li hmoov av, vim lawv muab Yawmsaub uas muaj hwjchim loj kawg nkaus txoj kevcai tso tseg thiab saib tsis taus cov Yixayee tug Tswv uas Dawb Huv tej lus. Vim li no, Yawmsaub txojkev npau taws thiaj tshwm plaws rau nws haiv neeg nws tsa tes tawm tsam lawv thiab ntaus lawv. Tej toj roob hauv pes ntseeg ua zog koog, thiab lawv tej cev tuag pawg lug hauv tej kev zoo yam li tej pawg tshwj xuam. Txawm li ntawd los nws txojkev chim tsis thim li, nws tseem tsa tes rawv. Nws yuav tsa chij hu kom ib lub tebchaws uas nyob deb tuaj, thiab xuav kauv hu lawv tuaj tim qab ntuj kawg tuaj. Nej saib maj, lawv tuaj sai, tuaj ceev kawg li. Tsis muaj ib tug txog siav, tsis muaj ib tug dawm, tsis muaj ib tug tsaug zog lossis ncaws dab ntub, lawv tej siv sia los tsis xoob, tej hlua khau los tsis tu li. Lawv tej xub kuj zuag plias, lawv tej hneev kuj sam cia huvsi, lawv tej rau nees kuj tawv cuag zeb hauvswm, lawv lub tsheb kuj zoo yam nkaus li khaub zeeg cua. Lawv tej suab nyooj li tsov ntxhuav, zoo ib yam nkaus li tej thav tsov ntxhuav lawv quaj nyooj, lawv nyooj luj laws, lawv nthos nkaus tus tsiaj thiab kwv mus, tsis muaj leejtwg cawm tau. Hnub ntawd lawv yuav nyooj luj laws saum lawv tus qauv yam nkaus li dej hiavtxwv nrov. Yog leejtwg saib rau hauv lub tebchaws mas tsuas yog pom tsaus ntuj nti thiab kev txom nyem nyuaj siab xwb, thiab huab laum nkaus qhov kaj huvsi. Xyoo uas vajntxwv Uxiya tuag lawd, kuv pom tug Tswv nyob saum ib lub zwm txwv uas siab thiab muaj meej, thiab nws lub tsho ntev nthuav puv nkaus lub tuam tsev. Muaj Xelafee sawv ntawm Vajtswv lawm saud txhua tus muaj rau txhais kooj tis, siv ob txhais kooj tis npog lub ntsej muag, ob txhais npog kotaw thiab ob txhais ya. Lawv ib leeg hu rau ib leeg tias, “Yawmsaub uas muaj hwjchim loj kawg dawb huv, dawb huv, dawb huv. Nws lub hwjchim ci ntsa iab puv nkaus lub ntiajteb.” Tus uas hu ntawd lub suab ua rau tej taw uas tiag qhov rooj tuam tsev ntseeg ua zog kais, thiab muaj pa ncho puv nkaus lub tuam tsev. Kuv hais tias, “Kuv raug txom nyem lauj! Kuv puam tsuaj lawm rau qhov kuv yog neeg uas daim tawv ncauj tsis huv thiab kuv nrog cov neeg uas daim tawv ncauj tsis huv nyob ua ke. Kuv lub qhov muag pom tus vajntxwv uas yog Yawmsaub muaj hwjchim loj kawg nkaus.” Ces cov Xelafee ntawd ib tug txawm ya los rau ntawm kuv. Hauv nws txhais tes muaj ib lub ncaig taws cig cig uas nws muab ciaj tais hauv lub thaj xyeem los. Nws muab twb kuv lub qhov ncauj thiab hais tias, “Saib maj, lub ncaig taws no nphav koj daim tawv ncauj lawm. Koj lub txim raug muab rhuav tshem lawm thiab koj tej kev txhaum raug muab ntxuav lawm.” Thiab kuv hnov tug Tswv lub suab hais tias, “Kuv yuav txib leejtwg mus, thiab leejtwg yuav sawv peb chaw mus?” Ces kuv hais tias, “Kuv nyob ntawm no, thov txib kuv mus.” Nws hais rau kuv tias, “Cia li mus thiab hais rau cov neeg no tias, ‘Nej cia li mloog tag mloog thiab los tsis nkag siab, saib tag saib thiab los tsis pom.’ Cia li ua rau haiv neeg no lub siab ruam puas ntsoog, thiab ntsaws lawv lub qhov ntsej, thiab pos lawv lub qhov muag, tsam ces lawv lub qhov muag ho pom, thiab lawv lub qhov ntsej ho hnov, thiab lawv lub siab ho to taub, ces lawv yuav tig rov los thiab tau kho kom zoo.” Mas kuv hais tias, “Au tug Tswv, yuav zoo li ntawd ntev li cas?” Mas nws hais tias, “Yuav zoo li ntawd mus txog thaum tej moos raug nyob do cuas tsis muaj neeg nyob lawm, thiab tej tsev tsis muaj neeg nyob, thiab lub tebchaws nyob do cuas cia, thiab mus txog thaum Yawmsaub muab cov neeg kuav mus deb, thiab muaj tej chaw uas raug muab tso tseg ntau kawg nyob rau hauv lub tebchaws. Txawm yog tshuav ib feem hauv kaum nyob los kuj yuav raug muab hlawv pov tseg. Yuav zoo li tej ntoo thuv thiab tej ntoo qheb uas raug muab ntov lawm tshuav lub hauv paus xwb. Lub hauv paus yog cov noob uas dawb huv rau hauv lub tebchaws.” Thaum Aha uas yog Yauthas tus tub thiab yog Uxiya tus xeeb ntxwv ua vajntxwv kav Yuda tebchaws, mas Alas tus vajntxwv Lexi thiab Yixayee tus vajntxwv Pekha uas yog Lemaliya tus tub tuaj ua rog rau lub nroog Yeluxalees, tiamsis ntaus tsis yeej. Thaum muaj neeg mus hais rau hauv Davi caj ces tias, “Cov Alas tuaj koom nrog cov Efa‑i lawm,” mas vajntxwv thiab cov pejxeem lub siab ntshai tshee hnyo yam li tej ntoo uas raug cua ntsawj. Yawmsaub thiaj hais rau Yaxaya tias, “Koj thiab koj tus tub Se‑ayasu cia li tawm mus ntsib Aha ntawm tus ciav dej uas ntws los rau lub pas sab ped, yog ntawm txojkev uas mus rau daim teb Ntxhua Xov, mas hais rau nws tias, ‘Koj cia li ceev faj, ua siab tus tsis txhob ntshai thiab tsis txhob poob siab rau ob yav nyuag tw taws uas ncho pa no, uas yog Lexi thiab cov Alas, thiab yog Lemaliya tus tub txojkev npau taws. Cov Alas thiab cov Efa‑i thiab Lemaliya tus tub tau ntaus tswvyim ua phem rau koj hais tias, “Cia peb mus ua rog rau Yuda thiab muab lawv dua rhe thiab txeeb Yuda rau peb, thiab tsa Thanpe‑ee tus tub ua vajntxwv kav lawv.” Vajtswv Yawmsaub hais li no tias, “ ‘Lawv tej tswvyim yuav tsis muaj, ua tsis tau tshwm los. Rau qhov Alas lub taubhau yog lub nroog Damaxaka, Damaxaka lub taubhau tsuas yog Lexi xwb. Tsis dhau rau caum tsib xyoo Efa‑i yuav tawg tag ua tej dwb daim, thiab ua tsis tsheej ib haiv neeg lawm. Efa‑i lub taubhau yog lub nroog Xamali, thiab Xamali lub taubhau tsuas yog Lemaliya tus tub xwb. Yog nej tsis tso siab tiag tiag, nej yuav tsis nyob ruaj khov kiag li.’ ” Yawmsaub rov hais rau Aha tias, “Cia li thov ib yam txujci ntawm Yawmsaub uas yog koj tus Vajtswv, txawm yog nyob tob li tub tuag teb lossis siab li saum ntuj kuj tau.” Tiamsis Aha hais tias, “Kuv yuav tsis thov thiab kuv yuav tsis sim Yawmsaub.” Mas Yaxaya hais tias, “Davi caj ces 'e, cia li tig ntsej mloog. Qhov uas nej ua rau neeg dhuav nej, tsis txaus lov es nej tseem ua rau kuv tus Vajtswv dhuav thiab lov? Vim li no Yawmsaub yuav pub txujci tshwm rau nej ntag. Saib maj, ib tug ntxhais hluas yuav xeeb menyuam thiab yug tau ib tug tub, thiab yuav tis npe hu ua Emanu‑ee. Nws yuav noj kua mis nyeem thiab zib ntab rau thaum nws paub tseg qhov phem thiab xaiv yuav qhov zoo. Ua ntej uas tus menyuam ntawd paub tseg qhov phem thiab xaiv yuav qhov zoo, ob tug vajntxwv uas koj ntshai kawg ntawd li tebchaws yuav nyob do cuas cia. Yawmsaub yuav coj Axilia tus vajntxwv los ntaus koj thiab koj cov neeg thiab koj txiv caj ces, yog tej xwm txheej uas txij thaum Efa‑i ncaim ntawm Yuda los tsis tau muaj dua li.” Hnub ntawd Yawmsaub yuav xuav hu tej yoov nyuj uas nyob ntawm tej hauv dej hauv Iyi tebchaws thiab tej ntab uas nyob hauv Axilia tebchaws tuaj. Tej ntawd huvsi yuav tuaj nyob puv nkaus tej khuab rooj khuab ha thiab tej kem zeb thiab nyob saum tej tsob pos thiab tej tshav zaub huvsi. Hnub ntawd Yawmsaub yuav xuas rab chais uas nws ntiav ntawm tus dej Yufeti sab hnub tuaj uas yog Axilia tus vajntxwv ntag tuaj chais tej plaubhau thiab tej plaub ntawm kotaw thiab yuav kuam kiag tej hwj txwv pov tseg. Hnub ntawd ib leeg yuav yug ib tug xyuas nyuj thiab ob tug yaj. Vim tej tsiaj pub kua mis ntau nplua mias, nws yuav tau noj kua mis nyeem. Txhua tus uas tseem tshuav nyob hauv lub tebchaws yuav tau noj kua mis nyeem thiab zib ntab. Hnub ntawd txhua thaj uas txeev muaj txiv hmab ib txhiab tsob uas tau nqe ib txhiab sekhee nyiaj, yuav ntxeev ua pos kaus ntsaj pos kaus ntsim. Tej neeg uas tuaj rau qhov ntawd yuav coj hneev coj xub tuaj, vim thoob tebchaws tsuas yog muaj pos kaus ntsaj pos kaus ntsim. Thiab tej pov roob uas lawv txeev xuas hlau ncaws, nej yuav mus tsis txog qhov ntawd vim ntshai pos kaus ntsaj pos kaus ntsim. Tej pov roob ntawd yuav ua chaw rau luag tso nyuj thiab ua chaw rau yaj tsuj. Mas Yawmsaub hais rau kuv tias, “Cia li coj ib daim txiag loj los sau npe ntawv hais tias, Mahaw Salahanpa.” Kuv nrhiav tau ob tug uas tso siab tau los ua kuv li timkhawv, yog pov thawj Uliya thiab Yenpelekhiya tus tub Xekhaliya. Mas kuv mus nrog poj xibhwb pw mas nws xeeb menyuam thiab yug tau ib tug tub. Ces Yawmsaub txawm hais rau kuv tias, “Cia li tis tus tub ntawd lub npe hu ua Mahaw Salahanpa, rau qhov ua ntej uas tus menyuam ntawd txawj hu niam thiab txiv, mas Damaxaka tej nyiaj txiag thiab Xamali tej qhov txhia chaw yuav raug Axilia tus vajntxwv txeeb coj mus.” Yawmsaub rov hais rau kuv tias, “Vim yog cov neeg no tsis yuav cov dej Silau‑a uas ntws tus yees thiab ntshai Lexi thiab Lemaliya tus tub, vim li no, saib nawj, Yawmsaub coj tus niag dej loj Yufeti uas hlob hlob tuaj tawm tsam lawv, yog Axilia tus vajntxwv thiab nws lub meej mom hwjchim huvsi. Tej dej yuav ntws nyab kiag tej hav dej huvsi thiab nyab kiag tej ntug dej huvsi. Thiab yuav kuav kiag mus rau hauv Yuda, thiab nyab kiag dhau plaws mus txij nkaus caj dab. Au Emanu‑ee, nws yuav nthuav tis dav puv nkaus koj lub tebchaws.” Ib tsoom neeg, cia li sau zog ua ke thiab ntshai, ib tsoom tebchaws uas nyob deb cia li tig ntsej mloog, cia li cuab zog ua rog thiab ntshai, cia li cuab zog ua rog thiab ntshai los maj. Cia li sablaj ua ke, tiamsis tej uas nej xav ntawd yuav tsis tiav, cia li hais lus, los yuav tsis tau qabhau, vim Vajtswv nrog nraim peb. Yawmsaub cev nws txhais tes uas muaj zog los rau saum kuv hais tej lus no rau kuv, thiab ntuas kuv tsis txhob ua raws li haiv neeg no ua, nws hais tias, “Txhua yam uas cov neeg no hais tias yog kev ntaus tswvyim fav xeeb, mas nej tsis txhob hais li ntawd, thiab tej uas lawv ntshai nej tsis txhob ntshai tsis txhob ceeb kiag li. Nej yuav suav tias Yawmsaub uas muaj hwjchim loj kawg nkaus nws dawb huv. Cia nws ua tus uas nej paub ntshai, cia nws ua tus uas nej ntshai kawg. Thiab nws yuav ua lub chaw dawb huv uas cawm siav, thiab ua lub pob zeb uas neeg dawm, thiab ua txhib zeb uas ua rau cov Yixayee thiab cov Yuda puavleej dawm ntog, thiab ua rooj hlua rooj nta uas cuab cov neeg uas nyob hauv Yeluxalees. Yuav muaj neeg coob dawm lub pob zeb ntawd. Lawv yuav ntog thiab yuav tawg tag, lawv yuav mag rooj hlua thiab raug ntes.” Cia li muab tej lus timkhawv khi khaws cia, thiab cia li muab tej lus qhia ntawd kaw cia rau hauv kuv cov thwjtim. Kuv yuav tos rawv Yawmsaub uas fee plhu ntawm Yakhauj caj ces lawd, thiab kuv yuav vam khom nws. Saib maj, kuv thiab cov menyuam uas Yawmsaub pub rau kuv yog txujci tseem ceeb thiab yog yam uas qhia tom hauv ntej rau cov Yixayee, yog los ntawm Yawmsaub uas muaj hwjchim loj kawg nkaus uas nyob saum lub roob Xi‑oo. Thaum luag hais rau nej tias, “Cia li mus ua nug rau tej txiv neeb txiv yaig uas qw ua nqaj ua nqug tsis tsheej suab,” mas tsis tsim nyog neeg ua nug rau lawv tus Vajtswv lov? Tsim nyog lawv ua nug rau tus uas tuag txog cov uas tseem ciaj lov? Cia li saib tej lus qhia thiab tej lus timkhawv. Cov uas hais tej lus li ntawd kuj yog cov uas tsis pom qhov kaj. Lawv yuav hla lub tebchaws mus ua ntxhov siab kawg thiab tshaib plab. Thaum lawv tshaib lawv yuav chim thiab tsa muag ntsia rau saum ntuj tsawm foom lawv tus vajntxwv thiab lawv tus Vajtswv. Lawv yuav saib rau lub ntiajteb tsuas muaj kev ntxhov siab kev tsaus ntuj kev lwj siab, lawv yuav raug muab xyeeb mus rau hauv qhov tsaus ntuj nti. Yuav tsis muaj kev tsaus ntuj rau tus uas txeev raug kev txom nyem lwj siab dua li lawm. Yav thaum ub Vajtswv ua rau Xenpuloo tebchaws thiab Nathali tebchaws raug luag saib tsis taus. Tiamsis yav tom qab nws yuav ua kom txojkev ntawm ntug hiavtxwv uas nyob sab dej Yaladee hnub poob tau koob meej, yog Kalilais uas lwm haiv neeg los nyob. Cov neeg uas taug txojkev tsaus ntuj twb pom qhov kaj uas loj kawg lawm. Cov uas nyob hauv txojkev tuag tus duab tsaus txojkev kaj ci rau lawv lawm. Koj twb pub lub tebchaws nthuav dav thiab tsav txojkev xyiv fab rau lawv lawm. Lawv zoo siab xyiv fab rau ntawm koj xubntiag, yam li xyiv fab rau thaum sau qoob loo, thiab yam li xyiv fab rau thaum muab tej uas txeeb tau los sib faib. Rab quab uas hnyav thiab tus las ntawm xub pwg thiab tus qws uas quab yuam lawv, koj twb muab lov ib yam li hnub uas ua rau cov Midee lawm. Txhua nkawm khau uas tswm av ntseeg mus ua rog, thiab txhua lub tsho uas raus hauv cov ntshav yuav raug muab ua taws hlawv hauv cub hluavtaws. Muaj ib tug menyuam yug los rau peb, muaj ib tug tub pub rau peb. Yuav muab qhov uas kav tebchaws rau saum nws xubpwg, thiab nws lub npe yuav hu tias yog lub chaw sablaj uas phimhwj kawg, yog Vajtswv uas muaj hwjchim loj kawg, yog leej txiv uas nyob mus ib txhis, yog vajntxwv leej tub uas coj kev thaj yeeb. Nws kev tswjhwm yuav dav zuj zus tuaj, thiab txojkev thaj yeeb yuav muaj tsis txawj kawg, rau saum Davi lub zwm txwv thiab saum nws lub tebchaws. Nws yuav txiav txim ncaj thiab ua ncaj ncees thiaj ua rau lub tebchaws nyob ruaj khov, thiab tuav lub tebchaws txij nimno mus ib txhis tsis kawg. Yawmsaub uas muaj hwjchim loj kawg nkaus kub siab lug yuav ua tej haujlwm no kom tiav. Tus Tswv xa xov mus tawm tsam Yakhauj, thiab yuav mus raug Yixayee. Tej pejxeem sawvdaws yuav paub, yog Efa‑i thiab cov neeg Xamali uas tsab ua loj thiab lub siab khav theeb hais tias, “Tej thwv cib pob tag lawm, tiamsis peb yuav siv tej txhib zeb uas txhwm los ua dua tshiab. Tej ntoo txiv cev raug muab ntov lawm, tiamsis peb yuav muab ntoo ciab cog rau hauv lub qub chaw.” Yawmsaub thiaj txhawb Lexi cov tshawj chim tawm tsam lawv, thiab tshum lawv cov yeeb ncuab. Cov Alas uas nyob sab hnub tuaj thiab cov Filixatee uas nyob sab hnub poob yuav rua ncauj nqos cov Yixayee. Txawm li ntawd los nws txojkev chim kuj tsis thim, thiab nws tseem tsa nws txhais tes li qub. Cov pejxeem kuj tsis tig los cuag tus uas nplawm lawv, tsis nrhiav Yawmsaub uas muaj hwjchim loj kawg nkaus. Yawmsaub thiaj li txiav Yixayee taubhau thiab kotw, thiab tej nplooj kuj yem thiab tej tauj deg rau tib hnub. Cov kev txwj laus thiab cov uas muaj meej yog lub taubhau, cov cuav xibhwb cev Vajtswv lus uas qhia tsis tseeb yog kotw. Cov thawj uas coj cov neeg no tau coj lawv yuam kev, thiab cov uas lawv coj kuj raug muab nqos. Vim li ntawd Yawmsaub thiaj tsis zoo siab rau lawv cov hluas, thiab tsis khuvleej cov menyuam ntsuag tsis muaj txiv thiab cov poj ntsuam, rau qhov txhua tus tsis hwm Vajtswv thiab ua phem thiab txhua lub qhov ncauj hais tej lus tsis paub qabhau. Txawm li ntawd los nws txojkev chim kuj tsis thim, thiab nws tseem tsa nws txhais tes li qub. Txojkev phem kub hnyiab yam li hluavtaws kub, mas kub kiag tej pos kaus ntsaj pos kaus ntsim, zes taws rau tej hav zoov ntom, mas hav zoov kub pa ncho tej niag nthwv rau saud. Lub tebchaws raug muab hlawv vim yog Yawmsaub uas muaj hwjchim loj kawg txojkev npau taws. Cov pejxeem zoo yam li tej taws uas muab rauv, tsis muaj ib tug twg tseg nws cov kwvtij txojsia li. Lawv txeeb tau rau sab xis los tseem tshaib, noj rau sab laug los kuj tsis tsau, nyias taus nyias noj kwvtij li nqaij. Manaxe noj Efa‑i, Efa‑i noj Manaxe, mas ob tug koom tawm tsam Yuda. Txawm li ntawd los Yawmsaub txojkev chim kuj tsis thim, thiab nws tseem tsa nws txhais tes li qub. Cov uas rhawv tej kevcai tsis ncaj thiab cov uas sau tej kevcai quab yuam yuav raug txom nyem lauj! Lawv ua li ntawd xwv lawv thiaj tsis tu plaub ncaj rau cov neeg txom nyem, thiab tsuj kuv haiv neeg cov uas pluag txojcai, thiab txeeb tau cov poj ntsuam li feem thiab txeeb cov menyuam ntsuag uas tsis muaj txiv li feem. Nej yuav ua li cas rau hnub uas raug txiav txim, yog hnub uas tej vij sub vij sw tuaj deb deb tuaj raug nej? Nej yuav khiav mus vam leejtwg? Nej yuav muab nej tej nyiaj txiag khaws cia rau qhovtwg? Tsis tshuav ib yam dabtsi li lawm tsuas yog nej yuav nyob ua nrob qaum khoov nkoos hauv nruab nrab cov uas raug ntes, lossis ntog rau hauv nruab nrab cov neeg uas raug tua lawm. Txawm li ntawd los nws txojkev chim kuj tsis thim, thiab nws tseem tsa nws txhais tes li qub. “Axilia yog kuv txojkev chim rab nplawm, thiab yog kuv txojkev npau tus qws. Kuv txib nws mus tawm tsam haiv neeg uas tsis hwm Vajtswv, kuv kom nws mus ua rog rau haiv neeg uas kuv chim, mus txeeb mus lws tej qhov txhia chaw thiab muab tsuj pes ntiag yam li tsuj pas kua av hauv txojkev. Tiamsis nws tsis npaj siab ua npaum li ntawd thiab tsis xav ua li ntawd xwb, nws npaj siab ua kom puam tsuaj thiab rhuav tshem ntau haiv neeg pov tseg. Rau qhov nws hais tias, ‘Kuv cov thawj rog txhua tus kuj yog vajntxwv huvsi thiab. Lub moos Khanau kuj tsuas zoo li lub moos Khakhemi xwb, thiab lub moos Hama kuj tsuas zoo li lub moos Apa xwb, thiab lub nroog Xamali kuj tsuas zoo li Damaxaka xwb. Kuv txhais tes twb ntaus tau tej tebchaws uas teev dab thiab muaj dab mlom loj dua Yeluxalees thiab Xamali tej. Kuv yuav tsis ua rau Yeluxalees thiab nws tej dab mlom ib yam li kuv twb ua rau Xamali thiab nws tej dab mlom lawm lov?’ ” Thaum tug Tswv twb ua nws tej haujlwm rau Xi‑oo thiab Yeluxalees tiav lawm, nws yuav txiav txim rau qhov uas Axilia tus vajntxwv khav theeb heev thiab tsab ua loj. Vim nws hais tias, “Kuv siv kuv txhais tes lub zog ua tau tej no, thiab siv kuv lub tswvyim ua vim kuv nkag siab zoo. Kuv tau rhuav tshem ntau haiv neeg tej ciam teb thiab tau lws lawv tej nyiaj txiag. Kuv twb nrau cov uas nyob saum tej zwm txwv poob tag ib yam li tus txiv nyuj nrau. Kuv txhais tes tau muab kiag lwm haiv neeg tej nyiaj txiag ib yam li muab zes noog. Thiab ib yam li khaws tej qe uas noog twb tso tseg lawm, kuv twb sau zog lub ntiajteb huvsi ib yam li ntawd, tsis muaj ib tug ntxuaj tis tsauj lossis rua ncauj quaj nthe.” Rab taus tseem yuav khav ua loj dua tus uas siv thiab lov? Rab kaw tseem yuav tsab ua loj dua tus uas kaw thiab lov? Rab nplawm yuav ua li cas nqa tau tus uas tuav nws thiab rab qws yuav ua li cas nqa tau tus uas tsis yog ntoo? Tus Tswv yog Yawmsaub uas muaj hwjchim loj kawg nkaus yuav tso mob yuag los rau hauv Axilia cov neeg uas rog nthaws, thiab yuav rauv taws kub nws lub koob meej ib yam li hluavtaws kub. Cov Yixayee qhov kaj yuav ua hluavtaws thiab tus Dawb Huv hauv cov Yixayee yuav ua nplaim taws. Ib hnub xwb yuav hlawv nws tej pos kaus ntsaj pos kaus ntsim kub tag huvsi. Yawmsaub yuav ua kom nws tej hav zoov uas tsim txiaj thiab tej teb uas ntsu qoob puam tsuaj tag tshooj kiag lub cev thiab ntsuj plig huvsi, mas yuav zoo yam nkaus li neeg mob kis yuag sem tag. Tej ntoo hauv nws tej hav zoov tshuav tsawg kawg, ib tug menyuam yaus los suav tau tag huvsi. Hnub ntawd cov Yixayee uas tseem tshuav nyob thiab Yakhauj caj ces uas dim txojsia nyob yuav tsis vam khom tus uas ntaus lawv, tiamsis lawv yuav vam khom Yawmsaub tiag tiag li uas yog Yixayee tus Vajtswv uas dawb huv. Cov uas tseem tshuav nyob ntawd yuav los cuag Vajtswv uas muaj hwjchim loj kawg, yog Yakhauj caj ces uas tshuav nyob. Yixayee 'e, txawm yog koj haiv neeg coob npaum li tej xuab zeb ntawm ntug hiavtxwv, los cov uas yuav rov los muaj tsawg heev. Qhov uas yuav ua kom puam tsuaj twb teem cia lawm, yeej yuav ua ncaj ua ncees rau txhua yam, vim tug Tswv uas yog Yawmsaub tus muaj hwjchim loj kawg nkaus, yuav ua kom puam tsuaj tag thoob plaws ntiajteb raws li uas twb teem cia lawm. Vim li no tug Tswv uas yog Yawmsaub tus muaj hwjchim loj kawg nkaus hais tias, “Kuv haiv neeg uas nyob hauv Xi‑oo 'e, nej tsis txhob ntshai cov Axilia rau thaum lawv xuas rab nplawm ntaus nej thiab tsa rab qws tawm tsam nej ib yam li cov Iyi txeev ua rau nej. Tshuav tsis ntev kuv yuav tsis chim rau nej lawm, tiamsis kuv txojkev chim yuav ua kom lawv puam tsuaj.” Yawmsaub uas muaj hwjchim loj kawg nkaus yuav tsa nplawm los tawm tsam lawv ib yam li thaum nws ntaus cov Midee ntawm lub pob zeb Aulej, thiab nws yuav tsa nws tus pas nyob saum dej hiavtxwv ib yam li tsa hauv Iyi tebchaws lawm. Hnub ntawd lawv tej nra hnyav yuav plam ntawm nej tej xub pwg thiab lawv tus quab ntawm nej caj qwb yuav raug muab ua puam tsuaj. Lawv twb tshais ntawm lub moos Limoo. Lawv twb los txog Aiyaj lawm, lawv twb hla Miloo lawm, lawv khaws lawv tej cuab yeej toom txeem rau ntawm Mimaj. Lawv twb hla hauv kem roob tuaj lawm, lawv so hmo ntuj ntawm Kenpa. Lub moos Lama ras zom zaws, Xa‑u lub moos Kinpe‑a twb khiav lawm. Kali tus ntxhais 'e, cia li tsa suab quaj. La‑isa 'e, cia li mloog. Anathau 'e, ntxim hlub kawg li. Mamena tabtom khiav, cov neeg Kenpi khiav kom dim plaws. Hnub no ntag lawv yuav so hauv lub moos Nau, lawv yuav nqus nrim rau Xi‑oo tus ntxhais lub roob, yog lub hauv roob Yeluxalees. Saib maj, tug Tswv uas yog Yawmsaub tus muaj hwjchim loj kawg nkaus yuav siv nws lub zog uas ntshai kawg txiav tej ceg ntoo. Tej ntoo uas siab kawg yuav raug muab ntov vau thiab tej uas siab yuav raug muab qhau vau. Yawmsaub yuav xuas taus ntov lub hav zoov tsaus nti, thiab tej ntoo siab zoo nkauj hauv Lenpanoo yuav vau. Yuav muaj ib tug ntsuag hlav ntawm Yexi lub hauv paus tuaj, yuav muaj ib tug ceg hlav ntawm nws tej cag tuaj. Yawmsaub tus Ntsuj Plig yuav nyob hauv tus ntawd, yog tus plig uas pub tswvyim thiab kev nkag siab, yog tus plig uas txawj taw qhia thiab pub hwjchim, yog tus plig uas pub kev txawj ntse thiab paub ntshai Yawmsaub. Tus ntawd yuav zoo siab hlo hwm thiab paub ntshai Yawmsaub. Nws yuav tsis tu plaub raws li nws lub qhov muag pom, lossis tu raws li lub qhov ntsej tau hnov. Nws yuav tu plaub ncaj ncees rau cov pluag, thiab tu rau cov uas tsis muab hlob hauv lub ntiajteb raws li raug cai. Nws yuav siv nws lub qhov ncauj ua rab qws ntaus lub ntiajteb, thiab siv cua ntawm nws daim tawv ncauj tua cov neeg limhiam. Txojkev ncaj ncees yuav ua nws txoj siv sia, thiab txojkev ncaj uas tso siab tau yuav sia rawv ntawm nws duav. Hma yuav nrog menyuam yaj nyob ua ke, tsov pom txwv yuav nrog menyuam tshis pw ua ke, menyuam nyuj thiab tsov ntxhuav yuav nrhiav noj ua ke, ib tug menyuam yaus yuav coj kev mus. Maum nyuj thiab dais yuav noj ua ke, ob tug ntawd li menyuam yuav pw ua ke, tsov ntxhuav yuav noj quav nyab ib yam li nyuj. Menyuam mos noj mis yuav ua si ntawm nab raj kub sai lub rooj qho, thiab menyuam tseg mis yuav tso tes rau saum nab quav twm lub zes. Tej tsiaj ntawd yuav tsis ua kom mob thiab tsis ua kom puam tsuaj thoob plaws hauv kuv lub roob uas dawb huv, vim lub ntiajteb yuav paub txog Yawmsaub thoob plaws, ib yam li dej puv nkaus nruab hiavtxwv. Hnub ntawd Yexi tus cag yuav muab tsa ua tus chij rau ib tsoom neeg. Ib tsoom tebchaws yuav nrhiav nws, thiab nws lub chaw nyob yuav muaj meej ci ntsa iab. Hnub ntawd Yawmsaub yuav cev nws txhais tes mus ua zaum uas ob kom thiaj coj tau nws cov neeg uas tseem tshuav nyob hauv Axilia, Iyi, Palau, Khuj, Elas, Sina, Hama thiab nyob raws ntug hiavtxwv rov qab los. Nws yuav tsa ib tug chij rau ib tsoom tebchaws, thiab yuav sau cov Yixayee uas raug ntiab tawm hauv tebchaws lawd, thiab qaws cov Yuda uas khiav ua sab ua sua los ntawm plaub ceg kaum ntuj los. Qhov uas Efa‑i khib yuav ploj mus, thiab cov uas tsim txom Yuda yuav raug muab txiav pov tseg, Efa‑i yuav tsis khib Yuda, Yuda yuav tsis tsim txom Efa‑i lawm. Lawv ob pab ntawd yuav qhwv nkaus los rau saum cov Filixatee uas nyob sab hnub poob lub nrob qaum, thiab yuav koom tes mus lws cov neeg uas nyob sab hnub tuaj. Lawv yuav tsa tes t awm tsam cov Edoo thiab cov Mau‑a, thiab cov Asmoo yuav mloog lawv lus. Thiab Yawmsaub yuav ua rau lub kaum hiavtxwv Iyi puam tsuaj tag, thiab yuav tso nws tej cua ntsawj kub lug yoj tes rau saum tus dej Yufeti, thiab nplawm kom ua kiag xya tus kwj deg, neeg thiaj hla mus tau saum cov av qhuav. Yuav muaj ib txoj niag kev tawm hauv Axilia tuaj rau nws haiv neeg uas tseem tshuav tau taug, ib yam li muaj rau cov Yixayee rau thaum lawv tawm hauv Iyi tebchaws los. Hnub ntawd koj yuav hais tias, “Au Yawmsaub, kuv ua koj tsaug txawm yog koj chim rau kuv los koj kuj thim txojkev chim lawm thiab nplij kuv lub siab. Vajtswv yog txojkev cawm kuv dim, kuv yuav tso siab thiab tsis ntshai dabtsi, vim Vajtswv Yawmsaub yog kuv lub zog thiab kuv zaj nkauj, thiab nws kuj yog txojkev cawm kuv dim. Koj yuav zoo siab xyiv fab ntaus dej ntawm lub qhov dej uas cawm txojsia.” Hnub ntawd koj yuav hais tias, “Cia li ua Yawmsaub tsaug, cia li thov hu nws lub npe, cia li piav nws tej haujlwm rau hauv ib tsoom tebchaws, piav kom paub tias nws lub npe loj tshaj plaws. Cia li hu nkauj qhuas Yawmsaub rau qhov nws tau ua tej haujlwm tseem ceeb kawg, qhia zaj no kom paub thoob plaws hauv ntiajteb. Cov neeg Xi‑oo 'e, cia li qw hu nkauj zoo siab xyiv fab vim cov Yixayee tug Tswv uas Dawb Huv loj tshaj plaws nyob hauv nej nruab nrab.” Tej lus uas Vajtswv qhia rau Yaxaya uas yog Amoj tus tub pom txog Npanpiloo. Cia li tsa tus chij ntaus rog rau saum lub roob do hau, cia li hu lawv, cia li co tes kom lawv nkag cov thawj lub rooj loog mus rau hauv. Kuv twb hais rau cov uas kuv xaiv cia lawm thiab twb hu kuv cov tub rog uas siab loj siab tuab yog kuv cov uas khav theeb thiab khav ntxhias, kom lawv mus ua raws li kuv chim. Mloog saib, lub suab nrov ntshu nrooj saum tej roob yam li ib pab neeg coob coob. Mloog saib, lub suab ntawd yog tej tebchaws thiab tej haiv neeg tuaj txoos ua ke. Yawmsaub uas muaj hwjchim loj kawg nkaus tabtom txhij tub rog coob coob mus ntaus rog. Lawv tuaj tej tebchaws uas deb tuaj thiab tuaj qab ntuj kawg tuaj, twb yog Yawmsaub thiab nws kev chim tej cuab yeej, thiaj ua rau lub ntiajteb puam tsuaj huvsi. Cia li quaj nyiav rau qhov hnub uas Yawmsaub teem cia los ze lawm, hnub ntawd yuav los yog hnub uas Vajtswv tus muaj hwjchim loj kawg nkaus yuav coj kev puam tsuaj los. Vim li ntawd txhua txhais tes yuav tsaug leeg thiab txhua tus lub siab yuav yaj tag. Lawv yuav poob siab tag, lawv yuav raug kev mob kev ntsaj. Lawv yuav nti yam nkaus li pojniam mob plab yug menyuam. Lawv ib leeg yuav saib ib leeg hle muag hlo ceeb kawg nkaus ua ntsej muag thim xem tag. Saib maj, Yawmsaub hnub tabtom los, ua nyaum npau taws vog chim heev ua rau lub ntiajteb nyob do cuas cia thiab muab tej neeg txhaum rhuav tshem ploj tag. Tej hnub qub saum ntuj thiab tej ntsauv hnub qub yuav tsis ci lawm. Txawm yog lub hnub tawm tuaj los yuav tsaus ntuj nti thiab lub hli yuav tsis muaj duab ci lawm. Kuv yuav rau txim rau lub ntiajteb vim yog tej kev phem, thiab tej neeg limhiam vim lawv tej kev txhaum. Kuv yuav ua rau cov neeg muab hlob tej kev khav theeb ploj tag thiab yuav txo cov neeg ua limhiam ntais ntuj uas tsab ua loj poob tag. Kuv yuav ua kom ceeblaj nrhiav tau tej txivneej heev dua li nrhiav tau tej tseem kub, thiab ceeblaj nrhiav tau neeg heev dua li nrhiav tau tej kub ntawm Aufi. Kuv yuav ua kom lub ntuj ntseeg nkaws, thiab lub ntiajteb ua zog koog txav dua ib qho, vim yog Yawmsaub uas muaj hwjchim loj kawg nkaus npau taws rau hnub uas nws chim heev. Txhua tus nyias yuav tig rov mus rau nyias haiv neeg thiab txhua tus nyias yuav khiav mus rau nyias lub tebchaws, ib yam nkaus li tus kauv seb uas raug luag raws thiab yam li tej yaj uas tsis muaj tus uas sau los ua ib pab. Yog luag ntsib tug twg mas tus ntawd yuav raug muab nkaug, thiab ntes tau tus twg mas yuav raug ntaj tua. Lawv tej menyuam mos yuav raug muab ntsawm rau hauv av tuag tag tab meeg ntawm lawv xubntiag, lawv tej tsev yuav raug lws thiab lawv tej pojniam yuav raug yuam. Kuv tabtom tshum cov Midia lub siab kom tawm tsam lawv, cov Midia yog cov uas tsis ntshaw tej nyiaj thiab tsis nyiam tej kub. Lawv tej hneev yuav tua tej tub hluas tuag tag. Lawv yuav tsis khuvleej tej menyuam mos, thiab lawv lub qhov muag yuav tsis tab ncuab tej menyuam yaus. Mas lub nroog Npanpiloo uas yog lub nroog ci nplas zoo dua lwm lub tebchaws, thiab yog cov Kheedia lub koob meej thiab yog lub chaw uas lawv khav ntxhias, mas yuav zoo ib yam li lub moos Xaudoo thiab Kaumaula rau thaum Vajtswv muab rhuav tshem tag. Yuav tsis muaj leejtwg mus nyob hauv Npanpiloo lossis nyob txhua tiam neeg. Yuav tsis muaj ib tug Alam mus tsa tsev ntaub rau hauv, thiab tsis muaj ib tug yug yaj yuav coj nws pab yaj mus pw rau qhov ntawd. Tej tsiaj qus yuav pw rau hauv, thiab lawv tej tsev yuav muaj lib nyug nyob puv nkaus, tej noog ntxhuav yuav nyob qhov ntawd, thiab tej dab tshis yuav seev cev yees rau hauv. Tej hma liab yuav quaj nqov hauv tej chaw tsom faj, thiab tej hma ntsuab yuav quaj nqov hauv vajntxwv tej vaj tse zoo nkauj. Lub nroog ntawd li sijhawm twb los ze lawm, thiab nws tej hnub nyoog yuav rub tsis tau ntev lawm. Yawmsaub yuav khuvleej Yakhauj thiab yuav rov xaiv Yixayee dua, thiab yuav tsa lawv nyob hauv lawv lub tebchaws, thiab lwm haiv neeg kuj yuav nrog lawv nyob thiab yuav koom nrog Yakhauj caj ces nyob ua ke. Thiab ib tsoom tebchaws yuav coj lawv los nyob hauv lawv tej qub teb qub chaw mas Yixayee caj ces yuav tau cov neeg ntawd ua cov Yixayee tug thiab ua tub qhe nkauj qhev rau hauv Yawmsaub lub tebchaws. Cov Yixayee yuav ntes cov uas txeev ntes lawv, thiab yuav kav cov uas txeev quab yuam lawv. Thaum Yawmsaub pub nej tau so tsis raug kev mob nkeeg thiab kev ntxhov siab thiab dim ntawm tej haujlwm hnyav uas nej raug lawv quab yuam ua, mas nej yuav tsa suab thuam luag Npanpiloo tus vajntxwv li no tias, “Tus uas quab yuam peb kuj ntsiag to lawm, thiab nws txojkev npau taws ua nruj ua tsiv kuj ntsiag to lawm lauj! Yawmsaub twb muab cov neeg limhiam tus qws lov lawm, yog lov cov thawj kav tus cwj uas ntaus tej haiv neeg ua npau taws vog tsis tseg tsis tu li, thiab kav rawv tej tebchaws ua chim tsawv thiab tsim txom tsis tseg tsis tu li. Thoob ntiajteb tau so siab tus yees, lawv tsa suab hu nkauj zoo siab. Tej ntoo ciab nplooj suab thiab tej ntoo ciab hauv Lenpanoo zoo siab xyiv fab vim koj ntog lawm thiab hais tias, ‘Txij thaum koj poob qes lawm tsis muaj leejtwg tuaj ntov peb lawm.’ Tub tuag teb tabtom npaj nroos tos txais koj mus, nws txhib cov uas twb tuag lawm sawv tos txais koj, uas yog txhua tus thawj kav ntiajteb thiab txhib txhua tus vajntxwv uas kav tej tebchaws kom sawv ntawm lawv lub zwm txwv tos txais koj. Lawv txhua tus yuav hais rau koj tias, ‘Koj kuj tsaug leeg ib yam li peb lawm. Koj yeej zoo li peb lawm.’ Koj lub hwjchim thiab meej mom, thiab tej suab nkauj nog ncas poob los rau hauv tub tuag teb lawm, mas kas pua koj lub chaw pw thiab cab ua daim pam rau koj vov. “Lub hnub qub toog uas ci nruab hnub uas tshwm thaum kaj ntug 'e, koj poob saum ntuj los lawm lauj! Koj uas ua rau tej tebchaws poob qes kawg, koj raug muab txiav poob rau hauv pem teb lawm lauj! Koj xav hauv koj lub siab tias, ‘Kuv yuav nce mus rau saum ntuj, kuv yuav tsa kuv lub zwm txwv siab dua Vajtswv tej hnub qub huvsi, kuv yuav nyob saum lub roob siab pem hauv ntuj uas tej timtswv tuaj txoos ua ke. Kuv yuav nce mus dhau saum cov huab. Kuv yuav ua kom kuv zoo ib yam nkaus li tus uas Loj Dua Ntais.’ Koj raug muab pov rau hauv tub tuag teb, poob rau hauv lub qhov uas tob tshaj plaws. Cov uas pom koj yuav saib ntsia ntsoov koj thiab yuav xav hais tias, ‘Tus yawg no puas yog tus uas ua rau lub ntiajteb ntseeg nkaws, thiab yog tus uas co tej tebchaws, thiab ua rau lub ntiajteb nyob do cuas cia thiab rhuav tej nroog puam tsuaj tag, thiab tsis tso tej neeg uas nws ntes tau rov mus tsev?’ Tej tebchaws txhua tus vajntxwv kuj nyias pw hauv nyias lub qhov ntxa uas muaj meej mom. Tiamsis koj raug muab laim pov tseg deb ntawm koj lub qhov ntxa, yog lub cev tuag uas ntxub kawg li, cov neeg raug tua sib tsub sib nias npog koj, yog cov uas raug ntaj nkaug thiab nqes mus rau lub qhov zeb uas yog qhov tuag, ib yam li lub cev tuag uas raug muab tsuj pes ntiag. Yuav tsis muab koj log nrog lwm tus vajntxwv ua ke vim koj twb ua rau koj lub tebchaws puam tsuaj thiab koj tua koj cov pejxeem pov tseg. “Thov kom tsis txhob muaj leejtwg hais txog tus neeg phem caj ces dua li lawm. Cia li npaj tua nws tej menyuam pov tseg vim yog leej txiv tej kev txhaum muaj txim. Tsis txhob cia lawv sawv los kav lub qab ntuj thiab rhawv tej moos puv nkaus lub ntiajteb.” Yawmsaub uas muaj hwjchim loj kawg nkaus hais tias, “Kuv yuav sawv tawm tsam lawv thiab yuav txiav Npanpiloo lub npe mus thiab tsis pub ib tug neeg nyob hauv kiag li thiab txiav lawv tej tub ki thiab lawv tej caj ces pov tseg.” Yawmsaub hais li no ntag. “Kuv yuav muab Npanpiloo ua plas chaw nyob thiab cia ua tej pas iav. Kuv yuav xuas rab khaub rhuab uas yog kev puam tsuaj cheb kom du lug.” Yawmsaub uas muaj hwjchim loj kawg nkaus hais li no ntag. Yawmsaub uas muaj hwjchim loj kawg nkaus cog lus khov kho hais tias, “Kuv tau kom haujlwm cia li cas lawm yeej yuav muaj raws li ntawd, thiab kuv tau xav tseg li cas yeej yuav muaj tshwm raws li ntawd. Kuv yuav ntaus cov Axilia hauv kuv lub tebchaws kom puam tsuaj tag huvsi, thiab muab lawv tsuj pes ntiag saum kuv tej roob. Mas lawv tus quab yuav plam ntawm kuv cov neeg mus thiab lawv lub nra yuav plam ntawm kuv cov neeg lub xub pwg.” Tej no yog tej uas kom tseg rau lub ntiajteb huvsi thiab no yog Yawmsaub txhais tes uas tsa rau saum ib tsoom tebchaws huvsi. Vim Yawmsaub uas muaj hwjchim loj kawg nkaus twb kom tseg cia lawm, leejtwg yuav muab rhuav tau pov tseg? Nws twb tsa hlo nws txhais tes lawm, leejtwg yuav ua tau kom rov qab nkaum tes? Xyoo uas vajntxwv Aha tuag lawm, Vajtswv hais tej lus no tuaj hais tias, “Cov Filixatee sawvdaws 'e, nej tsis txhob zoo siab xyiv fab hais tias rab qws uas ntaus nej lov lawm, rau qhov tus nab muaj taug tseem yuav tshwm ib tug nab raj kub sai, thiab yuav tshwm ib tug zaj uas txawj ya. Thiab tej neeg pluag tej tub hlob yuav muaj noj muaj haus, thiab cov neeg txom nyem yuav pw tso siab lug. Tiamsis kuv yuav muab kev tshaib nqhis tua nej caj ces thiab cov uas tshuav nyob los kuv yuav muab tua pov tseg huvsi. Tej rooj loog 'e, cia li quaj nyiav, lub nroog 'e, cia li quaj, txhua tus hauv Filixatee tebchaws 'e, nej cia li ntshai ua siab ntsws yaj tag vim yog tej pa taws tawm sab ped tuaj, thiab tsis muaj ib tug tub rog yuav poob qab li. Yuav teb li cas rau Filixatee cov tub tshaj xo? Kuj teb tau tias, ‘Yawmsaub twb rhawv lub moos Xi‑oo mas nws cov neeg uas raug kev txom nyem thiaj tau chaw cawm siav rau hauv.’ ” Tej lus uas hais txog Mau‑a. Vim yog tib hmos xwb lub moos A raug puam tsuaj, Mau‑a thiaj liamsim tag. Vim yog tib hmos xwb lub moos Khi raug puam tsuaj, Mau‑a thiaj liamsim tag. Cov neeg hauv lub moos Dinpoo tau nce mus quaj qw saum lub chaw siab uas teev dab. Mau‑a quaj nyiav txog lub moos Nenpau thiab lub moos Medenpa. Lawv txhua lub taubhau do cuas thiab muab hwj txwv chais du lug huvsi. Lawv hnav khaub seev tsaj nyob hauv tej kev, txhua tus quaj nyiav kua muag ntws lug saum tej tsev thiab tom tej tshav puam. Lub moos Hesanpoo thiab lub moos Ele‑ale quaj qw, lawv lub suab quaj nrov mus txog lub moos Yahaj. Vim li ntawd Mau‑a cov tub rog uas tuav cuab yeej thiaj li quaj nrov ua siab tshee hnyo. Kuv quaj mob siab cov Mau‑a. Mau‑a cov neeg khiav mus cawm siav rau lub moos Xau‑a thiab lub moos Elaselisiya. Lawv quaj taug kev nce mus txog lub moos Luhij, lawv tsa suab quaj tej kev puam tsuaj taug kev mus txog lub moos Haulauna‑i. Tus dej ntawm Nili kuj qhuav tag, tej nyom kuj qhuav qhawv, tsis hlav tej zaub mos, tsis tshuav tej zaub uas ntsuab li lawm. Tej uas lawv khwv tau ntau nplua mias thiab tej uas lawv sau khaws cia, lawv kuj thauj mus hla tus dej Ntoo Lwg Zaj. Lub suab quaj nrov thoob plaws Mau‑a tebchaws, lub suab nyiav nrov mus txog lub moos Ela‑i, thiab nrov mus txog lub moos Npe‑aweli, rau qhov muaj ntshav puv nkaus tus dej hauv lub moos Dimoo, txawm yog li ntawd los kuv tseem yuav tsav ntxiv vij sub vij sw rau Dimoo dua thiab. Kuv yuav tso tsov ntxhuav tom cov Mau‑a uas khiav dim thiab tom cov uas tseem tshuav nyob hauv lub tebchaws. Lawv tau xa menyuam yaj ntawm lub moos Xelaj taug txojkev tebchaws moj sab qhua mus rau tus uas kav Yixayee tebchaws, yog xa mus rau Xi‑oo tus ntxhais lub roob. Zoo yam nkaus li tej noog uas tabtom ya khiav thiab zoo yam li tej menyuam noog uas poob ntawm lub zes, mas Mau‑a tej ntxhais zoo ib yam li ntawd rau ntawm tej chaw hla tus dej Anoo. Cov Mau‑a hais tias, “Thov koj nrog peb sablaj, thov pub kev ncaj ncees rau peb, thov koj ua ntxoov ntxoo roos peb ib yam li tsaus ntuj rau thaum tav su, thov pab zais peb uas raug luag raws, thov tsis txhob ntxeev siab rau cov uas tuaj cawm siav. Thov cia Mau‑a cov neeg uas raug luag caum, nyob hauv koj nruab nrab, thov koj ua chaw cawm siav tiv thaiv lawv dim ntawm tus uas ua kom puam tsuaj.” Thaum uas tsis muaj leejtwg quab yuam lawm thiab tseg tsis ua kev puam tsuaj lawm, thiab thaum tus uas tsuj yuam nej tau ploj hauv lub tebchaws lawm, mas thaum ntawd yuav tsa ib lub zwm txwv uas muaj txojkev hlub ruaj khov, thiab Davi caj ces muaj ib tug yuav nyob saum ua ncaj ua ncees. Nws yuav txiav txim ncaj thiab maj nroos ua ncaj ncees. Peb tau hnov txog cov Mau‑a txojkev khav theeb, lawv yeej khav theeb tiag tiag, thiab hnov txog qhov uas lawv muab hlob, lawv khav theeb thiab lawv muaj muaj plhus, los tej uas lawv khav ntawd tsis muaj tseeb. Vim li ntawd Mau‑a yuav quaj nyiav, txhua tus yuav rov quaj nyiav Mau‑a. Cia li quaj ntsuag lwj siab ntsuav nco txog tej ncuav txiv hmab qhuav hauv lub moos Khihalexe. Tej liaj teb ntawm lub moos Hesanpoo thiab tej txiv hmab ntawm lub moos Xima liamsim tag, cov thawj uas kav tej tebchaws muab tej ceg txiav pov tseg tag, yog tej ceg uas txeev hla mus txog lub moos Yaxaw thiab nthuav mus txog tebchaws moj sab qhuav. Nws tej ntsuag hlav nthuav mus thiab mus dhau dej hiavtxwv. Vim li ntawd kuv thiaj quaj ib yam li cov neeg hauv lub moos Yaxaw quaj tej txiv hmab ntawm Xima. Hesanpoo thiab Ele‑ale 'e, kuv kua muag ntub neb tag vim yog lub suab qw zoo siab rau tej txiv uas siav lawm thiab tej qoob uas neb sau tau lawm tu nrho lawm. Luag muab kev xyiv fab kev zoo siab rho hauv tej teb uas ntsu qoob lawm, tsis muaj leejtwg hu nkauj hauv tej vaj txiv hmab, tsis muaj leejtwg qw zoo siab, tsis muaj leejtwg tsuam kua txiv hmab ntawm tej qhov tsuam, lub suab uas qw tsuam txiv hmab ntsiag to li lawm. Vim li no kuv lub siab thiaj li quaj ib yam li nkauj nog ncas rau Mau‑a thiab kuv tus ntsuj plig quaj rau lub moos Khihele. Thaum Mau‑a mus cuag dab thiab nws txog siav rau ntawm lub chaw siab uas teev dab, thaum nws mus thov rau ntawm lub tsev dab nws kuj tsis tau dabtsi li. Tej no yog tej lus uas Yawmsaub hais txog Mau‑a yav thaum ub. Tiamsis nimno Yawmsaub hais tias, “Hauv peb xyoos raws li uas cog lus ntiav tub zog, txawm yog Mau‑a pab neeg coob coob los nws lub koob meej yuav raug saib tsis taus thiab cov uas tshuav nyob los kuj tsawg tsawg thiab tsis muaj zog.” Tej lus uas hais txog lub nroog Damaxaka. “Saib maj, Damaxaka yuav tsis tau ua lub nroog lawm yuav pob tag ua tej niag pawg cia. Alau‑aw tej moos yuav nyob do cuas cia mus ib txhis, yuav ua chaw rau yaj rau tshis nyob thiab pw, tsis muaj leejtwg yuav ua rau tej tsiaj ntawd ntshai. Tej chaw ruaj khov hauv Efa‑i yuav ploj tag, thiab tej hwjchim uas kav tebchaws yuav ploj tag hauv Damaxaka mus. Thiab cov Alas uas tseem tshuav nyob yuav zoo ib yam li cov Yixayee uas poob koob meej.” Yawmsaub uas muaj hwjchim loj kawg nkaus hais li no ntag. “Txog hnub ntawd Yakhauj lub meej mom yuav poob qes thiab nws lub cev uas rog yuav yuag. Yuav zoo yam nkaus li thaum tus hlais qoob mus sau tej teg qoob uas muab tsa cia thiab nws txhais tes nruam tej hnab mog, thiab zoo yam li thaum ib tug xawb tej hnab qeb hauv hav Lefa‑i. Yuav tshuav ib txhia nyob hauv, ib yam nkaus li thaum ntaus tsob txiv aulib zeeg mas tseem tshuav ob peb lub nyob saum ntsis ceg, lossis tshuav plaub tsib lub nyob saum tej ceg ntoo.” Yawmsaub uas yog Yixayee tus Vajtswv hais li no ntag. Hnub ntawd tej neeg yuav muab siab rau rau tus uas tsim lawv, thiab lawv yuav tsa qhov muag ntsia ntsoov tus Dawb Huv hauv cov Yixayee. Lawv yuav tsis quav ntsej tej thaj teev dab uas lawv txhais tes ua, thiab lawv yuav tsis ntsia ntsoov tej uas lawv xuas ntiv tes ua, tsis hais tej ncej dab Asela lossis tej thaj hlawv hmoov xyab. Hnub ntawd lawv tej moos uas muaj ntsa loog ruaj khov yuav zoo yam nkaus li cov Hivai thiab cov Amaulai tej chaw uas nyob do cuas cia, yog tej chaw uas lawv muab tso tseg vim cov neeg Yixayee. Tsuas yog muaj nyob do cuas cia xwb. Nej tsis nco qab Vajtswv uas cawm nej dim thiab tsis nco ntsoov txhib zeb uas yog nej lub chaw cawm siav. Txawm yog nej cog qoob loo zoo thiab cog tej ceg ntoo uas teev lwm haiv neeg li dab, txawm yog hnub uas nej cog nej ua kom tuaj thiab hlob, thiab ua kom tawg paj rau tagkis uas nej tseb, los tej ntawd yuav khiav tag nej tsis tau sau, tsuas muaj hnub uas lwj siab thiab muaj mob kho tsis tau xwb. Muaj suab nrov ntsoog qees ntawm ntau haiv neeg tuaj, lawv tej suab nrov vig voog yam li hiavtxwv ntas. Muaj suab nyooj luj laws hauv tej tebchaws tuaj, lawv tej suab nyooj luj laws nrov yam li dej ntsawj. Tej tebchaws nyooj luj laws yam nkaus li dej ntsawj nrov, tiamsis Yawmsaub yuav txwv mas lawv yuav khiav mus deb, thiab yuav raug muab raws yam li tej npluag uas cua ntsawj ya saum tej roob thiab yam li tej cua daj cua dub ntsawj tej quav nyab. Saib maj, thaum tsaus ntuj kuj muaj kev ntshai kawg li. Tsis tau kaj ntug twb tsis muaj lawv tag lawm. Cov neeg uas txeeb peb tej qhov txhia chaw thiab cov uas lws peb yuav raug tej xwm txheej no. Lub tebchaws uas muaj kooj tis ntxuaj nrov voog uas nyob dhau tus dej hauv Khuj tebchaws 'e, koj xa tub tshaj xo mus hauv hiavtxwv, yog caij lub nkoj uas xuas pias iav ua. Nej uas yog tub tshaj xo sai, nej cia li mus cuag ib haiv neeg uas lub cev siab siab thiab daim tawv nqaij mos nyoos, yog haiv neeg uas luag nyob ze nyob deb los ntshai, yog haiv neeg uas muaj zog thiab pheej kov yeej thiab muaj dej quas lawv lub tebchaws. Nej sawvdaws uas nyob hauv qab ntuj, nej cov uas nyob hauv lub ntiajteb, thaum uas tsa tus chij saum tej roob, nej cia li tsa muag ntsia. Thaum tshuab raj xyu, nej cia li mloog. Vim Yawmsaub hais li no rau kuv tias, “Kuv yuav nyob twjywm ntawm kuv lub chaw nyob saib tuaj, zoo yam nkaus li duab tshav ntuj ci laim txias thaum tshav ntuj kub, thiab ib yam nkaus li huab zeeg niab nrog lwg thaum lub caij sau qoob.” Thaum tsis tau txog lub caij sau qoob uas paj nra dua lawm thiab txiv hmab tabtom siav, Yawmsaub yuav muab rab liag los tav tej ntsuag uas hlav, thiab yuav txiav tej ceg uas tabtom nthuav pov tseg. Mas lawv sawvdaws yuav raug muab pov tseg huvsi rau tej dav noj twm pem tej roob thiab rau tej tsiaj qus hauv ntiajteb, mas dav noj twm yuav muab noj rau lub caij ntuj kub, thiab tej tsiaj qus huvsi hauv ntiajteb yuav muab noj rau lub caij ntuj no. Mas thaum ntawd lawv yuav coj tshav ntuj tuaj pub rau Yawmsaub uas muaj hwjchim loj kawg nkaus, yog coj ntawm ib haiv neeg uas lub cev siab siab thiab daim tawv nqaij mos nyoos tuaj, yog haiv neeg uas luag nyob ze nyob deb los ntshai, yog haiv neeg uas muaj zog thiab pheej kov yeej thiab muaj dej quas lawv lub tebchaws, coj mus txog lub roob Xi‑oo uas yog Yawmsaub uas muaj hwjchim loj kawg nkaus lub npe lub chaw nyob. Tej lus uas hais txog Iyi. Saib maj, Yawmsaub caij huab cua nrawm kawg los rau hauv Iyi, mas Iyi tej dab mlom yuav tshee hnyo ntawm Yawmsaub xubntiag, thiab cov neeg Iyi lub siab yuav yaj tag. “Kuv yuav tshum cov Iyi kom lawv rov ua rog rau lawv, mas kwvtij yuav ntaus kwvtij, txhua tus yuav ntaus nws kwvtij zej zog, ib lub moos yuav ntaus ib lub moos thiab ib lub tebchaws yuav ntaus ib lub tebchaws. Mas cov Iyi yuav tws kev nkaus tsis muaj siab ua dabtsi, thiab kuv yuav ua kom lawv tej haujlwm uas lawv npaj tseg ntxhov tag ua tsis tau. Lawv yuav sablaj ntxig nug rau lawv tej dab mlom thiab rau lawv tej txiv neeb txiv yaig thiab tej uas txawj yees siv txawj tshuaj sij. Kuv yuav muab cov Iyi cob rau ib tug tswv uas siab tawv heev mas ib tug vajntxwv uas nyaum heev yuav kav rawv lawv.” Tus Tswv uas yog Yawmsaub tus muaj hwjchim loj kawg nkaus hais li no ntag. Dej hiavtxwv yuav qhuav thiab tus niag dej yuav qhuav qhawv. Tej kwj ha yuav tsw lwj ntxiag, thiab tej ceg dej uas los tshuam tus dej Nai hauv Iyi los yuav yau zuj zus thiab qhuav tag. Tej tauj deg thiab tej tauj iab yuav tuag tshav qhuav tag. Tej nroj tsuag uas nyo raws ob sab ntug dej Nai thiab txhua yam qoob loo uas tseb raws ntug dej Nai kuj yuav qhuav tag thiab cua yuav muab ntsawj ya ploj tag. Cov neeg muab ntses yuav quaj lwj siab ntsuav, yog txhua tus uas nuv ntses hauv tus dej Nai. Cov uas ntaus vas hauv tus dej yuav qaug zog zis. Cov tub zog uas tshuab ntuag thiab cov uas ntos ntaub xov paj yuav poob siab tag. Cov uas ntos ntaub hauv lub tebchaws yuav tws kev nkaus, thiab txhua tus uas ua dag ua zog yuav txhawj xeeb. Cov thawj coj hauv lub moos Xau‑as ruam kawg li, Falau cov tuav xam uas txawj ntse kuj taw qhia tej yam uas tsis muaj qabhau li. Nej yuav ua li cas hais rau Falau tias, “Kuv yog cov uas txawj ntse li tub, kuv yog cov vajntxwv thaum ub caj ces”? Nej cov tub txawj ntse nyob qhovtwg? Tiamsis lawv hais rau nej thiab qhia tseeb hais tias Yawmsaub uas muaj hwjchim loj kawg nkaus xav tseg li cas rau Iyi. Cov thawj coj hauv lub moos Xau‑as rov ua neeg ruam lawm, thiab cov thawj coj hauv lub moos Meefi raug ntxias tau lawm. Cov uas ua Iyi txhua xeem daim lag zeb tiag taw twb coj Iyi yuam kev lawm. Yawmsaub ua rau lawv lub siab ywj fab ywj fwj, thiab lawv ua rau cov Iyi ua txhua yam yuam kev ntsuav, ib yam nkaus li tus qaug cawv ntog puj poog saum nws cov ntuav. Tsis muaj ib yam dabtsi uas yuav ua pab tau Iyi, tsis hais lub taubhau thiab kotw, lossis nplooj toov laj thiab tauj deg, los yeej pab tsis tau. Hnub ntawd cov Iyi yuav zoo yam nkaus li tej pojniam. Lawv yuav ntshai tshee hnyo rau Yawmsaub uas muaj hwjchim loj kawg nkaus txhais tes uas nyem nrig saum lawv. Thiab Yuda lub tebchaws yuav ua cov Iyi lub chaw ntshai. Thaum hais txog Yuda lub npe rau leejtwg hnov, lawv kuj ntshai vim tej uas Yawmsaub tus muaj hwjchim loj kawg nkaus twb npaj tseg yuav ua rau lawv. Hnub ntawd yuav muaj tsib lub moos hauv Iyi tebchaws uas hais Khana‑as li lus thiab cog lus tias lawv ntseeg Yawmsaub uas muaj hwjchim loj kawg nkaus. Mas tej moos ntawd yuav muaj ib lub hu ua lub moos Nkauj Hnub. Hnub ntawd yuav muaj ib lub thaj xyeem rau Yawmsaub nyob hauv nruab nrab Iyi tebchaws, thiab yuav muaj ib tug ncej rau Yawmsaub nyob ntawm ciam teb. Tus ncej ntawd yuav ua tsoob zeej tim khawv rau Yawmsaub uas muaj hwjchim loj kawg nkaus rau hauv Iyi tebchaws. Thaum lawv raug quab yuam lawv thov hu Yawmsaub mas nws yuav txib ib tug cawmseej mas nws yuav tsom kwm lawv thiab cawm lawv dim. Yawmsaub yuav qhia kom cov Iyi paub nws, mas hnub ntawd cov Iyi yuav paub Yawmsaub thiab yuav muab qhov txhia chaw xyeem thiab ua kevcai hlawv xyeem pe hawm Yawmsaub, thiab lawv yuav yeem lus rau Yawmsaub thiab yuav ua raws li lawv yeem lus lawd. Yawmsaub yuav nplawm cov Iyi, nws yuav nplawm kom mob thiab yuav kho kom zoo. Lawv yuav tig rov los cuag Yawmsaub, mas nws yuav mloog lawv tej lus thov thiab yuav kho lawv zoo. Hnub ntawd yuav muaj ib txoj niag kev ntawm Iyi mus txog Axilia tebchaws, cov Axilia yuav tuaj rau hauv Iyi thiab cov Iyi yuav mus rau hauv Axilia. Mas cov Iyi yuav nrog cov Axilia pe hawm Yawmsaub ua ke. Hnub ntawd Yixayee yuav ua tus peb ntawm Iyi thiab Axilia, thiab yuav ua koob hmoov hauv plawv lub ntiajteb, yog cov uas Yawmsaub uas muaj hwjchim loj kawg nkaus foom koob hmoov hais tias, “Iyi uas yog kuv haiv neeg thiab Axilia uas yog kuv tes haujlwm thiab Yixayee uas yog kuv qub txeeg qub teg puavleej tau hmoov zoo.” Xyoo uas tus thawj tswjhwm uas cov Axilia tus vajntxwv Xakoo txib tuaj, tau tuaj txog lub moos Asadau thiab ua rog txeeb tau lub moos ntawd, lub sijhawm ntawd Yawmsaub tau hais rau Amoj tus tub Yaxaya hais tias, “Cia li mus es hle tej khaub seev tsaj ntawm koj lub cev thiab hle khau ntawm koj txhais kotaw tseg.” Mas nws kuj ua raws li ntawd liab qab mus kev tsis rau khau. Yawmsaub hais tias, “Kuv tus qhev Yaxaya mus liab qab thiab tsis rau khau tau peb xyoos li cas, yog ua txujci piv txog xwm txheej uas yuav los raug Iyi thiab Khuj. Mas ib yam li ntawd cov Axilia tus vajntxwv yuav ntes cov Iyi coj mus thiab muab cov Khuj kuav kiag mus, tsis hais cov laus cov tub ntxhais hluas yuav muab coj mus liab qab tsis rau khau, pobtw liab ploog ua rau cov Iyi txaj muag kawg. Mas cov uas vam Khuj thiab khav txog Iyi yuav poob siab nthav thiab raug txaj muag. Hnub ntawd cov neeg uas nyob ntawm ntug hiavtxwv no yuav hais tias, ‘Saib maj, cov uas peb cia siab thiab peb mus nrhiav kom pab peb dim Axilia tus vajntxwv, twb raug xwm txheej li no lawm. Mas peb nev, peb yuav dim tau li cas?’ ” Tej lus uas hais txog tebchaws moj sab qhua ntawm hiavtxwv. Zoo ib yam li khaub zeeg cua hauv Neke ntsawj ya du lug mus, muaj ib tug tuaj hauv tebchaws moj sab qhua tuaj, thiab tuaj hauv lub tebchaws uas txaus ntshai kawg li. Tej xwm txheej phem uas kuv ua yog toog pom hais tias, tus uas lws tabtom lws, tus uas ua kom puam tsuaj kuj tabtom ua. Elas 'e, cia li nce mus ntaus, Midia 'e, cia li mus vij lub nroog. Qhov uas Npanpiloo ua rau luag ntsaj laws kuv yuav ua kom ntsiag to tag nrho huvsi. Vim li ntawd kuv lub duav thiaj mob heev kawg, kuv mob heev cuag nkaus li tej pojniam mob plab yug menyuam. Kuv tws kev nkaus vim tej uas kuv hnov, kuv poob siab nthav vim tej uas kuv pom. Kuv siab ntsws fab tag, kuv ntshai ua ib ce hlauv hlo, kuv vam rau thaum tsaus ntuj, tiamsis qhov ntawd rov ua rau kuv ntshai tshee hnyo. Lawv npaj rooj noj cia, lawv muab ntaub pua chaw nyob. Lawv noj, lawv haus. Nej cov thawj cia li sawv tsees, cia li ntaus roj rau daim tawv uas thaiv ua rog. Vim yog Yawmsaub hais li no rau kuv tias, “Cia li mus tsa tus faj xwm kom nws tshaj tawm tej uas nws pom. Thaum nws pom cov uas caij nees ua ib nkawg ib nkawg, cov uas caij nees luav thiab caij ntxhuav, mas kom nws ua tib zoo mloog, mloog zoo zoo li.” Tus faj xwm qw hais tias, “Au tus Tswv, kuv sawv saum lub chaw faj xwm tas hnub tas hmo, thiab kuv nyob rawv ntawm kuv lub chaw tag niaj tag hmo. Saib maj, cov uas caij tuaj, yog cov uas caij nees ua ib nkawg ib nkawg.” Thiab nws teb hais tias, “Npanpiloo pob tag, pob tag lawm, lawv tej dab mlom huvsi tawg tag rau hauv pem teb.” Kuv haiv neeg uas txeev raug ntaus raug ntxuaj 'e, kuv tau hnov Yawmsaub tus muaj hwjchim loj kawg nkaus uas yog Yixayee tus Vajtswv hais li cas lawm, kuv kuj piav qhia li ntawd rau nej. Tej lus uas hais txog Duma. Muaj ib tug hu ntawm Xe‑i rau kuv tias, “Tus faj xwm, tsaus ntuj ntev li cas lawm? Tshuav ntev li cas li kaj ntug?” Tus faj xwm hais tias, “Twb yuav kaj ntug, tiamsis yuav rov tsaus ntuj thiab. Yog koj xav nug dua kuj nug tau, koj rov tuaj dua.” Tej lus uas hais txog Alanpia. Cov neeg Dedas uas ua ke mus ua luam tsheej pab 'e, nej yuav tsuam chaw so hauv Alanpia tej moj sab qhua. Nej cov uas nyob hauv Thema tebchaws 'e, cia li muab dej rau tus uas nqhis haus, cia li muab mov rau tus uas khiav tuaj cawm siav noj. Vim yog lawv khiav hniav ntaj tuaj, thiab khiav rab ntaj uas rho hlo thiab rab hneev uas nta lawm tuaj, thiab khiav ntawm tej tshav rog uas tawm tsam heev tuaj. Yog vim tug Tswv hais li no rau kuv tias, “Ib xyoos xwb mas Kheda lub meej mom huvsi yuav ploj tag, raws li uas ntiav tub zog ib xyoos xwb. Cov neeg Kheda cov tub rog uas siab loj siab tuab thiab txawj tua hneev yuav tshuav tsawg, rau qhov Yawmsaub uas yog Yixayee tus Vajtswv tau hais li no lawm.” Tej lus uas hais txog lub hav ua yog toog. Muaj xwm txheej dabtsi nej txhua tus thiaj tau nce mus saum txheej tsev las tshav, nej cov uas qw ua nqaj ua nqug, yog lub moos uas ntxhov hnyo thiab ua lomzem ntom nti ntshu nrooj? Nej cov uas raug tua tsis yog tuag rau hniav ntaj hniav riam lossis tuag rau hauv tshav rog. Cov thawj uas kav nej sawvdaws ua ke khiav tag lawm, luag cia li ntes tau lawv twb tsis siv hneev li. Nej cov uas luag ntsib kuj raug ntes txhua tus, txawm yog twb khiav deb lawm los kuj ntes tau. Vim li no kuv thiaj hais tias, “Tsis txhob tig ntsia kuv, cia kuv quaj los kua muag lwj siab ntsuav, tsis txhob siv zog tuaj nplij kuv rau qhov uas kuv haiv neeg raug puam tsuaj.” Rau qhov Vajtswv Yawmsaub uas muaj hwjchim loj kawg nkaus teem ib hnub cia ua hnub ntxhov hnyo thiab muaj kev tsuj yuam thiab muaj kev ywj fab ywj fwj hauv lub hav yog toog, yog hnub uas tsoo tej ntsa loog pob tag thiab quaj qw rau tej toj roob hauv pes. Elas tuav rawv raj xub tsav tsheb ua rog thiab caij nees, thiab Khi kuj npaj rawv daim hlau thaiv ua rog. Nej tej zeeg tiaj uas qoob zoo kawg nkaus mas tsheb ua rog puv nkaus, thiab tej tub rog caij nees txhij vog ntawm tej rooj loog. Yawmsaub muab tej uas roos thaiv Yuda tshem mus lawm. Hnub ntawd nej mus nrhiav tej cuab yeej ua rog hauv lub tsev hav zoov, thiab nej pom tias Davi lub nroog tej ntsa loog tawg pob ntau qhov, thiab nej mus ntim dej rau lub pas nram qab. Nej kuj suav tej tsev hauv Yeluxalees thiab nej muab tej tsev tsoo los ntxiv kho lub ntsa loog. Nej ua pas dej rau hauv ob kem ntsa loog thiaj cug tau dej ntawm lub pas qub. Tiamsis nej twb tsis tsa muag ntsia tus uas ua kom muaj tej xwm txheej no thiab nej twb tsis quav ntsej tus uas npaj tej no cia ntev los lawm. Hnub ntawd Vajtswv Yawmsaub uas muaj hwjchim loj kawg nkaus hu kom nej quaj thiab quaj ntsuag thiab chais plaubhau do cuas thiab hnav khaub seev tsaj. Tiamsis saib maj, tseem muaj kev zoo siab kev xyiv fab, tua nyuj tua yaj noj nqaij noj hno thiab haus cawv txiv hmab. Nej hais tias, “Cia peb noj tiag haus tiag rau qhov tagkis peb yuav tuag.” Yawmsaub uas muaj hwjchim loj kawg nkaus hais rau kuv qhov ntsej tias, “Tseeb tiag, yeej yuav tsis zam nej txojkev txhaum txim no mus txog thaum nej tuag.” Vajtswv Yawmsaub uas muaj hwjchim loj kawg nkaus hais li no ntag. Vajtswv Yawmsaub uas muaj hwjchim loj kawg nkaus hais li no tias, “Cia li mus cuag Sena uas yog tus uas tu haujlwm thiab saib xyuas txhua yam hauv vajntxwv lub tsev mas hais rau nws tias, ‘Koj muaj feem dabtsi ntawm no thiab koj muaj leejtwg muab log ntawm no koj thiaj txaug lub qhov ntxa zeb rau koj ntawm no, yog koj txaug qhov ntxa rau saum ib lub chaw siab thiab tu lub chaw nyob rau hauv qhov zeb? Saib maj, koj uas yog tus muaj zog 'e, Yawmsaub yuav siv zog muab koj laim pov tseg. Nws yuav tuav rawv koj ruaj ruaj, thiab muab koj dov yam nkaus li dov lub pob tawb thiab muab laim pov tseg rau lub chaw dav, mas koj yuav tuag rau qhov ntawd, thiab koj tej tsheb nees ua rog uas koj khav ntxhias yuav nyob qhov ntawd mus li. Koj yog tus coj kev txaj muag rau koj tus tswv tsev neeg. Kuv yuav muab koj thawb tawm ntawm tej haujlwm uas koj ua, thiab koj yuav raug muab txo nqes ntawm koj lub chaw. “ ‘Hnub ntawd kuv yuav hu kuv tus tub qhe Eliyakhi uas yog Hikhiya tus tub, thiab kuv yuav muab koj lub tsho rau nws hnav, thiab muab koj txoj siv sia rau nws sia, thiab yuav muab koj lub hwjchim kav rau hauv nws txhais tes. Mas nws yuav ua cov uas nyob hauv Yeluxalees thiab cov Yuda leej txiv. Kuv yuav muab Davi lub tsev tus yuam sij tso rau saum nws xub pwg. Nws yuav qheb tsis muaj leejtwg yuav kaw, nws yuav kaw tsis muaj leejtwg yuav qheb. Kuv yuav muab nws ntsia ib yam li tus ntsia hlau uas ntsia qhov chaw ruaj, thiab nws yuav ua lub rooj uas muaj meej rau nws txiv caj ces. Thiab lawv yuav muab nws txiv tsev neeg lub nra hnyav huvsi dai rau nws, yog nws tej tub ki thiab xeeb ntxwv thiab tej twj siv me me uas yog tej twj taig me mus rau tej phaj loj.’ ” Yawmsaub uas muaj hwjchim loj kawg nkaus hais tias, “Hnub ntawd tus ntsia uas ntsia rau qhov chaw ruaj yuav hle, yuav raug muab rho thiab poob los, tej nra hnyav uas dai ntawm nws yuav raug muab txiav pov tseg, vim yog Yawmsaub hais cia li ntawd lawm.” Tej lus uas hais txog lub nroog Thailab. Tej nkoj txwg ntawm lub moos Thasi 'e, cia li quaj nyiav, rau qhov lub nroog Thailab raug muab tso tseg piam tag, tsis muaj vaj tse tsis muaj chaw nres nkoj. Thaum lawv tawm hauv Xaipla tebchaws los lawv hnov tej xov ntawd. Cov uas nyob raws ntug hiavtxwv 'e, nej cov tub lag tub luam hauv Xaidoo 'e, cia li nyob twjywm. Nej hla dej hiavtxwv mus los ua rau nej vam meej. Nej hla dej ntau heev, mas tej uas nej tau yog tej qoob hauv lub moos Sihau, yog tej qoob uas sau ntawm tus dej Nai. Nej ua lag ua luam rau ib tsoom tebchaws. Xaidoo 'e, koj yog lub chaw ruaj khov hauv hiavtxwv, cia li txaj muag los maj, rau qhov hiavtxwv twb hais lawm tias, “Kuv tsis tau mob plab thiab tsis tau yug menyuam, kuv tsis tau tu tej tub hluas ntxhais hluas.” Thaum tej xov no tuaj txog Iyi tebchaws, lawv yuav quaj lwj siab txog tej xwm txheej hauv Thailab. Cia li hla mus rau lub moos Thasi. Cov neeg ntawm ntug hiavtxwv 'e, cia li quaj nyiav. Lub nroog no sub tsis yog lub uas nej lomzem heev lov? Yog lub nroog uas yav thaum ub tsim los lawd, thiab yog lub uas txhais kotaw coj nws haiv neeg mus nyob lwm lub tebchaws deb. Leejtwg npaj ua li no rau lub nroog Thailab? Yog lub nroog uas muab mom kub rau luag, thiab nws cov tub lag tub luam yog cov uas ua hlob, thiab cov uas txais nws li kev lag kev luam yog cov uas muaj koob meej hauv lub ntiajteb. Yawmsaub uas muaj hwjchim loj kawg nkaus yog tus uas npaj tej no cia, kom thiaj li rhuav tshem lawv tej meej mom huvsi uas lawv khav theeb, thiab txo tau txhua tus uas muaj koob meej hauv ntiajteb. Thasi tus ntxhais 'e, cia li laij nej daim teb ib yam li laij ntawm tus dej Nai, tsis muaj ib lub chaw nres nkoj li lawm. Yawmsaub tsa hlo nws txhais tes rau saum hiavtxwv, nws co ib tsoom tebchaws ua zog, nws nkaw lus txog Khana‑as tebchaws kom muab tej chaw ruaj khov ua puam tsuaj tag. Nws hais tias, “Xaidoo tus ntxhais dawb huv uas raug quab yuam 'e, koj yuav tsis lomzem dua li lawm. Cia li sawv tsees hla mus rau Xaipla tebchaws, txawm yog nyob qhov ntawd los koj yuav tsis muaj siab tus li.” Cia li saib cov Kheedia lub tebchaws nawj. Yog haiv neeg no, tsis yog cov Axilia, lawv hom lub nroog Thailab rau tsiaj qus nyob, lawv tib tej chaw siab vij ntaus lub nroog, lawv rhuav vajntxwv tej vaj tse pob tag huvsi, thiab muab lub nroog rhuav pob ua tej niag pawg. Thasi tej nkoj txwg 'e, cia li quaj nyiav lauj, rau qhov koj lub chaw ruaj khov raug muab tso tseg piam tag lawm. Lub sijhawm ntawd lawv yuav tsis nco qab Thailab xya caum xyoo, yam li ib tug vajntxwv hnub nyoog. Thaum dhau xya caum xyoo yuav muaj tshwm rau Thailab raws li cov poj muag cev hu nkauj hais tias, “Tus poj muag cev uas lawv tsis nco qab lawd 'e, cia li coj nkauj nog ncas mus thoob plaws lub nroog, cia li hu nkauj suab zoo zoo, cia li hu ntau zaj nkauj, xwv luag thiaj nco txog koj.” Thaum dhau xya caum xyoo lawm Yawmsaub yuav los xyuas lub nroog Thailab, mas Thailab yuav rov qab muag cev thiab deev ib tsoom tebchaws huvsi hauv lub qab ntuj. Nws tej lag luam thiab nws tej nqe ntiav yuav muab pub kiag rau Yawmsaub, yuav tsis muab khaws cia lossis muab ceev cia. Nws tej lag luam yuav siv ua zaub mov nplua mias thiab tej tsoos tsho zoo nkauj rau cov uas nyob ntawm Yawmsaub lub xubntiag. Yawmsaub yuav ua rau ntiajteb puam tsuaj nyob do cuag cia thiab yuav muab lub ntiajteb ntxeev ua kom tej neeg khiav ua sab ua sua tag. Yuav ua li ntawd rau cov pov thawj ib yam li ua rau cov pejxeem, yuav ua rau cov lospav ib yam li ua rau cov qhev, ua rau tus poj lospav ib yam li ua rau tus nkauj qhev, ua rau tus uas muag ib yam li ua rau tus uas yuav, ua rau tus uas qev luag li ib yam li ua rau tus uas muab qev, thiab ua rau tus uas tshuav luag nqe ib yam li ua rau tus uas luag tshuav nws nqe. Lub ntiajteb yuav raug puam tsuaj tag huvsi thiab yuav raug muab lws du lug, vim Yawmsaub twb hais cia li no lawm. Lub ntiajteb qhuav zuj zus thiab tuag tshav, lub qab ntuj qaug zog zuj zus thiab tuag tshav qhuav tag. Lub ntuj nrog lub ntiajteb qaug zog tag. Tej neeg hauv lub ntiajteb no ua rau ntiajteb vuab tsuab qias tag, rau qhov lawv tsis ua raws li tej kevcai thiab tawv nyom tej kab ke thiab muab tej lus cog tseg uas nyob mus ib txhis rhuav. Vim li no tej lus tsawm foom thiaj li nqos lub ntiajteb, thiab cov neeg uas nyob hauv kuj raug txom nyem vim lawv tej kev txhaum txim. Vim li ntawd cov uas nyob hauv ntiajteb raug muab hlawv tag tshuav neeg tsawg tsawg li. Tej cawv txiv hmab qhuav zuj zus, tej tsob txiv hmab kuj tuag tshav qhuav tag, sawvdaws uas siab xyiv fab kuj xyu zom zaws. Lub suab npuaj nruas ua lomzem kuj ntsiag to lawm, cov uas siab xyiv fab lub suab kuj tu nrho lawm, lub suab ntaus nkauj nog ncas ua lomzem kuj ntsiag to lawm. Lawv tsis haus cawv txiv hmab thiab hu nkauj ua ke dua li lawm. Cawv ntxwg kuj iab iab li rau cov uas haus. Lub nroog uas ntshu nrooj ntxhov hnyo kuj pob tag, txhua lub tsev kuj muab kaw tag tsis muaj leejtwg nkag tau rau hauv. Muaj suab qw tom tej kev vim yog tsis muaj cawv haus, tej kev xyiv fab huvsi kuj ntsiag tag lawm, lub ntiajteb kev zoo siab kuj ploj tag. Tshuav lub nroog nyob do cuas cia, tej rooj loog kuj raug muab tsoo pob tag lawm. Yuav muaj li no rau hauv ntiajteb thiab rau hauv ib tsoom tebchaws, yuav zoo ib yam li thaum muab tsob txiv aulib nplawm thiab ib yam li thaum muab tej txiv hmab xawb de suaj kaum. Lawv tsa lawv lub suab hu, lawv hu nkauj xyiv fab, lawv qw sab hnub poob tuaj qhuas Yawmsaub lub hwjchim meej mom. Vim li no sab hnub tuaj cia li ua rau Yawmsaub tau koob meej, ntawm tej tebchaws uas raws ntug hiavtxwv cia li qhuas Yawmsaub uas yog Yixayee tus Vajtswv lub npe. Thoob plaws hauv qab ntuj kawg peb hnov lub suab hu nkauj qhuas hais tias, “Tus ncaj ncees tau koob meej kawg.” Tiamsis kuv hais tias, “Kuv mas kuv qaug zog zuj zus, kuv qaug zog zuj zus, kuv raug txom nyem lawm lauj! Rau qhov cov uas fav xeeb kuj tabtom fav xeeb, lawv fav xeeb heev kawg li.” Nej cov uas nyob hauv ntiajteb 'e, mas tej kev txhawj kev ntshai thiab tej qhov taub thiab tej hlua cuab twb los raws cuag nej lawm. Tus uas khiav lub suab txhawj ntshai yuav poob rau hauv qhov taub, tus daum tawm hauv qhov taub los yuav mag lub voj hlua cuab. Vim yog qhov rais ntuj kuj qheb lawm thiab tej taw tiag ntiajteb ua zog kais. Lub ntiajteb tawg ntsoog ntxaws, lub ntiajteb tawg ua tej dwb daim, lub ntiajteb raug muab co ua zog koog heev. Lub ntiajteb yoj yuj yees ib yam nkaus tus qaug cawv, thiab ua zog kais ib yam li lub tsev pheeb suab. Ntiajteb tej kev fav xeeb hnyav tsuam lub ntiajteb, mas nws ntog lawm thiab yuav tsis rov sawv dua li. Hnub ntawd Yawmsaub yuav txiav txim saum ntuj rau tej timtswv saum nruab ntug, thiab yuav txiav txim hauv ntiajteb rau tej vajntxwv hauv ntiajteb. Lawv yuav raug muab sau zog ua ke yam nkaus li cov uas raug kaw hauv lub niag qhov tob tob. Lawv yuav raug muab kaw rau hauv tsev lojfaj, thiab dhau ntau hnub lawv yuav raug muab rau txim. Lub hli yuav poob ntsej muag thiab lub hnub yuav txaj muag rau qhov Yawmsaub uas muaj hwjchim loj kawg nkaus yuav ua vajntxwv kav saum lub roob Xi‑oo thiab hauv Yeluxalees, nws ua nws lub hwjchim ci ntsa iab tshwm rau nws cov kev txwj laus. Au Yawmsaub, koj yog kuv tus Vajtswv, kuv yuav txhawb nqa koj, kuv yuav qhuas koj lub npe, vim yog koj tau ua tej haujlwm phimhwj uas koj tau npaj tseg cia ntev los lawm, yog tej uas ncaj ncees thiab muaj tseeb. Koj twb ua rau lub nroog pob tag ua tej niag pawg, thiab ua rau lub moos uas muaj ntsa loog ruaj khov pob tag. Lwm haiv neeg tus vajntxwv lub tsev tsis ua lub moos lawm, thiab yuav tsis rov ua dua tshiab. Vim li no tej haiv neeg uas muaj zog yuav qhuas koj, tej tebchaws uas ua nruj ua tsiv tej moos yuav paub ntshai koj, rau qhov koj yog lub chaw ruaj khov rau cov neeg pluag, thiab yog lub chaw ruaj khov rau cov neeg txom nyem thaum lawv lwj siab. Koj yog lub chaw nraim cua daj cua dub thiab roos tshav ntuj kub. Cov neeg ua nruj ua tsiv li pa zoo yam nkaus li cua daj cua dub ntsawj ntsa loog, thiab zoo yam nkaus li tshav ntuj kub hauv lub chaw qhuav. Koj tswj lwm haiv neeg lub suab. Huab roos tshav ntuj kub li cas, cov neeg ua nruj ua tsiv lub suab hu nkauj yuav ntsiag zog ib yam li ntawd. Saum lub roob no Yawmsaub uas muaj hwjchim loj kawg nkaus yuav npaj noj npaj haus rau ib tsoom neeg yog tej zoo zaub zoo mov thiab tej cawv txiv hmab zoo zoo, yog tej zoo nqaij zoo qhauv thiab tej kua txiv hmab uas lim zoo zoo lawm. Saum lub roob no Yawmsaub yuav rhuav tshem daim ntaub npog uas npog ib tsoom neeg ntsej muag, yog daim ntaub uas thaiv saum ib tsoom tebchaws. Nws yuav muab txojkev tuag nqos kiag mus ib txhis, Vajtswv Yawmsaub yuav so ib tsoom neeg tej kua muag ntawm lawv lub plhu thiab nws yuav muab qhov uas luag saib tsis taus nws haiv neeg rhuav tshem kom ploj tag hauv lub ntiajteb no mus. Yawmsaub twb hais cia li no lawm. Hnub ntawd lawv yuav hais tias, “Saib maj, no yog peb tus Vajtswv. Peb twb tos rawv nws xwv nws thiaj cawm peb dim. No yog Yawmsaub, peb twb tos rawv nws. Cia peb zoo siab xyiv fab rau qhov uas nws cawm peb dim.” Yawmsaub txhais tes yuav nyob saum lub roob no, thiab Mau‑a yuav raug muab tsuj pes ntiag hauv nws lub chaw, yam li tsuj quav nyab hauv lub qhov quav chiv. Txawm yog lawv tsa tes hauv lub qhov quav chiv ntawd yam nkaus li tsa tes ua luam dej, los Yawmsaub yuav muab lawv txojkev khav theeb thiab lawv tej taw tes uas txawj txo mus. Tej lub chaw siab faj xwm ntawm ntsa loog nws yuav muab txo mus, yuav muab tsoo kom pob tag rau hauv pem teb xyaw hmoov av. Hnub ntawd lawv yuav hu zaj nkauj no hauv Yuda tebchaws. “Peb muaj ib lub nroog uas ruaj khov. Vajtswv rhawv txojkev cawm dim ua ntsa loog thiab chaw faj xwm. Cia li qheb rooj loog kom lub tebchaws uas ncaj ncees thiab pheej ua raws li lawv twb cog lus tseg lawm thiaj tau nkag los. Au Vajtswv, koj yuav pub lub siab tus yees puv npo rau tus uas lub siab ruaj nreeg rau koj, vim nws tso siab rau koj. Cia li tso siab rau Yawmsaub mus ib txhis rau qhov Vajtswv Yawmsaub yog txhib zeb uas nyob mus ib txhis tsis kawg. Nws twb txo cov neeg uas nyob lub chaw siab, thiab muab lub moos uas siab txo nqes los. Nws muab tsoo kom pob tag rau hauv pem teb xyaw hmoov av. Mas txhua txhais kotaw tsuj, yog cov neeg pluag li kotaw thiab cov neeg txom nyem li kotaw tsuj.” Cov neeg ncaj ncees txojkev tiaj tus. Au tus uas ncaj ncees, koj ua rau cov ncaj ncees txojkev tiaj du lug. Au Yawmsaub, peb ua raws li koj txoj kevcai tos rawv koj. Koj lub npe uas muaj koob meej yog qhov uas peb tus ntsuj plig ntshaw heev. Hmo ntuj los kuv lub siab dai qas dhuam koj, kuv tus ntsuj plig kub lug nrhiav ntshis koj, rau qhov thaum koj txiav txim rau neeg ntiajteb, tej neeg hauv qab ntuj kuj kawm paub koj txojkev ncaj ncees. Yog hlub cov neeg limhiam mas lawv yuav tsis kawm paub txojkev ncaj ncees. Lawv nyob hauv lub tebchaws ncaj ncees los lawv tseem ua phem thiab lawv tsis quav ntsej Yawmsaub lub hwjchim meej mom. Au Yawmsaub, koj twb tsa koj txhais tes tiamsis lawv pheej tsis pom. Thov cia lawv pom qhov uas koj kub siab lug rau koj haiv neeg thiab cia lawv txaj muag. Thov cia cov hluavtaws uas koj yuav hlawv koj cov yeeb ncuab, hlawv lawv thiab. Au Yawmsaub, koj pub kom peb tau txojkev thaj yeeb. Ib puas tsav yam uas peb ua tau lawm twb yog koj ua pab peb. Au Yawmsaub, uas yog peb tus Vajtswv, dhau ntawm koj lawm tseem muaj luag lwm tus nom tswv tau kav peb thiab, tiamsis peb tsuas lees paub koj tib leeg lub npe xwb. Lawv twb tuag lawm, lawv yuav tsis muaj txojsia nyob. Lawv nyob tub tuag teb xwb, lawv yuav tsis sawv rov los. Vim yog koj tau los ua kom lawv puam tsuaj thiab tau rhuav tej chaw uas nco txog lawv huvsi. Au Yawmsaub, koj tau ua rau haiv neeg no huaj vam coob, ua rau haiv neeg no huaj vam tuaj. Koj tau txais lub koob meej zoo kawg nkaus, koj tau nthuav lub tebchaws kom dav ntxiv mus. Au Yawmsaub, thaum lawv raug txom nyem lwj siab lawv tau nrhiav koj, thaum lawv raug nplawm qhuab qhia, lawv tsa ncauj thov koj tsis tu li. Ib yam li tus pojniam suab menyuam uas ntswj cev qw vim yog mob plab heev, yog thaum uas twb yuav txog caij yug, au Yawmsaub, peb zoo ib yam li ntawd rau ntawm koj xubntiag. Peb suab menyuam, peb ntswj cev, tiamsis peb tsuas yug tau cua xwb. Peb tsis tau rhawv kev cawm dim rau hauv lub ntiajteb thiab tsis tau yug neeg ntiajteb. Koj cov neeg uas tuag lawm yuav rov ciaj sia, lawv tej cev tuag yuav sawv rov los. Nej cov uas nyob hauv hmoov av 'e, cia li tsim dheev thiab hu nkauj vim nej zoo siab. Yawmsaub, koj cov dej lwg zoo yam nkaus li tej dej lwg thaum sawv ntxov mas lub ntiajteb yuav yug cov uas nyob hauv tub tuag teb rov los. Kuv cov neeg, cia li los, cia li nkag rau hauv nej chav tsev thiab kaw qhov rooj rau. Nej cia li mus nraim cev ib ntus mus txog thaum Yawmsaub kev npau taws dhau lawm. Vim yog Yawmsaub tabtom tawm ntawm nws lub chaw tuaj yuav rau txim rau neeg ntiajteb vim yog lawv tej kev txhaum txim. Mas lub ntiajteb yuav qhia tej ntshav uas los rau saum nws lawm thiab yuav tsis npog cov uas raug tua tuag ntxiv mus lawm. Hnub ntawd Yawmsaub yuav xuas nws rab ntaj uas yog hlau tawv thiab loj thiab muaj hwjchim rau txim rau Leviathas uas yog tus zaj uas txawj txawj khiav, yog Leviathas tus zaj uas nkhaus caj nkhaus cees. Yawmsaub yuav tua tus zaj uas nyob hauv hiavtxwv. Hnub ntawd Yawmsaub hais tias, “Muaj ib lub vaj txiv hmab uas ntxim siab, cia li hu nkauj txog lub vaj ntawd. Kuv uas yog Yawmsaub tsom kwm lub vaj ntawd, kuv ywg dej txhua lub sijhawm. Ntshai tsam muaj lwm tus ua phem rau lub vaj kuv thiaj zov tag hnub tag hmo. Kuv tsis npau taws rau lub vaj. Kuv xav kom muaj pos kaus ntsaj pos kaus ntsim tuaj tawm tsam kuv, kuv thiaj tau ua rog rau lawv thiab muab lawv hlawv pov tseg huvsi. Lossis cia lawv nyob hauv kuv qab kev tsom kwm, cia lawv cog lus nrog kuv sib raug zoo, cia lawv cog lus nrog kuv sib raug zoo los maj.” Lwm hnub tom hauv ntej Yakhauj yuav ntsia cag tob, Yixayee yuav tawg paj hlav ntsuag thiab txi txiv puv nkaus lub ntiajteb. Yawmsaub tau nplawm lawv yam nkaus li uas nws nplawm cov uas tau nplawm lawv lawm lov? Lossis lawv raug muab tua yam nkaus li cov uas tua lawv raug muab tua lawm lov? Qhov uas muab ntiab khiav mus thiab qhov uas muab kuav kiag mus poob tebchaws twb yog Yawmsaub tawm tsam lawv. Yawmsaub tej cua uas hlob heev ntsawj lawv mus zoo yam li hnub uas cua ntsawj sab hnub tuaj tuaj. Ua li no thiaj ntxuav tau Yakhauj tej kev txhaum txim, thiab zam kiag tau nws lub txim huvsi, yog thaum nws ua rau tej pob zeb uas ua lub thaj xyeem dab zoo yam nkaus li tej pob zeb phom phom uas muab tsoo mos nyoos tag, yuav tsis tshuav tej ncej dab Asela lossis tej thaj hlawv hmoov xyab nyob kiag li. Rau qhov lub nroog uas muaj ntsa loog ruaj khov kuj tsis muaj neeg nyob lawm, tej chaw nyob kuj muab tso tseg nyob do cuas ib yam nkaus li tebchaws moj sab qhua. Menyuam nyuj kuj noj zaub qhov ntawd, thiab pw qhov ntawd thiab noj tej nplooj ntawm tej ceg ntoo du lug. Thaum tej ceg ntoo qhuav lawm, kuj lov mas cov pojniam tuaj khaws coj mus rauv. Cov no yog ib co neeg uas tsis thoob tsib. Yog li ntawd tus uas tsim lawv yuav tsis khuvleej lawv, tus uas muab lawv puab yuav tsis hlub lawv lawm. Hnub ntawd Yawmsaub yuav ntaus txij ntua tus dej Yufeti mus txog ntawm tus dej Iyi ib yam li ntaus qoob. Cov Yixayee 'e, nej yuav raug muab sau zog ib tug zuj zus los. Thiab hnub ntawd luag yuav tshuab lub raj xyu loj hu, mas cov neeg uas tabtom yuav puam tsuaj hauv Axilia tebchaws thiab cov uas raug muab ntiab khiav mus rau Iyi tebchaws, yuav rov los pe hawm Yawmsaub saum lub roob dawb huv ntawm Yeluxalees. Lub mom kub uas Efa‑i cov neeg uas qaug cawv khav ntxhias yuav raug txom nyem lauj! Lawv tej paj ntoo zoo zoo nkauj uas tabtom zeeg uas nyob saum lub roob uas yog lub hauv hav uas av zoo heev, yog cov uas cawv txiv hmab kov yeej lawm lub nroog, yuav raug txom nyem lauj! Saib maj, Yawmsaub muaj ib tug uas muaj hwjchim thiab muaj zog. Ib yam nkaus li cua daj cua dub nrog lawg, yog cua daj cua dub uas ua kom puam tsuaj, thiab yam li tej nag xob nag cua uas ntws nyab kiag, mas tus ntawd yuav ua nruj ua tsiv muab laim pes ntiag rau hauv pem teb ib yam li ntawd. Lub mom kub uas Efa‑i cov neeg uas qaug cawv khav ntxhias yuav raug muab tsuj rau hauv xib taws. Lub paj ntoo zoo zoo nkauj uas tabtom zeeg uas nyob saum lub roob uas yog lub hauv hav uas av zoo heev yuav zoo yam li thawj phaum txiv cev uas siav ua ntej lub caij ntuj kub, thaum leejtwg pom kuj noj kiag tsuav yog txog nws txhais tes. Hnub ntawd Yawmsaub uas muaj hwjchim loj kawg nkaus yuav ua lub mom kub uas muaj meej kawg thiab ua lub mom paj ntoo zoo nkauj kawg rau nws haiv neeg uas tseem tshuav nyob. Nws yuav ua txojkev ncaj ncees rau tus uas nyob saum lub rooj txiav txim, thiab nws yuav ua lub zog rau cov uas ua rau yeeb ncuab tig kiag ntawm rooj loog mus. Cov no los kuj qaug cawv txiv hmab ua yoj yuj yees, thiab qaug cawv ntxwg ua pig ua poog. Txawm yog cov pov thawj thiab cov xibhwb cev Vajtswv lus los kuj qaug cawv ntxwg ua yoj yuj yees, lawv qaug cawv txiv hmab tsis meej pem tag, kuj qaug cawv ntxwg ua pig ua poog. Lawv thiaj ua yog toog pom yuam kev t hiab tsis txawj tu plaub, rau qhov txhua lub rooj noj tsuas puv nkaus ntuav, tsis muaj ib qho uas yuav tsis qias li. “Tus ntawd yuav qhia kev txawj ntse rau leejtwg? Nws yuav qhia Yawmsaub tej xov rau leejtwg? Yuav piav rau cov menyuam uas nyuam qhuav tseg mis lov? Lossis piav rau cov uas nyuam qhuav ncaim hauv xubntiag lov? Rau qhov nws qhia zuj zus ib txoj ib txoj kevcai, nws qhia zuj zus ib kab ib kab, ib qho me me ib qho mentsis.” Tsis yog li ntawd, Yawmsaub yuav siv lwm yam lus hais rau cov neeg no thiab siv lwm haiv neeg lub qhov ncauj hais. Nws twb hais rau lawv cov tias, “No yog qhov chaw tau so, yog lub chaw uas cov neeg txog siav tau so, thiab yog lub chaw uas so los siav.” Los lawv tsis yeem mloog. Vim li ntawd Yawmsaub tej lus thiaj zoo li no rau lawv, nws qhia zuj zus ib txoj ib txoj kevcai, nws qhia zuj zus ib kab ib kab, ib qho me me ib qho mentsis, xwv lawv thiaj li mus thiab thim rov qab thiab tawg tag, thiab mag hlua thiab raug ntes. Vim li no nej cov uas pheej nyiam thuam luag, uas yog cov thawj uas kav cov neeg no hauv Yeluxalees, cia li mloog Yawmsaub tej lus. Nej tau hais tias, “Peb twb nrog kev ploj kev tuag cog lus cia lawm thiab nrog tub tuag teb hais hum. Thaum tej vij sub vij sw uas loj kawg hla los mus yuav tsis raug peb, rau qhov peb ua tej lus dag ntxias los tsom kwm peb thiab peb tau chaw nraim rau hauv txojkev dag.” Vim li no Vajtswv Yawmsaub thiaj li hais tias, “Saib maj, kuv teeb ib lub pob zeb rau hauv Xi‑oo ua lub chaw tiag taw, yog ib lub pob zeb uas muab sim lawm zoo heev yog ua lub thawj pob zeb ntawm kaum tsev ua lub chaw tiag taw uas ruaj khov. Tus uas tso siab rau yuav tsis raug kev ntxhov siab. Kuv yuav muab txojkev ua ncaj ua hlua ntsuas thiab muab txojkev ncaj ncees ua lub qe hlau uas ntsuas qhov ntseg. Thiab lawg yuav kuav kiag txojkev dag ntxias uas tsom kwm lawv mus, thiab dej yuav nyab kiag lub chaw uas lawv nraim cev. Mas tej lus uas nej nrog kev ploj kev tuag cog tseg yuav raug muab rhuav tag, thiab tej uas nej nrog tub tuag teb hais hum yuav tsis muaj lawm. Thaum tej vij sub vij sw uas loj kawg hla los mus, nej yuav raug muab tsuj pes ntiag. Vij sub vij sw hla los pes tsawg zaus yuav los sau nej mus, nws yuav niaj tagkis hla los thiab niaj hnub niaj hmo los.” Thaum nkag siab tej xov no yuav muaj kev txhawj kev ntshai heev kawg li. Rau qhov lub txaj pw lov tsis txaus xyab cev rau saud daim pam kuj nqaim tsis txaus vov. Yawmsaub yuav sawv tsees yam li thaum uas nws sawv saum lub roob Pelaxi, thiab nws yuav npau taws ib yam li thaum npau hauv lub hav Kinpe‑oo, xwv nws thiaj ua tau nws tej haujlwm uas phimhwj kawg, thiab ua nws tej haujlwm uas txawv txawv. Vim li no tsis txhob thuam luag, tsam txoj saw hlau yimhuab khi nej ruaj, rau qhov kuv tau hnov Vajtswv Yawmsaub uas muaj hwjchim loj kawg nkaus tej lus txiav txim uas yuav ua kom lub tebchaws puam tsuaj huvsi. Cia li tig pob ntseg mloog kuv lub suab, cia li ua tib zoo mloog tej lus uas kuv hais. Tus uas laij teb cog qoob nws pheej laij mus li xwb lov? Nws pheej tsoo tej pob av thiab muab sua ib txhis li xwb lov? Thaum nws muab cov av pheej tiaj lawm nws tseb zaub txhwb qaib zaub txhwb nyug, thiab cog mog ua tej kwb kab thiab cog qeb rau tej thaj uas ntxim thiab tseb txhuv daj raws tej ntug teb. Vajtswv twb qhia nws paub raug kev raug cai lawm, yog nws tus Vajtswv qhia rau nws. Nws tsis siv thob log ntaus zaub txhwb qaib, thiab tsis muab log tsheb dov luam noob zaub txhwb nyug. Tiamsis nws muab rab pas me me nplawm noob zaub txhwb qaib, thiab muab pas nplawm noob zaub txhwb nyug. Leejtwg yuav muab tej mog ua ncuav ntaus ua txhuv tawg tag? Yeej tsis muaj li, nws yuav tsis muab ntaus tsis tseg mus li. Thaum nws muab log tsheb nees luam qoob nws tsis muab luam kom ntsoog. Tej no yog los ntawm Yawmsaub uas muaj hwjchim loj kawg nkaus. Tej uas nws taw qhia tseem ceeb kawg thiab nws muaj tswvyim zoo kawg nkaus. Au Ali‑ee, Ali‑ee 'e, lub nroog uas Davi tsa tsev ntaub nyob, cia li tsav lub xyoo ntxiv rau lub xyoo, cia li ua kevcai raws sijhawm uas teem cia. Txawm li cas los kuv yuav ua kom Ali‑ee raug kev txom nyem nyuaj siab, thiab yuav muaj kev ntsaj laws thiab quaj ntsuag, thiab lub nroog yuav ua rau kuv zoo li lub thaj uas hlawv xyeem. Kuv yuav ua yeej vij puag ncig koj, thiab kuv yuav ua tej chaw tsom faj vij ntaus koj, thiab tsub av nce mus tawm tsam koj. Koj yuav hais hauv qhov chaw uas tob kawg hauv ntiajteb tuaj, koj tej lus yuav tawm hauv tej hmoov av hauv qhov chaw qes tuaj, koj lub suab yuav tawm hauv av tuaj yam li dab lub suab, koj tej lus yuav hais lus ntxhi hauv tej hmoov av tuaj. Koj cov tshawj chim coob coob yuav zoo li tej hmoov av mos, thiab cov uas ua nruj ua tsiv yuav zoo li tej npluag qoob uas ya ploj tag. Ib pliag ntshis, tib ntsais muag xwb, Yawmsaub uas muaj hwjchim loj kawg nkaus yuav los xyuas koj, ua xob nthe thiab ntuj qeeg thiab muaj suab nrov heev, muaj khaub zeeg cua thiab cua daj cua dub ntsawj, thiab muaj nplaim taws hlawv du lug. Mas ib tsoom tebchaws coob coob uas tawm tsam Ali‑ee, yog txhua tus uas ntaus nws thiab nws tej chaw ruaj khov, thiab ua rau nws raug kev txom nyem nyuaj siab, lawv yuav zoo yam nkaus li zaj npau suav uas ua yog toog hmo ntuj. Ib yam li tus uas tshaib plab ua npau suav tias nws tabtom noj los tsim los tseem tshaib, thiab ib yam li tus uas nqhis dej ua npau suav tias nws tabtom haus los tsim los kuj qaug zog thiab tseem nqhis, mas ib tsoom tebchaws coob coob uas tuaj ntaus lub roob Xi‑oo yuav zoo ib yam li ntawd. Cia li ua neeg feeb tsis meej thiab ua neeg ruam, cia li rov ua rau nej dig muag tsis pom kev, cia li ntog tiamsis tsis yog qaug cawv txiv hmab, cia li ntog puj poog tiamsis tsis yog qaug cawv ntxwg. Vim Yawmsaub ua rau nej tsaug zog heev, thiab kaw nej lub qhov muag uas yog cov xibhwb cev nws lus, thiab kauv nej lub taubhau uas yog cov xibhwb hais pom tom hauv ntej. Tej yog toog no huvsi zoo yam li tej lus uas nyob hauv thooj ntawv uas ntaus cim kaw cia lawd rau nej. Thaum luag muab rau ib tug uas txawj nyeem thiab hais tias, “Nyeem no saib,” los tus ntawd yuav hais tias, “Kuv nyeem tsis tau, vim yog ntaus cim kaw lawm.” Thaum luag muab rau ib tug uas tsis txawj nyeem thiab hais tias, “Nyeem no saib,” nws kuj hais tias, “Kuv tsis txawj nyeem ntawv.” Tus Tswv hais tias, “Cov neeg no lam tuaj ze kuv ntawm lub ncauj, thiab hwm kuv ntawm daim tawv ncauj tiamsis lawv lub siab nyob deb kuv, thiab lawv tsuas yog hwm kuv raws li neeg tej kevcai uas cim tau. Vim li no kuv yuav ua txujci phimhwj rau haiv neeg no dua, yog yam uas phimhwj kawg thiab xav tsis thoob. Tej neeg uas muaj tswvyim lub tswvyim yuav puam tsuaj mus, thiab tej neeg txawj ntse txojkev txawj ntse yuav ploj tag.” Cov uas muab tej haujlwm uas nws npaj tseg zais tsis qhia Yawmsaub, yuav raug txom nyem lauj! Lawv ua haujlwm hauv qhov tsaus ntuj thiab lawv hais tias, “Leejtwg yuav pom peb? Leejtwg yuav paub?” Nej ntxeev ib puas tsav yam. Yuav suav tias tus Kws puab laujkaub av tsuas zoo li av nplaum xwb lov? Thiab yam uas tsim tau los yuav hais rau tus uas tsim tias, “Nws tsis tau tsim kuv,” no lov? Thiab yam uas muab puab tau los yuav hais rau tus uas puab tias, “Nws tsis txawj dabtsi li,” no lov? Tsis yog tshuav tsis ntev lov uas Lenpanoo yuav ciaj ua teb ntsu qoob, thiab tej teb ntsu qoob yuav ciaj ua hav zoov? Hnub ntawd cov neeg lag ntseg yuav hnov tej lus hauv thooj ntawv, thiab cov neeg dig muag yuav pom kev hauv qhov tsaus ntuj thiab qhov tsaus dub nciab. Cov uas tsis muab hlob yuav rov zoo siab xyiv fab rau hauv Yawmsaub, cov neeg uas pluag yuav zoo siab rau hauv tus Dawb Huv hauv cov Yixayee. Cov uas ua nruj ua tsiv yuav ploj mus, cov neeg thuam luag yuav tsis muaj lawm, thiab txhua tus uas nrhiav ntshis ua phem yuav raug muab txiav pov tseg, yog cov uas hais lus qhau luag cai, thiab ua hmab ua hlua cuab tus uas tu plaub ntawm rooj loog, thiab hais tsis tseeb qhau tus uas tsis txhaum cai. Vim li no, Yawmsaub uas txhiv Aplahas hais li no txog Yakhauj caj ces tias, “Yakhauj yuav tsis poob ntsej muag dua li lawm, thiab lawv lub plhu yuav tsis ntshaus dua li lawm. Thaum lawv pom lawv tej tub ki uas kuv txhais tes ua hauv lawv nruab nrab, lawv yuav xam pom tias kuv lub npe dawb huv. Lawv yuav hwm Yakhauj tug Tswv uas Dawb Huv, thiab paub ntshai Yixayee tus Vajtswv. Cov uas lub siab yuam kev yuav txawj nkag siab, thiab cov uas yws tuj taws yuav yeem txais kev qhuab qhia.” Yawmsaub hais tias, “Tej tub ki uas pheej fav xeeb yuav raug txom nyem lauj! Lawv ua raws li tej hom phiaj uas lawv npaj tseg tiamsis tsis yog tej uas kuv npaj rau lawv. Lawv nrog luag sib cog lus tiamsis tsis yog raws li kuv lub siab. Lawv thiaj ua kev txhaum tsub kev txhaum ntxiv ntau zuj zus. Lawv tawm mus rau Iyi tiamsis tsis tau thov kev sablaj ntawm kuv, lawv thiaj mus nraim cev rau hauv Falau kom tsom kwm lawv thiab nrhiav chaw nraim cev rau hauv Iyi tus duab ntxoov ntxoo. Vim li no qhov uas Falau tsom kwm nej yuav ntxeev rov ua rau nej txaj muag, thiab qhov uas nej nraim rau hauv Iyi tus duab ntxoov ntxoo yuav ntxeev ua rau nej poob ntsej muag. Txawm yog lawv cov nom tswv mus txog lub moos Xau‑as thiab lawv cov tubtxib mus txog Hane lawm, los lawv txhua tus puavleej raug txaj muag, vim cov neeg uas tsis muaj qabhau rau lawv, yog cov uas pab tsis tau lawv thiab tsis muaj qabhau rau lawv, tsuas yog coj mus raug txaj muag thiab poob ntsej muag xwb.” Tej lus uas hais txog tsiaj qus hauv Neke. Cov Yuda tej nom tswv xuas nees luav thauj lawv tej nyiaj txiag thiab lawv thauj lawv tej cuab txhiaj cuab tam saum ntxhuav lub ntsov taug kev hla lub tebchaws uas ceeblaj kawg thiab nyuaj kawg nkaus, uas muaj maum tsov ntxhuav txiv tsov ntxhuav, muaj tej nab muaj taug thiab muaj zaj txawj ya nyob, mus txog ib haiv neeg uas tsis muaj qabhau rau lawv, rau qhov Iyi txojkev pab, pab tsis tau thiab tsis muaj qabhau kiag li. Kuv thiaj hu nws hais tias, “Lahaj tus uas nyob dawb.” Nimno koj cia li mus muab sau rau hauv daim txiag tab meeg lawv thiab sau rau hauv ntawv, npaj rau tom hauv ntej ua timkhawv mus ib txhis. Vim lawv yog ib haiv neeg uas pheej fav xeeb, yog menyuam txawj dag, thiab yog menyuam tsis kam mloog Yawmsaub tej lus qhia. Lawv hais rau cov xibhwb uas hais pom tom hauv ntej tias, “Tsis txhob pom lawm,” thiab hais rau cov xibhwb cev Vajtswv lus tias, “Tsis txhob cev qhia tej lus uas raug cai rau peb li lawm. Cia li hais tej uas ntxim peb siab thiab cia li cev tej lus cuav rau peb xwb. Cia li txav kev thiab khiav ntawm txojkev no mus, nej tsis txhob hais txog Yixayee tus Tswv uas Dawb Huv rau peb hnov dua li lawm.” Vim li no Yixayee tug Tswv uas Dawb Huv hais li no tias, “Vim nej saib tsis taus tej lus no thiab tso siab rau txojkev quab yuam thiab txojkev dag ntxias, thiab vam khom tej ntawd, vim li no txojkev txhaum txim no yuav raug nej yam nkaus li lub ntsa loog siab uas tawg pleb thiab qaij tag twb yuav pob mas tib ntsais muag xwb yuav pob tag, yuav tawg yam nkaus li lub laujkaub av uas luag muab tsoo tawg rhe tsis khuvleej li. Tej dwb daim uas tawg ntawd nrhiav tsis tau ib daim uas zoo yawm ncaig taws hauv qhov cub thiab ntaus dej hauv qhov li.” Vajtswv Yawmsaub uas yog tus Dawb Huv hauv cov Yixayee hais li no tias, “Yog nej tig rov qab thiab so, nej yuav dim, qhov uas nej nyob twjywm thiab kev tso siab yuav ua rau nej muaj zog.” Tiamsis nej tsis kam ua li ntawd. Nej hais tias, “Peb tsis ua li ntawd, peb yuav caij nees khiav mus.” Vim li ntawd nej kuj yuav khiav mus. Nej hais tias, “Peb yuav caij nees sai kawg li,” vim li ntawd cov uas caum nej yuav caum sai kawg thiab. Ib leeg hem xwb, yuav khiav tag ib txhiab leej, tsib leeg hem xwb, nej yuav khiav tag, tsuas yog tshuav nej nyob zoo li tus ncej chij saum lub ncov roob thiab zoo li lub chaw ntaus cim rau saum pov roob. Yawmsaub tos nrhw yuav hlub nej, vim li no nws sawv tsees khuvleej nej. Yawmsaub yog tus Vajtswv uas txiav txim ncaj. Txhua tus uas tos nws yuav tau koob hmoov. Cov neeg uas nyob hauv Xi‑oo thiab nyob hauv Yeluxalees 'e, nej yuav tsis quaj dua li lawm. Thaum Yawmsaub hnov nej lub suab thov hu, nws yeej yuav hlub nej. Thaum nws hnov nws yuav teb nej. Txawm yog tug Tswv pub tej zaub mov uas yog txojkev txom nyem rau nej noj thiab pub dej uas yog txojkev nyuaj siab rau nej haus, los nej tus xibhwb tsis tsiv nraim lawm, nej lub qhov muag yuav pom nws. Thaum nej tig rau sab xis lossis tig rau sab laug, nej lub qhov ntsej yuav hnov lus tom nej nrob qaum hais tias, “No yog txojkev ntag, cia li taug txojkev no.” Thaum ntawd nej yuav muab tej dab mlom uas txaug thiab luam nyiaj thiab tej dab mlom uas nchuav thiab luam kub ua kom qias puas tsuas. Nej yuav muab laim pov tseg yam nkaus daim ntaub so uas qias tsis huv thiab yuav ntiab hais tias, “Cia li khiav kom ploj ntais mus.” Yawmsaub yuav pub nag los rau tej noob qoob uas nej tseb rau hauv av, thiab pub qoob loo tawm hauv av tuaj, uas yuav zoo heev thiab tau qoob ntau. Hnub ntawd nej tej nyuj yuav noj zaub hauv lub tshav uas dav heev, thiab tej nyuj tej nees luav uas nej laij teb yuav tau noj tej qoob xyaw ntsev uas xuas duav phuaj duav suam tov. Yuav muaj dej cag ntws nto saum txhua lub roob siab thiab saum tej pov roob siab txhua qhov rau hnub uas muaj kev sib tua heev thiab tej chaw tsom faj pob tag. Heev dua li ntawd, hnub uas Yawmsaub qhwv nws haiv neeg tej qhov mob thiab kho lawv tej qhov txhab uas lawv raug Yawmsaub nplawm ntawd, mas lub hli yuav ci yam nkaus li lub hnub, thiab lub hnub yuav ci xya npaug ntxiv mas yuav ci yam nkaus li xya hnub. Saib maj, Yawmsaub lub npe tuaj deb deb tuaj, nws txojkev chim kub lug ua pa ncho tsaus nti nce sawv siab rau saud. Nws lub qhov ncauj npau taws puv nkaus, thiab nws tus nplaig zoo yam nkaus li nplaim taws hlawv du lug. Nws tus pa zoo yam nkaus li tus dej uas nyab kiag txij nkaus caj dab. Mas yuav muab ib tsoom tebchaws tshau hauv lub vabtshaus uas yog kev puam tsuaj thiab yuav muab ib txoj xauv los sam ib tsoom neeg lub qhov ncauj coj lawv mus yuam kev. Nej yuav muaj zaj nkauj hu zoo yam li hmo uas muaj kevcai tseem ceeb, thiab zoo siab yam nkaus li cov uas nrog lub suab raj mus rau Yawmsaub lub roob, mus kom txog tus uas yog Yixayee txhib zeb. Mas Yawmsaub yuav ua kom hnov nws lub suab uas muaj hwjchim loj kawg thiab ua kom pom nws txhais tes tabtom nplawm ua npau taws heev, yuav muaj nplaim taws hlawv du lug nrog nag xob nag cua thiab cua daj cua dub thiab lawg. Cov Axilia yuav ntshai Yawmsaub lub suab kawg nkaus li. Nws yuav xuas nws tus pas nrig nplawm lawv. Txhua nplawm uas Yawmsaub rau txim nplawm lawv, yuav muaj suab nruas npuaj thiab suab nkauj nog ncas nrov ntsoog qees. Nws yuav tsa kiag tes ua rog ntaus lawv. Twb npaj lub chaw hlawv cia ntev los lawm, yog npaj hlawv Axilia tus vajntxwv, lub chaw kuj tob thiab dav muaj hluavtaws thiab taws ntau heev. Yawmsaub tus pa zoo yam nkaus li nplaim lawj faj zes taws hlawv. Cov uas mus thov kev pab rau nram Iyi tebchaws yuav raug txom nyem lauj! Lawv vam khom tej nees thiab tso siab rau tej tsheb ua rog uas muaj ntau, thiab tso siab rau tej tub rog caij nees uas muaj zog heev. Lawv tsis vam khom tus Dawb Huv hauv cov Yixayee lossis ua nug rau Yawmsaub. Txawm yog li ntawd los nws tseem muaj tswvyim thiab nws tso tau kev puam tsuaj los. Nws tsis thim nws tej lus. Nws yuav sawv tsees tawm tsam cov neeg ua phem thiab tawm tsam cov uas pab cov neeg ua txhaum. Cov Iyi yog neeg xwb tsis yog Vajtswv, lawv tej nees yog nqaij tawv xwb tsis yog ntsuj plig. Thaum uas Yawmsaub tsa hlo nws txhais tes, tus uas pab yuav dawm, tus uas tau kev pab yuav ntog, mas ob tog yuav puam tsuaj tag ua ke. Yawmsaub hais li no rau kuv hais tias, “Zoo li tus tsov ntxhuav l ossis thav tsov ntxhuav uas nyooj laws saum tus tsiaj uas nws tom tau. mas thaum luag hu ib pab neeg yug yaj tuaj tiv nws mas nws tsis ntshai lawv tej suab qw thiab tsis ntshai lawv tej suab uas nrov ntsoog qees, ib yam li ntawd Yawmsaub uas muaj hwjchim loj kawg nkaus yuav nqes los ua rog rau saum lub roob Xi‑oo thiab saum tej pov roob. Tej noog yuj tsom kwm menyuam li cas, Yawmsaub uas muaj hwjchim loj kawg nkaus yuav tsom kwm Yeluxalees ib yam li ntawd. Nws yuav tsom kwm thiab pab kom dim, nws yuav hla kom dhau thiab cawm kom dim.” Cov Yixayee 'e, cia li tig rov qab los cuag tus uas nej tau fav xeeb lawm. Vim hnub ntawd txhua tus yuav muab nws tej dab mlom nyiaj dab mlom kub uas nej txhais tes ua txhaum ua los rau nej, tso pov tseg. “Thiab cov Axilia yuav tuag rau hniav ntaj tiamsis tsis yog neeg li hniav ntaj, thiab rab ntaj uas tsis yog neeg li ntaj yuav ua kom lawv puam tsuaj. Lawv yuav khiav hniav ntaj thiab lawv tej tub hluas yuav raug quab yuam ua haujlwm. Lawv lub chaw ruaj khov yuav muaj kev ntshai heev thiab ploj tag, thiab cov thawj tub rog yuav tso tus chij tseg khiav ras zom zaws.” Yawmsaub uas muaj hluavtaws nyob hauv Xi‑oo thiab cub hluavtaws nyob hauv Yeluxalees hais li no ntag. Saib nawj, yuav muaj ib tug vajntxwv kav ncaj ncees, thiab cov thawj yuav txiav txim ncaj. Lawv txhua tus yuav zoo yam nkaus li lub chaw nraim cua, yog lub chaw uas roos cua daj cua dub, zoo yam li tus dej cag hauv teb qhua, thiab zoo yam li tus duab ntxoov ntxoo ntawm txhib zeb uas loj heev hauv tebchaws qhuav nkig nkuav. Thaum ntawd cov uas lub qhov muag pom kev yuav tsis qe muag, cov uas lub qhov ntsej mloog yuav tau hnov. Cov uas lub siab heev yuav txawj ntse, cov uas tus nplaig nrhiav nrhiav lus yuav hais lus meej nriav nrawm nroos. Luag yuav tsis hu tus neeg ruam tias yog neeg tsim txiaj, thiab yuav tsis hu tus uas siab nkhaus tias yog neeg ncaj dua li lawm. Tus neeg ruam yeej hais tej lus ruam thiab nws lub siab kuj ntaus tswvyim ua txhaum, nws ua tej kev phem thiab hais tsis tseeb txog Yawmsaub, nws ua rau cov uas tshaib tseem yoo thiab nkaum tes tsis pub rau cov uas nqhis tau haus. Tus neeg siab nkhaus tej tswvyim phem kawg, nws xav tswvyim phem hais lus dag ua rau cov pluag puam tsuaj, txawm yog cov pluag tej lus thov raug cai kuj xij. Tus neeg tsim txiaj xav ua yam uas zoo xwb, nws nyob ruaj vim qhov uas nws ua zoo. Nej cov pojniam uas tau zoo nyob, cia li sawv tsees, thiab mloog kuv hais. Nej cov ntxhais uas tsis txhawj dabtsi li, cia li tig ntsej mloog kuv tej lus. Nej cov pojniam uas tsis txhawj dabtsi li, tshuav ib xyoos ntau xwb nej yuav ceeb tshee hnyo, vim tej vaj txiv hmab yuav tsis txi txiv, lub caij sau txiv yuav los tsis txog nej. Nej cov pojniam uas tau zoo nyob, cia li tshee hnyo, nej cov uas tsis txhawj dabtsi li, cia li ceeb tshee hnyo lauj! Cia li hle tsoos tsho nyob liab qab, thiab muab khaub seev tsaj los npua ntawm duav. Cia li ntaus hauv siab txog tej teb uas zoo zoo thiab tej txiv hmab uas txi ncw, thiab txog kuv haiv neeg tej av uas tuaj pos kaus ntsaj pos kaus ntsim, thiab tej vaj tse uas xyiv fab hlo hauv lub nroog uas lomzem. Rau qhov vajntxwv lub tsev yuav raug muab tso tseg, lub nroog uas muaj neeg nyob coob yuav tsis muaj neeg nyob lawm, lub roob thiab tej chaw tsom faj yuav nyob do cuas mus ib txhis, yuav ua nees luav qus lub chaw hom khaj, thiab ua tshav zaub rau tej yaj tej tshis nog, mus txog thaum hliv Vaj Ntsuj Plig saum ntuj los rau peb, thiab tebchaws moj sab qhua yuav ntxeev ua teb ntsu qoob, thiab tej teb zoo qoob yuav ntom nti li hav zoov. Thaum ntawd kev ua ncaj yuav nyob hauv tebchaws moj sab qhua, thiab txojkev ncaj ncees yuav nyob hauv tej teb ntsu qoob. Qhov uas ua ncaj ncees yuav ua rau muaj kev thaj yeeb, thiab txojkev ncaj ncees yuav ua kom nyob tus yees tso siab plhuav mus ib txhis. Kuv haiv neeg yuav nyob kaj siab lug rau hauv lub tsev uas tso siab plhuav thiab so hauv lub chaw tus yees. Yuav los lawg ua rau hav zoov piam tag, thiab lub nroog yuav raug muab tshem pob tag, los nej cov uas tseb noob ntawm ntug dej, thiab tso nyuj thiab nees luav nyob kab ntsab yuav tau nyob kaj siab lug. Koj uas ua kom puam tsuaj 'e, koj tsis tau raug kev puam tsuaj los koj yuav raug txom nyem lauj! Koj yog tus uas fav xeeb, tiamsis tsis tau muaj leejtwg fav xeeb rau koj. Thaum koj tseg tsis ua kom puam tsuaj, koj yuav raug puam tsuaj, thaum koj tseg tsis fav xeeb lawd, luag yuav fav xeeb rau koj. Au Yawmsaub, thov koj hlub peb, peb tos rawv koj. Thov koj ua peb txhais npab rau txhua tagkis, thiab cawm peb dim rau lub sijhawm uas raug ceeblaj. Thaum hnov koj lub suab nroo ntws ib tsoom neeg cia li khiav, thaum koj sawv tsees, ib tsoom tebchaws khiav ri sua. Tej uas txeeb tau los raug muab sau zog ua ke ib yam li kab muab sau zog ua ke. Tej neeg kuj dhia caws qia mus huas ib yam li kooj txig dhia caws qia. Yawmsaub raug qhuas ntxhias vim nws nyob lub chaw siab, nws pub txojkev ua ncaj thiab txojkev ncaj ncees puv nkaus Xi‑oo. Nws yuav ua nej lub chaw ruaj khov rau nej lub caij nyoog, thiab yuav ua txojkev dim thiab tswvyim thiab kev txawj ntse nplua mias rau nej. Qhov uas hwm thiab paub ntshai Yawmsaub yog yam uas tsim txiaj kawg. Saib nawj, cov uas siab loj siab tuab nyob sab nraud taij hu, cov uas cheem kom sib hum xeeb kuj quaj lwj siab ntsuav. Tej niag kev kuj nyob ntsiag to, tsis muaj neeg mus mus los los lawm. Tej lus cog tseg raug muab rhuav pov tseg, cov uas ua timkhawv raug saib tsis taus, tej neeg tsis muaj leejtwg hwm. Lub tebchaws quaj ntsuag thiab ntaug zog zuj zus, Lenpanoo poob ntsej muag thiab qhuav zuj zus mus. Lub vos hav Saloo zoo yam nkaus ntuj nrag teb do, Npasas thiab lub roob Khamee zeeg nplooj tag. Yawmsaub hais tias, “Nimno kuv yuav sawv tsees, nimno kuv yuav raug qhuas ntxhias, nimno kuv yuav raug luag thiaj. Nej xeeb npluag qoob rau hauv plab, thiab nej yug tau quav nyab xwb. Nej tej pa zoo li tej nplaim taws uas yuav hlawv nej kub hnyiab tag huvsi. Ib tsoom neeg yuav zoo li raug muab hlawv ua hmoov zeb sib, thiab zoo li tej hav pos uas raug muab txiav hlawv pov tseg.” Nej cov uas nyob deb, cia li mloog saib kuv tau ua li cas, nej cov uas nyob ze, cia li lees paub kuv lub hwjchim. Cov neeg muaj txim hauv Xi‑oo kuj ntshai, cov uas tsis hwm Vajtswv kuj ceeb tshee hnyo. “Peb cov leejtwg yuav nrog nplaim taws kub ceev nyob tau ua ke? Peb cov leejtwg yuav nrog tej hluavtaws uas kub mus ib txhis nyob tau ua ke?” Tus uas ua lub neej ncaj ncees thiab hais lus raug cai, thiab tsis nyiam tej uas quab yuam luag li lus, thiab nkaum tes tsis txais tej nyiaj xiab, thiab ntsaws qhov ntsej tsis mloog tej lus uas ntaus tswvyim ua kom los ntshav, thiab qe muag tsis saib tej kev phem, mas tus ntawd yuav tau nyob saum lub chaw siab, nws lub chaw nraim cev yog lub chaw ruaj khov uas xuas pob zeb ua, nws yuav tau mov noj thiab yuav tsis txhawj dej haus. Koj lub qhov muag yuav pom tus vajntxwv muaj meej mom, thiab pom lub tebchaws uas nthuav dav. Koj lub siab yuav xav txog txojkev ntshai thaum ub, hais tias, “Tus uas txheeb npe dua twg lawm? Tus uas luj tej se nyob qhovtwg? Tus uas tshuaj saib tej chaw tsom faj nyob qhovtwg lawm?” Koj yuav tsis pom haiv neeg uas khav theeb dua li lawm, yog haiv neeg uas hais lus tsis meej uas koj mloog tsis tau, thiab hais lwm yam lus uas koj tsis nkag siab. Cia li tsa muag ntsia Xi‑oo, yog lub nroog uas peb coj tej kevcai raws li teem cia. Koj lub qhov muag yuav pom Yeluxalees, yog lub chaw nyob tus yees, yog lub tsev ntaub uas yuav tsis muab tshais chaw, tej tswg uas rub lub tsev ntaub yuav tsis muab rho li, thiab tej hlua tsa tsev yuav tsis tu ib txoj li. Yawmsaub yuav muaj hwjchim meej mom nrog peb nyob qhov ntawd, qhov ntawd muaj tej dej cag thiab tej niag dej dav, tsis muaj tej nkoj loj uas nquam duav phuaj mus, tsis muaj nkoj txwg zoo nkauj hla mus. Rau qhov Yawmsaub yog tus uas tu plaub rau peb, Yawmsaub yog tus uas kav peb, Yawmsaub yog peb tus Vajntxwv, nws yuav cawm peb dim. Koj tej hlua rub daim ntaub hauv nkoj taug, mas rub tsis tau tus ncej nyob ruaj thiab rub tsis tau daim ntaub dav. Thaum ntawd tej uas lws thiab txeeb tau los ntau ntau yuav raug muab faib, txawm yog tej neeg ceg tawv kuj yuav muab tau los. Tsis muaj ib tug uas nyob hauv lub tebchaws yuav hais tias, “Kuv mob lawm.” Cov neeg uas nyob qhov ntawd yuav tau txais kev zam txim. Ib tsoom tebchaws 'e, cia li txav los ze thiaj tau hnov, ib tsoom neeg 'e, cia li tig ntsej mloog. Thov cia lub ntiajteb thiab ib puas tsav yam hauv ntiajteb mloog thiab lub qab ntuj thiab txhua yam uas tshwm los hauv qab ntuj cia li mloog. Vim Yawmsaub chim siab heev rau ib tsoom tebchaws sawvdaws, thiab npau taws rau lawv tej pab tub rog huvsi. Nws rau txim rau lawv kom puam tsuaj thiab muab lawv cob rau luag tua. Lawv cov uas raug tua yuav raug muab laim pov tseg, thiab lawv tej cev tuag yuav tsw lwj ntxiag thoob plaws, lawv tej ntshav yuav ntws lug saum tej roob. Tej hnub qub saum ntuj yuav lwj ploj tag huvsi, thiab lub ntuj yuav kauv zog li thooj ntawv. Tej hnub qub saum ntuj huvsi yuav zeeg tag nrho yam nkaus li nplooj txiv hmab zeeg thiab zeeg yam nkaus li nplooj txiv cev zeeg. Kuv rab ntaj twb haus tsau saum ntuj lawm. Saib maj, rab ntaj nqes los txiav txim rau Edoo, yog haiv neeg uas kuv twb rau txim kom puam tsuaj lawm. Yawmsaub muaj rab ntaj uas raus ntshav thiab lo roj nplua mias, lo menyuam yaj thiab tshis li ntshav thiab lo tej txiv yaj li roj ntawm lub raum, rau qhov Yawmsaub muaj kev sib tua xyeem hauv lub moos Npauxa thiab sib tua loj heev hauv lub tebchaws Edoo. Nyuj qus yuav ntog tuag nrog lawv ua ke, thiab tej thav txiv nyuj kuj nrog tej txiv nyuj muaj zog ntog ua ke. Lawv lub tebchaws yuav raug ntshav cam tag, thiab tej roj yuav ua rau lawv tej av zoo tuaj. Yawmsaub muaj ib hnub uas yuav ua pauj, muaj ib xyoos uas ua pauj thiaj tuav tau Xi‑oo txojcai. Tej dej hauv Edoo yuav ntxeev ua roj ntoos thiab tej av yuav ntxeev ua lawj faj, nws lub tebchaws yuav ntxeev ua roj ntoos uas tabtom kub. Yuav kub nruab hnub hmo ntuj tsis tuag li, yuav ncho pa lug mus ib txhis li. Lub tebchaws yuav raug muab tso tseg nyob do cuas ib tiam dhau ib tiam, tsis muaj leejtwg hla hauv mus ib txhiab ib txhis. Liaj thiab plas yuav los nyob nraim, lib nyug thiab uab lag yuav los nyob rau hauv. Yawmsaub yuav muab ib txoj hlua ntsuas uas yog ua kom ntxhov quav niab thiab tso qe hlau uas ntsuas qhov ntseg uas yog ua kom nyob do cuas cia rau saum nws. Lawv tej nom tswv yuav tis lub npe tias, “Tsis muaj lub tebchaws ntawm no lawm,” thiab lawv cov thawj sawvdaws yuav tsis muaj nqes kiag li lawm. Tej pos yuav tuaj puv nkaus hauv tej chaw ruaj khov thiab pos kaus ntsaj thiab zaub kig yuav tuaj laum nkaus tej chaw zov khuav. Yuav ua chaw rau hma nkaum thiab noog ntxhuav los nyob. Tej tsiaj qus yuav ntsib hma ntsuab thiab dab tshis yuav quaj hu nws tej phoojywg, dab tsos yuav los rau qhov ntawd thiab nrhiav chaw so. Plas yuav los ua zes thiab nteg qe thiab puag qe daug rau qhov ntawd thiab sau nws tej menyuam mos rau hauv phab tis. Liaj ntsuab yuav sau zog rau qhov ntawd, nyias nrog nyias nkawm nyob ua ke. Cia li tshawb nrhiav nyeem Yawmsaub phau ntawv. Tej tsiaj no puavleej muaj txhij txhua tsis poob ib tug li, thiab tsis muaj ib tug uas tsis muaj nkawm. Yawmsaub lub qhov ncauj tau hais cia li no lawm, thiab nws tus ntsuj plig tau muab sau zog ua ke lawm. Yawmsaub twb rho ntawv rau tej tsiaj ntawd nyob lawm, nws txhais tes twb muab txoj hlua ntsuas faib chaw rau nyias nyob nyias lawm. Tej tsiaj yuav tau chaw ua lawv tug mus ib txhis, thiab yuav nyob hauv lub tebchaws ntawd txhua tiam mus li. Tebchaws moj sab qhua thiab qhov chaw uas qhuav nkig nkuav yuav zoo siab, tej ntuj nrag teb do yuav xyiv fab thiab tawg paj. Yam nkaus li tsob qoov tawg paj, mas ntuj teb do yuav tawg paj puv nkaus li ntawd thiab yuav xyiv fab zoo siab hu nkauj. Yuav muab Lenpanoo lub koob meej, thiab yuav muab Khamee thiab Saloo tej kev zoo nkauj rau lub tebchaws ntawd. Lawv yuav pom Yawmsaub lub hwjchim ci ntsa iab, uas yog peb tus Vajtswv li hwjchim meej mom. Cia li txhawb txhais tes uas tsaug lub zog thiab ua rau lub hauv caug uas tsaug leeg muaj zog tuaj. Cia li hais rau tus uas siab yau tias, “Cia li ua siab tuab tsis txhob ntshai. Saib maj, nej tus Vajtswv yuav los ua pauj, nws yuav los ua pauj rau lawv, nws yuav los cawm nej dim.” Mas tus neeg dig muag yuav pom kev, tus neeg lag ntseg yuav hnov lus. Tus neeg ceg tawv yuav dhia caws qia yam li muas lwj, tus neeg uas hais tsis tau lus tus nplaig yuav hu nkauj xyiv fab hlo. Dej yuav txhawv hauv tebchaws moj sab qhua thiab yuav txhawv dej ntws hauv ntuj nrag teb do, tej nras xuab zeb uas kub kub yuav ntxeev ua pas dej, thiab tej av qhuav nkig nkuav yuav ntxeev ua qhov dej txhawv. Hauv tej chaw uas hma nkaum pw nyom thiab pias iav thiab tauj deg yuav tuaj. Yuav muaj ib txoj niag kev hla tebchaws ntawd, yuav hu txojkev ntawd tias, “Txojkev dawb huv,” rau Vajtswv cov neeg. Cov neeg qias tsis huv yuav tsis taug txojkev ntawd, thiab cov neeg ruam uas taug txojkev ntawd los yuav tsis yuam kev. Tsis muaj ib tug tsov ntxhuav nyob hauv txojkev ntawd thiab tsis muaj ib tug tsiaj nyaum taug txojkev ntawd, yuav tsis pom muaj kiag li, tiamsis cov uas twb txhiv dim lawm yuav taug txojkev ntawd. Yawmsaub cov neeg uas twb txhiv dim lawm yuav rov qab los, thiab yuav hu nkauj laws los rau hauv Xi‑oo. Txojkev xyiv fab yuav nyob rau saum lawv lub taubhau mus ib txhis tsis kawg. Lawv yuav tau txojkev xyiv fab thiab txojkev zoo siab, mas txojkev xyu thiab kev lwj siab yuav ploj ntais mus. Xyoo kaum plaub uas Hexekhiya ua vajntxwv kav mas Axilia tus vajntxwv Xenakhawli tuaj ntaus Yuda txhua lub moos uas muaj ntsa loog ruaj khov mas txeeb tau huvsi. Axilia tus vajntxwv txib Lasakhe coj ib pab tub rog coob tawm ntawm lub moos Lakhi mus rau ntawm vajntxwv Hexekhiya hauv Yeluxalees. Mas nws mus sawv ntawm tus ciav dej uas tso dej tawm ntawm lub pas sab ped los, yog ntawm txojkev uas mus rau daim teb Ntxhua Xov. Hikhiya tus tub Eliyakhi uas yog tus saib xyuas vajntxwv lub tsev thiab Sena uas yog tus tub sau ntawv thiab Axas tus tub Yau‑av uas yog tus uas sau ntaub ntawv keeb kwm, mas lawv tuaj cuag Lasakhe. Lasakhe hais rau lawv tias, “Cia li hais rau Hexekhiya tias, ‘Tus huabtais loj uas yog Axilia tus vajntxwv hais tias, Koj tso siab rau dabtsi li kod? Koj xav tias nej tej nyuag lus sablaj xwb yog daim phiaj thiab hwjchim ua tau rog no lov? Nimno koj vam leejtwg es koj thiaj fav xeeb rau kuv? Koj sim xav saib, nimno koj vam khom Iyi uas yog tus pas nrig tauj deg uas lov lawm, yog leejtwg nrig yuav chob nws txhais tes. Iyi tus vajntxwv Falau zoo yam nkaus li ntawd rau txhua tus uas vam khom nws. Tiamsis yog koj hais rau kuv tias, “Peb tso siab rau Yawmsaub uas yog peb tus Vajtswv,” mas tus Vajtswv ntawd puas yog tus uas Hexekhiya muab tej chaw siab uas pe hawm nws thiab nws tej thaj xyeem rhuav pov tseg, thiab hais rau Yuda thiab Yeluxalees tias, “Nej yuav tsum pe Vajtswv ntawm lub thaj no xwb?” “ ‘Cia li tuaj nrog kuv tus tswv uas yog Axilia tus vajntxwv cog lus tseg. Kuv yuav muab ob txhiab tus nees rau koj yog tias koj nrhiav tau neeg caij cov nees ntawd. Koj yuav ua li cas raws tau kuv tus tswv li ib tug thawj rog uas me dhau tej rau thaum koj tseem vam khom Iyi thiab lawv tej tsheb ua rog thiab tej tub rog caij nees? Tsis yog li ntawd xwb, qhov uas kuv tuaj ntaus lub tebchaws no ua kom puam tsuaj tsis yog Yawmsaub nrog nraim lov? Yawmsaub hais rau kuv tias, Cia li mus ntaus lub tebchaws no thiab ua kom puam tsuaj.’ ” Mas Eliyakhi thiab Sena thiab Yau‑av hais rau Lasakhe tias, “Thov koj hais ua lus Alas rau peb uas yog koj li tub qhe, peb yeej paub tej lus ntawd. Thov tsis txhob hais ua lus Yuda rau cov neeg uas nyob saum tej ntsa loog tau hnov.” Tiamsis Lasakhe hais tias, “Tsis yog kuv tus vajntxwv txib kuv tuaj hais tej lus no rau nej thiab nej tus vajntxwv xwb. Yeej yog hais rau cov uas nyob saum tej ntsa loog uas lawv twb yuav noj lawv tej quav thiab haus lawv tej zis thiab ntag.” Mas Lasakhe sawv ntsug qw ua lus Yuda nrov nrov hais tias, “Cia li mloog tus huabtais loj uas yog Axilia tus vajntxwv tej lus. Vajntxwv hais li no tias, Tsis txhob cia Hexekhiya dag ntxias nej, vim nws tsis muaj peevxwm pab tau nej dim. Tsis txhob cia Hexekhiya ua rau nej vam khom Yawmsaub rau tej lus uas hais tias ‘Yawmsaub yuav pab peb dim tiag tiag li. Lub nroog no yuav tsis poob rau hauv Axilia tus vajntxwv txhais tes.’ Tsis txhob mloog Hexekhiya hais. Axilia tus vajntxwv hais li no tias, Cia li nrog kuv sib raug zoo thiab tawm tuaj cuag kuv, mas nej txhua tus nyias yuav tau noj nyias tej txiv hmab txiv cev thiab txhua tus nyias yuav tau haus nyias tej qhov dej, mus txog thaum kuv rov tuaj coj nej mus rau lub tebchaws uas zoo ib yam li nej lub tebchaws, yog lub tebchaws uas muaj qoob loo thiab cawv txiv hmab, yog lub tebchaws uas muaj mov noj thiab muaj vaj txiv hmab. Cia li ceev faj tsam ces Hexekhiya yuav coj nej yuam kev thiab hais tias, ‘Yawmsaub yuav cawm peb dim.’ Puas muaj ib tug dab twg hauv ib tsoom tebchaws uas pab tau nws lub tebchaws dim hauv Axilia tus vajntxwv txhais tes? Lub moos Hama thiab lub moos Apa tej dab dua twg tag lawm? Lub moos Xefava‑i tej dab dua twg lawm? Tej dab ntawd pab tau Xamali dim hauv kuv txhais tes thiab lov? Tej tebchaws no tej dab huvsi tsis muaj ib tug dab twg uas pab tau nws lub tebchaws dim hauv kuv txhais tes, mas Yawmsaub yuav cawm Yeluxalees dim hauv kuv txhais tes thiab lov?” Tiamsis lawv ntsiag twjywm tsis teb ib los li rau qhov vajntxwv Hexekhiya twb qhia hais tias, “Tsis txhob teb ib los li.” Hikhiya tus tub Eliyakhi uas yog tus saib xyuas vajntxwv lub tsev thiab Sena uas yog tus tub sau ntawv thiab Axas tus tub Yau‑av uas yog tus uas sau ntawv keeb kwm, lawv rov los cuag Hexekhiya ua ris tsho ntuag tag, thiab qhia Lasakhe tej lus rau vajntxwv. Thaum vajntxwv Hexekhiya hnov tej lus ntawd, nws txawm dua rhe nws lub tsho thiab muab khaub seev tsaj los hnav thiab mus rau hauv Yawmsaub lub tuam tsev. Mas nws txib Eliyakhi uas yog tus saib xyuas vajntxwv lub tsev thiab Sena uas yog tus tub sau ntawv thiab cov pov thawj laus hnav khaub seev tsaj mus cuag Amoj tus tub Yaxaya uas ua xibhwb cev Vajtswv lus. Lawv txawm hais rau nws tias, “Hexekhiya hais li no tias, ‘Hnub no yog hnub uas ntxhov siab thiab raug luag thuam poob ntsej muag. Tej menyuam tub txog caij yug lawm tiamsis tsis muaj zog ntsub. Tej zaum Yawmsaub uas yog koj tus Vajtswv twb hnov tej lus uas Axilia tus vajntxwv kom Lasakhe tuaj hais saib tsis taus Vajtswv uas muaj txojsia nyob, thiab Yawmsaub yuav rhuav tshem tej lus uas Yawmsaub uas yog koj tus Vajtswv tau hnov. Yog li ntawd thov koj thov Yawmsaub pab cov neeg uas tseem tshuav nyob no.’ ” Thaum vajntxwv Hexekhiya cov tim xyoob tuaj cuag Yaxaya, Yaxaya hais rau lawv tias, “Cia li hais rau nej tus vajntxwv tias, ‘Yawmsaub hais li no tias, Tsis txhob ntshai tej lus uas nej tau hnov ntawd, yog tej lus uas Axilia tus vajntxwv tej nom tswv thuam kuv. Saib maj, kuv yuav tshoov nws lub siab ua kom nws hnov lus huab lus cua mas nws yuav rov qab mus rau nws lub tebchaws. Thiab kuv yuav ua kom nws tuag hniav ntaj rau hauv nws lub tebchaws.’ ” Lasakhe thiaj rov qab mus mas ntsib Axilia tus vajntxwv ua rog rau lub moos Lina, rau qhov nws hnov tias vajntxwv twb tawm hauv Lakhi mus lawm. Axilia tus vajntxwv hnov xov hais tias Khuj tus vajntxwv Thihakha twb sawv kev tuaj ntaus nws. Thaum nws hnov li ntawd nws txawm txib neeg xa xov rov mus hais rau Hexekhiya hais tias, “Nej yuav tsum hais li no rau Yuda tus vajntxwv Hexekhiya hais tias, ‘Tsis txhob cia koj tus Vajtswv uas koj vam khom ntawd dag hais tias Yeluxalees yuav tsis raug muab rau hauv Axilia tus vajntxwv txhais tes. Saib maj, nej twb hnov lawm tias Axilia tej vajntxwv twb ua li cas rau ib tsoom tebchaws huvsi lawm, twb ua rau tej tebchaws puam tsuaj tag huvsi. Koj nev, koj yuav tau kev dim lov? Ib tsoom tebchaws tej dab pab tau lawv dim lov? Twb yog tej tebchaws uas kuv tej poj koob yawm txwv muab ua puam tsuaj, yog lub moos Kauxas, lub moos Halas, lub moos Lexe thiab cov neeg Edee uas nyob hauv lub moos Thee‑axa. Tus vajntxwv hauv lub moos Hama thiab tus vajntxwv hauv Apa thiab tus vajntxwv hauv Xefava‑i, thiab tus vajntxwv hauv Hena thiab tus vajntxwv hauv Iva dua twg lawm?’ ” Hexekhiya txais tsab ntawv ntawm tus xa xov txhais tes thiab nyeem. Mas Hexekhiya thiaj mus rau hauv Yawmsaub lub tuam tsev, thiab muab tsab ntawv nthuav rau ntawm Yawmsaub lub xubntiag. Thiab Hexekhiya thov Yawmsaub hais tias, “Au Yawmsaub tus muaj hwjchim loj kawg nkaus uas yog cov Yixayee tus Vajtswv, uas nyob lub zwm txwv saum cov Khelunpee, koj tib leeg xwb thiaj yog ib tsoom tebchaws hauv qab ntuj tus Vajtswv, koj tau tsim lub ntuj thiab lub ntiajteb. Au Yawmsaub, thov tig pob ntseg mloog. Au Yawmsaub thov tsa qhov muag saib, thiab thov koj mloog Xenakhawli tej lus huvsi uas nws xa tuaj thuam luag Vajtswv uas muaj txojsia nyob. Au Yawmsaub, yeej muaj tseeb li ntawd tiag, Axilia tej vajntxwv tau ua rau txhua haiv neeg thiab lawv lub tebchaws puam tsuaj tag, thiab muab lawv tej dab mlom pov rau hauv hluavtaws, vim tej ntawd tsis yog timtswv, tsuas yog tej uas neeg txhais tes ua xwb, yog ntoo thiab pob zeb. Vim li ntawd tej ntawd thiaj raug muab ua puam tsuaj tag. Au Yawmsaub uas yog peb tus Vajtswv, nimno kuv thov koj cawm peb dim hauv nws txhais tes, kom ib tsoom tebchaws hauv ntiajteb thiaj paub tias koj tib leeg yog Yawmsaub.” Mas Amoj tus tub Yaxaya hais mus rau Hexekhiya hais tias, “Yawmsaub uas yog Yixayee tus Vajtswv hais li no tias, Vim koj tau thov kuv hais txog Xenakhawli uas yog Axilia tus vajntxwv, mas ntawm no mus yog tej lus uas Yawmsaub hais txog Xenakhawli. “Xi‑oo tus ntxhais dawb huv saib tsis taus koj luag koj, Yeluxalees tus ntxhais co hau nto luag raws koj qab. “Koj thuam thiab hais phem rau leejtwg? Koj tsa koj lub suab tawm tsam leejtwg thiab koj khav theeb zij ncaug ntxi muag rau leejtwg? Yog ua rau cov Yixayee tug Tswv uas Dawb Huv ntag. Koj muab lus rau koj tej tub qhe thuam luag tus Tswv thiab koj tau khav tias, ‘Kuv muaj tsheb ua rog ntau heev, kuv nce mus saum tej roob siab, mus txog tej qhov uas deb kawg hauv Lenpanoo. Kuv twb muab nws tej ntoo ciab uas siab kawg ntov vau thiab ntov nws tej ntoo ciab nplooj suab uas zoo nkauj kawg. Kuv mus txog nws lub ncov roob uas deb kawg nkaus thiab mus txog lub hav zoov uas tsaus kawg nkaus. Kuv khawb qhov dej thiab haus tej dej, kuv txhais xib taws tsuj Iyi tej hav dej qhuav tag huvsi.’ “Koj tsis tau hnov lov? Kuv twb npaj cia li ntawd ntev los lawm. Tej haujlwm uas kuv ua nimno kuv twb hom cia thaum ub los lawm, hais tias koj yuav tsoo tej moos uas muaj ntsa loog ruaj khov pob tag ua tej niag pawg cia. Tej neeg hauv tej moos ntawd qaug zog ntshaus ntsho poob siab tag thiab txaj muag heev, lawv zoo li tej zaub hauv teb thiab zoo li tej nroj mos mos, zoo li tej nroj uas tuaj saum ruv tsev uas cia li qhuav tag tsis hlob. “Kuv yeej paub qhov uas koj zaum thiab qhov uas koj tawm mus thiab nkag los, thiab qhov uas koj npau taws rau kuv. Vim koj tau npau taws rau kuv thiab kuv twb hnov qhov uas koj khav theeb, mas kuv yuav muab kuv tus nqe lauj chob koj lub qhov ntswg thiab muab kuv txoj xauv sam koj lub qhov ncauj, mas kuv yuav cab koj tig hlo rov qab taug txojkev uas koj tuaj mus. “No yog tej txujci uas qhia rau koj paub. Xyoo no koj yuav noj tej qoob loo uas nws tuaj nws. Xyoo ob koj yuav noj tej uas tuaj ntawm lub qub chaw. Mas xyoo peb cia li tseb thiab hlais thiab ua vaj txiv hmab thiab noj tej txiv ntawd. Yuda caj ces cov uas dim thiab tseem tshuav nyob yuav rov cog cag rau hauv thiab txi txiv rau saud. Vim tias muaj ib co uas tseem tshuav nyob yuav tawm hauv Yeluxalees mus, thiab muaj ib co uas dim yuav tawm hauv lub roob Xi‑oo mus. Yawmsaub uas muaj hwjchim loj kawg nkaus kub siab lug yuav ua tej no. “Vim li no Yawmsaub thiaj hais txog Axilia tus vajntxwv li no tias, Nws yuav tsis nkag los rau hauv lub nroog no thiab tsis tua xub hneev mus rau hauv, thiab tsis tuav daim hlau thaiv tuaj ze lub nroog thiab tsis tsub av ua chaw nce ntsa loog. Nws tuaj txojkev twg nws yuav rov txojkev ntawd mus, nws yuav tsis nkag rau hauv lub nroog no. Yawmsaub hais li no ntag. Kuv yuav tsom kwm lub nroog no cia kom dim, vim saib rau kuv thiab saib rau kuv tus tub qhe Davi.” Yawmsaub tus tubtxib saum ntuj tawm mus tua Axilia cov tub rog hauv lawv lub yeej tuag 185,000 leej. Mas thaum sawv ntxov lawv sawv saib ua ciav cov ntawd twb tuag tag lawm. Ces Axilia tus vajntxwv Xenakhawli txawm cia li sawv kev rov qab mus tsev, mus nyob hauv Ninave. Thaum nws tabtom pe hawm hauv lub tsev teev dab Nilau uas yog nws tus dab, nws ob tug tub Alamelej thiab Salexaw txawm xuas ntaj tua nws. Ces ob tug khiav mus rau Alalab tebchaws lawm. Mas nws tus tub Exahadoo sawv kav nyob nws chaw. Lub sijhawm ntawd, Hexekhiya mob hnyav heev twb yuav tuag. Mas Amoj tus tub Yaxaya uas yog xibhwb cev Vajtswv lus tuaj cuag nws thiab hais rau nws tias, “Yawmsaub hais li no tias, Koj cia li tu tej kev teb kev chaw kom zoo, koj yuav tuag koj yuav tsis nquag.” Mas Hexekhiya tig xubntiag rau tim phab ntsa thiab thov Yawmsaub hais tias, “Au Yawmsaub, kuv taij thov koj nco txog tias kuv ua lub neej xib rau koj rau ntawm koj lub xubntiag kawg siab kawg ntsws thiab tau ua tej uas koj pom tias zoo.” Ces Hexekhiya txawm quaj heev kawg. Mas Yawmsaub hais tuaj rau Yaxaya tias, “Cia li mus hais rau Hexekhiya tias, ‘Yawmsaub uas yog koj yawg koob Davi tus Vajtswv hais li no tias, Kuv twb hnov koj tej lus thov lawm, kuv twb pom koj tej kua muag lawm. Kuv yuav txuas koj txojsia ntev kaum tsib xyoo ntxiv thiab. Kuv yuav cawm koj thiab lub nroog no dim ntawm Axilia tus vajntxwv txhais tes, thiab kuv yuav tsom kwm lub nroog no cia. “ ‘No yog txujci phimhwj uas Yawmsaub ua rau koj paub tias nws yuav ua raws li nws twb cog lus lawm. Saib maj, kuv yuav ua rau tus duab hnub uas teem rau ntawm lub chaw ntsuas uas Aha ua thim rov qab kaum qeb.’ ” Lub hnub txawm thim rov qab kaum qeb. No yog cov Yuda tus vajntxwv Hexekhiya zaj nkauj uas nws sau thaum uas nws mob thiab thaum nquag lawm. Kuv hais tias, “Thaum kuv txojsia los txog ib nrab neej kuv yuav ncaim mus. Kuv raug muab cob rau ntawm tub tuag teb lub qhov rooj tag kuv sim neej mus li.” Kuv hais tias, “Kuv yuav tsis pom Yawmsaub hauv lub chaw uas cov neeg ciaj sia nyob. Kuv yuav saib tsis pom neeg li lawm thiab tsis nrog cov neeg ntiajteb nyob lawm. Kuv lub chaw nyob raug muab yaws kiag ntawm kuv lawm ib yam li tus yug yaj yaws lub tsev ntaub. Kuv muab kuv txojsia kauv pes zog yam nkaus li tus ntos ntaub dov thooj ntaub. Vajtswv muab kuv txiav yam li txiav daim ntaub ntawm tus ntos. Nws coj kuv txojsia los txog qhov kawg nruab hnub hmo ntuj. Kuv ua ib siab nyiaj tos ib hmos kaj ntug, Vajtswv muab kuv tej pob txha lov tag ib yam li tsov ntxhuav lov. Nws coj kuv txojsia los txog qhov kawg nruab hnub hmo ntuj. “Kuv quaj yam nkaus li tus luv thiab yam nkaus li tus os dej dawb, thiab kuv ntsaj ib yam nkaus li nquab taug. Kuv tsa muag ntsia rau saud ntev, ua rau kuv ob lub qhov muag tsaug heev. Au tug Tswv, kuv raug quab yuam, thov koj ua tus uas tsom kwm kuv.” Tiamsis kuv yuav hais tau dabtsi? Rau qhov nws twb hais rau kuv lawm thiab nws yog tus uas ua tej no ntag. Kuv yuav ua neej nyob ntsiag to mus tag kuv sim neej vim kuv tej kev lwj siab. Au tug Tswv, neeg ua neej nyob tau vim yog muaj tej no, thiab kuv tus ntsuj plig muaj txojsia nyob tau kuj yog vim muaj tej no thiab. Thov koj pab kho kuv zoo thiab pub kuv rov muaj txojsia. Saib maj, vim yog saib rau qhov uas kuv noj qab nyob zoo kuv thiaj li muaj kev lwj siab heev. Tiamsis koj hlub kuv txojsia tsis kheev kom poob rau hauv lub qhov uas puam tsuaj. Koj muab kuv lub txim huvsi laim pov tseg rau tom koj nrob qaum. Tub tuag teb tsis txawj ua koj tsaug thiab txojkev tuag tsis txawj qhuas koj, cov uas mus rau hauv lub qhov tuag lawm tsis tau kev vam koj txojkev ncaj uas tso siab tau lawm. Tus neeg ciaj, tus neeg muaj txojsia, nws ua koj tsaug, ib yam li uas hnub no kuv ua. Leejtxiv qhia koj txojkev ncaj uas tso siab tau rau nws cov menyuam. Yawmsaub yuav cawm kuv dim, thiab peb yuav ntaus nkauj nog ncas hu nkauj qhuas tag peb sim neej rau hauv Yawmsaub lub tuam tsev. Mas Yaxaya hais tias, “Kom lawv muab ib lub ncuav txiv cev los npuab rau ntawm lub rwj kom vajntxwv thiaj nquag.” Hexekhiya kuj hais tias, “Yuav muaj ib yam txujci twg qhia kom paub tias kuv yuav tau nce mus rau hauv Yawmsaub lub tuam tsev?” Thaum ntawd Npaladas tus tub Melaudanpaladas uas ua vajntxwv hauv Npanpiloo txib cov tim xyoob coj tsab ntawv thiab tshav ntuj mus pub rau Hexekhiya vim yog nws hnov xov tias Hexekhiya mob thiab nquag lawm. Mas Hexekhiya zoo siab txais tos lawv thiab coj lawv mus saib nws tej txhab nyiaj, saib tej nyiaj, tej kub, tej txuj lom, tej roj tsim txiaj, thiab saib lub txhab uas rau cuab yeej ua rog, yog txhua yam uas nyob hauv nws tej txhab. Tsis tshuav ib yam hauv nws lub tsev thiab thoob plaws hauv nws lub tebchaws uas nws tsis muab qhia rau lawv saib. Mas Yaxaya uas yog xibhwb cev Vajtswv lus tuaj cuag vajntxwv Hexekhiya, thiab hais rau nws tias, “Cov neeg no tuaj hais dabtsi? Thiab lawv tuaj qhovtwg tuaj cuag koj?” Hexekhiya teb tias, “Lawv tuaj deb deb li tuaj, yog tuaj Npanpiloo tebchaws tuaj.” Yaxaya nug tias, “Lawv pom dabtsi hauv koj lub vaj lub tsev?” Hexekhiya teb tias, “Lawv pom txhua yam hauv kuv lub vaj lub tsev, tsis tshuav ib yam hauv kuv tej txhab uas kuv tsis tau muab qhia rau lawv saib li.” Ces Yaxaya txawm hais rau Hexekhiya tias, “Cia li mloog Yawmsaub uas muaj hwjchim loj kawg nkaus tej lus. Saib maj, lub caij lub nyoog tabtom los txog uas txhua tsav txhua yam hauv koj lub vaj lub tsev thiab tej uas koj tej poj koob yawm txwv khaws tau cia los txog hnub no yuav raug muab coj mus rau Npanpiloo, tsis tshuav ib yam dabtsi kiag li. Yawmsaub hais li no ntag. Thiab koj tej tub uas koj yug muaj qee leej yuav raug muab coj mus thiab lawv yuav ua nraug sam rau hauv vajntxwv Npanpiloo lub tsev.” Mas Hexekhiya hais rau Yaxaya tias, “Yawmsaub tej lus uas koj hais no kuj zoo.” Rau qhov nws xav hauv lub siab tias, “Yuav muaj kev thaj yeeb thiab nyob kaj siab lug mus tag kuv sim neej.” Nej tus Vajtswv hais tias, Cia li nplij, cia li nplij kuv haiv neeg lub siab. Cia li hais lus mos lus muag rau Yeluxalees, cia li tshaj tawm rau nws paub tias qhov uas nws raug txom nyem twb txaus lawm, thiab twb zam nws tej kev txhaum lawm, nws tau txais kev rau txim ntawm Yawmsaub txhais tes ob npaug lawm. Muaj ib lub suab qw hais tias, “Cia li npaj kev hauv tebchaws moj sab qhua rau Yawmsaub cia li ua txoj niag kev ncaj rau hauv ntuj nrag teb do rau peb tus Vajtswv. Txhua lub hav yuav raug muab txhub kom puv, txhua lub roob thiab tej pov roob yuav muab txo kom qes, tej kev uas ib qho siab ib qho qes yuav tiaj, tej qhov zawj yuav sib txig. Mas Yawmsaub lub hwjchim ci ntsa iab yuav tshwm los, thiab ib tsoom neeg sawvdaws yuav pom, vim Yawmsaub lub qhov ncauj tau hais cia lawm.” Muaj ib lub suab hu tias, “Cia li qw.” Mas kuv hais tias, “Kuv yuav qw li cas?” Qw tias, “Ib tsoom neeg yog nroj tsuag, thiab qhov uas zoo nkauj tsuas zoo li tej paj hauv daim teb xwb. Tej nroj tsuag tuag tshav qhuav, tej paj kuj zeeg, rau thaum Yawmsaub tshuab pa tuaj raug. Ib tsoom neeg yeej yog tej nroj tsuag xwb. Tej nroj tsuag tuag tshav qhuav, tej paj kuj zeeg, tiamsis peb tus Vajtswv tej lus yuav nyob ruaj mus ib txhis.” Au Xi‑oo uas tshaj tawm xov zoo 'e, koj cia li nce mus rau saum lub roob siab. Au Yeluxalees uas tshaj tawm xov zoo 'e, koj cia li tsa koj lub suab kawg zog nkaus, cia li tsa suab los maj, tsis txhob ntshai li. Cia li hais rau Yuda tej moos hais tias, “No yog nej tus Vajtswv.” Saib maj, Vajtswv Yawmsaub nrog nws lub hwjchim los, thiab siv nws txhais npab kav. Saib maj, nws tej tshav ntuj kuj nrog nraim nws, thiab nws tej nqe zog kuj nyob ntawm nws xubntiag. Nws yuav yug nws pab yaj ib yam li tus tswv yug yaj, nws yuav qaws cov menyuam yaj los rau ntawm nws txhais npab, nws yuav muab puag rau hauv nws lub xubntiag, thiab yuav coj cov yaj uas muaj menyuam mos maj mam mus. Leejtwg ua phoov tes luj tau tej dej tag nrho huvsi, thiab ua ib dos ntsuas tau lub ntuj, thiab ntim tej hmoov av hauv ntiajteb rau hauv ib thoob, thiab muab tej roob luj tau hauv rab teev, thiab muab tej pov roob luj hauv rab tsi? Leejtwg txawj qhia Yawmsaub tus ntsuj plig, lossis ua nws lub chaw sablaj taw qhia nws? Nws tau sablaj rau leejtwg es nws thiaj li nkag siab? Thiab leejtwg qhia txojkev ua ncaj thiab kev txawj ntse rau nws, thiab qhia rau nws to taub? Saib maj, ib tsoom tebchaws zoo li ib teev dej hauv lub thoob xwb, thiab suav zoo li cov pluas plav saum rab teev. Nws khaws nkaus tej koog povtxwv los yam li tej hmoov av xwb. Lenpanoo tsis txaus ua taws rauv, thiab tej tsiaj qus qhov ntawd tsis txaus muab ua kevcai hlawv xyeem. Ib tsoom tebchaws huvsi zoo li twb tsis muaj dabtsi rau ntawm nws xubntiag, nws suav tias lawv tsawg dhau thiab tsis muaj nqes kiag li. Nej yuav muab Vajtswv piv rau leejtwg, thiab muab nws tus yam ntxwv piv rau yam twg? Dab mlom mas yog tus Kws nchuav los, tus Kws kub muab kub luam, thiab nchuav saw nyiaj rau. Tus uas pluag mas xaiv tej ntoo uas tsis txawj lwj los xyeem, nws nrhiav tus Kws txawj ua tuaj ua ib tug dab mlom uas tsis txawj ua zog. Nej tsis paub lov? Nej tsis tau hnov lov? Thaum chiv thawj los tsis muaj leejtwg qhia rau nej lov? Txij thaum tsim lub ntiajteb nej tsis tau nkag siab lov? Vajtswv yog tus uas nyob thoob plaws siab saum lub ntiajteb, tej neeg ntiajteb tsuas zoo yam li tej kooj xwb. Nws nthuav lub ntuj ib yam li nthuav daim ntaub, thiab muab nthuav yam li lub tsev ntaub los nyob. Nws muab cov thawj uas ua hlob hle nyob do cuas, thiab ua rau cov uas kav lub ntiajteb nyob qhuav qhawv. Thaum muab lawv cog tsis ntev, thiab muab lawv tseb tsis ntev lawm, thiab lawv nrhau cag rau hauv av tsis ntev lawm, nws tshuab pa rau saum lawv, lawv kuj tuag tshav qhuav tag, thiab cua daj cua dub muab ntsawj ya mus yam li tej quav nyab. Tus uas Dawb Huv hais tias, “Nej yuav muab kuv piv rau leejtwg, uas zoo thooj li kuv?” Cia li tsa muag ntsia saum ntuj, leejtwg tsim tej no? Yog tus uas coj tej hnub qub huvsi los suav thiab hu txhua lub los raws li tej npe. Vim nws muaj hwjchim loj kawg nkaus thiab muaj zog heev, thiaj tsis tu ncua ib lub li. Yakhauj 'e, ua cas koj hais, Yixayee 'e, ua cas koj hais tias, “Yawmsaub tsis pom kuv txojkev lawm, kuv tus Vajtswv tsis tuav kuv txojcai lawm.”? Koj tsis paub lov? Koj tsis tau hnov lov? Yawmsaub yog tus Vajtswv uas nyob mus ib txhis, yog tus uas tsim thoob plaws qab ntuj kawg. Nws tsis tsaug leeg, nws tsis txog siav, nws txojkev txawj ntse tsis muaj leejtwg paub tag. Nws pub zog rau tus uas tsaug leeg, thiab txhab zog rau tus uas tsis muaj zog. Txawm yog cov hluas los yuav tsaug leeg thiab txog siav, thiab cov txivneej hluas kuj yuav dawm ntog tag. Tiamsis cov uas tos rawv Yawmsaub yuav tau zog tshiab tuaj, lawv yuav muaj tis ya siab yam li tej dav, lawv yuav dhia tsis txawj txog siav, lawv yuav mus kev tsis txawj tsaug leeg. “Cov tebchaws uas nyob ntawm ntug hiavtxwv 'e, cia li nyob twjywm mloog kuv hais. Cia ib tsoom tebchaws cuab lawv lub zog dua tshiab, cia lawv txav los ze thiab cia lawv hais. Peb cia li ua ke txav los ze lub chaw txiav txim. “Leejtwg txhob ib tug tawm sab hnub tuaj tuaj uas kov yeej txhua kauj ruam? Nws muab ib tsoom tebchaws cob rau tus ntawd thiab tsuj tej vajntxwv rau hauv xib taws. Nws rab ntaj ua rau lawv zoo yam nkaus li tej hmoov av, thiab nws rab hneev ua rau lawv zoo li tej quav nyab uas cua ntsawj ya mus. Nws raws lawv thiab hla dhau plaws tso siab plhuav, taug txojkev uas nws txhais kotaw tsis tau tsuj dua. Leejtwg tau ua tej no thiab ua kom tiav, yog hu txhua tiam neeg txij thaum chiv keeb los? Kuv uas yog Yawmsaub ua, kuv yeej nyob thawj tiam neeg thiab nyob tiam kawg. Kuv yog tus ntawd ntag.” Tej tebchaws ntawm ntug hiavtxwv twb pom lawm kuj ntshai, thiab thoob qab ntuj kawg kuj ntshai tshee hnyo. Lawv txav los ze thiab tuaj ua ke lawm. Txhua tus pab nws kwvtij zej zog, thiab hais rau nws cov kwvtij tias, “Cia li ua siab tuab.” Tus Kws txawj txhua yam txhawb tus Kws ntaus kub lub zog, tus uas xuas rauj ntaus kom du kuj txhawb tus uas ntaus ntawm lub thaiv lub zog, thiab hais txog qhov uas ham tias, “Zoo heev lawm.” Lawv kuj muab ntsia hlau ntsia tus dab mlom ntawd kom tsis txhob ua zog. Yixayee, koj uas yog kuv tus qhev, yog Yakhauj uas kuv tau xaiv cia, yog kuv tus kwvluag Aplahas caj ces, koj yog tus uas kuv coj tawm tim qab ntuj kawg los, thiab hu tawm hauv qhov uas deb kawg hauv ntiajteb los. Kuv hais rau koj tias, “Koj yog kuv tus qhev, kuv xaiv koj thiab kuv yuav tsis muab koj laim pov tseg.” Koj tsis txhob ntshai, vim kuv nrog nraim koj, tsis txhob poob siab vim kuv yog koj tus Vajtswv. Kuv yuav pub zog rau koj, kuv yuav pab koj, kuv txhais tes uas kov yeej yuav tuav rawv koj. “Saib maj, txhua tus uas chim heev rau koj yuav raug txaj muag thiab poob ntsej muag, cov uas tawm tsam koj yuav ploj thiab puam tsuaj mus. Koj yuav nrhiav cov uas tawm tsam koj los koj yuav tsis pom li lawm, cov uas ua rog rau koj yuav ploj yaj ntshis. Rau qhov kuv uas yog koj tus Vajtswv Yawmsaub tuav rawv koj txhais tes xis cia, kuv yog tus uas hais rau koj tias, Tsis txhob ntshai, kuv yuav pab koj.” Yawmsaub hais tias, “Tus nyuag kas Yakhauj 'e, tus nyuag Yixayee 'e, tsis txhob ntshai, kuv yuav pab koj. Tus uas txhiv koj yog Yixayee tug Tswv uas Dawb Huv. Saib maj, kuv yuav muab koj ua lub thob log tshiab ntaus qoob uas ntse thiab muaj hniav. Koj yuav ntaus thiab tsoo tej roob, thiab ua rau tej pov roob zoo li npluag qoob. Koj yuav ntxuaj thiab cua yuav ntsawj ya tag mus, cua daj cua dub yuav ua kom ri sua. Koj yuav zoo siab xyiv fab rau hauv Yawmsaub, koj yuav khav txog tus Dawb Huv hauv cov Yixayee. “Thaum cov neeg pluag thiab cov uas txom nyem nrhiav dej tiamsis tsis muaj, lawv tus nplaig qhuav qhawv vim yog nqhis heev, kuv uas yog Yawmsaub yuav teb lawv, kuv uas yog Yixayee tus Vajtswv yuav tsis tso lawv tseg. Kuv yuav ua dej ntws saum tej roob do hau los thiab ua dej txhawv hauv tej hav. Kuv yuav muab tebchaws moj sab qhua ua pas dej, thiab muab tej teb qhua ua qhov dej txhawv. Kuv yuav ua kom tebchaws moj sab qhua tuaj ntoo ciab thiab ntoo kub twg thiab txiv ntoo roj thiab ntoo aulib, kuv yuav ua rau ntuj nrag teb do tuaj ntoo ciab nplooj suab thiab ntoo seb thiab ntoo thuv tuaj ua ke, neeg thiaj yuav pom thiab paub, lawv yuav xav txog thiab nkag siab tias Yawmsaub txhais tes ua tej no, tus Dawb Huv hauv cov Yixayee tsim tej no.” Yawmsaub hais tias, “Nej cia li teev nej tej lus kom.” Yakhauj tus vajntxwv hais tias, “Cia li coj nej tej keeb puam tuaj. Cia lawv coj tej dab ntawd tuaj qhia rau peb paub tias yuav muaj dabtsi tshwm los. Thiab qhia peb paub tias tej uas muaj yav thaum ub los lawd yog dabtsi, peb thiaj tshuaj saib thiab paub tias tej ntawd yuav zoo li cas rau thaum kawg. Lossis piav rau peb mloog txog tej uas yuav muaj tshwm los. Cia li qhia rau peb paub tias yav tom ntej yuav muaj dabtsi tshwm los, peb thiaj paub tias nej yog timtswv tiag. Cia li ua zoo lossis ua phem, xwv peb thiaj li poob siab thiab ntshai. Saib maj, nej twb peem tsis tsheej dabtsi li, thiab tej uas nej ua tsis muaj qabhau li, cov uas xaiv yuav nej kuj qias vuab tsuab. “Kuv twb txhob ib tug tuaj sab ped tuaj mas nws tuaj lawm, nws tawm sab hnub tuaj tuaj thiab tuav kuv lub npe. Nws yuav tsuj pes ntiag cov thawj ib yam li tsuj hmoov zeb sib, ib yam li tus Kws puab laujkaub tsuj cov av nplaum. Leejtwg qhia txij thaum chiv keeb los rau peb paub, thiab qhia ua ntej lawm peb thiaj hais tau tias, ‘Nws hais tseeb tiag?’ Tsis muaj leejtwg qhia, tsis muaj leejtwg tshaj tawm, tsis muaj leejtwg hnov nej tej lus. Kuv yog thawj tug uas qhia rau Xi‑oo tias, ‘Lawv tuaj lawm,’ thiab tso tus uas xa xov zoo tuaj rau hauv Yeluxalees. Tiamsis thaum kuv tsa muag ntsia tej dab ntawd, tsis muaj ib tug li, tej dab ntawd tsis muaj ib tug ua tau lub chaw sablaj uas yuav teb kuv rau thaum kuv nug. Saib maj, tej dab ntawd puavleej yog cuav xwb, tej uas lawv ua tsis muaj qabhau li, tej dab mlom uas nchuav ntawd kuj yog ib nthwv cua ntsawj do xwb.” “Saib maj, kuv tus qhev uas kuv txhawb nqa, tus uas kuv xaiv cia, yog tus uas kuv txaus siab rau. Kuv muab kuv tus Ntsuj Plig rau hauv nws, nws yuav coj txojkev ua ncaj ua ncees tshwm los rau ib tsoom tebchaws. Nws yuav tsis qw tsis tsa lub suab nrov, thiab tsis ua rau luag hnov tom tej kev. Tus tauj deg uas lov lawm nws yuav tsis muab tu, tus teeb xeeb uas cig pluj pliv nws yuav tsis muab tua. Nws yuav coj txojkev ua ncaj ua ncees tshwm los tiag tiag li. Nws yuav tsis qaug zog lossis ua siab yau mus txog thaum nws tsa txojkev ua ncaj ua ncees nyob ruaj khov thoob plaws ntiajteb. Tej tebchaws ntawm ntug hiavtxwv tos rawv nws tej lus qhia.” Vajtswv yog Yawmsaub, yog tus uas tsim lub ntuj thiab muab lub ntuj nthuav, thiab nthuav lub ntiajteb thiab txhua yam uas tawm hauv ntiajteb los, thiab pub cua rau neeg ua pa, thiab pub ntsuj plig rau cov uas mus mus los los hauv ntiajteb, nws hais li no tias, “Kuv yog Yawmsaub, kuv ua ncaj ncees, kuv thiaj hu koj, kuv tuav koj tes tsom kwm koj cia, kuv pub koj ua lo lus cog tseg rau ib tsoom neeg, ua qhov kaj ci rau ib tsoom tebchaws, kom thiaj qheb tau tus uas dig muag lub qhov muag, thiab coj cov uas raug kaw dim hauv nkuaj los, thiab coj cov uas nyob qhov tsaus ntuj tawm hauv tsev lojfaj los. Kuv yog Yawmsaub, no yog kuv lub npe, kuv lub hwjchim ci ntsa iab kuv tsis pub rau lwm tus, thiab tej lus uas qhuas kuv tsis pub rau tej dab mlom. Saib maj, tej uas dhau los kuj tiav tag lawm, nimno kuv tshaj tawm tej yam tshiab, ua ntej uas tej ntawd tsis tau tshwm los kuv kuj piav rau nej mloog lawm.” Cia li hu zaj nkauj tshiab rau Yawmsaub, cia li hu tej nkauj qhuas nws tawm thoob qab ntuj kawg tuaj. Cov uas mus rau hauv hiavtxwv thiab txhua yam uas nyob hauv, tej tebchaws ntawm ntug hiavtxwv thiab tej neeg uas nyob ntawd 'e, cia li qhuas nws. Cia tej ntuj nrag teb do thiab tej moos uas nyob hauv, thiab tej zej zog uas cov neeg Kheda nyob hauv, tsa lub suab. Cia cov neeg uas nyob hauv lub moos Xela hu nkauj xyiv fab, cia lawv qw saum tej ncov roob tuaj. Cia lawv ua rau Yawmsaub tau koob meej, cia lawv hu tej zaj nkauj qhuas nws hauv tej tebchaws ntawm ntug hiavtxwv. Yawmsaub tawm mus yam nkaus li tus uas siab loj siab tuab, nws txhob nws lub zog kom kub siab lug yam li tus tub rog. Nws tsa suab qw, nws qw nrov, nws ua nws lub hwjchim tshwm los tawm tsam nws cov tshawj chim. “Kuv twb nyob twjywm ntev los lawm, kuv nyob ntsiag to thiab tswj kuv tus kheej cia. Nimno kuv yuav qw yam nkaus li tus pojniam uas mob plab yug menyuam, kuv yuav ceeb nkaus thiab txog siav qhe. Kuv yuav muab tej roob thiab tej pov roob tso tseg nyob do cuas, thiab ua rau tej nroj tsuag saud qhuav tag. Kuv yuav ua rau tej niag dej qhuav qhawv tshwm tej thaj av hauv nruab nrab dej, thiab ua rau tej pas dej qhuav. Kuv yuav cab cov dig muag taug txojkev uas lawv tsis tau paub dua, kuv yuav coj lawv taug tej kev uas lawv tsis tau txeev taug. Kuv yuav ua rau lawv lub hauv ntej uas tsaus ntuj nti pom kev kaj lug, thiab ua rau tej qhov zawj sib txig zos. Tej no yog tej uas kuv yuav ua, thiab kuv yuav tsis muab tso tseg. Lawv yuav raug muab tig rov qab thiab yuav raug txaj muag kawg, yog cov uas tso siab rau tej dab mlom uas txaug, yog cov uas hais rau tej dab mlom uas nchuav tias, ‘Nej yog peb li timtswv.’ ” “Nej cov uas lag ntseg 'e, cia li mloog maj. Nej cov uas dig muag 'e, cia li tsa muag ntsia xwv nej thiaj li pom. Leejtwg dig muag yam li kuv tus qhev lossis leejtwg lag ntseg yam li kuv tus tub xa xov uas kuv txib mus? Leejtwg dig muag yam li tus uas muab cais rau kuv lawd, lossis leejtwg dig muag yam li Yawmsaub tus qhev? Koj pom ntau yam tiamsis koj tsis ua tib zoo saib, koj qhov ntsej tsis lag los koj tsis hnov.” Vim yog saib rau Yawmsaub txojkev ncaj ncees Yawmsaub thiaj txaus siab tsa nws txoj kevcai ua loj thiab muaj koob meej. Tiamsis cov neeg no raug tub sab nyiag thiab raug lws, lawv txhua tus mag qhov taub thiab raug muab zais rau hauv nkuaj. Lawv raug luag lws tsis muaj leejtwg tuaj cawm, lawv raug luag txeeb mus tsis muaj leejtwg hais tias, “Muab thim rov qab.” Nej cov leejtwg yuav tig ntsej mloog zaj no, thiab yuav ua tib zoo mloog rau yav tom hauv ntej? Leejtwg muab Yakhauj cob rau tus uas txeeb, thiab muab Yixayee cob rau cov uas lws? Tsis yog Yawmsaub uas peb ua txhaum rau lov? Lawv tsis kam taug nws txojkev thiab tsis kam mloog nws txoj kevcai. Yog li no nws thiaj nchuav nws txojkev npau taws heev thiab txojkev ua rog loj rau saum lawv. Tej no ua rau lawv raug nplaim taws vij los lawv tsis nkag siab, tej no hlawv lawv los lawv tsis muab siab rau. Yakhauj 'e, nimno Yawmsaub uas tsim koj, Yixayee 'e, tus uas puab koj, hais li no tias, “Tsis txhob ntshai, rau qhov kuv twb txhiv koj lawm. Kuv hu koj raws li koj lub npe. Koj yog kuv tug. Thaum koj hla dej kuv yuav nrog nraim koj, thaum koj hla tus niag dej, dej yuav tsis nyab koj, thaum koj hla hluavtaws, koj yuav tsis kub hnyiab, thiab nplaim taws yuav tsis kub koj. Vim kuv yog Yawmsaub, yog koj tus Vajtswv, kuv yog tus Dawb Huv hauv cov Yixayee thiab yog koj tus cawmseej. Kuv muab Iyi ua cov nqe txhiv koj thiab muab Khuj thiab Xenpa pauv koj. Vim kuv qhov muag saib koj tsim txiaj thiab vim koj muaj koob meej thiab kuv hlub koj, kuv thiaj muab neeg pauv koj, thiab muab tej haiv neeg pauv koj txojsia. Tsis txhob ntshai, vim kuv nrog nraim koj, kuv yuav coj koj tej tub ki tawm sab hnub tuaj los thiab yuav qaws koj tawm sab hnub poob los. Kuv yuav hais rau sab ped tias, ‘Cia li tso lawv,’ thiab hais rau sab nrad tias, ‘Tsis txhob tav lawv.’ Cia li coj kuv cov tub tawm deb deb li los, thiab coj kuv cov ntxhais tawm qab ntuj kawg los, yog txhua tus uas raug hu raws li kuv lub npe, yog cov uas kuv tsim rau kuv tau koob meej, yog cov uas kuv tau puab thiab tsim cia.” Cia li coj cov uas muaj qhov muag los tsis pom kev, cov uas muaj qhov ntsej los tsis hnov lus tawm los. Cia ib tsoom tebchaws sawvdaws sau zog tuaj ua ke, thiab cia ib tsoom neeg tuaj txoos ua ke. Hauv nruab nrab lawv muaj leejtwg tau qhia tej no thiab piav tej uas dhau los lawd rau peb mloog? Cia lawv coj lawv tej timkhawv tuaj nres lawv, thiab cia luag tau hnov thiab hais tias, “Muaj tseeb tiag.” Yawmsaub hais tias, “Nej ua kuv li timkhawv, thiab ua kuv tus tub qhe uas kuv xaiv cia lawd, kom nej thiaj li paub thiab ntseeg kuv, thiab nkag siab tias, kuv yog tus ntawd ntag. Ua kuv ntej tsis muaj ib tug timtswv twg uas yog muab txua tshwm los, thiab ua kuv qab kuj yuav tsis muaj li. Kuv mas kuv thiaj yog Yawmsaub, dhau kuv lawm tsis muaj dua ib tug cawmseej. Kuv yog tus qhia nej paub, cawm nej dim, piav nej mloog, tsis muaj dua ib tug vajtswv twg nyob hauv nej. Thiab nej yog kuv li timkhawv.” Yawmsaub hais li no ntag. “Kuv yog Vajtswv, thiab txij no mus kuv yeej yog tus Vajtswv ntawd, tsis muaj ib tug twg tso dim tau hauv kuv txhais tes. Kuv ua yam haujlwm twg, leejtwg yuav tav tau?” Yawmsaub, yog tus uas txhiv nej, yog tus Dawb Huv hauv cov Yixayee hais li no tias, “Vim yog saib rau nej kuv yuav xa tub rog mus rau Npanpiloo, thiab coj cov Kheedia ntawd caij lub nkoj uas lawv khav ntxhias khiav tawm hauv lawv lub tebchaws. Kuv yog Yawmsaub, yog nej tus uas Dawb Huv, yog tus uas tsim Yixayee, thiab yog nej tus vajntxwv.” Yawmsaub uas tsim txojkev rau hauv hiavtxwv, thiab rhawv kev rau hauv dej hiavtxwv uas tob kawg, yog tus uas coj cov tsheb ua rog thiab tej nees, thiab pab tub rog thiab cov tub rog siab loj siab tuab tawm los, es lawv txawm pw tag sawv tsis taus los, lawv ploj tag yam li tus teeb xeeb uas muab tua kiag, nws hais li no tias, “Tsis txhob nco txog tej uas dhau tag los lawd, tsis txhob tshuaj saib tej qub thaum ub. Saib maj, kuv tabtom ua ib yam tshiab, twb tshwm los lawm, nej tsis pom lov? Kuv yuav rhawv ib txojkev rau hauv tebchaws moj sab qhua, thiab ua kom muaj tej hav dej rau hauv ntuj nrag teb do. Tej tsiaj qus yuav hwm kuv, tsis hais hma thiab noog ntxhuav, vim kuv pub dej rau hauv tebchaws moj sab qhua, ua hav dej rau hauv ntuj nrag teb do, yog pub dej rau haiv neeg uas kuv xaiv cia lawm haus, yog haiv neeg uas kuv tsim los rau kuv, xwv thiaj li qhia tej uas tsim nyog qhuas kuv. “Au Yakhauj 'e, txawm li ntawd los koj tsis tau hu thov kuv, au Yixayee 'e, koj tsis tau txog siav rau kuv kiag li. Koj tsis tau coj koj tej yaj tuaj hlawv xyeem rau kuv, koj tsis tau tua tsiaj xyeem hwm kuv. Kuv tsis tau cia koj ris lub nra hnyav uas xyeem qhov txhia chaw rau kuv, thiab tsis tau cia koj khwv txog qhov uas hlawv roj ntoos tsw qab. Koj tsis tau rho nyiaj yuav tauj qaib qab zib rau kuv, lossis muab tej roj hlawv xyeem ua rau kuv txaus siab. Tiamsis koj muab koj lub txim ua lub nra hnyav rau kuv ris, thiab koj ua rau kuv txog siav txog koj tej kev txhaum. “Kuv mas kuv yog tus uas rhuav koj tej kev fav xeeb vim yog saib rau kuv, thiab kuv yuav tsis cim ntsoov koj lub txim cia. Cia li hais koj tej keeb puam rau kuv mloog, wb cia li sib cam. Koj cia li hais tuaj xwv thiaj tshuaj tau tias koj ua raug cai. Koj thawj leej txiv thaum ub yeejlos ua txhaum muaj txim, thiab cov uas pab koj hais plaub kuj fav xeeb rau kuv. Yog li no kuv thiaj muab cov thawj hauv lub chaw pe kuv rhuav ntsej muag, kuv muab Yakhauj cais kom raug kev puam tsuaj tag, thiab muab Yixayee cob rau luag thuam.” “Yakhauj uas yog kuv tus qhev 'e, Yixayee uas kuv xaiv lawd, cia li tig ntsej mloog. Yawmsaub uas tsim koj, thiab puab koj rau hauv plab thiab yog tus uas yuav pab koj hais li no tias, Kuv tus qhev Yakhauj 'e, Yesulu uas kuv xaiv lawd, tsis txhob ntshai, rau qhov uas yuav ywg dej rau saum lub tebchaws uas nqhis, thiab ua dej ntws saum tej av qhuav. Kuv yuav hliv kuv tus Ntsuj Plig rau saum koj caj ces, thiab hliv kuv tej koob hmoov rau saum koj tej tub ki. Lawv yuav tuaj hlob mos nyoos yam li tej nyom hauv av noo, thiab yam li tej ntoo lwg zaj ntawm ntug dej cag. Ib tug yuav hais tias, ‘Kuv yog Yawmsaub li.’ Muaj dua ib tug yuav raug hu raws li Yakhauj lub npe, thiab muaj dua ib tug yuav sau rau ntawm nws txhais tes tias, ‘Yawmsaub li,’ thiab kiav xeem ua Yixayee.” Yawmsaub uas yog Yixayee tus vajntxwv thiab tus uas txhiv nws, yog Yawmsaub uas muaj hwjchim loj kawg nkaus hais li no tias, “Kuv yog lub hauv paus thiab yog lub ntsis, dhau kuv lawm tsis muaj ib tug vajtswv twg li. Leejtwg zoo cuag li kuv? Cia nws piav los maj. Cia nws qhia thiab cia nws hais ib zaj zuj zus rau ntawm kuv xubntiag tias txij thaum kuv tsim kuv haiv neeg thaum ub los muaj dabtsi tshwm los, thiab hais txog tej uas tseem yuav tshwm los. Cia nws hais ua ntej tias dabtsi yuav tshwm los los maj. Nej tsis txhob ntshai, tsis txhob tshee. Txij thaum ub los kuv tsis tau piav rau nej mloog thiab tsis tau qhia rau nej paub lov? Nej ua kuv li timkhawv. Dhau kuv lawm muaj dua ib tug vajtswv thiab lov? Tsis muaj dua ib txhib zeb, kuv tsis paub kiag li.” Txhua tus uas ua dab mlom tsis muaj qabhau dabtsi li, thiab tej uas lawv zoo siab ntawd kuj tsis muaj nqes kiag li. Tej uas ua timkhawv rau tej dab mlom ntawd, tsis pom kev thiab tsis paub dabtsi li, mas lawv yuav raug txaj muag. Leejtwg txaug tej dab mlom lossis nchuav dab mlom uas tsis muaj qabhau dabtsi rau nws? Saib maj, nws cov phoojywg sawvdaws yuav raug txaj muag, cov Kws txawj ua ntawd tsuas yog neeg xwb. Cia lawv txhua tus tuaj txoos ua ke, cia lawv sawv ntsug. Lawv yuav ntshai kawg, thiab lawv yuav raug txaj muag. Tus Kws hlau nchuav thiab hlawv hauv cub thee, nws txhais npab uas muaj zog xuas rauj ntaus. Nws tshaib plab thiab qaug zog. Nws tsis haus dej thiab tsaug leeg. Tus Kws ntoo muab hlua ntsuas, nws muab cwjmem sau yam ntxwv, nws muab rab txaug los txaug thiab muab sais ua kauj, nws ua moj zeej neeg zoo nkauj li neeg txawb rau hauv tsev. Nws ntov ntoo ciab lossis xaiv ib tug ntoo ciab nplooj suab lossis ntoo qheb. Nws cia tus ntoo ntawd hlob zoo rau hauv hav zoov. Lossis nws cog ib tug ntoo thuv thiab dej nag yug hlob. Tus ntoo ntawd txawm ua taws rau neeg rauv. Nws muab ib txhia los rauv nte sov thiab muab rauv ci ncuav. Nws kuj muab ib tog los ua dab mlom thiab pe hawm, nws muab txaug ua dab mlom thiab pe ntawm tus dab mlom ntawd xubntiag. Nws muab ib nrab hlawv rau hauv cub hluavtaws, saum cub tawg no nws npaj nqaij noj, nws ci nqaij thiab noj tsau npo. Nws kuj nte taws thiab hais tias, “Aub, sov kawg li, kuv pom hluavtaws lawm.” Cov ntoo uas tseem tshuav ntawd nws muab ua ib tug timtswv, yog ua nws tus dab mlom. Nws khoov ntshis pe hawm thiab thov tus dab mlom ntawd hais tias, “Thov cawm kuv, rau qhov koj yog kuv tus vajtswv.” Lawv cov ntawd tsis paub, lawv tsis to taub, lawv lub qhov muag raug muab npog lawm lawv thiaj tsis pom kev li, lawv lub siab ruam puas ntsoog lawm lawv thiaj tsis nkag siab. Tsis muaj leejtwg xav txog li thiab tsis muaj kev paub thiab tsis txawj xav hais tias, “Kuv muab ib nrab rauv hauv qhov cub thiab kuv ci ncuav saum cov ncaig, thiab ci nqaij saud los noj. Tsim nyog kuv muab tej uas tseem tshuav ua yam uas qias vuab tsuab lov? Tsim nyog kuv khoov ntshis pe tog ntoo ntawd lov?” Nws noj tshauv, nws lub siab uas raug ntxias coj nws yuam kev, nws tso tsis tau nws tus kheej dim, nws hais tsis tau tias, “Yam uas nyob hauv txhais tes xis yog tej uas cuav xwb los sav.” “Yakhauj thiab Yixayee 'e, cia li nco ntsoov tej no, vim koj yog kuv tus qhev. Kuv tsim koj, koj yog kuv tus qhev. Yixayee 'e, kuv pheej yuav nco ntsoov koj. Kuv twb tshem koj tej kev fav xeeb ploj ntais yam li tauv huab, thiab tshem koj lub txim yam li tej huab pw hav. Cia li rov los cuag kuv, vim kuv twb txhiv koj lawm.” Lub ntuj 'e, cia li hu nkauj, vim Yawmsaub tau ua tej no lawm. Tej qhov uas tob kawg hauv lub ntiajteb 'e, cia li qw nrov. Tej roob 'e, hav zoov thiab txhua tus ntoo uas nyob hauv 'e, cia li tsa suab hu nkauj, rau qhov Yawmsaub txhiv Yakhauj lawm, thiab ua nws hwjchim ci ntsa iab tshwm rau hauv Yixayee. Yawmsaub, yog tus uas txhiv koj thiab puab koj rau hauv lub plab, hais li no tias, “Kuv yog Yawmsaub uas tsim txhua yam huvsi, thiab kuv tib leeg nthuav lub ntuj thiab nthuav lub ntiajteb tsis muaj leejtwg pab. Kuv yog tus uas ua kom tej txujci uas hais dag tsis tiav, thiab ua rau cov uas saib yaig saib sij tej lus tsis muaj tseeb, thiab rhuav tshem cov neeg txawj ntse thiab ua rau lawv tej tswvyim ruam. Kuv yog tus uas qhwv kuv tus qhev tej lus thiab ua kom kuv cov tub xa xov tej lus tiav. Kuv hais txog Yeluxalees tias, ‘Yuav muaj neeg los nyob rau hauv,’ thiab hais txog Yuda tej moos tias, ‘Yuav raug muab tsim dua tshiab, thiab kuv yuav muab tej uas pob tag lawd ua dua tshiab.’ Thiab kuv hais rau nruab tiv txwv tias, ‘Cia li qhuav, kuv yuav ua rau koj tej hav qhuav qhawv.’ Kuv hais txog Xailab tias, ‘Nws yog kuv tus tswv yug yaj, thiab nws yuav ua txhua yam uas kuv xav tseg tiav huvsi,’ thiab hais txog Yeluxalees tias, ‘Yuav raug muab tsim dua tshiab,’ thiab hais txog lub tuam tsev tias, ‘Koj lub taw tiag yuav raug muab tiag dua.’ ” “Yawmsaub hais li no rau tus uas nws hliv roj tsa lawd, yog Xailab, yog tus uas kuv tuav nws sab tes xis kom kuv thiaj ntaus yeej tej tebchaws ntawm nws xubntiag, thiab hle tej vajntxwv txoj siv ntawm duav, thiab qheb tej qhov rooj rau ntawm nws hauv ntej tsis muaj ib lub rooj loog yuav muab kaw li. Kuv yuav mus ua koj ntej thiab muab tej roob pheej kom tiaj, kuv yuav tsoo tej rooj loog tooj liab pob tag ua tej dwb daim, thiab txiav tej las hlau kom tu. Kuv yuav pub tej nyiaj txiag uas khaws cia hauv qhov tsaus ntuj thiab tej qhov nyiaj uas muab zais lawm rau koj, xwv koj thiaj paub tias kuv uas yog Yawmsaub uas yog cov Yixayee tus Vajtswv hu koj raws li koj lub npe. Vim yog saib rau kuv tus qhev Yakhauj thiab saib rau Yixayee uas kuv twb xaiv cia lawd, kuv thiaj li hu koj raws li koj lub npe, txawm yog koj tsis paub kuv los kuv tis npe rau koj. Kuv yog Yawmsaub, tsis muaj dua ib tug twg li, dhau kuv lawm tsis muaj dua ib tug vajtswv. Txawm yog koj tsis paub kuv los kuv pub zog rau koj, xwv tej neeg txij ntua sab hnub tuaj mus txog ntua sab hnub poob thiaj li paub tias dhau kuv lawm tsis muaj dua ib tug li. Kuv yog Yawmsaub, tsis muaj dua lwm tus li lawm. Kuv tsim qhov kaj thiab tsim qhov tsaus ntuj, kuv ua kom noj qab nyob zoo thiab ua kom muaj kev puam tsuaj, kuv yog Yawmsaub yog tus uas ua txhua yam no huvsi. “Lub ntuj 'e, cia li tso txojkev ncaj ncees saum ntuj los, cia lub ntuj hliv los. Cia lub ntiajteb qheb kiag kom txojkev cawm dim thiaj li hlob tuaj, thiab cia lub ntiajteb ua txojkev ncaj ncees tshwm tuaj. Kuv yog Yawmsaub uas tsim tej no. “Tus tawm tsam tus uas tsim, nws yuav raug txom nyem lauj, yog lub laujkaub av tawm tsam tus Kws puab. Cov av nplaum puas hais rau tus Kws puab tias, ‘Koj tabtom ua dabtsi?’ lossis ‘Koj tsis ua tus tes nqa.’ lov? Tus uas hais rau leej txiv tias, ‘Koj yug tau dabtsi?’ lossis hais rau leej niam tias, ‘Koj yug tau dabtsi?’ yuav raug txom nyem lauj!” Yawmsaub, yog tus Dawb Huv hauv cov Yixayee, yog tus uas tsim lawv, hais li no tias, “Hais txog tej uas yuav muaj rau tom hauv ntej, mas nej yuav nug txog kuv tej tub ki, lossis qhia rau kuv txog tej uas kuv txhais tes yuav tsum ua lov? Kuv tsim lub ntiajteb thiab tsim neeg nyob rau hauv, kuv txhais tes ntag nthuav lub ntuj thiab kuv kav txhua yam uas nyob saum nruab ntug. Kuv ua ncaj ncees kuv thiaj li tsa Xailab sawv, kuv yuav ua rau nws tej kev huvsi ncaj. Nws yuav tsim kuv lub nroog dua tshiab thiab tso kuv cov neeg uas poob tebchaws dim tsis yuav nqe tsis yuav tshav ntuj.” Yawmsaub uas muaj hwjchim loj kawg nkaus hais li no ntag. Yawmsaub hais li no tias, “Tej nyiaj txiag hauv Iyi thiab cov neeg Khuj tej kev lag luam, thiab cov neeg Xenpa uas siab siab yuav tuaj cuag nej thiab ua nej li. Lawv yuav raws nej qab. Lawv yuav raug saw hlau khi tuaj thiab yuav khoov ntshis pe nej. Lawv yuav taij thov nej hais tias, ‘Vajtswv nrog nraim nej, thiab tsis muaj dua ib tug twg li, dhau nws lawm tsis muaj lwm tus vajtswv li.’ ” Au Yixayee tus Vajtswv, yog tus cawmseej, qhov tseeb koj yog tus Vajtswv uas tsis pub leejtwg pom. Lawv txhua tus yuav raug txaj muag thiab poob ntsej muag, cov uas ua dab mlom sawvdaws yuav raug rhuav ntsej muag. Cov Yixayee yuav raug Yawmsaub cawm dim mus ib txhis tsis kawg nej yuav tsis txaj muag thiab tsis poob ntsej muag mus ib txhis. Yawmsaub uas tsim lub ntuj, nws yog Vajtswv, nws yog tus uas puab lub ntiajteb thiab muab tsim cia, nws muab lub ntiajteb tsim ruaj khov, nws tsis tsim nyob do cuas, nws tsim kom muaj neeg nyob. Nws hais tias, “Kuv yog Yawmsaub, tsis muaj dua lwm tus li lawm. Kuv tsis tau hais nraim nkoos, tsis tau hais rau hauv lub tebchaws uas tsaus ntuj nti. Kuv tsis tau hais rau Yakhauj caj ces tias, ‘Cia li nrhiav kuv hauv lub chaw uas do cuas.’ Kuv uas yog Yawmsaub hais qhov tseeb, kuv qhia tej uas raug cai xwb. “Nej cov uas tseem tshuav nyob hauv ib tsoom tebchaws, cia li tuaj txoos ua ke thiab txav los ze ze. Cov uas nqa lawv tej dab mlom ntoo mus mus los los, thiab pheej thov tej dab uas cawm tsis tau dim, lawv tsis paub dabtsi li. Cia li piav thiab teev nej tshaj plaub, cia lawv sablaj ua ke. Leejtwg piav tej no mloog ntev los lawm? Leejtwg qhia tej no txij thaum ub los? Tsis yog kuv, uas yog Yawmsaub lov? Dhau kuv lawm tsis muaj dua ib tug vajtswv li. kuv yog tus Vajtswv ncaj ncees thiab yog tus cawmseej. Dhau kuv lawm tsis muaj dua lwm tus li. Thoob qab ntuj kawg, cia li tig los rau kuv thiab txais txojkev cawm dim, rau qhov kuv yog Vajtswv, tsis muaj dua lwm tus lawm. Kuv tuav kuv tus kheej twv thiab cog lus ncaj ncees tawm hauv kuv lub qhov ncauj mus, yuav tsis thim tej lus ntawd kiag li, hais tias, ‘Txhua lub hauv caug yuav pe kuv, txhua tus nplaig yuav cog lus rau kuv.’ Luag yuav hais txog kuv tias, ‘Txojkev ncaj ncees thiab lub zog tsuas yog nyob hauv Yawmsaub tib leeg xwb.’ ” Txhua tus uas npau taws rau nws yuav los cuag nws thiab yuav txaj muag kawg. Nyob hauv Yawmsaub, Yixayee caj ces sawvdaws yuav kov yeej, thiab qhuas ntxhias nws. Tus dab Npee cia li khoov lawm, tus dab Nenpau kuj ntshaus. Tej dab mlom no nyob saum tej nyuj tej tsiaj nrob qaum. Tej uas nej txeev kwv no kuj muab rau tej tsiaj txhu thauj txog siav kawg. Tej tsiaj ntawd kuj khoov kuj ntshaus ua ke, thiab cawm tsis tau lub nra hnyav ntawd dim, tej ntawd tseem raug luag lws coj mus. “Yakhauj caj ces 'e, cia li mloog kuv hais, nej txhua tus uas yog Yixayee caj ces uas tseem tshuav nyob, nej yog cov uas kuv puag txij thaum nyuam qhuav yug los thiab hwj thaum nruab thiab los. Mus txog nej laus, kuv yeej yog tib tug Vajtswv ntawd, kuv yuav puag nej mus txog thaum nej dawb hau. Kuv twb tsim mas kuv yuav hwj cia, kuv yuav puag thiab yuav cawm kom dim. “Nej yuav muab kuv piv thiab muab kuv xam nrog leejtwg sib luag, thiab muab kuv piv hais tias kuv zoo yam nkaus li luag tej thiab xwb? Cov uas rho kiag kub hauv hnab los thiab muab tej nyiaj luj saum rab teev ntiav tus Kws ntaus kub muab ntaus ua dab mlom, mas lawv kuj khoov ntshis pe hawm ntag. Lawv nqa tus dab mlom ntawd rau saum xub pwg, lawv muab kwv mus, lawv muab txawb rau lub chaw twg mas tus dab mlom kuj nyob lub chaw ntawd, mus tsis tau rau lwm qhov. Yog leejtwg hu thov, tus dab mlom ntawd kuj tsis teb li thiab pab tsis tau kom lawv dim lawv tej kev txom nyem. “Nej cov uas yog neeg fav xeeb, nej cia li cim tej no thiab nco ntsoov thiab ua tib zoo xav. Cia li nco ntsoov tej uas twb muaj thaum ub lawm, vim kuv tib leeg yog Vajtswv, tsis muaj dua lwm tus li lawm. Kuv yog Vajtswv, tsis muaj ib tug twg zoo thooj li kuv. Thaum chiv keeb kuv twb qhia tej uas yuav muaj tshwm los thaum kawg, thiab yav thaum ub kuv twb qhia tej uas tseem tsis tau ua. Kuv hais tias, Tej haujlwm uas kuv hom tseg yeej yuav nyob ruaj khov thiab kuv yuav ua kom tej uas kuv xav tseg tiav huvsi. Kuv hu tus liaj ya sab hnub tuaj tuaj, yog hu ib tug txivneej uas nyob lub tebchaws deb deb tuaj ua tej haujlwm uas kuv hom tseg. Kuv hais lawm mas kuv yuav ua kom tiav, kuv npaj siab lawm, kuv yuav ua kom tau. Nej cov uas lub siab tawv, nej cov uas nyob deb txojkev dim, cia li mloog kuv hais. Kuv yuav coj txojkev dim los ze, tsis nyob deb lawm, thiab kuv txojkev cawm dim yuav tsis tos ntev. Kuv yuav tso txojkev dim rau hauv Xi‑oo thiab tso kuv tus hwjchim ci ntsa iab rau hauv cov Yixayee.” “Npanpiloo tus ntxhais uas dawb huv 'e, cia li nqes los zaum hauv tej hmoov av. Kheedia tus ntxhais 'e, cia li zaum ntua hauv pem teb tsis muaj lub zwm txwv lawm, rau qhov luag yuav tsis hu koj tias nkauj mos nkauj dawb lawm. Cia li tuav nkaus lub zeb thiab zom hmoov, muab daim ntaub kauv koj lub ntsej muag yaws, hle koj lub tsho ntev cia, qaws koj daim tiab hla dej mus. Koj yuav raug liab qab thiab luag yuav pom koj txaj muag ntsuav. Kuv yuav ua pauj, kuv yuav tsis tseg ib tug cia li. Tus uas txhiv peb nws npe hu ua Yawmsaub uas muaj hwjchim loj kawg nkaus, nws yog tus Dawb Huv hauv cov Yixayee. “Kheedia tus ntxhais 'e, cia li nyob twjywm thiab nkag mus r au hauv qhov tsaus ntuj, rau qhov luag yuav tsis hu tias koj yog ib tsoom tebchaws tus poj vaj dua li lawm. Kuv chim rau kuv haiv neeg, kuv suav tias kuv qub txeeg qub teg qias tsis huv lawm. Kuv muab lawv rau hauv koj txhais tes, koj tsis khuvleej lawv kiag li, koj muab koj tus quab uas hnyav heev rau saum cov neeg laus caj qwb. Koj hais tias, ‘Kuv yuav ua poj vaj mus ib txhis,’ koj thiaj tsis muab tej xwm txheej no los qhuab qhia koj lub siab thiab tsis nco xav hais tias tej xwm txheej no thaum kawg yuav zoo li cas. “Vim li no koj uas nyiam kev lomzem, cia li mloog tej no. Koj yog tus uas zaum tso siab lug, yog tus uas xav hauv lub siab tias, ‘Tsuas yog kuv tus no xwb, tsis muaj dua lwm tus li lawm. Kuv yuav tsis nyob ua poj ntsuam lossis nyob ua ntsuag niam ntsuag txiv.’ Ob yam no yeej yuav los txog koj rau ib hnub thiab tib ntsais muag, yog qhov uas tej menyuam piam tag thiab qhov uas ua poj ntsuam yuav los raug koj pov khawv nkaus, txawm yog koj ua neeb ua yaig ntau kawg thiab ua khawv koob loj kawg los xij. Koj ruaj siab rau koj tej kev limhiam, koj hais tias, ‘Tsis muaj leejtwg pom kuv.’ Koj lub tswvyim thiab koj tej kev txawj ntse ua rau koj yuam kev, koj thiaj hais rau hauv koj lub siab tias, ‘Tsuas yog kuv tus no xwb, tsis muaj dua lwm tus li lawm.’ Tiamsis tej xwm txheej phem yuav los raug koj mas koj tej khawv koob yuav thaiv tsis tau. Tej vij sub vij sw yuav poob rau saum koj mas koj yuav tsis muaj peevxwm txhaws tau lub txhoj ntawd, mas tib ntsais muag xwb txojkev puam tsuaj yuav los raug koj tamsid, koj twb tsis faj txog li. “Cia li ruaj siab rau koj tej khawv koob thiab rau koj tej kev ua neeb ua yaig uas ntau heev uas thaum koj hluas nkauj koj siv zog ua kawg li lawm. Tej zaum nyaj koj ua tau tiav, tej zaum koj yuav ua tau rau luag ntshai siab yaj tag. Koj txog siav tag rau tej neeg coob coob uas nrog koj sablaj, cia lawv sawv tsees los pab koj dim, lawv yog cov uas txawj saib lub ntuj thiab txawj saib tej hnub qub, yog cov uas thaum hli xiab twv rau koj tias yuav muaj dabtsi tshwm los rau koj. Saib maj, lawv zoo yam nkaus li tej quav nyab, hluavtaws yuav kub lawv. Lawv pab tsis tau lawv tus kheej dim tej nplaim taws. No tsis yog cub thee uas sov rau leejtwg, thiab tsis yog cub tawg uas leejtwg nte. Cov uas nrog koj ua haujlwm ntawd yuav zoo li no rau koj, lawv yog cov uas txij thaum koj tseem hluas nkauj es ua neeb ua yaig rau koj. Lawv nyias mus nyias ib txojkev, tsis muaj ib tug cawm tau koj dim.” “Yakhauj caj ces 'e, cia li mloog zaj no nawj, nej yog cov uas luag hu ua Yixayee thiab yog cov uas tawm ntawm Yuda lub cev los, yog cov uas tuav Yawmsaub lub npe cog lus thiab pe hawm Yixayee tus Vajtswv tiamsis tsis yog ua ncaj ncees thiab ua tseeb. Lawv muab lawv lub npe hu raws li lub nroog uas dawb huv thiab vam khom Yixayee tus Vajtswv, nws lub npe hu ua Yawmsaub uas muaj hwjchim loj kawg nkaus. Tej uas dhau los lawd kuv twb qhia thaum ub los lawm, tej no twb tawm hauv kuv lub qhov ncauj thiab kuv twb hais rau sawvdaws paub. Mas tib ntsais muag xwb kuv ua li ntawd thiab muaj tshwm los raws li ntawd. Kuv paub tias nej tawv ncauj, thiab nej tej leeg caj dab yog hlau thiab nej lub hauv pliaj yog tooj liab. Kuv twb qhia tej xwm no rau nej paub ntxov thaum ub lawm, thaum tsis tau tshwm xwm los kuv twb qhia rau nej lawm xwv nej thiaj hais tsis tau tias, ‘Peb tej dab mlom ua tej xwm no, peb tej dab mlom uas txaug thiab tej uas nchuav hais kom muaj tej no tshwm los.’ “Nej twb hnov lawm, cia li saib txhua yam no, nej yuav tsis qhia kom paub li lov? Txij no mus kuv hais txog tej yam tshiab rau nej mloog, yog tej uas muab npog cia nej tsis tau paub. Yog tej uas tsim nimno tsis yog ntev los lawm, ua ntej hnub no nej tsis tau hnov txog li, ntshai tsam nej yuav hais tias, ‘Peb twb paub lawm.’ Nej yeej ib txwm tsis tau hnov, nej yeej ib txwm tsis tau paub, txij thaum ub los nej lub qhov ntsej yeej tsis tau qheb, rau qhov kuv paub tias nej xyaum ua neeg fav xeeb, thiab paub tias txij thaum yug los luag hu nej tias yog cov uas sawv twv. Vim yog saib rau kuv lub npe, kuv thiaj tswj kuv txojkev npau taws cia, vim yog saib rau qhov uas luag qhuas, kuv thiaj tswj lub siab kom kuv thiaj tsis muab nej txiav pov tseg. Saib maj, kuv twb muab nej nchuav hauv yeej vub kom tsis thooj li nyiaj, kuv twb muab nej sim rau hauv cub tawg uas yog kev txom nyem. Kuv ua li ntawd vim yog saib rau kuv, yog saib rau kuv xwb, rau qhov kuv lub npe yuav raug luag saib tsis taus tau li cas? Kuv tsis pub kuv lub hwjchim ci ntsa iab rau lwm tus li.” “Yakhauj thiab Yixayee uas kuv hu los 'e, cia li mloog kuv hais. Kuv yog Yawmsaub ntag, kuv yog lub hauv paus thiab yog lub ntsis. Kuv txhais tes tau pua daim uas tiag lub ntiajteb thiab kuv txhais tes xis tau nthuav lub ntuj. Thaum kuv hu mas lub ntuj thiab lub ntiajteb kuj sawv pes tsees. “Nej sawvdaws cia li tuaj txoos ua ke tig ntsej mloog. Lawv tej dab tus twg tau piav txog tej no rau nej mloog? Yawmsaub hlub Xailab, mas nws yuav ua raws li Yawmsaub twb npaj tseg rau Npanpiloo thiab nws yuav tawm tsam cov Kheedia. Kuv ntag lauj yog tus hais thiab hu nws, kuv coj nws los mas txhua yam uas nws ua nws yuav ua tau kom tiav. Cia li txav los ze kuv thiab mloog zaj no. Txij thaum chiv thawj los kuv yeej qhia tsis zais li. Txij thaum tej lus ntawd tshwm los, kuv yeej nrog nyob ua ke lawm.” Nimno Vajtswv Yawmsaub tau txib kuv thiab pub nws tus Ntsuj Plig rau kuv. Yawmsaub uas yog tus txhiv nej thiab yog tus Dawb Huv hauv cov Yixayee hais li no hais tias, “Kuv yog Yawmsaub, yog nej tus Vajtswv, kuv qhuab qhia tej uas muaj nuj nqes rau nej thiab coj nej taug txojkev uas tsim nyog mus. Au, yog nej tau mloog kuv tej lus nkaw, mas nej lub siab yuav tus yees yam nkaus li tus niag dej puv ntug nkaus, thiab nej txojkev ncaj ncees yuav zoo li tej nthwv dej hiavtxwv ntas, thiab nej tej tub ki yuav coob yam nkaus li tej xuab zeb, thiab nej caj ces yuav coob yam li tej tsig xuab zeb, lawv tej npe yuav tsis raug muab txiav pov tseg thiab tsis raug muab rhuav kom ploj tag ntawm kuv xubntiag.” Cia li tawm hauv Npanpiloo mus, cia li khiav hauv Kheedia mus. Cia li tshaj tawm zaj no qw nrov nrov xyiv fab hlo, cia li piav rau sawvdaws mloog, cia li xa xov kom thoob qab ntuj hais tias, “Yawmsaub twb txhiv nws tus tub qhe Yakhauj dim lawm.” Thaum Yawmsaub coj lawv taug txojkev hauv ntuj nrag teb do lawv kuj tsis nqhis dej. Nws ua dej txhawv hauv phab zeb los rau lawv haus. Nws phua phab zeb mas dej txhawv hlob kawg los. Yawmsaub hais tias, “Cov neeg limhiam yuav tsis muaj lub siab tus li.” Tej tebchaws raws ntug hiavtxwv 'e, cia li mloog kuv hais, nej cov neeg uas nyob deb 'e, cia tig ntsej mloog. Yawmsaub hu kuv txij thaum nruab thiab los, nws tis kuv npe txij thaum kuv nyob hauv kuv niam lub plab los. Nws ua kuv lub qhov ncauj ntse li rab ntaj, nws muab kuv nraim rau hauv nws txhais tes tus duab ntxoov ntxoo. Nws muab kuv ua rab xub uas muab txhuam zoo zoo lawm, nws muab kuv zais rau hauv nws lub raj xub. Nws hais rau kuv tias, “Yixayee, koj yog kuv tus qhev, kuv yuav tau koob meej ntawm koj.” Tiamsis kuv hais tias, “Kuv ua haujlwm khwv dawb dawb xwb, kuv nkim kuv lub zog do do qhuav qhawv xwb. Tiamsis kuv txojcai nyob ntawm Yawmsaub, thiab kuv tus nqe zog nyob ntawm kuv tus Vajtswv.” Yawmsaub yog tus uas puab kuv hauv lub plab los ua nws tus qhev thiab coj Yakhauj rov los cuag nws thiab qaws Yixayee sau zog ua ke los cuag nws, vim yog kuv tau koob meej ntawm Yawmsaub lub qhov muag, thiab kuv tus Vajtswv yog kuv lub dag lub zog. Nws hais tias, “Qhov uas koj yuav ua kuv tus qhev es tsa Yakhauj cov xeem sawv thiab pub cov uas tseem tshuav nyob hauv Yixayee rov tau zoo li qub yog ib qho me me xwb. Kuv yuav pub koj ua lub teeb uas ci rau ib tsoom tebchaws, kom kuv txojkev cawm dim thiaj mus txog qab ntuj kawg.” Yawmsaub uas yog tus txhiv Yixayee thiab yog tus Dawb Huv hauv cov Yixayee, hais li no rau tus uas ib tsoom tebchaws saib tsis taus thiab ntxub kawg, yog cov neeg uas kav li tub qhe, hais tias, “Tej vajntxwv yuav tsa muag ntsia thiab sawv tsees, cov thawj yuav pom thiab yuav pe, vim Yawmsaub yog tus uas ua ncaj, nws yog tus Dawb Huv hauv cov Yixayee, yog tus uas xaiv koj lawm.” Yawmsaub hais li no tias, “Lub sijhawm uas kuv hlub, kuv yuav teb koj, hnub uas cawm dim, kuv yuav pab koj. Kuv yuav tsom kwm koj thiab pub koj ua lo lus cog tseg rau ib tsoom neeg, kom thiaj li tuav tau lub tebchaws nyob ruaj thiab rov muab tej teb uas nyob do cuas faib ua qub txeeg qub teg, thiab hais rau cov uas raug kaw tias, ‘Cia li tawm los lauj,’ thiab hais rau cov uas nyob hauv qhov tsaus ntuj tias, ‘Cia li tshwm plaws los.’ Lawv yuav nrhiav noj ntawm tej ntug kev, thiab saum tej roob do hau yuav ua lawv lub tshav zaub. Lawv yuav tsis tshaib tsis nqhis, tej cua kub thiab lub hnub yuav tsis hlawv lawv rau qhov tus uas khuvleej lawv yuav coj lawv, nws yuav coj lawv taug kev ze tej qhov dej txhawv. Kuv yuav muab kuv tej roob huvsi ua txojkev, kuv tej niag kev yuav raug muab tsim tsa cia. Saib maj, lawv yuav los deb deb los, saib maj, lawv los sab ped thiab sab hnub poob, thiab lawv los tebchaws Xi‑ene los.” Lub ntuj 'e, cia li hu nkauj zoo siab xyiv fab, lub ntiajteb 'e, cia li xyiv fab kawg, tej roob 'e, cia li tsa suab hu nkauj, rau qhov Yawmsaub nplij nws haiv neeg lub siab, thiab yuav khuvleej nws cov neeg uas raug kev txom nyem nyuaj siab. Tiamsis Xi‑oo hais tias, “Yawmsaub tso kuv tseg lawm, kuv tug Tswv tsis nco qab kuv lawm.” “Tus pojniam yuav tsis nco qab nws tus menyuam uas tseem noj mis, thiab tsis khuvleej tus tub uas nws yug tau thiab lov? Txawm yog lawv tseem tsis nco qab tau los kuv pheej yuav nco ntsoov koj. Saib maj, kuv sais koj rau hauv kuv xib teg, koj lub ntsa loog nyob rawv ntawm kuv xubntiag. Cov uas tsim kho koj kuj kov yeej cov uas ua kom puam tsuaj, cov uas ua rau koj raug tso tseg nyob do cuas kuj khiav ntawm koj mus lawm. Cia li tsa muag ntsia puag ncig thiab pom, lawv sawvdaws tuaj txoos ua ke, lawv tuaj cuag koj.” Yawmsaub hais tias, “Kuv muaj txojsia nyob pom, koj yuav muab lawv los coj ib yam li coj tej npauj nyiaj npauj kub, koj yuav muab lawv coj ib yam li tus nkauj nyab coj npauj. “Txawm yog koj tej chaw raug muab tso tseg nyob do cuas thiab koj lub tebchaws raug liamsim tag, los nimno koj yeej yuav nqaim dhau tsis txaus koj cov neeg nyob, thiab cov uas nqos koj yuav nyob deb deb lawm. Cov menyuam uas yug rau thaum koj quaj ntsuag poob tebchaws yuav hais rau koj lub qhov ntsej tias, ‘Lub chaw no nqaim dhau tsis txaus kuv nyob, cia li nrhiav chaw rau kuv nyob.’ Thaum ntawd koj yuav hais hauv lub siab tias, ‘Leejtwg yug cov neeg no rau kuv? Kuv cov menyuam tuag thiab kuv xeeb tsis taus menyuam lawm. Kuv raug poob tebchaws thiab raug ntiab khiav tag lawm, mas leejtwg tu cov menyuam no? Saib maj kuv raug muab tso tseg nyob tib leeg, es cov no tawm qhovtwg los?’ ” Vajtswv Yawmsaub hais li no tias, “Kuv yuav tsa kuv txhais tes co rau ib tsoom tebchaws, thiab tsa kuv tus chij rau ib tsoom neeg, mas lawv yuav puag koj cov tub rau ntawm xubntiag los, thiab yuav ris koj cov ntxhais saum xub pwg los. Tej vajntxwv yuav ua koj txiv tshiab, thiab tej poj vaj yuav ua koj niam tshiab tu koj. Lawv cov no yuav khoov ntshis rau hauv av pe koj, lawv yuav yaim hmoov av ntawm koj kotaw. Ces koj thiaj paub tias kuv yog Yawmsaub. Cov uas tos ntsoov kuv yuav tsis raug txaj muag.” Yuav txeeb tau tej uas tus muaj zog heev lws tau rov los lov? Lossis cawm cov uas tus limhiam ntais ntuj ntes tau kom dim lov? Yawmsaub yeej hais li no tias, “Txawm yog cov uas raug tus muaj zog heev ntes lawm los yuav muab txeeb tau rov los, thiab tej uas tus limhiam ntais ntuj lws tau lawm los yuav cawm kom dim tau rov los, rau qhov kuv yuav tawm tsam cov uas tawm tsam koj, thiab kuv yuav cawm koj tej tub ki kom dim. Kuv yuav ua kom cov uas quab yuam koj rov noj lawv cev nqaij, thiab haus lawv tej ntshav qaug ib yam li qaug cawv txiv hmab. Mas ib tsoom neeg thiaj paub tias kuv yog Yawmsaub yog koj tus cawmseej, yog tus uas txhiv koj thiab yog Yakhauj tus Vajtswv uas muaj hwjchim.” Yawmsaub hais li no tias, “Koj niam daim ntawv nrauj uas kuv siv tso nws tseg ntawd nyob qhovtwg lawm? Lossis kuv muab koj muag rau cov uas kuv tshuav nqe leejtwg? Saib maj, yog tim koj tej kev txhaum koj thiaj raug muab muag, thiab tim koj tej kev fav xeeb koj niam thiaj raug muab tso tseg. Ua cas thaum kuv tuaj tsis muaj leejtwg li, thaum kuv hu tsis muaj leejtwg teb? Kuv txhais tes luv txhiv tsis tau lov? Kuv tsis muaj zog cawm kom dim lov? Saib maj, kuv hais xwb ua rau dej hiavtxwv qhuav, kuv muab tej niag dej ua ntuj nrag teb do, tej ntses hauv hav dej tsw lwj ntxiag vim yog tsis muaj dej thiaj li nqhis tuag tag. Kuv muab qhov tsaus ntuj nti qhwv lub ntuj, thiab muab khaub seev tsaj rau hnav.” Vajtswv Yawmsaub pub kuv muaj nplaig ib yam li lawv cov uas nws qhia kom kuv thiaj txawj hais ib lo lus txhawb cov uas qaug zog. Txhua tagkis nws tsa kuv tsim dheev, nws tsa kuv lub qhov ntsej tsim dheev los mloog yam li tus uas nws qhuab qhia. Vajtswv Yawmsaub qheb kuv lub qhov ntsej, kuv tsis fav xeeb, thiab kuv tsis thim rov qab. Kuv tig nrob qaum rau cov uas ntaus kuv, thiab tig plhu rau cov uas dob kuv cov hwj txwv, kuv tsis nraim kuv lub ntsej muag ntawm qhov uas raug txaj muag thiab raug luag nto qaub ncaug. Vim Vajtswv Yawmsaub pab kuv, kuv thiaj tsis poob ntsej muag. Kuv ua kuv lub plhu tawv cuag li zeb hauvswm, thiab kuv paub tias kuv yuav tsis raug txaj muag. Tus uas tsa kuv cai kuj nyob ze. Leejtwg yuav ua plaub rau kuv? Cia nws nrog kuv sawv sib cam. Leejtwg tawm tsam kuv? Cia nws tuaj ze kuv. Saib maj, Vajtswv Yawmsaub pab kuv. Leejtwg yuav hais tau tias kuv yog neeg txhaum? Lawv sawvdaws yuav lwj zuj zus tag yam li lub tsho, thiab kab ntsaum yuav noj lawv tag. Nej cov leejtwg hwm thiab paub ntshai Yawmsaub thiab mloog nws tus qhev lub suab? Tus ntawd taug txojkev tsaus ntuj nti tsis muaj qhov kaj, los nws tso siab rau Yawmsaub lub npe thiab vam khom nws tus Vajtswv. Nej sawvdaws uas zes taws thiab npaj nej teg tsau, nej cia li taug kev hauv cov duab hluavtaws ci uas nej hlawv ntawd thiab hauv tej teg tsau ci uas nej zes taws rau. Nej yuav tau li no ntawm kuv txhais tes, yog nej yuav pw raug kev tsim txom heev kawg li. “Nej cov uas huas ntshis txojkev cawm dim, nej cov uas nrhiav Yawmsaub, cia li mloog kuv hais. Cia li saib txhib zeb uas txua nej tawm los thiab saib lub qhov uas khawb tau nej los. Cia li tsa muag ntsia nej yawg koob Aplahas thiab saib Xala uas yug nej. Thaum muaj nws tib leeg xwb kuv twb hu nws lawm, thiab kuv foom koob hmoov rau nws thiab ua rau nws huaj vam coob. Yawmsaub yuav nplij Xi‑oo, Yawmsaub yuav nplij nws tej chaw uas muab tso tseg nyob do cuas cia, thiab yuav ua rau nws tej tebchaws moj sab qhua zoo li lub vaj Edee, thiab muab tej ntuj nrag teb do ua zoo li Yawmsaub lub vaj. Yuav ntsib txojkev xyiv fab zoo siab thiab txojkev ua tsaug thiab suab nkauj hauv nws. “Kuv haiv neeg 'e, cia li mloog kuv hais, kuv lub tebchaws 'e, cia li tig pob ntseg mloog kuv, vim yog txoj kevcai yuav tawm hauv kuv mus thiab txojkev ua ncaj ua ncees yuav tawm mus ua txojkev kaj ci rau ib tsoom neeg. Kuv txojkev dim twb los ze sai sai no, kuv txojkev cawm dim twb tawm mus lawm. Kuv txhais npab yuav kav rawv ib tsoom neeg. Tej tebchaws ntawm ntug hiavtxwv kuj tos rawv kuv, lawv tos vam khom kuv txhais npab. Cia li tsa muag ntsia saum ntuj thiab saib rau hauv lub ntiajteb, vim tias lub ntuj yuav ploj tag yam li tej pa ncho, thiab lub ntiajteb yuav khaub hlab tag yam li lub tsho, mas lawv cov uas nyob hauv yuav tuag tag yam li tej yoov qaib. Tiamsis kuv txojkev cawm dim yuav nyob mus ib txhis, thiab kuv txojkev dim yuav muaj mus tsis txawj kawg li. “Nej cov uas paub txojkev ncaj ncees, yog cov uas kuv txoj kevcai nyob hauv lawv lub siab, cia li mloog kuv hais. Tsis txhob ntshai qhov uas neeg thuam, thiab tsis txhob poob siab rau qhov uas luag iab hiam, rau qhov kab ntsaum yuav noj lawv yam li noj lub tsho, thiab kas yuav noj lawv yam li noj plaub yaj. Tiamsis kuv txojkev dim yuav nyob mus ib txhis thiab kuv txojkev cawm dim yuav nyob txhua txhia tiam.” Yawmsaub txhais npab 'e, cia li tsim dheev, cia li tsim dheev, cia li tsav koj lub zog, cia li tsim dheev ib yam li yav thaum ub, uas twb muaj ntev los lawm. Koj tsis yog tus uas muab Lahaj txiav ua tej dwb daim thiab nkaug niag zaj ntawd tshab plaws lov? Koj tsis yog tus uas ua rau dej hiavtxwv qhuav kiag lov, yog lub Hiavtxwv Loj? Koj tsis yog tus uas muab qab thu hauv hiavtxwv ua kiag txojkev rau cov uas twb txhiv dim lawm taug hla mus lov? Yawmsaub cov neeg uas twb txhiv dim lawm yuav rov qab los, thiab yuav hu nkauj laws los rau hauv Xi‑oo. Txojkev xyiv fab yuav nyob rau saum lawv lub taubhau mus ib txhis tsis kawg. Lawv yuav tau txojkev xyiv fab thiab txojkev zoo siab, mas txojkev xyu thiab kev lwj siab yuav ploj ntais mus. “Kuv yeej yog tus uas nplij nej. Nej yog leejtwg es nej yuav ntshai tej neeg uas txawj tuag, thiab ntshai neeg tej tub uas tsim los zoo li tej nroj xwb? Nej tseem tsis nco qab Yawmsaub tus uas tsim nej, yog tus uas nthuav lub ntuj thiab pua daim uas tiag lub ntiajteb, thiab tseem niaj hnub ua siab ntshai vim cov uas quab yuam nej npau taws, yog thaum lawv npaj yuav ua kom puam tsuaj. Cov uas quab yuam nej txojkev npau taws nyob qhovtwg? Tus uas raug quab yuam es khoov khoov yuav raug muab tso dim sai sai, nws yuav tsis tuag thiab tsis nqes mus rau hauv qhov tuag, thiab yuav muaj noj muaj haus tsis tu li. Kuv yog Yawmsaub, yog nej tus Vajtswv uas do dej hiavtxwv ua kom dej ntas tej niag nthwv nrov vig voog. (Nws lub npe yog Yawmsaub uas muaj hwjchim loj kawg nkaus.) Kuv muab kuv tej lus rau hauv koj lub qhov ncauj, thiab kuv muab koj zais rau hauv kuv txhais tes tus duab ntxoov ntxoo. Kuv nthuav lub ntuj thiab pua tej taw uas tiag lub ntiajteb, thiab hais rau Xi‑oo tias, ‘Koj yog kuv haiv neeg.’ ” Au Yeluxalees, cia li tsa koj sawv, cia li tsa koj sawv tsees, cia li sawv ntsug, koj yog tus uas tau haus ntawm Yawmsaub txhais tes, yog Yawmsaub lub khob npau taws, koj tau haus mus txog cov txo, yog lub khob uas ua rau vau pig poog. Cov tub uas Yeluxalees yug tsis muaj ib tug coj tau nws. Cov tub uas nws tu hlob los kuj tsis muaj ib tug tuav nws tes. Ob yam no tau tshwm los raug koj. Leejtwg yuav nplij koj? Yog kev rhuav tshem thiab kev puam tsuaj, kev tshaib nqhis thiab hniav ntaj. Leejtwg yuav nplij koj lub siab? Koj tej tub tsaus muag tsis xeev lawm, lawv pw rau txhua txoj hauv kev zoo yam nkaus li tus muas lwj mag hlua. Lawv raug Yawmsaub npau taws kawg nkaus li, thiab raug koj tus Vajtswv cem. Koj uas raug kev txom nyem nyuaj siab, koj uas qaug puj poog, tiamsis tsis yog qaug cawv txiv hmab, cia li mloog tej no. Koj tug Tswv, yog Yawmsaub uas yog koj tus Vajtswv uas pab nws haiv neeg hais plaub, hais li no tias, “Saib maj, kuv twb muab lub khob uas ua rau vau pig poog rho hauv koj txhais tes lawm, kuv lub khob npau taws, koj yuav tsis tau haus dua li lawm. Kuv yuav muab lub khob no rau hauv cov uas tsim txom koj txhais tes, yog cov uas hais rau koj tias, ‘Nyo maj, peb yuav hla saum koj mus,’ mas koj ua koj lub nrob qaum zoo li plas av thiab zoo li txojkev rau lawv taug mus.” Xi‑oo 'e, cia li tsim dheev, cia li tsim dheev los maj, cia li muab koj lub zog los hnav. Yeluxalees 'e, lub nroog dawb huv 'e, cia li hnav koj tej tsoos tsho zoo nkauj, rau qhov cov uas tsis ua kevcai txiav thiab cov uas qias tsis huv yuav tsis nkag los rau hauv koj dua li lawm. Yeluxalees 'e, cia li nchos tej hmoov av ntawm koj lub cev, cia li sawv tsees thiab zaum. Xi‑oo tus ntxhais uas raug ntes 'e, cia li daws tej hlua ntawm koj caj dab. Rau qhov Yawmsaub hais li no tias, “Koj raug muab muag dawb dawb, koj kuj yuav raug txhiv tsis them nqe li.” Vajtswv Yawmsaub hais li no tias, “Thaum ub kuv haiv neeg mus nyob rau hauv Iyi tebchaws, thiab cov neeg Axilia quab yuam lawv dawb dawb xwb.” Yawmsaub hais tias, “Nimno kuv muaj dabtsi nyob ntawm no, rau qhov uas kuv haiv neeg raug muab coj mus dawb dawb lawm?” Yawmsaub hais tias, “Lawv cov thawj quaj nyiav thiab hais lus tuam mom kuv lub npe tas hnub tas hmo tsis tu li. Vim li no kuv haiv neeg yuav paub kuv lub npe, rau qhov hnub ntawd lawv yuav paub tias yog kuv hais ntag, kuv nyob ntawm no.” Tus uas coj xov zoo tuaj txhais kotaw zoo nkauj kawg rau saum tej roob, yog tus uas tshaj tawm txojkev thaj yeeb thiab coj xov zoo hais txog zaj uas zoo, yog tus uas tshaj tawm txojkev cawm dim, thiab hais rau Xi‑oo tias, “Koj tus Vajtswv ua vajntxwv kav.” Cia li tig ntsej mloog. Cov uas faj xwm kuj tsa lub suab, lawv hu nkauj ua ke zoo siab xyiv fab, rau qhov lawv qhov muag pom ntsoov Yawmsaub rov los rau hauv Xi‑oo. Yeluxalees tej chaw uas raug muab tso tseg nyob do cuas, cia li tsa suab hu nkauj, rau qhov Yawmsaub twb nplij nws haiv neeg, nws twb txhiv Yeluxalees lawm. Yawmsaub twb loj npab ntshuas nws txhais npab uas dawb huv tab meeg ib tsoom tebchaws sawvdaws, mas thoob qab ntuj kawg yuav pom peb tus Vajtswv txojkev cawm dim. Cia li mus, cia li tawm mus, cia li tawm qhov ntawd mus, tsis txhob kov tej uas qias tsis huv. Nej cov uas nqa Yawmsaub tej twj siv, cia li tawm hauv lub plawv nroog ntawd mus, cia li tu nej tus kheej kom dawb huv. Nej yuav tsis maj tawm mus, thiab nej yuav tsis nyiag kev khiav mus, rau qhov Yawmsaub yuav mus ua nej ntej, thiab Yixayee tus Vajtswv yuav faj seeb tom nej qub qab. Saib maj, kuv tus qhev yuav muaj tswvyim ua tau txhua yam, nws yuav muaj koob meej thiab raug luag txhawb nqa thiab nws yuav nyob lub rooj siab heev. Neeg coob heev yuav ceeb nkaus nws, nws lub ntsej muag txawv heev tsis thooj li neeg, thiab nws lub cev kuj txawv tsis thooj li neeg tej tub. Nws yuav ua rau ntau lub tebchaws ceeb nkaus ib yam nkaus. Tej vajntxwv yuav qos ncauj nti vim yog tim nws, rau qhov lawv yuav pom yam uas tsis tau muaj leejtwg hais rau lawv, thiab lawv yuav nkag siab txog yam uas lawv tsis tau hnov dua. Leejtwg ntseeg tej uas peb tau hais? Yawmsaub ua nws txhais npab tshwm rau leejtwg? Nws tus tub qhe loj hlob rau ntawm nws xubntiag ib yam li tus kaus mos, thiab yam li tus cag uas hlav ntsuag hauv cov av qhuav tuaj. Nws lub cev ntaj ntsug tsis muaj ib qho zoo nraug uas txaus peb saib, thiab nws tsis muaj ib qho zoo uas txaus peb ntshaw nws. Nws raug neeg saib tsis taus thiab muab tso tseg, nws yog ib tug uas pheej raug kev txom nyem nyuaj siab, thiab txeev muaj mob nkeeg, nws raug saib tsis taus yam li tus uas tej neeg fee plhu, thiab peb tsis hwm nws kiag li. Yeej yog nws ris peb tej mob nkeeg thiab sau peb tej kev txom nyem nyuaj siab mus, txawm li ntawd los peb tseem suav tias nws raug nplawm, yog raug Vajtswv nplawm thiab raug kev txom nyem nyuaj siab. Tiamsis nws raug mob vim yog tim peb tej kev fav xeeb, nws raug ntsoog vim yog tim peb tej kev txhaum. Txojkev nplawm uas ua rau peb tau nyob kaj siab lug poob rau saum nws, qhov nws raug to ntawd kuj yog kho kom peb zoo. Peb txhua tus yuam kev yam li tej yaj, peb txhua tus nyias tig mus taug nyias txojkev, mas Yawmsaub muab peb sawvdaws l ub txim tso rau saum nws. Nws raug quab yuam thiab raug txom nyem nyuaj siab los nws tsis rua ncauj, ib yam li tus menyuam yaj uas raug coj mus tua, thiab ib yam li tus yaj nyob twjywm ntawm tus uas txiav plaub xubntiag li cas, nws kuj tsis rua ncauj ib yam li ntawd. Nws raug quab yuam raug txiav txim thiab raug coj mus. Nws tiam neeg leejtwg xav tias nws raug muab txiav ntawm cov neeg ciaj mus thiab raug ntaus vim yog tim kuv haiv neeg tej kev fav xeeb? Txawm yog nws tsis tau ua nruj ua tsiv, thiab nws lub qhov ncauj tsis tau dag ntxias, los luag npaj nws lub qhov ntxa nrog cov neeg limhiam ua ke, thiab thaum nws tuag lawv muab log nrog tus nplua nuj. Yeej yog Yawmsaub pom zoo yuav tsoo nws ntsoog thiab ua rau nws raug mob nkeeg. Txawm yog nws muab nws tus kheej xyeem daws txim, los nws yuav pom nws caj ces thiab yuav muaj txojsia nyob ntev. Tej uas Yawmsaub pom zoo yuav vam meej hauv nws txhais tes. Nws yuav pom qhov uas nws tus ntsuj plig raug txom nyem tej txiaj ntsig thiab nws yuav txaus siab, kuv tus qhev uas ncaj ncees yuav siv nws txojkev txawj ntse ua rau neeg coob coob ua tau neeg ncaj ncees, thiab nws yuav ris lawv tej kev txhaum. Kuv thiaj yuav pub nws muaj feem nrog cov uas ua hlob ua ke, thiab nws yuav nrog cov uas muaj zog muaj feem tau tej uas txeeb tau los, rau qhov nws tso nws tus ntsuj plig txog qhov uas tuag thiab raug muab suav rau hauv cov neeg fav xeeb. Txawm li ntawd los nws kuj ris neeg coob coob lub txim, thiab thov Vajtswv pab cov neeg uas fav xeeb. “Tus pojniam mooj 'e, tus uas tsis tau yug dua menyuam, cia li hu nkauj, koj uas tsis tau mob dua plab yug menyuam 'e, cia li tsa suab hu nkauj thiab hu nrov nrov, rau qhov tus pojniam uas tsis muaj txiv li menyuam yuav coob dua tus pojniam uas muaj txiv.” Yawmsaub hais li no ntag. “Cia li txuas koj lub tsev ntaub kom dav, thiab nthuav daim ntaub uas xov koj lub chaw nyob kom dav. Tsis txhob nkaum tes, cia li txuas koj txoj hlua kom ntev thiab txhos koj tej tswg kom ruaj, rau qhov koj yuav nthuav dav mus rau sab xis sab laug. Koj tej caj ces yuav tau ib tsoom tebchaws los ua lawv tug, thiab yuav mus nyob rau hauv tej moos uas nyob do cuas. Tsis txhob ntshai vim koj yuav tsis raug txaj muag, tsis txhob poob siab vim koj yuav tsis poob ntsej muag. Koj yuav tsis nco qab tej kev txaj muag thaum koj tseem hluas nkauj, thiab koj yuav tsis nco qhov uas luag thuam koj ua poj ntsuam dua li lawm. Tus uas tsim koj yog koj li txiv, nws npe yog Yawmsaub uas muaj hwjchim loj kawg nkaus, thiab tus Dawb Huv hauv cov Yixayee yog tus txhiv koj, nws hu ua Vajtswv uas kav tag nrho lub ntiajteb huvsi. Yawmsaub tau hu koj yam li tus pojniam uas raug muab tso tseg es lwj siab lawd, yam li tus pojniam hluas uas raug muab tso tseg.” Koj tus Vajtswv hais li no ntag. “Kuv tso koj tseg ib nyuag pliag xwb, tiamsis kuv khuvleej koj heev es kuv yuav qaws koj rov los. Kuv npau taws ceev es fee plhu ntawm koj ib nyuag pliag xwb, tiamsis vim yog muaj txojkev hlub ib txhis kuv yuav khuvleej koj.” Yawmsaub tus uas txhiv koj hais li no ntag. “Kuv saib tej no zoo ib yam li thaum Nau‑a nyob. Kuv cog lus twv rau Nau‑a tias dej yuav tsis nyab lub ntiajteb dua li lawm, ib yam li ntawd kuv tau cog lus twv tias kuv yuav tsis chim rau koj thiab yuav tsis cem koj. Txawm yog tej roob yuav ncaim mus thiab tej pov roob yuav raug muab rhuav tshem mus, los kuv txojkev hlub uas ruaj khov yuav tsis ncaim koj, thiab kuv tej lus cog tseg sib raug zoo yuav tsis raug muab rhuav tshem.” Yawmsaub uas khuvleej koj hais li no ntag. “Au koj uas raug txom nyem nyuaj siab, raug cua daj cua dub ntsawj thiab tsis muaj leejtwg nplij, saib maj, kuv muab koj tej pob zeb lo tej qe zeb hlaws dub txho txaij thiab muab tej qe zeb phaithu tsamxem los tiag koj lub taw. Kuv yuav muab tej qe zeb liab los ua koj tej chaw tsom faj, thiab muab tej qe zeb hlaws ci ci muaj nqes los ua koj tej rooj loog, thiab muab tej qe zeb muaj nqes los ua koj tej ntsa loog. Yawmsaub yuav qhuab qhia koj tej tub huvsi, thiab koj tej tub ki yuav vam meej heev kawg. Koj yuav raug muab tsa rau hauv txojkev ncaj ncees, koj yuav nyob deb ntawm kev raug luag quab yuam, vim koj yuav tsis ntshai, thiab deb ntawm txojkev txhawj xeeb kev ntshai vim tej ntawd yuav tsis los ze koj. Yog leejtwg tshum kom muaj kev sib txeeb, kuj tsis yog kuv ua. Leejtwg tshum kom muaj kev sib txeeb tus ntawd yuav piam tag rau koj tes. Saib maj, kuv twb tsim tus Kws hlau uas tshuab tej thee hluavtaws, thiab ua tej cuab yeej uas hum siv rau tej haujlwm ntawd. Kuv twb tsim tus uas rhuav tshem ua kom puam tsuaj. Tsis muaj ib yam cuab yeej uas tsim los tawm tsam yeej koj, thiab koj yuav rhuav tshem txhua tus nplaig uas sawv los txiav txim rau koj. No yog Yawmsaub cov tub qhe li qub txeeg qub teg, thiab yog qhov uas kuv tsa lawv cai.” Yawmsaub hais li no ntag. “Txhua tus uas nqhis cia li los cuag dej, tus uas tsis muaj nyiaj cia li los yuav thiab noj. Cia li los yuav cawv txiv hmab thiab kua mis tsis txog them nyiaj them nqe. Ua cas nej siv nej tej nyiaj yuav yam uas tsis yog zaub mov, thiab ua haujlwm khwv rau tej uas tsis txaus nej siab? Cia li rau siab mloog kuv hais, thiab noj yam uas zoo, thiab cia li zoo siab rau tej zaub mov uas zoo tshaj. Cia li tig ntsej mloog thiab los cuag kuv. Cia li mloog kom nej tus ntsuj plig thiaj li ciaj sia nyob. Kuv yuav cog lus tseg mus ib txhis rau nej, yog kuv txojkev hlub ruaj khov uas muaj tseeb rau Davi. Saib maj, kuv muab nws ua timkhawv rau ib tsoom neeg, ua tus thawj thiab tus uas kav ib tsoom neeg. Koj yuav hu tej tebchaws uas koj tsis tau paub dua, thiab tej haiv neeg uas tsis tau paub dua koj, yuav dhia tuaj cuag koj, vim yog muaj koj tus Vajtswv Yawmsaub uas yog tus Dawb Huv hauv cov Yixayee, rau qhov nws pub koob meej rau koj.” Cia li nrhiav Yawmsaub rau thaum uas tseem ntsib tau, cia li thov nws rau thaum nws tseem nyob ze. Cia cov neeg limhiam tso lawv tej kev phem tseg, thiab tus uas tsis ncaj ncees tso nws tej kev xav tseg. Cia lawv rov los cuag Yawmsaub kom nws thiaj li khuvleej lawv, thiab los cuag peb tus Vajtswv vim nws yuav zam txim huvsi rau lawv. “Kuv tej kev xav tsis thooj li nej tej kev xav, thiab nej tej kev tsis thooj li kuv tej kev.” Yawmsaub hais li no ntag. “Lub ntuj siab dhau lub ntiajteb li cas, kuv tej kev kuj siab dua nej tej kev, thiab kuv tej kev xav siab dua nej tej kev xav li ntawd. Nag thiab daus xib daus npu los saum ntuj los thiab tsis rov qab mus rau saud tsuas muaj uas ntub lub ntiajteb ua rau lub ntiajteb tuaj kaus tuaj ntsuag, pub noob rau tus uas tseb noob thiab pub zaub mov rau tus uas noj li cas, kuv tej lus uas tawm hauv kuv lub qhov ncauj mus kuj zoo ib yam li ntawd. Tej lus ntawd yuav tsis rov los do cuas rau kuv, tiamsis yuav ua tej uas kuv hom tseg lawd kom tiav, thiab ua rau tej uas kuv txib mus ua ntawd hlob tuaj. Nej yuav tawm mus ua zoo siab xyiv fab thiab raug coj mus kaj siab lug. Tej roob thiab tej pov roob yuav tsa suab hu nkauj ua nej ntej, thiab tej ntoo huvsi hauv nruab teb yuav npuaj teg. Ntoo ciab nplooj suab yuav tuaj nyob pos kaus ntsaj chaw, txiv ntoo roj yuav tuaj nyob pos kaus ntsim chaw. Tej no yuav ua lub chaw cim kom nco ntsoov Yawmsaub, yuav yog txujci tseem ceeb mus ib txhis uas tsis muab rhuav li.” Yawmsaub hais li no tias, “Cia li tuav rawv txojkev tu plaub ncaj thiab ua raws li txojkev ncaj ncees, rau qhov tshuav tsis ntev kuv txojkev dim yuav los thiab kuv txojkev cawm dim yuav nthuav rau sawvdaws paub. Tus uas ua li no thiab neeg tej tub uas coj nruj li no yuav tau nyob kaj siab lug, yog tus uas hwm hnub Xanpatau tsis txhob ua qias puas tsuas hnub ntawd thiab tswj nws txhais tes tsis txhob ua ib yam phem li.” Tsis txhob kheev lwm haiv neeg uas los ntseeg Yawmsaub hais tias, “Yawmsaub yuav muab kuv cais tawm ntawm nws haiv neeg tiag tiag,” thiab tsis txhob kheev tus txivneej uas chaw xis puag lawm hais tias, “Saib maj kuv yog tus ntoo qhuav,” rau qhov Yawmsaub hais li no tias, “Cov txivneej uas ua tsis taus txivneej mas yog lawv hwm kuv hnub Xanpatau thiab xaiv txhua yam uas hum kuv lub siab thiab tuav rawv kuv tej lus cog tseg nruj, mas kuv yuav ua lub chaw nco txog lawv cov ntawd thiab pub koob meej rau lawv rau hauv kuv lub tuam tsev thiab hauv kuv lub ntsa loog, mas zoo dua li uas lawv muaj tub muaj ntxhais, kuv yuav pub lub koob meej uas nyob mus ib txhis rau lawv, yuav tsis muab txiav pov tseg. Thiab lwm haiv neeg uas los ntseeg Yawmsaub ua koom tu nws thiab nyiam Yawmsaub lub npe thiab ua nws li tub qhe, yog txhua tus uas hwm hnub Xanpatau thiab tsis txhob ua qias puas tsuas hnub ntawd thiab tuav rawv kuv tej lus cog tseg, mas kuv yuav coj cov neeg no los txog kuv lub roob uas dawb huv, thiab ua rau lawv zoo siab xyiv fab rau hauv lub tuam tsev uas thov kuv. Tej uas lawv muab hlawv xyeem thiab tej uas lawv muab xyeem kuv yuav zoo siab txais yuav rau saum kuv lub thaj, rau qhov kuv lub tuam tsev yuav hu tias lub tsev uas txhua haiv neeg thov kuv.” Vajtswv Yawmsaub uas qaws cov Yixayee uas poob tebchaws ua sab ua sua lawm hais li no tias, “Kuv yuav qaws luag lwm tus los nrog cov uas kuv twb qaws cia lawm.” Txhua tus tsiaj nruab nrag thiab txhua tus tsiaj qus hauv hav zoov, cia li los noj lauj! Yixayee cov uas faj xwm dig muag, lawv sawvdaws tsis txawj tsis ntse, lawv sawvdaws yog dev tsis muaj suab, lawv tsis txawj tsem, lawv tsuas yog ua npau suav thiab pw thiab nyiam tsaug zog. Cov dev no tshaib heev noj tsis txawj tsau li. Cov uas yug yaj kuj tsis nkag siab dabtsi li, lawv sawvdaws tig rov taug lawv txojkev lawm, txhua tus nyias mus nrhiav tej uas muaj qabhau rau nyias xwb. Lawv hais tias, “Cia li los nawj. Cia peb muab cawv txiv hmab los thiab haus cawv ntxwg kom puv nkaus peb lub cev. Mas tagkis yuav zoo yam li hnub no, tseem yuav loj tshaj dua no.” Tus uas ncaj ncees puam tsuaj, thiab tsis muaj leejtwg quav ntsej, cov uas xyaum zoo raug muab ntes coj mus lawm thiab tsis muaj leejtwg txawj nkag siab. Rau qhov tus uas ncaj ncees tuag mas nws raug muab coj tawm hauv qhov uas txom nyem lawm. Nws nkag mus rau hauv qhov uas kaj siab lug lawm. Cov uas ua lub neej ncaj ncees kuj tau so hauv nws lub chaw pw. “Nej cov uas yog pojniam txawj ua neeb tej tub thiab cov uas yog tus ua nkauj ua nraug thiab tus poj muag cev tej tub ki cia li txav los ze ntawm no. Nej thuam luag leejtwg? Nej rua ncauj luag thiab hlev nplaig rau leejtwg? Nej tsis yog cov neeg fav xeeb thiab cov neeg dag li menyuam lov? Nej kub siab lug mus sib deev hauv tej qab ntoo xeeb thiab hauv txhua tsob qab ntoo ntsuab, nej muab nej tej menyuam tua rau hauv tej kwj ha thiab hauv tej qab tsuas. Nej li feem mas yog tej dab ntawm tej pob zeb du du hauv hav dej, tej dab ntawd yog nej li feem ntag. Nej hliv cawv txiv hmab haiv laig thiab coj qoob loo mus xyeem rau tej dab ntawd. Twb muaj tej no, kuv tseem yuav hloov siab tsis rau txim rau nej lov? Saum ib lub roob loj thiab siab nej mus ua chaw pw thiab nej coj qhov txhia chaw nce mus xyeem rau dab qhov ntawd. Nej twb rhais ntxais rau nraum nej qhov rooj thiab ntawm nej tus npuab rooj, vim nej tso kuv tseg nej thiaj tshem nej daim pam vov saum nej lub txaj pw, nej nce mus pw rau saud thiab kho chaw dav dav li. Nej nrog lawv hais hum thiab nej nyiam nrog lawv pw thiab nej saib qhov uas lawv liab qab. Nej pleev roj tsw qab thiab tshuaj tsw qab ntxiag mus nrhiav dab Maulej. Nej tso neeg mus nrhiav deb deb li, txawm yog hauv tub tuag teb los nej tseem txib neeg nqes mus thiab. Txawm yog kev deb deb ua rau nej txog siav kawg, los nej twb tsis hais tias, ‘Tag kev vam lawm.’ Nej tseem muaj kev txhawb kom nej rov muaj zog nej thiaj tsis tsaug leeg. “Nej ua siab puas tsus ntshai leejtwg nej thiaj dag kuv tsis nco txog kuv thiab tsis xav txog kuv mentsis li? Yog kuv qos ncauj ntev los lawm nej thiaj tsis ntshai kuv lov? Kuv yuav hais txog nej tej kev ncaj ncees thiab tej uas nej ua, tiamsis tej ntawd pab tsis tau nej. Thaum nej thov hu, kuj cia nej tej dab mlom coob ntawd l os cawm nej los maj! Cua yuav muab tej dab mlom ntawd ntsawj mus, ib nyuag nthwv cua xwb yuav nqa kiag tej ntawd mus. Tiamsis tus uas cawm siav rau hauv kuv yuav tau lub tebchaws ua nws tug, thiab yuav tau kuv lub roob uas dawb huv ua qub txeeg qub teg.” Yuav muaj lus hais tias, “Tsub av, tsub av kom siab, thiab npaj txojkev, cia li tshem tej uas tsuam kuv haiv neeg txojkev.” Rau qhov tus uas siab kawg, tus uas nyob ib txhis tsis kawg, tus uas lub npe hu ua Dawb Huv hais li no tias, “Kuv nyob qhov chaw uas siab thiab dawb huv, thiab nrog tus uas lees nws qhov txhaum thiab txo nws lub hwjchim nyob, yuav txhawb tus uas txo hwjchim tus ntsuj plig thiab txhawb tus uas lees nws qhov txhaum lub siab. Kuv yuav tsis tawm tsam mus ib txhis, thiab kuv yuav tsis chim mus li, rau qhov neeg tus ntsuj plig yuav qaug zog ntawm kuv xubntiag, yog cov neeg uas kuv pub muaj txojsia nyob. Kuv chim vim yog lawv txojkev siab hlob ua txhaum muaj txim, kuv thiaj ntaus lawv thiab fee plhu thiab chim lawm. Tiamsis lawv tseem tig rov qab mus ua raws li lawv lub siab nyiam. Kuv twb pom tej uas lawv ua tag lawm, mas kuv yuav kho kom lawv zoo. Kuv yuav coj lawv thiab yuav nplij lawv lub siab, thiab kuv yuav ua rau cov uas quaj ntsuag muaj lus qhuas ntawm lub qhov ncauj.” Yawmsaub hais tias, “Muaj kev thaj yeeb, kev thaj yeeb rau cov uas nyob deb thiab cov uas nyob ze. Kuv yuav kho kom lawv zoo.” Tiamsis cov neeg limhiam zoo yam nkaus li dej hiavtxwv ntas mus ntas los, tsis txawj tus li, thiab tej dej ntawd do kom tej txo thiab tej tog khaub tog tsuag sawv tuaj. Kuv tus Vajtswv hais tias, “Cov neeg limhiam yuav tsis muaj lub siab tus li.” “Cia li qw nrov nrov, tsis txhob qos ncauj cia, cia li tsa hlo koj lub suab yam nkaus li suab raj kub yaj. Cia li qhia rau kuv haiv neeg kom paub txog qhov uas lawv fav xeeb, qhia rau Yakhauj caj ces paub lawv tej kev txhaum. Tiamsis lawv tseem niaj hnub nrhiav kuv thiab tseem zoo siab kawm paub kuv tej kev, ib yam li lawv yog haiv neeg uas xyaum ncaj ncees thiab tsis tso lawv tus Vajtswv tej kevcai tseg. Lawv kuj thov kom kuv phua cai ncaj ncees rau lawv, lawv zoo siab uas yuav los ze Vajtswv. ‘Ua li cas peb twb ua kevcai yoo mov los koj tsis tsa muag ntsia? Ua li cas peb twb txo hwjchim los koj tsis quav ntsej li?’ Nej sim xav saib maj, hnub uas nej yoo mov nej tsuas ua raws li nej lub siab nyiam xwb thiab nej quab yuam nej tej tub dag tub zog txhua tus. Saib maj, nej tsuas yog yoo mov los sib cav sib ceg thiab sib ntaus sib nrig phem kawg. Kev yoo mov uas niaj hnub nimno nej ua, tsis ua rau nej lub suab mus txog saum ntuj. Qhov uas nej ua kevcai yoo mov li no thiab ua hnub uas txo hwjchim xwb yog tej uas kuv xaiv yuav lov? Qhov uas nyo taubhau zoo yam nkaus li tus tauj iab rawv, thiab muab khaub seev tsaj thiab tshauv pua chaw pw yog kevcai yoo mov lov? Nej hu qhov uas ua li no tias yog yoo mov thiab yog hnub uas Yawmsaub txaus siab yuav no lov? “Kevcai yoo mov uas kuv cheem tsum yuav tsis yog li no lov? Yog qhov uas daws txojkev limhiam txoj hlua uas khi neeg thiab daws txoj hlua ntawm tus quab, thiab muab cov uas raug quab yuam tso kom dim thiab muab tej quab lov pov tseg huvsi, thiab yog qhov uas muab nej tej mov faib rau cov uas tshaib plab, thiab coj cov pluag uas tsis muaj tsev nyob los rau hauv nej tsev, thiab thaum nej pom leejtwg liab qab kuj pub rau nws hnav, thiab tsis nkaum tes ntawm nej tej kwvtij txheeb. Mas txojkev kaj yuav tshwm plaws rau hauv nej yam li kaj ntug, thiab yuav muab nej kho zoo sai sai. Nej txojkev ncaj ncees yuav ua nej ntej, Yawmsaub lub hwjchim ci ntsa iab yuav raws nej qab tiv thaiv nej. Mas thaum nej hu, Yawmsaub yuav teb, thaum nej taij hu nws yuav hais tias, ‘Kuv nyob ntawm no.’ “Yog nej muab tus quab uas yuam luag thiab qhov uas taw tes thiab qhov uas hais lus phem rho hauv nej mus, thiab yog nej kub siab lug pub rau cov uas tshaib plab thiab pub rau cov uas txom nyem nyuaj siab tau txaus li lawv lub siab, mas txojkev kaj yuav tshwm plaws hauv qhov tsaus ntuj los rau nej, thiab qhov uas nej nyob qhov tsaus dub nciab yuav kaj lug zoo li thaum tav su. Thiab Yawmsaub yuav coj nej mus ib txhis thiab pub tej uas nej cheem tsum rau hauv lub tebchaws uas qhuav nkig nkuav, thiab yuav ua rau nej tej pob txha muaj zog. Nej yuav zoo yam nkaus li lub vaj uas muaj dej ntov, thiab zoo yam li lub qhov dej txhawv uas muaj dej tsis tu. Thiab tej uas twb pob tag ntev los lawm yuav raug muab tsim dua tshiab, thiab nej yuav kho dua tshiab rau saum tej taw tiag uas twb nyob ntau tiam neeg los lawm. Nej yuav tau lub npe hu tias yog cov uas kho tej ntsa loog uas pob tag lawm thiab kho tej kev thiaj tau chaw nyob.” “Yog nej tseg tsis txhob saib tsis taus hnub Xanpatau thiab tsis ua raws li nej lub siab nyiam rau kuv hnub uas dawb huv, thiab yog nej hu hnub Xanpatau ua hnub uas siab xyiv fab, thiab hu Yawmsaub hnub uas dawb huv tias yog hnub muaj meej, thiab yog nej hwm hnub ntawd tsis txhob mus raws li nej txojkev, lossis ua raws li nej lub siab nyiam, thiab tsis txhob hais tej uas tsis muaj qabhau, mas nej yuav tau kev zoo siab xyiv fab hauv Yawmsaub, thiab kuv yuav cia nej caij saum tej chaw siab hauv lub ntiajteb, thiab kuv yuav muab nej yawg koob Yakhauj tej qub txeeg qub teg yug nej, vim yog Yawmsaub lub qhov ncauj tau hais li no lawm.” Saib maj, Yawmsaub txhais tes tsis luv uas yuav cawm tsis tau kom dim, lossis nws lag ntseg tsis hnov lus. Tiamsis tim nej tej kev txhaum quas nej thiab nej tus Vajtswv, thiab nej lub txim roos nws lub ntsej muag lawm, nws thiaj tsis hnov, rau qhov nej txhais tes qias puas tsuas vim lo ntshav thiab nej tej ntiv tes qias vim nej tej kev txhaum. Nej lub qhov ncauj hais lus dag, nej tus nplaig yws tej lus phem. Tsis muaj leejtwg kom ncaj ncees, tsis muaj leejtwg ua plaub ncaj lawv vam khom tej lus uas tsis muaj qabhau, lawv hais lus dag xwb, lawv xeeb kev phem hauv plab thiab yug kev txhaum txim. Lawv puag qe nab raj kub sai, lawv ntos sab kab laug tsov. Tus uas noj tej qe ntawd kuj tuag, muab lub qe twg tsoo nab muaj taug kuj tawm los. Lawv tej sab kab laug tsov ua tsis tau ris tsho, neeg yuav muab tej uas lawv ua los hnav tsis tau. Lawv tej haujlwm yog ua txhaum xwb thiab lawv txhais tes ua nruj ua tsiv. Lawv txhais kotaw dhia mus ua phem, lawv maj nroos ua rau tus uas tsis txhaum nqaij ntuag ntshav nrog. Lawv tsuas yog xav qhov uas txhaum xwb, lawv txojkev yog muab ua puam tsuaj tag du lug. Lawv tsis paub txojkev hum xeeb, tej uas lawv ua tsis muaj ib qho ncaj kiag li. Lawv rhawv lawv tej kev nkhaus. Leejtwg taug tej kev ntawd kuj tsis paub kev hum xeeb. Vim li no qhov uas txiav txim ncaj nyob deb ntawm peb, thiab txojkev ncaj ncees raws tsis cuag peb. Peb nrhiav qhov kaj, kuj tsuas yog pom qhov tsaus ntuj nti xwb, peb nrhiav txojkev kaj ci, tiamsis peb taug kev tsaus dub nciab xwb. Peb xuas nrhiav ntsa loog ib yam li tus uas dig muag, peb xuas nrhiav yam nkaus li cov uas tsis muaj ntsiab muag. Peb dawm thaum tav su yam nkaus li thaum tsaus ntuj zuag. Nyob hauv cov neeg uas muaj zog peb zoo li cov uas tuag xwb. Peb txhua tus nyooj yam nkaus li dais, peb quaj qas ntsuav yam li nquab taug, peb nrhiav qhov uas txiav txim ncaj tiamsis tsis muaj kiag li, peb nrhiav txojkev cawm dim, los nyob deb peb heev. Peb tej kev fav xeeb ntau zuj zus rau ntawm koj xubntiag, thiab peb lub txim kuj ua timkhawv kom peb. Peb tej kev fav xeeb yeej nrog nraim peb thiab peb paub peb tej kev txhaum txim, yog qhov uas peb fav xeeb thiab tsis lees yuav Yawmsaub, thiab qhov uas thim tsis ua raws li peb tus Vajtswv, yog qhov uas hais tej lus quab yuam thiab fav xeeb, thiab hais tej lus dag uas npaj rau hauv lub siab. Qhov uas txiav txim ncaj raug muab ntiab rov qab lawm, thiab txojkev ncaj ncees nyob deb deb li, txojkev tseeb twb vau tag rau lub tshav puam hauv moos, thiab qhov uas ua siab ncaj mus tsis tau rau hauv lawm. Tsis muaj kev tseeb kiag li, tus uas tso kev phem tseg kuj raug luag tsim txom. Yawmsaub pom thiab tsis txaus siab rau qhov uas txiav txim tsis ncaj kiag li. Nws pom tias tsis muaj leejtwg kiag li, nws phimhwj qhov uas tsis muaj leejtwg cheem. Mas nws txhais tes thiaj coj txojkev cawm dim los, thiab nws txojkev ncaj ncees hwj nws cia. Nws muab txojkev ncaj ncees los ua lub tsho hlau hnav, thiab muab txojkev cawm dim los ua lub mom hlau ntoo. Nws muab txojkev ua pauj los ua ris tsho hnav, thiab muab qhov uas kub siab lug ua lub tsho kauv nws. Nws yuav ua pauj raws li lawv twb ua los lawd, nws yuav npau taws rau cov uas tawm tsam nws, thiab ua pauj rau nws cov yeeb ncuab. Nws yuav ua pauj rau cov uas nyob raws ntug hiavtxwv. Lawv thiaj yuav ntshai Yawmsaub lub npe rau sab hnub poob, thiab yuav hwm nws lub hwjchim ci ntsa iab rau sab hnub tuaj. Nws yuav tuaj yam li tus niag dej ntsawj uas Yawmsaub tej cua nplawm. “Nws yuav tuaj rau hauv Xi‑oo ua tus uas txhiv lawv, yog tuaj cuag Yakhauj cov neeg uas tso kev fav xeeb tseg.” Yawmsaub hais li no ntag. Yawmsaub hais tias, “Kuv mas kuv tej lus cog tseg rau lawv yog li no. Kuv tus Ntsuj Plig uas nyob ntawm nej thiab kuv tej lus uas kuv muab rau hauv nej lub qhov ncauj, yuav tsis ncaim ntawm nej lub qhov ncauj thiab tsis ncaim ntawm nej tej menyuam thiab nej tej xeeb ntxwv lub qhov ncauj txij nimno mus ib txhis.” Yawmsaub hais li no ntag. “Cia li sawv tsees tsom tus duab ci, rau qhov koj txojkev kaj los lawm, thiab Yawmsaub lub hwjchim ci ntsa iab tuaj rau saum koj. Saib maj, kev tsaus ntuj yuav los laum ntiajteb, thiab kev tsaus ntuj dub nciab yuav laum ib tsoom neeg. Tiamsis Yawmsaub yuav sawv rau saum koj, mas luag yuav pom nws lub hwjchim ci ntsa iab nyob saum koj. Tej tebchaws yuav los rau ntawm koj txojkev kaj, thiab tej vajntxwv yuav los rau ntawm koj uas nyuam qhuav tawm tuaj ci kaj lug. “Cia li tsa koj lub qhov muag ntsia rau ib ncig thiab pom, lawv sawvdaws sau zog ua ke tuaj cuag koj. Koj cov tub yuav tuaj deb deb li tuaj, thiab lawv yuav puag koj cov ntxhais tuaj. Mas koj yuav pom thiab xyiv fab luag ntxhi, koj xyiv fab siab dhia pig poog, rau qhov tej kev nplua nuj hauv hiavtxwv luag yuav coj los rau koj, ib tsoom tebchaws tej nyiaj txiag yuav los rau koj. Tej niag pab ntxhuav yuav tuaj laum nkaus koj, yog cov Midee thiab Efa tej ntxhuav mos. Thiab txhua tus ntxhuav hauv Senpa yuav tuaj, lawv yuav coj kub coj roj ntoos tsw qab tuaj thiab lawv yuav piav txog tej uas tsim nyog qhuas Yawmsaub. Tej pab tshis pab yaj huvsi ntawm Kheda yuav muab sau zog tuaj rau koj, tej txiv yaj ntawm Nenpayau yuav tu koj. Kuv txais yuav tej tsiaj ntawd uas xyeem rau saum kuv lub thaj, thiab kuv yuav ua rau kuv lub tuam tsev uas muaj koob meej nto moo lug. “Tej no yog leejtwg nev, uas ya los li tej huab thiab yam li nquab taug ya los rau ntawm lub chaw nyob? Tej tebchaws ntawm ntug hiavtxwv yuav tos kuv, thiab Thasi tej nkoj txwg tuaj ua ntej, coj koj cov tub deb deb los, coj nrog lawv tej nyiaj tej kub ua ke los, yog saib rau koj tus Vajtswv Yawmsaub lub npe thiab saib rau tus Dawb Huv hauv cov Yixayee, vim nws tau ua rau koj tau koob meej. Lwm haiv neeg yuav tsim koj tej ntsa loog, thiab lawv tej vajntxwv yuav zwm rau koj. Vim kuv npau taws kuv thiaj nplawm koj, tiamsis vim kuv hlub kuv thiaj khuvleej koj. Koj tej rooj loog yuav qheb lug mus li, nruab hnub hmo ntuj yuav tsis muab kaw, neeg thiaj coj tau ib tsoom tebchaws tej nyiaj txiag thiab cab lawv tej vajntxwv tuaj rau koj. Haiv neeg twg thiab lub tebchaws twg uas tsis ua num rau koj yuav puam tsuaj, tej tebchaws ntawd yuav raug muab tso tseg piam tag huvsi. Lenpanoo lub koob meej yuav los rau koj, tej ntoo ciab nplooj suab, tej ntoo seb, thiab tej thuv yuav los thiaj ua tau qhov chaw uas pe kuv zoo nkauj. Kuv yuav ua lub chaw uas tiag kuv kotaw tau koob meej. Cov neeg uas quab yuam koj li tub yuav tuaj khoov ntshis pe koj, thiab txhua tus uas saib tsis taus koj, yuav khoov ntshis pe ntawm koj kotaw. Lawv yuav hu koj tias yog Yawmsaub lub nroog, yog Yixayee tug Tswv uas Dawb Huv lub nroog Xi‑oo. Txawm yog koj raug muab tso tseg thiab raug luag ntxub, tsis muaj leejtwg hla koj tuaj li, los kuv yuav ua rau koj tau hwjchim meej mom mus ib txhis, thiab ua chaw zoo siab xyiv fab rau ib tiam dhau ib tiam. Koj yuav tau ntxais ib tsoom tebchaws li kua mis, thiab koj yuav tau ntxais tej vajntxwv li mis. Koj yuav paub tias kuv Yawmsaub yog koj tus cawmseej thiab tus uas txhiv koj, yog Yakhauj tus Vajtswv uas muaj hwjchim loj kawg. “Kuv yuav coj kub los nyob tooj liab chaw, thiab coj nyiaj los nyob hlau chaw, coj tooj liab nyob ntoo chaw, thiab coj hlau nyob pob zeb chaw. Kuv yuav muab txojkev hum xeeb ua tus uas tswjhwm koj, thiab muab txojkev ncaj ncees ua tus uas coj koj ua haujlwm. Hauv koj lub tebchaws yuav tsis hnov qhov uas ua nruj ua tsiv dua li lawm, hauv koj ciam teb yuav tsis hnov kev puam tsuaj lossis kev liamsim. Koj yuav hu koj lub ntsa loog tias, ‘Txojkev cawm dim,’ thiab hu koj tej rooj loog tias, ‘Qhuas.’ Nruab hnub lub hnub yuav tsis ci rau koj dua li lawm, hmo ntuj lub hli yuav tsis ci kaj lug lawm, tiamsis Yawmsaub yuav ua lub teeb ci rau koj mus ib txhis, thiab koj tus Vajtswv yuav ua koj lub koob meej. Koj lub hnub yuav tsis txawj poob qho, koj lub hli yuav tsis txawj nqeg, rau qhov Yawmsaub lub teeb ci kaj rau koj mus ib txhis, thiab lub sijhawm uas koj quaj ntsuag yuav tag tsis muaj li lawm. Koj cov neeg yuav ncaj ncees huvsi, lawv yuav tau lub tebchaws ua lawv teej lawv tug mus ib txhis. Lawv yog tej ntsuag uas kuv cog thiab yog tej uas kuv txhais tes ua, kuv thiaj ua tau kuv lub hwjchim ci ntsa iab tshwm los. Tus uas yau kawg yuav tau ua ib xeem, tus uas me dhau yuav tau ua ib haiv neeg uas muaj hwjchim. Kuv yog Yawmsaub, thaum txog sijhawm kuv yuav maj nroos ua.” Vajtswv Yawmsaub tus Ntsuj Plig nyob saum kuv, vim Yawmsaub tau tsa kuv kom coj xov zoo mus rau cov uas raug txom nyem nyuaj siab. Nws txib kuv mus nplij cov uas lwj siab, thiab tshaj tawm txojkev ywj pheej rau cov uas raug ntes, thiab txojkev dim rau cov uas raug kaw hauv tsev lojfaj, thiab tshaj tawm xyoo uas Yawmsaub hlub, thiab hnub uas peb tus Vajtswv ua pauj, thiab nplij txhua tus uas quaj ntsuag, thiab pub rau cov uas quaj ntsuag hauv Xi‑oo, pub ntshuas paj hloov tshauv chaw rau lawv, thiab roj zoo siab xyiv fab hloov kev quaj ntsuag chaw, thiab pub lub tsho hu nkauj qhuas hloov lub siab uas qaug zog, xwv luag thiaj hu lawv tias cov ntoo qheb ncaj ncees uas Yawmsaub cog cia rau nws ua nws lub hwjchim ci ntsa iab tshwm los. Lawv yuav tsim tej uas thaum ub pob tag lawm dua tshiab, lawv yuav kho tej qub uas yav nram ntej liamsim tag, lawv yuav kho tej moos uas pob tag lawd yog tej uas puam tsuaj tag ntau tiam neeg lawm. Lwm haiv neeg yuav yug nej tej yaj tej tshis, neeg lwm tebchaws yuav laij nej tej teb thiab tu nej tej txiv hmab. Nej yuav raug hu tias Yawmsaub cov pov thawj, luag yuav hais txog nej tias yog cov uas ua koom tu peb tus Vajtswv. Nej yuav tau noj ib tsoom tebchaws tej nyiaj txiag, thiab nej yuav khav txog qhov uas lawv nplua nuj. Kuv haiv neeg yuav tau ob npaug los hloov qhov uas lawv txaj muag, lawv yuav tau kev xyiv fab los hloov qhov uas lawv poob ntsej muag. Mas hauv lawv lub tebchaws lawv yuav tau ob npaug ua lawv teej tug, lawv yuav zoo siab xyiv fab mus ib txhis. Kuv yog Yawmsaub nyiam kev txiav txim ncaj, kuv ntxub qhov uas ua tub sab thiab ua txhaum. Kuv yuav ua pauj rau lawv tiag tiag li, thiab kuv yuav cog lus tseg rau lawv mus ib txhis. Lawv caj ces yuav muaj suab npe rau hauv ib tsoom tebchaws, lawv tej tub ki yuav muaj suab npe rau hauv ib tsoom neeg. Txhua tus uas pom lawv yuav cim tau lawv tias lawv yog haiv uas Yawmsaub foom koob hmoov. Kuv yuav zoo siab kawg rau hauv Yawmsaub, kuv tus ntsuj plig yuav xyiv fab hlo rau hauv kuv tus Vajtswv, rau qhov nws muab txojkev cawm dim ua lub tsho rau kuv hnav, thiab muab txojkev ncaj ncees ua lub tsho ntev kauv kuv, ib yam nkaus li tus nraug vauv coj ntshuas paj, thiab yam nkaus li tus nkauj nyab coj npauj nyiaj npauj kub. Tej kaus tuaj hauv av li cas thiab tej teb ua rau tej noob uas muab tseb tuaj hlob li cas, Vajtswv Yawmsaub ua rau txojkev ncaj ncees thiab kev qhuas tuaj hlob tab meeg ib tsoom tebchaws sawvdaws ib yam li ntawd. Vim saib rau Xi‑oo kuv thiaj tsis tswj kuv lub suab, thiab yog saib rau Yeluxalees kuv thiaj tsis nyob twjywm mus txog thaum uas Yeluxalees kev ncaj ncees ci yam li kaj ntug thiab nws txojkev cawm dim ci yam nkaus li teg tsau. Mas ib tsoom tebchaws yuav pom qhov uas koj ncaj ncees, thiab ib tsoom vajntxwv yuav pom koj lub meej mom. Koj yuav raug hu lub npe tshiab uas Yawmsaub lub qhov ncauj yuav tis rau koj. Koj yuav ua lub mom kub uas zoo nkauj kawg nyob hauv Yawmsaub txhais tes, thiab ua lub mom vajntxwv nyob hauv koj tus Vajtswv txhais tes. Luag yuav tsis hu koj lub npe hais tias, “Raug muab pov tseg,” dua li lawm thiab yuav tsis hu koj lub tebchaws tias, “Nyob do cuas cia,” dua li lawm, tiamsis koj yuav raug hu tias, “Hexinpa,” thiab hu koj lub tebchaws tias, “Npe‑ula,” rau qhov Yawmsaub zoo siab txaus siab rau koj, thiab koj lub tebchaws yuav muaj txij nkawm. Tus tub hluas yuav tus ntxhais hluas uas dawb huv li cas, tus uas tsim koj yuav yuav koj ib yam li ntawd. Tus nraug vauv zoo siab xyiv fab rau tus nkauj nyab li cas, koj tus Vajtswv yuav zoo siab xyiv fab ib yam li ntawd rau koj. Yeluxalees 'e, kuv tso cov uas faj xwm nyob saum koj tej ntsa loog, nruab hnub hmo ntuj lawv tej suab tsis ntsiag li. Nej cov uas ua kom Yawmsaub nco ntsoov tsis txhob so li, thiab tsis txhob cia Yawmsaub so mus txog thaum nws tsim tsa Yeluxalees kom ruaj, thiab ua kom yog lub chaw rau ib tsoom hauv ntiajteb qhuas. Yawmsaub tau cog lus khov kho rau nws txhais tes xis thiab nws txhais npab uas muaj zog hais tias, “Kuv yuav tsis muab koj tej qoob loo rau nej cov yeeb ncuab noj dua li lawm, thiab lwm haiv neeg yuav tsis haus nej tej cawv txiv hmab uas nej khwv tau. Mas cov uas hlais yuav tau noj thiab qhuas Yawmsaub, thiab cov uas muab tej txiv hmab sau los cia yuav tau haus rau hauv kuv lub tuam tsev tej tshav puam.” Cia li tawm mus, cia li tawm plaws ntawm rooj loog mus, cia li npaj kev rau haiv neeg no, cia li tsub kev, cia li tsub txoj niag kev, thiab khaws tej pob zeb pov tseg kom du lug, cia li tsa chij rau saum ib tsoom neeg. Yawmsaub tau tshaj tawm mus thoob plaws ntiajteb hais tias, “Cia li hais rau Xi‑oo tus ntxhais tias, ‘Saib maj, koj txojkev dim tabtom los. Nws coj yeeb koob nrog nws los, tej nqe zog kuj nyob ntawm nws lub xubntiag.’ ” Thiab luag yuav hu lawv tias, “Cov neeg uas dawb huv,” thiab “Cov uas Yawmsaub twb txhiv los lawm,” thiab yuav hu koj hais tias, “Nrhiav tau los, yog lub nroog uas tsis muab tso tseg lawm.” Leejtwg tawm ntawm Edoo tuaj? Nws tawm hauv lub moos Npauxa tuaj hnav tej tsoos tsho uas liab ploog, nws hnav tsoos tsho muaj meej mom thiab muaj zog heev tawm tuaj. “Yog kuv ntag uas tshaj tawm qhov uas tsa txojcai, thiab yog tus muaj hwjchim cawm kom dim.” Ua cas koj tej tsoos tsho liab ploog thiab koj lub tsho zoo yam li tus uas tsuam kua txiv hmab hauv lub rhawv? “Kuv tib leeg tsuj rau hauv lub rhawv tsuam txiv hmab, ib tsoom neeg tsis muaj leejtwg nrog kuv nyob li. Kuv tsuj lawv ua chim tsawv, kuv tsuam lawv ua npau taws vog. Lawv tej ntshav nchos lo kuv lub tsho thiab ntshav tsuas kuv tej tsoos tsho huvsi. Hnub uas ua pauj nyob hauv kuv lub siab, thiab xyoo uas kuv txhiv los txog lawm. Kuv tsa muag ntsia los tsis muaj leejtwg pab li. Kuv poob siab nthav los tsis muaj leejtwg txhawb kuv lub zog. Kuv tib leeg txhais tes thiaj pab kuv kov yeej, thiab kuv txojkev npau taws txhawb kuv lub zog. Kuv tsuj ib tsoom neeg ua chim tsawv, kuv npau taws vog ua rau lawv qaug li qaug cawv, thiab kuv nchuav lawv tej ntshav rau hauv av.” Kuv yuav piav Yawmsaub txojkev hlub uas ruaj khov thiab Yawmsaub tej haujlwm uas tsim nyog qhuas, raws li txhua yam uas Yawmsaub ua pab peb, yog tej kev zoo uas nws pub ntau kawg rau cov Yixayee, raws li nws txojkev khuvleej thiab nws txojkev hlub ruaj khov uas muaj nplua mias. Nws hais tias, “Lawv yeej yog kuv haiv neeg, yog cov tub uas yuav tsis dag kuv,” nws thiaj ua lawv tus cawmseej. Thaum lawv raug kev txom nyem nyuaj siab nws kuj nrog lawv raug thiab, mas tus tubtxib uas nyob ntawm nws xubntiag cawm lawv dim. Vim nws hlub thiab khuvleej lawv nws thiaj li txhiv lawv. Yav thaum ub nws niaj hnub tsa lawv thiab puag lawv. Tiamsis lawv fav xeeb thiab ua rau nws tus Ntsuj Plig uas dawb huv tu siab. Vim li no nws thiaj ua yeeb ncuab rau lawv lawm thiab tawm tsam lawv. Ces lawv txawm nco txog yav thaum ub uas Mauxe thiab nws cov neeg nyob. Tus uas coj lawv nrog tus uas yug nws pab yaj tawm hauv hiavtxwv los nws nyob qhovtwg? Tus uas pub nws tus Ntsuj Plig dawb huv rau hauv lawv nruab nrab, nyob qhovtwg? Nws yog tus uas pub nws txhais npab uas muaj hwjchim nrog Mauxe txhais tes xis mus, thiab faib dej rau ntawm lawv hauv ntej thiaj ua rau nws lub npe nto moo mus ib txhis, thiab coj lawv hla dej hiavtxwv. Ib yam li tus nees mus hauv tebchaws moj sab qhua lawv twb tsis dawm li. Tej tsiaj txhu nqes mus rau hauv lub hav li cas, Yawmsaub tus Ntsuj Plig pub lawv tau so ib yam li ntawd. Koj thiaj coj koj haiv neeg, ua rau koj lub npe nto moo lug. Thov koj tsa qhov muag saib saum ntuj tuaj thiab ntsia ntsoov ntawm koj lub chaw nyob uas dawb huv thiab muaj meej mom tuaj. Koj lub siab kub lug thiab koj lub hwjchim dua twg lawm? Koj lub siab uas khuvleej peb thiab mob siab peb raug muab rho ntawm peb lawm. Txawm yog Aplahas tsis paub peb thiab Yixayee cim tsis tau peb, los koj yeej yog peb leej txiv. Au Yawmsaub, koj yog peb leej txiv, koj lub npe yog tus uas txhiv peb thaum ub los. Au Yawmsaub, ua cas koj ua rau peb yuam kev ntawm koj txojkev, thiab ua rau peb lub siab tawv, peb thiaj tsis paub ntshai koj lawm? Vim yog saib rau koj cov qhev, yog saib rau cov xeem uas yog koj qub txeeg qub teg, thov koj rov qab los cuag peb. Koj cov neeg dawb huv tau lub chaw pe koj ua lawv tug ib nyuag pliag xwb, mas cov uas tawm tsam peb muab lub chaw pe koj tsuj pes ntiag. Peb zoo yam nkaus li cov neeg uas koj tsis tau kav kiag li, thiab zoo yam li lawv cov uas tsis raug hu raws koj lub npe. Au kheev yog koj dua rhe lub ntuj nqes los, thiab tej roob ntseeg ua zog kais rau ntawm koj xubntiag. Yam li nplaim taws cig kub tej pawg khaub thiab hluavtaws ua rau dej npau, thov koj qhia koj lub npe rau cov uas tawm tsam koj paub, thiab ua rau ib tsoom tebchaws ntseeg ua zog kais rau ntawm koj xubntiag. Thaum koj ua tej uas txaus ntshai kawg uas peb xav tsis txog, koj nqes los mas tej roob ua zog kais rau ntawm koj xubntiag. Txij thaum ub los tsis muaj leejtwg tau hnov lossis lub qhov ntsej tau mloog, tsis muaj ib lub qhov muag tau pom dua ib tug vajtswv uas tsis yog koj uas ua haujlwm pab cov uas tos rawv nws. Koj ntsib tus uas ua qhov ncaj ncees xyiv fab hlo, yog cov uas nco ntsoov koj txojkev. Saib maj, koj chim los peb tseem ua txhaum. Peb nyob hauv txojkev txhaum txim ntev heev, peb yuav dim thiab lov? Peb txhua tus zoo li cov uas qias tsis huv, thiab peb tej kev ncaj ncees huvsi zoo li tej khaubncaws uas qias puas tsuas. Peb txhua tus tuag tshav yam li tej nplooj ntoo, peb tej kev txhaum muab peb kuav kiag mus yam li cua ntsawj. Tsis muaj leejtwg thov hu koj lub npe thiab yooj xeeb tuav rawv koj. Koj tau fee plhu ntawm peb lawm, koj muab peb cob rau hauv peb tej kev txhaum txhais tes. Au Yawmsaub, koj yeej yog peb leej txiv, peb yog cov av nplaum, koj yog tus Kws puab peb, peb txhua tus yog koj txhais tes ua. Au Yawmsaub, thov tsis txhob chim heev, thiab tsis txhob cim ntsoov tej kev txhaum mus ib txhis. Thov tshuaj saib, peb sawvdaws yeej yog koj haiv neeg. Koj tej nroog uas dawb huv hloov ua tebchaws moj sab qhua lawm, Xi‑oo twb ua tebchaws moj sab qhua, Yeluxalees raug nyob do cuas lawm. Peb lub tuam tsev dawb huv uas zoo nkauj uas peb tej poj koob yawm txwv qhuas koj, raug hluavtaws kub lawm, thiab peb tej chaw uas muaj nqes pob tag ua tej niag pawg lawm. Au Yawmsaub, twb zoo li no lawm, koj tseem yuav tswj koj cia thiab lov? Koj yuav nyob twjywm thiab ua rau peb raug txom nyem pov khawv nkaus lov? “Kuv yeejlos tos rawv cov uas tsis tau thov kuv, los cuag kuv, kuv tos rawv cov uas tsis nrhiav kuv ntsib tau kuv. Kuv hais rau haiv neeg uas tsis thov hu kuv lub npe hais tias, ‘Kuv nyob ntawm no, kuv nyob ntawm no.’ Kuv cev kuv txhais tes tas hnub tas hmo rau haiv neeg uas pheej fav xeeb, yog cov uas taug txojkev tsis zoo, thiab ua raws li lawv tej tswvyim phem. Lawv pheej zes kuv tim ntsej tim muag tsis tu ncua. Lawv xyeem qhov txhia chaw hauv lawv tej vaj thiab hlawv hmoov xyab xyeem rau saum tej thwv cib. Lawv mus zaum rau hauv tej qhov ntxa, thiab pw ib hmos nraim cev rau hauv. Lawv noj nqaij npua, thiab hauv lawv tej laujkaub muaj tej zaub xyaw tej nqaij qias vuab tsuab. Lawv hais tias, ‘Koj khiav mus deb deb, tsis txhob txav los ze kuv, vim kuv dawb huv dua koj.’ Cov no yog tej pa hauv kuv qhov ntswg thiab yog tej hluavtaws uas kub ib hnub tsaus ntuj. Saib maj, twb sau tab meeg ntawm kuv hais tias, kuv yuav tsis nyob twjywm, kuv yuav ua pauj, kuv yeej yuav ua pauj rau hauv lawv xubntiag, yog pauj rau tej kev txhaum uas nej thiab nej tej poj koob yawm txwv tau ua huvsi.” Yawmsaub hais li no ntag. “Vim lawv hlawv xyab saum tej roob thiab rhuav kuv ntsej muag rau saum tej pov roob, kuv yuav them tus nqe txwm nkaus rau hauv lawv xubntiag ua pauj tej uas lawv ua thaum ub los lawd.” Yawmsaub hais li no tias, “Kua txiv tseem tshuav nyob hauv tauv txiv hmab li cas mas lawv hais tias, ‘Tsis txhob muab pov tseg vim tias tseem tshuav yam uas zoo nyob hauv,’ ib yam li ntawd, vim yog saib rau kuv tus qhev, kuv yuav tsis muab lawv ua kom puam tsuaj tag huvsi. Kuv yuav pub Yakhauj muaj caj ces, thiab pub Yuda muaj cov uas tau kuv tej roob ua lawv tug. Cov uas kuv xaiv cia lawd yuav tau tej ntawd ua qub txeeg qub teg, thiab kuv cov tub qhe yuav tau nyob qhov ntawd. Kuv haiv neeg uas nrhiav kuv yuav muaj lub nras tiaj Saloo ua tshav zaub yug yaj yug tshis, thiab yuav muaj lub hav Akhauj ua tshav rau tej nyuj pw. Tiamsis nej cov uas tso Yawmsaub tseg thiab tsis nco qab kuv lub roob dawb huv, nej tau npaj rooj mov teev tus dab saib hmoov, thiab muab cawv tov ntim khob xyeem rau tus dab uas npaj lub khuab rau nej. Kuv yuav muab nej lub khuab cob rau hniav ntaj, mas nej sawvdaws yuav khoov ntshis pe txojkev tua neeg, rau qhov thaum kuv hu, nej tsis teb, thaum kuv hais nej tsis mloog, tiamsis nej tau ua tej uas kuv pom tias phem kawg thiab xaiv yuav yam uas kuv tsis zoo siab.” Vim li no Yawmsaub thiaj hais li no tias, “Saib maj, kuv cov tub qhe yuav tau noj tiamsis nej yuav tshaib, kuv cov tub qhe yuav tau haus, tiamsis nej yuav nqhis, kuv cov tub qhe yuav zoo siab xyiv fab tiamsis nej yuav raug txaj muag. Saib maj, kuv cov tub qhe yuav hu nkauj vim yog zoo siab tiamsis nej yuav quaj qw vim yog tu siab thiab yuav quaj nyiav vim yog lwj siab. Nej yuav tso nej lub npe tseg cia rau cov uas kuv xaiv cia lawd siv ua lo lus tsawm foom. Thiab Vajtswv Yawmsaub yuav muab nej tua pov tseg, tiamsis nws yuav tis dua lub npe tshiab rau nws cov tub qhe. Leejtwg thov koob hmoov rau nws tus kheej hauv lub tebchaws yuav tuav nws tus Vajtswv uas muaj tseeb lub npe thov xwb. Thiab leejtwg hais lus twv dabtsi hauv lub tebchaws yuav tuav Vajtswv uas muaj tseeb lub npe twv, rau qhov tej kev txom nyem ceeblaj yav thaum ub kuj tsis nco qab tag lawm thiab ploj tag ntawm kuv lub qhov muag.” “Saib maj, kuv yuav tsim lub ntuj tshiab thiab lub ntiajteb tshiab, rau qhov tej uas muaj nyob yav thaum ub los yuav tsis nco thiab tsis xav txog dua li lawm. Cia li zoo siab thiab xyiv fab mus ib txhis rau yam uas kuv tsim los, rau qhov kuv tsim Yeluxalees ua lub chaw xyiv fab thiab tsim nws cov neeg kom zoo siab xyiv fab. Kuv yuav zoo siab xyiv fab rau Yeluxalees thiab zoo siab rau kuv haiv neeg. Yuav tsis hnov lub suab quaj thiab lub suab quaj txom nyem nyuaj siab rau hauv lub nroog ntawd dua li lawm. Hauv lub nroog ntawd yuav tsis muaj ib tug menyuam mos uas muaj txojsia nyob ob peb hnub xwb dua li lawm, thiab yuav tsis muaj ib tug laus nyob tsis puv sijhawm. Tus uas hnub nyoog muaj ib puas xyoo li tuag yuav suav tias tseem hluas, tus neeg uas nyob tsis puv ib puas xyoo yuav suav tias raug tsawm foom. Lawv yuav ua vaj tse thiab tau nyob rau hauv, lawv yuav cog vaj txiv hmab thiab tau noj tej txiv ntawd. Lawv yuav tsis ua vaj tse rau lwm tus los nyob, lawv yuav tsis cog rau lwm tus noj, rau qhov kuv haiv neeg li hnub nyoog yuav zoo yam li tej ntoo, thiab cov uas kuv xaiv cia lawd yuav tau siv tej uas lawv txhais tes ua ntev kawg li. Lawv yuav tsis khwv do do xwb, lossis yug menyuam los raug vij sub vij sw, rau qhov lawv yuav ua cov uas tau Yawmsaub koob hmoov li tub ki, tsis hais lawv thiab lawv tej menyuam. Ua ntej uas lawv tsis tau thov, kuv yuav teb, thaum lawv tseem tabtom hais, kuv yuav mloog. Hma thiab menyuam yaj yuav noj zaub ua ke, tsov ntxhuav yuav noj quav nyab ib yam li nyuj, thiab nab yuav noj hmoov av. Tej tsiaj ntawd yuav tsis ua kom mob thiab tsis ua kom puam tsuaj thoob plaws hauv kuv lub roob uas dawb huv.” Yawmsaub hais li no ntag. Yawmsaub hais li no tias, “Lub ntuj yog kuv lub zwm txwv, lub ntiajteb yog kuv lub rooj tiag taw, mas lub tsev uas nej yuav ua rau kuv yuav nyob qhovtwg, thiab kuv lub chaw so yuav nyob qhovtwg? Tej no puavleej yog kuv txhais tes ua thiaj muaj huvsi tshwm los.” Yawmsaub hais li no ntag. “Tus uas kuv yuav ntsia ntsoov yog tus uas txo hwjchim thiab lees txim tuaj nruab siab thiab tshee hnyo rau kuv tej lus. “Tus uas tua nyuj xyeem zoo yam li tus uas tua neeg. Tus uas tua menyuam yaj xyeem zoo yam li tus uas lov dev caj dab. Tus uas ua kevcai xyeem qoob loo zoo yam li tus uas muab ntshav npua los xyeem, Tus uas ua kevcai xyeem roj ntoos tsw qab ua lub chaw cim ntsoov, zoo yam li tus uas pe dab mlom. Lawv cov no nyias xaiv taug nyias txojkev, thiab lawv zoo siab rau lawv tej kev qias vuab tsuab. Kuv yuav xaiv kev txom nyem nyuaj siab rau lawv, thiab coj tej uas lawv ntshai los raug lawv, rau qhov thaum kuv hu tsis muaj leejtwg teb, thaum kuv hais tsis muaj leejtwg mloog. Lawv ua tej uas kuv pom tias phem kawg thiab xaiv yuav yam uas kuv tsis nyiam.” Nej cov uas tshee hnyo rau Yawmsaub tej lus, cia li mloog nws tej lus hais tias, “Nej cov kwvtij uas ntxub nej thiab muab nej laim tseg vim yog saib rau kuv lub npe tau hais tias, ‘Thov cia Yawmsaub tau koob meej xwv peb thiaj tau pom nej tej kev xyiv fab.’ Tiamsis lawv cov ntawd yog cov uas yuav raug txaj muag. Cia li mloog saib, muaj suab nrov ntsoog qees hauv lub nroog, muaj suab nrov hauv lub tuam tsev tuaj. Twb yog lub suab uas Yawmsaub ua pauj nws cov yeeb ncuab ntag. “Ua ntej uas nws tsis tau ua mob plab nws twb yug menyuam lawm, ua ntej uas nws tsis tau mob plab nws kuj yug tau ib tug tub. Leejtwg txeev hnov dua li no? Leejtwg txeev pom tej uas zoo li no? Ib hnub xwb yuav tshwm sim tau lub tebchaws lov? Ib pliag ntshis xwb yuav yug tau ib haiv neeg lov? Thaum Xi‑oo pib mob plab yug nws yug tau nws tej tub tamsim ntawd.” Yawmsaub hais tias, “Kuv coj los txog sijhawm lawm es tseem yuav tsis pub cia yug lov?” Nej tus Vajtswv hais tias, “Kuv uas pub kom yug yuav kaw lub plab menyuam lov?” “Nej cov sawvdaws uas nyiam Yeluxalees 'e, nej cia li nrog nws xyiv fab thiab zoo siab rau nws. Nej cov sawvdaws uas quaj ntsuag nws 'e, nej cia li nrog nws zoo siab xyiv fab. Nej thiaj tau ntxais kom tsau rau hauv nws lub xubntiag uas txawj nplij nej, thiab nej thiaj tau haus nws lub koob meej uas muaj nplua mias zoo siab hlo.” Yawmsaub hais li no tias, “Saib maj, kuv yuav pub kev vam meej rau nws ib yam li tus niag dej, thiab pub ib tsoom tebchaws tej nyiaj txiag rau nws yam li tus niag dej uas ntws los nyab kiag. Nej yuav tau ntxais, nws yuav puag nej rau ntawm nws lub xubntiag thiab nchos ntawm nws hauv caug. Ib yam li leej niam nplij tus menyuam, kuv yuav nplij nej li ntawd, nej yuav tau txais kev nplij siab rau hauv Yeluxalee.” Nej yuav pom thiab nej yuav zoo siab xyiv fab, nej tej pob txha yuav hlob mos nyoos yam li tej nroj tsuag. Mas luag yuav paub tias Yawmsaub txhais tes nrog nraim nws cov tub qhe nyob, thiab nws txojkev chim tawm tsam nws cov yeeb ncuab. Yawmsaub yuav nrog nplaim taws los, thiab nws tej tsheb ua rog los zoo yam li cua daj cua dub. Nws yuav coj nws txojkev chim los ua npau vog, thiab nws yuav xuas nplaim taws qhuab ntuas. Yawmsaub yuav xuas hluavtaws thiab nws rab ntaj txiav txim rau ib tsoom neeg, mas cov uas raug Yawmsaub tua tuag yuav coob kawg li. “Cov uas tu thiab ntxuav lawv tus kheej kom dawb huv thiaj nkag tau rau hauv tej vaj, mus raws kua tus uas nyob hauv lawv nruab nrab, thiab noj nqaij npua thiab nqaij nas tsuag thiab tej uas qias vuab tsuab, mas lawv yuav ua ke mus txog qhov kawg.” Yawmsaub hais li no ntag. “Kuv paub tej uas lawv ua thiab tej uas lawv xav, mas kuv los qaws ib tsoom tebchaws thiab cov neeg uas hais txhua yam lus huvsi. Lawv yuav tuaj pom kuv lub hwjchim ci ntsa iab. Kuv yuav txawb ib yam txujci rau hauv lawv nruab nrab. Thiab kuv yuav txib cov uas dim kev tuag mus rau ib tsoom tebchaws, yog mus rau tebchaws Thasi thiab cov neeg Puj thiab Lus uas txawj tua hneev nti, thiab mus txog tebchaws Thunpas thiab tebchaws Yavas, mus txog tej tebchaws ntawm ntug hiavtxwv uas deb kawg, yog cov uas tsis tau hnov kuv lub koob meej thiab tsis tau pom dua kuv lub hwjchim ci ntsa iab. Mas lawv yuav piav kuv lub hwjchim ci ntsa iab hauv nruab nrab ib tsoom tebchaws. Lawv yuav coj nej tej kwvtij sawvdaws tawm hauv ib tsoom tebchaws huvsi los xyeem rau Yawmsaub, yuav caij tej nees tej tsheb ua rog tej tsheb nyuj thiab caij luj txwv thiab caij ntxhuav los rau hauv Yeluxalees uas yog kuv lub roob dawb huv, ib yam li cov Yixayee coj tej uas ua kevcai xyeem qoob loo hauv lub choo uas huv lawd tuaj xyeem rau hauv Yawmsaub lub tuam tsev.” Yawmsaub hais li no ntag. “Thiab kuv yuav muab lawv cov qee leej ua pov thawj thiab ua cov Levi.” Yawmsaub hais li no ntag. Yawmsaub hais tias, “Lub ntuj tshiab thiab lub ntiajteb tshiab uas kuv yuav tsim nyob ruaj rau ntawm kuv xubntiag li cas, nej caj ces thiab nej lub npe yuav nyob ruaj ib yam li ntawd. Txhua hnub hli xiab mus txog hnub hli tag thiab txij hnub Xanpatau mus txog lwm hnub Xanpatau ib tsoom neeg sawvdaws yuav tuaj pe hawm rau ntawm kuv xubntiag.” Yawmsaub hais li no ntag. “Thiab lawv yuav tawm mus saib tej neeg uas fav xeeb rau kuv tej cev tuag. Tej kas uas noj lawv yuav tsis tuag thiab tej hluavtaws uas kub lawv yuav tsis tuag li, lawv yuav qias vuab tsuab rau ib tsoom neeg sawvdaws.” No yog Yelemi uas yog Hikhiya tus tub tej lus. Nws yog ib tug pov thawj uas nyob hauv lub moos Anathau hauv Npeeyamee tebchaws. Yawmsaub hais lus tuaj rau Yelemi rau xyoo kaum peb uas Asmoo tus tub Yauxiya ua vajntxwv kav Yuda tebchaws, thiab rau thaum Yauxiya tus tub Yehauyakhi ua vajntxwv kav Yuda, mus txog xyoo kaum ib uas Yauxiya tus tub Xedekhiya uas ua vajntxwv kav Yuda, thiab mus txog thaum Yeluxalees raug ntes rau lub tsib hlis. Yawmsaub hais lus tuaj rau kuv tias, “Kuv twb paub koj ua ntej uas kuv tsim koj rau hauv lub plab, thiab thaum koj tsis tau yug hauv plab los kuv twb muab koj cais cia rau kuv lawm, kuv twb tsa koj ua tus cev kuv lus rau ib tsoom tebchaws.” Ces kuv hais tias, “Au Vajtswv Yawmsaub, saib maj, kuv tsis paub hais li cas thiaj zoo rau qhov kuv tseem hluas.” Yawmsaub thiaj hais rau kuv tias, “Tsis txhob hais tias koj tseem hluas, rau qhov koj yuav tsum mus txog txhua tus uas kuv txib koj mus, kuv hais li cas rau koj koj yuav tsum hais li ntawd. Tsis txhob ntshai lawv vim kuv nrog nraim koj thiab yuav cawm koj. Yawmsaub hais li no ntag.” Ces Yawmsaub txawm cev tes kov kuv lub qhov ncauj thiab hais rau kuv tias, “Saib maj, kuv muab kuv tej lus rau hauv koj lub qhov ncauj. Hnub no kuv tsa koj nyob saum ib tsoom neeg thiab ib tsoom tebchaws, koj yuav muab dob thiab muab ua kom pob tag, muab ua puam tsuaj thiab muab rhuav tshem pov tseg, thiab muab tsim thiab muab cog.” Yawmsaub hais lus tuaj rau kuv tias, “Yelemi 'e, koj pom dabtsi?” Kuv teb tias, “Kuv pom ib ceg txiv duaj deg.” Mas Yawmsaub hais rau kuv tias, “Koj pom tseeb lawm, rau qhov kuv zov rawv kuv tej lus thiaj ua tau kom tiav.” Yawmsaub hais lus tuaj rau kuv zaum ob tias, “Koj pom dabtsi?” Kuv teb tias, “Kuv pom ib lub laujkaub tabtom npau qaij sab ped tuaj.” Mas Yawmsaub hais rau kuv tias, “Xwm txheej phem yuav tawm plaws sab ped tuaj rau saum cov neeg sawvdaws uas nyob hauv lub tebchaws no. Saib maj, kuv tabtom hu txhua haiv neeg hauv tej tebchaws sab ped sawvdaws tuaj.” Yawmsaub hais li no ntag. “Lawv yuav tuaj txog thiab yuav txawb lawv tej zwm txwv rau ntawm txojkev uas nkag rau hauv Yeluxalees lub rooj loog thiab vij puag ncig Yeluxalees tej ntsa loog thiab Yuda tej moos huvsi. Kuv yuav hais kuv tej lus teem txim rau kuv haiv neeg vim lawv tej kev limhiam huvsi uas tso kuv tseg. Lawv hlawv xyab xyeem rau luag tej dab thiab pe hawm tej uas lawv txhais tes ua cia. Koj cia li sia siv khov kho rau ntawm duav, cia li sawv tsees thiab hais txhua yam uas kuv hais rau koj lawm rau lawv mloog. Tsis txhob ntshai lawv, kuv thiaj tsis ua rau koj ntshai tab meeg lawv. Saib maj, hnub no kuv muab koj ua lub nroog ruaj khov thiab ua ncej hlau thiab ua ntsa loog tooj liab tawm tsam lub tebchaws huvsi thiab tawm tsam Yuda tej vajntxwv thiab cov thawj thiab cov pov thawj thiab cov pejxeem hauv lub tebchaws no. Lawv yuav tawm tsam koj tiamsis kov tsis yeej koj, vim kuv nrog nraim koj thiab yuav cawm koj dim.” Yawmsaub hais li no ntag. Yawmsaub hais lus tuaj rau kuv tias, “Cia li mus tshaj tawm rau hauv Yeluxalees lub qhov ntsej tias, Yawmsaub hais li no tias, “ ‘Kuv nco ntsoov qhov uas thaum koj tseem hluas nkauj koj xib rau kuv, thaum koj ua nkauj nyab koj nyiam kuv, koj raws kuv qab hauv tebchaws moj sab qhua los, yog lub tebchaws uas tsis tau cog ib yam qoob loo kiag li. Yixayee dawb huv rau Yawmsaub, yog thawj phaum qoob loo uas Yawmsaub sau los. Txhua tus uas noj tej qoob ntawd kuj txhaum, xwm txheej phem thiaj los raug lawv.’ ” Yawmsaub hais li no ntag. Yakhauj caj ces 'e, thiab Yixayee caj ces tej cum sawvdaws 'e, cia li tig ntsej mloog Yawmsaub tej lus. Yawmsaub hais li no tias, “Nej tej poj koob yawm txwv pom kuv ua txhaum qhov twg lawv thiaj khiav deb ntawm kuv, thiab mus raws kua tej uas tsis tsim txiaj lawv thiaj ua tau neeg tsis tsim txiaj? Lawv tsis tau hais tias, ‘Yawmsaub nyob qhovtwg? Nws yog tus uas coj peb tawm hauv Iyi tebchaws los, thiab coj peb los hauv tebchaws moj sab qhua uas yog ntuj nrag teb do thiab muaj qhov taub, yog lub tebchaws tsis muaj dej haus tsuas yog tsaus ntuj nti, yog lub tebchaws uas tsis muaj leejtwg hla mus thiab tsis muaj neeg nyob hauv.’ Kuv coj nej los rau hauv ib lub tebchaws uas zoo qoob xwv thiaj tau noj tej txiv ntoo thiab tej yam zoo zoo. Tiamsis thaum nej los rau hauv lawd nej ua qias puas tsuas kuv lub tebchaws, thiab ua rau kuv tej qub txeeg qub teg qias vuab tsuab. Cov pov thawj tsis tau hais tias, ‘Yawmsaub nyob qhovtwg?’ Cov uas qhia kuv tej kevcai twb tsis paub kuv, cov uas ua thawj kuj fav xeeb rau kuv. Cov uas cev kuv lus kuj tuav Npa‑as lub npe cev lus, thiab raws kua tej uas tsis muaj qabhau.” Yawmsaub hais tias, “Vim li no kuv tseem nrog nej ua plaub, thiab kuv yuav nrog nej tej tub ki ua plaub. Cia li mus kom txog ntug Khithi mus saib, lossis txib neeg mus txog tebchaws Kheda ua tib zoo tshuaj saib, saib txeev muaj tej uas zoo li no los tsis muaj. Muaj haiv neeg twg txeev pauv tej dab uas lawv teev, txawm yog tej dab ntawd twb tsis yog timtswv tiag? Tiamsis kuv haiv neeg muab Vajtswv uas yog lawv lub koob meej pauv yam uas tsis muaj qabhau kiag li.” Yawmsaub hais tias, “Lub ntuj 'e, cia li poob siab nthav rau tej no, cia li ceeb nkaus, thiab cia li ua siab puas tag, rau qhov kuv haiv neeg ua ob yam phem, lawv tso kuv uas yog lub qhov dej txhawv pub txojsia tseg, lawv khawb qhov zeb cug dej rau lawv, yog tej qhov dej tawg uas cug tsis tau dej. “Yixayee yog ib tug qhev lov? Nws yog ib tug qhev uas yug los hauv tsev lov? Ua cas nws yuav ua qauv rau luag noj? Tej tsov ntxhuav nyooj laws rau nws, nyooj ua suab nrov heev. Lawv tau ua rau nws lub tebchaws raug muab tso tseg piam tag, nws tej moos pob tag tsis muaj neeg nyob hauv. Dua li ntawd cov neeg hauv lub moos Meefi thiab cov hauv lub moos Thapahe, tsoo koj tiaj taubhau lawm. Koj coj tej xwm txheej no los raug koj xwb los sav, vim koj tso Yawmsaub uas yog koj tus Vajtswv tseg, rau thaum nws coj koj taug kev. Nimno qhov uas koj mus rau nram Iyi tebchaws mus haus tus dej Nai koj yuav tau dabtsi? Lossis qhov uas koj mus rau Axilia tebchaws mus haus tus dej Yufeti koj yuav tau dabtsi? Tej uas koj ua limhiam yuav txiav txim rau koj, qhov uas koj tso kuv tseg yuav cem koj. Koj cia li paub thiab pom tias qhov uas koj tso Yawmsaub uas yog koj tus Vajtswv tseg yog ib qho kev phem thiab kev lwj siab. Tsis muaj qhov uas hwm thiab paub ntshai kuv nyob hauv koj kiag li.” Vajtswv Yawmsaub uas muaj hwjchim loj kawg nkaus hais li no ntag. “Ntev los lawm koj muab koj tus quab lov thiab muab tej saw hlau uas khi koj tu nrho, thiab koj hais tias, ‘Kuv yuav tsis ua num rau koj lawm.’ Koj tau qhau cev hlo yam li tus poj muag cev rau saum txhua lub ncov roob siab thiab hauv txhua tsob qab ntoo ntsuab. Thaum kuv cog koj, koj yog tsob tseem txiv hmab zoo. Mas ua cas koj yuav phem txia ua tsob txiv hmab qus? Txawm yog koj muab kua tshuaj ntau ntau los ntxuav koj lub cev los kuv tseem pom qhov uas lub txim tsuas koj lub cev.” Vajtswv Yawmsaub hais li no ntag. “Koj yuav hais tau li cas tias, ‘Kuv tsis qias puas tsuas, kuv tsis raws kua tej dab Npa‑as’? Cia li saib tej uas koj ua hauv lub hav maj, cia li xav saib koj ua dabtsi lawm. Koj ua ib tug xyuas ntxhuav uas dhia mus dhia los nyob tsis tus li. Koj ua tus maum nees luav qus uas txeev nyob hauv tebchaws moj sab qhua, nws hnia ntxhiab rau thaum nws xav tshov heev. Leejtwg yuav tswj tau qhov uas nws xav ntawd? Cov uas tuaj nrhiav nws yuav tsis khwv li, txog lub caij tshov yeej yuav ntsib nws. Nej ceev faj tsis txhob dhia mus txog thaum nej khau ntuag tag, thiab ceev faj nej lub caj pas tsis txhob cia qhuav. Tiamsis nej hais tias, ‘Tag kev vam lawm, rau qhov kuv nyiam luag tej dab, thiab kuv yeej yuav raws kua mus.’ “Thaum tub sab raug ntes nws txaj muag li cas, Yixayee caj ces yuav txaj muag ib yam li ntawd, tsis hais lawv thiab lawv tej vajntxwv, thiab lawv cov thawj, thiab lawv cov pov thawj thiab lawv cov xibhwb cev kuv lus. Lawv hais rau ib tsob ntoo tias, ‘Koj yog kuv txiv,’ thiab hais rau ib lub pob zeb tias, ‘Koj yug kuv los.’ Lawv tig nrob qaum rau kuv tsis tig xubntiag los, los thaum raug kev txom nyem ceeblaj lawv hais tias, ‘Thov cia li sawv tsees thiab cawm peb dim.’ Tej dab mlom uas nej txua rau nej dua twg lawm? Yog tej dab mlom ntawd pab tau nej dim, kuj cia lawv sawv tsees rau thaum nej raug kev txom nyem ceeblaj. Yuda 'e, koj tej dab mlom muaj ntau npaum nkaus li koj tej moos.” Yawmsaub hais tias, “Ua cas nej yuav yws yws kuv? Nej txhua tus twb fav xeeb rau kuv tag huvsi lawm. Kuv twb nplawm nej tej menyuam do do xwb, nplawm tag los lawv tsis ua zoo tuaj. Nej muab hniav ntaj tua nej cov xibhwb uas cev kuv lus ntag, zoo yam nkaus li tus tsov ntxhuav uas nyaum kawg.” Nej tiam no 'e, nej cia li mloog Yawmsaub tej lus. “Kuv yog tebchaws moj sab qhua rau cov Yixayee lov, lossis yog lub tebchaws uas tsaus ntuj nti lov? Ua cas kuv haiv neeg yuav hais tias, ‘Peb nyob ywj pheej, peb yuav tsis tuaj cuag koj dua li lawm’? Tus hluas nkauj yuav tsis nco qab nws tej npauj tej saw tau lov, lossis tus nkauj nyab tsis nco qab cev tsoos ua tshoob tau thiab lov? Tiamsis kuv haiv neeg tsis nco qab kuv ntev los suav tsis tag lawm. Nej txawj txawj nrhiav tej uas nej nyiam heev kawg li! Nej tseem qhia nej tej kev rau cov pojniam phem. Twb pom tej neeg pluag uas tsis txhaum tej ntshav lo nej lub tw tsho, txawm yog nej tsis pom lawv tho qhov tsev los kuj xij. Txawm yog muaj tej ntawd los nej tseem hais tias, ‘Kuv tsis tau ua txhaum kiag li, nyaj Yawmsaub tsis chim rau kuv lawm.’ Saib maj, kuv yuav coj nej mus txiav txim vim yog nej hais tias, ‘Kuv tsis tau ua txhaum.’ Nej lam mus mus los los xwb, pheej ntxeev siab rau yam ub yam no. Iyi yuav ua rau nej raug txaj muag ib yam li Axilia ua rau nej raug txaj muag lawd. Nej yuav muab tes npuab rau saum taubhau tawm qhov ntawd los, vim Yawmsaub twb muab tej neeg uas nej tso siab ntawd tso tseg lawm, nej yuav tsis tau kev pab ntawm lawv kiag li.” “Yog tus txivneej twg nrauj nws tus pojniam lawm es tus pojniam twb khiav lawm thiab mus yuav dua ib tug txiv lawm, tus txiv qub tseem rov mus yuav nws thiab lov? Lub tebchaws yuav tsis qias puas tsuas thiab lov? Koj twb ua poj muag cev deev coob kawg li lawm, mas koj tseem yuav rov los cuag kuv thiab lov?” Yawmsaub hais li no ntag. “Cia li tsa muag ntsia saum tej roob do hau thiab sim saib maj. Tshuav qhov chaw twg uas koj tsis tau nrog luag sib deev? Koj zaum ntawm tej ntug kev tos tej uas koj deev, zoo yam nkaus li cov neeg Alam hauv tebchaws moj sab qhua. Koj ua rau lub tebchaws qias puas tsuas rau qhov uas koj muag cev phem kawg li. Vim li ntawd thiaj tsis tso nag los thiab cov nag hauv xyoo tu nrho tsis los, los koj tseem muaj plhus ntxiag zoo li tus poj muag cev plhu tuab, tsis paub txaj muag li. Puam tab koj hu kuv hais tias, ‘Kuv txiv, koj yog kuv tus phoojywg ib txwm thaum hluas nkauj los. Koj yuav chim mus ib txhis lov? Koj yuav npau taws mus txog thaum kawg li lov?’ Saib maj, koj twb hais li ntawd lawm, tiamsis koj tseem ua txhua yam kev phem npaum li uas koj ua tau.” Thaum Yauxiya ua vajntxwv Yawmsaub hais rau kuv tias, “Koj puas pom tej uas Yixayee tau ua, yog tus uas tso kuv tseg? Nws nce mus muag cev rau saum txhua lub roob siab thiab hauv txhua tsob qab ntoo ntsuab. Kuv xav tias thaum nws mus ua tej ntawd huvsi tag lawm nws yuav tig rov los cuag kuv. Tiamsis nws kuj tsis tig rov los, mas tus niam hluas Yuda uas fav xeeb kuj pom. Nws pom tias twb yog vim Yixayee tso kuv tseg mus ua poj muag cev kuv thiaj ua ntawv muab nws nrauj thiab muab ntiab khiav mus, los nws tus niam hluas Yuda uas fav xeeb tsis ntshai, nws tseem mus ua poj muag cev thiab. Vim nws pom tias qhov uas muag cev yog ib qho me me xwb, nws thiaj ua qias puas tsuas lub tebchaws, es mus deev tej pob zeb thiab tej ntoo. Txawm yog muaj li no los nws tus niam hluas Yuda uas fav xeeb tseem tsis tig rov los cuag kuv kawg siab kawg ntsws, nws ua txuj tig rov los xwb.” Yawmsaub hais li no ntag. Mas Yawmsaub hais rau kuv tias, “Yixayee uas tso kuv tseg tseem txhaum me dua li Yuda uas fav xeeb. Cia li mus tshaj tawm cov lus no rau yav tebchaws ped hais tias, “Yawmsaub hais tias, ‘Yixayee uas tso kuv tseg lawm 'e, koj cia li rov qab los. Kuv yuav tsis ntsia koj ua chim tsawv, rau qhov kuv yog tus uas khuvleej.’ Yawmsaub hais li no ntag. ‘Kuv yuav tsis chim mus ib txhis. Tsuav yog koj lees koj tej kev txhaum tias koj tau fav xeeb rau Yawmsaub uas yog koj tus Vajtswv thiab tau mus nrog lwm haiv neeg tej dab ua plees ua yig rau hauv txhua tsob qab ntoo ntsuab, thiab koj tsis tau mloog kuv tej lus.’ ” Yawmsaub hais li no ntag. Yawmsaub hais tias, “Cov menyuam uas tso kuv tseg 'e, cia li rov qab los, rau qhov kuv yog nej tus tswv, kuv yuav txais nej ib lub moos ib leeg, ib lub xeem ob leeg, thiab kuv yuav coj nej mus txog Xi‑oo. “Thiab kuv yuav pub cov yug yaj uas hum kuv lub siab rau nej, lawv yuav muaj tswvyim muaj kev paub txawj yug nej.” Yawmsaub hais tias, “Thaum nej huaj vam coob coob rau hauv lub tebchaws, lub sijhawm ntawd lawv yuav tsis hais dua tias, ‘Yawmsaub lub phij xab sib cog lus.’ Lawv lub siab yuav tsis xav txog thiab lawv yuav tsis hais txog thiab yuav tsis nco txog, thiab lawv yuav tsis ua dua ib lub tshiab lawm. Thaum ntawd yuav hu lub nroog Yeluxalees tias yog Yawmsaub lub zwm txwv, thiab ib tsoom tebchaws sawvdaws yuav sau tuaj cuag Yawmsaub lub xubntiag rau hauv Yeluxalees, thiab lawv yuav tsis tawv ncauj ua raws li lawv lub siab phem dua li lawm. Lub sijhawm ntawd Yuda caj ces yuav los koom nrog Yixayee caj ces, thiab lawv yuav ua ke tawm lub tebchaws sab ped los rau lub tebchaws uas kuv muab pub ua qub txeeg qub teg rau nej tej poj koob yawm txwv lawm. “Kuv xav txog qhov uas kuv yuav ua li cas tsa tau nej rau hauv kuv cov tub thiab muab lub tebchaws uas zoo rau nej, yog lub tebchaws uas zoo nkauj tshaj lwm lub tebchaws huvsi, ua qub txeeg qub teg rau nej. Thiab kuv xav tias nej yuav hu kuv tias, ‘Kuv leej txiv,’ thiab nej yuav tsis tig hlo tso kuv tseg. Yixayee caj ces 'e, kuv hais tseeb, tus pojniam ua nkauj fa tso nws tus txiv tseg li cas, nej tau fav xeeb rau kuv ib yam li ntawd.” Yawmsaub hais li no ntag. Muaj suab nrov saum tej roob do hau, twb yog Yixayee tej tub lub suab quaj qw thov, vim yog lawv tau muab lawv txoj kevcai ntxeev lawm, lawv tsis nco qab Yawmsaub uas yog lawv tus Vajtswv. “Kuv cov tub uas tso kuv tseg 'e, cia li rov qab los lauj. Kuv yuav kho qhov uas nej tso kuv tseg kom zoo.” “Saib maj, peb tabtom los cuag koj, vim koj yog Yawmsaub uas yog peb tus Vajtswv.” Muaj tseeb tiag tej pov roob yeej yog kev dag ntxias thiab qhov uas muaj kev qaug dej qaug cawv ua nqaj ua nqug saum tej roob kuj yog dag ntxias xwb. Qhov tseeb Yixayee txojkev cawm dim yeej yog nyob hauv Yawmsaub uas yog peb tus Vajtswv. “Txij thaum peb tseem yau los, tej uas rhuav ntsej muag ntawd tau noj nqos txhua yam uas peb tej poj koob yawm txwv tau nqes dag nqes zog ua cia lawm, yog lawv tej pab yaj tej pab nyuj, lawv tej tub tej ntxhais huvsi. Cia peb pw tsau tsawv hauv peb tej kev txaj muag thiab cia txojkev poob ntsej muag npog kiag peb, vim peb tau ua txhaum muaj txim rau Yawmsaub uas yog peb tus Vajtswv, tsis hais peb thiab peb tej poj koob yawm txwv, txij thaum peb yau los txog hnub no, thiab peb tsis mloog Yawmsaub uas yog peb tus Vajtswv lub suab.” Yawmsaub hais tias, “Yixayee 'e, yog koj yuav rov los kuj tsim nyog koj rov los cuag kuv lawm. Yog koj muab tej dab mlom qias vuab tsuab pov tseg kom dhau kuv lub xubntiag, thiab tsis txhob ua ywj fab ywj fwj, thiab yog tuav Yawmsaub uas muaj txojsia nyob lub npe cog lus twv tseeb thiab ncaj tiag tiag li, mas ib tsoom tebchaws yuav tau koob hmoov hauv Yawmsaub thiab lawv yuav qhuas ntxhias nws.” Rau qhov Yawmsaub hais li no rau cov neeg Yuda thiab cov uas nyob hauv Yeluxalees hais tias, “Cia li laij daim teb uas twb tso tseg ntev los lawm, tsis txhob tseb noob rau hauv nruab nrab tej hav pos. Cov neeg Yuda thiab cov uas nyob hauv Yeluxalees 'e, cia li muab nej ua kevcai txiav xyeem rau Yawmsaub, cia li txiav nej lub siab tawv tseg, ntshai tsam kuv txojkev npau taws yuav tawm hlawv nej yam li hluavtaws hlawv, thiab yuav kub tsis muaj leejtwg tua tau, vim yog tim nej tej kev phem uas nej ua.” Cia li tshaj tawm rau hauv Yuda thiab qhia rau hauv Yeluxalees hais tias, “Cia li tshuab raj kub yaj mus thoob lub tebchaws, qw piav nrov nrov hais tias, ‘Cia li tuaj txoos ua ke, cia peb nkag mus rau hauv tej moos uas muaj ntsa loog ruaj khov.’ Cia li tsa chij mus rau hauv Xi‑oo, cia li khiav kom dim, tsis txhob tos, rau qhov kuv coj tej xwm txheej phem sab ped tuaj thiab coj kev puam tsuaj loj kawg tuaj.” Tus tsov ntxhuav twb tawm hauv nws lub chaw nkaum mus lawm, tus uas ua rau tej tebchaws puam tsuaj twb sawv kev tuaj lawm. Nws tau tawm hauv nws lub chaw mus lawm, yuav ua rau nej lub tebchaws piam tag. Nej tej moos yuav pob tag tsis muaj leejtwg nyob. Vim li no nej cia li muab khaub seev tsaj los hnav, cia li quaj ntsuag thiab quaj nyiav, rau qhov Yawmsaub txojkev chim kub heev tsis thim rov qab ntawm peb li. Yawmsaub hais tias, “Hnub ntawd tej vajntxwv thiab cov thawj yuav qaug zog poob siab tag, cov pov thawj los yuav ceeb nkaus thiab cov xibhwb cev Vajtswv lus los yuav xav tsis thoob.” Mas kuv thiaj hais tias, “Au Vajtswv Yawmsaub, yeej yog koj dag haiv neeg no thiab lub nroog Yeluxalees xwb tiag, koj hais tias, ‘Nej yuav tau noj qab nyob zoo,’ tiamsis qhov tseeb hniav ntaj twb los txog peb txojsia lawm.” Thaum ntawd yuav muaj lus hais rau haiv neeg no thiab Yeluxalees tias, “Muaj cua kub ntsawj saum tej roob do hau hauv ntuj nrag teb do tuaj raug kuv haiv neeg, tsis yog tuaj ntxuaj tej npluag lossis tuaj cheb. Nthwv cua uas kuv tso tuaj hlob dhau tej ntawd. Tus uas hais tej lus txiav txim rau lawv no yog kuv ntag.” Saib maj, yeeb ncuab sawv tuaj yam nkaus li huab sawv, lawv tej tsheb ua rog zoo yam li khaub zeeg cua, lawv tej nees nrawm dhau li dav ya. Peb raug txom nyem lauj, rau qhov peb puam tsuaj lawm. Yeluxalees 'e, cia li muab tej kev limhiam hauv koj lub siab ntxuav pov tseg kom koj thiaj li dim. Yuav cia tej kev phem uas koj xav nyob hauv koj lub siab mus ntev li cas? Rau qhov muaj suab tshaj tawm tuaj pem lub moos Daj thiab saum lub roob Efa‑i hais txog tej xwm txheej phem uas tuaj. “Cia li ntuas ib tsoom tebchaws tias lawv tabtom tuaj lawm, cia li hais rau Yeluxalees tias, ‘Cov uas vij lub nroog tabtom tuaj deb deb tuaj, lawv qw nrov nrov tawm tsam Yuda tej moos. Lawv vij nkaus Yeluxalees ib yam nkaus li cov uas zov daim teb, vim nws tau fav xeeb rau kuv.’ ” Yawmsaub hais li no ntag. “Koj txojkev thiab tej uas koj ua los lawm coj tej no los raug koj. Tej no yog koj lub khuab thiab tej no iab kawg li thoob plaws rau hauv koj nruab siab.” Kuv lwj siab, kuv lwj siab kawg li. Kuv ntswj ib ce vim mob heev. Kuv lub siab, kuv lub siab ntshai nrov pig poog. Kuv nyob tsis tau twjywm, vim kuv hnov suab raj kub yaj thiab hnov lub suab txhib rog. Kev puam tsuaj ib yam tag ib yam tuaj, lub tebchaws huvsi kuj raug muab tso tseg piam tag. Tib ntsais muag xwb kuv tej tsev ntaub puam tsuaj tag, tib pliag ntshis xwb tej ntaub vov tsev tsis muaj tag. Kuv yuav tsa muag ntsia tug chij ua rog thiab mloog lub suab raj kub yaj ntev li cas? “Kuv haiv neeg ruam, lawv tsis paub kuv, lawv yog tej menyuam uas ruam kawg, lawv tsis to taub dabtsi. Lawv txawj ua phem xwb, lawv tsis paub ua qhov zoo.” Kuv tsa muag ntsia rau lub ntiajteb, ua ciav raug muab tso tseg piam tag tsis muaj ib yam dabtsi li, thiab ntsia rau lub ntuj kuj tsis muaj ib qho kaj li. Kuv tsa muag ntsia rau tej roob, ua ciav tabtom ntseeg ua zog kais, thiab tej pov roob txhua lub kuj yoj mus yoj los. Kuv tsa muag ntsia, ua ciav tsis muaj ib tug neeg li, thiab tej noog saum nruab ntug huvsi kuj ya khiav tag lawm. Kuv tsa muag ntsia, ua ciav lub tebchaws uas zoo ua qoob loo twb ua ntuj nrag teb do lawm thiab txhua lub moos kuj pob ntsoog tag rau ntawm Yawmsaub lub xubntiag uas nws chim heev kawg. Yawmsaub hais li no tias, “Lub tebchaws huvsi yuav raug nyob do cuas cia, tiamsis kuv yuav tsis muab ua puam tsuaj tag nrho. Vim tej no lub ntiajteb yuav quaj ntsuag, thiab lub ntuj saud yuav tsaus nti, rau qhov kuv twb hais cia lawm, kuv twb hom cia lawm, kuv yuav tsis hloov dua siab thiab tsis thim rov qab.” Thaum hnov cov tub rog caij nees thiab cov uas txawj tua hneev lub suab, txhua lub moos kuj khiav tag, lawv khiav nkaum hauv tej hav zoov uas fab fab thiab nce tsiv nraim saum tej kem tsua. Txhua lub moos kuj raug muab tso tseg, tsis muaj ib tug neeg nyob hauv tej moos ntawd kiag li. Tus uas nyob do cuas 'e, ua li cas koj hnav tej tsoos uas liab ploog thiab koj muab tej hlaws tej saw kub los coj thiab koj muab qhov muag sau ua kaim zees? Koj tseev zam ntxiag zoo nkauj do. Tej uas koj nyiam saib tsis taus koj, lawv xav txov koj txojsia. Kuv hnov ib lub suab zoo yam li tus pojniam mob plab qw, yog ntsaj cuag nkaus li uas yug thawj tug menyuam, yog Xi‑oo tus ntxhais lub suab quaj uas yuav tu siav, tsa kiag nws txhais tes quaj hu hais tias, “Kuv raug txom nyem lauj! Kuv qaug zog ntshaus ntsho rau ntawm tus uas tua neeg lub xubntiag.” “Cia li dhia mus dhia los hauv lub nroog Yeluxalees tej kev, cia li saib thiab ua tib zoo tshuaj. Cia li tshawb nrhiav hauv tej tshav puam saib nrhiav tau ib tug neeg uas ua ncaj ua ncees thiab nyiam qhov tseeb los tsis tau, es kuv thiaj zam txim rau lub nroog ntawd. Txawm yog lawv hais tias, ‘Muaj Yawmsaub uas muaj txojsia nyob pom,’ los lawv kuj twv dag xwb.” Au Yawmsaub, koj lub qhov muag nrhiav txojkev tseeb xwb los tsis yog? Koj twb nplawm lawv los lawv kuj tsis xeev li, koj twb muab lawv rhuav tshem los lawv tsis yuav li uas koj qhuab ntuas lawv. Lawv ua lawv lub ntsej muag tawv dua pob zeb, lawv tsis yeem ntxeev dua siab. Mas kuv thiaj hais tias, “Cov neeg no tsuas yog cov pluag xwb, lawv tsis paub qabhau dabtsi, rau qhov lawv tsis paub Yawmsaub txojkev thiab tsis paub lawv tus Vajtswv txoj kevcai. Kuv yuav mus cuag cov uas ua hlob thiab hais rau lawv rau qhov lawv paub Yawmsaub txojkev thiab paub lawv tus Vajtswv txoj kevcai.” Tiamsis lawv txhua tus muab Yawmsaub tus quab lov thiab lawv nti thawv Yawmsaub kev tswjhwm. Vim li ntawd tus tsov ntxhuav tom hav zoov yuav tom lawv tuag, thiab hma hauv ntuj nrag teb do yuav ua kom lawv puam tsuaj. Tsov pom txwv tabtom zov lawv tej moos, txhua tus uas tawm hauv tej moos ntawd yuav raug muab dua ua tej dwb daim, vim yog lawv ua txhaum ntau kawg thiab lawv fav xeeb loj kawg. “Kuv yuav zam nej lub txim tau li cas? Nej tej menyuam twb tso kuv tseg lawm thiab tau tuav tus uas tsis yog Vajtswv lub npe cog lus twv. Thaum kuv pub lawv noj tsau lawv kuj mus deev lwm tus, lawv mus tsheej pab rau hauv poj muag cev lub tsev. Lawv yog tej txiv nees rog hawj xav tshov maum, lawv txhua tus hee laws nrhiav luag tej pojniam.” Yawmsaub hais tias, “Vim li no kuv yuav tsis teem txim rau lawv lov? Thiab kuv yuav tsis ua pauj rau haiv neeg uas zoo li no lov? “Cia li mus raws nws kab ntoo txiv hmab thiab muab ua puam tsuaj, tiamsis tsis txhob ua kom puam tsuaj tag nrho huvsi. Muab nws tej ceg txiav pov tseg rau qhov tej ntawd tsis yog Yawmsaub li. Yixayee caj ces thiab Yuda caj ces kuj tso plhuav kuv tseg lawm.” Yawmsaub hais li no ntag. Lawv hais tsis tseeb txog Yawmsaub thiab lawv hais tias, “Nws yuav tsis ua ib yam dabtsi, yuav tsis muaj ib yam xwm txheej phem raug peb thiab peb yuav tsis pom hniav ntaj hniav riam thiab kev tshaib nqhis. Cov xibhwb cev Vajtswv lus tsuas yog cua xwb, Vajtswv tej lus tsis nyob hauv lawv lawm. Thov cia lawv raug raws li lawv hais.” Vim li no Vajtswv Yawmsaub uas muaj hwjchim loj kawg nkaus hais li no tias, “Vim yog lawv hais tej lus ntawd, saib maj, kuv yuav muab kuv tej lus hauv koj lub qhov ncauj ua hluavtaws, thiab muab cov neeg no ua cov taws, mas cov hluavtaws no yuav hlawv lawv kub tag.” Yawmsaub hais tias, “Saib maj, Yixayee caj ces 'e, kuv tabtom coj ib haiv neeg deb deb tuaj tawm tsam nej, yog ib haiv neeg uas muaj zog heev nyob ntev los lawm, yog haiv neeg uas nej tsis paub lawv li lus, lawv hais li cas nej kuj tsis nkag siab. Lawv lub raj xub zoo yam nkaus lub qhov ntxa uas qheb lug, lawv cov tub rog txhua tus siab loj siab tuab. Lawv yuav noj tej uas nej hlais tau thiab noj nej tej zaub mov, lawv yuav noj nej tej tub tej ntxhais, lawv yuav noj nej tej yaj tej nyuj, thiab noj nej tsob txiv hmab thiab tsob txiv cev, thiab lawv yuav xuas ntaj ua rau nej tej moos uas muaj ntsa loog uas nej tso siab puam tsuaj tag.” Yawmsaub hais tias, “Txawm yog hnub ntawd los kuv yuav tsis ua rau nej puam tsuaj tag huvsi. Thiab thaum nej cov neeg hais tias, ‘Ua li cas Yawmsaub uas yog peb tus Vajtswv ua txhua yam no rau peb?’ mas koj cia li hais rau lawv tias, ‘Nej twb tso kuv tseg thiab ua koom tu lwm haiv neeg tej dab rau hauv nej lub tebchaws li cas, ces nej yuav tu lwm haiv neeg rau hauv lub tebchaws uas tsis yog nej li ib yam li ntawd.’ “Cia li tshaj tawm tej lus no rau hauv Yakhauj caj ces, cia li piav tej no rau hauv Yuda, hais tias, Haiv neeg ruam thiab tsis thoob tsib 'e, nej cia li mloog tej lus no, nej muaj qhov muag los tsis pom kev, nej muaj qhov ntsej los tsis hnov lus.” Yawmsaub hais tias, “Nej tsis ntshai kuv lov? Nej tsis tshee hnyo rau ntawm kuv xubntiag lov? Kuv yog tus uas tso tej xuab zeb ua ciam thaiv dej hiavtxwv, yog tus ciam uas nyob ib txhis dej hla tsis tau, txawm yog tej niag nthwv dej nphau los kuj kuav tsis tau, txawm yog tej niag nthwv hlob nrov vig voog los hla tsis tau. Tiamsis haiv neeg no lub siab tawv thiab fav xeeb, lawv tau tig kiag thiab khiav mus lawm. Lawv lub siab tsis hais tuj taws tias, ‘Cia peb ntshai thiab hwm Yawmsaub uas yog peb tus Vajtswv, tus uas pub nag los raws lub caij lub nyoog, yog nag hauv xyoo qab xyoo, thiab tuav rawv lub caij uas teem cia rau peb sau qoob loo.’ Nej tej kev phem ua rau txhua yam no plam ntawm nej, nej tej kev txhaum thaiv tsis pub kev zoo los rau nej. Hauv kuv cov neeg kuj muaj neeg limhiam, lawv tos nrhw ib yam li cov uas cuab noog zov tos, lawv cuab hlua cia lawm, thiab lawv cuab neeg. Lawv lub tsev puv nkaus kev ntxeev ntxias, ib yam li lub tawb uas noog puv nkaus. Vim li no lawv thiaj tau ua loj thiab nplua nuj. Lawv thiaj rog rog kheej lam, lawv ua limhiam tsis paub txaus li. Lawv txiav txim tsis ncaj rau tej menyuam ntsuag tsis muaj txiv mas tej menyuam ntawd thiaj kov tsis yeej, lawv tsis tuav cov uas txom nyem txojcai.” Yawmsaub hais tias, “Vim tej no kuv yuav tsis rau txim rau lawv lov? Thiab kuv yuav tsis ua pauj rau haiv neeg uas zoo li no lov? “Muaj xwm txheej uas poob siab nthav t hiab txhawj ntshai kawg li tshwm rau hauv lub tebchaws no. Cov xibhwb cev Vajtswv lus tau cev tej lus dag, thiab cov pov thawj kuj kav raws li tej lus uas cov xibhwb cev dag ntawd. Thiab kuv haiv neeg kuj nyiam tej uas lawv ua no, tiamsis nej yuav ua li cas rau thaum txog hnub kawg?” “Cov neeg Npeeyamee 'e, cia li khiav hauv nruab nrab Yeluxalees mus thiaj li dim. Cia li tshuab raj kub yaj hauv lub moos Thekhau‑a, thiab tsa tus chij rau saum Npe Hakhelee. Vim yog xwm txheej phem tawm sab ped tuaj, yog kev puam tsuaj loj kawg. Kuv yuav ua rau tus uas cev yiag ntxiag zoo nkauj puam tsuaj, yog Xi‑oo tus ntxhais. Cov yug yaj thiab lawv pab yaj yuav tuaj tawm tsam nws, lawv yuav tsa tsev ntaub vij nws, lawv nyias nrhiav nyias noj hauv nyias lub chaw.” “Peb cia li npaj ua rog rau nws, sawv tsees es peb cia li ntaus thaum tav su. Tiamsis khuvxim, hnub twb yuav poob qho, tus duab ntxoov ntxoo ntxoo uas thaum yuav tsaus ntuj twb mus ntev zuj zus lawm. Sawv tsees, peb cia li ntaus thaum tsaus ntuj thiab muab vajntxwv tej vaj tse ua kom puam tsuaj.” Yawmsaub uas muaj hwjchim loj kawg nkaus hais li no tias, “Cia li ntov nws tej ntoo thiab tsub chaw nce ntsa loog ntaus Yeluxalees. No yog lub nroog uas yuav tsum muab rau txim. Nyob hauv nws tsis muaj dabtsi tsuas yog muaj kev quab yuam xwb. Lub qhov dej txhawv dej cag tsis tu li cas, mas Yeluxalees kuj txhawv kev phem tsis tu ncua ib yam li ntawd thiab. Tau hnov kev ua limhiam ntais ntuj thiab kev puam tsuaj nrov hauv nws, kev mob thiab tej qhov kiav txhab kuj tshwm rau kuv pom tsis tu ncua li. Lub nroog Yeluxalees 'e, cia li mloog tej lus qhuab ntuas, ntshai tsam kuv yuav nrauj ncaim koj mus thiab kuv ua kom koj nyob do cuas cia, ua lub tebchaws uas tsis muaj leejtwg nyob.” Yawmsaub uas muaj hwjchim loj kawg nkaus hais li no tias, “Sau zog cov Yixayee uas tseem tshuav nyob yam nkaus li muab tsob txiv hmab de du lug. Rov qab xuas tes xawb de tej ceg txiv hmab dua ib zaug ib yam li tus uas de txiv hmab.” Kuv yuav hais thiab yuav ntuas leejtwg xwv lawv thiaj tau mloog? Saib maj, lawv lub qhov ntsej txhaws lawm, lawv thiaj mloog tsis tau. Yawmsaub txojlus yog tej uas lawv saib tsis taus, lawv tsis txaus siab rau. Vim li no Yawmsaub kev npau taws thiaj puv nkaus hauv kuv, kuv thiaj khaws tsis taus cia lawm. “Cia li muab hliv rau saum tej menyuam tom tej kev, thiab rau saum cov tub hluas uas tuaj txoos ua ke. Tej pojniam txivneej, cov laus thiab cov uas laus heev kuj yuav raug muab coj mus huvsi. Lawv tej vaj tse liaj teb thiab lawv tej pojniam yuav raug muab rau lwm tus, vim yog kuv yuav tsa kuv txhais tes tawm tsam cov neeg hauv lub tebchaws no.” Yawmsaub hais li no ntag. “Tag nrho tej nyuag me neeg mus txog ntua tus uas ua loj kawg los txhua tus ua lub siab hlob xav tau tej uas los ntawm kev ua tsis ncaj, txawm yog cov xibhwb cev Vajtswv lus thiab cov pov thawj los txhua tus kuj dag ntxias huvsi. Lawv tau kho kuv haiv neeg lub qhov txhab loj ib qho nyuag me me xwb. Lawv hais tias, ‘Muaj kev thaj yeeb, muaj kev thaj yeeb,’ tiamsis twb tsis muaj kiag li. Thaum lawv ua tej uas qias vuab tsuab lawv txaj muag lov? Lawv tsis paub txaj muag li lauj. Twb tsis ntaiv lawv lub ntsej muag li. Vim li ntawd lawv yuav ntog rau hauv nruab nrab cov uas twb ntog tag lawm. Thaum kuv rau txim rau lawv, lawv yuav puam tsuaj.” Yawmsaub hais li no ntag. Yawmsaub hais li no tias, “Cia li sawv ntsug ntawm tej kev tshuam thiab tsa muag ntsia thiab nug saib tej qub kev thaum ub, txoj uas zoo tshaj plaws yog txoj twg, mas cia li taug txojkev ntawd, es nej yuav tau zoo nyob siab tus yees. Tiamsis lawv teb hais tias, ‘Peb yuav tsis taug txojkev ntawd.’ Kuv tso tej tub faj xwm saib xyuas nej thiab hais tias, ‘Nej ua tib zoo mloog raj kub yaj.’ Tiamsis lawv hais tias, ‘Peb yuav tsis mloog.’ Vim li no, ib tsoom tebchaws 'e, cia li mloog, cov uas tuaj txoos ua ke 'e, cia li paub tias yuav muaj xwm txheej dabtsi tshwm rau lawv. Lub ntiajteb 'e, cia li mloog nawj. Saib maj, kuv tabtom coj tej xwm txheej phem los rau saum haiv neeg no, yog lawv yuav saws raws li uas lawv ntaus tswvyim cia lawm, vim yog lawv tsis mloog kuv lus, thiab lawv tsis yuav kuv txoj kevcai kiag li. Tej roj ntoos tsw qab uas xa ntawm lub moos Senpa tuaj rau kuv thiab tej tauj qaib qab zib uas xa lub tebchaws deb deb tuaj rau kuv muaj qabhau dabtsi? Tej uas nej hlawv xyeem, kuv tsis txais yuav thiab tej uas nej muab xyeem kuj tsis hum kuv lub siab.” Vim li no Yawmsaub hais li no tias, “Saib maj, kuv yuav cuab tej uas haiv neeg no dawm rau tom lawv hauv ntej rau lawv dawm, tsis hais tej txiv tub thiab tej kwvtij zej zog phoojywg puavleej yuav puam tsuaj tag.” Yawmsaub hais li no tias, “Saib maj, ib haiv neeg tabtom tuaj sab ped tuaj, yog ib lub tebchaws loj uas raug txhib kom tuaj deb kawg hauv qab ntuj tuaj. Lawv tuav rawv hneev thiab hmuv, lawv nyaum heev tsis khuvleej li, lawv lub suab nrov vig voog yam li dej hiavtxwv ntas. Lawv caij nees tuaj ua ib kab ib kab zoo yam li tej txivneej tuaj ua rog. Xi‑oo tus ntxhais 'e, lawv tuaj tawm tsam koj.” Peb twb hnov xov txog lawv cov ntawd mas peb txhais tes tsaug leeg tag, txojkev nyuaj siab lwj siab npog nkaus peb, mob yam nkaus li tus pojniam mob plab yug menyuam. Tsis txhob tawm mus tom tej teb thiab taug tej kev, rau qhov yeeb ncuab muaj ntaj mas muaj kev txhawj kev ntshai heev rau txhua qhov. Kuv haiv neeg 'e, cia li muab khaub seev tsaj los hnav, thiab da luj luam hauv cub tshau. Cia li quaj ntsuag yam nkaus li muaj ib tug tub xwb los tuag lawm, yog quaj ntsuag mob siab hlais siab kawg vim yog tib ntsais muag xwb tus uas ua kom puam tsuaj tuaj txog peb lawm. “Yelemi, kuv kom koj ua tus uas sim thiab tshuaj saib kuv haiv neeg xwv koj thiaj paub thiab sim tau lawv lub neej zoo li cas. Lawv sawvdaws tawv ncauj thiab fav xeeb, nyiam nkawg xaiv rau tom ub tom no. Lawv yog tooj thiab hlau, lawv txhua tus xyaum ua phem huvsi. Lub pub kuj tshuab pa heev kawg mas tej quav txhuas kuj kub tag lawm. Yog pheej muab nchuav los kuj tsis tau qabhau rau qhov cov neeg phem tsis ploj mus. Yuav hu lawv tias yog quav nyiaj, vim yog Yawmsaub tsis lees yuav lawv lawm.” Tej lus uas Yawmsaub hais tuaj rau Yelemi. “Koj cia li mus sawv ntawm lub rooj loog uas nkag rau hauv Yawmsaub lub tuam tsev, thiab piav cov lus no rau qhov ntawd hais tias, ‘Ib tsoom neeg Yuda uas nkag lub rooj loog no mus pe Yawmsaub, cia li mloog Yawmsaub tej lus. Yawmsaub uas muaj hwjchim loj kawg nkaus, yog Yixayee tus Vajtswv, hais li no tias, Cia li kho nej lub neej thiab tej uas nej ua dua tshiab, mas thiaj pub nej nyob hauv lub chaw no. Tsis txhob tso siab rau tej lus dag uas hais tias, “No yog Yawmsaub lub tuam tsev, yog Yawmsaub lub tuam tsev, Yawmsaub lub tuam tsev.” “ ‘Yog nej kho nej lub neej thiab tej uas nej ua tiag tiag, yog nej ib leeg ua ncaj rau ib leeg tiag tiag, yog nej tsis txhob tsuj yuam lwm haiv neeg thiab tej menyuam ntsuag uas tsis muaj txiv thiab tej poj ntsuam, thiab tsis txhob muab tej neeg tsis txhaum tua tuag rau hauv lub chaw no, thiab tsis txhob raws ncuj nciav luag tej dab ua rau nej mob, mas kuv yuav pub nej nyob hauv lub chaw no, yog hauv lub tebchaws uas thaum ub kuv twb muab pub rau nej tej poj koob yawm txwv mus ib txhis li lawm. “ ‘Saib maj, nej tso siab rau tej lus dag uas tsis muaj qabhau dabtsi li. Nej yuav ua tub sab, tua neeg, ua nkauj ua nraug, cog lus twv dag, hlawv xyab xyeem rau dab Npa‑as thiab raws ncuj nciav luag tej dab uas nej tsis tau paub li lov? Nej yuav tuaj sawv ntawm kuv lub xubntiag hauv lub tuam tsev no uas hu raws li kuv lub npe, thiab hais tias, “Peb tau txais kev cawm dim lawm,” ces ho mus ua txhua yam kev qias vuab tsuab no dua thiab lov? Lub tuam tsev uas hu raws li kuv lub npe, mas nej xam pom tias yog lub qhov tsua uas tub sab nkaum lov? Yawmsaub hais tias, Yeej yog kuv pom ntsoov ntag. Nej cia li mus rau kuv lub chaw uas txeev muaj nyob hauv lub moos Silau, yog thawj lub chaw uas kuv ua rau kuv lub npe nyob, mas saib kuv ua li cas rau lub chaw ntawd vim kuv haiv neeg Yixayee tej kev limhiam. Yawmsaub hais tias, Nimno vim nej tau ua txhua yam no huvsi thiab thaum kuv hais rau nej tsis tu ncua los nej tsis mloog, thiab thaum kuv hu nej los nej tsis teb, vim li no kuv yuav ua rau lub tuam tsev uas hu raws li kuv lub npe thiab lub chaw uas nej vam khom ntawd, thiab ua rau lub chaw uas kuv muab pub rau nej thiab nej tej poj koob yawm txwv ib yam li uas kuv tau ua rau Silau. Thiab kuv yuav muab nej laim pov tseg kom dhau kuv lub qhov muag, ib yam nkaus li kuv twb muab nej cov kwvtij laim pov tseg lawm, yog Efa‑i caj ces huvsi.’ ” “Yelemi, koj tsis txhob thov pab cov neeg no, tsis txhob tsa suab hu lossis thov pab lawv, tsis txhob taij thov kuv, rau qhov kuv yuav tsis mloog koj tej lus. Koj tsis pom tias lawv ua dabtsi rau hauv Yuda tej moos thiab hauv Yeluxalees tej kev lov? Cov menyuam mus khaws taws, leej txiv rauv taws thiab cov pojniam ntse hmoov puab ncuav xyeem rau tus dab poj vaj saum ntuj, thiab lawv muab cawv txiv hmab hliv xyeem rau luag tej dab thiaj zes ua rau kuv chim. Yawmsaub hais tias, Yog lawv zes kuv lov? Tsis yog lawv rov zes kom lawv raug poob ntsej muag lov? Vim li ntawd Vajtswv Yawmsaub thiaj hais li no tias, Saib maj, kuv txojkev chim kev npau taws yuav muab nchuav rau saum lub chaw no, rau saum tej neeg thiab tej tsiaj txhu, rau saum tej ntoo hauv tej teb thiab saum tej qoob loo. Kuv txojkev npau taws yuav kub heev tua tsis tau li.” Yawmsaub uas muaj hwjchim loj kawg nkaus, uas yog Yixayee tus Vajtswv hais li no tias, “Cia li tsav tej uas hlawv xyeem rau hauv tej uas nej muab xyeem rau kuv, thiab noj tej nqaij ntawd, rau qhov hnub uas kuv coj nej tej poj koob yawm txwv tawm hauv Iyi tebchaws los, kuv tsis tau hais lossis qhia lawv txog tej kevcai hlawv xyeem thiab kevcai xyeem xwb. Kuv tseem qhia rau lawv tias, ‘Yuav tsum mloog kuv lus kuv thiaj ua nej tus Vajtswv thiab nej yuav ua kuv haiv neeg. Nej yuav tsum taug txojkev uas kuv tau qhia rau nej lawm nej thiaj tau noj qab nyob zoo.’ Tiamsis lawv tsis mloog lus thiab tsis tig ntsej mloog, lawv tsuas yog ua raws li uas lawv xav tseg thiab lawv tawv ncauj ua raws li lawv lub siab phem nyiam xwb, lawv thiaj li thim rov qab tsis mus tom hauv ntej. Txij hnub uas nej tej poj koob yawm txwv tawm hauv Iyi tebchaws los mus txog niaj hnub nimno, kuv twb tso kuv cov tub qhe uas yog cov xibhwb cev kuv li lus sawvdaws mus qhia lawv tsis tu ncua hnub tag hnub thiab. Txawm yog li ntawd los lawv kuj tsis mloog kuv lus thiab tsis tig ntsej mloog, lawv ua lawv lub caj dab tawv. Lawv tseem ua phem heev dua lawv tej poj koob yawm txwv. “Koj cia li hais tej lus no huvsi rau lawv, los lawv yuav tsis mloog koj. Koj yuav hu lawv los lawv yuav tsis teb koj. Koj cia li hais rau lawv tias, ‘No yog haiv neeg uas tsis mloog Yawmsaub uas yog lawv tus Vajtswv lub suab, thiab tsis yeem yuav tej kev nplawm qhuab qhia. Txojkev tseeb ploj tag lawm, raug muab txiav tu ntawm lawv lub qhov ncauj tag lawm. Cia li txiav koj cov plaubhau thiab muab laim pov tseg. Cia li quaj ntsuag saum tej roob do hau, rau qhov Yawmsaub tsis txais yuav nws haiv neeg tiam no uas nws npau taws rau thiab muab lawv tso tseg lawm.’ ” Yawmsaub hais tias, “Yuda caj ces tau ua phem rau ntawm kuv lub qhov muag ntsia ntsoov. Lawv muab tej dab mlom uas qias vuab tsuab txawb rau hauv lub tuam tsev uas hu raws li kuv lub npe thiaj ua puas tsuas lub tuam tsev. Thiab lawv ua tej chaw siab teev dab uas hu ua Thaufe, uas nyob hauv lub hav Npeehinoo, es lawv thiaj yuav muab lawv tej tub tej ntxhais hlawv rau hauv cub tawg, yog yam uas kuv tsis tau hais kom lawv ua, thiab kuv tsis tau xav tej ntawd rau hauv kuv lub siab li.” Yawmsaub hais tias, “Vim li no saib maj, lub caij lub nyoog tabtom los yuav txog mas lawv yuav tsis hu lub chaw ntawd ua Thaufe lossis hu ua lub hav Npeehinoo, tiamsis yuav hu tias lub hav tua neeg, rau qhov lawv yuav muab tej tuag log rau hauv Thaufe mus txog thaum tsis muaj chaw log lawm. Thiab tej liaj dav saum nruab ntug thiab tej tsiaj qus hauv ntiajteb yuav noj haiv neeg no tej cev tuag, tsis muaj leejtwg yuav ntiab kom khiav mus. Kuv yuav ua kom lub suab luag lub suab zoo siab thiab nraug vauv nkauj nyab lub suab tu nrho hauv Yuda tej moos thiab hauv Yeluxalees tej kev mus, rau qhov lub tebchaws yuav raug muab tso tseg piam tag.” Yawmsaub hais tias, “Lub sijhawm ntawd tej vajntxwv hauv Yuda tej pob txha, thiab Yuda cov thawj tej pob txha, cov pov thawj tej pob txha thiab cov xibhwb cev Vajtswv lus tej pob txha, thiab cov neeg hauv Yeluxalees tej pob txha yuav raug muab rho hauv tej qhov ntxa los, thiab luag yuav muab ua ri sua cuab hnub cuab hli thiab tej hnub qub saum nruab ntug huvsi, yog tej uas lawv nyiam thiab lawv teev tiam, yog tej uas lawv mus raws thiab nrhiav thiab pe hawm. Yuav tsis muaj leejtwg muab tej pob txha ntawd sau ua ke lossis muab faus, yuav nyob saum npoo av yam li tej quav tsiaj txhu. Tsev neeg phem no txhua tus uas tseem tshuav nyob rau hauv txhua lub chaw uas kuv ntiab lawv mus ntawd yuav nyiam tuag heev dua li nyiam ciaj sia nyob.” Yawmsaub uas muaj hwjchim loj kawg nkaus hais li no. “Koj cia li hais rau lawv tias, ‘Yawmsaub hais li no tias, Thaum leejtwg ntog nws txawm tsis sawv los li lov? Yog leejtwg yuam kev lawm nws yuav tsis rov los li lov? Ua li cas haiv neeg no uas yog Yeluxalees khiav ntawm kuv lawm tsis rov los ib txhis li? Lawv tsis tso tej kev dag ntxias tseg, lawv tsis yeem rov qab los. Kuv tig ntsej ncuv mloog, tiamsis lawv hais tsis tseeb. Tsis muaj ib tug yuav ntxeev dua siab ntawm nws txojkev phem es yuav hais tias, “Kuv tau ua dabtsi lawm?” Txhua tus nyias yuam kev taug nyias txoj lawm, ib yam nkaus li tus nees dhia too hau lias rau hauv tshav rog. Txawm yog dav npoj ya saum ntuj los tseem paub caij paub nyoog, txawm yog nquab taug thiab luv thiab os dej dawb los tseem tuaj raws li lawv lub caij lub nyoog. Tiamsis kuv haiv neeg tsis paub tej uas Yawmsaub qhia. “ ‘Nej yuav hais tau li cas tias, “Peb muaj tswvyim thiab peb muaj Yawmsaub txoj kevcai”? Tiamsis, saib maj, cov tub sau ntawv uas tsis ncaj txhais tes twb muab txoj kevcai sau ntxeev ua lus dag lawm. Cov neeg muaj tswvyim yuav raug txaj muag, lawv yuav poob siab nthav thiab raug muab ntes coj mus. Lawv tsis lees yuav Yawmsaub tej lus, es lawv muaj lub tswvyim twg? Vim li no kuv yuav muab lawv tej pojniam rau lwm tus yuav, thiab muab lawv tej teb rau cov uas tuaj txeeb tau, rau qhov tag nrho tej nyuag me neeg mus txog tus uas ua loj kawg los txhua tus ua lub siab hlob xav tau tej uas los ntawm kev ua tsis ncaj, tsis hais cov xibhwb cev Vajtswv lus thiab cov pov thawj los txhua tus kuj dag ntxias huvsi. Lawv tau kho kuv haiv neeg lub kiav txhab loj ib qho nyuag me me xwb, lawv hais tias, “Muaj kev thaj yeeb, muaj kev thaj yeeb,” tiamsis twb tsis muaj kiag li. Thaum lawv ua tej uas qias vuab tsuab lawv txaj muag lov? Lawv tsis paub txaj muag li lauj! Twb tsis ntaiv lawv lub ntsej muag li. Vim li ntawd lawv yuav ntog kiag rau hauv nruab nrab cov uas twb ntog tag lawm. Thaum kuv rau txim rau lawv, lawv yuav puam tsuaj. Yawmsaub hais li no ntag. Yawmsaub hais tias, Thaum kuv yuav qaws lawv, kuj pom tias tsob txiv hmab tsis muaj txiv thiab tsob txiv cev tsis muaj txiv. Txawm yog cov nplooj kuj ntsws qhuav tag lawm, thiab tej uas kuv twb pub rau lawv kuj ploj tag lawm.’ ” “Ua li cas peb zaum twjywm? Peb cia li sau zog ua ke los, peb cia li mus rau hauv tej moos uas muaj ntsa loog ruaj khov, thiab puam tsuaj tag rau qhov ntawd, rau qhov Yawmsaub uas yog peb tus Vajtswv twb npaj cia rau peb puam tsuaj thiab twb muab dej muaj taug rau peb haus, vim yog peb tau ua txhaum rau Yawmsaub. Peb vam qas ntsoov yuav tau kev thaj yeeb, tiamsis tsis tau ib qho zoo kiag li, peb vam qas ntsoov lub sijhawm uas kho kom mob zoo, tiamsis tsuas yog ntsib txojkev txhawj kev ntshai xwb. Hnov yeeb ncuab tej nees tshuab pa hauv lub moos Daj tuaj, lub tebchaws kuj ntseeg nkaws vim yog hnov lawv tej txiv nees lub suab hee. Lawv tuaj muab lub tebchaws thiab txhua yam uas nyob hauv noj nqos tag, tsis hais lub nroog thiab tej neeg uas nyob hauv huvsi.” “Saib maj, kuv tabtom tso ib co nab muaj taug los rau hauv nej nruab nrab, yog tej nab muaj taug uas ua khawv koob rau los tsis seej li mas tej nab ntawd yuav tom nej.” Yawmsaub hais li no ntag. Kuv txojkev quaj ntsuag loj heev kho tsis tau li, kuv lub siab mob heev. Cia li mloog kuv cov neeg tus ntxhais lub suab quaj thoob plaws lub tebchaws txhua qhov hais tias, “Yawmsaub tsis nyob hauv Xi‑oo lov? Xi‑oo tus vajntxwv tsis nyob rau hauv lov?” Yawmsaub teb tias, “Ua cas lawv pe tej dab mlom, thiab pe lwm haiv neeg tej dab zes ua rau kuv chim?” Lawv hais tias, “Twb dhau lub caij hlais thiab dhau lub caij ntuj qhua los peb tseem tsis tau dim.” Vim kuv cov neeg tus ntxhais muaj qhov txhab kuv lub siab thiaj li ua kiav txhab, kuv quaj ntsuag thiab txojkev poob siab nthav ntsiab tau kuv lawm. Tsis muaj tshuaj kho mob hauv Kile‑a lov? Tsis muaj Kws tshuaj nyob qhov ntawd lov? Yog li ntawd, ua cas kho tsis tau kuv cov neeg tus ntxhais rov zoo li qub? Ntuj 'e, kheev kuv lub taubhau yog qhov dej thiab kuv lub qhov muag yog qhov dej txhawv kuv thiaj li quaj tau nruab hnub hmo ntuj txog kuv cov neeg tus ntxhais uas raug tua. Ntuj 'e, kheev yog kuv muaj ib lub chaw so hauv ntuj nrag teb do rau cov neeg taug kev, kuv thiaj li tau ncaim ntawm kuv cov neeg thiab khiav kom dhau lawv mus, vim lawv sawvdaws yog cov ua nkauj ua nraug, thiab yog pab neeg uas ntxeev siab. “Lawv ua lawv tus nplaig nkhaus rawv li ib yam li tus qhaub nee, txojkev dag tsis yog txojkev tseeb uas vam meej rau hauv lub tebchaws. Lawv ua ib qho phem tag kuj mus ua ib qho phem thiab, lawv tsis paub kuv.” Yawmsaub hais li no ntag. “Cia sawvdaws ceev faj nws tej kwvtij phoojywg, thiab tsis txhob tso siab rau tus kwvtij twg li, rau qhov tias txhua tus kwvtij puavleej dag ntxias, thiab txhua tus phoojywg puavleej mus xyav luag. Txhua tus dag ntxias nws tej kwvtij phoojywg, tsis muaj ib tug hais tseeb kiag li. Lawv qhia lawv tus nplaig hais lus dag. Lawv ua txhaum muaj txim txog siav kawg. Lawv quab yuam tag los rov quab yuam thiab, lawv dag ntxias tag los rov dag ntxias thiab, lawv tsis kam lees paub kuv.” Yawmsaub hais li no ntag. Vim li no, Yawmsaub uas muaj hwjchim loj kawg nkaus hais li no tias, “Kuv yuav muab lawv nchuav li nchuav nyiaj thiab muab lawv sim. Vim kuv haiv neeg ua txhaum, kuv yuav ua tau lwm yam dabtsi rau lawv? Lawv tus nplaig yog xib xub uas tua tau neeg tuag, thiab hais tej lus dag. Txhua tus lub ncauj hais lus zoo rau nws tej kwvtij kwvluag, tiamsis hauv nws lub siab caws yej caws ntxiab cuab lawv.” Yawmsaub hais tias, “Lawv twb ua tej no los kuv yuav tsis rau txim rau lawv lov? Kuv yuav tsis ua pauj rau haiv neeg uas zoo li no lov?” Cia li quaj thiab quaj nyiav tej roob thiab quaj ntsuag tej tshav zaub hauv tebchaws moj sab qhua, vim yog raug muab tso tseg piam tag tsis muaj leejtwg hla mus hla los, tsis hnov tej tsiaj nyeg ua suab sab li. Tej nas noog saum nruab ntug thiab tej tsiaj qus khiav ploj tag lawm. “Kuv yuav ua kom Yeluxalees pob ua tej niag pawg cia, ua chaw rau hma nkaum. Thiab kuv yuav ua kom Yuda tej moos nyob do cuas cia tsis muaj neeg nyob hauv.” Leejtwg muaj tswvyim txaus uas yuav nkag siab tau tej no? Thiab Yawmsaub tau hais rau leejtwg es tus ntawd thiaj tshaj tawm tau tej ntawd? Vim li cas lub tebchaws no raug puam tsuaj, muab tso tseg piam tag ib yam li tebchaws moj sab qhua, tsis muaj leejtwg hla mus hla los? Mas Yawmsaub hais tias, “Lawv tso kuv txoj kevcai uas kuv muab txawb rau ntawm lawv xubntiag tseg, thiab tsis mloog kuv lub suab thiab tsis ua lub neej raws li ntawd, thiab lawv tawv ncauj ua raws li lawv lub siab nyiam, thiab raws ncuj nciav tej dab Npa‑as ib yam li uas lawv tej poj koob yawm txwv qhia rau lawv lawm.” Vim li no, Yawmsaub uas muaj hwjchim loj kawg nkaus, yog Yixayee tus Vajtswv, hais li no tias, “Saib maj, kuv yuav muab zaub iab zaub daw rau haiv neeg no noj thiab muab dej muaj taug rau lawv haus. Kuv yuav ua kom lawv tawg ri sua mus nyob rau hauv tej tebchaws uas lawv thiab lawv tej poj koob yawm txwv tsis tau paub dua li, thiab kuv yuav tso ntaj caum lawv qab mus txog thaum kuv ua kom lawv puam tsuaj tag.” Yawmsaub uas muaj hwjchim loj kawg nkaus hais li no tias, “Cia li xam saib, thiab hu cov pojniam uas txawj quaj nyiav tuaj, cia li tso neeg mus hu cov uas txawj quaj nyiav tuaj. Cia lawv maj nroos tsa suab quaj nyiav peb, kom peb tej qhov muag thiaj los kua muag, thiab peb daim tawv muag thiaj txhawv kua muag ntws nto. Tau hnov lub suab quaj nyiav hauv Xi‑oo. ‘Peb puam tsuaj tag lauj! Peb txaj muag kawg li lauj! Rau qhov peb tau tawm hauv lub tebchaws lawm thiab lawv twb muab peb tej vaj tse rhuav pob tag lawm.’ ” Cov pojniam 'e, cia li mloog Yawmsaub tej lus, thiab tig nej lub pob ntseg mloog tej lus uas nws lub qhov ncauj hais. Cia li qhia nej tej ntxhais paub quaj ntsuag, thiab nyias qhia zaj nkauj tuag rau nyias kwvtij kwvluag, rau qhov txojkev tuag twb nce tuaj nkag peb qhov rais thiab nkag rau hauv peb tus vajntxwv tej vaj tse, thiab muab tej menyuam txiav ploj tag tom tej kev thiab muab tej tub hluas txiav ploj tag hauv tej tshav puam. Cia li hais tias, “Yawmsaub hais li no tias, ‘Tej cev tuag yuav pawg lug ib yam li tej quav tsiaj tom tej teb thiab ib yam li cov teg qoob uas hlais tso pawg lug raws cov uas hlais qab, tsis muaj leejtwg khaws.’ ” Yawmsaub hais li no tias, “Tus uas muaj tswvyim tsis txhob khav nws lub tswvyim, tus uas muaj zog tsis txhob khav nws lub zog, tus uas muaj tsis txhob khav qhov uas nws nplua nuj. Cia tus uas khav tsuas khav txog qhov no, yog qhov uas nws nkag siab thiab paub kuv tias kuv yog Yawmsaub yog tus uas hlub ruaj khov mus li, txiav txim ncaj thiab ua ncaj ncees rau hauv ntiajteb, rau qhov kuv txaus siab rau tej uas hais no.” Yawmsaub hais li no ntag. Yawmsaub hais tias, “Saib maj, lub caij lub nyoog tabtom los yuav txog, mas kuv yuav rau txim rau txhua tus uas lam ua kevcai txiav tsis yog ua tiag tiag, yog cov Iyi, cov Yuda, cov Edoo, cov Asmoo, cov Mau‑a thiab txhua tus uas nyob hauv ntuj nrag teb do uas chais plaubhau raws npoo nplooj ntseg. Cov neeg no tsis ua kevcai txiav, thiab cov Yixayee sawvdaws los kuj tsis yog ua kevcai txiav hauv lub siab.” Ib tsoom Yixayee 'e, cia li mloog tej lus uas Yawmsaub hais rau nej. Yawmsaub hais li no tias, “Tsis txhob kawm raws kua ib tsoom tebchaws, tsis txhob poob siab nthav rau tej txujci uas tshwm saum nruab ntug txawm yog ib tsoom tebchaws poob siab los xij, rau qhov ib tsoom neeg tej kab ke yog cuav xwb. Lawv txiav ib tug ntoo tom hav zoov los thiab tus Kws ntoo txhais tes xuas taus txua. Luag muab nyiaj muab kub los luam rau, luag xuas rauj muab ntsia hlau ntsia kom ruaj tsis txhob ua zog. Lawv tej dab mlom kuj tsuas zoo ib yam nkaus li tej moj zeej hem noog hauv daim teb dib xwb, tsis txawj hais lus, luag yuav muab kwv mus, rau qhov tsis txawj mus kev. Nej tsis txhob ntshai tej dab mlom ntawd rau qhov tsis txawj ua phem thiab tsis txawj ua zoo.” Au Yawmsaub, tsis muaj ib tug twg zoo cuag li koj, koj loj kawg nkaus thiab koj lub npe muaj hwjchim heev. Ib tsoom tebchaws tus vajntxwv 'e, leejtwg tseem yuav tsis ntshai tsis hwm koj? Rau qhov koj yog tus uas tsim nyog peb hwm. Tej neeg txawj ntse hauv ib tsoom tebchaws thiab hauv tej tebchaws uas tej vajntxwv kav, tsis muaj ib tug zoo cuag li koj. Lawv sawvdaws tsis thoob tsib thiab ruam, tej dab mlom ntawd yog ntoo xwb tsis txawj qhia lawv ib yam dabtsi. Luag thauj tej nyiaj uas ntaus tau lawm tuaj ntawm lub moos Thasi tuaj thiab coj kub ntawm lub moos Ufa tuaj. Tej dab mlom ntawd yog cov Kws txawj tes haujlwm thiab yog cov Kws txawj ntaus kub txhais tes ua. Tej ntaub uas muab kauv tej dab mlom ntawd yog ntaub xiav thiab ntaub tsamxem, yog cov Kws txawj ntos ntaub ua. Tiamsis Yawmsaub yog tus Vajtswv uas tseeb tiag, nws yog Vajtswv uas muaj txojsia nyob thiab yog tus vajntxwv uas nyob mus ib txhis. Thaum nws npau taws lub ntiajteb ua zog kais, mas ib tsoom tebchaws thev tsis taus qhov uas nws chim. Koj yuav hais li no rau lawv tias, “Tej dab uas tsis yog tus tsim lub ntuj thiab lub ntiajteb yuav puam tsuaj ploj tag hauv lub ntiajteb thiab hauv lub qab ntuj.” Yawmsaub yog tus uas siv nws lub hwjchim tsim lub ntiajteb, thiab siv nws lub tswvyim tsim tsa lub qab ntuj, thiab siv nws txojkev txawj ntse nthuav lub ntuj. Thaum nws tsa nws lub suab hu, tej dej saum nruab ntug nrov vig voog, thiab nws ua huab sawv tim qab ntuj kawg tuaj. Nws ua xob laim rau thaum nag los thiab coj cua tawm hauv nws tej txhab cua los. Txhua tus neeg tsis thoob tsib thiab tsis paub qabhau. Txhua tus Kws ntaus kub yuav txaj muag vim tej dab mlom uas nws ua, rau qhov nws tej dab mlom yog cuav thiab tsis txawj ua pa kiag li. Tej dab mlom ntawd tsis muaj qabhau kiag li, yog tej uas ntxim thuam luag. Thaum txog sijhawm teem txim, tej ntawd yuav puam tsuaj. Tus uas yog Yakhauj li Vajtswv tsis thooj li tej dab mlom ntawd, rau qhov nws yog tus uas tsim txhua yam, thiab haiv neeg Yixayee yog nws qub txeeg qub teg, nws lub npe hu ua Yawmsaub uas muaj hwjchim loj kawg nkaus. Nej cov uas raug luag muab vij tag lawm 'e, cia li khaws pes nkaus nej tej qhov txhia chaw hauv pem teb. Rau qhov Yawmsaub hais li no tias, “Saib maj, kuv muab cov neeg hauv lub tebchaws no laim tawm mus tamsim no, thiab kuv yuav coj kev txom nyem nyuaj siab los rau lawv xwv lawv thiaj li xeev tau.” Kuv raug txom nyem lauj vim yog kuv txojkev mob! Kuv tej qhov txhab kuj mob heev kawg, tiamsis kuv hais tias, “Qhov tseeb tej no yog kuv li kev nyuaj siab thiab kuv yuav tsum thev xwb.” Kuv lub tsev ntaub kuj raug puam tsuaj, thiab tej hlua khi tsev kuj tu tag huvsi lawm. Kuv tej menyuam kuj ncaim kuv tag lawm, tsis muaj lawv li lawm. Tsis muaj leejtwg tsa kuv lub tsev ntaub dua li lawm thiab dai kuv daim ntaub uas thaiv. Cov uas yug yaj kuj tsis thoob tsib thiab tsis ua nug rau Yawmsaub, vim li no lawv thiaj tsis vam meej, thiab lawv tej pab yaj thiaj tawg ua sab ua sua tag lawm. Cia li mloog, muaj ib tsab xov tuaj. Saib maj, tuaj txog lawm. Muaj ib lub suab nrov ntshu nrooj hauv tej tebchaws uas nyob sab ped tuaj, tuaj ua rau Yuda tej moos raug nyob do cuas cia, ua chaw rau hma nkaum. Au Yawmsaub, kuv paub tias neeg lub neej tsis yog nyob ntawm nws tus kheej, thiab paub tias tsis yog neeg coj tau neeg tshais kauj ruam. Au Yawmsaub, thov koj qhuab ntuas kuv kom npaum li uas tsim nyog, tsis txhob qhuab qhia li uas koj chim tsam ces koj coj kuv mus txog kev puam tsuaj. Thov koj nchuav koj txojkev npau taws rau saum cov tebchaws uas tsis paub koj, thiab rau saum tej neeg uas tsis tuav koj lub npe pe koj, rau qhov lawv tau muab Yakhauj rhuav tshem, muab nws rhuav tshem tag thiab muab nws noj nqos tag, thiab muab nws tej vaj tse ua puam tsuaj tag. Tej lus uas Yawmsaub hais tuaj rau Yelemi. “Koj cia li mloog tej lus cog tseg no thiab hais rau cov Yuda thiab cov uas nyob hauv Yeluxalees. Koj cia li hais rau lawv tias, Yawmsaub uas yog Yixayee tus Vajtswv hais li no tias, ‘Tus uas tsis mloog tej lus cog tseg no yuav raug foom tsis zoo, yog tej lus cog tseg uas kuv twb hais rau nej tej poj koob yawm txwv rau thaum kuv coj lawv tawm hauv Iyi tebchaws los, yog tawm hauv cub thee nchuav hlau los.’ Kuv hais tias, ‘Cia li mloog kuv lub suab thiab ua txhua yam uas kuv hais kom nej ua, nej thiaj ua tau kuv haiv neeg thiab kuv yuav ua nej tus Vajtswv, kom kuv thiaj ua tau tiav raws li tej lus uas kuv cog tseg khov kho rau nej tej poj koob yawm txwv tias yuav muab lub tebchaws uas muaj kua mis thiab zib ntab ntws nto rau lawv,’ yam li uas muaj niaj hnub nimno.” Mas kuv thiaj teb tias, “Yawmsaub cia ua li uas koj hais.” Mas Yawmsaub thiaj hais rau kuv tias, “Cia li tshaj tawm tej lus no huvsi rau hauv Yuda tej moos thiab rau hauv Yeluxalees tej kev hais tias, ‘Cia li mloog tej lus cog tseg no thiab ua raws li ntawd. Kuv twb ntuas nej tej poj koob yawm txwv rau thaum kuv coj lawv tawm hauv Iyi tebchaws los, kuv ntuas tsis tu ncua los txog niaj hnub nimno tias, “Cia li mloog kuv lub suab.” Txawm li ntawd los lawv tsis mloog lus tsis tig ntsej mloog, lawv txhua tus tawv ncauj ua raws li lawv lub siab phem nyiam. Tim li no kuv thiaj coj txhua yam raws li tej lus uas kuv kom lawv ua los lawv tsis ua, los poob rau saum lawv.’ ” Thiab Yawmsaub hais rau kuv tias, “Cov Yuda thiab cov uas nyob hauv Yeluxalees ntaus tswvyim fav xeeb. Lawv twb thim rov qab mus ua lawv tej poj koob yawm txwv tej kev txhaum txim, yog cov uas tsis yeem mloog kuv tej lus. Lawv mus raws ncuj nciav luag tej dab thiab ua koom tu tej dab ntawd. Cov Yixayee thiab cov Yuda twb rhuav tej lus cog tseg uas kuv cog rau lawv tej poj koob yawm txwv. Vim li ntawd, Yawmsaub thiaj hais li no tias, ‘Saib maj, kuv yuav coj kev puam tsuaj los raug lawv, lawv yuav khiav tsis dim. Txawm yog lawv quaj thov kuv los kuv yuav tsis mloog lawv. Mas tej moos hauv Yuda thiab cov uas nyob hauv Yeluxalees yuav mus quaj thov tej dab uas lawv hlawv xyab teev, tiamsis thaum lawv raug kev txom nyem ceeblaj tej dab ntawd pab tsis tau lawv dim. Yuda 'e, nej tej dab coob npaum li nej tej moos, thiab tej thaj uas nej txua teev tej dab phem qias mas ntau npaum li tej kev hauv Yeluxalees, yog tej thaj hlawv xyab rau dab Npa‑as.’ “Vim li no koj tsis txhob thov kuv pab haiv neeg no, lossis tsa suab hu thov pab lawv, rau qhov kuv yuav tsis mloog lawv tej lus thov rau thaum lawv raug kev txom nyem ceeblaj. Tus uas kuv hlub thaum nws ua kev phem kev qias lawm muaj feem dabtsi rau hauv kuv lub tuam tsev? Nws tej lus yeem tseg thiab tej tsiaj uas tua xyeem yuav tshem tau nws lub khuab lov? Yog zoo li no lawm nej tseem yuav xyiv fab thiab lov? Yawmsaub twb txeev hu koj hais tias, tsob txiv ntoo aulib ntsuab tsaus nti uas txi txiv ncw, tiamsis nws yuav muab koj hlawv cig nrov voog yam li cua daj cua dub thiab tej ceg yuav kub hnyiab tag huvsi. Yawmsaub tus muaj hwjchim loj kawg nkaus uas cog koj, tau hais tseg kom kev puam tsuaj yuav raug koj vim txhua yam kev phem uas cov Yixayee thiab cov Yuda tau ua, yog qhov uas lawv hlawv xyab teev dab Npa‑as zes ua rau kuv chim.” Yawmsaub qhia tej uas lawv ntaus tswvyim rau kuv, kuv thiaj paub, koj qhia lawv tej kev phem rau kuv. Kuv zoo yam li tus menyuam yaj seej seej uas raug coj mus tua. Kuv tsis paub tias lawv ntaus tswvyim txov kuv ntag, lawv hais tias, “Cia peb muab tsob ntoo thiab tej txiv ua kom puam tsuaj, cia peb muab nws txiav tawm hauv cov neeg ciaj, kom thiaj tsis nco txog nws lub npe dua li lawm.” Au Yawmsaub uas muaj hwjchim loj kawg nkaus, koj yog tus uas txiav txim ncaj ncees, koj yog tus uas tshuaj saib neeg lub siab thiab tej uas lawv xav. Thov cia kuv pom tej uas koj ua pauj rau lawv, rau qhov kuv twb muab kuv tshaj plaub cob rau koj lawm. Vim li no, Yawmsaub hais txog cov neeg hauv Anathau uas xav txov koj txojsia thiab hais tias, “Tsis txhob tuav Yawmsaub lub npe cev nws tej lus, yog koj tsis mloog, koj yuav tuag hauv peb tes.” Vim li no Yawmsaub uas muaj hwjchim loj kawg nkaus hais li no tias, “Saib maj, kuv yuav rau txim rau lawv, cov tub hluas yuav tuag hniav ntaj, lawv tej tub tej ntxhais yuav tuag tshaib tuag nqhis. Yuav tsis tshuav ib tug li, rau qhov kuv yuav coj tej xwm txheej phem los rau cov neeg hauv Anathau, yog xyoo uas rau txim rau lawv.” Au Yawmsaub, thaum kuv nrog koj ua plaub koj yog tus uas ua raug cai. Txawm yog li ntawd los kuv tseem muab kuv zaj ua nug rau koj. Ua li cas cov neeg limhiam ho vam meej tuaj? Ua li cas cov neeg ntxeev ntxias ho tau zoo? Koj cog lawv, lawv thiaj ntsia cag tob, lawv hlob zoo thiab txi txiv. Lawv lub qhov ncauj pheej hais txog koj tiamsis lawv lub siab nyob deb ntawm koj. Au Yawmsaub, koj paub kuv, koj pom kuv thiab koj sim kuv lub siab saib kuv xav txog koj li cas. Thov muab lawv cais tawm yam li tej yaj uas yuav muab tua, thiab muab lawv tso rau ib cag tos hnub uas tua. Lub tebchaws yuav quaj ntsuag mus ntev li cas thiab tej nyom hauv txhua daim teb yuav qhuav tag mus ntev li cas? Vim cov uas nyob hauv lub tebchaws ntawd tej kev limhiam mas tej tsiaj txhu thiab tej nas noog thiaj yuav raug muab kuav hlo mus, vim lawv hais tias, “Yawmsaub yuav tsis pom peb lub neej yav uas kawg.” “Yog koj nrog neeg sib tw dhia es lawv twb ua rau koj txog siav lawm, koj yuav ua li cas nrog nees sib tw dhia tau? Yog koj twb ntog rau hauv lub tebchaws uas nyob tso siab lug, koj yuav ua li cas nyob tau hauv tej hav zoov ntawm ntug dej Yaladee? Txawm yog koj tej kwvtij, uas yog koj txiv caj ces, los lawv kuj ntxeev ntxias koj. Lawv tseem qw nrov nrov caum koj. Txawm yog lawv hais lus zoo kawg rau koj, kuj tsis txhob ntseeg lawv. “Kuv tso kuv tsev neeg tseg, kuv muab kuv tej qub txeeg qub teg pov tseg, kuv muab cov uas kuv hlub zog hauv nruab siab tso rau hauv lawv cov yeeb ncuab txhais tes. Kuv tej qub txeeg qub teg txia zoo li ib tug tsov ntxhuav tom hav zoov rau kuv, nws tsa suab nyooj laws rau kuv, vim li no kuv thiaj ntxub nws. Kuv tej qub txeeg qub teg zoo yam li tus dav txho uas muaj tej dav nyob vij nws ntaus nws lov? Cia li mus hu tej tsiaj qus huvsi tuaj ua ke, coj tej tsiaj ntawd tuaj noj. Cov uas yug yaj muaj ntau leej tau ua kom kuv lub vaj txiv hmab puam tsuaj tag. Lawv tau muab tej uas yog kuv li feem tsuj tag, lawv tau muab kuv li feem uas zoo nkauj ntxeev ua tebchaws moj sab qhua nyob do cuas cia. Lawv muab kuv li feem ua nyob do cuas cia. Thaum nyob do cuas lawm kuj quaj ntsuag rau kuv, lub tebchaws huvsi kuj nyob do cuas cia, los tsis muaj leejtwg mob siab li. Cov uas ua kom puam tsuaj twb tuaj txog saum tej roob do hau hauv ntuj nrag teb do, rau qhov Yawmsaub rab ntaj noj lub tebchaws tag ib sab mus thoob plaws rau ib sab. Tsis muaj ib tug tau nyob kaj siab li. Kuv cov neeg cog mog, tiamsis tau hlais pos xwb, lawv ua khwv khwv txog siav tag tiamsis tsis tau dabtsi li. Lawv yuav txaj muag rau tej uas lawv hlais lawv sau, yog tim qhov uas Yawmsaub chim heev rau lawv.” Yawmsaub hais li no tias, “Hais txog tej neeg ua phem txhua tus uas nyob ib ncig kuv uas tau kov tej qub txeeg qub teg uas kuv twb muab rau kuv haiv neeg Yixayee ua lawv tug lawm. Saib maj, kuv yuav muab tej neeg ntawd dob hauv lawv lub tebchaws mus, thiab kuv yuav dob Yuda caj ces hauv lawv nruab nrab cov ntawd mus. Tom qab uas kuv muab lawv dob mus tag lawm, kuv yuav rov qab khuvleej lawv, thiab kuv yuav coj lawv nyias rov qab los nyob nyias tej qub txeeg qub teg thiab nyias nyob nyias lub tebchaws. Thiab yuav muaj li no, yog lawv mob siab kawm kuv haiv neeg txojkev, uas yog tuav kuv lub npe cog lus twv hais tias, ‘Muaj Yawmsaub uas muaj txojsia nyob pom,’ yam li lawv tau qhia rau kuv haiv neeg tuav dab Npa‑as lub npe cog lus twv, mas lawv yuav kheev hlob rau hauv nruab nrab kuv haiv neeg. Tiamsis yog lub tebchaws twg tsis mloog, kuv yuav muab lawv dob kiag thiab muab ua kom puam tsuaj huvsi.” Yawmsaub hais li no ntag. Yawmsaub hais li no rau kuv tias, “Cia li mus yuav ib txoj siv sia ntaub mag, thiab muab sia kiag ntawm koj lub duav, tsis txhob muab raus dej.” Kuv thiaj yuav ib txoj siv sia raws li Yawmsaub hais, thiab muab sia kuv lub duav. Mas Yawmsaub hais dua zaum ob tuaj rau kuv tias, “Cia li coj txoj siv uas koj yuav los sia ntawm koj lub duav, es sawv tsees, mus rau ntawm niag dej Yufeti thiab muab txoj siv ntawd zais rau hauv ib kem zeb.” Kuv kuj mus thiab muab zais rau ntawm ntug dej Yufeti raws li Yawmsaub tau qhia rau kuv. Dhau ntau hnub lawm, Yawmsaub hais rau kuv tias, “Cia li sawv tsees, mus rau ntawm tus dej Yufeti es muab txoj siv uas kuv kom koj muab zais rau ntawd coj los.” Ces kuv thiaj li mus rau ntawm tus dej Yufeti, mus khaws txoj siv sia hauv lub chaw uas kuv muab zais ntawd los. Ua ciav, txoj siv sia ntawd twb lwj tag siv tsis tau kiag li lawm. Ces Yawmsaub thiaj hais tuaj rau kuv tias, “Yawmsaub hais li no tias, ‘Kuv yuav ua kom cov Yuda txojkev khav theeb thiab Yeluxalees txojkev khav theeb heev kawg lwj tag ib yam li txoj siv ntawd. Haiv neeg phem no uas tsis yeem mloog kuv tej lus thiab tawv ncauj ua raws li lawv lub siab thiab mus raws ncuj nciav ua koom pe luag tej dab, yuav zoo li txoj siv sia no uas siv tsis tau kiag li lawm. Rau qhov txoj siv sia ntawm neeg lub duav li cas, kuv kuj ua rau Yixayee caj ces thiab Yuda caj ces sawvdaws npuab kuv ib yam li ntawd, kom lawv thiaj ua tau ib haiv neeg rau kuv thiab ua koob meej rau kuv thiab ua chaw uas luag qhuas kuv thiab ua meej mom rau kuv. Tiamsis lawv tsis yeem mloog.’ Yawmsaub hais li no ntag.” “Koj cia li hais tej lus no rau lawv, ‘Yawmsaub uas yog Yixayee tus Vajtswv hais li no tias, Txhua lub hub yuav tsum muaj cawv txiv hmab puv nkaus.’ Mas lawv yuav hais rau koj tias, ‘Peb tsis paub tias txhua lub hub yuav tsum muaj cawv txiv hmab puv nkaus lov?’ Mas koj yuav hais rau lawv tias, ‘Yawmsaub hais li no tias, Saib maj, kuv yuav ua rau cov neeg hauv lub tebchaws no txhua tus qaug cawv tag huvsi, tsis hais tej vajntxwv uas nyob saum Davi lub zwm txwv, cov pov thawj, cov xibhwb cev Vajtswv lus thiab cov neeg hauv Yeluxalees txhua tus huvsi. Yawmsaub hais tias, Kuv yuav muab lawv laim ib tug tsoo ib tug, cov txiv yuav nraum cov tub. Kuv yuav tsis khuvleej lossis tseg lawv txojsia, kuv yuav tsis tab ncuab lawv li rau thaum kuv ua kom lawv puam tsuaj tag.’ ” Nej cia li mloog, cia li tig ntsej mloog, tsis txhob tsab ua loj, rau qhov Yawmsaub tau hais tseg cia lawm. Cia li ua rau Yawmsaub uas yog nej tus Vajtswv tau koob meej ua ntej uas nws yuav coj kev tsaus ntuj los, ua ntej uas nej txhais kotaw yuav dawm saum tej roob uas pom kev txoog, thiab thaum nej tabtom nrhiav txojkev kaj, nws muab ntxeev ua duab tsaus thiab muab ntxeev ua tsaus ntuj dub nciab heev. Tiamsis yog nej tsis mloog, kuv lub siab yuav quaj twjywm vim nej txojkev khav theeb. Kuv lub qhov muag yuav quaj heev ua kua muag ntws nto ntawm lub plhu, vim yog Yawmsaub pab yaj raug ntes coj mus lawm. Cia li hais rau vajntxwv thiab nws niam hais tias, “Cia li los nyob lub rooj qes, rau qhov koj lub mom vajntxwv uas zoo nkauj twb poob saum koj lub taubhau los lawm.” Tej moos hauv Neke raug muab kaw lawm tsis muaj leejtwg qheb tau. Yuda raug ntes coj mus poob tebchaws huvsi lawm, raug coj mus tag nrho huvsi lawm. Cia li tsa koj lub qhov muag saib lawv cov uas tuaj sab ped tuaj. Pab yaj uas muab cob rau koj lawm nyob qhovtwg, yog pab yaj uas zoo zoo nkauj? Thaum lawv tsa cov neeg uas koj tau qhia kom nrog koj sib raug zoo ua loj kav koj, koj yuav hais li cas? Tsis mob koj yam li tus pojniam mob plab yug menyuam lov? Yog koj hais rau hauv koj lub siab tias, “Ua cas tej no tshwm los raug kuv?” Kuj yog tim koj tej kev phem uas loj kawg luag thiaj muab koj daim tiab yaws thiab yuam koj. Tus neeg Khuj hloov tau nws daim tawv dub lossis tsov pom txwv hloov tau daim tawv txaij lov? Yog tau, mas nej cov uas pheej ua qhov phem yuav ua qhov zoo tau. “Kuv yuav ua rau nej tawg ua sab ua sua zoo yam nkaus li tej npluag qoob uas raug cua hauv ntuj nrag teb do ntsawj ya mus. No yog koj li feem, yog tej uas kuv muab tu tseg rau koj lawm, rau qhov koj tsis nco qab kuv lawm thiab tso siab rau tej lus dag.” Yawmsaub hais li no ntag. “Vim li no kuv yuav muab koj daim tiab yaws npog koj lub ntsej muag ua kom pom koj kev txaj muag. Kuv twb pom koj tej kev qias vuab tsuab, qhov uas koj hee laws nrhiav ua nkauj ua nraug thiab qhov uas koj ua poj muag cev phem qias kawg li saum tej roob thiab nram tej tiaj. Yeluxalees 'e, koj yuav raug txom nyem lauj! Yuav ntev li cas koj thiaj ua tau dawb huv?” No yog tej lus uas Yawmsaub hais tuaj rau Yelemi txog qhov uas ntuj qhua teb nkig. “Yuda quaj ntsuag, nws tej rooj loog kuj qaug zog tag, nws cov neeg pw hauv av quaj lwj siab, thiab Yeluxalees lub suab quaj nrov mus. Cov uas ua hlob txib lawv cov tub qhe mus nqa dej, cov tub qhe mus txog qhov dej mas tsis pom muaj dej, lawv nqa thoob qhuav rov qab los, lawv txaj muag thiab poob siab tag thiab kauv lawv lub taubhau. Cov av qhuav tawg pleb vim tsis muaj nag los rau saum lub tebchaws, cov neeg ua teb kuj poob siab tag thiab kauv lawv lub taubhau. Tus maum muas lwj uas nyob hauv hav zoov kuj tso nws tus menyuam tseg vim tsis muaj zaub. Tej nees luav qus kuj sawv saum tej roob do hau, txog siav qhe yam li tej hma, qhov muag tsaus tag vim tsis muaj nroj tsuag noj.” Au Yawmsaub, txawm yog peb tej kev txhaum ua timkhawv kom peb, los thov koj saib rau koj lub npe es pab peb. Peb tej kev fav xeeb loj heev, peb tau ua txhaum muaj txim rau koj. Au koj uas yog cov Yixayee lub chaw vam, thiab yog lawv tus cawmseej rau thaum lawv raug txom nyem ceeblaj, ua cas koj yuav zoo yam li tus qhua uas tuaj rau hauv lub tebchaws xwb, zoo yam li tus neeg uas taug kev tuaj pw ib hmos xwb? Ua cas koj yuav zoo li ib tug neeg uas nyob hab nuv, lossis zoo li ib tug neeg uas muaj zog heev los pab tsis tau leejtwg? Au Yawmsaub, koj yeej nyob hauv peb nruab nrab thiab peb raug hu raws li koj lub npe, thov koj tsis txhob tso peb tseg. Yawmsaub hais li no txog haiv neeg no tias, “Lawv nyiam mus rau ub rau no, lawv tsis tswj lawv txhais kotaw. Vim li no Yawmsaub thiaj tsis yuav lawv lawm, nimno nws yuav nco txog lawv tej kev txhaum thiab teem lawv lub txim.” Yawmsaub hais rau kuv tias, “Tsis txhob thov kev noj qab nyob zoo rau haiv neeg no. Txawm yog lawv yoo mov los kuv yuav tsis mloog lawv lub suab thov. Txawm yog lawv ua kevcai hlawv xyeem thiab ua kevcai xyeem qoob loo los kuv yuav tsis txais. Kuv yuav xuas ntaj xuas kev tshaib nqhis thiab mob kis muab lawv ua puam tsuaj.” Mas kuv hais tias, “Au Vajtswv Yawmsaub, cov xibhwb cev lus hais rau lawv tias, ‘Nej yuav tsis pom hniav ntaj hniav riam, yuav tsis raug kev tshaib nqhis, tiamsis kuv yuav pub nej nyob thaj yeeb ruaj khov hauv lub chaw no.’ ” Yawmsaub hais rau kuv tias, “Cov xibhwb cev lus tuav kuv lub npe cev lus dag xwb. Kuv tsis tau txib lawv lossis nkaw lus rau lawv lossis hais rau lawv. Lawv hais tej yog toog dag thiab tej uas pom tom hauv ntej uas tsis muaj qabhau, thiab hais tej lus dag raws li lawv lub siab xav xwb. Vim li no Yawmsaub thiaj hais txog cov xibhwb cev lus li no tias, Kuv tsis tau txib lawv los lawv tseem tuav kuv lub npe cev lus hais tias, ‘Hniav ntaj hniav riam kev tshaib nqhis yuav tsis los raug lub tebchaws no.’ Cov xibhwb cev lus ntawd yuav raug hniav ntaj hniav riam thiab kev tshaib nqhis muab ua puam tsuaj tag. Thiab cov neeg uas mloog tej lus uas lawv cev ntawd yuav tuag rau hniav ntaj hniav riam thiab tuag tshaib tuag nqhis, thiab yuav raug muab pov tseg rau hauv tej kev hauv lub nroog Yeluxalees tsis muaj leejtwg muab lawv log, tag nrho lawv thiab lawv tej pojniam, lawv tej tub tej ntxhais huvsi, rau qhov kuv yuav nchuav lawv tej kev limhiam los poob rov rau lawv.” “Koj cia li hais tej lus no rau lawv, ‘Thov cia kuv lub qhov muag muaj kua muag los nruab hnub hmo ntuj tsis tu li, rau qhov kuv haiv neeg tus ntxhais uas dawb huv raug ntaus to mob sab kawg. Yog kuv tawm mus tom teb, los pom muaj neeg raug hniav ntaj hniav riam tua. Yog kuv nkag mus rau hauv lub nroog, los pom muaj mob muaj nkeeg vim yog tshaib nqhis. Tag nrho cov xibhwb uas cev lus thiab cov pov thawj ua lawv tej haujlwm thoob plaws hauv lub tebchaws, los lawv twb tsis paub dabtsi li.’ ” Koj tau muab Yuda tso tseg tag huvsi lawm lov? Koj lub siab ntxub Xi‑oo heev lov? Ua cas koj nplawm peb tsis muaj kev kho kom peb zoo kiag li? Peb nrhiav kev thaj yeeb tiamsis tsis tau qhov zoo kiag li. Peb nrhiav sijhawm kho kom zoo tiamsis tsuas yog muaj kev txhawj ntshai xwb. Au Yawmsaub, peb thov lees peb tej kev ua limhiam thiab lees tej kev txhaum uas peb tej poj koob yawm txwv ua, rau qhov peb tau ua txhaum muaj txim rau koj lawm. Vim saib rau koj lub npe, thov tsis txhob fee plhu ntawm peb, thov tsis txhob ua rau koj lub zwm txwv uas ci ntsa iab poob koob meej. Thov koj nco txog thiab tsis txhob rhuav koj tej lus uas cog tseg rau peb. Ib tsoom tebchaws tej dab mlom cuav muaj ib tug twg ua tau nag los? Lossis lub ntuj ua tau nag los thiab lov? Au Yawmsaub uas yog peb tus Vajtswv, tej no tsis yog koj ua lov? Peb vam khom koj xwb vim koj yog tus uas ua txhua yam no. Yawmsaub hais rau kuv tias, “Txawm yog Mauxe thiab Xamuyee los sawv ntawm kuv lub xubntiag los kuv lub siab yuav tsis tig mus hlub cov neeg no. Cia li ntiab lawv tawm kom dhau ntawm kuv lub qhov muag mus, thiab tso lawv mus. Mas thaum lawv nug koj tias, ‘Peb yuav mus rau qhovtwg?’ koj hais rau lawv tias, ‘Yawmsaub hais li no tias, “ ‘Cov neeg uas twb npaj rau kev mob kis, cia li mus raug kev mob kis. Cov uas twb npaj rau hniav ntaj hniav riam, cia li mus raug hniav ntaj hniav riam, cov uas twb npaj rau kev tshaib kev nqhis, cia li mus raug kev tshaib kev nqhis, cov uas twb npaj rau luag ntes mus, cia li mus raug luag ntes.’ ” Yawmsaub hais tias, “Kuv yuav npaj plaub yam kev puam tsuaj los rau lawv, yog raug ntaj tua, raug dev tom dev dua, raug liaj dav saum nruab ntug thiab tej tsiaj qus hauv ntiajteb muab tom noj puam tsuaj tag. Kuv yuav ua rau lawv ua lub chaw uas ib tsoom tebchaws hauv ntiajteb huvsi ceeb thiab ntshai vim tej uas Hexekhiya tus tub Manaxe uas yog Yuda tus vajntxwv tau ua rau hauv Yeluxalee.” “Yeluxalees 'e, leejtwg yuav khuvleej koj, leejtwg yuav mob siab koj, leejtwg yuav tig los xauj nug txog koj kev noj qab nyob zoo?” Yawmsaub hais tias, “Koj tsis lees yuav kuv, koj pheej thim rov qab. Kuv thiaj tsa tes tawm tsam koj thiab ua rau koj puam tsuaj. Kuv dhuav qhov uas zam koj lawm. Kuv twb xuas ntxuam ntxuaj lawv ntawm tej rooj loog hauv lub tebchaws no Kuv ua rau lawv tej menyuam tuag, kuv muab kuv haiv neeg ua kom puam tsuaj. Lawv tsis tig ntawm lawv tej kev phem rov los. Kuv ua rau lawv cov poj ntsuam coob dua tej xuab zeb ntawm hiavtxwv. Thaum tav su kuv coj tus uas ua kom puam tsuaj tuaj txog cov tub hluas leej niam. Ib pliag ntshis xwb kuv ua kom kev lwj siab kev txhawj kev ntshai poob rau saum lawv. Tus uas muaj xya tus menyuam nws kuj qaug zog tag, feeb hlo lawm. Nws lub hnub poob qho thaum tseem nruab hnub. Nws raug kev txaj muag thiab raug rhuav ntsej muag. Kuv yuav muab cov uas tseem tshuav nyob cob rau hniav ntaj hniav riam tab meeg lawv cov yeeb ncuab.” Yawmsaub hais li no ntag. Kuv niam, qhov uas koj yug kuv ua rau kuv txom nyem lauj. Kuv yog tus uas xeeb kom muaj kev sib cav sib faib thoob tebchaws. Kuv tsis tau qev rau luag thiab kuv tsis tau qev luag li, los lawv sawvdaws tsawm foom kuv. Yawmsaub hais tias, “Kuv yeej yuav pab koj dim kom noj qab nyob zoo, kuv yeej yuav ua rau koj cov yeeb ncuab taij thov koj rau thaum lawv raug kev txom nyem thiab kev nyuaj siab. Muaj leejtwg lov tau hlau, yog tej hlau uas tuaj sab ped tuaj, thiab lov tau tooj liab? Nej tej nyiaj txiag cuab txhiaj cuab tam kuv yuav pub rau luag txeeb tau tsis yuav nqe, vim nej tej kev txhaum txim huvsi uas muaj thoob plaws hauv nej lub tebchaws. Kuv yuav ua rau nej mus ua nej cov yeeb ncuab qhev rau hauv l ub tebchaws uas nej tsis tau paub dua li, vim yog kuv chim kuv thiaj zes taws kom kub mus ib txhis li.” Au Yawmsaub, koj yeej paub, thov koj nco txog kuv thiab los xyuas kuv. Thov koj pab kuv thiab ua pauj rau cov uas tsim txom kuv. Vim yog koj ua tau lub siab ntev, mas thov tsis txhob muab kuv coj mus. Thov nco txog qhov uas kuv raug luag thuam vim yog saib rau koj. Thaum uas ntsib koj tej lus lawm kuv cia li muab noj kiag, mas koj tej lus ua rau kuv zoo siab xyiv fab thiab yog tej uas kuv lub siab nyiam kawg li. Au Vajtswv Yawmsaub uas muaj hwjchim loj kawg nkaus, kuv raug hu raws li koj lub npe. Kuv tsis nrog cov neeg uas ua lomzem zaum ua ke thiab kuv tsis nrog lawv zoo siab. Kuv nyob tib leeg xwb, vim yog koj txhais tes nyob saum kuv, thiab vim koj muab txojkev chim ntim puv nkaus rau hauv kuv. Ua li cas kuv tej kev mob tseem mob tsis tu ncua li, kuv li kiav txhab kuj kho tsis tau zoo, nws tsis yeem zoo? Koj yuav zoo li lub hav dej uas dag kuv, zoo yam li lub hav dej qhuav lov? Vim li no Yawmsaub hais li no tias, “Yog koj rov los, kuv yuav pub koj rov zoo li qub, thiab koj yuav tau sawv ntawm kuv lub xubntiag. Yog koj hais tej lus tseem ceeb tsis txhob hais tej lus tsis muaj qabhau, mas koj yuav zoo li kuv lub qhov ncauj. Lawv yuav tig rov los cuag koj, tiamsis koj tsis txhob tig mus cuag lawv. Kuv yuav muab koj ua lub ntsa loog tooj liab uas ruaj khov rau haiv neeg no. Lawv yuav tawm tsam koj tiamsis lawv kov tsis yeej koj, vim yog kuv nrog koj nyob kom thiaj pab koj dim thiab cawm koj.” Yawmsaub hais li no ntag. “Kuv yuav cawm koj dim hauv cov neeg limhiam txhais tes thiab txhiv koj hauv cov neeg ua nruj ua tsiv txhais tes.” Yawmsaub hais lus tuaj rau kuv tias, “Koj tsis txhob yuav pojniam, tsis txhob muaj tub muaj ntxhais rau ntawm lub chaw no.” Rau qhov Yawmsaub hais li no txog tej tub tej ntxhais uas yug ntawm lub chaw no thiab hais txog cov niam cov txiv uas yug lawv hauv lub tebchaws no tias, “Lawv yuav tuag rau tej mob phem. Yuav tsis muaj leejtwg quaj ntsuag lawv thiab muab lawv log. Lawv yuav zoo yam li tej quav tsiaj txhu nyob saum npoo av. Lawv yuav puam tsuaj vim raug hniav ntaj hniav riam thiab kev tshaib nqhis. Thiab tej liaj dav saum nruab ntug thiab tej tsiaj qus hauv ntiajteb yuav noj lawv tej cev tuag.” Yawmsaub hais li no tias, “Tsis txhob mus rau hauv tej tsev tuag, tsis txhob mus quaj ntsuag thiab nrog lawv mob siab, vim kuv twb muab kuv txojkev uas nyob kaj siab lug rho ntawm cov neeg no mus lawm, thiab rho kuv txojkev hlub uas ruaj khov thiab rho kuv txojkev khuvleej lawm.” Yawmsaub hais li no ntag. “Cov uas ua hlob thiab cov yau yuav tuag tag rau hauv lub tebchaws no. Yuav tsis muaj leejtwg muab lawv log tsis muaj leejtwg quaj ntsuag lawv thiab chais plaubhau thiab muab lub cev suam xyom cov tuag. Tsis muaj leejtwg ntais ib qho ncuav nplij tsev xyom cuab lub siab uas muaj tus tuag. Thiab tsis muaj leejtwg muab ib khob rau lawv haus nplij lawv lub siab vim lawv niam lawv txiv tuag. Koj tsis txhob mus zaum nrog lawv noj lawv haus hauv lub tsev uas pam noj pam haus. Rau qhov, Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, ‘Saib maj, kuv yuav ua kom lub suab luag lub suab zoo siab thiab nraug vauv nkauj nyab lub suab tu nrho hauv lub chaw no tab meeg nej rau thaum nej tseem ua neej ntag.’ “Thaum koj hais tej lus no huvsi rau haiv neeg no, mas lawv yuav hais rau koj tias, ‘Ua cas Yawmsaub hais tseg kom tej xwm txheej phem loj li no raug peb? Peb tej kev txhaum txim yog dabtsi? Peb tau ua txhaum dabtsi rau Yawmsaub uas yog peb tus Vajtswv?’ Ces koj hais rau lawv tias, ‘Vim yog nej tej poj koob yawm txwv tau tso kuv tseg thiab mus raws ncuj nciav luag tej dab thiab ua koom tu thiab pe tej dab ntawd, thiab muab kuv tso pov tseg tsis ua raws li kuv txoj kevcai, thiab vim yog nej ua phem heev dua nej tej poj koob yawm txwv, nej txhua tus nyias ua raws li nyias lub siab phem uas tawv tsaig, tsis yeem mloog kuv. Vim li no kuv yuav muab nej laim tawm hauv lub tebchaws no mus rau lub tebchaws uas nej thiab nej tej poj koob yawm txwv tsis tau paub dua, mas nej yuav ua koom tu luag tej dab rau qhov ntawd nruab hnub hmo ntuj, vim kuv yuav tsis hlub nej lawm.’ ” Yawmsaub hais tias, “Vim li no, saib maj, lub caij lub nyoog tabtom los yuav txog mas tsis muaj leejtwg yuav cog lus twv hais tias, ‘Muaj Yawmsaub tus muaj txojsia nyob uas coj cov Yixayee tawm hauv Iyi tebchaws los pom,’ tiamsis yuav hais tias, ‘Muaj Yawmsaub tus muaj txojsia nyob uas coj cov Yixayee tawm hauv tebchaws sab ped thiab hauv txhua lub tebchaws uas nws muab lawv ntiab mus nyob lawm rov los pom.’ Vim kuv yuav coj lawv rov los rau hauv lawv lub tebchaws uas kuv twb muab pub rau lawv tej poj koob yawm txwv lawm.” Yawmsaub hais tias, “Saib maj, kuv tabtom hu cov neeg muab ntses tuaj coob mas lawv yuav ntes kuv haiv neeg. Dhau ntawd kuv yuav hu cov neeg tua nqaij tuaj coob coob, mas lawv yuav raws kuv cov neeg pem tej roob thiab tej pov roob txhua qhov thiab hauv tej qhov zeb qhov tsua. Kuv lub qhov muag ntsia ntsoov tej uas lawv ua huvsi, zais tsis tau ib yam uas kuv tsis pom li, thiab lawv tej kev txhaum txim yuav muab zais dhau kuv lub qhov muag tsis tau li. Kuv yuav ua pauj lawv tej kev txhaum txim ob npaug, vim lawv muaj tej niag dab mlom tsis muaj sia uas ntxim ntxub kawg li ua rau kuv lub tebchaws qias puas tsuas, thiab ua rau kev qias vuab tsuab puv nkaus rau kuv tej qub txeeg qub teg.” Au Yawmsaub, uas yog kuv lub zog thiab kuv lub chaw ruaj khov, yog lub chaw uas kuv cawm siav rau hnub uas raug txom nyem, ib tsoom tebchaws yuav tuaj qab ntuj kawg tuaj cuag koj thiab hais tias, “Peb tej poj koob yawm txwv tsis tau qub txeeg qub teg dabtsi tsuas yog tau txojkev dag ntxias xwb, yog tej uas tsis muaj nuj nqes dabtsi li, pab tsis tau li. Neeg yuav tsim tej timtswv rau nws tau lov? Tej uas zoo li ntawd tsis yog timtswv.” “Vim li no, saib maj, kuv yuav ua kom lawv paub, tib zaug no xwb kuv yuav ua kom lawv paub kuv lub hwjchim thiab kuv lub zog, mas lawv yuav paub tias kuv lub npe yog Yawmsaub.” “Yuda lub txim yog muab tus cwjmem hlau sau cia, yog muab cwjmem uas lub hauv yog qe zeb hlaws iav txaug cia rau hauv lawv lub siab thiab sau rau tej kub ntawm lawv lub thaj xyeem. Lawv tej tub ki kuj nco txog lawv tej thaj teev dab thiab lawv tej ncej dab Asela uas nyob ntawm txhua tsob ntoo ntsuab thiab saum tej pov roob siab, thiab saum tej roob tom tej plawv tiaj. Kuv yuav muab koj tej nyiaj txiag cuab txhiaj cuab tam rau luag txeeb mus, ua nqe pauj tej kev txhaum uas koj ua thoob koj lub tebchaws. Koj yuav tsum tso koj txhais tes uas tuav tej qub txeeg qub teg uas kuv muab rau koj, thiab kuv yuav ua kom koj ua koj tej yeeb ncuab qhev rau hauv lub tebchaws uas koj tsis tau paub dua, vim yog kuv chim kuv thiaj zes taws kom kub mus ib txhis li.” Yawmsaub hais li no tias, “Tus uas tso siab rau neeg thiab cia nqaij tawv ua nws lub zog, thiab nws lub siab tig ntawm Yawmsaub lawm, nws yog tus uas raug tsawm foom. Nws zoo li tsob nyuag ntoo uas nyob hauv ntuj nrag teb do, tsis pom ib qho zoo los txog nws li. Nws yuav nyob tej chaw qhuav nkig nkuav hauv tebchaws moj sab qhua, yog tebchaws daw ntsev uas tsis muaj neeg nyob. Tus uas tso siab rau Yawmsaub yeej tau nyob kaj siab lug, yog tus uas nws txojkev tso siab nyob rawv hauv Yawmsaub. Nws zoo ib yam li tsob ntoo uas cog ntawm ntug dej, nws tej cag ntsia taug ntug dej, thaum tshav ntuj kub tuaj nws kuj tsis ntshai, vim tej nplooj ntsuab tsaus nti mus li, thiab nws tsis txhawj txog tej xyoo uas ntuj qhuav, thiab txi txiv tsis tu ncua li. Lub siab yog tus uas dag ntxias heev dua lwm yam huvsi, thiab phem kawg li. Leejtwg yuav paub tau neeg lub siab? Kuv yog Yawmsaub uas tshuaj saib tej uas neeg xav thiab sim lub siab, kom thiaj pub rau txhua tus raws li uas lawv xyaum ua lawv lub neej thiab pub raws li tej uas lawv ua.” Yam nkaus li tus ws uas sau tej menyuam uas tsis yog nws puag qe daug, tus neeg nplua nuj uas tau los ntawm tej kev ua tsis ncaj kuj zoo ib yam li ntawd. Thaum nws txog ib nrab neej tej nyiaj txiag yuav tso nws tseg mas thaum kawg nws yog ib tug ruam xwb. Peb lub chaw pe Yawmsaub yog lub zwm txwv ci ntsa iab uas tsim rau saum lub chaw siab thaum chiv keeb los lawm. Au Yawmsaub, tus uas yog cov Yixayee lub chaw vam, txhua tus uas tso koj tseg yuav raug txaj muag, cov uas tig ntawm koj mus lawm lawv lub npe yuav raug muab sau rau hauv av, rau qhov lawv tau muab Yawmsaub uas yog lub qhov dej txhawv pub txojsia tso tseg. Au Yawmsaub, thov kho kuv, kuv tej mob thiaj li zoo, thov cawm kuv, kuv thiaj li dim, vim koj yog tus uas kuv qhuas. Saib maj, lawv hais rau kuv tias, “Yawmsaub tej lus nyob qhovtwg? Cia muaj raws li nws hais los maj.” Kuv tsis tau txhib kom koj tso xwm txheej phem los, thiab kuv tsis xav tau hnub uas raug kev puam tsuaj, koj yeej paub lawm. Tej uas tawm hauv kuv lub qhov ncauj los kuj nyob tab meeg ntawm koj lub xubntiag. Thov tsis txhob ua rau kuv ntshai ceeb nkaus, koj yog kuv lub chaw cawm siav rau hnub uas tej xwm txheej phem los. Cov uas tsim txom kuv cia lawv raug kev txaj muag, tiamsis thov tsis txhob cia kuv raug kev txaj muag. Thov cia lawv poob siab nthav, tiamsis tsis txhob cia kuv poob siab nthav. Thov tso hnub uas muaj xwm txheej phem los raug lawv, thov muab kev puam tsuaj tsav kev puam tsuaj los rau lawv. Yawmsaub hais li no rau kuv tias, “Cia li mus sawv ntawm lub Rooj Loog Pejxeem uas Yuda cov vajntxwv nkag los thiab tawm mus, thiab sawv ntawm txhua lub rooj loog hauv Yeluxalees, mas hais tias, ‘Yuda cov vajntxwv thiab cov neeg Yuda sawvdaws thiab cov neeg hauv Yeluxalees sawvdaws uas nkag tej rooj loog no, nej cia li mloog Yawmsaub tej lus. Yawmsaub hais li no tias, Yog nej xam pom nej txojsia, tsis txhob ris lub nra dabtsi rau hnub Xanpatau lossis coj nkag Yeluxalees tej rooj loog rau hauv. Tsis txhob ris lub nra dabtsi tawm hauv nej lub tsev lossis ua ib yam haujlwm dabtsi rau hnub Xanpatau, tiamsis nej yuav tsum hwm hnub Xanpatau ua hnub uas dawb huv raws li kuv tau hais rau nej tej poj koob yawm txwv lawm. Txawm li ntawd los lawv tsis mloog thiab tsis tig ntsej mloog, lawv tawv ncauj thiaj tsis hnov lus thiab tsis yuav tej lus qhuab qhia.’ ” “Yawmsaub hais tias, ‘Yog nej mloog kuv lus thiab tsis txhob coj ib yam dabtsi nkag tej rooj loog no los rau hnub Xanpatau, thiab hwm hnub Xanpatau ua hnub uas dawb huv, thiab tsis txhob ua ib yam haujlwm dabtsi li rau hnub ntawd, mas yuav muaj vajntxwv uas nyob saum Davi lub zwm txwv thiab lawv cov thawj caij tsheb ua rog thiab caij nees nkag tej rooj loog nkag rau hauv lub nroog no, yog tej vajntxwv thiab lawv cov thawj thiab cov Yuda thiab cov uas nyob hauv Yeluxalees yuav nkag rau hauv. Mas yuav muaj neeg nyob rau hauv lub nroog no ib txhis tsis kawg. Mas tej pejxeem yuav tuaj hauv Yuda tej moos thiab hauv tej chaw uas nyob ib ncig Yeluxalees, thiab hauv Npeeyamee tebchaws, thiab hauv tej pov roob Sefela thiab tuaj pem tej roob siab thiab nram Neke tuaj. Lawv yuav coj qhov txhia chaw uas hlawv xyeem thiab tej uas muab tua xyeem, thiab tej qoob loo uas xyeem, thiab tej roj ntoos tsw qab tuaj rau ntawm Yawmsaub lub tuam tsev. Tiamsis yog nej tsis mloog kuv lus es hwm hnub Xanpatau ua hnub uas dawb huv thiab tseg qhov uas ris nra nkag tej rooj loog los rau hauv Yeluxalees rau hnub Xanpatau, ces kuv yuav zes taws rau ntawm tej rooj loog mas hluavtaws yuav kub tej vajntxwv tej vaj tse hauv Yeluxalees tag, tua tsis tau li.’ ” Yawmsaub hais lus tuaj rau Yelemi tias, “Cia li sawv tsees mus rau ntawm tus Kws puab laujkaub av lub tsev, kuv yuav hais lus rau koj mloog qhov ntawd.” Kuv txawm nqes mus rau ntawm tus Kws puab laujkaub av lub tsev, nws tabtom ua haujlwm ntawm lub tshuab puab laujkaub. Mas lub laujkaub av uas nws tabtom puab ntawd txawm piam rau hauv tus Kws puab laujkaub txhais tes, nws txawm muab puab dua ib lub raws li nws pom zoo ua. Ces Yawmsaub hais lus tuaj rau kuv tias, “Cov Yixayee 'e, kuv yuav ua rau nej ib yam li tus Kws laujkaub no ua tsis tau lov?” Yawmsaub hais li no ntag. “Cov Yixayee 'e, saib maj, nej nyob hauv kuv txhais tes yam nkaus li cov av nplaum nyob hauv tus Kws puab laujkaub txhais tes. Thaum twg kuj xij kuv tshaj tawm txog haiv neeg twg lossis lub tebchaws twg hais tias kuv yuav muab dob thiab muab rhuav tshem thiab ua kom puam tsuaj, yog tias haiv neeg uas kuv tau hais txog ntawd tig ntawm lawv txojkev phem, kuv kuj yuav hloov siab tsis ua tej xwm txheej phem uas kuv twb txiav txim siab yuav ua rau lawv. Thiab thaum twg kuj xij kuv tshaj tawm txog haiv neeg twg lossis lub tebchaws twg hais tias kuv yuav tsim tsa thiab muab cog cia, yog tias haiv neeg ntawd ua tej uas kuv pom tias phem kawg tsis mloog kuv tej lus, kuv kuj yuav hloov siab tsis ua qhov zoo uas kuv txiav txim siab yuav ua rau lawv. Vim li no, koj cia li hais rau cov Yuda thiab cov uas nyob hauv Yeluxalees tias, Yawmsaub hais li no tias, ‘Saib maj, kuv tabtom npaj xwm txheej phem rau nej thiab ntaus ib txoj tswvyim tawm tsam nej. Nej txhua tus cia li tig ntawm nej txojkev phem rov los, cia li kho dua nej lub neej thiab tej uas nej ua huvsi.’ “Tiamsis lawv hais tias, ‘Tsis muaj qabhau. Peb yuav ua raws li uas npaj tseg thiab peb txhua tus nyias taus nyias yuav tawv ncauj ua raws li nws lub siab phem.’ ” Vim li ntawd Yawmsaub hais li no tias, “Cia li mus nug thoob plaws ib tsoom tebchaws saib leejtwg txeev tau hnov tej yam li no. Yixayee uas yog tus nkauj dawb huv tau ua yam uas txaus ntxub kawg. Tej daus xib daus npu saum lub roob Lenpanoo yuav ploj ntawm tej pob tsuas Xili‑oo lov? Tej dej saum roob yuav qhuav lov, yog tej hav dej txiag uas ntws los? Tiamsis kuv haiv neeg tsis nco qab kuv lawm, lawv hlawv hmoov xyab xyeem rau tej dab. Lawv dawm txojkev uas lawv taug, yog txoj qub kev thaum ub, lawv taug tej kev me, tsis taug txoj niag kev loj, ua rau lawv lub tebchaws ua chaw ceeb thiab ntshai, ua lub chaw rau luag thuam mus ib txhis. Txhua tus uas hla mus yuav ceeb thiab ntshai thiab co hau nto. Kuv yuav ua kom lawv tawg ri sua mus ntawm lawv cov yeeb ncuab hauv ntej yam li raug cua ntsawj sab hnub tuaj. Hnub uas lawv raug xwm txheej phem ntawd kuv yuav tig nrob qaum rau lawv tsis tig xubntiag.” Lawv txawm hais tias, “Peb cia li ntaus tswvyim txov Yelemi, rau qhov txoj kevcai yuav tsis ploj ntawm cov pov thawj, thiab tej lus sablaj yuav tsis ploj ntawm cov neeg txawj ntse, thiab Vajtswv tej lus yuav tsis tu ntawm cov xibhwb cev lus. Peb cia li xuas nplaig tawm tsam nws, tsis txhob quav ntsej mloog nws tej lus ib los li.” Au Yawmsaub, thov mloog kuv thiab tig ntsej mloog kuv cov yeeb ncuab tej lus. Tsim nyog ua kev phem pauj kev zoo lov? Lawv kuj tseem khawb qhov taub txov kuv txojsia. Thov nco txog tias kuv sawv ntsug rau ntawm koj xubntiag pab lawv thov thiab thov koj thim koj txojkev npau taws ntawm lawv. Vim li no thov koj muab lawv tej menyuam cob rau kev tshaib nqhis, thiab muab lawv cob rau hniav ntaj hniav riam lub hwjchim. Thov cia lawv tej pojniam tsis muaj menyuam thiab ua poj ntsuam. Thov cia cov txivneej raug mob kis tuag tag, cia cov tub hluas raug hniav ntaj tuag tag rau hauv tshav rog. Thov cia hnov lub suab quaj qw hauv lawv tej tsev rau thaum koj coj tub rog tuaj lws lawv tamsid, rau qhov lawv tau khawb qhov taub cuab kuv, thiab ua rooj hlua cuab kuv kotaw. Au Yawmsaub, koj yeej paub txhua yam uas lawv ntaus tswvyim yuav tua kuv pov tseg. Thov tsis txhob zam lawv tej kev txhaum lossis ntxuav lawv lub txim ntawm koj lub qhov muag mus. Thov muab lawv laim tseg rau ntawm koj xubntiag, cia li rhuav tshem lawv rau thaum koj tseem chim. Yawmsaub hais li no tias, “Cia li mus yuav ib lub tais av ntawm tus Kws puab laujkaub av los mas coj cov kev txwj laus qee leej thiab cov pov thawj hlob qee leej, mus rau hauv lub hav Npeehinoo ncaj txojkev uas nkag lub Rooj Loog Txhais Laujkaub thiab piav tej lus uas kuv hais rau koj rau lawv mloog qhov ntawd. Koj yuav tsum hais tias, ‘Yuda tej vajntxwv thiab cov neeg Yeluxalees 'e, cia li mloog Yawmsaub tej lus. Yawmsaub uas muaj hwjchim loj kawg nkaus, uas yog cov Yixayee tus Vajtswv hais li no tias, Saib nawj, kuv yuav coj xwm txheej phem los raug lub chaw no ua rau txhua tus uas tau hnov rhiab pob ntseg, rau qhov cov neeg no tau tso kuv tseg thiab tau hlawv hmoov xyab xyeem rau luag tej dab uas lawv thiab lawv tej poj koob yawm txwv thiab Yuda tej vajntxwv tsis tau paub dua thiaj ua qias puas tsuas lub chaw no, thiab lawv ua rau tej neeg tsis txhaum li ntshav puv nkaus lub chaw no, thiab tib tej chaw siab teev dab Npa‑as thiab muab lawv tej tub hlawv xyeem rau Npa‑as, yog yam uas kuv tsis tau qhia kom lawv ua thiab tsis tau tso cai lossis xav tseg rau hauv kuv lub siab. Vim li no Yawmsaub hais tias, Saib nawj, lub caij lub nyoog tabtom los yuav txog mas yuav tsis hu lub chaw no tias Thaufe lossis hu tias lub hav Npeehinoo dua li lawm, tiamsis yuav hu tias lub hav Tua Pov Tseg. Kuv yuav ua rau tej uas Yuda thiab Yeluxalees npaj tseg lawd ploj tag rau ntawm lub chaw no, thiab ua rau ob tug tej neeg tuag hniav ntaj rau ntawm lawv cov yeeb ncuab xubntiag thiab tuag tag rau hauv cov uas nrhiav txov lawv txojsia txhais tes. Kuv yuav muab lawv tej cev tuag rau tej liaj dav saum nruab ntug thiab rau tej tsiaj qus hauv ntiajteb noj. Kuv yuav muab lub nroog no ua lub chaw uas luag ceeb thiab ntshai thiab thuam. Txhua tus uas hla mus yuav ceeb thiab ntshai thiab yuav thuam vim yog qhov uas raug kev puam tsuaj tag. Kuv yuav ua rau lawv noj lawv tej tub tej ntxhais li nqaij, thiab txhua tus yuav noj nws tej kwvtij zej zog li nqaij rau thaum raug luag vij thiab raug kev txom nyem nyuaj siab uas lawv cov yeeb ncuab thiab cov uas nrhiav txov lawv txojsia coj los raug lawv.’ “Ces koj cia li muab lub tais av tsoo tawg tag tab meeg cov neeg uas nrog koj mus ntawd, thiab hais rau lawv tias, ‘Yawmsaub uas muaj hwjchim loj kawg nkaus hais tias, Kuv yuav muab haiv neeg no thiab lub nroog no tsoo tawg ib yam li muab tus Kws puab laujkaub lub tais av tsoo tawg tag kho tsis tau li lawm. Yuav log neeg rau hauv Thaufe mus txog thaum tsis muaj chaw log lawm. Yawmsaub hais tias, Kuv yuav ua li no rau lub chaw no thiab cov neeg uas nyob hauv, thiaj ua rau lub nroog no zoo li Thaufe. Yeluxalees tej tsev thiab Yuda tej vajntxiv tej tsev, yog txhua lub tsev uas lawv hlawv hmoov xyab saum txheej tsev las tshav xyeem rau lub hnub lub hli tej hnub qub saum nruab ntug huvsi thiab hliv cawv txiv hmab xyeem rau luag tej dab, yuav qias puas tsuas ib yam li lub chaw Thaufe.’ ” Ces Yelemi txawm tawm ntawm Thaufe uas Yawmsaub txib nws mus cev lus ntawd los. Nws mus sawv ntsug hauv Yawmsaub lub tshav puam tuam tsev, thiab hais rau cov pejxeem sawvdaws tias, “Yawmsaub uas muaj hwjchim loj kawg nkaus, uas yog cov Yixayee tus Vajtswv hais li no tias, ‘Saib nawj, kuv tabtom coj tej xwm txheej phem huvsi uas kuv tau hais cia lawd los raug lub nroog no thiab nws tej moos huvsi, rau qhov lawv tawv ncauj lawv tsis yeem mloog kuv tej lus.’ ” Thaum tus pov thawj Pasaw uas yog Imaw uas ua thawj saib xyuas haujlwm hauv Yawmsaub lub tuam tsev tus tub hnov Yelemi cev Vajtswv tej lus no, Pasaw cia li ntaus Yelemi uas yog xibhwb cev Vajtswv lus thiab muab nws kotaw cuab rau hauv rab cuab ntawm lub rooj loog Npeeyamee uas yog lub sab ped uas mus rau hauv Yawmsaub lub tuam tsev. Tagkis tom qab thaum Pasaw muab Yelemi tso dim hauv rab cuab, Yelemi hais rau nws tias, “Yawmsaub tsis hu koj lub npe ua Pasaw, tiamsis hu tias ntshai kawg rau txhua fab. Rau qhov Yawmsaub hais li no tias, ‘Saib maj, kuv yuav ua rau koj rov ua kev ntshai kawg rau koj thiab koj tej phoojywg sawvdaws. Lawv yuav raug lawv tej yeeb ncuab hniav ntaj hniav riam tuag tag rau koj ntsia ntsoov. Thiab kuv yuav muab Yuda huvsi rau hauv Npanpiloo tus vajntxwv txhais tes, nws yuav muab lawv ntes coj mus rau Npanpiloo thiab xuas ntaj tua lawv pov tseg. Tsis tag li ntawd xwb, kuv yuav muab lub nroog no tej nyiaj txiag qhov txhia chaw huvsi, thiab tej cuab txhiaj cuab tam uas muaj nqes huvsi thiab muab Yuda tej vajntxwv tej nyiaj txiag cuab txhiaj cuab tam rau hauv lawv cov yeeb ncuab txhais tes mas lawv yuav lws thiab txeeb kiag coj mus rau Npanpiloo. Pasaw, koj tus kheej thiab txhua tus uas nrog koj nyob ua ib tse yuav raug ntes coj mus. Koj yuav tau mus txog Npanpiloo thiab koj yuav tuag thiab muab log rau qhov ntawd, koj thiab koj tej phoojywg sawvdaws uas koj pheej ua cuav cev Vajtswv tej lus ib yam nkaus.’ ” Au Yawmsaub, koj tau dag kuv, thiab kuv raug kev dag ntxias. Koj muaj zog heev dhau kuv thiab koj kov yeej. Kuv ua lub chaw uas lawv luag ib hnub tsaus ntuj. Sawvdaws thuam luag kuv. Kuv hais lus thaum twg, kuv yuav quaj qw, kuv qw nrov nrov hais tias, “Kev ua nruj ua tsiv thiab kev puam tsuaj.” Yawmsaub tej lus ua rau kuv raug thuam raug saib tsis taus tas hnub tas hmo. Yog kuv hais tias, “Kuv yuav tsis hais txog Yawmsaub thiab tsis hais nws lub npe dua li lawm,” txawm muaj ib yam hauv kuv lub siab zoo yam nkaus li hluavtaws hlawv kub lug rau hauv kuv tej pob txha, kuv thiaj tsaug leeg rau qhov uas yuav tswj cia, thiab kuv tswj cia tsis taus lawm. Kuv hnov neeg coob kawg sib ntxhi tias, “Muaj kev ntshai kawg rau txhua fab. Cia li iab hiam nws, cia peb iab hiam nws.” Kuv cov phoojywg sawvdaws tseem tos nrhw saib kuv ntog thiab hais tias, “Tej zaum nws yuav raug luag dag tau, ces peb yuav kov yeej nws thiab ua pauj rau nws.” Tiamsis Yawmsaub nrog nraim kuv yam li tus tub rog uas txaus ntshai kawg, vim li no cov uas tsim txom kuv yuav dawm, lawv yuav kov tsis yeej kuv. Lawv yuav raug txaj muag heev, vim yog lawv ua tsis tiav. Qhov uas lawv poob ntsej muag mus ib txhis ntawd, yuav tsis muaj hnub uas tsis nco qab li. Au Yawmsaub uas muaj hwjchim loj kawg nkaus, koj yog tus uas sim tus neeg ncaj ncees, yog tus uas pom ntsoov neeg lub siab thiab tej uas lawv xav. Thov cia kuv pom tej uas koj ua pauj rau lawv, rau qhov kuv twb muab kuv tshaj plaub cob rau koj lawm. Cia li hu nkauj rau Yawmsaub. Cia li qhuas Yawmsaub, rau qhov nws cawm tus uas txom nyem txojsia kom dim hauv cov uas ua phem txhais tes. Cia hnub uas yug kuv raug foom tsis zoo. Cia hnub uas kuv niam yug kuv tsis txhob tau hmoov zoo. Cia li foom tsis zoo rau tus uas xa xov rau kuv txiv hais tias, “Koj tau ib tug tub lawm,” ua rau kuv txiv zoo siab heev. Thov cia tus ntawd zoo yam nkaus li tej moos uas Yawmsaub muab rhuav puam tsuaj tag tsis khuvleej li. Thov cia nws hnov lub suab quaj thaum tagkis thiab hnov lub suab txhib tub rog thaum tav su, rau qhov nws tsis muab kuv tua thaum nruab thiab, kuv niam thiaj ua kuv lub qhov ntxa thiab nws lub plab menyuam thiaj li loj ib txhis. Ua cas kuv tawm hauv plab los, los pom kev txom nyem kev nyuaj siab thiab kuv lub caij nyoog nkim tag rau txojkev txaj muag xwb? No yog tej lus uas Yawmsaub hais tuaj rau Yelemi, yog thaum vajntxwv Xedekhiya txib Makhia tus tub Pasaw thiab Ma‑axeya tus tub Xefaniya uas ua pov thawj mus cuag Yelemi, hais tias, “Cia li thov nug Yawmsaub rau peb, vim Nenpukhanexa uas ua vajntxwv hauv Npanpiloo tabtom ua rog rau peb. Tej zaum Yawmsaub yuav ua nws tej haujlwm phimhwj huvsi pab peb raws li yav thaum ub thiab yuav ua rau Nenpukhanexa thim tub rog ntawm peb rov qab.” Mas Yelemi hais rau ob tug tias, “Neb cia li hais li no rau Xedekhiya tias, ‘Yawmsaub, uas yog Yixayee tus Vajtswv, hais li no tias, Saib maj, kuv yuav ua rau tej cuab yeej ua rog hauv nej txhais tes tig rov los raug nej, yog tej uas nej siv tawm tsam Npanpiloo tus vajntxwv thiab cov Kheedia uas vij nkaus nej lub ntsa loog. Thiab kuv yuav sau zog lawv tuaj rau hauv nruab nrab lub nroog no. Yog kuv ua rog rau nej ntag. Kuv yuav tsa hlo kuv txhais tes thiab siv kuv txhais npab uas muaj zog ntaus nej npau taws vog thiab chim heev thiab npau taws ceev. Thiab kuv yuav ntaus cov uas nyob hauv lub nroog no, tsis hais neeg thiab tsiaj txhu huvsi, mas yuav muaj mob kis loj tuag tag. Yawmsaub hais tias, Tom qab ntawd kuv yuav muab Yuda tus vajntxwv Xedekhiya thiab nws cov tub teg tub taws thiab cov neeg hauv lub nroog no uas tsis tuag mob kis thiab hniav ntaj thiab kev tshaib nqhis, cob rau hauv vajntxwv Nenpukhanexa hauv Npanpiloo txhais tes thiab rau hauv lawv cov yeeb ncuab txhais tes, yog muab rau hauv cov uas txov lawv txojsia txhais tes. Mas Nenpukhanexa yuav xuas ntaj tua lawv, nws yuav tsis khuvleej lawv, tsis tseg ib tug siav li, tsis tab ncuab lawv kiag li.’ “Thiab koj yuav hais rau cov pejxeem tias, ‘Yawmsaub hais li no tias, Saib maj, kuv muab txojkev ciaj thiab txojkev tuag txawb rau ntawm nej xubntiag. Tus uas nyob hauv lub nroog no yuav tuag hniav ntaj hniav riam thiab tuag tshaib tuag nqhis thiab tuag mob kis, tiamsis tus uas tawm mus zwm rau cov Kheedia uas vij lub nroog no lawm yuav dim txojsia, nws yuav tau txojsia ua nqe zog hauv tshav rog los. Kuv tsom ntsoov ua xwm txheej phem rau lub nroog no tsis yog ua zoo. Lub nroog no yuav raug muab cob rau tus vajntxwv hauv Npanpiloo txhais tes mas nws yuav muab hlawv pov tseg.’ Yawmsaub hais li no ntag.” “Cia li hais rau Yuda tus vajntxwv caj ces tias, ‘Cia li mloog Yawmsaub tej lus, Davi caj ces 'e, Yawmsaub hais li no tias, “ ‘Cia li txiav txim ncaj txhua tagkis thiab pab tus uas raug tub sab lws kom dim hauv tus uas quab yuam nws txhais tes, tsam ces kuv txojkev npau taws yuav tawm plaws yam li hluavtaws kub tsis muaj leejtwg tua tau, yog tim tej kev phem uas nej ua. Yawmsaub hais tias, Yeluxalees 'e, uas nyob saum tej hauv hav, thiab yog lub pob zeb uas nyob nram tiaj, saib maj, kuv tawm tsam koj. Nej hais tias, “Leejtwg yuav los tawm tsam peb thiab leejtwg yuav nkag rau hauv peb tej chaw nyob?” Kuv yuav rau txim rau nej raws li uas nej tau ua lawm. Kuv yuav zes taws rau nej lub hav zoov mas hluavtaws yuav kub txhua yam ib ncig ntawd huvsi.’ ” Yawmsaub hais li no ntag. Yawmsaub hais li no tias, “Cia li nqes mus rau hauv Yuda tus vajntxwv lub tsev thiab hais tej lus no rau qhov ntawd tias, ‘Yuda tus vajntxwv uas nyob saum Davi lub zwm txwv 'e, koj thiab koj cov tub teg tub taws thiab koj cov pejxeem uas mus los ntawm lub rooj loog no, cia li mloog Yawmsaub tej lus. Yawmsaub hais li no tias, Cia li txiav txim ncaj thiab ua ncaj ncees, thiab pab tus uas raug tub sab lws kom dim hauv tus uas quab yuam nws txhais tes. Thiab tsis txhob ua txhaum ua limhiam ntais ntuj rau lwm haiv neeg thiab tej menyuam ntsuag tsis muaj txiv thiab cov poj ntsuam, thiab tsis txhob tua tus uas tsis txhaum tuag rau hauv lub chaw no. Yog nej mloog tej lus no tiag tiag mas yuav muaj vajntxwv nyob saum Davi lub zwm txwv nkag tej rooj loog hauv lub tsev no, yuav caij tsheb ua rog thiab caij nees los, yog tej vajntxwv thiab lawv cov tub teg tub taws thiab lawv tej pejxeem. Tiamsis yog nej tsis mloog tej lus no, Yawmsaub hais tias, Kuv tuav kuv lub npe cog lus khov kho tias lub tsev no yuav nyob do cuas cia.’ ” Yawmsaub hais li no txog Yuda tus vajntxwv lub tsev tias, “Koj zoo yam nkaus li Kile‑a rau kuv, zoo yam nkaus li lub hau roob Lenpanoo. Txawm li ntawd los kuv yuav muab koj ua ciaj ntuj nrag teb do, ua lub nroog uas tsis muaj neeg nyob. Kuv yuav npaj cov uas ua kom puam tsuaj tuaj tawm tsam koj, lawv txhua tus muaj cuab yeej ua rog. Lawv yuav ntov koj tej ntoo ciab uas zoo nkauj vau tag, thiab muab hlawv pov tseg. “Thiab tej tebchaws coob yuav hla lub nroog no mus, thiab nyias yuav hais rau nyias phoojywg hais tias, ‘Ua cas Yawmsaub ua li no rau lub nroog loj no?’ Mas lawv yuav teb tias, ‘Vim yog cov neeg no muab Yawmsaub uas yog lawv tus Vajtswv tej lus cog tseg tso tseg lawm, lawv mus pe thiab ua koom tu luag tej dab.’ ” Tsis txhob quaj tus vajntxwv uas tuag lawd, thiab tsis txhob mob siab nws, tiamsis quaj heev rau nws tus tub uas raug ntes coj mus lawm, rau qhov nws yuav tsis tau rov los pom lub tebchaws uas yug nws li lawm. Yawmsaub hais li no txog Yauxiya tus tub Salu uas ua vajntxwv kav Yuda sawv nyob nws txiv Yauxiya chaw, yog tus uas tawm hauv lub chaw no mus, hais tias, “Nws yuav tsis tau rov los rau ntawm no li lawm. Nws yuav tuag rau hauv lub chaw uas luag ntes nws coj mus nyob thiab nws yuav tsis pom lub tebchaws no dua li lawm.” “Tus uas ua nws lub tsev los ntawm txojkev tsis ncaj ncees yuav raug txom nyem lauj! Nws ua txheej saud kuj tsis ua ncaj ua ncees thiab nws quab yuam kwvtij zej zog ua haujlwm dawb rau nws xwb tsis them nqe zog rau lawv li. Nws hais tias, ‘Kuv yuav ua lub tsev loj loj rau kuv nyob ua tej chav dav dav rau txheej saud.’ Nws tho qhov rais rau lub tsev thiab muab tej txiag ntoo ciab los teem lo tej phab ntsa nruab nrog thiab muab pleev liab ploog. Koj xav tias qhov uas koj muab ntoo ciab ntau dua lwm tus li ua tsev yuav ua rau koj tau ua vajntxwv lov? Koj txiv kuj tau noj tau haus thiab txiav txim ncaj thiab ua ncaj ncees, mas nws thiaj tau zoo thiab vam meej. Nws tu plaub rau tej pluag thiab tej txom nyem, nws thiaj tau zoo. Qhov uas ua tej no yog qhov uas paub kuv los tsis yog?” Yawmsaub hais li no ntag. “Tiamsis koj lub qhov muag lub siab lub ntsws tsuas yog xam pom qhov uas ua tsis ncaj es tau ntau xwb, yog qhov uas tua tej neeg tsis txhaum pov tseg, thiab qhov uas quab yuam ua limhiam ntais ntuj rau luag.” Vim li no Yawmsaub hais li no txog Yauxiya tus tub Yehauyakhi uas yog Yuda tus vajntxwv tias, “Lawv yuav tsis quaj ntsuag nws hais tias, ‘Kuv tus tijlaug,’ lossis ‘Kuv tus muam.’ Lawv yuav tsis quaj ntsuag nws hais tias ‘Kuv tus tswv,’ lossis ‘Kuv tus vajntxwv.’ Yuav muab nws log ib yam li faus nees luav, nws yuav raug muab hai mus laim rau nraum Yeluxalees tej rooj loog.” “Yeluxalees, koj cia li nce mus pem Lenpanoo thiab qw nrov nrov, thiab tsa koj lub suab hauv Npasas tebchaws, cia li qw hauv Anpali, rau qhov cov uas koj hlub sawvdaws raug puam tsuaj tag lawm. Thaum koj tseem vam meej kuv twb hais rau koj tiamsis koj hais tias, ‘Kuv tsis mloog.’ Tej no yog koj lub siab uas koj coj ib txwm thaum yau los, yog qhov uas koj tsis mloog kuv lub suab. Cua yuav qhwv nkaus koj cov neeg yug yaj huvsi, mas cov uas koj hlub kuj yuav raug muab ntes coj mus. Mas koj yuav txaj muag poob ntsej muag vim yog tim txhua yam kev phem uas koj ua. Tus uas nyob hauv Lenpanoo 'e, uas ua zes nyob hauv nruab nrab tej ntoo ciab koj yuav quaj ntsaj heev rau thaum kev mob nkeeg los raug koj yam nkaus li tus pojniam mob plab yuav yug menyuam.” Yawmsaub hais tias, “Kuv yeej muaj txojsia nyob mas txawm yog Yuda tus vajntxwv Yehauyakhee tus tub Khauniya yog lub nplhaib ntawm kuv txhais tes xis los kuv yuav muab hle pov tseg, thiab muab koj cob rau hauv cov uas txov koj txojsia txhais tes, yog cov neeg uas koj ntshai txhais tes, yog vajntxwv Nenpukhanexa hauv Npanpiloo txhais tes thiab cov Kheedia txhais tes. Kuv yuav muab koj thiab koj niam uas yug koj laim mus rau lwm lub tebchaws uas tsis yog yug neb, mas neb yuav tuag rau qhov ntawd. Tiamsis lub tebchaws uas lawv xav xav rov qab los nyob ntawd, lawv yuav tsis tau rov los nyob li lawm.” Tus txivneej Khauniya no yog lub laujkaub uas luag saib tsis taus thiab tawg lawm, yog laujkaub uas tsis muaj leejtwg nyiam li lov? Ua cas nws thiab nws tej menyuam raug muab laim pov tseg rau lub tebchaws uas lawv tsis paub li? Tebchaws 'e, tebchaws, tebchaws, cia li mloog Yawmsaub tej lus. Yawmsaub hais li no tias, “Cia li sau cia tias tus txiv no tsis muaj menyuam, nws yuav ua tsis tau ib yam dabtsi tiav rau nws sim neej, rau qhov tsis muaj ib tug tub uas yuav vam meej thiab nyob tau saum Davi lub zwm txwv thiab kav Yuda dua li lawm.” Yawmsaub hais tias, “Cov uas yug yaj yuav raug txom nyem lauj! Lawv yog cov uas ua rau kuv pab yaj puam tsuaj tawg ri sua hauv kuv lub tshav zaub.” Vim li no, Yawmsaub uas yog Yixayee tus Vajtswv hais li no txog cov yug yaj uas saib xyuas kuv cov neeg tias, “Nej muab kuv pab yaj ua tawg ri sua thiab muab lawv ntiab khiav tag, thiab nej kuj tsis mob siab saib xyuas lawv. Saib maj, kuv yuav ua tib zoo saib nej vim tej kev phem uas nej ua.” Yawmsaub hais li no ntag. “Mas kuv yuav sau kuv pab yaj uas tseem tshuav nyob tawm hauv txhua lub tebchaws uas kuv ntiab lawv mus nyob rov qab los, thiab kuv yuav coj lawv rov los txog lawv lub nkuaj mas lawv yuav muaj menyuam coob thiab huaj vam tuaj. Kuv yuav tsa cov yug yaj los kav lawv yog cov uas mob siab saib xyuas lawv thiab lawv yuav tsis ntshai li lawm, yuav tsis poob siab nthav thiab tsis muaj ib tug ploj li.” Yawmsaub hais li no ntag. Yawmsaub hais tias, “Saib maj, lub caij lub nyoog tabtom los yuav txog mas kuv yuav tsa Davi caj ces ib tug ceg uas ncaj ncees mas tus ntawd yuav ua vajntxwv kav thiab muaj tswvyim ua txhua yam thiab txiav txim ncaj thiab ua ncaj ncees rau hauv lub tebchaws. Thaum nws ua vajntxwv kav, Yuda yuav tau kev dim thiab Yixayee yuav nyob tso siab plhuav. Yuav hu nws lub npe hais tias ‘Yawmsaub uas yog peb txojkev ncaj ncees.’ ” Vim li no Yawmsaub hais tias, “Lub caij lub nyoog tabtom los yuav txog mas neeg yuav tsis twv hais tias ‘Muaj Yawmsaub tus muaj txojsia nyob uas coj cov Yixayee tawm hauv Iyi tebchaws los pom,’ tiamsis yuav hais tias, ‘Muaj Yawmsaub tus muaj txojsia nyob uas coj cov Yixayee tawm hauv tebchaws sab ped thiab hauv txhua lub tebchaws uas nws muab lawv ntiab mus nyob lawm rov los pom.’ Mas lawv yuav tau nyob hauv lub tebchaws uas yeej yog lawv li.” Tej lus hais txog cov xibhwb cev Vajtswv lus. Kuv siab ntsws puas tag, kuv tej pob txha tshee hnyo huvsi, kuv zoo yam nkaus li tus qaug cawv, zoo yam nkaus li tus qaug cawv txiv hmab tsis meej pem, vim yog Yawmsaub thiab tej lus dawb huv uas nws hais. Cov uas ua nkauj ua nraug muaj puv nkaus hauv lub tebchaws. Vim tej lus uas Yawmsaub foom tsis zoo lub tebchaws thiaj quaj ntsuag, thiab tej tshav zaub hauv tebchaws moj sab qhua kuj qhuav tag. Lawv ua tej uas phem kawg li, thiab lawv siv lawv lub hwjchim ua tsis ncaj. “Txawm yog cov xibhwb cev kuv lus thiab cov pov thawj los kuj tsis hwm kuv, txawm yog hauv kuv lub tuam tsev los kuv kuj pom lawv ua phem.” Yawmsaub hais li no ntag. “Vim li ntawd mas lawv txojkev yuav zoo yam li txojkev nplua rau thaum tsaus ntuj, lawv yuav raug muab raws rau hauv txojkev ntawd thiab ntog tag qhov ntawd. Kuv yuav coj xwm txheej phem los raug lawv rau xyoo uas rau txim rau lawv.” Yawmsaub hais li no ntag. “Cov xibhwb cev kuv lus hauv Xamali mas kuv pom muaj kev phem kev qias. Lawv tuav dab Npa‑as lub npe cev lus thiab ua rau kuv cov neeg Yixayee yuam kev. Tiamsis cov xibhwb cev kuv lus hauv Yeluxalees mas kuv pom muaj tej uas ntxim ntxub kawg li. Lawv ua nkauj ua nraug, thiab pheej dag, lawv tseem txhawb cov neeg ua phem lub zog, thiaj tsis muaj ib tug tig kiag ntawm nws txojkev limhiam rov los. Kuv pom lawv sawvdaws zoo yam li lub moos Xaudoo thiab cov neeg hauv Yeluxalees zoo yam nkaus li lub moos Kaumaula.” Vim li no Yawmsaub uas muaj hwjchim loj kawg nkaus hais li no txog cov xibhwb cev Vajtswv lus tias, “Saib maj, kuv yuav muab zaub iab zaub daw rau lawv noj thiab muab dej muaj taug rau lawv haus, vim qhov uas tsis hwm kuv twb tawm ntawm cov xibhwb cev Vajtswv lus hauv Yeluxalees nthuav mus thoob tebchaws lawm.” Yawmsaub uas muaj hwjchim loj kawg nkaus hais li no tias, “Nej tsis txhob mloog tej lus uas cov xibhwb cev Vajtswv lus hais rau nej, ua rau nej muaj siab vam qhuav qhuav xwb. Lawv hais tej zaj yog toog uas lawv xav hauv lawv lub siab xwb tsis yog tawm hauv Yawmsaub lub qhov ncauj los. Lawv hais tsis tu rau cov uas saib tsis taus Yawmsaub tej lus tias, ‘Nej yuav noj qab nyob zoo,’ thiab hais rau txhua tus uas tawv ncauj ua raws li lawv lub siab xwb hais tias, ‘Yuav tsis muaj xwm txheej phem los raug nej li.’ ” “Cov xibhwb ntawd muaj tus twg tau sawv hauv cov neeg uas nrog Yawmsaub sablaj es pom thiab hnov Yawmsaub tej lus, thiab leejtwg tau mloog nws tej lus thiab tig ntsej ncuv tos mloog? Saib maj, Yawmsaub tej cua daj cua dub uas yog nws txojkev npau taws tawm mus lawm, yog lub khaub zeeg cua uas ntswj pes lees yuav tawg saum cov neeg limhiam taubhau. Yawmsaub txojkev chim yuav tsis thim rov qab mus txog thaum nws ua kom tiav raws li nws lub siab xav tseg lawm. Yav tom hauv ntej nej yuav nkag siab zaj no meej. Kuv twb tsis txib cov xibhwb cev lus ntawd mus, los lawv dhia lawv mus xwb. Kuv twb tsis tau hais rau lawv los lawv cev lawv li lus xwb. Yog lawv tau sawv hauv cov neeg uas nrog kuv sablaj mas lawv twb cev kuv tej lus rau kuv cov neeg, thiab ua rau lawv tig ntawm lawv tej kev phem thiab tso tej uas lawv ua phem tseg lawm.” Yawmsaub hais tias, “Kuv yog tus Vajtswv uas nyob ze nej, tsis yog tus Vajtswv uas nyob deb nej los tsis yog?” Yawmsaub hais tias, “Leejtwg yuav mus tsiv nraim kuv ua rau kuv tsis pom nws tau lov?” Yawmsaub hais tias, “Kuv tsis nyob thoob plaws saum lub ntuj thiab hauv lub ntiajteb lov? Kuv twb hnov cov xibhwb uas tuav kuv lub npe cev lus dag, hais tias, ‘Kuv ua npau suav, kuv ua npau suav pom.’ Tej lus dag yuav nyob hauv cov xibhwb cev Vajtswv lus lub siab mus ntev li cas? Lawv pheej cev lus dag raws li lawv lub siab dag ntxias. Lawv pheej xav hais tias muab tej uas lawv ua npau suav pom piav ib leeg dhau ib leeg es yuav ua rau kuv cov neeg tsis nco qab kuv lub npe, ib yam li lawv tej poj koob yawm txwv tsis nco qab kuv lub npe mus teev dab Npa‑as lawm. Cia cov xibhwb uas ua npau suav piav lawv tej npau suav, hos cia cov uas muaj kuv tej lus piav kuv tej lus ncaj ncaj. Tej quav nyab puas thooj li tej txhuv mos?” Yawmsaub hais li no ntag. Yawmsaub hais tias, “Kuv tej lus zoo li hluavtaws thiab zoo li rab rauj uas tsoo pob zeb tawg ua tej dwb daim.” Yawmsaub hais tias, “Vim li no, saib maj, kuv tawm tsam cov xibhwb cev lus uas nyiag kuv tej lus ib tug dhau ib tug.” Yawmsaub hais tias, “Saib maj, kuv tawm tsam cov xibhwb cev lus uas siv lawv tus nplaig los tseem hais tias, ‘Yawmsaub hais li no.’ ” Yawmsaub hais tias, “Saib maj, kuv tawm tsam cov uas cev tej lus npau suav dag. Lawv qhia tej npau suav ntawd thiab coj kuv haiv neeg yuam kev vim yog tim lawv tej lus dag thiab tej lus uas lawv hais ua dog ua dig. Kuv twb tsis tau txib lawv thiab kom lawv ua. Vim li no lawv tsis muaj qabhau dabtsi rau haiv neeg no li.” Yawmsaub hais li no ntag. “Thaum muaj tus pejxeem twg lossis xibhwb cev Vajtswv lus twg lossis tus pov thawj twg nug koj hais tias, ‘Yawmsaub lub nra yog dabtsi?’ koj cia li teb nws tias, ‘Yawmsaub hais tias, Nej yog Yawmsaub lub nra hnyav ntag, mas kuv yuav muab nej laim pov tseg.’ Yog cov xibhwb cev Vajtswv lus thiab cov pov thawj thiab cov pejxeem tus twg lam hais tias, ‘Yawmsaub lub nra,’ mas kuv yuav rau txim rau tus ntawd thiab nws tsev neeg. Nej yuav tsum hais li no txhua tus nyias hais rau nyias tej phoojywg thiab nyias hais rau nyias tej kwvtij tias, ‘Yawmsaub teb li cas maj?’ lossis ‘Yawmsaub hais li cas lawm maj?’ Nej tsis txhob lam mus hais txog ‘Yawmsaub lub nra,’ dua li lawm, rau qhov lub nra ntawd yog tej lus uas txhua tus nyias hais nyias xwb, thiab nej muab Vajtswv uas muaj txojsia nyob, yog Yawmsaub tus muaj hwjchim loj kawg nkaus uas yog peb tus Vajtswv tej lus ntxeev dua rau ib qho lawm. Nej yuav tsum hais li no rau cov xibhwb cev Vajtswv lus tias, ‘Yawmsaub teb nej li cas maj?’ lossis ‘Yawmsaub hais li cas maj?’ Tiamsis yog nej cov xibhwb lam hais tias, ‘Yawmsaub lub nra yog li no,’ mas Yawmsaub hais tias, Nej hais tej lus no hais tias, ‘Yawmsaub lub nra,’ rau thaum kuv xa xov rau nej hais tias, ‘Nej tsis txhob hais tias Yawmsaub lub nra.’ Vim li no, saib maj, kuv yuav muab nej nqa laim pov tseg tawm ntawm kuv lub xubntiag tiag tiag li, muab kiag nej thiab lub nroog uas kuv pub rau nej thiab nej tej poj koob yawm txwv lawm huvsi. Thiab kuv yuav cia nej raug txaj muag ib txhis thiab raug thuam mus ib txhis li, yuav tsis tsis nco qab li.” Thaum vajntxwv Nenpukhanexa hauv Npanpiloo twb ntes Yehauyakhi tus tub Yekhauniya uas ua Yuda tus vajntxwv coj tawm hauv Yeluxalees ua ke nrog Yuda cov thawj thiab tej Kws txawj txhua yam thiab tej Kws tooj Kws hlau, coj mus rau Npanpiloo lawm, Yawmsaub rov qhia ib zaj yog toog rau kuv pom li no, pom muaj ob lub tawb txiv cev txawb rau ntawm hauv ntej Yawmsaub lub tuam tsev. Ib lub tawb muaj cov txiv cev uas zoo heev ib yam li cov txiv cev uas siav thawj phaum, tiamsis ib lub tawb muaj cov txiv cev uas tsis zoo kiag li, tsis zoo noj li. Mas Yawmsaub hais rau kuv tias, “Yelemi, koj pom dabtsi?” Kuv teb tias, “Kuv pom cov txiv cev, pom cov uas zoo kuj zoo kawg li, cov uas phem kuj phem kawg li, tsis zoo noj li.” Mas Yawmsaub hais tuaj rau kuv tias, “Yawmsaub uas yog Yixayee tus Vajtswv hais li no tias, ‘Kuj ib yam li cov txiv cev uas zoo no ntag, kuv yuav suav cov uas raug muab ntes coj tawm hauv Yuda lawm yog cov zoo, yog cov uas kuv xa tawm ntawm qhov chaw no mus rau cov Kheedia lub tebchaws. Kuv yuav saib xyuas lawv kom lawv tau zoo, thiab kuv yuav coj lawv rov qab los rau lub tebchaws no. Kuv yuav tsa lawv lub neej kom sawv, thiab kuv yuav tsis muab rhuav lawm. Kuv yuav muab lawv cog, yuav tsis muab lawv dob lawm. Kuv yuav pub lawv muaj lub siab uas xav paub tias kuv yog Yawmsaub. Lawv yuav ua kuv haiv neeg, thiab kuv yuav ua lawv tus Vajtswv, vim lawv yuav rov los cuag kuv kawg siab kawg ntsws.’ ” “Thiab Yawmsaub hais li no tias, ‘Zoo yam li ua rau cov txiv cev tsis zoo uas noj tsis tau ntawd, kuv yuav ua rau Yuda tus vajntxwv Xedekhiya thiab nws cov tub teg tub taws thiab cov neeg Yeluxalees uas tseem tshuav nyob hauv lub tebchaws no thiab cov uas nyob hauv Iyi tebchaws ib yam li ntawd. Kuv yuav ua rau lawv ua lub chaw uas ib tsoom tebchaws hauv ntiajteb sawvdaws ceeb thiab ntshai, lawv yuav raug luag thuam, tiag luag ncauj luag lo, raug luag luag thiab ua lo lus tsawm foom rau hauv txhua qhov chaw uas kuv ntiab lawv mus nyob. Kuv yuav tso hniav ntaj hniav riam thiab kev tshaib nqhis thiab mob kis los raug lawv mus txog thaum lawv puam tsuaj tag huvsi hauv lub tebchaws uas kuv muab pub rau lawv thiab lawv tej poj koob yawm txwv.’ ” Tej lus uas hais tuaj rau Yelemi ntsig txog cov neeg Yuda sawvdaws yog xyoo plaub uas Yauxiya tus tub Yehauyakhi ua vajntxwv kav Yuda. Xyoo ntawd yog thawj xyoo uas Nenpukhanexa ua vajntxwv hauv Npanpiloo. Mas Yelemi uas ua xibhwb cev Vajtswv lus hais tej lus ntawd rau cov neeg Yuda sawvdaws thiab cov uas nyob hauv Yeluxalees sawvdaws tias, “Yawmsaub hais nws tej lus rau kuv tau nees nkaum peb xyoos lawm, txij thaum xyoo kaum peb uas Asmoo tus tub Yauxiya ua vajntxwv kav Yuda los txog hnub no, mas kuv kuj hais rau nej tsis tu ncua li, tiamsis nej tsis mloog. Txawm yog Yawmsaub txib nws cov tub qhe uas yog xibhwb cev Vajtswv lus sawvdaws los rau nej tsis tu ncua li, los nej tsis mloog, tsis tig nej lub qhov ntsej mloog. Lawv hais tias, ‘Nej txhua tus cia li tig ntawm nej txojkev phem thiab nej tej kev txhaum rov qab, thiaj nyob tau hauv lub tebchaws uas Yawmsaub muab pub rau nej thiab nej tej poj koob yawm txwv txij thaum ub los mus ib txhis li. Tsis txhob mus raws ncuj nciav luag tej dab thiab txhob ua koom txhob pe tej dab ntawd, thiab tsis txhob zes ua rau kuv chim vim tej uas nej txhais tes ua. Mas kuv thiaj tsis tso kev txom nyem rau nej.’ Yawmsaub hais tias, ‘Txawm li ntawd los nej tsis mloog kuv, nej tseem txhob txwm zes ua rau kuv chim vim tej uas nej txhais tes ua, nej thiaj lob kev txom nyem rau nej.’ ” Vim li no Yawmsaub uas muaj hwjchim loj kawg nkaus hais li no tias, “Vim yog nej tsis mloog kuv tej lus,” Yawmsaub hais tias, “Saib maj, kuv yuav hu txhua haiv neeg uas nyob sab ped thiab hu kuv tus tub qhe Nenpukhanexa uas ua vajntxwv hauv Npanpiloo, mas kuv yuav coj lawv tuaj tawm tsam lub tebchaws no thiab cov neeg uas nyob hauv, thiab tawm tsam txhua lub tebchaws uas nyob ib ncig. Kuv yuav ua rau lawv puam tsuaj tag huvsi, thiab ua rau lawv ua lub chaw uas luag ceeb thiab ntshai, thiab raug luag thuam thiab raug nyob do cuas mus ib txhis. Tsis yog li ntawd xwb, kuv tseem yuav ua kom lub suab luag lub suab zoo siab, thiab nraug vauv nkauj nyab lub suab thiab lub suab zom zeb thiab tus duab teeb ploj ntais hauv nej mus. Tag nrho lub tebchaws no yuav pob tag thiab liamsim tag, thiab tej tebchaws no yuav ua num rau tus vajntxwv hauv Npanpiloo xya caum xyoo.” Yawmsaub hais tias, “Thaum puv xya caum xyoo lawm kuv yuav rau txim rau tus vajntxwv hauv Npanpiloo thiab lub tebchaws ntawd uas yog cov Kheedia lub tebchaws, vim lawv ua txhaum muaj txim, thiab ua rau lub tebchaws nyob liamsim tag mus ib txhis. Kuv yuav tso txhua yam uas kuv twb hais tseg tawm tsam lub tebchaws ntawd lawm, los raug lub tebchaws ntawd, yog txhua yam uas sau cia rau hauv phau ntawv no uas Yelemi tau cev tawm tsam ib tsoom tebchaws sawvdaws. Txawm yog cov Npanpiloo los yuav muaj ntau lub tebchaws thiab tej vajntxwv loj yuav muab lawv ua qhev. Kuv yuav ua pauj rau lawv raws li lawv tej haujlwm thiab raws li tej uas lawv txhais tes ua.” Yawmsaub uas yog Yixayee tus Vajtswv hais li no rau kuv tias, “Cia li txais lub khob cawv txiv hmab no uas yog kuv txojkev npau taws ntawm kuv txhais tes mus, thiab yuam txhua lub tebchaws uas kuv txib koj mus ntawd haus lub khob no. Lawv yuav haus thiab qaug yoj yuj yees tsis meej pem vim yog rab ntaj uas kuv xa mus rau hauv lawv nruab nrab.” Mas kuv thiaj txais lub khob ntawm Yawmsaub txhais tes thiab yuam txhua lub tebchaws uas Yawmsaub txib kuv mus ntawd haus. Yeluxalees thiab Yuda tej moos thiab tej vajntxwv thiab cov thawj hauv Yuda kuj haus ua rau lawv piam tag nyob do cuas, thiab raug luag thuam thiab ua lo lus tsawm foom yam li niaj hnub nimno. Iyi tus vajntxwv Falau thiab nws cov tub teg tub taws thiab nws cov thawj thiab nws cov pejxeem sawvdaws, thiab lwm haiv neeg uas nrog lawv nyob sawvdaws kuj haus. Tej vajntxwv hauv tebchaws Us txhua tus thiab tej vajntxwv hauv tebchaws Filixatee txhua tus kuj haus, yog lub moos Akheloo, lub moos Kaxa, lub moos Ekhoo thiab cov neeg hauv lub moos Asadau uas tseem tshuav nyob. Edoo, Mau‑a thiab cov neeg Asmoo kuj haus. Cov vajntxwv hauv lub nroog Thailab txhua tus thiab cov vajntxwv hauv lub moos Xaidoo txhua tus thiab cov vajntxwv raws ntug dej hiavtxwv sab tid txhua tus kuj haus. Lub moos Dedas, lub moos Thema, lub moos Npub thiab cov neeg sawvdaws uas chais plaubhau txij nplooj ntseg kuj haus. Cov vajntxwv hauv Alanpia txhua tus thiab cov vajntxwv txhua tus uas kav ntau haiv neeg uas nyob hauv ntuj nrag teb do kuj haus. Cov vajntxwv hauv lub moos Xili thiab hauv lub moos Elas thiab hauv tebchaws Midia txhua tus puavleej haus. Thiab cov vajntxwv uas nyob sab ped, tsis hais nyob deb nyob ze ib tug dhau ib tug huvsi, thiab txhua lub tebchaws hauv ntiajteb no uas nyob hauv qab ntuj kuj haus. Thiab tus vajntxwv hauv Npanpiloo yuav haus tom qab tej vajntxwv no. “Mas koj hais li no rau lawv tias, ‘Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, Cia li haus, haus kom qaug thiab ntuav, cia li ntog tsis txhob sawv los li, vim yog hniav ntaj uas kuv xa tuaj rau hauv nej nruab nrab.’ Yog lawv tsis kam txais lub khob ntawm koj txhais tes mus haus, koj cia li hais rau lawv tias, ‘Yawmsaub uas muaj hwjchim loj kawg nkaus hais li no tias, Nej yuav tsum haus. Saib maj, kuv twb pib tso xwm txheej phem rau lub nroog uas hu raws li kuv lub npe lawm, mas nej yuav tsis raug rau txim lov? Nej yuav tsis dim kev teem txim rau qhov kuv tabtom hu ib rab ntaj los tawm tsam cov neeg uas nyob hauv ntiajteb sawvdaws. Yawmsaub uas muaj hwjchim loj kawg nkaus hais li no ntag.’ “Vim li no koj yuav tsum cev tej lus no huvsi tawm tsam lawv, thiab hais rau lawv tias, “ ‘Yawmsaub yuav nyooj laws ntawm lub chaw siab thiab yuav tsa suab qw ntawm nws lub chaw nyob uas dawb huv. Yawmsaub yuav nyooj laws tawm tsam nws pab yaj thiab yuav qw nrov yam nkaus li cov uas tsuam kua txiv hmab qw, tawm tsam ib tsoom neeg sawvdaws hauv lub ntiajteb. Lub suab yuav nrov ntxhe mus thoob qab ntuj kawg, rau qhov Yawmsaub nrog ib tsoom tebchaws muaj plaub, nws yuav txiav txim rau ib tsoom neeg, mas nws yuav xuas ntaj tua cov neeg limhiam.’ ” Yawmsaub hais li no ntag. Yawmsaub uas muaj hwjchim loj kawg nkaus hais li no tias, “Saib maj, vij sub vij sw tabtom raug ib haiv neeg dhau ib haiv neeg, thiab cua daj cua dub ntsawj tim qab ntuj kawg tuaj.” Cov uas Yawmsaub tua rau hnub ntawd yuav muaj thoob plaws sab ntuj no mus txog sab ntuj tim ub. Lawv cov ntawd tsis muaj leejtwg yuav quaj ntsuag lossis muab sau coj mus log. Lawv yuav zoo li quav tsiaj txhu saum npoo av. Nej cov uas yug yaj, cia li quaj nyiav thiab quaj lauj! Nej cov tswv yaj, cia li da luj luam hauv cub tshauv, rau qhov txog hnub uas muab nej tua thiab nej yuav tawg ri sua, thiab nej yuav ntog vau hlo tawg tag yam li lub tais ntim uas zoo nkauj. Cov uas yug yaj tsis tau kev khiav thiab cov tswv yaj tsis muaj kev dim. Cia li mloog cov yug yaj lub suab quaj thiab cov tswv yaj lub suab quaj nyiav, rau qhov Yawmsaub tabtom ua rau lawv tej tshav zaub puam tsuaj. Tej nkuaj yaj uas nyob thaj yeeb kuj puam tsuaj tag vim yog qhov uas Yawmsaub chim heev. Yawmsaub tawm hauv nws lub chaw yam nkaus li tus tsov ntxhuav, thiab lawv lub tebchaws liamsim tag lawm vim tim tus uas tsim txom rab ntaj thiab vim yog Yawmsaub chim heev. Thaum Yehauyakhi uas yog Yauxiya tus tub pib ua vajntxwv kav Yuda tebchaws, Yawmsaub hais cov lus no tuaj. “Yawmsaub hais li no tias, Koj cia li sawv ntsug hauv Yawmsaub lub tuam tsev lub tshav puam, thiab hais rau Yuda txhua lub moos uas tuaj pe hawm rau hauv Yawmsaub lub tuam tsev hais txhua lo lus uas kuv kom koj hais rau lawv tsis txhob tseg ib los li. Tej zaum lawv yuav mloog thiab txhua tus yuav tig ntawm lawv txojkev phem rov los, mas kuv yuav hloov siab tsis ua tej xwm txheej phem uas kuv npaj yuav ua rau lawv vim yog tej kev phem uas lawv ua. Koj yuav tsum hais rau lawv tias, ‘Yawmsaub hais li no tias, Yog nej tsis mloog kuv hais, tsis ua lub neej raws li kuv txoj kevcai uas kuv tau qhia rau nej, thiab tsis quav ntsej kuv cov tub qhe tej lus, yog cov xibhwb cev lus uas kuv txib tuaj cuag nej tsis tu ncua los nej kuj tsis mloog, mas kuv yuav ua rau lub tuam tsev no zoo yam nkaus li lub moos Silau, thiab kuv yuav muab lub nroog no ua ib tsoom tebchaws huvsi thoob qab ntuj lo lus tsawm foom.’ ” Cov pov thawj thiab cov xibhwb cev lus thiab cov pejxeem sawvdaws tau hnov Yelemi hais tej lus no hauv Yawmsaub lub tuam tsev. Thaum Yelemi hais tej lus huvsi uas Yawmsaub kom nws hais rau cov neeg sawvdaws xaus nkaus, ces cov pov thawj thiab cov xibhwb cev lus thiab cov pejxeem sawvdaws txawm ntes Yelemi thiab hais rau nws tias, “Koj yuav tuag. Ua cas koj yuav tuav Yawmsaub lub npe cev lus tias, lub tuam tsev no yuav zoo li Silau, thiab lub nroog no yuav raug nyob do cuas tsis muaj neeg nyob hauv?” Mas cov neeg sawvdaws sau zog tuaj vij Yelemi rau hauv Yawmsaub lub tuam tsev. Thaum Yuda cov thawj hnov tej xwm txheej no, lawv kuj tawm hauv vajntxwv lub tsev tuaj rau ntawm Yawmsaub lub tuam tsev, tuaj zaum rau ntawm txojkev uas nkag lub Rooj Loog Tshiab ntawm Yawmsaub lub tuam tsev. Mas cov pov thawj thiab cov xibhwb cev lus hais rau cov thawj thiab rau cov neeg sawvdaws tias, “Tsim nyog muab yawg no txiav txim tuag, vim nws cev lus tawm tsam lub nroog no raws li nej lub qhov ntsej twb hnov lawd.” Yelemi thiaj hais rau cov thawj sawvdaws thiab hais rau cov neeg sawvdaws tias, “Yawmsaub txib kuv tuaj cev tej lus no tawm tsam lub tuam tsev thiab lub nroog no raws li tej lus huvsi uas nej tau hnov. Vim li no, nimno nej cia li kho nej lub neej thiab tej uas nej ua, thiab mloog Yawmsaub uas yog nej tus Vajtswv tej lus, mas Yawmsaub yuav hloov siab tsis tso tej xwm txheej phem uas nws twb hais lawd los raug nej. Kuv mas kuv nyob hauv nej txhais tes lawm. Nej cia li ua rau kuv raws li nej pom zoo thiab raug cai. Nej cia li paub tseeb tias yog nej muab kuv tua pov tseg, mas nej thiab lub nroog no thiab cov neeg uas nyob hauv yuav ris tus neeg tsis txhaum tej ntshav. Qhov tseeb yeej yog Yawmsaub txib kuv tuaj hais tej lus no huvsi kom nkag nej lub qhov ntsej.” Cov thawj thiab cov neeg sawvdaws txawm hais rau cov pov thawj thiab cov xibhwb cev lus tias, “Tsis tsim nyog muab tus yawg no txiav txim tuag, vim nws tuav Yawmsaub uas yog peb tus Vajtswv lub npe hais tej lus no rau peb.” Muaj cov kev txwj laus hauv lub tebchaws qee leej sawv tsees hais rau cov neeg uas tuaj txoos ua ke ntawd tias, “Mikha uas yog neeg hauv moos Maulese tau cev Vajtswv lus rau thaum Hexekhiya ua vajntxwv kav Yuda, nws hais rau cov neeg Yuda sawvdaws tias, ‘Yawmsaub uas muaj hwjchim loj kawg nkaus hais li no tias, “ ‘Xi‑oo yuav raug muab laij ib yam li laij teb, Yeluxalees yuav pob tag ua tej niag pawg, thiab lub roob lub tuam tsev yuav ciaj ua roob hav zoov.’ Yuda tus vajntxwv Hexekhiya thiab cov Yuda sawvdaws muab nws tua lawm lov? Hexekhiya ntshai Yawmsaub thiab thov Yawmsaub hlub los tsis yog? Thiab Yawmsaub tau hloov siab tsis tso tej xwm txheej phem uas nws twb hais rau lawv lawd los raug lawv los tsis yog? Tiamsis peb tabtom yuav coj tej xwm txheej phem loj no los raug peb tus kheej.” Tseem muaj dua ib tug xibhwb uas tuav Yawmsaub lub npe cev lus, npe hu ua Uliya uas yog Semaya tus tub, uas nyob hauv Khiliya Ye‑ali. Nws tau cev lus tawm tsam lub nroog no thiab lub tebchaws no ib yam li Yelemi hais. Mas thaum vajntxwv Yehauyakhi thiab nws cov tub rog sawvdaws thiab nws cov thawj sawvdaws hnov Uliya tej lus ntawd, vajntxwv nrhiav kev yuav muab nws tua pov tseg. Thaum Uliya hnov li ntawd, nws kuj ntshai thiab khiav dim mus rau Iyi tebchaws. Ces vajntxwv Yehauyakhi txawm tso Eenathas uas yog Anpau tus tub thiab dua lwm tus caum mus rau Iyi tebchaws. Lawv ntes tau Uliya hauv Iyi tebchaws los thiab coj nws los cuag vajntxwv Yehauyakhi, ces vajntxwv txawm xuas ntaj tua nws thiab muab nws lub cev tuag laim pov tseg rau hauv tej qhov ntxa uas log cov pejxeem. Tiamsis Ahikhas uas yog Safas tus tub tuaj Yelemi tog, yog li ntawd Yelemi thiaj tsis raug muab cob rau cov neeg tua pov tseg. Thaum Xedekhiya uas yog Yauxiya tus tub pib ua vajntxwv kav Yuda, Yawmsaub hais tej lus no tuaj rau Yelemi. Yawmsaub hais li no rau kuv tias, “Koj cia li ua tus quab thiab txoj hlua muab nruab rau ntawm koj caj qwb. Thiab xa xov rau Edoo tus vajntxwv, Mau‑a tus vajntxwv, cov Asmoo tus vajntxwv, Thailab tus vajntxwv thiab Xaidoo tus vajntxwv, yog muab rau lawv cov tub tes taw uas tuaj cuag Yuda tus vajntxwv Xedekhiya hauv Yeluxalees. Muab tej lus no rau cov tub teg tub taws ntawd coj mus rau lawv cov vajntxwv hais tias, ‘Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, “Nej yuav tsum hais li no rau nej cov vajntxwv tias, Yeej yog kuv ntag uas siv kuv lub hwjchim loj kawg thiab kuv txhais npab uas muaj zog tsim lub ntiajteb thiab neeg thiab tej tsiaj txhu uas nyob hauv ntiajteb, mas kuv pub rau leejtwg kuj nyob ntawm kuv pom zoo. Nimno kuv pub tej tebchaws no huvsi rau hauv kuv tus tub qhe Nenpukhanexa txhais tes uas ua vajntxwv hauv Npanpiloo, thiab kuv pub tej tsiaj qus rau nws tu nws. Ib tsoom tebchaws sawvdaws yuav ua num rau nws thiab nws tus tub thiab nws tus xeeb ntxwv, mus txog lub sijhawm uas nws lub tebchaws poob, mas ntau lub tebchaws thiab tej vajntxwv loj yuav muab nws ua lawv qhev. “ ‘ “Tiamsis yog haiv neeg twg lub tebchaws twg tsis ua num rau tus Nenpukhanexa no uas ua vajntxwv hauv Npanpiloo thiab tsis cug caj qwb kwv vajntxwv Npanpiloo tus quab, kuv yuav muab hniav ntaj thiab kev tshaib nqhis thiab mob kis rau txim rau haiv neeg ntawd mus txog thaum kuv siv Nenpukhanexa txhais tes muab lawv rhuav tag. Vim li no tsis txhob mloog nej cov xibhwb cev Vajtswv lus thiab nej cov uas hais pom tom hauv ntej thiab nej cov uas ua npau suav thiab nej cov saib sij saib yaig uas hais rau nej tias, Nej yuav tsis mus ua num rau Npanpiloo tus vajntxwv. Tej uas lawv cev Vajtswv lus rau nej ntawd yog lus cuav xwb, tseem ua rau nej raug coj khiav tawm hauv nej lub tebchaws mus deb deb, mas kuv yuav muab nej ntiab tawm mus thiab nej yuav puam tsuaj. Tiamsis yog haiv neeg twg cug caj qwb kwv vajntxwv Npanpiloo tus quab thiab ua num rau nws, mas kuv yuav tseg lawv nyob hauv lawv lub tebchaws cia ua liaj ua teb thiab nyob rau hauv. Yawmsaub hais li no ntag.” ’ ” Kuv hais rau Yuda tus vajntxwv Xedekhiya ib yam nkaus tias, “Cia li cug nej caj qwb kwv vajntxwv Npanpiloo tus quab thiab ua num rau nws thiab nws cov neeg, thiaj ciaj sia nyob. Ua cas koj thiab koj cov neeg yuav tuag hniav ntaj tuag tshaib thiab tuag mob kis raws li Yawmsaub tau hais txog tej tebchaws uas tsis ua num rau vajntxwv Npanpiloo? Koj tsis txhob mloog cov xibhwb cev Vajtswv lus uas hais rau koj tias, ‘Koj yuav tsis ua num rau vajntxwv Npanpiloo li,’ vim qhov uas lawv cev Vajtswv lus rau koj li no yog ua cuav xwb. Yawmsaub hais tias, ‘Kuv twb tsis tau txib lawv los lawv lam tuav kuv lub npe cev lus cuav, thiaj ua rau kuv muab koj ntiab tawm, mas koj thiab cov xibhwb cev Vajtswv lus rau koj yuav puam tsuaj tag.’ ” Thiab kuv kuj hais rau cov pov thawj thiab cov pejxeem no sawvdaws tias, “Yawmsaub hais li no tias, Tsis txhob mloog nej cov xibhwb cev Vajtswv lus tej lus uas cev lus rau nej hais tias, ‘Saib maj, tsis ntev luag yuav coj tej twj siv hauv Yawmsaub lub tuam tsev uas raug coj mus rau tim Npanpiloo lawm rov qab los.’ Qhov uas lawv cev Vajtswv lus li no rau nej yog lus cuav xwb. Tsis txhob mloog lawv li. Cia li ua num rau vajntxwv Npanpiloo thiaj ciaj sia nyob. Ua cas yuav cia lub nroog no pob tag nyob do cuas cia? Yog lawv cov ntawd yog tseem xibhwb cev Vajtswv lus thiab yog Vajtswv tej lus nyob hauv lawv tiag, kuj kom lawv taij thov Yawmsaub uas muaj hwjchim loj kawg nkaus hais tias tsis txhob kheev tej twj siv uas tseem tshuav nyob hauv Yawmsaub lub tuam tsev thiab hauv vajntxwv Yuda lub tsev thiab hauv lub nroog Yeluxalees tawm mus rau Npanpiloo. Yawmsaub uas muaj hwjchim loj kawg nkaus hais li no txog tej ncej thiab lub rhawv dej thiab tej ceg txawb thiab lwm yam twj siv uas tshuav nyob hauv lub nroog no, uas vajntxwv Nenpukhanexa hauv Npanpiloo tsis tau coj mus rau thaum nws ntes Yehauyakhi tus tub Yekhauniya uas yog Yuda tus vajntxwv thiab cov thawj hauv Yuda thiab cov hauv Yeluxalees coj tawm hauv Yeluxalees mus rau Npanpiloo. Yawmsaub tus muaj hwjchim loj kawg nkaus, uas yog Yixayee tus Vajtswv, hais txog tej twj siv uas tseem tshuav nyob hauv Yawmsaub lub tuam tsev thiab hauv vajntxwv Yuda lub tsev thiab hauv lub nroog Yeluxalees li no hais tias, ‘Tej twj siv no yuav raug muab thauj mus rau Npanpiloo mas yuav nyob qhov ntawd txog hnub uas kuv xav txog dua ces kuv li coj rov qab los thiab muab cia rau hauv lub qub chaw no.’ Yawmsaub hais li no ntag.” Tib xyoo ntawd, thaum Xedekhiya pib ua vajntxwv, yog xyoo plaub uas nws kav Yuda, mas lub tsib hlis Axu tus tub Hananiya uas ua xibhwb cev Vajtswv lus hauv lub moos Kipe‑oo tau hais rau kuv hauv Yawmsaub lub tuam tsev tab meeg cov pov thawj thiab cov pejxeem sawvdaws tias, “Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, ‘Kuv twb muab vajntxwv Npanpiloo tus quab lov lawm. Tshuav ob xyoos kuv yuav coj tej twj siv hauv Yawmsaub lub tuam tsev huvsi rov qab los rau lub chaw no, yog tej uas vajntxwv Nenpukhanexa hauv Npanpiloo txeeb hauv lub chaw no coj mus rau Npanpiloo lawm. Kuv kuj yuav coj Yehauyakhi tus tub Yekhauniya uas ua vajntxwv kav Yuda thiab cov uas raug ntes coj tawm hauv Yuda mus rau Npanpiloo lawm rov qab los huvsi, vim kuv yuav muab vajntxwv Npanpiloo tus quab lov.’ Yawmsaub hais li no ntag.” Ces Yelemi uas ua xibhwb cev Vajtswv lus txawm hais rau Hananiya tab meeg cov pov thawj thiab cov pejxeem sawvdaws uas nyob hauv Yawmsaub lub tuam tsev hnov. Yelemi uas cev Vajtswv lus hais tias, “Amee, thov Yawmsaub ua raws li ntawd tiag. Thov Yawmsaub ua kom tej lus uas koj cev ntawd muaj tseeb, thiab coj tej twj siv hauv Yawmsaub lub tuam tsev thiab cov neeg uas raug ntes coj mus tim Npanpiloo lawd sawvdaws rov qab los rau lub chaw no. Tiamsis koj cia li mloog tej lus uas kuv yuav hais rau koj thiab rau cov neeg sawvdaws tau hnov. Cov xibhwb cev Vajtswv lus uas nyob ua kuv thiab koj ntej thaum ub los lawm, twb cev Vajtswv lus txog kev ua rog thiab kev tshaib nqhis thiab mob kis uas muaj rau ntau lub tebchaws thiab tej tebchaws loj. Tiamsis tus xibhwb cev Vajtswv lus uas cev hais tias yuav muaj kev thaj yeeb, yog thaum muaj tseeb raws li tej lus uas tus cev Vajtswv lus hais ntawd tiag, thiaj paub tias Yawmsaub txib tug xibhwb cev Vajtswv lus ntawd tiag.” Mas Hananiya uas cev Vajtswv lus muab tus quab ntawm Yelemi uas cev Vajtswv lus caj qwb daws thiab muab lov pov tseg. Hananiya hais tab meeg cov pejxeem sawvdaws tias, “Yawmsaub hais li no tias, ‘Zoo ib yam li no ntag ob xyoos saum no kuv yuav muab vajntxwv Nenpukhanexa hauv Npanpiloo tus quab lov ntawm ib tsoom tebchaws sawvdaws caj qwb.’ ” Ces xibhwb Yelemi uas cev Vajtswv lus txawm tawm mus. Tsis ntev tom qab uas xibhwb Hananiya uas cev Vajtswv lus muab tus quab ntawm xibhwb Yelemi uas cev Vajtswv lus caj qwb lov lawm, Yawmsaub hais lus tuaj rau Yelemi tias, “Cia li mus hais rau Hananiya tias, ‘Yawmsaub hais li no tias, Koj muab tus quab ntoo lov lawm, tiamsis kuv yuav ua ib tug quab hlau nyob chaw. Rau qhov Yawmsaub tus uas muaj hwjchim loj kawg nkaus uas yog Yixayee tus Vajtswv hais li no tias, Kuv muab tus quab hlau tso rau saum ib tsoom tebchaws sawvdaws no caj qwb kom lawv ua vajntxwv Nenpukhanexa hauv Npanpiloo qhev, mas lawv yuav ua num rau nws, txawm yog tej tsiaj qus los kuv twb muab kiag rau nws lawm thiab.’ ” Thiab xibhwb Yelemi uas cev Vajtswv lus hais rau xibhwb Hananiya uas cev Vajtswv lus tias, “Hananiya, koj cia li mloog, Yawmsaub tsis tau txib koj, tiamsis koj tau ua rau haiv neeg no tso siab rau tej lus dag. Vim li no Yawmsaub hais tias, ‘Saib maj, kuv yuav muab koj rho tawm hauv lub ntiajteb no. Mas xyoo no ntag koj yuav tuag, vim koj hais tej lus uas fav xeeb rau Yawmsaub.’ ” Tib xyoo ntawd lub xya hli xibhwb Hananiya kuj tuag lawm. Ntawm no mus yog tej lus hauv tsab ntawv uas xibhwb Yelemi uas cev Vajtswv lus xa hauv Yeluxalees mus rau cov kev txwj laus uas poob tebchaws thiab cov pov thawj thiab cov xibhwb cev lus thiab cov pejxeem sawvdaws uas Nenpukhanexa muab kuav tawm hauv Yeluxalees mus rau hauv Npanpiloo. Tej no yog tom qab uas vajntxwv Yekhauniya thiab nws niam thiab cov nraug sam thiab Yuda thiab Yeluxalees cov thawj, thiab cov Kws txawj txhua yam thiab cov Kws tooj Kws hlau twb tawm hauv Yeluxalees lawm. Tsab ntawv no yog muab rau Elaxa uas yog Safas tus tub thiab Kemaliya uas yog Hikhiya tus tub coj mus, yog Yuda tus vajntxwv Xedekhiya txib mus rau Npanpiloo mus cuag Nenpukhanexa uas ua vajntxwv hauv Npanpiloo. Tsab ntawv no hais tias, Yawmsaub uas muaj hwjchim loj kawg nkaus, uas yog cov Yixayee tus Vajtswv hais li no rau cov uas poob tebchaws, yog cov uas kuv ntiab tawm hauv Yeluxalees mus rau Npanpiloo, hais tias, “Cia li ua vaj ua tsev thiab nyob rau hauv, cia li ua vaj cog zaub cog txiv thiab noj tej qoob loo ntawd. Cia li yuav pojniam thiab muaj tub muaj ntxhais, cia li muab nyab rau nej tej tub thiab muab nej tej ntxhais qua kom lawv thiaj muaj tub muaj ntxhais huaj vam coob rau qhov ntawd lawv thiaj tsis tsawg zuj zus. Cia li pab kom lub nroog uas kuv ntiab nej mus poob tebchaws ntawd noj qab nyob zoo, thiab thov Yawmsaub pab lub nroog ntawd rau qhov yog lub nroog ntawd noj qab nyob zoo nej kuj yuav tau kev noj qab nyob zoo thiab.” Cov Yixayee tus Vajtswv Yawmsaub uas muaj hwjchim loj kawg nkaus hais li no tias, “Tsis txhob kheev cov xibhwb cev lus lossis cov uas hais pom tom hauv ntej uas nrog nej nyob dag ntxias nej, thiab tsis txhob mloog tej uas nej kom lawv ua npau suav pom. Lawv tuav kuv lub npe cev lus dag rau nej, kuv tsis tau txib lawv.” Yawmsaub hais li no ntag. Yawmsaub hais li no tias, “Thaum puv xya caum xyoo uas teem rau Npanpiloo lawm, kuv yuav los xyuas nej, thiab ua kuv tej lus cog tseg tiav rau nej thiab coj nej rov los txog lub chaw no.” Yawmsaub hais tias, “Kuv paub tej uas kuv npaj tseg rau nej, yog tej uas yuav ua rau nej tau zoo tsis yog ua rau nej tau qhov phem, yuav pub kom nej muaj lub neej tom hauv ntej thiab muaj siab vam. Thaum ntawd nej yuav thov hu kuv thiab los taij kuv mas kuv yuav mloog nej. Nej yuav nrhiav kuv thiab ntsib kuv rau thaum nej nrhiav kuv kawg siab kawg ntsws.” Yawmsaub hais tias, “Nej yuav ntsib tau kuv thiab kuv yuav pub nej rov vam meej li qub thiab qaws nej tawm hauv txhua lub tebchaws thiab txhua qhov uas kuv ntiab nej mus nyob ntawd rov los. Thiab kuv yuav coj nej rov los rau hauv tej chaw uas kuv ntiab nej tawm mus poob tebchaws.” Yawmsaub hais li no ntag. Vim nej tau hais tias, “Yawmsaub tsa xibhwb cev lus hauv Npanpiloo rau peb,” mas Yawmsaub hais li no txog tus vajntxwv uas nyob saum Davi lub zwm txwv thiab hais txog cov neeg sawvdaws uas nyob hauv lub nroog no, yog nej cov kwvtij uas tsis nrog nej tawm mus poob tebchaws. Yawmsaub uas muaj hwjchim loj kawg nkaus hais li no tias, “Saib nawj, kuv yuav tso hniav ntaj hniav riam thiab kev tshaib nqhis thiab mob kis mus raug lawv, thiab kuv yuav ua rau lawv zoo yam nkaus li cov txiv cev tsis zoo uas lwj tag noj tsis tau. Kuv yuav xuas ntaj thiab kev tshaib nqhis thiab mob kis raws caum lawv, thiab kuv yuav muab lawv ua lub chaw uas txhua lub tebchaws hauv qab ntuj ceeb thiab ntshai, thiab ua lo lus tsawm foom thiab ua lub chaw txhawj chaw ntshai, ua yam uas luag thuam, thiab tiag luag ncauj luag lo rau hauv txhua lub tebchaws uas kuv ntiab lawv mus ntawd.” Yawmsaub hais tias, “Lawv tsis mloog kuv tej lus uas kuv txib kuv cov tub qhe uas cev kuv lus tuaj hais rau nej tsis tu ncua, thiab nej kuj tsis yeem mloog.” Yawmsaub hais li no ntag. Nej cov uas poob tebchaws sawvdaws uas kuv ntiab tawm hauv Yeluxalees mus rau Npanpiloo, cia li mloog Yawmsaub tej lus. Cov Yixayee tus Vajtswv Yawmsaub uas muaj hwjchim loj kawg nkaus hais li no txog Ahaj uas yog Khaulaya tus tub thiab hais txog Xedekhiya uas yog Ma‑axeya tus tub uas tabtom tuav kuv lub npe cev lus dag rau nej. “Saib nawj, kuv yuav muab ob tug ntawd cob rau hauv vajntxwv Nenpukhanexa hauv Npanpiloo txhais tes, mas nws yuav muab ob tug tua pov tseg tab meeg nej. Vim yog tim ob tug mas cov Yuda sawvdaws uas poob tebchaws mus nyob hauv Npanpiloo sawvdaws yuav siv lo lus tsawm foom li no hais tias, ‘Thov Yawmsaub ua rau koj ib yam li ua rau Xedekhiya thiab Ahaj uas tus vajntxwv hauv Npanpiloo muab hluavtaws hlawv tuag tag lawd.’ Rau qhov ob tug ua tej uas ruam kawg li rau hauv cov Yixayee. Ob tug tau deev kwvtij zej zog tej pojniam thiab tau tuav kuv lub npe hais tej lus dag uas tsis yog kuv kom ob tug hais. Kuv yog tus paub thiab kuv ua timkhawv.” Yawmsaub hais li no ntag. Koj cia li hais rau Semaya uas yog neeg hauv lub moos Nehelas tias, “Cov Yixayee tus Vajtswv Yawmsaub uas muaj hwjchim loj kawg nkaus hais li no tias, Koj tau xa tsab ntawv ua koj lub npe mus rau cov neeg sawvdaws uas nyob hauv Yeluxalees thiab rau Xefaniya uas yog pov thawj Ma‑axeya tus tub, thiab rau cov pov thawj sawvdaws tias, ‘Yawmsaub tau tsa koj ua pov thawj nyob tug pov thawj Yehauyada chaw saib xyuas Yawmsaub lub tuam tsev thiab muaj hwjchim muab txhua tus neeg vwm uas cev Vajtswv lus ntxig rau hauv rab cuab thiab muab saw hlau khi caj dab. Nimno ua cas koj tsis txwv Yelemi uas yog neeg Anathau uas cev Vajtswv lus rau nej? Rau qhov nws tau xa ntawv tuaj rau peb uas nyob hauv Npanpiloo tias, Nej yuav poob tebchaws ntev. Cia li ua vaj ua tsev thiab nyob rau hauv, cia li ua vaj cog zaub cog txiv thiab noj tej qoob loo ntawd.’ ” Pov thawj Xefaniya nyeem tsab ntawv no rau Yelemi uas yog xibhwb cev Vajtswv lus mloog. Mas Yawmsaub hais lus tuaj rau Yelemi tias, “Cia li sau ntawv mus rau cov uas poob tebchaws sawvdaws tias, ‘Yawmsaub hais li no txog Semaya uas yog neeg Nehelas tias, Vim yog Semaya tau cev lus rau nej rau thaum kuv tsis tau txib nws, thiab ua rau nej tso siab rau tej lus dag, vim li no Yawmsaub thiaj hais li no tias, Saib nawj, kuv yuav txiav txim rau Semaya uas yog neeg Nehelas thiab nws caj ces. Nws yuav tsis tshuav ib tug ciaj sia nyob hauv cov neeg no uas yuav pom tej kev zoo uas kuv yuav ua rau kuv haiv neeg, vim yog nws hais lus fav xeeb rau Yawmsaub. Yawmsaub hais li no ntag.’ ” Yawmsaub hais lus tuaj rau Yelemi tias, “Yawmsaub uas yog cov Yixayee tus Vajtswv hais li no tias, ‘Cia li sau tej lus uas kuv tau hais rau koj lawd huvsi rau hauv ib phau ntawv.’ Yawmsaub hais tias, ‘Saib nawj, lub caij lub nyoog tabtom los yuav txog mas kuv yuav pub kuv haiv neeg Yuda thiab Yixayee rov vam meej li qub, thiab kuv yuav coj lawv rov los rau lub tebchaws uas kuv muab rau lawv tej poj koob yawm txwv, mas lawv yuav tau lub tebchaws ntawd ua lawv teej lawv tug.’ Yawmsaub hais li no ntag.” Ntawm no mus yog tej lus uas Yawmsaub hais txog cov Yixayee thiab cov Yuda. Yawmsaub hais li no tias, “Peb tau hnov lub suab quaj ras zom zaws yog lub suab ntshai kawg, tsis tau nyob tiaj tus. Cia li nug thiab tshuaj saib, tus txivneej yuav yug tau menyuam lov? Ua cas kuv pom txhua tus txivneej muab tes npuab ntawm duav yam li cov pojniam uas mob plab yuav yug menyuam? Ua cas txhua tus lub ntsej muag thim xem tag? Hnub ntawd yuav txaus ntshai kawg li lauj! Tsis muaj ib hnub twg yuav thooj li hnub ntawd, yog hnub uas Yakhauj txom nyem lwj siab kawg, tiamsis nws yuav dim tau hnub ntawd.” Yawmsaub uas muaj hwjchim loj kawg nkaus hais tias, “Txog hnub ntawd kuv yuav lov tus quab ntawm lawv caj qwb, thiab kuv yuav muab tej saw hlau uas khi lawv tu pov tseg, thiab lwm haiv neeg yuav tsis muab lawv ua qhev dua li lawm. Mas lawv yuav ua koom tu Yawmsaub uas yog lawv tus Vajtswv thiab tu lawv tus vajntxwv Davi tus uas kuv yuav tsa sawv los ua vajntxwv kav lawv.” Yawmsaub hais tias, “Kuv tus qhev Yakhauj 'e, tsis txhob ntshai, Yixayee 'e, tsis txhob poob siab, rau qhov kuv yuav cawm nej dim deb deb li los, thiab cawm nej tej tub ki hauv lub tebchaws uas lawv raug ntes coj mus nyob. Yakhauj yuav rov los thiab nyob siab tus yees noj qab nyob zoo, thiab yuav tsis muaj leejtwg ua rau nws ntshai.” Yawmsaub hais tias, “Kuv nrog nraim koj thiab yuav cawm koj dim. Kuv yuav ua rau txhua lub tebchaws uas kuv ntiab nej ri sua mus nyob ntawd puam tsuaj tag nrho huvsi, tiamsis kuv yuav tsis ua rau koj puam tsuaj tag. Kuv yuav nplawm koj npaum li uas tsim nyog xwb, thiab kuv yuav tsis tso qhov uas rau txim rau koj tseg.” Yawmsaub hais li no tias, “Qhov uas koj mob kho tsis tau li, koj lub kiav txhab sab sab li. Tsis muaj leejtwg yuav pab hais koj tshaj plaub, tsis muaj tshuaj kho koj lub kiav txhab, tsis muaj ncauj kev kho tau koj zoo li. Cov uas koj nyiam sawvdaws tsis nco qab koj lawm, lawv tsis mob siab koj kiag li. Kuv tau nplawm koj ib yam li yeeb ncuab nplawm, thiab rau txim rau koj ib yam li neeg limhiam ntais ntuj rau, rau qhov koj ua txhaum ntau kawg, koj muaj txim loj. Ua cas koj yuav quaj qhov uas mob? Qhov uas koj mob kho tsis tau li. Vim koj ua txhaum ntau kawg thiab koj muaj txim loj, kuv thiaj ua tej no rau koj. Vim li no txhua tus uas noj koj nws yuav raug luag noj, txhua tus uas ua tshawj chim rau koj yuav raug muab ntes coj mus. Cov uas lws koj lawv yuav raug luag lws, thiab txhua tus uas quab yuam koj yuav raug luag quab yuam. Kuv yuav kho kom koj cev nqaij rov zoo li qub thiab kuv yuav kho koj tej qhov txhab kom zoo, vim lawv hu koj tias yog tus uas tsis muaj tswv, yog Xi‑oo uas tsis muaj leejtwg mob siab.” Yawmsaub hais li no ntag. Yawmsaub hais li no tias, “Kuv yuav pub Yakhauj tej tsev ntaub rov vam meej li qub, thiab khuvleej nws tej chaw nyob. Lub nroog yuav raug muab tsim dua tshiab rau saum nws lub roob, thiab vajntxwv lub tsev yuav nyob lub qub chaw. Yuav muaj suab hu nkauj ua tsaug thiab suab xyiv fab tawm qhov chaw ntawd tuaj. Kuv yuav ua rau lawv huaj vam coob tuaj, lawv yuav tsis tsawg. Kuv yuav ua kom lawv muaj koob meej, lawv yuav tsis raug luag saib tsis taus. Lawv tej tub ki yuav zoo ib yam li thaum ub, thiab lawv haiv neeg yuav raug muab tsa nyob ruaj rau ntawm kuv xubntiag. Kuv yuav rau txim rau txhua tus uas quab yuam lawv. Lawv tus thawj yeej yuav yog ib tug hauv lawv cov neeg, tus uas kav lawv yuav tawm hauv lawv nruab nrab los ntag. Kuv yuav coj tus ntawd txav los ze thiab nws yuav tuaj cuag kuv. Leejtwg yuav muaj cuabkav tuaj cuag kuv?” Yawmsaub hais li no. “Nej yuav ua kuv haiv neeg, thiab kuv yuav ua nej tus Vajtswv.” Cia li saib Yawmsaub tej cua daj cua dub. Txojkev npau taws tawm mus lawm, yog cua daj cua dub ntsawj hlob kawg, yuav tshwm plaws ntsawj raug cov neeg limhiam lub taubhau. Yawmsaub txojkev chim heev yuav tsis thim rov qab mus txog thaum nws ua tej uas nws xav hauv lub siab tiav. Nej yuav nkag siab tej no rau yav tom hauv ntej. Yawmsaub hais tias, “Lub sijhawm ntawd kuv yuav ua txhua xeem Yixayee tus Vajtswv, thiab lawv yuav ua kuv haiv neeg.” Yawmsaub hais li no tias, “Cov neeg uas dim hniav ntaj tau txais txojkev hlub hauv tebchaws moj sab qhua. Thaum cov Yixayee nrhiav chaw so, Yawmsaub los tshwm rau lawv pom deb deb. Kuv hlub nej hauv txojkev hlub uas muaj mus ib txhis, vim li no kuv hlub nej ruaj khov mus li. Yixayee uas yog tus nkauj dawb huv 'e, kuv yuav muab koj tsim dua, koj yuav raug muab tsim dua tshiab. Koj yuav coj nruas npuaj ua zam dua thiab tawm mus seev cev nrog cov uas ua lomzem ua ke. Koj yuav rov cog vaj txiv hmab rau saum Xamali tej roob, cov uas cog kuj yuav cog thiab tau tej txiv ntawd noj. Tseem yuav muaj ib hnub uas tus faj xwm yuav qw pem toj siab Efa‑i tebchaws tias, ‘Cia li sawv tsees, cia peb mus rau hauv Xi‑oo lauj, mus cuag Yawmsaub uas yog peb tus Vajtswv.’ ” Yawmsaub hais li no tias, “Cia li hu nkauj zoo siab xyiv fab vim yog Yakhauj, thiab tsa suab qw vim yog ib tsoom tebchaws tus thawj. Cia li qhuas tshaj tawm hais tias, ‘Yawmsaub cawm nws haiv neeg dim, yog cov Yixayee uas tseem tshuav nyob.’ Saib maj, kuv yuav coj lawv tawm tebchaws sab ped los, thiab qaws lawv hauv qhov uas deb kawg hauv qab ntuj. Muaj cov neeg dig muag ceg tawv, thiab cov pojniam uas suab menyuam thiab cov uas mob plab nrog lawv los ua ke, lawv yuav los ua ib pab coob coob rau ntawm no. Lawv yuav quaj laws los, thiab kuv yuav nplij lawv lub siab coj lawv rov los, kuv yuav coj lawv taug hav dej, yog txojkev tiaj uas lawv yuav tsis dawm, vim kuv ua Yixayee txiv thiab Efa‑i yog kuv tus tub hlob. “Ib tsoom tebchaws 'e, cia li mloog Yawmsaub tej lus, thiab tshaj tawm rau hauv tej tebchaws ntawm ntug hiavtxwv uas deb deb hais tias, ‘Tus uas ntiab cov Yixayee khiav ri sua yuav qaws lawv rov los, thiab yuav tsom kwm lawv yam li tus yug yaj tsom kwm nws pab yaj.’ Rau qhov Yawmsaub twb txhiv Yakhauj cia lawm, thiab tso nws dim hauv tus uas muaj zog dua nws txhais tes. Lawv yuav los qw zoo siab rau saum lub roob Xi‑oo, thiab lawv yuav zoo siab xyiv fab vim Yawmsaub tej hmoov zoo, yog tej qoob loo, tej cawv txiv hmab, tej roj, thiab tej yaj tej tshis tej nyuj cov menyuam. Lawv lub neej yuav zoo li lub vaj uas muaj dej ywg, lawv yuav tsis tsaug leeg dua li lawm. Cov ntxhais hluas yuav zoo siab thiab yuav seev cev, cov tub hluas thiab cov laus yuav xyiv fab. Kuv yuav muab lawv txojkev quaj ntsuag ntxeev ua kev xyiv fab, kuv yuav nplij lawv thiab muab txojkev zoo siab hloov txojkev nyuaj siab chaw. Kuv yuav muab tej qoob loo ntau nplua mias yug cov pov thawj tsau npo, kuv haiv neeg yuav txaus siab rau kuv tej qhov txhia chaw zoo.” Yawmsaub hais li no ntag. Yawmsaub hais li no tias, “Tau hnov suab nrov hauv Lama, yog suab quaj ntsuag suab quaj lwj siab. Lachee quaj nws tej menyuam, nws tsis yuav tej lus nplij siab rau qhov nws tej menyuam tsis nyob lawm.” Yawmsaub hais li no tias, “Cia li tswj lub suab quaj tseg los maj, thiab tauv lub kua muag ntawm koj qhov muag, rau qhov koj tes haujlwm yuav tau nqe zog, thiab lawv yuav rov hauv yeeb ncuab lub tebchaws los.” Yawmsaub hais li no ntag. “Koj lub neej tom hauv ntej tseem muaj vam, thiab koj tej menyuam yuav rov los rau hauv lawv lub tebchaws.” Yawmsaub hais li no ntag. “Kuv tau hnov Efa‑i quaj hais tias, ‘Koj nplawm qhuab qhia kuv thiab kuv raug nplawm yam li tus menyuam nyuj uas tsis tau seej. Thov koj coj kuv rov qab mas kuv yuav tig rov los cuag koj, rau qhov koj yog kuv tus Vajtswv Yawmsaub. Thaum kuv tig xubntiag mus lawd, kuv ntxeev dua siab. Thaum kuv raug qhuab qhia lawd, kuv ntaus kuv hauv siab. Kuv raug txaj muag thiab poob ntsej muag, rau qhov kuv ris txojkev txaj muag uas kuv ua thaum kuv tseem hluas.’ Efa‑i tsis yog tus tub uas kuv hlub lov? Nws tsis yog tus menyuam uas kuv nyiam lov? Kuv yws nws thaum twg, kuv kuj nco txog nws thaum ntawd. Vim li no kuv lub siab tseem nco txog nws, kuv yeej yuav khuvleej nws.” Yawmsaub hais li no ntag. “Koj cia li rhais phua qhia kev rau koj, cia li ua daim phiaj qhia kev rau koj, cia li ua tib zoo saib txoj niag kev yog txoj kev uas nej tawm mus ntawd. Yixayee uas yog tus nkauj dawb huv 'e, cia li rov qab los, cia li rov qab los rau hauv koj tej moos no. Tus ntxhais uas tso kuv tseg 'e, koj yuav ywj fab ywj fwj ntev li cas? Yawmsaub tsim ib yam tshiab rau hauv lub ntiajteb, yog ib tug pojniam yuav tsom kwm tus txiv.” Cov Yixayee tus Vajtswv Yawmsaub uas muaj hwjchim loj kawg nkaus hais li no tias, “Thaum kuv pub lawv rov vam meej li qub, lawv yuav siv tej lus no hauv Yuda tebchaws thiab hauv lawv tej moos dua ib zaug, yog hais tias, “ ‘Lub chaw uas txojkev ncaj ncees nyob 'e, lub roob dawb huv 'e, thov Yawmsaub foom koob hmoov rau koj.’ “Yuda thiab Yuda tej moos huvsi thiab cov uas ua liaj ua teb thiab cov uas yug yaj uas mus mus los los yuav nyob ua ke qhov ntawd. “Kuv yuav ua kom lub siab uas qaug zog tsau npo, thiab txhua lub siab uas tsaug leeg kuv yuav pub kom muaj zog puv npo tuaj.” Tamsim ntawd kuv tsim dheev los thiab tsa muag ntsia, mas qhov uas kuv pw tsaug zog ntawd kuj ua rau kuv zoo siab. Yawmsaub hais tias, “Saib nawj, lub caij lub nyoog tabtom los yuav txog mas kuv yuav tseb noob neeg thiab noob tsiaj txhu rau hauv cov Yixayee thiab cov Yuda. Kuv ntsia ntsoov lawv thiab muab lawv dob thiab muab ua pob tag thiab ua kom puam tsuaj thiab coj xwm txheej phem los raug lawv li cas, kuv yuav ntsia ntsoov lawv thiab muab lawv tsim dua tshiab thiab muab cog dua ib yam li ntawd.” Yawmsaub hais li no ntag. “Thaum ntawd lawv yuav tsis hais dua tias, ‘Leejtxiv noj txiv hmab qaub, tus menyuam rhiab hniav.’ Tiamsis txhua tus yuav tuag rau nws lub txim. Txhua tus uas noj txiv hmab qaub kuj yuav rhiab hniav.” Yawmsaub hais tias, “Saib nawj, lub caij lub nyoog tabtom los yuav txog mas kuv yuav cog dua lus tshiab rau cov Yixayee thiab cov Yuda, tsis thooj li uas kuv cog rau lawv tej poj koob yawm txwv rau thaum kuv cab lawv tes coj lawv tawm hauv Iyi tebchaws los. Kuv twb yog lawv tus txiv los lawv muab kuv tej lus cog tseg rhuav lawm.” Yawmsaub hais li no ntag. “No yog tej lus cog tseg uas kuv yuav cog rau cov Yixayee ua qab ncua sijhawm ntawd.” Yawmsaub hais li no ntag. “Kuv yuav muab kuv txoj kevcai tso rau hauv lawv, thiab sau cia rau hauv lawv lub siab. Kuv yuav ua lawv tus Vajtswv thiab lawv yuav ua kuv haiv neeg. Txhua tus yuav tsis qhia nws kwvtij zej zog thiab nws tej kwvtij txheeb kom paub Yawmsaub dua li lawm, rau qhov lawv txhua tus yeej yuav paub kuv txij tus yau kawg mus txog tus loj kawg. Kuv yuav zam lawv tej kev txhaum thiab tsis cim ntsoov lawv lub txim dua li lawm.” Yawmsaub hais li no ntag. Yawmsaub uas ua lub hnub ci pom kev nruab hnub, thiab teem caij nyoog rau lub hli thiab tej hnub qub ci rau hmo ntuj, thiab yog tus uas do hiavtxwv ntas tej niag nthwv nrov vig voog, nws lub npe yog Yawmsaub uas muaj hwjchim loj kawg nkaus, nws hais li no tias, “Yog tej kevcai ruaj khov no ploj ntawm kuv xubntiag lawm, mas Yixayee caj ces yuav ploj ntais tsis ua ib haiv neeg rau ntawm kuv xubntiag mus ib txhis.” Yawmsaub hais li no ntag. Yawmsaub hais li no tias, “Yog ntsuas tau saum nruab ntug, thiab tshuaj tau tej taw uas tiag hauv lub qab ntiajteb, ces kuv li muab Yixayee caj ces laim pov tseg vim txhua yam uas lawv tau ua ntawd.” Yawmsaub hais li no ntag. Yawmsaub hais tias, “Lub caij lub nyoog tabtom los yuav txog mas yuav muab lub nroog no tsim dua tshiab rau Yawmsaub, txij ntua ntawm lub chaw tsom faj Hananee mus txog lub rooj loog ntawm lub kaum loog. Thiab txoj hlua ntsuas yuav dhau plaws ncaj nraim mus txog lub pov roob Kale li tig mus txog Kau‑a. Tag nrho lub hav uas pov neeg tuag thiab tej tshauv, thiab tej teb tag nrho mus txog ntua lub hav Khiloo, mus txog lub Rooj Loog Nees ntawm kaum loog mus rau sab hnub tuaj, mas puavleej yog tej chaw uas dawb huv rau Yawmsaub. Lub nroog yuav tsis raug muab dob kiag cag lossis muab laim pov tseg dua mus ib txhis li.” No yog tej lus uas Yawmsaub hais tuaj rau Yelemi rau xyoo kaum uas Xedekhiya ua vajntxwv kav Yuda, thiab yog xyoo kaum yim uas Nenpukhanexa ua vajntxwv. Thaum ntawd vajntxwv Npanpiloo cov tub rog tabtom vij lub nroog Yeluxalees thiab Yelemi uas ua xibhwb cev Vajtswv lus kuj raug muab kaw rau hauv cov tub rog uas zov vajntxwv lub loog uas nyob hauv Yuda tus vajntxwv lub vaj. Yuda tus vajntxwv Xedekhiya tau muab Yelemi kaw thiab hais tias, “Ua cas koj cev Vajtswv lus hais tias, ‘Yawmsaub hais li no tias, Saib maj, kuv yuav muab lub nroog no rau hauv vajntxwv Npanpiloo txhais tes, thiab nws yuav txeeb tau lub nroog no. Yuda tus vajntxwv Xedekhiya yuav khiav tsis dim cov Kheedia txhais tes, ces nws yuav raug muab cob rau hauv vajntxwv Npanpiloo txhais tes tiag tiag li, thiab yuav tau nrog vajntxwv Npanpiloo sib txuas lus ntawm ncauj thiab pom nws tim ntsej tim muag. Vajntxwv Npanpiloo yuav coj Xedekhiya mus rau Npanpiloo, mas Xedekhiya yuav nyob qhov ntawd mus txog thaum kuv rau txim rau nws. Txawm yog koj ua rog rau cov Kheedia los koj yuav kov tsis yeej. Yawmsaub hais li no ntag.’ ” Yelemi hais tias, “Yawmsaub hais tej lus tuaj rau kuv tias, Saib maj, koj txiv ntxawm Salu tus tub Hanamee yuav tuaj cuag koj thiab hais tias, ‘Cia li yuav kuv daim teb ntawm Anathau, rau qhov koj muaj feem txhiv yuav ua koj tug.’ Mas kuv tus kwvtij Hanamee tuaj cuag kuv ntawm cov tub rog uas zov vajntxwv lub loog raws li tej lus uas Yawmsaub tau hais rau kuv lawm, mas Hanamee hais tias, ‘Cia li yuav kuv daim teb ntawm Anathau uas nyob hauv Npeeyamee tebchaws, rau qhov koj muaj feem tuav ua koj tug thiab txhiv rau koj. Cia li yuav maj.’ Mas kuv thiaj paub tias no yog Yawmsaub li lus tiag. “Mas kuv thiaj yuav daim teb hauv Anathau ntawm kuv tus kwvtij Hanamee, thiab kuv luj kaum xya sekee nyiaj rau nws. Kuv thiaj sau npe rau hauv daim ntawv teb thiab ntaus cim nias rau, muaj timkhawv thiab muab teev luj nyiaj rau. Kuv thiaj txais daim ntawv yuav teb uas ntaus cim rau lawm uas muaj ntsiab los muag thiab yuav, thiab daim ntawv uas tsis tau ntaus cim. Mas kuv muab daim ntawv yuav teb rau Npalu uas yog Neliya tus tub, tab meeg kuv tus kwvtij Hanamee thiab cov timkhawv uas teev npe rau daim ntawv yuav teb thiab tab meeg cov Yudai sawvdaws uas zaum hauv cov tub rog uas zov vajntxwv lub loog. Npalu yawg yog Maxeya. Kuv thiaj hais rau Npalu tab meeg lawv tias, ‘Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, Cia li coj daim ntawv teb no mus, yog daim uas ntaus cim rau thiab daim uas tsis ntaus, mas muab ntim rau hauv ib lub hub av thiaj nyob tau ntev, rau qhov Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, Tej vaj tse tej teb thiab tej vaj txiv hmab hauv lub tebchaws no yuav raug muab muag thiab yuav dua ib zaug thiab.’ “Thaum kuv muab daim ntawv yuav teb rau Neliya tus tub Npalu lawm, kuv thov Yawmsaub hais tias, Au Vajtswv Yawmsaub, koj yog tus uas siv koj lub hwjchim loj kawg thiab koj tsa hlo koj txhais npab tsim ntuj tsim ntiajteb. Tsis muaj ib yam dabtsi uas koj ua tsis tau. Koj yog tus uas ua txojkev hlub ruaj khov tshwm rau ntau txhiab leej, thiab rau txim rau tus neeg uas ua txhaum tej menyuam uas tshwm los tom qab. Au Vajtswv uas loj kawg thiab muaj hwjchim loj, koj lub npe yog Yawmsaub uas muaj hwjchim loj kawg nkaus. Koj yog lub chaw sablaj ntxig nug zoo heev thiab koj tej haujlwm muaj hwjchim loj kawg. Koj lub qhov muag pom ntsoov txhua yam uas neeg ua, thiab pub nqe zog rau txhua tus raws li uas lawv xyaum ua lawv lub neej thiab pub raws li tej uas lawv ua. Koj yog tus uas ua txujci tseem ceeb thiab txujci phimhwj tshwm rau hauv Iyi tebchaws, thiab los txog niaj hnub nimno kuj ua tshwm rau hauv Yixayee tebchaws thiab hauv nruab nrab ib tsoom neeg, thiab ua koj lub npe nto moo lug yam li niaj hnub nimno. Koj ua txujci tseem ceeb thiab txujci phimhwj coj koj haiv neeg Yixayee tawm hauv Iyi tebchaws los, koj siv koj txhais tes uas muaj hwjchim thiab tsa hlo koj txhais npab thiab ua kom muaj kev txhawj kev ntshai kawg li. Koj muab lub tebchaws no rau lawv, yog lub tebchaws uas koj tau cog lus tseg rau lawv tej poj koob yawm txwv tias yuav pub rau lawv, yog lub tebchaws uas muaj kua mis thiab zib ntab ntws nto. Lawv tau txeem los thiab tuav tau lub tebchaws no ua lawv tug. Tiamsis lawv tsis mloog koj lus thiab tsis ua raws li koj txoj kevcai thiab tsis ua ib yam dabtsi raws li koj hais kom lawv ua kiag li. Vim li no koj thiaj tso tej xwm txheej phem no huvsi los raug lawv. “ ‘Saib maj, twb tib tej chaw siab vij yuav txeeb lub nroog lawm. Vim tej hniav ntaj thiab kev tshaib nqhis thiab mob kis lub nroog twb raug muab rau hauv cov Kheedia uas tabtom ua rog ntawd txhais tes lawm. Tej lus uas koj hais twb muaj raws li ntawd lawm, koj yeej pom ntsoov. Au Vajtswv Yawmsaub, txawm yog lub nroog no raug muab rau hauv cov Kheedia txhais tes lawm, los koj tseem hais rau kuv tias, Rho nyiaj yuav daim teb thiab nrhiav timkhawv.’ ” Yawmsaub hais lus tuaj rau Yelemi tias, “Saib maj, kuv yog Yawmsaub, yog ib tsoom neeg tus Vajtswv, muaj ib yam dabtsi twg uas kuv ua tsis tau lov? Vim li no Yawmsaub hais li no tias, Saib maj, kuv tabtom muab lub nroog no cob rau hauv cov Kheedia txhais tes thiab muab cob rau vajntxwv Nenpukhanexa hauv Npanpiloo txhais tes mas nws yuav txeeb tau. Cov Kheedia uas ua rog ntaus lub nroog no yuav tuaj muab lub nroog no hlawv kub hnyiab tag, thiab yuav kub tej tsev uas lawv hlawv xyab xyeem rau dab Npa‑as thiab hliv cawv txiv hmab xyeem rau luag tej dab saum lawv txheej tsev las tshav, zes kom kuv chim. Yixayee caj ces thiab Yuda caj ces tsis tau ua ib yam dabtsi zoo tsuas yog ua kev phem rau kuv pom txij thaum yau los li xwb. Yixayee caj ces tsis tau ib yam dabtsi li, lawv txhais tes tsuas yog ua tej haujlwm uas zes kom kuv chim. Yawmsaub hais li no ntag. Lub nroog no tau zes kom kuv chim thiab npau taws txij hnub uas rhawv los txog niaj hnub nimno. Vim li no kuv yuav muab rhuav tshem ntawm kuv lub qhov muag mus, vim yog Yixayee caj ces thiab Yuda caj ces tej kev phem txhua yam uas zes ua rau kuv chim, twb yog lawv tej vajntxwv thiab lawv cov thawj coj thiab lawv cov pov thawj thiab lawv cov xibhwb cev lus thiab cov Yuda thiab cov uas nyob hauv Yeluxalees sawvdaws ua ntag. Lawv tau tig nrob qaum rau kuv, tsis yog tig ntsej muag rau kuv. Txawm yog kuv twb qhia lawv tsis tu ncua, los lawv tsis mloog tsis txais yuav tej lus qhuab qhia. Lawv muab tej uas qias vuab tsuab txawb rau hauv lub tuam tsev uas hu raws li kuv lub npe thiaj puas tsuas lub tuam tsev. Lawv ua lub chaw siab teev dab Npa‑as rau hauv lub hav Npeehinoo lawv thiaj muab lawv tej tub tej ntxhais txi rau dab Maulej, yog yam uas kuv tsis tau kom lawv ua, thiab kuv tsis tau xav rau hauv kuv lub siab tias lawv yuav ua tej uas qias vuab tsuab li no ua rau Yuda txhaum muaj txim. “Vim li no Yawmsaub uas yog Yixayee tus Vajtswv thiaj hais txog lub nroog no uas nej hais tias, ‘Lub nroog no twb raug muab cob rau hauv vajntxwv Npanpiloo txhais tes lawm, yog raug hniav ntaj hniav riam thiab kev tshaib nqhis thiab mob kis.’ Saib maj, kuv yuav sau lawv hauv txhua lub tebchaws uas kuv npau taws vog thiab chim heev es muab lawv ntiab mus nyob lawm rov los. Kuv yuav coj lawv rov los rau lub chaw no, thiab kuv yuav pub lawv nyob tso siab plhuav. Lawv yuav ua kuv haiv neeg, thiab kuv yuav ua lawv tus Vajtswv. Kuv yuav ua kom lawv ua ib lub siab thiab taug ib txojkev, kom lawv thiaj li hwm thiab paub ntshai kuv mus ib txhis, thiaj li zoo rau lawv thiab zoo rau lawv tej tub ki tom qab. Kuv yuav cog lus tseg rau lawv mus ib txhis tias kuv yuav tsis tseg qhov uas ua zoo rau lawv, kuv yuav muab lub siab uas hwm thiab paub ntshai kuv rau hauv lawv kom lawv thiaj tsis tso kuv tseg. Kuv yuav zoo siab qhov uas ua zoo rau lawv, thiab kuv ruaj siab yuav muab lawv cog cia rau hauv lub tebchaws no kawg kuv lub siab lub ntsws. “Yawmsaub hais li no tias, Kuv twb tso xwm txheej phem loj los raug cov neeg no li cas lawm, kuv yuav coj tej kev zoo raws li kuv cog lus tseg lawm huvsi los rau lawv thiab. Lawv yuav muag thiab yuav tej teb hauv lub tebchaws no uas nej hais tias, ‘Nyob do cuas tsis muaj neeg thiab tsiaj txhu nyob li, lub tebchaws raug muab rau hauv cov Kheedia txhais tes lawm.’ Yuav rho nyiaj yuav tej teb, thiab tej ntawv teb yuav sau npe thiab ntaus cim thiab muaj timkhawv, tsis hais hauv Npeeyamee tebchaws thiab ib ncig Yeluxalees thiab hauv Yuda tej moos thiab tej moos pem toj siab thiab tej moos ntawm tej pov roob Sefela, thiab tej moos hauv Neke, rau qhov kuv yuav pub lawv rov qab vam meej li qub. Yawmsaub hais li no ntag.” Yawmsaub hais lus zaum ob tuaj rau Yelemi yog thaum uas Yelemi tseem raug kaw rau hauv cov tub rog uas zov vajntxwv lub loog, hais tias. “Yawmsaub uas tsim ntiajteb, Yawmsaub uas rhawv lub ntiajteb kom nyob ruaj, nws npe yog Yawmsaub ntag, nws hais li no tias, ‘Cia li thov kuv, mas kuv yuav teb koj thiab yuav qhia tej yam loj uas zais cia lawm rau koj, yog tej uas koj tsis tau paub dua li.’ Rau qhov Yawmsaub uas yog Yixayee tus Vajtswv tau hais li no txog tej tsev hauv lub nroog no thiab Yuda tej vajntxwv tej tsev uas nej muab rhuav tag thiaj ua tau lub chaw tiv thaiv tej chaw siab uas tib vij lub nroog thiab tiv thaiv hniav ntaj. ‘Cov Kheedia yuav tuaj ua rog thiab ua rau tej vaj tse ntawd puv nkaus neeg tuag, yog cov uas kuv chim thiab npau taws es muab tua, rau qhov kuv twb fee plhu ntawm lub nroog no vim yog txhua yam limhiam uas lawv ua. Saib maj, kuv yuav ua rau lub nroog no noj qab nyob zoo thiab kho kom zoo, thiab kuv yuav kho kom lawv zoo thiab kuv yuav ua kev vam meej nplua mias thiab kev nyob tso siab plhuav tshwm los rau lawv. Kuv yuav pub kom Yuda thiab Yixayee rov vam meej li qub, thiab muab lawv tsim dua tshiab yam nkaus li yav thaum ub. Kuv yuav muab lawv lub txim uas ua txhaum rau kuv ntxuav huvsi mus, thiab kuv yuav zam lawv lub txim uas lawv ua txhaum thiab fav xeeb rau kuv. Thiab lub nroog no lub koob meej yuav ua rau kuv zoo siab xyiv fab thiab ua rau luag qhuas kuv thiab tau ntsej muag tab meeg ib tsoom tebchaws sawvdaws hauv ntiajteb uas tau hnov txog tej kev zoo huvsi uas kuv tau ua rau lawv lawm. Lawv yuav ntshai tshee hnyo vim yog tej kev zoo thiab tej kev vam meej huvsi uas kuv pub rau lub nroog no.’ “Yawmsaub hais li no tias, ‘Hauv lub chaw uas nej hais tias “Liamsim tag tsis muaj neeg thiab tsiaj txhu nyob li,” thiab hauv Yuda tej moos thiab hauv Yeluxalees tej kev uas nyob do cuas tsis muaj neeg lossis tsiaj txhu lawm, qhov chaw ntawd yuav rov hnov lub suab luag thiab lub suab zoo siab, thiab hnov nraug vauv nkauj nyab lub suab, thiab hnov tej suab nkauj uas thaum lawv coj qhov txhia chaw tuaj xyeem ua tsaug rau hauv Yawmsaub lub tuam tsev lawv hu hais tias, “ ‘Cia li ua tsaug Yawmsaub uas muaj hwjchim loj kawg nkaus, rau qhov Yawmsaub zoo kawg nkaus, nws txojkev hlub ruaj khov nyob mus ib txhis. Kuv yuav pub kom lub tebchaws rov vam meej li qub.’ Yawmsaub hais li no ntag. “Yawmsaub uas muaj hwjchim loj kawg nkaus hais li no tias, ‘Hauv lub chaw no uas liamsim tag tsis muaj neeg lossis tsiaj txhu nyob thiab hauv txhua lub moos yuav rov qab muaj lub chaw rau cov yug yaj coj lawv pab yaj mus so. Hauv tej moos pem toj siab thiab hauv tej moos ntawm tej pov roob Sefela, thiab tej moos hauv Neke, thiab hauv Npeeyamee tebchaws thiab ib ncig Yeluxalees thiab hauv Yuda tej moos yuav rov muaj tej pab yaj rau cov yug yaj suav.’ Yawmsaub hais li no ntag. “Yawmsaub hais tias, ‘Saib maj, lub caij lub nyoog tabtom los yuav txog mas kuv yuav ua kom tiav raws li kuv tej lus cog tseg rau Yixayee caj ces thiab Yuda caj ces. “ ‘Hnub ntawd thiab lub sijhawm ntawd kuv yuav ua kom ib tug ceg uas ncaj ncees yug tshwm hauv Davi los. Nws yuav txiav txim ncaj thiab ua ncaj ncees rau hauv lub tebchaws. Lub sijhawm ntawd Yuda yuav tau kev dim thiab Yeluxalees yuav nyob tso siab plhuav. Yuav hu lub nroog ntawd npe hais tias Yawmsaub yog peb txojkev ncaj ncees.’ Rau qhov Yawmsaub hais li no tias, ‘Davi yuav tsis tu ncua tus uas nyob saum cov Yixayee lub zwm txwv, thiab xeem Levi yuav tsis tu ncua tus pov thawj uas sawv ntawm kuv xubntiag ua kevcai hlawv xyeem thiab ua kevcai xyeem qoob loo thiab ua kevcai tua tsiaj xyeem mus ib txhis.’ ” Yawmsaub hais lus tuaj rau Yelemi tias, “Yawmsaub hais li no tias, ‘Yog nej muab kuv tej lus cog tseg uas hais kom muaj nruab hnub thiab muaj hmo ntuj rhuav tau, ua tau rau nruab hnub thiab hmo ntuj tsis muaj raws li lub caij lub nyoog, ces nej li rhuav tau tej lus uas kuv cog tseg rau kuv tus qhev Davi, thiab ua tau rau nws tsis muaj tub sawv kav saum nws lub zwm txwv, thiab rhuav tau tej lus uas kuv cog tseg rau cov pov thawj hauv xeem Levi uas ua koom tu kuv. Tej hnub qub saum ntuj suav tsis txheeb thiab tej xuab zeb ntawm hiavtxwv suav tsis tag li cas, ces kuv yuav pub rau kuv tus qhev Davi caj ces thiab cov pov thawj hauv xeem Levi uas ua koom tu kuv huaj vam coob ib yam li ntawd.’ ” Yawmsaub hais lus tuaj rau Yelemi tias, “Koj tsis tau tshuaj pom tias cov neeg no hais li cas lov? Lawv hais tias, ‘Yawmsaub muab ob xeem uas nws xaiv los tso tseg lawm.’ Vim li no lawv saib tsis taus kuv haiv neeg, mas lawv thiaj tsis suav hais tias kuv haiv neeg yog ib lub tebchaws lawm. Yawmsaub hais li no tias, ‘Yog kuv tsis tau cog lus ruaj rau nruab hnub thiab hmo ntuj thiab tsis tau rhawv kevcai ruaj rau lub ntuj thiab lub ntiajteb, ces kuv yuav tso Yakhauj thiab kuv tus qhev Davi caj ces pov tseg thiab tsis xaiv ib tug hauv nws caj ces los kav Aplahas, Yiha thiab Yakhauj caj ces li. Kuv yeej yuav pub lawv rov vam meej li qub, thiab kuv yuav khuvleej lawv.’ ” No yog tej lus uas Yawmsaub hais tuaj rau Yelemi rau thaum vajntxwv Nenpukhanexa hauv Npanpiloo thiab nws cov tub rog huvsi thiab txhua lub tebchaws hauv ntiajteb thiab txhua haiv neeg uas nws kav tabtom ua rog rau Yeluxalees thiab tej moos ib ncig. “Yawmsaub uas yog Yixayee tus Vajtswv hais li no tias, Koj cia li mus hais rau Yuda tus vajntxwv Xedekhiya hais tias, ‘Yawmsaub hais li no tias, Saib maj, kuv yuav muab lub nroog no rau hauv vajntxwv Npanpiloo txhais tes, mas nws yuav muab hlawv pov tseg. Koj yuav tsis dim hauv nws txhais tes li, koj yeej yuav raug ntes tiag tiag li thiab raug muab cob rau hauv nws txhais tes thiab koj yuav pom vajntxwv Npanpiloo tim ntsej tim muag thiab sib txuas lus ntawm ncauj. Thiab koj yuav tau mus rau Npanpiloo. Au vajntxwv Xedekhiya uas kav Yuda, txawm li cas kuj xij cia li mloog Yawmsaub tej lus. Yawmsaub hais txog koj li no tias, Koj yuav tsis tuag hniav ntaj. Koj yuav tuag siab tus yees. Luag hlawv tshuaj tsw qab pam koj tej poj koob yawm txwv uas yog tej vajntxwv nyob ua koj ntej li cas, luag kuj yuav hlawv tshuaj tsw qab pam koj thiab quaj ntsuag koj hais tias “Au peb tus vajntxwv” ib yam li ntawd, rau qhov kuv twb hais cia li no lawm. Yawmsaub hais li no ntag.’ ” Mas Yelemi uas cev Vajtswv lus hais tej lus no huvsi rau vajntxwv Xedekhiya uas kav Yuda hauv lub nroog Yeluxalees, rau thaum vajntxwv Npanpiloo cov tub rog tabtom ua rog rau Yeluxalees thiab Yuda txhua lub moos uas tseem tshuav, yog lub moos Lakhi thiab lub moos Axekha, vim yog tej moos uas muaj ntsa loog hauv Yuda tsuas tshuav ob lub moos no xwb. Yawmsaub hais lus tuaj rau Yelemi tom qab uas vajntxwv Xedekhiya tau cog lus rau cov neeg hauv Yeluxalees sawvdaws tias yuav tshaj tawm kevcai tso cov qhev nyob ywj pheej. Txhua tus nyias yuav tsum tso nyias tej qhev uas yog neeg Henplais tsis hais pojniam txivneej kom nyob ywj pheej, kom thiaj tsis muaj leejtwg muab nws cov kwvtij Yudai ua qhev. Mas cov thawj coj sawvdaws thiab cov pejxeem sawvdaws tau cog lus tseg tias nyias yuav tso nyias tej tub qhe nkauj qhev dim kom lawv thiaj tsis raug rov muab ua qhev dua. Lawv mloog lus thiab tso tej qhev dim nyob ywj pheej lawm. Tiamsis tom qab lawv rov qab fav dua thiab ntes tej tub qhe nkauj qhev uas lawv muab tso nyob ywj pheej lawm rov los quab yuam ua qhev dua. Mas Yawmsaub hais lus tuaj rau Yelemi tias, “Yawmsaub uas yog Yixayee tus Vajtswv hais li no tias, Kuv twb cog lus rau nej tej poj koob yawm txwv rau thaum uas kuv coj lawv tawm hauv Iyi tebchaws, thiab tawm hauv lub tsev ua qhev, hais tias, ‘Thaum puv rau xyoo lawm nej txhua tus yuav tsum tso tej kwvtij Henplais uas luag muag rau nej thiab tau ua haujlwm rau nej tau rau xyoo lawm. Nej yuav tsum tso lawv nyob ywj pheej tsis txhob ua haujlwm rau nej lawm.’ Tiamsis nej tej poj koob yawm txwv tsis mloog thiab tsis tig ntsej mloog kuv hais. Tsis ntev los no nej tau ntxeev dua siab ua yam uas kuv pom zoo es tshaj tawm kev ywj pheej nyias tshaj tawm rau nyias kwvtij uas ua qhev, thiab nej tau cog lus tab meeg kuv ntawm lub tuam tsev uas hu raws li kuv lub npe. Tiamsis dhau ntawd lawm nej rov fav dua thiab ua puas tsuas kuv lub npe rau thaum uas nej txhua tus ntes nej tej tub qhe nkauj qhev uas nej twb muab tso nyob ywj pheej lawm raws li lawv lub siab xav, rov los yuam ua nej li qhev dua. “Vim li no, Yawmsaub thiaj li hais tias, Nej tsis mloog kuv lus yog qhov uas nyias tshaj tawm rau nyias tej kwvtij zej zog txog qhov uas nyob ywj pheej. Yawmsaub hais tias, Saib maj, kuv tshaj tawm kom hniav ntaj hniav riam thiab kev tshaib nqhis thiab mob kis muaj kev ywj pheej tua nej. Kuv yuav ua rau nej ua chaw rau ib tsoom tebchaws sawvdaws hauv ntiajteb ceeb thiab ntshai. Thiab cov neeg uas ua txhaum kuv tej lus cog tseg thiab tsis ua raws li tej nqe lus hais hum uas lawv cog lus tseg tab meeg kuv ntawd, mas kuv yuav ua rau lawv zoo yam nkaus li tus menyuam nyuj uas lawv muab phua rhe ua ob sab es lawv mus hauv nruab nrab dhau plaws lawm. Tag nrho Yuda cov thawj thiab Yeluxalees cov thawj thiab cov nraug sam, thiab cov pov thawj thiab cov pejxeem sawvdaws hauv lub tebchaws uas tau hla dhau ob sab tus menyuam nyuj ntawd, mas kuv yuav muab lawv cob rau hauv lawv cov yeeb ncuab txhais tes thiab rau hauv cov uas nrhiav txov lawv txojsia txhais tes. Lawv tej cev tuag mas tej liaj dav saum nruab ntug thiab tej tsiaj qus hauv ntiajteb yuav noj. Kuv yuav muab vajntxwv Xedekhiya uas kav Yuda thiab nws cov thawj cob rau hauv lawv cov yeeb ncuab thiab rau hauv cov uas nrhiav txov lawv txojsia txhais tes, thiab muab rau hauv vajntxwv Npanpiloo cov tub rog txhais tes yog cov uas twb thim ntawm nej mus lawm. Yawmsaub hais tias, Saib maj, kuv yuav hais rau lawv thiab coj lawv rov qab tuaj rau ntawm lub nroog no, mas lawv yuav ua rog rau lub nroog no thiab txeeb tau thiab muab hlawv pov tseg. Kuv yuav ua rau Yuda tej moos nyob do cuas cia tsis muaj neeg nyob li.” Thaum Yauxiya tus tub Yehauyakhi ua vajntxwv kav Yuda, Yawmsaub hais lus tuaj rau Yelemi tias, “Cia li mus cuag Lekhaj caj ces thiab nrog lawv tham thiab coj lawv tuaj rau ntawm Yawmsaub lub tuam tsev nkag mus nyob hauv ib chav thiab muab cawv txiv hmab rau lawv haus.” Mas kuv thiaj coj Ya‑axaniya thiab nws cov kwvtij thiab nws cov tub huvsi thiab Lekhaj caj ces sawvdaws tuaj. Ya‑axaniya txiv yog Yelemi, nws yawg yog Hanpaxiniya. Kuv coj lawv tuaj rau ntawm Yawmsaub lub tuam tsev mus rau hauv Hanas cov tub chav tsev. Hanas yog Idaliya tus tub thiab yog Vajtswv tus neeg. Chav tsev ntawd npuas cov thawj uas saib xyuas lub tuam tsev chav, thiab yog nyob ncaj Salu tus tub Ma‑axeya uas zov qhov rooj chav txheej sab saud. Mas kuv muab tej hwj cawv txiv hmab thiab tej khob txawb rau ntawm Lekhaj cov neeg xubntiag, thiab kuv hais rau lawv tias, “Cia li haus cawv txiv hmab.” Tiamsis lawv teb tias, “Peb tsis haus cawv txiv hmab, vim yog peb yawg koob Yaunada uas yog Lekhaj tus tub hais rau peb tias, ‘Nej tsis txhob haus cawv txiv hmab, txawm yog nej thiab nej cov tub ki los tsis txhob haus ib txhis li. Nej tsis txhob ua tsev, tsis txhob tseb noob, tsis txhob cog thiab tsis txhob muaj vaj txiv hmab. Nej cia li nyob hauv tej tsev ntaub tag nej sim neej xwv nej thiaj li nyob tau ntev rau hauv lub tebchaws uas nej mus nyob ntawd.’ Peb mloog peb yawg koob Yaunada uas yog Lekhaj tus tub tej lus txhua lo lus uas nws hais kom peb ua, yog tsis txhob haus cawv txiv hmab tag peb sim neej, tag nrho peb tej pojniam thiab tej tub tej ntxhais huvsi, thiab tsis txhob ua tsev nyob. Peb tsis muaj vaj txiv hmab thiab teb thiab qoob loo. Peb tsuas yog nyob hauv tej tsev ntaub xwb thiab peb mloog lus thiab ua txhua yam raws li peb yawg koob Yaunada hais cia rau peb. Tiamsis thaum vajntxwv Nenpukhanexa hauv Npanpiloo tuaj ua rog rau tebchaws no, peb thiaj hais tias, ‘Cia peb mus rau hauv Yeluxalees vim yog ntshai cov tub rog Kheedia thiab cov tub rog Alas.’ Yog li no peb thiaj li nyob hauv lub nroog Yeluxalee.” Mas Yawmsaub hais lus tuaj rau Yelemi tias, “Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, Cia li mus hais rau cov Yuda thiab cov uas nyob hauv Yeluxalees tias, Yawmsaub hais tias, ‘Nej tsis yuav tej uas kuv qhia thiab tsis mloog kuv tej lus lov? Lekhaj tus tub Yaunada hais rau nws tej tub ki kom tsis txhob haus cawv txiv hmab, lawv kuj ua raws li nws hais. Lawv tsis haus cawv txiv hmab txog niaj hnub nimno, vim yog lawv mloog tej uas lawv yawg koob hais. Tiamsis kuv tau hais rau nej tsis tu ncua, los nej tsis mloog kuv hais. Kuv tau txib kuv cov tub qhe uas yog cov xibhwb cev lus txhua tus tuaj rau nej, kuv txib lawv tuaj hais tsis tu ncua li tias, “Nimno nej txhua tus cia li nyias tig ntawm nyias txojkev phem, thiab ua nej lub neej dua tshiab, thiab tsis txhob mus raws ncuj nciav luag tej dab thiab ua koom tu tej dab ntawd, mas nej thiaj tau nyob rau hauv lub tebchaws uas kuv muab pub rau nej thiab nej tej poj koob yawm txwv.” Tiamsis nej tsis tig ntsej mloog thiab tsis mloog kuv hais. Lekhaj tus tub Yaunada tej caj ces twb ua raws li tej lus uas lawv yawg koob hais cia rau lawv, tiamsis haiv neeg no tsis mloog kuv lus.’ Yog li no Yawmsaub, uas yog Vajtswv muaj hwjchim loj kawg nkaus thiab yog Yixayee tus Vajtswv thiaj hais li no tias, ‘Saib maj, kuv yuav coj tej xwm txheej phem huvsi uas kuv tshaj tawm lawm los raug Yuda thiab cov hauv Yeluxalees sawvdaws, rau qhov kuv twb hais rau lawv lawm los lawv tsis mloog. Kuv twb hu lawv los lawv tsis teb.’ ” Tiamsis Yelemi hais rau Lekhaj caj ces tias, “Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, ‘Nej tau mloog nej yawg koob Yaunada tej lus, thiab tuav rawv txhua nqe uas nws qhia nej thiab ua raws li txhua yam uas nws hais rau nej.’ Vim li no Yawmsaub tus muaj hwjchim loj kawg nkaus uas yog Yixayee tus Vajtswv hais tias, ‘Lekhaj tus tub Yaunada yuav muaj cov txivneej uas sawv ntawm kuv lub xubntiag tsis tu ncua mus ib txhis li.’ ” Xyoo plaub uas Yauxiya tus tub Yehauyakhi ua vajntxwv kav Yuda, Yawmsaub hais lus tuaj rau Yelemi tias, “Koj cia li muab ib thooj ntawv mas sau tej lus huvsi uas kuv tau hais rau koj, yog hais tawm tsam cov Yixayee thiab cov Yuda thiab ib tsoom tebchaws sawvdaws, txij hnub uas hais rau koj thaum Yauxiya ua vajntxwv los txog hnub no. Nyaj cov Yuda yuav hnov txog tej xwm txheej phem huvsi uas kuv xav tseg yuav ua rau lawv, kom lawv txhua tus thiaj tig ntawm lawv txojkev phem thiab kuv thiaj zam lawv tej kev txhaum thiab lawv lub txim.” Mas Yelemi thiaj hu Npalu uas yog Neliya tus tub los, thiab hais txhua lo lus uas Yawmsaub tau hais rau nws lawd rau Npalu sau cia rau hauv thooj ntawv. Thiab Yelemi qhia Npalu hais tias, “Luag txwv tsis kheev kuv mus rau hauv Yawmsaub lub tuam tsev. Yog li ntawd, koj yuav tsum mus, mas hnub uas ua kevcai yoo mov koj muab Yawmsaub tej lus uas koj sau cia rau hauv thooj ntawv raws li kuv hais kom koj sau ntawd nyeem hauv Yawmsaub lub tuam tsev rau cov pejxeem sawvdaws mloog. Koj yuav tsum muab nyeem rau cov Yuda uas tawm hauv lawv tej moos tuaj sawvdaws mloog thiab. Mas tej zaum lawv tej lus taij thov yuav mus txog Yawmsaub, thiab txhua tus yuav tig ntawm lawv txojkev phem, vim yog txojkev chim thiab txojkev npau taws uas Yawmsaub tau tshaj tawm rau haiv neeg no mas loj heev.” Neliya tus tub Npalu ua txhua yam raws li Yelemi hais rau nws kom mus nyeem Yawmsaub tej lus hauv thooj ntawv ntawd rau hauv Yawmsaub lub tuam tsev. Lub cuaj hli xyoo tsib uas Yauxiya tus tub Yehauyakhi ua vajntxwv kav Yuda, cov neeg hauv Yeluxalees sawvdaws thiab cov uas tawm hauv Yuda tej moos sawvdaws tuaj rau hauv Yeluxalees tshaj tawm kom ua kevcai yoo mov rau ntawm Yawmsaub xubntiag. Ces Npalu thiaj nyeem Yelemi tej lus hauv thooj ntawv rau cov neeg sawvdaws mloog hauv Yawmsaub lub tuam tsev, ntawm Kemaliya chav tsev uas nyob hauv lub tshav puam txheej saud ncaj ntawm lub Rooj Loog Tshiab uas mus rau hauv Yawmsaub lub tuam tsev. Kemaliya yog Safas uas yog tus sau ntawv li tub. Thaum Mikhaya uas yog Kemaliya tus tub thiab yog Safas tus xeeb ntxwv tau hnov Yawmsaub tej lus huvsi hauv thooj ntawv ntawd, nws txawm mus rau hauv vajntxwv lub tsev, mus rau hauv chav uas ua ntaub ntawv, mas cov thawj sawvdaws zaum qhov ntawd, yog Elisama uas ua tus tub sau ntawv, thiab Semaya tus tub Delaya, Anpau tus tub Eenathas, Safas tus tub Kemaliya, Hananiya tus tub Xedekhiya thiab cov thawj sawvdaws. Ces Mikhaya txawm piav tej lus huvsi uas nws tau hnov Npalu nyeem hauv thooj ntawv rau cov pejxeem mloog. Cov thawj sawvdaws thiaj txib Nethaniya tus tub Yehudi, mus hais rau Npalu tias, “Cia li coj thooj ntawv uas koj nyeem rau cov pejxeem mloog ntawd thiab tuaj cuag peb.” Yehudi yawg yog Selemiya nws yawg koob yog Kushi. Mas Neliya tus tub Npalu thiaj tuav rawv thooj ntawv ntawd tuaj cuag lawv. Lawv txawm hais rau nws tias, “Cia li zaum nyeem thooj ntawv ntawd rau peb mloog.” Npalu thiaj nyeem rau lawv mloog. Thaum lawv tau hnov tej lus huvsi ntawd, lawv ib leeg ntsia ntsoov rau ib leeg ntshai kawg, lawv txawm hais rau Npalu tias, “Peb yuav tsum hais tej lus no huvsi rau vajntxwv paub.” Lawv txawm nug Npalu tias, “Koj qhia peb saib, koj sau tej lus no huvsi li cas? Koj sau raws li Yelemi hais lov?” Npalu teb lawv tias, “Nws hais tej lus no huvsi rau kuv mloog mas kuv xuas kua mem sau cia rau hauv thooj ntawv.” Mas cov thawj hais rau Npalu tias, “Koj thiab Yelemi cia li mus tsiv nraim, tsis txhob qhia leejtwg paub tias neb nyob qhovtwg.” Thaum lawv muab thooj ntawv ntawd khaws cia rau hauv Elisama uas ua tus tub sau ntawv chav tsev lawm, lawv txawm mus cuag vajntxwv hauv lub tshav puam. Lawv qhia tej lus huvsi rau vajntxwv paub. Vajntxwv txawm txib Yehudi mus muab thooj ntawv ntawd los. Yehudi thiaj mus muab ntawm Elisama uas ua tus tub sau ntawv chav tsev los, thiab Yehudi muab nyeem rau vajntxwv thiab cov thawj uas sawv vij vajntxwv sawvdaws mloog. Thaum ntawd yog lub cuaj hli, vajntxwv zaum hauv chav tsev ntuj no thiab muaj ib cub tawg cig plaws ntawm vajntxwv xubntiag. Thaum Yehudi nyeem tag peb plaub pwm, vajntxwv txawm muab rab chais hlais tej uas nyeem tag pov rau hauv cub tawg, hlais li ntawd mus txog thaum thooj ntawv kub hnyiab tag hauv cub tawg huvsi lawm. Vajntxwv thiab nws cov tub teg tub taws uas tau hnov tej lus huvsi ntawd kuj tsis muaj ib tug twg ntshai thiab muab tej tsho dua tseg. Txawm yog Eenathas thiab Delaya thiab Kemaliya lawv thov vajntxwv tsis txhob muab thooj ntawv ntawd hlawv, los vajntxwv kuj tsis mloog. Vajntxwv tseem hais kom Yelame‑ee uas yog nws tus tub, thiab Xelaya uas yog Axali‑ee tus tub thiab Selemiya uas yog Ade‑ee tus tub mus ntes Npalu uas yog tus sau ntawv thiab Yelemi uas ua xibhwb cev lus, tiamsis Yawmsaub muab ob tug zais lawm. Thaum vajntxwv muab thooj ntawv uas Npalu sau raws li Yelemi hais hlawv tag lawm, Yawmsaub hais lus tuaj rau Yelemi tias, “Cia li muab dua ib thooj ntawv thiab muab tej lus uas nyob hauv thawj thooj ntawv uas Yuda tus vajntxwv Yehauyakhi muab hlawv tag lawd sau huvsi rau hauv. Hais txog Yuda tus vajntxwv Yehauyakhi ntawd koj cia li hais tias, Yawmsaub hais li no tias, ‘Koj muab thooj ntawv no hlawv pov tseg thiab hais tias, “Ua cas koj sau cia rau hauv tias tus vajntxwv hauv Npanpiloo yuav tuaj muab lub tebchaws no ua puam tsuaj tiag tiag li, thiab yuav muab tej neeg thiab tej tsiaj txhu txiav tawm hauv lub tebchaws no?” Vim li no Yawmsaub thiaj hais txog Yuda tus vajntxwv Yehauyakhi tias, nws yuav tsis muaj tub ki xeeb ntxwv nyob saum Davi lub zwm txwv, thiab nws lub cev tuag yuav raug muab laim ziab tshav ntuj kub nruab hnub, thiab hmo ntuj te yuav los ntub. Kuv yuav rau txim rau nws thiab nws caj ces thiab nws tej tub teg tub taws vim yog tim lawv tej kev txhaum. Thiab kuv yuav coj tej xwm txheej phem huvsi uas kuv tau hais tawm tsam lawv los lawv tsis mloog ntawd los raug cov uas nyob hauv Yeluxalees thiab cov neeg Yuda.’ ” Yelemi thiaj muab dua ib thooj ntawv los cob rau Neliya tus tub Npalu uas ua tus tub sau ntawv, mas Npalu muab txhua lo lus uas muaj hauv thooj ntawv uas Yuda tus vajntxwv Yehauyakhi muab hlawv kub hnyiab tag lawd sau huvsi raws nraim li Yelemi hais kom nws sau. Thiab muaj dua ntau lo lus uas sib thooj ntxiv rau. Yauxiya tus tub Xedekhiya uas vajntxwv Nenpukhanexa hauv Npanpiloo muab tsa ua vajntxwv hauv Yuda tebchaws, sawv Yehauyakhi tus tub Khauniya chaw ua vajntxwv kav. Txawm yog nws thiab nws cov tub teg tub taws thiab nws cov pejxeem los puavleej tsis mloog Yawmsaub tej lus uas nws kom Yelemi uas yog xibhwb cev lus hais rau lawv. Vajntxwv Xedekhiya txib Yehukhas uas yog Selemiya tus tub thiab pov thawj Xefaniya uas yog Ma‑axeya tus tub mus cuag Yelemi uas yog xibhwb cev lus thiab hais tias, “Koj cia li thov Yawmsaub uas yog peb tus Vajtswv pab peb.” Thaum ntawd Yelemi tseem mus los hauv cov pejxeem tau, rau qhov tsis tau muab nws kaw hauv tsev lojfaj. Mas Falau pab tub rog tawm hauv Iyi tuaj. Thaum cov Kheedia uas vij lub nroog Yeluxalees hnov li ntawd, lawv txawm thim tub rog ntawm Yeluxalees rov qab. Thaum ntawd Yawmsaub hais lus tuaj rau Yelemi uas yog xibhwb cev Vajtswv lus tias, “Yawmsaub uas yog cov Yixayee tus Vajtswv hais li no tias, Neb cia li mus hais rau Yuda tus vajntxwv uas txib neb tuaj nug kuv tias, ‘Saib nawj, Falau pab tub rog uas tawm tuaj pab koj tabtom yuav rov qab mus rau lawv lub tebchaws Iyi. Mas cov Kheedia yuav rov qab tuaj ua rog rau lub nroog no, lawv yuav txeeb tau thiab muab hlawv pov tseg.’ Yawmsaub hais li no tias, Nej tsis txhob rov dag nej tus kheej hais tias, ‘Cov Kheedia tso peb tseg lawm lauj,’ rau qhov lawv yeej yuav tsis tso nej tseg kiag li. Txawm yog nej kov yeej tau cov Kheedia pab tub rog huvsi uas tabtom ua rog rau nej, tsuas yog tshuav cov raug mob txhua tus nyob hauv lawv tej tsev ntaub xwb, los cov ntawd yuav sawv tsees muab hluavtaws hlawv lub nroog no pov tseg.” Thaum cov Kheedia cov tub rog thim ntawm Yeluxalees vim yog Falau pab tub rog tuaj ze, Yelemi kuj tawm hauv Yeluxalees mus rau Npeeyamee tebchaws thiaj tau nws li feem uas nyob hauv cov neeg ntawd. Thaum nws nyob ntawm lub Rooj Loog Npeeyamee, muaj ib tug tub rog faj xwm npe hu ua Iliya, yog Selemiya tus tub thiab yog Hananiya tus xeeb ntxwv, txawm ntes Yelemi uas cev Vajtswv lus, hais tias, “Koj tabtom khiav mus rau cov Kheedia.” Yelemi hais tias, “Tsis yog. Kuv tsis yog khiav mus rau cov Kheedia.” Tiamsis Iliya tsis yeem mloog nws hais, nws cia li ntes Yelemi coj los rau cov thawj. Cov thawj chim heev rau Yelemi, lawv muab nws nplawm thiab muab nws kaw rau hauv Yaunathas uas ua tus tub sau ntawv lub tsev, vim muab lub tsev ntawd ua tsev lojfaj lawm. Thaum Yelemi raug muab tso rau hauv lub nkuaj av thiab nyob qhov ntawd ntau hnub lawd, vajntxwv Xedekhiya txib neeg mus coj Yelemi los cuag nws, thiab nug Yelemi twjywm hauv nws lub tsev tias, “Yawmsaub hais lus tuaj los tsis hais?” Yelemi hais tias, “Muaj thiab. Koj yuav raug muab cob rau hauv tus vajntxwv Npanpiloo txhais tes.” Yelemi hais ntxiv rau vajntxwv Xedekhiya tias, “Kuv tau ua txhaum li cas rau koj lossis ua rau koj cov tub teg tub taws lossis ua rau cov neeg no, koj thiaj muab kuv kaw hauv tsev lojfaj? Koj cov xibhwb cev lus uas hais rau koj tias, ‘Npanpiloo tus vajntxwv yuav tsis tuaj ua rog rau koj lossis ua rog rau lub tebchaws no,’ dua twg lawm? Au vajntxwv uas yog kuv tus tswv, nimno thov koj mloog kuv hais, thov cia kuv tej lus taij thov tuaj txog ntawm koj xubntiag, es tsis txhob xa kuv rov mus rau hauv Yaunathas uas ua tus tub sau ntawv lub tsev tsam ces kuv tuag rau qhov ntawd.” Vajntxwv Xedekhiya thiaj li hais kom lawv coj Yelemi mus kaw cia rau hauv cov tub rog uas zov vajntxwv lub loog. Ib hnub lawv coj ib lub ncuav ntawm txojkev uas luag ua ncuav los rau nws noj mus txog thaum tej ncuav hauv lub nroog tag huvsi lawm. Yog li no Yelemi thiaj nyob hauv cov tub rog zov vajntxwv lub loog. Mathas tus tub Sefathiya, thiab Pasaw tus tub Kedaliya, thiab Selemiya tus tub Yukhas thiab Makhia tus tub Pasaw lawv tau hnov tej lus uas Yelemi hais rau cov pejxeem sawvdaws tias, “Yawmsaub hais li no tias, ‘Leejtwg tseem nyob hauv lub nroog no mas yuav tuag hniav ntaj hniav riam thiab tuag tshaib tuag nqhis thiab tuag mob kis. Yog leejtwg tawm mus zwm rau cov Kheedia mas yuav dim txojsia. Nws yuav tau txojsia ua nqe zog hauv tshav rog los.’ Yawmsaub hais li no tias, ‘Lub nroog no yuav raug muab cob rau hauv Npanpiloo tus vajntxwv cov tub rog txhais tes, mas lawv yuav txeeb tau.’ ” Cov thawj thiaj hais rau vajntxwv Xedekhiya tias, “Cia li muab tus yawg no tua pov tseg, vim nws ua rau cov tub rog uas tseem tshuav nyob hauv lub nroog no thiab cov pejxeem sawvdaws txhais tes tsaug leeg tag rau qhov uas nws hais tej lus li no rau lawv. Tus yawg no tsis nrhiav txojkev noj qab nyob zoo rau haiv neeg no, nws tsuas yog nrhiav kev txom nyem los xwb.” Vajntxwv Xedekhiya hais tias, “Tus yawg no twb nyob hauv nej txhais tes lawm, vajntxwv tsis fim yuav tav tau nej.” Lawv txawm coj Yelemi mus thiab muab hlua tso nws nqes rau hauv vajntxwv tus tub Makhia lub qhov dej uas nyob hauv cov tub rog zov vajntxwv lub loog. Lub qhov dej ntawd tsis muaj dej, tsuas yog muaj av nplaum xwb, Yelemi thiaj zom rau hauv cov av nplaum ntawd. Thaum Enpemelej uas yog neeg Khuj yog ib tug nraug sam nyob hauv vajntxwv lub tsev hnov tias lawv muab Yelemi tso rau hauv lub qhov dej ntawd, ces thaum vajntxwv nyob ntawm lub Rooj Loog Npeeyamee, Enpemelej txawm tawm hauv vajntxwv lub tsev mus hais rau vajntxwv tias, “Au vajntxwv uas yog kuv tus tswv, cov neeg no ua phem heev rau qhov uas lawv ua txhua yam no rau xibhwb Yelemi uas cev Vajtswv lus, lawv muab nws pov rau hauv lub qhov dej. Nws yuav tuag tshaib rau hauv xwb, rau qhov hauv lub nroog no tsis tshuav ib lub ncuav noj kiag li lawm.” Ces vajntxwv thiaj hais rau Enpemelej uas yog neeg Khuj tias, “Cia li coj peb caug leej ntawm no nrog koj mus, mas rub Yelemi uas cev Vajtswv lus tawm hauv lub qhov dej los ua ntej uas nws tsis tau tuag.” Enpemelej thiaj coj neeg nrog nws mus rau ntawm vajntxwv lub tsev chav uas rau qhov txhia chaw uas muaj ib lub phij xab rau khaubncaws, mas rho tej khaubncaws qub thiab tej khaub hlab los, muab hlua khi tso mus rau Yelemi hauv lub qhov dej. Mas Enpemelej uas yog neeg Khuj hais rau Yelemi tias, “Cia li muab tej khaubncaws thiab tej khaub hlab tiag txoj hlua hauv koj qhov tsos.” Yelemi ua raws li ntawd. Lawv txawm muab txoj hlua rub Yelemi tawm hauv lub qhov dej los. Mas Yelemi tseem nyob hauv cov tub rog zov vajntxwv lub loog. Vajntxwv Xedekhiya txib neeg mus coj Yelemi uas cev Vajtswv lus los cuag nws ntawm txojkev uas nkag lub rooj loog uas peb rau hauv Yawmsaub lub tuam tsev. Vajntxwv hais rau Yelemi tias, “Kuv yuav nug koj ib nqes, koj tsis txhob zais ib yam dabtsi ntawm kuv kiag li.” Yelemi thiaj hais rau Xedekhiya tias, “Yog kuv hais rau koj, koj yeej yuav muab kuv tua pov tseg xwb. Yog kuv qhia dabtsi rau koj, koj yeej yuav tsis mloog kuv hais.” Mas vajntxwv Xedekhiya cog lus twv rau Yelemi twjywm tias, “Yawmsaub uas tsim peb tus ntsuj plig muaj txojsia nyob pom, kuv yuav tsis tua koj lossis muab koj cob rau hauv cov neeg nrhiav kev txov koj txojsia txhais tes.” Yelemi thiaj hais rau Xedekhiya tias, “Yawmsaub uas yog Vajtswv muaj hwjchim loj kawg nkaus thiab yog cov Yixayee tus Vajtswv hais li no tias, ‘Yog koj yeem muab koj tus kheej cob rau Npanpiloo tus vajntxwv cov thawj, mas lawv yuav tseg koj txojsia thiab lub nroog no yuav tsis raug hluavtaws hlawv. Koj thiab koj cuab neeg yuav muaj txojsia nyob. Tiamsis yog koj tsis yeem muab koj cob rau Npanpiloo tus vajntxwv cov thawj, lub nroog yuav raug muab cob rau hauv cov Kheedia txhais tes, mas lawv yuav muab hluavtaws hlawv pov tseg, thiab koj yuav khiav tsis dim hauv lawv txhais tes.’ ” Vajntxwv Xedekhiya hais rau Yelemi tias, “Kuv ntshai cov Yudai uas nyiag kev khiav mus rau cov Kheedia lawm, tsam ces kuv raug muab cob rau cov neeg ntawd ces lawv tsim txom kuv.” Yelemi hais tias, “Luag yuav tsis muab koj cob rau lawv. Cia li mloog Yawmsaub tej lus raws li kuv hais rau koj, mas koj thiaj noj qab nyob zoo thiab lawv thiaj tseg koj txojsia. Tiamsis yog koj tsis yeem muab koj tus kheej cob rau lawv, mas Yawmsaub qhia zaj yog toog rau kuv pom li no. Kuv pom cov pojniam sawvdaws uas tshuav nyob hauv Yuda tus vajntxwv lub tsev raug muab coj mus pub rau Npanpiloo tus vajntxwv cov thawj, thiab lawv hais tias, “ ‘Koj cov phoojywg uas koj tso siab dag ntxias koj thiab kov yeej koj lawm. Nimno koj txhais kotaw zom rau hauv pas iav, mas lawv tso koj tseg lawm.’ “Koj cov pojniam sawvdaws thiab koj cov tub yuav raug muab coj mus rau cov Kheedia, thiab koj tus kheej yuav tsis dim hauv lawv txhais tes. Koj yuav raug Npanpiloo tus vajntxwv ntes, thiab lub nroog no yuav raug hluavtaws hlawv pov tseg.” Xedekhiya txawm hais rau Yelemi tias, “Tsis txhob cia leejtwg paub tej lus no koj thiaj li tsis tuag. Yog cov thawj hnov tias kuv tau nrog koj hais lus, thiab lawv tuaj cuag koj hais tias, ‘Cia li qhia saib koj hais li cas rau vajntxwv thiab vajntxwv hais li cas rau koj. Tsis txhob zais ib yam dabtsi ntawm peb mas peb thiaj tsis muab koj tua pov tseg,’ koj cia li hais rau lawv tias, ‘Kuv taij thov vajntxwv kom tsis txhob xa kuv rov qab mus tuag rau hauv Yaunathas lub tsev.’ ” Mas cov thawj sawvdaws kuj tuaj cuag Yelemi thiab nug nws, mas nws kuj teb lawv raws li vajntxwv qhia rau nws. Ces lawv txawm tseg tsis nug nws vim qhov uas ob tug sib tham tsis muaj leejtwg hnov. Yelemi txawm nyob hauv cov tub rog uas zov vajntxwv lub loog mus txog hnub uas Yeluxalees poob lawm. Xyoo cuaj uas Xedekhiya ua vajntxwv kav Yuda, lub kaum hli vajntxwv Nenpukhanexa hauv Npanpiloo thiab nws cov tub rog sawvdaws tuaj ua rog rau lub nroog Yeluxalees thiab vij cia. Xyoo kaum ib uas Xedekhiya ua vajntxwv hnub xiab cuaj lub plaub hlis, luag txawm tsoo lub ntsa loog pob ib qho. Thaum txeeb tau Yeluxalees lawm, Npanpiloo tus vajntxwv cov thawj sawvdaws txawm txeem los zaum ntawm lub Rooj Loog Nruab Nrab, yog Nawkas Salexaw, Xakanenpau, Xaxekhi uas yog Laxali, thiab Nawkas Salexaw uas yog Lamab, thiab Npanpiloo tus vajntxwv cov thawj rog sawvdaws. Thaum Yuda tus vajntxwv Xedekhiya thiab cov tub rog sawvdaws pom li ntawd, lawv txawm tawm hauv lub nroog khiav hmo ntuj hla vajntxwv lub vaj tawm lub rooj loog taug txojkev uas muaj ob sab ntsa loog mus. Lawv txawm khiav yuav mus rau Alanpa. Tiamsis Kheedia cov tub rog raws lawv qab thiab caum cuag Xedekhiya rau ntawm lub tiaj Yelikhau. Thaum lawv ntes tau nws lawm, lawv coj nws mus cuag Npanpiloo tus vajntxwv Nenpukhanexa ntawm lub moos Linpla hauv Hama tebchaws, mas vajntxwv Npanpiloo txiav txim rau nws. Npanpiloo tus vajntxwv tua Xedekhiya cov tub rau ntawm lub moos Linpla tab meeg nws, thiab Npanpiloo tus vajntxwv tua Yuda cov thawj huvsi pov tseg. Nws muab Xedekhiya ob lub qhov muag kaus pov tseg thiab muab saw hlau khi coj nws mus rau Npanpiloo. Cov Kheedia muab vajntxwv lub vaj tse thiab tej pejxeem tej vaj tse hlawv thiab tsoo tej ntsa loog Yeluxalees pob tag huvsi. Nenpuxaladas uas yog tus thawj rog zov vajntxwv kuav kiag cov pejxeem uas tseem tshuav nyob hauv lub nroog thiab cov uas khiav mus zwm rau nws lawm tawm tebchaws mus rau Npanpiloo. Nenpuxaladas uas yog tus thawj rog zov vajntxwv tsuas yog tseg cov neeg pluag uas tsis muaj dabtsi li cia nyob hauv Yuda tebchaws xwb, thiab nws muab tej vaj txiv hmab thiab tej teb rau cov neeg ntawd ua. Npanpiloo tus vajntxwv Nenpukhanexa hais txog Yelemi rau Nenpuxaladas uas yog tus thawj rog zov vajntxwv tias, “Cia li coj Yelemi mus, saib xyuas nws tib zoo, tsis txhob ua phem rau nws, thiab tu nws raws li nws hais rau koj.” Nenpuxaladas uas yog tus thawj rog zov vajntxwv, thiab Nenpusanpa uas yog Laxali, thiab Nawkas Salexaw uas yog Lamab, thiab Npanpiloo tus vajntxwv cov thawj rog sawvdaws thiaj txib neeg mus coj Yelemi tawm hauv cov tub rog zov vajntxwv lub loog los. Lawv muab Yelemi cob rau Ahikhas tus tub Kedaliya uas yog Safas tus xeeb ntxwv coj nws mus tsev. Yog li ntawd Yelemi thiaj tau nrog cov pejxeem nyob ua ke. Yawmsaub hais lus tuaj rau Yelemi rau thaum nws tseem raug kaw hauv cov tub rog zov vajntxwv lub loog hais tias, “Cia li mus hais rau Enpemelej uas yog neeg Khuj tias, ‘Yawmsaub uas muaj hwjchim loj kawg nkaus, uas yog cov Yixayee tus Vajtswv hais li no tias, Saib nawj, kuv yuav ua kom kuv tej lus tiav rau lub nroog no yog ua phem tsis yog ua zoo, mas yuav ua tiav rau hnub ntawd tab meeg koj. Yawmsaub hais tias, hnub ntawd kuv yuav cawm koj, thiab koj yuav tsis raug muab cob rau hauv cov neeg uas koj ntshai txhais tes. Kuv yuav tso koj dim tiag tiag li, thiab koj yuav tsis raug hniav ntaj tua. Koj yuav tau txojsia ua nqe zog hauv tshav rog los rau qhov koj tso siab rau kuv. Yawmsaub hais li no ntag.’ ” Yawmsaub hais lus tuaj rau Yelemi yog tom qab uas Nenpuxaladas uas yog tus thawj rog zov vajntxwv tau muab Yelemi tso dim ntawm Lama lawm, yog thaum lawv ntes Yelemi khi nrees nrog cov hauv Yeluxalees thiab cov hauv Yuda uas raug muab ntes kuav mus rau Npanpiloo. Tus thawj rog uas zov vajntxwv thiaj coj Yelemi los mas hais rau nws tias, “Yawmsaub uas yog koj tus Vajtswv twb tshaj tawm tej kev puam tsuaj uas raug lub chaw no lawm. Nimno Yawmsaub yeej ua kom tiav thiab ua raws li nws twb hais tseg lawm. Vim yog nej tau ua txhaum rau Yawmsaub thiab tsis mloog nws tej lus, tej xwm txheej no thiaj poob rau saum nej. Saib maj, hnub no kuv tso koj dim txoj saw hlau ntawm koj txhais tes. Yog koj pom zoo nrog kuv mus rau Npanpiloo, kuj mus, kuv yuav tsom kwm koj tib zoo. Tiamsis yog koj tsis pom zoo nrog kuv mus rau Npanpiloo kuj tsis txhob mus. Lub tebchaws no huvsi nyob ntawm koj xubntiag, koj yuav mus rau qhov twg uas koj pom zoo kuj tau. Yog koj yuav nyob ntawm no, koj cia li rov mus cuag Kedaliya, uas yog Ahikhas tus tub thiab yog Safas tus xeeb ntxwv, nws yog tus uas vajntxwv Npanpiloo tsa ua tus thawj kav Yuda tej moos. Koj mus nrog nws nyob rau hauv ib tsoom pejxeem, lossis yuav mus rau qhov twg uas koj pom zoo kuj tau.” Tus thawj rog uas zov vajntxwv cia li muab zaub mov thiab tshav ntuj rau Yelemi ces muab nws tso mus. Yelemi thiaj mus cuag Ahikhas tus tub Kedaliya ntawm Mixapa, thiab nrog nws nyob rau hauv ib tsoom pejxeem uas tshuav nyob hauv lub tebchaws ntawd. Thaum Yuda cov thawj tub rog huvsi uas tsiv nraim lawm thiab lawv cov tub rog tau hnov hais tias vajntxwv hauv Npanpiloo tau tsa Ahikhas tus tub Kedaliya ua tus thawj kav lub tebchaws thiab muab tej pojniam txivneej menyuam uas pluag kawg hauv lub tebchaws cob rau nws kav, lawv yog cov uas tsis raug muab kuav mus rau Npanpiloo, Nethaniya tus tub Yisama‑ee thiab Khale‑a tus tub Yauhanas, thiab Thahume tus tub Xelaya, thiab Efai cov tub uas yog neeg hauv lub moos Nethaufa, thiab Yexaniya uas yog neeg Ma‑akha li tub, lawv thiab lawv cov neeg sawvdaws mus cuag Kedaliya ntawm Mixapa. Kedaliya uas yog Ahikhas tus tub, thiab yog Safas tus xeeb ntxwv, cog lus twv rau lawv thiab lawv cov neeg hais tias, “Tsis txhob ntshai mus ua num rau cov Kheedia. Cia li nyob hauv lub tebchaws no thiab ua num rau vajntxwv Npanpiloo ces nej yuav tau noj qab nyob zoo. Kuv tus kheej mas kuv yuav nyob hauv Mixapa, sawv cev nej chaw rau cov Kheedia uas tuaj cuag peb. Tiamsis nej mas cia li mus khaws nej tej cawv txiv hmab thiab tej txiv ntoo lub caij ntuj kub thiab tej roj aulib, coj mus ntim cia hauv hub, thiab cia li mus nyob hauv tej moos uas nej txeeb tau ntawd.” Ib yam li ntawd, thaum cov Yudai uas nyob hauv Mau‑a tebchaws thiab hauv Asmoo thiab hauv Edoo thiab hauv lwm lub tebchaws sawvdaws tau hnov tias vajntxwv hauv Npanpiloo tso ib co neeg nyob hauv Yuda, thiab tsa Kedaliya uas yog Ahikhas tus tub thiab yog Safas tus xeeb ntxwv ua tus kav lawv, mas cov Yudai sawvdaws kuj rov qab los ntawm txhua lub tebchaws uas lawv raug ntiab mus nyob ntawd, los rau hauv Yuda tebchaws, thiab los cuag Kedaliya ntawm Mixapa. Mas lawv khaws tej cawv txiv hmab thiab tej txiv ntoo lub caij ntuj kub ntau heev. Khale‑a tus tub Yauhanas thiab cov thawj tub rog sawvdaws uas tsiv nraim lawm tuaj cuag Kedaliya ntawm Mixapa, thiab hais rau nws tias, “Koj puas paub tias Npa‑ali uas yog cov Asmoo tus vajntxwv tau txib Nethaniya tus tub Yisama‑ee tuaj tua koj?” Tiamsis Ahikhas tus tub Kedaliya tsis ntseeg lawv hais. Mas Khale‑a tus tub Yauhanas hais twjywm rau Kedaliya hauv Mixapa tias, “Cia kuv mus tua Nethaniya tus tub Yisama‑ee pov tseg, tsis muaj leejtwg yuav paub li. Ua cas yuav cia nws muab koj tua, mas cov Yudai sawvdaws uas tuaj koom rau koj yuav khiav ua sab ua sua, thiab cov neeg Yuda uas tseem tshuav nyob yuav puam tsuaj?” Tiamsis Ahikhas tus tub Kedaliya hais rau Khale‑a tus tub Yauhanas tias, “Koj tsis txhob ua zaj kod, qhov uas koj hais txog Yisama‑ee ntawd tsis muaj tseeb.” Lub xya hli, Nethaniya tus tub Yisama‑ee uas yog Elisama tus xeeb ntxwv thiab yog keeb vajntxwv, thiab nws yog vajntxwv ib tug thawj tub rog loj, tau coj kaum leej nrog nws tuaj cuag Ahikhas tus tub Kedaliya ntawm Mixapa. Mas thaum lawv tabtom noj mov ua ke hauv Mixapa, Nethaniya tus tub Yisama‑ee thiab kaum leej uas nrog nws tuaj txawm sawv tsees xuas ntaj muab Kedaliya uas yog Ahikhas tus tub thiab yog Safas tus xeeb ntxwv tua tuag, nws yog tus uas vajntxwv hauv Npanpiloo tsa ua tus thawj kav lub tebchaws ntawd. Yisama‑ee kuj tua cov Yudai uas nrog Kedaliya nyob hauv Mixapa huvsi, thiab tua cov tub rog Kheedia uas nyob ntawd thiab. Hnub tom qab uas Kedaliya raug tua lawm thiab tsis tau muaj leejtwg paub li, muaj yim caum tus txivneej tuaj ntawm lub moos Sekhee thiab lub moos Silau thiab lub nroog Xamali tuaj. Lawv chais hwj txwv du lug thiab tej ris tsho ntuag tag, thiab ib ce raug muab suam to tag. Lawv coj qoob loo xyeem thiab hmoov tshuaj tsw qab tuaj xyeem rau ntawm Yawmsaub lub tuam tsev. Mas Nethaniya tus tub Yisama‑ee tawm hauv Mixapa los ntsib nthav lawv cov ntawd, nws taug kev quaj quaj los. Thaum nws ntsib lawv nws hais rau lawv tias, “Cia li tuaj cuag Ahikhas tus tub Kedaliya nawj.” Thaum lawv tuaj txog hauv lub nroog, Nethaniya tus tub Yisama‑ee thiab cov uas nrog nws tuaj kuj muab lawv tua pov tseg tag, thiab muab lawv pov rau hauv pas dej. Tiamsis cov uas tuaj ntawd muaj kaum leej hais rau Yisama‑ee tias, “Thov tsis txhob tua peb, rau qhov peb muaj mog muaj qeb muaj roj muaj zib ntab zais rau tom teb.” Yog li no nws thiaj tsis muab lawv tua nrog cov uas nrog lawv tuaj ua ke. Lub pas dej uas Yisama‑ee muab cov uas nws tua tuag pov rau hauv yog lub pas dej loj uas vajntxwv Axa khawb los tau dej siv rau thaum cov Yixayee tus vajntxwv Npa‑asa tuaj ua rog rau lawv. Mas Nethaniya tus tub Yisama‑ee kuj muab cov uas nws tua tuag tso puv nkaus rau hauv. Mas Yisama‑ee ntes cov neeg hauv Mixapa huvsi, uas yog vajntxwv tej ntxhais thiab tej pejxeem uas tseem tshuav nyob hauv Mixapa sawvdaws, yog cov uas Nenpuxaladas uas yog tus thawj rog zov vajntxwv muab cob rau Ahikhas tus tub Kedaliya. Nethaniya tus tub Yisama‑ee ntes lawv coj sawv kev hla mus rau cov neeg Asmoo. Thaum Khale‑a tus tub Yauhanas thiab cov thawj rog uas nrog nws ua ke hnov tej xwm txheej phem uas Nethaniya tus tub Yisama‑ee tau ua ntawd, lawv txawm txhij lawv cov neeg sawvdaws mus ua rog rau Nethaniya tus tub Yisama‑ee. Lawv ntsib nws ntawm lub pas dej loj uas nyob ntawm lub moos Kinpe‑oo. Thaum cov neeg sawvdaws uas Yisama‑ee ntes mus pom Khale‑a tus tub Yauhanas thiab cov thawj rog uas nrog nws ua ke, lawv zoo siab heev. Cov neeg uas Yisama‑ee tau ntes coj hauv Mixapa mus txawm tig kiag khiav rov qab, thiab mus cuag Khale‑a tus tub Yauhanas. Ces Nethaniya tus tub Yisama‑ee thiab yim leej uas nrog nws ua ke txawm khiav dim ntawm Yauhanas mus rau hauv cov neeg Asmoo. Mas Khale‑a tus tub Yauhanas thiab cov thawj tub rog uas nrog nws ua ke coj cov pejxeem sawvdaws uas Nethaniya tus tub Yisama‑ee tau ntes coj hauv Mixapa mus lawm rau thaum uas nws tua Ahikhas tus tub Kedaliya, lawv yog cov tub rog, thiab tej pojniam menyuam thiab tej nraug sam uas Yauhanas coj ntawm Kinpe‑oo rov los. Lawv mus nyob rau ntawm Kelukhihas uas ze Npelehee. Lawv npaj siab yuav khiav mus rau Iyi tebchaws vim yog lawv ntshai cov Kheedia rau qhov uas Nethaniya tus tub Yisama‑ee tau tua Ahikhas tus tub Kedaliya, yog tus uas vajntxwv hauv Npanpiloo tsa ua tus thawj kav lub tebchaws ntawd. Cov thawj tub rog sawvdaws thiab Khale‑a tus tub Yauhanas thiab Hausaya tus tub Axaliya thiab cov pejxeem txij tus yau kawg mus txog tus loj kawg sawvdaws tau tuaj, thiab hais rau Yelemi uas yog xibhwb cev Vajtswv lus tias, “Thov koj mloog peb tej lus taij thov thiab koj thov Yawmsaub uas yog koj tus Vajtswv pab peb cov uas tseem tshuav nyob no sawvdaws, rau qhov peb tshuav tsawg kawg li raws li koj lub qhov muag pom ntsoov. Thov Yawmsaub uas yog koj tus Vajtswv qhia rau peb paub txojkev uas peb yuav tsum mus thiab qhia tej uas peb yuav tsum ua.” Yelemi uas cev Vajtswv lus hais rau lawv tias, “Kuv hnov nej hais lawm. Saib maj, kuv yuav thov Yawmsaub uas yog nej tus Vajtswv raws li nej tej lus taij thov. Yog Yawmsaub teb li cas rau nej kuv yuav hais rau nej. Kuv yuav tsis npog ib yam dabtsi li.” Mas lawv hais rau Yelemi tias, “Thov Yawmsaub ua timkhawv ncaj ncees thiab tseeb rau peb yog peb tsis ua raws li txhua lo lus uas Yawmsaub uas yog koj tus Vajtswv txib koj qhia peb. Txawm yog nws teb zoo thiab tsis zoo los peb yuav mloog Yawmsaub uas yog peb tus Vajtswv tej lus uas peb txib koj mus thov, mas thaum peb mloog Yawmsaub uas yog peb tus Vajtswv tej lus peb thiaj noj qab nyob zoo.” Thaum puv kaum hnub lawm Yawmsaub hais lus tuaj rau Yelemi. Mas nws thiaj hu Khale‑a tus tub Yauhanas thiab cov thawj tub rog sawvdaws uas nrog nws nyob thiab cov pejxeem sawvdaws txij tus yau kawg mus txog tus loj kawg tuaj, thiab hais rau lawv tias, “Yawmsaub uas yog Yixayee tus Vajtswv uas nej tau txib kuv coj nej tej lus taij thov mus hais rau nws hais li no tias, ‘Yog nej nyob hauv lub tebchaws no kuv yuav tsim tsa nej thiab tsis muab nej rhuav, kuv yuav muab nej cog tsis muab nej dob, rau qhov kuv tu siab tej xwm txheej phem uas kuv tso rau nej lawm. Tsis txhob ntshai tus vajntxwv hauv Npanpiloo uas nej yeej los ntshai ntawd.’ Yawmsaub hais tias, ‘Tsis txhob ntshai nws vim kuv twb nrog nej nyob lawm, yuav cawm nej thiab tso nej dim hauv nws txhais tes. Kuv yuav khuvleej nej xwv nws thiaj khuvleej nej thiab kheev nej nyob hauv nej lub tebchaws.’ Tiamsis yog nej tsis mloog Yawmsaub uas yog nej tus Vajtswv tej lus, es nej hais tias, ‘Peb yuav tsis nyob hauv lub tebchaws no,’ thiab hais tias, ‘Peb tsis yeem, peb yuav mus rau hauv Iyi tebchaws, yog qhov chaw uas peb yuav tsis pom muaj kev ua rog thiab yuav tsis hnov suab raj txhib rog, thiab tsis tshaib plab thiab peb yuav nyob qhov ntawd,’ cov Yuda uas tseem tshuav nyob 'e, cia li mloog Yawmsaub tej lus. Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, ‘Yog nej npaj siab yuav mus rau hauv Iyi tebchaws thiab mus nyob qhov ntawd, mas rab ntaj uas nej ntshai yuav caum cuag nej rau hauv Iyi tebchaws, thiab tej kev tshaib nqhis uas nej ntshai ntawd yuav caum nej qab mus rau hauv Iyi tebchaws thiab nej yuav tuag rau qhov ntawd. Txhua tus uas npaj siab mus nyob rau hauv Iyi tebchaws yuav tuag hniav ntaj hniav riam thiab tuag tshaib tuag nqhis thiab tuag mob kis, yuav tsis tshuav ib tug nyob lossis dim tej xwm txheej phem uas kuv yuav tso los rau saum lawv.’ “Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, ‘Kuv nchuav kuv txojkev chim kev npau rau saum cov uas nyob hauv Yeluxalees li cas, kuv kuj yuav nchuav kuv txojkev npau rau saum nej rau thaum nej mus txog Iyi tebchaws ib yam li ntawd thiab. Luag yuav tuav nej lub npe tsawm foom, nej yuav ua chaw rau luag ceeb thiab ntshai, thiab nej yuav ua lo lus tsawm foom thiab nej yuav raug luag thuam luag. Nej yuav tsis pom lub chaw no dua li lawm.’ Cov Yuda uas tseem tshuav nyob 'e, Yawmsaub tau hais rau nej tias, ‘Tsis txhob mus rau Iyi tebchaws.’ Nej cia li paub tseeb tias hnub no kuv twb ntuas nej tias nej tau yuam kev puas rau nej txojsia, vim yog nej txib kuv mus cuag Yawmsaub uas yog nej tus Vajtswv hais tias, ‘Thov koj pab peb thov Yawmsaub uas yog peb tus Vajtswv. Yawmsaub uas yog peb tus Vajtswv hais li cas, thov qhia rau peb mas peb yuav ua li ntawd.’ Mas hnub no kuv twb qhia Yawmsaub tej lus rau nej lawm, tiamsis nej tsis mloog Yawmsaub uas yog nej tus Vajtswv tej lus ib qho li, yog tej uas Yawmsaub txib kuv los hais rau nej. Vim li no nimno cia li paub tseeb tias nej yuav tuag hniav ntaj thiab tuag tshaib tuag nqhis thiab tuag mob kis rau hauv lub chaw uas nej ntshaw mus nyob ntawd.” Thaum Yelemi hais Yawmsaub uas yog lawv tus Vajtswv tej lus txhua lo rau cov pejxeem mloog tag lawm, yog tej lus uas Yawmsaub uas yog lawv tus Vajtswv txib Yelemi mus hais rau lawv, mas Hausaya tus tub Axaliya thiab Khale‑a tus tub Yauhanas thiab txhua tus txivneej uas khav theeb hais rau Yelemi tias, “Koj dag xwb. Yawmsaub uas yog peb tus Vajtswv tsis tau txib kom koj los hais tias, ‘Tsis txhob mus nyob rau nram Iyi tebchaws.’ Tiamsis Neliya tus tub Npalu tshum kom koj tawm tsam peb, es yuav muab peb cob rau hauv cov Kheedia txhais tes, kom lawv thiaj tua tau peb thiab coj peb mus poob tebchaws rau hauv Npanpiloo.” Khale‑a tus tub Yauhanas thiab cov thawj tub rog txhua tus thiab cov pejxeem sawvdaws tsis mloog Yawmsaub tej lus uas hais kom nyob hauv Yuda tebchaws xwb. Mas Khale‑a tus tub Yauhanas thiab cov thawj tub rog txhua tus coj cov neeg Yuda sawvdaws uas tseem tshuav nyob khiav mus, yog cov uas raug ntiab mus nyob hauv txhua lub tebchaws lawm es rov los nyob hauv Yuda, tsis hais txivneej, pojniam, menyuam thiab vajntxwv tej ntxhais, thiab txhua tus uas tus thawj rog Nenpuxaladas uas zov vajntxwv tau muab tseg cia rau Kedaliya uas yog Ahikhas tus tub thiab yog Safas tus xeeb ntxwv. Yauhanas kuj coj Yelemi uas ua xibhwb cev Vajtswv lus thiab Neliya tus tub Npalu mus. Lawv txawm mus txog Iyi tebchaws, vim yog lawv sawvdaws tsis mloog Yawmsaub tej lus. Mas lawv thiaj mus txog ntawm lub moos Thapahe. Mas Yawmsaub hais lus tuaj rau Yelemi hauv lub moos Thapahe tias, “Cia li nqa tej pob zeb loj hauv koj txhais tes coj mus zais rau hauv tej kem zeb uas pua txojkev uas mus rau hauv Falau lub tsev hauv lub moos Thapahe tab meeg cov neeg Yuda, thiab hais rau lawv tias, ‘Yawmsaub tus muaj hwjchim loj kawg nkaus, uas yog Yixayee tus Vajtswv hais li no tias, Saib maj, kuv yuav hu thiab coj vajntxwv Nenpukhanexa hauv Npanpiloo uas yog kuv tus qhev tuaj, mas nws yuav txawb nws lub zwm txwv thiab tsa nws lub tsev ntaub vajntxwv rau saum tej pob zeb uas kuv muab zais cia no. Nws yuav tuaj ntaus Iyi tebchaws, mas cov uas twb npaj rau kev mob kis kuj yuav muab rau kev mob kis, thiab cov uas twb npaj rau luag ntes mus, kuj muab rau luag ntes mus, cov uas twb npaj rau hniav ntaj hniav riam, kuj muab rau hniav ntaj hniav riam. Nws yuav zes taws hlawv Iyi tej tsev dab, thiab muab hlawv pov tseg thiab lws lawv tej dab mlom coj mus. Nws yuav muab lub tebchaws Iyi ntxuav ib yam li tus yug yaj ntxhua lub tsho ntev kom tuv ploj tag, thiab nws yuav tawm qhov ntawd mus tso siab plhuav. Nws yuav muab tej ncej teev dab hauv lub moos Heli‑aupoli hauv Iyi tebchaws rhuav tag, thiab yuav muab hluavtaws hlawv Iyi tej tsev dab pov tseg.’ ” Yawmsaub hais lus tuaj rau Yelemi ntsig txog cov Yudai sawvdaws hauv Iyi tebchaws, uas nyob hauv lub moos Midoo thiab Thapahe thiab Meefi thiab hauv tebchaws Palau, hais tias, “Yawmsaub tus muaj hwjchim loj kawg nkaus, uas yog Yixayee tus Vajtswv, hais li no tias, Nej twb pom tej xwm txheej phem uas kuv tso los rau hauv Yeluxalees thiab tej moos hauv Yuda huvsi. Saib maj, niaj hnub nimno tej moos ntawd nyob do cuas cia tsis muaj leejtwg nyob hauv li. Twb yog vim tej kev phem uas lawv ua zes ua rau kuv chim, yog qhov uas lawv mus hlawv xyab thiab ua koom tu luag tej dab uas lawv tsis tau paub dua li, tsis hais lawv lossis nej thiab nej tej poj koob yawm txwv. Tiamsis kuv twb tso kuv cov tub qhe uas yog cov xibhwb cev kuv lus sawvdaws tuaj rau nej tsis tu ncua hais tias, ‘Nej tsis txhob ua tej kev qias vuab tsuab no uas kuv ntxub.’ Tiamsis lawv tsis mloog, lawv tsis tig ntsej mloog es tig hlo ntawm tej kev phem thiab tseg tsis txhob hlawv xyab rau luag tej dab. Vim li no kuv thiaj nchuav kuv txojkev chim kev npau taws los rau hauv Yuda tej moos thiab hauv tej kev hauv lub nroog Yeluxalees, mas tej moos ntawd thiaj raug muab tso tseg nyob do cuas yam li niaj hnub nimno. Mas nimno Vajtswv Yawmsaub tus muaj hwjchim loj kawg nkaus, uas yog Yixayee tus Vajtswv, hais li no tias, Ua cas nej ua tej kev phem loj no rau nej ris? Nej txiav tej pojniam txivneej tej menyuam yaus thiab menyuam mos tawm hauv Yuda nej thiaj tsis tshuav neeg nyob li. Ua cas nej txhais tes yuav ua tej uas zes ua rau kuv chim? Yog qhov uas nej hlawv xyab rau luag tej dab hauv Iyi tebchaws uas nej los nyob no, nej thiaj raug muab txiav pov tseg thiab ua lo lus tsawm foom thiab yuav raug ib tsoom tebchaws huvsi hauv ntiajteb thuam luag. Nej tsis nco qab tej kev phem uas nej tej poj koob yawm txwv ua, thiab tej kev phem uas Yuda tej vajntxwv ua thiab lawv cov pojniam ua, thiab tej kev phem uas nej thiab nej tej pojniam ua, hauv Yuda tebchaws thiab hauv tej kev hauv Yeluxalees lawm lov? Txawm yog niaj hnub nimno los lawv tsis txo hwjchim, thiab tsis hwm tsis ntshai kuv, thiab tsis ua raws li kuv txoj kevcai thiab kuv tej kab ke uas kuv qhia rau nej thiab nej tej poj koob yawm txwv. “Vim li no, Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, Saib maj, kuv yuav tsom ntsoov coj xwm txheej phem los raug nej, thiab yuav txiav Yuda pov tseg huvsi. Kuv yuav muab cov Yuda uas tseem tshuav nyob yog cov uas tau npaj siab mus nyob rau hauv Iyi tebchaws, mas lawv yuav raug puam tsuaj tag huvsi. Lawv yuav ntog tag hauv Iyi tebchaws, lawv yuav raug hniav ntaj thiab kev tshaib nqhis puam tsuaj tag. Txij tus me kawg txog tus loj kawg lawv yuav tuag hniav ntaj thiab tuag tshaib tuag nqhis. Luag yuav tuav lawv lub npe tsawm foom, lawv yuav ua chaw rau luag ceeb thiab ntshai, thiab lawv yuav ua lo lus tsawm foom thiab lawv yuav raug luag thuam luag. Kuv yuav rau txim rau lawv cov uas mus nyob hauv Iyi tebchaws ib yam li kuv xuas ntaj xuas kev tshaib nqhis thiab mob kis rau txim rau Yeluxalees, ua rau cov neeg Yuda uas tseem tshuav nyob uas tuaj nyob hauv Iyi tebchaws yuav tsis dim ib tug li thiab tsis tshuav uas yuav rov mus nyob hauv Yuda tebchaws, yog lub chaw uas lawv xav rov mus nyob. Tiamsis lawv tsis tau rov mus li, tsuas yog qee leej uas khiav mus cawm siav xwb.” Mas cov txivneej sawvdaws uas paub hais tias nws pojniam tau hlawv xyab rau luag tej dab, thiab tej pojniam uas sawv ua ke coob coob ntawd, yog sawvdaws uas nyob hauv Palau hauv Iyi tebchaws, teb Yelemi tias, “Tej lus uas koj tuav Yawmsaub lub npe hais rau peb, peb tsis mloog. Peb yuav ua txhua yam raws li peb yeem lus cia, yog hlawv xyab xyeem rau tus dab poj vaj saum ntuj thiab hliv cawv xyeem rau nws raws li uas peb txeev ua, uas yog peb thiab peb tej poj koob yawm txwv thiab peb tej vajntxwv thiab cov thawj ua rau hauv Yuda tej moos thiab tej kev hauv Yeluxalees. Thaum peb ua li ntawd peb muaj zaub mov noj txaus thiab noj qab nyob zoo thiab tsis pom ib yam xwm txheej phem li. Tiamsis txij thaum peb tseg tsis hlawv xyab rau tus dab poj vaj saum ntuj thiab tsis hliv cawv xyeem rau nws peb txawm pluag txhua yam thiab raug kev puam tsuaj ntawm hniav ntaj thiab kev tshaib nqhis.” Cov pojniam hais tias, “Thaum peb hlawv xyab rau tus dab poj vaj saum ntuj thiab hliv cawv xyeem rau nws, qhov uas peb ua lub ncuav zoo li dab poj vaj saum ntuj xyeem thiab hliv cawv xyeem rau nws ntawd, peb cov txiv tsis pom zoo lov?” Mas Yelemi hais rau cov pojniam txivneej sawvdaws uas teb nws, hais tias, “Tej xyab uas nej hlawv hauv Yuda tej moos thiab tej kev hauv Yeluxalees tsis hais nej thiab nej tej poj koob yawm txwv thiab nej tej vajntxwv thiab nej cov thawj thiab tej pejxeem, Yawmsaub tsis tau muab cim cia lov? Nws nco tsis txog lov? Yawmsaub thev tsis taus nej tej kev phem kev qias vuab tsuab uas nej ua ntawd ntxiv mus lawm. Vim li no nej lub tebchaws thiaj raug muab tso tseg nyob do cuas thiab ua lub chaw uas tsawm foom, tsis muaj neeg nyob yam li niaj hnub nimno. Vim yog nej hlawv xyab thiab vim yog nej ua txhaum rau Yawmsaub thiab tsis mloog Yawmsaub tej lus thiab tsis ua raws nws txoj kevcai thiab nws tej kab ke thiab nws tej lus qhia, tej xwm txheej phem no thiaj raug nej yam li niaj hnub nimno.” Yelemi hais rau cov neeg huvsi thiab cov pojniam huvsi tias, “Nej cov neeg Yuda uas nyob hauv Iyi tebchaws sawvdaws, cia li mloog Yawmsaub tej lus. Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, Nej thiab nej tej pojniam tau hais ntawm nej lub qhov ncauj ntag thiab nej txhais tes tau ua kom tiav, raws li nej tau hais tias, ‘Peb yuav ua tej uas peb tau yeem lus cia tiag tiag li, peb yuav hlawv xyab rau dab poj vaj saum ntuj thiab hliv cawv xyeem rau nws.’ Nej cia li tuav rawv tej uas nej yeem lus tseg thiab pauj tej uas nej yeem lus maj. “Vim li no, cov neeg Yuda uas nyob hauv Iyi tebchaws sawvdaws 'e, cia li mloog Yawmsaub tej lus. Yawmsaub hais tias, ‘Saib maj, kuv tuav kuv lub npe uas loj kawg cog lus khov kho tseg tias cov neeg Yuda uas nyob hauv Iyi tebchaws tsis hais nyob qhovtwg tsis muaj ib lub qhov ncauj twg yuav tuav kuv lub npe twv tias, “Muaj Vajtswv Yawmsaub uas muaj txojsia nyob pom.” Saib maj, kuv ntsia ntsoov lawv rau qhov phem tsis yog ntsia rau qhov zoo. Cov neeg Yuda uas nyob hauv Iyi tebchaws sawvdaws yuav raug hniav ntaj thiab kev tshaib nqhis puam tsuaj tag mus txog thaum lawv suaj kaum kiag. Thiab cov uas khiav dim hniav ntaj yuav khiav hauv Iyi tebchaws mus rau Yuda tebchaws muaj tsawg kawg, thiab cov Yuda uas tshuav nyob huvsi uas khiav los nyob hauv Iyi tebchaws yuav paub tias leejtwg tej lus tseeb, yog lawv li tseeb los yog kuv li tseeb.’ Yawmsaub hais tias, ‘No yog tej txujci uas yuav qhia rau nej paub tias kuv yuav rau txim rau nej hauv lub chaw no, kom nej thiaj paub tias kuv tej lus uas hais kev puam tsuaj rau nej yeej muaj tseeb.’ Yawmsaub hais li no tias, ‘Kuv yuav muab Iyi tus vajntxwv Falau Haufa rau hauv nws cov yeeb ncuab txhais tes thiab muab rau hauv cov uas nrhiav txov nws txojsia txhais tes, ib yam li uas kuv muab Yuda tus vajntxwv Xedekhiya rau hauv vajntxwv Nenpukhanexa hauv Npanpiloo txhais tes, uas yog nws tus yeeb ncuab thiab nrhiav txov nws txojsia.’ ” Xyoo plaub uas Yauxiya tus tub Yehauyakhi ua vajntxwv kav mas Neliya tus tub Npalu tau muab cov lus no los sau rau hauv thooj ntawv raws li xibhwb Yelemi kom nws sau. No yog tej lus uas Yelemi hais ntxiv. “Npalu 'e, Yawmsaub tus muaj hwjchim loj kawg nkaus uas yog Yixayee tus Vajtswv, hais rau koj li no tias, Koj hais tias, ‘Kuv raug txom nyem, vim yog Yawmsaub tsav kev ntxhov siab nyuaj siab rau kuv tej kev mob. Kuv ntsaj txog siav lawm, tsis tau so li.’ Koj cia li hais rau nws tias, ‘Yawmsaub hais li no, Saib maj, yam uas kuv tsim tau los, kuv yuav muab rhuav pov tseg, thiab yam uas kuv cog tau kuv yuav muab dob tseg, tej ntawd yog lub tebchaws huvsi. Mas koj tseem yuav nrhiav meej mom loj rau koj no lov? Tsis txhob nrhiav lawm lauj. Rau qhov Yawmsaub hais tias, Saib maj, kuv tabtom tso xwm txheej phem los rau tej neeg sawvdaws, kuv yuav pub koj tau txojsia ua nqe zog hauv tshav rog rov los hauv txhua qhov uas koj mus.’ ” Yawmsaub tej lus uas hais tuaj rau Yelemi uas yog xibhwb cev Vajtswv lus ntsig txog ib tsoom tebchaws. No yog tej uas hais txog Iyi tebchaws, hais txog Iyi tus vajntxwv Falau Nekhau pab tub rog uas nyob ntawm ntug dej Yufeti hauv lub moos Khakhemi, uas vajntxwv Nenpukhanexa hauv Npanpiloo ntaus yeej, rau xyoo plaub uas Yauxiya tus tub Yehauyakhi ua vajntxwv kav Yuda. “Cia li npaj daim hlau tiv thaiv loj thiab daim uas me, thiab tawm mus ua rog. Cia li nog eeb rau nees, cia li nce kiag caij nees. Cia li ntoo nej tej mom hlau mus sawv ntawm nej lub chaw ua rog thiab hov nej rab hmuv thiab hnav nej lub tsho hlau. Kuv pom dabtsi? Lawv ntshai kawg li, lawv tig loo khiav rov qab. Lawv tej tub rog raug muab ntaus ntog thiab khiav sai kawg li lawm. Lawv tsis tig saib qab li. Kev txhawj kev ntshai muaj rau txhua fab.” Yawmsaub hais li no ntag. “Tus uas nrawm kuj khiav tsis taus, tub rog kuj khiav tsis dim, lawv dawm thiab ntog tag rau sab qaum teb ped ntawm ntug dej Yufeti. “No yog leejtwg nev, nyab kiag tuaj zoo yam nkaus li tus dej Nai, zoo yam nkaus li tej dej sab siv ntws ceev? Iyi nyab kiag tuaj zoo yam nkaus li tus dej Nai, zoo yam nkaus tej dej sab siv ntws ceev. Nws hais tias, ‘Kuv yuav sawv, kuv yuav nyab lub ntiajteb. Kuv yuav ua rau tej moos thiab tej neeg puam tsuaj tag.’ Tej nees 'e, cia li sawv kev mus, tej tsheb nees ua rog 'e, cia dhia nrawm nroos. Cia cov tub rog tawm mus, yog cov neeg Khuj thiab cov neeg Phuj uas tuav daim hlau thaiv, thiab cov neeg Lus uas txawj tua hneev. Hnub ntawd yog Vajtswv Yawmsaub uas muaj hwjchim loj kawg hnub, yog hnub uas ua pauj, yog hnub uas nws yuav ua pauj rau nws cov tshawj chim. Rab ntaj yuav noj kom tsau, thiab haus lawv cov ntshav kom pov khawv, vim yog Vajtswv Yawmsaub uas muaj hwjchim loj kawg nkaus ua kevcai tua xyeem rau hauv sab qaum teb ped ntawm ntug dej Yufeti. Iyi tus ntxhais uas dawb huv 'e, cia li nce mus rau Kile‑a, mus muab tshuaj. Koj twb siv tshuaj ntau kawg lawm tsis tau qabhau, mas koj kho tsis tau kom zoo. Tej tebchaws twb hnov txog koj txojkev txaj muag, koj lub suab quaj mus thoob ntiajteb, vim yog cov tub rog sib dawm, lawv ib txhij ntog tag.” Yawmsaub tej lus uas hais rau Yelemi uas yog xibhwb cev Vajtswv lus hais txog qhov uas vajntxwv Nenpukhanexa hauv Npanpiloo tuaj ntaus Iyi tebchaws. “Cia li tshaj tawm hauv Iyi, thiab piav hauv lub moos Midoo, cia li piav hauv lub moos Meefi thiab lub moos Thapahe, hais tias, ‘Sawv ntsug thiab npaj kom txhij, rau qhov rab ntaj yuav noj puag ncig nej.’ Ua cas tus dab Api khiav lawm? Ua cas nej tus dab mlom txiv nyuj nyob tsis ruaj? Vim yog Yawmsaub muab nws thawb ntog. Nej cov neeg coob coob kuj dawm thiab ntog, thiab lawv ib leeg hais rau ib leeg tias, ‘Cia li sawv tsees nawj, cia peb rov qab mus rau ntawm peb haiv neeg, mus rau lub tebchaws uas yug peb, vim yog tim tus uas quab yuam rab ntaj.’ Cia li hu cov Iyi tus vajntxwv Falau lub npe hais tias, ‘Tus uas tshoob hawb tso tej sijhawm tag dawb.’ ” Tus vajntxwv uas lub npe hu ua Yawmsaub uas muaj hwjchim loj kawg nkaus hais tias, “Kuv yeej muaj txojsia nyob, mas yuav muaj ib tug tuaj zoo ib yam li lub roob Thanpau uas nyob hauv nruab nrab tej roob thiab zoo yam li lub roob Khamee ntawm ntug hiavtxwv. Cov neeg Iyi 'e, cia li hwbxwm tej qhov txhia chaw siv rau thaum nej raug ntes coj mus, rau qhov lub moos Meefi yuav pob tag, nyob do cuas cia, tsis muaj neeg nyob. “Iyi yog tus xyuas nyuj uas zoo nkauj, tiamsis ib tug yoov nyuj sab qaum teb ped tuaj tom nws. Txawm yog nws cov tub rog uas ntiav nrog nws nyob zoo yam nkaus li tej menyuam nyuj rog rog, los lawv cia li tig kiag khiav tag mus ua ke, lawv tsis tiv rog kiag li, vim yog hnub uas lawv raug puam tsuaj twb los txog lawv lawm, yog lub sijhawm uas rau txim rau lawv. Nws ua lub suab zoo yam li tus nab uas tabtom ntaug leev mus, vim yog nws cov yeeb ncuab tuaj ua ib pab coob coob, thiab coj taus tuaj tawm tsam nws zoo yam li cov neeg uas tuaj ntov ntoo.” Yawmsaub hais tias, “Txawm yog nws lub hav zoov ntom nti los lawv yuav muab ntov tag huvsi, rau qhov lawv cov coob dua tej kooj txig twb suav tsis txheeb. Iyi tus ntxhais yuav raug txaj muag, nws yuav raug muab cob rau hauv ib haiv neeg uas nyob sab qaum teb ped txhais tes.” Yawmsaub tus muaj hwjchim loj kawg nkaus uas yog Yixayee tus Vajtswv hais tias, “Saib maj, kuv yuav coj kev rau txim rau tus dab Asmoo hauv lub moos Thenpe, thiab rau Falau thiab rau Iyi thiab Iyi tej dab thiab nws tej vajntxwv, yog rau txim rau Falau thiab cov uas tso siab rau nws. Kuv yuav muab lawv cob rau hauv cov uas nrhiav txov lawv txojsia txhais tes, yog vajntxwv Nenpukhanexa hauv Npanpiloo thiab nws cov thawj rog txhais tes. Dhau yav tom qab Iyi mam li muaj neeg nyob, ib yam li thaum ub.” Yawmsaub hais li no ntag. “Kuv tus qhev Yakhauj 'e, tsis txhob ntshai, Yixayee 'e, tsis txhob poob siab nthav, rau qhov, saib maj, kuv yuav cawm neb dim hauv lub chaw uas deb los, thiab pab neb tej tub ki xeeb ntxwv tawm hauv lub tebchaws uas lawv raug ntes los. Yakhauj yuav rov los thiab nyob kaj siab lug thiab noj qab nyob zoo, tsis muaj leejtwg yuav ua rau nws ntshai.” Yawmsaub hais tias, “Kuv tus qhev Yakhauj 'e, tsis txhob ntshai vim kuv nrog nraim koj nyob. Kuv yuav muab txhua lub tebchaws uas kuv tau ntiab nej mus nyob hauv lawd rhuav kom puam tsuaj tag huvsi, tiamsis kuv tsis ua rau nej puam tsuaj tag. Kuv yuav nplawm qhuab qhia nej raws li uas tsim nyog ua. Kuv yeej yuav tsis tseg qhov uas rau txim rau nej.” Yawmsaub tej lus uas hais tuaj rau Yelemi uas yog xibhwb cev Vajtswv lus hais txog cov Filixatee, yog ua ntej uas Falau tsis tau ntaus lub moos Kaxa. Yawmsaub hais li no tias, “Saib maj, tej dej tabtom ntws sab qaum teb ped los yuav nphau tej niag nthwv tuaj, yuav nyab lub tebchaws thiab txhua yam uas nyob hauv, tsis hais lub nroog thiab tej neeg uas nyob hauv. Neeg yuav quaj qw, txhua tus uas nyob hauv lub tebchaws yuav quaj nyiav. Thaum uas hnov nws tej txiv nees suab rau nrov, thiab hnov tej tsheb nees ua rog dhia ceev tuaj, thiab hnov lub suab log tsheb nrov vig voog tuaj, leej txiv tsis tig los saib nws tej menyuam li vim nws txhais tes tsaug leeg lawm, vim yog hnub uas cov Filixatee yuav puam tsuaj huvsi twb los txog lawm, uas yog hnub uas yuav rhuav tshem cov neeg uas tseem tshuav nyob uas yuav pab lub nroog Thailab thiab lub moos Xaidoo. Yawmsaub rhuav cov Filixatee puam tsuaj tag, yog cov uas tuaj ntawm ntug hiavtxwv Khathau uas tseem tshuav nyob. Lub moos Kaxa chais plaubhau nyob do hau cuas lawm, thiab lub moos Akheloo nyob ntsiag to. Cov uas nyob nruab tiag uas tseem tshuav nyob 'e, nej yuav suam nej lub cev ntev li cas? Au Yawmsaub rab ntaj, tseem yuav ntev li cas koj li so? Cia li nkag rau hauv lub hnab ntaj, cia li so thiab nyob twjywm. Thaum Yawmsaub txib lawm nws yuav nyob twjywm tau li cas? Yawmsaub tsa rab ntaj ntawd tawm tsam Akheloo thiab cov uas nyob ntawm ntug hiavtxwv.” Tej lus uas hais txog Mau‑a. Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, “Nenpau yuav raug txom nyem lauj, rau qhov raug muab tso tseg piam tag. Khiliyatha‑i raug txaj muag, luag txeeb tau lawm, lub chaw ruaj khov kuj raug txaj muag thiab pob tag. Mau‑a lub koob meej ploj tag. Cov neeg hauv lub moos Hesanpoo ntaus tswvyim ua phem rau Mau‑a. Lawv hais tias, ‘Cia li tuaj, peb muab nws rhuav kom ua tsis tau ib lub tebchaws.’ Lub moos Mamee 'e, koj yuav raug muab ua nyob ntsiag to, hniav ntaj yuav caum koj qab. Mloog saib, muaj suab hu ntawm lub moos Haulauna‑i tuaj tias, ‘Kev puam tsuaj, kev rhuav tshem du lug tuaj txog lauj!’ Mau‑a tebchaws raug puam tsuaj lawm, hnov nws tej menyuam quaj qw. Lawv quaj heev taug kev nce mus pem lub moos Luhij. Lawv hnov lub suab quaj ntsuag vim yog raug kev puam tsuaj, ntawm txojkev uas nqes mus nram lub moos Haulauna‑i. Cia li khiav, cia li khiav kom dim. Khiav yam li nees luav qus hauv ntuj nrag teb do. Vim nej tso siab rau nej tej haujlwm thiab nej tej nyiaj txiag, nej yuav raug ntes, thiab tus dab Khemauj yuav khiav tawm tebchaws nrog nws cov pov thawj thiab cov uas ua koom tu tus dab ntawd ua ke. Tus uas ua kom puam tsuaj yuav los rau saum txhua lub moos, tsis muaj ib lub moos twg yuav dim li. Hauv tej hav los yuav puam tsuaj, hauv tej tiaj kuj yuav raug muab ua kom puam tsuaj, raws li uas Yawmsaub tau hais tseg lawd. “Cia li muab kooj tis rau Mau‑a, kom nws thiaj li ya tau tawm mus. nws tej moos yuav raug nyob do cuas cia, tsis muaj neeg nyob hauv li lawm. Cia tus uas tsis kub siab ua Yawmsaub tej haujlwm raug foom tsis zoo, thiab cia tus uas tswj nws rab ntaj tsis tua neeg raug foom tsis zoo. “Mau‑a yeej nyob siab tus yees txij thaum yau los, lawv nyob tus yam nkaus li cawv txiv hmab txo tog hauv lub hub, tsis muab theej rau lub ub lub no, thiab tsis raug poob tebchaws, mas thiaj qab li qub thiab tsw tus qub ntxhiab.” Yawmsaub hais tias, “Vim li ntawd saib maj, lub caij lub nyoog tabtom los yuav txog mas kuv yuav txib tus uas theej tuaj muab lawv theej, thiab muab lawv tej hub nchuav du lug thiab muab lawv tej hub tsoo tawg ua tej dwb daim. Mas Mau‑a yuav txaj muag tus dab Khemauj ib yam nkaus cov Yixayee txaj muag qhov uas lawv tso siab rau dab ntawm Npe‑ee. “Nej cov Mau‑a yuav ua li cas hais tau tias, ‘Peb yog cov tub rog uas siab loj siab tuab thiab txawj ua rog’? Tus uas ua rau Mau‑a thiab Mau‑a tej moos puam tsuaj tag tuaj txog lawm, thiab Mau‑a tej hluas uas txawj ua rog tshaj plaws kuj raug muab tua lawm.” Tus vajntxwv uas lub npe hu ua Yawmsaub uas muaj hwjchim loj kawg nkaus, hais li no ntag. “Vij sub vij sw twb los txog Mau‑a tes lawm, thiab nws txojkev txom nyem nyuaj siab tuaj ze zuj zus lawm. Nej cov uas nyob ib ncig nws sawvdaws thiab nej cov uas paub nws lub npe sawvdaws, cia li quaj ntsuag nws. Cia li hais tias, ‘Nws tus cwj uas muaj hwjchim lov lawm lauj, yog nws tus pas nrig uas muaj meej mom.’ “Cov neeg hauv lub moos Dinpoo 'e, cia li nqes saum nej lub rooj uas muaj meej mom los, cia li zaum saum tej av tawg pleb tawg pluav, rau qhov tus uas ua rau Mau‑a puam tsuaj twb los tawm tsam nej lawm, nws twb muab nej tej chaw ruaj khov ua puam tsuaj lawm. Cov neeg hauv lub moos Alau‑aw 'e, cia li sawv ntawm ntug kev zov. Cia li nug cov txivneej uas khiav los thiab cov pojniam uas dim los, hais tias ‘Muaj xwm txheej dabtsi tshwm tuaj?’ Mau‑a raug txaj muag, vim yog tawg tag lawm. Cia li nyiav thiab quaj. Cia li hais rau ntawm ntug dej Anoo tias Mau‑a raug muab tso tseg piam tag lawm. Kev teem txim poob rau saum tej nras tiaj toj siab, yog lub moos Hauloo, Yaxa, Mefa‑a, Dinpoo, Nenpau, Npedilatha‑i, Khiliyatha‑i, Npekamu, Npeme‑oo, Kheli‑au thiab Npauxa thiab tej moos huvsi hauv Mau‑a tebchaws tsis hais deb thiab ze. Mau‑a txwm kub raug muab txiav lawm, nws txhais npab kuj lov lawm.” Yawmsaub hais li no ntag. “Vim yog nws tsab ua loj tawm tsam Yawmsaub, cia li ua kom nws qaug cawv, xwv nws thiaj li da luj luam saum nws cov ntuav thiab raug luag thuam. Yixayee tsis raug koj thuam luag lov? Koj pom nws yog tub sab lov es koj thiaj hais co hau nto txog nws? Cov Mau‑a 'e, cia li khiav tawm hauv tej moos mus nyob pem tej roob zeb, cia li ua yam nkaus li tus nquab taug uas ua zes rau ntawm rooj qhov tsua. “Peb twb hnov txog Mau‑a tej kev khav theeb, lawv khav theeb heev, lawv tsab ua loj, khav theeb, muaj plhus ntxiag thiab lawv lub siab saib tsis taus luag.” Yawmsaub hais tias, “Kuv paub lawv tej kev muaj plhus. Tej uas lawv khav tsis muaj tseeb, tej uas lawv ua kuj tsis muaj qabhau. Vim li no kuv thiaj quaj nyiav txog Mau‑a, kuv quaj rau cov Mau‑a huvsi. Kuv quaj ntsuag cov neeg hauv Khihele. Tej txiv hmab ntawm lub moos Xima 'e, kuv quaj nej heev dua li quaj lub moos Yaxaw. Nej tej ceg hlav nthuav mus dhau dej hiavtxwv, mus txog lub moos Yaxaw. Tus uas ua kom puam tsuaj twb los raug nej tej txiv ntuj qhua thiab nej tej txiv hmab uas nej twb de los lawm. Txojkev xyiv fab kev zoo siab twb raug muab rho tawm hauv Mau‑a tej liaj teb uas ntsu qoob lawm. Kuv ua rau tej kua txiv hmab tu nrho ntawm lub qhov tsuam txiv hmab. Tsis muaj leejtwg qw zoo siab tsuam kua txiv hmab. Lub suab qw ntawd tsis yog lub suab uas qw xyiv fab. “Lub moos Hesanpoo thiab lub moos Ele‑ale quaj qw, lawv lub suab quaj nrov mus txog lub moos Yahaj, lawv lub suab quaj nrov ntawm Xau‑a mus txog lub moos Haulauna‑i thiab lub moos Elaselisiya, vim yog tej dej ntawm Nili kuj qhuav tag. Kuv yuav coj hnub kawg los rau hauv Mau‑a tebchaws, yog coj los rau tus uas xyeem qhov txhia chaw ntawm tej chaw siab teev dab thiab hlawv xyab rau Mau‑a tej dab.” Yawmsaub hais li no ntag. “Vim li no kuv lub siab thiaj li quaj ntsuag rau Mau‑a yam li lub suab raj nplaim, kuv lub siab quaj ntsuag yam li lub suab raj nplaim rau cov neeg Khihele, vim lawv tej nyiaj txiag uas lawv tau los twb puam tsuaj lawm. Lawv muab txhua lub taubhau chais thiab chais txhua ncauj hwj txwv, thiab muab riam suam lawv tej tes huvsi thiab muab khaub seev tsaj hnav ntawm duav. Saum Mau‑a txhua txheej tsev las tshav thiab hauv tej tshav puam tsuas yog muaj kev quaj ntsuag xwb, vim kuv muab Mau‑a tsoo yam nkaus li tsoo tej twj taig uas tsis siv lawm.” Yawmsaub hais li no ntag. “Saib Mau‑a tawg tag li cas lauj! Saib lawv quaj nyiav li cas lauj! Saib Mau‑a tig kiag rov qab txaj muag kawg li lauj! Vim li no Mau‑a thiaj raug thuam thiab ua lub chaw rau tej neeg uas nyob ib ncig lawv ceeb thiab ntshai.” Yawmsaub hais li no tias, “Saib maj, ib tug qwv tis nkaus ya los yam li tus dav thiab nthuav tis kiag tawm tsam Mau‑a. Nws yuav ntaus yeej tej moos thiab txeeb tau tej chaw ruaj khov. Hnub ntawd Mau‑a tej tub rog lub siab yuav zoo yam nkaus li tus pojniam uas tabtom mob plab yug menyuam lub siab. Mau‑a yuav raug puam tsuaj, ua tsis tau ib haiv neeg li lawm, vim yog lawv tsab ua loj tawm tsam Yawmsaub. Cov Mau‑a 'e, tej kev txhawj kev ntshai thiab tej qhov taub thiab tej hlua cuab nyob ntawm nej xubntiag lawm.” Yawmsaub hais li no ntag. “Tus uas khiav ntawm kev txhawj kev ntshai yuav poob rau hauv qhov taub, tus uas daum tawm hauv qhov taub yuav mag lub voj hlua cuab, vim kuv yuav coj tej no los raug Mau‑a rau xyoo uas yuav rau txim rau lawv.” Yawmsaub hais li no ntag. “Cov uas khiav mus nraim ntxoov ntxoo ntawm lub moos Hesanpoo mas qaug zog tag, vim yog hluavtaws tawm hauv Hesanpoo tuaj, thiab nplaim taws tawm hauv Xihoo lub tsev tuaj, mas ua rau Mau‑a lub hauv pliaj puam tsuaj tag, thiab ua rau cov uas ua nruj ua tsiv tiaj taubhau puam tsuaj tag. Mau‑a 'e, koj yuav raug txom nyem lauj! Dab Khemauj cov neeg puam tsuaj tag, vim koj cov tub thiab koj cov ntxhais raug muab ntes coj mus. Tiamsis yav tom qab kuv yuav pub Mau‑a rov qab vam meej li qub.” Yawmsaub hais li no ntag. Tej lus uas rau txim rau Mau‑a huvsi tag li no lawm. Tej lus uas hais txog cov Asmoo. Yawmsaub hais li no tias, “Yixayee tsis muaj tub li lov? Tsis muaj tus uas tuav qub txeeg qub teg lov? Ua cas dab Mikhoo txeeb tau Kas tebchaws, thiab tej neeg uas teev tus dab ntawd mus nyob hauv Kas tej moos?” Yawmsaub hais tias, “Vim li ntawd, saib maj, lub caij lub nyoog tabtom los yuav txog mas kuv yuav ua kom hnov lub suab ua rog tawm tsam lub moos Lanpa hauv Asmoo tebchaws. Lub moos ntawd yuav pob tag ua tej pawg tsis muaj neeg nyob, thiab tej zej zog ib ncig lub moos ntawd yuav raug muab hlawv tag. Mas cov Yixayee yuav txeeb tau ntawm cov uas twb txeeb mus lawm rov qab los.” Yawmsaub hais li no ntag. “Lub moos Hesanpoo 'e, cia li quaj nyiav, vim yog lub moos Ai raug muab tso tseg piam tag. Lanpa tej ntxhais 'e, cia li muab khaub seev tsaj los hnav, cia li quaj ntsuag, dhia mus dhia los hauv tej kev ntawm tej ciam teb, rau qhov tus dab Mikhoo yuav khiav tawm tebchaws nrog nws cov pov thawj thiab cov uas ua koom tu tus dab ntawd ua ke. Tus ntxhais uas fav xeeb 'e, ua cas koj yuav khav txog koj tej hav, yog tej hav uas muaj dej ntws nto? Koj tso siab rau koj tej nyiaj txiag, hais tias, ‘Leejtwg yuav tuaj ua rog rau kuv naj?’ ” Vajtswv Yawmsaub uas muaj hwjchim loj kawg nkaus hais tias, “Kuv yuav coj kev txhawj kev ntshai ntawm cov neeg sawvdaws uas nyob ib ncig koj los raug koj, mas nej yuav raug muab ntiab tawm mus, txhua tus yuav khiav ncaj nraim ntawm nws xubntiag mus, yuav tsis muaj leejtwg qaws tau cov uas khiav ntawd los ua ke. Tiamsis yav tom qab, kuv yuav pub cov Asmoo rov qab vam meej li qub.” Yawmsaub hais li no ntag. Tej lus uas hais txog Edoo. Yawmsaub uas muaj hwjchim loj kawg nkaus hais li no tias, “Tsis muaj tswvyim nyob hauv lub moos Themas dua li lawm lov? Cov neeg txawj ntse tej lus sablaj uas zoo puam tsuaj tag lawm lov? Lawv tej tswvyim ploj ntais li lawm lov? Cov uas nyob hauv lub moos Dedas 'e, cia li khiav, cia li tig rov qab, cia li khiav mus nkaum qhov taub, vim yog kuv yuav coj xwm txheej phem los raug Exau rau lub sijhawm uas kuv rau txim rau lawv. Yog cov uas de txiv hmab tuaj de ntawm koj, lawv yuav tsis tseg ib txhia cia li lov? Yog tub sab tuaj hmo ntuj, lawv yuav tsis lws kom txaus lawv siab xwb lov? Tiamsis kuv de Exau tej txiv du lug, kuv rhuav nws tej chaw nkaum mas nws tsiv nraim tsis tau li lawm. Nws tej tub ki thiab nws tej txheeb ze thiab nws tej kwvtij zej zog raug puam tsuaj tag, nws tu noob tsis tshuav ib tug li lawm. Cia li muab nej tej menyuam ntsuag tso tseg, kuv yuav tuav lawv txojsia, thiab cia nej tej poj ntsuam tso siab rau kuv.” Rau qhov Yawmsaub hais li no tias, “Yog tus uas tsis tsim nyog haus lub khob no los yuav tsum haus, koj yuav dim kev teem txim tau lov? Koj yeej yuav tsis dim, koj yuav tsum haus.” Yawmsaub hais tias, “Kuv tuav kuv lub npe cog lus khov kho tias lub moos Npauxa yuav ua lub chaw ceeb thiab ntshai, thiab yuav raug luag thuam luag, thiab yuav raug tso tseg piam tag thiab ua lo lus tsawm foom, thiab nws tej moos huvsi yuav muab tso tseg nyob do cuas mus ib txhis.” Kuv hnov xov tuaj ntawm Yawmsaub, thiab ib tug tub tshaj xo raug txib mus hais rau ib tsoom tebchaws tias, “Cia li sau zog tuaj tawm tsam lub tebchaws ntawd, thiab sawv tsees ua rog.” “Saib maj, kuv yuav ua rau koj me dua tej tebchaws huvsi, ua rau ib tsoom neeg saib tsis taus koj. Qhov uas koj ua rau luag ceeb thiab ntshai thiab qhov uas koj lub siab khav theeb, dag ntxias koj. Koj yog tus uas nyob saum tej kem zeb thiab nyob ruaj saum tej ncov roob. Txawm yog koj ua zes nyob siab yam nkaus li tej dav, los kuv yuav muab koj chua nqes qhov ntawd los.” Yawmsaub hais li no ntag. “Edoo yuav ua lub chaw uas luag ceeb thiab ntshai, thiab txhua tus uas hla mus yuav ceeb thiab ntshai kawg thiab yuav thuam vim yog qhov uas lawv raug puam tsuaj tag.” Yawmsaub hais tias, “Ib yam li thaum ub lub moos Xaudoo thiab lub moos Kaumaula thiab tej moos uas nyob ze ntawd raug puam tsuaj tag, yuav tsis muaj neeg mus so rau hauv Edoo ib yam nkaus, thiab yuav tsis muaj neeg nyob hauv Edoo li lawm. Saib maj, kuv yuav ua rau lawv khiav tawm hauv Edoo sai kawg, yam nkaus li tus tsov ntxhuav uas tawm hauv lub hav zoov ntawm ntug dej Yaladee dhia mus huas yaj hauv lub nkuaj uas ruaj khov. Kuv yuav tsa tus uas kuv xaiv cia lawd kav Edoo. Muaj leejtwg zoo cuag li kuv? Leejtwg yuav teem sijhawm rau kuv tuaj? Tus yug yaj twg yuav tawm tsam yeej kuv?” Vim li no cia li mloog tej uas Yawmsaub npaj tseg yuav tawm tsam Edoo thiab tej uas nws npaj siab yuav ua rau cov neeg hauv lub moos Themas. Txawm yog cov me me uas nyob hauv pab ntawd los yeej yuav raug muab cab tawm mus. Lawv lub nkuaj yeej yuav ntshai heev kawg rau tej uas lawv raug. Thaum hnov lub suab uas lawv ntog mas lub ntiajteb yuav ntseeg nkaws, lawv lub suab quaj qw yuav nrov mus txog Hiavtxwv Liab. Saib maj, yuav muaj ib tug sawv tsees qwv tis nkaus ya los yam li tus dav thiab nthuav tis kiag tawm tsam lub moos Npauxa. Hnub ntawd Edoo tej tub rog lub siab yuav zoo yam nkaus li tus pojniam uas tabtom mob plab yug menyuam lub siab. Tej lus uas hais txog lub nroog Damaxaka. “Lub moos Hama thiab lub moos Apa ntxhov siab vim lawv hnov xov phem. Lawv ntshai siab yaj tag, thiab lawv siab fab tag zoo yam nkaus li dej hiavtxwv uas nyob tsis tus. Damaxaka kuj tsaug leeg tag, nws tig kiag khiav thiab ras zom zaws, lawv lwj siab thiab mob ntsaj laws yam nkaus tus pojniam tabtom yug menyuam. Lub nroog uas muaj koob meej raug muab tso tseg lawm lauj, yog lub nroog uas zoo siab xyiv fab. Vim li no tej tub hluas hauv lub nroog ntawd yuav ntog tuag tag rau hauv tej tshav puam, thiab hnub ntawd tej tub rog hauv lub nroog huvsi yuav raug puam tsuaj tag.” Yawmsaub uas muaj hwjchim loj kawg nkaus hais li no ntag. “Kuv yuav zes taws rau lub ntsa loog Damaxaka, thiab hluavtaws yuav kub vajntxwv Npeehada tej chaw ruaj khov.” Hais txog cov Kheda thiab ib cheeb tsam ntawm lub moos Haxau uas vajntxwv Nenpukhanexa hauv Npanpiloo ntaus rog rau, Yawmsaub hais li no tias, “Cia li sawv tsees, mus ua rog rau cov Kheda, cia li muab cov neeg uas nyob sab hnub tuaj ua kom puam tsuaj tag. Lawv tej tsev ntaub thiab lawv tej pab yaj pab tshis, lawv tej ntaub lawv tej qhov txhia chaw huvsi yuav raug muab txeeb mus, lawv tej ntxhuav yuav raug coj ntawm lawv mus. Neeg yuav qw rau lawv tias, ‘Muaj kev txhawj kev ntshai rau txhua fab lauj!’ ” Yawmsaub hais tias, “Cov neeg hauv lub moos Haxau 'e, cia li khiav, cia li mus deb deb, mus nkaum hauv qhov taub tob tob, vim yog vajntxwv Nenpukhanexa hauv Npanpiloo twb ntaus tswvyim phem rau nej, thiab npaj siab tseg tawm tsam nej.” Yawmsaub hais tias, “Cia li sawv tsees mus ua rog rau ib haiv neeg uas nyob siab tus yees, uas nyob tso siab plhuav, tsis muaj rooj loog tsis muaj las rooj li, lawv nyob lawv ib qho xwb. Lawv tej ntxhuav los yuav lws tau los, lawv tej pab nyuj los yuav txeeb tau los. Kuv yuav ua kom cov uas txiav plaubhau txij npoo nplooj ntseg tawg ri sua rau txhua fab raws cua ntsawj, kuv yuav coj tej xwm txheej phem txhua fab los raug lawv.” Yawmsaub hais li no ntag. “Lub moos Haxau yuav ua lub chaw rau hma nkaum, yuav muab tso tseg nyob do cuas mus ib txhis. Yuav tsis muaj leejtwg so tsis muaj leejtwg nyob rau hauv li lawm.” Tej lus uas Yawmsaub hais tuaj rau Yelemi uas ua xibhwb cev Vajtswv lus ntsig txog Elas tebchaws rau thaum Xedekhiya pib ua vajntxwv kav Yuda tebchaws. Yawmsaub uas muaj hwjchim loj kawg nkaus hais li no tias, “Saib maj, kuv yuav muab Elas rab hneev lov, yog yam uas lawv vam khom thiab muaj zog. Thiab kuv yuav coj cua plaub fab kaum ntuj tuaj tawm tsam Elas, thiab kuv yuav ua kom lawv tawg ri sua raws li tej cua ntsawj ntawd, yuav tsis muaj ib lub tebchaws twg uas cov neeg uas raug ntiab hauv Elas mus nyob tsis txog. Kuv yuav ua rau cov Elas ntshai lawv tej yeeb ncuab thiab cov uas nrhiav txov lawv txojsia kawg nkaus li.” Yawmsaub hais tias, “Kuv yuav coj tej xwm txheej phem los raug lawv, yog kuv tej kev chim heev. Kuv yuav tso hniav ntaj hniav riam caum cuag lawv mus txog thaum kuv ua rau lawv puam tsuaj tag. Mas kuv yuav ua kuv lub zwm txwv rau hauv Elas, thiab kuv yuav muab lawv tus vajntxwv thiab lawv cov thawj ua kom puam tsuaj tag.” Yawmsaub hais li no ntag. “Tiamsis yav tom qab kuv yuav pub Elas rov qab vam meej li qub.” Yawmsaub hais li no ntag. Tej lus uas Yawmsaub kom Yelemi uas ua xibhwb cev Vajtswv lus hais txog Npanpiloo thiab hais txog cov Kheedia lub tebchaws. “Cia li tshaj tawm thiab piav rau hauv ib tsoom tebchaws, cia li tsa chij thiab piav nrov, tsis txhob npog kiag li, cia li hais tias, ‘Npanpiloo raug txeeb lawm, tus dab Npee kuj raug txaj muag, tus dab Melauda kuj ntshai kawg li. Tej dab mlom kuj raug txaj muag, thiab tej dab mlom kuj ntshai kawg li.’ “Muaj ib lub tebchaws sab qaum teb ped tuaj tawm tsam lub nroog ntawd, thiab yuav ua rau nws lub tebchaws nyob do cuas cia, tsis muaj leejtwg nyob hauv kiag li, neeg thiab tsiaj txhu yuav khiav tag huvsi.” Yawmsaub hais tias, “Hnub ntawd thiab lub sijhawm ntawd, cov Yixayee thiab cov Yuda yuav tuaj ua ke, yuav quaj taug kev tuaj. Mas lawv yuav nrhiav Yawmsaub uas yog lawv tus Vajtswv. Lawv yuav nug txojkev uas mus rau Xi‑oo, lawv tig kiag ncaj nraim mus rau lub nroog ntawd thiab hais tias, ‘Cia peb cog lus tseg tias peb yuav koom kiag rau Yawmsaub mus ib txhis, thiab pheej nco ntsoov li.’ “Kuv haiv neeg yog cov yaj uas ploj lawm, cov uas yug lawv coj lawv yuam kev lawm, tso lawv khiav rau pem tej roob, lawv thiaj khiav ib lub roob dhau ib lub roob, lawv tsis nco qab lawv lub nkuaj lawm. Sawvdaws uas ntsib lawv kuj muab lawv tom noj, thiab lawv cov yeeb ncuab hais tias, ‘Peb tsis txhaum, rau qhov lawv tau ua txhaum rau Yawmsaub uas yog lawv lub chaw nyob tiag tiag, yog Yawmsaub uas yog lawv tej poj koob yawm txwv lub chaw vam.’ “Cia li khiav tawm hauv Npanpiloo cia li tawm hauv cov Kheedia lub tebchaws, cia li ua zoo yam nkaus li tus txiv tshis uas coj pab tshis kev. Saib maj, kuv yuav tshoov thiab coj ib co tebchaws uas muaj zog tuaj sab ped tuaj tawm tsam Npanpiloo. Lawv yuav txhij lawv tej neeg tuaj tawm tsam nws, mas Npanpiloo yuav raug cov neeg ntawd txeeb tau. Lawv tej xub hneev zoo ib yam nkaus li tej tub rog uas txawj ua rog tsis rov qab los tes dawb tes do. Kheedia tebchaws yuav raug lws, txhua tus uas lws lawv yuav tau txaus nkaus lub siab.” Yawmsaub hais li no ntag. “Cov uas lws kuv qub txeeg qub teg 'e, txawm yog nej zoo siab, txawm yog nej zoo siab xyiv fab kawg, thiab txawm yog nej dhia paj paws yam li tus xyuas nyuj hauv tshav zaub thiab hee yam li tus txiv nees, los nej niam yuav txaj muag kawg, thiab tus uas yug nej yuav poob koob meej. Saib maj, nws yuav ua lub tebchaws uas nyob tom tw, yuav ua tebchaws moj sab qhua uas qhuav heev thiab ua ntuj nrag teb do. Vim yog Yawmsaub txojkev npau taws, yuav tsis muaj neeg nyob hauv Npanpiloo li lawm, nws yuav nyob do cuas qhuav qhawv cia. Txhua tus uas hla Npanpiloo yuav poob siab nthav thiab thuam vim tej qhov txhab uas nws raug ntaus huvsi. Nej txhua tus uas txawj tua hneev, cia li txhij tuaj tawm tsam vij nkaus Npanpiloo. Cia li tua nws, tsis txhob khuvxim xub hneev, vim nws ua txhaum rau Yawmsaub. Cia li tsa suab qw tawm tsam vij nkaus nws, nws twb swb lawm. Tej chaw faj xwm twb pob tag lawm, nws tej ntsa loog kuj raug muab tsoo vau tag lawm. Vim tej no yog Yawmsaub ua pauj, cia li ua pauj rau nws, ua rau nws yam li nws tau ua los lawm. Cia li muab tus uas tseb noob hauv Npanpiloo txiav pov tseg, thiab muab tus uas tuav rab liag rau lub caij hlais txiav mus. Vim yog tus uas quab yuam rab ntaj, txhua tus nyias thiaj li tig mus txog nyias haiv neeg thiab txhua tus nyias khiav mus rau hauv nyias lub tebchaws.” “Yixayee zoo li ib tug yaj uas tej tsov ntxhuav muab ntiab khiav lawm. Chiv thawj Axilia tus vajntxwv tom lawv noj, thaum kawg no vajntxwv Nenpukhanexa hauv Npanpiloo cua lawv tej pob txha.” Vim li no, Yawmsaub tus muaj hwjchim loj kawg nkaus, uas yog Yixayee tus Vajtswv, hais li no tias, “Saib maj, kuv yuav coj kev teem txim los rau Npanpiloo tus vajntxwv thiab nws lub tebchaws, ib yam li kuv teem txim rau Axilia tus vajntxwv. Kuv yuav pub Yixayee rov qab los txog lawv lub tshav zaub, mas lawv yuav tau noj saum lub roob Khamee thiab hauv Npasas, lawv yuav tsau npo saum Efa‑i tej pov roob thiab hauv Kile‑a.” Yawmsaub hais tias, “Hnub ntawd thiab lub sijhawm ntawd, yuav nrhiav lub txim hauv Yixayee los tsis muaj ib qho li. Yuav nrhiav kev txhaum hauv Yuda los tsis muaj kiag li, rau qhov kuv yuav zam txim rau cov neeg uas kuv tso tseg tshuav nyob ntawd.” “Cia li mus ua rog rau lub tebchaws Melatha‑i, thiab ua rog rau cov uas nyob hauv Pekhau.” Yawmsaub hais tias, “Cia li muab lawv tua thiab raws ua kom lawv puam tsuaj tag huvsi, thiab ua txhua yam raws li uas kuv hais kom nej ua. Lub suab ua rog nyob hauv lub tebchaws, thiab lub suab ua kom puam tsuaj loj kawg. Rab rauj uas tsoo lub ntiajteb huvsi kuj raug muab rhuav thiab raug muab lov lawm lauj! Npanpiloo ua lub chaw uas ib tsoom tebchaws ceeb thiab ntshai lauj! Npanpiloo 'e, kuv cuab hlua rau koj, koj kuj mag rooj hlua ntawd, thiab koj tsis paub li. Luag ntsib koj thiab ntes koj vim yog koj siv zog ntsos tawm tsam Yawmsaub. Yawmsaub tau qheb nws lub txhab cuab yeej ua rog, thiab rho nws kev npau taws li cuab yeej tawm los, rau qhov Vajtswv Yawmsaub uas muaj hwjchim loj kawg nkaus tseem muaj haujlwm ua hauv cov Kheedia lub tebchaws. Cia li tuaj plaub fab kaum ntuj tuaj tawm tsam nws, cia li qheb nws tej txhab qoob, cia li muab nws tib ua tej pawg yam li tib mog tib qeb, thiab muab ua puam tsuaj tag huvsi, tsis txhob cia tshuav ib yam kiag li. Cia li muab nws tej txiv nyuj tua huvsi, cia lawv nqes mus rau hauv lub chaw tua. Lawv raug txom nyem lauj, vim lawv lub sijhawm los txog lawm, yog lub sijhawm uas teem lawv lub txim. Mloog saib, cov uas khiav dim hauv Npanpiloo tebchaws mus piav rau hauv Xi‑oo txog tej uas Yawmsaub uas yog peb tus Vajtswv ua pauj, yog nws ua pauj nws lub tuam tsev. “Cia li hu cov uas txawj tua hneev tuaj tawm tsam Npanpiloo, yog txhua tus uas nta hneev. Cia li mus tsuam chaw nyob vij nkaus nws, tsis txhob tseev ib tug khiav dim li. Cia li ua pauj rau nws raws li nws ua lawd, cia li ua rau nws yam li nws tau ua los, vim nws khav theeb tawm tsam Yawmsaub, uas yog tus Dawb Huv hauv cov Yixayee. Vim li no nws tej tub hluas yuav ntog tuag tag rau hauv tej tshav puam, thiab nws tej tub rog huvsi yuav raug puam tsuaj rau hnub ntawd.” Yawmsaub hais li no ntag. Vajtswv Yawmsaub uas muaj hwjchim loj kawg nkaus hais tias, “Tus uas khav theeb saib maj, kuv tawm tsam koj, vim yog koj lub sijhawm los txog lawm, yog lub sijhawm uas kuv yuav rau txim rau koj. Tus uas khav theeb yuav dawm thiab ntog, yuav tsis muaj leejtwg tsa nws sawv, thiab kuv yuav zes taws rau nws tej moos, mas hluavtaws yuav kub txhua yam uas nyob ib ncig ntawm nws.” Yawmsaub uas muaj hwjchim loj kawg nkaus hais li no tias, “Cov Yixayee raug quab yuam thiab cov Yuda kuj raug quab yuam ua ke. Cov uas ntes lawv coj mus kuj tuav lawv ruaj kawg, cov uas ntes lawv tsis yeem tso lawv dim. Tus uas txhiv lawv muaj zog, nws lub npe yog Yawmsaub uas muaj hwjchim loj kawg nkaus. Nws yeej yuav hais lawv tshaj plaub, kom nws thiaj li pub tau txojkev kaj siab lug rau lub ntiajteb, tiamsis pub kev ntxhov siab kev lwj siab rau cov uas nyob hauv Npanpiloo.” Yawmsaub hais tias, “Cia hniav ntaj raug cov Kheedia thiab raug cov uas nyob hauv Npanpiloo thiab raug nws cov thawj thiab cov uas txawj ntse. Cia hniav ntaj raug cov uas saib sij saib yaig kom lawv thiaj li ua neeg ruam. Cia hniav ntaj raug nws tej tub rog, kom lawv thiaj ntshai heev. Cia hniav ntaj raug nws tej nees thiab nws tej tsheb nees ua rog, thiab raug lwm haiv neeg uas ua lawv li tub rog, kom lawv thiaj zoo li tej pojniam. Cia hniav ntaj raug nws tej nyiaj txiag huvsi kom tej nyiaj txiag ntawd thiaj raug lws mus. Cia lub ntuj qhua teb nkig raug nws, kom nws tej dej thiaj qhuav tag, vim lub tebchaws tsuas yog muaj dab mlom xwb thiab lawv qaug siab rau tej dab mlom ntawd. “Vim li no mas tej tsiaj qus thiab tej hma yuav los nyob hauv Npanpiloo, thiab tej noog ntxhuav yuav nyob rau hauv, nws yuav tsis muaj neeg nyob mus ib txhis li, txhua tiam neeg yuav tsis muaj nyob hauv kiag li. Ib yam li thaum Vajtswv muab lub moos Xaudoo thiab lub moos Kaumaula thiab tej moos uas nyob ze rhuav pov tseg, yuav tsis muaj neeg mus so rau hauv Npanpiloo ib yam nkaus, thiab yuav tsis muaj neeg nyob hauv nws.” Yawmsaub hais li no ntag. “Saib maj, ib haiv neeg tabtom tuaj sab qaum teb ped tuaj, yog lub tebchaws uas muaj zog, thiab ntau tus vajntxwv tabtom sawv kev tuaj qab ntuj kawg tuaj. Lawv tuav rawv hneev thiab hmuv, lawv nyaum heev tsis khuvleej leejtwg kiag li. Lawv lub suab nrov vig voog yam li dej hiavtxwv ntas. Lawv caij nees ua ib kab sab ib kab sab tuaj ua rog rau koj nawj, Npanpiloo tus ntxhais 'e. Vajntxwv Npanpiloo hnov tej xov no mas nws txhais tes tsaug leeg tag, txojkev nyuaj siab lwj siab npog nkaus nws, nws mob yam nkaus li pojniam mob plab yuav yug menyuam. Saib maj, kuv yuav ua rau lawv khiav tawm hauv lub nroog sai kawg, yam nkaus li tus tsov ntxhuav uas tawm hauv lub hav zoov ntawm ntug dej Yaladee dhia mus huas yaj hauv lub nkuaj uas ruaj khov. Kuv yuav tsa tus uas kuv xaiv cia lawd kav nws. Muaj leejtwg zoo cuag li kuv? Leejtwg yuav teem sijhawm rau kuv tuaj? Tus yug yaj twg yuav tawm tsam yeej kuv?” Vim li no cia li mloog tej uas Yawmsaub npaj tseg yuav tawm tsam Npanpiloo thiab tej uas nws npaj siab yuav ua rau cov Kheedia lub tebchaws. Txawm yog cov me me uas nyob hauv pab ntawd los yeej yuav raug muab cab tawm mus. Lawv lub nkuaj yeej yuav ntshai heev kawg rau tej uas lawv raug. Thaum hnov lub suab uas Npanpiloo raug ntes lub ntiajteb yuav ntseeg nkaws, nws lub suab quaj qw yuav nrov mus thoob ib tsoom tebchaws. Yawmsaub hais li no tias, “Kuv yuav tshoov ib tug uas ua kev puam tsuaj lub siab kuas tawm tsam Npanpiloo, thiab tawm tsam cov neeg Kheedia. Thiab yuav xa cov uas txawj ntxuaj mus rau Npanpiloo, mas lawv yuav ntxuaj nws. Lawv yuav tsis tseg ib yam dabtsi nyob hauv lub tebchaws rau thaum uas lawv vij txhua fab tuaj, yog hnub uas raug txom nyem ceeblaj. Tsis txhob tseev cov uas txawj tua hneev nta tau hneev, tsis txhob tseev lawv hnav tau lub tsho hlau sawv li. Tsis txhob tseg nws tej tub hluas siav li, cia li muab nws tej tub rog coob coob ua puam tsuaj huvsi. Lawv yuav raug muab tua tuag tag rau hauv Kheedia tebchaws, thiab raug mob hauv nws tej kev. Rau qhov Yixayee thiab Yuda tus Vajtswv uas yog Yawmsaub muaj hwjchim loj kawg nkaus tsis tau tso lawv tseg, txawm yog lawv lub tebchaws muaj kev txhaum txim puv nkaus rau Yixayee tus Vajtswv uas dawb huv kuj xij. “Cia li khiav tawm hauv nruab nrab Npanpiloo, cia txhua tus huas siav dim. Tsis txhob raug tua rau thaum rau txim rau nws, rau qhov no yog lub sijhawm uas Yawmsaub ua pauj, yog Yawmsaub ua pauj rau nws raws li tsim nyog pauj. Npanpiloo twb txeev ua lub khob kub uas nyob hauv Yawmsaub txhais tes, ua rau lub ntiajteb huvsi qaug cawv, thiab tej tebchaws tau haus nws tej cawv txiv hmab, mas tej tebchaws thiaj qaug cawv tag tsis meej pem. Ib pliag ntshis xwb Npanpiloo twb vau pes hlo tawg tag. Cia li quaj nyiav nws. Cia li muab tshuaj kho nws tej mob, tej zaum yuav kho tau nws zoo kaj. ‘Peb xav kho kom Npanpiloo zoo, tiamsis nws tsis zoo. Cia li muab nws tso tseg, peb cia li mus, nyias mus rau nyias lub tebchaws, vim qhov uas txiav txim rau nws loj nce mus nto ntuj, thiab raug muab tsa mus txog ntua qab ntuj. Yawmsaub tsa peb txojcai lawm. Cia li los, cia peb piav Yawmsaub uas yog peb tus Vajtswv tej haujlwm rau hauv Xi‑oo.’ “Cia li hov rab xub vos thiab tuav rawv daim hlau tiv thaiv. Yawmsaub tshoov Midia tej vajntxwv lub siab, vim nws twb npaj siab yuav ua rau Npanpiloo puam tsuaj. No yog qhov uas Yawmsaub ua pauj, yog ua pauj nws lub tuam tsev. Cia li tsa chij ua rog rau lub loog Npanpiloo. Cia li tso neeg zov zoo zoo, thiab tsa cov uas faj xwm, thiab npaj cov uas mus zov kev tos, rau qhov Yawmsaub twb npaj tseg thiab ua kom tiav raws li nws tau hais tseg txog cov neeg hauv Npanpiloo. Koj tus uas nyob ntawm ntau tus dej thiab muaj nyiaj txiag cuab txhiaj cuab tam ntau kawg 'e, koj lub caij kawg los txog lawm, txoj hlua uas ntsuas koj txojsia twb muab txiav tu nrho lawm. Yawmsaub uas muaj hwjchim loj kawg nkaus tau tuav nws lub npe cog lus khov kho. Kuv yeej yuav coj neeg tuaj puv nkaus lub tebchaws, coob yam nkaus li tej kooj txig, mas lawv yuav tsa lub suab qw uas kov yeej koj. “Nws yog tus uas siv nws lub hwjchim tsim lub ntiajteb, thiab siv nws lub tswvyim tsim tsa lub qab ntuj, thiab siv nws txojkev txawj ntse nthuav lub ntuj. Thaum nws tsa nws lub suab hu, tej dej saum nruab ntug nrov vig voog, thiab nws ua huab sawv tim qab ntuj kawg tuaj. Nws ua xob laim rau thaum nag los, thiab coj cua tawm hauv nws tej txhab cua los. Txhua tus neeg tsis thoob tsib thiab tsis paub qabhau. Txhua tus Kws ntaus kub yuav txaj muag vim tej dab mlom uas nws ua, rau qhov nws tej dab mlom yog cuav thiab tsis txawj ua pa kiag li. Tej dab mlom ntawd tsis muaj qabhau kiag li, yog tej uas ntxim thuam luag. Thaum txog sijhawm teem txim, tej ntawd yuav puam tsuaj tag. Tus uas yog Yakhauj li Vajtswv tsis thooj li tej dab mlom ntawd, rau qhov nws yog tus uas tsim txhua yam, thiab haiv neeg Yixayee yog nws qub txeeg qub teg, nws lub npe hu ua Yawmsaub uas muaj hwjchim loj kawg nkaus. “Npanpiloo, koj yog kuv rab qws thiab yog kuv tej cuab yeej ua rog, kuv siv koj tsoo tej tebchaws tawg ua tej dwb daim, kuv siv koj ua rau tej tebchaws puam tsuaj tag. Kuv siv koj tsoo tej nees thiab cov uas caij nees tawg ua tej dwb daim, kuv siv koj tsoo tej tsheb ua rog thiab cov uas tsav tsheb tawg ua tej dwb daim. Kuv siv koj tsoo tej pojniam txivneej tawg ua tej dwb daim, kuv siv koj tsoo tej poj koob yawm txwv thiab tej hluas tawg ua tej dwb daim, kuv siv koj tsoo tej tub hluas ntxhais hluas tawg ua tej dwb daim. Kuv siv koj tsoo cov uas yug yaj thiab lawv pab yaj tawg ua tej dwb daim, kuv siv koj tsoo cov uas ua teb thiab lawv tej nkawm nyuj tawg ua tej dwb daim, kuv siv koj tsoo cov thawj hauv tej moos thiab cov tim xyoob tawg ua tej dwb daim. “Kuv yuav ua pauj rau Npanpiloo thiab cov neeg hauv Kheedia sawvdaws tab meeg koj pom ntsoov, ua pauj rau tej kev phem huvsi uas lawv ua hauv Xi‑oo.” Yawmsaub hais li no ntag. Yawmsaub hais tias, “Lub roob uas ua kom puam tsuaj 'e, koj yog lub roob uas ua kom thoob ntiajteb puam tsuaj, kuv tawm tsam koj. Kuv yuav tsa kuv txhais tes tawm tsam koj, thiab muab koj dov saum tsua los, thiab muab koj ua lub roob uas kub hnyiab tag. Luag yuav tsis muab koj tej pob zeb ib lub twg coj mus ua lub thawj ntawm kaum tsev, thiab tsis coj mus tiag taw ua tsev tiamsis koj yuav ua lub chaw uas muab tso tseg nyob do cuas mus ib txhis.” Yawmsaub hais li no ntag. “Cia li tsa chij ua rog rau hauv ntiajteb, cia li tshuab raj kub yaj rau hauv tej tebchaws, cia li npaj tej tebchaws tuaj ua rog rau nws, cia li hu tebchaws Alalab thiab tebchaws Mini thiab tebchaws Akhena tuaj ua rog rau nws. Cia li tsa ib tug thawj rog mus tawm tsam nws, cia li coj tej nees tuaj coob yam nkaus li kooj txig ua npoj ntws. Cia li npaj tej tebchaws tuaj ua rog rau nws, yog npaj cov Midia tej vajntxwv thiab cov thawj thiab tej tim xyoob, thiab txhua lub tebchaws uas zwm rau Midia. Lub tebchaws ntseeg nkaws mob ntswj ib ce pes yos, rau qhov Yawmsaub yeej yuav ua raws li nws npaj tseg rau Npanpiloo, yuav ua rau Npanpiloo nyob do cuas tsis muaj neeg nyob hauv kiag li. Npanpiloo tej tub rog twb tso tes tag lawm, lawv lam nyob hauv lawv tej chaw ruaj khov xwb. Lawv twb qaug zog tag lawm, lawv zoo li pojniam xwb. Tej vaj tse hauv Npanpiloo tabtom kub hnyiab, tej las rooj kuj lov tag. Ib tug dhia tuaj tag los ib tug dhia tuaj thiab, ib tug tshaj xo tuaj tag los ib tug tuaj thiab, yog tuaj hais rau vajntxwv Npanpiloo tias nws lub nroog twb raug luag txeeb tag nrho lawm. Lub chaw hla dej luag twb txeeb tau lawm, lub chaw faj xwm kub hnyiab tag, thiab tej tub rog kuj ntshai ras zom zaws.” Yawmsaub tus muaj hwjchim loj kawg nkaus uas yog Yixayee tus Vajtswv hais li no tias, “Npanpiloo tus ntxhais zoo yam nkaus li lub tshav ntaus qoob rau thaum luag tuaj tsuj. Ib pliag xwb twb yuav txog lub sijhawm hlais. “Vajntxwv Nenpukhanexa hauv Npanpiloo twb noj kuv lawm, nws muab kuv tsuam lawm, nws ua rau kuv zoo li lub tais uas nyob khoom xwb, nws muab kuv nqos kiag zoo li zaj nqos lawm, nws muab kuv tej qhov txhia chaw uas qab noj puv nkaus nws lub plab, thiab nws muab kuv ntuav tawm mus.” Cia tus uas nyob hauv Xi‑oo hais tias “Cia txojkev ua limhiam ntais ntuj uas ua rau kuv thiab kuv tej kwvtij rov poob rau saum Npanpiloo.” Cia Yeluxalees hais tias, “Kuv cov ntshav cia cov Kheedia ris.” Vim li no Yawmsaub hais li no tias, “Kuv yuav hais koj tshaj plaub thiab sawv koj chaw ua pauj. Kuv yuav ua rau nws lub hiavtxwv qhuav thiab ua rau nws tej hauv dej saus. Mas Npanpiloo yuav pob ua tej niag pawg cia, ua chaw rau hma nkaum, ua lub chaw uas luag ceeb thiab ntshai, thiab ua rau luag thuam, tsis muaj neeg nyob hauv li. Lawv yuav ua ke nyooj laws li tsov ntxhuav, lawv yuav quaj mluj mlom li tej menyuam tsov ntxhuav. Thaum uas lawv ua nyaum heev kuv yuav npaj ib pluag noj haus rau lawv ua kom lawv qaug cawv ua lom vab vab, mus txog thaum lawv tsis meej pem thiab pw tsaug zog mus ib txhis tsis xeev li.” Yawmsaub hais li no ntag. “Kuv yuav coj lawv los tua yam li tua menyuam yaj thiab tua tej txiv yaj txiv tshis. “Npanpiloo raug txeeb lawm lauj, lub nroog uas thoob ntiajteb qhuas raug ntes lawm lauj! Npanpiloo tau ua lub chaw uas ib tsoom tebchaws ceeb thiab ntshai lawm lauj! Dej hiavtxwv nphau tuaj nyab Npanpiloo, tej niag nthwv dej nrov voog tuaj npog nkaus nws. Nws tej moos ua chaw rau luag ceeb thiab ntshai, thiab ua lub tebchaws qhuav nkig nkuav thiab ua ntuj nrag teb do, ua lub tebchaws uas tsis muaj neeg nyob li, thiab tsis muaj leejtwg hla hauv mus li. Kuv yuav rau txim rau tus dab Npee hauv Npanpiloo, thiab ua rau nws ntuav tej uas nws nqos lawm tawm hauv lub ncauj los. Tej tebchaws yuav tsis mus nrhiav nws nchuav nthwv lawm. Npanpiloo tej ntsa loog pob tag lawm lauj! “Kuv cov neeg, cia li tawm hauv nws mus. Cia txhua tus huas kom dim txojsia ntawm qhov uas Yawmsaub npau taws heev. Nej tsis txhob poob siab thiab tsis txhob ntshai tej xov uas hnov hauv lub tebchaws ntawd. Muaj xov tuaj xyoo tag los tseem tuaj xyoo thiab, yog xov hais txog kev ua limhiam ntais ntuj hauv lub tebchaws, thiab ib tug thawj kuj tawm tsam rau ib tug thawj. Vim li no, saib maj, lub caij lub nyoog tabtom los yuav txog mas kuv yuav rau txim rau Npanpiloo tej dab mlom. Nws lub tebchaws huvsi yuav raug txaj muag, thiab nws cov neeg uas raug tua yuav ntog tag rau hauv nruab nrab nws lub tebchaws. Mas lub ntuj thiab lub ntiajteb thiab txhua yam uas nyob hauv yuav qw zoo siab xyiv fab txog Npanpiloo, vim tus uas ua kom puam tsuaj yuav tuaj sab qaum teb ped tuaj tawm tsam nws.” Yawmsaub hais li no ntag. “Npanpiloo yuav tsum ntog tuag tag vim yog nws tua cov Yixayee, ib yam li Npanpiloo ua rau ib tsoom neeg thoob ntiajteb ntog tuag tag. “Nej cov uas dim hniav ntaj, cia li mus tsis txhob nyob twjywm tos. Txawm yog nej nyob deb los cia li nco txog Yawmsaub, thiab cia Yeluxalees los nyob hauv nej lub siab.” “Peb tau txaj muag, vim yog peb hnov tej lus uas thuam peb. Kev poob koob npog nkaus peb lub ntsej muag tag, vim lwm haiv neeg tau nkag rau hauv Yawmsaub lub tuam tsev tej chav uas dawb huv.” Yawmsaub hais tias, “Vim li no, saib maj, lub caij lub nyoog tabtom los yuav txog mas kuv yuav rau txim rau nws tej dab mlom, thiab cov uas raug mob raug to yuav quaj ntsaj thoob nws lub tebchaws. Txawm yog Npanpiloo nce mus txog saum ntuj, thiab ua tau nws lub chaw tiv thaiv siab siab uas ruaj khov, los cov uas ua kom puam tsuaj yuav tuaj ntawm kuv mus tawm tsam nws.” Yawmsaub hais li no ntag. “Mloog saib, muaj suab quaj qw hauv Npanpiloo tuaj, muaj suab puam tsuaj loj nrov hauv cov Kheedia lub tebchaws tuaj. Yawmsaub tabtom ua rau Npanpiloo piam tag, thiab ua rau nws lub suab uas nrov heev ntsiag to mus. Tej tub rog tuaj nrov vig voog yam li tej niag nthwv dej uas loj heev, lawv tsa suab qw nrov heev, rau qhov tus uas ua kom puam tsuaj twb tuaj tawm tsam Npanpiloo. Nws tej tub rog luag twb ntes tau tag lawm, nws tej hneev kuj raug muab lov ua tej ywb yav tag lawm, vim Yawmsaub yog Vajtswv uas ua pauj, nws yeej ua pauj tiag tiag li. Kuv yuav ua rau nws cov thawj thiab nws cov neeg txawj ntse, thiab cov thawj hauv tej moos thiab nws cov thawj rog thiab nws tej tub rog qaug cawv tag. Lawv yuav pw tsaug zog mus ib txhis tsis xeev li.” Tus vajntxwv uas npe hu ua Yawmsaub uas muaj hwjchim loj kawg nkaus hais li no ntag. Yawmsaub uas muaj hwjchim loj kawg nkaus hais li no tias, “Npanpiloo tej ntsa loog uas tuab heev yuav raug muab rhuav pob tag ti nkaus npoo av, thiab nws tej rooj loog uas siab siab yuav raug muab hlawv kub hnyiab tag. Tej pejxeem ua tej haujlwm hnyav do tsis muaj qabhau, thiab tej tebchaws ua haujlwm khwv txog siav kom raug muab hlawv pov tseg xwb.” Tej lus no yog tej uas Yelemi uas ua xibhwb cev Vajtswv lus muab rau Xelaya rau thaum Xelaya nrog Yuda tus vajntxwv Xedekhiya mus rau Npanpiloo, yog xyoo plaub uas Xedekhiya ua vajntxwv kav. Xelaya yog Neliya tus tub, yog Maxeya tus xeeb ntxwv, nws yog tus thawj tub rog uas npaj chaw rau lawv so taug kev. Yelemi sau tej kev xwm txheej phem huvsi uas yuav raug Npanpiloo rau hauv ntawv, yog tej lus sau cia uas hais txog Npanpiloo no huvsi. Mas Yelemi hais rau Xelaya tias, “Thaum koj mus txog Npanpiloo lawm, koj yuav tsum nyeem tej lus no huvsi nav, thiab hais tias, ‘Au Yawmsaub, koj tau hais txog lub chaw no tias koj yuav muab rhuav pov tseg, kom thiaj tsis muaj ib yam dabtsi nyob hauv li, tsis hais neeg thiab tsiaj txhu, mas yuav nyob do cuas cia mus ib txhis.’ Thaum koj nyeem phau ntawv no tag, cia li muab ib lub pob zeb khi rau phau ntawv, es muab pov rau hauv nruab nrab tus dej Yufeti, thiab hais tias, ‘Npanpiloo yuav tog rau hauv ib yam li no tsis ntab los li, vim yog tej xwm txheej phem uas kuv yuav coj los raug nws.’ ” Yelemi tej lus tag li no lawm. Thaum Xedekhiya sawv ua vajntxwv nws hnub nyoog muaj nees nkaum ib xyoos. Nws nyob hauv Yeluxalees kav tau kaum ib xyoos. Nws niam npe hu ua Hamuthas uas yog Yelemi uas nyob hauv lub moos Lina tus ntxhais. Nws ua tej uas Yawmsaub pom tias phem kawg, ib yam li txhua yam uas Yehauyakhi tau ua lawd. Twb yog vim Yawmsaub chim heev thiaj muaj tej xwm txheej no huvsi tshwm rau hauv Yeluxalees thiab Yuda, mas Yawmsaub thiaj muab lawv laim ploj ntawm nws lub xubntiag mus. Xedekhiya fav xeeb rau Npanpiloo tus vajntxwv. Xyoo cuaj uas vajntxwv Nenpukhanexa kav hauv Npanpiloo, hnub xiab kaum lub kaum hli nws coj nws cov tub rog huvsi tuaj ua rog rau Yeluxalees thiab vij lub nroog cia. Lawv tsub av vij puag ncig lub nroog. Lub nroog thiaj raug vij mus txog xyoo kaum ib uas Xedekhiya ua vajntxwv. Hnub xiab cuaj lub plaub hlis muaj kev tshaib nqhis loj heev hauv lub nroog, tsis muaj zaub mov dabtsi li rau cov pejxeem noj. Lub ntsa loog thiaj raug tsoo pob ib qho. Txawm yog cov Kheedia nyob vij lub nroog los vajntxwv thiab cov tub rog sawvdaws khiav tawm hmo ntuj hla vajntxwv lub vaj tawm lub rooj loog taug txojkev uas muaj ob sab ntsa loog mus. Lawv txawm khiav yuav mus rau Alanpa. Tiamsis Kheedia cov tub rog caum vajntxwv Xedekhiya qab thiab caum cuag nws rau ntawm lub tiaj Yelikhau, mas vajntxwv cov tub rog txawm khiav ua sab ua sua tag lawm. Lawv thiaj ntes tau vajntxwv thiab coj nws mus cuag Npanpiloo tus vajntxwv ntawm lub moos Linpla hauv Hama tebchaws, mas vajntxwv Npanpiloo txiav txim rau nws. Npanpiloo tus vajntxwv tua Xedekhiya cov tub tab meeg nws, thiab tua Yuda cov thawj huvsi pov tseg rau ntawm lub moos Linpla. Nws muab Xedekhiya ob lub qhov muag kaus pov tseg thiab muab saw hlau khi nws mas vajntxwv Npanpiloo coj nws mus rau Npanpiloo thiab muab nws kaw hauv tsev lojfaj txog hnub uas nws tuag. Hnub xiab kaum lub tsib hlis, yog xyoo kaum cuaj uas Nenpukhanexa ua vajntxwv kav hauv Npanpiloo, mas Nenpuxaladas uas yog tus thawj rog zov vajntxwv thiab tu vajntxwv Npanpiloo txawm txeem mus rau hauv Yeluxalees. Nws muab Yawmsaub lub tuam tsev thiab vajntxwv lub tsev thiab tej tsev hauv Yeluxalees huvsi hlawv pov tseg. Nws hlawv tej tsev loj txhua lub kub hnyiab tag huvsi. Thiab cov tub rog Kheedia sawvdaws uas nrog tus thawj rog zov vajntxwv ua ke kuj tsoo tej ntsa loog Yeluxalees pob tag huvsi. Nenpuxaladas uas yog tus thawj rog zov vajntxwv kuav kiag cov pejxeem uas pluag kawg ib txhia thiab cov uas tseem tshuav nyob hauv lub nroog thiab cov uas khiav mus zwm rau Npanpiloo tus vajntxwv, thiab cov Kws txawj ua txhua yam uas tseem tshuav nyob tawm tebchaws mus. Tiamsis tus thawj rog uas zov vajntxwv tseg cov neeg uas pluag kawg hauv lub tebchaws ib txhia nyob tu vaj txiv hmab thiab laij teb. Tej ncej tooj liab uas nyob hauv Yawmsaub lub tuam tsev thiab tej tsheb thawb dej thiab lub rhawv dej tooj liab uas nyob hauv Yawmsaub lub tuam tsev, mas cov Kheedia muab tsoo ua tej dwb daim thiab coj kiag tej tooj liab huvsi mus rau Npanpiloo. Lawv kuj coj tej laujkaub, tej duav phuaj, tej tais khwb teeb xeeb, tej phaj loj thiab tej tais rau hmoov tshuaj tsw qab thiab tej twj taig tooj liab txhua yam uas siv hauv lub tuam tsev mus. Tus thawj rog uas zov vajntxwv coj tej phaj me, tej duav hlau yawm ncaig taws, tej phaj loj, tej laujkaub thiab tej ncej txawb teeb, thiab tej tais rau hmoov tshuaj tsw qab, thiab tej tais hliv cawv txiv hmab xyeem mus, yog txhua yam uas xuas tseem kub thiab xuas nyiaj ua. Tej tooj liab uas ua ob tug ncej thiab lub rhawv dej thiab kaum ob tug nyuj tooj liab uas tiag lub rhawv dej, thiab tej tsheb thawb dej uas Xalaumoo ua cia rau hauv Yawmsaub lub tuam tsev, hnyav dhau luj tsis tag. Ib tug ncej siab kaum yim tshim, ntsuas puag ncig muaj kaum ob tshim, khoob qhov tuab plaub ntiv. Muaj lub hau ncej tooj liab txawb rau saum lub hau ncej siab tsib tshim. Thiab muaj ib daim ntxais qhov muag tooj liab thiab tej lub txiv ntsiav kws tooj liab, nyob puag ncig lub hau ncej. Tus ncej uas ob kuj zoo ib yam nkaus thiab muaj tej lub txiv ntsiav kws. Ib ncig tus ncej muaj cuaj caum rau lub txiv ntsiav kws, huvsi muaj ib puas lub txiv ntsiav kws dai ib ncig saum daim ntxais qhov muag ntawd. Tus thawj rog uas zov vajntxwv kuj ntes Xelaya uas yog tus tuam pov thawj hlob thiab Xefaniya uas yog pov thawj yau thiab peb tug uas zov qhov rooj tuam tsev. Ntawm lub nroog nws kuj ntes ib tug thawj rog uas saib xyuas cov tub rog thiab xya tus uas ua vajntxwv lub chaw sablaj uas tseem nyob hauv lub nroog, thiab ntes tus tub sau ntawv ntawm tus thawj rog uas txhij tub rog thoob tebchaws, thiab ntes cov pejxeem rau caum leej uas tseem nyob hauv lub nroog. Nenpuxaladas uas ua tus thawj rog zov vajntxwv ntes cov neeg no coj los txog ntawm vajntxwv Npanpiloo hauv lub moos Linpla. Mas Npanpiloo tus vajntxwv muab lawv nplawm thiab muab lawv tua pov tseg rau ntawm lub moos Linpla hauv Hama tebchaws. Yuda thiaj raug muab ntes kuav tawm hauv nws lub tebchaws mus lawm. Ntawm no mus yog cov neeg uas Nenpukhanexa ntes coj mus, mas xyoo xya uas Nenpukhanexa ua vajntxwv kav nws coj cov Yudai peb txhiab nees nkaum peb leeg mus. Xyoo kaum yim uas nws kav, nws ntes cov hauv Yeluxalees yim pua peb caug ob leeg kuav mus. Xyoo nees nkaum peb uas Nenpukhanexa kav, Nenpuxaladas uas yog tus thawj rog zov vajntxwv ntes cov Yudai xya pua plaub caug tsib leeg kuav mus. Xam huvsi yog plaub txhiab rau pua leej. Thaum Yuda tus vajntxwv Yehauyakhee raug ntes tau peb caug xya xyoo mas hnub tim nees nkaum tsib lub kaum ob hlis rau xyoo uas Evimelauda sawv ua vajntxwv kav hauv Npanpiloo, Evimelauda ua zoo rau Yuda tus vajntxwv Yehauyakhee thiab muab nws tso tawm hauv tsev lojfaj los. Nws hais zoo rau Yehauyakhee thiab pub nws nyob lub rooj siab dua tej vajntxwv uas nrog nws nyob hauv Npanpiloo txhua tus. Yehauyakhee txawm hle cev tsoos tsho raug txim, thiab nws niaj hnub tau nrog vajntxwv koom rooj noj mov mus tag sim neej. Vajntxwv pheej pub qhov txhia chaw tsis tu ncua rau Yehauyakhee raws li uas niaj hnub cheem tsum mus tag nws sim neej. Lub nroog uas txeev muaj neeg nyob puv nkaus, nyob do cuas lawm lauj! Lub nroog uas txeev ua loj hauv ib tsoom tebchaws, zoo yam nkaus tus poj ntsuam lawm lauj! Lub nroog uas txeev ua poj vaj hauv tej moos, cia li ua luag qhev lawm lauj! Nws quaj ncia dhuj dhev ib hmos, kua muag ntws lug nws lub plhu, txhua tus uas nyiam nws tsis muaj ib tug nplij nws siab li. Nws tej phoojywg txhua tus fav xeeb rau nws, lawv ua yeeb ncuab rau nws lawm. Yuda raug kuav mus poob tebchaws, thiab raug kev tsim txom thiab raug quab yuam ua qhev, nws nyob rau luag teb luag chaw, nws tsis tau chaw nyob tus li, txhua tus uas caum nws caum cuag nws rau thaum nws tau chaw ti. Tej kev uas mus rau hauv Xi‑oo kuj quaj ntsuag vim tsis muaj leejtwg taug kev tuaj mus ua kevcai noj haus raws tej sijhawm lawm. Nws tej rooj loog huvsi tsis muaj neeg hla li lawm, nws cov pov thawj quaj nroo luj laws. Nws tej ntxhais hluas kuj lwj siab ntsuav, thiab nws kuj lwj siab kawg li. Nws cov tshawj chim tau ua thawj, nws cov yeeb ncuab tau noj qab nyob zoo, twb yog Yawmsaub ua rau nws raug kev txom nyem vim yog nws txojkev fav xeeb loj heev, nws tej tub ki thiaj raug tshawj chim ntes coj mus poob tebchaws. Xi‑oo tus ntxhais lub meej mom uas nrov nto moo lug twb poob tag lawm. Nws cov thawj zoo yam nkaus tej txiv muas lwj uas nrhiav tsis tau tshav zaub noj, thiab khiav qaug zog zis ntawm tus uas caum hauv ntej. Niaj hnub nimno uas Yeluxalees poob rau hauv kev txom nyem lwj siab thiab khiav mus rau tom ub tom no, nws kuj rov nco txog txhua yam tsim txiaj uas nws txeev muaj thaum ub. Thaum nws cov pejxeem poob rau hauv tshawj chim txhais tes, mas tsis muaj leejtwg yuav pab nws li, cov tshawj chim pom nws thiab luag qhov uas nws piam tag. Yeluxalees tau ua txhaum muaj txim loj heev nws thiaj qias tsis huv, sawvdaws uas txeev muab koob meej rau nws kuj saib tsis taus nws lawm vim lawv pom qhov uas nws nyob liab qab. Nws mas yeej ntsaj laws, thiab fee plhu rau ib qho. Nws tej uas qias tsis huv kuj lo rau ntawm nws daim tiab, nws tsis xav txog nws lub hauv ntej li. Vim li no nws thiaj li piam tag txaus ntshai kawg li, yeej tsis muaj leejtwg nplij tau nws lub siab. “Au Yawmsaub, thov tsa qhov muag saib kuv txojkev txom nyem lwj siab, vim cov yeeb ncuab kov yeej lawm.” Nws tej yeeb ncuab xyab tes hlo txeeb nws tej qhov txhia chaw tsim txiaj huvsi. Nws pom ib tsoom tebchaws txeem los rau hauv qhov chaw uas pe Vajtswv, yog cov neeg uas koj txwv tsis pub los nrog koj cov neeg tuaj txoos ua ke. Nws cov pejxeem sawvdaws ntsaj laws rau thaum mus nrhiav mov noj, lawv muab lawv tej qhov txhia chaw tsim txiaj rho mus pauv mov noj kom thiaj li rov muaj zog. “Au Yawmsaub, thov tsa muag saib kuv, rau qhov kuv raug luag saib tsis taus heev.” “Nej txhua tus uas dua kev, nej txawm tsis xav txog tej xwm txheej uas kuv raug no li lov? Saib maj, puas muaj txojkev txom nyem lwj siab twg uas thooj li txojkev txom nyem lwj siab uas kuv raug no, yog tej kev txom nyem uas Yawmsaub ua rau kuv rau hnub uas nws chim heev kawg li? Nws tso nplaim taws poob saum ntuj los, txeem mus rau hauv kuv tej pob txha, nws ua rooj hlua cuab kuv kotaw, nws ua rau kuv tig kiag rov qab, nws tso kuv tseg nyob do cuas, thiab ua rau kuv qaug zog tag ib hnub tsaus ntuj. Kuv tej kev fav xeeb huvsi nws muab pav ua ib tug quab, nws txhais tes muab pav ua ib ke thiab muab tso rau ntawm kuv caj qwb. Nws ua rau kuv lub zog ntaug lawm, tus Tswv muab kuv cob rau hauv cov uas kuv kov tsis yeej txhais tes. Tus Tswv muab kuv cov tub rog siab loj siab tuab uas nyob hauv kuv nruab nrab huvsi tso tseg, nws hu ib pab tub rog coob coob tuaj tawm tsam kuv kom thiaj tsuam tau kuv cov tub hluas ntsoog tag. Vajtswv muab Yuda tus ntxhais uas dawb huv tsuj ib yam li tsuj txiv hmab hauv lub qhov tsuam kua txiv. Vim li no kuv thiaj quaj, kuv lub qhov muag muaj kua muag ntws los, vim yog tus uas nplij siab nyob deb ntawm kuv lawm, yog tus uas yuav txhawb kuv lub siab kom rov muaj zog. Kuv cov menyuam kuj nyob ua ntsos ua ntsuag, vim cov yeeb ncuab twb kov yeej lawm.” Xi‑oo cev kiag ob txhais tes, tiamsis tsis muaj leejtwg nplij tau nws. Yawmsaub tau hais tseg txog Yakhauj tias tej uas nyob ib ncig nws yuav ua nws cov tshawj chim, Yeluxalees ntxeev ua yam uas qias tsis huv rau hauv lawv nruab nrab. “Yawmsaub yeej ua ncaj, vim yog kuv tawv nyom nws tej lus. Ib tsoom neeg, cia li mloog, cia li saib kuv tej kev txom nyem lwj siab, kuv tej ntxhais hluas thiab tej tub hluas raug ntes coj mus lawm. Kuv twb hu tej uas nyiam kuv tiamsis lawv dag kuv, kuv cov pov thawj thiab cov kev txwj laus kuj tuag tag hauv plawv nroog, rau thaum lawv mus nrhiav mov noj kom thiaj li rov muaj zog. Au Yawmsaub, thov tsa muag saib vim yog kuv raug kev lwj siab, kuv lub siab ntxhov hnyo, kuv lub siab puas tag, vim yog kuv tawv nyom heev. Sab nraud hniav ntaj ua rau neeg ua ntsuag, sab hauv tsev kuj muaj kev tuag. Lawv hnov kuv ntsaj li cas, tsis muaj ib tug twg nplij kuv lub siab li. Kuv cov yeeb ncuab sawvdaws tau hnov tej xwm txheej uas kuv raug, lawv zoo siab rau qhov uas koj ua li no. Koj cia li coj hnub uas koj tshaj tawm lawm los txog, mas cia lawv raug ib yam li uas kuv thiab. Cia lawv tej kev phem huvsi los tshwm rau ntawm koj xubntiag, thov koj ua rau lawv ib yam li koj ua rau kuv vim yog kuv tej kev fav xeeb huvsi, kuv ntsaj heev kawg li thiab kuv lub siab qaug zog kawg nkaus li lawm.” Tus Tswv chim thiaj tso huab los npog nkaus Xi‑oo tus ntxhais lawm lauj! Nws muab Yixayee lub koob meej uas nto moo lug laim saum ntuj los rau hauv pem teb lawm. Hnub uas nws chim nws tsis nco txog nws lub rooj tiag taw li. Tus Tswv ua rau Yakhauj tej chaw nyob puam tsuaj tag huvsi tsis khuvleej li, nws npau taws thiaj muab Yuda tus ntxhais tej chaw uas ruaj khov ua pob tag, nws ua rau lub tebchaws thiab cov thawj poob ti nkaus hauv pem teb raug txaj muag heev. Nws chim heev thiaj muab Yixayee tus kub lov ntho lawm, nws nkaum kiag nws txhais tes xis ntawm lawv rau thaum yeeb ncuab tuaj, nws hlawv hauv Yakhauj nruab nrab zoo yam nkaus li hluavtaws hlawv, mas kub hnyiab thoob plaws ib ncig huvsi. Nws nta nws rab hneev yam nkaus li yeeb ncuab, thiab nws txhais tes xis twb rub kiag hlua hneev yam nkaus li tshawj chim lawm, nws tua txhua tus uas peb khav ntxhias hauv Xi‑oo tus ntxhais lub chaw nyob, nws muab nws txojkev chim heev nchuav nthwv rau ib yam li nplaim taws los. Tus Tswv zoo yam nkaus li yeeb ncuab lawm, nws ua rau Yixayee puam tsuaj, nws ua rau lawv tus vajntxwv tej vaj tse huvsi puam tsuaj, thiab ua rau lawv tej chaw ruaj khov pob tag. nws tsav ntxiv kev quaj nyiav thiab kev quaj ntsuag rau Yuda tus ntxhais. Nws rhuav tshem nws lub tsev ntaub ib yam li rhuav lub tsev pheeb suab hauv teb, thiab nws muab lub chaw uas ua tej kevcai uas teem tseg rhuav pob tag, Yawmsaub ua rau tej kevcai uas teem tseg thiab hnub Xanpatau ploj tag hauv Xi‑oo lawm, nws chim npau taws heev thiaj muab vajntxwv thiab cov pov thawj pov tseg. Tus Tswv muab nws lub thaj xyeem pov tseg, thiab fee plhu ntawm qhov chaw uas pe hawm nws, nws muab tej ntsa loog ntawm vajntxwv tsev huvsi cob rau hauv yeeb ncuab txhais tes. Yeeb ncuab tsa suab qw ntshu nrooj hauv Yawmsaub lub tuam tsev ib yam li hnub uas ua tej kevcai uas teem tseg. Yawmsaub twb npaj siab yuav muab Xi‑oo tus ntxhais tej ntsa loog ua kom pob tag, nws twb muab hlua ntsuas, nws tsis nkaum nws txhais tes ntawm qhov uas ua kom puam tsuaj, nws ua rau tej chaw faj xwm thiab tej ntsa loog quaj ntsuag thiab qaug zog tag huvsi. Xi‑oo tej rooj loog twb pob tag rau hauv av lawm, Vajtswv muab tej las rooj rhuav thiab lov pov tseg lawm. Xi‑oo tus vajntxwv thiab cov thawj poob rau hauv lwm haiv neeg lawm. Txoj kevcai tsis muaj lawm thiab nws cov xibhwb cev Vajtswv lus tsis tau txais zaj yog toog ntawm Yawmsaub. Xi‑oo tus ntxhais cov kev txwj laus kuj nyob twjywm rau hauv pem teb, lawv tsuab hmoov av rau saum taubhau thiab hnav khaub seev tsaj, Yeluxalees tej ntxhais hluas nyo taubhau ti nkaus hauv pem teb lawm. Kuv quaj heev ua qhov muag plooj tag, kuv lub siab ntxhov kawg, kuv lub siab ntsws yaj tag vim kuv haiv neeg tus ntxhais puam tsuaj tag. thiab tej menyuam yaus thiab tej menyuam mos liab tsaus muag tsis nco qab rau hauv tej kev hauv lub nroog. Lawv quaj rau leej niam hais tias, “Mov thiab cawv txiv hmab nyob qhovtwg?” rau thaum lawv tsaus muag tsis ncu qab zoo yam nkaus li tej uas raug mob ntawm tej kev hauv lub nroog, yog thaum lawv txojsia twb yuav tu rau hauv lawv niam lub xubntiag. Yeluxalees tus ntxhais 'e, kuv yuav hais tau dabtsi rau koj? Kuv yuav muab koj piv txog yam twg? Xi‑oo tus ntxhais uas dawb huv 'e, kuv yuav muab koj piv tau rau yam twg, xwv kuv thiaj nplij tau koj? Rau qhov koj raug kev puam tsuaj loj yam li lub hiavtxwv, leejtwg yuav ua tau rau koj rov zoo li qub? Koj tej xibhwb cev Vajtswv lus tau pom tej yog toog cuav tsis tseeb coj los hais rau koj, lawv tsis qhia koj kev txhaum rau koj paub xwv koj thiaj rov tau lub neej zoo li qub, tiamsis lawv tseem cev tej lus cuav uas coj koj mus yuam kev xwb. Txhua tus uas dua kev mus kuj npuaj teg luag koj, lawv thuam luag co hau hnyo rau Yeluxalees tus ntxhais tias, “No yog lub nroog uas luag hu tias zoo nkauj kawg nkaus, yog lub nroog uas ib tsoom neeg hauv ntiajteb zoo siab rau lov?” Koj cov yeeb ncuab sawvdaws qheb ncauj cem koj, lawv thuam luag koj, lawv zim hniav qas zog rau koj, lawv qw tias, “Peb twb ua lub nroog no puam tsuaj lawm lauj! Hnub no yog hnub uas peb tos ntsoov. Peb twb ntsib thiab peb twb pom lawm lauj!” Yawmsaub twb ua raws li nws npaj tseg lawm, nws twb ua tiav raws li nws hais tseg lawm. Nws muab ua puam tsuaj tsis khuvleej li raws li nws twb txiav txim siab ntev los lawm. Nws ua rau yeeb ncuab zoo siab thiab luag koj, nws tsa koj cov tshawj chim muaj zog heev tuaj. Xi‑oo tus ntxhais lub ntsa loog 'e, cia li quaj thov tus Tswv, cia los kua muag ntws nto nruab hnub hmo ntuj yam li tus dej ntws, koj tsis txhob so li, koj tsis txhob cia koj cov kua muag qhuav ntawm koj lub qhov muag Cia li sawv tsees, cia li quaj hmo ntuj raws li tej sijhawm, cia li nchuav tej uas nyob hauv koj lub siab tawm los yam li dej ntws rau ntawm tus Tswv lub xubntiag. Cia li tsa koj ob txhais tes rau nws, thov cawm koj cov menyuam txojsia uas tabtom tshaib plab tsaus muag rau txhua txoj hauv kev. Au Yawmsaub, thov tsa muag saib lauj! Koj txeev ua li no rau leejtwg? Tsim nyog cov pojniam noj nws cov menyuam yog tej menyuam uas nws hlub heev lov? Tsim nyog tus pov thawj thiab tus xibhwb cev Vajtswv lus raug muab tua rau lub chaw pe tus Tswv lov? Tej hluas thiab tej poj koob yawm txwv tuag pawg lug hauv av ntawm tej kev, kuv tej ntxhais hluas thiab kuv tej tub hluas raug hniav ntaj ntog tuag tag lawm, koj muab lawv tua rau hnub uas koj chim, muab lawv tua tsis khuvleej li. Koj tau hu cov uas kuv ntshai tuaj txhua fab tuaj yam nkaus li hnub uas ua kevcai teem tseg. Hnub uas Yawmsaub chim tsis muaj ib tug khiav dim tau lossis tseem ciaj li. Cov uas kuv puag rawv thiab tu, mas kuv cov yeeb ncuab muab ua puam tsuaj tag. Kuv yog tus uas raug kev txom nyem nyuaj siab vim yog Vajtswv txojkev npau taws rab nplawm. Nws ntiab kuv mus thiab coj kuv mus rau hauv txojkev tsaus ntuj, uas tsis muaj qhov kaj kiag li. Nws yeej tsa nws txhais tes nplawm kuv nplawm tag rov nplawm thiab tas hnub mus li. Nws ua rau kuv cev nqaij daim tawv sem tag, thiab muab kuv tej pob txha lov. Nws muab kuv xov kaw cia, thiab muab kev lwj siab kev txom nyem xov kuv cia. Nws muab kuv yuam nyob qhov tsaus ntuj, ib yam li tus uas tuag ntev los lawm. Nws xov laj kab vij kuv cia kuv thiaj dim tsis tau, nws muab saw hlau hnyav khi kuv cia. Thaum kuv tsa suab taij hu thov nws pab, los nws tsis quav ntsej kuv tej lus thov. Nws muab tej txhib zeb uas txhwm los thaiv kuv txhua txoj hauv kev, nws ua rau kuv txojkev nkhaus mus nkhaus los. Nws zoo yam nkaus li tus dais uas zov tos kuv, thiab zoo yam nkaus li tus tsov ntxhuav uas zov kev tos. Nws chua kuv tawm ntawm kuv txojkev thiab muab kuv dua ua tej dwb daim, nws ua rau kuv raug muab tso tseg nyob do cuas. Nws nta nws rab hneev, thiab muab kuv ua daim phiaj rau nws rab xub. Nws muab cov xub hauv nws lub raj tua chob rau hauv kuv lub siab. Kuv thiaj ua lub chaw uas kuv haiv neeg sawvdaws luag, thiab ua zaj nkauj uas lawv hu thuam luag tas hnub tas hmo. Nws ua rau kuv lwj siab kawg nkaus, thiab muab zaub iab zaub daw rau kuv noj dhuav tag. Nws muab tsig zeb rau kuv cov hniav zom thiab muab kuv nias rau hauv cub tshau. Txojkev kaj siab lug raug muab rho ntawm kuv tus ntsuj plig lawm, kuv tsis nco qab tias kev zoo siab xyiv fab yog zoo li cas lawm. Kuv thiaj hais tias, “Kuv lub koob meej ploj tag lawm, thiab kuv txojkev vam rau Yawmsaub kuj ploj tag lawm.” Thov nco txog kuv tej kev txom nyem lwj siab thiab qhov uas raug khiav rau tom ub tom no, uas iab cuag li tej zaub iab zaub daw thiab tsib dais. Kuv tus ntsuj plig pheej nco txog tej ntawd, thiab poob siab nthav. Kuv rov nco txog li no, kuv thiaj muaj lub siab vam tuaj hais tias, Yawmsaub txojkev hlub uas ruaj khov yuav tsis tu ncua, thiab nws tej kev khuvleej tsis muaj chaw kawg, niaj tagkis rov muaj dua tshiab. Koj txojkev ua ncaj uas tso siab tau yeej loj kawg. Kuv tus ntsuj plig hais tias, “Yawmsaub yog kuv tug, vim li no kuv thiaj li vam ntsoov nws.” Yawmsaub yeej ua zoo rau cov uas tos rawv nws, thiab ua zoo rau tus ntsuj plig uas nrhiav nws. Qhov uas zoo yog qhov uas ua siab ntev tos Yawmsaub txojkev cawm dim. Qhov uas zoo yog qhov uas neeg kwv tus quab txij thaum yau los. Cia lawv nyob ib leeg ntsiag to rau thaum Yawmsaub muab tus quab rau lawv. Cia lawv muab lub qhov ncauj twb nkaus rau hauv av, tej zaum tseem yuav muaj vam. Cia lawv tig plhu rau tus uas ntaus lawv, cia lawv yeem raug luag thuam kawg nkaus. Vim tias tus Tswv yuav tsis muab lawv pov tseg mus ib txhis, Txawm yog nws ua rau raug kev lwj siab, los nws yuav khuvleej, raws li nws txojkev hlub ruaj khov uas muaj nplua mias. Vim yog nws tsis muaj pluaj siab ua rau leejtwg raug kev txom nyem, lossis ua rau neeg raug kev ntxhov siab. Qhov uas muab cov neeg uas raug ntes thoob ntiajteb tsuj yuam rau hauv xib taws kuj yog, qhov uas ntxeev neeg txojcai tab meeg Vajtswv tus uas loj dua ntais kuj yog, qhov uas tu plaub tsis ncaj kuj yog, tej no tus Tswv tsis pom lov? Leejtwg yog tus uas hais thiab ua kom tiav, tsuas yog tus Tswv tso ncauj thiaj ua tau xwb? Qhov zoo thiab tej xwm txheej phem tsis yog tawm hauv Vajtswv uas loj dua ntais lub qhov ncauj los lov? Ua cas cov neeg uas tseem ciaj yuav yws txog qhov uas nws raug teem txim vim nws kev txhaum? Cia peb tshuaj ntsuas saib peb lub neej thiab tig kiag rov los cuag Yawmsaub. Cia peb muab peb lub siab thiab peb txhais tes tsa rau Vajtswv uas nyob saum ntuj. “Peb tau fav xeeb thiab tawv nyom koj thiab koj tsis tau zam peb lub txim. “Koj muab koj txojkev chim los qhwv koj thiab caum peb, thiab muab tua tsis khuvleej li. Koj muab huab los qhwv koj, kom peb tej lus thov thiaj txeem tsis tau mus txog koj. Koj ua rau peb zoo yam nkaus li tej tshwj xuam thiab tej uas qias rau hauv nruab nrab ib tsoom neeg. “Peb tej yeeb ncuab sawvdaws qheb ncauj cem peb. Txojkev txhawj kev ntshai thiab qhov ntuj los txog peb, thiab kev liamsim thiab kev puam tsuaj los raug peb.” Kuv lub qhov muag muaj kua muag ntws los ua ib tug niag dej, vim kuv haiv neeg tus ntxhais raug kev puam tsuaj. Kuv tej kua muag ntws tsis tu, thiab ntws tsis so li, mus txog thaum Yawmsaub tsa qhov muag ntsia saum ntuj tuaj. Kuv lub qhov muag ua rau kuv lwj siab txog tej xwm txheej uas raug kuv lub nroog tej ntxhais sawvdaws. Cov uas cia li ua yeeb ncuab rau kuv do do xwb, lawv caum kuv ib yam li caum noog. Thaum kuv tseem ciaj sia lawv muab kuv laim rau hauv lub qhov taub thiab lawv pov pob zeb los tsuam kuv. Dej nyab kiag kuv taubhau, kuv hais tias, “Kuv ploj tiag tiag li lauj!” Au Yawmsaub, kuv hu koj lub npe rau thaum kuv nyob hauv lub qhov tob tob. Koj mloog kuv tej lus uas thov hais tias, “Thov tsis txhob ntsaws koj qhov ntsej rau tej lus uas kuv quaj thov koj pab.” Koj tuaj ze rau thaum uas kuv hu thov koj. Koj hais tias, “Tsis txhob ntshai.” Au tus Tswv, koj hais kuv tshaj plaub lawm, koj txhiv kuv txojsia. Au Yawmsaub, koj pom qhov uas lawv ua txhaum rau kuv lawm, thov tu kuv tshaj plaub lauj! Koj pom txhua yam uas lawv ua limhiam rau kuv lawm, thiab tej uas lawv ntaus tswvyim ua phem rau kuv huvsi. Au Yawmsaub, koj hnov tej lus uas lawv thuam luag kuv, thiab tej uas lawv ntaus tswvyim ua phem rau kuv huvsi. Tej uas kuv cov yeeb ncuab lub qhov ncauj hais thiab tej uas lawv ntaus tswvyim mas tawm tsam kuv tag hnub li. Saib maj, tsis hais lawv zaum lossis sawv ntsug, lawv muab kuv ua zaj nkauj hu thuam luag. Au Yawmsaub, koj cia li ua pauj rau lawv raws li lawv txhais tes tau ua lawm. Cia li ua rau lawv lub siab tsaus ntuj nti, cia koj tej lus foom tsis zoo poob rau saum lawv. Cia li caum cuag lawv ua chim kawg, thiab muab lawv ua kom puam tsuaj tag rau hauv Yawmsaub lub qab ntuj. Tej kub tsis ci lawm lauj! Tej tseem kub nphob tag lawm lauj! Tej qe zeb hlaws tseem ceeb raug muab pov tseg pawg lug rau txhua txoj hauv kev. Xi‑oo tej tub uas tsim txiaj muab luj muaj nqes yam nkaus li cov tseem kub, raug muab ntaus nqe qes npaum li lub laujkaub av uas luag xuas tes puab lawm xwb lauj! Txawm yog hma los tseem pub mis rau nws cov menyuam ntxais, tiamsis kuv haiv neeg tus ntxhais lub siab ua nruj ua tsiv yam nkaus li tus noog ntxhuav hauv tebchaws moj sab qhua. Tej menyuam mos uas tsis tau tseg mis nqhis nqhis ua nplaig lo qab yiag, tej menyuam yaus thov mov noj kuj tsis muaj leejtwg muab rau lawv. Cov neeg uas txeev noj zoo haus zoo qaug tshaib qas zias tom tej kev, cov uas txeev hnav tsoos tsho tsamxem mus pw rau saum tej pawg tshwj xuam. Kuv haiv neeg tus ntxhais raug teem txim hnyav dua li teem txim rau lub moos Xaudoo uas tib ntsais muag xwb twb piam tag, tsis muaj leejtwg txhais tes tau kov li. Yeluxalees cov thawj dawb huv dua daus xib daus npu, thiab dawb dua kua mis, lawv tej tawv nqaij tshiab liab ploog heev dua li paj zeb liab hauv hiavtxwv, lawv lub cev zoo nraug ntxiag yam li qe zeb phaithu tsamxem. Nimno lawv tej tawv plhu dub dua li hmoov qab yiag, tsis muaj leejtwg cim tau lawv tom tej kev lawm. Lawv tej tawv qhuav qhwv pob txha xwb, qhuav yam li tej ntoo qhuav. Cov uas raug hniav ntaj tuag tseem zoo dua li cov uas tuag tshaib, lawv yuag zuj zus mam li tuag vim yog tsis muaj tej qoob loo hauv teb los noj. Cov pojniam uas siab mos siab muag txhais tes muab lawv tej menyuam hau noj, tej menyuam ntawd raug ua mov noj rau thaum kuv haiv neeg tus ntxhais raug kev puam tsuaj. Yawmsaub tso nws txojkev npau taws tawm los, nws nchuav nws txojkev chim uas kub heev los lawm, thiab zes taws rau hauv Xi‑oo, hlawv kub hnyiab tag nrho ti nkaus hauv pem teb. Tej vajntxwv thoob ntiajteb thiab ib tsoom neeg hauv ntiajteb tsis ntseeg hais tias, tej yeeb ncuab thiab tej tshawj chim yuav tau nkag Yeluxalees tej rooj loog mus rau hauv. Vim yog tim nws cov xibhwb cev Vajtswv lus lub txim thiab nws cov pov thawj tej kev txhaum, uas tau ua rau cov neeg ncaj ncees tej ntshav ntws hauv plawv nroog. Lawv taug kev mus mus los los yam li tej dig muag, lawv tej tsoos tsho lo ntshav tag thiab qias tsis huv thiaj tsis muaj leejtwg kov tau lawv li. Tej neeg qw rau lawv tias, “Cia li mus, qias tsis huv. Cia li mus lauj, mus tsis txhob kov peb.” Lawv thiaj khiav mus nyob tsis muaj vag muaj tse mas tej neeg hauv ib tsoom tebchaws sib tham tias, “Lawv yuav tsis nrog peb nyob li lawm.” Yawmsaub yog tus uas ua rau lawv khiav ua sab ua sua, nws yuav tsis mob siab lawv li lawm, luag thiaj tsis hwm cov pov thawj thiab tsis thiaj cov kev txwj laus lawm. Peb lub qhov muag pheej nrhiav nrhw txojkev pab, tos liab muag tag los nrhiav do xwb, peb nyob tos lub tebchaws uas tuaj pab los kuj pab tsis tau li. Muaj neeg nyas raws peb qab, peb thiaj taug tsis tau peb tej kev, qhov kawg twb los yuav txog peb, peb lub niaj lub xyoo twb yuav kawg, vim tias qhov kawg twb los txog peb lawm. Cov uas dhia caum peb kuj nrawm dua tej dav ya saum nruab ntug, lawv dhia caum cuag peb saum tej roob, lawv zov tos peb hauv tebchaws moj sab qhua. Peb txoj hauv paus siav uas yog tus vajntxwv uas Yawmsaub tsa kuj poob rau hauv lawv lub qhov taub lawm, yog tus uas peb pheej hais txog nws tias, “Peb yuav nyob hauv nws tus qab duab ntxoov ntxoo rau hauv ib tsoom tebchaws.” Edoo tus ntxhais uas nyob hauv Us tebchaws 'e, cia li zoo siab thiab ua siab xyiv fab. Lub khob ntawd yeej yuav hla los txog koj, koj yuav qaug, thiab yuav hle tsoos tsho nyob liab qab. Xi‑oo tus ntxhais 'e, qhov uas teem txim rau koj tej kev txhaum kuj tiav lawm, Yawmsaub yuav tsis cia koj poob tebchaws dua li lawm. Tiamsis Edoo tus ntxhais 'e, nws yuav rau txim rau koj tej kev txhaum, nws yuav nthuav koj txojkev txhaum txim tshwm los. Au Yawmsaub, thov nco txog tej xwm txheej uas raug peb lawm, thov tsa muag ntsia peb txojkev txaj muag. Peb tej qub txeeg qub teg raug poob rau luag lawm, peb tej vaj tse ua lwm haiv neeg li lawm. Peb yog menyuam ntsuag tsis muaj txiv, peb niam zoo yam nkaus li tej poj ntsuam. Peb yuav tsum yuav dej haus thiab yuav tsum yuav taws rauv. Peb kwv tus quab ntawm caj qwb raug luag raws, peb thiaj qaug zog, thiab luag tsis kheev peb so kiag li. Peb tsa tes thov cov Iyi thiab cov Axilia xwv peb thiaj tau mov noj txaus. Peb tej poj koob yawm txwv tau ua txhaum, thiab dua tag lawm, peb thiaj tau ris lawv tej kev txhaum txim. Tej qhev sawv los kav peb, tsis muaj leejtwg pab peb dim lawv txhais tes. Peb sev nyog txojsia tiv thiaj tau mov noj, vim yog tej hniav ntaj hauv tebchaws moj sab qhua. Peb lub cev kub npaum nkaus li cub hluavtaws, vim kev tshaib kev nqhis ua rau peb mob kub lug. Tej pojniam raug luag yuam pw hauv Xi‑oo, tej ntxhais hluas uas dawb huv raug luag yuam pw hauv Yuda tej moos. Cov thawj raug muab khi tes dai, luag tsis hwm tej kev txwj laus. Tej tub hluas raug quab yuam zom zeb, tej menyuam tub kwv taws qaug qas nuag. Cov kev txwj laus ploj tag ntawm tej rooj loog lawm, cov tub hluas tseg tsis ntaus nkauj nog ncas lawm. Txojkev zoo siab ploj tag hauv peb lub siab lawm, peb tej kev seev cev ntxeev ua kev quaj ntsuag lawm. Lub mom kub hle saum peb taubhau lawm, peb raug txom nyem lauj, vim yog peb tau ua txhaum. Tim li no peb lub siab thiaj mob heev, vim yog tej no peb lub qhov muag thiaj plooj tag, yog tim lub roob Xi‑oo uas nyob do cuas cia, tej hma mus mus los los rau saud. Au Yawmsaub, koj yog tus uas kav mus ib txhis, koj lub zwm txwv nyob ruaj rau txhua tiam. Ua cas koj tsis nco qab peb mus ib txhis li? Ua cas koj tso peb tseg ntev li no? Au Yawmsaub, thov coj peb rov los cuag koj, peb thiaj los cuag koj, Thov koj tsa peb lub neej kom rov zoo li yav thaud. Ntshai tsuas yog koj muab peb tso pov tseg kiag li lawm thiab koj npau taws rau peb kawg nkaus li lawm. Hnub xiab tsib, lub plaub hlis, xyoo peb caug, thaum kuv nrog cov uas poob tebchaws nyob ua ke ntawm ntug dej Khenpa, rooj ntug txawm qheb mas kuv ua yog toog pom Vajtswv. Yog hnub xiab tsib lub hli ntawd (yog xyoo uas vajntxwv Yehauyakhee poob tebchaws tau tsib xyoos), mas Yawmsaub hais lus tuaj rau tus pov thawj Exekhee uas yog Npuxi tus tub, hauv cov Kheedia lub tebchaws, ntawm ntug dej Khenpa, thiab Yawmsaub txhais tes los rau saum nws ntawm lub chaw ntawd. Thaum kuv ntsia ntsoov ua ciav muaj cua daj cua dub ntsawj sab ped tuaj, thiab muaj ib tauv huab loj kawg ci kaj lug rau ib ncig, thiab muaj nplaim taws tawm liab vog tsis tu ncua li. Hauv nruab nrab cov hluavtaws ntawd muaj ib yam ci zoo li tooj dag. Thiab hauv nruab nrab cov cua daj cua dub ntawd muaj ib yam zoo li plaub tug tsiaj ciaj sia tawm los. Cov tsiaj ntawd kuv saib mas zoo li no. Lawv lub cev zoo thooj li neeg, tiamsis txhua tus muaj plaub lub ntsej muag, thiab txhua tus muaj plaub sab phab tis. Lawv txhais ceg yiag ntxiag, thiab cov rau taw zoo yam nkaus li rau menyuam nyuj, thiab ci yam nkaus li cov tooj dag uas twb muab txhuam ci nplas lawm. Thiab hauv txhua phab qab tis ntawm lawv lub cev plaub fab ntawd puavleej muaj txhais tes zoo li tes neeg. Plaub tug tsiaj ntawd muaj ntsej muag thiab kooj tis zoo li no, lawv nthuav tis sib tib ua ke, thiab lawv mus ncaj nraim rau tom ntej, mus rau sab twg tsis txog tig cev li. Lawv plaub tug ntawd lub ntsej muag zoo li uas hais no, sab xubntiag muaj lub ntsej muag zoo li neeg, sab xis muaj lub ntsej muag zoo li tsov ntxhuav, sab laug muaj lub ntsej muag zoo li txiv nyuj, sab nrob qaum muaj lub ntsej muag zoo li dav. Lawv lub ntsej muag zoo li ntawd ntag. Lawv nthuav tis rau sab saud. Txhua tus muaj ob phab tis sib tib ua ke, thiab muaj ob phab tis puag lub cev. Txhua tus mus ncaj nraim rau tom ntej, lawv tus plig xav mus sab twg lawv kuj mus tau rau sab ntawd tsis txog tig cev kiag li. Hauv nruab nrab cov tsiaj ciaj sia ntawd muaj ib yam zoo yam nkaus li cub thee, zoo yam nkaus li tej teg tsau cig mus mus los los hauv nruab nrab cov tsiaj ntawd. Cov hluavtaws ntawd ci heev thiab muaj xob laim tawm hauv hluavtaws tuaj. Cov tsiaj ciaj sia ntawd dhia mus dhia los yam nkaus li xob laim laim. Thaum kuv saib cov tsiaj ciaj sia ntawd, mas kuv pom muaj log tsheb nyob saum npoo av ntawm cov tsiaj ib sab, plaub tug nyias muaj nyias ib lub. Cov log tsheb ntawd zoo li uas hais no thiab ua tshwm los li no, ci zoo yam nkaus li tej qe zeb hlaws ntsuab lam lug. Plaub lub log tsheb zoo ib yam nkaus, plaub lub log tsheb zoo li nyias muaj nyias ib lub log muab nruab sib ris. Thaum yuav mus rau sab twg kuj cia li mus rau plaub fab tau tsis txog tig li. Lub npoo plaub lub log tsheb ntawd siab thiab txaus ntshai, cov npoo log tsheb muaj qhov muag nyob puag ncig. Thaum cov tsiaj ciaj sia ntawd mus kev mas cov log tsheb kuj ntog ntawm lawv ib sab. Thaum cov tsiaj ntawd ya hauv av mus, cov log tsheb kuj ya ua ke thiab. Tus plig xav mus qhovtwg cov tsiaj kuj mus, thiab cov log tsheb kuj ya ua ke mus, vim tias cov tsiaj ntawd tus plig nyob hauv cov log tsheb. Thaum cov tsiaj mus, cov log tsheb kuj mus thiab, thaum cov tsiaj nres cov log tsheb kuj nres. Thaum cov tsiaj sawv ya hauv av mus, cov log tsheb kuj sawv ya ua ke mus thiab, rau qhov cov tsiaj tus plig nyob hauv cov log tsheb. Saum cov tsiaj ciaj sia taubhau muaj ib yam khwb zoo li lub qab ntuj, ci nplas yam li qe zeb dawb uas txaus ntshai nthuav rau saum cov tsiaj ntawd taubhau. Hauv lub qab ntuj khwb no mas cov tsiaj nthuav tis mus sib ncaj, nthuav tis sib cuag, thiab txhua tus tsiaj muaj ob phab tis puag nws lub cev Thaum lawv mus kev, kuv hnov lawv cov kooj tis lub suab nrov yam li dej hlob ntsawj, nrov yam li Vajtswv uas muaj hwjchim loj kawg nkaus lub suab uas nrov vig voog, nrov yam li ib pab tub rog coob coob. Thaum cov tsiaj ntawd nres kuj qhaws tis cia. Muaj suab nrov saum lub qab ntuj uas khwb cov tsiaj ntawd taubhau tuaj. Thaum cov tsiaj ntawd nres kuj qhaws tis cia. Saum lub qab ntuj uas khwb cov tsiaj ntawd taubhau muaj ib yam zoo li lub zwm txwv, saib mas zoo li qe zeb phaithu tsamxem. Thiab saum lub zwm txwv ntawd muaj ib yam saib mas zoo li neeg. Thiab kuv pom ib yam zoo li tooj dag uas ci heev, saib mas zoo yam nkaus li hluavtaws nyob vij ib ncig, zoo li txij ntawm nws lub duav rov saud. Thiab txij ntawm nws lub duav rov hauv kuv pom ib yam zoo li hluavtaws thiab qhov uas kaj ci vij nws. Saib qhov uas kaj ci vij nws ntawd mas zoo yam li tus zaj sawv saum cov huab rau hnub uas nag los. Yawmsaub lub hwjchim ci ntsa iab saib mas muaj tus yam ntxwv zoo li no. Thaum kuv pom, kuv cia li khwb nkaus ua lub plhu ti nkaus av, thiab kuv hnov tus uas hais lub suab. Mas nws hais rau kuv tias, “Neeg tus tub 'e, cia li sawv tsees, kuv yuav hais lus rau koj.” Thaum nws hais rau kuv, Vaj Ntsuj Plig tau los rau hauv kuv thiab muab kuv tsa sawv ntsug. Mas kuv hnov Vajtswv hais lus rau kuv. Nws hais rau kuv tias, “Neeg tus tub, kuv txib koj mus rau hauv cov neeg Yixayee, yog lub tebchaws uas pheej fav xeeb, lawv yog cov uas fav xeeb rau kuv. Lawv thiab lawv tej poj koob yawm txwv yeej tawm tsam kuv los txog niaj hnub nimno. Cov neeg ntawd tsis paub txaj muag thiab tawv ncauj. Kuv txib koj mus rau ntawm lawv, mas koj yuav hais rau lawv tias, ‘Vajtswv Yawmsaub hais li no.’ Lawv yuav mloog thiab tsis mloog kuj xij, vim yog lawv yeej yog haiv neeg uas pheej fav xeeb, lawv yuav paub tias muaj ib tug cev Vajtswv lus nyob rau hauv lawv nruab nrab lawm. Neeg tus tub 'e, koj tsis txhob ntshai lawv, thiab tsis txhob ntshai tej lus uas lawv hais, txawm yog pos kaus ntsaj pos kaus ntsim nyob vij koj thiab koj nyob hauv nruab nrab cov raub ris teb, koj tsis txhob ntshai lawv tej lus, thiab tsis txhob poob siab rau lawv tej ntsej muag, rau qhov lawv yeej yog haiv neeg uas pheej fav xeeb. Koj cia li hais kuv tej lus rau lawv mloog, lawv yuav mloog thiab tsis mloog kuj xijpeem, rau qhov lawv yeej yog haiv neeg uas pheej fav xeeb. Neeg tus tub, koj cia li mloog tej uas kuv hais rau koj. Koj tsis txhob ua neeg fav xeeb yam li cov neeg uas pheej fav xeeb ntawd. Cia li rua ncauj thiab noj yam uas kuv muab rau koj.” Thaum kuv tsa muag ntsia ua ciav muaj ib txhais tes cev tuaj rau kuv, thiab muaj ib thooj ntawv nyob hauv txhais tes ntawd. Nws muab thooj ntawv ntawd nthuav rau kuv saib, mas muaj npe ntawv sau rau ob sab huvsi, muaj tej lus quaj ntsuag thiab quaj lwj siab thiab tej lus txom nyem sau rau hauv. Mas nws hais rau kuv tias, “Neeg tus tub 'e, cia li noj tej uas kuv muab rau koj. Cia li noj thooj ntawv no, thiab cia li mus hais rau haiv neeg Yixayee.” Kuv thiaj rua ncauj thiab nws muab thooj ntawv ntawd rau kuv noj. Thiab nws hais rau kuv tias, “Neeg tus tub, cia li noj thooj ntawv uas kuv muab rau koj no, cia li noj kom puv nkaus koj lub plab.” Mas kuv thiaj li noj. Thaum thooj ntawv ntawd nyob hauv kuv lub qhov ncauj kuj qab zib ib yam li zib ntab. Mas nws hais rau kuv tias, “Neeg tus tub, cia li mus cuag haiv neeg Yixayee, thiab hais kuv tej lus rau lawv. Tsis yog kuv txib koj mus cuag cov neeg uas hais lwm yam lus uas ceeblaj hais, tiamsis yog mus cuag haiv neeg Yixayee. Tsis yog mus cuag tej neeg coob coob uas hais lwm yam lus uas ceeblaj hais thiab koj tsis nkag siab. Yog kuv txib koj mus cuag tej neeg ntawd lawv yeej yuav mloog koj hais. Tiamsis haiv neeg Yixayee yuav tsis mloog koj hais rau qhov lawv yeej tsis yeem mloog kuv hais, thiab cov neeg Yixayee sawvdaws yog neeg hauv pliaj tawv lub siab tawv. Saib maj, kuv twb ua koj lub siab tawv tiv lawv, thiab ua rau koj lub hauv pliaj tawv tiv lawv lub hauv pliaj. Kuv ua rau koj lub hauv pliaj tawv dua pob zeb uas tawv heev, tawv dua zeb hauvswm. Koj tsis txhob ntshai lawv, tsis txhob poob siab rau lawv tej ntsej muag, rau qhov lawv yeej yog haiv neeg uas pheej fav xeeb.” Nws hais dua rau kuv tias, “Neeg tus tub, cia li khaws tej lus uas kuv hais rau koj huvsi rau hauv koj lub siab, thiab tig koj lub qhov ntsej mloog. Cia li mus, koj mus cuag cov neeg uas poob tebchaws, uas yog koj cov neeg, thiab hais rau lawv tias, ‘Vajtswv Yawmsaub hais li no,’ txawm yog lawv yuav mloog thiab tsis mloog kuj xij.” Vaj Ntsuj Plig txawm tsa kuv sawv, thiab thaum Yawmsaub lub hwjchim ci ntsa iab sawv ntawm lub chaw ntawd mus, kuv txawm hnov lub suab nrov vig voog tom kuv qub qab, yog cov tsiaj ciaj sia uas kooj tis sib tib ntxuaj lub suab nrov, thiab yog cov log tsheb uas nyob ib sab ntawm cov tsiaj ntawd lub suab nrov, yog lub suab uas nrov ua ntseeg nkaws. Vaj Ntsuj Plig kuj tsa kuv sawv thiab coj kuv mus, kuv thiaj mob siab thiab npau taws mus. Yawmsaub txhais tes muaj zog hnyav rau saum kuv. Kuv thiaj tuaj txog cov neeg poob tebchaws uas nyob ntawm Thee‑anpi, yog cov uas nyob ntawm ntug dej Khenpa. Kuv nrog lawv nyob qhov ntawd ua mluas mlob poob siab tag tau xya hnub. Thaum dhau xya hnub lawm, Yawmsaub hais lus tuaj rau kuv hais tias, “Neeg tus tub, kuv twb tsa koj ua tus faj xwm zov cov Yixayee. Koj hnov kuv lub ncauj thaum twg, ces koj cia li hais kuv tej lus ntawd ntuas lawv. Yog kuv hais rau tus neeg phem tias, ‘Koj yuav tuag tiag tiag li,’ yog koj tsis ntuas nws tsis hais kom nws tso nws txojkev phem tseg xwv thiaj cawm tau nws txojsia, mas tus neeg phem ntawd yuav tuag vim yog nws txojkev txhaum muaj txim, tiamsis kuv yuav ua rau koj ris nws cov ntshav. Tiamsis yog koj ntuas tus neeg phem lawm, tiamsis nws tsis tso qhov uas nws ua phem tseg thiab tsis tig ntawm txojkev phem rov los, nws yuav tuag vim yog nws txojkev txhaum muaj txim, mas koj yuav cawm tau koj txojsia. Thiab dua ib qho, yog tus ncaj ncees tso txojkev ncaj ncees tseg thiab tau ua txhaum muaj txim, thiab kuv muab yam uas ua rau nws dawm tso rau ntawm nws hauv ntej, mas nws yuav tuag. Vim koj tsis tau ntuas nws, mas nws yuav tuag rau nws lub txim. Kuv yuav tsis nco qhov uas nws ua ncaj ncees kiag li, tiamsis kuv yuav ua rau koj ris nws cov ntshav. Tiamsis yog koj ntuas tus ncaj ncees kom tsis txhob ua txhaum thiab nws tsis ua txhaum lawm, mas nws yuav muaj txojsia nyob tiag tiag vim yog nws yuav tej lus ntuas ntawd, thiab koj kuj cawm tau koj txojsia.” Yawmsaub txhais tes los rau saum kuv qhov ntawd, thiab nws hais rau kuv tias, “Cia li sawv tsees mus rau nram tiaj mas kuv yuav hais rau koj qhov ntawd.” Kuv thiaj sawv tsees mus rau nram tiaj, mas ua ciav Yawmsaub lub hwjchim ci ntsa iab nyob rau qhov ntawd, ib yam nkaus li lub hwjchim ci ntsa iab uas kuv pom ntawm tus dej Khenpa, mas kuv cia li khwb nkaus ua lub plhu ti nkaus av. Vaj Ntsuj Plig txawm los rau hauv kuv, ua rau kuv sawv tsees, thiab Yawmsaub hais rau kuv tias, “Koj cia li mus hauv koj tsev kaw nkaus qhov rooj cia. Neeg tus tub 'e, saib maj, koj yuav raug muab hlua khi, koj thiaj tawm mus tsis tau rau hauv nruab nrab cov Yixayee. Thiab kuv yuav ua rau koj tus nplaig lo koj qab yiag mas koj yuav hais tsis taus lus thiab ntuas tsis tau lawv, vim tias lawv yeej yog haiv neeg uas pheej fav xeeb. Tiamsis thaum kuv hais lus rau koj, kuv yuav ua rau koj rov hais tau lus mas koj yuav hais rau lawv tias, ‘Vajtswv Yawmsaub hais li no ntag.’ Tus uas yeem mloog kuj cia nws mloog, tus uas tsis yeem mloog kuj cia nws tsis txhob mloog, rau qhov lawv yeej yog haiv neeg uas pheej fav xeeb.” “Neeg tus tub 'e, koj cia li muab ib lub thwv cib tso rau ntawm koj xubntiag, thiab muab sais ua zoo li lub nroog Yeluxalees. Cia li tib chaw vij lub nroog ntawd cia thiab xov laj kab vij thiab tsub av ua chaw nce mus tawm tsam lub nroog ntawd thiab ua chaw ntaus rog vij, thiab ua tej chaw uas txam ntsa loog kom pob thoob plaws rau ib ncig. Koj cia li muab ib daim hlau los thiab muab txawb ua ntsa loog hlau quas koj thiab lub nroog. Koj cia li tig xubntiag rau ntawm lub nroog, lub nroog ntawd raug vij lawm, mas koj cia li ua tus uas ntaus lub nroog ntawd. No yog ua yam ntxwv qhia rau cov Yixayee. “Koj cia li pw ua ntsais rau sab laug, thiab muab qhov uas cov Yixayee raug teem txim tso rau saum koj. Koj pw rau sab laug pes tsawg hnub, mas koj yuav ris qhov uas lawv raug teem txim ntev ib yam li ntawd. Kuv teem tsawg hnub rau koj lawm, yog peb puas cuaj caum hnub, yog npaum li cov niaj xyoo uas rau txim rau lawv. Koj yuav ris qhov uas rau txim rau cov Yixayee ntev li ntawd ib hnub yog ib xyoos. Thaum koj pw puv sijhawm lawm, koj yuav tsum pw zaum ob, yog pw ua ntsais rau sab xis, thiab ris qhov uas rau txim rau cov Yuda. Kuv teem plaub caug hnub rau koj, ib hnub yog ib xyoo. Koj yuav tig xubntiag ntsia ntsoov daim duab uas yog vij lub nroog Yeluxalees, thiab loj npab ntshuas cev Vajtswv tej lus tawm tsam lub nroog ntawd. Saib maj, kuv yuav muab hlua khi koj cia, kom koj thiaj ntxeev tsis tau sab no rau sab tod mus txog thaum koj raug vij puv sijhawm lawm. “Koj cia li muab mog muab qeb muab taum lag taum pauv thiab pias thiab txhuv daj los tso ua ke rau hauv ib lub phaj muab ua ncuav. Thaum koj pw ua ntsais peb puas cuaj caum hnub ntawd, koj yuav noj cov ncuav ntawd xwb. Koj yuav tsum muab cov ncuav luj los noj, ib hnub noj nees nkaum sekhee, thiab noj raws li sijhawm uas teem cia xwb. Thiab dej los koj yuav muab luj haus, ib hee mas muab faib ua rau feem, ib hnub haus ib feem raws li sijhawm uas teem cia. Koj yuav noj cov ncuav ntawd ib yam li noj ncuav qeb. Koj yuav muab quav neeg los rauv taws ci tab meeg lawv.” Thiab Yawmsaub hais tias, “Cov Yixayee yuav noj lawv tej ncuav qias tsis huv ib yam li no rau hauv tej tebchaws uas kuv yuav ntiab lawv mus nyob.” Mas kuv thiaj hais tias, “Au Vajtswv Yawmsaub, tsis txhob ua li ntawd, kuv tsis txeev ua rau kuv qias puas tsuas. Txij thaum yau los txog nimno kuv tsis txeev noj tej tsiaj uas nws tuag nws thiab tej uas raug lwm tus tsiaj tom tuag. Tsis muaj ib qho nqaij qias tsis huv nkag rau hauv kuv lub qhov ncauj.” Mas Vajtswv thiaj hais rau kuv tias, “Ua li ntawd, kuv kheev koj muab quav nyuj hloov quav neeg ci ncuav rau koj.” Vajtswv hais dua rau kuv tias, “Neeg tus tub, saib maj, kuv yuav txiav tej zaub mov noj hauv Yeluxalees kom tu mus. Mas lawv yuav muab ncuav luj zuj zus los noj ua ntshai nrhw. Lawv yuav muab dej luj los haus ua poob siab tag. Mov thiab dej yuav tu nrho, mas lawv ib tug ntsia ib tug ua poob siab tag thiab yuag zuj zus rau thaum lawv raug teem txim.” “Neeg tus tub 'e, koj cia li muab ib rab ntaj ntse ntse los. Cia li siv rab ntaj ntawd ua tus Kws txiav plaubhau rab chais, cia li chais koj plaubhau thiab chais koj cov hwj txwv. Muab rab teev los luj faib koj cov plaubhau ua peb feem. Thaum txog hnub uas vij lub nroog puv sijhawm lawm, koj muab ib feem los hlawv rau hauv nruab nrab lub nroog, thiab muab ib feem los xuas ntaj tsuav vij lub nroog, thiab muab ib feem pov rau cua ntsawj ya mus, mas kuv yuav rho ntaj caum mus. Thiab koj muab cov plaubhau ntawd ib qho los pav rau ntawm koj lub qab tsho ntev. Thiab muab cov plaubhau ntawd ib txhia pov rau hauv cub tawg kom kub hnyiab tag. Mas yuav muaj hluavtaws tawm qhov ntawd mus rau cov Yixayee sawvdaws. “Vajtswv Yawmsaub hais li no tias, No yog Yeluxalees, kuv tsa nws rau hauv nruab nrab ib tsoom tebchaws, muaj lwm tebchaws nyob ib ncig nws. Nws tau fav xeeb ua phem kawg rau kuv tej kevcai heev dua li ib tsoom tebchaws, thiab fav xeeb rau kuv tej kab ke heev dua li tej tebchaws uas nyob ib ncig nws. Nws tsis lees yuav kuv tej kevcai thiab tsis ua raws li kuv tej kab ke. Vim li no Vajtswv Yawmsaub hais li no tias, Vim koj ua nruj ua tsiv heev dua tej tebchaws uas nyob ib ncig koj, thiab tsis ua raws li kuv tej kab ke thiab tsis coj raws li kuv tej kevcai, tiamsis tseem mus coj raws li tej tebchaws uas nyob ib ncig ntawm koj li kevcai, vim li no, Vajtswv Yawmsaub thiaj hais li no tias, Saib maj, twb yog kuv ntag uas tawm tsam koj. Kuv yuav teem koj lub txim hauv nruab nrab koj tab meeg ib tsoom tebchaws. Thiab yog tim koj tej kev qias vuab tsuab huvsi kuv thiaj yuav ua tej uas kuv tsis tau ua dua li rau koj thiab kuv yuav tsis ua tej ntawd dua li lawm. Vim li no leej txiv yuav noj lawv tej menyuam rau hauv nruab nrab nej, thiab tej menyuam yuav noj lawv leej txiv. Kuv yuav rau txim rau koj, thiab koj cov leejtwg tseem tshuav nyob kuv yuav ua kom tawg ri sua raws li cua ntsawj rau txhua fab. Vim li ntawd Vajtswv Yawmsaub thiaj hais tias, Kuv yeej muaj txojsia nyob, koj tau ua tej kev qias uas ntxub kawg li thiab tej kev qias vuab tsuab ua qias puas tsuas qhov chaw uas pe hawm kuv, kuv thiaj muab koj txiav pov tseg. Kuv lub qhov muag yuav tsis hlub koj, kuv yuav tsis khuvleej koj li. Koj ib feem hauv peb yuav tuag mob kis tag thiab yuav tuag tshaib tuag nqhis hauv nruab nrab koj, ib feem hauv peb yuav tuag hniav ntaj ib ncig nraum lub nroog, thiab ib feem hauv peb kuv yuav ua kom tawg ri sua mus raws li cua ntsawj rau txhua fab thiab kuv yuav rho ntaj caum lawv mus. “Ua li no kuv txojkev chim thiaj li tag thiab kuv yuav ua kuv txojkev npau taws rau lawv txog thaum kuv lub siab nqeg lawm. Thaum kuv ua txojkev chim rau lawv tag lawm mas lawv yuav paub tias kuv uas yog Yawmsaub tau hais tej no vim yog kuv khib xeeb. Tsis tag li ntawd xwb kuv tseem yuav ua kom koj nyob do cuas cia thiab ua lub chaw uas tej tebchaws uas nyob ib ncig koj thiab sawvdaws uas dua kev yuav thuam. Koj yuav raug luag thuam thiab raug luag luag, thiab ua lo lus uas ntuas luag thiab ua lub chaw uas tej tebchaws uas nyob ib ncig koj ceeb thiab ntshai, rau thaum kuv teem txim rau koj ua chim tsawv thiab npau taws, thiab qhuab qhia nplawm npau taws heev. Kuv yog Yawmsaub hais li no ntag. Kuv yuav tso rab xub uas tua tau neeg uas yog txojkev tshaib plab thiab rab xub uas ua kev puam tsuaj los rau koj, yog kuv tso los ua kom koj puam tsuaj, thiab kuv yuav tsav kev tshaib nqhis rau koj thiab txiav koj tej zaub mov noj tu mus. Kuv yuav tso kev tshaib nqhis thiab tsiaj qus tawm tsam koj, mas yuav txeeb koj tej tub ki coj mus. Mob kis thiab ntshav yuav nkag rau hauv koj mus. Thiab kuv yuav coj hniav ntaj los raug koj. Kuv yog Yawmsaub tau hais li no ntag.” Yawmsaub hais lus tuaj rau kuv tias, “Neeg tus tub 'e, cia tsom ntsoov rau Yixayee tej roob, thiab cev Vajtswv tej lus rau lawv, thiab hais tias, ‘Yixayee tej roob, nej cia li mloog Vajtswv Yawmsaub tej lus. Vajtswv Yawmsaub hais li no rau tej roob thiab tej pov roob thiab tej kwj ha thiab tej ntsaw ha tias, Saib maj, yog kuv ntag kuv yuav coj hniav ntaj los raug nej, thiab kuv yuav rhuav nej tej chaw uas teev dab saum tej roob pov tseg. Nej tej thaj yuav raug muab tso tseg nyob do cuas, thiab nej tej thaj hlawv xyab yuav raug muab tsoo pob tag. Kuv yuav muab nej cov neeg raug tua tuag pov rau ntawm nej tej dab mlom xubntiag. Kuv yuav muab cov Yixayee tej cev tuag tso rau ntawm lawv tej dab mlom xubntiag, thiab kuv yuav ua rau lawv tej pob txha ri sua rau ib ncig nej tej thaj. Nej nyob rau qhovtwg los nej tej moos yuav raug muab tso tseg nyob do cuas thiab nej tej chaw uas teev dab saum tej roob yuav puam tsuaj tag, nej tej thaj thiaj yuav nyob do cuas thiab raug puam tsuaj, nej tej dab mlom yuav raug muab tsoo thiab raug puam tsuaj, nej tej thaj hlawv xyab yuav raug muab txiav pov tseg, thiab tej uas nej tsim yuav raug muab sau zog pov tseg huvsi. Thiab cov uas raug tua tuag yuav ntog nplawg ntia rau hauv nej nruab nrab, mas nej yuav paub tias kuv yog Yawmsaub. “ ‘Tiamsis kuv yuav tseg nej tshuav nyob qee leej. Thaum nej qee leej khiav dim hniav ntaj mus nyob rau hauv ib tsoom tebchaws thiab thaum nej khiav ri sua mus nyob rau hauv luag tej tebchaws, mas nej cov uas khiav dim mus tau ntawd yuav nco txog kuv rau hauv ib tsoom tebchaws uas nej raug ntes coj mus, rau thaum kuv rhuav lawv lub siab phem tsis paub txaj muag uas ncaim ntawm kuv mus, thiab rhuav lawv lub qhov muag uas tig mus deev tej dab mlom lawm. Mas lawv yuav rov ntxub lawv tus kheej vim tej kev phem uas lawv tau ua thiab tej kev qias vuab tsuab uas lawv ua huvsi lawm. Lawv yuav paub tias kuv yog Yawmsaub. Kuv tsis tau lam hais tias kuv yuav ua tej xwm txheej phem no rau lawv. “ ‘Vajtswv Yawmsaub hais li no tias, Cia li npuaj teg ntaug taw hais tias, “Txom nyem kawg lauj,” vim cov Yixayee tej kev phem kev qias vuab tsuab huvsi. Lawv yuav raug hniav ntaj thiab kev tshaib kev nqhis thiab mob kis tuag tag. Cov uas nyob deb yuav tuag mob kis, cov uas nyob ze yuav tuag hniav ntaj, cov uas tseem tshuav nyob los yuav tuag tshaib tuag nqhis. Ua li no mas kuv txojkev npau taws rau lawv thiaj li nqeg. Thaum uas lawv cov uas raug tua tuag nyob pawg lug hauv nruab nrab lawv tej dab mlom thiab ib ncig tej thaj, thiab saum tej pov roob siab txhua qhov thiab saum tej ncov roob huvsi, thiab hauv txhua tsob qab ntoo ntsuab thiab txhua tsob ntoo xeeb uas nplooj tsaus nti, thiab txhua qhov uas lawv hlawv xyab rau lawv tej dab mlom txhua tus, mas nej yuav paub tias kuv yog Yawmsaub. Kuv yuav tsa kiag kuv txhais tes tawm tsam lawv, thiab ua rau lub tebchaws raug muab tso tseg nyob do cuas thoob plaws lawv tej zej zog, txij ntua tebchaws moj sab qhua mus txog lub moos Linpla. Mas thaum ntawd lawv yuav paub tias kuv yog Yawmsaub.’ ” Yawmsaub hais lus tuaj rau kuv tias, “Neeg tus tub 'e, Vajtswv Yawmsaub hais rau Yixayee tebchaws li no tias, Txog qhov kawg lawm. Qhov kawg nkaus twb los txog plaub fab lub tebchaws lawm. Nimno qhov kawg kuj los txog koj. Mas kuv yuav tso kuv txojkev chim los raug koj. Kuv yuav txiav txim rau koj raws li koj tau ua lawm, thiab kuv yuav rau txim rau koj vim koj kev qias vuab tsuab huvsi. Kuv lub qhov muag yuav tsis hlub koj thiab kuv yuav tsis khuvleej koj kiag li. Thaum koj tej kev qias vuab tsuab tseem nyob hauv nruab nrab koj, kuv yuav rau txim rau koj raws li koj tau ua. Thaum ntawd koj yuav paub tias kuv yog Yawmsaub. “Vajtswv Yawmsaub hais li no tias, liamsim tag liamsim thiab. Saib maj, kev liamsim los txog lawm. Qhov kawg los txog, qhov kawg los txog lawm. Nws sawv tsees tawm tsam koj. Saib maj, qhov kawg los txog lawm. Nej cov uas nyob hauv lub tebchaws no 'e, nej lub khuab los txog nej lawm, twb txog lub sijhawm lawm, hnub ntawd kuj los ze lawm, yog hnub uas kub ntxhov heev, tsis yog hnub uas qw zoo siab xyiv fab saum tej roob. Nimno tshuav tsis ntev lawm kuv yuav nchuav kuv tej kev npau taws rau saum nej, kuv yuav tso kuv tej kev chim rau nej mus txog thaum kuv siab nqeg, kuv yuav txiav txim rau nej raws li nej tau ua lawm, thiab yuav rau txim rau nej tej kev qias vuab tsuab huvsi. Kuv lub qhov muag yuav tsis hlub nej, kuv yuav tsis khuvleej nej li. Thaum nej tej kev qias vuab tsuab tseem nyob hauv nruab nrab nej, kuv yuav rau txim rau nej raws li nej tau ua lawm. Thaum ntawd nej thiaj paub tias kuv yog Yawmsaub uas nplawm nej. “Saib maj, hnub ntawd, saib maj, los txog lawm. Nej lub khuab los txog lawm, tus pas nrig tawg paj lawm, txojkev khav theeb ua cos paj lawm. Txojkev ua nruj ua tsiv kuj huam loj ua tus pas uas yog kev phem kawg. Yuav tsis muaj leejtwg tshuav nyob li, lawv tej kev vam meej nplua nuj thiab lawv tej nyiaj txiag yuav tsis muaj lawm, lawv tej koob meej kuj tsis muaj li lawm. Lub sijhawm los txog lawm, hnub ntawd los ze lawm. Tus uas yuav tsis txhob zoo siab xyiv fab, tus uas muag tsis txhob quaj ntsuag, rau qhov txojkev npau taws los raug lawv sawvdaws. Tus uas muag lawm nws yuav tsis tau yam uas nws muag rov los tag nws sim neej li, rau qhov zaj yog toog no kuj ntsig txog lawv tej neeg sawvdaws, thiab yuav tsis txawj muab thim rov qab. Yog tim lawv tej kev txhaum muaj txim thiaj tsis muaj ib tug tuav tau nws txojsia cia li. Lawv twb tshuab raj kub yaj thiab npaj txhua yam txhij lawm, tiamsis tsis muaj leejtwg nqes tes ua rog, rau qhov kuv txojkev npau taws los raug lawv tej neeg sawvdaws. “Hniav ntaj nyob sab nraud, mob kis thiab kev tshaib nqhis nyob sab hauv. Cov uas nyob tom tej teb kuj tuag hniav ntaj, cov uas nyob hauv lub nroog mas kev tshaib nqhis thiab mob kis muab noj kom tag. Cov uas tshuav nyob yog leejtwg khiav dim tau, lawv yuav nyob pem tej roob yam li tus nquab taug uas nyob hauv hav, txhua tus kuj quaj ntsuag tu siab rau lawv tej kev txhaum muaj txim. Txhua txhais tes kuj tsaug leeg tag, thiab txhua lub hauv caug kuj tsaus muag yam li dej. Lawv muab khaub seev tsaj los hnav, thiab txojkev ntshai los qhwv nkaus lawv. Lawv txhua tus lub ntsej muag raug txaj muag thiab txhua tus chais plaubhau do cuas. Lawv muab lawv tej nyiaj laim rau tom tej kev, thiab lawv tej kub zoo yam nkaus li tej uas qias tsis huv. Hnub uas Yawmsaub npau taws, lawv tej nyiaj tej kub pab tsis tau lawv dim. Lawv tej nyiaj tej kub pab tsis tau lawv lub plab tsau, txhaws tsis tau lawv lub plab tshaib. Rau qhov tej nyiaj tej kub yog qhov uas ua rau lawv dawm mus ua txhaum muaj txim. Lawv khav txog lawv tej saw kub saw nyiaj, tiamsis lawv siv tej ntawd ua lawv tej dab mlom uas qias vuab tsuab thiab tej yam uas ntxub kawg li. Vim li no kuv yuav ua rau tej ntawd qias tsis huv rau lawv. Thiab kuv yuav muab tej ntawd cob rau hauv lwm haiv neeg txhais tes kom txeeb tau, thiab muab cob rau tej neeg phem hauv ntiajteb kom lws tau, mas lawv yuav ua qias puas tsuas tej ntawd. Kuv yuav fee plhu kiag ntawm lawv xwv lawv thiaj ua rau kuv lub chaw tsim txiaj qias puas tsuas. Tub sab yuav nkag los rau hauv thiab muab ua qias puas tsuas. “Cia li npaj saw hlau rau qhov lub tebchaws muaj kev tua neeg los ntshav puv nkaus thiab muaj kev ua nruj ua tsiv puv nkaus lub nroog. Kuv yuav coj tej haiv neeg cov uas phem kawg los txeeb lawv tej vaj tse. Kuv yuav txo cov uas muaj zog txojkev khav theeb poob nthav ploj tag, thiab ua rau lawv tej chaw dawb huv qias puas tsuas. Thaum txojkev poob siab lwj siab los txog, lawv yuav nrhiav txojkev thaj yeeb, tiamsis tsis muaj li lawm. Kev puam tsuaj los txog tag los los txog thiab, muaj xaiv lus tag muaj xaiv lus thiab. Lawv nrhiav tej yog toog ntawm tej xibhwb cev Vajtswv lus, tiamsis Vajtswv txojlus ploj ntawm cov pov thawj lawm, thiab tej lus sablaj ploj tag ntawm cov kev txwj laus lawm. Vajntxwv kuj quaj ntsuag, tus thawj kuj raug kev poob siab qhwv nkaus nws, thiab cov pejxeem txhais tes kuj tshee hnyo. Kuv yuav ua rau lawv raws li lawv tau ua lawm, thiab kuv yuav txiav txim rau lawv raws li lawv txiav txim rau luag. Mas lawv yuav paub tias kuv yog Yawmsaub.” Hnub xiab tsib, lub rau hli, xyoo rau, thaum kuv zaum hauv kuv tsev thiab Yuda cov kev txwj laus nrog kuv nyob ua ke, Vajtswv Yawmsaub txhais tes los rau saum kuv hauv qhov chaw ntawd. Ces kuv saib mas ua ciav pom ib yam zoo li ib tug neeg. Txij ntawm lub duav rov hauv mas pom muaj hluavtaws, txij ntawm duav rov saud mas pom ib yam ci nplas zoo li tej tooj dag uas ci heev. Nws cev qhov uas zoo li txhais tes tuaj ntsiab kuv ib qais plaubhau, mas Vaj Ntsuj Plig muab kuv nqa kiag rau saum nruab nrab lub ntiajteb thiab lub ntuj, thiab coj kuv los txog Yeluxalees hauv zaj yog toog uas pom Vajtswv ntawd, coj kuv los txog lub qhov rooj sab ped uas nkag rau hauv lub tshav puam sab hauv lub tuam tsev pe Vajtswv, yog lub chaw uas txawb tus dab mlom uas khib xeeb, uas ua rau Vajtswv khib xeeb heev. Ua ciav, Yixayee tus Vajtswv lub hwjchim uas ci ntsa iab nyob qhov ntawd, yam nkaus li zaj yog toog uas kuv txeev pom nram tiaj. Mas Vajtswv hais rau kuv tias, “Neeg tus tub 'e, cia li tsa muag ntsia rau sab ped.” Kuv thiaj tsa muag ntsia rau sab ped ua ciav muaj tus dab mlom uas khib xeeb nyob ntawm lub qhov rooj thiab lub thaj xyeem sab ped. Thiab nws hais rau kuv tias, “Neeg tus tub, koj pom lawv ua dabtsi los tsis pom? Twb yog qhov uas cov Yixayee ua qias vuab tsuab loj kawg li rau ntawm no, thiaj ua rau kuv khiav deb ntawm qhov chaw uas pe hawm kuv. Tiamsis koj tseem yuav pom tej kev qias vuab tsuab loj dua li no thiab.” Nws coj kuv los txog ntawm lub qhov rooj uas nkag rau hauv lub tshav puam, mas thaum kuv tsa muag ntsia ua ciav muaj ib kem ntawm phab ntsa rau hauv. Mas nws hais rau kuv tias, “Neeg tus tub, cia li tho phab ntsa rau hauv.” Thaum kuv tho phab ntsa rau hauv ua ciav muaj ib lub qhov rooj. Mas nws hais rau kuv tias, “Cia li nkag mus maj, mus saib tej kev phem kev qias vuab tsuab uas lawv ua rau ntawm no.” Kuv thiaj li nkag mus rau hauv thiab saib ua ciav muaj tej duab thoob plaws ntawm phab ntsa, muaj txhua yam tsiaj txhu uas nkag hauv av thiab tej tsiaj uas ntxim ntxub kawg thiab cov Yixayee tej dab mlom huvsi. Thiab muaj cov Yixayee tej kev txwj laus xya caum leej sawv ntsug ntawm tej dab mlom ntawd xubntiag, thiab pom Safas tus tub Ya‑axaniya nrog lawv sawv ua ke ntawd. Txhua tus nyias tuav rawv nyias lub tais hlawv hmoov tshuaj tsw qab xyeem, ua pa ncho qas lug nce rau saud. Mas nws hais rau kuv tias, “Neeg tus tub, koj pom tej uas cov Yixayee tej kev txwj laus ua hauv qhov tsaus ntuj, txhua tus nyias nyob hauv nyias chav uas muaj tej duab ntawd los tsis pom? Rau qhov lawv hais tias, ‘Yawmsaub tsis pom peb li. Yawmsaub tso tebchaws no tseg lawm.’ ” Nws hais dua rau kuv tias, “Koj tseem yuav pom tej uas lawv ua qias vuab tsuab loj dua li no thiab.” Nws txawm coj kuv los txog lub qhov rooj sab ped uas nkag rau hauv Yawmsaub lub tuam tsev, ua ciav muaj ib pab pojniam zaum quaj tus dab Thamub. Mas nws hais rau kuv tias, “Neeg tus tub 'e, koj pom lawm lov? Koj tseem yuav pom tej kev ua qias vuab tsuab loj dua li no thiab.” Mas nws coj kuv nkag los rau hauv lub tshav puam sab hauv Yawmsaub lub tuam tsev. Ua ciav, ntawm lub qhov rooj nkag rau hauv Yawmsaub lub tuam tsev ntawm zaj qab khav thiab lub thaj xyeem ntu nruab nrab, muaj kwvlam nees nkaum tsib tug txivneej, tig nrob qaum rau Yawmsaub lub tuam tsev, tig xubntiag rau sab hnub tuaj tabtom pe lub hnub rau sab hnub tuaj ntawd. Mas nws hais rau kuv tias, “Neeg tus tub 'e, koj pom lawm lov? Qhov uas cov neeg Yuda ua tej kev qias vuab tsuab uas lawv ua ntawm no yog ib qho me me xwb lov? Lawv tseem ua nruj ua tsiv puv nkaus lub tebchaws thiab ua rau kuv yimhuab chim. Saib maj, lawv tseem muab ceg ntoo los tib rau ntawm lawv qhov ntswg. Vim li no kuv yuav ua npau taws heev rau lawv. Kuv lub qhov muag yuav tsis hlub li, kuv yuav tsis khuvleej kiag li. Txawm yog lawv hu nrov npaum li cas rau kuv lub qhov ntsej los kuv yuav tsis mloog lawv.” Yawmsaub qw nrov rau kuv qhov ntsej hais tias, “Nej cov uas yuav rau txim tua lub nroog no, cia li txav los ze, nyias tuav rawv nyias tej cuab yeej uas ua kom puam tsuaj rau hauv txhais tes los.” Ua ciav, muaj rau tus txivneej tuaj lub qhov rooj sab saud tuaj, yog lub uas tig rau sab ped, txhua tus tuav rawv tej cuab yeej tua neeg hauv nws txhais tes los. Thiab muaj ib tug txivneej hnav ntaub mag nqa lub hnab twj siv sau ntawv nrog lawv los ua ke. Lawv nkag mus sawv ntawm lub thaj tooj liab uas xyeem qhov txhia chaw ib sab. Yixayee tus Vajtswv lub hwjchim uas ci ntsa iab twb tawm ntawm ob tug Khelunpee saum lub phij xab, yog qhov chaw uas nws ib txwm nyob, mus rau ntawm lub qhov rooj tuam tsev lawm. Mas nws hu tus txivneej uas hnav ntaub mag thiab nqa lub hnab twj siv sau ntawv los. Thiab Yawmsaub hais rau nws tias, “Cia li mus thoob plaws lub nroog Yeluxalees, mas ntaus cim rau tej neeg lub hauv pliaj, yog cov uas quaj ncia dhawv tu siab rau tej kev qias vuab tsuab uas ua rau hauv lub nroog.” Thiab nws hais rau rau tus txivneej ntawd rau kuv hnov hais tias, “Nej cia li raws tus uas ntaus cim qab mus thoob plaws lub nroog thiab muab tej neeg tua. Nej lub qhov muag tsis txhob hlub, nej tsis txhob khuvleej kiag li. Cia li tua kiag tej poj koob yawm txwv, tej tub hluas tej ntxhais hluas, tej menyuam yaus thiab tej pojniam, tiamsis tsis txhob kov cov uas twb ntaus cim rau lawm. Cia li pib kiag ntawm qhov chaw uas pe hawm kuv.” Ua li ntawd lawv pib tua kiag cov kev txwj laus uas nyob ntawm lub tuam tsev zaj qab khav. Yawmsaub hais rau lawv tias, “Cia li ua rau lub tuam tsev qias puas tsuas, muab cov uas raug tua tuag tso puv nkaus tej tshav puam hauv lub tuam tsev. Cia li tawm mus.” Lawv thiaj li tawm mus tua tej neeg hauv lub nroog. Thaum uas lawv tabtom mus tua ntawd tshuav kuv tib leeg nyob, kuv thiaj khwb nkaus ua lub plhu ti nkaus av, thiab qw hais tias, “Au Vajtswv Yawmsaub, tsis txhob ua li ntawd lauj! Koj yuav muab cov Yixayee uas tseem tshuav nyob no ua kom puam tsuaj tag huvsi rau thaum uas koj nchuav koj txojkev npau taws rau Yeluxalees lov?” Nws hais rau kuv tias, “Cov Yixayee thiab cov Yuda lub txim loj kawg nkaus, ntshav puv nkaus lub tebchaws, thiab tej kev ua tsis ncaj puv nkaus hauv lub nroog. Rau qhov lawv hais tias, ‘Yawmsaub tso lub tebchaws tseg lawm, thiab Yawmsaub tsis pom peb li lawm.’ Kuv los kuv lub qhov muag yuav tsis hlub, kuv yuav tsis khuvleej kiag li, tiamsis kuv yuav ua pauj rau lawv raws li lawv tau ua lawm rau saum lawv lub taubhau.” Ua ciav tus uas hnav ntaub mag thiab nqa lub hnab twj siv sau ntawv ntawd rov los hais rau Yawmsaub tias, “Kuv twb ua raws li uas koj hais rau kuv tag lawm.” Kuv tsa muag ntsia saum lub qab ntuj uas khwb cov Khelunpee ntawd taubhau ua ciav muaj ib yam tshwm los zoo li qe zeb phaithu tsamxem, zoo yuav thooj li lub zwm txwv. Vajtswv hais rau tus txivneej uas hnav ntaub mag ntawd tias, “Cia li nkag mus rau hauv nruab nrab cov log tsheb kiv kiv uas nyob hauv cov qab Khelunpee. Cia li xuas tes yawm cov ncaig taws uas tseem kub hauv nruab nrab cov Khelunpee thiab coj mus w rau saum lub nroog.” Mas tus ntawd kuj nkag mus tab meeg kuv ntsia ntsoov. Thaum tus txivneej ntawd nkag mus, cov Khelunpee sawv ntawm lub tuam tsev sab nrad. Mas huab los laum puv nkaus lub tuam tsev lub tshav puam sab hauv. Mas Yawmsaub lub hwjchim uas ci ntsa iab kuj tawm ntawm cov Khelunpee mus rau ntawm lub qhov rooj tuam tsev, mas huab laum puv nkaus lub tuam tsev chav hauv nruab nrab, thiab Yawmsaub lub hwjchim ci ntsa iab puv nkaus lub tshav puam sab hauv. Txawm yog cov uas nyob lub tshav puam sab nraud los kuj hnov cov Khelunpee kooj tis lub suab nrov, ib yam li Vajtswv uas muaj hwjchim loj kawg nkaus lub suab hais lus. Thaum nws hais rau tus txivneej uas hnav ntaub mag hais tias, “Cia li muab hluavtaws hauv nruab nrab cov log tsheb kiv kiv uas nyob hauv nruab nrab cov Khelunpee,” tus txivneej ntawd nkag mus sawv ntawm ib sab ib lub log tsheb. Ib tug Khelunpee txawm cev loo tes mus rau hauv cov hluavtaws uas nyob hauv nruab nrab cov Khelunpee, muab hluavtaws los cev rau tus uas hnav ntaub mag ntawd txhais tes, ces tus ntawd txawm txais cov hluavtaws ntawd tawm mus lawm. Saib mas zoo li hauv cov Khelunpee qab phab tis muaj ib txhais tes thooj li tes neeg. Kuv tsa muag ntsia mas pom muaj plaub lub log tsheb nyob ib sab ntawm cov Khelunpee, ib tug muaj ib lub log. Saib cov log tsheb mas ci zoo yam nkaus li tej qe zeb hlaws ntsuab lam lug. Cov log tsheb ntawd zoo li uas hais no, plaub lub log tsheb zoo ib yam nkaus, plaub lub log tsheb zoo li nyias muaj nyias ib lub log muab nruab sib ris. Thaum yuav mus rau sab twg kuj cia li mus tau rau plaub fab tsis txog tig li. Yog ib lub log mus rau tom hauv ntej lwm lub log kuj mus raws qab tsis txog tig li. Lawv lub cev lub nrob qaum tej tes tej kooj tis thiab lawv plaub lub log tsheb puavleej muaj qhov muag thoob plaws. Cov log tsheb ntawd kuv hnov luag hu tias “log tsheb uas kiv kiv.” Txhua tus muaj plaub lub ntsej muag, lub ntsej muag ib yog Khelunpee, lub ntsej muag ob yog neeg, lub ntsej muag peb yog tsov ntxhuav, lub ntsej muag plaub yog dav. Cov Khelunpee kuj sawv ya mus. Yog tej tsiaj ciaj sia uas kuv txeev pom ntawm ntug dej Khenpa. Thaum cov Khelunpee mus, cov log tsheb kuj raws ib sab mus thiab. Thaum cov Khelunpee nthuav tis ya tawm hauv ntiajteb lawm, cov log tsheb ntawd kuj tsis tig ntawm lawv mus. Thaum cov Khelunpee nres, cov log tsheb kuj nres, thaum cov Khelunpee sawv ya cov log tsheb kuj sawv ya ua ke mus, rau qhov cov tsiaj tus plig nyob hauv cov log tsheb. Yawmsaub tus hwjchim uas ci ntsa iab txawm tawm ntawm lub qhov rooj tuam tsev mus nyob saum cov Khelunpee. Cov Khelunpee kuj nthuav tis ya nce hauv av mus tab meeg kuv ntsia ntsoov, cov log tsheb uas nyob ib sab kuj mus ua ke thiab. Lawv nres rau ntawm Yawmsaub lub tuam tsev lub qhov rooj uas nyob sab hnub tuaj. Cov Yixayee tus Vajtswv lub hwjchim ci ntsa iab nyob saum cov Khelunpee ntawd. Cov Khelunpee no yog cov tsiaj ciaj sia uas kuv txeev pom nyob hauv qab cov Yixayee tus Vajtswv ntawm ntug dej Khenpa. Thiab kuv paub tias lawv yog Khelunpee. Txhua tus muaj plaub lub ntsej muag thiab muaj plaub phab tis, thiab hauv cov qab tis ntawd muaj ib yam zoo li neeg txhais tes. Hais txog lawv lub ntsej muag zoo li cas, yeej zoo li cov ntsej muag uas kuv txeev pom ntawm ntug dej Khenpa. Txhua tus tawm ncaj nraim ntawm nws xubntiag mus. Vaj Ntsuj Plig muab kuv nqa thiab coj kuv mus rau ntawm Yawmsaub lub tuam tsev lub qhov rooj sab hnub tuaj uas tig rau sab hnub tuaj. Ua ciav ntawm txojkev uas nkag rau hauv lub qhov rooj muaj nees nkaum tsib tug txivneej. Thiab hauv lawv cov ntawd kuv pom Axu tus tub Ya‑axaniya thiab Npenaya tus tub Pelathiya, uas yog ua thawj coj cov pejxeem. Mas Vajtswv hais rau kuv tias, “Neeg tus tub, cov neeg no yog cov uas tuav tswvyim ua txhaum thiab taw qhia tej lus phem hauv lub nroog no. Lawv hais tias, ‘Tsis tau txog sijhawm ua vaj ua tsev. Lub nroog no yog lub laujkaub, peb yog cov nqaij.’ Neeg tus tub 'e, vim li no cia li cev Vajtswv li lus tawm tsam lawv, cia li hais los maj.” Mas Yawmsaub tus Ntsuj Plig thiaj los nyob rau saum kuv, thiab Yawmsaub hais rau kuv tias, “Cia li hais tias, Yawmsaub hais li no tias, Yixayee haiv neeg 'e, nej xav li ntawd, kuv yeej paub tej uas nyob hauv nej lub siab. Nej tau tua neeg hauv lub nroog no coob zuj zus, thiab muab cov uas raug tua tuag pov tseg puv nkaus hauv tej kev. Vim li no Vajtswv Yawmsaub thiaj hais li no tias, cov uas nej tua tuag thiab muab pov tseg rau hauv nruab nrab lub nroog no, lawv yog cov nqaij ntag, lub nroog no yog lub laujkaub. Tiamsis nej yuav raug muab coj tawm hauv no mus. Nej ntshai hniav ntaj, tiamsis kuv yuav coj hniav ntaj los raug nej. Vajtswv Yawmsaub hais li no ntag. Kuv yuav coj nej tawm hauv lub nroog no mus thiab muab nej cob rau hauv lwm haiv neeg txhais tes, thiab kuv yuav txiav txim rau nej. Nej yuav raug ntaj tuag. Kuv yuav rau txim rau nej ntawm Yixayee ciam teb, mas nej thiaj paub tias kuv yog Yawmsaub. Lub nroog no tsis yog lub laujkaub uas tsom kwm nej, thiab nej tsis yog cov nqaij uas nyob rau hauv. Kuv yuav rau txim rau nej ntawm Yixayee ciam teb. Mas nej thiaj paub tias kuv yog Yawmsaub, rau qhov nej tsis ua raws li kuv tej kab ke, thiab tsis coj raws li kuv txoj kevcai, tiamsis nej ua raws tej tebchaws uas nyob ib ncig nej li kevcai.” Thaum kuv tabtom cev Vajtswv lus ntawd, ua ciav Npenaya tus tub Pelathiya txawm tuag. Ces kuv cia li khwb nkaus lub plhu ti nkaus av thiab qw nrov nrov hais tias, “Au Vajtswv Yawmsaub, tsis txhob ua li ntawd lauj! Koj yuav ua kom cov Yixayee uas tseem tshuav nyob puam tsuaj tag nrho huvsi lov?” Yawmsaub hais lus tuaj rau kuv tias, “Neeg tus tub 'e, koj cov kwvtij, yog koj cov kwvtij uas nrog koj poob tebchaws lawm, yog cov Yixayee huvsi, uas raug cov hauv Yeluxalees hais tias, ‘Lawv khiav deb ntawm Yawmsaub lawm, mas lub tebchaws no raug muab rau peb ua peb tug lawm.’ Vim li no koj cia li hais tias, ‘Vajtswv Yawmsaub hais li no tias, Txawm yog kuv muab lawv tshais mus nyob deb rau hauv ib tsoom tebchaws, thiab ua rau lawv ri sua rau hauv tej tebchaws, los kuv tseem ua lub chaw rau lawv pe hawm ib ntus hauv tej tebchaws uas lawv mus nyob.’ “Vim li no cia li hais tias, ‘Vajtswv Yawmsaub hais li no tias, Kuv yuav qaws nej tawm hauv ib tsoom neeg los, thiab coj nej tawm hauv tej tebchaws uas nej mus nyob lawm los txoos ua ke, thiab kuv yuav muab Yixayee tebchaws rau nej.’ “Thaum lawv los txog lawm, lawv yuav rhuav tej uas ntxub kawg huvsi thiab tej uas qias vuab tsuab huvsi tawm mus pov tseg. Kuv yuav pub lawv muaj ib lub siab xwb, thiab kuv yuav pub tus ntsuj plig tshiab rau hauv lawv. Kuv yuav muab lawv lub siab pob zeb rho hauv lawv lub cev mus, thiab muab lub siab nqaij rau lawv, kom lawv thiaj li ua raws li kuv tej kab ke thiab tuav rawv kuv tej kevcai thiab ua raws nraim. Lawv yuav ua kuv haiv neeg thiab kuv yuav ua lawv tus Vajtswv. Tiamsis cov uas lub siab nyiam ua raws li lawv tej kev uas ntxub kawg thiab lawv tej kev qias vuab tsuab, kuv yuav ua pauj rau lawv raws li lawv tau ua lawm rau saum lawv lub taubhau. Vajtswv Yawmsaub hais li no ntag.” Cov Khelunpee kuj nthuav tis, cov log tsheb kuj nyob ib sab ntawm lawv, thiab Yixayee tus Vajtswv lub hwjchim ci ntsa iab nyob saum lawv. Yawmsaub lub hwjchim ci ntsa iab txawm tawm hauv nruab nrab lub nroog mus, mus nyob saum lub roob uas nyob ntawm lub nroog sab hnub tuaj. Ces Vaj Ntsuj Plig txawm nqa kuv mus, coj kuv los hauv zaj yog toog uas Vaj Ntsuj Plig pub rau kuv, los txog Kheedia tebchaws rau ntawm cov uas poob tebchaws. Ces zaj yog toog uas kuv pom txawm ncaim kuv mus lawm. Ces kuv thiaj hais txhua yam uas Yawmsaub qhia rau kuv rau cov uas poob tebchaws paub. Yawmsaub hais lus tuaj rau kuv tias, “Neeg tus tub, koj nyob hauv cov neeg uas pheej fav xeeb nruab nrab. Lawv muaj qhov muag los saib tsis pom, muaj qhov ntsej los tsis hnov lus, vim lawv yog cov neeg uas pheej fav xeeb. Yog li no, neeg tus tub, koj cia li hwbxwm nra ib yam li tus uas yuav poob tebchaws, thiab cia li khiav ua neeg poob tebchaws nruab hnub nrig tab meeg lawv. Koj yuav khiav ib yam li tus uas poob tebchaws, tawm ntawm koj lub chaw mus rau ib qho tab meeg lawv. Tej zaum lawv yuav nkag siab, txawm yog lawv yog cov neeg uas pheej fav xeeb. Koj cia li ris koj lub nra tawm mus nruab hnub nrig tab meeg lawv yam li tej nra uas raug poob tebchaws. Mas thaum tsaus ntuj koj yuav tawm mus tab meeg lawv, ib yam li tus uas raug poob tebchaws. Cia li tho qhov tsev tab meeg lawv pom thiab coj lub nra tawm lub qhov tsev ntawd mus. Cia li tsaws koj lub nra rau saum xub pwg tab meeg lawv, thiab cia li kwv tawm mus thaum tsaus ntuj nti. Koj yuav npog ntsej muag, kom thiaj tsis pom lub tebchaws. Kuv muab koj ua yam ntxwv rau cov Yixayee.” Kuv kuj ua raws li uas Yawmsaub hais. Kuv ris kuv lub nra tawm nruab hnub nrig ib yam li tej nra uas raug poob tebchaws. Thaum tsaus ntuj kuv txawm xuas kuv txhais tes tho qhov tsev. Kuv kwv kuv lub nra tawm mus thaum tsaus ntuj nti, kuv kwv saum xub pwg tab meeg lawv. Tagkis thaum kaj ntug Yawmsaub hais lus tuaj rau kuv tias, “Neeg tus tub, haiv neeg Yixayee uas pheej fav xeeb, puas tau hais rau koj tias, ‘Koj ua dabtsi?’ los tsis hais? Koj cia li hais rau lawv tias, ‘Vajtswv Yawmsaub hais li no tias, Tej lus no ntsig txog tus thawj hauv Yeluxalees thiab cov Yixayee sawvdaws uas nyob qhov ntawd.’ Koj cia li hais tias, ‘Kuv ua yam ntxwv rau nej.’ Qhov uas kuv ua li no, twb yog lawv yuav raug ib yam li ntawd. Lawv yuav raug poob tebchaws, lawv yuav raug ntes kuav mus. Tus thawj uas nyob hauv lawv nruab nrab yuav tsaws nws lub nra rau saum xub pwg tawm khiav tsaus ntuj nti mus. Nws yuav tho qhov tsev thiab tawm mus. Nws yuav npog ntsej muag xwv nws lub qhov muag thiaj tsis pom lub tebchaws. Kuv yuav nthuav vas cuab nws mas nws yuav mag kuv lub vas. Kuv yuav coj nws mus rau Npanpiloo hauv cov Kheedia lub tebchaws, tiamsis nws yuav tsis pom lub tebchaws. Nws yuav tuag rau qhov ntawd. Kuv yuav ua kom cov uas nyob ib ncig nws txhua tus, tag nrho nws cov tub teg tub taws thiab nws cov tub rog huvsi, ri sua mus raws cua rau txhua fab. Thiab kuv yuav rho ntaj caum tua lawv mus. Thaum kuv ntiab lawv mus nyob rau hauv ib tsoom tebchaws thiab ua rau lawv khiav ri sua mus rau hauv luag tej tebchaws, mas lawv yuav paub tias kuv yog Yawmsaub. Tiamsis kuv yuav pub qee leej dim hniav ntaj thiab kev tshaib kev nqhis thiab mob kis, kom lawv thiaj piav lawv tej kev qias vuab tsuab huvsi rau hauv ib tsoom tebchaws uas lawv khiav mus nyob ntawd paub, thiab lawv yuav paub tias kuv yog Yawmsaub.” Yawmsaub hais dua lus tuaj rau kuv tias, “Neeg tus tub, cia li noj mov ua tshee hnyo, thiab haus dej ua ntshai nrhw. Thiab hais rau cov neeg hauv lub tebchaws no tias, ‘Vajtswv Yawmsaub hais li no txog cov neeg hauv Yeluxalees hauv Yixayee tebchaws tias, Lawv yuav noj mov ua ntshai nrhw, thiab yuav haus dej ua siab poob nthav, vim txhua yam hauv lub tebchaws yuav raug muab lws du lug mus, yog tim cov neeg sawvdaws nyob hauv uas ua nruj ua tsiv. Thiab tej moos uas muaj neeg nyob yuav raug muab tso tseg piam tag thiab lub tebchaws yuav nyob do cuas. Mas nej yuav paub tias kuv yog Yawmsaub.’ ” Yawmsaub hais lus tuaj rau kuv tias, “Neeg tus tub, lo paj lug uas koj muaj hais txog Yixayee tebchaws tias, ‘Ib hnub dhau ib hnub los txhua zaj yog toog twb tsis tiav,’ yog li cas maj? Cia li hais rau lawv tias, ‘Vajtswv Yawmsaub hais li no tias, Kuv yuav ua kom lo paj lug no ploj tag mus, lawv yuav tsis siv lo paj lug no hauv Yixayee dua li lawm.’ Cia li hais rau lawv tias, ‘Hnub ntawd twb los txog tes lawm, txhua zaj yog toog kuj yuav tiav. Rau qhov yuav tsis muaj ib zaj yog toog cuav thiab yuav tsis muaj tej lus hais txog tom hauv ntej uas dag ntxias rau hauv cov Yixayee li lawm. Tiamsis kuv uas yog Yawmsaub yuav hais tej lus uas kuv hais xwb, thiab yuav muaj raws li tej lus ntawd, tsis tos ntev lawm. Nej cov neeg uas pheej fav xeeb 'e, hauv nej tiam no ntag kuv yuav hais thiab ua kom tiav. Vajtswv Yawmsaub hais li no ntag.’ ” Yawmsaub hais lus dua tuaj rau kuv tias, “Neeg tus tub, saib maj, cov neeg Yixayee hais tias, ‘Tej yog toog uas nws pom yog tej uas tseem nyob yav tom hauv ntej ub ntev hnub, thiab nws cev Vajtswv tej lus txog tej sijhawm uas tseem nyob deb.’ Vim li no cia li hais rau lawv tias, ‘Vajtswv Yawmsaub hais li no tias, Kuv cov lus tsis muaj ib los uas yuav tos ntev li lawm, tiamsis tej lus uas kuv hais yeej yuav ua kom tiav. Vajtswv Yawmsaub hais li no ntag.’ ” Yawmsaub hais lus tuaj rau kuv tias, “Neeg tus tub, cia li cev lus tawm tsam Yixayee cov xibhwb uas cev Vajtswv lus. Cia li cev lus hais rau cov uas cev lus raws li lawv lub siab xav xwb hais tias, ‘Cia li mloog Yawmsaub tej lus. Vajtswv Yawmsaub hais li no tias, Cov xibhwb ruam uas cev Vajtswv lus raug txom nyem lauj, yog cov uas nws hais raws nws tus plig xwb, tsis pom dabtsi li. Cov Yixayee 'e, nej cov xibhwb cev Vajtswv lus ces zoo ib yam li tej hma uas nyob hauv tej qub moos uas pob tag. Nej tsis tau nce mus txog tej phab ntsa loog uas pob to qhov lawm, thiab tsis tau kho cov Yixayee tej ntsa loog kom lawv thiaj tiv tau kev ua rog rau hnub uas Yawmsaub teem cia lawm. Lawv ua yog toog cuav thiab cev tej lus hais txog tom hauv ntej dag ntxias. Lawv hais tias, “Yawmsaub hais li no,” tiamsis qhov tseeb Yawmsaub tsis tau txib lawv mus hais, txawm yog li ntawd los lawv tseem vam tias lawv tej lus yuav tiav. Thaum nej hais tias, “Yawmsaub hais li no,” tiamsis kuv twb tsis tau hais, tsis yog nej pom tej yog toog cuav thiab cev tej lus hais txog tom hauv ntej dag ntxias lov? “ ‘Vim li no, Vajtswv Yawmsaub thiaj hais li no tias, Vim nej cev lus cuav thiab ua yog toog dag, Yawmsaub hais tias, vim li no kuv tawm tsam nej. Kuv txhais tes yuav tawm tsam cov xibhwb cev lus uas ua yog toog cuav thiab cev lus hais txog tom hauv ntej dag ntxias. Lawv yuav tsis tau nyob hauv kuv cov neeg lub chaw sablaj thiab tsis tau nce npe rau hauv haiv neeg Yixayee, thiab lawv yuav tsis tau nkag rau hauv Yixayee tebchaws. Mas nej thiaj paub tias kuv yog Vajtswv Yawmsaub. Vim lawv yeej coj kuv haiv neeg yuam kev thiab hais tias, “Muaj kev thaj yeeb,” rau thaum uas twb tsis muaj kev thaj yeeb li, thiab thaum muaj neeg ua lub ntsa loog cov xibhwb ntawd cia li pleev hmoov zeb sib dawb paug rau, vim li no, cia li hais rau cov uas pleev hmoov zeb sib dawb tias lub ntsa loog yuav pob. Yuav muaj nag los hlob hlob, thiab yuav los lawg loj, thiab cua daj cua dub yuav ntsawj hlob. Thaum lub ntsa loog pob lawm, luag yeej yuav hais rau nej tias, “Tej hmoov zeb sib dawb uas nej pleev ntawd dua twg tag lawm?” Vim li no Vajtswv Yawmsaub thiaj hais li no tias, Kuv txojkev npau taws yuav ua rau cua daj cua dub ntsawj, thiab kuv txojkev chim yuav ua rau nag los hlob hlob, thiab kuv txojkev npau taws yuav ua rau los lawg loj ua kom ntsa loog puam tsuaj. Kuv yuav muab lub ntsa loog uas nej pleev hmoov zeb sib dawb ntawd ua kom tawg thiab pob tag rau hauv pem teb, thiaj pom ntsoov lub taw loog. Thaum lub ntsa loog pob tag, nej yuav puam tsuaj rau hauv plawv loog. Nej thiaj paub tias kuv yog Yawmsaub. Kuv yuav ua kom kuv txojkev npau taws tiav li no rau lub ntsa loog thiab rau cov uas pleev hmoov zeb sib dawb rau lub ntsa loog. Thiab kuv yuav hais rau nej tias, “Lub ntsa loog tsis muaj li lawm, thiab cov uas pleev hmoov zeb sib dawb kuj tsis muaj li lawm, yog Yixayee cov xibhwb cev lus uas hais txog Yeluxalees thiab ua yog toog pom Yeluxalees muaj kev thaj yeeb rau thaum yeej tsis muaj kev thaj yeeb. Vajtswv Yawmsaub hais li no ntag.” ’ “Neeg tus tub, koj cia li tsom ntsoov tawm tsam koj cov neeg tej ntxhais uas cev lus raws li lawv lub siab xav xwb. Cia li cev Vajtswv lus tawm tsam lawv thiab hais tias, ‘Vajtswv Yawmsaub hais li no tias, Cov pojniam uas xaws pluaj ntaub txheev dab qhwv txhua tus txhais tes thiab xaws txoj phuam kauv taubhau uas hum txhua tus thiaj muab tau luag tej plig, yuav raug txom nyem lauj! Nej yuav muab kuv haiv neeg tej plig es yuav tsom kwm luag lwm tus tej plig kom muaj txojsia nyob xwv nej thiaj tau nqe ntau lov? Nej ua qias puas tsuas kuv rau hauv kuv haiv neeg xwv thiaj tau ob peb teg qeb thiab tau ob peb daim ncuav. Nej hais tej lus dag rau kuv haiv neeg uas ntseeg tej lus dag ntawd mas tus uas tsis tsim nyog tuag nej kuj muab ua kom tuag, thiab tus uas tsis tsim nyog tseg siav nyob nej kuj tseg nws siav nyob. “ ‘Yog li no Vajtswv Yawmsaub thiaj hais li no tias, Kuv tawm tsam nej pluaj ntaub txheev dab uas nej cuab neeg tej plig ib yam li cuab noog. Kuv yuav muab pluaj ntaub ntawd dua ntawm nej txhais tes mus, thiab kuv yuav tso tej plig uas nej muab ib yam li muab noog ntawd dim mus. Nej txoj phuam kauv kuv yuav muab dua pov tseg, thiab yuav cawm kuv haiv neeg dim hauv nej txhais tes mus, lawv yuav tsis mag khi rau hauv nej txhais tes lawm. Mas nej thiaj paub tias kuv yog Yawmsaub. Vim nej dag ua rau cov uas ncaj ncees poob siab rau thaum kuv tsis tau ua rau lawv poob siab, thiab vim nej txhawb cov neeg phem ua kom lawv tsis tig ntawm lawv txojkev phem rov los tau txojsia, vim li no nej yuav tsis tau pom tej yog toog cuav thiab yuav tsis tau hais txog tom hauv ntej dua li lawm. Kuv yuav cawm kuv haiv neeg dim hauv nej txhais tes. Mas nej thiaj paub tias kuv yog Yawmsaub.’ ” Yixayee cov kev txwj laus qee leej tuaj cuag kuv thiab los zaum ntawm kuv xubntiag. Mas Yawmsaub hais lus tuaj rau kuv tias, “Neeg tus tub, cov neeg no tuav rawv lawv tej dab mlom rau hauv lawv lub siab lawm, thiab muab tej uas ua rau lawv dawm mus ua txhaum muaj txim cuab rau ntawm lawv xubntiag. Tsim nyog kuv yuav kheev lawv nug kuv lov? Yog li no, cia li hais rau lawv tias, ‘Vajtswv Yawmsaub hais li no tias, Cov Yixayee yog leejtwg tuav rawv nws tej dab mlom rau hauv lub siab thiab muab yam uas ua kom nws dawm mus ua txhaum muaj txim cuab rau ntawm nws xubntiag es tseem tuaj cuag tus xibhwb cev Vajtswv lus, mas kuv uas yog Yawmsaub yuav teb nws kom tsim nyog qhov uas nws muaj dab mlom ntau kawg, xwv kuv thiaj tuav tau cov Yixayee lub siab uas ncaim ntawm kuv lawm txhua tus, vim lawv tej dab mlom.’ “Vim li no, cia li hais rau cov Yixayee tias, ‘Vajtswv Yawmsaub hais li no tias, Cia li ntxeev dua siab thiab tig ntawm nej tej dab mlom rov los, thiab fee plhu kiag ntawm nej tej kev qias vuab tsuab huvsi. Cov Yixayee lossis lwm haiv neeg uas nrog cov Yixayee nyob, yog leejtwg tawm ntawm kuv mus tuav rawv nws tej dab mlom rau hauv lub siab, thiab muab yam uas ua kom nws dawm mus ua txhaum muaj txim cuab rau ntawm nws xubntiag, es tseem tuaj cuag tus xibhwb cev Vajtswv lus ua nug rau kuv txog nws, mas kuv uas yog Yawmsaub yuav teb nws ntag. Kuv yuav tsom ntsoov tawm tsam tus ntawd. Kuv yuav ua rau nws ua tus yam ntxwv rau luag pom thiab tiag luag ncauj luag lo, thiab muab nws txiav tawm hauv kuv haiv neeg mus. Mas nej thiaj paub tias kuv yog Yawmsaub. Thiab yog tus xibhwb cev lus twg raug ntxias lo lus twg, kuj yog kuv uas yog Yawmsaub ntxias tus xibhwb ntawd, mas kuv yuav tsa kuv txhais tes tawm tsam nws, thiab yuav ua kom nws puam tsuaj hauv kuv haiv neeg Yixayee mus. Lawv yuav ris lawv lub txim, tus xibhwb thiab tus uas mus ua nug yuav raug txim ib yam nkaus, kom cov Yixayee thiaj tsis yuam kev ntawm kuv mus, thiab tsis ua tej kev txhaum txim huvsi ua rau lawv qias puas tsuas dua li lawm, tiamsis lawv yuav ua kuv haiv neeg thiab kuv yuav ua lawv tus Vajtswv. Vajtswv Yawmsaub hais li no ntag.’ ” Yawmsaub hais lus tuaj rau kuv tias, “Neeg tus tub, yog lub tebchaws twg fav xeeb ua txhaum rau kuv, es kuv tsa kuv txhais tes tawm tsam lub tebchaws ntawd thiab txiav nws tej zaub mov noj kom tu nrho, thiab tso kev tshaib nqhis los rau nws, thiab rhuav tshem tej neeg thiab tej tsiaj txhu hauv lub tebchaws ntawd, mas txawm yog peb tug neeg no, uas yog Nau‑a, Daniyee thiab Yauj, nyob rau hauv lub tebchaws ntawd, los qhov uas lawv ua ncaj ncees tsuas yog pab tau lawv txojsia dim xwb. Vajtswv Yawmsaub hais li no. “Lossis yog kuv ua rau tsiaj nyaum los rau hauv lub tebchaws ntawd ua rau neeg tuag tag thiab ua rau lub tebchaws nyob do cuas cia, neeg thiaj hla tsis tau mus rau hauv li lawm vim yog muaj tej tsiaj nyaum ntawd, Vajtswv Yawmsaub hais tias, kuv yeej muaj txojsia nyob, mas txawm yog peb tug neeg ntawd nyob rau hauv lub tebchaws ntawd, los lawv yuav pab tsis tau tej tub tej ntxhais dim kiag li, tsuas yog lawv tus kheej dim xwb, mas lub tebchaws yuav nyob do cuas cia. “Lossis yog kuv coj ntaj los rau hauv lub tebchaws ntawd, thiab hais tias, ‘Cia hniav ntaj mus thoob plaws lub tebchaws,’ thiab kuv rhuav tshem tej neeg thiab tsiaj txhu hauv lub tebchaws ntawd, Vajtswv Yawmsaub hais tias, kuv yeej muaj txojsia nyob, mas txawm yog peb tug neeg ntawd nyob rau hauv lub tebchaws ntawd, los lawv yuav pab tsis tau tej tub tej ntxhais dim kiag li, tsuas yog lawv tus kheej dim xwb. “Lossis yog kuv tso mob kis los rau hauv lub tebchaws ntawd, thiab nchuav kuv tej kev npau taws uas ua kom los ntshav rau hauv, thiaj rhuav tshem tau tej neeg thiab tsiaj txhu hauv lub tebchaws ntawd, Vajtswv Yawmsaub hais tias, kuv yeej muaj txojsia nyob, mas txawm yog Nau‑a, Daniyee thiab Yauj nyob rau hauv, los lawv yuav pab tsis tau tej tub tej ntxhais dim kiag li, qhov uas lawv ua ncaj ncees tsuas yog pab tau lawv dim xwb. “Vajtswv Yawmsaub hais li no tias, Yuav yimhuab raug kev txom nyem loj dua li ntawd, rau thaum kuv tso kuv plaub yam kev teem txim uas hnyav heev los rau Yeluxalees, yog hniav ntaj, kev tshaib nqhis, tsiaj nyaum thiab mob kis, thiaj rhuav tshem tej neeg thiab tsiaj txhu hauv lub tebchaws ntawd. Txawm yog li ntawd los yog yuav muaj qee leej dim txojsia hauv lub tebchaws ntawd coj lawv tej tub tej ntxhais tawm los, mas thaum lawv tawm los cuag nej thiab nej pom lawv lub neej thiab tej uas lawv twb ua lawm, nej yuav tsis hnyav siab rau tej xwm txheej phem uas kuv tau ua rau Yeluxalees thiab txhua yam uas kuv coj los raug lub nroog ntawd. Lawv cov yuav ua rau nej tsis hnyav siab rau thaum nej pom lawv lub neej thiab tej uas lawv twb ua lawm mas nej yuav paub tias txhua yam uas kuv ua rau hauv lub nroog ntawd tsis yog kuv lam ua tsis muaj keeb puam. Vajtswv Yawmsaub hais li no ntag.” Yawmsaub hais lus tuaj rau kuv tias, “Neeg tus tub, cov ntoo txiv hmab tsim txiaj dua lwm yam ntoo li cas? Tej ceg txiv hmab tsim txiaj dua li tej ceg ntoo hav zoov li cas? Luag muab cov ntoo txiv hmab coj mus ua lwm yam thiab lov? Lawv muab coj mus ua nqe lauj dai tej twj siv thiab lov? Lawv siv ua taws rauv, mas thaum kub ob tog tag lawm thiab hauv ntu nruab nrab plhov dub tag siv tau qabhau thiab lov? Thaum tseem zoo nkauj twb tsis siv ua dabtsi, thaum raug hluavtaws kub thiab plhov dub tag lawm yimhuab siv tsis tau qabhau. “Vim li ntawd Vajtswv Yawmsaub thiaj hais li no tias, Cov ntoo txiv hmab uas nyob tom hav zoov kuv muab ua taws rau hluavtaws li cas, mas kuv yuav muab cov hauv Yeluxalees tso tseg li ntawd. Kuv yuav tsom ntsoov tawm tsam lawv, txawm yog lawv khiav dim ntawm cub hluavtaws, los hluavtaws yeej yuav kub lawv tag. Thaum kuv tsom ntsoov tawm tsam lawv, nej yuav paub tias kuv yog Yawmsaub. Kuv yuav ua lub tebchaws ntawd nyob do cuas cia vim yog lawv tau fav xeeb. Vajtswv Yawmsaub hais li no ntag.” Yawmsaub hais lus tuaj dua rau kuv tias, “Neeg tus tub, cia li qhia Yeluxalees paub txog nws tej kev qias vuab tsuab, thiab hais tias, ‘Vajtswv Yawmsaub hais li no rau Yeluxalees tias, Koj lub keeb thaum ub thiab lub chaw uas yug koj yog Khana‑as tebchaws. Koj txiv yog ib tug Amaulai, koj niam yog ib tug Hithai. Mas hais txog qhov uas yug koj, hnub uas yug koj los ntawd luag tsis txiav koj txoj hlab ntaws, thiab tsis muab koj ntxuav kom huv, thiab tsis muab ntsev txhuam koj, thiab tsis muab khaubncaws qhwv koj. Tsis muaj ib lub qhov muag khuvleej koj es yuav ua tej uas hais no vim yog tab ncuab koj. Tiamsis koj raug muab pov tseg rau tom teb, vim koj raug ntxub kawg li rau hnub uas yug koj. “ ‘Mas thaum kuv dua kev tuaj mus kuv pom koj nti cuj ca hauv koj pas ntshav, kuv thiaj hais rau koj hauv koj cov ntshav tias, “Cia li ciaj sia nyob,” thiab kuv ua rau koj kheev hlob zoo li tej qoob loo hauv nruab teb. Koj kuj kheev hlob thiab siab, tiav nkauj hlo, koj ob lub mis kuj puv tuaj thiab koj kuj tuaj plaub, tiamsis koj liab qab tsuas. “ ‘Thaum kuv rov dua kev tuaj mus ib zaug kuv tsa muag ntsia koj, mas koj twb muaj hnub nyoog paub sib nyiam lawm, kuv thiaj nthuav kuv lub tsho ntev los roos koj thiab npog koj lub cev uas liab qab. Kuv thiaj cog lus khov kho thiab nrog koj cog lus tseg mas koj thiaj ua kuv tug lawm. Yawmsaub hais li no ntag. “ ‘Kuv muab koj da dej thiab ntxuav tej ntshav uas lo koj thiab muab roj tsw qab pleev koj. Kuv muab tsoos tsho paj rau koj hnav thiab muab zoo khau tawv rau koj rau, thiab muab tej ntaub mag uas zoo zoo qhwv koj thiab muab ntaub xov kab kauv koj. Kuv muab npauj nyiag ntsais nyiaj teem rau koj lub tsho, thiab muab tooj npab rau koj coj ntawm txhais tes thiab muab saw nyiaj los looj koj caj dab. Kuv muab lub nplhaib rau koj coj ntawm qhov ntswg thiab muab kauj co rau koj coj ntawm qhov ntsej thiab muab lub mom kub zoo nkauj rau koj ntoo saum taubhau. Kuv muab nyiaj muab kub los phim koj li no thiab koj tej tsoos tsho yog muab ntaub mag zoo zoo thiab ntaub xov kab thiab ntaub ua paj los ua. Koj noj tej hmoov mog zoo zoo thiab zib ntab thiab roj aulib. Koj kheev hlob, zoo nkauj tshaj plaws thiab koj ua tau vajntxwv. Koj lub koob meej zoo nkauj nto moo lug rau hauv ib tsoom tebchaws, vim qhov uas koj zoo nkauj kawg nkaus ntawd twb yog kuv pub meej mom rau koj. Vajtswv Yawmsaub hais li no ntag. “ ‘Tiamsis koj tso siab rau qhov uas koj zoo nkauj thiab muab koj lub koob meej mus ntxias nrog luag sib deev, thiab tsis hais leejtwg tuaj los koj kuj nrog luag sib deev coob kawg li. Koj muab koj tej tsoos tsho ib txhia los ua lub chaw teev dab kom zoo nkauj, thiab deev dab lub chaw ntawd, tsis txeev muaj dua li no thiab yuav tsis muaj li no ntxiv mus. Koj muab koj tej npauj nyiag npauj kub zoo nkauj uas kuv muab pub rau koj, los ua tej dab mlom txivneej rau koj, thiab koj nrog lawv sib deev. Thiab koj muab koj tej tsoos tsho paj mus kauv tej dab mlom ntawd, thiab muab kuv tej roj tej tshuaj tsw qab xyeem rau ntawm lawv xubntiag. Tej zaub mov noj uas kuv pub rau koj, koj ua ib yam li ntawd. Kuv muab hmoov mog zoo zoo thiab roj aulib thiab zib ntab rau koj noj, tiamsis koj kuj coj mus xyeem rau ntawm lawv xubntiag ua tej pa ncho txaus lawv siab. Vajtswv Yawmsaub hais li no ntag. “ ‘Thiab koj muab koj tej tub tej ntxhais uas koj yug rau kuv coj mus xyeem pub rau lawv ua ploj tag. Koj tej kev sib deev yog ib qho me me xwb lov? Koj thiaj muab kuv tej menyuam tua coj mus hlawv xyeem rau tej dab mlom ntawd. Tag nrho koj tej kev qias vuab tsuab huvsi thiab koj tej kev sib deev koj txawm tsis nco txog hnub uas koj tseem liab ntsha tsuas liab qab tsuas nti cuj ca hauv koj pas ntshav. “ ‘Vajtswv Yawmsaub hais tias, Koj yuav raug txom nyem, yuav raug txom nyem lauj! Tom qab uas koj ua tej kev phem kev qias huvsi, koj tseem mus ua lub ruv tsev uas koov qas loo rau koj, thiab txhua lub tshav puam hauv lub nroog koj ua lub chaw siab teev dab rau koj. Txhua lub ncauj kev koj kuj ua lub chaw siab teev dab rau koj thiab muab koj txojkev zoo nkauj ua qias vuab tsuab, nrhab ceg hlo rau txhua tus uas dua kev tuaj mus tsis hais leejtwg kuj xij, koj thiaj deev tau ntau zuj zus. Koj kuj nrog cov Iyi sib deev, yog cov uas nyob ze koj thiab nyiam sib deev heev. Koj tsav kev sib deev ntau zuj zus zes kom kuv chim. Vim li no kuv thiaj tsa kiag kuv txhais tes tawm tsam koj, thiab txiav koj lub tebchaws kom nqaim zuj zus, thiab muab koj cob rau koj cov yeeb ncuab cia lawv ua raws li lawv lub siab nyiam, yog cob rau cov Filixatee tej ntxhais uas txaj muag rau koj txojkev ua dev ua npua qias tsis huv. Koj tseem nrog cov Axilia sib deev, vim tsis tau txaus koj lub siab li. Koj yeej nrog lawv cov sib deev, tiamsis koj tseem tsis txaus siab. Koj tseem yimhuab nrog Kheedia lub tebchaws uas ua lag ua luam sib deev heev zuj zus. Txawm yog nrog lub tebchaws ntawd sib deev los koj tseem tsis txaus siab li. “ ‘Vajtswv Yawmsaub hais li no tias, Koj qaug siab ua tej no huvsi yam nkaus li tus poj muag cev ua, tsis paub txaj muag li. Txhua lub ncauj kev koj ua tej lub ruv tsev koov qas loo rau koj, thiab txhua lub tshav puam koj ua lub chaw siab teev dab rau koj. Txawm ua li ntawd los koj tseem tsis thooj li poj muag cev rau qhov koj twb tsis yuav nqe ntiav kiag li. Koj yog tus pojniam uas deev hluas nraug, uas txais luag lwm tus nyob nws tus txiv chaw. Tej txivneej yeej muab nqe rau txhua tus poj muag cev, tiamsis koj mas tseem muab nqe ntiav rau txhua tus uas nyiam koj, thiab muab qhov txhia chaw dib kom luag tuaj txhua fab tuaj deev koj. Yog li no koj txawv tsis thooj li lwm tus poj muag cev rau thaum koj mus deev luag. Tsis muaj leejtwg tuaj thov nrog koj pw, los koj tseem mus ntiav, twb tsis muaj leejtwg muab nqe ntiav koj. Vim li no koj thiaj txawv luag lwm tus. “ ‘Vim li no, tus poj muag cev 'e, cia li mloog Yawmsaub tej lus. Vajtswv Yawmsaub hais li no tias, Vim koj qhov kev txaj muag thiab koj txojkev liab qab twb tshwm los rau thaum koj thiab cov uas nrog koj sib nyiam sib deev, thiab vim koj tej dab mlom uas qias vuab tsuab huvsi thiab koj cov menyuam tej ntshav uas muab xyeem rau lawv, vim li no, kuv yuav sau zog cov uas nrog koj sib nyiam huvsi, uas koj nrog pw zoo siab, yog txhua tus uas koj nyiam thiab txhua tus uas koj ntxub. Kuv yuav sau zog lawv tuaj txhua fab tuaj tawm tsam koj, thiab kuv yuav thws koj txojkev liab qab tab meeg lawv xwv lawv thiaj pom koj liab qab huvsi. Kuv yuav txiav txim rau koj ib yam li txiav txim rau tus pojniam deev hluas nraug thiab txiav txim rau cov uas tua neeg, thiab kuv yuav coj cov ntshav ntawm kuv txojkev npau taws thiab txojkev khib xeeb los raug koj. Thiab kuv yuav muab koj cob rau hauv cov uas nrog koj sib nyiam txhais tes, mas lawv yuav rhuav koj lub ruv tsev uas koov qas loo, thiab muab koj tej chaw siab teev dab rhuav kom pob tag. Lawv yuav hle koj tej tsoos tsho thiab coj koj tej npauj nyiag npauj kub mus, thiab tso koj nyob liab qab tsuas. Lawv yuav coj ib pab neeg coob coob tuaj tawm tsam koj, mas lawv yuav xuas pob zeb ntaus koj thiab xuas ntaj tsuav koj. Lawv yuav hlawv koj tej vaj tse thiab txiav txim rau koj tab meeg tej pojniam coob coob. Kuv yuav ua rau koj tseg kiag tsis ua poj muag cev, thiab koj yuav tsis ntiav luag deev koj dua li lawm. “ ‘Kuv ua li no kuv txojkev npau taws rau koj thiaj li nqeg tag, thiab kuv yuav tsis khib xeeb rau koj lawm. Kuv yuav nyob tus thiab yuav tsis chim dua li lawm. Vim koj tsis nco txog hnub uas koj tseem liab ntsha tsuas tiamsis koj ua tej no huvsi ua rau kuv chim kawg, vim li no, kuv yuav ua pauj rau koj raws li koj tau ua lawm rau saum koj taubhau. Koj tsis tau ua dev ua npua ntxiv rau koj tej kev qias vuab tsuab huvsi lov? Vajtswv Yawmsaub hais li no ntag. “ ‘Saib maj, txhua tus uas hais paj lug yuav hais paj lug li no txog koj, “Niam zoo li cas, ntxhais kuj zoo li ntawd.” Koj yog koj niam li ntxhais yog tus uas ntxub nws tus txiv thiab nws cov menyuam. Koj yog tus ntxhais uas yoog koj niam laus niam hluas uas ntxub tus txiv thiab tej menyuam. Koj niam yog ib tug Hithai koj txiv yog ib tug Amaulai. Koj tus niam laus yog Xamali uas nrog nws tej ntxhais nyob ntawm koj sab ped. Koj tus niam hluas yog Xaudoo uas nrog nws tej ntxhais nyob ntawm koj sab nrad. Txawm li ntawd koj tseem tsis ua lub neej yam li lawv thiab ua raws li lawv tej kev qias vuab tsuab xwb, ib pliag xwb txhua yam uas koj ua kuj phem heev dua li lawv ua thiab. Vajtswv Yawmsaub hais tias, Kuv yeej muaj txojsia nyob, koj tus niam hluas Xaudoo thiab nws tej ntxhais twb tsis tau ua phem npaum li koj thiab koj tej ntxhais ua. No nawj yog koj tus niam hluas Xaudoo lub txim, yog qhov uas nws thiab nws tej ntxhais khav theeb, muaj noj muaj haus nplua mias, tau zoo heev dhau, tsis pab tej neeg pluag thiab tej neeg txom nyem. Lawv tsab ua loj thiab ua tej kev qias vuab tsuab rau ntawm kuv xubntiag. Vim li no, thaum kuv pom, kuv muab lawv rhuav tshem pov tseg. Xamali tsis tau ua txhaum npaum li koj ib nrab. Koj ua qias vuab tsuab loj dua ob tug, tej kev qias vuab tsuab huvsi uas koj ua ntawd thiaj ua rau pom zoo li koj tus niam laus thiab koj tus niam hluas ncaj ncees. Koj yuav tsum ris koj txojkev poob ntsej muag, vim koj ua rau qhov txiav txim qaij rau koj tus niam laus thiab koj tus niam hluas. Vim koj tej kev txhaum uas ua qias vuab tsuab loj dua li ob tug, ob tug thiaj ncaj dua koj. Koj cia li txaj muag thiab ris koj txojkev poob ntsej muag, rau qhov koj ua rau pom yam li koj tus niam laus thiab koj tus niam hluas ncaj ncees. “ ‘Kuv yuav ua rau Xaudoo thiab nws tej ntxhais rov vam meej li qub, thiab ua rau Xamali thiab nws tej ntxhais rov vam meej li qub. Thiab kuv yuav ua rau koj nrog lawv rov vam meej li qub, koj thiaj yuav ris koj txojkev poob ntsej muag thiab koj yuav txaj muag rau txhua yam uas koj tau ua lawm thiaj ua qhov uas nplij ob tug lub siab. Hais txog koj tus niam laus thiab koj tus niam hluas, mas Xaudoo thiab nws tej ntxhais yuav rov ua lub neej zoo li qub, thiab Xamali thiab nws tej ntxhais yuav rov ua lub neej zoo li qub. Thiab koj thiab koj tej ntxhais yuav rov ua lub neej li qub. Thaum koj tseem khav theeb tsis yog koj tus niam hluas Xaudoo tiag koj ncauj koj lo lov, yog ua ntej uas tsis tau muab koj tej kev phem thws los? Nimno koj zoo ib yam li nws lawm, koj ua lub chaw uas Edoo tej ntxhais thiab tej uas nyob ib ncig Edoo thiab cov Filixatee tej ntxhais thuam luag, yog cov uas nyob ib ncig koj saib tsis taus koj. Koj yuav ris lub txim uas koj ua dev ua npua thiab ua qias vuab tsuab. Yawmsaub hais li no ntag. “ ‘No nawj, Vajtswv Yawmsaub hais li no tias, Kuv yuav ua rau koj yam li koj tau ua los lawm, vim koj saib tsis taus tej lus twv tseg thiab rhuav kuv tej lus cog tseg. Txawm li ntawd los kuv tseem yuav nco ntsoov kuv tej lus cog tseg uas thaum koj tseem hluas nkauj kuv cog rau koj. Thiab kuv yuav tuav rawv cov lus cog tseg rau koj kom nyob ruaj mus ib txhis. Thaum ntawd koj yuav nco txog tej uas koj tau ua los lawm thiab koj yuav raug txaj muag rau thaum koj txais koj tus niam laus thiab koj tus niam hluas, thiab kuv muab ob tug pub ua koj li ntxhais, tiamsis qhov uas kuv ua no tsis nyob hauv kuv tej lus uas cog tseg rau koj. Kuv yuav tuav rawv tej lus uas kuv cog tseg rau koj, mas koj yuav paub tias kuv yog Yawmsaub, kom koj thiaj cim tau thiab xav tsis thoob thiab txaj muag tsis rua ncauj hais lus dua li, rau thaum kuv zam tej kev txhaum txim txhua yam uas koj tau ua los lawm. Vajtswv Yawmsaub hais li no ntag.’ ” Yawmsaub hais lus tuaj rau kuv tias, “Neeg tus tub 'e, cia li ua txhiaj txhais hais thiab ua paj lug hais rau cov Yixayee, hais tias, ‘Vajtswv Yawmsaub hais li no tias, Muaj ib tug dav loj thiab kooj tis loj thiab plaub kooj tis ntev, muaj plaub ntau ntau txaij nraug zees, los rau hauv Lenpanoo, thiab ntxo lub ntsis ntoo ciab. Nws muab tej ntsis ntoo mos txiav kwv mus rau lub tebchaws uas ua lag ua luam thiab muab tso rau hauv lub nroog uas muaj tub lag tub luam. Thiab nws muab lub noob qoob hauv lub tebchaws cog rau hauv qhov av zoo. Nws muab cog rau ntawm tej ntug dej, ib yam li cog ceg ntoo txiv duaj deg. Lub noob kuj tuaj thiab hlob zoo yam nkaus li tsob txiv hmab qes qes uas ceg nthuav dav heev. Nws tej ceg kuj nthuav tuaj txog tus dav thiab nws tej cag kuj ntsia av tob. Lub noob tuaj ua ib tsob txiv hmab nthuav ceg thiab hlav nplooj. “ ‘Tiamsis muaj dua ib tug dav loj kawg muaj kooj tis loj thiab muaj plaub ntau. Mas tsob txiv hmab ntawd nrhau cag tuaj nrhiav tus dav no, thiab nthuav ceg ncaj nraim tuaj rau tus dav kom tus dav ntov dej rau nws. Ntawm lub chaw uas cog tus dav muab tsob txiv hmab ntawd tshais mus cog rau hauv qhov av zoo ntawm ntug dej lawm kom thiaj li hlav ceg thiab txi txiv, ua tsob txiv hmab uas muaj koob meej.’ “Cia li hais tias, ‘Vajtswv Yawmsaub hais li no tias, Tsob txiv hmab no yuav hlob tau lov? Thawj tug dav yuav tsis muab nws dob kiag cag thiab de tej txiv ua rau tej nplooj mos tuag tshav tag lov? Tsis txog muaj txhais npab uas muaj zog thiab neeg coob thiaj dob tau tsob txiv hmab rho cag. Saib maj, thaum muab tsob txiv hmab tshais mus cog dua, nws yuav hlob zoo lov? Thaum cua sab hnub tuaj ntsawj raug nws, nws yuav tsis tuag tshav qhuav lov? Nws yeej yuav tuag tshav rau hauv lub chaw uas cog nws.’ ” Yawmsaub hais lus tuaj rau kuv tias, “Nimno cia li hais rau cov neeg uas pheej fav xeeb tias, ‘Nej tsis paub tias tej no muaj lub ntsiab li cas?’ Cia li hais rau lawv tias, ‘Saib maj, tus vajntxwv hauv Npanpiloo tuaj rau hauv Yeluxalees thiab ntes tus vajntxwv thiab cov thawj coj mus txog nws hauv Npanpiloo. Nws muab ib tug noob vaj hauv Yeluxalees nrog nws sib cog lus twv tseg. Tej neeg uas ua thawj hauv lub tebchaws, mas vajntxwv hauv Npanpiloo tau ntes coj mus lawm, kom lub tebchaws thiaj poob qes kawg tsis tsab ua loj thiab tuav tau tej lus cog tseg, lub tebchaws thiaj nyob tau. Tiamsis tus vajntxwv hauv Yeluxalees fav xeeb rau tus vajntxwv hauv Npanpiloo thiaj li txib neeg mus rau Iyi tebchaws thov nees ua rog thiab ib pab tub rog coob. Nws yuav ua tau tiav lov? Tus uas ua tej no nws yuav khiav dim thiab lov? Muab tej lus cog tseg rhuav los tseem dim thiab lov? Vajtswv Yawmsaub hais tias, kuv yeej muaj txojsia nyob, mas nws yeej yuav tuag rau hauv lub chaw uas tus vajntxwv uas tsa nws ua vajntxwv hauv Yeluxalees nyob, yog tuag rau hauv Npanpiloo vim nws saib tsis taus tus vajntxwv hauv Npanpiloo tej lus twv tseg thiab muab tej lus cog tseg rhuav. Falau thiab nws tej pab tub rog coob coob thiab nws tej neeg coob coob yuav pab tsis tau nws ua rog, rau thaum luag tib tej chaw siab vij ntaus lub nroog thiab xov laj kab vij lub nroog kom thiaj tua tau tej neeg coob coob. Vim yog nws saib tsis taus tej lus twv tseg thiab rhuav tej lus cog tseg, thiab vim nws twb nrog tus vajntxwv hauv Npanpiloo tuav tes cog lus los nws tseem ua tej no, nws yeej yuav tsis dim. Vim li no Vajtswv Yawmsaub hais li no tias, Kuv yeej muaj txojsia nyob, mas qhov uas nws saib tsis taus tej lus cog tseg uas nws tuav kuv lub npe twv thiab rhuav tej lus cog tseg, mas kuv yuav ua pauj rau saum nws lub taubhau. Kuv yuav nthuav kuv lub vas cuab nws thiab nws yuav mag kuv rooj hlua. Kuv yuav coj nws mus rau Npanpiloo thiab txiav txim rau nws qhov ntawd rau qhov uas nws fav xeeb rau kuv. Thiab nws tej tub rog uas siab tuab tshaj yuav raug hniav ntaj tuag tag, thiab cov uas tsis tuag los yuav tawg khiav ri sua mus raws li cua ntsawj rau txhua fab. Mas nej thiaj paub tias kuv uas yog Yawmsaub tau hais cia lawm. “ ‘Vajtswv Yawmsaub hais li no tias, Kuv yuav txiav lub ntsis ntoo ciab uas siab los cog. Kuv yuav muab nws ib tug ceg mos lov thiab kuv yuav muab cog rau saum lub ncov roob siab ntag. Kuv yuav muab nws cog rau saum Yixayee lub roob siab, kom thiaj ncau ceg thiab txi txiv thiab ua ib tsob ntoo ciab uas muaj koob meej. Thiab txhua yam noog yuav nyob rau hauv thiab yuav los ua zes rau hauv tej ceg uas muaj ntxoov ntxoo. Mas txhua tsob ntoo hauv hav zoov yuav paub tias kuv uas yog Yawmsaub ua rau tsob ntoo siab qes mus thiab ua rau tsob ntoo qes siab tuaj, ua rau tsob ntoo ntsuab qhuav mus thiab ua rau tsob ntoo qhuav ntsuab tsaus nti tuaj. Kuv uas yog Yawmsaub hais cia lawm, kuv yuav ua li ntawd.’ ” Yawmsaub hais dua lus tuaj rau kuv tias, “Nej xav li cas txog lo paj lug uas hais txog Yixayee tebchaws tias, ‘Leejtxiv noj txiv hmab qaub, menyuam rhiab hniav’? Vajtswv Yawmsaub hais tias, Kuv yeej muaj txojsia nyob mas nej yuav tsis hais lo paj lug no rau hauv Yixayee dua li lawm. Saib maj, txhua txojsia yog kuv li, tsis hais leej txiv txojsia thiab menyuam txojsia puavleej yog kuv li. Txojsia twg ua txhaum muaj txim kuj yuav tuag. “Yog leejtwg ncaj ncees thiab ua tej uas ncaj thiab raug cai, yog tus ntawd tsis noj mov teev dab saum tej roob thiab tsis tsa qhov muag pe cov Yixayee tej dab mlom, thiab tsis deev luag tej pojniam thiab tsis nrog pojniam pw rau thaum tseem ua pojniam raws lub hli, thiab yog nws tsis quab yuam leejtwg, tiamsis thim tej tiv thawj rau tus uas tshuav nqe, thiab tsis ua tub sab, tiamsis muab mov rau tus uas tshaib noj, thiab muab tsoos tsho rau tus uas liab qab hnav, thiab yog nws tsis muab qev rau luag yuav paj nyiag lossis noj tshaj thawj, thiab nkaum tes tsis ua kev txhaum, thiab txiav txim ncaj ncees rau ob tog uas ua plaub, thiab yog nws ua raws li kuv tej kab ke, thiab ua tib zoo coj raws li kuv tej kevcai, mas tus ntawd thiaj yog tus ncaj ncees, nws yuav muaj txojsia nyob. Vajtswv Yawmsaub hais li no ntag. “Yog nws muaj ib tug tub uas ua tub sab, tua neeg los ntshav, thiab ua lwm yam uas nws leej txiv tsis tau ua kiag li, thiab yog tus tub ntawd mus noj mov teev dab saum tej roob, thiab deev luag pojniam, thiab quab yuam tej neeg pluag thiab tej neeg txom nyem, thiab ua tub sab, tsis thim tej tiv thawj rau luag, tsa qhov muag pe tej dab mlom, ua tej kev qias vuab tsuab, thiab muab qev txais rau luag yuav paj nyiag noj tshaj thawj, mas tus ntawd yuav muaj txojsia nyob lov? Nws yeej yuav tsis muaj txojsia nyob. Nws ua tej kev qias vuab tsuab no huvsi lawm, nws yeej yuav tuag. Qhov uas nws tuag ntawd nws ris nws xwb. “Tiamsis yog tus ntawd muaj ib tug tub uas pom tej kev txhaum txim huvsi uas nws txiv tau ua, thiab nws paub ntshai nws tsis ua raws li leej txiv ua, nws tsis noj mov teev dab saum tej roob, tsis tsa qhov muag pe Yixayee tej dab mlom, tsis deev luag tej pojniam, tsis ua txhaum rau leejtwg, tsis kom leejtwg muab tiv thawj yuam rau nws, tsis ua tub sab, tiamsis muab nws tej mov rau tus uas tshaib noj thiab pub tsoos tsho rau tus uas liab qab hnav, nkaum tes tsis ua txhaum, tsis yuav paj nyiag tsis noj tshaj thawj, nws ua raws li kuv tej kevcai thiab coj raws li kuv tej kab ke, mas nws yuav tsis this nws txiv tuag, nws yeej yuav muaj txojsia nyob. Tiamsis leej txiv, mas nws ua nruj ua tsiv thiaj tau nyiaj txiag, nyiag kwvtij li qhov txhia chaw, thiab ua tej uas tsis zoo rau hauv nws haiv neeg, mas nws yuav tuag rau nws lub txim. “Tiamsis nej tseem hais tias, ‘Ua cas tus tub yuav tsis ris leej txiv tej kev txhaum txim?’ Thaum tus tub ua ncaj ua ncees thiab ua raug cai, thiab ua tib zoo coj raws li kuv tej kab ke huvsi, nws yeej yuav muaj txojsia nyob. Txojsia uas ua txhaum muaj txim yuav tuag. Tus tub yuav tsis ris leej txiv tej kev txhaum txim, thiab leej txiv yuav tsis ris tus tub tej kev txhaum txim. Tus ncaj ncees yuav tau nws txojkev ncaj ncees, tus uas phem yuav tau nws txojkev phem. “Tiamsis yog tus neeg phem tso plhuav nws txojkev phem uas nws tau ua lawm tseg thiab coj raws li kuv tej kab ke huvsi thiab ua ncaj ua ncees thiab raug cai, nws yeej yuav muaj txojsia nyob, nws yuav tsis tuag. Tej kev fav xeeb uas nws tau ua lawm yuav tsis nco ib qho los rau txim rau nws kiag li. Nws yuav muaj txojsia nyob vim tej kev ncaj ncees uas nws tau ua lawm. Vajtswv Yawmsaub hais tias, Kuv txaus siab rau qhov uas tej neeg phem tuag lov? Kuv yeej txaus siab rau qhov uas lawv tso lawv txojkev phem tseg es muaj txojsia nyob heev dua los tsis yog? Tiamsis thaum tus ncaj ncees twg tso nws txojkev ncaj ncees tseg mus ua txhaum muaj txim thiab ua tej uas qias vuab tsuab ib yam li tej neeg phem ua, nws tseem yuav muaj txojsia nyob thiab lov? Tej kev ncaj ncees uas nws tau ua lawm yuav tsis nco ib qho cia kiag li. Vim nws tej kev fav xeeb thiab tej kev txhaum muaj txim uas nws tau ua lawm, nws yeej yuav tuag. “Tiamsis nej tseem hais tias, ‘Tej uas tus Tswv ua mas ua tsis ncaj.’ Cov Yixayee 'e, cia li mloog nawj. Tej uas kuv ua, ua tsis ncaj lov? Twb yog tej uas nej ua, ua tsis ncaj los tsis yog? Thaum tus ncaj ncees tso nws txojkev ncaj ncees tseg mus ua txhaum muaj txim, nws yuav tuag rau qhov uas nws ua ntawd. Nws yuav tuag rau tej kev txhaum muaj txim uas nws tau ua. Thiab thaum tus neeg phem tso nws txojkev phem uas nws tau ua tseg lawm thiab ua ncaj ua ncees thiab raug cai, nws yuav cawm tau nws txojsia. Vim nws ua tib zoo xav thiab muab nws tej kev fav xeeb uas nws tau ua lawm tso tseg, nws yeej yuav muaj txojsia nyob, nws yuav tsis tuag. Tiamsis cov Yixayee hais tias, ‘Tej uas tus Tswv ua mas ua tsis ncaj.’ Cov Yixayee 'e, tej uas kuv ua, ua tsis ncaj ntag lov? Twb yog tej uas nej ua, ua tsis ncaj los tsis yog? “Vajtswv Yawmsaub hais tias, Cov Yixayee 'e, vim li no, kuv yuav txiav txim rau nej txhua tus raws li nws tau ua lawm. Cia li ntxeev dua siab thiab tso plhuav nej txojkev fav xeeb tseg, ntshai tsam nej tej kev txhaum txim ua rau nej dawm thiab puam tsuaj. Cia li tso tej kev fav xeeb uas nej tau ua tawm tsam kuv huvsi pov tseg, thiab cia li yuav lub siab tshiab thiab ntsuj plig tshiab lauj. Cov Yixayee 'e, nej yuav tuag ua dabtsi? Vajtswv Yawmsaub hais tias, Kuv yeej tsis txaus siab rau qhov uas ib tug twg tuag li. Yog li ntawd, cia li tig kiag rov los thiab muaj txojsia nyob.” “Koj cia li tsa suab quaj ntsuag txog Yixayee cov thawj, thiab hais tias, “ ‘Koj niam yog tus maum tsov ntxhuav uas nyob hauv nruab nrab tej tsov ntxhuav tiag lauj, nws nyob hauv nruab nrab tej thav tsov tu nws cov menyuam. Nws tu ib tug menyuam tsov ntxhuav hlob tiav thav tsov ntxhuav, nws xyaum tom tsiaj thiab nws noj neeg. Ib tsoom tebchaws tau hnov nws lub moo, lawv thiaj cuab qhov taub mag nws, lawv muab nqe lauj cab nws mus rau hauv Iyi tebchaws. Thaum tus maum tsov ntxhuav tos ntev pom tias tsis muaj chaw vam lawm, nws thiaj muab dua nws ib tug menyuam tsov ntxhuav los tu kom hlob tiav thav tsov ntxhuav. Nws tawg loj tawg lees hauv nruab nrab tej tsov ntxhuav, nws thiaj tiav thav tsov ntxhuav, nws xyaum tom tsiaj thiab noj neeg. Nws ua rau lawv tej chaw ruaj khov pob tag thiab ua rau lawv tej moos nyob do cuas cia. Thaum hnov nws lub suab nyooj mas lub tebchaws thiab txhua tus uas nyob hauv ntshai kawg. Ib tsoom tebchaws kuj tuaj tawm tsam vij nws txhua fab huvsi, lawv nthuav vas cuab nws, thiab nws mag lawv lub qhov taub. Lawv muab nqe lauj cab nws los kaw rau hauv nkuaj, thiab coj nws mus rau vajntxwv Npanpiloo, lawv muab nws kaw rau hauv lub nkuaj uas khov heev, kom thiaj tsis hnov nws lub suab saum Yixayee tej roob. Koj niam zoo yam nkaus li tsob txiv hmab hauv lub vaj uas cog rau ntawm ntug dej, txi txiv ncw thiab hlav ntsuag ntau vim yog muaj dej ntau. Nws tej ntsuag uas khov dua tej kuj ua tej vajntxwv tus cwj, nws siab dua tej ceg uas ntsuab tsaus nti huvsi, leejtwg los kuj pom tias nws siab thiab ncau ceg ntau. Tiamsis tsob txiv hmab ntawd raug tus uas npau taws heev muab dob kiag laim rau hauv pem teb, mas cov cua sab hnub tuaj ntsawj ua rau tuag tshav qhuav tag, nws tej txiv raug muab de du lug, tej ntsuag uas khov kho kuj tuag tshav qhuav tag, thiab hluavtaws muab kub lawm. Nimno raug muab dob mus cog rau hauv tebchaws moj sab qhua, yog lub tebchaws uas qhuav nkig nkuav tsis muaj dej. Hluavtaws tawm hauv tus ntsuag loj tuaj kub tej ceg thiab tej txiv huvsi, thiaj tsis tshuav tej ntsuag uas khov, thiab tsis muaj vajntxwv tus cwj dua li lawm.’ “No yog zaj nkauj quaj ntsuag, thiab yuav siv ua zaj kwv txhiaj ntsuag mus li.” Hnub xiab kaum, lub tsib hlis, xyoo xya, Yixayee cov kev txwj laus qee leej tuaj nyob ntawm kuv xubntiag ua nug rau Yawmsaub. Mas Yawmsaub hais lus tuaj rau kuv tias, “Neeg tus tub, cia li hais rau Yixayee cov kev txwj laus, hais rau lawv tias, ‘Vajtswv Yawmsaub hais li no tias, Qhov uas nej tuaj no yog tuaj ua nug rau kuv lov? Vajtswv Yawmsaub hais tias, Kuv yeej muaj txojsia nyob, mas kuv yuav tsis kheev nej tuaj ua nug rau kuv.’ “Neeg tus tub, koj yuav txiav txim rau lawv, koj yuav txiav txim rau lawv ntag lov? Mas koj cia li qhia rau lawv paub txog tej uas lawv tej poj koob yawm txwv tau ua qias vuab tsuab lawm. Thiab cia li hais rau lawv tias, ‘Vajtswv Yawmsaub hais li no tias, Hnub uas kuv xaiv Yixayee, mas kuv cog lus khov kho rau Yakhauj caj ces. Thaum lawv nyob hauv Iyi tebchaws, kuv qhia kuv rau lawv thiab kuv cog lus rau lawv tias, “Kuv yog Yawmsaub, yog nej tus Vajtswv.” Hnub ntawd kuv cog lus khov kho rau lawv tias kuv yuav coj lawv tawm hauv Iyi tebchaws los mus rau lub tebchaws uas kuv nrhiav cia rau lawv lawm, yog lub tebchaws uas muaj kua mis thiab muaj zib ntab ntws nto, yog lub tebchaws uas zoo tshaj plaws lwm lub tebchaws huvsi. Thiab kuv hais rau lawv tias, “Nej cia li muab tej yam uas kuv ntxub kawg tso pov tseg yog tej uas nej txhua tus liab muag qas khiav rau, thiab tsis txhob ua rau nej qias puas tsuas rau qhov uas nej pe Iyi tej dab mlom. Kuv yog Yawmsaub, yog nej tus Vajtswv.” “ ‘Tiamsis lawv tau fav xeeb rau kuv thiab tsis yeem mloog kuv lus. Lawv txhua tus tsis tso tej uas kuv ntxub kawg uas lawv liab muag qas khiav rau pov tseg, thiab lawv tsis tso Iyi tej dab mlom tseg. Kuv xav tias kuv yuav nchuav kuv txojkev npau taws los raug lawv thiab ua kuv txojkev chim raug lawv rau thaum lawv nyob hauv Iyi tebchaws mus txog kuv siab nqeg. Tiamsis kuv tsis ua vim saib rau kuv lub npe kom thiaj tsis ua puas tsuas kuv lub npe rau hauv ib tsoom tebchaws uas lawv nyob, yog tej tebchaws uas kuv qhia lawv paub txog kuv lawm rau thaum uas kuv coj cov Yixayee tawm hauv Iyi tebchaws mus. Yog li ntawd kuv thiaj coj lawv tawm hauv Iyi tebchaws thiab coj lawv los rau hauv tebchaws moj sab qhua. Kuv muab kuv tej kab ke rau lawv thiab qhia kuv tej kevcai rau lawv paub, yog neeg coj tau li ntawd yuav muaj txojsia nyob. Tsis tag li ntawd xwb, kuv tseem pub kuv hnub Xanpatau rau lawv ua lub chaw cim rau lawv thiab kuv, kom lawv thiaj paub tias kuv uas yog Yawmsaub ua rau lawv dawb huv. “ ‘Tiamsis cov Yixayee tau fav xeeb rau kuv hauv tebchaws moj sab qhua. Lawv tsis ua raws li kuv tej kab ke thiab tsis yuav kuv tej kevcai uas yog neeg coj tau yuav muaj txojsia nyob. Lawv ua qias puas tsuas kuv hnub Xanpatau heev. Kuv xav tias kuv yuav nchuav kuv txojkev npau taws los raug lawv hauv lub tebchaws moj sab qhua, thiab ua rau lawv tu noob nrho. Tiamsis kuv tsis ua li ntawd vim xam pom rau kuv lub npe, kom thiaj tsis ua puas tsuas kuv lub npe rau hauv ib tsoom tebchaws, uas pom kuv coj cov Yixayee tawm hauv Iyi tebchaws mus. Tsis tag li ntawd xwb, kuv tseem cog lus khov kho rau lawv hauv tebchaws moj sab qhua tias kuv yuav tsis coj lawv los rau hauv lub tebchaws uas kuv muab pub rau lawv, yog lub tebchaws uas muaj kua mis thiab muaj zib ntab ntws nto, yog lub tebchaws uas zoo tshaj plaws lwm lub tebchaws huvsi, vim yog lawv tsis yuav kuv tej kevcai thiab tsis ua raws li kuv tej kab ke, thiab ua qias puas tsuas kuv hnub Xanpatau vim lawv qaug siab rau lawv tej dab mlom. Txawm li ntawd, los kuv lub qhov muag tseem khuvleej lawv, kuv tsis muab lawv ua kom puam tsuaj thiab tsis ua rau lawv tu noob nrho hauv tebchaws moj sab qhua. Thiab kuv hais rau lawv tej tub ki hauv tebchaws moj sab qhua ntawd tias, “Tsis txhob ua raws li nej tej poj koob yawm txwv li kab ke thiab coj raws li lawv tej kevcai lossis pe lawv tej dab mlom ua qias puas tsuas nej. Kuv yog Yawmsaub, yog nej tus Vajtswv. Nej cia li ua raws li kuv tej kab ke thiab ua tib zoo coj raws li kuv tej kevcai, thiab hwm kuv hnub Xanpatau ua hnub uas dawb huv kom thiaj ua tau lub chaw cim rau kuv thiab nej, nej thiaj paub tias kuv yog Yawmsaub, yog nej tus Vajtswv.” “ ‘Tiamsis nej tej tub ki kuj fav xeeb rau kuv. Lawv tsis ua raws li kuv tej kab ke, thiab tsis ua tib zoo coj raws li kuv tej kevcai uas yog neeg coj tau yuav muaj txojsia nyob, thiab lawv ua qias puas tsuas kuv hnub Xanpatau. Kuv xav tias kuv yuav nchuav kuv txojkev npau taws thiab kuv txojkev chim los raug lawv hauv tebchaws moj sab qhua mus txog thaum kuv siab nqeg. Tiamsis kuv tau nkaum kuv txhais tes, thiab kuv tsis ua li ntawd vim kuv saib rau kuv lub npe, kom thiaj tsis ua puas tsuas kuv lub npe rau hauv ib tsoom tebchaws, uas pom kuv coj cov Yixayee tawm hauv Iyi tebchaws mus. Tsis tag li ntawd xwb, kuv tseem cog lus twv rau lawv hauv tebchaws moj sab qhua tias kuv yuav ua rau lawv tawg ri sua mus rau hauv ib tsoom tebchaws thiab khiav lawv mus nyob rau hauv luag tej tebchaws, vim yog lawv tsis coj raws li kuv tej kevcai thiab tsis yuav kuv tej kab ke thiab ua qias puas tsuas kuv hnub Xanpatau, thiab lawv lub qhov muag ntsia ntsoov rau lawv tej poj koob yawm txwv tej dab mlom. Tsis tag li ntawd xwb, kuv thiaj muab tej kab ke uas tsis zoo thiab tej kevcai uas yog lawv ua raws li ntawd lawv yuav tsis muaj txojsia nyob. Thiab kuv ua rau tej uas lawv coj tuaj xyeem qias puas tsuas lawv, vim kuv cia lawv muab tej menyuam uas yog tus hlob huvsi hlawv xyeem rau dab, kom kuv thiaj ua rau lawv ntshai kawg. Kuv ua li ntawd kom lawv thiaj paub tias kuv yog Yawmsaub.’ “Vim li no, neeg tus tub, cia li hais rau cov Yixayee thiab hais rau lawv tias, ‘Vajtswv Yawmsaub hais li no tias, Qhov no nej tej poj koob yawm txwv kuj ua tub qaug rau kuv dua thiab, yog ua fav xeeb rau kuv thiab. Thaum kuv coj lawv los rau hauv lub tebchaws uas kuv cog lus cia tias kuv yuav muab pub rau lawv, thaum lawv pom lub roob siab twg thiab pom tsob ntoo nplooj ntsuab tsaus nti twg, lawv kuj muab tsiaj xyeem rau dab, thiab muab qhov txhia chaw xyeem rau qhov ntawd zes ua rau kuv chim. Qhov chaw ntawd lawv hlawv xyab thiab lawv hliv cawv txiv hmab xyeem. Ces kuv thiaj nug lawv tias, Lub chaw siab uas teev dab uas nej mus ntawd yog dabtsi?’ ” (Lawv thiaj hu lub chaw ntawd ua Npama los txog niaj hnub nimno.) “Vim li no cia li hais rau cov Yixayee tias, ‘Vajtswv Yawmsaub hais li no tias, Nej yuav ua qias puas rau nej ib yam li nej tej poj koob yawm txwv ua thiab raws lawv qab ua tej uas kuv ntxub kawg li lov? Thaum nej muab qhov txhia chaw pub rau dab thiab muab nej tej tub hlawv xyeem rau dab, mas nej tej dab mlom huvsi ua rau nej qias puas tsuas los txog niaj hnub nimno. Au cov Yixayee 'e, nej tseem yuav ua nug rau kuv lov? Vajtswv Yawmsaub hais tias, kuv yeej muaj txojsia nyob, mas kuv yuav tsis kheev nej ua nug rau kuv kiag li. “ ‘Yam uas nyob hauv nej lub siab yuav tsis tshwm los, yog qhov uas nej xav hais tias, “Cia peb ua ib yam li ib tsoom tebchaws, ua ib yam li txhua haiv neeg hauv tej tebchaws, es mus pe hawm ntoo thiab pob zeb.” Vajtswv Yawmsaub hais tias, Kuv yeej muaj txojsia nyob mas kuv yuav siv kuv txhais tes uas muaj hwjchim thiab kuv txhais npab uas tsa hlo, thiab nchuav kuv txojkev npau taws los, ua vajntxwv kav kiag nej. Kuv yuav siv kuv txhais tes uas muaj hwjchim thiab kuv txhais npab uas tsa hlo, thiab nchuav kuv txojkev npau taws los, coj nej tawm hauv txhua haiv neeg los thiab qaws nej tawm hauv tej tebchaws uas nej tawg ri sua mus lawm los. Thiab kuv yuav coj nej mus rau hauv tebchaws moj sab qhua uas yog ib tsoom tebchaws uas nej mus nyob, mas qhov chaw ntawd kuv yuav txiav txim rau nej tim ntsej tim muag. Kuv txiav txim rau nej tej poj koob yawm txwv hauv tebchaws moj sab qhua ntawm Iyi tebchaws li cas, kuv yuav txiav txim rau nej ib yam li ntawd. Vajtswv Yawmsaub hais li no ntag. Kuv yuav suav nej los chaws hauv kuv tus qab pas nrig thiab kuv yuav coj nej los yuav kuv tej lus cog tseg. Kuv yuav rhuav tshem cov uas fav xeeb thiab cov uas ua txhaum rau kuv tawm hauv nej mus. Kuv yuav coj lawv tawm hauv lub tebchaws uas lawv khiav mus nyob hauv, tiamsis lawv yuav tsis tau los nyob hauv Yixayee tebchaws. Thaum ntawd nej yuav paub tias kuv yog Yawmsaub. “ ‘Vajtswv Yawmsaub hais li no tias, Cov Yixayee 'e, yog nej tsis mloog kuv lus, mas nej txhua tus cia li mus ua koom tu nej tej dab mlom txij no mus. Tiamsis nej tsis txhob ua qias puas tsuas kuv lub npe uas dawb huv rau qhov uas nej xyeem qhov txhia chaw thiab pe nej tej dab mlom dua li lawm. Vajtswv Yawmsaub hais tias, Saum kuv lub roob dawb huv, yog Yixayee lub roob siab, mas ib tsoom Yixayee sawvdaws yuav ua koom tu kuv hauv lub tebchaws. Kuv yuav txais yuav lawv qhov chaw ntawd, thiab kuv kom nej coj qhov txhia chaw tuaj pub thiab coj tej uas zoo kawg nkaus tuaj xyeem thiab coj tej uas tua xyeem ua yam uas dawb huv tuaj rau qhov ntawd. Thaum kuv coj nej tawm hauv ib tsoom tebchaws thiab qaws nej tawm hauv tej tebchaws uas nej tawg ri sua mus nyob los, kuv yuav txais yuav nej ib yam li tej pa tshuaj tsw qab uas kuv txaus siab. Thiab yuav ua kuv txojkev dawb huv tshwm rau hauv nej nruab nrab tab meeg ib tsoom tebchaws. Mas nej yuav paub tias kuv yog Yawmsaub rau thaum kuv coj nej los rau hauv Yixayee tebchaws uas kuv cog lus cia tias kuv yuav pub rau nej tej poj koob yawm txwv. Qhov chaw ntawd nej yuav nco tej uas nej tau ua los lawm thiab txhua yam uas nej ua rau nej qias puas tsuas, mas nej yuav ntxub nej tus kheej vim tej kev phem uas nej tau ua ntawd. Cov Yixayee 'e, thaum kuv ua rau nej vim kuv saib rau kuv lub npe, kuv thiaj tsis ua rau nej raws li nej tej kev phem thiab nej tej kev qias huvsi, thaum ntawd nej yuav paub tias kuv yog Yawmsaub. Vajtswv Yawmsaub hais li no ntag.’ ” Yawmsaub hais lus tuaj rau kuv tias, “Neeg tus tub, cia li tsom ntsoov rau sab nrad, cia li piav rau sab tebchaws nrad, cia li cev lus tawm tsam lub hav zoov sab nrad. Cia li hais rau lub hav zoov hauv Neke tias, ‘Cia li mloog Yawmsaub tej lus. Vajtswv Yawmsaub hais li no tias, Saib maj, kuv yuav zes taws rau hauv koj, mas hluavtaws yuav kub txhua tsob ntoo ntsuab thiab txhua tsob ntoo qhuav hauv koj. Yuav tua tsis tau tej nplaim taws hlob ntawd li, thiab txhua lub ntsej muag tag nrho sab nrad mus txog sab ped yuav kub hiav tag. Ib tsoom neeg yuav pom tias kuv uas yog Yawmsaub zes taws hlawv ntag, tsis muaj leejtwg tua tau li.’ ” Kuv thiaj hais tias, “Au Vajtswv Yawmsaub, lawv tabtom hais txog kuv tias, ‘Nws yog ib tug uas rhawv tej paj lug los tsis yog?’ ” Yawmsaub hais lus tuaj rau kuv tias, “Neeg tus tub, koj cia li tsom ntsoov rau Yeluxalees, cia li piav txog tej chaw teev dab thiab cev kuv lus tawm tsam Yixayee tebchaws. Thiab hais rau Yixayee tebchaws tias, ‘Yawmsaub hais li no tias, Saib maj, kuv tawm tsam koj. Kuv yuav rho kiag kuv rab ntaj hauv lub hnab, kuv yuav txiav tej neeg ncaj ncees thiab tej uas tsis ncaj tawm ntawm koj mus. Vim kuv yuav txiav cov neeg ncaj ncees thiab cov tsis ncaj tawm ntawm koj mus, mas kuv rab ntaj yuav tawm hauv lub hnab mus tawm tsam tej neeg sawvdaws uas nyob sab nrad tag nrho rau sab ped huvsi. Mas ib tsoom neeg yuav paub tias kuv uas yog Yawmsaub tau rho kuv rab ntaj tawm hauv lub hnab lawm, yuav tsis muab ntxig rau hauv lub hnab dua li.’ “Vim li no, neeg tus tub, cia li ntsaj, cia li ntsaj laws vim yog lwj siab tag thiab lwj siab kawg tab meeg lawv. Thaum lawv nug koj tias, ‘Ua cas koj ntsaj?’ koj cia li hais tias, ‘Vim yog tsab xov. Thaum tsab xov ntawd tuaj txog, txhua lub siab yuav yaj tag thiab txhua txhais tes yuav tsaug leeg tag, thiab lawv yuav qaug zog tag thiab txhua lub hauv caug yuav tsaus muag yam li dej.’ Saib maj, tsab xov tabtom tuaj txog thiab yuav tiav, Vajtswv Yawmsaub hais li no ntag.” Yawmsaub hais lus tuaj rau kuv tias, “Neeg tus tub, cia li cev Vajtswv lus hais tias, ‘Tus Tswv hais li no tias, “ ‘Ib rab ntaj, ib raj ntaj twb muab hov ntse thiab txhuam ci nplas lawm. Muab hov ntse yuav tua neeg muab txhuam ci nplas zoo li xob laim. Peb yuav zoo siab lov? Kuv tus tub, koj tau saib tsis taus tus pas nrig thiab txhua rab nplawm ntoo. Vim li no rab ntaj tabtom raug muab txhuam, thiaj li coj mus siv tau, rab ntaj ntse thiab muab txhuam lawm yuav muab cob rau tus uas tua neeg txhais tes. Neeg tus tub 'e, cia li quaj thiab nyiav lauj, rau qhov rab ntaj tawm tsam kuv haiv neeg, thiab tawm tsam Yixayee cov thawj txhua tus, lawv raug muab cob nrog kuv haiv neeg ua ke rau hniav ntaj. Vim li no cia li ntaus koj hauv siab. Yuav muaj kev sim siab, vim nej twb saib tsis taus rab nplawm ntawd lawm mas yuav muaj dabtsi tuaj ntxiv? Vajtswv Yawmsaub hais li no ntag.’ “Neeg tus tub, vim li no cia li cev Vajtswv lus. Cia li npuaj teg thiab cia rab ntaj los ob zaug, peb zaug los maj, yog rab ntaj uas npaj cia rau cov uas yuav raug tua, yog rab ntaj uas npaj cia tua tej neeg coob kawg uas nyob vij nkaus lawv, ua rau lawv lub siab ntshai yaj tag, thiab ua rau lawv dawm ntog coob kawg. Kuv muab rab ntaj ci nplas tso rau ntawm lawv tej rooj loog huvsi, ua zoo li xob laim, thiab raug muab txhuam yuav tua neeg. Rab ntaj 'e, cia li txiav rau sab xis thiab sab laug, tsis hais koj hniav ntaj tig rau sab twg cia li txiav rau sab ntawd. Kuv kuj yuav npuaj teg, kuv yuav ua kuv txojkev npau taws kom kuv siab nqeg. Kuv uas yog Yawmsaub twb hais cia li no lawm.” Yawmsaub hais lus tuaj rau kuv dua tias, “Neeg tus tub, cia li kuam ob txojkev rau vajntxwv Npanpiloo rab ntaj tuaj, kuam ob txojkev tawm hauv tib lub tebchaws tuaj. Thiab cia li ua daim phiaj qhia kev, cia li ua rau ntawm ncauj ke uas mus rau hauv lub nroog Yeluxalees. Cia li kuam ib txoj rau rab ntaj los rau lub moos Lanpa uas nyob hauv cov Asmoo tebchaws, thiab kuam ib txoj los rau hauv Yuda los txog lub nroog Yeluxalees uas muaj ntsa loog ruaj khov. Vim yog vajntxwv Npanpiloo sawv ntawm ob txojkev tshuam, ntawm ob txoj ncauj ke mas nws saib yaig. Nws co nws rab xub saib yaig, thiab nug nws tej dab qhuas, thiab saib kotaw qaib. Hauv nws sab tes xis nws tuav rab xub uas sau hais tias Yeluxalees, yog lub chaw uas nws yuav ua tej chaw uas txam tsoo ntsa loog kom pob, thiab yuav tsa suab qw kom tua, thiab tsa suab qw ua rog, thiab ua tej cuab yeej uas txam rooj loog, thiab tsub av ua chaw nce mus ntaus ntsa loog, thiab ua chaw siab ntaus rog vij lub nroog. Cov uas nyob hauv Yeluxalees xav tias nws saib yaig tsis tseeb, lawv twb cog lus tseg twv cia lawm. Tiamsis vajntxwv Npanpiloo rov nco txog lawv kev txhaum xwv lawv thiaj yuav raug muab ntes coj mus. “Vim li no Vajtswv Yawmsaub hais li no tias, ‘Vim yog nej tau ua kom rov nco txog nej lub txim, vim nej tej kev fav xeeb nthuav tawm los lawm, thiab nej lub txim tshwm los rau hauv txhua yam uas nej ua, vim li no, nej yuav raug ntes coj mus. “ ‘Thiab koj, uas yog neeg phem thiab qias tsis huv, uas yog Yixayee tus thawj, hnub uas teem rau koj los txog lawm, yog lub sijhawm uas teem txim zaum kawg. Vajtswv Yawmsaub hais li no tias, Cia li hle hauv phuam thiab hle lub mom vajntxwv tseg. Txhua yam yuav tsis nyob ruaj khov li qub. Cia li txhawb nqa yam uas qes kom sawv, thiab nias yam uas siab kom qes. Kuv yuav ua kom pob tag, pob tag, pob tag. Yuav tsis tshuav ib nyuag qho li mus txog thaum tus uas muaj feem los txog, mas kuv yuav muab pub rau nws.’ ” “Neeg tus tub, cia li cev Vajtswv lus thiab hais tias, ‘Vajtswv Yawmsaub hais li no txog cov Asmoo thiab hais txog qhov uas lawv thuam cov Yixayee mas nws hais tias, “ ‘Ib rab ntaj, ib raj ntaj raug muab rho lawm yuav tua neeg, twb muab txhuam kom haus ntshav thiab ci nplas yam li xob laim. Thaum luag pom tej yog toog cuav thiab hais txog nej lub hauv ntej tsis tseeb, yuav muab rab ntaj tso rau saum cov neeg phem qias tsis huv lub caj dab. Twb txog hnub uas teem rau lawv lawm, yog lub sijhawm uas teem txim zaum kawg. Cia li muab rab ntaj rov ntxig rau hauv nab. Kuv yuav txiav txim rau nej hauv lub qub chaw uas tsim nej, yog lub tebchaws uas yug nej. Thiab kuv yuav nchuav kuv txojkev chim los raug nej, kuv yuav tshuab tej nplaim taws uas yog kuv txojkev npau taws los raug nej, thiab kuv yuav muab nej cob rau hauv cov neeg siab nyoos txhais tes, yog cov neeg uas txawj ua kom puam tsuaj txhais tes. Nej yuav ua taws rau luag rauv, nej cov ntshav yuav los rau hauv nruab nrab nej lub tebchaws, yuav tsis muaj leejtwg nco nej li lawm, rau qhov kuv uas yog Yawmsaub tau hais tej lus no cia.’ ” Yawmsaub hais lus tuaj rau kuv dua tias, “Neeg tus tub, koj yuav txiav txim lov? Koj yuav txiav txim rau lub nroog uas ua kom los ntshav ntawd lov? Ua li no koj cia li piav txhua yam kev qias vuab tsuab uas nws ua rau nws mloog. Koj cia li hais tias, ‘Vajtswv Yawmsaub hais li no tias, No yog lub nroog uas ua kom los ntshav rau hauv nruab nrab nws thiab ua tej dab mlom qias puas tsuas nws. Lub sijhawm uas teem rau nws los txog lawm. Koj muaj txim vim qhov uas koj ua rau muaj ntshav ntws los, thiab ua tej dab mlom qias puas tsuas koj. Koj thiaj coj hnub uas teem rau koj los ze lawm, thiab xyoo uas teem rau koj los txog lawm. Vim li no kuv thiaj ua rau koj raug ib tsoom tebchaws saib tsis taus thiab raug tej tebchaws thuam luag. Cov nyob ze nyob deb koj los thuam luag koj, koj yog lub nroog uas poob koob thiab muaj kev kub nthxov puv nkaus. “ ‘Saib maj, Yixayee cov thawj uas nyob hauv koj, txhua tus kuj huas mus ua kom los ntshav raws li nws muaj peevxwm ua tau. Tej niam tej txiv raug saib tsis taus rau hauv koj, lwm haiv neeg uas nrog nej nyob kuj raug quab yuam hauv nruab nrab koj, tej menyuam ntsuag tsis muaj txiv thiab tej poj ntsuam kuj raug tsim txom hauv koj. Koj saib tsis taus kuv tej qhov txhia chaw uas dawb huv, thiab ua qias puas tsuas kuv hnub Xanpatau. Muaj neeg nyob hauv koj uas iab hiam luag ua kom los ntshav, thiab muaj cov uas noj mov teev dab saum tej roob, thiab ua dev ua npua qias rau hauv koj. Hauv koj muaj cov uas deev nws txiv li pojniam, hauv koj muaj cov uas yuam deev tej pojniam uas cev tsis huv tseem ua pojniam. Ib tug ua dev rau nws tus kwvtij pojniam, ib tug ua dev yuam nws tus nyab qias puas tsuas. Hauv koj muaj dua ib tug ua dev rau nws tus muam uas yog nws txiv tus ntxhais. Hauv koj muaj cov uas yuav nyiaj xiab ua kom los ntshav. Koj yuav paj nyiag noj tshaj thawj, koj quab yuam txhav kwvtij zej zog li nyiaj txiag. Koj tsis nco qab kuv lawm. Vajtswv Yawmsaub hais li no ntag. “ ‘Saib maj, vim li no kuv yuav npuaj teg rau qhov uas koj ua phem tau tshaj thawj thiab qhov uas ua kom los ntshav rau hauv koj. Hnub uas kuv rau txim rau koj, koj lub siab yuav tuab thev tau lov thiab koj txhais tes tseem yuav muaj zog lov? Kuv uas yog Yawmsaub tau hais li no lawm mas kuv yuav ua. Kuv yuav ua kom koj khiav ri sua mus rau hauv ib tsoom tebchaws thiab ntiab koj mus nyob rau hauv luag tej tebchaws, thiab kuv yuav rhuav tshem koj tej kev qias tsis huv tawm hauv koj mus. Ib tsoom tebchaws yuav pom koj qias puas tsuas yeej yog tim koj, mas koj yuav paub tias kuv yog Yawmsaub.’ ” Yawmsaub hais lus tuaj rau kuv tias, “Neeg tus tub, cov Yixayee ntxeev ua quav tooj quav hlau rau kuv lawm. Lawv sawvdaws yog tej quav tooj liab tooj dawb quav hlau quav txhuas hauv lub yeej vub, lawv yog cov quav nyiaj lawm xwb. Vim li no, Vajtswv Yawmsaub thiaj hais tias, ‘Vim nej yog quav tooj quav hlau xwb, mas kuv yuav sau zog nej rau hauv Yeluxalees. Luag sau nyiaj thiab tooj liab thiab hlau thiab txhuas thiab tooj dawb rau hauv lub yeej vub muab hlawv kom yaj li cas, kuv yuav sau zog nej ua npau taws chim tsawv los ua ke hlawv kom yaj ib yam li ntawd. Kuv yuav sau zog nej los ua ke, thiab yuav muab tej nplaim taws uas yog kuv txojkev npau taws hlawv nej thiab nej yuav yaj tag rau hauv nruab nrab. Nyiaj yaj tag rau hauv lub yeej vub li cas, nej yuav yaj tag rau hauv lub nroog ib yam li ntawd. Mas nej yuav paub tias kuv uas yog Yawmsaub nchuav txojkev npau taws los raug nej.’ ” Yawmsaub hais lus tuaj rau kuv tias, “Neeg tus tub, cia li hais rau lub tebchaws tias, ‘Koj yog lub tebchaws uas tsis tau muab ntxuav kom huv thiab tsis muaj nag los rau hnub uas kuv chim.’ Cov thawj kav hauv lub tebchaws kuj zoo li tej tsov ntxhuav uas nyooj laws dua nqaij noj. Lawv noj neeg, lawv txeeb tej nyiaj txiag thiab tej qhov txhia chaw tsim txiaj coj mus, lawv ua rau muaj poj ntsuam coob hauv lub tebchaws. Cov pov thawj hauv lub tebchaws rhuav tshem kuv txoj kevcai thiab ua qias puas tsuas tej uas dawb huv rau kuv. Lawv tsis cais tej uas dawb huv thiab tej uas qias, thiab lawv tsis qhia hais tias yam twg huv thiab yam twg qias. Lawv tsis coj kuv hnub Xanpatau, lawv thiaj qias puas tsuas kuv lawm. Cov nom tswv hauv lub tebchaws zoo li tej hma uas dua nqaij noj ua ntshav los, txov luag txojsia thiaj tau ntau ntawm qhov uas ua tsis ncaj. Cov xibhwb cev Vajtswv lus hauv lub tebchaws muab hmoov zeb sib dawb pleev npog lawv tej kev txhaum. Lawv pom yog toog cuav thiab hais tej lus tsis tseeb rau tom hauv ntej hais tias, ‘Vajtswv Yawmsaub hais li no,’ tiamsis Yawmsaub yeej tsis tau hais kiag li. Tej pejxeem hauv lub tebchaws kuj quab yuam txhav luag nyiaj txiag thiab lws luag, lawv tsuj yuam tej pluag thiab tej txom nyem, thiab tsuj yuam lwm haiv neeg uas nrog lawv nyob hais tsis taus lawv lawm. Thiab kuv nrhiav ib tug hauv lawv cov uas yuav tsim dua ntsa loog, thiab yuav sawv nres nroos ntawm tej chaw uas pob, tuav lub tebchaws rau ntawm kuv lub xubntiag, kom kuv thiaj tsis muab ua kom puam tsuaj, tiamsis kuv nrhiav tsis muaj ib tug kiag li. Vim li no kuv thiaj nchuav kuv txojkev chim los raug lawv, kuv muab nplaim taws uas yog kuv txojkev npau taws hlawv lawv kub hnyiab tag, kuv ua pauj rau saum lawv taubhau raws li lawv tau ua lawm. Vajtswv Yawmsaub hais li no ntag.” Yawmsaub hais lus tuaj rau kuv tias, “Neeg tus tub, muaj ob tug vivncaus hluas nkauj koom ib leeg niam. Ob tug ua poj muag cev rau hauv Iyi tebchaws. Ob tug ua poj muag cev thaum tseem hluas nkauj los lawm. Ob tug ob lub mis raug muab zuaj thiab lub xubntiag nkauj xwb raug kov. Tus niam laus npe hu ua Auhaulia, tus niam hluas npe hu ua Auhaulinpa. Ob tug los ua kuv tug thiab ob tug yug tau tub thiab ntxhais. Auhaulia yog lub nroog Xamali, Auhaulinpa yog lub nroog Yeluxalees. “Auhaulia ua poj muag cev thaum nws tseem yog kuv tug. Nws siab qaug lias raws cov Axilia uas nws nyiam. Lawv yog tub rog, thiab hnav tsoos tsamxem, yog nom tswv loj thiab thawj tub rog. Lawv puavleej caij nees, txhua tus yog tub hluas zoo nraug kawg. Nws thiaj ua poj muag cev rau cov no, txhua tus yog Axilia cov thawj, thiab nws kuj pe txhua tus uas nws qaug siab rau tej dab mlom huvsi ua qias puas rau nws. Nws tsis tseg qhov uas nws tau ua poj muag cev txij thaum nws nyob hauv Iyi tebchaws los. Thaum nws tseem hluas tej tub hluas twb nrog nws pw thiab kov nws lub xubntiag nkauj xwb, thiab ua tag nrho li lawv lub siab nyiam rau nws. “Vim li no kuv thiaj muab nws cob rau cov uas nws nyiam txhais tes, yog cob rau hauv cov Axilia uas nws qaug siab txhais tes. Lawv muab nws hle liab qab, lawv txeeb nws tej tub tej ntxhais, thiab xuas ntaj tua nws. Thaum txiav txim rau nws lawm, nws thiaj ua ib tsoom pojniam lo lus thuam luag. “Nws tus niam hluas Auhaulinpa pom li no, los nws tseem phem heev dua nws tus niam laus qhov uas nws qaug siab rau luag thiab ua poj muag cev phem heev dua nws tus niam laus. Nws siab qaug lias raws cov Axilia, uas yog nom tswv loj thiab thawj tub rog, thiab tej tub rog uas hnav ris tsho hlau. Lawv puavleej caij nees, txhua tus yog tub hluas zoo nraug ntxiag. Kuv pom nws qias puas tsuas lawm. Ob vivncaus taug tib txojkev. “Tiamsis nws tseem ua poj muag cev heev dua qub. Nws pom tej duab txivneej ntawm phab ntsa, yog tej duab uas cov Kheedia hnav tsoos tsho liab liab. Lawv muaj siv tawv sia ntawm duav, muaj phuam ntoo saum taubhau tso tw, txhua tus zoo yam nkaus li tej thawj tub rog. Mas daim duab ntawd yog cov neeg Npanpiloo uas thaum ub yug rau hauv Kheedia tebchaws. Thaum nws pom tej duab ntawd, nws kuj qaug siab rau lawv, thiab tso cov tub xa xov mus cuag lawv hauv Kheedia tebchaws. Cov Npanpiloo kuj tuaj nrog nws pw hauv nws lub txaj, lawv deev nws ua rau nws qias puas tsuas. Thaum nws raug lawv ua qias puas tsuas lawm, nws dhuav fee plhu kiag. Thaum nws ua poj muag cev tab meeg thiab ua rau sawvdaws pom nws liab qab, kuv dhuav fee plhu kiag, ib yam li kuv dhuav fee plhu kiag ntawm nws tus niam laus. Txawm yog li ntawd los nws tseem yimhuab ua poj muag cev, thiab nco txog thaum nws tseem hluas nkauj nws ua poj muag cev rau hauv Iyi tebchaws. Nws qaug siab rau cov uas nws nyiam ntawd, lawv nqaij plees loj ib yam li nees luav li, lawv tej kua npaum li nees. Yog li no koj thiaj ntshaw koj txojkev plees thaum koj tseem hluas nkauj, es cov Iyi kov koj xubntiag thiab zuaj koj lub txiv mis hluas nkauj. “Vim li ntawd, Auhaulinpa 'e, Vajtswv Yawmsaub hais li no tias, Saib maj, kuv yuav tshoov cov uas koj nyiam thiab fee plhu dhuav lawm, tiamsis tuaj tawm tsam koj. Kuv yuav coj lawv txhua fab tuaj, yog cov Npanpiloo thiab cov Kheedia huvsi, thiab cov Pekhau thiab cov Sau‑a thiab cov Khau‑a, thiab cov Axilia huvsi, yog cov tub hluas zoo nraug, puavleej yog nom tswv thiab cov thawj, yog cov thawj rog thiab tub rog, puavleej caij nees. Lawv yuav tuaj sab ped tuaj tawm tsam koj. Lawv muaj tsheb ua rog tsheb nyuj thiab ib pab neeg coob heev, lawv yuav txhij tub rog tawm tsam koj txhua fab, lawv tuav rawv tej daim phiaj hlau loj thiab daim phiaj me thiab mom hlau. Kuv yuav muab hwjchim txiav txim rau lawv mas lawv yuav txiav txim rau koj raws li lawv txoj kevcai txiav txim. Thiab kuv yuav tso kuv txojkev chim los tawm tsam koj, mas lawv yuav txiav txim npau taws heev rau koj. Lawv yuav txiav koj lub qhov ntswg thiab koj nplooj ntseg pov tseg, thiab cov uas tshuav nyob yuav raug hniav ntaj tuag tag. Lawv yuav txeeb koj tej tub tej ntxhais thiab cov uas tshuav nyob yuav raug muab hluavtaws hlawv. Lawv yuav hle koj lub tsho thiab lws koj tej npauj nyiag npauj kub zoo zoo nkauj coj mus. Kuv yuav ua kom koj txojkev ua dev ua npua thiab koj txojkev ua poj muag cev uas koj coj hauv Iyi tebchaws los ploj tag mus, koj thiaj li tsis ntshaw saib cov neeg Iyi thiab tsis nco txog lawv dua li lawm. Vajtswv Yawmsaub hais li no tias, Saib maj, kuv yuav muab koj cob rau hauv cov uas koj ntxub thiab koj dhuav fee plhu kiag txhais tes. Mas lawv yuav ua rau koj raws li lawv ntxub, thiab txeeb txhua yam uas koj khwv tau, thiab muab koj tso liab qab do cuas, thiab thws qhov uas koj liab qab thiab ua poj muag cev tshwm los. Koj txojkev ua dev ua npua thiab koj txojkev ua poj muag cev coj tej no los raug koj, vim yog koj ua poj muag cev rau ib tsoom tebchaws, thiab koj pe lawv tej dab mlom ua rau koj qias puas tsuas. Koj ua raws li koj tus niam laus, vim li no kuv yuav muab nws lub khob rau hauv koj txhais tes. “Vajtswv Yawmsaub hais li no tias, “Koj yuav haus koj tus niam laus lub khob uas loj thiab tob. Koj yuav raug luag luag thiab saib tsis taus vim lub khob ntim ntau kawg li. Koj tsuas muaj uas qaug cawv thiab lwj siab xwb. Koj tus niam laus Xamali lub khob yog txojkev ntshai kawg thiab kev puam tsuaj. Koj yuav haus thiab yuav haus kom khee kawv hauv qab khob, koj yuav cua tej txhais khob uas tawg thiab yuav dua koj lub mis. Kuv twb hais cia li ntawd lawm. Vajtswv Yawmsaub hais li no ntag. “Vim li no Vajtswv Yawmsaub hais li no tias, Vim koj tsis nco qab kuv thiab muab kuv laim tseg rau tom koj qub qab, vim li no koj yuav raug lub txim uas koj ua dev ua npua thiab ua poj muag cev.” Yawmsaub hais rau kuv tias, “Neeg tus tub, koj yuav txiav txim rau Auhaulia thiab Auhaulinpa lov? Koj cia li piav tej uas lawv ua qias vuab tsuab rau lawv paub. Rau qhov ob tug tau ua nkauj ua nraug, thiab ob tug txhais tes lo ntshav, ob tug deev ob tug tej dab mlom. Ob tug tseem muab ob tug tej tub uas ob tug yug rau kuv tua xyeem rau tej dab mlom ua tej dab mlom li zaub mov. Heev dua li ntawd ob tug tseem ua li no rau kuv, tib hnub xwb ob tug ua qias puas tsuas qhov chaw uas pe kuv thiab puas tsuas kuv hnub Xanpatau. Vim yog hnub uas ob tug muab ob tug li menyuam tua xyeem rau ob tug tej dab mlom, ob tug kuj nkag rau hauv qhov chaw uas pe kuv thiab, thiaj ua qias puas tsuas lub chaw ntawd. Tej no ntag yog tej uas ob tug ua rau hauv kuv lub tuam tsev. “Thiab ob tug tseem hu tej txivneej uas nyob deb deb tuaj. Ob tug tso neeg mus hu, ua ciav lawv kuj tuaj. Koj kuj da dej thiab pleev koj qhov muag kaim qas zees thiab coj npauj nyiag npauj kub tos lawv. Koj zaum saum ib lub rooj uas zoo nkauj, muaj ib lub rooj noj mov nyob ntawm koj xubntiag thiab koj muab kuv li tshuaj tsw qab thiab kuv li roj tso rau saum lub rooj ntawd. Muaj neeg coob coob nrog nws nyob qw ua lomzem nrov ntshu nrooj, thiab muaj tej txivneej dos dig qaug cawv uas coj hauv tebchaws moj sab qhua tuaj. Lawv muab tooj npab rau cov pojniam coj thiab muab mom kub zoo nkauj rau lawv ntoo. “Kuv thiaj hais tias, ‘Cov txivneej nyiam mus nrog tus uas ua nkauj ua nraug ntau ntawd sib deev lov?’ Vim lawv mus cuag nws ib yam nkaus li cov txivneej mus cuag ib tug poj muag cev. Ib yam li ntawd lawv thiaj mus cuag Auhaulia thiab Auhaulinpa uas nyiam sib deev. Tiamsis cov uas ncaj ncees yuav txiav txim rau ob tug raws li txiav txim rau tus pojniam ua nkauj ua nraug thiab raws li txiav txim rau tus pojniam uas txhais tes lo ntshav, vim yog ob tug ua nkauj ua nraug thiab ob tug txhais tes lo ntshav. “Vajtswv Yawmsaub hais li no tias, Cia li coj ib pab tub rog coob tuaj tawm tsam ob tug, ua rau ob tug ntshai kawg li thiab txeeb tau ob tug. Thiab pab neeg ntawd yuav xuas pob zeb ntaus ob tug thiab xuas ntaj tua ob tug. Lawv yuav tua ob tug tej tub tej ntxhais thiab muab tej tsev hlawv kub hnyiab huvsi. Ua li no kuv thiaj li ua kom tej kev ua dev ua npua hauv lub tebchaws ploj tag, xwv tej pojniam sawvdaws thiaj li tau lo lus qhuab ntuas thiab tsis ua raws li tej kev uas ua dev ua npua yam li neb tau ua los lawm. Kuv yuav ua pauj rau neb txog tej kev uas neb ua dev ua npua, thiab neb yuav ris neb lub txim uas neb ua txhaum pe dab mlom. Mas neb thiaj paub tias kuv yog Vajtswv Yawmsaub.” Hnub xiab kaum, lub kaum hli, xyoo cuaj, Yawmsaub hais lus tuaj rau kuv tias, “Neeg tus tub, cia li sau hnub no cia, hnub no ntag, yog hnub uas vajntxwv Npanpiloo twb vij lub nroog Yeluxalees ntag. Thiab hais paj lug rau haiv neeg uas pheej fav xeeb, thiab hais rau lawv tias, ‘Vajtswv Yawmsaub hais li no tias, “ ‘Cia li muab lub laujkaub txawb rau hauv qhov cub, txawb los maj, hliv dej rau hauv laujkaub. Muab cov nqaij tso rau hauv, muab tej tseem nqaij zoo zoo ntawm ncej qab thiab ntawm pwgpu tso rau hauv, thiab muab tej pob txha uas zoo tso puv nkaus. Cia li muab ib tug yaj uas zoo tshaj plaws los, sau ib pawg taws rau hauv lub qab laujkaub, thiab muab tej nqaij hau, thiab tsaws tej pob txha. “ ‘Vim li no Vajtswv Yawmsaub hais li no tias, Lub nroog uas lo ntshav raug txom nyem lauj, yog lub laujkaub uas xeb mas tej xeb ntawd tsis tawm li. Cia li muab tej nqaij rho ib daig zuj zus, tsis txhob xaiv li. Rau qhov tej ntshav uas nws ua los lawm tseem nyob hauv nws nruab nrab, nws muab ua los rau saum tej lag zeb uas du du, nws tsis muab nchuav rau hauv tej av thiaj muab hmoov av npoog tau. Kuv muab tej ntshav uas nws ua los ntawd tso rau saum tej lag zeb du du, xwv thiaj npog tsis tau tej ntshav ntawd, kom thiaj zes kuv txojkev npau taws ua rau kuv ua pauj. Vim li no Vajtswv Yawmsaub hais li no tias, Lub nroog uas lo ntshav raug txom nyem lauj! Kuv yuav ua rau pawg taws ntau tuaj thiab. Cia li tsij taws rau hauv qhov cub, cia li rauv taws. Cia li hau tej nqaij zoo zoo, cia li rau txuj lom rau hauv tseg cov pob txha cia kub hnyiab. Txawb lub laujkaub qhuav rau saum cub tawg kom thiaj kub, ua rau tej tooj liab kub hnyiab, xwv tej kev qias thiaj kub yaj tag rau hauv, thiab nws tej xeb kub tag. Kuv ua rau kuv khwv txog siav do xwb, tej xeb uas khub kuj tsis kub hnyiab zeeg li. “ ‘Tej xeb ntawd yog koj txojkev qias ua dev ua npua. Vim kuv twb ntxuav koj lawm tiamsis koj tsis yeem cia ntxuav koj tej kev qias tseg, mas kuv yuav tsis ntxuav koj dua li lawm mus txog thaum nchuav kuv txojkev kev npau taws rau koj tag. Kuv yog Yawmsaub tau hais cia lawm. Twb txog lub sijhawm lawm, kuv yuav ua kom tiav, kuv yuav tsis thim li, kuv yuav tsis khuvleej li, kuv yuav tsis hloov dua siab. Kuv yuav txiav txim rau koj raws li koj lub neej thiab raws li koj tau ua lawm. Vajtswv Yawmsaub hais li no ntag.’ ” Yawmsaub hais lus tuaj rau kuv dua tias, “Neeg tus tub, saib maj, kuv yuav muab tus uas koj lub qhov muag nyiam, ntaus ib teg xwb kom tuag mus. Txawm li ntawd los koj tsis txhob quaj ntsuag thiab quaj thiab los los kua muag. Cia li ntsaj tiamsis tsis txhob ua suab nrov, tsis txhob quaj ntsuag tus uas tuag. Cia li ntoo koj hauv phuam thiab rau khau qas nrees ntawm kotaw, tsis txhob muab ntaub npog qhov ncauj thiab tsis txhob noj cov neeg quaj ntsuag tej mov.” Yog li ntawd thaum tagkis kuv thiaj hais rau cov neeg, mas thaum tsaus ntuj kuv pojniam cia li tag txojsia. Mas tagkis tom qab kuv txawm ua raws li Yawmsaub hais rau kuv lawm. Cov neeg kuj hais rau kuv tias, “Koj yuav tsis qhia rau peb tias tej uas koj ua li no muaj lub ntsiab li cas rau peb lov?” Mas kuv thiaj hais rau lawv tias, “Yawmsaub hais lus tuaj rau kuv tias, Cia li hais rau cov Yixayee tias, ‘Vajtswv Yawmsaub hais li no tias, Saib maj, kuv yuav ua rau qhov chaw uas pe hawm kuv qias puas tsuas, yog lub chaw uas muaj hwjchim uas nej khav txog thiab yog lub chaw uas nej qhov muag nyiam thiab nej lub siab ntshaw. Nej tej tub tej ntxhais uas nej muab tso tseg rau tom qab yuav raug hniav ntaj tuag tag. Mas nej yuav ua ib yam li kuv ua no, nej yuav tsis npog qhov ncauj, thiab yuav tsis noj cov neeg quaj ntsuag tej mov. Nej yuav ntoo phuam saum nej taubhau thiab rau khau nrees ntawm kotaw. Nej yuav tsis quaj ntsuag thiab quaj, tiamsis yuav ntshaus zuj zus vim yog nej kev txhaum txim thiab ib leeg yuav nroo rau ib leeg. Exekhee thiaj ua tus yam ntxwv rau nej li no, nws ua li cas nej yuav ua li ntawd. Thaum tej xwm txheej no los txog, nej yuav paub tias kuv yog Vajtswv Yawmsaub.’ “Neeg tus tub, hnub uas kuv muab lawv lub chaw ruaj khov rhuav tag, tsis hais lawv lub chaw xyiv fab, lawv lub koob meej, thiab lub chaw uas lawv qhov muag nyiam thiab lawv lub siab ntshaw, thiab lawv tej tub tej ntxhais huvsi, mas hnub ntawd ib tug uas khiav dim txojsia yuav tuaj cuag koj tshaj xo rau koj hnov. Thiab hnub ntawd koj lub qhov ncauj yuav hais tau lus rau tus uas khiav dim ntawd, thiab yuav hais tau lus thiab yuav tsis ruam li lawm. Yog li no koj thiaj ua tus yam ntxwv rau lawv mas lawv thiaj yuav paub tias kuv yog Yawmsaub.” Yawmsaub hais lus tuaj rau kuv tias, “Neeg tus tub, cia li tsom ntsoov rau cov Asmoo thiab cev Vajtswv tej lus tawm tsam lawv. Cia li hais rau cov Asmoo tias, ‘Nej cia li mloog Vajtswv Yawmsaub tej lus, Vajtswv Yawmsaub hais li no tias, Vim nej qw hnyos zoo siab rau thaum qhov chaw uas pe kuv qias puas tsuas tag thiab Yixayee tebchaws raug muab tso tseg nyob do cuas thiab thaum cov Yuda raug kuav tawm tebchaws lawm, vim li no kuv yuav muab nej cob rau cov neeg uas nyob sab hnub tuaj ua lawv tug. Lawv yuav ua lub yeej rau tub rog nyob rau hauv nej nruab nrab thiab lawv yuav ua vaj ua tsev nyob hauv nej nruab nrab. Lawv yuav noj nej tej txiv ntoo thiab haus nej tej kua mis. Kuv yuav ua rau lub moos Lanpa ua lub tshav zaub yug ntxhuav, thiab ua rau Asmoo tebchaws ua nkuaj yaj nkuaj tshis. Mas nej yuav paub tias kuv yog Yawmsaub. Vajtswv Yawmsaub hais li no tias, Vim nej npuaj teg ntaug taw zoo siab hnyos thiab ntxub Yixayee tebchaws kawg li, vim li no, saib maj, kuv tsa kiag kuv txhais tes tawm tsam nej, thiab kuv yuav muab nej cob rau ib tsoom tebchaws lws nej, thiab kuv yuav muab nej txiav kom ploj tag rau hauv txhua haiv neeg thiab ua rau nej puam tsuaj tag rau hauv tej tebchaws. Kuv yuav ua rau nej puam tsuaj. Nej thiaj paub tias kuv yog Yawmsaub.’ ” “Vajtswv Yawmsaub hais li no tias, ‘Vim Mau‑a thiab Xe‑i hais tias, “Saib maj, cov Yuda kuj zoo ib yam li txhua lub tebchaws xwb,” vim li no kuv yuav qheb kev rau luag ntaus Mau‑a tej moos uas nyob ntawm ciam teb ua ntej, yog tej moos uas ua rau lub tebchaws tau koob meej, yog lub moos Npe Yesimau thiab lub moos Npa‑ame‑oo thiab lub moos Khiliyatha‑i. Kuv yuav muab Mau‑a tebchaws nrog cov Asmoo ua ke cob rau cov neeg uas nyob sab hnub tuaj ua lawv tug, xwv thiaj tsis muaj leejtwg nco txog cov Asmoo rau hauv ib tsoom tebchaws. Thiab kuv yuav txiav txim rau Mau‑a. Mas lawv yuav paub tias kuv yog Yawmsaub.’ ” “Vajtswv Yawmsaub hais li no tias, ‘Vim Edoo tebchaws ua nruj ua tsiv ua pauj rau cov Yuda thiab qhov uas ua pauj yog ua txhaum muaj txim loj, vim li no Vajtswv Yawmsaub hais li no tias, Kuv yuav tsa tes kiag tawm tsam Edoo thiab muab neeg thiab tsiaj txhu txiav tu nrho hauv lub tebchaws ntawd, kuv yuav ua rau lub tebchaws nyob do cuas. Txij ntua ntawm lub moos Themas mus txog lub moos Dedas lawv yuav raug hniav ntaj hniav riam tuag tag. Thiab kuv yuav siv kuv haiv neeg Yixayee txhais tes ua pauj rau Edoo, mas lawv yuav ua raws li kuv txojkev chim thiab kev npau taws rau hauv Edoo tebchaws. Mas lawv yuav paub qhov uas kuv ua pauj. Vajtswv Yawmsaub hais li no ntag.’ ” “Vajtswv Yawmsaub hais li no tias, ‘Vim cov Filixatee ua nruj ua tsiv ua pauj rau cov Yuda thiab ua yeeb ncuab rau lawv tsis paub kawg li thiab ntxub lawv heev xav ua pauj kom puam tsuaj, vim li no, Vajtswv Yawmsaub hais li no tias, Saib maj, kuv yuav tsa tes kiag tawm tsam cov Filixatee, thiab kuv yuav txiav cov Khelethi tu nrho thiab muab cov uas nyob raws ntug hiavtxwv ua kom puam tsuaj tag. Kuv yuav ua pauj rau lawv loj kawg thiab yuav nplawm lawv ua npau taws heev. Mas lawv yuav paub tias kuv yog Yawmsaub rau thaum kuv ua pauj rau lawv.’ ” Hnub xiab ib, xyoo kaum ib Yawmsaub hais lus tuaj rau kuv tias, “Neeg tus tub, vim yog lub nroog Thailab tau qw hnyos Yeluxalees tias, ‘Yeluxalees uas yog ib tsoom neeg lub qhov rooj pob tag lawm, nws qheb lug rau kuv lawm. Nws liamsim tag lawm kuv thiaj vam meej tuaj.’ Vim li no Vajtswv Yawmsaub hais li no tias, Thailab 'e, saib maj, kuv tawm tsam koj. Kuv yuav coj ntau lub tebchaws tawm tsam koj, ib yam li dej hiavtxwv nphau nphwv tuaj. Lawv yuav ua rau Thailab tej ntsa loog puam tsuaj tag thiab rhuav nws tej chaw tsom faj pob tag. Kuv yuav muab tej av hauv lub nroog ntawd kuam pov tseg thiab ua kom tshuav lag zeb du lug li xwb. Lub nroog ntawd yuav ua lub chaw ziab vas hauv nruab nrab hiavtxwv, vim yog kuv tau hais cia lawm. Vajtswv Yawmsaub hais li no ntag. Ib tsoom tebchaws yuav lws lub nroog ntawd. Thiab nws tej moos me me uas nyob hauv nws lub tebchaws yuav raug hniav ntaj hniav riam tuag tag. Mas lawv thiaj paub tias kuv yog Yawmsaub. “Vajtswv Yawmsaub hais li no tias, Sim saib, kuv yuav coj vajntxwv Nenpukhanexa hauv Npanpiloo, yog tus vajntxwv uas loj tshaj plaws tej vajntxwv huvsi, tuaj sab ped tuaj ntaus Thailab, muaj nees thiab tsheb ua rog thiab tub rog caij nees thiab ib pab tub rog coob kawg li. Nws yuav xuas ntaj tua koj tej moos hauv koj lub tebchaws. Nws yuav ua laj kab vij koj cia, thiab tsub av ua chaw tawm tsam koj, thiab tsa daim hlau vov tawm tsam koj. Nws yuav xuas cuab yeej txam koj tej ntsa loog pob, thiab xuas taus ntov koj lub chaw tsom faj vau. Nws tej nees coob kawg thiaj ua hmoov av laum nkaus koj, thiab tej tub rog caij nees thiab tej tsheb nyuj thiab tsheb ua rog lub suab yuav nrov ua koj tej ntsa loog ntseeg nkaws, rau thaum nws txeem rau hauv koj rooj loog, yam nkaus li tus uas nkag rau hauv lub nroog uas pob tag lawm. Nws tej rau nees yuav tsuj koj txhua txojkev huvsi. Nws yuav xuas ntaj tua koj tej pejxeem. Koj tej ncej uas loj kawg yuav vau hlo rau hauv av. Koj tej nyiaj txiag lawv yuav lws mus, thiab koj tej lag luam lawv yuav txeeb mus. Lawv yuav ua rau koj tej ntsa loog pob tag thiab ua rau koj tej vaj tse uas zoo nyob kawg puam tsuaj tag. Koj tej pob zeb tej ntoo tej av lawv yuav muab laim rau hauv dej. Koj lub suab nkauj kuv yuav ua kom ntsiag to mus, thiab yuav tsis hnov koj lub suab nkauj nog ncas dua li lawm. Kuv yuav ua rau koj tshuav daim lag zeb du lug xwb. Koj yuav ua lub chaw uas ziab vas, yuav tsis muaj leejtwg tsim koj dua li lawm. Vim kuv yog Yawmsaub tau hais cia lawm. Vajtswv Yawmsaub hais li no ntag. “Vajtswv Yawmsaub hais li no rau Thailab tias, Thaum hnov lub suab uas koj vau thiab hnov cov uas raug mob lub suab quaj ntsoog qees thiab muaj kev sib tua hauv nruab nrab koj, mas tej tebchaws raws ntug hiavtxwv tsis ntseeg nkaws lov? Cov vajntxwv sawvdaws uas nyob ntawm ntug hiavtxwv yuav nqes saum tej zwm txwv los thiab hle tej tsoos tsho meej mom thiab hle tej tsoos uas ua paj ntaub rau. Lawv yuav muab txojkev tshee los hnav thiab lawv yuav zaum hauv pem teb tshee hnyo txhua lub sijhawm thiab yuav ntshai kawg vim koj vau. Lawv yuav tsa suab hu zaj nkauj ntsuag txog koj, thiab hais rau koj tias, “ ‘Lub nroog uas muaj koob meej 'e, koj ploj ntawm hiavtxwv lawm lauj! Koj txeev ua lub nroog loj hauv hiavtxwv, twb yog koj thiab koj cov neeg ntag. Koj ua rau txhua tus hauv lub tebchaws ntshai kawg. Nimno tej tebchaws ntawm ntug hiavtxwv tshee hnyo rau hnub uas koj vau, tej koog povtxwv hauv hiavtxwv kuj ntshai vim tsis muaj koj lawm.’ “Vajtswv Yawmsaub hais li no tias, Thaum kuv ua rau koj ua lub nroog uas raug muab tso tseg piam tag ib yam li tej moos uas tsis muaj neeg nyob, thaum kuv coj dej hiavtxwv los nyab koj thiab dej nphau khwb nkaus koj, mas thaum ntawd kuv yuav thawb koj nqes nrog cov uas mus rau hauv tub tuag teb ua ke, mus rau cov neeg thaum ub, thiab kuv yuav ua rau koj nyob rau hauv nruab yeeb hauv nruab nrab tej uas thaum ub pob tag lawm, mus nrog cov uas mus rau hauv tub tuag teb nyob ua ke, xwv thiaj tsis muaj leejtwg nyob hauv koj thiab koj thiaj tsis muaj chaw nrog cov uas muaj txojsia nyob ua ke. Kuv yuav coj koj mus txog qhov kawg uas txaus ntshai kawg li, thiab yuav tsis muaj koj dua li lawm. Txawm yog leejtwg yuav tuaj nrhiav koj, los yuav nrhiav tsis pom koj mus ib txhis li. Vajtswv Yawmsaub hais li no ntag.” Yawmsaub hais lus tuaj rau kuv tias, “Neeg tus tub, nimno koj cia li tsa suab hu zaj nkauj ntsuag hais txog lub nroog Thailab. Cia li hais rau Thailab uas nyob ntawm txojkev mus rau hauv hiavtxwv, thiab ua lag luam rau cov neeg hauv ntau lub tebchaws uas nyob ntawm ntug hiavtxwv hais tias, ‘Vajtswv Yawmsaub hais li no tias, “ ‘Thailab 'e, koj tau hais tias koj zoo nkauj kawg nkaus. Koj ciam teb nyob hauv hiavtxwv. Cov uas tsim koj ua rau koj zoo nkauj kawg nkaus. Lawv xuas ntoo thuv hauv Xeni ua koj tej txiag xov huvsi, Lawv muab ntoo ciab hauv Lenpanoo ua koj tus ncej hauv plawv nkoj. Lawv muab ntoo qheb hauv Npasas ua koj tej duav nquam nkoj, Lawv muab ntoo thuv hauv Xaipla ua cov txiag pua lub nkoj thiab muab kaus ntxhw lo rau hauv. Koj daim ntaub cua ntsawj yog muab cov ntaub mag ua paj zoo zoo hauv Iyi tebchaws ua, thiab ua koj tus chij. Muab ntaub xiav ntaub tsamxem ntawm ntug hiavtxwv Elisas vov roos tshav. Cov neeg Xaidoo thiab cov neeg hauv lub moos Alava yog cov uas nquam nkoj rau koj. Thailab 'e, koj cov neeg uas txawj ua txhua yam yog cov uas ua haujlwm hauv lub nkoj. Cov laus thiab cov uas txawj ua txhua yam haujlwm hauv lub moos Kenpas nyob hauv koj, ua Kws ntoo kho tej kem txiag ntoo hauv koj lub nkoj. Txhua lub nkoj hauv hiavtxwv thiab cov uas ua haujlwm hauv nkoj kuj tuaj nyob hauv koj, nrog koj ua lag luam. Cov neeg Pawxia thiab Lus thiab Phuj kuj ua koj li tub rog hauv koj pab tub rog, lawv muab lawv tej daim hlau thiab mom hlau dai rau hauv koj, lawv ua rau koj tau koob meej. Cov Alava thiab cov Helem nyob saum koj tej ntsa loog thoob plaws, cov Kama nyob saum koj tej chaw tsom faj. lawv dai daim hlau thaiv cev raws koj tej ntsa loog thoob plaws, lawv ua rau qhov uas koj zoo nkauj zoo nkauj kawg nkaus. “ ‘Lub moos Thasi nrog koj ua lag luam vim koj muaj txhua tsav txhua yam ntau kawg, lawv coj nyiaj, hlau, tooj dawb thiab txhuas tuaj pauv koj tej qhov txhia chaw. “ ‘Lub moos Yavas, Thunpas thiab Mese nrog koj ua lag luam. Lawv coj tub qhe thiab twj taig tooj liab tuaj pauv koj li qhov txhia chaw. “ ‘Lub moos Npe Thaukama coj nees thiab nees ua rog thiab luj txwv tuaj pauv rau koj. “ ‘Cov neeg Dedas nrog koj ua lag luam, ntau lub tebchaws ntawm ntug hiavtxwv kuj nrog koj ua lag luam qas nraim. Lawv coj kaus ntxhw thiab ntoo kub twg tuaj ua nqe them rau koj. “ ‘Alas kuj nrog koj ua lag luam vim yog koj muaj qhov txhia chaw ntau nplua mias. Lawv coj qe zeb hlaws ntsuab txho, ntaub tsamxem, ntaub paj, ntaub mag zoo zoo, paj zeb hiavtxwv thiab qe zeb hlaws uas txho taws tuaj pauv koj tej qhov txhia chaw. “ ‘Yuda thiab Yixayee tebchaws kuj nrog koj ua lag luam. Lawv coj mog hauv lub moos Minij thiab thawj phaum txiv cev, thiab zib ntab thiab roj thiab roj ntoo ua tshuaj tuaj pauv koj tej qhov txhia chaw. “ ‘Damaxaka nrog koj ua lag luam yuav koj tej qhov txhia chaw ntau, vim yog koj muaj txhua yam ntau nplua mias. Lawv coj cawv txiv hmab hauv Henpoo thiab plaub yaj dawb, thiab cawv txiv hmab hauv Uxas tuaj pauv koj tej qhov txhia chaw. Lawv coj cov tseem hlau thiab hmoov xyab txob thiab tauj qaib qab zib tuaj pauv koj tej qhov txhia chaw. “ ‘Lub moos Dedas nrog koj ua lag luam. Lawv coj ntaub pua eeb nees tuaj. “ ‘Alanpia thiab cov thawj hauv Kheda sawvdaws nrog koj ua lag ua luam qas nraim. Lawv coj menyuam yaj thiab txiv yaj thiab tshis tuaj muag rau koj. “ ‘Cov tub luam hauv lub moos Senpa thiab lub moos La‑ama kuj nrog koj ua lag luam. Lawv coj txhua yam txuj lom zoo zoo thiab txhua yam qe zeb hlaws muaj nqes thiab kub tuaj pauv koj tej qhov txhia chaw. “ ‘Lub moos Halas thiab Khane thiab Edee, thiab tej tub luam hauv lub moos Senpa thiab Asu thiab Khimaj kuj nrog koj ua lag luam. Lawv coj tej tsoos tsho zoo zoo, tej tsoos tsho xiav, ntaub paj thiab tej ntaub txaij pua chaw uas muab xaws ntug ruaj ruaj lawm tuaj nrog koj ua lag luam. “ ‘Tej nkoj txwg hauv lub moos Thasi thauj koj tej lag luam. Koj thiaj thauj puv nkaus hnyav kawg hauv nruab nrab hiavtxwv. Koj cov uas nquam nkoj coj koj mus txog hauv hiavtxwv uas tob tob, mas cua sab hnub tuaj ua rau koj tog rau hauv nruab nrab hiavtxwv. Koj tej nyiaj txiag, koj tej qhov txhia chaw thiab koj tej lag luam, koj tej tub nquam nkoj thiab tej uas ua haujlwm hauv nkoj, koj tej Kws ntoo, koj tej tub lag tub luam thiab koj tej tub rog huvsi uas nrog koj nyob, thiab ib tsoom neeg sawvdaws uas nyob hauv koj, tog kiag rau hauv qab hiavtxwv rau hnub uas koj puam tsuaj thiab. Lub tebchaws kuj ntseeg ua zog kais rau thaum uas hnov koj tej neeg ua haujlwm hauv nkoj lub suab quaj qw. Txhua tus uas tuav duav nquam nkoj nqes ntawm lawv lub nkoj los, tej neeg uas ua haujlwm hauv lawv tej nkoj sawvdaws los sawv rau ntawm ntug hiavtxwv. Lawv quaj nyiav koj nrov nrov, thiab quaj heev kawg li. Lawv w hmoov av rau saum lawv taubhau thiab da luj luam hauv tej pluav tshauv. Lawv chais plaubhau vim yog koj, thiab muab khaub seev tsaj los hnav, lawv quaj koj lwj siab kawg, thiab quaj ntsuag koj nyuaj siab kawg. Lawv quaj nyiav hu zaj nkauj ua ntsuag rau koj, thiab quaj ntsuag rau koj hais tias, “Txeev muaj leejtwg raug puam tsuaj ib yam li lub nroog Thailab rau hauv nruab nrab hiavtxwv lov?” Thaum koj tej lag luam hla hiavtxwv tuaj kuj ua rau ntau haiv neeg coob coob txaus siab. Koj tej qhov txhia chaw uas ntau nplua mias thiab koj tej lag luam ua rau tej vajntxwv hauv ntiajteb nplua nuj. Nimno dej hiavtxwv ua rau koj puam tsuaj tag rau hauv nruab nrab hiavtxwv tob tob. Koj tej lag luam thiab koj tej tub nkoj kuj tog nrog koj ua ke rau hauv. Koj ua rau tej neeg uas nyob raws ntug hiavtxwv poob siab nthav, lawv tej vajntxwv ntshai heev kawg plhu thim xem tag. Tej tub luam hauv ib tsoom neeg xyu thuam koj. Koj txog qhov kawg uas txaus ntshai kawg li thiab ploj ntais mus ib txhis.’ ” Yawmsaub hais lus tuaj rau kuv tias, “Neeg tus tub, cia li hais rau tus thawj hauv lub nroog Thailab tias, ‘Vajtswv Yawmsaub hais li no tias, “ ‘Koj lub siab khav theeb thiab koj hais tias, “Kuv yog ib tug vajtswv, kuv nyob saum tej vajtswv lub zwm txwv hauv nruab nrab hiavtxwv.” Tiamsis koj tsuas yog neeg xwb, tsis yog vajtswv, txawm yog koj xam pom tias koj ntse li ib tug vajtswv. Koj ntse dua Daniyee tiag, tsis muaj ib yam dabtsi uas koj tsis paub. Koj siv koj lub tswvyim thiab koj kev txawj ntse nrhiav tau nyiaj txiag rau koj, thiab sau tej nyiaj tej kub los rau hauv koj tej txhab. Koj siv koj lub tswvyim loj kawg uas txawj ua lag ua luam koj thiaj tsav tau koj tej nyiaj txiag tau ntau zuj zus rau koj, thiab koj lub siab thiaj khav theeb rau koj tej nyiaj txiag. Vim li no Vajtswv Yawmsaub hais li no tias, Vim koj xam pom tias koj ntse ib yam li ib tug vajtswv, vim li no kuv yuav coj lwm haiv neeg tuaj tawm tsam koj, yog haiv neeg uas ua nruj ua tsiv heev dua ib tsoom tebchaws huvsi. Lawv yuav rho ntaj tawm tsam tej kev zoo nkauj uas koj tus tswvyim ua thiab ua puas tsuas koj lub koob meej. Lawv yuav thawb koj mus rau hauv tub tuag teb, koj yuav tuag rau hauv hiavtxwv ib yam li raug tua. Koj tseem yuav hais tias, “Kuv yog ib tug vajtswv,” tab meeg cov uas tua koj lov? Koj tsuas yog neeg xwb, uas nyob hauv cov uas ntaus koj txhais tes, koj tsis yog ib tug vajtswv. Koj yuav tuag yam nkaus li cov uas tsis ua kevcai txiav tuag rau hauv lwm haiv neeg txhais tes vim kuv twb hais cia lawm. Vajtswv Yawmsaub hais li no ntag.’ ” Yawmsaub hais dua lus tuaj rau kuv tias, “Neeg tus tub, cia li tsa suab hu zaj nkauj ntsuag rau Thailab tus vajntxwv, thiab hais rau nws tias, ‘Vajtswv Yawmsaub hais li no tias, “ ‘Koj txeev ua lub nplhaib nias cim uas zoo tshaj plaws, koj muaj tswvyim kawg, thiab zoo nkauj kawg nkaus. Koj txeev nyob hauv Edee, uas yog Vajtswv lub vaj. Txhua yam qe zeb hlaws muaj nqes muab lo rau koj lub tsho, yog qe zeb liab tsim tseb, qe zeb daj pes lis, thiab qe zeb daj tshiab tshiab, qe zeb ntsuab lam lug, qe zeb ntsuab pes xiab, thiab qe zeb iav txho ci lam lug, qe zeb phaithu tsamxem, qe zeb ntsuab liab, thiab qe zeb ntsuab txho. Tej hlaws qe zeb no muab ntsia rau hauv lub tais kub thiab tej uas txaij nraug zees yog kub. Tej no twb npaj cia rau koj rau hnub uas tsim koj. Thaum kuv tsim koj kuv muab ib tug tubtxib Khelunpee tsom kwm koj, koj txeev nyob saum Vajtswv lub roob uas dawb huv, koj mus los ntawm tej lag zeb uas ci lam lug li nplaim taws. Koj lub neej tsis muaj chaw thuam li txij hnub uas tsim koj, los txog thaum pom kev txhaum txim tshwm hauv koj. Qhov uas koj ua lag ua luam ntau nplua mias ntawd koj kuj ua nruj ua tsiv thiab koj ua txhaum muaj txim, kuv thiaj muab koj laim ntawm Vajtswv lub roob mus vim koj qias vuab tsuab, thiab tus tubtxib Khelunpee uas tsom kwm koj ntiab koj tawm hauv tej lag zeb uas ci lam lug li nplaim taws mus. Koj lub siab khav theeb vim yog qhov uas koj zoo nkauj, qhov uas koj muaj koob meej ua rau koj lub tswvyim ruam zuj zus. Kuv muab koj laim rau hauv pem teb lawm, kuv muab koj nthuav rau tej vajntxwv saib, xwv lawv lub qhov muag thiaj ntsia ntsoov koj. Vim koj ua phem ntau kawg rau kev ua lag ua luam tsis ncaj, koj thiaj ua qias puas tsuas koj lub chaw pe hawm. Vim li no kuv thiaj coj hluavtaws hauv nruab nrab koj los. Hluavtaws kub koj tag, kuv ua rau koj ciaj pluav tshauv tag rau hauv av tab meeg txhua tus uas ntsia ntsoov. Ib tsoom neeg tej uas paub koj kuj poob siab nthav txog koj. Koj los txog qhov kawg uas txaus ntshai kawg, thiab ploj ntais mus ib txhis.’ ” Yawmsaub hais lus tuaj rau kuv tias, “Neeg tus tub, cia li tsom ntsoov rau Xaidoo thiab cev Vajtswv lus tawm tsam lub moos ntawd, thiab hais tias, ‘Vajtswv Yawmsaub hais li no tias, “ ‘Xaidoo 'e, saib maj, kuv tawm tsam koj, kuv yuav ua kuv lub hwjchim ci ntsa iab tshwm los rau hauv koj. Mas luag yuav paub tias kuv yog Yawmsaub rau thaum kuv teem txim rau lub moos ntawd, thiab ua kuv txojkev dawb huv tshwm rau hauv lub moos ntawd. Vim yog kuv yuav tso mob kis los rau hauv nws thiab tso ntshav los rau hauv nws tej kev. Neeg yuav raug tua tuag pawg lug rau hauv nws, yuav raug tuag rau tej hniav ntaj uas tuaj txhua fab tuaj ntaus nws. Mas lawv yuav paub tias kuv yog Yawmsaub. “ ‘Cov Yixayee mas yuav tsis muaj pos kaus ntsaj los chob thiab tsis muaj pos kaus ntsim los tsuab dua li lawm, rau hauv nruab nrab tej tebchaws uas nyob ib ncig lawv uas txeev ua saib tsis taus lawv. Mas lawv yuav paub tias kuv yog Vajtswv Yawmsaub. “ ‘Vajtswv Yawmsaub hais li no tias, Thaum kuv sau zog cov Yixayee hauv tej tebchaws uas lawv khiav ri sua mus lawm, thiab thaum kuv ua kuv txojkev dawb huv tshwm rau hauv lawv tab meeg ib tsoom tebchaws pom, mas lawv yuav tau nyob hauv lawv lub tebchaws uas kuv twb muab pub rau kuv tus tub qhe Yakhauj lawm. Mas lawv yuav tau nyob hauv lub tebchaws ntawd tso siab plhuav, lawv yuav ua vaj ua tsev thiab cog vaj txiv hmab. Thaum kuv txiav txim rau tej neeg uas nyob ib ncig lawv uas ua saib tsis taus lawv tag lawm, mas lawv yuav nyob tso siab plhuav. Mas lawv yuav paub tias kuv yog Yawmsaub yog lawv tus Vajtswv.’ ” Hnub xiab kaum ob, lub kaum hli, xyoo kaum, Yawmsaub hais lus tuaj rau kuv tias, “Neeg tus tub, cia li tsom ntsoov tawm tsam Falau vajntxwv Iyi, thiab cev Vajtswv lus tawm tsam nws thiab cov Iyi huvsi. Cia li hais los maj hais tias, ‘Vajtswv Yawmsaub hais li no tias, “ ‘Kuv tawm tsam koj, Falau vajntxwv Iyi. Koj yog tus niag zaj uas nyob hauv nws tej hav dej, koj hais tias, “Niag dej Nai yog kuv li, kuv tsim nws rau kuv.” Kuv yuav muab nqe lauj nqe koj lub kaum ncauj, thiab ua rau tej ntses hauv hav dej khuam koj cov nplai, thiab kuv yuav rub koj tawm hauv koj tej hav dej los, nrog tej ntses hauv koj tej hav dej uas khuam koj cov nplai ua ke los. Kuv yuav muab koj thiab tej ntses huvsi hauv koj tej hav dej laim rau hauv tebchaws moj sab qhua. Koj yuav poob rau hauv pem teb, tsis muaj leejtwg khaws koj coj mus log. Kuv muab koj cob rau tej tsiaj qus hauv ntiajteb thiab tej liaj dav saum nruab ntug noj. Mas tej neeg uas nyob hauv Iyi tebchaws sawvdaws yuav paub tias kuv yog Yawmsaub. Vim koj yog tus pas nrig tauj deg rau cov Yixayee, thaum lawv xuas tes tuav koj, koj kuj lov thiab hlais lawv txhua tus xub pwg. Thaum lawv pheeb koj, koj kuj lov, thiab ua rau lawv txhua tus lub duav tshee tag. “ ‘Yog li no Vajtswv Yawmsaub thiaj hais li no tias, Saib maj, kuv yuav coj ntaj los raug koj thiab kuv yuav txiav tej neeg thiab tej tsiaj txhu tu ntawm koj mus. Mas Iyi tebchaws yuav raug muab tso tseg nyob do cuas cia. Mas lawv yuav paub tias kuv yog Yawmsaub. “ ‘Vim koj hais tias, “Niag dej Nai yog kuv li, kuv tsim nws,” yog li no, saib maj, kuv tawm tsam koj thiab tawm tsam koj tej hav dej, thiab kuv yuav ua rau tebchaws Iyi tag nrho raug muab tso tseg nyob do cuas cia txij ntua lub moos Midoo mus txog lub moos Xi‑ene, mus txog ntua Khuj ciam teb. Yuav tsis muaj neeg txhais kotaw hla lub tebchaws ntawd, thiab yuav tsis muaj tsiaj txhu tej kotaw hla lub tebchaws ntawd. Yuav tsis muaj neeg nyob mus txog plaub caug xyoo. Thiab kuv yuav ua rau lub tebchaws Iyi nyob do cuas cia rau hauv nruab nrab tej tebchaws uas nyob do cuas cia lawd. Thiab nws tej moos yuav nyob do cuas cia plaub caug xyoo rau hauv nruab nrab tej moos uas raug muab tso tseg piam tag lawd. Kuv yuav ua rau cov Iyi khiav ri sua mus rau hauv ib tsoom tebchaws thiab ntiab lawv mus nyob rau hauv luag tej tebchaws. “ ‘Vajtswv Yawmsaub hais li no tias, Dhau plaub caug xyoo lawm, kuv yuav qaws cov Iyi hauv tej tebchaws uas lawv khiav ri sua mus nyob lawd rov los. Kuv yuav pub cov Iyi rov vam meej li qub, thiab coj lawv rov los rau lub tebchaws Palau, uas yog lawv qub teb qub chaw. Mas lawv yuav ua lub tebchaws uas me kawg rau qhov ntawd. Iyi yuav ua lub tebchaws uas me dua luag tej tebchaws huvsi, thiab yuav tsis ua loj rau saum ib tsoom tebchaws dua li lawm. Kuv yuav ua rau lawv ua lub tebchaws me me tsis muaj peevxwm kav tau lwm lub tebchaws. Thiab lawv yuav tsis ua cov Yixayee lub chaw vam khom dua li lawm, thiaj nco txog Yixayee kev txhaum uas mus thov kev pab ntawm Iyi. Mas lawv thiaj yuav paub tias kuv yog Vajtswv Yawmsaub.’ ” Hnub xiab ib, lub ib hlis, xyoo nees nkaum xya, Yawmsaub hais lus tuaj rau kuv tias, “Neeg tus tub, vajntxwv Nenpukhanexa hauv Npanpiloo tau kom nws pab tub rog mus ntaus lub nroog Thailab khwv kawg ua rau txhua tus tub rog plaubhau hle tag thiab txhua tus xub pwg hle tawv. Txawm li ntawd los nws cov tub rog tsis tau ib yam dabtsi hauv Thailab ua nqe zog uas nws ntaus lub nroog ntawd. Yog li ntawd, Vajtswv Yawmsaub hais li no tias, Saib maj, kuv yuav muab Iyi tebchaws rau vajntxwv Nenpukhanexa hauv Npanpiloo, mas nws yuav thauj tej nyiaj txiag huvsi mus, nws yuav lws thiab txeeb mus ua nqe ntiav nws pab tub rog. Kuv muab Iyi tebchaws pub rau nws ua nqe zog rau tej haujlwm uas nws tau ua lawd, twb yog lawv ua haujlwm rau kuv. Vajtswv Yawmsaub hais li no ntag. “Hnub ntawd kuv yuav ua kom muaj ib tug kub tuaj rau hauv cov Yixayee, thiab kuv yuav qheb Exekhee koj lub qhov ncauj hais lus rau hauv lawv nruab nrab. Mas lawv yuav paub tias kuv yog Yawmsaub.” Yawmsaub hais lus tuaj rau kuv tias, “Neeg tus tub, cia li cev Vajtswv lus thiab hais tias, ‘Vajtswv Yawmsaub hais li no tias, “ ‘Cia li quaj nyiav hais tias, “Hnub uas teem cia los txog lauj!” Vim tias hnub ntawd los ze lawm, Yawmsaub hnub los ze lawm yog hnub uas muaj huab, yog lub sijhawm uas ib tsoom tebchaws raug lawv lub khuab. Ib rab ntaj yuav los raug Iyi, thiab txojkev lwj siab yuav nyob hauv Khuj tebchaws rau thaum muaj neeg raug tua tuag rau hauv Iyi, thiab Iyi tej nyiaj txiag raug muab coj mus, thiab Iyi tebchaws raug muab ua pob tag nrho txog tej taw loog. Khuj thiab Phuj thiab Lus thiab Alanpia thiab Linpia thiab cov neeg hauv tej tebchaws uas nrog lawv sib cog lus, yuav nrog lawv raug hniav ntaj tuag ua ke. “ ‘Yawmsaub hais li no tias, “ ‘Cov uas pab Iyi yuav tuag tag thiab nws lub hwjchim uas nws khav yuav vau tag, txij ntawm lub moos Midoo txog Xi‑ene lawv yuav raug hniav ntaj tuag tag hauv lub tebchaws ntawd. Vajtswv Yawmsaub hais li no ntag. Nws yuav nyob do cuas cia rau hauv nruab nrab ib tsoom tebchaws uas nyob do cuas cia lawm, thiab nws tej moos yuav nyob hauv nruab nrab tej moos uas raug muab tso tseg piam tag lawd. Mas lawv yuav paub tias kuv yog Yawmsaub, rau thaum kuv hlawv Iyi thiab cov uas pab nws sawvdaws raug muab ua kom puam tsuaj tag lawm. “ ‘Hnub ntawd tej tubtxib yuav caij nkoj tawm ntawm kuv mus xwv thiaj ua rau cov neeg Khuj uas nyob tsis txob tsis txhawj dabtsi ntshai tshee hnyo, thiab txojkev lwj siab yuav los raug lawv rau hnub uas teem rau cov Iyi. Saib maj, hnub ntawd los txog tiag tiag li. “ ‘Vajtswv Yawmsaub hais li no tias, “ ‘Kuv yuav ua rau Iyi tej nyiaj txiag cuab txhiaj cuab tam ploj tag, yog siv vajntxwv Nenpukhanexa hauv Npanpiloo txhais tes ua. Nenpukhanexa thiab nws cov neeg, uas ua nruj ua tsiv heev dua lwm lub tebchaws huvsi, yuav raug muab coj tuaj ua kom lub tebchaws ntawd puam tsuaj. Lawv yuav rho ntaj tawm tsam Iyi thiab ua rau neeg tuag puv nkaus lub tebchaws. Thiab kuv yuav ua rau tus dej Nai qhuav, thiab kuv yuav muab lub tebchaws ntawd muag rau hauv cov neeg phem txhais tes. Kuv yuav siv lwm haiv neeg txhais tes ua rau lub tebchaws thiab txhua yam uas nyob hauv nyob do cuas cia. Kuv uas yog Yawmsaub tau hais cia li no lawm. “ ‘Vajtswv Yawmsaub hais li no tias, “ ‘Kuv yuav ua rau tej dab mlom puam tsuaj, thiab ua rau tej dab mlom hauv lub moos Meefi piam tag, thiab yuav tsis muaj leejtwg ua thawj kav Iyi tebchaws dua li lawm, thiab kuv yuav tso txojkev ntshai rau hauv Iyi tebchaws. Kuv yuav ua rau lub moos Palau nyob do cuas cia, thiab yuav hlawv lub moos Xau‑as, thiab yuav txiav txim rau lub moos Thenpe. Kuv yuav nchuav kuv txojkev npau taws rau saum lub moos Peluxi‑ee, uas yog Iyi lub chaw ruaj khov, kuv yuav txiav tej neeg coob coob hauv lub moos Thenpe pov tseg. Kuv yuav hlawv Iyi tebchaws, lub moos Peluxi‑ee yuav raug txom nyem mob heev, lub moos Thenpe yuav tawg, thiab yeeb ncuab yuav tuaj ua rog rau lub moos Meefi nruab hnub nrig. Cov txivneej uas tseem hluas hauv lub moos Oo thiab lub moos Phinpexe yuav raug hniav ntaj tuag tag, cov uas tsis tuag yuav raug ntes coj mus. Lub moos Thapahe yuav tsaus ntuj rau thaum tav su, rau thaum kuv muab Iyi tus quab ua kom puam tsuaj, thiab thaum nws lub hwjchim uas nws khav ploj ntais. Yuav muaj huab laum nkaus lub moos, thiab nws tej ntxhais yuav raug ntes coj mus. Kuv yuav txiav txim rau Iyi yam li no ntag. Mas lawv yuav paub tias kuv yog Yawmsaub.’ ” Hnub xiab xya, lub ib hlis, xyoo kaum ib, Yawmsaub hais lus tuaj rau kuv tias, “Neeg tus tub, kuv twb muab Falau vajntxwv Iyi txhais npab lov lawm. Saib maj, tsis muaj leejtwg muab ntaub los qhwv nws txhais npab kho kom zoo, kom nws txhais npab thiaj muaj zog siv tau ntaj. Vim li no Vajtswv Yawmsaub hais li no tias, Kuv tawm tsam Falau vajntxwv Iyi, thiab kuv yuav lov nws ob txhais npab, tsis hais txhais uas twb lov lawm thiab txhais uas tseem muaj zog. Kuv yuav ua kom ntaj plam hauv nws txhais tes. Kuv yuav ua rau cov Iyi khiav ri sua mus rau hauv ib tsoom tebchaws, thiab ntiab lawv mus nyob rau luag tej tebchaws. Kuv yuav ua kom vajntxwv hauv Npanpiloo txhais npab muaj zog, thiab muab kuv rab ntaj rau hauv nws txhais tes, tiamsis kuv yuav lov Falau txhais npab mas nws yuav ntsaj laws ntawm vajntxwv Npanpiloo xubntiag ib yam li tus uas raug mob heev twb yuav tuag. Kuv yuav pub zog rau vajntxwv Npanpiloo txhais npab, tiamsis Falau txhais npab yuav dai vias. Mas lawv thiaj li paub tias kuv yog Yawmsaub. Thaum kuv muab kuv rab ntaj rau vajntxwv hauv Npanpiloo txhais tes, mas nws yuav tsa kiag ntaj tawm tsam Iyi tebchaws. Kuv yuav ua rau cov Iyi khiav ri sua mus rau hauv ib tsoom tebchaws, thiab ntiab lawv mus nyob rau luag tej tebchaws. Mas lawv thiaj li paub tias kuv yog Yawmsaub.” Hnub xiab ib, lub peb hlis, xyoo kaum ib, Yawmsaub hais lus tuaj rau kuv tias. “Neeg tus tub, cia li hais rau vajntxwv Falau hauv Iyi thiab nws ib tsoom pejxeem coob coob tias, “ ‘Qhov uas koj ua loj heev ntawd koj zoo li leejtwg? Sim xav saib, Axilia zoo yam nkaus li tus ntoo ciab hauv Lenpanoo muaj ceg zoo nkauj muaj nplooj ntxoov qas nyos lub ntsis siab kawg nkaus mus laum huab. Muaj dej yug nws, thiab tej dej hauv av ua rau nws hlob siab siab, tej dej ntawd ntws vij ib ncig lub chaw uas nws cog, thiab ncau tawm los mus rau tej ntoo hauv hav zoov huvsi. Nws thiaj siab heev dhau tej ntoo hauv hav zoov huvsi, ceg kuj nthuav dav thiab tej ceg kuj ntev, vim muaj dej ntau ua rau nws hlob zoo. Tej nas noog saum nruab ntug huvsi los ua zes rau hauv nws tej ceg, tej tsiaj qus huvsi los xya menyuam rau hauv nws tej qab ceg, thiab txhua lub tebchaws uas loj kawg nyob hauv nws tus qab duab ntxoov ntxoo. Nws zoo nkauj kawg vim nws loj kawg thiab nws tej ceg ntev, vim cag ntsia av mus txog dej ntau. Cov ntoo ciab hauv Vajtswv lub vaj twb zoo tsis cuag li nws, cov ntoo thuv twb zoo tsis cuag li nws tej ceg, cov faj khum yimhuab piv tsis tau rau nws tej ceg, tsis muaj ib tsob ntoo hauv Vajtswv lub vaj zoo nkauj cuag li nws. Kuv ua rau nws zoo nkauj nthuav ceg ntau heev, mas tej ntoo huvsi hauv Edee kuj khib nws, yog tej ntoo hauv Vajtswv lub vaj. “ ‘Vim li no Vajtswv Yawmsaub hais li no tias, Vim yog nws siab thiab tshoom nws lub ntsis siab mus rau hauv nruab nrab cov huab, thiab nws lub siab khav theeb vim yog nws siab, kuv muab nws rau hauv tus thawj uas kav ib tsoom tebchaws txhais tes, mas tus ntawd rau txim rau nws npaum nkaus li nws tej kev ua phem tiag tiag li. Kuv twb muab nws laim pov tseg lawm. Lwm haiv neeg, yog haiv neeg uas ua nruj ua tsiv heev dhau ib tsoom tebchaws, muab nws ntov pov tseg. Nws tej ceg poob rau saum tej roob thiab hauv tej hav huvsi, thiab nws tej ceg uas lov nyob rau txhua lub hav dej hauv lub tebchaws. Mas ib tsoom neeg hauv qab ntuj tawm ntawm nws tus duab ntxoov ntxoo mus tso nws tseg. Tej nas noog saum nruab ntug huvsi los nyob saum nws tej ceg uas lov tag, thiab tej tsiaj qus huvsi los nyob saum nws tej ceg ntawd. Qhov uas ua li no kuj yog ua rau tej ntoo uas nyob ntawm ntug dej tsis txhob muaj ib tug tuaj siab heev thiab tshoom nws lub ntsis siab mus rau hauv nruab nrab cov huab, thiab thiaj tsis muaj ib tug ntoo rub dej loj siab ib yam li ntawd. Rau qhov lawv sawvdaws yuav raug muab rau hauv txojkev tuag, yog muab cob rau hauv nruab yeeb nrog cov neeg ua ke, yog cov uas mus rau hauv tub tuag teb lawd. “ ‘Vajtswv Yawmsaub hais li no tias, Thaum tus ntoo ntawd mus rau hauv tub tuag teb lawm, kuv ua rau dej hauv av laum nkaus nws thiab quaj ntsuag nws, tauv nws tej dej tsis pub ntws, mas tej dej ntau ntau tu nrho. Vim nws raug li no kuv muab txojkev tsaus ntuj looj nkaus Lenpanoo thiab txhua tsob ntoo hauv hav zoov qhuav tag. Kuv yuav ua ib tsoom tebchaws ntseeg nkaws rau lub suab uas nws vau, yog thaum kuv muab nws laim rau hauv tub tuag teb ua ke nrog cov uas twb mus rau hauv tub tuag teb lawm. Mas tej tsob ntoo hauv Edee huvsi thiab tej ntoo uas zoo tshaj plaws thiab zoo kawg nkaus hauv Lenpanoo, txhua tsob ntoo uas rub dej, yuav tau txais kev nplij siab hauv nruab yeeb. Cov uas nyob hauv ib tsoom tebchaws uas pab nws thiab nyob hauv nws tus qab duab ntxoov ntxoo nrog nws ua ke mus rau hauv tub tuag teb, mus rau cov uas raug ntaj tua. “ ‘Tej ntoo hauv Edee muaj tsob twg tau koob meej thiab tau ua loj cuag li koj? Koj yuav raug muab coj nrog tej ntoo hauv Edee ua ke mus rau hauv nruab yeeb, koj yuav pw hauv nruab nrab cov uas tsis ua kevcai txiav, ua ke nrog cov uas raug ntaj tua tuag. “ ‘No yog Falau thiab nws tej pejxeem coob coob huvsi. Vajtswv Yawmsaub hais li no ntag.’ ” Hnub xiab ib, lub kaum ob hlis, xyoo kaum ob, Yawmsaub hais lus tuaj rau kuv tias, “Neeg tus tub, koj cia li tsa suab hu zaj nkauj ntsuag rau Falau vajntxwv Iyi, thiab hais rau nws tias, “ ‘Koj xam pom tias koj yog ib tug tsov ntxhuav hauv nruab nrab ib tsoom tebchaws, tiamsis koj tsuas yog zoo li tus zaj hauv hiavtxwv, koj nplawm koj tej hav dej thiab xuas kotaw do dej ua rau lawv tej hav dej qias. Vajtswv Yawmsaub hais li no tias, Kuv yuav ntaus kuv lub vas khwb nkaus koj, yog ntau haiv neeg tej pab tub rog coob coob, mas lawv cov ntawd yuav rub kiag koj hauv kuv lub vas. Kuv yuav muab koj pov rau hauv pem teb, kuv yuav muab koj laim rau saum nruab nqhuab, thiab kuv yuav ua rau tej nas noog saum nruab ntug huvsi ya los tsaws koj, thiab ua rau tej tsiaj txhu tag nrho hauv ntiajteb los noj koj kom tsau. Kuv yuav muab koj cov nqaij laim rau saum tej roob, thiab ua rau koj lub cev tuag puv nkaus hauv tej hav. Kuv yuav ua rau koj tej ntshav uas tabtom los ntub lub tebchaws mus txog tej roob, thiab koj cov tuag puv nkaus hauv tej hav. Thaum kuv rhuav tshem koj, kuv yuav roos lub ntuj thiab ua rau tej hnub qub tsaus tag, kuv yuav muab huab los roos lub hnub, thiab lub hli yuav tsis ci lawm. Txhua yam uas ci heev saum nruab ntug kuv yuav ua kom tsaus rau saum koj, thiab muab txojkev tsaus ntuj rau hauv koj lub tebchaws. Vajtswv Yawmsaub hais li no ntag. Thaum kuv ua rau koj puam tsuaj rau hauv nruab nrab ib tsoom tebchaws, uas koj tsis tau paub dua, kuv yuav ua rau ntau haiv neeg ntxhov siab. Thaum kuv rho kiag kuv rab ntaj tab meeg lawv, kuv yuav ua rau ntau haiv neeg poob siab nthav txog koj, thiab lawv tej vajntxwv yuav ntshai tshee hnyo vim yog koj. Hnub uas koj ntog tuag ntawd lawv yuav tshee hnyo txhua lub sijhawm, sawvdaws nyias txhawj txog nyias txojsia. Vajtswv Yawmsaub hais li no tias, Tus vajntxwv hauv Npanpiloo rab ntaj yuav los raug koj. Kuv yuav ua rau koj cov pejxeem coob coob raug cov neeg uas siab loj siab tuab tej hniav ntaj tuag tag, txhua tus yog cov uas ua nruj ua tsiv heev dhau ib tsoom tebchaws. Lawv yuav ua rau tej uas Iyi khav theeb txog ploj tag, thiab nws tej pejxeem uas coob coob yuav puam tsuaj. Kuv yuav ua rau nws txhua tus tsiaj puam tsuaj ploj tag ntawm ntug dej, thiab yuav tsis muaj neeg txhais kotaw do tej dej ntawd dua li lawm, thiab tej tsiaj txhu tej tes taw yuav tsis do kom dej nro dua li lawm. Mas kuv yuav ua rau tej dej ntawd ntshiab, thiab ua rau tej hav dej ntws nto ib yam li roj ntws. Vajtswv Yawmsaub hais li no ntag. Thaum kuv ua rau Iyi tebchaws nyob do cuas cia, thiab thaum txhua yam uas muaj puv nkaus hauv lub tebchaws ntawd raug muab lws coj mus tag lawm, thiab thaum kuv tua tau tej neeg hauv lub tebchaws huvsi, mas lawv thiaj paub tias kuv yog Yawmsaub.’ No yog zaj nkauj ua ntsuag uas yuav tsum hu, ib tsoom tebchaws tej ntxhais yuav hu zaj no, lawv yuav hu zaj nkauj ua ntsuag no rau Iyi thiab nws tej pejxeem coob coob. Vajtswv Yawmsaub hais li no ntag.” Hnub tim kaum tsib, lub ib hlis, xyoo kaum ob, Yawmsaub hais lus tuaj rau kuv tias, “Neeg tus tub, cia li quaj nyiav Iyi tej pejxeem coob coob, thiab xa lawv thiab tej tebchaws uas muaj hwjchim loj tej ntxhais nqes mus rau hauv nruab yeeb, yog mus txog cov uas twb mus rau hauv tub tuag teb lawm. Qhov uas zoo nkauj koj zoo dhau leejtwg? Cia li nqes mus, muab tso nrog cov uas tsis ua kevcai txiav ua ke. Cov Iyi yuav tuag tag rau hauv nruab nrab cov uas raug hniav ntaj tuag, muab teem sijhawm rau hniav ntaj lawm, cia li cab Iyi nrog nws cov pejxeem sawvdaws ua ke mus. Cov thawj uas siab loj siab tuab thiab cov uas pab lawv yuav hais txog Iyi hauv nruab nrab tub tuag teb tuaj tias, ‘Lawv nqes los lawm, lawv xyab luas ntawm no, yog cov uas tsis ua kevcai txiav uas raug hniav ntaj tuag.’ “Axilia kuj nyob qhov ntawd thiab nws pab tub rog huvsi, lawv tej qhov ntxa nyob ib ncig nws, txhua tus raug tua tuag, yog raug hniav ntaj tuag. Lawv tej qhov ntxa nyob hauv tub tuag teb qhov uas tob kawg nkaus, nws pab tub rog nyob ib ncig nws lub qhov ntxa. Txhua tus raug hniav ntaj tuag, lawv yog cov uas ua kom muaj kev ntshai heev ncha mus thoob rau cov uas muaj txojsia nyob hauv ntiajteb. “Tebchaws Elas kuj nyob qhov ntawd thiab nws tej pejxeem sawvdaws nyob puag ncig nws lub qhov ntxa. Txhua tus raug tua tuag, yog raug hniav ntaj tuag, lawv yog cov uas tsis ua kevcai txiav nqes mus rau hauv nruab yeeb. Lawv yog cov uas ua kom muaj kev ntshai heev ncha mus rau cov uas muaj txojsia nyob hauv ntiajteb, mas lawv nrog cov uas mus rau hauv tub tuag teb raug txaj muag ua ke. Luag ua rau nws nrog nws cov pejxeem coob coob pw xyab luas hauv nruab nrab cov uas raug tua tuag. Lawv tej qhov ntxa nyob vij ib ncig nws, txhua tus tsis ua kevcai txiav thiab raug hniav ntaj tuag. Qhov uas ntshai lawv ntawd ntshai mus thoob plaws cov uas muaj txojsia nyob hauv ntiajteb, mas lawv nrog cov uas mus rau hauv tub tuag teb raug txaj muag ua ke, lawv raug muab tso hauv nruab nrab cov uas raug tua tuag. “Tebchaws Mese thiab Thunpas kuj nyob qhov ntawd thiab lawv tej pejxeem sawvdaws tej qhov ntxa kuj nyob ib ncig, txhua tus tsis ua kevcai txiav thiab raug hniav ntaj tuag, vim lawv ua kom muaj kev ntshai heev ncha mus rau cov uas muaj txojsia nyob hauv ntiajteb. Lawv tsis tau nrog cov uas muaj siab loj siab tuab uas tsis ua kevcai txiav pw xyab luas ua ke, yog cov uas tuav tej cuab yeej ua rog nqes mus rau hauv tub tuag teb, thiab muab ntaj coj los ua hauv ncoo rau, thiab muab lawv lub txim khwb rau saum lawv cov pob txha, vim cov uas muaj siab loj siab tuab ua rau cov uas muaj txojsia nyob hauv ntiajteb ntshai heev kawg li. Yog li no Iyi koj yuav raug muab lov thiab yuav pw xyab luas nrog cov uas tsis ua kevcai txiav ua ke, yog cov uas raug hniav ntaj tuag. “Edoo kuj nyob qhov ntawd, yog nws cov vajntxwv thiab nws cov thawj sawvdaws. Txawm yog lawv muaj hwjchim loj, los lawv raug muab tso ua ke rau hauv nruab nrab cov uas raug ntaj tuag. Lawv xyab luas nrog cov uas tsis ua kevcai txiav uas nqes mus rau hauv tub tuag teb ua ke. “Cov thawj uas nyob sab ped sawvdaws kuj nyob qhov ntawd, thiab cov Xaidoo huvsi, yog cov uas raug txaj muag nrog cov uas raug tua tuag nqes mus ua ke, txawm yog lawv tau siv lawv lub hwjchim ua rau neeg ntshai heev. Lawv yog cov uas tsis ua kevcai txiav pw xyab luas nrog cov uas raug ntaj tua tuag ua ke, thiab lawv nrog cov uas nqes mus rau hauv tub tuag teb raug txaj muag. “Vajtswv Yawmsaub hais tias, Thaum Falau pom tej no lawm, yuav nplij tau nws lub siab txog qhov uas nws tej pejxeem sawvdaws thiab nws tej tub rog huvsi raug ntaj tua tuag. Vim kuv kom nws ua kom muaj kev ntshai heev ncha mus rau cov uas muaj txojsia nyob hauv ntiajteb, vim li no Falau thiab nws tej pejxeem sawvdaws yuav raug muab tso xyab luas hauv nruab nrab cov uas tsis ua kevcai txiav, nrog cov uas raug ntaj tua tuag ua ke. Vajtswv Yawmsaub hais li no ntag.” Yawmsaub hais lus tuaj rau kuv tias, “Neeg tus tub, cia li hais rau koj haiv neeg thiab hais rau lawv tias, ‘Yog kuv coj ntaj los raug lub tebchaws twg, thiab haiv neeg ntawd tsa lawv ib tug txivneej ua tus faj xwm, thiab yog nws pom rab ntaj tabtom los raug lub tebchaws thiab nws tshuab raj kub yaj ceeb toom cov neeg, mas thaum leejtwg hnov suab raj kub yaj tiamsis tsis quav ntsej lub suab ceeb toom ntawd rab ntaj thiaj raug nws tuag, qhov uas nws tuag ntawd nws ris nws ib leeg. Nws twb hnov suab raj kub yaj tiamsis nws tsis quav ntsej lub suab ceeb toom, mas nws yuav ris nws cov ntshav ib leeg. Tiamsis yog nws quav ntsej lub suab ceeb toom, nws yuav cawm tau nws txojsia. Tiamsis yog tus faj xwm pom rab ntaj los, nws tsis tshuab raj kub yaj, cov neeg thiaj tsis hnov lub suab ceeb toom, yog rab ntaj los raug leejtwg tuag, mas tus ntawd yuav raug tuag vim yog nws lub txim, tiamsis kuv yuav muab nws cov ntshav rau tus faj xwm ris.’ “Ib yam nkaus li no, neeg tus tub, kuv tsa koj ua tus faj xwm rau cov Yixayee. Koj hnov kuv tej lus ntawm kuv lub qhov ncauj thaum twg, koj cia li hais kuv tej lus ceeb toom rau lawv. Yog kuv hais rau tus uas ua phem tias, ‘Tus neeg phem 'e, koj yuav tuag tiag tiag li,’ tiamsis koj tsis hais tej lus ceeb toom rau tus neeg phem kom tso nws txojkev phem tseg, mas tus neeg phem ntawd yuav tuag vim yog nws lub txim, tiamsis kuv yuav muab nws cov ntshav rau koj ris. Tiamsis yog koj twb ceeb toom tus neeg phem kom tso nws txojkev phem tseg tiamsis nws tsis tso tseg, mas nws yuav tuag rau nws lub txim, tiamsis koj yuav cawm tau koj txojsia dim. “Neeg tus tub, koj cia li hais rau cov Yixayee tias, ‘Nej txeev hais li no tias, “Peb ris peb tej kev xeeb thiab peb lub txim hnyav, peb ntshaus zuj zus mus vim lub txim, peb yuav muaj txojsia nyob tau li cas?” ’ Koj cia li hais rau lawv tias, ‘Vajtswv Yawmsaub hais li no tias, Kuv yeej muaj txojsia nyob, mas kuv tsis txaus siab rau qhov uas cov neeg phem tuag. Tiamsis kuv yeej txaus siab rau qhov uas lawv tso lawv txojkev phem tseg es muaj txojsia nyob. Cia li tig rov los, cia li tig ntawm nej txojkev phem rov los. Cov Yixayee 'e, ua cas nej yuav yeem tuag?’ Neeg tus tub, koj cia li hais rau koj haiv neeg tias, ‘Cov neeg ncaj ncees txojkev ua ncaj yuav tsis pab nws dim rau thaum nws ua txhaum, thiab cov neeg phem txojkev phem yuav tsis ua rau nws raug txim rau thaum nws tso nws txojkev phem tseg lawm. Cov neeg ncaj ncees txojkev ua ncaj yuav tsis pab nws muaj txojsia nyob rau thaum nws ua txhaum muaj txim.’ Txawm yog kuv hais rau tus neeg ncaj ncees tias nws yuav muaj txojsia nyob, yog nws tso siab rau nws txojkev ncaj ncees thiab ho mus ua txhaum muaj txim, mas qhov uas nws ua ncaj ntawd yuav tsis muab nco txog kiag li, nws yeej yuav tuag vim yog tej kev txhaum uas nws ua. Muaj dua ib qho, txawm yog kuv hais rau tus neeg phem tias. ‘Koj yuav tuag tiag tiag li,’ tiamsis yog nws tso plhuav nws txojkev phem tseg los ua tej uas ncaj thiab raug cai, yog tus neeg phem ntawd tau thim tej tiv thawj uas muab yuam rau nws, thiab xa tej uas nws nyiag los rov qab, thiab ua raws li tej kab ke uas pub txojsia, tsis ua kev txhaum li lawm, mas nws yuav muaj txojsia nyob tiag tiag li, nws yuav tsis tuag. Tej kev txhaum muaj txim uas nws ua lawm yuav tsis muab ib qho nco cia coj los rau txim rau nws. Nws tau ua tej uas ncaj thiab raug cai, nws yuav muaj txojsia nyob tiag tiag li. “Tiamsis koj haiv neeg tseem hais tias, ‘Tej uas tus Tswv ua mas ua tsis ncaj,’ twb yog tej uas lawv ua, ua tsis ncaj ntag. Thaum tus neeg ncaj ncees tso nws txojkev ncaj ncees tseg ua tej kev txhaum, nws yuav tuag vim yog tej kev phem ntawd. Thaum tus neeg phem tso nws txojkev phem tseg thiab ua tej uas ncaj thiab raug cai, nws yuav muaj txojsia nyob vim yog tej uas nws ua ntawd. Tiamsis nej tseem hais tias, ‘Tej uas tus Tswv ua mas ua tsis ncaj.’ Cov Yixayee 'e, kuv yuav txiav txim rau nej txhua tus raws li nyias tau ua.” Thaum hnub xiab tsib, lub kaum hli, xyoo kaum ob uas peb raug kuav mus poob tebchaws, ib tug khiav dim hauv Yeluxalees tuaj cuag kuv thiab hais tias, “Lub nroog Yeluxalees poob lawm.” Hmo ua ntej uas tus khiav dim ntawd tsis tau tuaj txog thaum tsaus ntuj Yawmsaub txhais tes los rau saum kuv, mas Yawmsaub qheb kuv lub qhov ncauj ua ntej tus txivneej ntawd tuaj txog thaum tagkis. Ua li ntawd kuv lub qhov ncauj thiaj li rua tau, kuv thiaj rov hais tau lus lawm. Yawmsaub hais lus tuaj rau kuv tias, “Neeg tus tub, cov neeg uas nyob hauv tej chaw uas raug muab tso tseg nyob do cuas hauv Yixayee tebchaws pheej hais tias, ‘Aplahas tib leeg xwb, los nws tuav tau lub tebchaws no ua nws tug. Tiamsis peb twb muaj coob coob, nyaj yuav muab lub tebchaws rau peb ua peb tug kaj.’ Vim li ntawd, koj cia li hais rau lawv tias, ‘Vajtswv Yawmsaub hais li no tias, Nej noj tej nqaij txheem ntshav, thiab tsa muag ntsia thiab pe nej tej dab mlom thiab tua neeg. Nej tseem yuav tau lub tebchaws no ua nej tug thiab lov? Nej vam khom rab ntaj, nej ua tej uas qias vuab tsuab, nej txhua tus deev kwvtij zej zog tej pojniam. Nej tseem yuav tau lub tebchaws no ua nej tug thiab lov?’ Koj cia hais li no rau lawv tias, ‘Vajtswv Yawmsaub hais li no tias, Kuv yeej muaj txojsia nyob, cov uas nyob hauv tej chaw uas muab tso tseg nyob do cuas ntawd yuav raug hniav ntaj tuag, thiab cov uas nyob tom tej teb kuv yuav muab cob rau tsiaj qus noj, thiab cov uas nyob hauv tej chaw ruaj khov thiab nyob hauv qhov tsua yuav tuag mob kis tag. Mas kuv yuav ua rau lub tebchaws raug muab tso tseg nyob do cuas cia, thiab nws lub hwjchim uas nws khav txog yuav ploj tag. Yixayee tej roob yuav nyob do cuas yuav tsis muaj neeg hla mus. Mas lawv yuav paub tias kuv yog Yawmsaub, rau thaum kuv ua rau lub tebchaws ntawd raug muab tso tseg nyob do cuas cia vim yog tim lawv tej kev qias vuab tsuab huvsi uas lawv tau ua.’ “Neeg tus tub, koj haiv neeg piav zom zaws txog koj ntawm tej ntsa loog thiab ntawm lawv tej qhov rooj, lawv ib tug hais rau ib tug tias, ‘Cia li tuaj maj, tuaj mloog saib tej lus uas tawm ntawm Yawmsaub tuaj yog hais li cas.’ Lawv tuaj cuag koj ib yam li txeev tuaj thiab tuaj nyob ntawm koj xubntiag, yog kuv haiv neeg ntag. Lawv mloog tej uas koj hais tiamsis lawv tsis yeem ua raws li ntawd, vim lawv lub ncauj hais lus zoo tiamsis lawv lub siab tsuas xav txog tej tshaj thawj uas lawv yuav tau xwb. Lawv saib koj li saib tus uas hais zaj kwv txhiaj sib nyiam, thiab muaj lub suab nkauj zoo thiab txawj ntaus nkauj nog ncas. Lawv mloog tej uas koj hais, tiamsis lawv tsis yeem ua raws li ntawd. Thaum muaj tej xwm txheej no tshwm los, yeej yuav muaj tshwm los tiag tiag li, mas lawv yuav paub tias ib tug xibhwb cev Vajtswv lus twb nrog lawv nyob.” Yawmsaub hais lus tuaj rau kuv tias, “Neeg tus tub, cia li cev kuv li lus tawm tsam Yixayee cov yug yaj, cia li cev kuv li lus thiab hais rau lawv tias, ‘Vajtswv Yawmsaub hais li no tias, Cov yug yaj hauv Yixayee uas nws yug nws tus kheej xwb yuav raug txom nyem lauj! Cov uas yug yaj yeej yuav tsum yug yaj los tsis yog? Nej noj yaj tej roj thiab hnav yaj tej plaub, nej tua tej yaj rog rog, tiamsis nej twb tsis yug pab yaj ntawd. Tus uas tsaug leeg nej twb tsis txhawb nws lub zog, tus uas mob nej kuj tsis kho, tus uas pob txha lov nej kuj tsis muab ntaub qhwv, tus uas yuam kev mus lawm nej kuj tsis mus coj rov los, tus uas ploj lawm nej kuj tsis mus nrhiav. Nej kav lawv quab yuam lawv ua nruj ua tsiv rau lawv. Ua li no lawv thiaj khiav ri sua tag vim yog tsis muaj ib tug yug yaj. Lawv khiav ua sab ua sua, tej tsiaj nyaum huvsi thiaj muab lawv noj. Kuv cov yaj tawg khiav mus mus los los rau saum txhua lub roob thiab saum txhua lub pov roob siab. Kuv cov yaj khiav ri sua mus thoob qab ntuj, tsis muaj leejtwg mus cuab mus nrhiav. “ ‘Vim li no, nej cov uas yug yaj, cia li mloog Yawmsaub tej lus, Vajtswv Yawmsaub hais tias, kuv yeej muaj txojsia nyob, kuv cov yaj tau raug muab txeeb lawm thiab kuv cov yaj raug muab tso rau tsiaj nyaum huvsi noj vim tsis muaj ib tug yug yaj, thiab kuv cov uas yug yaj tsis mus nrhiav kuv cov yaj, lawv yug lawv xwb tsis yug kuv cov yaj. Vim li no, nej cov uas yug yaj, cia li mloog Yawmsaub tej lus. Vajtswv Yawmsaub hais li no tias, Saib maj, kuv tawm tsam cov uas yug yaj thiab kuv yuav rho kuv cov yaj hauv lawv txhais tes los, thiab txwv tsis pub lawv yug yaj lawm. Cov uas yug yaj yuav tsis tau yug lawv dua li lawm. Kuv yuav cawm kuv cov yaj dim ntawm lawv lub qhov ncauj, kom lawv thiaj tsis tau noj kuv cov yaj. “ ‘Rau qhov Vajtswv Yawmsaub hais li no tias, Saib maj, kuv, yog kuv ntag, uas yuav mus cuab kuv cov yaj thiab mus nrhiav lawv. Ib yam li tus yug yaj mus nrhiav nws pab yaj rau thaum nws nyob hauv nruab nrab nws pab yaj uas tawg ri sua lawm, kuv yuav nrhiav kuv cov yaj ib yam li ntawd. Kuv yuav cawm lawv dim hauv txhua lub chaw uas lawv khiav ri sua mus rau hnub uas muaj huab thiab tsaus ntuj nti. Kuv yuav coj lawv tawm hauv txhua haiv neeg los thiab qaws lawv tawm hauv luag tej tebchaws los, thiab kuv yuav coj lawv los rau hauv lawv lub tebchaws. Thiab kuv yuav yug lawv saum Yixayee tej roob, thiab ntawm tej ntug dej thiab ntawm txhua lub chaw uas muaj neeg nyob hauv lub tebchaws. Kuv yuav yug lawv hauv lub tshav zaub uas zoo zoo, thiab lawv tej tshav zaub yog Yixayee tej roob siab. Qhov chaw ntawd lawv yuav pw hauv tej chaw uas muaj zaub zoo zoo, thiab lawv yuav nrhiav noj hauv tej tshav zaub mos mos saum Yixayee tej roob. Kuv yuav ua tus uas yug kuv cov yaj ntag, thiab kuv yuav cia lawv pw. Vajtswv Yawmsaub hais li no. Kuv yuav mus nrhiav tus yaj uas ploj, thiab coj tus yuam kev rov los, thiab kuv muab ntaub qhwv tus uas pob txha lov. Kuv yuav txhawb zog rau tus uas tsaug leeg, tiamsis tus uas rog thiab muaj zog kuv yuav muab ua kom puam tsuaj. Kuv yuav ua ncaj ua ncees yug lawv. “ ‘Nej cov uas yog kuv pab yaj pab tshis mas Vajtswv Yawmsaub hais li no rau nej tias, Saib maj, kuv yuav txiav txim rau kuv cov maum yaj ib tug zuj zus thiab txiav txim rau tej txiv tshis txiv yaj. Qhov uas nej noj zaub hauv lub tshav zaub uas zoo tsis txaus lov? Nej tseem tsuj pes ntiag tej zaub uas tseem tshuav hauv nej lub tshav. Nej haus dej ntshiab tsis txaus lov? Nej tseem xuas kotaw do tej dej uas tseem tshuav nro tag. Kuv cov yaj yuav noj tej uas nej kotaw tsuj thiab haus tej dej uas nej kotaw ua nro tag lov? “ ‘Vim li no Vajtswv Yawmsaub hais li no rau lawv tias, Saib maj, kuv, yog kuv ntag uas yuav tu plaub rau cov yaj uas rog thiab cov uas yuag. Vim nej muab xub pwg thiab phab tav xyeeb tus uas tsis muaj zog, thiab xuas nej tej kub xyob lawv, ua rau lawv khiav ri sua mus, kuv yuav cawm kuv pab yaj pab tshis kom dim, lawv yuav tsis raug luag lws dua li lawm, kuv yuav txiav txim rau cov yaj ib tug zuj zus. Kuv yuav tsa ib tug yug yaj xwb ua tus uas yug lawv, yog kuv tus qhev Davi, mas nws yuav yug lawv. Nws yuav yug lawv thiab ua lawv tus yug yaj. Thiab kuv uas yog Yawmsaub yuav ua lawv tus Vajtswv, thiab kuv tus qhev Davi yuav ua lawv tus thawj. Kuv yog Yawmsaub tau hais cia li no lawm ntag. “ ‘Kuv yuav nrog lawv sib cog lus kom muaj kev thaj yeeb thiab yuav ntiab tej tsiaj nyaum tawm hauv lub tebchaws, xwv lawv thiaj tau nyob hauv tebchaws moj sab qhua thiab pw hauv tej hav zoov tso siab plhuav. Kuv yuav ua rau lawv thiab tej chaw uas nyob ib ncig kuv lub roob ua lub chaw uas muaj koob hmoov rau luag. Kuv yuav tso nag los raws lub caij lub nyoog, thiab yuav los tsheej kob uas muaj koob hmoov. Tej txiv ntoo hauv teb yuav txi txiv, thiab tej av yuav zoo qoob loo. Lawv yuav nyob tso siab plhuav hauv lawv lub tebchaws. Mas lawv yuav paub tias kuv yog Yawmsaub rau thaum kuv muab lawv tus quab lov thiab cawm lawv dim hauv cov uas muab lawv ua qhev txhais tes. Lawv yuav tsis raug ib tsoom tebchaws lws dua li lawm, thiab tej tsiaj qus hauv lub tebchaws yuav tsis tom lawv noj li lawm. Lawv yuav nyob tso siab plhuav thiab yuav tsis muaj leejtwg ua rau lawv ntshai. Kuv yuav pub tej teb uas qoob loo zoo rau lawv, kom lawv thiaj li tsis raug kev tshaib hauv lub tebchaws dua li lawm, thiab tsis raug ib tsoom tebchaws saib tsis taus li lawm. Mas lawv yuav paub tias kuv uas yog Yawmsaub, yog lawv tus Vajtswv, nrog nraim lawv nyob, thiab paub tias lawv uas yog cov Yixayee yog kuv haiv neeg. Vajtswv Yawmsaub hais li no. Nej yog kuv cov yaj, yog cov yaj uas nyob hauv kuv lub tshav zaub, thiab kuv yog nej tus Vajtswv. Vajtswv Yawmsaub hais li no ntag.’ ” Yawmsaub hais lus tuaj rau kuv tias, “Neeg tus tub, cia li tsom ntsoov tawm tsam lub roob Xe‑i thiab cev Vajtswv lus tawm tsam nws, thiab hais rau nws tias, ‘Vajtswv Yawmsaub hais li no tias, Lub roob Xe‑i, saib maj, kuv tawm tsam koj, thiab kuv yuav tsa kiag kuv txhais tes tawm tsam koj, thiab kuv yuav ua rau koj raug muab tso tseg nyob do cuas cia. Kuv yuav ua rau koj tej moos liamsim tag, mas koj yuav nyob do cuas cia, mas koj thiaj li paub tias kuv yog Yawmsaub. Vim koj ua yeeb ncuab rau cov Yixayee thiab cib nyeej ib txwm los, thiab muab lawv cob rau hniav ntaj lub hwjchim rau thaum lawv raug vij sub vij sw, yog thaum lawv raug txim zaum kawg. Vim li no, Vajtswv Yawmsaub hais tias, Kuv yeej muaj txojsia nyob, kuv yuav npaj koj cia raug txim los ntshav thiab ntshav yuav caum cuag koj. Vim koj tsis ntxub qhov uas ua rau neeg los ntshav, vim li no ntshav thiaj caum koj qab mus. Kuv yuav ua rau lub roob Xe‑i raug muab tso tseg nyob do cuas cia, thiab kuv yuav muab cov uas mus mus los los txiav tu nrho ntawm nws. Kuv yuav ua kom saum koj tej roob muaj neeg raug tua tuag puv nkaus. Cov uas raug hniav ntaj tua tuag yuav ntog rau saum koj tej pov roob thiab hauv koj tej kwj ha thiab hauv koj tej hav dej huvsi. Kuv yuav ua rau koj nyob do cuas cia mus ib txhis, thiab yuav tsis muaj neeg nyob hauv koj tej moos. Mas koj yuav paub tias kuv yog Yawmsaub. “ ‘Txawm yog Yawmsaub nyob qhov ntawd, los koj tseem hais tias, “Ob haiv neeg thiab ob lub tebchaws ntawd yuav ua kuv li, thiab peb yuav muab lawv los ua peb tug.” Vim li no, Vajtswv Yawmsaub thiaj hais tias, Kuv yeej muaj txojsia nyob, kuv yuav ua rau koj raws li koj txojkev chim thiab raws li koj txojkev khib uas koj ua tshwm los vim yog koj ntxub lawv. Thaum kuv txiav txim rau koj, kuv yuav qhia kuv rau lawv paub. Mas koj yuav paub tias kuv uas yog Yawmsaub tau hnov koj tej lus phem huvsi uas koj hais saib tsis taus Yixayee tej roob hais tias, “Lawv raug muab tso tseg nyob do cuas, lawv raug muab rau peb noj lawm.” Koj lub qhov ncauj khav theeb heev tawm tsam kuv, thiab hais tawm tsam kuv tsis txawj tag li. Kuv twb hnov lawm. Vajtswv Yawmsaub hais li no tias, Kuv yuav ua rau koj nyob do cuas cia, kom thoob ntiajteb thiaj xyiv fab. Thaum cov Yixayee tej qub txeeg qub teg nyob do cuas cia koj zoo siab xyiv fab li cas, kuv yuav ua rau koj ib yam li ntawd. Lub roob Xe‑i thiab tag nrho Edoo huvsi, nej yuav nyob do cuas cia. Mas lawv yuav paub tias kuv yog Yawmsaub.’ ” “Neeg tus tub, koj cia li cev kuv tej lus rau Yixayee tej roob hais tias, ‘Yixayee tej roob 'e, cia li mloog Yawmsaub tej lus. Vajtswv Yawmsaub hais li no tias, Vim koj cov yeeb ncuab hnyos koj hais tias, “Tej roob siab uas ib txwm muaj nyob poob ua peb tug lawm lauj.” ’ Vim li no cia li cev Vajtswv lus hais tias, ‘Vajtswv Yawmsaub hais li no tias, Vim yog lawv ua rau nej nyob do cuas cia thiab tsuam nej txhua fab, ua rau nej poob mus ua luag tej tebchaws teej tug, thiab nej tiag luag ncauj luag lo thiab raug ib tsoom neeg thuam luag saib tsis taus, Yixayee tej roob 'e, vim li no, cia li mloog Vajtswv Yawmsaub tej lus. Vajtswv Yawmsaub hais li no rau tej roob thiab tej pov roob, tej hav dej thiab tej kwj ha, thiab tej chaw uas raug muab tso tseg nyob do cuas cia thiab tej moos uas tsis muaj neeg nyob, yog tej chaw uas raug luag lws thiab raug ib tsoom tebchaws uas nyob ib ncig thuam luag. Vim li no, Vajtswv Yawmsaub hais li no tias, Kuv khib xeeb siab kub lug hais tej lus tawm tsam luag tej tebchaws, thiab tawm tsam Edoo huvsi, yog tus uas zoo siab xyiv fab kawg muab kuv lub tebchaws ua nws tug thiab saib tsis taus heev kawg, xwv nws thiaj tau lub tebchaws ntawd ua nws tug thiab lws tau huvsi mus.’ Vim li no cia li cev lus hais txog Yixayee tebchaws thiab hais rau tej roob thiab tej pov roob, tej hav dej thiab tej kwj ha tias, ‘Vajtswv Yawmsaub hais li no tias, Saib maj, kuv hais ntawm kuv txojkev khib xeeb thiab npau taws, vim nej raug ib tsoom tebchaws thuam thiab saib tsis taus. Vim li no Vajtswv Yawmsaub thiaj hais tias, kuv cog lus ruaj khov tias tej tebchaws uas nyob ib ncig ntawm nej kuj yuav raug thuam thiab raug saib tsis taus. “ ‘Yixayee tej roob 'e, nej yuav ncau ceg nthuav thiab txi txiv rau kuv haiv neeg Yixayee, rau qhov tsis ntev lawv yuav tau rov los. Saib maj, kuv tuaj nej tog, kuv yuav tig rov los rau ntawm nej, yuav muab nej laij thiab muab nej cog. Thiab kuv yuav ua kom neeg huaj vam coob rau hauv nej, yog tag nrho cov Yixayee huvsi. Yuav muaj neeg nyob hauv tej moos, thiab tej chaw uas muab tso tseg nyob do cuas yuav raug tsim dua tshiab. Kuv yuav ua kom tsiaj txhu thiab neeg huaj vam coob rau hauv nej, lawv yuav muaj menyuam huaj vam coob. Kuv yuav ua kom muaj neeg nyob hauv nej ib yam li yav thaum ub, thiab kuv yuav ua zoo rau nej ntau dua yav thaum ub. Mas nej thiaj yuav paub tias kuv yog Yawmsaub. Kuv yuav pub kom muaj neeg taug kev saum nej, yog kuv haiv neeg Yixayee ntag, thiab lawv yuav tau nej ua lawv tug, thiab nej yuav ua lawv li qub txeeg qub teg, thiab nej yuav tsis rhuav tshem lawv tej menyuam dua li lawm. “ ‘Vajtswv Yawmsaub hais li no tias, Vim yog luag tej hais rau nej tias, “Nej noj neeg, thiab nej rhuav tshem tej menyuam tawm hauv nej lub tebchaws mus,” vim li no, Vajtswv Yawmsaub hais tias, nej yuav tsis noj neeg thiab yuav tsis rhuav tshem tej menyuam tawm hauv nej lub tebchaws mus dua li lawm. Kuv yuav tsis pub kom nej tau hnov ib tsoom tebchaws tej lus thuam luag dua li lawm, thiab nej yuav tsis txaj muag rau ib tsoom neeg dua li lawm, thiab nej yuav tsis ua rau nej lub tebchaws dawm li lawm. Vajtswv Yawmsaub hais li no ntag.’ ” Yawmsaub hais lus tuaj rau kuv tias, “Neeg tus tub, thaum cov Yixayee nyob hauv lawv lub tebchaws, lawv lub neej thiab tej uas lawv ua, qias puas tsuas lub tebchaws. Tej uas lawv ua, kuv saib mas qias tsis huv ib yam li tej pojniam uas tseem ua pojniam raws lub caij qias tsis huv. Vim li no kuv thiaj nchuav kuv txojkev npau taws los vim yog tim tej ntshav uas lawv tua los rau hauv lub tebchaws, thiab tim tej dab mlom uas lawv ua qias puas tsuas lub tebchaws. Kuv thiaj ua rau lawv khiav ri sua mus rau hauv ib tsoom tebchaws, thiab lawv raug muab ntiab mus rau luag tej tebchaws. Kuv txiav txim rau lawv raws li lawv lub neej thiab tej uas lawv ua. Tiamsis thaum lawv mus rau hauv luag tej tebchaws, tsis hais lub tebchaws twg, lawv tau ua puas tsuas kuv lub npe uas dawb huv, rau qhov tej neeg pheej hais txog lawv tias, ‘Cov neeg no yog Yawmsaub haiv neeg lov? Txawm yog li ntawd los lawv raug tawm hauv nws lub tebchaws.’ Tiamsis kuv txhawj txog kuv lub npe uas dawb huv, uas cov Yixayee muab ua qias puas tsuas rau hauv tej tebchaws uas lawv mus txog. “Vim li no, koj cia li hais rau cov Yixayee tias, ‘Vajtswv Yawmsaub hais li no tias, Cov Yixayee 'e, tej uas kuv tabtom yuav ua no tsis yog saib rau nej, tiamsis yog saib rau kuv lub npe uas dawb huv, uas nej tau muab ua puas tsuas rau hauv tej tebchaws uas nej mus txog ntawd. Kuv yuav ua kuv lub npe loj kawg qhov uas dawb huv tshwm los, yog kuv lub npe uas raug muab ua qias puas tsuas rau hauv ib tsoom tebchaws, twb yog nej ua qias puas tsuas hauv lawv nruab nrab. Mas ib tsoom tebchaws yuav paub tias kuv yog Yawmsaub rau thaum kuv ua kuv txojkev dawb huv tshwm rau hauv nej rau lawv pom. “ ‘Kuv yuav coj nej tawm hauv ib tsoom tebchaws thiab sau zog nej hauv txhua lub tebchaws los, thiab coj nej rov los rau hauv lub tebchaws uas yog nej li ntag. Kuv yuav muab cov dej huv nchos rau nej, nej thiaj li huv ntawm qhov uas nej qias tsis huv, thiab kuv yuav ntxuav kom nej huv ntawm qhov uas nej pe tej dab mlom huvsi. Kuv yuav pub lub siab tshiab rau nej thiab pub tus ntsuj plig tshiab rau nej. Kuv yuav muab lub siab pob zeb rho hauv nej lub cev mus thiab muab lub siab nqaij rau nej. Kuv yuav muab kuv tus ntsuj plig rau hauv nej, thiab kuv yuav ua kom nej ua raws li kuv tej kab ke thiab ua tib zoo coj raws li kuv tej kevcai. Nej yuav tau nyob rau hauv lub tebchaws uas kuv muab pub rau nej tej poj koob yawm txwv. Nej yuav ua kuv haiv neeg, thiab kuv yuav ua nej tus Vajtswv. Kuv yuav cawm nej dim nej tej kev qias tsis huv. Kuv yuav hu kom muaj qoob loo nplua mias rau nej thiab tsis kheev nej raug kev tshaib nqhis dua li lawm. Kuv yuav ua kom tej ntoo hauv teb txi txiv ntau thiab ua rau tej teb tau qoob loo nplua mias, kom nej thiaj tsis raug txaj muag rau ib tsoom tebchaws vim yog qhov uas muaj kev tshaib nqhis. Nej yuav nco txog nej tej kev phem, thiab nco txog tej uas nej ua tsis zoo, mas nej yuav ntxub nej tus kheej vim yog nej tej kev txhaum thiab nej tej kev qias vuab tsuab. Vajtswv Yawmsaub hais tias, qhov uas kuv yuav ua li ntawd tsis yog saib rau nej. Nej cia li paub tseeb qhov ntawd. Cov Yixayee 'e, nej cia li txaj muag thiab poob ntsej muag rau tej uas nej ua. “ ‘Vajtswv Yawmsaub hais li no tias, Hnub uas kuv ntxuav nej kev txhaum ploj tag huvsi ntawd, kuv yuav ua kom muaj neeg nyob hauv tej moos, thiab tej chaw uas muab tso tseg nyob do cuas yuav muab tsim dua tshiab. Thiab yuav laij tej teb uas muab tso tseg nyob do cuas, yuav tsis nyob do cuas rau txhua tus uas dua kev pom. Luag yuav hais tias, “Lub tebchaws uas muab tso tseg no zoo yam nkaus li lub vaj Edee lawm, tej moos uas raug muab tso tseg nyob do cuas thiab pob tag, nimno muaj neeg nyob thiab muaj ntsa loog lawm.” Mas tej tebchaws uas tshuav nyob ib ncig nej yuav paub tias kuv uas yog Yawmsaub tau tsim tej chaw uas pob tag no dua tshiab thiab cog qoob loo rau tej teb uas nyob do cuas dua tshiab. Kuv uas yog Yawmsaub tau hais cia li no lawm, thiab kuv yuav ua li ntawd.’ “Vajtswv Yawmsaub hais li no tias, Kuv yuav kheev cov Yixayee thov kuv ua yam no, yog thov pub kom neeg huaj vam coob ib yam li yaj thiab tshis. Tej pab yaj pab tshis uas siv ua kevcai tua xyeem, yog tej pab yaj pab tshis hauv Yeluxalees rau thaum ua kevcai raws sijhawm coob npaum li cas, mas tej moos uas raug muab tso tseg nyob do cuas yuav muaj tej pab neeg nyob coob puv nkaus ib yam li ntawd. Mas lawv yuav paub tias kuv yog Yawmsaub.” Yawmsaub txhais tes los nyob rau saum kuv, mas Yawmsaub tus ntsuj plig coj kuv tawm los, coj kuv mus tso rau hauv ib lub hav, muaj pob txha puv nkaus. Nws coj kuv mus saib thoob plaws cov pob txha ntawd, ua ciav muaj pob txha hauv lub hav ntawd ntau kawg li, thiab tej pob txha ntawd qhuav nkig nkuav. Nws hais rau kuv tias, “Neeg tus tub, tej pob txha no yuav ciaj taus siav los tsis taus?” Mas kuv teb tias, “Au Vajtswv Yawmsaub, koj thiaj yog tus uas paub xwb.” Nws hais dua rau kuv tias, “Cia li cev Vajtswv lus rau tej pob txha no, thiab hais rau tej pob txha tias, ‘Cov pob txha qhuav 'e, nej cia li mloog Yawmsaub tej lus. Vajtswv Yawmsaub hais li no rau cov pob txha tias, Kuv yuav tso pa txeem rau hauv nej mas nej yuav ciaj sia. Kuv yuav muab leeg los tso rau saum nej, thiab ua kom muaj nqaij saum nej, thiab muab tawv los qhwv nej, thiab tso pa rau hauv nej, mas nej yuav ciaj sia. Ces nej yuav paub tias kuv yog Yawmsaub.’ ” Kuv kuj cev Vajtswv tej lus raws li nws hais rau kuv. Thaum kuv tabtom cev lus ntawd, muaj ib lub suab nrov, yog lub suab nrov qij qawj, thiab tej pob txha ntawd txav los sib txuas nyias li rau nyias. Thaum kuv ntsia ntsoov txawm muaj leeg hlav tuaj rau saum cov pob txha, thiab muab nqaij los rau saud thiab muaj tawv los qhwv tej pob txha. Tiamsis tsis muaj pa rau hauv. Mas Yawmsaub hais rau kuv tias, “Cia li cev Vajtswv lus rau pa, neeg tus tub, cia li cev los maj, thiab hais rau pa tias, ‘Vajtswv Yawmsaub hais li no tias, Tus pa 'e, cia li los ntawm plaub fab cua los thiab tshuab pa rau hauv cov neeg uas raug tua tuag no kom lawv thiaj li ciaj sia.’ ” Kuv thiaj li cev Vajtswv lus raws li uas nws hais rau kuv, mas pa kuj nkag rau hauv lawv thiab lawv kuj ciaj sia, thiab lawv sawv tsees, ua ib pab tub rog coob coob. Mas Yawmsaub hais rau kuv tias, “Neeg tus tub, cov pob txha no yog cov Yixayee huvsi. Lawv hais tias, ‘Peb tej pob txha qhuav nkig nkuav, peb tsis muaj chaw vam lawm, peb raug muab txiav tu nrho.’ Yog li no, cia li cev Vajtswv lus thiab hais rau lawv tias, ‘Vajtswv Yawmsaub hais li no tias, Saib maj, kuv haiv neeg 'e, kuv yuav qheb nej tej qhov ntxa thiab tsa nej tawm hauv nej tej qhov ntxa los thiab yuav coj nej rov los rau hauv Yixayee tebchaws. Kuv haiv neeg 'e, thaum kuv qheb nej tej qhov ntxa thiab tsa nej sawv tawm hauv nej tej qhov ntxa los mas nej yuav paub tias kuv yog Yawmsaub. Thiab kuv yuav muab kuv tus ntsuj plig rau hauv nej, thiab nej yuav ciaj sia, thiab kuv yuav muab nej txawb rau hauv nej lub tebchaws. Mas nej thiaj li paub tias kuv uas yog Yawmsaub tau hais tseg thiab tau ua raws li ntawd. Yawmsaub hais li no ntag.’ ” Yawmsaub hais lus tuaj rau kuv tias, “Neeg tus tub, koj muab ib tog ntoo los thiab sau rau hauv tias, ‘Yuda li thiab cov Yixayee uas koom Yuda li.’ Thiab muab dua ib tog ntoo los sau rau hauv tias, ‘Efa‑i li, yog Yauxej thiab cov Yixayee uas koom Yauxej li.’ Muab ob tog ntoo los ua ke ua ib tog, kom thiaj tuav tau ua ib tog hauv koj txhais tes. Mas thaum koj haiv neeg hais rau koj tias, ‘Koj yuav tsis qhia rau peb paub tias ob tog ntoo no lub ntsiab yog dabtsi lov?’ koj cia li hais rau lawv tias, ‘Vajtswv Yawmsaub hais li no tias, Saib maj, kuv tabtom yuav muab Yauxej thiab cov Yixayee uas koom Yauxej tog ntoo uas nyob hauv Efa‑i txhais tes, thiab muab Yuda tog ntoo los koom ua ke, thiab muab ob tog los ua ke, kom thiaj tuav tau ua ib tog rau hauv kuv txhais tes.’ Thaum ob tog ntoo uas koj sau ntawd nyob hauv koj txhais tes tab meeg lawv, mas cia li hais rau lawv tias, ‘Vajtswv Yawmsaub hais li no tias, Saib maj, kuv yuav coj cov Yixayee tawm hauv ib tsoom tebchaws uas lawv mus nyob lawm los, thiab yuav sau zog lawv hauv txhua fab los thiab coj lawv los rau hauv lub tebchaws uas yeej yog lawv li. Thiab kuv yuav ua kom lawv koom ua ib haiv neeg rau hauv lub tebchaws xwb, yog saum Yixayee tej roob. Thiab yuav muaj tib tug vajntxwv kav lawv sawvdaws. Lawv yuav tsis ua ob haiv neeg dua li lawm, thiab tsis faib ua ob lub tebchaws dua li lawm. Lawv yuav tsis ua rau lawv qias puas tsuas ntawm qhov uas pe lawv tej dab mlom thiab ntawm lawv tej qhov txhia chaw uas ntxub kawg thiab ntawm lawv tej kev fav xeeb dua li lawm. Tiamsis kuv yuav cawm lawv dim qhov uas lawv fav xeeb ua txhaum muaj txim, thiab yuav ntxuav lawv kom huv. Mas lawv yuav ua kuv haiv neeg thiab kuv yuav ua lawv tus Vajtswv. “ ‘Kuv tus qhev Davi yuav ua vajntxwv kav lawv, thiab lawv yuav muaj tib tug yug yaj xwb. Lawv yuav ua raws li kuv tej kevcai thiab ua tib zoo coj raws li kuv tej kab ke. Lawv yuav nyob hauv lub tebchaws uas nej tej poj koob yawm txwv nyob uas kuv muab pub rau kuv tus qhev Yakhauj. Lawv thiab lawv cov menyuam thiab tej menyuam ntawd li tub ki yuav nyob qhov ntawd mus ib txhis. Kuv tus qhev Davi yuav ua lawv tus thawj mus ib txhis. Kuv yuav nrog lawv sib cog lus kom muaj kev thaj yeeb, thiab tej lus cog tseg ntawd yuav nyob mus ib txhis. Kuv yuav foom koob hmoov rau lawv thiab ua kom lawv huaj vam coob, thiab kuv yuav txawb qhov chaw uas pe kuv rau hauv lawv nruab nrab mus ib txhis. Kuv lub chaw nyob yuav nyob hauv lawv. Kuv yuav ua lawv tus Vajtswv thiab lawv yuav ua kuv haiv neeg. Mas ib tsoom tebchaws yuav paub tias kuv uas yog Yawmsaub muab cov Yixayee cais ua cov uas dawb huv rau thaum qhov chaw uas pe kuv nyob hauv lawv nruab nrab mus ib txhis.’ ” Yawmsaub hais lus tuaj rau kuv tias, “Neeg tus tub, cia li tsom ntsoov rau vajntxwv Kau hauv Makau tebchaws, nws yog lub moos Mese thiab lub moos Thunpas li thawj, mas cia li cev Vajtswv lus tawm tsam nws, thiab hais tias, ‘Vajtswv Yawmsaub hais li no tias, Saib maj, Kau 'e, koj yog Mese thiab Thunpas li thawj, kuv tawm tsam koj. Kuv yuav ua rau koj tig rov qab thiab yuav muab nqe lauj nqe koj lub qhov ncauj, kuv yuav cab koj thiab koj tej tub rog huvsi thiab tej nees thiab tej tub rog caij nees tawm mus. Sawvdaws puavleej hnav ris tsho ua rog txhij zog, ua ib pab tub rog coob heev, txhua tus muaj daim hlau loj uas tiv thaiv thiab daim hlau me, thiab tuav rawv ntaj. Pawxia thiab Khuj thiab Phuj tuaj koj tog, txhua tus muaj daim hlau thaiv thiab ntoo mom hlau, thiab muaj Kaumaw thiab nws pab tub rog huvsi, thiab Npe Thaukama uas tuaj sab ped kawg nkaus nrog nws pab tub rog huvsi tuaj. Muaj ntau haiv neeg tuaj koj tog. “ ‘Koj thiab tej pab tub rog huvsi uas tuaj koom nrog koj ua ke, cia li npaj thiab npaj kom txhij txhua lub sijhawm, thiab koj cia li ua tus uas faj xwm rau lawv. Thaum dhau ntau hnub lawm kuv yuav kom koj tawm mus. Yav tom qab koj yuav mus tawm tsam lub tebchaws uas twb txeev ua rog uas rov nyob tus lawm, yog lub tebchaws uas tej neeg sau nthwv hauv ntau lub tebchaws los nyob saum Yixayee tej roob, yog tej chaw uas twb txeev muab tso tseg nyob do cuas ntev los lawm. Cov pejxeem hauv lub tebchaws ntawd raug coj tawm hauv ib tsoom tebchaws los, tiamsis nimno lawv sawvdaws nyob tso siab plhuav lawm. Koj yuav tawm mus zuj zus yam li cua daj cua dub. Koj yuav zoo yam nkaus li tauv huab uas laum nkaus lub tebchaws, yog koj thiab koj tej pab tub rog huvsi thiab ntau haiv neeg uas koom nrog koj. “ ‘Vajtswv Yawmsaub hais li no tias, Hnub ntawd koj yuav xav hauv koj lub siab thiab yuav ntaus tswvyim phem, thiab hais tias, “Kuv yuav mus ntaus rog rau lub tebchaws uas tej zej zog tsis muaj ntsa loog. Kuv yuav ntaus haiv neeg uas nyob thaj yeeb thiab tso siab plhuav, txhua tus nyob tsis muaj ntsa loog thaiv tsis muaj rooj loog tsis muaj las rooj. Kuv yuav txeeb thiab lws tej qhov txhia chaw coj mus, thiab ua rog rau tej chaw uas twb muab tso tseg nyob do cuas kom nimno muaj neeg nyob hauv lawm, thiab ua rog rau tej neeg uas sau hauv ib tsoom tebchaws los, yog cov uas tau tsiaj txhu qhov txhia chaw uas nyob hauv plawv ntiajteb.” Cov neeg hauv lub moos Senpa thiab lub moos Dedas thiab cov tub lag tub luam hauv Thasi thiab hauv Thasi tej zej zog yuav hais rau koj tias, “Koj tuaj txeeb qhov txhia chaw lov? Koj txhij koj tej pab tub rog tuaj lws, tuaj coj tej nyiaj tej kub tej tsiaj txhu thiab tej qhov txhia chaw mus thiab txeeb tau ntau kawg li lov?” ’ “Yog li no, neeg tus tub, cia li cev Vajtswv lus thiab hais rau Kau tias, ‘Vajtswv Yawmsaub hais li no tias, Hnub uas kuv haiv neeg Yixayee nyob tso siab plhuav lawm, koj tsis paub lov? Koj yuav tuaj ntawm koj lub chaw uas nyob sab ped kawg nkaus tuaj, koj thiab ntau haiv neeg uas koom nrog koj, txhua tus caij nees, ua ib pab tub rog coob heev thiab muaj zog heev. Koj yuav tuaj ua rog rau kuv haiv neeg Yixayee ib yam li tauv huab laum nkaus lub tebchaws. Yav tom qab kuv yuav coj koj tuaj ua rog rau kuv lub tebchaws. Kau 'e, thaum kuv siv koj ua kuv txojkev dawb huv tshwm los tab meeg ib tsoom tebchaws, mas lawv thiaj li paub kuv. “ ‘Vajtswv Yawmsaub hais li no tias, Koj yog tus uas yav thaum ub kuv kom kuv cov tub qhe uas cev lus rau cov Yixayee hais txog los tsis yog? Lawv cev kuv li lus ntau xyoo tias kuv yuav coj koj los tawm tsam lawv. Vajtswv Yawmsaub hais tias, Hnub ntawd uas Kau tuaj ua rog rau Yixayee tebchaws, kuv yuav npau taws heev. Vim kuv khib xeeb thiab npau taws ceev kuv thiaj hais tawv tias, Hnub ntawd av yuav ntseeg nkaws heev hauv Yixayee tebchaws. Tej ntses hauv hiavtxwv thiab tej noog saum nruab ntug, thiab tej tsiaj nyeg tsiaj qus, thiab tej uas nkag hauv av huvsi thiab tej neeg sawvdaws hauv ntiajteb yuav tshee hnyo rau thaum kuv los. Tej roob yuav pob tag, tej roob tsuas yuav nphau, thiab txhua lub ntsa loog yuav vau tag. Vajtswv Yawmsaub hais tias, Kuv yuav hu rab ntaj tuaj tawm tsam Kau saum kuv tej roob huvsi, Kau lawv txhua tus rab ntaj yuav rov tawm tsam lawv cov kwvtij. Kuv yuav tso mob kis thiab sub tawg sub ntsha txiav txim rau nws, thiab kuv yuav tso nag xob nag cua thiab lawg thiab hluavtaws thiab lawj faj los raug nws thiab nws tej pab tub rog thiab ntau haiv neeg uas koom nrog nws. Ua li no mas kuv thiaj ua kuv lub hwjchim thiab kuv txojkev dawb huv tshwm los, thiaj qhia kuv rau ntau lub tebchaws pom. Mas lawv yuav paub tias kuv yog Yawmsaub.’ ” “Neeg tus tub, koj cia li cev Vajtswv lus tawm tsam Kau hais tias, ‘Vajtswv Yawmsaub hais li no tias, Kau 'e, koj yog Mese thiab Thunpas tus thawj, kuv tawm tsam koj. Kuv yuav ua rau koj tig rov qab thiab muab koj ntiab mus, thiab coj koj tuaj sab ped kawg nkaus tuaj, thiab coj mus tawm tsam Yixayee tej roob. Mas kuv yuav ntaus koj rab hneev kom poob ntawm koj sab tes laug, thiab ua rau koj cov xub poob ntawm koj sab tes xis. Koj yuav tuag rau saum Yixayee tej roob, koj thiab koj tej pab tub rog huvsi thiab tej haiv neeg uas koom nrog koj yuav tuag. Kuv yuav muab koj rau txhua yam dav thiab tsiaj qus noj. Koj yuav tuag rau tom tej teb, rau qhov kuv hais cia lawm. Vajtswv Yawmsaub hais li no ntag. Kuv yuav tso nplaim taws los raug Makau tebchaws thiab raug cov uas nyob tso siab plhuav ntawm ntug hiavtxwv. Mas lawv yuav paub tias kuv yog Yawmsaub. “ ‘Kuv yuav ua kuv lub npe dawb huv rau lawv paub rau hauv nruab nrab kuv haiv neeg Yixayee, thiab kuv yuav tsis kheev kuv lub npe uas dawb huv raug muab ua qias puas tsuas dua li lawm. Mas ib tsoom tebchaws yuav paub tias kuv yog Yawmsaub, yog tus Dawb Huv rau hauv cov Yixayee. Vajtswv Yawmsaub hais tias, Saib maj, hnub ntawd tabtom los, yuav los tiag tiag li. No yog hnub uas kuv twb hais cia lawm. Mas cov neeg uas nyob hauv Yixayee tej moos yuav tawm mus thiab muab lawv tej cuab yeej ua rog hlawv yog tej daim hlau loj thiab daim me uas tiv thaiv, tej hneev thiab tej xub, tej hmuv ntev thiab tej hmuv uas laim nkaug, los lawv yuav muab los ua taws rauv txaus xya xyoo. Vim li no tsis txog lawv txiav taws tom teb lossis tom hav zoov, rau qhov lawv yuav muab tej cuab yeej ua taws rauv. Lawv yuav txeeb ntawm cov uas txeeb lawv li mus lawm rov los, thiab yuav lws ntawm cov uas lws lawv li lawm. Vajtswv Yawmsaub hais li no ntag. “ ‘Hnub ntawd kuv yuav pub Kau muaj toj ntxas rau hauv Yixayee tebchaws, yog ntawm lub hav uas neeg mus mus los los uas nyob ntawm hiavtxwv Tuag sab hnub tuaj, yuav ua chaw thaiv cov uas mus mus los los kev vim yog muab Kau thiab nws cov neeg coob coob huvsi log rau qhov ntawd. Luag yuav hu tias lub hav Hamookau. Cov Yixayee yuav muab lawv cov ntawd log xya lub hli thiaj li ntxuav tau lub tebchaws kom huv. Txhua tus hauv lub tebchaws yuav muab lawv cov ntawd log. Lawv ua li ntawd lawv thiaj yuav tau koob meej rau hnub uas kuv ua kuv lub hwjchim ci ntsa iab tshwm los. Vajtswv Yawmsaub hais li no ntag. Lawv yuav tsa ib co neeg mus mus los los thoob plaws hauv lub tebchaws tsis tu li, thiab muab cov tuag uas tseem tshuav nyob saum npoo av log, kom thiaj ntxuav tau lub tebchaws kom huv. Dhau xya lub hli ntawd lawm lawv li mus nrhiav. Thaum cov neeg ntawd mus nrhiav thoob plaws lub tebchaws yog leejtwg pom pob txha neeg, nws yuav rhais phua rau ntawm cov pob txha, mas cov uas log yuav tuaj muab coj mus log rau hauv lub hav Hamookau. (Ib lub moos hu ua Hamauna kuj nyob qhov ntawd.) Lawv yuav ntxuav lub tebchaws kom huv li no.’ “Neeg tus tub, Vajtswv Yawmsaub hais li no tias, Cia li hais rau txhua yam nas noog thiab tej tsiaj qus huvsi tias, ‘Cia li sau zog tuaj ua ke, cia li tuaj txhua qhov tuaj, tuaj noj tej uas muab tua xyeem uas kuv tabtom npaj rau nej, yuav noj haus tej uas muab xyeem saum Yixayee tej roob, nej yuav noj nqaij thiab haus ntshav. Nej yuav noj cov uas siab loj siab tuab li nqaij thiab haus cov thawj hauv ntiajteb li ntshav, ib yam li noj tej txiv yaj tej menyuam yaj thiab tej tshis tej txiv nyuj, uas puavleej yog tsiaj rog rog hauv Npasas tebchaws. Nej yuav noj roj kom tsau npo thiab haus ntshav kom qaug rau thaum uas nej noj haus tej uas muab xyeem yog tej uas kuv npaj rau nej. Nej yuav noj nqaij nees thiab cov uas caij nees thiab tej uas siab loj siab tuab thiab txhua yam tub rog tsau npo rau ntawm kuv rooj mov.’ Vajtswv Yawmsaub hais li no ntag. “Kuv yuav ua rau kuv lub hwjchim ci ntsa iab tshwm rau hauv ib tsoom tebchaws, thiab txhua lub tebchaws yuav pom tej uas kuv txiav txim rau lawv thiab pom kuv txhais tes uas ntaus lawv. Txij hnub ntawd mus cov Yixayee yuav paub tias kuv yog Yawmsaub uas yog lawv tus Vajtswv. Mas ib tsoom tebchaws yuav paub tias cov Yixayee raug muab ntes coj mus poob tebchaws vim yog tim lawv tej kev phem. Yog vim lawv fav xeeb rau kuv, kuv thiaj fee plhu ntawm lawv thiab muab lawv cob rau hauv cov yeeb ncuab txhais tes, thiab lawv sawvdaws raug hniav ntaj hniav riam tuag. Kuv ua rau lawv raws li lawv tej kev phem kev qias thiab raws li lawv tej kev fav xeeb, thiab kuv fee plhu ntawm lawv. “Yog li no Vajtswv Yawmsaub hais li no tias, Nimno kuv yuav ua rau Yakhauj rov vam meej li qub, thiab kuv yuav khuvleej cov Yixayee huvsi, thiab kuv yuav khib xeeb kuv lub npe uas dawb huv. Thaum lawv nyob tso siab plhuav hauv lawv lub tebchaws tsis muaj leejtwg ua rau lawv ntshai, mas lawv yuav tsis nco qhov uas lawv raug txaj muag thiab tsis nco txhua yam uas lawv ua fav xeeb rau kuv lawm. Thaum kuv tau coj lawv tawm hauv ib tsoom neeg los thiab tau sau zog hauv lawv tej yeeb ncuab tebchaws los, thiab thaum kuv ua kuv txojkev dawb huv tshwm rau hauv lawv rau ntau lub tebchaws pom, mas lawv yuav paub tias kuv yog Yawmsaub uas yog lawv tus Vajtswv, rau qhov kuv ntiab lawv poob mus nyob rau hauv nruab nrab ib tsoom tebchaws, thiab sau lawv rov los nyob hauv lawv lub tebchaws lawm. Kuv yuav tsis tso lawv ib tug tseg rau hauv tej tebchaws uas lawv mus nyob ntawd dua li lawm. Thiab thaum kuv hliv kuv tus Ntsuj Plig rau saum cov Yixayee, kuv yuav tsis fee plhu ntawm lawv dua li lawm. Vajtswv Yawmsaub hais li no ntag.” Thaum peb poob tebchaws tau nees nkaum tsib xyoos, hnub xiab kaum lub hauv xyoo, yog thaum Yeluxalees poob tau kaum plaub xyoos lawm, mas hnub ntawd ntag Yawmsaub txhais tes los rau saum kuv, thiab coj kuv mus qhov ntawd. Mas nws coj kuv hauv Vajtswv zaj yog toog los txog Yixayee tebchaws, thiab muab kuv tso rau saum ib lub roob siab heev. Ncaj ntawm kuv rau sab nrad muaj ib lub chaw zoo li lub nroog. Thaum nws coj kuv los txog lub chaw ntawd, ua ciav muaj ib tug txivneej, saib mas zoo li tooj liab, muaj ib txoj hlua maj thiab ib tug pas ntsuas nyob hauv nws txhais tes. Nws sawv nres nroos ntawm rooj loog. Tus txivneej ntawd hais rau kuv tias, “Neeg tus tub, koj cia li tsa muag ntsia thiab tig ntsej mloog, muab lub siab rau rau txhua yam uas kuv yuav qhia rau koj, vim tias qhov uas coj koj tuaj ntawm no kuj yog yuav qhia rau koj. Txhua yam uas koj pom no cia li piav rau cov Yixayee.” Kuv saib ua ciav muaj ntsa loog vij kiag lub tuam tsev. Tus pas ntsuas uas nyob hauv tus txivneej ntawd txhais tes ntev rau tshim, txhua tshim yog ib tshim thiab ib dos. Nws thiaj ntsuas lub ntsa loog qhov uas tuab mas tuab ib pas, thiab qhov uas siab kuj yog siab ib pas. Mas nws nkag mus rau hauv lub rooj loog uas tig rau sab hnub tuaj. Nws nce tus ntaiv mus thiab nws ntsuas lub taw rooj tuab ib pas. Nws ntsuas tej chav zov khuav, ib cha ntev ib pas dav ib pas xwm fab xwm meem, qhov uas kem ib cha zov khuav rau ib cha yog ntev tsib tshim. Thiab lub taw rooj tom kawg zaj qab khav kuj tuab ib pas. Nws ntsuas lub rooj loog zaj qab khav dav yim tshim. Ob tug npuab rooj ntawm zaj qab khav dav ob tshim xwm fab xwm meem. No yog lub rooj loog zaj qab khav sab hauv. Ob sab kev ntawm rooj loog sab hnub tuaj muaj chav zov khuav, ib sab muaj peb chav sib luag zos, thiab tej ncej uas nyob ob sab sib luag zos thiab. Nws ntsuas lub taw rooj qhov dav kaum tshim, thiab txojkev hauv lub rooj loog dav kaum peb tshim. Tej chav zov khuav ntawm xubntiag xov siab ib tshim tuab ib tshim, tej chav zov khuav ntawd dav rau tshim xwm fab xwm meem. Nws ntsuas qhov dav ntawm chav zov khuav sab nrob qaum mus rau chav uas sib ncaj sab nrob qaum mas muaj nees nkaum tsib tshim, yog ntsuas ntawm ib lub qhov rooj me mus rau chav sib ncaj lub qhov rooj me. Nws ntsuas zaj qab khav qhov ntev muaj nees nkaum tshim, nws ntsuas mus rau tej npuab rooj uas saib rau hauv lub tshav puam. Ntsuas ntawm lub rooj loog sab nraud mus txog zaj qab khav sab hauv muaj tsib caug tshim. Lub rooj loog muaj qhov rais puag ncig, tej qhov rais hauv tej chav zov khuav mas ua nqaim zuj zus mus rau tus npuab qhov rais sab nraud. Zaj qab khav kuj muaj qhov rais ib yam nkaus, thiab luag sais tej tsob toov laj rau tej ncej npuab rooj. Nws coj kuv tawm los rau hauv lub tshav puam sab nraud, ua ciav muaj ntau chav thiab pua lag zeb puag ncig lub tshav puam. Muaj peb caug chav tig xubntiag rau ntawm txojkev uas pua lag zeb. Cov lag zeb ntawd pua taug txojkev uas npuas cov rooj loog, pua thoob plaws qhov uas muaj rooj loog. No yog cov lag zeb uas pua txheej kev qes. Mas nws ntsuas ntawm lub rooj loog uas nyob txheej qes mus txog lub qhov rooj uas nkag mus rau hauv lub tshav puam sab hauv, muaj ib puas tshim, sab ped thiab sab hnub tuaj ntev ib yam nkaus. Lub rooj loog ntawm lub tshav puam sab nraud uas tig rau sab ped, nws kuj ntsuas qhov ntev thiab qhov dav. Lub rooj loog ib sab muaj peb chav zov khuav, mas tej npuab rooj thiab tej chaw kem ib cha rau ib cha loj sib luag zos ib yam li thawj lub rooj loog, qhov ntev muaj tsib caug tshim, qhov dav muaj nees nkaum tsib tshim. Tej qhov rais thiab zaj qab khav thiab tej tsob toov laj uas sais zoo ib yam nkaus li lub rooj loog uas tig rau sab hnub tuaj. Muaj xya qeb ntai nce mus txog thiab zaj qab khav nyob sab hauv. Ncaj rau lub rooj loog sab ped muaj ib lub qhov rooj nkag mus rau hauv lub tshav puam sab hauv ib yam li lub rooj loog sab hnub tuaj. Nws ntsuas ntawm lub rooj loog mus txog lub qhov rooj ntawd muaj ib puas tshim. Nws coj kuv mus rau sab nrad ua ciav muaj ib lub rooj loog sab nrad. Nws ntsuas tej npuab rooj thiab zaj qab khav kuj loj sib luag li lwm lub. Muaj qhov rais puag ncig rooj loog thiab zaj qab khav ib yam li lwm lub qhov rais, ntev tsib caug tshim, dav nees nkaum tsib tshim. Muaj xya qeb ntai nce mus txog thiab zaj qab khav nyob sab hauv, sais tsob toov laj rau ob tug npuab rooj ib sab ib tsob. Thiab muaj ib lub qhov rooj sab nrad uas nkag mus rau hauv lub tshav puam sab hauv. Nws ntsuas ntawm lub qhov rooj mus txog lub rooj loog sab nrad muaj ib puas tshim. Mas nws coj kuv nkag lub qhov rooj sab nrad los rau hauv lub tshav puam sab hauv. Nws ntsuas lub qhov rooj sab nrad kuj loj sib luag li lwm lub rooj loog. Tej chav zov khuav thiab tej npuab rooj thiab zaj qab khav kuj loj sib luag li lwm lub. Muaj qhov rais puag ncig lub qhov rooj thiab zaj qab khav, ntev tsib caug tshim, dav nees nkaum tsib tshim. [Muaj qab khav puag ncig ntev nees nkaum tsib tshim dav tsib tshim.] Zaj qab khav tig rau lub tshav puam sab nraud, thiab sais tsob toov laj rau tej npuab rooj, thiab muaj yim qeb ntai nce mus txog. Thiab nws coj kuv los rau hauv lub tshav puam sab hauv uas yog sab hnub tuaj, thiab nws ntsuas lub qhov rooj, kuj loj sib luag ib yam li lwm lub. Tej chav zov khuav thiab tej npuab rooj thiab zaj qab khav kuj loj sib luag li lwm lub. Lub qhov rooj thiab zaj qab khav, ntev tsib caug tshim, dav nees nkaum tsib tshim, muaj qhov rais puag ncig. Zaj qab khav tig rau lub tshav puam sab nraud, thiab sais tsob toov laj rau tej npuab rooj ib sab ib tsob, thiab muaj yim qeb ntai nce mus txog. Thiab nws coj kuv los rau lub qhov rooj sab ped thiab muab ntsuas, mas kuj loj sib luag li lwm lub. Tej chav zov khuav thiab tej npuab rooj thiab zaj qab khav kuj loj sib luag li lwm lub. Muaj qhov rais puag ncig, ntev tsib caug tshim, dav nees nkaum tsib tshim. Zaj qab khav tig rau lub tshav puam sab nraud, thiab sais tsob toov laj rau ob tug npuab rooj, ib sab ib tsob, thiab muaj yim qeb ntai. Muaj ib chav uas nkag ntawm zaj qab khav lub qhov rooj rau hauv, yog lub chaw uas ntxuav tej tsiaj uas yuav hlawv xyeem. Ntawm zaj qab khav uas yuav nkag rau hauv lub qhov rooj muaj ob lub rooj txawb ib sab kev, ob lub txawb ib sab kev cia tua tej tsiaj uas yuav hlawv xyeem thiab xyeem daws txim thiab xyeem ntxuav kev txaug kev txhaum. Lub qhov rooj sab ped zaj qab khav sab nraud muaj ob lub rooj txawb ib sab kev, ob lub rooj txawb ib sab kev. Muaj plaub lub rooj nyob sab qhov rooj hauv, muaj plaub lub nyob sab qhov rooj nraud, huvsi yim lub, yog lawv siv tua tej tsiaj uas yuav xyeem. Muaj plaub lub rooj uas txaug pob zeb ua siv tua tsiaj hlawv xyeem, ntev ib tshim txhais dav ib tshim txhais siab ib tshim, muab tej cuab yeej uas tua tej tsiaj xyeem thiab tej tsiaj hlawv xyeem tso rau saud. Muaj nqe lauj ntev ib dos dai puag ncig tej phab ntsa ntawm lub rooj. Yuav muab tej nqaij uas xyeem tso rau saum tej rooj ntawd. Mas nws coj kuv mus rau hauv lub tshav puam sab hauv, ua ciav muaj ob chav hauv lub tshav puam sab hauv, ib chav nyob ntawm ib sab lub qhov rooj sab ped tig rau sab nrad, thiab ib chav nyob ntawm ib sab lub qhov rooj sab nrad tig rau sab ped. Mas nws hais rau kuv tias, “Chav uas tig rau sab nrad yog cov pov thawj uas saib xyuas lub tuam tsev chav, chav uas tig rau sab ped yog cov pov thawj uas saib xyuas lub thaj xyeem chav. Cov pov thawj no yog Xadau caj ces, hauv xeem Levi mas tib cov no yog cov uas tuaj ze Yawmsaub ua tau num rau nws.” Mas nws ntsuas lub tshav puam ntawd ntev ib puas tshim dav ib puas tshim xwm fab xwm meem, thiab lub thaj xyeem nyob ntawm lub tuam tsev hauv ntej. Thiab nws coj kuv mus txog ntawm lub tuam tsev zaj qab khav thiab nws ntsuas ob sab npuab rooj, ib sab phab ntsa ntawm qhov rooj dav tsib tshim, thiab lub qhov rooj dav kaum plaub tshim, ib sab npuab rooj tuab peb tshim. Zaj qab khav ntev nees nkaum tshim dav kaum ob tshim. Muaj kaum qeb ntai nce mus txog thiab muaj ob tug ncej qab khav nyob ob sab npuab rooj. Mas nws coj kuv mus rau hauv chav dawb huv. Nws ntsuas ob sab npuab rooj, ib sab dav rau tshim, lub qhov rooj dav kaum tshim, ib sab phab ntsa ntawm qhov rooj dav tsib tshim, thiab nws ntsuas chav dawb huv ntev plaub caug tshim dav nees nkaum tshim. Nws nkag rau chav sab hauv mas nws ntsuas ob sab npuab rooj, ib sab dav ob tshim, lub qhov rooj dav rau tshim, ib sab phab ntsa ntawm qhov rooj dav xya tshim. Thiab nws ntsuas chav ntawd qhov ntev nees nkaum tshim thiab qhov dav nees nkaum tshim. Chav uas nws ntsuas ntawd yog dhau chav dawb huv lawm. Nws hais rau kuv tias, “No yog chav uas dawb huv kawg nkaus.” Mas nws ntsuas lub ntsa loog tuam tsev tuab rau tshim. Tej chav uas puag ncig lub ntug ntsa loog dav plaub tshim. Tej chav ntawd muaj peb txheej, ib txheej muaj peb caug chav, thiab muaj theem txawb peb txheej ntawd rau ntawm lub ntsa loog tuam tsev, tej txheej ntawd thiaj tsis tsuam lub ntsa loog tuam tsev. Tej chav ntawd yim siab kuj yim dav zuj zus mus raws li tej qeb ntai ib txheej rau ib txheej puag ncig lub tuam tsev. Sab ntsa loog nraud muaj qeb ntai nce mus thiaj tau kev nce txheej hauv qab mus rau txheej nruab nrab thiab txheej saud. Kuv tseem pom tias muaj ntug taw loog puag ncig lub tuam tsev, lub chaw uas tiag tej chav ntawd siab ib pas uas yog rau tshim. Tej chav ntsa loog ntawd sab nraud tuab tsib tshim, thiab lub ntug taw loog uas tshwm rau sab nraud dav tsib tshim. Ntawm ntug taw loog uas siab ntawd mus txog cov pov thawj tej chav hauv lub tshav puam sab hauv mas dav nees nkaum tshim puag ncig lub tuam tsev txhua fab. Ob lub qhov rooj uas nkag rau hauv tej chav uas puag ncig ntsa loog tuam tsev ntawd qheb mus tshwm rau nraum ntug taw loog, ib lub rau sab ped ib lub rau sab nrad. Lub ntug taw loog ntawd dav tsib tshim. Muaj ib lub tsev nyob ntawm lub tuam tsev sab hnub poob tig rau lub tshav puam tuam tsev, dav xya caum tshim, ntev cuaj caum tshim, tej phab ntsa tuab tsib tshim. Nws ntsuas lub tuam tsev ntev ib puas tshim, thiab ntsuas lub tsev sab hnub poob thiab tej phab ntsa mus rau lub tshav puam tuam tsev ntev ib puas tshim. Qhov ntev ntawm lub tuam tsev sab hnub tuaj mus rau lub tshav puam tuam tsev kuj ib puas tshim. Nws ntsuas lub tsev sab hnub poob uas tig rau lub tshav puam tuam tsev thiab tej phab ntsa mas dav ib puas tshim rau ob sab. Lub tuam tsev chav dawb huv thiab chav dawb huv kawg nkaus thiab zaj qab khav sab nraud puavleej muab ntoo xov dua ib txheej puag ncig thiab muab qhov rais som zuj zus sab hauv rau sab nraud, muab ntoo xov ncaj ntawm lub qhov rooj txij ntua hauv taw mus nto plaws qhov rais (tej qhov rais ntawd muab ntaub thaiv), thiab xov tej kem saum lub qhov rooj, tsis hais chav dawb huv kawg nkaus thiab chav dawb huv. Tej phab ntsa uas xov puag ncig chav hauv thiab chav nraud muab txaug tej duab rau, yog duab Khelunpee thiab duab toov laj. Muaj ib tsob toov laj quas ib tug Khelunpee. Ib tug Khelunpee muaj ob lub ntsej muag, ib lub ntsej muag txivneej tig ntsia rau ib tsob toov laj, ib lub ntsej muag thav tsov ntxhuav tig ntsia dua rau ib tsob toov laj. Txaug li no thoob plaws lub tuam tsev. Txij ntua hauv taw mus rau saum qhov rooj muaj Khelunpee thiab tsob toov laj txaug rau ntawm phab ntsa. Tej npuab rooj ntawm chav dawb huv xwm fab xwm meem. Hauv chav dawb huv sab hauv ntej muaj ib yam li lub thaj xyeem uas muab ntoo ua, siab peb tshim, ntev ob tshim, dav ob tshim, yog muab ntoo ua tej kaum thaj tej taw thiab tej xov. Nws hais rau kuv tias, “No yog lub rooj uas nyob ntawm Yawmsaub xubntiag.” Chav uas dawb huv thiab chav uas dawb huv kawg nkaus muaj qhov rooj muaj ob daim txiag qhov rooj. Lub qhov rooj muaj ob txhib qhov rooj, ob lub qhov rooj muaj ob txhib qhov rooj qheb. Saum chav uas dawb huv lub qhov rooj muaj Khelunpee thiab tsob toov laj txaug rau ib yam li txaug rau ntawm phab ntsa. Thiab vov ib qho ntoo roos zaj qab khav sab nraud. Zaj qab khav muaj qhov rais uas som zuj zus sab hauv rau sab nraud thiab txaug tsob toov laj rau ob sab phab ntsa ntawm qhov rooj. Mas nws coj kuv mus txog ntawm lub tshav puam sab nraud uas ncaj rau sab ped, thiab coj kuv los txog chav uas sib ncaj lub tshav puam tuam tsev thiab sib ncaj lub tsev rau sab ped. Lub tsev uas nyob sab ped ntev ib puas tshim, dav tsib caug tshim. Nyob npuas lub tshav puam sab hauv uas muaj nees nkaum tshim thiab tig rau txojkev uas pua lag zeb hauv lub tshav puam sab nraud, muaj ib lub tsev uas muaj peb txheej, ib txheej txuas ib txheej. Ntawm cov chav ntawd hauv ntej muaj ib txojkev dav kaum tshim ntev ib puas tshim, lub tsev no qhov rooj nyob rau sab ped. Cov chav uas nyob txheej saud nqaim dua vim lub qab khav noj chaw dav ntau dua txheej sab hauv thiab txheej nruab nrab. Vim yog muaj peb txheej thiab tsis muaj ncej txheem ib yam li tej ncej hauv lub tshav puam sab nraud, txheej sab saud thiaj nqaim dua txheej nruab nrab thiab txheej hauv qab. Thiab mus rau lub tshav puam sab nraud muaj ib zaj phab ntsa sib ncaj rau cov chav ntawd ntev tsib caug tshim. Rau qhov cov chav uas npuas lub tshav puam sab nraud ntev tsib caug tshim, tiamsis cov chav uas sib ncaj rau lub tuam tsev ntev ib puas tshim. Hauv cov chav no muaj ib txojkev nkag sab hnub tuaj tuaj rau hauv, yog txojkev uas tawm lub tshav puam sab nraud tuaj, yog tawm ntawm lub kaum phab ntsa tuaj. Sab nrad sib ncaj lub tshav puam tuam tsev thiab sib ncaj lub tsev mas muaj tej chav, thiab ntawm tej chav ntawd muaj ib txojkev, ib yam nkaus li tej chav uas nyob sab ped, ntev thiab dav ib yam nkaus, kev tawm thiab tus yam ntxwv thiab qhov rooj zoo ib yam nkaus. Hauv cov chav uas nyob sab nram no muaj kev nkag sab hnub tuaj tuaj rau hauv, yog ntawm txojkev uas muaj ob sab phab ntsa. Mas nws hais rau kuv tias, “Cov chav uas nyob sab ped thiab cov chav uas nyob sab nrad uas npuas lub tshav puam tuam tsev mas yog chav dawb huv uas cov pov thawj uas mus rau ntawm Yawmsaub xubntiag noj tej yam dawb huv kawg nkaus uas muab xyeem rau Yawmsaub lawm. Lawv yuav muab tej uas xyeem dawb huv kawg nkaus tso rau hauv, yog tej qoob loo uas xyeem, thiab tej uas xyeem daws txim thiab tej uas xyeem ntxuav kev txaug kev txhaum, rau qhov lub chaw ntawd dawb huv. Thaum cov pov thawj nkag rau hauv chav uas dawb huv, lawv yuav tsis tawm hauv chav no rau lub tshav puam sab nraud tsuas yog lawv muab tej tsoos tsho uas hnav ua koom tu Yawmsaub hle tso rau qhov ntawd tso, vim tej tsoos tsho no yog yam uas dawb huv. Lawv yuav hnav dua lwm yam tsoos lawv mam li mus rau tej chaw uas tej pejxeem mus.” Thaum nws ntsuas txhua yam hauv lub tuam tsev tag lawm, nws txawm coj kuv tawm ntawm lub rooj loog uas tig rau sab hnub tuaj los, thiab ntsuas ib ncig lub tuam tsev sab nraud. Nws muab tus pas ntsuas sab hnub tuaj ntsuas tau tsib puas tshim raws li tus pas. Thiab nws tig los ntsuas sab ped, tau tsib puas tshim raws li tus pas. Thiab nws tig los ntsuas sab nrad, tau tsib puas tshim raws li tus pas. Thiab nws kuj tig los ntsuas sab hnub poob, tau tsib puas tshim raws li tus pas. Nws ntsuas plaub fab huvsi. Muaj ntsa loog puag ncig, ntev tsib puas tshim, dav tsib puas tshim, uas quas yam uas dawb huv thiab yam uas tsis dawb huv. Dhau ntawd nws coj kuv los rau ntawm lub rooj loog uas tig rau sab hnub tuaj. Ua ciav cov Yixayee tus Vajtswv lub hwjchim ci ntsa iab tuaj sab hnub tuaj los. Thiab lub suab uas Vajtswv tuaj nrov yam nkaus li dej ntsawj, thiab nws lub hwjchim ci ntsa iab rau lub qab ntuj. Zaj yog toog uas pom no kuj zoo li zaj yog toog uas kuv pom nws los ua rau lub nroog ntawd puam tsuaj, thiab zoo li zaj yog toog uas kuv pom ntawm ntug dej Khenpa. Ces kuv txawm khwb nkaus ua lub plhu ti nkaus hauv av. Thaum Yawmsaub lub hwjchim ci ntsa iab nkag ntawm lub rooj loog uas tig rau sab hnub tuaj los rau hauv lub tuam tsev, Vaj Ntsuj Plig kuj tsa kuv sawv thiab coj kuv los rau hauv lub tshav puam sab hauv, ua ciav Yawmsaub lub hwjchim ci ntsa iab puv nkaus lub tuam tsev. Thaum tus txivneej ntawd tseem sawv ntsug ntawm kuv ib sab, kuv hnov ib tug hais hauv lub tuam tsev tuaj rau kuv, thiab nws hais rau kuv tias, “Neeg tus tub, no yog lub chaw uas kuv lub zwm txwv nyob thiab lub chaw uas kuv tiag taw, yog lub chaw uas kuv yuav nyob hauv nruab nrab cov Yixayee mus ib txhis. Thiab cov Yixayee yuav tsis ua qias puas tsuas kuv lub npe uas dawb huv dua li lawm, tsis hais lawv thiab lawv tej vajntxwv, rau qhov uas lawv deev luag tej dab thiab qhov uas lawv muab tej vajntxwv tuag log rau hauv no, thiab qhov uas lawv ua lawv tej rooj vag ti nkaus kuv tej rooj loog thiab ua lawv tej npuab rooj ti nkaus kuv li npuab rooj, tsuas muaj tib zaj phab ntsa quas kuv thiab lawv. Lawv tej kev qias vuab tsuab uas lawv tau ua qias puas tsuas kuv lub npe uas dawb huv, kuv thiaj chim muab lawv ua kom puam tsuaj tag. Nimno cia lawv tso lawv kev pe dab thiab lawv tej vajntxwv lub cev tuag nyob deb kuv, mas kuv yuav nyob hauv lawv nruab nrab mus ib txhis. “Neeg tus tub, koj cia li qhia rau cov Yixayee paub txog lub tuam tsev thiab tus qauv thiab tej chaw ntawm lub tuam tsev, kom lawv thiaj li txaj muag paub tej kev txhaum muaj txim. Yog lawv txaj muag rau txhua yam uas lawv tau ua lawm, ces cia li qhia daim duab lub tuam tsev thiab txojkev tawm mus nkag los thiab tus qauv tuam tsev txhua yam, thiab qhia lawv paub txog tej kab ke thiab tej kevcai hauv lub tuam tsev huvsi. Muab sau tab meeg lawv, kom lawv thiaj li coj raws li tej kab ke huvsi thiab tej kevcai huvsi thiab ua raws nraim. No yog tej kevcai ntawm lub tuam tsev. Ib cheeb tsam saum lub ncov roob yuav ua qhov chaw dawb huv kawg nkaus. No nawj yog kevcai ntawm lub tuam tsev.” “Ntawm no yog lub thaj xyeem muab ntsuas ua tshim (ib tshim yog ntev ib tshim thiab ib dos). Lub ntug taw siab ib tshim thiab dav ib tshim, thiab muaj lub npoo siab ib dos puag ncig. Ntawm no yog lub thaj qhov uas siab. Ntawm lub taw mus txog theem hauv qab siab ob tshim, lub ntug dav ib tshim, thiab ntawm theem hauv qab mus txog theem loj siab plaub tshim, lub ntug dav ib tshim. Ntawm theem loj mus txog theem uas lub qhov cub siab plaub tshim, thiab ntawm theem uas lub qhov cub muaj plaub tug kub siab ib tshim. Theem uas lub qhov cub ntawd ua plaub fab xwm fab xwm meem, ntev kaum ob tshim dav kaum ob tshim. Theem loj kuj xwm fab xwm meem, ntev kaum plaub tshim dav kaum plaub tshim, muaj lub npoo dav ib txhais tshim puag ncig. Lub ntug taw dav ib tshim puag ncig. Lub thaj tus ntaiv nyob sab hnub tuaj.” Nws hais rau kuv tias, “Neeg tus tub, Vajtswv Yawmsaub hais li no tias, No mus yog tej kab ke ntawm lub thaj. Hnub uas ua lub thaj uas yuav muab tsiaj hlawv xyeem thiab nchos ntshav rau tiav lawm, koj yuav muab ib tug txiv nyuj rau xeem Levi cov pov thawj uas yog Xadau caj ces uas tuaj ze kuv thiab ua koom tu kuv, ua kevcai xyeem daws txim. Vajtswv Yawmsaub hais li no ntag. Koj yuav muab tus txiv nyuj ntawd cov ntshav ib txhia tso rau saum plaub tug kub thaj thiab saum plaub lub kaum thaj theem loj thiab saum lub npoo ib ncig theem loj ntawd. Ua li no koj thiaj li ntxuav tau lub thaj thiab ntxuav tau tej kev qias tsis huv mus. Koj yuav muab tus txiv nyuj uas xyeem daws txim ntawd coj mus thiab muab hlawv rau lub chaw uas npaj cia lawm uas yog lub tuam tsev thaj av uas nyob nraum tej chaw dawb huv. “Thiab hnub uas ob koj yuav muab ib tug txiv tshis uas tsis muaj chaw thuam li tua xyeem daws txim, thiab ntxuav lub thaj xyeem kom huv ib yam li xyeem tus txiv nyuj ntxuav. Thaum koj ua kevcai ntxuav lub thaj tag lawm, koj yuav muab ib tug txiv nyuj uas tsis muaj chaw thuam thiab ib tug txiv yaj uas tsis muaj chaw thuam xyeem. Koj yuav coj ob tug tsiaj no los rau ntawm Yawmsaub xubntiag, mas cov pov thawj yuav muab ntsev nphoo rau saum ob tug tsiaj thiab muab xyeem ua kevcai hlawv xyeem rau Yawmsaub. Koj muab ib tug txiv tshis xyeem daws txim ib hnub ib tug txog xya hnub, thiab muab ib tug txiv nyuj thiab ib tug txiv yaj uas tsis muaj chaw thuam xyeem nrog ua ke. Lawv yuav ua kevcai ntxuav tej kev qias tsis huv ntawm lub thaj kom dawb huv puv xya hnub thiaj muab pub tau ua Yawmsaub tus. Thaum lawv ua tej no tiav tag lawm, mas txij hnub yim mus cov pov thawj yuav xyeem tej uas nej coj tuaj ua kevcai hlawv xyeem thiab tej uas nej coj tuaj ua kevcai xyeem sib raug zoo rau saum lub thaj no, mas kuv thiaj li txais yuav nej. Vajtswv Yawmsaub hais li no ntag.” Mas nws coj kuv rov los rau ntawm lub tshav puam tuam tsev sab nraud ntawm lub rooj loog uas nyob sab hnub tuaj. Lub rooj loog ntawd kaw qas nrees. Thiab nws hais rau kuv tias, “Lub rooj loog no yuav kaw mus li, yuav tsis kheev qheb thiab yuav tsis muaj leejtwg nkag mus li, rau qhov Yawmsaub, uas yog Yixayee tus Vajtswv twb mus lub rooj loog no rau hauv lawm. Vim li no thiaj muab kaw mus li. Tsuas yog tus thawj thiaj tau nyob ntawm lub rooj loog no noj tej nqaij no rau ntawm Yawmsaub lub xubntiag. Nws yuav nkag lub qab khav ntawm lub rooj loog ntawd rau hauv thiab tawm tib txojkev ntawd mus.” Thiab nws coj kuv mus hla lub rooj loog sab ped mus rau sab nraud ntawm lub tuam tsev hauv ntej. Kuv tsa muag ntsia ua ciav Yawmsaub lub hwjchim ci ntsa iab puv nkaus hauv Yawmsaub lub tuam tsev, kuv thiaj khwb nkaus ua lub plhu ti nkaus av. Mas Yawmsaub hais rau kuv tias, “Neeg tus tub, cia tsa koj lub qhov muag saib thiab tig koj lub qhov ntsej mloog thiab ua tib zoo khaws txhua yam uas kuv yuav qhia koj txog tej kab ke thiab tej kevcai huvsi uas siv rau hauv Yawmsaub lub tuam tsev, thiab ua tib zoo saib qhov uas nkag los rau hauv lub tuam tsev thiab qhov uas tawm hauv lub chaw pe hawm kuv mus. Cia li hais rau haiv neeg Yixayee uas pheej fav xeeb tias, ‘Vajtswv Yawmsaub hais li no tias, Cov Yixayee 'e, nej cia li ua rau nej tej kev qias vuab tsuab ploj ntais mus, yog qhov uas nej kheev lwm haiv neeg uas tsis ua kevcai txiav ntawm lub siab thiab ntawm cev nqaij nkag los rau hauv qhov chaw uas pe kuv thiaj ua rau kuv lub chaw qias puas tsuas, rau thaum uas nej xyeem qhov txhia chaw noj rau kuv, yog tej roj thiab ntshav. Nej twb rhuav tshem kuv tej lus cog tseg vim yog tim nej tej kev qias vuab tsuab huvsi. Thiab nej tsis tau saib xyuas thiab tu tej uas dawb huv rau kuv, tiamsis nej tsa lwm haiv neeg nyob nej chaw saib xyuas thiab tu qhov chaw uas pe hawm kuv. “ ‘Vim li no, Vajtswv Yawmsaub hais li no tias, Lwm haiv neeg uas tsis ua kevcai txiav ntawm lub siab thiab ntawm cev nqaij, yog lwm haiv neeg huvsi uas nrog cov Yixayee nyob, tsis pub ib tug twg mus rau hauv qhov chaw uas pe hawm kuv. Tiamsis cov Levi uas khiav deb ntawm kuv, yuam kev mus raws ncuj nciav lawv tej dab mlom rau thaum cov Yixayee yuam kev ntawd, mas cov Levi yuav tau ris lawv lub txim. Lawv yuav ua koom tu kuv rau hauv qhov chaw uas pe kuv. Lawv yuav zov tej qhov rooj ntawm lub tuam tsev thiab ua haujlwm hauv lub tuam tsev. Lawv yuav tua tej tsiaj uas cov pejxeem coj tuaj ua kevcai xyeem thiab ua kevcai hlawv xyeem. Lawv yuav tos nrhw cov pejxeem thiab ua haujlwm rau lawv. Vim lawv twb coj cov pejxeem pe lawv tej dab mlom thiab lawv ua rau cov Yixayee dawm ntog rau txojkev ua txhaum, vim li no kuv cog lus tawv txog lawv tias lawv yuav tau ris lawv lub txim. Vajtswv Yawmsaub hais li no ntag. Tsis kheev lawv txav los ze kuv tuaj ua pov thawj tej haujlwm ua koom tu kuv lawm, thiab tsis kheev lawv tuaj ze tej uas dawb huv rau kuv thiab tej uas dawb huv kawg nkaus. Lawv yuav raug txaj muag vim tej kev qias vuab tsuab uas lawv tau ua lawm. Txawm li ntawd los kuv tsa lawv saib xyuas thiab tu lub tuam tsev thiab ua txhua yam haujlwm uas yuav tsum ua hauv lub tuam tsev. “ ‘Tiamsis cov pov thawj uas yog xeem Levi uas yog Xadau caj ces, yog cov uas tseem saib xyuas thiab tu qhov chaw uas pe kuv rau thaum cov Yixayee yuam kev ntawm kuv lawm, kheev lawv txav los ze kuv ua koom tu kuv, thiab tos nrhw ua kuv tej haujlwm uas yuav xyeem tej roj thiab ntshav rau kuv. Vajtswv Yawmsaub hais li no ntag. Lawv tuaj tau rau hauv qhov chaw uas pe kuv thiab txav los ze kuv lub rooj ua koom tu kuv, thiab lawv yuav ua raws li tej kevcai uas kuv hais cia lawm. Thaum lawv nkag lub qhov rooj los rau hauv lub tshav puam sab hauv, lawv yuav hnav tsoos tsho ntaub mag. Lawv tsis txhob hnav ib yam uas muaj plaub yaj kiag li rau thaum lawv ua haujlwm ntawm qhov rooj lub tshav puam sab hauv thiab nyob sab hauv. Lawv yuav ntoo phuam ntaub mag saum taubhau thiab hnav ris ntaub mag luv rau ntawm duav. Lawv tsis txhob muab dabtsi los npua lub cev kom nto hws. Thaum lawv tawm mus cuag cov pejxeem rau lub tshav puam sab nraud, lawv yuav hle tej tsoos tsho uas ua haujlwm thiab muab cia rau hauv chav uas dawb huv li hnav dua lwm cev tsoos tsho tawm mus, tsam ces lawv tej tsoos tsho dawb huv ho mus rhuav tshem cov pejxeem. “ ‘Lawv tsis txhob chais plaubhau do cuas thiab tsis txhob tseg plaubhau ntev. Lawv yuav txiav kom hum rau saum taubhau xwb. Thaum tus pov thawj twg mus rau hauv lub tshav puam sab hauv, tsis txhob haus cawv txiv hmab li. Lawv tsis txhob yuav tej poj ntsuam lossis tej poj nrauj ua pojniam, cia lawv yuav tej hluas nkauj uas tsis tau deev hluas nraug uas yog Yixayee caj ces, lossis tej poj ntsuam pov thawj xwb. Lawv yuav qhuab qhia kuv cov neeg paub txog tej uas dawb huv thiab tej uas tsis dawb huv txawv li cas, thiab qhia rau lawv txawj pom tias yam twg qias tsis huv yam twg huv. Yog muaj plaub muaj ntug lawv yuav ua tus uas tu plaub, thiab lawv yuav tu plaub raws li kuv txoj kevcai. Txhua zaus uas muaj tej kevcai noj haus uas kuv teem cia, lawv yuav ua raws li kuv tej kevcai thiab kuv tej kab ke, thiab lawv yuav tuav rawv kuv hnub Xanpatau kom dawb huv. Lawv tsis txhob mus ze tej tuag ua rau lawv qias puas tsuas. Tsuas yog lawv niam lawv txiv, lawv tus tub tus ntxhais, lossis ib tug kwvtij, lossis ib tug muam uas tsis muaj txiv, lawv thiaj mus ze ua qias puas tsuas tau. Thaum nws ua kevcai ntxuav tag lawm nws yuav caiv xya hnub. Hnub uas nws nkag mus rau hauv lub chaw pe kuv ntawm lub tshav puam sab hauv, yog mus ua haujlwm rau hauv lub chaw uas dawb huv, nws yuav tsum ua kevcai xyeem daws nws lub txim. Vajtswv Yawmsaub hais li no ntag. “ ‘Lawv yuav tsis muaj qub txeeg qub teg, kuv yuav ua lawv li qub txeeg qub teg. Nej tsis txhob tu teb rau lawv ua lawv tug hauv Yixayee tebchaws, kuv yog lawv tug. Lawv yuav noj tej qoob loo uas muab xyeem, thiab tej tsiaj uas muab xyeem daws txim thiab tej uas xyeem ntxuav kev txaug kev txhaum, thiab txhua yam uas muab cais pub rau Yawmsaub hauv Yixayee tebchaws mas yog lawv li feem. Thiab thawj phaum txiv ntoo txhua yam uas zoo kawg nkaus, thiab txhua yam uas nej coj tuaj xyeem, yog cov pov thawj li feem. Nej yuav muab nej thawj phaum hmoov qeb hmoov mog rau cov pov thawj, kom thiaj muaj koob hmoov rau nej tsev neeg. Cov pov thawj yuav tsis noj tej nqaij uas nws tuag nws lossis lwm tus tsiaj tom tuag, tsis hais noog thiab tsiaj txhu.’ ” “ ‘Thaum koj faib tebchaws rau lawv ua lawv tug, koj yuav rho ib thaj av ntev ob vam tsib txhiab tshim dav ob vam tshim pub rau Yawmsaub ua thaj uas dawb huv. Yuav dawb huv thoob plaws thaj ntawd. Hauv thaj no yuav muab tu ib thaj xwm fab xwm meem ntev tsib puas tshim dav tsib puas tshim ua qhov chaw uas pe kuv, tseg sab nraud dav tsib caug tshim thoob plaws ib ncig. Thaj uas dawb huv ntawd koj yuav ntsuas ib thaj ntev ob vam tsib txhiab tshim, dav ib vam tshim, mas lub chaw pe kuv yuav nyob hauv nruab nrab thaj no, yog lub chaw uas dawb huv kawg nkaus. Thaj ntawd yog thaj uas dawb huv hauv lub tebchaws, yog cov pov thawj uas ua haujlwm hauv lub chaw pe Yawmsaub thiab tuaj ua num rau ntawm Yawmsaub lub xubntiag li chaw, ua lub chaw uas lawv ua vaj ua tsev thiab yog thaj dawb huv rau lub chaw pe kuv. Thiab muaj dua ib thaj ntev ob vam tsib txhiab tshim dav ib vam tshim ua cov Levi uas ua haujlwm rau hauv lub tuam tsev li tug uas yuav ua tsev ua moos nyob. “ ‘Ti nkaus thaj av uas tu ua thaj dawb huv ntawd, koj yuav tseg ib thaj dav tsib txhiab tshim ntev ob vam tsib txhiab tshim ua lub nroog, yog cov Yixayee sawvdaws li tug. “ ‘Ob thaj av uas nyob ob sab ntawm thaj uas dawb huv thiab ob sab ntawm thaj uas yog lub nroog li, yog tus thawj li tug, yog thaj uas npuas thaj uas dawb huv thiab npuas lub nroog sab hnub poob thiab thaj uas npuas sab hnub tuaj, ntev mus txog ntua sab hnub poob ciam teb thiab ntev mus txog ntua sab hnub tuaj ciam teb, npaum li uas ib thaj uas tu rau ib lub xeem. Ob thaj no yuav ua tus thawj li tug, xwv kuv cov thawj thiaj tsis quab yuam kuv haiv neeg dua li lawm, tiamsis lawv yuav tsum cia cov Yixayee tau lub tebchaws ua lawv tug raws li lawv xeem. “ ‘Vajtswv Yawmsaub hais li no tias, Yixayee cov thawj 'e, cia li txaus los maj. Cia li tso kev ua nruj ua tsiv thiab kev quab yuam tseg es txiav txim ncaj thiab ua ncaj ncees. Cia li tseg qhov uas ntiab kuv haiv neeg tawm hauv lawv thaj av mus. Vajtswv Yawmsaub hais li no ntag. Nej yuav tsum muaj rab teev ncaj thiab efa thiab npa ncaj. Efa thiab npa yuav tsum luj sib luag zos, ib haumaw muaj kaum npa, ib haumaw kuj muaj kaum efa, haumaw yuav tsum yog lub thoob luj uas ruaj khov. Ib sekhee yuav tsum muaj nees nkaum kela, thiab nej li ib mina yuav tsum muaj rau caum sekhee. “ ‘Ntawm no yog tej uas nej yuav tsum muab xyeem. Ib haumaw mog yuav muab ib feem hauv rau caum pub, ib haumaw qeb yuav muab ib feem hauv rau caum pub. Tej roj uas yuav tsum xyeem, mas ib khaula yuav pub ib feem hauv ib puas, (ib khaula muaj kaum npa, ib yam li ib haumaw muaj kaum efa). Ob puas tus yaj kuj muab ib tug xyeem. Txhua yim Yixayee yuav ua li no. No yog tej uas muab xyeem ua kevcai xyeem qoob loo, thiab tej uas ua kevcai hlawv xyeem thiab tej uas ua kevcai xyeem sib raug zoo, kom thiaj li ntxuav tau lawv kev txhaum txim. Vajtswv Yawmsaub hais li no ntag. Tej pejxeem sawvdaws hauv lub tebchaws yuav pub tej no rau Yixayee tus thawj. Tus thawj yog tus uas yuav tsum npaj tej uas hlawv xyeem thiab tej qoob loo uas xyeem thiab tej cawv txiv hmab xyeem rau thaum uas ua tej kevcai teem tseg, thiab thaum hli xiab thiab hnub Xanpatau, yog txhua txoj kevcai uas teem cia rau cov Yixayee ua. Nws yuav tsum npaj tej uas ua kevcai xyeem daws txim thiab tej qoob loo xyeem thiab tej uas hlawv xyeem thiab tej uas ua kevcai xyeem sib raug zoo, kom thiaj ntxuav tau cov Yixayee tej kev txhaum txim. “ ‘Vajtswv Yawmsaub hais li no tias, Hnub xiab ib lub ib hlis koj yuav tsum muab ib tug thav nyuj uas tsis muaj chaw thuam li, thiab koj yuav ua kevcai ntxuav qhov chaw uas pe kuv. Tus pov thawj yuav muab tus tsiaj uas xyeem daws txim tej ntshav ib qho los pleev tej npuab rooj ntawm lub tuam tsev thiab pleev plaub lub kaum thaj thiab pleev tej npuab rooj ntawm tej qhov rooj uas mus rau hauv lub tshav puam sab hauv. Hnub xiab xya lub hli ntawd koj yuav tsum ua ib yam li ntawd rau ib tug twg uas tsis paub es yuam kev mus ua txhaum, kom thiaj ntxuav tau tej kev phem kev qias hauv lub tuam tsev. “ ‘Lub ib hlis hnub xiab kaum plaub, nej yuav tsum ua kevcai Hla Dhau thiab noj tej ncuav uas tsis xyaw keeb kom tag xya hnub. Hnub ntawd tus thawj yuav muab ib tug thav nyuj los ua kevcai daws nws thiab cov pejxeem sawvdaws hauv lub tebchaws li txim. Thiab xya hnub uas ua kevcai Hla Dhau ntawd, nws yuav npaj xya tus thav nyuj thiab xya tus txiv yaj uas tsis muaj chaw thuam li los ua kevcai hlawv xyeem rau Yawmsaub txhua hnub, thiab npaj ib tug txiv tshis los ua kevcai xyeem daws txim txhua hnub kom puv xya hnub. Nws yuav npaj tej hmoov uas ua kevcai xyeem qoob loo los, ib efa nrog ib tug thav nyuj thiab ib efa nrog ib tug txiv yaj, thiab ib hee roj nrog ib efa hmoov. Lub xya hli hnub xiab kaum tsib uas ua kevcai nyob tsev pheeb suab, nws yuav npaj ib yam nkaus li ntawd kom puv xya hnub, yuav npaj tej uas ua kevcai xyeem daws txim thiab tej uas hlawv xyeem thiab tej uas ua kevcai xyeem qoob loo thiab tej roj.’ ” “ ‘Vajtswv Yawmsaub hais li no tias, Lub qhov rooj tshav puam sab hauv uas tig rau sab hnub tuaj yuav muab kaw rau rau hnub uas ua haujlwm, mas hnub Xanpatau yuav muab qheb thiab thaum hli xiab kuj muab qheb. Tus thawj yuav tuaj sab nraud tuaj rau ntawm zaj qab khav lub qhov rooj sab hauv, thiab los sawv rau ntawm tej npuab rooj. Tej uas nws coj tuaj ua kevcai hlawv xyeem thiab ua kevcai xyeem sib raug zoo mas cov pov thawj yuav muab xyeem. Nws yuav pe hawm Yawmsaub ntawm lub taw rooj, nws li tawm mus, tiamsis yuav tsis kaw lub qhov rooj mus txog thaum tsaus ntuj. Cov pejxeem yuav pe hawm Yawmsaub ntawm txojkev uas mus rau hauv lub qhov rooj ntawd rau hnub Xanpatau thiab hnub hli xiab. Tej uas tus thawj muab ua kevcai hlawv xyeem rau Yawmsaub rau hnub Xanpatau yog rau tus menyuam yaj uas tsis muaj chaw thuam li thiab ib tug txiv yaj uas tsis muaj chaw thuam li. Tej uas muab xyeem ua kevcai xyeem qoob loo nrog tus txiv yaj ntawd yog ib efa hmoov, tej uas muab xyeem nrog cov menyuam yaj ntawd yog npaum li uas nws pub tau, thiab yuav muab ib hee roj nrog ib efa hmoov. Thaum hli xiab nws yuav xyeem ib tug thav nyuj uas tsis muaj chaw thuam thiab rau tus menyuam yaj thiab ib tug txiv yaj uas tsis muaj chaw thuam li. Tej uas nws muab ua kevcai xyeem qoob loo yuav muab ib efa hmoov nrog tus thav nyuj thiab ib efa hmoov nrog tus txiv yaj, thiab nrog cov menyuam yaj npaum li uas nws pub tau, thiab yuav muab ib hee roj nrog ib efa hmoov. Thaum tus thawj nkag los nws yuav nkag ntawm zaj qab khav lub qhov rooj, thiab tawm tib txojkev rov mus. “ ‘Thaum cov pejxeem tuaj rau ntawm Yawmsaub lub xubntiag tuaj ua kevcai raws li uas teem tseg, tus uas nkag lub rooj loog sab ped los yuav tsum tawm lub rooj loog sab nrad mus, thiab tus uas nkag lub rooj loog sab nrad los yuav tsum tawm lub rooj loog sab ped mus. Tsis txhob kheev leejtwg tawm lub rooj loog uas nws nkag los mus, tiamsis txhua tus yuav tawm ncaj nraim mus. Thaum cov pejxeem nkag mus tus thawj yuav nkag nrog lawv ua ke mus, thiab thaum lawv tawm mus, nws kuj yuav tsum tawm mus thiab. “ ‘Tej qoob loo uas coj tuaj ua kevcai xyeem rau tej kevcai thiab tej sijhawm uas teem cia, mas yuav muab ib efa hmoov nrog ib tug thav txiv nyuj, thiab ib efa nrog ib tug txiv yaj thiab nrog cov menyuam yaj npaum li uas yus pub tau, thiab yuav muab ib hee roj nrog ib efa hmoov. Thaum tus thawj coj tej uas nws zoo siab muab xyeem pub xwb, tsis hais ua kevcai hlawv xyeem thiab ua kevcai xyeem sib raug zoo uas nws zoo siab pub xyeem rau Yawmsaub, mas yuav muab lub rooj loog uas tig rau sab hnub tuaj qheb rau nws, thiab nws yuav xyeem tej uas nws coj tuaj ua kevcai hlawv xyeem thiab ua kevcai xyeem sib raug zoo ib yam li nws ua rau hnub Xanpatau. Mas nws yuav tawm mus. Thaum nws tawm mus lawm, yuav kaw rooj loog. “ ‘Nws yuav npaj ib tug menyuam yaj uas hnub nyoog muaj ib xyoos tsis muaj chaw thuam li los ua kevcai hlawv xyeem rau Yawmsaub txhua hnub. Nws yuav npaj rau txhua tagkis. Thiab nws yuav npaj tej hmoov uas ua kevcai xyeem qoob loo ua ke rau txhua tagkis, yuav muab ib feem rau hauv ib efa hmoov, thiab muab roj ib feem peb hauv ib hee los xyaw cov hmoov, ua kevcai xyeem qoob loo rau Yawmsaub. No yog txoj kevcai uas yuav siv mus ib txhis. Yog li no thiaj yuav npaj tus menyuam yaj thiab tej hmoov uas ua kevcai xyeem qoob loo thiab tej roj rau txhua tagkis, ua kevcai hlawv xyeem mus ib txhis. “ ‘Vajtswv Yawmsaub hais li no tias, Yog tus thawj muab nws qub txeeg qub teg ib qho pub rau nws tej tub, mas yam ntawd yuav ua lawv teej lawv tug, yuav ua qub txeeg qub teg rau lawv mus ib txhis. Tiamsis yog nws muab nws qub txeeg qub teg ib qho pub rau nws ib tug tub qhe, yam ntawd yuav ua nws teej tug mus txog xyoo uas tso nws nyob ywj pheej, mas xyoo ntawd tej ntawd yuav thim rov mus ua tus thawj teej tug. Tsuas yog tus thawj cov tub thiaj tuav tau tej uas leej txiv pub rau lawv mus ib txhis li xwb. Tus thawj tsis txhob txeeb tej pejxeem qub txeeg qub teg ib qho li es muab lawv ntiab tawm ntawm tej uas yog lawv teej lawv tug mus. Nws yuav tsum muab nws teej nws tug pub ua qub txeeg qub teg rau nws cov tub ntag, xwv kuv cov neeg thiaj tsis muaj ib tug twg raug ntiab tawm hauv nws teej nws tug mus.’ ” Nws coj kuv taug txojkev ntawm ib sab qhov rooj los rau hauv cov pov thawj tej chav uas dawb huv sab ped, mas qhov ntawd kuv pom ib qho chaw uas yog chav kawg nkaus rau sab hnub poob. Mas nws hais rau kuv tias, “No yog qhov chaw uas cov pov thawj hau tej nqaij uas xyeem ntxuav kev txhaum thiab tej uas xyeem daws txim, thiab yog qhov chaw uas lawv yuav ci tej ncuav uas ua kevcai xyeem qoob loo, xwv thiaj tsis coj tawm mus rau lub tshav puam sab nraud mas tej uas dawb huv thiaj tsis rhuav tshem cov pejxeem.” Mas nws coj kuv tawm mus rau lub tshav puam sab nraud, thiab coj kuv mus txog plaub lub kaum tshav puam ntawd, mas txhua lub kaum ntawd muaj ib lub tshav puam. Ntawm plaub lub kaum tshav puam ntawd muaj ib lub tshav puam me me, ntev plaub caug tshim dav peb caug tshim, plaub lub tshav puam ntawd sib luag ib yam nkaus. Hauv plaub lub nrog tshav puam ntawd muaj thwv cib tib ua ib zaj, thiab ua qhov txos rau hauv qab thoob plaws ib ncig. Mas nws hais rau kuv tias, “No yog tej chaw hau nqaij, yog tej chaw uas cov uas ua haujlwm hauv lub tuam tsev yuav hau tej nqaij uas cov pejxeem coj tuaj xyeem.” Mas nws coj kuv rov los rau ntawm lub qhov rooj tuam tsev, ua ciav muaj dej ntws tawm hauv lub qab taw rooj tuam tsev mus rau sab hnub tuaj, rau qhov lub tuam tsev tig rau sab hnub tuaj. Dej ntws hauv lub qab taw rooj sab nrad mus rau ntawm lub thaj sab nrad. Nws coj kuv tawm mus lub qhov rooj sab ped, nws coj kuv mus sab nraud mus txog lub rooj loog sab nraud uas tig rau sab hnub tuaj, mas dej ntws ntawm rooj loog sab nrad mus. Tus txivneej ntawd mus rau sab hnub tuaj thiab tuav ib txoj hlua ntsuas hauv nws txhais tes. Nws ntsuas tau ib txhiab tshim thiab coj kuv hla dej mus, mas dej tob txij cos taw. Nws rov ntsuas tau dua ib txhiab tshim. Nws coj kuv hla dej mus mas dej tob txij hauv caug. Nws rov ntsuas tau dua ib txhiab tshim. Nws coj kuv hla dej mus, mas dej tob txij duav. Nws rov ntsuas tau dua ib txhiab tshim, mas ua ib tug niag dej hlob kuv hla tsis tau lawm, rau qhov dej hlob, tob heev txaus ua luam dej lawm, yog ib tug dej hlob hla tsis tau lawm. Mas nws hais rau kuv tias, “Neeg tus tub, koj pom tej no lov?” Ces nws txawm coj kuv rov qab taug ntug dej los. Thaum kuv rov qab los, kuv pom muaj ntoo ntau kawg ntawm ob sab ntug dej. Mas nws hais rau kuv tias, “Tus dej no ntws ncaj mus rau sab hnub tuaj thiab ntws mus txog Alanpa. Thaum tus dej ntws rau hauv Hiavtxwv Tuag mas tej dej hauv hiavtxwv cia li tsuag tsis daw ntsev lawm. Tus dej ntawd ntws mus rau qhovtwg mas yuav muaj txhua yam tsiaj coob coob ciaj sia nyob ua ib pab ib pab, thiab yuav muaj ntses ntau kawg, rau qhov tus dej ntws mus txog qhovtwg, dej hiavtxwv kuj tsuag rau qhov ntawd, tus dej mus txog qhovtwg txhua yam tsiaj yuav ciaj sia nyob. Cov uas muab ntses kuj yuav sawv ntsug ntawm ntug hiavtxwv. Txij ntawm lub moos Eekedi mus txog Ee‑ela‑i yuav ua chaw ziab vas. Tej ntses ntawd yuav muaj ntau yam, ib yam nkaus tej ntses hauv Hiavtxwv Loj. Tej qhov uas ua pas dej teev pas dej tuag dej yuav tsis tsuag, yuav tseg cia ua ntsev. Raws ob sab ntug dej yuav muaj txhua yam ntoo uas noj tau. Tej nplooj yuav tsis tuag tshav, thiab tej txiv yuav tsis txawj dua taw, yuav txi txiv tshiab txhua lub hlis vim yog tus dej uas yug tej txiv ntoo ntawd ntws tawm hauv lub chaw pe Yawmsaub los. Tej txiv ntoo ntawd noj tau, tej nplooj kuj yog tshuaj kho mob.” Vajtswv Yawmsaub hais li no tias, “No yog tej ciam teb uas nej yuav faib tebchaws ua qub txeeg qub teg rau kaum ob xeem Yixayee. Xeem Yauxej yuav tau ob feem. Nej yuav faib sib npaug zos. Kuv cog lus tias kuv yuav muab rau nej tej poj koob yawm txwv thiab lub tebchaws no yuav poob rau nej ua nej qub txeeg qub teg. “No yog tej ciam teb hauv lub tebchaws no. Sab ped mas txij ntua Hiavtxwv Loj mus txog lub moos Heloo mus txog txojkev uas mus rau lub moos Hama, thiab mus txog lub moos Xeda, lub moos Npelautha, lub moos Xila‑i uas nyob ntawm lub nroog Damaxaka thiab Hama ciam teb, mus txog lub moos Haxawhathikhoo uas nyob ntawm Haulas tebchaws ciam teb. Yog li no tus ciam teb yuav txij ntua hiavtxwv mus txog lub moos Haxa‑enoo uas nyob ntawm Damaxaka ciam teb sab ped, thiab sab ped yog npuas lub moos Hama ciam teb. No yog ciam teb sab ped. “Ciam teb sab hnub tuaj txij ntua lub moos Haxa‑enoo thiab mus rau nram Damaxaka thiab tebchaws Haulas ntu nruab nrab, raws tus dej Yaladee uas quas Kile‑a tebchaws thiab Yixayee tebchaws mus txog hiavtxwv sab hnub tuaj mus txog lub moos Thama. No yog ciam teb sab hnub tuaj. “Ciam teb sab nrad txij ntua lub moos Thama mus txog lub pas dej Melinpa Khade, thiab raws tus dej Iyi mus txog Hiavtxwv Loj. No yog ciam teb sab nrad. “Sab hnub poob mas Hiavtxwv Loj yog ciam teb mus txog ped uas ncaj txojkev mus rau lub moos Hama. No yog ciam teb sab hnub poob. “Yog li no nej yuav faib lub tebchaws rau nej txhua xeem Yixayee. Nej yuav faib lub tebchaws ua qub txeeg qub teg rau nej thiab rau lwm haiv neeg uas nrog nej nyob thiab yug menyuam rau hauv nej lawm. Nej yuav suav tias lawv yog neeg Yixayee, lawv yuav nrog nej xeem Yixayee muaj feem tau lub tebchaws ua qub txeeg qub teg. Lwm haiv neeg yuav nrog xeem twg nyob kuj tau, nej cia li faib teb ua qub txeeg qub teg rau nws qhov ntawd. Vajtswv Yawmsaub hais li no ntag.” “Ntawm no mus yog txhua xeem lub npe. Pib ntawm ciam teb sab ped, txij ntua hiavtxwv txog lub moos Heloo mus txog txojkev uas mus rau lub moos Hama, mus txog ntua Haxa‑enoo uas nyob ntawm Damaxaka ciam teb sab ped uas npuas tebchaws Hama, mas tu ib ntsug txij ntua sab hnub tuaj mus txog sab hnub poob rau xeem Daj, tu ib ntsug npuas xeem Daj txij sab hnub tuaj mus txog sab hnub poob rau xeem Asaw, tu ib ntsug npuas xeem Asaw txij sab hnub tuaj mus txog sab hnub poob rau xeem Nathali, tu ib ntsug npuas xeem Nathali txij sab hnub tuaj mus txog sab hnub poob rau xeem Manaxe, tu ib ntsug npuas xeem Manaxe txij sab hnub tuaj mus txog sab hnub poob rau xeem Efa‑i, tu ib ntsug npuas xeem Efa‑i txij sab hnub tuaj mus txog sab hnub poob rau xeem Lunpee, tu ib ntsug npuas xeem Lunpee txij sab hnub tuaj mus txog sab hnub poob rau xeem Yuda. “Tu ib ntsug npuas xeem Yuda txij sab hnub tuaj mus txog sab hnub poob, cia nyob rau ib cag, dav ob vam tsib txhiab tshim, qhov ntev mas npaum li lwm xeem li txij sab hnub tuaj mus txog sab hnub poob, mas qhov chaw uas pe Yawmsaub yuav nyob hauv nruab nrab tebchaws ntawd. Thaj uas nej yuav muab rho pub rau Yawmsaub mas ntev ob vam tsib txhiab tshim, dav ob vam tshim. Thaj uas dawb huv yuav faib li no. Cov pov thawj yuav tau ib thaj uas sab ped ntev ob vam tsib txhiab tshim, sab hnub poob dav ib vam tshim, sab hnub tuaj dav ib vam tshim, sab nrad ntev ob vam tsib txhiab tshim, mas lub chaw pe Yawmsaub nyob hauv nruab nrab. Thaj no yog muab rau cov pov thawj uas tu kom lawv dawb huv, yog Xadau caj ces, yog cov uas tseem ua raws li tej kevcai uas kuv hais cia thiab tsis yuam kev rau thaum cov Yixayee yuam kev ntawm kuv lawm ib yam li cov Levi yuam kev. Thaj no yuav ua lawv tug, yog ib feem tseem ceeb hauv thaj uas dawb huv rau hauv lub tebchaws, yog lub chaw dawb huv kawg nkaus, mas nyob npuas cov Levi thaj. Cov Levi yuav tau thaj uas npuas cov pov thawj ntawd, yog ntev ob vam tsib txhiab tshim, dav ib vam tshim. Qhov ntev huvsi yog ob vam tsib txhiab tshim, qhov dav ob vam tshim. Lawv tsis txhob muab muag lossis muab pauv ib qho kiag li. Lawv tsis txhob cia lwm tus tau thaj av zoo no kiag li, rau qhov yog thaj uas dawb huv rau Yawmsaub. “Thaj uas tseem tshuav ntawd, yog dav tsib txhiab tshim, ntev ob vam tsib txhiab tshim, yuav muab rau lub nroog siv ua vaj ua tsev thiab ua tshav zaub. Lub nroog yuav nyob hauv nruab nrab thaj ntawd. No yog lub nroog qhov uas ntev thiab dav li cas. Sab ped yog plaub txhiab tsib puas tshim, sab nrad yog plaub txhiab tsib puas tshim, sab hnub tuaj yog plaub txhiab tsib puas tshim, thiab sab hnub poob kuj yog plaub txhiab tsib puas tshim. Ib ncig nraum lub nroog yuav tseg muaj tshav zaub, sab ped ob puas tsib caug tshim, sab nrad ob puas tsib caug tshim, sab hnub tuaj ob puas tsib caug tshim, thiab sab hnub poob ob puas tsib caug tshim. Thaj uas tseem tshuav npuas ntawm thaj chaw uas dawb huv, sab hnub tuaj ntev ib vam tshim sab hnub poob ntev ib vam tshim, nyob npuas thaj chaw uas dawb huv. Tej qoob loo uas tau hauv thaj teb no yuav muab rau cov uas ua haujlwm hauv lub nroog noj. Cov neeg uas ua haujlwm hauv lub nroog uas tuaj hauv txhua xeem Yixayee yuav tsum ua thaj teb no. Tag nrho thaj uas nej muab rho faib ntawd yog ib sab ob vam tsib txhiab tshim xwm fab xwm meem, yeej yog thaj uas dawb huv thiab thaj uas yog lub nroog li ua ke. “Ob thaj uas tseem tshuav nyob ob sab ntawm thaj uas dawb huv thiab thaj uas yog lub nroog li yuav muab ua tus thawj li feem. Txij ntawm thaj uas dawb huv uas muaj ob vam tsib txhiab tshim mus txog tus ciam teb sab hnub tuaj thiab txij ntua thaj uas dawb huv uas muaj ob vam tsib txhiab tshim mus txog tus ciam teb sab hnub poob, uas npuas lwm xeem li rau ob sab, yog tus thawj li feem. Thaj uas dawb huv thiab lub tuam tsev uas pe hawm Yawmsaub nyob hauv nruab nrab. Cov Levi thaj thiab thaj uas yog lub nroog li yuav nyob hauv nruab nrab thaj uas yog tus thawj li. Tus thawj thaj nyob hauv xeem Yuda thiab xeem Npeeyamee ntu nruab nrab. “Xeem uas tseem tshuav yuav tu ib ntsug txij ntua sab hnub tuaj mus txog sab hnub poob rau xeem Npeeyamee, tu ib ntsug npuas xeem Npeeyamee txij sab hnub tuaj mus txog sab hnub poob rau xeem Xime‑oo, tu ib ntsug npuas xeem Xime‑oo txij sab hnub tuaj mus txog sab hnub poob rau xeem Ixakha, tu ib ntsug npuas xeem Ixakha txij sab hnub tuaj mus txog sab hnub poob rau xeem Xenpuloo, tu ib ntsug npuas xeem Xenpuloo txij sab hnub tuaj mus txog sab hnub poob rau xeem Kas. Kas ciam teb sab nrad yog txij ntua lub moos Thama mus txog lub pas dej Melinpa Khade, thiab raws tus dej Iyi mus txog Hiavtxwv Loj. No yog lub tebchaws uas nej yuav muab faib ua qub txeeg qub teg rau txhua xeem Yixayee, thiab lawv nyias muaj nyias feem raws li hais no.” Vajtswv Yawmsaub hais li no ntag. “No yog tej ncauj kev tawm hauv lub nroog. Sab ped uas ntsuas tau plaub txhiab tsib puas tshim muaj peb lub rooj loog tis npe hu li no, yog rooj loog Lunpee, rooj loog Yuda thiab rooj loog Levi, tej rooj loog puag ncig lub nroog ntawd tis npe raws li cov xeem Yixayee. Sab hnub tuaj uas ntsuas tau plaub txhiab tsib puas tshim muaj peb lub rooj loog, yog rooj loog Yauxej, rooj loog Npeeyamee thiab rooj loog Daj. Sab nrad uas ntsuas tau plaub txhiab tsib puas tshim muaj peb lub rooj loog, yog rooj loog Xime‑oo, rooj loog Ixakha thiab rooj loog Xenpuloo. Sab hnub poob uas ntsuas tau plaub txhiab tsib puas tshim muaj peb lub rooj loog, yog rooj loog Kas, rooj loog Asaw thiab rooj loog Nathali. “Ntsuas puag ncig lub nroog ntawd los cob nkaus mas muaj ib vam yim txhiab tshim. Txij no mus lub nroog yuav muaj npe hu ua Yawmsaub nyob qhov ntawd.” Xyoo peb uas Yehauyakhi ua vajntxwv kav Yuda tebchaws, vajntxwv Nenpukhanexa hauv Npanpiloo tuaj vij ntaus lub nroog Yeluxalees. Mas tus Tswv muab Yuda tus vajntxwv Yehauyakhi thiab tej twj siv hauv Vajtswv lub tuam tsev qee yam cob rau hauv Nenpukhanexa txhais tes, ces nws txawm coj tej ntawd los rau hauv Sina tebchaws muab cia rau hauv nws tus dab lub txhab nyiaj. Vajntxwv txawm hais rau Apena uas yog nws tus thawj nraug sam kom coj cov Yixayee qee leej, yog tej noob vajntxwv thiab cov uas ua hlob los, yog cov hluas uas tsis muaj chaw thuam, zoo nraug ntxiag thiab muaj tswvyim, txawj paub thiab txawj nkag siab txhua yam uas muaj peevxwm ua tau haujlwm hauv vajntxwv lub tsev, mas nws yuav tsum qhia lawv paub cov Kheedia li ntawv thiab paub lus. Vajntxwv niaj hnub kom muab cov zaub mov zoo zoo uas vajntxwv noj thiab tej cawv txiv hmab uas nws haus rau lawv raws li uas teem tseg. Nws kom lawv kawm txuj ci tau peb xyoos, mas thaum puv sijhawm lawd lawv yuav tsum ua vajntxwv li haujlwm. Hauv lawv cov ntawd muaj Daniyee, Hananiya, Misa‑ee thiab Axaliya uas yog xeem Yuda. Tus thawj nraug sam tis dua npe tshiab rau lawv. Daniyee mas hu ua Npeethesaxa, Hananiya hu ua Salab, Misa‑ee hu ua Mesa, thiab Axaliya hu ua Anpenekau. Daniyee txiav txim siab tias nws yuav tsis cia vajntxwv tej zaub mov zoo thiab tej cawv txiv hmab uas vajntxwv haus ua rau nws lub cev qias puas tsuas. Vim li ntawd nws thiaj thov tus thawj nraug sam kom yeem tsis txhob cia Daniyee ua rau nws qias puas tsuas. Vajtswv kuj ua rau tus thawj nraug sam hlub thiab khuvleej Daniyee. Tus thawj nraug sam thiaj hais rau Daniyee tias, “Ntshai tsam vajntxwv uas yog kuv tus tswv uas tu tej zaub mov thiab cawv rau nej, pom tias nej lub cev tsis puv li cov hluas uas hnub nyoog nrog nej ib phaum. Ces nej kuj yuav ua rau vajntxwv muab kuv lub taubhau txiav pov tseg.” Mas Daniyee thiaj hais rau tus uas tus thawj nraug sam tsa los saib xyuas Daniyee, Hananiya, Misa‑ee thiab Axaliya tias, “Thov koj sim peb uas yog koj cov tub qhe kaum hnub. Cia li muab zaub thiab dej rau peb noj thiab haus xwb, es koj li tshuaj saib peb lub cev piv rau cov hluas uas noj vajntxwv tej zaub mov zoo ntawd, mas ua rau peb uas yog koj cov tub qhe raws li koj pom tias peb zoo li cas lawm” Tus uas saib xyuas lawv kuj yeem ua raws li lawv hais ntawd thiab sim lawv kaum hnub. Thaum puv kaum hnub lawd, thiaj pom tias lawv lub cev zoo dua thiab puv dua txhua tus hluas uas noj vajntxwv tej zaub mov zoo. Tus uas saib xyuas lawv thiaj rho tej zaub mov zoo thiab tej cawv uas tu rau lawv haus mus lawm, muab zaub rau lawv noj xwb. Plaub tug hluas ntawd, mas Vajtswv pub kev txawj ntse rau lawv thiab pub kom lawv txawj ntaub txawj ntawv thiab paub txhua yam tswvyim. Thiab Daniyee kuj nkag siab tej uas ua yog toog thiab ua npau suav txhua yam. Thaum tag sijhawm uas vajntxwv teem cia kom coj lawv tuaj cuag nws, tus thawj nraug sam thiaj coj lawv los rau ntawm Nenpukhanexa lub xubntiag. Vajntxwv thiaj li nrog lawv tham, mas tag nrho lawv sawvdaws tsis pom muaj ib tug uas zoo cuag li Daniyee, Hananiya, Misa‑ee thiab Axaliya. Lawv thiaj tau ua vajntxwv li haujlwm. Tsis hais txhua yam kev tswvyim thiab kev txawj ntse uas vajntxwv nug lawv mas nws pom tias lawv zoo dua tej txiv neeb txiv yaig thiab tej uas txawj ua khawv koob uas nyob hauv nws lub tebchaws kaum npaug. Daniyee kuj tau nyob li ntawd mus txog thawj xyoo uas Xailab ua vajntxwv. Xyoo ob uas Nenpukhanexa ua vajntxwv kav, Nenpukhanexa txawm ua npau suav mas nws ntxhov siab heev pw tsis tsaug zog. Vajntxwv thiaj hais kom hu cov txiv neeb txiv yaig thiab tej uas txawj ua khawv koob thiab cov uas txawj saib caij saib nyoog thiab cov Kheedia tuaj txhais vajntxwv tej npau suav rau nws. Lawv txawm nkag los sawv ntsug rau ntawm vajntxwv xubntiag. Mas vajntxwv hais rau lawv tias, “Kuv tau ua npau suav mas kuv ntxhov siab kawg xav paub zaj npau suav lub ntsiab.” Cov Kheedia thiaj hais rau vajntxwv tias, “Au vajntxwv, thov koj muaj txojsia nyob mus ib txhis. Thov koj piav koj zaj npau suav rau peb uas yog koj cov qhev mloog, mas peb yuav txhais lub ntsiab rau koj.” Vajntxwv teb cov Kheedia tias, “Kuv yeej hais tu nrho tias, yog nej tsis piav zaj npau suav thiab txhais lub ntsiab rau kuv, nej tej tes taw yuav raug muab dua tu pov tseg, thiab nej tej tsev yuav raug muab rhuav pob tag. Tiamsis yog nej piav zaj npau suav thiab txhais lub ntsiab rau kuv, kuv yuav pub tshav ntuj thiab nqe thiab koob meej loj rau nej. Yog li no, cia li piav zaj npau suav thiab txhais lub ntsiab rau kuv.” Lawv teb zaum ob hais tias, “Thov vajntxwv piav zaj npau suav rau peb mloog, mas peb yuav txhais lub ntsiab rau koj.” Vajntxwv teb tias, “Kuv paub tseeb tias nej yooj xeeb luab lim sijhawm xwb, vim nej pom tias kuv hais tu nrho tias, yog nej tsis piav zaj npau suav rau kuv, ces muaj tib lo lus txiav txim rau nej xwb. Nej yeej hais hum yuav hais lus dag thiab hais lus tsis tseeb rau kuv mus txog thaum txawv txav tsis thooj li kuv hais. Vim li no nej cia li hais zaj npau suav rau kuv, kuv thiaj paub tias nej txhais tau lub ntsiab thiab.” Cov Kheedia txawm teb vajntxwv tias, “Vajntxwv, thoob plaws hauv lub qab ntuj no yeej tsis muaj ib tug yuav ua tau raws li koj hais. Yeej tsis txeev muaj ib tug vajntxwv loj kawg uas muaj hwjchim thov li no ntawm cov txiv neeb txiv yaig, cov uas ua khawv koob yees siv thiab cov Kheedia. Tej uas koj thov ntawd nyuaj kawg, tsis muaj ib tug twg yuav piav tau rau koj tsuas yog tej timtswv uas tsis nrog neeg nyob thiaj qhia tau xwb.” Vim qhov no vajntxwv thiaj chim heev thiab npau taws ceev txawm hais kom muab cov neeg txawj ntse hauv Npanpiloo tua pov tseg huvsi. Muaj ntawv tshaj tawm kom tua cov neeg txawj ntse pov tseg, mas luag kuj mus nrhiav Daniyee thiab nws cov kwvluag yuav muab tua pov tseg. Daniyee txawm ua tib zoo hais tej lus txawj ntse teb Ali‑au uas ua thawj rog saib xyuas cov tub rog zov vajntxwv uas tawm mus tua cov neeg txawj ntse hauv Npanpiloo, thiab nws hais rau Ali‑au uas yog vajntxwv tus thawj rog tias, “Ua cas vajntxwv tsab ntawv yuav txiav txim hnyav ua luaj?” Ces Ali‑au kuj piav zaj ntawd rau Daniyee paub. Mas Daniyee thiaj nkag mus thiab thov vajntxwv pub sijhawm rau nws kom nws thiaj txhais tau zaj npau suav lub ntsiab rau vajntxwv. Ces Daniyee txawm rov los rau hauv nws tsev thiab qhia zaj ntawd rau nws cov kwvluag uas yog Hananiya thiab Misa‑ee thiab Axaliya mloog. Nws hais kom lawv thov Vajtswv ntuj txojkev khuvleej txog zaj uas tsis muaj leejtwg paub no, xwv Daniyee thiab nws cov kwvluag thiaj tsis nrog lwm tus neeg txawj ntse hauv Npanpiloo puam tsuaj. Mas zaj uas tsis muaj leejtwg paub ntawd raug muab qhia rau Daniyee ua yog toog hmo ntuj. Mas Daniyee thiaj qhuas Vajtswv ntuj. Daniyee hais tias “Cia li qhuas Vajtswv lub npe mus ib txhiab ib txhis, tswvyim thiab hwjchim loj kawg yog nws li. Nws hloov lub caij lub nyoog, nws hle tej vajntxwv thiab tsa tej vajntxwv tshiab. Nws pub tswvyim rau cov neeg txawj ntse, thiab pub kev paub rau cov uas txawj nkag siab. Nws qhia tej uas nyob tob tsis muaj leejtwg paub tshwm los, nws paub tej uas nyob hauv qhov tsaus ntuj. thiab qhov kaj nrog nraim nws nyob. Au kuv tej yawg koob tus Vajtswv, kuv ua koj tsaug thiab qhuas koj, vim yog koj pub tswvyim thiab pub zog rau kuv, thiab qhia yam uas peb thov rau kuv paub, rau qhov koj qhia vajntxwv zaj tshwm rau peb paub.” Ces Daniyee txawm mus cuag Ali‑au uas vajntxwv tau tsa kom muab cov neeg txawj ntse hauv Npanpiloo ua kom puam tsuaj. Nws nkag mus hais rau Ali‑au tias, “Thov tsis txhob ua kom cov neeg txawj ntse hauv Npanpiloo puam tsuaj tag. Cia li coj kuv mus cuag vajntxwv, kuv yuav txhais zaj npau suav rau vajntxwv.” Ces Ali‑au txawm maj nroos coj Daniyee mus cuag vajntxwv, thiab hais rau vajntxwv tias, “Kuv ntsib ib tug hauv cov neeg Yuda uas poob tebchaws uas txhais tau zaj npau suav rau vajntxwv paub.” Vajntxwv thiaj hais rau Daniyee uas muaj dua npe hu ua Npeethesaxa tias, “Koj muaj peevxwm piav zaj npau suav uas kuv pom ntawd thiab txhais lub ntsiab rau kuv paub lov?” Daniyee teb vajntxwv tias, “Tsis muaj ib tug tub txawj ntse, lossis ib tug txiv neeb txiv yaig lossis ib tug uas txawj ua khawv koob yees siv lossis ib tug uas txawj saib caij saib nyoog yuav qhia tau yam uas tsis muaj leejtwg paub rau vajntxwv. Tiamsis muaj ib tug Vajtswv uas nyob saum ntuj qhia yam uas tsis muaj leejtwg paub tshwm los, thiab nws qhia rau vajntxwv Nenpukhanexa paub txog tej uas yuav muaj tshwm los rau tom hauv ntej. Koj zaj npau suav thiab koj zaj yog toog uas koj pom hauv koj lub taubhau saum koj lub txaj pw yog li no. Au vajntxwv, thaum koj pw saum koj lub txaj, mas koj xav txog tej uas yuav tshwm los rau yav tom ntej, mas tus Vajtswv uas qhia tej uas tsis muaj leejtwg paub ntawd qhia tej uas yuav tshwm los rau koj. Qhov uas muab yam no uas tsis muaj leejtwg paub qhia tshwm rau kuv paub, tsis yog vim kuv muaj tswvyim ntau dua tej neeg uas tseem ciaj sia nyob sawvdaws, tiamsis yog qhia rau vajntxwv paub zaj npau suav lub ntsiab thiab paub txog tej uas koj xav cia hauv lub siab. “Au vajntxwv, koj tsa qhov muag saib mas pom muaj ib tug niag moj zeej loj loj. Tus moj zeej loj no muaj hwjchim heev ci nplas, nyob rau ntawm koj xubntiag thiab saib mas txaus ntshai kawg li. Tus moj zeej lub taubhau yog tseem kub, lub hauv siab thiab ob txhais npab yog nyiaj, lub plab thiab ob txhais ncej qab yog tooj liab, ob txhais ceg yog hlau, ob txhais taw yog hlau xyaw av nplaum. Thaum koj tabtom saib, txawm muaj ib lub pob zeb uas muab txam tsis yog neeg txhais tes txam, txawm dhia los raug tus moj zeej ntawd txhais kotaw uas yog av nplaum xyaw hlau thiab tsoo ua tawg tag ua tej dwb daim. Mas tej hlau, tej av nplaum, tej tooj liab, tej nyiaj thiab tej kub puavleej tawg ntsoog ntxaws ua tej dwb daim zoo li tej npluag hauv tshav ntaus qoob thaum lub caij ntuj kub, cua muab ntsawj ya tag lawm, tsis pom tshuav ib yam dabtsi kiag li. Tiamsis lub pob zeb uas tsoo tus moj zeej ntawd txawm loj zuj zus ua ib lub roob loj loj puv nkaus lub ntiajteb. “No yog koj zaj npau suav. Nimno peb yuav txhais lub ntsiab rau vajntxwv paub. Au vajntxwv, uas yog ib tsoom vajntxwv tus tuam vajntxwv, uas Vajtswv ntuj tau pub qhov uas kav tej tebchaws thiab pub hwjchim thiab zog thiab meej mom rau koj, thiab tau muab ib tsoom neeg thiab tsiaj qus thiab tej nas noog saum nruab ntug cob rau koj txhais tes tsis hais nyob qhovtwg kuj xij, muab rau koj kav tag nrho huvsi, mas lub taubhau kub ntawd yog koj ntag. Dhau koj lawm yuav muaj dua ib lub tebchaws kav uas qes dua koj, thiab tseem muaj dua lub tebchaws uas peb yog tooj liab uas yuav kav thoob plaws lub ntiajteb. Thiab yuav muaj lub tebchaws uas plaub muaj zog yam li hlau, rau qhov hlau yuav tsoo txhua yam lov tawg tag ua tej dwb daim. Thiab yuav muab lov thiab tsoo tej tebchaws ntawd ntsoog tag ib yam li hlau tsoo. Ib yam li koj pom txhais kotaw thiab cov ntiv taw ib qho yog av nplaum ib qho yog hlau, mas lub tebchaws ntawd yuav sib faib li ntawd. Tiamsis tseem muaj zog li hlau ib txhia, ib yam li koj pom hlau xyaw av nplaum ntawd. Ib yam li tej ntiv taw ib qho yog hlau ib qhov yog av nplaum, lub tebchaws ntawd ib qho yuav nplaum ib qho yuav nkig. Ib yam li koj pom hlau xyaw av nplaum, lub tebchaws yuav txuam tsoov ua tshoob ua kos tiamsis yuav tsis lo ua ke, ib yam li hlau tsis lo rau av nplaum. Ncua sijhawm uas tej vajntxwv ntawd nyob Vajtswv ntuj yuav tsa dua ib lub tebchaws uas tsis muaj ib hnub uas ua kom puam tsuaj li, lossis qhov uas kav lub tebchaws ntawd yuav tsis poob rau lwm haiv neeg. Lub tebchaws ntawd yuav ua rau tej tebchaws tawg ntsoog ntxaws ua tej dwb daim yaj tag, thiab lub tebchaws ntawd yuav nyob ruaj khov mus ib txhis, raws li uas koj pom lub pob zeb raug muab txam ntawm lub roob uas tsis yog neeg txhais tes txam, thiab lub pob zeb ua rau tej hlau, tej tooj liab, tej av nplaum, tej nyiaj thiab tej kub tawg ntsoog ua tej dwb daim. Tus Vajtswv loj kawg tau qhia vajntxwv paub tias yuav muaj dabtsi tshwm los rau yav tom ntej. Zaj npau suav no muaj tseeb thiab tej lus txhais lub ntsiab kuj tseeb tiag tiag li.” Vajntxwv Nenpukhanexa txawm khwb nkaus pe Daniyee, thiab hais kom muab qhov txhia chaw thiab hmoov tshuaj tsw qab los xyeem rau Daniyee. Vajntxwv hais rau Daniyee tias, “Muaj tseeb tiag, koj tus Vajtswv yog ib tsoom timtswv tus Vajtswv, thiab yog ib tsoom vajntxwv tus Tswv, yog tus uas qhia tej uas tsis muaj leejtwg paub tshwm los, vim koj muaj peevxwm qhia tau zaj uas tsis muaj leejtwg paub no tshwm los.” Vajntxwv thiaj pub meej mom siab thiab tshav ntuj ntau kawg rau Daniyee, thiab tsa nws ua tus kav tag nrho lub xeev Npanpiloo huvsi, thiab ua tus thawj uas kav cov neeg txawj ntse hauv Npanpiloo sawvdaws. Daniyee thov vajntxwv mas vajntxwv kuj tsa Salab, Mesa thiab Anpenekau ua cov uas tu haujlwm hauv lub xeev Npanpiloo. Hos Daniyee tseem nyob hauv vajntxwv lub tsev ua haujlwm. Vajntxwv Nenpukhanexa ua ib tug dab mlom kub siab rau caum tshim dav rau tshim. Nws muab txawb rau hauv lub tiaj Dula hauv lub xeev Npanpiloo. Mas vajntxwv Nenpukhanexa hu cov thawj kav tej tebchaws, cov thawj uas kav lub xeev, cov thawj uas kav tej moos, cov tub sablaj, cov uas ceev txhab nyiaj, cov uas tu plaub, cov tub ceev xwm, thiab tej nom tswv huvsi hauv tej xeev kom tuaj txoos ua ke ua thawj zaug kevcai pe hawm tus dab mlom uas vajntxwv Nenpukhanexa muab txawb cia lawm. Cov thawj kav tej tebchaws, cov thawj uas kav lub xeev, cov thawj uas kav tej moos, cov tub sablaj, cov uas ceev txhab nyiaj, cov uas tu plaub, cov tub ceev xwm, thiab tej nom tswv huvsi hauv tej xeev txawm tuaj txoos ua ke thawj zaug ua kevcai pe hawm tus dab mlom uas vajntxwv Nenpukhanexa muab txawb cia lawd. Lawv tuaj sawv ntsug rau ntawm tus dab mlom uas Nenpukhanexa muab txawb cia lub xubntiag. Mas tus uas tshaj tawm kuj qw nrov hais tias, “Ib tsoom neeg, ib tsoom tebchaws thiab nej cov uas hais txhua yam lus, cia li mloog. Thaum nej hnov lub suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, nej sawvdaws yuav tsum khwb nkaus pe hawm tus dab mlom kub uas vajntxwv Nenpukhanexa ua txawb cia ntawd. Leejtwg tsis khwb nkaus pe hawm, yuav muab tus ntawd pov tamsim ntawd rau hauv lub niag qhov hluavtaws uas tabtom cig.” Yog li no thaum cov neeg sawvdaws hnov suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, mas ib tsoom neeg, ib tsoom tebchaws thiab cov uas hais txhua yam lus sawvdaws txawm khwb nkaus pe hawm tus dab mlom kub uas vajntxwv Nenpukhanexa ua txawb cia ntawd. Thaum ntawd cov Kheedia qee leej txawm ua lub siab phem tuaj kom cov Yudai. Lawv hais rau vajntxwv Nenpukhanexa tias, “Au vajntxwv, thov koj muaj txojsia nyob mus ib txhis. Au vajntxwv, koj twb tawm ib txoj kevcai tias txhua tus uas hnov suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, lawv yuav tsum khwb nkaus pe hawm tus dab mlom kub. Yog leejtwg tsis khwb nkaus pe hawm, yuav muab tus ntawd pov rau hauv cub hluavtaws uas tabtom cig. Cov Yudai muaj qee leej uas koj muab tsa tu tej haujlwm hauv lub xeev Npanpiloo, yog Salab, Mesa thiab Anpenekau. Au vajntxwv, cov neeg no tsis quav ntsej koj. Lawv tsis ua koom tu koj tej dab thiab tsis pe hawm tus dab mlom kub uas koj ua txawb cia ntawd.” Mas Nenpukhanexa kuj chim heev thiaj hais kom coj Salab, Mesa thiab Anpenekau tuaj. Lawv thiaj coj peb leeg ntawd tuaj cuag vajntxwv. Nenpukhanexa hais rau lawv tias, “Salab, Mesa thiab Anpenekau 'e, qhov uas nej tsis ua koom tu kuv tej dab thiab tsis pe hawm tus dab mlom kub uas kuv ua txawb cia ntawd muaj tseeb los tsis muaj? Yog nej kam mas thaum nej hnov suab raj kub yaj, raj ntsaws, nkauj nog ncas me, nkauj nog ncas tshiav, nkauj nog ncas loj, nruas npuaj thiab txhua yam cuab yeej suab nkauj nrov, nej cia li khwb nkaus pe hawm tus dab mlom uas kuv tau ua cia ntawd. Yog nej tsis pe hawm mas yuav muab nej pov tamsim ntawd rau hauv cub hluavtaws uas tabtom cig. Mas tus timtswv twg yuav pab nej dim hauv kuv txhais tes?” Ces Salab, Mesa thiab Anpenekau txawm teb vajntxwv tias, “Au Nenpukhanexa, tsis txog peb yuav teb koj txog qhov no. Yog muaj li ntawd Vajtswv uas peb ua koom tu yuav cawm tau peb dim hauv cub hluavtaws. Au vajntxwv, nws kuj yuav cawm peb dim hauv koj txhais tes thiab. Txawm yog tsis ua li ntawd los, au vajntxwv, thov hais rau koj paub tias peb yuav tsis ua koom tu koj tej dab lossis pe hawm tus dab mlom kub uas koj ua txawb cia ntawd.” Ces Nenpukhanexa kuj npau taws kawg, nws lub ntsej muag txawv kiag rau Salab, Mesa thiab Anpenekau. Nws hais kom rauv cub hluavtaws kom cig hlob dua li uas txeev rauv xya npaug. Nws hais kom nws cov tub rog qee leej uas muaj zog muab Salab, Mesa thiab Anpenekau khi thiab muab pov rau hauv cub hluavtaws uas tabtom cig. Peb leeg no raug muab khi nrees tseem hnav tsho ntev thiab ris tsho thiab ntoo kaus mom thiab lwm yam tsoos, thiab lawv raug muab pov rau hauv cub hluavtaws uas tabtom cig. Vim yog vajntxwv hais tawv kawg li thiab cub hluavtaws kuj kub heev mas tej nplaim taws thiaj hlawv cov neeg uas pov Salab, Mesa thiab Anpenekau ntawd kub hnyiab tag. Mas peb tug no uas yog Salab, Mesa thiab Anpenekau lawv raug khi nrees poob rau hauv cub hluavtaws uas tabtom cig. Thaum ntawm vajntxwv Nenpukhanexa phimhwj thiaj maj nroos sawv tsees. Nws hais rau nws cov tub sablaj tias, “Peb muab peb leeg khi pov rau hauv cub hluavtaws xwb los tsis yog?” Lawv teb vajntxwv tias, “Au vajntxwv, muaj tseeb li koj hais.” Mas Vajntxwv teb tias, “Ciav kuv pom plaub leeg tsis khi li tabtom mus mus los los hauv cov hluavtaws thiab lawv tsis raug mob li. Tus uas plaub mas saib yam li yog tej timtswv li ib tug tub.” Nenpukhanexa txawm txav los ze ntawm lub qhov rooj cub tawg uas tabtom cig thiab hais tias, “Salab, Mesa thiab Anpenekau uas yog tus Vajtswv loj dua ntais cov tub qhe 'e, cia li tawm los, Cia li los ntawm no.” Salab, Mesa thiab Anpenekau txawm tawm hauv hluavtaws los. Cov thawj kav tej tebchaws, cov thawj uas kav lub xeev, cov thawj uas kav tej moos, thiab vajntxwv cov tub sablaj kuj tuaj ua ke mas pom tias hluavtaws tsis ua li cas rau lawv peb leeg ntawd lub cev kiag li, lawv tej plaubhau twb tsis caws, lawv tej tsho twb tsis hiav thiab twb tsis hnov tsw pa hluavtaws ntawm lawv kiag li. Nenpukhanexa hais tias, “Qhuas Salab, Mesa thiab Anpenekau lawv tus Vajtswv, yog tus uas txib nws li tubtxib saum ntuj tuaj tso nws cov tub qhe uas tso siab rau nws kom dim. Lawv rhuav vajntxwv tej lus pov tseg, thiab yeem tso lawv lub cev tseg zoo dua li ua koom tu thiab pe lwm tus dab uas tsis yog lawv tus Vajtswv. Vim li no kuv tawm ib tsab kevcai tias, haiv neeg twg thiab lub tebchaws twg thiab cov uas hais yam lus twg kuj xij, yog hais tawm tsam Salab, Mesa thiab Anpenekau tus Vajtswv, mas nws tej tes taw yuav raug muab dua tu pov tseg, thiab nws lub tsev yuav raug muab rhuav pob tag, rau qhov tsis muaj dua ib tug timtswv uas yuav tso kom dim tau li no.” Vajntxwv txawm muab Salab, Mesa thiab Anpenekau lawv tsa ua loj dua qub rau hauv lub xeev Npanpiloo. Kuv yog vajntxwv Nenpukhanexa tshaj tawm rau ib tsoom neeg thiab ib tsoom tebchaws thiab cov uas hais txhua yam lus uas nyob thoob qab ntuj hais tias, Thov kom nej tsuas muaj noj qab nyob zoo heev zuj zus. Kuv pom zoo uas yuav piav tej txujci tseem ceeb thiab tej txujci phimhwj uas Vajtswv tus loj dua ntais tau ua rau kuv. Nws tej txujci loj kawg li lauj! Nws tej haujlwm phimhwj muaj hwjchim kawg li lauj! Nws yuav kav mus ib txhis tsis kawg thiab nws muaj hwjchim kav ib tiam dhau ib tiam. Kuv yog Nenpukhanexa noj qab nyob zoo hauv kuv lub tsev thiab vam meej rau hauv kuv lub tsev vajntxwv. Kuv ua npau suav pom yam uas ua rau kuv ntshai. Thaum kuv pw saum kuv lub txaj tej uas kuv xav thiab tej uas kuv ua yog toog tshwm rau hauv kuv lub taubhau ua rau kuv poob siab. Kuv thiaj ua ntawv kom coj cov neeg txawj ntse hauv Npanpiloo sawvdaws tuaj cuag kuv kom lawv thiaj txhais tau zaj npau suav rau kuv paub. Cov txiv neeb txiv yaig thiab cov uas txawj ua khawv koob yees siv thiab cov Kheedia txawm nkag los. Kuv thiaj piav zaj npau suav rau lawv, tiamsis lawv txhais tsis tau lub ntsiab. Thaum kawg Daniyee thiaj tuaj cuag kuv, nws muaj dua ib lub npe hu ua Npeethesaxa raws li kuv tus dab lub npe, nws muaj tej timtswv uas dawb huv tus ntsuj plig, mas kuv piav zaj npau suav rau nws mloog tias, “Npeethesaxa uas yog tej txiv neeb tus thawj 'e, vim yog kuv paub tias tej timtswv uas dawb huv tus ntsuj plig nyob hauv koj thiab tsis muaj ib yam dabtsi uas tsis muaj leejtwg paub uas yuav ceeblaj dhau koj txhais tsis tau, zaj uas kuv ua npau suav pom yog li no. Mas thov koj txhais lub ntsiab rau kuv. Zaj yog toog uas tshwm rau hauv kuv lub taubhau rau thaum kuv pw saum lub txaj yog li no. Kuv saib mas pom ib tsob ntoo nyob hauv plawv lub ntiajteb siab kawg li. Tsob ntoo ntawd loj hlob thiab khov kawg li, lub ntsis siab mus nto ntuj, thiab thoob qab ntuj kawg puavleej pom tau. Cov nplooj kuj zoo nkauj, cov txiv kuj ncw, sawvdaws noj tau tsob ntoo ntawd. Tej tsiaj qus los nraim hauv tus qab duab ntxoov ntxoo thiab tej nas noog saum nruab ntug los nyob saum tej ceg, thiab txhua yam uas muaj txojsia kuj noj tsob ntoo ntawd. “Zaj yog toog uas tshwm rau hauv kuv lub taubhau rau thaum kuv pw saum lub txaj, ua ciav kuv pom ib tug faj xwm dawb huv nqes saum ntuj los. Nws qw nrov thiab hais tias, ‘Cia li ntov tsob ntoo no thiab txiav nws tej ceg huvsi, cia li muab tej nplooj lwg du lug thiab muab tej txiv w rau tom ub tom no. Cia tej tsiaj khiav hauv tsob qab ntoo mus thiab tej noog khiav saum tej ceg tag. Tiamsis tseg lub hauv paus thiab cov cag nyob hauv av, muab ib daim hlau thiab tooj liab khwb lub hauv paus cia nyob hauv nruab nrab tej nroj mos tom teb. Cia nws ntub tej lwg saum ntuj, cia nws nrog tsiaj qus nyob hauv nruab nrab tej nroj tsuag hauv lub ntiajteb. Cia nws lub siab hloov tsis thooj li neeg lub thiab muab tsiaj qus lub siab rau nws. Tso nws nyob li ntawd kom puv xya xyoo. Tej lus txiav txim ntawd yog cov faj xwm txiav, yog cov uas dawb huv tej lus txiav txim siab kom cov uas muaj txojsia nyob thiaj paub tias tus Vajtswv loj dua ntais kav neeg tej tebchaws thiab pub tebchaws rau tus uas nws xav pub, thiab tsa tus uas qes kawg ua tus uas kav.’ Zaj npau suav no yog kuv vajntxwv Nenpukhanexa pom. Npeethesaxa 'e, koj cia li hais lub ntsiab rau kuv, rau qhov cov neeg txawj ntse hauv kuv lub tebchaws sawvdaws txhais tsis tau zaj npau suav rau kuv, tiamsis koj yuav txhais tau vim tej timtswv dawb huv tus ntsuj plig nyob hauv koj.” Ces Daniyee uas muaj dua npe hu ua Npeethesaxa txawm nyuaj siab ib nyuag pliag thiab tej uas nws xav ua rau nws poob siab. Vajntxwv thiaj hais tias, “Npeethesaxa, tsis txhob cia zaj npau suav lossis lub ntsiab ua rau koj poob siab.” Npeethesaxa teb tias, “Yawg hlob, thov cia zaj npau suav ntawd poob rau cov uas ntxub koj thiab lub ntsiab poob rau koj cov yeeb ncuab. Tsob ntoo uas koj pom, uas loj hlob thiab khov kawg li, lub ntsis siab mus nto ntuj, thiab thoob qab ntuj kawg puavleej pom tau, cov nplooj kuj zoo nkauj, cov txiv kuj ncw, sawvdaws noj tau tsob ntoo ntawd, thiab tej tsiaj qus los nraim hauv tus qab duab ntxoov ntxoo thiab tej nas noog saum nruab ntug los nyob saum tej ceg, au vajntxwv, tsob ntoo ntawd yog koj ntag. Koj loj hlob thiab khov, qhov uas koj tau ua loj kuj loj zuj zus tuaj thiab siab mus nto ntuj, thiab koj muaj hwjchim kav mus thoob qab ntuj kawg. Koj pom ib tug faj xwm dawb huv nqes saum ntuj los thiab hais tias, ‘Cia li ntov tsob ntoo no thiab ua kom puam tsuaj, tiamsis tseg lub hauv paus thiab cov cag nyob hauv av, muab ib daim hlau thiab tooj liab khwb lub hauv paus cia nyob hauv nruab nrab tej nroj mos tom teb. Cia nws ntub tej lwg saum ntuj, cia nws nrog tsiaj qus nyob, mus txog thaum puv xya xyoo.’ Au vajntxwv, tej uas koj pom ntawd lub ntsiab yog li no. Vajtswv uas loj dua ntais hais lus tuaj rau vajntxwv uas yog kuv tus tswv tias koj yuav raug muab ntiab tawm hauv tej neeg mus thiab koj yuav nrog tej tsiaj qus nyob, thiab koj yuav tsum noj zaub ib yam li nyuj, thiab koj yuav ntub cov lwg saum ntuj, thiab koj yuav nyob li ntawd kom puv xya xyoo, mus txog thaum koj paub tias tus uas loj dua ntais kav neeg tej tebchaws thiab pub tebchaws rau tus uas nws xav pub. Qhov uas hais kom tseg lub hauv paus ntoo thiab tej cag nyob ntawd, lub ntsiab yog hais tias koj lub tebchaws tseem tseg rau koj kav, txij thaum koj lees tias Vajtswv ntuj kav rawv. Au vajntxwv, vim li no thov koj yuav tej lus uas kuv hais. Muab koj tej kev txhaum pov tseg es ua ncaj ncees, thiab tseg koj tej kev phem kev qias es muaj lub siab khuvleej cov uas raug quab yuam, xwv koj thiaj noj qab nyob zoo ntev mus.” Tej xwm txheej no huvsi tshwm los raug vajntxwv Nenpukhanexa. Dhau kaum ob lub hlis nws mus ncig saum vajntxwv txheej tsev las tshav hauv Npanpiloo, thiab vajntxwv hais tias, “No yog lub tuam nroog Npanpiloo los tsis yog, uas kuv siv lub hwjchim loj kawg tsim los ua lub chaw rau vajntxwv nyob thiab ua rau kuv lub hwjchim meej mom nto moo lug?” Thaum tej lus ntawd tseem nyob hauv vajntxwv lub qhov ncauj txawm muaj ib lub suab hais saum ntuj tuaj hais tias, “Au vajntxwv Nenpukhanexa, tej lus no yog hais rau koj tias, lub tebchaws ncaim ntawm koj lawm, thiab koj yuav raug muab ntiab tawm hauv tej neeg mus thiab koj yuav nrog tej tsiaj qus nyob, thiab koj yuav tsum noj zaub ib yam li nyuj, thiab koj yuav nyob li ntawd kom puv xya xyoo, mus txog thaum koj lees paub tias tus uas loj dua ntais kav neeg tej tebchaws thiab pub tebchaws rau tus uas nws xav pub.” Ces tamsim ntawd tej lus ntawd txawm tiav rau Nenpukhanexa. Nws raug muab ntiab tawm hauv tej neeg mus thiab nws noj zaub ib yam li nyuj, nws lub cev ntub lwg saum ntuj mus txog thaum cov plaubhau ntev li plaub dav thiab nws tej rau tes ntev li rau noog. Dhau lub sijhawm ntawd lawm, kuv, Nenpukhanexa, tsa muag ntsia saum ntuj mas kuv rov feeb meej li qub, kuv thiaj qhuas Vajtswv uas loj dua ntais, thiab kuv qhuas thiab ua rau tus uas nyob mus ib txhis tau koob meej, rau qhov nws muaj hwjchim kav mus ib txhis thiab nws lub tebchaws yuav nyob ruaj ib tiam dhau ib tiam mus li. Nws pom tias ib tsoom neeg hauv ntiajteb sawvdaws tsis tseem ceeb dabtsi, nws ua raws li nws lub siab nyiam rau cov neeg qaum ntuj thiab rau cov uas nyob ntiajteb, tsis muaj leejtwg tav tau Vajtswv txhais tes lossis hais rau nws tias, “Koj ua dabtsi ne?” Lub sijhawm ntawd kuv lub siab thiaj li feeb rov los, thiab kuv lub hwjchim meej mom thiab kuv lub meej nthawb thiaj li rov los rau kuv ua rau kuv lub tebchaws tau koob meej. Kuv cov tub sablaj thiab kuv cov thawj tuaj cuag kuv, thiab kuv thiaj rov raug muab tsa kav lub tebchaws ruaj thiab tau koob meej loj tsav ntxiv rau. Nimno kuv, Nenpukhanexa, qhuas thiab txhawb nqa thiab muab koob meej rau tus tuam vajntxwv saum ntuj, rau qhov txhua yam uas nws ua kuj raug cai thiab nws tej kev kuj ncaj. Cov uas ua lub neej khav theeb nws muab txo tau kom qes. Vajntxwv Npeesaxa npaj ib rooj noj loj rau nws cov thawj ib txhiab leej, thiab nws haus cawv txiv hmab tab meeg ib txhiab leej ntawd. Thaum Npeesaxa sim tej cawv txiv hmab ntawd lawm txawm hais kom coj tej tais nyiaj tais kub uas nws txiv Nenpukhanexa tau coj hauv lub tuam tsev hauv lub nroog Yeluxalees los, xwb vajntxwv thiab nws cov thawj thiab nws tej pojniam thiab tej hluas nkauj thiaj siv haus cawv txiv hmab. Lawv thiaj coj tej tais nyiaj tais kub uas coj hauv lub tuam tsev uas yog Vajtswv lub tuam tsev hauv Yeluxalees los tuaj. Mas vajntxwv thiab nws cov thawj thiab nws tej pojniam thiab nws tej hluas nkauj siv tej tais ntawd haus cawv txiv hmab. Lawv haus cawv txiv hmab thiab qhuas tej dab mlom uas muab nyiaj muab kub muab tooj liab muab hlau muab ntoo thiab muab pob zeb ua. Tamsim ntawd txawm muaj ntiv tes neeg tshwm plaws los sau rau ntawm vajntxwv phab ntsa tsev ncaj ntawm lub teeb. Mas vajntxwv pom txhais tes uas sau ntawd. Vajntxwv ntshaus tag thiab tej uas nws xav ua rau nws poob siab tag. Nws txhais ceg tsaug tag, nws hauv caug tshee hnyo. Vajntxwv txawm qw nrov kom coj cov txiv neeb txiv yaig thiab cov Kheedia thiab cov uas txawj saib caij saib nyoog. Vajntxwv hais rau cov neeg txawj ntse hauv Npanpiloo tias, “Leejtwg nyeem tau tej lus uas sau no thiab txhais tau rau kuv, kuv yuav pub cev tsoos tsamxem rau nws hnav thiab pub txoj saw kub rau nws coj ntawm caj dab, thiab yuav muab nws tsa ua kuv tus tim xyoob uas ob kav lub tebchaws.” Mas vajntxwv cov neeg uas txawj ntse tuaj tag nrho tiamsis lawv nyeem tsis tau thiab txhais tsis tau lub ntsiab rau vajntxwv paub kiag li. Mas vajntxwv Npeesaxa kuj poob siab heev thiab nws ntsej muag thim xem tag, thiab nws cov thawj kuj ntxhov hnyo. Thaum poj vaj hnov vajntxwv thiab cov thawj tej lus ntawd nws txawm nkag mus rau hauv chav tsev noj haus thiab hais tias, “Au vajntxwv, thov kom koj muaj txojsia nyob mus ib txhis. Tsis txhob poob siab lossis ua ntsej muag thim xem tag. Hauv koj lub tebchaws muaj ib yawg uas tej timtswv uas dawb huv tus ntsuj plig nyob hauv nws. Thaum koj txiv ua vajntxwv kav, mas pom muaj txojkev kaj thiab kev paub thiab tswvyim ib yam li tej timtswv li tswvyim nyob hauv nws, mas koj txiv vajntxwv Nenpukhanexa tau tsa nws ua cov uas ua khawv koob yees siv, cov txiv neeb txiv yaig, cov Kheedia thiab cov uas txawj saib caij saib nyoog tus thawj, rau qhov pom tias Daniyee uas vajntxwv tis dua npe hu ua Npeethesaxa muaj ntsuj plig zoo kawg thiab kev paub txawj txhais npau suav, txawj txhais txhiaj txhais thiab daws teeb meem. Nimno cia li hu Daniyee tuaj, nws yuav qhia lub ntsiab rau koj paub.” Lawv thiaj coj Daniyee tuaj cuag vajntxwv, mas vajntxwv hais rau Daniyee tias, “Koj yog tus Daniyee uas poob Yuda tebchaws los uas tus vajntxwv uas yog kuv txiv coj hauv Yuda tebchaws los lov? Kuv hnov tias tej timtswv uas dawb huv tus ntsuj plig nyob hauv koj, thiab txojkev kaj thiab kev paub thiab tswvyim zoo muaj nyob hauv koj. Nimno cov neeg txawj ntse thiab cov txiv neeb txiv yaig raug muab coj tuaj cuag kuv tuaj nyeem tej lus uas sau no thiab txhais lub ntsiab rau kuv paub, tiamsis lawv txhais tsis tau zaj no kiag li. Kuv hnov tias koj txawj txhais lub ntsiab thiab daws tau teeb meem. Nimno yog koj nyeem tau tej lus uas sau no thiab txhais tau lub ntsiab rau kuv paub, kuv yuav pub cev tsoos tsamxem rau koj hnav thiab pub txoj saw kub rau koj coj ntawm caj dab, thiab koj yuav raug muab tsa ua kuv tus tim xyoob uas ob kav lub tebchaws.” Mas Daniyee teb vajntxwv tias, “Thov khaws tej uas koj pub ntawd cia rov rau koj, thiab muab tej tshav ntuj ntawd rau lwm tus. Vajntxwv, txawm li cas los kuv yuav nyeem tej lus uas sau ntawd rau koj mloog thiab txhais lub ntsiab rau koj paub. Au vajntxwv, Vajtswv uas loj dua ntais pub koj txiv Nenpukhanexa tau ua vajntxwv kav thiab pub nws ua loj kawg thiab pub koob meej thiab hwjchim meej mom rau nws. Vim nws pub koj txiv ua loj kawg mas ib tsoom neeg thiab ib tsoom tebchaws thiab cov uas hais txhua yam lus thiaj ntshai koj txiv ua tshee hnyo. Nws yuav tua leejtwg kuj tua kiag pov tseg, yuav tseg leejtwg txojsia kuj tseg, nws yuav tsa leejtwg kuj tsa, yuav qhau leejtwg kuj qhau. Tiamsis thaum koj txiv lub siab tsab ua loj thiab nws ua lub siab tawv nws thiaj khav ntxhias, mas nws thiaj raug muab hle ntawm lub zwm txwv vajntxwv, thiab nws lub koob meej raug muab rho ntawm nws mus. Nws raug muab ntiab tawm hauv tej neeg mus thiab nws lub siab hloov zoo li tsiaj qus lub. Nws nrog nees luav qus nyob, muab zaub rau nws noj yam li nyuj thiab nws lub cev ntub lwg saum ntuj, mus txog thaum nws lees paub tias tus Vajtswv uas loj dua ntais kav neeg tej tebchaws thiab tsa tus uas nws xav kom kav tej tebchaws ntawd. Npeesaxa, koj uas yog nws tus tub, txawm yog koj paub tej no huvsi lawm los koj tsis txo koj lub siab, koj txawm tsa koj tus kheej tawm tsam tus Tswv ntuj. Koj tseem coj tej tais hauv tus Tswv lub tuam tsev los rau ntawm koj xubntiag, mas koj thiab koj cov thawj thiab koj cov pojniam thiab koj cov hluas nkauj muab tej tais ntawd haus cawv txiv hmab, thiab koj qhuas tej dab mlom uas muab nyiaj muab kub muab tooj liab muab hlau muab ntoo thiab muab pob zeb ua uas tsis pom kev tsis hnov lus thiab tsis paub dabtsi. Tiamsis koj tsis muab koob meej rau tus Vajtswv uas tuav koj txojsia rau hauv nws txhais tes thiab koj txhua txojkev nyob ntawm nws coj. Nws thiaj txib txhais tes ntawm nws xubntiag mus sau tej lus no. “No yog tej lus uas sau cia ntawd. MENE, MENE, TEKHEE thiab PAXI. No yog tej ntsiab lus ntawd. MENE txhais tias Vajtswv twb teem caij nyoog rau qhov uas koj ua vajntxwv thiab coj los txog qhov kawg lawm. TEKHEE txhais tias koj raug muab luj hauv rab teev mas pom tias muaj tsis txwm. PELE txhais tias koj lub tebchaws raug muab faib thiab muab rau cov Midia thiab cov Pawxia.” Npeesaxa txawm hais kom lawv muab cev tsoos tsamxem rau Daniyee hnav, thiab muab txoj saw kub rau nws coj ntawm caj dab, thiab tshaj tawm txog nws tias nws yuav ua tus tim xyoob uas ob kav lub tebchaws. Ces hmo ntawd Npeesaxa uas yog neeg Kheedia txawm raug muab tua pov tseg. Mas Dali‑a uas yog neeg Midia txeeb kav lub tebchaws, nws hnub nyoog muaj rau caum ob xyoos. Dali‑a txaus siab yuav tsa ib puas nees nkaum leej ua thawj kav tej tebchaws huvsi uas nws tau kav lawd. Thiab nws tsa peb tug tim xyoob kav cov ntawd, Daniyee yog ib tug hauv peb tug tim xyoob ntawd. Cov thawj uas kav tebchaws ntawd yuav tsum cev lus rau peb tug ntawd thiaj tsis muaj kev nyuaj rau vajntxwv. Daniyee tau koob meej heev dua lwm tus tim xyoob thiab cov thawj uas kav tebchaws, vim nws muaj ntsuj plig zoo tshaj plaws, mas vajntxwv thiaj npaj siab yuav tsa nws kav tag nrho lub tebchaws huvsi. Cov tim xyoob thiab cov thawj uas kav tej tebchaws txawm nrhiav plaub kom Daniyee txog tej kev kav tebchaws, tiamsis lawv nrhiav tsis tau plaub lossis ib qho txhaum kom nws, vim nws pheej ua ncaj, mas nrhiav tsis tau ib qho uas nws ua yuam kev lossis ib qho txhaum kiag li. Lawv cov ntawd txawm hais tias, “Peb yuav nrhiav tsis tau ib qho plaub kom tus Daniyee no, tsuas yog peb nrhiav plaub ntsig txog nws tus Vajtswv txoj kevcai xwb thiaj tau.” Mas cov tim xyoob thiab cov thawj ntawd thiaj ntaus tswvyim mus cuag vajntxwv thiab hais tias, “Au vajntxwv Dali‑a, thov kom koj muaj txojsia nyob mus ib txhis. Cov tim xyoob hauv lub tebchaws, cov thawj kav tej tebchaws, cov thawj uas kav lub xeev, vajntxwv cov tub sablaj thiab cov thawj uas kav tej moos sawvdaws hais hum tias tsim nyog vajntxwv rhawv ib txoj kevcai rau sawvdaws coj thiab txwv tu nrho hais tias, hauv peb caug hnub no yog leejtwg thov tej dab lossis ib tug neeg twg uas tsis yog vajntxwv koj, mas cia muab tus ntawd pov rau hauv qhov tsov ntxhuav. Au vajntxwv, nimno thov koj rhawv txoj kevcai txwv li no thiab sau koj npe rau hauv kom thiaj hloov tsis tau raws li cov Midia thiab cov Pawxia tej kevcai uas muab kho dua tsis tau li.” Vim li no vajntxwv Dali‑a thiaj nqes npe rau tsab ntawv uas rhawv kevcai txwv ntawd. Thaum Daniyee paub tias vajntxwv nqes npe rau tsab ntawv kevcai ntawd lawm, nws mus rau hauv nws lub tsev txheej saud uas muaj qhov rais qheb tig mus rau lub nroog Yeluxalees. Mas nws txhos caug thov thiab ua Vajtswv tsaug ib hnub peb zaug ib yam li nws txeev ua los lawd. Cov neeg ntawd txawm ntaus tswvyim tuaj mas pom Daniyee thov thiab taij nws tus Vajtswv. Ces lawv txawm mus cuag vajntxwv thiab hais txog txoj kevcai uas txwv ntawd tias, “Au vajntxwv, koj tsis tau nqes npe rau hauv tsab ntawv uas txwv hais tias, hauv peb caug hnub no yog leejtwg thov tej dab lossis ib tug neeg twg uas tsis yog vajntxwv koj, ces yuav muab tus ntawd pov rau hauv qhov tsov ntxhuav lov?” Vajntxwv teb tias, “Zaj ntawd tseem ruaj khov, raws li cov Midia thiab cov Pawxia tej kevcai uas muab kho dua tsis tau li.” Lawv thiaj teb vajntxwv tias, “Au vajntxwv, tus Daniyee uas nrog cov Yuda uas poob tebchaws los no, tsis quav ntsej koj thiab tsab kevcai txwv uas koj twb nqes npe rau lawd, nws tseem thov Vajtswv ib hnub peb zaug thiab.” Thaum vajntxwv hnov tej lus ntawd lawm, nws txawm nyuaj siab heev thiab nws muaj siab nrhiav kev tso Daniyee dim. Nws yooj xeeb nrhiav kev cawm Daniyee mus txog thaum hnub poob qho. Ces cov neeg ntawd txawm ua ke rov tuaj cuag vajntxwv thiab hais rau vajntxwv tias, “Au vajntxwv, koj yeej paub tias cov Midia thiab cov Pawxia txoj kevcai hais tias tsab ntawv kevcai txwv lossis txoj kevcai twg uas vajntxwv rhawv cia lawd yeej hloov tsis tau li.” Ces vajntxwv txawm hais kom coj Daniyee mus pov rau hauv qhov tsov ntxhuav. Vajntxwv thiaj hais rau Daniyee tias, “Thov koj tus Vajtswv uas koj ib txwm ua koom tu tso koj dim lauj!” Thiab lawv coj ib txhib zeb los kaw lub rooj qho, thiab vajntxwv ntaus nws lub cim rau thiab ntaus nws cov thawj li cim rau, kom thiaj hloov tsis tau tej uas ua rau Daniyee kiag li. Ces vajntxwv txawm rov mus tsev thiab yoo mov ib hmos, tsis kheev coj ib yam kev lomzem los rau nws, thiab nws pw tsis tsaug zog. Thaum kaj ntug vajntxwv sawv tsees maj nroos mus rau tom qhov tsov ntxhuav. Thaum nws tuaj ze lub qhov tsov uas Daniyee nyob, nws txawm qw nyuaj siab kawg hu Daniyee tias, “Au Daniyee uas yog Vajtswv uas muaj txojsia nyob tug qhev, koj tus Vajtswv uas koj ib txwm ua koom tu tso tau koj dim hauv cov tsov ntxhuav los lawm lov?” Daniyee teb vajntxwv tias, “Au vajntxwv, thov kom koj muaj txojsia nyob mus ib txhis. Kuv tus Vajtswv txib nws tus tubtxib saum ntuj tuaj kaw tsov ntxhuav qhov ncauj, tsov thiaj tsis ua li cas rau kuv, vim Vajtswv pom tias kuv tsis txhaum. Au vajntxwv, kuv tsis tau ua ib qho txhaum rau koj.” Mas Vajntxwv zoo siab heev kawg, nws txawm hais kom rho Daniyee tawm hauv lub qhov los. Daniyee thiaj raug muab rho tawm los mas tsis pom nws raug ib qho mob kiag li vim nws tso siab rau nws tus Vajtswv. Ces vajntxwv hais kom coj cov neeg uas kom Daniyee ntawd tuaj pov rau hauv qhov tsov ntxhuav, tsis hais lawv thiab lawv tej pojniam menyuam huvsi. Thaum lawv poob tsis tau ti qab thu cov tsov ntxhuav twb muab lawv tom dua noj tag ua rau lawv tej pob txha tawg ua tej dwb daim. Vajntxwv Dali‑a txawm xa ntawv mus rau ib tsoom neeg thiab ib tsoom tebchaws thiab cov uas hais txhua yam lus uas nyob thoob plaws lub ntiajteb sawvdaws hais tias, “Thov kom nej muaj noj qab nyob zoo heev zuj zus. Kuv rhawv ib tsab kevcai tias thoob plaws tej tebchaws uas kuv kav tej neeg cia li ntshai Daniyee tus Vajtswv ua ib ce tshee hnyo, “rau qhov nws yog Vajtswv uas muaj txojsia nyob, nws nyob mus ib txhis, nws lub tebchaws yuav tsis raug kev puam tsuaj, thiab nws lub hwjchim tswjhwm yuav muaj nyob mus txog thaum kawg. Nws cawm thiab tso kom dim, nws ua tej txujci tseem ceeb thiab txujci phimhwj rau saum ntuj thiab hauv lub ntiajteb, nws yog tus uas cawm Daniyee dim hauv tsov ntxhuav lub hwjchim.” Tus Daniyee no thiaj li vam meej rau thaum Dali‑a ua vajntxwv kav thiab thaum Xailab uas yog neeg Pawxia kav. Thawj xyoo uas Npeesaxa ua vajntxwv hauv Npanpiloo Daniyee ua npau suav thiab ua yog toog hauv nws taubhau rau thaum nws pw saum lub txaj. Nws thiaj muab zaj npau suav ntawd sau cia hais li no. Daniyee hais tias, “Kuv pom hauv zaj yog toog hmo ntuj muaj cua ntsawj plaub ceg kaum ntuj tuaj ua rau dej hiavtxwv loj ntas. Txawm muaj plaub tug niag tsiaj loj tawm hauv hiavtxwv los, nyias yog nyias ib yam tsiaj. Thawj tug zoo li tsov ntxhuav thiab muaj kooj tis li dav. Kuv ntsia ntsoov mas pom ob sab kooj tis raug muab rho kiag mus lawm thiab tus tsiaj ntawd raug muab tsa kiag sawv hauv pem teb kom siv ob txhais kotaw sawv ntsug yam li neeg, thiab muab neeg txojkev xav rau hauv tus tsiaj ntawd. Ua ciav txawm muaj dua ib tug tsiaj yog tus uas ob zoo li dais, tsa ib sab cev sawv. Nws kaus hniav ntxo nrees peb tug tav hauv nws qhov ncauj, mas muaj suab hais rau nws tias, ‘Cia li sawv tsees, cia li noj nqaij ntau ntau.’ Dhau ntawd kuv saib ua ciav muaj dua ib tug tsiaj zoo li tsov pom txwv, muaj plaub phab tis noog saum nrob qaum. Tus tsiaj ntawd muaj plaub lub taubhau, thiab muab hwjchim tswjhwm rau nws. Dhau ntawd kuv pom hauv zaj yog toog hmo ntuj, ua ciav muaj tus tsiaj uas plaub, nyaum kawg thiab txaus ntshai heev thiab muaj zog heev kawg, muaj kaus hniav hlau loj heev. Nws noj thiab muab tsoo ua tej dwb daim thiab xuas kotaw ntaug tej uas noj tsis tag pov tseg. Nws tsis thooj li tej tsiaj uas nyob ua nws ntej, nws muaj kaum tus kub. Thaum kuv tshuaj saib tej kub ntawd, ua ciav muaj dua ib tug kub me me hlav hauv nruab nrab cov kub ntawd tuaj. Peb tus kub ua ntej raug muab dob kiag cag rau ntawm nws xubntiag. Tus kub me me ntawd muaj qhov muag zoo yam li neeg qhov muag, thiab muaj qhov ncauj uas hais tej lus khav ntxhias. “Thaum kuv tabtom ntsia ntsoov txawm muaj ntau lub zwm txwv raug muab txawb cia, thiab tus uas ib txwm muaj nyob los zaum. Nws cev tsoos dawb yam li daus xib daus npu, nws plaubhau saum taubhau zoo yam li cov tseem plaub yaj. Nws lub zwm txwv yog nplaim taws cig plaws, cov log tsheb ntawm lub zwm txwv yog hluavtaws cig laim pes lias. Hluavtaws tawm ntawm nws lub xubntiag ntws los yam li dej ntws. Muaj ntau txhiab leej ua koom tu nws, muaj ntau vam leej nyob ntawm nws xubntiag, tus tu plaub kuj txiav txim, tej phau ntawv kuj muab qheb cia. “Kuv tseem ntsia ntsoov vim tej lus khav theeb uas tus kub me me ntawd tabtom hais. Thaum kuv ntsia ntsoov, tus tsiaj ntawd txawm raug muab tua pov tseg, nws lub cev tuag muab ua puam tsuaj thiab raug muab hlawv kub hnyiab tag. Cov tsiaj uas tseem tshuav ntawd li hwjchim tswjhwm raug muab rho pov tseg lawm, tiamsis lawv txojsia tseem nyob mus txog ib lub caij thiab ib lub sijhawm. “Hmo ntuj kuv ua yog toog pum ua ciav muaj ib tug zoo li neeg tus tub nrog tej huab saum ntuj los, nws los cuag tus uas ib txwm muaj nyob, thiab raug coj los rau ntawm tus uas ib txwm muaj nyob lub xubntiag. Hwjchim tswjhwm thiab hwjchim ci ntsa iab thiab lub tebchaws raug muab cob rau nws, kom ib tsoom neeg thiab ib tsoom tebchaws thiab tej neeg uas hais txhua yam lus thiaj yuav ua koom tu nws, nws lub hwjchim tswjhwm yuav tsis txawj ploj, thiab nws lub tebchaws yuav tsis raug puam tsuaj. “Kuv yog Daniyee, kuv ntxhov siab heev thiab tej zaj yog toog hauv kuv taubhau ua rau kuv ntshai. Kuv thiaj txav mus cuag ib tug uas sawv ntawd thiab nug qhov tseeb txog tej no huvsi. Nws txawm hais rau kuv thiab qhia kuv paub tej ntawd lub ntsiab hais tias, ‘Plaub tug niag tsiaj loj ntawd yog plaub tug vajntxwv uas yuav tshwm los hauv lub ntiajteb. Tiamsis Vajtswv uas loj dua ntais cov neeg dawb huv yuav tau hwjchim kav tebchaws, qhov uas kav tebchaws ntawd yuav ua lawv teej lawv tug mus ib txhiab ib txhis li.’ “Mas kuv xav paub qhov tseeb txog tus tsiaj uas plaub uas tsis thooj li lwm tus tsiaj huvsi, uas yog nyaum kawg muaj kaus hniav hlau thiab rau tooj liab, thiab noj thiab muab tsoo ua tej dwb daim thiab xuas kotaw ntaug tej uas noj tsis tag pov tseg. Thiab xav paub txog kaum tus kub uas nyob saum nws taubhau thiab tus kub uas hlav tuaj thiab peb tug kub dam daws ntawm nws xubntiag, yog tus kub uas muaj qhov muag muaj qhov ncauj uas hais tej lus khav ntxhias, thiab saib zoo yam li loj dua lwm tus kub huvsi. Thaum kuv ntsia ntsoov, tus kub ntawd ua rog rau cov neeg dawb huv thiab kov yeej mus txog thaum tus uas ib txwm muaj nyob los txog, thiab txiav txim tuaj Vajtswv uas loj dua ntais cov neeg dawb huv tog, thiab txog sijhawm uas cov neeg dawb huv tau hwjchim kav. “Tus yawg ntawd hais tias, ‘Tus tsiaj uas plaub yog li no. Yuav muaj lub tebchaws uas plaub rau saum lub ntiajteb uas yuav txawv tsis thooj li txhua lub tebchaws huvsi, nws yuav noj thoob ntiajteb thiab muab tsuj thiab muab tsoo ua tej dwb daim. Hais txog kaum tus kub ntawd mas yuav muaj kaum tus vajntxwv sawv tawm hauv lub tebchaws ntawd los. Dhau lawv lawm yuav muaj dua ib tug tshwm los tom qab txawv tej uas nyob ua ntej, thiab nws yuav kov yeej peb tus vajntxwv. Nws yuav hais lus tawm tsam Vajtswv uas loj dua ntais, thiab yuav quab yuam tus uas loj dua ntais cov neeg dawb huv, thiab xav tswvyim hloov lub caij nyoog thiab tej kevcai. Lawv yuav raug muab cob rau hauv nws txhais tes ib ncua sijhawm thiab ob ncua thiab ib nrab ncua. Tiamsis cov tu plaub yuav txiav txim, mas yuav muab nws lub hwjchim tswjhwm rho ntawm nws mus, yuav muab ua puam tsuaj liamsim tag nrho huvsi. Mas qhov uas kav tebchaws thiab hwjchim tswjhwm thiab txhua lub tebchaws hauv qab ntuj li meej mom yuav raug muab rau tus uas loj dua ntais cov neeg dawb huv, lawv yuav muaj hwjchim kav mus ib txhis, thiab txhua lub tebchaws yuav zwm rau lawv thiab mloog lawv lus.’ “Tej xwm txheej kuj kawg li no. Kuv yog Daniyee, mas tej uas kuv xav ua rau kuv poob siab heev thiab kuv lub ntsej muag thim xem tag. Tiamsis kuv khaws tej no cia rau hauv kuv lub siab.” Xyoo peb uas Npeesaxa ua vajntxwv kav, muaj ib zaj yog toog tshwm rau kuv Daniyee tom qab zaj yog toog thawj zaug. Kuv ua yog toog pom tias kuv nyob hauv lub tuam nroog Xuxa uas nyob hauv lub xeev Elas. Kuv ua yog toog pom tias kuv nyob ntawm ntug dej Ulai. Kuv tsa muag ntsia mas pom ib tug txiv yaj nyob ntawm ntug dej. Muaj ob tug kub, ob tug puavleej ntev, tiamsis ib sab kub ntev dua ib sab. Sab kub uas ntev ntawd hlav tuaj tom qab. Kuv pom tus txiv yaj dhia mus rau sab hnub poob sab ped thiab sab nrad. Tsis muaj ib tug tsiaj tiv tau nws li, thiab tsis muaj leejtwg cawm kom dim tau hauv nws lub hwjchim. Nws ua raws li nws lub siab nyiam xwb thiab tsab ua loj. Thaum kuv tshuaj saib, ua ciav muaj ib tug txiv tshis tawm sab hnub poob tuaj, nws hla thoob qab ntuj tiamsis tsis tsuj av kiag li. Tus txiv tshis ntawd muaj ib tug kub uas nyob nruab nrab nws ob lub qhov muag rau sawvdaws pom. Nws tuaj txog tus txiv yaj uas muaj ob tug kub uas kuv pom sawv ntsug ntawm ntug dej, thiab nws siv zog dhia npau taws vog los rau ntawm tus txiv yaj ntawd. Kuv pom nws dhia los ze tus txiv yaj mas npau taws thiab nrau tus txiv yaj ua rau nws ob sab kub lov ntho. Tus txiv yaj tsis muaj zog tiv tau nws. Nws muab tus txiv yaj nrau ntog rau hauv av thiab tsuj pes ntiag. Tsis muaj leejtwg cawm tau tus txiv yaj dim hauv nws lub hwjchim. Mas tus txiv tshis thiaj yimhuab tsab ua loj, tiamsis thaum nws muaj zog heev nws tus kub txawm lov lawm, muaj plaub tug kub hlav tuaj nyob chaw taw rau plaub ceg kaum ntuj rau sawvdaws pom. Txawm muaj ib tug kub me me hlav ntawm plaub tug kub ntawd ib tug tuaj, nws hlob loj kawg li mus rau sab nrad thiab sab hnub tuaj thiab rau sab tebchaws uas zoo nkauj kawg. Nws hlob loj kawg tuaj mus nto tej hnub qub saum nruab ntug thiab muab tej hnub qub ib txhia laim rau hauv av thiab muab tsuj pes ntiag. Nws tsab ua loj, xav ua loj yam li tus thawj saum nruab ntug. Nws muab tej kevcai hlawv xyeem uas niaj hnub xyeem rau tus thawj ntawd rhuav pov tseg thiab ua qias puas tsuas lub chaw pe hawm. Vim lawv fav xeeb, Vajtswv cov neeg thiab qhov uas niaj hnub ua kevcai hlawv xyeem raug muab cob rau hauv tus kub ntawd txhais tes, thiab txojkev tseeb raug muab laim kiag tseg rau hauv av, thiab tus kub ntawd kuj ua txhua yam tiav. Kuv hnov ib tug uas dawb huv hais thiab muaj dua ib tug dawb huv hais tias, “Zaj yog toog uas hais txog tej kevcai uas niaj hnub hlawv xyeem thiab qhov uas fav xeeb thiaj ua kom liamsim tag thiab qhov uas muab lub chaw pe hawm cob rau luag thiab qhov uas Vajtswv cov neeg raug muab tsuj yuav nyob ntev li cas?” Tus uas teb nws hais tias, “Yuav nyob ob txhiab peb puas lub sijhawm nruab hnub hmo ntuj li. Mas lub chaw pe hawm yuav rov nyob zoo li qub.” Thaum kuv Daniyee tau pom zaj yog toog no lawd, kuv yooj xeeb xav nkag siab. Ua ciav muaj ib tug zoo li neeg sawv ntawm kuv xubntiag. Kuv hnov lub suab neeg hu hauv nruab nrab hav dej Ulai tuaj, hais tias, “Kali‑ee 'e, cia li qhia kom tus no nkag siab zaj yog toog no.” Nws thiaj los ze qhov chaw uas kuv sawv ntsug. Thaum nws los txog lawd kuv ntshai heev thiab khwb nkaus ua lub plhu ti nkaus av. Tiamsis nws hais rau kuv tias, “Neeg tus tub 'e, cia li nkag siab tias zaj yog toog no yog hais txog lub sijhawm kawg.” Thaum nws tabtom hais rau kuv, kuv looj hlias lub plhu ti nkaus av, nws kov kuv thiab tsa kuv sawv ntsug. Nws txawm hais rau kuv tias, “Saib maj, kuv yuav qhia koj paub tias thaum txojkev chim dhau lawd yuav muaj dabtsi tshwm los, vim ntsig txog lub sijhawm uas teem cia thaum kawg. Tus txiv yaj muaj ob tug kub uas koj pom ntawd yog Midia thiab Pawxia ob tug vajntxwv. Tus txiv tshis yog Kili tus vajntxwv, thiab tus kub loj uas tuaj hauv ob lub qhov muag kem nruab nrab yog thawj tug vajntxwv. Tus kub uas lov thiab muaj dua plaub tug kub hlav tuaj nyob lub chaw, yog plaub tug vajntxwv yuav tshwm hauv nws haiv neeg tuaj, tiamsis tsis muaj hwjchim loj li thawj tug kub. “Lub sijhawm uas lawv cov ntawd kav thaum kawg, thaum cov uas fav xeeb tau ua phem txaus nkaus lawd, yuav muaj ib tug vajntxwv uas lub ntsej muag nyaum kawg thiab lub siab ntse nkhaus tshwm los. Nws lub hwjchim yuav loj heev tiamsis tsis yog nws lub zog ua tau, thiab nws yuav ua kom puam tsuaj txaus ntshai kawg, thiab txhua yam uas nws ua nws ua tau tiav, thiab nws yuav ua rau cov uas muaj zog thiab Vajtswv cov neeg dawb huv raug kev puam tsuaj. Nws txojkev ntse yuav ua rau tej kev dag ntxias nthuav loj zuj zus ntawm nws txhais tes tuaj, thiab nws lub siab yuav tsab ua loj heev. Nws tsis qhia ua ntej, nws cia li muab neeg coob coob ua kom puam tsuaj. Txawm yog cov thawj tug thawj los nws yuav tawm tsam. Tiamsis nws yuav raug tsoo pob tag tsis yog neeg txhais tes ua. Zaj yog toog uas hais txog lub sijhawm nruab hnub thiab hmo ntuj kuj muaj tseeb. Tiamsis cia li muab zaj yog toog ntawd npog twjywm cia, rau qhov yog zaj hais txog ntau hnub tom hauv ntej.” Kuv Daniyee kuj tsaug leeg heev thiab pw mob tau ntau hnub, kuv mam li sawv tsees mus ua vajntxwv tej haujlwm ntxiv mus. Kuv tseem ntxhov siab txog zaj yog toog ntawd thiab tsis nkag siab kiag li. Thawj xyoo uas Ahaxu‑ela tus tub Dali‑a uas yug ua neeg Midia ua vajntxwv kav cov Kheedia lub tebchaws, thawj xyoo uas nws ua vajntxwv, kuv uas yog Daniyee tau saib hauv tej ntawv mas pom tias yuav tsum muaj pes tsawg xyoo raws li tej lus uas Yawmsaub hais rau xibhwb Yelemi uas cev Vajtswv lus, es qhov uas Yeluxalees raug muab tso tseg nyob do cuas thiaj li kawg, mas yog xya caum xyoo. Ces kuv txawm tig xubntiag mus nrhiav Vajtswv uas yog tus Tswv thiab thov thiab taij yoo mov thiab hnav khaub seev tsaj thiab nyob hauv qhov tshauv. Kuv hu thov Yawmsaub uas yog kuv tus Vajtswv thiab lees txim hais tias, “Au tus Tswv, koj yog Vajtswv uas loj kawg thiab txaus ntshai. Koj ua raws li koj tej lus cog tseg thiab raws li koj txojkev hlub ruaj khov rau cov uas muaj siab npuab koj thiab tuav rawv koj tej lus nkaw. Peb muaj txim, peb tau ua txhaum thiab ua phem kawg li thiab fav xeeb, tig ntawm koj tej lus nkaw thiab koj tej kevcai. Peb tsis mloog koj cov tub qhe uas cev koj lus, uas tuav koj lub npe hais rau peb cov vajntxwv thiab peb cov thawj thiab peb tej poj koob yawm txwv thiab cov pejxeem sawvdaws hauv lub tebchaws. Au tus Tswv, txojkev ncaj ncees nyob ntawm koj, tiamsis txojkev poob ntsej muag nyob ntawm peb txog niaj hnub nimno, tag nrho cov Yuda, cov uas nyob hauv Yeluxalees, thiab cov Yixayee sawvdaws, cov uas nyob ze nyob deb rau hauv txhua lub tebchaws uas koj ntiab lawv mus, vim yog tim lawv tej kev fav xeeb rau koj. Au tus Tswv, txojkev poob ntsej muag nyob ntawm peb thiab peb tej vajntxwv thiab peb cov thawj thiab peb tej poj koob yawm txwv vim peb tau ua txhaum rau koj. Vajtswv uas yog peb tus Tswv muaj kev khuvleej thiab kev zam txim, txawm yog peb fav xeeb rau nws kuj xij. Peb tsis mloog peb tus Vajtswv Yawmsaub tej lus, thiab tsis ua raws li nws tej kevcai uas nws kom nws cov tub qhe uas cev lus muab txawb rau ntawm peb xubntiag. “Ib tsoom Yixayee sawvdaws tau fav xeeb koj txoj kevcai thiab tig kiag lawm, tsis yeem mloog koj tej lus. Tej lus tsawm foom thiab tej lus twv uas muab sau cia rau hauv Vajtswv tus qhev Mauxe phau kevcai thiaj raug muab nchuav rau saum peb vim peb tau ua txhaum muaj txim rau koj. Koj tuav rawv koj tej lus uas koj tau hais txog peb thiab cov uas kav peb, es coj tej xwm txheej phem loj kawg los raug peb. Thoob plaws hauv lub qab ntuj tsis txeev ua tej uas thooj li ua rau Yeluxalees. Raws li uas tau sau cia rau hauv Mauxe phau kevcai lawd, tej xwm txheej phem no huvsi thiaj poob los raug peb, los peb tseem tsis thov kom peb tus Vajtswv Yawmsaub tsa muag zaj saib peb, thiab tsis tig ntawm peb tej kev txhaum thiab tsis rau siab rau koj txojkev tseeb. Vim li no Yawmsaub thiaj khaws tej xwm txheej phem cia thiab coj los raug peb. Peb tus Vajtswv Yawmsaub ua txhua yam ncaj ncees tiamsis yog peb tsis mloog nws tej lus. “Au Vajtswv uas yog peb tus Tswv, nimno koj tau siv koj txhais tes uas muaj hwjchim coj koj haiv neeg tawm hauv Iyi tebchaws los, thiab ua koj lub npe nto moo lug txog niaj hnub nimno, peb tau ua txhaum muaj txim thiab peb tau ua phem kawg. Au tus Tswv, raws li koj txojkev ncaj ncees huvsi, thov koj thim koj txojkev npau thiab kev chim ntawm koj lub nroog Yeluxalees, uas yog koj lub roob dawb huv. Vim yog tim peb tej kev txhaum txim thiab tim peb tej poj koob yawm txwv tej kev txhaum, Yeluxalees thiab koj cov neeg thiaj tiag luag ncauj luag lo thoob plaws cov neeg uas nyob ib ncig peb. Au peb tus Vajtswv, nimno thov koj tig ntsej mloog koj tus qhev tej lus thov thiab nws tej lus taij. Au tus Tswv, vim yog saib rau koj, thov koj lub ntsej muag ci mus rau lub chaw pe hawm koj uas raug muab tso tseg ntawd. Au kuv tus Vajtswv, thov tig ntsej mloog thiab tsa muag ntsia qhov uas peb thiab lub nroog uas hu raws li koj lub npe raug nyob do cuas, rau qhov tsis yog peb ua ncaj ncees peb thiaj taij thov koj, tiamsis vim koj muaj kev khuvleej loj kawg peb thiaj taij thov. Au tus Tswv, thov mloog. Au tus Tswv, thov zam txim. Au tus Tswv, thov koj mob siab thiab pab. Au kuv tus Vajtswv, thov saib rau koj es tsis txhob tos ntev, rau qhov koj lub nroog thiab koj cov neeg raug hu raws li koj lub npe.” Thaum kuv tabtom hais lus thiab thov thiab lees kuv thiab kuv haiv neeg Yixayee lub txim, thiab taij thov kuv tus Vajtswv Yawmsaub pab kuv tus Vajtswv lub roob dawb huv, thaum kuv tabtom hais tej lus thov, tus Kali‑ee uas kuv twb pom hauv thawj zaj yog toog txawm ya los sai sai ze ntawm kuv rau lub sijhawm uas ua kevcai xyeem thaum yuav tsaus ntuj. Nws los hais rau kuv tias, “Daniyee 'e, kuv los nimno yog yuav pub tswvyim thiab kev nkag siab rau koj. Thaum koj pib taij thov, muaj tej lus tawm mus, mas kuv thiaj los qhia tej lus ntawd rau koj paub rau qhov koj yog tus uas ntxim hlub. Vim li no cia li tshuaj saib tej lus no thiab nkag siab zaj yog toog. “Xya caum lub chib so yog teem cia rau koj haiv neeg thiab koj lub nroog dawb huv xwv tej kev fav xeeb thiaj li kawg thiab lub txim thiaj li tag thiab thiaj ntxuav tau kev txhaum thiab coj txojkev ncaj ncees ib txhis los thiab ntaus cim rau zaj yog toog thiab tej lus uas hais txog tom hauv ntej no thiab hliv roj tsa kom muaj lub chaw uas dawb huv kawg nkaus. Vim li no koj cia li paub thiab nkag siab tias suav txij thaum hais tej lus no tawm mus kom kho thiab tsim Yeluxalees dua tshiab mus txog thaum tus uas raug muab roj hliv tsa ua ib tug thawj yog sijhawm xya lub chib so. Yuav siv rau caum ob lub chib so tsim kho Yeluxalees dua tshiab kom muaj tshav puam thiab tej kwj deg vij, yog ncua sijhawm uas muaj kev ceeblaj. Dhau rau caum ob lub chib so lawm, tus uas raug muab roj hliv tsa ntawd yuav raug muab txiav pov tseg, nws yuav tsis muaj dabtsi li. Tus thawj uas yuav tshwm los cov neeg yuav ua rau lub nroog thiab lub chaw pe hawm Vajtswv puam tsuaj. Thaum kawg yuav raug dej nyab, thiab yuav muaj kev ua tsov ua rog mus txog thaum kawg thiab muaj kev puam tsuaj teem cia lawm Nws yuav cog lus ruaj khov rau neeg coob coob ib lub chib so, nws yuav ua rau tej kevcai tua tsiaj xyeem thiab xyeem qhov txhia chaw tu nrho tau ib nrab chib so. Tus uas ua kom muaj kev liamsim ntawd yuav nyob saum tej kev qias vuab tsuab phab tis los, mus txog lub txim uas teem cia thaum kawg yuav raug muab nchuav rau saum tus uas ua kom muaj kev liamsim ntawd.” Xyoo peb uas Xailab ua vajntxwv kav Pawxia tebchaws, muaj ib zaj tshwm los rau Daniyee uas muaj dua npe hu ua Npeethesaxa paub. Zaj ntawd muaj tseeb, yog hais txog kev ua rog loj heev. Nws nkag siab tej lus ntawd thiab nkag siab zaj yog toog ntawd. Thaum ntawd kuv Daniyee quaj ntsuag tau peb lub chib so. Kuv tsis noj ib yam qab, tsis hais nqaij lossis cawv txiv hmab yeej tsis nkag rau hauv kuv lub qhov ncauj kiag li, thiab kuv tsis muab roj pleev kuv lub cev tau peb lub chib so txwm nkaus. Hnub tim nees nkaum plaub lub ib hlis, kuv sawv ntsug ntawm ntug dej loj yog tus niag dej Thaiki. Kuv tsa muag ntsia mas pom ib tug yawg hnav tsoos tsho ntaub mag, nws sia ib txoj siv uas xuas cov kub hauv lub moos Ufa ua. Nws lub cev zoo li qe zeb hlaws ntsuab pes xiab, nws lub ntsej muag zoo li xob laim, nws lub qhov muag zoo li teg tsau cig, nws tej tes taw ci zoo li tooj liab uas muab txhuam lawm, nws lub suab nrov ntsoog qees yam li neeg coob coob li suab. Kuv Daniyee tib leeg pom zaj yog toog no, cov uas nrog kuv tsis pom zaj ntawd, tiamsis lawv kuj ntshai tshee heev kawg lawv thiaj dhia mus tsiv nraim. Tshuav kuv tib leeg nyob thiab pom zaj yog toog loj no. Kuv lub zog ploj tag huvsi, kuv lub ntsej muag tshiab hloov ua ntsej muag thim xem zoo li neeg tuag, kuv tsis muaj zog kiag li. Mas kuv hnov nws lub suab hais lus. Thaum kuv hnov nws lub suab ntawd kuv txawm khwb nkaus looj hlias ua lub plhu ti nkaus av. Txawm muaj ib txhais tes kov kuv thiab tsa kuv sawv txhos caug nthia tes rau hauv av ua ib ce tshee hnyo. Nws hais rau kuv tias, “Daniyee 'e, koj yog tus uas ntxim hlub, cia li muab siab rau rau tej lus uas kuv hais rau koj thiab sawv ntseg, rau qhov kuv raug txib tuaj cuag koj nimno.” Thaum nws tabtom hais tej lus no rau kuv, kuv txawm sawv tsees tshee hnyo. Nws hais rau kuv tias, “Daniyee 'e, koj tsis txhob ntshai, vim txij thawj hnub uas koj muaj siab xav to taub thiab txo koj lub hwjchim rau ntawm koj tus Vajtswv lub xubntiag, Vajtswv yeej hnov koj tej lus thov lawm mas kuv thiaj tuaj vim yog koj tej lus. Tus timtswv uas kav Pawxia tebchaws tav kuv kev tau nees nkaum ib hnub, tiamsis Mikha‑ee uas yog cov tubtxib saum ntuj ib tug thawj tuaj pab kuv, vim kuv muaj kev tab kaum ntawm tus timtswv uas kav Pawxia tebchaws. Kuv tuaj qhia koj nkag siab txog tej uas yuav los raug koj haiv neeg rau yav tom hauv ntej. Rau qhov zaj yog toog no hais txog yav tom hauv ntej.” Thaum nws hais tej lus no rau kuv lawd, kuv txawm tig plhu rau hauv av thiab ruam hais tsis tau lus. Txawm muaj ib tug zoo yam li neeg los kov kuv tawv ncauj, ces kuv txawm rua ncauj hais tau lus. Kuv hais rau tus uas sawv ntsug ntawm kuv xubntiag tias, “Yawg hlob 'e, vim yog zaj yog toog no kuv thiaj li raug mob, kuv tsis muaj zog kiag li. Kuv uas yog koj tus qhev yuav nrog koj uas yog kuv tus tswv hais tau lus li cas? Rau qhov nimno kuv tsis muaj zog kiag li thiab kuv tej pa kuj ploj tag ntawm kuv li lawm.” Tus uas zoo yam li neeg ntawd txawm kov kuv dua ib zaug thiab pub zog rau kuv. Nws hais tias, “Tus uas ntxim hlub 'e, tsis txhob ntshai, cia li nyob kaj siab lug. Cia li ua khov kho thiab ua siab tuab.” Thaum nws hais rau kuv ntawd kuv thiaj li muaj zog tuaj thiab hais tias, “Thov koj uas yog kuv tus tswv cia li hais, rau qhov koj twb pub zog rau kuv lawm.” Nws txawm hais tias, “Koj paub tias yog vim li cas kuv tuaj cuag koj los tsis paub? Nimno kuv yuav rov mus ua rog rau tus timtswv uas kav Pawxia tebchaws. Thaum kuv ua txhua yam rau nws tiav lawd, tus timtswv uas kav Kili tebchaws yuav tuaj. Kuv yuav qhia rau koj paub txog tej uas sau rau hauv phau ntawv uas hais qhov tseeb. Tsis muaj leejtwg nrog kuv tawm tsam cov timtswv ntawd li, tsuas yog Mikha‑ee uas yog tus tubtxib saum ntuj uas tsom kwm koj xwb.” Thawj xyoo uas Dali‑a uas yog neeg Midia ua vajntxwv kav, mas kuv ua tus uas sawv pab thiab txhawb Mikha‑ee lub zog. “Nimno kuv yuav qhia qhov tseeb rau koj paub. Saib maj, yuav muaj dua peb tug vajntxwv sawv los rau hauv Pawxia tebchaws, mas tus uas plaub yuav nplua nuj heev dua lwm tus huvsi. Thaum nws tej nyiaj txiag ua rau nws muaj zog, nws yuav tshum txhua tus kom tawm tsam Kili tebchaws. Mas yuav muaj ib tug sawv los ua vajntxwv muaj hwjchim loj heev. Nws yuav muaj hwjchim loj kav thiab ua raws li nws lub siab. Thaum nws sawv los kav lawd, nws lub tebchaws yuav tawg thiab raug muab faib rau plaub ceg kaum ntuj, tiamsis tsis yog faib rau nws caj ces thiab tsis muaj hwjchim kav li nws lawm. Lub tebchaws uas nws kav yuav raug muab rho rau lwm tus uas tsis yog nws caj ces kav. “Mas tus vajntxwv uas kav sab nrad yuav muaj zog, tiamsis nws ib tug thawj yuav muaj zog heev dua nws, mas tus thawj ntawd yuav muaj hwjchim loj kav. Dhau ntau xyoo tom qab ob tug yuav sib cog lus ua phoojywg. Tus vajntxwv sab nrad tus ntxhais yuav tuaj cuag tus vajntxwv sab ped es cog lus sib hum xeeb. Tiamsis tus ntxhais ntawd txhais npab yuav tsis muaj zog khov ntev, thiab tus vajntxwv sab ped thiab nws tus tub yuav nyob tsis ntev. Tus ntxhais ntawd yuav raug muab tso tseg, tag nrho nrog rau cov uas nrog nws tuaj thiab nws tus menyuam thiab tus uas yuav nws. “Thaum lub sijhawm ntawd yuav muaj ib tug ntsuag hlav ntawm tus ntxhais lub hauv paus tuaj nyob vajntxwv chaw. Nws yuav tuaj ua rog rau tus vajntxwv sab ped cov tub rog thiab txeem mus rau hauv tus vajntxwv ntawd lub chaw ruaj khov, thiab ua rog rau lawv thiab kov yeej. Nws yuav thauj kiag lawv tej dab mlom uas lawv nchuav thiab tej twj siv tsim txiaj uas lawv muab nyiaj muab kub ua mus rau Iyi tebchaws, thiab nws yuav tseg tsis nrog tus vajntxwv sab ped ua rog ntau xyoo. Tus vajntxwv sab ped yuav txeem mus rau hauv tus vajntxwv sab nrad lub tebchaws ces nws yuav cia li rov qab los rau nws lub tebchaws. “Nws tej tub npaj ua rog thiab yuav sau tub rog coob coob muaj zog heev tuaj ua ke. Lawv yuav tuaj nyab kiag hla dhau plaws mus, thiab yuav ua rog mus txog ntua tus vajntxwv sab nrad lub chaw ruaj khov. Mas tus vajntxwv sab nrad yuav chim heev thiab tawm mus ua rog rau tus vajntxwv sab ped. Tus vajntxwv sab ped yuav txhij tub rog coob coob tiamsis lawv yuav raug muab cob rau hauv tus vajntxwv sab nrad txhais tes. Thaum tus vajntxwv sab ped cov tub rog raug muab ntes kiag lawm, tus vajntxwv sab nrad lub siab yuav khav theeb heev, thiab nws yuav tua ntau vam leej tiamsis nws yuav tsis kov yeej mus li. Rau qhov tus vajntxwv sab ped yuav txhij tub rog dua ib zaug coob heev, coob dua qub. Mas ntau xyoo tom qab nws yuav coj kiag cov tub rog coob ntawd muaj zaub mov ntau nplua mias tuaj. “Lub sijhawm ntawd yuav muaj neeg coob coob fav xeeb rau tus vajntxwv sab nrad, thiab koj haiv neeg cov uas ua nruj ua tsiv kuj yuav fav xeeb, xwv thiaj ua rau zaj yog toog no tiav, tiamsis lawv yuav kov tsis yeej. Mas tus vajntxwv sab ped yuav tuaj tib chaw vij lub nroog uas muaj ntsa loog ruaj khov thiab txeeb tau. Tus vajntxwv sab nrad cov tub rog yuav tiv tsis taus. Txawm yog pab tub rog uas txawj tshaj plaws los tiv tsis taus rau qhov tsis muaj zog sawv tiv khov kho. Tus uas tuaj ua rog rau lawv ntawd yuav ua tau raws li nws lub siab xav, tsis muaj leejtwg tiv tau nws. Nws yuav sawv nres nroos rau hauv lub tebchaws uas zoo tshaj, thiab tag nrho lub tebchaws yuav nyob hauv nws lub qab hwjchim. Tus vajntxwv sab ped yuav sau zog nws lub tebchaws huvsi lub zog tsom ntsoov tuaj thiab yuav nrog tus vajntxwv sab nrad cog lus sib hum xeeb thiab yuav muab nws tus ntxhais qua rau tus vajntxwv sab nrad thiaj li rhuav tshem tau lub tebchaws sab nrad, tiamsis tsis ruaj khov thiab tsis muaj qabhau ib yam dabtsi rau nws li. Dhau ntawd nws yuav tsom ntsoov mus rau tej tebchaws ntawm ntug hiavtxwv, thiab yuav txeeb tau ntau lub. Tiamsis muaj ib tug thawj rog yuav rhuav tshem tau nws txojkev khav theeb, qhov tseeb yuav muab qhov uas nws khav theeb ntawd ua pauj rau nws. Ces nws yuav tig kiag ncaj nraim mus rau lub chaw ruaj khov hauv nws lub tebchaws, tiamsis nws yuav dawm ntog, nrhiav tsis tau nws li lawm. “Mas yuav muaj dua ib tug sawv nws chaw. Tus ntawd yuav tso ib tug tub teg tub taws mus sau se thiaj ua rau nws lub tebchaws vam meej nto moo lug. Tiamsis tsis muaj tsawg hnub tus vajntxwv ntawd yuav raug puam tsuaj, tsis yog muaj kev chim lossis kev ua rog. Yuav muaj ib tug niag neeg tsis tsim txiaj sawv los, yeej tsis muaj leejtwg muab mom vajntxwv rau nws. Ib sij huam xwb nws cia li tuaj ntxias tau ua vajntxwv kav. Tej tub rog thiab tus tuam pov thawj hlob yuav raug muab kuav tag nrho huvsi thiab puam tsuaj tag. Txij thaum luag nrog nws cog lus sib raug zoo, nws yuav dag ntxias. Txawm yog nws muaj neeg tsawg tsawg xwb los nws yuav muaj zog heev zuj zus tuaj. Ib sij huam xwb nws yuav txeem tuaj rau hauv lub chaw nplua nuj kawg hauv lub xeev, thiab nws yuav ua tej uas nws poj koob yawg koob thiab nws tej laus tsis tau txeev ua. Nws yuav muab tej nyiaj txiag uas lws tau thiab tej uas txeeb tau los thiab tej cuab txhiaj cuab tam faib rau nws cov neeg. Nws yuav ntaus tswvyim phem tawm tsam tej chaw ruaj khov, tiamsis yuav ua tau ib pliag xwb. Nws yuav cuab nws lub zog thiab ua lub siab tuab txhij tub rog coob coob mus ua rog rau tus vajntxwv sab nrad. Mas tus vajntxwv sab nrad yuav coj tub rog coob muaj zog heev tuaj ua rog, tiamsis nws yuav kov tsis yeej vim yog luag ntaus tswvyim phem rau nws. Txawm yog cov uas nrog nws noj tej zaub mov zoo zoo ua ke los tseem yuav nrhiav kev txov nws. Nws cov tub rog yuav raug muab kuav kiag mus, cov uas raug tua tuag kuj coob heev. Ob tug vajntxwv ntawd lub siab tseem xav ua phem. Ob tug yuav hais lus dag ntawm rooj mov uas ob tug koom noj ua ke, los kuj tsis muaj qabhau dabtsi. Rau qhov lub sijhawm kawg yuav txog rau lub sijhawm uas teem cia. Tus vajntxwv sab ped yuav coj tej cuab txhiaj cuab tam ntau kawg rov qab mus rau nws lub tebchaws, tiamsis nws lub siab xav rhuav tej lus cog tseg uas dawb huv pov tseg. Nws yuav ua kom tiav li rov qab mus rau nws lub tebchaws. “Thaum txog sijhawm uas teem cia lawd, nws yuav rov qab tuaj rau sab nrad, tiamsis zaum no yuav tsis thooj li zaum ua ntej. Rau qhov Khithi li nkoj yuav tuaj tawm tsam nws, ces nws yuav ntshai thiab khiav rov qab. Nws yuav tig kiag chim heev rov qab mus rhuav tej lus cog tseg uas dawb huv. Nws yuav tig mus mloog cov uas twb muab tej lus cog tseg dawb huv tso tseg lawd. Nws tej pab tub rog yuav los ua qias puas tsuas lub chaw ruaj khov uas pe Vajtswv, thiab rhuav tej kevcai uas niaj hnub hlawv xyeem. Lawv yuav muab yam uas qias vuab tsuab uas ua kom muaj kev liamsim txawb cia. Nws yuav hais lus mos lus muag ntxias cov uas fav xeeb rau tej lus cog tseg. Tiamsis cov neeg uas paub lawv tus Vajtswv yuav nyob ruaj nreeg thiab tiv thaiv. Cov uas txawj ntse hauv cov pejxeem yuav ua rau neeg coob coob nkag siab, txawm yog lawv tuag rau hniav ntaj thiab nplaim taws, lossis raug ntes raug lws ib ntus kuj xij. Thaum lawv raug tej ntawd lawv yuav txais kev pab mentsis. Yuav muaj neeg coob nrog lawv koom tiamsis tsis yog muaj lub siab dawb paug ua. Cov neeg txawj ntse qee leej yuav raug tej ntawd xwv thiaj raug muab nchuav thiab muab ntxuav kom dawb, mus txog lub sijhawm kawg, rau qhov lub sijhawm kawg yuav los txog raws li teem cia. “Tus vajntxwv ntawd yuav ua raws li nws lub siab nyiam. Nws yuav khav theeb thiab tsab ua loj dua tej timtswv txhua tus, thiab yuav hais tej lus phem kawg li tawm tsam ib tsoom timtswv tus Vajtswv. Nws yuav vam meej mus txog thaum Vajtswv chim rau nws txaus nkaus lawm, rau qhov yam uas teem cia lawd yeej yuav tiav. Nws yuav tsis quav ntsej nws tej poj koob yawm txwv tej dab, lossis tus dab uas cov pojniam nyiam. Nws yuav tsis quav ntsej ib tug dab twg kiag li, vim nws tsab ua loj dua tej dab huvsi. Nws yuav hwm tus dab uas zov tej chaw ruaj khov nyob tej dab ntawd chaw huvsi. Nws yuav muab nyiaj muab kub muab qe zeb hlaws thiab tshav ntuj muaj nqes xyeem teev ib tug dab uas nws tej poj koob yawm txwv tsis tau paub dua. Nws yuav muaj lwm tebchaws tus dab pab nws ua rog rau tej chaw uas ruaj khov kawg. Leejtwg txais yuav nws, nws kuj muab meej mom loj rau. Nws yuav tsa lawv kom kav neeg coob coob thiab yuav muab tej tebchaws faib ua nqe zog rau lawv. “Thaum txog lub sijhawm kawg tus vajntxwv sab nrad yuav tuaj ua rog rau nws, mas tus vajntxwv sab ped yuav coj tej tsheb nees ua rog thiab tej tub rog caij nees thiab tej nkoj coob kawg pluav mus ntaus nws yam nkaus li khaub zeeg cua. Nws yuav txeem mus rau ntau lub tebchaws thiab ntws nyab kiag hla plaws mus. Nws yuav txeem mus rau hauv lub tebchaws uas zoo nkauj kawg, mas yuav tuag tag ntau vam leej, tiamsis cov Edoo thiab cov Mau‑a thiab feem coob hauv cov Asmoo yuav dim hauv nws txhais tes. Nws yuav tsa tes mus ntaus ntau lub tebchaws, thiab Iyi tebchaws kuj yuav tsis dim. Nws yuav kav Iyi tej cuab txhiaj cuab tam uas yog nyiaj thiab kub thiab tej uas tsim txiaj huvsi. Cov neeg Linpia thiab cov neeg Khuj yuav zwm rau nws. Tiamsis tej xov uas tuaj sab hnub tuaj thiab tuaj sab ped tuaj yuav ua rau nws poob siab, mas nws yuav tawm mus ua npau taws vog mus ua kom neeg coob coob puam tsuaj tag tu noob nrho huvsi. Nws yuav tsa nws tej tsev ntaub vajntxwv loj rau ntu nruab nrab hiavtxwv thiab lub roob dawb huv uas zoo nkauj kawg. Ces nws yuav tuag tsis muaj leejtwg pab li.” “Thaum ntawd Mikha‑ee uas yog tus thawj loj uas tsom kwm koj haiv neeg yuav sawv los. Thaum ntawd yog lub sijhawm uas raug txom nyem ceeblaj loj uas txij thaum muaj neeg nyob los txog thaum ntawd tsis tau txeev muaj dua li. Tiamsis lub sijhawm ntawd koj haiv neeg yuav dim, yog txhua tus uas muaj npe sau rau hauv ntawv. Cov neeg coob coob uas pw tsaug zog rau hauv hmoov av hauv lub ntiajteb yuav tsim los, ib txhia yuav tau txojsia ntev mus ib txhis, ib txhia yuav raug kev txaj muag thiab poob ntsej muag mus ib txhis. Cov uas txawj ntse yuav ci yam li duab tshav ntuj, cov uas coj neeg coob coob los txog kev ncaj ncees yuav ci zoo li tej hnub qub mus ib txhiab ib txhis. Daniyee 'e, koj cia li muab tej lus no npog cia thiab ntaus cim rau kaw phau ntawv ntawd cia mus txog lub sijhawm kawg. Neeg coob yuav dhia mus dhia los, thiab kev nkag siab yuav huaj vam zuj zus.” Kuv Daniyee txawm tsa muag ntsia mas pom muaj dua ob leeg sawv ntsug, ib tug sawv sab ntug dej no, ib tug sawv sab ntug dej tim ub. Ob tug ntawd txawm hais rau tus yawg uas hnav ntaub mag uas nyob saum tus niag dej ntawd tias, “Tshuav ntev li cas tej xwm txheej phimhwj no li tiav?” Tus yawg uas hnav ntaub mag uas nyob saum tus niag dej ntawd txawm tsa txhais tes xis thiab txhais tes laug rau saum ntuj. Kuv hnov nws tuav tus uas nyob mus ib txhis lub npe cog lus twv tias, “Tseem tshuav ib ncua sijhawm thiab ob ncua thiab ib nrab ncua. Thaum haiv neeg dawb huv lub hwjchim raug muab rhuav tshem tag lawm, tej no huvsi kuj tiav.” Kuv hnov tiamsis kuv tsis nkag siab kuv thiaj hais tias, “Au kuv tus tswv, tej no yuav ua tau tiav mus li cas?” Nws hais tias, “Daniyee 'e, cia li mus, rau qhov tej lus no muab npog cia lawm thiab muab ntaus cim kaw cia mus txog lub sijhawm kawg. Neeg coob coob yuav raug muab ntxuav thiab muab ua kom dawb thiab raug muab nchuav kom dawb huv. Cov neeg limhiam tseem yuav ua limhiam. Cov neeg limhiam yuav tsis muaj leejtwg nkag siab, tiamsis cov neeg txawj ntse yuav nkag siab. Txij thaum muab tej kevcai uas niaj hnub hlawv xyeem rhuav tseg, thiab muab yam uas qias vuab tsuab uas ua kom liamsim tag los txawb cia, mas yuav muaj ib txhiab ob puas cuaj caum hnub. Tus uas tos rawv thiab nyob mus txog ib txhiab peb puas peb caug tsib hnub yuav tau nyob kaj siab lug. Koj cia li mus kom txog tom kawg, mas koj yuav tau so siab tus yees thiab yuav sawv ntsug tau txais tej uas tu rau koj rau thaum tsis muaj nruab hnub hmo ntuj lawm.” Ntawm no yog Yawmsaub tej lus uas hais tuaj rau Hauxeya uas yog Npe‑awli tus tub, yog ncua sijhawm uas Uxiya, Yauthas, Aha thiab Hexekhiya ua vajntxwv kav Yuda, thiab ncua sijhawm uas Yelaunpau‑as uas yog Yau‑as tus tub ua vajntxwv kav Yixayee. Thawj zaug uas Yawmsaub kom Hauxeya hais nws tej lus, mas Yawmsaub hais rau Hauxeya tias, “Cia li mus, mus yuav ib tug pojniam uas nyiam deev hluas nraug thiab yug tej menyuam hluas nraug, rau qhov lub tebchaws no deev hluas nraug loj heev yog qhov uas tso Yawmsaub tseg.” Nws txawm mus yuav Kaumaw uas yog Dila‑i tus ntxhais los ua pojniam. Kaumaw thiaj xeeb menyuam thiab yug tau ib tug tub rau nws. Yawmsaub txawm hais rau Hauxeya tias, “Cia li tis tus tub lub npe hu ua Yile‑ee, rau qhov tshuav tsis ntev kuv yuav teem txim rau Yehu caj ces vim yog tim tej ntshav uas los ntawm lub moos Yile‑ee, thiab kuv ua rau Yixayee tebchaws tej vajntxwv tu noob nrho. Hnub ntawd kuv yuav lov Yixayee rab hneev rau hauv lub hav Yile‑ee.” Kaumaw rov xeeb dua menyuam mas yug tau ib tug ntxhais. Yawmsaub hais rau Hauxeya tias, “Cia li tis tus mentxhais ntawd lub npe hu ua Lauluhama, rau qhov kuv yuav tsis khuvleej Yixayee caj ces dua li lawm, kuv yuav tsis zam lawv lub txim kiag li lawm. Tiamsis kuv yuav khuvleej Yuda caj ces, thiab kuv uas yog Yawmsaub, uas yog lawv tus Vajtswv, kuv tus kheej yuav tso lawv dim. Kuv yuav tsis siv hneev tsis siv ntaj, tsis siv kev ua rog, tsis siv nees lossis tub rog caij nees cawm lawv dim.” Thaum Lauluhama tseg mis lawd, Kaumaw rov xeeb dua menyuam thiab yug tau ib tug tub. Mas Yawmsaub hais tias, “Cia li tis tus tub ntawd lub npe hu ua Lau‑ami, rau qhov nej tsis yog kuv haiv neeg thiab kuv tsis yog nej tus Vajtswv lawm. “Txawm li cas los cov Yixayee yuav coob yam nkaus li tej xuab zeb ntawm ntug hiavtxwv uas luj tsis tag suav tsis txheeb. Hauv lub chaw uas txeev hais rau lawv tias, ‘Nej tsis yog kuv haiv neeg, ’ kuj yuav rov hais rau lawv tias, ‘Nej yog Vajtswv uas muaj txojsia nyob cov tub. ’ Cov Yuda thiab cov Yixayee yuav rov sib sau ua ke, thiab lawv yuav tsa ib tug ua lawv tus thawj, mas lawv yuav ua ke tawm hauv lub tebchaws ntawd, rau qhov Yile‑ee lub caij lub nyoog yuav tseem ceeb heev.” “Cia li hais rau koj cov kwv tias, ‘Ami,’ thiab hais rau koj cov muam tias, ‘Luhama.’ “Cia li cem nej niam, cia li cem los maj, rau qhov nws tsis yog kuv pojniam thiab kuv tsis yog nws txiv. Thov nws tso qhov uas deev hluas nraug hauv nws xubntiag tseg, thiab tseg qhov uas nws nrog luag pw ntawm nws lub mis. Tsis ua li ntawd, kuv yuav muab nws tsoos tsho hle cia nws liab qab, ua kom nws zoo yam li hnub uas yug los. Kuv yuav ua kom nws zoo yam li tebchaws moj sab qhua, thiab ua rau nws zoo li lub tebchaws qhuav nkig nkuav, thiab ua rau nws nqhis dej tuag. Kuv yuav tsis khuvleej nws cov menyuam, vim lawv yog menyuam hluas nraug. Lawv niam mus deev hluas nraug, tus uas xeeb lawv ua tej uas txaj muag kawg. Nws hais tias, ‘Kuv yuav raws cov uas kuv nyiam qab mus, lawv yog cov uas pub zaub mov thiab dej, pub plaub yaj thiab maj, pub roj thiab cawv txiv hmab rau kuv.’ Vim li ntawd kuv yuav muab tsob pos thaiv nws kev, kuv yuav xov laj kab kaw nws cia, xwv nws thiaj nrhiav tsis tau kev mus. Nws yuav raws cov uas nws nyiam, tiamsis yuav raws tsis cuag, nws yuav nrhiav lawv tiamsis yuav nrhiav tsis ntsib. Ces nws yuav hais tias, ‘Kuv yuav rov qab mus rau kuv thawj tug txiv, rau qhov yav thaum ub kuv lub neej zoo dua li nimno.’ Nws tsis lees paub tias kuv yog tus uas pub qoob loo, cawv txiv hmab thiab roj rau nws, thiab yog tus uas pub nyiaj pub kub ntau nplua mias rau nws, mas lawv thiaj siv tej nyiaj kub ntawd teev dab Npa‑as. “Vim li no kuv yuav thim kuv tej qoob raws li lub caij lub nyoog, thiab thim kuv tej cawv txiv hmab raws li lub caij, thiab yuav thim kuv tej plaub yaj thiab tej maj uas siv npog nws lub cev liab qab rov los. Nimno kuv yuav thws qhov uas nws ua dev tab meeg cov uas nws nyiam, thiab yuav tsis muaj leejtwg cawm nws dim hauv kuv txhais tes. Kuv yuav ua rau nws tej kev xyiv fab huvsi ploj ntais, tsis hais kevcai pam noj pam haus, kevcai hnub hli xiab, hnub Xanpatau thiab nws tej kevcai uas teem cia huvsi. Kuv yuav ua rau nws tej txiv hmab txiv cev puam tsuaj tag, yog tej uas nws hais tias, ‘No yog tej nqe ntiav uas cov uas kuv nyiam pub rau kuv.’ Kuv yuav rov muab tej ntawd ua hav zoov, thiab tsiaj qus yuav muab noj tag. Kuv yuav rau txim rau nws vim txhua hnub uas nws ua kevcai hlawv hmoov xyab xyeem rau tej dab Npa‑as, thiab nws ua zam coj nplhaib coj npauj nyiaj npauj kub raws cov uas nws nyiam qab mus thiab tsis nco qab kuv lawm.” Yawmsaub hais li no ntag. “Vim li no kuv yuav ntxias nws, coj nws mus rau tebchaws moj sab qhua thiab hais lus mos lus muag rau nws. Kuv yuav rov pub nws muaj vaj txiv hmab rau qhov ntawd, thiab muab lub hav Akhauj hloov ua lub qhov rooj uas nws muaj vam. Qhov ntawd nws yuav teb kuv ib yam li thaum nws tseem hluas nkauj, thiab yam li thaum nws tawm hauv Iyi tebchaws los.” Yawmsaub hais tias, “Hnub ntawd koj yuav hu kuv ua koj tus txiv, koj yuav tsis hu kuv ua koj tus dab Npa‑as dua li lawm. Kuv yuav muab tej dab Npa‑as lub npe rho tawm hauv nws lub qhov ncauj, mas nws yuav tsis hais txog lawv lub npe dua li lawm. Hnub ntawd kuv yuav cog lus rau tej tsiaj qus thiab tej noog saum nruab ntug thiab tej tsiaj uas nkag hauv av kom tsis txhob txov koj. Kuv yuav rhuav tshem tej hneev, tej ntaj riam thiab tej kev ua rog tawm hauv lub tebchaws. Kuv yuav pub koj pw tso siab plhuav. Kuv yuav qhaib koj rau kuv mus ib txhis, kuv yuav qhaib koj hauv txojkev ncaj ncees thiab kev ua ncaj, thiab hauv txojkev hlub ruaj khov thiab txojkev khuvleej. Kuv yuav qhaib koj rau kuv, tsis tso koj tseg kiag li, mas koj yuav lees paub Yawmsaub.” Yawmsaub hais tias, “Hnub ntawd kuv yuav teb, kuv yuav teb lub ntuj, thiab lub ntuj yuav teb lub ntiajteb, mas lub ntiajteb yuav teb tej qoob loo, tej cawv txiv hmab thiab tej roj, thiab tej no yuav teb Yile‑ee. Kuv yuav tseb nws rau hauv lub tebchaws rau kuv. Kuv yuav khuvleej tus uas tsis txais kev khuvleej, kuv yuav hais rau tus uas tsis yog kuv haiv neeg tias, ‘Koj yog kuv haiv neeg,’ mas nws yuav hais tias, ‘Koj yog kuv tus Vajtswv.’ ” Yawmsaub hais rau kuv tias, “Cia li mus dua ib zaug thiab hlub tus pojniam uas muaj hluas nraug thiab yog tus pojniam uas nrog luag pw, ib yam li Yawmsaub hlub cov Yixayee, txawm yog lawv tig mus raws luag tej dab thiab nyiam tej ncuav txiv hmab qhuav uas xyeem rau dab kuj xij.” Kuv thiaj muab kaum tsib sekhee nyiaj thiab ib haumaw txhais qeb yuav kuv tus pojniam rov los. Kuv hais rau nws tias, “Koj yuav tsum nrog kuv nyob ua kuv tug ntev ntev, tsis txhob mus deev lwm tus, thiab tsis txhob mus ua lwm tus li. Mas kuv yuav nrog koj nyob ib yam nkaus thiab.” Yixayee caj ces yuav nyob tsis muaj vajntxwv tsis muaj ib tug thawj, tsis muaj kevcai xyeem tsis muaj ncej teev dab tsis muaj efauj tsis muaj dab mlom ntev. Dhau ntawd Yixayee caj ces yuav rov los thiab nrhiav Yawmsaub uas yog lawv tus Vajtswv thiab nrhiav Davi uas yog lawv tus vajntxwv. Yav tom hauv ntej lawv yuav los cuag Yawmsaub ua ntshai kawg thiab tau nws txojkev zoo. Cov Yixayee 'e, cia li mloog Yawmsaub tej lus, rau qhov Yawmsaub muaj plaub rau cov uas nyob hauv lub tebchaws no. “Tsis muaj kev ua ncaj, tsis muaj kev khuvleej, tsis muaj kev paub Vajtswv hauv lub tebchaws no. Tsuas yog muaj kev twv tsawm, kev dag, kev sib tua, thiab ua tub sab ua nkauj ua nraug xwb. Lawv tsis tswj lawv tus kheej kiag li, tua neeg tag los tua thiab. Vim li no lub tebchaws thiaj quaj ntsuag, txhua tus uas nyob hauv lub tebchaws poob siab qaug zog tag, tej tsiaj qus thiab tej noog saum nruab ntug thiab tej ntses hauv hiavtxwv raug muab rhuav tshem tag. “Tsis txhob cia leejtwg ua plaub, tsis txhob cia leejtwg kom, rau qhov kuv ua plaub rau koj nawj, pov thawj 'e. Nruab hnub koj yuav dawm, thiab hmo ntuj tus xibhwb cev lus yuav nrog koj dawm, thiab kuv yuav ua rau koj niam puam tsuaj. Kuv haiv neeg raug puam tsuaj vim tsis muaj kev paub. Vim koj tsis yuav kev paub, kuv kuj tsis yuav koj ua kuv li pov thawj. Vim koj tsis nco qab koj tus Vajtswv txoj kevcai, mas kuv yuav tsis nco qab koj cov tub ki thiab. Lawv yim huaj vam coob, lawv yim ua txhaum. Mas kuv yuav muab lawv lub koob meej ntxeev ua kev txaj muag rau lawv. Lawv muab kuv haiv neeg lub txim yug lawv, lawv ntshaw noj cov neeg ntawd tej kev txhaum. Cov pejxeem raug li cas cov pov thawj yuav raug ib yam li ntawd, kuv yuav rau txim rau lawv raws li lawv txojkev txhaum, kuv yuav ua pauj rau lawv raws li lawv tau ua. “Lawv yuav noj tiamsis tsis txawj tsau, lawv yuav deev luag tiamsis yuav tsis huaj vam, rau qhov lawv tso Yawmsaub tseg, txhob txwm mus deev lwm tus. Tej cawv txiv hmab thiab cawv txiv hmab tshiab txeeb tej kev nkag siab lawm. Kuv haiv neeg mus ua nug rau yam uas muab ntoo ua, thiab ib tug nyuag pas qhia tej uas lawv xav paub. Lub siab uas nyiam deev luag, coj lawv mus yuam kev lawm thiab lawv tso lawv tus Vajtswv tseg mus deev luag. Lawv muab tsiaj xyeem rau saum tej ncov roob, thiab lawv muab qhov txhia chaw hlawv xyeem rau saum tej pov roob hauv tej qab ntoo qheb, tej ntoo txiv cev thiab tej ntoo thuv, vim tias hauv tej qab ntoo ntawd muaj duab ntxoov ntxoo zoo. Vim li ntawd koj tej ntxhais thiaj li ua nkauj ua nraug, koj tej nkauj nyab kuj mus deev lwm tus. Thaum koj tej ntxhais ua nkauj ua nraug thiab koj tej nkauj nyab deev lwm tus kuv yuav tsis rau txim, rau qhov cov txivneej kuj mus tham cov poj muag cev thiab deev cov poj muag cev xyeem rau dab, mas cov neeg uas tsis paub qabhau ntawd yuav raug kev puam tsuaj. “Yixayee 'e, txawm yog koj mus deev hluas nraug, los tsis txhob cia Yuda ua txhaum li koj. Tsis txhob mus rau hauv lub moos Kilakas, lossis nce mus rau lub moos Npe‑avee, thiab tsis txhob twv tsawm hais tias, ‘Muaj Yawmsaub uas muaj txojsia nyob pom.’ Yixayee tawv ncauj ib yam li tus xyuas nyuj tawv ncauj. Yawmsaub yuav yug lawv ib yam li yug menyuam yaj hauv lub tshav zaub dav tau lov? Efa‑i kuj koom nrog dab mlom lawm, cia li tso nws nyob nws. Thaum lawv haus cawv tag lawm lawv kuj mus ua poj muag cev, lawv nyiam qhov uas poob ntsej muag heev dua li nyiam tau koob meej. Cua daj cua dub nthuav tis qhwv nkaus lawv, lawv yuav raug txaj muag rau lawv tej kevcai xyeem dab.” “Cov pov thawj 'e, cia li mloog tej no. Cov Yixayee 'e, cia li tig ntsej mloog. Vajntxwv caj ces 'e, cia li mloog. Nej yuav raug teem txim, vim nej ua rooj ntxiab caws rau ntawm lub moos Mixapa, thiab ua rooj hlua cuab ntawm lub moos Thanpau. Lawv khawb qhov taub tob tob rau ntawm lub moos Sithi, tiamsis kuv yuav nplawm qhuab qhia lawv cov ntawd sawvdaws. “Kuv paub Efa‑i, thiab Yixayee nraim tsis dhau kuv, Efa‑i 'e koj mus deev hluas nraug Yixayee kuj qias puas tsuas. Tej uas lawv ua tsis kheev lawv rov los cuag lawv tus Vajtswv, vim lub siab uas nyiam deev luag nyob hauv lawv, thiab lawv tsis paub Yawmsaub. Yixayee txojkev khav theeb kuj rov ua timkhawv kom lawv lawm, Yixayee thiab Efa‑i yuav dawm ntog vim ob tug tej kev txhaum, Yuda kuj yuav dawm ntog nrog ob tug ua ke. Lawv yuav coj yaj coj tshis coj nyuj mus nrhiav Yawmsaub, los kuj nrhiav tsis ntsib, nws twb ncaim lawv lawm. Lawv tau fav xeeb rau Yawmsaub, rau qhov lawv yug menyuam tsaub xwb. Tej kevcai hnub hli xiab yuav muab lawv thiab lawv tej teb rhuav tshem tag. “Cia li tshuab raj kub yaj rau hauv lub moos Kinpe‑a, cia li tshuab raj xyu rau hauv lub moos Lama, cia li qw suab ceeb toom rau ntawm lub moos Npe‑avee. Npeeyamee 'e, cia li coj lawv mus. Hnub uas teem txim, Efa‑i yuav raug nyob do cuas. Kuv tshaj tawm txog tej uas muaj tseeb rau hauv Yixayee tej xeem. Yuda cov thawj ntxeev ua zoo li cov uas txav luag ciam teb, kuv yuav nchuav kuv txojkev npau taws rau saum lawv ib yam li nchuav dej. Efa‑i raug quab yuam thiab raug muab tsuj txiav txim, vim yog nws npaj siab mus raws kua tej uas qhuav qhawv xwb. Vim li no kuv zoo yam nkaus li tus kab noj Efa‑i, thiab zoo yam li qhov lwj kas rau Yuda caj ces. Thaum Efa‑i pom nws qhov mob thiab Yuda pom nws lub qhov txhab, Efa‑i kuj mus nrhiav cov Axilia thiab txib neeg mus thov lawv tus vajntxwv loj. Tiamsis nws kho tsis tau nej thiab kho tsis tau nej lub qhov txhab zoo. Kuv yuav zoo yam li tus tsov ntxhuav rau Efa‑i, kuv yuav zoo yam li tus thav tsov ntxhuav rau Yuda caj ces. Kuv, yog kuv ntag, yuav muab dua tag li khiav mus, kuv yuav muab cab mus thiab tsis muaj leejtwg yuav cawm tau. Kuv yuav rov mus rau kuv lub chaw, mus txog thaum lawv lees paub lawv tej kev txhaum thiab nrhiav kuv lub xubntiag. Thaum lawv raug kev txom nyem nyuaj siab lawv yuav los nrhiav kuv.” “Los maj, peb cia li rov mus cuag Yawmsaub, rau qhov nws muab peb dua pes rhe lawm, tiamsis nws yuav kho peb. Nws nplawm lawm, tiamsis nws yuav qhwv peb tej qhov txhab. Tshuav ob hnub nws yuav ua rau peb rov muaj zog, hnub uas peb nws yuav muab peb tsa sawv, kom peb thiaj tau nyob ntawm nws xubntiag. Cia peb paub nws, cia peb kub siab kawm paub Yawmsaub, nws yeej yuav tshwm los tiag tiag yam li tus duab kaj ntug. Nws yuav los txog peb yam li tej pluav nag, yam li cov nag hauv xyoo uas ntub lub ntiajteb.” “Efa‑i 'e, kuv yuav ua li cas rau koj? Yuda 'e, kuv yuav ua li cas rau koj nev? Qhov uas koj npuab kuv zoo yam li tej huab pw hav thaum kaj ntug, zoo li tej dej lwg uas ploj tag thaum sawv ntxov. Vim li no kuv siv xibhwb cev kuv tej lus hlais lawv, kuv siv tej lus hauv kuv lub qhov ncauj tua lawv pov tseg, kuv tej lus teem txim tawm mus zoo yam li tus duab tshav ntuj. Kuv ntshaw txojkev hlub, tsis yog ntshaw qhov uas tua tsiaj xyeem, thiab ntshaw qhov uas paub Vajtswv heev dua qhov uas hlawv huvsi xyeem. Tiamsis lawv rhuav tshem kuv tej lus cog tseg rau ntawm lub moos Adas, lawv fav xeeb rau kuv ntawm lub chaw ntawd. Kile‑a yog lub moos uas cov neeg ua phem nyob, ntshav tsuas lub moos ntawd tag. Tej tub sab zov kev tos li cas, cov pov thawj kuj ua ib pab zov kev tos ib yam li ntawd, lawv tua neeg ntawm txojkev uas mus rau lub moos Sekhee, lawv ua tej uas limhiam ntais ntuj ntag. Kuv pom tej uas ntxim ntxub kawg nyob hauv cov Yixayee, Efa‑i kuj mus deev luag qhov ntawd, Yixayee kuj qias puas tsuas. Yuda 'e, twb teem lub caij hlais ib yam li ntawd rau koj lawm. “Thaum kuv yuav pub kuv haiv neeg rov vam meej li qub, thiab thaum kuv yuav kho Yixayee kom zoo, los tsuas yog pom Efa‑i tej kev phem kev qias thiab Xamali tej kev limhiam tshwm los, vim yog lawv ua tsis ncaj. Cov tub sab tho qhov tsev los rau sab hauv thiab cov uas lws kuj lws sab nraud. Lawv tsis nco tias kuv twb cim ntsoov tej uas lawv ua phem huvsi lawm. Nimno tej uas lawv ua nyob vij lawv tag, thiab nyob ntawm kuv xubntiag lawm. Lawv tej kev limhiam ua rau lawv tus vajntxwv zoo siab, thiab lawv tej kev dag ntxias ua rau lawv cov thawj zoo siab. Lawv txhua tus ua nkauj ua nraug, lawv kub lug yam li lub qhov txos kub uas tus ua ncuav tsis txog yuav ceev taws txij thaum nws zuaj ncuav mus txog thaum lub ncuav su tuaj lawm. Hnub uas ua kevcai hwm vajntxwv, cov thawj haus cawv txiv hmab qaug tag lawm, vajntxwv kuj nrog cov uas nyiam thuam luag koom tes. Lawv lub siab kub lug yam li lub qhov txos ntaus tswvyim ua phem, lawv txojkev chim cig pluj pliv ib hmos kaj ntug, thaum sawv ntxov kuj cig plaws nplaim nroo ntws tuaj. Lawv txhua tus kub lug li lub qhov txos, thiab hlawv cov uas kav lawv. Lawv tej vajntxwv sawvdaws tuag tag tsis muaj ib tug thov kuv li. “Efa‑i nrog lwm haiv neeg nyob sib xyaw, Efa‑i yog ib lub ncuav uas siav ib sab xwb. Lwm haiv neeg noj nws lub zog los nws twb tsis paub, nws plaubhau dawb paug ib txhia lawm, los nws twb tsis paub. Cov Yixayee txojkev khav theeb kuj rov ua timkhawv kom lawv. Txawm yog lawv raug li ntawd, los lawv tsis rov mus cuag Yawmsaub uas yog lawv tus Vajtswv lossis rov los nrhiav nws. Efa‑i zoo yam nkaus li tus nquab taug uas ruam tsis paub qabhau, nws quaj hu Iyi thiab mus cuag Axilia. Thaum lawv mus ntawd kuv yuav nthuav kuv lub vas khwb nkaus lawv, kuv yuav rub lawv los ib yam li cuab noog saum nruab ntug, kuv yuav ntes lawv rau thaum muaj suab zom zaws. Lawv yuav raug txom nyem vim lawv yuam kev ntawm kuv mus lawm. Lawv yuav raug kev puam tsuaj vim lawv fav xeeb rau kuv. Kuv twb yuav txhiv lawv, los lawv muab kuv hais dag xwb. Lawv tsis muaj siab quaj thov kuv, lawv quaj nyiav saum lawv tej txaj pw xwb. Lawv suam lawv lub cev thov qoob loo thiab cawv txiv hmab tshiab, tiamsis lawv fav xeeb rau kuv. Txawm yog kuv cob lawv thiab pub zog rau lawv txhais npab, los lawv tseem ntaus tswvyim phem tawm tsam kuv. Lawv tsis tig rov mus cuag Vajtswv uas loj dua ntais, lawv zoo yam nkaus li rab hneev uas dag. Lawv cov thawj yuav raug hniav ntaj tuag tag vim yog tim lawv tus nplaig khav theeb. Tej no yuav ua rau lawv raug thuam luag rau hauv Iyi tebchaws.” “Cia li muab raj kub yaj los npuav ntawm koj qhov ncauj. Ib tug dav noj twm tabtom ya saum Yawmsaub lub tsev, vim cov neeg tau rhuav kuv tej lus cog tseg thiab fav xeeb rau kuv txoj kevcai lawm. Cov Yixayee quaj thov kuv hais tias, ‘Kuv tus Vajtswv 'e, peb cov Yixayee lees paub koj.’ Cov Yixayee muab txojkev zoo tso tseg lawm, yeeb ncuab thiaj raws caum lawv. Lawv tsa muaj vajntxwv tiamsis tsis yog kuv qhia lawv ua li ntawd. Lawv tsa cov thawj, los kuv tsis paub kiag li. Lawv xuas lawv tej nyiaj tej kub ua tej dab mlom ua rau lawv raug kev puam tsuaj. Cov Xamali 'e, nej tus dab mlom thav nyuj kuv tsis yuav kiag li. Kuv txojkev npau taws tshwm los rau lawv. Yuav ntev li cas lawv li dawb huv tau? Tus dab mlom ntawd ib tug Kws nchuav los rau hauv Yixayee xwb, tus dab mlom ntawd yeej tsis yog Vajtswv. Xamali tus thav nyuj yuav raug muab tsoo ua tej dwb daim. “Lawv tseb cua, lawv yuav tau sau khaub zeeg cua. Tej mog uas tseem nyob hauv teb tsis puv, yuav tsis tau coj los ua hmoov kiag li. Txawm yog tau hmoov, los lwm haiv neeg yuav coj mus noj. Cov Yixayee raug luag noj tag lawm, lawv nyob hauv nruab nrab ib tsoom tebchaws zoo yam li tej twj taig uas tsis muaj qabhau kiag li. Lawv mus cuag Axilia yam li tus nees luav qus mus yos ua twm xwb, Efa‑i mus ntiav neeg tuaj nyiam nws. Txawm yog lawv ntiav lwm haiv neeg tuaj lawv tog, los nimno kuv yuav sau zog lawv ua ke. Tshuav tsis ntev lawv yuav raug mob da pes luam vim raug tej vajntxwv thiab cov thawj tsuj yuam. “Efa‑i ua thaj ntau zuj zus los daws txim, los tej thaj ntawd kuj ntxeev ua lub txim rov rau nws. Txawm yog kuv sau kuv tej kevcai qas vam txoj, los lawv yuav suav tias yog tej nyuag yam txawv txawv xwb. Lawv tua tsiaj xyeem rau kuv thiab lawv noj tej nqaij ntawd, los Yawmsaub yeej tsis zoo siab rau lawv. Nimno nws cim ntsoov txog lawv tej kev txhaum thiab txiav txim rau lawv, lawv yuav rov qab mus rau Iyi tebchaws. Yixayee tsis nco qab tus uas tsim lawv lawm, thiab ua tej tsev vajntxwv. Yuda kuj ua tej moos uas muaj ntsa loog tsav ntxiv. Kuv yuav tso hluavtaws los raug lawv tej moos thiab kub lawv tej chaw ruaj khov.” Yixayee 'e, tsis txhob xyiv fab, tsis txhob zoo siab xyiv fab li ib tsoom neeg, rau qhov koj mus deev luag es tso koj tus Vajtswv tseg. Nej sawvdaws nyiam cov niam ntiav tej nqe ntiav tom tej tshav ntaus nplej. Tej tshav ntaus qoob thiab tej qhov tsuam kua txiv hmab yuav tsis txaus yug lawv, thiab tej cawv txiv hmab tshiab yuav tu ncua. Lawv yuav tsis tau nyob hauv Yawmsaub lub tebchaws mus li. Efa‑i yuav rov mus rau Iyi tebchaws, thiab lawv yuav noj tej uas qias tsis huv rau hauv Axilia tebchaws. Lawv yuav tsis hliv cawv txiv hmab xyeem rau Yawmsaub, Lawv yuav tsis tua tsiaj xyeem ua rau Yawmsaub txaus siab. Lawv tej mov noj yuav zoo li tej mov pam tuag, leejtwg noj lawm yuav qias tsis huv. Lawv tej mov noj tsuas yog daws lawv kev tshaib xwb, yuav coj mus tsis txog Yawmsaub lub tuam tsev. Nej yuav ua li cas thaum txog hnub uas ua tej kevcai uas teem cia, thiab hnub uas ua kevcai noj haus rau Yawmsaub? Txawm yog lawv khiav dim kev puam tsuaj, los Iyi yuav sau zog lawv cia, lub moos Meefi yuav muab lawv log. Zaub kig yuav tuaj laum lawv tej qhov txhia chaw tsim txiaj uas xuas nyiaj ua, thiab pos yuav tuaj laum nkaus lawv tej tsev ntaub. Hnub uas teem txim los txog lawm, hnub uas ua pauj los txog lawm. Yixayee yeej yuav paub. Tus xibhwb cev lus mas ruam kawg thiab tus uas muaj Vaj Ntsuj Plig kuj vwm lawm, vim yog tim nej lub txim loj kawg thiab vim nej ntxub kuv heev. Tus xibhwb cev lus ua tus faj xwm nrog kuv tus Vajtswv ntsia ntsoov Efa‑i. Tiamsis rooj hlua cuab noog nyob hauv xibhwb txhua txojkev, thiab txojkev ntxub tos rawv nws rau hauv nws tus Vajtswv lub tuam tsev. Lawv ua phem ua qias kawg yam li thaum uas ua rau hauv lub moos Kinpe‑a. Vajtswv yuav nco ntsoov lawv tej kev txhaum, nws yuav rau txim rau lawv. “Thaum kuv ntsib Yixayee mas zoo yam li ntsib txiv hmab hauv tebchaws moj sab qhua. Thaum kuv pom nej tej poj koob yawm txwv mas zoo yam li pom thawj phaum txiv cev saum tsob ntoo txiv cev. Tiamsis lawv tuaj cuag Npa‑as ntawm Pe‑au, thiab muab lawv tus kheej pub kiag rau yam uas txaj muag ntawd, lawv thiaj ntxim ntxub kawg ib yam li tus uas lawv nyiam ntawd. Efa‑i lub koob meej yuav ya plaws yam li noog ya, yuav tsis yug menyuam, tsis suab menyuam, tsis xeeb menyuam. Txawm yog lawv tu menyuam hlob lawm los kuv yuav ua kom ncaim lawv tsis tshuav ib tug li. Lawv yuav raug txom nyem rau thaum kuv ncaim lawv lawm. Raws li kuv pom, Efa‑i tej tub ki twb raug muab ua luag li nqaij qhauv lawm, Efa‑i yuav coj nws li tub ki mus cob rau tus uas tua pov tseg. Au Yawmsaub thov pub rau lawv. Koj yuav pub dabtsi rau lawv? Thov pub lub plab nchuav menyuam thiab pub lub txiv mis uas qhuav rau lawv. “Lawv txhua yam kev phem nyob hauv lub moos Kilakas. Kuv pib ntxub lawv qhov chaw ntawd. Kuv yuav ntiab lawv tawm hauv kuv lub tsev vim yog tim tej kev limhiam uas lawv ua. Kuv yuav tsis hlub lawv dua li lawm, lawv cov thawj puavleej fav xeeb. Efa‑i raug muab ua puam tsuaj lawm, lawv tej cag qhuav lawm, lawv yuav tsis txi txiv lawm. Txawm yog lawv yug tau tub ki, los kuv yuav muab tej tub ki uas lawv hlub ntawd tua pov tseg.” Kuv tus Vajtswv yuav muab lawv laim pov tseg, rau qhov lawv tsis mloog nws lus. Lawv yuav ua neeg loj leeb rau hauv ib tsoom tebchaws. Yixayee yog tsob txiv hmab uas hlob zoo thiab txi txiv ncw. Yimhuab txi txiv ntau kuj yimhuab ua thaj teev dab ntau. Thaum lawv lub tebchaws vam meej tuaj, lawv yimhuab ua tej ncej teev dab zoo nkauj tuaj. Lawv lub siab dag, nimno lawv thiaj yuav tsum ris lawv lub txim. Yawmsaub yuav tsoo lawv tej thaj pov tseg, thiab muab lawv tej ncej teev dab ua kom puam tsuaj. Thaum ntawd lawv yuav hais tias, “Peb tsis muaj vajntxwv vim peb tsis paub ntshai Yawmsaub. Yog peb muaj vajntxwv nws yuav pab tau peb li cas?” Lawv hais lus do do xwb, lawv lam cog lus twv qhuav qhuav xwb. Vim li no kev ua plaub ua ntug yuav hlav tuaj yam nkaus li tej nroj tsuag muaj taug tuaj raws kwj hniav khais hauv daim teb. Cov Xamali tshee hnyo vim txhawj txog tus dab mlom thav nyuj ntawm Npe‑avee. Lawv yuav quaj ntsuag thiab cov pov thawj uas teev dab yuav quaj nyiav tus dab mlom, vim tus dab mlom ntawd lub koob meej ploj lawm. Tus dab mlom ntawd yuav raug coj mus rau Axilia tebchaws pub ua tshav ntuj rau tus vajntxwv uas loj kawg. Efa‑i yuav raug poob ntsej muag, Yixayee yuav txaj muag vim yog qhov uas ua dab mlom. Xamali tus vajntxwv yuav puam tsuaj, yam nkaus li tej nplais ntoo ntab saum nplaim dej mus. Tej chaw siab teev dab hauv lub moos Avee, uas yog Yixayee lub txim, yuav raug puam tsuaj tag. Tej pos thiab nroj tsuag yuav tuaj rau saum lawv tej thaj xyeem. Lawv yuav hais rau tej roob tias, “Cia li txhub kiag peb lauj,” thiab hais rau tej pov roob tias, “Cia li nphau los tsuam peb.” “Cov Yixayee 'e, nej yeej ua txhaum txij thaum ua hauv lub moos Kinpe‑a. Lawv tseem ua quj qees ntawm lub chaw ntawd los li. Kev ua rog tseem yuav tsis los raug lawv ntawm Kinpe‑a lov? Kuv yuav tuaj rau txim rau cov neeg tawv ncauj ntawd. Ib tsoom tebchaws yuav sau zog tuaj ua ke tawm tsam lawv, mas lawv yuav raug khi vim muaj ob npaug kev txhaum. Efa‑i yog tus xyuas nyuj uas cob tau, nws nyiam tsuj qoob hauv lub tshav, kuv tsis tau yuam nws lub cej dab zoo nkauj ua haujlwm hnyav. Tiamsis kuv yuav muab Efa‑i hai tus quab, Yuda yuav tsum laij, Yakhauj yuav tsum muab lob phuaj sua. Cia li tseb txojkev ncaj ncees rau nej tus kheej, cia li sau tej uas tau ntawm qhov uas hlub kuv, cia li laij daim teb uas muab tso tseg lawm, rau qhov txog sijhawm uas yuav mus nrhiav Yawmsaub, xwv nws thiaj los tso txojkev dim rau nej. Nej twb cog txojkev limhiam lawm, nej twb sau txojkev phem, nej twb saws tej uas nej dag tau los noj. Vim nej tso siab rau nej tej tsheb nees ua rog thiab tso siab rau nej cov tub rog uas coob coob, lub suab ua rog thiaj yuav nrov tshwm rau hauv nej haiv neeg, nej tej chaw ruaj khov huvsi yuav raug muab ua puam tsuaj, ib yam li Samas muab lub moos Npe Anpee ua puam tsuaj rau hnub uas ua rog. Leej niam raug muab ntsawm ntuag ua tej dwb daim nrog nws cov menyuam ua ke. Cov neeg hauv Npe‑ee 'e, nej yuav raug li no ntag lauj, rau qhov nej txojkev limhiam loj kawg li. Thaum kaj ntug Yixayee tus vajntxwv yuav raug muab txiav tu nrho.” “Thaum Yixayee tseem yau kuv hlub nws, kuv hu kuv tus tub tawm hauv Iyi tebchaws los. Kuv yimhuab hu lawv los lawv yimhuab khiav deb ntawm kuv. Lawv tseem muab tsiaj xyeem rau tej dab Npa‑as, thiab hlawv xyab xyeem rau tej dab mlom tsis tu li. Kuv yog tus qhia Efa‑i mus kev, thiab kuv muab lawv puag, los lawv tsis paub tias yog kuv kho lawv zoo. Kuv muab txoj hlua khuvleej cab lawv, thiab muab txojkev hlub khi lawv. Kuv ua rau tus quab ntawm lawv caj qwb sib zog, thiab kuv khoov mus pub rau lawv noj. “Lawv yuav rov mus rau Iyi tebchaws thiab Axilia yuav ua vajntxwv kav lawv, vim lawv tsis yeem rov los cuag kuv. Hniav ntaj yuav laim pes lias rau hauv lawv tej moos, ua rau lawv tej las rooj lov tag, thiab muab lawv rhuav tshem pov tseg vim yog lawv tej tswvyim phem. Kuv haiv neeg yeej txiav txim siab yuav khiav ntawm kuv mus, lawv thiaj raug muab nruab rau tus quab, tsis muaj leejtwg yuav daws tus quab ntawm lawv. “Efa‑i 'e, kuv yuav muab koj tso tseg tau li cas? Yixayee 'e, kuv yuav muab koj cob rau lwm tus tau li cas? Kuv yuav muab koj ua zoo li lub moos Ama tau li cas? Kuv yuav ua rau koj ib yam li ua rau lub moos Xenpau‑i tau li cas? Kuv lub siab yeej ceeb nkaus tsis xav ua li ntawd, kuv txojkev khuvleej kub lug tuaj. Kuv yuav tsis rau txim raws li kuv npau taws ceev, kuv yuav tsis ua rau Efa‑i puam tsuaj dua li lawm, rau qhov kuv yog Vajtswv, kuv tsis yog neeg, kuv yog tus Dawb Huv nyob hauv nej, kuv yuav tsis ua npau taws vog tuaj. Lawv yuav raws Yawmsaub qab, nws yuav nyooj laws li tsov ntxhuav. Thaum nws nyooj ntawd, nws cov tub yuav tawm sab hnub poob los ua tshee hnyo. Lawv yuav tawm tshee hnyo hauv Iyi tebchaws los yam li tej nas noog, thiab tawm hauv Axilia tebchaws los yam li nquab taug. Kuv yuav kom lawv rov mus rau lawv lub tsev.” Yawmsaub hais li no ntag. Efa‑i hais lus dag thiab Yixayee caj ces dag ntxias puag ncig kuv, thiab Yuda ywj fab ywj fwj ntawm Vajtswv uas yog tus Dawb Huv thiab yeej ua raws li nws cog tseg. Efa‑i haus cua xwb, thiab raws cua sab hnub tuaj tas hnub tas hmo. Lawv ua rau kev dag thiab kev ua nruj ua tsiv nthuav dav zuj zus. Lawv nrog Axilia cog lus sib raug zoo thiab thauj roj mus rau Iyi tebchaws. Yawmsaub muaj plaub rau Yuda, thiab yuav rau txim rau Yakhauj raws li nws lub neej, thiab ua pauj rau nws raws li nws tau ua. Thaum Yakhauj tseem nyob hauv nws niam lub plab, nws tuav rawv nws tus tijlaug luj taws, thiab thaum nws hlob lawd nws kuj nrog Vajtswv sib ntsuas zog. Nws nrog tus tubtxib saum ntuj sib ntsuas zog thiab kov yeej, nws quaj thiab thov kev hlub. Nws ntsib Vajtswv ntawm Npe‑ee thiab Vajtswv nrog nws hais lus qhov ntawd, yog Vajtswv Yawmsaub uas muaj hwjchim loj kawg nkaus, Yawmsaub yog nws lub npe ntag. Nej cia li rov los cuag nej tus Vajtswv, thiab tuav rawv txojkev hlub thiab txojkev ua ncaj, thiab tos rawv nej tus Vajtswv tsis tu li. Tus tub luam uas txhais tes muaj rab teev tsis ncaj, nws nyiam ntxo luag. Efa‑i tau hais tias, “Kuv yeej nplua nuj, kuv muaj nyiaj txiag ntau. Kuv tau tej nyiaj txiag huvsi los tsis muaj leejtwg nrhiav tau kuv ua txhaum muaj txim.” “Kuv yog Yawmsaub uas yog nej tus Vajtswv txij thaum nyob hauv Iyi tebchaws los. Kuv yuav ua rau nej nyob hauv tej tsev ntaub dua ib zaug, ib yam li lub sijhawm uas nej ua tej kevcai uas teem cia. Kuv hais rau cov xibhwb cev lus, kuv ua rau lawv ua yog toog ntau zuj zus, thiab kom cov xibhwb cev lus ua paj lug hais rau lawv.” Muaj kev phem kev qias hauv Kile‑a mas lawv yuav ploj ntais tag. Lawv muab txiv nyuj xyeem rau hauv Kilakas, mas lawv tej thaj xyeem yuav zoo yam li tej pawg pob zeb uas nyob ntawm tej hniav khais laij teb. Yakhauj khiav mus rau Alas tebchaws, nws ua haujlwm qhov ntawd thiaj yuav tau pojniam, thiab nws yug yaj thiaj tau pojniam. Yawmsaub siv ib tug xibhwb cev lus coj Yixayee tawm hauv Iyi tebchaws los, thiab siv tus xibhwb cev lus tsom kwm lawv. Efa‑i ua rau Yawmsaub mob siab kawg, Yawmsaub thiaj cia lawv ris lawv lub txim uas tua neeg, thiab yuav ua pauj rau tej uas lawv saib tsis taus nws. Thaum Efa‑i hais lus, luag tej tshee hnyo, mas nws tau koob meej loj rau hauv cov Yixayee, tiamsis nws teev dab Npa‑as thiaj muaj txim thiab tuag. Nimno lawv tseem ua txhaum ntau zuj zus tuaj, thiab lawv nchuav dab mlom rau lawv pe, yog tej dab mlom nyiaj uas lawv siv lawv lub tswvyim ua, txhua tus yog tej Kws nyiaj li haujlwm. Lawv hais tias, “Cia li xyeem tsiaj rau tej dab mlom no.” Neeg nwj tej dab mlom thav nyuj lawm lauj! Vim li no lawv yuav zoo yam li tej huab pw hav thaum kaj ntug, thiab zoo li tej dej lwg uas ploj tag thaum sawv ntxov, thiab zoo li tej npluag qoob uas cua ntsawj ya tag hauv lub tshav mus, thiab zoo li tej pa ncho uas tawm hauv lub qhov tsev. “Kuv yog Yawmsaub, yog nej tus Vajtswv txij thaum nyob hauv Iyi tebchaws los. Nej tsis paub lwm tus timtswv tsuas yog paub kuv xwb, dhau kuv lawm tsis muaj dua ib tug cawmseej li. Kuv yog tus uas saib nej hauv tebchaws moj sab qhua, yog lub tebchaws uas tsis muaj dej haus. Thaum kuv pub rau lawv noj, lawv tau noj tsau. Thaum lawv noj tsau npo lawm, lawv lub siab txawm khav theeb thiab tsis nco qab kuv lawm. Yog li no kuv yuav ua li tus tsov ntxhuav rau lawv, kuv yuav zov kev tos lawv yam li tus tsov pom txwv. Kuv yuav mos lawv yam li tus maum dais uas cov menyuam ploj lawm, kuv yuav dua lawv lub hauv nrob, thiab yuav muab lawv noj rau qhov ntawd ib yam li tsov ntxhuav thiab yam li tsiaj qus dua lawv. “Cov Yixayee 'e, kuv yuav ua kom nej puam tsuaj. Leejtwg yuav pab tau nej? Nimno nej tus vajntxwv nyob qhovtwg uas yuav los cawm nej? Nej cov thawj hauv nej txhua lub moos dua twg tag lawm? Lawv yog cov uas nej hais tias, ‘Thov tsa ib tug vajntxwv thiab cov thawj los kav peb.’ Vim yog kuv chim kuv thiaj pub nej muaj vajntxwv. Vim yog kuv npau taws kuv thiaj muab tej vajntxwv coj mus. Efa‑i tej kev txhaum twb muab qhwv cia lawm, nws lub txim muab khaws cia lawm. Twb mob plab txog caij yug nws lawm tiamsis nws yog menyuam tsis paub tab, rau qhov nws tsis kam tawm hauv plab los raws li lub caij. Kuv yuav txhiv lawv dim hauv tub tuag teb li hwjchim lov? Kuv yuav txhiv lawv dim hauv txojkev tuag lov? Txojkev tuag 'e, koj tej ua siv ua npog dua twg lawm? Tub tuag teb 'e, koj tej vij sub vij sw dua twg lawm? “Kuv lub qhov muag tsis khuvleej lawm. Txawm yog Efa‑i hlob zoo rau hauv nruab nrab nws cov kwvtij, los tej cua sab hnub tuaj yuav tuaj ntawm Yawmsaub tuaj, thiab ntsawj hauv tebchaws moj sab qhua tuaj. Efa‑i lub qhov dej txhawv yuav qhuav thiab nws lub hauv dej cag yuav qhuav qhawv. Tej cua ntawd yuav nplawm tej qhov txhia chaw tsim txiaj huvsi hauv nws tej txhab ya du lug mus. Xamali yuav ris nws lub txim vim yog nws fav xeeb rau nws tus Vajtswv. Lawv yuav raug hniav ntaj tuag tag. Lawv tej menyuam mos yuav raug muab ntsawm ntuag dhia ua tej dwb daim. Lawv tej pojniam uas suab menyuam yuav raug muab phua plab.” Yixayee 'e, cia li rov los cuag Yawmsaub uas yog nej tus Vajtswv, nej dawm vim yog tim nej tej kev txhaum txim. Cia li coj tej lus los, thiab rov los cuag Yawmsaub, cia li hais rau nws tias, “Thov daws peb tej kev txhaum txim huvsi pov tseg. Thov txais yuav yam uas zoo, mas peb yuav coj tej lus ntawm peb lub qhov ncauj tuaj xyeem. Axilia cawm tsis tau peb lawm, peb yuav tsis caij nees. Peb yuav tsis hu tej uas peb txhais tes ua tias yog peb tus Vajtswv dua li lawm. Nyob hauv Vajtswv mas tej menyuam ntsuag tau ntsib kev khuvleej.” “Kuv yuav kho qhov uas lawv fav xeeb kom zoo, kuv yuav ua siab dawb paug hlub lawv kawg nkaus li, rau qhov kuv txojkev chim twb thim ntawm lawv lawm. Kuv yuav zoo li dej lwg rau cov Yixayee, lawv yuav tawg paj li lub paj lilij, lawv yuav nrhau cag tob yam li ntoo ciab Lenpanoo, lawv yuav ncau ceg nthuav dav, lawv yuav zoo nkauj li tsob ntoo aulib, thiab yuav tsw qab yam li ntoo ciab Lenpanoo. Lawv yuav rov los nyob hauv kuv tus qab duab ntxoov ntxoo, lawv yuav hlob zoo yam li mog thiab qeb, lawv yuav tawg paj yam li tsob txiv hmab, lawv yuav tsw qab zib yam li cawv txiv hmab hauv Lenpanoo. Efa‑i 'e, kuv ntsig txog dab mlom li cas? Kuv yog tus uas teb lawv thiab tsom kwm lawv. Kuv zoo yam li tsob ntoo ciab nplooj suab uas ntsuab tsaus nti thawm xyoo, lawv tawg paj txi txiv yog los ntawm kuv los.” Leejtwg ntse, cia nws nkag siab tej no, leejtwg txawj tshuaj saib, cia nws paub tej no, rau qhov Yawmsaub tej kev yeej raug cai. Cov neeg siab ncaj kuj taug txojkev ntawd, cov neeg fav xeeb kuj dawm ntog hauv txojkev ntawd. No yog Yawmsaub tej lus uas hais tuaj rau Yau‑ee uas yog Pethu‑ee tus tub. Nej cov laus, nej cia li mloog zaj no, cov neeg hauv lub tebchaws sawvdaws, cia li tig ntsej mloog. Tej no puas txeev muaj tshwm rau nej sim neej lossis tshwm rau nej tej poj koob yawm txwv sim neej li? Cia li hais rau nej tej menyuam paub, thiab cia nej tej menyuam hais rau tej xeeb ntxwv, thiab cia tej xeeb ntxwv hais rau tiam tom qab. Tej uas kooj txig noj tsis tag, kooj ntsuab muab noj, tej uas kooj ntsuab noj tsis tag, kooj tshuab muab noj. tej uas kooj tshuab noj tsis tag, tej kooj me muab noj huvsi. Cov uas qaug cawv 'e, cia li tsim dheev thiab quaj, cov uas nyiam haus cawv txiv hmab 'e, cia li quaj nyiav rau qhov cawv txiv hmab qab zib tu nrho ntawm nej lub qhov ncauj. Muaj ib haiv neeg tuaj ua rog rau kuv lub tebchaws, lawv muaj zog heev thiab muaj coob suav tsis txheeb, lawv tej kaus hniav yog kaus hniav tsov ntxhuav, lawv tej los yuaj yog los yuaj maum tsov ntxhuav. Lawv muab kuv tej txiv hmab ua piam tag, thiab muab kuv tej txiv cev ua puam tsuaj tag. Lawv muab tej txiv ntoo laws tawv pov tseg tag, tseg tej kav dawb paug cia. Cia li quaj ntsuag ib yam nkaus li tus nkauj nyab uas hnav khaub seev tsaj quaj nws tus txiv uas yuav thaum tseem hluas. Tej qoob loo uas muab xyeem thiab tej cawv txiv hmab uas hliv xyeem tu nrho ntawm Yawmsaub lub tuam tsev lawm. Cov pov thawj uas ua koom tu Yawmsaub kuj quaj ntsuag. Tej teb piam tag, tej av kuj quaj ntsuag, rau qhov tej qoob raug ua puam tsuaj tag, tej cawv txiv hmab tshiab tsis muaj lawm, roj tu nrho lawm. Cov uas ua teb 'e, cia li poob siab nthav, cov uas tu txiv hmab 'e, cia li quaj nyiav, vim tsis muaj mog tsis muaj qeb, tej qoob loo hauv teb raug puam tsuaj tag huvsi. Tej txiv hmab kuj tuag tshav, tej txiv cev kuj qhuav tag. Tej txiv ntsiav kws, tej txiv toov laj thiab tej txiv duaj, thiab tej txiv ntoo huvsi hauv teb kuj tuag tshav tag. Tej kev xyiv fab kuj ploj zuj zus ntawm neeg mus lawm. Cov pov thawj 'e, cia li muab khaub seev tsaj los hnav thiab quaj ntsuag, cov uas ua haujlwm rau ntawm lub thaj xyeem 'e, cia li quaj nyiav, cov uas ua koom tu kuv tus Vajtswv 'e, cia li nkag mus thiab muab khaub seev tsaj los hnav ib hmos kaj ntug, rau qhov tej qoob loo uas xyeem thiab tej cawv txiv hmab uas hliv xyeem tu ncua hauv nej tus Vajtswv lub tuam tsev lawm. Cia li tshaj tawm kom ua kevcai yoo mov, cia li hu kom tuaj txoos ua ke caiv so tiag tiag li, cia li sau zog cov kev txwj laus thiab tag nrho cov pejxeem hauv lub tebchaws sawvdaws tuaj rau hauv nej tus Vajtswv Yawmsaub lub tuam tsev thiab quaj thov Yawmsaub. Hnub ntawd yuav txom nyem lauj! Hnub uas Yawmsaub teem cia los ze lawm, yog hnub uas tus uas muaj hwjchim loj kawg nkaus ua kom puam tsuaj. Tej zaub mov tsis raug muab txiav tu nrho ntawm peb xubntiag lov? Txojkev zoo siab thiab kev xyiv fab tsis raug tu nrho ntawm peb tus Vajtswv lub tuam tsev lov? Tej noob qoob qhuav tag rau hauv av, tej txhab kuj khoob ntshuv. Tej txhab kuj piam tag vim tsis tau qoob kiag li. Tej tsiaj txhu quaj zom zaws xwb lauj! Tej pab nyuj nkag sib chab sib chaws vim tsis muaj tshav zaub, txawm yog tej pab yaj los kuj qaug zog zuj zis. Au Yawmsaub, kuv tsa suab thov koj, vim yog hluavtaws muab tej tshav zaub hauv tebchaws moj sab qhua kub tag, thiab nplaim taws kub tej ntoo hauv teb tag nrho huvsi. Txawm yog tej tsiaj qus, los kuj quaj thov koj thiab, vim tej hav dej qhuav tag, thiab hluavtaws muab tej tshav zaub hauv tebchaws moj sab qhua kub tag. Cia li tshuab raj kub yaj rau hauv Xi‑oo, cia li tshuab raj ceeb toom saum kuv lub roob dawb huv. Cia cov neeg sawvdaws hauv lub tebchaws no tshee hnyo, rau qhov hnub uas Yawmsaub teem cia tabtom los, tabtom los ze lawm, yog hnub uas tsaus ntuj thiab tsaus dub nciab, yog hnub uas muaj huab thiab tsaus nciab. Muaj ib pab kooj coob coob uas muaj zog heev tuaj laum nkaus saum tej roob nyob tsaus nti yam li duab ntxoov ntxoo. Ib txwm thaum ub los tsis tau txeev muaj li no thiab txij no mus yuav tsis muaj dua ib txhiab ib txhis mus rau txhua tiam neeg. Hluavtaws kub ua lawv ntej, nplaim taws cig raws lawv qab. Tom lawv hauv ntej lub tebchaws zoo yam nkaus li lub vaj Edee, tom lawv qub qab zoo yam nkaus li tebchaws moj sab qhua uas nyob do cuas, tsis tshuav ib yam dabtsi dim li. Lawv lub cev zoo yam li nees, lawv dhia li tej nees ua rog dhia. Lawv dhia caws qia saum tej ncov roob nrov qas voog yam li tsheb nees ua rog, thiab nrov plij plej yam li nplaim taws hlawv quav nyab, thiab yam li pab tub rog uas muaj zog npaj txhij ua rog. Tej neeg pom lawv, mas poob siab nthav, txhua tus ntsej muag thim xem tag. Lawv dhia yam li cov uas txawj ua rog, lawv nce saum ntsa loog yam li tub rog. Lawv mus tau ua ib sob, tsis tig rau sab twg kiag li. Lawv tsis sib txeeb kev mus, nyias mus ncaj nyias xubntiag. Lawv txeem plaws tej cuab yeej uas thaiv kev, tsis muaj dabtsi tav tau lawv li. Lawv caws qia rau hauv lub nroog lawv dhia saum tej ntsa loog, lawv nce mus rau hauv tej tsev, lawv nkag tej qhov rais ib yam li tub sab. Lub ntiajteb ua zog kais rau ntawm lawv xubntiag, thiab lub ntuj ntseeg nkaws. Lub hnub lub hli tsaus ntais, tej hnub qub tsis ci lawm. Yawmsaub nthe nqho rau ntawm nws cov tub rog xubntiag. Nws pab tub rog coob heev, cov uas ua raws li nws hais kuj muaj zog heev. Hnub uas Yawmsaub teem cia yog hnub uas loj heev thiab txaus ntshai. Leejtwg yuav thev taus? Yawmsaub hais tias, “Txawm li ntawd kuj xij, nej cia li rov los cuag kuv kawg siab kawg ntsws nimno, thiab yoo mov, quaj thiab quaj ntsuag.” Cia li dua nej lub siab tsis yog dua nej lub tsho. Cia li tig rov los cuag Yawmsaub uas yog nej tus Vajtswv, nws yog tus uas hlub thiab khuvleej, nws tsis chim sai, nws txojkev hlub uas ruaj khov muaj nplua mias, nws hloov dua siab tsis tso xwm txheej phem los. Leejtwg yuav paub tias tej zaum nws yuav tig kiag hloov dua siab, thiab tseg tej koob hmoov rau nej, yog tseg qoob loo uas nej yuav xyeem thiab tej cawv txiv hmab uas yuav hliv xyeem rau Yawmsaub uas yog nej tus Vajtswv. Cia li tshuab raj kub yaj rau hauv Xi‑oo, tshaj tawm kom ua kevcai yoo mov, hu kom sawvdaws tuaj txoos ua ke caiv so tiag tiag li. Cia li sau zog cov pejxeem tuaj, cia li tu ib tsoom pejxeem kom dawb huv. Cia li hu cov laus tuaj, thiab sau zog cov menyuam yaus, thiab cov menyuam noj mis. Cia tus nraug vauv tawm hauv nws lub chaw tuaj, thiab cia tus nkauj nyab tawm hauv nws lub txaj tuaj. Cia cov pov thawj uas ua koom tu Yawmsaub quaj rau ntawm lub qab khav tuam tsev thiab lub thaj kem nruab nrab, thiab hais tias, “Au Yawmsaub, thov khuvleej koj haiv neeg, thov tsis txhob cia koj qub txeeg qub teg raug ib tsoom tebchaws thuam luag thiab tiag luag ncauj luag lo. Ua cas ib tsoom neeg yuav hais tias, ‘Lawv tus Vajtswv dua twg lawm?’ ” Yawmsaub txawm khib xeeb nws lub tebchaws thiab khuvleej nws haiv neeg. Yawmsaub thiaj teb nws haiv neeg tias, “Saib maj, kuv tabtom pub qoob loo thiab cawv txiv hmab thiab roj rau nej, nej thiaj muaj txaus nkaus. Kuv yuav tsis ua rau nej raug ib tsoom tebhcaws thuam luag dua li lawm. Kuv yuav rho cov kooj uas tuaj sab ped tuaj coj mus kom deb nej, kuv yuav muab lawv ntiab khiav mus rau hauv lub tebchaws uas qhuav nkig nkuav thiab tsis muaj dabtsi. Pab uas ua ntej yuav mus rau hauv lub hiavtxwv uas nyob sab hnub tuaj, pab uas ua qab yuav mus rau hauv lub hiavtxwv uas nyob sab hnub poob. Yuav hnov lawv tej ntxhiab tsw lwj tuaj, vim Vajtswv ua haujlwm loj heev.” Lub tebchaws 'e, tsis txhob ntshai, cia li zoo siab thiab xyiv fab, rau qhov Yawmsaub tau ua tej haujlwm loj kawg lawm. Tej tsiaj qus 'e, tsis txhob ntshai, vim tej tshav zaub hauv tebchaws moj sab qhua ntsuab tsaus nti, tej txiv ntoo kuj txi txiv, tej txiv cev thiab tej txiv hmab txi txiv ncw ncw. Xi‑oo cov tub 'e, cia li zoo siab nawj, cia li xyiv fab rau hauv Yawmsaub uas yog nej tus Vajtswv. Nws muab cov nag hauv xyoo cawm nej, nws tso nag ntau kawg los rau nej, muaj nag hauv xyoo thiab nag qab xyoo ib yam li yav thaum ub. Yuav muaj qoob puv nkaus tej tshav ntaus qoob, yuav muaj cawv txiv hmab thiab roj puv tej rhawv phwj yos. “Kuv yuav pub kom lub niaj lub xyoos rov zoo li qub rau nej, yuav pauj tej xyoos uas kooj txig kooj ntsuab kooj tshuab kooj me muab noj tag lawd, yog kuv pab tub rog coob coob uas kuv tso los rau hauv nej. Nej yuav tau noj nplua mias thiab tsau npo, mas nej yuav qhuas nej tus Vajtswv Yawmsaub lub npe uas tau ua tej txujci phimhwj pab nej. Kuv haiv neeg yuav tsis raug txaj muag dua li lawm. Nej yuav paub tias kuv nyob hauv nruab nrab cov Yixayee, thiab paub tias kuv yog Yawmsaub, yog nej tus Vajtswv, tsis muaj dua lwm tus li. Kuv haiv neeg yuav tsis raug txaj muag dua li lawm.” “Yav tom qab kuv yuav hliv kuv tus Ntsuj Plig rau saum ib tsoom neeg sawvdaws. Nej tej tub tej ntxhais yuav cev kuv li lus, nej cov laus yuav ua npau suav, nej cov hluas yuav ua yog toog pom. Lub sijhawm ntawd txawm yog kuv cov tub qhe nkauj qhev los kuv yuav hliv kuv tus Ntsuj Plig rau saum lawv. Kuv yuav ua tej txujci phimhwj tshwm saum nruab ntug thiab hauv lub ntiajteb yuav muaj ntshav thiab hluavtaws thiab pa ncho. Lub hnub yuav ntxeev ua tsaus ntuj, lub hli yuav ua ntshav, ua ntej hnub uas loj txaus ntshai uas Yawmsaub teem cia los txog. Thaum ntawd txhua tus uas thov hu Yawmsaub lub npe yuav dim. Yuav muaj neeg dim hauv Xi‑oo thiab hauv Yeluxalees raws li Yawmsaub hais cia lawd, thiab cov uas dim ntawd yog yuav muaj cov uas Yawmsaub hu.” “Saib nawj, hnub ntawd thiab lub sijhawm ntawd uas kuv pub Yuda thiab Yeluxalees rov vam meej li qub, kuv yuav sau zog ib tsoom tebchaws huvsi thiab coj lawv los rau hauv lub hav Yehausafa, mas yuav txiav txim rau lawv qhov ntawd vim tej uas lawv tau ua rau kuv haiv neeg Yixayee uas yog kuv qub txeeg qub teg. Lawv ua rau kuv haiv neeg khiav ua sab ua sua rau hauv ib tsoom tebchaws thiab muab kuv lub tebchaws faib, thiab lawv muab kuv haiv neeg rho ntawv saib leejtwg tau, muab tej menyuam tub ua nqe ntiav poj muag cev, muab tej menyuam ntxhais muag pauv cawv txiv hmab haus. “Thailab thiab Xaidoo, thiab tag nrho Filixatee tebchaws 'e, nej muaj plaub dabtsi rau kuv? Nej ua pauj rau kuv lov? Yog nej ua pauj rau kuv, kuv yuav ua pauj tej uas nej ua poob sai kawg rau saum nej taubhau tamsid. Nej twb coj kuv tej nyiaj tej kub mus thiab coj kuv tej qhov txhia chaw tsim txiaj mus rau hauv nej tej tsev dab. Nej twb muab cov Yuda thiab cov Yeluxalees muag rau cov Kili, thiab muab lawv dob cag coj mus deb lawv lub tebchaws. Tiamsis nimno kuv yuav tsa lawv sawv tawm hauv tej chaw uas nej muab lawv muag ntawd thiab kuv yuav ua pauj tej uas nej ua poob rau saum nej taubhau. Kuv yuav muab nej tej tub tej ntxhais muag rau hauv Yuda caj ces txhais tes, mas lawv yuav muab muag rau cov neeg Xenpa uas yog lub tebchaws nyob deb kawg.” Yawmsaub hais tej lus no ntag. Cia li tshaj tawm li no rau ib tsoom tebchaws paub. Cia li npaj ua rog, cia li cuab cov tub rog siab loj siab tuab lub zog. Txhib cov tub sawvdaws tuaj ua ke, cia lawv mus ntaus rog. Cia li muab nej tej khais laij teb ntaus ua ntaj, muab nej tej liag tav txiv hmab ntaus ua hmuv. Cia tus uas tsis muaj zog hais tias, “Kuv yog tub rog siab loj siab tuab.” Ib tsoom tebchaws sawvdaws uas nyob ib ncig, cia li maj nroos tuaj, cia li sau zog ua ke rau qhov ntawd. Au Yawmsaub, thov coj koj cov tub rog siab loj siab tuab nqes los. Cia ib tsoom tebchaws ras zom zaws tuaj rau hauv lub hav Yehausafa, rau qhov lub chaw ntawd kuv yuav zaum txiav txim rau ib tsoom tebchaws sawvdaws uas nyob ib ncig. Cia li xuas rab liag hlais, rau qhov tej qoob loo siav lawm. Cia li mus tsuj pes ntiag, rau qhov lub qhov tsuam puv lawm. Tej rhawv kua txiv hmab phwj lawm, vim lawv tej kev limhiam ntau kawg li. Neeg coob, neeg coob kawg hauv lub hav txiav txim, vim yog ze hnub uas Yawmsaub teem cia lawd rau hauv lub hav txiav txim. Lub hnub lub hli kuj tsaus lawm, tej hnub qub tsis ci lawm. Yawmsaub nthe nqho hauv Xi‑oo, nws tsa suab nrov hauv Yeluxalees tuaj, lub ntuj thiab lub ntiajteb ua zog kais. Tiamsis Yawmsaub ua lub chaw cawm siav rau nws haiv neeg, ua lub chaw ruaj khov rau cov Yixayee. “Thaum ntawd nej yuav paub tias kuv yog Yawmsaub, yog nej tus Vajtswv, yog tus uas nyob hauv Xi‑oo uas yog kuv lub roob dawb huv. Yeluxalees yuav dawb huv thiab lwm haiv neeg yuav tsis nkag mus rau hauv lub nroog ntawd dua li lawm. Thaum txog hnub ntawd cawv txiv hmab qab zib yuav nrog saum tej roob los, thiab kua mis yuav ntws saum tej pov roob los, thiab Yuda txhua lub hav yuav muaj dej ntws, thiab dej cag yuav txhawv ntawm Yawmsaub lub tuam tsev los ntxooj lub hav Sithi. Iyi tebchaws yuav raug nyob do cuas, Edoo tebchaws yuav ntxeev ua tebchaws moj sab qhua nyob do cuas, vim lawv tau ua limhiam ntais ntuj rau cov Yuda lawm, thiab lawv ua rau tej neeg tsis txhaum los ntshav rau hauv lub tebchaws. Tiamsis yuav muaj neeg nyob hauv Yuda mus ib txhis, thiab nyob hauv Yeluxalees txhua tiam mus li. Kuv yuav ua pauj qhov uas los ntshav ntawd, kuv yuav tsis daws tus uas ua txhaum lub txim, rau qhov Yawmsaub nyob hauv Xi‑oo.” No yog Amau uas yog ib tug yug yaj hauv lub moos Thekhau‑a tej lus uas nws tau pom ntsig txog cov Yixayee rau thaum Uxiya ua vajntxwv kav Yuda tebchaws thiab Yau‑as tus tub Yelaunpau‑as ua vajntxwv kav Yixayee tebchaws ua ntej uas ntuj qeeg ob xyoos. Nws hais tias, “Yawmsaub lub suab nyooj laws hauv Xi‑oo tuaj, thiab nws tsa lub suab nrov hauv Yeluxalees tuaj. Cov uas yug yaj tej tshav zaub qhuav tag, lub ncov roob Khamee tuag tshav.” Yawmsaub hais li no tias, “Qhov uas Damaxaka ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv tau muab thob log hlau luam Kile‑a. Vim li no kuv yuav tso hluavtaws los rau saum Haxa‑ee lub tsev, mas hluavtaws yuav kub Npeehada tej chaw ruaj khov. Kuv yuav lov Damaxaka tej las rooj pov tseg, thiab rhuav tshem cov neeg tawm hauv lub hav Avee mus, thiab ntiab tus uas tuav rawv tus cwj kav hauv lub moos Npe‑edee tawm mus. Cov pejxeem hauv Alas tebchaws yuav raug poob tebchaws mus rau lub moos Khi.” Yawmsaub hais li no ntag. Yawmsaub hais li no tias, “Qhov uas lub moos Kaxa ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv kuav cov pejxeem huvsi tawm tebchaws coj mus cob rau cov Edoo. Vim li no kuv yuav tso hluavtaws los rau saum Kaxa tej ntsa loog, mas hluavtaws yuav kub Kaxa tej chaw ruaj khov. Kuv yuav rhuav tshem cov neeg tawm hauv lub moos Asadau mus thiab ntiab tus uas tuav rawv tus cwj kav hauv lub moos Akheloo tawm mus. Kuv yuav tig kiag kuv txhais tes tawm tsam lub moos Ekhoo, mas cov Filixatee uas tseem tshuav yuav puam tsuaj tag huvsi.” Vajtswv Yawmsaub hais li no ntag. Yawmsaub hais li no tias, “Qhov uas lub nroog Thailab ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv kuav cov pejxeem huvsi tawm tebchaws coj mus cob rau cov Edoo, lawv tsis nco txog tej lus cog tseg sib raug zoo. Vim li no kuv yuav tso hluavtaws los rau saum Thailab tej ntsa loog, mas hluavtaws yuav kub Thailab tej chaw ruaj khov.” Yawmsaub hais li no tias, “Qhov uas cov Edoo ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv tau xuas riam xuas ntaj raws caum lawv tus kwv, thiab tso plhuav txojkev khuvleej pov tseg, lawv txojkev chim muaj tsis tu li, thiab lawv npau taws vog mus ib txhis. Vim li no kuv yuav tso hluavtaws los rau saum lub moos Themas, thiab hluavtaws yuav kub lub moos Npauxa tej chaw ruaj khov.” Yawmsaub hais li no tias, “Qhov uas cov Asmoo ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv tau muab tej pojniam uas suab menyuam tej plab phua hauv Kile‑a, xwv lawv thiaj li nthuav lawv lub tebchaws dav tuaj. Vim li no kuv yuav zes taws rau lub moos Lanpa tej ntsa loog, mas hluavtaws yuav kub lub moos ntawd tej chaw ruaj khov, thiab yuav muaj lub suab qw nrov rau hnub uas ua rog, thiab yuav muaj cua daj cuab dub ntsawj rau hnub uas muaj khaub zeeg cua. Lawv tus vajntxwv thiab nws cov thawj yuav ua ke raug poob tebchaws.” Yawmsaub hais li no ntag. Yawmsaub hais li no tias, “Qhov uas cov Mau‑a ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv muab cov Edoo tus vajntxwv tej pob txha hlawv ua hmoov zeb sib. Vim li no kuv yuav tso hluavtaws los rau saum cov Mau‑a, mas hluavtaws yuav kub lub moos Kheli‑au tej chaw ruaj khov, thiab cov Mau‑a yuav tuag rau hauv tej suab ua nqaj ua nqug thiab rau thaum muaj suab qw ua rog thiab suab raj kub yaj nrov. Kuv yuav muab tus uas ua thawj kav rhuav tshem tawm hauv lawv mus, thiab yuav tua cov thawj hauv lub tebchaws ntawd sawvdaws nrog nws ua ke.” Yawmsaub hais li no ntag. Yawmsaub hais li no tias, “Qhov uas cov Yuda ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv muab Yawmsaub txoj kevcai tso tseg, thiab lawv tsis tuav rawv nws tej kab ke. Lawv mloog tej lus dag mus yuam kev ib yam li lawv tej poj koob yawm txwv. Vim li no kuv yuav tso hluavtaws los rau saum Yuda, mas hluavtaws yuav kub Yeluxalees tej chaw ruaj khov.” Yawmsaub hais li no tias, “Qhov uas cov Yixayee ua txhaum peb zaug tag los ua plaub zaug thiab, kuv yuav tsis tso qhov uas rau txim tseg li, rau qhov lawv muab cov neeg ncaj ncees muag yuav nyiaj, thiab muab cov neeg pluag muag yuav ib nkawg khau. Lawv tsuj tej neeg pluag lub taubhau rau hauv cov hmoov av, thiab muab cov neeg txom nyem nyuaj siab thawb pes ntiag mus. Ob txiv tub mus deev tib tug pojniam, ua qias puas tsuas kuv lub npe uas dawb huv. Lawv pw ib sab ntawm txhua lub thaj xyeem dab pw rau saum tej tsoos tsho uas muab los yuam nqe. Hauv lawv tus Vajtswv lub tuam tsev mas lawv haus cawv txiv hmab uas yog muab ntawm cov uas raug nplua los. “Kuv kuj muab cov Amaulai ua puam tsuaj rau ntawm lawv hauv ntej, yog cov neeg uas siab yam li tej ntoo ciab, thiab khov yam li tej ntoo qheb. Kuv muab lawv tej txiv uas nyob saud thiab tej cag uas nyob hauv ua puam tsuaj tag huvsi. Kuv kuj coj nej tawm hauv Iyi tebchaws los, thiab coj nej hauv tebchaws moj sab qhua tau plaub caug xyoo, kom nej thiaj tau cov Amaulai lub tebchaws ua nej teej nej tug. Kuv tsa nej cov tub qee leej ua xibhwb cev kuv lus, thiab tsa nej cov tub hluas qee leej ua cov Naxi. Cov Yixayee 'e, tej no tsis muaj tseeb lov?” Yawmsaub hais li no ntag. “Tiamsis nej tseem yuam cov Naxi haus cawv txiv hmab, thiab txwv cov xibhwb cev lus tias, ‘Nej tsis txhob cev lus kiag li.’ “Saib maj, kuv yuav muab nej nias rau hauv nej lub chaw, ib yam li lub tsheb nyuj uas thauj tej qoob puv nkaus nias rau hauv av. Tus neeg nrawm yuav tsis muaj peevxwm khiav dim lawm, tus neeg muaj zog los yuav tsis muaj zog lawm, tus uas siab loj siab tuab yuav cawm tsis tau nws txojsia. Tus uas tuav rawv hneev yuav sawv tiv tsis tau, tus uas txhais taw nrawm yuav khiav tsis dim, tus uas caij nees yuav cawm tsis tau nws txojsia. Tus uas siab loj siab tuab hauv cov tub rog, los hnub ntawd yuav khiav liab qab tsuas.” Yawmsaub hais li no ntag. Cov Yixayee 'e, cia li mloog tej lus uas Yawmsaub hais tawm tsam nej, yog hais tawm tsam tag nrho haiv neeg uas kuv coj tawm hauv Iyi tebchaws los. “Tag nrho ib tsoom neeg hauv lub ntiajteb no, nej yog haiv neeg uas kuv xaiv cia, mas kuv yuav rau txim rau nej vim tim nej tej kev txhaum huvsi.” Yog ob leeg tsis tau teem tseg cia yuav ua ke taug kev tau thiab lov? Tsov ntxhuav nyooj tom hav zoov rau thaum tsis tau qauv noj lov? Yog thav tsov ntxhuav tom tsis tau dabtsi noj mas yuav quaj hauv nws lub chaw nkaum lov? Tsis cuab hlua noog yuav los mag rooj hlua hauv av lov? Yog tsis muaj dabtsi mus tsuj rooj hlua, rooj hlua yuav cia li txhais hauv av lov? Tshuab raj kub yaj rau hauv lub moos, tej pejxeem tsis ras lov? Yog Yawmsaub tsis ua, tej xwm txheej phem yuav poob los raug lub moos lov? Qhov tseeb Vajtswv Yawmsaub yeej tsis npog ib yam dabtsi uas nws ua es tsis qhia rau nws cov qhev uas yog xibhwb cev nws li lus. Tsov ntxhuav nyooj lawm, leejtwg yuav tsis ntshai? Vajtswv Yawmsaub hais lawm, leejtwg yuav npog tsis cev nws tej lus? Cia li tshaj tawm rau tej chaw ruaj khov hauv lub moos Asadau thiab tej chaw ruaj khov hauv Iyi tebchaws hais tias, “Cia li tuaj txoos ua ke rau saum Xamali tej roob thiab tsa muag ntsia tej kev ntxhov hnyo ntau kawg thiab tej kev quab yuam hauv lub nroog ntawd.” Yawmsaub hais tias, “Cov uas ua limhiam ntais ntuj thiab ua tub sab thiaj tau nyiaj txiag los khaws cia rau hauv lawv tej chaw ruaj khov, lawv yeej tsis paub ua raws li uas raug cai.” Vim li no Vajtswv Yawmsaub thiaj hais li no tias, “Yeeb ncuab yuav tuaj vij lub tebchaws no thiab ntaus nej tej chaw tiv thaiv kom pob tag, thiab lws nej tej chaw ruaj khov.” Yawmsaub hais li no tias, “Tus uas yug yaj txeeb tau ob ceg lossis ib nplais nplooj ntseg ntawm tsov ntxhuav qhov ncauj li cas, mas cov Yixayee hauv Xamali yuav tau ib nyuag ceg kaum rooj thiab ib sab chaw pw dim ib yam li ntawd.” Vajtswv Yawmsaub, uas yog Vajtswv muaj hwjchim loj kawg nkaus hais tias, “Cia li mloog thiab ua timkhawv kom Yakhauj caj ces. Hnub uas kuv rau txim rau cov Yixayee tej kev fav xeeb, kuv yuav rau txim rau tej thaj xyeem dab hauv lub moos Npe‑ee, thiab tej kub ntawm lub kaum thaj ntawd yuav raug muab txiav poob rau hauv av. Kuv yuav rhuav tej tsev ntuj no thiab tej tsev ntuj kub pob tag ua ke, thiab tej tsev uas xuas kaus ntxhw ua yuav puam tsuaj, thiab tej vaj tse loj loj yuav ploj tag huvsi.” Yawmsaub hais li no ntag. Nej cov maum nyuj Npasas uas nyob saum lub roob Xamali, cia li mloog tej lus no. Nej quab yuam cov neeg pluag thiab zuaj cov neeg txom nyem, thiab hais rau nej tus txiv tias, “Cia li muab cawv los rau peb haus.” Vajtswv Yawmsaub tuav nws txojkev dawb huv cog lus twv hais tias, “Saib nawj, lub caij lub nyoog uas luag yuav muab nqe lauj nqe nej mus yeej yuav los, mas nej txhua tus yuav raug luag muab nuv ntses nqe mus tag nrho huvsi. Nej txhua tus yuav tawm hauv tej qhov ntsa loog uas pob ncaj nraim mus, thiab yuav raug muab laim pov tseg rau ntawm Hamoos.” Yawmsaub hais li no ntag. “Nej cia li los rau ntawm Npe‑ee thiab ua txhaum los maj, cia li los rau ntawm Kilakas thiab ua tej kev fav xeeb ntau zuj zus tuaj los maj, cia li coj tej tsiaj tuaj xyeem txhua tagkis, thiab coj ib feem kaum tuaj txhua txhia peb hnub. Cia li muab tej ncuav xyaw keeb los hlawv xyeem ua tsaug, thiab tshaj tawm txog tej uas nej zoo siab pub thiab khav txog tej ntawd. Cov Yixayee 'e, nej yeej nyiam ua li no.” Vajtswv Yawmsaub hais li no ntag. “Thoob plaws hauv nej txhua lub moos kuv cia nej tej kaus hniav tau so, thiab cia nej tu ncua tsis muaj mov noj rau hauv nej txhua lub chaw, los nej tseem tsis rov los cuag kuv.” Yawmsaub hais li no ntag. “Tseem tshuav peb lub hlis li txog caij hlais qoob tiamsis kuv tav tsis pub nag los rau nej lawm. Kuv pub nag los rau ib lub moos, tseg ib lub moos, ib daim teb muaj nag los, ib daim teb tsis muaj nag los, qoob qhuav tag. Ob lub peb lub moos thiaj li tuaj mus nrhiav dej haus rau hauv ib lub moos, kuj tsis tau haus tsau, los nej tseem tsis rov los cuag kuv.” Yawmsaub hais li no ntag. “Kuv ua rau nej tej qoob ua npluag thiab tuaj pwm, kuv ua rau nej tej vaj thiab nej tej vaj txiv hmab puam tsuaj tag, kooj txig noj nej tej txiv cev tej txiv aulib tag, los nej tseem tsis rov los cuag kuv.” Yawmsaub hais li no ntag. “Kuv tso tej mob kis uas muaj rau hauv Iyi tebchaws los raug nej, kuv xuas hniav ntaj tua nej tej tub hluas pov tseg, thiab coj nej tej nees mus, kuv ua rau nej tej yeej ua rog tsw lwj ntxiag rau hauv nej qhov ntswg, los nej tseem tsis rov los cuag kuv.” Yawmsaub hais li no ntag. “Kuv muab nej ib txhia rhuav tshem ib yam li Vajtswv rhuav tshem lub moos Xaudoo thiab lub moos Kaumaula, mas nej zoo li tus tw taws uas luag thau hauv cub tawg los, los nej tseem tsis rov los cuag kuv.” Yawmsaub hais li no ntag. “Cov Yixayee 'e, vim li no kuv yuav ua li no rau nej. Cov Yixayee 'e, vim kuv yuav ua li no rau nej, cia li npaj ntsib nej tus Vajtswv.” Tus uas puab tej roob thiab tsim tej cua, thiab hais tej uas nws xav tseg rau neeg paub, yog tus uas muab kaj ntug ua qhov tsaus ntuj lawm, thiab mus los saum tej chaw siab hauv lub ntiajteb, nws lub npe hu ua Yawmsaub, yog Vajtswv uas muaj hwjchim loj kawg nkaus. Yixayee caj ces 'e, cia li mloog tej lus uas kuv quaj ntsuag txog nej hais tias, “Yixayee uas yog tus hluas nkauj dawb huv, ntog lawm lauj, yuav tsis sawv rov los li. Nws raug muab tso tseg rau hauv nws lub tebchaws, tsis muaj leejtwg tsa nws sawv.” Vajtswv Yawmsaub hais li no tias, “Lub moos uas neeg tawm ib txhiab leej mus yuav tshuav ib puas leej xwb, thiab yog tawm ib puas leej yuav tshuav kaum leej rau Yixayee caj ces xwb.” Yawmsaub hais li no rau Yixayee caj ces tias, “Cia li nrhiav kuv thiaj muaj txojsia nyob. Tsis txhob nrhiav Npe‑ee thiab tsis txhob nkag mus rau hauv Kilakas lossis hla mus rau Npe‑awsenpa, rau qhov Kilakas yeej yuav poob tebchaws, thiab Npe‑ee yuav ploj mus.” Cia li nrhiav Yawmsaub thiab muaj txojsia nyob, ntshai tsam nws yuav tshwm plaws los ib yam li hluavtaws rau hauv Yauxej caj ces, hluavtaws yuav kub du lug, tsis muaj leejtwg tua tau ntawm Npe‑ee. Nej yog cov uas muab qhov uas tu plaub ncaj ntxeev ua cov tshuaj iab, thiab muab txojkev ncaj ncees laim pov tseg rau hauv av. Tus uas tsim tej hnub qub Txhiaj Txiv Mim thiab tej hnub qub Poj Sua Kwv Ntas thiab muab qhov tsaus ntuj ntxeev ua kaj ntug, thiab muab nruab hnub ntxeev ua hmo ntuj, nws yog tus uas hu dej hiavtxwv tawm tuaj thiab muab hliv rau saum lub ntiajteb, nws lub npe hu ua Yawmsaub. Nws muab kev puam tsuaj ua tshwm plaws los raug tus uas muaj zog, kev puam tsuaj thiaj los raug lub chaw ruaj khov. Lawv ntxub tus uas qhuab ntuas ntawm rooj loog tu plaub, thiab ntxub tus uas hais lus tseeb kawg li. Nej tsuj pes ntiag tej neeg pluag thiab sau kiag lawv tej se qoob loo mus. Vim li no nej thiaj ua tej tsev txhwm zeb los nej yuav tsis tau nyob hauv, nej cog vaj txiv hmab zoo zoo los nej yuav tsis tau cawv txiv hmab los haus. Kuv yeej paub nej tej kev fav xeeb muaj npaum li cas thiab nej lub txim loj li cas. Nej quab yuam cov neeg ncaj ncees thiab yuav tej nyiaj xiab, thiab ntiab tsis kam hais cov neeg txom nyem tej plaub ntawm rooj loog. Vim li no, lub sijhawm ntawd tus uas muaj tswvyim thiaj li nyob twjywm rau qhov yog lub sijhawm phem kawg. Cia li nrhiav txojkev zoo, tsis txhob nrhiav txojkev phem xwv nej thiaj muaj txojsia nyob. Vajtswv Yawmsaub uas muaj hwjchim loj kawg nkaus thiaj nrog nraim nej nyob yam li uas nej hais ntawd. Cia li ntxub txojkev phem es nyiam txojkev zoo, cia li tu plaub ncaj rau ntawm rooj loog. Tej zaum Vajtswv Yawmsaub uas muaj hwjchim loj kawg nkaus yuav khuvleej Yauxej caj ces uas tseem tshuav nyob. Vim li no, tus Tswv uas yog Vajtswv Yawmsaub tus muaj hwjchim loj kawg nkaus hais li no tias, “Txhua lub tshav puam yuav muaj kev quaj nyiav, thiab txhua txoj kev yuav muaj neeg seev hais tias, ‘Txom nyem lauj, txom nyem lauj!’ Lawv yuav hu tej tub qoob tub loos tuaj quaj ntsuag, thiab kom cov uas txawj quaj ntsuag tuaj nyiav. Hauv txhua lub vaj txiv hmab yuav quaj nyiav, vim kuv yuav hla hauv nej nruab nrab mus.” Yawmsaub hais li no ntag. Nej cov uas ntshaw Yawmsaub hnub yuav raug txom nyem lauj! Ua cas nej yuav ntshaw Yawmsaub hnub ntawd? Hnub ntawd yog kev tsaus ntuj, tsis yog kev kaj. Hnub ntawd zoo li tus uas khiav tsov ntxhuav mus ntsib dais, lossis zoo li tus uas nkag mus rau hauv tsev nthia tes rau ntawm phab ntsa, los nab cia li tom. Yawmsaub hnub yeej yog kev tsaus ntuj tsis yog kev kaj, yog kev tsaus dub nciab tsis muaj duab kaj ci kiag li. “Kuv ntxub thiab saib tsis taus nej tej kevcai xyeem pam noj pam haus, thiab kuv tsis zoo siab rau qhov uas nej tuaj txoos ua ke ua kevcai caiv. Txawm yog nej ua kevcai hlawv xyeem thiab ua kevcai xyeem qoob loo los kuv tsis txais yuav. Txawm yog nej muab tej tsiaj rog rog ua kevcai xyeem sib raug zoo los kuv yuav tsis tsa muag ntsia. Cia li coj nej tej suab nkauj khiav mus deb deb ntawm kuv, kuv yuav tsis mloog nej tej suab nkauj nog ncas. Cia txojkev ua ncaj ntws nto yam li dej ntws, thiab cia txojkev ncaj ncees ntws yam li lub hav uas dej ntws ib txhis. “Yixayee caj ces 'e, nej tau tua tsiaj xyeem thiab muab qhov txhia chaw xyeem rau kuv hauv tebchaws moj sab qhua tau plaub caug xyoo lov? Nej yuav kwv nej tus vajntxwv dab Xakhu, thiab Khaivas uas yog nej tus dab hnub qub, yog ob tug dab mlom uas nej txua rau nej. Vim li no kuv yuav coj nej tawm tebchaws mus dhau plaws lub nroog Damaxaka.” Yawmsaub uas npe hu ua Vajtswv muaj hwjchim loj kawg nkaus hais li no ntag. Cov uas nyob tsis txob tsis txhawj hauv Xi‑oo, thiab cov uas nyob tso siab plhuav saum lub roob Xamali, yuav raug txom nyem lauj! Lawv yog cov uas muaj meej nthawb hauv lub tebchaws uas ua thawj, uas cov Yixayee tuaj vam khom. Cia li mus tshuaj saib lub moos Khanej, thiab tawm qhov ntawd mus rau lub moos loj Hama, li mus rau nram lub moos Ka hauv cov Filixatee tebchaws. Tej moos ntawd zoo dua lub tebchaws uas nej kav no lov? Lawv lub tebchaws dav dua nej lub tebchaws lov? Nej tav hnub uas phem ntawd kom nyob deb, tiamsis nej coj lub zwm txwv uas ua limhiam ntais ntuj los ze. Cov uas pw saum lub txaj kaus ntxhw thiab nyob xyab luas saum lub rooj ntev, thiab noj tej menyuam yaj hauv pab yaj thiab noj tej menyuam nyuj hauv nkuaj, yuav raug txom nyem lauj! Lawv hu nkauj ua si ntxuag suab nkauj nog ncas, thiab ntaus tej suab nkauj phim tej nkauj tshiab ib yam li Davi. Lawv haus kiag tej niag phaj cawv txiv hmab thiab muab tej roj zoo zoo pleev lawv lub cev, tiamsis lawv twb tsis quaj ntsuag txog qhov uas Yauxej raug puam tsuaj. Vim li no lawv yuav ua thawj pab uas poob tebchaws, thiab qhov uas lawv pam noj pam haus pw xyab luas yuav ploj ntais mus. Vajtswv Yawmsaub tau tuav nws lub npe cog lus twv. Vajtswv Yawmsaub uas muaj hwjchim loj kawg nkaus hais tias, “Kuv dhuav qhov uas Yakhauj khav theeb, thiab ntxub nws tej chaw ruaj khov. Kuv yuav muab lub nroog no thiab txhua yam uas nyob hauv cob rau yeeb ncuab.” Yog hauv tsev tshuav kaum leej nyob xwb, lawv yuav tuag tag huvsi. Thaum leejtwg li kwvtij tuaj muab tej cev tuag hlawv es yuav nqa tej pob txha tawm hauv tsev, thiab hais rau tus uas nyob chav hauv lub plawv tsev ntawd tias, “Puas tshuav leejtwg nrog koj nyob thiab?” tus ntawd yuav teb tias “Tsis tshuav.” Mas nws yuav hais tias, “Nyob twjywm, tsis txhob hais txog Yawmsaub lub npe kiag li.” Saib maj, Yawmsaub yeej hais cia lawm, mas tej vaj tse loj yuav raug muab tsoo tawg ua tej dwb daim, thiab tej tsev me yuav tawg mos nyoos. Nees dhia saum tej roob tsuas lov? Muaj leejtwg muab nyuj laij dej hiavtxwv lov? Nej muab txojkev ua ncaj ntxeev ua tshuaj lom muaj taug, thiab muab qhov uas ua ncaj ncees ntxeev ua cov tshuaj iab. Nej zoo siab xyiv fab rau hauv lub moos Laudenpa, thiab hais tias, “Qhov uas peb txeeb tau lub moos Khana‑i los rau peb, tsis yog siv peb lub zog lov?” Vajtswv Yawmsaub uas muaj hwjchim loj kawg nkaus hais tias, “Yixayee caj ces 'e, saib nawj, kuv yuav tsa ib haiv neeg sawv tawm tsam nej, mas lawv yuav quab yuam nej txij ntua txojkev uas nkag mus rau hauv lub moos Hama mus txog lub hav Alanpa.” Vajtswv Yawmsaub qhia tshwm rau kuv pom li no. Nws tsim tej kooj txig rau thaum phaum qoob tom qab hlav tuaj, yog tom qab phaum qoob uas hlais pub rau vajntxwv lawm. Thaum kooj txig noj tej nroj tsuag hauv lub tebchaws tag lawm, kuv txawm hais tias, “Au Vajtswv Yawmsaub, thov koj zam txim lauj! Yakhauj yuav ua li cas ua neej nyob? Nws tseem me me xwb.” Zaj no Yawmsaub hloov dua siab. Yawmsaub hais tias, “Yuav tsis muaj raws li no.” Thiab Vajtswv Yawmsaub qhia tshwm rau kuv pom li no. Vajtswv Yawmsaub hu hluavtaws los txiav txim, mas hluavtaws kub kiag hiavtxwv loj thiab lub tebchaws huvsi. Kuv thiaj hais tias, “Au Vajtswv Yawmsaub, thov tswj cia. Yakhauj yuav ua li cas ua neej nyob? Nws tseem me me xwb.” Zaj no Yawmsaub kuj hloov dua siab. Yawmsaub hais tias, “Yuav tsis muaj raws li no.” Thiab nws qhia tshwm rau kuv pom li no. Yawmsaub sawv ntsug ntawm phab ntsa uas siv lub qe hlau ntsuas qhov ntseg, nws tuav rawv lub qe hlau hauv nws txhais tes. Mas Yawmsaub hais rau kuv tias, “Amau 'e, koj pom dabtsi?” Kuv teb tias, “Pom lub qe hlau ntsuas.” Yawmsaub hais tias, “Saib maj, kuv tabtom muab lub qe hlau ntsuas hauv nruab nrab kuv haiv neeg Yixayee, kuv yuav tsis zam lawv dua li lawm. “Yiha tej chaw siab teev dab yuav raug muab ua puam tsuaj thiab Yixayee tej chaw pe hawm yuav raug muab tso tseg piam tag, thiab kuv yuav xuas ntaj sawv tsees tawm tsam Yelaunpau‑as caj ces.” Amaxiya uas ua pov thawj hauv Npe‑ee xa xov mus rau Yixayee tus vajntxwv Yelaunpau‑as hais tias, “Amau ntaus tswvyim fav xeeb rau koj hauv ib tsoom Yixayee. Lub tebchaws ris tsis taus nws tej lus huvsi. Rau qhov Amau hais tias, ‘Yelaunpau‑as yuav tuag hniav ntaj, thiab cov Yixayee yuav poob tebchaws mus deb.’ ” Thiab Amaxiya hais rau Amau tias, “Koj uas hais pom tom hauv ntej, cia li mus, cia li khiav rov mus rau hauv Yuda tebchaws. Noj tej mov qhov ntawd thiab cev Vajtswv lus rau qhov ntawd nawj. Tsis txhob tuaj cev Vajtswv lus ntawm Npe‑ee dua li, rau qhov lub chaw no yog lub chaw uas vajntxwv pe hawm, thiab yog lub tebchaws li tuam tsev.” Amau txawm teb Amaxiya tias, “Kuv tsis yog ib tug xibhwb cev Vajtswv lus lossis xibhwb cev lus li tub, kuv yog neeg yug tsiaj txhu thiab neeg tu txiv cev. Yawmsaub coj kuv tawm hauv qhov uas yug yaj yug tshis tuaj, thiab Yawmsaub hais rau kuv tias, ‘Mus maj, cia li cev lus rau kuv haiv neeg Yixayee.’ “Nimno koj cia li mloog Yawmsaub tej lus. Koj hais tias, ‘Tsis txhob cev Vajtswv li lus tawm tsam cov Yixayee, thiab tsis txhob qhuab qhia tawm tsam Yiha caj ces.’ Vim li no Yawmsaub thiaj hais li no tias, ‘Koj pojniam yuav ua poj muag cev rau hauv lub nroog, koj tej tub tej ntxhais yuav tuag tag rau hniav ntaj, koj tej teb yuav raug muab ntsuas faib. Koj tus kheej yuav tuag rau hauv lub tebchaws uas qias tsis huv, thiab cov Yixayee yeej yuav poob tebchaws mus deb ntawm lawv lub tebchaws.’ ” Vajtswv Yawmsaub qhia tshwm rau kuv pom li no. Muaj ib lub tawb txiv ntoo ntuj qhua. Nws hais rau kuv tias, “Amau 'e, koj pom dabtsi?” Kuv teb tias, “Pom ib lub tawb txiv ntoo ntuj qhua.” Mas Yawmsaub hais rau kuv tias, “Hnub kawg los txog kuv haiv neeg Yixayee lawm. Kuv yuav tsis zam lawv dua li lawm.” Vajtswv Yawmsaub hais tias, “Hnub ntawd lub suab nkauj hauv lub tuam tsev yuav ntxeev ua lub suab quaj nyiav. Yuav muaj cev tuag ntau kawg li, muab pov tseg thiab ntsiag to rau txhua qhov.” Nej cov uas tsuj yuam cov neeg txom nyem, thiab rhuav tshem cov pluag hauv lub tebchaws, cia li mloog tej lus no. Nej hais tias, “Thaum twg li dhau lub hli xiab peb thiaj tau muag peb tej qoob? Thaum twg li dhau hnub Xanpatau peb thiaj tau muab peb tej mog muag? Peb thiaj tau muab lub efa ua kom me, thiab muab lub sekhee ua kom loj, thiab muab rab teev tsis hum txiaj los ntxo luag, thiab muab nyiaj yuav tau tej neeg pluag, thiab muab ib nkawg khau ntuag yuav tau cov uas txom nyem, thiab muag tej npluag mog.” Yawmsaub tuav Yakhauj lub meej mom cog lus twv hais tias, “Tej uas lawv ua kuv yeej yuav nco ntsoov txhua yam huvsi mus ib txhis. Lub tebchaws yuav tsis ntseeg nkaws rau zaj no lov? Txhua tus uas nyob hauv lub tebchaws no yuav tsis quaj ntsuag lov? Lub tebhcaws yuav phwj tuaj yam li tus dej Nai, yuav ntas mus ntas los thiab rov nqeg ib yam li tus dej Nai hauv Iyi tebchaws.” Vajtswv Yawmsaub hais tias, “Hnub ntawd kuv yuav ua rau lub hnub poob thaum tav su, thiab ua rau lub ntiajteb tsaus ntuj thaum nruab hnub nrig. Kuv yuav muab qhov uas nej pam noj pam haus ntxeev ua kev quaj lwj siab ntsuav, thiab muab nej tej suab nkauj huvsi ntxeev ua lub suab quaj ntsuag. Kuv yuav muab khaub seev tsaj rau sawvdaws sia ntawm duav, thiab ua rau txhua lub taubhau do hau cuas. Kuv yuav ua kom quaj ntsuag ib yam li quaj ntsuag tib tug tub uas tuag lawd, thiab lub sijhawm kawg yuav zoo yam li hnub uas lwj siab kawg.” Vajtswv Yawmsaub hais tias, “Saib nawj, lub caij lub nyoog tabtom los, mas kuv yuav tso kev tshaib kev nqhis los rau hauv lub tebchaws no, tiamsis tsis yog tshaib nqhis mov noj lossis dej haus, yog tshaib nqhis Yawmsaub tej lus. Lawv yuav mus mus los los sab hiavtxwv no mus txog sab hiavtxwv tim ub, thiab sab ped mus txog sab hnub tuaj. Lawv dhia mus dhia los nrhiav Yawmsaub tej lus tiamsis lawv nrhiav tsis tau. Hnub ntawd tej hluas nkauj zoo nkauj thiab tej tub hluas yuav tsaus muag ntog vim yog nqhis dej. Cov uas tuav dab Asima hauv Xamali lub npe twv thiab hais tias, ‘Daj 'e, koj tus dab muaj txojsia nyob pom,’ thiab hais tias, ‘Tus dab ntawm Npe‑awsenpa muaj txojsia nyob pom,’ lawv cov ntawd yuav ntog tag, yuav tsis sawv los dua li lawm.” Kuv pom Yawmsaub sawv ntawm lub thaj xyeem ib sab thiab nws hais tias, “Cia li ntaus tej hau ncej ua kom tej taw rooj ua zog koog, thiab cia li muab lov ua tej dwb daim poob rau saum cov pejxeem sawvdaws taubhau. Cov uas tseem tshuav nyob, kuv yuav xuas ntaj tua pov tseg, yuav tsis muaj ib tug twg khiav mus tau, yuav tsis dim ib tug kiag li. Txawm yog lawv khawb mus txog tub tuag teb los kuv txhais tes yuav ntes lawv qhov ntawd los. Txawm yog lawv nce mus txog saum ntuj, l os kuv yuav coj lawv nqes qhov ntawd los. Txawm yog lawv tsiv nraim rau saum lub ncov roob Khamee, los kuv yuav nrhiav lawv thiab ntes lawv qhov ntawd los. Txawm yog lawv tsiv nraim rau hauv qab thu hiavtxwv kom dhau kuv qhov muag, los kuv yuav hais rau tus zaj uas nyob hauv kom tom lawv. Txawm yog lawv raug ntes coj mus rau ntawm yeeb ncuab xubntiag lawm, los kuv yuav txib tej hniav ntaj hniav riam tua lawv qhov ntawd. Kuv yuav tsom ntsoov saib lawv rau qhov phem, tsis yog saib rau qhov zoo.” Vajtswv Yawmsaub uas muaj hwjchim loj kawg nkaus, nws kov lub ntiajteb mas lub ntiajteb yaj ntshis tag, thiab txhua tus uas nyob hauv yuav quaj ntsuag. Lub ntiajteb phwj tuaj yam li tus dej Nai, thiab rov nqeg ib yam li tus dej Nai hauv Iyi tebchaws. Tus uas tsim nws lub chaw nyob rau txheej saum ntuj, thiab tsim lub ntuj khwb lub ntiajteb, yog tus uas hu dej hiavtxwv tawm tuaj thiab muab hliv rau saum lub ntiajteb, nws lub npe hu ua Yawmsaub. Yawmsaub hais tias, “Cov Yixayee 'e, nej tsis thooj li cov neeg Khuj rau kuv lov? Kuv tsis coj cov Yixayee tawm hauv Iyi tebchaws los lov, thiab tsis tau coj cov Filixatee tawm hauv Khathau tebchaws thiab cov Alas tawm hauv Khi tebchaws los lov? Saib nawj, Vajtswv Yawmsaub lub qhov muag ntsia ntsoov lub tebchaws uas ua txhaum muaj txim. Kuv yuav muab lub tebchaws ntawd rhuav tshem kom ploj ntais hauv lub ntiajteb mus, tiamsis kuv yuav tsis rhuav tshem Yakhauj caj ces kom tu noob nrho.” Yawmsaub hais li no ntag. “Kuv yuav hais thiab kuv yuav tshau cov Yixayee hauv nruab nrab ib tsoom tebchaws sawvdaws ib yam li muab vab tshaus los tshau, tiamsis tsis muaj ib lub qe zeb yuav poob rau hauv av. Kuv haiv neeg uas ua txhaum txhua tus yuav tuag tag rau hniav ntaj, lawv yog cov uas hais tias, ‘Kev phem yuav caum tsis cuag thiab tsis raug peb.’ ” “Hnub ntawd kuv yuav tsa Davi lub tsev ntaub uas vau lawd sawv dua tshiab, thiab kho tej ntu uas tawg thiab tsa tej uas pob tag ua tej niag pawg dua tshiab, thiab tsim dua tshiab kom zoo yam li yav thaum ub. Lawv thiaj li txeeb tau tej uas tshuav hauv Edoo tebchaws thiab hauv txhua lub tebchaws uas hu raws li kuv lub npe los ua lawv teej lawv tug.” Yawmsaub uas yuav ua tej no hais li no ntag. Yawmsaub hais tias, “Saib maj, lub caij lub nyoog tabtom los mas tus uas laij teb yuav laij yeej tus uas hlais, thiab tus uas tsuam kua txiv hmab yuav tsuam yeej tus uas cog noob txiv hmab. Tej cawv txiv hmab qab zib yuav nrog saum tej roob los, thiab yuav ntws saum tej pov roob huvsi los. Kuv yuav pub kuv haiv neeg Yixayee rov vam meej li qub. Lawv yuav tsim tej moos uas pob tag dua tshiab thiab nyob rau hauv, lawv yuav cog vaj txiv hmab thiab tau cawv txiv hmab los haus, lawv yuav cog vaj txiv ntoo thiab tau noj tej txiv ntawd. Kuv yuav cog lawv rau hauv lawv lub tebchaws, lawv yuav tsis raug muab dob tawm hauv lub tebchaws uas kuv twb pub rau lawv dua li lawm.” Nej tus Vajtswv Yawmsaub hais li no ntag. Aunpadiya zaj yog toog. Vajtswv Yawmsaub hais li no txog cov Edoo. Peb hnov xov ntawm Yawmsaub tuaj, thiab muaj ib tug xa xov mus thoob plaws ib tsoom tebchaws hais tias, “Cia li sawv tsees, cia peb sawv mus ua rog rau cov Edoo.” “Saib maj, kuv yuav ua rau nej me kawg rau hauv ib tsoom tebchaws, nej yuav raug saib tsis taus heev. Nej cov uas nyob hauv tej kem zeb thiab nej tej chaw nyob nyob qhov chaw siab, nej lub siab khav theeb rov dag ntxias nej tus kheej. Nej xav hauv lub siab tias, ‘Leejtwg yuav rub tau peb nqes rau hauv av? ’ Txawm yog nej nce mus siab yam li tus liaj, txawm yog nej lub zes nrog cov hnub qub nyob ua ke, los kuv yuav chua nej nqes qhov ntawd los.” Yawmsaub hais li no ntag. “Yog tub sab tuaj txog nej, yog cov uas lws nej tuaj hmo ntuj, es nej puam tsuaj liamsim tag, mas tub sab tsuas nyiag kom txaus nws siab xwb los tsis yog? Yog cov uas de txiv hmab tuaj txog nej, lawv yuav tsis tseg tej txiv hmab ib txhia lov? Exau raug muab lws sab kawg li lauj, nws nyiaj txiag cuab txhiaj cuab tam raug muab xawb coj mus tag huvsi. Cov neeg sawvdaws uas koom nrog nej dag ntxias nej, lawv muab nej ntiab mus txog ntua ciam teb lawm. Nej cov kwvluag rov tawm tsam kov yeej nej, cov uas nrog nej sib raug noj ib lauj kaub mov kuj ua rooj hlua cuab nej. Tej no tsis muaj leejtwg nkag siab kiag li.” Yawmsaub hais tias, “Hnub ntawd kuv yuav tsis rhuav tshem cov neeg txawj ntse ploj tag hauv Edoo lov, thiab tsis rhuav tshem cov uas txawj nkag siab ploj tag saum lub roob Exau lov? Lub moos Themas 'e, koj cov tub rog siab loj siab tuab yuav ntshai kawg, txhua tus uas nyob saum lub roob Exau yuav raug tua tu noob nrho. Vim yog tim qhov uas ua limhiam ntais ntuj rau koj tus kwv Yakhauj, koj yuav raug txaj muag thiab yuav raug muab txiav tu nrho mus ib txhis. Hnub uas koj sawv rau ib cag ntsia, yog hnub uas neeg lwm tebchaws lws lawv tej nyiaj txiag thiab lwm haiv neeg nkag lawv tej rooj loog los, muab lub nroog Yeluxalees rho ntawv saib leejtwg tau, koj kuj yog cov neeg ntawd ib tug ntag. Tsis tsim nyog koj luag hnyos rau hnub uas koj tus kwv raug txom nyem ceeblaj, tsis tsim nyog koj xyiv fab luag hnub uas cov Yuda raug kev puam tsuaj, tsis tsim nyog koj khav rau hnub uas lawv raug txom nyem nyuaj siab. Tsis tsim nyog koj nkag kuv haiv neeg lub rooj loog rau hnub uas lawv liamsim tag, tsis tsim nyog koj luag hnyos qhov uas lawv raug puam tsuaj rau hnub uas lawv liamsim tag, tsis tsim nyog koj lws lawv tej nyiaj txiag rau hnub uas lawv liamsim tag. Tsis tsim nyog koj sawv ntsug ntawm tej kev tshuam tav lawv cov uas khiav dim, tsis tsim nyog koj muab cov uas dim los cob rau yeeb ncuab rau hnub uas lawv raug txom nyem nyuaj siab. Hnub uas Yawmsaub teem cia los ze ib tsoom tebchaws sawvdaws lawm. Koj tau ua li cas lawm, koj yuav raug ib yam li ntawd, tej uas koj ua yuav rov los poob rau saum koj lub taubhau. Koj haus saum kuv lub roob dawb huv li cas, tej tebchaws sawvdaws uas nyob puag ncig koj yuav haus ib yam li ntawd. Lawv yuav haus kom qaug thiab lawv yuav zoo li uas lawv twb tsis tau txeev yug los. Yuav muaj neeg hauv lub roob Xi‑oo khiav dim, lub chaw ntawd yuav dawb huv. Yakhauj caj ces yuav rov tuav lawv qub txeeg qub teg ua lawv tug. Yakhauj caj ces yuav ua hluavtaws Yauxej caj ces yuav ua nplaim taws, Exau caj ces yuav ua quav nyab, hluavtaws thiab nplaim taws yuav kub tag du lug, Exau caj ces yuav tsis muaj leejtwg dim tau li,” rau qhov Yawmsaub twb hais cia lawm. Cov uas nyob hauv Neke yuav tau lub roob Exau ua lawv tug, cov uas nyob saum tej pov roob Sefela yuav tau Filixatee tebchaws. Lawv yuav tau Efa‑i tebchaws thiab Xamali tebchaws ua lawv tug, thiab cov Npeeyamee yuav tau Kile‑a tebchaws ua lawv tug. Cov Yixayee uas poob tebchaws rau hauv lub moos Halam, yuav tau Finikia tebchaws mus txog ntua lub moos Xalefa ua lawv tug. Cov neeg Yeluxalees uas poob tebchaws rau hauv lub moos Xefala, yuav tau tej moos hauv Neke ua lawv tug. Cov uas cawm lub tebchaws dim yuav nce mus rau saum lub roob Xi‑oo thiab kav lub roob Exau mas lub tebchaws yuav poob ua Yawmsaub li. Yawmsaub hais lus tuaj rau Yauna uas yog Amithai tus tub hais tias, “Cia li sawv tsees mus rau lub nroog loj Ninave, thiab qw tawm tsam lub nroog ntawd, vim lawv tej kev ua limhiam tuaj txog kuv lawm.” Tiamsis Yauna sawv tsees khiav ntawm Yawmsaub lub xubntiag mus rau lub moos Thasi. Nws mus rau nram lub moos Yaupa mas ntsib ib lub nkoj txwg tabtom yuav mus rau lub moos Thasi. Nws thiaj them nqe nkoj thiab nce rau hauv lub nkoj nrog lawv mus rau lub moos Thasi kom dhau Yawmsaub lub xubntiag. Mas Yawmsaub tso cua nplawm hlob hlob rau hauv hiavtxwv thiaj li muaj cua daj cua dub ntsawj ceev kawg hauv hiavtxwv ua rau lub nkoj yuav tawg. Cov uas tsav nkoj ntshai kawg, nyias taus nyias thov nyias tus dab pab, thiab lawv thau tej nra hauv lub nkoj pov rau hauv hiavtxwv kom lub nkoj thiaj li sib zog. Tiamsis Yauna twb nkag mus rau hauv lub plawv nkoj pw tsaug zog ceev lawm. Tus tswv nkoj thiaj los hais rau nws tias, “Koj tsaug zog ceev ua dabtsi li no? Cia li sawv tsees, thov hu koj tus timtswv. Tej zaum tus timtswv ntawd yuav nco txog peb, peb thiaj tsis puam tsuaj.” Cov tsav nkoj thiaj sib yaum hais tias, “Cia li los, cia peb rho ntawv xwv peb thiaj paub tias yog tim leejtwg es tej xwm txheej phem no tshwm los raug peb.” Lawv thiaj rho ntawv mas rho tau Yauna. Lawv hais rau nws tias, “Koj qhia rau peb saib, yog tim leejtwg es tej xwm txheej phem no thiaj tshwm los raug peb? Koj ua haujlwm dabtsi? Koj tuaj qhovtwg tuaj? Koj lub tebchaws hu li cas? Koj yog haiv neeg twg?” Mas Yauna teb lawv tias, “Kuv yog neeg Henplais, kuv hwm thiab paub ntshai Yawmsaub uas yog Vajtswv ntuj uas tsim hiavtxwv thiab nruab nqhuab.” Mas cov neeg ntawd yimhuab ntshai heev, lawv thiaj hais rau nws tias, “Koj ua dabtsi li no?” Cov neeg ntawd paub tias nws khiav ntawm Yawmsaub lub xubntiag tuaj, vim nws twb hais li ntawd rau lawv lawm. Lawv txawm hais rau nws tias, “Peb yuav ua li cas rau koj kom hiavtxwv thiaj li tus rau peb?” rau qhov dej hiavtxwv yimhuab nphau heev zuj zus tuaj. Nws thiaj hais rau lawv tias, “Cia li muab kuv pov rau hauv hiavtxwv, mas dej hiavtxwv yuav tus rau nej, rau qhov kuv paub tias qhov uas cua daj cua dub raug nej loj li no yog tim kuv tus kheej.” Txawm li ntawd los cov uas tsav nkoj kuj siv zog nquam nkoj xav coj lub nkoj mus txog tim ntug, tiamsis ua tsis tau li, rau qhov dej hiavtxwv yimhuab nphau heev zuj zus tav lawv kev. Lawv thiaj quaj thov Yawmsaub tias, “Au Yawmsaub, peb thov koj tsis txhob cia peb raug puam tsuaj vim yog tim tus yawg no txojsia. Thov tsis txhob muab tus uas tsis txhaum cov ntshav rau peb ris. Au Yawmsaub, koj yeej ua raws li koj pom zoo.” Lawv thiaj muab Yauna pov rau hauv hiavtxwv, mas dej hiavtxwv thiaj li tus tsis nphau lawm. Cov neeg ntawd kuj ntshai Yawmsaub heev, lawv thiaj tua tsiaj xyeem thiab yeem lus rau Yawmsaub. Yawmsaub npaj ib tug ntses loj heev nqos Yauna. Yauna nyob hauv ntses lub plab tau peb hnub peb hmos. Mas Yauna nyob hauv ntses lub plab thov Yawmsaub uas yog nws tus Vajtswv, hais tias, “Thaum kuv raug kev txom nyem kuv hu thov Yawmsaub, mas nws teb kuv. Kuv nyob hauv tub tuag teb lub plab quaj thov, mas koj mloog kuv lub suab. Koj muab kuv pov rau hauv qhov uas tob heev rau hauv plawv hiavtxwv. Dej nyab laum nkaus kuv lawm. Koj tej niag nthwv dej thiab tej dej nphau nyab kiag kuv lawm. Thaum ntawd kuv hais tias, ‘Kuv raug muab laim tawm ntawm koj lub xubntiag lawm, tiamsis kuv yeej yuav rov tsa muag ntsia koj lub tuam tsev uas dawb huv dua.’ Dej nyab nkaus kuv, dej hiavtxwv twb vij nkaus kuv, tej ntxhuab hiavtxwv kuj rig kuv taubhau. Kuv nqes mus rau hauv tej cag roob, ntiajteb tej las rooj kaw kuv cia mus ib txhis, los kuv tus Vajtswv Yawmsaub, koj tseem coj kuv txojsia tawm hauv qhov tuag los. Thaum kuv tus ntsuj plig tawm zuj zus hauv kuv lub cev, kuv nco txog Yawmsaub, thiab kuv tej lus thov tuaj txog koj, nkag mus rau hauv koj lub tuam tsev uas dawb huv. Cov uas hwm tej dab mlom uas tsis muaj qabhau, yeej yog lawv muab tus uas hlub lawv tiag tiag tso tseg. Tiamsis kuv yuav tsa suab ua tsaug xyeem tsiaj rau koj, kuv yuav pauj tej uas kuv yeem lus cia lawd. Qhov uas cawm dim nyob ntawm Yawmsaub.” Yawmsaub txawm hais rau tus ntses mas tus ntses thiaj muab Yauna ntuav rau saum nruab nqhuab. Yawmsaub hais lus tuaj rau Yauna zaum ob hais tias, “Cia li sawv tsees mus rau lub nroog loj Ninave thiab tshaj tawm rau lub nroog ntawd raws li kuv hais rau koj.” Yauna thiaj sawv tsees mus rau lub nroog Ninave raws li Yawmsaub tej lus. Ninave yog lub nroog loj heev, dav heev mus peb hnub ke thiaj dhau. Yauna pib mus rau hauv lub nroog tau ib hnub ke, nws li qw hais tias, “Tshuav plaub caug hnub xwb Ninave yuav raug puam tsuaj.” Cov pejxeem hauv lub nroog Ninave kuj ntseeg Vajtswv. Lawv tshaj tawm kom yoo mov. Lawv muab khaub seev tsaj los hnav, tus hlob tus yau huvsi. Tej xov no nrov mus txog vajntxwv hauv Ninave, mas nws sawv tsees saum nws lub zwm txwv, hle nws cev tsoos tsho tseg muab khaub seev tsaj los hnav thiab nyob hauv qhov tshauv. Nws tawm ib tsab ntawv tshaj tawm thoob plaws lub nroog Ninave hais tias, “Vajntxwv thiab cov uas ua hlob tawm tsab ntawv no. Txwv tu nrho neeg thiab tsiaj txhu, tsis hais nyuj yaj tshis kom tsis txhob sim yaim ib yam dabtsi li, tsis txhob noj tsis txhob haus dej li. Cia neeg thiab tsiaj txhu hnav khaub seev tsaj, thiab kub siab lug thov Vajtswv. Cia txhua tus tig kiag ntawm nws txojkev phem los thiab ntawm tej kev limhiam ntais ntuj uas nws txhais tes ua. Leejtwg yuav txawj paub? Tej zaum Vajtswv yuav ntxeev dua siab thiab tso nws txojkev npau taws ceev tseg, peb thiaj tsis puam tsuaj.” Thaum Vajtswv pom tej uas lawv ua thiab pom qhov uas lawv tig kiag ntawm lawv tej kev phem, Vajtswv kuj hloov siab tsis tso tej xwm txheej phem uas nws hais tias nws yuav tso los raug lawv lawm. Tej xwm txheej no tsis txaus Yauna lub siab kiag li nws thiaj chim. Nws thov Yawmsaub tias, “Au Yawmsaub, thaum kuv tseem nyob hauv kuv lub tebchaws, kuv yeej hais lawm tias yuav zoo li no los tsis yog? Twb yog vim li no kuv thiaj maj nroos khiav mus rau lub moos Thasi, rau qhov kuv paub tias koj yog tus Vajtswv uas hlub thiab khuvleej, tsis chim sai, muaj txojkev hlub ruaj khov nplua mias, thiab ntxeev dua siab tsis tso tej xwm txheej phem los. Au Yawmsaub, vim li no nimno thov koj muab kuv txojsia rho mus, rau qhov kuv tuag kuj zoo dua li nyob.” Mas Yawmsaub hais tias, “Qhov uas koj chim li kod zoo lov?” Yauna txawm tawm mus rau nraum lub nroog, zaum ntawm ntug nroog sab hnub tuaj thiab ua ib lub tsev pheeb suab nyob. Nws zaum nraim ntxoov ntxoo hauv lub tsev pheeb suab tos saib lub nroog ntawd yuav raug xwm txheej li cas. Vajtswv Yawmsaub ua kom ib tsob ntoo qaib tuaj hlob rau saum Yauna ua ntxoov ntxoo roos nws lub taubhau nws thiaj tau zoo nyob. Vim tsob ntoo qaib no Yauna thiaj zoo siab xyiv fab heev. Tiamsis hnub tom qab thaum kaj ntug txoog Vajtswv kom ib tug kab noj tsob ntoo qaib ntawd ua rau tuag tshav lawm. Thaum hnub tawm lawd, Vajtswv tso cua ntsawj sab hnub tuaj kub lug tuaj, mas tshav ntuj kub Yauna lub taubhau ua rau nws qaug zog heev, mas nws thov tias cia nws tuag. Nws hais tias, “Kuv tuag kuj zoo dua li nyob.” Vajtswv hais rau Yauna tias, “Vim tsob ntoo qaib ntawd tsim nyog koj chim li kod lov?” Yauna teb tias, “Yeej tsim nyog kuv chim tuag li lawm.” Mas Yawmsaub hais tias, “Koj khuvxim tsob ntoo uas koj tsis tau nqes dag nqes zog cog lossis ua kom hlob tuaj. Ib hmos xwb nws twb hlob tuaj lawm, ib hmos xwb kuj tuag lawm. Tsis tsim nyog kuv yuav khuvxim lub nroog loj Ninave no uas muaj pejxeem coob dua 120,000 leej uas tsis paub tias sab twg yog sab xis sab twg yog sab laug thiab muaj tsiaj txhu coob heev lov?” No yog tej lus uas Yawmsaub hais tuaj rau Mikha uas yog neeg hauv lub moos Maulese rau thaum Yauthas, Aha thiab Hexekhiya ua vajntxwv kav Yuda tebchaws, yog tej lus uas Mikha pom txog Xamali thiab Yeluxalees. Ib tsoom neeg txhua tus 'e, cia li tig ntsej mloog, lub qab ntuj 'e thiab txhua yam uas nyob hauv cia li mloog. Cia Vajtswv Yawmsaub ua timkhawv kom nej, yog tus Tswv uas hais hauv nws lub tuam tsev dawb huv tuaj. Saib nawj, Yawmsaub tawm hauv nws lub chaw los, nws yuav nqes los tsuj mus los saum tej chaw siab hauv lub ntiajteb. Tej roob yuav yaj tag rau hauv nws qab thiab tej hav yuav tawg pes rhe, yam nkaus li ciab ntab yaj ntawm hluavtaws thiab yam li tej dej uas ntws ntawm tej toj ntxhab los. Tej xwm txheej no huvsi yog tim Yakhauj tej kev fav xeeb thiab tim Yixayee caj ces tej kev txhaum txim. Yakhauj tej kev fav xeeb yog dabtsi? Tsis yog lub nroog Xamali lov? Yuda caj ces lub chaw siab teev dab yog dabtsi? Tsis yog lub nroog Yeluxalees lov? “Vim li no kuv yuav ua rau Xamali pob ua tej niag pawg ciaj hav nroj, yuav ua chaw cog vaj txiv hmab. Kuv yuav muab tej pob zeb uas tsim lub nroog ntawd nchuav rau hauv tej khuab ha, mas yuav pom tej taw uas tiag lub nroog. Tej dab mlom huvsi hauv lub nroog ntawd yuav raug muab tsoo ua tej dwb daim. Tej uas muab xyeem rau hauv tej tsev dab yuav raug muab hlawv pov tseg, thiab kuv yuav muab tej dab mlom ua kom piam tag huvsi. Tej dab mlom ntawd yog Xamali muab cov nqe ua poj muag cev sau zog yuav los, mas yuav rov mus ua nqe ntiav poj muag cev.” Vim li no kuv yuav quaj ntsuag thiab quaj nyiav, kuv yuav mus mus los los liab qab tsuas tsis rau khau. Kuv yuav quaj ntsuag yam li hma nqov ntuj, thiab kuv yuav quaj lwj siab ntsuav yam li noog ntxhuav. Xamali tej kiav txhab kho tsis tau li thiab kis tuaj txog Yuda lawm, twb los txog ntawm kuv haiv neeg lub rooj loog, uas yog Yeluxalees ntag. Tsis txhob piav zaj no rau hauv lub moos Ka, tsis txhob quaj kiag li. Cia li da luj luam rau hauv tej hmoov av ntawm lub moos Npe Le‑ala. Cov neeg hauv lub moos Safi cia li taug nej txojkev liab qab tsuas thiab txaj muag. Cov neeg hauv lub moos Xana tsis tawm los. Lub moos Npe‑exee quaj nyiav, nej thiaj tsis tau chaw cawm siav rau qhov ntawd lawm. Cov neeg hauv lub moos Malau tos qhov zoo qhuav siab qhawv, vim yog Yawmsaub tso tej xwm txheej phem los txog ntawm rooj loog Yeluxalees lawm. Cov neeg hauv lub moos Lakhi 'e, cia li muab nees nruab rau tej tsheb ua rog. Nej xub ua txhaum thiaj coj kev txhaum los rau hauv Xi‑oo tus ntxhais, rau qhov Yixayee tej kev fav xeeb muaj nyob hauv nej nruab nrab. Vim li no nej yuav muab tshav ntuj xa lub moos Mauleseka mus, thiab lub moos Axij tej vaj tse yuav tsis ua chaw vam khom rau Yixayee tej vajntxwv. Cov neeg hauv lub moos Malesa 'e, kuv yuav coj tus uas kov yeej los ntaus nej. Tus uas yog Yixayee lub koob meej yuav los rau hauv lub moos Adulas. Cia li chais nej cov plaubhau kom do cuas quaj ntsuag nej tej menyuam uas nej nyiam kawg. Cia li ua rau nej do hau ib yam li dav noj twm, rau qhov lawv yuav ncaim nej mus poob tebchaws. Cov uas pw saum lawv lub txaj npaj yuav ua limhiam thiab ntaus tswvyim phem yuav raug txom nyem lauj! Thaum kaj ntug lawv kuj mus ua tej ntawd, rau qhov lawv txhais tes muaj peevxwm ua tau. Lawv ntshaw luag tej teb ces txawm mus txeeb kiag, lawv ntshaw luag vaj tse ces txawm mus txhav kiag, lawv quab yuam tus tswv tsev thiab nws lub tsev, lawv ntswj nws thiab nws qub txeeg qub teg. Vim li no Yawmsaub thiaj hais li no tias, “Saib nawj, kuv tabtom npaj xwm txheej phem los raug cov neeg ntawd, mas nej yuav rho nej tej caj dab kom dim tsis tau li. Nej yuav mus kev ua khav theeb ntsuav tsis tau, rau qhov yog lub sijhawm raug xwm txheej phem. Lub sijhawm ntawd luag yuav hu nkauj thuam nej, thiab yuav quaj ntsuag lwj siab kawg nkaus hais tias, ‘Peb puam tsuaj tu noob nrho lawm lauj! Yawmsaub muab kuv haiv neeg li feem hloov rau luag lawm, nws muab rho kiag ntawm kuv lawm lauj! Nws muab peb tej teb faib rau cov uas ntes peb.’ ” Vim li no nej yuav tsis muaj leejtwg rho ntawv faib teb rau nej rau hauv Yawmsaub cov neeg. Lawv qhuab qhia hais tias, “Tsis txhob qhuab qhia, tsis txhob kheev leejtwg qhuab qhia txog zaj no. Kev poob ntsej muag yuav caum tsis cuag peb li.” Yakhauj caj ces 'e, tsim nyog yuav hais li no lov? “Yawmsaub tus Ntsuj Plig tsis muaj lub siab thev lawm lov? Tej no yog Vajtswv ua lov?” “Kuv tej lus tsis ua zoo rau tus uas ua lub neej ncaj lov? Tiamsis nej tawm tsam kuv haiv neeg ib yam li yog yeeb ncuab, nej lws kiag tus uas nyob hum xeeb lub tsho ntev, yog lws cov uas taug kev tso siab plhuav tsis xav hais tias tseem muaj kev ua rog lawm. Nej ntiab kuv haiv neeg tej pojniam khiav tawm hauv lawv tej tsev zoo zoo mus, nej lws kuv tej koob hmoov ntawm lawv tej menyuam yaus mus ib txhis. Cia li sawv tsees mus, rau qhov ntawm no tsis yog lub chaw so, vim yog qhov chaw qias tsis huv uas ua kom puam tsuaj liamsim tag txom nyem kawg. Yog leejtwg mus ncig hais lus foob lus cua thiab lus dag hais tias, ‘Kuv yuav qhuab qhia rau nej mloog txog cawv txiv hmab thiab cawv ntxwg,’ ces nws yuav ua tau ib tug xibhwb qhuab qhia rau haiv neeg no ntag lauj! “Yakhauj 'e, kuv yuav sau zog nej sawvdaws los ua ke tiag tiag li, kuv yuav qaws cov Yixayee uas tseem tshuav nyob los ua ke, kuv yuav sau lawv los ua ke yam li tej yaj nyob hauv lub nkuaj, thiab yam li pab yaj nyob hauv tshav zaub, ua ib pab neeg coob coob qw zom zaws. Tus uas qheb tau qhov tawm mus nws yuav mus ua lawv ntej, lawv yuav txeem tawm mus thiab yuav tawm ntawm lub rooj loog mus. Lawv tus vajntxwv yuav mus ua lawv ntej, yog Yawmsaub coj lawv kev.” Thiab kuv hais tias, “Nej cov uas ua thawj hauv Yakhauj thiab cov uas kav Yixayee caj ces, nej cia li mloog. Tsim nyog nej yuav paub txojkev ua ncaj los tsis yog? Nej ntxub kev zoo nyiam kev phem, nej laws kuv haiv neeg daim tawv thiab laws tej nqaij ntawm lawv tej pob txha. Nej noj kuv haiv neeg tej nqaij thiab tev lawv daim tawv los, thiab muab lawv tej pob txha lov ua tej ywb yav, thiab muab lawv tsuav mos nyoos ib yam li cov nqaij hauv lub yias, ib yam li cov nqaij rog hauv lub lauj kaub.” Lawv yuav quaj thov Yawmsaub, tiamsis nws yuav tsis teb lawv. Thaum ntawd nws yuav fee plhu ntawm lawv vim lawv tau ua phem kawg. Yawmsaub hais li no ntsig txog cov xibhwb cev lus uas coj kuv haiv neeg yuam kev, uas qw tias muaj kev thaj yeeb rau thaum lawv muaj noj, thiab tshaj tawm tias muaj kev ua rog rau tus uas tsis muab ib yam dabtsi rau lawv noj hauv lub qhov ncauj. “Vim li no yuav ua hmo ntuj rau nej tiamsis nej yuav tsis ua yog toog pom, yuav tsaus ntuj nti tiamsis nej yuav tsis txawj pom tom hauv ntej. Lub hnub yuav poob qho rau cov xibhwb cev lus ntawd, nruab hnub los yuav tsaus ntuj nti rau lawv. Cov uas txeev ua yog toog pom yuav poob ntsej muag, cov uas pom tom hauv ntej yuav raug txaj muag. Lawv sawvdaws yuav pos ncauj nti rau qhov tsis muaj lus teb ntawm Vajtswv tuaj.” Hais txog kuv mas kuv muaj hwjchim thiab muaj Yawmsaub tus Ntsuj Plig thiab muaj txojkev ua ncaj thiab muaj zog puv nkaus, xwv thiaj tau qhia Yakhauj paub nws tej kev fav xeeb thiab qhia Yixayee paub nws lub txim. Nej cov uas ua thawj hauv Yakhauj caj ces, thiab cov uas kav Yixayee caj ces, cia li mloog tej lus no. Nej ntxub qhov ua ncaj thiab muab qhov zoo ntxeev ua qhov phem tag huvsi. Nej muab ntshav los tsim Xi‑oo thiab muab kev txhaum los tsim Yeluxalees. Cov thawj hauv lub nroog yuav nyiaj xiab tu plaub, cov pov thawj yuav nqe ntiav thiaj qhuab qhia, cov xibhwb cev lus yuav nyiaj thiaj hais pom tom hauv ntej, los lawv tseem vam Yawmsaub thiab hais tias, “Yawmsaub nrog nraim peb nyob los tsis yog? Tsis muaj ib yam kev phem dabtsi yuav tshwm los raug peb li.” Vim yog tim nej ntag, Xi‑oo thiaj yuav raug muab laij ib yam li laij teb, Yeluxalees yuav pob tag ua tej niag pawg, thiab lub roob tuam tsev yuav ciaj ua roob hav zoov. Yav tom hauv ntej yuav muaj li no, lub roob uas muaj Yawmsaub lub tuam tsev yuav raug muab tsa ua lub roob uas siab dhau tej, thiab yuav raug txhawb nqa siab dua tej pov roob, mas ib tsoom neeg yuav ntws lug rau qhov ntawd. Ntau haiv neeg yuav tuaj hais tias, “Cia li los, cia peb nce mus rau saum Yawmsaub lub roob, mus rau hauv Yakhauj tus Vajtswv lub tuam tsev, mas nws yuav qhia nws txojkev rau peb, kom peb thiaj taug tau nws txojkev.” Rau qhov txoj kevcai yuav tawm hauv Xi‑oo los thiab Yawmsaub txojlus yuav tawm hauv Yeluxalees los. Nws yuav phua cai rau ntau haiv neeg, thiab nws yuav tu plaub rau tej tebchaws muaj zog uas nyob deb, Lawv yuav muab lawv tej ntaj riam ntaus ua khais laij teb, thiab muab lawv tej hmuv ntaus ua liag. Ib lub tebchaws yuav tsis rho ntaj ua tsov ua rog rau ib lub tebchaws, lawv yuav tsis kawm txujci ua tsov ua rog dua li lawm. Nyias yuav zaum hauv nyias tsob qab txiv hmab thiab hauv nyias tsob qab txiv cev, thiab tsis muaj leejtwg yuav ua rau lawv ntshai, vim Yawmsaub uas muaj hwjchim loj kawg nkaus lub qhov ncauj hais cia li no lawm. Ib tsoom neeg sawvdaws nyias tuav nyias tus timtswv lub npe ua neej, tiamsis peb yuav tuav Yawmsaub uas yog peb tus Vajtswv lub npe ua neej mus ib txhis tsis kawg. Yawmsaub hais tias, “Hnub ntawd kuv yuav sau zog cov neeg ceg tawv, thiab qaws cov uas raug muab ntiab tawm mus thiab cov uas kuv ua rau raug kev txom nyem nyuaj siab rov los ua ke. Cov uas ceg tawv kuv yuav xaiv tseg cia nyob, cov uas raug muab tso tseg lawd kuv yuav muab ua lub tebchaws uas muaj zog. Thiab Yawmsaub yuav kav lawv rau saum lub roob Xi‑oo, txij nimno mus ib txhiab ib txhis. Lub chaw tsom faj uas zov pab yaj 'e, lub pov roob Xi‑oo tus ntxhais 'e, koj yuav rov tau hwjchim kav tebchaws li qub, yog lub tebchaws uas Yeluxalees tus ntxhais txeev kav.” Nimno ua cas koj yuav quaj nrov heev? Tsis muaj vajntxwv nyob hauv koj lov? Tus uas ua koj lub chaw sablaj puam tsuaj lawm lov, es koj mob heev yam li tus pojniam mob plab lov? Xi‑oo tus ntxhais 'e, cia li ntswj ib ce ntsaj laws, ib yam li tus pojniam mob plab heev yuav yug menyuam, rau qhov nimno koj yuav tsum tawm hauv lub nroog mus nyob tom teb. Koj yuav tau mus rau Npanpiloo thiab yuav tau kev cawm dim qhov ntawd. Yawmsaub yuav txhiv koj dim hauv koj cov yeeb ncuab txhais tes. Nimno muaj ntau lub tebchaws sau zog tawm tsam koj, hais tias, “Cia ua puas tsuas nws, cia peb lub qhov muag mus saib Xi‑oo.” Tiamsis lawv tsis paub txog tej uas Yawmsaub xav tseg lawd, lawv tsis nkag siab tej uas nws npaj cia. Twb yog nws sau zog lawv los ua ke ib yam li sau tej teg qoob los rau ntawm lub tshav ntaus. Xi‑oo tus ntxhais 'e, cia li sawv tsees ntaus tej qoob ntawd, rau qhov kuv yuav pub koj muaj txwm kub hlau thiab muaj rau taw tooj liab, mas koj yuav ntaus ntau haiv neeg tawg ua tej dwb daim, thiab koj yuav muab tej uas lawv txeeb tau los cais kiag pub rau Yawmsaub, yog muab lawv tej nyiaj txiag pub rau tus Tswv uas kav tag nrho lub qab ntuj. Cov tub rog hauv lub nroog 'e, cia li npaj nej cov tub rog. Yeeb ncuab twb tuaj vij peb lawm, lawv xuas pas ntoo ntaus cov Yixayee tus thawj sab plhu. “Au Npelehee Efatha 'e, koj yog ib tug me me hauv Yuda tej cum, yuav muaj ib tug tshwm hauv koj los rau kuv, yog tus uas yuav ua tus thawj kav cov Yixayee. Nws lub hauv paus yeej muaj thaum chiv keeb thaum ub los.” Vim li no Yawmsaub yuav muab lawv tso tseg mus txog lub sijhawm uas tus pojniam mob plab yug menyuam lawm, mas nws cov kwvtij uas tseem tshuav nyob yuav rov los rau hauv cov Yixayee. Tus ntawd yuav sawv ruaj khov thiab muaj Yawmsaub lub zog thiab muaj nws tus Vajtswv Yawmsaub lub koob meej uas ci ntsa iab yug nws pab yaj. Lawv yuav nyob tso siab plhuav rau qhov tus ntawd yuav ua loj mus thoob qab ntuj kawg, thiab nws yuav ua lawv lub chaw nyob kaj siab lug. Thaum cov Axilia tuaj txeem rau hauv peb lub tebchaws thiab tsuj peb tej chaw ruaj khov, peb yuav tsa xya tus yug yaj thiab tsa yim tus thawj tawm tsam lawv. Lawv yuav xuas ntaj kav Axilia tebchaws, thiab rho ntaj kav Nilauj tebchaws. Thaum cov Axilia tuaj txeem rau hauv peb lub tebchaws thiab tsuj hauv peb ciam teb, tus ntawd yuav tso peb dim. Yakhauj caj ces uas tseem tshuav nyob yuav nyob rau hauv nruab nrab ntau haiv neeg zoo yam li dej lwg ntawm Yawmsaub thiab zoo li pluav nag uas los rau saum tej nroj tsuag thiab tsis nyob ntawm neeg lossis tos neeg tej tub. Yakhauj caj ces uas tseem tshuav yuav nyob hauv nruab nrab ib tsoom tebchaws thiab hauv nruab nrab ntau haiv neeg yam li tus tsov ntxhuav nyob hauv nruab nrab tej tsiaj qus hauv hav zoov, lossis yam li tus thav tsov ntxhuav uas nyob hauv nruab nrab tej yaj, thaum nws hla mus nws tsuj pes ntiag thiab muab dua tseg, tsis muaj leejtwg cawm tau. Nej txhais tes yuav raug muab tsa rau saum nej cov tshawj chim, thiab nej cov yeeb ncuab huvsi yuav raug muab txiav tu nrho. Yawmsaub hais tias, “Hnub ntawd kuv yuav muab nej tej nees ua kom ploj tag hauv nej nruab nrab mus, thiab muab nej tej tsheb nees ua rog ua puam tsuaj tag. Kuv yuav muab tej moos hauv nej lub tebchaws rhuav tshem tag, thiab rhuav nej tej chaw ruaj khov pob tag huvsi. Kuv yuav muab qhov uas ua khawv koob rhuav tshem tag ntawm nej txhais tes, nej yuav tsis muaj txiv neeb txiv yaig dua li lawm. Kuv yuav rhuav nej tej dab mlom thiab nej tej ncej teev dab kom ploj ntawm nej mus, thiab nej yuav tsis tau pe tej uas nej txhais tes ua dua li lawm. Kuv yuav rho kiag nej tej ncej dab Asela hauv nej nruab nrab pov tseg, thiab ua rau nej tej moos puam tsuaj. Kuv yuav chim thiab ua pauj npau taws vog rau tej tebchaws uas tsis mloog lus.” Cia li tig ntsej mloog tej uas Yawmsaub hais. “Cia li sawv tsees piav koj tshaj plaub rau tej roob, thiab cia tej pov roob mloog koj lub suab. Tej roob 'e, cia li mloog tej uas Yawmsaub kom, thiab tej taw tiag lub ntiajteb uas nyob mus ib txhis, tig ntsej mloog, rau qhov Yawmsaub muaj plaub rau nws haiv neeg, thiab nws yuav kom plaub rau cov Yixayee. “Kuv haiv neeg 'e, kuv tau ua li cas rau nej? Kuv tau ua rau nej tsaug leeg qhov twg? Cia li teb kuv. Kuv coj nej tawm hauv Iyi tebchaws los, thiab txhiv nej tawm hauv lub tsev ua qhev los. Kuv txib Mauxe thiab Aloo thiab Mili‑as coj nej kev mus. Kuv haiv neeg 'e, cia li nco txog tias, Mau‑a tus vajntxwv Npalaj xav tswvyim phem li cas thiab Npe‑au tus tub Npala‑as teb nws li cas, thiab ntawm Sithi mus txog Kilakas muaj dabtsi tshwm tuaj, kom nej thiaj paub tej uas Yawmsaub ua cawm nej.” Kuv yuav coj dabtsi tuaj cuag Yawmsaub thiab pe Vajtswv uas nyob lub chaw siab? Tsim nyog kuv coj menyuam nyuj hnub nyoog muaj ib xyoos tuaj ua kevcai hlawv xyeem rau nws lov? Yawmsaub yuav txaus siab rau qas txhiab tus txiv yaj thiab qas vam lub hav uas muaj roj ntws lov? Tsim nyog kuv yuav muab kuv tus tub hlob xyeem ntxuav kuv tej kev fav xeeb lov, yog xyeem tus menyuam uas kuv yug ntxuav kuv tus ntsuj plig lub txim lov? Neeg 'e, nws twb qhia qhov uas zoo rau nej paub lawm. Tej uas Yawmsaub xav kom nej ua tsuas yog ua ncaj thiab nyiam txojkev hlub luag, thiab ua lub neej txo lub siab nrog nraim nej tus Vajtswv xwb. Qhov uas hwm thiab paub koj lub npe kuj yog muaj tswvyim tiag. Yawmsaub lub suab tshaj tawm rau lub nroog hais tias, “Lub xeem thiab ib tsoom neeg hauv lub nroog, cia li mloog. Kuv yuav tsis nco qab tej nyiaj txiag uas ua phem es tau los uas muaj nyob hauv cov neeg phem lub tsev, thiab lub efa ntxo uas raug foom tsis zoo tau lov? Kuv yuav zam tus uas muaj rab teev tsis hum txiaj thiab muaj cov thauj teev ntxo hauv nws lub hnab lov? Nej cov uas nplua nuj yeej yog ua limhiam ntais ntuj, nej cov neeg zej zog hais lus dag. Lawv tus nplaig hauv lawv lub qhov ncauj dag ntxias. Vim li no kuv thiaj pib nplawm nej, ua rau nej liamsim tag vim yog nej lub txim. Nej yuav noj tiamsis tsis tsau, nej lub plab tseem tshaib. Nej yuav khaws cia tiamsis khaws tsis tau ruaj. Tej uas nej khaws tau ruaj kuv yuav muab pub rau hniav ntaj. Nej yuav tseb los yuav tsis tau hlais, nej yuav tsuam txiv aulib los yuav tsis tau roj los pleev nej lub cev, nej yuav tsuam txiv hmab los tsis tau cawv txiv hmab haus. Nej tuav rawv vajntxwv Ooli tej kab ke, thiab ua raws li Ahaj caj ces ua txhua yam huvsi, thiab nej ua raws li ob tug taw qhia lawm. Kuv thiaj yuav ua rau nej liamsim tag, thiab ua rau nej cov neeg raug luag thuam luag, thiab nej yuav raug kuv haiv neeg saib tsis taus.” Kuv raug txom nyem lauj! Kuv zoo yam li thaum tus uas de tej txiv rau lub caij ntuj qhua thiab xawb de tej txiv hmab tag lawm, tsis tshuav ib tauv txiv hmab noj kiag li, thawj phaum txiv cev uas kuv ntshaw noj los tsis muaj ib lub siav li. Cov uas hwm Vajtswv ploj tag hauv lub tebchaws lawm, ib tsoom neeg tsis tshuav ib tug siab ncaj kiag li. Lawv sawvdaws zov kev tos tua neeg xwb, nyias ua hlua cuab nyias li kwvtij. Lawv txhais tes tsuas yog txawj ua phem xwb. Tus thawj thiab tus uas tu plaub thov yuav nyiaj xiab, tus uas ua hlob kuj tsa ncauj hais tej kev phem uas nws lub siab ntshaw, lawv sawvdaws ntaus tswvyim npaj ua tej no. Lawv cov tus uas zoo kawg kuj zoo li tsob pos, tus uas siab ncaj kawg kuj zoo yam li lub laj kab xov pos. Hnub uas nej cov faj xwm hais rau nej, yog hnub uas txiav txim rau nej, twb los txog lawm. Nimno qhov uas lawv raug kev kub ntxhov los ze lawm. Tsis txhob tso siab rau kwvtij zej zog, tsis txhob cia siab rau phoojywg, cia li tswj koj lub qhov ncauj tsis txhob qhia rau tus uas nyob hauv koj lub xubntiag. Rau qhov tus tub saib tsis taus leej txiv, tus ntxhais tawm tsam leej niam, tus nyab tawm tsam niam pog, yus tus yeeb ncuab kuj yog yus tsev neeg ntag. Kuv li kuv yuav ntsia ntsoov Yawmsaub, kuv yuav tos rawv Vajtswv uas cawm kuv dim. Kuv tus Vajtswv yuav mloog kuv tej lus. Kuv tus yeeb ncuab 'e, tsis txhob zoo siab thuam luag kuv. Thaum kuv ntog los kuv yuav rov sawv tau, thaum kuv nyob hauv qhov tsaus ntuj, Yawmsaub yuav ua qhov kaj rau kuv. Vim yog kuv ua txhaum rau Yawmsaub, kuv yuav thev nws txojkev chim mus txog thaum nws daws kuv tshaj plaub thiab tu plaub rau kuv. Nws yuav coj kuv tawm mus rau hauv qhov kaj thiab kuv yuav pom nws txojkev cawm dim. Mas kuv tus yeeb ncuab yuav pom thiab tus uas hais rau kuv tias, “Koj tus Vajtswv Yawmsaub nyob qhovtwg?” yuav raug txaj muag. Kuv lub qhov muag yuav saib thiab hnyos nws. Nimno nws yuav raug muab tsuj yam nkaus li cov av nplaum rau hauv txojkev. Hnub uas tsim kho nej tej ntsa loog yuav los, mas hnub ntawd nej tej ciam teb yuav nthuav dav. Hnub ntawd luag yuav tuaj cuag nej, yog tuaj txij ntawm Axilia tebchaws mus txog ntua Iyi tebchaws, thiab tuaj txij Iyi tebchaws mus txog tus dej Yufeti, thiab txij lub hiavtxwv no mus txog lub hiavtxwv tim ub, thiab txij lub roob no mus txog lub roob tim ub. Lub ntiajteb yuav nyob do cuas vim yog tim cov neeg uas nyob hauv, thiab tim tej uas lawv ua. Thov koj tuav rawv koj tus pas nrig yug koj haiv neeg, uas yog koj pab yaj, yog koj qub txeeg qub teg. Lawv nyob ua twm zeej twm kawv hauv hav zoov uas nyob hauv nruab nrab lub tebchaws uas zoo qoob. Thov cia lawv nrhiav noj hauv Npasas thiab Kile‑a ib yam li yav thaum ub. Ib yam li thaum nej tawm hauv Iyi tebchaws los, kuv yuav ua tej txujci phimhwj tshwm los rau lawv pom. Ib tsoom tebchaws yuav pom thiab yuav txaj muag lawv li hwjchim huvsi, lawv yuav muab tes pos qhov ncauj cia, lawv lub qhov ntsej yuav lag. Lawv yuav yaim hmoov av yam li nab, ib yam li tej tsiaj uas nkag hauv av. Lawv yuav tawm hauv lawv tej chaw ruaj khov ua ib ce tshee hnyo los, lawv yuav tig los cuag peb tus Vajtswv Yawmsaub ua ntshai kawg, thiab lawv yuav ntshai koj. Leejtwg yog tus timtswv uas zoo cuag li koj, uas daws lub txim thiab zam tej kev fav xeeb uas koj cov qub txeeg qub teg uas tseem tshuav nyob tau ua? Koj tsis cim ntsoov txojkev chim mus ib txhis rau qhov koj txaus siab ua txojkev hlub ruaj khov tshwm los. Koj yuav rov khuvleej peb, thiab muab peb tej kev txhaum tsuj ntiag tseg. Koj yuav muab peb lub txim huvsi laim pov tseg rau hauv qab thu hiavtxwv. Koj yuav ua txojkev ncaj uas tso siab tau tshwm rau Yakhauj thiab ua txojkev hlub ruaj khov tshwm rau Aplahas, ib yam li koj twb cog lus ruaj khov rau peb tej poj koob yawm txwv thaum ub los lawm. Cov lus no hais txog lub nroog Ninave, yog phau uas sau tej uas Nahu uas yog neeg hauv lub zos Eekhau ua yog toog pom. Yawmsaub yog Vajtswv uas khib xeeb thiab ua pauj, Yawmsaub ua pauj thiab npau taws, thiab Yawmsaub ua pauj rau cov uas tawm tsam nws thiab nws chim rau nws cov yeeb ncuab mus li. Yawmsaub tsis chim sai, nws muaj hwjchim loj kawg nkaus. Yawmsaub yeej tsis tso tus uas ua txhaum dim dawb li. Yawmsaub taug kev nrog khaub zeeg cua thiab cua daj cua dub, thiab huab pos nti ntawm nws kotaw yam li hmoov av. Yawmsaub txwv dej hiavtxwv thiab ua kom qhuav kiag thiab ua kom tej niag dej huvsi qhuav tag. Npasas thiab Khamee kuj tuag tshav tag thiab tej paj xyoob paj ntoos hauv Lenpanoo ntsws tag lawm. Tej toj roob hauv pes ntseeg nkaws rau ntawm Yawmsaub xubntiag, thiab tej ncov roob kuj yaj tag. Lub ntiajteb thiab ib puas tsav yam hauv qab ntuj kuj raug nyob do cuas rau ntawm Yawmsaub xubntiag. Leejtwg yuav thev taus qhov uas Yawmsaub chim? Leejtwg thev taus qhov uas Yawmsaub npau taws ceev ceev? Qhov uas Yawmsaub npau mas tawm plaws li nplaim taws, thiab nws ua rau tej pob zeb pob tsuas tawg pes rhe. Yawmsaub zoo kawg nkaus. Nws yog lub chaw ruaj khov rau hnub uas raug txom nyem. Yawmsaub paub zoo tus uas los cawm siav rau hauv nws. Yawmsaub yuav tso dej nyab los kuav kom cov uas tawm tsam nws ploj tag mus, thiab yuav muab nws cov yeeb ncuab ntiab rau hauv qhov tsaus ntuj. Nej xav zaj tswvyim phem twg rau Yawmsaub? Yawmsaub yuav ua rau nej puam tsuaj ploj tag nrho mus, tsis muaj leejtwg yuav mus tiv tau Yawmsaub zaum ob. Lawv yuav zoo yam nkaus li cov pos kaus ntsim uas sib qhaib tag lawm, thiab yam li cov haus cawv qaug cawv, thiab yam li tej quav nyab qhuav kub hnyiab tag. Txeev muaj ib tug tawm hauv nej cov tuaj ntaus tswvyim phem rau Yawmsaub thiab qhia kom ua phem. Yawmsaub hais li no tias, “Txawm yog lawv muaj zog thiab coob heev los lawv yuav raug muab rhuav tshem kom ploj tag mus. Txawm yog kuv ua rau nej raug kev txom nyem lawm los kuv yuav tsis rov ua rau nej txom nyem dua li lawm. Nimno kuv yuav muab lawv tus quab uas nej kwv lov pov tseg, thiab yuav muab tej saw hlau uas khi nej ua kom tu plam tag.” Yawmsaub hais hnyav txog Ninave tias, “Koj lub moo yuav tsis nto mus ntxiv lawm. Kuv yuav muab tej dab mlom uas koj txaug thiab tej uas koj nchuav huvsi rhuav tshem tawm hauv koj tej tsev teev dab. Kuv yuav khawb qhov ntxa tos koj vim koj phem qias heev.” Saib maj, ib tug ntauj taw tuaj txog saum roob, yog coj txoj xov zoo tuaj thiab tshaj tawm kev thaj yeeb siab tus. Cov Yuda 'e, nej cia li coj tej kevcai pam noj pam haus, thiab cia li ua tej uas nej yeem lus tseg lawd kom tiav, vim cov neeg limhiam yuav tsis rov tuaj ntaus nej dua li lawm, lawv twb raug puam tsuaj tag huvsi lawm. Lub nroog Ninave, cov uas tsoo koj twb tuaj ua rog rau koj lawm. Kavtsij mus zov rooj loog, zov ncauj kev, cia li sia siv khov kho npaj tos, sau tub rog txhij zog. (Yawmsaub tabtom ua kom Yakhauj tebchaws rov muaj hwjchim meej mom li qub ib yam li Yixayee tebchaws yuav vam meej nto moo, vim yog tub sab lws lawv thiab muab lawv tej ceg ua liamsim tag.) Cov tub rog uas siab tuab mas lawv daim hlau thaiv liab ploog, cov tub rog tej tsoos liab tsaus nti. Hnub uas npaj txhij mas tej tsheb ua rog ci nplas cuag li nplaim taws, cov nees ua rog kuj txauj tes peem qas qees yuav mus. Cov tsheb ua rog mas dhia nroo ntws taug kev, mus tawg pes lees hauv tej tshav puam hauv nroog, ci nplas li taws tsau, laim pes lias li xob laim. Cov thawj rog raug hu, lawv dhia dawm taw pig poog mus, lawv dhia ncaj nraim rau ntawm ntsa loog, lawv tsa kiag daim hlau thaiv hauv ntaj hauv hmuv. Lub qhov rooj dej qheb kiag lawm, cov hauv vajntxwv tsev poob siab tag. Lawv muab tus poj vaj tej tsoos tsho hle, lawv ntes poj vaj coj mus. Cov nkauj qhev kuj quaj ntsuag zom zaws yam nkaus li nquab quaj thiab lawv ntaus hauv siab. Ninave zoo nkaus li lub pas dej uas ntws zuj zus mus lawm. Lawv qw hais tias, “Txhob mus, txhob mus,” tiamsis tsis muaj leejtwg tig rov los li. Cia li mus lws nyiaj lws kub. Muaj nyiaj txiag ntau kawg tsis paub tag li, muaj ib puas tsav yam qhov txhia chaw muaj nqes. Ninave txom nyem lauj, puam tsuaj tag du lug lauj! Lub siab yaj ntshis, hauv caug tshee hnyo, ib ce tsaug qas hnyo, ntsej muag thim xem tag. Tsov ntxhuav lub chaw nyob dua twg lawm? Yog lub qhov tsua uas cov tsov ntxhuav mos nyob thiab kwv nqaij mus noj tsis muaj leejtwg nkag mus tab kaum tau. Qhov chaw uas tsis muaj leejtwg nkag mus zes cov menyuam tsov ntxhuav dua twg lawm? Tus tsov ntxhuav dua nqaij txaus cov menyuam noj thiab ntxo kiag nqaij caj dab los rau cov maum tsov ntxhuav. Nws nrhiav nqaij coj los puv nkaus qhov tsua thiab dua nqaij los tso puv nkaus lub chaw nyob. Yawmsaub uas muaj hwjchim loj kawg nkaus hais tias, “Saib maj, kuv tawm tsam koj. Kuv yuav hlawv koj tej tsheb ua rog kom ncho pa lug, thiab hniav ntaj yuav tua koj cov tsov ntxhuav mos. Kuv yuav muab cov nqaij uas koj noj rho tawm hauv lub ntiajteb mus, thiab yuav tsis hnov koj cov tub tshaj xo lub suab li lawm.” Lub nroog uas lo ntshav raug txom nyem lauj! Yog lub nroog muaj kev dag thiab muaj tej qhov txhia chaw uas txeeb tau puv nkaus hauv, tsuas yog mus lws luag tsis tseg tsis tu li xwb. Mloog saib, suab pas nplawm nees nrov nplaj, suab tsheb nees nrov dig dawg, nees dhia noj tuam pwm, tsheb nees dhia ya qas ntxiag. Cov tub rog caij nees dhia npoj ntws ceev kawg li, hniav ntaj ci nplas, hauv hmuv ci qas npuaj. Neeg raug tua coob kawg, cev tuag tej niag pawg, cev tuag suav tsis txheeb, lawv dawm tej cev tuag. Qhov no yog vim Ninave ua niag poj muag cev tsis txawj pov khawv li, nws zoo nkauj ntxim siab txawj haub txawj ntxias txawj ua khawv koob rau luag qaug siab tuag rau nws tes. Nws muab nws lub cev muag ntxias tau ib tsoom tebchaws thiab ua khawv koob ntxias tau ib tsoom neeg ua qhev. Yawmsaub uas muaj hwjchim loj kawg nkaus hais tias, “Saib maj, kuv tawm tsam koj. Kuv yuav yaws koj daim tiab mus npog nkaus koj lub ntsej muag, kuv yuav cia ib tsoom neeg saib koj liab qab, kuv yuav cia ib tsoom tebchaws saib koj chaw txaj muag. Kuv yuav muab tej niag kua lwj qias qas ntsuav laim rau koj. Kuv yuav saib tsis taus koj thiab ua rau sawvdaws thuam koj. Txhua tus uas pom koj yuav cia li nkaum zog khiav rov qab. Lawv yuav hais tias, ‘Lub nroog Ninave puam tsuaj tag do cuas li lawm. Leejtwg yuav quaj ntsuag nws? Yuav nrhiav leejtwg qhovtwg tuaj nplij tau nws?’ ” Koj tseem zoo dua lub moos Thenpe uas nyob ntawm tus niag dej Nai lov? Muaj dej vij lub moos ntawd, thiab muaj dej hiavtxwv thaiv quas sab nraud, thiab muaj dej thaiv ua ntsa loog. Khuj tebchaws thiab Iyi tebchaws yog nws li zog loj kawg tsis txawj tag. Phuj tebchaws thiab Linpia tebchaws kuj pab nws thiab. Txawm yog li ntawd los nws tseem raug muab kuav kiag mus poob tebchaws lawm. Nws tej menyuam kuj raug muab ntsawm ntsoog tag rau txhua txoj ncauj kev. Lawv muab cov uas muaj meej hauv lub moos ntawd rho ntawv saib leejtwg tau tus twg, cov uas ua hlob puavleej raug muab saw hlau khi. Ninave, koj yuav qaug cawv ua tus niag vwm loj vwm leg feeb tsis meej kiag li. Koj yuav mus nrhiav chaw cawm siav kom dim koj cov yeeb ncuab. Koj tej chaw ruaj khov txhua lub zoo li tsob txiv cev uas txiv siav thawj phaum, yog diaj mas cov txiv yuav zeeg rau hauv tus uas noj lub qhov ncauj. Saib maj, koj cov tub rog hauv nej nruab nrab tsuas zoo li tej niag pojniam xwb. Koj tej rooj loog twb qheb lug rau koj cov yeeb ncuab. Hluavtaws twb kub koj tej las rooj tag lawm. Cia li nqa dej los cia, vim yeeb ncuab yuav tuaj vij. Kho koj tej chaw zov khuav kom ruaj khov. Cia li nqes plaws rau hauv niag qhov av nplaum tuav kiag av nplaum, coj lub dab thwv cib tuaj. Tiamsis hluavtaws yuav kub koj qhov ntawd thiab hniav ntaj hniav riam yuav txiav koj yuav noj koj yam nkaus li menyuam kooj txig noj. Cia li huaj vam coob li kooj tshuab, cia li huaj vam coob li kooj txig. Koj cov tub lag tub luam huaj vam coob yam nkaus li tej hnub qub saum nruab ntug. Lawv zoo yam li tej kooj txig uas noj nroj tsuag tag es nthuav tis kiag ya ploj ntais lawm. Koj cov thawj zoo nkaus li cov kooj txig, koj cov nom tswv zoo nkaus li ib npoj kooj txig uas thaum tseem no ces dai ntawm tej ntsa laj kab, thaum hnub tuaj lawd ces ya tag nrho lawm tsis muaj leejtwg paub tias dua qhovtwg lawm. Cov Axilia tus vajntxwv 'e, koj cov neeg yug yaj twb tsaug zog lawm, koj cov thawj twb mus ncaws dab ntub lawm. Koj cov pejxeem tawg ua sab ua sua rau pem tej roob, tsis muaj leejtwg qaws tau lawv los. Koj qhov mob tsis ntaug kiag li, koj qhov kiav txhab mas sab kawg li kho tsis tau. Txhua tus uas tau hnov koj lub moo mas yuav npuaj teg luag koj. Muaj leejtwg txeev dim tau ntawm koj txojkev tsim txom uas tsis txawj tag li? No yog Vajtswv tej lus uas Hanpaku uas yog xibhwb cev lus pom. Au Yawmsaub, kuv yuav quaj thov kev pab ntev li cas, los koj tsis hnov, lossis kuv yuav quaj thov koj hais tias, “Muaj kev limhiam ntais ntuj,” los koj tsis cawm? Ua cas koj yuav cia kuv pom tej uas ua tsis ncaj thiab ntsia ntsoov tej kev ceeblaj? Txojkev puam tsuaj thiab kev ua limhiam ntais ntuj nyob ntawm kuv xubntiag, txojkev sib ceg thiab kev sib cam kuj tshwm tuaj. Vim li no txoj kevcai thiaj tsis nruj thiab tsis muaj kev tu plaub ncaj kiag li. Cov neeg limhiam vij cov neeg ncaj ncees cia, thiaj tu plaub tsis ncaj. “Cia li tsa muag ntsia pom ib tsoom tebchaws, cia li phimhwj thiab xav tsis thoob, rau qhov lub sijhawm uas nej nyob kuv tabtom ua tej uas yog kuv hais ua ntej los nej yuav tsis ntseeg. Kuv tabtom tshoov cov Kheedia uas yog haiv neeg nyaum thiab siab kub heev, uas mus thoob lub ntiajteb txeeb kiag tej vaj tse uas tsis yog lawv li. Lawv yog cov uas txaus ntshai siab puas tsus, lawv txojcai thiab lawv lub koob meej lawv rhawv lawv xwb. Lawv tej nees nrawm dua tsov pom txwv, thiab nyaum dua tej hma uas tawm hmo ntuj. Lawv cov tub rog caij nees dhia huas ntej mus khav ntxhias. Lawv cov tub rog caij nees tuaj deb deb tuaj, lawv ya mus yam nkaus li tus dav qwv tis nkaus los tom. Lawv sawvdaws tuaj ua limhiam ntais ntuj, luag ntshai rwg lawv rau ntawm lawv hauv ntej, lawv ntes tau neeg coob cuag li xuab zeb. Lawv thuam luag tej vajntxwv thiab luag cov thawj kav. Lawv thuam luag txhua lub chaw ruaj khov, lawv tsub av nce txeeb tau tej chaw ntawd. Lawv hla dhau plaws mus yam li cua ntsawj, lawv yog neeg muaj txim, lawv lub hwjchim yog lawv tus timtswv.” Au kuv tus Vajtswv Yawmsaub, yog kuv tus Tswv uas Dawb Huv, koj tsis tau nyob ib txwm los lov? Peb yuav tsis tuag. Au Yawmsaub, koj tsa lawv ua cov txiav txim. Au txhib zeb, koj tsa lawv ua cov uas nplawm qhuab qhia. Koj lub qhov muag dawb huv dhau uas yuav saib qhov phem, thiab koj tsis xav saib tej uas ua tsis ncaj. Ua cas koj yuav tsa muag ntsia cov uas fav xeeb, thiab nyob twjywm rau thaum cov neeg limhiam nqos tus uas ncaj ncees dua li lawv? Koj muab neeg ua zoo li tej ntses hauv hiavtxwv, zoo yam li tej tsiaj nkag hauv av uas tsis muaj tus thawj. Tus yeeb ncuab xuas nqe lauj nqe lawv txhua tus los, nws xuas tsig cab lawv los, nws xuas vas ntaus lawv los, nws thiaj xyiv fab thiab zoo siab kawg. Vim li no nws thiaj xyeem qhov txhia chaw rau nws phob tsig, thiab hlawv hmoov xyab rau nws lub vas. Vim nws siv tej no nws thiaj muaj nplua mias thiab noj tej zaub mov uas zoo heev. Nws tseem yuav nchos cov ntses hauv lub vas mus li, thiab tua ib tsoom tebchaws tsis khuvleej kiag li lov? Kuv yuav sawv ntsug zov ntsia, kuv yuav sawv saum lub chaw tsom faj ntsia mus, saib nws yuav hais li cas rau kuv, thiab saib kuv yuav teb li cas rau nws txog tej uas kuv yws ntawd. Yawmsaub teb kuv tias, “Cia li sau zaj yog toog no, cia li muab sau cia rau saum daim txiag kom pom meej, kom tus uas dhia thiaj nyeem tau npliag. Zaj yog toog ntawd tseem tos nws lub sijhawm, nws maj nroos mus txog qhov uas tiav, nws tsis dag. Yog pom tias qeeb kuj tos mentsis, nws yuav tshwm los tiag tiag li, nws yuav tsis sej cia ntev. Saib maj, tus uas lub siab tsis ncaj yuav ntog, tiamsis tus uas ncaj ncees yuav muaj txojsia nyob vim nws ntseeg Vajtswv. Tsis tag li ntawd, cawv txiv hmab dag ntxias xwb, tus neeg uas tsab ua loj nyob tsis tus. Nws txojkev hu dab dav li tub tuag teb, yam li txojkev tuag uas tsis txawj tsau. Nws zuas zog ib tsoom tebchaws sawvdaws los rau nws tib leeg, nws sau ib tsoom neeg sawvdaws los ua nws li. Ib tsoom neeg sawvdaws yuav tsis muaj lo lus cem thuam tau nws lov? Lawv yuav thuam saib tsis taus nws hais tias, ‘Tus uas sau zog tej uas tsis yog nws li los, thiab sau zog tej uas luag muab yuam nqe tau ntau kawg, yuav raug txom nyem lauj! Nws yuav ua li ntawd tau ntev li cas ne?’ Txhua tus uas tshuav koj nqe yuav tsis sawv tsees tamsid lov? Thiab cov uas ua kom koj tshee yuav tsis tsim dheev lov? Thaum ntawd koj yuav raug luag txeeb thiab. Vim koj twb lws ntau lub tebchaws lawm, ib tsoom neeg sawvdaws uas tseem tshuav yuav tuaj lws koj vim yog tim neeg tej ntshav los tag thiab qhov uas ua limhiam ntais ntuj rau lub ntiajteb thiab rau tej moos thiab rau txhua tus uas nyob hauv.” “Tus uas ua phem es tau ntau coj los rau hauv lub tsev yuav raug txom nyem lauj! Nws ua nws lub zes rau qhov chaw siab kawg, kom thiaj tsis muaj ib yam phem ncav mus txog. Koj ntaus tswvyim phem ua rau koj lub tsev raug txaj muag vim koj rhuav tshem ntau haiv neeg pov tseg. Koj ua rau koj txojsia piam tag. Tej pob zeb txhim phab ntsa yuav qw tuaj, tej qhab tse yuav teb hauv tej ntoo ua tsev tuaj. “Tus uas muab ntshav los ua lub moos thiab muab txojkev phem tiag lub taw nroog yuav raug txom nyem lauj! Saib maj, qhov uas ib tsoom neeg ua haujlwm los rau hluavtaws hlawv, thiab qhov uas ib tsoom tebchaws ua khwv khwv tsis muaj qabhau, tsis yog los ntawm Yawmsaub uas muaj hwjchim loj kawg nkaus los lov? Yawmsaub lub hwjchim ci ntsa iab yuav puv nkaus hauv lub qab ntuj rau sawvdaws paub, ib yam li dej puv hiavtxwv. “Tus uas chim tsawv yuam cawv rau kwvtij zej zog haus qaug es thiaj pom lawv nyob liab qab tsuas, yuav raug txom nyem lauj! Koj yuav tsau npo txojkev txaj muag tsis yog tsau lub meej mom. Koj cia li haus thiab qaug puj poog. Lub khob uas nyob hauv Yawmsaub txhais tes xis yuav ncig los txog koj, mas txojkev txaj muag yuav los rau saum koj lub meej mom. Tej kev limhiam ntais ntuj uas koj ua rau Lenpanoo yuav los nyab kiag koj, thiab qhov uas muab tej tsiaj qus tsiaj nyeg tua ua lwj ua liam yuav ua rau koj ntshai, vim koj ua rau tej neeg los ntshav thiab ua limhiam ntais ntuj rau lub ntiajteb thiab rau tej moos thiab rau txhua tus uas nyob hauv. “Tej dab mlom txaug uas yog tus Kws txaug cia xwb, thiab tej dab mlom uas nchuav uas qhia kev dag, muaj qabhau dabtsi? Tus Kws tso siab rau yam uas nws tsim, nws tsim tej dab mlom uas tsis txawj hais lus. Tus uas hais rau tog ntoo tias, ‘Cia li tsim dheev,’ thiab hais rau lub pob zeb uas tsis txawj hais lus tias, ‘Cia li sawv tsees,’ yuav raug txom nyem lauj! Tej ntawd txawj qhuab qhia thiab lov? Saib maj, tej ntawd yog muab nyiaj thiab kub luam, los yeej tsis txawj ua pa kiag li. Yawmsaub nyob hauv nws lub tuam tsev uas dawb huv, cia tag nrho lub ntiajteb nyob twjywm rau ntawm nws lub xubntiag.” Hanpaku uas ua xibhwb cev lus tej lus thov uas raws li lub suab nkauj Siki‑aunau. Au Yawmsaub, kuv tau hnov txog koj lub koob meej, au Yawmsaub, tej uas koj tau ua lawd kuv ntshai kawg. Ncua sijhawm no thov koj rov ua dua, peb tiam no thov qhia koj tej haujlwm rau peb paub. Thaum koj npau taws thov koj nco txog txojkev khuvleej. Vajtswv tuaj ntawm Themas tuaj, tus uas Dawb Huv tuaj ntawm lub roob Palas tuaj. Nws lub hwjchim ci ntsa iab laum nkaus saum ntuj, thiab lub ntiajteb kuj puv nkaus tej suab qhuas nws. Nws ci lam lug yam li duab tshav ntuj, muaj duab ci nplas ntawm nws txhais tes uas nraim nws lub hwjchim cia. Muaj mob kis mus ua nws ntej, muaj mob phem ti nkaus nws qab. Nws sawv ntsug co lub ntiajteb, nws ntsia ntsoov thiab ua rau ib tsoom tebchaws tshee hnyo, mas tej roob uas nyob ib txwm los kuj tawg ri sua thiab tej pov roob uas nyob mus ib txhis kuj saus tag, yog tej roob uas thaum ub nws txeev mus los. Kuv pom cov neeg Khusas tej tsev ntaub lwj siab ntsuav, thiab pom cov Midee daim ntaub xov tsev tshee hnyo. Au Yawmsaub, koj npau taws rau tej dej lov? Koj npau taws rau tej hav dej lov? Lossis koj chim rau hiavtxwv rau thaum koj caij nees thiab thaum koj caij koj lub tsheb ua rog uas kov yeej lov? Koj rho kiag rab hneev nti, nruab nkaus xub rau txoj hlua lawm. Koj ua rau lub ntiajteb tawg faib sua ua hav dej. Tej roob pom dheev koj kuj ntswj ntseeg nkaws, tej nthwv dej ceev kuj ntsawj kiag mus, nruab tiv txwv kuj tsa suab nrov thiab ntas siab siab. Lub hnub thiab lub hli nres twjywm ntawm lub chaw rau thaum koj rab xub ci tuaj mus thiab thaum koj rab hmuv ci nplas tuaj. Koj hla lub ntiajteb mus ua npau taws vog, thiab tsuj pes ntiag ib tsoom tebchaws ua chim tsawv. Koj tawm mus cawm koj haiv neeg kom dim, yog cawm tus uas koj hliv roj tsa kom dim. Koj tsoo cov neeg limhiam tus thawj, kom nyob liab qab txij ntawm taubhau ti nkaus kotaw. Koj xuas koj rab hmuv nkaug nws cov tub rog tus thawj, rau thaum nws tuaj ceev li khaub zeeg cua yuav ua rau kuv tawg ri sua, nws zoo siab xyiv fab yam li nws yuav tau noj cov neeg pluag uas tsiv nraim lawm. Koj caij koj tej nees tsuj hiavtxwv, ua rau dej loj nphau pes nphwv. Kuv tau hnov, kuv ib ce tshee hnyo, thaum hnov lub suab kuv daim tawv ncauj kuj tshee hnyo. Kuv tej pob txha po, kuv txhais ceg vau pes tsus. Kuv yuav nyob twjywm tos rawv hnub txom nyem, uas yuav los raug cov neeg uas txeem tuaj ntaus peb. Txawm yog tej txiv cev tsis tawg paj, tej txiv hmab tsis txi txiv, tej txiv aulib tu nrho lawm, tsis muaj qoob hauv tej teb, tej nkuaj nqha nrig tsis muaj yaj tsis muaj tshis thiab tej nkuaj nyug khoob ntshuv, los kuv yuav xyiv fab rau hauv Yawmsaub, kuv yuav zoo siab rau Vajtswv uas cawm kuv dim. Vajtswv Yawmsaub yog kuv lub zog, nws ua kuv txhais kotaw zoo yam li kotaw maum muas lwj, nws ua rau kuv mus tau saum tej chaw siab. Zaj nkauj sau rau tus thawj coj hu nkauj, thiab siv nkauj nog ncas. Cov los no yog Yawmsaub hais tuaj rau Xefaniya uas yog Khusi tus tub. Nws yawg yog Kedaliya, nws yawg koob yog Amaliya, nws yawg suab yog Hexekhiya. Thaum Yawmsaub hais cov lus no yog ncua sijhawm uas Asmoo tus tub Yauxiya ua vajntxwv kav Yuda tebchaws. Yawmsaub hais tias, “Kuv yuav muab txhua tsav txhua yam hauv qab ntuj no rhuav tshem pov tseg huvsi. Kuv yuav rhuav tshem tej neeg thiab tej tsiaj qus tsiaj nyeg thiab tej noog saum nruab ntug thiab tej ntses hauv hiavtxwv huvsi. Kuv yuav muab cov neeg limhiam ntxuav pov tseg, kuv yuav rhuav tshem neeg kom ploj tag hauv qab ntuj.” Yawmsaub hais li no ntag. “Kuv yuav tsa tes kiag tawm tsam cov Yuda thiab cov neeg hauv Yeluxalees huvsi. Kuv yuav rhuav tshem tej chaw uas tseem tshuav teev dab Npa‑as ntawm thaj chaw no, thiab kuv yuav muab tej txiv neeb txiv yaig lub npe rhuav tshem kom ploj mus, yog cov uas nyob saum txheej tsev las tshav pe hnub pe hli pe tej hnub qub saum nruab ntug, thiab cov uas tuav Yawmsaub lub npe yeem lus twv los tseem tuav dab Mikhoo lub npe yeem lus twv thiab, thiab cov uas tig kiag tsis raws Yawmsaub thiab tsis nrhiav nws thiab tsis ua nug rau Yawmsaub. Cia li nyob twjywm rau ntawm Vajtswv Yawmsaub lub xubntiag, rau qhov Yawmsaub hnub los ze lawm. Yawmsaub npaj tej uas nws yuav muab xyeem lawm thiab nws cais nws cov qhua kom dawb huv rau nws. Hnub uas Yawmsaub muab tua xyeem ntawd kuv yuav teem txim rau cov nom tswv thiab vajntxwv tej tub thiab cov neeg uas muab lwm tebchaws tej tsoos los hnav. Hnub ntawd kuv yuav rau txim rau txhua tus uas caws qia hla kiag taw rooj thiab cov neeg uas ua nruj ua tsiv ua tsis ncaj es tau qhov txhia chaw los puv nkaus tus lospav tsev.” Yawmsaub hais tias, “Hnub ntawd mas yuav hnov suab quaj qw ntawm lub rooj loog Ntses, thiab hnov suab quaj nyiav ntawm ceg kaum nroog uas ua tshiab thiab hnov suab nrov pig poog saum tej roob. Cov neeg uas nyob qhov Zawj cia li quaj nyiav, vim nej tej tub lag tub luam tsis tshuav nyob lawm, cov uas luj nyiaj raug muab rhuav tshem tag lawm. Thaum ntawd kuv yuav taws teeb mus tshuaj lub nroog Yeluxalees, kuv yuav rau txim rau cov neeg uas tso cev plhuav nyob zoo li tej txo cawv txiv hmab uas tseg cia ntev tsis lim kiag li. Lawv xav hauv lub siab tias, ‘Yawmsaub yuav tsis ua qhov zoo, thiab nws kuj yuav tsis ua qhov phem. ’ Lawv tej cuab txhiaj cuab tam yuav raug muab lws tag, thiab lawv tej vaj tse yuav nyob nqha lug cia. Lawv ua vaj ua tsev los lawv tsis tau nyob hauv, lawv ua teb txiv hmab los lawv yuav tsis tau haus tej cawv txiv hmab hauv tej teb ntawd. “Yawmsaub hnub tseem ceeb los ze lawm, los ze zuj zus los sai kawg li. Yawmsaub hnub ntawd yuav muaj suab quaj qhuav siab qhawv. Cov uas siab loj siab tuab los yuav quaj qw nrov nrov. Hnub ntawd yog hnub uas npau taws, yog hnub uas txom nyem lwj siab heev, yog hnub uas raug puam tsuaj thiab piam tag du lug, yog hnub uas tsaus ntuj thiab tsaus dub nciab, yog hnub uas muaj huab thiab tsaus nti, yog hnub uas muaj suab raj kub yaj nrov thiab suab tub rog qw nrov rau thaum lawv ntaus tej moos uas muaj ntsa loog thiab tej chaw zov khuav siab siab. Kuv yuav tso kev txom nyem lwj siab los rau tej neeg, mas lawv yuav taug kev yam nkaus li tej dig muag. Vim yog lawv tau ua txhaum rau Yawmsaub, mas lawv tej ntshav yuav raug muab hliv nchuav yam nkaus li hmoov av, thiab lawv cev nqaij yuav raug muab nchuav pov tseg yam nkaus li tej quav tsiaj txhu. Hnub uas Yawmsaub npau taws lawv tej nyiaj tej kub kuj pab tsis tau lawv dim. Qhov uas Yawmsaub khib xeeb thiab npau taws yuav hlawv ib puas tsav yam hauv qab ntuj huvsi pov tseg. Yawmsaub yuav ua rau ib tsoom neeg hauv qab ntuj no puam tsuaj tag huvsi tamsim ntag.” Tsoom zeej neeg uas tsis paub txaj muag 'e, cia li sau zog tuaj txoos ua ke, ua ntej uas nej tsis tau raug muab ntiab khiav mus yam nkaus li tej npluag qoob uas cua ntsawj ya tag, thiab ua ntej uas Yawmsaub kev chim heev tsis tau los txog nej, thiab ua ntej uas tsis tau txog hnub uas Yawmsaub npau taws rau nej. Txhua tus uas txo hwjchim hauv lub tebchaws no thiab ua raws li Yawmsaub qhia mas cia li nrhiav Yawmsaub. Cia li nrhiav txojkev ncaj ncees, cia li nrhiav ncauj kev txo lub siab kom qes mas tej zaum nej yuav tau chaw nraim cev rau hnub uas Yawmsaub npau taws. Lub moos Kaxa yuav tsis muaj neeg nyob hauv lawm, lub moos Akheloo yuav nyob do cuas cia, lub moos Asadau yuav raug muab ntiab khiav rau thaum tav su, thiab lub moos Ekhoo yuav raug muab rhuav pov tseg. Nej cov neeg Khelethi uas nyob ntawm ntug hiavtxwv 'e, nej yuav raug puam tsuaj lauj! Yawmsaub cov lus tawm tsam nej lauj! Cov neeg Khana‑as, tebchaws Filixatee 'e, kuv yuav ua rau nej puam tsuaj tsis tseg ib tug li. Cov tebchaws uas nyob ntawm ntug hiavtxwv 'e, nej yuav ua tshav zaub rau luag yug yaj, ua nkuaj rau luag kaw yaj kaw tshis. Cov tebchaws uas nyob ntawm ntug hiavtxwv yuav poob ua cov Yuda uas tseem tshuav nyob li tug. Lawv yuav yug yaj qhov ntawd thiab thaum tsaus ntuj lawv yuav pw hauv Akheloo tej vaj tse, rau qhov Yawmsaub uas yog lawv tus Vajtswv yuav mob siab lawv yuav pub lawv rov vam meej li qub. “Kuv twb hnov cov Mau‑a cem, kuv twb hnov cov Asmoo thuam. Lawv cem kuv cov neeg thiab lawv khav ntxhias txog lawv tej ciam teb ciam chaw.” Yawmsaub uas muaj hwjchim loj kawg nkaus uas yog cov Yixayee tus Vajtswv hais tias, “Vim li no, kuv yeej muaj txojsia nyob, mas cov Mau‑a yuav zoo yam li lub moos Xaudoo, cov Asmoo yuav zoo yam li lub moos Kaumaula. Lawv tebchaws yuav ciaj hav nroj zaub kig, ciaj qhov ntsev thiab yuav ciaj quav poj ib txhis. Kuv haiv neeg uas tseem tshuav nyob yuav mus lws lawv, thiab kuv cov neeg uas tseem muaj nyob yuav txeeb tau tej tebchaws ntawd los ua lawv tug.” Tej no yog pauj qhov uas lawv khav theeb, vim lawv saib tsis taus thiab thuam Yawmsaub uas muaj hwjchim loj kawg nkaus li neeg lawm. Yawmsaub yuav ua rau lawv ntshai nws kawg nkaus li, vim yog Yawmsaub ua rau txhua tus dab hauv lub qab ntuj no yuag yuag qhuav qhawv. Mas txhua lub tebchaws hauv ntiajteb yuav khoov ntshis pe hawm Yawmsaub rau hauv nyias lub tebchaws. “Cov neeg Khuj 'e, nej yuav raug kuv hniav ntaj tua tag thiab.” Yawmsaub yuav tsa nws txhais tes ntaus lub tebchaws uas nyob sab ped thiab ua rau Axilia puam tsuaj, thiab yuav ua rau lub nroog Ninave pob tag nyob do cuas cia, thiab yuav qhuav qhawv yam li ntuj nrag teb do. Tej niag pab tsiaj txhu thiab ib puas tsav yam tsiaj qus yuav pw hauv nruab nrab lub nroog ntawd. Lib nyug me thiab lib nyug loj yuav los nyob saum tej hau ncej tse. Plas yuav los quaj ntawm tej qhov rais, thiab uab lag yuav quaj zom zaws ntawm tej taw rooj. Tej ntsa tsev uas xuas ntoo ciab ua nyob ziab tshav raug nag xwb. No yog lub nroog uas nyob khav ntxhias thiab tso siab lug, yog lub nroog uas xav hauv lub siab tias, “Tsuas yog kuv xwb, tsis muaj leejtwg zoo cuag kuv lawm.” Twb yog lub nroog uas nyob do cuas cia ua chaw rau tsiaj qus pw. Txhua tus uas taug kev tuaj zij ncaug rub nrim rau lub nroog Ninave. Lub nroog Yeluxalees uas fav xeeb rau Yawmsaub ua phem ua qias quab yuam nws cov neeg yuav raug txom nyem lauj! Nws tsis mloog leejtwg hais, tsis yuav leejtwg nplawm thiab qhuab qhia. Nws tsis tso siab rau Yawmsaub thiab nws tsis txav los ze nws tus Vajtswv. Cov nom tswv hauv lub nroog no yog cov tsov ntxhuav uas nyooj laws. Cov uas tu plaub kuj yog cov hma uas nrhiav noj hmo ntuj tsis kam tseg ib qho nqaij cia txog kaj ntug. Nws cov xibhwb cev Yawmsaub lus yog neeg loj leeb neeg fav xeeb. Cov pov thawj kuj muab tej uas dawb huv rau Yawmsaub ua qias tsis huv, thiab lawv txhob txwm tsis ua raws li Yawmsaub kevcai. Yawmsaub uas nyob hauv lub nroog no mas ncaj ncees, nws tsis ua ib qho txhaum li. Txhua tagkis Yawmsaub txiav cai ncaj, nws ua li ntawd rau txhua hnub kaj tsis tu li, tiamsis tej neeg uas ua tsis ncaj tsis paub txaj muag li. “Kuv twb muab tej tebchaws rhuav tshem tag, ua rau lawv tej chaw zov khuav saum tej ntsa loog pob tag lawm. Kuv ua kom tej kev hauv lub nroog ntawd pob tag nyob do cuas tsis muaj neeg taug, thiab kuv twb ua rau lawv tej moos nyob do cuas tsis muaj neeg, tsis muaj ib tug nyob hauv lawv lawm. Kuv hais tias ‘Lub nroog ntawd yeej yuav ntshai thiab hwm kuv xwb, thiab yuav mloog kuv tej lus qhuab ntuas. Nws yuav tsis muab kuv tej lus qhuab lus qhia pov tseg.’ Tiamsis lawv yimhuab siv zog ua txhua yam kom phem kom qias.” Yawmsaub hais tias, “Vim li no nej cia li nyob tos kuv, tos hnub uas kuv sawv tsees ua timkhawv. Kuv twb npaj siab cia lawm tias kuv yuav sau zog ib tsoom neeg thiab txhua lub tebchaws tuaj ua ke, kuv yuav nchuav kuv txojkev chim uas npau taws ceev kawg los rau saum lawv sawvdaws. Qhov uas kuv khib xeeb thiab npau taws yuav hlawv ib puas tsav yam hauv qab ntuj no huvsi pov tseg. “Thaum ntawd kuv yuav muab ib tsoom neeg tus nplaig hloov kom lawv tau tus nplaig dawb nplaig huv, kom sawvdaws thiaj li txawj hu thov Yawmsaub lub npe thiab txawj ua ib lub siab ua koom tu nws. Kuv cov neeg uas thov kuv, cov uas raug muab ntiab khiav ua sab ua sua lawm, lawv yuav coj qhov txhia chaw hla niag dej hauv Khuj tebchaws tuaj xyeem rau kuv. Hnub ntawd nej yuav tsis raug txaj muag rau qhov uas nej ua phem fav xeeb rau kuv, vim lub sijhawm ntawd kuv yuav muab cov uas khav theeb tuam mom rho tawm hauv nej mus, mas nej yuav tsis tshoob hawb rau saum kuv lub roob dawb huv dua li lawm. Kuv yuav tseg cov uas tsis muab hlob, cov uas txo lub siab rau hauv nej nruab nrab. Lawv yuav nrhiav chaw nraim cev rau hauv Yawmsaub lub npe. Cov neeg uas tshuav nyob hauv cov Yixayee mas lawv yuav tsis ua txhaum thiab tsis hais tej lus dag, yuav nrhiav tsis tau ib tug nplaig dag hauv lawv tej qhov ncauj kiag li. Lawv yuav noj yuav haus pw tso siab lug, tsis muaj leejtwg yuav ua rau lawv ntshai.” Xi‑oo tus ntxhais 'e, cia li hu nkauj. Cov Yixayee 'e, cia li qw nrov. Yeluxalees tus ntxhais 'e, cia li zoo siab xyiv fab hlo. Yawmsaub twb tseg tsis rau txim rau nej lawm. Nws twb ntiab nej cov yeeb ncuab tawm khiav tag lawm. Yawmsaub uas yog cov Yixayee tus vajntxwv nyob hauv nej nruab nrab mas nej yuav tsis ntshai tej xwm txheej phem dua li lawm. Hnub ntawd luag yuav hais rau Yeluxalees tias, “Xi‑oo 'e, koj tsis txhob ntshai, koj tsis txhob cia koj txhais tes tsaug leeg li. Yawmsaub uas yog nej tus Vajtswv twb nyob hauv nej nruab nrab, nws yog tus uas txawj ntaus rog pab tau nej kov yeej. Nws yuav zoo siab kawg li rau nej thiab nws yuav muab nej tsim dua tshiab vim yog nws hlub nej kawg li. Nws yuav hu nkauj zoo siab xyiv fab kawg li rau nej, yam nkaus li thaum nej ua kevcai noj haus.” “Kuv yuav tshem tej vij sub vij sw ntawm nej mus kom nej thiaj tsis raug luag thuam. Txog thaum ntawd kuv yuav rau txim rau txhua tus uas quab yuam nej. Kuv yuav cawm cov uas ceg tawv, thiab kuv yuav qaws cov neeg uas tawg khiav ua sab ua sua lawd rov los thiab kuv yuav muab lawv tej kev poob ntsej muag ntxeev ua kom luag qhuas thiab tau koob meej nrov nto moo thoob ntiajteb. Thaum ntawd kuv yuav qaws nej sawvdaws los ua ke coj nej los nyob rau hauv nej qub vag qub tse. Kuv yuav ua kom nej rov tau koob meej thiab ib tsoom neeg hauv qab ntuj yuav qhuas nej, yog thaum uas kuv pub nej rov vam meej li qub. Nej qhov muag yeej yuav pom ntag.” Yawmsaub hais li no ntag. Hnub xiab ib lub rau hli xyoo ob uas Dali‑a ua vajntxwv, Yawmsaub kom Hakai uas ua xibhwb cev lus mus hais Yawmsaub tej lus rau Se‑athi‑ee tus tub Xelunpanpee uas ua thawj kav lub xeev Yuda thiab hais rau Yehauxada tus tub Yausua uas ua tus tuam pov thawj hlob, hais tias, Yawmsaub uas muaj hwjchim loj kawg nkaus hais li no tias, “Cov neeg no hais tias, ‘Tsis tau txog sijhawm ua dua Yawmsaub lub tuam tsev.’ ” Mas Yawmsaub hais tuaj rau Hakai uas ua xibhwb cev lus tias, “Lub sijhawm no tsim nyog nej nyob hauv tej tsev uas xov dua ib txheej ntoo tiamsis lub tuam tsev no tseem pob tag ua tej niag pawg cia lov?” Vim li no nimno Yawmsaub uas muaj hwjchim loj kawg nkaus thiaj hais li no tias, “Nej cia li ua tib zoo saib nej lub neej nyob li cas lawm. Nej tseb ntau kom sau tau tsawg, nej noj tiamsis tsis tsau, nej haus tiamsis tseem nqhis, nej hnav tiamsis tsis muaj leejtwg sov. Cov uas ua zog kuj tau nqe zog los cia rau hauv lub hnab to qab.” Yawmsaub uas muaj hwjchim loj kawg nkaus hais li no tias, “Cia li ua tib zoo saib nej lub neej nyob li cas lawm. Cia li nce mus txiav ntoo pem roob coj los ua lub tuam tsev, kuv thiaj txaus siab rau lub tuam tsev ntawd thiab tau koob meej.” Yawmsaub hais li no ntag. “Nej vam tias yuav tau ntau tiamsis tsuas yog tau tsawg xwb. Thaum nej sau qoob los rau hauv tsev kuv muab tshuab ya ploj tag lawm.” Yawmsaub uas muaj hwjchim loj kawg nkaus hais tias, “Ua cas ho zoo li ntawd? Kuj yog vim kuv lub tuam tsev pob tag ua tej niag pawg los nej txhua tus nyias tseem rau siab ntso ua nyias lub tsev xwb. Vim li no lub ntuj saum nej thiaj tauv dej lwg cia, thiab lub ntiajteb thiaj muab tej qoob loo foob lawm. Thiab kuv hu txojkev qhuav nkig nkuav los rau hauv lub tebchaws thiab saum tej roob, thiab rau saum tej qoob loo, cawv txiv hmab tshiab, roj, thiab txhua yam uas tawm hauv av tuaj, thiab rau neeg thiab tsiaj txhu thiab txhua yam uas lawv txhais tes ua.” Mas Se‑athi‑ee tus tub Xelunpanpee thiab Yehauxada tus tub Yausua uas ua tus tuam pov thawj hlob, thiab cov peejxeem uas tseem tshuav nyob sawvdaws kuj mloog lawv tus Vajtswv Yawmsaub tej lus thiab tej lus uas Hakai uas ua xibhwb cev lus hais, vim yog lawv tus Vajtswv Yawmsaub txib nws los. Thiab cov pejxeem kuj paub ntshai Yawmsaub. Hakai, uas yog Yawmsaub tus tubtxib thiaj hais Yawmsaub tej lus rau cov pejxeem hais tias, “Yawmsaub hais tias, ‘Kuv nrog nraim nej nyob.’ ” Thiab Yawmsaub ua rau Se‑athi‑ee tus tub Xelunpanpee uas ua thawj kav lub xeev Yuda thiab Yehauxada tus tub Yausua uas ua tus tuam pov thawj hlob, thiab cov peejxeem uas tseem tshuav nyob sawvdaws kub siab lug mas lawv thiaj tuaj ua lawv tus Vajtswv Yawmsaub uas muaj hwjchim loj kawg nkaus lub tuam tsev, rau hnub tim nees nkaum plaub lub rau hli ntawd, yog xyoo ob uas Dali‑a ua vajntxwv. Hnub tim nees nkaum ib lub xya hli, Yawmsaub hais lus tuaj rau Hakai uas ua xibhwb cev lus tias, “Cia li hais rau Se‑athi‑ee tus tub Xelunpanpee uas ua thawj kav Yuda tebchaws thiab Yehauxada tus tub Yausua uas ua tus tuam pov thawj hlob, thiab cov peejxeem uas tseem tshuav nyob hais tias, ‘Tshuav leejtwg nyob hauv nej txeev pom lub tuam tsev qub thaum ub zoo nkauj li cas? Nimno nej ho pom lub tuam tsev zoo li cas lawm? Saib mas tsis tseem ceeb li lov?’ Yawmsaub hais tias, ‘Xelunpanpee 'e, cia li ua siab tuab. Yehauxada tus tub Yausua uas ua tus tuam pov thawj hlob 'e, cia li ua siab tuab.’ Yawmsaub hais tias, ‘Nej cov pejxeem thoob tebchaws cia li ua siab tuab.’ Yawmsaub uas muaj hwjchim loj kawg nkaus hais tias, ‘Cia li ua mus, vim kuv nrog nraim nej nyob, ib yam li thaum kuv coj nej tawm hauv Iyi tebchaws los kuv tau cog lus rau nej. Kuv tus Ntsuj Plig yeej nrog nraim nej nyob, tsis txhob ntshai li.’ “Yawmsaub uas muaj hwjchim loj kawg nkaus hais li no tias, ‘Tshuav tsis ntev kuv yuav co lub ntuj thiab lub ntiajteb thiab dej hiavtxwv thiab nruab nqhuab dua ib zaug. Kuv yuav co ib tsoom tebchaws sawvdaws ua kom ib tsoom tebchaws sawvdaws tej nyiaj txiag ntws los rau nej, thiab kuv yuav muab lub koob meej ci ntsa iab ntim puv nkaus lub tuam tsev no.’ Yawmsaub uas muaj hwjchim loj kawg nkaus hais li no ntag. ‘Nyiaj yog kuv li, kub yog kuv li.’ Yawmsaub uas muaj hwjchim loj kawg nkaus hais li no ntag. Yawmsaub uas muaj hwjchim loj kawg nkaus hais tias, ‘Lub tuam tsev no yuav muaj lub koob meej ci ntsa iab loj dua lub qub thaum ub. Kuv yuav pub lub chaw no vam meej noj qab nyob zoo.’ Yawmsaub uas muaj hwjchim loj kawg nkaus hais li no ntag.” Hnub tim nees nkaum plaub lub cuaj hlis xyoo ob uas Dali‑a ua vajntxwv, Yawmsaub hais lus tuaj rau Hakai uas cev lus tias, “Yawmsaub uas muaj hwjchim loj kawg nkaus hais li no tias, ‘Cia li nug cov pov thawj saib txoj kevcai hais li cas. Yog leejtwg qaws lub qab tsho ntev qhwv ib qho nqaij dawb huv coj mus, es yog lub qab tsho ntawd mus nphav tej ncuav lossis zaub siav lossis cawv txiv hmab lossis roj lossis ib yam zaub mov twg, mas tej ntawd yuav dawb huv thiab lov?’ ” Cov pov thawj teb tias, “Tsis dawb huv.” Mas Hakai hais tias, “Yog leejtwg tau mus kov tej cev tuag ua rau nws qias tsis huv es nws ho los kov tej no, mas tej no yuav qias tsis huv thiab lov?” Cov pov thawj teb tias, “Tej no yuav qias tsis huv thiab.” Hakai thiaj hais tias, “Yawmsaub hais tias, ‘Kuv pom kuv cov neeg no thiab lub tebchaws no zoo ib yam li ntawd. Txhua yam uas lawv txhais tes ua kuj zoo li ntawd thiab tej uas lawv muab xyeem kuj qias tsis huv. Nimno cia li tshuaj saib txij hnub no mus yuav muaj dabtsi tshwm los. Ua ntej uas nej tsis tau muab tej pob zeb los tib sib tshooj ua Yawmsaub lub tuam tsev nej lub neej zoo li cas? Thaum ib tug mus rau ntawm pawg qoob xav tias yuav luj tau nees nkaum thoob tiamsis tsuas muaj kaum thoob xwb. Thaum ib tug mus txog ntawm lub rhawv kua txiv hmab yuav ntaus tsib caug thoob tiamsis tsuas muaj nees nkaum thoob xwb. Kuv twb nplawm nej thiab ua rau nej tej qoob loo huvsi nce hmob thiab tuaj pwm thiab raug lawg ntaus los nej tsis rov los cuag kuv.’ Yawmsaub hais li no ntag. ‘Cia li tshuaj saib txij hnub no mus, yog hnub tim nees nkaum plaub lub cuaj hlis, yog hnub uas tiag tej taw ua Yawmsaub lub tuam tsev. Cia li ua tib zoo xav saib, tseem tshuav qoob hauv txhab lov? Tej txiv hmab txiv cev txiv ntsiav kws thiab tej txiv aulib tsis txi txiv lov? Txij hnub no mus kuv yuav foom koob hmoov rau nej.’ ” Hnub tim nees nkaum plaub lub hli ntawd Yawmsaub hais lus zaum ob tuaj rau Hakai tias, “Cia li hais rau Xelunpanpee uas ua tus thawj kav lub xeev Yuda hais tias, ‘Kuv tabtom yuav co lub ntuj thiab lub ntiajteb, thiab yuav muab tej tebchaws lub zwm txwv ntxeev pov tseg. Kuv tabtom yuav rhuav tshem ib tsoom tebchaws li hwjchim thiab muab tej tsheb nees ua rog thiab tus uas tsav tsheb ntxeev pov tseg. Tej nees thiab tus caij nees yuav ntog tuag, txhua tus yuav tuag rau nws tus phoojywg li hniav ntaj.’ Yawmsaub uas muaj hwjchim loj kawg nkaus hais tias, ‘Se‑athi‑ee tus tub Xelunpanpee uas yog kuv tus qhev, hnub ntawd kuv yuav qaws koj.’ Yawmsaub hais tias, ‘Kuv yuav muab koj ua zoo li lub nplhaib txam txwm, vim kuv twb xaiv koj lawm.’ Yawmsaub uas muaj hwjchim loj kawg nkaus hais li no ntag.” Lub yim hli xyoo ob uas Dali‑a ua vajntxwv mas Yawmsaub hais lus tuaj rau Xekhaliya uas ua xibhwb cev Vajtswv lus. Nws txiv yog Npelekhiya, nws yawg yog Idau. “Yawmsaub npau taws heev rau nej tej laus poj koob yawg koob kawg li. Vim li no koj cia li hais rau lawv tias, Yawmsaub uas muaj hwjchim loj kawg nkaus hais li no tias, ‘Nej cia li rov los cuag kuv. ’ Yawmsaub uas muaj hwjchim loj kawg nkaus hais tias ‘Kuv kuj yuav los cuag nej. ’ Tej lus no yog Yawmsaub uas muaj hwjchim loj kawg nkaus hais ntag. Tsis txhob ua raws li nej tej laus poj koob yawg koob uas cov xibhwb cev Vajtswv lus txheej thaum ub twb tshaj tawm rau lawv tias, ‘Yawmsaub uas muaj hwjchim loj kawg nkaus twb hais li no tias, Cia li tig kiag ntawm nej txojkev phem thiab tej kev phem uas nej ua rov los. Lawv yeej tsis mloog tsis quav ntsej kuv tej lus. ’ Yawmsaub hais li no ntag. Nej tej laus poj koob yawg koob dua twg lawm? Cov xibhwb cev Vajtswv lus nev, lawv tseem muaj txojsia nyob ib txhis lov? Tiamsis kuv tej lus thiab kuv tej kab ke uas kuv cob rau cov xibhwb cev kuv lus uas yog kuv cov tub qhe tsis tau los raug nej poj koob yawm txiv lov? Lawv thiaj ntxeev dua siab tshiab thiab hais tias, ‘Yawmsaub uas muaj hwjchim loj kawg nkaus npaj tseg tias nws yuav ua li cas rau peb pauj tej uas peb ua mas nws kuj ua raws li ntawd rau peb ntag.’ ” Hnub tim nees nkaum plaub lub kaum ib hlis xyoo ob uas Dali‑a ua vajntxwv yog lub hli Senpas mas Yawmsaub hais lus tuaj rau Xekhaliya uas ua xibhwb cev Vajtswv lus. Nws txiv yog Npelekhiya, nws yawg yog Idau. Hmo ntuj kuv txawm ua yog toog pom ib tug txivneej caij ib tug nees liab sawv nres nroos hauv nruab nrab cov txiv ntoo roj uas nyob ntawm kwj hav. Muaj ib tug nees liab ib tug nees liab dub thiab ib tug nees dawb nyob ntawm tus ntawd qub qab. Ces kuv txawm nug hais tias, “Yawg hlob, tej no yog dabtsi?” Tus tubtxib saum ntuj uas nrog kuv hais lus thiaj hais rau kuv tias, “Kuv yuav qhia rau koj paub tias yog dabtsi.” Tus txivneej uas sawv nres nroos hauv nruab nrab cov txiv ntoo roj thiaj hais tias, “Cov no yog cov uas Yawmsaub txib mus tshuaj saib thoob plaws lub ntiajteb.” Mas lawv cov ntawd txawm hais rau Yawmsaub tus tubtxib saum ntuj uas sawv hauv cov txiv ntoo roj hais tias, “Peb twb mus tshuaj saib thoob plaws ntiajteb lawm mas lub ntiajteb nyob ntsiag to.” Mas Yawmsaub tus tubtxib txawm hais tias, “Au Yawmsaub uas muaj hwjchim loj kawg nkaus, koj yuav tsis khuvleej lub nroog Yeluxalees thiab Yuda tej moos ntev li cas uas koj chim rau tau xya caum xyoo lawm?” Yawmsaub teb ib co zoo lus nplij siab rau tus tubtxib saum ntuj uas nrog kuv hais lus. Tus tubtxib saum ntuj uas nrog kuv hais lus thiaj hais rau kuv tias, “Cia li qw hais tias Yawmsaub uas muaj hwjchim loj kawg nkaus hais li no tias, ‘Kuv khib xeeb lub nroog Yeluxalees thiab Xi‑oo heev kawg li. Thiab kuv chim heev rau cov tebchaws uas tau zoo nyob kawg li, vim yog thaum kuv chim me me xwb lawv tseem ua rau tej xwm txheej phem loj zuj zus tuaj. ’ Vim li no Yawmsaub thiaj hais tias, ‘Kuv rov qab los nyob rau hauv Yeluxalees thiab khuvleej lawv lawm. Yuav ua dua kuv lub tuam tsev qhov ntawd thiab yuav cab hlua ntsuas saum lub nroog Yeluxalee. ’ Cia li rov qw hais tias Yawmsaub uas muaj hwjchim loj kawg nkaus hais li no tias, ‘Kuv tej moos yuav rov vam meej nplua nuj kawg nkaus dua thiab Yawmsaub yuav rov nplij Xi‑oo thiab rov xaiv Yeluxalees ua nws li.’ ” Kuv tsa muag ntsia mas pom dheev plaub tug kub. Kuv txawm nug tus tubtxib saum ntuj uas nrog kuv hais lus hais tias, “Tej no yog dabtsi?” Nws thiaj teb kuv tias, “Tej no yog cov kub uas nrau Yuda thiab Yixayee thiab Yeluxalees tawg ua sab ua sua.” Yawmsaub ua rau kuv pom plaub tug Kws hlau. Ces kuv txawm nug tias, “Cov Kws hlau no tuaj ua dabtsi?” Nws teb hais tias, “Cov kub no yog cov uas tuaj nrau Yuda tawg ua sab ua sua tsis muaj leejtwg tsa taus taubhau li. Cov Kws hlau yog cov uas tuaj ua rau cov kub no ntshai, thiab yuav muab cov kub no rhuav tshem ntawm tej tebchaws uas tsa kub tuaj nrau Yuda tebchaws tawg tag.” Kuv tsa muag ntsia mas pom dheev ib tug txivneej muaj ib txoj hlua ntsuas hauv nws txhais tes. Kuv nug nws hais tias, “Koj mus qhovtwg?” Nws hais rau kuv tias, “Kuv yuav mus ntsuas lub nroog Yeluxalees saib dav li cas ntev li cas.” Tus tubtxib saum ntuj uas nrog kuv hais lus txawm cia li mus lawm thiab muaj dua ib tug tubtxib saum ntuj tuaj ntsib nws, mas hais rau nws tias, “Dhia maj, hais rau tus hluas ntawd tias Yeluxalees yuav zoo li tej zej zog uas tsis muaj ntsa loog vim muaj neeg thiab tsiaj txhu nyob coob heev. Kuv yuav ua ntsa loog nplaim taws uas vij nws. Kuv yuav ua hwjchim ci ntsa iab rau hauv lub nroog ntawd.” Yawmsaub hais li no ntag. Yawmsaub hais tias, “Los los, cia li khiav tawm hauv lub tebchaws sab ped rov los.” Yawmsaub hais tias, “Kuv twb muab nej ntiab khiav mus yam nkaus li cua ntsawj plaub fab ntuj tuaj. Nej cov uas nrog Npanpiloo tus ntxhais nyob cia li khiav los rau hauv Xi‑oo.” Thaum Yawmsaub lub hwjchim txib kuv mus rau ntawm cov neeg uas lws nej, (rau qhov yog leejtwg kov nej kuj yog kov Yawmsaub lub ntsiab muag) Yawmsaub uas muaj hwjchim loj kawg nkaus hais li no tias, “Saib nawj, kuv yuav tsa kuv txhais tes rau saum lawv mas lawv yuav raug muab lws rau cov uas ua lawv qhev. Mas nej yuav paub tseeb tias yog Yawmsaub uas muaj hwjchim loj kawg nkaus txib kuv tuaj. “Xi‑oo tus ntxhais 'e, cia li hu nkauj xyiv fab hlo rau qhov kuv tuaj mas kuv yuav nyob hauv nej nruab nrab.” Yawmsaub hais li no ntag. “Mas hnub ntawd yuav muaj ntau haiv neeg los tuaj Yawmsaub tog thiab yuav ua kuv li neeg. Kuv yuav nyob hauv nej nruab nrab mas nej yuav paub tseeb tias Yawmsaub uas muaj hwjchim loj kawg nkaus txib kuv los rau nej. Yawmsaub yuav los txais yuav Yuda tebchaws ua nws teej nws tug ua nws feem hauv lub tebchaws dawb huv thiab yuav rov xaiv lub nroog Yeluxalees. Ib tsoom neeg 'e, cia li nyob twjywm rau ntawm Yawmsaub lub xubntiag, rau qhov Yawmsaub twb sawv ntawm nws lub chaw dawb huv tuaj lawm.” Yawmsaub ua rau kuv pom tus tuam pov thawj hlob Yausua sawv ntawm Yawmsaub tus tubtxib saum ntuj xubntiag thiab pom Xatas kuj sawv ntawm Yausua sab xis yuav kom Yausua. Yawmsaub hais rau Xatas tias, “Au Xatas, Yawmsaub txwv koj lawm, Yawmsaub uas xaiv lub nroog Yeluxalees tav koj. Tus no tsis yog tus tw taws uas rho hauv cub tawg los lov?” Yausua hnav cev tsoos tsho qias ntsuav sawv ntawm tus tubtxib saum ntuj xubntiag. Mas tus tubtxib saum ntuj hais rau cov uas sawv ntawm nws xubntiag hais tias, “Cia li muab Yausua cev tsoos tsho qias ntsuav hle pov tseg,” thiab nws hais rau Yausua tias, “Saib maj, kuv twb muab koj kev txhaum txim daws huvsi lawm thiab kuv yuav muab ib cev tsoos zoo zoo nkauj rau koj hnav.” Kuv thiaj hais tias, “Cia lawv muab ib txoj phuam huv huv rau nws ntoo.” Mas lawv thiaj muab txoj phuam huv rau nws ntoo thiab muab tej tsoos rau nws hnav thiab Yawmsaub tus tubtxib saum ntuj sawv ntawd. Yawmsaub tus tubtxib saum ntuj hais rau Yausua tias, “Yawmsaub uas muaj hwjchim loj kawg nkaus hais li no tias, ‘Yog koj ua raws li kuv tej kev thiab tuav rawv tej lus nkaw ces koj yuav tau kav kuv lub tuam tsev thiab saib xyuas kuv tej tshav puam, thiab kuv yuav pub koj muaj feem nkag mus rau hauv cov uas sawv ntawm no. Yausua uas yog tus tuam pov thawj hlob thiab koj cov kwvluag uas nrog koj nyob ua ke cia li tig ntsej mloog. Lawv yog cov uas ua yam ntxwv zoo rau yav tom hauv ntej. Kuv yuav coj kuv tus tub qhe uas yog tus ceg ntoo los.’ Yawmsaub uas muaj hwjchim loj kawg nkaus hais tias ‘Kuv yuav txam txwm rau ib txhib zeb uas muaj xya fab thiab muab txawb rau ntawm Yausua xubntiag, mas tib hnub xwb kuv yuav daws lub tebchaws no tej kev txhaum txim huvsi pov tseg. Hnub ntawd mas nej txhua leej txhua tus yuav hu kwvtij zej zog tuaj nyob tso siab lug nraim ntxoov ntxoo rau hauv tej qab txiv hmab txiv cev.’ Yawmsaub uas muaj hwjchim loj kawg nkaus hais li no ntag.” Tus tubtxib saum ntuj uas nrog kuv hais lus rov qab los ntawm kuv mas tsa kuv yam nkaus li tsa tus neeg uas tsaug zog heev. Nws hais rau kuv tias, “Koj pom dabtsi?” Kuv teb tias, “Kuv pom ib lub chaw txawb teeb yog muab kub ua huvsi. Muaj ib lub phaj txawb saum lub chaw ntawd thiab muaj xya lub teeb txawb hauv lub phaj, thiab muaj xya tus teeb xeeb. Thiab muaj ob tsob txiv aulib nyob ntawm lub phaj, ib tsob nyob sab xis ib tsob nyob sab laug.” Mas kuv nug tus tubtxib saum ntuj uas nrog kuv hais lus tias, “Yawg hlob, tej no yog dabtsi?” Tus tubtxib saum ntuj uas nrog kuv hais lus teb kuv tias, “Koj tsis paub tias tej no yog dabtsi lov?” Kuv teb tias, “Yawg hlob, kuv yeej tsis paub.” Ces nws hais rau kuv tias, “No yog Yawmsaub tej lus uas hais tuaj rau Xelunpanpee tias, ‘Tsis yog siv dag siv zog, tsis yog siv hwjchim, tiamsis yog kuv tus Ntsuj Plig yuav pab.’ Yawmsaub hais li no ntag. Lub roob loj 'e, koj yog dabtsi? Koj yuav raug nphau ua tiaj ntees rau ntawm Xelunpanpee xubntiag. Nws yuav coj lub pob zeb uas yuav muab txawb saum ruv tsev los mas sawvdaws yuav qw tias, ‘Zoo nkauj lauj, zoo nkauj lauj!’ ” Tsis tag li ntawd Yawmsaub hais lus tuaj rau kuv tias, “Xelunpanpee txhais tes pua tej taw uas ua lub tuam tsev no thiab nws txhais tes yuav ua kom tiav. Mas koj yuav paub tias yog Yawmsaub uas muaj hwjchim loj kawg nkaus txib kuv los rau nej. Yog leejtwg saib tsis taus hnub uas ua tej haujlwm me me mas nws yuav zoo siab thaum uas pom lub qe hlau uas ntsuas qhov ntseg hauv Xelunpanpee txhais tes. (Xya lub teeb no yog Yawmsaub li qhov muag uas pom tag nrho lub qab ntuj no.)” Kuv thiaj li nug nws tias, “Ob tsob txiv aulib uas nyob ntawm lub chaw txawb teeb sab xis sab laug yog dabtsi?” Thiab kuv rov nug zaum ob tias, “Ob tug ceg txiv aulib uas nyob ob sab ntawm ob tug teeb xeeb uas xuas kub ua es hliv roj rau hauv yog dabtsi?” Nws hais rau kuv tias, “Tej no koj tsis paub los?” Kuv hais tias, “Yawg hlob, kuv tsis paub.” Ces nws hais tias, “Ob tug ceg no yog ob tug uas raug tsa los sawv ntawm Yawmsaub uas kav tag nrho lub qab ntuj no xubntiag.” Kuv rov tsa muag ntsia mas pom dheev ib thooj ntawv uas ya yuj yees. Tus tubtxib saum ntuj hais rau kuv tias, “Koj pom dabtsi?” Kuv teb tias, “Kuv pom ib thooj ntawv ya yuj yees, thooj ntawv ntawd ntev nees nkaum tshim dav kaum tshim.” Mas nws hais rau kuv tias, “Thooj ntawv no yog tej lus foom tsis zoo uas yuav mus txhua nrho hauv ntiajteb. Txhua tus uas ua tub sab yuav raug rhuav tshem raws li uas hais rau thooj ntawv ntawd sab hauv, thiab txhua tus uas cog lus twv dag yuav raug rhuav tshem raws li uas hais rau thooj ntawv ntawd sab nraud. Yawmsaub uas muaj hwjchim loj kawg nkaus hais tias ‘Kuv yuav xa thooj ntawv ntawd tawm mus mas thooj ntawv ntawd yuav nkag rau hauv cov tub sab lub tsev thiab nkag rau hauv cov neeg uas tuav kuv lub npe cog lus twv dag lub tsev. Mas thooj ntawv ntawd yuav nyob hauv lub tsev ntawd thiab ua rau tej ntoo tej pob zeb uas ua tsev puam tsuaj tag huvsi.’ ” Tus tubtxib saum ntuj uas nrog kuv hais lus txav zog los hais rau kuv tias, “Tsa muag ntsia yam uas tawm mus yog dabtsi.” Kuv thiaj nug tias, “Yam ntawd yog dabtsi?” Nws teb tias, “Yam ntawd yog lub tawb efa uas tawm mus.” Thiab nws hais tias, “Yam ntawd yog tej kev txhaum uas cov neeg thoob plaws hauv lub tebchaws no ua.” Lub hau tawb uas muab txhuas ua cia li qheb kiag ua ciav muaj ib tug pojniam zaum hauv lub tawb efa ntawd. Mas tus tubtxib hais tias, “Tus no yog tej kev txhaum kev phem.” Mas nws cia li muab tus pojniam ntawd thawb kiag rau hauv lub tawb thiab muab lub hau uas muab txhuas ua kaw nkaus rau. Kuv tsa muag ntsia mas pom dheev ob tug pojniam tuaj txog ntawd. Muaj cua nyob hauv ob tug pojniam ntawd phab tis, ob sab tis zoo li phab tis os dej dub. Ob tug pojniam ntawd txawm muab lub tawb efa ntawd nqa ya rau saum ib nta ntuj. Kuv txawm nug tus tubtxib uas nrog kuv hais lus tias, “Ob tug pojniam ntawd yuav coj lub tawb efa ntawd mus rau qhovtwg?” Nws teb kuv tias, “Yuav coj mus rau tebchaws Sina, yuav mus ua tsev rau lub tawb efa. Thaum ua tau tiav lawd, ob tug pojniam ntawd yuav muab lub tawb efa txawb rau lub chaw uas npaj cia lawd.” Kuv rov tsa muag ntsia mas pom dheev plaub lub tsheb ua rog tawm ntawm ob lub roob kem nruab nrab tuaj. Ob lub roob ntawd yog roob tooj liab. Thawj lub tsheb yog cov nees liab hai, lub ob yog cov nees dub hai, lub peb yog cov nees dawb hai, lub plaub yog cov nees txheeb hai. ces kuv txawm nug tus tubtxib saum ntuj uas nrog kuv hais lus tias, “Yawg hlob, tej no yog dabtsi?” Tus tubtxib saum ntuj ntawd teb kuv tias, “Tej no yog plaub fab cua uas nyob ntawm Yawmsaub uas kav tag nrho qab ntuj no huvsi xubntiag es tawm mus. Lub tsheb uas cov nees dub hai mus rau lub tebchaws sab ped, lub tsheb uas cov nees dawb hai mus rau lub tebchaws sab hnub poob, thiab lub tsheb uas cov nees txheeb hai mus rau tebchaws sab nrad.” Thaum cov nees no tawm mus mas cov nees siab kub heev huas ntshis mus tshuaj saib thoob plaws ntiajteb. Tus tubtxib hais tias, “Mus maj, mus tshuaj saib thoob plaws ntiajteb.” Mas lawv thiaj li mus tshuaj saib thoob plaws ntiajteb. Nws txawm qw rau kuv hais tias, “Cov nees uas mus rau tebchaws sab ped tau ua rau kuv tus ntsuj plig nyob tus yees rau hauv lub tebchaws sab ped lawm.” Yawmsaub hais lus tuaj rau kuv tias, “Heedai thiab Thaunpiya thiab Yedaya uas twb poob tebchaws lawm rov qab los ntawm Npanpiloo tebchaws los. Koj cia li txais tej uas lawv coj tuaj mas ua tib hnub mus rau hauv Xefaniya tus tub Yauxiya lub tsev. Muab cov nyiaj thiab cov kub ntawd ua ib lub mom vajntxwv es muab looj kiag rau saum Yehauxada tus tub Yausua uas ua tus tuam pov thawj hlob ntoo. Thiab hais rau nws tias, ‘Yawmsaub uas muaj hwjchim loj kawg nkaus hais tias, Saib maj, tus txivneej no yog tus uas muaj npe hu ua tus ceg ntoo, vim yog nws yuav hlob loj zuj zus rau hauv nws lub chaw, thiab nws yuav ua Yawmsaub lub tuam tsev. Tus no yog tus uas yuav ua Yawmsaub lub tuam tsev thiab yuav tau hwjchim meej mom thiab yuav tau nyob lub zwm txwv kav txhua yam. Thiab yuav muaj ib tug pov thawj nyob ntawm lub zwm txwv ib sab mas ob tug ntawd yuav nyob thooj xeeb hum hauv.’ Lub mom vajntxwv ntawd yuav nyob hauv Yawmsaub lub tuam tsev, yuav ua lub chaw nco txog Heedai thiab Thaunpiya thiab Yedaya thiab Xefaniya tus tub Yauxiya. “Cov neeg uas nyob deb yuav tuaj pab ua Yawmsaub lub tuam tsev mas nej yuav paub tseeb tias yog Yawmsaub uas muaj hwjchim loj kawg nkaus txib kuv los rau nej. Yog nej mob siab mloog Yawmsaub uas yog nej tus Vajtswv tej lus mas tej no yeej yuav tshwm los.” Xyoo plaub uas Dali‑a ua vajntxwv hnub tim plaub lub cuaj hli uas yog lub hli Khile mas Yawmsaub hais lus tuaj rau Xekhaliya. Cov neeg hauv lub moos Npe‑ee txib Salexaw thiab Lekeemelej thiab lawv cov neeg mus thov Yawmsaub tsa muag zaj saib, thiab ua nug rau cov pov thawj uas nyob hauv Yawmsaub uas muaj hwjchim loj kawg nkaus lub tuam tsev thiab cov xibhwb uas cev Vajtswv lus hais tias, “Puas tsim nyog quaj ntsuag yoo mov rau lub tsib hlis yam li uas peb twb ua ntau xyoo los lawm los tsis tsim nyog ua lawm?” Yawmsaub uas muaj hwjchim loj kawg nkaus hais lus tuaj rau kuv tias, “Cia li hais rau cov pejxeem sawvdaws hauv lub tebchaws thiab cov pov thawj tias, ‘Thaum nej yoo mov quaj ntsuag rau lub tsib hlis thiab lub xya hli tau xya caum xyoo los no sub yog nej yoo vim nej nco txog kuv lov? Thiab thaum nej noj nej haus sub tsis yog nej noj nej haus rau nej tus kheej xwb lov? Thaum tseem muaj neeg nyob hauv Yeluxalees thiab muaj kev vam meej heev, thiab tseem muaj neeg nyob hauv tej zej zog ib ncig thiab nyob hauv Neke thiab saum tej pov roob Sefela, Yawmsaub twb hais tej lus no rau cov xibhwb uas cev kuv li lus txheej thaum ub los tsis yog?’ ” Yawmsaub hais lus tuaj rau Xekhaliya tias, “Yawmsaub uas muaj hwjchim loj kawg nkaus hais li no tias, ‘Yuav tsum tu plaub ncaj thiab khuvleej lwm tus ib leeg hlub ib leeg. Tsis txhob quab yuam tej poj ntsuam tej menyuam ntsuag uas tsis muaj txiv thiab lwm haiv neeg uas nrog nej nyob thiab tej neeg pluag, thiab tsis txhob ntaus tswvyim phem hauv lub siab rau kwvtij zej zog.’ Tiamsis lawv tsis kam mloog lawv fee plhu kiag tawv ncauj thiab ntsaws qhov ntsej thiaj tsis hnov. Lawv ua lawv lub siab tawv cuag zeb cuag hlau lawv thiaj tsis mloog txoj kevcai thiab Yawmsaub uas muaj hwjchim loj kawg nkaus tej lus uas nws tus ntsuj plig kom cov xibhwb cev Vajtswv lus txheej thaum ub qhia rau lawv. Vim li no Yawmsaub uas muaj hwjchim loj kawg nkaus thiaj li chim heev rau lawv. Yawmsaub uas muaj hwjchim loj kawg nkaus hais tias, ‘Thaum kuv hu, lawv tsis mloog li cas mas thaum lawv hu, kuv kuj tsis mloog ib yam li ntawd thiab. Kuv thiaj cia khaub zeeg cua ntsawj lawv tawg ri sua mus nyob rau hauv txhua lub tebchaws uas lawv tsis tau paub kiag li. Mas lawv lub tebchaws thiaj li nyob do cuas tsis muaj neeg nkag mus rau hauv li. Lub tebchaws uas txeev noj qab nyob zoo twb puam tsuaj tag nyob do cuas cia.’ ” Yawmsaub uas muaj hwjchim loj kawg nkaus hais lus tuaj rau kuv. Yawmsaub uas muaj hwjchim loj kawg nkaus hais tias, “Kuv khib xeeb Xi‑oo heev. Kuv khib xeeb kawg ua npau taws vog.” Yawmsaub hais li no tias, “Kuv yuav rov qab mus rau ntawm Xi‑oo thiab mus nyob hauv plawv Yeluxalees. Mas lawv yuav hu Yeluxalees tias lub nroog ncaj ncees, thiab hu Yawmsaub uas muaj hwjchim loj kawg nkaus lub roob ua lub roob dawb huv.” Yawmsaub uas muaj hwjchim loj kawg nkaus hais li no tias, “Cov yawg laus pog laus yuav rov zaum tswb tsaws hauv tej kev hauv Yeluxalees, sawvdaws yuav tuav pas nrig vim yog laus laus li lawm. Yuav muaj metub mentxhais dhia ua si hauv tej kev hauv lub nroog thoob plaws.” Yawmsaub uas muaj hwjchim loj kawg nkaus hais li no tias, “Thaum cov neeg uas tseem tshuav nyob pom tej no lawv yuav phimhwj. Tiamsis tej no yuav ua rau kuv phimhwj lov?” Yawmsaub uas muaj hwjchim loj kawg nkaus hais li no ntag. Yawmsaub uas muaj hwjchim loj kawg nkaus hais li no tias, “Saib maj, kuv yuav cawm kuv cov neeg kom dim hauv cov tebchaws uas nyob sab hnub tuaj thiab hauv cov tebchaws uas nyob sab hnub poob. Kuv yuav coj lawv los nyob hauv Yeluxalees. Lawv yuav ua kuv haiv neeg thiab kuv yuav ua lawv tus Vajtswv thiab ua ncaj ncees thiab ua zoo rau lawv.” Yawmsaub uas muaj hwjchim loj kawg nkaus hais li no tias, “Nej cov uas nimno tau hnov tej lus no ntawm cov xibhwb cev Vajtswv lus qhov ncauj txij hnub uas nej tiag tej taw ua Yawmsaub uas muaj hwjchim loj kawg nkaus lub tuam tsev, nej cia li ua nej txhais tes kom muaj zog xwv thiaj ua tau lub tuam tsev tiav. Vim yog thaum ub tsis muaj nqe zog rau neeg thiab tsiaj txhu, tsis muaj leejtwg tau luag tawm mus nkag los vim yog muaj yeeb ncuab, vim kuv ua rau sawvdaws sib tawm tsam.” Yawmsaub uas muaj hwjchim loj kawg nkaus hais tias, “Nimno kuv yuav tsis ua rau cov neeg uas tshuav nyob zoo yam li yav thaum ub lawm. Yuav muaj siab tus yees mus tseb noob qoob noob loo. Tsob txiv hmab yuav txi txiv thiab tej teb yuav tau qoob thiab lub ntuj yuav pub lwg los. Kuv yuav pub kom cov neeg uas tseem tshuav nyob tau tej no huvsi ua lawv tug. Cov Yuda thiab cov Yixayee 'e, nej twb txeev raug ib tsoom tebchaws tsawm foom li cas mas kuv yuav cawm nej thiab nej yuav muaj koob hmoov rau luag ib yam li ntawd. Nej tsis txhob ntshai, cia li ua nej txhais tes khov kho.” Yawmsaub uas muaj hwjchim loj kawg nkaus hais li no tias, “Thaum nej tej poj koob yawm txwv zes ua kom kuv chim kuv kuj txiav txim siab tias kuv yuav ua rau nej raug xwm txheej phem kuv tsis zam nej li.” Yawmsaub uas muaj hwjchim loj kawg nkaus hais li no ntag. “Mas hnub no kuv txiav txim siab dua tias kuv yuav ua zoo rau Yeluxalees thiab cov Yuda. Nej tsis txhob ntshai li. Tej uas nej yuav tsum ua yog li no, ib leeg yuav hais lus tseeb rau ib leeg, yuav tu plaub ncaj ua kom sawvdaws nyob sib hum xeeb. Ib leeg tsis txhob ntaus tswvyim phem hauv lub siab rau ib leeg, tsis txhob tuav Yawmsaub lub npe cog lus twv dag. Tej no huvsi mas kuv ntxub heev.” Yawmsaub hais li no ntag. Yawmsaub uas muaj hwjchim loj kawg nkaus hais lus tuaj rau kuv. Yawmsaub uas muaj hwjchim loj kawg nkaus hais li no tias, “Tej sijhawm uas nej yoo mov rau lub plaub hlis thiab lub tsib hlis thiab lub xya hli thiab lub kaum hli mas yuav ntxeev ua tej sijhawm zoo siab xyiv fab pam noj pam haus rau Yuda caj ces. Vim li no nej yuav tsum nyiam kev tseeb thiab kev sib hum xeeb.” Yawmsaub uas muaj hwjchim loj kawg nkaus hais li no tias, “Yuav muaj neeg coob coob tuaj, yuav tuaj hauv ntau lub moos tuaj. Ib lub moos li neeg yuav mus nrhiav ib lub moos li neeg hais tias, ‘Cia peb ua ke tamsim no mus thov Yawmsaub tsa muag zaj saib peb thiab nrhiav Yawmsaub uas muaj hwjchim loj kawg nkaus. Kuv yeej yuav mus thiab.’ Yuav muaj neeg coob coob thiab ntau lub tebchaws uas muaj zog tuaj nrhiav Yawmsaub uas muaj hwjchim loj kawg nkaus hauv Yeluxalees thiab thov Yawmsaub tsa muag zaj saib lawv.” Yawmsaub uas muaj hwjchim loj kawg nkaus hais li no tias, “Lub sijhawm ntawd yuav muaj kaum leej tuaj ntawm txhua lub tebchaws thiab txhua haiv neeg tuaj tuav ib tug Yudai lub qab tsho thiab hais tias, ‘Thov cia peb nrog nej mus thiab, vim peb twb hnov tias Vajtswv nrog nraim nej.’ ” Yawmsaub hais lus tawm tsam Halaj tebchaws thiab yuav los nyob rau saum lub nroog Damaxaka. Ib tsoom tebchaws thiab cov Yixayee txhua xeem yuav tsa muag ntsia Yawmsaub. Thiab tawm tsam lub moos Hama uas nyob npuas nkaus lawv ciam teb thiab tawm tsam lub nroog Thailab thiab lub moos Xaidoo uas muaj kev txawj ntse heev. Thailab ua ntsa loog thaiv lub moos cia, thiab sau tau nyiaj ntau yam nkaus li tej niag pawg hmoov av thiab sau tau kub ntau yam nkaus li tej niag plas hmoov av hauv tej kev, tiamsis Yawmsaub yuav sau zog tej qhov txhia chaw hauv lub moos huvsi coj mus, thiab muab tej nyiaj txiag laim rau hauv hiavtxwv, thiab lub moos ntawd yuav raug hluavtaws kub hnyiab tag huvsi. Lub moos Akheloo yuav pom thiab yuav ntshai, lub moos Kaxa yuav pom mas ib ce yuav tshee hnyo, lub moos Ekhoo kuj ib yam nkaus vim yog nws lub chaw vam ploj tag lawm. Tus vajntxwv uas kav lub moos Kaxa yuav puam tsuaj, yuav tsis muaj neeg nyob hauv lub moos Akheloo lawm, cov neeg txuam tsoov yuav los nyob hauv lub moos Asadau. Kuv yuav rhuav tshem cov Filixatee tej kev khav theeb kom ploj mus. Kuv yuav muab cov ntshav uas lawv noj rho hauv lawv qhov ncauj los, kuv yuav muab tej nqaij qias vuab tsuab rho hauv lawv kaus hniav los. Cov neeg uas tseem tshuav nyob yuav los ua peb tus Vajtswv li neeg thiab yuav zoo ib yam li ib cum neeg hauv Yuda. Ekhoo yuav zoo yam li cov neeg Yenpu. Thiab kuv yuav zov kuv lub tsev tsis pub leejtwg coj tau tub rog mus mus los los. Thiab yuav tsis muaj leejtwg tuaj quab yuam tsim txom tau kuv cov neeg dua li lawm vim nimno kuv ntsia ntsoov lawv lawm. Xi‑oo tus ntxhais 'e, cia li zoo siab xyiv fab kawg, Yeluxalees tus ntxhais 'e, cia li qw nrov. Saib maj, koj tus vajntxwv tabtom los cuag koj. Nws yog tus ncaj ncees thiab yog tus kov yeej. Nws txo nws lub hwjchim thiab caij ib tug nees luav, yog caij menyuam nees luav los. Kuv yuav muab tej tsheb ua rog rhuav tshem hauv Efa‑i tebchaws mus thiab yuav muab cov nees ua rog tshem tawm hauv Yeluxalees mus. Tej hneev tua rog yuav raug muab rhuav tshem, mas tus vajntxwv yuav tu kom muaj kev thaj yeeb nyab xeeb rau ib tsoom tebchaws. Nws yuav kav txij ntua ntawm lub hiavtxwv no mus txog lub hiavtxwv tim ub, thiab ntawm tus niag dej Yufeti mus txog qab ntuj kawg. Koj ne, vim yog cov ntshav uas ua lub hom thawj nias rau tej lus uas kuv cog tseg rau koj, mas kuv yuav tso koj cov uas raug muab kaw lawm dim hauv lub qhov qhuav ntawd. Cov neeg uas raug luag kaw uas tseem muaj vam 'e, cia li rov qab mus rau nej lub chaw ruaj khov. Hnub no kuv tshaj tawm rau nej tias, kuv yuav thim ob npaug rau nej. Kuv twb muab Yuda nta rawv li tus qhaub hneev, thiab muab Efa‑i ua rab xub coj los nruab rau lawm. Xi‑oo 'e, kuv yuav sau koj cov tub huvsi mus ntaus Kili cov tub thiab yuav tuav nej yam nkaus li cov tub rog tuav rab ntaj. Mas Yawmsaub yuav tshwm rau saum lawv thiab Yawmsaub cov xub yuav ya mus yam nkaus li xob laim. Vajtswv Yawmsaub yuav tshuab raj kub yaj thiab yuav nrog lub khaub zeeg cua nram qab ntug mus. Yawmsaub uas muaj hwjchim loj kawg nkaus yuav tsom kwm lawv, mas lawv yuav rhuav tshem tsuj pes ntiag cov uas txawj xuas hlua fiav ntaus qe zeb. Lawv yuav noj yuav haus qw ua tsuj ua tsaug yam li haus cawv txiv hmab. Lawv yuav tsau npo yam nkaus li lub phaj uas rau cov ntshav thiab ntub yam nkaus li cov kub thaj ntub ntshav. Hnub ntawd mas Yawmsaub uas yog lawv tus Vajtswv yuav cawm lawv vim lawv yog nws li neeg ib yam li yog nws pab yaj. Lawv yuav ci ntsa iab rau hauv nws lub tebchaws yam nkaus li tej qe zeb hlaws uas ci ci hauv lub mom kub. Lub tebchaws yuav zoo thiab zoo nkauj tiag tiag li lauj! Tej qoob yuav ua rau cov tub hluas kheev hlob thiab tej cawv txiv hmab tshiab yuav ua rau cov ntxhais hluas hlob zoo. Cia li thov Yawmsaub pub nag los rau lub hauv xyoo, thov ntawm Yawmsaub uas tsim tej niag tauv huab tsaus nti, uas pub tej niag pluav nag rau neeg thiab pub tej liaj teb tuaj nroj tsuag thiab zaub rau sawvdaws. Rau qhov tej dab mlom hais tsis tau qabhau dabtsi, thiab cov txiv neeb txiv yaig kuj tsis pom qhov tseeb. Tus Kws npau suav los kuj piav tej npau suav dag, lawv lam nplij dag. Mas cov neeg thiaj li yuam kev yam nkaus li tej yaj, lawv raug kev txom nyem vim tsis muaj tus yug yaj. “Kuv chim thiab npau rau cov uas yug yaj, thiab kuv yuav teem txim rau cov thawj. Vim Yawmsaub uas muaj hwjchim loj kawg nkaus mob siab nws pab yaj uas yog cov Yuda, thiab yuav ua rau lawv zoo yam nkaus li cov nees ua rog uas cus heev. Lub thawj txhib zeb uas muab ua tsev yuav tawm hauv lawv tuaj, tus tswg uas tsa tsev ntaub yuav tawm hauv lawv tuaj, rab hneev uas ua rog yuav tawm hauv lawv tuaj, thiab txhua tus thawj kav puavleej yuav tawm hauv lawv tuaj. Lawv sau zog ua ke yuav zoo cuag li cov tub siab loj siab tuab, yuav tsuj pes ntiag tej yeeb ncuab rau hauv tej av nplaum hauv txoj kev. Vim Yawmsaub nrog nraim lawv nyob lawv thiaj txawj ntaus rog, thiab lawv yuav ua rau cov uas caij nees poob pes nroos. “Kuv yuav pub zog rau Yuda caj ces thiab cawm Yauxej caj ces kom dim. Kuv yuav coj lawv rov qab los vim kuv khuvleej lawv. Thiab lawv yuav zoo yam nkaus li kuv twb tsis tau txeev tso lawv tseg li, rau qhov kuv yog Yawmsaub uas yog lawv tus Vajtswv mas kuv yuav teb lawv. Efa‑i cov neeg yuav zoo yam nkaus li cov tub rog siab loj siab tuab, lawv yuav xyiv fab yam nkaus li haus cawv txiv hmab. Lawv tej menyuam yuav pom mas yuav zoo siab heev, lawv lub siab yuav xyiv fab kawg nkaus rau hauv Yawmsaub. Kuv yuav xuav kauv hu lawv thiab qaws zog lawv los ua ke, rau qhov kuv twb txhiv lawv lawm thiab lawv yuav muaj coob yam nkaus li yav thaum ub. Txawm yog kuv muab lawv ntiab ri sua rau hauv ib tsoom tebchaws los lawv tseem yuav nco ntsoov kuv hauv tej tebchaws deb deb ntawd, thiab lawv yuav tuav siav qas rawv nrog lawv tej menyuam nyob thiab rov qab los. Kuv yuav coj lawv hauv Iyi tebchaws rov los thiab qaws lawv hauv Axilia tebchaws rov los, thiab kuv yuav coj lawv mus rau hauv Kile‑a thiab Lenpanoo tebchaws kom puv nkaus tsis muaj chaw nyob. Lawv yuav hla lub hiavtxwv uas yog kev txom nyem, thiab kuv yuav ntaus tej niag nthwv dej ntas thiab ua rau tus niag dej Nai uas tob tob qhuav qhawv. Kuv yuav txo Axilia lub hwjchim uas khav theeb thiab Iyi tus cwj kav tebchaws yuav ploj mus. Kuv yuav ua kom lawv muaj zog hauv Yawmsaub thiab lawv yuav khav txog Yawmsaub lub npe.” Yawmsaub hais li no ntag. Lenpanoo tebchaws cia li qheb qhov rooj xwv hluavtaws thiaj li kub tau koj tej ntoo ciab. Cov ntoo ciab nplooj suab 'e, cia li quaj nyiav rau qhov cov ntoo ciab twb vau tag lawm, vim tej ntoo loj ntoo tsim txiaj twb puam tsuaj tag lawm. Cov ntoo qheb Npasas 'e, cia li quaj nyiav rau qhov tej hav zoov ntoo ntom nti twb raug muab ntov tag lawm. Cia li mloog cov yug yaj lub suab quaj nyiav rau qhov lawv tej tshav zaub zoo zoo twb puam tsuaj tag lawm. Cia li mloog cov tsov ntxhuav nyooj vim tej hav zoov hav tsuag ntawm ntug dej Yaladee raug muab tso tseg piam tag. Yawmsaub uas yog kuv tus Vajtswv hais li no tias, “Cia li yug pab yaj uas twb hom cia lawm yuav raug muab tua. Cov neeg uas yuav tej yaj ntawd kuj muab tej yaj tua los kuj tsis raug txiav txim. Cov neeg uas muab lawv muag kuj hais tias ‘Qhuas Yawmsaub, rau qhov kuv nplua nuj lawm.’ Thiab cov uas yug cov yaj ntawd los tsis khuvleej cov yaj li.” Yawmsaub hais tias, “Kuv yuav tsis khuvleej cov neeg hauv lub tebchaws no dua li lawm. Kuv kuj yuav ua kom lawv nyias taus nyias poob rau hauv nws tus yug yaj txhais tes thiab poob rau hauv nws tus vajntxwv txhais tes. Mas cov ntawd yuav zuaj lub tebchaws no kom ntsoog, thiab kuv yuav tsis cawm ib tug dim hauv lawv txhais tes li.” Mas kuv thiaj yug cov yaj uas yuav raug muab tua, yog saib rau cov uas ua luam yaj. Kuv thiaj muab ob tug pas nrig, ib tug npe hu ua Kev Hlub, ib tug npe hu ua Hum Xeeb, mas kuv thiaj yug cov yaj ntawd. Ib hlis xwb mas kuv rhuav tshem peb tus neeg yug yaj. Kuv dhuav cov yaj lawm thiab cov yaj kuj ntxub kuv. Kuv thiaj hais tias, “Kuv tsis ua tus uas yug nej lawm. Yog tus twg yuav tuag kuj cia li tuag mus. Yog tus twg yuav raug puam tsuaj kuj cia li puam tsuaj mus. Cov uas tseem tshuav nyob ntawd ces cia ib tug noj ib tug li nqaij.” Kuv thiaj muab tus pas nrig uas npe hu ua Kev Hlub lov kiag tseg, rhuav kiag lo lus uas cog tseg rau ib tsoom tebchaws lawm. Hnub ntawd thiaj rhuav kiag lo lus cog tseg ntawd lawm. Cov uas ua luam yaj uas tos ntsia ntsoov kuv kuj paub tias tej no yog Yawmsaub li lus. Mas kuv thiaj hais rau lawv tias, “Yog nej pom zoo mas thov them kuv nqe zog, yog tsis pom zoo kuj cia li.” Ces lawv txawm luj peb caug sekhee nyiaj ua nqe zog rau kuv. Mas Yawmsaub hais rau kuv tias, “Muab tej nyiaj ntawd pov rau tus Kws puab laujkaub.” Qhov nyuag nyiaj npaum li no xwb yog cov uas lawv them rau kuv. Mas kuv thiaj li muab peb caug sekhee nyiaj no pov rhees rau tus Kws puab laujkaub hauv Yawmsaub lub tuam tsev. Ces kuv thiaj muab tus pas nrig uas npe hu ua Hum Xeeb lov tseg, yog tus uas ob, mas thiaj rhuav tshem Yuda thiab Yixayee txoj kev hum xeeb. Yawmsaub txawm hais rau kuv tias, “Cia li khaws tus yug yaj uas tsis tsim txiaj tej twj siv dua ib zaug, rau qhov kuv tabtom tsa ib tug yug yaj hauv lub tebchaws no. Nws yog ib tug uas tsis mob siab tej yaj uas yuav puam tsuaj, thiab tsis nrhiav tej menyuam yaj uas ploj lawm thiab tsis kho tej uas lov ceg thiab tsis yug tej uas nyob zoo, nws ho muab tej yaj uas rog rog tej nqaij noj xwb, nws muab tej rau dua los noj huvsi. “Kuv tus qhev uas yug yaj uas tsis tsim txiaj yuav raug txom nyem lauj, vim nws muab pab yaj tso tseg. Cia hniav ntaj txiav nws tej npab thiab txiav nws sab qhov muag xis. Cia nws tej npab qhuav kiag, cia nws sab qhov muag xis dig nkaus.” No yog Yawmsaub cov lus uas hais txog cov Yixayee. Yawmsaub uas nthuav lub ntuj rau saud thiab pua lub ntiajteb thiab tsim ntsuj plig rau hauv neeg hais li no tias, “Saib maj, kuv tabtom yuav ua kom Yeluxalees zoo nkaus li lub khob cawv uas ua rau ib tsoom neeg uas nyob ib ncig qaug. Lub khob no yuav ua rau Yuda qaug rau thaum yeeb ncuab vij lub nroog Yeluxalees. Hnub ntawd kuv yuav ua rau Yeluxalees zoo li ib txhib zeb uas hnyav kawg rau ib tsoom tebchaws. Yog leejtwg mus nyom txhib zeb ntawd mas yuav ua rau leejtwg raug mob sab kawg. Ib tsoom tebchaws hauv qab ntuj yuav sau nthwv tuaj ntaus Yeluxalee.” Yawmsaub hais tias, “Hnub ntawd kuv yuav ua rau txhua tus nees ceeb sob, thiab ua rau cov uas caij vwm, tiamsis kuv yuav tsa muag saib Yuda caj ces, thiab kuv yuav ua rau ib tsoom tebchaws tej nees dig muag. Mas Yuda tej cum yuav xav hauv lub siab tias, ‘Cov neeg hauv Yeluxalees muaj zog kawg vim yog lawv tus Vajtswv Yawmsaub uas muaj hwjchim loj kawg nkaus pub zog rau lawv.’ “Hnub ntawd kuv yuav ua rau Yuda tej cum zoo yam nkaus li lub laujkaub kub liab ploog hauv cub hluavtaws thiab zoo yam nkaus li teg tsau uas cig lam lug hauv nruab nrab cov teg qoob, thiab yuav kub ib tsoom tebchaws uas nyob vij ib ncig sab xis sab laug, tiamsis yuav muaj neeg nyob ruaj khov hauv Yeluxalees rau lub qub chaw. “Yawmsaub yuav pub kom Yuda cov tub rog xub kov yeej xwv Davi caj ces thiab cov neeg hauv Yeluxalees thiaj tsis tau koob meej loj dua cov Yuda. Hnub ntawd Yawmsaub yuav thaiv cov hauv Yeluxalees cia, xwv cov uas qaug zog kawg hauv lawv yuav zoo yam li Davi rau hnub ntawd. Davi caj ces yuav zoo yam nkaus li Vajtswv, zoo yam nkaus li Yawmsaub tus tubtxib saum ntuj uas coj lawv. Hnub ntawd kuv yuav nrhiav kev ua kom txhua lub tebchaws uas tuaj tawm tsam Yeluxalees puam tsuaj. “Kuv yuav hliv tus ntsuj plig uas pub kev hlub thiab kev kub siab thov Vajtswv rau Davi caj ces thiab cov hauv Yeluxalees, mas thaum lawv tsa muag ntsia kuv uas lawv xuas hmuv nkaug ces lawv yuav quaj ntsuag nws yam nkaus li cov uas muaj tib tug menyuam xwb los tuag lawm es quaj, thiab yuav quaj nyiav yam nkaus li cov uas tus tub hlob tuag es quaj nyiav heev. Hnub ntawd yuav muaj kev quaj ntsuag heev hauv Yeluxalees yam nkaus li uas quaj ntsuag Hadalimoo hauv lub tiaj Mekidau. Lub tebchaws yuav quaj ntsuag txhua yim nyias quaj nyias, Davi cuab neeg nws quaj nws, thiab Davi cov pojniam nws quaj nws ib cag, Nathas cuab neeg nws quaj nws, thiab cov pojniam nws quaj nws ib cag, Levi cuab neeg nws quaj nws, thiab cov pojniam nws quaj nws ib cag, thiab Sime‑i cuab neeg nws quaj nws, thiab cov pojniam nws quaj nws ib cag, thiab txhua cuab neeg uas tshuav nyob kuj quaj nyiav thiab lawv cov pojniam kuj nws quaj nws ib cag.” “Hnub ntawd yuav muaj dej cag txhawv kiag rau Davi caj ces thiab rau cov hauv Yeluxalees thiaj li ntxuav tau lawv kev txhaum kev qias pov tseg.” Yawmsaub uas muaj hwjchim loj kawg nkaus hais tias, “Hnub ntawd kuv yuav rhuav tshem tej dab mlom lub npe kom ploj hauv lub tebchaws mus, kom lawv thiaj tsis nco txog kiag li lawm. Kuv yuav ntiab cov xibhwb uas cev Vajtswv lus thiab tus ntsuj plig uas tsis huv tawm hauv lub tebchaws mus. Yog muaj leejtwg tsab ua xibhwb cev Vajtswv lus mas nws niam nws txiv uas yug nws yuav hais rau nws tias, ‘Koj yuav tuag vim koj tuav Yawmsaub lub npe hais dag xwb.’ Thaum nws cev Vajtswv lus leej niam leej txiv uas yug nws yuav muab nws nkaug tshab plaws. Hnub ntawd txhua tus xibhwb cev Vajtswv lus yuav txaj muag vim qhov uas nws ua yog toog cev Vajtswv lus. Nws yuav tsis hnav lub tsho uas muaj plaub mus hais lus dag lawm. Nws yuav hais tias, ‘Kuv tsis yog tus uas cev Vajtswv lus, kuv yog neeg ua liaj ua teb xwb, rau qhov kuv yeej ua liaj ua teb txij thaum kuv tseem hluas los lawm.’ Yog leejtwg nug nws tias, ‘Ua cas koj muaj kiav txhab saum nrob qaum?’ mas nws yuav teb tias ‘Kuv tau tej kiav txhab no ntawm tej kwvluag lub tsev.’ ” Yawmsaub uas muaj hwjchim loj kawg nkaus hais tias, “Rab ntaj 'e, cia li tsim dheev sawv los tiv kuv tus qhev yug yaj, sawv los tiv tus uas txheeb ze kuv. Cia li nplawm tus qhev yug yaj mas pab yaj thiaj yuav tawg ua sab ua sua mus. Kuv yuav tig kiag kuv txhais tes tawm tsam tus me tus yau.” Yawmsaub hais tias, “Tag nrho lub tebchaws yuav muab rhuav tshem ob feem kom puam tsuaj, tshuav ib feem hauv peb feem thiaj li ciaj xwb. Kuv yuav muab ib feem hauv peb feem ntawd coj mus rau hauv hluavtaws mas yuav muab nchuav ib yam li nchuav nyiaj, thiab yuav muab lawv sim yam li sim kub. Lawv yuav thov hu kuv lub npe, mas kuv yuav teb lawv. Kuv yuav hais tias ‘Lawv yog kuv haiv neeg’ thiab lawv yuav hais tias ‘Yawmsaub yog peb tus Vajtswv.’ ” Saib maj, Yawmsaub hnub tabtom los, yog hnub uas tej nyiaj txiag uas luag txeeb ntawm koj mus luag yuav faib rau hauv nruab nrab koj, rau qhov kuv yuav sau zog ib tsoom tebchaws sawvdaws tuaj ua rog rau Yeluxalees. Lub nroog ntawd yuav raug luag txeeb tau, luag yuav lws tej nyiaj txiag qhov txhia chaw hauv vaj hauv tsev thiab yuav muab tej pojniam yuam. Ib nrab pejxeem yuav tawm mus poob tebchaws, tiamsis cov uas tshuav nyob yuav tsis raug muab ntiab tawm hauv lub nroog mus. Mas Yawmsaub yuav tawm mus tiv tej tebchaws ntawd ib yam li hnub uas Yawmsaub tawm mus ua rog ntag. Hnub ntawd Yawmsaub txhais taw yuav tsuj saum lub Roob Txiv Aulib uas nyob ntawm Yeluxalees sab hnub tuaj, mas lub Roob Txiv Aulib ntawd yuav tawg rhe ua ob sab thiaj ua kiag ib lub kwj ha dav dav li kem sab hnub tuaj mus thoob plaws sab hnub poob, mas ib nrab roob thiaj txav rau sab ped ib nrab roob txav rau sab nrad. Nej yuav khiav ntawm lub hav uas kuv ua ntawd vim lub hav ntawd ntev mus txog ntua Asxa. Nej yuav tawm khiav mus yam nkaus li thaum Uxiya ua vajntxwv kav Yuda tebchaws es ntuj qeeg nej thiaj khiav. Yawmsaub uas yog kuv tus Vajtswv yuav los thiab cov neeg dawb huv saum ntuj sawvdaws yuav nrog nws los. Hnub ntawd yuav tsis muaj caij no tsis muaj te, yuav muaj nruab hnub xwb (Yawmsaub yeej paub hnub ntawd), tsis muaj nruab hnub tsis muaj hmo ntuj, txawm yog txog caij tsaus ntuj lawm los yeej pom kev li. Hnub ntawd dej cag yuav ntws tawm hauv Yeluxalees, ib nrab ntws mus rau lub hiavtxwv sab hnub tuaj, ib nrab ntws mus rau lub hiavtxwv sab hnub poob. Lub caij ntuj kub los dej yuav ntws nto yam nkaus li lub caij ntuj no. Yawmsaub yuav ua vajntxwv kav tag nrho lub ntiajteb huvsi. Hnub ntawd tsuas yog muaj Yawmsaub tib leeg xwb thiab muaj Yawmsaub tib lub npe xwb. Lub tebchaws huvsi yuav ntxeev ua teb tiaj teb tus txij ntawm lub moos Kenpa mus txog lub moos Limoo uas nyob ntawm Yeluxalees sab nrad, tiamsis Yeluxalees tseem yuav nyob nws qhov chaw uas siab txij ntua ntawm Rooj Loog Npeyamee mus txog ntua lub chaw uas muaj Rooj Loog Qub thiab mus txog ntua lub rooj loog ntawm lub kaum loog, thiab ntawm lub chaw tsom faj Hananee txog ntua vajntxwv lub chaw tsuam kua txiv hmab. Thiab yuav muaj neeg nyob hauv nroog vim yog tsis raug lo lus foom tsis zoo lawm. Yeluxalees yuav nyob tso siab lug. Ntawm no mus yog tej vij sub vij sw uas Yawmsaub yuav siv ntaus ib tsoom tebchaws uas ua rog rau Yeluxalees. Thaum lawv tseem sawv tau nres nroos lawv tej nqaij yuav cia li lwj, lawv lub ntsiab muag yuav cia li lwj kiag ntawm lub qhov muag, thiab lawv tus nplaig yuav cia li lwj kiag hauv lawv lub qhov ncauj. Hnub ntawd Yawmsaub yuav ua rau lawv ntshai ras zom zaws loj kawg li. Lawv ib leeg yuav ntsiab pes nkaus ib leeg thiab ib leeg yuav tsa pes kiag tes ntaus ib leeg. Txawm yog cov Yuda los kuj yuav mus ntaus rog rau hauv Yeluxalees. Tej tebchaws sawvdaws uas nyob ib ncig tej nyiaj txiag qhov txhia chaw yuav raug muab khaws cia sau zog ua ke, yog kub thiab nyiaj thiab ris tsho hnav ntau kawg li. Yawmsaub yuav tso vij sub vij sw li no los rau lawv tej nees thiab tej luj txwv thiab tej ntxhuav thiab tej nees luav thiab txhua yam tsiaj txhu hauv tej yeej ntawd. Mas cov neeg hauv ib tsoom tebchaws uas mus tawm tsam Yeluxalees es tseem muaj txojsia nyob kuj niaj xyoo yuav mus pe hawm tus vajntxwv uas yog Yawmsaub uas muaj hwjchim loj kawg nkaus thiab ua kevcai nyob tsev pheeb suab. Yog haiv neeg twg hauv qab ntuj no tsis mus rau hauv Yeluxalees es pe tus vajntxwv uas yog Yawmsaub uas muaj hwjchim loj kawg nkaus mas nag yuav tsis los rau lawv. Yog haiv neeg Iyi tsis mus tshwm ntsej muag rau ntawd ces lawv yuav raug tej vij sub vij sw uas Yawmsaub tso rau tej tebchaws uas tsis mus ua kevcai nyob tsev pheeb suab. Tej uas hais lus no yog tej uas txiav txim rau Iyi thiab ib tsoom tebchaws uas tsis mus ua kevcai nyob tsev pheeb suab. Hnub ntawd yuav txam txwm rau phiaj tswb uas nees coj hais tias, “Dawb huv rau Yawmsaub,” thiab tej lauj kaub uas siv hauv Yawmsaub lub tuam tsev yuav zoo ib yam li tej phaj dawb huv uas siv ntawm lub thaj xyeem qhov txhia chaw. Txhua lub lauj kaub hauv Yeluxalees thiab hauv Yuda yuav dawb huv rau Yawmsaub uas muaj hwjchim loj kawg nkaus kom txhua tus uas tuaj xyeem tsiaj rau Yawmsaub thiaj coj tau tej lauj kaub ntawd mus hau tej nqaij uas xyeem ntawd. Hnub ntawd yuav tsis muaj tub lag tub luam nyob hauv Yawmsaub uas muaj hwjchim loj kawg nkaus lub tuam tsev dua li lawm. No yog Yawmsaub tej lus uas nws kom Malakhi hais rau cov Yixayee. Yawmsaub hais tias, “Kuv hlub nej.” Tiamsis nej hais tias, “Koj hlub peb li cas?” Yawmsaub hais tias, “Exau yog Yakhauj tus tijlaug los tsis yog? Tiamsis kuv hlub Yakhauj, kuv ntxub Exau. Kuv ua rau nws lub tebchaws toj siab nyob do cuas, thiab muab nws qub txeeg qub teg cob rau tej hma hauv ntuj nrag teb do.” Cov Edoo hais tias, “Peb raug puam tsuaj tag lawm tiamsis peb yuav rov muab tej uas pob tag tsim dua tshiab.” Yawmsaub uas muaj hwjchim loj kawg nkaus hais tias, “Lawv yuav tsim dua kuj tau, tiamsis kuv yuav muab rhuav pov tseg thiab, mus txog thaum raug luag hu tias lub tebchaws phem, thiab yog haiv neeg uas Yawmsaub chim rau mus ib txhis. Nej lub qhov muag yuav pom ntsoov tej no thiab nej yuav hais tias, ‘Txawm yog dhau Yixayee lub tebchaws lawm los Yawmsaub yeej yog tus uas loj kawg nkaus.’ ” “Tus tub yeej hwm leej txiv, tus tub qhe yeej hwm tus lospav. Yog tias kuv yog leej txiv, qhov uas hwm kuv dua twg lawd? Yog kuv yog tus lospav, qhov uas paub ntshai kuv dua twg lawm? Cov pov thawj 'e, Yawmsaub uas muaj hwjchim loj kawg nkaus hais li no rau nej ntag. Nej saib tsis taus kuv lub npe los nej tseem hais tias, ‘Peb saib tsis taus koj lub npe li cas? ’ Kuj yog qhov uas nej coj tej zaub mov qias tsis huv tuaj xyeem rau kuv saum kuv lub thaj. Nej tseem hais tias, ‘Peb ua rau tej zaub mov ntawd qias tsis huv li cas? ’ Kuj yog qhov uas nej xav hais tias Yawmsaub lub rooj mas saib tsis taus kuj tau. Thaum nej muab tej tsiaj dig muag xyeem, ua li ntawd tsis yog qhov phem lov? Thiab thaum nej muab tej tsiaj ceg tawv lossis muaj mob xyeem, ua li ntawd tsis yog qhov phem lov? Cia li coj tej ntawd mus ua tshav ntuj rau tus thawj uas kav nej lub tebchaws, nws yuav txaus siab rau nej thiab tsa muag zaj saib nej zoo lov?” Yawmsaub hais li no ntag. “Nimno nej sim taij thov Vajtswv tsa muag zaj saib peb, kom nws thiaj li khuvleej peb. Yog nej coj tej tshav ntuj zoo li ntawd hauv nej txhais tes mus rau nws, nws yuav txais yuav nej ib tug twg lov?” Yawmsaub uas muaj hwjchim loj kawg nkaus hais li no ntag. “Au xav kom nej cov muaj ib tug twg muab lub qhov rooj kaw cia, xwv nej thiaj tsis mus rauv taws saum kuv lub thaj do do xwb. Kuv tsis txaus siab rau nej thiab tsis txais yuav tej uas nej txhais tes muab xyeem kiag li.” Yawmsaub uas muaj hwjchim loj kawg nkaus hais li no ntag. “Txij sab hnub tuaj mus txog sab hnub poob, kuv lub npe kuj loj kawg nkaus rau hauv ib tsoom tebchaws sawvdaws, thiab lawv muab tej tshuaj tsw qab thiab tej uas dawb huv xyeem rau kuv lub npe rau txhua qhov chaw, vim tias kuv lub npe loj kawg rau hauv ib tsoom tebchaws.” Yawmsaub uas muaj hwjchim loj kawg nkaus hais li no ntag. “Tiamsis thaum nej hais tias, ‘Tus Tswv lub thaj qias tsis huv,’ thiab hais tias, ‘Yuav saib tsis taus tej zaub mov uas xyeem ntawd kuj tau,’ kuj yog nej ua puas tsuas kuv lub npe.” Yawmsaub uas muaj hwjchim loj kawg nkaus hais tias, “Nej hais tias, ‘Peb dhuav siab rau tej no lawm, ’ thiab nej ua saib tsis taus kuv. Nej coj tej uas txeeb tau los lossis tej uas ceg tawv tej muaj mob tuaj, mas nej muab tej ntawd xyeem ntag. Kuv yuav txais tej ntawm nej txhais tes no lov?” Yawmsaub hais li no ntag. “Leejtwg pab tsiaj muaj ib tug txiv thiab yeem lus yuav xyeem tiamsis tseem muab dua tus tsiaj uas muaj chaw thuam xyeem rau tus Tswv mas tus uas ua tsis ncaj ntawd yuav raug tsawm foom. Kuv yog tus vajntxwv loj kawg thiab kuv lub npe txaus ib tsoom tebchaws sawvdaws hwm thiab ntshai.” Yawmsaub uas muaj hwjchim loj kawg nkaus hais li no ntag. “Cov pov thawj 'e, nimno tej lus qhuab qhia no yog hais rau nej ntag.” Yawmsaub uas muaj hwjchim loj kawg nkaus hais tias, “Yog nej tsis mloog, thiab yog nej tsis muab siab rau ua kom kuv lub npe tau koob meej, kuv yuav tso tej lus tsawm foom los raug nej, thiab kuv yuav tsawm foom tej lus uas nej foom koob hmoov. Kuv twb tsawm foom tej koob hmoov ntawd lawm lauj, rau qhov nej tsis muab siab rau ua. Kuv yuav cem nej cov tub ki, thiab muab tej tsiaj uas nej muab xyeem cov quav pleev nej lub ntsej muag, thiab kuv yuav coj nej tawm ntawm kuv xubntiag nrog cov quav ua ke mus. “Nej thiaj paub tias tej lus qhuab qhia no yog kuv hais rau nej, kom kuv tej lus uas kuv cog tseg rau Levi thiaj li nyob ruaj.” Yawmsaub uas muaj hwjchim loj kawg nkaus hais li no ntag. “Tej lus uas kuv cog tseg rau nws ntawd yog tej lus cog tseg uas pub txojsia thiab nyob kaj siab lug. Kuv muab tej lus cog tseg no rau nws kom nws thiaj paub ntshai kuv. Ces nws txawm paub ntshai kuv thiab hwm kuv lub npe. Nws lub qhov ncauj muaj tej lus qhuab qhia uas tseeb, nws tus nplaig tsis hais tej lus txhaum kiag li. Nws ua lub neej nrog kuv sib hum xeeb thiab ua ncaj ncees, thiab nws coj ntau leej tig ntawm txojkev txhaum txim. Cov pov thawj tus nplaig tsim nyog zov txojkev paub, thiab tsim nyog neeg nrhiav tej lus qhuab qhia ntawm lawv lub qhov ncauj, rau qhov lawv yog Yawmsaub uas muaj hwjchim loj kawg nkaus li tubtxib. Tiamsis nej cov pov thawj tau tig ntawm txojkev ntawd mus lawm, nej tej lus qhuab qhia ua rau ntau leej dawm. Nej rhuav tej lus uas cog tseg rau Levi lawm.” Yawmsaub uas muaj hwjchim loj kawg nkaus hais li no ntag. “Vim li no kuv thiaj ua rau nej raug saib tsis taus thiab raug poob qes tab meeg cov pejxeem sawvdaws rau qhov nej tsis tuav rawv kuv txhua txojkev, nej tseem saib neeg ntsej muag qhuab qhia.” Peb sawvdaws tsis yog koom tib leeg txiv lov? Tsis yog tib tug Vajtswv tsim peb los lov? Ua cas peb tseem yuav rhuav tej lus uas ib leeg cog rau ib leeg thiaj ua txhaum rau tej lus uas cog tseg rau peb tej poj koob yawm txwv? Yuda kuj fav xeeb rau tej lus cog tseg lawm, thiab ua qias vuab tsuab rau hauv Yixayee tebchaws thiab hauv Yeluxalees, rau qhov Yuda tau ua qias puas tsuas lub chaw pe hawm Yawmsaub uas Yawmsaub nyiam, thiab mus yuav lwm tebchaws tej dab li ntxhais. Yog tus txivneej twg ua li no ces thov Yawmsaub rhuav tshem tus ntawd tawm hauv Yakhauj tej tsev ntaub mus, txawm yog lawv coj qhov txhia chaw tuaj xyeem rau Yawmsaub uas muaj hwjchim loj kawg nkaus kuj xij. Nej kuj ua li no thiab. Nej muab kua muag ywg Yawmsaub lub thaj, nej quaj thiab ntsaj laws vim Yawmsaub tsis quav ntsej thiab tsis zoo siab txais tej uas nej txhais tes coj tuaj xyeem li lawm. Nej nug tias, “Ua cas nws tsis txais?” Twb yog vim Yawmsaub ua timkhawv rau koj thiab koj tus pojniam uas thaum tseem hluas koj yuav nws. Txawm yog nws ua koj txij nkawm thiab ua koj pojniam raws li koj cog lus, los koj tseem fav xeeb rau nws. Vajtswv ua rau ob tug koom ua ib tug los tsis yog? Lub cev lub siab huvsi yog Vajtswv li. Qhov uas Vajtswv ua li no nws xav tau dabtsi? Yog xav tau tub ki uas hwm Vajtswv. Vim li no nej yuav tsum ceev faj tib zoo, tsis txhob cia leejtwg fav xeeb rau tus pojniam uas nws yuav thaum hluas. Yixayee tus Vajtswv Yawmsaub hais tias, “Kuv ntxub qhov uas sib nrauj thiab qhov uas ua limhiam ntais ntuj.” Yawmsaub uas muaj hwjchim loj kawg nkaus hais li no ntag. Vim li no cia li ceev faj tib zoo tsis txhob ua neeg fav xeeb. Nej tej lus ua rau Yawmsaub dhuav siab, los nej tseem hais tias, “Peb ua rau nws dhuav siab li cas?” Kuj yog tej lus uas nej hais tias, “Yawmsaub pom tias txhua tus uas ua phem kuj yog neeg zoo thiab nws txaus siab rau cov neeg ntawd.” Thiab nej tseem nug tias, “Vajtswv uas ua ncaj nyob qhovtwg?” “Saib maj, kuv tso kuv tus tubtxib mus npaj kev rau tom kuv hauv ntej, thiab tus Tswv uas nej nrhiav yuav los rau hauv nws lub tuam tsev tamsid. Tus tubtxib uas yuav qhia tej lus cog tseg uas nej txaus siab ntawd nws tabtom los.” Yawmsaub uas muaj hwjchim loj kawg nkaus hais li no ntag. Leejtwg yuav thev tau hnub uas nws los, thiab leejtwg yuav sawv khov kho rau thaum nws tshwm plaws los? Rau qhov nws zoo yam nkaus li cub thee uas nchuav nyiaj thiab zoo li kua tshuaj ntxhua khaubncaws. Nws yuav zaum yam li tus uas nchuav thawj tom thiab nchuav kom tau cov tseem nyiaj. Nws yuav ntxuav Levi caj ces kom dawb huv thiab muab lawv nchuav ib yam li nchuav nyiaj nchuav kub, mus txog thaum lawv coj tej uas raug cai tuaj xyeem rau Yawmsaub. Thaum ntawd tej uas cov Yuda thiab Yeluxalees muab xyeem yuav txaus Yawmsaub lub siab ib yam li yav thaum ub thiab yam li xyoo uas dhau los. “Kuv yuav los ze nej thiab txiav txim. Kuv yuav ua timkhawv sai kawg kom cov txiv neeb txiv yaig thiab cov uas ua nkauj ua nraug thiab cov uas twv tsawm dag thiab cov uas sej cov tub zog nqe zog, thiab cov uas quab yuam cov poj ntsuam thiab cov menyuam uas tsis muaj txiv, thiab cov uas thawb pes ntiag lwm haiv neeg khiav tsis pub muaj cai, thiab cov uas tsis paub ntshai kuv.” Yawmsaub uas muaj hwjchim loj kawg nkaus hais li no ntag. “Kuv yog Yawmsaub uas tsis txawj txawv txav. Yakhauj caj ces 'e, vim li no nej thiaj tsis raug puam tsuaj tag. Nej tig kiag ntawm kuv tej kab ke thiab tsis ua raws li ntawd txij thaum nej tej poj koob yawm txwv los lawm. Nej cia li rov los cuag kuv, kuv yuav rov los cuag nej.” Yawmsaub uas muaj hwjchim loj kawg nkaus hais li no ntag. “Tiamsis nej hais tias, ‘Peb yuav rov los cuag koj li cas?’ “Neeg yuav qee Vajtswv tug lov? Nej tabtom qee kuv, tiamsis nej hais tias, ‘Peb qee koj li cas?’ Kuj yog qee ib feem kaum thiab tej uas muab xyeem ntag. Nej raug tsawm foom lawm, rau qhov tag nrho nej haiv neeg sawvdaws qee kuv.” Yawmsaub uas muaj hwjchim loj kawg nkaus hais tias, “Cia li coj ib feem kaum puv npo tuaj rau hauv lub txhab, kom thiaj li muaj zaub mov rau hauv kuv lub tuam tsev. Cia li sim kuv qhov no saib kuv yuav qheb qhov rais saum ntuj rau nej thiab hliv hmoov zoo phwj yos ntws lug rau nej. Kuv yuav txwv tej kab tej kooj kom tsis txhob ua rau nej tej qoob loo puam tsuaj tag. Thiab tej txiv hmab hauv teb txi txiv tsis tu ncua.” Yawmsaub uas muaj hwjchim loj kawg nkaus hais li no ntag. “Ib tsoom tebchaws sawvdaws yuav hu nej tias nej yog cov uas tau hmoov zoo, rau qhov nej yuav ua lub tebchaws uas ntxim siab heev.” Yawmsaub uas muaj hwjchim loj kawg nkaus hais li no ntag. Yawmsaub hais tias, “Nej iab hiam kuv, los nej tseem hais tias ‘Peb iab hiam koj li cas?’ Nej twb hais tias, ‘Qhov uas ua koom tu Vajtswv tsis muaj qabhau. Qhov uas tuav rawv nws tej lus nkaw lossis ua lub neej yam li cov neeg quaj ntsuag rau ntawm Yawmsaub uas muaj hwjchim loj kawg nkaus lub xubntiag yuav tau qhov zoo li cas? Nimno peb suav tias cov neeg khav theeb kuj nyob kaj siab lug. Cov neeg ua phem tsis yog vam meej xwb, thaum lawv sim Vajtswv lawm los lawv kuj dim thiab.’ ” Cov neeg uas hwm thiab paub ntshai Yawmsaub kuj sib tham. Yawmsaub kuj mloog thiab hnov, thiab muaj ib phau ntawv sau nyob ntawm nws lub xubntiag, yog sau cov uas paub ntshai Yawmsaub thiab saib taus nws lub npe tej npe cia rau hauv. Yawmsaub uas muaj hwjchim loj kawg nkaus hais tias, “Lawv yuav ua kuv li, yuav ua kuv teej kuv tug uas tsim txiaj kawg rau hnub uas kuv teem txim, thiab kuv yuav tseg lawv txojsia ib yam li leej txiv tseg nws cov tub uas tu nws txojsia. Mas nej yuav rov qab pom tias tus uas ncaj ncees thiab tus uas limhiam txawv li cas, thiab tus uas ua koom tu Vajtswv thiab tus uas tsis ua koom tu nws txawv li cas.” Yawmsaub uas muaj hwjchim loj kawg nkaus hais tias, “Hnub ntawd yeej tabtom los yog hnub uas yuav hlawv kub hnyiab yam li lub qhov txos. Cov neeg khav theeb thiab cov ua phem sawvdaws yuav ua quav nyab mas hnub uas tabtom los ntawd yuav hlawv lawv kub hnyiab huvsi, tsis tshuav cag tsis tshuav ceg kiag li. Tiamsis lub hnub uas coj kev ncaj ncees thiab muaj tis txawj kho mob yuav tawm tuaj rau nej cov uas lawv ntshai kuv lub npe. Nej yuav dhia paj paws tawm mus yam nkaus li tej menyuam nyuj dhia tawm hauv nkuaj. Nej yuav tsuj pes ntiag cov neeg limhiam, rau qhov lawv yuav zoo yam li tej hmoov tshauv hauv nej xib taws rau hnub uas kuv txiav txim.” Yawmsaub uas muaj hwjchim loj kawg nkaus hais li no ntag. “Cia li nco ntsoov kuv tus qhev Mauxe txoj kevcai, yog tej kab kev thiab tej kevcai uas kuv muab cob rau nws ntawm lub roob Haule rau cov Yixayee sawvdaws lawd. “Saib nawj, kuv yuav xa Eliya uas ua xibhwb cev lus los rau nej ua ntej Yawmsaub hnub tseem ceeb thiab ntshai kawg los. Mas nws yuav ua rau leej txiv lub siab tig mus xib rau cov menyuam thiab ua rau cov menyuam lub siab tig mus xib rau leej txiv. Yog tsis ua li ntawd kuv yuav los tsawm foom lub tebchaws ntawd.” Phau ntawv no hais txog Yexus Kheto li keeb kwm. Yexus yog Davi xeeb ntxwv thiab Davi yog Aplahas xeeb ntxwv. Aplahas yog Yiha txiv, Yiha yog Yakhauj txiv, thiab Yakhauj yog Yuda thiab nws cov kwvtij txiv, Yuda yog Peles thiab Xelag txiv, ob tug niam yog Thama, Peles yog Hexaloo txiv, Hexaloo yog Las txiv, Las yog Aminada txiv, Aminada yog Nasoo txiv, Nasoo yog Xamoo txiv, Xamoo yog Npau‑a txiv, Npau‑a niam yog Lahaj. Npau‑a yog Aunpe txiv, Aunpe niam yog Luv, Aunpe yog Yexi txiv, thiab Yexi yog vajntxwv Davi txiv. Davi yog Xalaumoo txiv, Xalaumoo niam yog Uliyia tus pojniam, Xalaumoo yog Lehaunpau‑as txiv, Lehaunpau‑as yog Anpiya txiv, Anpiya yog Axa txiv, Axa yog Yehausafa txiv, Yehausafa yog Yaulas txiv, Yaulas yog Uxiya txiv, Uxiya yog Yauthas txiv, Yauthas yog Aha txiv, Aha yog Hexekhiya txiv, Hexekhiya yog Manaxe txiv, Manaxe yog Asmoo txiv, Asmoo yog Yauxiya txiv, Yauxiya yog Yekhauniya thiab nws cov kwvtij txiv, yog nyob rau thaum lawv raug kuav coj mus rau Npanpiloo. Lub sijhawm uas raug kuav mus rau Npanpiloo rov los, Yekhauniya yog Se‑athi‑ee txiv, Se‑athi‑ee yog Xelunpanpee txiv, Xelunpanpee yog Anpi‑u txiv, Anpi‑u yog Eliyakhi txiv, Eliyakhi yog Axo txiv, Axo yog Xadau txiv, Xadau yog Akhi txiv, Akhi yog Eli‑u txiv, Eli‑u yog Ele‑axa txiv, Ele‑axa yog Mathas txiv, Mathas yog Yakhauj txiv, Yakhauj yug Yauxej uas yog Maivliag tus txiv, Maivliag yug Yexus uas hu ua Khetos. Yog li no txij thaum Aplahas los txog Davi muaj kaum plaub tiam, thiab txij thaum Davi los txog thaum raug kuav mus rau Npanpiloo muaj kaum plaub tiam, thiab txij thaum raug kuav mus rau Npanpiloo los txog tus Khetos muaj kaum plaub tiam. Qhov uas yug Yexus Khetos yog li no. Yauxej twb xub qhaib Maivliag uas yog Yexus niam ua ntej lawm, tiamsis tsis tau los ua txij nkawm nyob ua ke mas pom tias Maivliag suab menyuam ntawm Vaj Ntsuj Plig uas dawb huv lawm. Mas Yauxej uas qhaib nws yog neeg ncaj, tsis xav rhuav Maivliag ntsej muag, nws thiaj txiav txim siab yuav tso Maivliag twjywm tseg. Thaum nws tseem xav txog zaj ntawd, nws txawm ua npau suav pom ib tug tubtxib saum ntuj ntawm tus Tswv tuaj hais rau nws tias, “Yauxej, uas yog Davi tus xeeb ntxwv, tsis txhob ntshai qhov uas yuav coj Maivliag los ua koj pojniam, rau qhov tus menyuam hauv nws lub cev yog xeeb ntawm Vaj Ntsuj Plig uas dawb huv. Nws yuav yug ib tug tub mas koj yuav tsum tis lub npe hu ua Yexus, rau qhov nws yuav cawm nws haiv neeg kom dim lawv lub txim.” Tej no huvsi tshwm los kom thiaj ua tiav raws li tus Tswv tej lus uas tus xibhwb cev lus hais tias, “Saib maj, ib tug ntxhais hluas dawb huv yuav xeeb menyuam thiab yug tau ib tug tub, thiab lawv yuav tis lub npe hu ua Emanu‑ee” (txhais hais tias “Vajtswv nrog nraim peb.”) Thaum Yauxej tsim dheev los, nws kuj ua raws li tus Tswv tus tubtxib saum ntuj hais rau nws. Nws coj Maivliag los ua nws pojniam, tiamsis tsis nrog nws pw ua ke mus txog thaum yug tus metub lawd. Mas Yauxej muab tis npe hu ua Yexus. Thaum yug Yexus rau hauv lub moos Npelehee uas nyob hauv Yudia tebchaws, yog thaum Helauj ua vajntxwv kav, txawm muaj ib co neeg txawj ntse tuaj sab hnub tuaj rau hauv Yeluxalees nug hais tias, “Tus uas yug los ua vajntxwv kav cov Yudai nyob qhovtwg? Peb twb pom nws lub hnub qub tshwm rau sab hnub tuaj, peb thiaj li tuaj pe hawm nws.” Thaum vajntxwv Helauj hnov li ntawd, nws kuj ntxhov siab thiab tag nrho lub nroog Yeluxalees nrog nws ntxhov siab tag. Nws hu cov pov thawj hlob thiab cov xibhwb qhia Vajtswv kevcai tuaj sablaj ua ke mas nug lawv tias tus Kheto yuav yug rau qhovtwg. Lawv teb nws hais tias, “Hauv lub moos Npelehee hauv Yuda tebchaws. Rau qhov tus xibhwb cev Vajtswv lus tau sau tseg cia tias, “ ‘Au Npelehee hauv Yuda tebchaws 'e, koj tsis yog lub moos uas me dhau tej moos uas kav Yuda tebchaws, rau qhov yuav muaj ib tug thawj tshwm hauv koj los kav kuv haiv neeg Yixayee.’ ” Mas Helauj thiaj hu cov tub txawj ntse los cuag nws twjywm thiab kom lawv qhia nws paub txog lub sijhawm uas lub hnub qub ntawd tshwm tuaj. Ces nws txawm tso lawv mus rau lub moos Npelehee thiab hais tias, “Cia li mus ua tib zoo nrhiav tus menyuam ntawd, thiab thaum nej ntsib lawd cia li los qhia rau kuv paub, es kuv yuav mus pe hawm nws thiab.” Thaum vajntxwv hais tag rau lawv paub, lawv txawm sawv kev mus, ua ciav lub hnub qub uas lawv pom tshwm sab hnub tuaj txawm coj lawv kev mus nres ncaj saum lub chaw uas tus menyuam ntawd nyob. Thaum lawv pom lub hnub qub ntawd lawv zoo siab xyiv fab heev kawg. Thaum lawv nkag mus rau hauv lub tsev lawv pom tus menyuam thiab leej niam Maivliag, lawv txawm khwb nkaus pe hawm tus menyuam ntawd. Lawv qheb lawv tej phij xab rho lawv tej tshav ntuj los, yog kub thiab roj ntoos tsw qab thiab roj tsw qab los pub rau nws. Lawv ua npau suav pom tias tsis txhob rov mus cuag Heluaj, ces lawv txawm taug lwm txojkev rov mus rau lawv lub tebchaws lawm. Thaum lawv mus dhau lawm, tus Tswv li ib tug tubtxib saum ntuj txawm los tshwm rau Yauxej pom hauv npau suav hais tias, “Cia li sawv tsees coj tus menyuam thiab leej niam khiav mus rau Iyi tebchaws thiab nyob qhov ntawd tos txog thaum kuv hais rau koj vim yog Helauj yuav nrhiav tus menyuam no tua pov tseg.” Yauxej txawm sawv tsees coj tus menyuam thiab leej niam mus hmo ntuj rau Iyi tebchaws, thiab nyob qhov ntawd mus txog thaum Helauj tuag. Tej no tshwm los kom thiaj ua tiav raws li tus Tswv tej lus uas tus xibhwb cev lus hais tias, “Kuv hu kuv tus tub tawm hauv Iyi tebchaws los.” Thaum Helauj pom tias cov tub txawj ntse dag nws, nws kuj npau taws heev thiaj tso neeg mus tua cov menyuam tub txhua tus uas hnub nyoog muaj ob xyoos rov hauv, hauv lub moos Npelehee thiab ib cheeb tsam ntawd huvsi, kom hum lub sijhawm uas nws paub ntawm cov tub txawj ntse ntawd. Qhov no kuj tiav raws li tej lus uas xibhwb Yelemi uas cev Vajtswv lus hais tias, “Tau hnov suab nrov hauv Lama, yog suab quaj ntsuag suab quaj lwj siab. Lachee quaj nws tej menyuam, nws tsis yuav tej lus nplij siab rau qhov nws tej menyuam tsis nyob lawm.” Thaum Helauj tuag lawm, Yauxej txawm ua npau suav pom tus Tswv li ib tug tubtxib saum ntuj los hais rau nws hauv Iyi tebchaws hais tias, “Cia li sawv tsees coj tus menyuam thiab leej niam mus rau hauv Yixayee tebchaws, vim cov uas yuav txov tus menyuam no txojsia, twb tuag lawm.” Yauxej txawm sawv tsees coj tus menyuam thiab leej niam mus rau Yixayee tebchaws. Thaum nws hnov tias Akhelau sawv nws txiv Helauj chaw ua vajntxwv kav lub xeev Yudia, nws thiaj ntshai mus qhov ntawd. Thaum Yauxej hnov tej lus hauv zaj npau suav, nws thiaj mus kiag rau lub xeev Kalilais. Nws mus nyob rau hauv lub moos Naxale, kom thiaj tiav raws li tej lus uas cov xibhwb cev Vajtswv lus hais tias, “Luag yuav hu nws ua neeg Naxale.” Thaum ntawd Yauhas uas coj ua kevcai raus dej tawm los tshaj tawm hauv tebchaws moj sab qhua Yudia hais tias, “Cia li ntxeev dua siab tshiab rau qhov Ntuj Ceeb Tsheej los ze lawm.” Tus Yauhas no yog tus uas xibhwb Yaxaya uas cev Vajtswv lus tau hais tseg tias, “Muaj ib lub suab qw hauv tebchaws moj sab qhua hais tias, ‘Cia li npaj tus Tswv txojkev, cia li ua nws txoj kev kom ncaj.’ ” Tus Yauhas no hnav tej ris tsho uas muab plaub ntxhuav ua thiab sia txoj siv tawv ntawm duav. Nws tej zaub mov yog kooj txig thiab zib ntab. Thaum ntawd cov neeg hauv Yeluxalees thiab thoob plaws lub xeev Yudia thiab thoob plaws ntug dej Yaladee kuj tawm mus cuag nws. Lawv nyias lees nyias lub txim txhaum mas Yauhas muab lawv ua kevcai raus dej hauv tus dej Yaladee. Thaum Yauhas pom cov Falixai thiab cov Xadukai tuaj coob coob yuav ua kevcai raus dej, nws txawm hais rau lawv tias, “Cov niag noob nab phem, leejtwg ntuas kom nej khiav ntawm Vajtswv txojkev npau taws uas yuav los? Cia li ua lub neej kom phim qhov uas nej ntxeev dua siab tshiab, thiab tsis txhob xav hauv lub siab hais tias, ‘Peb muaj Aplahas ua peb txiv,’ rau qhov kuv qhia rau nej tias Vajtswv muab tau tej pob zeb no ua tau Aplahas li tub ki. Nimno twb muab rab taus twb rau ntawm hauv paus ntoo lawm. Txhua tsob ntoo uas tsis txi txiv zoo yuav raug muab ntov pov rau hauv cub hluavtaws. “Kuv muab nej ua kevcai raus hauv dej qhia tias nej ntxeev dua siab tshiab, tiamsis ib tug yuav ua kuv qab los muaj hwjchim loj dua kuv, kuv twb tsis tsim nyog nqa nws nkawm khau kiag li. Nws yuav muab nej ua kevcai raus hauv Vaj Ntsuj Plig uas dawb huv thiab hauv hluavtaws. Rab ntxuam nyob hauv nws txhais tes lawm, nws yuav ntxuaj nws lub tshav ntaus qoob, thiab yuav sau nws tej mog los cia rau hauv txhab, tiamsis nws yuav muab hluavtaws hlawv cov npluag kub hnyiab tsis txawj tuag li.” Thaum ntawd Yexus tawm hauv Kalilais tuaj cuag Yauhas ntawm tus dej Yaladee es kom Yauhas muab nws ua kevcai raus dej. Tiamsis Yauhas cheem Yexus hais tias, “Kuv yuav tsum ua kevcai raus dej ntawm koj, koj tseem tuaj cuag kuv lov?” Yexus teb nws tias, “Koj cia li yeem, rau qhov tsim nyog ua li no thiaj ua txhua yam kev ncaj ncees kom tiav.” Ces Yauhas thiaj li yeem. Thaum Yexus ua kevcai raus dej lawd, nws tawm hauv dej los, ces rooj ntug txawm qheb kiag, nws pom Vajtswv tus Ntsuj Plig zoo li ib tug nquab nqes los tsaws saum nws, thiab muaj suab hais saum ntuj tuaj hais tias, “Tus no yog kuv tus tub uas kuv hlub, kuv txaus siab rau nws heev.” Dhau ntawd Vaj Ntsuj Plig txawm coj Yexus mus rau hauv tebchaws moj sab qhua kom Yexus thiaj raug Ntxwg Nyoog sim. Mas Yexus yoo mov tau plaub caug hnub plaub caug hmo, dhau ntawd nws tshaib plab heev. Tus uas ntxias txawm los hais rau Yexus tias, “Yog koj yog Vajtswv tus tub cia li hais kom tej pob zeb no ntxeev ua ncuav los maj.” Yexus teb tias, “Twb muaj lus sau cia tias, ‘Tsis yog tib cov mov xwb thiaj yug tau neeg txojsia, tiamsis yog txhua lo lus uas tawm ntawm Vajtswv qhov ncauj los thiaj yug tau.’ ” Dhau ntawd Ntxwg Nyoog txawm coj Yexus mus rau hauv lub nroog uas dawb huv, thiab kom Yexus mus sawv saum lub tuam tsev txheej tsev las tshav uas siab tshaj plaws, thiab hais rau nws tias, “Yog koj yog Vajtswv tus tub, cia li caws qia lawm hauv, rau qhov twb muaj lus sau cia tias, “ ‘Vajtswv yuav muab koj cob rau nws cov tubtxib saum ntuj,’ thiab hais tias, ‘Lawv txhais tes yuav hwj koj, kom koj kotaw thiaj tsis ntsawm pob zeb.’ ” Yexus hais rau nws tias, “Twb muaj dua lus sau cia hais tias, ‘Tsis txhob sim tus Tswv uas yog koj tus Vajtswv.’ ” Muaj dua ib zaug Ntxwg Nyoog coj Yexus nce mus rau saum lub roob uas siab kawg mas muab tag nrho tej tebchaws hauv ntiajteb thiab tej tebchaws ntawd kev vam meej ua tshwm rau Yexus saib, thiab hais rau Yexus tias, “Yog koj khwb nkaus pe hawm kuv, kuv yuav muab txhua yam no huvsi rau koj.” Yexus txawm hais rau nws tias, “Xatas, cia li khiav mus, rau qhov twb muaj lus sau cia tias, ‘Koj yuav tsum pe hawm tus Tswv uas yog koj tus Vajtswv thiab ua koom tu nws ib leeg xwb.’ ” Ces Ntxwg Nyoog txawm tso Yexus tseg mus lawm, mas cov tubtxib saum ntuj los ua koom tu Yexus. Thaum Yexus hnov tias Yauhas raug ntes lawm, nws txawm tawm mus rau Kalilais. Nws tsiv hauv lub moos Naxale mus nyob hauv lub moos Khapena‑u uas nyob ntawm ntug hiavtxwv hauv Xenpuloo thiab Nathali tebchaws, kom thiaj tiav raws li xibhwb Yaxaya uas cev Vajtswv lus tau hais tseg tias, “Xenpuloo tebchaws thiab Nathali tebchaws uas nyob ntawm txojkev raws ntug hiavtxwv uas nyob sab dej Yaladee hnub poob, yog Kalilais tebchaws uas lwm haiv neeg los nyob. Cov neeg uas nyob hauv txojkev tsaus ntuj tau pom txojkev kaj uas loj kawg lawm. Cov uas nyob hauv txojkev tuag tus duab tsaus, txojkev kaj ci rau lawv lawm.” Txij thaum ntawd los Yexus pib tshaj tawm hais tias, “Cia li ntxeev dua siab tshiab, rau qhov Ntuj Ceeb Tsheej los ze lawm lauj.” Thaum Yexus taug kev ntawm ntug Hiavtxwv Kalilais nws pom ob tug kwvtij, yog Ximoos uas hu ua Petus thiab nws tus kwv Anru, tabtom ntaus vas hauv hiavtxwv. Ob tug yog neeg muab ntses. Yexus hais rau ob tug tias, “Cia li los, raws kuv qab, mas kuv yuav tsa neb ua cov uas npo neeg ib yam li npo ntses.” Tamsim ntawd ob tug txawm tso ob tug tej vas tseg thiab raws Yexus qab mus. Yexus mus rau tom ntej kuj pom dua ob kwvtij, yog Xenpedi ob tug tub, yog Yakaunpau thiab nws tus kwv Yauhas, nrog ob tug txiv Xenpedi nyob ua ke hauv lub nkoj tabtom ntxiv vas, ces Yexus txawm hu ob tug. Tamsim ntawd ob tug txawm tso lub nkoj thiab leej txiv tseg raws Yexus qab mus. Yexus mus thoob plaws lub xeev Kalilais qhuab qhia hauv lawv tej tsev sablaj thiab tshaj tawm txoj xov zoo uas hais txog Vajtswv lub tebchaws thiab kho tej neeg txhua yam mob nkeeg zoo huvsi. Nws lub koob meej thiaj nrov nto moo lug thoob plaws lub xeev Xilia, luag thiaj coj txhua tus uas muaj mob, tsis hais mob dabtsi kuj xij, cov uas mob hnyav, cov uas raug dab, cov uas qaug dab peg, cov uas tuag tes tuag taw sawvdaws tuaj cuag Yexus mas Yexus kho lawv zoo. Muaj neeg coob coob hauv lub xeev Kalilais thiab hauv lub xeev Dekapoli thiab hauv Yeluxalees thiab lub xeev Yudia thiab ntawm ntug dej Yaladee sab tim ub raws Yexus qab mus. Thaum Yexus pom neeg coob coob, nws txawm nce mus rau saum roob. Thaum nws zaum lawd nws cov thwjtim txawm los cuag nws. Nws txawm qheb ncauj qhia lawv tias, “Cov uas pluag sab ntsuj plig tau nyob kaj siab lug, rau qhov Ntuj Ceeb Tsheej yog lawv tug lawm. “Cov uas quaj ntsuag tau nyob kaj siab lug, rau qhov lawv yuav tau txais kev nplij siab. “Cov uas txo hwjchim tau nyob kaj siab lug, rau qhov lawv yuav tau lub ntiajteb ua lawv tug. “Cov uas tshaib nqhis txojkev ncaj ncees, tau nyob kaj siab lug, rau qhov lawv yuav tsau npo. “Cov uas muaj lub siab khuvleej tau nyob kaj siab lug, rau qhov lawv yuav tau txais kev khuvleej. “Cov uas lub siab dawb huv tau nyob kaj siab lug, rau qhov lawv yuav pom Vajtswv. “Cov uas tsim kev hum xeeb tau nyob kaj siab lug, rau qhov lawv yuav raug hu ua Vajtswv cov tub. “Cov uas raug kev tsim txom vim yog ua ncaj ncees tau nyob kaj siab lug, rau qhov Ntuj Ceeb Tsheej yog lawv tug lawm. “Thaum luag thuam thiab tsim txom nej thiab dag iab hiam txhua yam lus phem rau nej vim yog tim kuv, nej tau nyob kaj siab lug. Cia li zoo siab xyiv fab rau qhov nej twb muaj nqe zog ntau rau saum ntuj ceeb tsheej lawm, vim luag twb tsim txom cov xibhwb cev Vajtswv lus uas nyob ua nej ntej ib yam nkaus. “Nej yog cov ntsev rau lub ntiajteb. Yog ntsev tsuag lawm, yuav ua kom rov daw tau li cas? Yeej tsis muaj qabhau dabtsi li lawm, tsuas muaj uas muab pov tseg rau neeg tsuj xwb. “Nej yog qhov kaj rau lub ntiajteb. Lub nroog uas nyob saum roob yuav muab npog tsis tau li. Tsis muaj leejtwg taws teeb es muab thoob khwb cia, tsuas muaj uas muab txawb rau saum lub chaw txawb teeb thiaj li ci pom kev rau txhua tus hauv lub tsev ntawd. Ib yam li ntawd nej cia li ci tab meeg neeg sawvdaws kom lawv thiaj pom nej tej haujlwm zoo thiab qhuas nej leej Txiv uas nyob saum ntuj ceeb tsheej. “Tsis txhob xav hais tias kuv los rhuav Mauxe txoj kevcai thiab cov xibhwb cev lus tej lus qhia. Kuv tsis tau los rhuav, yog los ua kom tiav xwb. Kuv hais tseeb rau nej tias, thaum lub ntuj lub teb tseem muaj nyob Mauxe txoj kevcai yuav tsis ploj ib npe lossis ib nyuag teev kiag li mus txog thaum tej ntawd tiav huvsi. Yog li ntawd leejtwg tso tej kevcai no nqe uas me kawg tseg thiab qhia lwm tus ua raws li ntawd, tus ntawd yuav raug hu tias yog tus yau kawg hauv ntuj ceeb tsheej. Tiamsis yog leejtwg xyaum thiab qhia tej kevcai ntawd, nws yuav raug hu tias yog tus loj hauv ntuj ceeb tsheej. Kuv qhia rau nej tias, yog nej tsis muaj txojkev ncaj ncees ntau dua cov xibhwb qhia Vajtswv kevcai thiab cov Falixai, nej yeej yuav nkag tsis tau rau hauv ntuj ceeb tsheej kiag li. “Nej twb hnov tej lus uas qhia rau cov neeg thaum ub hais tias, ‘Tsis txhob tua neeg, yog leejtwg tua neeg tus ntawd yuav raug teem txim.’ Tiamsis kuv hais rau nej tias, txhua tus uas chim rau nws kwvtij yuav raug teem txim. Leejtwg hais rau nws kwvtij tias, ‘Niag neeg ruam’ tus ntawd yuav raug teem txim rau hauv cov thawj lub rooj sablaj, thiab leejtwg hais tias, ‘Niag neeg vwm,’ tus ntawd yuav raug muab pov rau hauv ntuj tawg kub. Vim li no yog koj tabtom muab qhov txhia chaw xyeem rau ntawm lub thaj es nco tau tias koj kwvtij tseem muaj kev tu siab rau koj, koj cia li muab tej uas yuav muab xyeem ntawd tso rau ntawm lub thaj ib sab es rov mus nrog tus kwvtij ntawd hais hum sib raug zoo tso mam li tuaj muab xyeem. Cia li nrog tus yeej kom hais kom hum sai rau thaum neb ua ke mus rau tsev tu plaub, tsam ces tus yeej kom muab koj cob rau tus txiav txim, mas tus txiav txim yuav muab koj cob rau tus ceev xwm ces koj yuav raug kaw rau hauv tsev lojfaj. Kuv qhia tseeb rau koj tias, koj yuav tawm tsis tau mus txog thaum them tag txhua npiv huvsi. “Nej twb hnov tej lus uas qhia hais tias, ‘Tsis txhob deev luag poj luag txiv.’ Tiamsis kuv hais rau nej tias, txhua tus uas saib ib tug pojniam twg thiab xav ntxias nws mas twb deev tus pojniam ntawd hauv lub siab lawm. Yog koj sab qhov muag xis ua rau koj ua txhaum, cia li muab kaus pov tseg. Qhov uas koj lub cev piam ib yam lawm kuj zoo dua li tag nrho koj lub cev raug muab pov rau hauv ntuj tawg. Yog koj sab tes xis ua rau koj ua txhaum, cia li muab txiav pov tseg. Qhov uas koj lub cev piam ib yam lawm kuj zoo dua li tag nrho koj lub cev raug muab pov rau hauv ntuj tawg. “Tseem muaj lus qhia hais tias, ‘Yog leejtwg yuav nrauj nws tus pojniam, cia nws ua ntawv nrauj cev rau tus pojniam ntawd.’ Tiamsis kuv hais rau nej tias, txhua tus uas muab nws tus pojniam nrauj tsis yog tim qhov uas deev hluas nraug kuj yog nws ua rau tus pojniam ntawd mus deev hluas nraug. Thiab yog leejtwg yuav tus poj nrauj ntawd ua pojniam kuj yog nws deev luag pojniam. “Thiab nej twb hnov tej lus uas qhia rau cov neeg thaum ub hais tias, ‘Tsis txhob rhuav tej lus uas nej twv lawm, nej yuav tsum ua raws li tej lus uas nej twv rau tus Tswv.’ Tiamsis kuv hais rau nej tias, tsis txhob twv kiag li, tsis hais twv ntuj, rau qhov lub ntuj yog Vajtswv lub zwm txwv, lossis twv lub ntiajteb rau qhov lub ntiajteb yog Vajtswv lub rooj tiag taw, lossis twv txog Yeluxalees rau qhov Yeluxalees yog tus Vajntxwv uas loj kawg lub nroog. Tsis txhob twv txog koj lub taubhau rau qhov koj ua tsis tau kom cov plaubhau dawb ib txog lossis dub ib txog. Thaum nej hais lus, lo uas ‘Yog’ kuj hais tias ‘Yog,’ lo uas tsis yog cia li hais tias ‘Tsis yog’ xwb. Yog hais tshaj no lawm kuj yog los ntawm kev phem xwb. “Nej twb hnov tej lus uas qhia tias, ‘Qhov muag pauj qhov muag, hniav pauj hniav.’ Tiamsis kuv hais rau nej tias, tsis txhob tawm tsam tus uas ua phem. Yog leejtwg ntaus koj sab plhu xis, cia li tig sab laug rau nws ntaus thiab. Thiab yog leejtwg xav muab koj nplua yuav koj lub tsho, mas cia li muab koj lub tsho ntev rau nws thiab. Yog leejtwg yuam kom koj mus ib kilu kev kuj cia li nrog nws mus ob kilu kev. Cia li pub rau tus uas thov koj, thiab tsis txhob fee plhu ntawm tus uas xav qev koj ib yam dabtsi. “Nej twb hnov tej lus uas qhia tias, ‘Yuav tsum hlub kwvtij zej zog thiab ntxub koj cov yeeb ncuab.’ Tiamsis kuv hais rau nej tias, nej yuav tsum hlub nej cov yeeb ncuab thiab thov Vajtswv pab cov uas tsim txom nej, nej thiaj yog leej Txiv uas nyob saum ntuj li tub. Rau qhov nws pub nws lub hnub tawm tuaj rau cov neeg phem thiab cov neeg zoo, thiab nws tso nag los rau cov neeg ncaj thiab cov neeg tsis ncaj ib yam nkaus. Yog nej tsuas hlub cov uas hlub nej xwb, nej tau nqe zog li cas? Txawm yog cov neeg sau se los kuj ua ib yam li ntawd los tsis yog? Yog nej tsuas nrog nej cov kwvtij tham xwb, nej tau ua dabtsi zoo tshaj lwm tus? Txawm yog lwm haiv neeg los lawv kuj ua ib yam li ntawd los tsis yog? Vim li no nej yuav tsum ua neeg zoo kawg nkaus, ib yam li nej leej Txiv Ntuj yog tus zoo kawg nkaus.” “Nej yuav tsum ceev faj tsis txhob ua nej tej haujlwm uas ncaj ncees tab meeg rau neeg pom. Yog nej ua li ntawd nej yuav tsis tau nqe zog ntawm nej leej Txiv uas nyob saum ntuj. “Vim li no thaum koj pub rau cov neeg txom nyem, tsis txhob tshuab raj ua koj ntej ib yam li cov neeg ncauj lus zoo siab phem ua rau hauv tej tsev sablaj thiab tom tej kev kom luag qhuas. Kuv qhia tseeb rau nej tias lawv twb tau lawv li nqe zog lawm. Tiamsis thaum koj pub rau luag, tsis txhob cia koj txhais tes laug paub tias koj txhais tes xis ua dabtsi, xwv tej uas koj pub koj thiaj pub tau twjywm xwb, mas koj leej Txiv uas pom tej uas ua twjywm yuav pub yeeb koob rau koj.” “Thaum nej thov Vajtswv, nej tsis txhob ua li cov neeg ncauj lus zoo siab phem. Rau qhov lawv nyiam sawv ntsug thov hauv tej tsev sablaj thiab tom tej kev tshuam rau neeg pom. Kuv qhia tseeb rau nej tias, lawv twb tau lawv li yeeb koob lawm. Tiamsis thaum koj thov Vajtswv, cia li nkag rau hauv txaj thiab kaw rooj txag es thov koj leej Txiv uas tsis muaj leejtwg pom, mas koj leej Txiv uas pom tej uas ua twjywm yuav pub nqe zog rau koj. “Thaum nej thov Vajtswv, tsis txhob hais rov hais rais tib los qub yam li lwm haiv neeg ua, rau qhov lawv xav tias hais lus ntau ntau dab thiaj mloog. Nej tsis txhob yoog li lawv rau qhov yam uas nej cheem tsum nej leej Txiv twb paub ua ntej uas nej tsis tau thov lawm. Nej yuav tsum thov raws li no. “ ‘Peb leej Txiv uas nyob saum ntuj, thov sawvdaws hwm koj lub npe kom dawb huv. Thov cia koj lub tebchaws los. Thov cia muaj raws li koj lub siab nyiam rau hauv ntiajteb ib yam li muaj saum ntuj ceeb tsheej. Thov pub tej zaub mov uas peb niaj hnub noj rau peb hnub no. Thov koj daws peb lub txim ib yam li peb zam cov uas ua txhaum rau peb. Thov tsis txhob coj peb mus raug kev sim siab, thov cawm peb dim tej kev phem.’ “Yog nej zam luag tej kev txhaum, nej leej Txiv Ntuj yuav zam nej tej kev txhaum thiab. Tiamsis yog nej tsis zam luag tej kev txhaum, nej leej Txiv yuav tsis zam nej tej kev txhaum thiab. “Thaum nej yoo mov, tsis txhob ua ntsej muag mluas mlob yam li cov neeg ncauj lus zoo siab phem, vim lawv ua lawv ntsej muag mluas mlob kom luag thiaj pom tias lawv yoo mov. Kuv qhia tseeb rau nej tias, lawv twb tau lawv li yeeb koob lawm. Tiamsis thaum koj yoo mov, koj yuav tsum muab roj ntaus taubhau thiab ntxuav muag, kom luag thiaj tsis pom tias koj yoo mov, tiamsis koj leej Txiv uas tsis muaj leejtwg pom, pom xwb, mas koj leej Txiv uas pom tej uas ua twjywm yuav pub yeeb koob rau koj. “Tsis txhob khaws nyiaj txiag cia rau nej hauv ntiajteb, qhov ntawd muaj kab ntsaum thiab xeb noj thiab tub sab tho qhov tsev mus nyiag. Tiamsis nej yuav tsum khaws nyiaj txiag cia rau nej saum ntuj ceeb tsheej, qhov ntawd kab ntsaum thiab xeb tsis noj thiab tub sab tsis tho qhov tsev mus nyiag. Rau qhov koj tej nyiaj txiag nyob qhovtwg, koj lub siab yeej nyob qhov ntawd. “Lub qhov muag yog lub teeb rau lub cev. Yog tias koj lub qhov muag nyob zoo, tag nrho koj lub cev kuj kaj lug. Yog koj lub qhov muag tsis zoo, tag nrho koj lub cev yuav tsaus ntuj nti. Yog tias qhov kaj hauv koj tsaus nti lawm, mas yog tsaus ntuj nti kawg li lauj! “Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Vajtswv li qhev thiab ua nyiaj txiag li qhev ua ke tsis tau. “Vim li no kuv hais rau nej tias, tsis txhob txhawj txog nej txojsia tias yuav muab dabtsi los noj muab dabtsi los haus, thiab tsis txhob txhawj txog nej lub cev tias yuav muab dabtsi los hnav. Txojsia tseem ceeb dua mov noj thiab lub cev tseem ceeb dua tej tsoos tsho los tsis yog? Cia li saib tej nas noog saum nruab ntug, twb tsis tseb tsis hlais tsis sau los cia rau hauv txhab los nej leej Txiv Ntuj tseem yug tej nas noog ntawd. Nej tsis tsim txiaj dua tej nas noog lov? Nej cov muaj leejtwg txojkev txhawj yuav txuas tau nws txojsia ntev ib tshim ntxiv? Thiab nej txhawj txog tej tsoos tsho hnav ua dabtsi? Cia li tshuaj saib tej paj lilij tom teb saib tuaj hlob li cas, twb tsis ua haujlwm thiab tsis ntos ntaub. Tiamsis kuv hais rau nej tias, txawm yog Xalaumoo hnav nws tej tsoos meej mom huvsi los twb zoo tsis cuag ib lub nyuag paj ntawd. Tej nroj tsuag hauv teb uas nyob hnub no xwb, tagkis twb yuav muab pov rau hauv cub hluavtaws, yog Vajtswv twb pub rau hnav li ntawd, nej cov uas kev ntseeg yau 'e, nws yimhuab yuav pub rau nej hnav los tsis yog? “Yog li ntawd, tsis txhob txhawj hais tias, ‘Yuav muab dabtsi noj?’ lossis ‘Yuav muab dabtsi haus?’ lossis ‘Yuav muab dabtsi hnav?’ Rau qhov lwm haiv neeg yeej nrhiav tej no huvsi. Nej leej Txiv Ntuj yeej paub lawm tias nej cheem tsum tej no huvsi. Tiamsis nej yuav tsum xub nrhiav Vajtswv lub tebchaws thiab nws txojkev ncaj ncees ua ntej, mas yuav muab tej no huvsi tsav ntxiv rau nej. Vim li no tsis txhob txhawj txog tagkis rau qhov tagkis yeej muaj kev txhawj rau tagkis lawm. Txhua hnub li kev ceeblaj kuj txaus txhua hnub lawm.” “Nej tsis txhob txiav txim rau luag nej thiaj tsis raug txiav txim. Rau qhov nej txiav txim rau luag li cas nej yuav raug txiav txim li ntawd. Nej muab lub thoob twg luj rau luag, yuav muab lub thoob ntawd luj rov rau nej ib yam nkaus. Ua cas koj yuav pom qhov nyuag hmoov ntoo hauv koj tus kwvtij lub qhov muag, tiamsis koj tsis quav ntsej txog tog niag ntoo uas nyob hauv koj lub qhov muag? Ua cas koj yuav hais tau rau koj tus kwvtij tias, ‘Cia kuv so qhov nyuag hmoov ntoo tawm hauv koj lub qhov muag,’ tiamsis tseem muaj ib tog niag ntoo nyob hauv koj lub qhov muag? Tus neeg ncauj lus zoo siab phem, cia li rho tog niag ntoo hauv koj lub qhov muag ua ntej tso, koj thiaj pom meej thiaj so tau qhov nyuag hmoov ntoo tawm hauv koj tus kwvtij lub qhov muag. “Tsis txhob muab tej yam dawb huv pub rau dev, tsis txhob muab nej li pov hum pov rau ntawm npua hauv ntej, tsam ces nws yuav muab tsuj thiab tig rov los tom nej. “Cia li thov mas yuav muab rau nej, cia li nrhiav nej thiaj ntsib, cia li khob mas yuav qheb rau nej. Rau qhov txhua tus uas thov kuj yuav tau, tus uas nrhiav kuj ntsib, thiab tus uas khob kuj qheb rau nws. Nej cov muaj leejtwg uas nws tus tub thov ncuav noj es yuav muab ib lub pob zeb rau nws? Lossis yog nws thov ntses es yuav muab ib tug nab rau nws lov? Yog li no nej cov uas yog neeg phem los nej twb paub muab tej yam uas zoo rau nej tej menyuam, nej leej Txiv uas nyob saum ntuj yimhuab yuav muab tej yam uas zoo rau cov uas thov nws. Txhua yam uas nej xav kom lwm tus ua rau nej, nej cia li ua ib yam li ntawd rau lwm tus. Qhov ntawd yog Mauxe txoj kevcai thiab yog cov xibhwb cev lus tej lus qhia. “Nej yuav tsum nkag lub qhov rooj nqaim mus, rau qhov lub qhov rooj dav thiab txoj niag kev loj coj mus txog kev puam tsuaj, mas cov uas nkag lub qhov rooj ntawd muaj coob coob. Lub qhov rooj nqaim thiab txojkev me uas coj mus txog txojsia, mas cov uas nrhiav tau kuj muaj tsawg heev. “Nej yuav tsum ceev faj cov cuav xibhwb cev Vajtswv lus uas hnav tsoos plaub yaj tuaj cuag nej tiamsis lawv lub siab limhiam li hma. Nej yuav saib lawv cov txiv zoo li cas nej thiaj paub lawv. Cov txiv hmab yuav de tau ntawm tsob ntoo pos lov? Lossis txiv cev de tau ntawm tsob pos lws lov? Txhua tsob ntoo zoo yeej txi txiv zoo, tsob ntoo phem yeej txi txiv phem. Tsob ntoo zoo yeej txi tsis tau cov txiv phem, tsob ntoo phem yeej txi tsis tau cov txiv zoo. Txhua tsob ntoo uas tsis txi txiv zoo yuav raug muab ntov pov rau hauv cub hluavtaws. Vim li no nej yuav saib lawv cov txiv zoo li cas nej thiaj paub lawv. “Tsis yog txhua tus uas hu kuv tias, ‘Tus Tswv, tus Tswv,’ yuav tau nkag rau hauv ntuj ceeb tsheej, tsuas yog tus uas ua raws li kuv leej Txiv uas nyob saum ntuj lub siab nyiam thiaj nkag tau xwb. Thaum txog hnub ntawd yuav muaj neeg coob coob hais rau kuv tias, ‘Tus Tswv, tus Tswv, peb twb tuav koj lub npe cev koj tej lus thiab tuav koj lub npe ntiab dab tawm thiab tuav koj lub npe ua ntau yam txujci phimhwj los tsis yog?’ Thaum ntawd kuv yuav hais tseeb rau lawv tias, ‘Kuv tsis txeev paub nej kiag li. Cov niag neeg ua phem, cia li khiav ntawm kuv mus.’ ” “Vim li no, txhua tus uas tau hnov kuv tej lus no thiab ua raws nraim, lawv zoo li tus uas muaj tswvyim ua nws lub tsev rau saum daim lag zeb. Nag los, dej nyab, cua ntsawj nplawm lub tsev ntawd los lub tsev tsis pob vim yog cog rau saum daim lag zeb. Tiamsis txhua tus uas hnov kuv tej lus los tsis ua raws nraim, lawv zoo li tus neeg ruam uas ua nws lub tsev rau saum tej xuab zeb. Nag los, dej nyab, cua ntsawj nplawm lub tsev ntawd, lub tsev kuj pob tag, mas qhov uas pob vau tag ntawd loj heev.” Thaum Yexus qhia tej lus no tag lawd, cov neeg coob coob ntawd kuj xav tsis thoob rau tej lus uas nws qhia, rau qhov nws muaj hwjchim qhuab qhia lawv, nws tsis thooj li lawv cov xibhwb. Thaum Yexus nqes pem roob los, muaj neeg coob coob raws nws qab. Txawm muaj ib tug mob lig mob ruas tuaj pe Yexus hais tias, “Au tus Tswv, yog koj xav kho, koj yeej kho tau kuv zoo kom huv.” Yexus cev kiag tes mus npuab nws thiab hais tias, “Kuv xav los maj, cia li zoo kiag huv lauj.” Tamsim ntawd nws tej mob lig mob ruas txawm zoo huv lawm. Yexus hais rau nws tias, “Tsis txhob piav ib los rau leejtwg mloog kiag li, cia li mus qhia koj lub cev rau tus pov thawj saib thiab xyeem tej uas Mauxe qhia tseg lawd ua timkhawv rau sawvdaws.” Thaum Yexus mus txog hauv lub moos Khapena‑u, muaj ib tug thawj rog uas kav ib puas leej tuaj cuag Yexus thov Yexus pab hais tias, “Tus Tswv, kuv tus tub qhe tuag tes tuag taw pw tom tsev txom nyem heev.” Yexus hais rau nws tias, “Kuv yuav mus kho kom nws zoo.” Tus thawj tub rog teb Yexus tias, “Tus Tswv, kuv yog ib tug uas tsis tsim nyog koj yuav nkag mus rau hauv kuv lub tsev. Thov koj cia li hais ib los xwb ces kuv tus qhev yeej yuav zoo. Rau qhov kuv kuj nyob hauv tub rog txoj qab kev tswjhwm thiab tseem muaj cov tub rog uas kuv tswjhwm. Kuv hais rau tus no tias, ‘Cia li mus,’ nws kuj mus, thiab hais rau dua ib tug tias, ‘Cia li los,’ nws kuj los, thiab kuv hais rau kuv tus tub qhe tias, ‘Cia li ua yam no,’ nws kuj ua.” Thaum Yexus hnov nws hais li ntawd, Yexus kuj xav tsis thoob, nws txawm hais rau cov neeg uas raws nws qab tias, “Kuv hais tseeb rau nej tias, txawm yog hauv cov Yixayee los kuv tsis tau pom muaj kev ntseeg loj li no. Kuv hais rau nej tias yuav muaj neeg coob tuaj sab hnub tuaj thiab tuaj sab hnub poob los nrog Aplahas, Yiha thiab Yakhauj koom rooj noj haus ua ke hauv ntuj ceeb tsheej, tiamsis cov neeg uas yog ntuj ceeb tsheej li menyuam yuav raug muab laim tawm mus rau sab nraud uas tsaus ntuj nti, qhov ntawd yuav muaj kev quaj tom hniav qas qawv.” Thiab Yexus hais rau tus thawj rog tias, “Koj cia li rov qab mus. Cia muaj raws li koj ntseeg.” Tamsim ntawd tus thawj rog tus qhev txawm zoo kiag lawm. Thaum Yexus mus rau hauv Petus tsev, Yexus pom Petus niam tais ua npaws pw saum txaj. Yexus txawm tuav nkaus nws tes mas nws tus npaws txawm zoo kiag. Nws sawv los thiab ua koom tu Yexus. Thaum yuav tsaus ntuj lawv coj tej neeg raug dab tuaj cuag Yexus coob coob, mas Yexus hais lus ntiab dab tawm, thiab nws kho cov neeg muaj mob txhua tus zoo huvsi. Tej no thiaj tiav raws li xibhwb Yaxaya uas cev Vajtswv lus tau hais tseg tias, “Nws sau peb tej mob thiab ris peb tej mob nkeeg mus.” Thaum Yexus pom neeg coob coob tuaj vij vog nws, nws txawm hais kom hla hiavtxwv mus rau sab tim ub. Muaj ib tug xibhwb qhia Vajtswv kevcai txawm tuaj cuag Yexus thiab hais rau nws tias, “Xibhwb, koj mus qhovtwg kuv yuav nrog koj mus qhov ntawd.” Yexus hais rau nws tias, “Tej hma tseem muaj qhov nkaum thiab tej nas noog saum nruab ntug tseem muaj zes, tiamsis Neeg leej Tub tsis muaj lub chaw rau ncoo.” Thiab muaj dua ib tug hauv Yexus cov thwjtim hais rau nws tias, “Tus Tswv, thov cia kuv mus log kuv txiv tso.” Yexus hais rau nws tias, “Cia li nrog kuv mus, cia cov neeg tuag lawv log lawv tus tuag.” Thaum Yexus nce rau hauv lub nkoj, nws cov thwjtim kuj nrog nws mus. Txawm muaj cua daj cua dub ntsawj hiavtxwv, mas lub nkoj thiaj raug tej niag nthwv dej nyab, tiamsis Yexus pw tsaug zog lawm. Cov thwjtim thiaj mus tsa Yexus hais tias, “Tus Tswv, thov koj cawm peb lauj. Peb tabtom yuav puam tsuaj.” Yexus txawm hais rau lawv tias, “Nej cov uas kev ntseeg yau 'e, ua cas nej ntshai ua luaj li?” Ces Yexus txawm sawv tsees los tav cua thiab dej hiavtxwv, txhua yam txawm tus yees huvsi lawm. Cov neeg ntawd txawm phimhwj kawg hais tias, “Tus no yog neeg dabtsi es tej cua thiab dej hiavtxwv kuj mloog nws lus?” Thaum Yexus hla hiavtxwv mus rau hauv Kadala li kav xyuam lawm, txawm muaj ob tug raug dab tawm hauv toj ntxas los ntsib nws, ob tug nyaum heev thiaj tsis muaj leejtwg taug tau txojkev ntawd kiag li. Ces ob tug txawm qw hais tias, “Au Vajtswv tus tub, koj tuaj thab wb ua dabtsi? Koj tuaj tsim txom wb ua ntej lub sijhawm lov?” Nyob tsis deb qhov ntawd muaj ib pab npua coob tabtom nrhiav noj. Cov dab ntawd txawm thov Yexus tias, “Yog koj ntiab peb tawm, thov koj xa peb mus rau hauv pab npua ntawd.” Yexus txawm hais rau cov dab ntawd tias, “Cia li mus.” Cov dab txawm tawm mus nkag rau hauv pab npua, mas pab npua huvsi thiaj dhia plas toj ntxhab mus rau hauv hiavtxwv thiab tuag tag rau hauv. Cov neeg yug npua thiaj khiav mus rau hauv lub moos thiab piav txhua yam xwm txheej thiab tej uas tshwm rau ob tug raug dab ntawd. Tag nrho lub moos ntawd sawvdaws txawm tawm mus ntsib Yexus. Thaum lawv pom nws, lawv thov kom nws tawm hauv lawv li kav xyuam mus. Yexus txawm nce rau hauv nkoj hla mus rau nws lub moos. Txawm muaj neeg kwv ib tug tuag tes tuag taw hauv nws lub chaw pw tuaj cuag Yexus. Thaum Yexus pom lawv kev ntseeg nws txawm hais rau tus tuag tes tuag taw tias, “Tub 'e, cia li zoo siab, koj lub txim twb muab daws lawm.” Cov xibhwb qhia Vajtswv kevcai qee leej txawm xav hauv lub siab tias, “Tus yawg no hais lus tuam mom Vajtswv.” Tiamsis Yexus paub tej uas lawv xav lawm thiaj hais tias, “Ua cas nej lub siab yuav xav phem? Qhov uas hais tias, ‘Twb daws koj lub txim lawm,’ thiab hais tias, ‘Cia li sawv tsees mus kev,’ qhov twg yoojyim dua? Kom nej thiaj paub tias Neeg leej Tub muaj hwjchim hauv ntiajteb daws tau lub txim,” Yexus thiaj hais rau tus tuag tes tuag taw tias, “Cia li sawv tsees nqa koj lub chaw pw mus tsev.” Nws txawm sawv tsees mus tsev. Thaum cov neeg coob coob pom li ntawd lawv ntshai thiab qhuas Vajtswv tus uas pub hwjchim li no rau neeg. Thaum Yexus tawm qhov ntawd mus, nws pom ib tug yawg npe hu ua Mathai zaum ntawm lub rooj sau se, Yexus txawm hais rau nws tias, “Cia li raws kuv qab mus.” Mathai txawm sawv tsees raws Yexus qab mus. Thaum Yexus zaum noj mov hauv tsev, txawm muaj cov neeg sau se thiab cov neeg muaj txim ntau leej tuaj nrog Yexus thiab nws cov thwjtim nyob ua ke ntawm rooj mov. Thaum cov Falixai pom li ntawd, lawv txawm hais rau Yexus cov thwjtim tias, “Ua cas nej tus xibhwb nrog cov neeg sau se thiab cov neeg muaj txim noj mov ua ke?” Thaum Yexus hnov li ntawd nws txawm hais tias, “Cov neeg uas tsis muaj mob tsis cheem tsum Kws tshuaj, tsuas yog cov muaj mob thiaj cheem tsum xwb. Nej cia li mus kawm nqe no kom nkag siab hais tias, ‘Kuv ntshaw txojkev hlub, tsis yog ntshaw qhov uas tua tsiaj xyeem,’ rau qhov kuv tsis yog los hu cov neeg ncaj ncees, tiamsis yog los hu cov neeg muaj txim.” Thaum ntawd Yauhas cov thwjtim txawm tuaj cuag Yexus thiab hais tias, “Ua cas peb thiab cov Falixai coj kevcai yoo mov, tiamsis koj cov thwjtim tsis coj?” Yexus hais rau lawv tias, “Tus nraug vauv cov kwvluag yuav quaj ntsuag rau thaum tus nraug vauv tseem nrog lawv nyob lov? Yuav muaj ib hnub twg uas tus nraug vauv yuav raug muab coj ncaim lawv mus, mas thaum ntawd lawv yuav coj kevcai yoo mov. Tsis muaj leejtwg muab daim ntaub tshiab los ntxiv lub qub tsho, rau qhov daim ntaub uas muab ntxiv ntawd yuav xaum dua lub tsho yimhuab ntuag loj dua. Thiab tsis muab cawv txiv hmab tshiab ntim rau hauv lub hnab tawv qub. Yog ua li ntawd, lub hnab tawv yuav tawg, cov cawv txiv hmab yuav xau tag, lub hnab kuj piam tag. Yeej yuav muab cov cawv txiv hmab tshiab ntim rau hauv lub hnab tawv tshiab ob yam thiaj li nyob zoo.” Thaum Yexus tabtom hais tej lus ntawd rau lawv txawm muaj ib tug nom tswv tuaj pe rau ntawm Yexus xubntiag thiab hais tias, “Kuv tus ntxhais nyuam qhuav tuag lawm, thov koj mus muab tes npuab nws mas nws yuav ciaj rov los.” Yexus txawm sawv tsees raws tus nom qab mus thiab Yexus cov thwjtim kuj mus thiab. Txawm muaj ib tug pojniam uas muaj mob nchuav cev tau kaum ob xyoos los raws Yexus qab thiab kov Yexus lub qab tsho, rau qhov nws xav hais tias, “Tsuav yog kuv tau kov Yexus lub tsho xwb, mas kuv tus mob yeej yuav zoo.” Yexus tig hlo pom nws mas hais tias, “Mentxhais 'e, cia li zoo siab. Koj txojkev ntseeg ua rau koj zoo lawm.” Txij thaum ntawd los tus pojniam ntawd cia li zoo lawm. Thaum Yexus tuaj txog tus nom tswv ntawd lub tsev thiab pom cov uas tshuab raj thiab cov neeg qw ua nqaj ua nqug, Yexus txawm hais tias, “Cia li txav mus rau qhov tus mentxhais no tsis tuag, nws tsaug zog xwb.” Lawv txawm thuam luag Yexus. Thaum ntiab cov neeg ntawd tawm mus lawd, Yexus nkag mus ntsiab nkaus tus mentxhais ntawd txhais tes, ces tus mentxhais txawm sawv tsees. Mas zaj no nrov nto moo lug thoob plaws tebchaws ntawd. Thaum Yexus tawm qhov ntawd mus txawm muaj ob tug dig muag raws Yexus qab hu nrov nrov hais tias, “Davi tus tub, thov khuvleej wb lauj!” Thaum Yexus mus rau hauv tsev lawd, ob tug dig muag los cuag nws. Yexus hais rau ob tug tias, “Neb ntseeg tias kuv ua tau tej no lov?” Ob tug teb nws tias, “Tus Tswv, wb ntseeg.” Ces Yexus txawm kov ob tug li qhov muag hais tias, “Cia muaj raws li neb ntseeg lauj.” Ces ob tug li qhov muag txawm pom kev lawm. Yexus txwv ob tug tawv tawv hais tias, “Tsis txhob hais rau leejtwg paub li.” Tiamsis thaum ob tug tawm mus lawd ob tug piav txog Yexus thoob plaws tebchaws ntawd. Thaum ob tug ntawd tabtom tawm qhov ntawd mus, txawm muaj neeg coj ib tug yawg ruam raug dab tuaj cuag Yexus. Thaum Yexus muab tus dab ntiab tawm lawd tus ruam ntawd txawm hais tau lus, mas cov neeg ntawd kuj phimhwj hais tias, “Tsis tau pom dua li no rau hauv cov Yixayee kiag li.” Tiamsis cov Falixai hais tias, “Tus no siv tus thawj dab li hwjchim ntiab dab tawm.” Yexus mus thoob plaws txhua lub moos thiab tej zej zog qhuab qhia hauv lawv tej tsev sablaj thiab tshaj tawm txoj xov zoo uas hais txog Vajtswv lub tebchaws thiab kho tej neeg txhua yam mob nkeeg zoo huvsi. Thaum nws pom cov neeg coob coob nws kuj khuvleej lawv rau qhov lawv raug kev kub ntxhov thiab tag kev vam ib yam li pab yaj uas tsis muaj tus tswv yug. Nws txawm hais rau nws cov thwjtim tias, “Cov qoob uas zoo hlais muaj ntau heev, tiamsis cov tub zog muaj tsawg. Vim li no nej yuav tsum thov tus tswv teb kom txib tub zog mus hlais nws tej qoob.” Yexus hu nws kaum ob tug thwjtim los cuag nws thiab pub hwjchim rau lawv ntiab tau dab tawm thiab kho tau txhua yam mob nkeeg zoo. Kaum ob tug tubtxib ntawd npe hu li no. Tus ib yog Ximoos uas hu ua Petus, thiab nws tus kwv Anru, thiab Yakaunpau thiab nws tus kwv Yauhas, ob tug yog Xenpedi li tub, thiab Fili thiab Npathaulaumai, thiab Thauma thiab Mathai uas sau se, thiab Afe‑a tus tub Yakaunpau thiab Thade‑a, thiab Ximoos uas tuav nws lub tebchaws, thiab Yudas Ikhali‑au uas fav xeeb rau Yexus. Yexus txib kaum ob tug thwjtim no tawm mus thiab nkaw lus rau lawv tias, “Nej tsis txhob mus rau hauv lwm haiv neeg thiab tsis txhob nkag mus rau hauv cov Xamali tej moos, cia li mus kom txog cov yaj uas ploj lawd uas yog Yixayee caj ces. Cia li tshaj tawm taug kev hais tias, ‘Ntuj Ceeb Tsheej los ze lawm.’ Cia li kho cov uas muaj mob kom zoo, tsa cov tuag sawv, kho tej uas mob lig mob ruas kom zoo huv thiab ntiab dab tawm. Nej tau dawb dawb, cia li pub dawb dawb xwb. Tsis txhob coj nyiaj coj kub coj txiaj toog liab rau hauv nej lub hnas tawv, tsis txhob khuam hnab thoob puab taug kev, lossis coj ob lub tsho lossis nkawm khau lossis tus pas nrig, rau qhov tus tub zog tsim nyog tau noj. Thaum nej mus rau hauv lub moos twg lossis lub zos twg, mas tshuaj saib leejtwg tsim nyog mus so rau hauv mas mus nrog tus ntawd nyob txog thaum tawm qhov chaw ntawd mus. Thaum nej nkag rau hauv lub tsev, cia li foom lo lus nyob kaj siab lug rau lub tsev ntawd. Yog lub tsev ntawd tsim nyog tau koob hmoov, kuj cia nej tej lus kaj siab lug nyob hauv lub tsev ntawd. Tiamsis yog lub tsev ntawd tsis tsim nyog tau, kuj thim nej tej lus kaj siab lug rov rau nej. Yog leejtwg tsis txais nej thiab tsis mloog nej tej lus, mas thaum nej tawm hauv lub tsev lossis lub moos ntawd mus nej cia li nchos tej hmoov av ntawm nej kotaw pov tseg. Kuv qhia tseeb rau nej tias, hnub uas teem txim mas Xaudoo thiab Kaumaula tebchaws yuav raug sib dua lub moos ntawd. “Saib maj, kuv txib nej tawm mus zoo yam nkaus li tus yaj uas nyob hauv nruab nrab pab hma. Vim li no nej yuav tsum ntse li nab thiab siab mos siab muag li tus nquab. Nej yuav tsum ceev faj neeg rau qhov lawv yuav muab nej cob rau tej tsev tu plaub thiab nplawm nej hauv lawv tej tsev sablaj, thiab nej yuav raug muab cab mus rau cov thawj kav thiab tej vajntxwv vim yog tim kuv, xwv nej thiaj ua tau timkhawv rau lawv thiab lwm haiv neeg. Thaum lawv muab nej cob rau luag, nej tsis txhob txhawj txog tej lus uas nej yuav hais thiab nej yuav hais li cas, rau qhov thaum txog sijhawm hais yuav muab tej lus uas nej yuav hais pub rau nej, rau qhov tus uas hais tsis yog nej, yog nej Leejtixv tus Ntsuj Plig coj nej hais. Kwvtij yuav muab kwvtij cob rau kev tuag, txiv yuav muab tub cob rau kev tuag, menyuam yuav sawv twv niam txiv thiab muab tua. ib tsoom tebchaws yuav ntxub nej vim yog tim kuv lub npe. Tiamsis leejtwg thev tau mus txog thaum kawg tus ntawd yuav dim. Thaum luag tsim txom nej hauv lub moos twg, cia li khiav mus rau lwm lub moos. Kuv qhia tseeb rau nej tias, ua ntej nej tsis tau mus thoob Yixayee tej moos ces Neeg leej Tub yuav los. “Tus tub kawm yeej tsis loj dhau tus xibhwb qhia, thiab tus qhev yeej tsis loj dhau nws tus lospav. Yog tus tub kawm sib luag yam li tus xibhwb thiab tus qhev sib luag yam li tus lospav kuj txaus lawm. Yog luag twb hu tus tswv tsev tias dab Npe‑eexenpu lawm, luag yimhuab yuav hu nws tsev neeg phem dua li ntawd thiab. “Vim li no nej tsis txhob ntshai lawv rau qhov tsis muaj ib yam twg uas muab npog cia lawm yuav tsis muab thws tshwm los, thiab tsis muaj ib yam twg uas muab zais lawm yuav tsis paub. Tej uas kuv hais rau nej hauv qhov tsaus ntuj, nej cia li piav rau hauv qhov pom kev, thiab tej uas nej hnov hais lus ntxhi rau hauv nej qhov ntsej, cia li tshaj tawm saum txheej tsev las tshav. Tsis txhob ntshai cov uas tua tau lub cev tiamsis tua tsis tau tus ntsuj plig. Nej yuav tsum ntshai tus uas ua tau rau tus ntsuj plig thiab lub cev huvsi puam tsuaj rau hauv ntuj tawg. Ob tug noog tsev luag muag ib npiv los tsis yog? Yog nej leej Txiv tsis pom zoo txawm yog ib tug noog xwb los yeej tsis poob rau hauv av li. Nej cov plaubhau los kuj raug muab suav txhua txoj lawm. Yog li no nej tsis txhob ntshai. Nej yeej tsim txiaj dua ntau tus noog tsev. “Yog li ntawd txhua tus uas lees yuav kuv tab meeg tibneeg, kuv yuav lees yuav tus ntawd tab meeg kuv leej Txiv uas nyob saum ntuj. Yog leejtwg tsis lees yuav kuv tab meeg tibneeg, kuv kuj yuav tsis lees yuav tus ntawd tab meeg kuv leej Txiv uas nyob saum ntuj thiab. “Tsis txhob xav tias kuv los yog coj kev sib hum xeeb los rau lub ntiajteb. Kuv los, tsis yog coj kev sib hum xeeb los yog coj ntaj los. Kuv los yog los “ ‘ua rau twb tawm tsam txiv, thiab ntxhais tawm tsam niam, thiab nyab tawm tsam niam pog, mas cov uas ua yeeb ncuab yeej yog yug tsev neeg.’ Tus uas nyiam nws niam nws txiv heev dua li nyiam kuv tus ntawd tsis tsim nyog ua kuv li, thiab tus uas nyiam nws twb nws ntxhais heev dua li nyiam kuv kuj tsis tsim nyog ua kuv li. Tus uas tsis kwv nws tus khaublig ntoo raws kuv qab tus ntawd tsis tsim nyog ua kuv li. Tus uas huas nws txojsia yuav piam txojsia, tiamsis tus uas tso nws txojsia tseg vim yog saib rau kuv, mas yuav huas tau txojsia. “Tus uas lees yuav nej kuj yog lees yuav kuv, thiab tus uas lees yuav kuv kuj yog lees yuav tus uas txib kuv tuaj. Tus uas lees yuav tus xibhwb cev lus vim nws cev Vajtswv lus, kuj yuav tau nqe zog ib yam li tus xibhwb cev Vajtswv lus, thiab tus uas lees yuav tus ncaj ncees vim yog tus neeg ntawd ua ncaj ncees, kuj yuav tau nqe zog ib yam li tus neeg ncaj ncees. Leejtwg muab ib khob dej txiag rau cov neeg yau no ib tug twg haus vim tus ntawd yog kuv li thwjtim, kuv hais tseeb rau nej tias, tus ntawd yuav tsis plam nws tej nqe zog.” Thaum Yexus qhia nws kaum ob tug thwjtim tag lawm, nws txawm tawm qhov ntawd mus qhuab qhia thiab tshaj tawm rau hauv Yixayee tej moos. Thaum Yauhas nyob hauv tsev lojfaj hnov txog tus Khetos tej haujlwm, nws txawm txib nws cov thwjtim mus hais rau Yexus tias, “Koj yog tus uas yuav los ntawd lov? Lossis peb yuav tos dua lwm tus?” Yexus teb lawv tias, “Cia li mus qhia tej uas nej hnov thiab pom rau Yauhas. Neeg dig muag kuj pom kev lawm, neeg ceg tawv kuj mus tau kev, cov uas mob lig mob ruas kuj zoo huv lawm, cov uas lag ntseg kuj hnov lus, cov uas tuag kuj raug muab tsa ciaj sawv los thiab txoj xov zoo kuj piav mus rau cov neeg pluag lawm. Tus uas tsis dawm kuv kuj tau nyob kaj siab lug.” Thaum lawv rov mus lawm, Yexus pib hais txog Yauhas rau cov neeg ntawd mloog tias, “Nej tawm mus rau tom tebchaws moj sab qhua mus saib dabtsi? Nej mus saib tug tauj deg uas cua ntsawj rawv mus rawv los lov? Los nej tawm mus saib dabtsi? Nej mus saib ib tug uas hnav tsuj hnav npuag lov? Saib maj, cov uas hnav tsuj hnav npuag yeej nyob hauv vajntxwv lub tsev. Los nej mus saib dabtsi? Mus saib ib tug xibhwb cev Vajtswv lus lov? Kuv hais rau nej tias, tseeb tiag, thiab nws loj dua ib tug xibhwb cev lus. Nws yog tus uas twb muaj lus sau tseg cia lawm tias, ‘Saib maj, kuv tso kuv tus tubtxib mus ua koj ntej, tus ntawd yuav npaj kev rau tom koj hauv ntej.’ Kuv hais tseeb rau nej tias, cov neeg uas yug ntawm pojniam los tsis muaj ib tug loj dhau Yauhas uas coj ua kevcai raus dej. Tiamsis tus uas yau kawg hauv ntuj ceeb tsheej tseem loj dua Yauhas. Txij thaum Yauhas uas coj ua kevcai raus dej nyob los txog hnub no, muaj neeg siv zog txeem mus rau hauv ntuj ceeb tsheej, thiab neeg ua nruj ua tsiv txeeb ntuj ceeb tsheej. Rau qhov cov xibhwb cev Vajtswv lus sawvdaws thiab Mauxe txoj kevcai twb hais tsis tu ncua txog tus Yauhas no. Yog nej ntseeg mas Yauhas yog tus Eliya uas yuav los ntawd ntag. Leejtwg muaj qhov ntsej hnov, cia li mloog nawj. “Kuv yuav muab cov neeg tiam no piv txog dabtsi? Muab piv ib yam li cov menyuam yaus uas zaum tom tshav puam hu rau lawv cov kwvluag tias, ‘Peb twb tshuab raj rau nej los nej tsis dhia seev cev, peb twb quaj nyiav los nej tsis quaj ntsuag.’ Rau qhov Yauhas los nws tsis noj tsis haus, mas luag hais tias, ‘Nws raug ib tug dab.’ Neeg leej Tub los nws noj thiab haus, mas luag hais tias, ‘Saib maj, niag neeg noj loj haus qaug, nrog cov neeg sau se thiab cov neeg muaj txim ua kwvluag.’ Tiamsis tswvyim tes haujlwm qhia tias tswvyim ua raug cai lawm.” Yexus txawm pib cem tej moos uas nws twb ua nws tej txujci phimhwj ntau rau hauv lawd vim yog lawv tsis ntxeev dua siab tshiab hais tias, “Lub moos Khaulaxi 'e, koj raug txom nyem lauj! Lub moos Npexaida 'e, koj raug txom nyem lauj! Yog tej txujci phimhwj uas ua rau hauv neb lawd tau ua rau hauv lub nroog Thailab thiab lub nroog Xaidoo, ces lawv twb muab khaub seev tsaj los hnav thiab tsuab tshauv nphoo ib ce ntxeev dua siab tshiab ntev los lawm lauj! Kuv hais rau neb tias, hnub uas teem txim mas Thailab thiab Xaidoo yuav raug sib dua neb. Lub moos Khapena‑u 'e, koj yuav muab koj tsa siab mus nto ntuj lov? Koj yuav raug muab txo qes mus rau hauv tub tuag teb. Yog tej txujci phimhwj uas ua rau hauv koj tau ua rau hauv lub moos Xaudoo, ces lub moos ntawd tseem nyob los txog niaj hnub nimno. Kuv hais rau nej tias, hnub uas teem txim mas Xaudoo tebchaws yuav raug sib dua koj.” Thaum ntawd Yexus hais tias, “Au leej Txiv uas yog tus Tswv ntuj Tswv teb, kuv qhuas koj uas koj muab tej no npog cia tsis qhia rau cov neeg muaj tswvyim thiab txawj ntse, tiamsis koj muab qhia rau tej menyuam yaus paub. Au leej Txiv, koj yeej pom zoo ua li ntawd. Kuv leej Txiv twb muab txhua yam cob rau kuv. Tsis muaj leejtwg paub leej Tub tsuas yog leej Txiv xwb thiab tsis muaj leejtwg paub leej Txiv tsuas yog leej Tub thiab tus uas leej Tub xav qhia rau thiaj paub xwb. “Txhua tus uas ua haujlwm khwv thiab ris lub nra hnyav, cia li los cuag kuv, kuv yuav pub nej tau so los siav. Cia li muab kuv rab quab los kwv thiab kawm ntawm kuv, rau qhov kuv siab mos siab muag tsis muab hlob, mas nej lub siab thiaj tau so. Rau qhov kuv rab quab kuj yoojyim kwv, thiab kuv lub nra kuj sib.” Tom qab ntawd hnub Xanpatau Yexus taug kev hauv ib daim teb mog. Nws cov thwjtim tshaib plab lawv txawm pib de hnab mog los noj. Thaum cov Falixai pom li ntawd, lawv txawm hais rau Yexus tias, “Saib maj, koj cov thwjtim ua tej uas caiv tsis kheev ua rau hnub Xanpatau.” Yexus hais rau lawv tias, “Nej tsis tau nyeem tej uas Davi ua rau thaum nws thiab cov neeg uas nrog nws tshaib plab lov? Nws twb nkag mus rau hauv Vajtswv lub tsev muab tej ncuav uas xyeem txawb rau ntawm Vajtswv lub xubntiag los noj, yog tej uas nws thiab nws cov neeg caiv tsis pub noj tsuas yog cov pov thawj thiaj noj tau xwb. Thiab nej tsis tau nyeem hauv phau kevcai lov, qhov uas hais tias hnub Xanpatau cov pov thawj hauv lub tuam tsev yeej ua puas tsuas hnub Xanpatau los kuj tsis txhaum? Kuv hais rau nej tias, ntawm no muaj ib yam uas loj dua lub tuam tsev. Yog nej nkag siab nqe uas hais tias, ‘Kuv ntshaw txojkev hlub, tsis yog ntshaw qhov uas tua tsiaj xyeem,’ mas nej yuav tsis rau txim rau tus uas tsis txhaum. Rau qhov Neeg leej Tub yog hnub Xanpatau tus tswv.” Yexus tawm qhov ntawd mus thiab mus rau hauv lawv lub tsev sablaj. Mas muaj ib tug yawg qhuav ib sab tes nyob hauv thiab. Lawv txawm nug Yexus tias, “Muaj cai kho mob rau hnub Xanpatau los tsis muaj cai?” xwv lawv thiaj tau chaw kom Yexus. Yexus hais rau lawv tias, “Nej cov yog leejtwg muaj tib tug yaj xwb mas tus yaj ntawd poob rau hauv qhov rau hnub Xanpatau, nws yuav tsis mus muab tus yaj ntawd rho tawm los lov? Ib tug neeg yimhuab tsim txiaj dua tus yaj. Yog li no muaj cai ua qhov zoo rau hnub Xanpatau.” Ces Yexus txawm hais rau tus qhuav tes ntawd tias, “Cia li xyab kiag koj txhais tes.” Tus ntawd txawm xyab kiag tes, mas nws txhais tes txawm zoo kiag li qub ib yam li sab tod. Cov Falixai txawm tawm mus sablaj tias yuav ua li cas thiaj tua tau Yexus. Thaum Yexus paub li ntawd nws txawm tawm qhov ntawd mus. Muaj neeg coob coob raws nws qab mus mas nws kho lawv tej mob zoo txhua tus, thiab hais kom lawv tsis txhob qhia rau luag paub nws. Tej no thiaj tiav raws li xibhwb Yaxaya uas cev Vajtswv lus tau hais tseg tias, “Saib maj, kuv tus qhev uas kuv xaiv cia lawd, yog tus uas kuv hlub, yog tus uas kuv txaus siab rau. Kuv muab kuv tus Ntsuj Plig rau hauv nws, nws yuav qhia txojkev ua ncaj ua ncees rau ib tsoom tebchaws. Nws yuav tsis sib cav sib ceg thiab tsis qw nrov, thiab tsis muaj leejtwg hnov nws lub suab tom tej kev. Tus tauj deg uas lov lawm nws yuav tsis muab tu, tus teeb xeeb ncho pa twb yuav tuag los nws yuav tsis muab tua, mus txog thaum nws coj txojkev ua ncaj ua ncees kov yeej. Ib tsoom tebchaws yuav vam khom nws lub npe.” Thaum ntawd muaj neeg coj ib tug raug dab uas dig muag thiab hais tsis tau lus tuaj cuag Yexus, mas Yexus kho nws zoo, tus ntawd txawm hais tau lus thiab pom kev lawm. Tej neeg sawvdaws kuj phimhwj thiab hais tias, “Tus no tsis yog Davi li tub kaj?” Tiamsis thaum cov Falixai hnov li ntawd, lawv txawm hais tias, “Tus yawg no siv tus thawj dab Npe‑eexenpu li hwjchim ntiab dab tawm.” Yexus paub tej uas lawv xav nws thiaj hais rau lawv tias, “Txhua lub tebchaws uas tawg faib lawd yeej yuav puam tsuaj, thiab lub moos twg lossis lub tsev twg tawg faib lawd yeej nyob tsis tau. Yog Xatas rov ntiab Xatas tawm, nws kuj faib tawg tag lawm, mas nws lub tebchaws yuav nyob tau li cas? Yog kuv siv dab Npe‑eexenpu li hwjchim ntiab dab tawm, es nej cov neeg nev, lawv siv leejtwg ntiab dab tawm? Yog li ntawd ces lawv yuav ua cov uas txiav txim rau nej. Yog kuv siv Vajtswv Ntsuj Plig ntiab dab tawm, mas Vajtswv lub tebchaws twb los txog nej lawm. Lossis leejtwg yuav nkag mus rau hauv ib tug uas muaj zog heev lub tsev thiab lws tau nws tej qhov txhia chaw tau li cas? Yuav tsum yog xub muab tus uas muaj zog ntawd khi ua ntej tso thiaj li lws tau nws lub tsev. Tus uas tsis tuaj kuv tog yeej tawm tsam kuv, thiab tus uas tsis nrog kuv qaws los ua ke, nws yeej muab ua kom tawg ua sab ua sua. Vim li no kuv hais rau nej tias, txhua yam kev txhaum thiab tej lus uas hais lus tuam mom yuav zam tau rau neeg tiamsis tej lus uas hais tuam mom Vaj Ntsuj Plig yuav zam tsis tau kiag li. Leejtwg hais lus tawm tsam Neeg leej Tub yuav zam tau nws lub txim, tiamsis leejtwg hais lus tawm tsam Vaj Ntsuj Plig dawb huv yuav zam tsis tau kiag li tsis hais tiam no lossis tiam tom ntej. “Yuav tsum yog tsob ntoo zoo cov txiv thiaj zoo, yog tsob ntoo phem cov txiv kuj phem. Yuav pom cov txiv thiaj paub tsob ntoo. Cov niag noob nab phem, nej yog neeg phem, nej yuav ua li cas hais tau lus zoo? Rau qhov lub qhov ncauj yeej hais tej uas puv nkaus hauv lub siab tawm los. Tus neeg zoo yeej rho yam zoo hauv nws lub txhab uas khaws yam zoo cia tawm los, tus neeg phem yeej rho yam phem hauv nws lub txhab uas khaws yam phem cia tawm los. Kuv hais rau nej tias, neeg yuav tsum lees txhua lo lus tsis muaj qabhau uas lawv tau hais lawd rau hnub uas teem txim. Koj yuav dim lub txim lossis yuav raug txim kuj nyob ntawm koj lo lus hais xwb.” Thaum ntawd cov xibhwb qhia Vajtswv kevcai thiab cov Falixai qee leej hais rau Yexus tias, “Xibhwb, peb xav pom koj ua ib yam txujci phimhwj.” Yexus teb lawv tias, “Tiam neeg no phem thiab fav xeeb nrhiav ib yam txujci tseem ceeb, tiamsis lawv yuav tsis pom dua txujci tseem ceeb tsuas yog zaum txujci uas muaj rau Yauna uas yog xibhwb cev Vajtswv lus xwb. Yauna nyob hauv tus ntses loj lub plab tau peb hnub peb hmos li cas, Neeg leej Tub yuav nyob hauv nruab av peb hnub peb hmos ib yam li ntawd. Thaum txiav txim rau tiam neeg no cov neeg Ninave yuav sawv tsees thiab yuav taw lawv qhov txhaum rau lawv, rau qhov thaum cov neeg Ninave hnov Yauna qhia, lawv ntxeev dua siab tshiab lawm, tiamsis muaj ib tug loj dua Yauna nyob ntawm no. Thaum txiav txim rau tiam neeg no tus poj vajntxwv uas kav tebchaws sab nrad yuav sawv tsees thiab yuav taw lawv qhov txhaum rau lawv, rau qhov nws tau tuaj nram qab ntuj kawg tuaj mloog Xalaumoo tej tswvyim, tiamsis muaj ib tug loj dua Xalaumoo nyob ntawm no. “Thaum dab qias tawm hauv leejtwg lawm, dab mus rau hauv tej chaw qhuav nkig nkuav nrhiav chaw so tiamsis nrhiav tsis tau. Nws txawm hais tias, ‘Kuv yuav rov qab mus rau kuv lub tsev uas kuv tawm tuaj.’ Thaum nws los txog nws pom lub tsev khoom, muab cheb thiab tu du lug cia. Nws txawm mus coj dua xya tus dab uas phem heev dua nws los nrog nws nkag mus nyob rau hauv. Mas tus neeg ntawd lub neej thaum kawg phem heev dua thaum chiv thawj. Tiam neeg phem no yuav raug ib yam li ntawd ntag.” Thaum Yexus tseem tabtom hais rau cov neeg ntawd, nws niam thiab nws cov kwv txawm tuaj sawv rau sab nraud xav nrog Yexus tham. Muaj ib tug hais rau Yexus tias, “Koj niam thiab koj cov kwv sawv sab nraud xav nrog koj tham.” Yexus teb tus uas hais rau nws ntawd tias, “Leejtwg yog kuv niam, thiab leejtwg yog kuv cov kwv?” Nws txawm taw tes rau nws cov thwjtim thiab hais tias, “Cov no yog kuv niam thiab kuv cov kwv. Rau qhov yog leejtwg ua raws li kuv leej Txiv Ntuj lub siab nyiam, tus ntawd yog kuv li kwv, kuv li muam thiab kuv niam.” Tib hnub ntawd Yexus tawm hauv lub tsev mus zaum rau ntawm ntug hiavtxwv. Muaj neeg coob coob tuaj txoos ua ke ntawm nws, nws txawm nce mus zaum rau hauv ib lub nkoj, mas cov neeg sawvdaws nyob saum ntug nqhuab. Nws txawm ua paj lug qhia ntau yam rau lawv hais tias, “Muaj ib tug tawm mus tseb noob. Thaum nws tseb cov noob ib txhia poob rau saum txojkev mas noog lus khaws noj lawm. Muaj ib txhia poob rau thaj av uas muaj pob zeb tiv muaj av tsawg tsawg, mas cov noob tuaj tamsid vim av tsis tob. Thaum hnub tuaj raug tshav ntuj kub, mas cov cag tsis tob txawm tuag tshav lawm. Muaj ib txhia poob rau hauv plawv tsob pos, ces tsob pos hlob tuaj laum lawm. Muaj ib txhia poob rau hauv thaj av zoo thiab txi tau ib puas npaug, rau caum npaug thiab peb caug npaug. Leejtwg muaj qhov ntsej cia li mloog nawj!” Cov thwjtim txawm los nug Yexus tias, “Ua cas koj ua paj lug hais rau lawv?” Yexus teb lawv tias, “Tej uas muab npog cia lawd uas hais txog Ntuj Ceeb Tsheej twb muab pub rau nej paub lawm tiamsis tsis pub rau cov neeg ntawd paub. Rau qhov tus uas muaj lawd yuav muab tsav ntxiv rau kom nws muaj ntau nplua mias, tiamsis tus uas tsis muaj, txawm yog tej uas nws muaj los yuav muab rho ntawm nws mus. Vim li ntawd kuv thiaj ua paj lug hais rau lawv, rau qhov “ ‘Lawv saib los lawv tsis pom, lawv hnov los lawv tsis mloog thiab tsis nkag siab.’ Mas thiaj tiav raws li tej lus uas Yaxaya cev hais tias, ‘Nej yuav mloog tag mloog thiab los tsis nkag siab, nej yuav saib tag saib thiab los tsis pom kiag li. Vim haiv neeg no lub siab tawv, thiab lawv ua ntsej lag muag dig, thiab lawv kaw lawv lub qhov muag, tsam ces lawv lub qhov muag ho pom, thiab lawv lub qhov ntsej ho hnov, thiab lawv lub siab ho to taub, ces lawv yuav tig rov los ces kuv yuav kho lawv zoo.’ Tiamsis nej lub qhov muag tau koob hmoov rau qhov uas tau pom, thiab nej lub qhov ntsej tau koob hmoov rau qhov uas tau hnov. Kuv hais tseeb rau nej tias, cov xibhwb cev Vajtswv lus thiab cov neeg ncaj ncees ntau leej xav pom tej uas nej pom los lawv tsis pom, thiab xav hnov tej uas nej tau hnov los lawv tsis hnov.” “Yog li no cia li mloog zaj paj lug hais txog tus tseb noob. Thaum leejtwg hnov tej lus hais txog Vajtswv lub tebchaws los tsis nkag siab, kuj yog tus uas Phem tuaj txeeb kiag tej noob uas tseb hauv nws lub siab mus lawm. Qhov ntawd yog cov noob uas tseb poob rau saum txojkev. Cov noob uas tseb poob rau thaj av uas muaj pob zeb tiv ntawd mas yog tus uas hnov dheev tej lus ntawd thiab zoo siab hlo txais yuav tamsid, tiamsis nws cog cag tsis tob rau hauv nws, thiaj nyob ib ntus xwb. Thaum muaj kev ceeblaj txom nyem lossis kev tsim txom tshwm los vim yog tim tej lus ntawd, nws txawm tso tseg tamsim ntawd. Cov noob uas tseb poob rau hauv plawv tsob pos yog tus uas tau hnov tej lus ntawd, tiamsis tej kev txhawj xeeb hauv ntiajteb thiab tej kev qaug siab rau nyiaj txiag laum tej lus ntawd lawm, thiaj tsis txi txiv. Cov noob uas tseb poob rau hauv thaj av zoo yog tus uas tau hnov tej lus ntawd thiab nkag siab. Nws thiaj txi tau ib puas npaug rau caum npaug peb caug npaug.” Yexus hais dua ib zaj piv lus rau lawv mloog hais tias, “Ntuj Ceeb Tsheej piv ib yam li ib tug muab noob zoo tseb rau hauv nws daim teb. Thaum sawvdaws tsaug zog lawm, nws tus yeeb ncuab txawm tuaj tseb noob txhauv xyaw rau tej noob mog ntawd ces txawm khiav lawm. Thaum tej mog tuaj thiab txhawv lawm, tej txhauv kuj hlob tshwm tuaj thiab. Tus tswv tsev cov qhev txawm los hais rau nws tias, ‘Yawg hlob, koj tseb cov noob zoo rau hauv koj daim teb los tsis yog? Ua cas ho tuaj txhauv thiab?’ Nws hais rau lawv tias, ‘Tej ntawd yog yeeb ncuab ua.’ Cov tub qhe txawm hais rau nws tias, ‘Koj xav kom peb muab cov txhauv dob lov?’ Nws teb tias, ‘Tsis txhob ua li ntawd tsam ces thaum nej dob cov txhauv nej ho dob tau cov mog ua ke thiab. Cia ob yam hlob ua ke txog lub caij hlais. Thaum lub caij hlais kuv yuav hais rau cov uas hlais tias, Cia li sau tej txhauv ua ntej thiab muab pav ua tej twb teg hlawv pov tseg, hos cov mog cia li muab sau ntim rau hauv kuv lub txhab.’ ” Yexus hais dua ib zaj piv lus rau lawv mloog hais tias, “Ntuj Ceeb Tsheej piv ib yam li lub noob me me uas ib tug coj mus tseb rau hauv nws daim teb. Lub noob ntawd me dhau lwm yam noob huvsi, tiamsis thaum tuaj hlob lawd kuj loj dua lwm yam zaub huvsi thiab hlob ua ib tsob ntoo. Tej nas noog saum nruab ntug los ua zes rau saum tej ceg.” Yexus hais dua ib zaj piv lus rau lawv mloog hais tias, “Ntuj Ceeb Tsheej piv ib yam li cov keeb uas ib tug pojniam coj mus xyaw peb xe‑a hmoov mog tos txog thaum cov hmoov mog ntawd su tag huvsi.” Tej lus no huvsi Yexus ua paj lug qhia rau cov neeg ntawd. Tsis muaj ib zaj twg uas nws tsis ua paj lug qhia rau lawv li, kom thiaj ua tiav raws li tus xibhwb cev lus hais tias, “Kuv qheb ncauj hais paj lug, kuv yuav hais tej uas muab npog cia txij thaum tsim ntuj tsim teb.” Yexus txawm ncaim cov neeg ntawd mus rau hauv tsev. Cov thwjtim los cuag nws thiab hais tias, “Thov koj txhais zaj paj lug txhauv hauv daim teb rau peb.” Yexus teb tias, “Tus uas tseb cov noob zoo yog Neeg leej Tub, daim teb yog lub ntiajteb, cov noob zoo yog Ntuj Ceeb Tsheej cov menyuam, thiab cov txhauv yog tus uas Phem li menyuam, tus yeeb ncuab uas tseb cov noob txhauv yog dab Ntxwg Nyoog, lub caij hlais yog lub sijhawm kawg, thiab cov uas hlais yog cov tubtxib saum ntuj. Cov txhauv raug muab sua hlawv pov tseg li cas, lub sijhawm kawg yuav zoo ib yam li ntawd. Neeg leej Tub yuav txib nws cov tubtxib saum ntuj mus sau zog txhua yam uas ua kom yuam kev thiab txhua tus uas ua phem tawm hauv nws lub tebchaws mus, thiab yuav muab pov rau hauv lub niag qhov hluavtaws, qhov ntawd yuav muaj kev quaj tom hniav qas qawv. Thaum ntawd cov uas ncaj ncees yuav ci rau hauv lawv leej Txiv lub tebchaws ib yam li lub hnub. Leejtwg muaj qhov ntsej cia li mloog nawj! “Ntuj Ceeb Tsheej piv ib yam li cov nyiaj txiag ntau uas muab zais rau hauv ib daim teb. Thaum muaj ib tug pom lawm nws rov muab zais dua mas zoo siab heev thiaj muab txhua yam uas nws muaj muag huvsi coj mus yuav daim teb ntawd. “Thiab Ntuj Ceeb Tsheej piv ib yam li ib tug tub luam mus nrhiav tej qe qwj uas zoo heev. Thaum nws nrhiav pom ib lub uas muaj nqes heev, nws txawm muab txhua yam uas nws muaj muag huvsi coj mus yuav lub qe qwj ntawd. “Thiab Ntuj Ceeb Tsheej piv ib yam li lub vas uas muab ntaus rau hauv hiavtxwv mag tau txhua yam ntses. Thaum puv lawm, lawv rub los rau saum ntug, thiab zaum xaiv cov uas zoo cia rau hauv lub tawb, cov uas tsis zoo mas muab pov tseg. Thaum lub sijhawm kawg yuav zoo ib yam li ntawd. Cov tubtxib saum ntuj yuav los muab cov neeg phem cais tawm ntawm cov neeg ncaj ncees, thiab yuav muab pov rau hauv lub niag qhov hluavtaws, qhov ntawd yuav muaj kev quaj tom hniav qawv. “Tej lus no nej nkag siab huvsi lov?” Lawv teb nws tias, “Peb nkag siab.” Yexus txawm hais rau lawv tias, “Vim li no txhua tus xibhwb qhia Vajtswv kevcai uas kawm paub txog Ntuj Ceeb Tsheej kuj zoo ib yam li tus tswv tsev uas muab tej qhov txhia chaw tshiab thiab qub rho hauv nws lub txhab los.” Thaum Yexus hais tej paj lug no tag lawd nws txawm tawm qhov ntawd mus. Thaum nws los txog nws lub moos nws kuj qhuab qhia lawv hauv lub tsev sablaj, mas lawv phimhwj sib hais tias, “Tus neeg no tau tej tswvyim thiab txujci phimhwj li no qhovtwg los? Nws tsis yog tus Kws ntoo li tub lov? Nws niam twb yog Maivliag, nws cov kwv twb yog Yakaunpau thiab Yauxes thiab Ximoos thiab Yudas los tsis yog? Nws cov muam sawvdaws kuj nrog peb nyob no los tsis yog? Nws tau tej no huvsi qhovtwg los?” Lawv txawm tsis txaus siab rau nws. Yexus hais rau lawv tias, “Luag tej yeej hwm tus xibhwb cev Vajtswv lus tsuas yog nws lub moos thiab nws cuab neeg thiaj tsis hwm nws xwb.” Nws thiaj tsis ua txujci phimhwj ntau rau hauv lub moos ntawd vim yog lawv tsis ntseeg. Thaum tus tswv xeev Helauj tau hnov txog Yexus lub moo, nws txawm hais rau nws cov tub teg tub taws tias, “Tus no yeej yog Yauhas uas coj ua kevcai raus dej. Nws sawv hauv qhov tuag rov los lawm, mas nws thiaj muaj hwjchim ua tau tej txujci phimhwj no.” Helauj twb ntes Yauhas thiab muab khi kaw rau hauv tsev lojfaj, vim yog tim Helaudia uas yog Helauj tus kwv Fili tus pojniam, rau qhov Yauhas txeev hais rau Helauj tias, “Koj tsis muaj cai yuav tus ntawd ua koj pojniam.” Txawm yog Helauj xav muab Yauhas tua los nws kuj ntshai cov pejxeem, rau qhov lawv hwm tias Yauhas yog ib tug xibhwb cev Vajtswv lus. Thaum ua kevcai nco txog hnub uas yug Helauj, Helaudia tus ntxhais txawm dhia seev cev tab meeg cov qhua sawvdaws mas ua rau Helauj txaus siab heev, Helauj thiaj cog lus twv tias nws thov dabtsi nws yeej yuav tau yam ntawd. Tus ntxhais thiaj thov raws li leej niam qhia rau nws tias, “Thov muab Yauhas uas coj ua kevcai raus dej lub taubhau tso hauv lub choo coj los rau kuv ntawm no.” Mas vajntxwv ntxhov siab, tiamsis vim yog saib rau tej lus uas nws twv thiab saib rau cov qhua nws thiaj tso ncauj kom muab rau tus ntxhais. Nws txawm txib neeg mus txiav Yauhas lub taubhau hauv tsev lojfaj. Lawv muab Yauhas lub taubhau tso rau hauv lub choo coj los pub rau tus ntxhais ntawd, tus ntxhais thiaj coj mus rau leej niam. Mas Yauhas cov thwjtim tuaj coj Yauhas lub cev mus log, thiab lawv mus hais rau Yexus paub. Thaum Yexus hnov li ntawd nws txawm nce nkoj tawm qhov ntawd mus nyob tib leeg rau ib qho chaw uas tsis muaj neeg. Thaum tej neeg hnov li ntawd, lawv txawm tawm hauv tej moos mus kotaw raws nws qab mus. Thaum Yexus tawm hauv lub nkoj los nws pom muaj neeg coob coob, nws thiaj khuvleej lawv thiab kho cov neeg muaj mob kom zoo. Thaum yuav tsaus ntuj nws cov thwjtim los hais rau nws tias, “Ntawm no yog ntuj nrag teb do, thiab tav no lig lawm. Cia li tso cov neeg mus xwv lawv thiaj tau mus yuav mov noj tom tej zej zog.” Yexus hais tias, “Tsis txog lawv tawm mus, nej cia li pub rau lawv noj.” Lawv hais rau nws tias, “Ntawm no peb tsuas muaj tsib lub ncuav thiab ob tug ntses xwb.” Nws txawm hais tias, “Muab los rau kuv.” Ces nws txawm hais kom cov neeg ntawd zaum rau ntawm tej nyom. Thaum nws txais tsib lub ncuav thiab ob tug ntses ntawd lawm, nws tsa muag ntsia saum ntuj thov Vajtswv foom koob hmoov mas muab ntais cev rau cov thwjtim, mas cov thwjtim faib rau cov neeg coob coob ntawd. Lawv txhua tus noj tsau huvsi. Tej ncuav uas noj tsis tag lawv khaws tau kaum ob tawb puv nkaus. Cov neeg uas noj ntawd cov txivneej xwb muaj kwvlam tsib txhiab leej tsis suav cov pojniam menyuam. Thaum ntawd Yexus hais kom nws cov thwjtim nce nkoj hla dej ua nws ntej mus rau sab tid, ces Yexus txawm tso cov neeg rov mus. Thaum nws tso cov neeg ntawd mus tag lawd, nws tib leeg txawm nce mus thov Vajtswv pem roob. Thaum tsaus ntuj lawd, Yexus tib leeg tseem nyob pem roob, tiamsis lub nkoj nyob deb ntawm ntug hiavtxwv lawm thiab raug tej niag nthwv dej nplawm vim yog cua ntsawj tom hauv ntej tuaj. Thaum qaib qua thawj tsig Yexus mus kotaw saum nplaim dej hiavtxwv tuaj rau ntawm cov thwjtim. Thaum cov thwjtim pom nws los kotaw saum nplaim dej, lawv ntshai kawg thiab hais tias, “Yog dab!” Lawv qw nrov vim yog ntshai. Tamsim ntawd Yexus hais rau lawv tias, “Ua siab tuab, yog kuv ntag. Tsis txhob ntshai.” Petus txawm teb nws tias, “Tus Tswv, yog koj tiag, thov hais kom kuv tuaj saum nplaim dej rau ntawm koj.” Yexus hais tias, “Tuaj los maj.” Petus txawm nqes nkoj mus kotaw saum nplaim dej rau ntawm Yexus. Tiamsis thaum nws pom cua ntsawj nws txawm ntshai. Nws pib tog txawm qw nrov tias, “Tus Tswv, cawm kuv lauj!” Tamsim ntawd Yexus cev loo tes ntsiab nkaus nws thiab hais rau nws tias, “Tus uas kev ntseeg yau 'e, ua cas koj tsis ruaj siab?” Thaum ob tug nce rau hauv lub nkoj lawm, cua kuj tu lawm. Lawv cov uas nyob hauv nkoj txawm pe hawm Yexus hais tias, “Koj yog Vajtswv tus tub tiag.” Thaum lawv hla dhau hiavtxwv lawd lawv nres nkoj rau ntawm Kenexale. Thaum cov neeg uas nyob ntawd cim tau Yexus, lawv txawm txib neeg mus hais thoob plaws ib ncig ntawd, mas lawv coj txhua tus uas muaj mob tuaj cuag Yexus, thiab thov Yexus cia cov neeg mob ntawd kov nws lub qab tsho xwb. Txhua tus uas tau kov lawd kuj zoo huvsi. Thaum ntawd cov Falixai thiab cov xibhwb qhia Vajtswv kevcai tawm hauv Yeluxalees tuaj cuag Yexus thiab nug hais tias, “Ua cas koj cov thwjtim tsis ua raws li puj koob yawm txwv tej kevcai? Rau qhov thaum lawv noj mov lawv tsis xub ntxuav tes.” Yexus teb lawv tias, “Ua cas nej rhuav Vajtswv tej lus nkaw vim yog saib rau nej tej kevcai? Rau qhov Vajtswv twb hais cia tias, ‘Koj yuav tsum hwm koj niam koj txiv,’ thiab hais tias, ‘Leejtwg hais lus phem rau nws niam nws txiv mas yuav raug txim tuag.’ Tiamsis nej qhia hais tias, yog leejtwg hais rau nws niam nws txiv tias, ‘Yam uas muaj qabhau rau neb twb muab pub rau Vajtswv lawm,’ nws thiaj tsis txog hwm nws txiv. Nej ua li no twb yog nej rhuav Vajtswv tej lus vim yog saib rau nej tej kevcai. Cov neeg ncauj lus zoo siab phem, Yaxaya cev lus zoo heev hais txog nej tias, “ ‘Cov neeg no hwm kuv ntawm daim tawv ncauj xwb tiamsis lawv lub siab nyob deb kuv. Qhov uas lawv pe hawm kuv tsis muaj qabhau kiag li, lawv muab neeg tej kevcai los qhia ib yam li yog Vajtswv tej lus nkaw.’ ” Yexus hu cov neeg tuaj cuag nws thiab hais rau lawv tias, “Cia li mloog thiab nkag siab nawj. Tsis yog yam uas nkag rau hauv lub qhov ncauj ua rau neeg qias tsis huv, tiamsis yog yam uas tawm hauv lub qhov ncauj los thiaj ua rau neeg qias tsis huv.” Thaum ntawd cov thwjtim txawm los hais rau Yexus tias, “Koj puas paub tias thaum cov Falixai hnov tej lus ntawd lawv tsis txaus siab heev?” Nws teb tias, “Txhua tsob ntoo uas tsis yog kuv leej Txiv Ntuj cog mas yuav raug muab dob pov tseg. Cia lawv ua lawv. Lawv yog cov dig muag coj dig muag kev. Yog tus dig muag coj tus dig muag kev mas ob leeg yeej yuav poob rau hauv qhov.” Petus hais rau Yexus tias, “Thov koj txhais zaj paj lug ntawd rau peb paub.” Mas Yexus hais tias, “Nej tseem tsis tau to taub thiab lov? Nej tsis pom tias yam uas nkag rau hauv lub qhov ncauj kuj nqes rau hauv lub plab thiab tawm rau hauv lub qhov vuab tsuab lawm lov? Tiamsis yam uas tawm hauv neeg lub ncauj kuj yog tawm hauv lub siab los, thiaj ua rau neeg qias tsis huv. Qhov uas xav phem, tua neeg, deev luag poj luag txiv, ua nkauj ua nraug, ua tub sab, ua cuav timkhawv, iab hiam luag puavleej yog tawm hauv lub siab los. Tej no thiaj ua rau neeg qias tsis huv. Tiamsis qhov uas tsis ntxuav tes cia li noj mov tsis ua rau neeg qias tsis huv.” Yexus txawm tawm qhov ntawd mus rau hauv lub nroog Thailab thiab lub nroog Xaidoo li kav xyuam. Txawm muaj ib tug pojniam Khana‑as uas nyob tebchaws ntawd tawm tuaj qw hais tias, “Tus Tswv uas yog Davi li tub, thov khuvleej kuv lauj! Kuv tus ntxhais raug dab txom nyem kawg li.” Yexus tsis teb ib los li, mas cov thwjtim los thov Yexus hais tias, “Cia li ntiab tus pojniam ntawd khiav mus, rau qhov nws pheej qw raws peb qab.” Yexus teb tias, “Kuv raug txib mus kom txog Yixayee caj ces cov yaj uas ploj lawd.” Tiamsis tus pojniam ntawd los pe thov Yexus hais tias, “Tus Tswv, thov pab kuv lauj!” Yexus teb tias, “Tsis tsim nyog muab menyuam tej mov pov rau dev noj.” Tus pojniam ntawd thiaj hais tias, “Tus Tswv, tseeb tiag, tiamsis dev yeej tau noj tej mov uas poob saum tus tswv lub rooj los.” Yexus txawm teb nws tias, “Mentxhais 'e, koj txojkev ntseeg loj heev, cia muaj raws li koj ntshaw.” Ces nws tus ntxhais txawm zoo kiag tamsim ntawd. Yexus txawm tawm qhov ntawd mus taug ntug Hiavtxwv Kalilais thiab nce mus zaum saum lub pov roob. Muaj neeg coob coob tuaj cuag Yexus. Lawv coj tej neeg ceg tawv, neeg tuag tes tuag taw, neeg dig muag, neeg ruam thiab tej uas mob lwm yam ntau leej tuaj tso rau ntawm Yexus kotaw. Mas Yexus kho lawv zoo huvsi. Cov neeg ntawd thiaj phimhwj heev rau thaum lawv pom cov neeg ruam hais tau lus, cov uas tuag tes tuag taw zoo, cov neeg ceg tawv mus tau kev thiab cov dig muag pom kev lawm. Lawv thiaj qhuas cov Yixayee tus Vajtswv. Yexus hu nws cov thwjtim los thiab hais tias, “Kuv khuvleej cov neeg no, vim lawv nrog kuv nyob tau peb hnub thiab tsis muaj mov noj lawm. Kuv tsis xav tso lawv mus tshaib qaug zog zws ntshai tsam lawv ho tsaus muag tom tej kev.” Cov thwjtim hais rau Yexus tias, “Hauv ntuj nrag teb do no peb yuav nrhiav mov qhovtwg los txaus rau cov neeg coob npaum li no noj?” Yexus hais rau lawv tias, “Nej muaj tsawg lub ncuav?” Lawv teb tias, “Muaj xya lub thiab ob peb tus ntses me me.” Nws txawm hais kom cov neeg zaum rau hauv pem teb, thiab nws muab xya lub ncuav thiab cov ntses ntawd los ua Vajtswv tsaug mas muab ntais cev rau cov thwjtim, cov thwjtim muab faib rau cov neeg coob coob ntawd. Lawv sawvdaws noj tsau, mas tej uas noj tsis tag lawv khaws tau xya tawb puv nkaus. Cov uas noj zaum ntawd cov txivneej xwb muaj plaub txhiab leej tsis suav cov pojniam menyuam. Yexus tso cov neeg rov mus tag lawm nws txawm nce nkoj mus rau lub moos Makadas li kav xyuam. Cov Falixai thiab cov Xadukai tuaj sim Yexus thov kom nws ua ib yam txujci tseem ceeb tshwm saum ntuj los rau lawv pom. Yexus txawm teb lawv tias, “Thaum yuav tsaus ntuj nej hais tias, ‘Tagkis yuav tshav ntuj vim yog qab ntuj liab liab.’ Thaum sawv ntxov nej hais tias, ‘Hnub no yuav muaj nag xob nag cua vim yog qab ntuj liab thiab tsaus nti.’ Nej txawj saib lub ntuj thiaj paub tias yuav muaj dabtsi tshwm los, tiamsis tej txujci tseem ceeb ntsig txog tiam no nej ho tsis paub. Tiam neeg no phem thiab fav xeeb nrhiav ib yam txujci tseem ceeb, tiamsis yuav tsis muab dua txujci tseem ceeb rau lawv pom tsuas yog zaum txujci uas muaj rau Yauna xwb.” Ces Yexus txawm ncaim lawv mus lawm. Thaum cov thwjtim hla mus rau sab Hiavtxwv tim ub, lawv tsis nco qab coj ncuav mus. Yexus txawm hais rau lawv tias, “Nej yuav tsum ua tib zoo ceev faj cov Falixai thiab cov Xadukai cov keeb.” Cov thwjtim txawm sib tham hais tias, “Yog tim qhov uas peb tsis coj ncuav tuaj.” Yexus paub tej uas lawv tham ntawd, nws thiaj hais tias, “Nej cov uas kev ntseeg yau 'e, ua cas nej sib tham txog qhov uas tsis muaj ncuav? Nej tseem tsis tau nkag siab lov? Nej tsis nco tsib lub ncuav thiab tsib txhiab leej thiab nej khaws tau pes tsawg tawb lov? Nej tsis nco xya lub ncuav thiab plaub txhiab leej thiab nej khaws tau pes tsawg tawb lov? Ua cas nej tsis to taub tias kuv tsis tau hais txog tej ncuav? Cia li ceev faj cov Falixai thiab cov Xadukai cov keeb.” Lawv thiaj nkag siab tias tsis yog Yexus hais kom lawv ceev faj cov keeb ua ncuav, tiamsis yog hais kom ceev faj cov Falixai thiab cov Xadukai tej lus qhia. Thaum Yexus mus rau hauv lub moos Xixaleya Filipi li kav xyuam, nws txawm nug nws cov thwjtim tias, “Luag tej hais tias Neeg leej Tub yog leejtwg?” Lawv hais tias, “Qee leej hais tias yog Yauhas uas coj ua kevcai raus dej, qee leej hais tias yog Eliya, thiab dua lwm tus hais tias koj yog Yelemi lossis yog dua ib tug xibhwb cev Vajtswv lus.” Yexus hais rau lawv tias, “Nej nev nej hais tias kuv yog leejtwg?” Ximoos Petus teb tias, “Koj yog tus Khetos, yog Vajtswv uas muaj txojsia nyob leej tub.” Yexus thiaj hais rau Petus tias, “Yauna tus tub Ximoos 'e, koj tau koob hmoov, rau qhov tsis yog neeg uas muaj roj muaj ntshav qhia rau koj, tiamsis yog kuv leej Txiv uas nyob saum ntuj qhia rau koj. Kuv hais rau koj tias, koj yog Petus kuv yuav tsim tsa kuv pawg ntseeg rau saum lub txhib zeb no, thiab tub tuag teb lub zog yuav kov tsis yeej pawg ntseeg no. Kuv yuav muab tus yuam sij Ntuj Ceeb Tsheej rau koj. Koj txwv yam twg hauv lub ntiajteb yam ntawd kuj raug txwv saum ntuj, koj tso ncauj yam twg hauv lub ntiajteb yam ntawd kuj raug tso ncauj saum ntuj thiab.” Ces Yexus txawm txwv cov thwjtim kom tsis txhob qhia rau leejtwg paub tias nws yog tus Khetos. Txij thaum ntawd los Yexus txawm pib qhia rau nws cov thwjtim paub tias nws yuav tsum mus rau Yeluxalees thiab yuav raug cov kev txwj laus thiab cov pov thawj hlob thiab cov xibhwb qhia Vajtswv kevcai tsim txom thiab raug muab tua mas peb hnub nws yuav raug muab tsa ciaj sawv rov los. Ces Petus txawm coj Yexus mus rau ib cag pib txwv nws hais tias, “Tus Tswv, thov kom tsis txhob muaj li ntawd. Koj yeej yuav tsis raug li ntawd.” Yexus txawm tig hais rau Petus tias, “Xatas, koj cia li khiav rau tom kuv qub qab. Koj ua chaw rau kuv dawm rau qhov koj xav li neeg xwb tsis xav li Vajtswv.” Thaum ntawd Yexus hais rau nws cov thwjtim tias, “Yog leejtwg xav raws kuv qab mus, cia tus ntawd tswj nws tus kheej thiab kwv nws tus khaublig ntoo raws kuv qab. Vim tias tus uas xav cawm tau nws txojsia yuav piam txojsia, tiamsis tus uas tso nws txojsia tseg vim yog saib rau kuv, mas yuav nrhiav tau txojsia. Yog leejtwg tau tag nrho lub ntiajteb huvsi tiamsis nws txojsia tu lawm, tus ntawd yuav tau qabhau dabtsi? Neeg yuav muab dabtsi pauv tau txojsia rov los? Neeg leej Tub yuav nrog leej Txiv lub hwjchim ci ntsa iab los thiab nrog nws cov tubtxib saum ntuj ua ke los mas nws yuav ntxiv rau txhua tus raws li tej uas lawv ua lawd. Kuv hais tseeb rau nej tias, cov uas sawv ntawm no muaj qee leej yuav tsis tau sim txojkev tuag ces yuav xub pom Neeg leej Tub los ua vajntxwv kav.” Dhau rau hnub tom qab Yexus txawm coj Petus thiab Yakaunpau thiab Yakaunpau tus kwv Yauhas ncaim lwm tus nce mus rau saum lub roob siab. Yexus lub cev txawm hloov kiag tab meeg lawv, mas nws lub ntsej muag ci yam li lub hnub thiab nws cev tsoos tsho kuj ci dawb paug li qhov kaj. Ces Mauxe thiab Eliya txawm tshwm nrog Yexus sib tham rau lawv pom. Petus txawm hais rau Yexus tias, “Tus Tswv, peb nyob ntawm no kuj zoo. Yog koj yeem, kuv yuav ua peb lub tsev pheeb suab rau ntawm no, ua ib lub rau koj, ib lub rau Mauxe thiab ib lub rau Eliya.” Thaum Petus tseem tabtom hais li ntawd txawm muaj ib tauv huab ci dawb paug los laum nkaus lawv, thiab muaj ib lub suab hais hauv tauv huab tuaj hais tias, “Tus no yog kuv tus tub uas kuv hlub, kuv txaus siab rau nws heev. Nej cia li mloog nws hais.” Thaum cov thwjtim hnov li ntawd lawv txawm khwb nkaus rau hauv pem teb ntshai kawg li. Yexus thiaj li los kov lawv thiab hais tias, “Cia li sawv tsees, tsis txhob ntshai.” Thaum lawv tsa muag ntsia tsis pom leejtwg li tsuas yog pom Yexus tib leeg xwb. Thaum lawv nqes pem roob los, Yexus txwv lawv tias, “Tej uas nej pom ntawd tsis txhob hais rau leejtwg mus txog thaum Neeg leej Tub raug muab tsa sawv hauv qhov tuag rov los tso.” Cov thwjtim kuj nug Yexus tias, “Yog li ntawd, ua cas cov xibhwb qhia Vajtswv kevcai hais tias Eliya yuav xub los ua ntej?” Yexus teb tias, “Eliya yeej yuav los thiab yuav ua kom txhua yam rov zoo li qub. Tiamsis kuv hais rau nej tias Eliya twb los lawm los neeg tsis paub nws, lawv ua rau nws raws li lawv lub siab nyiam. Neeg leej Tub yuav raug kev tsim txom ntawm lawv txhais tes ib yam li ntawd.” Cov thwjtim thiaj nkag siab tias qhov uas Yexus hais rau lawv ntawd yog hais txog Yauhas uas coj ua kevcai raus dej. Thaum lawv los txog ntawm cov neeg coob coob, muaj ib tug yawg los txhos caug ntua rau ntawm Yexus hais tias, “Tus Tswv, thov khuvleej kuv tus tub, vim tias nws qaug dab peg raug txom nyem heev. Nws pheej poob rau hauv qhov cub thiab poob dej. Kuv twb coj nws mus cuag koj cov thwjtim, tiamsis lawv kho tsis tau nws zoo.” Yexus teb tias, “Au tiam neeg uas tsis muaj kev ntseeg tsuas muaj kev phem kev qias xwb, kuv yuav nrog nej nyob ntev li cas? Kuv yuav ua siab ntev thev nej mus txog thaum twg? Cia li coj tus tub ntawd los rau kuv ntawm no.” Yexus txawm hais tawv rau tus dab ntawd ces dab txawm tawm plaws hauv tus tub ntawd lawm, tus tub thiaj zoo kiag tamsid. Dhau ntawd cov thwjtim txawm los cuag Yexus twjywm thiab hais tias, “Ua cas peb ntiab tsis tau tus dab ntawd tawm?” Yexus hais rau lawv tias, “Twb yog vim nej kev ntseeg yau heev. Kuv hais tseeb rau nej tias, yog nej muaj kev ntseeg luaj li ib lub noob me me, nej yuav hais rau lub roob no tias ‘Cia li txav ntawm no mus lawm tom ub,’ mas lub roob yeej yuav txav mus. Tsis muaj ib yam dabtsi uas nej yuav ua tsis tau.” Thaum cov thwjtim tuaj txoos ua ke rau hauv lub xeev Kalilais, Yexus txawm hais rau lawv tias, “Neeg leej Tub yuav raug muab cob rau hauv neeg txhais tes, thiab lawv yuav muab nws tua pov tseg, mas peb hnub nws yuav raug muab tsa ciaj sawv rov los.” Cov thwjtim thiaj ntxhov siab heev kawg. Thaum lawv los txog ntawm lub moos Khapena‑u lawm, cov uas sau ib nrab sekhee them se rau lub tuam tsev txawm tuaj cuag Petus thiab hais tias, “Koj tus xibhwb them se los tsis them?” Petus teb tias, “Them hos.” Thaum Petus nkag mus rau hauv tsev Yexus hais rau nws ua ntej tias, “Ximoos 'e, koj xav li cas? Tej vajntxwv hauv ntiajteb sau se neeg se liaj teb ntawm leejtwg? Sau ntawm nws cov tub lossis sau ntawm lwm tus?” Petus teb tias, “Sau ntawm lwm tus.” Yexus txawm hais rau nws tias, “Yog li ntawd cov tub tsis txog them. Tiamsis tsis txhob ua rau lawv ntsawv siab, koj cia li mus nuv ntses ntawm hiavtxwv. Thawj tug ntses uas koj nuv tau, cia li muab lub qhov ncauj rua mas koj yuav pom ib lub sekhee. Cia li coj lub nyiaj ntawd mus them se ua kuv thiab koj li feem.” Thaum ntawd cov thwjtim los hais rau Yexus tias, “Leejtwg ua tus loj dua ntais saum ntuj ceeb tsheej?” Yexus hu ib tug menyuam yaus los kom sawv hauv lawv nruab nrab, thiab hais tias, “Kuv hais tseeb rau nej tias, yog nej tsis ntxeev siab thiab ua zoo li menyuam yaus, nej yuav tsis tau nkag rau hauv ntuj ceeb tsheej kiag li. Yog li ntawd leejtwg txo nws lub siab yam li tus menyuam yaus no, tus ntawd yuav tau ua tus loj dua ntais rau hauv ntuj ceeb tsheej. “Leejtwg lees yuav ib tug menyuam yaus zoo li no vim yog saib rau kuv lub npe, kuj yog tus ntawd lees yuav kuv. Tiamsis yog leejtwg ua rau cov menyuam yaus uas ntseeg kuv no ib tug yuam kev ua txhaum, mas muab ib txhib zeb loj khi rau tus ntawd caj dab thiab muab pov rau hauv hiavtxwv tob kuj zoo dua. Lub ntiajteb yuav raug txom nyem lauj vim tim tej uas ua rau neeg ua txhaum. Yeej yuav tsum muaj tej yam ua kom ua txhaum, tiamsis tus uas ua rau lwm tus ua txhaum yuav raug txom nyem lauj! Yog koj txhais tes lossis koj txhais kotaw ua rau koj ua txhaum, cia li muab txiav pov tseg. Koj txawm nqws tes nqws taw los koj tau txojsia kuj zoo dua koj muaj ob sab tes ob sab taw es raug muab pov rau hauv qhov hluavtaws mus ib txhis. Yog koj lub qhov muag ua rau koj ua txhaum, cia li muab kaus pov tseg. Koj muaj ib sab qhov muag xwb los tau txojsia kuj zoo dua koj muaj ob sab qhov muag es raug muab pov rau hauv ntuj tawg kub.” “Cia li ceev faj zoo tsis txhob saib tsis taus cov menyuam yaus no ib tug twg, rau qhov kuv hais rau nej tias, cov tubtxib saum ntuj uas tsom kwm lawv niaj hnub nyob ntawm kuv leej Txiv uas nyob saum ntuj lub xubntiag. “Nej xav li cas? Yog ib tug yawg muaj ib puas tus yaj mas ib tug yuam kev ploj lawm, nws yuav tsis tseg cuaj caum cuaj tug yaj rau pem roob es mus nrhiav tus uas yuam kev ntawd lov? Yog nws nrhiav tau, kuv qhia tseeb rau nej tias, nws yuav zoo siab xyiv fab rau tus ntawd heev dua cuaj caum cuaj tug uas tsis yuam kev. Ib yam nkaus li no kuv leej Txiv uas nyob saum ntuj tsis xav cia cov menyuam yaus no ib tug twg puam tsuaj li. “Yog koj ib tug kwvtij ua txhaum rau koj cia li mus qhia nws qhov txhaum rau nws, neb ob leeg sib hais xwb. Yog nws mloog koj hais, koj yuav tau koj tus kwvtij rov qab los. Yog nws tsis mloog koj hais, koj cia li coj ib leeg ob leeg nrog koj mus thiab, xwv thiaj muaj ob peb tus timkhawv pom tias txhua lo lus muaj tseeb. Yog nws tsis yeem mloog lawv cov ntawd hais, cia li mus qhia rau pawg ntseeg. Yog nws tsis yeem mloog pawg ntseeg hais thiab, koj cia li suav tias nws zoo ib yam li lwm haiv neeg lossis yog ib tug neeg sau se. “Kuv qhia tseeb rau nej tias, nej txwv yam twg hauv lub ntiajteb yam ntawd kuj raug txwv saum ntuj, koj tso ncauj yam twg hauv lub ntiajteb yam ntawd kuj raug tso ncauj saum ntuj thiab. Thiab dua ib yam, kuv hais rau nej tias, yog nej ob leeg uas nyob hauv ntiajteb hais hum koom siab thov ib yam dabtsi, kuv leej Txiv uas nyob saum ntuj yuav pub yam ntawd rau nej. Muaj ob leeg peb leeg tuaj ua ke hauv kuv lub npe, kuv nyob hauv lawv nruab nrab qhov ntawd.” Thaum ntawd Petus txawm txav los hais rau Yexus tias, “Tus Tswv, yog kuv tus kwvtij pheej ua txhaum rau kuv, kuv yuav zam txim rau nws pes tsawg zaus? Txog xya zaus lov?” Yexus hais rau nws tias, “Kuv tsis yog hais tias xya zaus xwb, tiamsis yog xya tus xya caum zaum. Vim li no Ntuj Ceeb Tsheej piv ib yam nkaus li ib tug vajntxwv uas xam nuj nqes rau nws cov qhev. Thaum nws pib xam, lawv txawm coj ib tug qhev uas tshuav ib vam tala nyiaj los rau nws. Vim tus qhev ntawd them tsis tau ces nws tus lospav txawm hais kom muab nws thiab nws pojniam menyuam thiab txhua yam uas nws muaj muag huvsi coj los them nuj nqes. Tus qhev ntawd txawm khwb nkaus pe thov nws hais tias, ‘Yawg hlob, thov ua siab ntev es kuv yuav them huvsi.’ Tus lospav khuvleej thiaj tso nws mus thiab zam tej nuj nqes ntawd. Thaum tus qhev ntawd tawm mus nws ntsib ib tug qhev uas yog nws tib pab uas tshuav nws ib puas denalia ces nws txawm ntsiab nkaus tus ntawd nyem caj dab hais tias, ‘Cia li them tej uas koj tshuav kuv.’ Tus qhev ntawd txawm khwb nkaus thov hais tias, ‘Thov ua siab ntev es kuv yuav them.’ Tiamsis nws tsis yeem li, txawm coj tus qhev ntawd mus kaw txog thaum them nqe tag. Thaum nws tib pab tub qhe ntawd pom tej xwm txheej ntawd, lawv nyuaj siab heev, thiaj mus piav txhua yam xwm txheej ntawd rau lawv tus lospav mloog. Tus lospav thiaj hu tus tub qhe ntawd los thiab hais rau nws tias, ‘Koj tus niag qhev phem, kuv twb zam koj tej nuj nqes huvsi vim koj thov kuv. Tsis tsim nyog koj khuvleej koj tib pab tub qhe ib yam li kuv tau khuvleej koj lawm lov?’ Mas tus lospav npau taws txawm muab tus qhev ntawd cob rau cov ceev xwm tsim txom mus txog thaum them nqe tag huvsi. Kuv leej Txiv Ntuj yuav ua ib yam li ntawd rau nej txhua tus, yog tias nej tsis ua lub siab dawb paug zam txim rau nej tej kwvtij.” Thaum Yexus hais tej lus no tag lawm, nws txawm tawm ntawm Kalilais mus rau hauv Yudia lub xeev uas nyob dej Yaladee sab tid, thiab muaj neeg coob coob raws nws qab mus, mas nws kho lawv tej mob zoo huvsi qhov ntawd. Cov Falixai txawm txav los sim Yexus nug hais tias, “Yog tus txiv twg muab nws tus pojniam nrauj tsis hais yog tim txoj twg kuj xij mas raug txoj kevcai los tsis raug?” Yexus teb tias, “Nej tsis tau nyeem lov? Tus uas tsim neeg chiv keeb thaum ub nws tsim kom muaj txivneej thiab pojniam, thiab hais tias, ‘Vim li no tus txivneej yuav ncaim ntawm nws niam nws txiv thiab nrog nws tus pojniam tsheej xeeb ua ke mas ob tug koom ua ib lub cev.’ Ob tug thiaj tsis ua ob lub cev tiamsis koom ua ib lub cev xwb. Vim li no yam uas Vajtswv muab lo tsheej xeeb ua ke lawm, neeg tsis txhob muab ua kom ncaim.” Lawv hais rau Yexus tias, “Yog li ntawd ua cas Mauxe hais kom ua ntawv nrauj cev rau tus pojniam thiab muab nws nrauj tau?” Yexus hais rau lawv tias, “Mauxe kheev kom nej nrauj pojniam tau vim yog nej lub siab tawv, tiamsis chiv keeb thaum ub yeej tsis muaj li ntawd. Kuv hais rau nej tias, leejtwg nrauj pojniam tsis yog tim qhov uas deev hluas nraug es mus yuav dua pojniam tshiab, kuj yog ua txhaum kev nkauj nraug.” Cov thwjtim hais rau nws tias, “Yog ua txij nkawm zoo li ntawd, ces tsis txhob sib yuav kuj zoo dua.” Yexus hais rau lawv tias, “Tsis yog txhua tus txais yuav tej lus no, tsuas yog tus uas Vajtswv pub kom ua tau raws li thiaj txais yuav xwb. Vim tias qee leej yeej ua nraug sam txij thaum yug los, qee leej yog neeg muab sam thiab qee leej ua nraug sam vim yog nws xam pom ntuj ceeb tsheej. Leejtwg txais yuav tau tej lus no kuj txais yuav mus.” Thaum ntawd muaj neeg coj cov menyuam yaus tuaj cuag Yexus xav kom nws tsa tes npuab thiab thov Vajtswv pab. Tiamsis cov thwjtim txwv lawv. Yexus txawm hais tias, “Cia cov menyuam yaus los cuag kuv, tsis txhob tav lawv, rau qhov Ntuj Ceeb Tsheej yog cov uas zoo li cov menyuam yaus no tug.” Thaum nws tsa tes npuab cov menyuam ntawd tag lawm nws txawm tawm qhov ntawd mus. Muaj ib tug tuaj hais rau Yexus tias, “Xibhwb, kuv yuav tsum ua yam zoo twg kuv thiaj tau txojsia ib txhis tsis kawg?” Yexus hais rau nws tias, “Koj nug kuv txog yam uas zoo ua dabtsi? Tus uas zoo tsuas muaj ib tug xwb. Yog koj xav tau txojsia, cia li tuav rawv tej kevcai.” Tus ntawd hais rau Yexus tias, “Yog nqe kevcai twg?” Yexus hais tias, “Tsis txhob tua neeg, tsis txhob deev luag poj luag txiv, tsis txhob ua tub sab, tsis txhob ua cuav timkhawv, koj yuav tsum hwm koj niam koj txiv thiab koj yuav tsum hlub kwvtij zej zog ib yam li koj hlub koj tus kheej.” Tus hluas ntawd hais rau Yexus tias, “Tej nqes kod kuv twb coj txhua yam lawm, kuv tseem tu ncua dabtsi thiab?” Yexus hais rau nws tias, “Yog koj xav ua tus uas zoo kawg nkaus, cia li mus muab koj tej qhov txhia chaw muag es muab faib rau cov neeg pluag, koj thiaj li muaj nyiaj txiag saum ntuj ceeb tsheej, thiab cia li los raws kuv qab.” Thaum tus hluas ntawd hnov tej lus no nws txawm tawm mus nyuaj siab kawg vim nws muaj cuab txhiaj cuab tam ntau heev. Yexus hais rau nws cov thwjtim tias, “Kuv hais tseeb rau nej tias, tus nplua nuj ceeblaj nkag tau rau hauv ntuj ceeb tsheej. Kuv hais rau nej tias, ib tug ntxhuav nkag lub qhov koob yoojyim dua tus nplua nuj nkag rau hauv Vajtswv lub tebchaws.” Thaum cov thwjtim hnov li ntawd kuj xav tsis thoob thiaj hais tias, “Yog li ntawd, leejtwg yuav dim tau?” Yexus tsa muag ntsia rau lawv mas hais rau lawv tias, “Neeg ua tsis tau yam no, tiamsis Vajtswv ua tau txhua yam huvsi.” Mas Petus teb Yexus tias, “Peb twb tso txhua yam tseg raws koj tuaj. Peb yuav tau dabtsi?” Yexus hais rau lawv tias, “Kuv hais tseeb rau nej tias, thaum Neeg leej Tub zaum saum nws lub zwm txwv uas ci ntsa iab hauv lub ntiajteb tshiab, nej cov uas raws kuv qab yuav tau zaum saum kaum ob lub zwm txwv txiav txim rau kaum ob xeem Yixayee. Txhua tus uas tso vaj tse kwvtij nkauj muam niam txiv menyuam liaj teb tseg vim yog saib rau kuv lub npe, mas yuav tau qas pua npaug thiab yuav tau txojsia ntev mus ib txhis. Tiamsis muaj ntau leej uas ua thawj yuav rov ua tus tom tw, thiab tus tom tw yuav tau ua tus thawj.” “Ntuj Ceeb Tsheej piv ib yam li tus tswv teb sawv ntxov mus ntiav zog tu nws lub vaj txiv hmab. Thaum hais hum ib hnub ib denalia rau cov tub zog lawm nws txawm tso lawv mus ua haujlwm hauv lub vaj txiv hmab. Thaum kwvlam cuaj teev nws pom dua ib co neeg nyob dawb tom tshav puam, nws txawm hais rau lawv tias, ‘Nej cia li mus ua haujlwm hauv lub vaj txiv hmab thiab, kuv yuav muab nqe zog kom tsim nyog rau nej.’ Ces lawv txawm mus. Thaum kwvlam tav su thiab thaum hnub qaij peb teev nws kuj ua ib yam li thawj zaug. Thaum kwvlam hnub qaij tsib teev nws mus pom dua ib co nyob dawb ces nws txawm hais rau lawv tias, ‘Nej nyob dawb ntawm no ib hnub tsaus ntuj ua dabtsi?’ Lawv hais rau nws tias, ‘Vim tsis muaj leejtwg ntiav peb.’ Nws txawm hais rau lawv tias, ‘Nej cia li mus ua haujlwm hauv lub vaj txiv hmab thiab.’ “Thaum tsaus ntuj tus tswv vaj hais rau tus uas saib xyuas tub zog tias, ‘Hu cov tub zog los thiab muab nqe zog rau lawv, xub muab rau cov uas tuaj tom qab kawg li muab zuj zus rau cov uas xub tuaj.’ Thaum cov uas tuaj ua haujlwm kwvlam hnub qaij tsib teev los mas lawv tau nqe zog ib leeg ib denalia. Thaum cov uas xub tuaj los mas lawv xav hais tias lawv yuav tau ntau dua ntawd, tiamsis kuj tau ib leeg ib denalia xwb. Thaum lawv tau lawd lawv txawm yws tus tswv teb hais tias, ‘Cov uas tuaj tom qab kawg no tau ua haujlwm ib teev xwb los koj saib lawv sib luag li peb cov uas ua haujlwm khwv tiv tshav ntuj ib hnub li.’ Nws teb cov neeg ntawd ib tug tias, ‘Kwvluag 'e, tsis yog kuv ua tsis ncaj rau koj. Koj yeej nrog kuv hais hum tias ib hnub ib denalia los tsis yog? Cia li txais koj tus nqe zog mus lauj. Kuv yeej xav muab rau tus uas tuaj tom qab kawg ib yam li muab rau koj. Kuv tsis muaj cai siv kuv li nyiaj txiag raws li kuv xav lov? Ua cas koj yuav khib qhov uas kuv ua siab dav?’ Ib yam li ntawd tus tom tw yuav rov ua tus thawj, thiab tus thawj yuav rov ua tus tom tw.” Thaum Yexus tabtom taug kev mus pem Yeluxalees, nws coj nws kaum ob tug thwjtim los hais twjywm rau lawv tias, “Saib nawj, peb tabtom mus nram Yeluxalees, mas Neeg leej Tub yuav raug muab cob rau cov pov thawj hlob thiab cov xibhwb qhia Vajtswv kevcai, mas lawv yuav txiav txim tuag rau nws, thiab muab nws cob rau lwm haiv neeg thuam luag thiab nplawm thiab muab teem rau saum khaublig ntoo, mas peb hnub nws yuav raug muab tsa ciaj sawv rov los.” Thaum ntawd Xenpedi tus pojniam coj nws ob tug tub tuaj cuag Yexus thiab pe ntawm Yexus xubntiag thov ib yam ntawm Yexus. Yexus thiaj hais rau nws tias, “Koj xav yuav dabtsi?” Nws teb Yexus tias, “Thov koj tso cai rau kuv ob tug tub no ib tug zaum ntawm koj sab xis ib tug nyob ntawm koj sab laug rau hauv koj lub tebchaws.” Tiamsis Yexus teb tias, “Neb tsis paub tias neb thov dabtsi. Lub khob uas kuv yuav haus, neb haus tau lov?” Ob tug hais rau Yexus tias, “Tau los maj.” Yexus hais rau ob tug tias, “Neb yeej yuav tau haus kuv lub khob, tiamsis qhov uas zaum ntawm kuv sab xis thiab ntawm kuv sab laug kuv tsis yog tus uas pub tau, tiamsis kuv leej Txiv npaj cia rau leejtwg, tus ntawd thiaj tau xwb.” Thaum kaum tus thwjtim hnov li ntawd lawv kuj chim rau ob tug kwvtij. Yexus hu lawv sawvdaws los hais rau lawv tias, “Nej yeej paub tias lwm haiv neeg cov uas ua thawj yeej kav rawv cov pejxeem, thiab cov uas ua hlob yeej muaj hwjchim tswjhwm lawv. Nej cov yuav tsis thooj li ntawd. Nej cov leejtwg xav ua tus hlob tus ntawd yuav tsum zoo siab ua num rau nej, thiab nej cov leejtwg xav ua tus thawj, tus ntawd yuav tsum ua nej tus qhev, ib yam li Neeg leej Tub tsis yog los rau leejtwg tu, tiamsis nws los tu lawv, thiab pub nws txojsia ua nqe txhiv neeg coob coob.” Thaum lawv tawm hauv lub moos Yelikhau mus muaj neeg coob coob raws lawv qab mus. Mas muaj ob tug yawg dig muag zaum ntawm ntug kev. Thaum hnov tias Yexus taug kev tuaj ob tug txawm qw hais tias, “Tus Tswv uas yog Davi tus tub 'e, thov khuvleej wb lauj!” Cov neeg ntawd txawm txiv ob tug kom nyob twjywm, los ob tug yimhuab qw hais tias, “Tus Tswv uas yog Davi tus tub 'e, thov khuvleej wb lauj!” Yexus txawm nres nkaus hu ob tug los hais tias, “Neb xav kom kuv ua dabtsi rau neb?” Ob tug hais rau nws tias, “Tus Tswv, thov qheb wb li qhov muag kom pom kev.” Yexus khuvleej ob tug thiaj kov ob tug qhov muag, ces tamsim ntawd ob tug txawm rov pom kev thiab raws Yexus qab mus. Thaum lawv tuaj ze lub nroog Yeluxalees thiab tuaj txog lub zos Npefake ntawm lub roob Txiv Aulib, Yexus txawm txib ob tug thwjtim mus, thiab hais rau ob tug tias, “Neb cia li mus rau lub zos uas nyob tom hauv ntej, mas tamsim ntawd neb yuav pom ib tug nees luav khi cia thiab muaj ib tug menyuam nrog. Cia li daws cab los rau kuv. Yog leejtwg hais li cas rau neb, neb cia li hais tias, ‘Tus tswv cheem tsum siv,’ ces luag yuav tso plhuav rau neb coj los tamsim ntawd.” Tej no tshwm los kom thiaj ua tiav raws li tej lus uas tus xibhwb cev lus hais tias, “Cia li hais rau Xi‑oo tus ntxhais hais tias, ‘Saib maj, koj tus vajntxwv tabtom los cuag koj. Nws txo nws lub hwjchim thiab caij ib tug nees luav los, yog caij menyuam nees luav.’ ” Ob tug thwjtim ntawd txawm mus ua raws li Yexus hais, mas cab tus maum nees luav thiab tus menyuam los, thiab muab ob tug tej tsho ntev pua saum ob tug nees luav nrob qaum mas Yexus li caij. Tej neeg coob coob muab lawv tej tsho ntev pua txojkev thiab ib txhia txiav tej ceg ntoo los pua raws txojkev. Cov neeg uas mus ua nws ntej thiab cov uas raws nws qab kuj qw hais tias, “Hauxana rau Davi tus tub. Tus uas tuaj hauv Yawmsaub lub npe tau nyob kaj siab lug.” “Hauxana rau saum ntuj uas siab kawg nkaus.” Thaum Yexus nkag rau hauv Yeluxalees lawm, tag nrho lub nroog sawvdaws ras zom zaws sib nug tias, “Tus no yog leejtwg?” Tej neeg teb tias, “Yog Yexus uas cev Vajtswv lus uas tuaj hauv lub moos Naxale xeev Kalilais tuaj.” Yexus txawm mus rau hauv Vajtswv lub tuam tsev mas ntiab cov neeg uas ua lag ua luam hauv lub tuam tsev khiav, thiab nws muab cov uas pauv nyiaj tej rooj thiab cov uas muag nquab nyeg tej rooj zaum ntxeev pes kiag tseg. Nws hais rau lawv tias, “Twb muaj lus sau cia hais tias, ‘Kuv lub tuam tsev yuav hu tias lub tsev uas thov Vajtswv,’ tiamsis nej muab ua qhov rau tub sab nkaum.” Neeg dig muag thiab neeg ceg tawv tuaj cuag Yexus hauv lub tuam tsev, mas Yexus kho lawv zoo huvsi. Thaum cov pov thawj hlob thiab cov xibhwb qhia Vajtswv kevcai pom tej haujlwm phimhwj uas Yexus ua thiab pom cov menyuam yaus qw hauv lub tuam tsev hais tias, “Hauxana rau Davi tus tub,” mas lawv chim heev. Lawv thiaj hais rau nws tias, “Koj hnov tej uas cov menyuam yaus qw los tsis hnov?” Yexus hais rau lawv tias, “Hnov thiab. Nej tsis tau txeev nyeem lov qhov uas hais tias, “ ‘Koj tau ua rau tej lus qhuas tawm hauv cov menyuam yaus thiab cov menyuam uas tsis tau cais mis lub qhov ncauj los? ’ ” Yexus tawm hauv lub nroog ncaim lawv mus so rau hauv lub zos Npethani. Tagkis tom qab thaum Yexus rov qab mus rau lub nroog Yeluxalees nws tshaib plab. Nws pom ib tsob txiv cev ntawm ntug kev. Thaum nws mus txog tsis pom muaj ib lub txiv li tsuas muaj nplooj xwb. Nws txawm hais rau tsob txiv cev ntawd tias, “Tsis txhob txi txiv dua li lawm lauj!” Tamsim ntawd tsob txiv cev txawm tuag tshav qhuav lawm. Thaum cov thwjtim pom li ntawd lawv kuj phimhwj hais tias, “Ua cas tsob txiv cev yuav tuag tshav qhuav tamsid?” Yexus teb lawv tias, “Kuv hais tseeb rau nej tias, yog nej ntseeg tiag thiab lub siab tsis ywj fab ywj fwj, tsis yog nej yuav ua tau ib yam li kuv ua rau tsob txiv cev no xwb, nej yuav hais rau lub roob no tias, ‘Cia li rho kiag ntab plaws rau hauv hiavtxwv,’ los yuav muaj li ntawd. Yog nej ntseeg tiag mas nej yeej yuav tau txhua yam uas nej thov.” Thaum nws nkag mus rau hauv lub tuam tsev, cov pov thawj hlob thiab cov kev txwj laus tuaj cuag nws rau thaum nws tabtom qhuab qhia thiab hais tias, “Koj muaj hwjchim dabtsi thiaj ua tau tej no thiab leejtwg muab lub hwjchim no rau koj?” Yexus teb lawv tias, “Kuv yuav nug nej ib los thiab. Yog nej teb tau, kuv li qhia rau nej tias kuv muaj hwjchim dabtsi thiaj ua tau tej no. Txoj kevcai raus dej uas Yauhas ua ntawd, los qhovtwg los? Los saum ntuj los lossis los ntawm neeg los?” Lawv txawm sablaj tias, “Yog peb hais tias, ‘Los saum ntuj los,’ nws yuav hais rau peb tias, ‘Yog li ntawd, ua cas nej tsis ntseeg Yauhas?’ Yog peb hais tias, ‘Los ntawm neeg los,’ peb kuj ntshai cov pejxeem, rau qhov lawv sawvdaws suav tias Yauhas yog ib tug xibhwb cev Vajtswv lus.” Lawv txawm teb Yexus tias, “Peb tsis paub.” Yexus thiaj hais rau lawv tias, “Kuv kuj tsis qhia rau nej tias kuv muaj hwjchim dabtsi thiaj ua tau tej no. “Nej xav li cas? Ib tug yawg muaj ob tug tub. Leej txiv mus hais rau thawj tug hais tias, ‘Tub 'e, hnub no cia li mus ua haujlwm hauv lub vaj txiv hmab.’ Tus tub ntawd teb tias, ‘Kuv tsis mus,’ tiamsis dhau ntawd nws ntxeev dua siab mas ho mus ua lawm. Leej txiv mus hais rau tus tub uas ob hais ib yam nkaus. Tus tub ntawd teb tias, ‘Txiv, kuv yuav mus,’ tiamsis ho tsis mus. Ob tug tub no tus twg ua raws li leej txiv lub siab?” Lawv hais tias, “Yog thawj tug.” Yexus hais rau lawv tias, “Kuv hais tseeb rau nej tias, cov neeg sau se thiab cov poj muag cev xub nkag rau hauv Vajtswv lub tebchaws ua nej ntej. Rau qhov Yauhas twb tuaj qhia txojkev ncaj ncees rau nej, los nej tsis ntseeg nws, tiamsis cov uas sau se thiab cov poj muag cev twb ntseeg. Txawm yog nej twb pom lawm los nej kuj tsis ntxeev dua siab ntseeg nws. “Cia li mloog dua ib zaj piv lus. Muaj ib tug tsiv teb cog tau ib vaj txiv hmab thiab xov laj kab thiab khawb qhov tsuam kua txiv hmab thiab ua ib lub tsev zov, thiab muab tso rau ib cov tu faib txiv ces txawm mus lwm tebchaws lawm. Thaum ze lub caij de txiv, nws txib nws cov tub qhe mus cuag cov uas tu lub vaj ntawd yuav sau tej txiv uas yog nws li feem. Cov uas tu lub vaj txawm muab cov tub qhe ntawd ntes muab ib tug ntaus, muab ib tug tua pov tseg thiab muab pob zeb ntaus dua ib tug. Mas tus tswv vaj rov tso dua ib co tub qhe coob dua thawj zaug mus, los cov uas tu lub vaj kuj ua ib yam nkaus li ntawd rau lawv. Zaum kawg nws tso nws tus tub mus hais tias, ‘Nyaj lawv yuav hwm kuv tus tub.’ Thaum cov uas tu lub vaj pom tus tswv tus tub tuaj lawv txawm sib hais tias, ‘Tus no yog tus uas saws nws qub txeeg qub teg. Peb cia li muab nws tua thiab txeeb kiag nws qub txeeg qub teg.’ Lawv txawm muab nws ntes pov rau nraum ntug vaj thiab muab nws tua pov tseg. Yog li no thaum tus tswv vaj los, nws yuav ua li cas rau cov uas tu lub vaj ntawd?” Lawv hais rau Yexus tias, “Nws yuav muab cov neeg phem ntawd tua kom puam tsuaj tag thiab yuav muab lub vaj txiv hmab rau lwm cov tu uas yuav faib tej txiv rau nws raws li lub caij.” Yexus hais rau lawv tias, “Nej tsis tau nyeem hauv Vajtswv phau ntawv lov? Qhov uas hais tias, “ ‘Lub pob zeb uas cov Kws ua tsev muab xyeeb tseg lawm twb muab los teeb ua lub thawj rau ntawm kaum tsev lawm. Tej no yog tus Tswv ua, yog yam phimhwj uas peb qhov muag pom.’ “Vim li no kuv hais rau nej tias, Vajtswv lub tebchaws yuav raug muab rho ntawm nej mus pub rau ib haiv neeg uas txi txiv phim lub tebchaws ntawd. [Leejtwg ntog mus tsiam lub pob zeb no tus ntawd yuav tawg ua tej dwb daim, lub pob zeb poob los tsuam leejtwg tus ntawd yuav ntsoog tag.]” Thaum cov pov thawj hlob thiab cov Falixai hnov zaj paj lug no, lawv kuj paub tias Yexus hais raug lawv. Lawv nrhiav kev ntes Yexus, tiamsis lawv ntshai cov pejxeem, rau qhov cov pejxeem ntseeg tias Yexus yog ib tug xibhwb cev Vajtswv lus. Yexus hais dua piv lus rau lawv tias, “Ntuj Ceeb Tsheej piv ib yam li ib tug vajntxwv uas npaj rooj tshoob rau nws tus tub, mas txib nws cov qhev mus hu cov qhua uas caw tuaj noj tshoob, tiamsis lawv tsis kam tuaj. Nws rov txib dua ib co tub qhe mus hais tias, ‘Cia li hais rau cov uas twb caw ntawd tias, Kuv twb npaj nqaij qhauv thiab kuv twb tua tej nyuj thiab tej menyuam nyuj uas hwv tiav tag lawm, txhua yam twb npaj txhij lawm. Nej cia li tuaj noj tshoob lauj!’ Tiamsis lawv tsis quav ntsej li, ib tug mus ua liaj ua teb, ib tug mus ua lag ua luam, dua li cov tseem ua phem rau nws cov qhev thiab muab tua pov tseg. Vajntxwv npau taws heev nws thiaj tso nws cov tub rog mus ua kom cov uas tua neeg ntawd puam tsuaj thiab muab lawv lub moos hlawv pov tseg. Nws hais rau nws cov tub qhe tias, ‘Rooj tshoob npaj txhij lawm, tiamsis cov uas caw ntawd tsis tsim nyog tuaj noj. Vim li no cia li tawm mus tom tej kev tshuam ntsib leejtwg kuj hu tuaj noj tshoob.’ Cov tub qhe ntawd thiaj tawm mus tom tej kev thiab hu txhua tus uas lawv ntsib tsis hais tus zoo tus phem, thiaj muaj qhua puv nkaus chav tsev ua tshoob. “Thaum tus vajntxwv ntawd los xyuas cov qhua, nws pom ib tug tsis hnav tsoos tsho ua tshoob, ces txawm hais rau tus ntawd tias, ‘Kwvluag 'e, ua cas koj tuaj ntawm no tsis hnav tsoos tsho ua tshoob?’ Tus ntawd hais tsis taus ib los li. Vajntxwv hais rau cov tub qhe tias, ‘Cia li muab tus no khi tes khi taw laim rau sab nraud uas tsaus ntuj nti, qhov ntawd yuav muaj kev quaj tom hniav qas qawv.’ Cov uas caw hu muaj coob, tiamsis cov uas xaiv tau muaj tsawg.” Thaum ntawd cov Falixai mus sablaj saib yuav nyas Yexus tej lus li cas. Lawv txawm txib lawv cov thwjtim thiab Helauj cov mus thom Yexus hais tias, “Xibhwb, peb paub tias koj yog ib tug ncaj ncees thiab koj qhia Vajtswv txoj kev raws li muaj tseeb thiab tsis ua raws li leejtwg lub siab nyiam rau qhov koj tsis saib leejtwg ntsej muag. Yog li no, thov koj qhia rau peb saib koj xav li cas. Tsim nyog them se rau Xixa los tsis them?” Yexus paub qhov uas lawv xav phem, nws thiaj hais tias, “Cov niag neeg ncauj lus zoo siab phem, nej tuaj sim kuv ua dabtsi? Cia li muab lub nyiaj them se ntawd rau kuv saib.” Lawv thiaj muab ib lub denalia rau nws. Yexus hais rau lawv tias, “Lub ntsej muag thiab lub npe uas txaug no yog leejtwg?” Lawv teb tias, “Yog Xixa li.” Yexus txawm hais rau lawv tias, “Yog li no yam uas yog Xixa li cia li muab rau Xixa, yam uas yog Vajtswv li cia li muab rau Vajtswv.” Thaum lawv hnov tej lus ntawd lawv xav tsis thoob, lawv txawm ncaim Yexus mus lawm. Tib hnub ntawd cov Xadukai uas qhia hais tias tsis muaj qhov uas sawv hauv qhov tuag los txawm tuaj cuag Yexus. Lawv thiaj thom Yexus hais tias, “Xibhwb, Mauxe twb hais tias, ‘Yog leejtwg tuag lawm tsis tau muaj menyuam, mas nws ib tug kwvtij yuav tsum yuav tus poj ntsuam ntawd thiaj tuav tau tus uas tuag li keeb kwm cia.’ Peb cov muaj xya tus kwvtij. Tus hlob muaj pojniam lawm li tuag tsis tau muaj menyuam, tseg tus pojniam rau tus kwv yuav ua pojniam. Mas tus ob tus peb mus txog tus xya kuj tuag tag ib yam nkaus. Thaum kawg tus pojniam ntawd kuj tuag lawm. Vim li no hnub uas ciaj sawv rov los, tus pojniam ntawd yuav ua xya leej ntawd tus twg li pojniam, rau qhov nws twb ua xya leej ntawd li pojniam lawm?” Yexus teb lawv tias, “Nej yuam kev lawm, nej tsis paub Vajtswv txojlus thiab tsis paub Vajtswv lub hwjchim. Thaum neeg ciaj sawv rov los ntawd, tsis muaj kev sib yuav ua txij ua nkawm lawm, yuav zoo ib yam li cov tubtxib saum ntuj xwb. Hais txog qhov uas sawv hauv qhov tuag rov los, nej tsis tau nyeem tej uas Vajtswv hais rau nej lov? Nws hais tias, ‘Kuv yog Aplahas tus Vajtswv, yog Yiha tus Vajtswv thiab yog Yakhauj tus Vajtswv.’ Vajtswv tsis yog cov neeg tuag tus Vajtswv, nws yog cov neeg ciaj tus Vajtswv.” Thaum cov neeg ntawd hnov, lawv kuj phimhwj rau Yexus tej lus qhuab qhia. Thaum cov Falixai hnov tias Yexus ua rau cov Xadukai tws kev tsis muaj lus hais lawm, lawv txawm sau zog ua ke, mas ib tug xibhwb uas paub cai txawm sim nug Yexus hais tias, “Xibhwb, txoj kevcai nqe twg tseem ceeb dua ntais?” Yexus hais rau nws tias, “ ‘Koj yuav tsum hlub tus Tswv uas yog koj tus Vajtswv kawg siab kawg ntsws, thiab kawg koj lub tswvyim.’ Nqe no yog thawj nqes thiab yog nqe uas tseem ceeb dua ntais. Nqe uas ob kuj ib yam nkaus hais tias, ‘Koj yuav tsum hlub kwvtij zej zog ib yam li koj hlub koj tus kheej.’ Mauxe txoj kevcai thiab cov xibhwb cev lus tej lus qhia huvsi nyob tag nrho rau hauv ob nqes no.” Thaum cov Falixai tseem nyob ua ke ntawd, Yexus txawm nug lawv hais tias, “Nej xav li cas txog tus Khetos? Nws yog leejtwg li tub?” Lawv hais rau nws tias, “Yog Davi li tub.” Yexus thiaj nug lawv tias, “Yog li ntawd ua cas Vaj Ntsuj Plig kom Davi hu tus Khetos tias ‘tus Tswv’ thiab hais tias, “ ‘Tus Tswv hais rau kuv tus tswv tias, “Cia li zaum ntawm kuv sab xis, mus txog thaum kuv muab koj cov yeeb ncuab tiag koj xib taws” ’? Yog Davi twb hu tus Khetos tias ‘tus Tswv,’ nws yuav ua li cas ua tau Davi li tub?” Tsis muaj ib tug twg teb tau Yexus ib los li. Txij hnub ntawd los tsis muaj leejtwg muaj cuabkav nug Yexus dua li lawm. Thaum ntawd Yexus hais rau cov neeg ntawd thiab nws cov thwjtim tias, “Cov xibhwb qhia Vajtswv kevcai thiab cov Falixai nyob Mauxe chaw qhia. Yog li ntawd txhua yam uas lawv qhia rau nej mas nej yuav tsum ua thiab tuav rawv, tsuas yog tseg tsis ua raws nraim li lawv ua, rau qhov lawv tsuas yog qhia xwb, lawv tsis ua raws li lawv qhia. Lawv muab lub nra hnyav [uas ceeblaj ris] nog rau neeg ris saum xubpwg tiamsis lawv twb tsis kam xuas lawv tus ntiv tes thiab kiag li. Txhua yam uas lawv ua lawv ua rau neeg qhuas lawv xwb. Lawv muab lub hnab loj ntim Vajtswv txojlus khi rau ntawm hauv pliaj thiab ntxhoo tw ntev rau lawv tej qab tsho, thiab thaum muaj rooj noj rooj haus lawv nyiam zaum sam tsum, thiab zaum tej rooj siab hauv tej tsev sablaj, lawv nyiam kom luag hwm lawv tom tej tshav puam, thiab nyiam kom luag hu lawv tias, ‘Lanpi.’ Nej tsis txhob cia leejtwg hu nej tias ‘Lanpi,’ vim nej muaj tib tug ua xibhwb qhia nej xwb, thiab nej sawvdaws yog kwvtij. Tsis txhob hu leejtwg hauv ntiajteb tias yog nej leej txiv, rau qhov nej muaj tib leej Txiv uas nyob saum ntuj. Tsis txhob cia leejtwg hu nej tias, ‘Kws xibhwb,’ rau qhov nej muaj tib tug Kws xibhwb uas yog tus Khetos. Nej cov tus uas ua hlob nws yuav tsum ua nej li qhev. Leejtwg tsab ua loj yuav raug muab txo kom qes. Leejtwg txo hwjchim tus ntawd yuav raug muab tsa ua loj. “Nej cov xibhwb qhia Vajtswv kevcai thiab cov Falixai uas ncauj lus zoo siab phem, nej yuav raug txom nyem lauj! Nej kaw qhov rooj ntuj ceeb tsheej tsis kheev neeg nkag mus. Nej cov los kuj tsis mus rau hauv, thiab nej tseem txwv cov uas yuav mus rau hauv thiab. “Nej cov xibhwb qhia Vajtswv kevcai thiab cov Falixai uas ncauj lus zoo siab phem, nej yuav raug txom nyem lauj! Nej hla hiavtxwv hla nruab nqhuab mus xwv thiaj coj tau ib tug twg los ntseeg nej kevcai, tiamsis thaum nws ntseeg lawd nej tseem ua rau nws rov ua ntuj tawg kub li menyuam heev dua nej ob npaug. “Nej cov niag neeg dig muag uas coj luag kev, nej yuav raug txom nyem lauj! Nej hais tias, ‘Yog leejtwg tuav lub tuam tsev cog lus twv, mas tej lus ntawd tsis yom ceev, tiamsis yog tuav tej kub hauv lub tuam tsev cog lus twv, mas nws yuav tsum ua raws li tej lus twv ntawd.’ Cov niag neeg ruam dig muag, yam twg tseem ceeb dua, yog tej kub lossis lub tuam tsev uas ua rau tej kub ntawd dawb huv? Thiab nej hais tias, ‘Leejtwg tuav lub thaj xyeem cog lus twv mas tej lus ntawd tsis yom ceev, tiamsis yog leejtwg tuav tej uas muab xyeem rau saum lub thaj ntawd twv, mas nws yuav tsum ua raws li tej lus uas twv ntawd.’ Cov niag neeg dig muag, yam twg tseem ceeb dua, yog tej uas muab xyeem lossis lub thaj uas ua rau tej uas xyeem ntawd dawb huv? Yog li no tus uas tuav lub thaj cog lus twv kuj yog nws tuav lub thaj thiab txhua yam uas nyob saum lub thaj ntawd, thiab tus uas tuav lub tuam tsev cog lus twv kuj yog tuav lub tuam tsev thiab tus Vajtswv uas nyob hauv lub tuam tsev ntawd, thiab tus uas tuav ntuj ceeb tsheej cog lus twv kuj yog tuav Vajtswv lub zwm txwv thiab Vajtswv uas zaum saum lub zwm txwv ntawd twv. “Nej cov xibhwb qhia Vajtswv kevcai thiab cov Falixai uas ncauj lus zoo siab phem, nej yuav raug txom nyem lauj! Nej muab ib feem kaum pum hub, xyab txob thiab qhiav daj xyeem, tiamsis tej nqes tseem ceeb dua hauv Vajtswv txoj kevcai uas yog tu plaub ncaj thiab kev khuvleej thiab qhov uas xib rau Vajtswv nej ho muab tso tseg lawm. Tej uas hais tag no nej yuav tsum ua, thiab tsis txhob tso lwm txoj tseg. Nej cov niag neeg dig muag uas coj luag kev, nej lim ib tug nyuag yoov tseg tiamsis nej nqos kiag tus niag ntxhuav lawm. “Nej cov xibhwb qhia Vajtswv kevcai thiab cov Falixai uas ncauj lus zoo siab phem, nej yuav raug txom nyem lauj! Nej ntxuav khob ntxuav tais sab nraud, tiamsis sab hauv nej puv nkaus qhov uas ua siab hlob thiab qaug siab rau yam ub yam no. Cov Falixai dig muag 'e, cia li ntxuav khob sab hauv ua ntej, sab nraud thiaj li hauv thiab. “Nej cov xibhwb qhia Vajtswv kevcai thiab nej cov Falixai uas ncauj lus zoo siab phem, nej yuav raug txom nyem lauj! Nej zoo yam nkaus li lub ntxa uas luam hmoov zeb sib dawb paug, saib sab nraud mas zoo nkauj tiamsis sab hauv puv nkaus pob txha neeg tuag thiab txhua yam kev phem kev qias. Ib yam li ntawd saib sab nraud mas nej yog neeg ncaj ncees, tiamsis sab hauv yog neeg ncauj lus zoo siab phem thiab puv nkaus kev txhaum txim. “Nej cov xibhwb qhia Vajtswv kevcai thiab cov Falixai uas ncauj lus zoo siab phem, nej yuav raug txom nyem lauj! Nej txhim cov xibhwb cev Vajtswv lus tej ntxa thiab kho tej chaw uas nco txog cov neeg ncaj ncees thaum ub kom zoo nkauj, thiab nej hais tias, ‘Yog peb nyob rau lub sijhawm uas peb tej poj koob yawm txwv ntawd nyob, peb yuav tsis nrog lawv tua tej xibhwb uas cev Vajtswv lus ntawd.’ Nej hais li ntawd kuj yog nej ua timkhawv rov tom nej hais tias nej yog cov uas tua tej xibhwb cev lus ntawd li tub ki. Nej cia li tsav ntxiv tej kev txhaum uas nej tej poj koob yawm txwv tau ua kom puv nkaus. Cov niag nab 'e, cov niag noob nab phem 'e, nej yuav dim lub txim uas yuav poob ntuj tawg kub tau li cas? Vim li no kuv thiaj tso cov xibhwb cev lus thiab cov neeg txawj ntse thiab cov xibhwb qhia Vajtswv kevcai tuaj cuag nej, los nej yuav muab ib txhia tua thiab muab teem rau saum khaublig ntoo thiab muab nplawm hauv nej tej tsev sablaj, thiab muab ntiab tawm ib lub moos dhau ib lub moos. Yog li ntawd cov neeg ncaj ncees txhua tus tej ntshav uas los rau hauv lub ntiajteb txij thaum Anpee uas yog tus ncaj ncees cov ntshav mus txog Xekhaliya uas yog Npalakhiya tus tub cov ntshav uas nej tua ntawm lub tuam tsev thiab lub thaj kem nruab nrab, yuav poob rau saum nej. Kuv hais tseeb rau nej tias, tej txim ntawd huvsi yuav poob rau tiam neeg no. “Au Yeluxalees, Yeluxalees 'e, koj yog tus uas tua cov xibhwb cev Vajtswv lus thiab xuas pob zeb ntaus cov uas txib tuaj cuag koj tuag. Muaj ntau zaus kuv twb xav qaws koj cov menyuam los ua ke ib yam li tus poj qaib puag nws cov menyuam rau hauv nws phab tis, tiamsis nej tsis yeem kiag li. Saib nawj nej lub tuam tsev yuav raug muab tso tseg nyob do cuas. Kuv hais rau nej tias txij no mus nej yuav tsis rov pom kuv dua mus txog thaum nej hais tias, ‘Tus uas tuaj hauv tus Tswv lub npe tau nyob kaj siab lug.’ ” Thaum Yexus tawm ntawm lub tuam tsev mus, nws cov thwjtim txawm los taw tes rau tej tsev hauv lub loog tuam tsev rau Yexus saib. Yexus txawm hais rau lawv tias, “Nej pom tej no huvsi lov? Kuv hais tseeb rau nej tias tej txhib zeb uas tib ib lub tshooj ib lub no yuav tsis tshuav ib lub uas tsis raug muab ua pob tag.” Thaum Yexus zaum saum roob Txiv Aulib, cov thwjtim txawm los cuag nws twjywm hais tias, “Thov qhia peb paub tias tej xwm txheej no yuav tshwm los thaum twg, thiab muaj yam txujci twg qhia kom paub tias koj yuav tshwm plaws los thiab lub caij lub nyoog yuav kawg?” Yexus thiaj teb lawv tias, “Cia li ceev faj tib zoo tsis txhob cia leejtwg ntxias nej yuam kev. Rau qhov yuav muaj ntau leej tuav kuv lub npe los hais tias, ‘Kuv yog tus Khetos,’ mas lawv yuav ua rau neeg coob coob yuam kev. Nej yuav hnov suab ua tsov ua rog thiab hnov moo ua rog. Cia li ceev faj tsis txhob poob siab kiag li, rau qhov tej no yeej yuav tsum tshwm los tiamsis tsis tau txog thaum kawg. Ib lub tebchaws yuav sawv tawm tsam rau ib lub tebchaws, ib tug vajntxwv yuav tawm tsam rau ib tug vajntxwv, yuav muaj kev tshaib nqhis thiab ntuj qeeg ntau qhov. Tej xwm txheej no huvsi yog pib mob plab yug menyuam xwb. “Lub sijhawm ntawd luag yuav muab nej cob rau kev tsim txom thiab muab nej tua pov tseg. Ib tsoom tebchaws sawvdaws yuav ntxub nej vim yog tim kuv lub npe. Thaum ntawd ntau leej yuav thim thiab ib leeg fav xeeb rau ib leeg thiab ib leeg ntxub ib leeg. Yuav muaj ntau tus cuav xibhwb cev lus tshwm tuaj ua rau neeg coob coob yuam kev. Vim kev phem nthuav dav zuj zus, tej neeg coob coob txojkev hlub yuav txias zuj zus mus. Tiamsis tus uas thev taus txog thaum kawg yuav dim. Txoj xov zoo uas hais txog Vajtswv lub tebchaws yuav raug muab tshaj tawm thoob plaws lub ntiajteb ua timkhawv rau ib tsoom tebchaws, mas thaum ntawd lub sijhawm kawg yuav los txog. “Thaum nej pom yam uas qias vuab tsuab uas ua kom liamsim tag txawb cia rau hauv lub chaw dawb huv raws li xibhwb Daniyee uas cev Vajtswv lus tau qhia tseg lawd (cia tus uas nyeem nkag siab nawj), mas thaum ntawd cov uas nyob hauv Yudia cia li khiav mus rau pem tej roob, tus uas nyob saum txheej tsev las tshav tsis txhob nqes muab nws tej qhov txhia chaw hauv tsev, thiab tus uas nyob tom teb tsis txhob rov los muab nws lub tsho ntev. “Hnub ntawd cov uas suab menyuam thiab cov uas muaj menyuam noj mis yuav txom nyem kawg li lauj! Cia li thov kom nej tsis txhob tau khiav rau lub caij ntuj no lossis hnub Xanpatau. Vim tias lub sijhawm ntawd yuav muaj kev ceeblaj txom nyem loj kawg li, txij thaum tsim ntuj tsim teb los txog niaj hnub nimno tsis tau muaj dua li ntawd thiab dhau ntawd mus yuav tsis muaj dua li lawm. Yog tsis muab lub caij lub nyoog ntawd txiav kom luv, yuav tsis muaj neeg dim tau li. Tiamsis vim saib rau cov uas twb xaiv cia lawd, thiaj muab lub caij lub nyoog txiav kom luv. “Thaum ntawd yog leejtwg hais rau nej tias, ‘Saib maj, tus Khetos nyob ntawm no,’ lossis hais tias, ‘Nws nyob tim ub,’ nej tsis txhob ntseeg. Rau qhov tias yuav muaj cov cuav Khetos thiab cov cuav xibhwb cev lus sawv los ua txujci tseem ceeb thiab txujci phimhwj uas loj kawg, mas yog ua tau, tej txujci ntawd yuav ntxias cov uas twb xaiv cia lawd kom yuam kev. Saib nawj, kuv twb hais rau nej ua ntej lawm. Yog li no yog lawv hais rau nej tias, ‘Saib maj, nws nyob hauv tebchaws moj sab qhua,’ tsis txhob tawm mus saib. Yog lawv hais tias, ‘Nws nyob hauv txaj,’ kuj tsis txhob ntseeg. Xob laim tawm sab hnub tuaj ci mus rau sab hnub poob li cas, qhov uas Neeg leej Tub tshwm plaws los yuav zoo ib yam li ntawd. Tsiaj tuag qhovtwg, dav noj twm yuav sau nthwv los rau qhov ntawd. “Thaum dhau tej kev ceeblaj txom nyem ntawd lawm, “ ‘lub hnub yuav tsaus mus, lub hli yuav tsis ci, tej hnub qub yuav poob saum ntuj los, tej uas muaj hwjchim saum nruab ntug yuav raug muab co ua zog koog.’ Thaum ntawd yam txujci uas qhia txog Neeg leej Tub, yuav tshwm rau saum nruab ntug. Txhua haiv neeg hauv qab ntuj yuav ntaus hauv siab quaj ntsuag, thiab lawv yuav pom Neeg leej Tub nrog nws lub hwjchim thiab meej mom loj nrog huab saum ntuj los. Nws yuav txib nws cov tubtxib saum ntuj nrog suab raj suab xyu nrov heev los, mas lawv yuav qaws cov neeg uas nws xaiv cia lawd tag nrho plaub ceg kaum ntuj txij sab ntuj no mus thoob plaws sab ntuj tim ub huvsi. “Cia li kawm tej piv lus ntawm tsob ntoo cev. Thaum tej ceg mos nyoos thiab pib hlav nplooj, nej kuj paub tias yuav txog lub caij ntuj kub. Ib yam li ntawd, thaum nej pom tej xwm txheej no huvsi nej kuj paub tias nws twb los ze ntawm qhov rooj lawm. Kuv hais tseeb rau nej tias, tiam neeg no yuav tsis tau dua tag mus txog thaum txhua yam no tshwm los lawm. Lub ntuj thiab lub ntiajteb yuav dua mus, tiamsis kuv tej lus yuav tsis ploj kiag li. “Tiamsis hnub ntawd thiab teev ntawd tsis muaj leejtwg paub, txawm yog cov tubtxib saum ntuj thiab leej Tub kuj tsis paub tsuas yog leej Txiv tib leeg paub xwb. Tiam uas Nau‑a nyob zoo li cas, ces thaum Neeg leej Tub tshwm plaws los kuj yuav zoo ib yam li ntawd. Rau qhov ua ntej uas dej tsis tau nyab, tej neeg noj haus ua tshoob qua tub qua ntxhais mus txog hnub uas Nau‑a nkag rau hauv lub nkoj, mas lawv twb tsis paub mus txog thaum dej los nyab kiag lawv thiab kuav tag nrho huvsi. Thaum Neeg leej Tub tshwm plaws los yuav zoo ib yam li ntawd. Thaum ntawd muaj ob tug txivneej nyob tom teb, los yuav coj ib tug mus yuav tseg ib tug cia. Muaj ob tug pojniam zom zeb hauv lub tsev zeb, los yuav coj ib tug mus yuav tseg ib tug cia. Vim li no nej yuav tsum ceev faj zov tos, rau qhov nej tsis paub tias nej tus Tswv yuav los rau hnub twg. Cia li paub tias, yog tus tswv tsev xub paub tias tub sab yuav tuaj hmo ntuj thaum twg, nws yuav zov tos tsis kheev kom tho tau nws lub tsev. Yog li no nej yuav tsum npaj txhij rau qhov Neeg leej Tub yuav los rau teev uas nej tsis nco xav txog. “Leejtwg yog tus qhev ncaj thiab ntse uas tus lospav tsa saib xyuas cov tub qhe thiab faib mov rau lawv noj raws sijhawm? Thaum tus lospav los pom nws tseem ua haujlwm li ntawd, tus qhev ntawd yuav tau nyob kaj siab lug. Kuv hais tseeb rau nej tias, tus lospav yuav tsa nws ua tus saib xyuas tag nrho lospav tej cuab txhiaj cuab tam huvsi. Tiamsis yog tus qhev ntawd phem thiab xav hais tias, ‘Kuv tus lospav los qeeb,’ ces nws txawm pib muab nws pab tub qhe ntaus thiab mus nrog cov qaug cawv noj haus ua ke, mas nws tus lospav yuav los rau hnub uas nws tsis nco xav txog thiab teev uas nws tsis paub, mas tus lospav yuav muab nws tsuav ua tej dwb daim thiab tu chaw rau nws nrog cov neeg ncauj lus zoo siab phem nyob, yog lub chaw uas muaj kev quaj tom hniav qas qawv.” “Thaum txog hnub ntawd Ntuj Ceeb Tsheej yuav piv zoo ib yam li kaum tus hluas nkauj nqa teeb mus tos tus nraug vauv. Muaj tsib tug ruam muaj tsib tug ntse. Cov uas ruam nqa teeb tiamsis tsis nqa roj mus. Cov uas ntse coj teeb thiab coj hwj roj mus. Tus nraug vauv tuaj lig lig ces lawv txawm ncaws dab ntub tsaug zog lawm. “Thaum ib tag hmo, muaj suab hu hais tias, ‘Tus nraug vauv tuaj lawm lauj! Cia li tawm mus tos nws.’ Cov hluas nkauj ntawd sawvdaws txawm sawv tsees los kho lawv tej teeb xeeb. Cov uas ruam hais rau cov uas ntse tias, ‘Thov faib nej li roj rau peb thiab, vim peb tej teeb twb yuav tuag.’ Cov uas ntse teb tias, ‘Ntshai tsam roj tsis txaus rau peb thiab nej. Nej cia li mus yuav roj ntawm cov uas muag roj rau nej.’ Thaum lawv cov tawm mus yuav roj lawd, tus nraug vauv txawm tuaj txog, mas cov uas npaj txhij lawd kuj tau nrog nws mus rau hauv rooj tshoob, ces lub qhov rooj txawm raug muab kaw lawm. Dhau ntawd tsib tug hluas nkauj ruam ntawd txawm los mas hais tias, ‘Yawg hlob, yawg hlob, thov qheb qhov rooj rau peb.’ Tus nraug vauv teb tias, ‘Kuv hais tseeb rau nej tias, kuv tsis paub nej.’ Vim li no nej yuav tsum zov tos, rau qhov nej tsis paub tias yog hnub twg thiab yog teev twg. “Hnub ntawd piv ib yam li ib tug yawg uas yuav mus kev deb, nws txawm hu nws cov tub qhe los cuag nws thiab muab nws tej cuab txhiaj cuab tam rau lawv saib. Nws muab tsib tala rau ib tug, muab ob tala rau ib tug thiab ib tala rau dua ib tug, muab rau txhua tus raws li nyias tus peevxwm, ces nws txawm mus lawm. Tus uas tau tsib tala txawm coj cov nyiaj ntawd mus ua lag ua luam tamsid mas tau tshaj thawj tsib tala. Ib yam nkaus tus uas tau ob tala kuj tau tshaj thawj ob tala thiab. Tiamsis tus uas tau ib tala txawm mus khawb qhov muab nws tus lospav li nyiaj zais cia. “Dhau ntev loo, cov tub qhe ntawd tus lospav txawm rov los tshuaj saib tej nyiaj txiag ntawd lawv siv li cas. Tus uas tau tsib tala txav los thiab coj tsib tala uas yog tshaj thawj los hais tias, ‘Yawg hlob, koj muab tsib tala cob rau kuv. Saib maj, kuv tau tshaj thawj tsib tala thiab.’ Tus lospav hais rau nws tias, ‘Tus tub qhe zoo thiab ncaj ncees, koj ua zoo lawm. Koj ua ncaj rau tej yam tsawg tsawg, kuv yuav tsa koj saib xyuas tej yam uas ntau heev. Koj cia li los nrog kuv zoo siab xyiv fab.’ Tus uas tau ob tala kuj txav los thiab hais tias, ‘Yawg hlob, koj muab ob tala cob rau kuv. Saib maj, kuv tau tshaj thawj ob tala thiab.’ Tus lospav hais rau nws tias, ‘Tus tub qhe zoo thiab ncaj ncees, koj ua zoo lawm. Koj ua ncaj rau tej yam tsawg tsawg, kuv yuav tsa koj saib xyuas tej yam uas ntau heev. Koj cia li los nrog kuv zoo siab xyiv fab.’ Tus uas tau ib tala kuj txav los thiab hais tias, ‘Yawg hlob, kuv yeej paub tias koj yog ib tug neeg tsiv tsaim, koj hlais tej qoob uas koj tsis tau cog thiab sau tej uas koj tsis tau tseb. Kuv ntshai kuv thiaj muab koj tala nyiaj zais rau hauv av lawm. Saib maj, koj tala nyiaj nyob no.’ Tus lospav txawm teb nws tias, ‘Niag tub qhe phem thiab tub nkeeg, koj paub tias kuv hlais tej uas kuv tsis tau cog thiab sau tej uas kuv tsis tau tseb lov? Yog li ntawd, tsim nyog koj coj kuv cov nyiaj mus tso rau hauv tsev cia nyiaj, es thaum kuv rov los kuv thiaj tau kuv cov nyiaj thiab tau cov paj. Yog li no cia li muab nws ib tala nyiaj ntawd rho mus rau tus uas muaj kaum tala. Rau qhov txhua tus uas muaj lawd yuav muab tsav kom muaj ntau nplua mias, tiamsis tus uas tsis muaj, txawm yog tej uas nws muaj los yuav muab rho ntawm nws mus. Cia li muab tus tub qhe tsis tsim txiaj ntawd laim tawm mus rau sab nraud uas tsaus ntuj nti, qhov ntawd yuav muaj kev quaj tom hniav qas qawv.’ “Thaum Neeg leej Tub nrog nws lub hwjchim ci ntsa iab thiab cov tubtxib saum ntuj sawvdaws nqes los, thaum ntawd nws yuav zaum saum nws lub zwm txwv uas muaj hwjchim ci ntsa iab. Ib tsoom tebchaws sawvdaws yuav raug sau zog tuaj ua ke rau ntawm nws xubntiag, mas nws yuav muab lawv cais ua ob pab ib yam li tus yug yaj cais cov yaj tawm ntawm cov tshis. Nws yuav muab cov yaj tso nyob rau ntawm nws sab xis, muab cov tshis tso nyob rau ntawm nws sab laug. Thaum ntawd vajntxwv yuav hais rau cov uas nyob ntawm nws sab xis tias, ‘Nej cov uas tau koob hmoov ntawm kuv leej Txiv cia li los txais lub tebchaws uas twb npaj tseg rau nej txij thaum tsim lub ntiajteb los lawm ua nej tug. Vim thaum kuv tshaib nej pub rau kuv noj, thaum kuv nqhis dej nej pub kuv haus, thaum kuv ua qhua txawv ntsej muag nej hu kuv los tsev, thaum kuv liab qab nej muab rau kuv hnav, thaum kuv muaj mob nej tuaj xyuas kuv, thaum kuv raug kaw hauv tsev lojfaj nej tuaj xyuas kuv.’ “Mas cov neeg ncaj ncees yuav teb nws tias, ‘Tus Tswv, thaum twg peb pom koj tshaib es tau muab rau koj noj, lossis pom koj nqhis es muab rau koj haus? Thaum twg peb pom koj ua qhua txawv ntsej muag es tau hu koj los tsev, lossis pom koj liab qab es muab rau koj hnav? Thaum twg peb pom koj muaj mob lossis raug kaw es tuaj xyuas koj?’ Vajntxwv yuav teb lawv tias, ‘Kuv hais tseeb rau nej tias, qhov uas nej tau ua rau kuv cov kwvtij no ib tug twg uas me dhau, kuj yog ua rau kuv lawm.’ “Mas nws yuav hais rau cov uas nyob ntawm nws sab laug tias, ‘Nej cov uas raug tsawm foom, cia li khiav ntawm kuv mus rau hauv cub tawg uas kub ib txhis uas npaj tseg cia rau dab Ntxwg Nyoog thiab nws cov tubtxib lawm. Rau qhov thaum kuv tshaib nej tsis pub rau kuv noj, thaum kuv nqhis dej nej tsis pub kuv haus, thaum kuv ua qhua txawv ntsej muag nej tsis hu kuv los tsev, thaum kuv liab qab nej tsis muab rau kuv hnav, thaum kuv muaj mob thiab raug kaw hauv tsev lojfaj nej tsis tuaj xyuas kuv.’ Mas lawv yuav teb nws tias, ‘Tus Tswv, thaum twg peb pom koj tshaib lossis nqhis dej lossis ua qhua txawv ntsej muag lossis liab qab lossis mob lossis raug kaw, es tsis tu koj?’ Nws yuav teb lawv tias, ‘Kuv hais tseeb rau nej tias, qhov uas nej tsis tau ua rau cov no ib tug twg uas me dhau, kuj yog tsis ua rau kuv lawm.’ Mas lawv yuav tawm mus raug teem txim ib txhis tsis kawg, tiamsis cov ncaj ncees yuav tau txojsia ntev mus ib txhis tsis kawg.” Thaum Yexus hais tej lus no huvsi tag lawm nws txawm hais rau nws cov thwjtim tias, “Nej yeej paub lawm tias tshuav ob hnub xwb ces txog lub caij ua kevcai Hla Dhau, mas Neeg leej Tub yuav raug muab cob rau luag teem rau saum khaublig ntoo.” Thaum ntawd cov pov thawj hlob thiab cov kev txwj laus tuaj ua ke rau hauv tus tuam pov thawj hlob Khayafa lub tsev, thiab lawv sablaj ntaus tswvyim yuav ntes Yexus twjywm thiab muab nws tua pov tseg. Lawv hais tias, “Tsis txhob ntes nws rau lub sijhawm uas ua kevcai no tsam ces muaj kev kub ntxhov rau hauv cov pejxeem.” Thaum Yexus nyob hauv Ximoos uas mob ruas lub tsev hauv lub zos Npethani, Yexus tseem pheeb ntawm rooj mov, txawm muaj ib tug pojniam nqa ib hwj roj tsw qab muaj nqes heev tuaj cuag Yexus ces txawm muab hliv rau saum Yexus taubhau. Thaum cov thwjtim pom li ntawd lawv chim txawm hais tias, “Ua cas yuav nkim tej roj no? Cov roj no yog muab muag tau nyiaj ntau coj mus pub rau cov neeg pluag kuj tau.” Yexus kuj paub ces nws txawm hais rau lawv tias, “Nej ua rau tus pojniam no ntxhov siab ua dabtsi? Nws ua yam uas zoo heev rau kuv. Yeej yuav muaj cov neeg pluag nrog nej nyob mus li, tiamsis nej yuav tsis muaj kuv nrog nej nyob mus li. Qhov uas nws hliv roj rau saum kuv lub cev twb yog nws tu kuv lub cev cia rau hnub uas log kuv. Kuv hais tseeb rau nej tias, tshaj tawm txoj xov zoo no tawm mus thoob ntiajteb txog qhovtwg, qhov uas tus pojniam no ua yuav nrov ncha mus txog qhov ntawd ua lub chaw nco txog nws.” Thaum ntawd kaum ob tug thwjtim tus uas npe hu ua Yudas Ikhali‑au txawm mus cuag cov pov thawj hlob, thiab hais tias, “Yog kuv muab Yexus cob rau nej, nej yuav muab dabtsi rau kuv?” Lawv txawm suav peb caug lub nyiaj rau nws. Txij thaum ntawd los Yudas nrhiav sijhawm yuav muab Yexus cob rau lawv. Thawj hnub uas ua kevcai Noj Ncuav tsis Xyaw Keeb cov thwjtim los hais rau Yexus tias, “Yuav cia peb npaj kevcai Hla Dhau rau koj noj qhovtwg?” Nws hais tias, “Cia li mus cuag ib tug yawg hauv lub nroog thiab hais rau nws tias, ‘Tus xibhwb hais tias, Lub sijhawm uas teem rau kuv los ze lawm. Kuv yuav nrog kuv cov thwjtim ua kevcai Hla Dhau rau hauv koj lub tsev.’ ” Cov thwjtim kuj ua raws li Yexus hais, lawv txawm mus npaj ua kevcai Hla Dhau txhij zog. Thaum tsaus ntuj Yexus nrog kaum ob tug thwjtim nyob pheeb ntawm rooj mov ua ke. Thaum lawv tabtom noj, nws txawm hais tias, “Kuv hais tseeb rau nej tias, nej cov no muaj ib tug yuav fav xeeb rau kuv.” Lawv kuj ntxhov siab heev lawv nyias taus nyias pib nug tias, “Tus Tswv, yog kuv lov?” Yexus teb tias, “Tus uas cev nws txhais tes nrog kuv koom ntsw ib lub tais yog tus uas yuav fav xeeb rau kuv. Neeg leej Tub yuav mus raws li tej uas muaj sau cia hais txog nws, tiamsis tus uas fav xeeb rau Neeg leej Tub yeej yuav raug txom nyem kawg. Tsis txhob yug nws los kuj zoo dua.” Yudas uas fav xeeb rau Yexus txawm hais tias, “Xibhwb, yog kuv lov?” Yexus teb nws tias, “Koj hais yog lawm.” Thaum lawv noj mov, Yexus txawm muab ib lub ncuav los foom koob hmoov rau mas muab ntais cev rau cov thwjtim thiab hais tias, “Cia li txais mus noj, no yog kuv lub cev.” Thiab nws muab ib lub khob los ua Vajtswv tsaug tag muab cev rau lawv hais tias, “Nej txhua tus cia li haus lub khob no. No yog kuv cov ntshav uas nias hom thawj rau tej lus cog tseg, uas raug muab nchuav daws neeg coob coob lub txim. Kuv hais rau nej tias kuv yuav tsis haus cawv txiv hmab no dua li mus txog hnub uas kuv nrog nej haus cawv txiv hmab tshiab hauv kuv leej Txiv lub tebchaws.” Thaum lawv hu ib zaj nkauj tag lawv tawm mus rau pem roob Txiv Aulib. Thaum ntawd Yexus hais rau lawv tias, “Hmo no nej txhua tus yuav tso kuv tseg, vim muaj lus sau cia hais tias, “ ‘Kuv yuav tua tus yug yaj, mas pab yaj yuav tawg ua sab ua sua mus.’ Tiamsis thaum kuv raug muab tsa ciaj sawv rov los lawm, kuv yuav ua nej ntej mus rau Kalilais.” Petus txawm hais rau Yexus tias, “Txawm yog lawv sawvdaws tso koj tseg los kuv yuav tsis tso koj tseg kiag li.” Yexus hais rau nws tias, “Kuv hais tseeb rau koj tias, hmo no ntag thaum qaib tsis tau qua koj yuav tsis lees paub kuv peb zaug.” Petus hais rau nws tias, “Txawm yog kuv yuav tsum nrog koj tuag, los kuv yuav tsis hais tias kuv tsis paub koj.” Cov thwjtim sawvdaws puavleej hais li ntawd. Ces Yexus txawm nrog nws cov thwjtim mus rau ib qho chaw uas hu ua Kexemane, mas nws hais rau lawv tias, “Cia li zaum ntawm no rau thaum kuv mus thov Vajtswv lawm tod.” Nws coj Petus thiab Xenpedi ob tug tub nrog nws mus. Yexus pib txhawj thiab ntxhov siab kawg. Yexus hais rau lawv tias, “Kuv lub siab ntxhov kawg twb yuav tuag. Nej cia li nyob ntawm no thiab nrog kuv zov tos.” Yexus txawm mus rau tom ntej mentsis mas nws khwb nkaus rau hauv pem teb thov hais tias, “Au kuv leej Txiv, yog ua tau, thov cia lub khob no dhau ntawm kuv mus. Txawm li cas kuj xij, thov tsis txhob cia ua raws li kuv lub siab tiamsis cia ua raws li koj lub siab.” Nws rov los rau ntawm cov thwjtim pom lawv pw tsaug zog tag. Nws thiaj hais rau Petus tias, “Nej nrog kuv zov tos ib nyuag teev tsis taus li lov? Nej yuav tsum zov tos thiab thov Vajtswv xwv nej thiaj tsis raug kev sim siab. Lub siab npaj txhij lawm tiamsis lub cev tsis muaj zog.” Yexus txawm rov mus thov Vajtswv zaum ob hais tias, “Au kuv leej Txiv, yog lub khob no dhau ntawm kuv mus tsis tau, yog kuv yuav tsum haus xwb, mas thov cia ua raws li koj lub siab.” Yexus rov los pom lawv pw tsaug zog dua ib zaug vim lawv qheb tsis taus qhov muag. Nws txawm ncaim lawv rov mus thov Vajtswv zaum peb ib yam li thov thawj ob zaug. Nws txawm rov los rau ntawm cov thwjtim thiab hais rau lawv tias, “Nej tseem pw tsaug zog thiab so los siav lov? Lub sijhawm twb los txog lawm, mas Neeg leej Tub twb raug muab cob rau hauv cov neeg txhaum txhais tes lawm. Cia li sawv tsees, peb mus. Saib maj, tus uas fav xeeb rau kuv tuaj ze lawm.” Thaum Yexus tseem tabtom hais lus, ces Yudas uas yog ib tug thwjtim hauv kaum ob leeg ntawd txawm tuaj txog, thiab muaj neeg coob coob coj ntaj coj qws nrog nws tuaj, yog cov pov thawj hlob thiab cov kev txwj laus txib tuaj. Tus uas fav xeeb ntawd twb qhia rau lawv ua ntej tias, “Kuv nwj tus twg mas yog tus ntawd ntag. Cia li ntes kiag nws.” Tamsim ntawd Yudas txawm los rau ntawm Yexus thiab hais tias, “Nyob zoo, xibhwb,” thiab nwj Yexus. Yexus hais rau nws tias, “Kwvluag, cia li ua raws li koj xav tseg lawm.” Ces cov neeg ntawd txawm los ntsiab nkaus Yexus muab nws ntes. Thaum ntawd muaj ib tug uas nrog nraim Yexus txawm cev tes rho kiag ntaj los tib ntag tus tuam pov thawj hlob tus tub qhe txiav nws ib sab nplooj ntseg tu nrho. Yexus hais rau nws tias, “Cia li muab koj rab ntaj ntxig rau hauv lub hnab, vim tias txhua tus uas siv ntaj yeej yuav tuag rau hniav ntaj. Nej xav tias kuv yuav thov kuv leej Txiv tsis tau lov? Mas nws yuav tso tubtxib saum ntuj coob dua kaum ob pab tub rog los pab kuv tamsim ntawd. Yog ua li ntawd mas tej lus uas hais tias yuav tsum muaj li no, yuav tiav tau li cas?” Thaum ntawd Yexus hais rau cov neeg tias, “Nej coj ntaj coj qws tuaj ntes kuv ib yam li tawm mus ntes tub sab lov? Kuv niaj hnub zaum hauv lub tuam tsev qhuab qhia, los nej ho tsis ntes kuv. Tiamsis tej xwm txheej no huvsi tshwm los thiaj tiav raws li tej lus uas cov xibhwb cev lus sau cia.” Ces cov thwjtim sawvdaws txawm tso Yexus tseg khiav tag lawm. Cov uas ntes Yexus txawm coj nws mus rau ntawm tus tuam pov thawj hlob Khayafa. Cov xibhwb qhia Vajtswv kevcai thiab cov kev txwj laus twb tuaj txoos ua ke rau qhov ntawd lawm. Petus raws Yexus qab deb deb mus txog lub tshav puam ntawm tus tuam pov thawj hlob lub tsev. Nws nkag mus nrog cov tub rog uas zov lub tuam tsev nyob ua ke rau hauv xauj, saib thaum kawg yuav zoo li cas. Cov pov thawj hlob thiab tag nrho cov thawj lub rooj sablaj txawm nrhiav cuav timkhawv nkaug Yexus xwv thiaj tua tau nws pov tseg. Txawm yog muaj ntau leej los ua cuav timkhawv tom los nrhiav tsis tau keeb puam. Thaum kawg muaj ob leeg los, thiab hais tias, “Tus no hais tias, ‘Kuv yuav rhuav Vajtswv lub tuam tsev pov tseg mas peb hnub xwb yuav ua tau dua tshiab.’ ” Tus tuam pov thawj hlob txawm sawv tsees hais tias, “Koj tsis muaj ib lo lus teb lov? Lawv kom koj txog dabtsi?” Yexus nyob twjywm. Tus tuam pov thawj hlob txawm hais tias, “Kuv cia koj tuav Vajtswv uas muaj txojsia nyob lub npe twv hais rau peb tias koj yog tus Khetos uas yog Vajtswv tus tub los tsis yog.” Yexus hais rau nws tias, “Yog li koj hais. Tiamsis kuv hais rau nej tias, tom hauv ntej nej yuav pom Neeg leej Tub zaum ntawm tus uas muaj hwjchim loj kawg sab xis, thiab nrog huab saum ntuj los.” Ces tus tuam pov thawj hlob txawm dua rhe nws lub tsho thiab hais tias, “Nws hais lus tuam mom Vajtswv lawm. Peb tseem yuav timkhawv ntxiv li cas thiab? Nej twb hnov nws hais tuam mom Vajtswv lawm. Nej pom zoo li cas?” Lawv teb tias, “Tsim nyog muab teem txim tuag.” Lawv txawm nto qaub ncaug rau Yexus ntsej muag thiab ntaus nws thiab muaj qee leej xuas tawg ncuav rau Yexus, thiab hais tias, “Tus Khetos, cia li cev Vajtswv lus rau peb. Saib leejtwg ntaus koj?” Petus zaum nraum lub tshav puam. Muaj ib tug nkauj qhev los hais rau nws tias, “Koj twb nrog Yexus uas yog neeg Kalilais ua ke los sas.” Tiamsis Petus tsis lees tab meeg sawvdaws, nws hais tias, “Qhov uas koj hais kod kuv tsis paub li.” Thaum Petus tawm mus rau ntawm rooj vag muaj dua ib tug nkauj qhev txawm pom nws ces txawm hais rau cov neeg uas nyob ib ncig ntawd tias, “Tus no yeej nrog Yexus uas yog neeg Naxale nyob ua ke.” Petus rov tsis lees thiab twv hais tias, “Kuv yeej tsis paub tus ntawd li.” Tom qab ntawd mentsis cov neeg uas nyob ib ncig txawm los hais rau Petus tias, “Koj yeej yog lawv cov ntawd ib tug tiag tiag li, rau qhov koj lub suab seebchim yeej qhia rau peb paub lawm.” Petus txawm pib twv tsawm tawv tawv hais tias, “Kuv tsis paub tus ntawd kiag li.” Tamsim ntawd qaib txawm qua. Petus thiaj nco dheev txog tej lus uas Yexus tau hais tias, “Thaum qaib tsis tau qua koj yuav tsis lees paub kuv peb zaug.” Ces Petus txawm mus rau sab nraud quaj nyuaj siab heev. Thaum sawv ntxov cov pov thawj hlob sawvdaws thiab cov kev txwj laus sablaj yuav muab Yexus tua pov tseg. Lawv txawm muab nws khi coj mus cob rau Philaj uas yog tus tswv xeev. Thaum Yudas uas fav xeeb rau Yexus pom tias Yexus raug teem txim nws txawm ntxeev dua siab thiab coj peb caug lub nyiaj ntawd tuaj thim rau cov pov thawj hlob thiab cov kev txwj laus, hais tias, “Kuv tau ua txhaum qhov uas tau muab tus uas tsis txhaum cob rau luag tua.” Lawv hais tias, “Tej kod ntsig txog peb dabtsi? Koj cia li ua li uas koj pom zoo xwb.” Yudas txawm muab cov nyiaj ntawd pov rau hauv lub tuam tsev mas tawm mus lawm. Nws txawm mus dai caj dab tuag. Cov pov thawj hlob txawm khaws cov nyiaj ntawd los mas hais tias, “Qhov uas muab cov nyiaj no cia rau hauv lub txhab nyiaj tuam tsev kuj tsis raug cai rau qhov yog nqe ntshav.” Thaum lawv sablaj hais hum lawm, lawv txawm coj cov nyiaj ntawd mus yuav tus Kws Puab Laujkaub Av daim teb cia ua toj ntxas log lwm haiv neeg. Vim li no luag thiaj hu daim teb ntawd tias Daim Teb Ntshav los txog niaj hnub nimno. Qhov no kuj tiav raws li tej lus uas xibhwb Yelemi cev Vajtswv lus hais tias, “Lawv txais peb caug lub nyiaj ntawd uas yog tus ntawd li nqe uas cov Yixayee qee leej ntaus nqe cia lawd, mas coj mus yuav tus Kws Puab Laujkaub Av daim teb raws li tus Tswv tau hais tseg cia rau kuv.” Thaum Yexus sawv ntawm tus tswv xeev xubntiag, tus tswv xeev nug tias, “Koj yog cov Yudai tus vajntxwv lov?” Yexus hais tias, “Yog li koj hais.” Tiamsis thaum cov pov thawj hlob thiab cov kev txwj laus kom, Yexus tsis teb ib los li. Philaj txawm hais rau nws tias, “Koj tsis hnov tej lus uas lawv kom koj ntau yam li lov?” Tiamsis Yexus tsis teb lawv tej lus kom ib los li, tus tswv xeev kuj phimhwj heev. Raws li ib txwm txhua zaus uas ua kevcai Hla Dhau tus tswv xeev yuav tso ib tug raug txim dim raws li cov pejxeem pom zoo. Zaum ntawd muaj ib tug raug txim hu ua [Yexus] Npalanpa uas sauvdaws paub. Thaum cov pejxeem tuaj txoos ua ke, Philaj hais rau lawv tias, “Nej xav kom kuv tso leejtwg dim, [Yexus] Npalanpa lossis Yexus uas hu ua Khetos?” Philaj paub tias lawv khib thiaj muab Yexus cob rau nws. Thaum Philaj zaum hais plaub ntawd, nws tus pojniam hais tuaj rau nws tias, “Tsis txhob ntsig txog tus ncaj ncees ntawd kiag li, rau qhov hnub no kuv ua npau suav txog nws ua rau kuv nyuaj siab heev.” Cov pov thawj hlob thiab cov kev txwj laus haub cov pejxeem kom thov tso Npalanpa es muab Yexus tua pov tseg. Tus tswv xeev rov hais rau lawv tias, “Ob tug no nej xav kom kuv tso tus twg?” Lawv teb tias, “Npalanpa.” Philaj txawm hais tias, “Yog li ntawd kuv yuav ua li cas rau Yexus uas hu tias Khetos?” Lawv sawvdaws hais tias, “Muab teem rau saum khaublig ntoo.” Philaj thiaj hais tias, “Ua cas muab teem? Nws tau ua txhaum dabtsi?” Tiamsis lawv yimhuab qw hais tias, “Muab nws teem rau saum khaublig ntoo.” Thaum Philaj pom tias tsis tau qabhau tsuas muaj kev kub ntxhov tuaj xwb, nws txawm muab dej los ntxuav tes tab meeg cov neeg ntawd hais tias, “Kuv tsis txhaum rau qhov uas tus no tuag. Nej ua nej xwb.” Ib tsoom neeg teb tias, “Cia tus ntawd cov ntshav poob rau saum peb thiab peb tej menyuam.” Philaj thiaj tso Npalanpa rau lawv, mas muab Yexus nplawm thiab muab cob rau luag coj mus teem rau saum khaublig ntoo. Tus tswv xeev cov tub rog txawm coj Yexus mus rau hauv lub tsev Plitholia, mas sau kiag pab tub rog sawvdaws tuaj vij nkaus Yexus. Lawv muab nws cev tsoos hle tseg thiab muab ib lub tsho ntev liab los ua rau Yexus hnav. Lawv muab pos kaus ntsaj los qhaib ua ib lub mom vajntxwv looj nws taubhau, thiab muab ib tug tauj deg rau nws tuav hauv nws txhais tes xis. Lawv txhos caug ntua ntawm nws xubntiag thuam luag hais tias, “Cov Yudai tus vajntxwv, thov kom koj tau zoo lauj!” Lawv nto qaub ncaug rau nws thiab muab tus tauj deg los ntaus nws taubhau. Thaum lawv ua saib tsis taus Yexus tag lawd, lawv muab lub tsho ntev hle thiab rov muab nws cev tsoos ua rau nws hnav, thiab coj nws mus yuav muab teem rau saum khaublig ntoo. Thaum lawv tawm mus lawv ntsib ib tug neeg Khulene hu ua Ximoos, lawv txawm yuam nws kwv Yexus tus khaublig ntoo. Thaum lawv mus txog lub chaw uas hu ua Kaukautha uas txhais hais tias lub chaw txha taubhau, lawv txawm muab cawv txiv hmab xyaw hmab dib iab cev rau Yexus haus. Thaum nws sim mentsis lawd nws tsis kam haus. Thaum lawv muab Yexus teem rau saum khaublig ntoo lawd, lawv txawm muab nws cev tsoos tsho los rho ntawv sib faib rau lawv. Ces lawv txawm zaum qhov ntawd zov nws. Lawv muab cov lus uas kom Yexus sau teem ncaj rau saum nws taubhau hais tias, “Tus no yog Yexus, yog cov Yudai tus vajntxwv.” Zaum ntawd lawv muab ob tug tub sab teem nrog Yexus ua ke thiab, sab xis ib tug, sab laug ib tug. Tej neeg uas dua kev mus los kuj thuam Yexus co hau hnyo, hais tias, “Tus uas yuav rhuav lub tuam tsev thiab peb hnub xwb ua dua tshiab 'e, koj cia li cawm koj tus kheej kom dim los maj. Yog koj yog Vajtswv tus tub, cia li nqes saum khaublig ntoo los los maj.” Cov pov thawj hlob thiab cov xibhwb qhia Vajtswv kevcai thiab cov kev txwj laus kuj thuam luag nws ib yam nkaus hais tias, “Nws cawm tau luag dim, tiamsis nws cawm tsis tau nws dim. Nws yog cov Yixayee tus vajntxwv. Cia nws nqes saum khaublig ntoo los tamsim no mas peb thiaj li ntseeg nws. Nws tso siab rau Vajtswv. Yog Vajtswv txaus siab rau nws, thov Vajtswv tso nws dim tamsim no. Rau qhov nws twb hais tias, ‘Kuv yog Vajtswv tus tub.’ ” Ob tug tub sab uas raug muab teem nrog Yexus kuj thuam nws ib yam nkaus thiab. Ntuj txawm tsaus ntais thoob plaws lub tebchaws txij thaum tav su mus txog hnub qaij peb teev. Kwvlam peb teev Yexus qw nrov nrov hais tias, “Eli, eli, Lama xanpathani?” txhais hais tias, “Kuv tus Vajtswv, kuv tus Vajtswv ua cas koj tso kuv tseg lawm?” Thaum cov neeg uas nyob ntawd qee leej hnov ces txawm hais tias, “Tus yawg ntawd hu Eliya.” Tamsim ntawd ib tug dhia mus muab ib lub xwb kuab raus cov kua qaub chob rau tus hau pas tauj deg cev mus rau Yexus haus. Tiamsis muaj dua ib cov hais tias, “Tsis txhob ua dabtsi, cia peb saib Eliya yuav los cawm nws los tsis los.” Thaum Yexus rov qw nrov dua ib zaug ces nws txawm tso nws txojsia tseg. Ua ciav daim ntaub uas thaiv hauv lub tuam tsev txawm ntuag rhe sab saud los thoob plaws hauv taw ua ob daim, av kuj ntseeg ua zog koog, tej txhib zeb kuj tawg zom zaws, tej qhov ntxa kuj qheb, thiab Vajtswv cov neeg uas tuag lawd raug muab tsa sawv los. Mas thaum Yexus ciaj sawv los lawd, lawv cov ntawd kuj tawm hauv qhov ntxa mus rau hauv lub nroog dawb huv tshwm rau neeg coob coob pom. Thaum tus thawj rog uas kav ib puas leej thiab cov uas nrog nws zov Yexus pom av ntseeg nkaws thiab txhua yam tshwm tuaj li no, mas lawv ntshai kawg li thiab hais tias, “Tus no yog Vajtswv tus tub tiag tiag li.” Qhov ntawd muaj cov pojniam coob coob sawv deb deb ntsia, lawv yog cov uas nrog Yexus tuaj pem Kalilais tuaj thiab ua num rau nws. Hauv lawv cov ntawd muaj Maivliag Madala, thiab Yakaunpau thiab Yauxej niam, thiab Xenpedi ob tug tub li niam. Thaum yuav tsaus ntuj muaj ib tug nplua nuj uas nyob hauv lub moos Alimathia hu ua Yauxej tuaj, nws kuj yog Yexus li thwjtim. Nws mus cuag Philaj thov Yexus lub cev tuag. Philaj thiaj hais kom muab cob rau nws. Yauxej txawm muab Yexus lub cev tuag los thiab muab ib daim ntaub mag uas huv los qhwv, coj mus tso rau hauv Yauxej lub qhov ntxa tshiab uas nws txaug cia rau hauv phab zeb, mas dov ib daim lag zeb loj los npog lub rooj ntxa ces txawm mus lawm. Maivliag Madala thiab dua ib tug Maivliag kuj zaum qhov ntawd ncaj ntawm lub rooj ntxa. Tagkis tom qab dhau hnub uas npaj rau hnub Xanpatau lawm, cov pov thawj hlob thiab cov Falixai ua ke tuaj cuag Philaj hais tias, “Yawg hlob, peb nco tau tias tus neeg dag ntawd thaum nws tseem muaj txojsia nyob nws hais tias, ‘Dhau peb hnub mas kuv yuav ciaj sawv rov los.’ Yog li ntawd thov koj hais kom zov lub qhov ntxa ruaj ruaj kom puv peb hnub, ntshai tsam nws cov thwjtim tuaj nyiag nws lub cev mus thiab hais rau cov pejxeem tias, ‘Nws twb sawv ciaj hauv qhov tuag rov los lawm.’ Ces qhov uas dag zaum no yuav phem heev dua thawj zaug.” Philaj thiaj hais rau lawv tias, “Tub rog zov yeej yog nej li, mas nej cia li mus zov ruaj ruaj npaum li uas ua tau.” Lawv txawm mus ntaus cim rau daim lag zeb kaw lub rooj ntxa ruaj ruaj thiab tso tub rog zov. Thaum dhau hnub Xanpatau lawm, hnub ib thaum kaj ntug txoog Maivliag Madala thiab dua ib tug Maivliag txawm mus saib lub qhov ntxa. Ua ciav ntuj txawm qeeg ntseeg nkaws heev. Tus Tswv ib tug tubtxib saum ntuj nqes los muab daim lag zeb dov tawm, ces txawm zaum saum daim lag zeb ntawd. Saib tug tubtxib ntawd mas zoo li xob laim thiab nws cev tsoos tsho dawb paug li daus xib daus npu. Cov tub rog uas zov ntxa ntshai tus tubtxib saum ntuj ntawd tshee hnyo thiab zoo yam li neeg tuag. Tus tubtxib saum ntuj thiaj hais rau cov pojniam tias, “Tsis txhob ntshai, kuv paub tias neb tuaj nrhiav Yexus uas raug muab teem rau saum tus khaublig ntoo. Nws tsis nyob ntawm no, nws twb ciaj sawv los lawm raws li nws twb hais tseg lawd. Cia li los saib lub chaw uas nws pw. Thiab maj nroos mus hais rau nws cov thwjtim tias, ‘Nws twb ciaj sawv hauv qhov tuag rov los lawm, nws yuav ua nej ntej mus rau pem Kalilais. Nej yuav pom nws qhov ntawd.’ No yog kuv hais rau neb ntag.” Ob tug txawm tawm hauv lub qhov ntxa sai sai ntshai thiab zoo siab thiab dhia mus qhia rau Yexus cov thwjtim. Ua ciav Yexus txawm ntsib ob tug thiab hais tias, “Nyob zoo lov?” Ob tug txawm los ze tuav nkaus Yexus kotaw pe hawm nws. Yexus hais rau ob tug tias, “Tsis txhob ntshai, cia li mus hais rau kuv cov kwvtij kom mus rau Kalilais, lawv yuav ntsib kuv qhov ntawd.” Thaum cov pojniam ntawd tabtom mus cov tub rog uas zov lub ntxa qee leej kuj mus rau hauv nroog thiab qhia txhua yam xwm uas tshwm los rau cov pov thawj hlob. Thaum cov pov thawj hlob thiab cov kev txwj laus tuaj ua ke sablaj ua ke tag lawd lawv txawm muab nyiaj ntau ntsaws rau cov tub rog thiab hais tias, “Nej cia li hais tias, ‘Thaum tsaus ntuj uas peb tsaug zog lawm Yexus cov thwjtim tuaj nyiag nws lub cev tuag coj mus lawm.’ Yog tus tswv xeev hnov txog tej no, peb mam li nrog nws hais, tsis pub nej raug teeb meem.” Cov tub rog txawm txais cov nyiaj ntawd thiab ua raws li lawv qhia. Mas zaj no ncha mus rau hauv cov Yudai txog niaj hnub nimno. Kaum ib tug thwjtim txawm mus rau pem Kalilais mus txog lub roob uas Yexus hais rau lawv. Thaum lawv pom Yexus lawv pe hawm nws, tiamsis muaj qee leej tseem ua xyem xyav. Yexus txawm txav los ze thiab hais rau lawv tias, “Hwjchim tag nrho saum ntuj thiab hauv ntiajteb twb muab cob rau kuv lawm. Yog li no nej cia li mus coj txhua haiv neeg los ua kuv li thwjtim, thiab muab lawv ua kevcai raus dej hauv leej Txiv, leej tub thiab Vaj Ntsuj Plig dawb huv lub npe, thiab qhia kom lawv tuav rawv txhua yam uas kuv tau qhia rau nej lawd. Thiab kuv niaj hnub yuav nrog nraim nej mus txog lub sijhawm kawg.” Yexus Khetos uas yog Vajtswv tus tub txoj xov zoo yog pib li no mus. Yog raws li Yaxaya uas yog xibhwb cev Vajtswv lus sau cia hais tias, “Saib maj, kuv tso kuv tus tubtxib mus ua koj ntej, tus ntawd yuav npaj koj txojkev cia. Muaj ib lub suab qw hauv tebchaws moj sab qhua hais tias, ‘Cia li npaj tus Tswv txojkev, cia li ua nws txoj kev kom ncaj.’ ” Yauhas uas coj ua kevcai raus dej kuj tshwm los rau hauv tebchaws moj sab qhua. Nws tshaj tawm kom ua kevcai raus dej qhia tias ntxeev dua siab tshiab thiaj tau txais kev zam txim. Thoob plaws Yudia tebchaws thiab cov neeg hauv Yeluxalees kuj tawm mus cuag nws. Lawv nyias lees nyias lub txim txhaum mas Yauhas muab lawv ua kevcai raus dej hauv tus dej Yaladee. Yauhas hnav tej ris tsho uas muab plaub ntxhuav ua thiab sia txoj siv tawv ntawm duav, nws noj kooj txig thiab zib ntab. Nws tshaj tawm hais tias, “Muaj ib tug yuav ua kuv qab los muaj hwjchim loj dua kuv, kuv twb tsis tsim nyog khoov mus daws nws txoj hlua khau. Kuv muab nej ua kevcai raus hauv dej tiamsis nws yuav muab nej ua kevcai raus hauv Vaj Ntsuj Plig uas dawb huv.” Lub sijhawm ntawd Yexus txawm tawm hauv lub moos Naxale uas nyob hauv lub xeev Kalilais tuaj, mas Yauhas muab nws ua kevcai raus dej hauv tus dej Yaladee. Thaum Yexus tawm hauv dej los tamsid nws txawm pom rooj ntug qheb kiag thiab Vaj Ntsuj Plig zoo li ib tug nquab nqes los rau saum nws. thiab muaj suab hais saum ntuj tuaj hais tias, “Koj yog kuv tus tub uas kuv hlub, kuv txaus siab rau koj heev.” Tamsim ntawd Vaj Ntsuj Plig txawm txhib Yexus mus rau hauv tebchaws moj sab qhua. Mas Yexus nyob hauv tebchaws moj sab qhua raug Xatas sim tau plaub caug hnub. Yexus nrog tsiaj qus nyob thiab cov tubtxib saum ntuj los ua koom tu nws. Thaum Yauhas raug ntes lawm, Yexus txawm mus rau Kalilais thiab tshaj tawm Vajtswv txoj xov zoo, hais tias, “Puv lub sijhawm lawm, thiab Vajtswv lub tebchaws los ze lawm, cia li ntxeev dua siab tshiab thiab ntseeg txoj xov zoo.” Thaum Yexus mus raws ntug Hiavtxwv Kalilais nws pom Ximoos thiab Ximoos tus kwv Anru, tabtom ntaus vas hauv hiavtxwv. Ob tug yog neeg muab ntses. Yexus hais rau ob tug tias, “Cia li los, raws kuv qab, mas kuv yuav tsa neb ua cov uas npo neeg ib yam li npo ntses.” Tamsim ntawd ob tug txawm tso ob tug tej vas tseg thiab raws Yexus qab mus. Yexus mus rau tom ntej mentsis kuj pom Xenpedi ob tug tub yog Yakaunpau thiab nws tus kwv Yauhas tabtom ntxiv vas hauv lub nkoj. Tamsim ntawd Yexus txawm hu ob tug ces ob tug txawm tso leej txiv Xenpedi thiab cov tub zog tseg rau hauv lub nkoj mas raws Yexus qab mus. Lawv mus rau hauv lub moos Khapena‑u, ces txog hnub Xanpatau Yexus txawm mus qhuab qhia hauv lub tsev sablaj. Lawv kuj xav tsis thoob rau tej lus uas nws qhia, rau qhov nws muaj hwjchim qhuab qhia lawv, tsis thooj li lawv cov xibhwb. Tamsim ntawd muaj ib tug yawg raug dab qias nyob hauv tsev sablaj qw nrov, hais tias, “Yexus uas yog neeg Naxale, koj tuaj thab peb ua dabtsi? Koj tuaj ua kom peb puam tsuaj lov? Kuv paub koj yog leejtwg, koj yog tus dawb huv ntawm Vajtswv.” Yexus txawm txwv dab hais tias, “Cia li nyob twjywm, thiab cia li tawm plaws hauv nws mus.” Tus dab qias ua rau tus ntawd huam ib tshaj, thiab qw nrov nrov tawm hauv nws lawm. Sawvdaws phimhwj heev sib tham tias, “Tej no yog dabtsi? Yog tej lus qhuab qhia tshiab uas muaj hwjchim heev. Nws hais rau dab mas dab kuj mloog nws lus.” Tamsim ntawd Yexus lub moo txawm nrov nto moo mus thoob plaws lub xeev Kalilais. Tamsim ntawd Yexus txawm tawm hauv tsev sablaj mus mas Yakaunpau thiab Yauhas nrog nws mus rau hauv Petus thiab Anru tsev. Ximoos niam tais pw tabtom ua npaws, lawv txawm hais rau Yexus paub. Yexus txawm mus tuav nkaus nws tes tsa sawv ces nws tus npaws txawm zoo kiag, nws txawm ua num rau lawv. Hnub ntawd thaum hnub poob qho lawm lawv coj txhua tus muaj mob thiab raug dab tuaj cuag Yexus. Tag nrho cov neeg hauv lub moos ntawd sau zog ua ke tuaj rau ntawm qhov rooj. Yexus kho cov uas muaj ntau yam mob zoo coob coob huvsi thiab ntiab dab tawm coob heev. Nws txwv tsis kheev cov dab ntawd hais lus vim cov dab ntawd paub nws. Thaum sawv ntxov tsis tau kaj ntug Yexus sawv tsees mus rau ib qho chaw uas tsis muaj neeg nyob thiab thov Vajtswv qhov ntawd. Ximoos thiab cov uas nrog nws ua ke kuj mus nrhiav Yexus. Thaum lawv ntsib nws lawv hais rau nws tias, “Sawvdaws puavleej nrhiav koj.” Yexus hais rau lawv tias, “Cia peb mus dua rau lwm lub zos uas nyob ib ncig no xwv kuv thiaj tshaj tawm rau qhov ntawd, rau qhov kuv yeej los ua tes haujlwm no.” Yexus txawm mus tshaj tawm hauv lawv tej tsev sablaj thiab ntiab dab tawm thoob plaws Kalilais tebchaws. Muaj ib tug mob lig mob ruas tuaj cuag nws txhos caug ntua thov Yexus hais tias, “Yog koj xav kho, koj yeej kho tau kuv zoo kom huv.” Yexus khuvleej nws heev txawm cev kiag tes mus npuab nws thiab hais rau nws tias, “Kuv xav los maj, cia li zoo kiag huv lauj.” Tamsim ntawd nws tej mob lig mob ruas txawm tawm hauv nws lub cev thiab nws zoo huv lawm. Yexus txwv tus ntawd tawv tawv, li tso nws mus thiab hais rau nws tias, “Tsis txhob piav ib los rau leejtwg mloog kiag li, cia li mus qhia koj lub cev rau tus pov thawj saib thiab xyeem tej uas ua kevcai ntxuav kom koj huv raws li Mauxe qhia tseg lawd ua timkhawv rau sawvdaws.” Tiamsis tus ntawd tawm mus ces txawm pib piav thiab tshaj tawm zaj ntawd nrov nto moo lug ua rau Yexus mus tsis tau tab meeg rau hauv lub moos, nws yuav tsum nyob sab nraud uas tsis muaj neeg nyob. Mas muaj neeg tuaj txhua qhov tuaj cuag Yexus. Dhau ntau hnub tom qab Yexus rov mus rau hauv lub moos Khapena‑u, sawvdaws hnov tias nws nyob hauv tsev lawm. Tej neeg coob coob sau nthwv tuaj ua ke, txawm yog ntawm qhov rooj los tsis tau kev nkag lawm, mas Yexus piav txoj xov zoo rau lawv mloog. Muaj neeg coj ib tug tuag tes tuag taw tuaj cuag Yexus, yog plaub leeg kwv nws tuaj. Thaum lawv coj tsis tau nws los rau ntawm Yexus vim muaj neeg coob, lawv txawm yaws cov vuas ib qho ncaj ntawm Yexus nyob lawm saud. Thaum qheb tau ib qho lawm lawv txawm tso lub chaw uas tus tuag tes tuag taw pw ntawd dauv los. Thaum Yexus pom lawv kev ntseeg nws txawm hais rau tus tuag tes tuag taw tias, “Tub 'e, koj lub txim twb muab daws lawm.” Cov xibhwb qhia Vajtswv kevcai qee leej uas zaum qhov ntawd txawm xav hauv lub siab nug hais tias, “Ua cas tus yawg no hais li ntawd? Nws hais lus tuam mom Vajtswv. Leejtwg yuav daws tau lub txim tsuas yog Vajtswv xwb?” Tamsim ntawd Yexus lub siab paub tias lawv xav hauv lawv lub siab li ntawd mas nws thiaj hais rau lawv tias, “Ua cas nej yuav xav li no hauv nej lub siab? Qhov uas hais rau tus tuag tes tuag taw ntawd tias, ‘Twb daws koj lub txim lawm,’ thiab hais tias, ‘Cia li sawv tsees nqa koj lub chaw pw mus kev,’ qhov twg yoojyim dua? Kom nej thiaj paub tias Neeg leej Tub muaj hwjchim hauv ntiajteb daws tau lub txim,” Yexus thiaj hais rau tus tuag tes tuag taw tias, “Kuv hais rau koj tias, cia li sawv tsees nqa koj lub chaw pw mus tsev.” Nws txawm sawv tsees tamsim ntawd nqa kiag nws lub chaw pw tawm mus tab meeg sawvdaws. Tej neeg sawvdaws thiaj phimhwj heev thiab qhuas Vajtswv hais tias, “Peb tsis tau txeev pom dua li no kiag li.” Yexus txawm tawm mus rau tom ntug hiavtxwv dua ib zaug. Neeg coob coob tuaj cuag nws mas nws qhuab qhia lawv. Thaum nws tabtom mus ntawd nws pom Levi uas yog Afe‑a tus tub zaum ntawm lub rooj sau se, Yexus txawm hais rau nws tias, “Cia li raws kuv qab mus.” Levi txawm sawv tsees raws Yexus qab mus. Thaum Yexus zaum noj mov hauv Levi tsev, txawm muaj cov neeg sau se thiab cov neeg muaj txim ntau leej tuaj nrog Yexus thiab nws cov thwjtim nyob ua ke ntawm rooj mov, vim yog muaj neeg raws Yexus qab coob heev. Thaum cov xibhwb qhia Vajtswv kevcai uas yog Falixai pom tias Yexus nrog cov neeg sau se thiab cov neeg muaj txim noj mov ua ke, lawv txawm hais rau Yexus cov thwjtim tias, “Ua cas nws nrog cov neeg sau se thiab cov neeg muaj txim noj mov ua ke?” Thaum Yexus hnov li ntawd nws txawm hais rau lawv tias, “Cov neeg uas tsis muaj mob tsis cheem tsum Kws tshuaj, tsuas yog cov muaj mob thiaj cheem tsum xwb. Kuv tsis yog los hu cov neeg ncaj ncees, tiamsis yog los hu cov neeg muaj txim.” Yauhas cov thwjtim thiab cov Falixai tabtom ua kevcai yoo mov. Muaj neeg tuaj hais rau Yexus tias, “Ua cas Yauhas cov thwjtim thiab cov Falixai coj kevcai yoo mov, tiamsis koj cov thwjtim tsis coj?” Yexus hais rau lawv tias, “Tus nraug vauv cov kwvluag yuav yoo mov rau thaum tus nraug vauv tseem nrog lawv nyob lov? Ncua sijhawm uas tus nraug vauv tseem nrog lawv nyob lawv yeej yuav tsis yoo mov. Yuav muaj ib hnub twg uas tus nraug vauv yuav raug muab coj ncaim lawv mus, mas thaum ntawd lawv yuav coj kevcai yoo mov. Tsis muaj leejtwg muab daim ntaub tshiab los ntxiv lub qub tsho. Yog ua li ntawd daim ntaub uas muab ntxiv ntawd yuav xaum dua lub qub tsho ces yimhuab dua lub tsho ntuag loj dua. Thiab tsis muaj leejtwg muab cawv txiv hmab tshiab ntim rau hauv lub hnab tawv qub. Yog ua li ntawd, cov cawv txiv hmab yuav ua rau lub hnab tawv tawg, ces cov cawv txiv hmab thiab lub hnab yuav piam tag huvsi. Cov cawv txiv hmab tshiab yuav muab ntim rau hauv lub hnab tawv tshiab.” Muaj ib hnub Xanpatau Yexus tabtom taug kev hauv ib daim teb mog. Thaum cov thwjtim taug kev lawv pib de hnab mog los. Cov Falixai hais rau Yexus tias, “Saib maj, ua cas koj cov thwjtim ua tej uas caiv tsis kheev ua rau hnub Xanpatau?” Yexus hais rau lawv tias, “Nej tsis tau nyeem tej uas Davi ua rau thaum nws thiab cov neeg uas nrog nws cheem tsum noj mov thiab tshaib plab lov? Nws twb nkag mus rau hauv Vajtswv lub tsev rau thaum Anpiyatha ua tuam pov thawj hlob, thiab muab tej ncuav uas xyeem txawb rau ntawm Vajtswv lub xubntiag los noj, yog tej uas caiv tsis pub noj tsuas yog cov pov thawj thiaj noj tau xwb. Thiab nws tseem muab rau cov uas nrog nws ua ke noj.” Thiab Yexus hais rau lawv tias, “Hnub Xanpatau yog tsim los rau neeg tsis yog tsim neeg los rau hnub Xanpatau. Rau qhov Neeg leej Tub yeej yog hnub Xanpatau tus tswv.” Yexus mus rau hauv lub tsev sablaj dua ib zaug. Mas muaj ib tug yawg qhuav ib sab tes nyob hauv thiab. Lawv txawm soj saib Yexus yuav kho tus mob ntawd rau hnub Xanpatau los tsis kho xwv lawv thiaj tau chaw kom Yexus. Yexus txawm hais rau tus yawg qhuav tes tias, “Cia li los rau tom hauv ntej no.” Yexus txawm hais rau lawv tias, “Hnub Xanpatau muaj cai ua qhov zoo los ua qhov phem, muaj cai cawm txojsia los txov txojsia tseg?” Lawv nyob ntsiag to. Yexus txawm tsa muag ntsia ua chim tsawv rau lawv cov uas nyob ib ncig ntawd. Nws ntxhov siab vim lawv lub siab tawv heev, nws thiaj hais rau tus qhuav tes ntawd tias, “Cia li xyab kiag koj txhais tes lauj!” Tus ntawd txawm xyab kiag tes, mas nws txhais tes txawm zoo kiag li qub. Cov Falixai txawm tawm mus thiab tamsim ntawd nrog Helauj cov sablaj tias yuav ua li cas thiaj tua tau Yexus. Yexus thiab nws cov thwjtim txawm tawm qhov ntawd mus rau nram hiavtxwv, thiab muaj neeg coob coob tawm hauv Kalilais raws qab mus. Thiab muaj neeg tuaj hauv lub xeev Yudia, tuaj hauv Yeluxalees thiab lub xeev Idumia, thiab tuaj sab ntug dej Yaladee tim ub thiab tuaj ib ncig Thailab thiab Xaidoo coob coob tuaj cuag nws vim hnov txog txhua yam uas Yexus ua. Yexus txawm hais rau nws cov thwjtim kom npaj ib lub nkoj tos nws xwv cov neeg coob coob thiaj tsis txav los ti nws, rau qhov Yexus tau kho neeg coob coob zoo, mas txhua tus uas muaj mob thiaj sib txiv los xav kov tau nws. Cov dab qias pom Yexus thaum twg, lawv txawm khwb nkaus rau ntawm Yexus qw nrov hais tias, “Koj yog Vajtswv tus tub.” Mas nws txwv tawv tawv kom lawv tsis txhob qhia rau luag paub nws. Yexus txawm nce mus pem roob thiab nws hu cov uas nws xav kom ua nws cov thwjtim los, ces lawv txawm los cuag nws. Yexus tsa kaum ob leeg ua cov uas nrog nws nyob thiab ua cov uas txib mus tshaj tawm, thiab muaj hwjchim ntiab tau dab tawm, yog Ximoos uas Yexus tis dua npe hu ua Petus, thiab Xenpedi ob tug tub yog Yakaunpau thiab nws tus kwv Yauhas, uas Yexus tis dua npe hu ua Npau‑anawke txhais hais tias “Xob nthe li tub,” thiab Anru thiab Fili thiab Npathaulaumai, thiab Mathai thiab Thauma thiab Afe‑a tus tub Yakaunpau thiab Thade‑a, thiab Ximoos uas tuav nws tebchaws, thiab Yudas Ikhali‑au uas fav xeeb rau Yexus. Yexus mus rau hauv ib lub tsev, rov qab muaj neeg coob coob tuaj ua rau Yexus lawv tsis xyeej noj mov li. Thaum Yexus tsev neeg hnov li ntawd lawv txawm mus tswj tav Yexus rau qhov muaj neeg hais tias, “Nws pib vwm lawm.” Cov xibhwb qhia Vajtswv kevcai uas tuaj Yeluxalees tuaj hais tias, “Nws raug dab Npe‑eexenpu thiab nws siv tus thawj dab li hwjchim ntiab dab tawm.” Yexus txawm hu lawv los ua paj lug hais rau lawv tias, “Xatas yuav ntiab Xatas tau li cas? Yog lub tebchaws twg tawg faib lawm lub tebchaws ntawd nyob tsis tau ruaj lawm. Yog lub tsev twg tawg faib lawm lub tsev ntawd nyob tsis tau ruaj lawm. Yog Xatas rov tawm tsam Xatas tawg faib lawm, nws kuj nyob tsis tau ruaj, nws muaj uas yuav ploj tag mus xwb. Tsis muaj leejtwg yuav nkag tau rau hauv tus uas muaj zog heev lub tsev thiab lws tau nws tej qhov txhia chaw, yuav tsum yog xub muab tus uas muaj zog ntawd khi ua ntej tso thiaj li lws tau nws lub tsev. “Kuv hais tseeb rau nej tias, txhua yam kev txhaum thiab tej lus uas hais tuam mom yuav zam tau rau neeg tiamsis tus uas hais lus tuam mom Vaj Ntsuj Plig uas dawb huv mas yuav tsis muaj ib hnub uas zam tau tus ntawd li, nws yuav muaj txim mus ib txhis.” Qhov uas hais li no twb yog vim lawv hais tias, “Nws raug ib tug dab qias.” Thaum ntawd Yexus niam thiab nws cov kwv txawm tuaj sawv rau sab nraud. Lawv txib neeg mus hu Yexus. Muaj neeg coob zaum vij Yexus, lawv txawm hais rau Yexus tias, “Koj niam thiab koj cov kwv [thiab nkauj muam] sawv sab nraud nrhiav koj.” Yexus teb lawv tias, “Leejtwg yog kuv niam, thiab leejtwg yog kuv cov kwv?” Nws tsa muag ntsia rau cov neeg uas zaum ib ncig ntawm nws mas hais tias, “Cov no yog kuv niam thiab kuv cov kwv. Leejtwg ua raws li Vajtswv lub siab nyiam, tus ntawd yog kuv li kwv, kuv li muam thiab kuv niam.” Yexus pib qhuab qhia ntawm ntug hiavtxwv dua ib zaug. Muaj neeg coob coob tuaj txoos ua ke ntawm nws, nws txawm nce mus zaum rau hauv ib lub nkoj hauv hiavtxwv, mas cov neeg ntawd sawvdaws nyob saum ntug nqhuab ntawm ntug hiavtxwv. Nws txawm ua paj lug qhia ntau yam rau lawv, thiab nws qhuab qhia hais tias, “Cia li tig ntsej mloog. Muaj ib tug tawm mus tseb noob. Thaum nws tseb cov noob ib txhia poob rau saum txojkev mas noog los khaws noj lawm. Muaj ib txhia poob rau thaj av uas muaj pob zeb tiv muaj av tsawg tsawg, mas cov noob tuaj tamsid vim av tsis tob. Thaum hnub tuaj raug tshav ntuj kub, mas cov cag tsis tob txawm tuag tshav lawm. Muaj ib txhia poob rau hauv plawv tsob pos, ces tsob pos hlob tuaj laum lawm, thiaj tsis txi txiv. Muaj ib txhia poob rau hauv thaj av zoo thiab txi txiv, yog hlob zoo huaj vam thiab txi tau peb caug npaug, rau caum npaug thiab ib puas npaug.” Thiab Yexus hais tias, “Leejtwg muaj qhov ntsej hnov, cia li mloog nawj!” Thaum cov neeg mus tag lawm, cov uas nyob ntawm Yexus ib ncig thiab kaum ob tug thwjtim txawm nug Yexus txog tej paj lug. Nws hais rau lawv tias, “Tej uas muab npog cia lawd uas hais txog Ntuj Ceeb Tsheej twb muab qhia rau nej lawm, tiamsis yuav ua paj lug qhia txhua yam rau cov uas nyob sab nraum nej, “ ‘Xwv lawv thiaj saib tag saib thiab los tsis pom, lawv mloog tag mloog thiab los tsis nkag siab. tsam ces lawv yuav tig los thiab txais kev zam txim.’ ” Yexus hais rau lawv tias, “Zaj paj lug ntawd nej tsis nkag siab lov? Yog li ntawd, nej yuav nkag siab tej paj lug huvsi tau li cas? Tus tseb noob ntawd tseb txoj xov zoo. Cov noob uas poob rau saum txojkev uas tseb txoj xov zoo ntawd yog zoo li no. Neeg hnov lawm tiamsis tamsim ntawd Xatas tuaj muab txoj xov zoo uas tseb rau hauv lawv lub siab txeeb lawm. Cov noob uas tseb poob rau thaj av uas muaj pob zeb tiv yog cov uas hnov dheev txoj xov zoo thiab zoo siab txais yuav tamsid, tiamsis lawv cog cag tsis tob rau hauv lawv, thiaj nyob ib ntus xwb. Thaum muaj kev ceeblaj txom nyem lossis kev tsim txom tshwm los vim yog tim txoj xov zoo ntawd, lawv txawm tso tseg tamsim ntawd. Cov noob uas tseb poob rau hauv plawv tsob pos yog cov uas tau hnov txoj xov zoo, tiamsis tej kev txhawj xeeb hauv ntiajteb thiab tej kev qaug siab rau nyiaj txiag thiab kev ntshaw lwm yam txawm los laum txoj xov zoo ntawd lawm, thiaj tsis txi txiv. Cov noob uas tseb poob rau hauv thaj av zoo yog cov uas tau hnov txoj xov zoo ntawd mas txais yuav thiab txi tau peb caug npaug, rau caum npaug thiab ib puas npaug.” Yexus hais rau lawv tias, “Yuav muab lub teeb txawb rau lub thoob khwb lossis muab txawb rau hauv qab txag lov, tsis yog muab txawb rau saum lub chaw txawb teeb lov? Rau qhov tsis muaj ib yam dabtsi uas muab zais cia lawm yuav tsis raug muab thws tshwm los, thiab tsis muaj ib yam dabtsi uas muab npog cia lawm yuav tsis raug muab nthuav tawm los. Leejtwg muaj qhov ntsej hnov, cia li mloog nawj!” Yexus hais rau lawv tias, “Cia li saib tib zoo rau yam uas nej hnov. Rau qhov nej muab lub thoob twg luj rau luag, yuav muab lub thoob ntawd luj rov rau nej ib yam nkaus thiab tseem yuav tsav ntxiv rau nej. Rau qhov tus uas muaj lawd yuav muab tsav ntxiv rau nws, tiamsis tus uas tsis muaj, txawm yog tej uas nws muaj los yuav muab rho ntawm nws mus.” Yexus hais tias, “Vajtswv lub tebchaws piv ib yam li ib tug mus tseb noob rau hauv av, tsaus ntuj nws kuj pw tsaug zog nruab hnub nws sawv los, lub noob ntawd ua kaus tuaj hlob li cas nws kuj tsis paub. Twb yog cov av ua kom tuaj, xub tawg kaus hlob tuaj mam li txhawv mam li muaj hnab puv tuaj. Thaum siav lawd, nws xuas liag mus hlais vim yog txog lub caij hlais lawm.” Thiab Yexus hais tias, “Peb yuav muab dabtsi los piv txog Vajtswv lub tebchaws lossis ua paj lug qhia li cas? Muab piv ib yam li lub noob me me uas thaum muab tseb rau hauv av yog lub uas me dhau lwm yam noob huvsi hauv ntiajteb, tiamsis thaum tuaj hlob lawd kuj loj dua lwm yam zaub huvsi thiab nthuav ceg dav loj hlob, tej nas noog saum nruab ntug thiaj tau ua zes hauv tus qab duab ntxoov ntxoo.” Yexus ua ntau yam paj lug li no qhia txoj xov zoo rau lawv raws li uas lawv muaj peevxwm mloog tau. Tsis muaj ib zaj twg uas nws tsis ua paj lug qhia rau lawv. Thaum tshuav cov thwjtim nyob xwb nws txhais txhua yam lub ntsiab rau lawv. Tib hnub ntawd thaum yuav tsaus ntuj, Yexus hais rau lawv tias, “Peb cia li hla mus rau sab tim ub.” Lawv txawm ncaim cov neeg ntawd mus. Yexus twb nyob hauv lub nkoj lawm mas cov thwjtim coj nws nrog lawv mus. Thiab muaj ntau lub nkoj nrog lawv mus. Mas cua daj cua dub ntsawj hlob thiab ntas tej niag nthwv dej rau hauv lub nkoj, dej twb yuav puv lub nkoj. Tiamsis Yexus rau ncoo pw tsaug zog tom tw nkoj. Cov thwjtim thiaj mus tsa nws hais tias, “Xibhwb, koj tsis txhawj qhov uas peb yuav puam tsuaj lov?” Yexus txawm tsim dheev los tav cua thiab hais rau hiavtxwv tias, “Cia li tus yees, nyob twjywm.” Cua txawm tu thiab txhua yam tus yees huvsi lawm. Yexus hais rau lawv tias, “Ua cas nej ntshai? Nej tsis muaj kev ntseeg lov?” Lawv ntshai thiab hwm nws heev thiab sib tham hais tias, “Tus no yog leejtwg es tej cua thiab dej hiavtxwv kuj mloog nws lus?” Yexus lawv thiaj mus txog sab hiavtxwv tim ub uas yog lub moos Kelaxa li kav xyuam. Thaum Yexus tawm hauv nkoj los txawm muaj ib tug raug dab qias tawm hauv toj ntxas los ntsib nws. Tus ntawd nyob tom toj ntxas, tsis muaj leejtwg khi tau nws kiag li, txawm yog muab saw hlau khi los kuj tsis tau li. Twb muab loj cuj thiab muab saw hlau khi kotaw ntau zaus lawm los nws rub saw hlau tu thiab muab loj cuj lov pes ntho. Tsis muaj leejtwg muaj zog tswj tau nws. Nws qw nrov nrov tom toj ntxas thiab pem tej roob thiab muab pob zeb suam nws lub cev nruab hnub hmo ntuj tsis tu li. Thaum nws pom dheev Yexus deb deb, nws txawm dhia los pe Yexus, thiab qw nrov hais tias, “Au Yexus uas yog Vajtswv loj dua ntais tus tub, koj tuaj thab kuv ua dabtsi? Kuv thov koj tuav Vajtswv lub npe cog lus tias koj yuav tsis tsim txom kuv.” Twb yog vim Yexus tau hais rau nws tias, “Dab qias, cia li tawm ntawm nws mus.” Yexus txawm nug dab tias, “Koj npe hu li cas?” Nws teb tias, “Kuv npe hu ua Coob rau qhov peb muaj coob tus.” Tus yawg ntawd txawm taij thov Yexus tsis txhob ntiab cov dab tawm hauv lub tebchaws ntawd mus. Muaj ib pab npua coob tabtom nrhiav noj ntawm ntav toj. Cov dab ntawd txawm thov Yexus tias, “Thov ntiab peb mus rau ntawm pab npua ntawd thiab cia peb txeem rau hauv cov npua.” Yexus txawm tso ncauj. Cov dab qias txawm tawm mus nkag rau hauv pab npua, mas pab npua uas muaj kwvlam ob txhiab tus thiaj dhia plas toj ntxhab mus rau hauv hiavtxwv txham dej tuag tag. Cov neeg yug npua thiaj khiav mus piav tej ntawd rau hauv lub moos thiab tej zej zog. Mas tej neeg txawm tawm tuaj saib muaj xwm txheej dabtsi tshwm los. Thaum lawv tuaj txog ntawm Yexus, lawv pom tus uas raug dab coob ntawd hnav ris tsho zaum meej pem zoo, lawv thiaj ntshai kawg. Cov neeg uas tau pom, piav tej xwm txheej uas tshwm rau tus raug dab ntawd thiab tshwm rau pab npua rau lawv mloog. Lawv txawm pib thov kom Yexus tawm hauv lawv li kav xyuam mus. Thaum Yexus tabtom yuav nce rau hauv nkoj mas tus uas txeev raug dab ntawd kuj thov cia nws nrog Yexus nyob ua ke. Yexus tsis kheev thiab hais rau tus ntawd tias, “Koj cia li mus cuag koj cov neeg hauv tsev thiab qhia rau lawv paub tias tus Tswv tau ua li cas rau koj thiab twb khuvleej koj lawm.” Ces tus ntawd txawm rov qab mus thiab pib piav txhua yam uas Yexus ua rau nws mus thoob plaws lub xeev Dekapoli. Mas tej neeg sawvdaws kuj phimhwj heev. Thaum Yexus caij nkoj hla mus rau sab tim ub lawd muaj neeg coob coob tuaj ua ke rau ntawm nws. Yexus tseem nyob ntawm ntug hiavtxwv. Txawm muaj ib tug thawj uas saib xyuas lub tsev sablaj npe hu ua Yaila tuaj. Thaum nws pom Yexus nws txawm pe ti nkaus ntawm Yexus kotaw, thov Yexus hais tias, “Kuv tus mentxhais mob twb yuav tuag. Thov koj mus muab tes npuab rau saum nws mas nws yuav zoo muaj txojsia nyob.” Yexus thiaj nrog nws mus, muaj neeg coob coob raws Yexus qab mus sib txiv qev. Muaj ib tug pojniam uas muaj mob nchuav cev tau kaum ob xyoos lawm. Nws raug txom nyem heev vim yog nrhiav ntau tus Kws tshuaj thiab nyiaj txiag tag huvsi los tus mob kuj tsis zoo, tseem yimhuab mob loj tuaj. Nws twb hnov txog Yexus nws thiaj nrog cov neeg coob ntawd raws Yexus qab kov Yexus lub tsho, rau qhov nws xav tias, “Yog kuv tau kov Yexus lub tsho xwb, mas kuv tus mob yeej yuav zoo.” Tamsim ntawd nws ntshav txawm tu nrho lawm, nws kuj hnov tias nws lub cev zoo lawm. Tamsim ntawd Yexus kuj paub tias hwjchim tawm hauv nws lawm nws txawm tig ntsia rau ib ncig cov neeg ntawd, nug hais tias, “Leejtwg kov kuv lub tsho?” Nws cov thwjtim txawm hais rau Yexus tias, “Koj pom cov neeg coob sib txiv qev rau koj es koj tseem nug hais tias, ‘Leejtwg kov kuv?’ ” Yexus tsa muag ntsia rau ib ncig saib leejtwg tau kov nws. Thaum tus pojniam ntawd paub tej uas tshwm rau nws lawd nws thiaj ntshai tshee hnyo los khwb nkaus rau ntawm Yexus xubntiag qhia rau Yexus raws li uas muaj tseeb. Yexus hais rau nws tias, “Mentxhais 'e, koj txojkev ntseeg ua rau koj zoo lawm. Cia li mus ua siab tus yees thiab tus mob no zoo kiag.” Thaum Yexus tseem hais tej lus ntawd, muaj qee leej tuaj ntawm tus thawj uas saib xyuas tsev sablaj lub tsev tuaj hais tias, “Koj tus ntxhais twb tuag lawm. Koj tseem yuav tab kaum xibhwb ua dabtsi?” Yexus tsis quav ntsej tej uas lawv hais ntawd, nws txawm hais rau tus thawj uas saib xyuas tsev sablaj tias, “Tsis txhob ntshai, cia li ntseeg xwb.” Yexus tsis kheev leejtwg nrog nws mus tsuas yog Petus, Yakaunpau thiab Yakaunpau tus kwv Yauhas mus xwb. Thaum lawv tuaj txog tus thawj saib xyuas tsev sablaj ntawd lub tsev, mas Yexus pom neeg ntxhov hnyo quaj thiab quaj nyiav zom zaws. Thaum nws nkag rau hauv tsev lawd nws txawm hais rau lawv tias, “Nej ntxhov hnyo thiab quaj ua dabtsi? Tus menyuam no tsis tuag, nws tsaug zog xwb.” Lawv txawm thuam luag Yexus. Tiamsis Yexus ntiab cov neeg ntawd sawvdaws tawm tag lawd, mas nws coj leej txiv thiab leej niam thiab peb tus thwjtim nrog nws nkag rau hauv lub chaw uas tus menyuam pw. Yexus ntsiab nkaus tus mentxhais ntawd txhais tes thiab hais rau nws tias, “Thalitha khumi,” uas txhais hais tias, “Mentxhais 'e, kuv hais rau koj, cia li sawv tsees.” Tamsim ntawd tus mentxhais txawm sawv tsees mus kev (nws hnub nyoog muaj kaum ob xyoos). Thaum ntawd lawv phimhwj heev. Yexus kuj txwv lawv tawv tawv kom tsis txhob qhia leejtwg paub txog zaj no, thiab hais kom lawv muab mov rau tus mentxhais noj. Yexus txawm tawm qhov ntawd mus rau nws lub moos, cov thwjtim kuj nrog nws mus. Txog hnub Xanpatau nws pib qhuab qhia hauv lub tsev sablaj, mas cov neeg uas hnov ntawd muaj ntau leej phimhwj sib hais tias, “Tus neeg no tau txhua yam no qhovtwg los? Thiab lub tswvyim uas muab pub rau nws yog tswvyim dabtsi? Nws txhais tes tau ua tej txujci phimhwj loj kawg li lauj! Nws tsis yog tus Kws ntoo thiab yog Maivliag li tub lov? Thiab nws cov kwv yog Yakaunpau thiab Yauxes thiab Yudas thiab Ximoos los tsis yog? Nws cov muam kuj nrog peb nyob no los tsis yog?” Lawv txawm tsis txaus siab rau nws. Yexus txawm hais rau lawv tias, “Luag tej yeej hwm tus xibhwb cev Vajtswv lus, tsuas yog nws lub moos thiab nws cov kwvtij thiab nws cuab neeg thiaj tsis hwm nws xwb.” Nws thiaj ua tsis tau ib yam txujci phimhwj rau hauv lub moos ntawd tsuas yog tsa tes npuab cov uas muaj mob ob peb leeg zoo xwb. Nws xav tsis thoob rau qhov lawv tsis muaj kev ntseeg. Ces nws txawm mus qhuab qhia thoob plaws tej zej zog ib ncig. Yexus hu kaum ob tug thwjtim los thiab pib txib lawv tawm mus ua ib nkawg ib nkawg, thiab pub hwjchim rau lawv ntiab tau dab tawm. Nws nkaw lus kom lawv tsis txhob coj dabtsi mus siv taug kev tsuas yog coj tus pas nrig xwb, tsis txhob coj mov noj, tsis txhob khuam hnab thoob puab, tsis txhob coj nyiaj hauv lub hnas tawv, yuav tsum rau khau, tsis txhob hnav ob lub tsho. Thiab Yexus hais rau lawv tias, “Yog nej mus poob rau yig twg kuj nyob hauv lub tsev ntawd mus txog thaum tawm qhov ntawd mus. Yog lub chaw twg tsis txais nej thiab tsis mloog nej qhia, mas thaum nej tawm mus nej cia li nchos tej hmoov av uas lo nej kotaw pov tseg ua timkhawv tawm tsam lawv.” Lawv txawm tawm mus tshaj tawm kom ntxeev dua siab tshiab. Lawv ntiab ntau tus dab tawm thiab muab roj pleev cov uas muaj mob zoo ntau leej. Vajntxwv Helauj hnov txog tej no rau qhov Yexus lub moo nrov nto moo lug. Qee leej hais tias, “Yauhas uas coj ua kevcai raus dej sawv hauv qhov tuag rov los lawm, mas nws thiaj muaj hwjchim ua tau tej txujci phimhwj no.” Tiamsis qee leej hais tias, “Nws yog Eliya.” Thiab qee leej hais tias, “Nws yog ib tug xibhwb cev Vajtswv lus ib yam li ib tug xibhwb thaum ub.” Thaum Helauj hnov lawm nws txawm hais tias, “Yauhas uas kuv txiav caj dab lawd sawv hauv qhov tuag rov los.” Rau qhov Helauj twb txib neeg mus ntes Yauhas khi los kaw rau hauv tsev lojfaj, vim yog tim Helaudia uas yog Helauj tus kwv Fili tus pojniam, uas Helauj yuav los ua pojniam, rau qhov Yauhas txeev hais rau Helauj tias, “Koj tsis muaj cai yuav koj tus kwv tus pojniam los ua koj pojniam.” Helaudia thiaj cib nyeej rau Yauhas xav muab nws tua pov tseg. Tiamsis nws tua tsis tau, vim Helauj ntshai Yauhas, thiab paub tias Yauhas yog ib tug ncaj ncees thiab dawb huv Helauj thiaj tsom kwm nws. Thaum Helauj hnov Yauhas tej lus ntawd nws kuj nyuaj siab heev los nws tseem zoo siab mloog thiab. Muaj ib hnub txawm txog sijhawm zoo yog hnub uas ua kevcai nco txog hnub uas yug Helauj, ces Helauj npaj ib rooj noj haus rau cov uas ua hlob thiab cov thawj tub rog thiab cov neeg tseem ceeb thoob plaws lub xeev Kalilais. Thaum Helaudia tus ntxhais los dhia seev cev mas ua rau Helauj thiab cov qhua txaus siab heev. Vajntxwv txawm hais rau tus ntxhais ntawd tias, “Koj thov yam twg kuv yuav pub yam ntawd rau koj.” Helauj txawm cog lus twv tias, “Koj thov yam twg kuv yuav pub yam ntawd rau koj, txawm yog thov lub tebchaws ib nrab los kuj tau.” Tus ntxhais thiaj tawm mus nug leej niam tias, “Kuv yuav thov dabtsi?” Leej niam teb tias, “Cia li thov Yauhas uas coj ua kevcai raus dej lub taubhau.” Tamsim ntawd tus ntxhais txawm maj nroos nkag mus cuag vajntxwv thiab thov hais tias, “Kuv xav kom koj muab Yauhas uas coj ua kevcai raus dej lub taubhau tso rau hauv lub choo coj los pub rau kuv tamsim no.” Mas vajntxwv ntxhov siab kawg, tiamsis vim yog saib rau tej lus uas nws twv thiab saib rau cov qhua nws thiaj tsis kam rhuav tej lus uas twv cia ntawd. Tamsim ntawd vajntxwv txawm txib tus uas tua neeg mus coj Yauhas lub taubhau los. Nws thiaj mus txiav Yauhas lub taubhau hauv tsev lojfaj tso rau hauv lub choo coj los pub rau tus ntxhais ntawd, tus ntxhais thiaj coj mus rau leej niam. Thaum Yauhas cov thwjtim hnov tej xwm txheej no, lawv txawm tuaj coj Yauhas lub cev mus log rau hauv qhov ntxa. Cov tubtxib thiaj rov los cuag Yexus thiab piav txog txhua yam uas lawv tau ua thiab qhuab qhia. Mas Yexus hais rau lawv tias, “Nej cia li nrog kuv mus rau ib qho chaw uas tsis muaj neeg es so kom los siav mentsis.” Rau qhov muaj neeg mus los coob coob twb tsis muaj sijhawm noj mov li. Lawv txawm nce nkoj mus rau ib qho chaw uas tsis muaj neeg nyob. Muaj neeg coob pom lawv mus thiab paub lawv, ces txawm tawm hauv txhua lub moos dhia kotaw mus txog ua ntej. Thaum Yexus tawm hauv lub nkoj los nws pom muaj neeg coob coob, nws thiaj khuvleej lawv rau qhov lawv zoo li pab yaj uas tsis muaj tus tswv yug, mas Yexus txawm pib qhuab qhia lawv ntau yam. Thaum lig lawm nws cov thwjtim los hais rau nws tias, “Ntawm no yog ntuj nrag teb do, thiab tav no lig lawm. Cia li tso cov neeg mus xwv lawv thiaj tau mus yuav mov noj tom tej teb thiab tej zej zog ib ncig no.” Yexus teb lawv tias, “Nej cia li pub rau lawv noj.” Lawv hais rau nws tias, “Peb yuav mus yuav ncuav ob puas txiaj denalia pub rau lawv noj lov?” Yexus hais rau lawv tias, “Nej muaj pes tsawg lub ncuav? Nej cia li mus saib.” Thaum lawv saib lawd lawv txawm hais tias, “Muaj tsib lub ncuav thiab ob tug ntses.” Ces Yexus txawm hais kom cov neeg sawvdaws zaum rau hauv tej nyom ntsuab ntsuab ua tej pab tej pawg. Lawv txawm zaum ua tej pawg, tej pawg ib puas leej, tej pawg tsib caug leej. Thaum Yexus txais tsib lub ncuav thiab ob tug ntses ntawd lawm, nws tsa muag ntsia rau saum ntuj thov Vajtswv foom koob hmoov mas muab cov ncuav ntais cev rau cov thwjtim kom muab faib rau cov neeg thiab nws muab ob tug ntses ntawd faib rau lawv sawvdaws. Lawv txhua tus noj tsau huvsi. Tej ncuav thiab tej ntses uas noj tsis tag lawv khaws tau kaum ob tawb puv nkaus. Cov neeg uas noj ntawd cov txivneej xwb muaj tsib txhiab leej. Tamsim ntawd Yexus hais kom nws cov thwjtim nce nkoj hla dej ua nws ntej mus rau sab tid rau hauv lub moos Npexaida, ces Yexus txawm tso cov neeg rov mus. Thaum nws xa lawv mus tag lawm, nws txawm nce mus thov Vajtswv pem roob. Thaum tsaus ntuj lawd, lub nkoj nyob tom plawv hiavtxwv, Yexus tib leeg nyob nruab nqhuab. Nws pom tias cov thwjtim nquam nkoj ceeblaj heev kawg vim yog cua ntsawj tom hauv ntej tuaj. Thaum kwvlam qaib qua thawj tsig Yexus mus kotaw saum nplaim dej hiavtxwv tuaj rau ntawm cov thwjtim. Nws yuav hla kiag lawv mus, tiamsis thaum lawv pom nws los kotaw saum nplaim dej, lawv xav tias yog dab, thiab lawv qw nrov, rau qhov lawv sawvdaws pom nws thiab ntshai kawg li. Tamsim ntawd Yexus hais rau lawv tias, “Ua siab tuab, yog kuv ntag. Tsis txhob ntshai.” Nws thiaj nce mus nrog lawv nyob ua ke hauv lub nkoj, ces cua kuj tu lawm. Lawv phimhwj kawg li, rau qhov lawv tsis nkag siab txog tej ncuav ntawd, lawv lub siab tawv. Thaum lawv hla dhau hiavtxwv lawd lawv tuaj txog ntawm Kenexale thiab nres nkoj qhov ntawd. Thaum lawv tawm hauv lub nkoj, tamsim ntawd cov neeg uas nyob ntawd cim tau Yexus. Lawv txawm dhia mus thoob plaws ib ncig ntawd, mas pib kwv cov uas muaj mob pw saum txaj tuaj rau tej chaw uas lawv hnov tias Yexus nyob ntawd. Thaum Yexus mus rau qhovtwg, tsis hais hauv tej zej zog thiab hauv tej moos thiab hauv tej teb, lawv kuj muab cov neeg muaj mob tso rau ntawm tshav puam, thiab thov Yexus cia cov neeg mob ntawd kov Yexus lub qab tsho. Txhua tus uas tau kov lawd kuj zoo huvsi. Thaum cov Falixai thiab cov xibhwb qhia Vajtswv kevcai qee leej uas tuaj hauv Yeluxalees tuaj, ua ke tuaj cuag Yexus, lawv pom nws cov thwjtim qee leej tes qias tsis huv cia li noj mov tsis tau ntxuav. (Rau qhov cov Falixai thiab cov Yudai sawvdaws yog tsis tau ntxuav tes tso mas tsis noj mov, raws li lawv tej poj koob yawm txwv qhia. Thiab yog lawv mus tom kiab los tsis tau ua kevcai ntxuav kom huv, lawv kuj tsis noj mov. Tseem tshuav ntau yam kevcai uas lawv coj, xws li ntxuav tais ntxuav laujkaub thiab ntxuav tej hwj tooj liab.) Cov Falixai thiab cov xibhwb qhia Vajtswv kevcai txawm nug Yexus tias, “Ua cas koj cov thwjtim tsis ua raws li poj koob yawm txwv tej kevcai, tes qias tsis huv cia li noj mov?” Yexus hais rau lawv tias, “Yaxaya twb cev lus zoo heev hais txog nej cov neeg ncauj lus zoo siab phem, raws li nws sau tseg hais tias, “ ‘Cov neeg no hwm kuv ntawm daim tawv ncauj xwb tiamsis lawv lub siab nyob deb kuv. Qhov uas lawv pe hawm kuv tsis muaj qabhau kiag li, lawv muab neeg tej kevcai los qhia ib yam li yog Vajtswv tej lus nkaw.’ Nej muab Vajtswv tej lus nkaw tso tseg rov mus tuav rawv neeg tej kevcai xwb.” Yexus hais rau lawv tias, “Nej ua zoo hwv lawm, qhov uas nej muab Vajtswv tej lus nkaw tso tseg xwv nej thiaj tau tuav rawv nej tej kevcai. Rau qhov Mauxe twb hais cia tias, ‘Koj yuav tsum hwm koj niam koj txiv,’ thiab hais tias, ‘Leejtwg hais lus phem rau nws niam nws txiv yuav raug txim tuag.’ Tiamsis nej qhia hais tias, ‘Yog leejtwg hais rau nws niam nws txiv tias, “Yam uas muaj qabhau rau neb twb yog Khaulanpa lawm” ’ (uas txhais hais tias, twb muab pub rau Vajtswv lawm) nej thiaj tsis tso cai cia tus ntawd ua ib yam dabtsi pab tau nws niam nws txiv. Nej ua li no twb yog nej rhuav Vajtswv tej lus qhia vim yog saib rau nej tej kevcai uas nej txais pub rau tiam tom qab. Thiab nej ua ntau yam zoo li no.” Yexus hu cov neeg rov tuaj cuag nws thiab hais rau lawv tias, “Nej sawvdaws, cia li mloog kuv thiab nkag siab nawj. Tsis muaj ib yam dabtsi nyob sab nraud uas nkag rau hauv neeg yuav ua rau neeg qias tsis huv, tiamsis tej uas tawm hauv neeg los thiaj ua rau neeg qias tsis huv.” Thaum Yexus ncaim cov neeg mus rau hauv tsev lawm, nws cov thwjtim nug nws txog zaj paj lug ntawd. Yexus hais rau lawv tias, “Nej kuj tsis to taub thiab lov? Nej tsis pom tias yam nyob sab nraud uas nkag rau hauv neeg ua tsis tau rau neeg qias tsis huv lov? Rau qhov tej ntawd tsis yog nkag rau hauv lub siab tsuas yog nkag rau hauv lub plab xwb thiab tawm rau hauv lub qhov vuab tsuab lawm?” (Yexus qhia li no yog hais tias txhua yam zaub mov puavleej huv lawm.) Thiab Yexus hais tias, “Yam uas tawm hauv neeg los thiaj ua rau neeg qias tsis huv, rau qhov tej uas tawm hauv neeg los, yog tej uas tawm hauv lub siab los, yog tej no qhov uas xav phem, kev ua nkauj ua nraug, ua tub sab, tua neeg, deev luag poj luag txiv, ua siab hlob, kev phem, dag ntxias luag, ntshaw kev phem kev qias, khib luag, iab hiam luag, khav theeb thiab ua niag neeg ruam. Txhua yam phem no yog tawm hauv neeg los thiab ua rau neeg qias tsis huv.” Yexus txawm sawv kev qhov ntawd mus rau hauv lub nroog Thailab thiab lub nroog Xaidoo li kav xyuam. Nws mus rau hauv ib lub tsev tsis kheev leejtwg paub, tiamsis nws tsiv nraim tsis tau. Tamsim ntawd muaj ib tug pojniam uas tus mentxhais raug dab qias, thaum nws hnov txog Yexus nws txawm tuaj pe khwb ti nkaus ntawm Yexus kotaw. Tus pojniam ntawd yog neeg Kili uas yug rau hauv lub xeev Xiliafinikia. Nws thov Yexus ntiab dab tawm hauv nws tus ntxhais. Yexus hais rau nws tias, “Cia menyuam noj tsau tso, rau qhov tsis tsim nyog muab menyuam tej mov pov rau dev noj.” Tiamsis tus pojniam ntawd teb nws tias, “Tus Tswv, tseeb tiag, tiamsis dev uas nyob hauv qab rooj yeej tau noj menyuam tej mov uas txeej.” Yexus hais rau nws tias, “Vim koj cov lus no koj cia li rov mus lauj. Dab tawm hauv koj tus ntxhais lawm.” Thaum tus pojniam ntawd rov mus txog tsev mas pom nws tus ntxhais pw saum txaj thiab dab twb tawm lawm. Dhau ntawd Yexus txawm tawm hauv lub nroog Thailab li kav xyuam, hla lub nroog Xaidoo mus txog hiavtxwv Kalilais rau hauv lub xeev Dekapoli. Lawv coj ib tug yawg lag ntseg hais lus tsis meej tuaj cuag Yexus. Lawv thov Yexus muab tes npuab rau saum tus ntawd. Yexus coj nws tib leeg tawm hauv cov neeg mus rau ib qho mas muab ntiv tes ntxig rau hauv tus ntawd ob lub qhov ntsej thiab nto qaub ncaug thiab kov nws tus nplaig. Yexus tsa muag ntsia saum ntuj, xyu ib pas thiab hais rau tus ntawd tias, “Efatha,” txhais hais tias, “Cia li qheb kiag.” Tus ntawd qhov ntsej txawm qheb kiag thiab yam uas cam nws tus nplaig plam lawm nws txawm hais tau lus meej. Yexus txwv cov neeg ntawd kom tsis txhob qhia zaj no rau leejtwg li. Tiamsis nws yimhuab txwv los lawv yimhuab piav ncha mus heev. Lawv kuj phimhwj kawg sib hais tias, “Nws ua txhua yam puavleej zoo, nws kuj ua rau tus lag ntseg hnov tau lus, thiab tus ruam hais tau lus.” Lub sijhawm ntawd muaj neeg tuaj coob coob dua ib zaug thiab tsis muaj mov noj. Yexus txawm hu cov thwjtim los thiab hais rau lawv tias, “Kuv khuvleej cov neeg no, vim lawv nrog kuv nyob tau peb hnub thiab tsis muaj mov noj lawm. Yog kuv cia lawv mus tsev tshaib qaug zog zws, lawv yuav tsaus muag tom tej kev. Muaj qee leej tuaj deb heev.” Cov thwjtim teb nws tias, “Hauv ntuj nrag teb do no yuav ua li cas pub mov rau cov neeg no noj?” Yexus nug lawv tias, “Nej muaj tsawg lub ncuav?” Lawv teb tias, “Muaj xya lub.” Nws txawm hais kom cov neeg zaum rau hauv pem teb, thiab nws muab xya lub ncuav los ua Vajtswv tsaug mas muab ntais cev rau cov thwjtim kom coj mus faib rau cov neeg. Cov thwjtim muab faib rau cov neeg ntawd. Lawv muaj ob peb tus ntses me me thiab. Yexus txawm thov Vajtswv foom koob hmoov rau cov ntses thiab hais kom coj cov ntses mus faib rau cov neeg thiab. Lawv noj tsau, mas tej uas noj tsis tag lawv khaws tau xya tawb puv nkaus. Cov uas noj zaum ntawd kwvlam muaj plaub txhiab leej. Yexus tso cov neeg rov mus ces tamsim ntawd nws txawm nce nkoj nrog nws cov thwjtim mus txog lub moos Damanutha li kav xyuam. Cov Falixai tuaj pib nrog Yexus sib cam, thov kom nws ua ib yam txujci tseem ceeb tshwm saum ntuj los es yuav sim nws. Yexus xyu ib pas hauv lub siab thiab hais tias, “Tiam neeg no nrhiav txujci tseem ceeb ua dabtsi? Kuv hais tseeb rau nej tias, yuav tsis muab ib yam txujci tseem ceeb rau tiam neeg no pom li.” Ces Yexus txawm ncaim lawv mus, nws nce nkoj hla mus rau sab tim ub. Cov thwjtim tsis nco qab coj ncuav mus. Lawv muaj ib lub ncuav hauv lub nkoj xwb. Yexus txawm ntuas lawv hais tias, “Nej yuav tsum ua tib zoo ceev faj cov Falixai thiab Helauj cov keeb.” Cov thwjtim txawm sib tham hais tias, “Yog tim qhov uas peb tsis muaj ncuav.” Thaum Yexus paub li ntawd, nws txawm hais rau lawv tias, “Ua cas nej sib tham txog qhov uas tsis muaj ncuav? Nej tseem tsis tau paub thiab tsis nkag siab lov? Nej tseem ua lub siab tawv lov? Nej muaj qhov muag los tsis pom, muaj qhov ntsej los tsis hnov lov? Nej tsis nco lawm lov? Thaum kuv muab tsib lub ncuav ntais faib rau tsib txhiab leej ntawd, nej khaws tej uas noj tsis tag tau pes tsawg tawb?” Lawv teb tias, “Kaum ob tawb.” “Thaum kuv muab xya lub ncuav faib rau plaub txhiab leej ntawd, nej khaws tej uas noj tsis tag tau pes tsawg tawb?” Lawv teb tias, “Xya tawb.” Nws thiaj hais rau lawv tias, “Nej tseem tsis to taub lov?” Lawv txawm mus rau lub zos Npexaida. Muaj neeg coj ib tug dig muag tuaj cuag Yexus, thov Yexus kov tus ntawd. Yexus tuav tus dig muag ntawd tes coj tawm mus rau sab nraum ntug zos. Thaum Yexus nti qaub ncaug rau nws ob lub qhov muag thiab tsa tes npuab saum tus ntawd, nws nug tias, “Koj pom dabtsi los tsis pom?” Tus ntawd tsa muag ntsia thiab hais tias, “Kuv pom neeg mus mus los los tiamsis zoo li ntoo xwb.” Yexus rov muab tes npuab nws dua ib zaug mas tus ntawd rov saib mas nws lub qhov muag zoo kiag thiab nws pom txhua yam meej lawm. Yexus txawm kom tus ntawd ncaj nraim mus tsev hais tias, “Tsis txhob mus rau hauv lub zos no.” Yexus thiab nws cov thwjtim mus rau hauv tej zej zog ib ncig lub moos Xixaleya Filipi. Thaum lawv taug kev ntawd Yexus nug cov thwjtim tias, “Luag tej hais tias kuv yog leejtwg?” Lawv hais tias, “Yog Yauhas uas coj ua kevcai raus dej, qee leej hais tias yog Eliya, thiab dua lwm tus hais tias koj yog ib tug xibhwb cev Vajtswv lus thaum ub.” Nws nug lawv tias, “Nej nev nej hais tias kuv yog leejtwg?” Petus teb nws tias, “Koj yog tus Khetos. ” Yexus txawm txiv lawv kom tsis txhob qhia nws rau leejtwg paub. Ces Yexus txawm pib qhia rau cov thwjtim paub tias Neeg leej Tub yuav tsum raug kev tsim txom ntau yam thiab cov kev txwj laus, cov pov thawj hlob thiab cov xibhwb qhia Vajtswv kevcai yuav tsis lees yuav nws, thiab nws yuav raug muab tua thiab peb hnub nws yuav ciaj sawv rov los. Tej lus no Yexus hais tsis npog li. Ces Petus txawm coj Yexus mus rau ib cag pib txwv nws. Yexus txawm tig hlo ntsia rau cov thwjtim cem Petus tias, “Xatas, koj cia li khiav rau tom kuv qub qab. Rau qhov koj xav li neeg xwb tsis xav li Vajtswv.” Yexus txawm hu cov neeg thiab nws cov thwjtim los thiab hais rau lawv tias, “Yog leejtwg xav raws kuv qab mus, cia tus ntawd tswj nws tus kheej thiab kwv nws tus khaublig ntoo raws kuv qab. Vim tias tus uas xav cawm tau nws txojsia yuav piam txojsia, tiamsis tus uas tso nws txojsia tseg vim yog saib rau kuv thiab saib rau txoj xov zoo, mas yuav cawm tau nws txojsia. Yog leejtwg tau tag nrho lub ntiajteb huvsi tiamsis nws txojsia tu lawm, tus ntawd yuav tau qabhau dabtsi? Neeg yuav muab dabtsi pauv tau txojsia rov los? Leejtwg txaj muag rau kuv thiab kuv tej lus hauv tiam neeg fav xeeb thiab ua txhaum muaj txim no ces thaum Neeg leej Tub nrog leej txiv lub hwjchim ci ntsa iab thiab nrog cov tubtxib saum ntuj uas dawb huv ua ke los, nws yuav txaj muag rau tus ntawd.” Yexus hais rau lawv tias, “Kuv hais tseeb rau nej tias, cov uas sawv ntawm no muaj qee leej yuav tsis tau sim txojkev tuag ces yuav xub pom Vajtswv lub tebchaws nrog hwjchim los.” Dhau rau hnub tom qab Yexus txawm coj Petus thiab Yakaunpau thiab Yauhas ncaim lwm tus nce mus saum lub roob siab. Yexus lub cev txawm hloov kiag tab meeg lawv. Nws cev tsoos tsho kuj dawb paug ci ntsa iab, thoob ntiajteb tsis muaj ib tug muaj tshuaj ntxhua tau dawb li ntawd. Ces Eliya thiab Mauxe kuj tshwm los rau lawv pom thiab nrog Yexus sib tham. Petus txawm hais rau Yexus tias, “Lanpi, peb nyob ntawm no kuj zoo. Cia peb ua peb lub tsev pheeb suab, ua ib lub rau koj, ib lub rau Mauxe thiab ib lub rau Eliya.” Petus tsis pom qab hais li cas vim lawv ntshai kawg li. Txawm muaj ib tauv huab los laum nkaus lawv, thiab muaj ib lub suab hais hauv tauv huab tuaj tias, “Tus no yog kuv tus tub uas kuv hlub. Nej cia li mloog nws hais.” Tamsim ntawd lawv tsa muag ntsia mas tsis pom muaj leejtwg, tsuas yog pom Yexus tib leeg nrog lawv nyob xwb. Thaum lawv nqes pem roob los, Yexus txwv lawv kom tsis txhob qhia tej uas lawv pom ntawd rau leejtwg li mus txog thaum Neeg leej Tub sawv hauv qhov tuag rov los tso. Cov thwjtim thiaj khaws tej lus ntawd cia thiab sib nug tias qhov uas sawv hauv qhov tuag rov los ntawd yog dabtsi. Lawv kuj nug Yexus tias, “Ua cas cov xibhwb qhia Vajtswv kevcai hais tias Eliya yuav xub los ua ntej?” Yexus hais rau lawv tias, “Eliya yeej los ua ntej ua kom txhua yam rov zoo li qub. Tiamsis vim li cas muaj lus sau cia hais txog Neeg leej Tub tias nws yuav tsum raug kev tsim txom ntau yam thiab raug luag saib tsis taus heev? Tiamsis kuv hais rau nej tias Eliya twb los lawm thiab neeg ua rau nws raws li lawv lub siab nyiam, raws li uas sau cia hais txog nws.” Thaum Yexus lawv los txog ntawm cov thwjtim, mas pom neeg coob coob nyob vij ntawm lawv, thiab cov xibhwb qhia Vajtswv kevcai tabtom nrog lawv sib cam. Tamsim ntawd thaum cov neeg ntawd pom Yexus lawv xav tsis thoob lawv txawm dhia mus tos nws. Yexus thiaj nug lawv tias, “Nej nrog cov thwjtim sib cam txog dabtsi?” Cov neeg ntawd muaj ib tug teb Yexus tias, “Xibhwb, kuv coj kuv tus tub tuaj cuag koj vim yog raug dab ruam. Nws nyob qhovtwg kuj xij, thaum dab ntswj nws dab muab nws thawb ntog, npuas ncauj nto plaws, zom hniav, ib ce txhav kiag. Kuv thov koj cov thwjtim ntiab tus dab ntawd tawm, tiamsis lawv ntiab tsis tau.” Yexus teb lawv tias, “Au tiam neeg uas tsis muaj kev ntseeg, kuv yuav nrog nej nyob ntev li cas? Kuv yuav ua siab ntev thev nej mus txog thaum twg? Cia li coj tus tub ntawd los rau kuv.” Lawv thiaj coj tus tub ntawd los cuag Yexus. Thaum tus dab pom Yexus tamsim ntawd dab txawm ua rau tus tub huam ib tshaj, ntog nti rau hauv av npuas ncauj nto plaws. Yexus nug leej txiv hais tias, “Ua li no ntev li cas lawm?” Leej txiv teb tias, “Txij thaum me me los lawm. Thiab muaj ntau zaus dab muab nws thawb rau hauv qhov cub thiab thawb rau hauv dej xav ua kom nws tuag. Yog koj pab tau, thov koj khuvleej thiab pab peb lauj!” Yexus hais rau nws tias, “Yog pab tau no lov? Ua tau txhua yam rau tus uas ntseeg.” Tamsim ntawd tus tub ntawd leej txiv txawm qw hais tias, “Kuv ntseeg, qhov uas kuv tseem tsis tau ntseeg thov pab kom kuv ntseeg.” Thaum Yexus pom tias muaj neeg coob coob dhia los, nws txawm txwv tus dab qias ntawd hais tias, “Niag dab ruam lag ntseg, kuv hais rau koj, cia li tawm mus, tsis txhob rov nkag rau hauv tus no dua li lawm.” Dab qw nrov ua rau tus tub ntawd huam ib tshaj nti heev heev ces txawm tawm plaws lawm, tus tub ntawd txawm zoo li tuag lawm. Muaj neeg coob thiaj hais tias, “Nws tuag lawm.” Tiamsis Yexus ntsiab nkaus nws tes tsa nws sawv, ces tus tub ntawd txawm sawv los. Thaum Yexus mus rau hauv tsev lawm cov thwjtim txawm nug Yexus twjywm tias, “Ua cas peb ntiab tsis tau tus dab ntawd tawm?” Yexus hais rau lawv tias, “Dab zoo li no yuav tsum yog thov Vajtswv xwb thiaj ntiab tau tawm.” Yexus lawv txawm tawm qhov ntawd hla lub xeev Kalilais mus. Yexus tsis xav cia leejtwg paub, vim yog nws tabtom qhia nws cov thwjtim hais tias, “Neeg leej Tub yuav raug muab cob rau hauv neeg txhais tes, thiab lawv yuav muab nws tua pov tseg. Thaum tuag lawd mas peb hnub nws yuav ciaj sawv rov los.” Tiamsis lawv tsis nkag siab tej lus no thiab lawv tsis kav nug Yexus. Lawv txawm los rau hauv lub moos Khapena‑u. Thaum Yexus nyob hauv tsev nws nug cov thwjtim tias, “Thaum taug kev tuaj nej sib tham txog dabtsi?” Lawv nyob twjywm vim thaum taug kev tuaj ntawd lawv sib cam tias leejtwg yog tus loj dua ntais. Yexus txawm zaum thiab hu kaum ob tug thwjtim los thiab hais rau lawv tias, “Yog leejtwg xav ua tus thawj, nws yuav tsum ua tus tom tw thiab ua num rau sawvdaws.” Yexus txawm muab ib tug menyuam yaus los sawv hauv lawv nruab nrab. Nws muab tus menyuam ntawd puag thiab hais rau lawv tias, “Leejtwg lees yuav ib tug menyuam yaus zoo li no vim yog saib rau kuv lub npe, kuj yog tus ntawd lees yuav kuv. Thiab tus uas lees yuav kuv kuj tsis yog lees yuav kuv xwb kuj yog lees yuav tus uas txib kuv los thiab.” Yauhas txawm hais rau Yexus tias, “Xibhwb, peb pom ib tug tuav koj lub npe ntiab dab tawm, mas peb txwv nws rau qhov nws tsis koom nrog peb.” Yexus hais rau nws tias, “Tsis txhob txwv nws, rau qhov tsis muaj leejtwg yuav tuav kuv lub npe ua tej txujci phimhwj thiab ho rov thuam kuv. Rau qhov tus uas tsis tawm tsam kuv kuj tuaj kuv tog lawm. Leejtwg muab ib khob dej rau nej haus hauv kuv lub npe vim nej yog Khetos cov, mas kuv hais tseeb rau nej tias, tus ntawd yuav tsis plam nws tej nqe zog. “Leejtwg ua rau cov menyuam yaus uas ntseeg kuv no ib tug yuam kev ua txhaum, mas muab ib txhib zeb loj khi rau tus ntawd caj dab thiab muab laim rau hauv hiavtxwv kuj zoo dua. Yog koj txhais tes ua rau koj ua txhaum, cia li muab txiav pov tseg. Koj txawm nqws tes los koj tau txojsia kuj zoo dua koj muaj ob sab tes es poob rau hauv ntuj tawg kub uas hluavtaws tsis txawj tuag li. Yog koj txhais kotaw ua rau koj ua txhaum, cia li muab txiav pov tseg. Koj txawm nqws taw los koj tau txojsia kuj zoo dua koj muaj ob sab taw es raug muab pov rau hauv ntuj tawg. Yog koj lub qhov muag ua rau koj ua txhaum, cia li muab kaus. Koj nkag mus rau hauv Vajtswv lub tebchaws muaj ib sab qhov muag xwb kuj zoo dua koj muaj ob sab qhov muag es raug muab pov rau hauv ntuj tawg kub, qhov chaw ntawd cov kas uas noj lawv tsis txawj tuag thiab hluavtaws kuj kub tsis txawj tuag. Txhua tus yuav raug hluavtaws ntxuav kom huv ib yam li las ntsev. Ntsev yog yam uas zoo. Yog ntsev tsuag lawm, yuav ua kom rov daw tau li cas? Nej cia li muaj ntsev rau hauv nej thiab nyob sib hum.” Yexus txawm sawv kev qhov ntawd mus rau hauv lub xeev Yudia thiab mus rau sab ntug dej Yaladee tid, thiab muaj neeg coob coob tuaj txoos ua ke dua ib zaug rau ntawm nws. Yexus rov qhuab qhia lawv raws li nws txeev qhia. Cov Falixai txawm txav los sim Yexus nug hais tias, “Tej txivneej muab nws tus pojniam nrauj mas raug txoj kevcai los tsis raug?” Yexus teb lawv tias, “Mauxe qhia nej li cas?” Lawv hais tias, “Mauxe kheev kom ua ntawv nrauj cev rau tus pojniam thiab muab nws nrauj tau.” Yexus hais rau lawv tias, “Mauxe sau txoj kevcai no twb yog vim nej lub siab tawv. Tiamsis txij thaum tsim ntuj tsim teb ‘Vajtswv tsim neeg kom muaj txivneej thiab pojniam.’ ‘Vim li no tus txivneej yuav ncaim ntawm nws niam nws txiv thiab nrog nws tus pojniam tsheej xeeb ua ke, mas ob tug koom ua ib lub cev.’ Ob tug thiaj tsis ua ob lub cev tiamsis koom ua ib lub cev xwb. Vim li no yam uas Vajtswv muab lo tsheej xeeb ua ke lawm, neeg tsis txhob muab ua kom ncaim.” Thaum lawv nyob hauv tsev lawd cov thwjtim txawm rov nug Yexus txog zaj ntawd. Yexus hais rau lawv tias, “Leejtwg nrauj pojniam es nws mus yuav dua pojniam tshiab, kuj yog ua txhaum kev nkauj kev nraug rau tus pojniam qub, thiab yog tus pojniam nrauj tus txiv es mus yuav dua txiv tshiab, tus pojniam ntawd kuj ua txhaum kev nkauj nraug.” Muaj neeg coj cov menyuam yaus tuaj cuag Yexus xav kom Yexus plhws cov menyuam ntawd. Tiamsis cov thwjtim txwv lawv. Thaum Yexus pom li ntawd nws kuj chim thiaj hais rau cov thwjtim tias, “Cia cov menyuam yaus los cuag kuv, tsis txhob tav lawv, rau qhov Vajtswv lub tebchaws yog cov uas zoo li cov menyuam yaus no tug. Kuv hais tseeb rau nej tias, leejtwg tsis lees yuav Vajtswv lub tebchaws ib yam li ib tug menyuam yaus, tus ntawd yuav nkag tsis tau rau hauv lub tebchaws ntawd.” Yexus txawm puag cov menyuam ntawd thiab tsa tes npuab lawv thiab foom koob hmoov rau lawv. Thaum Yexus tabtom taug kev mus muaj ib tug dhia tuaj txhos caug ntua pe nws nug hais tias, “Xibhwb uas zoo kawg, kuv yuav tsum ua li cas kuv thiaj tau txojsia ib txhis tsis kawg?” Yexus hais rau nws tias, “Ua cas koj hu kuv tias tus zoo kawg? Tsis muaj leejtwg zoo tsuas yog Vajtswv tib leeg xwb. Koj paub tej kevcai uas hais tias, ‘Tsis txhob tua neeg, tsis txhob deev luag poj luag txiv, tsis txhob ua tub sab, tsis txhob ua cuav timkhawv, tsis txhob ntxo lwm tus, koj yuav tsum hwm koj niam koj txiv.’ ” Tus ntawd hais rau Yexus tias, “Xibhwb, tej nqes kod kuv twb coj txhua yam txij thaum yau los lawm.” Yexus ntsia ntsoov rau tus ntawd kuj hlub nws mas hais rau nws tias, “Koj tseem tu ncua ib yam. Cia li mus muab koj tej qhov txhia chaw muag es muab faib rau cov neeg pluag, koj thiaj li muaj nyiaj txiag saum ntuj ceeb tsheej, thiab cia li los raws kuv qab.” Thaum nws hnov tej lus no nws ntsej muag ntshaus ntsho thiab nws tawm mus nyuaj siab kawg vim nws muaj cuab txhiaj cuab tam ntau heev. Yexus tsa muag ntsia ib ncig mas hais rau nws cov thwjtim tias, “Tus uas muaj nyiaj txiag ntau ceeblaj nkag tau rau hauv Vajtswv lub tebchaws.” Cov thwjtim kuj xav tsis thoob rau Yexus tej lus. Mas Yexus rov hais rau lawv tias, “Cov tub 'e, ceeblaj kawg nkag rau hauv Vajtswv lub tebchaws. Ib tug ntxhuav nkag lub qhov koob kuj yoojyim dua tus nplua nuj nkag rau hauv Vajtswv lub tebchaws.” Cov thwjtim kuj xav tsis thoob thiaj hais rau nws tias, “Yog li ntawd, leejtwg yuav dim tau?” Yexus tsa muag ntsia rau lawv mas hais tias, “Neeg ua tsis tau tiamsis Vajtswv ua tau, rau qhov Vajtswv ua tau txhua yam huvsi.” Mas Petus pib hais rau Yexus tias, “Peb twb tso txhua yam tseg raws koj tuaj.” Yexus hais tias, “Kuv hais tseeb rau nej tias, tus uas tso vaj tse kwvtij nkauj muam niam txiv menyuam liaj teb tseg vim yog saib rau kuv thiab txoj xov zoo, tiam no nws yuav tau qas pua npaug uas yog vaj tse kwvtij nkauj muam niam txiv menyuam thiab liaj teb, thiab tseem yuav raug tsim txom thiab tiam tom ntej nws yuav tau txojsia ib txhis tsis kawg. Tiamsis muaj ntau leej uas ua thawj yuav rov ua tus tom tw, thiab tus tom tw yuav tau ua tus thawj.” Thaum lawv tabtom taug kev mus nram Yeluxalees, Yexus txawm ua lawv ntej. Mas cov thwjtim xav tsis thoob thiab cov uas raws qab kuj ntshai. Yexus coj nws kaum ob tug thwjtim mus rau ib cag mas pib qhia rau lawv paub txog tej xwm txheej uas yuav los raug nws, hais tias, “Saib nawj, peb tabtom mus nram Yeluxalees, mas Neeg leej Tub yuav raug muab cob rau cov pov thawj hlob thiab cov xibhwb qhia Vajtswv kevcai, mas lawv yuav txiav txim tuag rau nws, thiab muab nws cob rau lwm haiv neeg, mas lawv yuav thuam luag nws thiab nto qaub ncaug rau nws thiab muab nws nplawm thiab muab tua pov tseg, mas peb hnub nws yuav ciaj sawv rov los.” Yakaunpau thiab Yauhas uas yog Xenpedi li tub txawm txav los rau ntawm Yexus thiab hais rau nws tias, “Xibhwb, wb ob leeg xav kom koj ua yam uas wb thov.” Yexus hais rau ob tug tias, “Neb xav kom kuv ua dabtsi rau neb?” Ob tug teb tias, “Thov cia wb, ib leeg zaum ntawm koj sab xis ib leeg nyob ntawm koj sab laug hauv koj lub hwjchim ci ntsa iab.” Tiamsis Yexus hais rau ob tug tias, “Neb tsis paub tias neb thov dabtsi. Lub khob uas kuv haus, neb haus tau lov, thiab kevcai raus dej uas kuv raug neb raug tau thiab lov?” Ob tug hais rau Yexus tias, “Tau los maj.” Yexus hais rau ob tug tias, “Lub khob uas kuv haus neb yeej yuav tau haus, thiab kevcai raus dej uas kuv raug neb yeej yuav tau raug, tiamsis qhov uas zaum ntawm kuv sab xis thiab ntawm kuv sab laug kuv tsis yog tus uas pub tau, tiamsis twb npaj cia rau leejtwg lawm, tus ntawd thiaj tau xwb.” Thaum kaum tus thwjtim hnov li ntawd lawv kuj pib chim rau Yakaunpau thiab Yauhas. Yexus thiaj hu lawv sawvdaws los hais rau lawv tias, “Nej yeej paub tias cov uas luag suav tias ua thawj kav lwm haiv neeg yeej kav rawv cov pejxeem, thiab cov uas ua hlob yeej muaj hwjchim tswjhwm lawv. Tiamsis nej cov yuav tsis thooj li ntawd. Nej cov leejtwg xav ua tus hlob tus ntawd yuav tsum zoo siab ua num rau nej, thiab nej cov leejtwg xav ua tus thawj, tus ntawd yuav tsum ua sawvdaws li qhev, rau qhov Neeg leej Tub tsis yog los rau leejtwg tu, tiamsis nws los tu lawv, thiab pub nws txojsia ua nqe txhiv neeg coob coob.” Yexus lawv txawm tuaj rau hauv lub moos Yelikhau. Thaum Yexus thiab cov thwjtim thiab tej neeg coob coob tawm hauv lub moos Yelikhau mus, muaj ib tug yawg dig muag thov khawv npe hu ua Npathime‑a, yog Thime‑a tus tub, zaum ntawm ntug kev. Thaum nws hnov tias yog Yexus uas yog neeg Naxale, ces nws txawm pib qw nrov hais tias, “Yexus uas yog Davi tus tub 'e, thov khuvleej kuv lauj!” Muaj neeg coob txwv kom nws nyob twjywm, los nws yimhuab qw hais tias, “Davi tus tub 'e, thov khuvleej kuv lauj!” Yexus txawm nres nkaus hais tias, “Hu nws los.” Lawv txawm hu tus dig muag ntawd thiab hais rau nws tias, “Cia li zoo siab, sawv tsees, Yexus hu koj.” Tus ntawd txawm tso plhuav nws lub tsho ntev sawv tsees caws qia dhia los cuag Yexus. Yexus hais rau nws tias, “Koj xav kom kuv ua dabtsi rau koj?” Tus dig muag hais rau nws tias, “Lanpi, thov pub kuv pom kev.” Yexus hais rau nws tias, “Cia li mus, koj txojkev ntseeg ua rau koj zoo kiag.” Ces tamsim ntawd tus dig muag txawm pom kev thiab taug kev raws Yexus qab mus. Thaum lawv tuaj ze lub nroog Yeluxalees txog lub zos Npefake thiab lub zos Npethani ntawm lub roob Txiv Aulib, Yexus txawm txib ob tug thwjtim mus, thiab hais rau ob tug tias, “Neb cia li mus rau lub zos uas nyob tom hauv ntej, mas thaum neb nkag rau hauv tamsim ntawd neb yuav pom ib tug menyuam nees luav khi cia, tsis tau muaj leejtwg caij dua li. Neb cia li daws cab los. Yog leejtwg nug neb tias, ‘Neb ua dabtsi?’ neb cia li hais tias, ‘Tus tswv cheem tsum siv, thiab ib pliag nws yuav xa rov los rau ntawm no.’ ” Ob tug txawm mus pom ib tug menyuam nees luav khi ntawm qhov rooj ntawm ntug kev, ob tug txawm daws hlua. Tej neeg uas sawv ntawd hais rau ob tug tias, “Neb daws tus menyuam nees luav ua dabtsi?” Ob tug teb raws li Yexus hais, ces lawv kuj kheev. Mas ob tug cab tus menyuam nees luav los txog Yexus, thiab muab ob tug tej tsho ntev pua saum tus nees luav nrob qaum mas Yexus li caij. Muaj neeg coob coob muab lawv tej tsho ntev pua txojkev thiab ib txhia txiav tej rev nplooj ntoo tom teb los pua. Cov neeg uas mus ua nws ntej thiab cov uas raws nws qab kuj qw hais tias, “Hauxana rau Davi tus tub. Thov cia peb yawg koob Davi lub tebchaws uas yuav los tau koob hmoov. Hauxana rau saum ntuj uas siab kawg nkaus.” Yexus mus rau hauv Yeluxalees thiab nkag mus rau hauv lub tuam tsev. Thaum nws saib txhua yam tag lawd twb yuav tsaus ntuj, nws txawm nrog kaum ob tug thwjtim rov qab mus tom lub zos Npethani. Hnub tom qab thaum Yexus lawv rov tawm hauv lub zos Npethani mus Yexus tshaib plab. Nws pom ib tsob txiv cev nyob deb muaj nplooj tsaus nti, nws txawm txav mus saib muaj txiv los tsis muaj. Thaum nws mus txog lawd tsis pom muaj ib lub txiv li tsuas muaj nplooj xwb, rau qhov tsis tau txog caij txi txiv. Nws txawm hais rau tsob txiv cev ntawd tias, “Yuav tsis muaj leejtwg tau noj koj cov txiv dua li lawm lauj!” Cov thwjtim kuj hnov Yexus tej lus ntawd. Thaum lawv mus txog hauv Yeluxalees Yexus txawm nkag mus rau hauv lub tuam tsev mas pib ntiab cov neeg uas ua lag ua luam hauv lub tuam tsev khiav, thiab nws muab cov uas pauv nyiaj tej rooj thiab cov uas muag nquab nyeg tej rooj zaum ntxeev pes kiag tseg. Nws txwv tsis kheev leejtwg nqa qhov txhia chaw hla tuaj mus hauv lub tuam tsev. Nws qhia rau lawv tias, “Tsis tau muaj lus sau cia lov, hais tias, ‘Kuv lub tuam tsev yuav hu tias yog lub tsev rau txhua haiv neeg thov Vajtswv,’ tiamsis nej muab ua qhov rau tub sab nkaum.” Thaum cov pov thawj hlob thiab cov xibhwb qhia Vajtswv kevcai hnov zaj no lawv txawm nrhiav kev tua Yexus, rau qhov lawv ntshai nws vim cov pejxeem sawvdaws phimhwj rau tej lus uas nws qhia. Thaum yuav tsaus ntuj Yexus lawv tawm hauv lub nroog mus. Tagkis tom qab thaum Yexus lawv hla tuaj mus, lawv pom tsob txiv cev tuag tshav qhuav ti nkaus cag. Petus nco dheev Yexus tej lus thiaj hais rau nws tias, “Lanpi, saib maj. Tsob txiv cev uas koj foom ntawd cia li tuag tshav qhuav lawm.” Yexus txawm teb lawv tias, “Cia li muaj siab ntseeg Vajtswv. Kuv hais tseeb rau nej tias, yog leejtwg hais rau lub roob no tias, ‘Cia li rho kiag ntab plaws rau hauv hiavtxwv,’ thiab nws lub siab tsis ywj fab ywj fwj, tiamsis ntseeg tias yuav muaj raws li uas nws hais, kuj yuav muaj li ntawd. Vim li no kuv hais rau nej tias thaum nej thov ib yam dabtsi cia li ntseeg tias nej twb txais lawm, mas nej yuav tau yam ntawd tiag. Thaum nej sawv ntsug thov Vajtswv, yog nej nrog leejtwg muaj teeb meem cia li zam txim rau tus ntawd, xwv nej leej Txiv uas nyob saum ntuj thiaj li zam nej tej kev txhaum thiab.” Yexus lawv rov mus rau hauv Yeluxalees dua ib zaug. Thaum Yexus mus ncig hauv lub tuam tsev mas cov pov thawj hlob thiab cov xibhwb qhia Vajtswv kevcai thiab cov kev txwj laus tuaj cuag nws, thiab lawv hais rau Yexus tias, “Koj muaj hwjchim dabtsi thiaj ua tau tej no thiab leejtwg muab lub hwjchim no rau koj?” Yexus hais rau lawv tias, “Kuv yuav nug nej ib lus thiab. Yog nej teb tau, kuv li qhia rau nej tias kuv muaj hwjchim dabtsi thiaj ua tau tej no. Txoj kevcai raus dej uas Yauhas ua ntawd, los saum ntuj los lossis los ntawm neeg los? Cia li teb kuv saib.” Lawv txawm sablaj tias, “Yog peb hais tias, ‘Los saum ntuj los,’ nws yuav hais tias, ‘Yog li ntawd, ua cas nej tsis ntseeg Yauhas?’ Lossis peb yuav hais tias, ‘Los ntawm neeg los,’ lov?” Lawv kuj ntshai cov pejxeem, rau qhov cov pejxeem sawvdaws suav tias Yauhas yog ib tug xibhwb cev Vajtswv lus tiag tiag li. Lawv txawm teb Yexus tias, “Peb tsis paub.” Yexus thiaj hais rau lawv tias, “Kuv kuj tsis qhia rau nej tias kuv muaj hwjchim dabtsi thiaj ua tau tej no.” Yexus txawm ua lus piv txwv hais rau lawv hais tias, “Muaj ib tug yawg cog tau ib vaj txiv hmab thiab xov laj kab thiab khawb qhov tsuam kua txiv hmab thiab ua ib lub tsev zov, thiab muab tso rau ib cov tu faib txiv ces txawm mus lwm tebchaws lawm. Thaum txog lub caij de txiv, nws txib ib tug tub qhe mus cuag cov uas tu lub vaj ntawd es yuav sau tej txiv hmab ib txhia los rau nws. Cov uas tu lub vaj txawm ntes tus tub qhe ntawd los ntaus thiab muab nws ntiab rov mus tes dawb tes do. Mas tus tswv vaj rov tso dua ib tug tub qhe mus, los lawv kuj muab tus ntawd ntaus taubhau to tag thiab ua saib tsis taus nws. Nws kuj tso dua ib tug mus, lawv kuj muab tus ntawd tua pov tseg. Thiab ua ib yam li ntawd rau ntau leej, muab ib txhia ntaus muab ib txhia tua. Nws tseem tshuav dua ib tug, yog nws tus tub uas nws hlub. Nws thiaj tso tus tub ntawd ua zaum kawg hais tias, ‘Nyaj lawv yuav hwm kuv tus tub.’ Tiamsis cov uas tu lub vaj ntawd sib hais tias, ‘Tus no yog tus uas saws nws qub txeeg qub teg. Peb cia li muab nws tua mas tej qub txeeg qub teg yuav poob rau peb.’ Lawv txawm muab nws ntes tua thiab muab pov rau nraum ntug vaj. Tus tswv vaj yuav ua li cas? Nws yeej yuav muab cov uas tu lub vaj ntawd ua kom puam tsuaj thiab muab lub vaj txiv hmab rau lwm cov tu. “Nej tsis tau nyeem Vajtswv phau ntawv lov? Qhov uas hais tias, “ ‘Lub pob zeb uas cov Kws ua tsev muab xyeeb tseg lawm twb muab los teeb ua lub thawj rau ntawm kaum tsev lawm. Tej no yog tus Tswv ua, yog yam phimhwj uas peb qhov muag pom.’ ” Lawv nrhiav kev ntes Yexus, rau qhov lawv paub tias Yexus hais zaj paj lug no raug lawv, tiamsis lawv ntshai cov pejxeem. Lawv txawm ncaim nws mus lawm. Lawv thiaj txib cov Falixai qee leej thiab Helauj cov qee leej mus cuag Yexus xav nyas Yexus tej lus. Lawv txawm tuaj hais rau nws tias, “Xibhwb, peb paub tias koj yog ib tug ncaj ncees thiab tsis ua raws li leejtwg lub siab nyiam, rau qhov koj tsis saib leejtwg ntsej muag, koj tsuas qhia Vajtswv txoj kev raws li muaj tseeb xwb. Mas tsim nyog them se rau Xixa los tsis them? Peb yuav tsum them los tsis them?” Yexus twb paub lawv lub ncauj zoo tiamsis lub siab phem, nws thiaj hais rau lawv tias, “Nej tuaj sim kuv ua dabtsi? Cia li muab ib lub nyiaj denalia los rau kuv saib.” Lawv thiaj muab ib lub rau nws. Yexus hais rau lawv tias, “Lub ntsej muag thiab lub npe uas txaug no yog leejtwg?” Lawv teb tias, “Yog Xixa li.” Yexus txawm hais rau lawv tias, “Yam uas yog Xixa li cia li muab rau Xixa, yam uas yog Vajtswv li cia li muab rau Vajtswv.” Lawv thiaj xav tsis thoob li. Cov Xadukai uas qhia hais tias tsis muaj qhov uas sawv hauv qhov tuag los txawm tuaj cuag Yexus. Lawv thiaj thom Yexus hais tias, “Xibhwb, Mauxe twb sau cia rau peb tias, ‘Yog leejtwg tuag lawm tseg tus pojniam nyob tsis tau muaj menyuam, ib tug kwvtij yuav tsum yuav tus pojniam ntawd thiaj tuav tau tus uas tuag li keeb kwm cia.’ Muaj xya tus kwvtij. Tus hlob yuav pojniam lawm li tuag tsis tau muaj menyuam. Mas tus ob kuj yuav tus ntawd ua pojniam, tsis tau muaj menyuam kuj tuag lawm thiab. Tus peb kuj zoo ib yam nkaus. Xya tus ntawd puavleej tsis tau muaj menyuam li. Thaum kawg tus pojniam ntawd kuj tuag lawm thiab. Hnub uas ciaj sawv rov los, tus pojniam ntawd yuav ua leejtwg li pojniam, rau qhov nws twb ua xya leej ntawd li pojniam lawm?” Yexus hais rau lawv tias, “Qhov uas nej tsis paub Vajtswv txojlus thiab tsis paub Vajtswv lub hwjchim ua rau nej yuam kev lawm los tsis yog? Thaum neeg ciaj sawv hauv qhov tuag rov los ntawd, tsis muaj kev sib yuav ua txij ua nkawm lawm, yuav zoo ib yam li cov tubtxib saum ntuj xwb. Hais txog qhov uas neeg tuag ciaj sawv rov los, nej tsis tau nyeem hauv Mauxe phau kevcai zaj uas hais txog tsob ntoo kub hnyiab lov? Qhov uas Vajtswv hais rau Mauxe tias, ‘Kuv yog Aplahas tus Vajtswv, yog Yiha tus Vajtswv thiab yog Yakhauj tus Vajtswv.’ Vajtswv tsis yog tus neeg tuag tus Vajtswv, nws yog cov neeg ciaj tus Vajtswv. Nej yuam kev loj heev lawm.” Muaj ib tug xibhwb uas qhia Vajtswv kevcai txav los ze. Thaum nws hnov lawv sib cam thiab pom tias Yexus teb tau lawv zoo heev, nws txawm nug Yexus tias, “Txoj kevcai nqe twg tseem ceeb dua ntais?” Yexus teb hais tias, “Thawj nqes kevcai yog li no, ‘Cov Yixayee 'e, cia li tig ntsej mloog. Tus Tswv uas yog peb tus Vajtswv yog tib tug Tswv xwb. Koj yuav tsum hlub tus Tswv uas yog koj tus Vajtswv kawg siab kawg ntsws, kawg tswvyim plab plaws thiab kawg dag kawg zog.’ Nqe uas ob hais tias, ‘Koj yuav tsum hlub kwvtij zej zog ib yam li koj hlub koj tus kheej.’ Tsis muaj lwm txoj kevcai uas tseem ceeb dua ob nqes no lawm.” Tus xibhwb ntawd txawm hais rau nws tias, “Xibhwb, koj teb zoo heev. Koj hais tseeb tias muaj tib tug Tswv xwb, dhau nws lawm tsis muaj dua lwm tus li, thiab qhov uas hlub tus Tswv kawg siab kawg ntsws, kawg tswvyim plab plaws thiab kawg dag kawg zog, thiab hlub kwvtij zej zog ib yam li yus hlub yus tus kheej, kuj tseem ceeb heev dua li tej uas muab hlawv huvsi xyeem thiab tej uas muab xyeem huvsi.” Thaum Yexus pom tias tus ntawd muaj tswvyim teb, Yexus txawm hais rau nws tias, “Koj nyob tsis deb ntawm Vajtswv lub tebchaws lawm.” Dhau ntawd tsis muaj leejtwg muaj cuabkav nug Yexus dua li lawm. Thaum Yexus qhuab qhia hauv lub tuam tsev, nws hais tias, “Cov xibhwb qhia Vajtswv kevcai hais tau li cas tias tus Kheto yog Davi li tub? Vaj Ntsuj Plig dawb huv yeej kom Davi hais tias, “ ‘Tus Tswv hais rau kuv tus tswv tias, “Cia li zaum ntawm kuv sab xis, mus txog thaum kuv muab koj cov yeeb ncuab tiag koj xib taws.” ’ Yog Davi twb hu tus Khetos tias ‘tus Tswv,’ nws yuav ua li cas ua tau Davi li tub?” Tej pejxeem coob coob ntawd zoo siab mloog Yexus. Thaum Yexus qhuab qhia nws hais tias, “Cia li ceev faj cov xibhwb qhia Vajtswv kevcai uas nyiam hnav lub tsho ntev mus mus los los thiab nyiam kom luag hwm lawv tom tej tshav puam, thiab nyiam zaum tej rooj siab hauv tej tsev sablaj, thiab thaum muaj rooj noj rooj haus lawv nyiam zaum sam tsum. Lawv txeeb cov poj ntsuam tej vaj tse thiab thov Vajtswv ntev ntev rau luag pom. Lawv yimhuab yuav raug txim hnyav heev dua.” Yexus mus zaum ncaj ntawm lub phij xab xyeem nyiaj thiab ntsia cov neeg tso nyiaj rau hauv lub phij xab ntawd. Muaj ntau leej nplua nuj tso nyiaj ntau rau hauv. Thiab muaj ib tug poj ntsuam pluag pluag tuaj, nws tso ob lub txiaj toog liab ntaus nqe tsis txog ib npiv rau hauv. Yexus hu cov thwjtim los hais rau lawv tias, “Kuv hais tseeb rau nej tias, tus poj ntsuam pluag no tso nyiaj rau hauv lub phij xab ntau dua txhua tus uas tso lawd. Rau qhov lawv txhua tus rho lawv tej nyiaj uas lawv muaj nplua mias lawm mentsis tuaj tso rau hauv tiamsis tus pojniam no lub neej txom nyem kawg li los nws khee kawv qhov nyiaj yug nws txojsia tso rau hauv.” Thaum Yexus tawm ntawm lub tuam tsev mus, nws ib tug thwjtim txawm hais rau Yexus tias, “Xibhwb, koj saib, tej txhib zeb thiab tej tsev no zoo kawg li lauj!” Yexus txawm hais rau nws tias, “Koj pom tej tsev loj no lov? Tej txhib zeb uas tib ib lub tshooj ib lub no yuav tsis tshuav ib lub uas tsis raug muab ua pob tag.” Thaum Yexus zaum saum lub roob Txiv Aulib ncaj ntawm lub tuam tsev, Petus thiab Yakaunpau thiab Yauhas thiab Anru txawm nug nws twjywm hais tias, “Thov qhia peb paub tias tej xwm txheej no yuav tshwm los thaum twg, thiab muaj yam txujci twg qhia kom paub tias txog sijhawm uas tej no yuav tiav?” Yexus thiaj pib hais rau lawv tias, “Cia li ceev faj tib zoo tsis txhob cia leejtwg ntxias nej yuam kev. Yuav muaj ntau leej tuav kuv lub npe los hais tias. ‘Kuv yog tus ntawd ntag,’ mas lawv yuav ua rau neeg coob coob yuam kev. Thaum nej hnov suab ua tsov ua rog thiab hnov moo ua rog, tsis txhob poob siab. Tej no yeej yuav tsum tshwm los tiamsis tsis tau txog thaum kawg. Ib lub tebchaws yuav sawv tawm tsam rau ib lub tebchaws, ib tug vajntxwv yuav tawm tsam rau ib tug vajntxwv, yuav muaj ntuj qeeg ntau qhov thiab yuav muaj kev tshaib kev nqhis. Tej xwm txheej no yog pib mob plab yug menyuam xwb. “Nej yuav tsum ceev faj vim yog luag yuav muab nej cob rau tej tsev tu plaub thiab nplawm nej hauv lawv tej tsev sablaj, thiab nej yuav sawv tab meeg cov thawj kav thiab tej vajntxwv vim yog tim kuv xwv nej thiaj ua tau timkhawv rau lawv. Thiab txoj xov zoo yuav tsum xub raug muab tshaj tawm rau ib tsoom tebchaws. Thaum lawv ntes nej mus cob rau luag, nej tsis txhob txhawj ua ntej tias nej yuav hais li cas, cia li hais tej lus uas twb muab pub rau nej rau thaum lub sijhawm ntawd, rau qhov tus uas hais ntawd tsis yog nej, yog Vaj Ntsuj Plig dawb huv hais. Kwvtij yuav muab kwvtij cob rau kev tuag, txiv yuav muab tub cob rau kev tuag, menyuam yuav sawv twv niam txiv thiab muab tua. Ib tsoom neeg yuav ntxub nej vim yog tim kuv lub npe. Tiamsis leejtwg thev tau mus txog thaum kawg tus ntawd yuav dim. “Thaum nej pom yam uas qias vuab tsuab uas ua kom liamsim tag txawb cia rau hauv lub chaw uas tsis tsim nyog txawb (cia tus uas nyeem nkag siab nawj), mas thaum ntawd cov uas nyob hauv Yuda cia li khiav mus rau pem tej roob, tus uas nyob saum txheej tsev las tshav tsis txhob nqes los nkag rau hauv lub tsev nqa ib yam dabtsi mus, thiab tus uas nyob tom teb tsis txhob rov los muab nws lub tsho ntev. Hnub ntawd cov uas suab menyuam thiab cov uas muaj menyuam noj mis yuav txom nyem kawg li lauj!. Cia li thov kom tej xwm txheej no tsis txhob tshwm los rau lub caij ntuj no. Vim tias lub sijhawm ntawd yuav muaj kev ceeblaj txom nyem loj kawg li, txij thaum Vajtswv tsim ntuj tsim teb los txog niaj hnub nimno tsis tau txeev muaj dua li ntawd thiab yuav tsis muaj ntxiv li lawm. Yog tus Tswv tsis muab lub caij lub nyoog ntawd txiav kom luv, yuav tsis muaj neeg dim tau li. Tiamsis vim saib rau cov uas Vajtswv twb xaiv cia lawd, nws thiaj muab lub caij lub nyoog txiav kom luv. Thaum ntawd yog leejtwg hais rau nej tias, ‘Saib maj, tus Khetos nyob ntawm no,’ lossis hais tias, ‘Nws nyob tim ub,’ nej tsis txhob ntseeg li. Yuav muaj cov cuav Khetos thiab cov cuav xibhwb cev lus sawv los ua txujci tseem ceeb thiab txujci phimhwj, mas yog ua tau, tej txujci ntawd thiaj yuav ntxias cov uas twb xaiv cia lawd kom yuam kev. Nej yuav tsum ceev faj, kuv twb hais txhua yam rau nej ua ntej lawm. “Thaum dhau tej kev ceeblaj txom nyem ntawd lawm, “ ‘lub hnub yuav tsaus mus, lub hli yuav tsis ci, tej hnub qub yuav poob saum ntuj los, tej uas muaj hwjchim saum nruab ntug yuav raug muab co ua zog koog.’ Thaum ntawd lawv yuav pom Neeg leej Tub nrog nws lub hwjchim loj thiab meej mom nrog huab saum ntuj los. Thaum ntawd nws yuav txib cov tubtxib saum ntuj mus mas nws yuav qaws cov neeg uas nws xaiv cia lawd plaub ceg kaum ntuj tag nrho txhua lub kaum ntiajteb mus thoob qab ntuj kawg. “Cia li kawm tej lus piv ntawm tsob ntoo cev. Thaum tej ceg mos nyoos thiab pib hlav nplooj, nej kuj paub tias yuav txog lub caij ntuj kub. Ib yam li ntawd, thaum nej pom tej xwm txheej no tshwm los nej kuj paub tias nws twb los ze ntawm qhov rooj lawm. Kuv hais tseeb rau nej tias, tiam neeg no yuav tsis tau dua tag mus txog thaum txhua yam no tshwm los lawm. Lub ntuj thiab lub ntiajteb yuav dua mus, tiamsis kuv tej lus yuav tsis ploj kiag li. “Tiamsis hnub ntawd thiab teev ntawd tsis muaj leejtwg paub, txawm yog cov tubtxib saum ntuj thiab leej Tub kuj tsis paub tsuas yog leej Txiv tib leeg paub xwb. Nej yuav tsum ceev faj zov tos, rau qhov nej tsis paub lub sijhawm ntawd los txog thaum twg. Piv li ib tug yawg uas yuav mus kev deb, thaum nws tawm rooj mus, nws cob haujlwm rau nws cov tub qhe nyias ua nyias tes haujlwm thiab nws nkaw lus rau tus uas zov qhov rooj kom ceev faj zov zoo. Vim li no nej yuav tsum zov tos, rau qhov nej tsis paub tias tus tswv tsev yuav los thaum twg, yog thaum tsaus ntuj lossis ib tag hmo lossis thaum qaib qua lossis thaum sawv ntxov, nyob tsam nws los tamsid mas pom nej tseem pw tsaug zog. Tej uas kuv hais rau nej no kuv kuj hais rau sawvdaws tias, cia li zov tos.” Tshuav ob hnub li ua kevcai Hla Dhau thiab ua kevcai Noj Ncuav tsis Xyaw Keeb, mas cov pov thawj hlob thiab cov xibhwb qhia Vajtswv kevcai txawm nrhiav kev saib yuav ua li cas ntes tau Yexus twjywm thiab muab nws tua pov tseg. Lawv hais tias, “Tsis txhob ntes nws rau lub sijhawm uas ua kevcai no tsam ces cov pejxeem ho ntxhov hnyo.” Thaum Yexus nyob hauv Ximoos uas mob ruas lub tsev hauv lub zos Npethani, Yexus tseem pheeb ntawm rooj mov, txawm muaj ib tug pojniam nqa ib hwj roj tsw qab tuaj ces txawm muab lub ncauj hwj lov ntho muab cov roj hliv rau saum Yexus taubhau. Muaj qee leej chim txawm sib hais tias, “Ua cas yuav muab tej roj no ua nkim pov tseg? Cov roj no yog muab muag tau nyiaj peb puas tawm denalia coj mus pub rau cov neeg pluag kuj tau.” Lawv txawm yws tus pojniam ntawd. Yexus thiaj hais tias, “Tsis txhob yws nws. Nej ua rau nws ntxhov siab ua dabtsi? Nws ua yam uas zoo heev rau kuv. Yeej yuav muaj cov neeg pluag nrog nej nyob mus li, mas nej yuav ua zoo rau lawv thaum twg kuj tau tiamsis nej yuav tsis muaj kuv nrog nej nyob mus li. Nws ua raws li nws ua tau. Twb yog nws hliv roj pleev kuv lub cev ua ntej uas yuav muab kuv log. Kuv hais tseeb rau nej tias, tshaj tawm txoj xov zoo no mus thoob ntiajteb txog qhovtwg, qhov uas tus pojniam no ua yuav nrov ncha mus txog qhov ntawd ua lub chaw nco txog nws.” Thaum ntawd Yudas Ikhali‑au uas yog ib tug hauv kaum ob tug thwjtim txawm mus cuag cov pov thawj hlob es yuav muab Yexus cob rau lawv. Thaum lawv hnov li ntawd mas lawv zoo siab heev thiab cog lus tias yuav muab nyiaj rau Yudas. Nws txawm nrhiav sijhawm muab Yexus rau lawv. Thawj hnub uas ua kevcai Noj Ncuav tsis Xyaw Keeb, yog lub sijhawm uas lawv tua menyuam yaj ua kevcai Hla Dhau, cov thwjtim hais rau Yexus tias, “Yuav cia peb npaj kevcai Hla Dhau rau koj noj qhovtwg?” Yexus txib ob tug thwjtim mus thiab hais rau ob tug tias, “Neb cia li mus rau hauv lub nroog, mas yuav muaj ib tug yawg nqa ib lub laujkaub dej ntsib neb. Neb cia li raws nws qab mus. Nws nkag rau lub tsev twg, neb cia li hais rau tus tswv tsev ntawd tias, ‘Tus xibhwb hais tias, Chav txais qhua uas kuv yuav nrog kuv cov thwjtim noj kevcai Hla Dhau nyob qhovtwg?’ Nws yuav qhia ib chav loj uas nyob txheej saud muaj rooj tog txhij lawm. Cia li npaj qhov ntawd rau peb.” Ob tug thwjtim txawm sawv kev mus rau hauv lub nroog thiab ntsib raws li Yexus hais rau ob tug, ces ob tug thiaj npaj ua kevcai Hla Dhau txhij zog. Thaum tsaus ntuj Yexus nrog kaum ob tug thwjtim tuaj. Thaum lawv pheeb noj mov ntawm rooj, Yexus hais tias, “Kuv hais tseeb rau nej tias, nej cov no ib tug yuav fav xeeb rau kuv, yog ib tug uas nrog kuv noj ua ke.” Lawv kuj pib ntxhov siab heev lawv nyias taus nyias nug tias, “Yog kuv lov?” Yexus hais rau lawv tias, “Yog kaum ob tug no ib tug, yog tus uas nrog kuv koom ntsw ib lub tais. Neeg leej Tub yuav mus raws li tej uas sau cia hais txog nws, tiamsis tus uas fav xeeb rau Neeg leej Tub yeej yuav raug txom nyem kawg. Tsis txhob yug nws los kuj zoo dua.” Thaum lawv noj mov ntawd, Yexus txawm muab ib lub ncuav los foom koob hmoov rau mas muab ntais cev rau lawv thiab hais tias, “Cia li txais, no yog kuv lub cev.” Thiab nws muab ib lub khob los ua Vajtswv tsaug tag muab cev rau lawv mas lawv txhua tus haus. Thiab nws hais rau lawv tias, “No yog kuv cov ntshav uas nias hom thawj rau tej lus cog tseg, uas raug muab nchuav rau neeg coob coob. Kuv hais tseeb rau nej tias kuv yuav tsis haus cawv txiv hmab dua li mus txog hnub uas kuv haus cawv txiv hmab tshiab hauv Vajtswv lub tebchaws.” Thaum lawv hu ib zaj nkauj tag lawv tawm mus rau pem roob Txiv Aulib. Yexus hais rau lawv tias, “Nej txhua tus yuav tso kuv tseg, vim muaj lus sau cia hais tias, “ ‘Kuv yuav tua tus yug yaj, mas pab yaj yuav tawg ua sab ua sua mus.’ Tiamsis thaum kuv raug muab tsa ciaj sawv rov los lawm, kuv yuav ua nej ntej mus rau Kalilais.” Petus txawm hais rau Yexus tias, “Txawm yog lawv sawvdaws tso koj tseg los kuv yuav tsis tos koj tseg kiag li.” Yexus hais rau nws tias, “Kuv hais tseeb rau koj tias, hmo no ntag thaum qaib tsis tau qua ob tsig koj yuav tsis lees paub kuv peb zaug.” Tiamsis Petus hais tawv nkawv tias, “Txawm yog kuv yuav tsum nrog koj tuag, los kuv yuav tsis hais tias kuv tsis paub koj.” Cov thwjtim sawvdaws puavleej hais ib yam nkaus li ntawd. Ces Yexus lawv txawm mus rau ib qho chaw uas hu ua Kexemane, mas Yexus hais rau nws cov thwjtim tias, “Cia li zaum ntawm no rau thaum kuv thov Vajtswv.” Nws coj Petus, Yakaunpau thiab Yauhas nrog nws mus. Yexus pib nyuaj siab thiab ntxhov siab kawg. Nws hais rau lawv tias, “Kuv lub siab ntxhov kawg twb yuav tuag. Nej cia li nyob ntawm no zov tos.” Yexus txawm mus rau tom ntej mentsis mas nws khwb nkaus rau hauv pem teb thov tias, yog ua tau, cia teev no hla dhau nws mus. Thiab nws hais tias “Anpa, kuv txiv 'e, koj ua tau txhua yam, thov rho lub khob no ntawm kuv mus. Txawm li cas kuj xij, thov tsis txhob cia ua raws li kuv lub siab tiamsis cia ua raws li koj lub siab.” Nws rov los rau ntawm cov thwjtim pom lawv pw tsaug zog tag. Nws thiaj hais rau Petus tias, “Ximoos, koj tseem pw tsaug zog lov? Koj nrog kuv zov tos ib nyuag teev tsis taus li lov? Nej yuav tsum zov tos thiab thov Vajtswv xwv nej thiaj tsis raug kev sim siab. Lub siab npaj txhij lawm tiamsis lub cev tsis muaj zog.” Yexus txawm rov mus thov Vajtswv hais ib yam nkaus li thawj zaug. Yexus rov los pom lawv pw tsaug zog dua ib zaug vim lawv qheb tsis taus qhov muag, mas lawv tsis paub tias yuav teb Yexus li cas. Nws txawm rov los rau ntawm cov thwjtim zaum peb thiab hais rau lawv tias, “Nej tseem pw tsaug zog thiab so los siav lov? Txaus lawm lauj! Lub sijhawm twb los txog lawm, mas Neeg leej Tub twb raug muab cob rau hauv cov neeg txhaum txhais tes lawm. Cia li sawv tsees, peb mus. Saib maj, tus uas fav xeeb rau kuv tuaj ze lawm.” Thaum Yexus tseem tabtom hais lus, ces Yudas uas yog ib tug thwjtim hauv kaum ob tug ntawd txawm tuaj txog tamsim ntawd, thiab muaj neeg coob coob coj ntaj coj qws nrog nws tuaj, yog cov pov thawj hlob thiab cov xibhwb qhia Vajtswv kevcai thiab cov kev txwj laus txib tuaj. Tus uas fav xeeb ntawd twb qhia rau lawv ua ntej tias, “Kuv nwj tus twg mas yog tus ntawd ntag. Cia li ntes kiag nws coj mus ceev tib zoo.” Ces Yudas txawm ncaj nraim los rau ntawm Yexus tamsid thiab hais tias, “Xibhwb,” thiab nwj Yexus. Ces cov neeg ntawd txawm los ntsiab nkaus Yexus muab nws ntes. Muaj ib tug uas sawv ntawd rho kiag ntaj los tib ntag tus tuam pov thawj hlob tus tub qhe txiav nws ib sab nplooj ntseg tu nrho. Yexus hais rau cov neeg ntawd tias, “Nej coj ntaj coj qws tuaj ntes kuv ib yam li tawm mus ntes tub sab lov? Kuv niaj hnub nrog nej nyob hauv lub tuam tsev qhuab qhia, los nej ho tsis ntes kuv. Tiamsis Vajtswv txojlus yeej yuav tsum tiav li no.” Ces cov thwjtim sawvdaws txawm tso Yexus tseg khiav tag lawm. Muaj ib tug hluas tsuas npua ib daim ntaub mag xwb raws Yexus qab mus, lawv txawm ntes tus hluas ntawd, ces nws tso plhuav daim ntaub mag tseg khiav liab qab mus. Lawv txawm coj Yexus mus rau ntawm tus tuam pov thawj hlob, mas cov pov thawj hlob thiab cov kev txwj laus thiab cov xibhwb qhia Vajtswv kevcai sawvdaws twb tuaj txoos ua ke rau qhov ntawd lawm. Petus raws Yexus qab deb deb mus rau hauv lub tshav puam ntawm tus tuam pov thawj hlob lub tsev. Nws nrog cov tub rog uas zov lub tuam tsev nyob ua ke nte taws. Cov pov thawj hlob thiab tag nrho cov thawj lub rooj sablaj txawm nrhiav lus kom Yexus xwv thiaj tua tau nws pov tseg, tiamsis nrhiav tsis tau. Muaj ntau leej los ua cuav timkhawv nkaug nws los lawv tej lus timkhawv tsis sib tim. Qee leej sawv tsees ua cuav timkhawv kom Yexus hais tias, “Peb hnov tus no hais tias, ‘Kuv yuav rhuav lub tuam tsev no uas neeg txhais tes ua, mas peb hnub xwb kuv yuav ua dua ib lub tshiab, uas tsis yog neeg txhais tes ua.’ ” Txawm yog lawv hais li ntawd los lawv tej lus timkhawv tsis sib tim. Tus tuam pov thawj hlob txawm sawv tsees hauv lawv nruab nrab thiab nug Yexus tias, “Koj tsis muaj ib lo lus teb lov? Lawv kom koj txog dabtsi?” Yexus nyob twjywm tsis teb kiag li. Tus tuam pov thawj hlob txawm nug dua ib zaug hais tias, “Koj yog tus Khetos, yog Vajtswv uas tsim nyog qhuas tus tub lov?” Yexus hais tias, “Kuv yog, thiab nej yuav pom Neeg leej Tub zaum ntawm tus uas muaj hwjchim loj kawg sab xis, thiab nrog huab saum ntuj los.” Ces tus tuam pov thawj hlob txawm dua rhe nws lub tsho thiab hais tias, “Peb tseem yuav timkhawv ntxiv li cas thiab? Nej twb hnov nws hais lus tuam mom Vajtswv lawm. Nej pom zoo li cas?” Lawv sawvdaws teem txim tias tsim nyog muab nws tua tuag. Qee leej pib nto qaub ncaug rau Yexus thiab muab nws lub ntsej muag qhwv thiab ntaus nws thiab hais rau nws tias, “Cia li cev Vajtswv lus rau peb saib.” Cov tub rog txawm kav nws thiab xuas tawg ncuav rau nws. Thaum Petus nyob hauv lub tshav puam sab nrad, tus tuam pov thawj hlob ib tug nkauj qhev txawm los. Thaum nws pom Petus nte taws, nws txawm ntsia ntsoov rau Petus thiab hais tias, “Koj twb nrog Yexus uas yog neeg Naxale ua ke thiab los sas.” Tiamsis Petus tsis lees, nws hais tias, “Qhov uas koj hais kod kuv tsis paub thiab tsis nkag siab li.” Ces Petus txawm tawm mus rau ntawm rooj vag. Tus nkauj qhev rov pom nws ces txawm pib hais rau cov neeg uas nyob ib ncig ntawd tias, “Tus no yeej yog lawv cov thiab.” Petus rov tsis lees. Tom qab ntawd mentsis cov neeg uas nyob ib ncig txawm hais rau Petus tias, “Koj yeej yog lawv cov ntawd ib tug tiag tiag li, rau qhov koj yog neeg Kalilais.” Petus txawm pib twv tsawm tawv tawv hais tias, “Kuv yeej tsis paub tus uas nej hais kod.” Tamsim ntawd qaib txawm qua zaum ob. Petus thiaj nco dheev txog tej lus uas Yexus tau hais rau nws tias, “Thaum qaib tsis tau qua ob tsig koj yuav tsis lees paub kuv peb zaug.” Petus tswj tsis tau nws lub siab ces txawm quaj quaj. Thaum sawv ntxov cov pov thawj hlob thiab cov kev txwj laus thiab cov xibhwb thiab tag nrho cov thawj sawvdaws sablaj ua ke. Lawv txawm muab Yexus khi coj mus cob rau Philaj. Philaj nug Yexus tias, “Koj yog cov Yudai tus vajntxwv lov?” Yexus hais tias, “Yog li koj hais.” Cov pov thawj hlob kuj kom Yexus ntau yam. Philaj txawm rov nug nws tias, “Koj tsis teb ib los li lov? Saib lawv kom koj npaum li cas.” Tiamsis Yexus tsis teb dua li lawm, Philaj kuj xav tsis thoob li. Txhua zaus uas ua kevcai Hla Dhau Philaj txeev tso ib tug raug txim dim raws li cov pejxeem thov. Muaj ib tug npe hu ua Npalanpa raug kaw hauv tsev lojfaj nrog cov uas fav xeeb tua neeg rau thaum txeeb tebchaws. Cov pejxeem txawm tuaj ua ke pib thov Philaj ua rau lawv raws li nws txeev ua. Philaj thiaj teb lawv tias, “Nej xav kom kuv tso cov Yudai tus vajntxwv dim lov?” Vim Philaj pom tias cov pov thawj hlob khib thiaj muab Yexus cob rau nws. Tiamsis cov pov thawj hlob tshum cov pejxeem kom thov Philaj tso Npalanpa. Philaj rov hais rau lawv tias, “Yog li ntawd kuv yuav ua li cas rau tus uas nej hu tias cov Yudai tus vajntxwv?” Lawv rov qw hais tias, “Muab teem rau saum khaublig ntoo.” Philaj thiaj hais rau lawv tias, “Ua cas muab teem? Nws tau ua txhaum dabtsi?” Tiamsis lawv yimhuab qw hais tias, “Muab nws teem rau saum khaublig ntoo.” Philaj xav ua kom hum cov pejxeem lub siab thiaj tso Npalanpa rau lawv, mas muab Yexus nplawm thiab muab cob rau luag coj mus teem rau saum khaublig ntoo. Cov tub rog txawm coj Yexus mus rau hauv tus tswv xeev lub loog (uas hu ua Plitholia, ) mas hu kiag pab tub rog sawvdaws tuaj ua ke. Lawv muab ib lub tsho ntev tsamxem los ua rau Yexus hnav. Lawv muab pos kaus ntsaj los qhaib ua ib lub mom vajntxwv looj nws taubhau, thiab lawv pib hawm nws hais tias, “Cov Yudai tus vajntxwv, thov kom koj tau zoo lauj!” Lawv xuas ib tug tauj deg ntaus nws taubhau thiab nto qaub ncaug rau nws thiab txhos caug ntua pe nws. Thaum lawv ua saib tsis taus Yexus tag lawd, lawv muab lub tsho ntev tsamxem hle thiab rov muab nws cev tsoos ua rau nws hnav, thiab coj nws mus yuav muab teem rau saum khaublig ntoo. Muaj ib tug yawg npe hu ua Ximoos uas yog neeg Khulene, yog Alexadaw thiab Lufa txiv, nws taug kev pem yaj sab tuaj. Lawv txawm yuam Ximoos kwv Yexus tus khaublig ntoo. Lawv coj Yexus mus txog lub chaw uas hu ua Kaukautha uas txhais hais tias lub chaw txha taubhau. Lawv txawm muab cawv txiv hmab xyaw roj tsw qab cev rau Yexus haus, tiamsis Yexus tsis txais. Lawv muab Yexus teem rau saum khaublig ntoo thiab muab nws cev tsoos tsho los rho ntawv faib saib leejtwg tau daim twg. Thaum lawv muab Yexus teem rau saum khaublig ntoo yog thaum tagkis cuaj teev. Tej lus uas kom Yexus sau cia hais tias, “Cov Yudai tus vajntxwv.” Lawv kuj muab ob tug tub sab teem nrog Yexus ua ke, sab xis ib tug, sab laug ib tug. Tej neeg uas dua kev mus los kuj thuam Yexus co hau hnyo, hais tias, “Au tus uas yuav rhuav lub tuam tsev thiab peb hnub xwb ua dua tshiab 'e, koj cia li cawm koj tus kheej kom dim thiab nqes kiag saum khaublig ntoo los los maj.” Cov pov thawj hlob thiab cov xibhwb qhia Vajtswv kevcai kuj thuam luag nws ib yam nkaus hais tias, “Nws cawm tau luag dim, tiamsis nws cawm tsis tau nws dim. Cia tus Khetos uas yog Yixayee tus vajntxwv nqes saum khaublig ntoo los tamsim no peb thiaj pom thiab ntseeg.” Ob tug tub sab uas raug teem nrog Yexus kuj thuam nws. Thaum tav su ntuj txawm tsaus ntais thoob plaws lub tebchaws mus txog hnub qaij peb teev. Thaum peb teev Yexus qw nrov nrov hais tias, “Elau‑i, elau‑i, Lama xanpathani?” txhais hais tias, “Kuv tus Vajtswv, kuv tus Vajtswv ua cas koj tso kuv tseg lawm?” Thaum cov neeg uas nyob ntawd qee leej hnov ces txawm hais tias, “Saib maj, nws hu Eliya.” Muaj ib tug dhia loo mus muab ib lub xwb kuab raus cov kua qaub chob rau tus hau pas tauj deg cev mus rau Yexus haus thiab hais tias, “Peb tos saib Eliya yuav los tso nws nqes los tsis tso.” Yexus qw nrov nrov ces txawm tu siav nrho. Daim ntaub uas thaiv hauv lub tuam tsev txawm ntuag rhe sab saud los thoob plaws hauv taw ua ob daim. Thaum tus thawj rog kav ib puas leej uas sawv ncaj ntawm Yexus xubntiag pom Yexus tu siav li ntawd, nws txawm hais tias, “Tus no yeej yog Vajtswv tus tub tiag tiag li.” Muaj ib pab pojniam nyob deb deb saib, lawv cov ntawd muaj Maivliag Madala, thiab Maivliag uas yog Yakaunpau me thiab Yauxes niam thiab Xalaume. Cov pojniam no nrog Yexus nyob thiab tu nws rau thaum nws nyob hauv Kalilais. Thiab tseem muaj lwm tus pojniam coob leej uas nrog Yexus tuaj rau hauv Yeluxalees. Thaum yuav tsaus ntuj, yog hnub uas npaj ua ntej hnub Xanpatau, Yauxej uas yog neeg hauv lub moos Alimathia, nws yog ib tug hauv cov thawj lub rooj sablaj uas sawvdaws hwm, thiab nws tos rawv Vajtswv lub tebchaws, txawm ua lub siab tuab mus cuag Philaj thov Yexus lub cev tuag. Philaj kuj xav tsis thoob qhov uas Yexus tuag lawd txawm hu tus thawj rog uas kav ib puas leej los nug tias Yexus tuag lawm los tsis tau. Thaum Philaj paub tseeb ntawm tus thawj rog ntawd lawm nws txawm muab Yexus lub cev tuag cob rau Yauxej. Yauxej thiaj mus yuav ib daim ntaub mag los, mas txo Yexus lub cev tuag los thiab muab daim ntaub mag qhwv, coj mus tso rau hauv lub qhov ntxa uas txaug cia rau hauv phab zeb, mas dov ib daim lag zeb npog lub rooj ntxa. Maivliag Madala thiab Maivliag uas yog Yauxes niam kuj pom lub chaw uas tso Yexus lub cev. Thaum dhau hnub Xanpatau lawm, Maivliag Madala thiab Maivliag uas yog Yakaunpau niam thiab Xalaume lawv mus yuav tshuaj tsw qab coj mus pleev Yexus lub cev. Hnub ib thaum sawv ntxov lawv txawm mus txog lub qhov ntxa rau thaum hnub tawm tuaj lawm. Lawv sib tham hais tias, “Leejtwg yuav pab muab daim lag zeb dov tawm ntawm lub rooj ntxa?” Lawv tsa muag ntsia daim lag zeb uas loj heev twb muab dov tawm lawm. Thaum lawv nkag mus rau hauv lub ntxa lawv pom ib tug hluas hnav lub tsho ntev dawb paug zaum sab xis. Lawv kuj phimhwj heev. Tus hluas ntawd hais rau lawv tias, “Nej tsis txhob phimhwj, nej tuaj nrhiav Yexus neeg Naxale uas raug muab teem rau saum khaublig ntoo. Nws twb ciaj sawv los lawm. Nws tsis nyob ntawm no. Cia li saib lub chaw uas lawv tso nws. Nej cia li mus hais rau nws cov thwjtim thiab Petus tias nws yuav ua nej ntej mus rau pem Kalilais. Nej yuav pom nws qhov ntawd, raws li nws tau hais rau nej.” Lawv txawm tawm hauv lub qhov ntxa dhia mus, rau qhov lawv ntshai tshee hnyo thiab phimhwj heev. Lawv tsis hais rau leejtwg vim lawv ntshai. Txij nqe 9 mus txog nqe 20 tej phau thaum ub uas zoo kawg tsis muaj cov nqe no. Tej zaum tsis yog Malakau sau. Hnub ib thaum sawv ntxov uas Yexus ciaj sawv rov los lawd, nws los tshwm rau Maivliag Madala pom ua ntej, yog tus uas Yexus ntiab xya tus dab tawm. Maivliag thiaj mus hais rau cov uas txeev nrog Yexus nyob rau thaum lawv tabtom nyuaj siab thiab quaj ntsuag. Thaum lawv hnov tias Yexus muaj txojsia nyob thiab Maivliag twb pom Yexus lawm, los lawv tseem tsis tshua ntseeg. Dhau ntawd Yexus hloov dua lub cev lus tshwm rau ob tug thwjtim pom rau thaum ob tug tabtom taug kev nraum lub nroog. Ob tug thiaj rov los piav rau cov thwjtim sawvdaws los lawv kuj tsis ntseeg ob tug. Dhau ntawd Yexus los tshwm rau kaum ib tug thwjtim rau thaum lawv tabtom noj mov. Nws yws qhov uas lawv tsis ntseeg thiab lawv ua lub siab tawv vim yog lawv tsis ntseeg cov uas twb pom Yexus rau thaum nws ciaj sawv rov los lawm. Yexus hais rau lawv tias, “Cia li tawm mus thoob ntiajteb tshaj tawm txoj xov zoo rau ib tsoom neeg sawvdaws. Tus uas ntseeg thiab ua kevcai raus dej yuav dim. Tus uas tsis ntseeg yuav raug teem txim. Cov uas ntseeg yuav ua tau tej txujci tseem ceeb no. Lawv yuav tuav kuv lub npe ntiab dab tawm, lawv yuav hais tau lus txawv txawv, lawv txhais tes yuav tuav tau nab, yog lawv haus tau tshuaj lom yam twg yuav tsis lom lawv kiag li, lawv muab tes npuab cov neeg muaj mob, cov neeg ntawd yuav zoo huvsi.” Thaum tus Tswv Yexus hais rau lawv tag lawd, nws raug coj mus saum ntuj thiab zaum ntawm Vajtswv sab tes xis. Cov thwjtim txawm tawm mus tshaj tawm rau txhua qhov, tus Tswv kuj nrog lawv ua haujlwm ua ke thiab ua txujci phimhwj tshwm los qhia tias txoj xov zoo muaj tseeb.] Tej phau lus Kili txuas nqe 8 no mus. Cov pojniam ntawd mus qhia tej uas lawv tau hnov rau Petus thiab cov uas nrog nws nyob ua ke paub. Dhau ntawd Yexus txib cov thwjtim mus tshaj tawm Vajtswv txojlus dawb huv uas tsis txawj lwj hais txog txojkev dim mus ib txhis tsis kawg thoob plaws sab hnub tuaj rau sab hnub poob.] Twb muaj coob leej yooj xeeb sau tej xwm txheej uas muaj tshwm los tiav tag rau hauv peb lawm, raws li cov neeg uas qhov muag pom txij thaum chiv lub keeb los thiab yog cov uas qhia txoj xov zoo tau muab cob rau peb lawm. Kuv twb ua tib zoo tshawb nrhiav txhua yam no txij thaum chiv lub keeb los lawm, kuv thiaj pom zoo muab sau ua ib qeb zuj zus qhia rau koj The‑aufila uas saib hlob, kom koj thiaj paub qhov tseeb txog zaj no uas twb txeev muaj neeg qhia rau koj paub lawd. Thaum Helauj ua vajntxwv kav Yudia, muaj ib tug pov thawj hu ua Xekhaliya, uas nyob hauv Apiya pab. Nws tus pojniam yog Aloo caj ces npe hu ua Elixanpe. Vajtswv pom tias ob tug yog neeg ncaj ncees thiab ua lub neej raws nraim tus Tswv tej lus nkaw thiab tej kab ke huvsi, tsis muaj chaw thuam li. Tiamsis ob tug tsis muaj menyuam rau qhov Elixanpe ib txwm yeej tsis xeeb menyuam, thiab ob tug laus heev lawm. Muaj ib hnub yog txog Xekhaliya lawv pab li caij ua pov thawj tes haujlwm ua koom tu Vajtswv, mas lawv rho ntawv raws li cov pov thawj txoj kevcai mas rho tau nws mus hlawv hmoov tshuaj tsw qab rau hauv tus Tswv lub tuam tsev. Lub sijhawm hlawv hmoov tshuaj tsw qab ntawd ib tsoom pejxeem nyob sab nraud thov Vajtswv. Tus Tswv ib tug tubtxib saum ntuj txawm los tshwm rau Xekhaliya pom sawv ntsug ntawm lub thaj hlawv hmoov tshuaj tsw qab sab xis. Thaum Xekhaliya pom dheev, nws poob siab thiab ntshai heev. Tus tubtxib saum ntuj ntawd hais rau nws tias, “Xekhaliya, tsis txhob ntshai, vim Vajtswv twb mloog koj tej lus thov lawm. Koj tus pojniam Elixanpe yuav yug ib tug tub, mas koj yuav tsum tis tus tub ntawd lub npe hu ua Yauhas. Koj yuav muaj kev zoo siab xyiv fab, thiab neeg coob coob yuav xyiv fab qhov uas yug tus tub ntawd los. Rau qhov tus Tswv pom tias tus tub ntawd tseem ceeb, thiab nws yuav tsis haus cawv txiv hmab thiab cawv ntxwg kiag li thiab nws yuav muaj Vaj Ntsuj Plig uas dawb huv puv npo txij thaum nruab thiab los. Nws yuav coj Yixayee caj ces coob coob tig los cuag tus Tswv uas yog lawv tus Vajtswv. Nws yuav muaj Eliya tus ntsuj plig thiab lub hwjchim mus ua tus Tswv ntej ua rau leej txiv lub siab tig mus xib rau cov menyuam thiab ua kom cov uas tawv ncauj tig los mloog cov uas ncaj ncees lub tswvyim, kom thiaj ua tau ib haiv neeg uas npaj txhij rau tus Tswv.” Xekhaliya txawm hais rau tus tubtxib saum ntuj hais tias, “Kuv yuav paub tej no li cas? Rau qhov kuv laus lawm thiab kuv tus pojniam kuj hnub nyoog nchav lawm.” Tus tubtxib saum ntuj teb nws tias, “Kuv yog Kali‑ee uas sawv ntawm Vajtswv lub xubntiag. Vajtswv txib kuv los hais rau koj thiab qhia txoj xov zoo no rau koj Saib maj, vim koj tsis ntseeg kuv tej lus uas yeej yuav tiav raws li lub sijhawm, koj yuav ruam hais tsis tau lus mus txog hnub uas tej xwm txheej no muaj tshwm los.” Cov neeg uas tseem tos Xekhaliya kuj xav tsis thoob ua cas nws nyob ntev heev rau hauv lub tuam tsev. Thaum nws tawm los nws hais tsis tau lus rau lawv lawm, mas lawv thiaj paub tias nws twb pom ib zaj yog toog hauv lub tuam tsev. Nws ua ruam piav rau lawv thiab hais tsis tau lus mus li. Thaum tag lub sijhawm uas nws ua nws tes haujlwm nws txawm rov mus tsev. Dhau ntawd nws tus pojniam Elixanpe txawm xeeb menyuam mas nyob twjywm nraim cev tau tsib lub hlis. Nws hais tias, “Tus Tswv ua li no rau kuv, rau hnub no uas nws tsa qhov muag saib kuv thiaj rho tau qhov uas neeg saib tsis taus kuv mus.” Thaum Elixanpe xeeb menyuam tau rau lub hlis, Vajtswv txib tug tubtxib saum ntuj Kali‑ee mus rau hauv ib lub moos uas hu ua Naxale hauv lub xeev Kalilais, mus cuag ib tug ntxhais dawb huv uas Yauxej uas yog Davi caj ces twb qhaib lawm. Tus ntxhais dawb huv ntawd npe hu ua Maivliag. Tus tubtxib saum ntuj los hais rau Maivliag tias, “Tus uas tau txais kev hlub 'e, koj cia li noj qab nyob zoo. Tus Tswv nrog nraim koj.” Maivliag kuj ntxhov siab vim tej lus ntawd, thiab tshuaj saib tej lus ntawd yog li cas. Tus tubtxib saum ntuj hais rau nws tias, “Maivliag, tsis txhob ntshai, koj yog tus uas Vajtswv hlub. Saib maj, koj yuav xeeb menyuam thiab yuav yug tau ib tug tub, mas koj yuav tis nws lub npe hu ua Yexus. Nws yuav ua tus loj thiab yuav hu tias Vajtswv uas loj dua ntais tus tub. Tus Tswv uas yog Vajtswv yuav pub nws yawg koob Davi lub zwm txwv rau nws, mas nws yuav ua vajntxwv kav Yakhauj caj ces mus ib txhis li, thiab nws lub tebchaws yuav tsis txawj kawg.” Maivliag hais rau tus tubtxib saum ntuj ntawd tias, “Yuav ua li cas muaj tau li ntawd, rau qhov kuv tsis tau nrog txivneej pw kiag li.” Tus tubtxib saum ntuj hais rau nws tias, “Vaj Ntsuj Plig uas dawb huv yuav los rau saum koj, thiab Vajtswv uas loj dua ntais lub hwjchim yuav roos koj. Vim li no tus tub uas yuav yug los ntawd thiaj yuav hu tias dawb huv thiab hu tias Vajtswv tus tub. Saib maj, Elixanpe uas txheeb koj twb laus heev los tau xeeb tub lawm. Nimno tus uas luag hais tias mooj los twb xeeb tub tau rau lub hlis lawm. Rau qhov tsis muaj ib yam dabtsi uas Vajtswv yuav ua tsis tau.” Maivliag thiaj hais tias, “Kuv yog tus Tswv tus nkauj qhev. Cia li muaj rau kuv raws li koj tej lus.” Ces tus tubtxib saum ntuj txawm mus lawm. Lub sijhawm ntawd Maivliag sawv kev tsees maj nroos mus pem roob yuav mus rau Yuda ib lub moos, thiab nkag mus rau hauv Xekhaliya lub tsev thiab mus fim Elixanpe. Thaum Elixanpe hnov Maivliag tej lus ntawd tus menyuam hauv Elixanpe lub plab txawm nti, thiab Elixanpe tau Vaj Ntsuj Plig dawb huv puv nkaus, nws txawm qw nrov tias, “Hauv ib tsoom pojniam koj tau hmoov zoo thiab tus menyuam hauv koj lub plab kuj tau hmoov zoo. Ua cas kuv yuav tau tej no, yog qhov uas kuv tus Tswv leej niam tuaj cuag kuv? Saib maj, thaum kuv lub qhov ntsej hnov koj lub suab hu kuv, tus menyuam hauv kuv lub plab txawm nti xyiv fab. Tus pojniam uas ntseeg tias tej uas tus Tswv tau hais rau nws yuav tiav mas tau nyob kaj siab lug.” Maivliag txawm hais tias, “Kuv lub siab qhuas tus Tswv, thiab kuv tus ntsuj plig xyiv fab rau Vajtswv uas yog kuv tus Cawmseej. Rau qhov nws saib rau nws tus nkauj qhev uas nyob rau lub chaw qes. Saib maj, txij no mus txhua tiam neeg yuav hu kuv tias tus uas nyob kaj siab lug, vim yog tus uas muaj hwjchim loj kawg nkaus ua tes haujlwm loj kawg rau kuv, nws lub npe dawb huv. Nws txojkev khuvleej muaj rau cov uas hwm thiab paub ntshai nws, ib tiam dhau ib tiam. Nws txhais npab ua nws lub hwjchim tshwm los, nws ua rau cov uas lub siab khav theeb tawg ua sab ua sua mus. Nws txo cov thawj nqes ntawm lawv lub zwm txwv, thiab tsa cov uas poob qes tau nyob lub chaw siab. Nws pub yam uas zoo rau cov uas tshaib tau noj tsau npo, thiab nws tso cov nplua nuj mus tes dawb tes do. Nws pab nws tus tub qhe Yixayee, thiab nco txog nws txojkev khuvleej, raws li nws tau hais rau peb tej laus uas yog Aplahas thiab Aplahas caj ces mus ib txhis.” Maivliag nrog Elixanpe nyob kwvlam tau peb lub hlis li rov mus tsev. Thaum txog caij uas Elixanpe yug menyuam nws yug tau ib tug tub. Thaum nws tej txheeb ze thiab kwvtij zej zog hnov tias tus Tswv ua txojkev khuvleej tshwm los rau nws ntau kawg, lawv nrog nws zoo siab xyiv fab. Thaum puv yim hnub lawv tuaj muab tus menyuam ntawd ua kevcai txiav thiab yuav muab nws tis npe hu ua Xekhaliya raws li leej txiv. Tiamsis leej niam hais tias, “Tsis yog. Yuav tsum tis hu ua Yauhas.” Lawv hais rau nws tias, “Koj cov kwvtij tsis muaj ib tug hu li ntawd.” Lawv txawm ua ruam piav rau leej txiv nug saib nws yuav hu tus menyuam npe li cas. Xekhaliya txawm thov ib daim txiag sau ntawv mas sau hais tias, “Nws lub npe hu ua Yauhas.” Lawv sawvdaws kuj xav tsis thoob li. Tamsim ntawd Xekhaliya lub qhov ncauj thiab tus nplaig txawm zoo kiag thiab nws hais lus qhuas Vajtswv. Tej kwvtij zej zog sawvdaws kuj ntshai kawg. Luag sib tham txog tej xwm txheej no huvsi thoob plaws pem Yudia tej roob huvsi. Sawvdaws uas tau hnov kuj muab cim cia rau hauv nruab siab thiab hais tias, “Tus menyuam no yuav zoo li cas rau tom hauv ntej?” Rau qhov tus Tswv txhais tes nrog nraim nws. Xekhaliya uas yog leej txiv puv npo Vaj Ntsuj Plig uas dawb huv thiab hais cev Vajtswv lus hais tias, “Qhuas tus Tswv uas yog cov Yixayee tus Vajtswv, rau qhov nws los saib thiab txhiv nws haiv neeg, thiab tsa muaj ib tug kub hauv nws tus qhev Davi caj ces los pab peb dim, raws li nws kom cov xibhwb dawb huv thaum ub lub qhov ncauj hais cia lawd, yog cawm peb dim hauv peb cov yeeb ncuab thiab txhua tus uas ntxub peb txhais tes. Nws ua nws txojkev khuvleej tshwm rau peb tej poj koob yawm txwv, thiab nco ntsoov nws tej lus cog tseg uas dawb huv, yog tej lus uas nws cog twv tseg rau peb yawg koob Aplahas tias, thaum peb dim hauv peb cov yeeb ncuab txhais tes lawm, nws yuav pub kom peb ua koom tau rau nws tsis ntshai dabtsi kiag li, thiab ua neeg dawb huv thiab ncaj ncees rau ntawm nws lub xubntiag mus tag peb sim neej. Metub 'e, lawv yuav hu koj tias tus xibhwb uas cev Vajtswv uas loj dua ntais tej lus, rau qhov koj yuav ua tus Tswv ntej npaj kev rau nws, thiab yuav qhia txojkev cawm dim rau nws haiv neeg paub, yog qhov uas zam lawv lub txim. Vim peb tus Vajtswv lub siab khuvleej peb, tus duab kaj saum ntuj thiaj los txog peb, thiab yuav ci mus rau cov neeg uas nyob hauv txojkev tsaus ntuj thiab nyob hauv txojkev tuag tus duab ntxoov ntxoo, kom thiaj coj tau peb txhais kotaw taug txojkev kaj siab lug.” Tus menyuam ntawd kuj hlob zoo thiab nws tus ntsuj plig muaj zog tuaj, thiab nws nyob hauv tebchaws moj sab qhua mus txog hnub uas nws los tshwm rau cov Yixayee pom. Lub sijhawm ntawd Xixa Aukata rhawv kevcai kom neeg thoob ntiajteb txheeb npe rau hauv ntawv. No yog thawj zaug uas sau npe. Thaum ntawd Khilenia ua tus kav lub xeev Xilia. Txhua tus nyias mus sau npe rau hauv nyias lub moos. Yauxej kuj taug kev tawm hauv lub moos Naxale xeev Kalilais mus rau Davi lub moos uas hu ua Npelehee xeev Yudia, rau qhov nws yog Davi caj ces thiab yog Davi cum. Nws nrog Maivliag uas nws twb qhaib cia lawd ua ke mus sau npe thiab Maivliag kuj suab menyuam. Thaum ob tug nyob qhov ntawd txawm txog caij Maivliag yug menyuam. Nws txawm yug tau nws tus tub hlob thiab muab khaub ncaws qhwv tso pw rau hauv ib lub dab zaub, rau qhov hauv lub tsev so tsis muaj chaw rau ob tug so lawm. Thaj tsam ntawd muaj neeg yug yaj zov yaj hmo ntuj tom tshav zaub. Mas tus Tswv ib tug tubtxib saum ntuj los tshwm rau lawv thiab muaj tus Tswv lub hwjchim ci ntsa iab vij nkaus lawv, mas lawv ntshai heev kawg li. Tus tubtxib saum ntuj hais rau lawv tias, “Nej tsis txhob ntshai, kuv coj txoj xov zoo los rau nej, yog hais txog txojkev xyiv fab loj kawg uas yuav los txog rau neeg sawvdaws, rau qhov hnub no yug ib tug Cawmseej rau hauv Davi lub moos rau nej, nws yog tus Kheto uas yog tus Tswv. No yog tus txujci uas qhia rau nej paub. Nej yuav pom ib tug menyuam mos qhwv khaub ncaws pw hauv ib lub dab zaub.” Tamsim ntawd muaj ib pab tubtxib saum ntuj coob coob los nrog tus tubtxib ntawd qhuas Vajtswv hais tias, “Cia Vajtswv tau koob meej ci ntsa iab rau saum ntuj uas siab kawg nkaus, thiab hauv ntiajteb cia li muaj kev kaj siab lug rau cov neeg uas Vajtswv txaus siab.” Thaum cov tubtxib saum ntuj ncaim lawv rov mus saum ntuj lawm, cov neeg yug yaj txawm sib yaum hais tias. “Cia peb mus rau hauv lub moos Npelehee saib tej xwm txheej uas tshwm los raws li tus Tswv qhia rau peb lawd.” Lawv txawm maj nroos mus mas pom Maivliag thiab Yauxej thiab tus menyuam mos pw hauv lub dab zaub. Thaum lawv pom lawd lawv thiaj piav tej uas lawv tau hnov txog tus menyuam ntawd. Txhua tus uas hnov kuj xav tsis thoob txog zaj uas cov yug yaj piav rau lawv. Tiamsis Maivliag kuj khaws lawv tej lus ntawd huvsi cia xav ntsuj ntsoov rau hauv nruab siab. Cov uas yug yaj rov qab mus ua rau Vajtswv tau koob meej thiab qhuas Vajtswv rau txhua yam uas lawv tau hnov thiab pom raws li uas tau hais rau lawv lawd. Thaum puv yim hnub yog hnub uas muab tus metub ntawd ua kevcai txiav, lawv muab nws tis npe hu ua Yexus raws li tus tubtxib saum ntuj tau tis npe rau thaum tsis tau xeeb rau hauv plab. Thaum txog lub sijhawm uas ob niam txiv yuav ua kevcai ntxuav raws li Mauxe txoj kevcai, ob tug txawm coj Yexus mus rau hauv lub nroog Yeluxalees yuav muab xyeem rau tus Tswv, raws li tus Tswv txoj kevcai uas sau tseg hais tias, “Txhua tus tub uas yug thawj plab los yuav hu tias dawb huv rau tus Tswv,” thiab ob tug yuav muab qhov txhia chaw xyeem raws li uas hais hauv tus Tswv txoj kevcai hais tias, “ib nkawg nquab taug lossis ob tug rhaws nquab nyeg.” Muaj ib tug yawg nyob hauv Yeluxalees npe hu ua Xime‑oo, nws yog ib tug ncaj ncees thiab hwm Vajtswv. Nws tos rawv lub sijhawm uas cov Yixayee yuav tau txojkev nplij siab, thiab Vaj Ntsuj Plig dawb huv nyob hauv nws. Vaj Ntsuj Plig dawb huv twb qhia rau nws paub tias nws yuav tsis pom txojkev tuag mus txog thaum nws pom tus Khetos uas tus Tswv tsa tso. Vaj Ntsuj Plig txawm coj Xime‑oo nkag mus rau hauv lub tuam tsev. Thaum ob niam txiv coj tus menyuam Yexus tuaj yuav ua raws li txoj kevcai, Xime‑oo txawm muab Yexus puag thiab qhuas Vajtswv hais tias, “Tus Tswv, nimno thov cia koj tus qhev mus ua kaj siab lug, raws li koj tej lus, rau qhov kuv lub qhov muag twb pom koj txojkev cawm dim, uas koj twb npaj tab meeg ib tsoom neeg sawvdaws, yog txojkev kaj uas yuav ci rau lwm haiv neeg pom kev, thiab ua rau koj haiv neeg Yixayee tau koob meej.” Leej niam thiab leej txiv xav tsis thoob txog tej lus uas hais txog tus menyuam ntawd. Xime‑oo kuj foom koob hmoov rau lawv thiab hais rau Maivliag uas yog Yexus niam hais tias, “Saib maj, tus menyuam no raug tsa ua rau cov Yixayee ntau leej ntog thiab ntau leej sawv, thiab ua txujci tseem ceeb uas neeg yuav tawm tsam, kom thiaj thws tej uas nyob hauv ntau leej lub siab tshwm los, thiab txawm yog koj lub siab los yuav raug rab ntaj nkaug.” Muaj ib tug pojniam ua xibhwb cev Vajtswv lus npe hu ua Ana, yog Fanu‑ee tus ntxhais yog xeem Asaw. Nws laus heev lawm, nws yuav txiv tau xya xyoo xwb, ces nws txawm ua poj ntsuam los txog thaum nws hnub nyoog muaj yim caum plaub xyoos. Nws tsis tawm hauv lub tuam tsev mus li, nws pe hawm Vajtswv thiab yoo mov thiab thov Vajtswv nruab hnub hmo ntuj. Tamsim ntawd Ana txawm tuaj txog, nws ua Vajtswv tsaug thiab hais txog tus metub ntawd rau txhua tus uas tos rawv qhov uas txhiv Yeluxalees dim. Thaum ob niam txiv ua txhua yam raws li tus Tswv txoj kevcai tiav lawm ces ob tug txawm rov mus rau ob tug lub moos Naxale hauv lub xeev Kalilais. Tus menyuam ntawd kuj hlob zoo thiab muaj zog, muaj tswvyim kawg, thiab Vajtswv txojkev hlub nrog nraim nws. Yexus niam thiab txiv pheej niaj xyoo mus nram Yeluxalees rau thaum ua kevcai Hla Dhau. Thaum Yexus hnub nyoog muaj kaum ob xyoos lawv kuj mus ua kevcai Hla Dhau raws li ib txwm. Thaum tag lub sijhawm ua kevcai lawm, lawv tabtom rov qab mus, tiamsis Yexus tseem nyob hauv Yeluxalees, leej niam thiab leej txiv tsis paub. Ob tug xav tias Yexus nrog pab neeg uas taug kev ntawd ua ke lawm, ob tug txawm mus tau ib hnub ke mam li nrhiav nws hauv cov txheeb ze thiab cov kwvtij kwvluag. Thaum ob tug nrhiav tsis pom nws ob tug txawm rov qab mus nrhiav nram Yeluxalees. Nrhiav tau peb hnub ob tug li nrhiav tau nws nyob hauv lub tuam tsev nrog cov xibhwb zaum ua ke mloog lawv qhia thiab nug lawv. Txhua tus uas hnov nws hais kuj phimhwj rau nws tej tswvyim thiab tej lus uas nws teb. Thaum niam thiab txiv pom nws ob tug kuj xav tsis thoob. Leej niam hais rau nws tias, “Tub 'e, ua cas koj ua li no rau wb? Saib maj, koj txiv wb nrhiav koj txhawj kawg li.” Yexus hais rau ob tug tias, “Ua cas neb nrhiav kuv? Neb tsis paub tias kuv yeej yuav tsum nyob hauv kuv leej Txiv lub tsev lov?” Ob tug tsis nkag siab tej lus uas Yexus hais rau ob tug. Yexus txawm nrog ob tug rov mus rau Naxale, thiab nyob hauv ob tug qab kev tswjhwm. Leej niam khaws tej xwm txheej no huvsi cia rau hauv nruab siab. Yexus muaj tswvyim zuj zus thiab nws lub cev hlob zoo thiab nws txaus Vajtswv lub siab thiab neeg lub siab zuj zus. Xyoo kaum tsib uas Xixa Thinpeli‑au ua vajntxwv, yog thaum Phauthi‑au Philaj ua tswv xeev kav Yudia thiab Helauj ua thawj kav lub xeev Kalilais, thiab nws tus kwv Fili ua thawj kav Ithulia thiab Thakhaunithi li kav xyuam thiab Lixana ua thawj kav lub xeev Anpilee, lub sijhawm ntawd Anas thiab Khayafa ua tuam pov thawj hlob, mas Vajtswv tej lus tuaj txog Xekhaliya tus tub Yauhas hauv tebchaws moj sab qhua. Yauhas mus thoob plaws ntawm ntug dej Yaladee tshaj tawm kom ua kevcai raus dej qhia tias ntxeev dua siab tshiab thiaj tau txais kev zam txim. Raws li tej lus sau cia hauv xibhwb Yaxaya uas cev Vajtswv lus phau ntawv hais tias, “Muaj ib lub suab qw hauv tebchaws moj sab qhua hais tias, “ ‘Cia li npaj tus Tswv txojkev, cia li ua nws txoj kev kom ncaj. Txhua lub hav yuav raug muab txhub kom puv, txhua lub roob thiab tej pov roob yuav muab txo kom qes, tej kev nkhaus yuav muab kho kom ncaj, tej kev uas ib qho siab ib qho qes yuav ua kom tiaj, thiab ib tsoom neeg sawvdaws yuav pom Vajtswv txojkev cawm dim.’ ” Yauhas hais rau cov neeg coob coob uas tuaj ua kevcai raus dej ntawm nws hais tias, “Cov niag noob nab phem, leejtwg ntuas kom nej khiav ntawm Vajtswv txojkev npau taws uas yuav los? Cia li ua lub neej kom phim qhov uas nej ntxeev dua siab tshiab, thiab tsis txhob pib xav hauv lub siab tias, ‘Peb muaj Aplahas ua peb txiv,’ rau qhov kuv qhia rau nej tias Vajtswv muab tau tej pob zeb no ua tau Aplahas li tub ki. Nimno twb muab rab taus twb rau ntawm hauv paus ntoo lawm. Txhua tsob ntoo uas tsis txi txiv zoo yuav raug muab ntov pov rau hauv cub hluavtaws.” Cov neeg ntawd thiaj nug Yauhas tias, “Yog li ntawd peb yuav ua li cas?” Nws teb lawv tias, “Tus uas muaj ob lub tsho ntev, cia li muab faib rau tus uas tsis muaj. Tus uas muaj zaub mov kuj cia nws muab faib ib yam nkaus.” Cov neeg sau se kuj tuaj ua kevcai raus dej thiab nug nws hais tias, “Xibhwb, peb yuav ua li cas?” Nws hais rau lawv tias, “Tsis txhob sau tshaj tej uas teem cia.” Cov tub rog kuj nug nws tias, “Peb nev, peb yuav ua li cas?” Nws hais rau lawv tias, “Tsis txhob txhav luag nyiaj, tsis txhob nrhiav lus nkaug luag, cia li txaus siab rau nej tej nqe zog.” Tej neeg tos ntsoov thiab sawvdaws xav hauv lub siab tias tej zaum Yauhas yog tus Khetos. Yauhas teb lawv sawvdaws tias, “Kuv muab nej ua kevcai raus hauv dej tiamsis muaj ib tug muaj hwjchim loj dua kuv yuav los, kuv twb tsis tsim nyog daws nws txoj hlua khau. Nws yuav muab nej ua kevcai raus hauv Vaj Ntsuj Plig uas dawb huv thiab hauv hluavtaws. Rab ntxuam nyob hauv nws txhais tes lawm, nws yuav ntxuaj nws lub tshav ntaus qoob, thiab yuav sau nws tej mog los cia rau hauv txhab, tiamsis nws yuav muab hluavtaws hlawv cov npluag kub hnyiab tsis txawj tuag li.” Yauhas qhuab qhia ntau zaj ntxiv thiab tshaj tawm txoj xov zoo rau lawv. Tus tswv xeev uas yog Helauj twb raug Yauhas yws vim yog tim Helaudia uas yog Helauj tus kwv Fili tus pojniam thiab tim tej kev phem huvsi uas Helauj ua, los Helauj tseem ua ib yam phem ntxiv rau tej uas nws ua tag lawd, yog qhov uas nws muab Yauhas kaw rau hauv tsev lojfaj. Thaum sawvdaws ua kevcai raus dej, Yexus kuj ua kevcai raus dej thiab. Thaum nws tabtom thov Vajtswv ces rooj ntug txawm qheb kiag, mas Vajtswv tus Ntsuj Plig uas dawb huv zoo li ib tug nquab nqes los rau saum nws, thiab muaj suab hais saum ntuj tuaj hais tias, “Koj yog kuv tus tub uas kuv hlub, kuv txaus siab rau koj heev.” Thaum Yexus pib ua haujlwm, nws hnub nyoog muaj kwvlam peb caug xyoo. Raws li neeg suav mas Yexus yog Yauxej tus tub, Yauxej yog Heli tub, Heli yog Mathab tub, Mathab yog Levi tub, Levi yog Meekhi tub, Meekhi yog Yanai tub, Yanai yog Yauxej tub, Yauxej yog Mathathia tub, Mathathia yog Amau tub, Amau yog Nahu tub, Nahu yog Exali tub, Exali yog Nakai tub, Nakai yog Ma‑a tub, Ma‑a yog Mathathia tub, Mathathia yog Xeme‑i tub, Xeme‑i yog Yauxe tub, Yauxe yog Yauda tub, Yauda yog Yau‑anas tub, Yau‑anas yog Lexa tub, Lexa yog Xelunpanpee tub, Xelunpanpee yog Se‑athi‑ee tub, Se‑athi‑ee yog Neli tub, Neli yog Meekhi tub, Meekhi yog Adi tub, Adi yog Khauxas tub, Khauxas yog Eemada tub, Eemada yog Ws tub, Ws yog Yausua tub, Yausua yog Eliyexaw tub, Eliyexaw yog Yauli tub, Yauli yog Mathab tub, Mathab yog Levi tub, Levi yog Xime‑oo tub, Xime‑oo yog Yuda tub, Yuda yog Yauxej tub, Yauxej yog Yauna tub, Yauna yog Eliyakhi tub, Eliyakhi yog Melia tub, Melia yog Mena tub, Mena yog Mathatha tub, Mathatha yog Nathas tub, Nathas yog Davi tub, Davi yog Yexi tub, Yexi yog Aunpe tub, Aunpe yog Npau‑a tub, Npau‑a yog Xamoo tub, Xamoo yog Nasoo tub, Nasoo yog Aminada tub, Aminada yog Ami tub, Ami yog Alani tub, Alani yog Hexaloo tub, Hexaloo yog Peles tub, Peles yog Yuda tub, Yuda yog Yakhauj tub, Yakhauj yog Yiha tub, Yiha yog Aplahas tub, Aplahas yog Thela tub, Thela yog Nahau tub, Nahau yog Xelu tub, Xelu yog Le‑u tub, Le‑u yog Pele tub, Pele yog Enpaw tub, Enpaw yog Sela tub, Sela yog Khainas tub, Khainas yog Afaxa tub, Afaxa yog Xeeb tub, Xeeb yog Nau‑a tub, Nau‑a yog Lame tub, Lame yog Methuxela tub, Methuxela yog Enauj tub, Enauj yog Yale tub, Yale yog Mahalalee tub, Mahalalee yog Khainas tub, Khainas yog Enaus tub, Enaus yog Xej tub, Xej yog Adas tub, Adas yog Vajtswv tus tub. Yexus rov ntawm tus dej Yaladee los puv npo Vaj Ntsuj Plig uas dawb huv, thiab Vaj Ntsuj Plij coj nws mus rau hauv tebchaws moj sab qhua mas Yexus raug Ntxwg Nyoog sim tau plaub caug hnub. Txhua hnub ntawd Yexus tsis tau noj dabtsi li. Thaum dhau lub sijhawm ntawd, Yexus tshaib plab heev. Ntxwg Nyoog txawm hais rau Yexus tias, “Yog koj yog Vajtswv tus tub cia li hais kom lub pob zeb no ntxeev ua ncuav los maj.” Yexus teb nws tias, “Twb muaj lus sau cia tias, ‘Tsis yog tib cov mov xwb yuav yug tau neeg txojsia.’ ” Ntxwg Nyoog txawm coj Yexus nce mus rau ib lub chaw siab mas muab tag nrho tej tebchaws hauv ntiajteb ua tshwm rau Yexus saib ib ntsais muag, thiab hais rau Yexus tias, “Lub hwjchim thiab tej koob meej no huvsi kuv yuav muab pub rau koj. Rau qhov twb muab tej no cob rau kuv lawm, thiab kuv muab pub rau tus uas kuv xav pub. Yog koj pe hawm kuv, txhua yam no yuav yog koj li.” Yexus txawm teb nws tias, “Twb muaj lus sau cia tias, ‘Koj yuav tsum pe hawm tus Tswv uas yog koj tus Vajtswv thiab ua koom tu nws ib leeg xwb.’ ” Ntxwg Nyoog txawm coj Yexus mus rau hauv lub nroog Yeluxalees, thiab kom Yexus mus sawv saum lub tuam tsev txheej tsev las tshav uas siab tshaj plaws, thiab hais rau nws tias, “Yog koj yog Vajtswv tus tub, cia li caws qia ntawm no lawm hauv, rau qhov twb muaj lus sau cia tias, “ ‘Vajtswv yuav muab koj cob rau nws cov tubtxib saum ntuj kom tsom kwm koj,’ thiab hais tias, ‘Lawv txhais tes yuav hwj koj, kom koj kotaw thiaj tsis ntsawm pob zeb.’ ” Yexus teb nws tias, “Twb muaj lus sau cia tias, ‘Tsis txhob sim tus Tswv uas yog koj tus Vajtswv.’ ” Thaum Ntxwg Nyoog sim txhua yam tag lawm nws txawm tso Yexus tseg mus lawm tos txog thaum rov muaj zoo sijhawm. Yexus rov mus pem Kalilais muaj Vaj Ntsuj Plig lub hwjchim nrog nraim, thiab nws lub moo nrov nto moo lug mus thoob plaws ib ncig ntawd. Nws qhuab qhia hauv lawv tej tsev sablaj mas sawvdaws qhuas nws. Yexus txawm los txog hauv lub moos Naxale uas nws loj hlob mas hnub Xanpatau nws mus rau hauv lub tsev sablaj yam li nws txeev mus. Nws sawv tsees yuav nyeem, lawv txawm muab thooj ntawv uas Yaxaya uas cev Vajtswv lus sau cia cev rau nws. Nws nthuav thooj ntawv ntawd thiab nrhiav tau nqe uas sau cia hais tias, “Tus Tswv tus Ntsuj Plig nrog nraim kuv, vim nws tau tsa kuv kom coj xov zoo mus rau cov uas pluag. Nws txib kuv mus tshaj tawm txojkev dim rau cov uas raug ntes, thiab tshaj tawm qhov uas cov dig muag yuav rov pom kev, thiab ua kom cov uas raug quab yuam tau nyob ywj pheej, thiab tshaj tawm xyoo uas tus Tswv hlub.” Nws txawm muab thooj ntawv dov cev rov rau tus uas saib xyuas tej ntawv thiab rov zaum. Cov uas nyob hauv lub tsev sablaj txhua tus lub qhov muag ntsia ntsoov rau Yexus. Nws txawm pib hais rau lawv tias, “Vajtswv txojlus pwm uas nej lub qhov ntsej tau hnov kuj tiav rau hnub no lawm.” Txhua tus kuj qhuas Yexus thiab xav tsis thoob txog tej lus zoo uas tawm hauv nws lub qhov ncauj, thiab lawv hais tias, “Tus no tsis yog Yauxej tus tub lov?” Nws txawm hais rau lawv tias, “Nej yeej xav hais nqe paj lug no rau kuv hais tias, ‘Tus Kws tshuaj cia li rov kho koj tus kheej. Tej uas peb hnov koj ua rau hauv lub moos Khapena‑u cia li ua rau hauv koj lub moos no los maj.’ ” Thiab Yexus hais tias, “Kuv hais tseeb rau nej tias, tsis muaj ib tug xibhwb cev Vajtswv lus twg uas nws lub moos lees yuav nws. “Kuv hais tseeb rau nej tias, thaum Eliya nyob uas ntuj qhuav tau peb xyoos rau hli thiab muaj kev tshaib nqhis heev thoob plaws tebchaws tej poj ntsuam muaj coob kawg hauv Yixayee tebchaws. Vajtswv tsis txib Eliya mus rau ntawm tej poj ntsuam ntawd ib tug li tsuas yog mus rau ntawm tus poj ntsuam hauv lub zos Xalefa uas nyob ib cheeb tsam ntawm Xaidoo. Thiab thaum Elisa ua xibhwb cev Vajtswv lus muaj neeg mob lig mob ruas ntau leej hauv Yixayee tebchaws. Tsis muaj leejtwg raug kho zoo kom huv tsuas yog Na‑amas uas yog neeg Xilia xwb.” Thaum lawv hnov li ntawd, txhua tus hauv lub tsev sablaj ntawd kuj chim heev. Lawv sawv pes tsees muab Yexus thawb tawm hauv lub moos mus thiab coj nws mus rau saum hauv tsua uas rhawv lub moos ntawd yuav muab nws thawb poob mus. Tiamsis nws cia li pluav dhau plaws hauv lawv mus lawm. Yexus txawm mus txog lub moos Khapena‑u hauv lub xeev Kalilais, thiab qhuab qhia lawv rau hnub Xanpatau. Lawv kuj xav tsis thoob rau tej lus uas nws qhia, rau qhov nws tej lus muaj hwjchim. Muaj ib tug nyob hauv tsev sablaj raug dab qias qw nrov hais tias, “Au Yexus uas yog neeg Naxale, koj tuaj thab peb ua dabtsi? Koj tuaj ua kom peb puam tsuaj lov? Kuv paub koj yog leejtwg, koj yog tus dawb huv ntawm Vajtswv.” Yexus txawm txwv dab hais tias, “Cia li nyob twjywm, thiab cia li tawm plaws hauv nws mus.” Tus dab ua rau tus ntawd ntog vau hlo rau hauv lawv nruab nrab ces txawm tawm hauv tus ntawd mus lawm, tsis ua phem li cas. Sawvdaws phimhwj heev sib tham tias, “Tej lus no yog dabtsi? Rau qhov nws muaj hwjchim thiab muaj peevxwm hais rau dab mas dab kuj tawm mus.” Yexus lub moo txawm nrov nto moo mus thoob plaws txhua qhov ib cheeb tsam ntawd. Ces Yexus txawm sawv tsees tawm hauv tsev sablaj mus rau hauv Ximoos tsev. Ximoos niam tais tabtom ua npaws heev, lawv txawm thov Yexus pab nws. Yexus los sawv ntsug ntawm nws ib sab thiab txwv tus mob mas tus npaws txawm zoo kiag. Nws txawm sawv los tamsim ntawd thiab ua num rau lawv. Thaum hnub yuav poob qho txhua tus uas muaj neeg mob tsis hais mob yam twg kuj coj tuaj cuag Yexus. Nws muab tes npuab saum lawv txhua tus thiab kho lawv zoo huvsi. Dab kuj tawm hauv coob leej qw hais tias, “Koj yog Vajtswv tus tub.” Yexus txwv tsis kheev cov dab ntawd hais lus vim cov dab ntawd paub tias Yexus yog tus Khetos. Thaum kaj ntug Yexus tawm mus rau ib qho chaw uas tsis muaj neeg nyob. Cov neeg kuj mus nrhiav Yexus thiab tuaj cuag nws, lawv thiaj cheem tsis kheev nws ncaim lawv mus. Tiamsis Yexus hais rau lawv tias, “Kuv yuav tsum tshaj tawm txoj xov zoo hais txog Vajtswv lub tebchaws rau lwm lub moos thiab, rau qhov Vajtswv yeej txib kuv los ua tes haujlwm no.” Yexus txawm mus tshaj tawm rau hauv tej tsev sablaj hauv Yudia tebchaws. Thaum Yexus sawv ntsug ntawm ntug dej hiavtxwv Kenexale, muaj neeg sib txiv qev vij nws xav mloog Vajtswv tej lus. Yexus pom ob lub nkoj ntawm ntug hiavtxwv, cov neeg muab ntses twb tawm hauv lub nkoj los lawm thiab tabtom ntxhua vas. Yexus txawm nce rau hauv ib lub nkoj uas yog Ximoos lub, thiab thov Ximoos txav kom deb ntug mentsis. Yexus txawm zaum hauv lub nkoj qhuab qhia cov neeg. Thaum nws qhia tag lawd, nws hais rau Ximoos tias, “Cia li tsav nkoj mus rau tom qhov uas dej tob es muab lub vas ntaus ntses.” Ximoos teb Yexus tias, “Xibhwb, peb twb ntaus ib hmos khwv kawg tsis tau dabtsi li. Tiamsis yog koj hais, ces kuv yuav ntaus ib vag.” Lawv txawm ntaus ib vag mas lawv tau ntses ntau kawg li, lub vas twb yuav ntuag. Lawv txawm co tes hu cov phoojywg uas nyob dua ib lub nkoj tuaj pab. Cov ntawd kuj tuaj mas tau ntses puv nkaus ob lub nkoj, mas ob lub nkoj twb yuav tog. Thaum Ximoos Petus pom li ntawd nws txawm khwb nkaus ntawm Yexus hauv caug pe thiab hais tias, “Tus Tswv, cia li tawm ntawm kuv mus rau qhov kuv yog neeg muaj txim,” vim nws thiab txhua tus uas nrog nws ua ke phimhwj rau cov ntses uas lawv ntaus tau ntawd. Yakaunpau thiab Yauhas uas yog Xenpedi li tub uas nrog Ximoos ntaus ntses ua ke kuj phimhwj ib yam nkaus. Yexus txawm hais rau Ximoos tias, “Tsis txhob ntshai, txij no mus koj yuav ua tus uas mus npo neeg.” Thaum lawv nquam ob lub nkoj los txog tim ntug lawm, lawv txawm tso txhua yam tseg raws Yexus qab mus. Thaum Yexus nyob hauv ib lub moos txawm muaj ib tug mob ruas thoob plaws ib ce los. Thaum nws pom dheev Yexus nws txawm pe khwb ti nkaus av thov hais tias, “Tus Tswv, yog koj xav kho, koj yeej kho tau kuv zoo kom huv.” Yexus txawm cev kiag tes mus npuab nws thiab hais tias, “Kuv xav los maj, cia li zoo kiag huv lauj.” Tamsim ntawd nws tej mob ruas txawm tawm hauv nws lub cev lawm. Yexus txwv tus ntawd kom tsis txhob qhia rau leejtwg, thiab hais tias, “Cia li mus qhia koj lub cev rau tus pov thawj saib thiab xyeem tej uas ua kevcai ntxuav kom koj huv raws li Mauxe qhia tseg lawd ua timkhawv rau sawvdaws.” Tiamsis Yexus lub moo yimhuab nrov nto moo mus, thiab muaj neeg coob coob tuaj txoos ua ke yuav mloog Yexus thiab kho lawv tej mob kom zoo. Tiamsis Yexus cia li ncaim lawv mus rau ib qho uas tsis muaj neeg nyob thiab thov Vajtswv. Muaj ib hnub thaum Yexus tabtom qhuab qhia, muaj cov Falixai thiab cov xibhwb qhia kevcai zaum ua ke, yog tuaj hauv txhua lub zos uas nyob hauv Kalilais thiab Yudia, thiab tuaj hauv Yeluxalees tuaj. Yexus muaj hwjchim ntawm tus Tswv kho tau mob. Txawm muaj neeg kwv ib tug tuag tes tuag taw hauv lub chaw pw tuaj, lawv yuav kwv tus ntawd los tso rau ntawm Yexus xubntiag. Thaum lawv tsis tau kev kwv los rau hauv vim neeg coob heev, lawv txawm nce mus rau txheej sab saud thiab yaws cov vuas ib qho tso tus ntawd dauv nrog lub chaw pw ua ke los rau ntawm Yexus xubntiag hauv nruab nrab cov neeg ntawd. Thaum Yexus pom lawv kev ntseeg nws txawm hais tias, “Phoojywg 'e, koj lub txim twb muab daws lawm.” Cov xibhwb qhia Vajtswv kevcai thiab cov Falixai txawm pib nug hais tias, “Tus uas hais lus tuam mom Vajtswv no yog leejtwg? Leejtwg yuav daws tau lub txim tsuas yog Vajtswv xwb?” Thaum Yexus paub tias lawv xav li cas nws thiaj teb lawv tias, “Ua cas nej yuav xav li no hauv nej lub siab? Qhov uas hais tias, ‘Twb daws koj lub txim lawm,’ thiab hais tias, ‘Cia li sawv tsees mus kev,’ qhov twg yoojyim dua? Kom nej thiaj paub tias Neeg leej Tub muaj hwjchim hauv lub ntiajteb daws tau lub txim,” Yexus thiaj hais rau tus tuag tes tuag taw tias, “Kuv hais rau koj tias, cia li sawv tsees nqa koj lub chaw pw mus tsev.” Tamsim ntawd nws txawm sawv tsees tab meeg sawvdaws thiab nqa kiag nws lub chaw pw mus tsev thiab qhuas Vajtswv. Tej neeg sawvdaws thiaj phimhwj heev thiab qhuas Vajtswv thiab ntshai heev hais tias, “Hnub no peb tau pom yam uas txawv ua luaj li.” Dhau ntawd lawm Yexus tawm mus mas pom ib tug neeg sau se hu ua Levi zaum ntawm lub rooj sau se. Yexus txawm hais rau nws tias, “Cia li raws kuv qab mus.” Levi txawm sawv tsees tso txhua yam tseg raws Yexus qab mus. Levi npaj ib pluag rau Yexus noj hauv nws lub tsev, mas cov neeg sau se coob coob thiab lwm tus nrog Yexus lawv zaum ua ke ntawm rooj mov. Cov Falixai thiab lawv cov xibhwb qhia Vajtswv kevcai yws rau Yexus cov thwjtim tias, “Ua cas nej nrog cov neeg sau se thiab cov neeg muaj txim noj haus ua ke?” Yexus txawm teb lawv tias, “Cov neeg uas tsis muaj mob tsis cheem tsum Kws tshuaj, tsuas yog cov muaj mob thiaj cheem tsum xwb. Kuv tsis yog los hu cov neeg ncaj ncees, tiamsis yog los hu cov neeg muaj txim kom ntxeev dua siab tshiab.” Mas lawv hais rau Yexus tias, “Yauhas cov thwjtim thiab cov Falixai cov thwjtim kuj coj kevcai yoo mov ntau zaus thiab thov Vajtswv, tiamsis koj cov thwjtim cia li noj thiab haus.” Yexus hais rau lawv tias, “Nej yuam tau tus nraug vauv cov kwvluag kom yoo mov rau thaum tus nraug vauv tseem nrog lawv nyob lov? Yuav muaj ib hnub twg uas tus nraug vauv yuav raug muab coj ncaim lawv mus, mas thaum ntawd lawv yuav coj kevcai yoo mov.” Yexus kuj ua ib zaj paj lug hais rau lawv tias, “Tsis muaj leejtwg muab lub tsho tshiab dua ib qho los ntxiv lub tsho qub. Yog ua li ntawd lub tsho tshiab yuav ntuag thiab daim ntaub ntawm lub tsho tshiab kuj tsis phim lub tsho qub. Thiab tsis muaj leejtwg muab cawv txiv hmab tshiab ntim rau hauv lub hnab tawv qub. Yog ua li ntawd, cov cawv txiv hmab tshiab yuav ua rau lub hnab tawv tawg, mas cov cawv txiv hmab yuav xau tag thiab lub hnab yuav piam tag. Cov cawv txiv hmab tshiab yuav tsum muab ntim rau hauv lub hnab tawv tshiab. Tsis muaj leejtwg thaum haus cawv txiv hmab qub lawm, yuav nqhis cawv txiv hmab tshiab, rau qhov nws hais tias, ‘Cov qub zoo dua.’ ” Muaj ib hnub Xanpatau Yexus tabtom taug kev hauv ib daim teb mog mas nws cov thwjtim txawm de hnab mog los mos noj. Cov Falixai qee leej hais tias, “Ua cas nej ua tej uas caiv tsis kheev ua rau hnub Xanpatau?” Yexus teb tias, “Nej tsis tau nyeem tej uas Davi ua rau thaum nws thiab cov neeg uas nrog nws tshaib plab lov? Nws twb nkag mus rau hauv Vajtswv lub tsev, thiab muab tej ncuav uas xyeem txawb rau ntawm Vajtswv lub xubntiag los noj, thiab nws tseem muab rau cov uas nrog nws ua ke noj. Tej ntawd yog tej uas caiv tsis pub noj, tsuas yog cov pov thawj thiaj noj tau xwb.” Thiab Yexus hais rau lawv tias, “Neeg leej Tub yeej yog hnub Xanpatau tus tswv.” Muaj dua ib hnub Xanpatau thaum Yexus mus rau hauv lub tsev sablaj thiab qhuab qhia mas muaj ib tug yawg qhuav sab tes xis nyob ntawd. Cov xibhwb qhia Vajtswv kevcai thiab cov Falixai txawm soj saib Yexus yuav kho tus mob ntawd rau hnub Xanpatau los tsis kho xwv lawv thiaj tau chaw kom Yexus. Tiamsis Yexus twb paub tej uas lawv xav, nws thiaj hais rau tus yawg qhuav tes tias, “Cia li los sawv rau tom hauv ntej no.” Nws txawm sawv tsees mus sawv ntsug rau ntawd. Yexus txawm hais rau lawv tias, “Kuv nug nej tias, hnub Xanpatau muaj cai ua qhov zoo los ua qhov phem, muaj cai cawm txojsia los txov txojsia tseg?” Yexus tsa muag ntsia rau lawv sawvdaws ib ncig ntawd, thiab hais rau tus qhuav tes ntawd tias, “Cia li xyab kiag koj txhais tes lauj!” Tus ntawd txawm ua li ntawd, mas nws txhais tes txawm zoo kiag li qub. Lawv chim rau Yexus heev, lawv txawm sablaj saib yuav ua li cas rau Yexus. Thaum ntawd Yexus mus thov Vajtswv pem roob, nws thov Vajtswv ib hmos kaj ntug. Thaum kaj ntug Yexus hu nws cov thwjtim los thiab xaiv kaum ob tug uas nws tis npe hu ua tubtxib, yog Ximoos uas nws tis dua npe hu ua Petus, thiab nws tus kwv Anru, thiab Yakaunpau thiab Yauhas, thiab Fili thiab Npathaulaumai, thiab Mathai thiab Thauma thiab Afe‑a tus tub Yakaunpau thiab Ximoos uas hu ua Xelaute, thiab Yakaunpau tus tub Yudas, thiab Yudas Ikhali‑au uas fav xeeb. Yexus thiab kaum ob tug tubtxib ntawd nqes los sawv rau ntawm ib lub chaw tiaj. Muaj lwm tus thwjtim coob thiab neeg coob coob tuaj thoob plaws lub xeev Yudia thiab hauv Yeluxalees thiab ntawm ntug hiavtxwv uas yog Thailab thiab Xaidoo li kav xyuam tuaj mloog Yexus qhia thiab tuaj kho lawv tej mob. Cov uas raug kev txom nyem vim yog raug dab qias kuj kho tau zoo huvsi. Ib tsoom neeg sawvdaws xav kov nws vim yog hwjchim tawm hauv nws los kho lawv txhua tus zoo huvsi. Yexus tsa muag ntsia rau nws cov thwjtim mas hais tias, “Nej cov uas pluag tau nyob kaj siab lug, rau qhov Vajtswv lub tebchaws yog nej tug lawm. Nej cov uas nimno tshaib tau nyob kaj siab lug, rau qhov nej yuav tsau npo. Nej cov uas nimno quaj tau nyob kaj siab lug, rau qhov nej yuav luag. “Thaum luag ntxub nej thiab ntiab nej khiav tawm hauv lawv cov, thiab thuam nej thiab iab hiam tias nej yog neeg phem vim yog tim Neeg leej Tub, nej tau nyob kaj siab lug. Hnub ntawd nej cia li zoo siab thiab dhia paj paws xyiv fab rau qhov nej twb muaj nqe zog ntau rau saum ntuj ceeb tsheej lawm, vim lawv tej poj koob yawm txwv twb ua ib yam nkaus li ntawd rau cov xibhwb cev Vajtswv lus thiab. “Tiamsis nej cov uas nplua nuj yuav raug txom nyem lauj, rau qhov nej twb tau tej uas nplij nej lub siab lawm. Nej cov uas nimno tsau npo yuav raug txom nyem lauj, rau qhov nej yuav tshaib. Nej cov uas nimno luag yuav raug txom nyem lauj, rau qhov nej yuav quaj thiab quaj ntsuag. “Thaum sawvdaws qhuas nej, nej yuav raug txom nyem lauj, rau qhov lawv tej poj koob yawm txwv twb ua ib yam nkaus li ntawd rau cov cuav xibhwb cev lus thiab. “Tiamsis kuv hais rau nej cov uas mloog kuv tias, nej yuav tsum hlub nej cov yeeb ncuab thiab ua zoo rau cov uas ntxub nej, thiab thov Vajtswv foom koob hmoov rau cov uas tsawm foom nej thiab thov Vajtswv pab cov uas ua phem rau nej. Leejtwg ntaus koj ib sab plhu, cia li tig sab tod rau nws ntaus thiab. Leejtwg txeeb koj lub tsho ntev mus, cia li kam muab koj lub tsho sab hauv rau nws thiab. Cia li pub rau txhua tus uas thov koj. Yog leejtwg txeeb koj ib yam dabtsi mus lawm, tsis txhob muab thim rov los. Nej xav kom lwm tus ua li cas rau nej, nej cia li ua ib yam li ntawd rau lwm tus. “Yog nej hlub cov uas hlub nej xwb, nej tau koob hmoov li cas? Txawm yog cov neeg muaj txim los kuj hlub cov uas hlub lawv thiab. Yog nej ua zoo rau cov uas ua zoo rau nej xwb, nej tau koob hmoov li cas? Txawm yog cov muaj txim los kuj ua ib yam li ntawd thiab. Yog nej tsuas qev rau cov uas nej vam tias yuav tau rov qab xwb, nej tau koob hmoov li cas? Txawm yog cov muaj txim los kuj qev rau cov muaj txim uas yuav tau rov qab sib npaug thiab. Tiamsis nej yuav tsum hlub nej cov yeeb ncuab thiab ua zoo rau lawv thiab qev txais tsis txhob vam tias yuav tau rov qab, mas nej thiaj yuav tau nqe zog ntau thiab nej yuav ua tau Vajtswv uas loj dua ntais li tub, rau qhov nws yeej ua siab dav rau tus uas mom txiaj mom ntsig thiab siab phem. Nej yuav tsum khuvleej luag ib yam li nej leej Txiv khuvleej. “Nej tsis txhob txiav txim rau luag nej thiaj tsis raug txiav txim. Tsis txhob rau txim rau luag nej thiaj tsis raug rau txim. Cia li zam txim rau luag mas nej thiaj tau txais kev zam txim. Cia li pub rau luag, mas nej thiaj li tau txais. Nej yuav tau txais co ceev nias puv nkaus thoob phwj yos rau hauv nej lub xubntiag. Nej muab lub thoob twg luj rau luag, yuav muab lub thoob ntawd luj rov rau nej ib yam nkaus.” Yexus ua paj lug hais rau lawv tias, “Neeg dig muag yuav coj neeg dig muag kev tau lov? Ob tug yuav tsis poob rau hauv qhov lov? Tus tub kawm yeej tsis loj dhau tus xibhwb qhia. Txhua tus uas kawm tiav tag yuav zoo thooj li tus xibhwb qhia. Ua cas koj yuav pom qhov nyuag hmoov ntoo hauv koj tus kwvtij lub qhov muag, tiamsis koj tsis quav ntsej txog tog niag ntoo uas nyob hauv koj lub qhov muag? Ua cas koj yuav hais tau rau koj tus kwvtij tias, ‘Kwvtij, cia kuv so qhov nyuag hmoov ntoo hauv koj lub qhov muag tawm,’ tiamsis koj ho tsis pom tog niag ntoo nyob hauv koj lub qhov muag? Tus neeg ncauj lus zoo siab phem, cia li rho tog niag ntoo hauv koj lub qhov muag ua ntej tso, koj thiaj pom meej thiaj so tau qhov nyuag hmoov ntoo hauv koj tus kwvtij lub qhov muag tawm. “Tsob ntoo zoo yeej tsis txi cov txiv phem, tsob ntoo phem yeej tsis txi cov txiv zoo. Yuav paub txhua tsob ntoo ntawm cov txiv, rau qhov yeej tsis de txiv cev ntawm tsob ntoo pos kaus ntsaj lossis de txiv hmab ntawm tsob pos kaus ntsim. Tus neeg zoo yeej muab yam zoo uas muaj nyob hauv nws lub siab los txi txiv zoo, tus neeg phem yeej muab yam phem uas muaj nyob hauv nws los txi txiv phem. Rau qhov lub qhov ncauj yeej hais tej uas muaj puv nkaus hauv lub siab tawm los. “Ua cas nej hu kuv tias ‘Tus Tswv, tus Tswv’ tiamsis tsis ua raws li kuv hais? Txhua tus uas los cuag kuv thiab hnov kuv tej lus thiab ua raws nraim, kuv yuav qhia rau nej paub tias nws zoo li cas. Nws zoo li tus uas ua tsev, nws khawb tob tob thiab tiag taw rau saum daim lag zeb. Thaum dej nyab, dej ntsawj lub tsev ntawd los ua tsis tau rau lub tsev ntawd ua zog, rau qhov ua ruaj heev. Tiamsis tus uas hnov los tsis ua raws nraim, kuj zoo li tus uas ua tsev rau saum npoo av, tsis tiag tej taw. Thaum muaj dej ntsawj ces lub tsev ntawd txawm pob vau hlo tamsid, mas lub tsev ntawd puam tsuaj loj heev.” Thaum Yexus hais tej lus no huvsi rau lawv mloog tag lawm nws txawm mus rau hauv lub moos Khapena‑u. Ib tug thawj rog uas kav ib puas leej muaj ib tug qhev uas nws hlub heev mob hnyav twb yuav tuag. Thaum nws hnov txog Yexus nws txawm txib Yudai cov kev txwj laus mus thov Yexus tuaj kho nws tus qhev. Thaum lawv tuaj cuag Yexus lawv siv zog thov nws tias, “Tus thawj rog ntawd tsim nyog koj mus ua yam no rau nws, rau qhov nws hlub peb haiv neeg thiab ua lub tsev sablaj rau peb.” Yexus txawm nrog lawv mus. Thaum mus yuav txog tsev tus thawj rog txawm txib phoojywg mus hais rau Yexus tias, “Tus Tswv, thov tsis txhob tab kaum koj, rau qhov kuv yog ib tug uas tsis tsim nyog koj yuav nkag mus rau hauv kuv lub tsev. Vim li no kuv thiaj pom tias kuv tsis tsim nyog mus cuag koj. Thov koj cia li hais xwb thiab kho kuv tus qhev kom zoo. Rau qhov kuv kuj nyob hauv tub rog txoj qab kev tswjhwm thiab tseem muaj cov tub rog uas kuv tswjhwm. Kuv hais rau tus no tias, ‘Cia li mus,’ nws kuj mus, thiab hais rau dua ib tug tias, ‘Cia li los,’ nws kuj los, thiab kuv hais rau kuv tus tub qhe tias, ‘Cia li ua yam no,’ nws kuj ua.” Thaum Yexus hnov nws hais li ntawd, Yexus xav tsis thoob rau nws, Yexus txawm tig los hais rau cov neeg coob uas raws nws qab tias, “Kuv hais rau nej tias, txawm yog hauv cov Yixayee los kuv tsis tau pom muaj kev ntseeg loj li no.” Thaum cov uas tus thawj rog txib mus ntawd rov los txog tsev kuj pom tus qhev ntawd zoo kiag lawm. Dhau ntawd tsis ntev Yexus mus rau hauv lub moos Na‑i, nws cov thwjtim thiab tej neeg coob coob nrog nws mus. Thaum nws tuaj ze lub rooj loog ntawd, txawm muaj neeg kwv ib tug tuag tawm tuaj, yog ib tug poj ntsuam tib tug tub. Muaj neeg coob hauv lub moos nrog nws tuaj. Thaum Yexus pom leej niam ntawd nws khuvleej heev, thiab hais rau nws tias, “Tsis txhob quaj.” Yexus txav mus kov lub hleb, cov neeg kwv tuag kuj nres. Yexus hais tias, “Tub hluas 'e, kuv hais rau koj, cia li sawv.” Tus tuag ntawd txawm sawv zaum pib hais lus. Yexus thiaj muab tus ntawd cob rau leej niam. Txhua tus kuj ntshai heev thiab lawv qhuas Vajtswv hais tias, “Ib tug xibhwb cev Vajtswv lus loj kawg tshwm los rau hauv peb lawm.” thiab hais tias, “Vajtswv los saib nws haiv neeg lawm.” Yexus lub moo no nrov nto moo lug mus thoob plaws lub xeev Yudia thiab ib ncig ntawd. Yauhas cov thwjtim kuj piav txhua yam no rau Yauhas mloog. Yauhas txawm hu nws ob tug thwjtim los thiab txib ob tug mus nug tus Tswv tias, “Koj yog tus uas yuav los ntawd lov? Lossis peb yuav tos dua lwm tus?” Thaum ob tug mus cuag Yexus lawd, ob tug hais tias, “Yauhas uas coj ua kevcai raus dej txib wb tuaj cuag koj nug tias, ‘Koj yog tus uas yuav los ntawd lov? Lossis peb yuav tos dua lwm tus?’ ” Lub sijhawm ntawd Yexus kho ntau leej mob nkeeg zoo thiab dim ntawm dab thiab kho ntau leej uas dig muag pom kev. Yexus txawm teb ob tug ntawd tias, “Cia li mus qhia tej uas nej pom thiab nej hnov lawd rau Yauhas. Neeg dig muag kuj pom kev lawm, neeg ceg tawv kuj mus tau kev, cov uas mob lig mob ruas kuj zoo huv lawm, cov uas lag ntseg kuj hnov tau lus, cov uas tuag kuj raug muab tsa ciaj sawv los thiab txoj xov zoo kuj piav mus rau cov neeg pluag lawm. Tus uas tsis dawm kuv kuj tau nyob kaj siab lug.” Thaum Yauhas ob tug tub xa xov rov mus lawm, Yexus pib hais txog Yauhas rau cov neeg ntawd mloog tias, “Nej tawm mus rau tom tebchaws moj sab qhua mus saib dabtsi? Nej mus saib tug tauj deg uas cua ntsawj rawv mus rawv los lov? Los nej tawm mus saib dabtsi? Nej mus saib ib tug uas hnav tsuj hnav npuag lov? Saib maj, cov uas hnav tsoos zoo nkauj thiab muaj nplua mias yeej nyob hauv vajntxwv lub tsev. Los nej mus saib dabtsi? Mus saib ib tug xibhwb cev Vajtswv lus lov? Kuv hais rau nej tias, tseeb tiag, thiab nws loj dua ib tug xibhwb cev lus. Nws yog tus uas twb muaj sau tseg cia lawm tias, “ ‘Saib maj, kuv tso kuv tus tubtxib mus ua koj ntej, tus ntawd yuav npaj kev rau tom koj hauv ntej.’ Kuv hais rau nej tias, cov neeg uas yug ntawm pojniam los tsis muaj ib tug loj dhau Yauhas. Tiamsis tus uas yau kawg hauv Vajtswv lub tebchaws tseem loj dua Yauhas.” Thaum cov neeg sawvdaws thiab cov neeg sau se hnov tej lus no, lawv kuj lees tias Vajtswv ncaj ncees, vim lawv tau ua kevcai raus dej ntawm Yauhas lawm. Tiamsis cov Falixai thiab cov xibhwb qhia kevcai tsis txais yuav tej uas Vajtswv npaj tseg rau lawv, vim lawv tsis ua kevcai raus dej ntawm Yauhas. “Vim li no kuv yuav muab cov neeg tiam no piv txog dabtsi thiab lawv zoo li cas? Lawv zoo li cov menyuam yaus uas zaum tom tshav puam ib leeg hu rau ib leeg tias, ‘Peb twb tshuab raj rau nej los nej tsis dhia seev cev, peb twb quaj nyiav los nej tsis quaj ntsuag.’ Rau qhov Yauhas uas coj ua kevcai raus dej los nws tsis noj mov tsis haus cawv txiv hmab, mas nej hais tias, ‘Nws raug ib tug dab.’ Neeg leej Tub los nws noj thiab haus, los nej hais tias, ‘Saib maj, niag neeg noj loj haus qaug, nrog cov neeg sau se thiab cov neeg muaj txim ua kwvluag.’ Tiamsis txhua tus uas ua raws li tswvyim tej menyuam sawvdaws kuj qhia tias tswvyim ua raug cai lawm.” Muaj ib tug Falixai hu Yexus mus nrog nws noj mov, Yexus txawm mus rau hauv tus Falixai ntawd lub tsev mas pw pheeb ntawm rooj mov. Ces txawm muaj ib tug pojniam muaj txim nyob hauv lub moos ntawd thaum nws paub tias Yexus tabtom noj mov hauv tus Falixai tsev nws txawm nqa ib hwj roj tsw qab tuaj, sawv ntsug ntawm Yexus kotaw sab tom nrob qaum, mas quaj quaj kua muag pib ntub Yexus kotaw, ces nws txawm muab nws cov plaubhau los so thiab nwj Yexus kotaw, thiab muab roj tsw qab pleev rau. Thaum tus Falixai uas hu Yexus los noj mov pom li ntawd, ces txawm xav hauv lub siab tias, “Yog tus no nws yog xibhwb cev Vajtswv lus nws yeej yuav paub tias tus niag pojniam uas kov nws yog leejtwg thiab yog neeg zoo li cas, rau qhov tus pojniam ntawd yog neeg muaj txim.” Yexus txawm hais rau nws tias, “Ximoos 'e, kuv muaj ib yam yuav hais rau koj.” Ximoos teb tias, “Xibhwb, hais los maj.” Yexus hais tias, “Muaj ob tug tshuav ib tug yawg nqe, ib tug tshuav tsib puas denalia, ib tug tshuav tsib caug denalia. Thaum ob tug them tsis tau tej nuj nqes, tus yawg ntawd txawm zam kiag rau ob tug. Ob tug ntawd leejtwg yuav nyiam tus yawg ntawd heev dua?” Ximoos teb tias, “Raws li kuv xav mas yog tus uas nws zam ntau dua.” Yexus hais rau nws tias, “Koj txiav cai raug lawm.” Yexus txawm tig saib rau tus pojniam ntawd thiab hais rau Ximoos tias, “Koj pom tus pojniam no los tsis pom? Thaum kuv los rau hauv koj tsev koj twb tsis muab dej ntxuav kuv kotaw tiamsis tus pojniam no muab nws cov kua muag ntxuav kuv kotaw thiab muab nws cov plaubhau so. Koj twb tsis nwj kuv tiamsis txij thaum kuv los rau hauv tsev nws nwj kuv txhais kotaw tsis tu ncua li. Koj twb tsis muab roj pleev kuv taubhau tiamsis nws muab roj pleev kuv kotaw. Vim li no kuv hais rau koj tias, tej kev txhaum uas nws ua ntau kawg twb muab daws tag lawm vim nws muaj lub siab hlub heev. Tus uas daws nws lub txim tsawg nws kuj hlub tsawg.” Yexus thiaj hais rau tus pojniam ntawd tias, “Koj lub txim twb muab daws lawm.” Cov uas nrog Yexus nyob pheeb ntawm rooj mov kuj pib sib hais tias, “Tus no yog leejtwg es yuav daws tau lub txim?” Yexus hais rau tus pojniam ntawd tias, “Koj txojkev ntseeg cawm koj dim lawm. Cia li mus ua siab tus yees.” Dhau ntawd Yexus txawm mus thoob plaws tej moos thiab tej zej zog tshaj tawm thiab qhia txoj xov zoo hais txog Vajtswv lub tebchaws. Kaum ob tug thwjtim kuj nrog Yexus mus, thiab muaj cov pojniam qee leej uas Yexus ntiab dab tawm thiab kho mob zoo, yog Maivliag uas hu ua Madala yog tus uas xya tus dab twb tawm hauv nws mus lawm, thiab Yau‑ana uas yog Khuxa uas saib xyuas Helauj lub tsev tus pojniam, thiab Xuxana, thiab muaj dua ntau tus pojniam uas lawv siv lawv tej nyiaj txiag qhov txhia chaw yug Yexus lawv. Thaum cov neeg tuaj txoos ua ke coob coob thiab muaj neeg tuaj ntau lub moos tuaj cuag Yexus, nws txawm ua paj lug hais tias, “Muaj ib tug tawm mus tseb noob. Thaum nws tseb cov noob ib txhia poob rau saum txojkev mas raug muab tsuj thiab nas noog los khaws noj lawm. Muaj ib txhia poob rau saum tej lag zeb. Thaum noob tuaj lawd txawm tuag tshav rau qhov tsis muaj dej yug. Muaj ib txhia poob rau hauv plawv tsob pos, ces tsob pos hlob tuaj ua ke laum lawm. Muaj ib txhia poob rau hauv thaj av zoo mas hlob thiab txi txiv ib puas npaug.” Thaum Yexus hais tag li no lawd nws txawm qw nrov hais tias, “Leejtwg muaj qhov ntsej hnov cia li mloog nawj!” Thaum cov thwjtim nug Yexus txog zaj paj lug ntawd lub ntsiab yog li cas, Yexus hais tias, “Tej uas muab npog cia lawd hais txog Vajtswv lub tebchaws, twb muab pub rau nej paub lawm, tiamsis ua paj lug qhia rau lwm tus “ ‘kom lawv thiaj saib tag saib thiab los tsis pom lawv mloog tag mloog thiab los tsis nkag siab.’ “Zaj paj lug ntawd lub ntsiab yog li no. Cov noob yog Vajtswv txojlus. Cov uas poob rau saum txojkev yog cov uas tau hnov mas dab Ntxwg Nyoog tuaj txeeb kiag tej lus ntawd hauv lawv lub siab mus kom lawv thiaj tsis ntseeg thiab tsis txais txojkev dim. Cov uas poob rau saum tej lag zeb mas yog cov uas thaum tau hnov tej lus ntawd lawv zoo siab txais yuav, tiamsis lawv cog cag tsis tob, lawv thiaj ntseeg ib ntus xwb. Thaum muaj kev sim siab lawv txawm tso tseg lawm. Cov noob uas poob rau hauv plawv tsob pos yog cov uas tau hnov lawm, tiamsis thaum lawv ua neej nyob tej kev txhawj kev nyiaj txiag kev lomzem hauv lawv lub neej muab lawv laum, lawv tej txiv thiaj tsis puv. Cov noob uas poob rau hauv thaj av zoo yog cov uas tau hnov tej lus ntawd thiab muab khaws cia rau hauv lub siab uas ncaj thiab zoo, thiab lawv muaj siab ntev txi txiv. “Tsis muaj leejtwg taws teeb es muab thoob khwb cia lossis txawb rau hauv qab txag, yeej yuav muab txawb rau saum lub chaw txawb teeb kom cov neeg uas nkag los thiaj li pom kev. Rau qhov tsis muaj ib yam twg uas muab zais cia lawm yuav tsis raug muab thws tshwm los, thiab tsis muaj ib yam twg uas muab npog cia lawm yuav tsis raug muab nthuav tawm los rau luag pom. Vim li no nej yuav tsum ua tib zoo mloog. Rau qhov tus uas muaj lawd yuav muab tsav ntxiv rau nws, tiamsis tus uas tsis muaj, txawm yog tej uas nws xav tias nws muaj los yuav muab rho ntawm nws mus.” Thaum ntawd Yexus niam thiab nws cov kwv txawm tuaj cuag Yexus tiamsis tuaj tsis tau ti vim neeg coob heev. Muaj neeg hais rau Yexus tias, “Koj niam thiab koj cov kwv sawv sab nraud xav ntsib koj.” Yexus hais rau lawv tias, “Kuv niam thiab kuv cov kwv yog cov uas mloog Vajtswv tej lus thiab ua raws nraim li.” Muaj ib hnub Yexus nrog nws cov thwjtim nce rau hauv lub nkoj thiab hais rau lawv tias, “Peb cia li hla hiavtxwv mus rau sab tim ub.” Lawv txawm sawv kev mus. Thaum lawv tabtom caij nkoj mus Yexus pw tsaug zog lawm. Ces cua daj cua dub txawm ntsawj dej hiavtxwv mas dej twb yuav puv lub nkoj, ua rau lawv raug ceeblaj. Cov thwjtim thiaj mus tsa Yexus hais tias, “Tus Tswv tus Tswv, peb tabtom yuav puam tsuaj.” Yexus txawm tsim dheev los txwv cua thiab tej nthwv dej uas ntas, cua thiab dej txawm tu nrho txhua yam thiaj li tus yees lawm. Yexus hais rau lawv tias, “Nej txojkev ntseeg dua twg lawm?” Lawv kuj ntshai thiab phimhwj, sib hais tias, “Tus no yog leejtwg es hais rau cua thiab dej mas cua thiab dej kuj mloog nws lus?” Yexus lawv txawm caij nkoj mus txog lub moos Kelaxa li kav xyuam, uas ncaj ntawm Kalilais sab tim ub. Thaum Yexus nce saum ntug nqhuab, muaj ib tug yawg raug dab hauv lub moos ntawd txawm ntsib Yexus. Nws tsis hnav ris tsho thiab tsis nyob hauv tsev ntev los lawm, nws nyob tom toj ntxas xwb. Thaum nws pom dheev Yexus nws txawm qw nrov thiab khwb nkaus ntawm Yexus hais nrov nrov tias, “Au Yexus uas yog Vajtswv uas Loj Dua Ntais tus tub, koj tuaj thab kuv ua dabtsi? Kuv thov koj tsis txhob tsim txom kuv.” Twb yog vim Yexus tau hais kom tus dab qias tawm hauv tus yawg ntawd mus. (Dab pheej ntswj nws ntau zaus. Luag zov nws zoo thiab twb muab loj cuj thiab saw hlau khi nws lawm los nws rub saw hlau tu nrho thiab raug dab muab raws rau tom tebchaws moj sab qhua.) Mas Yexus nug dab tias, “Koj npe hu li cas?” Nws teb tias, “Kuv npe hu ua Coob,” rau qhov muaj dab coob coob nkag rau hauv nws. Tej dab ntawd txawm taij thov Yexus tsis txhob ntiab lawv mus rau hauv lub niag qhov tob tob. Muaj ib pab npua coob tabtom nrhiav noj ntawm ntav toj. Cov dab ntawd txawm thov Yexus cia lawv txeem rau hauv cov npua ntawd. Yexus txawm tso ncauj. Cov dab txawm tawm hauv tus yawg ntawd mus nkag rau hauv pab npua, mas pab npua thiaj dhia plas toj ntxhab rau hauv hiavtxwv txham dej tuag tag. Thaum cov neeg yug npua pom tej xwm txheej no lawv txawm dhia mus piav tej ntawd rau hauv lub moos thiab tej zej zog. Mas neeg txawm tawm tuaj saib tej xwm txheej uas tshwm los ntawd. Thaum lawv tuaj txog ntawm Yexus, lawv pom tus uas dab twb tawm mus lawd hnav ris tsho thiab meej pem zoo, zaum ntawm Yexus kotaw, lawv thiaj ntshai kawg. Cov neeg uas tau pom, kuj piav rau lawv mloog txog tus uas raug dab ntawd zoo kiag li cas. Cov neeg uas nyob lub moos Kelaxa li kav xyuam sawvdaws txawm thov Yexus tawm ntawm lawv mus, vim lawv ntshai heev. Yexus txawm nce nkoj rov mus. Tus uas dab tawm hauv nws lawd kuj thov cia nws nrog Yexus nyob ua ke. Tiamsis Yexus kom nws rov mus thiab hais tias, “Cia li mus tsev thiab piav tias Vajtswv tau ua li cas rau koj lawd rau lawv mloog.” Ces tus ntawd txawm rov qab mus thiab piav txhua yam uas Yexus tau ua rau nws thoob plaws lub moos ntawd paub. Thaum Yexus rov los lawm muaj neeg coob zoo siab tos nws vim lawv sawvdaws tos ntsoov nws. Muaj ib tug npe hu ua Yaila, yog tus thawj uas saib xyuas lub tsev sablaj txawm tuaj khwb nkaus ntawm Yexus kotaw, thov kom Yexus mus tom nws tsev, rau qhov nws muaj tib tug ntxhais hnub nyoog kwvlam kaum ob xyoos, mob heev twb yuav tuag. Thaum Yexus mus, muaj neeg coob coob nrog nws mus sib txiv qev. Muaj ib tug pojniam uas muaj mob nchuav cev tau kaum ob xyoos lawm, tsis muaj leejtwg kho tau nws tus mob zoo, nws txawm los raws Yexus qab kov Yexus qab tsho. Tamsim ntawd nws ntshav txawm tu nrho lawm. Yexus hais tias, “Leejtwg kov kuv?” Thaum txhua tus tsis lees Petus txawm hais rau Yexus tias, “Xibhwb, neeg coob vij nkaus koj sib txiv qev koj.” Tiamsis Yexus hais tias, “Muaj ib tug kov kuv rau qhov kuv paub tias hwjchim tawm hauv kuv lawm.” Thaum tus pojniam ntawd pom tias tsiv nraim tsis tau nws los tshee hnyo los khwb nkaus rau ntawm Yexus xubntiag qhia tab meeg sawvdaws tias nws kov Yexus vim yog li cas, thiab nws tus mob twb zoo tamsid lawm. Yexus hais rau nws tias, “Mentxhais 'e, koj txojkev ntseeg ua rau koj zoo lawm. Cia li mus ua siab tus yees.” Thaum Yexus tseem hais tej lus ntawd, muaj ib tug tuaj ntawm tus thawj uas saib xyuas tsev sablaj lub tsev tuaj hais tias, “Koj tus ntxhais twb tuag lawm. Tsis txhob tab kaum xibhwb dua li lawm.” Thaum Yexus hnov li ntawd nws txawm teb tus ntawd tias, “Tsis txhob ntshai, cia li ntseeg xwb. Tus mentxhais yeej yuav zoo.” Thaum Yexus tuaj txog lub tsev lawm nws tsis kheev leejtwg nrog nws nkag mus tsuas yog Petus, Yauhas thiab Yakaunpau thiab leej niam leej txiv mus xwb. Sawvdaws quaj thiab quaj nyiav tus mentxhais ntawd, tiamsis Yexus hais tias, “Tsis txhob quaj. Nws tsis tuag, nws tsaug zog xwb.” Lawv txawm thuam luag Yexus rau qhov lawv paub tias tus mentxhais twb tuag lawm tiag. Tiamsis Yexus ntsiab nkaus tus mentxhais ntawd txhais tes thiab hais rau nws tias, “Mentxhais 'e, cia li sawv tsees.” Mas tus ntsuj plig txawm rov los rau nws, nws thiaj sawv tsees tamsim ntawd. Yexus hais kom muab mov rau tus mentxhais noj. Leej niam leej txiv kuj phimhwj heev. Yexus txwv kom tsis txhob qhia leejtwg paub txog zaj no. Yexus hu kaum ob tug thwjtim los mas pub hwjchim peevxwm rau lawv kov yeej txhua tus dab thiab kho mob zoo, thiab txib lawv tawm mus tshaj tawm txog Vajtswv lub tebchaws thiab kho mob kom zoo. Thiab nws hais rau lawv tias, “Tsis txhob coj dabtsi mus siv taug kev, tsis hais tus pas nrig, hnab thoob puab, mov noj, nyiaj siv lossis ob lub tsho. Yog nej mus poob rau yim twg kuj nyob hauv lub tsev ntawd mus txog thaum tawm qhov ntawd mus. Yog lub chaw twg tsis txais nej, mas thaum nej tawm hauv lub moos ntawd mus cia li nchos tej hmoov av ntawm nej kotaw pov tseg ua timkhawv tawm tsam lawv.” Lawv txawm tawm mus thoob plaws tej zej zog tshaj tawm txoj xov zoo thiab kho mob zoo rau txhua qhov. Thaum tus tswv xeev Helauj hnov tej xwm txheej no huvsi nws ntxhov siab heev, vim qee leej hais tias, Yauhas ciaj sawv hauv qhov tuag rov los lawm, thiab qee leej hais tias yog Eliya tshwm los, thiab qee leej hais tias yog ib tug xibhwb cev Vajtswv lus yav thaum ub sawv rov los. Helauj hais tias, “Kuv twb muab Yauhas lub taubhau txiav lawm, mas tus uas kuv tau hnov tej xwm txheej no yog leejtwg nev?” Ces Helauj txawm xav ntsib Yexus. Thaum cov tubtxib rov los lawv piav tej uas lawv tau ua rau Yexus mloog. Nws txawm coj lawv mus rau ib cag ntawm lub moos Npexaida. Thaum tej neeg paub lawm lawv raws Yexus qab mus. Yexus zoo siab txais lawv thiab hais txog Vajtswv lub tebchaws rau lawv mloog thiab cov uas cheem tsum kho mob nws kuj kho kom zoo huvsi. Thaum hnub yuav poob qho, kaum ob tug thwjtim los hais rau Yexus tias, “Cia li tso cov neeg mus kom lawv thiaj tau mus so thiab nrhiav mov noj hauv tej zej zog thiab tom tej teb ib ncig no, vim qhov uas peb nyob no ntuj nrag teb do xwb.” Yexus hais rau lawv tias, “Nej cia li pub rau lawv noj.” Lawv hais tias, “Peb tsis muaj dabtsi tsuas muaj tsib lub ncuav thiab ob tug ntses xwb, ntshai ho mus yuav mov los yug cov neeg no sawvdaws xwb.” Rau qhov cov txivneej kwvlam muaj tsib txhiab leej. Yexus txawm hais rau cov thwjtim tias, “Kom cov neeg zaum ua tej pab tej pawg ib pawg kwvlam tsib caug leej.” Lawv kuj ua raws li ntawd thiab hais kom cov neeg sawvdaws zaum. Thaum Yexus txais tsib lub ncuav thiab ob tug ntses ntawd lawm, nws tsa muag ntsia rau saum ntuj thov Vajtswv foom koob hmoov mas muab ntais cev rau cov thwjtim kom lawv faib rau cov neeg. Lawv txhua tus noj tsau huvsi. Cov thwjtim khaws tej uas noj tsis tag tau kaum ob tawb. Thaum Yexus tabtom thov Vajtswv ib leeg cov thwjtim kuj nrog nws nyob. Yexus txawm nug lawv tias, “Luag tej hais tias kuv yog leejtwg?” Lawv teb tias, “Yog Yauhas uas coj ua kevcai raus dej, tiamsis qee leej hais tias yog Eliya, dua li lwm tus hais tias yog ib tug xibhwb cev Vajtswv lus thaum ub sawv rov los.” Nws hais rau lawv tias, “Nej nev nej hais tias kuv yog leejtwg?” Petus teb tias, “Koj yog Vajtswv tus Khetos.” Yexus txawm nkaw lus rau lawv txwv tsis txhob qhia zaj no rau leejtwg paub, thiab hais tias, “Neeg leej Tub yuav tsum raug kev tsim txom ntau yam thiab cov kev txwj laus thiab cov pov thawj hlob thiab cov xibhwb qhia Vajtswv kevcai yuav tsis lees yuav nws, thiab nws yuav raug muab tua thiab peb hnub nws yuav raug muab tsa ciaj sawv rov los.” Thiab Yexus hais rau lawv txhua tus tias, “Yog leejtwg xav raws kuv qab mus, cia tus ntawd tswj nws tus kheej thiab niaj hnub kwv nws tus khaublig ntoo raws kuv qab. Vim tias tus uas xav cawm tau nws txojsia yuav piam txojsia, tiamsis tus uas tso nws txojsia tseg vim yog saib rau kuv, mas yuav cawm tau nws txojsia. Yog leejtwg tau tag nrho lub ntiajteb huvsi tiamsis muab nws tus kheej rhuav tshem puam tsuaj tag lawm, tus ntawd yuav tau qabhau dabtsi? Leejtwg txaj muag rau kuv thiab kuv tej lus ces thaum Neeg leej Tub nrog nws lub hwjchim ci ntsa iab thiab nrog leej txiv thiab cov tubtxib saum ntuj uas dawb huv lub hwjchim ua ke los, nws yuav txaj muag rau tus ntawd. Kuv hais tseeb rau nej tias, cov uas sawv ntawm no muaj qee leej yuav tsis tau sim txojkev tuag ces yuav xub pom Vajtswv lub tebchaws.” Yexus hais tej lus ntawd dhau kwvlam yim hnub, nws txawm coj Petus thiab Yauhas thiab Yakaunpau nrog nws nce mus thov Vajtswv saum lub roob. Thaum Yexus tabtom thov, nws lub ntsej muag txawm hloov kiag, thiab nws cev tsoos tsho kuj dawb ci nplas. Txawm muaj ob tug yawg nrog Yexus sib tham, yog Mauxe thiab Eliya, nrog hwjchim ci ntsa iab tshwm los thiab hais txog qhov uas Yexus yuav ncaim mus uas twb yuav tiav rau hauv Yeluxalees. Petus thiab cov uas nrog nws nyob ua ke tabtom ncaws dab ntub tsaug zog, mas thaum lawv tsim dheev lawv pom Yexus lub hwjchim ci ntsa iab thiab pom ob tug yawg uas nrog nws sawv ua ke. Thaum ob tug yawg ntawd tabtom ncaim Yexus mus, Petus hais rau Yexus tias, “Xibhwb, peb nyob ntawm no kuj zoo. Cia peb ua peb lub tsev pheeb suab, ua ib lub rau koj, ib lub rau Mauxe thiab ib lub rau Eliya.” Petus tsis paub tias nws hais li cas lawm. Thaum nws tabtom hais li ntawd txawm muaj ib tauv huab los laum nkaus lawv. Thaum tauv huab laum lawv ntawd lawv ntshai kawg. Muaj ib lub suab hais hauv tauv huab tuaj tias, “Tus no yog kuv tus Tub uas kuv xaiv cia lawm. Nej cia li mloog nws hais.” Thaum lub suab ntawd tu nrho lawd tsuas yog pom Yexus tib leeg xwb. Lawv npog zaj no cia twjywm rau ncua sijhawm ntawd tsis piav rau leejtwg hnov txog tej uas lawv pom ntawd li. Hnub tom qab thaum Yexus lawv nqes pem roob los muaj neeg coob coob tuaj ntsib Yexus. Muaj ib tug yawg hauv cov neeg ntawd qw tias, “Xibhwb, thov saib kuv tus tub rau qhov kuv muaj tib tug tub xwb. Thaum dab ntswj nws, nws txawm qw tamsim ntawd. Dab pheej ua rau nws nti ntswj ua npuas ncauj nto plaws, tsis tshua tawm hauv nws mus kiag li, ua rau nws ib ce ntsuab tag. Kuv thov koj cov thwjtim ntiab dab tawm tiamsis lawv ntiab tsis tau.” Yexus teb tias, “Au tiam neeg uas tsis muaj kev ntseeg tsuas muaj kev phem kev qias xwb, kuv yuav nrog nej nyob thiab ua siab ntev thev nej mus ntev li cas? Cia li coj koj tus tub los ntawm no.” Thaum tus tub ntawd tabtom los dab txawm ua rau nws ntog huam ib tshaj. Yexus hais tawv rau tus dab qias ntawd thiab kho tus tub ntawd zoo, thiab muab nws rov rau leej txiv. Txhua tus kuj phimhwj qhov uas Vajtswv loj kawg nkaus. Thaum lawv tseem phimhwj rau txhua yam uas Yexus ua, Yexus txawm hais rau nws cov thwjtim tias, “Cia li ua tib zoo mloog tej lus no. Neeg leej Tub yuav raug muab cob rau hauv neeg txhais tes.” Tiamsis lawv tsis nkag siab tej lus no, thiab lub ntsiab raug muab zais ntawm lawv lawm lawv thiaj tsis nkag siab. Lawv kuj tsis kav nug Yexus txog zaj no. Cov thwjtim muaj lus sib cam tias lawv cov leejtwg yog tus loj dua ntais. Thaum Yexus paub tej uas lawv lub siab xav nws txawm muab ib tug menyuam yaus los sawv rau ntawm nws ib sab, mas hais rau lawv tias, “Leejtwg lees yuav tus menyuam yaus no vim yog saib rau kuv lub npe, kuj yog tus ntawd lees yuav kuv. Thiab tus uas lees yuav kuv kuj yog lees yuav tus uas txib kuv los thiab. Tus uas me kawg nkaus hauv nej cov sawvdaws yog tus loj.” Yauhas hais tias, “Xibhwb, peb pom ib tug tuav koj lub npe ntiab dab tawm, mas peb txwv nws rau qhov nws tsis koom nrog peb.” Yexus hais rau nws tias, “Tsis txhob txwv nws, rau qhov tus uas tsis tawm tsam nej yeej yog tuaj nej tog lawm.” Thaum ze lub sijhawm uas Yexus yuav raug coj mus saum ntuj, nws txiav txim siab ncaj nraim mus rau Yeluxalees. Nws txawm txib cov xa xov ua nws ntej mus. Lawv mus rau hauv cov Xamali ib lub zos mus npaj tos Yexus. Tiamsis cov neeg ntawd tsis lees txais Yexus vim yog nws txhob txwm ncaj nraim mus rau Yeluxalees. Thaum Yakaunpau thiab Yauhas uas yog Yexus cov thwjtim pom li ntawd ob tug txawm hais rau Yexus tias, “Tus Tswv, koj xav kom wb thov hluavtaws saum ntuj los hlawv cov neeg ntawd los tsis xav?” Tiamsis Yexus tig los txwv ob tug, mas Yexus lawv txawm mus dua rau ib lub zos. Thaum lawv tabtom taug kev mus muaj ib tug hais rau Yexus tias, “Koj mus qhovtwg kuv yuav nrog koj mus qhov ntawd.” Yexus hais rau nws tias, “Tej hma tseem muaj qhov nkaum thiab tej nas noog saum nruab ntug tseem muaj zes, tiamsis Neeg leej Tub tsis muaj lub chaw rau ncoo.” Thiab Yexus hais dua rau ib tug tias, “Koj cia li nrog kuv mus.” Tiamsis tus ntawd hais tias, “Tus Tswv, thov cia kuv mus log kuv txiv tso.” Yexus hais rau nws tias, “Cia cov neeg tuag lawv log lawv tus tuag. Koj cia li mus tshaj tawm txog Vajtswv lub tebchaws.” Muaj dua ib tug hais tias, “Tus Tswv, kuv yuav nrog koj mus. Tiamsis cia kuv mus hais lus ncaim kuv tsev neeg tso.” Yexus hais rau nws tias, “Tsis muaj leejtwg tuav tus khais lawm tseem tig ntsia tom qab es yuav tsim nyog rau Vajtswv lub tebchaws.” Dhau ntawd Yexus tsa xya caum ob leeg thiab txib lawv tawm mus ua ib nkawg ib nkawg ua Yexus ntej mus rau txhua lub moos thiab txhua lub chaw uas Yexus tseem yuav mus. Yexus hais rau lawv tias, “Cov qoob uas zoo hlais muaj ntau heev, tiamsis cov tub zog muaj tsawg. Vim li no nej yuav tsum thov tus tswv teb kom txib tub zog mus hlais nws tej qoob. Nej cia li mus. Saib maj, kuv txib nej tawm mus zoo yam li tus menyuam yaj uas nyob hauv nruab nrab pab hma. Tsis txhob coj hnab nyiaj lossis hnab thoob puab lossis khau rau, tsis txhob nrog leejtwg hais lus ntawm tej tog kev. Yog nej nkag rau hauv lub tsev twg, cia li hais ua ntej tias, ‘Thov kom lub tsev no nyob kaj siab lug.’ Yog muaj tus uas txais kev kaj siab lug nyob qhov ntawd, mas nej txojkev kaj siab yuav nyob ntawm nws. Tiamsis yog tsis muaj mas nej txojkev kaj siab yuav thim rov los rau nej. Cia li nyob hauv lub tsev ntawd mus li thiab noj haus tej uas lawv npaj cia, rau qhov tus tub zog tsim nyog tau nws li nqe zog. Tsis txhob tawm ntawm lub tsev no mus nyob rau lwm lub. Thaum nej mus rau hauv lub moos twg thiab muaj neeg txais nej lawm cia li noj txhua yam uas lawv npaj rau nej. Thiab kho tej neeg muaj mob hauv lub moos ntawd kom zoo thiab hais rau lawv tias, ‘Vajtswv lub tebchaws los ze nej lawm.’ Tiamsis thaum nej mus rau hauv lub moos twg es tsis muaj leejtwg txais tos nej, nej cia li tawm mus rau hauv tej kev hauv lub moos ntawd thiab hais tias, ‘Txawm yog tej hmoov av hauv nej lub moos uas lo peb kotaw los peb muab so rov rau nej. Tiamsis nej cia li paub tias Vajtswv lub tebchaws twb los ze lawm.’ Kuv hais rau nej tias, txog hnub ntawd lub moos Xaudoo yuav raug txim sib dua lub moos ntawd. “Lub moos Khaulaxi 'e, koj raug txom nyem lauj! Lub moos Npexaida 'e, koj raug txom nyem lauj! Yog tej txujci phimhwj uas ua rau hauv neb lawd tau ua rau hauv lub nroog Thailab thiab lub nroog Xaidoo, ces lawv twb muab khaub seev tsaj los hnav thiab zaum hauv qhov tshauv ntxeev dua siab tshiab ntev los lawm. Tiamsis hnub uas teem txim mas Thailab thiab Xaidoo yuav raug sib dua neb. Lub moos Khapena‑u 'e, yuav muab koj tsa siab mus nto ntuj lov? Koj yuav raug muab txo qes mus rau hauv tub tuag teb. Tus uas mloog nej hais, kuj yog mloog kuv hais, tus uas tsis lees nej kuj yog tsis lees kuv, tus uas tsis lees kuv kuj tsis lees tus uas txib kuv los.” Xya caum ob tug thwjtim rov los zoo siab xyiv fab hais tias, “Tus Tswv, txawm yog dab los thaum peb tuav koj lub npe dab kuj nyob hauv peb qab kev tswjhwm lawm.” Yexus hais rau lawv tias, “Kuv pom Xatas poob saum ntuj los ib yam li xob laim. Saib maj, kuv pub hwjchim rau nej tsuj tau nab thiab raub ris teb thiab muaj hwjchim loj dua tus yeeb ncuab li hwjchim huvsi, tsis muaj ib yam dabtsi yuav ua phem rau nej. Tiamsis tsis txhob zoo siab rau qhov uas tej dab nyob hauv nej qab kev tswjhwm. Cia li zoo siab rau qhov uas nej lub npe sau cia rau hauv ntuj ceeb tsheej lawm.” Tib lub sijhawm ntawd Vaj Ntsuj Plig dawb huv ua rau Yexus zoo siab mas nws hais tias, “Au leej Txiv uas yog tus Tswv ntuj Tswv teb, kuv qhuas koj uas koj muab tej no npog cia tsis qhia rau cov neeg muaj tswvyim thiab txawj ntse, tiamsis muab qhia rau tej menyuam yaus paub. Au leej Txiv, koj yeej pom zoo ua li ntawd. Kuv leej Txiv twb muab txhua yam cob rau kuv. Tsis muaj leejtwg paub tias leej Tub yog leejtwg tsuas yog leej Txiv xwb thiab tsis muaj leejtwg paub tias leej Txiv yog leejtwg tsuas yog leej Tub thiab tus uas leej Tub xav qhia rau thiaj paub xwb.” Yexus txawm tig rau ntawm cov thwjtim hais twjywm rau lawv tias, “Lub qhov muag uas pom tej uas nej pom kuj tau koob hmoov. Kuv hais rau nej tias, cov xibhwb cev Vajtswv lus thiab tej vajntxwv ntau leej xav pom tej uas nej pom los lawv tsis pom, thiab xav hnov tej uas nej tau hnov los lawv tsis hnov.” Muaj ib tug xibhwb uas paub kevcai txawm sawv tsees sim Yexus nug hais tias, “Xibhwb, kuv yuav tsum ua yam twg kuv thiaj tau txojsia ib txhis tsis kawg?” Yexus hais rau nws tias, “Txoj kevcai sau cia li cas? Koj nyeem hais li cas?” Nws teb tias, “Koj yuav tsum hlub tus Tswv uas yog koj tus Vajtswv kawg siab kawg ntsws, kawg koj lub dag lub zog thiab kawg koj tswvyim plab plaws thiab hlub kwvtij zej zog ib yam li koj hlub koj tus kheej.” Yexus hais rau nws tias, “Koj teb raug lawm, cia li mus ua li ntawd koj thiaj tau txojsia.” Tiamsis tus ntawd tsis xav poob ntsej muag nws txawm hais rau Yexus tias, “Leejtwg yog kuv li kwvtij zej zog nev?” Yexus teb tias, “Muaj ib tug yawg taug kev ntawm Yeluxalees mus rau nram lub moos Yelikhau, ces txawm raug tub sab lws txeeb nws ris tsho muab nws ntaus li khiav mus tseg nws cia twb yuav tuag. Ces txawm muaj ib tug pov thawj taug kev tuaj. Thaum nws pom tus uas raug tub sab ntaus, nws txawm lug ib sab ntug kev mus lawm. Muaj ib tug Levi ua ib yam nkaus. Thaum nws tuaj txog ntawd thiab pom nws kuj lug ib sab ntug kev mus lawm thiab. Tiamsis thaum ib tug Xamali taug kev tuaj txog ntawm tus ntawd, pom dheev mas khuvleej, txawm mus ti nkaus thiab muab roj thiab cawv txiv hmab hliv pleev tej qhov txhab muab ntaub qhwv rau, thiab muab tus ntawd caij nws tus nees luav coj mus txog ib lub tsev so thiab tu tus mob ntawd. Hnub tom qab nws muab ob denalia pub rau tus Tswv tsev thiab hais tias, ‘Thov pab tu tus mob no. Tej nyiaj uas koj siv tshaj cov no lawm mas thaum kuv rov tuaj kuv yuav ntxiv rov rau koj.’ Koj xav tias peb tug no tus twg yog tus uas raug tub sab ntaus li kwvtij zej zog?” Tus xibhwb ntawd hais tias, “Yog tus uas khuvleej tus ntawd.” Yexus thiaj hais rau nws tias, “Koj cia li mus ua ib yam nkaus li ntawd.” Thaum Yexus lawv taug kev mus txawm mus rau hauv ib lub zos. Muaj ib tug pojniam hu ua Matha hu Yexus mus so hauv nws lub tsev. Matha muaj ib tug niam hluas hu ua Maivliag. Maivliag kuj zaum ntawm Yexus kotaw mloog Yexus tej lus qhia. Matha ntxhov siab rau nws tej haujlwm uas muaj ntau, nws txawm los hais rau Yexus tias, “Tus Tswv, koj tsis quav ntsej qhov uas kuv tus niam hluas cia kuv tib leeg ua haujlwm xwb lov? Koj cia li hais kom nws los pab kuv thiab.” Tus Tswv teb nws tias, “Matha, Matha 'e, koj txhawj thiab ntxhov siab rau ntau yam heev. Tsuas muaj tib yam uas cheem tsum xwb. Maivliag twb xaiv yam uas zoo lawm, tsis muaj leejtwg txeeb tau ntawm nws mus.” Muaj ib hnub Yexus tabtom thov Vajtswv hauv ib qho chaw. Thaum nws thov tag lawm, nws cov thwjtim ib tug hais rau nws tias, “Tus Tswv, thov koj qhia peb paub thov Vajtswv ib yam li Yauhas qhia nws cov thwjtim.” Yexus txawm hais rau lawv tias, “Thaum nej thov yuav tsum hais tias, “ ‘Leej Txiv, thov sawvdaws hwm koj lub npe kom dawb huv. Thov cia koj lub tebchaws los. Thov pub tej zaub mov uas peb niaj hnub noj rau peb txhua hnub. Thov koj daws peb lub txim rau qhov peb zam txhua tus uas ua txhaum rau peb. Thov tsis txhob coj peb mus raug kev sim siab.’ ” Yexus kuj hais rau lawv tias, “Nej cov leejtwg muaj ib tug kwvluag mas thaum ib tag hmo nej mus hais rau nws tias, ‘Kwvluag, thov txais peb lub ncuav, vim kuv ib tug phoojywg nyuam qhuav tuaj txog mas kuv tsis muaj dabtsi rau nws noj,’ mas tus uas nyob hauv tsev teb tias, ‘Tsis txhob txob kuv, twb kaw qhov rooj lawm thiab kuv cov menyuam nrog kuv pw tag lawm. Kuv sawv tsis tau mus muab rau koj.’ Kuv hais rau nej tias, txawm yog nws tsis sawv mus muab rau tus ntawd vim yog kwvluag, los vim tus ntawd pheej txob nws heev nws yeej yuav sawv mus muab raws li tus ntawd cheem tsum. “Kuv hais rau nej tias, cia li thov mas yuav muab rau nej, cia li nrhiav nej thiaj ntsib, cia li khob mas yuav qheb rau nej. Rau qhov txhua tus uas thov kuj yuav tau, tus uas nrhiav kuj ntsib, thiab tus uas khob kuj qheb rau nws. Nej cov uas yog txiv muaj leejtwg, es nws tus tub thov ntses noj nws yuav muab ib tug nab rau nws? Lossis yog nws thov ib lub qe es yuav muab ib tug raub ris teb rau nws lov? Yog li no nej cov uas yog neeg phem los nej twb paub muab tej yam uas zoo rau nej tej menyuam, nej leej Txiv uas nyob saum ntuj yimhuab yuav muab Vaj Ntsuj Plig uas dawb huv rau cov uas thov nws.” Yexus tabtom ntiab tus dab ruam hais tsis tau lus tawm. Thaum dab tawm lawd tus ruam txawm hais tau lus, cov neeg kuj phimhwj. Tiamsis qee leej hais tias, “Nws siv tus thawj dab Npe‑eexenpu li hwjchim ntiab dab tawm.” Dua lwm tus kuj sim Yexus thov kom nws ua txujci tseem ceeb tshwm saum ntuj los. Yexus paub tej uas lawv xav nws thiaj hais rau lawv tias, “Txhua lub tebchaws uas tawg faib lawd yeej yuav puam tsuaj, thiab lub tsev twg uas tawg faib lawd yeej yuav piam tag. Yog Xatas tawg faib tag lawm nws lub tebchaws yuav nyob tau li cas? Rau qhov nej hais tias kuv siv Npe‑eexenpu li hwjchim ntiab dab tawm. Yog kuv siv dab Npe‑eexenpu ntiab dab tawm, es nej cov neeg nev, lawv siv leejtwg ntiab dab tawm? Yog li ntawd ces lawv yuav ua cov uas txiav txim rau nej. Yog kuv siv Vajtswv tus ntiv tes ntiab dab tawm, mas Vajtswv lub tebchaws twb los txog nej lawm. Thaum tus uas muaj zog tuav rawv cuab yeej zov nws lub tsev nws tej qhov txhia chaw kuj nyob tso siab plhuav. Tiamsis thaum tus uas muaj zog heev dhau nws, tuaj ntaus yeej nws, tus ntawd yuav txeeb kiag nws tej cuab yeej uas nws tso siab ntawd mus thiab muab tej uas txeeb tau ntawd faib. Tus uas tsis tuaj kuv tog yeej tawm tsam kuv, thiab tus uas tsis nrog kuv qaws los ua ke, nws yeej muab ua kom tawg ua sab ua sua. “Thaum dab qias tawm hauv leejtwg lawm, dab mus rau hauv tej chaw qhuav nkig nkuav nrhiav chaw so. Thaum nrhiav tsis tau nws hais tias, ‘Kuv yuav rov qab mus rau kuv lub tsev uas kuv tawm tuaj.’ Thaum nws los txog nws pom lub tsev muab cheb thiab tu du lug cia. Nws txawm mus coj dua xya tus dab uas phem heev dua nws nkag mus nyob rau hauv. Mas tus neeg ntawd lub neej thaum kawg phem heev dua thaum chiv thawj.” Thaum Yexus tabtom hais tej lus ntawd muaj ib tug pojniam uas nyob hauv cov neeg ntawd hais nrov rau Yexus tias, “Lub plab uas yug koj thiab lub txiv mis uas koj ntxais nyob kaj siab lug.” Tiamsis Yexus hais tias, “Cov uas hnov Vajtswv tej lus thiab coj raws nraim thiaj yog cov uas tau nyob kaj siab lug.” Thaum neeg tuaj coob zuj zus, Yexus pib hais tias, “Tiam neeg no phem heev thiab nrhiav ib yam txujci tseem ceeb, tiamsis lawv yuav tsis pom dua txujci tseem ceeb tsuas yog zaum txujci uas muaj rau Yauna xwb. Rau qhov Yauna ua txujci tseem ceeb rau cov neeg Ninave li cas, Neeg leej Tub yuav ua txujci tseem ceeb rau tiam neeg no ib yam li ntawd. Thaum txiav txim rau tiam neeg no tus poj vajntxwv uas kav tebchaws sab nrad yuav sawv tsees thiab yuav taw lawv qhov txhaum rau lawv, rau qhov nws tau tuaj nram qab ntuj kawg tuaj mloog Xalaumoo tej tswvyim, tiamsis muaj ib tug loj dua Xalaumoo nyob ntawm no. Thaum txiav txim rau tiam neeg no cov neeg Ninave yuav sawv tsees thiab yuav taw lawv qhov txhaum rau lawv, rau qhov thaum cov neeg Ninave hnov Yauna qhia, lawv ntxeev dua siab tshiab lawm, tiamsis muaj ib tug loj dua Yauna nyob ntawm no. “Tsis muaj leejtwg taws teeb es muab txawb rau lub chaw nraim nkoos lossis muab thoob khwb cia, yeej yuav muab txawb rau saum lub chaw txawb teeb xwv cov uas nkag los thiaj pom kev. Lub qhov muag yog lub teeb rau lub cev. Yog tias koj lub qhov muag nyob zoo, tag nrho koj lub cev kuj kaj lug. Yog koj lub qhov muag tsis zoo, tag nrho koj lub cev yuav tsaus ntuj nti. Ceev faj tib zoo tsis txhob cia qhov kaj uas nyob hauv koj rov tsaus ntuj nti. Yog koj lub cev kaj huvsi tsis muaj ib qho tsaus li, mas nws yuav kaj lug huvsi ib yam li duab teeb ci kaj lug rau koj.” Thaum Yexus hais tag lawm, muaj ib tug Falixai hu Yexus mus nrog nws noj mov. Yexus txawm mus zaum ntawm rooj mov. Thaum tus Falixai ntawd pom tias Yexus tsis ntxuav tes ua ntej li mam noj mov nws xav tsis thoob. Tus Tswv txawm hais rau nws tias, “Nej cov Falixai ntxuav khob ntxuav tais sab nraud, tiamsis sab hauv nej puv nkaus qhov uas ua siab hlob thiab siab phem. Au niag neeg ruam, tus uas tsim sab nraud kuj tsim sab hauv los tsis yog? Cia li pub tej uas nyob sab hauv rau cov neeg pluag mas txhua yam thiaj li huv rau nej. “Nej cov Falixai raug txom nyem lauj! Nej muab ib feem kaum pum hub, luam laws thiab txhua yam txuj lom, tiamsis qhov uas tu plaub ncaj thiab hlub Vajtswv nej muab tso tseg. Tej uas hais tag no nej yuav tsum ua, thiab tsis txhob tso lwm yam tseg. “Nej cov Falixai raug txom nyem lauj! Nej nyiam zaum tej rooj siab hauv tej tsev sablaj, thiab nyiam kom luag hwm nej tom tej tshav puam. Nej raug txom nyem lauj! Nej zoo li lub qhov ntxa uas saib tsis pom mas neeg tsuj mus tsuj los los tsis paub.” Muaj ib tug xibhwb paub kevcai txawm hais rau Yexus tias, “Xibhwb, qhov uas koj hais li ntawd kuj yog koj thuam peb thiab.” Yexus hais tias, “Nej cov xibhwb uas paub kevcai raug txom nyem lauj! Nej muab lub nra hnyav uas ceeblaj ris nog rau neeg ris tiamsis nej twb tsis xuas nej tus ntiv tes kov kiag li. Nej raug txom nyem lauj! Nej txhim cov xibhwb cev Vajtswv lus tej qhov ntxa uas nej tej poj koob yawm txwv muab cov xibhwb ntawd tua. Nej ua li ntawd kuj yog ua timkhawv qhia hais tias nej pom zoo rau tej uas nej cov laus ua, rau qhov lawv yog cov uas tua cov xibhwb ntawd, thiab nej yog cov uas txhim tej qhov ntxa. Vim li no Vajtswv Tus Tswvyim thiaj hais tias, ‘Kuv yuav txib cov xibhwb cev lus thiab cov tubtxib mus cuag lawv, mas qee leej yuav raug lawv muab tua thiab qee leej raug tsim txom.’ Vim li no, yuav tsob cov xibhwb cev Vajtswv lus tej ntshav uas los txij thaum tsim ntiajteb los ntawm tiam neeg no, yog txij thaum Anpee cov ntshav mus txog Xekhaliya cov ntshav uas raug tua tuag ntawm lub thaj thiab lub tuam tsev kem nruab nrab. Kuv hais tseeb rau nej tias yuav tsob tej ntshav ntawm tiam neeg no. Nej cov xibhwb paub kevcai raug txom nyem lauj! Nej muab tus yuam sij qheb txojkev paub coj mus lawm. Nej kuj tsis nkag mus rau hauv, thiab nej tav cov uas tabtom nkag mus.” Thaum Yexus tawm qhov ntawd mus, cov xibhwb qhia Vajtswv kevcai thiab cov Falixai pib cib nyeej thiab thom Yexus txog ntau yam, xwv thiaj nrhiav tau chaw kom nws tej lus. Thaum ntawd muaj neeg ntau txhiab leej tuaj txoos ua ke, ib leeg tsuj ib leeg, Yexus txawm pib hais rau nws cov thwjtim tias, “Nej yuav tsum ceev faj cov Falixai cov keeb, yog qhov uas ncauj lus zoo lub siab phem. Tsis muaj ib yam twg uas muab npog cia lawm yuav tsis muab thws tshwm los, thiab tsis muaj ib yam twg uas muab zais lawm yuav tsis paub. Vim li ntawd tej uas nej hais hauv qhov tsaus ntuj, yuav tau hnov rau hauv qhov pom kev, thiab tej uas nej hais lus ntxhi hauv txaj yuav raug muab tshaj tawm rau saum txheej tsev las tshav. “Kuv cov kwvluag, kuv hais rau nej tias, tsis txhob ntshai cov uas tua tau lub cev xwb, dhau ntawd ua tsis tau dabtsi ntxiv lawm. Kuv qhia rau nej tias nej yuav tsum ntshai leejtwg. Yuav tsum ntshai tus uas tua tag lawm tseem muaj hwjchim muab pov tau rau hauv ntuj tawg. Kuv hais tseeb rau nej tias, cia li ntshai tus ntawd. Tsib tug noog tsev luag muag ob npiv los tsis yog? Tsis muaj ib tug noog uas Vajtswv yuav tsis nco qab li. Nej cov plaubhau los kuj raug muab suav txhua txoj lawm. Tsis txhob ntshai. Nej tsim txiaj dua ntau tus noog tsev. “Kuv hais rau nej tias, txhua tus uas lees yuav kuv tab meeg tibneeg, Neeg leej Tub yuav lees yuav tus ntawd tab meeg Vajtswv cov tubtxib saum ntuj. Tiamsis tus uas tsis lees yuav kuv tab meeg tibneeg, tus ntawd yuav raug tsis lees tab meeg Vajtswv cov tubtxib saum ntuj. Txhua tus uas hais lus tawm tsam Neeg leej Tub yuav zam tau tus ntawd lub txim, tiamsis tus uas hais lus tuam mom Vaj Ntsuj Plig uas dawb huv yuav zam tsis tau kiag li. “Thaum luag coj nej mus cob rau hauv tej tsev sablaj thiab coj mus rau cov thawj kav thiab cov nom tswv, nej tsis txhob txhawj tias nej yuav hais daws nej tus kheej li cas lossis nej yuav teb li cas, rau qhov thaum txog lub sijhawm ntawd Vaj Ntsuj Plig dawb huv yuav qhia tej uas nej yuav tsum hais.” Muaj ib tug hauv cov neeg ntawd hais rau Yexus tias, “Xibhwb, thov koj hais kuv tus tijlaug faib qub txeeg qub teg rau kuv thiab.” Tiamsis Yexus hais rau nws tias, “Koj yawg, leejtwg tsa kuv ua tus tu plaub lossis ua tus faib qub txeeg qub teg rau neb?” Yexus hais rau lawv tias, “Ceev faj tib zoo tsis txhob ua siab hlob rau txhua yam, rau qhov neeg txojsia tsis yog nyob ntawm qhov uas muaj nplua mias.” Ces nws txawm hais ib zaj paj lug rau lawv mloog tias, “Muaj ib tug nplua nuj nws daim teb muaj qoob loo ntau kawg. Nws txawm xav hauv lub siab tias, ‘Kuv yuav ua li cas thiaj zoo nev, vim tias kuv tsis muaj chaw rau kuv tej qoob loo?’ Nws txawm hais tias, ‘Kuv yuav ua li no, kuv yuav muab kuv tej txhab rhuav thiab ua tshiab kom loj dua, mas kuv yuav sau kuv tej qoob thiab kuv tej qhov txhia chaw huvsi ntim rau hauv. Mas kuv yuav hais rau kuv lub siab tias, “Lub siab 'e, koj muaj ib puas tsav yam ntau heev khaws cia txaus ntau xyoo, cia li nyob zoo zoo noj haus thiab xyiv fab nawj.” ’ Tiamsis Vajtswv hais rau nws tias, ‘Tus niag neeg ruam 'e, hmo no koj tus ntsuj plig yuav raug hu tawm ntawm koj mus, mas tej qhov txhia chaw uas koj npaj cia ntawd yuav yog leejtwg li?’ Tus uas khaws nyiaj txiag cia rau nws xwb, tsis nplua nuj rau Vajtswv kuj zoo ib yam li ntawd ntag.” Yexus hais rau nws cov thwjtim tias, “Vim li no, kuv hais rau nej tias, tsis txhob txhawj txog nej txojsia tias yuav muab dabtsi los noj, thiab tsis txhob txhawj txog nej lub cev tias yuav muab dabtsi los hnav, rau qhov txojsia tseem ceeb dua mov noj thiab lub cev tseem ceeb dua tej tsoos tsho. Cia li saib tej uab lag, twb tsis tseb tsis hlais thiab tsis muaj txhab tsis muaj phawv los Vajtswv tseem yug tej uab lag ntawd. Nej yimhuab tsim txiaj dua tej noog ntawd. Nej cov muaj leejtwg txojkev txhawj yuav txuas tau nws txojsia ntev ib tshim ntxiv? Yam nyuag me me no nej twb ua tsis tau, es nej tseem yuav txhawj txog lwm yam ua dabtsi? Cia li tshuaj saib tej paj lilij saib tuaj hlob li cas, twb tsis ua haujlwm thiab tsis ntos ntaub. Tiamsis kuv hais rau nej tias, txawm yog Xalaumoo hnav nws tej tsoos tsho meej mom huvsi los twb zoo tsis cuag ib lub nyuag paj ntawd. Tej nroj tsuag uas nyob tom teb hnub no xwb, tagkis twb yuav muab pov rau hauv cub hluavtaws, yog Vajtswv twb pub rau hnav li ntawd, nej cov uas kev ntseeg yau 'e, nws yimhuab yuav pub rau nej hnav thiab. Tsis txhob nrhiav yuav noj dabtsi yuav haus dabtsi, tsis txhob txhawj, rau qhov ib tsoom tebchaws hauv ntiajteb yeej nrhiav tej no. Nej leej Txiv yeej paub lawm tias nej cheem tsum tej no. Tiamsis nej yuav tsum nrhiav Vajtswv lub tebchaws, mas yuav muab tej no tsav ntxiv rau nej. “Pab nyuag yaj me me, nej tsis txhob ntshai, vim tias nej leej Txiv txaus siab pub lub tebchaws ntawd rau nej. Cia li muab tej uas nej muaj muag thiab pub rau cov pluag. Cia li ua lub hnab nyiaj uas tsis txawj qub rau nej, yog tej nyiaj txiag saum ntuj uas tsis txawj tag li. Qhov ntawd tub sab tuaj tsis tau ze thiab kab ntsaum ua tsis tau kom puam tsuaj. Rau qhov nej tej nyiaj txiag nyob qhovtwg, nej lub siab yeej nyob qhov ntawd. “Nej cia li sia siv khov kho thiab taws nej lub teeb cia, thiab ua zoo li cov uas tos rawv lawv tus lospav mus ua tshoob rov los, mas thaum nws los khob qhov rooj lawv thiaj qheb kiag tamsid rau nws. Cov qhev uas tus lospav los pom tseem tos rawv kuj tau nyob kaj siab lug. Kuv hais tseeb rau nej tias tus lospav yuav sia siv khov kho thiab cia cov tub qhe nyob ntawm rooj mov mas nws yuav los tu lawv. Yog tus lospav los thaum ib tag hmo lossis qaib qua nws pom tias cov tub qhe tseem tos rawv, cov tub qhe ntawd yuav nyob kaj siab lug. Cia li paub tias, yog tus tswv tsev xub paub tias tub sab yuav tuaj thaum twg, nws yuav tsis kheev kom tho tau nws lub tsev. Yog li no nej yuav tsum npaj txhij rau qhov Neeg leej Tub yuav los rau teev uas nej tsis nco xav txog.” Petus hais tias, “Tus Tswv, koj hais zaj paj lug no rau peb xwb los hais rau sawvdaws thiab?” Tus Tswv hais tias, “Leejtwg yog tus tub qhe saib tsev uas ncaj thiab ntse uas tus lospav yuav tsa saib xyuas cov tub qhe thiab faib mov rau lawv noj raws sijhawm? Thaum tus lospav los pom nws ua haujlwm li ntawd, tus qhev ntawd yuav tau nyob kaj siab lug. Kuv hais tseeb rau nej tias, tus lospav yuav tsa nws ua tus saib xyuas tag nrho lospav tej cuab txhiaj cuab tam huvsi. Tiamsis yog tus qhev ntawd xav hauv lub siab hais tias, ‘Kuv tus lospav los qeeb,’ ces nws txawm pib muab cov tub qhe nkauj qhev ntaus thiab noj tsau haus qaug, mas nws tus lospav yuav los rau hnub uas nws tsis nco xav txog thiab teev uas nws tsis paub, mas tus lospav yuav muab nws tsuav ua tej dwb daim thiab tu chaw rau nws nrog cov uas tsis ntseeg nyob ua ke. Mas tus qhev ntawd uas twb paub tus lospav lub siab tiamsis tsis npaj thiab tsis ua raws nraim yuav raug nplawm hnyav heev. Tiamsis tus uas tsis paub es ua yam uas tsim nyog raug nplawm, los nws yuav raug nplawm mentsis xwb. Txhua tus uas tau txais ntau yuav raug tsob ntawm nws ntau. Thiab tus uas luag muab ntau rau nws, luag yuav thov thim ntawm nws ntau dua. “Kuv los yog coj hluavtaws los rau hauv lub ntiajteb. Kuv xav kom cub hluavtaws twb cig plaws lawm. Kuv tseem yuav tsum ua dua ib yam kevcai raus dej. Kuv yuav nyuaj siab kawg mus txog thaum ua tiav lawd. Nej xav tias kuv los yog coj kev sib hum xeeb los rau lub ntiajteb no lov? Kuv hais rau nej tias, tsis yog. Kuv los yog coj kev tawg sib faib los. Txij no mus tsib leeg nyob ua ib tse los yuav tawg peb leeg tawm tsam rau ob leeg, ob leeg tawm tsam rau peb leeg. Lawv yuav sib faib, txiv tawm tsam tub, tub tawm tsam txiv, niam tawm tsam ntxhais, ntxhais tawm tsam niam, niam pog tawm tsam nyab thiab nyab tawm tsam niam pog.” Yexus hais rau cov neeg coob coob ntawd tias, “Thaum nej pom huab laum nkaus sab hnub poob nej hais tamsim ntawd tias, ‘Nag yuav los,’ ces txawm muaj li ntawd. Thaum nej pom cua ntsawj sab nrad tuaj, nej kuj hais tias, ‘Yuav kub heev,’ ces txawm muaj li ntawd. Cov niag neeg ncauj lus zoo siab phem, nej txawj saib lub ntiajteb thiab lub ntuj, thiaj paub tias yuav muaj dabtsi tshwm los. Vim li cas nej ho tsis txawj saib tiam no yuav muaj li cas? “Ua cas nej tsis txiav txim siab tias yam twg raug cai? Thaum koj nrog tus yeej kom ua ke mus tom tus tu plaub, ua tiag nrhiav kev nrog tus yeej kom hais hum ntawm tog kev, tsam ces nws coj koj mus cuag tus uas txiav txim, mas tus txiav txim yuav muab koj cob rau tus ceev xwm, thiab tus ceev xwm muab koj kaw rau hauv tsev lojfaj. Kuv hais rau koj tias, koj yuav tawm tsis tau mus txog thaum them tag txhua npiv huvsi.” Lub sijhawm ntawd muaj qee leej piav rau Yexus mloog txog cov neeg Kalilais uas Philaj tau muab lawv cov ntshav xyaw ua ke nrog cov ntshav tsiaj uas lawv tua xyeem. Yexus txawm hais rau lawv tias, “Nej xav hais tias cov Kalilais ntawd yog neeg muaj txim heev dua cov Kalilais sawvdaws rau qhov lawv raug li ntawd no lov? Kuv hais rau nej tias, tsis yog li ntawd. Yog nej tsis ntxeev dua siab tshiab nej txhua tus kuj yuav puam tsuaj ib yam li lawv. Lossis kaum yim leej uas lub chaw tsom faj hauv Xilau‑as pob los tais tuag ntawd, nej xav hais tias lawv ua txhaum loj dua sawvdaws uas nyob hauv Yeluxalees no lov? Kuv hais rau nej tias, tsis yog li ntawd. Yog nej tsis ntxeev dua siab tshiab nej txhua tus kuj yuav puam tsuaj ib yam li ntawd.” Yexus hais ib zaj paj lug tias, “Muaj ib tug yawg cog ib tsob txiv cev rau hauv nws lub vaj txiv hmab, nws tuaj xyuas los tsis muaj txiv. Nws txawm hais rau tus uas tu txiv hmab tias, ‘Kuv tuaj xyuas tsob txiv cev no peb xyoos lawm los tsis pom muaj txiv li. Cia li muab ntov pov tseg, yuav cia ntxoov av do do ua dabtsi?’ Tus tu txiv hmab teb nws tias, ‘Yawg hlob, thov tseg cia ib xyoos thiab, es kuv npoog av thiab rau chiv rau. Yog lwm xyoo txi txiv kuj zoo. Yog tsis txi txiv koj li muab ntov pov tseg kuj tau.’ ” Muaj ib hnub Xanpatau Yexus tabtom qhuab qhia hauv ib lub tsev sablaj. Muaj ib tug pojniam raug dab ua rau nws muaj mob tau kaum yim xyoo, nws khoov duav sawv tsis tau ntseg li. Thaum Yexus pom nws, Yexus txawm hu tus pojniam ntawd los hais rau nws tias, “Tus ntxhais 'e, koj dim koj tus mob lawm lauj!” Thaum Yexus muab tes npuab nws, tamsim ntawd nws txawm sawv tau ntses, thiab nws qhuas Vajtswv. Tiamsis tus thawj uas saib xyuas lub tsev sablaj chim rau qhov uas Yexus kho mob rau hnub Xanpatau, nws txawm hais rau cov neeg tias, “Muaj rau hnub uas tsim nyog ua haujlwm, nej cia li tuaj kho mob rau rau hnub ntawd, tsis txhob tuaj kho rau hnub Xanpatau.” Tus Tswv txawm teb nws tias, “Cov niag neeg ncauj lus zoo siab phem, hnub Xanpatau nej txhua tus twb daws nyuj daws nees luav ntawm lub dab zaub cab mus haus dej los tsis yog? Tus pojniam no yog Aplahas li ib tug ntxhais uas raug Xatas muab khi tau kaum yim xyoo lawm, tsis tsim nyog muab nws daws kom dim txoj hlua khi no rau hnub Xanpatau lov?” Thaum Yexus hais li ntawd lawd, cov uas tawm tsam nws kuj raug txaj muag, mas cov neeg sawvdaws zoo siab xyiv fab rau tej yam zoo uas Yexus ua. Yexus txawm hais tias, “Vajtswv lub tebchaws zoo li cas? Kuv yuav muab piv rau dabtsi? Muab piv ib yam li lub noob me me uas ib tug coj mus tseb rau hauv nws lub vaj. Thaum tuaj hlob ua ib tsob ntoo, thiab tej nas noog saum nruab ntug los ua zes rau saum tej ceg.” Yexus hais dua ib zaug tias, “Kuv yuav muab Vajtswv lub tebchaws piv rau dabtsi? Yuav piv ib yam li cov keeb uas ib tug pojniam coj mus xyaw peb xe‑a hmoov mog tos txog thaum cov hmoov mog ntawd su tag huvsi.” Yexus mus hauv tej moos thiab tej zej zog qhuab qhia taug kev mus rau Yeluxalees. Muaj ib tug hais rau nws tias, “Tus Tswv, cov neeg uas dim muaj tsawg tsawg xwb lov?” Yexus hais rau lawv tias, “Yuav tsum siv zog nkag lub qhov rooj nqaim mus, rau qhov kuv hais rau nej tias, muaj neeg coob coob yooj xeeb nkag mus tiamsis nkag tsis tau. Thaum tus tswv tsev twb sawv los kaw qhov rooj lawm, nej yuav pib mus nyob sab nraud khob qhov rooj hais tias, ‘Tus tswv, qheb rau peb thiab.’ Nws yuav teb nej tias, ‘Kuv tsis paub nej tuaj qhovtwg tuaj.’ Thaum ntawd nej yuav pib hais tias, ‘Peb txeev nrog koj noj haus ua ke thiab koj tau qhia hauv peb tej kev.’ Tiamsis nws yuav hais rau nej tias, ‘Kuv tsis paub xyov nej tuaj qhovtwg tuaj. Cov niag neeg ua phem sawvdaws, nej cia li khiav ntawm kuv mus.’ Qhov chaw ntawd yuav muaj kev quaj tom hniav qas qawv rau thaum nej pom Aplahas, Yiha thiab Yakhauj thiab cov xibhwb cev Vajtswv lus sawvdaws nyob hauv Vajtswv lub tebchaws, tiamsis nej raug muab pov rau sab nraud. Yuav muaj neeg tuaj sab hnub tuaj sab hnub poob sab ped sab nram tuaj zaum koom rooj mov ua ke hauv Vajtswv lub tebchaws. Saib maj, yeej yuav muaj cov uas ua tom tw rov ua cov thawj, thiab cov thawj rov ua cov tom tw.” Thaum ntawd cov Falixai qee leej tuaj hais rau Yexus tias. “Koj cia li khiav ntawm no mus, rau qhov Helauj xav muab koj tua.” Yexus txawm hais rau lawv tias, “Cia li mus hais rau tus niag hma ntawd tias, ‘Saib maj, kuv yuav ntiab dab tawm thiab kho mob rau hnub no thiab tagkis mas hnub peb kuv yuav ua kuv tes haujlwm kom tiav. Tiamsis hnub no, tagkis thiab nagkis kuv yuav tsum taug kev mus, rau qhov tus xibhwb cev Vajtswv lus yuav raug tua tuag rau sab nraud Yeluxalees tsis tau li.’ “Au Yeluxalees, Yeluxalees 'e, koj yog tus uas tua cov xibhwb cev Vajtswv lus thiab xuas pob zeb ntaus cov uas txib tuaj cuag koj tuag. Muaj ntau zaus kuv twb yuav qaws koj cov menyuam los ua ke ib yam li tus poj qaib puag nws cov menyuam rau hauv nws phab tis, tiamsis nej tsis yeem kiag li. Saib nawj, nej lub tuam tsev yuav raug muab tso tseg. Kuv hais rau nej tias nej yuav tsis pom kuv mus txog thaum nej hais tias, ‘Tus uas tuaj hauv tus Tswv lub npe tau nyob kaj siab lug.’ ” Muaj dua ib hnub Xanpatau Yexus mus noj mov rau hauv ib tug thawj Falixai tsev, mas lawv ntsia ntsoov Yexus. Txawm muaj ib tug yawg tes taw phoj vog tuaj nyob ntawm Yexus xubntiag. Yexus txawm nug cov xibhwb uas paub kevcai thiab cov Falixai tias, “Muaj cai kho mob rau hnub Xanpatau los tsis muaj cai?” Lawv nyob ntsiag to. Yexus txawm ntsiab nkaus tus ntawd thiab kho nws zoo kiag li tso nws mus. Yexus hais rau lawv tias, “Nej cov yog leejtwg muaj menyuam lossis nyuj uas poob rau hauv qhov dej rau hnub Xanpatau nws yuav tsis muab rho tawm los tamsim ntawd lov?” Mas lawv teb tsis tau li. Thaum Yexus pom cov neeg uas hu tuaj ntawd xaiv sam tsum zaum xwb, nws txawm ua paj lug hais rau lawv tias, “Thaum luag hu nej mus noj tshoob, nej tsis txhob mus zaum sam tsum ntshai tsam lawv twb hu ib tug uas muaj meej dua koj tuaj, mas tus uas hu neb ob leeg tuaj yuav los hais rau koj tias, ‘Cia tus no nyob lub chaw kod,’ ces koj yuav poob ntsej muag nqes mus zaum lub rooj uas qes kawg. Thaum luag hu koj mus, cia li mus zaum lub rooj qes ua ntej xwv thaum tus uas hu koj los hais rau koj tias ‘Kwvluag, cia li mus zaum sam tsum,’ mas thaum ntawd koj thiaj li tau koob meej tab meeg sawvdaws uas tuaj koom noj mov ntawd. Txhua tus uas tsab ua loj yuav raug muab txo kom qes, thiab tus uas txo hwjchim yuav raug muab tsa ua loj.” Mas Yexus txawm hais rau tus uas hu Yexus mus noj mov ntawd tias, “Thaum koj muaj pluag noj tsis hais pluas su pluas hmo, tsis txhob yog hu koj cov kwvluag lossis kwvtij lossis tej txheeb ze lossis neeg zej zog uas nplua nuj xwb, tsam ces lawv rov hu koj thiaj pauj tau koj. Thaum koj muaj pluag noj cia li hu cov pluag, cov qhuav tes qhuav taw, cov tuag taw thiab cov dig muag, mas koj yuav tau hmoov zoo rau qhov lawv pauj tsis tau koj, mas yuav pauj rau koj thaum cov neeg ncaj ncees ciaj sawv hauv qhov tuag rov los.” Thaum ib tug uas nrog Yexus nyob ntawm rooj mov hnov tej lus ntawd, nws txawm hais rau Yexus tias, “Tus uas yuav tau noj mov hauv Vajtswv lub tebchaws kuj nyob kaj siab lug.” Yexus hais rau nws tias, “Muaj ib tug yawg npaj ib pluag noj loj heev thiab hu qhua coob. Thaum txog sijhawm noj nws txib nws tus tub qhe mus hais rau cov uas twb hu lawd tias, ‘Cia li tuaj, twb npaj txhua yam txhij lawm.’ Lawv txhua tus nyias taus nyias yig. Ib tug hais tias, ‘Kuv yuav teb lawm, kuv yuav tsum mus saib daim teb ntawd. Kuv tuaj tsis tau, txhob tu siab.’ Muaj dua ib tug hais tias, ‘Kuv yuav tau tsib nkawg nyuj cia, kuv yuav mus xyuas. Kuv tuaj tsis tau, txhob tu siab.’ Muaj dua ib tug hais tias, ‘Kuv nyuam qhuav yuav pojniam, vim li no kuv tuaj tsis tau.’ Tus tub qhe ntawd rov los hais tej no huvsi rau tus lospav mloog. Mas tus tswv tsev kuj chim thiaj hais rau tus tub qhe tias, ‘Cia li tawm mus sai sai tom tej kev loj thiab tej kev me hauv lub moos coj cov pluag, cov qhuav tes qhuav taw, cov dig muag thiab cov tuag taw tuaj noj.’ Tus tub qhe txawm los hais tias, ‘Yawg hlob, kuv twb ua txhua yam raws li koj hais tseg lawm, tiamsis tseem tshuav chaw seem.’ Tus lospav txawm hais rau tus tub qhe tias, ‘Cia li tawm mus tom tej kev loj kev me mus yuam cov neeg ntawd kom tuaj, thiaj li muaj qhua puv kuv lub tsev. Kuv hais rau nej tias cov neeg uas twb hu lawd tsis muaj ib tug yuav tau saj kuv rooj mov li.’ ” Muaj neeg coob coob nrog Yexus mus, mas Yexus tig los hais rau lawv tias, “Yog leejtwg los cuag kuv es tsis ntxub nws niam nws txiv nws pojniam menyuam kwvtij nkauj muam thiab nws txojsia tus ntawd ua tsis tau kuv li thwjtim. Leejtwg tsis kwv nws tus khaublig ntoo raws kuv qab mus, tus ntawd ua tsis tau kuv li thwjtim. Nej cov muaj leejtwg uas xav ua lub chaw tsom faj es yuav tsis xub zaum xam txog tus nqe ua ntej tias muaj txaus ua kom tiav los tsis muaj? Yog tsis ua li ntawd, thaum twb tiag tej taw lawm nws ua tsis tau kom tiav, mas txhua tus uas pom yuav thuam luag nws, hais tias, ‘Tus no pib ua lawm, tiamsis nws ua tsis tau kom tiav.’ Lossis muaj ib tug vajntxwv twg uas yuav mus ua rog rau dua ib tug vajntxwv, es tsis zaum ua tib zoo xav ua ntej saib muaj tub rog ib vam leej yuav mus ua rog tau rau tus uas muaj ob vam leej los tsis tau? Yog ua tsis tau, mas thaum tus vajntxwv ntawd tseem nyob deb nws cia li txib neeg mus thov kom nyob sib raug zoo. Ib yam li ntawd, nej cov leejtwg tsis tso txhua yam uas nws muaj tseg mas ua tsis tau kuv li thwjtim. “Ntsev yog yam uas zoo, tiamsis yog ntsev tsuag lawm, yuav ua kom rov daw tau li cas? Siv ua chiv rau av kuj tsis tau, muab tov xyaw quav tsiaj kuj tsis tau, tsuas muaj uas muab laim pov tseg xwb. Leejtwg muaj qhov ntsej hnov, cia li mloog nawj!” Cov neeg sau se thiab cov neeg muaj txim sawvdaws kuj txav los ze yuav mloog Yexus qhia. Cov Falixai thiab cov xibhwb qhia Vajtswv kevcai yws hais tias, “Tus no lees yuav cov neeg muaj txim thiab nrog lawv noj ua ke.” Yexus txawm ua paj lug qhia rau lawv tias, “Nej cov yog leejtwg muaj ib puas tus yaj mas ib tug ploj lawm nws yuav tsis tseg cuaj caum cuaj tug yaj cia rau hauv tshav zaub es mus nrhiav kom tau tus uas ploj lawd lov? Thaum nrhiav tau lawd, nws muab kwv kiag saum xubpwg zoo siab xyiv fab. Thaum los txog tsev, nws hu kwvtij kwvluag zej zog tuaj ua ke hais rau lawv tias, ‘Cia li nrog kuv zoo siab, rau qhov kuv twb nrhiav tau kuv tus yaj uas ploj lawm.’ Ib yam nkaus li ntawd kuv hais rau nej tias, yog ib tug neeg muaj txim ntxeev dua siab tshiab mas yuav muaj kev zoo siab xyiv fab saum ntuj ceeb tsheej heev dua li zoo siab rau cuaj caum cuaj tug neeg ncaj ncees uas tsis txog ntxeev dua siab tshiab. “Lossis tus pojniam twg uas muaj kaum lub nyiaj muaj ib lub ploj lawm yuav tsis taws teeb cheb vaj cheb tse ua tib zoo nrhiav mus txog thaum tau lov? Thaum nrhiav tau lawd, nws hu kwvtij kwvluag zej zog tuaj ua ke hais rau lawv tias, ‘Cia li nrog kuv zoo siab, rau qhov kuv twb nrhiav tau lub nyiaj uas ploj lawm.’ Ib yam nkaus li ntawd kuv hais rau nej tias, yuav muaj kev zoo siab xyiv fab rau ntawm Vajtswv cov tubtxib saum ntuj xubntiag rau thaum ib tug neeg muaj txim ntxeev dua siab tshiab.” Thiab Yexus hais tias, “Muaj ib tug yawg muaj ob tug tub. Tus tub yau hais rau leej txiv tias, ‘Txiv, thov faib tej cuab txhiaj cuab tam uas yog kuv feem rau kuv.’ Leej txiv txawm muab faib rau ob tug tub. Dhau ntawd tsis muaj tsawg hnub tus tub yau txawm sau zog txhua yam uas yog nws li mas taug kev mus rau lwm lub tebchaws deb deb, thiab muab nws tej nyiaj txiag phob xuam phumlam qas ntsuav. Thaum nws muab siv tag lawm, txawm muaj kev tshaib nqhis heev hauv lub tebchaws ntawd, nws txawm pib tu pluas. Nws txawm mus nrhiav zog ntawm ib tug neeg hauv lub tebchaws ntawd, tus ntawd thiaj txib nws mus yug npua tom teb. Nws yeej xav noj tej plhaub taum uas npua noj ntawd, tsis muaj leejtwg pub dabtsi rau nws noj li. Thaum nws xav txog nws lub neej nws txawm hais tias, ‘Kuv txiv cov tub zog muaj coob li cas los tseem tau noj tsau npo noj tsis tag, tiamsis kuv tabtom tuag tshaib rau ntawm no. Kuv yuav sawv tsees mus cuag kuv txiv thiab hais rau nws tias, “Txiv, kuv ua txhaum rau lub ntuj thiab ua txhaum rau koj lawm. Tsis tsim nyog yuav hu kuv ua koj tus tub dua li lawm. Thov cia kuv zoo li koj ib tug tub zog xwb.” ’ Ces nws txawm sawv tsees mus cuag nws txiv. Thaum nws tseem los txog deb, leej txiv pom nws thiab khuvleej nws, txawm dhia mus puag nws thiab nwj nws. Tus tub hais rau leej txiv tias, ‘Txiv, kuv ua txhaum rau lub ntuj thiab ua txhaum rau koj lawm. Tsis tsim nyog hu kuv ua koj tus tub dua li lawm.’ Tiamsis leej txiv hais rau nws cov tub qhe tias, ‘Cia li maj nroos mus coj lub tsho ntev uas zoo kawg tuaj ua rau nws hnav, thiab muab nplhaib rau nws coj ntawm ntiv tes thiab muab khau rau nws rau. Thiab coj tus menyuam nyuj uas hwv rog rog los tua, thiab cia peb noj ua kev zoo siab xyiv fab, rau qhov kuv tus tub no tuag lawm los nws ciaj rov los, nws ploj lawm los rov qab ntsib dua.’ Lawv pib ua kev zoo siab xyiv fab. “Tiamsis tus tub hlob nyob tom teb. Thaum nws los yuav txog tsev nws kuj hnov suab raj suab nruas thiab suab seev cev. Nws txawm hu ib tug tub qhe tuaj nug tias tej no yog dabtsi. Tus tub qhe teb tias, ‘Koj tus kwv rov los es koj txiv tua tus menyuam nyuj rog rog rau qhov leej txiv tau tus tub yau rov los nyob kaj siab lug.’ “Tus tijlaug txawm chim tsis kam nkag los tsev. Leej txiv thiaj tawm tuaj thov nws los tsev. Nws teb leej txiv tias, ‘Sim saib, kuv ua koj qhev khwv ntau xyoo los, tsis tau tawv koj tej lus ib los li, los koj twb tsis muab ib tug menyuam tshis rau kuv xwv kuv thiaj tau nrog kuv cov phoojywg noj ua kev zoo siab xyiv fab. Tiamsis koj tus tub no mus deev tej poj muag cev muab koj tej cuab txhiaj cuab tam phob xuam tag, los thaum nws rov los koj tseem tua tus menyuam nyuj rog rog yug nws thiab.’ Leej txiv hais rau nws tias, ‘Tub 'e, koj yeej ib txwm nrog nraim kuv nyob, txhua yam uas kuv muaj puavleej yog koj li. Tsim nyog peb zoo siab xyiv fab hlo, rau qhov koj tus kwv no tuag lawm los nws ciaj rov los, nws ploj lawm los rov qab ntsib dua.’ ” Yexus kuj hais rau cov thwjtim tias, “Ib tug nplua nuj muaj ib tug tub qhe uas saib xyuas nws vaj tse. Muaj neeg kom rau tus nplua nuj tias tus tub qhe ntawd tabtom phob tus nplua nuj tej qhov txhia chaw. Tus nplua nuj thiaj hu tus tub qhe ntawd los hais rau nws tias, ‘Zaj uas kuv tau hnov txog koj li ntawd yog li cas? Muab phau ntawv teev nyiaj los rau kuv saib, rau qhov koj yuav ua tsis tau tus uas saib xyuas vaj tse ntxiv mus lawm.’ Tus tub qhe ntawd xav hauv lub siab tias, ‘Kuv yuav ua li cas, rau qhov tus lospav muab kuv rho tawm qhov uas ua tus saib tsev lawm? Yuav mus khawb av kuj tsis muaj zog, mus thov khawv kuj txaj muag. Kuv paub lawm tias kuv yuav ua li cas, xwv thaum kuv raug rho tawm lawm lwm tus thiaj hu kuv mus rau hauv lawv tsev.’ Nws txawm hu cov uas tshuav nws tus lospav nqe los ib tug zuj zus mas nug thawj tug tias, ‘Koj tshuav kuv tus lospav npaum twg?’ Tus ntawd hais tias, ‘Tshuav ib puas thoob roj.’ Tus tub qhe ntawd hais rau nws tias, ‘Cia li muab koj daim ntawv tshuav nqe los zaum thiab sau kiag ua tsib caug thoob xwb.’ Thiab nws nug dua ib tug tias, ‘Koj tshuav npaum twg?’ Tus ntawd hais tias, ‘Tshuav ib puas seev tsaj mog.’ Tus tub qhe hais rau nws tias, ‘Cia li muab koj daim ntawv tshuav nqe los sau ua yim caum seev.’ Tus lospav kuj qhuas tus tub qhe tsis ncaj ntawd vim nws muaj tswvyim ua li ntawd. Rau qhov neeg ntiajteb tiam no muaj tswvyim ua haujlwm heev dua txojkev kaj li menyuam. Kuv hais rau nej tias, cia li muab tej nyiaj txiag uas tsis ncaj coj mus zeem kwvluag, xwv thaum tej nyiaj txiag tag lawm luag thiaj txais nej nyob hauv lub chaw uas nyob mus ib txhis. “Tus uas ua ncaj rau tej yam tsawg kuj yuav ua ncaj rau tej yam ntau. Tus uas ua tsis ncaj rau tej yam tsawg kuj yuav ua tsis ncaj rau tej yam ntau. Yog li ntawd, yog nej ua tsis ncaj rau tej nyiaj txiag uas tsis ncaj, leejtwg yuav muab tej nyiaj txiag uas ncaj cob rau nej? Yog nej ua tsis ncaj rau tej uas yog lwm tus li, leejtwg yuav muab tej uas yog nej li rau nej? Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Vajtswv li qhev thiab ua nyiaj txiag li qhev ua ke tsis tau.” Thaum cov Falixai uas nyiam nyiaj txiag hnov tej lus ntawd lawv txawm thuam luag Yexus. Tiamsis Yexus hais rau lawv tias, “Nej suav tias nej yog neeg ncaj ncees tab meeg sawvdaws, tiamsis Vajtswv paub nej lub siab. Rau qhov yam uas neeg saib tias muaj nqes yog yam uas Vajtswv pom tias qias vuab tsuab. Tsuas muaj txoj kevcai thiab cov xibhwb cev Vajtswv lus los txog thaum Yauhas tshwm los xwb. Txij ntawd los, txoj xov zoo hais txog Vajtswv lub tebchaws raug muab tshaj tawm, mas sawvdaws siv zog sib txeeb kev mus rau hauv lub tebchaws ntawd. Lub ntuj thiab lub ntiajteb yuav ploj yoojyim dua rhuav txoj kevcai ib nyuag teev pov tseg. “Txhua tus nrauj pojniam es nws mus yuav dua pojniam tshiab, kuj yog ua txhaum kev nkauj kev nraug, thiab tus uas yuav ib tug pojniam nrauj ua pojniam kuj yog nws deev luag pojniam. “Muaj ib tug nplua nuj hnav tsoos tsamxem thiab ntaub mag zoo zoo nyob xyiv fab noj seem noj so txhua hnub. Thiab muaj ib tug pluag hu ua Laxalau ua kiav txhab thoob plaws ib ce pw ntawm tus nplua nuj lub rooj vag. Nws xav noj tus nplua nuj tej qub mov uas poob saum rooj los, thiab dev tseem los muab nws tej kiav txhab yaim. Dhau ntawd tus pluag ntawd txawm tuag mas cov tubtxib saum ntuj qaws nws mus rau ntawm Aplahas lub xubntiag. Tus nplua nuj kuj tuag thiab muab log. Thaum nws raug tsim txom hauv tub tuag teb nws tsa qhov muag ntsia pom Aplahas nyob deb deb thiab Laxalau nyob ntawm Aplahas xubntiag. Tus nplua nuj txawm hu hais tias, ‘Txiv Aplahas 'e, thov khuvleej kuv lauj. Thov txib Laxalau tuaj muab nws tus hau ntiv tes raus dej los twb kuv tus nplaig kom laj, rau qhov kuv raug txom nyem heev kawg hauv cov nplaim taws no.’ “Tiamsis Aplahas hais tias, ‘Tub 'e, koj cia li nco tias thaum koj tseem ua neej nyob koj tau txhua yam zoo rau koj tiamsis Laxalau tau yam uas phem kawg. Nimno nws tau kev nplij siab lawm, koj ho raug kev txom nyem heev. Tsis tag li ntawd nyob ntawm peb thiab nej ntu nruab nrab muaj ib lub niag hav tob heev quas lawm, kom cov uas xav hla tim no mus rau tim nej los tsis tau, thiab cov tim nej hla los tim peb los kuj tsis tau.’ Tus nplua nuj txawm hais tias, ‘Yog li ntawd, kuv txiv, thov koj txib Laxalau rov mus rau tom kuv txiv tsev, rau qhov kuv tseem tshuav tsib tug kwv, kom Laxalau mus qhuab ntuas lawv xwv lawv thiaj tsis los raug tsim txom hauv lub chaw no.’ Tiamsis Aplahas hais tias, ‘Lawv muaj Mauxe thiab cov xibhwb cev Vajtswv lus lawm, cia lawv mloog cov neeg ntawd hais.’ Nws txawm hais tias, ‘Txiv Aplahas 'e, tsis tau li. Yog muaj ib tug tawm hauv cov neeg tuag mus cuag lawv, lawv thiaj li ntxeev dua siab tshiab.’ Aplahas hais rau nws tias, ‘Yog lawv tsis mloog Mauxe thiab cov xibhwb cev Vajtswv lus hais, ces txawm yog muaj ib tug sawv hauv qhov tuag los los lawv yeej yuav tsis ntseeg.’ ” Yexus hais rau nws cov thwjtim tias, “Yeej yuav tsum muaj tej yam ua kom ua txhaum, tiamsis tus uas ua rau lwm tus ua txhaum yuav raug txom nyem lauj! Mas muab ib txhib zeb loj los khi rau tus ntawd caj dab es muab pov rau hauv hiavtxwv kuj zoo dua li cia nws ua rau cov menyuam yaus no ib tug dawm. Nej cia li ceev faj zoo. Yog koj li kwvtij ua txhaum cia li ntuas nws, yog nws ntxeev dua siab tshiab cia li zam txim rau nws. Yog ib hnub nws ua txhaum rau koj xya zaus thiab tuaj cuag koj xya zaus thiab hais rau koj tias, ‘Kuv ntxeev dua siab lawm,’ koj yuav tsum zam txim rau nws.” Cov tubtxib hais rau tus Tswv tias, “Thov koj tsav kev ntseeg rau peb ntau zuj zus.” Tus Tswv hais tias, “Yog nej muaj kev ntseeg luaj li ib lub noob me me, nej yuav hais tau rau tsob txiv cev no tias, ‘Cia li rho kiag cag mus cog rau hauv hiavtxwv,’ nws kuj yuav mloog nej lus. “Yog nej muaj ib tug tub qhe mus laij teb lossis yug yaj, mas thaum nws los tom teb los, nej leejtwg yuav hais rau nws tias, ‘Los zaum noj mov lauj’? Nws yuav tsis hais rau tus tub qhe li no lov hais tias, ‘Cia li npaj rau kuv noj thiab sia siv khov kho tu kuv mus txog thaum kuv noj haus tag, dhau ntawd koj mam li noj thiab haus.’ Nws yuav ua tus tub qhe tsaug vim tus tub qhe ua raws li nws hais lov? Ib yam li ntawd, thaum nej ua txhua yam raws li uas hais rau nej lawd, nej cia li hais tias, ‘Peb yog cov tub qhe uas tsis tsim txiaj. Peb tsuas ua raws li tes haujlwm uas peb yuav tsum ua xwb.’ ” Thaum Yexus mus nram Yeluxalees nws taug txojkev ntawm Kalilais thiab Xamali ciam teb. Thaum nws tabtom mus rau hauv ib lub zos muaj kaum tus mob lig mob ruas tuaj ntsib nws. Lawv sawv ntsug deb deb, thiab hu nrov hais tias, “Xibhwb Yexus, thov khuvleej peb.” Thaum Yexus pom dheev lawv nws txawm hais rau lawv tias, “Cia li mus qhia nej lub cev rau cov pov thawj saib.” Thaum lawv tabtom mus lawv txawm zoo tag huv lawm. Lawv cov ntawd muaj ib tug, thaum nws pom tias nws zoo lawm ces nws txawm rov los qhuas Vajtswv nrov nrov, thiab khwb nkaus rau ntawm Yexus kotaw ua Yexus tsaug. Tus ntawd yog neeg Xamali. Yexus txawm hais tias, “Muaj kaum leej zoo mob los tsis yog? Cuaj leeg ntawd dua twg lawm? Tsis pom lwm tus rov los qhuas Vajtswv li, tsuas yog tus uas yog lwm haiv neeg no los xwb lov?” Yexus txawm hais rau tus ntawd tias, “Cia li sawv tsees mus lauj. Koj txojkev ntseeg ua rau koj zoo lawm.” Thaum cov Falixai nug Yexus tias Vajtswv lub tebchaws yuav los thaum twg, Yexus teb lawv tias, “Thaum Vajtswv lub tebchaws los, yuav tsis muaj ib yam dabtsi tshwm uas neeg txawj paub thiab pom. Thiab lawv yuav tsis hais tias, ‘Saib maj, nyob ntawm no,’ lossis ‘Nyob tod,’ rau qhov Vajtswv lub tebchaws yeej nyob hauv nej nruab nrab lawm.” Yexus hais rau cov thwjtim tias, “Yuav muaj ib lub sijhawm uas nej xav pom hnub uas Neeg leej Tub rov los, los nej yuav tsis pom. Thiab luag yuav hais rau nej tias, ‘Mus saib maj, nyob tod,’ lossis ‘Saib maj, nyob ntawm no.’ Nej tsis txhob mus, tsis txhob raws luag qab mus. Xob laim laim ib sab ntuj ci mus txog dua ib sab ntuj li cas, hnub uas Neeg leej Tub los yuav zoo ib yam li ntawd. Tiamsis ua ntej ntawd nws yuav tsum raug kev tsim txom ntau yam thiab cov neeg tiam no yuav tsis lees yuav nws. Tiam uas Nau‑a nyob zoo li cas, mas hnub uas Neeg leej Tub los yuav zoo ib yam li ntawd. Lawv noj haus ua tshoob qua tub qua ntxhais mus txog hnub uas Nau‑a nkag rau hauv lub nkoj thiab dej los nyab kiag lawv puam tsuaj tag huvsi. Tiam uas Lauj nyob kuj zoo ib yam nkaus thiab, lawv noj haus ua lag ua luam cog qoob loo ua vaj ua tsev, tiamsis hnub uas Lauj tawm hauv lub moos Xaudoo, hluavtaws lawj faj poob saum ntuj los hlawv lawv puam tsuaj tag huvsi. Hnub uas Neeg leej Tub tshwm plaws los kuj yuav zoo ib yam li ntawd. Hnub ntawd tus uas nyob saum txheej tsev las tshav, nws tej qhov txhia chaw tseem nyob hauv tsev, los tsis txhob nqes los muab. Thiab tus uas nyob tom teb tsis txhob tig rov los ib yam nkaus. Cia li nco txog Lauj tus pojniam. Tus uas xav tau nws txojsia yuav piam txojsia, tiamsis tus uas tso nws txojsia tseg, mas yuav cawm tau nws txojsia. Kuv hais rau nej tias, hmo ntawd muaj ob leeg pw ib txag, los yuav coj ib tug mus yuav tseg ib tug cia. Muaj ob tug pojniam zom zeb ua ke, los yuav coj ib tug mus yuav tseg ib tug cia.” Lawv txawm nug Yexus tias, “Tus Tswv, yuav muaj li no rau qhovtwg?” Yexus teb lawv tias, “Tsiaj tuag qhovtwg, dav noj twm yuav sau nthwv los rau qhov ntawd.” Yexus hais ib zaj paj lug rau lawv mloog qhia kom lawv thov Vajtswv tsis tseg li thiab tsis txhob qaug zog. Nws hais tias, “Hauv ib lub moos muaj ib tug yawg tu plaub uas tsis ntshai Vajtswv thiab tsis hwm neeg. Hauv lub moos ntawd muaj ib tug poj ntsuam pheej tuaj hais rau tus tu plaub ntawd tias, ‘Thov hwj kuv txojcai rau tus uas kom kuv.’ Thaum chiv thawj tug tu plaub ntawd tsis yeem ua li ntawd, tiamsis tom qab nws xav hauv lub siab tias, ‘Txawm yog kuv tsis ntshai Vajtswv thiab tsis hwm neeg, los vim tus poj ntsuam no pheej tuaj txob kuv, kuv yuav hwj nws txojcai, tsam ces qhov uas nws pheej tuaj ntawd thaum kawg yuav ua rau kuv dhuav siab tag.’ ” Tus Tswv hais tias, “Cia li mloog tus tu plaub tsis ncaj ntawd tej lus. Vajtswv yeej yuav tsis hwj cov uas nws xaiv cia lawd txoj cai lov, yog cov uas thov hu nws nruab hnub hmo ntuj? Vajtswv yuav nyiaj taus lov? Kuv hais rau nej tias, Vajtswv yuav hwj lawv txojcai sai sai. Tiamsis thaum Neeg leej Tub los, nws tseem yuav ntsib kev ntseeg hauv lub ntiajteb lov?” Yexus hais zaj paj lug no rau qee leej uas tso siab rau lawv tus kheej tias lawv ncaj ncees thiab saib tsis taus lwm tus, tias “Muaj ob tug mus thov Vajtswv rau hauv lub tuam tsev, ib tug yog Falixai, ib tug yog neeg sau se. Tus Falixai sawv ntsug thov hauv lub siab tias, ‘Vajtswv, kuv ua koj tsaug uas kuv zoo tsis thooj li lwm tus, tsis hais cov uas ntxo luag, cov ua tsis ncaj, cov uas deev luag pojniam, thiab tsis thooj li tus sau se no. Ib lub chib so kuv yoo mov ob zaug, kuv muab txhua yam uas kuv tau ib feem kaum rau koj.’ Tiamsis tus sau se sawv ntsug deb tsawv, tsis kam tsa muag ntsia saum ntuj, nws ntaus nws hauv siab hais tias, ‘Vajtswv, thov khuvleej kuv uas yog neeg muaj txim lauj!’ Kuv hais rau nej tias, thaum mus tsev tus sau se no yog tus uas suav tau tias ncaj ncees, tsis yog tus Falixai ntawd. Rau qhov txhua tus uas tsab ua loj yuav raug muab txo kom qes, tiamsis tus uas txo hwjchim yuav raug muab tsa ua loj.” Muaj neeg puag cov menyuam mos tuaj cuag Yexus xav kom Yexus kov cov menyuam ntawd. Thaum cov thwjtim pom kuj txwv lawv. Tiamsis Yexus hu cov menyuam los hais tias, “Cia cov menyuam yaus los cuag kuv, tsis txhob tav lawv, rau qhov Vajtswv lub tebchaws yog cov uas zoo li cov menyuam yaus no tug. Kuv hais tseeb rau nej tias, leejtwg tsis lees yuav Vajtswv lub tebchaws ib yam li ib tug menyuam yaus, tus ntawd yuav nkag tsis tau rau hauv lub tebchaws ntawd.” Muaj ib tug thawj coj nug Yexus tias, “Xibhwb uas zoo kawg, kuv yuav tsum ua li cas kuv thiaj tau txojsia ib txhis tsis kawg?” Yexus hais rau nws tias, “Ua cas koj hu kuv tias tus zoo kawg? Tsis muaj leejtwg zoo tsuas yog Vajtswv tib leeg xwb. Koj paub tej kevcai uas hais tias, ‘Tsis txhob deev luag poj luag txiv, tsis txhob tua neeg, tsis txhob ua tub sab, tsis txhob ua cuav timkhawv, koj yuav tsum hwm koj niam koj txiv.’ ” Tus ntawd hais tias, “Tej nqe kod kuv twb coj txhua yam txij thaum yau los lawm.” Thaum Yexus hnov li ntawd txawm hais rau nws tias, “Koj tseem tu ncua ib yam. Cia li mus muab txhua yam uas koj muaj muag es muab faib rau cov neeg pluag, koj thiaj li muaj nyiaj txiag saum ntuj ceeb tsheej, thiab cia li los raws kuv qab.” Thaum nws hnov tej lus no nws nyuaj siab kawg vim nws nplua nuj heev. Yexus tsa muag ntsia nws thiab hais tias, “Tus uas muaj nyiaj txiag ntau ceeblaj nkag tau rau hauv Vajtswv lub tebchaws. Ib tug ntxhuav nkag lub qhov koob kuj yoojyim dua tus nplua nuj nkag rau hauv Vajtswv lub tebchaws.” Cov uas hnov li ntawd txawm hais tias, “Yog li ntawd, leejtwg yuav dim tau?” Yexus hais tias, “Tej uas neeg ua tsis tau Vajtswv yeej ua tau.” Petus hais tias, “Peb twb tso peb tej vaj tse tseg raws koj tuaj.” Yexus hais rau lawv tias, “Kuv hais tseeb rau nej tias, tus uas tso vaj tse pojniam kwvtij niam txiv menyuam tseg vim yog saib rau Vajtswv lub tebchaws, tiam no nws yuav tau ntau npaug thiab tiam tom ntej nws yuav tau txojsia ib txhis tsis kawg.” Yexus txawm coj kaum ob tug thwjtim mus rau ib cag mas hais rau lawv tias, “Saib nawj, peb tabtom mus nram Yeluxalees, mas txhua yam uas cov xibhwb cev Vajtswv lus hais cia txog Neeg leej Tub yuav tiav. Rau qhov nws yuav raug muab cob rau lwm haiv neeg, mas lawv yuav thuam luag nws thiab ua saib tsis taus nws thiab nto qaub ncaug rau nws, thiab lawv yuav nplawm nws thiab muab nws tua pov tseg, mas peb hnub nws yuav ciaj sawv rov los.” Lawv tsis nkag siab txog tej no kiag li, tej lus no lub ntsiab raug muab zais ntawm lawv lawm, thiab lawv tsis paub tias Yexus hais txog dabtsi. Thaum Yexus tuaj ze lub moos Yelikhau, muaj ib tug dig muag zaum thov khawv ntawm ntug kev. Thaum nws hnov neeg coob taug kev tuaj mus, nws txawm nug tias yog dabtsi. Lawv hais rau nws tias, “Yexus uas yog neeg Naxale, taug kev tuaj mus.” Ces nws txawm qw hais tias, “Yexus uas yog Davi tus tub 'e, thov khuvleej kuv lauj!” Cov neeg uas ua ntej txawm txwv nws kom nyob twjywm, los nws yimhuab qw hais tias, “Davi tus tub 'e, thov khuvleej kuv lauj!” Yexus txawm nres nkaus hais kom coj nws los. Thaum nws los ze lawm Yexus nug nws tias, “Koj xav kom kuv ua dabtsi rau koj?” Nws teb tias, “Tus Tswv, thov pub kuv pom kev.” Yexus hais rau nws tias, “Cia li pom lauj! Koj txojkev ntseeg ua rau koj zoo kiag.” Ces tamsim ntawd tus dig muag txawm rov pom kev thiab raws Yexus qab mus qhuas Vajtswv. Thaum cov neeg sawvdaws pom li ntawd lawv kuj qhuas Vajtswv. Yexus mus rau hauv lub moos Yelikhau thiab yuav hla dhau plaws mus. Muaj ib tug yawg npe hu ua Xakhai, nws yog ib tug thawj sau se thiab nws nplua nuj. Nws xav pom tias Yexus yog leejtwg, tiamsis neeg coob heev nws thiaj ntsia tsis pom vim nws qes taub. Nws thiaj dhia tom hauv ntej nce rau saum ib tsob txiv cev thiaj ntsia pom Yexus, rau qhov Yexus yuav taug txojkev ntawd tuaj. Thaum Yexus tuaj txog ntawd Yexus tsa muag ntsia pom Xakhai txawm hais rau Xakhai tias, “Xakhai 'e, cia li nqes kiag los, rau qhov hnub no kuv yuav tsum mus so hauv koj tsev.” Xakhai txawm maj nroos nqes los tos Yexus zoo siab xyiv fab. Thaum cov neeg sawvdaws pom, lawv txawm yws hais tias, “Nws mus so hauv tus neeg muaj txim tsev.” Xakhai sawv tsees hais rau tus Tswv tias, “Tus Tswv, saib maj, kuv tej qhov txhia chaw kuv yuav muab ib nrab pub rau cov neeg pluag, thiab yog kuv tau qaum leejtwg li los, kuv yuav thim plaub npaug rov qab.” Yexus hais rau nws tias, “Hnub no txojkev dim los txog lub tsev no lawm, rau qhov tus yawg no kuj yog Aplahas li tub. Rau qhov Neeg leej Tub los nrhiav cov neeg uas ploj lawd thiab cawm kom lawv dim.” Thaum lawv tabtom mloog Yexus qhia tej no, Yexus kuj hais ib zaj paj lug rau lawv mloog rau qhov Yexus tabtom tuaj ze lub nroog Yeluxalees, thiab vim lawv xav tias Vajtswv lub tebchaws yuav cia li tshwm plaws los tamsim ntawd. Vim li no Yexus thiaj hais tias, “Muaj ib tug neeg muaj meej yuav mus rau lwm lub tebchaws deb mus txais meej mom kav tebchaws mam li rov los. Nws thiaj hu nws kaum tus tub qhe los mas muab kaum lub nyiaj rau lawv ib leeg ib mina thiab hais rau lawv tias, ‘Cia li coj mus ua lag luam txog thaum kuv rov qab los.’ Tiamsis nws cov pejxeem ntxub nws, lawv txawm txib neeg raws qab mus hais tias, ‘Peb tsis yuav tus no los kav peb.’ Thaum nws tau meej mom kav tebchaws rov los lawm nws hais kom hu cov tub qhe uas nws tau muab nyiaj rau lawd los cuag nws, yuav saib lawv ua lag luam tau tshaj thawj npaum li cas. Thawj tug los cuag nws hais tias, ‘Tus tswv, koj lub nyiaj mina ntawd tau tshaj thawj kaum mina.’ Nws hais rau tus tub qhe ntawd tias, ‘Tub qhe zoo, koj ua zoo lawm. Vim koj ua ncaj rau tej yam me me, koj yuav tau hwjchim kav kaum lub moos.’ Tus ob los hais tias, ‘Tus tswv, koj lub mina tau tshaj thawj tsib mina.’ Nws hais rau tus tub qhe ntawd tias, ‘Koj yuav tau kav tsib lub moos.’ Muaj dua ib tug los hais tias, ‘Tus tswv, koj lub nyiaj mina nyob no, kuv muab ntaub qhwv khaws cia, rau qhov kuv ntshai koj vim koj yeej yog neeg ua nruj ua tsiv. Koj sau tej uas koj tsis tau nqes dag zog ua thiab hlais tej qoob uas koj tsis tau tseb.’ Tus tswv txawm hais rau nws tias, ‘Niag tub qhe phem, kuv yuav muab koj tej lus txiav txim rau koj ntag. Koj yeej paub tias kuv yog neeg ua nruj ua tsiv thiab kuv sau tej uas kuv tsis tau nqes dag zog ua thiab hlais tej uas kuv tsis tau tseb lov? Yog li ntawd, ua cas koj tsis muab kuv lub nyiaj mus tso rau hauv tsev cia nyiaj, es thaum kuv los kuv thiaj tau kuv cov nyiaj thiab tau cov paj?’ Ces nws txawm hais rau cov neeg uas nyob ntawd tias, ‘Cia li muab nws lub nyiaj mina rho mus rau tus uas muaj kaum mina.’ (Lawv hais rau nws tias, ‘Tus tswv, nws twb muaj kaum mina lawm nev.’) ‘Kuv hais rau nej tias, txhua tus uas muaj lawd yuav muab tsav ntxiv rau nws, tiamsis tus uas tsis muaj, txawm yog tej uas nws muaj los yuav muab rho ntawm nws mus. Kuv cov yeeb ncuab uas tsis yuav kuv kav lawv ntawd, cia li coj lawv los rau ntawm no thiab muab tua tab meeg kuv.’ ” Thaum Yexus hais tej lus no tag lawd, nws txawm ua lawv ntej mus rau nram Yeluxalees. Thaum nws tuaj ze lub zos Npefake thiab lub zos Npethani ntawm lub roob uas hu ua roob Txiv Aulib, nws txib ob tug thwjtim mus, hais tias, “Neb cia li mus rau lub zos uas nyob tom hauv ntej, mas thaum neb nkag rau hauv neb yuav pom ib tug menyuam nees luav khi cia, tsis tau muaj leejtwg caij dua li. Neb cia li daws cab los rau ntawm no. Yog leejtwg nug neb tias, ‘Neb muab daws ua dabtsi?’ neb cia li hais li no tias, ‘Tus Tswv cheem tsum siv.’ ” Ob tug uas nws txib ntawd txawm mus ntsib raws li Yexus hais rau ob tug. Thaum ob tug tabtom daws tus menyuam nees luav ntawd, tus tswv tsiaj txawm hais rau ob tug tias, “Neb daws tus menyuam nees luav ua dabtsi?” Ob tug hais tias, “Tus Tswv cheem tsum siv.” Ces ob tug txawm cab tus menyuam nees luav los txog Yexus, thiab muab ob tug tej tsho ntev pua saum tus menyuam nees luav nrob qaum thiab kom Yexus caij. Thaum Yexus caij mus mas tej neeg muab lawv tej tsho ntev pua txojkev. Thaum Yexus tuaj ze txojkev uas nqes ntawm lub roob Txiv Aulib lawm, cov thwjtim sawvdaws kuj pib zoo siab xyiv fab tsa suab nrov qhuas Vajtswv rau txhua yam txujci phimhwj uas lawv tau pom, thiab hais tias, “Tus vajntxwv uas tuaj hauv tus Tswv lub npe tau nyob kaj siab lug. Thov kom muaj kev kaj siab lug rau saum ntuj thiab muaj koob meej rau saum ntuj uas siab kawg nkaus.” Cov Falixai qee leej uas nrog cov neeg ntawd ua ke hais rau Yexus tias, “Xibhwb, cia li txwv koj cov thwjtim tsis txhob qw qw.” Yexus teb tias, “Kuv hais rau nej tias, yog lawv cov no nyob twjywm lawm los tej pob zeb yeej yuav qw nrov.” Thaum nws tuaj ze thiab pom Yeluxalees lawm nws kuj quaj lub nroog ntawd, hais tias, “Hnub no kheev koj lam paub tej uas pub kev kaj siab lug rau koj. Tiamsis nimno tej ntawd raug muab zais ntawm koj lub qhov muag lawm. Rau qhov lub sijhawm los yuav txog koj, mas koj cov yeeb ncuab yuav tsub av tawm tsam koj thiab vij nkaus koj kaw koj txhua fab. Lawv yuav muab koj ntsawm rau hauv pem teb, tag nrho koj thiab koj cov menyuam uas nyob hauv koj, thiab yuav tsis tseg tej txhib zeb ib lub tib ib lub rau hauv koj, vim yog koj tsis paub lub sijhawm uas Vajtswv los xyuas koj.” Yexus txawm nkag mus rau hauv lub tuam tsev mas pib ntiab cov neeg ua lag ua luam, thiab hais rau lawv tias, “Twb muaj lus sau cia hais tias, ‘Kuv lub tuam tsev yuav ua lub tsev thov Vajtswv,’ tiamsis nej muab ‘ua qhov rau tub sab nkaum.’ ” Yexus niaj hnub qhuab qhia rau hauv lub tuam tsev. Ces cov pov thawj hlob thiab cov xibhwb qhia Vajtswv kevcai thiab cov uas ua thawj txawm nrhiav kev txov Yexus, tiamsis lawv nrhiav tsis tau ib lub ncauj kev uas yuav ua tau vim yog cov neeg sawvdaws dai siab qas dhuam rau Yexus tej lus. Muaj ib hnub thaum Yexus qhuab qhia cov neeg hauv lub tuam tsev thiab tshaj tawm txoj xov zoo, cov pov thawj hlob thiab cov xibhwb qhia Vajtswv kevcai thiab cov kev txwj laus kuj tuaj cuag nws. Lawv hais rau Yexus tias, “Cia li hais rau peb saib, koj muaj hwjchim dabtsi thiaj ua tau tej no thiab leejtwg muab lub hwjchim no rau koj?” Yexus teb lawv tias, “Kuv yuav nug nej ib los thiab. Qhia kuv saib, txoj kevcai raus dej uas Yauhas ua ntawd, los saum ntuj los lossis los ntawm neeg los?” Lawv txawm sablaj hais tias, “Yog peb hais tias, ‘Los saum ntuj los,’ nws yuav hais tias, ‘Ua cas nej tsis ntseeg Yauhas?’ Tiamsis yog peb hais tias, ‘Los ntawm neeg los,’ cov pejxeem sawvdaws yuav xuas pob zeb ntaus peb rau qhov lawv yeej hwm tias Yauhas yog ib tug xibhwb cev Vajtswv lus.” Lawv txawm teb Yexus tias lawv tsis paub tias los qhovtwg los. Yexus thiaj hais rau lawv tias, “Kuv kuj tsis qhia rau nej tias kuv muaj hwjchim dabtsi thiaj ua tau tej no.” Yexus txawm pib ua lus piv txwv hais rau cov neeg tias, “Muaj ib tug yawg cog tau ib lub vaj txiv hmab thiab muab tso rau ib cov tu faib txiv ces txawm mus nyob lwm tebchaws ntev lawm. Thaum txog lub caij de txiv, nws txib ib tug tub qhe mus cuag cov uas tu lub vaj ntawd xwv lawv thiaj faib cov txiv ib txhia rau tus tswv. Tiamsis cov uas tu lub vaj txawm muab tus tub qhe ntawd ntaus thiab ntiab nws rov mus tes dawb tes do. Mas tus tswv vaj rov tso dua ib tug tub qhe mus, los lawv kuj muab tus ntawd ntaus thiab ua saib tsis taus nws, thiab tso nws rov mus tes dawb tes do. Nws kuj tso tus peb mus, los lawv kuj ua rau nws raug mob thiab muab nws ntiab tawm mus. Tus tswv vaj txawm hais tias, ‘Kuv yuav ua li cas? Kuv yuav tso kuv tus tub uas kuv hlub mus. Nyaj lawv yuav hwm nws.’ Tiamsis thaum cov uas tu lub vaj pom tus tub ntawd lawv sib hais tias, ‘Tus no yog tus uas saws nws qub txeeg qub teg. Peb cia li muab nws tua mas tej qub txeeg qub teg yuav poob rau peb.’ Lawv txawm muab nws pov rau nraum lub vaj thiab muab tua pov tseg. Yog li ntawd tus tswv vaj yuav ua li cas rau lawv? Nws yeej yuav los muab cov uas tu lub vaj ntawd ua kom puam tsuaj thiab muab lub vaj txiv hmab rau lwm cov tu.” Thaum lawv hnov li ntawd lawv txawm hais tias, “Tsis txhob cia muaj li no.” Yexus ntsia ntsoov rau lawv hais tias, “Tej lus no uas sau cia lawd lub ntsiab yog dabtsi? “ ‘Lub pob zeb uas cov Kws ua tsev muab xyeeb tseg lawm twb muab los teeb ua thawj lub rau ntawm kaum tsev lawm.’ Txhua tus uas ntog mus tsiam lub pob zeb ntawd yuav tawg ua tej dwb daim, lub pob zeb poob los tsuam leejtwg tus ntawd yuav ntsoog tag.” Cov xibhwb qhia Vajtswv kevcai thiab cov pov thawj hlob txawm nrhiav kev ntes Yexus lub sijhawm ntawd, rau qhov lawv paub tias Yexus hais zaj paj lug no raug lawv, tiamsis lawv ntshai cov pejxeem. Lawv txawm soj nraim Yexus thiab tso qee leej ua txuj ua li tus ncaj ncees mus tshuaj Yexus xwv lawv thiaj nyas tau Yexus tej lus thiab muab tau Yexus cob rau hauv tus tswv xeev li hwjchim txiav txim. Lawv txawm nug Yexus tias, “Xibhwb, peb paub tias koj hais thiab qhuab qhia raws li qhov tseeb, thiab koj tsis saib leejtwg ntsej muag, koj tsuas qhia Vajtswv txoj kev raws li muaj tseeb xwb. Mas tsim nyog peb them se rau Xixa los tsis them?” Yexus twb paub lawv tej tswvyim phem thiaj hais rau lawv tias, “Cia li muab ib lub nyiaj denalia los rau kuv saib. Lub ntsej muag thiab lub npe uas txaug no yog leejtwg?” Lawv teb tias, “Yog Xixa li.” Yexus txawm hais rau lawv tias, “Yog li no yam uas yog Xixa li cia li muab rau Xixa, yam uas yog Vajtswv li cia li muab rau Vajtswv.” Lawv nyas tsis tau Yexus tej lus tab meeg cov pejxeem, lawv xav tsis thoob rau tej lus uas Yexus teb, lawv thiaj ntsiag to lawm. Cov Xadukai qee leej uas qhia hais tias tsis muaj qhov uas sawv hauv qhov tuag los txawm tuaj cuag Yexus, mas lawv thiaj thom Yexus hais tias, “Xibhwb, Mauxe twb sau cia rau peb tias, ‘Yog leejtwg tuag lawm nws tus pojniam tsis tau muaj menyuam, ib tug kwvtij yuav tsum yuav tus pojniam ntawd thiaj tuav tau tus uas tuag li keeb kwm cia.’ Muaj xya tus kwvtij. Tus hlob yuav pojniam lawm li tuag tsis tau muaj menyuam. Mas tus ob thiab tus peb kuj yuav tus pojniam ntawd ua pojniam. Tag nrho xya leej kuj yuav nws ib yam nkaus los tsis muaj menyuam txawm tuag tag lawm. Thaum kawg tus pojniam ntawd kuj tuag lawm thiab. Yog li ntawd, hnub uas ciaj sawv rov los, tus pojniam ntawd yuav ua leejtwg li pojniam? Rau qhov nws twb ua xya leej ntawd li pojniam lawm.” Yexus hais rau lawv tias, “Tiam neeg no muaj kev sib yuav ua txij ua nkawm, tiamsis cov neeg uas suav tias tsim nyog nyob rau tiam tom ntej thiab ciaj sawv hauv qhov tuag rov los yuav tsis muaj kev sib yuav ua txij ua nkawm lawm, rau qhov lawv tsis txawj tuag dua li lawm. Lawv zoo ib yam li cov tubtxib saum ntuj thiab yog Vajtswv cov menyuam, vim lawv yog cov uas ciaj sawv rov los lawm. Qhov uas neeg ciaj sawv hauv qhov tuag rov los ntawd, Mauxe twb qhia rau hauv zaj uas hais txog tsob ntoo kub hnyiab, yog qhov chaw uas nws hu tus Tswv tias yog Aplahas tus Vajtswv thiab yog Yiha tus Vajtswv thiab yog Yakhauj tus Vajtswv. Vajtswv tsis yog cov neeg tuag tus Vajtswv, nws yog cov neeg ciaj tus Vajtswv. Rau qhov txhua tus puavleej tseem muaj txojsia nyob rau ntawm Vajtswv.” Cov xibhwb qhia Vajtswv kevcai qee leej txawm hais rau Yexus tias, “Xibhwb, koj hais tau zoo kawg.” Lawv tsis kav nug Yexus dua li lawm. Yexus txawm nug lawv tias, “Lawv hais tau li cas tias tus Khetos yog Davi li tub? Rau qhov Davi yeej hais hauv phau Ntawv Nkauj hais tias, “ ‘Tus Tswv hais rau kuv tus tswv tias, “Cia li zaum ntawm kuv sab xis, mus txog thaum kuv muab koj cov yeeb ncuab ua koj lub rooj tiag taw.” ’ Yog Davi twb hu tus Khetos tias ‘tus Tswv,’ nws yuav ua li cas ua tau Davi li tub?” Thaum cov neeg sawvdaws tabtom mloog tej lus qhia, Yexus hais rau nws cov thwjtim tias, “Cia li ceev faj cov xibhwb qhia Vajtswv kevcai uas nyiam hnav lub tsho ntev mus mus los los thiab nyiam kom luag hwm lawv tom tej tshav puam, thiab nyiam zaum tej rooj siab hauv tej tsev sablaj, thiab thaum muaj rooj noj rooj haus lawv nyiam zaum sam tsum. Lawv txeeb cov poj ntsuam tej vaj tse thiab thov Vajtswv ntev ntev rau luag pom. Lawv cov no yimhuab yuav raug txim hnyav heev dua.” Yexus tsa muag ntsia pom cov neeg nplua nuj tso nyiaj rau hauv lub phij xab tso nyiaj, thiab nws pom ib tug poj ntsuam pluag pluag tso ob lub txiaj toog liab rau hauv. Yexus txawm hais tias, “Kuv hais tseeb rau nej tias, tus poj ntsuam pluag no tso nyiaj rau hauv ntau dua txhua tus. Rau qhov lawv txhua tus rho tej nyiaj uas lawv muaj ntau nplua mias lawm mentsis tuaj tso rau hauv tiamsis tus pojniam no lub neej txom nyem kawg li los nws muab txhua yam uas yug nws txojsia tso rau hauv.” Thaum muaj qee leej qhuas lub tuam tsev tias xuas tej txhib zeb zoo nkauj ua thiab xuas tej uas luag coj tuaj xyeem pub ua kom zoo nkauj, Yexus txawm hais tias, “Tej uas nej pom no, mas muaj ib hnub twg tej txhib zeb uas tib ib lub tshooj ib lub no yuav tsis tshuav ib lub uas tsis raug muab ua pob tag.” Lawv txawm nug Yexus tias, “Xibhwb, tej xwm txheej no yuav tshwm los thaum twg, thiab muaj yam txujci twg qhia kom paub tias twb ze sijhawm uas yuav tshwm los?” Yexus hais tias, “Cia li ceev faj tib zoo tsam ces nej raug ntxias yuam kev. Rau qhov yuav muaj ntau leej tuav kuv lub npe los hais tias, ‘Kuv yog tus ntawd ntag,’ thiab hais tias, ‘Lub sijhawm los ze lawm.’ Tsis txhob raws lawv mus. Thaum nej hnov suab ua tsov ua rog thiab kev kub ntxhov tsis txhob ntshai, rau qhov tej no yeej yuav tsum tshwm los ua ntej tiamsis hnub kawg tsis tau los txog tamsid.” Yexus txawm hais rau lawv tias, “Ib lub tebchaws yuav sawv tawm tsam rau ib lub tebchaws, ib tug vajntxwv yuav tawm tsam rau ib tug vajntxwv, yuav muaj ntuj qeeg loj thiab yuav muaj kev tshaib kev nqhis thiab mob kis rau ntau qhov, thiab yuav muaj tej xwm txheej txaus ntshai thiab tej txujci tseem ceeb los saum ntuj los. Tiamsis thaum tsis tau muaj tej xwm txheej no luag yuav ntes nej thiab tsim txom nej, muab nej cob rau tej tsev sablaj thiab tej tsev lojfaj, thiab yuav coj nej mus rau ntawm tej vajntxwv thiab cov thawj kav xubntiag vim yog tim kuv lub npe. Lub sijhawm ntawd yog lub sijhawm uas nej ua tau timkhawv. Yog li no, nej yuav tsum nco ntsoov tias tsis txog yuav npaj ua ntej tias yuav hais li cas daws nej zaj, rau qhov kuv yuav pub tej lus thiab tswvyim rau nej hais uas nej cov yeeb ncuab yuav tiv tsis tau thiab cav tsis yeej. “Txawm yog niam txiv kwvtij tej txheeb ze thiab kwvluag los lawv yuav muab nej cob rau luag, mas luag yuav muab nej qee leej tua pov tseg. Ib tsoom neeg yuav ntxub nej vim yog tim kuv lub npe, los nej ib txog plaubhau yuav tsis puam tsuaj. Nej yuav tau txojsia vim nej ua siab ntev thev. “Thaum nej pom tub rog vij nkaus lub nroog Yeluxalees, cia li paub tias ze lub sijhawm uas lub nroog yuav puam tsuaj tag nyob do cuas. Thaum ntawd cov uas nyob hauv Yudia cia li khiav mus rau pem tej roob, thiab cov uas nyob hauv lub nroog cia li tawm khiav mus, thiab cov uas nyob tom teb tsis txhob rov los rau hauv nroog. rau qhov lub sijhawm ntawd yog hnub uas teem txim kom txhua yam uas sau cia lawd thiaj li tiav. Hnub ntawd cov uas suab menyuam thiab cov uas muaj menyuam noj mis yuav txom nyem kawg li lauj! Vim tias yuav muaj kev txom nyem loj kawg rau lub ntiajteb thiab txojkev npau taws yuav raug haiv neeg no. Lawv yuav raug hniav ntaj hniav riam tuag tag thiab yuav raug muab ntes coj mus rau hauv txhua lub tebchaws. Thiab lwm haiv neeg yuav tsuj lub nroog Yeluxalees mus txog thaum lwm haiv neeg lub sijhawm tiav. “Yuav muaj txujci tseem ceeb tshwm rau saum lub hnub lub hli thiab tej hnub qub huvsi, thiab ib tsoom tebchaws hauv ntiajteb no yuav raug kev txom nyem thiab yuav tsis pom qab xav vim lub suab nrov uas dej hiavtxwv ntas tej niag nthwv. Tej neeg yuav feeb pes tsias vim ntshai heev thiab tos ntsoov tej uas yuav tsim los raug lub ntiajteb, rau qhov tej uas muaj hwjchim saum nruab ntug yuav raug muab co ua zog koog. Thaum ntawd lawv yuav pom Neeg leej tub nrog nws lub hwjchim thiab meej mom loj nrog huab saum ntuj los. Thaum tej xwm txheej no pib muaj tshwm los, cia li sawv ntsug thiab tsa taubhau, vim qhov uas txhiv nej dim los ze lawm.” Yexus ua paj lug hais rau lawv tias, “Cia li saib tsob ntoo cev thiab tej ntoo huvsi. Thaum pib hlav nplooj, nej kuj pom thiab paub tias yuav txog lub caij ntuj kub lawm. Ib yam li ntawd, thaum nej pom tej xwm txheej no tshwm los nej kuj paub tias Vajtswv lub tebchaws los ze lawm. Kuv hais tseeb rau nej tias, tiam neeg no yuav tsis tau dua tag mus txog thaum txhua yam no tshwm los lawm. Lub ntuj thiab lub ntiajteb yuav dua mus, tiamsis kuv tej lus yuav tsis ploj kiag li. “Yuav tsum ceev faj zoo tsam ces nej lub siab qaug rau tej kev tsis tsheej haj, kev qaug dej qaug cawv thiab tej kev txhawj txog lub neej tiam no ces hnub ntawd yuav los txog nej rau thaum nej xav tsis txog, ib yam li mag rooj hlua. Rau qhov hnub ntawd yuav los raug txhua tus uas nyob thoob plaws hauv lub ntiajteb. Nej yuav tsum zov tos txhua lub sijhawm, thiab thov Vajtswv pab kom nej muaj zog dim txhua yam xwm txheej uas yuav tshwm los no thiab sawv ntsug tau rau ntawm Neeg leej Tub xubntiag.” Yexus niaj hnub qhuab qhia hauv lub tuam tsev, mas tsaus ntuj nws tawm mus so saum lub roob uas hu ua roob Txiv Aulib. Thaum sawv ntxov cov neeg sawvdaws tuaj cuag nws hauv lub tuam tsev mloog nws qhia. Kevcai Noj Ncuav tsis Xyaw Keeb uas hu ua kevcai Hla Dhau twb los yuav txog. Cov pov thawj hlob thiab cov xibhwb qhia Vajtswv kevcai nrhiav kev saib yuav muab Yexus tua pov tseg li cas, vim lawv ntshai cov pejxeem. Thaum ntawd Xatas tshoov Yudas uas hu tias Ikhali‑au uas yog ib tug hauv kaum ob tug thwjtim lub siab. Yudas txawm mus nrog cov pov thawj hlob thiab cov nom tswv uas saib xyuas lub tuam tsev sablaj tias yuav muab Yexus cob rau lawv li cas. Lawv zoo siab heev thiab cog lus tias yuav muab nyiaj rau Yudas. Nws txawm hais hum thiab nrhiav sijhawm muab Yexus cob rau lawv, rau thaum tsis muaj neeg. Thaum txog hnub uas ua kevcai Noj Ncuav tsis Xyaw Keeb yog hnub uas yuav tsum tua menyuam yaj ua kevcai Hla Dhau. Yexus txawm txib Petus thiab Yauhas mus hais tias, “Cia li mus npaj kevcai Hla Dhau rau peb noj.” Ob tug hais rau Yexus tias, “Yuav cia wb npaj noj rau qhovtwg?” Nws hais rau ob tug tias, “Thaum neb mus rau hauv lub nroog, mas yuav muaj ib tug yawg nqa ib lub laujkaub dej ntsib neb. Nws nkag rau lub tsev twg, neb cia li raws nws qab mus rau hauv, thiab hais rau tus tswv tsev ntawd tias, ‘Tus xibhwb hais rau koj tias, Chav txais qhua uas kuv yuav nrog kuv cov thwjtim noj kevcai Hla Dhau nyob qhovtwg?’ Nws yuav qhia ib chav loj uas nyob txheej saud muaj rooj tog txhij lawm. Cia li npaj qhov ntawd.” Ob tug txawm mus thiab ntsib raws li Yexus hais rau ob tug, ces ob tug thiaj npaj ua kevcai Hla Dhau txhij zog. Thaum txog sijhawm, Yexus nrog nws cov tubtxib nyob pheeb ntawm rooj mov, thiab hais rau lawv tias, “Kuv xav xav nrog nej noj pluas mov kevcai Hla Dhau no ua ntej uas kuv tsis tau raug tsim txom, rau qhov kuv hais rau nej tias, kuv yuav tsis noj li no mus txog thaum kevcai Hla Dhau tiav rau hauv Vajtswv lub tebchaws.” Thiab nws muab ib lub khob los. Thaum ua Vajtswv tsaug lawd, nws hais tias, “Cia li txais lub khob no mus sib faib haus, rau qhov kuv hais rau nej tias txij nimno mus kuv yuav tsis haus cawv txiv hmab mus txog thaum Vajtswv lub tebchaws los.” Thiab nws muab ib lub ncuav los. Thaum ua Vajtswv tsaug lawd, nws muab ntais cev rau lawv hais tias, “No yog kuv lub cev uas muab pub rau nej. Cia li ua li no thiaj nco ntsoov kuv.” Thaum noj hmo tag, Yexus txawm muab lub khob los ua ib yam nkaus hais tias, “Lub khob uas raug muab nchuav rau nej no yog lo lus cog tseg tshiab hauv kuv cov ntshav. Tus uas yuav fav xeeb rau kuv txhais tes kuj nrog kuv koom saum rooj no. Neeg leej Tub yuav mus raws li uas teem tseg cia lawd tiamsis tus uas fav xeeb rau nws yeej yuav raug txom nyem kawg.” Ces lawv txawm sib nug saib lawv cov leejtwg yog tus yuav ua li ntawd. Cov thwjtim sib cam tias yuav pom tias lawv cov leejtwg yog tus loj dua. Yexus txawm hais rau lawv tias, “Lwm haiv neeg tej vajntxwv yeej kav rawv cov pejxeem, thiab cov uas muaj hwjchim kav rov hu lawv tus kheej tias yog neeg siab dav pab luag. Tiamsis nej cov tsis thooj li ntawd. Nej cov tus uas ua loj dua ntais cia li ua zoo li tus me dua ntais, thiab tus uas ua thawj cia li ua zoo li tus qhev. Leejtwg loj dua, yog tus uas zaum noj lossis yog tus uas ua qhev? Yog tus uas zaum noj los tsis yog? Tiamsis kuv nrog nej nyob zoo li tus uas ua qhev. “Nej yog cov uas nrog nraim kuv nyob rau thaum kuv raug sim siab txom nyem, mas kuv npaj ib lub tebchaws rau nej ib yam li kuv Txiv npaj rau kuv lawm, kom nej thiaj tau noj tau haus ntawm kuv lub rooj hauv kuv lub tebchaws, thiab nej yuav tau zaum saum tej zwm txwv txiav txim rau kaum ob xeem Yixayee. “Ximoos, Ximoos 'e, saib maj, Xatas twb thov nej lawm yuav muab nej tshau ib yam li tshau mog, tiamsis kuv twb thov Vajtswv pab kom koj kev ntseeg tsis txhob tu. Mas thaum koj tig rov los lawd, koj cia li txhawb koj cov kwvtij lub zog.” Petus hais rau Yexus tias, “Tus Tswv, kuv yeej npaj txhij yuav nrog koj raug kaw hauv tsev lojfaj thiab nrog koj tuag ua ke.” Yexus hais tias, “Petus 'e, kuv hais rau koj tias, hnub no thaum qaib tsis tau qua koj yuav tsis lees paub kuv txog peb zaug.” Yexus hais rau lawv tias, “Thaum kuv txib nej tawm mus es tsis muaj hnab nyiaj thiab hnab thoob puab thiab khau nej tu ncua dabtsi?” Lawv teb tias, “Tsis tu ncua dabtsi.” Yexus txawm hais rau lawv tias, “Nimno leejtwg muaj hnab nyiaj kuj cia li coj mus, thiab coj hnab thoob puab ib yam nkaus. Tus uas tsis muaj ntaj kuj cia li muab nws lub tsho ntev muag mus yuav ntaj. Kuv hais rau nej tias tej lus uas muab sau cia lawd yuav tsum tiav rau hauv kuv, uas hais tias, ‘Nws raug muab suav rau hauv cov neeg muaj txim.’ Tej uas muab sau tseg hais txog kuv tabtom tiav.” Lawv txawm hais tias, “Tus Tswv, ntawm no muaj ob rab ntaj.” Yexus hais rau lawv tias, “Txaus lauj!” Yexus txawm tawm mus pem lub roob Txiv Aulib ib yam li txeev mus, nws cov thwjtim kuj raws nws qab mus. Thaum nws mus txog lawm, Yexus hais rau lawv tias, “Nej cia li thov Vajtswv kom thiaj tsis raug kev sim siab.” Yexus txawm ncaim lawv mus deb li laim ib pob zeb, mas nws txhos caug thov Vajtswv hais tias, “Au leej Txiv, yog koj pom zoo, thov rho lub khob no ntawm kuv mus. Txawm li cas kuj xij, tsis txhob ua raws li kuv lub siab, cia ua raws li koj lub siab.” [Muaj ib tug tubtxib saum ntuj los tshwm rau Yexus thiab txhawb nws lub zog. Yexus txhawj heev kawg li, nws yimhuab thov Vajtswv heev, nws tawm hws zoo yam nkaus li ntshav nrog tej teev rau hauv av.] Thaum Yexus thov tag nws sawv los rau ntawm cov thwjtim, pom lawv tsaug zog ua txhawj ntsuav, nws txawm hais rau lawv tias, “Nej tsaug zog ua dabtsi? Cia li sawv tsees thov Vajtswv, kom nej thiaj tsis raug kev sim siab.” Thaum Yexus tseem tabtom hais lus, txawm muaj ib pab neeg coob tuaj, thiab tus yawg uas hu ua Yudas uas yog ib tug hauv kaum ob tug thwjtim coj lawv tuaj. Yudas txav los ze yuav nwj Yexus, tiamsis Yexus hais rau nws tias, “Yudas 'e, koj yuav nwj fav xeeb rau Neeg leej Tub lov?” Thaum cov uas nrog Yexus pom tias yuav tshwm xwm, lawv txawm hais tias, “Tus Tswv, peb xuas ntaj tiv lov?” Muaj ib tug txawm tib ntag tus tuam pov thawj hlob tus tub qhe txiav nws sab nplooj ntseg xis tu nrho. Yexus hais tias, “Cia li lauj!” Ces Yexus txawm cev tes npuab tus ntawd sab qhov ntsej kho kom zoo kiag. Yexus txawm hais rau cov pov thawj hlob thiab cov thawj rog uas saib xyuas lub tuam tsev thiab cov kev txwj laus uas tawm tuaj ntes nws hais tias, “Nej coj ntaj coj qws tuaj ntes kuv ib yam li tawm mus ntes tub sab lov? Thaum kuv niaj hnub nrog nej nyob hauv lub tuam tsev, nej ho tsis cev tes ntes kuv. Tiamsis no yog nej li sijhawm thiab yog lub hwjchim tsaus ntuj li sijhawm.” Lawv txawm ntes Yexus coj mus rau hauv tus tuam pov thawj hlob lub tsev. Petus raws Yexus qab deb deb mus. Thaum lawv rauv taws nte hauv lub plawv tshav puam ntawm lub tsev thiab zaum lawm, Petus kuj nrog lawv zaum ua ke. Muaj ib tug nkauj qhev pom Petus zaum ntawm cov duab hluavtaws lam lug, txawm ntsia ntsoov rau thiab hais tias, “Tus no twb nrog Yexus ua ke thiab.” Tiamsis Petus tsis lees, nws hais tias, “Tus muam 'e, kuv tsis paub tus ntawd kiag li.” Dhau ntawd ib pliag muaj dua ib tug pom Petus txawm hais tias, “Koj yeej yog lawv cov ib tug thiab.” Petus hais tias, “Txiv ntxawm 'e, kuv tsis yog.” Dhau ntawd kwvlam ib teev, muaj dua ib tug hais tawv tawv tias, “Tus no yeej nrog Yexus ua ke tiag tiag li, vim nws twb yog neeg Kalilais.” Petus hais tias, “Txiv ntxawm 'e, kuv yeej tsis paub tej uas koj hais kod.” Thaum Petus tseem tabtom hais li ntawd qaib txawm qua tamsid. Tus Tswv txawm tig los ntsia Petus, mas Petus nco dheev txog tej lus uas tus Tswv tau hais rau nws tias, “Hnub no thaum qaib tsis tau qua koj yuav tsis lees paub kuv peb zaug.” Petus txawm tawm mus rau sab nraud quaj nyuaj siab heev. Cov uas ntes Yexus kuj thuam luag thiab ntaus Yexus. Lawv muab ntaub qhwv Yexus qhov muag nug nws tias, “Cia li cev Vajtswv lus. Saib leejtwg ntaus koj?” Thiab lawv tseem hais ntau yam tuam mom Yexus. Thaum kaj ntug cov kev txwj laus hauv cov pejxeem thiab cov pov thawj hlob thiab cov xibhwb qhia Vajtswv kevcai tuaj txoos ua ke. Lawv coj Yexus mus rau hauv lawv lub chaw sablaj. thiab hais tias, “Yog koj yog tus Khetos kuj cia li hais rau peb.” Tiamsis Yexus hais rau lawv tias, “Txawm yog kuv hais rau nej los nej yuav tsis ntseeg. thiab yog kuv nug los nej yuav tsis teb. Tiamsis txij no mus Neeg leej Tub yuav zaum ntawm Vajtswv uas muaj hwjchim loj kawg sab xis.” Lawv txhua tus txawm hais tias, “Yog li ntawd, koj yog Vajtswv tus Tub lov?” Yexus hais rau lawv tias, “Nej hais tias kuv yog.” Lawv txawm hais tias, “Peb tseem yuav dua timkhawv li cas? Peb twb hnov nws lub qhov ncauj hais ntag.” Lawv sawvdaws txawm sawv tsees coj Yexus mus cuag Philaj. Lawv pib kom Yexus hais tias, “Peb pom tus no tabtom ntxeev peb lub tebchaws. Nws txwv kom peb tsis txhob them se rau Xixa thiab hais tias nws yog tus Khetos, yog ib tug vajntxwv.” Philaj txawm nug Yexus tias, “Koj yog cov Yudai tus vajntxwv lov?” Yexus hais tias, “Yog li koj hais.” Philaj txawm hais rau cov pov thawj hlob thiab cov neeg ntawd tias, “Kuv tsis pom tus no muaj ib qho txhaum kiag li.” Tiamsis lawv hais tawv qhawv tias, “Tus no tshum cov pejxeem thiab qhuab qhia thoob plaws Yudia txij ntua Kalilais los txog ntawm no.” Thaum Philaj hnov li ntawd, nws txawm nug tias tus ntawd yog neeg Kalilais lov? Thaum nws paub tias Yexus nyob hauv Helauj li kav xyuam, nws txawm xa Yexus mus cuag Helauj uas tseem nyob hauv Yeluxalees rau lub sijhawm ntawd. Thaum Helauj pom Yexus nws kuj zoo siab heev rau qhov nws twb xav pom Yexus ntev los lawm rau qhov nws twb hnov txog Yexus, thiab nws vam tias yuav pom Yexus ua ib yam txujci tseem ceeb. Nws txawm nug Yexus ntau qhov tiamsis Yexus tsis teb li. Cov pov thawj hlob thiab cov xibhwb qhia Vajtswv kevcai kuj sawv ntawd siv zog kom Yexus heev kawg. Helauj thiab nws cov tub rog kuj saib tsis taus thuam luag Yexus. Thaum muab ib cev tsoos zoo nkauj kho rau Yexus hnav, Helauj txawm xa Yexus rov mus rau Philaj. Helauj thiab Philaj txawm sib raug zoo rau hnub ntawd, rau qhov yav tag los ob tug ua yeeb ncuab. Philaj txawm hu cov pov thawj hlob thiab cov thawj thiab cov pejxeem tuaj txoos ua ke, thiab hais rau lawv tias, “Nej coj tus no tuaj cuag kuv hais tias nws tshum cov pejxeem kom fav xeeb. Kuv twb tshuaj saib nws tab meeg nej los kuv tsis pom tias nws muaj kev txhaum raws li nej kom nws, thiab Helauj kuj tsis pom nws muaj kev txhaum rau qhov Helauj twb xa nws rov los cuag kuv. Saib maj, tus no yeej tsis muaj ib qhov txhaum uas tsim nyog muab rau txim tuag. Vim li no kuv yuav muab nws nplawm thiab tso nws dim.” Tiamsis cov neeg ib txhij qw hais tias, “Muab tus no tua pov tseg, es tso Npalanpa rau peb.” Npalanpa yeej raug kaw hauv tsev lojfaj vim yog tshum neeg fav xeeb hauv lub nroog thiab tua neeg. Philaj tseem xav tso Yexus dim thiaj hais rau lawv dua ib zaug, tiamsis lawv qw nrov hais tias, “Muab nws teem, muab nws teem rau saum khaublig ntoo.” Philaj hais rau lawv zaum peb tias, “Ua cas muab teem? Nws tau ua txhaum dabtsi? Kuv tsis pom nws ua txhaum dabtsi uas yuav tsim nyog tuag. Vim li no kuv yuav muab nws nplawm thiab tso nws mus.” Tiamsis lawv qw nrov nrov txhib kom muab Yexus teem rau saum khaublig ntoo, ces lawv lub suab txawm kov yeej. Philaj thiaj txiav txim raws li lawv thov. Nws thiaj tso tus uas lawv thov ntawd yog tus raug kaw hauv tsev lojfaj vim yog tshum neeg fav xeeb thiab tua neeg. Thiab nws muab Yexus cob rau lawv ua raws li lawv lub siab. Thaum lawv tabtom coj Yexus mus, lawv yuam Ximoos uas yog neeg Khulene taug kev pem yaj sab tuaj. Lawv txawm muab tus khaublig ntoo rau nws kwv raws Yexus qab mus. Muaj neeg coob coob thiab ib co pojniam uas ntaus hauv siab quaj ntsuag raws Yexus qab mus. Yexus tig los ntsia lawv thiab hais tias, “Yeluxalees cov ntxhais 'e, tsis txhob quaj kuv, cia li quaj nej tus kheej thiab nej cov menyuam nawj. Rau qhov yuav txog lub sijhawm uas luag yuav hais tias, ‘Cov pojniam mooj thiab lub plab uas tsis tau xeeb dua menyuam thiab tej txiv mis uas menyuam tsis tau ntxais dua tau nyob kaj siab lug.’ Lub sijhawm ntawd lawv yuav pib hu rau tej roob tias, ‘Cia li nphau los tsuam peb,’ thiab hu rau tej pov roob tias, ‘Cia li txhub kiag peb.’ Thaum tsob ntoo nyoos, lawv twb ua li no, ces thaum tsob ntoo qhuav lawm lawv tseem yuav ua li cas?” Lawv kuj coj dua ob tug yawg neeg phem mus tua pov tseg nrog Yexus ua ke. Thaum lawv mus txog lub chaw uas hu tias roob Txha Taubhau, lawv txawm muab Yexus teem rau saum khaublig ntoo rau qhov ntawd, thiab muab ob tug neeg phem ntawd teem nrog Yexus, sab xis ib tug sab laug ib tug. Yexus hais tias, “Au kuv Txiv, thov daws lawv lub txim, vim lawv tsis paub tias lawv ua dabtsi.” Lawv muab nws cev tsoos tsho los rho ntawv faib rau lawv. Cov neeg kuj sawv ntawd ntsia ntsoov. Cov thawj kuj thuam luag Yexus hais tias, “Nws cawm tau luag dim, yog nws yog Vajtswv tus Khetos uas Vajtswv xaiv cia lawd, kuj cia nws cawm nws tus kheej dim los maj!” Cov tub rog kuj thuam luag nws, thiab tuaj muab cov kua qaub cev rau nws haus, thiab hais tias, “Yog koj yog cov Yudai tus vajntxwv, cia li cawm koj tus kheej dim los maj!” Ntawm Yexus lawm saud muaj ib co lus sau cia hais tias, “Tus no yog cov Yudai tus vajntxwv.” Ib tug uas raug teem rau saum khaublig ntoo ntawd, kuj hais tuam mom Yexus tias, “Koj yog tus Khetos los tsis yog? Cia li cawm koj thiab wb ob leeg dim los maj!” Tiamsis muaj dua ib tug txwv nws hais tias, “Koj tsis ntshai Vajtswv lov? Koj twb raug txim ib yam nkaus thiab. Wb ob leeg yeej raug txim raws li txojcai, vim wb tau saws raws li wb tau ua los lawm, tiamsis tus no tsis tau ua ib qho txhaum kiag li.” Ces nws txawm hais tias, “Yexus, thaum koj nkag rau hauv koj lub tebchaws thov koj nco txog kuv.” Yexus hais rau nws tias, “Kuv hais tseeb rau koj tias, hnub no koj yeej yuav tau nrog kuv nyob hauv lub chaw zoo kawg nkaus.” Thaum ntawd kwvlam tav su txawm tsaus ntuj ntais thoob plaws lub tebchaws mus txog hnub qaij peb teev. Lub hnub kuj tsaus nti, daim ntaub uas thaiv hauv lub tuam tsev txawm ntuag rhe ua ob daig. Yexus txawm tsa suab qw nrov hais tias, “Kuv Txiv, kuv muab kuv tus ntsuj plig cob rau hauv koj txhais tes.” Yexus hais li ntawd tag nws txawm tu siav nrho. Thaum tus thawj rog uas kav ib puas leej pom tej uas tshwm los no, nws txawm qhuas Vajtswv hais tias, “Tseeb tiag lauj, tus no yeej yog ib tug ncaj ncees.” Cov neeg coob uas tuaj saib tej xwm txheej no thaum pom lawd kuj ntaus hauv siab rov qab mus tsev. Txhua tus uas paub Yexus thiab cov pojniam uas nrog Yexus tuaj pem Kalilais tuaj kuj sawv deb deb ntsia tej xwm txheej no. Muaj ib tug yawg npe hu ua Yauxej uas nyob hauv cov Yudai lub moos Alimathia yog ib tug hauv cov thawj lub rooj sablaj, nws yog ib tug neeg zoo thiab ncaj ncees. Nws tsis pom zoo qhov uas lawv tau hais hum thiab lawv ua li ntawd, thiab nws tos rawv Vajtswv lub tebchaws. Yauxej txawm mus cuag Philaj thov Yexus lub cev tuag. Thaum Yauxej txo Yexus lub cev tuag los lawd nws muab ib daim ntaub mag qhwv, coj mus tso rau hauv lub qhov ntxa uas txaug cia rau hauv phab zeb, uas tsis tau log tuag li. Hnub ntawd yog hnub uas npaj rau hnub Xanpatau uas twb yuav txog. Cov pojniam uas nrog Yexus tuaj pem Kalilais tuaj kuj raws qab mus pom lub qhov ntxa ntawd thiab pom tias lawv muab Yexus lub cev tuag tso li cas. Ces cov pojniam ntawd txawm rov qab mus npaj tshuaj tsw qab thiab roj tsw qab. Hnub Xanpatau lawv txawm so raws li kevcai. Hnub ib thaum sawv ntxov tsis tau kaj ntug cov pojniam coj tej tshuaj tsw qab uas lawv npaj lawd mus txog lub qhov ntxa. Lawv pom daim lag zeb twb muab dov tawm ntawm rooj ntxa lawm. Thaum lawv nkag mus saib mas tsis pom Yexus lub cev tuag lawm. Thaum lawv tseem xav tsis thoob rau tej no ua ciav txawm muaj ob tug yawg hnav tsoos tsho ci ntsa iab los sawv ze ntawm lawv. Lawv ntshai heev thiab nyo ntsej muag rau hauv pem teb, mas ob tug yawg ntawd txawm hais rau lawv tias, “Ua cas nej nrhiav tus neeg ciaj hauv cov neeg tuag? Nws tsis nyob ntawm no, nws twb ciaj sawv rov los lawm. Cia li nco txog tej lus uas thaum tseem nyob hauv Kalilais nws hais rau nej tias, ‘Neeg leej Tub yuav tsum raug muab cob rau hauv cov neeg muaj txim txhais tes, thiab yuav raug muab teem rau saum khaublig ntoo, mas peb hnub yuav ciaj sawv rov los.’ ” Ces lawv thiaj nco dheev txog Yexus tej lus, thiab rov tom lub ntxa los piav tej xwm txheej no huvsi rau kaum ib tug tubtxib thiab lwm tus uas nyob ntawd mloog. Cov uas piav tej xwm txheej no rau cov tubtxib mloog yog Maivliag Madala thiab Yau‑ana thiab Maivliag uas yog Yakaunpau niam thiab lwm tus pojniam uas nrog lawv ua ke. Tiamsis cov tubtxib pom tias tej lus ntawd tsis muaj tseeb thiaj tsis ntseeg cov pojniam hais. [Tiamsis Petus sawv tsees dhia mus tom lub ntxa. Thaum nyo xauj rau hauv tsuas pom tej ntaub mag xwb, txawm rov los phimhwj kawg rau tej xwm txheej uas tshwm los ntawd.] Tib hnub ntawd muaj ob tug thwjtim taug kev mus rau ib lub zos npe hu ua Ema‑u, nyob deb ntawm Yeluxalees kwvlam kaum ib kilumeb. Ob tug sib tham txog txhua yam xwm txheej uas tshwm los no. Thaum ob tug tabtom sib tham sib nug ntawd, Yexus txawm los ze nrog ob tug taug kev ua ke mus. Tiamsis ob tug qhov muag plooj lawm cim tsis tau Yexus. Yexus hais rau ob tug tias, “Thaum taug kev tuaj neb sib tham txog dabtsi?” Ob tug txawm nres nkaus ua ntsej muag mluas mlob. Tus uas npe hu ua Khelaupa txawm teb Yexus tias, “Koj tib leeg yog qhua hauv Yeluxalees uas tsis paub tej xwm txheej uas tshwm los ob peb hnub no lov?” Yexus hais rau ob tug tias, “Xwm txheej dabtsi?” Ob tug teb nws tias, “Tej xwm txheej uas tshwm rau Yexus uas yog neeg Naxale. Nws yog ib tug xibhwb cev Vajtswv lus uas muaj hwjchim ua haujlwm thiab hais tau lus tseem ceeb tab meeg Vajtswv thiab tab meeg cov neeg sawvdaws, mas peb cov pov thawj hlob thiab cov thawj muab nws cob rau luag rau txim tuag thiab muab teem rau saum khaublig ntoo. Peb twb vam tias nws yuav ua tus uas txhiv cov Yixayee dim. Dua li ntawd, hnub no yog hnub peb uas muaj tej xwm txheej ntawd tshwm los. Cov pojniam uas nrog peb ua ke muaj qee leej ua rau peb phimhwj heev. Lawv sawv mus tom lub qhov ntxa, mas tsis pom Yexus lub cev tuag lawm. Lawv rov los piav tias lawv ua yog toog pom ob tug tubtxib saum ntuj hais tias tus ntawd tseem muaj txojsia nyob. Peb cov qee leej txawm mus tom lub qhov ntxa mas pom raws li cov pojniam hais, tiamsis tsis pom Yexus.” Yexus txawm hais rau ob tug tias, “Au neeg ruam thiab tsis kub siab ntseeg txhua yam uas cov xibhwb cev Vajtswv lus hais cia lawd. Tus Khetos yeej yuav tsum raug txom nyem li ntawd thiaj li tau nws lub hwjchim ci ntsa iab los tsis yog?” Ces Yexus txawm txhais Vajtswv txojlus txhua nqe uas ntsig txog nws rau ob tug mloog pib kiag ntawm Mauxe mus rau cov xibhwb cev Vajtswv lus huvsi. Thaum lawv tuaj ze lub zos uas yuav mus ntawd, Yexus txawm ua li nws yuav dhau plaws mus. Tiamsis ob tug cheem cheem nws hais tias, “Koj cia li nrog wb so ua ke vim twb yuav tsaus ntuj thiab hnub yuav poob qho.” Yexus thiaj nkag mus nrog ob tug so. Thaum Yexus nrog ob tug zaum ntawm rooj mov, nws txawm muab ncuav los thov Vajtswv foom koob hmoov, thiab muab ntais cev rau ob tug. Ces ob tug qhov muag txawm qheb kiag ob tug thiaj cim tau Yexus. Ces Yexus txawm ploj ntais ntawm ob tug mus lawm. Ob tug txawm sib tham tias, “Wb ob leeg lub siab kub qas lug rau thaum nws nrog wb tham taug kev thiab thaum nws txhais Vajtswv txojlus rau wb mloog los tsis yog?” Ob tug txawm sawv tsees tamsim ntawd rov mus rau Yeluxalees, mas ntsib kaum ib tug tubtxib thiab cov uas nrog lawv ua ke tuaj txoos ua ke. Lawv hais tias, “Tus Tswv ciaj sawv rov los lawm tiag tiag li, nws twb los tshwm rau Ximoos pom.” Ob tug ntawd txawm piav tej uas tshwm taug kev thiab qhov uas ob tug paub Yexus rau thaum muab ncuav ntais ntawd, rau lawv mloog. Thaum ob tug tabtom piav txog zaj no, Yexus txawm los sawv ntsug hauv lawv nruab nrab, thiab hais rau lawv tias, [“Nej cia li nyob kaj siab lug.”] Lawv poob siab ntshai kawg, lawv xav tias pom ib tug dab. Yexus hais rau lawv tias, “Nej ntxhov siab ua dabtsi? Vim li cas nej tsis tso siab ntseeg? Cia li saib kuv txhais tes thiab kuv txhais kotaw yeej yog kuv ntag. Thiab kov kuv lub cev saib, rau qhov dab tsis muaj nqaij muaj txha yam li nej pom kuv muaj.” [Thaum hais li ntawd tag, Yexus txawm muab nws txhais tes txhais kotaw rau lawv saib.] Thaum lawv tseem tsis tshua ntseeg vim yog zoo siab thiab tseem tabtom phimhwj, Yexus txawm hais rau lawv tias, “Ntawm no nej muaj dabtsi noj los tsis muaj?” Lawv txawm muab ib qhov ntses ci rau Yexus, nws txawm noj tab meeg lawv. Yexus hais rau lawv tias, “No yog tej lus uas kuv hais rau nej rau thaum kuv tseem nrog nej nyob tias txhua lo lus uas sau cia rau hauv Mauxe phau kevcai thiab sau rau hauv cov xibhwb cev Vajtswv lus thiab hauv ntawv nkauj uas hais txog kuv puavleej yeej yuav tsum tiav.” Thiab Yexus qheb lawv lub siab kom to taub Vajtswv txojlus, thiab hais rau lawv tias, “Muaj lus sau cia hais tias tus Khetos yuav tsum raug kev tsim txom thiab peb hnub yuav ciaj sawv hauv qhov tuag rov los, thiab yuav tsum tuav tus Khetos lub npe tshaj tawm qhov uas ntxeev dua siab tshiab thiab qhov uas daws tau lub txim rau txhua haiv neeg mloog, yuav pib ntawm Yeluxalees mus. Nej yog cov uas ua timkhawv rau tej no ntag. Saib maj, kuv yuav tso yam uas kuv leej Txiv cog lus tseg lawm los rau saum nej. Tiamsis nej yuav tsum nyob hauv lub nroog tos mus txog thaum nej tau hnav lub hwjchim uas los saum ntuj los.” Yexus txawm coj lawv tawm mus txog lub zos Npethani, mas nws tsa ob txhais tes foom koob hmoov rau lawv. Thaum nws tabtom foom koob hmoov ntawd, nws txawm ncaim lawv mus lawm, thiab nws raug coj mus saum ntuj. Lawv txawm pe hawm nws thiab rov los rau hauv Yeluxalees zoo siab kawg, thiab niaj hnub nyob hauv lub tuam tsev qhuas Vajtswv. Thaum chiv keeb Txojlus yeej los muaj nyob, thiab Txojlus ntawd yeej nrog Vajtswv nyob, thiab Txojlus ntawd yog Vajtswv. Thaum chiv keeb nws yeej nrog Vajtswv nyob. Vajtswv kom Txojlus ntawd tsim txhua yam, tsis muaj ib yam dabtsi uas tsis yog Txojlus ntawd tsim tshwm los. Txojlus ntawd yog txoj hauv paus txojsia, thiab txojsia ntawd yog neeg txojkev kaj. Txojkev kaj ci tuaj rau hauv qhov tsaus ntuj, mas qhov tsaus ntuj kov tsis yeej txojkev kaj. Muaj ib tug yawg uas Vajtswv txib tuaj hu ua Yauhas. Nws tuaj ua phaj peeb ua timkhawv rau txojkev kaj xwv txhua tus thiaj li ntseeg vim yog nws. Nws tsis yog txojkev kaj ntawd, tiamsis nws tuaj ua timkhawv txog txojkev kaj. Txojkev kaj tseeb uas ua rau neeg txhua tus pom kev tabtom los rau hauv lub ntiajteb. Nws nyob lub ntiajteb, thiab lub ntiajteb yog Vajtswv siv nws tsim tiamsis lub ntiajteb tsis lees paub nws. Nws los rau hauv nws teb nws chaw los nws haiv neeg tsis lees yuav nws. Tiamsis txhua tus uas lees yuav nws, yog cov uas ntseeg nws lub npe, nws kuj pub lawv muaj feem ua Vajtswv li menyuam, tsis yog yug ntawm nqaij ntawm ntshav raws li neeg ib txwm yug lossis yug raws li neeg lub siab xav tiamsis yug ntawm Vajtswv los. Txojlus ntawd tshwm los ua neeg thiab nyob hauv peb nruab nrab. Peb pom nws lub hwjchim, yog lub hwjchim ci ntsa iab uas phim leej Txiv tib leeg Tub, nws muaj txojkev hlub txojkev tseeb nplua mias. Yauhas ua timkhawv txog nws thiab qw hais tias, “Tus no yog tus uas kuv hais txog tias, ‘Tus uas los ua kuv qab loj dua kuv, rau qhov nws yeej nyob ua kuv ntej lawm.’ ” Peb tau txais txojkev hlub ntxiv rau txojkev hlub uas nws muaj nplua mias ntawd. Peb tau txoj kevcai ntawm Mauxe los, tiamsis txojkev hlub thiab txojkev tseeb yog los ntawm Yexus Khetos los. Tsis muaj leejtwg txeev pom dua Vajtswv li. Tib tug tub uas yog Vajtswv thiab nyob ntawm leej Txiv lub xubntiag thiaj qhia Vajtswv tshwm los xwb. No yog Yauhas tej lus timkhawv, yog thaum cov Yudai txib cov pov thawj thiab cov Levi hauv lub nroog Yeluxalees mus nug nws tias, “Koj yog leejtwg?” Yauhas kuj yeem lees, nws qhia tseeb rau lawv tias, “Kuv tsis yog tus Khetos.” Lawv thiaj nug nws tias, “Yog li ntawd koj yog leejtwg? Koj yog Eliya lov?” Nws hais tias, “Kuv tsis yog.” Lawv nug tias, “Koj yog tus xibhwb cev Vajtswv lus uas yuav los ntawd lov?” Nws teb tias, “Kuv tsis yog.” Lawv txawm hais rau nws tias, “Ces koj yog leejtwg? Thov teb qhia rau cov uas txib peb tuaj. Koj yuav teb li cas txog koj tus kheej?” Yauhas hais tias, “Kuv yog lub suab qw hauv tebchaws moj sab qhua hais tias, ‘Cia li ua tus Tswv txojkev kom ncaj,’ raws li xibhwb Yaxaya uas cev Vajtswv lus hais tseg lawd.” Cov uas yog cov Falixai txib tuaj ntawd txawm nug tias, “Yog koj tsis yog tus Khetos tsis yog Eliya tsis yog tus xibhwb cev Vajtswv lus ntawd, ua cas koj ho muab neeg ua kevcai raus dej?” Yauhas teb lawv tias, “Kuv coj ua kevcai raus dej, tiamsis muaj ib tug sawv ntsug hauv nej nruab nrab uas nej tsis paub. Tus ntawd los ua kuv qab, kuv twb tsis tsim nyog daws nws txoj hlua khau kiag li.” Tej xwm txheej no tshwm rau hauv lub zos Npethani uas nyob sab dej Yaladee tim ub, yog lub chaw uas Yauhas tabtom muab neeg ua kevcai raus dej. Hnub tom qab Yauhas pom Yexus taug kev tuaj rau ntawm nws, nws txawm hais tias, “Cia li saib Vajtswv tus menyuam yaj uas ris ntiajteb lub txim mus. Nws yog tus uas kuv hais txog tias, ‘Yuav muaj ib tug los ua kuv qab uas loj dua kuv rau qhov nws yeej nyob ua kuv ntej lawm. ’ Kuv tsis paub nws tiamsis kuv los muab neeg ua kevcai raus dej kom thiaj qhia nws rau cov Yixayee paub.” Thiab Yauhas ua timkhawv hais tias, “Kuv pom Vaj Ntsuj Plig nqes saum ntuj los zoo li tus nquab tsaws saum nws. Kuv tus kheej tsis paub nws, tiamsis tus uas txib kuv los coj ua kevcai raus dej hais rau kuv tias, ‘Thaum pom Vaj Ntsuj Plig nqes los tsaws rau saum leejtwg mas tus ntawd yog tus uas yuav coj ua kevcai raus hauv Vaj Ntsuj Plig uas dawb huv. ’ Kuv twb pom lawm thiab ua timkhawv tias nws yog Vajtswv tus Tub.” Hnub tom qab Yauhas tabtom nrog nws ob tug thwjtim nyob ua ke dua, mas nws ntsia pom Yexus tabtom hla tuaj mus, ces nws txawm hais tias, “Saib maj, Vajtswv tus menyuam yaj.” Ob tug thwjtim ntawd hnov nws hais li ntawd ces txawm raws Yexus qab mus. Yexus tig los pom ob tug raws nws qab ces txawm nug ob tug tias, “Neb nrhiav dabtsi?” Ob tug hais rau nws tias, “Lanpi,” (uas txhais tias Xibhwb loj) “koj so qhovtwg?” Yexus hais rau ob tug tias, “Los saib maj.” Ob tug txawm mus mas pom qhov chaw uas Yexus so thiab nrog Yexus nyob ua ke hnub ntawd. Lub sijhawm ntawd hnub qaij plaub teev lawm. Ob tug uas hnov Yauhas hais es raws Yexus qab mus ntawd, ib tug yog Anru uas yog Ximoos Petus tus kwv. Anru txawm mus nrhiav nws tus tijlaug Ximoos ua ntej thiab hais rau nws tias, “Peb twb ntsib tug Mexiyas lawm,” (Mexiyas txhais hais tias Khetos). Anru txawm coj Ximoos mus cuag Yexus. Yexus ntsia ntsoov Ximoos thiab hais rau nws tias, “Koj yog Yauhas tus tub Ximoos, koj yuav raug hu tias Khefa” (uas txhais hais tias Petus ). Hnub tom qab Yexus npaj siab yuav mus rau pem lub xeev Kalilais. Nws txawm ntsib Fili thiab hais rau nws tias, “Cia li raws kuv qab los.” Fili yog neeg hauv lub moos Npexaida, yog lub moos uas Anru thiab Petus nyob. Fili mus nrhiav Nathana‑ee thiab hais rau nws tias, “Peb twb ntsib tus uas Mauxe hais txog rau hauv phau kevcai thiab cov xibhwb cev Vajtswv lus hais txog, yog Yexus uas yog neeg Naxale, yog Yauxej tus tub.” Nathana‑ee hais rau nws tias, “Yuav muaj ib yam dabtsi zoo tshwm hauv Naxale los tau lov?” Fili hais rau nws tias, “Cia li los saib maj.” Yexus pom Nathana‑ee los, ces txawm hais txog Nathana‑ee tias, “Saib maj, nws yog ib tug Yixayee tiag, nws tsis muaj kev dag ntxias kiag li.” Nathana‑ee hais rau Yexus tias, “Koj paub kuv li cas?” Yexus teb nws tias, “Kuv pom koj nyob hauv tsob qab txiv cev ua ntej uas Fili hu koj.” Nathana‑ee teb Yexus tias, “Lanpi, koj yeej yog Vajtswv tus tub, koj yog cov Yixayee tus vajntxwv.” Yexus teb nws tias, “Vim kuv hais rau koj tias kuv pom koj nyob hauv tsob qab txiv cev koj thiaj li ntseeg lov? Koj yuav pom tej yam uas loj dua ntawd thiab.” Thiab Yexus hais rau nws tias, “Kuv hais tseeb rau nej tias nej yuav pom rooj ntug qheb thiab pom Vajtswv cov tubtxib saum ntuj nce nce nqes nqes saum Neeg leej Tub.” Tau peb hnub muaj tshoob hauv lub zos Khana hauv lub xeev Kalilais, Yexus niam kuj nyob ntawd. Lawv kuj hu Yexus thiab nws cov thwjtim mus noj tshoob. Thaum cawv txiv hmab tag lawm, Yexus niam hais rau Yexus tias, “Lawv tsis muaj cawv txiv hmab lawm.” Yexus hais rau nws tias, “Tus pojniam 'e, koj thab hais ua dabtsi? Tsis tau txog kuv sijhawm.” Yexus niam txawm hais rau cov tub qhe tias, “Cia li ua raws li nws hais nawj.” Muaj rau lub hub zeb nyob ntawd rau dej siv ua kevcai ntxuav raws li cov Yudai tej kevcai, ib lub hub rau kwvlam yim caum lossis ib puas lib. Yexus txawm hais rau cov tub qhe tias, “Cia li ntaus dej kom puv nkaus cov hub ntawd.” Ces lawv txawm ntaus dej puv nkaus txhua lub ncauj hub. Yexus hais rau lawv tias, “Cia li ntaus nqa mus rau tus kavxwm.” Lawv txawm nqa mus. Thaum tus kavxwm sim cov dej uas txia ua cawv txiv hmab lawm thiab tsis paub tias coj qhovtwg los, tiamsis cov tub qhe uas ntaus cov dej ntawd paub, tus kavxwm txawm hu tus nraug vauv los, thiab hais rau nws tias, “Txhua tus yeej muab cov thawj cawv txiv hmab los haus ua ntej, mas thaum haus ntau lawd mam li muab cov tw cawv txiv hmab los. Tiamsis koj muab cov thawj cawv txiv hmab khaws cia txog tav no.” Thawj zaug txujci tseem ceeb no Yexus ua ntawm lub zos Khana hauv lub xeev Kalilais, thiab ua nws lub hwjchim ci ntsa iab tshwm los. Yexus cov thwjtim kuj ntseeg nws. Dhau ntawd Yexus thiab nws niam nws cov kwv thiab nws cov thwjtim sawvdaws mus rau hauv lub moos Khapena‑u thiab so ob peb hnub qhov ntawd. Thaum yuav txog cov Yudai ua kevcai Hla Dhau, Yexus txawm mus rau nram Yeluxalees. Nws pom cov uas muag nyuj muag yaj muag nquab thiab pom cov uas pauv nyiaj zaum rooj pauv nyiaj ntawm lub tuam tsev. Nws txawm muab hlua ua ib tug nplawm ntiab cov neeg ntawd sawvdaws thiab tej yaj tej nyuj huvsi tawm ntawm lub tuam tsev mus, thiab nws xyeeb pes hlo cov uas pauv nyiaj tej nyiaj thiab muab lawv tej rooj pauv nyiaj ntxeev pov tseg. Nws hais rau cov uas muag nquab tias, “Cia li coj tej no tawm mus, tsis txhob muab kuv leej Txiv lub tuam tsev ua chaw ua lag ua luam.” Yexus cov thwjtim nco dheev txog tej lus uas sau cia tias, “Kuv kub siab lug rau koj lub tuam tsev kawg dag kawg zog.” Cov Yudai txawm hais rau nws tias, “Koj yuav ua txujci tseem ceeb dabtsi rau peb pom tias koj muaj cai ua tau tej no?” Yexus teb lawv tias, “Yog muab lub tuam tsev no ua puam tsuaj tag, peb hnub xwb kuv yuav rov muab tsa tau.” Cov Yudai txawm hais tias, “Lub tuam tsev no lawv ua tau plaub caug rau xyoo es peb hnub xwb koj yuav tsa tau dua tshiab lov?” Tiamsis lub tuam tsev uas Yexus hais txog ntawd yog hais txog nws lub cev. Vim li ntawd thaum Yexus raug muab tsa sawv hauv qhov tuag rov los lawd, cov thwjtim thiaj nco dheev tias nws tau hais li ntawd. Mas lawv thiaj ntseeg Vajtswv txojlus thiab tej lus uas Yexus hais ntawd. Thaum Yexus nyob hauv Yeluxalees rau ncua sijhawm uas ua kevcai Hla Dhau ntawd, muaj neeg coob los ntseeg nws vim lawv pom tej txujci tseem ceeb uas nws ua. Tiamsis Yexus tsis tso siab rau lawv, rau qhov nws yeej paub neeg txhua tus, thiab nws tsis cheem tsum leejtwg ua timkhawv txog neeg rau nws, rau qhov nws yeej paub tej uas nyob hauv neeg lub siab. Muaj ib tug Falixai npe hu ua Nikhaudemau, nws yog cov Yudai ib tug thawj. Nws tuaj cuag Yexus hmo ntuj hais rau Yexus tias, “Lanpi, peb paub tias koj yog ib tug xibhwb uas los ntawm Vajtswv los, rau qhov tsis muaj ib tug ua tau tej txujci tseem ceeb uas koj ua, tsuas yog tus uas Vajtswv nrog nraim xwb.” Yexus teb nws tias, “Kuv hais tseeb rau koj tias, yog leejtwg tsis tau yug dua tshiab tus ntawd yuav tsis pom Vajtswv lub tebchaws kiag li.” Nikhaudemau hais rau Yexus tias, “Neeg laus yuav yug dua tshiab tau li cas? Yuav nkag rau hauv niam lub plab zaum ob thiab rov yug dua tau lov?” Yexus teb tias, “Kuv hais tseeb rau koj tias, yog leejtwg tsis tau yug ntawm dej thiab ntawm Vaj Ntsuj Plig, tus ntawd yuav nkag tsis tau rau hauv Vajtswv lub tebchaws kiag li. Yam uas yug ntawm nqaij tawv yeej yog nqaij tawv, yam uas yug ntawm Vaj Ntsuj Plig kuj yog ntsuj plig. Tsis txhob phimhwj rau qhov uas kuv hais rau koj tias, ‘Nej yuav tsum yug dua tshiab.’ Cua yuav ntsawj mus qhov twg, kuj ntsawj mus qhov ntawd. Koj hnov cua lub suab tiamsis tsis paub tias cua tuaj qhovtwg tuaj thiab mus rau qhovtwg. Txhua tus uas yug ntawm Vaj Ntsuj Plig kuj zoo ib yam li ntawd.” Nikhaudemau hais rau Yexus tias, “Tej no yuav ua mus tau li cas?” Yexus teb nws tias, “Koj twb yog ib tug xibhwb hauv cov Yixayee, koj tseem tsis nkag siab tej no lov? “Kuv hais tseeb rau koj tias, peb hais txog yam uas peb paub thiab ua timkhawv rau yam uas peb pom, los nej tsis lees yuav peb tej lus timkhawv. Yog kuv hais txog tej uas yog ntiajteb li rau nej, nej twb tsis ntseeg, mas yog kuv hais txog tej uas yog qaum ntuj li, nej yuav ua li cas ntseeg tau? Tsis muaj leejtwg txeev nce mus saum ntuj tsuas yog tus uas nqes saum ntuj los xwb, yog Neeg leej Tub. Mauxe tsa tus nab hauv tebchaws moj sab qhua li cas, Neeg leej Tub yuav tsum raug muab tsa ib yam li ntawd, xwv txhua tus uas ntseeg nws thiaj tau txojsia ib txhis tsis kawg. “Vajtswv hlub ntiajteb kawg li nws thiaj pub nws tib leej Tub los kom txhua tus uas ntseeg leej Tub ntawd thiaj tsis puam tsuaj tiamsis yuav tau txojsia ib txhis tsis kawg. Rau qhov Vajtswv txib leej Tub los rau hauv ntiajteb tsis yog los rau txim rau ntiajteb, yog los cawm ntiajteb dim. Tus uas tso siab rau leej Tub yeej tsis raug teem txim, tus uas tsis tso siab rau leej Tub twb raug teem txim lawm vim nws tsis tso siab rau Vajtswv tib leej Tub lub npe. Qhov uas txiav txim yog li no, vim txojkev kaj los rau hauv lub ntiajteb tiamsis neeg nyiam txojkev tsaus ntuj heev dua txojkev kaj vim tej uas lawv ua phem kawg. Txhua tus uas ua phem yeej ntxub txojkev kaj thiab tsis los rau hauv txojkev kaj ntshai tsam tej uas nws ua raug muab nthuav tshwm los. Tiamsis tus uas xyaum raws li txojkev tseeb kuj los txog txojkev kaj xwv thiaj pom tseeb tias yog nyob hauv Vajtswv nws thiaj ua tau tej haujlwm ntawd.” Dhau ntawd Yexus thiab nws cov thwjtim mus rau hauv lub xeev Yudia, thiab Yexus nrog lawv nyob qhov ntawd thiab coj ua kevcai raus dej. Yauhas kuj coj ua kevcai raus dej ntawm Ainoo ze lub moos Xali vim qhov ntawd muaj dej ntau thiab muaj neeg tuaj ua kevcai raus dej. Rau qhov Yauhas tseem tsis tau raug kaw rau hauv tsev lojfaj. Yauhas cov thwjtim thiab ib tug Yudai sib cam txog qhov uas ua kevcai ntxuav. Lawv mus hais rau Yauhas tias, “Lanpi, tus uas nrog koj nyob sab dej Yaladee tim ub, uas koj ua timkhawv txog ntawd, sim saib nws tabtom coj ua kevcai raus dej, mas txhua tus mus cuag nws.” Yauhas teb tias, “Tsis muaj leejtwg yuav tau txais ib yam twg uas tsis yog pub saum ntuj los rau nws. Nej cov ua tau timkhawv tias kuv twb hais tias kuv tsis yog tus Khetos, kuv tsuas yog tus raug txib mus ua nws ntej xwb. Tus uas tau tus nkauj nyab yog tus nraug vauv. Tus phijlaj uas sawv mloog tus nraug vauv, thaum tau hnov tus nraug vauv lub suab kuj zoo siab kawg. Vim li no kuv thiaj zoo siab xyiv fab kawg nkaus ib yam li ntawd. Nws yeej yuav loj zuj zus tuaj, tiamsis kuv yuav yau zuj zus mus. “Tus uas los saum ntuj los yeej loj dua ib puas tsav yam. Tus uas nyob hauv ntiajteb yeej yog ntiajteb li, thiab hais txog tej uas yog ntiajteb li. Tus uas los saum ntuj los yeej loj dua ib puas tsav yam. Nws ua timkhawv txog tej uas nws tau pom thiab hnov tiamsis tsis muaj leejtwg lees yuav nws tej lus timkhawv. Tus uas lees yuav nws tej lus timkhawv kuj lees tias Vajtswv yog qhov tseeb. Tus uas Vajtswv txib los nws hais Vajtswv tej lus, rau qhov Vajtswv pub Vaj Ntsuj Plig tsis paub tag li. Leej Txiv hlub leej Tub thiab muab txhua yam cob rau hauv nws txhais tes. Tus uas tso siab rau leej Tub, tus ntawd tau txojsia ib txhis tsis kawg, tus uas tsis mloog leej Tub lus kuj yuav tsis pom txojsia, tiamsis Vajtswv txojkev npau taws nyob saum nws lawm.” Thaum Yexus paub tias cov Falixai hnov moo tias Yexus muaj thwjtim thiab coj neeg ua kevcai raus dej coob dua Yauhas, tiamsis qhov tseeb Yexus tsis tau muab neeg ua kevcai raus dej tsuas yog nws cov thwjtim muab xwb, Yexus txawm tawm hauv Yudia rov mus rau lub xeev Kalilais. Yexus yuav tsum taug kev hla lub xeev Xamali mus. Nws thiaj mus txog ib lub moos hauv lub xeev Xamali hu ua Xikha nyob ze ntawm thaj teb uas Yakhauj pub rau nws tus tub Yauxej. Yakhauj lub qhov dej kuj nyob qhov ntawd. Yexus taug kev khwv khwv lawm thiaj los zaum ntawm lub qhov dej ib sab. Lub sijhawm ntawd kwvlam tav su. Muaj ib tug pojniam Xamali tuaj nqa dej. Yexus hais rau nws tias, “Thov muab dej rau kuv haus thiab.” Yexus cov thwjtim twb mus yuav mov noj hauv lub moos lawm. Tus pojniam Xamali hais rau Yexus tias, “Koj yog neeg Yudai, ua cas koj thov dej haus ntawm kuv uas yog ib tug pojniam Xamali?” (Rau qhov cov Yudai yeej tsis nrog cov Xamali sib koom dabtsi li.) Yexus teb nws tias, “Yog koj paub yam uas Vajtswv pub thiab paub tias tus uas thov koj dej haus yog leejtwg, ces koj yuav thov tus ntawd thiab tus ntawd yuav pub cov dej uas pub txojsia rau koj.” Tus pojniam ntawd hais rau Yexus tias, “Yawg hlob, koj twb tsis muaj thoob ntaus dej, lub qhov dej no tob heev, koj yuav muab cov dej uas pub txojsia qhovtwg los? Koj loj dua peb tus yawg koob Yakhauj uas khawb lub qhov dej no rau peb lov? Yakhauj thiab tag nrho nws cov tub thiab tej tsiaj txhu puavleej haus lub qhov dej no.” Yexus hais rau nws tias, “Txhua tus uas haus cov dej no yuav rov nqhis dua, tiamsis tus uas haus cov dej uas kuv pub rau nws yuav tsis rov nqhis dua li lawm. Cov dej uas kuv yuav pub ntawd yuav ua ib lub qhov dej txhawv hauv tus ntawd pub txojsia ib txhis tsis kawg rau nws.” Tus pojniam ntawd txawm hais rau Yexus tias, “Yawg hlob, thov muab cov dej ntawd rau kuv haus kuv thiaj tsis rov nqhis thiab tsis tau tuaj nqa dej ntawm no lawm.” Yexus hais rau tus pojniam ntawd tias, “Cia li mus hu koj tus txiv nrog koj tuaj ntawm no.” Nws teb Yexus tias, “Kuv tsis muaj txiv.” Yexus hais rau tus pojniam ntawd tias, “Qhov uas koj hais tias koj tsis muaj txiv kuj yog tiag, vim koj twb muaj tsib tug txiv lawm, thiab tus uas nimno nrog koj nyob yeej tsis yog koj li txiv. Qhov no kuj yog koj hais tseeb.” Tus pojniam ntawd txawm hais rau Yexus tias, “Yawg hlob, kuv paub tseeb tias koj yog ib tug xibhwb cev Vajtswv lus. Peb tej poj koob yawm txwv ib txwm pe Vajtswv saum lub roob no, tiamsis nej hais tias Yeluxalees thiaj yog lub chaw uas sawvdaws yuav tsum pe hawm Vajtswv.” Yexus hais rau nws tias, “Tus ntxhais 'e, cia li ntseeg kuv nawj, lub sijhawm tabtom los mas nej yuav tsis pe hawm leej Txiv saum lub roob no lossis hauv Yeluxalees. Nej tsis paub tus uas nej pe hawm, tiamsis peb yeej paub tus uas peb pe, vim txojkev dim tshwm hauv cov Yudai los. Tiamsis lub sijhawm tabtom los thiab nimno twb los txog lawm mas cov uas pe hawm tiag tiag yuav pe leej Txiv ntawm sab ntsuj plig thiab qhov tseeb, rau qhov leej Txiv nrhiav cov neeg zoo li no pe hawm nws. Vajtswv yog Ntsuj Plig, mas cov uas pe hawm nws yuav tsum pe ntawm ntsuj plig thiab qhov tseeb.” Tus pojniam ntawd txawm hais rau Yexus tias, “Kuv paub tias tus Mexiyas uas hu tias Khetos yuav los. Thaum nws los lawd nws yuav qhia txhua yam rau peb.” Yexus hais rau nws tias, “Kuv uas nrog koj hais lus no yog tus ntawd ntag.” Thaum ntawd Yexus cov thwjtim rov los txog. Lawv kuj phimhwj qhov uas Yexus nrog ib tug pojniam hais lus, tiamsis tsis muaj leejtwg hais tias, “Koj cheem tsum dabtsi?” lossis, “Ua cas koj nrog tus pojniam ntawd hais lus?” Tus pojniam ntawd txawm tso nws lub hub dej tseg rov mus rau hauv lub moos thiab hais rau cov neeg hauv lub moos tias, “Cia li tuaj saib tug yawg uas piav tau txhua yam uas kuv tau ua dhau los lawd rau kuv mloog. Tus no puas yog tus Khetos?” Ces lawv txawm tawm tuaj mus cuag Yexus. Thaum ntawd cov thwjtim txawm hu Yexus tias, “Lanpi, los noj mov.” Tiamsis Yexus hais rau lawv tias, “Kuv twb muaj cov mov uas nej tsis paub noj lawm.” Cov thwjtim txawm sib nug hais tias, “Leejtwg nqa mov tuaj rau nws noj lawm nev?” Yexus hais rau lawv tias, “Kuv cov mov yog ua raws li tus uas txib kuv los lub siab nyiam thiab ua nws tes haujlwm kom tiav. Nej hais tias, ‘Tshuav plaub lub hlis li txog caij hlais mog’ los tsis yog? Kuv hais rau nej tias, cia li tsa muag ntsia, tej teb twb daj qas rhuv zoo hlais lawm. Tus uas hlais kuj tau nqe zog thiab muab tej qoob sau los cia rau txojsia uas nyob mus ib txhis, tus uas tseb thiab tus uas hlais thiaj yuav zoo siab ib yam nkaus. Lo lus uas hais tias, ‘Ib tug tseb muaj dua ib tug hlais,’ kuj muaj tseeb. Kuv txib nej mus hlais tej uas nej tsis tau siv dag siv zog ua, yog lwm tus siv dag siv zog, mas nej muaj feem tau qhov uas lwm tus siv dag siv zog.” Cov neeg Xamali hauv lub moos ntawd muaj coob kuj ntseeg Yexus vim yog tus pojniam ntawd tej lus timkhawv uas hais tias, “Nws qhia txhua yam uas kuv tau ua los lawd rau kuv mloog.” Yog li ntawd, thaum cov Xamali tuaj txog lawv txawm thov Yexus nrog lawv nyob, mas Yexus nrog lawv nyob tau ob hnub. Muaj neeg los ntseeg coob ntxiv vim yog tej lus uas Yexus qhia. Lawv txawm hais rau tus pojniam ntawd tias, “Txij no mus qhov uas peb ntseeg tsis yog vim koj tej lus uas koj hais tiamsis yog peb tus kheej tau hnov thiab paub tias tus no yog ntiajteb tus Cawmseej tiag tiag li.” Dhau ob hnub lawm Yexus tawm qhov ntawd los txog lub xeev Kalilais. Yexus twb ua timkhawv hais tias tus xibhwb cev Vajtswv lus tsis muaj koob meej rau hauv nws lub zej zog. Yog li ntawd thaum nws los txog lub xeev Kalilais, cov neeg Kalilais kuj tos txais nws vim lawv tau pom txhua yam uas nws ua rau thaum ua kevcai Hla Dhau rau hauv Yeluxalees, rau qhov lawv twb mus ua kevcai ntawd thiab. Yexus thiaj rov qab mus rau lub zos Khana hauv Kalilais, yog lub zos uas Yexus muab dej txia ua cawv txiv hmab. Hauv lub moos Khapena‑u muaj ib tug nom tswv, nws tus tub mob hnyav heev. Thaum nws hnov xov tias Yexus tuaj hauv Yudia los txog Kalilais lawm, ces nws txawm mus thov kom Yexus mus kho nws tus tub rau qhov twb yuav tuag. Yexus txawm hais rau nws tias, “Yog nej tsis pom txujci tseem ceeb thiab txujci phimhwj nej yeej tsis ntseeg.” Tus nom ntawd hais rau Yexus tias, “Tus Tswv, thov cia li mus ua ntej uas kuv tus menyuam tsis tau tuag.” Yexus hais rau nws tias, “Cia li rov mus, koj tus tub yuav tsis tuag.” Tus nom ntawd ntseeg tej lus uas Yexus hais rau nws ces txawm rov mus. Thaum nws taug kev rov mus ntawd, nws cov tub qhe tuaj ntsib nws mas hais tias nws tus metub zoo lawm. Nws txawm nug txog lub sijhawm uas tus tub zoo lawd, mas lawv hais rau nws tias, “Nag thaum hnub qaij ib teev tus npaws zoo kiag lawm.” Leej txiv thiaj paub tias yog lub sijhawm uas Yexus hais rau nws tias, “ Koj tus tub yuav tsis tuag.” Ces nws thiab nws tsev neeg txawm ntseeg huvsi. No yog txujci tseem ceeb zaum ob uas Yexus ua rau thaum nws tawm hauv Yudia los rau hauv lub xeev Kalilais. Dhau ntawd txog ib lub caij uas cov Yudai ua kevcai, Yexus txawm mus rau nram Yeluxalees. Ntawm Rooj Loog Yaj hauv Yeluxalees muaj ib lub pas dej uas lus Henplais hu tias Npexatha, muaj tsib lub tsev so nraim tshav. Hauv tej tsev ntawd muaj neeg mob pw coob coob, tus dig muag, tus ceg tawv thiab tus tuag tes tyag taw muaj tag huvsi. Muaj ib tug yawg mob tau peb caug yim xyoo los lawm nyob qhov ntawd. Thaum Yexus pom nws thiab paub tias nws pw ntawd ntev los lawm, Yexus txawm hais rau nws tias, “Koj puas xav zoo kiag?” Tus yawg mob ntawd teb Yexus tias, “Yawg hlob, thaum dej tabtom ntas, tsis muaj leejtwg muab kuv raus rau hauv pas dej. Thaum kuv tabtom yuav nqes mus rau hauv, lwm tus twb nqes mus ua ntej lawm.” Yexus hais rau nws tias, “Cia li sawv tsees thiab nqa kiag koj lub chaw pw thiab mus kev.” Tamsim ntawd nws txawm zoo kiag thiab nws nqa nws lub chaw pw thiab mus kev. Hnub ntawd yog hnub Xanpatau. Cov Yudai txawm hais rau tus uas mob zoo ntawd tias, “Hnub no yog hnub Xanpatau, qhov uas koj nqa koj lub chaw pw kod kuj txhaum kevcai lawm.” Tus yawg ntawd teb lawv tias, “Tus uas kho kuv zoo hais rau kuv tias, ‘Cia li nqa kiag koj lub chaw pw thiab mus kev.’ ” Lawv txawm nug nws tias, “Tus yawg uas hais kom koj nqa kiag koj lub chaw pw mus yog leejtwg?” Tus uas mob zoo ntawd kuj tsis paub tias yog leejtwg, rau qhov Yexus twb ncaim hauv cov neeg coob coob ntawd mus lawm. Los rau tom qab, Yexus ntsib tug yawg ntawm lub tuam tsev Yexus txawm hais rau nws tias, “Saib maj, koj twb zoo lawm. Tsis txhob ua txhaum dua lawm xwv thiaj tsis muaj xwm txheej phem dua li no los raug koj.” Tus yawg ntawd thiaj tawm mus hais rau cov Yudai tias tus uas kho nws zoo yog Yexus. Vim li no cov Yudai thiaj tsim txom Yexus rau qhov nws ua tej no rau hnub Xanpatau. Tiamsis Yexus hais rau lawv tias, “Kuv leej Txiv tseem ua haujlwm tsis tu ncua, kuv kuj ua thiab.” Vim li no cov Yudai yimhuab nrhiav kev txov Yexus, tsis yog vim qhov uas nws tsis ua raws li tej kevcai hnub Xanpatau xwb, tiamsis nws tseem hu Vajtswv ua leej Txiv yam li nws sib luag zos li Vajtswv ntag. Yexus hais rau lawv tias, “Kuv hais tseeb rau nej tias, leej Tub yeej ua tsis tau ib yam dabtsi raws li nws lub siab, tsuas yog nws ua tej uas nws pom leej Txiv ua xwb, vim leej Txiv ua yam twg, leej Tub kuj ua ib yam li ntawd. Rau qhov leej Txiv hlub leej Tub thiab qhia txhua yam uas nws ua rau leej Tub pom. Thiab leej Txiv yuav qhia tej haujlwm uas loj dua li ntawd rau leej Tub pom, mas nej yuav xav tsis thoob. Leej Txiv tsa cov neeg tuag sawv rov los thiab pub txojsia rau lawv li cas, leej Tub kuj yuav pub txojsia rau cov uas nws xav pub ib yam li ntawd. Leej Txiv tsis txiav txim rau leejtwg, tiamsis nws muab qhov uas txiav txim cob rau leej Tub, kom txhua tus thiaj li hwm leej Tub ib yam li hwm leej Txiv. Tus uas tsis hwm leej Tub tus ntawd kuj tsis hwm leej Txiv uas txib leej Tub los. Kuv hais tseeb rau nej tias, tus uas mloog kuv lus thiab ntseeg tus uas txib kuv los, tus ntawd kuj tau txojsia ib txhis tsis kawg. Nws yuav tsis raug txiav txim, nws twb hla txojkev tuag mus tau txojsia lawm. “Kuv hais tseeb rau nej tias lub sijhawm tabtom los thiab twb los txog lawm mas cov neeg tuag yuav hnov Vajtswv leej Tub lub suab thiab cov uas tau hnov yuav muaj txojsia nyob. Rau qhov leej Txiv muaj txojsia rau hauv nws tus kheej li cas, nws kuj pub leej Tub muaj txojsia rau hauv leej Tub tus kheej ib yam li ntawd, thiab pub leej Tub muaj hwjchim txiav txim, rau qhov nws kuj yog Neeg leej Tub. Tsis txhob phimhwj rau tej no li, vim tias lub sijhawm tabtom los mas txhua tus uas nyob hauv qhov ntxa yuav hnov leej Tub lub suab thiab yuav tawm los. Cov uas ua zoo yuav sawv los tau txojsia, cov uas ua phem yuav sawv los raug txiav txim.” “Kuv yuav ua ib yam dabtsi raws li kuv lub siab tsis tau. Kuv tau hnov li cas kuv kuj txiav txim li ntawd. Kuv yeej txiav txim ncaj rau qhov kuv tsis ua raws li kuv lub siab xwb tiamsis ua raws li tus uas txib kuv los lub siab. Yog kuv rov ua timkhawv txog kuv tus kheej, kuv tej lus timkhawv kuj tsis tseeb. Muaj dua ib tug ua timkhawv txog kuv, thiab kuv paub tias tej lus timkhawv uas nws ua txog kuv ntawd muaj tseeb. Nej twb tso neeg mus cuag Yauhas, thiab Yauhas kuj ua timkhawv txog qhov tseeb. Kuv tsis yuav neeg li lus timkhawv. Kuv hais tej no xwv nej thiaj dim. Yauhas yog lub teeb uas taws ci lam lug thiab nej kuj zoo siab xyiv fab rau Yauhas qhov kaj ib nyuag ntu. Tiamsis tej lus timkhawv uas kuv muaj loj dua Yauhas tej lus timkhawv, rau qhov tej haujlwm uas leej Txiv muab cob rau kuv ua kom tiav, yog tej haujlwm uas kuv tabtom ua no, ua timkhawv txog kuv tias leej Txiv txib kuv los. Thiab leej Txiv uas txib kuv los kuj ua timkhawv txog kuv. Nej tsis tau hnov nws lub suab thiab tsis tau pom nws lub cev, thiab nej tsis muaj nws tej lus nyob ruaj rau hauv nej, rau qhov nej tsis ntseeg tus uas leej Txiv txib los. Nej tshawb nrhiav Vajtswv txojlus rau qhov nej xav tias yuav ntsib txojsia ib txhis tsis kawg hauv txojlus ntawd. Txojlus ntawd kuj ua timkhawv txog kuv, tiamsis nej tsis yeem los cuag kuv xwv thiaj tau txojsia. “Kuv tsis txais koob meej ntawm neeg. Tiamsis kuv paub tias nej tsis hlub Vajtswv. Kuv tuaj hauv kuv leej Txiv lub npe los nej tsis lees yuav kuv. Yog luag tuaj hauv lawv tus kheej lub npe, nej kuj lees yuav tus ntawd. Nej yuav ua li cas ntseeg tau kuv vim nej tau tej koob meej uas ib leeg muab rau ib leeg, tsis yog nrhiav lub koob meej uas Vajtswv uas yog tib tug Vajtswv muab? Tsis txhob xav tias kuv yuav kom nej rau leej Txiv. Muaj ib tug kom nej lawm yog Mauxe uas nej muaj siab vam. Yog nej ntseeg Mauxe, nej kuj yuav ntseeg kuv, rau qhov Mauxe twb sau qhia txog kuv. Yog nej tsis ntseeg tej uas Mauxe sau tseg, nej yuav ua li cas ntseeg tau kuv tej lus?” Dhau ntawd Yexus hla Hiavtxwv Kalilais uas yog Hiavtxwv Thinpela mus rau sab tim ub. Muaj neeg coob coob raws nws qab mus vim yog lawv pom tej txujci tseem ceeb uas Yexus ua rau cov neeg muaj mob. Yexus nce mus rau pem roob nrog nws cov thwjtim zaum ua ke. Thaum ntawd ze lub sijhawm uas cov Yudai ua kevcai Hla Dhau. Thaum Yexus tsa muag ntsia pom neeg coob heev tuaj cuag nws, nws txawm hais rau Fili tias, “Peb yuav yuav mov qhovtwg los rau cov neeg no noj?” Yexus hais li ntawd sim Fili, rau qhov Yexus yeej paub tias nws yuav ua dabtsi. Fili teb Yexus tias, “Ob puas denalia twb tsis txaus yuav mov rau cov neeg no noj ib leeg mentsis.” Ximoos Petus tus kwv Anru uas yog ib tug thwjtim hais rau Yexus tias, “Muaj ib tug tub nyob no muaj tsib lub ncuav qeb thiab ob tug ntses. Tiamsis qhov nyuag no yuav ua li cas txaus rau neeg coob li no noj?” Yexus hais tias, “Kom cov neeg zaum.” Qhov chaw ntawd muaj nyom ntau, ces cov neeg txawm zaum, suav cov txivneej xwb muaj kwvlam tsib txhiab leej. Yexus txawm muab cov ncuav ntawd los mas thaum nws ua Vajtswv tsaug tag nws muab faib rau cov neeg uas zaum ntawd npaum li uas lawv cheem tsum, thiab muab cov ntses faib ib yam li ntawd. Thaum lawv noj tsau lawm Yexus hais rau cov thwjtim tias, “Cia li khaws tej uas lawv noj tsis tag cia, tsis txhob cia ib nyuag qho poob xuam mus.” Lawv txawm khaws tej uas cov neeg ntawd noj tsis tag ntawm tsib lub ncuav qeb ntawd tau kaum ob tawb puv nkaus. Thaum cov neeg pom tej txujci tseem ceeb uas Yexus ua ntawd, lawv txawm hais tias, “Tus no yeej yog tus xibhwb cev Vajtswv lus uas yuav los rau hauv ntiajteb tiag tiag li.” Thaum Yexus paub tias lawv twb yuav tuaj yuam nws coj mus tsa ua vajntxwv, nws txawm nce tib leeg mus pem roob lawm. Thaum yuav tsaus ntuj Yexus cov thwjtim txawm mus rau nram hiavtxwv, thiab nce nkoj hla hiavtxwv mus rau lub moos Khapena‑u. Thaum ntawd twb tsaus ntuj lawm los Yexus tsis tau los txog lawv. Cua txawm ntsawj heev ua rau dej hiavtxwv ntas. Thaum lawv nquam nkoj mus kwvlam tsib rau kilu kev, lawv pom Yexus mus kotaw saum nplaim dej hiavtxwv tabtom tuaj ze lub nkoj. Lawv ntshai kawg, tiamsis Yexus hais rau lawv tias, “Yog kuv ntag. Tsis txhob ntshai.” Lawv thiaj txaus siab hlo cia Yexus nce rau hauv lub nkoj. Tamsim ntawd lub nkoj txawm mus txog tim ntug uas lawv yuav mus ntawd. Hnub tom qab cov neeg uas tseem nyob sab ntug dej hiavtxwv tim ub pom tias tsuas muaj tib lub nkoj nyob ntawd xwb thiab twb tsis pom Yexus nrog cov thwjtim nce nkoj mus, tsuas yog Yexus cov thwjtim mus xwb. Tamsim ntawd muaj dua ib co nkoj tuaj ntawm Thinpela tuaj nres ze lub chaw uas lawv tau noj ncuav uas tus Tswv ua Vajtswv tsaug lawd. Thaum cov neeg ntawd pom tias Yexus thiab nws cov thwjtim tsis nyob qhov ntawd lawm, lawv txawm nce tej nkoj ntawd mus nrhiav Yexus rau ntawm lub moos Khapena‑u. Thaum lawv ntsib Yexus sab hiavtxwv tim ub lawv hais rau nws tias, “Lanpi, koj tuaj rau ntawm no thaum twg lawm?” Yexus teb lawv tias, “Kuv hais tseeb rau nej tias, qhov uas nej nrhiav kuv tsis yog vim nej pom tej txujci tseem ceeb tiamsis yog nej tau noj ncuav tsau lawm. Tsis txhob ua haujlwm nrhiav tej mov uas txawj lwj, tiamsis yuav tsum nrhiav tej mov uas nyob ruaj thiaj tau txojsia ib txhis tsis kawg, uas Neeg leej Tub yuav pub rau nej, rau qhov Vajtswv uas yog leej Txiv twb nias hom thawj qhwv nws lawm.” Lawv txawm hais rau Yexus tias, “Peb yuav tsum ua li cas thiaj ua tau Vajtswv tes haujlwm?” Yexus teb lawv tias, “Vajtswv tes haujlwm yog li no, yog ntseeg tus uas Vajtswv txib los.” Lawv txawm hais rau nws tias, “Yog li ntawd koj yuav ua txujci dabtsi rau peb pom peb thiaj li ntseeg koj? Koj yuav ua dabtsi? Peb tej poj koob yawm txwv tau noj mana hauv tebchaws moj sab qhua, raws li muaj lus sau cia hais tias, ‘Nws pub zaub mov saum ntuj rau lawv noj.’ ” Yexus txawm hais rau lawv tias, “Kuv hais tseeb rau nej tias, tsis yog Mauxe pub cov mov saum ntuj rau nej. Tiamsis kuv leej Txiv pub cov tseem mov saum ntuj los rau nej. Rau qhov Vajtswv cov mov yog tus uas los saum ntuj los thiab pub txojsia rau neeg ntiajteb.” Lawv hais rau nws tias, “Tus Tswv, thov pub cov mov ntawd rau peb noj mus li.” Yexus hais rau lawv tias, “Kuv yog cov mov pub txojsia. Tus uas los cuag kuv yuav tsis tshaib, thiab tus uas tso siab rau kuv yuav tsis nqhis dua li lawm. Tiamsis kuv hais rau nej tias nej twb pom kuv los nej tseem tsis ntseeg kuv. Txhua tus uas leej Txiv muab pub rau kuv yeej yuav los cuag kuv. Thiab tus uas los cuag kuv, kuv yuav tsis muab laim pov tseg kiag li. Rau qhov kuv los saum ntuj los tsis yog los ua raws li kuv lub siab xwb tiamsis ua raws li tus uas txib kuv los lub siab. Tus uas txib kuv los lub siab xav li no, yog txhua tus uas nws muab cob rau kuv lawd yuav tsis ploj ib tug li, thiab hnub kawg kuv yuav tsa kom tus ntawd ciaj sawv rov los. Rau qhov kuv leej Txiv lub siab xav li no, yog txhua tus uas pom leej Tub thiab tso siab rau nws yuav tau txojsia ib txhis tsis kawg thiab kuv yuav tsa tus ntawd ciaj sawv rov los rau hnub kawg.” Thaum ntawd cov Yudai txawm yws Yexus rau qhov nws hais tias, “Kuv yog cov mov uas los saum ntuj los.” Lawv txawm hais tias, “Tus no yog Yexus, uas yog Yauxej tus tub los tsis yog? Nws niam nws txiv peb kuj paub. Ua li cas nimno nws yuav hais tias, ‘Kuv nqes saum ntuj los’ no?” Yexus teb lawv tias, “Tsis txhob sib yws kiag li. Tsis muaj leejtwg yuav los cuag tau kuv tsuas yog leej Txiv uas txib kuv los rub nws los xwb, thiab kuv yuav tsa tus ntawd ciaj sawv los rau hnub kawg. Muaj lus sau cia rau hauv cov xibhwb cev Vajtswv lus phau ntawv hais tias, ‘Vajtswv yuav qhuab qhia lawv txhua tus.’ Txhua tus uas tau mloog thiab tau kawm paub ntawm leej Txiv kuj los cuag kuv. Tsis muaj leejtwg tau pom leej Txiv tsuas yog tus uas los ntawm Vajtswv los, nws thiaj tau pom leej Txiv lawm. Kuv hais tseeb rau nej tias, tus uas ntseeg kuj muaj txojsia ib txhis tsis kawg. Kuv yog cov mov pub txojsia. Nej tej poj koob yawm txwv tau noj mana hauv tebchaws moj sab qhua los lawv kuj tuag tag lawm. No yog cov mov uas los saum ntuj los mas tus uas tau noj lawm yuav tsis tuag. Kuv yog cov mov pub txojsia uas los saum ntuj los. Yog leejtwg noj cov mov no tus ntawd yuav muaj txojsia nyob mus ib txhis tsis kawg. Thiab cov mov uas kuv yuav pub rau lub ntiajteb muaj txojsia kuj yog kuv lub cev nqaij.” Cov Yudai txawm sib cam hais tias, “Tus no yuav muab nws cev nqaij rau peb noj li cas?” Yexus thiaj hais rau lawv tias, “Kuv hais tseeb rau nej tias, yog nej tsis tau noj Neeg leej Tub cev nqaij thiab tsis tau haus nws cov ntshav, mas nej yuav tsis tau txojsia. Tus uas noj kuv cev nqaij thiab haus kuv cov ntshav mas tau txojsia ib txhis tsis kawg, thiab kuv yuav tsa nws ciaj sawv los rau hnub kawg. Rau qhov kuv cev nqaij yog cov tseem mov thiab kuv cov ntshav yog cov tseem dej haus. Tus uas noj kuv cev nqaij thiab haus kuv cov ntshav, tus ntawd nyob hauv kuv thiab kuv kuj nyob hauv nws. Leej Txiv uas muaj txojsia nyob txib kuv los thiab kuv muaj txojsia vim yog muaj leej Txiv li cas, tus uas noj kuv yuav muaj txojsia vim yog muaj kuv ib yam li ntawd. No yog cov mov uas nqes saum ntuj los, tsis thooj li tej mov uas nej tej poj koob yawm txwv noj thiab lawv tuag tag lawm. Tus uas noj cov mov no yuav muaj txojsia nyob mus ib txhis tsis kawg.” Tej lus no Yexus hais rau thaum nws qhuab qhia hauv lub tsev sablaj ntawm lub moos Khapena‑u. Thaum cov thwjtim hnov Yexus hais li ntawd txawm muaj ntau leej hais tias, “Tej lus no nyuaj kawg li, leejtwg yuav lees tau?” Thaum Yexus paub tias nws cov thwjtim yws txog tej lus ntawd nws txawm hais rau lawv tias, “Tej lus no ua rau nej dawm lov? Yog nej pom Neeg leej Tub nce rov mus rau lub chaw uas thaum ub nws nyob, nej yuav hais li cas? Vaj Ntsuj Plig yog tus uas pub txojsia, lub cev nqaij tawv tsis muaj qabhau dabtsi. Tej lus uas kuv hais rau nej yog Ntsuj Plig ntawd thiab yog txojsia. Tiamsis nej cov muaj qee leej tsis ntseeg.” Rau qhov txij thaum chiv thawj los lawd Yexus yeej paub leejtwg tsis ntseeg thiab leejtwg yuav fav xeeb rau nws. Mas Yexus thiaj hais tias, “Vim li no kuv thiaj hais rau nej tias tsis muaj leejtwg los cuag tau kuv tsuas yog leej Txiv pub rau nws xwb thiaj los tau.” Txij ntawd los nws cov thwjtim ntau leej txawm thim tsis nrog Yexus mus lawm. Yexus txawm hais rau kaum ob tug thwjtim tias, “Nej kuj xav ncaim kuv mus thiab lov?” Ximoos Petus teb Yexus tias, “Tus Tswv, peb yuav mus cuag leejtwg? Koj tej lus thiaj pub txojsia ib txhis tsis kawg. Peb yeej ntseeg thiab paub tias koj yog tus dawb huv ntawm Vajtswv.” Yexus teb lawv tias, “Kuv xaiv nej kaum ob leeg los tsis yog? Tiamsis nej cov muaj ib tug yog dab.” Yog Yexus hais txog Yuda uas yog Ximoos Ikhali‑au tus tub, rau qhov nws yog ib tug hauv kaum ob tug thwjtim uas yuav fav xeeb rau Yexus. Dhau ntawd Yexus mus mus los los hauv lub xeev Kalilais. Nws tsis xav mus rau hauv lub xeev Yudia rau qhov cov Yudai pheej nrhiav kev txov Yexus. Thaum ntawd ze lub sijhawm uas cov Yudai ua kevcai nyob tsev pheeb suab. Yexus cov kwv txawm hais rau Yexus tias, “Cia li tawm ntawm no mus rau nram Yudia xwv koj cov thwjtim thiaj li pom tej haujlwm uas koj ua, vim tsis muaj leejtwg xav tau koob meej es yuav ua haujlwm nraim nkoos. Yog koj yuav ua tej no koj cia li tshwm ntsej muag rau sawvdaws pom.” Txawm yog Yexus cov kwv los kuj tsis tso siab rau nws. Yexus thiaj hais rau lawv tias, “Tsis tau txog kuv lub sijhawm, tiamsis nej li mas lub sijhawm twg kuj tau. Lub ntiajteb tsis muaj chaw ntxub nej tiamsis ntxub kuv vim kuv ua timkhawv tias tej uas ntiajteb ua mas phem kawg li. Nej cia li mus ua kevcai nyob tsev pheeb suab, kuv tsis mus ua zaum kevcai no vim tsis tau txog lub sijhawm uas teem cia rau kuv.” Thaum hais li ntawd tag lawd Yexus tseem nyob hauv Kalilais. Thaum Yexus cov kwv mus ua kevcai tsev pheeb suab tag lawm, Yexus kuj mus thiab tiamsis nws mus twjywm tsis tab meeg rau sawvdaws pom. Thaum ua zaum kevcai ntawd cov Yudai nrhiav Yexus thiab nug tias, “Nws nyob qhovtwg?” Tej neeg sib ntxhi zom zaws txog Yexus. Qee leej hais tias, “Nws yog neeg zoo,” qee leej hais tias, “Tsis yog, nws ua rau cov neeg yuam kev xwb.” Tiamsis tsis muaj leejtwg tab meeg hais txog Yexus vim yog ntshai cov Yudai. Thaum twb ua kevcai txog nrab lawm, Yexus nce mus qhuab qhia rau hauv lub tuam tsev. Cov Yudai xav tsis thoob hais tias, “Tus no twb tsis kawm ntawv ua cas nws paub ua luaj li?” Yexus teb lawv tias, “Tej lus uas kuv qhia tsis yog kuv li, tiamsis yog tus uas txib kuv los li. Yog leejtwg xav ua raws li Vajtswv lub siab nyiam, tus ntawd yuav paub tias tej lus qhia no los ntawm Vajtswv los lossis kuv hais raws li kuv lub siab xwb. Tus uas hais raws nws lub siab xwb yeej nrhiav koob meej rau nws tus kheej. Tiamsis tus uas nrhiav koob meej rau tus uas txib nws los tus ntawd yeej hais tseeb, tsis muaj ib qho dag li. Mauxe muab txoj kevcai rau nej los tsis yog? Tiamsis nej cov tsis muaj ib tug tuav txoj kevcai ntawd. Nej nrhiav kev tua kuv ua dabtsi?” Cov neeg ntawd teb tias, “Koj raug dab. Leejtwg nrhiav kev tua koj?” Yexus teb lawv tias, “Kuv tau ua ib yam xwb, mej txhua tus xav tsis thoob li. Mauxe qhia nej ua kevcai txiav, tiamsis txoj kevcai txiav ntawd tsis yog tau ntawm Mauxe los yog tau ntawm tej yawg koob thaum ub los. Nej twb muab neeg ua kevcai txiav rau hnub Xanpatau. Yog hnub Xanpatau nej twb muab menyuam tub ua kevcai txiav kom thiaj tsis txhaum Mauxe txoj kevcai, ua cas nej tseem chim rau qhov uas kuv kho ib tug yawg zoo mob rau hnub Xanpatau? Tsis txhob txiav txim raws li lub qhov muag pom xwb, yuav tsum txiav raws li qhov ncaj.” Cov neeg hauv Yeluxalees qee leej thiaj hais tias, “Tus no tsis yog tus uas lawv nrhiav kev tua lov? Nws twb nyob ntawm no nev, nws tabtom hais tab meeg los lawv tsis hais li cas rau nws. Nyaj cov uas ua hlob yeej paub tseeb tias tus no yog tus Kheto los tsis yog? Tiamsis peb paub tias tus no tuaj qhovtwg tuaj. Thaum tus Khetos tshwm los yuav tsis muaj leejtwg paub tias nws tuaj qhovtwg tuaj.” Thaum Yexus qhuab qhia hauv lub tuam tsev nws txawm qw hais tias, “Nej yeej paub kuv thiab paub tias kuv tuaj qhovtwg tuaj. Tsis yog kuv tuaj raws li kuv lub siab xwb. Tus uas txib kuv tuaj mas muaj tseeb los nej tsis paub nws. Kuv paub nws vim yog kuv tuaj ntawm nws tuaj thiab nws txib kuv tuaj.” Lawv txawm nrhiav kev ntes Yexus tiamsis tsis muaj leejtwg tsa tes kov nws vim tsis tau txog nws lub sijhawm. Tiamsis muaj ntau leej hauv cov neeg ntawd ntseeg Yexus thiab hais tias, “Thaum tus Khetos tshwm los, nws yuav ua tej txujci tseem ceeb ntau dua tus no ua thiab lov?” Thaum cov Falixai hnov tej pejxeem sib ntxhi txog Yexus li ntawd, cov pov thawj hlob thiab cov Falixai txawm txib tub teg tub taws mus ntes Yexus. Yexus txawm hais tias, “Kuv yuav nrog nej nyob tsis ntev, ces kuv yuav rov mus cuag tus uas txib kuv tuaj. Nej yuav nrhiav kuv los nrhiav tsis tau. Qhov chaw uas kuv nyob ntawd nej mus tsis tau.” Cov Yudai txawm sib tham hais tias, “Tus yawg no yuav mus rau qhovtwg uas peb nim yuav nrhiav tsis tau nws? Nws yuav mus rau peb cov neeg uas nyob ua sab ua sua rau hauv cov Kili thiab qhia cov Kili lov? Qhov uas nws hais tias, ‘Nej yuav nrhiav kuv los nrhiav tsis tau,’ thiab ‘Qhov chaw uas kuv nyob ntawd nej mus tsis tau,’ lub ntsiab yog li cas?” Hnub kawg uas lawv ua kevcai ntawd yog hnub tseem ceeb heev, Yexus sawv ntsug qw nrov hais tias, “Yog leejtwg nqhis, cia tus ntawd los cuag kuv thiab haus. Leejtwg tso siab rau kuv yuav muaj raws li Vajtswv txojlus uas sau cia hais tias, ‘Tej niag dej uas pub txojsia yuav txhawv ntws hauv tus ntawd lub siab los.’ ” Qhov uas Yexus hais ntawd yog hais txog Vaj Ntsuj Plig uas cov uas tso siab rau Yexus yuav tau txais. Rau qhov tseem tsis tau pub Vaj Ntsuj Plig los vim Yexus tseem tsis tau txais lub hwjchim ci ntsa iab. Thaum cov neeg tau hnov li ntawd, muaj qee leej hais tias, “Tus no yog tus xibhwb cev Vajtswv lus tiag tiag li.” Lwm tus kuj hais tias, “Tus no yog tus Khetos.” Muaj qee leej hais tias, “Tus Khetos yuav tshwm hauv Kalilais tuaj lov? Vajtswv txojlus hais cia tias tus Khetos yuav tshwm hauv Davi caj ces los thiab tshwm los hauv lub moos Npelehee uas Davi txeev nyob los tsis yog?” Yog li no cov neeg thiaj sib cam txog Yexus. Qee leej xav ntes Yexus tiamsis tsis muaj leejtwg tsa tes kov nws li. Cov tub teg tub taws rov qab mus cuag cov pov thawj hlob thiab cov Falixai. Lawv txawm nug cov tub teg tub taws tias, “Ua li cas nej tsis ntes nws los?” Cov tub teg tub taws teb tias, “Tsis txeev muaj ib tug txawj hais li tus ntawd kiag li.” Cov Falixai teb lawv tias, “Nej raug nws ntxias lawm thiab lov? Cov uas ua hlob thiab cov Falixai muaj leejtwg ntseeg nws thiab lov? Tiamsis cov pejxeem no uas tsis paub Mauxe kevcai twb raug tsawm foom lawm.” Nikhaudemau uas tom ntej tuaj cuag Yexus thiab yog ib tug hauv lawv cov ntawd thiaj hais rau lawv tias, “Peb txoj kevcai txeev txiav txim rau neeg ua ntej uas tsis tau hnov nws hais lossis tsis tau paub tias nws ua dabtsi lov?” Lawv txawm teb tias, “Koj tuaj pem Kalilais tuaj thiab lov? Koj sim tshawb saib, yuav pom tias tsis muaj ib tug xibhwb cev Vajtswv lus tshwm hauv Kalilais tuaj li.” (7:53‑8:11 - tej phau lus Kili tsis muaj tej nqes no.) [Ces lawv txawm nyias mus nyias tsev lawm. Yexus txawm mus rau ntawm lub roob Txiv Aulib. Mas tagkis sawv ntxov nws tuaj rau hauv lub tuam tsev dua ib zaug. Cov neeg sawvdaws tuaj cuag Yexus thiab nws zaum qhuab qhia lawv. Ces cov xibhwb qhia Vajtswv kevcai thiab cov Falixai txawm coj ib tug pojniam uas raug ntes thaum deev hluas nraug tuaj cuag Yexus, thiab kom nws sawv tab meeg ntawm cov neeg xubntiag. Lawv hais rau Yexus tias, “Xibhwb, tus pojniam no raug ntes rau thaum tabtom deev hluas nraug. Hauv phau kevcai Mauxe hais kom peb xuas pob zeb ntaus tus neeg zoo li no kom tuag. Koj yuav hais li cas?” Lawv hais li no sim Yexus thiaj tau chaw kom nws. Ces Yexus txawm khoov ntshis xuas ntiv tes sau rau hauv av. Lawv tseem pheej nug tsis tu, Yexus txawm sawv los hais rau lawv tias, “Nej cov leejtwg uas tsis muaj txim cia tus ntawd xub xuas pob zeb ntaus tus pojniam no.” Yexus txawm rov khoov ntshis xuas ntiv tes sau rau hauv av dua. Thaum lawv hnov Yexus hais li ntawd lawv txawm tawm mus ib tug zuj zus cov laus xub mus ua ntej, tshuav Yexus tib leeg thiab tus pojniam ntawd sawv ntawm Yexus xubntiag xwb. Yexus sawv los hais rau tus pojniam ntawd tias, “Mentxhais, lawv dua twg tag lawm? Tsis muaj leejtwg rau txim rau koj lov?” Nws hais tias, “Tus Tswv, tsis muaj leejtwg li.” Mas Yexus txawm hais tias, “Kuv kuj tsis rau txim rau koj ib yam nkaus thiab. Cia li mus tsev, tsis txhob rov ua txhaum dua li lawm.”] Yexus hais dua rau lawv tias, “Kuv yog qhov kaj rau lub ntiajteb. Tus uas raws kuv qab mus yuav tsis taug txojkev tsaus ntuj, tiamsis nws yuav muaj qhov kaj uas pub txojsia.” Cov Falixai txawm hais rau Yexus tias, “Koj rov ua timkhawv txog koj xwb. Koj tej lus timkhawv tsis muaj tseeb.” Yexus teb tias, “Txawm yog kuv ua timkhawv rau kuv tus kheej, los kuv tej lus yeej muaj tseeb, rau qhov kuv paub tias kuv tuaj qhovtwg tuaj thiab yuav mus qhovtwg. Tiamsis nej cov tsis paub tias kuv tuaj qhovtwg tuaj thiab yuav mus rau qhovtwg. Nej txiav txim raws li neeg ntiajteb txiav, kuv tsis txiav txim rau leejtwg. Tiamsis yog kuv yuav txiav txim los kuv yeej txiav txim raug cai, rau qhov tsis yog kuv tib leeg txiav txim xwb, tiamsis kuv thiab leej Txiv uas txib kuv los wb txiav txim ua ke. Nej txoj kevcai muaj sau cia hais tias tej lus timkhawv uas muaj ob leeg hais yeej yog muaj tseeb. Kuv ua timkhawv rau kuv tus kheej thiab leej Txiv uas txib kuv los kuj ua timkhawv rau kuv thiab.” Lawv txawm hais rau Yexus tias, “Koj leej txiv nyob qhovtwg?” Yexus teb tias, “Nej tsis paub kuv thiab tsis paub kuv leej Txiv. Yog nej paub kuv, nej kuj yuav paub kuv leej Txiv thiab.” Yexus hais tej lus no ntawm lub txhab nyiaj rau thaum nws qhuab qhia hauv lub tuam tsev. Tiamsis tsis muaj leejtwg ntes nws, vim yog tsis tau txog nws lub sijhawm. Yexus hais dua rau lawv tias, “Kuv yuav ncaim nej mus, mas nej yuav nrhiav kuv, thiab nej yuav tuag rau hauv nej lub txim. Lub chaw uas kuv mus ntawd nej mus tsis tau.” Cov Yudai txawm hais tias, “Nws yuav rov tua nws tuag lov? Rau qhov nws hais tias, ‘Lub chaw uas kuv mus ntawd nej mus tsis tau.’ ” Yexus hais rau lawv tias, “Nej yog neeg ntiajteb, kuv yog neeg qaum ntuj, nej yog ntiajteb li, kuv tsis yog ntiajteb li. Kuv twb hais rau nej tias nej yuav tuag rau hauv nej lub txim. Yog nej tsis ntseeg tias kuv yog tus ntawd, nej yeej yuav tuag rau hauv nej lub txim.” Lawv hais rau nws tias, “Koj yog leejtwg?” Yexus hais rau lawv tias, “Kuv yog tus uas kuv twb hais rau nej thaum chiv thawj lawd. Kuv tseem tshuav ntau yam uas yuav hais thiab yuav txiav txim ntsig txog nej. Tiamsis tus uas txib kuv los ncaj ncees thiab tej uas kuv tau hnov ntawm tus ntawd, kuv hais rau ntiajteb paub.” Lawv tsis nkag siab tias Yexus hais txog leej Txiv rau lawv. Yexus txawm hais tias, “Thaum nej muab Neeg leej Tub tsa rau saud ces nej yuav paub tias kuv yog tus ntawd ntag thiab paub tias kuv tsis ua ib yam dabtsi raws li kuv lub siab xwb, tiamsis leej Txiv qhia li cas kuv kuj hais li ntawd. Tus uas txib kuv los kuj nrog nraim kuv, nws tsis tso kuv nyob tib leeg, rau qhov kuv pheej ua raws li nws lub siab nyiam.” Thaum Yexus hais li ntawd, kuj muaj neeg coob tso siab rau nws. Yexus txawm hais rau cov Yudai uas tso siab rau nws tias, “Yog nej tuav rawv kuv tej lus, nej kuj yog kuv li thwjtim tiag tiag, thiab nej yuav paub qhov tseeb, thiab qhov tseeb yuav tso nej nyob ywj pheej.” Lawv txawm teb Yexus tias, “ Peb yog Aplahas caj ces, peb tsis txeev ua leejtwg li qhev. Ua li cas koj hais tias, ‘Peb yuav tau nyob ywj pheej’?” Yexus teb lawv tias, “Kuv hais tseeb rau nej tias, txhua tus uas ua txhaum kuj ua txojkev txhaum li qhev. Tus qhev tsis nyob hauv lub tsev mus ib txhis, tsuas yog tus tub thiaj nyob mus ib txhis. Vim li no yog leej Tub tso nej nyob ywj pheej, nej yuav tau nyob ywj pheej tiag tiag li. Kuv paub tias nej yog Aplahas li caj ces tiamsis nej nrhiav kev muab kuv tua pov tseg vim kuv tej lus tsis tau chaw nyob hauv nej. Kuv hais txog tej uas kuv pom thaum kuv nrog leej Txiv nyob, nej ua tej uas nej hnov nej leej txiv qhia.” Lawv teb Yexus tias, “Aplahas yog peb li txiv.” Yexus txawm hais rau lawv tias, “Yog nej yog Aplahas li menyuam, nej yeej yuav ua tej uas Aplahas ua. Kuv twb hais qhov tseeb uas kuv tau hnov ntawm Vajtswv rau nej los nej tseem nrhiav kev tua kuv. Aplahas twb tsis ua li no. Nej ua tej uas nej txiv ua.” Lawv hais rau Yexus tias, “Peb tsis yog menyuam tsaub, peb muaj tib leej txiv xwb, yog Vajtswv.” Yexus hais rau lawv tias, “Yog Vajtswv yog nej leej Txiv, ces nej yuav hlub kuv rau qhov kuv los ntawm Vajtswv los thiab nyob ntawm no lawm. Kuv tsis yog los raws li kuv lub siab xav, yog Vajtswv txib kuv los. Ua li cas nej tsis nkag siab tej lus uas kuv hais? Twb yog vim nej mloog tsis taus kuv tej lus. Nej los ntawm nej txiv uas yog Ntxwg Nyoog, nej xav ua raws li nej txiv lub siab nyiam xwb. Nws yog tus tua neeg thaum chiv keeb thaum ub los lawm, thiab nws tsis nyob hauv qhov tseeb vim nws tsis muaj qhov tseeb kiag li. Thaum nws hais dag, nws kuj hais raws li nws ib txwm hais, rau qhov nws yeej yog tus niag dag, thiab yog cov uas dag leej txiv. Tiamsis twb yog vim kuv hais qhov tseeb nej thiaj tsis ntseeg kuv. Nej cov muaj leejtwg hais tau tias kuv muaj txim? Yog kuv hais qhov tseeb, ua li cas nej tsis ntseeg kuv? Tus uas los ntawm Vajtswv yeej mloog Vajtswv tej lus. Qhov uas nej tsis mloog Vajtswv lus twb yog vim nej tsis los ntawm Vajtswv los.” Cov Yudai teb Yexus tias, “Qhov uas peb hais tias koj yog neeg Xamali thiab koj raug dab ntawd tsis tseeb lov?” Yexus teb tias, “Kuv tsis raug dab. Kuv hwm kuv leej Txiv tiamsis nej saib tsis taus kuv. Kuv tsis nrhiav koob meej rau kuv. Muaj ib tug nrhiav rau kuv thiab nws yog tus uas yuav txiav txim. Kuv hais tseeb rau nej tias, yog leejtwg tuav rawv kuv tej lus, tus ntawd yuav tsis ntsib txojkev tuag.” Cov Yudai hais rau Yexus tias, “Nimno peb paub lawm tias yeej yog koj raug dab. Aplahas twb tuag lawm thiab cov xibhwb cev Vajtswv lus kuj tuag tag lawm tiamsis koj hais tias, yog leejtwg tuav rawv kuv tej lus, tus ntawd yuav tsis tau sim txojkev tuag li. Koj loj dhau peb txiv Aplahas uas twb tuag lawd lov? Cov xibhwb cev Vajtswv lus kuj tuag tag lawm thiab. Koj khav tias koj yog leejtwg?” Yexus teb tias, “Yog kuv huas koob meej rau kuv, kuv lub koob meej ntawd tsis muaj qabhau dabtsi. Kuv txiv yog tus uas muab koob meej rau kuv, yog tus uas nej hais tias yog nej tus Vajtswv. Nej twb tsis paub nws, tiamsis kuv paub nws. Yog kuv hais tias kuv tsis paub nws, kuj yog kuv dag ib yam li nej. Tiamsis kuv paub nws thiab kuv tuav rawv nws tej lus. Nej txiv Aplahas zoo siab uas yuav tau pom kuv hnub. Nws twb pom lawm thiab zoo siab kawg.” Cov Yudai txawm hais rau Yexus tias, “Koj hnub nyoog twb tsis tau txog tsib caug xyoo, koj txawm siv pom Aplahas lawm lov?” Yexus hais rau lawv tias, “Kuv hais tseeb rau nej tias, thaum tsis tau yug Aplahas, kuv yeej yog kuv.” Lawv txawm khaws pob zeb yuav ntaus nws, tiamsis Yexus cia li tsiv nraim tawm dhau hauv lub tuam tsev lawm. Thaum Yexus taug kev mus nws pom ib tug yawg dig muag ib txwm nruab thiab los. Yexus cov thwjtim nug Yexus tias, “Lanpi, leejtwg ua txhaum, yog nws ua lossis yog nws niam nws txiv ua nws thiaj yug los dig muag nruab thiab los li ntawd?” Yexus teb tias, “Tsis yog nws lossis nws niam nws txiv ua txhaum, tiamsis nws dig muag xwv Vajtswv tej haujlwm thiaj tshwm rau ntawm nws lub cev. Peb yuav tsum ua tus uas txib kuv los tes haujlwm rau thaum tseem nruab hnub. Qhov tsaus ntuj uas tsis muaj leejtwg ua tau haujlwm tabtom los. Thaum kuv tseem nyob hauv ntiajteb, kuv yog qhov kaj rau lub ntiajteb.” Thaum hais li ntawd lawm, Yexus txawm nti qaub ncaug rau hauv av, muab do xyaw ua av nplaum pleev tus dig muag ob lub qhov muag, thiab hais rau nws tias, “Cia li mus ntxuav muag tom lub pas dej Xilau‑as,” (Xilau‑as txhais tias txib mus). Tus dig muag txawm mus ntxuav qhov muag tag rov los mas pom kev lawm. Tej neeg zej zog uas txeev pom tus yawg ntawd thov khawv txawm hais tias, “Tus no yog tus uas txeev zaum thov khawv los tsis yog?” Muaj qee leej hais tias, “Yog tus ntawd ntag.” Muaj dua lwm tus hais tias, “Tsis yog, nws zoo thooj li tus ntawd xwb.” Nws tus kheej txawm hais tias, “Kuv yog tus ntawd ntag.” Lawv txawm hais rau nws tias, “Koj lub qhov muag pom kev tau li cas?” Nws teb tias, “Ib tug yawg uas hu ua Yexus ua av nplaum pleev kuv ob lub qhov muag thiab hais rau kuv tias, ‘Cia li mus ntxuav muag tom lub paj des Xilau‑as.’ Kuv txawm mus ntxuav muag tag ces pom kev lawm.” Lawv hais rau nws tias, “Tus ntawd nyob qhovtwg?” Nws hais tias, “Kuv tsis paub.” Lawv txawm coj tus uas txeev dig muag ntawd mus cuag cov Falixai. Hnub uas Yexus ua av nplaum thiab kho tus yawg ntawd pom kev yog hnub Xanpatau. Cov Falixai rov nug nws tias nws lub qhov muag pom kev tau li cas. Nws hais rau lawv tias, “Tus yawg ntawd muab av nplaum pleev kuv qhov muag ces kuv mus ntxuav tag txawm pom kev lawm.” Cov Falixai qee leej hais tias, “Tus yawg ntawd tsis yog tuaj ntawm Vajtswv tuaj vim yog nws tsis caiv hnub Xanpatau.” Tiamsis lwm tus hais tias, “Tus neeg muaj txim yuav ua tej txujci tseem ceeb no tau li cas?” Ces lawv txawm tsis sib hum lawm. Lawv txawm rov hais rau tus dig muag ntawd tias, “Koj hais li cas txog tus yawg ntawd, vim nws yog tus uas kho koj qhov muag pom kev?” Nws hais tias, “Nws yog ib tug xibhwb cev Vajtswv lus.” Cov Yudai tsis ntseeg tias nws txeev dig muag thiab pom kev lawm mus txog thaum lawv hu tus uas pom kev lawd niam thiab txiv tuaj, thiab nug ob tug tias, “Tus no puas yog neb tus tub uas neb hais tias dig muag thaum nruab thiab los? Ua li cas nimno nws ho pom kev lawm?” Nws niam nws txiv teb tias, “Wb paub tias tus no yeej yog wb tus tub thiab paub tias nws yeej dig muag thaum yug los. tiamsis wb tsis paub tias ua li cas nimno nws ho pom kev lawm thiab xyov leejtwg kho nws qhov muag pom kev. Nej nug nws maj. Nws twb hlob lawm, nws txawj piav qhia nej.” Nws niam nws txiv hais li no vim ob tug ntshai cov Yudai, rau qhov cov Yudai twb hais hum lawm tias yog leejtwg lees hais tias Yexus yog tus Khetos, tus ntawd yuav raug muab txiav tawm hauv lub tsev sablaj. Vim li no nws niam nws txiv thiaj hais tias, “Nws twb hlob lawm, cia li nug nws.” Lawv thiaj hu tus uas txeev dig muag los dua ib zaug thiab hais rau nws tias, “Cia li ua rau Vajtswv tau koob meej, peb paub tias tus yawg ntawd yog neeg muaj txim.” Nws teb tias, “Tus yawg ntawd muaj txim los tsis muaj, kuv tsis paub. Kuv tsuas paub tib yam xwb, yog qhov uas kuv txeev dig muag tiamsis nimno kuv pom kev lawm.” Lawv txawm hais rau nws tias, “Tus yawg ntawd ua li cas rau koj? Nws ua li cas koj lub qhov muag thiaj pom kev lawm?” Nws teb lawv tias, “Kuv twb hais tag rau nej lawm los nej tsis mloog. Ua li cas nej tseem xav mloog dua thiab? Nej xav ua tus ntawd li thwjtim thiab lov?” Lawv txawm thuam nws hais tias, “Koj yog nws li thwjtim, peb yog Mauxe li thwjtim. Peb paub tias Vajtswv hais lus rau Mauxe, tiamsis tus yawg ntawd peb tsis paub tias nws tuaj qhovtwg tuaj.” Nws teb lawv tias, “Aub, xav tsis thoob li lauj! Nej tsis paub tias nws tuaj qhovtwg tuaj los nws tseem kho kuv lub qhov muag pom kev. Peb paub tias Vajtswv tsis mloog tej neeg muaj txim li lus, tsuas yog mloog tus uas paub ntshai Vajtswv thiab ua raws li Vajtswv lub siab nyiam xwb. Chiv keeb thaum ub los tsis txeev hnov tias muaj leejtwg kho tau tus uas dig muag thaum nruab thiab los pom kev. Yog tus yawg ntawd tsis los ntawm Vajtswv los nws yuav ua tsis tau dabtsi li.” Lawv teb nws tias, “Koj yeej muaj tuam txim txij thaum yug los, es koj tseem yuav qhia peb thiab lov?” Ces lawv txawm muab nws ntiab tawm mus lawm. Yexus hnov tias cov Yudai muab tus ntawd ntiab tawm lawm. Thaum Yexus nrhiav tau nws, Yexus hais tias, “Koj tso siab rau Neeg leej Tub lov?” Nws teb tias, “Yawg hlob, leejtwg yog Neeg leej Tub uas kuv yuav tso siab tau?” Yexus hais rau nws tias, “Koj twb pom nws lawm, yog tus uas tabtom nrog koj hais lus no.” Nws txawm hais tias, “Tus Tswv, kuv tso siab.” Ces nws txawm pe hawm Yexus. Yexus hais tias, “Kuv los rau hauv lub ntiajteb yog los txiav txim kom cov uas tsis pom kev thiaj li pom kev, thiab cov uas pom kev yuav dig muag.” Cov Falixai uas nyob ntawd muaj qee leej hnov Yexus hais li ntawd lawv txawm hais rau nws tias, “Peb dig muag thiab lov?” Yexus hais rau lawv tias, “Yog nej dig muag nej yuav tsis muaj txim. Tiamsis vim nimno nej hais tias, ‘Peb pom kev,’ nej tseem muaj txim.” “ Kuv hais tseeb rau nej tias, tus uas tsis nkag lub rooj nkuag yaj tiamsis nce lwm qhov los tus ntawd yog tub sab tub nyiag. Tus uas nkag lub rooj nkuag thiaj yog tus tswv yug yaj. Tus uas zov rooj nkuag thiaj qheb rooj nkuag rau nws. Pab yaj yeej mloog nws lub suab, nws cuab nws cov yaj tej npe thiab nws coj yaj tawm mus. Thaum nws tso nws cov yaj huvsi tawm tag lawm nws coj kev ua ntej, cov yaj raws nws qab vim yog paub nws lub suab. Dua lwm tus cov yaj tsis raws qab, muaj uas khiav ntawm nws mus xwb vim tsis paub nws lub suab.” Zaj piv lus no Yexus hais rau lawv tiamsis lawv tsis nkag siab tej ntsiab lus uas Yexus hais rau lawv. Yexus txawm rov hais rau lawv tias, “Kuv hais tseeb rau nej tias, kuv yog lub rooj nkuag yaj. Txhua tus uas tuaj ua kuv ntej puavleej yog tub sab tub nyiag, tiamsis cov yaj tsis mloog lawv. Kuv yog lub rooj nkuag. Leejtwg nkag ntawm kuv mus tus ntawd yuav dim. Nws yuav nkag mus nkag los thiab nrhiav tau zaub noj. Tub sab tsuas yog tuaj nyiag thiab tua thiab ua kom puam tsuaj xwb. Kuv los kom lawv thiaj tau txojsia thiab tau txojsia puv npo. “Kuv yog tus tswv yug yaj uas zoo. Tus tswv yug yaj uas zoo yeej tso nws txojsia this cov yaj. Tus uas raug ntiav tsis yog tus tswv yug yaj, cov yaj tsis yog nws li. Thaum nws pom hma tuaj nws tso cov yaj tseg khiav lawm, hma thiaj raws tom cov yaj khiav tawg ua sab ua sua. Tus ntawd khiav vim nws raug ntiav xwb thiab tsis mob siab cov yaj. Kuv yog tus tswv yug yaj uas zoo. Kuv paub kuv cov yaj thiab kuv cov yaj paub kuv, ib yam li leej Txiv paub kuv thiab kuv paub leej Txiv. Thiab kuv tso kuv txojsia this cov yaj. Kuv tseem muaj dua ib co yaj uas tsis nyob hauv lub nkuaj no, kuv yuav tsum mus coj los. Thiab cov yaj ntawd yuav mloog kuv lub suab, thiab yuav los koom ua ib pab muaj ib tug tswv yug xwb. Qhov uas leej Txiv hlub kuv yog vim kuv tso kuv txojsia tseg thiaj tau txojsia ntawd rov los. Tsis muaj leejtwg yuav txeeb tau kuv txojsia mus tiamsis kuv tso kuv txojsia raws li kuv npaj siab tseg. Kuv muaj cai tso txojsia tseg thiab muaj cai muab txojsia rov los. Tej lus nkaw no kuv tau ntawm kuv leej Txiv los.” Tej lus no ua rau cov Yudai rov tsis sib hum lawm. Ntau leej hais tias, “Tus no raug dab thiab vwm. Mus mloog nws hais ua dabtsi?” Dua lwm tus hais tias, “Tej lus no tsis yog tus neeg raug dab hais. Dab nim ua tau neeg dig muag pom kev lov?” Thaum ntawd yog lub sijhawm uas ua kevcai xyeem lub tuam tsev hauv Yeluxalees, thiab yog lub caij ntuj no. Yexus ncig mus hauv lub tuam tsev ntawm Zaj Qab Khav Xalaumoo. Cov Yudai txawm tuaj vij vog Yexus thiab hais tias, “Koj yuav cia peb pheej tsis to taub ntev li cas? Yog koj yog tus Khetos cia li qhia tseeb kiag rau peb paub.” Yexus teb lawv tias, “Kuv twb hais rau nej lawm tiamsis nej tsis ntseeg. Tej haujlwm uas kuv tuav kuv leej Txiv lub npe ua, twb ua timkhawv rau kuv lawm. Tiamsis nej tsis ntseeg vim nej tsis yog kuv cov yaj. Kuv cov yaj yeej mloog kuv lub suab, kuv paub cov yaj ntawd thiab cov yaj kuj raws kuv qab. Thiab kuv pub txojsia ib txhis rau lawv. Tsis muaj ib hnub uas lawv yuav puam tsuaj, thiab tsis muaj leejtwg yuav txeeb tau lawv hauv kuv txhais tes mus. Kuv leej Txiv uas pub lawv rau kuv loj dua txhua yam, tsis muaj leejtwg yuav txeeb tau lawv ntawm leej Txiv txhais tes mus. Kuv thiab leej Txiv yog ib tug xwb.” Cov Yudai txawm rov khaws pob zeb los yuav ntaus Yexus dua. Yexus txawm hais rau lawv tias, “Kuv twb qhia leej Txiv li haujlwm ntau yam zoo rau nej pom. Nej tseem khaws pob zeb yuav ntaus kuv yog tim yam haujlwm twg?” Cov Yudai teb Yexus tias, “Qhov uas peb yuav xuas pob zeb ntaus koj tsis yog tim yam haujlwm zoo twg, tiamsis yog tim qhov uas koj hais lus tuam mom Vajtswv, vim koj tsuas yog neeg xwb los nim tsab ua Vajtswv.” Yexus teb lawv tias, “Hauv nej phau kevcai twb muaj lus sau cia hais tias, ‘Kuv hais tias, nej yog timtswv,’ los tsis yog? Yog Vajtswv hu cov uas txais Vajtswv txojlus tias yog timtswv, (mas yeej rhuav tsis tau Vajtswv txojlus,) ua cas nej nrhiav lus kom tus uas leej Txiv tau tsa ua tus dawb huv thiab txib los rau hauv lub ntiajteb? Ua cas nej hais tias, ‘Koj hais lus tuam mom Vajtswv’ no, vim qhov uas kuv hais tias, ‘Kuv yog Vajtswv leej Tub,’? Yog kuv tsis ua kuv leej Txiv tes haujlwm, kuj tsis txhob tso siab rau kuv kiag li. Tiamsis yog kuv ua nws tes haujlwm, txawm yog nej tsis tso siab rau kuv los nej yuav tsum tso siab rau tej haujlwm ntawd, kom nej thiaj paub thiab nkag siab tias leej Txiv nyob hauv kuv thiab kuv nyob hauv leej Txiv.” Lawv yooj xeeb yuav ntes Yexus dua ib zaug tiamsis nws khiav dhau ntawm lawv txhais tes lawm. Nws hla tus dej Yaladee rov mus rau lub chaw uas Yauhas txeev ua kevcai raus dej thiab so qhov ntawd. Muaj neeg coob tuaj cuag Yexus thiab hais tias, “Yauhas tsis ua txujci tseem ceeb dabtsi, los txhua yam uas Yauhas hais txog Yexus puavleej muaj tseeb.” Muaj neeg ntau leej tso siab rau Yexus qhov ntawd. Muaj ib tug txivneej npe hu ua Laxalau tabtom mob nyob hauv Npethani yog lub zos uas Maivliag thiab nws tus niam laus Matha nyob. Tus Maivliag no yog tus uas muab roj tsw qab los pleev tus Tswv thiab muab nws cov plaubhau so tus Tswv kotaw, yog nws tus nus Laxalau tabtom mob. Yog li ntawd ob tug muam thiaj txib neeg mus hais rau Yexus tias, “Tus Tswv, tus uas koj hlub tabtom mob.” Thaum Yexus hnov li ntawd nws hais tias, “Tus mob ntawd yuav tsis ua rau nws tuag, tiamsis yuav ua rau Vajtswv tau koob meej kom Vajtswv leej Tub thiaj tau koob meej ntawm tus mob ntawd.” Yexus hlub Matha thiab nws tus niam hluas thiab Laxalau heev. Thaum Yexus hnov tias Laxalau mob, nws tseem nyob lub qub chaw uas nws nyob ntawd tau ob hnub ntxiv thiab. Dhau ntawd Yexus hais rau nws cov thwjtim tias, “Peb cia li rov mus rau hauv lub xeev Yudia.” Cov thwjtim hais rau nws tias, “Lanpi, nyuam qhuav dhau tsis ntev no cov Yudai twb nrhiav kev xuas pob zeb ntaus koj kom tuag, koj tseem yuav rov mus rau hauv dua thiab lov?” Yexus teb tias, “Nruab hnub muaj kaum ob teev los tsis yog? Yog leejtwg taug kev nruab hnub nws yuav tsis dawm rau qhov nws pom qhov kaj hauv lub ntiajteb no. Tiamsis yog leejtwg taug kev hmo ntuj nws yuav dawm vim nws tsis muaj qhov kaj.” Yexus hais li ntawd tag ces nws txawm hais rau lawv tias, “Peb tus kwvluag Laxalau tsaug zog lawm, tiamsis kuv yuav mus tsa kom nws tsim dheev los.” Cov thwjtim hais rau Yexus tias, “Tus Tswv, yog nws tsaug zog lawm, nws tus mob yeej yuav zoo.” Yexus hais txog qhov uas Laxalau tuag tiamsis lawv xav tias Yexus hais txog qhov uas Laxalau pw tsaug zog xwb. Yexus thiaj qhia ncaj nraim rau lawv hais tias, “Laxalau twb tuag lawm. Vim yog saib rau nej kuv thiaj zoo siab uas kuv tsis tau nyob qhov ntawd xwv nej thiaj tau kev ntseeg. Peb cia li mus rau ntawm nws.” Thauma uas hu hais tias Didoma txawm hais rau nws tib pab thwjtim ntawd tias, “Peb cia li mus thiab, xwv peb thiaj tau nrog tus Tswv tuag ua ke.” Thaum Yexus tuaj txog mas pom tias twb muab Laxalau log rau hauv lub qhov ntxa tau plaub hnub lawm. Lub zos Npethani nyob ze Yeluxalees kwvlam peb kilu kev, mas cov Yudai muaj coob leej tawm tuaj nplij Matha thiab Maivliag lub siab vim ob tug tus nus tuag lawm. Thaum Matha hnov tias Yexus tabtom tuaj nws txawm tawm mus tos Yexus, hos Maivliag zaum hauv tsev. Matha hais rau Yexus tias, “Tus Tswv, yog koj nyob ntawm no, kuv tus nus yuav tsis tuag. Tiamsis nimno kuv paub tias yog koj thov ib yam dabtsi ntawm Vajtswv, Vajtswv yeej yuav pub rau koj.” Yexus hais rau nws tias, “Koj tus nus yeej yuav ciaj sawv rov qab los.” Matha hais rau Yexus tias, “Kuv paub tias nws yuav sawv rov los rau hnub kawg uas tej neeg sawvdaws sawv rov los.” Yexus hais rau nws tias, “Kuv yog qhov uas ciaj sawv rov los thiab yog txojsia. Tus uas ntseeg kuv txawm yog nws tuag lawm los nws yeej yuav muaj txojsia, thiab txhua tus uas muaj txojsia nyob thiab ntseeg kuv yuav tsis tuag ib txhis li. Koj puas ntseeg li no?” Matha teb tias, “Tus Tswv kuv ntseeg los maj, kuv ntseeg tias koj yog tus Khetos, yog Vajtswv leej Tub uas los rau hauv lub ntiajteb.” Thaum Matha hais li no tag nws txawm mus hu nws tus niam hluas Maivliag thiab hais twjywm rau nws tias, “Tus xibhwb tuaj lawm, nws twb hu koj.” Thaum Maivliag hnov dheev nws txawm maj nroos sawv tsees mus cuag Yexus. Thaum ntawd Yexus tsis tau nkag mus rau hauv lub zos, nws tseem nyob ntawm qhov chaw uas Matha mus tos nws. Thaum cov Yudai uas tabtom nrog Maivliag nyob ua ke hauv tsev thiab nplij nws lub siab pom nws maj nroos sawv tsees tawm mus, lawv txawm raws qab mus xav hais tias nws yuav mus quaj ntawm lub qhov ntxa. Thaum Maivliag tuaj txog qhov chaw uas Yexus nyob thiab pom Yexus lawm, nws txawm pe khwb nkaus ntawm Yexus kotaw hais tias, “Tus Tswv, yog koj nyob ntawm no, kuv tus nus yuav tsis tuag.” Thaum Yexus pom Maivliag quaj quaj thiab cov Yudai uas nrog Maivliag ua ke quaj quaj, Yexus mob siab heev thiab nyuaj siab kawg. Yexus hais tias, “Nej muab nws coj mus tso rau qhovtwg?” Lawv teb tias, “Tus Tswv, los saib maj.” Yexus kuj quaj. Cov Yudai txawm hais tias, “Saib maj, nws hlub Laxalau npaum li ntawd diam!” Tiamsis muaj qee leej hais tias, “Tus uas kho tau cov dig muag pom kev nws ua tsis tau rau tus no txhob tuag lov?” Yexus rov nyuaj siab kawg, nws thiaj tuaj rau ntawm lub qhov ntxa uas yog ib lub qhov zeb uas muaj ib daim lag zeb npog lub rooj ntxa lawm. Yexus hais tias, “Cia li muab daim lag zeb tshem.” Matha uas yog tus tuag li muam txawm hais tias, “Tus Tswv, twb tsw tsw lwj lawm rau qhov twb tuag tau plaub hnub lawm.” Yexus hais rau nws tias, “Kuv twb hais rau koj lawm tias yog koj ntseeg koj yuav pom Vajtswv lub hwjchim ci ntsa iab los tsis yog?” Lawv thiaj li muab daim lag zeb tshem. Yexus tsa muag ntsia saum ntuj thiab hais tias, “Au kuv leej Txiv, kuv ua koj tsaug uas koj twb mloog kuv tej lus. Kuv paub tias koj mloog kuv tej lus txhua zaus, tiamsis kuv hais li no vim yog saib rau cov neeg uas nyob ntawm no kom lawv thiaj tau ntseeg hais tias koj yog tus uas txib kuv los.” Thaum hais li ntawd tag, Yexus txawm hu nrov hais tias, “Laxalau 'e, cia li tawm los.” Tus tuag ntawd txawm tawm los muaj nrhoob qhwv nws tes nws taw thiab muaj ib daim ntaub npog muag kauv nws lub ntsej muag. Yexus txawm hais rau lawv tias, “Cia li muab tej ntaub ntawd daws tseg thiab tso nws mus.” Vim li no thaum cov Yudai uas tuaj xyuas Maivliag pom tej haujlwm uas Yexus ua muaj coob leej txawm tso siab rau nws. Tiamsis qee leej mus cuag cov Falixai thiab piav tej uas Yexus ua rau lawv mloog. Yog li no cov pov thawj hlob thiab cov Falixai txawm hu cov thawj lub rooj sablaj tuaj sablaj thiab hais tias, “Peb yuav ua li cas, rau qhov tus no ua tej txujci tseem ceeb ntau heev? Yog peb tso nws ua li no mus li txhua tus yuav ntseeg nws ces cov Loos yuav tuaj rhuav tshem peb lub tuam tsev thiab peb lub tebchaws.” Tiamsis lawv cov ntawd muaj ib tug hu ua Khayafa uas ua tuam pov thawj hlob rau xyoo ntawd hais rau lawv tias, “Nej tsis paub qabhau kiag li. Nej tsis nkag siab tias qhov uas ib tug tuag this ib tsoom sawvdaws kuj zoo rau nej heev dua li tag nrho lub tebchaws puam tsuaj.” Nws tsis yog hais raws li nws lub siab xav xwb tiamsis nws ua tuam pov thawj hlob rau xyoo ntawd nws thiaj hais txog tom hauv ntej tias Yexus yuav tuag this lub tebchaws ntawd, thiab tsis yog this lub tebchaws ntawd xwb tiamsis nws yuav qaws Vajtswv cov menyuam uas tawg ua sab ua sua los koom ua ib pab. Txij hnub ntawd los lawv txawm ntaus tswvyim yuav muab Yexus tua pov tseg. Vim li no Yexus thiaj tsis mus los tab meeg rau hauv cov Yudai lawm. Nws tawm qhov ntawm mus rau hauv thaj tebchaws uas nyob ze tebchaws moj sab qhua thiab mus rau hauv lub moos hu ua Efa‑i, mas nrog nws cov thwjtim nyob qhov ntawd. Thaum ntawd ze lub sijhawm uas cov Yudai ua kevcai Hla Dhau, mas muaj neeg coob coob hauv tej zej zog tuaj mus rau hauv Yeluxalees kom thiaj ua tau kevcai ntxuav lawv tus kheej kom dawb huv ua ntej uas yuav ua kevcai Hla Dhau. Thaum lawv sawv ntsug rau hauv lub tuam tsev lawv txawm nrhiav Yexus thiab ib leeg hais rau ib leeg tias, “Nej xav li cas? Nws yuav tuaj rau hauv lub caij ua kevcai no los tsis tuaj?” Cov pov thawj hlob thiab cov Falixai hais tseg tias yog leejtwg pom Yexus nyob qhovtwg mas cia li hais rau lawv xwv lawv thiaj mus ntes tau nws. Tshuav rau hnub li txog sijhawm ua kevcai Hla Dhau, Yexus txawm mus rau hauv lub zos Npethani, yog lub zos uas tus Laxalau uas Yexus tsa ciaj sawv hauv qhov tuag rov los nyob. Lawv txawm pam ib pluag mov rau Yexus noj. Matha kuj ua num rau lawv thiab Laxalau kuj nrog Yexus lawv koom rooj mov ua ke. Maivliag txawm muab ib nrab lib roj tsw qab uas muaj nqes heev los pleev Yexus kotaw thiab muab nws cov plaubhau so Yexus kotaw. Cov roj ntawd tsw qab thoob plaws lub tsev ntawd. Tiamsis Yexus ib tug thwjtim uas hu ua Yudas Ikhali‑au, yog tus uas yuav fav xeeb rau Yexus txawm hais tias, “Ua li cas tsis muab cov roj no muag tau nyiaj peb puas denalia coj mus pub rau cov neeg pluag?” Nws hais li ntawd tsis yog nws mob siab cov pluag tiamsis nws yog ib tug tub sab. Nws ceev lub hnab nyiaj thiab pheej qee cov nyiaj hauv lub hnab coj mus. Yexus hais tias, “Tsis txhob tav nws. Cia nws khaws cov roj no cia txog hnub uas log kuv. Vim tias nej yeej yuav muaj cov neeg pluag nrog nej nyob mus li, tiamsis nej yuav tsis muaj kuv nrog nej nyob mus li.” Thaum cov Yudai coob coob paub tias Yexus nyob qhov ntawd ces lawv txawm tuaj rau qhov ntawd tsis yog tuaj saib Yexus xwb tiamsis yog tuaj saib Laxalau uas Yexus tsa ciaj sawv hauv qhov tuag rov los. Vim li no cov pov thawj hlob thiaj ntaus tswvyim yuav muab Laxalau tua pov tseg thiab, rau qhov yog tim Laxalau cov Yudai coob leej thiaj ncaim mus ntseeg Yexus. Hnub tom qab thaum cov neeg coob coob uas tuaj ua kevcai Hla Dhau ntawd hnov tias Yexus tabtom taug kev yuav tuaj rau hauv Yeluxalees, lawv txawm coj tej rev nplooj toov laj tawm mus tos nws thiab qw hais tias, “Hauxana. Tus uas tuaj hauv tus Tswv lub npe tau nyob kaj siab lug, yog Yixayee tus vajntxwv.” Thiab Yexus pom ib tug menyuam nees luav ces txawm muab caij raws li muaj lus sau cia hais tias, “Xi‑oo tus ntxhais, tsis txhob ntshai. Saib maj, koj tus vajntxwv tabtom los yog caij ib tug menyuam nees luav los.” Thaum chiv thawj Yexus cov thwjtim tsis nkag siab tej xwm txheej no, tiamsis thaum Yexus tau koob meej ci ntsa iab lawd lawv nco tau tias muaj lus sau cia li no hais txog nws thiab luag twb ua li no rau nws. Cov neeg uas nrog Yexus nyob lub sijhawm uas nws hu Laxalau tawm hauv lub qhov ntxa los thiab tsa nws ciaj sawv hauv qhov tuag rov los kuj ua timkhawv. Qhov uas cov neeg tawm mus tos nws twb yog lawv tau hnov tias Yexus ua tej txujci tseem ceeb ntawd. Cov Falixai txawm sib hais tias, “Sim saib, nej ua tsis tau dabtsi li lawm. Saib maj, lub ntiajteb twb raws nws qab tag lawm.” Cov neeg uas tuaj pe Vajtswv hauv kevcai Hla Dhau ntawd muaj qee leej kuj yog cov Kili. Lawv txawm mus cuag Fili uas tuaj hauv lub moos Npexaida hauv lub xeev Kalilais tuaj thiab hais rau nws tias, “Yawg hlob, peb xav pom Yexus.” Fili txawm mus hais rau Anru, mas Anru thiab Fili txawm mus hais rau Yexus paub. Yexus teb ob tug tias, “Txog lub sijhawm uas Neeg leej Tub yuav tau koob meej ci ntsa iab. Kuv hais tseeb rau nej tias yog lub noob mog tsis poob rau hauv av thiab lwj kuj tsuas nyob tib lub xwb. Yog lwj mus, kuj yuav tuaj tawg paj txi txiv ntau. Tus uas nyiam nws txojsia yuav piam txojsia, tus uas ntxub nws txojsia hauv lub ntiajteb no yuav tuav tau txojsia mus ib txhis. Yog leejtwg ua koom tu kuv, nws yuav tsum raws kuv qab. Thiab kuv nyob qhovtwg, tus uas ua koom tu kuv yuav nyob qhov ntawd. Yog leejtwg ua koom tu kuv, mas leej Txiv yuav pub koob meej rau tus ntawd. “Nimno kuv nyuaj siab heev, mas kuv yuav hais li cas? Kuv yuav hais tias, ‘Au leej Txiv thov cawm kuv dim lub sijhawm no,’ no lov? Kuv tsis hais li ntawd, rau qhov twb yog kuv yuav tsum raug li no kuv thiaj los txog lub sijhawm no. Au leej Txiv, thov koj ua rau koj lub npe tau koob meej.” Ces txawm muaj ib lub suab nrov saum ntuj tuaj hais tias, “Kuv twb tau koob meej lawm, thiab kuv tseem yuav tau koob meej ntxiv.” Cov neeg uas sawv ntawd tau hnov lub suab ntawd lawv txawm hais tias yog xob nroo. Muaj lwm tus hais tias, “Yog tubtxib saum ntuj hais lus tuaj rau nws.” Yexus teb tias, “Lub suab ntawd yog hais kom muaj qabhau rau nej tsis yog rau kuv. Nimno yog lub sijhawm uas txiav txim rau lub ntiajteb no. Nimno tus uas kav lub ntiajteb yuav raug ntiab tawm mus. Mas thaum kuv raug tsa rau saum lub ntiajteb lawm, kuv yuav rub sawvdaws los rau kuv.” Nws hais li ntawd yog qhia hais tias nws yuav tuag li cas. Cov neeg teb nws tias, “Peb tau hnov hauv txoj kevcai hais tias tus Khetos yuav nyob mus ib txhis. Ua li cas koj ho hais tau tias Neeg leej Tub yuav tsum raug muab tsa saum lub ntiajteb? Tus Neeg leej Tub ntawd yog leejtwg?” Yexus hais rau lawv tias, “Qhov kaj tseem nrog nej nyob ib nyuag ntu. Thaum tseem muaj qhov kaj nyob cia li taug kev mus kom txojkev tsaus ntuj thiaj caum tsis cuag nej. Tus uas taug txojkev tsaus ntuj yeej tsis paub tias nws mus qhovtwg. Thaum nej tseem muaj qhov kaj, nej cia li tso siab rau qhov kaj ntawd xwv thiaj tau ua qhov kaj li menyuam.” Thaum Yexus hais li ntawd tag nws txawm tawm qhov ntawd mus thiab nraim cev ntawm lawv. Txawm yog nws ua ntau yam txujci tseem ceeb no rau lawv pom los lawv tsis ntseeg nws. Tej no thiaj yog tiav raws li xibhwb Yaxaya uas cev Vajtswv lus tau hais tias, “Tus Tswv, leejtwg ntseeg tej uas peb tau hais? Vajtswv ua nws txhais npab tshwm rau leejtwg?” Yog vim li no lawv thiaj ntseeg tsis tau, rau qhov Yaxaya hais ntxiv tias, “Nws ua rau lawv dig muag thiab ua rau lawv lub siab tawv, tsam ces lawv lub qhov muag yuav pom, thiab lawv lub siab yuav to taub, ces lawv yuav tig rov los kom kuv kho lawv zoo.” Yaxaya hais li no vim yog nws pom tus Tswv lub hwjchim ci ntsa iab thiab hais txog tus Tswv. Txawm li cas kuj xij, cov nom tswv kuj muaj coob leej ntseeg Yexus tiamsis lawv tsis lees nws tab meeg rau qhov lawv ntshai cov Falixai. Lawv ntshai tsam lawv yuav raug muab ntiab tawm hauv lub tsev sablaj, vim lawv nyiam neeg qhuas lawv heev dua li Vajtswv qhuas. Yexus qw nrov hais tias, “Tus uas tso siab rau kuv, tsis yog tso siab rau kuv xwb tiamsis kuj tso siab rau tus uas txib kuv los. Tus uas pom kuv kuj yog pom tus uas txib kuv los. Kuv los ua qhov kaj rau hauv lub ntiajteb xwv txhua tus uas tso siab rau kuv thiaj tsis nyob hauv qhov tsaus ntuj mus li. Tus uas hnov kuv tej lus los tsis ua raws li, kuv tsis txiav txim rau tus ntawd, rau qhov kuv tsis yog los txiav txim rau lub ntiajteb, tiamsis yog los cawm lub ntiajteb kom dim. Tus uas tso kuv tseg thiab tsis lees yuav kuv tej lus yeej muaj ib tug yuav txiav txim rau nws. Tej lus uas kuv twb hais lawd yuav ua tus uas txiav txim rau nws rau hnub kawg. Kuv tsis hais raws li kuv lub siab. Leej Txiv uas txib kuv los qhia kom kuv hais li cas thiab hais dabtsi. Kuv paub tias tej uas Vajtswv qhia ntawd yog txojsia ib txhis tsis kawg. Yog li ntawd, tej uas kuv hais ntawd kuv hais raws li leej Txiv qhia kom kuv hais xwb.” Ua ntej uas yuav txog hnub ua kevcai Hla Dhau, Yexus paub tias twb txog lub sijhawm uas nws yuav ncaim hauv lub ntiajteb mus cuag leej Txiv. Yexus hlub nws cov neeg uas nyob hauv lub ntiajteb no thiab nws tseem hlub mus txog thaum kawg. Dab Dxwg Nyoog twb tshoov Ximoos tus tub Yudas Ikhali‑au lub siab kom fav xeeb rau Yexus ua ntej lawm. Mas thaum lawv tabtom noj hmo, Yexus paub tias leej Txiv muab txhua yam cob rau hauv nws txhais tes thiab paub tias nws los ntawm Vajtswv los thiab yuav rov mus cuag Vajtswv, Yexus txawm sawv tsees ntawm rooj mov hle nws lub tsho cia thiab muab txoj sawv hwm los siav ntawm duav. Nws muab dej hliv rau hauv lub phaj thiab pib ntxuav cov thwjtim kotaw thiab muab txoj sawv hwm ntawm duav los so. Thaum Yexus los txog ntawm Ximoos Petus, Petus hais rau Yexus tias, “Tus Tswv, koj yuav ntxuav kuv kotaw thiab lov?” Yexus teb nws tias, “Tej uas kuv ua, nimno koj tsis nkag siab, tiamsis yav tom qab koj yuav nkag siab.” Petus hais rau nws tias, “Koj ntxuav kuv kotaw tsis tau kiag li.” Yexus teb nws tias, “Yog kuv tsis ntxuav koj, koj yuav tsis muaj feem tau rau hauv kuv.” Ximoos Petus hais rau nws tias, “Tus Tswv, tsis txhob yog ntxuav kuv kotaw xwb, cia li ntxuav kuv tes thiab taubhau huvsi.” Yexus hais rau nws tias, “Tus uas da dej lawm tsis cheem tsum ntxuav lub cev dua, tsuas yog ntxuav kotaw xwb rau qhov ib ce twb huv lawm. Nej cov twb huv lawm tiamsis tsis yog txhua tus.” Yexus yeej paub tias leejtwg yuav fav xeeb rau nws, vim li no nws thiaj hais tias, “Tsis yog nej txhua tus huv lawm.” Thaum Yexus ntxuav lawv kotaw tag lawm nws rov qab hnav nws lub tsho thiab zaum hais rau lawv tias, “Nej nkag siab tej uas kuv ua rau nej los tsis nkag? Nej hu kuv tias ‘Xibhwb’ thiab ‘Tus Tswv’, nej kuj hu raug lawm rau qhov kuv yeej yog li ntawd. Yog kuv uas yog nej tus Tswv thiab nej tus xibhwb twb ntxuav nej kotaw kuj tsim nyog nej ib leeg ntxuav ib leeg kotaw thiab. Rau qhov kuv twb ua qauv tseg rau nej lawm kom nej thiaj ua ib yam nkaus li kuv ua rau nej thiab. “Kuv hais tseeb rau nej tias, tus qhev yeej tsis loj dhau tus lospav, thiab tus tubtxib kuj tsis loj dhau tus uas txib nws mus. Yog nej paub li no thiab ua raws nraim mas nej yuav nyob kaj siab lug. Tsis yog kuv hais txog nej txhua tus. Kuv paub cov uas kuv xaiv cia lawm. Tej no tshwm los thiaj yuav tiav raws li Vajtswv txojlus uas hais tias, ‘Tus uas nrog kuv noj mov ua ke yuav tsa luj taws tuam kuv.’ Nimno kuv hais tej no ua ntej rau nej thaum tsis tau tshwm los, xwv thaum tej no tshwm los lawd nej thiaj ntseeg tias kuv yog tus ntawd ntag. Kuv hais tseeb rau nej tias tus uas lees yuav tus uas kuv txib mus kuj yog nws lees yuav kuv thiab, thiab tus uas lees yuav kuv kuj yog lees yuav tus uas txib kuv los.” Thaum Yexus hais li ntawd lawm, nws kuj nyuaj siab kawg thiab ua timkhawv hais tias, “Kuv hais tseeb rau nej tias, nej cov ib tug yuav fav xeeb rau kuv.” Cov thwjtim ib leeg saib rau ib leeg tsis paub tias tus uas Yexus hais ntawd yog leejtwg. Tus thwjtim uas Yexus nyiam nws pheeb ze ntawm Yexus. Ximoos Petus thiaj ncaws hau kom nws nug Yexus saib tus uas nws hais ntawd yog leejtwg. Thaum tseem pheeb ze rau ntawm Yexus, tus thwjtim ntawd txawm nug nws tias, “Tus Tswv, tus ntawd yog leejtwg?” Yexus teb tias, “Yog tus uas kuv yuav muab qhov ncuav no ntsw cev rau nws.” Thaum Yexus muab qhov ncuav ntsw lawd nws txawm muab cev rau Ximoos Ikhali‑au tus tub Yudas. Thaum Yudas txais qhov ncuav ntawd lawd Xatas kuj nkag rau hauv Yudas. Yexus txawm hais rau Yudas tias, “Tej uas koj yuav ua cia li ua sai sai.” Cov uas pheeb koom ua ke ntawm lub rooj mov ntawd tsis muaj leejtwg paub tias ua li cas Yexus hais li ntawd rau Yuda. Qee leej xav tias vim Yudas yog tus ceev lub hnab nyiaj Yexus thiaj hais rau nws tias, “Cia li mus yuav tej uas peb cheem tsum ua kevcai no,” lossis yog hais rau nws kom muab dabtsi pub rau cov neeg pluag. Vim li no thaum Yudas txais qhov ncuav ntawd lawm nws txawm tawm plaws tamsid. Thaum ntawd tsaus ntuj lawm. Thaum Yudas tawm mus lawd Yexus txawm hais tias, “Nimno Neeg leej Tub tau koob meej lawm, thiab Vajtswv tau koob meej vim Neeg leej Tub. Yog Vajtswv tau koob meej vim Neeg leej Tub, Vajtswv kuj yuav pub Neeg leej Tub tau koob meej rau hauv Vajtswv, thiab yuav pub koob meej tamsim no. Cov menyuam 'e, kuv yuav nrog nej nyob ib nyuag pliag xwb. Nej yuav nrhiav kuv. Thiab kuv hais li cas rau cov Yudai lawm nimno kuv kuj hais li ntawd rau nej tias, qhov chaw uas kuv yuav mus ntawd nej mus tsis tau. Kuv pub txoj kevcai tshiab rau nej. Nej ib leeg yuav tsum hlub ib leeg. Kuv hlub nej li cas lawm nej yuav tsum sib hlub ib yam li ntawd. Qhov uas nej sib hlub no yuav ua rau sawvdaws paub tias nej yog kuv li thwjtim.” Ximoos Petus hais rau Yexus tias, “Tus Tswv, koj yuav mus qhovtwg?” Yexus teb tias, “Qhov uas kuv yuav mus ntawd nimno koj raws kuv qab mus tsis tau, tiamsis yav tom qab koj yuav raws kuv qab mus.” Petus hais rau nws tias, “Tus Tswv, ua li cas nimno kuv yuav raws koj qab mus tsis tau? Kuv yuav tso txojsia tseg vim saib rau koj.” Yexus teb tias, “Koj yuav tso koj txojsia tseg saib rau kuv lov? Kuv hais tseeb rau koj tias ua ntej qaib qua koj yuav tsis lees kuv peb zaug.” “Nej tsis txhob txhawj tsis txhob nyuaj siab. Nej tso siab rau Vajtswv, cia li tso siab rau kuv thiab. Hauv kuv leej Txiv lub tsev muaj chaw nyob ntau heev. Yog tsis muaj li ntawd kuv yeej hais rau nej lawm. Kuv mus tu chaw tseg rau nej. Thaum kuv mus tu chaw tseg rau nej tiav lawd, kuv yeej yuav rov los dua thiab coj nej mus nrog kuv nyob, xwv kuv nyob qhovtwg nej thiaj tau nyob qhov ntawd. Thiab nej paub txojkev uas mus txog lub chaw uas kuv yuav mus ntawd lawm.” Thauma hais rau Yexus tias, “Tus Tswv, peb tsis paub tias koj yuav mus qhovtwg. Peb yuav paub txojkev ntawd tau li cas?” Yexus hais rau nws tias, “Kuv yog txojkev ntawd, yog qhov tseeb thiab yog txojsia. Tsis muaj leejtwg mus cuag tau leej Txiv tsuas yog mus ntawm kuv mus xwb. Yog nej twb paub kuv lawm nej yeej yuav paub kuv leej Txiv thiab. Txij no mus nej yuav paub nws thiab pom nws.” Fili hais rau nws tias, “Tus Tswv, thov qhia leej Txiv tshwm rau peb pom mas peb thiaj txaus siab.” Yexus hais rau nws tias, “ Fili, kuv nrog nej nyob ntev txog tav no lawm, nej tseem tsis paub kuv thiab lov? Tus uas pom kuv kuj yog pom leej Txiv. Koj yuav hais tau li cas tias, ‘Thov qhia leej Txiv tshwm rau peb pom’? Koj tsis ntseeg tias kuv nyob hauv leej Txiv thiab leej Txiv nyob hauv kuv lov? Tej lus uas kuv hais rau nej ntawd kuv tsis tau hais raws li kuv lub siab xwb. Tiamsis leej Txiv uas nyob hauv kuv ua nws tes haujlwm. Nej cia li ntseeg kuv hais tias kuv nyob hauv leej Txiv thiab leej Txiv nyob hauv kuv. Yog tsis ua li ntawd, cia li ntseeg vim tej haujlwm no. Kuv hais tseeb rau nej tias tus uas tso siab rau kuv yuav ua tej haujlwm uas kuv ua no thiab. Thiab nws tseem yuav ua tej haujlwm loj dua tej no vim kuv yuav mus cuag leej Txiv. Yam twg uas nej tuav kuv lub npe thov, kuv yuav ua yam ntawd kom leej Txiv thiaj tau koob meej ci ntsa iab ntawm leej Tub. Yog nej tuav kuv lub npe thov ib yam dabtsi, kuv yuav ua yam ntawd. “Yog nej hlub kuv, nej yuav tuav rawv kuv tej lus nkaw. Kuv yuav thov leej Txiv mas nws yuav pub dua ib tug los taw qhia nej, nws yuav nrog nej nyob mus li. Tus ntawd yog Vaj Ntsuj Plig uas qhia qhov tseeb, uas lub ntiajteb txais tsis tau vim yog ntsia tsis pom thiab tsis paub nws. Nej cov paub nws vim nws nrog nej nyob thiab yuav nyob hauv nej. Kuv yuav tsis muab nej tso pov tseg ua ntsoj ua ntsuag. Kuv yuav los cuag nej. Tshuav tsis ntev lub ntiajteb yuav tsis pom kuv tiamsis nej yuav pom kuv. Vim kuv muaj txojsia nyob nej kuj yuav muaj txojsia nyob thiab. Hnub ntawd nej yuav paub tias kuv nyob hauv leej Txiv thiab nej nyob hauv kuv thiab kuv nyob hauv nej. Tus uas muaj kuv tej lus nkaw thiab tuav rawv tej lus ntawd, tus ntawd thiaj yog tus uas hlub kuv. Thiab tus uas hlub kuv ntawd kuv leej Txiv yuav hlub nws, thiab kuv yuav hlub nws thiab qhia kuv rau nws pom.” Yudas uas tsis yog Ikhali‑au hais rau Yexus tias, “Tus Tswv, ua li cas koj yuav qhia koj tshwm rau peb pom xwb tsis qhia rau lub ntiajteb pom?” Yexus teb nws tias, “Yog leejtwg hlub kuv, tus ntawd yuav tuav rawv kuv tej lus, thiab kuv leej Txiv yuav hlub nws thiab wb ob leeg yuav los cuag nws thiab nrog nraim nws nyob. Tus uas tsis hlub kuv kuj tsis tuav rawv kuv tej lus. Thiab tej lus uas nej hnov no tsis yog kuv li lus tiamsis yog leej Txiv uas txib kuv los li lus. “Kuv hais tej lus no rau nej rau thaum kuv tseem nrog nej nyob. Tiamsis tus uas taw qhia, yog Vaj Ntsuj Plig tus dawb huv uas leej Txiv yuav txib los hauv kuv lub npe, nws yuav qhia txhua yam rau nej thiab ua rau nej nco txog txhua yam uas kuv twb hais rau nej lawd. Kuv muab txojkev nyob kaj siab lug cob rau nej. Kuv pub kuv txojkev nyob kaj siab lug rau nej, kuv pub tsis thooj li lub ntiajteb pub. Nej lub siab tsis txhob txhawj thiab tsis txhob ntshai. Nej twb hnov kuv hais rau nej tias, ‘Kuv yuav ncaim mus thiab kuv yuav rov los cuag nej.’ Yog nej hlub kuv nej kuj yuav xyiv fab rau qhov uas kuv mus cuag leej Txiv, vim leej Txiv loj dua kuv. Nimno kuv twb hais tej no rau nej ua ntej uas tsis tau tshwm los, xwv thaum muaj tej no tshwm los nej thiaj li ntseeg. Kuv yuav tsis nrog nej tham li no dua li lawm rau qhov tus uas kav ntiajteb tabtom los. Tus ntawd tsis muaj hwjchim loj dua kuv. Tiamsis kuv ua raws li leej Txiv kom kuv ua, xwv lub ntiajteb thiaj paub tias kuv hlub leej Txiv. Cia li sawv tsees, peb mus lauj.” “Kuv yog tsob tseem txiv hmab, thiab kuv leej Txiv yog tus uas tu. Txhua ceg hauv kuv uas tsis txi txiv nws yuav muab txiav pov tseg, thiab txhua ceg uas txi txiv nws yuav muab tav kom yimhuab txi ntau heev. Nej twb raug ntxuav kom dawb huv ntawm tej lus uas kuv hais rau nej lawm. Nej cia li nyob ruaj rau hauv kuv thiab kuv yuav nyob rau hauv nej. Tus ceg uas nyob ib cag yuav txi txiv tsis tau, tsuas yog koom lub hauv paus thiaj txi tau. Nej kuj ib yam nkaus, yog nej tsis nyob ruaj rau hauv kuv, nej yuav txi txiv tsis tau. Kuv yog lub hauv paus txiv hmab, nej yog cov ceg. Tus uas nyob ruaj rau hauv kuv thiab kuv nyob hauv nws, tus ntawd yuav txi txiv ntau. Yog nej ncaim ntawm kuv lawm nej yuav ua tsis tau ib yam dabtsi li. Yog leejtwg tsis nyob ruaj rau hauv kuv, tus ntawd yuav raug muab txiav pov tseg ib yam li tej ceg thiab yuav qhuav tag. Tej ceg ntawd yuav raug muab sau mus pov rau hauv hluavtaws hlawv kub hnyiab tag. “Yog nej nyob ruaj rau hauv kuv thiab kuv tej lus nyob ruaj hauv nej lawm, nej cia li thov yam twg uas nej xav yuav mas nej yuav tau yam ntawd. Yog nej tawg paj txi txiv ntau thiaj ua kuv li thwjtim, qhov ntawd yuav ua rau kuv leej Txiv tau koob meej. Leej Txiv hlub kuv li cas, kuv kuj hlub nej ib yam li ntawd. Nej cia li nyob ruaj rau hauv kuv txojkev hlub. Yog nej tuav rawv kuv tej lus nkaw nej kuj nyob ruaj rau hauv kuv txojkev hlub ib yam li kuv tuav rawv kuv Txiv tej lus nkaw thiab nyob ruaj hauv nws txojkev hlub. Kuv hais tej no rau nej lawm xwv kuv txojkev xyiv fab thiaj nyob hauv nej thiab nej thiaj muaj txojkev xyiv fab puv npo. “Kuv nkaw lus tseg rau nej tias nej ib leeg yuav tsum hlub ib leeg ib yam li kuv hlub nej. Tsis muaj txojkev hlub loj dhau txoj no lawm, yog qhov uas ib tug tso txojsia this nws cov kwvluag. Yog nej ua tej uas kuv kom nej ua, nej kuj yog kuv li kwvluag. Kuv tsis hu nej ua tub qhe dua li lawm rau qhov tus tub qhe tsis paub tias nws tus lospav ua dabtsi. Tiamsis kuv hu nej ua kwvluag rau qhov txhua yam uas kuv tau hnov ntawm leej Txiv kuv twb qhia rau nej paub lawm. Nej tsis tau xaiv kuv tiamsis kuv xaiv nej thiab tsa nej kom mus tawg paj txi txiv thiab ua rau tej txiv ntawd yuav nyob mus li, kom thaum nej tuav kuv lub npe thov ib yam dabtsi ntawm leej Txiv, nws thiaj pub yam ntawd rau nej. Tej uas kuv nkaw lus tseg rau nej no yog qhov uas ib leeg yuav tsum hlub ib leeg. “Yog lub ntiajteb no ntxub nej, nej cia li paub tias lub ntiajteb twb xub ntxub kuv ua ntej lawm. Yog nej ua neeg ntiajteb, lub ntiajteb yeej yuav hlub cov uas yog ntiajteb li. Vim nej tsis yog neeg ntiajteb, rau qhov kuv twb xaiv nej tawm hauv lub ntiajteb lawm, vim li no lub ntiajteb thiaj ntxub nej. Nej cia li nco txog tej lus uas kuv hais rau nej lawm tias, ‘Tus tub qhe tsis loj dhau nws tus lospav.’ Yog lawv twb tsim txom kuv lawm lawv yeej yuav tsim txom nej thiab. Yog lawv tuav rawv kuv tej lus, lawv yeej yuav tuav rawv nej tej lus thiab. Tiamsis lawv yuav ua txhua yam no rau nej vim yog tim kuv lub npe, rau qhov lawv tsis paub tus uas txib kuv los. Yog kuv tsis tau los qhia lawv, lawv yuav tsis muaj txim. Tiamsis nimno lawv tsis muaj ib los hais daws lawv lub txim. Tus uas ntxub kuv kuj yog ntxub kuv leej Txiv thiab. Yog kuv tsis tau ua tej uas lwm tus tsis ua rau lawv pom, lawv yuav tsis muaj txim. Tiamsis nimno lawv twb pom tej no los lawv tseem ntxub kuv thiab kuv leej Txiv. Tej no yog tiav raws li tej lus sau cia rau hauv Vajtswv txoj kevcai hais tias, ‘Lawv lam ntxub kuv do do.’ Tiamsis thaum tus uas taw qhia los, uas kuv txib ntawm leej Txiv los rau nej, yog Vaj Ntsuj Plig uas qhia qhov tseeb thiab los ntawm leej Txiv los, nws yuav ua timkhawv txog kuv. Thiab nej kuj yuav ua timkhawv rau qhov nej twb nrog kuv nyob thaum chiv thawj los.” “Kuv hais tej no rau nej kom nej thiaj tsis yuam kev. Luag yuav muab nej ntiab tawm hauv tej tsev sablaj. Qhov tseeb lub sijhawm tabtom los txog, txhua tus uas muab nej tua pov tseg yuav xav tias lawv ua koom tu Vajtswv. Lawv yuav ua li ntawd vim lawv twb tsis paub leej Txiv thiab tsis paub kuv. Tiamsis kuv hais tej no rau nej xwv thaum txog lawv li sijhawm lawd nej thiaj nco ntsoov tias kuv twb hais rau nej ua ntej lawm. “Thaum chiv thawj kuv tsis tau hais tej no rau nej rau qhov kuv tseem nrog nej nyob. Tiamsis nimno kuv yuav mus cuag tus uas txib kuv los, los nej cov tsis muaj leejtwg nug kuv tias, ‘Koj yuav mus qhovtwg?’ Vim kuv hais tej no rau nej, nej thiaj li nyuaj siab kawg. Tiamsis kuv qhia qhov tseeb rau nej. Qhov uas kuv ncaim mus ntawd yuav muaj nuj nqes rau nej. Yog kuv tsis mus, tus uas taw qhia yuav tsis los cuag nej. Tiamsis yog kuv mus lawm, kuv yuav txib nws los cuag nej. Thaum nws los lawd nws yuav ua rau lub ntiajteb paub tseeb txog lub txim thiab txojkev ncaj ncees thiab qhov uas teem txim. Hais txog lub txim mas yog vim lawv tsis ntseeg kuv, hais txog kev ncaj ncees yog vim kuv mus cuag leej Txiv mas nej yuav tsis pom kuv dua li lawm, hais txog qhov uas teem txim yog vim tus uas kav ntiajteb raug teem txim lawm. “Tseem tshuav ntau yam uas kuv yuav hais rau nej, tiamsis nimno nej thev tsis taus. Thaum Vaj Ntsuj Plig uas qhia qhov tseeb los lawm nws yuav coj nej mus txog qhov tseeb huvsi. Nws yuav tsis hais raws nws lub siab xwb, nws yuav hais tej uas nws tau hnov thiab nws yuav qhia nej paub txog tej uas yuav tshwm los. Nws yuav ua rau kuv tau koob meej, vim nws yuav muab tej uas yog kuv li lus qhia rau nej. Txhua yam uas leej Txiv muaj yog kuv li. Vim li no kuv thiaj hais tias Vaj Ntsuj Plig yuav muab tej uas yog kuv li los qhia rau nej. “Tshuav tsis ntev nej yuav tsis pom kuv dua li lawm, thiab tshuav tsis ntej nej yuav rov pom kuv thiab.” Cov thwjtim qee leej sib nug hais tias, “Qhov uas Yexus hais tias, ‘Tshuav tsis ntev nej yuav tsis pom kuv, thiab tshuav tsis ntev nej yuav rov pom kuv thiab,’ thiab hais tias, ‘rau qhov kuv mus cuag leej Txiv,’ yog nws hais txog dabtsi?” Lawv hais tias, “Tshuav tsis ntev ntawd hais txog dabtsi? Peb tsis nkag siab nws hais li cas.” Yexus paub tias lawv xav nug nws, nws txawm hais rau lawv tias, “Nej sib nug hais tias qhov uas kuv hais tias ‘Tshuav tsis ntev nej yuav tsis pom kuv, thiab tshuav tsis ntej nej yuav rov pom kuv’ ntawd yog kuv hais txog dabtsi lov? Kuv hais tseeb rau nej tias, nej yuav quaj thiab quaj ntsuag, tiamsis lub ntiajteb yuav xyiv fab. Nej yuav nyuaj siab, tiamsis nej txojkev nyuaj siab yuav ntxeev ua kev xyiv fab. Thaum ib tug pojniam yuav yug menyuam nws muaj kev nyuaj siab vim yog txog lub caij yug lawm, tiamsis thaum yug tau lawd nws tsis nco txog qhov uas mob ntawd vim muaj kev xyiv fab rau qhov uas yug tau ib tug rau hauv ntiajteb. Ib yam li ntawd nimno nej muaj kev nyuaj siab, tiamsis kuv yuav rov pom nej dua thiab nej lub siab yuav xyiv fab, tsis muaj leejtwg yuav txeeb tau nej txojkev xyiv fab mus. Hnub ntawd nej yuav tsis nug kuv ib yam dabtsi lawm. Kuv hais tseeb rau nej tias yog nej tuav kuv lub npe thov leej Txiv ib yam dabtsi, nws yuav pub yam ntawd rau nej. Txog tav no nej twb tsis tau tuav kuv lub npe thov ib yam dabtsi. Cia li thov mas nej yuav tau xwv nej thiaj muaj kev xyiv fab kawg nkaus. “Kuv ua lus piv txwv li no hais rau nej. Lub sijhawm tabtom los txog mas kuv yuav tsis ua lus piv txwv hais rau nej dua li lawm, tiamsis kuv yuav hais txog leej Txiv meej meej rau nej. Hnub ntawd nej yuav tuav kuv lub npe thov. Kuv tsis hais rau nej tias kuv yuav thov leej Txiv pab nej, rau qhov leej Txiv yeej hlub nej vim nej hlub kuv thiab ntseeg tias kuv los ntawm Vajtswv los. Kuv los ntawm leej Txiv los thiab nkag rau hauv lub ntiajteb lawm. Kuv tabtom ncaim hauv lub ntiajteb rov mus cuag leej Txiv.” Nws cov thwjtim hais tias, “Nimno koj hais meej meej tsis ua lus piv txwv hais. Nimno peb paub tias koj paub txhua yam huvsi thiab tsis txog leejtwg nug koj dua lawm. Vim li no peb thiaj ntseeg tias koj los ntawm Vajtswv los.” Yexus teb lawv tias, “Nimno nej ntseeg lawm lov? Lub sijhawm tabtom los thiab twb los txog lawm mas nej yuav tawg ua sab ua sua nyias mus nyias tsev thiab tso kuv tseg nyob ib leeg. Tiamsis tsis yog kuv nyob ib leeg, vim leej Txiv nrog nraim kuv. Kuv hais tej no rau nej kom nej thiaj nyob kaj siab lug hauv kuv. Nej yuav raug kev txom nyem nyuaj siab hauv lub ntiajteb no tiamsis nej cia li ua siab tuab. Kuv twb kov yeej ntiajteb lawm.” Thaum Yexus hais tej ntawd tag lawm, nws txawm tsa muag ntsia saum ntuj thiab hais tias, “Au leej Txiv, txog sijhawm lawm. Thov ua rau koj leej Tub tau koob meej ci ntsa iab, kom leej Tub thiaj ua rau leej Txiv tau koob meej, rau qhov koj pub hwjchim rau leej Tub kav tag nrho ib tsoom neeg sawvdaws, kom leej Tub thiaj pub txojsia ib txhis tsis kawg rau txhua tus uas koj muab cob rau nws. Txojsia ib txhis tsis kawg yog li no, yog qhov uas lawv paub koj uas yog tus Vajtswv tib leeg uas yog tus tseem Tswv, thiab paub Yexus Khetos uas koj txib los. “Kuv ua rau koj tau koob meej rau hauv ntiajteb rau qhov kuv ua tej haujlwm uas koj muab cob rau kuv ua lawd tiav. Leej Txiv, nimno thov koj ua rau kuv tau koob meej tab meeg ntawm koj lub xubntiag, yog lub koob meej uas kuv nrog koj muaj ua ntej uas tsis tau muaj lub ntiajteb no los. “Kuv qhia koj lub npe rau cov neeg uas koj pub rau kuv hauv lub ntiajteb paub. Lawv yeej yog koj li lawm, thiab koj muab lawv pub rau kuv thiab lawv tuav rawv koj tej lus. Nimno lawv paub tias txhua yam uas koj muab pub rau kuv yog los ntawm koj los, rau qhov tej lus uas koj muab rau kuv, kuv twb muab rau lawv thiab lawv twb txais lawm, thiab lawv paub tseeb tias kuv los ntawm koj los thiab lawv ntseeg tias koj txib kuv los. Kuv thov koj pab lawv. Kuv tsis thov koj pab lub ntiajteb tiamsis thov pab cov neeg uas koj muab pub rau kuv, rau qhov lawv yog koj li. Txhua tus uas yog kuv li kuj yog koj li, thiab txhua tus uas yog koj li kuj yog kuv li, thiab kuv tau koob meej ntawm lawv. “Nimno kuv yuav tsis nyob hauv lub ntiajteb no lawm, tiamsis lawv tseem nyob hauv lub ntiajteb no. Kuv tabtom yuav los cuag koj. Au leej Txiv uas dawb huv, thov koj tsom kwm lawv cia rau hauv koj lub npe uas koj muab rau kuv kom lawv thiaj koom ib lub siab ib yam li koj thiab kuv. Thaum kuv tseem nrog lawv nyob kuv tsom kwm lawv hauv koj lub npe uas koj pub rau kuv. Kuv zov lawv cia, tsis muaj ib tug puam tsuaj tsuas yog tus uas tshwj tseg rau kev puam tsuaj xwb kom thiaj tiav raws li Vajtswv txojlus. “Nimno kuv tabtom yuav los cuag koj. Kuv hais tej no rau hauv lub ntiajteb kom lawv thiaj tau kuv li kev xyiv fab kawg nkaus. Kuv twb muab koj tej lus cob rau lawv lawm. Lub ntiajteb ntxub lawv vim lawv tsis yog ntiajteb li ib yam li kuv tsis yog ntiajteb li. Kuv tsis tau thov koj coj lawv tawm hauv lub ntiajteb mus, tiamsis thov koj tsom kwm lawv dim ntawm tus uas Phem. Lawv tsis yog ntiajteb li ib yam li kuv tsis yog ntiajteb li. Thov koj muab txojkev tseeb cais tsa lawv kom dawb huv. Koj tej lus yeej yog txojkev tseeb. Koj txib kuv los rau hauv lub ntiajteb li cas, kuv kuj txib lawv mus rau hauv lub ntiajteb ib yam li ntawd. Kuv muab kuv tus kheej cais kom dawb huv vim yog saib rau lawv, xwv lawv thiaj raug muab cais tsa kom dawb huv raws li txojkev tseeb. “Tsis yog kuv thov pab lawv cov no xwb, tiamsis thov pab cov uas yuav ntseeg kuv, vim tej lus uas lawv qhia, kom lawv txhua tus thiaj koom ua ib lub siab, ib yam li leej Txiv koj nyob hauv kuv thiab kuv nyob hauv koj, lawv thiaj nyob hauv wb ob leeg kom lub ntiajteb thiaj ntseeg tias koj txib kuv los. Lub koob meej uas koj pub rau kuv, kuv muab cob rau lawv lawm kom lawv thiaj koom ua ib lub siab ib yam li wb ob leeg koom ua tib tug. Kuv nyob hauv lawv thiab koj nyob hauv kuv kom lawv thiaj koom tau ua ib lub siab, lub ntiajteb thiaj paub tias koj txib kuv los thiab koj hlub lawv ib yam li koj hlub kuv. “Au leej Txiv, kuv xav kom cov neeg uas koj muab pub rau kuv yuav nrog kuv nyob hauv lub chaw uas kuv nyob ntawd, xwv lawv thiaj pom lub koob meej ci ntsa iab uas koj pub rau kuv vim koj hlub kuv ua ntej uas tsis tau tsim lub ntiajteb. Au leej Txiv uas ncaj ncees, lub ntiajteb tsis paub koj, tiamsis kuv paub koj thiab cov neeg no paub tias koj txib kuv los. Kuv twb qhia koj lub npe rau lawv paub lawm thiab kuv tseem yuav qhia rau lawv paub thiab, kom txojkev hlub uas koj hlub kuv thiaj nyob hauv lawv thiab kuv nyob hauv lawv.” Thaum Yexus hais tej no tag lawm nws txawm nrog nws cov thwjtim tawm mus hla lub hav Khiloo txog ib lub vaj, nws thiab nws cov thwjtim nkag rau hauv. Yudas uas fav xeeb rau Yexus kuj paub lub vaj ntawd thiab, rau qhov Yexus thiab nws cov thwjtim pheej txeev tuaj ua ke rau qhov ntawd. Yudas thiaj coj ib pab tub rog thiab tej tub teg tub taws ntawm cov pov thawj hlob thiab cov Falixai tuaj. Lawv taws tsau taws teeb thiab coj ntaj riam tuaj. Yexus yeej paub txhua yam uas yuav tshwm xwm rau nws, nws thiaj tawm mus hais rau lawv tias, “Nej tuaj nrhiav leejtwg?” Lawv teb tias, “Tuaj nrhiav Yexus uas yog neeg Naxale.” Yexus hais rau lawv tias, “Kuv yog tus ntawd ntag.” Yudas uas fav xeeb rau Yexus kuj nrog lawv sawv ua ke ntawd. Thaum Yexus hais rau lawv tias, “Kuv yog tus ntawd,” lawv txawm thaub pes ncho thiab ntog rau hauv av. Yexus rov nug lawv tias, “Nej tuaj nrhiav leejtwg?” Lawv hais tias, “Tuaj nrhiav Yexus uas yog neeg Naxale.” Yexus teb lawv tias, “Kuv twb hais rau nej tias yog kuv. Yog nej nrhiav kuv, kuj cia tso cov neeg no mus.” Nws ua li no thiaj tiav raws li tej lus uas nws twb hais tias, “Cov neeg uas koj muab pub rau kuv tsis muaj ib tug puam tsuaj li.” Ximoos Petus muaj ib rab ntaj nws txawm rho kiag ntaj los tib ntag tus tuam pov thawj hlob tus tub qhe txiav nws sab nplooj ntseg xis tu nrho. Tus tub qhe ntawd npe hu ua Makhu. Yexus hais rau Petus tias, “Cia li muab rab ntaj ntxig rau hauv hnab. Kuv yuav tsis haus lub khob uas leej Txiv muab pub rau kuv lov?” Cov tub rog thiab lawv tus thawj rog thiab Yudai cov tub teg tub taws txawm ntes Yexus khi cia. Lawv coj nws mus cuag Anas ua ntej. Anas yog Khayafa uas ua tuam pov thawj hlob rau xyoo ntawd li yawm txiv. Tus Khayafa no yog tus uas qhia cov Yudai tias cia ib tug tuag this ib tsoom neeg zoo dua. Ximoos Petus thiab dua ib tug thwjtim raws Yexus qab mus. Vim yog tus tuam pov thawj hlob paub tus thwjtim ntawd, nws thiaj nrog Yexus nkag rau hauv lub tshav puam ntawm tus tuam pov thawj hlob tsev, tiamsis Petus sawv sab nraum rooj loog. Tus thwjtim uas tus pov thawj hlob paub ntawd txawm tawm mus hais rau tus nkauj qhev uas zov rooj loog thiab coj Petus nkag rau hauv. Tus nkauj qhev uas zov rooj loog hais rau Petus tias, “Koj yog tus yawg ntawd li ib tug thwjtim thiab los tsis yog?” Nws teb tias, “Kuv tsis yog.” Cov tub qhe thiab cov tub teg tub taws twb muab thee los rauv vim yog no heev, mas lawv sawv nte taws ua ke ntawd. Petus kuj nrog lawv sawv nte taws thiab. Tus tuam pov thawj hlob txawm nug Yexus txog Yexus cov thwjtim thiab nws tej lus qhia. Yexus teb nws tias, “Kuv hais tab meeg rau lub ntiajteb lawm. Kuv pheej qhuab qhia hauv tej tsev sablaj thiab hauv lub tuam tsev uas yog lub chaw uas cov Yudai sawvdaws tuaj txoos ua ke. Kuv tsis tau qhia ib yam dabtsi zais qas ntshi. Ua li cas koj tseem nug kuv? Cia li nug cov neeg uas mloog kuv qhia saib kuv hais dabtsi rau lawv. Lawv yeej paub tias kuv hais dabtsi.” Thaum Yexus hais li ntawd, ib tug tub teg tub taws uas sawv ntawd txawm xuas tib tawg ncuav rau Yexus lub plhu thiab hais tias, “Koj teb tus tuam pov thawj hlob li kod lov?” Yexus teb nws tias, “Yog kuv hais txhaum, cia li ua timkhawv rau yam uas kuv hais txhaum, tiamsis yog kuv hais raug, koj ntaus kuv ua dabtsi?” Ces Anas txawm xa Yexus uas tseem khi qas nrees mus cuag tus tuam pov thawj hlob Khayafa. Thaum ntawd Petus tseem sawv nte taws, mas lawv txawm hais rau Petus tias, “Koj yog tus ntawd li ib tug thwjtim thiab los tsis yog?” Petus tsis lees thiab hais tias, “Kuv tsis yog.” Tus tuam pov thawj hlob ib tug qhev uas txheeb ze tus uas Petus txiav sab nplooj ntseg tu txawm hais tias, “Kuv pom koj nrog tus ntawd nyob hauv lub vaj thiab los sas.” Petus kuj tsis lees dua thiab, mas tamsim ntawm qaib txawm qua. Ces lawv txawm coj Yexus tawm hauv Khayafa lub tsev mus rau hauv lub tsev Plitholia. Lub sijhawm ntawd kaj ntug txoog. Lawv cov ntawd tsis nkag rau hauv tus tswv xeev lub tsev kom thiaj tsis qias puas tsuas lawv, mas lawv thiaj noj tau kevcai Hla Dhau. Philaj txawm tawm tuaj cuag lawv thiab hais tias, “Nej muaj plaub dabtsi tuaj kom tus no?” Lawv teb nws tias, “Yog tus no tsis ua neeg phem peb yeej yuav tsis muab nws cob rau koj.” Philaj hais rau lawv tias, “Nej cia li coj tus no mus teem txim raws li nej txoj kevcai.” Cov Yudai thiaj hais rau nws tias, “Peb tsis muaj cai yuav muab ib tug twg txiav txim tuag.” Yuav muaj li no thiaj tiav raws li tej lus uas Yexus hais cia tias nws yuav tuag li cas. Philaj thiaj rov nkag mus rau hauv lub tsev Plitholia thiab hu Yexus los nug tias, “Koj yog cov Yudai tus vajntxwv lov?” Yexus teb tias, “Koj nug li no yog koj xav koj xwb los yog lwm tus qhia rau koj paub hais kuv li kod?” Philaj teb tias, “Kuv yog neeg Yudai thiab lov? Koj haiv neeg thiab cov pov thawj hlob muab koj cob rau kuv. Koj tau ua dabtsi?” Yexus teb tias, “Kuv lub tebchaws tsis yog nyob hauv lub ntiajteb no. Yog kuv lub tebchaws nyob hauv lub ntiajteb no kuv cov neeg yuav tawm tsam tsis kheev kuv raug muab cob rau cov Yudai. Tiamsis nimno kuv lub tebchaws tsis yog nyob ntawm no.” Philaj txawm hais rau nws tias, “Yog li ntawd koj yog ib tug vajntxwv lov?” Yexus teb tias, “Koj hais tias kuv yog vajntxwv. Yog vim li no kuv thiaj yug los thiab los rau hauv lub ntiajteb thiaj ua tau timkhawv rau txojkev tseeb. Txhua tus uas nyob hauv txojkev tseeb yeej mloog kuv tej lus.” Philaj hais rau nws tias, “Kev tseeb yog dabtsi?” Thaum Philaj hais li ntawd tag, nws kuj rov tawm mus cuag cov Yudai thiab hais rau lawv tias, “Kuv tsis pom tus no muaj kev txhaum. Tiamsis nej muaj kevcai kom kuv tso ib tug neeg dim rau thaum nej ua kevcai Hla Dhau. Nej xav kom kuv tso cov Yudai tus vajntxwv rau nej lov?” Lawv qw nrov nrov tias, “Tsis txhob tso tus no, cia li tso Npalanpa.” Tus Npalanpa no yog tus fav xeeb rau lub tebchaws. Philaj txawm kom coj Yexus mus nplawm. Cov tub rog txawm muab pos kaus ntsaj los qhaib ua ib lub mom vajntxwv looj nws taubhau, thiab muab ib lub tsho ntev tsamxem los ua rau Yexus hnav. Lawv tuaj cuag nws thiab hais tias, “Cov Yudai tus vajntxwv, thov kom koj tau zoo lauj!” thiab lawv ntaus nws lub plhu. Philaj txawm rov tawm mus hais rau cov Yudai tias, “Saib maj, kuv coj tus no tuaj cob rau nej kom nej thiaj paub tias kuv tsis pom nws muaj ib qho txhaum li.” Yexus ntoo lub mom vajntxwv uas muab tej pos ua thiab hnav lub tsho ntev tsamxem tawm los. Philaj hais rau lawv tias, “Saib nawj, nws nyob ntawm no.” Thaum cov pov thawj hlob thiab cov tub teg tub taws pom Yexus, lawv txawm qw nrov hais tias, “Muab nws teem rau saum khaublig ntoo, muab teem rau saum khaublig ntoo.” Philaj hais rau lawv tias, “Nej cia li coj nws mus teem nej, vim kuv tsis pom nws muaj kev txhaum li.” Cov Yudai teb Philaj tias, “Peb muaj txoj kevcai thiab raws li txoj kevcai ntawd nws tsim nyog tuag vim nws tsab ua Vajtswv leej Tub.” Thaum Philaj hnov tej lus no nws yimhuab ntshai. Nws nkag mus rau hauv lub tsev Plitholia thiab hais rau Yexus tias, “Koj tuaj qhovtwg tuaj?” Tiamsis Yexus tsis teb li lawm. Philaj thiaj hais rau nws tias, “Koj yuav tsis hais rau kuv ib los li lov? Koj tsis paub tias kuv muaj hwjchim tso koj dim thiab muaj hwjchim muab koj teem rau saum khaublig ntoo lov?” Yexus teb nws tias, “Koj yuav tsis muaj hwjchim loj dua kuv, tsuas yog pub saum ntuj los rau koj xwb. Vim li no tus uas muab kuv cob rau koj thiaj muaj txim loj dua koj.” Txij ntawd los Philaj nrhiav kev yuav tso Yexus dim tiamsis cov Yudai qw nrov hais tias, “Yog koj tso tus no koj tsis yog Xixa li kwvluag lawm. Txhua tus uas tsab ua vajntxwv yeej los tawm tsam Xixa.” Thaum Philaj hnov li ntawd, nws txawm coj Yexus tawm los thiab zaum saum lub rooj txiav txim ntawm qhov chaw uas hu tias Tshav Pua Lag Zeb, thiab lus Henplais hu tias Kanpatha. Hnub ntawd yog hnub uas npaj ua kevcai Hla Dhau yog thaum tav su. Philaj hais rau cov Yudai tias, “Saib nawj, nej tus vajntxwv.” Lawv qw nrov hais tias, “Coj nws mus, coj nws mus, muab nws teem rau saum khaublig ntoo.” Philaj hais rau lawv tias, “Kuv yuav muab nej tus vajntxwv teem rau saum khaublig ntoo lov?” Cov pov thawj hlob teb tias, “Peb tsis muaj vajntxwv tsuas yog muaj Xixa xwb.” Ces Philaj txawm muab Yexus cob rau lawv coj mus teem rau saum khaublig ntoo. Lawv txawm coj Yexus mus. Yexus kwv nws tus khaublig ntoo tawm mus rau lub chaw uas hu ua Txha Taubhau uas lus Henplais hu ua Kaukautha. Lawv txawm muab Yexus teem rau saum tus khaublig ntoo qhov ntawd thiab muab dua ob tug teem nrog nws ua ke ib tug ib sab, mas Yexus nyob nruab nrab. Philaj sau ib daim phiaj thiab muab ntsia rau saum tus khaublig ntoo, nyeem hais tias “Yexus uas yog neeg Naxale, yog cov Yudai tus vajntxwv.” Cov Yudai muaj coob tau nyeem daim phiaj no vim lub chaw uas Yexus raug muab teem ntawd nyob ze lub nroog, thiab cov lus ntawd sau ua lus Henplais thiab lus Latee thiab lus Kili. Yudai cov pov thawj hlob txawm hais rau Philaj tias, “Tsis txhob sau tias, ‘Cov Yudai tus vajntxwv.’ Cia li sau hais tias, ‘Tus yawg no nws hais tias, Kuv yog cov Yudai tus vajntxwv.’ ” Philaj teb tias, “Tej uas kuv sau lawd kuj tau lawm.” Thaum cov tub rog muab Yexus teem rau saum khaublig ntoo lawm, lawv txawm muab Yexus lub tsho faib ua plaub npaug, ib tug tub rog thiaj tau ib qho, tseg lub tsho sab hauv. Lub tsho ntawd tsis muaj lej leeg, ntos kiag ua ib lub keev. Lawv thiaj sib hais tias, “Peb tsis txhob muab dua, peb cia li ua ntawv rho saib leejtwg tau.” Ua li no thiaj tiav raws li Vajtswv tej lus hais tias, “Lawv muab kuv tej ris tsho faib, kuv lub tsho lawv muab ua ntawv rho.” Cov tub rog thiaj ua li ntawd. Yexus niam thiab tus niam hluas thiab Kelaupa tus pojniam Maivliag thiab Maivliag Madala sawv ze Yexus tus khaublig ntoo. Thaum Yexus pom nws niam thiab tus thwjtim uas Yexus hlub sawv ze ntawd, Yexus txawm hais rau leej niam tias, “Tug pojniam 'e, tus ntawm kod yog koj tus tub.” Thiab nws hais rau tus thwjtim ntawd tias, “Tus ntawm kod yog koj niam.” Ces tus thwjtim ntawd txawm coj Yexus niam mus nyob hauv nws tsev txij thaum ntawd los. Dhau ntawd Yexus paub tias txhua yam tiav lawm nws thiaj hais tias, “Kuv nqhis dej,” kom thiaj tiav raws li Vajtswv txojlus. Qhov ntawd muaj ib lub tais rau kua qaub, lawv txawm muab ib lub xwb kuab raus cov kua qaub ntawd chob rau tus hau pas tauj deg cev mus rau Yexus lub qhov ncauj. Thaum Yexus txais cov kua qaub ntawd lawm nws hais tias, “Tiav lawm lauj!” Nws nyo hau thiab tso nws txojsia tseg. Hnub ntawd yog hnub uas npaj rau hnub Xanpatau. Cov Yudai txawm thov Philaj cia tsoo cov neeg uas raug teem ntawd kom lov ceg thiab txo tej cev tuag mus, kom thiaj tsis nyob saum tus khaublig ntoo rau hnub Xanpatau, rau qhov hnub Xanpatau ntawd yog hnub uas tseem ceeb dua huvsi. Yog li ntawd cov tub rog thiaj los tsoo tus ib li ceg thiab tsoo dua ib tug uas raug teem nrog Yexus ua ke li ceg, mas thaum lawv los txog ntawm Yexus kuj pom tias Yexus tu siav lawm, lawv thiaj tsis tsoo Yexus li. Tiamsis muaj ib tug tub rog txawm xuas hmuv nkaug Yexus sab tav mas los ntshav thiab dej tamsid. Tus uas pom li no kuj ua timkhawv, thiab nws tej lus timkhawv kuj yog tseeb thiab nws paub tias nws hais tseeb, kom nej thiaj li ntseeg. Tej xwm txheej no tshwm los thiaj tiav raws li Vajtswv txojlus uas hais tias, “Nws tej txha yuav tsis lov ib tug li.” Thiab Vajtswv txojlus muaj dua ib nqes hais tias “Lawv yuav tsa muag ntsia tus uas lawv xuas hmuv nkaug.” Dhau ntawd Yauxej uas yog neeg hauv lub moos Alimathia thiab ua Yexus li thwjtim twjywm vim nws ntshai cov Yudai, txawm tuaj thov Philaj cia nws muab Yexus lub cev txo. Philaj kuj kheev, Yauxej txawm tuaj txo Yexus lub cev mus. Nikhaudemau uas tom ntej tuaj cuag Yexus hmo ntuj, kuj coj roj tsw qab thiab roj ntoo alau‑es hnyav kwvlam peb caug kilu tuaj. Ob tug thiaj txo Yexus lub cev los thiab muab ntaub mag qhwv cov roj tsw qab ntawd rau Yexus lub cev raws li cov Yudai kevcai log tuag. Ib cheeb tsam uas teem Yexus rau saum tus khaublig ntoo ntawd muaj ib lub vaj, thiab lub vaj ntawd muaj ib lub qhov ntxa tshiab uas tsis tau log tuag li. Vim hnub ntawd yog hnub npaj rau hnub Xanpatau thiab lub qhov ntxa nyob ze, ob tug thiaj muab Yexus lub cev log rau hauv. Hnub ib thaum sawv ntxov tsis tau pom kev Maivliag Madala tuaj txog ntawm lub qhov ntxa pom tias daim lag zeb uas kaw rooj ntxa raug muab nqa rau ib cag lawm. Nws thiaj dhia mus cuag Ximoos Petus thiab cuag dua ib tug thwjtim uas Yexus hlub thiab hais rau ob tug tias, “Luag twb coj tus Tswv lub cev tawm hauv qhov ntxa lawm, thiab peb tsis paub tias luag muab nws coj mus tso rau qhovtwg.” Petus thiab tus thwjtim ntawd txawm tawm mus tom lub qhov ntxa. Ob tug dhia mus tiamsis tus thwjtim ntawd dhia sai dua Petus thiaj xub mus txog lub qhov ntxa ua ntej. Nws nyo xauj mas pom tej ntaub mag nyob hauv tiamsis nws tsis nkag mus rau hauv. Ximoos Petus txawm raws qab tuaj txog thiab nws nkag plaws mus rau hauv lub qhov ntxa mas pom tej ntaub mag nyob hauv xwb, thiab pom hauv phuam uas Yexus ntoo nyob tsis nrog tej ntaub mag ua ke, tiamsis muab tais cia rau ib cag. Ces tus thwjtim uas xub tuaj txog kuj nkag mus rau hauv thiab. Nws pom thiab ntseeg. Thaum ntawd ob tug tseem tsis tau nkag siab Vajtswv nqe lus uas hais tias nws yuav ciaj sawv hauv qhov tuag rov los. Ces ob tug thwjtim txawm rov qab mus tsev. Tiamsis Maivliag tseem sawv nraum lub qhov ntxa quaj. Thaum nws tabtom quaj, nws nyo xauj rau hauv lub qhov ntxa, mas pom ob tug tubtxib saum ntuj hnav tsoos dawb paug zaum ntawm lub chaw uas tso Yexus lub cev tuag, ib tug nyob lub chaw ntawm Yexus taubhau, ib tug nyob lub chaw ntawm Yexus kotaw. Ob tug tubtxib hais rau Maivliag tias, “Tus pojniam 'e, koj quaj ua dabtsi?” Nws teb ob tug tias, “Vim luag coj kuv tus Tswv mus lawm, kuv tsis paub tias coj mus tso rau qhovtwg.” Thaum nws hais li ntawd tag nws tig kiag los pom Yexus sawv ntawd, tiamsis tsis paub tias yog Yexus. Yexus hais rau nws tias, “Tus pojniam 'e, koj quaj ua dabtsi? Koj nrhiav leejtwg?” Maivliag xav tias ntshai yog tus uas tu lub vaj ntawd thiaj hais rau nws tias, “Yawg hlob, yog koj coj nws lub cev mus lawm, thov qhia kuv paub tias koj muab nws tso rau qhovtwg, kuv thiaj tau coj nws mus.” Yexus hais rau nws tias, “Maivliag 'e.” Maivliag thiaj tig kiag los hais rau nws ua lus Henplais tias, “Lanpauni” uas txhais hais tias xibhwb. Yexus hais rau nws tias, “Tsis txhob tuav kuv vim kuv tsis tau nce mus cuag kuv leej Txiv. Koj cia li mus cuag kuv cov kwvtij thiab hais rau lawv tias, ‘Kuv tabtom yuav nce mus cuag kuv leej Txiv thiab nej leej Txiv, mus cuag kuv tus Vajtswv thiab nej tus Vajtswv.’ ” Maivliag Madala txawm mus hais rau cov thwjtim tias, “Kuv twb pom tus Tswv lawm,” thiab hais tias tus Tswv hais tej lus ntawd rau nws. Hnub ib ntawd thaum tsaus ntuj cov thwjtim nyob ua ke thiab kaw qhov rooj cia lawm vim lawv ntshai cov Yudai. Yexus txawm los sawv ntsug tshwm rau hauv lawv nruab nrab thiab hais tias, “Nej cia li nyob kaj siab lug.” Thaum nws hais li ntawd tag nws txawm muab nws txhais tes thiab nws sab tav rau lawv saib. Thaum cov thwjtim pom tus Tswv lawm lawv zoo siab xyiv fab. Yexus rov hais rau lawv tias, “Cia li nyob kaj siab lug. Leej Txiv txib kuv los li cas, kuv txib nej mus ib yam li ntawd.” Thaum nws hais li ntawd tag, nws txawm tshuab pa rau saum lawv thiab hais rau lawv tias, “Cia li txais Vaj Ntsuj Plig uas dawb huv nawj. Yog nej zam leejtwg lub txim, tus ntawd lub txim yuav raug muab daws. Yog nej tsis zam leejtwg lub txim tus ntawd lub txim yuav tsis raug muab daws.” Thauma uas hu ua Didoma thiab yog ib tug hauv kaum ob tug thwjtim ntawd tsis nrog lawv nyob rau thaum Yexus tshwm los. Lwm tus thwjtim thiaj hais rau nws tias, “Peb twb pom tus Tswv lawm.” Tiamsis Thauma hais rau lawv tias, “Yog kuv tsis pom tej qhov ntsia hlau ntawm nws txhais tes thiab tsis tau muab ntiv tes ntxig rau hauv tej qhov ntsia hlau ntawd thiab tsis tau muab tes ntxig rau hauv tej qhov hmuv ntawm nws sab tav, mas kuv yuav tsis ntseeg li.” Thaum dhau yim hnub lawd cov thwjtim nyob ua ke hauv lub tsev ntawd dua thiab Thauma nrog lawv nyob thiab. Qhov rooj kuj kaw tag lawm tiamsis Yexus los sawv hauv lawv nruab nrab thiab hais tias, “Nej cia li nyob kaj siab lug.” Nws hais rau Thauma tias, “Muab koj tus ntiv tes ntxig ntawm no thiab saib kuv txhais tes. Cev koj txhais tes ntxig rau hauv kuv sab tav. Tsis txhob ua xyem xyav, cia li ntseeg.” Thauma teb nws tias, “Au kuv tus Tswv thiab kuv tus Vajtswv.” Yexus hais rau nws tias, “Vim koj pom kuv koj thiaj li ntseeg lov? Cov uas tsis pom kuv tiamsis ntseeg, tau nyob kaj siab lug.” Yexus tau ua dua ntau yam txujci tseem ceeb tab meeg nws cov thwjtim uas tsis tau muab sau cia rau hauv phau ntawv no. Tej uas muab sau cia no kuj yog sau kom nej tau ntseeg tias Yexus yog tus Khetos, yog Vajtswv leej Tub. Yog nej ntseeg nej yuav tau txojsia hauv nws lub npe. Dhau ntawd los Yexus rov tshwm rau cov thwjtim pom ntawm ntug Hiavtxwv Thinpela. Yexus tshwm los li no. Ximoos Petus, thiab Thauma uas hu ua Ntxaib thiab Nathana‑ee uas nyob lub zos Khana xeev Kalilais, thiab Xenpedi ob tug tub thiab dua ob tug thwjtim lawv tabtom nyob ua ke. Ximoos Petus hais rau lawv tias, “Kuv yuav mus muab ntses.” Lawv hais rau nws tias, “Peb yuav nrog koj mus thiab.” Ces lawv txawm nce nkoj mus, tiamsis hmo ntawd lawv muab tsis tau ntses kiag li. Thaum kaj ntug txoog, Yexus los sawv ntawm ntug nqhuab, tiamsis cov thwjtim tsis paub tias yog Yexus. Yexus hais rau lawv tias, “Cov menyuam 'e, nej puas tau ntses os?” Lawv teb nws tias, “Tsis tau li.” Nws hais rau lawv tias, “Cia li ntaus vas rau ntawm lub nkoj sab xis mas yuav tau ntses.” Lawv thiaj ntaus ib vag rau hauv, tau ntses ntau kawg rub tsis taus lub vas los. Tus thwjtim uas Yexus hlub hais rau Petus tias, “Tus ntawd yog tus Tswv.” Thaum Petus hnov tias yog tus Tswv, nws txawm khaws nkaus tsho los hnav vim yog nws twb hle tsho lawm mas caws qia rau hauv hiavtxwv. Lwm tus thwjtim caij lub nkoj los thiab rub lub vas uas ntses puv nkaus los rau qhov lawv nyob tsis deb ntawm ntug kwvlam tsib caug daj. Thaum lawv nce los rau saum ntug nqhuab lawv pom muaj ib cub thee muaj ntses ci rau saum thiab muaj ncuav. Yexus hais rau lawv tias, “Muab cov ntses uas nyuam qhuav ntaus tau ib txhia los thiab.” Ximoos Petus txawm nce rau hauv nkoj rub lub vas rau saum ntug. Lub vas ntawd muaj cov ntses loj loj puv nkaus, muaj ib puas tsib caug peb tus. Txawm yog muaj ntau li ntawd los lub vas tsis ntuag. Yexus hais rau lawv tias, “Los noj tshais.” Cov thwjtim tsis muaj leejtwg kav nug nws tias, “Koj yog leejtwg?” Lawv yeej paub tias yog tus Tswv. Yexus los muab ncuav cev rau lawv thiab muab ntses rau lawv. No yog zaum peb uas Yexus tshwm rau cov thwjtim pom tom qab uas nws raug tsa hauv qhov tuag rov los. Thaum lawv noj tshais tag Yexus hais rau Ximoos Petus tias, “Yauhas tus tub Ximoos 'e, koj hlub kuv heev dua lawv cov no lov?” Petus teb nws tias, “Yog los maj, tus Tswv. Koj paub tias kuv nyiam koj.” Yexus hais rau nws tias, “Cia li yug kuv cov menyuam yaj.” Yexus hais dua zaum ob rau nws tias, “Yauhas tus tub Ximoos 'e, koj hlub kuv lov?” Petus teb nws tias, “Yog los maj, tus Tswv. Koj yeej paub tias kuv nyiam koj.” Yexus hais rau nws tias, “Cia li saib xyuas kuv cov yaj.” Yexus hais rau nws zaum peb tias, “Yauhas tus tub Ximoos 'e, koj nyiam kuv lov?” Petus ntxhov siab rau qhov uas Yexus hais rau nws zaum peb tias, “Koj nyiam kuv lov?” nws txawm hais rau Yexus tias, “Tus Tswv, koj yeej paub txhua yam huvsi, koj paub tias kuv nyiam koj.” Yexus hais rau nws tias, “Cia li yug kuv cov yaj. Kuv hais tseeb rau koj tias, thaum koj tseem hluas koj sia siv khov kho ntawm duav thiab koj mus qhovtwg los mus raws li koj xav mus. Tiamsis thaum koj laus lawd koj yuav tsa tes thiab yuav muaj lwm tus tuaj kho siv rau koj sia ntawm duav thiab coj koj mus qhov chaw uas koj tsis xav mus.” Yexus hais li no kuj yog nws qhia tias Petus yuav tuag li cas thiaj ua rau Vajtswv tau koob meej. Thaum hais li ntawd tag, Yexus hais rau Petus tias, “Cia li raws kuv qab los.” Petus tig los pom tus thwjtim uas Yexus hlub raws qab los, yog tus uas pheeb ze Yexus rau thaum noj mov es nug hais tias, “Tus Tswv tus uas yuav fav xeeb rau koj yog leejtwg?” Thaum Petus pom tus thwjtim ntawd Petus txawm hais rau Yexus tias, “Tus Tswv, tus no nev yuav ua li cas?” Yexus hais rau nws tias, “Yog kuv xav cia nws nyob mus txog thaum kuv rov los, los yuav nki txog koj dabtsi? Koj cia li raws kuv qab los.” Vim li ntawd lo lus uas hais tias tus thwjtim ntawd yuav tsis tuag thiaj li ncha mus thoob plaws cov kwvtij. Tiamsis Yexus tsis tau hais rau nws tias tus thwjtim ntawd yuav tsis tuag, tiamsis hais tias, “Yog kuv xav cia nws nyob mus txog thaum kuv rov los, yuav nki txog koj dabtsi?” Tus thwjtim no yog tus uas ua timkhawv rau tej xwm txheej no thiab yog tus uas sau tej no cia. Thiab peb paub tias nws tej lus timkhawv muaj tseeb tiag. Tseem muaj dua ntau yam uas Yexus tau ua. Yog muab txhua yam sau tag huvsi, kuv xav tias txawm yog lub ntiajteb los yuav tsis muaj chaw txaus rau tej phau ntawv uas sau ntawd. Au The‑aufila, thawj phau ntawv ntawd kuv hais txog txhua yam uas Yexus pib ua thiab qhuab qhia mus txog hnub uas nws raug coj mus saum ntuj lawm, yog tom qab uas nws nkaw lus hauv Vaj Ntsuj Plig dawb huv rau cov tubtxib uas nws xaiv cia lawd. Thaum nws raug kev tsim txom tag lawm Yexus los tshwm rau lawv pom, muaj tsoob zeej timkhawv ntau yam qhia tias nws muaj txojsia nyob. Nws tshwm rau lawv pom rau ncua sijhawm plaub caug hnub thiab tau hais txog Vajtswv lub tebchaws. Thaum nws tseem nrog lawv nyob ua ke nws kuj nkaw lus rau lawv tias, “Tsis txhob tawm hauv Yeluxalees mus tiamsis nyob tos yam uas leej Txiv cog lus tias yuav pub raws li nej hnov kuv hais lawd. Yauhas coj ua kevcai raus hauv dej, tiamsis tshuav tsis ntev nej yuav ua kevcai raus hauv Vaj Ntsuj Plig uas dawb huv.” Thaum lawv tuaj txoos ua ke, lawv txawm nug Yexus tias, “Tus Tswv, koj yuav muab lub tebchaws rov rau cov Yixayee kav zaum no lov?” Nws hais rau lawv tias, “Tsis txog nej yuav paub lub caij lub nyoog uas leej Txiv teem cia raws li nws muaj hwjchim teem. Tiamsis nej yuav tau txais hwjchim rau thaum Vaj Ntsuj Plig uas dawb huv nqes los rau saum nej, thiab nej yuav ua timkhawv hais txog kuv hauv lub nroog Yeluxalees thiab thoob plaws lub xeev Yudia thiab lub xeev Xamali thiab mus thoob qab ntuj kawg.” Thaum Yexus hais li no tag lawd, nws txawm raug coj mus saum ntuj rau lawv ntsia ntsoov, thiab muaj huab laum nkaus nws ploj ntais ntawm lawv qhov muag lawm. Thaum lawv tseem ntsia ntsoov rau saum ntuj rau thaum Yexus nce mus, txawm muaj ob tug yawg hnav tsoos tsho dawb paug los sawv ntawm lawv ib sab, thiab hais tias, “Cov neeg Kalilais 'e, ua cas nej yuav sawv ntsia ntsoov rau saum ntuj? Tus Yexus no uas raug coj ncaim nej mus rau saum ntuj lawm, nws yuav rov los ib yam nkaus li uas nej pom nws nce mus rau saum ntuj ntag.” Ces lawv txawm nqes pem lub roob Txiv Aulib rov qab mus rau Yeluxalees. Lub roob ntawd nyob ze Yeluxalees, ntu kev ntawd deb npaum li uas tso cai mus tau rau hnub Xanpatau. Thaum lawv mus rau hauv lub nroog lawm lawv txawm nce mus rau txheej tsev saud yog chav uas lawv nyob, yog Petus, Yauhas, Yakaunpau thiab Anru, Fili thiab Thauma, Npathaulaumai thiab Mathai, Afe‑a tus tub Yakaunpau thiab Ximoos uas yog ib tug Xelaute. Lawv sawvdaws txawm koom ib lub siab siv zog thov Vajtswv, thiab muaj cov pojniam thiab Maivliag uas yog Yexus niam thiab Yexus cov kwv koom ua ke. Thaum ntawd Petus sawv tsees hauv nruab nrab cov kwvtij uas nyob ua ke ntawd huvsi kwvlam muaj ib puas nees nkaum leej, thiab nws hais tias, “Cov kwvtij 'e, yeej los yuav tsum tiav raws li Vajtswv txojlus uas Vaj Ntsuj Plig dawb huv kom Davi lub qhov ncauj hais txog Yudas uas coj cov uas ntes Yexus kev, vim twb suav tias nws yog peb cov thiab muaj feem ua tej haujlwm no.” (Tus ntawd coj cov nqe uas ntiav nws ua phem ntawd mus yuav ib daim teb, mas nws poob rau hauv daim teb ntawd ntsawm nws lub plab tawg ua hnyuv tawm tag huvsi. Txhua tus uas nyob hauv Yeluxalees yeej paub tej xwm txheej no, thaj av ntawd thiaj raug hu raws li lawv li lus hais tias Akhedama uas txhais hais tias Teb Ntshav.) “Muaj lus sau cia rau hauv phau Ntawv Nkauj hais tias, “ ‘Cia nws lub chaw nyob nyob do cuas, tsis kheev leejtwg nyob hauv. ’ thiab hais tias, ‘Thov kom muaj dua ib tug los nyob nws chaw ua haujlwm. ’ Vim li no ib tug hauv cov uas nrog nraim peb nyob rau ncua sijhawm uas Yexus tseem mus mus los los hauv peb, yog txij thaum Yauhas muab Yexus ua kevcai raus dej mus txog hnub uas Yexus raug muab coj ncaim peb mus saum ntuj lawm, mas ib tug hauv cov neeg no yuav tsum nrog peb ua timkhawv txog qhov uas Yexus ciaj sawv rov los.” Lawv thiaj tawm npe ob leeg, tus ib yog Yauxej uas hu ua Npaxanpa thiab kuj hu ua Yuxatha, tus ob yog Mathia. Ces lawv txawm thov Vajtswv hais tias, “Tus Tswv uas paub txhua tus neeg lub siab, thov qhia tshwm rau peb paub tias ob tug no koj xaiv tus twg los tuav tes haujlwm no thiab ua tubtxib nyob Yudas lub chaw uas nws muab tso tseg es mus nyob rau lub chaw uas yeej yog nws li.” Lawv thiaj rho ntawv mas rho tau Mathia. Nws thiaj raug xaiv los nrog kaum ib tug tubtxib ntawd. Thaum txog hnub Pheethekhoxate, lawv sawvdaws nyob ua ke hauv ib qho chaw. Tamsim ntawd txawm muaj ib lub suab saum ntuj tuaj yam nkaus li cua daj cua dub ntsawj hlob thoob plaws lub tsev uas lawv zaum ntawd. Txawm muaj nplaim taws zoo li tus nplaig tshwm rau lawv pom thiab faib pes rhe nyob rau saum lawv txhua tus. Lawv sawvdaws thiaj tau Vaj Ntsuj Plig uas dawb huv puv npo thiab lawv pib hais lwm yam lus raws li Vaj Ntsuj Plig kom lawv hais. Muaj cov Yudai uas hwm Vajtswv tuaj txhua lub tebchaws hauv qab ntuj tuaj so rau hauv lub nroog Yeluxalees. Thaum hnov lub suab ntawd, cov neeg coob coob txawm tuaj ua ke, thiab lawv tsis pom qab xav vim lawv nyias hnov nyias yam lus uas cov ntawd hais. Lawv xav tsis thoob thiab phimhwj hais tias, “Cov neeg uas hais no puavleej yog neeg Kalilais los tsis yog? Ua cas peb txhua tus hnov lawv hais peb txhua lub tebchaws tej lus? Muaj cov Pathia, cov Midia, cov Elas thiab cov uas nyob hauv Mexauphautamia thiab hauv Yudia thiab hauv Khapadaukia thiab hauv Phauthia thiab hauv Axia, thiab hauv Fikia thiab hauv Pafilia thiab hauv Iyi, thiab hauv Linpia tebchaws tej thaj uas zwm rau lub nroog Khulene, thiab muaj cov uas tuaj lub nroog Loos tuaj, tsis hais cov Yudai thiab cov uas los coj Yudai kevcai, thiab muaj cov Khete thiab cov Alanpia, mas peb nyias taus nyias hnov lawv cov no hais peb tej lus hais txog Vajtswv tej haujlwm loj.” Lawv sawvdaws thiaj phimhwj thiab tsis pom qab xav thiab ib leeg hais rau ib leeg tias, “Tej no yog dabtsi?” Muaj ib txhia thuam luag hais tias, “Yog lawv qaug cawv txiv hmab tshiab xwb.” Ces Petus txawm sawv tsees nrog kaum ib tug tubtxib ua ke tsa suab nrov hais rau cov neeg ntawd tias, “Cov neeg Yudia thiab sawvdaws uas nyob hauv Yeluxalees, nej cia li paub zaj no thiab mloog tej lus uas kuv hais. Cov neeg no tsis yog qaug cawv yam li nej xav, rau qhov nyuam qhuav cuaj teev sawv ntxov xwb. Tiamsis tej no yog tej uas Yau‑ee uas ua xibhwb cev Vajtswv lus hais cia lawm tias, “ ‘Vajtswv hais tias, lub sijhawm kawg kuv yuav hliv kuv tus Ntsuj Plig rau saum ib tsoom neeg sawvdaws. Nej tej tub tej ntxhais yuav cev kuv li lus, nej cov hluas yuav ua yog toog pom, thiab nej cov laus yuav ua npau suav pom. Lub sijhawm ntawd txawm yog kuv cov tub qhe nkauj qhev los kuv yuav hliv kuv tus Ntsuj Plig rau saum lawv, thiab lawv yuav cev kuv li lus. Kuv ua tej txujci phimhwj tshwm saum nruab ntug thiab ua txujci tseem ceeb tshwm rau hauv lub ntiajteb, yuav muaj ntshav thiab hluavtaws thiab pa ncho. Lub hnub yuav ntxeev ua tsaus ntuj, lub hli yuav ua ntshav, ua ntej hnub uas loj thiab zoo kawg nkaus uas tus Tswv teem cia los txog. Thaum ntawd txhua tus uas thov hu tus Tswv lub npe yuav dim.’ “Nej cov uas yog haiv neeg Yixayee cia li mloog tej lus no. Yexus uas yog neeg Naxale yog tus uas Vajtswv ua tej haujlwm loj thiab tej txujci tseem ceeb thiab tej uas phimhwj qhwv nws rau nej, yog tej uas Vajtswv kom Yexus ua hauv nej nruab nrab raws li uas nej twb paub lawd, mas tus Yexus no raug muab cob rau nej raws li Vajtswv twb xav tseg ruaj cia thiab paub ua ntej lawd, mas nej thiaj siv neeg phem txhais tes muab nws teem rau saum khaublig ntoo thiab muab nws tua pov tseg. Tiamsis Vajtswv tsa nws ciaj sawv rov los thiab tso nws dim txojkev tuag tej mob, rau qhov txojkev tuag tuav tsis tau nws cia kiag li. Davi hais txog Yexus tias, “ ‘Kuv pom tus Tswv nyob ntawm kuv lub hauv ntej tsis tu li. Vim nws nyob ntawm kuv sab xis kuv thiaj tsis ua zog. Vim li ntawd kuv lub siab thiaj xyiv fab thiab kuv tus nplaig zoo siab, thiab kuv lub cev thiaj li nyob muaj siab vam. Rau qhov koj yuav tsis muab kuv tso tseg rau hauv tub tuag teb, lossis cia koj tus uas Dawb Huv lwj mus. Koj qhia txojkev uas tau txojsia rau kuv paub, koj yuav pub kom kuv zoo siab xyiv fab Kawg nkaus rau qhov koj nrog nraim kuv.’ “Kwvtij 'e, kuv muaj siab tuab uas yuav hais rau nej txog tus yawg koob Davi tias nws twb tuag thiab muab log lawm thiab nws lub ntxa nrog peb nyob txog niaj hnub nimno. Nws yog ib tug cev Vajtswv txojlus, nws thiaj paub tias Vajtswv cog lus twv tseg rau nws tias Vajtswv yuav pub nws caj ces muaj ib tug los nyob saum nws lub zwm txwv. Nws paub ua ntej thiab hais txog qhov uas tus Kheto yuav ciaj sawv rov los hais tias Vajtswv tsis tso nws tseg rau hauv tub tuag teb thiab tsis cia nws lub cev lwj mus. Vajtswv twb tsa tus Yexus no ciaj sawv rov los lawm, peb txhua tus ua tau timkhawv txog zaj no. Twb yog vim Yexus raug tsa sawv los nyob ntawm Vajtswv sab tes xis lawm thiab tau txais Vaj Ntsuj Plig uas dawb huv ntawm leej Txiv raws li cog lus cia lawd, Yexus thiaj hliv tus Ntsuj Plig ntawd los raws li nej tau pom thiab hnov. Rau qhov Davi tsis tau nce mus rau saum ntuj, tiamsis nws hais tias, “ ‘Tus Tswv hais rau kuv tus tswv tias, “Cia li zaum ntawm kuv sab xis, mus txog thaum kuv muab koj cov yeeb ncuab ua koj lub rooj tiag taw.” ’ Vim li no, ib tsoom Yixayee sawvdaws, nej cia li paub tseeb tias Vajtswv tsa tus Yexus no uas nej muab teem rau saum tus khaublig ntoo ua tus Tswv thiab ua tus Khetos.” Thaum lawv hnov li ntawd lawm kuj chob lawv lub siab, lawv thiaj hais rau Petus thiab lwm tus tubtxib tias, “Kwvtij 'e, peb yuav ua li cas?” Petus thiaj hais rau lawv tias, “Cia li ntxeev dua siab tshiab thiab txhua tus ua kevcai raus dej hauv Yexus Khetos lub npe kom thiaj daws tau nej lub txim, mas nej yuav tau txais Vaj Ntsuj Plig tus dawb huv uas Vajtswv pub. Rau qhov tej lus cog tseg ntawd poob rau nej thiab rau nej tej tub ki thiab txhua tus uas nyob deb, yog txhua tus uas tus Tswv uas yog peb tus Vajtswv hu los cuag nws.” Petus tseem hais ntau yam ua timkhawv thiab ntuas lawv hais tias, “Cia li nrhiav kev dim ntawm cov neeg phem tiam no.” Cov uas txais yuav Petus tej lus ntawd kuj ua kevcai raus dej, thiab hnub ntawd muaj neeg los tsav ntxiv rau cov ntseeg kwvlam peb txhiab leej. Lawv rau siab ntso mloog cov tubtxib qhia thiab koom ua ib lub siab sib raug zoo thiab koom noj mov ua ke thiab thov Vajtswv ua ke. Cov neeg sawvdaws kuj ntshai, thiab Vajtswv pub cov tubtxib ua tau txujci tseem ceeb thiab txujci phimhwj ntau yam. Cov ntseeg sawvdaws nyob ua ke thiab muab lawv tej qhov txhia chaw ua sawvdaws li, thiab muab lawv tej teb thiab cuab txhiaj cuab tam muag faib rau txhua tus raws li cheem tsum. Lawv niaj hnub tuaj nyob ua ke thooj ib lub siab hauv lub tuam tsev thiab noj mov ua ke hauv lawv tej tsev, thiab ua siab dawb paug noj mov ua ke zoo siab xyiv fab, thiab qhuas Vajtswv thiab ib tsoom sawvdaws txaus siab rau lawv. Tus Tswv kuj pub cov uas tabtom dim niaj hnub tsav ntxiv coob zuj zus rau hauv lawv. Muaj ib hnub thaum hnub qaij peb teev Petus thiab Yauhas tabtom nce mus rau hauv lub tuam tsev yog lub sijhawm thov Vajtswv. Txawm muaj ib tug yawg uas ceg tawv thaum nruab thiab los raug muab kwv tuaj. Niaj hnub muaj neeg muab nws tso rau ntawm ib sab rooj loog tuam tsev, yog lub rooj loog uas hu ua Zoo Nkauj xwv nws thiaj tau thov khawv ntawm cov neeg uas nkag mus rau hauv lub tuam tsev. Thaum nws pom Petus thiab Yauhas tabtom tuaj mus rau hauv lub tuam tsev, nws thiaj thov khawv. Petus thiab Yauhas ntsia ntsoov rau tus ntawd thiab hais tias, “Cia li saib rau wb.” Tus ntawd txawm ntsia ntsoov rau ob tug xav tias yuav tau dabtsi ntawm ob tug. Tiamsis Petus hais tias, “Nyiaj thiab kub kuv tsis muaj. Yam uas kuv muaj, kuv yuav pub rau koj. Hauv Yexus Khetos uas yog neeg Naxale lub npe, koj cia li sawv tsees mus kev.” Petus txawm ntsiab nkaus nws sab tes xis tsa nws sawv, mas tamsim ntawd nws txhais kotaw thiab nws tej pob qej txha txawm muaj zog. Nws dhia caws qia sawv tsees mus kev thiab nrog ob tug nkag rau hauv lub tuam tsev, nws mus kev dhia caws qia qhuas Vajtswv. Ib tsoom neeg pom nws mus kev thiab qhuas Vajtswv, thiab cim tau tias tus ntawd yog tus uas zaum thov khawv ntawm lub rooj loog Zoo Nkauj tuam tsev. Lawv thiaj phimhwj thiab xav tsis thoob rau tej xwm txheej uas tshwm los rau tus ntawd. Thaum tus ntawd tseem tuav rawv Petus thiab Yauhas, tej neeg sawvdaws txawm dhia los rau ntawm lawv ntawm lub chaw uas hu ua Zaj Qab Khav Xalaumoo thiab phimhwj kawg. Thaum Petus pom cov neeg ntawd nws txawm hais rau lawv tias, “Haiv neeg Yixayee, ua cas nej yuav xav tsis thoob qhov xwm txheej no? Ua cas nej yuav ntsia ntsoov rau wb, yam li wb siv wb li hwjchim thiab siv wb txojkev ncaj ncees kho tau tus yawg no mus tau kev? Aplahas, Yiha thiab Yakhauj tus Vajtswv, yog peb tej poj koob yawm txwv tus Vajtswv, pub lub koob meej rau nws tus tub qhe Yexus uas nej muab cob rau luag thiab tsis lees yuav tab meeg Philaj uas twb npaj siab yuav tso nws dim lawm. Tiamsis nej tsis lees yuav tus uas dawb huv thiab ncaj ncees, nej thov kom tso tus niag neeg tua neeg rau nej. Nej thiaj muab tus uas yog txoj hauv paus siav tua pov tseg, tiamsis Vajtswv tsa nws sawv hauv qhov tuag rov los. Peb ua timkhawv rau zaj no. Qhov uas ntseeg Yexus lub npe, mas lub npe ntawd thiaj ua rau tus uas nej pom thiab paub no muaj zog, thiab qhov uas ntseeg Yexus ua rau tus no zoo kiag tab meeg nej sawvdaws. “Cov kwvtij, nimno kuv paub tias nej ua li ntawd twb yog nej tsis paub, ib yam li nej cov thawj. Tiamsis tej uas Vajtswv twb txib cov xibhwb cev Vajtswv lus tshaj tawm ua ntej lawm tias nws tus Khetos yuav raug tsim txom, nws kuj ua kom tiav li no. Vim li no cia li ntxeev dua siab tshiab thiab tig rov los kom thiaj ntxuav tau nej lub txim, thiab nej thiaj tau sijhawm so lub siab ntawm tus Tswv lub xubntiag, thiab Vajtswv thiaj txib tug Khetos uas teem cia lawd los rau nej, yog Yexus ntag. Yexus yuav tsum nyob saum ntuj ceeb tsheej mus txog lub sijhawm uas Vajtswv ua rau ib puas tsav yam rov zoo li qub raws li nws kom nws cov xibhwb dawb huv uas cev nws lus lub qhov ncauj hais thaum ub los. Mauxe hais cia tias, ‘Tus Tswv uas yog Vajtswv yuav tsa ib tug xibhwb cev lus ib yam li kuv tshwm los hauv nej cov kwvtij, mas nej yuav tsum mloog txhua yam uas tus ntawd hais rau nej. Txhua tus uas tsis mloog tus xibhwb cev lus ntawd mas yuav raug puam tsuaj ploj ntawm nws haiv neeg mus.’ Cov xibhwb uas cev Vajtswv lus txij Xamuyee thiab cov uas ua nws qab puavleej tshaj tawm txog lub sijhawm no. Nej yog cov xibhwb cev lus li tub ki thiab yuav tau tej uas Vajtswv cog tseg rau nej tej poj koob yawm txwv, yog qhov uas hais rau Aplahas tias, ‘Ib tsoom neeg hauv lub ntiajteb yuav tau koob hmoov ntawm koj caj ces.’ Thaum Vajtswv tsa nws tus tub qhe ciaj sawv rov los lawd, kuj txib nws tuaj cuag nej ua ntej, nej thiaj tau koob hmoov ntawm qhov uas nej tig kiag ntawm nej tej kev txhaum los.” Thaum ob tug tseem qhia cov neeg ntawd cov pov thawj thiab tus uas ua thawj saib xyuas lub tuam tsev thiab cov Xadukai txawm tuaj rau ntawm ob tug. Lawv tsis txaus siab rau qhov uas ob tug qhia thiab tshaj tawm tias muaj kev sawv hauv qhov tuag rov los hauv Yexus. Lawv thiaj ntes ob tug coj mus kaw ib hmos kaj ntug rau hauv tsev lojfaj vim yog tsaus ntuj lawm. Cov neeg uas hnov ob tug tej lus ntawd muaj ntau leej ntseeg. Cov txivneej huvsi uas ntseeg kwvlam tsib txhiab leej. Thaum tagkis cov uas ua thawj thiab cov kev txwj laus thiab cov xibhwb qhia Vajtswv kevcai txawm tuaj sablaj ua ke rau hauv Yeluxalees, nrog Anas uas yog tus tuam pov thawj hlob thiab Khayafa thiab Yauhas thiab Alexadaw thiab txhua tus uas yog tus tuam pov thawj hlob li caj ces. Thaum lawv coj Petus thiab Yauhas los sawv ntsug tab meeg, lawv nug ob tug tias, “Neb siv leejtwg li hwjchim thiab siv leejtwg lub npe ua tej haujlwm no?” Thaum ntawd Petus muaj Vaj Ntsuj Plig dawb huv puv npo, nws txawm hais rau lawv tias, “Nej cov thawj uas kav cov pejxeem thiab nej cov kev txwj laus, yog hnub no nej tshuaj saib wb ob leeg rau qhov zoo uas wb tau ua rau ib tug neeg ceg tawv thiab nug tias ua li cas kho tau nws zoo lawm, mas nej sawvdaws thiab cov Yixayee sawvdaws cia li paub tias twb yog vim Yexus Khetos uas yog neeg Naxale lub npe uas nej muab teem rau saum tus khaublig ntoo thiab Vajtswv tsa sawv hauv qhov tuag rov los, mas tus yawg uas sawv ntawm nej xubntiag no thiaj zoo kiag. Yexus yog “ ‘lub pob zeb uas cov Kws ua tsev muab xyeeb tseg lawm twb rov muab los teeb ua thawj lub rau ntawm kaum tsev lawm.’ Hauv lwm tus yeej tsis muaj kev dim kiag li, rau qhov thoob plaws hauv qab ntuj no tsis muaj dua ib lub npe uas pub rau neeg siv cawm peb dim.” Thaum lawv pom Petus thiab Yauhas muaj siab tuab thiab paub tias ob tug tsis tau kawm ntawv tsuas zoo li luag tej xwb, lawv xav tsis thoob, thiab nco tau tias ob tug txeev nrog Yexus nyob. Tiamsis vim lawv pom tus yawg uas zoo ntawd sawv ntsug ntawm ob tug ib sab, lawv thiaj tsis muaj lus cam kiag li lawm. Thaum lawv hais kom ob tug tawm ntawm cov thawj lub rooj sablaj lawm, lawv txawm sablaj tias, “Peb yuav ua li cas rau ob tug no? Rau qhov ob tug tau ua ib yam txujci tseem ceeb rau txhua tus uas nyob hauv Yeluxalees paub tseeb, mas peb tsis lees paub kuj tsis tau li. Peb cia li txwv ob tug kom tsis txhob hais dabtsi hauv lub npe no xwv zaj no thiaj tsis ncha heev zuj zus mus rau hauv cov pejxeem.” Lawv thiaj hu ob tug los thiab txwv kom ob tug tsis txhob hais lossis qhia hauv Yexus lub npe kiag li lawm. Tiamsis Petus thiab Yauhas teb lawv tias, “Nej sim xav saib, nyob ntawm Vajtswv xubntiag tsim nyog mloog nej hais zoo dua li mloog Vajtswv hais lov? Rau qhov peb tseg tsis tau qhov uas hais txog tej uas peb pom thiab tej uas peb hnov.” Thaum lawv rov txwv tawv tawv dua ces txawm tso ob tug mus. Lawv nrhiav tsis tau txim rau ob tug vim lawv ntshai cov pejxeem, rau qhov txhua tus qhuas Vajtswv vim yog tej xwm txheej uas tshwm los ntawd. Tus uas mob zoo ntawm txujci tseem ceeb ntawd hnub nyoog plaub caug tawm xyoo lawm. Thaum tso Petus thiab Yauhas lawm, ob tug txawm mus rau hauv cov ntseeg thiab piav txhua yam uas cov pov thawj hlob thiab cov kev txwj laus hais rau ob tug. Thaum lawv hnov lawm lawv txawm koom ib lub siab tsa suab thov Vajtswv hais tias, “Au tus Tswv, koj tsim lub ntuj thiab lub ntiajteb thiab dej hiavtxwv thiab txhua yam uas muaj nyob hauv. Koj kom Vaj Ntsuj Plig uas dawb huv siv peb yawg koob Davi uas yog koj tus qhev lub qhov ncauj hais tias, “ ‘Vim li cas lwm haiv neeg yuav npau taws heev, thiab tej neeg ntaus tswvyim phem qhuav qhuav? Tej vajntxwv hauv lub ntiajteb kuj sawv twv, cov uas ua thawj tuaj txoos ua ke tawm tsam tus Tswv thiab nws tus Khetos.’ Qhov tseeb hauv lub nroog no Helauj thiab Phauthi‑au Philaj thiab lwm haiv neeg thiab cov Yixayee tuaj txoos ua ke tawm tsam Yexus uas yog koj tus qhev uas dawb huv thiab koj tsa cia lawd, kom lawv thiaj ua txhua yam raws li koj txhais tes thiab koj lub siab twb teem tseg lawd. Au tus Tswv, nimno thov koj tsa muag ntsia qhov uas lawv hem, thiab thov pub koj cov tub qhe muaj siab tuab hais koj tej lus, rau lub sijhawm uas koj cev koj txhais tes kho mob thiab ua kom tej txujci tseem ceeb thiab txujci phimhwj tshwm los hauv Yexus uas yog koj tus tub qhe dawb huv lub npe.” Thaum lawv thov tag, lub chaw uas lawv tuaj txoos ua ke ntawd txawm ua zog kais, mas lawv puv npo Vaj Ntsuj Plig dawb huv thiab lawv muaj siab tuab hais Vajtswv tej lus. Cov uas los ntseeg ntawd koom ua ib lub siab. Tsis muaj leejtwg yuav hais tias nws tej qhov txhia chaw yog nws li xwb, tiamsis lawv muab txhua yam ua sawvdaws li. Cov tubtxib hais lus muaj hwjchim loj kawg ua timkhawv txog qhov uas tus Tswv Yexus ciaj sawv rov los, thiab Vajtswv txojkev hlub nrog nraim lawv txhua tus. Mas lawv cov tsis muaj ib tug tu ncua ib yam dabtsi, rau qhov txhua tus uas muaj liaj teb thiab vaj tse kuj muab muag thiab coj tej nyiaj uas muag tau ntawd tuaj tso rau ntawm cov tubtxib kotaw, mas muab faib rau txhua tus raws li uas cheem tsum. Yauxej uas cov tubtxib hu tias Npananpa (uas txhais hais tias, tus tub uas txhawb siab) yog ib tug Levi uas yog neeg Xaipla, nws muaj ib daim teb, nws muab muag thiab coj cov nqe teb ntawd tuaj tso rau ntawm cov tubtxib kotaw. Muaj ib tug yawg npe hu ua Anania thiab nws tus pojniam hu ua Xafila muag nws tej qhov txhia chaw. Mas Anania qee cov nyiaj ib txhia cia, nws tus pojniam kuj paub thiab. Nws coj ib qho tuaj tso rau ntawm cov tubtxib kotaw. Petus txawm hais tias, “Anania, ua cas Xatas nyob puv nkaus hauv koj lub siab kom dag Vaj Ntsuj Plig uas dawb huv es koj thiaj qee cov nqe teb ntawd ib txhia cia? Thaum daim teb tseem nyob kuj yeej yog koj li los tsis yog? Thaum muab muag lawd cov nyiaj yeej nyob ntawm koj ceev los tsis yog? Ua cas koj lub siab yuav xav ua li no? Koj tsis tau dag neeg tiamsis dag Vajtswv.” Thaum Anania hnov tej lus ntawd nws txawm ntog vau hlo tu siav nrho. Txhua tus uas hnov txog zaj ntawd kuj ntshai heev kawg. Cov hluas txawm sawv tsees thiab muab nws lub cev tuag qhwv kwv coj mus log. Dhau ntawd kwvlam peb teev nws tus pojniam tuaj txog twb tsis paub tej xwm txheej uas tshwm los. Petus hais rau nws tias, “Qhia rau kuv saib neb muag daim teb tau nqe npaum li no xwb lov?” Nws teb tias, “Yog lauj, tau npaum kod xwb.” Petus txawm hais rau nws tias, “Ua cas neb koom ua ib lub siab sim tus Tswv tus Ntsuj Plig? Saib maj, cov uas kwv koj tus txiv mus log tej kotaw nyob ntawm qhov rooj, mas lawv yuav kwv koj mus log thiab.” Tamsim ntawd nws txawm ntog vau hlo tu siav nrho ntawm Petus kotaw. Thaum cov hluas los txog lawv pom tias tuag lawm, ces lawv txawm kwv nws lub cev tuag mus log rau ntawm nws tus txiv ib sab. Ib tsoom ntseeg thiab txhua tus uas tau hnov txog zaj no kuj ntshai kawg li. Muaj ntau yam txujci tseem ceeb thiab txujci phimhwj tshwm ntawm cov tubtxib txhais tes rau hauv nruab nrab cov neeg. Cov ntseeg sawvdaws tuaj nyob ua ke rau ntawm Zaj Qab Khav Xalaumoo. Luag lwm tus tsis kav tuaj nrog lawv koom ua ke, tiamsis ib tsoom neeg hwm lawv heev. Muaj neeg los ntseeg coob tsav ntxiv zuj zus rau cov uas ntseeg tus Tswv tsis hais pojniam txivneej. Cov neeg kwv tej mob tawm tuaj rau ntawm tej ntug kev thiab muab tso pw rau saum tej txaj thiab tej lev, xwv thaum Petus taug kev tuaj mus nws tus duab thiaj yuav roos tau lawv qee leej. Tej neeg uas nyob hauv tej moos uas nyob ib ncig Yeluxalees kuj tuaj txoos ua ke thiab coj cov neeg muaj mob thiab cov neeg uas raug dab tuaj, mas lawv txhua tus kuj zoo huvsi. Tus tuam pov thawj hlob thiab txhua tus uas nrog nws ua ke uas yog cov Xadukai txawm khib heev. Lawv thiaj ntes cov tubtxib thiab muab kaw rau hauv nom tswv lub tsev lojfaj. Thaum hmo ntuj tus Tswv ib tug tubtxib saum ntuj tuaj qheb qhov rooj tsev lojfaj thiab coj cov tubtxib tawm los thiab hais tias, “Nej cia li mus sawv ntsug hauv lub tuam tsev tshaj tawm txhua lo lus hais txog txojsia tshiab no rau cov neeg mloog.” Thaum cov tubtxib tau hnov li ntawd, ces kaj ntug lawv txawm nkag rau hauv lub tuam tsev thiab qhuab qhia. Thaum tus tuam pov thawj hlob thiab cov uas nrog nws tuaj txog lawv txawm hu cov thawj lub rooj sablaj thiab Yixayee cov kev txwj laus sawvdaws tuaj sablaj, thiab txib neeg mus coj cov tubtxib tom lub tsev lojfaj los. Thaum cov tub teg tub taws mus txog, lawv tsis pom cov tubtxib nyob hauv tsev lojfaj, lawv txawm rov los hais tias, “Peb pom lub tsev lojfaj tseem kaw qas nrees thiab cov uas zov tseem sawv ntawm qhov rooj, tiamsis thaum peb qheb qhov rooj tsis pom leejtwg nyob hauv li.” Thaum tus thawj uas saib lub tuam tsev thiab cov pov thawj hlob hnov tej lus no, kuj tsis pom qab xav txog cov tubtxib tias yuav ua li cas ntxiv mus. Muaj ib tug tuaj hais rau lawv tias, “Saib maj, cov neeg uas nej muab kaw rau hauv lub tsev lojfaj tabtom sawv ntsug qhuab qhia cov pejxeem hauv lub tuam tsev.” Tus thawj uas saib lub tuam tsev thiab cov tub teg tub taws kuj mus coj cov tubtxib los, tsis ua nyaum, vim yog ntshai tsam cov pejxeem xuas pob zeb ntaus lawv. Thaum lawv coj cov tubtxib los txog lawd kuj kom cov tubtxib sawv tab meeg ntawm cov thawj lub rooj sablaj ntawd. Tus tuam pov thawj hlob txawm nug lawv hais tias, “Peb twb txwv nej tawv tawv hais tias tsis txhob qhuab qhia dabtsi hauv lub npe ntawd, los nej tej lus qhia twb ncha mus thoob plaws hauv Yeluxalees lawm thiab nej tseem xav muab tus ntawd cov ntshav nog rau peb ris thiab.” Petus thiab cov tubtxib teb tias, “Peb yuav tsum mloog Vajtswv lus heev dua li mloog neeg lus. Yexus uas nej muab dai tuag rau saum tus ntoo ntawd, peb tej poj koob yawm txwv tus Vajtswv twb muab tsa ciaj sawv rov los lawm. Vajtswv tsa nws nyob ntawm Vajtswv sab tes xis ua tus thawj coj thiab ua tus Cawmseej kom thiaj pub tau kev ntxeev dua siab tshiab thiab kev zam txim rau cov Yixayee. Peb ua timkhawv txog zaj no, thiab Vaj Ntsuj Plig dawb huv uas Vajtswv pub rau cov uas mloog Vajtswv lus kuj ua timkhawv thiab.” Thaum lawv hnov li ntawd lawm, lawv npau taws heev xav muab cov tubtxib tua pov tseg. Tiamsis muaj ib tug npe hu ua Kamali‑ee nyob hauv lub rooj sablaj ntawd, nws yog ib tug Falixai thiab yog ib tug xibhwb qhia Vajtswv txoj kevcai thiab yog ib tug uas cov pejxeem sawvdaws hwm. Nws txawm sawv tsees hais kom coj cov tubtxib tawm mus sab nraud ib pliag. Nws hais rau lub rooj sablaj tias, “Nej cov Yixayee, cia li ceev faj zoo rau tej uas nej yuav ua rau cov neeg no. Rau qhov ua ntej no muaj ib tug npe hu ua Thuda uas khav tias nws yog neeg loj. Muaj kwvlam plaub puas leej tuaj nws tog. Tiamsis nws raug tua lawm thiab txhua tus uas tuaj nws tog kuj tawg ua sab ua sua ploj tag lawm. Dhau tus ntawd kuj muaj dua ib tug npe hu ua Yudas uas yog neeg Kalilais tshwm los rau ncua sijhawm uas txheeb npe. Nws haub ntxias neeg tuaj nws tog los nws kuj puam tsuaj lawm. Cov neeg uas tuaj nws tog kuj tawg ua sab ua sua tag. Vim li no zaum no kuv hais rau nej tias, tsis txhob ua li cas rau lawv cov no, cia li tso lawv mus. Yog tias tej tswvyim uas lawv xav thiab tej haujlwm uas lawv ua no los ntawm neeg los mas yuav tsis tiav. Tiamsis yog los ntawm Vajtswv los nej yuav muab rhuav tshem tsis tau li, ntshai tsam yog nej tawm tsam Vajtswv.” Lawv kuj mloog Kamali‑ee hais. Lawv txawm hu cov tubtxib rov los mas muab nplawm thiab txwv lawv tsis txhob hais dabtsi hauv Yexus lub npe ces txawm tso lawv mus. Cov tubtxib txawm tawm ntawm cov thawj lub rooj sablaj mus zoo siab heev rau qhov Vajtswv suav tias lawv tsim txiaj uas yuav poob koob vim yog Yexus lub npe. Lawv niaj hnub qhuab qhia thiab tshaj tawm tias Yexus yog tus Kheto tsis tso tseg li tsis hais hauv lub tuam tsev thiab hauv lawv tej tsev. Lub sijhawm ntawd thaum cov thwjtim huaj vam coob zuj zus tuaj, cov Yudai uas hais tau lus Kili xwb yws cov Yudai uas yog neeg Henplais rau qhov cov poj ntsuam Kili raug muab tshwj tseg tsis tau txais tej zaub mov uas lawv niaj hnub faib. Kaum ob tug tubtxib thiaj hu cov thwjtim sawvdaws los thiab hais tias, “Tsis tsim nyog peb yuav tso Vajtswv txojlus tseg mus tu kev noj kev haus. Vim li no, cov kwvtij, nej cia li xaiv xya leej hauv nej cov uas muaj koob meej zoo thiab muaj Vaj Ntsuj Plig puv npo thiab muaj tswvyim, mas peb yuav tsa lawv ua tes haujlwm no. Peb cov yuav rau siab ntso thov Vajtswv thiab faib Vajtswv txojlus.” Lawv sawvdaws pom zoo li uas hais ntawd, mas lawv xaiv Xatefanau uas muaj kev ntseeg thiab muaj Vaj Ntsuj Plig dawb huv puv npo, thiab Fili thiab Plaukhaula thiab Nikhanau thiab Thimoo thiab Pamena thiab Nikhaulau uas yog neeg Athi‑au uas coj Yudai kevcai. Lawv coj cov neeg no los sawv rau ntawm cov tubtxib xubntiag mas cov tubtxib thov Vajtswv pab lawv thiab muab tes npuab saum lawv. Vajtswv txojlus nrov nto moo lug. Cov uas los ua thwjtim kuj tsav ntxiv coob zuj zus tuaj rau hauv Yeluxalees, thiab muaj cov pov thawj ntau leej los ntseeg thiab mloog lus. Xatefanau uas muaj txojkev hlub thiab hwjchim puv npo ua tej txujci tseem ceeb thiab txujci phimhwj hauv nruab nrab cov neeg. Muaj qee leej uas tuaj ntawm lub tsev sablaj uas hu tias cov neeg ywj pheej lub tsev sablaj thiab cov uas tuaj hauv lub moos Khulene thiab lub nroog Alexadia tuaj thiab cov uas nyob hauv lub xeev Khilikia thiab lub xeev Axia, lawv cov ntawd txawm tuaj nrog Xatefanau sib cam. Tiamsis lawv tsis muaj peevxwm cam tau nws lub tswvyim thiab tej lus uas Vaj Ntsuj Plig kom nws hais. Lawv txawm ua twjywm mus tshum kom neeg hais tias, “Peb hnov tus no hais lus tuam mom Mauxe thiab Vajtswv.” Lawv tshum cov neeg thiab cov kev txwj laus thiab cov xibhwb qhia Vajtswv kevcai kom ntxhov. Ces lawv txawm tuaj ntes Xatefanau coj mus rau cov thawj lub rooj sablaj, mas kom cuav timkhawv tuaj tom hais tias, “Tus yawg no hais lus tawm tsam lub chaw dawb huv no thiab Vajtswv txoj kevcai tsis tu li, rau qhov peb hnov nws hais tias tus Yexus no uas yog neeg Naxale yuav rhuav tshem lub chaw no thiab yuav hloov tej kevcai uas Mauxe muab cob rau peb lawd.” Txhua tus uas nyob hauv cov thawj lub rooj sablaj ntawd ntsia ntsoov rau Xatefanau pom tias nws lub ntsej muag zoo yam li ib tug tubtxib saum ntuj. Tus tuam pov thawj hlob txawm nug tias, “Zaj no muaj tseeb lov?” Xatefanau hais tias, “Nej cov kwvtij thiab cov uas ua hlob, cia li mloog kuv hais. Vajtswv uas muaj hwjchim ci ntsa iab tshwm rau peb yawg koob Aplahas rau thaum nws tseem nyob hauv Mexauphautamia tebchaws ua ntej uas nws tsis tau mus nyob rau lub moos Halas, mas hais rau nws tias, ‘Koj cia li tawm hauv koj lub tebchaws thiab tawm hauv koj cov kwvtij mus rau lub tebchaws uas kuv yuav qhia rau koj.’ Aplahas thiaj tawm hauv cov Kheedia tebchaws mus nyob rau hauv lub moos Halas. Thaum nws txiv tuag lawd, Vajtswv thiaj kom nws tawm qhov ntawd los nyob rau hauv lub tebchaws uas nej nyob txog niaj hnub nimno. Tiamsis Vajtswv tsis pub nws muaj qub txeeg qub teg rau hauv lub tebchaws, tsis pub nws muaj ib daim av dav li xib taws. Thiab thaum nws tsis tau muaj menyuam Vajtswv cog lus tseg tias yuav pub lub tebchaws ua nws li teej tug thiab ua nws caj ces li. Vajtswv hais rau nws tias, ‘Koj caj ces yuav mus tsuam nyob rau hauv lwm tebchaws thiab cov neeg hauv lub tebchaws ntawd yuav muab lawv ua qhev thiab tsim txom lawv ntev txog plaub puas xyoo, tiamsis kuv yuav rau txim rau lub tebchaws uas lawv ua qhev ntawd.’ Thiab Vajtswv hais tias, ‘Dhau ntawd, lawv yuav tawm los thiab ua koom tu kuv ntawm lub chaw no.’ Vajtswv thiaj muab kevcai txiav rau nws ua lo lus cog tseg. Vim li no Aplahas thiaj yug tau Yiha thiab muab nws ua kevcai txiav rau hnub uas yim. Yiha yug tau Yakhauj, thiab Yakhauj yug tau kaum ob tug tub uas yog peb yawg koob. “Cov yawg koob ntawd khib Yauxej thiaj muab nws muag mus rau Iyi tebchaws. Tiamsis Vajtswv nrog nraim Yauxej, thiab cawm nws dim hauv txhua yam kev txom nyem thiab pub nws muaj tswvyim thiab txaus Iyi tus vajntxwv Falau lub siab. Falau thiaj tsa Yauxej ua tus kav Iyi tebchaws thiab txhua yam hauv vajntxwv lub tsev. Ces txawm muaj kev tshaib plab thoob plaws Iyi tebchaws thiab Khana‑as tebchaws mas raug kev txom nyem heev, peb yawg koob thiaj nrhiav tsis tau mov noj. Thaum Yakhauj hnov tias hauv Iyi tebchaws muaj mov noj nws thiaj txib peb cov yawg koob mus zaum ib. Thaum mus zaum ob Yauxej thiaj qhia nws rau cov kwvtij paub, thiab Falau kuj paub txog Yauxej tsev neeg. Yauxej thiaj hu nws txiv Yakhauj thiab cov kwvtij huvsi xya caum tsib leeg los. Yakhauj thiaj mus rau Iyi tebchaws mas nws thiab peb cov yawg koob tuag tag rau qhov ntawd, thiab coj mus rau lub moos Sekhee muab log rau hauv lub qhov ntxa uas Aplahas muab nyiaj yuav ntawm Hamau cov tub uas nyob hauv Sekhee. “Tiamsis thaum ze lub sijhawm uas Vajtswv cog lus rau Aplahas, haiv neeg Yixayee huaj vam coob heev rau hauv Iyi tebchaws mus txog thaum ib tug vajntxwv uas tsis paub Yauxej sawv los kav Iyi tebchaws. Tus vajntxwv ntawd thiaj ua phem rau peb haiv neeg thiab tsim txom peb tej poj koob yawm txwv yuam lawv muab lawv tej menyuam mos pov tseg kom tuag. Lub sijhawm ntawd kuj yug Mauxe, mas nws zoo nraug heev, thiab tu nws tau peb lub hlis rau hauv nws txiv lub tsev. Thaum Mauxe raug muab tso tseg rau sab nraud, Falau tus ntxhais coj los tu ua nws li tub. Mauxe thiaj tau kawm cov Iyi txhua yam kev txawj ntse, nws thiaj muaj zoo ncauj lus thiab txawj ua haujlwm. “Thaum nws hnub nyoog plaub caug xyoo, nws xav mus tsham nws cov kwvtij uas yog Yixayee caj ces. Thaum nws pom ib tug raug tsim txom nws thiaj mus pab tus uas raug tsim txom thiab muab tus Iyi ntawd tua pauj. Nws xav tias nws cov kwvtij nkag siab tias Vajtswv siv nws txhais tes tso lawv dim, tiamsis lawv tsis nkag siab li ntawd. Hnub tom qab nws tuaj ntsib ob tug tabtom sib cav thiab nws xav kom ob tug rov sib zoo txawm cheem tias, ‘Ob tug 'e, neb yog kwvtij, ua cas ib leeg yuav ua phem rau ib leeg?’ Tus uas ua phem rau nws tus kwvtij txawm thawb Mauxe khiav mus thiab hais tias, ‘Leejtwg tsa koj ua tus uas kav peb thiab ua tus uas txiav txim rau peb? Koj npaj siab yuav tua kuv ib yam li nag koj tua tus Iyi thiab lov?’ Thaum Mauxe hnov lo lus ntawd nws txawm khiav mus tsuam nyob hauv Midee tebchaws thiab muaj ob tug tub qhov ntawd. “Thaum nyob tau plaub caug xyoo muaj ib tug tubtxib saum ntuj ua nplaim taws tshwm los rau Mauxe pom ntawm tsob ntoo hauv tebchaws moj sab qhua ntawm lub roob Xinai. Thaum Mauxe pom, nws xav tsis thoob rau tej uas nws pom ntawd. Thaum nws mus saib ze ze, nws hnov tus Tswv lub suab hais tias, ‘Kuv yog koj cov yawg koob tug Vajtswv, yog Aplahas, Yiha thiab Yakhauj tus Vajtswv.’ Mauxe thiaj ntshai tshee hnyo tsis kav ntsia. Tus Tswv hais rau Mauxe tias, ‘Cia li hle koj nkawm khau tseg vim tias qhov chaw uas koj sawv no yog lub chaw dawb huv. Kuv twb pom kuv haiv neeg uas nyob hauv Iyi tebchaws txojkev txom nyem lawm thiab twb hnov lawv lub suab quaj lawm, thiab kuv nqes los yuav cawm lawv dim. Cia li los, kuv yuav txib koj mus rau hauv Iyi tebchaws.’ “Tus Mauxe no uas lawv tsis lees yuav thiab hais tias, ‘Leejtwg tsa koj ua tus kav peb thiab ua tus txiav txim rau peb?’ mas Vajtswv siv tus tubtxib saum ntuj txhais tes uas tshwm rau Mauxe pom hauv tsob ntoo ntawd txib tug Mauxe no mus ua tus thawj kav thiab tus uas cawm lawv dim. Nws yog tus coj lawv tawm los, thiab ua txujci tseem ceeb thiab tej kev phimhwj hauv Iyi tebchaws thiab hauv dej Hiavtxwv Liab thiab hauv tebchaws moj sab qhua plaub caug xyoo. Tus no yog tus Mauxe uas hais rau cov Yixayee tias, ‘Vajtswv yuav tsa ib tug xibhwb cev lus tshwm los hauv nej cov kwvtij ib yam li kuv.’ Tus no yog tus uas nrog ib tsoom neeg nyob hauv tebchaws moj sab qhua thiab nrog tus tubtxib saum ntuj uas hais lus rau nws nyob ntawm roob Xinai thiab nrog peb tej poj koob yawm txwv nyob. Nws txais tej lus uas pub txojsia coj los rau peb. Peb tej poj koob yawm txwv tsis mloog Mauxe hais. Lawv muab nws thawb khiav mus thiab lawv lub siab fav kiag rov mus rau Iyi tebchaws. Lawv hais rau Aloo tias, ‘Cia li ua tej dab mlom rau peb uas yuav coj peb kev mus. Tus Mauxe uas coj peb tawm hauv Iyi tebchaws los peb tsis paub xyov nws ua li cas lawm.’ Lawv thiaj ua ib tug dab mlom thav nyuj thiab coj qhov txhia chaw tuaj xyeem rau tus dab mlom ntawd thiab zoo siab xyiv fab rau tej uas lawv txhais tes ua. Mas Vajtswv fee plhu tso lawv mus pe lub hnub lub hli thiab tej hnub qub saum nruab ntug huvsi, raws li muaj lus sau cia rau hauv cov xibhwb cev lus phau ntawv hais tias, “ ‘Yixayee caj ces 'e, nej tau tua tsiaj xyeem thiab muab qhov txhia chaw xyeem rau kuv hauv tebchaws moj sab qhua tau plaub caug xyoo lov? Nej kwv dab Maulej lub tsev ntaub thiab nej tus dab Lefas lub hnub qub, yog ob tug dab mlom uas nej txua rau nej pe. Thiab kuv yuav kuav nej mus dhau plaws lub nroog Npanpiloo.’ “Thaum peb tej poj koob yawm txwv nyob hauv tebchaws moj sab qhua lawv muaj lub tsev ntaub uas ua timkhawv, raws li Vajtswv kom Mauxe ua, yog ua raws tus qauv uas Mauxe tau pom. Thaum peb tej poj koob yawm txwv tau lub tsev ntaub ntawd lawm lawv kuj kwv nrog Yausua los rau thaum lawv txeeb tau lub tebchaws ntawm tej haiv neeg uas Vajtswv ntiab khiav ntawm peb tej poj koob yawm txwv xubntiag lawm. Lub tsev ntaub ntawd kuj nyob los txog thaum Davi sim neej. Vajtswv hlub Davi, Davi thiaj thov Vajtswv cia nws npaj ib lub chaw rau Yakhauj tus Vajtswv nyob. Tiamsis Xalaumoo yog tus uas ua lub tuam tsev rau Vajtswv. Txawm yog li ntawd los Vajtswv uas loj dua ntais tsis nyob hauv lub tuam tsev uas neeg txhais tes ua, raws li tus xibhwb cev lus hais tias, “ ‘Lub ntuj yog kuv lub zwm txwv, lub ntiajteb yog kuv lub rooj tiag taw. Tus Tswv hais tias, Nej yuav ua lub tsev zoo li cas rau kuv, thiab kuv lub chaw so yuav nyob qhovtwg? Tej no yog kuv txhais tes ua huvsi los tsis yog?’ “Nej cov niag neeg tawv ncauj, siab tawv thiab lag ntseg, nej pheej tav Vaj Ntsuj Plig dawb huv tsis tu ncua. Nej tej poj koob yawm txwv ua li cas lawm, nej kuj ua ib yam li ntawd. Puas muaj ib tug xibhwb cev lus uas nej tej poj koob yawm txwv tsis tau muab tsim txom? Lawv tua cov uas tshaj tawm txog tom hauv ntej tias tus ncaj ncees yuav los, yog tus uas nimno nej twb fav xeeb rau thiab muab tua lawm. Nej twb tau txais txoj kevcai uas cov tubtxib saum ntuj hais rau nej los nej tsis tuav rawv txoj kevcai ntawd.” Thaum lawv hnov tej lus ntawd mas lawv npau taws heev thiab zim hniav qas zog rau Xatefanau. Tiamsis Xatefanau puv npo Vaj Ntsuj Plig dawb huv, nws tsa muag ntsia saum ntuj pom Vajtswv lub hwjchim ci ntsa iab thiab pom Yexus sawv ntawm Vajtswv sab tes xis. Nws hais tias, “Saib maj, kuv pom rooj ntug qheb thiab Neeg leej Tub sawv ntawm Vajtswv sab tes xis.” Ces lawv txawm qw nrov thiab ntsaws qhov ntsej dhia ib tsaug los rau ntawm Xatefanau. Lawv muab nws thawb tawm hauv lub nroog thiab xuas pob zeb ntaus. Cov uas ua timkhawv nkaug Xatefanau kuj hle tej tsho cia rau ntawm ib tug hluas uas hu ua Xolau kotaw. Thaum lawv tabtom xuas pob zeb ntaus Xatefanau, nws thov hais tias, “Tus Tswv Yexus, thov txais kuv tus ntsuj plig.” Ces Xatefanau txawm txhos caug ntua qw nrov nrov hais tias, “Tus Tswv, thov tsis txhob muab lub txim uas lawv ua no rau lawv ris.” Thaum hais li no lawm nws txawm tu siav lawm. Xolau kuj pom zoo qhov uas tua Xatefanau. Thaum ntawd pawg ntseeg hauv lub nroog Yeluxalees raug kev tsim txom heev. Lawv thiaj li khiav tawg ua sab ua sua mus thoob plaws lub xeev Yudia thiab lub xeev Xamali tsuas yog tseg cov tubtxib nyob xwb. Cov uas hwm Vajtswv kuj muab Xatefanau log thiab quaj mob siab nws kawg. Xolau rhuav tshem cov pawg ntseeg heev, nws nkag mus chua cab cov pojniam txivneej hauv lawv tej tsev coj mus kaw rau hauv tsev lojfaj. Cov uas khiav tawg ua sab ua sua kuj mus piav txoj xov zoo rau txhua qhov. Fili thiaj mus rau hauv ib lub moos uas nyob hauv lub xeev Xamali, thiab tshaj tawm txog tus Khetos rau lawv mloog. Thaum cov neeg hnov Fili hais thiab pom tej txujci tseem ceeb uas nws ua, lawv sawvdaws kub siab mloog nws tej lus, rau qhov dab qw nrov tawm hauv ntau leej mus, thiab ntau leej uas tuag cev tuag tes tuag taw kuj zoo kiag. Lub moos ntawd thiaj xyiv fab kawg. Muaj ib tug yawg hu ua Ximoos txeev ua khawv koob yees siv hauv lub moos ntawd. Nws ua rau cov neeg Xamali phimhwj, thiab nws khav tias nws yog ib tug tseem ceeb. Cov neeg sawvdaws tus hlob tus yau kub siab mloog tus ntawd hais thiab lawv hais tias, “Tus no yog Vajtswv lub hwjchim uas hu ua lub hwjchim loj kawg nkaus.” Lawv kub siab mloog nws rau qhov nws ua khawv koob yees siv rau lawv phimhwj ntev los lawm. Tiamsis thaum Fili piav txoj xov zoo hais txog Vajtswv lub tebchaws thiab Yexus Khetos lub npe, mas lawv kuj ntseeg Fili tej lus thiab lawv cov pojniam txivneej ua kevcai raus dej. Ximoos kuj ntseeg thiab thaum nws ua kevcai raus dej lawm nws kuj nrog Fili nyob ntxiv mus. Thaum nws pom tej txujci tseem ceeb thiab tej kev phimhwj uas Fili ua nws xav tsis thoob li. Thaum cov tubtxib uas nyob hauv Yeluxalees tau hnov tias cov Xamali kuj txais yuav Vajtswv tej lus lawm, lawv txawm txib Petus thiab Yauhas mus cuag cov Xamali. Thaum ob tug tuaj txog, ob tug thov Vajtswv pab kom lawv txais tau Vaj Ntsuj Plig uas dawb huv, rau qhov Vaj Ntsuj Plig tsis tau los rau hauv lawv leejtwg li, lawv tsuas yog ua kevcai raus dej hauv tus Tswv Yexus lub npe xwb. Ob tug txawm tsa tes npuab rau saum lawv mas lawv kuj tau txais Vaj Ntsuj Plig uas dawb huv. Thaum Ximoos pom tias qhov uas ob tug tubtxib tsa tes npuab pub tau Vaj Ntsuj Plig rau lawv, ces nws txawm coj nyiaj tuaj rau ob tug, hais tias, “Thov pub lub hwjchim no rau kuv thiab xwv thaum kuv tsa tes npuab leejtwg tus ntawd thiaj tau txais Vaj Ntsuj Plig uas dawb huv.” Petus txawm hais rau Ximoos tias, “Cia koj cov nyiaj thiab koj tus kheej raug puam tsuaj ua ke, rau qhov koj xav tias tej uas Vajtswv pub no koj tshwm nyiaj yuav tau. Koj tsis muaj feem dabtsi koom tes haujlwm no rau qhov koj lub siab tsis ncaj rau Vajtswv. Vim li no koj cia li ntxeev dua siab ntawm koj txojkev phem no thiab thov tus Tswv saib, tej zaum nws yuav zam tej uas koj xav hauv koj lub siab, rau qhov kuv pom tias koj poob rau hauv kev khib siab, thiab txojkev phem muab koj khi lawm.” Ximoos txawm teb tias, “Thov koj thov tus Tswv pab kuv kom tej uas koj hais ntawd thiaj tsis raug kuv ib yam kiag li.” Thaum ob tug tubtxib ua timkhawv thiab qhia tus Tswv tej lus tag lawm, ob tug txawm rov mus rau Yeluxalees, ob tug piav txoj xov zoo hauv Xamali ntau lub zos taug kev mus. Tus Tswv ib tug tubtxib saum ntuj hais rau Fili tias, “Cia li sawv tsees mus rau sab nrad mus kom txog txojkev uas mus lub nroog Yeluxalees mus txog lub moos Kaxa.” (Yog txojkev uas hla tebchaws moj sab qhua.) Fili txawm sawv tsees mus, ua ciav ntsib ib tug yawg nraug sam uas yog neeg Ethi‑aupia, yog cov Ethi‑aupia tus poj vaj Khadake tus tim xyoob uas saib xyuas tug poj vaj lub txhab nyiaj huvsi. Nws mus pe Vajtswv hauv Yeluxalees los. Thaum nws caij tsheb nees rov qab, nws tabtom nyeem xibhwb Yaxaya uas cev Vajtswv lus phau ntawv. Vaj Ntsuj Plig txawm hais rau Fili tias, “Cia li mus ti nkaus lub tsheb ntawd.” Fili txawm dhia mus txog mas hnov nws nyeem xibhwb Yaxaya uas cev Vajtswv lus phau ntawv, thiaj nug tias, “Koj nkag siab tej uas koj nyeem los tsis nkag?” Tus nraug sam teb tias, “Yog tsis muaj leejtwg txhais yuav ua li cas nkag siab tau?” Nws txawm hu Fili nce nrog nws caij saum lub tsheb nees. Vajtswv txojlus uas nws nyeem ntawd yog nqe uas hais tias, “Nws raug coj mus tua ib yam li tus yaj, thiab ib yam li tus menyuam yaj nyob twjywm ntawm tus uas txiav plaub xubntiag li cas, nws kuj tsis rua ncauj ib yam li ntawd. Thaum nws raug luag saib tsis taus nws tsis tau txais kev txiav txim ncaj. Leejtwg yuav hais tau txog nws caj ces? Rau qhov nws txojsia twb raug muab rho hauv lub ntiajteb lawm.” Tus nraug sam hais rau Fili tias, “Thov koj qhia kuv saib, qhov uas tus xibhwb cev lus hais no yog nws hais txog nws tus kheej los yog hais txog lwm tus?” Fili thiaj qheb ncauj pib piav ntawm Vajtswv txojlus nqes ntawd mus, nws piav txoj xov zoo hais txog Yexus rau tus nraug sam mloog. Thaum tabtom taug kev mus ob tug txawm mus txog ib qho chaw uas muaj dej, mas tus nraug sam txawm hais tias, “Saib maj, ntawm no muaj dej. Muaj dabtsi khuam cheem ua rau kuv ua tsis tau kevcai raus dej?” Ces nws txawm kom lub tsheb nees nres, mas Fili thiab tus nraug sam nqes rau hauv dej thiab Fili muab nws ua kevcai raus dej. Thaum ob tug nce hauv dej los, tus Tswv tus Ntsuj Plig txawm coj Fili mus lawm. Tus nraug sam tsis rov pom dua Fili, nws taug kev mus zoo siab xyiv fab. Tiamsis Fili tshwm rau hauv lub moos Axautha thiab thaum nws taug kev mus nws piav txoj xov zoo rau txhua lub moos mus txog thaum nws tuaj txog lub moos Xixaleya. Xolau ua nyaum heev hais tias yuav tua tus Tswv cov thwjtim nws thiaj mus cuag tus tuam pov thawj hlob thov ntawv tso cai mus rau tej tsev sablaj hauv lub nroog Damaxaka, es yog ntsib leejtwg taug Yexus Txojkev tsis hais pojniam txivneej, mas yuav ntes khi coj los rau hauv Yeluxalees. Thaum Xolau tabtom taug kev mus yuav txog lub nroog Damaxaka, tamsim ntawd txawm muaj ib tug duab ci nplas saum ntuj tuaj vij nkaus nws. Nws thiaj ntog vau hlo rau hauv pem teb thiab hnov ib lub suab hais tias, “Xolau, Xolau, ua cas koj tsim txom kuv?” Xolau thiaj hais tias, “Tus Tswv, koj yog leejtwg?” Tus Tswv teb tias, “Kuv yog Yexus uas koj tabtom tsim txom. Cia li sawv tsees nkag mus rau hauv lub nroog, yuav muaj neeg qhia rau koj paub tias koj yuav tsum ua dabtsi.” Cov uas nrog nws taug kev mus kuj nres yoob tag. Lawv hnov lub suab tiamsis tsis pom leejtwg. Xolau sawv hauv pem teb los, thaum nws qheb qhov muag nws kuj tsis pom kev. Lawv thiaj tuav nws tes coj mus rau hauv lub nroog Damaxaka. Nws qhov muag dig tau peb hnub, thiab nws tsis noj tsis haus dabtsi li. Hauv lub nroog Damaxaka muaj ib tug thwjtim npe hu ua Anania. Tus Tswv ua yog toog hais rau nws tias, “Anania 'e.” Nws teb tias, “Tus Tswv, kuv nyob ntawm no.” Tus Tswv hais rau nws tias, “Cia li sawv tsees mus kom txog txojkev uas hu ua Kev Ncaj, thiab mus nrhiav Xolau uas yog neeg Thaxa hauv Yudas lub tsev, rau qhov Xolau tabtom thov Vajtswv, thiab nws ua yog toog pom ib tug yawg npe hu ua Anania tuaj muab tes npuab rau saum nws kom nws thiaj rov pom kev.” Tiamsis Anania teb tias, “Kuv tau hnov ntau leej hais txog tus yawg ntawd tias nws twb ua phem heev npaum li cas rau koj cov xov dawb huv Yeluxalees. Thiab nws tau ntawv tso cai ntawm cov pov thawj hlob kom tuaj ntes txhua tus uas tuav koj lub npe thov.” Tiamsis tus Tswv hais rau nws tias, “Cia li mus, rau qhov nws yog kuv tej cuab yeej uas kuv xaiv cia lawm. Nws yuav coj kuv lub npe mus hais rau lwm haiv neeg thiab tej vajntxwv thiab cov Yixayee. Kuv yuav qhia rau nws paub tias nws yuav raug kev tsim txom npaum li cas vim yog saib rau kuv lub npe.” Ces Anania txawm mus thiab nkag mus rau hauv lub tsev ntawd. Nws tsa tes npuab saum Xolau thiab hais tias, “Kwv Xolau 'e, tus Tswv txib kuv tuaj, yog Yexus uas tshwm rau koj pom thaum koj taug kev tuaj, kom koj thiaj rov pom kev thiab muaj Vaj Ntsuj Plig dawb huv puv npo.” Tamsim ntawd muaj ib yam zoo li daim nplai poob ntawm nws lub qhov muag los nws thiaj rov pom kev, nws thiaj sawv tsees ua kevcai raus dej, thiab noj mov thiab rov muaj zog tuaj. Xolau nrog cov thwjtim hauv lub nroog Damaxaka nyob ntau hnub. Thiab tamsim ntawd nws tshaj tawm txog Yexus rau hauv tej tsev sablaj hais tias, “Yexus yog Vajtswv leej Tub.” Sawvdaws uas tau hnov nws hais kuj phimhwj sib tham hais tias, “Tus no yog tus uas ua phem kawg rau cov uas tuav lub npe no thov hauv Yeluxalees los tsis yog? Qhov uas nws tuaj no twb yog nws tuaj ntes cov ntawd khi coj mus rau cov pov thawj hlob ntag los tsis yog?” Tiamsis Xolau muaj zog zuj zus tuaj thiab ua rau cov Yudai uas nyob hauv Damaxaka tsis pom qab xav rau qhov nws qhia rau sawvdaws paub tseeb tias Yexus yog tus Khetos. Dhau ntawd ntau hnub cov Yudai txawm ntaus tswvyim yuav tua Xolau, tiamsis lawv lub tswvyim twb nrov mus txog Xolau lawm. Lawv zov ntawm rooj loog nruab hnub hmo ntuj yuav tua Xolau. Tiamsis cov thwjtim muab Xolau nyob rau hauv ib lub tawb loj tso dauv ntawm ntsa loog hmo ntuj mus lawm. Thaum Xolau mus txog hauv lub nroog Yeluxalees lawm nws yooj xeeb yuav koom nrog cov thwjtim ua ke, tiamsis lawv sawvdaws ntshai vim tsis ntseeg tias Xolau ua thwjtim lawm. Mas Npananpa coj Xolau mus cuag cov tubtxib thiab piav rau lawv mloog tias Xolau pom tus Tswv uas hais rau nws ntawm tog kev li cas thiab nws twb muaj lub siab tuab qhia hauv Yexus lub npe rau hauv lub nroog Damaxaka li cas lawm. Ces Xolau thiaj koom tau nrog cov tubtxib mus mus los los hauv lub nroog Yeluxalees. Nws muaj siab tuab qhuab qhia hauv tus Tswv lub npe. Thiab nws nrog cov Yudai uas hais tau lus Kili xwb sib hais thiab sib cam, mas lawv cov ntawd kuj nrhiav kev muab nws tua. Thaum cov kwvtij paub zaj no, lawv txawm coj nws mus rau lub moos Xixaleya thiab xa nws mus rau lub moos Thaxa. Cov pawg ntseeg thoob plaws Yudia, Kalilais thiab Xamali thiaj nyob siab tus yees thiab loj hlob. Txhua tus ua lub neej paub ntshai tus Tswv thiab tau kev txhawb siab ntawm Vaj Ntsuj Plig dawb huv, cov pawg ntseeg thiaj huaj vam coob tuaj. Thaum Petus mus mus los los rau txhua qhov nws mus txog Vajtswv cov xov dawb uas nyob hauv lub moos Lida. Nws ntsib ib tug yawg npe hu ua Aine‑a qhov ntawd, nws tuag cev pw saum txaj tau yim xyoo lawm. Petus hais rau nws tias, “Aine‑a, Yexus Khetos kho koj zoo. Cia li sawv tsees khaws koj lub chaw pw.” Tamsim ntawd nws txawm sawv tsees. Thaum cov neeg uas nyob hauv lub moos Lida thiab ntawm lub tiaj Saloo pom nws zoo, lawv kuj tig los cuag tus Tswv. Hauv lub moos Yaupa muaj ib tug pojniam uas yog thwjtim hu ua Thanpitha uas lus Kili hu ua Daukha. Tus pojniam no pheej ua zoo rau luag thiab pab cov txom nyem ntau heev. Lub sijhawm ntawd tus pojniam ntawd txawm mob thiab tuag lawm. Thaum lawv muab nws lub cev ntxuav lawv muab nws tso rau ib chav txheej saud. Lub moos Lida nyob ze lub moos Yaupa. Thaum cov thwjtim hnov tias Petus nyob qhov ntawd, lawv txawm txib ob tug mus thov nws hais tias, “Thov koj tuaj cuag peb sai sai.” Petus txawm sawv tsees nrog ob tug mus. Thaum Petus mus txog lawm lawv coj nws mus rau chav uas nyob txheej saud. Cov poj ntsuam sawvdaws kuj sawv ntsug vij Petus quaj thiab qhia nws saib txhua yam tsoos tsho uas Daukha ua thaum nws tseem muaj txojsia nyob. Petus txawm kom lawv sawvdaws tawm mus sab nraud mas nws txawm txhos caug thov Vajtswv thiab tig los hais rau tus tuag tias, “Thanpitha, cia li sawv tsees.” Thanpitha txawm qheb muag pom Petus thiab sawv los zaum. Petus cev tes mus rub nws sawv. Nws hu cov xov dawb thiab cov poj ntsuam rov los thiab muab tus pojniam uas ciaj rov los ntawd cob rau lawv. Tej xwm txheej ntawd nrov ncha thoob plaws lub moos Yaupa, thiab muaj neeg coob coob los ntseeg tus Tswv. Petus nyob hauv lub moos Yaupa ntau hnub, nws so hauv Ximoos uas yog tus Kws luam tawv lub tsev. Muaj ib tug yawg npe hu ua Khaunelia nyob hauv lub moos Xixaleya, nws yog ib tug thawj rog uas kav ib puas leej nyob hauv pab tub rog uas hu ua Ithali Pab. Nws thiab nws tsev neeg coj Vajtswv kevcai nruj thiab paub ntshai Vajtswv, nws pub rau tej neeg txom nyem ntau heev thiab thov Vajtswv tsis tu ncua. Thaum kwvlam hnub qaij peb teev tus thawj rog ntawd ua yog toog pom ib tug tubtxib saum ntuj los hais rau nws tias, “Khaunelia 'e.” Nws saib dheev tus tubtxib saum ntuj ntawd thiab ntshai heev thiab hais tias, “Yawg hlob, no yog dabtsi?” Tus tubtxib saum ntuj hais rau nws tias, “Koj tej lus thov thiab tej uas koj muab pub rau luag twb nce mus txog Vajtswv ua lub chaw uas Vajtswv nco txog koj lawm. Nimno koj cia li txib neeg mus rau lub moos Yaupa thiab coj Ximoos uas hu ua Petus tuaj. Nws nyob hauv tus Ximoos Kws luam tawv lub tsev uas nyob ntawm ntug hiavtxwv.” Thaum tus tubtxib saum ntuj uas hais rau nws mus lawm, Khaunelia txawm hu ob tug tub qhe thiab ib tug tub rog uas hwm Vajtswv nruj hauv cov uas tu nws los. Thaum nws piav txhua yam rau lawv mloog lawm nws txib lawv mus rau lub moos Yaupa. Hnub tom qab thaum peb tug no taug kev mus yuav txog lub moos Yaupa mas kwvlam tav su Petus txawm nce mus thov Vajtswv saum txheej tsev las tshav. Nws txawm tshaib plab xav noj mov. Thaum lawv tseem ua su nws txawm ua yog toog pom rooj ntug qheb thiab pom ib yam zoo li ib daim ntaub dav dav khi plaub lub kaum tso nqes los rau hauv lub ntiajteb. Hauv daim ntaub ntawd muaj txhua yam tsiaj plaub txhais tes taw, thiab tsiaj nkag hauv av thiab nas noog saum nruab ntug. Txawm muaj ib lub suab hais tuaj rau nws hais tias, “Petus, cia li sawv tsees muab tua noj.” Petus hais tias, “Tsis tau, tus Tswv. Yam uas qias thiab tsis dawb huv kuv tsis txeev noj kiag li.” Lub suab rov hais zaum ob rau nws tias, “Yam uas Vajtswv muab ntxuav lawm koj tsis txhob hais tias qias.” Muaj li ntawd txog peb zaug ces daim ntaub txawm raug muab nqa mus rau saum ntuj tamsid lawm. Thaum Petus tseem tsis pom qab xav txog zaj yog toog ntawd lub ntsiab yog dabtsi, ces tamsim ntawd cov neeg uas Khaunelia txib tuaj txawm tuaj nug nrhiav tau Ximoos lub tsev. Lawv tuaj txog sawv sab nraum rooj vag, thiab hu nug tias tus Ximoos uas hu ua Petus puas nyob ntawm no. Thaum Petus tseem tabtom xav txog zaj yog toog ntawd, Vaj Ntsuj Plig txawm hais rau nws tias, “Saib maj, muaj peb tug yawg tuaj nrhiav koj. Cia li sawv tsees nqes mus rau txheej hauv qab thiab nrog lawv mus tsis txhob ua xyem xyav, vim yog kuv txib lawv tuaj.” Petus thiaj nqes mus ntsib lawv thiab hais tias, “Kuv yog tus uas nej tuaj nrhiav ntag. Nej tuaj tus kev dabtsi?” Lawv hais tias, “Khaunelia yog ib tug thawj rog kav ib puas leej thiab yog ib tug ncaj ncees paub ntshai Vajtswv thiab yog ib tug muaj koob meej hauv ib tsoom Yudai huvsi. Muaj ib tug tubtxib saum ntuj uas dawb huv kom Khaunelia hu koj mus rau hauv nws lub tsev es yuav mloog koj tej lus qhia.” Petus thiaj hu lawv los so rau hauv tsev. Hnub tom qab nws sawv kev nrog lawv mus, thiab cov kwvtij qee leej hauv lub moos Yaupa kuj nrog nws mus thiab. Dhau dua ib hnub tom qab lawv li mus txog lub moos Xixaleya. Khaunelia tabtom tos ntsoov lawv thiab hu nws tej kwvtij kwvluag tuaj txoos ua ke. Thaum Petus tuaj txog Khaunelia tuaj tos nws thiab pe khwb ti nkaus ntawm nws kotaw. Petus ntsiab nkaus Khaunelia tsa sawv, thiab hais tias, “Cia li sawv, kuv kuj tsuas yog neeg thiab xwb.” Thaum tabtom hais lus Petus nkag mus hauv tsev mas pom neeg nyob ua ke coob coob, ces nws txawm hais rau lawv tias, “Nej yeej paub tias qhov uas ib tug Yudai mus tsham thiab koom nrog lwm haiv neeg ua ke yog yam uas txhaum kevcai heev. Tiamsis Vajtswv qhia tshwm rau kuv tias yuav tsis txhob hais tias ib tug twg qias lossis tsis dawb huv. Vim li no, thaum nej hu kuv tuaj kuv thiaj li tuaj tsis khuam cheem dabtsi. Kuv thov nug nej tias nej hu kuv tuaj tus kev dabtsi?” Khaunelia hais tias, “Tau plaub hnub los lawm kuv tabtom thov Vajtswv hauv kuv tsev kwvlam lub sijhawm no yog hnub qaij peb teev, txawm muaj ib tug yawg sawv ntawm kuv xubntiag hnav tsoos tsho ci nplas. Tus ntawd hais tias, ‘Khaunelia, Vajtswv twb hnov koj tej lus thov thiab nco txog tej uas koj pub rau cov txom nyem lawm. Vim li no cia li txib neeg mus rau lub moos Yaupa hu Ximoos uas hu ua Petus tuaj. Nws nyob hauv tus Ximoos Kws luam tawv lub tsev ntawm ntug hiavtxwv.’ Kuv thiaj txib neeg mus hu koj tamsid, mas qhov uas koj tuaj kuj zoo lawm. Lub sijhawm no peb sawvdaws nyob txhij zog tab meeg Vajtswv, tos mloog txhua yam uas tus Tswv kom koj hais.” Petus txawm qheb ncauj hais tias, “Kuv pom tseeb lawm tias Vajtswv tsis saib leejtwg ntsej muag, thiab hauv txhua haiv neeg tus uas paub ntshai Vajtswv thiab xyaum ncaj ncees kuj yog txaus Vajtswv lub siab. Nej yeej paub txog tej lus uas Vajtswv muab cob rau cov Yixayee, yog qhov uas nws piav txoj xov zoo uas hais txog nyob siab tus yees hauv Yexus Khetos uas yog sawvdaws tus Tswv. Nej yeej paub tej xwm txheej uas tshwm thoob plaws lub xeev Yudia yog pib hauv lub xeev Kalilais tom qab tus Yauhas uas coj ua kevcai raus dej tshaj tawm ntawd, yog qhov uas hais tias Vajtswv muab Vaj Ntsuj Plig dawb huv thiab muab lub hwjchim hliv rau hauv Yexus uas yog neeg Naxale li cas, thiab qhov uas hais tias Yexus mus mus los los ua tej haujlwm zoo thiab kho txhua tus uas raug dab tsim txom li cas, vim yog Vajtswv nrog nraim Yexus. Peb ua timkhawv txog tej haujlwm huvsi uas nws ua rau hauv lub xeev Yudia thiab hauv lub nroog Yeluxalees. Lawv muab nws dai rau saum tus ntoo tua pov tseg mas hnub peb Vajtswv tsa nws ciaj sawv rov los thiab pub nws tshwm rau peb, tsis yog tshwm rau tej neeg sawvdaws tiamsis tshwm rau peb pom xwb yog cov timkhawv uas Vajtswv xaiv cia lawd. Tom qab uas nws ciaj sawv hauv qhov tuag rov los peb kuj nrog nws noj haus ua ke. Nws hais kom peb tshaj tawm thiab ua timkhawv rau sawvdaws tias Vajtswv twb tsa Yexus ua tus uas txiav txim rau cov neeg ciaj thiab cov neeg tuag. Cov xibhwb cev Vajtswv lus sawvdaws kuj ua timkhawv txog Yexus tias txhua tus uas ntseeg nws tau txais kev zam txim hauv Yexus lub npe.” Thaum Petus tseem tabtom hais tej lus ntawd, Vaj Ntsuj Plig dawb huv txawm los rau saum txhua tus uas hnov tej lus ntawd. Cov uas twb ua kevcai txiav thiab ntseeg uas nrog Petus tuaj kuj phimhwj heev vim tias Vajtswv hliv Vaj Ntsuj Plig uas dawb huv rau lwm haiv neeg thiab, rau qhov lawv hnov cov neeg ntawd hais lwm yam lus thiab qhuas ntxhias Vajtswv. Petus txawm hais tias, “Leejtwg yuav txwv tau cov neeg no uas tau txais Vaj Ntsuj Plig dawb huv ib yam li peb, tsis pub lawv ua kevcai raus dej?” Petus thiaj hais kom muab lawv ua kevcai raus dej hauv Yexus Khetos lub npe. Lawv thov kom Petus nrog lawv nyob ob peb hnub. Cov tubtxib thiab cov kwvtij uas nyob hauv Yudia hnov xov tias lwm haiv neeg twb txais yuav Vajtswv txojlus thiab. Thaum Petus mus txog hauv lub nroog Yeluxalees cov ntseeg uas ua kevcai txiav txawm yws nws tias, “Ua cas koj mus rau hauv cov neeg uas tsis tau ua kevcai txiav thiab nrog lawv noj mov ua ke?” Petus thiaj pib piav ua ib qeb zuj zus rau lawv mloog tias, “Thaum kuv nyob hauv lub moos Yaupa thiab tabtom thov Vajtswv, kuv ua yog toog pom ib yam zoo li ib daim ntaub dav dav khi plaub lub kaum tso nqes saum ntuj los ze ntawm kuv. Kuv saib mas pom muaj tej tsiaj nruab nqhuab plaub txhais tes taw, tsiaj qus tsiaj nkag thiab tej noog saum nruab ntug. Thiab kuv hnov ib lub suab hais rau kuv tias, ‘Petus, cia li sawv tsees muab tua noj.’ Kuv hais tias, ‘Tsis tau, tus Tswv, vim tias yam uas qias lossis tsis dawb huv tsis txeev nkag rau hauv kuv lub qhov ncauj kiag li.’ Tiamsis lub suab rov hais saum ntuj tuaj zaum ob hais tias, ‘Yam uas Vajtswv muab ntxuav lawm koj tsis txhob hais tias qias.’ Tej ntawd los tshwm peb zaug ces txhua yam ntawd txawm raug muab nqa rov mus saum ntuj lawm. Mas tamsim ntawd txawm muaj peb tus yawg tuaj sawv ntawm lub tsev uas peb nyob, lawv raug txib hauv lub moos Xixaleya tuaj cuag kuv. Vaj Ntsuj Plig txawm hais kom kuv nrog lawv mus tsis txhob ua xyem xyav. Thiab rau tus kwvtij no kuj nrog kuv mus, mas peb nkag mus rau hauv tus yawg ntawd lub tsev. Nws thiaj piav rau peb mloog tias nws tau pom ib tug tubtxib saum ntuj tshwm los rau hauv nws tsev li cas thiab hais rau nws tias, ‘Cia li txib neeg mus rau lub moos Yaupa thiab coj Ximoos uas hu tias Petus tuaj, mas nws yuav qhia txoj xov zoo uas yuav cawm koj thiab koj tsev neeg dim.’ Thaum kuv pib qhia, Vaj Ntsuj Plig dawb huv txawm nqes los rau saum lawv ib yam li thaum chiv thawj los rau saum peb. Mas kuv thiaj nco txog tus Tswv tej lus uas nws hais tias, ‘Yauhas coj neeg ua kevcai raus hauv dej tiamsis nej yuav ua kevcai raus hauv Vaj Ntsuj Plig uas dawb huv.’ Yog Vajtswv twb pub rau lawv cov ib yam li thaum peb ntseeg tus Tswv Yexus Khetos es pub rau peb, kuv yog leejtwg es kuv yuav tav Vajtswv?” Thaum lawv hnov tej lus ntawd lawd lawv txawm tsis muaj lus hais. Lawv qhuas Vajtswv hais tias, “Vajtswv twb pub lwm haiv neeg ntxeev dua siab tshiab thiaj tau txojsia thiab.” Thaum Xatefanau raug muab tua thiab cov ntseeg raug kev tsim txom, ces txawm khiav ua sab ua sua mus, ib txhia mus txog lub xeev Finikia thiab Xaipla thiab lub moos Athi‑au. Lawv tsuas yog piav txoj xov zoo rau cov Yudai mloog xwb. Lawv cov ntawd muaj qee leej uas yog neeg Xaipla thiab neeg Khulene mus txog hauv lub moos Athi‑au kuj piav txoj xov zoo hais txog tus Tswv Yexus rau cov neeg Kili mloog. Thiab Vajtswv txhais tes nrog nraim lawv, thiaj muaj neeg coob coob ntseeg thiab tig los cuag tus Tswv. Tej xov no nrov los txog pawg ntseeg hauv Yeluxalees, lawv thiaj txib Npananpa mus rau lub moos Athi‑au. Thaum Npananpa mus txog thiab pom qhov uas Vajtswv hlub lawv nws zoo siab xyiv fab. Nws txhawb lawv lub zog kom lawv sawvdaws muab lub siab xib hlo rau tus Tswv. Npananpa yog ib tug neeg zoo thiab muaj Vaj Ntsuj Plig thiab kev ntseeg puv npo. Muaj neeg coob los ntseeg tus Tswv tsav ntxiv. Npananpa thiaj mus nrhiav Xolau ntawm lub moos Thaxa. Thaum nrhiav tau lawd, nws thiaj coj Xolau los rau hauv lub moos Athi‑au. Ob tug koom ua ke rau hauv pawg ntseeg tau ib xyoos thiab qhuab qhia cov ntseeg coob heev. Hauv lub moos Athi‑au no yog thawj zaug uas cov ntseeg raug hu ua Khixatia. Lub sijhawm ntawd muaj cov xibhwb cev Vajtswv lus tuaj hauv Yeluxalees tuaj rau hauv lub moos Athi‑au. Lawv cov muaj ib tug hu ua Akanpa sawv tsees los hais pom tom hauv ntej raws li Vaj Ntsuj Plig kom nws hais, hais tias yuav muaj kev tshaib plab loj heev thoob plaws lub ntiajteb. Tej xwm txheej no muaj tshwm los rau ntu uas huabtais Khaunti‑au kav. Cov thwjtim txhua tus hais hum tias yuav pub nyiaj raws li txhua tus muab tau xa mus pab cov kwvtij uas txom nyem hauv lub xeev Yudia. Lawv kuj ua li ntawd mas muab rau Npananpa thiab Xolau xa mus rau cov uas saib xyuas cov ntseeg. Thaum ntawd vajntxwv Helauj tsa tes kiag ua phem rau cov ntseeg qee leej. Nws xuas ntaj tua Yauhas tus tijlaug Yakaunpau. Thaum nws pom tias qhov uas nws ua ntawd hum cov Yudai lub siab nws kuj ntes Petus thiab. Tej xwm txheej no tshwm rau thaum ua kevcai Noj Ncuav tsis Xyaw Keeb. Thaum ntes Petus lawd txawm muab kaw rau hauv tsev lojfaj, thiab muab cob rau plaub pab tub rog zov ib pab muaj plaub leeg. Helauj npaj siab cia tias thaum ua kevcai Hla Dhau tag lawm nws yuav coj Petus los rau cov pejxeem txiav txim. Vim li no Petus thiaj raug kaw hauv tsev lojfaj. Tiamsis pawg ntseeg kub siab lug thov Vajtswv pab Petus. Hmo ntawd ua ntej uas Helauj yuav coj Petus tawm los txiav txim, Petus tabtom tsaug zog hauv nruab nrab ob tug tub rog, muaj ob txoj saw hlau khi thiab muaj cov tub rog tabtom zov qhov rooj tsev lojfaj. Mas txawm muaj tus Tswv ib tug tubtxib saum ntuj tshwm plaws los thiab muaj duab ci nplas rau hauv chav uas kaw. Tus tubtxib saum ntuj ntawd txawm diaj Petus ib sab cev tsa kom sawv thiab hais tias, “Cia li sawv tsees sai sai.” Ob txoj saw hlau kuj plam ntawm Petus tes lawm. Tus tubtxib saum ntuj hais rau Petus tias, “Cia li sia siv thiab rau khau.” Petus kuj ua li ntawd. Thiab hais rau Petus tias, “Cia li muab lub tsho ntev los kauv thiab raws kuv qab mus.” Petus txawm raws qab tawm mus. Nws tsis paub tias qhov uas tus tubtxib saum ntuj ua ntawd yog tseeb, nws xav tias yog ua yog toog xwb. Thaum ob tug hla dhau pab tub rog uas ib thiab pab uas ob lawm, kuj los txog lub qhov rooj hlau uas yog txojkev uas mus rau hauv lub nroog. Txhib qhov rooj ntawd cia li qheb rau ob tug mus, ob tug thiaj hla tawm mus mas thaum taug txojkev tau ib nyuag ntu, tus tubtxib saum ntuj cia li ploj ntais ntawm Petus lawm. Thaum Petus feeb meej lawm nws hais tias, “Nimno kuv paub tseeb tias tus Tswv txib nws li tubtxib saum ntuj los cawm kuv dim hauv Helauj txhais tes thiab dim qhov uas cov Yudai npaj siab ua phem.” Thaum Petus paub li ntawd lawm, nws txawm mus rau ntawm Yauhas uas muaj dua ib lub npe hu ua Malakau leej niam lub tsev. Qhov ntawd muaj ntau leej tuaj txoos ua ke thov Vajtswv. Thaum Petus khob rooj vag muaj ib tug nkauj qhev hu ua Lauda tawm mus saib. Thaum nws cim tau tias yog Petus lub suab nws zoo siab heev, ces txawm tsis nco qheb rooj vag. Nws cia li dhia rov qab mus hais tias Petus sawv ntawm rooj vag. Lawv txawm hais rau nws tias, “Koj vwm kaj.” Tiamsis nws hais khov kho tias yog tiag tiag li. Lawv txawm hais tias, “Yog tus tubtxib saum ntuj uas nrog nraim Petus xwb.” Tiamsis Petus tseem khob khob rooj vag. Thaum lawv qheb rooj vaj thiab pom nws, lawv kuj phimhwj heev. Petus co tes rau lawv kom nyob twjywm thiab piav rau lawv mloog tias tus Tswv coj nws tawm hauv tsev lojfaj los li cas. Nws hais tias, “Cia li mus hais zaj no rau Yakaunpau thiab cov kwvtij paub.” Ces Petus txawm tawm mus rau lwm qhov lawm. Thaum kaj ntug cov tub rog kuj ntxhov heev rau qhov uas lawv tsis paub xyov Petus ua li cas lawm. Thaum Helauj nrhiav tsis pom Petus, nws tshuaj cov tub rog uas zov tsev lojfaj ntawd thiab hais kom muab lawv tua pov tseg. Ces Helauj txawm tawm hauv lub xeev Yudia mus nyob rau hauv lub moos Xixaleya lawm. Helauj chim rau cov neeg uas nyob hauv lub nroog Thailab thiab hauv lub nroog Xaidoo. Cov neeg thiaj koom ua ib lub siab tuaj cuag nws. Lawv yaum kom Nplata uas saib xyuas vajntxwv Helauj tsev pab lawv hais, ces lawv li mus thov vajntxwv Helauj kom rov sib raug zoo, rau qhov lawv lub tebchaws yeej yuav mov noj hauv vajntxwv lub tebchaws. Txog hnub uas teem cia lawd Helauj hnav nws cev tsoos vajntxwv thiab zaum saum lub rooj txiav txim thiab ua lus zaj lus zuag hais lus rau lawv. Ib tsoom neeg qw tias, “No yog ib tug timtswv lub suab, tsis yog suab neeg.” Tamsim ntawd tus Tswv ib tug tubtxib saum ntuj txawm ntaus Helauj mob vim nws tsis muab koob meej rau Vajtswv, mas nws thiaj raug kas muab noj txog tuag. Tiamsis Vajtswv txojlus huaj vam tuaj thiab nthuav dav zuj zus mus. Thaum Npananpa thiab Xolau ua haujlwm tag, ob tug txawm tawm hauv Yeluxalees mus, thiab coj Yauhas uas muaj dua npe hu ua Malakau mus thiab. Pawg ntseeg hauv Athi‑au muaj xibhwb cev Vajtswv lus thiab xibhwb qhia, yog Npananpa thiab Xime‑oo uas hu ua Nikaw thiab Lukia uas yog neeg Khulene, thiab Mana‑ee uas nrog Helauj uas yog tus tswv xeev nyob loj hlob ua ke thiab Xolau. Thaum lawv tabtom pe hawm tus Tswv thiab yoo mov, Vaj Ntsuj Plig dawb huv hais tias, “Cia li muab Npananpa thiab Xolau cais los ua tej haujlwm uas kuv hu kom ob tug ua.” Thaum yoo mov thiab thov Vajtswv tag lawm lawv txawm tsa tes npuab saum Npananpa thiab Xolau thiab xa ob tug mus. Vaj Ntsuj Plig dawb huv txib ob tug mus, ob tug thiaj mus rau lub moos Xelukia thiab caij nkoj deg qhov ntawd mus rau lub koog povtxwv Xaipla. Thaum mus txog lub moos Xalami, ob tug txawm piav Vajtswv txojlus rau hauv cov Yudai tej tsev sablaj. Yauhas kuj nyob rawv pab ob tug thiab. Thaum lawv mus thoob plaws lub koog povtxwv lawm kuj los txog lub moos Pafau mas ntsib ib tug yawg Yudai uas ua khawv koob yees siv thiab yog ib tug cuav xibhwb cev lus, npe hu ua Npalayexu. Nws nrog Xawkia Paulau uas ua tus thawj kav Xaipla nyob. Tus thawj ntawd yog ib tug txawj ntse, nws txawm hu Npananpa thiab Xolau los cuag nws yuav mloog Vajtswv txojlus. Elima uas ua khawv koob yees siv (nws lub npe lub ntsiab yeej yog li ntawd) nws tawm tsam ob tug. Nws yooj xeeb ua kom tus thawj uas kav tebchaws ntawd txhob ntseeg. Tiamsis Xolau uas muaj dua ib lub npe hu ua Povlauj muaj Vaj Ntsuj Plig dawb huv puv npo txawm ntsia ntsoov Elima, thiab hais tias, “Koj yog Ntxwg Nyoog li tub, koj muaj kev dag ntxias thiab kev phem puv nkaus, koj ua tshawj chim rau txhua txojkev ncaj ncees. Koj yuav tsis tseg qhov uas muab tus Tswv txojkev ncaj ua kom nkhaus lov? Saib mas, nimno tus Tswv txhais tes yuav rau txim rau koj, koj yuav dig muag tsis pom lub hnub mus ib ntus.” Tamsim ntawd txawm muaj ib yam zoo li huab los ua rau Elima qhov muag tsaus ntais tsis pom kev lawm nws thiaj xuas dub nrhiav neeg tuav nws tes mus. Thaum tus thawj kav tebchaws pom tej xwm txheej uas tshwm los ntawd nws kuj ntseeg, rau qhov nws phimhwj rau tej lus uas qhia txog tus Tswv. Povlauj thiab cov uas nrog nws ua ke txawm caij nkoj ntawm lub moos Pafau mus txog lub moos Pawka hauv lub xeev Pafilia. Yauhas txawm ncaim lawv rov mus rau Yeluxalees lawm. Lawv txawm taug kev ntawm lub moos Pawka mus txog lub moos Athi‑au hauv lub xeev Pixidia. Mas hnub Xanpatau lawv mus zaum rau hauv lub tsev sablaj. Thaum nyeem Vajtswv txoj kevcai thiab tej lus uas cov xibhwb cev lus sau cia tag lawm, cov thawj saib xyuas lub tsev sablaj txawm tso neeg mus hais rau Povlauj lawv tias, “Cov kwvtij, yog nej muaj lus txhawb siab rau cov neeg no kuj hais tau.” Povlauj txawm sawv tsees tsa tes hais tias, “Nej haiv neeg Yixayee thiab nej cov uas paub ntshai Vajtswv, cia li mloog nawj. Haiv neeg Yixayee tus Vajtswv xaiv peb tej poj koob yawm txwv cia thiab pub lawv huaj vam coob rau thaum lawv ua qhua nyob hauv Iyi tebchaws, thiab tsa kiag nws txhais npab coj lawv tawm hauv lub tebchaws ntawd. Nws ua siab ntev thev lawv hauv tebchaws moj sab qhua kwvlam plaub caug xyoo. Thaum nws muab xya haiv neeg hauv Khana‑as tebchaws ua puam tsuaj tag lawm nws kuj muab lawv lub tebchaws ntawd pub ua qub txeeg qub teg rau peb tej poj koob yawm txwv, lub sijhawm huvsi kwvlam plaub puas tsib caug xyoo. Dhau ntawd nws pub cov uas ua thawj rau lawv, mus txog thaum Xamuyee uas yog xibhwb cev Vajtswv lus. Thaum ntawd lawv thov kom muaj vajntxwv, Vajtswv thiaj li pub Khij tus tub Xa‑u uas yog xeem Npeeyamee ua vajntxwv kav lawv plaub caug xyoo. Thaum muab Xa‑u hle lawm, Vajtswv tsa Davi ua vajntxwv kav lawv thiab ua timkhawv hais txog Davi tias, ‘Kuv tau nrhiav Yexi tus tub Davi, uas hum kuv siab. Nws yuav ua txhua yam raws li kuv lub siab xav.’ Vajtswv coj ib tug Cawmseej hauv tus Davi no caj ces los rau cov Yixayee, yog Yexus, raws li Vajtswv cog lus tseg lawd. Ua ntej Yexus los, Yauhas twb tshaj tawm txog qhov uas ua kevcai raus dej uas qhia hais tias ntxeev dua siab tshiab rau ib tsoom Yixayee sawvdaws lawm. Thiab thaum Yauhas ua haujlwm yuav tiav, nws hais tias, ‘Nej xav tias kuv yog leejtwg? Kuv tsis yog tus ntawd. Tiamsis muaj ib tug yuav ua kuv qab los, kuv twb tsis tsim nyog daws txoj hlua khau ntawm nws kotaw.’ “Cov kwvtij, nej cov uas yog Aplahas caj ces thiab nej cov uas paub ntshai Vajtswv, txoj xov zoo hais txog kev dim no twb xa tuaj txog peb lawm. Cov neeg uas nyob hauv Yeluxalees thiab lawv cov thawj tsis paub thiab tsis nkag siab cov xibhwb cev lus tej lus uas txhua hnub Xanpatau lawv nyeem, lawv thiaj teem txim rau Yexus kom tiav raws li tej lus ntawd. Txawm yog tsis pom muaj kev txhaum txaus tuag los lawv kuj thov kom Philaj muab nws tua pov tseg. Thaum lawv ua txhua yam tiav raws li sau txog nws lawm, lawv txawm muab nws lub cev tuag txo saum ntoo los thiab muab nws log rau hauv lub qhov ntxa. Tiamsis Vajtswv tsa nws ciaj sawv hauv qhov tuag los. Ncua sijhawm ntau hnub Yexus los tshwm rau cov neeg uas nrog nws tuaj hauv lub xeev Kalilais tuaj rau Yeluxalees pom, mas nimno cov neeg ntawd ua timkhawv txog nws rau ib tsoom neeg. Peb coj txoj xov zoo no qhia rau nej tias tej lus uas cog tseg rau peb tej poj koob yawm txwv ntawd Vajtswv twb ua tiav li ntawd rau peb cov uas yog lawv li tub ki, yog qhov uas nws tsa Yexus ciaj sawv rov los. Kuj yog raws li tej lus sau cia rau hauv Ntawv Nkauj zaj ob hais tias, “ ‘Koj yog kuv tus tub, hnub no kuv yug tau koj lawm.’ Qhov uas Vajtswv tsa nws ciaj hauv qhov tuag rov los tsis kheev nws lwj mus, Vajtswv kuj hais li no tias, ‘Kuv yuav pub tej lus cog tseg dawb huv ruaj khov uas kuv cog rau Davi lawd rau nej.’ Vim li ntawd Vajtswv kuj hais hauv lwm qhov tias, ‘Koj yuav tsis kheev koj tus uas Dawb huv lwj kiag li.’ Thaum Davi ua nws tes haujlwm raws li Vajtswv lub siab tag nws sim neej, nws kuj tuag mus thiab muab log nrog nws tej poj koob yawm txwv thiab nws kuj lwj lawm, tiamsis tus uas Vajtswv tsa ciaj sawv rov los tsis lwj kiag li. Vim li no, kwvtij 'e, cia li nkag siab tias vim muaj tus no thiaj muaj qhov uas tshaj tawm kev zam txim rau nej. Thiab vim muaj tus no txhua tus uas ntseeg thiaj dim txhua yam uas Mauxe txoj kevcai cawm tsis tau. Vim li no nej yuav tsum ceev faj tib zoo xwv tej lus uas cov xibhwb cev lus hais ntawd thiaj tsis raug nej. ‘Nej cov uas thuam luag cia li tsa muag ntsia thiab phimhwj thiab puam tsuaj, rau qhov lub sijhawm uas nej nyob, kuv tabtom yuav ua yam uas yog muaj neeg hais rau nej ua ntej los nej yuav tsis ntseeg.’ ” Thaum Povlauj thiab Npananpa tawm mus, cov neeg ntawd kuj thov kom ob tug rov hais tej lus ntawd rau lawv mloog rau hnub Xanpatau tom ntej. Thaum kaw kev sablaj lawm cov Yudai thiab cov uas los coj Yudai kevcai nruj ntau leej txawm raws Povlauj thiab Npananpa qab mus. Ob tug thiaj hais rau lawv thiab txhawb lawv lub siab kom nyob rau hauv Vajtswv txojkev hlub mus li. Thaum rov txog hnub Xanpatau yuav luag tag cov neeg hauv lub moos tuaj txoos ua ke mloog tus Tswv txojlus. Thaum cov Yudai pom muaj neeg coob heev, lawv txawm khib heev, thiab cam tej lus uas Povlauj hais thiab hais lus saib tsis taus nws. Povlauj thiab Npananpa muaj siab tuab hais tias, “Yuav tsum piav Vajtswv txojlus rau nej ua ntej. Tiamsis nej tsis lees yuav thiab txiav txim siab nej tus kheej tias tsis tsim nyog tau txojsia ib txhis tsis kawg, vim li no peb yuav tig mus rau lwm haiv neeg. Rau qhov tus Tswv hais rau peb tias, “ ‘Kuv tsa koj ua qhov kaj ci mus rau lwm haiv neeg kom koj thiaj tau coj txojkev dim mus txog qab ntuj kawg.’ ” Thaum lwm haiv neeg hnov tej lus ntawd lawd lawv kuj zoo siab kawg thiab qhuas tus Tswv txojlus. Txhua tus uas twb xaiv cia kom tau txojsia ib txhis tsis kawg kuj los ntseeg. Tus Tswv txojlus thiaj li nthuav thoob plaws tebchaws ntawd. Tiamsis cov Yudai tshum cov pojniam muaj koob meej uas hwm Vajtswv nruj thiab cov txiv uas ua thawj hauv lub moos ntawd kom tsim txom Povlauj thiab Npananpa, thiab ntiab ob tug tawm hauv lawv li kav xyuam mus. Povlauj thiab Npananpa txawm nchos tej hmoov av uas lo ob tug kotaw tab meeg lawv ces txawm mus rau hauv lub moos Ikhauniyu lawm. Cov thwjtim zoo siab xyiv fab heev thiab puv npo Vaj Ntsuj Plig dawb huv. Hauv lub moos Ikhauniyu Povlauj thiab Npananpa mus rau hauv cov Yudai lub tsev sablaj ib yam li txeev mus thiab qhia ntxim siab mas cov Yudai thiab cov Kili thiaj los ntseeg coob. Tiamsis cov Yudai uas tsis ntseeg tshum kom lwm haiv neeg xav phem rau cov kwvtij uas ntseeg. Vim li no ob tug thiaj nyob qhov chaw ntawd ntev, muaj lub siab tuab piav txog tus Tswv, thiab tus Tswv pub kom ob tug ua tau txujci tseem ceeb thiab txujci phimhwj thiaj qhwv tau tej lus uas hais txog Vajtswv txojkev hlub. Ces cov neeg hauv lub moos ntawd txawm tawg ua ob pab, ib pab nrog cov Yudai ib pab nrog cov tubtxib. Thaum lwm haiv neeg thiab cov Yudai thiab lawv cov thawj ntaus tswvyim yuav ua phem xuas pob zeb ntaus ob tug, ob tug kuj paub lawm, txawm khiav mus rau lub xeev Likhaunia mus rau lub moos Lixatha thiab lub moos Dawnpi thiab tej zej zog ib ncig, thiab piav txoj xov zoo rau qhov ntawd. Hauv lub moos Lixatha muaj ib tug yawg zaum ob txhais kotaw mus tsis tau kev. Nws tuag taw txij thaum yug los tsis tau txeev mus kev li. Nws mloog Povlauj hais, mas Povlauj ntsia ntsoov nws pom tias nws muaj kev ntseeg txaus kho nws tus mob zoo, Povlauj txawm qw nrov hais tias, “Cia li sawv tsees sawv ntsug.” Tus yawg ntawd txawm sawv tsees caws qia dhia mus kev. Thaum cov neeg pom tej uas Povlauj ua, lawv txawm tsa suab qw hais lus Likhaunia tias, “Tej timtswv txia ua neeg nqes los txog peb lawm.” Lawv txawm tis npe rau Npananpa hu ua Xu thiab tis npe rau Povlauj hu ua Hawme vim Povlauj yog tus txiv lus. Tus povthawj uas teev tus dab mlom Xu uas nyob sab nraum lub moos txawm coj txiv nyuj thiab paj ntoo tuaj rau ntawm rooj loog yuav nrog cov pejxeem ua kevcai xyeem rau ob tug. Thaum Npananpa thiab Povlauj hnov li ntawd ob tug txawm dua pes rhe ob tug tej ris tsho thiab dhia mus rau hauv cov neeg ntawd thiab qw hais tias, “Nej sawvdaws, nej ua dabtsi li no? Wb kuj yog neeg thooj ib yam li nej xwb, thiab wb coj txoj xov zoo tuaj rau nej kom nej tig kiag ntawm tej kev uas tsis muaj qabhau no los cuag Vajtswv tus uas muaj txojsia nyob, yog tus uas tsim lub ntuj thiab lub ntiajteb thiab dej hiavtxwv thiab txhua yam uas muaj nyob rau hauv. Yav tag los Vajtswv cia ib tsoom neeg sawvdaws nyias mus raws li nyias txojkev. Tiamsis nws pheej qhia nws rau nej paub tsis tu ncua, rau qhov nws ua zoo rau nej thiab pub nag los saum ntuj los thiab pub muaj qoob loo raws caij raws nyoog rau nej, thiab pub nej muaj noj tsau npo thiab muaj kev zoo siab.” Txawm yog hais li ntawd lawm, los ob tug ceeblaj txwv lawv kom tsis txhob xyeem tej ntawd rau ob tug. Muaj cov Yudai qee leej tuaj tim lub moos Athi‑au thiab lub moos Ikhauniyu tuaj. Lawv tshum cov pejxeem mas lawv xuas pob zeb ntaus Povlauj thiab muab nws hai tawm hauv lub moos mus, lawv xav tias nws tuag lawm. Tiamsis thaum cov thwjtim tuaj vij nkaus nws, nws txawm sawv tsees mus rau hauv lub moos. Hnub tom qab nws nrog Npananpa mus rau hauv lub moos Dawnpi. Thaum ob tug piav txoj xov zoo hauv lub moos ntawd thiab coj neeg los ua thwjtim coob coob, ob tug txawm rov mus rau lub moos Lixatha thiab lub moos Ikhauniyu thiab lub moos Athi‑au. Ob tug txhawb cov thwjtim muaj zog tuaj thiab txhawb kom lawv nyob ruaj hauv txojkev ntseeg thiab hais tias, “Peb yuav tsum raug kev txom nyem ntau yam thiaj nkag tau rau hauv Vajtswv lub tebchaws.” Thaum ob tug tsa cov uas saib xyuas cov ntseeg rau txhua qhov lawm, ob tug kuj yoo mov thov Vajtswv thiab muab lawv cob rau tus Tswv uas lawv ntseeg. Ob tug hla lub xeev Pixidia los txog lub xeev Pafilia Thaum ob tug qhia Vajtswv txojlus rau hauv lub moos Pawka tag lawm, ob tug txawm nqes mus rau lub moos Athala, thiab caij nkoj qhov ntawd mus rau lub moos Athi‑au, yog lub moos uas muab ob tug cob rau hauv Vajtswv txojkev hlub kom mus ua tej haujlwm uas ob tug twb ua tiav lawm. Thaum los txog, ob tug hu pawg ntseeg tuaj txoos ua ke thiab piav txhua yam uas Vajtswv siv ob tug ua thiab piav txog qhov uas Vajtswv qheb qhov rooj rau lwm haiv neeg los ntseeg li cas. Mas ob tug nrog cov thwjtim nyob qhov ntawd ntev loo. Muaj qee leej tuaj hauv lub xeev Yudia tuaj qhuab qhia cov kwvtij hais tias, “Yog tsis ua kevcai txiav raws li Mauxe kevcai, nej kuj tsis dim.” Thaum Povlauj thiab Npananpa nrog lawv cov sib cam heev lawd, cov ntseeg txawm tsa Povlauj thiab Npananpa thiab lwm tus kom mus sablaj rau cov tubtxib thiab cov saib xyuas cov ntseeg hauv lub nroog Yeluxalees txog zaj uas sib cam ntawd. Pawg ntseeg thiaj xa lawv mus. Thaum lawv taug kev hla hauv lub xeev Finikia thiab lub xeev Xamali mus, lawv piav txog qhov uas lwm haiv neeg ntxeev dua siab tshiab mas ua rau cov kwvtij sawvdaws zoo siab heev kawg. Thaum tuaj txog Yeluxalees, pawg ntseeg thiab cov tubtxib thiab cov saib xyuas cov ntseeg kuj tos txais lawv, mas lawv piav txhua yam uas Vajtswv siv lawv ua rau cov ntawd mloog. Tiamsis cov Falixai uas ntseeg qee leej sawv tsees hais tias, “Yuav tsum muab lawv ua kevcai txiav, thiab nkaw lus kom lawv coj raws li Mauxe txoj kevcai.” Cov tubtxib thiab cov uas saib xyuas pawg ntseeg thiaj sau zog ua ke sablaj txog zaj no. Thaum sib cam ntev lawm, Petus txawm sawv tsees hais tias, “Cov kwvtij, nej yeej paub tias thaum chiv thawj Vajtswv xaiv kuv hauv nej los ua tus uas piav txoj xov zoo rau lwm haiv neeg hnov thiab ntseeg. Vajtswv, tus uas paub neeg lub siab, twb qhwv lawv thiab pub Vaj Ntsuj Plig dawb huv rau lawv ib yam li uas pub rau peb. Nws tsis cais peb thiab lawv, thiab vim lawv ntseeg nws ntxuav lawv lub siab kom dawb huv. Yog li ntawd nimno ua cas nej tseem sim Vajtswv es muab tus quab tso rau saum cov thwjtim caj qwb yog yam uas peb tej poj koob yawm txwv thiab peb ris tsis taus lawm? Tiamsis peb ntseeg hais tias peb yuav dim vim muaj tus Tswv Yexus txojkev hlub, mas lawv yuav dim li ntawd thiab.” Ib tsoom sawvdaws nyob twjywm thiab mloog Npananpa thiab Povlauj piav txog tej txujci tseem ceeb thiab txujci phimhwj uas Vajtswv siv ob tug ua rau hauv nruab nrab lwm haiv neeg. Thaum piav tag lawd, Yakaunpau thiaj hais tias, “Cov kwvtij, cia li mloog kuv hais. Ximoos twb piav tias Vajtswv los saib lwm haiv neeg thawj zaug li cas thiab xaiv ib pawg tawm hauv lawv ua nws li neeg. Tej lus uas cov xibhwb cev Vajtswv lus tau hais tseg kuj hum zaj no, raws li uas sau cia hais tias, “ ‘Tom qab ntawd kuv yuav rov los tsim Davi lub tsev uas pob tag dua tshiab. Kuv yuav kho tej uas pob tag thiab tsa dua tshiab, kom ib tsoom neeg thiab lwm haiv neeg sawvdaws uas hu raws li kuv lub npe thiaj los nrhiav tus Tswv. Tus Tswv hais li no ntag, nws twb qhia kom paub thaum ub los lawm.’ Vim li no raws li kuv pom zoo mas peb tsis txhob ua ceeblaj rau lwm haiv neeg uas tig los cuag Vajtswv, tiamsis cia peb sau ntawv mus hais kom lawv tseg tsis txhob noj yam uas qias tsis huv uas muab xyeem rau dab mlom, tsis txhob ua nkauj ua nraug, tsis txhob noj tej tsiaj uas zawm caj dab tuag thiab tsis txhob noj ntshav. Rau qhov txij thaum ub los txhua lub moos yeej muaj neeg tshaj tawm txog Mauxe thiab muab nws tej lus nyeem rau txhua hnub Xanpatau hauv tej tsev sablaj.” Thaum ntawd cov tubtxib thiab cov uas saib xyuas pawg ntseeg thiab pawg ntseeg sawvdaws pom zoo yuav xaiv qee leej hauv lawv nrog Npananpa thiab Povlauj mus rau lub moos Athi‑au. Lawv xaiv Yudas uas muaj dua ib lub npe hu ua Npaxanpa thiab Xila, ob tug yog cov uas ua thawj hauv cov kwvtij. Lawv sau tsab ntawv rau ob tug xa mus hais tias, “Peb cov kwvtij, uas yog tubtxib thiab cov uas saib xyuas pawg ntseeg, muaj lus zoo siab tuaj rau cov kwvtij uas yog lwm haiv neeg hauv lub moos Athi‑au thiab hauv lub xeev Xilia thiab lub xeev Khilikia. Vim yog peb hnov tias peb cov qee leej uas tsis yog peb txib tuaj los kuj tau tuaj hais ua rau nej ntxhov siab thiab tsis pom qab xav lawm, peb thiaj pom zoo ua ib lub siab xaiv qee leej txib nrog Npananpa thiab Povlauj uas peb hlub tuaj cuag nej, yog ob tug uas sev nyog txojsia vim saib rau peb tus Tswv Yexus Khetos lub npe. Vim li no peb thiaj xa Yudas thiab Xila tuaj, mas ob tug yuav xuas qhov ncauj piav tib zaj no rau nej mloog. Rau qhov Vaj Ntsuj Plig uas dawb huv thiab peb pom zoo tsis txhob muab lub nra hnyav rau nej ris tsuas yog tej yam uas cheem tsum xwb, yog tseg tsis txhob noj tej uas xyeem rau dab mlom, tsis txhob noj ntshav, tsis txhob noj tej tsiaj uas zawm caj dab tuag thiab tsis txhob ua nkauj ua nraug. Yog nej tseg tau tej no kuj yog nej ua zoo lawm. Thov kom noj qab nyob zoo.” Thaum sib fim ncaim tag lawm, lawv txawm mus rau lub moos Athi‑au. Thaum hu sawvdaws tuaj txoos ua ke, ces txawm muab tsab ntawv cob rau lawv. Thaum muab nyeem lawm lawv kuj zoo siab xyiv fab rau tej lus txhawb siab ntawd. Yudas thiab Xila uas yog xibhwb cev Vajtswv lus txawm hais lus txhawb cov kwvtij lub siab ntau yam thiab pab lawv muaj zog. Thaum ob tug nrog lawv nyob ib ntus lawm, cov kwvtij txawm xa ob tug mus zoo rov los rau hauv pawg ntseeg uas xa ob tug tuaj. Povlauj thiab Npananpa tseem nyob hauv lub moos Athi‑au nrog lwm tus qhuab qhia thiab piav tus Tswv txoj xov zoo. Ob peb hnub tom qab Povlauj txawm hais rau Npananpa tias, “Cia wb ob leeg rov mus saib cov kwvtij hauv txhua lub moos uas wb tau piav tus Tswv txoj xov zoo lawm saib lawv zoo li cas.” Npananpa xav coj Yauhas uas muaj dua ib lub npe hu ua Malakau mus thiab. Tiamsis Povlauj pom tias tsis tsim nyog coj mus rau qhov nws twb tso ob tug tseg ntawm Pafilia tsis nrog ob tug ua ke mus ua haujlwm. Ces ob tug txawm sib cam heev thiaj sib ncaim. Npananpa coj Malakau nrog nws nce nkoj mus rau Xaipla, tiamsis Povlauj xaiv Xila nrog nws mas thaum cov kwvtij muab ob tug cob rau tus Tswv txojkev hlub lawm ces ob tug txawm mus. Nws mus thoob plaws lub xeev Xilia thiab lub xeev Khilikia txhawb cov pawg ntseeg lub zog. Povlauj txawm mus rau lub moos Dawnpi thiab lub moos Lixatha. Qhov ntawd muaj ib tug thwjtim npe hu ua Timaute, nws niam yog neeg Yudai uas ntseeg, nws txiv yog neeg Kili. Cov kwvtij hauv lub moos Lixatha thiab lub moos Ikhauniyu puavleej pom tias Timaute yog ib tug zoo. Povlauj xav coj Timaute nrog nws mus thiaj muab nws ua kevcai txiav vim yog saib rau cov Yudai uas nyob hauv tej moos ntawd rau qhov lawv sawvdaws paub tias nws txiv yog neeg Kili. Thaum lawv taug kev mus rau hauv txhua lub moos lawv kuj muab tej lus uas cov tubtxib thiab cov saib xyuas pawg ntseeg hauv lub nroog Yeluxalees hais hum ntawd cob rau lawv xyaum raws li ntawd. Yog li ntawd cov pawg ntseeg thiaj muaj zog thiab cov xov dawb niaj hnub tsav ntxiv coob zuj zus tuaj. Lawv mus thoob plaws lub xeev Fikia thiab lub xeev Kalatia rau qhov Vaj Ntsuj plig txwv tsis kheev lawv hais txoj xov zoo rau hauv lub xeev Axia. Thaum lawv tuaj txog ntawm lub xeev Mixia ciam teb, lawv yooj xeeb yuav mus rau hauv lub xeev Npithinia tiamsis Yexus tus Ntsuj Plig tsis kheev lawv mus. Yog li ntawd lawv txawm taug kev hla lub xeev Mixia los txog lub moos Rhau‑a. Thaum tsaus ntuj Povlauj ua yog toog pom ib tug yawg neeg Makhedaunia sawv ntsug thov nws hais tias, “Cia li tuaj pab peb hauv lub xeev Makhedaunia thiab.” Thaum nws pom zaj yog toog ntawd lawm, peb txawm npaj mus rau hauv lub xeev Makhedaunia tamsid, rau qhov peb ruaj siab tias Vajtswv hu peb mus piav txoj xov zoo rau cov neeg hauv lub xeev ntawd. Peb nce nkoj ntawm Rhau‑a mus ncaj nraim rau lub koog povtxwv Xamorhe, mas hnub tom qab kuj mus txog lub moos Ne‑apoli. Peb tawm qhov ntawd mus rau lub moos Filipi uas yog lub moos loj hauv xeev Makhedaunia thiab yog ib lub moos uas cov neeg Loos kav. Peb txawm so hauv lub moos ntawd ntau hnub. Txog hnub Xanpatau peb tawm mus rau nraum rooj loog mus rau ntawm ntug dej, rau qhov peb xav tias muaj chaw rau neeg thov Vajtswv qhov ntawd. Peb thiaj zaum nrog cov pojniam uas tuaj ua ke ntawd sib tham. Cov uas mloog peb qhia ntawd muaj ib tug pojniam npe hu ua Lidia uas tuaj lub moos Thiathila tuaj. Nws yog ib tug pojniam ua luam muag ntaub tsamxem thiab yog ib tug uas hwm Vajtswv. Tus Tswv qheb nws lub siab kom nws ua tib zoo mloog tej lus uas Povlauj qhia. Thaum tus pojniam ntawd thiab nws tsev neeg ua kevcai raus dej lawm, nws txawm thov peb hais tias, “Yog nej pom tias kuv yog ib tug ntseeg tus Tswv tiag, thov nej los so hauv kuv tsev lauj.” Mas nws thiaj hu yeej peb lawm. Muaj ib zaug thaum peb tabtom tawm mus rau lub chaw uas thov Vajtswv muaj ib tug nkauj qhev uas raug dab leej nkaub txawm tuaj ntsib peb. Qhov uas nws hais paub tom hauv ntej ua rau nws cov lospav tau nyiaj ntau heev. Nws pheej raws Povlauj peb qab mus qw hais tias, “Cov neeg no yog Vajtswv tus Loj Dua Ntais cov tub qhe uas piav txojkev dim rau nej.” Nws pheej ua li no tau ntau hnub. Povlauj xeeb txob thiaj tig los hais rau tus dab ntawd tias, “Kuv tuav Yexus Khetos lub npe ntiab koj tawm hauv tus pojniam no mus.” Dab txawm tawm plaws tamsid. Thaum tus pojniam ntawd cov lospav pom tias tsis muaj chaw tau nyiaj lawm lawv txawm ntes Povlauj thiab Xila cab mus rau hauv lub tshav puam loj ntawm cov uas kav lub moos ntawd xubntiag. Thaum coj ob tug los rau ntawm cov thawj uas kav lub moos lawv txawm hais tias, “Ob tug no yog neeg Yudai thiab tsim kev kub ntxhov rau hauv peb lub moos. Ob tug qhia tej kevcai uas tsis tsim nyog peb cov Loos yuav ntseeg thiab coj.” Cov pejxeem kuj sawv tawm tsam ob tug, thiab cov thawj txawm muab ob tug lub tsho hle thiab hais kom xuas pas muab ob tug nplawm. Thaum nplawm ntau tes lawm lawv txawm muab ob tug kaw hauv tsev lojfaj thiab nkaw lus kom tus uas zov tsev lojfaj saib tib zoo. Thaum tus uas zov tsev lojfaj tau tej lus ntawd, nws txawm muab ob tug coj mus kaw rau chav sab hauv thiab muab rab cuab xauv ob tug kotaw. Thaum kwvlam ib tag hmo Povlauj thiab Xila tabtom thov Vajtswv thiab hu nkauj qhuas Vajtswv, thiab cov uas raug txim tabtom mloog, ua ciav ntuj txawm qeeg heev ua rau tej taw tsev lojfaj ua zog kais. Tamsim ntawd txhua lub qhov rooj qheb tag huvsi thiab tej saw hlau khi lawv txhua tus kuj hle tag huvsi. Thaum tus uas zov tsev lojfaj tsim dheev los nws pom tias tej qhov rooj qheb tag lawm. Nws xav tias cov uas raug kaw khiav tag lawm nws txawm rho kiag ntaj yuav tua nws tus kheej. Tiamsis Povlauj qw nrov nrov hais tias, “Tsis txhob ua phem rau koj tus kheej, rau qhov peb txhua tus tseem nyob ntawm no.” Tus uas zov tsev lojfaj txawm hais kom taws teeb los thiab dhia mus khwb nkaus pe tshee hnyo rau ntawm Povlauj thiab Xila xubntiag. Nws coj ob tug tawm los thiab hais tias, “Yawg hlob, kuv yuav tsum ua li cas thiaj tau txojkev dim?” Ob tug hais tias, “Cia li tso siab rau tus Tswv Yexus mas koj thiab koj tsev neeg yuav tau txojkev dim.” Thiab ob tug piav tus Tswv txojlus rau nws thiab txhua tus uas nyob hauv nws tsev mloog. Hmo ntawd thiab teev ntawd nws txawm coj ob tug mus ntxuav tej qhov txhab mas nws thiab nws tsev neeg sawvdaws ua kevcai raus dej tamsid. Nws coj ob tug mus rau hauv nws tsev thiab npaj zaub mov rau ob tug noj. Nws thiab tag nrho tsev neeg zoo siab xyiv fab vim lawv tau ntseeg Vajtswv lawm. Thaum kaj ntug cov thawj uas kav lub moos tso cov tub ceev xwm mus hais tias, “Cia li muab ob tug ntawd tso mus.” Tus uas zov tsev lojfaj hais tej lus ntawd rau Povlauj hais tias, “Cov thawj tso neeg tuaj tso neb dim. Yog li ntawd neb cia li tawm los thiab mus zoo.” Tiamsis Povlauj hais rau lawv tias, “Lawv muab wb uas yog Loos li neeg nplawm tab meeg sawvdaws ua ntej uas tsis tau txiav txim, thiab tseem muab wb kaw rau hauv tsev lojfaj. Nimno lawv yuav cia li tso wb mus twjywm no lov? Tsis tau li. Cia lawv tuaj coj wb tawm mus.” Cov tub ceev xwm mus hais tej lus no rau cov thawj kav lub moos. Thaum cov thawj paub tias ob tug yog Loos li neeg, lawv yimhuab ntshai heev. Lawv thiaj tuaj sam hwm ob tug. Lawv coj ob tug tawm mus thiab thov kom ob tug tawm hauv lawv lub moos mus. Ob tug thiaj tawm hauv tsev lojfaj mus thiab mus xyuas Lidia. Thaum ntsib cov kwvtij lawm, ob tug txawm hais lus txhawb lawv lub siab thiab ncaim lawv mus. Thaum Povlauj thiab Xila taug kev hla lub moos Afipoli thiab lub moos Apaulaunia mus ob tug los txog lub moos Thexalaunika uas muaj cov Yudai lub tsev sablaj. Povlauj thiaj nkag mus rau hauv lub tsev sablaj yam li uas txeev mus, nws siv Vajtswv tej lus nrog lawv sib cam rau peb hnub Xanpatau, thiab piav thiab qhia kom lawv paub tseeb tias tus Khetos yuav tsum raug kev tsim txom thiab ciaj sawv hauv qhov tuag rov los, thiab hais tias, “Tus Yexus uas kuv qhia rau nej yog tus Khetos.” Lawv cov ntawd muaj qee leej lees ntseeg Povlauj tej lus thiab los koom nrog Povlauj thiab Xila. Muaj cov Kili uas hwm Vajtswv ntau leej thiab cov pojniam uas tseem ceeb ntau leej los koom thiab. Tiamsis cov Yudai khib siab txawm mus nrhiav cov neeg phem tom tej tshav puam sau mus ua ib pab tsim kev kub ntxhov rau hauv lub moos. Lawv mus rau ntawm Yaxoo lub tsev es yuav coj ob tug los rau cov pejxeem. Thaum nrhiav tsis pom ob tug, lawv txawm cab Yaxoo thiab cov kwvtij qee leej mus cuag cov thawj uas kav lub moos thiab lawv qw hais tias, “Cov neeg uas tsim kev kub ntxhov thoob ntiajteb kuj tuaj txog ntawm no lawm, thiab Yaxoo tseem txais lawv cia. Cov neeg no puavleej tsis mloog Xixa tej lus, lawv tseem hais tias muaj dua ib tug vajntxwv, yog Yexus.” Thaum cov pejxeem thiab cov thawj kav lub moos hnov li ntawd mas ntxhov siab heev. Lawv kom Yaxoo thiab lwm tus them nyiaj ua pov thawj qhwv li tso lawv mus. Thaum tsaus ntuj cov kwvtij txawm xa Povlauj thiab Xila mus rau lub moos Npele‑a. Thaum mus txog lawd ob tug nkag mus rau hauv cov Yudai lub tsev sablaj. Cov Yudai hauv lub moos ntawd siab zoo dua cov Yudai uas nyob hauv lub moos Thexalaunika vim lawv kub siab txais txoj xov zoo thiab niaj hnub tshawb nrhiav Vajtswv txojlus saib tej no muaj tseeb li uas hais los tsis muaj. Vim li no lawv cov ntau leej ntseeg thiab cov pojniam Kili uas tseem ceeb thiab cov txivneej Kili ntau leej kuj ntseeg. Tiamsis thaum cov Yudai uas nyob hauv lub moos Thexalaunika paub tias Povlauj piav Vajtswv txojlus rau hauv lub moos Npele‑a ib yam nkaus, lawv txawm tuaj tshum cov pejxeem kom kub ntxhov thiab. Tamsim ntawd cov kwvtij txawm xa Povlauj tawm taug txojkev uas yuav mus rau nram hiavtxwv, tiamsis Xila thiab Timaute tseem nyob qhov ntawd. Cov neeg uas xa Povlauj ntawd xa nws mus rau lub nroog Athee. Thaum Xila thiab Timaute txais tej lus uas Povlauj kom ob tug maj mus cuag nws, ces ob tug txawm tawm mus. Thaum Povlauj tseem tos ob tug hauv lub nroog Athee nws ntxhov siab vim pom dab mlom puv nkaus hauv lub nroog. Vim li ntawd nws thiaj nrog cov Yudai thiab cov uas hwm Vajtswv sib cam hauv lub tsev sablaj thiab nrog cov neeg uas nws niaj hnub ntsib tom tshav puam sib cam Cov Epiculi thiab cov Xatasu‑i li xibhwb qee leej kuj tuaj nrog Povlauj tham thiab. Ib txhia hais tias, “Tus nyuas neeg ncauj ntau no tabtom hais dabtsi?” Muaj qee leej hais tias, “Zoo li nws coj lwm tebchaws tej dab los qhia,” rau qhov Povlauj piav txog Yexus thiab qhov uas ciaj sawv rov los. Lawv txawm coj Povlauj mus rau hauv lub chaw sablaj Ale‑aupaka thiab nug tias, “Thov koj qhia rau peb saib koj tej lus qhia tshiab no yog li cas? Rau qhov koj coj tej zaj txawv txawv tuaj txog peb lub qhov ntsej. Peb xav paub tias zaj ntawd muaj lub ntsiab li cas.” Cov neeg Athee sawvdaws thiab lwm haiv neeg uas nyob qhov ntawd tsuas yog nrhiav sijhawm hais lossis mloog txog tej yam uas tshiab tshiab xwb. Povlauj thiaj sawv ntsug hauv nruab nrab lub chaw sablaj Ale‑aupaka thiab hais tias, “Cov neeg Athee, kuv pom tias nej coj kevcai ntseeg nruj rau txhua fab. Rau qhov thaum kuv taug kev mus ncig thiab saib tej uas nej teev ntawd, kuv pom muaj ib lub thaj uas sau cia hais tias, ‘Pub rau tus timtswv uas tsis tau paub.’ Vim li no tus timtswv uas nej tsis paub los nej tseem teev, kuv thiaj muab piav rau nej. Tus Vajtswv uas tsim lub ntiajteb thiab txhua yam uas nyob hauv, nws yog lub ntuj thiab lub ntiajteb tus Tswv. Nws tsis nyob hauv tej tsev uas neeg txhais tes ua, thiab tsis txog neeg txhais tes tu nws vim nws tsis cheem tsum dabtsi li, rau qhov nws yog tus uas pub txojsia thiab pa thiab txhua yam rau tej neeg sawvdaws. Nws tsim txhua haiv neeg los ntawm tib tug los xwb kom nyob mus thoob plaws hauv qab ntuj, thiab teem caij teem nyoog thiab tu ciam rau lawv nyob, xwv lawv thiaj li nrhiav Vajtswv thiab tej zaum yuav xuas nrhiav mus ntsib nws. Tiamsis nws yeej tsis nyob deb ntawm peb txhua tus, rau qhov ‘hauv Vajtswv peb muaj txojsia, mus tau kev thiab muaj nyob.’ Nej cov uas txawj phim nkauj kuj hais tias ‘Qhov tseeb peb yog Vajtswv li tub ki.’ Vim li no, peb yog Vajtswv li tub ki peb thiaj tsis txhob xav tias Vajtswv zoo li nyiaj kub lossis pob zeb uas muab txua ua yam ntxwv raws li neeg lub tswvyim thiab lub siab xav. Thaum neeg tseem tsis tau paub, Vajtswv kuj tsis suav tias muaj txim, tiamsis nimno nws hais rau neeg sawvdaws uas nyob txhua qhov kom ntxeev dua siab tshiab, rau qhov nws twb teem ib hnub cia lawm mas hnub ntawd nws yuav kom tus uas nws twb teem cia lawd txiav txim ncaj ncees rau lub ntiajteb. Thiab Vajtswv pub kom sawvdaws ruaj siab txog zaj no vim nws twb tsa tus ntawd ciaj sawv hauv qhov tuag rov los lawm.” Thaum lawv hnov txog qhov uas ciaj sawv hauv qhov tuag rov los, muaj qee leej kuj thuam luag, tiamsis muaj qee leej tseem hais tias, “Peb yuav mloog koj hais zaj no dua thiab.” Povlauj txawm ncaim lawv mus. Muaj qee leej koom nrog Povlauj thiab ntseeg. Cov ntawd ib tug yog Di‑aunixia uas yog ib tug tuav haujlwm hauv lub chaw sablaj Ale‑aupaka, thiab muaj ib tug pojniam npe hu ua Damali thiab muaj dua lwm tus. Dhau ntawd Povlauj tawm hauv lub nroog Athee mus rau lub moos Khaulee. Nws ntsib ib tug Yudai qhov ntawd npe hu ua Akhila uas yug hauv lub xeev Phauthia, nyuam qhuav nrog nws tus pojniam Plixila khiav hauv Ithali tebchaws los, vim yog huabtais Khaunti‑au hais kom cov Yudai tawm hauv lub nroog Loos khiav mus. Povlauj txawm mus xyuas ob tug, thiab nrog ob tug nyob rau qhov lawv peb leeg ua tib yam haujlwm. Lawv ua haujlwm ua ke vim lawv sawvdaws yog Kws xaws tsev ntaub. Txhua hnub Xanpatau Povlauj mus nrog lawv sib cam hauv lub tsev sablaj thiab yaum cov Yudai thiab cov Kili lus ntseeg. Thaum Xila thiab Timaute tuaj hauv lub xeev Makhedaunia tuaj lawm Povlauj kuj rau siab ntso qhia txoj xov zoo, thiab ua timkhawv rau cov Yudai tias tus Khetos yog Yexus ntag. Thaum cov neeg ntawd tawm tsam nws thiab hais lus phem rau nws, Povlauj txawm ncho nws tej ris tsho thiab hais rau lawv tias, “Nej cia li ris nej cov ntshav. Kuv tsis muaj txim lawm. Nimno kuv yuav mus rau lwm haiv neeg.” Nws txawm tawm qhov ntawd mus rau hauv ib yawg npe hu ua Thitia Yuxata lub tsev, nws yog ib tug uas pe hawm Vajtswv. Nws lub tsev nyob npuas lub tsev sablaj. Khipa uas ua tus thawj saib lub tsev sablaj thiab nws tsev neeg sawvdaws los ntseeg tus Tswv. Thiab cov neeg Khaulee ntau leej hnov Povlauj qhia kuj ntseeg thiab ua kevcai raus dej. Muaj ib hmos tus Tswv ua yog toog rau Povlauj pom hais tias, “Tsis txhob ntshai, cia li hais tsis txhob nyob twjywm, rau qhov kuv nrog nraim koj. Yuav tsis muaj leejtwg tawm tsam ua phem rau koj, rau qhov hauv lub moos no kuv muaj neeg coob coob.” Povlauj txawm nyob qhov ntawd ib xyoos rau lub hli ntxiv thiab qhia Vajtswv txojlus rau lawv. Thaum Kali‑au ua thawj kav lub xeev Akhaya, cov Yudai txawm ntaus tswvyim ua ib lub siab tawm tsam Povlauj thiab coj nws mus rau hauv tsev tu plaub, kom hais tias, “Tus yawg no yaum kom neeg pe hawm Vajtswv uas yog ua txhaum kevcai.” Thaum Povlauj tabtom yuav qheb ncauj hais, Kali‑au txawm hais rau cov Yudai tias, “Cov Yudai 'e, yog tias nws ua tsis ncaj lossis ua ib yam kev phem, kuj tsim nyog kuv yuav ua siab ntev mloog nej hais. Tiamsis tsuas yog tej nyuag kev sib cam txog tej lus thiab tej npe thiab nej tej kevcai xwb, nej cia li tu nej xwb. Kuv tsis xav tu tej nyuag plaub li no.” Nws txawm muab lawv ntiab tawm hauv lub tsev tu plaub mus. Lawv txawm ntes Xauthene uas saib lub tsev sablaj coj los nplawm tab meeg ntawm lub tsev tu plaub, los Kali‑au tsis quav ntsej li. Povlauj tseem so qhov ntawd ntau hnub ces nws txawm ncaim cov kwvtij thiab nce nkoj mus rau lub xeev Xilia. Plixila thiab Akhila kuj nrog nws mus. Povlauj chais plaubhau hauv lub moos Kheekhia vim nws twb yeem lus cia lawm. Thaum los txog lub moos Efexau Povlauj txawm tso Plixila thiab Akhila tseg rau qhov ntawd. Mas nws nkag rau hauv lub tsev sablaj nrog cov Yudai sib cam. Thaum lawv thov kom nws nrog lawv nyob ntev, nws tsis kam. Thaum nws ncaim lawv mus nws fim lawv tias, “Yog Vajtswv pom zoo kuv yuav rov tuaj ntsib nej dua thiab.” Ces nws txawm nce nkoj tawm hauv lub moos Efexau mus. Thaum nws los txog lub moos Xixaleya, nws mus saib xyuas pawg ntseeg mam li mus rau lub moos Athi‑au. Thaum nws so qhov ntawd ib ntus lawm nws txawm tawm mus thoob plaws lub xeev Kalatia thiab Fikia txhawb cov thwjtim sawvdaws lub zog. Muaj ib tug Yudai npe hu ua Apaulau uas yug hauv lub nroog Alexadia tuaj rau hauv lub moos Efexau. Nws yog ib tug txawj hais lus thiab paub Vajtswv phau ntawv thoob. Nws tau kawm paub tus Tswv txojkev. Nws muaj lub siab kub lug piav thiab qhuab qhia tseeb txog Yexus zaj, tiamsis nws tsuas paub txoj kevcai raus dej uas Yauhas qhia xwb. Nws muaj siab tuab pib hais rau hauv lub tsev sablaj. Thaum Plixila thiab Akhila hnov nws hais, ob tug coj nws mus qhia kom paub Vajtswv txoj kev zoo heev dua tuaj. Thaum Apaulau xav hla mus tim lub xeev Akhaya, cov kwvtij kuj txhawb nws lub siab thiab sau ntawv mus rau cov thwjtim uas nyob tid tos txais nws. Thaum nws mus txog lawd nws kuj pab cov uas Vajtswv txojkev hlub coj los ntseeg ntau heev, rau qhov nws siv zog cam yeej cov Yudai tab meeg sawvdaws thiab muab Vajtswv txojlus qhia rau lawv pom tias Yexus yog tus Khetos. Thaum Apaulau tseem nyob hauv lub moos Khaulee, Povlauj taug txojkev nruab nqhuab hla hauv plawv tebchaws mus txog lub moos Efexau. Nws ntsib cov thwjtim qee leej qhov ntawd. Nws txawm hais rau lawv tias, “Thaum nej ntseeg nej tau txais Vaj Ntsuj Plig uas dawb huv los tsis tau?” Lawv hais tias, “Tsis tau, peb tsis tau hnov tias muaj Vaj Ntsuj Plig dawb huv kiag li.” Povlauj thiaj hais tias, “Yog li ntawd nej ua kevcai raus dej li cas?” Lawv teb tias, “Ua kevcai raus dej uas Yauhas qhia.” Povlauj thiaj hais tias, “Yauhas muab ua kevcai raus dej uas qhia hais tias ntxeev dua siab tshiab, thiab hais kom neeg ntseeg tus uas yuav ua nws qab los, yog Yexus.” Thaum lawv hnov li ntawd lawv txawm ua kevcai raus dej hauv tus Tswv Yexus lub npe. Thaum Povlauj tsa tes npuab lawv lawm, Vaj Ntsuj Plig dawb huv kuj los rau saum lawv, lawv txawm hais lus txawv txawv thiab cev Vajtswv lus. Cov neeg ntawd kwvlam muaj kaum ob leeg. Povlauj nkag rau hauv lub tsev sablaj muaj siab tuab qhia tau peb lub hli nrog lawv sib cam txog Vajtswv lub tebchaws thiab yaum tau lawv los ntseeg. Tiamsis muaj qee leej siab tawv tsis kam ntseeg thiab hais phem rau txojkev ntawd tab meeg ib tsoom neeg. Povlauj txawm ncaim lawv cov ntawd mus thiab coj cov thwjtim nrog nws mus. Nws niaj hnub nrog luag sib cam hauv Thilana chav tsev sablaj. Nws ua li ntawd tau ob xyoos, mas cov neeg uas nyob hauv lub xeev Axia tsis hais cov Yudai thiab cov Kili puavleej tau hnov tus Tswv txojlus. Vajtswv ua txujci phimhwj loj tshwm hauv Povlauj txhais tes. Lawv muab Povlauj txoj phuam ntxuav muag thiab daim ntaub npua ua haujlwm coj mus lwm cov uas muaj mob, tej mob kuj zoo thiab dab kuj khiav tawm mus. Mas cov Yudai muaj qee leej uas ua txiv neeb mus rau tom ub tom no kuj hu tus Tswv Yexus lub npe ntiab dab tawm hauv cov uas raug dab hais tias, “Kuv tuav Yexus lub npe uas Povlauj qhia ntiab nej tawm.” Cov Yudai ib tug pov thawj hlob npe hu Xeva xya leej tub kuj ua li ntawd. Ces dab txawm hais rau lawv tias, “Yexus kuv kuj paub thiab Povlauj kuv kuj paub, tiamsis nej yog leejtwg?” Mas tus uas raug dab ntawd txawm tib plhaw mus ntaus lawv thiab kovyeej lawv ua rau lawv khiav tawm hauv lub tsev ntawd mus liab qab tsuas thiab raug mob. Txhua tus uas nyob hauv lub moos Efexau tag nrho cov Yudai thiab cov Kili kuj paub zaj no, lawv sawvdaws thiaj ntshai kawg thiab Yexus lub npe nrov nto moo lug. Cov uas los ntseeg muaj ntau leej los lees lub txim thiab qhia tej uas lawv ua los lawd. Thiab muaj ntau leej uas ua khawv koob yees siv kuj muab lawv tej ntawv khawv koob los hlawv ua ke tab meeg sawvdaws. Tej ntawv khawv koob ntawd xam nqe raug tsib vam lub txiaj nyiaj. Vajtswv txojlus thiaj muaj zog nthuav dav thiab muaj hwjchim. Thaum dhau tej xwm txheej no lawm, Povlauj npaj siab yuav taug kev hla lub xeev Makhedaunia thiab lub xeev Akhaya thiab mus kom txog lub nroog Yeluxalees. Nws hais tias, “Dhau ntawd kuv yuav tsum mus pom lub nroog Loos thiab.” Nws txawm txib ob tug uas pab nws yog Timaute thiab Elata mus rau hauv lub xeev Makhedaunia, ces nws tus kheej tseem nyob hauv lub xeev Axia ib ntus thiab. Lub sijhawm ntawd muaj kev ntxhov tshwm los vim yog tim Yexus Txojkev. Muaj ib tug Kws ntaus nyiaj npe hu ua Demethia. Nws muab nyiaj los ntaus ua tej lub nyuag tsev me me zoo li lub tsev dab Athemi, mas ua rau cov Kws ntaus nyiaj tau tshaj thawj ntau heev. Demethia txawm hu lawv cov ntawd thiab cov uas ua tib yam haujlwm tuaj ua ke thiab hais tias, “Cov kwvluag, nej yeej paub tias peb tau nyiaj txiag yog ntawm tej haujlwm no. Thiab nej twb pom thiab hnov tias tsis yog hauv lub moos Efexau no xwb tiamsis yuav tag lub xeev Axia uas tus Povlauj no tau yaum thiab ua kom neeg coob coob tso txoj qub kev tseg, thiab hais tias tej dab mlom uas neeg txhais tes ua tsis yog timtswv. Ntshai tsam ces tsis yog peb tej haujlwm no yuav poob koob xwb tiamsis lub tuam tsev uas teev tus poj dab Athemi uas loj kuj yuav tsis muaj qabhau lawm thiab tus poj dab uas neeg thoob plaws hauv Axia thiab thoob qab ntuj hwm yuav poob qes tsis muaj tsim lawm.” Thaum lawv hnov li ntawd lawm, lawv npau taws thiab qw hais tias, “Peb cov Efexau tus poj dab Athemi yog tus loj kawg.” Ces txawm muaj kev ntxhov thoob plaws lub moos. Lawv txawm ib txhij dhia cab Kai‑a thiab Alithakha uas yog neeg Makhedaunia uas nrog Povlauj taug kev tuaj ntawd coj mus rau hauv lub tshav puam loj uas ua yeeb yam. Povlauj xav mus rau hauv cov neeg ntawd thiab, tiamsis cov thwjtim tsis kheev nws mus. Txawm yog cov thawj uas kav lub xeev Axia qee leej uas yog Povlauj li phoojywg kuj tso neeg mus thov Povlauj tsis txhob nkag mus rau hauv lub tshav puam uas ua yeeb yam. Ib txhia qw li no ib txhia qw li ub rau qhov hauv lub chaw sablaj ntxhov heev, thiab neeg feem coob tsis paub tias tuaj sablaj tus kev dabtsi. Cov neeg ntawd qee leej taw qhia rau Alexadaw uas cov Yudai muab thawb rau tom hauv ntej. Alexadaw thiaj co tes yuav hais daws zaj ntawd rau cov pejxeem. Thaum lawv paub tias nws yog ib tug Yudai lawv txawm ua ib lub suab qw nrov heev ntev txog ob teev hais tias, “Peb cov Efexau tus poj dab Athemi yog tus loj kawg.” Thaum tus nom uas ua tub sau ntawv hauv lub moos ntawd ua rau cov neeg nyob twjywm lawm, nws txawm hais tias, “Nej cov Efexau, muaj leejtwg uas tsis paub tias lub moos Efexau yog lub uas tsomkwm tus poj dab Athemi uas loj kawg lub tsev thiab tsomkwm lub pov hum uas poob saum ntuj los? Tsis muaj leejtwg tsis lees paub tej no lawm, mas tsim nyog nej nyob twjywm tsis txhob ua lub siab kub. Nej coj cov neeg no tuaj twb tsis yog lawv lws lub tsev dab lossis hais lus saib tsis taus peb tus poj dab yam twg li nev. Vim li no yog tias Demethia thiab cov Kws nyiaj uas tuaj nws tog muaj teeb meem rau leejtwg yeej muaj tsev tu plaub thiab muaj cov thawj tu plaub. Cia lawv mus sib kom lawv. Yog nej muaj dua lwm yam thiab, kuj hais hum rau hauv lub chaw sablaj raws li ib txwm. Ntshai tsam peb yuav raug kom hais tias peb yog cov uas tsim kev kub ntxhov rau hnub no vim peb qhia tsis tau hais tias kev kub ntxhov zaum no yog tim dabtsi.” Thaum hais li no tag lawm nws txawm kaw lub rooj sablaj ntawd. Thaum dhau tej kev ntxhov ntawd lawm Povlauj txawm kom cov thwjtim tuaj cuag nws thiab hais txhawb lawv lub siab thiab fim ncaim lawv ces nws txawm mus rau lub xeev Makhedaunia lawm. Thaum taug kev hla qhov ntawd mus thiab hais lus txhawb lawv siab ntau lawm nws txawm tuaj txog Kili tebchaws. Nws nyob qhov ntawd tau peb lub hli. Thaum nws tabtom yuav nce nkoj mus rau lub xeev Xilia cov Yudai txawm tuav tswvyim ua phem rau nws. Nws thiaj txiav txim siab taug txojkev hla lub xeev Makhedaunia rov mus. Cov uas nrog nws mus yog Xaupathaw uas yog neeg hauv lub moos Npele‑a yog Pila tus tub, thiab Alithakha thiab Xekhuda uas yog neeg hauv lub moos Thexalaunika, thiab Kai‑a uas yog neeg hauv lub moos Dawnpi, thiab Thikhika thiab Rhaufima uas yog neeg Axia, thiab Timaute. Lawv cov ntawd ua ntej mus nyob ntawm lub moos Rhau‑a tos peb. Dhau lub sijhawm uas ua kevcai Noj Ncuav tsis Xyaw Keeb lawm peb li nce nkoj tawm hauv lub moos Filipi mus. Peb mus tau tsib hnub li los cuag lawv ntawm lub moos Rhau‑a thiab so qhov ntawd xya hnub. Hnub ib thaum peb tuaj txoos ua ke noj mov Povlauj qhuab qhia lawv. Vim nws npaj siab tias tagkis tom qab nws yuav ncaim mus nws thiaj qhia ntev loo txog ib tag hmo. Txheej saud uas peb sablaj ntawd taws ntau lub teeb. Muaj ib tug hluas npe hu ua Yuthikha zaum ntawm qhov rais. Nws pheej ncaws dab ntub heev rau thaum Povlauj qhia ntev zuj zus, nws txawm tsaug zog looj hlias poob saum txheej peb los. Thaum muab tsa kiag mas pom tias tuag lawm. Tiamsis Povlauj nqes mus khwb nkaus puag kiag tus ntawd thiab hais tias, “Nej tsis txhob ntshai, nws tseem muaj txojsia.” Thaum Povlauj nce rov mus rau txheej saud nws ntais ncuav noj thiab nrog lawv tham ntev ntev txog kaj ntug ces nws txawm ncaim mus lawm. Lawv coj tus hluas uas tseem ciaj ntawd mus thiab lawv tau txais kev txhawb siab ntau heev. Peb nce nkoj ua ntej mus rau lub moos Axau npaj siab yuav tos Povlauj nce nkoj qhov ntawd, rau qhov nws hais cia li ntawd vim nws npaj siab taug kev nruab nqhuab mus. Thaum nws ntsib peb ntawm lub moos Axau lawm peb kuj txais nws nce nkoj thiab mus rau lub moos Mithileni. Peb caij nkoj ntawm mus tau ib hnub mas mus txog ze lub koog povtxwv Khi‑au. Mas hnub uas ob mus txog lub koog povtxwv Xamau, mus dua ib hnub mus txog lub moos Miletha. Rau qhov Povlauj txiav txim siab tias yuav hla kiag lub moos Efexau xwv thiaj tsis nkim sijhawm rau hauv lub xeev Axia. Nws maj mus kom txog Yeluxalees, yog mus tau nws xav mus kav kom cuag hnub Pheethekhoxate. Povlauj txib neeg ntawm lub moos Miletha mus hu cov saib xyuas pawg ntseeg hauv lub moos Efexau tuaj. Thaum lawv tuaj txog lawm, Povlauj hais tias, “Nej paub lawm tias txij hnub uas kuv xub tuaj nyob hauv lub xeev Axia kuv nrog nej nyob txhua lub sijhawm kuv coj li cas. Kuv txo kuv lub hwjchim ua tus Tswv tes haujlwm ntawm lub kua muag thiab kuv raug kev sim siab vim yog cov Yudai tej tswvyim phem. Yam twg uas muaj nuj nqes rau nej kuv yeej qhia tsis zais li, kuv qhuab qhia tab meeg sawvdaws thiab qhia hauv tej tsev, ua timkhawv rau cov Yudai thiab cov Kili txog qhov uas yuav tsum ntxeev dua siab tshiab rov los cuag Vajtswv thiab qhov uas ntseeg peb tus Tswv Yexus Khetos. Saib maj, nimno Vaj Ntsuj Plig cab kuv mus rau hauv lub nroog Yeluxalees, tsis paub tias yuav muaj xwm dabtsi tshwm los rau kuv qhov ntawd, tsuas yog paub tias Vaj Ntsuj Plig dawb huv ua timkhawv rau kuv hauv txhua lub moos hais tias tej kev raug kaw thiab kev txom nyem tos rawv kuv. Tiamsis kuv tsis suav tias kuv txojsia tseem ceeb dabtsi rau kuv, tsuav yog kuv dhia tau mus txog qhov kawg thiab tau ua tes haujlwm uas tus Tswv Yexus muab cob rau kuv lawd kom tiav xwb, uas yog ua timkhawv txog txoj xov zoo uas hais txog Vajtswv txojkev hlub. “Nimno kuv paub tias nej txhua tus uas kuv tau mus tshaj tawm txog Vajtswv lub tebchaws rau lawm yuav tsis rov pom kuv ntsej muag dua li. Vim li no hnub no kuv ua timkhawv rau nej tias kuv tsis txhaum, kuv yuav tsis ris nej sawvdaws tej ntshav lawm, rau qhov kuv tsis tseg qhov uas hais txhua yam uas Vajtswv xav tseg lawd rau nej mloog. Nej yuav tsum ua tib zoo saib nej thiab saib xyuas pab yaj huvsi uas Vaj Ntsuj Plig dawb huv tsa nej ua tus saib nej thiaj yug tau Vajtswv pawg ntseeg uas Vajtswv muab nws tus Tub cov ntshav yuav los. Kuv paub tias thaum kuv ncaim nej lawm yuav muaj hma nyaum tuaj rau hauv nej, thiab yuav tsis tseg pab yaj kiag li. Thiab yuav muaj qee leej hauv nej cov sawv los ntxeev txojkev tseeb thiaj rub tau cov thwjtim raws lawv qab. Vim li no cia li zov tos, thiab nco tias kuv twb qhuab ntuas nej ntawm lub kua muag nruab hnub hmo ntuj tau peb xyoos tsis tu ncua li. Nimno kuv muab nej tso rau hauv Vajtswv thiab hauv txoj xov zoo uas hais txog nws txojkev hlub. Txoj xov zoo ntawd muaj peevxwm tsim nej nyob ruaj thiab pub kom nej nrog txhua tus uas Vajtswv muab cais ua dawb huv tau qub txeeg qub teg. Kuv tsis ntshaw leejtwg li nyiaj kub lossis ris tsho. Nej yeej paub tias kuv ob txhais tes khwv txhua yam uas kuv thiab cov uas nrog kuv nyob ua ke cheem tsum. Kuv twb ua txhua yam qhia rau nej paub tias peb yuav tsum ua haujlwm khwv li no thiaj pab tau cov uas tsis muaj zog, thiab nco tus Tswv Yexus tej lus uas nws hais tias, ‘Qhov uas pub rau luag ua rau yus kaj siab dua li txais luag li los.’ ” Thaum Povlauj hais li ntawd tag lawd, nws txawm txhos caug nrog lawv sawvdaws thov Vajtswv. Lawv txhua tus quaj heev thiab khawm nws thiab nwj nws. Lawv nyuaj siab kawg txog lo lus uas nws hais tias lawv yuav tsis rov pom nws ntsej muag dua li lawm. Ces lawv txawm xa nws mus nce nkoj. Thaum peb ncaim lawv lawd peb txawm caij nkoj mus ncaj nraim rau lub koog povtxwv Khau, thiab mus dua ib hnub li txog lub koog povtxwv Laude, dhau ntawd peb mus rau lub moos Pathala. Thaum peb ntsib ib lub nkoj tabtom yuav hla mus rau lub xeev Finikia peb txawm nce lub nkoj ntawd mus. Thaum peb mus pom Xaipla lawm peb txawm lug sab nrad mus rau lub xeev Xilia mas nres nkoj rau ntawm lub nroog Thailab, rau qhov yuav thau nra rau qhov ntawd. Thaum nrhiav tau cov thwjtim lawm peb nrog lawv nyob qhov ntawd xya hnub. Lawv tav Povlauj raws li Vaj Ntsuj Plig qhia lawv kom tsis txhob mus rau Yeluxalees. Thaum puv xya hnub lawm peb txawm ncaim lawv sawv kev mus. Lawv thiab lawv tej pojniam menyuam xa peb tawm hauv lub moos mas peb txhos caug thov Vajtswv ntawm ntug hiavtxwv. Thaum peb sib fim ncaim tag peb nce nkoj, ces lawv txawm rov mus tsev. Thaum peb caij nkoj ntawm lub nroog Thailab mus txog lub moos Tauleme‑i, peb txawm mus saib cov kwvtij thiab nrog lawv nyob ib hnub. Hnub tom qab peb tawm qhov ntawd mus txog lub moos Xixaleya. Peb nkag mus rau hauv Fili uas ua tus qhia txoj xov zoo lub tsev, nws yog ib tug hauv xya leej ntawd, mas peb so hauv nws. Fili muaj plaub tug ntxhais uas tsis tau yuav txiv, puavleej txawj cev Vajtswv lus. Thaum peb nyob ntawd ntau hnub lawm muaj ib tug yawg xibhwb cev Vajtswv lus npe hu ua Akanpa tuaj lub xeev Yudia tuaj. Nws tuaj txog peb thiab muab Povlauj txoj siv tawv los khi nws txhais tes thiab nws txhais kotaw ces nws hais tias, “Vaj Ntsuj Plig dawb huv hais li no tias, ‘Cov Yudai hauv Yeluxalees yuav muab txoj siv tawv no tus tswv khi thiab muab nws cob rau hauv lwm haiv neeg txhais tes,’ ” Thaum peb tau hnov li ntawd peb thiab cov uas nyob ua ke txawm cheem Povlauj kom tsis txhob mus rau hauv Yeluxalees. Povlauj teb tias, “Ua li cas nej yuav quaj thiab ua rau kuv ntxhov siab? Kuv tsis yog npaj txhij rau lawv khi xwb, tiamsis tseem npaj txhij yuav tuag rau hauv Yeluxalees vim saib rau tus Tswv Yexus lub npe.” Thaum nws tsis yeem mloog peb cheem, peb txawm tso tseg thiab hais tias, “Thov cia ua raws li tus Tswv lub siab.” Dhau ntawd peb hwbxwm txhij thiab mus rau hauv Yeluxalees. Cov thwjtim uas nyob hauv Xixaleya qee leej nrog peb mus thiab. Lawv coj peb mus rau hauv Manaxoo tsev mas peb so hauv nws. Nws yog ib tug ntseeg ntxov thiab yog neeg Xaipla. Thaum peb tuaj txog Yeluxalees lawm cov kwvtij kuj zoo siab txais tos peb. Hnub tom qab Povlauj nrog peb mus tsham Yakaunpau, thiab cov uas saib xyuas pawg ntseeg txhua tus kuj nyob qhov ntawd. Thaum Povlauj fim lawv tag lawm, nws piav txhua yam uas Vajtswv siv Povlauj ua hauv nruab nrab lwm haiv neeg ntawd ib yam zuj zus rau lawv mloog. Thaum lawv tau hnov lawv kuj qhuas Vajtswv. Lawv hais rau nws tias, “Kwvtij, koj kuj pom tias cov Yudai uas los ntseeg muaj ntau txhiab leej thiab lawv kub siab lug coj Mauxe txoj kevcai. Lawv tau hnov txog koj tias koj qhuab qhia cov Yudai uas nyob hauv lwm haiv neeg kom tso Mauxe tej lus tseg thiab hais kom lawv tsis txhob muab lawv cov menyuam ua kevcai txiav lossis coj raws li qub kevcai. Yuav ua li cas? Lawv yeej yuav hnov tias koj tuaj txog no. Vim li no koj cia li ua raws li peb hais rau koj. Peb muaj plaub leej txivneej uas twb cog lus cais lawm. Koj cia li coj cov txivneej ntawd nrog koj mus ua kevcai ntxuav ua ke thiab them lawv li feem kom lawv thiaj chais tau plaubhau. Yog ua li no sawvdaws thiaj paub tias tej uas lawv tau hnov txog koj tsis muaj tseeb tiamsis koj yeej tuav rawv ua raws li txoj kevcai. Lwm haiv neeg uas ntseeg ntawd, peb twb sau ntawv qhia tej uas peb txiav txim siab lawm hais tias kom lawv tsis txhob noj tej uas xyeem rau dab thiab tsis txhob noj ntshav thiab tsis txhob noj tej tsiaj uas zawm caj dab tuag thiab tsis txhob ua nkauj ua nraug.” Povlauj txawm coj cov txivneej ntawd mus mas hnub tom qab nws nrog lawv ua kevcai ntxuav li nkag mus rau hauv lub tuam tsev thiab nws qhia tias lub sijhawm uas ua kevcai ntxuav yuav tiav rau hnub twg thiab yuav muab qhov txhia chaw xyeem ua txhua tus li feem rau hnub ntawd. Thaum twb yuav puv xya hnub ntawd, cov Yudai uas tuaj hauv lub xeev Axia tuaj pom Povlauj nyob hauv lub tuam tsev, ces lawv txawm tshum ib tsoom pejxeem thiab ntes nws. Lawv qw hais tias, “Cov Yixayee, cia li pab cuam. Tus yawg no yog tus uas qhia neeg txhua qhov kom tawm tsam peb haiv neeg thiab txoj kevcai thiab lub chaw no. Tsis tag li ntawd nws tseem coj cov Kili los rau hauv lub tuam tsev, thiab ua qias puas tsuas lub chaw dawb huv no.” Vim ua ntej ntawd lawv pom Rhaufima uas yog neeg Efexau nrog Povlauj ua ke hauv lub nroog thiab xav tias Povlauj coj tus ntawd nkag rau hauv lub tuam tsev lawm. Ces tag nrho lub nroog txawm muaj kev kub ntxhov, cov pejxeem dhia ua ke mus ntes Povlauj rub nws tawm hauv lub tuam tsev mus, ces luag txawm muab tej rooj loog tuam tsev kaw tamsid. Thaum lawv tabtom nrhiav kev tua Povlauj, txawm muaj xov hais mus txog tus thawj rog uas kav ib txhiab leej tias lub nroog Yeluxalees tabtom kub ntxhov heev. Nws txawm coj cov tub rog thiab cov uas kav ib puas leej dhia mus rau hauv cov neeg tamsim ntawd. Thaum lawv pom tus thawj rog uas kav ib txhiab thiab cov tub rog tuaj lawv txawm tseg tsis ntaus Povlauj. Tus thawj rog txawm txav mus ze thiab ntes Povlauj thiab hais kom muab ob txoj saw hlau khi nws, mas nug tias nws yog leejtwg thiab nws tau ua dabtsi. Cov neeg ntawd ib txhia qw li no ib txhia qw li ub. Thaum tus thawj rog uas kav ib txhiab nrhiav tsis tau qhov tseeb vim ntxhov heev, nws hais kom coj Povlauj mus rau hauv cov tub rog lub yeej. Thaum los txog ntawm tus ntaiv lawm, cov tub rog txawm nqa Povlauj vim cov neeg ua nruj ua tsiv heev. Cov neeg coob coob uas raws qab kuj qw hais tias, “Coj nws mus tua.” Thaum coj Povlauj mus yuav dhau rau hauv cov tub rog lub yeej, Povlauj txawm hais rau tus thawj rog uas kav ib txhiab hais tias, “Kuv thov hais ib los rau koj puas tau?” Tus thawj rog hais tias, “Koj paub lus Kili thiab lov? Koj yog tus Iyi uas tsis ntev ntawd tsim kev kub ntxhov thiab coj plaub txhiab leej tuav ntaj riam khiav mus rau hauv tebchaws moj sab qhua los tsis yog?” Povlauj teb tias, “Kuv yog neeg Yudai, nyob hauv lub moos Thaxa hauv lub xeev Khilikia, kuv yog ib tug pejxeem hauv lub moos tseem ceeb. Kuv thov koj cia kuv hais rau cov neeg no.” Thaum tus thawj rog tso cai lawm, Povlauj txawm sawv saum tus ntaiv co tes rau cov neeg. Thaum sawvdaws nyob twjywm lawm, nws txawm ua lus Henplais hais rau lawv tias, “Ib tsoom kwvtij niam txiv, thov nej mloog kuv hais daws kuj zaj rau nej.” Thaum lawv hnov nws hais lus Henplais lawv yimhuab nyob twjywm. Nws hais tias, “Kuv yog neeg Yudai, yug hauv lub moos Thaxa hauv lub xeev Khilikia, loj hlob hauv lub nroog no thiab kawm tiav ntawm tus xibhwb Kamali‑ee. Kuv tau txais kev cob qhia nruj raws li peb tej poj koob yawm txwv txoj kevcai thiab kuv kub siab lug rau Vajtswv ib yam li nej sawvdaws niaj hnub nimno. Kuv tsim txom cov uas ntseeg Txojkev no ua kom tuag, thiab muab pojniam txivneej khi coj mus kaw rau hauv tsev lojfaj, raws li tus tuam pov thawj hlob thiab cov thawj lub rooj sablaj sawvdaws ua tau timkhawv. Kuv tuav ntawv ntawm lawv mus rau lawv cov kwvtij hauv lub nroog Damaxaka, thiab kuv taug kev mus yuav ntes cov uas nyob hauv lub nroog ntawd khi coj los rau txim rau hauv lub nroog Yeluxalees. “Mas thaum kuv tabtom taug kev mus yuav txog lub nroog Damaxaka, kwvlam tav su txawm muaj ib tug duab ci nplas saum ntuj tuaj vij nkaus kuv tamsid. Kuv txawm ntog vau hlo rau hauv pem teb thiab hnov ib lub suab hais rau kuv tias, ‘Xolau, Xolau 'e, ua cas koj tsim txom kuv?’ Kuv teb tias, ‘Tus Tswv, koj yog leejtwg?’ Nws hais rau kuv tias, ‘Kuv yog Yexus, yog neeg Naxale uas koj tabtom tsim txom.’ Cov neeg uas nrog kuv ua ke pom tus duab tiamsis tsis hnov lub suab uas hais rau kuv. Kuv thiaj hais tias, ‘Tus Tswv, kuv yuav tsum ua dabtsi?’ Tus Tswv hais rau kuv tias, ‘Cia li sawv tsees nkag mus rau hauv lub nroog Damaxaka, yuav muaj neeg qhia rau koj paub txog txhua yam uas tu rau koj ua.’ Kuv tsis pom kev kiag li vim tus duab uas ci nplas rau kuv ntawd, mas cov uas nrog kuv ua ke thiaj tuav kuv tes coj kuv mus rau hauv lub nroog Damaxaka. “Muaj ib tug yawg npe hu ua Anania, nws yog ib tug coj Vajtswv kevcai nruj thiab muaj koob meej hauv cov Yudai uas nyob ntawd. Nws tuaj cuag kuv thiab los sawv ze ze hais tias, ‘Kwv Xolau 'e, cia li rov pom kev.’ Tamsim ntawd kuv txawm pom kev thiab pom nws. Nws hais tias, ‘Peb tej poj koob yawm txwv tus Vajtswv twb xaiv koj ua tus uas paub nws lub siab nyiam thiab pom tus uas Ncaj Ncees thiab hnov lub suab ntawm nws lub qhov ncauj, vim koj yuav ua nws tus timkhawv rau ib tsoom neeg txog tej uas koj tau pom thiab hnov lawd. Nimno koj tseem tos ua dabtsi? Cia li sawv tsees ua kevcai raus dej thiab tuav Yexus lub npe thov thiaj ntxuav tau koj lub txim pov tseg.’ “Thaum kuv rov los rau hauv Yeluxalees thiab tabtom thov Vajtswv hauv lub tuam tsev, kuv ua yog toog pom tus Tswv hais rau kuv tias, ‘Cia li maj tawm hauv Yeluxalees mus sai sai, vim lawv yuav tsis lees yuav koj tej lus timkhawv uas hais txog kuv.’ Kuv hais tias, ‘Tus Tswv, lawv paub zoo tias kuv ntes cov uas ntseeg koj hauv tej tsev sablaj coj mus kaw thiab muab nplawm. Thaum Xatefanau uas yog koj li timkhawv los ntshav kuv kuj sawv ntsug ze ntawd thiab pom zoo, thiab kuv tseem zov cov uas tua nws tej ris tsho.’ Mas tus Tswv hais rau kuv tias, ‘Cia li mus, rau qhov kuv yuav txib koj mus deb rau lwm haiv neeg.’ ” Lawv mloog Povlauj hais lus txog qhov no ces txawm qw nrov hais tias, “Tus neeg zoo li no cia li muab nws tua kom ploj hauv lub ntiajteb mus. Tsis tsim nyog cia nws muaj txojsia nyob lawm.” Thaum uas lawv tabtom qw thiab hle tej tsho los co thiab w hmoov av rau saum ntuj, tus thawj rog uas kav ib txhiab hais kom coj Povlauj mus rau hauv cov tub rog lub yeej thiab hais kom nug nws thiab muab nws nplawm thiaj paub tias lawv qw nkaug nws yog vim li cas. Thaum lawv muab hlua tawv khi Povlauj, nws txawm nug tus thawj uas kav ib puas leej uas sawv ze ntawd tias, “Qhov uas muab ib tug neeg Loos nplawm ua ntej uas tsis tau txiav txim raug cai lov?” Thaum tus thawj kav ib puas leej hnov li ntawd nws txawm mus hais rau tus thawj rog uas kav ib txhiab tias, “Koj yuav ua li cas? Rau qhov tus yawg ntawd yog neeg Loos.” Tus thawj uas kav ib txhiab txawm mus cuag Povlauj nug hais tias, “Cia li qhia kuv saib, koj yog neeg Loos lov?” Povlauj teb tias, “Yog lauj.” Tus thawj uas kav ib txhiab teb tias, “Kuv them nyiaj ntau thiaj ua tau neeg Loos.” Povlauj hais tias, “Kuv yeej yug los ua neeg Loos.” Cov uas yuav tshuaj Povlauj zaj txawm thim ntawm nws mus tamsid. Thaum tus thawj uas kav ib txhiab paub tias Povlauj yog neeg Loos, kuj ntshai vim nws twb muab Povlauj khi lawm. Hnub tom qab tus thawj uas kav ib txhiab xav paub tseeb tias cov Yudai kom Povlauj yog vim li cas, nws txawm muab Povlauj daws thiab hais kom cov pov thawj hlob thiab cov thawj sawvdaws mus sablaj ua ke thiab coj Povlauj mus sawv rau ntawm rooj sablaj. Povlauj ntsia ntsoov rau cov thawj uas tuaj sablaj ntawd thiab hais tias, “Cov kwvtij, kuv ruaj siab tias kuv xyaum zoo tab meeg Vajtswv lub xubntiag txog niaj hnub nimno.” Tus tuam pov thawj hlob Anania txawm hais kom cov neeg uas nyob ze ntaus Povlauj qhov ncauj. Povlauj thiaj hais rau nws tias, “Vajtswv yuav ntaus koj, koj yog lub phab ntsa uas luam hmoov zeb sib dawb paug xwb. Koj nyob lub rooj txiav txim rau kuv raws li kevcai los koj tseem hais kom lawv ntaus kuv, yog qhov uas ua txhaum kevcai lov?” Cov neeg uas sawv ntawd txawm hais tias, “Koj yuav hais lus saib tsis taus Vajtswv tus tuam pov thawj hlob thiab lov?” Povlauj txawm hais tias, “Cov kwvtij, kuv tsis paub tias nws yog tus tuam pov thawj hlob, rau qhov muaj lus sau cia hais tias, ‘Tsis txhob hais lus phem rau tus uas kav koj cov neeg.’ ” Thaum Povlauj pom tias lawv cov ib txhia yog Xadukai, ib txhia yog Falixai nws thiaj hais nrov rau hauv lub rooj sablaj tias, “Cov kwvtij, kuv yog ib tug Falixai, yog cov Falixai li tub. Qhov uas kuv raug txiav txim no vim yog kuv muaj chaw vam qhov uas ciaj sawv hauv qhov tuag rov los.” Thaum nws hais li ntawd cov Falixai thiab cov Xadukai txawm sib cav thiab lub rooj sablaj tawg ua ob pab, vim cov Xadukai hais tias tsis muaj qhov uas ciaj sawv hauv qhov tuag rov los, thiab tsis muaj tubtxib saum ntuj thiab tsis muaj ntsuj plig. Tiamsis cov Falixai ntseeg tias puavleej muaj. Ces txawm muaj lus sib cav nrov. Cov xibhwb qhia Vajtswv kevcai uas yog Falixai qee leej sawv tsees cav nrov hais tias, “Peb tsis pom tias tus no muaj kev txhaum. Yog tias ntsuj plig lossis tubtxib saum ntuj hais rau nws nev, nej yuav hais li cas?” Thaum sib cav loj heev tus thawj rog uas kav ib txhiab ntshai tsam Povlauj yuav raug lawv muab dua ua tej dwb daim, nws txawm hais kom cov tub rog mus txeeb Povlauj ntawm lawv coj mus rau hauv lub yeej lawm. Hmo ntawd tus Tswv los sawv ntawm Povlauj ib sab thiab hais tias, “Koj cia li ua siab tuab, vim koj tau ua timkhawv txog kuv hauv lub nroog Yeluxalees li cas lawm, koj yuav tsum ua timkhawv rau hauv lub nroog Loos ib yam li ntawd thiab.” Thaum kaj ntug cov Yudai ntaus tswvyim twv tsawm tias lawv yuav tsis noj tsis haus mus txog thaum tua tau Povlauj. Cov uas ntaus tswvyim ua phem ntawd muaj coob dua plaub caug leej. Lawv txawm mus cuag cov pov thawj hlob thiab cov kev txwj laus thiab hais tias, “Peb twv tsawm tawv hais tias peb yuav tsis noj ib yam dabtsi txog thaum tua tau Povlauj. Vim li no, nimno thov nej thiab cov thawj lub rooj sablaj hais rau tus thawj rog uas kav ib txhiab kom coj Povlauj los cuag nej. Nej ua txuj yuav ua tib zoo nug nws zaj txhua txhua mas peb npaj txhij yuav muab nws tua ua ntej uas nws tsis tau tuaj txog.” Tiamsis Povlauj tus muam li tub twb paub txog qhov uas lawv yuav zov tua ntawd, nws thiaj nkag mus rau hauv cov tub rog lub yeej thiab qhia Povlauj paub. Povlauj thiaj hu ib tug thawj uas kav ib puas leej los hais tias, “Thov coj tus hluas no mus rau tus thawj uas kav ib txhiab, vim nws muaj lus yuav qhia rau tus thawj paub.” Tus thawj uas kav ib puas txawm coj nws mus cuag tus thawj uas kav ib txhiab thiab hais tias, “Tus Povlauj uas raug kaw hu kuv thiab thov kuv coj tus hluas no tuaj cuag koj vim nws muaj lus uas yuav qhia rau koj paub.” Tus thawj uas kav ib txhiab thiaj tuav tus hluas ntawd tes coj mus rau ib qho mas nug nws twjywm tias, “Koj muaj dabtsi yuav hais rau kuv?” Tus hluas hais tias, “Cov Yudai hais hum tias tagkis yuav thov koj coj Povlauj mus rau hauv lawv lub rooj sablaj, ua txuj yuav nug nws zaj txhua txhua heev dua qub. Tiamsis thov tsis txhob mloog lawv hais, rau qhov lawv twb muaj coob dua plaub caug leej zov kev tos tua Povlauj thiab twv tsawm tias yuav tsis noj tsis haus mus txog tua tau Povlauj. Tamsim no lawv npaj txhij lawm tos koj tso ncauj xwb.” Tus thawj uas kav ib txhiab txawm tso tus hluas ntawd mus thiab nkaw lus rau nws tias, “Tsis txhob qhia rau leejtwg paub tias koj tuaj qhia zaj no rau kuv.” Tus thawj rog uas kav ib txhiab txawm hu ob tug thawj uas kav ib puas leej los thiab hais tias, “Hmo no thaum cuaj teev cia li npaj ob puas leej tub rog thiab xya caum leej tub rog caij nees thiab ob puas leej tub rog tuav hmuv yuav mus rau lub moos Xixaleya. Thiab npaj nees rau Povlauj caij xa nws mus tso siab plhuav kom txog tus tswv xeev Feli.” Tus thawj rog uas kav ib txhiab sau tsab ntawv li no mus, “Khaunti‑au Lixia hais rau tus tswv xeev Feli uas saib hlob, nyob zoo. Cov Yudai ntes tus no cia twb yuav muab nws tua, tiamsis kuv coj tub rog mus cawm tau nws vim kuv paub tias nws yog neeg Loos. Kuv xav paub lub keeb uas cov Yudai kom nws kuv thiaj coj nws mus rau hauv lawv cov thawj lub rooj sablaj. Kuv pom tias qhov uas nws raug kom vim yog tej teeb meem ntsig txog cov Yudai tej kevcai, tsis muaj ib qho txhaum uas txaus nws tuag lossis muab kaw. Thaum kuv paub tias muaj tswvyim phem yuav txov nws, kuv thiaj xa nws tuaj cuag koj tamsid thiab hais rau cov yeej kom tuaj kom nws rau ntawm koj.” Yog li no cov tub rog thiaj li coj Povlauj mus hmo ntuj rau lub moos Athipati raws li uas hais. Hnub tom qab lawv cia cov tub rog caij nees xa Povlauj mus mas cov tub rog mus kotaw rov los rau hauv lub yeej. Thaum cov tub rog caij nees mus txog lub moos Xixaleya lawm lawv txawm cev tsab ntawv rau tus tswv xeev thiab muab Povlauj cob rau nws. Thaum tus tswv xeev nyeem tsab ntawv lawm nws txawm nug tias Povlauj tuaj lub xeev twg tuaj. Thaum nws paub tias Povlauj tuaj lub xeev Khilikia tuaj, nws txawm hais tias, “Cia yeej kom tuaj txog, kuv li mloog koj peev lus.” Nws txawm hais kom zov Povlauj zoo rau hauv lub tsev Plitholia. Dhau tsib hnub tus tuam pov thawj hlob Anania thiab cov kev txwj laus qee leej thiab ib tug txiv lus hais plaub npe hu ua Thawthula tuaj txog. Lawv txawm mus kom Povlauj rau tus tswv xeev. Thaum hu Povlauj los txog, Thawthula pib kom hais tias, “Feli uas saib hlob, peb tau nyob kaj siab lug ntev vim yog muaj koj, thiab peb haiv neeg tau kev vam meej vim yog qhov uas koj xam pom deb, mas peb ua koj tsaug thiab nco koj tshav ntuj rau txhua fab txhua qhov. Tiamsis tsis xav nkim koj lub sijhawm, kuv thov koj tsa muag zaj saib peb es mloog peb hais ib nyuag pliag. Peb pom tias tus neeg no yog ib tug xeeb plaub thiab pheej tsim kev kub ntxhov rau cov Yudai thoob plaws ntiajteb thiab yog ib tug thawj coj hauv cov Naxale. Thiab nws yooj xeeb ua qias puas tsuas lub tuam tsev, peb thiaj ntes nws. Yog koj tshuaj nws koj yuav paub txhua yam uas peb kom nws.” Cov Yudai ua ib tsaug lus hais tias muaj tseeb li ntawd. Thaum tus tswv xeev ncaws hau kom Povlauj hais, Povlauj txawm hais tias, “Vim kuv paub tias koj ua tus tu plaub rau lub tebchaws no ntau xyoo los lawm kuv thiaj zoo siab hlo hais daws kuv zaj. Koj yeej tshuaj tau hais tias, txij thaum kuv mus pe hawm Vajtswv hauv lub nroog Yeluxalees ntawd los tsis tau dhau kaum ob hnub. Lawv yeej tsis pom kuv nrog leejtwg sib cam rau hauv lub tuam tsev lossis tshum cov neeg kom ntxhov rau hauv tej tsev sablaj lossis hauv lub nroog li. Tej uas lawv tabtom kom kuv no lawv nrhiav tsis tau ib qho keeb puam uas tseeb kiag li. Tiamsis kuv yeem lees li no rau koj tias, kuv ua koom tu peb tej poj koob yawm txwv tus Vajtswv raws li Txojkev tshiab no uas lawv hais tias yog kev ntseeg cuav. Kuv ntseeg txhua lo lus raws txoj kevcai thiab tej lus uas sau hauv cov xibhwb cev Vajtswv lus phau ntawv. Kuv muaj siab vam rau hauv Vajtswv uas lawv vam ib yam nkaus, uas hais tias cov ncaj ncees thiab cov tsis ncaj puavleej yuav sawv hauv qhov tuag rov los. Vim li no kuv thiaj siv zog ua lub siab ncaj xyaum txhua lub sijhawm kom hum Vajtswv thiab neeg lub siab. Dhau los ntau xyoo kuv coj nyiaj tuaj pab kuv haiv neeg thiab tuaj xyeem qhov txhia chaw rau Vajtswv. Lub sijhawm ntawd lawv kuj pom kuv nyob hauv lub tuam tsev, yog thaum kuv twb ua kevcai ntxuav lawm thiab tsis muaj neeg nrog kuv ua ke thiab yeej tsis muaj kev kub ntxhov kiag li. Tiamsis cov Yudai qee leej tuaj hauv lub xeev Axia tuaj, mas tsim nyog lawv cov ntawd tuaj rau ntawm koj xubntiag no thiab yog lawv muaj dabtsi, lawv cia li kom kuv. Lossis cia cov neeg uas nyob ntawm no hais tej uas lawv pom tias kuv ua txhaum rau thaum kuv nyob tab meeg rau ntawm cov thawj lub rooj sablaj, tsuas yog tib qhov uas thaum kuv sawv hauv lawv nruab nrab kuv qw hais tias, ‘Qhov uas kuv raug txiav txim tab meeg nej hnub no vim yog qhov uas ciaj sawv hauv qhov tuag rov los.’ ” Tiamsis Feli paub txog Txojkev ntawd zoo, txawm sej rooj plaub ntawd ntxiv mus, nws hais tias, “Thaum Lixia uas yog tus thawj rog kav ib txhiab tuaj txog, kuv li tu koj rooj plaub.” Nws txawm hais kom tus thawj rog uas kav ib puas leej zov Povlauj ntxiv mus tiamsis tsis ua nruj thiab tsis txwv nws cov kwvluag tuaj tu nws. Dhau ob peb hnub Feli thiab nws tus pojniam Ruxila uas yog neeg Yudai tuaj. Nws txawm hais kom hu Povlauj los thiab mloog Povlauj hais txog qhov uas ntseeg Yexus Khetos. Thaum Povlauj hais txog txojkev ncaj ncees thiab qhov uas tswj yus lub siab thiab qhov uas yuav raug txiav txim yav tom hauv ntej, Feli kuj ntshai thiab hais tias, “Nimno koj cia li mus, yog muaj sijhawm kuv yuav hu koj rov tuaj.” Tamsim ntawd Feli kuj xav tias Povlauj yuav muab nyiaj xiab nws. Vim li no nws thiaj pheej hu Povlauj los nrog nws tham. Dhau ob xyoos lawm Paukia Fexata los nyob Feli chaw. Feli xav ua zoo rau cov Yudai nws txawm cia Povlauj raug kaw hauv tsev lojfaj ntxiv mus. Thaum Fexata tuaj txog hauv lub xeev tau peb hnub lawm nws txawm tawm hauv lub moos Xixaleya mus rau lub nroog Yeluxalees. Cov pov thawj hlob thiab Yudai cov thawj tuaj kom Povlauj rau nws, thiab thov nws. Lawv thov kom nws xa Povlauj tuaj rau hauv Yeluxalees, vim lawv ntaus tswvyim yuav tos kev tua Povlauj. Fexata txawm teb tias, “Povlauj tseem raug kaw rau hauv Xixaleya thiab tshuav tsis ntev kuv yuav rov mus rau qhov ntawd.” Thiab nws hais tias, “Vim li no, nej cov uas ua thawj cia li nrog kuv mus. Yog Povlauj ua txhaum txoj twg, lawv cia li kom nws qhov ntawd.” Thaum Fexata so hauv lawv tsis dhau yim hnub lossis kaum hnub, nws kuj mus rau lub moos Xixaleya. Mas hnub tom qab nws zaum saum lub rooj tu plaub hais kom coj Povlauj los. Thaum Povlauj los txog, cov Yudai uas tuaj ntawm Yeluxalees kuj sawv vij Povlauj, thiab hais ntau pwm lus hnyav kom Povlauj tiamsis tej lus ntawd tsis muaj keeb puam tseeb. Povlauj thiaj hais daws nws zaj tias, “Kuv tsis tau ua dabtsi txhaum cov Yudai txoj kevcai lossis lub tuam tsev lossis Xixa.” Fexata xav ua zoo rau cov Yudai thiaj hais rau Povlauj tias, “Koj puas xav mus rau hauv lub nroog Yeluxalees es kuv li tu koj rooj plaub qhov ntawd?” Tiamsis Povlauj hais tias, “Kuv tabtom sawv ntsug ntawm Xixa lub rooj tu plaub, yog lub chaw uas tsim nyog tu kuv rooj plaub. Koj yeej paub zoo tias kuv tsis ua dabtsi txhaum rau cov Yudai. Yog kuv tau ua txhaum thiab ua dabtsi uas tsim nyog raug lub txim tuag, kuv kuj yeem tuag. Yog qhov uas lawv kom kuv tsis muaj tseeb, mas tsis muaj leejtwg muaj hwjchim muab kuv cob tau rau lawv. Kuv thov mus hais plaub ntawm Xixa.” Thaum Fexata nrog nws cov tuav haujlwm sablaj lawm txawm teb tias, “Koj twb thov mus hais ntawm Xixa, mas koj yuav tau mus cuag Xixa.” Dhau ntau hnub lawm vajntxwv Akipa thiab nws tus muam Npawnij tuaj tsham Fexata ntawm lub moos Xixaleya. Thaum so qhov ntawd ntau hnub lawm, Fexata txawm piav Povlauj tshaj plaub rau vajntxwv mloog hais tias, “Muaj ib tug yawg raug Feli kaw cia. Mas thaum kuv mus rau hauv Yeluxalees cov pov thawj hlob thiab Yudai cov kev txwj laus tuaj kom thov kuv rau txim rau tus ntawd. Kuv thiaj teb tias tsis yog Loos li kevcai uas yuav muab tus pem kom cob rau cov yeej kom ua ntej uas ob tog tsis tau sib ntsib thiab tus pem kom muaj sijhawm hais daws nws zaj txog tej uas lawv kom nws. Vim li no thaum lawv tuaj txhij rau ntawm no lawm kuv tsis tos ntev, tagkis tom qab kuv zaum saum lub rooj tu plaub thiab hais kom coj tus yawg ntawd los. Thaum cov yeej kom sawv lawv tsis kom tias nws ua txhaum yam li kuv xav, tiamsis tsuas yog lawv sib cam txog lawv tej kev ntseeg tej qhov xwb thiab hais txog ib tug yawg npe hu ua Yexus uas twb tuag lawm tiamsis Povlauj hais khov kho tias nws muaj txojsia nyob. Thaum kuv tsis pom qab xav yuav tshuaj zaj teeb meem ntawd li cas, kuv txawm nug Povlauj saib nws puas xav mus rau hauv Yeluxalees li tu tshaj plaub rau qhov ntawd. Tiamsis Povlauj thov kom muab nws kaw cia tos huabtais txiav txim, kuv thiaj muab nws kaw cia mus txog thaum kuv xa tau nws mus cuag Xixa.” Akipa txawm hais rau Fexata tias, “Kuv xav mloog tus yawg ntawd hais thiab.” Fexata hais tias, “Tagkis koj yuav tau hnov nws hais.” Tagkis tom qab Akipa thiab Npawnij hnav meej mom txhij zog tuaj rau hauv chav tsev tu plaub nrog cov thawj tub rog uas kav ib txhiab thiab cov neeg tseem ceeb hauv lub moos ntawd ua ke. Ces Fexata txawm hais kom coj Povlauj los. Fexata hais tias, “Vajntxwv Akipa thiab nej sawvdaws uas tuaj ua ke ntawm no, nej pom tus yawg no uas cov Yudai sawvdaws tuaj thov kuv hauv lub nroog Yeluxalees, thiab ntawm no lawv tau qw hais tias tsis tsim nyog cia nws muaj txojsia nyob ntxiv lawm. Tiamsis kuv pom tias nws tsis tau ua ib qho txhaum uas txaus tuag, mas thaum nws thov mus hais plaub rau ntawm huabtais, kuv thiaj txiav txim siab yuav xa nws mus. Tiamsis kuv tsis muaj tus no li keeb puam meej uas yuav xa mus rau kuv tus tswv. Vim li no kuv thiaj coj nws los rau ntawm nej xubntiag thiab qhov loj yog los rau ntawm vajntxwv Akipa koj xubntiag, vam hais tias thaum muab nws tshuaj tag lawm yuav muaj ntsiab lus sau tau thiab. Kuv xav tias qhov uas xa ib tug raug txim mus tiamsis tsis qhia tej keeb puam uas kom mus kuj yog tsis thoob tsib.” Akipa hais rau Povlauj tias. “Kuv tso cai koj hais daws koj zaj.” Povlauj txawm tsa tes hais daws nws zaj tias, “Vajntxwv Akipa, kuv pom tias hnub no muaj zoo sijhawm uas tau nyob ntawm koj xubntiag hais daws tej lus uas cov Yudai kom huvsi, mas qhov loj yog qhov uas koj yeej paub cov Yudai tej kevcai thiab tej teeb meem. Yog li no thov koj ua siab ntev mloog kuv hais. “Cov Yudai sawvdaws yeej paub kuv lub neej txij thaum yau los thiab paub thaum chiv thawj kuv yeej nrog kuv haiv neeg nyob thiab nyob hauv lub nroog Yeluxalees. Lawv yeej paub kuv ntev los lawm. Yog lawv yeem ua timkhawv lawv yeej ua tau hais tias kuv ua lub neej raws li pab Falixai uas coj kevcai nruj kawg. Qhov uas nimno kuv tau los sawv rau koj txiav txim twb yog qhov uas muaj siab vam rau tej lus uas Vajtswv cog tseg rau peb tej poj koob yawm txwv. Peb kaum ob xeem ua koom tu Vajtswv kawg dag kawg zog nruab hnub hmo ntuj vim muaj siab vam yuav tau tej lus cog tseg ntawd. Au vajntxwv, vim yog txojkev vam no cov Yudai thiaj kom kuv. Ua cas nej xav tias qhov uas Vajtswv tsa neeg tuag ciaj sawv rov los ntawd yog zaj uas ntseeg tsis tau? “Kuv txeev xav hauv kuv lub siab tias kuv yuav tsum ua ntau yam tawm tsam Yexus uas yog neeg Naxale lub npe. Kuv twb ua tej no rau hauv Yeluxalees. Thaum kuv tau hwjchim ntawm cov pov thawj hlob lawm kuv ntes cov xov dawb coob coob kaw rau hauv tsev lojfaj, thiab thaum lawv raug tua pov tseg kuv kuj pom zoo. Kuv pheej rau txim rau lawv tsis tseg hauv txhua lub tsev sablaj thiab quab yuam lawv hais lus tuam mom Vajtswv. Kuv npau taws rau lawv heev kuv thiaj caum mus tsim txom lawv rau hauv lwm tebchaws tej moos. “Yog li ntawd thaum kuv tau hwjchim ntawm cov pov thawj hlob thiab lawv txib kuv mus, kuv txawm taug kev mus rau lub nroog Damaxaka. Au vajntxwv, thaum tav su kuv tabtom taug kev mus kuv txawm pom ib tug duab ci heev dua lub hnub tsom saum ntuj los vij nkaus kuv thiab cov neeg uas nrog kuv mus. Thaum peb sawvdaws ntog tag rau hauv pem teb kuv hnov ib lub suab hais rau kuv ua lus Henplais tias, ‘Xolau, Xolau 'e, ua cas koj tsim txom kuv. Qhov uas koj tuam tus hmuv kuj mob koj tus kheej xwb.’ Kuv txawm hais tias, ‘Tus Tswv, koj yog leejtwg?’ Tus Tswv hais tias, ‘Kuv yog Yexus uas koj tabtom tsim txom. Cia li sawv tsees sawv ntsug vim tias kuv los tshwm rau koj pom, yuav tsa koj ua tub qhe thiab ua timkhawv txog tej xwm txheej uas koj tau pom kuv ua thiab tej uas kuv yuav ua tshwm rau koj. Kuv yuav cawm koj dim hauv koj haiv neeg thiab hauv lwm haiv neeg uas kuv txib koj mus ntawd. Koj yuav mus qheb lawv lub qhov muag kom lawv tig ntawm txojkev tsaus ntuj los cuag txojkev kaj, thiab tig ntawm Xatas lub hwjchim los cuag Vajtswv, lawv thiaj tau txais kev zam txim thiab muaj feem nrog cov uas twb raug muab cais ua dawb huv vim yog ntseeg kuv nyob ua ke.’ “Au vajntxwv Akipa, vim li no kuv thiaj tsis tawv zaj yug toos uas los saum ntuj los, tiamsis kuv xub piav rau cov uas nyob Damaxaka paub li piav rau hauv Yeluxalees thiab thoob plaws lub xeev Yudia thiab piav rau lwm haiv neeg kom lawv ntxeev dua siab tshiab thiab tig los cuag Vajtswv thiab ua lub neej phim qhov uas lawv ntxeev dua siab tshiab. Vim li no cov Yudai thiaj ntes kuv hauv lub tuam tsev thiab yooj xeeb yuav tua kuv pov tseg. Tiamsis vim Vajtswv pab kuv los txog niaj hnub nimno kuv thiaj tau los sawv ntawm no ua timkhawv rau cov hlob cov yau. Kuv tsuas hais txog tej uas cov xibhwb cev Vajtswv lus thiab Mauxe hais cia tias yuav tshwm los xwb, yog qhov uas tus Kheto yuav tsum raug kev tsim txom thiab qhov uas nws yog thawj tug uas ciaj sawv hauv qhov tuag rov los nws thiaj qhia txojkev kaj rau cov Yudai thiab lwm haiv neeg.” Thaum Povlauj tabtom hais daws nws zaj ntawd, Fexata txawm qw nrov hais tias, “Povlauj, koj vwm lawm lauj. Koj kawm paub txujci ntau ua rau koj vwm.” Tiamsis Povlauj hais tias, “Fexata uas saib hlob, kuv tsis vwm li, kuv hais tseeb thiab hais lus feeb meej. Vajntxwv yeej paub txog tej no, kuv thiaj muaj siab tuab hais rau nws, vim kuv ntseeg tias tej xwm txheej no tsis muaj ib yam twg uas nws tsis pom, rau qhov tej no tsis tau ua nraim nkoos. Vajntxwv Akipa, koj puas ntseeg tej lus uas cov xibhwb cev Vajtswv lus hais? Kuv yeej paub tias koj ntseeg.” Akipa hais rau Povlauj tias, “Koj yuav yaum kuv los ua Khixatia sai sai no lov?” Povlauj hais tias, “Tsis hais qeeb los sai kuv thov Vajtswv tias tsis yog koj tib leeg xwb tiamsis txhua tus uas hnub no hnov kuv hais yuav tau ua ib yam li kuv tsuas yog tseg tsis txhob raug saw hlau khi li kuv no xwb.” Ces vajntxwv thiab tus tswv xeev thiab Npawnij thiab sawvdaws uas nyob ntawd txawm sawv pes tsees. Thaum lawv tawm mus lawv txawm sib hais tias, “Tus yawg no tsis tau ua ib yam txhaum uas tsim nyog muab rau txim tuag lossis muab kaw.” Akipa txawm hais rau Fexata tias, “Yog tus no tsis tau thov cia mus hais kom txog Xixa, ces muab nws tso kuj tau.” Thaum txiav txim siab tias peb yuav nce nkoj mus rau Ithali tebchaws, lawv txawm muab Povlauj thiab lwm tus uas raug txim cob rau tus thawj rog uas kav ib puas leej hauv Xixa pab tub rog npe hu ua Yulia. Peb thiaj nce lub nkoj uas los ntawm lub moos Alamithiyu tabtom yuav tawm mus rau tej moos hauv lub xeev Axia ntawm ntug hiavtxwv. Peb txawm tawm mus mas Alithakha uas yog neeg Makhedaunia tuaj hauv lub moos Thexalaunika tuaj nrog peb ua ke mus thiab. Hnub tom qab peb los nres ntawm lub nroog Xaidoo. Yulia hlub Povlauj thiaj kheev Povlauj mus xyuas nws cov kwvluag xwv lawv thiaj tu tau nws. Thaum peb caij nkoj tawm qhov ntawd mus, peb txawm lug lub koog povtxwv Xaipla sab uas nraim cua mus vim cua ntsawj tom hauv ntej tuaj. Thaum peb hla hiavtxwv uas nyob ntawm lub xeev Khilikia thiab lub xeev Pafilia, peb txawm tuaj txog lub moos Mila uas nyob hauv lub xeev Likia. Hauv lub moos ntawd tus thawj uas kav ib puas leej nrhiav tau ib lub nkoj txwg uas tuaj lub nroog Alexadia tuaj tabtom yuav mus rau Ithali tebchaws, nws txawm kom peb nce lub nkoj ntawd. Peb caij lub nkoj ntawd mus qeeb qeeb ntau hnub mas ceeblaj mus txog lub moos Khanida kawg. Thaum tsav nkoj kwm cua tsis taus lawm, peb txawm lug lub koog povtxwv Khete sab uas nraim cua mus ntawm ceg kaum uas hu ua Xamaune. Ceeblaj tsav nkoj mus npuas lub koog povtxwv, peb mus txog ib qho chaw uas hu ua Chaw Nres Nkoj Zoo Nkauj uas nyob ze lub moos Laxia. Vim yog nkim sijhawm ntau thiab tsis tso siab caij nkoj vim twb dhau lub sijhawm ua kevcai yoo mov lawm, Povlauj txawm ntuas lawv, thiab hais tias, “Kwvtij sawvdaws, kuv pom tias qhov uas caij nkoj zaum no yuav raug xwm txheej phem thiab yuav muaj kev puas xwm, tsis yog tej nra thiab lub nkoj xwb, peb txojsia los yuav puas thiab.” Tiamsis tus thawj rog uas kav ib puas leej ntseeg tus thawj uas tsav nkoj thiab tus tswv nkoj heev dua li ntseeg Povlauj tej lus. Vim lub tshav nres nkoj ntawd tsis zoo nres rau lub caij ntuj no, cov neeg feem coob txiav txim siab tias yuav tsav nkoj tawm qhov ntawd mus vam hais tias yuav mus kom txog lub moos Fini uas yog lub chaw nres nkoj hauv lub koog povtxwv Khete uas tig rau qaum teb hnub poob thiab tig rau sab qab teb hnub poob, mas yuav nyob qhov ntawd kom dhau lub caij ntuj no. Thaum cua maj mam ntsawj sab nram tuaj, lawv kuj xav tias yuav mus tau raws li lawv txiav txim siab ntawd, lawv txawm rho tog hlau nres nkoj los thiab tsav nkoj mus raws ntug koog povtxwv Khete. Tiamsis mus tsis ntev txawm muaj cua daj cua dub uas hu tias “Cua qaum teb sab hnub tuaj” tuaj ntsawj saum nruab nqhuab tuaj raug peb. Thaum lub nkoj raug cua nplawm thiab tig lub nkoj mus tiv cua tsis taus lawm, peb txawm muab lub nkoj tig mus raws cua. Thaum mus rau ntawm lub koog povtxwv me me hu ua Khauda sab nraim cua, peb txawm ceeblaj muab lub nkoj me khi tau cia. Thaum muab lub nkoj me nqa los lawm, lawv txawm muab hlua rig zawm lub nkoj loj ceev ceev. Vim lawv ntshai tsam lub nkoj mus nkaug tej xuab zeb ntawm ntug nqhuab Xawthi, lawv thiaj muab daim ntaub txo tso lub nkoj mus li cua ntsawj. Hnub tom qab lawv pib thau tej nra uas lawv thauj pov tseg vim peb raug cua daj cua dub heev. Hnub uas peb lawv txawm xuas tes thau tej twj cuab yeej uas siv hauv lub nkoj pov tseg. Thaum tsis pom lub hnub lossis tej hnub qub ntau hnub lawm thiab tseem raug cua daj cua dub heev, peb tsis muaj chaw vam tias peb yuav dim lawm. Lawv tsis tau noj mov ntev los lawm Povlauj txawm los sawv hauv lawv nruab nrab hais tias, “Cov kwvtij 'e, tsim nyog nej mloog kuv hais es tsis txhob tawm hauv lub koog povtxwv Khete ces nej twb tsis raug puas xwm thiab qhov txhia chaw piam tag. Nimno kuv thov kom nej ua lub siab loj rau qhov nej yuav tsis muaj ib tug piam txojsia li tsuas yog lub nkoj piam xwb. Rau qhov nag hmo tus Vajtswv uas xaiv kuv thiab kuv ua koom tu, nws li ib tug tubtxib saum ntuj los sawv ze ntawm kuv thiab hais tias, ‘Povlauj 'e, tsis txhob ntshai. Koj yuav tsum sawv ntawm Xixa xubntiag thiab Vajtswv saib rau koj thiaj pub kom txhua tus uas nrog koj nyob ua ke hauv nkoj dim txojsia.’ Vim li no kwvtij 'e, nej cia li zoo siab rau qhov kuv tso siab rau Vajtswv tias yuav muaj xwm txheej raws li uas nws hais rau kuv lawm. Tiamsis peb lub nkoj yuav tsum mus nkaug rau ib lub koog povtxwv.” Txog hmo kaum plaub uas peb tabtom ntab saum nplaim dej hiavtxwv Aria, kwvlam ib tag hmo cov tub nkoj xav hais tias twb los ze nruab nqhuab lawm. Lawv txawm ntsuas saib mas dej tob li nees nkaum daj, dhau mentsis lawm rov qab ntsuas dua mas tob kaum tsib daj. Lawv ntshai tsam yuav txam raug pob zeb tim ntug, lawv txawm tso plaub tog hlau nres nkoj tom tw thiab thov kom kaj ntug tuaj. Thaum cov tub nkoj tabtom nrhiav kev yuav khiav kom dim ntawm lub nkoj, thiab muab lub nkoj me tso dauv rau hauv hiavtxwv, ua txuj yuav tso tog hlau nres nkoj tom taubhau, Povlauj txawm hais rau tus thawj rog uas kav ib puas leej thiab cov tub rog hais tias, “Yog cov neeg no tsis nyob hauv lub nkoj lawm, nej yuav tsis dim li.” Cov tub rog thiaj txiav cov hlua uas khi lub nkoj me tso lub nkoj me ntab mus lawm. Thaum yuav kaj ntug Povlauj cheem kom sawvdaws noj mov thiab hais tias, “Hnub no tau kaum plaub hnub lawm uas nej pheej tos rawv yoo mov tsis tau noj ib yam dabtsi li. Vim li no kuv thov kom nej noj mov kom thiaj muaj txojsia nyob tau, rau qhov nej cov ib txog plaubhau los yeej yuav tsis ploj li.” Thaum hais li ntawd lawm nws txawm muab ncuav los ua Vajtswv tsaug tab meeg lawv sawvdaws, thiab muab ntais noj. Txhua tus lub siab thiaj loj tuaj thiab lawv kuj noj mov thiab. (Peb cov uas nyob hauv lub nkoj huvsi muaj ob puas xya caum rau leej.) Thaum lawv noj txaus lawm, lawv txawm muab tej mog pov rau hauv dej hiavtxwv ua rau lub nkoj thiaj li sib tuaj. Thaum kaj ntug lawm lawv kuj tsis paub tias ntug nqhuab ntawd yog lub tebchaws twg, tiamsis lawv pom ib ceg hiavtxwv uas muaj xuab zeb, ces txawm hais hum tias yog ua tau ces cia lub nkoj mus nkaug cov xuab zeb ntawd. Lawv txawm txiav tej hlua ntawm tej tog hlau nres nkoj tso tseg rau hauv hiavtxwv, thiab daws tej hlua uas khi tej duav nkoj thiab tsa daim ntaub tom hauv nkoj kom raug cua mas lawv txawm ncaj nraim mus rau tim ntug. Thaum los txog ib qhov uas dej hiavtxwv ntiav zog lub nkoj txawm los nkaug rau hauv cov xuab zeb rhais ruaj ruaj li, yav tw nkoj thiaj raug tej nthwv dej uas ntas muab nplawm tawg tag. Cov tub rog xav tua cov neeg raug txim ntshai tsam lawv ua luam dej khiav dim lawm. Tiamsis tus thawj uas kav ib puas leej xav cawm Povlauj nws thiaj txwv tsis kheev lawv ua raws li lawv xav ntawd. Nws hais rau cov uas txawj ua luam dej kom caws qia rau hauv dej mus rau tim ntug ua ntej, thiab kom cov uas tseem tshuav tuav tej daim txiag thiab tej yam uas ntais ntawm lub nkoj los luam mus. Yog li no mas txhua tus puavleej dim mus txog tim ntug. Thaum peb dim tag lawm peb li paub tias lub koog povtxwv ntawd hu ua Melita. Cov neeg hauv lub tebchaws hlub peb heev. Lawv rauv taws tos txais peb rau qhov nag los thiab no heev. Povlauj mus khaws ib tsuag taws los rauv rau hauv qhov cub, ces muaj ib tug nab muaj taug txawm tawm hauv tsuag taws los vim yog kub mas tom Povlauj txhais tes. Thaum cov neeg hauv lub tebchaws ntawd pom tus nab dai vias ntawm Povlauj txhais tes, lawv sib hais tias, “Tus no yeej yog ib tug tua neeg tiag tiag li. Txawm yog nws dim hauv hiavtxwv los lawm, los tus uas txiav txim ncaj tsis pub nws muaj txojsia nyob.” Tiamsis Povlauj txawm tib ncho tus nab poob rau hauv qhov cub thiab nws tsis ua li cas kiag li. Lawv tos ntsoov saib nws yuav o o lossis ntog kiag tuag tamsid. Tiamsis thaum lawv tos ntev lawm kuj tsis pom nws ua li cas, lawv txawm hloov kev xav hais tias nws yog ib tug timtswv. Tus thawj uas kav lub tebchaws ntawd npe hu ua Pulia muaj teb nyob ze ntawd. Nws tos txais peb thiab yug peb zoo tau peb hnub. Pulia txiv tabtom ua npaws thiab raws plab, mas Povlauj mus saib nws thiab thov Vajtswv thiab muab tes npuab rau saum nws kho nws zoo. Thaum ua li ntawd lawm cov neeg muaj mob kis nyob hauv lub koog povtxwv ntawd txawm tuaj cuag nws mas nws kuj kho lawv tej mob zoo. Lawv kuj pub tshav ntuj rau peb ntau yam. Thaum peb yuav caij nkoj tawm mus, lawv kuj coj tej uas peb cheem tsum tuaj pub rau peb. Dhau peb lub hli peb li caij ib lub nkoj uas tuaj nres tag lub caij ntuj no rau hauv koog povtxwv ntawd tawm mus. Lub nkoj ntawd yog tuaj ntawm lub nroog Alexadia tuaj, thiab muaj ob tug dab mlom ntxaib rau ntawm hauv nkoj. Peb mus nres so rau ntawm lub moos Xailakhu tau peb hnub. Thaum tawm qhov ntawd peb mus txog lub moos Leki‑u. Hnub tom qab cua ntsawj sab nrad tuaj mas hnub uas ob peb mus txog lub moos Puthi‑auli. Peb ntsib cov kwvtij qhov ntawd thiab lawv hu peb mus so hauv lawv tau xya hnub. Yog li uas hais no peb thiaj mus txog lub nroog Loos. Thaum cov kwvtij uas nyob hauv lub nroog Loos hnov xov, lawv txawm tuaj tos peb ntawm lub Kiab Apia thiab ntawm Peb Lub Tsev So. Thaum Povlauj pom lawv lawm nws txawm ua Vajtswv tsaug thiab txhawb tau nws lub zog. Thaum peb tuaj txog lub nroog Loos, nom tswv tso cai rau Povlauj nyob ib cag thiab muaj ib tug tub rog zov. Dhau peb hnub lawm, Povlauj txawm hu Yudai cov thawj tuaj txoos ua ke. Thaum tuaj txhij lawd, nws hais rau lawv tias, “Cov kwvtij, txawm yog kuv tsis tau ua txhaum rau peb haiv neeg lossis ua txhaum peb tej poj koob yawm txwv tej kevcai los kuv tseem raug ntes hauv lub nroog Yeluxalees thiab raug muab cob rau hauv cov Loos txhais tes. Thaum lawv tshuaj kuv zaj lawm lawv xav muab kuv tso vim tsis muaj keeb puam dabtsi uas yuav rau txim tuag rau kuv. Thaum cov Yudai txwv tav, kuv thiaj li yuav tsum thov cia hais mus txog Xixa, tiamsis kuv tsis muaj ib zaj dabtsi yuav kom kuv haiv neeg. Vim li no, kuv thiaj hu nej tuaj xwv thiaj ntsib nej thiab nrog nej hais lus. Qhov uas kuv raug saw hlau khi no twb yog tim cov Yixayee txojkev vam.” Lawv hais rau nws tias, “Peb tsis tau txais tsab ntawv uas xa hauv lub xeev Yudia tuaj hais txog koj thiab tsis muaj ib tug kwvtij twg coj xov tuaj hais phem txog koj. Mas peb xav hnov koj hais saib koj xav li cas, vim peb paub tias cov uas ntseeg Txojkev no raug luag tawm tsam txhua qhov.” Thaum lawv teem dua ib hnub tuaj ntsib nws, muaj neeg coob tuaj cuag nws hauv nws lub chaw nyob. Nws txawm qhia lawv txij thaum tagkis mus txog tsaus ntuj. Nws ua timkhawv txog Vajtswv lub tebchaws thiab muab tej lus hauv Mauxe phau kevcai thiab hauv cov xibhwb cev Vajtswv lus phau ntawv los qhia yaum kom lawv los ntseeg Yexus. Tej lus uas nws hais ntawd muaj qee leej ntseeg, muaj qee leej tsis ntseeg. Ces lawv txawm tsis sib hum lawm. Thaum lawv yuav sib ncaim mus, Povlauj hais dua ib nqes ntxiv tias, “Vaj Ntsuj Plig dawb huv hais raug lawm qhov uas nws kom xibhwb Yaxaya uas cev lus hais rau nej tej poj koob yawm txwv tias, “ ‘Cia li mus thiab hais rau cov neeg no tias, “ ‘ “Nej yeej yuav mloog tag mloog thiab los tsis nkag siab, nej yuav saib tag saib thiab los tsis pom.” Vim haiv neeg no lub siab tawv, thiab lawv ua ntsej lag muag dig thiab lawv kaw lawv lub qhov muag, tsam ces lawv lub qhov muag ho pom, thiab lawv lub qhov ntsej ho hnov, thiab lawv lub siab yuav to taub, ces lawv yuav tig rov los cuag kuv kho lawv kom zoo.’ Vim li no nej cia li paub tias Vajtswv txojkev dim no thiaj raug muab xa mus rau lwm haiv neeg lawm, mas lawv yuav mloog.” Povlauj nyob hauv lub tsev uas nws ntiav tau ob xyoos thiab tos txais txhua tus uas tuaj cuag nws. Nws tshaj tawm txog Vajtswv lub tebchaws thiab ua siab tuab qhia txog tus Tswv Yexus Khetos tsis muaj dabtsi khuam cheem. Kuv yog Povlauj uas yog Yexus Khetos tus tub qhe, uas raug hu los ua tubtxib thiab muab cais tsa piav Vajtswv txoj xov zoo, yog txoj xov zoo uas yav thaum ub twb cog lus rau cov xibhwb cev Vajtswv lus sau cia rau hauv Vajtswv txojlus uas dawb huv. Txoj xov zoo ntawd hais txog Vajtswv tus Tub uas sab nqaij tawv yug hauv Davi caj ces los, tiamsis sab ntsuj plig uas dawb huv twb qhia tshwm ntawm Vajtswv lub hwjchim hais tias nws yog Vajtswv tus Tub rau qhov nws twb sawv hauv qhov tuag rov los, yog Yexus Khetos uas yog peb tus Tswv. Vim yog tus Yexus no peb thiaj tau txojkev hlub thiab raug tsa ua tubtxib kom mus coj txhua haiv neeg los ntseeg thiab mloog lus, vim yog saib rau nws lub npe. Nej cov kuj yog cov uas raug hu los ua Yexus Khetos li neeg. Kuv sau rau txhua tus hauv lub nroog Loos uas Vajtswv hlub, thiab yog cov uas raug hu los ua Vajtswv cov xov dawb. Thov txojkev hlub thiab txojkev siab tus ntawm Vajtswv uas yog peb leej Txiv thiab ntawm tus Tswv Yexus Khetos nrog nraim nej nyob. Ua ntej no, kuv tuav Yexus Khetos lub npe ua kuv tus Vajtswv tsaug txog nej sawvdaws, vim nej txojkev ntseeg nrov ncha mus thoob ntiajteb. Vajtswv uas kuv ua nws tes haujlwm kawg siab kawg ntsws rau qhov uas piav txoj xov zoo hais txog nws tus tub, kuj ua timkhawv rau kuv tias thaum kuv thov Vajtswv kuv nco txog nej tsis tu ncua. Kuv thov hais tias yog Vajtswv pom zoo mas tej zaum thaum kawg no kuv yuav muaj sijhawm tuaj cuag nej. Rau qhov kuv xav xav pom nej, xwv thiaj tau coj tej tshav ntuj sab ntsuj plig tuaj txhawb nej lub zog, thiab peb ob tog ib leeg yuav txhawb ib leeg lub zog ntawm kuv thiab nej txojkev ntseeg. Cov kwvtij, kuv xav kom nej paub tias kuv twb npaj siab ntau zaus lawm tias kuv yuav tuaj xyuas nej kom kuv thiaj tau sau neeg los ntseeg rau hauv nej ib yam li kuv sau hauv lwm haiv neeg lawm. (Los txog nimno los tseem muaj chaw khuam cheem kuv.) Kuv tshuav cov Kili thiab lwm haiv neeg, thiab cov txawj ntse thiab cov ruam li nuj nqes. Vim li no kuv thiaj kub siab lug xav piav txoj xov zoo rau nej cov uas nyob hauv lub nroog Loos thiab. Kuv tsis txaj muag rau txoj xov zoo vim txoj xov zoo ntawd yog Vajtswv lub hwjchim uas cawm tau txhua tus uas ntseeg kom dim, xub cawm cov Yudai li cawm cov Kili. Vim tias hauv txoj xov zoo ntawd txojkev ncaj ncees uas Vajtswv pub thiaj li tshwm tuaj, yog txojkev ncaj ncees uas tau los ntawm txojkev ntseeg xwb xwb li, raws li twb sau cia hais tias, “Tus uas ncaj ncees yuav muaj txojsia nyob vim yog qhov uas ntseeg.” Vajtswv ua nws txojkev npau taws tshwm saum ntuj los tawm tsam txhua yam uas neeg ua phem thiab tsis hwm Vajtswv, yog cov uas pheej muab txojkev phem yuam txojkev tseeb. Qhov uas paub txog Vajtswv yeej paub meej lawm vim tias Vajtswv twb qhia tshwm tag rau lawv lawm. Txij thaum tsim ntuj tsim teb los, txawm yog neeg tsis pom Vajtswv zoo li cas, los Vajtswv lub hwjchim uas nyob mus ib txhis thiab qhov uas nws yog Vajtswv kuj tshwm meej rau hauv txhua yam uas tsim los lawd. Yog li ntawd neeg tsis muaj lus cav li. Txawm yog lawv paub Vajtswv los lawv tsis hwm Vajtswv raws li tsim nyog hwm lossis ua nws tsaug. Tiamsis lawv tsuas xav txog tej uas tsis muaj qabhau thiab lawv lub siab ruam tsaus ntuj nti lawm. Lawv khav tias lawv muaj tswvyim, los lawv yeej ruam lawm. Lawv muab Vajtswv uas tsis txawj tuag lub hwjchim ci tsa iab los pauv tej dab mlom zoo li neeg uas txawj tuag thiab zoo li nas noog zoo li tej tsiaj txhu thiab zoo li tej tsiaj uas nkag hauv av. Vim li no Vajtswv thiaj tso lawv mus ua phem ua qias raws li lawv lub siab ntshaw. Lawv ib leeg ua txaj muag rau ib leeg lub cev, rau qhov lawv muab txojkev tseeb uas hais txog Vajtswv los pauv txojkev dag, thiab pe tej uas Vajtswv tsim, tsis pe tus uas tsim, yog tus uas tsim nyog qhuas mus ib txhis. Amee. Vim li no Vajtswv thiaj tso lawv ua phem ua qias tsis paub txaj muag. Tej pojniam kuj hloov mus deev pojniam tsis ua raws li uas ib txwm, tej txivneej los kuj ua ib yam li ntawd. Lawv kuj tseg qhov uas nrog pojniam pw raws li uas ib txwm, thiab lawv huas qas ntshis ib leeg ua dev ua npua rau ib leeg, txivneej nrog txivneej ua tej uas txaj muag kawg li, lawv thiaj tau saws raws li lawv tej kev txhaum. Vim lawv pom tias qhov uas paub Vajtswv tsis tseem ceeb, Vajtswv thiaj tso lawv muaj lub siab qias thiab xyaum ua tej uas tsis tsim nyog ua. Lawv muaj txhua yam kev phem kev limhiam kev ntshaw thiab kev xav ua phem puv nkaus. Lawv sib khib, sib tua, sib cav sib ceg, dag ntxias, xav phem, lis xaiv, xyav luag moo, ntxub Vajtswv, siab hlob, tsab ua loj, khav theeb, ntaus tswvyim ua phem, tsis mloog niam txiv lus, tsis muaj tswvyim, tsis ua raws li tej lus uas twb cog tseg lawd, tsis sib hlub thiab tsis muaj lub siab khuvleej. Txawm yog lawv paub Vajtswv txoj kevcai uas hais tias txhua tus uas ua li ntawd tsim nyog raug txim tuag, los lawv tsis yog ua tej ntawd xwb lawv tseem pom zoo rau lwm tus ua thiab. Vim li no, neeg 'e, tsis hais koj yog leejtwg, thaum koj rau txim rau lwm tus koj tsis muaj lus daws koj tus kheej li. Rau qhov thaum koj txiav txim rau luag kuj yog koj txiav txim rau koj thiab, vim koj twb yog tus uas txiav txim rau luag los koj tseem ua ib yam li luag ua thiab. Peb paub tias qhov uas Vajtswv rau txim rau cov uas ua phem li ntawd kuj yog ua raws li qhov tseeb. Neeg 'e, thaum koj txiav txim rau cov uas ua li ntawd tiamsis koj tseem ua ib yam li lawv thiab, koj xav tias koj yuav dim qhov uas Vajtswv txiav txim lov? Lossis koj tseem saib tsis taus nws txojkev khuvleej thiab nws txojkev ua siab ntev thiab nws txojkev uas thev taus uas nws muaj nplua mias? Koj tsis paub tias Vajtswv txojkev hlub yuav coj kom koj ntxeev dua siab tshiab lov? Tiamsis vim nej lub siab tawv tsis yeem ntxeev dua siab, nej thiaj khaws txojkev npau taws rau nej rau hnub uas Vajtswv npau taws, yog hnub uas Vajtswv txiav txim ncaj tshwm plaws los. Rau qhov nws yuav pauj rau txhua tus raws li tej uas lawv tau ua. Cov uas ua siab ntev ua zoo thiab nrhiav lub koob meej thiab meej mom thiab qhov uas nyob mus ib txhis, Vajtswv yuav pub txojsia ib txhis tsis kawg rau. Tiamsis cov uas xam pom nws tus kheej tsis ua raws li txojkev tseeb tiamsis ua raws li txojkev phem, Vajtswv yuav npau taws thiab chim rau. Txojkev txom nyem thiab kev nyuaj siab yuav raug txhua tus neeg uas ua phem, yuav raug cov Yudai ua ntej li raug cov Kili. Tiamsis lub koob meej thiab meej mom thiab qhov uas kaj siab lug yuav raug txhua tus uas ua zoo, yuav raug cov Yudai ua ntej li raug cov Kili, rau qhov Vajtswv tsis xaiv leejtwg ntsej muag li. Txhua tus uas tsis muaj Vajtswv txoj kevcai es mus ua txhaum yuav raug puam tsuaj tsis kiam txog Vajtswv txoj kevcai ntawd. Txhua tus uas muaj Vajtswv txoj kevcai es mus ua txhaum yuav raug txiav txim raws li txoj kevcai ntawd. Rau qhov cov uas mloog txoj kevcai xwb tsis yog cov uas ncaj ncees rau ntawm Vajtswv lub xubntiag, tiamsis cov uas xyaum raws li txoj kevcai mas Vajtswv yuav suav tias yog cov uas ncaj ncees. Thaum lwm haiv neeg uas tsis muaj Vajtswv txoj kevcai muaj lub siab ua lawv lub neej raws nraim li txoj kevcai ntawd, mas txawm yog lawv tsis muaj Vajtswv txoj kevcai los lawv rov rhawv txoj kevcai rau lawv. Lawv ua lub neej kom pom tias txoj kevcai twb sau cia rau hauv lawv lub siab lawm, thiab lawv lub siab uas paub qhov phem qhov zoo kuj ua timkhawv, thiab lawv tej kev xav uas tej zaum yog rau txim tej zaum yog zam txim. Yuav zoo li ntawd rau hnub uas Vajtswv siv Yexus Khetos txiav txim rau neeg tej kev zais siab, yog raws li txoj xov zoo uas kuv piav. Yog koj hu koj tus kheej tias yog Yudai thiab vam khom txoj kevcai thiab khav txog qhov uas nrog Vajtswv sib raug zoo, thiab paub Vajtswv lub siab nyiam li cas thiab pom zoo tej uas tsim txiaj vim yog tau kawm hauv Vajtswv txoj kevcai, thiab yog koj ruaj siab tias koj yog tus coj tus neeg dig muag kev, thiab ua qhov kaj rau cov uas nyob hauv qhov tsaus ntuj, thiab yog tus uas qhia cov neeg ruam, ua tus uas qhia cov menyuam yaus, thiab muaj tus qauv qhia kev paub thiab qhov tseeb hauv Vajtswv txoj kevcai, yog li ntawd koj uas qhia lwm tus koj yuav tsis qhia koj tus kheej lov? Thaum koj qhia tias tsis txhob ua tub sab, koj tus kheej tseem ua lov? Koj qhia tias tsis txhob ua nkauj ua nraug, los koj tseem ua lov? Koj ntxub tej dab mlom los koj tseem lws tej tsev pe dab lov? Koj khav txog Vajtswv txoj kevcai, los koj tseem saib tsis taus Vajtswv vim yog ua txhaum txoj kevcai lov? Muaj lus sau cia tias, “Lwm haiv neeg hais lus tuam mom Vajtswv lub npe vim yog tim nej.” Yog nej xyaum raws li txoj kevcai, qhov uas ua kevcai txiav kuj muaj qabhau tiag, tiamsis yog nej tsis ua raws li txoj kevcai qhov uas nej ua kevcai txiav ntawd kuj zoo li nej tsis tau ua kiag li. Vim li no yog tus uas tsis ua kevcai txiav tseem xyaum raws li tej nqes hauv txoj kevcai, mas qhov uas nws tsis ua kevcai txiav ntawd yuav suav tau tias nws twb ua kevcai txiav lawm los tsis yog? Tus uas tsis ua kevcai txiav ntawm lub cev nqaij tiamsis nws xyaum raws nraim txoj kevcai, nws yuav txiav txim rau koj uas muaj txoj kevcai sau cia thiab tau ua kevcai txiav lawm tiamsis tseem tsis ua raws li txoj kevcai ntawd. Tus tseem Yudai tsis yog tus uas ua sab nraud xwb, thiab qhov uas ua kevcai txiav tiag tiag tsis yog ua sab nraum daim tawv xwb. Tus tseem Yudai tiag yog tus uas ua sab hauv, thiab qhov uas ua kevcai txiav tiag yog qhov uas ua hauv lub siab, raws li Vaj Ntsuj Plig tsis yog raws li txoj kevcai uas sau cia. Tus uas ua li ntawd neeg tsis qhuas, tiamsis Vajtswv qhuas. Yog li ntawd cov Yudai tsim txiaj dua lwm tus li cas? Qhov uas ua kevcai txiav muaj qabhau dabtsi? Muaj qabhau txhua yam. Qhov ib, muab Vajtswv tej lus cob rau cov Yudai tuav. Txawm yog muaj qee leej ua tsis ncaj los qhov uas lawv ua tsis ncaj ntawd yuav rhuav Vajtswv txojkev ncaj lov? Tsis tau li. Txawm yog neeg txhua tus dag kuj thov cia Vajtswv ua tus tseeb, raws li uas sau cia hais tias, “kom thiaj pom tias koj ncaj ncees hauv koj tej lus, thiab kov yeej rau thaum koj txiav txim.” Tiamsis yog peb tej kev phem ua rau Vajtswv txojkev ncaj ncees tshwm los, peb yuav hais li cas? Peb yuav hais tias qhov uas Vajtswv npau taws tshwm rau peb, yog nws ua tsis ncaj lov? (Kuv hais raws li neeg hais xwb.) Tsis yog li, rau qhov yog hais tias zoo li ntawd Vajtswv yuav txiav txim rau lub ntiajteb tau li cas? Yog Vajtswv txojkev tseeb tshwm los vim yog qhov uas kuv dag kuj ua rau Vajtswv tau koob meej ntau heev lawm, ua li cas kuv tseem yuav raug txiav txim zoo li tus uas muaj txim? Thiab ua cas peb tsis ua qhov phem xwv qhov zoo thiaj tshwm tuaj? Raws li muaj qee leej xyav peb hais tias peb hais li ntawd. Cov neeg uas hais li no raug txim kuj yog ua ncaj lawm. Yog li ntawd yuav hais li cas? Peb cov Yudai zoo dua lov? Tsis yog kiag li, vim tias kuv twb qhia tseeb tias neeg txhua tus tsis hais cov Yudai thiab cov Kili puavleej nyob hauv txoj qab kev txhaum. Raws li twb sau cia hais tias, “Tsis muaj ib tug ncaj ncees, tsis muaj ib tug kiag li. Tsis muaj ib tug nkag siab, tsis muaj ib tug nrhiav Vajtswv. Lawv txhua tus yuam kev tag, thiab lawv phem tag huvsi ib yam nkaus, tsis muaj ib tug ua zoo, tsis muaj kiag li.” “Lawv lub caj pas yog lub qhov ntxa uas qheb lug, lawv siv lawv tus nplaig dag ntxias.” “Taug nab nyob ntawm lawv daim tawv ncauj.” “Tej lus tsawm foom thiab tej lus lwj siab puv nkaus hauv lawv lub qhov ncauj.” “Lawv txhais kotaw dhia mus ua rau nqaij ntuag ntshav nrog, txojkev uas lawv mus muaj kev puam tsuaj thiab kev txom nyem, thiab lawv tsis paub txojkev hum xeeb.” “Lawv tsis paub ntshai Vajtswv kiag li” Peb paub tias Vajtswv txoj kevcai hais li cas, kuj yog hais rau cov uas nyob hauv txoj kevcai ntawd, xwv txhua tus lub qhov ncauj thiaj tsis muaj lus teb li thiab tag nrho lub ntiajteb yuav raug Vajtswv txiav txim. Vim qhov uas xyaum raws li txoj kevcai, Vajtswv tsis pom muaj ib tug twg yuav raug suav tias ncaj ncees, rau qhov txoj kevcai ntawd qhia kom peb paub txog lub txim xwb. Tiamsis nimno txojkev ncaj ncees uas Vajtswv pub tshwm los tsis yog vim coj raws li txoj kevcai, tiamsis txoj kevcai thiab cov xibhwb cev Vajtswv lus tseem ua timkhawv rau txojkev ncaj ncees ntawd. Txojkev ncaj ncees uas Vajtswv pub vim yog ntseeg Yexus Khetos, yog pub rau txhua tus uas ntseeg, tsis suav tias ib leeg txawv ib leeg, rau qhov txhua tus puavleej muaj txim thiab poob ntawm Vajtswv lub hwjchim ci ntsa iab lawm, tiamsis Vajtswv muaj txojkev hlub thiaj pub dawb rau lawv ua tau tus ncaj ncees vim qhov uas Yexus Khetos txhiv lawv dim lub txim. Vajtswv tsa Yexus ua tus uas muab Yexus cov ntshav ntxuav txhua tus uas ntseeg lub txim. Tej no thiaj ua kom pom txojkev ncaj ncees uas Vajtswv pub vim nws ua siab ntev tsis rau txim rau tej kev txhaum uas ua los lawd, kom thiaj ua nws txojkev ncaj ncees tshwm rau cov neeg tiam no thiab qhia tias nws yog tus ncaj ncees thiab suav tias tus uas ntseeg Yexus yog tus ncaj ncees. Yog li no peb yuav khav tau li cas? Khav tsis tau kiag li. Yuav ua raws li txoj kevcai twg? Yuav ua raws txoj kevcai xyaum zoo lov? Tsis tau li. Yuav tsum ua raws li txojkev ntseeg xwb. Peb paub tias neeg raug suav tias ncaj ncees yog vim nws ntseeg tsis yog qhov uas nws xyaum raws li txoj kevcai. Vajtswv tsuas yog cov Yudai tus Vajtswv xwb lov? Nws tsis yog lwm haiv neeg tus Vajtswv thiab lov? Nws yeej yog lwm haiv neeg tus Vajtswv thiab, rau qhov Vajtswv yog tib tug Vajtswv thiab nws suav tias tus uas ua kevcai txiav thiab tus uas tsis tau ua puavleej ncaj ncees ib yam nkaus vim qhov uas ntseeg. Yog li ntawd peb muab txojkev ntseeg no rhuav txoj kevcai lov? Tsis tau li. Peb yeej tuav rawv txoj kevcai. Yog li ntawd peb yuav hais li cas txog Aplahas uas yog peb yawg koob ntawm nqaij tawv? Yog Aplahas raug suav tias ncaj ncees vim qhov uas nws xyaum zoo, nws yeej muaj tej uas nws khav tau, tiamsis nws khav tsis tau tab meeg Vajtswv. Vajtswv phau ntawv hais li cas? “Aplahas ntseeg Vajtswv mas Vajtswv suav tias qhov uas nws ntseeg ntawd yog txojkev ncaj ncees rau Aplahas.” Tus neeg ua haujlwm mas cov nqe zog uas nws tau tsis suav tias yog tshav ntuj tiamsis suav tias yog nws li nqe zog. Tus uas tsis vam khom nws tes haujlwm tiamsis ntseeg tus uas pub cov neeg phem ua tau ncaj ncees, mas nws txojkev ntseeg ntawd Vajtswv suav tias yog txojkev ncaj ncees. Ib yam li Davi tau hais txog tus uas nyob kaj siab lug, yog tus uas Vajtswv suav tias yog tus ncaj ncees tsis yog vim nws xyaum raws li txoj kevcai, hais tias, “Cov uas tau txais kev zam txim tau nyob kaj siab lug, yog cov uas nws tej kev txhaum raug muab faus lawm. Tus uas tus Tswv tsis suav nws tej kev txhaum kuj tau nyob kaj siab lug.” Txojkev kaj siab no pub rau cov uas ua kevcai txiav xwb lov, lossis pub rau cov tsis ua thiab? Peb hais tias Vajtswv suav tias qhov uas nws ntseeg ntawd yog txojkev ncaj ncees rau Aplahas. Vajtswv suav li ntawd rau Aplahas thaum twg? Suav thaum nws twb ua kevcai txiav lawm los thaum tseem tsis tau ua? Tsis yog thaum nws ua kevcai txiav lawm tiamsis yog thaum nws tseem tsis tau ua. Nws ua kevcai txiav ua lub hom thawj ntaus txwm rau txojkev ncaj ncees uas nws tau ntawm txojkev ntseeg ua ntej uas nws tsis tau ua kevcai txiav. Yog li ntawd Aplahas thiaj tau ua txhua tus ntseeg uas tsis tau ua kevcai txiav li txiv, Vajtswv thiaj suav tias lawv yog neeg ncaj ncees thiab. Nws kuj ua cov uas ua kevcai txiav li txiv, tsis yog lawv ua kevcai txiav xwb tiamsis lawv ntseeg, taug peb yawg koob Aplahas tus neev taw uas nws twb ntseeg thaum nws tsis tau ua kevcai txiav. Tej lus uas Vajtswv cog rau Aplahas thiab nws cov tub ki hais tias lawv yuav tau lub ntiajteb ua lawv qub txeeg qub teg, tej lus ntawd tsis yog tau ntawm txoj kevcai los tiamsis tau ntawm txojkev ncaj ncees uas yog los ntawm txojkev ntseeg los. Yog cov uas coj raws li txoj kevcai tau ua cov uas saws qub txeeg qub teg, ces txojkev ntseeg tsis muaj qabhau kiag li, thiab tej lus cog tseg siv tsis tau. Rau qhov txoj kevcai coj txojkev npau taws los, tiamsis qhov twg tsis muaj txoj kevcai qhov ntawd tsis muaj kev txhaum. Vim li no tej lus cog tseg ntawd nyob ntawm txojkev ntseeg, xwv thiaj ua tau raws li Vajtswv txojkev hlub thiab tuav tau tej lus cog tseg ntawd rau Aplahas caj ces sawvdaws, tsis yog rau cov uas coj txoj kevcai xwb tiamsis rau cov uas muaj kev ntseeg ib yam li Aplahas, uas yog peb txhua tus leej txiv, raws li uas sau cia hais tias, “Kuv ua rau koj ua ntau haiv neeg leej txiv.” Nws yog peb tus yawg koob tab meeg Vajtswv uas Aplahas ntseeg, yog tus uas pub txojsia rau cov uas tuag thiab hu tej uas tsis tau muaj kom muaj tshwm los. Txawm yog tsis muaj vam lawm los Aplahas tseem ntseeg tias yuav ua tau ntau haiv neeg leej txiv, raws li tej lus uas twb hais rau nws lawm tias, “Koj caj ces yuav coob li no.” Nws tsis qaug zog ntawm txojkev ntseeg rau thaum nws tshuaj saib nws lub cev mas piv zoo li tuag lawm vim nws hnub nyoog muaj kwvlam ib puas xyoo lawm, thiab thaum nws xav txog qhov uas Xala lub plab mooj. Nws ua siab ruaj tsis ua siab ywj fab ywj fwj rau Vajtswv tej lus cog tseg, tiamsis nws txojkev ntseeg loj zuj zus tuaj thiab ua rau Vajtswv tau koob meej. Nws ntseeg ruaj tias Vajtswv muaj peevxwm ua tau yam uas Vajtswv cog lus. Vim yog qhov no ntag “Vajtswv thiaj suav tias qhov uas Aplahas ntseeg yog txojkev ncaj ncees rau nws.” Tej lus uas hais tias, “Suav tias yog txojkev ncaj ncees rau nws” tsis yog sau rau nws ib leeg xwb tiamsis yog sau rau peb thiab. Vajtswv kuj yuav suav tias yog txojkev ncaj ncees rau peb cov uas ntseeg tus uas tsa peb tus Tswv Yexus ciaj sawv hauv qhov tuag rov los thiab. Yexus raug muab tua pov tseg vim peb tej kev txhaum thiab raug tsa ciaj sawv rov los Vajtswv thiaj suav tau tias peb yog neeg ncaj ncees. Yog li ntawd, twb yog vim peb raug suav tias ncaj ncees vim yog qhov uas ntseeg, peb thiaj nrog Vajtswv sib hum xeeb vim muaj peb tus Tswv Yexus Khetos lawm. Ntawm Yexus peb thiaj nkag los rau hauv txojkev hlub uas peb los nyob no thiab peb khav txog qhov uas peb muaj vam tias yuav muaj feem tau Vajtswv lub hwjchim ci ntsa iab. Tsis tag li ntawd xwb, peb kuj khav txog qhov uas peb raug txom nyem vim peb paub tias kev txom nyem ua kom muaj siab ntev thev taus, thiab qhov uas muaj siab ntev thev taus yog muab peb sim ua tau zoo siv lawm, thiab qhov uas raug muab sim ntawd ua kom muaj siab vam, thiab yuav tsis plam txojkev vam ntawd vim Vajtswv siv Vaj Ntsuj Plig dawb huv uas nws twb pub rau peb lawm hliv Vajtswv txojkev hlub rau hauv peb lub siab. Thaum peb tseem qaug zog Khetos tuag this cov neeg phem raws li lub sijhawm uas teem tseg lawm. Qhov tseeb tsis tshua muaj leejtwg tuag this tus neeg ncaj ncees, tiamsis tej zaum yuav muaj ib tug yeem tuag this tus neeg zoo. Tiamsis Vajtswv ua nws txojkev hlub tshwm rau peb, yog qhov uas thaum peb tseem ua neeg muaj txim Khetos tuag this peb. Yog li ntawd, vim Yexus cov ntshav ua rau peb raug suav tias ncaj ncees lawm, mas loj dua li ntawd peb yeej yuav dim hauv Vajtswv txojkev npau taws vim muaj Yexus. Rau qhov thaum peb tseem ua yeeb ncuab rau Vajtswv, nws tus Tub txojkev tuag ua rau peb twb tau rov los nrog Vajtswv sib raug zoo. Loj dua li ntawd thaum peb nrog nws sib raug zoo lawm, qhov uas nws tus Tub ciaj sia nyob yuav cawm peb dim. Tsis yog li ntawd xwb, peb yuav khav rau hauv Vajtswv vim yog muaj peb tus Tswv Yexus Khetos ua tus uas ua rau peb rov nrog Vajtswv sib raug zoo. Yog li no, lub txim tshwm los rau hauv lub ntiajteb yog tim tib leeg, thiab txojkev tuag tshwm los yog tim lub txim ntawd, thiab txojkev tuag kis mus rau ib tsoom neeg txhua tus vim yog neeg txhua tus ua txhaum muaj txim. Qhov tseeb lub txim muaj nyob rau hauv lub ntiajteb no ua ntej uas tsis tau muab txoj kevcai rau Mauxe, tiamsis qhov twg tsis muaj txoj kevcai kuj tsis suav tias muaj txim. Tiamsis txojkev tuag yeej kav kiag txij thaum Adas los txog Mauxe. Txawm yog cov uas tsis tau ua txhaum ib yam li Adas los txojkev tuag kuj kav rawv. Adas ua qauv txog tus uas yuav tom qab los. Tiamsis yam uas Vajtswv pub dawb dawb tsis thooj li qhov uas ua txhaum ntawd. Yog neeg coob coob tuag vim qhov uas ib tug ua txhaum, heev dua li ntawd Vajtswv txojkev hlub thiab yam uas Vajtswv pub dawb dawb ntawm ib tug los, uas yog los ntawm Yexus Khetos, kuj muaj nplua mias rau neeg coob coob. Yam uas Vajtswv pub dawb ntawd tsis thooj li tej kev txhaum uas ib tug ua ntawd, vim tias kev txiav txim rau tib zaug txhaum ntawd coj kev rau txim los, tiamsis yam uas pub dawb tom qab uas ua txhaum ntau zaus coj txojkev ncaj ncees los. Yog qhov uas ib tug ua txhaum ua rau txojkev tuag kav kiag ntawm tus ntawd los, heev dua li ntawd cov uas tau txais txojkev hlub nplua mias thiab txojkev ncaj ncees uas Vajtswv pub dawb, yuav tau txojsia ntawm ib tug uas yog Yexus Khetos thiab yuav kav mus li. Qhov uas ib tsoom neeg raug txim vim qhov uas ib tug ua txhaum xwb, mas qhov uas ib tug ua ncaj ncees yuav coj txojkev ncaj ncees uas pub txojsia los rau txhua tus ib yam nkaus. Qhov uas ib tug tsis mloog lus kuj ua rau ib tsoom neeg txhaum li cas, mas qhov uas ib tug mloog lus kuj ua rau ib tsoom neeg ncaj ncees tau ib yam nkaus. Txoj kevcai tshwm los ua rau kev txhaum tsav ntxiv zuj zus tuaj. Qhovtwg muaj kev txhaum tsav ntxiv zuj zus, Vajtswv txojkev hlub kuj muaj nplua mias tsav ntxiv rau qhov ntawd. Mas kev txhaum kav ua kom muaj kev tuag li cas, Vajtswv txojkev hlub thiaj kav ua kom tau txojsia ib txhis ntawm txojkev ncaj ncees hauv Yexus Khetos uas yog peb tus Tswv ib yam li ntawd. Yog li ntawd peb yuav hais li cas? Peb yuav ua txojkev txhaum ntxiv mus kom Vajtswv txojkev hlub thiaj tsav zuj zus tuaj lov? Tsis yog li ntawd. Peb uas twb tuag ntawm kev txhaum lawm tseem yuav muaj sia rau hauv kev txhaum tau li cas? Nej tsis paub tias peb txhua tus uas ua kevcai raus dej rau hauv Yexus Khetos kuj ua kevcai raus dej rau hauv Yexus txojkev tuag lov? Peb raug muab log nrog Yexus ua ke ntawm qhov uas ua kevcai raus dej rau hauv txojkev tuag ntawd, mas ib yam li leej Txiv siv nws lub hwjchim ci ntsa iab tsa tus Khetos sawv hauv qhov tuag rov los, peb thiaj tau ua lub neej raws li txojsia tshiab ib yam nkaus. Yog peb nrog Yexus koom txojkev tuag li hais no, peb yeej yuav nrog nws koom qhov uas sawv hauv qhov tuag rov los. Peb paub tias peb tus qub twb raug muab teem nrog Yexus rau saum tus ntoo khaublig xwv peb lub cev qub uas muaj txim ntawd thiaj raug muab ua puam tsuaj tag mas peb yuav tsis ua lub txim li qhev dua li lawm, rau qhov tus uas tuag lawd kuj dim lub txim lawm. Yog peb twb nrog Khetos tuag lawm, peb ntseeg tias peb yuav muaj txojsia nrog nws nyob thiab. Peb yeej paub tias Khetos raug muab tsa ciaj sawv hauv qhov tuag rov los thiab nws yuav tsis tuag dua li lawm. Txojkev tuag tsis muaj hwjchim kav nws lawm. Qhov uas nws tuag ntawd nws tuag ntawm lub txim tib zaug xwb mas txaus, tiamsis qhov uas nws muaj txojsia nyob nws nyob rau Vajtswv. Ib yam nkaus, nej cia li suav tias nej tuag ntawm lub txim thiab muaj txojsia hauv Yexus Khetos nyob rau Vajtswv. Vim li no tsis txhob kheev lub txim kav nej lub cev uas txawj tuag kom nej ua raws li tej kev phem uas nej lub cev nqaij ntshaw. Tsis txhob muab nej lub cev ib qho ua cuab yeej pub rau lub txim siv ua phem, tiamsis nej yuav tsum muab nej tus kheej uas zoo li cov neeg uas raug tsa sawv hauv qhov tuag rov los ntawd pub rau Vajtswv siv thiab muab nej lub cev txhua yam ua tej cuab yeej uas siv ua haujlwm ncaj ncees pub rau Vajtswv. Lub txim yuav tsis tswjhwm nej ntxiv mus lawm, rau qhov nej tsis nyob hauv txoj qab kevcai lawm tiamsis nyob hauv txoj qab kev hlub. Yog li ntawd peb yuav ua li cas? Peb yuav ua txhaum vim peb tsis nyob hauv txoj qab kevcai tiamsis nyob hauv txoj qab kev hlub lov? Tsis tau li. Nej tsis paub lov? Yog nej yeem ua leejtwg li qhev thiab mloog nws lus, nej kuj yog tus uas nej mloog lus ntawd li qhev, yog ua lub txim li qhev uas coj mus txog kev tuag, lossis ua qhov uas mloog lus li qhev uas coj mus txog txojkev ncaj ncees. Tiamsis ua Vajtswv tsaug, vim nej txeev ua lub txim li qhev tiamsis nimno nej muaj lub siab mloog tej lus qhuab qhia uas muab cob rau nej lawm. Nej twb dim lub txim lawm thiab nej tau ua txojkev ncaj ncees li qhev. Kuv hais raws li neeg ib txwm hais vim nej lub cev nqaij tseem tsis muaj zog. Nej muab nej lub cev txhua yam ua kev phem kev qias li qhev thiab ua tej kev txhaum uas nej ua tag ua thiab li qhev li cas, nimno nej cia li muab nej lub cev txhua yam ua txojkev ncaj ncees li qhev ib yam li ntawd kom thiaj raug muab cais kom dawb huv. Thaum nej tseem ua lub txim li qhev, txojkev ncaj ncees tsis kav nej. Thaum ntawd nej tau nuj nqes dabtsi ntawm tej uas nimno ua rau nej txaj muag? Tej uas nej ua ntawd thaum kawg yog txojkev tuag xwb. Tiamsis nimno nej twb dim qhov uas ua lub txim li qhev thiab tig los ua Vajtswv li qhev lawm, mas nuj nqes uas nej tau yog qhov uas muab nej cais ua dawb huv thiab thaum kawg yog txojsia ib txhis tsis kawg. Rau qhov lub txim li nqe yog txojkev tuag tiamsis yam uas Vajtswv pub dawb yog txojsia ib txhis tsis kawg hauv Yexus Khetos uas yog peb tus Tswv. Kwvtij sawvdaws nej tsis paub lov? (Kuv hais rau cov uas paub Mauxe txoj kevcai lawm.) Txoj kevcai muaj hwjchim kav neeg tsuas yog thaum uas nws muaj txojsia nyob xwb. Ib yam li tus pojniam uas yuav txiv lawm mas raws li txoj cai thaum tus txiv tseem nyob nws yuav tsum nrog tus txiv nyob. Yog tus txiv tuag lawm nws thiaj dim txoj kevcai uas muaj txiv. Vim li no yog tus pojniam ntawd cia li mus muaj dua lwm tus rau thaum tus txiv tseem muaj txojsia nyob nws yuav tau lub npe tias deev hluas nraug. Tiamsis yog nws tus txiv tuag lawm nws kuj dim txoj kevcai ntawd. Yog nws mus yuav dua lwm tus txiv kuj tsis yog deev hluas nraug. Ib yam nkaus li ntawd, kuv cov kwvtij, nej kuj tuag ntawm Mauxe txoj kevcai rau ntawm Khetos lub cev, kom nej thiaj ua tau lwm tus li, yog ua tus uas raug tsa sawv hauv qhov tuag rov los li, kom peb thiaj txi txiv rau Vajtswv. Thaum peb muaj txojsia nyob hauv lub cev nqaij tawv, peb lub siab uas ntshaw ua phem raug txoj kevcai tshum ua rau peb lub cev txi txiv uas coj mus txog txojkev tuag. Tiamsis nimno peb twb dim hauv txoj kevcai lawm, yog peb tuag ntawm yam uas txeev khi peb cia, xwv peb thiaj ua tau qhev raws li Vaj Ntsuj Plig txojkev tshiab tsis yog raws li txojkev qub uas sau cia. Yog li ntawd peb yuav hais li cas? Yuav hais tias txoj kevcai yog kev txhaum lov? Tsis tau li. Yog tsis muaj txoj kevcai lawm kuv yeej yuav tsis paub kev txhaum. Yog txoj kevcai tsis tau hais tias, “Tsis txhob ua siab hlob,” kuv yeej tsis paub tias dabtsi yog kev ua siab hlob. Tiamsis kev txhaum tos nrhw siv txoj kevcai ntawd txhob ua rau kuv ua siab hlob rau txhua yam. Yog tsis muaj txoj kevcai, kev txhaum kuj tuag lawm. Yav tag los kuv ua lub neej tsis muaj txoj kevcai, tiamsis thaum muaj txoj kevcai los kev txhaum kuj rov ciaj sia tuaj mas kuv thiaj tuag. Txoj kevcai uas yuav tsum pub txojsia, kuv pom tias tsuas yog coj txojkev tuag los. Rau qhov kev txhaum tos nrhw siv txoj kevcai ntawd dag ntxias kuv thiab muab kuv tua. Vim li no txoj kevcai yog kev dawb huv thiab tej kab ke kuj dawb huv thiab ncaj thiab zoo kawg. Yog li no yam uas zoo ntxeev ua txojkev tuag rau kuv lov? Tsis yog. Yog kev txhaum siv yam uas zoo ua rau kev tuag tshwm rau hauv kuv, kom thiaj pom tias txojkev txhaum ntawd txhaum tiag tiag li thiab vim muaj txoj kevcai kev txhaum thiaj phem kawg nkaus. Peb paub tias txoj kevcai yog hais txog sab ntsuj plig, tiamsis kuv yog nqaij tawv kuv thiaj raug muab muag ua kev txhaum li qhev. Kuv tsis nkag siab tej uas kuv ua. Rau qhov kuv tsis ua yam uas kuv xav ua, kuv ho ua yam uas kuv ntxub xwb. Yog kuv ua yam uas kuv tsis xav ua, kuv yeem lees tias txoj kevcai zoo. Ces tsis yog kuv tus kheej ua tiamsis yog kev txhaum uas nyob hauv kuv ua. Rau qhov kuv paub tias hauv kuv tus kheej uas yog hauv kuv lub cev nqaij tawv tsis muaj ib qho zoo kiag li. Kuv txawj xav zoo tiamsis ua tsis tau qhov zoo kiag li, vim qhov zoo uas kuv xav ua kuv kuj tsis ua, tiamsis qhov phem uas kuv tsis xav ua, kuv kuj tseem ua. Yog kuv pheej ua yam uas kuv tsis xav ua, yeej tsis yog kuv tus kheej ua, tiamsis yog kev txhaum uas nyob hauv kuv ua xwb. Yog li ntawd kuv thiaj pom muaj ib txoj kevcai hais tias yog thaum twg kuv xav ua qhov zoo, qhov phem kuj nyob ze. Vim tob tob hauv kuv lub siab yeej nyiam Vajtswv txoj kevcai, tiamsis kuv pom muaj dua ib txoj kevcai nyob hauv kuv lub cev uas pheej tawm tsam txoj kevcai uas nyob hauv kuv lub siab thiab ua kom kuv raug txoj kev txhaum uas nyob hauv kuv lub cev ntes. Ua li cas kuv yuav nyuaj siab ua luaj li no? Leejtwg yuav tso kuv dim hauv lub cev uas coj mus txog kev tuag no? Ua Vajtswv tsaug uas nws yuav tso kuv dim vim yog muaj Yexus Khetos uas yog peb tus Tswv. Yog li ntawd kuv lub siab ua Vajtswv txoj kevcai li qhev, tiamsis kuv lub cev ua txojkev txhaum li qhev. Vim li no tsis muaj kev rau txim rau tus uas nyob hauv Yexus Khetos, vim tias Vaj Ntsuj Plig txoj kevcai uas pub txojsia hauv Yexus Khetos twb tso kuv dim ntawm txoj kevcai uas coj mus ua txhaum thiab coj mus txog kev tuag lawm. Tej uas txoj kevcai ua tsis tau vim lub cev nqaij tawv ua rau txoj kevcai tsis muaj zog lawm, Vajtswv ua tau. Nws txib nws tus Tub los zoo li neeg uas lub cev nqaij txhaum thiaj daws tau neeg lub txim, thiab rau txim rau kev txhaum uas nyob hauv neeg lub cev nqaij, kom tej uas hais txog kev ncaj ncees hauv txoj kevcai yuav tiav rau hauv peb cov uas tsis ua lub neej raws li lub cev nqaij tawv tiamsis ua raws li Vaj Ntsuj Plig. Cov uas ua lub neej raws li nqaij tawv kuj kub siab rau tej uas yog nqaij tawv li xwb, tiamsis cov uas ua lub neej raws li Vaj Ntsuj Plig kuj kub siab rau tej uas yog Vaj Ntsuj Plig li. Qhov uas muab lub siab rau rau nqaij tawv kuj yog kev tuag. Qhov uas muab lub siab rau rau Vaj Ntsuj Plig kuj yog txojsia thiab nyob kaj siab lug. Rau qhov lub siab uas muab rau rau nqaij tawv kuj ua yeeb ncuab rau Vajtswv, tsis cia Vajtswv txoj kevcai kav nws, nws yeej ua tsis tau kiag li. Thiab cov uas nyob hauv nqaij tawv yuav ua tsis tau kom hum Vajtswv lub siab. Tiamsis yog Vajtswv tus Ntsuj Plig nyob hauv nej lawm nej kuj tsis nyob hauv nqaij tawv nej yeej nyob hauv Vaj Ntsuj Plig. Leejtwg tsis muaj Khetos tus Ntsuj Plig, tus ntawd kuj tsis yog Khetos li. Yog Khetos nyob hauv nej lawm, txawm yog nej lub cev tuag vim muaj txim, los nej tus ntsuj plig tseem ciaj sia nyob vim muaj txojkev ncaj ncees. Yog tus uas tsa Yexus sawv hauv qhov tuag rov los tus Ntsuj Plig nyob hauv nej lawm, mas tus uas tsa Yexus Khetos sawv hauv qhov tuag yuav siv nws tus Ntsuj Plig uas nyob hauv nej pub txojsia rau nej lub cev uas txawj tuag. Vim li no cov kwvtij, peb tshuav nqe tiamsis tsis yog tshuav nqe sab nqaij tawv uas yuav ua lub neej raws li nqaij tawv. Yog nej ua lub neej raws li nqaij tawv nej yuav tuag, tiamsis yog nej ua raws li Vaj Ntsuj Plig nej yuav tua tau tej haujlwm uas nej lub cev ua, nej thiaj ciaj sia nyob, vim tias Vajtswv tus Ntsuj Plig coj leejtwg tus ntawd thiaj yog Vajtswv li menyuam. Rau qhov nej tsis tau txais tus ntsuj plig uas coj nej rov mus ua qhev poob rau txojkev ntshai dua, tiamsis nej tau txais tus Ntsuj Plig uas coj nej los ua Vajtswv li menyuam peb thiaj hu Vajtswv tias, “Anpa, Leej Txiv.” Vaj Ntsuj Plig nrog peb tus ntsuj plig ua timkhawv tias peb yog Vajtswv li menyuam. Yog peb ua menyuam lawm peb kuj yog tus uas saws qub txeeg qub teg, yog peb saws Vajtswv li qub txeeg qub teg thiab koom nrog Khetos saws. Yog peb nrog Yexus raug kev tsim txom peb kuj yuav nrog Yexus tau koob meej ib yam nkaus. Kuv pom tias tej kev tsim txom uas raug nimno tsis tsim nyog muab piv rau tej koob meej uas yuav tshwm los rau peb yav tom ntej. Tej uas tsim los lawd tos ntsoov Vajtswv cov menyuam tshwm los. Txhua yam uas tsim ntawd poob rau hauv lub hwjchim kev qhuav qhawv lawm tsis yog raws li lub siab nyiam tiamsis raws li Vajtswv tu tseg kom nyob hauv lub qab hwjchim ntawd. Tiamsis tseem muaj chaw vam tias txhua yam uas tsim ntawd yuav dim ntawm qhov uas ua txojkev puam tsuaj li qhev es yuav los nyob ywj pheej thiab nrog Vajtswv cov menyuam tau koob meej. Peb paub tias txhua yam uas tsim los tabtom ntsaj laws mob plab yam li tus pojniam yuav yug menyuam los txog niaj hnub nimno. Tsis yog tej uas tsim xwb tiamsis peb cov ntag uas muaj Vaj Ntsuj Plig uas yog thawj yam uas Vajtswv pub lawm, peb kuj ntsaj laws hauv lub siab tos qhov uas Vajtswv yuav saws peb ua nws li menyuam, yog qhov uas txhiv kiag peb lub cev. Peb muaj chaw vam li no peb thiaj li dim. Qhov chaw vam uas peb twb ntsib lawm mas tsis yog chaw vam ntxiv lawm. Leejtwg tseem yuav vam yam uas nws twb ntsib lawm? Tiamsis yog peb vam yam uas tseem tsis tau ntsib peb ua siab ntev tos yam ntawd. Ib yam li ntawd, Vaj Ntsuj Plig pab peb rau thaum peb tsis muaj zog. Rau qhov peb tsis paub tias tsim nyog peb thov dabtsi ntawm Vajtswv, tiamsis Vaj Ntsuj Plig sawv peb chaw thov nroo luj laws tsis paub hais ua lus li. Thiab Vajtswv uas tshuaj saib neeg lub siab kuj paub Vaj Ntsuj Plig lub siab, rau qhov Vaj Ntsuj Plig yeej thov Vajtswv pab cov xov dawb raws li Vajtswv lub siab nyiam. Peb paub tias txhua yam xwm txheej puavleej ua qhov zoo rau cov uas hlub Vajtswv yog cov uas Vajtswv hu raws li nws xav tseg lawd. Rau qhov txhua tus uas Vajtswv xaiv cia lawd nws kuj muab tu cia ua ntej kom zoo thooj li nws leej Tub tus yam ntxwv xwv nws leej Tub thiaj tau ua tijlaug hauv ib tsoom kwvtij coob coob. Thiab cov uas Vajtswv tu cia lawd nws kuj hu los, thiab cov uas nws twb hu lawd nws suav tias yog cov ncaj ncees, thiab cov uas nws suav tias ncaj ncees, nws kuj pub kom muaj koob meej ci ntsa iab. Yog li ntawd, peb yuav hais li cas txog tej no? Yog Vajtswv tuaj peb tog lawm leejtwg yuav tawm tsam tau peb? Tus uas tsis khuvxim nws tus Tub tiamsis muab nws tus Tub theej peb txhua tus, nws yuav tsis muab txhua yam nrog tus Tub ntawd pub dawb rau peb thiab lov? Leejtwg yuav kom tau cov uas Vajtswv twb xaiv cia lawd? Vajtswv twb suav tias lawv ncaj ncees lawm. Leejtwg yuav rau txim tau rau lawv? Yexus Khetos uas tuag lawm thiab heev dua li ntawd twb raug muab tsa sawv hauv qhov tuag rov los, nws zaum ntawm Vajtswv sab tes xis thiab thov Vajtswv pab peb. Leejtwg yuav muab peb cais tau ntawm tus Khetos txojkev hlub? Txawm yog kev ceeblaj, kev txom nyem, kev tsim txom, kev tshaib nqhis, kev khaub hlab, tej xwm txheej phem lossis hniav ntaj hniav riam yuav cais tau lov? Raws li uas muaj lus sau cia tias, “Vim tim koj peb thiaj raug muab tua tas hnub tas hmo, thiab raug muab suav yam li cov yaj uas coj mus tua.” Tiamsis hauv txhua yam xwm txheej no peb kov yeej kiag vim yog muaj tus uas hlub peb kawg. Rau qhov kuv ruaj siab tias txawm yog kev tuag lossis txojsia lossis cov tubtxib saum ntuj lossis tej timtswv lossis tej xwm txheej tiam no lossis tiam tom ntej lossis tej hwjchim, lossis qhov uas siab kawg lossis qhov uas tob kawg lossis ib yam dabtsi uas tau tsim los no yuav cais tsis tau peb ntawm Vajtswv txojkev hlub uas muaj hauv peb tus Tswv Yexus Khetos kiag li. Kuv hais tseeb hauv tus Khetos, kuv tsis dag. Kuv lub siab uas paub qhov zoo qhov phem kuj ua timkhawv hauv Vaj Ntsuj Plig uas dawb huv tias, kuv nyuaj siab kawg thiab mob siab tsis tu ncua li. Kuv xav kom kuv tus kheej raug muab tsawm foom thiab raug muab txiav tawm ntawm tus Khetos vim yog saib rau kuv cov kwvtij, uas yog kuv haiv neeg ntawm sab nqaij tawv. Lawv yog cov Yixayee uas muaj feem ua Vajtswv li menyuam thiab muaj lub koob meej ci ntsa iab thiab tau tej lus uas sib cog tseg thiab tau txais txoj kevcai thiab tej kevcai pe hawm Vajtswv thiab tau txhua yam lus cog tseg. Tej yawg koob kuj yog lawv li thiab tus Khetos kuj los ntawm lawv haiv neeg sab nqaij tawv, yog Vajtswv uas kav txhua yam mus ib txhis uas tsim nyog qhuas. Amee. Tiamsis tsis yog Vajtswv txojlus raug muab rhuav tshem lawm, rau qhov tsis yog txhua tus uas yug ntawm Yixayee yog tseem neeg Yixayee tiag, thiab tsis yog txhua tus uas yog Aplahas caj ces yog Aplahas cov tub ki tiag, tiamsis muaj lus hais tias, “Luag yuav hu koj caj ces tias yog los ntawm Yiha.” Kuj yog hais tias cov uas yog Vajtswv li menyuam tiag tsis yog cov menyuam sab nqaij tawv, tiamsis tsuas yog cov menyuam ntawm tej lus cog tseg thiaj suav tias yog caj ces tiag. Rau qhov tej lus cog tseg muaj hais li no tias, “Lwm xyoo kuv yuav rov tuaj, mas Xala yuav muaj ib tug tub.” Tsis yog li ntawd xwb, tiamsis Lenpekha kuj xeeb ob tug menyuam hauv lub plab ntawm tib leeg txiv, uas yog peb yawg koob Yiha. Ua ntej uas ob tug menyuam ntawd tsis tau yug thiab tsis tau ua ib yam dabtsi zoo lossis phem xwv qhov uas Vajtswv xaiv raws li Vajtswv lub siab xav tseg lawd thiaj li ruaj khov, tsis yog xaiv raws li tej haujlwm uas ob tug ua tiamsis xaiv raws li Vajtswv hu, Vajtswv hais rau Lenpekha tias “Tus tijlaug yuav ua tus kwv qhev.” Raws li uas muaj lus sau cia hais tias, “Kuv hlub Yakhauj tiamsis kuv ntxub Exau.” Yog li ntawd, peb yuav hais li cas? Vajtswv ua tsis ncaj lov? Tsis yog. Rau qhov Vajtswv hais rau Mauxe tias, “Kuv xav khuvleej tus twg kuv yuav khuvleej tus ntawd, kuv xav tab ncuab tus twg kuv yuav tab ncuab tus ntawd.” Vim li no qhov uas Vajtswv xaiv tsis yog raws li neeg lub siab xav thiab raws li neeg ua, tiamsis nyob ntawm Vajtswv txojkev khuvleej. Vajtswv phau ntawv muaj ib nqe hais rau Falau tias, “Qhov uas kuv tsa koj kuj yog kuv yuav ua kuv lub hwjchim tshwm rau hauv koj kom kuv lub npe thiaj tshaj tawm mus thoob ntiajteb.” Vim li no Vajtswv xav khuvleej tus twg nws kuj khuvleej tus ntawd, thiab xav ua rau tus twg lub siab tawv kuj ua rau tus ntawd lub siab tawv. Yog li ntawd koj yuav hais rau kuv tias, “Ua cas Vajtswv tseem thuam? Leejtwg yuav tav tej uas Vajtswv xav tseg lawd?” Neeg 'e, koj yog leejtwg es yuav nrog Vajtswv sib cav? Yam uas raug muab puab yuav hais rau tus Kws puab tias, “Ua cas koj puab kuv zoo li no?” Tus Kws puab laujkaub tsis muaj cai muab tib thooj av los puab ua ib lub tais siv rau tej yam uas tseem ceeb thiab ua dua ib lub siv rau lwm yam lov? Puas yog li no? Vim Vajtswv xav ua kom nws txojkev npau taws tshwm los thiab xav qhia nws lub hwjchim nws thiaj ua siab ntev thev tej twj taig uas npaj cia rau kev puam tsuaj, kom nws thiaj tau ua nws lub hwjchim ci ntsa iab uas muaj ntau kawg nkaus tshwm rau tej twj taig uas nws khuvleej, yog cov uas nws twb npaj tseg rau lub koob meej uas ci ntsa iab, yog peb cov uas nws twb hu los lawd, tsis yog hu ntawm cov Yudai xwb tiamsis hu ntawm lwm haiv neeg thiab. Raws li Vajtswv hais cia rau hauv phau Hauxeya hais tias, “Kuv yuav hu cov uas tsis txeev ua kuv haiv neeg hu ua ‘kuv li neeg,’ thiab hu tus uas kuv tsis txeev hlub hu ua ‘tus uas kuv hlub.’ ” “Thiab hauv lub chaw uas txeev hais rau lawv tias, ‘Nej tsis yog kuv haiv neeg,’ kuj yuav hu lawv tias, yog ‘Vajtswv uas muaj txojsia nyob cov tub.’ ” Thiab Yaxaya tau qw piav txog cov Yixayee tias, “Txawm yog cov Yixayee coob npaum li tej xuab zeb ntawm ntug hiavtxwv, los cov uas yuav dim muaj tsawg heev. Rau qhov Vajtswv yuav ua kom tiav sai kawg rau saum lub ntiajteb raws li nws hais tseg.” Thiab raws li Yaxaya hais ua ntej tias, “Yog tus Tswv uas muaj hwjchim loj kawg tsis tseg peb muaj noob cia, ces peb kuj yuav zoo ib yam li lub moos Xaudoo thiab zoo li lub moos Kaumaula.” Yog li ntawd, peb yuav hais li cas? Yuav hais tias lwm haiv neeg uas tsis tau nrhiav txojkev ncaj ncees kuj tau txojkev ncaj ncees lawm, yog txojkev ncaj ncees uas tau ntawm txojkev ntseeg, tiamsis cov Yixayee uas nrhiav txojkev ncaj ncees ntawm qhov uas xyaum raws li txoj kevcai, kuj tsis tau li. Vim yog li cas? Vim lawv tsis nrhiav ntawm txojkev ntseeg, lawv nrhiav ntawm txojkev xyaum, lawv thiaj dawm lub pob zeb uas ua rau lawv dawm, raws li uas muaj lus sau cia tias, “Saib maj, kuv teeb ib lub pob zeb rau hauv Xi‑oo yuav ua kom dawm, thiab lub pob zeb yuav ua kom ntog. Tus uas tso siab rau yuav tsis raug txaj muag.” Cov kwvtij, tej uas kuv lub siab ntshaw thiab siv zog thov Vajtswv pab cov Yixayee yog thov kom lawv tau kev dim. Kuv ua timkhawv txog lawv tias lawv kub siab lug ua koom tu Vajtswv tiamsis lawv paub tsis tag. Rau qhov lawv tsis paub txojkev ncaj ncees uas Vajtswv pub tiamsis lawv siv zog rhawv lawv txojkev ncaj ncees, lawv tsis yeem nyob hauv Vajtswv txojkev ncaj ncees. Rau qhov tus Khetos yog qhov uas kawg nkaus ntawm txoj kevcai kom txhua tus uas ntseeg thiaj tau kev ncaj ncees. Mauxe sau txog txojkev ncaj ncees uas los ntawm txoj kevcai tias, “Tus uas xyaum raws nraim yuav tau txojsia ntawm qhov uas xyaum ntawd.” Tiamsis txojkev ncaj ncees uas los ntawm txojkev ntseeg hais li no tias, “Tsis txhob xav hauv lub siab tias, ‘Leejtwg yuav nce mus saum ntuj?’ ” (yog mus coj Khetos nqes los) “lossis, ‘Leejtwg yuav nqes mus rau hauv lub qhov tob tob?’ ” (yog mus coj Yexus sawv hauv qhov tuag los.) Txojkev ncaj ncees hais li cas? Kuj hais tias, “Tej lus ntawd yeej nyob ze koj, nyob hauv koj lub qhov ncauj thiab nyob hauv koj lub siab” (yog tej lus uas ua kom muaj kev ntseeg uas peb tshaj tawm no.) Yog koj lub ncauj lees hais tias Yexus yog tus Tswv thiab lub siab ntseeg tias Vajtswv twb tsa Yexus sawv hauv qhov tuag rov los, koj yuav dim. Qhov uas lub siab ntseeg thiaj li suav tias ncaj ncees, qhov uas lub ncauj lees thiaj li dim. Vajtswv phau ntawv hais cia tias, “Txhua tus uas ntseeg nws yuav tsis raug txaj muag.” Cov Yudai thiab cov Kili kuj tsis txawv qhov twg. Tus Tswv ib leeg yog sawvdaws tus Tswv thiab pub nplua mias rau txhua tus uas thov nws. Vim tias “Txhua tus uas tuav tus Tswv lub npe thov yuav dim.” Cov uas tsis tau ntseeg tus Tswv yuav ua li cas thov tau nws? Thiab cov uas tsis tau hnov txog nws yuav ua li cas ntseeg tau nws? Thaum tsis muaj leejtwg tshaj tawm, lawv yuav ua li cas tau hnov? Thiab yog tsis muaj leejtwg txib mus, lawv yuav ua li cas mus tshaj tawm tau? Raws li uas muaj lus sau cia hais tias, “Cov uas piav txoj xov zoo txhais kotaw zoo nkauj kawg.” Tiamsis tsis yog txhua tus ntseeg txoj xov zoo ntawd. Rau qhov Yaxaya hais tias, “Tus Tswv, leejtwg ntseeg tej uas lawv tau hnov ntawm peb?” Yog li no txojkev ntseeg tshwm los ntawm qhov uas tau hnov, thiab qhov uas tau hnov kuj yog tshwm los ntawm qhov uas tshaj tawm txog Khetos. Kuv nug tias, lawv tsis tau hnov lov? Lawv tau hnov lawm tiag tiag, rau qhov “Lawv lub suab twb nrov ncha mus thoob lub ntiajteb lawm, thiab lawv tej lus kuj mus kawg qab ntuj.” Kuv nug dua tias Yixayee tsis nkag siab lov? Mauxe xub hais ua ntej tias, “Kuv yuav ua rau nej khib cov uas tsis yog ib haiv neeg, kuv yuav muab ib haiv neeg ruam zes nej chim.” Thiab Yaxaya ua siab tuab hais tias, “Cov uas tsis nrhiav kuv twb ntsib kuv lawm, kuv los tshwm rau cov uas tsis tau nug nrhiav kuv.” Thiab nws hais txog cov Yixayee tias, “Kuv cev kuv txhais tes tas hnub tas hmo rau haiv neeg uas tawv ncauj thiab pheej fav xeeb.” Kuv txawm nug tias, Vajtswv muab nws haiv neeg tso tseg lawm lov? Tsis yog li ntawd. Kuv tus kheej kuv yeej yog haiv neeg Yixayee, yog Aplahas caj ces thiab yog xeem Npeeyamee. Vajtswv tsis tau muab haiv neeg uas nws xaiv cia lawd tso tseg. Nej tsis paub Vajtswv phau ntawv zaj uas hais txog Eliya lov? Nws yws cov Yixayee lub txim rau Vajtswv tias, “Tus Tswv, lawv tua cov xibhwb cev koj li lus, lawv muab koj tej thaj xyeem rhuav pov tseg. Tsuas tshuav kuv tib leeg xwb los lawv tseem nrhiav txov kuv txojsia thiab.” Tiamsis Vajtswv teb nws li cas? “Kuv tseg xya txheeb leej cia rau kuv, yog cov uas tsis tau txhos caug pe dab Npa‑as.” Ib yam li ntawd, niaj hnub nimno tseem tshuav ib co nyob raws li uas Vajtswv txojkev hlub xaiv cia. Tiamsis yog xaiv raws li txojkev hlub, mas tsis yog raws li txojkev xyaum lawm. Yog raws li txojkev xyaum mas txojkev hlub tsis yog tseem kev hlub lawm. Yog li ntawd yuav hais li cas? Cov Yixayee tsis ntsib yam uas lawv nrhiav. Cov uas Vajtswv xaiv cia thiaj ntsib, tiamsis dua li lwm tus ua lub siab tawv, raws li uas muaj lus sau cia tias, “Vajtswv pub lub siab ruam puas ntsoog, lub qhov muag tsis pom kev, thiab lub qhov ntsej tsis hnov lus rau lawv los txog niaj hnub nimno.” Thiab Davi hais tias, “Thov cia lawv lub rooj noj ua yej ua ntxiab cuab lawv, thiab ua yam uas lawv dawm thiab yam uas pauj rau lawv. Thov kom lawv lub qhov muag tsaus lawv thiaj tsis pom kev, thiab ua kom lawv lub duav khoov mus li.” Kuv thiaj nug tias cov Yixayee dawm ntog tag lov? Tsis yog li ntawd. Tiamsis qhov uas lawv fav xeeb ntawd ua rau txojkev dim nthuav mus rau lwm haiv neeg xwv thiaj ua rau cov Yixayee khib. Yog qhov uas lawv fav xeeb ntawd ua rau tag nrho lub ntiajteb tau koob hmoov nplua mias thiab yog qhov uas lawv plam lawm ua rau lwm haiv neeg tau koob hmoov nplua mias, mas thaum cov Yixayee los ntseeg txhij lawm yuav yimhuab zoo dua. Kuv hais rau nej cov uas yog lwm haiv neeg. Vim kuv yog ib tug tubtxib rau lwm haiv neeg, kuv thiaj qhuas kuv tes haujlwm xwv thiaj ua rau kuv cov neeg khib thiab cawm tau lawv qee leej dim. Yog qhov uas lawv raug muab tso tseg lawm ua chaw rau lub ntiajteb rov los nrog Vajtswv sib raug zoo, mas qhov uas Vajtswv rov lees yuav lawv dua, mas yuav zoo li lawv sawv hauv qhov tuag rov los los tsis yog? Yog thawj phaum hmoov uas muab xyeem, dawb huv lawm, tag nrho cov hmoov huvsi dawb huv thiab. Yog tus cag dawb huv lawm tej ceg kuj dawb huv thiab. Yog tej ceg ib txhia raug muab txiav lawm thiab muab koj uas yog txiv aulib qus tus ntsuag los txuas nyob cov ceg ntawd li chaw kom thiaj koom tib cov dej ntawm lub hauv paus txiv aulib nyeg los yug, mas koj tsis txhob khav saib tsis taus cov ceg ntawd. Yog koj khav, cia li nco tias koj tsis tau yug tus cag, tiamsis tus cag yug koj. Koj yuav hais tias, “Tej ceg raug muab txiav pov tseg kom thiaj muab kuv txuas rau hauv.” Tseeb tiag. Lawv yeej raug muab txiav vim lawv tsis ntseeg, tiamsis koj nyob tau vim yog koj ntseeg. Yog li ntawd koj tsis txhob khav theeb, koj yuav tsum paub ntshai, rau qhov yog Vajtswv tsis tseg tej ceg nyeg ntawd nyob, nws yeej yuav tsis tseg koj nyob ib yam nkaus thiab. Vim li no cia li tshuaj saib Vajtswv txojkev hlub thiab qhov uas nws ua nruj ua tsiv. Nws ua nruj ua tsiv rau cov uas dawm ntog, tiamsis nws ua txojkev hlub tshwm rau koj, tsuav yog koj nyob hauv nws txojkev hlub ntawd mus li. Yog tsis ua li ntawd, koj yuav raug muab txiav pov tseg thiab. Thiab cov Yixayee yog lawv yeem tso qhov uas pheej tsis ntseeg tseg mas lawv yuav raug muab rov txuas dua, rau qhov Vajtswv muaj hwjchim muab lawv rov los txuas dua tau thiab. Yog koj raug muab txiav ntawm tsob txiv aulib uas ib txwm yeej yog txiv aulib qus thiab raug muab txuas rau hauv tsob txiv aulib nyeg uas ib txwm tsis tau txuas dua li, mas qhov uas muab tej ceg uas ib txwm yog ceg nyeg txuas rau lawv tsob txiv aulib nyeg kuj yimhuab yoojyim dua. Cov kwvtij 'e, kuv xav kom nej nkag siab txog tej uas muab npog cia tob tob lawd, kom nej thiaj tsis khav tias nej txawj ntse. Cov Yixayee ua lub siab tawv ib ntus xwb mus txog thaum lwm haiv neeg nkag los txhij lawm, ces tag nrho cov Yixayee sawvdaws kuj yuav dim, raws li uas muaj lus sau cia hais tias, “Tus cawmseej yuav tuaj hauv Xi‑oo tuaj, nws yuav rhuav tej kev phem kom ploj hauv Yakhauj mus.” “No yog tej lus cog tseg uas kuv cog rau thaum kuv daws lawv lub txim.” Hais txog txoj xov zoo mas lawv ua yeeb ncuab rau Vajtswv nej thiaj tau qabhau. Tiamsis hais txog qhov uas xaiv cia lawd, lawv yog cov uas Vajtswv hlub vim yog saib rau lawv tej poj koob yawm txwv. Rau qhov Vajtswv yeej tsis hloov siab rau tej uas nws pub dawb thiab qhov uas nws hu los. Yav tag los nej tsis mloog Vajtswv lus tiamsis nimno nej tau Vajtswv txojkev khuvleej vim yog tim cov Yixayee tsis mloog lus. Ib yam li ntawd lawv cov ntawd kuj tsis mloog lus xwv nimno lawv thiaj tau kev khuvleej vim yog Vajtswv twb khuvleej nej lawm. Vajtswv twb tu kom neeg txhua tus tsis mloog lus kom nws thiaj khuvleej tau txhua tus. Au, Vajtswv muaj txhua yam nplua mias. Nws lub tswvyim thiab kev txawj ntse nyob tob kawg. Tej uas Vajtswv txiav txim siab mas paub tsis tag, thiab nws tej kev mas tshuaj tsis tau. “Leejtwg txawj paub tus Tswv lub siab lossis leejtwg ua nws lub chaw sablaj?” “Leejtwg pub ib yam dabtsi rau Vajtswv uas Vajtswv yuav tsum pauj rau nws?” Rau qhov txhua yam lus ntawm Vajtswv los thiab muaj nyob hauv nws thiab tsim los rau nws. Thov kom nws tau koob meej mus ib txhis. Amee. Yog li no, cov kwvtij, vim Vajtswv txojkev khuvleej kuv thiaj thov nej muab nej lub cev xyeem pub rau Vajtswv, yog yam uas xyeem ciaj sia thiab dawb huv thiab txaus Vajtswv lub siab ua qhov uas nej sab ntsuj plig pe hawm Vajtswv. Tsis txhob yoog raws li tej neeg tiam no ua. Nej yuav tsum txais kev hloov dua siab nej tej kev xav thiaj hloov dua tshiab. Mas nej yuav paub tias Vajtswv lub siab nyiam li cas thiaj paub tias yam uas zoo thiab yam uas txaus nws siab thiab yam uas zoo kawg nkaus. Kuv hais rau nej txhua tus hauv Vajtswv txojkev hlub uas pub rau kuv lawm tias, nej tsis txhob xav tias nej tus kheej loj dhau li uas tsim nyog xav, tiamsis nej yuav tsum ua tib zoo xav kom phim qhov uas Vajtswv pub txojkev ntseeg npaum li cas rau nej. Hauv peb lub cev peb muaj ntau yam thiab txhua yam ntawd tsis yog ua tib yam haujlwm xwb. Ib yam li ntawd, peb muaj coob leej kuj koom ib lub cev hauv Khetos thiab ib leeg koom rau ib leeg. Peb txhua tus nyias muaj nyias tswvyim raws li txojkev hlub uas Vajtswv pub rau peb. Yog nws pub kom cev Vajtswv lus, kuj cia li cev raws li muaj kev ntseeg npaum li cas, tus txawj tu lwm tus, cia li ua koom, tus txawj qhuab qhia cia li qhuab qhia, tus txawj txhawb lwm tus lub zog cia li txhawb, tus txawj pub rau luag, cia li ua siab dav pub, tus txawj kav cia li muab siab rau kav, tus txawj khuvleej luag cia li zoo siab hlo khuvleej. Cia li hlub tuaj nruab siab tiag tiag. Cia li ntxub yam uas phem, tuav rawv yam uas zoo. Cia li sib hlub li kwvtij sib hlub. Muab lwm tus saib hlob dua yus. Cia li rau siab ua haujlwm tsis txhob qaug zog, cia li kub siab lug sab ntsuj plig ua koom tu tus Tswv. Cia li zoo siab xyiv fab rau hauv txojkev vam, cia li ua lub siab ntev thev kev txom nyem, thiab thov Vajtswv tsis tseg tsis tu li. Cia li pub rau cov xov dawb uas tu pluas, thiab ua siab dav txais qhua. Cia li foom koob hmoov rau cov uas tsim txom nej, cia li foom koob hmoov rau lawv tsis txhob tsawm foom li. Cia li nrog cov uas xyiv fab zoo siab xyiv fab, thiab nrog cov uas quaj, quaj. Cia li koom ua ib lub siab, tsis txhob tsab ua loj, yuav tsum yeem koom nrog cov neeg tsis tseem ceeb. Tsis txhob xav tias yus ntse dua. Tsis txhob ua phem pauj phem rau leejtwg kiag li, tiamsis tsom ntsoov ua yam uas sawvdaws pom tias zoo. Yog ua tau mas koj yuav siv zog nrog luag nyob sib hum xeeb npaum li uas koj tus kheej ua tau. Nej cov uas kuv hlub, tsis txhob sib pauj, cia li muab qhov no tso rau Vajtswv txojkev npau taws vim muaj lus sau cia hais tias, “Qhov uas ua pauj yog kuv li feem, kuv yuav pauj. Tus Tswv hais li no ntag.” Tiamsis “Yog koj tus yeeb ncuab tshaib plab cia li muab mov rau nws noj, yog nws nqhis dej cia li muab rau nws haus, Yog koj ua li ntawd, koj yuav rauv ib cub thee cig plaws rau saum nws taubhau.” Tsis txhob cia kev phem kov yeej nej, tiamsis cia qhov zoo kov yeej qhov phem. Txhua tus yuav tsum nyob hauv tus uas kav qab kev tswjhwm, vim tias tsis muaj ib tug hwjchim twg uas tsis yog los ntawm Vajtswv los, thiab cov uas tau hwjchim ntawd yog Vajtswv tsa. Vim li ntawd tus uas tawv nyom lub hwjchim ntawd kuj yog nws tawv nyom tus uas Vajtswv tsa, thiab cov uas tawv nyom ntawd yuav raug txim. Tus uas xyaum zoo tsis txog ntshai cov thawj kav, tiamsis tus uas xyaum tsis zoo yuav ntshai. Koj tsis xav ntshai tus uas muaj hwjchim kav lov? Yog li ntawd koj yuav tsum ua qhov zoo xwb mas nws thiaj qhuas koj, vim nws yog Vajtswv tus qhev uas muaj txiaj ntsig rau koj. Tiamsis yog koj ua phem, cia li ntshai nawj, rau qhov tus uas kav ntawd tsis yog tuav ntaj do do xwb, nws yog Vajtswv tus qhev uas yuav txiav txim li uas Vajtswv npau taws rau tus uas ua txhaum. Vim li no nej yuav tsum nyob hauv cov nom tswv qab kev tswjhwm tsis yog yuav zam Vajtswv txojkev npau taws xwb tiamsis yog muaj lub siab uas paub qhov zoo qhov phem. Vim li no nej yuav tsum them se, rau qhov cov uas muaj hwjchim kav yog Vajtswv cov qhev uas ua tej haujlwm no mus li. Cia li them rau txhua tus uas koj yuav tsum them, tsis hais them se neeg them se liaj se teb rau tus uas yuav tsum them, hwm tus uas yuav tsum hwm thiab muab koob meej rau tus uas yuav tsum muab. Tsis txhob tshuav leejtwg li nuj nqes dabtsi li, tsuas yog tshuav nqe sib hlub, rau qhov tus uas hlub lwm tus kuj ua raws nraim li txoj kevcai huvsi lawm. Nqe uas hais tias, “Tsis txhob deev luag poj luag txiv, tsis txhob tua neeg, tsis txhob ua tub sab, tsis txhob ua siab hlob xav tau luag tug,” thiab lwm nqe kuj sau zog rau hauv nqe no uas hais tias, “Nej yuav tsum hlub kwvtij zej zog ib yam li nej hlub nej tus kheej.” Kev hlub tsis ua phem rau kwvtij zej zog kiag li, vim li no txojkev hlub thiaj ua rau txoj kevcai tiav puv npo. Tsis tag li ntawd nej yeej paub tias txog lub sijhawm uas nej yuav tsum tsim dheev nruab dab ntub lawm rau qhov nimno txojkev dim twb los ze heev dua li thaum uas peb pib ntseeg lawm. Twb tsaus ntuj ntev lawm twb yuav kaj ntug. Peb cia li tso qhov tsaus ntuj tej haujlwm tseg thiab muab txojkev kaj tej cuab yeej los hnav. Cia peb xyaum zoo kom phim qhov uas nyob nruab hnub, tsis txhob noj haus qaug dej qaug cawv, tsis txhob ua dev ua npua ua phem ua qias, tsis txhob sib cav sib ceg sib khib. Tiamsis cia li muab tus Tswv Yexus Khetos los hnav, tsis txhob npaj siab ua tej kev phem uas lub cev nqaij tawv ntshaw. Nej yuav tsum txais tus uas kev ntseeg yau, tsis txhob sib cam rau tej uas nyias lub siab xav. Ib tug ntseeg hais tias noj txhua yam tau, tiamsis tus uas kev ntseeg yau tsuas yog noj zaub xwb. Tus uas noj los tsis txhob saib tsis taus tus uas tsis noj, thiab tus uas tsis noj los tsis txhob txiav txim tias tus uas noj txhaum, rau qhov Vajtswv twb txais nws lawm. Koj yog leejtwg es koj yuav txiav txim rau lwm tus li tub qhe? Tus tub qhe yuav sawv ntseg lossis yuav ntog kuj nyob ntawm nws tus lospav. Nws yuav sawv ruaj khov rau qhov Vajtswv muaj peevxwm ua rau nws sawv ntseg tau. Ib tug hwm tias muaj ib hnub zoo dua li ib hnub, tiamsis muaj dua ib tug hwm tias txhua hnub zoo ib yam nkaus. Cia txhua tus nyias ruaj siab rau nyias qhov kev xav. Tus uas hwm hnub kuj yog hwm ua rau tus Tswv tau koob meej. Tus uas noj txhua yam kuj yog noj ua rau tus Tswv tau koob meej rau qhov nws ua Vajtswv tsaug. Thiab tus uas tsis noj kuj yog tsis noj ua rau tus Tswv tau koob meej thiab ua Vajtswv tsaug. Peb cov tsis muaj leejtwg muaj txojsia nyob rau nws tus kheej thiab tsis muaj leejtwg tuag rau nws tus kheej xwb. Yog peb muaj txojsia nyob kuj yog nyob rau tus Tswv, thiab yog peb tuag kuj yog tuag rau tus Tswv. Yog li ntawd txawm yog peb muaj txojsia nyob lossis tuag mus lawm los peb yeej yog tus Tswv li. Vim li no Khetos thiaj li tuag thiab ciaj sawv rov los kom thiaj ua tau cov neeg tuag thiab cov neeg ciaj tus Tswv. Koj nev, ua cas koj yuav txiav txim rau koj tus kwvtij? Lossis ua cas koj yuav saib tsis taus koj tus kwvtij? Vim tias peb txhua tus yuav tsum sawv ntawm Vajtswv lub zwm txwv txiav txim. Rau qhov muaj lus sau cia hais tias, “Tus Tswv hais tias, ‘Kuv yeej muaj txojsia nyob, txhua lub hauv caug yuav pe kuv thiab txhua tus nplaig yuav qhuas Vajtswv.’ ” Yog li no peb txhua tus nyias yuav tsum hais nyias zaj rau Vajtswv. Yog li no peb ib leeg tsis txhob txiav txim tias ib leeg txhaum, tiamsis peb yuav tsum txiav txim siab tias yuav tsis ua ib yam dabtsi ua rau lwm tus dawm lossis tav lwm tus kev mas zoo dua. Hauv tus Tswv Yexus kuv paub thiab ruaj siab tias tsis muaj ib yam dabtsi uas nws cia li qias nws xwb, tiamsis yog leejtwg xav tias yam twg qias tsis huv mas yam ntawd kuj qias tsis huv rau tus ntawd. Yog koj tus kwvtij nyuaj siab rau tej zaub mov uas koj noj, koj kuj tsis tau xyaum raws li txojkev hlub lawm. Tsis txhob cia tej uas koj noj ua rau tus uas Khetos twb tuag txhiv lawd puam tsuaj. Yog li no tsis txhob cia yam uas koj pom tias zoo, ua lub chaw rau lwm tus thuam. Rau qhov Vajtswv lub tebchaws tsis yog kev noj kev haus, tiamsis yog qhov uas ncaj ncees thiab nyob kaj siab lug thiab txojkev xyiv fab uas nyob hauv Vaj Ntsuj Plig uas dawb huv. Tus uas ua koom tu Khetos raws nraim li no kuj ua hum Vajtswv lub siab thiab neeg kuj hwm nws. Yog li no cia peb huas qas ntshis ua tej uas ua kom muaj kev sib hum xeeb thiab ua tej uas ua rau ib leeg txhawb ib leeg lub zog. Tsis txhob rhuav Vajtswv tes haujlwm vim yog saib rau tej zaub mov. Txhua yam zaub mov puavleej huv tiag tiamsis qhov uas noj tej zaub mov uas ua kom lwm tus dawm kuj yog tsis zoo. Qhov uas tsis noj nqaij lossis tsis haus cawv txiv hmab lossis tsis ua ib yam dabtsi uas ua rau koj tus kwvtij dawm, kuj yog qhov zoo. Koj kev ntseeg uas ntsig txog tej no cia nyob ntawm koj thiab Vajtswv xwb. Tus uas tsis muaj chaw hais tias nws tus kheej txhaum rau tej uas nws pom zoo, kuj tau nyob kaj siab lug. Tiamsis tus uas ua xyem xyav yog nws tseem noj kuj raug txim lawm vim nws tsis noj raws li nws ntseeg. Txhua yam uas tsis yog ua raws li qhov uas ntseeg puavleej txhaum huvsi. Peb cov uas ruaj khov lawm tsim nyog thev qhov uas cov tsis tau muaj zog ua yuam kev, thiab peb tsis txhob ua kom txaus peb lub siab xwb. Cia peb txhua tus ua rau lwm tus txaus siab xwv thiaj muaj qabhau txhawb tau lwm tus lub zog. Rau qhov Khetos tsis ua yam uas txaus nws siab xwb, tiamsis raws li muaj lus sau cia tias, “Tej lus uas luag thuam koj poob rau saum kuv.” Rau qhov tej uas sau cia yav thaum ub kuj yog sau cia qhuab qhia peb kom Vajtswv txojlus thiaj ua rau peb muaj lub siab ntev thev taus thiab txhawb peb lub zog peb thiaj muaj siab vam. Thov Vajtswv uas pub peb muaj lub siab ntev thev taus thiab txhawb peb lub zog pab nej kom koom tau ua ib lub siab raws li Yexus Khetos, kom nej thiaj ua ib lub siab qhuas Vajtswv uas yog peb tus Tswv Yexus Khetos leej Txiv. Vim li no, ib leeg yuav tsum txais yuav ib leeg, ib yam li Khetos twb txais yuav nej kom thiaj ua rau Vajtswv tau koob meej. Kuv hais rau nej tias Khetos los tu cov uas ua kevcai txiav kom thiaj ua Vajtswv txojkev tseeb tshwm los, thiaj qhwv tej lus uas cog tseg rau peb tej yawg koob lawd, thiab lwm haiv neeg thiaj tau qhuas Vajtswv vim nws khuvleej. Raws li muaj lus sau cia hais tias, “Vim li no kuv thiaj qhuas koj rau hauv lwm haiv neeg thiab hu nkauj qhuas koj lub npe.” thiab muaj lus hais dua tias, “Lwm haiv neeg 'e, cia li nrog Vajtswv haiv neeg zoo siab xyiv fab.” Thiab muaj lus hais dua tias, “Lwm haiv neeg txhua tus, cia li qhuas tus Tswv, ib tsoom neeg sawvdaws cia li qhuas ntxhias nws.” Thiab Yaxaya kuj hais tias, “Yexi tus cag yuav los, yog tus uas yuav sawv kav lwm haiv neeg. Lwm haiv neeg yuav muaj lub chaw vam rau hauv nws.” Thov Vajtswv uas pub kev vam ua kom nej xyiv fab thiab nyob kaj siab lug kawg nkaus hauv txojkev ntseeg, kom Vaj Ntsuj Plig dawb huv lub hwjchim thiaj pub kom nej muaj siab vam kawg nkaus. Kuv cov kwvtij, kuv ntseeg tias nej muaj txhua yam zoo thiab paub txhua yam thiab ib leeg txawj ntuas ib leeg. Tiamsis qhov uas kuv muaj cuab kav sau qee zaj rau nej yog ceeb toom kom nej nco, vim yog txojkev hlub uas Vajtswv pub rau kuv kom ua Yexus Khetos tus qhev mus rau lwm haiv neeg thiab ua pov thawj tes haujlwm qhia Vajtswv txoj xov zoo xwv lwm haiv neeg thiaj ua tau yam uas muab xyeem hum Vajtswv lub siab, yog yam uas Vaj Ntsuj Plig dawb huv muab cais kom dawb huv lawm. Yog li no, hauv Yexus Khetos kuv thiaj muaj chaw khav txog tej uas kuv ua rau Vajtswv. Kuv tsis kav hais txog ib yam dabtsi tsuas yog hais txog tej uas Yexus Khetos txib kuv ua kom coj lwm haiv neeg los mloog Vajtswv lus. Nws siv kuv tej lus thiab tej haujlwm uas kuv ua, yog siv lub hwjchim ntawm tej txujci tseem ceeb thiab txujci phimhwj, thiab siv Vaj Ntsuj Plig uas dawb huv lub hwjchim, kuv thiaj piav txoj xov zoo hais txog Khetos tag nrho huvsi mus thoob plaws txij ntua lub nroog Yeluxalees mus txog lub xeev Ililikhu. Kuv pheej npaj siab xav piav txoj xov zoo rau tej chaw uas tsis txeev muaj neeg mus hais txog Khetos lub npe kiag li, xwv kuv thiaj tsis mus ua rau saum tej taw tiag uas lwm tus twb ua cia lawd, raws li muaj lus sau cia hais tias, “Cov uas tsis txeev muaj neeg mus hais txog nws, lawv yuav tau pom, thiab cov uas tsis tau hnov dua yuav nkag siab.” No yog qhov uas tab kaum kuv ntau kuv thiaj tsis tau tuaj xyuas nej. Tiamsis nimno kuv tsis muaj haujlwm ua hauv tej tebchaws ntawd lawm, thiab kuv twb xav tuaj cuag nej ntau xyoo lawm. Vim li no, thaum kuv yuav hla nej mus rau Xapee tebchaws kuv vam tias kuv yuav ntsib nej, thiab thaum kuv nrog nej nyob ib ntus txaus siab lawm, nej yuav pab xa kuv mus. Nimno kuv tabtom mus rau Yeluxalees yog mus pab cov xov dawb. Rau qhov cov ntseeg hauv lub xeev Makhedaunia thiab lub xeev Akhaya pom zoo sau nyiaj xa mus rau cov xov dawb uas txom nyem hauv Yeluxalees. Lawv zoo siab ua qhov no thiab qhov tseeb lawv kuj tshuav cov ntseeg hauv Yeluxalees nqe thiab. Yog lwm haiv neeg los koom tej uas Vajtswv pub sab ntsuj plig rau cov ntseeg hauv Yeluxalees, kuj tsim nyog lawv tu cov hauv Yeluxalees sab nqaij tawv. Thaum kuv xa cov nyiaj uas sau ntawd mus cob rau lawv tag lawm kuv yuav hla nej mus rau Xapee tebchaws. Kuv paub tias thaum kuv tuaj txog nej kuv yuav coj Khetos li koob hmoov txhij zog tuaj rau nej. Cov kwvtij, vim muaj peb tus Tswv Yexus Khetos thiab Vaj Ntsuj Plig txojkev hlub kuv thiaj thov kom nej koom ib lub siab siv zog thov Vajtswv pab kuv kom dim cov neeg uas tsis ntseeg hauv lub xeev Yudia thiab thov kom tej haujlwm uas kuv mus ua rau hauv Yeluxalees yuav hum cov xov dawb lub siab, xwv kuv thiaj muaj siab xyiv fab tuaj cuag nej raws li Vajtswv lub siab nyiam, thiab nrog nej nyob sov siab. Thov Vajtswv uas pub txojkev siab tus nrog nraim nej txhua tus. Amee. Kuv thov qhia rau nej paub peb tus muam Fenpi uas yog ib tug ua haujlwm hauv pawg ntseeg Kheekhia. Thov nej tos txais nws hauv tus Tswv raws li uas tsim nyog txais cov xov dawb thiab pab nws raws li nws cheem tsum rau qhov nws tau pab neeg coob coob thiab tau pab kuv. Kuv nco ntsoov txog Plixakha thiab Akhila uas nrog kuv ua Yexus Khetos tes haujlwm, ob tug tau sev nyog txojsia pab kuv. Kuv ua ob tug tsaug, tsis yog kuv tib leeg xwb tiamsis txhua pawg ntseeg uas yog lwm haiv neeg kuj ua ob tug tsaug thiab. Thiab nco txog pawg ntseeg uas nyob hauv ob tug tsev. Nco txog Epainetha uas kuv hlub, nws yog thawj tug uas los ntseeg hauv lub xeev Axia. Nco txog Maivliag uas siv zog ua haujlwm pab nej. Nco txog Anraunika thiab Yuna, uas nrog kuv koom ib haiv neeg thiab nrog kuv raug kaw ua ke. Ob tug muaj koob meej hauv cov tubtxib, thiab ob tug los nyob hauv Khetos ua kuv ntej. Nco txog Aplhi‑atha, uas kuv hlub hauv tus Tswv. Nco txog Unpana uas nrog peb koom ua Khetos tes haujlwm thiab nco txog Xathakhi uas kuv hlub. Nco txog Apele uas raug muab sim tias zoo heev rau hauv Khetos. Nco txog Alithaupula tsev neeg. Nco txog Helaudi‑oo uas nrog kuv koom ib haiv neeg. Nco txog cov uas ntseeg tus Tswv hauv Naxixa tsev neeg. Nco txog Rhifena thiab Rhifauxa uas tabtom ua tus Tswv tes haujlwm. Nco txog Pawxi uas kuv hlub thiab nws siv zog ua Vajtswv tes haujlwm. Nco txog Lufa uas xaiv cia rau hauv tus Tswv thiab nws niam uas yog kuv niam thiab. Nco txog Axikhitha, Falekoo, Hawme, Palaunpa, Hawma thiab cov kwvtij uas nrog lawv nyob. Nco txog Filaulauka, Yuli, Nele‑a thiab nws tus muam, thiab Aulinpa thiab cov xov dawb sawvdaws uas nrog lawv nyob. Cia li sib fim ntawm txoj kevcai nwj uas dawb huv. Khetos txhua pawg ntseeg nco txog nej. Cov kwvtij, kuv thov nej tshuaj saib tej neeg uas tsim kev sib cav thiab tav nej kev ua rau nej tig ntawm tej lus qhia uas nej tau kawm los lawd. Cia li txav deb ntawm lawv. Lawv cov ntawd tsis yog ua peb tus Tswv Yexus Khetos li tub qhe, lawv ua lawv lub plab li qhev xwb, thiab ua lus mos lus muag lus qab zib dag ntxias cov uas tsis paub qabhau lub siab. Qhov uas nej mloog lus twb ncha mus txog txhua tus lawm, kuv thiaj zoo siab kawg rau nej. Kuv xav kom nej txawj ntse rau qhov uas zoo, ruam rau qhov uas phem. Tshuav tsis ntev Vajtswv uas pub txojkev siab tus yuav muab Xatas nias ntho rau hauv nej xib taws. Thov peb tus Tswv Yexus Khetos txojkev hlub nrog nraim nej. Timaute uas nrog kuv ua haujlwm kuj nco txog nej. Luka thiab Yaxoo thiab Xauxipathaw uas nrog kuv koom ib haiv neeg kuj nco txog nej thiab. Kuv uas yog Thawthia, yog tus sau Povlauj tsab ntawv no, kuv kuj nco txog nej hauv tus Tswv. Kai‑a uas kuv nrog nyob thiab nws muab nws lub tsev ua chaw rau pawg ntseeg sawvdaws pe Vajtswv nco txog nej. Elatha uas ua thawj saib xyuas txhab nyiaj hauv lub moos thiab peb tus kwv Khautha nco txog nej thiab. Cia li qhuas tus uas pab tau nej nyob ruaj raws li txoj xov zoo uas kuv piav thiab raws li qhov uas kuv tshaj tawm txog Yexus Khetos, thiab raws li qhov uas nthuav tej uas muab npog cia tob tob thaum ub los lawd tshwm los. Tiamsis nimno twb muab tej no nthuav tshwm los rau txhua haiv neeg pom tseeb raws li tej lus uas cov xibhwb cev Vajtswv lus sau cia, yog raws li Vajtswv uas muaj txojsia nyob mus ib txhis tau hais cia kom lawv thiaj tau ntseeg thiab mloog lus. Thov cia Vajtswv tib leeg uas muaj tswvyim tau koob meej hauv Yexus Khetos mus ib txhis. Amee. Povlauj uas raug hu los ua Yexus Khetos tus tubtxib raws li Vajtswv lub siab nyiam thiab peb tus kwvtij Xauthene hais mus rau Vajtswv pawg ntseeg hauv lub moos Khaulee uas muab cais ua cov uas dawb huv rau hauv Yexus Khetos thiab raug hu los ua xov dawb koom nrog txhua tus uas nyob txhua qhov uas tuav peb tus Tswv Yexus Khetos lub npe uas yog peb thiab lawv tus Tswv. Thov txojkev hlub thiab txojkev siab tus ntawm Vajtswv uas yog peb leej Txiv thiab ntawm tus Tswv Yexus Khetos nrog nraim nej nyob. Kuv ua Vajtswv tsaug txog nej tsis tu ncua vim txojkev hlub uas Vajtswv pub hauv Yexus Khetos rau nej. Nej tau txais txhua yam hauv Khetos puv npo tsis hais txhua yam kev hais lus thiab txhua yam kev txawj ntse, vim tias tej lus timkhawv hais txog Khetos nyob ruaj khov rau hauv nej lawm. Nej thiaj tsis tu ncua ib yam dabtsi uas Vajtswv pub rau ncua sijhawm uas nej tseem tos rawv peb tus Tswv Yexus Khetos rov los. Yexus yuav ua rau nej nyob ruaj mus txog thaum kawg xwv thiaj tsis muaj chaw thuam nej tau rau hauv peb tus Tswv Yexus Khetos hnub. Vajtswv uas hu nej los nrog nws tus tub Yexus Khetos uas yog peb tus Tswv sib raug zoo yog tus ncaj uas peb tso siab tau. Cov kwvtij, kuv tuav peb tus Tswv Yexus Khetos lub npe thov kom nej sawvdaws nyob sib hum thiab tsis txhob tawg ua pab ua pawg, thiab thov kom nej koom ua ib lub siab thiab xam pom ib yam nkaus. Kuv cov kwvtij, Khalau‑e tsev neeg piav rau kuv mloog tias muaj kev sib cav sib ceg hauv nej. Kuv xav txog qhov uas nej nyias taus nyias hais tias “Kuv yog Povlauj cov,” “Kuv yog Apaulau cov,” “Kuv yog Khefa cov,” lossis “Kuv yog Khetos cov.” Muab Khetos faib ua ntau tus lawm lov? Povlauj yog tus raug teem rau saum khaublig ntoo this nej lov? Nej tau ua kevcai raus dej hauv Povlauj lub npe lov? Kuv ua Vajtswv tsaug uas kuv tsis tau muab nej cov leejtwg ua kevcai raus dej tsuas yog Khipa thiab Kai‑a xwb. Yog li ntawd, tsis muaj leejtwg hais tau tias nws ua kevcai raus dej hauv kuv lub npe. (Kuv tau muab Xatefana tsev neeg ua kevcai raus dej thiab. Dua li ntawd, kuv tsis paub tias kuv tau muab leejtwg ua kevcai raus dej.) Rau qhov Khetos tsis tau txib kuv mus coj ua kevcai raus dej tiamsis txib kom piav txoj xov zoo, tsis yog hais lus txawj lus ntse tsam ua rau Khetos tus khaublig ntoo tsis muaj hwjchim lawm. Zaj uas hais txog tus khaublig ntoo yog kev ruam rau cov uas tabtom puam tsuaj tiamsis yog Vajtswv lub hwjchim rau peb cov uas tabtom dim. Rau qhov muaj lus sau cia hais tias, “Kuv yuav rhuav tshem cov neeg uas muaj tswvyim lub tswvyim, thiab yuav ua rau cov neeg txawj ntse txojkev txawj ntse ploj mus.” Tus neeg muaj tswvyim nyob qhovtwg? Tus xibhwb qhia kevcai nyob qhovtwg? Tiam no tus uas txawj sib cam txog txhua yam nyob qhovtwg? Vajtswv twb ua rau lub ntiajteb lub tswvyim ruam lawm los tsis yog? Vim tias raws li uas Vajtswv lub tswvyim teem cia, lub ntiajteb siv ntiajteb lub tswvyim tsis txawj paub Vajtswv, mas Vajtswv thiaj li txaus siab siv txojkev ruam uas peb tshaj tawm ua rau cov uas ntseeg dim. Cov Yudai thov txujci tseem ceeb thiab cov Kili nrhiav tswvyim, tiamsis peb tshaj tawm txog Khetos uas raug teem rau saum khaublig ntoo, yog qhov uas ua rau cov Yudai dawm thiab lwm haiv neeg suav tias yog kev ruam. Tiamsis peb piav Khetos uas yog Vajtswv lub hwjchim thiab yog Vajtswv lub tswvyim rau cov uas Vajtswv twb hu los lawd tsis hais cov Yudai thiab cov Kili. Vim qhov uas Vajtswv ruam tseem muaj tswvyim loj dua neeg lub tswvyim, thiab qhov uas Vajtswv tsis muaj zog tseem muaj zog loj dua neeg lub zog. Cov kwvtij, cia li tshuaj saib thaum Vajtswv hu nej, nej zoo li cas. Raws li neeg ntiajteb xav, nej cov tsis muaj tsawg leej uas muaj tswvyim, tsis muaj tsawg leej uas muaj hwjchim thiab tsis muaj tsawg leej uas muaj koob meej. Tiamsis Vajtswv xaiv cov uas ruam hauv lub ntiajteb kom thiaj ua rau cov uas muaj tswvyim txaj muag. Vajtswv xaiv cov uas tsis muaj zog hauv lub ntiajteb kom thiaj ua rau cov uas muaj zog txaj muag. Vajtswv xaiv cov neeg qes qes thiab cov uas lub ntiajteb saib tsis taus thiab cov uas tsis tseem ceeb los kom rhuav tshem tau tej uas tseem ceeb, kom thiaj tsis muaj ib tug neeg khav tau rau ntawm Vajtswv lub xubntiag. Vim muaj Vajtswv nej thiaj tau nyob hauv Yexus Khetos uas yog lub tswvyim uas Vajtswv pub rau peb, nws yog peb txojkev ncaj ncees thiab muab peb cais kom dawb huv thiab txhiv peb dim, kom thiaj ua raws li uas muaj lus sau cia hais tias, “Cia tus uas khav tsuas khav txog tus Tswv xwb.” Cov kwvtij, thaum kuv tuaj txog nej, kuv tsis yog tuaj hais lus zaj lus zuag lossis siv kev txawj ntse qhia tej uas Vajtswv muab npog cia lawd. Rau qhov kuv npaj siab tias kuv yuav tsis qhia ib yam dabtsi tsuas yog qhia txog Yexus thiab qhov uas nws raug teem rau saum khaublig ntoo xwb. Thaum kuv tuaj cuag nej kuv qaug zog thiab ntshai tshee hnyo. Tej lus uas kuv hais thiab tej uas kuv qhia tsis yog siv tej lus txawj lus ntse ntxias nej tiamsis yog ua kom nej pom Vaj Ntsuj Plig lub hwjchim xwb, nej txojkev ntseeg thiaj tsis yog vam khom neeg lub tswvyim tiamsis vam khom Vajtswv lub hwjchim. Txawm li ntawd los peb kuj hais txog tswvyim rau cov uas paub qabhau lawm tiamsis tsis yog lub tswvyim ntawm tiam no thiab tsis yog lub tswvyim ntawm cov thawj uas kav tiam no uas tabtom yuav ploj mus. Tiamsis peb hais txog Vajtswv lub tswvyim uas tsis muaj leejtwg paub thiab muab zais cia lawm, yog lub tswvyim uas Vajtswv twb teem cia ua ntej tsim ntuj tsim teb uas yuav ua rau peb tau koob meej ci ntsa iab. Cov thawj uas kav tiam no tsis muaj ib tug paub lub tswvyim ntawd. Yog lawv paub lawm, lawv yuav tsis muab tus Tswv uas muaj hwjchim ci ntsa iab teem rau saum khaublig ntoo. Raws li uas muaj lus sau cia hais tias, “Yam uas qhov muag tsis pom qhov ntsej tsis tau hnov, thiab neeg lub siab xav tsis txog, yog yam uas Vajtswv npaj cia rau cov uas hlub Vajtswv,” mas Vajtswv kom Vaj Ntsuj Plig qhia yam ntawd rau peb, rau qhov Vaj Ntsuj Plig tshuaj saib txhua yam txawm yog nyob tob tob hauv Vajtswv. Tej uas neeg xav tsis muaj leejtwg paub tau, tsuas yog tus neeg ntawd tus ntsuj plig thiaj paub xwb. Ib yam nkaus li ntawd, tej uas Vajtswv xav kuj tsis muaj leejtwg paub tau, tsuas yog Vajtswv tus Ntsuj Plig thiaj paub xwb. Peb tsis yog tau ntsuj plig ntawm ntiajteb tiamsis tau Ntsuj Plig ntawm Vajtswv kom peb thiaj paub txog tej uas Vajtswv pub dawb dawb rau peb. Thiab peb hais txog tej no tsis yog hais tej lus uas neeg lub tswvyim qhia tiamsis yog tej lus uas Vaj Ntsuj Plig qhia, peb qhia tej uas yog sab ntsuj plig li rau cov uas muaj Vaj Ntsuj Plig. Tiamsis cov uas tsis muaj Vaj Ntsuj Plig mas lawv tsis txais yuav tej uas yog Vajtswv tus Ntsuj Plig li rau qhov lawv pom tias yog yam uas ruam thiab lawv tsis txawj nkag siab tsuas yog tus uas muaj Vaj Ntsuj Plig thiaj txawj tshuaj saib. Tus uas muaj Vaj Ntsuj Plig thiaj txawj tshuaj saib txhua yam, tiamsis tsis muaj leejtwg txawj tshuaj saib nws. “Leejtwg txawj paub Yawmsaub lub siab thiab taw qhia nws tau?” Tiamsis peb muaj Khetos lub siab lawm. Cov kwvtij, kuv tsis txawj hais rau nej ib yam li hais rau cov uas muaj Vaj Ntsuj Plig tiamsis hais yam li hais rau cov uas nyob sab nqaij daim tawv thiab tseem yog menyuam mos hauv Khetos. Kuv muab kua mis yug nej, tsis yog muab tej zaub mov rau qhov nej noj tsis tau, thiab nimno los nej tseem noj tsis tau thiab, vim nej tseem nyob sab nqaij tawv. Thaum nej tseem sib khib thiab ib leeg nrog ib leeg sib cav nej tseem nyob sab nqaij tawv thiab xyaum raws li neeg ntiajteb los tsis yog? Thaum ib tug hais tias, “Kuv yog Povlauj cov,” thiab dua ib tug hais tias, “Kuv yog Apaulau cov,” nej kuj zoo li neeg ntiajteb los tsis yog? Apaulau yog leejtwg? Povlauj yog leejtwg? Kuj yog cov uas ua haujlwm coj nej los ntseeg raws li tus Tswv tu haujlwm rau nyias ua nyias. Kuv yog tus cog, Apaulau yog tus ywg dej tiamsis Vajtswv ua kom loj hlob. Vim li no tus uas cog thiab tus uas ywg dej tsis tseem ceeb dabtsi, tsuas yog Vajtswv uas ua kom loj hlob thiaj li tseem ceeb. Tus uas cog thiab tus uas ywg dej kuj yeej yog tib pab thiab txhua tus yuav tau nqe zog raws li nyias tes haujlwm. Rau qhov peb koom nrog Vajtswv ua haujlwm, nej yog Vajtswv daim teb thiab yog Vajtswv lub tsev. Vim txojkev hlub uas Vajtswv pub rau kuv, kuv thiaj li tiag taw ib yam li tus Kws txawj ua tsev, thiab muaj dua ib tug tuaj tib thwv cib rau saum tej taw ntawd. Txhua tus yuav tsum ceev faj zoo tias nws yuav tib li cas. Rau qhov leejtwg yuav tiag dua taw tsis tau lawm, tsuas yog siv tej uas twb muab tiag lawm, yog Yexus Khetos xwb. Yog leejtwg yuav coj kub coj nyiaj coj hlaws zeb uas muaj nqes, coj ntoo, coj nroj qhuav lossis quav nyab tuaj tib rau saum tej taw ntawd, mas txhua tus tes haujlwm yeej yuav tshwm los rau sawvdaws pom, vim hnub uas teem cia ntawd yuav ua kom pom tseeb. Yuav raug hluavtaws nthuav tshwm los thiab hluavtaws yuav muab tes haujlwm uas txhua tus ua sim saib zoo li cas. Yog leejtwg tes haujlwm uas tib rau saum tej taw ntawd nyob tau mus li, tus ntawd yuav tau nqe zog. Yog leejtwg tes haujlwm kub hnyiab tag, tus ntawd yuav piam tag tiamsis nws tus kheej yuav dim zoo ib yam li dim hauv hluavtaws los. Nej tsis paub lov? Nej yog Vajtswv lub tuam tsev thiab Vajtswv tus Ntsuj Plig nyob hauv nej. Yog leejtwg rhuav tshem Vajtswv lub tuam tsev, Vajtswv yuav rhuav tshem tus ntawd. Vim tias Vajtswv lub tuam tsev yog lub chaw dawb huv, thiab nej yog lub tuam tsev ntawd ntag. Tsis txhob rov dag yus tus kheej. Yog nej cov leejtwg xav hais tias tiam no nws yog tus muaj tswvyim, cia tus ntawd ua tus ruam xwv thiaj tau ua tus uas muaj tswvyim. Rau qhov tej tswvyim hauv ntiajteb no Vajtswv pom tias yog kev ruam. Muaj lus sau cia hais tias, “Nws siv cov neeg muaj tswvyim txojkev ntse rov ntes lawv” thiab muaj sau cia hais tias, “Tus Tswv yeej paub tias tej uas cov neeg muaj tswvyim xav yeej tsis muaj qabhau.” Vim li no tsis txhob cia leejtwg khav txog neeg, rau qhov txhua yam yog nej li, tsis hais Povlauj lossis Apaulau lossis Khefa lossis lub ntiajteb no thiab txojsia thiab kev tuag thiab lub sijhawm no thiab yav tom ntej, txhua yam no puavleej yog nej li. Thiab nej yog Khetos li thiab Khetos yog Vajtswv li. Txhua tus yuav tsum suav tias peb yog Khetos cov tub qhe thiab Vajtswv muab tej uas nws muab npog cia lawd cob rau peb saib xyuas. Tsis tag li ntawd cov uas lees saib xyuas yuav tsum yog cov uas tso siab tau. Kuv tus kheej mas qhov uas nej lossis neeg leejtwg yuav rau txim rau kuv, kuv suav tias yog qhov me me xwb. Txawm yog kuv los kuj tsis rau txim rau kuv tus kheej. Kuv tsis paub muaj ib qho kom kuv tus kheej, tiamsis qhov no kuj tsis tau suav tias kuv tsis txhaum. Tus uas rau txim rau kuv yog tus Tswv. Yog li ntawd tsis txhob rau txim ua ntej uas tsis tau txog sijhawm. Cia li tos txog thaum tus Tswv los mas nws yuav rho txhua yam uas muab zais rau hauv qhov tsaus ntuj lawd los rau hauv qhov kaj thiab yuav thws tej uas neeg lub siab xav tshwm los. Thaum ntawd nyias yuav tau tej lus uas Vajtswv qhuas nyias. Cov kwvtij, kuv muab tej no piv rau kuv tus kheej thiab Apaulau xwv thiaj muaj qabhau rau nej, ua rau nej kawm paub tej lus uas hais tias tsis txhob ua dhau tej uas muab sau cia lawd, kom nej ib leeg thiaj tsis tsab ua loj dua ib leeg. Leejtwg ua rau nej zoo dua lwm tus? Nej muaj dabtsi uas tsis yog tau lwm qhov los? Yog nej tau los, ua cas nej yuav khav yam nkaus li nej tsis tau txais lwm qhov los? Nej twb muaj ib puas tsav yam txhij lawm lauj! Nej nplua nuj lawm lauj! Nej twb tau ua vajntxwv lawm tsis txog muaj peb. Kuv yeej xav kom nej tau ua vajntxwv tiag tiag xwv peb thiaj tau nrog nej kav. Kuv xav tias Vajtswv muab peb cov tubtxib tso rau tom tw ib yam li cov uas raug txiav txim tuag peb thiaj ua yeeb yam rau lub qab ntuj thiab tubtxib saum ntuj thiab neeg saib. Peb yog neeg ruam vim saib rau Khetos, nej yog cov uas muaj tswvyim hauv Khetos. Peb qaug zog tiamsis nej muaj zog. Luag hwm nej tiamsis luag saib tsis taus peb. Los txog tav no los peb tseem tshaib nqhis, tsis muaj ris tsho zoo hnav, peb raug nplawm thiab tsis muaj vag muaj tse, thiab peb ua haujlwm khwv ntawm peb txhais tes. Thaum peb raug luag cem peb kuj foom koob hmoov rau luag, thaum peb raug tsim txom peb kuj ua siab ntev thev, thaum peb raug luag iab hiam, peb kuj ua tib zoo teb luag. Peb zoo li tej tshwj xuam hauv ntiajteb thiab zoo li txhua yam uas qias los txog niaj hnub nimno. Kuv tsis yog sau tej no ua rau nej txaj muag tiamsis yog sau ntuas nej ib yam li nej yog kuv cov menyuam uas kuv hlub. Txawm yog nej muaj qas vam leej uas qhuab qhia nej hauv Khetos, los nej tsis muaj ntau leej txiv, rau qhov kuv yog tus qhia txoj xov zoo thiaj yug tau nej rau hauv Yexus Khetos. Vim li no kuv thiaj thov kom nej ua yoog raws li kuv ua. Vim li no kuv thiaj txib Timaute uas yog tus tub uas kuv hlub hauv tus Tswv thiab yog tus uas kuv tso siab tau tuaj cuag nej pab kom nej nco txog kuv lub neej hauv Khetos ib yam li uas kuv qhia rau hauv txhua pawg ntseeg. Muaj qee leej tsab ua loj vim xav hais tias kuv yuav tsis tuaj cuag nej. Tiamsis yog tus Tswv pom zoo kuv yeej yuav tuaj cuag nej tsis ntev no, mas kuv tsis yog yuav paub cov neeg khav theeb ntawd tej lus xwb tiamsis yuav paub lawv lub hwjchim. Vim tias Vajtswv lub tebchaws tsis yog tej lus uas hais xwb tiamsis yog lub hwjchim. Nej xav yuav dabtsi? Yuav cia kuv coj rab nplawm tuaj cuag nej lossis coj txojkev hlub thiab lub siab mos siab muag tuaj? Kuv hnov xov hais tias muaj kev ua nkauj nraug hauv nej cov. Txawm yog lwm haiv neeg los twb tsis muaj kev ua nkauj nraug li no, yog qhov uas ib tug tau deev nws txiv tus pojniam. Los nej tseem khav ntxhias. Twb tsim nyog nej nyuaj siab thiab muab tus uas ua txhaum ntawd ntiab tawm hauv nej cov mus los sas. Txawm yog kuv tsis nrog nej nyob los kuv lub siab yeej nrog nej nyob, thiab ib yam li kuv nrog nej nyob ntag kuv twb txiav txim rau tus uas ua txhaum li ntawd hauv peb tus Tswv Yexus lub npe lawm. Thaum nej tuaj sablaj ua ke thiab kuv lub siab yeej koom nrog nej ua ke thiab peb tus Tswv Yexus lub hwjchim nrog nraim, nej cia li muab tus ntawd cob rau Xatas ua kom nws lub cev nqaij tawv puam tsuaj kom nws tus ntsuj plig thiaj li dim rau hnub uas tus Tswv teem cia. Qhov uas nej khav theeb ntawd tsis zoo kiag li. Nej tsis paub lov? Ib nyuag qhov keeb xwb yeej ua rau ib phaj hmoov su tag huvsi. Cia li ntxuav tej keeb qub huvsi pov tseg kom nej thiaj li ua tau cov hmoov tshiab uas tsis xyaw keeb ib yam li nej cov uas yeej tsis xyaw keeb. Rau qhov Khetos uas yog peb tus menyuam yaj ua kevcai Hla Dhau twb raug muab xyeem lawm. Vim li no, cia peb ua qhov kevcai Hla Dhau no, tsis yog muab cov qub keeb uas yog kev txhaum thiab kev phem kev qias los ua, tiamsis muab cov ncuav tsis xyaw keeb uas yog lub siab dawb paug thiab txojkev tseeb los ua. Kuv twb sau tsab ntawv tuaj hais kom nej tsis txhob koom nrog cov neeg ua nkauj ua nraug ua ke. Tsis yog kuv hais txog txhua tus hauv ntiajteb uas ua nkauj ua nraug thiab ntshaw luag tug thiab txeeb luag tug thiab pe dab mlom, vim tias yog txwv tej no huvsi lawm ces nej yuav tsum tawm hauv lub ntiajteb no mus. Tiamsis nimno kuv sau hais kom nej tsis txhob mus koom nrog cov uas hu ua kwvtij los tseem ua nkauj nraug, ntshaw luag tug, pe dab mlom, thuam luag, qaug dej qaug cawv, lossis txeeb luag tug, txawm yog yuav noj yuav haus los tsis txhob koom kiag li. Kuv muaj cai qhovtwg uas yuav txiav txim rau cov uas tseem nyob sab nraud? Nej yuav tsum txiav txim rau cov uas nyob hauv nej pawg xwb los tsis yog? Vajtswv yog tus txiav txim rau cov uas nyob sab nraud. “Cia li rhuav tshem tus neeg phem tawm hauv nej cov mus.” Thaum nej cov ib leeg muaj plaub rau ib leeg, nws tseem muaj plhus coj mus rau cov uas tsis ntseeg tu, tsis muab rau Vajtswv cov xov dawb tu lov? Nej tsis paub lov? Vajtswv cov xov dawb yuav txiav txim rau lub ntiajteb. Yog nej twb yuav txiav txim rau lub ntiajteb nej tsis muaj peevxwm tu tej nyuag plaub me me no lov? Nej tsis paub tias peb yuav txiav txim rau cov tubtxib saum ntuj no lov? Yog li ntawd peb yimhuab yuav txiav txim rau tej plaub uas muaj hauv lub neej no. Yog muaj plaub hauv nej lub neej no nej yuav tsa cov uas pawg ntseeg tsis quav ntsej tu lov? Kuv hais li no kom nej thiaj li txaj muag. Hauv nej cov tsis muaj ib tug muaj tswvyim uas yuav txawj tu plaub rau cov kwvtij lov? Tiamsis kwvtij tseem nrog kwvtij ua plaub thiab coj mus rau cov uas tsis ntseeg tu. Qhov uas nej sib ua plaub kuj yog nej poob lub neej ntseeg lawm. Ua cas nej tsis cia luag ua phem rau nej zoo dua? Ua cas nej tsis cia luag ntxo nej zoo dua? Tiamsis nej ho ua phem thiab ntxo luag, txawm yog kwvtij los nej tseem ua. Nej tsis paub tias cov neeg tsis ncaj yuav tsis muaj feem tau Vajtswv lub tebchaws lov? Tsis txhob xav yuam kev. Cov uas ua nkauj ua nraug, pe dab mlom, deev luag poj luag txiv, cov txivneej muag cev, cov txivneej deev txivneej, ua tub sab, ntshaw luag tug, quav cawv, thuam luag, txeeb luag tug tsis muaj feem tau Vajtswv lub tebchaws kiag li. Nej cov muaj qee leej txeev zoo li no. Tiamsis nej twb raug ntxuav kom huv lawm thiab raug muab cais ua dawb huv thiab raug suav tias ncaj ncees rau hauv tus Tswv Yexus Khetos lub npe thiab hauv peb tus Vajtswv tus Ntsuj Plig lawm. “Kuv muaj cai ua txhua yam,” tiamsis tsis yog txhua yam yuav muaj qabhau. “Kuv muaj cai ua txhua yam,” tiamsis kuv tsis yeem nyob hauv txhua yam lub qab hwjchim. “Tej zaub mov muaj cia rau lub plab thiab lub plab kuj muaj cia rau tej zaub mov,” tiamsis Vajtswv yuav ua rau ob yam ntawd ploj tag. Lub cev tsis yog muaj los cia ua nkauj nraug tiamsis muaj los cia rau tus Tswv, thiab tus Tswv muaj los cia rau lub cev. Vajtswv tsa tus Tswv ciaj sawv rov los, thiab Vajtswv yuav siv nws lub hwjchim tsa peb sawv. Nej tsis paub tias nej lub cev yog Khetos tej tes taw lov? Vim li no kuv yuav muab Khetos tej tes taw ua poj muag cev tej tes taw tau lov? Tsis txhob cia muaj li ntawd kiag li. Nej tsis paub tias tus uas koom nrog poj muag cev kuj koom nrog nws ua ib lub cev lawm lov? Rau qhov muaj lus sau cia hais tias, “Ob tug yuav koom ua ib lub cev.” Tiamsis tus uas koom nrog tus Tswv kuj nrog tus Tswv koom tib tug ntsuj plig. Cia li khiav ntawm kev ua nkauj nraug. Lwm yam kev txhaum uas neeg ua nyob sab nraum lub cev, tiamsis tus uas ua nkauj nraug kuj ua txhaum rau nws lub cev ntag. Nej tsis paub tias nej lub cev yog Vaj Ntsuj Plig uas dawb huv lub tuam tsev lov? Nws yog tus uas nyob hauv nej thiab nej tau ntawm Vajtswv los. Nej tsis yog tus uas kav nej lub cev, rau qhov Vajtswv them nqe yuav nej. Yog li no nej yuav tsum cia nej lub cev ua rau Vajtswv tau koob meej. Hais txog qhov uas nej sau ntawv tuaj ntawd. Yog txivneej tsis kov pojniam kiag li kuj zoo. Tiamsis tim qhov uas ua nkauj nraug, tsim nyog txhua tus txivneej nyias muaj nyias pojniam thiab txhua tus pojniam nyias muaj nyias txiv. Tus txiv tsis txhob cais nws tus pojniam thiab tus pojniam tsis txhob cais nws tus txiv. Tus pojniam tsis yog tus uas kav tau nws lub cev, nws tus txiv yog tus uas kav. Ib yam nkaus, tus txiv tsis yog tus kav tau nws lub cev, nws tus pojniam yog tus uas kav. Ob niam txiv tsis txhob cais chaw pw tsuas yog hais hum cais ib ntus es tau kev thov Vajtswv xwb, mas li rov pw ua ke dua xwv Xatas thiaj ntxias tsis tau neb ua txhaum vim neb tswj tsis tau lub siab. Qhov uas kuv hais li no yog kuv tso cai, tsis yog yuam nej. Kuv xav kom txhua tus ua tau ib yam li kuv. Tiamsis txhua tus nyias tau raws li Vajtswv pub rau nyias, ib tug tau li ub ib tug tau li no. Kuv hais rau cov uas tsis muaj txij nkawm thiab cov poj ntsuam tias, yog lawv yuav nyob ib yam li kuv kuj zoo. Tiamsis yog lawv tswj tsis tau lawv tus kheej, lawv yuav tsum yuav txij nkawm. Vim tias qhov uas yuav txij nkawm kuj zoo dua qhov uas lub siab kub lug tswj tsis tau. Kuv hais rau cov uas yuav txij nkawm lawm, tsis yog kuv hais xwb tiamsis yog tus Tswv hais kom tus pojniam tsis txhob tso tus txiv tseg. Yog nws tso tus txiv tseg lawm nws tsis txhob mus yuav dua txiv tshiab lossis rov nrog nws tus txiv qub sib hum. Thiab tus txiv los tsis txhob muab tus pojniam nrauj. Kuv hais rau lwm tus, yog kuv hais tsis yog tus Tswv hais. Yog tus kwvtij twg muaj pojniam uas tsis ntseeg thiab tus pojniam txaus siab nrog tus txiv nyob, mas tus txiv tsis txhob muab nws nrauj. Yog tus pojniam twg muaj txiv uas tsis ntseeg thiab tus txiv txaus siab nrog nws nyob, nws tsis txhob muab tus txiv nrauj. Vim tias tus txiv uas tsis ntseeg ntawd raug muab cais ua tus dawb huv vim yog nws tus pojniam, thiab tus pojniam uas tsis ntseeg kuj raug muab cais ua tus dawb huv vim yog nws tus txiv. Yog tsis muaj li ntawd, neb cov menyuam kuj qias tsis huv tiamsis nimno neb cov menyuam twb dawb huv lawm. Tiamsis yog tus uas tsis ntseeg yuav tso tus ntseeg tseg, kuj ua tau. Yog zoo li no tus kwvtij uas ntseeg tsis hais pojniam txivneej tsis raug muab khi, rau qhov Vajtswv hu peb los nyob sib hum xeeb. Koj uas yog tus pojniam, koj paub tau li cas tias koj yuav pab koj tus txiv dim? Koj uas yog tus txiv, koj paub tau li cas tias koj yuav pab koj tus pojniam dim? Tus Tswv tu txhua tus nyob los li cas thiab Vajtswv hu txhua tus nyob li cas los, kuj cia lawv ua lub neej li ntawd mus. Kuv qhia kom txhua pawg ntseeg ua ib yam li uas hais tag no. Yog tus twg uas Vajtswv hu rau thaum nws twb ua kevcai txiav lawm nws kuj tsis txhob rhuav qhov uas ua kevcai txiav ntawd tseg. Yog tus twg uas Vajtswv hu rau thaum nws tsis tau ua kevcai txiav, nws kuj tsis txhob ua. Qhov uas ua kevcai txiav thiab tsis ua kuj tsis tseem ceeb dabtsi, tiamsis qhov tseem ceeb yog qhov uas coj raws li Vajtswv txoj kevcai. Cia txhua tus nyob lub neej li thaum uas Vajtswv hu nws los. Vajtswv hu koj rau thaum koj tseem ua qhev los tsis txhob txhawj. Yog koj muaj peevxwm nyob ywj pheej, kuj ua raws li ntawd. Tus uas Vajtswv hu rau thaum nws tseem ua qhev los nws twb ua Vajtswv li neeg uas nyob ywj pheej. Ib yam li ntawd, tus uas Vajtswv hu rau thaum nws tseem nyob ywj pheej nws kuj ua Khetos li qhev. Vajtswv them nqe yuav nej mas tsis txhob ua neeg li qhev kiag li. Cov kwvtij, Vajtswv hu txhua tus nyob lub neej li cas, kuj cia nws nyob lub neej li ntawd nrog nraim Vajtswv. Hais txog cov uas tsis muaj txij nkawm, tsis yog Vajtswv kom kuv hais tiamsis kuv hais li uas kuv xam pom, vim Vajtswv khuvleej kuv, nej thiaj tso siab tau rau kuv. Vim yog tej kev txom nyem uas muaj rau niaj hnub nimno, kuv xav tias txhua tus nyob li uas nws ib txwm nyob kuj zoo. Koj tseem nrog koj tus pojniam nyob lov? Tsis txhob nrhiav kev muab nws tso tseg. Koj tsis muaj pojniam lov? Tsis txhob mus nrhiav yuav pojniam. Tiamsis yog koj yuav pojniam los kuj tsis txhaum, thiab yog cov hluas nkauj dawb huv yuav txiv kuj tsis txhaum. Tiamsis cov neeg uas sib yuav yeej yuav muaj kev ntxhov siab hauv lub neej, mas kuv xav tav nej kom tsis txhob raug tej kev ntxhov siab no. Cov kwvtij, kuv hais tias lub sijhawm uas teem cia twb tag zuj zus lawm. Txij no mus cov uas muaj pojniam lawm cia li nyob zoo yam li tsis muaj pojniam, cov uas quaj ntsuag cia li nyob zoo yam li tsis muaj kev quaj ntsuag, cov uas xyiv fab cia li nyob yam li tsis xyiv fab, cov uas yuav qhov txhia chaw, cia li nyob zoo li tsis muaj ib yam dabtsi li, thiab cov uas tau siv tej qhov txhia chaw hauv lub ntiajteb no cia li nyob yam li tsis quav ntsej tej qhov txhia chaw ntawd, rau qhov txhua yam hauv lub ntiajteb no yuav dua mus. Kuv xav kom nej dim tej kev txhawj xeeb. Tus yawg uas tsis muaj pojniam kuj txhawj txog tej uas yog tus Tswv li, saib nws yuav ua kom hum tus Tswv lub siab li cas. Tiamsis tus uas muaj pojniam lawm kuj txhawj txog tej uas yog lub ntiajteb no li, saib nws yuav ua kom hum tus pojniam lub siab li cas, nws thiaj ua ob lub siab. Tus pojniam uas tsis muaj txiv thiab tus hluas nkauj dawb huv kuj txhawj txog tej uas yog tus Tswv li, saib nws yuav dawb huv ntawm lub cev thiab ntawm ntsuj plig li cas. Tiamsis tus pojniam uas muaj txiv lawm kuj txhawj txog tej uas yog lub ntiajteb no li, saib nws yuav ua kom hum tus txiv lub siab li cas. Kuv hais li no kuj yog ua kom nej tau qabhau, tsis yog muab hlua tav nej, tiamsis xav kom nej ua tej uas tsim nyog ua thiab nej siv zog ua koom tu tus Tswv tsis tu ncua tsis khuam cheem dabtsi li. Yog leejtwg xav hais tias ua tsis tau li uas tsim nyog rau tus hluas nkauj uas nws twb qhaib lawd thiab tus hluas nkauj hnub nyoog nchav lawm thiab xav tias yuav tsum sib yuav, kuj cia nws ua raws li nws xav. Cia ob tug sib yuav, kuj tsis txhaum. Tiamsis tus txivneej uas npaj siab ruaj khov thiab tsis muaj kev cheem tsum thiab tswj tau nws txojkev ntshaw, thiab txiav txim siab tias cia tus hluas nkauj ntawd nyob ua hluas nkauj dawb huv mus li, nws kuj ua zoo lawm. Vim li no tus uas yuav tus uas nws qhaib lawm kuj yog nws ua zoo. Tus uas tsis yuav tus uas nws qhaib kuj yimhuab ua zoo. Thaum tus txiv tseem muaj txojsia nyob tug pojniam nyob hauv tus txiv lub xubntiag. Yog tus txiv tuag lawm, nws li nyob ywj pheej mus yuav tau lwm tus txiv raws li nws siab xav, tiamsis yuav tsum yog yuav tus uas ntseeg tus Tswv. Tiamsis raws li kuv xam pom, yog nws nyob tib leeg mus li, nws yuav tau nyob kaj siab lug heev dua. Thiab kuv xav tias yog Vajtswv tus Ntsuj Plig qhia tej lus no rau kuv. Hais txog tej zaub mov uas xyeem rau dab mlom. Peb paub tias, peb txhua tus muaj kev txawj ntse. Txojkev txawj ntse ua rau khav theeb, tiamsis txojkev hlub ua rau nyob ruaj khov tuaj. Yog leejtwg suav tias nws paub yam twg lawm, nws tsis tau paub li uas tsim nyog paub. Tiamsis yog leejtwg hlub Vajtswv, Vajtswv kuj paub tus ntawd. Vim li no, hais txog qhov uas noj tej zaub mov uas xyeem rau tej dab mlom, peb kuj paub tias tej dab mlom tsis tseem ceeb rau hauv lub ntiajteb thiab paub tias muaj Vajtswv tib leeg xwb. Txawm yog muaj ntau yam uas luag hu tias timtswv tsis hais saum ntuj thiab hauv ntiajteb, yeej muaj ntau tus timtswv thiab ntau tus tswv, tiamsis peb li mas muaj tib tug Vajtswv uas yog leej Txiv, yog tus uas tsim txhua yam thiab peb nyob ua koom tu nws, thiab peb muaj tib tug Tswv uas yog Yexus Khetos, yog tus uas Vajtswv kom tsim txhua yam thiab qhov uas muaj peb yog vim muaj Yexus. Tiamsis tsis yog txhua tus paub ib yam li no. Muaj qee leej txeev teev dab mlom los lawm. Thaum lawv noj tej zaub mov ntawd lawv tseem suav tias yog muab xyeem rau dab mlom tiag tiag li lawm, lawv lub siab uas paub qhov zoo qhov phem tsaug leeg heev thiaj qias puas tsuas. Tej zaub mov tsis ua rau peb nyob ze Vajtswv. Yog peb tsis noj peb kuj tsis phem mus. Yog noj, kuj tsis zoo tuaj. Nej yuav tsum ceev faj tsis txhob cia qhov uas nej muaj cai ntawd ua rau cov uas kev ntseeg yau dawm. Vim tias yog leejtwg pom koj uas paub lawd zaum noj mov hauv lub tsev teev dab, ces tus uas lub siab paub qhov zoo qhov phem tsis muaj zog ntawd yuav ua siab loj mus noj tej zaub mov uas xyeem rau tej dab mlom los tsis yog? Ces koj tej kev paub yuav ua rau koj tus kwvtij uas kev ntseeg yau uas Yexus Khetos twb tuag txhiv lawd puam tsuaj. Thaum nej ua txhaum rau nej cov kwvtij li no thiab rhuav lawv lub siab paub qhov zoo qhov phem uas tsis muaj zog, kuj yog nej ua txhaum rau Khetos lawm. Vim li no yog tej zaub mov ua rau kuv cov kwvtij dawm kuv yuav tsis noj nqaij dua li lawm xwv thiaj tsis ua rau kwvtij dawm. Kuv tsis nyob ywj pheej lov? Kuv tsis yog tubtxib lov? Kuv tsis tau pom Yexus uas yog peb tus Tswv lov? Nej tsis yog tes haujlwm uas kuv ua rau tus Tswv lov? Yog lwm tus tsis pom tias kuv yog tubtxib los nej kuj pom, rau qhov nej yog lub hom thawj uas nias rau qhov uas kuv ua tus Tswv li tubtxib. Yog leejtwg tshuaj saib kuv, kuv yuav hais daws kuv zaj li no. Kuv tsis muaj cai noj thiab haus lov? Kuv tsis muaj cai coj pojniam uas ntseeg nrog kuv mus ib yam li lwm tus tubtxib thiab yam li tus Tswv cov kwv thiab Khefa lov? Lossis tsuas yog kuv thiab Npananpa xwb thiaj tsis muaj cai tso tej haujlwm uas yug wb lub ncauj tseg lov? Leejtwg ua tub rog es rov them nws tus nqe zog? Leejtwg cog vaj txiv hmab es tsis noj tej txiv hauv lub vaj ntawd? Leejtwg yug yaj es tsis haus tej kua mis? Kuv hais li no raws li neeg lub siab xav xwb lov? Phau kevcai kuj hais ib yam li no los tsis yog? Rau qhov twb muaj lus sau cia rau hauv Mauxe phau kevcai hais tias, “Thaum nyuj tabtom tsuj qeb tsuj mog nej tsis txhob muab tawb looj nyuj qhov ncauj.” Yog Vajtswv txhawj nyuj xwb lov? Vajtswv yeej hais rau peb los tsis yog? Tej lus ntawd sau cia rau peb rau qhov tus uas laij teb, laij muaj siab vam thiab tus uas ntaus qoob ntaus muaj vam tias yuav tau tej qoob ntawd. Yog peb tseb sab ntsuj plig rau nej, peb sau sab nqaij tawv ntawm nej yog hnyav rau nej lov? Yog lwm tus muaj cai tau ntawm nej, peb yimhuab muaj cai los tsis yog? Txawm li cas los peb tsis siv txoj cai no, tiamsis peb thev txhua yam kom peb thiaj tsis muab dabtsi los tav Khetos txoj xov zoo. Nej tsis paub lov? Cov uas ua haujlwm hauv lub tuam tsev kuj noj lub tuam tsev li zaub mov, thiab cov uas ua haujlwm ntawm lub thaj kuj tau tej uas faib ntawm lub thaj. Ib yam li ntawd, tus Tswv hais tias tsim nyog cov uas piav txoj xov zoo tau noj ntawm qhov uas piav txoj xov zoo ntawd. Tiamsis kuv tsis siv txoj cai no kiag li thiab qhov uas kuv sau tej no tsis yog hais kom luag pub li ntawd rau kuv, rau qhov kuv yeem tuag zoo dua cia luag rhuav qhov uas kuv khav. Yog kuv piav txoj xov zoo kuv yeej tsis muaj chaw khav kiag li, rau qhov kuv yeej yuav tsum ua. Yog kuv tsis piav txoj xov zoo kuv kuj raug txom nyem. Yog kuv zoo siab piav txoj xov zoo kuv yuav tau nqe zog. Yog kuv tsis zoo siab piav los kuv yeej yuav tsum ua tej uas muab cob rau kuv lawm. Tej nqe zog uas muab rau kuv yog dabtsi? Kuj yog qhov uas piav txoj xov zoo ntawd kuv piav tsis yuav nqe, kuv thiaj tsis siv txoj cai hauv txoj xov zoo kiag li. Txawm yog kuv tau nyob ywj pheej tsis ua leejtwg qhev los kuv tseem ua txhua tus li qhev kom thiaj coj tau neeg los ntseeg coob zuj zus. Kuv ua yam li ib tug Yudai rau hauv cov Yudai xwv thiaj coj tau cov Yudai los ntseeg. Kuv ua yam li tus uas nyob hauv Mauxe txoj kevcai rau hauv cov uas nyob hauv txoj kevcai (tiamsis kuv tus kheej tsis yog nyob hauv txoj qab kevcai) xwv thiaj coj tau cov uas nyob hauv txoj kevcai ntawd los ntseeg. Kuv ua yam li tus uas tsis nyob hauv txoj kevcai rau hauv cov uas tsis nyob hauv txoj kevcai, (kuv tsis yog nyob dhau Vajtswv txoj kevcai tiamsis nyob hauv Khetos txoj qab kevcai) xwv thiaj coj tau cov uas tsis nyob hauv txoj kevcai los. Kuv ua yam li tus uas qaug zog rau hauv cov uas qaug zog xwv thiaj coj tau cov uas qaug zog los. Kuv yeem ua txhua yam neeg rau txhua tus kom thiaj siv txhua txojkev pab tau qee leej dim. Kuv ua txhua yam vim yog saib rau txoj xov zoo kuv thiaj li muaj feem tau tej uas txoj xov zoo pub. Nej tsis paub lov? Cov uas sib tw dhia sawvdaws yeej dhia tiamsis tsuas yog tib tug thiaj tau tshav ntuj xwb. Nej yuav tsum dhia tiag kom tau tshav ntuj. Txhua tus uas sib tw dhia yuav tsum tswj lawv lub cev rau txhua fab. Lawv ua kom tau lub mom paj ntoos uas txawj zeeg tiamsis peb ua kom tau lub mom paj ntoos uas tsis txawj zeeg. Yog li ntawd kuv tsis yog lam dhia tsis muaj hom phiaj, kuv tsis yog ntaus nrig yam li tus uas ntaus cua xwb. Tiamsis kuv ntaus kuv lub cev thiab tswj cia, ntshai tsam thaum kuv tshaj tawm txoj xov zoo rau lwm tus lawm kuv tus kheej tsis nrog luag tau tej tshav ntuj ntawd. Cov kwvtij, kuv xav kom nej nkag siab tias peb tej poj koob yawm txwv sawvdaws tau nyob hauv tauv qab huab thiab txhua tus tau hla hiavtxwv, thiab txhua tus tau ua kevcai raus hauv tauv huab thiab hauv hiavtxwv koom nrog Mauxe, thiab txhua tus tau noj tib yam mov uas los saum ntuj los thiab txhua tus tau haus tib yam dej uas los saum ntuj los, vim tias lawv tau haus dej ntawm phab zeb uas nrog lawv mus thiab yog Vajtswv pub. Phab zeb ntawd yog Khetos ntag. Txawm li ntawd los Vajtswv tsis txaus siab rau cov neeg ntawd feem coob, lawv thiaj tuag pawg lug hauv tebchaws moj sab qhua. Tej xwm txheej no yog ua yam ntxwv qhia rau peb kom peb tsis txhob ntshaw tej yam phem ib yam li lawv cov ntawd. Nej tsis txhob pe dab mlom ib yam li lawv qee leej pe, raws li muaj lus sau cia hais tias, “Cov pejxeem kuj zaum noj haus thiab sawv dhia ua lomzem.” Peb tsis txhob ua nkauj nraug ib yam li lawv qee leej ua, mas tib hnub xwb lawv tuag ob vam peb txhiab leej. Peb tsis txhob sim tus Tswv ib yam li lawv qee leej tau sim es raug nab tom puam tsuaj. Peb tsis txhob yws ib yam li lawv qee leej tau yws es raug tus uas ua kom puam tsuaj muab tua pov tseg. Tej xwm txheej no tshwm los raug lawv ua lub chaw qhia muab sau cia ntuas peb cov uas nyob ze lub sijhawm kawg. Vim li no tus uas xav tias nws nyob ruaj khov lawm yuav tsum ceev faj tsam nws ntog. Tsis muaj ib yam kev sim siab twg yuav tshwm los raug nej dhau tej uas txeev tshwm los raug ib tsoom neeg lawd. Vajtswv yog tus uas peb tso siab tau, mas nws yuav tsis cia nej raug kev sim siab dhau li uas nej thev tsis taus, tiamsis thaum raug kev sim siab nws yuav qheb kev rau nej dim kom nej thiaj li thev taus. Yog li no, cov uas kuv hlub, nej cia li khiav ntawm qhov uas pe dab mlom. Kuv hais rau nej yam li hais rau cov neeg uas muaj tswvyim. Nej cia li tshuaj saib tej lus uas kuv hais. Lub khob koob hmoov uas peb thov koob hmoov ntawd ua rau peb koom Khetos cov ntshav los tsis yog? Lub ncuav uas peb muab ntais ntawd ua rau peb koom Khetos lub cev los tsis yog? Muaj tib lub ncuav xwb mas peb txawm muaj coob leej los peb koom ib lub cev vim peb txhua tus noj tib lub ncuav ntawd. Cia li tshuaj saib cov Yixayee lub neej. Cov uas noj tej uas muab xyeem rau Vajtswv kuj koom lub thaj xyeem ntawd los tsis yog? Yog li ntawd kuv hais li cas? Tej uas muab xyeem rau dab mlom yog yam tseem ceeb lov? Lossis tej dab mlom ntawd tseem ceeb lov? Tsis yog li ntawd, kuv tsuas hais tias tej uas lawv muab xyeem ntawd lawv xyeem rau dab xwb tsis yog xyeem rau Vajtswv. Kuv tsis xav kom nej koom dab. Nej yuav haus tus Tswv lub khob thiab dab lub khob tsis tau. Nej yuav noj tus Tswv rooj mov thiab dab rooj mov kuj tsis tau. Peb yuav zes ua rau tus Tswv khib lov? Peb muaj zog heev dua nws lov? “Peb muaj cai ua txhua yam,” tiamsis tsis yog txhua yam yuav muaj qabhau. “Peb muaj cai ua txhua yam,” tiamsis tsis yog txhua yam tsim tsa kom nyob ruaj. Tsis txhob cia leejtwg xam pom nws tus kheej, yuav tsum xam pom lwm tus. Txhua yam nqaij uas muag tom kiab cia li noj, tsis txhob nug dabtsi raws li nej lub siab ua xyem xyav. Rau qhov “Lub ntiajteb thiab txhua yam uas nyob hauv yog tus Tswv li.” Yog ib tug uas tsis ntseeg hu nej mus noj mov thiab nej muaj lub siab mus, mas cia li noj txhua yam uas lawv rau rau nej, tsis txhob nug dabtsi raws li nej lub siab ua xyem xyav. Tiamsis yog leejtwg hais rau nej tias, “Yam no twb muab xyeem rau dab lawm,” nej yuav tsum saib rau tus uas hais rau nej ntawd es tsis txhob noj, thiab saib rau lub siab uas paub qhov zoo qhov phem, kuv tsis yog hais txog nej lub siab tiamsis hais txog tus ntawd lub siab. Ua li cas lwm tus lub siab uas paub qhov zoo qhov phem yuav txiav txim rau qhov uas kuv tau nyob ywj pheej? Yog kuv ua Vajtswv tsaug li noj, ua li cas kuv yuav raug luag thuam vim tim tej uas kuv twb ua Vajtswv tsaug lawd? Vim li no nej yuav noj yuav haus lossis yuav ua ib yam dabtsi, cia li ua txhua yam rau Vajtswv tau koob meej. Tsis txhob ua rau cov Yudai lossis cov Kili lossis Vajtswv pawg ntseeg dawm yuam kev, ib yam li kuv ua txhua yam ua kom hum sawvdaws siab, tsis yog kuv xav nrhiav qabhau rau kuv tus kheej tiamsis kuv nrhiav qabhau rau neeg coob coob kom lawv thiaj tau dim. Nej cia li yoog raws li kuv, ib yam li kuv yoog raws li Khetos. Kuv qhuas nej vim nej nco txog kuv rau txhua yam thiab nej tuav rawv tej lus qhia raws li uas kuv muab cob rau nej. Kuv xav kom nej nkag siab tias Khetos yog txhua tus txivneej lub taubhau, tus txiv yog tus pojniam lub taubhau thiab Vajtswv yog Khetos lub taubhau. Txhua tus txivneej uas thov Vajtswv lossis cev Vajtswv lus yog nws ntoo phuam kuj yog saib tsis taus nws lub taubhau, tiamsis txhua tus pojniam uas thov Vajtswv lossis cev Vajtswv lus yog nws tsis kauv taubhau kuj yog saib tsis taus nws lub taubhau, ib yam li nws plaubhau raug muab chais tag lawm. Yog tus pojniam tsis kauv taubhau, tsim nyog muab nws cov plaubhau txiav, tiamsis yog qhov uas txiav plaubhau lossis chais plaubhau ntawd ua rau tus pojniam poob ntsej muag, kuj cia nws kauv taubhau. Tus txivneej tsis tsim nyog ntoo phuam rau qhov nws yog Vajtswv tus yam ntxwv thiab yog Vajtswv lub meej mom, tiamsis tus pojniam yog tus txiv lub meej mom. Rau qhov tsis yog tsim txivneej ntawm pojniam los tiamsis tsim pojniam ntawm txivneej los, thiab tsis yog tsim txivneej rau pojniam tiamsis tsim pojniam rau txivneej. Vim li no pojniam yuav tsum kauv taubhau thiaj muaj cai thov vim yog saib rau cov tubtxib saum ntuj. Txawm li cas los xij nyob hauv tus Tswv yog tsis muaj txivneej kuj tsis txawj muaj pojniam, yog tsis muaj pojniam kuj tsis txawj muaj txivneej, vim tias ib yam li pojniam tsim ntawm txivneej los, txivneej kuj yug ntawm pojniam los ib yam nkaus. Tiamsis txhua yam puavleej los ntawm Vajtswv los. Nej cia li sim xav saib qhov uas pojniam tsis kauv taubhau rau thaum thov Vajtswv tsim nyog lov? Raws li ib txwm nej yeej paub tias yog txivneej tseg plaubhau ntev kuj yog nws raug txaj muag los tsis yog? Tiamsis yog pojniam tseg plaubhau ntev kuj yog meej mom rau nws los tsis yog? Rau qhov cov plaubhau yog pub rau nws npog taubhau. Yog leejtwg yuav cam, mas peb thiab Vajtswv cov pawg ntseeg tsis muaj dua lwm txoj kevcai dhau tej uas hais no. Tej lus nkaw no kuv yuav qhuas nej tsis tau, rau qhov thaum nej tuaj txoos ua ke tsis yog tuaj ua tau qhov zoo tiamsis yog tuaj ua tau qhov phem. Thawj qhov, kuv hnov tias thaum nej tuaj txoos ua ke rau hauv pawg ntseeg nej tawg ua pab ua pawg. Kuv ntseeg tias muaj tseeb ib txhia, vim yeej yuav tsum muaj kev sib faib hauv nej li ntawd kom thiaj pom nej cov uas ua raug cai tshwm tuaj. Thaum nej tuaj txoos ua ke tsis yog tuaj noj tus Tswv rooj mov. Vim tias thaum noj mov ntawd nyias taus nyias noj tsis sib tos, muaj ib txhia tseem tshaib ib txhia twb haus qaug lawm. Nej tsis muaj vag tsis muaj tse noj haus lov? Lossis nej saib tsis taus Vajtswv pawg ntseeg thiab ua rau cov uas tsis muaj dabtsi noj txaj muag lov? Kuv yuav hais li cas rau nej? Kuv yuav qhuas nej txog zaj no lov? Kuv yuav tsis qhuas kiag li. Tej uas kuv muab cob rau nej lawm kuv tau txais ntawm tus Tswv los, yog hmo uas luag fav xeeb rau tus Tswv Yexus, nws muab lub ncuav los. Thaum nws ua Vajtswv tsaug lawm nws txawm muab ntais thiab hais tias, “No yog kuv lub cev uas muab pub rau nej. Cia li ua li no thiaj nco ntsoov kuv.” Thaum noj hmo tag lawd, nws txawm muab lub khob los ua ib yam nkaus thiab hais tias, “Lub khob no yog lo lus cog tseg tshiab hauv kuv cov ntshav. Thaum twg nej haus lub khob no nej yuav tsum haus ua lub chaw nco ntsoov kuv.” Vim tias thaum twg nej noj cov ncuav no thiab haus lub khob no nej kuj qhia tus Tswv txojkev tuag mus txog thaum nws rov qab los. Yog li ntawd, yog leejtwg lam noj lub ncuav lossis lam haus tus Tswv lub khob ua yam uas tsis tsim nyog, nws kuj ua txhaum tus Tswv lub cev thiab nws cov ntshav. Txhua tus yuav tsum tshuaj saib nws tus kheej mam li noj lub ncuav thiab haus lub khob. Rau qhov tus uas noj thiab haus tsis xav txog Yexus lub cev kuj noj thiab haus ua rau nws tus kheej raug txim. Vim li no nej cov muaj coob leej thiaj li qaug zog thiab muaj mob muaj nkeeg, thiab qee leej kuj tuag lawm. Tiamsis yog peb tshuaj saib peb tus kheej peb yuav tsis raug txiav txim. Thaum Vajtswv txiav txim rau peb, kuj yog Vajtswv nplawm peb kom peb thiaj tsis nrog lub ntiajteb raug txim. Vim li no, kuv cov kwvtij, thaum nej tuaj txoos ua ke noj mov ntawd nej yuav tsum sib tos. Yog leejtwg tshaib plab, cia nws noj mov hauv nws tsev ua ntej xwv thaum tuaj txoos ua ke nej thiaj tsis raug rau txim. Dua li lwm zaj cia thaum kuv tuaj txog nej kuv li qhia. Cov kwvtij, kuv xav kom nej nkag siab txog tej tswvyim uas Vaj Ntsuj Plig pub. Nej yeej paub tias thaum nej tsis tau los ntseeg nej raug cab yuam kev mus pe tej dab mlom uas tsis txawj hais lus. Vim li no kuv thiaj qhia nej paub tias tsis muaj leejtwg uas yuav hais hauv Vajtswv tus Ntsuj Plig tias, “Cia Yexus raug foom tsis zoo.” Thiab tsis muaj leejtwg hais tau tias, “Yexus yog tus Tswv,” tsuas yog Vaj Ntsuj Plig uas dawb huv qhia thiaj hais tau xwb. Tej tswvyim uas Vaj Ntsuj Plig pub muaj ntau yam, tiamsis muaj tib tug Vaj Ntsuj Plig xwb, thiab tej haujlwm uas ua koom tu tus Tswv muaj ntau yam, tiamsis muaj tib tug Tswv xwb, thiab tej haujlwm muaj ntau yam, tiamsis muaj tib tug Vajtswv ua kom txhua tus ua tau txhua yam haujlwm. Vajtswv pub Vaj Ntsuj Plig los tshwm rau hauv txhua tus xwv thiaj muaj qabhau rau sawvdaws. Vajtswv kom Vaj Ntsuj Plig pub ib tug txawj hais tej lus muaj tswvyim, thiab kom tib tug Vaj Ntsuj Plig pub dua ib tug hais tej lus txawj ntse, thiab kom tib tug Vaj Ntsuj Plig pub dua ib tug muaj kev ntseeg, thiab kom tib tug Vaj Ntsuj Plig pub dua ib tug muaj tswvyim kho tau mob, thiab pub dua ib tug ua tau tej txujci phimhwj, thiab pub dua ib tug cev Vajtswv lus thiab dua ib tug txawj tshuaj saib tej ntsuj plig, thiab pub dua ib tug txawj hais lus txawv txawv thiab dua ib tug txawj txhais tej lus txawv txawv ntawd. Tib tug Vaj Ntsuj Plig tu tej no huvsi rau nyias muaj nyias raws li Vaj Ntsuj Plig lub siab nyiam. Zoo ib yam li lub cev yog tib lub los muaj ntau yam koom ua ke, thiab txhua yam ntawm lub cev ntawd txawm yog muaj ntau yam lus tseem koom ua tib lub cev, Khetos kuj zoo ib yam li ntawd. Vim tias peb sawvdaws tsis hais cov Yudai cov Kili cov uas ua qhev thiab cov uas nyob ywj pheej peb puavleej tau ua kevcai raus dej hauv tib tug Vaj Ntsuj Plig los koom ua ib lub cev, thiab muaj tib tug Vaj Ntsuj Plig pub rau peb haus. Lub cev tsis yog muaj tib yam xwb, tiamsis muaj ntau yam. Yog kotaw hais tias, “Kuv tsis yog tes ces kuv tsis koom lub cev,” vim qhov uas hais li no kotaw txawm tsis koom lub cev los yeej tsis tau li. Yog qhov ntsej hais tias, “Kuv tsis yog qhov muag ces kuv tsis koom lub cev,” vim qhov uas hais li no qhov ntsej txawm tsis koom lub cev los yeej tsis tau li. Yog lub cev huvsi ua qhov muag tag lawm, qhov uas hnov tau yuav nyob qhovtwg? Yog lub cev huvsi ua qhov ntsej, qhov uas hnov ntxhiab yuav nyob qhovtwg? Tiamsis Vajtswv pub txhua yam rau lub cev nyias nyob nyias chaw raws li Vajtswv lub siab nyiam. Yog txhua yam ntawm lub cev ua tib yam xwb, lub cev yuav muaj tau li cas? Qhov tseeb muaj ntau yam ntawm lub cev tiamsis yeej yog tib lub cev xwb. Lub qhov muag hais tsis tau rau txhais tes tias, “Kuv tsis yuav koj,” lossis lub taubhau hais tsis tau rau txhais kotaw tias, “Kuv tsis yuav koj.” Tsis yog li ntawd, tiamsis tej yam ntawm lub cev uas xav tias tsis muaj zog tseem yog yam uas cheem tsum, thiab tej yam uas peb xav tias tsis tsim txiaj pes tsawg peb yimhuab ua kom tsim txiaj tuaj, thiab yam uas tsis zoo nkauj peb ua tib zoo tu, mas yam uas tib zoo saib lawm tsis cheem tsum yuav tu. Tiamsis Vajtswv pub lub cev muaj txhua yam koom ua ke thiab pub koob meej ntau dua rau yam uas tsis tsim txiaj, kom thiaj tsis pub lub cev sib faib, tiamsis txhua yam ntawm lub cev ib yam yuav mob siab rau ib yam. Yog lub cev ib qho twg mob, txhua yam ntawm lub cev kuj mob thiab. Yog lub cev ib qho twg tau koob meej, txhua yam ntawm lub cev kuj zoo siab xyiv fab. Nej yog Khetos lub cev, thiab nej txhua tus ib leeg yog ib yam ntawm lub cev. Vajtswv tsa qee leej rau hauv pawg ntseeg, pab ib yog cov tubtxib, pab ob yog cov uas cev Vajtswv lus, pab peb yog cov xibhwb qhuab qhia, dua li ntawd yog cov uas ua tau txujci phimhwj, thiab cov uas Vajtswv pub tswvyim txawj kho mob, thiab cov uas pab lwm tus, cov uas txawj coj thiab cov uas hais tau ntau yam lus txawv txawv. Txhua tus ua tubtxib lov? Txhua tus cev Vajtswv lus lov? Txhua tus ua xibhwb qhuab qhia lov? Txhua tus ua tau txujci phimhwj lov? Txhua tus muaj tswvyim kho mob zoo lov? Txhua tus hais tau lus txawv txawv lov? Txhua tus txhais tau tej lus txawv txawv lov? Nej yuav tsum siv zog nrhiav tej tswvyim uas loj dua. Thiab kuv yuav qhia nej paub txojkev uas zoo tshaj plaws. Txawm yog kuv hais tej lus uas neeg hais lossis tej lus uas tubtxib saum ntuj hais, los tsis muaj kev hlub, kuv kuj zoo li tej suab tswb suab nruas uas nrov ua nqaj ua nqug xwb. Txawm yog kuv txawj cev tau Vajtswv lus thiab paub txhua yam uas muab npog cia lawd thiab txawj ntse txhua yam, thiab txawm yog kuv muaj kev ntseeg txhij uas tshais tau tej roob mus rau lwm qhov los tsis muaj kev hlub, kuv kuj tsis muaj nqes dabtsi kiag li. Txawm yog kuv pub txhua yam uas kuv muaj rau luag thiab muab kuv lub cev hlawv pov tseg, los kuv tsis muaj kev hlub, kuj tsis muaj qabhau dabtsi rau kuv. Txojkev hlub ua tau siab ntev, muaj siab khuvleej, tsis khib luag, tsis khav theeb, tsis tsab ua loj, tsis ua tej uas rhuav ntsej muag, tsis xam pom nws xwb, tsis chim sai, tsis cim ntsoov luag tej kev txhaum, tsis xyiv fab rau tej kev phem tiamsis xyiv fab rau txojkev tseeb. Txojkev hlub nyiaj taus txhua yam, ntseeg mus li, muaj kev vam mus li thiab ua siab ntev thev txhua yam. Txojkev hlub tsis txawj kawg kiag li. Qhov uas cev Vajtswv lus yuav ploj mus, qhov uas hais lus txawv txawv yuav tseg tsis hais, thiab tej kev txawj ntse yuav ploj mus. Rau qhov peb tsuas paub qee yam thiab tsuas cev Vajtswv lus qee yam xwb. Tiamsis thaum muaj txhua yam txhij lawm qhov uas muaj qee yam xwb yuav ploj ntais mus. Thaum kuv tseem yau kuv hais lus yam li menyuam yaus, kuv xav yam li menyuam yaus, thiab tshuaj saib txhua yam ib yam li menyuam yaus. Thaum kuv hlob lawd kuv tseg tsis ua li menyuam yaus lawm. Rau qhov nimno peb pom zem zuag yam li saib hauv daim iav, tiamsis thaum ntawd peb yuav pom tim ntsej tim muag. Nimno kuv tsuas paub qee yam xwb, tiamsis thaum ntawd kuv yuav paub txhij txhua ib yam li Vajtswv paub kuv. Nimno peb yam no tseem muaj nyob, yog kev vam, kev ntseeg thiab kev hlub, tiamsis yam uas loj kawg yog kev hlub. Cia li tsom ntsoov nrhiav kev hlub thiab siv zog nrhiav tej tswvyim uas Vaj Ntsuj Plig pub, thiab nrhiav qhov uas cev Vajtswv lus heev dua. Rau qhov tus uas hais lus txawv txawv tsis yog hais rau neeg, yog hais rau Vajtswv, rau qhov tsis muaj leejtwg nkag siab, nws hais tej uas muab npog cia raws li Vaj Ntsuj Plig qhia. Tiamsis tus uas cev Vajtswv lus yog hais rau neeg kom kheev hlob thiab muaj kev txhawb siab thiab nplij siab. Tus uas hais lus txawv txawv kuj ua rau nws tus kheej kheev hlob xwb, tiamsis tus uas cev Vajtswv lus ua rau pawg ntseeg kheev hlob. Kuv xav kom nej sawvdaws txawj hais lus txawv txawv, tiamsis loj dua li ntawd kuv xav kom nej cev Vajtswv li lus. Tus uas cev Vajtswv lus kuj loj dua tus uas hais lus txawv txawv. Qhov uas hais lus txawv txawv yuav tsum muaj tus uas txhais tau xwv pawg ntseeg thiaj kheev hlob. Cov kwvtij, yog kuv tuaj cuag nej kuv hais lus txawv txawv xwb, kuv tsis hais tej lus uas Vajtswv qhia tshwm los lossis tej lus txawj ntse lossis cev Vajtswv tej lus lossis tej lus qhuab qhia, kuv yuav pab tau nej li cas? Txawm yog tej cuab yeej tsis muaj sia uas ua tau suab xws li raj thiab nkauj nog ncas, yog tsis muaj suab siab suab qes uas txawv neeg yuav paub lub suab uas tshuab thiab ntaus tau li cas? Yog raj xyu nrov tsis meej, leejtwg yuav txawj npaj ua rog? Nej kuj zoo ib yam li ntawd. Yog nej hais lus txawv txawv tsis siv tej lus uas nkag siab tau, neeg yuav nkag siab tej lus ntawd tau li cas? Nej tej lus yuav ploj raws cua mus. Hauv ntiajteb no yeej muaj ntau yam lus. Tsis muaj ib yam lus twg uas tsis muaj lub ntsiab. Tiamsis yog kuv tsis paub tej lus ntawd lub ntsiab kuv kuj yog lwm haiv neeg rau tus uas hais ntawd, thiab tus uas hais ntawd yog lwm haiv neeg rau kuv. Nej kuj ib yam li ntawd. Vim nej siv zog nrhiav tej uas Vaj Ntsuj Plig pub, cia li nrhiav tej tswvyim nplua mias uas ua rau pawg ntseeg kheev hlob. Yog li no, tus uas hais lus txawv txawv, kuj yuav tsum thov kom nws txhais tau thiab. Yog kuv hais lus txawv txawv thov Vajtswv, kuv tus ntsuj plig kuj thov tiag tiamsis kuv txojkev xav tsis tau qabhau. Vim li no kuv yuav ua li cas? Kuv yuav siv kuv tus ntsuj plig thiab siv kuv txojkev xav thov Vajtswv. Thiab kuv yuav siv tus ntsuj plig thiab siv kuv txojkev xav hu nkauj. Yog tsis ua li ntawd, yog koj siv tus ntsuj plig qhuas Vajtswv mas cov neeg uas tsis nkag siab yuav hais “Amee” rau tej lus uas koj ua Vajtswv tsaug ntawd tau li cas, rau qhov lawv tsis paub tias koj hais dabtsi? Txawm yog koj ua Vajtswv tsaug zoo npaum li cas, los lwm tus kuj tsis kheev hlob. Kuv ua Vajtswv tsaug, kuv hais lus txawv txawv ntau dua nej sawvdaws. Tiamsis hauv pawg ntseeg kuv xav hais tsib lo lus uas kuv twb xav cia lawm xwb kom thiaj qhia tau lwm tus, zoo dua li hais ib vam lo lus txawv txawv. Cov kwvtij, nej tsis txhob xav li tej menyuam yaus xav. Qhov uas ua phem cia li ua menyuam mos, qhov uas xav, cia li xav li tus neeg laus. Hauv txoj kevcai muaj sau cia hais tias, “Kuv yuav siv lwm yam lus thiab siv lwm haiv neeg lub qhov ncauj hais rau cov neeg no. Txawm li ntawd los lawv yuav tsis mloog kuv hais. Tus Tswv hais li no ntag.” Yog li no qhov uas hais lus txawv txawv tsis yog txujci rau cov uas ntseeg tiamsis yog txujci rau cov uas tsis ntseeg. Qhov uas cev Vajtswv lus tsis yog muaj rau cov uas tsis ntseeg, tiamsis yog muaj rau cov uas ntseeg. Yog li no yog tag nrho pawg ntseeg tuaj sablaj ua ke thiab txhua tus nyias taus nyias hais lus txawv txawv mas muaj cov uas tsis paub lossis cov uas tsis ntseeg tuaj rau hauv, lawv yuav hais tias nej vwm lawm los tsis yog? Tiamsis yog txhua tus cev Vajtswv lus mas ib tug uas tsis ntseeg lossis ib tug uas tsis paub tuaj rau hauv, mas nws raug txhua tus ntuas thiab sawvdaws taw nws qhov txhaum, thiab tej uas muab zais rau hauv nws lub siab yuav raug muab nthuav tshwm los thiab nws yuav khwb nkaus hauv pem teb pe Vajtswv hais tias. “Vajtswv nrog nraim nej tiag tiag li.” Yog li ntawd, cov kwvtij 'e, yuav hais li cas? Thaum nej tuaj txoos ua ke, muaj tus muaj nkauj, muaj tus qhuab qhia, muaj tus muaj tej lus uas Vajtswv qhia tshwm, muaj tus hais lus txawv txawv thiab muaj tus txhais tej lus txawv txawv. Nej yuav tsum ua txhua yam kom pawg ntseeg kheev hlob. Yog leejtwg hais lus txawv txawv, cia ob leeg hais lossis ntau kawg peb leeg xwb, ib leeg hais tag ib leeg li hais, thiab cia muaj dua ib leeg txhais. Tiamsis yog tsis muaj leejtwg txhais, kuj kom lawv nyob twjywm hauv chaw sablaj, cia lawv hais rau lawv tus kheej thiab hais rau Vajtswv xwb. Pub cov uas cev Vajtswv lus hais tau ob leeg lossis peb leeg thiab cia sawvdaws tshuaj saib tej lus uas lawv hais. Yog Vajtswv qhia tshwm rau dua ib tug uas zaum ua ke ntawd, kuj cia thawj tug nyob twjywm tso. Vim tias nej sawvdaws cev Vajtswv lus tau ib leeg zuj zus xwv txhua tus thiaj kawm tau thiab tau txais kev txhawb siab. Cov uas cev Vajtswv lus tus ntsuj plig yeej nyob hauv cov uas cev Vajtswv lus ntawd li kev tswjhwm, rau qhov Vajtswv tsis yog tus Vajtswv uas nyiam kev kub ntxhov tiamsis yog tus uas nyiam kev tus yees. Ib yam li uas muaj rau hauv cov xov dawb txhua pawg ntseeg, cia cov pojniam nyob twjywm hauv lub chaw sablaj, vim tias tsis tso cai rau lawv hais lus, lawv yuav tsum txo hwjchim raws li txoj kevcai hais tseg. Yog lawv xav paub dabtsi, kuj cia lawv nug tus txiv tom tsev, vim tias qhov uas pojniam yuav hais lus hauv chaw sablaj kuj txaj muag. Vajtswv txojlus tshwm hauv nej cov los lov? Vajtswv txojlus tuaj txog nej tib cov xwb lov? Yog leejtwg xav tias nws yog tus cev Vajtswv lus lossis nws muaj Vaj Ntsuj Plig kuj yuav tsum lees tias tej lus uas kuv sau tuaj txog nej no yog Vajtswv tej lus qhia. Yog leejtwg tsis quav ntsej tej lus no, yuav tsis quav ntsej tus ntawd. Yog li no, kuv cov kwvtij, cia li siv zog rau qhov uas cev Vajtswv lus, thiab tsis txhob txwv qhov uas hais lus txawv txawv. Cia li ua txhua yam raws li tsim nyog ua thiab raws li txoj kevcai. Cov kwvtij, kuv xav kom nej nco txog txoj xov zoo uas kuv txeev qhia rau nej, thiab nej twb txais yuav thiab nyob ruaj rau hauv lawm. Nej yuav tau dim vim muaj txoj xov zoo ntawd, tsuav yog nej tuav rawv tej lus uas kuv qhia rau nej. Yog nej tsis tuav rawv li ntawd nej kev ntseeg tsis muaj qabhau. Rau qhov kuv twb muab zaj uas tseem ceeb kawg nkaus uas kuv tau txais los ntawd cob rau nej lawm, yog qhov uas Khetos tuag vim yog tim peb lub txim raws li sau cia rau hauv Vajtswv phau ntawv, thiab nws raug muab log lawm, hnub peb nws raug tsa sawv rov los raws li sau cia rau hauv Vajtswv phau ntawv, thiab nws los tshwm rau Khefa thiab tshwm rau kaum ob tug thwjtim pom. Dhau ntawd nws los tshwm rau cov kwvtij coob dua tsib puas leej pom rau tib lub sijhawm, cov uas pom ntawd feem coob nimno tseem muaj txojsia nyob, tsuas yog qee leej tsaug zog lawm xwb. Dhau ntawd nws los tshwm rau Yakaunpau thiab cov tubtxib sawvdaws pom. Thaum kawg nws los tshwm rau kuv pom, kuv zoo li tus menyuam uas tsis tau txog caij yug cia li yug lawm. Vim tias kuv yog tus tubtxib uas yau dua lwm tus huvsi, thiab tsis tsim nyog tau lub npe hu ua tubtxib rau qhov kuv tsim txom Vajtswv pawg ntseeg. Vim yog Vajtswv txojkev hlub kuv thiaj tau nyob li uas nyob no thiab qhov uas Vajtswv hlub kuv tau muaj qabhau heev. Kuv ua haujlwm khwv dua lawv sawvdaws tiamsis tsis yog kuv tus kheej ua, yog Vajtswv txojkev hlub uas nrog nraim kuv ua. Vim li no txawm yog kuv thiab lawv, los peb puavleej tshaj tawm zaj no thiab nej ntseeg zaj no. Yog peb tshaj tawm tias Khetos raug tsa ciaj sawv hauv qhov tuag rov los lawm, ua cas nej cov qee leej tseem hais tias qhov uas sawv hauv qhov tuag rov los tsis muaj? Yog qhov uas sawv hauv qhov tuag rov los tsis muaj, Khetos kuj tsis raug tsa sawv rov los. Yog Khetos tsis tau raug tsa sawv rov los, qhov uas peb tshaj tawm ntawd kuj tsis muaj qabhau, thiab qhov uas nej ntseeg kuj tsis muaj qabhau. Neeg yuav pom tias peb ua cuav timkhawv txog Vajtswv vim peb twb ua timkhawv tias Vajtswv tsa Khetos sawv rov los lawm, tiamsis yog neeg tuag tsis raug tsa sawv rov los, Vajtswv kuj tsis tsa Khetos sawv rov los thiab. Yog cov neeg tuag tsis raug tsa sawv rov los, Khetos kuj tsis tau raug tsa sawv rov los. Yog Khetos tsis tau raug tsa sawv rov los, nej txojkev ntseeg kuj tsis muaj qabhau thiab nej tseem nyob hauv nej lub txim. Yog li ntawd cov neeg uas tsaug zog rau hauv Khetos kuj puam tsuaj mus lawm. Yog peb muaj siab vam rau hauv Khetos rau sim neej no xwb, peb kuj yog cov uas ntxim khuvleej dua ib tsoom sawvdaws. Tiamsis nimno Khetos twb raug tsa hauv qhov tuag rov los lawm, yog thawj tug hauv cov uas tsaug zog lawm. Vim tias txojkev tuag tshwm ntawm ib tug neeg los li cas, mas qhov uas ciaj sawv hauv qhov tuag kuj tshwm ntawm ib tug neeg los ib yam nkaus li ntawd. Vim tias txhua tus nyob hauv Adas thiaj li tuag, mas txhua tus uas nyob hauv Khetos yuav ciaj sawv rov los ib yam li ntawd. Tiamsis yuav tsum sawv raws ib qeb zuj zus, Khetos yog thawj tug, dhau ntawd thaum Khetos rov qab los cov uas yog Khetos li yuav sawv rov los. Thaum ntawd yog lub sijhawm kawg uas Khetos muab lub tebchaws cob rau Vajtswv uas yog leej Txiv yog thaum Khetos twb rhuav tshem txhua tus timtswv uas kav thiab tej hwjchim thiab tej dab huvsi lawm. Rau qhov Khetos yuav tsum kav mus txog thaum Vajtswv muab txhua tus yeeb ncuab txo nyob hauv Khetos qab xib taws. Tus yeeb ncuab kawg uas yuav muab ua kom puam tsuaj yog txojkev tuag. “Rau qhov Vajtswv muab txhua yam tso rau hauv nws qab xib taws.” Thaum Vajtswv txojlus hais tias, “Muab txhua yam tso rau hauv nws qab xib taws,” kuj paub tseeb tias tsis yog hais txog Vajtswv uas muab txhua yam tso rau hauv leej Tub lub qab hwjchim. Thaum txhua yam nyob hauv leej Tub lub qab hwjchim lawm, thaum ntawd leej Tub kuj yuav raug nyob rau hauv leej Txiv lub qab hwjchim, kom Vajtswv thiaj ua txhua yam tus thawj. Yog li ntawd cov uas ua kevcai raus dej mus pab rau cov uas tuag lawd yuav ua li cas? Yog cov uas tuag lawm tsis ciaj sawv rov los li, ua cas tseem muaj neeg ua kevcai raus dej mus pab cov uas tuag thiab? Thiab ua cas peb yuav raug kev ceeblaj txhua lub sijhawm? Cov kwvtij, kuv niaj hnub ntsib kev tuag. Kuv hais li no vim kuv khav txog nej rau hauv Yexus Khetos uas yog peb tus Tswv. Yog kuv tawm tsam tsiaj qus hauv lub moos Efexau, thiab muaj siab vam ib yam li ib tsoom neeg xwb, kuv yuav tau qabhau dabtsi? Yog cov neeg tuag tsis txawj sawv rov los, kuj “cia peb noj tiag haus tiag rau qhov tagkis peb yuav tuag.” Tsis txhob yuam kev. “Qhov uas nrog cov neeg phem ua ke yeej yuav rhuav qhov uas yus ua zoo.” Cia li rov qab feeb meej ua lub neej zoo, tsis txhob ua txhaum dua li lawm, rau qhov muaj qee leej tsis paub Vajtswv. Kuv hais li no kom nej paub txaj muag. Tiamsis yuav muaj neeg nug hais tias, “Cov neeg tuag yuav ciaj sawv rov los li cas? Lawv yuav muaj lub cev zoo li cas los?” Au niag neeg ruam. Yam uas nej muab tseb, yog tsis tuag ua ntej yuav tsis txawj tuaj dua tshiab. Yam uas nej muab tseb ntawd tsis hais mog lossis lwm yam qoob, tsis yog nej muab kiag tsob qoob mus tseb, tiamsis nej coj noob qhuav qhuav mus tseb xwb. Vajtswv pub lub cev rau lub noob raws li nws pom zoo, thiab pub txhua yam noob nyias muaj nyias lub cev. Txhua yam nqaij tsis sib thooj, neeg muaj dua ib yam nqaij, tsiaj txhu muaj dua ib yam nqaij, nas noog muaj dua ib yam nqaij thiab ntses muaj dua ib yam nqaij. Lub cev saum ntuj kuj muaj, lub cev hauv ntiajteb kuj muaj. Lub cev saum ntuj muaj dua ib yam meej mom, lub cev hauv ntiajteb kuj muaj dua ib yam meej mom. Lub hnub muaj dua ib yam meej mom, lub hli muaj dua ib yam meej mom thiab tej hnub qub kuj muaj dua ib yam meej mom. Ib lub hnub qub li meej mom zoo tsis thooj lwm lub hnub qub li meej mom. Qhov uas neeg tuag ciaj sawv rov los kuj zoo ib yam nkaus. Lub cev uas muab tseb txawj lwj tag, lub cev uas sawv rov los tsis txawj lwj. Yam uas muab tseb lawd tsis muaj koob meej, yam uas sawv rov los muaj meej mom. Yam uas muab tseb tsis muaj zog, yam uas sawv rov los muaj zog. Yam uas muab tseb yog lub cev nqaij, yam uas sawv rov los yog lub cev ntsuj plig. Yog muaj lub cev nqaij lawm, yeej muaj lub cev ntsuj plig. Raws li muaj lus sau cia tias, “Thawj tug neeg uas yog Adas thiaj li ciaj sia,” tiamsis tus Adas uas los tom kawg yog ntsuj plig uas pub txojsia. Thawj lub cev tsis yog lub cev ntsuj plig, yog lub cev nqaij tawv, lub cev tom qab thiaj yog cev ntsuj plig. Thawj tug neeg yog tawm hauv ntiajteb los yog neeg av, tus neeg uas ob los saum ntuj los. Tus neeg av ntawd zoo li cas, tej neeg av kuj zoo ib yam li ntawd. Tus neeg saum ntuj zoo li cas, tej neeg saum ntuj kuj zoo ib yam nkaus li ntawd. Yam nkaus li peb twb muaj yam ntxwv zoo li tus neeg av, peb kuj yuav muaj yam ntxwv zoo li tus neeg saum ntuj. Cov kwvtij, kuv hais tias, nqaij thiab ntshav tsis muaj feem tau Vajtswv lub tebchaws, thiab yam uas txawj lwj tsis muaj feem tau yam uas tsis txawj lwj. Saib maj, kuv yuav qhia ib zaj uas muab npog cia tob tob lawd rau nej. Peb sawvdaws yuav tsis tsaug zog tag huvsi, tiamsis peb txhua tus yuav raug plhis dua tshiab, rau tib pliag tib ntsais muag xwb rau thaum tshuab raj xyu zaum kawg. Rau qhov yuav tshuab raj xyu mas cov uas tuag tag lawd yuav raug tsa ciaj sawv rov los tsis txawj lwj thiab peb yuav raug plhis dua tshiab. Yam uas txawj lwj yuav tsum hnav yam uas tsis txawj lwj, thiab yam uas yuav tsum tuag yuav tsum hnav yam uas tsis txawj tuag. Thaum yam uas txawj lwj hnav yam uas tsis txawj lwj thiab yam uas yuav tsum tuag hnav yam uas tsis txawj tuag, thaum ntawd yuav tiav raws li tej lus sau cia hais tias, “Txojkev kov yeej twb nqos txojkev tuag lawm.” “Txojkev tuag 'e, koj txojkev kov yeej dua twg lawm? Txojkev tuag 'e, koj tus taug dua twg lawm?” Txojkev tuag tus taug yog lub txim thiab lub txim lub hwjchim yog Mauxe txoj kevcai. Ua Vajtswv tsaug nws pub peb kov yeej vim yog peb tus Tswv Yexus Khetos. Vim li no, cov kwvtij uas kuv hlub, cia li nyob ruaj khov, tsis txhob ywj fab ywj fwj, cia li ua tus Tswv tes haujlwm puv npo txhua lub sijhawm thiab paub tias tej haujlwm uas nej ua rau hauv tus Tswv tsis tag dawb tag do. Nimno hais txog qhov uas sau nyiaj pab Vajtswv cov xov dawb, kuv hais rau cov pawg ntseeg hauv lub xeev Kalatia li cas, nej yuav tsum ua ib yam li ntawd. Hnub ib hauv txhua lub chib so nej txhua tus yuav tsum khaws tej nyiaj ib qho cia raws li nyias khwv tau, xwv thaum kuv tuaj txog thiaj tsis txog sau lawm. Thaum kuv tuaj txog lawd, yog nej pom zoo leejtwg, kuv yuav txib cov neeg ntawd xa cov nyiaj uas nej pub thiab tsab ntawv mus rau lub nroog Yeluxalees. Yog pom tias tsim nyog kuv mus thiab, lawv yuav nrog kuv ua ke mus. Thaum kuv hla lub xeev Makhedaunia lawd kuv yuav los xyuas nej, vim tias kuv yuav hla lub xeev Makhedaunia mus. Tej zaum kuv yuav so hauv nej, thiab yuav so kom tag lub caij ntuj no, xwv thaum kuv mus qhovtwg nej thiaj tau xa kuv mus qhov ntawd. Tsis yog kuv xav tuaj xyuas nej rau thaum kuv dua kev xwb. Yog tus Tswv pub, kuv vam tias kuv yuav nrog nej nyob ib ntus Kuv yuav nyob hauv lub moos Efexau mus txog hnub Pheethekhoxate, vim ntawm no qheb qhov rooj dav qas fo rau kuv ua haujlwm txi txiv thiab muaj cov uas tawm tsam coob. Thaum Timaute tuaj txog nej, nej yuav tsum saib nws zoo tsis txhob cia nws nyuaj siab rau thaum nws nrog nej nyob, rau qhov nws ua tus Tswv tes haujlwm ib yam li kuv. Vim li ntawd, tsis txhob cia leejtwg saib tsis taus nws. Cia li xa nws mus kev ua kaj siab lug kom nws thiaj rov los txog kuv, vim kuv tseem tos ntsoov nws nrog cov kwvtij los. Hais txog peb tus kwvtij Apaulau, kuv twb thov thov nws nrog cov kwvtij mus xyuas nej, tiamsis nws tsis kam mus lub sijhawm no. Thaum muaj sijhawm nws yuav mus. Nej yuav tsum ceev faj zov tos, nyob ruaj hauv txojkev ntseeg, ua lub siab tuab thiab khov kho. Cia li ua txhua yam ntawm txojkev hlub. Cov kwvtij, nej paub tias Xatefana tsev neeg yog thawj phaum uas ntseeg hauv lub xeev Akhaya, thiab lawv tau pub lawv tus kheej tu cov xov dawb, mas kuv thov nej kom nej txo hwjchim rau cov neeg zoo li no thiab txhua tus uas koom ua haujlwm thiab rau siab ua. Kuv zoo siab qhov uas Xatefana, Fothunatha thiab Akha‑ika tuaj, vim lawv twb tuaj txhawb kuv lub zog puv npo lawm ntxiv qhov uas nej tsis tau tuaj. Lawv ua rau kuv lub siab thiab nej lub siab kaj lug. Vim li no nej yuav tsum lees yuav cov neeg zoo li no. Cov pawg ntseeg hauv lub xeev Axia hais lus nco txog nej. Akhila thiab Plixakha thiab pawg ntseeg hauv ob tug lub tsev hais lus nco txog nej heev tshaj plaws hauv tus Tswv. Cov kwvtij txhua tus hais lus nco txog nej. Cia li sib fim ntawm txoj kevcai nwj uas dawb huv. Tej lus nco txog no yog kuv Povlauj txhais tes sau. Yog leejtwg tsis hlub tus Tswv, cia tus ntawd raug foom tsis zoo. Thov tus Tswv cia li los. Thov tus Tswv Yexus txoj koob hmoov nrog nraim nej. Kuv txojkev hlub nrog nraim nej txhua tus hauv Yexus Khetos. Povlauj uas yog Yexus Khetos tus tubtxib raws li Vajtswv lub siab nyiam thiab peb tus kwv Timaute xa mus rau Vajtswv pawg ntseeg hauv lub moos Khaulee thiab rau txhua tus xov dawb uas nyob thoob plaws lub xeev Akhaya. Thov txojkev hlub thiab txojkev siab tus ntawm Vajtswv uas yog peb leej Txiv thiab ntawm tus Tswv Yexus Khetos nrog nraim nej nyob. Qhuas Vajtswv uas yog peb tus Tswv Yexus Khetos leej Txiv, yog leej Txiv uas muaj lub siab khuvleej thiab yog Vajtswv uas txhawb siab txhua yam. Nws txhawb peb lub siab rau txhua yam kev ceeblaj uas peb raug xwv peb thiaj muab qhov uas Vajtswv txhawb peb lub siab ntawd mus txhawb tau cov uas raug ceeblaj lub siab tsis hais yam twg. Vim peb koom nrog Khetos tej kev txom nyem ntau npaum li cas, peb kuj koom kev txhawb siab rau hauv Khetos ntau npaum li ntawd. Qhov uas peb raug ceeblaj kuj yog ua rau nej tau txais kev txhawb siab thiab tau txojkev dim. Thiab qhov uas peb tau txais kev txhawb siab kuj ua rau nej tau txais kev txhawb siab rau qhov uas nej tiv kev txom nyem ib yam li peb tiv ntawd. Peb yeej cia siab hlo rau nej, vim peb paub tias nej koom nrog peb raug kev txom nyem li cas, nej kuj koom nrog peb tau kev txhawb siab ib yam li ntawd. Cov kwvtij, peb xav kom nej paub txog tej kev ceeblaj uas peb raug hauv lub xeev Axia. Peb raug txojkev txom nyem hnyav kawg dhau peb lub zog ua rau peb tag kev vam tias peb yuav tsis muaj txojsia nyob. Qhov tseeb peb xav tias peb twb raug txiav txim tuag lawm. Tej no ua rau peb tsis txhob cia siab rau peb tus kheej tiamsis cia siab rau Vajtswv uas tsa cov neeg tuag ciaj sawv rov los. Vajtswv cawm peb dim tej xwm txheej kev tuag los lawm, thiab nws yuav cawm peb dua thiab. Peb cia siab rau hauv nws tias nws yuav cawm peb ntxiv mus, vim nej koom nrog peb ua haujlwm rau thaum nej thov Vajtswv pab. Thiab yuav muaj neeg coob ua Vajtswv tsaug txog peb vim yog txojkev hlub uas muab pub rau peb vim qhov uas neeg coob coob tej lus thov. Peb khav li no. Peb lub siab ua timkhawv tias peb muaj lub siab dawb huv thiab lub siab dawb paug los ntawm Vajtswv thiaj xyaum zoo rau hauv lub ntiajteb, tsis yog xyaum raws li neeg li tswvyim tiamsis xyaum raws li Vajtswv txojkev hlub, thiab peb yimhuab xyaum zoo rau nej. Peb tsis sau dua lwm zaj tuaj rau nej tsuas yog zaj uas nej nyeem tau thiab nkag siab tau xwb. Kuv vam tias nej yuav nkag siab tag huvsi, ib yam li nej twb nkag siab ib txhia lawm, mas txog tus Tswv Yexus hnub nej yuav khav tau txog peb ib yam li uas peb khav txog nej. Vim kuv ruaj siab li no kuv thiaj xav tuaj xyuas nej ua ntej, xwv nej thiaj tau koob hmoov ob zaug. Thaum kuv taug kev mus rau lub xeev Makhedaunia, kuv xav los xyuas nej, thiab thaum rov qab ntawm Makhedaunia los kuv yuav los xyuas nej dua thiab nej li xa kuv mus rau lub xeev Yudia. Qhov uas kuv npaj siab li no kuv tseem ua ywj fab ywj fwj lov? Kuv npaj siab yam li neeg ntiajteb kuv thiaj hais tias “Yog” thiab “Tsis yog” ua ke lov? Muaj Vajtswv uas tso siab tau pom, tej lus uas peb hais rau nej tsis muaj lo uas hais tias “Yog” thiab “Tsis yog” ua ke. Rau qhov Vajtswv leej Tub uas yog Yexus Khetos uas kuv thiab Xivana thiab Timaute peb tshaj tawm rau hauv nej tsis yog “Yog” thiab “Tsis yog” ua ke, tiamsis hauv Tswv Yexus puavleej “yog” xwb. Vajtswv tej lus cog tseg huvsi puavleej “Yog” hauv Yexus. Vim li no peb thiaj hais tias “Amee” ntawm Yexus, thiaj ua rau Vajtswv tau koob meej. Tus uas ua rau peb nrog nej nyob ruaj rau hauv Khetos thiab tus uas tsa peb yog Vajtswv. Vajtswv nias lub hom thawj rau peb thiab pub Vaj Ntsuj Plig rau hauv peb lub siab ua puav pheej. Kuv thov Vajtswv ua timkhawv txog kuv tias qhov uas kuv tsis tau rov mus rau lub moos Khaulee, twb yog kuv tsis xav cia nej raug kev nyuaj siab. Peb tsis yog cov uas tswjhwm nej txojkev ntseeg, tiamsis peb nrog nej koom tes kom nej tau txojkev xyiv fab, vim tias nej nyob ruaj khov hauv txojkev ntseeg lawm. Yog li ntawd kuv thiaj npaj siab tias kuv yuav tsis tuaj ua rau nej rov ntxhov siab dua ib zaug. Yog kuv ua rau nej ntxhov siab, leejtwg yuav ua rau kuv zoo siab xyiv fab tsuas yog cov uas kuv ua rau ntxhov siab xwb? Kuv sau thawj tsab ntawv ntawd xwv thaum tuaj txog lawd kuv thiaj tsis raug kev ntxhov siab ntawm cov neeg uas tsim nyog ua kom kuv zoo siab xyiv fab, rau qhov kuv ruaj siab rau nej txhua tus tias thaum kuv zoo siab nej sawvdaws yuav zoo siab thiab. Kuv sau tsab ntawv ntawd nrog lub kua muag thiab kev ceeblaj txom nyem thiab kev nyuaj siab heev kawg tuaj rau nej, tsis yog sau tuaj ua rau nej ntxhov siab tiamsis yog sau qhia nej paub tias kuv hlub nej ntau tshaj plaws. Yog leejtwg ua kom muaj kev ntxhov siab tus ntawd tsis yog ua rau kuv tib leeg ntxhov siab xwb tiamsis kuj ua rau nej txhua tus ntxhov qho ntsis thiab (kuv hais “qho ntsis” ntawd twb yog vim kuv tsis xav hais hnyav dhau.) Qhov uas feem coob rau txim rau tus ntawd kuj txaus lawm. Yog li no tsim nyog nej zam txim thiab nplij tus ntawd lub siab zoo dua, tsam ces txojkev uas nyuaj siab heev kawg nyab kiag nws. Yog li no kuv thiaj thov nej tuav rawv txojkev hlub rau nws dua. Qhov uas kuv sau li ntawd yog kuv xav sim nej saib nej yuav mloog lus txhua yam los tsis mloog. Yog nej zam txim rau leejtwg kuv kuj zam txim rau tus ntawd thiab. Yog kuv zam txim rau txojkev txhaum twg (yog muaj zaj twg uas yuav tsum zam txim rau tiag) kuv kuj zam txim tab meeg Khetos lub xubntiag vim yog saib rau nej, xwv Xatas thiaj kov tsis yeej peb vim peb twb paub nws tej tswvyim phem lawm. Thaum kuv mus txog lub moos Rhau‑a es yuav piav txoj xov zoo hais txog Khetos, tus Tswv twb qheb qhov rooj rau kuv qhov ntawd. Tiamsis kuv tseem tsis tau kaj siab vim tsis tau ntsib kuv tus kwv Titau qhov ntawd, kuv thiaj fim ncaim lawv thiab mus rau lub xeev Makhedaunia. Tiamsis ua Vajtswv tsaug, uas nws niaj hnub coj peb mus ua ib pab uas kov yeej rau hauv Khetos, thiab nws siv peb ua rau tus ntxhiab tsw qab uas yog qhov uas paub Khetos nthuav mus rau txhua qhov. Peb yog Khetos tus ntxhiab tsw qab rau Vajtswv hauv cov neeg uas tabtom dim thiab hauv cov uas tabtom puam tsuaj, yog cov pa uas coj mus rau txojkev tuag rau cov uas tabtom puam tsuaj thiab yog cov pa uas coj mus rau txojsia rau cov uas tabtom dim. Leejtwg tsim nyog rau tej haujlwm uas hais tag no? Peb zoo tsis thooj li cov neeg coob coob uas muab Vajtswv txojlus muag tshaj thawj tiamsis peb nyob hauv Khetos muaj lub siab dawb paug hais tab meeg Vajtswv ib yam li neeg uas Vajtswv txib tuaj. Peb pib rov qhuas peb tus kheej dua lov? Lossis peb cheem tsum tej tsab ntawv qhia peb tus kheej rau nej lossis cheem tsum nej sau ntawv qhia peb rau luag ib yam li qee leej cheem tsum lov? Nej twb yog tsab ntawv uas qhia peb tus kheej uas muab sau cia rau hauv peb lub siab, rau ib tsoom neeg paub thiab nyeem. Nej kuj tshwm los ua Khetos li tsab ntawv uas peb muab xa mus thiab tsis yog kua mem sau tiamsis yog Vajtswv uas muaj txojsia nyob tug Ntsuj Plig sau thiab tsis yog sau rau hauv daim txiag zeb tiamsis sau rau hauv nej nplooj siab. Vim muaj Khetos peb thiaj muaj lub siab ruaj nreeg li no. Peb tsis muaj peevxwm suav tias muaj ib yam dabtsi tshwm hauv peb tus kheej los tiamsis peb tej peevxwm ntawd los ntawm Vajtswv los xwb. Nws pub peevxwm rau peb txawj ua haujlwm rau tej lus cog tseg tshiab, tsis yog raws li tus npe ntawv uas sau cia tiamsis yog raws li Vaj Ntsuj Plig qhia. Tus npe ntawv uas sau cia tua kom tuag, tiamsis Vaj Ntsuj Plig pub txojsia. Qhov uas ua koom tu Vajtswv raws li tej npe ntawv uas muab txaug cia rau hauv daim txiag zeb kuj txawj ua rau neeg tuag tau, los tseem muaj hwjchim ci ntsa iab, ua rau cov Yixayee saib tsis tau Mauxe lub ntsej muag vim ci heev. Tiamsis lub hwjchim ci ntsa iab ntawd ploj lawm. Qhov uas ua koom tu Vajtswv raws li Vaj Ntsuj Plig coj kuj yimhuab yuav muaj hwjchim ci ntsa iab heev dua los tsis yog? Yog qhov uas coj raws li txoj kevcai uas ua kom raug txim muaj hwjchim ci ntsa iab mas qhov uas ua raws li txojkev uas ua kom tau txojkev ncaj ncees yimhuab yuav muaj hwjchim ci ntsa iab ntau npaug. Qhov tseeb yam uas txeev muaj hwjchim ci ntsa iab twb ploj lawm rau qhov nimno muaj lub hwjchim ci ntsa iab uas loj dua. Yog tias yam uas ploj mus lawm txeev nrog hwjchim ci ntsa iab tuaj, yam uas nyob mus ib txhis yimhuab yuav muaj hwjchim ci ntsa iab ntau npaug. Vim peb muaj vam li no peb thiaj ua tau siab tuab heev. Thiab peb tsis thooj li Mauxe uas muab daim ntaub kauv lub ntsej muag thiaj tsis pub cov Yixayee saib qhov uas lub hwjchim ci ntsa iab ploj zuj zus tag. Tiamsis lawv lub siab tawv heev, rau qhov los txog niaj hnub nimno thaum lawv nyeem tej lus cog tseg qub, tib daim ntaub ntawd tseem tsis tau muab yaws, rau qhov yuav raug muab tshem tau hauv Khetos xwb. Tiamsis los txog niaj hnub nimno thaum nyeem Mauxe tej lus daim ntaub tseem kauv lawv lub siab cia. Tiamsis thaum leejtwg tig los cuag tus Tswv, daim ntaub ntawd thiaj raug muab tshem mus. Tus Tswv yog Vaj Ntsuj Plig, thiab tus Tswv tus Ntsuj Plig nyob qhovtwg, kev thaj yeeb nyob qhov ntawd. Peb sawvdaws tsis muaj daim ntaub kauv lub ntsej muag lawm mas peb zoo li daim iav uas tsom tus Tswv lub hwjchim ci ntsa iab, peb kuj hloov kom zoo li nws tus yam ntxwv thiab muaj koob meej zuj zus mus, yog lub koob meej uas los ntawm tus Tswv uas yog Vaj Ntsuj Plig los. Yog li no vim peb muaj tes haujlwm no ntawm Vajtswv txojkev khuvleej, peb thiaj tsis poob siab. Peb tso tej kev txaj muag uas zais ntshis hauv peb lub siab tseg. Peb tsis siv tej tswvyim phem lossis muab Vajtswv txojlus hloov, tiamsis peb nthuav kiag qhov tseeb thiaj qhia peb tus kheej rau sawvdaws lub siab tshuaj saib tab meeg Vajtswv lub xubntiag. Yog peb txoj xov zoo tseem raug daim ntaub kauv, kuj yog raug kauv ntawm cov uas tabtom yuav puam tsuaj. Tus dab uas kav tiam no ua rau cov uas tsis ntseeg, txojkev xav tsaus ntuj nti mus lawm, lawv thiaj tsis pom txoj xov zoo qhov kaj uas hais txog lub hwjchim ci ntsa iab hauv Khetos uas yog Vajtswv tus yam ntxwv. Rau qhov tsis yog peb tshaj tawm peb tus kheej tiamsis tshaj tawm tias Yexus Khetos yog tus Tswv thiab peb yog nej li qhev vim yog saib rau Yexus. Rau qhov Vajtswv uas hais tias, “Cia qhov kaj ci hauv qhov tsaus ntuj tuaj,” nws tsom qhov kaj tuaj rau hauv peb lub siab kom peb thiaj muaj qhov kaj uas paub txog Vajtswv lub hwjchim ci ntsa iab uas tshwm rau ntawm Khetos lub ntsej muag. Peb muaj tej uas muaj nqes no nyob hauv lub tais av xwv thiaj pom tias lub hwjchim uas loj kawg nkaus ntawd yog Vajtswv li tsis yog los ntawm peb los. Peb raug kev ceeblaj txhua fab tuaj, tiamsis tsis txog qeb nti tsis taus, peb siab faj tag tiamsis tsis tag kev vam, peb raug tsim txom, tiamsis tsis raug muab pov tseg, peb raug ntaus ntog tiamsis kuj tsis raug puam tsuaj. Peb niaj hnub ris Yexus txojkev tuag rau hauv peb lub cev, kom Yexus txojsia thiaj li tshwm rau hauv peb lub cev thiab. Peb cov uas tseem muaj txojsia nyob raug muab cob rau txojkev tuag tsis tu li vim yog saib rau Yexus, kom Yexus txojsia thiaj li tshwm rau hauv peb lub cev nqaij uas txawj tuag. Yog li no txojkev tuag tabtom ua haujlwm rau hauv peb, tiamsis txojsia tabtom ua haujlwm rau hauv nej. Peb muaj siab ntseeg ib yam nkaus li uas sau cia hais tias, “Kuv ntseeg kuv thiaj li hais,” peb kuj ntseeg peb thiaj li hais thiab. Peb paub tias tus uas tsa tus Tswv Yexus ciaj sawv rov los yuav tsa peb nrog Yexus ciaj sawv rov los thiab, thiab yuav coj peb nrog nej ua ke mus cuag nws. Txhua yam no muaj qabhau rau nej, xwv thaum Vajtswv txojkev hlub nthuav mus txog neeg coob zuj zus, qhov uas ua Vajtswv tsaug kuj yuav muaj ntau zuj zus thiaj ua rau Vajtswv tau koob meej. Vim li no peb thiaj tsis poob siab. Txawm yog peb lub cev sab nraud sem zuj zus los sab hauv kuj niaj hnub hloov dua tshiab. Rau qhov tej kev txom nyem me me uas peb raug ib nyuag ntu no yuav ua rau peb tau koob meej ntau kawg mus ib txhis tsis muaj dabtsi piv tau, rau qhov peb tsis saib rau tej uas peb qhov muag pom tiamsis saib rau tej uas qhov muag tsis pom. Vim tias tej uas qhov muag pom nyob tsis ntev tiamsis tej uas qhov muag tsis pom nyob mus ib txhis. Peb paub tias yog lub cev uas zoo li lub tsev pheeb suab uas peb nyob hauv ntiajteb no raug puam tsuaj, peb tseem muaj lub chaw nyob uas Vajtswv pub, yog lub tsev uas tsis yog neeg txhais tes ua uas yuav nyob mus ib txhis tsis kawg sau ntuj. Hauv lub tsev no peb ntsaj laws xav muab lub chaw nyob sau ntuj los hnav, vim thaum hnav lawm peb yuav tsis liab qab. Thaum peb tseem nyob hauv lub tsev pheeb suab no peb ntsaj laws hnyav siab kawg, tsis yog peb xav nyob do cuas tiamsis peb xav hnav dua lub tshiab xwv yam uas txawj tuag thiaj raug txojsia muab nqos. Vajtswv yog tus uas npaj peb cia kom muaj lub chaw nyob tshiab. Thiab nws pub Vaj Ntsuj Plig ua puav pheej rau peb. Vim li no peb thiaj ruaj siab tsis tu ncua thiab paub tias thaum peb tseem nyob hauv lub cev no peb nyob deb ntawm tus Tswv lub xubntiag, vim peb ua neej nyob raws li txojkev ntseeg tsis yog raws li tej uas qhov muag pom. Peb ruaj siab thiab pom tias qhov uas peb tawm hauv lub cev no mus nrog tus Tswv nyob zoo dua. Vim li no peb npaj siab tias txawm yog yuav nyob hauv lub cev no lossis tawm mus peb yuav ua kom txaus Vajtswv siab. Vim tias peb txhua tus yuav tsum tshwm ntsej muag rau ntawm Khetos lub rooj txiav txim, xwv txhua tus thiaj tau saws raws li tej uas thaum nws tseem nyob hauv lub cev no nws tau ua, tsis hais zoo lossis phem. Yog li ntawd, vim peb paub ntshai tus Tswv lawm peb thiaj yaum ib tsoom neeg. Peb zoo li cas Vajtswv yeej pom huvsi, thiab kuv vam tias nej lub siab kuj pom thiab. Tsis yog peb rov qhuas peb rau nej tiamsis yog muab sijhawm rau nej khav txog peb, xwv nej thiaj muaj lus teb cov uas nyiam khav txog tej uas qhov muag pom tsis yog khav txog tej uas nyob hauv lub siab. Yog tias peb vwm lawm kuj yog peb saib rau Vajtswv, thiab yog tias peb meej pem kuj yog peb saib rau nej. Rau qhov Khetos txojkev hlub kav rawv peb. Peb ruaj siab tias muaj ib tug tuag this sawvdaws, yog li ntawd sawvdaws thiaj tuag lawm. Thiab nws tuag this sawvdaws xwv cov uas tseem muaj txojsia nyob thiaj tsis nyob xam pom rau lawv tus kheej xwb tiamsis yuav nyob xam pom rau tus uas tuag thiab raug muab tsa sawv rov los vim yog saib rau lawv. Vim li no txij no mus peb tsis tshuaj saib leejtwg raws li neeg ntiajteb saib. Txawm yog yav tag los peb tshuaj saib Khetos raws li neeg ntiajteb saib, los nimno peb tsis tshuaj saib nws li ntawd dua li lawm. Vim li no, yog leejtwg nyob hauv Khetos, tus ntawd kuj raug muab tsim dua tshiab lawm. Tej yam qub twb dua tag lawm, saib maj tej yam tshiab twb tshwm los lawm. Txhua yam no tshwm ntawm Vajtswv los. Vajtswv siv Khetos ua kom peb rov nrog Vajtswv sib raug zoo thiab muab tes haujlwm uas coj luag los nrog nws sib raug zoo rau peb ua, yog qhov uas Vajtswv nyob hauv Khetos ua kom ntiajteb rov nrog Vajtswv sib raug zoo, nws tsis suav tias lawv muaj txim, thiab nws muab zaj uas hais txog qhov uas rov nrog Vajtswv sib raug zoo rau peb qhia. Vim li no peb thiaj ua Khetos cov tub sawv cev, mas zoo li Vajtswv siv peb thov nej. Peb thiaj nyob Khetos chaw thov nej los nrog Vajtswv sib raug zoo. Vajtswv muab Khetos uas tsis muaj txim ua lub txim nyob peb chaw, kom peb thiaj tau Vajtswv txojkev ncaj ncees hauv Khetos. Vim peb nrog Vajtswv ua haujlwm peb thov kom nej tsis txhob txais Vajtswv txojkev hlub los ua yam uas tsis muaj qabhau. Rau qhov Vajtswv hais tias, “Lub sijhawm uas kuv hlub, kuv twb mloog koj, hnub uas cawm dim, kuv twb pab koj.” Saib maj, nimno yog lub sijhawm uas nws hlub, thiab no yog hnub uas cawm dim. Peb tsis muab ib yam dabtsi los tav leejtwg kev kiag li kom qhov uas ua tes haujlwm no thiaj tsis raug thuam. Tiamsis peb ua rau sawvdaws pom tias peb yog cov uas ua koom tu Vajtswv rau txhua txojkev, yog qhov uas peb ua siab ntev thev ntau yam, raug kev txom nyem, kev ceeblaj, kev nyuaj siab, peb raug nplawm, raug kaw hauv tsev loj faj, raug kev kub ntxhov, ua haujlwm khwv, nyiaj dab ntub, thiab yoo tshaib yoo nqhis, peb muaj siab dawb paug, muaj kev paub, muaj kev thev taus, muaj kev khuvleej, muaj Vaj Ntsuj Plig uas dawb huv thiab muaj txojkev hlub uas tuaj nruab siab, peb hais lus tseeb thiab muaj Vajtswv lub hwjchim thiab tuav rawv txojkev ncaj ncees ua cuab yeej rau hauv txhais tes xis thiab txhais tes laug. Peb raug luag hwm thiab raug luag saib tsis taus, peb raug luag thuam thiab raug luag qhuas. Luag hais tias peb yog neeg dag ntxias tiamsis tseem yog neeg ncaj, peb zoo li tej neeg uas tsis muaj leejtwg paub los sawvdaws tseem paub peb zoo, peb zoo li neeg tuag, tiamsis saib maj tseem muaj txojsia nyob, peb raug nplawm los tsis tuag, peb muaj kev txhawj xeeb tiamsis tseem xyiv fab tsis tu ncua, peb yog neeg pluag tiamsis tseem ua rau neeg coob coob nplua nuj tuaj, peb tsis muaj ib yam dabtsi li los tseem muaj txhua yam ua peb tug. Cov neeg Khaulee 'e, peb hais rau nej tsis zais kiag li thiab peb ua lub siab dav rau nej. Peb tsis ua peb lub siab nqaim, tsuas yog nej ua nej lub siab nqaim xwb. Thov nej ua ib yam nkaus li peb ua. Kuv hais rau nej ib yam li hais rau menyuam, mas thov nej ua lub siab dav thiab. Tsis txhob nrog tus uas tsis ntseeg koom ib tug quab. Rau qhov txojkev ncaj ncees yuav koom nrog txojkev tsis ncaj tau li cas? Thiab qhov kaj yuav koom nrog qhov tsaus ntuj tau li cas? Khetos thiab tus dab Npeli‑a yuav nyob tau ua ke li cas? Lossis tus ntseeg yuav muaj feem dabtsi nrog tus tsis ntseeg? Vajtswv lub tuam tsev thiab tej dab mlom yuav hais hum tau li cas? Rau qhov peb yog Vajtswv uas muaj txojsia nyob lub tuam tsev raws li Vajtswv hais cia tias, “Kuv yuav nyob hauv lawv thiab mus mus los los hauv lawv nruab nrab thiab kuv yuav ua lawv tus Vajtswv thiab lawv yuav ua kuv haiv neeg.” “Vim li no, cia li tawm hauv lawv mus thiab cais ntawm lawv cov nyob rau ib cag, tus Tswv hais li no. Thiab tsis txhob kov tej uas qias tsis huv, kuv thiaj li txais yuav nej.” “Thiab kuv yuav ua nej leej txiv thiab nej yuav ua kuv li tub li ntxhais. Tus Tswv uas muaj hwjchim loj kawg nkaus hais li no.” Cov kwvtij uas kuv hlub, vim peb muaj tej lus cog tseg no, cia peb ntxuav peb tus kheej kom dawb huv ntawm txhua yam kev phem kev qias sab nqaij tawv thiab sab ntsuj plig thiaj muaj txojkev dawb huv puv npo vim paub ntshai Vajtswv. Cia li qheb siab txais peb. Peb tsis tau ua txhaum rau leejtwg, peb tsis tau rhuav tshem leejtwg, tsis tau txeeb luag tug. Kuv hais li no tsis yog hais rau txim rau nej vim kuv twb hais ua ntej tias nej yeej nyob rawv hauv peb lub siab, txawm yog tuag thiab ciaj los peb yeej yuav nyob ua ke. Kuv tso siab rau nej thiab khav ntxhias txog nej heev kawg li. Kuv tau txais kev txhawb siab puv npo. Kuv zoo siab xyiv fab kawg nkaus rau txhua yam kev txom nyem ceeblaj uas peb raug. Vim tias thaum peb tuaj txog lub xeev Makhedaunia lawm, peb lub cev tsis tau so kiag li, tiamsis peb raug kev ceeblaj rau txhua fab, sab nraud muaj kev tawm tsam sab hauv muaj kev txhawj ntshai. Tiamsis Vajtswv uas txhawb tus uas poob siab lub siab nws kuj txhawb peb lub siab yog qhov uas Titau tuaj, tsis yog qhov uas Titau tuaj txhawb peb lub siab xwb, tiamsis qhov uas nws txais kev txhawb siab ntawm nej kuj txhawb peb lub siab thiab. Nws hais rau peb paub txog qhov uas nej nco txog kuv thiab tej uas nej nyuaj siab thiab qhov uas nej kub siab lug rau kuv, ua rau kuv yimhuab xyiv fab tuaj. Txawm yog kuv thawj tsab ntawv ua rau nej ntxhov siab los kuv tsis nyuaj siab. Txawm yog ua ntej kuv nyuaj siab vim kuv pom tias tsab ntawv ntawd ua rau nej ntxhov siab ib nyuag ntu, tiamsis nimno kuv zoo siab, tsis yog vim nej ntxhov siab tiamsis yog vim qhov uas nej ntxhov siab ntawd ua rau nej ntxeev dua siab. Rau qhov nej ntxhov siab raws li Vajtswv pom zoo, nej thiaj tsis raug txom nyem li cas vim yog tim peb. Vim qhov uas ntxhov siab raws li Vajtswv pom zoo yuav coj mus txog txojkev dim thiab tsis ua kom muaj kev nyuaj siab, tiamsis qhov uas ntxhov siab raws li ntiajteb yuav coj mus txog kev tuag. Sim saib maj, qhov uas ntxhov siab raws li Vajtswv pom zoo no ua rau nej kub siab lug npaum li cas, thiab ua kom nej kub siab daws nej zaj thiab ua kom nej chim siab thiab ras dheev thiab ua rau nej nco txog kuv heev thiab ua kom nej mob siab thiab ua kom nej rau txim rau tus uas txhaum. Txhua yam no twb qhia tias nej tsis txhaum kiag li. Yog li no, txawm yog kuv twb sau tsab ntawv tuaj rau nej lawm, kuj tsis yog kuv xam pom tus uas ua txhaum lossis xam pom tus uas raug tus ntawd ua txhaum rau, tiamsis kuv xav kom qhov uas nej kub siab lug rau kuv tshwm rau hauv nej cov tab meeg Vajtswv lub xubntiag. Vim yog li no peb thiaj tau txais kev txhawb siab. Dua li qhov uas peb tau txais kev txhawb siab peb tseem yimhuab zoo siab heev kawg rau qhov uas Titau xyiv fab vim nej txhua tus ua rau nws lub siab tus. Yog kuv tau qhuas nej li cas rau Titau lawm kuv kuj tsis raug txaj muag li. Txhua yam uas peb hais rau nej muaj tseeb li cas, tej uas peb qhuas rau Titau kuj tshwm los muaj tseeb li ntawd. Thiab nws lub siab yimhuab hlub nej rau thaum nws nco txog qhov uas nej txhua tus mloog lus thiab qhov uas nej txais tos nws ntshai tshee hnyo. Kuv zoo siab heev vim kuv tso siab tag nrho tau rau nej. Cov kwvtij, peb xav kom nej paub txog Vajtswv txojkev hlub uas nws pub rau cov pawg ntseeg hauv lub xeev Makhedaunia. Thaum lawv raug kev sim siab uas yog kev txom nyem ceeblaj, lawv txojkev xyiv fab kawg nkaus thiab lawv txojkev pluag phwj tshwm los ua kom muaj lub siab dav kawg pub rau luag. Kuv ua tau timkhawv tias lawv pub raws li lawv tus peevxwm, thiab yeej pub dhau lawv tus peevxwm. Tsis muaj leejtwg yuam lawv los lawv thov peb heev cia lawv muaj feem rau txojkev hlub uas pab Vajtswv cov xov dawb. Thiab lawv tsis ua li uas peb xav tseg cia, lawv xub muab lawv tus kheej pub rau tus Tswv mam li muab pub rau peb raws li Vajtswv lub siab nyiam. Vim li no peb thiaj thov Titau kom nws pab nej ua txojkev hlub no kom tiav rau qhov nws yog tus uas pib ua tes haujlwm ntawd. Ib yam li nimno nej muaj txhua yam txhij lawm tsis hais kev ntseeg, kev hais lus, kev paub, kev kub siab rau txhua yam thiab txojkev hlub uas nej muaj rau peb, nej yuav tsum muaj txojkev hlub no txhij thiab. Qhov uas kuv hais li no tsis yog kuv yuam nej, tiamsis yog coj qhov uas lwm tus kub siab lug tuaj sim nej txojkev hlub saib muaj tseeb los tsis muaj. Vim nej paub peb tus Tswv Yexus Khetos txojkev hlub lawm tias, txawm yog nws nplua nuj los nws kuj yeem ua tus pluag vim yog saib rau nej, kom nej thiaj ua neeg nplua nuj vim yog qhov uas nws ua tus pluag. Thiab kuv hais raws li kuv xam pom qhov uas zoo rau nej ua. Tsaib no nej tsis yog thawj cov uas nqes tes ua xwb tiamsis nej yog thawj cov uas xav ua thiab. Mas nimno tsim nyog nej ua kom tiav, kom nej kub siab lug xav ua li cas, nej thiaj ua kom tiav raws li muaj peevxwm ua tau ib yam li ntawd. Yog muaj lub siab kub lug lawm, Vajtswv yuav txais yuav raws li uas yus muaj tsis yog raws li yus tsis muaj. Tsis yog kuv xav cia lwm tus li haujlwm sib, cia nej li haujlwm hnyav, tiamsis yeej xav kom zoo sib txig. Qhov uas nimno nej muaj nplua mias kuj pab cov uas tu ncua, thiab thaum lawv muaj nplua mias, lawv yuav pab nej rau thaum tu ncua xwv thiaj zoo sib txig. Raws li muaj lus sau cia hais tias, “Tus uas khaws tau ntau kuj tsis muaj seem, tus uas khaws tau tsawg kuj tsis tu ncua.” Ua Vajtswv tsaug uas pub qhov uas kub siab lug rau nej rau hauv Titau lub siab ib yam li kuv kub siab. Rau qhov nws tsis yog zoo siab txais tej lus uas peb thov nws xwb tiamsis nws tseem kub siab lug heev mus cuag nej tsis muaj leejtwg yuam nws. Peb xa tus kwvtij uas txhua pawg ntseeg qhuas qhov uas nws txawj piav txoj xov zoo nrog nws ua ke mus. Tsis tag li ntawd xwb cov pawg ntseeg tseem xaiv tsa tus no kom nrog peb taug kev thiab nrog peb koom ua tes haujlwm hauv txoj hmoov zoo uas peb tabtom ua no, ua kom Vajtswv tau koob meej thiab ua kom pom qhov uas peb kub siab lug. Peb xav kom tsis muaj leejtwg thuam tau peb txog tej uas luag pub ntau kawg rau peb ceev thiab tu. Peb npaj siab ua ncaj ncees tsis yog ua tab meeg tus Tswv lub qhov muag xwb tiamsis tab meeg ib tsoom sawvdaws thiab. Peb kuj txib peb tus kwvtij nrog ob tug mus thiab, yog tus uas peb twb muab sim ntau zaus lawm pom tias nws kub siab rau ntau qhov, thiab nimno nws yimhuab kub siab heev dua vim nws tso siab rau nej ntau heev. Hais txog Titau, nws koom nrog kuv thiab pab kuv ua num rau nej. Hais txog ob tug kwvtij ntawd, cov pawg ntseeg txib ob tug mus thiab ob tug ua rau Khetos tau koob meej. Vim li no nej cia li ua nej txojkev hlub thiab tej uas kuv khav txog nej tshwm rau lawv pom thiab ua tshwm rau cov pawg ntseeg pom. Tsis tag kuv yuav sau tuaj qhia nej txog qhov uas pab Vajtswv cov xov dawb, rau qhov kuv paub tias nej yeej kub siab pab, thiab kuv khav txog nej rau cov neeg hauv lub xeev Makhedaunia paub hais tias, lub xeev Akhaya twb npaj txhij tsaib no los lawm. Thiab qhov uas nej kub siab lug kuj txhob lawv feem coob kom ua ib yam li ntawd. Kuv txib cov kwvtij no tuaj xwv tej uas kuv khav txog nej thiaj tsis yog kuv hais do xwb, tiamsis nej yuav npaj kom txhij raws li kuv twb hais tseg lawd. Yog tsis ua li ntawd yog cov Makhedaunia qee leej nrog kuv tuaj pom tias nej tsis tau npaj txhij, tsis hais nej yuav txaj muag xwb tiamsis peb yuav poob ntsej muag vim qhov uas peb ruaj siab li ntawd. Vim li no kuv thiaj xav tias yuav tsum thov cov kwvtij no ua kuv ntej tuaj cuag nej thiab npaj tej uas nej cog lus cia tias yuav pub ntawd, kom tej uas npaj ntawd yog tej uas nej zoo siab pub tsis yog tej uas nej raug yuam pub. Yog li no tus uas tseb tsawg kuj sau tau tsawg, tus uas tseb ntau kuj sau tau ntau. Txhua tus nyias yuav tsum muab raws li nyias twb xav tseg hauv lub siab lawm, tsis yog yuav khuvxim lossis raug yuam muab, rau qhov Vajtswv hlub tus uas xyiv fab muab. Thiab Vajtswv muaj peevxwm yuav pub txhua yam koob hmoov rau nej nplua mias kom nej thiaj muaj txhua yam txhij txaus siv rau txhua lub sijhawm thiab nej tseem muaj nplua mias siv rau txhua yam haujlwm zoo thiab. Raws li muaj lus sau cia hais tias, “Nws faib rau luag thiab pub rau tej pluag, nws txojkev ncaj ncees yuav nyob mus ib txhis.” Tus uas pub noob rau tus uas tseb thiab pub mov rau tus uas noj nws yeej yuav pub noob qoob rau nej thiab yuav tsav tej noob qoob rau nej, thiab yuav tsav tej qoob uas nej sau ntawm nej txojkev ncaj ncees. Nej yuav nplua nuj rau txhua yam nej thiaj muaj lub siab dav pub tau rau luag txhua lub sijhawm, thiab yuav ua kom muaj kev ua Vajtswv tsaug rau tej uas hla ntawm peb mus. Qhov uas ua tes haujlwm no tsis yog pab cov xov dawb uas tu ncua xwb tiamsis yuav ua kom muaj kev ua Vajtswv tsaug loj kawg nkaus. Thaum luag tshuaj saib nej tes haujlwm no luag yuav qhuas Vajtswv rau qhov uas nej mloog lus kom tsim nyog qhov uas nej txais yuav Khetos txoj xov zoo thiab rau qhov uas nej muaj lub siab dav pub rau lawv thiab pub rau txhua tus. Lawv yuav taij thov Vajtswv pab nej thiab nco txog nej vim Vajtswv txojkev hlub uas nej muaj nplua mias. Ua Vajtswv tsaug rau tej uas nws pub tshaj dhau peb txawj piav tau. Kuv yog Povlauj, kuv tus kheej thov nej hauv Khetos uas txo hwjchim thiab lub siab mos siab muag. Thaum kuv nrog nej nyob kuv ua siab mos siab muag rau nej tiamsis thaum kuv nyob deb nej lawm kuv ua siab tawv rau nej. Kuv thov nej tias thaum kuv tuaj nrog nej nyob tsis txhob cia kuv ua siab tawv rau nej raws li kuv ruaj siab tias kuv yuav tsum ua siab tawv rau qee leej uas lawv xav hais tias peb ua lub neej raws li neeg ntiajteb ua xwb. Txawm yog peb ua lub neej nyob hauv ntiajteb los peb tsis tawm tsam raws li neeg ntiajteb. Rau qhov tej cuab yeej uas peb tawm tsam tsis yog neeg ntiajteb li tiamsis yog Vajtswv lub hwjchim uas rhuav tau tej chaw ruaj khov. Peb rhuav tej lus dag uas tawm tsam peb thiab rhuav txhua lub ntsa loog siab uas thaiv tsis pub kom paub Vajtswv, thiab ntes txhua yam kev xav coj los mloog Khetos tej lus, thiab peb npaj txhij yuav rau txim rau txhua tus uas tsis mloog lus rau thaum nej mloog tej lus huvsi lawm. Cia li saib tej uas nyob ntawm nej qhov muag. Yog leejtwg ruaj siab tias nws yog Khetos li cia nws xav txog nws tus kheej dua ib zaug tias nws yog Khetos li, peb kuj yog Khetos li ib yam nkaus. Txawm yog kuv khav ntau mentsis txog peb lub hwjchim uas tus Tswv pub tsim kom tsa nej, tsis yog pub ua kom nej puam tsuaj, kuv yuav tsis raug txaj muag. Kuv tsis xav kom nej pom tias kuv sau tsab ntawv tuaj hem nej. Rau qhov muaj qee leej hais tias, “Nws tej tsab ntawv muaj hwjchim thiab hais hnyav tiag tiamsis thaum nws tuaj txog nws tus kheej qaug zog, thiab nws tej lus siv tsis tau.” Cov neeg ntawd cia li to taub li no tias, peb hais li cas rau hauv tsab ntawv rau thaum peb tsis nyob ntawd, thaum peb tuaj txog peb kuj ua li ntawd. Peb tsis muaj siab tuab suav tias peb zoo cuag li luag lossis muab peb piv rau qee leej uas lawv qhuas lawv tus kheej. Tiamsis thaum lawv tshuaj saib lawv thiab muab lawv tus kheej piv ib leeg rau ib leeg, los lawv yeej yog cov uas tsis nkag siab. Peb li mas yuav tsis khav dhau cai, tiamsis yuav khav txog tej uas Vajtswv tu tseg rau peb xwb, thiab tej uas Vajtswv tu tseg ntawd kuj yog nej cov thiab. Rau qhov peb tsis ua dhau tej uas tsis yog peb li feem yam nkaus li peb tsis tau txeev tuaj cuag nej dua li. Peb yog thawj pab uas coj Khetos txoj xov zoo tuaj cuag nej. Peb tsis khav dhau cai, tsis tau khav txog lwm tus tes haujlwm. Tiamsis peb vam tias thaum nej txojkev ntseeg loj hlob lawm, peb li haujlwm hauv nej yuav nthuav dav zuj zus mus, xwv peb thiaj piav txoj xov zoo rau hauv tej chaw uas dhau ntawm nej li feem mus, tsis khav txog lwm tus tej haujlwm uas ua rau hauv luag li feem lawm. “Cia tus uas khav tsuas khav txog tus Tswv xwb.” Rau qhov tus uas khav txog nws tus kheej luag tsis thiaj, tsuas yog tus uas tus Tswv qhuas, luag thiaj thiaj xwb. Kuv xav thov kom nej ua siab ntev thev tej lus ruam uas kuv hais qho mentsis. Nej cia li thev los maj. Kuv yeej khib xeeb nej ib yam li Vajtswv khib xeeb, rau qhov kuv twb qhaib nej rau tib tug txiv xwb, xwv kuv thiaj muab nej ua nkauj xwb dawb huv pub rau Khetos. Tiamsis kuv ntshai tsam nej tej kev xav yuav raug ntxias yuam kev tsis muaj lub siab xib thiab tsis dawb huv rau Khetos ib yam li tus nab tej tswvyim phem dag ntxias Eva. Yog tias leejtwg tuaj tshaj tawm txog dua ib tug Yexus uas tsis yog tus Yexus uas peb tshaj tawm, lossis yog nej txais dua ib tug ntsuj plig uas txawv dua tus uas nej twb txais lawm, lossis yog nej txais yuav txoj xov zoo uas txawv txoj uas nej twb txais lawm, kuj yog nej thev taus tej ntawd zoo tiag tiag li. Kuv xav tias kuv tsis qes dua cov tubtxib uas zoo tshaj ntawd ib qho twg li. Txawm yog kuv tsis txawj hais lus, los kuv kuj txawj paub. Peb ua tej no tshwm rau nej pom tseeb rau hauv txhua yam uas peb ua. Qhov uas kuv txo hwjchim thiaj tsa kom nej tau ntsej muag thiab kuv piav Vajtswv txoj xov zoo rau nej tsis yuav nqe ntawd yog txhaum lov? Kuv lws lwm pawg ntseeg, yog qhov uas kuv txais lawv cov nyiaj los yug kuv kom kuv thiaj ua num tau rau nej. Thiab thaum kuv tseem nrog nej nyob thiab tabtom tu ncua, los kuv tsis ua lub nra hnyav rau leejtwg ris, rau qhov cov kwvtij uas tuaj hauv lub xeev Makhedaunia twb pub tej uas kuv tu ncua rau kuv lawm. Txhua yam mas kuv tsis ua lub nra hnyav rau nej kiag li thiab kuv yeej yuav tsis ua lub nra mus li. Khetos txojkev tseeb yeej nyob hauv kuv, tej uas kuv khav txog ntawd mas tsis muaj leejtwg hauv lub xeev Akhaya yuav txwv tau kuv tsis txhob hais. Vim li cas? Yog vim kuv tsis hlub nej lov? Vajtswv paub tias kuv yeej hlub nej. Thiab yam uas kuv ua kuv yuav ua mus li, kom thiaj tav tau cov neeg uas pheej nrhiav sijhawm kom luag suav tias lawv ua haujlwm ib yam li peb ua hauv txhua yam uas lawv khav ntawd. Lawv cov ntawd yog cuav tubtxib, yog tub zog uas dag ntxias, thiab lawv ua txuj zoo li lawv yog Khetos cov tubtxib. Qhov uas ua li ntawd tsis txhob phimhwj li, rau qhov Xatas kuj txia ua tubtxib saum ntuj uas tawm hauv qhov kaj tuaj. Vim li no yog Xatas cov tub qhe txia los ua txojkev ncaj ncees li tub qhe kuj yoojyim ua tau. Thaum kawg lawv yuav saws raws li lawv tau ua. Kuv rov hais dua tias tsis txhob cia leejtwg xav tias kuv yog neeg ruam. Tiamsis yog nej xav li ntawd kuj cia li lees yuav kuv yam li lees yuav tus neeg ruam xwv kuv thiaj khav tau mentsis. (Tej uas kuv muaj cuab kav khav li no kuv tsis yog hais raws li tus Tswv kom kuv hais tiamsis kuv hais raws li tej neeg ruam. Vim muaj ntau leej khav raws li neeg ntiajteb, kuv kuj yuav khav thiab.) Nej twb zoo siab ua siab ntev thev cov neeg ruam, vim nej txawj ntse heev kaj. Rau qhov nej ua tau siab ntev thev rau thaum luag yuam nej ua qhev lossis noj nej tug lossis tsuj yuam nej lossis tsab ua loj lossis ntaus nej lub plhu. Kuv txaj muag lees hais tias peb tsis muaj zog txaus ua li ntawd. Tiamsis leejtwg muaj cuab kav khav txog yam twg, kuv kuj kav khav txog yam ntawd thiab. (Kuv hais yam li tus ruam hais.) Lawv yog haiv neeg Henplais lov? Kuv kuj yog thiab. Lawv yog neeg Yixayee lov? Kuv kuj yog thiab. Lawv yog Aplahas caj ces lov? Kuv kuj yog thiab? Lawv yog cov uas ua num rau Khetos lov? Kuv kuj ua num rau nwg zoo dua lawv (kuv tabtom hais yam li tus vwm hais,) kuv ua haujlwm khwv dua lawv, kuv raug kaw hauv tsev lojfaj ntau dua lawv, kuv raug muab nplawm heev kawg li, thiab kuv ntsib kev tuag ntau zaus. Kuv raug cov Yudai nplawm tsib zaug, ib zaug twg yog peb caug cuaj nplawm. Kuv raug xuas pas nplawm peb zaug, raug xuas pob zeb ntaus ib zaug. Kuv caij nkoj tawg peb zaug. Kuv ntab hauv dej hiavtxwv ib hnub ib hmos, kuv taug kev tsis tu ncua, kuv ntsib xwm txheej phem hauv hav dej, ntsib xwm txheej phem ntawm tub sab, ntsib ntawm kuv haiv neeg, ntsib ntawm lwm haiv neeg, ntsib hauv lub nroog, ntsib hauv tebchaws moj sab qhua, ntsib hauv dej hiavtxwv thiab ntsib ntawm cov cuav kwvtij. Kuv ua haujlwm khwv thiab txom nyem, kuv yoo dab ntub ntau zaus, tshaib nqhis, yoo mov ntau zaus, thiab tiv no thiab liab qab. Dua li ntawd qhov uas kuv txhawj txog txhua pawg ntseeg tseem niaj hnub ua rau kuv hnyav siab. Leejtwg tsis muaj zog ces kuv kuj tsis muaj zog thiab? Leejtwg raug ntxias kom yuam kev es kuv tsis ntxhov siab? Yog tsim nyog kuv khav, kuv yuav khav txog tej uas qhia kom pom tias kuv qaug zog. Vajtswv uas yog peb tus Tswv Yexus Khetos leej Txiv, yog tus uas tsim nyog qhuas mus ib txhis, nws paub tias kuv tsis dag. Tus uas vajntxwv Aletha tsa kav lub nroog Damaxaka txib neeg zov lub nroog Damaxaka yuav ntes kuv, tiamsis kuv raug nyob hauv lub tawb loj muab tso ntawm qhov rais hauv lub ntsa loog nqes dauv rau sab nraud kuv thiaj khiav dim ntawm tus thawj uas kav lub nroog txhais tes. Kuv yuav tsum khav. Txawm yog tsis muaj qabhau, los kuv yuav hais txog zaj yog toog thiab tej uas tus Tswv qhia tshwm los. Kuv paub ib tug yawg uas nyob hauv Khetos, thaum kaum plaub xyoos uas dhau los nws raug qaws mus rau saum ntuj txheej uas peb. Nws mus kiag lub cev lossis tsis muaj lub cev mus kuv tsis paub, Vajtswv paub xwb. Kuv paub tias tus yawg ntawd raug qaws mus rau hauv lub chaw zoo kawg nkaus. Nws mus kiag lub cev lossis tsis muaj lub cev mus kuv kuj tsis paub, Vajtswv paub xwb. thiab nws hnov tej lus uas hais tsis tau, yog tej uas tsis tso cai rau neeg hais kiag li. Tus yawg ntawd kuv khav tau, tiamsis kuv tus kheej mas kuv tsis khav, tsuas yog khav txog qhov uas kuv qaug zog xwb. Yog kuv xav khav los kuv kuj tsis yog neeg ruam vim tias kuv hais lus tseeb. Tiamsis kuv tsis khav xwv thiaj tsis muaj leejtwg xam pom kuv loj dua li uas lawv tau pom kuv tus kheej lossis hnov kuv hais. Xwv thiaj tsis pub kuv tsab ua loj vim tej uas Vajtswv qhia tshwm rau kuv pom ntau kawg ntawd, thiaj ua kom muaj pos chob kuv lub cev, yog Xatas tus tubtxib uas pheej nplawm kuv kom kuv thiaj tsis tsab ua loj dhau. Tus pos ntawd kuv twb thov tus Tswv peb zaug kom tawm hauv kuv lub cev mus. Tiamsis tus Tswv hais rau kuv tias, “Kuv txojkev hlub txaus rau koj lawm, vim qhov twg tsis muaj zog kuv lub hwjchim yuav tshwm puv nkaus rau qhov ntawd.” Vim li no kuv yuav zoo siab khav txog qhov uas kuv tsis muaj zog heev dua, xwv Khetos lub hwjchim thiaj roos kuv. Vim saib rau Khetos kuv thiaj txaus siab rau qhov uas tsis muaj zog, thiab raug kev thuam luag, raug kev txom nyem, raug kev tsim txom thiab raug kev ceeblaj nyuaj siab, vim kuv qaug zog thaum twg kuv kuj muaj zog thaum ntawd. Kuv ua neeg ruam lawm lauj. Yeej yog nej yuam kuv ruam. Tsim nyog nej qhuas kuv, rau qhov txawm yog kuv tsis tsim txiaj dabtsi los kuv tsis qes dhau cov tubtxib uas zoo tshaj ntawd. Kuv twb ua siab ntev ua tej txujci uas ua tubtxib rau hauv nej, yog tej txujci tseem ceeb thiab txujci phimhwj thiab tej haujlwm uas muaj hwjchim. Nej tu ncua dabtsi uas lwm pawg ntseeg tsis tau txais? Tsuas yog qhov uas kuv tsis ua lub nra hnyav rau nej xwb. Qhov kev txhaum no thov nej zam txim rau kuv nawj. Nimno kuv npaj txhij yuav tuaj saib nej ua zaum uas peb, thiab kuv yuav tsis ua lub nra hnyav rau nej, vim tias kuv tsis cheem tsum nej tej qhov txhia chaw tiamsis kuv cheem tsum nej tus kheej xwb. Rau qhov tsis tsim nyog menyuam yuav npaj cia rau niam txiv tiamsis niam txiv npaj cia rau menyuam. Kuv kuj zoo siab kawg uas yuav siv kuv tej nyiaj txiag qhov txhia chaw thiab kuv tus kheej ua haujlwm pab nej. Yog kuv hlub nej heev zuj zus, ces nej yuav hlub kuv yau zuj zus lov? Tej zaum nej kuj lees tias kuv tsis ua lub nra hnyav rau nej tiamsis nej tseem hais tias kuv siv tswvyim phem ntes tau nej. Kuv siv cov neeg uas kuv txib tuaj cuag nej ib tug twg noj nej tug lov? Kuv thov Titau tuaj thiab tso ib tug kwvtij nrog nws tuaj. Titau tau noj nej tug lov? Peb tsis koom ib lub siab ua haujlwm thiab taug tib tug neev taw lov? Nej xav ib txwm tias peb hais daws peb zaj xwb lov? Peb hais hauv Khetos tab meeg Vajtswv thiab ua txhua yam tsim tsa kom nej cov uas peb hlub loj hlob tuaj. Rau qhov kuv ntshai tsam thaum kuv tuaj txog yuav pom tias nej zoo tsis thooj li uas kuv xav thiab nej kuj yuav pom tias kuv zoo tsis thooj li uas nej xav, thiab ntshai tsam yuav muaj kev sib cav, sib khib, sib chim, sib txeeb, ib leeg hais phem rau ib leeg, taug xaiv, khav theeb thiab ua ntxhov hnyo. Kuv ntshai tsam thaum kuv rov tuaj dua Vajtswv yuav ua rau kuv poob ntsej muag ntshaus tag rau ntawm nej thiab kuv yuav ntxhov siab qhov uas ntau leej ua txhaum thiab tsis tau ntxeev dua siab ntawm tej kev phem kev qias, tej kev ua nkauj ua nraug thiab tej kev ua dev uas lawv ua. Zaum no yog zaum peb uas kuv tuaj cuag nej. Muaj lus iab hiam dabtsi yuav tsum muaj ob leeg peb leeg ua timkhawv thiaj ntseeg tau. Kuv twb txeev ntuas cov uas ua txhaum yav tag los thiab ntuas luag lwm tus huvsi. Nimno thaum kuv tsis nrog nej nyob kuv ntuas nej ib yam li thaum kuv tuaj saib nej zaum ob ntawd, kuv ntuas nej hais tias yog kuv rov tuaj dua kuv yuav tsis zam leejtwg lub txim, vim tias nej xav tau tej keeb puam uas pom tias Khetos muab lus rau kuv hais. Khetos tsis qaug zog pab nej, tiamsis nws muaj hwjchim rau hauv nej. Thaum nws raug teem rau saum tus ntoo khaublig nws qaug zog tag, tiamsis nws muaj txojsia nyob vim Vajtswv lub hwjchim. Peb nyob hauv Khetos kuj qaug zog thiab, tiamsis thaum nrog nej nyob peb yuav muaj txojsia nrog nraim nws vim yog Vajtswv lub hwjchim. Cia li tshuaj nej tus kheej saib nej nyob hauv txojkev ntseeg los tsis nyob. Cia li sim nej tus kheej. Nej tsis paub tias Yexus Khetos nyob hauv nej lov? Ntshai tsuas yog nej hla tsis dhau qhov uas muab sim xwb. Kuv vam tias nej yuav paub tias peb hla dhau qhov uas raug sim lawm. Peb thov Vajtswv pab kom nej tsis txhob ua txhaum, tsis yog ua kom pom tias peb hla dhau qhov uas raug sim, tiamsis xwv nej thiaj yuav ua zoo, txawm yog saib yam li peb hla tsis dhau qhov uas raug sim ntawd kuj xij. Rau qhov peb ua tsis tau ib yam dabtsi tawm tsam qhov tseeb, tsuas yog ua txhawb qhov tseeb. Thaum peb qaug zog thiab nej muaj zog, peb kuj zoo siab. Peb thov Vajtswv pab yam no, yog qhov uas nej rov ua zoo kawg nkaus. Vim li no kuv thiaj sau tej no tuaj rau nej rau thaum kuv tsis nrog nej nyob, xwv thaum kuv tuaj txog lawd kuv thiaj tsis ua tawv rau nej raws li lub hwjchim uas Vajtswv pub rau kuv tsim kho, tsis yog muab rau kuv rhuav pov tseg. Thaum kawg no, cov kwvtij, thov ncaim. Nej cia li rov ua zoo kawg nkaus, cia li mloog tej lus uas kuv thov, cia li koom ua ib lub siab, nyob sib hum xeeb. Mas Vajtswv uas muaj txojkev hlub thiab muaj kev kaj siab lug yuav nrog nej nyob. Cia li sib fim ntawm txoj kevcai nwj uas dawb huv. Vajtswv cov xov dawb txhua tus nco txog nej. Thov tus Tswv Yexus Khetos txoj koob hmoov thiab Vajtswv txojkev hlub thiab txojkev sib raug zoo uas los ntawm Vaj Ntsuj Plig uas dawb huv nrog nraim nej txhua tus. Povlauj, uas yog tus tubtxib uas tsis yog neeg tsa lossis neeg txib, tiamsis Yexus Khetos thiab leej Txiv Vajtswv uas tsa Yexus ciaj sawv hauv qhov tuag rov los ua tus tsa, thiab cov kwvtij sawvdaws uas nrog kuv nyob, hais mus rau cov pawg ntseeg hauv lub xeev Kalatia. Thov txojkev hlub thiab txojkev siab tus ntawm Vajtswv uas yog peb leej Txiv thiab ntawm tus Tswv Yexus Khetos nrog nraim nej nyob. Yexus muab nws tus kheej xyeem this peb lub txim kom thiaj cawm peb dim tiam neeg phem no raws li Vajtswv uas yog peb leej Txiv lub siab nyiam. Thov kom Vajtswv muaj koob meej ci ntsa iab mus ib txhis tsis kawg. Amee. Kuv xav tsis thoob rau qhov uas nej muab tus uas hu nej los hauv Khetos txojkev hlub tso tseg sai kawg li thiab tig mus raws lwm txoj xov zoo, tiamsis yeej tsis muaj dua lwm txoj xov zoo. Tiamsis muaj qee leej ua rau nej ntxhov siab thiab xav hloov Khetos txoj xov zoo. Yog tias peb lossis ib tug tubtxib saum ntuj piav lwm txoj xov zoo rau nej uas tsis thooj li txoj xov zoo uas peb twb piav rau nej tag lawm, kuj cia tus ntawd raug foom tsis zoo. Nimno kuv rov hais dua raws li uas peb twb hais ua ntej lawd hais tias, yog leejtwg piav lwm txoj xov zoo rau nej uas tsis thooj li txoj uas nej twb tau txais lawd, kuj cia tus ntawd raug foom tsis zoo. Nimno kuv tabtom xav kom neeg lees yuav kuv los xav kom Vajtswv lees yuav kuv? Kuv ua kom hum neeg lub siab lov? Yog kuv ua kom hum neeg lub siab kuv yeej tsis yog Khetos li tub qhe. Cov kwvtij, kuv xav kom nej paub tias txoj xov zoo uas kuv piav tsis yog neeg li, vim tsis yog kuv tau txoj xov zoo ntawm neeg los. Tsis muaj leejtwg qhia kuv, tiamsis yog Yexus Khetos qhia tshwm rau kuv. Nej kuj tau hnov txog kuv lub neej yav thaum ub uas kuv tseem coj raws li cov Yudai txoj kevcai hais tias kuv tau tsim txom Vajtswv cov pawg ntseeg heev kawg nkaus thiab yooj xeeb ua kom puam tsuaj. Kuv coj Yudai txoj kevcai zoo dua lwm tus uas nrog kuv ib phaum hauv kuv haiv neeg thiab kuv kub siab heev kawg rau kuv tej luag tej kab ke. Tiamsis Vajtswv muab kuv cais txij thaum nruab thiab los thiab hu kuv ntawm nws txojkev hlub. Thaum nws pom zoo qhia nws tus tub tshwm rau kuv pom kom kuv thiaj piav tus tub ntawd rau lwm haiv neeg, kuv tsis tau sablaj rau ib tug neeg twg kiag li. Thiab kuv tsis tau mus rau hauv lub nroog Yeluxalees mus xyuas cov uas ua tubtxib ua kuv ntej, tiamsis kuv mus rau lub tebchaws Alanpia li rov mus rau lub nroog Damaxaka. Dhau peb xyoo kuv li mus tsham Khefa hauv lub nroog Yeluxalees thiab nrog nws nyob tau kaum tsib hnub. Tiamsis kuv tsis ntsib lwm tus tubtxib li tsuas yog ntsib Yakaunpau uas yog tus Tswv li kwv. Tej uas kuv sau tuaj rau nej no, muaj Vajtswv pom, kuv tsis dag li. Dhau ntawd kuv li mus rau hauv lub xeev Xilia thiab lub xeev Khilikia. Khetos cov pawg ntseeg hauv lub xeev Yudia tsis tau pom dua kuv tim ntsej tim muag, lawv tsuas yog tau hnov tias, “Tus uas txeev tsim txom peb nimno piav txojkev ntseeg uas nws txeev muab rhuav kom puam tsuaj.” Mas lawv thiaj qhuas Vajtswv vim yog kuv. Tom qab ntawd kaum plaub xyoos kuv thiab Npananpa wb li tau rov mus rau lub nroog Yeluxalees dua ib zaug thiab coj Titau nrog kuv mus. Kuv mus raws li Vajtswv qhia tshwm rau kuv, thiab kuv tau piav txoj xov zoo uas kuv tau qhia rau lwm haiv neeg rau lawv mloog, tsuas yog piav rau cov uas tseem ceeb mloog twjywm xwb. Kuv ntshai tsam kuv tabtom dhia lossis twb dhia dhau los lawm tsis muaj qabhau. Txawm yog Titau uas nrog kuv nyob yog neeg Kili, los nws tsis raug muab yuam ua kevcai txiav. Tiamsis zaj no tshwm sim los vim yog muaj cov kwvtij uas ua cuav nyas kev tuaj tshuaj saib qhov uas peb tau nyob ywj pheej hauv Yexus Khetos, xwv thiaj muab tau peb ua qhev. Tiamsis peb tsis yeem swb lawv ib nyuag txoog teev li, kom txoj xov zoo uas tseeb ntawd thiaj nyob ruaj hauv nej mus li. Cov neeg uas suav tias lawv tseem ceeb ntawd (txawm yog lawv txeev zoo li cas kuj xij, kuv tsis quav ntsej, Vajtswv tsis saib leejtwg ntsej muag,) cov neeg uas lawv suav tias tseem ceeb ntawd tsis tau muab ib yam dabtsi tsav ntxiv rau kuv. Tiamsis lawv pom tias qhov uas piav txoj xov zoo rau cov neeg uas tsis ua kevcai txiav raug muab cob rau kuv ib yam li qhov uas piav txoj xov zoo rau cov uas ua kevcai txiav raug muab cob rau Petus, vim tias Vajtswv uas ua haujlwm rau hauv Petus kom mus ua tubtxib rau hauv cov uas ua kevcai txiav, kuj ua haujlwm rau hauv kuv kom mus rau hauv lwm haiv neeg. Thaum Yakaunpau thiab Khefa thiab Yauhas uas luag hwm tias yog cov uas ua thawj pom Vajtswv txojkev hlub uas muab pub rau kuv lawm, lawv kuj tuav kuv thiab Npananpa sab tes xis qhia tias sib koom tes ua haujlwm, mas peb thiaj yuav mus rau hauv lwm haiv neeg thiab lawv cov yuav mus rau hauv cov uas ua kevcai txiav. Lawv tsuas yog thov kom peb nco txog cov pluag, kuj yog yam uas kuv kub siab lug ua. Thaum Khefa tuaj txog lub moos Athi‑au kuv tau nrog nws sib cam tim ntsej tim muag vim nws ua txhaum muaj txim tiag. Ua ntej uas cov uas Yakaunpau txib tuaj tsis tau tuaj txog, Petus kuj nrog lwm haiv neeg koom noj haus ua ke, tiamsis thaum lawv tuaj txog, nws txawm thim ncaim mus nyob rau ib cag vim ntshai cov uas coj ua kevcai txiav. Thiab lwm tus Yudai kuj ua tsis ncaj raws li nws, txawm yog Npananpa los nws kuj ua tsis ncaj raws lawv qab thiab. Tiamsis thaum kuv pom tias lawv tsis coj ncaj raws nraim qhov tseeb hauv txoj xov zoo, kuv txawm hais rau Khefa tab meeg sawvdaws tias, “Koj yog neeg Yudai, los koj tseem ua lub neej raws li lwm haiv neeg tsis raws li cov Yudai. Ua cas koj tseem yuam lwm haiv neeg xyaum raws li cov Yudai thiab?” Peb cov uas yug los ua Yudai, tsis yog lwm haiv neeg uas muaj txim, peb paub tias tsis muaj leejtwg raug suav tias ncaj ncees vim xyaum raws li txoj kevcai, tiamsis yog vim ntseeg Yexus Khetos. Peb kuj ntseeg Yexus Khetos xwv peb thiaj raug suav tias ncaj ncees vim ntseeg Khetos tsis yog vim xyaum raws li txoj kevcai, vim qhov uas xyaum raws li txoj kevcai tsis muaj ib tug twg raug suav tias ncaj ncees. Tiamsis thaum peb siv zog nrhiav kom raug suav tias ncaj ncees hauv Khetos, ho rov raug suav tias yog neeg txhaum, mas Khetos yog tus uas ua kom muaj txim lov? Tsis yog li ntawd. Tiamsis yog kuv muab tej uas kuv muab rhuav tag lawd tsim dua tshiab, kuv kuj qhia kom pom tias kuv ua txhaum txoj kevcai. Vim txoj kevcai ntawd kuv twb tuag ntawm txoj kevcai lawm kom kuv thiaj muaj txojsia nyob rau ntawm Vajtswv. Kuv raug muab teem nrog Khetos saum khaublig ntoo lawm. Kuv txojsia tsis muaj nyob lawm, tiamsis Khetos nyob hauv kuv. Txojsia uas kuv tseem muaj nyob hauv kuv lub cev no, yog kuv ua neej nyob ntawm txojkev ntseeg Vajtswv leej Tub uas hlub kuv thiab muab nws tus kheej this kuv. Kuv tsis mom txiaj mom ntsig Vajtswv txojkev hlub. Yog xyaum raws li txoj kevcai raug suav tias ncaj ncees, Khetos kuj tuag dawb tsis muaj nuj nqes. Cov Kalatia uas ruam 'e, leejtwg tshoov nej lub siab? Yexus Khetos twb raug teem rau saum khaublig ntoo tab meeg rau nej lub qhov muag pom. Kuv xav paub ib nqes ntawm nej tias, nej tau txais Vaj Ntsuj Plig ntawm qhov uas xyaum raws li txoj kevcai lossis ntawm qhov uas ntseeg tej uas nej tau hnov? Nej ruam npaum li no diam lov? Nej pib ntawm Vaj Ntsuj Plig tiamsis yuav xaus rau ntawm nqaij tawv lov? Qhov uas nej raug ntau yam lawd tsis muaj nuj nqes lov? Yeej muaj nuj nqes. Tus uas pub Vaj Ntsuj Plig rau nej thiab ua tej haujlwm uas muaj hwjchim hauv nej nruab nrab, ua tej ntawd vim nej xyaum raws li txoj kevcai lossis vim nej ntseeg tej uas nej tau hnov? Ib yam li ntawd, Aplahas “ntseeg Vajtswv. Vajtswv suav tias qhov uas nws ntseeg ntawd yog txojkev ncaj ncees rau Aplahas.” Cia li paub tseeb tias cov uas ntseeg thiaj yog Aplahas li menyuam. Vajtswv txojlus paub ua ntej tias Vajtswv yuav suav tias lwm haiv neeg ncaj ncees vim yog qhov uas ntseeg, thiaj piav txoj xov zoo ua ntej rau Aplahas hais tias, “Ib tsoom neeg yuav tau koob hmoov ntawm koj los.” Vim li no cov neeg uas ntseeg thiaj nrog Aplahas uas ntseeg tau koob hmoov ua ke. Txhua tus uas vam khom qhov uas xyaum raws li txoj kevcai kuj raug foom tsis zoo, rau qhov muaj lus sau cia hais tias, “Txhua tus uas tsis xyaum raws li txhua nqe uas sau cia rau hauv phau kevcai mus li, tus ntawd kuj yuav raug foom tsis zoo.” Yeej paub tseeb tias tsis muaj leejtwg xyaum raws li txoj kevcai yuav raug suav tias ncaj ncees rau ntawm Vajtswv lub qhov muag. Rau qhov “Tus uas ncaj ncees yuav muaj txojsia nyob vim qhov uas nws ntseeg.” Tiamsis txoj kevcai tsis yog vam khom txojkev ntseeg, rau qhov “Tus uas ua raws nraim txoj kevcai kuj yuav muaj txojsia nyob vim xyaum raws li txoj kevcai.” Khetos raug tsawm foom this peb, thiaj txhiv peb dim qhov uas raug foom raws li txoj kevcai, rau qhov muaj lus sau cia hais tias “Txhua tus uas raug muab dai rau saum ntoo raug foom tsis zoo,” xwv tej koob hmoov ntawm Aplahas thiaj los txog lwm haiv neeg uas nyob hauv Yexus Khetos, peb thiaj tau txais Vaj Ntsuj Plig ntawm txojkev ntseeg raws li uas cog lus tseg. Cov kwvtij, kuv muab piv rau neeg lub neej. Txawm yog neeg tej lus cog tseg los thaum hais hum lawm tsis muaj leejtwg yuav muab rhuav lossis tsav ntxiv tau. Tej lus uas cog tseg rau Aplahas thiab nws caj ces, tsis tau hais tias, “Pub rau caj ces sawvdaws” yam li pub rau coob leej, tiamsis zoo yam li pub rau ib tug xwb yog tus tseem caj ces uas yog Khetos. Kuv hais li no. Txoj kevcai uas tshwm los plaub puas peb caug xyoo tom qab yuav rhuav tsis tau tej lus cog tseg uas Vajtswv pub ua ntej ntawd kom siv tsis tau. Rau qhov yog tau qub txeeg qub teg ntawm txoj kevcai, kuj tsis yog tau ntawm tej lus cog tseg. Tiamsis Vajtswv pub qub txeeg qub teg rau Aplahas ntawm tej lus cog tseg. Yog li ntawd, muaj txoj kevcai ua dabtsi? Qhov uas muab txoj kevcai tsav rau tej lus cog tseg kuj yog tim qhov uas tsis mloog lus. Txoj kevcai nyob mus txog thaum tus caj ces uas raws li tej lus cog tseg ntawd los txog. Cov tubtxib saum ntuj siv ib tug neeg nruab nrab rhawv txoj kevcai ntawd. Tus uas nyob nruab nrab yuav tsum muaj ob tog, tiamsis Vajtswv tib leeg cog lus xwb. Yog li ntawd txoj kevcai tawm tsam Vajtswv tej lus cog tseg lov? Tsis yog li ntawd, rau qhov yog tsa ib txoj kevcai pub tau txojsia ces txojkev ncaj ncees yeej yuav tau ntawm txoj kevcai ntawd los. Tiamsis Vajtswv txojlus muab txhua tus kaw cia rau hauv lub txim, kom tej lus cog tseg rau cov uas ntseeg Yexus Khetos thiaj raug muab pub rau cov uas ntseeg. Ua ntej uas txojkev ntseeg tsis tau los, peb raug txoj kevcai khi cia, peb raug kav cia mus txog thaum txojkev ntseeg tshwm los. Txoj kevcai thiaj ua tus uas kav peb mus txog thaum Khetos los peb thiaj raug suav tias ncaj ncees vim qhov uas peb ntseeg. Tiamsis nimno txojkev ntseeg twb los lawm, peb thiaj tsis nyob hauv txoj qab kevcai kav ntxiv mus lawm, vim tias nej txhua tus yog Vajtswv li menyuam hauv txojkev ntseeg Yexus Khetos. Nej txhua tus uas ua kevcai raus dej hauv Khetos lawm, kuj muab Khetos los hnav. Tsis muaj Yudai lossis Kili, tsis muaj qhev lossis cov uas tsis ua qhev, tsis muaj txivneej lossis pojniam, vim nej sawvdaws koom ua ib rau hauv Yexus Khetos. Yog nej ua Khetos li lawm, nej kuj yog Aplahas caj ces thiab nej yuav saws qub txeeg qub teg raws li cog lus tseg. Kuv hais li no. Thaum tus uas saws qub txeeg qub teg tseem yau nws kuj tsuas zoo li tus qhev xwb, txawm yog yuav ua tej cuab txhiaj cuab tam huvsi tus tswv kuj xij. Nws yuav nyob hauv tus uas zov nws thiab tus uas saib xyuas tsev qab mus txog lub sijhawm uas leej txiv teem cia. Peb kuj zoo ib yam li ntawd. Thaum peb tseem ua menyuam yaus, peb kuj ua qhev rau hauv qab tej hwjchim uas kav tag nrho lub qab ntuj. Tiamsis thaum txog lub sijhawm uas teem cia lawd, Vajtswv txib nws tus Tub los yug ntawm pojniam thiab yug hauv txoj qab kevcai, kom thiaj txhiv cov uas nyob hauv txoj qab kevcai dim, peb thiaj tau ua nws li tub. Vim nej ua nws li tub lawm Vajtswv thiaj txib nws leej Tub tus Ntsuj Plig los rau hauv peb lub siab hu tias, “Anpa, txiv.” Vim li no nyob hauv Vajtswv nej thiaj tsis yog qhev dua li lawm tiamsis yog tub. Yog tub lawm, nej saws tau qub txeeg qub teg. Yav tag los uas nej tsis paub Vajtswv, nej ua tej uas tsis yog timtswv li qhev. Tiamsis nimno nej paub Vajtswv lawm, tiamsis qhov uas raug, yog Vajtswv paub nej lawm. Ua cas nej tseem yuav tig rov mus cuag tej hwjchim uas tsis muaj zog thiab tsis muaj qabhau kiag li, thiab xav rov ua lawv li qhev dua? Nej caiv hnub caiv hli caiv nyoog caiv xyoo. Kuv ntshai tsam kuv ua haujlwm khwv rau nej nkim zog do xwb. Cov kwvtij, thov kom nej ua ib yam li kuv rau qhov kuv kuj thooj yam li nej. Nej yeej tsis tau ua txhaum rau kuv. Nej kuj paub lawm tias thawj zaug uas kuv qhia txoj xov zoo rau nej twb yog vim kuv lub cev muaj mob. Txawm yog qhov uas kuv mob ntawd ua rau nej nyuaj siab, los nej tseem muab kuv saib hlob tsis ntxub kuv, tiamsis nej lees yuav kuv ib yam li kuv yog Vajtswv ib tug tubtxib saum ntuj, lossis ib yam li yog Yexus Khetos ntag. Nej txojkev siab tus siab xyiv fab ploj dua twg lawm? Kuv ua timkhawv rau nej tias yog ua tau nej twb yuav kaus nej lub qhov muag pub rau kuv. Nimno kuv ho ntxeev ua yeeb ncuab rau nej vim yog qhov uas kuv qhia qhov tseeb rau nej lov? Cov neeg ntawd mob siab nej heev tiamsis tsis yog mob siab rau qhov zoo. Lawv xav cais nej ncaim ntawm peb, xwv nej thiaj mob siab lawv. Qhov uas mob siab rau qhov uas zoo kuj zoo thiab tsim nyog ua rau txhua lub sijhawm tsis yog ua rau thaum kuv nrog nej nyob xwb. Kuv cov menyuam 'e, kuv tseem mob plab ntxiv vim yog tim nej mus txog thaum Khetos raug muab tsim tsa rau hauv nej. Kuv xav nrog nej nyob nimno thiab kuv yuav hloov kuv lub suab rau qhov kuv tsis pom qab xav li cas txog nej. Nej cov uas xav nyob hauv txoj qab kevcai, cia li hais rau kuv saib, nej tsis mloog txoj kevcai lov? Rau qhov muaj lus sau cia hais tias Aplahas muaj ob tug tub, ib tug yog tus nkauj qhev yug, ib tug yog tus uas tsis ua qhev yug. Tus nkauj qhev tus tub kuj yug raws li cev nqaij tawv yug, tiamsis tus uas tsis ua qhev tus tub yug raws li lo lus cog tseg. Zaj no yog piv lus. Ob tug pojniam ntawd piv ib yam li ob yam kev cog lus tseg. Ib tug los ntawm lub roob Xinai los, yog tus uas yug menyuam ua qhev. Tus ntawd yog Haka. Tus Haka no piv li lub roob Xinai hauv Alanpia tebchaws, thiab piv txog lub nroog Yeluxalees uas nyob tamsim no, vim nws thiab nws tej menyuam puavleej ua qhev. Tiamsis lub nroog Yeluxalees uas nyob saud tsis ua qhev, nws yog peb li niam. Vim muaj lus sau cia hais tias, “Tus pojniam mooj 'e, tus uas tsis tau yug dua menyuam, cia li xyiv fab, koj uas tsis tau mob dua plab yug menyuam 'e, cia li tsa suab hu nrov nrov, rau qhov tus pojniam uas tsis muaj txiv li menyuam kuj coob dua tus pojniam uas muaj txiv.” Cov kwvtij, peb yog menyuam uas yug ntawm tej lus cog tseg ib yam li Yiha. Tiamsis thaum ntawd tus uas yug raws li nqaij tawv tsim txom tus uas yug raws li Vaj Ntsuj Plig pub, mas tamsim no kuj ib yam li ntawd. Tiamsis Vajtswv txojlus hais li cas? “Cia li muab tus nkauj qhev thiab nws tus tub ntiab khiav mus, rau qhov tus nkauj qhev tus tub yuav tsis nrog tus pojniam uas tsis ua qhev tus tub txais qub txeeg qub teg kiag li.” Vim li no, cov kwvtij, peb tsis yog tus nkauj qhev li menyuam, peb yog tus pojniam uas tsis ua qhev li menyuam. Peb tau nyob ywj pheej li ntawd twb yog vim Khetos tso peb dim. Yog li ntawd cia li nyob ruaj, tsis txhob rov qab mus kwv tus quab uas ua qhev dua li lawm. Nimno kuv Povlauj hais rau nej tias yog nej tseem ua kevcai txiav ces Khetos yuav tsis muaj qabhau dabtsi rau nej kiag li. Kuv rov qhia dua rau txhua tus uas ua kevcai txiav tias lawv raug muab khi kom xyaum raws li txoj kevcai huvsi lawm. Nej cov uas xav raug suav tias ncaj ncees vim qhov uas xyaum raws li txoj kevcai, nej kuj raug muab txiav tu nrho ntawm Khetos thiab poob ntawm Vajtswv txojkev hlub lawm. Vim peb muaj Vaj Ntsuj Plig thiab muaj kev ntseeg peb thiaj tos rawv txojkev ncaj ncees uas peb vam tias yuav tau. Rau qhov nyob hauv Yexus Khetos qhov uas ua kevcai txiav thiab tsis ua yeej tsis tseem ceeb dabtsi, tsuas yog txojkev ntseeg uas muaj kev sib hlub thiaj tseem ceeb xwb. Nej twb dhia tau zoo heev. Leejtwg tav tsis pub nej mloog txoj tseeb? Qhov uas luag haub ntxias li ntawd tsis yog los ntawm Vajtswv uas hu nej los ntseeg. Ib nyuag qhov keeb me me ua rau ib phaj hmoov su tag huvsi. Kuv ruaj siab hauv tus Tswv tias nej yuav tsis xav rau lwm yam. Tus uas ua rau nej ntxhov ntawd txawm yog leejtwg kuj xij nws yuav raug txim. Cov kwvtij, yog tias kuv tseem qhia kom ua kevcai txiav, ua cas kuv ho raug tsim txom? Yog li ntawd, tus khaublig ntoo yuav tsis ua rau neeg dawm lawm. Kuv xav kom cov uas ua rau nej ntxhov ntawd muab lawv tus kheej sam kiag. Cov kwvtij, nej raug hu los nyob ywj pheej. Tiamsis tsis txhob siv txojkev ywj pheej ntawd ua hauv paus coj nej mus ua raws li lub cev nqaij tawv ntshaw, tiamsis ib leeg cia li zoo siab ua num rau ib leeg ntawm txojkev hlub. Rau qhov tag nrho txoj kevcai huvsi muab sau zog ua ib los hais tias, “Koj yuav tsum hlub kwvtij zej zog ib yam li koj hlub koj tus kheej.” Tiamsis yog nej sib tom sib ntxo cia li ceev faj tib zoo tsam ces nej ib leeg yuav ua rau ib leeg puam tsuaj tag. Kuv hais tias, cia li ua lub neej raws li Vaj Ntsuj Plig, tsis txhob ua raws li lub cev nqaij tawv ntshaw. Rau qhov tej uas lub cev nqaij tawv ntshaw tawm tsam Vaj Ntsuj Plig, thiab tej uas Vaj Ntsuj Plig ntshaw kuj tawm tsam nqaij tawv. Ob yam no yeej sib tawm tsam, nej thiaj ua tsis tau tej uas nej xav ua. Tiamsis yog Vaj Ntsuj Plig coj nej, nej kuj tsis nyob hauv txoj qab kevcai. Nqaij tawv li haujlwm pom tseeb li no, yog qhov uas ua nkauj ua nraug, ua phem ua qias, ua vuab tsuab, pe dab mlom, ua khawv koob, ua yeeb ncuab, sib cav sib ceg, sib khib, sib chim, sib txeeb, sib cam, tawg ua pab ua pawg, ntshaw luag tug, qaug dej qaug cawv, ua nqaj ua nqug thiab dua lwm yam zoo li no uas kuv twb ntuas nej ua ntej tias cov uas ua tej no yuav tsis muaj feem tau Vajtswv lub tebchaws kiag li. Tiamsis Vaj Ntsuj Plig txi txiv li no, yog kev hlub, kev xyiv fab, kev siab tus, kev thev taus, kev khuvleej, kev ua zoo, kev ua ncaj, lub siab mos siab muag thiab paub tswj tus kheej. Tej no tsis muaj kevcai txwv kiag li. Cov uas yog Yexus Khetos li lawv twb muab lawv lub cev nqaij tawv thiab tej uas lub cev ntshaw thiab xav teem ua ke rau saum tus khaublig ntoo lawm. Yog peb muaj txojsia nyob hauv Vaj Ntsuj Plig, peb cia li ua lub neej raws li Vaj Ntsuj Plig. Peb tsis txhob khav theeb, ib leeg tsis txhob zes kom ib leeg chim, thiab tsis txhob sib khib. Cov kwvtij, yog nej pom leejtwg ua txhaum yam twg nej cov uas nyob sab ntsuj plig cia li ua lub siab mos siab muag pab tus ntawd kom rov xyaum dua. Thiab nej yuav ceev faj txog nej tus kheej ntshai tsam ces nej raug ntxias ua txhaum thiab. Cia li sib pab ris nra, thiaj yog ua kom Khetos txoj kevcai tiav. Yog leejtwg xav tias nws yog ib tug tseem ceeb tiamsis nws twb tsis tseem ceeb dabtsi kiag li, ces kuj yog nws dag nws tus kheej. Txhua tus nyias yuav tsum tshuaj nyias tes haujlwm thiaj khav tau nws tus kheej xwb, tsis muab piv rau lwm tus, rau qhov txhua tus nyias yuav tsum ris nyias lub nra. Tus uas kawm Vajtswv tej lus, cia li faib nws li txhua yam zoo rau tus qhia nws. Tsis txhob xav yuam kev. Nej dag ntxias Vajtswv tsis tau, rau qhov tias leejtwg tseb yam twg nws kuj yuav sau yam ntawd. Tus uas tseb tej uas lub cev nqaij tawv ntshaw nws kuj yuav sau tej uas txawj lwj ntawm lub cev ntawd. Tus uas tseb yam uas Vaj Ntsuj Plig nyiam kuj yuav sau txojsia ib txhis tsis kawg ntawm Vaj Ntsuj Plig. Peb tsis txhob qaug zog qhov uas ua zoo, rau qhov yog peb tsis tsaug leeg peb yuav tau sau raws li lub sijhawm. Yog li ntawd thaum peb muaj sijhawm peb cia li ua zoo rau txhua tus thiab yimhuab ua zoo rau cov uas ua ib tse neeg hauv txojkev ntseeg. Cia li saib tej npe ntawv uas kuv txhais tes sau tuaj rau nej loj li cas. Cov uas xav tau ntsej muag raws li nqaij tawv yog cov uas yuam nej ua kevcai txiav, xwv lawv thiaj tsis raug tsim txom vim yog tim Khetos tus khaublig ntoo xwb. Txawm yog cov uas ua kevcai txiav lawm los kuj tsis ua raws li txoj kevcai, tiamsis lawv tseem xav kom nej ua kevcai txiav kom lawv thiaj tau coj nej lub cev nqaij tawv mus khav. Thov cia kuv tsis txhob khav txog dabtsi li tsuas yog khav txog peb tus Tswv Yexus Khetos tus khaublig ntoo xwb. Vim tus khaublig ntoo ntawd lub ntiajteb thiaj li tuag ntawm kuv thiab kuv tuag ntawm lub ntiajteb. Vim tias qhov uas ua kevcai txiav thiab tsis ua kuj tsis tseem ceeb dabtsi, tiamsis qhov tseem ceeb yog qhov uas muab tsim dua tshiab xwb. Thov kom lub siab tus thiab Vajtswv txojkev khuvleej nrog nraim txhua tus uas xyaum raws li txoj kab ke no, uas yog Vajtswv cov tseem Yixayee. Txij no mus leejtwg tsis txhob ua rau kuv ntxhov siab lawm, rau qhov kuv muaj Yexus lub cim nias rau kuv lub cev lawm. Cov kwvtij, kuv thov kom peb tus Tswv Yexus Khetos txojkev hlub nrog nraim nej tus ntsuj plig nyob. Amee. Povlauj uas yog Yexus Khetos tus tubtxib raws li Vajtswv lub siab nyiam hais mus rau cov xov dawb [hauv lub moos Efexau] uas muaj siab xib rau Yexus Khetos. Thov txojkev hlub thiab txojkev siab tus ntawm Vajtswv uas yog peb leej Txiv thiab ntawm tus Tswv Yexus Khetos nrog nraim nej nyob. Qhuas Vajtswv uas yog peb tus Tswv Yexus Khetos leej Txiv, uas foom koob hmoov sab ntsuj plig txhua yam saum ntuj los hauv Khetos rau peb. Rau qhov Vajtswv xaiv peb hauv Khetos ua ntej uas tsim ntuj tsim teb kom peb ua neeg dawb huv tsis muaj chaw thuam rau ntawm nws qhov muag. Nws hlub peb thiab teem tseg ua ntej kom peb ua nws li menyuam rau hauv Yexus Khetos raws li Vajtswv lub siab nyiam thiab nws twb xav tseg lawd, kom thiaj ua lub chaw qhuas nws txojkev hlub ci ntsa iab uas nws pub dawb dawb hauv Khetos uas nws hlub rau peb. Hauv Khetos peb thiaj tau txais kev txhiv dim vim muaj nws cov ntshav, yog peb tau txais kev zam txim ntawm peb tej kev txhaum raws li Vajtswv txojkev hlub muaj nplua mias uas nws pub rau peb ntau kawg li ntawm nws lub tswvyim thiab ntawm nws txojkev paub txhua yam. Nws pub peb paub tej uas nws lub siab xav uas nws twb muab npog cia lawd raws li nws lub siab nyiam uas nws hom cia rau hauv Khetos. Thaum txog sijhawm lawm nws yuav ua tej haujlwm uas nws hom tseg lawd kom tiav, yog qhov uas yuav sau zog txhua yam uas nyob saum ntuj thiab hauv ntiajteb los nyob hauv Khetos. Hauv Khetos peb thiaj raug xaiv, yog peb raug teem cia ua ntej raws li Vajtswv lub siab xav. Nws yog tus uas ua txhua yam raws li nws lub siab hom tseg kom peb cov uas muaj vam rau hauv Khetos ua ntej lwm tus thiaj yuav nyob qhuas ntxhias Vajtswv lub koob meej. Hauv Khetos, thaum nej tau hnov txojlus tseeb yog txoj xov zoo uas cawm nej dim thiab tso siab rau nws lawm, nej kuj raug nias lub hom thawj uas yog Vaj Ntsuj Plig dawb huv raws li cog lus cia. Tus Vaj Ntsuj Plig ntawd yog puav pheej uas peb yuav tau txais qub txeeg qub teg mus txog thaum Vajtswv cov neeg txais kev txhiv dim, kom thiaj qhuas ntxhias nws lub koob meej. Vim li no, thaum kuv tau hnov txog nej txojkev ntseeg tus Tswv Yexus thiab qhov uas nej hlub cov xov dawb, kuv thiaj ua Vajtswv tsaug txog nej tsis tu li rau thaum kuv nco txog nej hauv kuv tej lus thov. Kuv thov kom peb tus Tswv Yexus Khetos tus Vajtswv, yog leej Txiv uas muaj hwjchim ci ntsa iab, pub nej muaj lub siab uas muaj tswvyim thiab qhia Vajtswv tshwm rau nej kom nej paub nws zoo. Kuv thov kom nej lub siab qheb pom kev xwv nej thiaj paub tias txojkev vam uas Vajtswv hu nej mus txog ntawd zoo li cas, thiab paub tej qub txeeg qub teg ci ntsa iab uas Vajtswv pub rau cov xov dawb ntau kawg npaum li cas, thiab paub nws lub hwjchim loj kawg muaj ntau npaum li cas rau peb cov uas ntseeg. Yog tib lub hwjchim uas nws siv lub zog loj ua tej haujlwm uas nws ua tshwm rau hauv Khetos rau thaum nws tsa Khetos sawv hauv qhov tuag rov los thiab pub Khetos zaum ntawm nws sab tes xis saum ntuj ceeb tsheej, siab dhau txhua tus timtswv uas kav thiab tej hwjchim, tej dab, thiab tej uas txawj tswjhwm huvsi, thiab tseem siab dhau txhua lub npe uas luag hu txog, tsis yog hauv tiam no xwb tseem yog hauv tiam uas yuav tshwm los thiab. Vajtswv muab txhua yam txo los nyob hauv Khetos qab xib taws thiab pub nws ua lub taubhau kav txhua yam rau cov pawg ntseeg. Pawg ntseeg yog Khetos lub cev, yog muaj Yexus nyob puv npo. Nws yog tus uas tsav txhua yam kom muaj txhij zog rau txhua qhov. Nej twb tuag lawm vim qhov uas fav xeeb yuam kev ua txhaum muaj txim. Yav tag los nej txeev ua nej lub neej nyob hauv kev txhaum raws li ntiajteb txojkev, thiab raws li tus uas kav tej hwjchim saum nruab ntug, yog tus dab uas ua haujlwm rau hauv cov uas tsis mloog lus rau lub sijhawm no. Yav tag los peb txhua tus txeev nrog lawv nyob ua lub neej raws li lub cev nqaij tawv ntshaw, yog ua raws li peb lub cev nqaij tawv thiab peb lub siab xav yuav, mas raws li peb lub neej ces tsim nyog peb raug Vajtswv txojkev npau taws ib yam li lwm tus. Tiamsis Vajtswv muaj txojkev khuvleej ntau heev, thiab nws txojkev hlub loj uas nws ua tshwm los rau peb, mas txawm yog peb twb tuag lawm vim qhov uas fav xeeb ua txhaum, los Vajtswv tseem pub peb nrog Khetos muaj txojsia nyob. (Nej tau txais txojkev dim ntawm Vajtswv txojkev hlub.) Thiab Vajtswv tsa peb nrog Khetos sawv los, thiab pub peb nrog nws zaum ua ke saum ntuj ceeb tsheej rau hauv Yexus Khetos, xwv lwm tiam uas yuav los nws thiaj qhia nws txojkev hlub uas muaj nplua mias tshwm los, yog qhov uas nws khuvleej peb hauv Yexus Khetos. Rau qhov nej dim, yog los ntawm txojkev hlub vim yog nej ntseeg. Txojkev dim no tsis yog tshwm ntawm nej los tiamsis yog Vajtswv pub dawb xwb, tsis yog tau ntawm qhov uas xyaum xwv thiaj tsis muaj leejtwg khav tau. Vim tias peb yog Vajtswv txhais tes ua, yog tsim rau hauv Yexus Khetos kom ua tej haujlwm zoo uas Vajtswv twb npaj ua ntej cia lawm rau peb xyaum raws nraim. Yog li ntawd nej yuav tsum nco tias yav tag los nej yog lwm haiv neeg raws li lub cev nqaij tawv. Thiab cov uas ua kevcai txiav, uas yog neeg txhais tes ua rau lub cev, txeev hu nej tias yog cov tsis ua kevcai txiav. Cia li nco tias thaum ntawd nej tsis muaj Khetos, tsis muaj feem ua neeg Yixayee, thiab tsis muaj cai koom tej lus uas Vajtswv cog tseg, nyob hauv lub ntiajteb no tsis muaj chaw vam thiab tsis muaj Vajtswv. Tiamsis nimno nyob hauv Yexus Khetos nej cov uas yav tag los nyob deb raug coj los nyob ze vim muaj Khetos cov ntshav. Khetos yog peb txojkev sib hum xeeb ntag. Nws muab peb ob tog los koom ua ib ntawm nws lub cev thiab rhuav lub ntsa loog uas kem nruab nrab yog qhov uas ob tog ua yeeb ncuab. Nws rhuav txoj kevcai uas muaj tej lus nkaw thiab tej kab ke ntawd tseg, kom thiaj muab tau ob pab neeg los tsim ua ib pab tshiab rau hauv nws, thiaj ua kom muaj kev nyob sib hum xeeb, thiab ua kom ob tog rov nrog Vajtswv sib raug zoo koom ib lub cev vim yog muaj tus khaublig ntoo, thiaj ua kom txojkev ua yeeb ncuab ploj tag lawm. Khetos los tshaj tawm txojkev sib hum xeeb rau nej cov uas nyob deb thiab cov uas nyob ze. Vim yog muaj Yexus peb ob tog thiaj tau los cuag leej Txiv ntawm tib tug Vaj Ntsuj Plig. Vim li no nej tsis yog neeg lwm tebchaws thiab lwm haiv neeg dua li lawm, tiamsis nej koom nrog Vajtswv cov xov dawb thiab koom ua Vajtswv tsev neeg lawm. Nej raug tsim tsa rau saum tej taw tiag uas yog cov tubtxib thiab cov xibhwb cev Vajtswv lus, muaj Yexus Khetos ua lub thawj pob zeb ntawm kaum tsev. Hauv Khetos mas txhua yam uas ua lub tsev yuav muab sib txuas ua ke thiab hlob tuaj ua lub tuam tsev dawb huv rau hauv Vajtswv. Hauv Khetos nej kuj tabtom raug tsim tsa ua lub chaw rau Vajtswv nyob, yog Vaj Ntsuj Plig nyob. Vim li no, kuv Povlauj raug kaw vim yog ua Yexus Khetos tes haujlwm pab nej cov uas yog lwm haiv neeg. Nej twb hnov txog tes haujlwm uas kuv qhia Vajtswv txojkev hlub, uas Vajtswv muab cob rau kuv pab nej. Vajtswv muab tej uas muab npog cia tob tob lawd qhia tshwm rau kuv paub raws li kuv twb sau qho mentsis lawm. Thaum nej nyeem tej lus ntawd nej yuav nkag siab tau qhov uas kuv paub tej uas muab npog cia hais txog Khetos, uas yav tag los Vajtswv tsis muab qhia rau neeg yam li lub sijhawm no uas nws muab qhia tshwm rau nws cov tubtxib dawb huv thiab rau cov xibhwb cev Vajtswv lus ntawm Vaj Ntsuj Plig. Yog qhov uas lwm haiv neeg tau koom saws qub txeeg qub teg thiab koom tib lub cev thiab muaj feem koom tej lus cog tseg hauv Yexus Khetos ntawm txoj xov zoo. Kuv los ua ib tug tub qhe qhia txoj xov zoo no raws li Vajtswv txojkev hlub uas muab pub rau kuv, vim Vajtswv lub hwjchim loj ua haujlwm rau hauv kuv. Txawm yog kuv yau dhau Vajtswv cov xov dawb huvsi, los kuj muab txojkev hlub pub rau kuv kom mus piav rau lwm haiv neeg paub txog tej uas Khetos muaj nplua mias uas tsis txawj tshawb nrhiav tag, thiab qhia kom txhua tus pom tias dabtsi yog tes haujlwm uas yuav qhia tej uas Vajtswv tus uas tsim txhua yam tau muab npog cia tob tob ntau tiam thaum ub los lawd, xwv thiaj siv cov pawg ntseeg qhia rau tej hwjchim thiab tej timtswv uas kav saum nruab ntug paub txog Vajtswv lub tswvyim uas muaj nplua mias rau lub sijhawm no. Tej no yog raws li Vajtswv xav tseg ib txwm los uas nws ua kom tiav rau hauv Yexus Khetos uas yog peb tus Tswv. Hauv Khetos peb thiaj muaj siab tuab thiab ruaj siab uas yuav mus cuag Vajtswv vim qhov uas ntseeg Khetos. Vim li no kuv thiaj thov nej kom tsis txhob poob siab rau qhov uas kuv raug txom nyem vim yog saib rau nej. Tej no yuav ua rau nej tau koob meej. Vim li no kuv thiaj txhos caug rau ntawm leej Txiv, yog tus uas txhua haiv neeg saum ntuj thiab hauv ntiajteb hu ua leej txiv. Kuv thov Vajtswv pub kom nej muaj zog rau hauv lub siab ntawm lub hwjchim uas tau ntawm nws tus Ntsuj Plig los rau nej, raws li nws lub hwjchim ci ntsa iab uas muaj nplua mias, thiab thov kom Khetos nyob hauv nej lub siab ntawm txojkev ntseeg. Kuv thov kom nej ntsia cag ruaj rau hauv txojkev hlub nej thiaj muaj peevxwm nrog Vajtswv cov xov dawb sawvdaws nkag siab tau txog txojkev hlub qhov dav qhov ntev qhov siab thiab qhov tob, thiab paub Khetos txojkev hlub uas paub tsis tag, kom nej thiaj tau tej uas Vajtswv muaj nplua mias puv npo. Thov cia tus uas ua tau txhua yam ntau dua li tej uas peb thov thiab peb xav txog raws li nws lub hwjchim uas ua haujlwm rau hauv peb, tau koob meej. Thov kom nws tau koob meej hauv pawg ntseeg thiab hauv Yexus Khetos txhua txhia tiam mus ib txhis tsis kawg. Amee. Vim li no kuv uas raug kaw vim saib rau tus Tswv, thov nej ua lub neej kom phim qhov uas Vajtswv hu nej los xyaum. Nej yuav tsum txo kiag lub siab, thiab ua lub siab mos siab muag, ua lub siab ntev, thiab ua siab thev ib leeg rau ib leeg ntawm txojkev hlub, thiab kub siab tuav rawv qhov uas koom ua ib lub siab uas Vaj Ntsuj Plig pub, muab txojkev sib hum xeeb los khi nej. Muaj tib lub cev thiab tib tug Ntsuj Plig, ib yam li nej raug hu los txais tib txojkev vam rau thaum Vajtswv hu nej los, muaj tib tug Tswv, muaj tib txojkev ntseeg, muaj tib txoj kevcai raus dej, muaj tib tug Vajtswv uas yog peb txhua tus leej Txiv, nws kav txhua tus, txhua tus tshwm ntawm nws los, thiab nws nyob hauv txhua tus. Txojkev hlub muab pub rau peb txhua tus npaum li uas Khetos pub. Vim li ntawd thiaj muaj lus sau cia hais tias, “Thaum nws nce mus rau saum lub chaw siab, nws coj ib pab uas nws ntes tau nrog nws mus, thiab nws pub qhov txhia chaw rau tibneeg.” (Qhov uas hais tias “Nws nce mus saud” muaj lub ntsiab li cas? Kuj yog hais tias nws nqes mus rau hauv nruab yeeb lawm thiab. Tus uas nqes mus rau hauv nruab yeeb kuj yog tus uas nce mus siab dhau saum ntuj huvsi, kom thiaj nyob tau thoob plaws txhua qhov.) Tej uas nws pub ntawd kuj yog pub kom qee leej ua tubtxib, qee leej ua xibhwb cev Vajtswv lus, qee leej qhia txoj xov zoo, qee leej ua tus yug pawg ntseeg thiab ua xibhwb qhia, thiaj npaj tau cov xov dawb ua Vajtswv tes haujlwm tsim tsa Khetos lub cev kom kheev hlob, mus txog thaum peb sawvdaws txawj koom ua ib lub siab hauv txojkev ntseeg thiab hauv txojkev paub txog Vajtswv leej Tub, thiab peb hlob tiav txiv lawm, yog hlob puv npo ib yam li Khetos rau txhua fab. Peb thiaj tsis ua menyuam yaus ntxiv mus, tsis ua lub siab ywj fab ywj fwj raug ntas mus ntas los qaug raws cua rau neeg txhua yam lus qhia thiab tsis raug neeg tej kev txawj ntse li tswvyim phem dag ntxias. Tiamsis peb yuav hais qhov tseeb ntawm txojkev sib hlub kom thiaj loj hlob txhua fab koom rau tus uas yog lub taubhau, yog Khetos ntag. Vim muaj Khetos, tag nrho lub cev huvsi thiaj tau sib txuas thiab koom ua ke ntawm txhua lub pob qej txha uas pub rau lub cev ntawd, thiab thaum txhua yam nyias ua nyias tes haujlwm, kuj ua rau lub cev loj hlob thiab tsim tsa tus kheej ntawm txojkev sib hlub. Yog li ntawd kuv hais li no thiab kuv hais tawv qhawv hauv tus Tswv kom nej tsis txhob ua nej lub neej ib yam li lwm haiv neeg dua li lawm. Lawv ua raws li lawv tej kev xav uas tsis muaj qabhau. Lawv tej kev xav tsaus ntuj nti lawm, lawv tsis muaj cai koom txojsia uas Vajtswv pub vim yog lawv tsis paub dabtsi li vim lawv lub siab tawv heev. Lawv yeej tsis paub txaj muag, lawv tso plhuav lawv lub cev mus ua kev phem kev qias thiab ua txhua yam kev vuab tsuab tsis tswj lub siab kiag li. Tiamsis zaj uas nej kawm txog Khetos tsis tau qhia li ntawd. Nej twb hnov txog Khetos tiag tiag li lawm thiab tau txais tej lus qhia uas yog txojkev tseeb hauv Yexus, yog qhia kom tso tus neeg qub hauv lub neej qub tseg, yog tus neeg qub uas raug txojkev ntshaw ntxias coj mus puam tsuaj, thiab cia nej tus ntsuj plig thiab tej kev xav raug hloov dua tshiab, thiab muab tus neeg tshiab los hnav, yog tus neeg uas raug muab tsim kom ncaj ncees thiab dawb huv tseeb tiag ib yam li Vajtswv. Vim li no, cia li muab txojkev dag tso tseg, txhua tus cia li hais lus tseeb rau kwvtij zej zog, rau qhov peb yeej koom tib lub cev. “Thaum nej chim tsis txhob ua txhaum,” tsis txhob cia hnub poob tseem chim, thiab tsis txhob pub sijhawm rau Ntxwg Nyoog. Tus uas txeev ua tub sab kuj tsis txhob ua dua li lawm, cia nws siv nws txhais tes ua tej haujlwm zoo mas zoo dua, kom thiaj li muaj faib rau cov uas cheem tsum. Tsis txhob cia tej lus phem tawm hauv nej lub qhov ncauj los, tsuas yog hais lo lus zoo uas tsim tsa lub neej raws li uas cheem tsum xwv thiaj li muaj nuj nqes rau cov uas tau hnov. Thiab tsis txhob ua rau Vajtswv tus Ntsuj Plig uas dawb huv tu siab, vim Vaj Ntsuj Plig yog lub hom thawj nias cia rau nej rau hnub uas txhiv nej dim. Cia li muab txhua yam kev cib nyeej, kev chim, kev npau taws, kev sib cav sib ceg, kev xyav luag moo thiab txhua yam kev phem tso tseg. Cia li muaj lub siab khuvleej, siab tab ncuab, siab zam txim ib leeg rau ib leeg ib yam li Vajtswv zam txim rau nej hauv Khetos. Vim li no nej cia li yoog li Vajtswv vim nej yog cov menyuam uas nws hlub. Cia li ua lub neej sib hlub ib yam li Khetos hlub peb thiab pub nws tus kheej this peb ua yam uas muab pub thiab muab xyeem tsw qab rau Vajtswv. Kev ua nkauj ua nraug, ua kev phem kev qias thiab qhov uas xav yuav luag tug, nej tsis txhob hais txog tej no rau hauv nej cov li, thiaj li tsim nyog yog Vajtswv cov xov dawb. Tsis txhob hais lus dev thiab hais lus ua dog ua dig thiab hais lus tsis muaj qabhau, yog tej uas tsis tsim nyog hais, cia li ua Vajtswv tsaug zoo dua. Cia li paub tseeb tias, txhua tus uas ua nkauj ua nraug, lossis ua kev phem kev qias lossis xav yuav luag tug uas zoo li pe dab mlom, yuav tsis muaj qub txeeg qub teg rau hauv Khetos thiab Vajtswv lub tebchaws li. Tsis txhob cia leejtwg hais tej lus tsis muaj qabhau dag ntxias nej, rau qhov twb yog vim tej uas hais tag no Vajtswv txojkev npau taws thiaj tshwm los raug cov uas tsis mloog lus. Vim li no tsis txhob koom nrog lawv kiag li, vim yav tag los nej yog txojkev tsaus ntuj tiamsis nimno nej yog qhov kaj hauv tus Tswv. Cia li ua lub neej uas yog qhov kaj li menyuam, (rau qhov txhua yam kev ua zoo thiab kev ncaj ncees thiab kev tseeb yog tshwm ntawm qhov kaj los,) thiab cia li tshawb nrhiav saib yam twg hum Vajtswv lub siab. Tsis txhob muaj feem ua txojkev tsaus ntuj tes haujlwm uas tsis muaj qabhau, tiamsis cia li nthuav tej haujlwm ntawd tshwm los zoo dua. Vim tias txawm yog yuav hais txog tej uas lawv ua nraim nkoos ntawd los kuj txaj muag. Tiamsis txhua yam uas raug qhov kaj muab nthuav tshwm los kuj pom tseeb lawm, rau qhov txhua yam uas nthuav tshwm los pom kuj yog qhov kaj. Vim li no thiaj muaj lus hais tias, “Cov uas tsaug zog, cia li tsim dheev, thiab cia li sawv tsees hauv qhov tuag los, mas Khetos yuav ci rau nej.” Vim li no nej ceev faj tib zoo ua nej lub neej, tsis txhob ua zoo li cov uas tsis muaj tswvyim, yuav tsum ua zoo li cov uas muaj tswvyim. Yuav tsum siv lub sijhawm kom muaj nuj nqes rau qhov tiam no phem kawg. Vim li no tsis txhob ua neeg ruam, yuav tsum nkag siab tias dabtsi yog Vajtswv lub siab nyiam. Tsis txhob haus cawv txiv hmab kom qaug, uas yuav ua rau nej puas. Tiamsis cia li puv npo Vaj Ntsuj Plig, muab Davi tej nkauj thiab tej nkauj qhuas thiab tej nkauj sab ntsuj plig los qhia ib leeg rau ib leeg. Cia li hu nkauj thiab xyiv fab hauv lub siab qhuas tus Tswv. Cia li tuav peb tus Tswv Yexus Khetos lub npe ua leej Txiv Vajtswv tsaug rau txhua yam tsis tu ncua. Nej ib leeg yuav tsum txo hwjchim rau ib leeg vim yog hwm Khetos. Cov pojniam, cia li nyob hauv nej tus txiv qab kev tswjhwm ib yam li nyob hauv qab tus Tswv Yexus. Rau qhov tus txiv yog tus pojniam lub taubhau, ib yam li Khetos yog pawg ntseeg lub taubhau, pawg ntseeg yog Khetos lub cev thiab Khetos yog pawg ntseeg tus Cawmseej. Pawg ntseeg nyob hauv Khetos qab kev tswjhwm li cas, cov pojniam yuav tsum nyob hauv tus txiv qab kev tswjhwm txhua yam li ntawd. Cov txiv, cia li hlub nej cov pojniam ib yam li Khetos hlub pawg ntseeg thiab muab nws tus kheej this pawg ntseeg kom thiaj cais tau pawg ntseeg dawb huv vim muab dej thiab nws txojlus ntxuav, Khetos thiaj tau pawg ntseeg uas muaj koob meej ci ntsa iab tsis ceb tsis txoom tsis dub tsis phem ib qho, tiamsis dawb huv tsis muaj chaw thuam li. Ib yam li ntawd, cov txiv yuav tsum hlub tus pojniam ib yam li nws hlub nws lub cev. Tus uas hlub nws tus pojniam kuj yog nws hlub nws tus kheej. Rau qhov tsis muaj leejtwg yuav ntxub nws lub cev tsuas muaj uas yug thiab tu kom zoo xwb ib yam li Khetos tu pawg ntseeg, rau qhov peb puavleej koom Yexus lub cev. “Vim li no tus txivneej thiaj ncaim ntawm nws niam nws txiv thiab nrog nws tus pojniam tsheej xeeb ua ke mas ob tug yuav koom ua ib lub cev.” Qhov no lub ntsiab muab npog cia tob tob. Kuv nkag siab tias yog hais txog Khetos thiab pawg ntseeg. Txawm li cas kuj xij nej cov nyias yuav tsum hlub nyias tus pojniam ib yam li nej hlub nej lub cev, thiab cov pojniam los yuav tsum hwm nws tus txiv. Cov menyuam, nej cia li mloog niam txiv lus rau hauv tus Tswv vim qhov no raug cai lawm. “Koj yuav tsum hwm koj niam koj txiv.” No yog thawj nqe kevcai uas muaj tej lus cog tseg hais tias, “koj thiaj li noj qab nyob zoo thiab muaj txojsia nyob ntev rau hauv lub ntiajteb.” Nej cov uas ua txiv, tsis txhob zes ua rau nej tej menyuam npau taws, tiamsis yuav tsum tu lawv rau hauv tus Tswv tej lus qhuab qhia thiab nws tej lus ntuas. Nej cov uas yog tub qhe, cia li muab siab rau mloog nej tus lospav hauv ntiajteb no lus ntshai ua tshee hnyo ib yam li mloog Khetos lus, tsis yog ua zoo rau thaum tus lospav pom xwb yam li cov uas ua rau neeg txaus siab, tiamsis ua ib yam li nej yog Khetos cov qhev, thiab ua tuaj nruab siab raws li Vajtswv lub siab nyiam. Nej cia li zoo siab ua nej tes haujlwm zoo yam li nej ua koom tu tus Tswv, tsis yog tu neeg, vim nej yeej paub tias leejtwg ua qhov zoo li cas cia lawm kuj yuav saws yam ntawd ntawm tus Tswv, tsis hais tus uas ua qhev lossis tus tsis ua qhev. Nej cov uas yog lospav, cia li ua ib yam li ntawd rau nej cov qhev. Tsis txhob hem lawv rau qhov nej yeej paub tias tus uas yog lawv tus Tswv thiab yog peb tus Tswv nyob saum ntuj ceeb tsheej, nws tsis saib leejtwg ntsej muag li. Thaum kawg no cia li muaj zog rau hauv tus Tswv thiab rau hauv nws lub hwjchim uas muaj zog. Cia li muab Vajtswv cev cuab yeej huvsi los hnav thiaj li tawm tsam yeej Ntxwg Nyoog tej tswvyim phem. Rau qhov peb tsis yog tawm tsam nqaij thiab ntshav, tiamsis tawm tsam tej timtswv thiab tej hwjchim thiab tej uas kav lub qab ntuj tiam tsaus ntuj no thiab tawm tsam tej dab phem saum nruab ntug huvsi. Vim li no cia li muab Vajtswv cev cuab yeej huvsi los, kom nej thiaj tiv yeej rau hnub uas phem, mas thaum ua txhua yam tag lawd nej tseem yuav nyob ruaj khov tau. Vim li no nej cia li nyob ruaj khov es muab txojkev tseeb los sia ntawm duav, thiab muab txojkev ncaj ncees los ua daim hlau hnav thaiv hauv siab, thiab muab qhov uas npaj txhij piav txoj xov zoo hais txog kev kaj siab lug, los ua khau rau. Tsis tag li ntawd cia li muab txojkev ntseeg ua daim hlau thaiv, uas nej siv tua tau tus uas Phem rab hmuv hluavtaws. Cia li muab txojkev dim ua lub mom hlau los ntoo, thiab tuav rawv Vaj Ntsuj Plig rab ntaj uas yog Vajtswv txojlus. Cia li thov Vajtswv rau hauv Vaj Ntsuj Plig txhua lub sijhawm, yuav tsum siv zog taij thov txhua yam. Vim li no cia li ceev faj zov tos thiab taij thov pab cov xov dawb txhua tus tsis tu ncua li, thiab thov pab kuv xwv thaum kuv qheb qhov ncauj hais lus Vajtswv thiaj li pub los rau kuv muaj siab tuab qhia txoj xov zoo uas Vajtswv muab npog cia tob tob lawd tshwm los. Vim txoj xov zoo no kuv raug saw hlau khi los kuv tseem ua Khetos tus tub sawv cev. Thiab cia li thov Vajtswv pab kom kuv muaj siab tuab hais raws li uas tsim nyog hais. Thikhika uas yog tus kwv uas kuv hlub thiab muaj siab xib ua koom tu tus Tswv, nws yuav hais txhua yam rau nej paub, nej thiaj paub tias kuv nyob li cas thiab ua dabtsi. Qhov uas kuv txib nws tuaj cuag nej, twb yog xav kom nej paub tias peb nyob li cas thiab xwv nws thiaj txhawb tau nej lub siab. Thov kom cov kwvtij tau txojkev siab tus thiab kev hlub thiab kev ntseeg ntawm leej Txiv Vajtswv thiab ntawm tus Tswv Yexus Khetos. Thov Vajtswv txojkev hlub nrog nraim txhua tus uas hlub peb tus Tswv Yexus Khetos, yog cov uas hlub nws tsis tu mus li. Povlauj thiab Timaute uas yog Yexus Khetos li tub qhe hais mus rau cov xov dawb huv Yexus Khetos txhua tus uas nyob hauv lub moos Filipi, thiab rau cov saib xyuas cov ntseeg thiab cov uas pab ua haujlwm. Thov txojkev hlub thiab txojkev siab tus ntawm Vajtswv uas yog peb leej Txiv thiab ntawm tus Tswv Yexus Khetos nrog nraim nej nyob. Kuv ua Vajtswv tsaug rau txhua zaus uas kuv nco txog nej. Txhua zaus uas thov Vajtswv pab nej sawvdaws kuv yeej zoo siab kawg li, vim nej nrog kuv koom tes hauv txoj xov zoo txij thawj hnub los txog nimno. Kuv ruaj siab li no tias, tus Tswv uas pib ua tes haujlwm zoo rau hauv nej lawd yuav ua kom tiav rau Yexus Khetos hnub. Qhov uas kuv xav li no kuj raug lawm vim nej nyob rawv hauv kuv lub siab thiab nej txhua tus nrog kuv koom Vajtswv txojkev hlub tsis hais thaum kuv raug kaw thiab thaum kuv hwj xwm txoj xov zoo thiab qhia kom pom tias txoj xov zoo muaj tseeb. Vim tias Vajtswv ua tau timkhawv tias kuv lub siab nco txog nej txhua tus ib yam li Yexus Khetos lub siab khuvleej. Kuv thov Vajtswv li no tias thov kom nej txojkev sib hlub loj zuj zus tuaj thiab muaj kev paub muaj kev nkag siab txhua yam, xwv nej thiaj xam pom tias yam twg tsim txiaj kawg nkaus, thiab nej thiaj ua tau neeg dawb huv tsis muaj chaw thuam rau Khetos hnub, thiab nej thiaj puv npo tej haujlwm uas los ntawm txojkev ncaj ncees uas tshwm hauv Yexus Khetos los, kom thiaj pub koob meej rau Vajtswv thiab qhuas nws. Cov kwvtij, kuv xav kom nej paub tias tej uas tshwm xwm rau kuv no twb rov ua rau txoj xov zoo yimhuab nthuav dav mus. Yog li ntawd cov tub rog uas zov Xixa tsev thiab lwm tus thiaj paub thoob plaws tias qhov uas kuv raug txoj saw hlau khi no twb yog vim kuv ua Khetos li haujlwm. Thiab vim txoj saw hlau khi no ua rau cov kwvtij feem coob ruaj siab rau hauv tus Tswv, thiab muaj lub siab tuab heev dua uas yuav piav Vajtswv txojlus tsis ntshai kiag li. Yeej muaj qee leej tshaj tawm txog Khetos vim yog lawv khib thiab nyiam sib cam, tiamsis kuj muaj qee leej tshaj tawm vim yog xav ua zoo. Ib co tshaj tawm ntawm txojkev hlub vim yog lawv paub tias kuv raug tsa cia kom hwj xwm txoj xov zoo no. Tiamsis ib co piav txog Khetos vim lawv sib txeeb tsis yog muaj lub siab dawb paug ua, tiamsis yog xav tsim txom kuv rau thaum kuv raug kaw. Tiamsis tsis ua li cas. Tsis hais yuav lam piav lossis muaj siab dawb paug piav, Khetos kuj raug muab tshaj tawm. Qhov no ua rau kuv zoo siab. Thiab kuv yeej yuav zoo siab ntxiv mus, vim kuv paub tias qhov uas nej thov thiab qhov uas Yexus Khetos tus Ntsuj Plig pab yuav ua rau kuv dim qhov uas raug kaw. Vim tias kuv lub siab xav thiab vam tias kuv yuav tsis raug txaj muag kiag li, tiamsis yuav muaj lub siab tuab kawg nkaus, xwv Khetos thiaj yuav tau koob meej ntawm kuv lub cev nimno ib yam li ib txwm tau, tsis hais kuv tseem ciaj lossis tuag. Rau qhov kuv muaj txojsia nyob los nyob rau Khetos, kuv tuag los kuj tau tshaj thawj. Yog kuv tseem yuav muaj txojsia nyob hauv lub cev no los kuv yuav ua haujlwm kom tawg paj txi txiv. Tiamsis kuv tsis paub yuav xaiv qhov twg. Kuv nyuaj siab rau ob qhov no. Kuv xav ncaim mus thiab nrog Khetos nyob, yog qhov uas zoo heev dua. Tiamsis qhov uas tseem nyob hauv lub cev no kuj yog qhov cheem tsum heev dua rau nej. Kuv ruaj siab txog qhov no, mas kuv paub tias kuv tseem yuav muaj txojsia nyob, thiab yuav nrog nej txhua tus nyob pab kom nej kheev hlob thiab muaj lub siab xyiv fab hauv txojkev ntseeg, kom nej thiaj li muaj lus khav txog kuv heev zuj zus rau hauv Yexus Khetos vim kuv yuav tuaj txog nej dua ib zaug thiab. Thov kom nej ua lub neej phim Yexus txoj xov zoo xwb. Txawm yog kuv yuav tuaj saib nej thiab tsis tuaj los kuv yuav tau hnov xov tias nej koom ua ib lub siab nyob ruaj, thiab thooj xeeb hum hauv ua haujlwm pab txojkev ntseeg uas los ntawm txoj xov zoo, thiab nej tsis ntshai cov uas tawm tsam nej kiag li. Tej no yog ua timkhawv uas qhia rau lawv paub tias lawv yuav puam tsuaj tiamsis qhia tias nej yuav tau txojkev dim uas los ntawm Vajtswv los. Rau qhov vim yog saib rau Khetos, thiaj muab pub rau nej kom nej tsis yog ntseeg nws xwb tiamsis tseem raug kev txom nyem vim yog saib rau nws, vim nej kuj muaj tib txojkev tawm tsam ib yam li nej txeev pom kuv muaj thiab hnov tias nimno kuv tseem tabtom muaj. Vim li no, yog nej muaj kev txhawb siab rau hauv Khetos, thiab muaj kev nplij siab ntawm txojkev sib hlub, thiab muaj kev sib raug zoo rau hauv Vaj Ntsuj Plig, thiab muaj qhov uas ib leeg mob siab rau ib leeg thiab ib leeg khuvleej ib leeg li cas lawm, kuj cia li ua rau kuv zoo siab xyiv fab kawg nkaus vim nej muaj lub siab xav ib yam nkaus, muaj lub siab hlub ib yam nkaus, thiab koom ua ib lub siab thiab koom xav ib yam nkaus. Tsis txhob ua siab hlob txeeb ua ib yam dabtsi rau yus lossis tsab ua loj tiamsis yuav tsum txo hwjchim xam pom lwm tus zoo dua yus. Nej tsis txhob nyias xam pom nyias tus kheej xwb yuav tsum xam pom lwm tus thiab. Nej cia li muaj lub siab yam li no rau hauv nej ib yam li muaj rau hauv Yexus Khetos. Nws yeej zoo ib yam li Vajtswv tiamsis nws tsis suav tias yuav txeeb qhov uas sib luag li Vajtswv rau nws, tiamsis nws yeem muab txhua yam tso tseg es saws lub neej zoo li tus qhev los yug zoo li ib tug neeg. Thaum nws tshwm los zoo nkaus ib tug neeg. nws txo nws tus kheej kom qes thiab mloog lus mus txog qhov uas tuag, yog tuag saum ntoo khaublig. Vim li no Vajtswv thiaj muab nws tsa siab kawg nkaus thiab pub lub npe uas siab dhau tej npe huvsi rau nws, vim lub npe Yexus ntawd txhua lub hauv caug saum ntuj thiab hauv ntiajteb thiab hauv qab ntiajteb yuav txhos caug ntua pe nws, thiab txhua tus nplaig yuav lees tias Yexus Khetos yog tus Tswv, thiaj ua rau Vajtswv uas yog leej Txiv tau koob meej ci ntsa iab. Yog li ntawd, cov kwvtij uas kuv hlub, ib yam li nej txeev mloog kuv lus tsis tu ncua, tsis yog mloog rau thaum kuv nrog nej nyob xwb tiamsis thaum kuv tsis nrog nej nyob kuj yimhuab yuav mloog, mas nimno nej yuav tsum ntshai tshee hnyo ua lub neej phim nej txojkev dim kom tiav. Rau qhov Vajtswv ua haujlwm rau hauv nej kom nej muaj lub siab xav thiab muaj peevxwm ua raws li nws lub siab nyiam. Cia li ua txhua yam tsis txhob sib yws sib cav, kom nej thiaj tsis muaj chaw thuam thiab tsis muaj qhov txhaum, ua Vajtswv cov menyuam uas tsis muaj ib qhov phem rau hauv nruab nrab tiam neeg phem thiab nkhaus no, thiab ci rau hauv lawv ib yam li tej hnub qub ci rau lub ntiajteb. Cia li tuav txojlus uas pub txojsia ruaj, xwv kuv thiaj khav tau rau Khetos hnub hais tias kuv tsis tau dhia do do xwb lossis siv zog ua haujlwm tsis muaj qabhau. Txawm yog kuv yuav raug muab hliv ib yam li tej cawv txiv hmab uas hliv xyeem rau saum tej uas nej muab xyeem thiab saum tej haujlwm uas nej ua vim nej ntseeg, kuv kuj zoo siab thiab nrog nej txhua tus zoo siab xyiv fab. Thiab tsim nyog nej yuav zoo siab thiab nrog kuv zoo siab xyiv fab. Kuv muaj siab vam rau hauv tus Tswv Yexus tias tsis ntev no kuv yuav txib Timaute tuaj cuag nej, xwv thaum kuv hnov nej xov lawd thiaj txhawb tau kuv lub siab. Kuv tsis muaj leejtwg thooj li nws uas mob siab nej tiag tiag. Vim tias lwm tus sawvdaws nrhiav tej uas muaj qabhau rau lawv xwb, tsis yog nrhiav tej uas muaj qabhau rau Yexus Khetos. Tiamsis nej twb paub Timaute tes haujlwm zoo tias nws nrog kuv koom ua haujlwm rau txoj xov zoo ib yam li ob txiv tub. Vim li no kuv vam tias thaum kuv paub tias yuav muaj xwm li cas tshwm rau kuv ces kuv yuav xa nws tuaj sai sai, thiab kuv ruaj siab rau hauv tus Tswv tias tsis ntev no kuv yuav tuaj thiab. Kuv pom tias cheem tsum xa Epafaudita tuaj cuag nej. Nws yog kuv kwvtij uas nrog kuv koom ua haujlwm thiab nrog kuv ua tub rog, thiab tseem yog tus tubtxib uas nej txib tuaj tu kuv thiab pab tej uas kuv tu ncua, vim nws nco txog nej sawvdaws thiab nws txhawj vim qhov uas nej hnov tias nws muaj mob. Nws mob tiag twb yuav tuag, tiamsis Vajtswv khuvleej nws, tsis yog nws tib leeg xwb tseem khuvleej kuv thiab, xwv kuv thiaj tsis raug kev txhawj xeeb tsav ntxiv rau tej kev txhawj. Vim li no kuv yimhuab xav xa nws tuaj kom nej thiaj zoo siab qhov uas rov pom nws thiab qhov uas kuv txhawj thiaj li tsawg zuj zus mus. Vim li no cia li zoo siab kawg txais nws hauv tus Tswv, thiab hwm cov neeg uas zoo li no, rau qhov nws twb yuav tuag vim yog Khetos tes haujlwm, nws sev txojsia zoo siab ua num rau kuv rau tej uas nej ua tsis tau. Thaum kawg no, kuv cov kwvtij, cia li zoo siab rau hauv tus Tswv. Qhov uas rov sau tej qub no dua ib zaug tuaj rau nej kuj tsis ceeblaj li cas rau kuv, thiab yog ua rau nej paub ceev faj. Cia li ceev faj cov dev, ceev faj cov uas ua phem, cov uas hlais nqaij hlais tawv. Vim tias peb thiaj yog tseem cov uas ua kevcai txiav, yog peb cov uas pe hawm Vajtswv ntawm Vaj Ntsuj Plig thiab khav txog Yexus Khetos, tsis vam khom rau nqaij tawv, txawm yog kuv muaj tej qhov uas vam khom rau nqaij tawv thiab kuj xij. Yog lwm tus xav tias lawv muaj qhov uas vam khom nqaij tawv kuv kuj yimhuab muaj ntau dua. Kuv twb ua kevcai txiav rau thaum kuv muaj yim hnub lawm, kuv yog haiv neeg Yixayee, yog xeem Npeeyamee, yog ib tug Henplais uas yug ntawm neeg Henplais los, hais txog txoj kevcai kuv yog ib tug Falixai, hais txog qhov uas kub siab lug kuv kuj tsim txom cov pawg ntseeg, hais txog qhov uas ua ncaj ncees raws li txoj kevcai kuv tsis muaj chaw thuam li. Tiamsis yam uas txeev ua tshaj thawj rau kuv, kuv suav tias yam ntawd yog poob peev lawm vim yog saib rau Khetos. Kuv suav tias txhua yam poob peev vim yog qhov uas paub Yexus Khetos uas yog kuv tus Tswv muaj nqes heev dhau. Vim muaj tus Tswv kuv thiaj poob peev txhua yam thiab suav tias tej ntawd zoo ib yam li tej tshwj xuam uas muab pov tseg xwv kuv thiaj tau Khetos ua tshaj thawj, thiab thiaj pom tias kuv nyob hauv tus Tswv. Kuv txojkev ncaj ncees tsis yog tau ntawm qhov uas xyaum raws li txoj kevcai tiamsis yog tau ntawm qhov uas ntseeg Khetos, yog txojkev ncaj ncees uas tau ntawm Vajtswv vim yog qhov uas ntseeg. Kuv xav paub tus Tswv thiab paub lub hwjchim uas nws ciaj sawv rov los, thiab koom nrog nws raug kev tsim txom thiab zoo ib yam li nws rau hauv nws txojkev tuag, thiab tseem vam tias yuav tau ciaj sawv hauv qhov tuag rov los. Tsis yog kuv twb tau lawm lossis kuv twb zoo kawg nkaus lawm, tiamsis kuv tabtom siv zog mus kom kuv thiaj txeeb tau ua kuv tug vim yog tim li no Yexus Khetos twb txeeb kuv cia lawm. Cov kwvtij, kuv tsis suav tias kuv twb txeeb tau lawm tiamsis kuv ua ib yam xwb yog kuv tsis nco tej uas dhau tag los lawd thiab huas mus rau yam uas nyob yav tom ntej, thiab siv zog mus kom txog tus ciam kom thiaj tau txais tshav ntuj uas yog qhov uas Vajtswv hu kuv mus rau saum ntuj hauv Yexus Khetos. Peb cov uas hlob tiav lawd yuav tsum xav li no, thiab yog nej xav dua lwm yam, Vajtswv yuav muab yam ntawd qhia rau nej paub tseeb. Txawm li cas los xij, peb cia coj raws nraim tej uas peb paub los lawd. Cov kwvtij, cia li koom ua ke yoog raws li kuv, nej cia li saib cov neeg uas ua lub neej raws li tus yam ntxwv uas peb tau ua rau nej pom lawd. Rau qhov muaj ntau leej ua lub neej ua yeeb ncuab rau Khetos tus khaublig ntoo, yog cov uas kuv twb txeev hais rau nej ntau zaus lawm thiab nimno kuv hais nrog lub kua muag. Thaum kawg lawv yuav raug puam tsuaj, lawv tus Vajtswv yog lawv lub plab, thiab lawv khav txog lawv tej kev txaj muag, lawv tsuas yog xav txog tej uas yog ntiajteb li xwb. Tiamsis peb yog neeg saum ntuj thiab peb tos rawv tus cawmseej uas los saum ntuj los, yog tus Tswv Yexus Khetos. Nws yuav muab peb lub cev uas tsis tsim txiaj hloov kom zoo ib yam li nws lub cev uas muaj hwjchim ci ntsa iab, yog nws siv nws lub hwjchim uas ua kom txhua yam nyob hauv nws qab kev tswjhwm. Vim li no, kuv cov kwvtij uas kuv hlub thiab nco heev, nej yog kuv lub chaw zoo siab thiab yog kuv lub mom kub. Cov uas kuv hlub 'e, cia li nyob ruaj khov rau hauv tus Tswv li uas hais no. Kuv thov ntuas Yu‑audia thiab kuv thov ntuas Xithikhe kom muaj lub siab sib hum rau hauv tus Tswv. Tus uas muaj siab nrog kuv koom ua haujlwm 'e, thov koj pab ob tug pojniam ntawd, vim ob tug nrog kuv thiab Khemee thiab lwm tus uas pab kuv ua haujlwm, siv zog ua haujlwm qhia txoj xov zoo. Lawv tej npe twb muaj nyob hauv phau ntawv uas sau cov uas muaj txojsia lawm. Cia li xyiv fab rau hauv tus Tswv txhua lub sijhawm. Kuv rov hais dua tias, cia li xyiv fab hlo. Cia li ua lub siab mos siab muag tshwm los rau sawvdaws. Tus Tswv nyob ze lawm. Tsis txhob txhawj rau ib yam dabtsi, tiamsis cia li taij thiab thov thiab ua Vajtswv tsaug qhia txhua yam uas koj cheem tsum rau nws paub. Mas Vajtswv txojkev siab tus uas ntau dhau li neeg nkag siab tau yuav tsom kwm nej lub siab thiab nej tej kev xav cia rau hauv Yexus Khetos. Thaum kawg no, cov kwvtij, yam uas tseeb, yam uas tsim nyog hwm, yam uas ncaj ncees, yam uas dawb huv, yam uas ntxim hlub, yam uas muaj koob meej, thiab yog muaj yam twg uas zoo kawg nkaus, thiab muaj yam twg uas tsim nyog qhuas, cia li xav txog tej no huvsi. Cia li ua raws li tej uas nej kawm paub thiab khaws tau thiab tau hnov thiab pom ntawm kuv. Mas Vajtswv uas pub txojkev siab tus yuav nrog nraim nej nyob. Kuv zoo siab xyiv fab kawg rau hauv tus Tswv vim thaum kawg no nej rov qab nco txog kuv dua. Nej yeej nco txog kuv tiamsis nej nrhiav sijhawm tsis tau xwb. Kuv tsis yog hais txog qhov uas kuv tu ncua, vim kuv yeej kawm paub tias yuav nyob li cas los kuv txaus siab nyob li ntawd. Kuv yeej paub qhov uas tu ncua thiab paub qhov uas muaj nplua mias. Tsis hais txojkev twg lossis txhua txojkev kuv twb kawm paub qhov uas tsau thiab tshaib, thiab qhov uas muaj nplua mias thiab tu ncua lawm. Kuv yeej ua tau txhua yam vim muaj Vajtswv uas txhawb kuv lub zog. Txawm li cas kuj xij, qhov uas nej xav pab kuv rau thaum kuv raug kev txom nyem, kuj yog nej ua zoo heev. Thiab nej cov Filipi yeej paub tias, thaum kuv tawm hauv lub xeev Makhedaunia rau thaum pib tshaj tawm txoj xov zoo, tsis muaj pawg ntseeg twg nrog kuv koom tes tsuas yog nej tib pawg xwb thiaj pub pab kuv. Txawm yog thaum kuv nyob hauv lub moos Thexalaunika, nej kuj xa tuaj pab kuv ib zaug tag ib zaug thiab. Tsis yog kuv nrhiav tej uas nej pub ntawd, tiamsis kuv nrhiav tshaj thawj uas tsav rau nej ntau zuj zus tuaj. Kuv tau txais txhua yam puv npo thiab tseem muaj seem. Kuv muaj txhua yam nplua mias, vim kuv tau txais tej uas nej muab rau Epafaudita xa tuaj. Tej ntawd yog tej uas muab xyeem tsw qab uas txaus Vajtswv lub siab thiab Vajtswv txais yuav. Kuv tus Vajtswv yuav pub txhua yam uas nej cheem tsum rau nej raws li nws lub hwjchim ci ntsa iab uas muaj nplua mias rau hauv Yexus Khetos. Thov kom Vajtswv uas yog peb leej Txiv tau koob meej mus ib txhis tsis kawg. Amee. Kuv thov hais lus nco txog cov xov dawb txhua tus hauv Yexus Khetos. Cov kwvtij uas nrog kuv nyob ua ke kuj xa lus nco txog nej. Vajtswv cov xov dawb sawvdaws xa lus nco txog nej, cov uas nco nej heev tshaj yog cov uas nyob hauv Xixa lub tsev. Thov tus Tswv Yexus Khetos txojkev hlub nyob hauv nej lub siab mus li. Povlauj uas yog Yexus Khetos li tub qhe raws li Vajtswv lub siab nyiam, thiab peb tus kwv Timaute hais mus rau cov xov dawb thiab cov kwvtij uas ntseeg Khetos hauv lub moos Khaulauxi. Thov txojkev hlub thiab txojkev siab tus ntawm Vajtswv uas yog peb leej Txiv nrog nraim nej nyob. Txhua zaus uas peb thov Vajtswv pab nej peb ua Vajtswv uas yog peb tus Tswv Yexus Khetos leej Txiv tsaug, vim peb twb hnov txog nej txojkev ntseeg hauv Yexus Khetos thiab hnov txog qhov uas nej hlub Vajtswv cov xov dawb txhua tus. Txojkev ntseeg thiab txojkev hlub ntawd los ntawm txojkev vam uas khaws cia saum ntuj ceeb tsheej rau nej, uas nej twb txeev hnov ntawm txojlus tseeb uas yog txoj xov zoo, uas twb tuaj txog nej lawm. Txoj xov zoo ntawd tabtom tawg paj txi txiv thiab huaj vam thoob ntiajteb, ib yam li huaj vam rau hauv nej txij hnub uas nej tau hnov thiab nkag siab Vajtswv txojkev hlub raws li qhov tseeb. Nej tau kawm ntawm Epafa uas nrog kuv koom ua haujlwm thiab kuv hlub nws, nws yog ib tug uas muaj siab xib ua Khetos tes haujlwm vim yog saib rau nej, thiab nws tau qhia rau peb paub txog nej txojkev hlub hauv Vaj Ntsuj Plig. Vim li no txij hnub uas peb hnov txog nej, peb kuj tsis tseg qhov uas thov Vajtswv pab nej. Peb thov kom nej yuav muaj txhua yam tswvyim thiab nkag siab sab ntsuj plig thiaj paub tag nrho Vajtswv lub siab nyiam li cas, xwv nej thiaj ua lub neej raws li uas tsim nyog ua rau tus Tswv, thiab txaus nws lub siab txhua yam, yog tawg paj txi txiv rau txhua yam haujlwm zoo thiab paub Vajtswv zuj zus. Kuv thov txhawb nej lub zog kom muaj zog heev raws li Vajtswv lub hwjchim ci ntsa iab, kom nej thiaj thev taus thiab ua siab ntev rau txhua yam thiab muaj siab xyiv fab thiab ua leej Txiv tsaug uas pub nej muaj feem nrog cov xov dawb tau qub txeeg qub teg hauv qhov kaj. Vajtswv cawm peb dim lub hwjchim tsaus ntuj thiab coj peb los nyob hauv nws tus tub uas nws hlub lub tebchaws. Hauv tus tub ntawd peb thiaj raug txhiv dim, yog qhov uas daws lub txim. Khetos yog Vajtswv uas peb qhov muag tsis pom tus yam ntxwv, yog thawj tug uas yug los hauv ib puas tsav yam uas tsim los. Vim tus Tub ntawd, thiaj li tsim ib puas tsav yam tshwm los yog tej uas nyob saum nruab ntug, tej uas nyob hauv ntiajteb, tej uas qhov muag pom thiab tej uas qhov muag tsis pom, tsis hais tej dab, tej timtswv, tej hwjchim thiab tej dab uas kav huvsi, txhua yam puavleej tsim ntawm nws thiab tsim rau nws. Nws nyob ua ntej dua txhua yam thiab txhua yam raug rub los txuas ua ke rau hauv nws. Nws yog lub taubhau rau lub cev uas yog pawg ntseeg. Nws yog lub hauv paus, nws yog tus tub hlob uas xub ciaj sawv hauv qhov tuag rov los, kom nws thiaj ua txhua yam tus thawj. Rau qhov Vajtswv txaus siab pub qhov uas yog Vajtswv tag nrho huvsi nyob rau hauv Khetos, thiab Vajtswv siv Khetos ua rau txhua yam rov los nrog Vajtswv sib raug zoo, tsis hais tej uas nyob hauv lub ntiajteb thiab nyob saum nruab ntug, vim yog Khetos cov ntshav ntawm tus khaublig ntoo ua kom muaj kev sib hum xeeb. Yav nram ntej nej raug txiav tu ntawm Vajtswv, thiab lub siab ua yeeb ncuab ua phem kawg, tiamsis nimno Vajtswv pub nej rov nrog nws sib raug zoo vim yog qhov uas Yexus lub cev tau tuag thiaj coj nej los cuag Vajtswv ua cov uas dawb huv thiab tsis muaj qhov qias thiab tsis muaj chaw thuam rau ntawm Vajtswv xubntiag, tsuav yog nej tsim tsa ruaj hauv txojkev ntseeg thiab nyob ruaj nreeg, tsis txhob khiav ntawm txojkev vam hauv txoj xov zoo uas nej tau hnov, uas twb tshaj tawm rau txhua tus neeg thoob qab ntuj lawm, thiab kuv Povlauj yog tus uas ua tes haujlwm tshaj txoj xov zoo no. Nimno kuv zoo siab qhov uas raug kev txom nyem vim yog saib rau nej, thiab raug kev txom nyem ntxiv rau tej kev tsim txom uas Khetos raug tsis tag, vim yog saib rau nws lub cev uas yog pawg ntseeg, kuv thiaj ris kom tiav rau hauv kuv lub cev. Kuv ua haujlwm rau pawg ntseeg ntawd raws li tes haujlwm uas Vajtswv muab cob rau kuv kom qhia Vajtswv txojlus tag nrho huvsi rau nej, yog tej uas muab npog cia ib txwm thaum ub los thiab ntau tiam neeg los lawm tiamsis nimno raug muab nthuav tshwm los rau nws cov xov dawb lawm. Vajtswv xav kom lawv paub tias yam uas muab npog cia tob tob no muaj hwjchim ci ntsa iab nplua mias li cas rau hauv lwm haiv neeg. Yam ntawd yog Khetos uas nyob hauv nej, yog qhov chaw vam tias yuav tau koob meej ci ntsa iab. Peb tshaj tawm tus Tswv no, thiab peb muab txhua yam tswvyim los ntuas thiab qhuab qhia txhua tus kom peb thiaj coj tau txhua tus mus cuag Vajtswv ua neeg uas hlob tiav rau hauv Khetos lawm. Kuv thiaj siv zog ua haujlwm khwv rau qhov ntawd raws li lub zog uas Vajtswv pub kuv muaj ntau kawg li. Kuv xav kom nej paub tias kuv siv zog ua haujlwm pab nej thiab pab cov uas nyob hauv lub moos Laudikia thiab pab txhua tus uas tsis tau pom dua kuv ntsej muag npaum li cas, xwv lawv thiaj li tau txais kev txhawb siab thiab koom ua ib lub siab rau hauv txojkev hlub uas yuav ua rau lawv nkag siab tag nrho txhua yam huvsi thiab paub txog yam uas Vajtswv muab npog cia tob tob lawd, yog Khetos. Lub txhab tswvyim thiab kev txawj ntse txhua yam muab zais rau hauv nws. Kuv hais li no xwv thiaj tsis muaj leejtwg hais lus mos lus muag dag ntxias nej. Txawm yog kuv lub cev tsis nrog nej nyob los kuv lub siab yeej nrog nej nyob, thiab kuv zoo siab xyiv fab qhov uas pom nej nyob muaj kab muaj ke thiab pom qhov uas nej ntseeg Khetos ruaj khov. Yog li ntawd, vim nej twb txais Yexus Khetos uas yog tus Tswv lawm, nej cia li ua lub neej rau hauv Khetos ib yam nkaus. Cia li ntsia cag thiab tsim tsa rau hauv nws, thiab nyob ruaj hauv txojkev ntseeg raws li uas nej tau kawm los lawd, thiab ua Vajtswv tsaug heev kawg nkaus. Cia li ceev faj tsis txhob cia leejtwg tej lus txawj ntse thiab tej lus dag do do ntes tau nej mus ua qhev. Tej lus ntawd yog raws li neeg tej qub kevcai thiab raws li tej hwjchim uas kav lub qab ntuj, tsis yog raws li Khetos. Vim tias qhov uas yog Vajtswv tag nrho huvsi nyob rau hauv Khetos lub cev, thiab nej tau txhua yam puv npo hauv Khetos, uas yog tej timtswv uas kav thiab tej hwjchim huvsi lub taubhau. Hauv Khetos, nej ua kevcai txiav uas tsis yog neeg txhais tes ua, yog nej rhuav tshem nej lub cev nqaij tawv ntawm qhov uas Khetos muab nej ua kevcai txiav. Thiab nej kuj raug muab log nrog nws ua ke hauv txoj kevcai raus dej, thiab Vajtswv tsa nej nrog nws sawv rov los vim qhov uas nej ntseeg Vajtswv lub hwjchim uas tsa Khetos sawv hauv qhov tuag rov los. Nej cov uas twb tuag lawm vim qhov uas nej ua txhaum thiab vim qhov uas tsis ua kevcai txiav ntawm nej lub cev nqaij, Vajtswv ua rau nej nrog Khetos muaj txojsia nyob. Nws daws peb tej kev txhaum huvsi, thiab txoj kevcai uas sau cia tawm tsam peb, nws muab rhuav tseg thiab muab rho ntawm peb mus teem rau saum khaublig ntoo lawm. Khetos rhuav tej timtswv thiab tej hwjchim uas kav thiab qhia lawv tshwm rau sawvdaws pom tab meeg thiab kov yeej lawv saum tus khaublig ntoo ntawd. Vim li no tsis txhob cia leejtwg txiav txim rau nej vim qhov kev noj kev haus thiab qhov uas ua tej kevcai thiab hwm lub hli xiab thiab hnub Xanpatau. Tej no tsuas yog tej uas yuav tshwm los tus duab xwb, tiamsis tus tseem yog Khetos. Tsis txhob cia leejtwg ua rau nej raug rau txim rau qhov uas xav kom nej ua txuj txo hwjchim thiab pe hawm tubtxib saum ntuj. Lawv ntshaw ua yog toog pom thiab khav theeb do do raws li tej uas lawv lub cev nqaij tawv xav. Lawv tsis tuav ruaj lub taubhau uas yug lub cev huvsi thiab ua kom tej leeg tej pob qej txha los txuas ua ke, lub cev thiaj loj hlob raws li Vajtswv pub. Yog nej nrog Khetos tuag thiaj hla dhau tej hwjchim uas kav lub qab ntuj, ua cas nej tseem zoo li cov uas nyob hauv qab ntuj thiab ua raws li tej kevcai uas hais tias, “tsis txhob kov, tsis txhob sim, tsis txhob nphav”? Tej no huvsi yuav puam tsuaj rau thaum uas muab siv, thiab tsuas yog neeg tej lus qhia thiab neeg tej kab ke xwb. Saib yam li tej kab ke no muaj tswvyim, yog qhov uas yus pe hawm raws li yus lub siab xav thiab qhov uas txo hwjchim thiab qhov uas tsim txom yus lub cev, tiamsis tsis muaj qabhau tawm tsam lub cev nqaij tawv txojkev ntshaw. Vim li no, yog nej twb raug tsa nrog Khetos sawv rov los lawm, cia li nrhiav tej uas nyob saum ntuj, yog lub chaw uas Khetos zaum ntawm Vajtswv sab tes xis. Cia li xib rau tej uas nyob saum ntuj, tsis txhob xib rau tej uas nyob hauv ntiajteb, vim nej twb tuag thiab nej txojsia twb muab zais nrog Khetos rau hauv Vajtswv lawm. Thaum Khetos uas yog nej txojsia tshwm los, lub sijhawm ntawd nej yuav nrog nws tshwm los muaj koob meej ci ntsa iab. Yog li ntawd, cia li muab nej lub neej uas nyiam kev ntiajteb tua pov tseg, tsis hais kev ua nkauj nraug, kev ua phem ua qias, kev ntshaw, xav tej uas phem thiab xav yuav luag tug uas zoo li pe dab mlom. Vim tej no Vajtswv txojkev npau taws yuav tshwm los. Yav nram ntej uas nej tseem nyob hauv tej kev phem no, nej yeej ua lub neej zoo li no. Tiamsis nimno nej cia li muab tej no tso tseg huvsi, yog kev chim kev npau kev xav phem, xyav luag moo, hais lus phem lus qias tawm ntawm nej lub qhov ncauj. Ib leeg tsis txhob dag ib leeg rau qhov nej twb muab tus neeg qub thiab tej kev qub hle tseg lawm, thiab nej twb muab tus neeg tshiab uas tabtom tsim dua tshiab raws li tus uas tsim tus yam ntxwv los hnav xwv thiaj paub Vajtswv. Qhov no tsis muaj cov Yudai thiab cov Kili, tsis muaj cov uas ua kevcai txiav thiab cov uas tsis ua, tsis muaj lwm haiv neeg thiab neeg Xithia, tsis muaj qhev thiab cov uas tsis ua qhev, tiamsis Khetos yog txhua yam thiab nyob hauv txhua yam. Vim li no, nej yog cov uas Vajtswv xaiv thiab yog cov uas dawb huv thiab nws hlub, nej cia li hnav lub siab tab ncuab, siab khuvleej, siab txo hwjchim, siab mos siab muag thiab thev taus, ib leeg ua siab ntev rau ib leeg thiab yog leejtwg muaj xaiv muaj lus ib leeg kuj zam ib leeg. Tus Tswv zam txim rau nej li cas nej yuav tsum zam txim ib yam li ntawd. Cia li hnav txojkev hlub tsav rau tej no huvsi, txojkev hlub khi tau txhua yam sib koom ua ke. Cia txojkev siab tus uas Khetos pub coj nej lub siab, rau qhov Vajtswv hu nej los koom ua ib lub cev rau txojkev siab tus no. Thiab cia li ua Vajtswv tsaug. Cia Khetos txojlus nyob puv npo rau hauv nej, cia li qhuab qhia thiab muaj txhua yam tswvyim ntuas, thiab hu Davi tej nkauj thiab tej nkauj qhuas thiab tej nkauj sab ntsuj plig ua Vajtswv tsaug hauv nej lub siab. Thaum nej ua ib yam dabtsi tsis hais tej lus hais lossis tej haujlwm uas nej ua, cia li ua txhua yam rau hauv tus Tswv Yexus lub npe thiab ua tsaug Vajtswv uas yog leej Txiv hauv Khetos lub npe. Cov pojniam, cia li nyob hauv nej tus txiv qab kev tswjhwm, yog yam uas tsim nyog rau hauv tus Tswv. Cov txiv, cia li hlub nej tus pojniam, tsis txhob ua nruj ua tsiv rau nws. Cov menyuam, cia li mloog nej niam nej txiv lus txhua yam, vim qhov no hum tus Tswv lub siab. Nej cov uas yog txiv, nej tsis txhob zes nej tej menyuam lawv thiaj tsis poob siab. Nej cov uas yog tub qhe, cia li mloog nej tej lospav hauv ntiajteb no lus txhua yam, tsis yog mloog rau thaum tus lospav pom xwb yam li cov uas ua rau neeg txaus siab, tiamsis ua txhua yam tuaj nruab siab thiab paub ntshai tus Tswv. Tsis hais nej yuav ua dabtsi, cia li rau siab ua ib yam li ua rau tus Tswv tsis yog ua rau neeg, vim nej yeej paub tias nej yuav tau saws qub txeeg qub teg ntawm tus Tswv ua nqe zog. Nej tabtom ua koom tu tus Tswv Khetos. Cov uas ua txhaum yuav tau saws raws li tej kev txhaum uas nws tau ua, yuav tsis saib leejtwg ntsej muag li. Nej cov uas yog lospav, cia li ua ncaj sib luag zos rau nej cov qhev, vim nej kuj paub tias nej muaj ib tug Tswv nyob saum ntuj. Cia li siv zog thov Vajtswv mus li, thiab thaum thov cia li zov tos thiab ua Vajtswv tsaug. Thiab thov Vajtswv pab peb kom nws qheb qhov rooj rau peb qhia txoj xov zoo, yog piav txog Khetos zaj uas Vajtswv muab npog cia tob tob lawd, vim qhov no kuv thiaj raug kaw. Thov pab kom kuv qhia tau zaj no meej raws li uas tsim nyog qhia. Cia li siv tswvyim xyaum rau cov uas nyob sab nraud thiab siv txhua lub sijhawm kom muaj qabhau Cia li hais nej tej lus muaj kev hlub thiab qab ntsev, xwv nej thiaj paub tias tsim nyog teb txhua tus li cas. Thikhika uas yog ib tug kwvtij uas kuv hlub thiab muaj siab xib ua haujlwm thiab nrog kuv koom ua tus Tswv tes haujlwm, nws yuav qhia rau nej paub txhua yam txog kuv Qhov uas kuv txib nws tuaj cuag nej twb yog kuv xav kom nej paub tias peb nyob li cas thiab xav kom nws txhawb tau nej lub siab, thiab Aunexima uas yog ib tug kwvtij uas kuv hlub thiab yog tus uas tso siab tau, yog ib tug hauv nej cov ntag, yuav nrog mus thiab. Ob tug yuav piav rau nej paub txog txhua yam xwm txheej ntawm no. Alithakha uas nrog kuv raug kaw xa lus nco txog nej, thiab Malakau uas yog Npananpa li kwvtij kuj nco txog nej thiab. Nej twb txais tej lus hais txog Malakau lawm, yog nws tuaj txog cia li tos txais nws. Thiab Yexus uas hu ua Yuxatha kuj xa lus nco txog nej. Cov uas koom nrog kuv ua haujlwm rau Vajtswv lub tebchaws, tsuas yog cov no thiaj ua kevcai txiav lawm xwb, thiab lawv txhawb kuv lub zog. Epafa uas yog ib tug hauv nej cov thiab ua Yexus Khetos ib tug qhev kuj xa lus nco txog nej. Nws siv zog thov Vajtswv pab nej tsis tu li kom nej nyob ruaj, hlob tiav thiab muaj siab ruaj rau txhua yam uas Vajtswv lub siab nyiam. Kuv ua timkhawv tau tias nws ua haujlwm hnyav pab nej thiab cov uas nyob hauv lub moos Laudikia thiab lub moos Hialapoli. Tus Kws tshuaj Luka uas kuv hlub thiab Dema xa lus nco txog nej. Thov nej xa tej lus nco txog mus rau cov kwvtij uas nyob hauv lub moos Laudikia thiab xa rau tus pojniam Nifa thiab pawg ntseeg hauv nws tsev. Thaum nej nyeem tsab ntawv no tag lawm, thov nej xa mus rau pawg ntseeg hauv Laudikia tau nyeem thiab. Thiab tsab ntawv uas tuaj hauv lub moos Laudikia tuaj nej kuj muab nyeem thiab. Thiab hais rau Akhipa tias, “Tes haujlwm uas koj lees ua hauv tus Tswv, cia li rau siab ua kom tiav.” Tej lus nco txog no yog kuv Povlauj txhais tes sau. Thov nej nco txog txoj saw hlau uas khi kuv. Thov Vajtswv txojkev hlub nrog nraim nej. Povlauj, Xivana thiab Timaute hais lus mus rau pawg ntseeg hauv lub moos Thexalaunika uas nyob hauv leej Txiv Vajtswv thiab hauv tus Tswv Yexus Khetos. Thov Vajtswv txojkev hlub thiab txojkev siab tus nrog nraim nej. Peb ua Vajtswv tsaug txog nej txhua tus txhua lub sijhawm thiab thaum thov Vajtswv peb kuj thov txog nej thiab. Peb nco tab meeg Vajtswv uas yog peb leej Txiv lub xubntiag txog nej txojkev ntseeg uas ua haujlwm tshwm los thiab nco txog nej txojkev hlub uas rau siab ua haujlwm hnyav thiab qhov uas nej muaj siab ntev thev vim muaj chaw vam hauv peb tus Tswv Yexus Khetos. Cov kwvtij uas Vajtswv hlub, peb yeej paub tias nws twb xaiv nej cia lawm, vim txoj xov zoo uas peb qhia tuaj txog nej, tsis yog tuaj lo lus qhuav xwb tiamsis muaj hwjchim thiab muaj Vaj Ntsuj Plig uas dawb huv thiab muaj kev ruaj siab puv npo. Nej kuj paub tias peb ua neeg zoo li cas rau hauv nej vim yog saib rau nej. Thiab nej kuj ua raws li kuv thiab ua raws li tus Tswv. Txawm yog nej raug kev txom nyem ceeblaj, los nej tseem muaj siab xyiv fab ntawm Vaj Ntsuj Plig mloog txoj xov zoo. Vim li no nej thiaj ua yam ntxwv zoo rau cov uas ntseeg sawvdaws hauv lub xeev Makhedaunia thiab lub xeev Akhaya. Vajtswv tej lus nrov nto moo ntawm nej mus tsis yog rau hauv lub xeev Makhedaunia thiab Akhaya xwb tiamsis nej txojkev ntseeg Vajtswv nrov nto moo mus txog txhua qhov, tsis tag peb yuav hais dabtsi li lawm. Vim tias cov neeg ntawd piav tias nej tau txais peb zoo npaum li cas diam thiab piav txog qhov uas nej tau tso tej dab mlom tseg tig los cuag Vajtswv thiab ua koom tu tus tseem Vajtswv uas muaj txojsia nyob, thiab tos rawv Vajtswv tus Tub uas yuav los saum ntuj los, yog tus uas Vajtswv tsa ciaj sawv hauv qhov tuag rov los, yog Yexus uas cawm peb dim Vajtswv tej kev npau taws uas yuav muaj los tom hauv ntej. Cov kwvtij, nej kuj paub tias qhov uas peb tuaj saib nej ntawd tsis nkim zog. Txawm yog peb twb raug kev txom nyem thiab poob ntsej muag hauv lub moos Filipi uas nej twb paub lawm, los peb tseem muaj lub siab tuab hauv peb tus Vajtswv rau qhov uas yuav qhia Vajtswv txoj xov zoo rau nej txawm yog muaj neeg tawm tsam peb ntau heev kuj xij. Tej lus uas peb qhia tsis yog los ntawm qhov uas xav yuam kev lossis ntawm tej uas tsis dawb huv lossis ib yam kev dag, tiamsis Vajtswv pom zoo thiaj muab txoj xov zoo cob rau peb, peb thiaj qhia tsis yog ua kom txaus neeg lub siab tiamsis ua kom txaus Vajtswv lub siab, yog tus uas tshuaj saib peb. Nej kuj paub tias peb tsis hais tej lus qab rog qab ntse, lossis hais kom tau tshaj thawj ntawm nej. Muaj Vajtswv ua timkhawv rau tej no thiab. Peb tsis tau nrhiav koob meej ntawm neeg tsis hais nej thiab ntawm lwm tus. Peb yog Khetos cov tubtxib yeej muaj feem ua lub nra rau nej ris. Tiamsis thaum peb nrog nej nyob peb ua siab mos siab muag ib yam li leej niam tu nws cov menyuam. Vim peb hlub nej li no lawm, peb yeej npaj txhij tsis yog pub txoj xov zoo rau nej xwb tiamsis pub peb tus kheej rau nej thiab, vim nej yog cov uas peb hlub heev. Cov kwvtij, nyaj nej kuj nco txog qhov uas peb ua haujlwm hnyav thiab khwv kawg li. Thaum peb tshaj tawm txoj xov zoo rau nej peb ua haujlwm nruab hnub hmo ntuj kom thiaj tsis ua lub nra hnyav rau nej leejtwg. Nej ua tau timkhawv rau peb thiab Vajtswv ua timkhawv tias peb tau xyaum ua lub neej dawb huv thiab ncaj ncees thiab tsis muaj chaw thuam rau hauv nej cov uas ntseeg. Nej twb paub lawm tias peb ua ib yam li leej txiv ua rau nws cov menyuam, yog qhuab ntuas nej txhua tus thiab txhawb nej lub zog thiab nkaw lus kom nej ua lub neej hum Vajtswv lub siab, yog tus uas hu nej los rau hauv nws lub tebchaws thiab hauv nws lub hwjchim ci ntsa iab. Peb kuj ua Vajtswv tsaug tsis tu vim thaum nej tau txais Vajtswv txojlus uas nej tau hnov ntawm peb, nej tsis tau txais yuav yam li yog neeg tej lus tiamsis txais yuav raws li qhov tseeb yog Vajtswv txojlus uas tabtom ua haujlwm rau hauv nej cov uas ntseeg. Cov kwvtij, nej kuj zoo ib yam li Vajtswv cov pawg ntseeg hauv Yexus Khetos uas nyob hauv lub xeev Yudia vim nej twb raug nej cov neeg tsim txom ib yam li lawv raug cov Yudai tsim txom. Cov Yudai tau tua tus Tswv Yexus thiab tua cov xibhwb cev Vajtswv lus thiab ntiab peb khiav mus. Lawv ua tsis hum Vajtswv lub siab thiab tawm tsam ib tsoom neeg sawvdaws, rau qhov uas lawv txwv tsis pub peb hais rau lwm haiv neeg kom tau txais kev dim, lawv thiaj tsav lub txim zuj zus. Tiamsis thaum kawg no Vajtswv txojkev npau taws poob rau saum lawv lawm. Cov kwvtij, thaum peb raug ncaim nej mus ib nyuag ntu lawm, peb tsuas ncaim lub cev xwb tsis ncaim lub siab, los peb lub siab kub lug heev xav rov pom nej ntsej muag. Peb xav tuaj cuag nej, thiab kuv Povlauj kuj xav tag xav thiab uas yuav tuaj, tiamsis Xatas pheej tav peb kev. Peb txojkev vam thiab peb txojkev xyiv fab thiab peb lub mom kub uas peb yuav khav txog rau ntawm peb tus Tswv Yexus Khetos lub xubntiag rau thaum nws rov los yog dabtsi? Tsis yog nej lov? Rau qhov nej yog peb lub koob meej thiab yog peb txojkev xyiv fab. Vim li no thaum peb thev tsis taus lawm, peb thiaj pom zoo cia peb nyob hauv lub nroog Athee xwb, thiab peb txib peb tus kwv Timaute uas koom ua Vajtswv tes haujlwm qhia txoj xov zoo hais txog Khetos, tuaj cuag nej kom thiaj ua rau nej nyob ruaj thiab txhawb nej lub zog hauv nej txojkev ntseeg, kom tej kev tsim txom no thiaj tsis ua rau leejtwg lub siab ywj fab ywj fwj. Nej yeej paub tias twb teem cia rau peb raug kev tsim txom. Thaum peb nrog nej nyob peb twb hais rau nej paub ua ntej tias peb yuav raug kev tsim txom mas kuj muaj li ntawd raws li nej paub. Vim li no, thaum kuv thev tsis taus lawm kuv thiaj txib neeg tuaj xwv thiaj paub txog nej txojkev ntseeg nyob li cas. Kuv ntshai tsam tus uas sim siab yuav sim nej qee yam ces tes haujlwm uas peb siv zog ua yuav tsis muaj qabhau. Nimno Timaute twb rov ntawm nej los txog peb lawm, thiab coj xov zoo hais txog nej txojkev ntseeg thiab nej txojkev sib hlub thiab qhia rau peb paub tias nej nco txog peb tsis tu ncua rau qhov zoo, thiab xav pom peb ib yam li peb xav pom nej. Vim li no, cov kwvtij, nej txojkev ntseeg txhawb peb lub zog rau thaum peb raug txhua yam kev ceeblaj thiab raug kev tsim txom, rau qhov yog nej nyob ruaj hauv tus Tswv, peb tau txojsia puv qas npo lawm. Peb yuav ua Vajtswv tsaug txog nej li cas rau qhov uas peb zoo siab xyiv fab tab meeg peb tus Vajtswv lub xubntiag vim yog nej? Peb siv zog thov Vajtswv heev nruab hnub hmo ntuj pab kom peb yuav rov pom nej ntsej muag thiab tau tsav nej txojkev ntseeg qhov uas tu ncua ntxiv rau nej. Thov Vajtswv uas yog peb leej Txiv thiab peb tus Tswv Yexus coj peb kev tuaj txog nej. Thiab thov tus Tswv ua rau nej kheev hlob hauv txojkev sib hlub thiab txojkev hlub txhua tus kom muaj nplua mias ib yam li peb hlub nej. Thiab thov kom nws ua rau nej lub siab nyob ruaj hauv txojkev dawb huv tsis muaj chaw thuam rau ntawm Vajtswv uas yog peb leej Txiv lub xubntiag rau thaum peb tus Tswv Yexus nrog nws cov xov dawb sawvdaws ua ke rov los. Cov kwvtij, thaum kawg no, peb twb qhia nej ua lub neej li cas thiaj hum Vajtswv lub siab thiab nej tabtom ua li ntawd lawm. Peb thiaj thov thiab ntuas nej hauv peb tus Tswv Yexus kom nej yimhuab ua lub neej li no zoo zuj zus mus. Nej twb paub tej uas peb qhia rau nej hauv tus Tswv Yexus lub npe lawm. Vajtswv lub siab nyiam yog qhov uas cais nej ua dawb huv, tseg tsis txhob ua nkauj nraug, cia txhua tus paub tswj nej lub cev kom dawb huv kom luag thiaj saib taus, tsis yog ua raws li lub siab ntshaw kev phem kev qias yam li lwm haiv neeg uas tsis paub Vajtswv. Nej tsis txhob ua txhaum thiab ua dhau cai rau kwvtij txog zaj no, rau qhov tus Tswv yog tus uas yuav rau txim rau tus uas ua txhaum li ntawd ib yam li kuv twb ntuas thiab qhia nej ua ntej lawm. Rau qhov Vajtswv tsis tau hu peb los ua neeg qias tiamsis hu peb los ua neeg dawb huv. Yog li no, tus uas tsis lees yuav tej no, tsis yog tsis lees yuav neeg tiamsis tsis lees yuav Vajtswv uas pub nws tus Ntsuj Plig dawb huv rau nej. Hais txog qhov uas kwvtij sib hlub, tsis tag yuav sau tuaj qhia rau nej vim Vajtswv twb qhia nej sib hlub lawm. Nej yeej hlub cov kwvtij sawvdaws uas nyob thoob plaws lub xeev Makhedaunia lawm. Tiamsis, cov kwvtij, thov ntuas kom nej yimhuab ua li no ntau zuj zus mus. Cia li npaj siab nyob tus yees, tsis txhob thab luag, cia li siv koj txhais tes ua koj tej haujlwm, raws li peb twb nkaw lus rau nej lawd, xwv luag thiaj li hwm nej, thiab nej tsis tab kaum leejtwg. Cov kwvtij, peb xav kom nej paub tseeb txog cov uas tsaug zog lawd, xwv nej thiaj tsis quaj ntsuag yam li lwm tus uas tsis muaj chaw vam. Vim peb ntseeg tias Yexus tuag thiab ciaj sawv rov los lawm, hauv tus Tswv Yexus no Vajtswv yuav coj cov uas tsaug zog lawd nrog Yexus los. Raws li tus Tswv txojlus, kuv qhia rau nej tias, peb cov uas tseem ciaj sia tshuav nyob txog thaum tus Tswv rov los, yuav tsis ua cov uas tsaug zog lawd ntej mus. Rau qhov tus Tswv yuav nqes saum ntuj los muaj lub suab hu nrov, yog tus thawj tubtxib saum ntuj lub suab hu, thiab muaj Vajtswv lub suab raj suab xyu nrov, mas cov uas tuag rau hauv Khetos lawm yuav xub ciaj sawv los ua ntej. Dhau ntawd peb cov uas tseem tshuav muaj txojsia nyob yuav raug muab qaws rau saum ntuj huab nrog cov ntawd ua ke thiab yuav ntsib tug Tswv saum nruab ntug, mas raws li no peb yuav tau nrog tus Tswv nyob mus ib txhis. Yog li no nej cia li muab tej lus no txhawb nej txhua tus lub siab. Cov kwvtij, hais txog lub caij lub nyoog ntawd, tsis tag yuav sau dabtsi qhia rau nej paub. Rau qhov nej yeej paub tias tus Tswv hnub ntawd yuav los yam li tub sab tuaj hmo ntuj. Thaum neeg hais tias, “Nyob tiaj nyob tus nyob tso siab plhuav,” thaum ntawd ntag kev puam tsuaj yuav los raug lawv tamsid, yam li tus pojniam mob plab yuav yug menyuam, thiab lawv yuav khiav tsis dim. Tiamsis, cov kwvtij, nej tsis nyob hauv qhov tsaus ntuj lawm, hnub ntawd thiaj tsis los txog nej yam li tub sab tuaj, vim nej yog qhov kaj li menyuam thiab yog nruab hnub li menyuam. Peb tsis yog hmo ntuj li lossis qhov tsaus ntuj li. Vim li no peb tsis txhob tsaug zog yam li lwm tus, tiamsis peb cia li ceev faj zov tos thiab feeb meej. Rau qhov cov uas tsaug zog yeej tsaug zog hmo ntuj, thiab cov uas qaug cawv yeej qaug hmo ntuj. Tiamsis vim peb yog cov nruab hnub, peb cia li feeb meej, thiab cia li muab txojkev ntseeg thiab txojkev sib hlub los hnav thaiv hauv siab, thiab muab txojkev vam tias yuav dim los ua lub mom hlau ntoo. Rau qhov Vajtswv tsis tau tu peb cia kom raug txojkev npau taws tiamsis tu kom tau txojkev dim ntawm peb tus Tswv Yexus Khetos, yog tus uas tuag this peb. Txawm yog peb yuav tsaug zog thiab tsis tsaug los peb yuav nrog nws muaj txojsia nyob. Yog li no, ib leeg cia li txhawb ib leeg lub zog thiab ib leeg pab ib leeg kom nyob ruaj yam li nej tseem ua ntawd. Cov kwvtij, peb thov kom nej hwm cov uas ua haujlwm hauv nej nruab nrab thiab cov uas kav nej thiab qhuab ntuas nej hauv tus Tswv. Cia li hwm lawv heev thiab hlub lawv vim tes haujlwm uas lawv ua. Cia li nyob sib hum xeeb. Cov kwvtij, thov nej ntuas cov uas tub nkeeg, txhawb cov uas siab yau lub zog, pab cov uas qaug zog, thiab ua siab ntev rau txhua tus. Tsis txhob cia leejtwg ua phem pauj phem, tiamsis ib leeg yuav tsum nrhiav kev ua zoo rau ib leeg thiab ua zoo rau txhua tus. Cia li zoo siab xyiv fab txhua lub sijhawm, cia li thov Vajtswv tsis tu ncua, thiab ua Vajtswv tsaug rau txhua yam, vim qhov no yog raws li Vajtswv lub siab nyiam rau nej cov uas nyob hauv Yexus Khetos. Tsis txhob txwv tav Vaj Ntsuj Plig, tsis txhob saib tsis taus tej lus uas tus xibhwb cev Vajtswv lus hais. Ua tib zoo tshuaj saib txhua yam. Yam uas zoo cia li tuav ruaj, txhua yam uas phem cia li tseg tsis txhob ua. Thov Vajtswv uas pub txojkev siab tus cais nej kom dawb huv kawg nkaus, thiab tsom kwm nej tus ntsuj plig nej lub siab thiab nej lub cev kom zoo kawg tsis muaj chaw thuam mus txog thaum peb tus Tswv Yexus Khetos rov los. Tus Tswv uas hu nej yeej tso siab tau, nws yuav ua kom tiav. Cov kwvtij, cia li thov Vajtswv pab peb thiab. Cia li fim cov kwvtij sawvdaws ntawm txoj kevcai nwj uas dawb huv. Kuv tuav tus Tswv lub npe nkaw lus rau nej kom nyeem tsab ntawv no rau txhua tus kwvtij mloog. Thov peb tus Tswv Yexus Khetos txojkev hlub nrog nraim nej. Povlauj, Xivana thiab Timaute hais lus mus rau pawg ntseeg hauv lub moos Thexalaunika hauv Vajtswv uas yog peb leej Txiv thiab hauv tus Tswv Yexus Khetos. Thov Vajtswv txojkev hlub thiab txojkev siab tus ntawm Vajtswv uas yog leej Txiv thiab ntawm tus Tswv Yexus Khetos nrog nraim nej. Cov kwvtij, peb yuav tsum ua Vajtswv tsaug tsis tu txog nej raws li uas tsim nyog vim nej txojkev ntseeg loj hlob thiab nej txhua tus txojkev sib hlub loj zuj zus. Yog li no peb thiaj khav rau Vajtswv cov pawg ntseeg txog qhov uas nej ua siab ntev thev thiab khav txog nej txojkev ntseeg rau thaum nej raug txhua yam kev tsim txom thiab raug ceeblaj txom nyem. Qhov no kuj ua rau pom meej tias Vajtswv txiav txim ncaj ncees thiab qhia tias nej tsim nyog nyob Vajtswv lub tebchaws uas nej tabtom raug txom nyem vim yog saib rau lub tebchaws ntawd. Vajtswv yeej ncaj ncees, nws yuav muab txojkev tsim txom pauj rau cov uas tsim txom nej, thiab pub nej cov uas raug kev tsim txom ntawd tau nrog peb so kaj siab, rau thaum tus Tswv Yexus nrog nws cov tubtxib uas muaj hwjchim tshwm saum ntuj nrog hluavtaws los. Nws yuav rau txim rau cov uas tsis paub Vajtswv thiab rau cov uas tsis mloog peb tus Tswv Yexus txoj xov zoo. Lawv yuav raug txim yog qhov uas lawv puam tsuaj mus ib txhis thiab raug ncaim ntawm tus Tswv lub xubntiag thiab ntawm nws lub zog uas muaj hwjchim ci ntsa iab, rau hnub uas nws los txais koob meej hauv nws cov xov dawb thiab ua lub chaw phimhwj rau hauv txhua tus uas ntseeg thiab hauv nej vim nej ntseeg peb tej lus timkhawv. Vim li no peb thiaj thov Vajtswv tsis tu pab nej kom Vajtswv ua rau nej tsim nyog qhov uas nws hu nej ntawd thiab thov kom nws siv nws lub hwjchim ua txhua yam uas nej npaj siab cia thiab tej haujlwm uas los ntawm nej txojkev ntseeg kom tiav, kom peb tus Tswv Yexus lub npe thiaj tau koob meej hauv nej thiab nej tau koob meej hauv nws, raws li peb tus Vajtswv thiab tus Tswv Yexus Khetos txojkev hlub. Cov kwvtij, hais txog qhov uas peb tus Tswv Yexus Khetos yuav rov los thiab qhov uas nws qaws peb mus nrog nws nyob ntawd, peb thov kom nej tsis txhob ua siab ywj fab ywj fwj sai lossis poob siab tsis hais ntawm ntsuj plig lossis tej lus hais lossis tej tsab ntawv uas dag hais tias yog peb sau tuaj, hais tias tus Tswv hnub twb los txog lawm. Tsis txhob cia leejtwg dag tau nej rau txojkev twg, vim tias hnub ntawd yuav tsis los txog ua ntej uas tsis tau muaj kev fav xeeb thiab tus neeg phem uas tsis yuav cai tsis tau tshwm los, nws yog tus uas raug tshwj tseg rau kev puam tsuaj. Nws tawm tsam thiab tsab ua loj dua txhua yam uas hu ua timtswv thiab txhua yam uas neeg pe hawm, nws thiaj zaum rau hauv Vajtswv lub tuam tsev thiab tshaj tawm tias nws yog Vajtswv. Nej nco tsis tau lawm lov? Thaum kuv nrog nej nyob kuv twb qhia zaj no rau nej lawm. Thiab nimno nej kuj paub tias muaj dabtsi tswj nws cia kom nws thiaj tshwm los tau rau lub sijhawm uas teem rau nws. Txojkev phem uas muab npog cia ntawd tabtom ua haujlwm, tiamsis tus uas nimno tswj nrees txojkev phem ntawd tsuas tswj mus txog thaum nws raug muab ntiab tawm mus xwb. Thaum ntawd tus phem uas tsis yuav cai yuav tshwm los, mas tus Tswv Yexus yuav tshuab pa ntawm nws qhov ncauj tua tus ntawd thiab qhov uas Yexus ci ntsa iab nqes los yuav ua kom tus ntawd puam tsuaj tag. Tus phem uas tsis yuav cai ntawd yuav tuaj raws li Xatas tshoov nws lub siab thiab yuav muaj txhua yam hwjchim thiab ua tau cuav txujci tseem ceeb thiab txujci phimhwj dag ntxias, thiab muaj txhua yam tswvyim phem dag cov uas yuav puam tsuaj vim lawv tsis nyiam txojkev tseeb uas cawm tau lawv dim. Vim li no Vajtswv thiaj tso txojkev dag ntxias los raug lawv ua rau lawv ntseeg txoj uas cuav, mas txhua tus uas tsis ntseeg txojkev tseeb tiamsis nyiam txojkev phem thiaj raug teem txim. Cov kwvtij uas tus Tswv hlub, tsim nyog peb ua Vajtswv tsaug txog nej tsis tu, rau qhov Vajtswv twb xaiv nej thaum chiv keeb los kom thiaj dim vim yog Vaj Ntsuj Plig cais nej kom dawb huv thiab vim nej ntseeg txojkev tseeb. Vajtswv siv txoj xov zoo uas peb qhia hu nej los kom tau tej no, kom nej thiaj tau koom peb tus Tswv Yexus Khetos lub hwjchim ci ntsa iab. Vim li no, cov kwvtij, nej cia li nyob ruaj thiab tuav rawv tej lus qhia uas peb cob rau nej, tsis hais tej lus uas xuas ncauj hais thiab tej tsab ntawv. Nimno thov kom peb tus Tswv Yexus Khetos thiab Vajtswv uas yog peb leej Txiv uas hlub peb thiab txhawb peb lub siab mus ib txhis thiab pub peb muaj lub chaw vam uas zoo ntawm nws txojkev hlub, txhawb nej lub siab thiab pab kom nej nyob ruaj rau txhua yam haujlwm zoo uas nej ua thiab tej lus uas nej hais. Cov kwvtij, thaum kawg no, cia li thov Vajtswv pab peb kom tus Tswv txojlus yuav nthuav mus sai sai thiab tau koob meej ib yam li twb tau hauv nej lawd, thiab thov kom peb tau dim hauv tej neeg limhiam thiab phem, rau qhov tsis yog sawvdaws ntseeg. Tus Tswv yog tus uas tso siab tau. Nws yuav pab kom nej nyob ruaj thiab tsom kwm nej tsis pub tus uas phem ua phem rau nej. Peb kuj tso siab rau hauv tus Tswv tias nej tabtom ua thiab nej yuav ua tej uas peb hais rau nej ntxiv mus. Thov tus Tswv coj nej lub siab kom mus txog Vajtswv txojkev hlub thiab txog Khetos txojkev ua siab ntev thev taus. Cov kwvtij, peb tuav peb tus Tswv Yexus Khetos lub npe nkaw lus rau nej kom nej txav deb ntawm txhua tus kwvtij uas tub nkeeg thiab tsis xyaum raws li tej lus qhia uas peb muab cob rau nej. Vim nej kuj paub tias nej yuav tsum yoog raws li peb. Thaum peb nrog nej nyob peb tsis tub nkeeg, thiab peb tsis tau noj leejtwg li zaub mov tsis them nqe, peb siv zog ua haujlwm hnyav nruab hnub hmo ntuj thiaj tsis ua nra rau nej cov leejtwg. Tsis yog peb tsis muaj cai, tiamsis yog peb ua lub neej ua yam ntxwv rau nej xyaum. Txawm yog thaum peb tseem nrog nej nyob, peb yeej nkaw lus li no tias yog leejtwg tsis yeem ua haujlwm, tsis txhob kheev nws noj. Vim peb hnov tias nej cov muaj qee leej tub nkeeg tsis ua haujlwm dabtsi li tiamsis mus tab kaum lwm tus. Nimno peb tuav tus Tswv Yexus Khetos lub npe nkaw lus thiab ntuas cov neeg zoo li ntawd kom lawv cia li nyob tus yees ua lawv tej haujlwm thiab nrhiav rau lawv noj. Cov kwvtij, nej tsis txhob nkees ua qhov zoo. Yog leejtwg tsis mloog tej lus uas kuv hais hauv tsab ntawv no, cia li cim tus ntawd cia, tsis txhob nrog nws ua ke xwv nws thiaj li txaj muag. Tsis txhob suav tias nws yog yeeb ncuab tiamsis cia li ntuas nws yam li yog kwvtij. Thov kom tus Tswv uas muaj siab tus yees pub lub siab tus yees rau nej txhua lub sijhawm thiab rau hauv txhua yam. Thov tus Tswv nrog nraim nej. Tej lus sib fim no yog kuv Povlauj txhais tes sau, kuv ntaus cim li no rau txhua tsab ntawv. Kuv yeej sau li no. Thov peb tus Tswv Yexus Khetos txojkev hlub nrog nraim nej txhua tus. Povlauj, uas yog Yexus Khetos tus tubtxib raws li Vajtswv uas yog peb tus Cawmseej thiab Yexus Khetos uas yog peb lub chaw vam, hais mus rau Timaute uas yog kuv tus tseem tub hauv txojkev ntseeg. Thov txojkev hlub, txojkev khuvleej thiab txojkev siab tus ntawm leej Txiv Vajtswv thiab ntawm Yexus Khetos uas yog peb tus Tswv nrog nraim koj. Kuv thov koj nyob hauv lub moos Efexau, ib yam li kuv twb hais rau koj rau thaum kuv mus rau lub xeev Makhedaunia, kom thiaj li txwv qee leej kom tsis txhob qhia tej uas txawv peb qhia, thiab tsis txhob kub siab rau tej dab neeg thiab tej zaj uas hais txog poj koob yawm txwv tsis paub tag. Tej no ua rau muaj kev sib cam ntau dua li qhov uas ua Vajtswv tes haujlwm hauv txojkev ntseeg. Tiamsis qhov uas kuv nkaw lus li no yog xav kom lawv muaj kev sib hlub uas los ntawm lub siab dawb paug thiab lub siab uas paub qhov zoo thiab ntawm txojkev ntseeg tuaj nruab siab los. Qee leej tso tej uas hais no tseg tig mus hais tej zaj uas tsis muaj qabhau. Lawv xav ua xibhwb qhia txoj kevcai los lawv twb tsis nkag siab tej uas lawv hais lossis tej uas lawv ruaj siab qhia. Peb paub tias txoj kevcai ntawd zoo, tsuav yog siv raug cai. Peb paub tias txoj kevcai tsis yog rhawv rau cov uas ncaj ncees tiamsis rhawv rau cov uas tsis coj raws li kevcai thiab tawv ncauj, cov uas tsis yuav Vajtswv thiab cov uas muaj txim, cov uas tsis hwm Vajtswv thiab tuam mom Vajtswv, cov uas tua niam tua txiv, cov uas tua neeg, cov uas ua nkauj ua nraug, cov txivneej deev txivneej, cov uas ua tub sab nyiag neeg, cov uas txawj dag, cov uas ua cuav timkhawv thiab dua lwm yam uas tawm tsam tej lus tseeb uas raws li nyob hauv txoj xov zoo tsim txiaj uas hais txog Vajtswv uas tsim nyog qhuas, yog txoj xov zoo uas muab cob rau kuv lawm. Kuv ua tsaug Yexus Khetos uas yog peb tus Tswv, nws yog tus uas pub zog rau kuv, vim nws suav tias tso siab tau rau kuv thiaj tsa kuv ua nws tes haujlwm. Txawm yog yav tag los kuv yog neeg tuam mom thiab tsim txom thiab ua limhiam los kuv tseem tau txais kev khuvleej vim thaum ntawd kuv tsis paub, kuv tsis ntseeg, kuv thiaj ua li ntawd. Tiamsis peb tus Tswv txoj koob hmoov muaj nplua mias rau kuv nrog txojkev ntseeg thiab txojkev sib hlub uas muaj hauv Yexus Khetos ua ke. Tej lus no tso siab tau thiab tsim nyog lees yuav kawg, yog qhov uas Yexus Khetos los rau hauv lub ntiajteb cawm cov neeg muaj txim kom dim. Hauv cov neeg muaj txim ntawd kuv yog tus thawj. Tiamsis vim li no kuv thiaj tau txais kev khuvleej kom Yexus Khetos thiaj ua txojkev siab ntev thev tshwm rau kuv uas yog tus thawj ua txhaum thiaj ua yam ntxwv rau cov uas yuav ntseeg nws thiab txais txojsia ib txhis tsis kawg. Tus vajntxwv uas kav mus ib txhis thiab tsis txawj tuag thiab tsis muaj leejtwg pom, nws yog tib tug Vajtswv. Thov kom nws muaj koob meej thiab hwjchim ci ntsa iab mus ib txhis tsis kawg. Amee. Kuv tus tub Timaute, tej lus nkaw no kuv muab cob rau koj, raws li tus xibhwb cev lus hais pom tom hauv ntej hais txog koj. Tej lus ntawd yuav pab kom koj txawj ua rog zoo, thiab tuav rawv txojkev ntseeg thiab lub siab uas paub qhov zoo ruaj. Tej no qee leej muab tso tseg lawm ua rau lawv txojkev ntseeg qaug. Hauv cov neeg ntawd muaj Himene‑a thiab Alexadaw, uas kuv twb muab cob rau Xatas lawm kom ob tug thiaj kawm paub qhov uas tsis txhob tuam mom Vajtswv. Vim li no ua ntej dua lwm yam huvsi, kuv thov kom nej siv zog thov thiab taij thov thiab thov pab lwm tus thiab ua Vajtswv tsaug txog ib tsoom neeg, yog thov pab tej vajntxwv thiab txhua tus nom tswv kom peb thiaj tau ua neej nyob siab tus yees thiab kaj siab lug muaj siab xib rau Vajtswv thiab paub cai. Qhov uas ua li no yog qhov zoo thiab hum Vajtswv uas yog peb tus Cawmseej lub siab. Nws xav kom ib tsoom neeg sawvdaws tau txais kev dim thiab paub txojkev tseeb. Rau qhov muaj tib tug Vajtswv thiab muaj tib tug nyob nruab nrab Vajtswv thiab neeg, yog Yexus Khetos uas yog neeg, uas pub nws tus kheej txhiv txhua tus, thiaj yog ua timkhawv raws li lub sijhawm uas teem cia. Vim zaj no kuv thiaj raug tsa ua tus tshaj txoj xov zoo thiab ua tubtxib thiab ua xibhwb qhia lwm haiv neeg txog txojkev ntseeg thiab txojkev tseeb. Kuv hais tseeb tsis dag li. Vim li no kuv thiaj xav kom cov txivneej tsa txhais tes dawb huv thov Vajtswv rau txhua qhov, tsis txhob muaj kev sib chim sib cav. Cov pojniam yuav tsum ua tib zoo hnav tsoos kom phim thiab tsim nyog, tsis txhob ntxias plaubhau lossis coj kub coj qe qwj muaj nqes lossis hnav tej tsoos tsho kim kim, tiamsis tu lub cev rau qhov uas ua haujlwm zoo kom tsim nyog ib tug pojniam uas hais tias nws hwm Vajtswv. Cov pojniam yuav tsum txo hwjchim nyob twjywm kawm. Kuv tsis kheev cov pojniam qhuab qhia lossis tswjhwm cov txiv. Cia nws nyob twjywm. Rau qhov Vajtswv tsim Adas ua ntej mam li tsim Eva, thiab tsis yog Adas raug dag ntxias, tiamsis tus pojniam raug dag ntxias thiab poob rau hauv kev txhaum. Txawm li ntawd los pojniam yuav tau kev dim hauv qhov uas yug menyuam tsuav yog lawv nyob hauv kev ntseeg thiab kev hlub thiab kev dawb huv thiab paub cai. Tej lus no tso siab tau. Yog leejtwg xav ua tes haujlwm uas saib xyuas pawg ntseeg, kuj yog tus ntawd xav ua tes haujlwm zoo. Tus uas saib xyuas pawg ntseeg yuav tsum yog tus uas tsis muaj chaw thuam thiab muaj ib tug pojniam xwb, thiab paub xyuam xim, txawj tswj nws tus kheej, paub cai, zoo siab txais qhua, txawj qhuab qhia, tsis qaug dej qaug cawv, tsis ua nruj ua tsiv tiamsis muaj lub siab zam xeeb, tsis sib cav sib ceg, thiab tsis ntshaw nyiaj txiag. Nws yuav tsum kav tau nws tsev neeg, thiab tswj nws cov menyuam kom mloog lus thiab hwm lwm tus. Yog tus txivneej twg tsis txawj kav nws tsev neeg, nws yuav saib xyuas tau Vajtswv pawg ntseeg li cas? Tsis txhob cia tus uas nyuam qhuav ntseeg tshiab ua tus saib xyuas pawg ntseeg tsam ces nws khav theeb thiab raug txim ib yam li Ntxwg Nyoog. Thiab nws kuj yuav tsum yog tus uas tej neeg sab nraud hwm, xwv nws thiaj tsis raug thuam thiab tsis mag Ntxwg Nyoog lub voj hlua. Cov uas pab ua haujlwm kuj ib yam nkaus yuav tsum yog cov uas luag hwm, tsis txhob ua ncauj lus zoo siab phem, tsis txhob quav dej quav cawv, tsis txhob ua lub siab hlob xav yuav ntau. Lawv yuav tsum muaj lub siab dawb paug tuav txojkev ntseeg uas Vajtswv muab npog cia tob tob kom ruaj. Yuav tsum xub tshuaj saib lawv tso, yog pom tias lawv tsis muaj chaw thuam, mam li cia lawv ua cov uas pab ua haujlwm. Cov pojniam kuj ib yam nkaus thiab, yuav tsum yog cov uas luag hwm, tsis xyav lwm tus moo, paub xyuam xim thiab ua ncaj rau txhua yam. Cov uas pab ua haujlwm yuav tsum muaj ib tug pojniam xwb, thiab yuav tsum kav tau lawv cov menyuam thiab tsev neeg zoo. Cov uas pab yog ua tau haujlwm zoo kuj tau koob meej thiab yuav ruaj siab kawg rau hauv txojkev ntseeg Yexus Khetos. Kuv vam tias kuv yuav tuaj cuag koj sai sai no, tiamsis qhov uas sau tej no tuaj rau koj kuj yog tias yog kuv tuaj qeeb koj thiaj paub tias tsim nyog yuav xyaum li cas rau hauv Vajtswv tsev neeg, uas yog Vajtswv tus muaj txojsia nyob pawg ntseeg, yog tej ncej txawb thiab tej taw tiag txojkev tseeb. Peb lees tias txojkev ntseeg uas muab npog cia tob tob lawd tseem ceeb heev. Nws tshwm los ua neeg nqaij tawv. Vaj Ntsuj Plig qhia kom paub tseeb tias nws ncaj ncees, thiab cov tubtxib saum ntuj pom ntsoov nws. Nws raug muab tshaj tawm rau ib tsoom neeg, thiab neeg hauv ntiajteb ntseeg nws. Nws raug muab qaws nrog hwjchim ci ntsa iab nce mus. Vaj Ntsuj Plig qhia meej tias yav tom ntej yuav muaj qee leej tso kev ntseeg tseg tig mus ntseeg tej ntsuj plig uas dag ntxias thiab tej lus uas dab qhia. Tej no los ntawm cov neeg ncauj lus zoo siab phem uas txawj dag, lawv lub siab uas paub qhov zoo qhov phem raug hluavtaws kub tuag lawm. Lawv txwv tsis kheev sib yuav ua txij nkawm, thiab txwv tsis pub noj qee yam uas Vajtswv tsim cia rau cov uas ntseeg thiab paub txojkev tseeb, ua Vajtswv tsaug li noj tau. Vim txhua yam uas Vajtswv tsim cia puavleej zoo, tsis muaj ib yam dabtsi yuav txwv, tsuav yog ua Vajtswv tsaug li noj xwb, vim Vajtswv txojlus thiab tej lus thov twb ntxuav tej ntawd kom dawb huv lawm. Yog koj qhia tej no rau cov kwvtij kuj yog koj ua Yexus Khetos tus tub qhe uas ua haujlwm zoo vim txojkev ntseeg tej lus thiab tej lus qhia zoo uas koj xyaum raws li lawm yug koj kom kheev hlob. Tsis txhob quav ntsej tej dab neeg uas rhuav tshem Vajtswv thiab tej kwv huam. Tiamsis koj yuav tsum ua lub neej xyaum kom tau lub siab uas hwm Vajtswv. Qhov uas muab lub cev xyaum twb muaj qabhau mentsis lawm, tiamsis lub siab uas hwm Vajtswv muaj qabhau rau txhua txojkev, vim muaj lo lus cog tseg rau txojsia tiam no thiab tiam tom ntej. Tej lus no tso siab tau thiab tsim nyog lees yuav kawg. Qhov uas peb ua haujlwm khwv thiab siv zog ua haujlwm kuj yog vim peb vam khom Vajtswv tus muaj txojsia nyob uas yog ib tsoom neeg tus Cawmseej, thiab qhov tseem ceeb nws yog cov ntseeg li Cawmseej. Cia li nkaw lus thiab qhia tej no. Tsis txhob cia leejtwg saib tsis taus qhov uas koj tseem hluas, tiamsis cia li ua yam ntxwv zoo rau cov ntseeg tsis hais kev hais lus kev ua haujlwm, kev sib hlub, thiab kev ntseeg kev dawb huv huvsi. Cia li kub siab nyeem Vajtswv txojlus rau sawvdaws mloog, thiab txhawb lawv lub zog thiab qhuab qhia mus txog thaum kuv tuaj txog. Tsis txhob hnov qab lub tswvyim uas muab pub rau koj raws li uas cev Vajtswv lus rau thaum cov saib xyuas pawg ntseeg tsa tes npuab koj. Cia li ua tej haujlwm no thiab siv zog ua kom txhua tus thiaj pom tias koj kheev hlob zuj zus. Cia li ua tib zoo saib koj tus kheej thiab tej uas koj qhia. Cia li xyaum raws li tej no tsis tu li, rau qhov yog koj ua li no koj yuav cawm tau koj tus kheej thiab cov uas mloog koj qhia kom dim. Tsis txhob cem tus yawg laus twg, tiamsis ntuas nws zoo ib yam yog koj txiv. Cia li saib cov hluas ib yam li yog koj kwvtij, thiab saib cov pojniam laus ib yam li yog koj niam, thiab saib cov pojniam uas tseem hluas ib yam li yog koj tus muam ntawm lub siab dawb huv. Cia li saib taus cov poj ntsuam uas tsis muaj chaw vam khom leejtwg. Yog tus poj ntsuam twg muaj tub ki xeeb ntxwv, kuj cia cov menyuam ntawd kawm paub ua raws li Vajtswv hais rau lawv tsev neeg ua ntej thiab ua pauj lawv niam lawv txiv tej txiaj ntsig, vim qhov uas ua li no hum Vajtswv lub siab. Tus poj ntsuam uas tsis muaj chaw vam uas nyob ib leeg xwb nws yeej vam ntsoov thiab taij thov thiab thov Vajtswv pab nruab hnub hmo ntuj tsis tu li. Tiamsis tus poj ntsuam uas tsis tsheej haj txawm yog nws tseem ciaj los kuj tiv li tuag lawm. Cia li qhia tej no rau lawv xwv lawv thiaj tsis raug thuam. Yog leejtwg tsis yug nws cov kwvtij thiab qhov loj tsis yug nws tsev neeg, tus ntawd twb tso kev ntseeg tseg lawm, nws tseem phem dua tus uas tsis tau ntseeg thiab. Cia li nce npe cov poj ntsuam uas hnub nyoog tsis qes dhau rau caum xyoo thiab yuav tib zaug txiv tej npe rau hauv phau ntawv xwb. Tus pojniam ntawd yuav tsum yog tus uas muaj koob meej rau qhov uas ua haujlwm zoo xws li muaj siab tu menyuam, nyiam txais qhua, ntxuav cov xov dawb kotaw, pab cov neeg txom nyem thiab siv zog ua txhua yam haujlwm zoo. Tiamsis tsis txhob nce cov poj ntsuam hluas hluas npe rau hauv ntawv, vim tias thaum lawv txojkev ntshaw ua rau lawv tso Khetos tseg lawv kuj xav yuav txiv dua, ces lawv thiaj muaj txim vim yog tsis ua raws li uas cog lus cia ua ntej lawd. Dua li ntawd lawv tseem xyaum ua neeg tub nkeeg, nyiam mus cuav zej cuav zos, thiab tsis yog tub nkeeg xwb tseem taug xaiv thiab tab kaum lwm tus thiab hais tej lus uas tsis tsim nyog hais. Vim li no kuv thiaj xav kom cov poj ntsuam hluas hluas rov yuav txiv, muaj menyuam, saib vaj saib tsev xwv yeeb ncuab thiaj tsis tau kev thuam. Rau qhov muaj qee leej yuam kev raws dab Xatas mus lawm. Yog cov pojniam uas ntseeg leejtwg muaj txheeb ze ua poj ntsuam, kuj cia nws pab yug lawv cov ntawd. Tsis txhob cia ua nra rau pawg ntseeg xwv pawg ntseeg thiaj pab tau cov poj ntsuam uas tsis muaj chaw vam tiag tiag. Cia li suav tias cov saib xyuas pawg ntseeg uas kav zoo tsim nyog tau tshav ntuj ob npaug, yimhuab tsim nyog muab rau cov uas siv zog piav Vajtswv txojlus thiab qhuab qhia, rau qhov Vajtswv txojlus sau cia hais tias, “Thaum nyuj tabtom tsuj qeb tsuj mog, tsis txhob muab tawb looj nyuj qhov ncauj,” thiab “Tus tub zog tsim nyog tau nws li nqe zog.” Tsis txhob ntseeg tej lus uas iab hiam tus saib xyuas cov ntseeg twg, yuav yog muaj ob leeg lossis peb leeg ua timkhawv thiaj ntseeg xwb. Cov uas tseem ua txhaum, koj cia li ntuas lawv tab meeg sawvdaws, kom lwm tus thiaj paub ntshai. Kuv nkaw lus rau koj tab meeg Vajtswv thiab tab meeg Yexus Khetos thiab tab meeg cov tubtxib saum ntuj uas xaiv cia lawd kom koj tuav rawv tej lus no cia tsis txhob saib leejtwg ntsej muag thiab tsis txhob tuaj leejtwg tog. Tsis txhob maj muab tes npuab tsa leejtwg, thiab tsis txhob koom nrog lwm tus ua txhaum. Cia li tsom kwm koj tus kheej kom dawb huv mus li. Tsis txhob haus dej xwb, tiamsis koj yuav tsum haus mentsis cawv txiv hmab thiaj pab tau koj lub plab thiab pab qhov uas koj pheej muaj mob. Qee leej tej kev txhaum mas tshwm los meej tamsid mas coj ncaj nraim mus raug txiav txim uas nyob tom hauv ntej. Tiamsis lwm tus tej kev txhaum tshwm los meej rau yav tom qab. Qhov uas ua zoo kuj yuav tshwm los meej ib yam nkaus thiab, txawm yog qee yam tsis tau tshwm los thaum ntawd los yuav muab npog cia mus li tsis tau. Cia txhua tus uas nyob hauv tus qab quab uas ua qhev suav tias lawv tus lospav yog tus uas tsim nyog hwm kawg, kom Vajtswv lub npe thiab tej lus qhia thiaj tsis raug saib tsis taus. Cov qhev uas tus lospav yog ib tug ntseeg, kuj tsis txhob saib tsis taus tus lospav rau qhov ob tog puavleej yog kwvtij lawm. Tiamsis lawv yuav tsum yimhuab ua haujlwm zoo rau tus lospav vim tias tus lospav uas tau txiaj ntsig ntawm cov tub qhe ntawd yog tus uas ntseeg thiab ntxim hlub. Cia li qhuab qhia thiab ntuas zaj no. Yog leejtwg qhia txawv tej no thiab tsis pom zoo raws li tej lus raug cai uas peb tus Tswv Yexus Khetos qhia thiab tej lus qhia uas hum Vajtswv txojkev, kuj yog nws khav theeb thiab tsis paub dabtsi li. Nws nyiam sib cav sib ceg dhau cai thiab sib cam rau tej nyuag lo lus uas ua rau muaj kev sib khib, sib faib, xyav luag moo, pheej xav tias luag phem, thiab ua rau cov neeg uas xav phem thiab tsis muaj txoj tseeb kiag li sib cam. Lawv xav tias qhov uas hwm Vajtswv yog ncauj kev nrhiav tshaj thawj. Qhov uas hwm Vajtswv thiab tau kev siab tus kuj yog tau tshaj thawj ntau kawg, vim peb tsis tau coj ib yam dabtsi los rau hauv lub ntiajteb, thiab peb yuav coj tsis tau ib yam dabtsi tawm hauv lub ntiajteb mus li thiab. Tiamsis yog peb muaj noj muaj hnav peb yuav txaus siab rau tej ntawd. Cov uas xav nplua nuj kuj poob rau hauv txojkev dag ntxias thiab mag rooj hlua thiab poob rau hauv txojkev ntshaw ntau yam uas ruam thiab ua kom raug ceeblaj, uas yuav coj mus txog kev liamsim thiab kev puam tsuaj. Vim tias qhov uas nyiam nyiaj txiag yog txhua yam kev phem tus cag. Qhov uas ntshaw nyiaj txiag no ua rau qee leej yuam kev ntawm txojkev ntseeg thiab lawv lub siab raug ntau yam kev txom nyem chob. Koj uas yog Vajtswv li neeg, cia li khiav kom dhau tej no. Cia li nrhiav txojkev ncaj ncees, kev hwm Vajtswv, kev ntseeg, kev hlub, kev ua siab ntev thev, thiab kev zam xeeb. Cia li tawm tsam kawg nkaus rau hauv txojkev ntseeg lub tshav rog. Cia li tuav rawv txojsia ib txhis uas Vajtswv hu koj los txais rau thaum koj yeem lees tib zoo tab meeg ntau leej timkhawv. Kuv nkaw lus rau koj tab meeg Vajtswv uas pub txojsia rau txhua yam thiab tab meeg Yexus Khetos uas ua timkhawv lees tib zoo rau ntawm Phauthi‑au Philaj lub xubntiag, kom koj tuav rawv tej lus nkaw no huvsi tsis txhob ua ib qho phem thiab tsis muaj chaw thuam li mus txog thaum peb tus Tswv Yexus Khetos rov los. Vajtswv yuav ua kom tshwm los rau lub sijhawm uas teem cia, yog Vajtswv uas tsim nyog qhuas, thiab yog tib tug uas muaj hwjchim loj kawg nkaus, yog ib tsoom vajntxwv tus Vajntxwv thiab yog cov uas muaj hwjchim tus Tswv, yog tib tug uas tsis txawj tuag, thiab nyob hauv qhov kaj tsis muaj leejtwg mus tau ze thiab tsis muaj leejtwg txeev pom thiab pom tsis tau. Thov kom nws tau koob meej thiab hwjchim tswjhwm mus ib txhis. Amee. Hais txog cov uas nplua nuj tiam no, koj cia li nkaw lus rau lawv kom tsis txhob khav theeb thiab tsis txhob vam tej nyiaj txiag uas tsis ruaj khov tiamsis vam Vajtswv uas pub txhua yam nplua mias rau peb kom peb thiaj muaj siab xyiv fab. Cia li nkaw lus kom lawv ua zoo, thiab ua tes haujlwm zoo ntau kawg, thiab ua lub siab dav zoo siab faib rau luag. Qhov uas ua li ntawd yog khaws qhov txhia chaw cia ua lub chaw tiag ruaj khov rau tom hauv ntej, kom lawv thiaj tuav tau txojsia, yog txojsia uas tseeb. Timaute 'e, cia li tuav rawv tej uas twb muab cob rau koj lawm. Cia li zam tej lus tsis muaj qabhau uas saib tsis taus Vajtswv thiab tej lus sib cam uas luag xav yuam kev tias yog kev txawj ntse. Muaj qee leej lees yuav tej kev txawj ntse ntawd thiaj yuam kev ntawm txojkev ntseeg. Thov Vajtswv txojkev hlub nrog nraim nej. Povlauj, uas yog Yexus Khetos tus tubtxib raws li Vajtswv lub siab nyiam rau tej lus cog tseg uas muaj txojsia hauv Yexus Khetos, hais mus rau kuv tus tub Timaute uas kuv hlub. Thov txojkev hlub, txojkev khuvleej thiab txojkev siab tus ntawm leej Txiv Vajtswv thiab ntawm Yexus Khetos uas yog peb tus Tswv nrog nraim koj. Kuv ua Vajtswv tsaug tus uas kuv muaj lub siab dawb paug ua koom tu ib yam li kuv tej poj koob yawm txwv ua, rau thaum kuv nco txog koj hauv kuv tej lus thov nruab hnub hmo ntuj. Thaum kuv nco txog koj tej kua muag, kuv xav pom koj thiaj ua rau kuv zoo siab kawg. Kuv nco txog koj txojkev ntseeg tuaj nruab siab, yog txojkev ntseeg uas koj tais Lau‑i xub muaj thiab koj niam Yuni muaj, mas nimno kuv ntseeg tias kuj muaj nyob hauv koj thiab. Vim li no kuv thiaj xav hais dua ib zaug rau koj tias yam uas Vajtswv pub rau koj rau thaum kuv muab tes npuab, koj cia li ua kom cig hlob tuaj, vim Vajtswv tsis pub lub siab ntshai rau peb tiamsis pub lub siab muaj hwjchim thiab kev hlub thiab kev tswj yus tus kheej rau peb. Vim li no koj tsis txhob txaj muag ua timkhawv txog peb tus Tswv thiab tsis txhob txaj muag txog kuv uas raug kaw vim yog ua nws tes haujlwm, tiamsis cia li koom nrog kuv vam khom Vajtswv lub hwjchim thev kev txom nyem rau txoj xov zoo. Vajtswv yog tus cawm peb dim thiab hu peb ntawm txojkev dawb huv, tsis yog raws li tej haujlwm uas peb ua tiamsis raws li Vajtswv xav tseg lawm, thiab raws li nws txojkev hlub uas nws pub rau peb hauv Yexus Khetos ua ntej chiv keeb thaum ub los thiab nimno ua tshwm kom pom tseeb ntawm qhov uas peb tus Cawmseej Yexus Khetos tshwm los, yog tus uas rhuav tshem txojkev tuag kom ploj tag thiab ua kom txojsia thiab qhov uas tsis txawj tuag tshwm los ntawm txoj xov zoo. Txoj xov zoo ntawd mas kuv raug tsa ua tus tshaj tawm thiab ua tus tubtxib thiab ua tus qhuab qhia, kuv thiaj raug kev txom nyem li no. Tiamsis kuv tsis txaj muag vim tias kuv paub tus uas kuv ntseeg thiab ntseeg ruaj tias nws muaj peevxwm tsom kwm yam uas kuv muab cob rau nws mus txog hnub uas teem cia. Cia li xyaum raws li tej lus qhia raug cai uas koj tau hnov ntawm kuv thiab nyob hauv txojkev ntseeg thiab txojkev hlub uas muaj hauv Yexus Khetos. Cia Vaj Ntsuj Plig dawb huv uas nyob hauv peb pab koj tuav rawv yam tsim txiaj uas muab cob rau koj lawd. Koj kuj paub tias txhua tus uas nyob hauv lub xeev Axia kuj ncaim kuv mus tag lawm, hauv lawv cov ntawd kuj muaj Fikela thiab Hawmaukene. Thov tus Tswv khuvleej Aunexifaula tsev neeg rau qhov nws pheej txhawb kuv lub zog. Nws tsis txaj muag rau kuv txoj saw hlau li, vim thaum nws tuaj txog lub nroog Loos nws siv zog nrhiav kuv kom ntsib li. Thov tus Tswv pub kom nws tau txais tus Tswv txojkev khuvleej rau hnub kawg. Nws tu kuv hauv lub moos Efexau npaum li cas nej kuj paub lawm. Vim li no, kuv tus tub, cia li muaj zog hauv txojkev hlub uas muaj hauv Yexus Khetos, thiab cia li muab tej lus uas koj tau hnov kuv qhia tab meeg ntau tus timkhawv cob rau cov neeg ncaj ncees uas muaj peevxwm qhia tau lwm tus qhia mus. Cia li koom nrog peb raug txom nyem yam li Yexus Khetos tus tub rog uas zoo. Tsis muaj ib tug uas ua tub rog yuav ntsig txog tej pejxeem li haujlwm vim nws yeej xav ua kom hum tus thawj rog lub siab. Thiab tus uas sib tw dhia yog nws tsis dhia raws li kevcai nws yeej yuav tsis tau tshav ntuj. Tus uas siv zog ua teb tsim nyog yog thawj tug uas tau qoob loo. Cia li tshuaj saib tej uas kuv hais vim tus Tswv yuav pub koj nkag siab txhua yam. Cia li nco txog Yexus Khetos. Nws raug tsa ciaj sawv hauv qhov tuag rov los, thiab nws yog Davi caj ces, raws li txoj xov zoo uas kuv qhia. Vim txoj xov zoo no kuv thiaj raug txom nyem thiab raug saw hlau khi yam li tus neeg phem. Tiamsis muab saw hlau khi Vajtswv txojlus tsis tau. Vim li no kuv thiaj tiv thev txhua yam vim yog saib rau cov uas xaiv cia lawd, kom lawv thiaj tau txais txojkev dim hauv Yexus Khetos thiab tau koob meej ci ntsa iab mus ib txhis. Tej lus no tso siab tau, hais tias, Yog peb nrog nws tuag lawm, peb kuj yuav nrog nws muaj txojsia. Yog peb tiv thev, peb kuj yuav tau nrog nws kav, yog peb tsis lees yuav nws, nws yeej yuav tsis lees yuav peb thiab. Yog peb tsis muaj siab xib rau nws, nws tseem ua ncaj rau peb, rau qhov nws yuav tso qhov uas nws yog Vajtswv tseg tsis tau li. Cia li qhia lawv nco txog tej no thiab nkaw lus rau lawv tab meeg tus Tswv kom lawv tsis txhob sib cam txog tej nyuag lo lus. Qhov ntawd tsis muaj qabhau thiab ua rau cov uas mloog puam tsuaj. Cia li siv zog ua kom Vajtswv pom tias koj yog ib tug uas hum nws siab, yog ib tug tub zog uas tsis txaj muag thiab qhia Vajtswv txojlus tseeb raug cai. Cia li zam tej lus tsis muaj qabhau uas saib tsis taus Vajtswv vim tej lus ntawd yuav ua rau neeg tso Vajtswv tseg zuj zus, thiab lawv tej lus yuav huam dav zuj zus yam li lub kiav txhab qawj. Hauv lawv cov ntawd muaj Himene‑a thiab Filetha uas twb yuam kev ntawm txojkev tseeb lawm vim ob tug qhia hais tias qhov uas ciaj sawv hauv qhov tuag rov los twb dhau tag lawm. Ob tug rhuav qee leej txojkev ntseeg lawm. Tiamsis tej taw uas Vajtswv tiag ruaj khov tseem nyob thiab nias hom thawj hais li no tias, “Tus Tswv paub cov uas yog nws li neeg,” thiab “Cia txhua tus uas tuav tus Tswv lub npe tso kev txhaum tseg.” Ib lub tsev loj tsis yog muaj tej tais nyiaj tais kub xwb tseem muaj tais ntoo tais av thiab, qee yam yog siv rau qhov zoo qee yam yog siv rau qhov tsis zoo. Yog leejtwg ntxuav tej kev phem ntawm nws tus kheej lawm nws yuav yog tej twj taig uas siv rau qhov zoo, uas twb ntxuav kom dawb huv lawm thiab tus tswv tsev siv muaj qabhau, thiab npaj txhij rau txhua yam haujlwm zoo. Vim li no cia li khiav ntawm tej kev phem uas cov hluas ntshaw thiab nrog cov uas muaj lub siab dawb paug tuav tus Tswv lub npe, cia li nrhiav txojkev ncaj ncees, kev ntseeg, kev hlub thiab kev sib hum xeeb. Tsis txhob mus thab txog tej kev sib cam uas ruam thiab tsis muaj qabhau. Koj yeej paub tias tej ntawd ua kom muaj kev sib cav sib ceg xwb. Tus Tswv tus tub qhe yuav tsum yog tus uas tsis nyiam sib cav sib ceg, muaj lub siab hlob txhua tus, mob siab qhuab qhia thiab ua lub siab ntev thev, ua siab mos siab muag qhia cov uas tawm tsam nws. Tej zaum Vajtswv yuav pub lawv ntxeev dua siab los paub txojkev tseeb, thiab dim Ntxwg Nyoog lub voj hlua, yog tus uas cuab ntes lawv kom ua raws li nws lub siab nyiam. Koj yuav tsum nkag siab qhov no, tiam kawg yuav yog lub sijhawm txom nyem nyuaj siab kawg. Rau qhov neeg yuav xam pom lawv tus kheej xwb, ntshaw nyiaj txiag, khav theeb, muab hlob, saib tsis taus luag, tsis mloog niam txiv lus, tsis nco luag txiaj ntsig, tsis yuav Vajtswv, tsis hlub luag, tsis zam txim, xyav luag moo, tsis tswj lub siab, ua neeg nyaum, ntxub qhov zoo, fav xeeb rau luag, ua siab heev, tsab ua loj, nyiam kev lomzem heev dua li nyiam Vajtswv. Lawv ua txuj tuav Vajtswv txojkev ntawm lub ncauj xwb, tiamsis tsis lees yuav txojkev ntawd lub hwjchim. Cia li txav deb ntawm cov neeg ntawd. Lawv cov ntawd qee leej pheej nkag mus rau hauv luag tej tsev thiab haub cov pojniam uas lub siab ywj fab ywj fwj uas ris lub txim hnyav thiab qaug rau tej kev ntshaw phem. Cov pojniam no pheej kawm lawm tiamsis tsis nkag siab qhov tseeb. Yane thiab Yanpe tawm tsam Mauxe li cas, cov neeg no kuj tawm tsam qhov tseeb ib yam li ntawd. Lawv lub siab phem thiab tsis muaj kev ntseeg qhov tseeb. Lawv yuav mus tau tsis deb rau qhov lawv txojkev ruam yuav tshwm rau sawvdaws pom ib yam li ob tug txivneej ntawd txojkev ruam. Koj twb paub kuv tej lus qhia, kuv lub neej, tej uas kuv xav tseg, kuv txojkev ntseeg, qhov uas kuv ua siab ntev, qhov uas kuv hlub luag, qhov uas kuv tiv thev, qhov uas kuv raug tsim txom thiab raug txom nyem, thiab tej uas tshwm los raug kuv hauv lub moos Athi‑au, hauv lub moos Ikhauniyu thiab hauv lub moos Lixatha, thiab qhov uas kuv thev kev tsim txom npaum li cas. Tiamsis tus Tswv cawm kuv dim txhua yam ntawd. Qhov tseeb txhua tus uas xav ua lub neej uas hwm Vajtswv hauv Yexus Khetos yuav raug tsim txom, mas cov neeg phem thiab cov neeg txawj dag yuav phem heev zuj zus, thiab yuav dag ntxias luag thiab raug luag dag ntxias. Tiamsis koj cia li ua raws li koj tau kawm paub thiab ntseeg ruaj lawm, vim koj kuj paub tias koj kawm ntawm leejtwg los. Txij thaum yau los koj twb paub Vajtswv txojlus tseem ceeb, uas pub tau koj muaj tswvyim paub txojkev dim vim ntseeg Yexus Khetos. Vajtswv txojlus txhua nqe yog tawm hauv Vajtswv lub qhov ncauj los thiab siv tau qhuab qhia, qhuab ntuas, qhia tus uas txhaum rov ua zoo, thiab cob qhia ua ncaj ua ncees, kom Vajtswv cov neeg thiaj li npaj txhij zog ua tau txhua yam haujlwm zoo. Kuv nkaw lus rau koj tab meeg Vajtswv thiab Yexus Khetos uas yuav txiav txim rau cov neeg ciaj thiab cov neeg tuag, thiab kuv ntuas koj vim qhov uas nws yuav rov los thiab nws lub tebchaws yuav los, cia li tshaj tawm Vajtswv txojlus, thiab kub siab qhia rau thaum muaj sijhawm thiab tsis muaj, cia li yaum kom los ntseeg, qhuab ntuas thiab txhawb lub siab, ua siab ntev thiab ua tib zoo qhuab qhia. Rau qhov yuav txog lub sijhawm uas neeg thev tsis taus mloog tej lus qhia uas tseeb lawm, lawv yuav sau zog cov xibhwb kom qhia raws li lawv lub siab nyiam thiab raws li lawv lub qhov ntsej xav mloog, lawv yuav tseg tsis mloog txoj tseeb thiab tig mus mloog tej dab neeg. Koj cia li tswj koj lub siab txhua yam, cia li thev tej kev txom nyem, ua tes haujlwm uas qhia txoj xov zoo thiab ua koj tes haujlwm kom tiav huvsi. Rau qhov kuv twb yuav raug muab hliv xyeem thiab txog sijhawm uas kuv yuav ncaim mus. Kuv twb tawm tsam zoo heev lawm, kuv twb dhia txog tom kawg lawm, kuv twb tuav txojkev ntseeg cia lawm. Txij no mus twb muab lub mom kub uas yog txojkev ncaj ncees khaws cia rau kuv. Tus Tswv uas tu plaub ncaj ncees yuav muab pub rau kuv rau hnub ntawd, thiab tsis yog pub rau kuv tib leeg xwb tiamsis yuav pub rau txhua tus uas tos ntsoov qhov uas tus Tswv rov los. Koj cia li siv zog tuaj cuag kuv sai sai. Rau qhov Dema mus nyiam kev ntiajteb thiab tso kuv tseg mus rau lub moos Thexalaunika lawm. Khexakhe mus rau lub xeev Kalatia thiab Titau mus rau lub xeev Damatia. Luka tib leeg nrog kuv nyob xwb. Cia li mus coj Malakau nrog koj tuaj thiab, rau qhov nws muaj qabhau rau kuv tes haujlwm. Kuv twb txib Thikhika mus rau lub moos Efexau lawm. Thaum koj tuaj, cia li coj kuv lub tsho ntev uas kuv tseg rau Khapa hauv lub moos Rhau‑a tuaj thiab coj tej phau ntawv thiab qhov cheem tsum yog coj tej tsiag ntawv tuaj. Alexadaw tus Kws ntaus tooj liab ua phem rau kuv ntau heev. Tus Tswv yuav pauj rau nws raws li tej uas nws tau ua. Koj cia li ceev faj nws tib zoo vim nws tawm tsam tej lus uas peb qhia heev kawg li. Thawj zaug uas kuv hais daws kuv tshaj plaub tsis muaj ib tug tuaj kuv tog kiag li, lawv txhua tus tso kuv tseg. Thov tsis txhob suav lawv tej kev txhaum. Tiamsis tus Tswv nrog nraim kuv thiab pub zog kom kuv thiaj piav tau txoj xov zoo tag nrho huvsi xwv lwm haiv neeg sawvdaws thiaj tau hnov. Thiab kuv dim hauv tsov ntxhuav lub qhov ncauj. Tus Tswv yuav cawm kuv dim txhua yam kev phem thiab yuav cawm kuv dim los nyob hauv nws lub tebchaws saum ntuj ceeb tsheej. Thov kom nws tau koob meej ci ntsa iab mus ib txhis tsis kawg. Amee. Thov hais lus nco txog Plixakha thiab Akhila thiab Aunexifaula tsev neeg. Elata tseem nyob hauv lub moos Khaulee. Kuv tseg Rhaufima uas muaj mob rau hauv lub moos Miletha. Thov koj siv zog tuaj kom txog ua ntej lub caij ntuj no. Yunpula, Pudee, Lina thiab Khaudia thiab cov kwvtij sawvdaws hais lus nco txog tuaj rau koj. Thov tus Tswv nrog nraim koj tus ntsuj plig. Thov Vajtswv txojkev hlub nrog nraim nej. Kuv yog Povlauj, yog Vajtswv tus qhev thiab yog Yexus Khetos tus tubtxib uas pab cov uas Vajtswv xaiv cia lawd txojkev ntseeg thiab pab lawv paub qhov tseeb uas raws li Vajtswv txojkev, lawv thiaj muaj vam tias yuav tau txojsia ib txhis tsis kawg uas Vajtswv tus tsis txawj dag tau cog lus tseg thaum chiv keeb los lawm. Thaum txog lub sijhawm uas teem cia Vajtswv ua nws txojlus tshwm los ntawm tej lus uas muab cob rau kuv tshaj tawm raws li Vajtswv uas yog peb tus Cawmseej nkaw lus cia. Kuv hais mus rau Titau uas yog kuv tus tseem tub uas ntseeg ib yam li kuv. Thov txojkev hlub thiab txojkev siab tus ntawm Vajtswv uas yog leej Txiv thiab ntawm Yexus Khetos uas yog peb tus Cawmseej nrog nraim koj. Qhov uas kuv tso koj tseg rau hauv koog povtxwv Khete ntawd kuj yog cia koj daws tej teeb meem kom tiav huvsi thiab tsa kom muaj cov uas saib xyuas pawg ntseeg rau hauv txhua lub moos raws li kuv hais rau koj. Tus uas saib xyuas pawg ntseeg yuav tsum yog tus uas tsis muaj chaw thuam, muaj ib tug pojniam thiab nws cov menyuam kuj ntseeg tsis raug luag xyav tias yog neeg loj leeb neeg tawv ncauj. Vim tias tus saib xyuas pawg ntseeg yog tus uas leg Vajtswv tes haujlwm yuav tsum yog tus uas tsis muaj chaw thuam, tsis khav theeb, tsis chim sai, tsis qaug dej qaug cawv, tsis ua nruj ua tsiv, tsis txhob ua lub siab hlob ntshaw ntau, zoo siab txais qhua, nyiam qhov zoo, xyuam xim, ncaj ncees, dawb huv thiab txawj tswj nws lub siab. Thiab nws yuav tsum tuav rawv tej lus qhia uas tso siab tau raws li uas qhia lawd, kom nws thiaj siv tej lus qhia raug cai txhawb siab thiab cav yeej cov uas tawm tsam tej lus ntawd. Rau qhov muaj neeg coob coob uas tawv ncauj, tsuas yog hais tej lus tsis muaj qabhau thiab dag ntxias xwb, feem coob yog cov uas qhia kom ua kevcai txiav. Yuav tsum kom lawv tswj lawv lub qhov ncauj vim lawv qhia tej uas tsis tsim nyog qhia xwv thiaj tau tshaj thawj ua rau tej tsev neeg ntxhov tag nrho. Hauv lawv cov ntawd muaj ib tug cev lus txeev hais tias, “Cov neeg Khete pheej dag ntxias, lawv yog tsiaj qus phem, thiab tub nkeeg noj loj.” Tej lus timkhawv no muaj tseeb. Vim li no koj cia li ntuas lawv hnyav kom lawv thiaj li ntseeg raug cai, tsis quav ntsej cov Yudai tej dab neeg lossis tej lus nkaw uas cov neeg uas twb tso txojkev tseeb tseg lawd qhia nej. Txhua yam kuj dawb huv rau cov neeg uas lub siab dawb huv, tiamsis tsis muaj ib yam dawb huv rau cov neeg phem thiab tsis ntseeg. Lawv tej kev xav thiab lawv lub siab uas paub qhov zoo qhov phem kuj phem tag huvsi. Lawv hais tias lawv paub Vajtswv tiamsis qhov uas lawv ua, lawv tsis lees yuav Vajtswv. Lawv yog neeg ntxim ntxub, tsis mloog lus, tsis phim ua ib yam haujlwm zoo kiag li. Koj yuav tsum qhia kom phim tej lus qhia uas raug cai. Qhia cov txivneej laus kom paub xyuam xim, ua tus uas luag hwm, paub cai, thiab ua kom raug cai rau hauv txojkev ntseeg, hauv txojkev hlub thiab hauv txojkev ua siab ntev thev taus. Qhia cov pojniam laus ib yam nkaus kom xyaum ua neeg dawb huv, tsis txhob xyav luag moo, tsis txhob quav cawv, ua tus uas qhuab qhia yam uas zoo, kom thiaj cob qhia tau cov pojniam hluas kom hlub lawv tus txiv thiab lawv tej menyuam, thiab paub tswj lawv lub siab, ua neeg dawb huv, tu vaj tu tsev zoo, muaj siab khuvleej, nyob hauv tus txiv qab kev tswjhwm, kom Vajtswv txojlus thiaj tsis raug luag thuam. Cov txivneej hluas kuj ib yam nkaus, cia li ntuas kom lawv tswj lawv tus kheej. Koj yuav tsum xyaum ua tus yam ntxwv zoo rau txhua fab rau qhov uas ua haujlwm zoo, thiab qhuab qhia tuaj nruab siab thiab rau siab qhia, thiab siv tej lus raug cai uas tsis muaj leejtwg thuam tau, xwv cov uas tawm tsam thiaj li txaj muag vim tsis muaj ib qho phem uas hais tau peb. Cia li qhia cov qhev kom nyob hauv lawv tus lospav kev tswjhwm rau txhua yam thiab ua kom hum tus lospav lub siab, tsis txhob cam thawj kiag li, tsis txhob qee luag tug, tiamsis yuav tsum ua kom pom tias tso siab tau thiab ua zoo rau txhua yam kom lawv thiaj ua rau luag qhuas Vajtswv uas yog peb tus Cawmseej tej lus qhia rau txhua fab. Vajtswv txojkev hlub uas pab neeg txhua tus dim twb tshwm los lawm, thiab qhia kom peb tso tej kev phem kev qias thiab tej kev ntshaw uas yog ntiajteb li tseg, thiab ua lub neej uas paub tswj lub siab thiab ua ncaj ncees thiab ua raws li Vajtswv txojkev hauv tiam neeg no, rau thaum peb tabtom tos rawv txojkev vam kaj siab lug thiab tos rawv peb tus Vajtswv loj uas yog peb tus Cawmseej lub hwjchim ci ntsa iab rov los, yog Yexus Khetos. Nws pub nws tus kheej this peb kom thiaj txhiv tau peb dim txhua yam kev txhaum thiab ntxuav peb kom dawb huv thiaj ua tau nws li neeg uas kub siab lug ua haujlwm zoo. Cia li piav tej no, thiab txhawb lawv lub zog thiab siv koj lub hwjchim qhuab ntuas lawv kawg nkaus. Tsis txhob cia leejtwg saib tsis taus koj. Cia li ntuas kom lawv nyob hauv cov nom tswv thiab cov uas muaj hwjchim qab kev tswjhwm, mloog lus, npaj txhij ua txhua yam haujlwm zoo, tsis txhob muab leejtwg hais phem, tsis txhob sib cav sib ceg, ua lub siab zam xeeb, thiab ua lub siab mos siab muag rau sawvdaws. Vim yav tag los peb yog neeg ruam, tsis mloog lus, yuam kev, ua txhua yam kev phem kev lomzem li qhev, ua lub neej xav ua phem thiab sib khib, raug luag ntxub thiab ib leeg ntxub ib leeg. Tiamsis thaum Vajtswv uas yog peb tus Cawmseej txojkev khuvleej thiab txojkev hlub tshwm los, Vajtswv cawm peb dim, tsis yog vim peb ua ncaj ncees tiamsis yog Vajtswv txojkev khuvleej uas nws ntxuav peb kom yug dua tshiab thiab tsim dua tshiab hauv Vaj Ntsuj Plig uas dawb huv. Tus Vaj Ntsuj Plig no, nws muab hliv rau saum peb nplua mias hauv Yexus Khetos uas yog peb tus Cawmseej, mas thaum nws txojkev hlub ua rau peb raug suav tias ncaj ncees lawm peb thiaj muaj feem saws tej uas peb vam ntsoov, yog txojsia ib txhis tsis kawg. Tej lus no tso siab tau. Kuv xav kom koj siv zog qhia tej no kom cov uas ntseeg Vajtswv thiaj li muab siab rau ua haujlwm zoo. Qhov uas ua li no zoo thiab muaj qabhau rau neeg. Cia li zam tej kev sib cam uas ruam, tej zaj uas hais txog poj koob yawg koob, thiab tej kev sib faib thiab kev sib cav sib ceg txog Mauxe txoj kevcai, vim tej ntawd tsis tseem ceeb tsis muaj qabhau. Tus uas pheej tshum kom tawg ua pab ua pawg cia li ntuas nws ib ob zaug mas tsis txhob quav ntsej nws dua li lawm, vim yeej paub tias tus neeg zoo li ntawd twb muab txojkev ncaj ntxeev ua txojkev nkhaus thiab ua txhaum muaj txim. Nws rov rau txim rau nws tus kheej xwb. Thaum kuv txib Athema lossis Thikhika tuaj txog koj lawm, koj cia li maj nroos tuaj cuag kuv hauv lub moos Nikhaupoli, vim kuv npaj siab tias yuav nyob qhov ntawd tag lub caij ntuj no. Koj cia li siv zog pab xa Xena uas txawj hais plaub thiab Apaulau taug kev mus, tsis txhob cia ob tug tu ncua ib yam dabtsi. Thiab cia peb cov ntseeg kawm paub ua haujlwm zoo, lawv thiaj pab tau tej uas cheem tsum thiab tsis ua lub neej nkim zog xwb. Txhua tus uas nrog kuv nyob ua ke hais lus nco txog nej. Thov hais lus nco txog cov uas hlub peb hauv txojkev ntseeg. Thov Vajtswv txojkev hlub nrog nraim nej txhua tus. Povlauj uas raug kaw vim ua Yexus Khetos tes haujlwm, thiab peb tus kwv Timaute, hais mus rau Filemoo uas peb hlub thiab nrog peb koom ua haujlwm, thiab hais rau peb tus muam Afia thiab Akhipa uas nrog peb koom ua tub rog, thiab hais rau pawg ntseeg hauv koj lub tsev. Thov txojkev hlub thiab txojkev siab tus ntawm Vajtswv uas yog peb leej Txiv thiab ntawm tus Tswv Yexus Khetos nrog nraim nej. Kuv ua Vajtswv tsaug tsis tu ncua rau thaum kuv nco txog koj hauv kuv tej lus thov, vim kuv twb hnov txog koj txojkev hlub thiab koj txojkev ntseeg uas muaj rau tus Tswv Yexus thiab cov xov dawb txhua tus. Kuv thov Vajtswv pab kom qhov uas koj nrog kuv koom txojkev ntseeg yuav ua rau koj paub tag nrho txhua yam zoo uas peb muaj hauv Yexus Khetos. Kuv tus kwv, koj txojkev hlub ua rau kuv muaj siab xyiv fab thiab tau txais kev txhawb siab ntau heev, vim yog koj ua rau cov xov dawb sov siab tuaj. Vim li no, txawm yog kuv muaj cuab kav hauv Khetos yuav hais kom koj ua tej uas tsim nyog ua, tiamsis vim txojkev hlub kuv yuav thov koj thiaj li zoo dua. Kuv Povlauj uas ua tubtxib thiab nimno raug kaw vim ua Yexus Khetos tes haujlwm, kuv thov koj txog kuv tus tub Aunexima uas los ua kuv li tub rau thaum kuv raug kaw. Yav tom ntej nws tsis muaj qabhau rau koj, tiamsis nimno nws yeej muaj qabhau rau koj thiab rau kuv. Kuv xa nws uas yog kuv lub siab ntag rov tuaj rau koj. Kuv xav cia nws nrog kuv nyob tu kuv hloov koj chaw rau lub sijhawm uas kuv raug kaw vim yog tim txoj xov zoo. Tiamsis kuv tsis xav ua ib yam dabtsi ua ntej uas koj tsis tau pom zoo, xwv qhov uas koj ua zoo thiaj tsis yog raug yuam ua tiamsis yog koj txaus siab ua. Tej zaum yog tim li no nws thiaj ncaim koj mus ib nyuag ntu xwv koj thiaj rov tau nws mus ib txhis li. Nws yuav tsis ua qhev dua li lawm tiamsis zoo dua li ib tug qhev, yog ib tug kwvtij uas ntxim hlub. Kuv yeej hlub nws mas koj yimhuab yuav tsum hlub nws ntawm lub cev nqaij tawv thiab hauv tus Tswv. Vim li no, yog koj pom tias kuv nrog koj koom ua tib tes haujlwm, koj cia li txais yuav nws ib yam li txais yuav kuv. Yog nws ua txhaum rau koj lossis tshuav koj nqe dabtsi, cia li xam ntawm kuv. Kuv Povlauj siv kuv txhais tes sau li no tias kuv yuav them. Kuv yuav tsis hais txog qhov uas koj tus kheej yeej tshuav kuv. Yog li no, tus kwv, kuv xav tau qabhau ntawm koj hauv tus Tswv. Cia li ua rau kuv sov siab hauv Khetos. Kuv ruaj siab tias koj yuav mloog lus, kuv thiaj sau ntawv tuaj rau koj thiab paub tias koj yuav ua ntau dua tej uas kuv thov. Dua li ntawd thov koj npaj chaw rau kuv so thiab, vim kuv vam tias yuav rov tuaj cuag nej dua vim nej tej lus thov. Epafa uas nrog raug kaw vim ua Yexus Khetos tes haujlwm hais lus nco txog tuaj rau koj. Malakau, Alithakha, Dema thiab Luka uas nrog kuv koom ua haujlwm hais lus nco txog ib yam nkaus. Thov tus Tswv Yexus Khetos txojkev hlub nrog nraim nej tus ntsuj plig. Yav thaum ub Vajtswv siv cov xibhwb cev lus hais rau peb tej poj koob yawm txwv ntau zaus thiab siv ntau yam txujci, tiamsis tiam kawg no nws hais ntawm nws tus Tub rau peb, yog tus uas nws tsa los saws ib puas tsav yam ua qub txeeg qub teg, thiab yog tus uas nws siv tsim lub ntuj lub teb huvsi. Leej Tub zoo li daim iav tsom kom pom Vajtswv tus duab ci ntsa iab, nws tus yam ntxwv zoo thooj li Vajtswv txhua yam huvsi, nws siv nws tej lus uas muaj hwjchim loj tuav rawv ib puas tsav yam huvsi cia. Thaum nws ntxuav tej kev txhaum tseg huvsi lawm nws zaum ntawm Vajtswv uas loj dua ntais sab tes xis saum ntuj ceeb tsheej, thiaj zoo dhau cov tubtxib saum ntuj ib yam li uas nws tau lub npe uas tsim txiaj dua cov tubtxib saum ntuj tej npe. Rau qhov muaj ib tug tubtxib twg uas Vajtswv hais rau nws tias, “Koj yog kuv tus Tub, hnub no kuv yug tau koj lawm”? Lossis hais tias, “Kuv yuav ua nws leej txiv thiab nws yuav ua kuv tus Tub.”? Thiab muaj dua ib zaug thaum Vajtswv coj nws tus tub hlob los rau hauv lub ntiajteb nws hais tias, “Cia Vajtswv cov tubtxib saum ntuj sawvdaws pe hawm tus Tub.” Hais txog cov tubtxib saum ntuj nws hais tias, “Nws tsim nws cov tubtxib saum ntuj zoo ib yam li cua, thiab tsim nws cov tub qhe zoo ib yam li nplaim taws.” Tiamsis hais txog nws leej Tub nws hais tias, “Au Vajtswv, koj lub zwm txwv muaj nyob mus ib txhis tsis kawg. Tus cwj uas ua vajntxwv kav yog tus cwj ncaj ncees. Koj nyiam txojkev ncaj ncees, koj ntxub txojkev limhiam. Vim li no Vajtswv, koj tus Vajtswv, tau muab cov roj uas ua kom zoo siab xyiv fab hliv tsa koj ua loj dua koj cov kwvluag.” Thiab hais tias, “Au tus Tswv, thaum ub koj tiag taw rau lub ntiajteb, thiab lub ntuj yog koj txhais tes ua. Tej ntawd yuav puam tsuaj tag, tiamsis koj yuav nyob mus li, tej ntawd yuav txawj qub yam li tej tsoos tsho. Koj yuav muab tej ntawd kauv ib yam li kauv thooj ntaub thiab raug muab hloov ib yam tej tsoos tsho. Tiamsis koj tseem zoo li qub, thiab koj lub niaj lub xyoo tsis txawj kawg.” Muaj tus tubtxib saum ntuj twg uas Vajtswv hais rau nws tias, “Cia li zaum ntawm kuv sab xis, mus txog thaum kuv muab koj cov yeeb ncuab ua koj lub rooj tiag taw.”? Tej tubtxib saum ntuj yog tej ntsuj plig uas ua Vajtswv tes haujlwm uas raug txib mus tu cov uas yuav tau txojkev dim los tsis yog? Vim li no peb yimhuab yuav tsum muab siab rau rau tej lus uas peb tau hnov lawd heev dua qub peb thiaj tsis txav deb zuj zus qhov no lawm. Yog tej lus uas cov tubtxib saum ntuj hais ntawd pom tias muaj tseeb thiab txhua yam kev fav xeeb thiab tsis mloog lus tau raug txim raws li uas tsim nyog lawm, yog peb tsis quav ntsej txojkev dim uas loj kawg li no peb yuav dim tau li cas? Tus Tswv twb xub tshaj tawm txojkev dim ntawd thiab cov uas tau hnov tus Tswv kuj qhwv tias muaj tseeb. Vajtswv kuj ua tej txujci tseem ceeb thiab txujci phimhwj thiab ua ntau yam haujlwm uas muaj hwjchim ua timkhawv txog tej no, thiab muab Vaj Ntsuj Plig uas dawb huv faib rau peb raws li nws lub siab nyiam. Vajtswv tsis tau muab lub ntiajteb uas nyob tom hauv ntej uas peb tabtom hais txog tso rau cov tubtxib saum ntuj tswjhwm. Muaj ib tug ua timkhawv rau ib qhov hais tias, “Neeg yog dabtsi es koj nco txog lawv, thiab neeg tus tub yog dabtsi es koj mob siab nws? Koj ua rau nws qes dua cov tubtxib saum ntuj ib nyuag ntu xwb, thiab koj muab meej mom thiab koob meej ua mom kub rau nws ntoo. Koj muab txhua yam tso rau hauv nws qab xib taws.” Qhov uas Vajtswv pub txhua yam nyob hauv nws qab kev kaav, tsis muaj ib yam twg uas tsis nyob hauv nws qab kev tswjhwm. Qhov tseeb lub sijhawm no peb tsis tau pom tias txhua yam nyob hauv nws qab kev tswjhwm. Tiamsis peb pom tias Yexus uas raug muab ua qes dua cov tubtxib saum ntuj ib nyuag ntu, twb tau meej mom thiab koob meej ua mom kub ntoo lawm vim nws raug kev tsim txom tuag, xwv Yexus thiaj sim txojkev tuag this txhua tus vim yog Vajtswv hlub. Thaum Vajtswv coj cov tub coob coob mus tau koob meej ci ntsa iab, kuj tsim nyog Vajtswv tus uas ua rau txhua yam muaj nyob thiab txhua yam nyob rau nws, ua rau tus uas rhawv txojkev dim rau lawv ntawd zoo kawg nkaus rau qhov uas nws raug tsim txom. Tus uas cais neeg ua dawb huv thiab cov uas raug muab cais ua dawb huv kuj koom tib leej txiv. Yog li no Yexus tsis txaj muag hu lawv cov ntawd ua kwvtij. Nws hais tias, “Kuv yuav piav koj lub npe rau kuv cov kwvtij paub, kuv yuav qhuas koj rau thaum ib tsoom neeg tuaj txoos ua ke.” Thiab dua ib zaug hais tias, “Kuv yuav vam khom nws,” thiab hais tias, “kuv thiab cov menyuam uas Vajtswv pub rau kuv nyob ntawm no.” Twb yog vim cov menyuam muaj roj muaj ntshav li cas, nws thiaj muaj roj muaj ntshav ib yam li lawv, kom qhov uas nws tuag ntawd thiaj rhuav tau Ntxwg Nyoog, tus uas muaj hwjchim ua rau neeg tuag, thiab cawm tau txhua tus uas ntshai txojkev tuag es poob ua txojkev ntshai li qhev ib sim neej kom dim. Qhov tseeb Vajtswv tsis txhawj cov tubtxib saum ntuj tiamsis txhawj Aplahas caj ces. Vim li no Yexus yuav tsum ua zoo li nws cov kwvtij txhua yam huvsi, kom nws thiaj ua tau tus tuam pov thawj hlob uas muaj kev khuvleej thiab kev ncaj ncees ua koom tu Vajtswv thiaj ntxuav tau neeg lub txim. Vim Yexus raug kev txom nyem thiab raug kev sim siab, nws thiaj pab tau cov uas raug kev sim siab thiab. Vim li no, cov kwvtij dawb huv uas koom qhov uas Vajtswv hu mus saum ntuj, nej cia li ua tib zoo saib Yexus uas yog tubtxib thiab yog tus tuam pov thawj hlob uas peb hais tias peb ntseeg. Yexus ua ncaj rau Vajtswv uas tsa nws, ib yam li Mauxe ua ncaj rau hauv Vajtswv tsev neeg. Yexus kuj tsim nyog tau koob meej ntau dua Mauxe, ib yam li tus Kws ua tsev yeej tau koob meej ntau dua lub tsev. Vim txhua lub tsev muaj tus uas ua, tiamsis tus uas tsim txhua yam huvsi yog Vajtswv. Mauxe ua ncaj rau hauv Vajtswv tsev neeg sawvdaws yam li ib tug tub qhe kom nws thiaj ua tau timkhawv txog tej uas yuav hais txog tom hauv ntej, tiamsis Khetos ua ncaj yam li tus tub kav Vajtswv tsev neeg. Peb kuj yog Vajtswv tsev neeg tsuav yog peb tuav rawv txojkev ruaj siab thiab txojkev vam uas peb khav txog. Vim li no, raws li Vaj Ntsuj Plig uas dawb huv hais tias, “Hnub no yog nej mloog nws lub suab, tsis txhob ua nej lub siab tawv yam li zaum uas nej fav xeeb yog hnub uas sim siab hauv tebchaws moj sab qhua ntawd, yog qhov chaw uas nej tej poj koob yawm txwv sim thiab tshuaj saib kuv, thiab pom tej haujlwm uas kuv ua plaub caug xyoo. Vim li ntawd kuv thiaj chim rau cov neeg tiam ntawd, thiab kuv hais tias, ‘Lawv lub siab pheej yuam kev, thiab lawv tsis paub kuv txojkev.’ Raws li kuv cog lus twv chim tsawv tias, ‘Lawv yuav tsis tau nkag mus rau hauv lub chaw uas kuv pub lawv so kiag li.’ ” Cov kwvtij, cia li ceev faj tib zoo tsis txhob cia nej cov muaj ib tug twg uas lub siab phem, lub siab tsis ntseeg, uas yuav coj nej yuam kev ntawm Vajtswv uas muaj txojsia nyob. Tiamsis nej yuav tsum niaj hnub ib leeg txhawb ib leeg lub siab rau thaum tseem hu tau tias “Hnub no,” kom nej thiaj tsis muaj ib tug twg ua lub siab tawv vim yog raug lub txim dag ntxias. Vim tias peb twb koom nrog Khetos ua ke, tsuav yog peb tuav txojkev ruaj siab uas peb muaj txij thaum chiv thawj ruaj mus txog thaum kawg, raws li uas hais tias, “Hnub no yog nej mloog nws lub suab, tsis txhob ua nej lub siab tawv yam li zaum uas nej fav xeeb ntawd.” Leejtwg yog cov uas hnov thiab fav xeeb ntawd? Twb yog txhua tus uas Mauxe coj tawm hauv Iyi tebchaws mus lawm los tsis yog? Leejtwg yog cov uas Vajtswv chim rau plaub caug xyoo ntawd? Twb yog txhua tus uas ua txhaum thiab lawv tej cev tuag poob tag rau hauv tebchaws moj sab qhua los tsis yog? Leejtwg yog cov uas Vajtswv cog lus twv tias yuav tsis tau nkag rau hauv lub chaw uas nws pub lawv so? Twb yog cov uas tsis mloog lus los tsis yog? Vim li ntawd peb thiaj pom tias qhov uas lawv mus tsis tau rau hauv vim yog lawv tsis ntseeg. Yog li ntawd, thaum lo lus cog tseg tseem muaj nyob hais tias nkag tau rau hauv Vajtswv lub chaw so, peb yuav tsum ceev faj tsam ces yuav suav tias nej qee leej mus tsis txog. Vim tias peb kuj tau hnov txoj xov zoo ib yam li lawv. Tiamsis tej lus uas lawv hnov ntawd tsis muaj qabhau rau lawv vim lawv tsis los ntseeg. Peb cov uas ntseeg lawm kuj nkag tau rau hauv lub chaw so ntawd, raws li Vajtswv hais tias, “Raws li kuv cog lus twv chim tsawv tias, ‘Lawv yuav tsis tau nkag mus rau hauv lub chaw uas kuv pub lawv so kiag li,’ ” txawm yog nws tej haujlwm tiav tag txij thaum tsim ntuj tsim teb kuj xij. Rau qhov muaj ib nqes uas nws hais txog hnub xya li no hais tias, “Hnub xya ntawd Vajtswv so txhua yam haujlwm uas nws tau ua.” Thiab hauv cov nqe no nws hais tias, “Lawv yuav tsis tau nkag mus rau hauv lub chaw uas kuv pub lawv so kiag li.” Yog li ntawd tseem tshuav kev rau qee leej nkag mus tau, thiab cov uas yav nram ntej tau hnov txoj xov zoo tsis tau nkag mus vim lawv tsis mloog lus. Vim li no Vajtswv thiaj teem dua ib hnub, yog “Hnub no,” raws li nws hais rau Davi ntau xyoo tom qab rau nqe uas txeev hais txog lawm tias, “Hnub no yog nej mloog nws lub suab nej tsis txhob ua nej lub siab tawv.” Yog Yausua twb coj lawv los txog lub chaw so lawm, tom qab ntawd Vajtswv yuav tsis hais txog dua rau lwm hnub. Yog li no tseem tshuav hnub Xanpatau rau Vajtswv cov neeg so, rau qhov leejtwg tau nkag mus rau hauv Vajtswv lub chaw so lawm, tus ntawd kuj so nws tej haujlwm ib yam li Vajtswv tau so nws tej haujlwm. Vim li no peb cia li siv zog nkag mus rau hauv lub chaw so ntawd, kom thiaj tsis muaj leejtwg plam raws li cov uas tsis mloog lus ntawd. Rau qhov Vajtswv txojlus muaj txojsia thiab pheej ua haujlwm. Txojlus ntawd ntse dua rab ntaj uas ob sab ntse, nkaug mus thoob plaws nruab siab thiab tus ntsuj plig, thiab tej pob qej txha thiab tej hlwb txha, thiab txawj tshuaj saib tej uas neeg xav thiab tej uas nyob hauv neeg lub siab. Tsis muaj ib yam uas tsim los lawd yuav nraim tau ntawm Vajtswv, tiamsis txhua yam yuav raug tshwm los kom pom tseeb rau ntawm nws lub qhov muag, nws yog tus uas peb yuav tsum qhia peb lub neej huvsi rau nws. Yog li ntawd vim peb muaj ib tug tuam pov thawj hlob loj kawg uas twb hla mus rau saum ntuj lawm, yog Yexus uas yog Vajtswv tus Tub, cia peb tuav rawv txojkev ntseeg uas peb lees yuav. Rau qhov peb tsis yog muaj tus tuam pov thawj hlob uas tsis txawj mob siab qhov uas peb qaug zog tiamsis nws txeev raug kev sim siab txhua yam ib yam li peb los nws tsis ua txhaum kiag li. Yog li no peb cia li ua siab tuab los rau ntawm lub zwm txwv uas muaj txojkev hlub, kom peb thiaj tau txais txojkev khuvleej thiab ntsib txojkev hlub uas pab tau rau thaum peb cheem tsum. Txhua tus tuam pov thawj yog xaiv neeg los ua thiab tsa los nyob neeg chaw ua koom tu Vajtswv, yog muab qhov txhia chaw xyeem thiab ua kevcai xyeem daws txim. Nws ua siab mos siab muag pab cov neeg tsis paub qabhau thiab cov uas yuam kev rau qhov nws kuj txawj qaug zog thiab. Vim li no nws thiaj yuav tsum muab tsiaj xyeem daws nws lub txim thiab daws cov pejxeem lub txim. Tsis muaj leejtwg tsa nws tus kheej ua tes haujlwm uas muaj meej no, tiamsis yuav tsum yog Vajtswv hu nws ib yam li hu Aloo. Ib yam li ntawd Khetos tsis tau tsa nws tus kheej kom tau koob meej ua tuam pov thawj hlob, tiamsis Vajtswv hais rau nws tias, “Koj yog kuv tus Tub, hnub no kuv yug tau koj lawm.” Thiab hais dua ib qho hais tias, “Koj ua pov thawj mus ib txhis ib yam li Mekhixede.” Thaum Yexus tseem ua neeg nqaij tawv nws thov thiab taij thov nrov nrov los kua muag rau Vajtswv tus uas cawm tau nws dim hauv txojkev tuag, thiab Vajtswv mloog nws tej lus thov vim Yexus paub ntshai Vajtswv. Txawm yog nws yog tus Tub los nws kuj kawm paub mloog lus ntawm tej kev tsim txom uas nws raug. Thaum Yexus raug muab ua zoo kawg nkaus lawm nws thiaj ua lub hauv paus kev dim mus ib txhis rau txhua tus uas mloog nws lus, thiab Vajtswv tsa nws ua tus tuam pov thawj hlob ib yam li Mekhixede. Tseem muaj ntau yam uas peb yuav hais txog qhov no tiamsis ceeblaj piav vim nej ntsej lag tag lawm. Nimno twb tsim nyog nej ua tau xibhwb qhia lawm tiamsis nej tseem cheem tsum ib tug muab Vajtswv txojlus lub hauv paus qhia nej dua. Nej tseem cheem tsum kua mis tsis yog tej zaub mov tawv. Txhua tus uas tseem noj mis yeej tsis paub txog tej lus uas hais txog kev ncaj ncees, vim nws tseem yog menyuam mos. Tiamsis tej zaub mov tawv yog muab rau cov uas hlob lawd noj, yog cov uas twb xyaum kawm lawm thiaj txawj cais tias yam twg zoo yam twg phem. Vim li no peb tsis txhob yog qhia lub hauv paus uas hais txog Khetos ntxiv, peb cia li mus txog qhov uas hlob tiav lawm. Peb yuav tsis tiag dua taw uas hais txog qhov uas ntxeev dua siab tshiab ntawm tej haujlwm uas coj mus txog kev tuag thiab hais txog qhov uas ntseeg Vajtswv, thiab qhov uas ua kevcai raus dej, qhov uas tsa tes npuab, qhov uas cov tuag ciaj sawv rov los thiab qhov uas raug txim mus ib txhis. Yog Vajtswv tso cai, peb yuav ua li ntawd mus. Cov neeg uas twb txais txojkev kaj ib zaug lawm thiab twb sim tej uas pub saum ntuj los lawm thiab tau koom Vaj Ntsuj Plig uas dawb huv thiab tau sim qhov zoo hauv Vajtswv txojlus thiab lub hwjchim uas yuav los tiam tom ntej, los tseem yuam kev lawm, kuj yuav coj tsis tau lawv cov ntawd rov los ntxeev dua siab tshiab dua li lawm, vim lawv yeej rov muab Vajtswv tus Tub teem rau saum tus khaublig ntoo thiab ua rau nws raug txaj muag tab meeg sawvdaws. Thaj av uas pheej nqus dej nag thiab tawg paj txi txiv muaj qabhau rau tus uas cog, kuj yog tau koob hmoov ntawm Vajtswv. Tiamsis yog thaj av ntawd tuaj pos kaus ntsaj pos kaus ntsim kuj tsis muaj nqes thiab twb yuav raug foom tsis zoo, thiab thaum kawg yuav raug hluavtaws hlawv. Nej cov uas peb hlub, txawm yog peb hais li ntawd, los peb kuj ruaj siab rau nej tias nej muaj tej yam uas zoo dua, yog tej uas ntsig txog txojkev dim. Rau qhov Vajtswv tsis yog tus uas ua tsis ncaj es yuav tsis nco qab nej tes haujlwm thiab qhov uas nej hlub Vajtswv lub npe, yog qhov uas nej tu cov xov dawb ib yam li uas nej tseem ua. Thiab peb xav kom nej txhua tus kub siab lug ib yam nkaus mus txog thaum kawg kom thiaj tau puv npo raws li lub siab vam, kom nej thiaj tsis ua neeg tub nkeeg tiamsis xyaum raws li cov uas muaj kev ntseeg thiab ua siab ntev thev thiaj tau tej uas cog lus cia lawd ua lawv tug. Thaum Vajtswv cog lus rau Aplahas, tsis muaj leejtwg loj dhau Vajtswv uas Vajtswv yuav tuav tus ntawd lub npe cog lus, Vajtswv thiaj tuav Vajtswv lub npe cog lus ruaj, hais tias, “Kuv yeej yuav foom koob hmoov rau koj thiab ua rau koj huaj vam coob tiag tiag li.” Yog li ntawd thaum Aplahas ua siab ntev tos, nws thiaj tau tej uas cog lus tseg ntawd. Neeg yeej tuav tus uas loj dua lawv lub npe cog lus twv, mas thaum muaj lus sib cam dabtsi kuj xij yuav tuav tej lus twv ntawd thiaj tsis muaj lus sib cam lawm. Yog li ntawd thaum Vajtswv xav qhia rau cov uas yuav saws raws li tej lus cog tseg kom yimhuab paub tseeb tias tej uas Vajtswv xav tseg yuav tsis hloov li, Vajtswv thiaj cog lus ruaj khov qhwv tej lus uas nws cog tseg. Vim muaj ob yam no uas hloov tsis tau li, rau qhov Vajtswv tsis txawj dag, peb cov uas khiav mus txeeb txojkev vam uas muab tso tom peb hauv ntej yuav tau txais kev txhawb siab ntau heev. Txojkev vam uas peb muaj zoo ib yam li tog hlau nres nkoj uas ruaj thiab tso siab tau uas tuav tau peb lub siab, yog txojkev vam uas nkag mus rau hauv chav tsev uas nyob ntawm daim ntaub thaiv sab hauv, yog qhov chaw uas Yexus twb coj kev ua ntej mus thiaj pab peb, vim nws ua tus tuam pov thawj hlob mus ib txhis ib yam li Mekhixede. Tus Mekhixede no yog tus vajntxwv hauv lub moos Xalee, yog Vajtswv uas loj dua ntais tus pov thawj, mus ntsib Aplahas rau thaum Aplahas tabtom mus tua yeej cov vajntxwv los, thiab nws foom koob hmoov rau Aplahas. Aplahas txawm muab txhua yam ib feem hauv kaum pub rau Mekhixede. Qhov ib Mekhixede lub npe txhais hais tias, “Tus vajntxwv uas ncaj ncees,” thiab ntxiv mus nws kuj yog tus vajntxwv kav lub moos Xalee uas txhais hais tias, “Tus vajntxwv uas coj kev thaj yeeb.” Tsis muaj sau cia txog nws niam nws txiv nws keeb puam los li cas, thiab tsis hais txog hnub nws yug hnub nws tuag. Tiamsis nws ua pov thawj mus ib txhis ib yam li Vajtswv tus Tub. Sim xav saib, nws loj npaum li cas. Peb yawg koob Aplahas tseem muab tej uas txeeb tau los ib feem hauv kaum pub rau nws. Thiab muaj kevcai hais kom Levi caj ces uas raug tsa ua pov thawj txais tau ib hauv kaum ntawm cov pejxeem uas yog lawv cov kwvtij txawm yog cov kwvtij ntawd kuj tshwm ntawm Aplahas los kuj xij. Tiamsis Mekhixede tsis yog Levi caj ces, los tseem tau txais ib hauv kaum ntawm Aplahas, thiab foom koob hmoov rau Aplahas uas tau txais tej lus cog tseg. Yam uas cam tsis tau, yeej muaj uas tus hlob foom koob hmoov rau tus yau. Hais txog cov Levi, kuj yog neeg uas txawj tuag txais ib hauv kaum, tiamsis hais txog Mekhixede, kuj yog tus uas sau cia hais tias nws muaj txojsia nyob ib txhis txais ib hauv kaum. Kuj hais tau hais tias, Levi uas tau txais ib hauv kaum kuj pub ib hauv kaum thiab, vim Aplahas pub ib hauv kaum rau Mekhixede, rau qhov thaum Mekhixede mus ntsib Aplahas, Levi tseem nyob hauv nws yawg suab lub cev. Yog li ntawd, yog tias cov pov thawj uas yog xeem Levi tej kevcai ua tau rau neeg zoo kawg nkaus (vim cov pejxeem tau txais tej kevcai ntawm cov Levi), ua cas tseem yuav tsum muaj dua ib tug pov thawj uas zoo ib yam li Mekhixede tsis yog zoo li Aloo? Thaum hloov cov pov thawj lawm txoj qub kevcai kuj yuav tsum raug muab hloov thiab. Rau qhov tus Tswv uas peb hais txog no yog lwm xeem uas tsis muaj ib tug txeev ua num rau ntawm lub thaj xyeem kiag li. Yeej pom tseeb tias peb tus Tswv yog tshwm hauv xeem Yuda los, thiab Mauxe kuj tsis tau hais tias yuav muaj pov thawj tshwm hauv xeem Yuda los. Qhov no kuj yimhuab pom meej rau thaum muaj dua ib tug pov thawj zoo ib yam li Mekhixede tshwm los. Tus ntawd ua pov thawj uas tsis yog raug tsa raws li tej kevcai hais tias xeem twg tiamsis yog raws li lub hwjchim uas ua kom nws muaj txojsia uas rhuav tsis tau. Rau qhov muaj lus timkhawv hais tias, “Koj ua pov thawj mus ib txhis ib yam li Mekhixede.” Txoj qub kevcai kuj raug muab rhuav lawm vim yog tsis muaj zog thiab siv tsis tau, rau qhov txoj kevcai ntawd tsis txawj ua kom ib yam dabtsi zoo kawg nkaus, mas txojkev vam uas zoo dua ntawd muab pub rau peb ua rau peb mus cuag tau Vajtswv. Thiab yeej muaj tej lus cog tseg tawv thiab. Lwm tus raug tsa ua pov thawj tsis muaj lo lus cog tseg tawv, tiamsis Yexus muaj lus cog tseg tawv hais txog nws tias, “Tus Tswv twb cog lus tawv lawm, nws yuav tsis hloov dua siab li. ‘Koj ua pov thawj mus ib txhis.’ ” Vim tej lus cog tseg tawv no Yexus thiaj ua tus uas qhwv tej lus cog tseg uas zoo dua li tej qub. Cov uas raug tsa ua pov thawj muaj coob, vim txojkev tuag lawv thiaj ua haujlwm tsis tau mus li, tiamsis Yexus ua pov thawj tes haujlwm mus ib txhis vim nws muaj txojsia nyob mus ib txhis. Vim li no nws thiaj muaj peevxwm cawm tau txhua tus uas los cuag Vajtswv hauv nws kom dim mus ib txhis, vim nws muaj txojsia nyob mus li thiaj thov Vajtswv pab cov neeg ntawd. Tus tuam pov thawj hlob zoo li no thiaj tsim nyog rau peb. Nws yog tus dawb huv, tsis muaj qhov phem qhov qias, cais ntawm cov neeg muaj txim thiab raug txhawb nqa siab dhau saum ntuj. Yexus tsis thooj li cov tuam pov thawj hlob, tsis txog nws yuav muab qhov txhia chaw xyeem txhua hnub thiab xub muab xyeem daws nws lub txim mam li muab xyeem daws cov pejxeem lub txim, rau qhov nws muab xyeem tib zaug xwb mas txaus lawm yog thaum nws muab nws tus kheej xyeem. Rau qhov txoj kevcai tsa cov neeg uas tsis muaj zog ua tuam pov thawj hlob, tiamsis tej lus cog tseg tawv uas hais tom qab txoj kevcai ntawd tsa Vaj leej Tub ua pov thawj uas twb raug ua zoo kawg nkaus mus ib txhis. Tej uas peb hais no qhov tseem ceeb yog qhov uas peb muaj ib tug tuam pov thawj hlob li no, zaum ntawm Vajtswv uas loj dua ntais lub zwm txwv sab tes xis saum ntuj ceeb tsheej. Nws ua haujlwm hauv lub chaw dawb huv thiab hauv lub tseem tsev ntaub uas tus Tswv tsa cia tsis yog neeg tsa. Txhua tus tuam pov thawj hlob yog raug tsa los muab qhov txhia chaw xyeem thiab tua tsiaj xyeem. Yog li no tus tuam pov thawj hlob no yuav tsum muaj ib yam uas muab xyeem thiab. Yog nws nyob hauv lub ntiajteb no, nws yuav tsis ua pov thawj kiag li vim tias muaj cov pov thawj uas muab qhov txhia chaw xyeem raws li txoj kevcai lawm. Cov pov thawj ntawd ua haujlwm rau hauv lub chaw dawb huv uas tsuas yog tej uas nyob saum ntuj tus yam ntxwv thiab tus duab, raws li Vajtswv hais rau Mauxe thaum Mauxe yuav tsa lub tsev ntaub hais tias, “Yuav tsum ceev faj ua txhua yam raws li tus qauv uas qhia rau koj sau lub roob.” Tiamsis nimno Yexus tau txais tes haujlwm ua uas zoo tshaj dua lawv cov ntawd, thiab ib yam li ntawd nws yog tus nruab nrab hauv tej lus sib cog tseg tshiab uas zoo heev dua vim raug muab tsa rau saum tej lus cog tseg uas zoo dua. Yog tej lus cog tseg zaum ib zoo txaus lawm kuj tsis txog muaj tej lus cog tseg zaum ob. Rau qhov Vajtswv thuam lawv thiab hais tias, “Tus Tswv hais tias, Saib nawj, lub caij lub nyoog tabtom los yuav txog mas kuv yuav cog dua lus tshiab rau cov Yixayee thiab cov Yuda, tsis thooj li uas kuv cog rau lawv tej poj koob yawm txwv rau hnub uas kuv cab lawv tes coj lawv tawm hauv Iyi tebchaws los. Lawv tsis ua raws li kuv tej lus cog tseg, kuv thiaj tsis quav ntsej lawv lawm. Tus Tswv hais li no ntag. No yog tej lus cog tseg uas kuv yuav cog rau cov Yixayee ua qab ncua sijhawm ntawd. Tus Tswv hais li no ntag. Kuv yuav muab kuv txoj kevcai tso rau hauv lawv thiab sau cia rau hauv lawv lub siab. Kuv yuav ua lawv tus Vajtswv thiab lawv yuav ua kuv haiv neeg. Txhua tus yuav tsis qhia nws kwvtij zej zog thiab nws tej kwvtij txheeb kom paub tus Tswv, rau qhov lawv txhua tus yeej yuav paub kuv txij tus yau kawg mus txog tus loj kawg. Kuv yuav khuvleej lawv tej kev txhaum thiab tsis cim ntsoov lawv lub txim dua li lawm.” Thaum Vajtswv hais txog tej lus cog tseg tshiab kuj yog nws rhuav tej lus cog tseg qub lawm. Tej uas muab rhuav thiab tej qub twb ploj yuav tag. Txawm yog tej lus cog tseg thawj zaug ntawd kuj muaj kevcai pe hawm thiab muaj lub chaw pe hawm hauv lub ntiajteb. Lub tsev ntaub muab tsa lawm. Hauv chav ib muaj lub teeb, lub rooj thiab cov ncuav xyeem txawb rau ntawm Vajtswv xubntiag. Chav no hu ua Chav Dawb Huv. Sab hauv daim ntaub thaiv muaj ib chav uas hu ua Chav Dawb Huv Kawg Nkaus. Hauv chav ntawd muaj lub thaj kub uas hlawv hmoov tshuaj tsw qab thiab muaj lub phij xab sib cog lus uas luam kub thoob plaws txhua fab huvsi, sab hauv muaj ib lub me hub kub ntim mana, thiab muaj Aloo tus pas nrig uas tawg cos paj thiab ob daim txiag zeb uas sau tej lus cog tseg. Muaj ob tug Khelunpee uas muaj Vajtswv lub hwjchim ci ntsa iab nthuav tis rau saum lub hau phij xab uas roos kev txhaum. Tej no peb hais tsis tau txhua rau ntawm no. Thaum npaj tej no txhij lawm, cov pov thawj pheej nkag mus ua lawv tes haujlwm raws li tej kevcai tsis tu ncua rau hauv chav ib. Tiamsis chav uas ob tsuas yog tus tuam pov thawj hlob tib leeg nkag tau ib xyoo ib zaug xwb, thiab yuav tsum coj tej ntshav mus xyeem daws nws lub txim thiab daws cov pejxeem lub txim uas tsis yog txhob txwm ua. Qhov no Vaj Ntsuj Plig uas dawb huv thiaj qhia meej tias tsis tau qheb kev mus rau hauv chav uas Dawb Huv Kawg Nkaus rau thaum chav ib tseem muaj nyob. Chav ntawd piv txog tiam no ntag, txhais hais tias qhov uas muab qhov txhia chaw xyeem thiab tua tsiaj xyeem ua tsis tau kom tus uas pe hawm Vajtswv lub siab zoo hlo. Tej ntawd tsuas yog hais txog tej zaub mov thiab dej haus thiab tej kevcai ntxuav xwb, yog tej kevcai uas hais txog lub cev nqaij tawv mus txog lub sijhawm uas muab hloov dua tshiab. Tiamsis thaum Khetos los ua tus tuam pov thawj hlob uas tu txhua yam zoo uas twb los txog lawm, nws kuj nkag mus rau hauv lub tsev ntaub uas loj dua thiab zoo kawg nkaus uas tsis yog neeg txhais tes ua thiab tsis yog tsim rau hauv lub ntiajteb no. Nws nkag tib zaug rau hauv chav uas Dawb Huv Kawg Nkaus mas txaus lawm, thiab nws tsis coj ntshav tshis ntshav thav nyuj mus tiamsis coj nws cov ntshav mus ntag, thiaj txhiv tau neeg mus ib txhis. Yog tias ntshav tshis ntshav txiv nyuj thiab tshauv xyuas nyuj uas muab nchos rau saum tus uas qias tsis huv ntxuav tau nws lub cev nqaij tawv kom dawb huv, mas heev dua ntawd Khetos cov ntshav uas nws muab nws tus kheej uas tsis muaj ib qho chaw thuam xyeem rau Vajtswv ntawm Vaj Ntsuj Plig uas nyob mus ib txhis, kuj yimhuab ntxuav tau peb lub siab kom dawb huv ntawm tej haujlwm uas coj mus txog kev tuag kom peb thiaj mus ua koom tu Vajtswv uas muaj txojsia nyob. Vim li no Khetos yog tus uas nyob nruab nrab hauv tej lus cog tseg tshiab, kom txhua tus uas Vajtswv hu los thiaj tau txais qub txeeg qub teg uas nyob mus ib txhis raws li cog lus tseg, vim qhov uas ib tug tuag txhiv lawv dim hauv tej kev fav xeeb uas lawv ua rau thaum nyob hauv tej lus cog tseg qub qab kev tswjhwm. Hais txog tej ntawv uas sau faib qub txeeg qub teg ua ntej cia, kuj yuav tsum paub tseeb tias tus uas sau ntawv cia ntawd twb tuag lawm tiag. Yuav yog tus sau ntawv faib tuag lawm thiaj siv tau tsab ntawv ntawd. Yog tus sau tseem muaj txojsia nyob tsab ntawv faib ntawd kuj siv tsis tau. Yog li ntawd tej lus cog tseg zaum ib yeej yuav tsum muaj ntshav los thiaj siv tau. Vim thaum Mauxe piav tej kevcai txhua nqe rau cov pejxeem sawvdaws nws kuj muab ntshav menyuam nyuj thiab ntshav tshis thiab dej thiab plaub yaj liab thiab zaub txig theem los nchos rau thooj ntawv thiab cov pejxeem sawvdaws, thiab hais tias, “Cov ntshav no yog lub hom thawj uas nias rau tej lus cog tseg uas Vajtswv kom nej ua.” Thiab nws muab cov ntshav nchos rau lub tsev ntaub thiab txhua yam twj uas siv ua num rau Vajtswv ib yam nkaus. Qhov tseeb raws li txoj kevcai txhua yam yuav luag raug ntshav ntxuav kom dawb huv, yog tsis muaj ntshav los kuj tsis muaj kev zam txim li. Vim li no tej uas yog yam uas nyob saum ntuj tus yam ntxwv yuav tsum raug muab ntxuav kom dawb huv raws li tej kevcai ntawd, tiamsis tej uas yeej yog saum ntuj li mas yuav tsum muab tej uas tsim txiaj dua ntawd xyeem ntxuav. Rau qhov Khetos tsis tau nkag mus rau lub chaw dawb huv uas neeg txhais tes ua, uas zoo li tus qauv uas muaj tseeb, tiamsis nws cia li nkag mus rau hauv ntuj ceeb tsheej ntag thiaj li mus nyob ntawm Vajtswv lub xubntiag pab peb. Thiab tsis yog nws rov muab nws tus kheej xyeem tag xyeem thiab ib yam li tus tuam pov thawj hlob uas niaj xyoo nkag mus rau hauv chav Dawb Huv Kawg Nkaus thiab coj ntshav uas tsis yog nws li mus. Yog ua li ntawd Yexus yuav tsum raug kev tsim txom ntau zaus txij thaum tsim ntuj tsim teb los. Tiamsis qhov tseeb nimno nws tsuas los tshwm tib zaug rau tiam kawg no xwb thiaj rhuav tshem lub txim tag huvsi yog qhov uas nws muab nws tus kheej xyeem. Ib yam li uas teem cia rau neeg tuag tib zaug xwb thiab tom qab kuj raug txiav txim li cas, Khetos kuj zoo ib yam li ntawd. Nws tsuas raug muab xyeem tib zaug xwb thiaj ris tau neeg coob coob lub txim. Nws yuav los tshwm zaum ob tsis yog los rhuav tshem lub txim tiamsis coj txojkev dim los rau cov uas tos rawv nws. Vim tias txoj kevcai yog yam tsim txiaj uas yuav los tom qab tus duab xwb, tsis yog tus tseem, mas txoj kevcai uas hais kom niaj xyoo muab tsiaj xyeem li qub tsis tu ncua ua tsis tau rau cov uas los cuag Vajtswv ua neeg zoo kawg nkaus. Yog ua tau, ces lawv kuj tseg tsis muab tsiaj xyeem los tsis yog? Yog tus uas pe hawm Vajtswv raug muab ntxuav kom dawb huv ib zaug lawm, lawv kuj yuav tsis xav tias tseem muaj lub txim ntxiv mus. Tiamsis qhov uas xyeem tsiaj ntawd qhia kom niaj xyoo nco txog lub txim. Rau qhov ntshav txiv nyuj ntshav tshis ris tsis tau lub txim mus kiag li. Vim li no thaum Khetos los rau hauv lub ntiajteb lawd, nws hais tias, “Koj tsis xav yuav tej tsiaj thiab tej qhov txhia chaw uas muab xyeem, tiamsis koj npaj lub cev rau kuv. Qhov uas tua tsiaj hlawv xyeem thiab xyeem daws txim koj tsis txaus siab. Kuv hais tias, ‘Au Vajtswv, kuv tuaj lawm, yuav ua raws li koj lub siab nyiam, raws li uas sau txog kuv rau hauv thooj ntawv.’ ” Nws xub hais tias, “Tej tsiaj uas tua xyeem thiab tej qhov txhia chaw uas muab xyeem thiab tej uas hlawv xyeem thiab tej uas xyeem daws txim, koj tsis xav yuav thiab koj tsis txaus siab rau,” tej no yog tej uas muab xyeem raws li txoj kevcai xwb. Thiab nws hais tias, “Kuv tuaj lawm, yuav ua raws li koj lub siab nyiam.” Nws thiaj rhuav txoj qub kev ntawd lawm kom thiaj rhawv tau txoj tshiab. Vim Yexus ua raws li Vajtswv lub siab nyiam, peb thiaj raug muab cais ua neeg dawb huv vim qhov uas muab Yexus Khetos lub cev xyeem tib zaug xwb kuj txaus lawm. Txhua tus pov thawj kuj niaj hnub sawv ntsug ua nws tes haujlwm, thiab coj tib yam qub tuaj xyeem tsis tu ncua li, tej ntawd yeej ris tsis tau lub txim mus kiag li. Tiamsis thaum Khetos xyeem tib zaug xwb daws tau mus ib txhis, nws zaum ntawm Vajtswv sab tes xis, tos txog thaum nws cov yeeb ncuab raug muab los ua chaw tiag nws xib taws. Qhov uas muab nws xyeem tib zaug xwb, Yexus kuj ua rau cov uas tabtom muab cais ua dawb huv ua tau neeg zoo kawg nkaus mus ib txhis. Vaj Ntsuj Plig uas dawb huv kuj ua timkhawv rau peb. Nws xub hais tias, “No yog tej lus cog tseg uas kuv yuav cog rau lawv ua qab ncua sijhawm ntawd. Tus Tswv hais li no ntag. Kuv yuav muab kuv txoj kevcai tso rau hauv lawv thiab sau cia rau hauv lawv lub siab.” Thiab nws hais tias, “Kuv yuav tsis cim ntsoov lawv lub txim thiab lawv tej kev txhaum dua li lawm.” Thaum muaj kev zam txim lawm kuj tsis txog muaj kev xyeem daws txim dua li lawm. Vim li no, cov kwvtij, vim muaj Yexus cov ntshav peb thiaj muaj cuabkav nkag mus rau hauv lub chaw Dawb Huv Kawg Nkaus, yog taug txojkev tshiab thiab txojkev muaj txojsia uas nws qheb rau peb hla daim ntaub mus, vim muaj nws lub cev. Thiab vim peb muaj ib tug pov thawj loj kav Vajtswv tsev neeg lawm, peb cia li ua lub siab dawb paug nkag mus ze thiab muaj lub siab ntseeg ruaj, muaj lub siab uas raug muab ntshav nchos kom tsis muaj ib qho phem kiag li thiab muaj lub cev uas raus dej ntshiab ntxuav kom dawb huv. Peb cia li tuav txojkev vam uas peb lees yuav ntawd ruaj tsis txhob ywj fab ywj fwj, vim tus uas cog lus tseg ntawd tso siab tau. Peb cia li ua tib zoo saib yuav ua li cas ib leeg thiaj txhawb tau ib leeg lub zog kom sib hlub thiab ua haujlwm zoo, thiab tsis txhob tseg qhov uas tuaj txoos ua ke yam li qee leej txeev tseg, tiamsis ib leeg yuav tsum txhawb ib leeg lub siab, thiab yimhuab yuav tsum ua tej no vim nej paub tias hnub uas teem cia los ze lawm. Thaum peb twb paub txojkev tseeb lawm, yog peb tseem txhob txwm ua txhaum kuj tsis muaj ib yam dabtsi uas muab xyeem daws tau peb lub txim dua li lawm, tsuas muaj uas yuav tos txojkev teem txim uas ntshai rwg thiab hluavtaws uas cig hlob heev uas yuav kub cov uas tawm tsam Vajtswv. Tus uas tso Mauxe txoj kevcai tseg yog muaj ob leeg lossis peb leeg ua timkhawv lawm, tus ntawd yuav raug muab tua tuag tsis khuvleej li. Nej sim xav saib tus uas tsuj Vajtswv tus tub thiab ua qias puas tsuas cov ntshav uas cog lus tseg uas muab nws cais ua dawb huv lawm thiab saib tsis taus Vaj Ntsuj Plig uas pub txojkev hlub mas tsim nyog tus ntawd yuav raug txim hnyav heev dua npaum li cas? Rau qhov peb paub Vajtswv tus uas hais tias, “Qhov uas ua pauj yog kuv li feem thiab kuv yuav pauj rau.” Thiab hais dua tias, “Tus Tswv yuav txiav txim rau nws haiv neeg.” Qhov uas poob rau hauv Vajtswv uas muaj txojsia nyob txhais tes yog qhov uas txaus ntshai kawg. Tiamsis nej cia li nco txog yav nram ntej uas nej tau txais txojkev kaj lawm nej tau tiv thev tej kev txom nyem loj kawg, qee zaum nej raug thuam thiab raug tsim txom tab meeg sawvdaws, thiab qee zaum nej kuj nrog cov uas raug tsim txom li ntawd koom ua ke. Rau qhov nej kuj mob siab cov uas raug kaw, thiab thaum luag lws nej tej cuab txhiaj cuab tam coj mus nej kuj zoo siab hlo, vim nej paub tias nej muaj cuab txhiaj cuab tam uas zoo dua li tej ntawd thiab yuav nyob mus li. Vim li no tsis txhob muab nej lub siab tuab uas yuav coj nqe zog ntau heev los rau nej tso tseg. Vim nej yuav tsum muaj lub siab thev taus kom nej thiaj ua tau raws li Vajtswv lub siab thiab nej thiaj tau tej uas cog lus cia lawd. Tshuav tsis ntev, “tus uas yuav los yeej yuav los, nws yuav tsis tos ntev. Tiamsis tus uas kuv suav tias ncaj ncees yuav muaj txojsia nyob vim nws ntseeg Vajtswv. Yog nws thim rov qab, kuv yuav tsis txaus siab rau nws.” Tiamsis peb tsis yog cov uas thim rov qab thiab raug kev puam tsuaj. Peb yog cov uas ntseeg thiaj tuav tau peb txojsia. Kev ntseeg yog qhov uas ruaj siab rau tej uas vam ntsoov, yog qhov uas cia siab tias tej uas qhov muag tsis tau pom muaj tseeb. Vim cov neeg yav thaum ub ntseeg lawv thiaj hum Vajtswv siab. Vim peb ntseeg peb thiaj nkag siab tias Vajtswv lo lus tsim ntuj tsim teb, mas yam uas qhov muag pom thiaj li tshwm ntawm yam uas qhov muag tsis pom los. Vim Anpee ntseeg nws thiaj muab tej uas zoo dua Khayee li xyeem rau Vajtswv. Vim nws ntseeg, Vajtswv thiaj suav tias nws ncaj ncees, yog Vajtswv pom zoo tej uas nws muab xyeem ntawd. Txawm yog Anpee tuag lawm los nws txojkev ntseeg tseem qhia peb. Vim Enauj ntseeg nws thiaj raug coj mus saum ntuj, nws thiaj tsis ntsib txojkev tuag. Tsis muaj leejtwg nrhiav tau nws vim Vajtswv twb coj nws mus lawm. Ua ntej uas tsis tau coj nws mus muaj lus timkhawv tias nws ua hum Vajtswv siab. Yog tsis muaj kev ntseeg yeej ua tsis tau hum Vajtswv siab li. Rau qhov tus uas yuav los cuag Vajtswv yuav tsum ntseeg tias muaj Vajtswv tiag thiab nws pub nqe zog rau cov uas nrhiav nws. Vim Nau‑a ntseeg, thaum Vajtswv qhia tej xwm txheej uas qhov muag tsis tau pom, nws thiaj paub ntshai thiab ua ib lub nkoj txwg cawm nws tsev neeg dim. Vim txojkev ntseeg ntawd nws thiaj rau txim rau lub ntiajteb, thiab nws saws tau txojkev ncaj ncees uas yog los ntawm txojkev ntseeg. Vim Aplahas ntseeg, thaum nws raug hu kom tawm mus rau lub chaw uas yuav tau ua nws qub txeeg qub teg nws kuj mloog lus thiab taug kev mus tsis paub tias yuav mus rau qhovtwg. Vim nws ntseeg nws thiaj ua qhua nyob hauv lub tebchaws uas Vajtswv cog lus. Nws nyob hauv lub tsev ntaub ib yam li Yiha thiab Yakhauj uas nrog nws saws qub txeeg qub teg raws li tib lo lus cog tseg ntawd. Nws tos rawv lub nroog uas tsim tsa rau saum tej taw tiag uas Vajtswv tsim thiab Vajtswv ua. Vim Aplahas ntseeg, txawm yog nws laus heev lawm thiab Xala kuj xeeb tsis taus menyuam los nws tau hwjchim uas yuav muaj tub vim nws suav tias Vajtswv uas cog lus tseg lawm yog tus uas tso siab tau. Yog li no tus txivneej uas zoo li twb tuag lawm kuj muaj caj ces yug los coob yam li tej hnub qub saum nruab ntug thiab yam li tej xuab zeb uas suav tsis txheeb ntawm ntug hiavtxwv. Cov neeg no huvsi tuag tag rau thaum tseem muaj txojkev ntseeg thiab tsis tau txais tej uas cog lus cia tiamsis lawv kuj pom tej ntawd deb deb thiab zoo siab tos txais. Lawv lees hais tias lawv tsis muaj teb tsis muaj chaw nyob hauv ntiajteb no, lawv tuaj ua qhua xwb. Vim tias cov neeg uas hais li no kuj ua kom pom tias lawv tabtom nrhiav lub tebchaws uas yog lawv teej lawv tug. Yog lawv xav txog lub tebchaws uas lawv tawm tuaj lawd lawv kuj yuav muaj sijhawm rov qab mus tau. Tiamsis lawv yeej xav tau lub tebchaws uas zoo dua ntawd, yog lub tebchaws saum ntuj ceeb tsheej. Vim li no, Vajtswv thiaj tsis txaj muag uas raug hu tias yog lawv tus Vajtswv rau qhov nws twb npaj ib lub nroog cia rau lawv lawm. Vim Aplahas ntseeg, thaum nws raug sim siab, nws kuj muab Yiha xyeem, thiab nws yog tus uas tau txais tej lus cog tseg los nws kuj npaj txhij yuav muab nws tib tug tub xyeem, yog tus tub uas muaj lus hais tias, “Koj caj ces yuav yog tshwm ntawm Yiha mus.” Aplahas ntseeg tias Vajtswv tsa tau cov neeg tuag ciaj sawv rov los. Piv ib yam li, Aplahas kuj tau nws tus tub rov qab los ntag. Vim Yiha ntseeg, nws thiaj foom koob hmoov rau Yakhauj thiab Exau txog tej xwm txheej uas yuav tshwm los. Vim Yakhauj ntseeg, thaum nws yuav tuag nws thiaj foom koob hmoov rau Yauxej ob tug tub, thiab nws nyo hau rau saum nws tus hau pas nrig pe hawm Vajtswv. Vim Yauxej ntseeg, thaum yuav tag nws sim neej, nws thiaj hais txog qhov uas cov Yixayee yuav khiav dim thiab hais tseg txog nws cov pob txha. Vim Mauxe niam txiv ntseeg, thaum yug nws los ob tug thiaj muab nws zais tau peb lub hlis, vim pom tias nws zoo nraug heev thiab ob tug tsis ntshai vajntxwv tej lus kiag li. Vim Mauxe ntseeg, thaum nws hlob lawd nws thiaj tsis yeem kom hu hais tias nws yog Falau tus ntxhais li tub, tiamsis nws xaiv qhov uas nrog Vajtswv cov neeg raug txom nyem zoo dua li qhov uas nyob ua lomzem ib vuag dua hauv txojkev txhaum. Nws suav tias qhov uas raug thuam vim saib rau Khetos muaj nqes dua tej cuab txhiaj cuab tam hauv Iyi tebchaws, vim nws xam pom tej nqe zog uas nws tseem yuav tau. Vim nws ntseeg, nws thiaj tawm hauv Iyi tebchaws tsis ntshai qhov uas vajntxwv npau taws. Nws ua siab ntev thev cuag li nws pom tus uas neeg qhov muag tsis pom. Vim nws ntseeg, nws thiaj ua kevcai Hla Dhau thiab muab cov ntshav nchos kom tus uas ua kom puam tsuaj thiaj tsis kov Yixayee tej tub hlob. Vim cov Yixayee ntseeg, lawv thiaj hla tau Dej Hiavtxwv Liab ib yam li mus saum nruab nqhuab. Tiamsis thaum cov Iyi sim hla mus lawv kuj raug dej nphau los nyab tuag tag. Vim muaj txojkev ntseeg tej ntsa loog Yelikhau thiaj pob tag rau thaum cov Yixayee ncig mus puv xya hnub. Vim tus poj muag cev Lahaj ntseeg, nws thiaj tsis nrog cov uas tsis mloog lus raug puam tsuaj, vim nws tos txais ob tug uas tshuaj tebchaws zoo heev. Kuv yuav hais dabtsi ntxiv mus? Rau qhov tsis muaj sijhawm txaus uas yuav hais txog Kide‑oo, Npala, Xaxoo, Yetha, Davi thiab Xamuyee thiab cov xibhwb cev Vajtswv lus. Vim lawv ntseeg lawv thiaj kov yeej tebchaws, txiav txim ncaj ncees, tau txais tej uas Vajtswv cog lus tseg, kaw tsov ntxhuav qhov ncauj, tua tau tej hluavtaws uas kub heev, dim hniav ntaj hniav riam, cov uas tsaug leeg rov ua cov uas muaj zog, muaj zog ua rog thiab ntaus lwm lub tebchaws tej tub rog thim rov qab. Cov pojniam kuj tau lawv tej neeg uas tuag lawd sawv rov los. Qee leej raug kev tsim txom thiab tsis yeem cia tso kom dim kom lawv thiaj tau ciaj sawv los tau txojsia uas zoo dua. Qee leej raug thuam luag thiab raug nplawm thiab raug saw hlau khi kaw hauv tsev lojfaj. Lawv raug xuas pob zeb ntaus, lawv raug muab kaw txiav ua ob ya, lawv raug tuag hniav ntaj, lawv hnav tawv yaj tawv tshis mus rau tom ub tom no, lawv tsis muaj ib yam dabtsi, raug txom nyem kawg, raug ua nruj ua tsiv. Lub ntiajteb no tsis phim rau lawv nyob. Lawv mus mus los los hauv tebchaws moj sab qhua thiab saum tej roob, thiab nyob hauv tej qhov tsua thiab qhov av. Txawm yog muaj timkhawv zoo rau cov neeg no txhua tus txojkev ntseeg, los lawv tseem tsis tau txais tej uas cog lus cia, vim Vajtswv twb npaj tej uas zoo dua ntawd cia rau peb kom lawv tsuas yog nrog peb ua ke xwb thiaj ua tau neeg zoo kawg nkaus. Yog li ntawd, vim peb muaj timkhawv coob nyob puag ncig peb yam li tauv huab laum nkaus peb li no lawm, kuj cia peb muab txhua yam nra hnyav thiab lub txim uas yoojyim khi tau peb tso tseg, thiab peb cia li ua siab ntev thev sib tw dhia hauv txojkev uas nyob tom peb hauv ntej. Peb cia li ntsia ntsoov Yexus uas yog peb lub hauv paus kev ntseeg thiab yog tus uas ua kom txojkev ntseeg tiav. Nws tiv thev tus khaublig ntoo kom thiaj tau txojkev zoo siab uas nyob tom nws hauv ntej. Nws tsis quav ntsej qhov uas raug txaj muag, thiab nws twb zaum ntawm Vajtswv lub zwm txwv sab xis lawm. Nej cia li xav txog tus uas thev cov neeg muaj txim kev tawm tsam li no xwv nej thiaj tsis ntog thiab tsis poob siab. Qhov uas tawm tsam lub txim nej tsis tau tawm tsam txog los ntshav. Thiab nej tsis nco tej lus uas nws ntuas nej ib yam li nej yog nws li tub, hais tias, “Kuv tub 'e, tsis txhob saib tsis taus tus Tswv tej lus qhuab qhia, thiab tsis txhob poob siab rau thaum nws ntuas koj, rau qhov tus Tswv qhuab ntuas tus uas nws hlub, thiab nws nplawm txhua tus tub uas nws txais yuav.” Nej cia li thev tej uas nej raug vim yog kev qhuab qhia. Vajtswv ua rau nej ib yam nej yog nws li tub. Muaj tus tub twg uas leej txiv tsis qhuab qhia? Yog nej tsis raug qhuab qhia yam li txhua tus raug, nej kuj yog menyuam tsaub tsis yog nws li tub. Tsis tag li ntawd, peb muaj leej txiv ntawm lub cev nqaij tawv uas qhuab qhia peb thiab peb hwm lawv. Peb yimhuab tsim nyog nyob hauv leej Txiv sab ntsuj plig qab kev tswjhwm thiaj muaj txojsia nyob los tsis yog? Peb leej txiv qhuab qhia peb ib nyuag ntu raws li lawv pom zoo, tiamsis Vajtswv qhuab qhia kom muaj qabhau rau peb kom peb thiaj koom tau nws txojkev dawb huv. Txhua yam kev nplawm qhuab qhia saib mas tsis yog qhov zoo siab tiamsis yog qhov nyuaj siab rau lub sijhawm ntawd. Tiamsis muaj txiaj ntsig rau yav tom qab, yog ua rau cov uas xyaum raws li tau nyob kaj siab lug thiab tau txojkev ncaj ncees. Yog li no cia li txhawb nej txhais tes uas tsis muaj zog thiab lub hauv caug uas tsaug leeg, thiab kho txojkev kom ncaj rau nej txhais kotaw, kom tus uas ceg tawv thiaj tsis qes ceg tiamsis yuav zoo kiag. Cia li siv zog nrog txhua tus nyob sib hum xeeb thiab nrhiav kev dawb huv. Yog tsis muaj kev dawb huv lawm yuav tsis muaj leejtwg pom tau Vajtswv li. Cia li ceev faj zoo tsis txhob cia leejtwg plam Vajtswv txojkev hlub, thiab tsis txhob muaj tus cag iab tawm tuaj tsim kev ceeblaj thiab ua rau ntau leej qias tsis huv. Tsis txhob cia leejtwg ua nkauj ua nraug lossis tsis hwm Vajtswv li Exau uas muab feem uas ua tij muag pauv tib pluag mov noj xwb. Nej yeej paub tias los rau yav tom qab thaum Exau xav tau tej koob hmoov ua qub txeeg qub teg, nws kuj raug muab tso tseg, txawm yog nws nrhiav los kua muag los nws ua tsis tau kom leej txiv hloov siab. Rau qhov nej tsis tau los txog lub roob uas xuas tes kov tau thiab muaj hluavtaws cig thiab muaj qhov tsaus ntuj thiab qhov tsaus dub nciab thiab cua daj cua dub, thiab muaj suab raj kub yaj thiab muaj lub suab hais lus. Thaum cov uas hnov lawd lawv thov kom tsis txhob hais dua rau lawv lawm, vim lawv thev tsis tau tej lus nkaw uas hais tias, “Txawm yog tsiaj txhu tuaj nphav lub roob no kuj yuav raug xuas pob zeb ntaus kom tuag.” Tej uas pom ntawd mas ntshai kawg, Mauxe thiaj hais tias, “Kuv ntshai tshee hnyo.” Tiamsis nej kuj los txog lub roob Xi‑oo thiab los txog Vajtswv uas muaj txojsia nyob lub nroog uas yog lub nroog Yeluxalees saum ntuj ceeb tsheej, thiab los txog cov tubtxib saum ntuj uas tuaj txoos ua ke zoo siab xyiv fab coob coob suav tsis txheeb, thiab los txog cov tub hlob uas raug hu ua ke thiab muaj npe sau cia rau hauv ntuj ceeb tsheej lawm, thiab los txog Vajtswv uas txiav txim rau txhua tus, thiab los txog cov neeg ncaj ncees tej ntsuj plig uas raug muab ua zoo kawg nkaus lawm, thiab los txog Yexus, uas ua tus nyob nruab nrab hauv tej lus cog tseg tshiab, thiab los txog cov ntshav uas muab nchos, yog cov ntshav uas hais txog tej yam zoo dua Anpee cov ntshav hais. Cia li ceev faj zoo tsis txhob tso tus uas hais ntawd tseg. Rau qhov yog lawv cov ntawd tsis dim vim lawv tsis lees yuav tus uas ntuas lawv hauv lub ntiajteb no, mas yog peb fee plhu ntawm tus uas ntuas saum ntuj tuaj peb yimhuab yuav tsis dim. Vajtswv lub suab uas hais thaum ntawd ua rau lub ntiajteb ntseeg nkaws tiamsis nimno nws cog lus tseg tias, “Tshuav dua ib zaug kuv tsis yog yuav co lub ntiajteb xwb tiamsis lub ntuj thiab.” Lo lus uas hais tias “Tshuav dua ib zaug” ntawd kuj yog qhia hais tias yam uas ntseeg nkaws ntawd yog tej uas tsim los lawd yuav raug muab rho coj mus kom yam uas tsis txawj ntseeg nkaws thiaj li nyob mus li. Yog li ntawd, vim peb tau lub tebchaws uas tsis ua zog lawm kuj cia peb ua Vajtswv tsaug, thiab cia peb pe hawm Vajtswv ua kom hum nws lub siab thiab paub hwm thiab paub ntshai nws, vim “peb tus Vajtswv yog nplaim taws kub ceev.” Cia li sib hlub yam li kwvtij mus li. Tsis txhob tseg qhov uas txais tej qhua txawv ntsej muag, qhov uas ua li no qee leej thiaj txais tubtxib saum ntuj los twb tsis paub. Cia li nco ntsoov cov uas raug kaw ib yam li yog nej nrog lawv raug kaw thiab. Thiab nco ntsoov cov uas raug ua nruj ua tsiv ib yam li yog nej lub cev raug thiab. Nej txhua tus yuav tsum saib taus qhov uas sib yuav, thiab tsis txhob ua qias puas tsuas nej lub cev txij nkawm, rau qhov Vajtswv yuav txiav txim rau cov uas ua nkauj ua nraug thiab deev luag poj luag txiv. Nej tsis txhob xam pom nyiaj txiag xwb, cia li txaus siab rau tej uas nej muaj vim Vajtswv hais tias, “Kuv yuav tsis ncaim koj thiab yuav tsis tso koj tseg kiag li.” Vim li no peb thiaj ruaj siab hais tau tias, “Tus Tswv yog tus pab kuv, kuv tsis ntshai li. Neeg yuav ua li cas tau rau kuv?” Cia li nco txog cov uas coj nej, yog cov uas hais Vajtswv txojlus rau nej. Cia li tshuaj saib lawv lub neej thaum kawg thiab yoog raws li lawv txojkev ntseeg. Yexus Khetos zoo ib yam li qub, nag thiab hnub no thiab mus ib txhis. Tsis txhob yuam kev raws txhua yam lus qhia txawv txawv. Qhov uas zoo, yuav tsum cia txojkev hlub txhawb yus lub siab tsis yog qhov uas coj raws li tej kab ke kev noj kev haus uas tsis muaj qabhau rau cov uas ua raws li ntawd. Peb muaj ib lub thaj xyeem mas cov uas ua haujlwm hauv lub tsev ntaub tsis muaj feem noj yam uas nyob saum lub thaj ntawd. Tej tsiaj uas tus tuam pov thawj hlob coj cov ntshav mus xyeem daws txim rau hauv chav Dawb Huv Kawg Nkaus, tej tsiaj ntawd lub cev muab hlawv rau nraum ntug zos. Vim li no Yexus thiaj li raug tsim txom sab nraum lub rooj loog ib yam nkaus xwv nws cov ntshav thiaj cais tau neeg kom dawb huv. Vim li no peb cia li tawm mus cuag nws sab nraum ntug zos thiab ris txojkev txaj muag uas nws raug. Vim tias peb tsis muaj lub nroog uas ruaj khov nyob ntawm no tiamsis peb nrhiav lub nroog uas yuav los. Vim li no cia peb muab tej lus qhuas ua yam uas xyeem rau Vajtswv mus tsis tu li rau hauv Yexus, yog xyeem tej lus ntawm lub qhov ncauj uas lees yuav nws lub npe. Tsis txhob tseg qhov uas ua zoo thiab qhov uas muab qhov txhia chaw faib rau luag, vim tej uas muab xyeem li no hum Vajtswv lub siab. Cia li mloog cov uas coj nej lus thiab nyob hauv lawv qab kev tswjhwm, vim lawv yog cov uas zov tu nej tus ntsuj plig thiab lawv yuav tsum qhia lawv tes haujlwm rau Vajtswv. Cia ua rau lawv ua haujlwm xyiv fab hlo tsis yog ua nyuaj siab qas ntsuav uas yuav tsis muaj qabhau rau nej kiag li. Cia li thov Vajtswv pab peb, vim peb ruaj siab tias peb muaj lub siab dawb paug, xav xyaum zoo rau txhua fab. Kuv thov thov nej siv zog thov Vajtswv li no kom kuv thiaj tau rov los nrog nej nyob sai sai li. Nimno kuv thov Vajtswv uas pub txojkev siab tus thiab tsa peb tus Tswv Yexus uas yog tus Tswv yug yaj loj kawg ciaj sawv hauv qhov tuag rov los, ntawm cov ntshav uas cog tseg mus ib txhis, pub kom nej muaj txhua yam zoo txhij zog kom nej thiaj ua raws li Vajtswv lub siab nyiam, thiab thov nws ua tej uas nws pom zoo rau hauv peb, rau hauv Yexus Khetos. Thov nws tau koob meej ci tsa iab mus ib txhis tsis kawg. Amee. Cov kwvtij, kuv thov nej ua siab ntev mloog tej lus ntuas no, rau qhov kuv sau tsis ntau pes tsawg rau nej xwb. Kuv xav kom nej paub tias peb tus kwv Timaute twb raug tso dim lawm. Yog nws tuaj txog sai kuv yuav nrog nws tuaj saib nej. Kuv thov hais lus nco txog rau nej cov thawj thiab Vajtswv cov xov dawb sawvdaws. Cov kwvtij uas tuaj ntawm Ithali tebchaws tuaj kuj hais lus nco txog nej thiab. Thov Vajtswv txojkev hlub nrog nraim nej txhua tus. Yakaunpau uas yog Vajtswv thiab tus Tswv Yexus Khetos tus tub qhe hais mus rau kaum ob xeem uas khiav mus nyob rau txhua qhov, thov kom nej noj qab nyob zoo. Kuv cov kwvtij, thaum nej ntsib txhua yam kev sim siab cia li suav tias yog yam uas zoo siab heev, vim nej yeej paub tias qhov uas nej txojkev ntseeg raug sim ntawd ua kom muaj siab ntev thev taus. Nej yuav tsum ua siab ntev thev kom tiav xwv nej thiaj ua tau neeg zoo kawg nkaus muaj txhua yam zoo txhij zog tsis tu ncua ib yam dabtsi li. Yog nej cov leejtwg tsis muaj tswvyim, cia tus ntawd thov Vajtswv uas muaj lub siab dav pub rau txhua tus tsis thuam leejtwg li, mas Vajtswv yuav pub tswvyim rau nws. Tiamsis nws yuav tsum muaj lub siab ntseeg yam uas nws thov, tsis txhob ua xyem xyav, vim tus uas ua xyem xyav kuj zoo ib yam li tej nthwv dej hiavtxwv uas cua ntsawj ntas mus ntas los. Tus neeg zoo li ntawd tsis txhob xav hais tias nws yuav tau ib yam dabtsi ntawm tus Tswv, nws pheej ua ob lub siab tsis ruaj siab rau hauv nws txhua txojkev. Cia tus uas ua lub neej txom nyem zoo siab hlo rau thaum nws lub neej sawv, thiab cia tus uas nplua nuj zoo siab hlo rau thaum nws lub neej poob qes, rau qhov nws yuav dua tag yam li tej paj nroj. Lub hnub tuaj tshav ntuj kub heev ces ua rau tej nroj tsuag tuag tshav. Tej paj nroj zeeg tag thiab qhov uas zoo nkauj kuj puam tsuaj tag. Tus nplua nuj kuj yuav ploj zuj zus rau hauv nws tej haujlwm ib yam nkaus. Tus uas thev taus kev sim siab kuj tau nyob kaj siab lug, vim thaum nws thev dhau lawd nws yuav tau lub mom kub uas yog txojsia uas Vajtswv cog lus cia rau cov uas hlub Vajtswv. Leejtwg raug dag ntxias nws tsis txhob hais tias, “Kuv raug Vajtswv ntxias,” rau qhov Vajtswv yeej tsis raug txojkev phem ntxias thiab nws kuj tsis ntxias leejtwg li. Tiamsis txhua tus raug ntxias rau thaum nws txojkev ntshaw yaum nws thiab coj nws mus ua txhaum. Thaum xeeb txojkev ntshaw lawm kuj yug tau txojkev txhaum los. Thaum txojkev txhaum hlob tiav lawm kuj yug tau txojkev tuag los. Cov kwvtij uas kuv hlub, nej tsis txhob mloog luag ntxias. Txhua yam zoo uas pub rau peb thiab txhua yam uas zoo kawg nkaus yog los saum ntuj los, yeej yog los ntawm leej Txiv uas tsim lub hnub lub hli thiab tej hnub qub huvsi. Nws tsis txawv txav li tsis thooj li tej duab uas txawj ploj. Nws siv nws txojlus uas muaj tseeb yug peb tshwm los raws li nws twb npaj siab lawm kom peb thiaj zoo li thawj phaum txiv hauv txhua yam uas nws tsim ntag. Cov kwvtij uas kuv hlub, cia li nkag siab qhov no. Txhua tus yuav tsum maj mloog tsis txhob maj hais, tsis txhob chim sai, vim neeg txojkev chim tsis rhawv Vajtswv txojkev ncaj ncees tshwm los. Vim li no cia li rhuav tshem txhua yam kev qias thiab tej kev phem uas huam zuj zus tuaj thiab ua siab mos siab muag txais tej lus uas muab cog cia rau hauv nej lawd uas cawm tau nej tus ntsuj plig kom dim. Nej yuav tsum xyaum raws li tej lus ntawd tsis txhob yog mloog xwb thiaj tsis rov ntxias nej tus kheej. Yog leejtwg tsuas yog mloog tej lus ntawd xwb tsis xyaum raws li ntawd tus ntawd kuj zoo ib yam li tus uas saib nws lub ntsej muag hauv daim iav. Thaum nws saib tag nws tawm mus thiab tamsim ntawd kuj tsis nco qab xyov nws lub plhu zoo li cas. Tiamsis tus uas tshuaj saib txoj kevcai uas zoo kawg nkaus, yog txoj kevcai uas pub kev thaj yeeb, thiab nws nyob ruaj hauv txoj kevcai ntawd tsis yog mloog xwb es tsis nco qab lawm tiamsis yog tus uas xyaum raws nraim, tus ntawd yuav tau txojkev kaj siab lug hauv txhua yam uas nws ua. Yog leejtwg xav hais tias nws coj Vajtswv txoj kevcai nruj tiamsis nws tsis tswj nws tus nplaig kuj yog nws rov ntxias nws lub siab xwb thiab qhov uas nws coj txoj kevcai nruj ntawd kuj tsis muaj qabhau. Txoj kevcai uas leej Txiv Vajtswv suav tias dawb huv thiab tsis muaj qhov phem yog qhov uas saib xyuas tej menyuam ntsuag thiab tej poj ntsuam uas raug kev txom nyem, thiab ceev faj tsis txhob cia yus tus kheej kis tej kev phem kev qias hauv ntiajteb. Kuv cov kwvtij, nej muaj kev ntseeg hauv peb tus Tswv Yexus Khetos uas muaj hwjchim ci ntsa iab, nej tsis txhob saib leejtwg ntsej muag. Yog tias muaj ib tug coj nplhaib kub thiab hnav tsoos tsho zoo tuaj rau hauv nej lub chaw sablaj thiab muaj ib tug pluag hnav khaub hlab ntsuav tuaj thiab, mas nej saib hlob rau tus uas hnav tsoos tsho zoo thiab hais tias, “Cia li los zaum lub rooj siab no,” tiamsis nej hais rau tus pluag hais tias, “Koj cia li sawv tom kod,” lossis hais tias, “Los zaum ntawm kuv lub chaw tiag taw.” Ua li ntawd tsis yog nej sib cais ua pab ua pawg thiab tu faib raws nej lub siab xav phem lov? Cov kwvtij uas kuv hlub, cia li mloog. Vajtswv xaiv cov neeg pluag hauv ntiajteb no los ua cov nplua nuj hauv txojkev ntseeg thiab saws tau lub tebchaws uas Vajtswv cog lus tseg tias yuav pub rau cov uas hlub nws los ua qub txeeg qub teg los tsis yog? Tiamsis nej saib tsis taus tus pluag. Tus nplua nuj twb yog tus uas quab yuam nej, thiab cab nej mus rau tom tsev tu plaub los tsis yog? Lawv tsis yog cov uas saib tsis taus lub npe tsim txiaj uas hu nej puas lov? Yog nej yeej ua raws li Vajtswv lub tebchaws txoj kevcai uas sau cia hais tias, “Nej yuav tsum hlub kwvtij zej zog ib yam li nej hlub nej tus kheej,” kuj yog nej ua zoo. Tiamsis yog nej saib neeg ntsej muag, nej kuj ua txhaum thiab raug txoj kevcai txiav txim tias nej txhaum. Yog leejtwg tuav rawv txoj kevcai huvsi tsuas yog txhaum ib nqes xwb tus ntawd kuj ua txhaum txoj kevcai tag nrho huvsi. Rau qhov tus uas hais tias, “Tsis txhob deev luag poj luag txiv,” kuj hais tias “Tsis txhob tua neeg.”. Txawm yog koj tsis tau deev luag poj luag txiv tiamsis tau tua neeg, koj kuj ua txhaum txoj kevcai. Nej yuav tsum hais thiab xyaum yam li nej yog cov uas yuav raug txiav txim raws li txoj kevcai uas pub kev thaj yeeb. Vim tias tus uas tsis muaj siab khuvleej yuav raug txiav txim tsis khuvleej kiag li. Txojkev khuvleej yeej kov yeej txojkev txiav txim. Kuv cov kwvtij, yog leejtwg hais tias nws muaj kev ntseeg tiamsis nws tsis xyaum raws li, yuav muaj qabhau dabtsi? Nws txojkev ntseeg ntawd yuav cawm tau nws dim lov? Yog tus kwvtij twg tsis hais pojniam txivneej tsis muaj hnav thiab tu ncua tej mov uas niaj hnub yuav noj, es nej cov ib tug hais rau nws tias, “Cia li rov mus, noj qab nyob zoo, pw sov thiab tsau npo,” tiamsis tsis muab ib yam dabtsi rau tus ntawd li, yuav muaj qabhau dabtsi? Ib yam li ntawd, txojkev ntseeg xwb uas tsis muaj kev xyaum kuj yog yam uas tuag lawm. Tiamsis ib tug yuav hais tias, “Koj muaj kev ntseeg, kuv muaj kev xyaum.” Sim qhia rau kuv pom koj txojkev ntseeg uas tsis muaj kev xyaum, mas kuv yuav qhia rau koj pom kuv txojkev ntseeg ntawm qhov uas kuv xyaum. Koj ntseeg tias muaj tib tug Vajtswv xwb, kuj yog zoo. Txawm yog dab los kuj ntseeg thiab ntshai tshee hnyo. Tus neeg ruam, koj xav paub tias txojkev ntseeg uas tsis muaj kev xyaum tsis muaj qabhau lov? Thaum Aplahas uas yog peb yawg koob muab nws tus tub Yiha xyeem rau saum lub thaj nws thiaj raug suav tias yog tus ncaj ncees vim qhov uas nws xyaum los tsis yog? Koj kuj pom tias txojkev ntseeg thiab txojkev xyaum yeej ua ib txig thiab kev xyaum ua rau txojkev ntseeg tiav, thiab Vajtswv txojlus kuj tiav raws li hais tias, “Aplahas ntseeg Vajtswv. Vajtswv suav tias qhov uas Aplahas ntseeg ntawd yog txojkev ncaj ncees rau Aplahas,” thiab Aplahas tau lub npe hu ua Vajtswv tus kwvluag. Nej yeej pom tias ib tug twg raug suav tias ncaj ncees vim qhov uas nws xyaum tsis yog qhov uas ntseeg xwb. Thiab ib yam li ntawd tus poj muag cev Lahaj kuj raug suav tias ncaj ncees vim yog qhov uas nws xyaum rau thaum nws tos txais ob tug uas tshuaj tebchaws thiab xa ob tug tawm dua lwm txojkev mus los tsis yog? Lub cev uas tsis muaj ntsuj plig lawd tuag li cas, txojkev ntseeg uas tsis muaj kev xyaum kuj tuag ib yam li ntawd. Kuv cov kwvtij, nej tsis txhob ua xibhwb coob leej rau qhov nej yeej paub tias peb cov uas qhuab qhia yuav raug txiav txim nruj dua, vim tias peb txhua tus ua yuam kev ntau yam. Yog leejtwg tsis tau hais lus yuam kev li tus ntawd kuj yog tus uas zoo kawg nkaus thiab tswj tau nws lub cev huvsi. Yog peb muab xauv los sam nees qhov ncauj kom mloog lus, peb kuj tswj tau nees lub cev huvsi. Sim saib tej nkoj txwg kuj ib yam. Txawm yog loj thiab raug cua ntsawj hlob heev, los daim duav me me tseem tswj tau lub nkoj mus raws li tus tsav nkoj xav kom lub nkoj mus. Ib yam li ntawd tus nplaig yog yam me me tiamsis khav theeb loj heev. Sim xav saib ib nyuag qhov hluavtaws kub tau hav zoov dav heev npaum li cas. Tus nplaig yog hluavtaws, tus nplaig yog yam uas phem puv nkaus rau hauv peb lub cev, nws ua rau lub cev huvsi qias tsis huv thiab hlawv txojsia tag mus ib sim neej, thiab tus nplaig zes taws ntawm ntuj tawg kub los. Txhua yam tsiaj nas noog thiab tej tsiaj nkag hauv av thiab tej tsiaj hauv hiavtxwv puavleej cob tau kom seej thiab neeg los cob tau kom seej thiab, tiamsis tus nplaig tsis muaj leejtwg cob tau kom seej. Tus nplaig phem kawg nyob tsis tus thiab puv nkaus tej taug uas ua kom tuag. Peb siv tus nplaig qhuas tus Tswv uas yog leej Txiv thiab siv tsawm foom neeg uas raug tsim raws li Vajtswv tus yam ntxwv. Lo lus qhuas thiab lo lus tsawm foom tawm hauv tib lub qhov ncauj los. Cov kwvtij, tsis tsim nyog ua li ntawd. Lub qhov dej txhawv yuav muaj dej tsuag thiab dej qab ntsev txhawv ua ke hauv tib lub qhov los tau thiab lov? Cov kwvtij, tsob txiv cev txi tau txiv aulib lov, lossis tsob txiv hmab txi tau txiv cev lov? Lub qhov dej txhawv qab ntsev yeej tsis txhawv dej tsuag. Nej cov leejtwg muaj tswvyim thiab nkag siab? Cia tus ntawd xyaum nws lub neej kom zoo thiab ua ob yam no tshwm los, thiab ua nws tes haujlwm ntawm lub siab mos siab muag thiab muaj tswvyim. Tiamsis yog nej cib nyeej khib siab thiab xav ua loj, tsis txhob khav theeb thiab tsis txhob ntxeev txojkev tseeb. Lub tswvyim zoo li no tsis yog lub tswvyim uas los saum ntuj los, tiamsis yog tswvyim hauv ntiajteb thiab yog lub cev nqaij daim tawv li thiab los ntawm dab los. Qhov twg muaj kev sib khib thiab xav ua loj, qhov ntawd yuav muaj kev kub ntxhov thiab ua txhua yam kev phem kev qias. Tiamsis lub tswvyim uas los saum ntuj los, qhov ib yog dawb huv, thiab ua kom nyob sib hum xeeb, ua siab zam xeeb, yoojyim hais lus, muaj txojkev khuvleej puv npo thiab ua tau txhua yam haujlwm zoo, tsis saib leejtwg ntsej muag thiab tsis ua siab nkhaus. Cov uas tsim kev sib hum xeeb thiab tseb txojkev sib hum yuav tau sau txojkev ncaj ncees. Dabtsi ua kom muaj kev ua rog thiab muaj kev sib cav sib ceg rau hauv nej? Twb yog los ntawm tej kev ntshaw uas ua rog rau hauv nej lub siab los tsis yog? Nej xav yuav tiamsis tsis tau, nej txawm sib tua. Nej ntshaw los tsis tau nej txawm sib ceg thiab ua rog. Nej tsis muaj vim nej tsis thov. Nej thov los tsis tau, vim nej thov yuam kev, yuav coj mus siv kom tau tej uas nej lub siab ntshaw. Nej cov neeg fav xeeb, nej tsis paub tias qhov uas nrog ntiajteb ua kwvluag twb nrog Vajtswv ua yeeb ncuab lov? Vim li no leejtwg nrog ntiajteb ua kwvluag nws kuj nrog Vajtswv ua yeeb ncuab. Nej xav tias qhov uas Vajtswv txojlus hais tias, “Tus ntsuj plig uas Vajtswv pub nyob rau hauv peb khib xeeb heev kawg,” tsis muaj qabhau lov? Tiamsis Vajtswv pub txojkev hlub ntau dua. Vim li no muaj lus hais tias, “Vajtswv tawm tsam cov uas khav theeb, tiamsis pub txojkev hlub rau cov uas txo hwjchim.” Vim li no nej cia li nyob hauv Vajtswv qab kev tswjhwm. Cia li tawm tsam Ntxwg Nyoog, Ntxwg Nyoog thiaj li khiav ntawm nej mus. Cia li txav los ze Vajtswv mas nws yuav los ze nej. Nej cov neeg muaj txim, cia li ntxuav nej txhais tes kom huv. Nej cov uas muaj ob lub siab, cia li ntxuav nej lub siab kom dawb huv. Cia li txhawj xeeb thiab quaj ntsuag thiab quaj. Cia nej lub suab luag ntxeev ua lub suab quaj ntsuag, thiab cia nej kev xyiv fab ntxeev ua kev poob siab. Nej cia li txo nej lub siab rau ntawm tus Tswv, nws thiaj li tsa nej sawv. Cov kwvtij, nej ib leeg tsis txhob muab ib leeg hais phem. Tus uas muab kwvtij hais phem lossis txiav txim rau kwvtij kuj yog muab txoj kevcai hais phem thiab thuam txoj kevcai. Yog koj thuam txoj kevcai koj kuj tsis yog xyaum raws li txoj kevcai tiamsis yog tus uas thuam xwb. Muaj tib tug rhawv txoj kevcai thiab ua tus txiav txim, nws cawm tau kom dim thiab ua kom puam tsuaj tau. Tiamsis koj yog leejtwg es koj yuav txiav txim rau koj kwvtij zej zog? Nej cov uas hais tias, “Hnub no lossis tagkis peb yuav mus rau lub moos ub lub moos no thiab nyob ntawd ib xyoos ua lag ua luam kom tau tshaj thawj,” mloog tib zoo ov. Tiamsis nej twb tsis paub yuav muaj xwm dabtsi rau tagkis. Nej txojsia zoo li cas? Kuj zoo ib yam li tej huab uas nyob ib pliag xwb kuj ploj tag lawm. Tsis txhob hais li ntawd, tsim nyog nej hais tias, “Yog Vajtswv pom zoo, peb yuav muaj txojsia nyob thiab yuav ua yam ub yam no.” Tiamsis nimno nej muab hlob thiab khav theeb. Txhua yam kev khav theeb li ntawd yog kev phem. Vim li no tus uas paub qhov zoo uas nws yuav tsum ua tiamsis tsis ua, tus ntawd thiaj muaj txim. Nej cov uas nplua nuj, mloog tib zoo ov. Cia li quaj thiab quaj ntsuag vim tej kev txom nyem uas tabtom yuav los raug nej. Nej tej cuab txhiaj cuab tam po tag thiab nej tej tsoos tsho kab ntsaum muab noj tag. Nej tej nyiaj tej kub twb xeb tag lawm thiab tej xeb ntawd yuav ua timkhawv tom nej thiab yuav noj nej lub cev nqaij ib yam li hluavtaws hlawv. Nej khaws nyiaj txiag cia rau lub sijhawm kawg no. Saib maj, nej cov tub zog hlais qoob hauv nej daim teb tej nqe zog uas koj muab qaum lawd, twb qw nrov tuaj, thiab cov tub zog uas sau qoob ntawd lub suab twb nrov mus txog tus Tswv uas muaj hwjchim loj kawg nkaus lub qhov ntsej. Nej ua neej nyob noj seem noj so phum lam qas ntsuav rau hauv lub ntiajteb. Nej txav kom nej rog cia rau hnub uas muab tua. Nej rau txim thiab tua tus neeg tsis txhaum. Nws kuj tsis tiv nej. Vim li no, cov kwvtij, cia li ua siab ntev thev mus txog thaum tus Tswv rov los. Saib maj, cov tub qoob tub loo tos rawv tej qoob muaj nqes uas yuav tau hauv daim teb, nws ua siab ntev tos txog nag tshiab los thiab nag qab xyoos los. Nej yuav tsum ua siab ntev tos ib yam li ntawd thiab ua lub siab ruaj, rau qhov ze lub sijhawm uas tus Tswv rov los lawm. Cov kwvtij, nej ib leeg tsis txhob yws ib leeg xwv thiaj tsis raug txiav txim. Saib maj, tus uas txiav txim twb sawv ntawm qhov rooj lawm. Cov kwvtij, cia li muab cov xibhwb uas tuav tus Tswv lub npe cev lus tus qauv los rau nej xyaum thev kev tsim txom thiab ua siab ntev tos. Saib maj, peb suav tias cov uas ua siab ntev thev kuj tau nyob kaj siab lug. Nej twb hnov txog qhov uas Yauj ua siab ntev thev, thiab pom tej uas tus Tswv ua rau nws thaum kawg, vim tus Tswv muaj kev tab ncuab thiab kev khuvleej. Kuv cov kwvtij, qhov uas tseem ceeb dua tej huvsi, tsis txhob twv tsawm tsis hais twv ntuj twv teb lossis tuav txog lwm yam twv. Qhov yog kuj hais tias “Yog.” Qhov tsis yog kuj hais tias “Tsis yog,” xwv nej thiaj tsis raug txim. Nej cov leejtwg raug txom nyem? Cia tus ntawd thov Vajtswv. Muaj leejtwg xyiv fab? Cia tus ntawd hu nkauj qhuas. Nej cov muaj leejtwg muaj mob? Cia tus ntawd hu cov uas saib xyuas pawg ntseeg tuaj thiab cia lawv thov Vajtswv pab nws thiab muab roj pleev nws hauv tus Tswv lub npe. Tej lus thov uas muaj siab ntseeg yuav kho tus mob zoo thiab tus Tswv yuav tsa nws sawv. Yog nws tau ua txhaum, tus Tswv yuav zam txim. Vim li no nej ib leeg yuav tsum lees txim rau ib leeg, thiab ib leeg thov Vajtswv pab ib leeg xwv thiaj kho nej tej mob zoo. Tus ncaj ncees tej lus thov muaj hwjchim ua tau tiav. Eliya kuj yog neeg zoo ib yam li peb. Nws siv zog thov Vajtswv kom nag tsis txhob los, mas nag tsis los rau hauv lub tebchaws tau peb xyoos thiab rau lub hli. Nws rov thov Vajtswv dua ib zaug, lub ntuj kuj pub nag los thiab cov av kuj tuaj qoob loo. Kuv cov kwvtij, yog nej cov leejtwg yuam kev ntawm txoj tseeb thiab muaj neeg coj nws rov los, cia li paub tias tus uas coj tus uas ua txhaum rov los kuj yog nws cawm tau tus uas ua txhaum ntawd tus ntsuj plig dim txojkev tuag thiab roos tau tej kev txhaum uas ntau kawg. Petus uas yog Yexus Khetos tus tubtxib hais mus rau cov uas khiav mus nyob ua lwm haiv neeg rau txhua qhov hauv lub xeev Phauthia, lub xeev Kalatia, lub xeev Khapadaukia, lub xeev Axia thiab lub xeev Npithinia, yog cov uas Vajtswv xaiv cia lawd, raws li leej Txiv Vajtswv tau teem cia ua ntej lawd, thiab Vaj Ntsuj Plig tau muab cais ua tus dawb huv kom mloog Yexus Khetos lus thiab raug Yexus cov ntshav nchos rau. Thov Vajtswv txojkev hlub thiab txojkev siab tus tsav ntxiv rau nej ntau zuj zus. Qhuas Vajtswv uas yog peb tus Tswv Yexus Khetos leej Txiv. Vim Vajtswv txojkev khuvleej uas loj kawg, nws thiaj pub peb yug dua tshiab koom txojkev vam uas ciaj sia nyob mus ib txhis, vim qhov uas Yexus Khetos ciaj sawv hauv qhov tuag rov los, thiab koom tej qub txeeg qub teg uas tsis txawj lwj, tsis muaj qhov phem qhov qias thiab tsis txawj ploj uas twb khaws cia rau saum ntuj rau nej lawm. Vim nej ntseeg, Vajtswv lub hwjchim twb tsom kwm nej kom tau txojkev dim uas npaj txhij yuav tshwm los rau hnub kawg. Nej xyiv fab kawg rau tej no, txawm yog nimno nej raug ntau yam kev sim siab ib nyuag ntu kuj xij. Tej kev sim siab ntawd sim nej txojkev ntseeg saib puas muaj tseeb. (Nej txojkev ntseeg muaj nqes dua kub uas txawj ploj tag los tseem raug hluavtaws sim.) Peb thiaj yuav raug qhuas thiab tau meej mom thiab koob meej rau thaum Yexus Khetos rov los. Nws yog tus uas nej tsis tau pom dua los nej tseem hlub nws. Txawm yog nimno nej tsis pom nws los nej tseem ntseeg thiab muaj kev zoo siab xyiv fab heev kawg uas piav tsis txawj tag, vim nej txais yam uas nej txojkev ntseeg vam ntsoov, yog qhov uas nej tus ntsuj plig tau txojkev dim. Cov xibhwb cev Vajtswv lus uas hais txog Vajtswv txojkev hlub uas yuav tshwm los rau nej twb nrhiav thiab xawb txhua zog txojkev dim no. Lawv tshawb nrhiav tus neeg thiab lub sijhawm uas Khetos tus ntsuj plig uas nyob hauv lawv qhia rau lawv, rau thaum nws hais ua ntej txog qhov uas Khetos yuav raug kev tsim txom thiab hais txog lub hwjchim ci ntsa iab uas yuav tshwm los tom qab ntawd. Vajtswv qhia lawv paub hais tias lawv tsis yog tu lawv tus kheej tiamsis tu nej rau tej uas lawv hais no, yog tej uas nimno cov uas tshaj tawm txoj xov zoo twb tshaj tawm rau nej ntawm Vaj Ntsuj Plig dawb huv uas raug txib saum ntuj los lawm, yog tej uas cov tubtxib saum ntuj xav pom. Vim li no nej lub siab cia li npaj kom txhij, paub tswj nej tus kheej thiab cia li vam tag nrho rau txojkev hlub uas yuav pub rau nej rau thaum Yexus Khetos rov los. Ib yam li tus menyuam uas mloog lus, tsis txhob xyaum raws li nej tej kev ntshaw uas nej muaj thaum ub uas nej tsis paub qabhau dabtsi li. Tiamsis tus uas hu nej dawb huv li cas, nej yuav tsum ua neeg dawb huv rau txhua yam uas nej ua ib yam li ntawd, rau qhov muaj lus sau cia hais tias, “Nej yuav tsum ua neeg dawb huv, vim kuv yog tus dawb huv.” Vim nej thov hu leej Txiv uas txiav txim rau txhua tus raws li lawv tau ua los lawd tsis saib leejtwg ntsej muag, nej cia li ua nej lub neej ntshai rwg rau thaum nej ua qhua nyob hauv ntiajteb no. Nej kuj paub tias nej raug txhiv dim hauv lub neej uas tsis muaj qabhau uas nej saws ntawm nej tej poj koob yawm txwv los. Yam uas txhiv nej los ntawd tsis yog yam uas txawj puam tsuaj yam li nyiaj thiab kub, tiamsis yog Khetos cov ntshav muaj nqes, ib yam li tus menyuam yaj uas tsis muaj chaw thuam thiab tsis muaj ib qho phem cov ntshav. Twb muab Yexus npaj tseg cia thaum tsis tau tsim ntuj tsim teb lawm, tiamsis nws tshwm los rau tiam kawg no pab nej. Vim muaj Yexus nej thiaj tso siab rau Vajtswv uas tsa Yexus ciaj sawv hauv qhov tuag rov los thiab pub hwjchim ci ntsa iab rau nws, nej thiaj muaj kev ntseeg thiab kev vam rau hauv Vajtswv. Vim nej ua raws li txojkev tseeb thiaj ntxuav tau nej lub siab kom dawb huv lawm, nej thiaj muaj lub siab txawj sib hlub tuaj nruab siab tiag tiag, nej cia li siv zog sib hlub ntawm lub siab dawb paug. Nej twb yug dua tshiab lawm, tsis yog lub noob uas txawj lwj tag tiamsis yog lub noob uas tsis txawj lwj, vim Vajtswv txojlus uas muaj txojsia thiab nyob mus li. Rau qhov, “Ib tsoom neeg zoo yam li tej nroj tsuag, thiab lawv lub meej mom tsuas zoo li tej paj nroj. Tej nroj tsuag tuag tshav qhuav, tej paj kuj zeeg, tiamsis tus Tswv tej lus yuav nyob ruaj mus ib txhis.” Tej lus no yog txoj xov zoo uas twb piav tag rau nej lawm. Vim li no, cia li muab txhua yam kev phem thiab txhua yam kev dag ntxias, kev zais siab, kev sib khib thiab kev xyav luag moo txhua yam tso tseg. Ib yam li cov menyuam mos uas nyuam qhuav yug, nej cia li ntshaw cov kua mis dawb huv sab ntsuj plig, xwv cov kua mis ntawd thiaj pab nej kheev hlob mus tau txojkev dim, rau qhov nej twb sim tias tus Tswv zoo kawg nkaus. Cia li los cuag nws, yog lub pob zeb uas muaj txojsia uas neeg tsis lees yuav tiamsis twb raug Vajtswv xaiv lawm thiab tsim txiaj kawg. Nej zoo yam li tej pob zeb muaj sia cia li yeem muab ua lub tsev rau sab ntsuj plig, kom thiaj ua tau pov thawj dawb huv xyeem qhov txhia chaw sab ntsuj plig uas hum Vajtswv lub siab hauv Yexus Khetos. Vim muaj lus sau cia rau hauv Vajtswv txojlus hais tias, “Saib maj, kuv teeb ib lub pob zeb rau hauv Xi‑oo, yog ua lub thawj pob zeb uas xaiv cia thiab tsim txiaj kawg ntawm kaum tsev. Tus uas ntseeg nws yuav tsis raug txaj muag.” Vim li no tus Tswv muaj nqes kawg nkaus rau nej cov uas ntseeg, tiamsis hais txog cov uas tsis ntseeg mas “Lub pob zeb uas cov Kws ua tsev muab xyeeb tseg lawm twb rov muab los teeb ua thawj lub rau ntawm kaum tsev lawm.” thiab “ua lub pob zeb uas ua rau neeg dawm, thiab ua txhib zeb uas ua rau neeg ntog.” Lawv dawm vim lawv tsis mloog Vajtswv txojlus raws li uas tu tseg rau lawv. Tiamsis nej yog haiv neeg uas xaiv cia lawm, yog Vajntxwv cov pov thawj thiab ua neeg dawb huv, yog cov neeg uas ua Vajtswv tug, kom nej thiaj qhia nws tes haujlwm tseem ceeb, yog tus uas hu nej tawm hauv qhov tsaus ntuj los nyob rau hauv nws qhov kaj uas phimhwj kawg. Yav tag los nej tsis yog nws haiv neeg tiamsis nimno nej yog Vajtswv haiv neeg lawm. Yav tag los nej tsis tau txais kev khuvleej tiamsis nimno nej tau txais kev khuvleej lawm. Cov uas kuv hlub, kuv thov kom nej cov uas zoo li lwm haiv neeg tuaj ua qhua nyob hauv lub ntiajteb no tseg tej uas lub cev nqaij tawv ntshaw uas tawm tsam nej tus ntsuj plig. Cia li ua zoo kawg nkaus rau hauv lwm haiv neeg xwv yog lawv hais tias nej ua txhaum, lawv thiaj pom tej uas nej ua zoo thiab yuav qhuas Vajtswv rau hnub uas nws los xyuas. Nej yuav tsum nyob hauv txhua tus uas muaj hwjchim qab kev tswjhwm vim saib rau tus Tswv, tsis hais tus ntawd yuav yog huabtais uas muaj hwjchim lossis cov tswv xeev uas vajntxwv txib mus txiav txim rau cov uas ua txhaum thiab qhuas cov uas ua zoo. Vajtswv xav kom nej xyaum zoo kom thiaj ua rau cov neeg ruam uas hais lus tsis muaj qabhau tseg tsis hais lawm. Nej cia li ua lub neej yam li uas nyob ywj pheej tiamsis tsis txhob muab qhov uas nyob ywj pheej ntawd los mus ua txhaum. Tiamsis nej yuav tsum ua nej lub neej yam li yog Vajtswv cov tub qhe. Cia li hwm txhua tus, hlub cov kwvtij, paub ntshai Vajtswv, thiab hwm huabtais. Nej cov uas yog tub qhe, nej yuav tsum nyob hauv nej tus lospav qab kev tswjhwm thiab paub ntshai lawv txhua yam, tsis yog hwm tus uas siab zoo thiab hlub nej xwb tiamsis hwm tus uas ua nruj ua tsiv thiab. Vim qhov no hum Vajtswv lub siab, yog thaum ib tug twg xam pom Vajtswv nws thiaj thev kev mob rau thaum nws raug tej kev tsim txom uas tsis raug cai. Yog nej ua txhaum thiaj raug nplawm txawm yog nej ua siab ntev thev los nej yuav tau koob meej li cas? Tiamsis yog nej ua zoo thiaj raug kev tsim txom thiab ua siab ntev thev, thiaj yog ua hum Vajtswv lub siab. Vim Vajtswv hu nej los thev kev tsim txom li no, rau qhov Khetos twb raug kev tsim txom this nej, ua yam ntxwv tseg rau nej xwv nej thiaj tau taug raws nws tus neev taw. Nws tsis tau ua txhaum dabtsi li thiab “tsis pom muaj lus dag ntxias nyob hauv nws lub qhov ncauj li.” Thaum lawv hais lus phem rau nws, nws tsis hais phem pauj. Thaum nws raug tsim txom nws tsis hem lawv, tiamsis nws muab nws tus kheej cob rau tus uas txiav txim ncaj ncees. Nws ris peb lub txim rau hauv nws lub cev saum tus khaublig ntoo kom peb thiaj tuag ntawm lub txim thiab muaj txojsia nyob rau txojkev ncaj ncees. “Yog muaj nws tej kiav txhab thiaj kho tau peb kom zoo.” Rau qhov nej yuam kev yam li tej yaj, tiamsis nimno nej twb rov los cuag tus Tswv yug yaj thiab tus uas tsom kwm nej tus ntsuj plig lawm. Nej cov pojniam kuj ib yam nkaus, nej yuav tsum nyob hauv nej tus txiv qab kev tswjhwm. Txawm yog cov txiv qee leej tsis ntseeg Vajtswv txojlus los qhov uas cov pojniam xyaum zoo yuav coj tau cov txiv los ntseeg tsis txog hais ib los li, rau thaum lawv pom nej ua lub neej dawb huv thiab hwm lawv. Tsis txhob tu lub cev sab nraud xwb uas yog ntxias plaubhau, coj npauj kub lossis hnav tej tsoos tsho zoo zoo nkauj xwb. Tiamsis cia li muab tej uas tsis txawj lwj los tu tej uas nyob hauv nej lub siab kom zoo nkauj, yog qhov uas ua lub siab mos siab muag thiab muaj lub siab tus yees. Tej no yog yam uas Vajtswv pom tias muaj nqes heev. Cov pojniam dawb huv uas nyob txheej thaum ub uas muaj vam rau hauv Vajtswv kuj tu lawv lub cev thiab nyob hauv cov txiv qab kev tswjhwm li ntawd. Ib yam li Xala mloog Aplahas lus thiab hu Aplahas ua nws tus tswv. Yog nej xyaum zoo thiab tsis txhob ntshai ib yam dabtsi, nej kuj yog Xala tej tub ki. Nej cov txiv kuj ib yam nkaus, cia li nrog tus pojniam nyob thiab nkag siab tias cov pojniam tsis muaj zog li txivneej, thiab saib taus nws rau qhov nws nrog koj koom txais txojsia ntawm Vajtswv txojkev hlub xwv nej thiaj tsis muaj ib yam dabtsi khuam cheem nej tej lus thov. Thaum kawg no, nej sawvdaws cia li koom ua ib lub siab, ib leeg xam pom ib leeg, sib hlub, muaj lub siab khuvleej thiab ua siab mos siab muag. Tsis txhob ua phem pauj phem, thiab tsis txhob cem pauj qhov uas luag cem. Tiamsis cia li foom koob hmoov rau luag, rau qhov Vajtswv hu nej los ua li ntawd xwv nej thiaj tau koob hmoov. Vim tias “Tus uas nyiam txojsia thiab xav pom lub caij lub nyoog zoo, cia tus ntawd tswj nws tus nplaig tsis txhob hais lus phem, thiab tswj nws daim tawv ncauj tsis txhob hais tej lus dag. Cia nws tig ntawm txojkev phem thiab ua qhov zoo, cia nws nrhiav kev hum xeeb thiab caum kom cuag. Tus Tswv lub qhov muag yeej ntsia ntsoov cov uas ncaj ncees, thiab nws lub qhov ntsej mloog ntsoov lawv tej lus quaj thov. Tiamsis tus Tswv tsom ntsoov tawm tsam cov neeg ua phem.” Yog nej siv zog ua zoo, leejtwg yuav ua phem rau nej? Tiamsis yog nej raug kev tsim txom vim qhov uas nej ua raug cai, nej yuav tau nyob kaj siab lug. Tsis txhob ntshai tej uas lawv ntshai, tsis txhob txhawj, tiamsis hauv nej lub siab nej yuav tsum hwm Khetos ua tus Tswv. Cia li npaj txhij txhua lub sijhawm uas yuav piav rau txhua tus uas xav paub qhov uas nej muaj siab vam, tiamsis nej yuav tsum ua siab zam xeeb teb lawv thiab muab lawv saib hlob. Thiab cia li ua lub siab dawb paug xwv thaum nej raug luag hais phem cov uas thuam qhov uas nej xyaum zoo hauv Khetos thiaj raug txaj muag. Yog raws li Vajtswv lub siab nyiam mas qhov uas nej raug kev tsim txom vim yog ua zoo, kuj zoo dua raug kev tsim txom vim yog ua phem. Rau qhov Khetos tuag txhiv lub txim tib zaug xwb kuj txaus lawm, nws yog tus uas ncaj ncees this cov uas tsis ncaj, kom nws thiaj coj tau peb los cuag Vajtswv. Nws lub cev nqaij tawv raug muab tua tiamsis nws rov tau txojsia ntawm sab ntsuj plig. Nws tus ntsuj plig mus tshaj tawm rau cov ntsuj plig uas raug kaw, yog cov uas yav thaum ub tsis mloog Vajtswv lus. Vajtswv ua siab ntev rau lawv rau ncua sijhawm uas Nau‑a ua lub nkoj. Hauv lub nkoj ntawd neeg tsawg tsawg yog yim leej dim hauv cov dej. Cov dej ntawd piv txog qhov uas ua kevcai raus dej uas nimno pab nej dim, tsis yog ntxuav kev qias ntawm nej lub cev tiamsis yog tej lus cog tseg rau Vajtswv tias muaj lub siab dawb paug lawm. Txojkev dim ntawd yog tau ntawm qhov uas Yexus Khetos ciaj sawv rov los. Yexus mus saum ntuj thiab zaum ntawm Vajtswv sab tes xis lawm, muaj cov tubtxib saum ntuj thiab cov timtswv uas kav thiab tej hwjchim nyob hauv nws qab kev tswjhwm. Yog li ntawd, vim Khetos raug kev tsim txom ntawm cev nqaij tawv mas nej cia li tuav rawv tej cuab yeej uas yog muaj lub siab xav ib yam nkaus li nws, rau qhov tus uas raug kev tsim txom ntawm cev nqaij tawv twb tso kev txhaum tseg lawm, xwv lub sijhawm uas tseem tshuav rau nej nyob hauv cev nqaij tawv nej thiaj tsis ua raws li neeg txojkev ntshaw tiamsis ua raws li Vajtswv lub siab nyiam. Cia tej sijhawm uas dhau tag los txaus rau tej uas lwm haiv neeg nyiam ua, yog qhov uas ua dev, ua raws li lub siab phem ntshaw, qaug dej qaug cawv, noj txaus siab txaus ntsws, ua nqaj ua nqug thiab pe tej dab mlom uas ntxim ntxub. Lawv phimhwj tias nej tsis nrog lawv dhia mus ua phem ua qias phum lam qas ntsuav ib yam li lawv, thiab lawv iab hiam nej. Tiamsis lawv yuav qhia tej uas lawv ua lawd rau tus uas txiav txim rau cov ciaj thiab cov tuag. Vim li no txoj xov zoo thiaj raug muab piav rau cov neeg uas tuag tag lawm xwv lawv thiaj raug txiav txim rau sab nqaij tawv ib yam li neeg tiamsis muaj txojsia nyob rau sab ntsuj plig ib yam li Vajtswv. Lub sijhawm uas txhua yam yuav kawg los ze lawm. Vim li no nej cia li feeb meej thiab tswj nej lub siab kom thiaj zoo thov Vajtswv. Qhov uas tseem ceeb dua ntais huvsi, cia li siv zog sib hlub vim txojkev hlub tswj tau ntau yam kev txhaum. Nej ib leeg tos txais ib leeg tsis txhob yws li. Nej txhua tus yuav tsum siv tej tswvyim uas Vajtswv pub rau nyias ib leeg ua num rau ib leeg. Nej yog cov uas Vajtswv muab txhua yam kev hlub cob rau nej ua lawd. Yog leejtwg hais lus, cia li hais yam li yog hais Vajtswv tej lus, yog leejtwg ua num rau luag cia li siv lub zog uas Vajtswv pub rau nws ua, kom Vajtswv thiaj tau koob meej ntawm txhua yam hauv Yexus Khetos. Lub koob meej thiab lub hwjchim kav yeej yog nws li mus ib txhis tsis kawg. Amee. Cov kwvtij uas kuv hlub, tsis txhob poob siab rau tej kev tsim txom loj heev uas yuav los raug nej sim nej lub siab, tsis txhob xav tias yog ib yam phimhwj los tshwm raug nej. Tiamsis cia li xyiv fab rau qhov uas tau koom Yexus tej kev tsim txom, xwv thaum nws lub hwjchim ci ntsa iab tshwm los nej yuav zoo siab xyiv fab kawg. Yog nej raug luag thuam vim yog tim Khetos lub npe, nej yuav tau nyob kaj siab lug, vim Vaj Ntsuj Plig uas muaj hwjchim ci ntsa iab, uas yog Vajtswv tus Ntsuj Plig, nrog nraim nej nyob. Tsis txhob cia nej cov leejtwg raug kev tsim txom vim yog tua neeg, ua tub sab, ua phem lossis ua neeg tab kaum lwm tus. Tiamsis yog raug tsim txom vim yog ib tug Khixatia, tus ntawd tsis txhob txaj muag, cia nws pub koob meej rau Vajtswv vim yog lub npe ntawd. Twb txog lub sijhawm lawm uas yuav xub txiav txim rau Vajtswv tsev neeg ua ntej. Yog pib txiav txim rau peb ua ntej, cov neeg uas tsis mloog Vajtswv txoj xov zoo thaum kawg yuav zoo li cas? “Yog tus ncaj ncees twb ceeblaj dim tau, tus neeg phem thiab muaj txim yuav raug li cas?” Yog li no cia cov uas raug kev tsim txom raws li Vajtswv lub siab nyiam muab lawv tus ntsuj plig cob rau tus uas tsim uas peb tso siab tau, thiab cia li ua zoo mus li. Kuv thov ntuas nej cov uas saib xyuas pawg ntseeg. Kuv yog ib tug uas saib xyuas pawg ntseeg thiab ua timkhawv txog Khetos txojkev raug tsim txom thiab koom lub hwjchim ci ntsa iab uas yuav tshwm los. Cia li yug Vajtswv pab yaj uas nyob hauv nej [uas muab cob rau nej saib xyuas], tsis yog yuam nej lub siab tiamsis zoo siab ua [raws li Vajtswv lub siab nyiam], tsis yog ntshaw tej nyiaj txiag uas yuav tau tiamsis kub siab ua, tsis yog siv hwjchim quab yuam cov uas muab cob rau nej saib xyuas tiamsis ua yam ntxwv rau pab yaj xyaum. Mas thaum tus Tswv yaj uas loj kawg rov los nej yuav tau lub mom kub muaj meej uas tsis txawj qub. Ib yam li ntawd nej cov hluas yuav tsum nyob hauv cov saib xyuas pawg ntseeg qab kev tswjhwm. Nej txhua tus cia li muab qhov uas txo hwjchim ib leeg rau ib leeg los hnav, rau qhov “Vajtswv tawm tsam cov uas tsab ua loj, tiamsis nws hlub cov uas txo hwjchim.” Vim li no nej cia li txo nej nyob hauv Vajtswv txhais qab tes uas muaj hwjchim loj xwv thaum txog sijhawm Vajtswv thiaj li tsa nej sawv kom siab. Cia li muab nej txhua yam kev txhawj xeeb tso plhuav rau nws, vim nws mob siab nej. Cia li feeb meej thiab ceev faj zov tos. Nej tus yeeb ncuab uas yog Ntxwg Nyoog ncig mus ncig los zoo yam nkaus li tus tsov ntxhuav nyooj laws nrhiav tus uas yuav tom tau noj. Cia li muaj siab ruaj hauv txojkev ntseeg tiv thaiv nws, rau qhov nej paub tias nej cov kwvtij thoob plaws lub ntiajteb kuj raug kev tsim txom ib yam nkaus. Thaum nej raug kev tsim txom ib nyuag ntu, mas Vajtswv uas muaj txojkev hlub puv npo uas tau hu nej los koom nws lub hwjchim ci ntsa iab uas nyob mus ib txhis hauv Khetos, nws yuav pub nej nyob zoo li qub, yuav hwj nej nyob ruaj, pub zog rau nej thiab tsa nej nyob ruaj mus li. Thov cia nws muaj hwjchim kav mus ib txhis tsis kawg. Amee. Kuv kom Xivana uas kuv pom tias yog ib tug kwvtij uas tso siab tau sau tsab ntawv tsis ntau pes tsawg no tuaj rau nej. Kuv xav txhawb nej lub siab thiab ua timkhawv rau nej tias tej uas kuv sau no yog Vajtswv txojkev hlub tiag. Cia li nyob ruaj rau hauv txojkev hlub no. Tus uas nyob hauv lub nroog Npanpiloo uas raug xaiv los ntseeg ib yam nkaus thiab kuv tus tub Malakau hais lus nco txog tuaj rau nej. Cia li sib fim ntawm txoj kevcai nwj uas yog kev sib hlub. Thov txojkev siab tus nrog nraim nej cov uas nyob hauv Khetos. Ximoos Petus uas yog Yexus Khetos tus qhev thiab tus tubtxib hais mus rau cov uas tau txais txojkev ntseeg uas tsim txiaj kawg nkaus ib yam li peb ntawm Yexus Khetos uas yog peb tus Vajtswv thiab tus Cawmseej txojkev ncaj ncees. Thov txojkev hlub thiab txojkev siab tus tsav ntxiv rau nej ntau zuj zus rau thaum nej paub Vajtswv thiab Yexus uas yog peb tus Tswv. Vajtswv lub hwjchim pub txhua yam rau peb txojsia thiab qhov uas peb ua lub neej hwm Vajtswv, vim yog peb paub tus uas hu peb los koom nws lub hwjchim ci ntsa iab thiab qhov uas nws zoo kawg nkaus. Vim yog tej no nws thiaj pub nws tej lus cog tseg uas tsim txiaj kawg thiab loj kawg, mas vim tej lus cog tseg ntawd nej thiaj dim txojkev lwj lam hauv lub ntiajteb uas los ntawm txojkev ntshaw, thiab muaj lub neej zoo ib yam li Vajtswv lub. Vim li no nej yuav tsum siv zog kawg nkaus muab txojkev ua zoo kawg nkaus ntxiv rau txojkev ntseeg, thiab muab txojkev paub ntxiv rau txojkev ua zoo, thiab muab qhov uas tswj yus tus kheej ntxiv rau kev paub, thiab muab qhov uas ua siab ntev thev ntxiv rau qhov uas tswj tus kheej, thiab muab qhov uas hwm Vajtswv ntxiv rau qhov uas ua siab ntev thev, thiab muab qhov uas hlub kwvtij ntxiv rau qhov uas hwm Vajtswv, thiab muab txojkev sib hlub ntxiv rau qhov uas hlub kwvtij. Yog tej no nyob hauv nej thiab huaj vam nplua mias, mas tej no yuav ua rau nej tsis nkim zog thiab tawg paj txi txiv rau qhov uas paub peb tus Tswv Yexus Khetos. Tus uas tu ncua tej no kuj yog dig muag thiab pom kev tsis tseeb thiab tsis nco tias nws tej kev txhaum thaum ub twb raug muab ntxuav lawm. Vim li no, cov kwvtij, nej yuav tsum yimhuab siv zog heev dua qub ua rau qhov uas Vajtswv hu nej thiab xaiv nej nyob ruaj. Yog nej ua li no, tsis muaj ib hnub twg uas nej yuav ntog li, thiab yuav muaj txojkev npaj txhij zoo zoo rau nej nkag rau hauv peb tus Tswv Yexus Khetos uas yog peb tus Cawmseej lub tebchaws uas nyob mus ib txhis. Vim li no txawm yog nej twb paub thiab nyob ruaj hauv txojkev tseeb uas nej tau lawd los kuv yeej yuav niaj hnub ntuas kom nej nco ntsoov txog tej ntawd. Thaum kuv tseem muaj txojsia nyob hauv lub cev nqaij tawv, kuv pom tias tsim nyog txhob kom nej nco ntsoov, vim kuv paub tias tsis ntev kuv yuav ncaim lub cev no mus raws li peb tus Tswv Yexus Khetos twb qhia meej rau kuv lawd. Thiab kuv yuav siv zog ua rau nej nco ntsoov tej no rau thaum kuv ncaim nej mus lawd. Thaum peb piav rau nej paub txog peb tus Tswv Yexus Khetos lub hwjchim thiab qhov uas nws yuav rov los, peb tsis yog hais raws li tej dab neeg uas xav tswvyim hais, tiamsis peb qhov muag tau pom nws lub hwjchim meej mom ntag. Thaum Yexus tau txais koob meej thiab hwjchim ci ntsa iab ntawm leej Txiv Vajtswv thiab lub suab ntawm lub hwjchim ci ntsa iab uas loj kawg hais txog nws tias, “Tus no yog kuv tus Tub uas kuv hlub, kuv txaus siab rau nws heev.” peb kuj hnov lub suab no saum ntuj tuaj, rau thaum peb nrog nws nyob saum lub roob dawb huv ntawd. Thiab peb tuav cov xibhwb cev Vajtswv lus tej lus ruaj dua. Yog nej muab siab rau tej lus ntawd kuj zoo vim tej lus ntawd zoo yam li lub teeb uas ci hauv qhov chaw tsaus ntuj, mus txog kaj ntug es lub hnub qub toog thaum sawv ntxov tawm tuaj rau hauv nej lub siab. Nej yuav tsum nkag siab ua ntej tias tsis muaj leejtwg txhais tau tej lus cev uas nyob hauv Vajtswv txojlus lub ntsiab raws li nws lub siab, rau qhov tej lus uas cov xibhwb cev Vajtswv lus hais tsis yog hais raws li neeg xav, tiamsis Vaj Ntsuj Plig uas dawb huv kav neeg lub siab lawv thiaj hais tej lus uas los ntawm Vajtswv los. Tiamsis twb muaj cov cuav xibhwb cev lus uas tshwm rau hauv cov neeg ntawd lawm, mas yeej yuav muaj cov cuav xibhwb hauv nej ib yam nkaus. Lawv yuav nyiag coj tej lus qhia cuav uas ua kom puam tsuaj tuaj. Lawv kuj tsis lees yuav tus Tswv uas them nqe yuav lawv, mas thiaj coj kev puam tsuaj los raug lawv sai kawg. Yuav muaj neeg coob ua qias vuab tsuab raws li lawv ua, mas txojkev tseeb yuav raug thuam vim yog tim lawv. Lawv ua lub siab hlob, lawv thiaj hais tej lus dag ntxias nej kom lawv tau tshaj thawj. Kev rau txim twb teem cia rau lawv ntev los lawm yuav tsis tos ntev. Qhov uas lawv yuav raug puam tsuaj kuj tsis tsaug zog lawm. Rau qhov Vajtswv tsis zam txim rau cov tubtxib saum ntuj uas ua txhaum thaum ub, nws muab lawv laim rau hauv ntuj txiag teb tsaus thiab rau hauv tej qhov uas tsaus ntuj nti mus txog lub sijhawm uas txiav txim. Thiab nws tsis zam txim rau cov neeg txheej thaum ub tiamsis thaum Vajtswv tso dej los nyab lub ntiajteb uas cov neeg tsis hwm Vajtswv nyob, nws tsom kwm Nau‑a uas tshaj tawm txojkev ncaj ncees thiab xya leej. Thiab Vajtswv rau txim rau lub moos Xaudoo thiab lub moos Kaumaula ua kom puam tsuaj ciaj tshauv tag kom thiaj ua yam ntxwv rau cov neeg tsis hwm Vajtswv uas nyob yav tom qab, thiab nws cawm tau Lauj dim. Lauj yog tus ncaj ncees thiab ntxhov siab heev rau tej kev qias vuab tsuab uas cov neeg phem ua, rau qhov thaum tus ncaj ncees ntawd nyob hauv lawv nruab nrab, tej kev phem uas nws niaj hnub pom thiab hnov lawv ua ntawd ua rau nws lub siab uas ncaj ncees ntxhov tag. Yog li ntawd, tus Tswv yeej paub tias yuav cawm cov uas hwm Vajtswv dim txojkev sim siab tau li cas, thiab paub tias yuav muab cov neeg phem rau txim li cas mus txog hnub uas txiav txim rau sawvdaws, qhov loj kawg yog txiav txim rau cov neeg uas ua phem ua qias raws li lawv lub cev nqaij tawv ntshaw thiab saib tsis taus cov uas muaj hwjchim kav. Lawv ua siab tuab siab twm xeeb, lawv tsis ntshai qhov uas hais lus saib tsis taus cov tubtxib saum ntuj uas muaj hwjchim ci ntsa iab. Txawm yog cov tubtxib saum ntuj uas muaj zog thiab muaj hwjchim loj dua, los twb tsis hais lus saib tsis taus kom lawv cov ntawd rau ntawm tus Tswv lub xubntiag. Tiamsis cov cuav xibhwb no zoo nkaus li tej tsiaj txhu uas tsis txawj xav dabtsi, thiab ua raws li nws lub siab ntshaw, yug los rau luag ntes thiab muab tua xwb. Lawv hais lus saib tsis taus tej uas lawv tsis nkag siab, lawv yuav raug kev puam tsuaj ib yam li tej tsiaj txhu ntawd. Lawv yuav raug kev txom nyem pauj lawv tej kev phem. Lawv suav tias qhov uas ua nqaj ua nqug noj seem noj so nruab hnub yog kev lomzem. Lawv yog tej teev uas dub thiab qias puas tsuas. Thaum lawv nrog nej noj haus ua ke, lawv qw ua nqaj ua nqug qaug dej qaug cawv. Lawv lub qhov muag tsuas yog cus ciav rau kev ua nkauj ua nraug xwb, lawv ua txhaum tsis txawj pov khawv li. Lawv ntxias cov uas siab tsis ruaj. Lawv xyaum lawv lub siab kom xav yuav luag tug. Lawv yog cov noob uas raug tsawm foom. Lawv muab txojkev raug cai tso tseg yuam kev mus raws Npe‑au tus tub Npala‑as txojkev, yog tus uas nyiam tej nqe ntiav uas tau ntawm tej kev ua tsis ncaj. Nws kuj raug thuam rau qhov uas nws tsis mloog lus. Tus nees luav uas tsis txawj hais lus hais tau lus li neeg thiab tswj tus xibhwb cev lus ntawd txojkev ruam. Cov xibhwb ntawd yog lub qhov dej qhuav thiab cov huab uas cua daj cua dub ntsawj ya mus. Twb npaj qhov tsaus ntuj nti cia rau lawv lawm. Lawv hais lus khav theeb qhuav qhuav thiab muab tej kev phem uas lub cev nqaij tawv ntshaw los ntxias cov neeg uas tabtom khiav dim ntawm cov neeg uas ua lub neej yuam kev lawm. Lawv cog lus tias yuav pub cov neeg ntawd nyob ywj pheej, tiamsis lawv tus kheej tseem ua tej kev puam tsuaj qhev, rau qhov leejtwg kov tsis yeej yam twg, nws kuj ua yam ntawd qhev. Thaum lawv khiav dim txhua yam kev qias hauv ntiajteb lawm vim yog paub Yexus Khetos uas yog peb tus Tswv thiab yog peb tus Cawmseej, yog lawv rov mus mag thiab swb tej kev qias ntawd dua, mas thaum kawg lawv yimhuab raug kev phem dua thaum chiv thawj. Rau qhov yog lawv tsis paub txojkev ncaj ncees ntawd kiag li kuj tseem zoo dua li uas lawv paub lawm los tseem tig nrob qaum rau txoj kevcai dawb huv uas muab cob rau lawv ntawd. Tej uas tshwm los rau lawv kuj yog raws li lo paj lug uas hais tseeb tias, “Dev rov noj dev cov ntuav,” thiab “tus npua uas muab ntxuav huv lawm rov qab mus da pas kua av dua.” Cov uas kuv hlub, no yog tsab ntawv ob uas kuv sau tuaj rau nej, thiab ob tsab ntawv no kuv tshum nej lub siab kom nco ntsoov xav txog tej yam uas zoo, kom nej thiaj li nco ntsoov tej lus uas cov xibhwb cev Vajtswv lus uas dawb huv tau hais cia ua ntej thiab nco txog tus Tswv thiab tus Cawmseej tej lus nkaw uas nej cov tubtxib qhia. Nej yuav tsum paub qhov no ua ntej tias thaum lub sijhawm kawg cov uas nyiam thuam luag yuav tuaj thuam luag thiab ua raws li lawv lub siab phem ntshaw, thiab lawv yuav hais tias, “Tej lus cog tseg uas tus Tswv yuav los, nyob qhovtwg? Txij thaum tej poj koob yawm txwv twb tuag tag lawm txhua yam tseem zoo li thaum tsim ntuj tsim teb.” Lawv txhob txwm tsis nco qhov no, uas hais tias chiv keeb thaum ub Vajtswv lo lus hais, lub ntuj thiaj raug tsim thiab lub ntiajteb thiaj tshwm hauv dej los thiab nyob hauv nruab nrab cov dej. Vim cov dej ntawd lub ntiajteb uas nyob thaum ntawd thiaj raug dej nyab puam tsuaj. Vim Vajtswv tib los lus ntawd, lub ntuj thiab lub ntiajteb thiaj raug muab tu tseg cia rau hluavtaws, yog raug muab khaws cia rau hnub uas txiav txim rau cov neeg tsis hwm Vajtswv thiab ua kom puam tsuaj. Cov uas kuv hlub, nej cia li nco ntsoov nqe no. Ib hnub ntawm tus Tswv zoo li ib txhiab xyoo thiab ib txhiab xyoo kuj ntev li ib hnub xwb. Tus Tswv tsis sej nws tej lus cog tseg raws li qee leej xav ntawd tiamsis nws ua siab ntev rau nej, vim nws tsis xav cia leejtwg puam tsuaj, tiamsis xav kom txhua tus ntxeev dua siab tshiab. Tiamsis tus Tswv hnub yuav los li tub sab tuaj, thiab lub ntuj yuav ploj nrog lub suab nrov ntseeg nkaws mus thiab hluavtaws yuav kub txhua yam saum nruab ntug yaj tag, thiab lub ntiajteb thiab txhua yam uas nyob saum ntiajteb yuav kub hnyiab tag huvsi. Vim txhua yam yuav puam tsuaj tag li uas hais tag no tsim nyog nej yuav ua neeg zoo li cas? Nej yuav tsum ua lub neej dawb huv thiab hwm Vajtswv, thiab nej yuav tsum zov tos thiab txhib kom Vajtswv hnub los txog sai. Hnub ntawd lub ntuj yuav raug muab hlawv ploj tag thiab txhua yam saum nruab ntug yuav kub hnyiab yaj tag. Tiamsis raws li Vajtswv tej lus cog tseg peb tos rawv lub ntuj tshiab thiab lub ntiajteb tshiab uas txojkev ncaj ncees nyob hauv. Vim li no, cov uas kuv hlub, thaum nej tseem tos rawv tej no nej cia li kub siab lug ua nej lub neej rau Vajtswv pom tias nej tsis muaj ib qho phem, tsis muaj ib qho chaw thuam thiab nej nyob siab tus yees. Cia li suav tias qhov uas peb tus Tswv ua siab ntev rau peb kuj yog cia peb tau dim, ib yam li peb tus kwvtij Povlauj uas peb hlub tau sau ntawv tuaj rau nej raws li tej tswvyim uas pub rau nws lawm. Nws txhua tsab ntawv nws kuj hais txog zaj no lawm. Hauv tej tsab ntawv ntawd muaj qee yam uas ceeblaj nkag siab, tej neeg uas tsis paub qabhau thiab lub siab ywj fab ywj fwj thiaj tau muab lub ntsiab ntxeev lawm ib yam li lawv muab lwm nqe hauv Vajtswv txojlus ntxeev thiaj ua rau lawv raug kev puam tsuaj. Cov uas kuv hlub, vim nej paub zaj no ua ntej lawm nej cia li ceev faj tib zoo xwv nej thiaj tsis raug ntxias yuam kev raws li cov neeg phem ua, thiab nej yuav tsis muaj lub siab ruaj khov. Tiamsis nej cia li kheev hlob rau hauv tus Tswv Yexus Khetos uas yog peb tus Cawmseej txojkev hlub thiab paub nws zuj zus. Thov kom nws tau koob meej ci ntsa iab nimno thiab mus ib txhis tsis kawg. [Amee.] Peb qhia txog yam uas muaj nyob txij thaum chiv keeb los uas peb tau hnov thiab peb qhov muag tau pom thiab tau ua tib zoo saib thiab peb txhais tes tau kov, yog hais txog txojlus uas pub txojsia. Txojsia ntawd tau tshwm los thiab peb tau pom thiab ua timkhawv txog, thiab peb tau qhia rau nej paub txog txojsia ib txhis tsis kawg uas nrog nraim leej Txiv nyob thiab los tshwm rau peb. Yam uas peb tau pom thiab tau hnov lawd peb kuj qhia rau nej paub nej thiaj tau nrog peb sib raug zoo. Peb kuj nrog leej Txiv thiab nws tus tub Yexus Khetos sib raug zoo. Thiab peb sau tej lus no kom peb thiaj zoo siab kawg nkaus li. No yog tej lus uas peb tau hnov ntawm Yexus thiab peb qhia rau nej tias, Vajtswv yog txojkev kaj thiab tsis muaj ib qho kev tsaus ntuj nyob hauv nws kiag li. Yog peb hais tias peb nrog nws sib raug zoo tiamsis peb tseem taug txojkev tsaus ntuj, kuj yog peb dag thiab tsis ua lub neej raws li txojkev tseeb. Tiamsis yog peb taug txojkev kaj ib yam li nws nyob hauv txojkev kaj, peb thiaj muaj kev sib raug zoo ib leeg rau ib leeg, thiab nws leej Tub Yexus cov ntshav kuj ntxuav peb lub txim huvsi lawm. Yog peb hais tias peb tsis muaj txim, kuj yog peb rov dag peb tus kheej, thiab txojkev tseeb tsis nyob hauv peb kiag li. Yog peb lees peb lub txim Vajtswv ncaj ncees thiab tso siab tau, nws yuav daws peb lub txim thiab ntxuav peb tej kev phem huvsi mus. Yog peb hais tias peb tsis tau ua txhaum, kuj yog peb suav tias Vajtswv hais dag thiab nws tej lus tsis nyob hauv peb lawm. Kuv cov menyuam 'e, kuv sau tej lus no tuaj rau nej kom nej thiaj tsis ua txhaum. Yog leejtwg ua txhaum, peb muaj ib tug uas pab hais peb zaj rau leej Txiv, yog Yexus Khetos uas ncaj ncees, thiab nws yog yam uas muab xyeem ntxuav peb lub txim, tsis yog peb lub txim xwb tiamsis yog tag nrho lub ntiajteb li txim thiab. Yog peb tuav rawv nws tej lus qhia, peb thiaj ruaj siab hais tias peb paub Vajtswv. Tus uas hais tias, “Kuv paub Vajtswv,” tiamsis nws tsis ua raws li Vajtswv tej lus qhia, tus ntawd hais dag xwb, txojkev tseeb tsis nyob hauv nws kiag li. Tiamsis tus uas tuav rawv Vajtswv tej lus, tus ntawd thiaj hlub Vajtswv tiag tiag. Qhov uas peb paub tias peb nyob hauv Vajtswv yog li no, tus uas hais tias nws nyob hauv Vajtswv kuj tsim nyog tus ntawd ua lub neej raws li Yexus ua. Cov uas kuv hlub, kuv tsis yog sau txoj kevcai tshiab rau nej tiamsis yog txoj kevcai qub uas nej twb muaj thaum chiv thawj los lawm. Txoj qub kevcai ntawd yog tej lus uas nej twb hnov los lawm. Tiamsis dua ib fab kuj yog kuv sau txoj kevcai tshiab tuaj rau nej. Txoj kevcai ntawd muaj tseeb rau hauv Yexus thiab rau hauv nej, rau qhov txojkev tsaus ntuj tabtom dua mus thiab txojkev kaj uas tseeb tabtom ci tuaj. Tus uas hais tias nws nyob hauv txojkev kaj tiamsis nws tseem ntxub nws tus kwvtij tus ntawd tseem nyob hauv txojkev tsaus ntuj. Tus uas hlub nws tus kwvtij kuj nyob hauv txojkev kaj thiab nws tsis muaj ib yam dabtsi ua lub chaw dawm. Tiamsis tus uas ntxub nws tus kwvtij kuj yog nyob hauv txojkev tsaus ntuj thiab taug txojkev tsaus ntuj, nws tsis paub tias nws tabtom mus qhovtwg rau qhov txojkev tsaus ntuj ua rau nws qhov muag dig lawm. Nej cov menyuam yaus 'e, kuv sau tuaj rau nej vim nej lub txim twb raug muab daws lawm vim yog saib rau Yexus lub npe. Nej cov uas ua txiv, kuv sau tuaj rau nej vim nej twb paub tus uas nyob thaum chiv keeb los. Nej cov hluas, kuv sau tuaj rau nej vim nej twb kov yeej tus uas Phem lawm. Nej cov menyuam, kuv sau tuaj rau nej vim nej paub leej Txiv. Nej cov uas ua txiv, kuv sau tuaj rau nej vim nej paub tus uas nyob thaum chiv keeb los. Nej cov hluas, kuv sau tuaj rau nej vim nej muaj zog heev thiab Vajtswv tej lus nyob hauv nej thiab nej twb kov yeej tus uas Phem lawm. Tsis txhob nyiam kev ntiajteb thiab tej uas nyob hauv ntiajteb. Yog leejtwg nyiam kev ntiajteb, txojkev hlub Vajtswv tsis muaj nyob hauv tus ntawd. Txhua yam uas nyob hauv ntiajteb, yog tej uas lub cev nqaij tawv ntshaw, tej uas lub qhov muag ntshaw, thiab tej uas neeg khav theeb txog hauv lub neej, tsis yog los ntawm Vajtswv tiamsis los ntawm ntiajteb. Lub ntiajteb thiab tej uas lub ntiajteb ntshaw yuav dua mus, tiamsis tus uas ua raws li Vajtswv lub siab nyiam yuav nyob mus ib txhis. Cov menyuam 'e, nimno yog lub sijhawm kawg lawm. Raws li nej tau hnov hais tias Khetos tus yeeb ncuab yuav tuaj, nimno Khetos cov yeeb ncuab twb tuaj coob lawm. Vim li no peb thiaj paub tias nimno yog lub sijhawm kawg lawm. Lawv cov ntawd tawm ntawm peb mus lawm, tiamsis lawv tsis yog peb cov. Yog tias lawv yog peb cov, lawv kuj yuav nrog peb nyob ua ke mus. Tiamsis qhov uas lawv tawm mus ntawd twb qhia kom pom tseeb tias lawv tsis yog peb cov. Tiamsis tus uas Dawb Huv twb raug muab hliv rau nej lawm thiab nej txhua tus kuj paub qhov tseeb lawm. Kuv sau tuaj rau nej, tsis yog vim nej tsis paub qhov tseeb tiamsis nej twb paub lawm thiab paub tias tej lus dag tsis yog los ntawm qhov tseeb. Leejtwg yog tus dag? Tsuas yog tus uas tsis lees tias Yexus yog tus Khetos. Tus uas tsis lees leej Txiv thiab leej Tub tus ntawd yog Khetos tus yeeb ncuab. Txhua tus uas tsis lees yuav leej Tub kuj tsis muaj leej Txiv. Tus uas lees yuav leej Tub kuj muaj leej Txiv thiab. Nej yuav tsum khaws tej uas nej hnov thaum chiv thawj los lawd cia hauv nej mus li. Yog tej uas nej hnov thaum chiv thawj los ntawd nyob hauv nej, thiaj yog nej nyob ruaj hauv leej Tub thiab hauv leej Txiv mus li. No yog yam uas Vajtswv twb cog lus cia rau peb, yog txojsia ib txhis tsis kawg. Kuv sau tej lus no tuaj rau nej hais txog cov uas pheej dag ntxias nej. Tiamsis Vaj Ntsuj Plig uas Vajtswv hliv rau nej lawd tseem nyob hauv nej, tsis tag yuav muaj leejtwg qhia nej. Vim Vaj Ntsuj Plig uas nej txais lawd kuj qhia nej paub txhua yam thiab qhov uas hliv Vaj Ntsuj Plig rau nej muaj tseeb tsis yog dag, yog Vaj Ntsuj Plig qhia nej li cas, nej cia li nyob hauv Yexus li ntawd. Cov menyuam yaus 'e, nej cia li nyob ruaj hauv Yexus xwv thaum nws rov los peb thiaj li ruaj siab thiab tsis txaj muag rau ntawm nws xubntiag rau thaum nws los. Yog nej paub tias nws ncaj ncees, nej kuj paub tias txhua tus uas xyaum ncaj ncees kuj yug ntawm nws los. Sim xav saib leej Txiv hlub peb npaum li cas diam, peb thiaj raug hu tias yog Vajtswv cov menyuam, thiab peb yeej yog tiag. Qhov uas lub ntiajteb tsis paub peb twb yog vim lawv tsis paub nws. Nej cov uas kuv hlub, nimno peb yog Vajtswv cov menyuam. Peb yuav zoo li cas rau yav tom hauv ntej kuj tsis tau muab qhia tshwm rau peb. Tiamsis peb paub tias thaum Yexus rov los peb yuav zoo ib yam li nws, vim tias nws zoo li cas peb yuav pom nws tseeb li ntawd. Txhua tus uas muaj lub siab vam li no rau hauv Yexus kuj ntxuav nws tus kheej kom dawb huv ib yam li Yexus dawb huv. Txhua tus uas ua txhaum kuj rhuav txoj kevcai. Qhov uas ua txhaum yeej yog rhuav txoj kevcai. Nej twb paub lawm tias Yexus tshwm los ris peb lub txim mus, thiab Yexus tsis muaj txim kiag li. Txhua tus uas nyob ruaj hauv Yexus tsis ua txhaum. Tus uas pheej ua txhaum mus li kuj yog nws tsis tau pom Yexus thiab tsis paub Yexus. Cov menyuam yaus 'e, tsis txhob cia leejtwg ntxias nej yuam kev. Tus uas xyaum ua ncaj kuj ncaj ncees ib yam li Yexus yog tus ncaj ncees. Tus uas ua txhaum kuj yog los ntawm dab Ntxwg Nyoog los, rau qhov dab Ntxwg Nyoog yeej ua txhaum thaum chiv keeb los. Qhov uas Vajtswv tus tub tshwm los twb yog nws los rhuav dab Ntxwg Nyoog tes haujlwm. Txhua tus uas yug ntawm Vajtswv los tsis ua txhaum, rau qhov Vajtswv cov noob nyob hauv nws, nws thiaj ua txhaum tsis tau vim nws yug ntawm Vajtswv los. Raws li no thiaj pom tseeb tias leejtwg yog Vajtswv li menyuam leejtwg yog dab Ntxwg Nyoog li. Txhua tus uas tsis ua ncaj thiab tsis hlub nws li kwvtij kuj tsis yog los ntawm Vajtswv los. No yog tej lus qhuab qhia uas nej tau hnov thaum chiv thawj los hais tias peb ib leeg yuav tsum hlub ib leeg, tsis txhob zoo li Khayee uas los ntawm tus uas Phem los thiab muab nws tus kwv tua pov tseg. Ua cas nws yuav tua tus kwv? Twb yog vim nws tes haujlwm phem, nws tus kwv tes haujlwm ncaj ncees. Cov kwvtij, tsis txhob phimhwj rau qhov uas lub ntiajteb ntxub nej. Peb yeej paub tias peb twb tawm txojkev tuag mus tau txojsia lawm rau qhov peb hlub peb cov kwvtij. Tus uas tsis hlub ces tseem nyob hauv txojkev tuag. Txhua tus uas ntxub nws tus kwvtij kuj yog tus uas tua neeg, thiab nej paub tias tus uas tua neeg tsis muaj txojsia ib txhis tsis kawg nyob hauv nws. Peb paub txojkev hlub li no, yog qhov uas Yexus tso nws txojsia tseg this peb, thiab tsim nyog peb tso txojsia tseg this peb cov kwvtij thiab. Yog leejtwg muaj nyiaj txiag qhov txhia chaw hauv ntiajteb no thiab pom nws tus kwvtij pluag tseem tsis khuvleej nws, Vajtswv txojkev hlub yuav muaj nyob hauv tus ntawd tau li cas? Cov menyuam yaus 'e, peb tsis txhob sib hlub ntawm lo lus thiab ntawm lub ncauj xwb tiamsis yuav tsum hlub ntawm tes haujlwm thiab ntawm qhov tseeb. Yog li ntawd peb yuav paub tias peb nyob hauv txojkev tseeb, thiab peb yuav ruaj siab rau ntawm Vajtswv lub xubntiag yog rau thaum peb lub siab qhia tias peb ua txhaum, vim Vajtswv yog tus loj dua peb lub siab thiab paub txhua yam huvsi. Cov uas kuv hlub, yog peb lub siab tsis qhia tias peb txhaum, peb kuj muaj siab tuab rau ntawm Vajtswv lub xubntiag. Thiab yog peb thov yam twg Vajtswv kuj yuav pub yam ntawd rau peb vim peb tuav rawv nws tej lus nkaw thiab ua tej uas hum nws lub siab. No yog tej uas Vajtswv qhia peb ua, yog kom peb tso siab rau nws tus Tub Yexus Khetos lub npe thiab ib leeg hlub ib leeg raws li nws tej lus nkaw rau peb. Tus uas tuav rawv nws tej lus nkaw kuj nyob ruaj hauv nws thiab nws kuj nyob hauv tus ntawd thiab. Qhov uas peb paub tias nws nyob hauv peb yog qhov uas peb muaj Vaj Ntsuj Plig uas Vajtswv pub rau peb. Cov uas kuv hlub, tsis txhob ntseeg txhua tus ntsuj plig, tiamsis yuav tsum tshuaj saib tej ntsuj plig ntawd yog los ntawm Vajtswv los tsis yog, vim tias muaj cov cuav xibhwb cev lus coob coob tawm mus rau hauv lub ntiajteb. Nej yuav paub Vajtswv tus Ntsuj Plig yog qhov no. Txhua tus ntsuj plig uas lees hais tias Yexus Khetos tau los yug ua neeg, thiaj yog los ntawm Vajtswv los. Txhua tus ntsuj plig uas tsis lees paub Yexus yeej tsis yog los ntawm Vajtswv los. Tus ntsuj plig ntawd yog Khetos tus yeeb ncuab uas nej yeej hnov hais tias yuav los thiab nimno kuj nyob hauv lub ntiajteb lawm. Cov menyuam yaus 'e, nej yog Vajtswv li, thiab kov yeej lawv lawm, rau qhov tus uas nyob hauv nej loj dua tus uas nyob hauv ntiajteb. Lawv yog ntiajteb li, vim li no lawv thiaj hais ntiajteb zaj thiab ntiajteb thiaj mloog lawv lus. Peb yog Vajtswv li. Tus uas paub Vajtswv kuj mloog peb hais, tus uas tsis yog Vajtswv li kuj tsis mloog peb hais. Yog li no peb thiaj paub tus ntsuj plig uas hais tseeb thiab tus ntsuj plig uas hais cuav. Nej cov uas kuv hlub, cia peb ib leeg hlub ib leeg, rau qhov txojkev hlub yog los ntawm Vajtswv los, thiab txhua tus uas muaj kev hlub kuj yug ntawm Vajtswv los thiab paub Vajtswv. Tus uas tsis muaj kev hlub kuj tsis paub Vajtswv vim Vajtswv yog txojkev hlub. Vajtswv txojkev hlub kuj tshwm rau peb pom li no, yog Vajtswv txib nws tib tug Tub los rau hauv lub ntiajteb kom peb thiaj muaj txojsia nyob ntawm tus Tub ntawd. Txojkev hlub yog li no, tsis yog peb hlub Vajtswv tiamsis Vajtswv hlub peb thiab txib nws tus Tub los ua yam uas xyeem ntxuav peb lub txim. Cov uas kuv hlub, yog Vajtswv hlub peb li no, tsim nyog peb sib hlub ib yam li ntawd. Tsis muaj leejtwg tau pom Vajtswv. Yog peb sib hlub, Vajtswv yeej nyob hauv peb thiab Vajtswv txojkev hlub kuj tiav kiag rau hauv peb. Qhov uas peb paub tias peb nyob ruaj rau hauv nws thiab nws nyob hauv peb, twb yog vim nws tau pub nws tus Ntsuj Plig rau peb. Thiab peb twb pom thiab ua timkhawv tias leej Txiv tau txib nws tus Tub los ua ntiajteb tus Cawmseej. Leejtwg lees tias Yexus yog Vajtswv tus Tub, Vajtswv nyob hauv tus ntawd thiab tus ntawd nyob ruaj hauv Vajtswv. Yog li ntawd peb thiaj paub thiab tso siab rau txojkev hlub uas Vajtswv hlub peb. Vajtswv yog txojkev hlub, thiab tus uas nyob hauv txojkev hlub kuj nyob hauv Vajtswv thiab Vajtswv kuj nyob hauv nws. Yog li no txojkev hlub thiaj tiav kiag rau hauv peb, mas hnub uas txiav txim peb yeej muaj siab tuab, vim tias Yexus zoo li cas peb kuj zoo ib yam li ntawd rau hauv lub ntiajteb no. Hauv txojkev hlub tsis muaj txojkev ntshai. Tiamsis txojkev hlub uas muaj puv npo lawm yuav ntiab txojkev ntshai tawm mus, vim txojkev ntshai ntsig txog txojkev txiav txim xwb. Tus uas ntshai yeej tsis tau muaj txojkev hlub uas tiav kiag. Peb hlub vim Vajtswv xub hlub peb ua ntej. Yog leejtwg hais tias, “Kuv hlub Vajtswv,” tiamsis nws tseem ntxub nws kwv nws tij, nws kuj hais dag xwb, vim tus uas tsis hlub nws kwv nws tij uas qhov muag pom, nws yuav hlub tsis tau Vajtswv uas qhov muag tsis pom. Tej lus nkaw no peb tau ntawm Vajtswv los hais tias tus uas hlub Vajtswv nws yuav tsum hlub nws kwv nws tij thiab. Txhua tus uas ntseeg tias Yexus yog tus Khetos kuj yog yug ntawm Vajtswv los thiab txhua tus uas hlub leej txiv nws kuj hlub leej txiv cov menyuam. Peb paub tias peb yog Vajtswv li menyuam vim qhov uas peb hlub Vajtswv thiab ua raws li nws tej lus nkaw. Qhov uas peb hlub Vajtswv yog li no, yog qhov uas peb tuav rawv nws tej lus nkaw. Nws tej lus nkaw tsis ua nra hnyav rau peb, rau qhov txhua tus uas yug ntawm Vajtswv los kuj kov yeej lub ntiajteb. Thiab peb txojkev ntseeg yog qhov uas kov yeej lub ntiajteb. Leejtwg kov yeej lub ntiajteb? Tsuas yog tus uas ntseeg tias Yexus yog Vajtswv tus Tub xwb. Tus no yog Yexus Khetos uas los ntawm dej thiab ntshav, tsis yog los ntawm dej xwb tiamsis yog ntawm dej thiab ntshav. Thiab Vaj Ntsuj Plig ua timkhawv, vim Vaj Ntsuj Plig yog qhov tseeb. Muaj peb tus timkhawv, yog Vaj Ntsuj Plig, thiab dej thiab ntshav, peb yam no ua timkhawv ib yam nkaus. Peb lees yuav neeg tej lus timkhaw tiamsis Vajtswv tej lus timkhawv yimhuab muaj tseeb dua, vim qhov no yog tej uas Vajtswv muab ua timkhawv txog nws leej Tub. Tus uas ntseeg Vajtswv tus tub kuj muaj timkhawv nyob hauv nws. Tus uas tsis ntseeg Vajtswv kuj yog nws suav tias Vajtswv hais dag, vim nws tsis ntseeg tej lus uas Vajtswv ua timkhawv txog nws leej Tub. Tej lus timkhawv yog li no, Vajtswv pub txojsia ib txhis rau peb thiab txojsia no nyob hauv nws leej Tub. Tus uas muaj leej Tub kuj muaj txojsia. Tus uas tsis muaj leej Tub kuj tsis muaj txojsia. Kuv sau tej lus no rau nej cov uas tso siab rau Vajtswv leej Tub lub npe kom nej thiaj paub tias nej muaj txojsia ib txhis tsis kawg. No yog qhov uas peb muaj siab tuab rau ntawm Vajtswv xubntiag, yog peb thov yam twg raws li Vajtswv lub siab nyiam, nws kuj mloog. Thiab yog peb paub tias Vajtswv mloog peb rau thaum peb thov yam twg, peb kuj paub tias peb tau yam uas thov ntawm nws. Yog leejtwg pom nws tus kwvtij ua txhaum uas tsis coj mus txog kev tuag, cia nws thov Vajtswv mas Vajtswv yuav pub txojsia rau tus ua txhaum uas tsis coj mus txog kev tuag. Kev txhaum uas coj mus txog kev tuag kuj muaj. Kuv tsis tau hais tias yuav thov txog qhov kev txhaum ntawd. Txhua yam kev ua tsis ncaj puavleej yog txhaum. Tiamsis kev txhaum uas tsis coj mus txog kev tuag kuj muaj. Peb paub tias txhua tus uas yug ntawm Vajtswv los tsis ua txhaum tiamsis tus Tswv uas yug ntawm Vajtswv los tsom kwm nws, thiab tus uas Phem tsis kov nws. Peb paub tias peb yug ntawm Vajtswv, thiab lub ntiajteb huvsi nyob hauv tus uas Phem qab hwjchim. Thiab peb paub tias Vajtswv tus Tub los lawm thiab pub tswvyim rau peb kom peb paub tus uas tseeb, thiab peb nyob hauv tus uas tseeb ntawd, yog peb nyob hauv nws leej Tub Yexus Khetos. Nws yog tus tseem Vajtswv thiab yog txojsia ib txhis tsis kawg. Cov menyuam 'e, cia li ceev faj tsis txhob pe dab mlom. Kuv yog tus saib xyuas cov ntseeg, kuv hais rau tus niam tsev uas Vajtswv xaiv cia thiab nws cov menyuam uas kuv hlub tiag, tsis yog kuv tib leeg xwb, txhua tus uas paub qhov tseeb kuj hlub thiab, vim yog tim qhov tseeb uas nyob hauv peb thiab yuav nrog nraim peb mus ib txhis li. Txojkev hlub, txojkev khuvleej thiab txojkev siab tus ntawm leej Txiv Vajtswv thiab ntawm leej Txiv tus Tub Yexus Khetos yuav nrog peb nyob rau hauv txojkev tseeb thiab txojkev hlub. Kuv zoo siab xyiv fab kawg uas pom tias koj cov menyuam qee leej ua raws li qhov tseeb raws li leej Txiv tau qhia rau peb ua. Tus muam uas saib hlob, nimno kuv thov koj, tsis yog kuv sau dua ib txoj kevcai tshiab rau koj, tiamsis yog txoj kevcai uas peb yeej muaj txij thaum chiv thawj los lawm, yog qhov uas peb ib leeg yuav hlub ib leeg. Txojkev hlub yog qhov uas peb xyaum raws li Vajtswv tej lus qhia. Tej lus qhia ntawd uas nej tau hnov txij thaum chiv thawj los yog qhov uas nej yuav tsum xyaum raws li txojkev sib hlub. Vim muaj cov uas dag coob coob tawm mus rau hauv lub ntiajteb, yog cov uas tsis lees hais tias Yexus Khetos los ua neeg. Tus neeg zoo li ntawd yog tus dag thiab yog Khetos tus yeeb ncuab. Nej cia li ceev faj zoo kom nej thiaj tsis plam tej uas nej ua los lawd, tiamsis yuav tau nqe zog puv npo. Txhua tus uas ua dhau cai thiab tsis nyob hauv Khetos tej lus qhuab qhia kuj yog tsis muaj Vajtswv. Tus uas nyob hauv tej lus qhia thiaj yog muaj Vajtswv thiab muaj leej Tub. Yog leejtwg tuaj cuag nej tsis coj tej lus qhuab qhia no tuaj, tsis txhob hu nws los tsev thiab tsis txhob fim nws kiag li, rau qhov tus uas fim nws kuj nrog nws koom ua phem. Tseem tshuav ntau yam uas kuv xav sau tuaj rau nej tiamsis kuv tsis xav siv ntawv thiab kua mem sau. Kuv vam tias kuv yuav tuaj xyuas nej thiab nrog nej sib tham ntawm ncauj, xwv peb thiaj zoo siab xyiv fab kawg nkaus. Koj tus muam uas xaiv cia lawd cov menyuam kuj hais lus nco txog tuaj rau koj. Kuv yog tus saib xyuas cov ntseeg, kuv sau tuaj rau Kai‑a uas kuv hlub, yog tus uas kuv hlub hauv txojkev tseeb. Tus uas kuv hlub, kuv thov Vajtswv pab koj noj qab nyob zoo thiab muaj txhua yam zoo, ib yam li koj tus ntsuj plig nyob zoo. Kuv zoo siab xyiv fab kawg rau qhov uas muaj qee leej kwvtij tuaj txog thiab ua timkhawv tias koj tseem nyob hauv txojkev tseeb, ib yam li koj twb xyaum raws li txojkev tseeb. Tsis muaj ib yam dabtsi ua rau kuv zoo siab npaum li qhov uas kuv hnov tias kuv cov menyuam xyaum raws li txojkev tseeb. Tus uas kuv hlub, thaum koj pab cuam kwvtij thiab tseem pab tej qhua uas txawv ntsej muag, koj ua ncaj. Lawv twb ua timkhawv tab meeg pawg ntseeg txog koj txojkev hlub. Yog koj pab xa lawv mus raws li hum Vajtswv lub siab, kuj yog koj ua zoo. Vim yog saib rau Yexus lub npe lawv thiaj tawm mus, tsis tau txais ib yam dabtsi ntawm cov uas tsis tau ntseeg kiag li. Yog li no tsim nyog peb txais cov neeg no kom peb thiaj koom ua tes haujlwm uas muaj tseeb. Kuv twb sau qee yam tuaj rau pawg ntseeg, tiamsis Di‑autefe uas nyiam ua lawv tus thawj tsis kam lees yuav peb. Vim li no yog kuv tuaj txog, kuv yuav thws nws lub qe uas nws hais tej lus phem xyav peb. Tsis tag li ntawd xwb, nws tseem tsis kam txais cov kwvtij ntawd thiab txwv cov uas xav txais lawv thiab ntiab lawv tawm hauv pawg ntseeg. Tus uas kuv hlub, tsis txhob yoog raws li qhov phem tiamsis cia li yoog raws li qhov zoo. Tus uas ua zoo yog los ntawm Vajtswv los. Tus uas ua phem yeej tsis tau txeev pom Vajtswv li. Sawvdaws ua timkhawv zoo txog Demethia, thiab txojkev tseeb kuj ua timkhawv txog nws. Peb kuj ua timkhawv thiab, thiab nej yeej paub tias kuv tej lus timkhawv muaj tseeb. Muaj ntau yam uas kuv xav sau tuaj rau koj tiamsis kuv tsis xav siv cwjmem thiab kua mem sau. Kuv vam tias kuv yuav pom koj sai sai no thiab wb yuav tau sib tham ntawm ncauj. Thov txojkev siab tus nrog nraim koj. Cov kwvtij hais lus nco txog tuaj rau koj. Thov koj hais lus nco txog rau cov kwvtij txhua tus thiab. Yuda uas yog Yexus Khetos tus tub qhe thiab yog Yakaunpau tus kwv hais mus rau cov uas raug hu los, yog cov uas leej Txiv Vajtswv hlub thiab muab tsom kwm cia rau hauv Yexus Khetos. Thov txojkev khuvleej, txojkev siab tus thiab txojkev hlub tsav ntxiv rau nej ntau zuj zus. Cov uas kuv hlub, kuv kub siab lug xav sau tuaj qhia nej txog txojkev dim uas peb koom, tiamsis kuv pom tias cheem tsum sau thov kom nej tawm tsam cov uas thuam txojkev ntseeg uas twb muab cob rau cov xov dawb tib zaug xwb. Vim muaj qee leej nyiag kev tuaj rau hauv nej. Qhov uas lawv yuav raug txim twb muab sau cia ntev los lawm. Lawv tsis hwm Vajtswv thiab muab peb tus Vajtswv txojkev hlub ntxeev kom tau kev ua phem ua qias, thiab tsis lees yuav Yexus Khetos uas yog peb tus Tswv thiab yog tib tug uas kav peb. Txawm yog nej twb paub tej no tag huvsi lawm los kuv xav kom nej nco txog tias tus Tswv cawm nws haiv neeg dim hauv Iyi tebchaws tiamsis yav tom qab nws kuj muab cov uas tsis ntseeg ua kom puam tsuaj. Thiab cov tubtxib saum ntuj uas tsis tuav lawv lub meej mom kav thiab tso lawv tej chaw nyob tseg, Vajtswv twb muab txoj saw hlau uas nyob mus ib txhis khi lawv cia rau hauv qhov tsaus ntuj nti tos txog thaum txiav txim rau hnub uas tseem ceeb ntawd. Ib yam li ntawd, twb yog lub moos Xaudoo thiab lub moos Kaumaula thiab tej moos uas nyob ib ncig ntawd ua nkauj ua nraug ua dev ua npua thiaj ua yam ntxwv rau qhov uas yuav raug txim rau hauv hluavtaws mus ib txhis. Ib yam nkaus li ntawd, cov uas pheej ua npau suav no ua rau lawv lub cev nqaij tawv qias tsis huv thiab tsis lees yuav Vajtswv kav lawv thiab hais lus saib tsis taus cov tubtxib saum ntuj uas muaj hwjchim ci ntsa iab. Thaum Mikha‑ee uas ua thawj tubtxib saum ntuj nrog Ntxwg Nyoog sib cam txog Mauxe lub cev tuag los nws twb tsis kav hais lus hnyav kom Ntxwg Nyoog, nws tsuas yog hais tias, “Cia tus Tswv cem koj.” Tiamsis cov neeg no hais lus saib tsis taus tej uas lawv tsis nkag siab. Tej uas lawv nkag siab yog raws li lawv lub siab ntshaw xwb, zoo yam li tej tsiaj txhu uas tsis txawj xav dabtsi thiaj ua rau lawv puam tsuaj. Lawv yuav raug txom nyem lauj, vim lawv ua lub neej raws li Khayee ua, thiab tso cev plhuav ua txhaum ib yam li Npala‑as xwv thiaj tau nqe zog. Lawv raug puam tsuaj ib yam li Khaula uas fav xeeb. Lawv ua qias puas tsuas nej rooj mov uas noj sib raug zoo. Thaum lawv nrog nej noj mov lawv tsis paub ntshai Vajtswv, lawv yog tus yug yaj uas yug lawv tus kheej xwb. Lawv yog tauv huab tsis muaj dej uas cua ntsawj ya mus, yog tsob ntoo uas txog lub caij txi txiv kuj tsis txi thiab muab cov cag dob tuag ob zaug lawm. Lawv yog tej nthwv dej hauv hiavtxwv uas nphau heev, ua lawv tej kev txaj muag tshwm los li tej npuas dej. Lawv yog tej hnub qub uas ya poob ntawm nws txojkev lawm, twb npaj qhov chaw tsaus ntuj nti cia rau lawv nyob mus ib txhis lawm. Enauj uas nyob tiam xya suav txij thaum Adas los, kuj cev lus txog cov neeg no hais tias, “Saib maj, tus Tswv nrog nws cov tubtxib saum ntuj dawb huv coob coob qas vam leej los txiav txim rau txhua tus thiab ua rau txhua tus xeev txog txhua yam kev phem uas lawv tau ua vim yog tsis hwm Vajtswv, thiab xeev txog tej lus nruj lus tsiv huvsi uas cov neeg muaj txim uas tsis hwm Vajtswv hais tawm tsam Vajtswv.” Cov neeg ntawd nyiam yws, nyiam iab hiam lwm tus, lawv ua lub neej raws li lawv lub siab phem ntshaw, lawv lub ncauj hais lus khav theeb, ua txuj qhuas luag kom tau tshaj thawj. Cov uas kuv hlub, nej yuav tsum nco txog peb tus Tswv Yexus Khetos cov tubtxib tej lus hais pom tom hauv ntej. Lawv hais rau nej tias, “Thaum lub sijhawm kawg yuav muaj neeg uas nyiam thuam luag, thiab ua raws li lawv lub siab phem ntshaw.” Cov neeg no yog cov uas ua rau nej tawg ua pab ua pawg, lawv yog neeg ntiajteb, tsis muaj Vaj Ntsuj Plig. Nej cov uas kuv hlub, cia li tsim tsa kom nej nyob ruaj saum nej txojkev ntseeg uas dawb huv kawg nkaus thiab thov Vajtswv hauv Vaj Ntsuj Plig uas dawb huv. Cia li ceev faj nyob hauv Vajtswv txojkev hlub rau thaum uas tos rawv peb tus Tswv Yexus Khetos txojkev khuvleej uas coj mus txog txojsia ib txhis tsis kawg. Cia li khuvleej cov uas tseem ua ob lub siab. Cia li pab kom neeg dim thiab rub lawv tawm hauv hluavtaws los, thiab muaj lub siab paub ntshai Vajtswv khuvleej luag, thiab ntxub tej ris tsho uas tsuas tej kev phem kev qias ntawm lawv lub cev. Thov kom Vajtswv uas muaj hwjchim tsom kwm nej kom tsis dawm ntog, thiab tsa nej kom nyob ntawm Vajtswv uas muaj hwjchim ci ntsa iab lub xubntiag tsis muaj chaw thuam thiab zoo siab kawg, yog Vajtswv tib leeg uas yog peb tus Cawmseej vim muaj peb tus Tswv Yexus Khetos, mas thov kom nws tau koob meej thiab hwjchim meej mom thiab lub zog thiab hwjchim kav txhua yam huvsi, tsis hais yav thaum ub thiab nimno thiab yav tom hauv ntej mus ib txhis. Amee. No yog Yexus Khetos tej lus qhia tshwm uas Vajtswv pub rau Yexus kom thiaj qhia rau nws cov tub qhe pom tej uas yuav tsum tshwm los sai sai no. Vajtswv txib nws tus tubtxib saum ntuj mus qhia rau nws tus tub qhe Yauhas. Yauhas ua timkhawv txog Vajtswv txojlus thiab txog Yexus Khetos tej lus timkhawv, yog txhua yam uas nws pom. Tus uas nyeem tej lus hais txog tom hauv ntej no, thiab tus uas mloog thiab tuav rawv tej uas sau cia rau hauv ntawv no tau nyob kaj siab lug, rau qhov lub sijhawm twb los ze lawm. Yauhas hais mus rau xya pawg ntseeg uas nyob lub xeev Axia. Thov nej tau txojkev hlub thiab txojkev siab tus ntawm tus uas muaj txojsia nyob nimno thiab ib txwm muaj nyob thiab tseem yuav los, thiab ntawm xya tus ntsuj plig uas nyob ntawm nws lub zwm txwv, thiab ntawm Yexus Khetos uas yog tus timkhawv uas tso siab tau. Nws yog tus tub hlob uas xub ciaj sawv hauv qhov tuag rov los, thiab yog tus kav tej vajntxwv hauv ntiajteb. Thov kom tus uas hlub peb thiab muab nws cov ntshav tso peb dim peb lub txim, thiab tsa peb ua ib lub tebchaws thiab ua pov thawj uas ua koom tu nws leej Txiv Vajtswv, tau koob meej thiab hwjchim kav mus ib txhis tsis kawg. Amee. Saib maj, nws yuav nrog huab los thiab txhua tus lub qhov muag yuav pom nws, yog cov uas nkaug nws ntag. Thiab txhua haiv neeg hauv ntiajteb yuav quaj ntsuag vim nws los. Yeej yuav muaj li ntawd. Amee. Tus Tswv uas yog Vajtswv uas muaj nyob nimno thiab ib txwm muaj nyob thiab yuav los, thiab yog tus uas muaj hwjchim loj kawg nkaus hais tias, “Kuv yog Alafa thiab Aumeka.” Kuv yog Yauhas uas yog nej kwvtij thiab nrog nej koom raug kev tsim txom thiab koom lub tebchaws thiab nrog nej ua siab ntev thev tej kev tsim txom rau hauv Yexus. Kuv nyob saum lub koog povtxwv Pamau vim yog kuv qhia Vajtswv txojlus thiab Yexus tej lus timkhawv. Hnub uas yog tus Tswv hnub, Vaj Ntsuj Plig los kav tag nrho kuv lub siab, thiab kuv hnov ib lub suab nrov yam li suab raj xyu tom kuv qub qab hais tias, “Cia li muab tej uas koj pom sau cia rau hauv thooj ntawv xa mus rau xya pawg ntseeg, yog pawg ntseeg hauv lub moos Efexau, lub moos Xamawna, lub moos Pawkamu, lub moos Thiathila, lub moos Xadi, lub moos Filadefia thiab lub moos Laudikia.” Mas kuv tig los saib lub suab uas hais rau kuv ntawd. Thaum kuv tig los lawd, kuv pom xya tus ncej kub uas txawb teeb, thiab hauv nruab nrab cov ncej txawb teeb ntawd muaj ib tug zoo li Neeg leej Tub, hnav lub tsho ntev suab yi hauv kotaw thiab sia ib txoj siv kub ntawm nws hauv siab. Nws lub taubhau thiab nws cov plaubhau dawb ib yam li plaub yaj, thiab dawb ib yam li daus xib daus npu, nws lub qhov muag zoo ib yam li nplaim taws, nws txhais kotaw zoo ib yam li tooj liab uas twb muab nchuav hauv cub thee los thiab muab txhuam ci nplas lawm, thiab nws lub suab nrov yam li dej hlob ntsawj. Nws txhais tes xis tuav rawv xya lub hnub qub, thiab ib rab ntaj ob sab ntse tawm hauv nws lub qhov ncauj los, thiab nws lub ntsej muag ci ib yam li thaum lub hnub ci heev. Thaum kuv pom nws kuv cia li khwb nkaus rau ntawm nws kotaw yam li tus neeg tuag. Mas nws muab nws txhais tes xis npuab rau saum kuv thiab hais tias, “Tsis txhob ntshai kiag li, kuv yog lub hauv paus thiab yog lub ntsis, thiab yog tus uas muaj txojsia nyob. Kuv twb tuag lawm tiamsis saib maj, kuv tseem muaj txojsia nyob mus ib txhis thiab kuv tuav rawv txojkev tuag thiab tub tuag teb tej yuam sij. Vim li no, koj cia li sau tej uas koj pom, yog tej uas tabtom muaj thiab tej uas yuav tshwm los yav tom qab. Xya lub hnub qub uas koj pom nyob hauv kuv txhais tes thiab xya tus ncej kub txawb teeb ntawd lub ntsiab yog li no. Xya lub hnub qub yog xya pawg ntseeg tus tubtxib saum ntuj thiab xya tus ncej txawb teeb kuj yog xya pawg ntseeg.” “Cia li sau xa rau tus tubtxib saum ntuj hauv pawg ntseeg Efexau hais tias, Tus uas tuav rawv xya lub hnub qub hauv nws txhais tes xis thiab mus mus los los hauv nruab nrab xya tus ncej kub txawb teeb hais li no tias, “ ‘Kuv paub koj tes haujlwm, thiab paub qhov uas koj khwv thiab ua siab ntev thev ua haujlwm, thiab paub tias koj thev tsis taus cov neeg ua phem thiab koj twb tshuaj saib cov uas khav hais tias lawv yog tubtxib tiamsis tsis yog, thiab koj pom tias lawv cov ntawd dag xwb. Kuv paub tias koj muaj lub siab ntev thev taus thiab yeem thev vim saib rau kuv lub npe, thiab tsis qaug zog. Tiamsis kuv muaj ib qho uas thuam koj, yog qhov uas koj muab txojkev hlub uas koj muaj thaum chiv thawj tso tseg lawm. Vim li no cia li nco txog lub neej uas koj poob los ntawd, cia li ntxeev dua siab tshiab thiab ua tes haujlwm ib yam li thaum chiv thawj. Yog tsis ua li ntawd, kuv yuav tuaj cuag koj thiab muab tus ncej txawb teeb rho ntawm koj mus, yuav yog koj ntxeev dua siab tshiab xwb thiaj tsis muab rho mus. Tiamsis koj tseem muaj qhov zoo thiab, yog qhov uas koj ntxub tej uas cov neeg Nikaulaite ua ib yam li kuv ntxub. Tus uas muaj qhov ntsej cia li mloog tej uas Vaj Ntsuj Plig hais rau cov pawg ntseeg. Tus uas kov yeej, kuv yuav pub nws noj tsob txiv ntoo uas pub txojsia uas nyob hauv Vajtswv lub vaj uas zoo kawg nkaus.’ “Cia li sau xa rau tus tubtxib saum ntuj hauv pawg ntseeg Xamawna hais tias, Tus uas yog lub hauv paus thiab yog lub ntsis, yog tus uas twb tuag lawm thiab ciaj sawv rov los hais li no tias, “ ‘Kuv paub tias koj raug kev tsim txom thiab kev pluag, tiamsis koj kuj nplua nuj. Thiab kuv paub qhov uas cov neeg uas khav tias lawv yog Yudai tiamsis yeej tsis yog, iab hiam koj. Lawv yog Xatas lub tsev sablaj xwb. Tsis txhob ntshai qhov uas nej yuav raug tsim txom. Saib maj, Ntxwg Nyoog yuav muab nej qee leej pov rau hauv tsev lojfaj xwv thiaj tau chaw sim nej, thiab nej yuav raug kev tsim txom kaum hnub. Koj cia li muaj siab ntseeg mus txog hnub tuag mas kuv yuav muab lub mom kub uas yog txojsia rau koj. Tus uas muaj qhov ntsej cia li mloog tej uas Vaj Ntsuj Plig hais rau cov pawg ntseeg. Tus uas kov yeej, yuav tsis raug txojkev tuag zaum ob kiag li.’ “Cia li sau xa rau tus tubtxib saum ntuj hauv pawg ntseeg Pawkamu hais tias, Tus uas tuav rawv rab ntaj ob sab ntse hais li no tias, “ ‘Kuv paub qhov chaw uas koj nyob, yog lub chaw uas muaj Xatas lub zwm txwv. Tiamsis koj tseem tuav rawv kuv lub npe thiab koj tsis muab txojkev ntseeg kuv tso tseg. Txawm yog thaum Atipa uas ua timkhawv ncaj ncees rau kuv raug muab tua hauv nruab nrab nej uas yog Xatas lub chaw nyob los koj tsis tso kuv tseg. Tiamsis muaj ob peb qho uas kuv yuav thuam koj. Muaj qee leej hauv koj uas tuav rawv Npala‑as tej lus qhia uas qhia Npalaj muab tej uas ua rau cov Yixayee dawm, cuab ntawm lawv hauv ntej, yog kom lawv noj tej zaub mov uas muab xyeem rau tej dab mlom thiab ua nkauj ua nraug. Ib yam li ntawd, koj kuj muaj qee leej uas tuav rawv cov neeg Nikaulaite tej lus qhia. Vim li no, cia li ntxeev dua siab tshiab. Yog tsis ua li ntawd kuv yuav tuaj cuag koj sai sai no, thiab yuav xuas rab ntaj uas yog kuv lub qhov ncauj tawm tsam cov neeg ntawd. Tus uas muaj qhov ntsej cia li mloog tej uas Vaj Ntsuj Plig hais rau cov pawg ntseeg. Tus uas kov yeej, kuv yuav muab cov mana uas muab zais cia lawd rau nws noj thiab yuav muab ib lub pob zeb dawb rau nws. Muaj lub npe tshiab sau cia ntawm lub pob zeb ntawd tsis muaj leejtwg paub li tsuas yog tus uas tau txais thiaj paub xwb.’ “Cia li sau xa rau tus tubtxib saum ntuj hauv pawg ntseeg Thiathila hais tias, Vajtswv tus tub uas lub qhov muag zoo li nplaim taws thiab txhais kotaw zoo li tooj liab uas txhuam ci nplas lawm hais li no tias, “ ‘Kuv paub koj tes haujlwm thiab paub koj kev hlub, kev ntseeg, kev ua num rau luag thiab qhov uas ua siab ntev thev, thiab paub tias tej haujlwm uas koj ua thaum kawg no zoo dua thaum chiv thawj. Tiamsis muaj ib qho uas kuv yuav thuam koj, yog qhov uas koj tso ncauj rau tus niag pojniam Yexenpee uas khav hais tias nws yog poj xibhwb cev Vajtswv lus thiab nws qhia thiab dag ntxias kuv cov qhev kom ua nkauj ua nraug thiab noj tej zaub mov uas muab xyeem rau dab mlom. Kuv pub sijhawm rau nws ntxeev dua siab tshiab tiamsis nws tsis yeem ntxeev dua siab tshiab ntawm qhov uas ua nkauj ua nraug. Saib maj, kuv yuav muab nws pov rau hauv lub lav mob, thiab muab cov uas nrog nws sib deev pov rau hauv txojkev txom nyem loj heev, ntshai tsuas yog lawv ntxeev dua siab tshiab ntawm tus pojniam ntawd tej kev phem lawm. Kuv yuav muab tus pojniam ntawd cov menyuam tua pov tseg. Mas txhua pawg ntseeg yuav paub tias kuv yog tus uas tshuaj saib lawv lub siab thiab tej uas lawv xav, thiab kuv yuav pub rau nej txhua tus raws li tej haujlwm uas txhua tus ua. Tiamsis nej cov hauv lub moos Thiathila uas tsis ua raws li nws tej lus qhia ntawd, thiab tsis kawm paub tej uas luag hais tias yog tej uas nyob tob tob hauv dab Xatas, kuv hais rau nej tias kuv yuav tsis muab dua lub nra hnyav rau nej ris, tsuas yog nej yuav tsum tuav rawv tej uas nej muaj lawd mus txog thaum kuv los xwb. Tus uas kov yeej thiab ua kuv tes haujlwm mus txog thaum kawg, kuv yuav pub kom nws muaj hwjchim kav ib tsoom tebchaws. “ ‘Nws yuav xuas qws hlau kav lawv, ib yam li tej laujkaub av uas raug muab tsoo ntsoog tag,’ ib yam li kuv tau txais hwjchim ntawm kuv leej Txiv lawm, thiab kuv yuav muab lub hnub qub toog rau nws. Tus uas muaj qhov ntsej cia li mloog tej uas Vaj Ntsuj Plig hais rau cov pawg ntseeg.” “Cia li sau xa rau tus tubtxib saum ntuj hauv pawg ntseeg Xadi hais tias, Tus uas muaj Vajtswv xya tus ntsuj plig thiab muaj xya lub hnub qub hais li no tias, “ ‘Kuv paub koj tes haujlwm. Koj muaj lub npe hais tias muaj txojsia nyob tiamsis koj twb tuag lawm. Koj cia li tsim dheev los thiab cuab zog rau tej qhov uas koj tseem muaj uas twb yuav tuag, rau qhov kuv pom koj tes haujlwm tsis tau tiav zoo rau ntawm kuv tus Vajtswv lub xubntiag. Vim li no cia li nco txog tej uas koj tau txais thiab tau hnov lawm. Cia li tuav rawv tej ntawd thiab ntxeev dua siab tshiab. Yog koj tsis tsim dheev los, kuv yuav los ib yam li tub sab tuaj mas koj yuav tsis paub tias kuv yuav los txog koj rau lub sijhawm twg. Tiamsis koj tseem muaj ob peb leeg hauv lub moos Xadi uas tsis tau ua rau lawv tej tsoos tsho qias puas tsuas. Lawv yuav hnav cev tsoos dawb nrog kuv mus ua ke vim tsim nyog lawv tau li ntawd. Tus uas kov yeej yuav tau hnav cev tsoos dawb ib yam li lawv, thiab kuv yuav tsis rhuav nws lub npe hauv phau ntawv txojsia. Kuv yuav lees nws lub npe tab meeg kuv leej Txiv xubntiag thiab tab meeg leej Txiv cov tubtxib saum ntuj. Tus uas muaj qhov ntsej cia li mloog tej uas Vaj Ntsuj Plig hais rau cov pawg ntseeg.’ “Cia li sau xa rau tus tubtxib saum ntuj hauv pawg ntseeg Filadefia hais tias, Tus uas dawb huv thiab muaj tseeb, nws tuav rawv Davi tus yuam sij, yog nws qheb lawm tsis muaj leejtwg kaw tau, yog nws kaw lawm tsis muaj leejtwg qheb tau, nws hais li no tias, “ ‘Kuv paub koj tes haujlwm. Saib maj, kuv muab lub qhov rooj qheb cia rau ntawm koj lub xubntiag, tsis muaj leejtwg kaw tau. Kuv paub tias koj tsuas muaj zog me me xwb, txawm li ntawd los koj tseem tuav rawv kuv tej lus thiab tsis tso kuv lub npe tseg. Saib maj, kuv yuav ua rau cov uas yog Xatas lub tsev sablaj uas hais tias lawv yog Yudai tiamsis tsis yog, yog lawv dag xwb, mas kuv yuav ua rau lawv tuaj pe ntawm koj kotaw thiab lawv yuav paub tias kuv hlub koj. Vim koj ua raws li kuv tej lus uas hais tias yuav tsum ua siab ntev thev, kuv yuav tsom kwm koj kom dim lub sijhawm uas raug kev sim siab uas yuav los raug lub ntiajteb huvsi, xwv thiaj sim tau cov neeg uas nyob hauv lub ntiajteb. Kuv yuav los sai sai no. Cia li tuav rawv tej uas koj muaj, kom thiaj tsis muaj leejtwg txeeb tau koj lub mom kub mus. Tus uas kov yeej mas kuv yuav tsa nws ua ib tug ncej hauv kuv tus Vajtswv lub tuam tsev. Nws yuav tsis tawm hauv lub tuam tsev dua li thiab kuv yuav muab kuv tus Vajtswv lub npe thiab muab kuv tus Vajtswv lub nroog lub npe, yog lub nroog Yeluxalees tshiab uas yuav nqes saum ntuj ntawm kuv tus Vajtswv los, thiab muab kuv lub npe tshiab sau rau ntawm nws lub cev. Tus uas muaj qhov ntsej cia li mloog tej uas Vaj Ntsuj Plig hais rau cov pawg ntseeg.’ “Cia li sau xa rau tus tubtxib saum ntuj hauv pawg ntseeg Laudikia hais tias, Tus uas yog Amee, yog tus timkhawv uas tso siab tau thiab muaj tseeb, yog txhua yam uas Vajtswv tsim lub hauv paus, hais li no tias, “ ‘Kuv paub koj tes haujlwm. Koj tsis txias tsis kub. Kuv xav kom koj txias kiag lossis kub kiag. Yog li ntawd vim koj sov sem so xwb, tsis kub tsis txias, kuv yuav muab koj nti tawm hauv kuv qhov ncauj. Koj hais tias, “Kuv nplua nuj, kuv muaj txiag lawm, kuv tsis cheem tsum dabtsi li.” Koj tsis paub tias koj twb txom nyem kawg thiab ntxim khuvleej, koj pluag, dig muag thiab liab qab. Vim li no kuv qhia kom koj yuav cov kub ntawm kuv uas muab nchuav hauv cub thee lawm xwv koj thiaj li nplua nuj, thiab yuav tej tsoos tsho dawb los hnav kom thiaj tsis pom koj lub cev liab qab uas txaj muag, thiab yuav cov tshuaj los teev koj lub qhov muag kom koj thiaj pom kev. Cov uas kuv hlub kuv yeej qhuab ntuas thiab nplawm. Vim li no cia li kub siab lug thiab ntxeev dua siab tshiab. Saib maj, kuv sawv nraum qhov rooj khob. Yog leejtwg hnov kuv lub suab thiab qheb qhov rooj, kuv yuav nkag mus rau hauv thiab nrog nws noj mov ua ke thiab nws yuav nrog kuv noj mov ua ke. Tus uas kov yeej kuv yuav pub nws nrog kuv zaum saum kuv lub zwm txwv, ib yam li uas kuv kov yeej lawm thiab nrog kuv leej Txiv zaum saum nws lub zwm txwv. Tus uas muaj qhov ntsej cia li mloog tej uas Vaj Ntsuj Plig hais rau cov pawg ntseeg.’ ” Dhau ntawd kuv ntsia pom ib lub qhov rooj saum ntuj ceeb tsheej qheb lug cia. Thiab lub suab uas kuv tau hnov ntawd hais rau kuv ib yam li lub suab raj xyu hais tias, “Cia li nce tuaj saum no, kuv yuav qhia rau koj paub txog tej uas yuav tsum muaj tshwm los rau thaum dhau no lawd.” Tamsim ntawd Vaj Ntsuj Plig kav tag nrho kuv lub siab, kuv txawm pom muaj ib lub zwm txwv nyob saum ntuj thiab muaj ib tug zaum saum lub zwm txwv ntawd. Tus uas zaum ntawd saib mas ci zoo li qe zeb hlaws daj thiab qe zeb hlaws liab, thiab muaj zaj sawv puag ncig lub zwm txwv ntawd ci zoo li qe zeb hlaws ntsuab txho. Thiab ib ncig lub zwm txwv ntawd muaj nees nkaum plaub lub zwm txwv, thiab muaj nees nkaum plaub tug kev txwj laus nyob saum tej zwm txwv ntawd. Lawv hnav tsoos tsho dawb paug thiab ntoo lub mom kub saum taubhau. Muaj xob laim laim liab vog thiab xob nroo xob nthe tawm ntawm lub zwm txwv ntawd tuaj, thiab muaj xya teg tsau cig lam lug rau ntawm lub zwm txwv ntawd sab xubntiag. Tej teg tsau ntawd yog Vajtswv xya tus ntsuj plig, thiab ncaj ntawm lub zwm txwv xubntiag muaj ib yam zoo li hiavtxwv ntshiab li iav ci yam li qe zeb dawb. Ib ncig ntawm ob sab lub zwm txwv muaj plaub tug tsiaj ciaj sia, muaj qhov muag puv nkaus sab nrob qaum thiab sab xubntiag. Tej tsiaj ciaj sia ntawd tus ib zoo li tsov ntxhuav, tus ob zoo li txiv nyuj, tus peb muaj ntsej muag li neeg, tus plaub zoo li ib tug dav uas tabtom ya. Plaub tug tsiaj ciaj sia ntawd txhua tus muaj rau phab kooj tis, thiab muaj qhov muag puv nkaus ib ncig sab saud sab hauv, thiab lawv qw nruab hnub hmo ntuj tsis tu hais tias, “Dawb huv, dawb huv, dawb huv yog Vajtswv uas muaj hwjchim loj kawg nkaus, yog tus uas ib txwm muaj nyob thiab muaj txojsia nyob thiab tseem yuav los.” Thaum tej tsiaj ciaj sia hu nkauj qhuas thiab hwm thiab ua tsaug tus uas zaum saum lub zwm txwv, uas yog tus muaj txojsia nyob mus ib txhis tsis kawg, ces nees nkaum plaub tug kev txwj laus ntawd txawm khwb nkaus rau ntawm tus uas zaum saum lub zwm txwv xubntiag thiab pe hawm tus uas muaj txojsia nyob mus ib txhis tsis kawg, thiab hle lawv lub mom kub txawb rau ntawm lub zwm txwv lub xubntiag, thiab hais tias, “Au tus Tswv uas yog peb tus Vajtswv, koj tsim nyog tau meej mom thiab koob meej thiab hwjchim loj kawg, vim koj tsim ib puas tsav yam, thiab ib puas tsav yam muaj nyob thiab raug tsim los raws li koj twb xav tseg.” Hauv tus uas zaum saum lub zwm txwv txhais tes xis kuv pom muaj ib thooj ntawv sau sab hauv thiab sab nraud huvsi thiab ntaus xya lub cim rau. Thiab kuv pom ib tug tubtxib saum ntuj uas muaj hwjchim tshaj tawm nrov nrov hais tias, “Leejtwg yog tus uas tsim nyog qheb thooj ntawv thiab tev tej cim tseg?” Tsis muaj leejtwg uas nyob saum ntuj lossis hauv lub ntiajteb lossis hauv nruab tiv txwv yuav qheb tau thiab saib hauv thooj ntawv. Ces kuv txawm quaj heev vim nrhiav tsis tau leejtwg uas tsim nyog qheb thooj ntawv thiab saib thooj ntawv ntawd. Cov kev txwj laus ib tug txawm hais rau kuv tias, “Tsis txhob quaj. Saib maj, xeem Yuda tus Tsov Ntxhuav, yog Davi caj ces, twb kov yeej lawm, nws thiaj qheb tau thooj ntawv thiab tev xya lub cim tau.” Hauv ntu nruab nrab ntawm lub zwm txwv thiab plaub tug tsiaj ciaj sia, thiab hauv nruab nrab cov kev txwj laus kuv pom ib tug menyuam yaj sawv ntsug, zoo yam nkaus li twb raug muab tua lawm. Nws muaj xya tus kub thiab xya lub qhov muag uas yog Vajtswv xya tus ntsuj plig uas muab txib mus thoob plaws lub ntiajteb. Nws mus muab thooj ntawv ntawm tus uas zaum saum lub zwm txwv txhais tes xis. Thaum nws txais thooj ntawv lawm, plaub tug tsiaj ciaj sia thiab nees nkaum plaub tug kev txwj laus txawm khwb nkaus rau ntawm tus menyuam yaj xubntiag, txhua tus tuav rawv nkauj nog ncas thiab lub phaj kub rau tshuaj tsw qab puv nkaus uas yog Vajtswv cov xov dawb tej lus thov. Lawv hu ib zaj nkauj tshiab hais tias, “Koj yog tus uas tsim nyog txais thooj ntawv ntawd thiab tev tej cim tseg, vim koj raug muab tua thiab koj muab koj cov ntshav txhiv neeg ntawm txhua lub xeem txhua yam lus txhua haiv neeg thiab txhua lub tebchaws los rau Vajtswv, thiab tsa lawv ua ib lub tebchaws thiab ua pov thawj ua koom tu peb tus Vajtswv, thiab lawv yuav kav lub ntiajteb.” Mas kuv saib thiab hnov cov tubtxib saum ntuj coob coob lub suab, suav muaj qas txhiab qas vam leej nyob puag ncig lub zwm txwv thiab tej tsiaj ciaj sia thiab cov kev txwj laus. Lawv qw nrov hais tias, “Tus Menyuam Yaj uas raug muab tua tsim nyog txais hwjchim thiab nyiaj txiag thiab tswvyim thiab zog thiab meej mom thiab koob meej thiab tej lus qhuas.” Thiab kuv hnov txhua yam muaj sia uas tsim los lub suab, tsis hais saum ntuj, hauv ntiajteb, hauv nruab tiv txwv, hauv hiavtxwv, thiab txhua yam uas nyob ntawd qw hais tias, “Thov kom tus uas zaum saum lub zwm txwv thiab tus Menyuam Yaj tau tej lus qhuas thiab meej mom thiab koob meej thiab hwjchim mus ib txhis tsis kawg.” Plaub tug tsiaj ciaj sia kuj hais tias, “Amee,” thiab cov kev txwj laus kuj khwb nkaus pe. Kuv pom tus Menyuam Yaj muab xya lub cim ntawd ib lub tev thiab kuv hnov plaub tug tsiaj ciaj sia ib tug qw nrov yam nkaus li xob quaj hais tias, “Cia li los.” Kuv saib mas pom ib tug nees dawb thiab tus uas caij nees ntawd tuav rawv rab hneev, thiab muab ib lub mom kub pub rau nws mas nws tawm mus yam nkaus li tus kov yeej uas yuav mus ntaus yeej. Thaum tus Menyuam Yaj tev lub cim uas ob, kuv hnov tus tsiaj ciaj sia tus ob hais tias, “Cia li los.” Mas muaj dua ib tug nees liab ploog tawm los. Tso cai rau tus uas caij nees rho txojkev thaj yeeb tawm hauv lub ntiajteb mus kom neeg thiaj sib ntaus sib tua, thiab muab ib rab ntaj loj pub rau nws. Thaum tus Menyuam Yaj tev lub cim uas peb, kuv hnov tus tsiaj ciaj sia tus peb hais tias, “Cia li los.” Kuv ntsia mas pom ib tug nees dub thiab tus uas caij nees tuav rawv rab teev hauv nws txhais tes. Thiab kuv hnov yam nkaus li ib lub suab nrov hauv nruab nrab plaub tug tsiaj ciaj sia ntawd hais tias, “Ib lib mog muag ib denalia, thiab peb lib qeb muag ib denalia. Tiamsis tsis txhob ua li cas rau tej roj thiab tej cawv txiv hmab.” Thaum tus Menyuam Yaj tev lub cim uas plaub, kuv hnov tus tsiaj ciaj sia tus plaub lub suab hais tias, “Cia li los.” Kuv ntsia mas pom ib tug nees txheeb thiab tus uas caij nees ntawd npe hu ua Kev Tuag, thiab Tub Tuag Teb kuj raws nws qab los. Twb muab hwjchim rau ob tug kav lub ntiajteb ib feem hauv plaub. Ob tug yuav xuas ntaj thiab kev tshaib nqhis thiab mob kis thiab tsiaj qus hauv lub ntiajteb tua neeg pov tseg. Thaum tus Menyuam Yaj tev lub cim uas tsib, kuv pom cov ntsuj plig uas nyob hauv lub qab thaj xyeem, yog cov neeg uas raug muab tua vim tim Vajtswv txojlus thiab tej lus timkhawv uas lawv tuav rawv cov ntsuj plig. Lawv qw nrov hais tias, “Au tus Tswv uas dawb huv thiab muaj tseeb, tshuav ntev li cas koj li txiav txim thiab pauj peb cov ntshav rau cov uas nyob hauv lub ntiajteb?” Thiab muab lub tsho ntev dawb pub rau cov uas raug tua ntawd txhua tus thiab hais kom lawv so ib nyuag ntu ntxiv mus txog thaum cov uas nrog lawv koom ua tub qhe thiab lawv cov kwvtij raug muab tua ib yam li lawv kom tiav. Thaum tus Menyuam Yaj tev lub cim uas rau, kuv saib mas pom lub ntuj qeeg ntiajteb ua zog heev. Lub hnub cia li tsaus ntais yam li tej ntaub dub thiab lub hli ntxeev liab ploog li ntshav, thiab tej hnub qub poob zom zaws rau hauv ntiajteb yam li tsob txiv cev uas raug cua ntsawj tej txiv uas tsis siav zeeg los. Lub ntuj kuj ploj mus yam nkaus li thooj ntawv uas muab kauv cia, thiab txhua lub roob thiab txhua lub koog povtxwv raug muab rho ntawm tej qub chaw lawm. Thaum ntawd tej vajntxwv hauv ntiajteb thiab cov uas ua loj thiab cov thawj rog thiab cov nplua nuj thiab cov uas muaj hwjchim thiab txhua tus tag nrho cov uas ua qhev thiab cov uas nyob ywj pheej, puavleej mus tsiv nraim rau hauv tej qhov tsua thiab tej kem zeb saum tej roob, thiab hu tej roob thiab tej pob zeb hais tias, “Cia li pob los tsuam peb, muab peb zais ntawm tus uas zaum saum lub zwm txwv lub xubntiag thiab ntawm tus Menyuam Yaj txojkev npau taws. Rau qhov hnub tseem ceeb uas Vajtswv npau taws rau neeg los txog lawm, mas leejtwg yuav thev nyob tau?” Dhau ntawd kuv pom plaub tug tubtxib saum ntuj sawv ntawm plaub ceg kaum ntuj tswj plaub fab cua hauv ntiajteb cia, tsis kheev cua ntsawj saum nruab nqhuab, hauv hiavtxwv thiab tej xyoob ntoo huvsi. Ces kuv txawm pom dua ib tug tubtxib saum ntuj tshwm sab hnub tuaj los tuav rawv Vajtswv uas muaj txojsia nyob lub cim, thiab nws qw nrov rau plaub tug tubtxib saum ntuj uas muaj cai ua rau ntiajteb thiab hiavtxwv raug txom nyem ntawd hais tias, “Tsis txhob ua rau ntiajteb thiab hiavtxwv thiab tej xyoob ntoo raug txom nyem mus txog thaum peb nias cim rau Vajtswv cov tub qhe hauv pliaj.” Thiab kuv hnov tias cov uas raug nias cim muaj 144,000 leej yog los ntawm txhua xeem Yixayee. Xeem Yuda muaj 12,000 leej uas raug nias cim, xeem Lunpee muaj 12,000 leej, xeem Kas muaj 12,000 leej, xeem Asaw muaj 12,000 leej, xeem Nathali muaj 12,000 leej, xeem Manaxe muaj 12,000 leej, xeem Xime‑oo muaj 12,000 leej, xeem Levi muaj 12,000 leej, xeem Ixakha muaj 12,000 leej, xeem Xenpuloo muaj 12,000 leej, xeem Yauxej muaj 12,000 leej, thiab xeem Npeeyamee muaj 12,000 leej uas raug nias cim. Dhau ntawd kuv saib mas pom ib pab neeg coob coob tsis muaj leejtwg suav txheeb tuaj hauv txhua lub tebchaws txhua xeem txhua haiv neeg thiab txhua yam lus, tuaj sawv rau ntawm lub zwm txwv xubntiag thiab tab meeg tus Menyuam Yaj. Lawv hnav tsoos dawb paug thiab tuav rawv tej rev nplooj toov laj hauv txhais tes, thiab lawv qw nrov hais tias, “Txojkev dim nyob ntawm peb tus Vajtswv uas zaum saum lub zwm txwv thiab nyob ntawm tus Menyuam Yaj.” Cov tubtxib saum ntuj sawvdaws sawv vij lub zwm txwv thiab vij cov kev txwj laus thiab cov tsiaj ciaj sia, thiab lawv khwb nkaus rau ntawm lub zwm txwv xubntiag pe hawm Vajtswv, hais tias, “Thov kom peb tus Vajtswv tau tej lus qhuas thiab koob meej thiab tswvyim thiab tej lus ua tsaug thiab meej mom thiab hwjchim thiab lub zog mus ib txhis tsis kawg. Amee.” Ib tug kev txwj laus nug kuv hais tias, “Cov uas hnav tsoos dawb paug ntawd yog leejtwg thiab tuaj qhovtwg tuaj?” Kuv teb nws tias, “Yawg hlob, koj thiaj paub.” Nws txawm hais rau kuv tias, “Cov neeg ntawd yog cov uas tuaj hauv txojkev tsim txom loj kawg tuaj. Lawv twb ntxhua lawv tej tsoos tsho hauv tus Menyuam Yaj cov ntshav kom dawb paug. Vim li no “ ‘lawv thiaj nyob ntawm Vajtswv lub zwm txwv xubntiag thiab ua koom tu nws hauv nws lub tuam tsev nruab hnub hmo ntuj. Tus uas zaum saum lub zwm txwv yuav nrog nraim lawv roos lawv. Lawv yuav tsis tshaib tsis nqhis dua li lawm. Lub hnub yuav tsis kub lawv dua li lawm. Rau qhov tus Menyuam Yaj uas nyob hauv nruab nrab lub zwm txwv yuav yug lawv thiab coj lawv mus rau tej qhov dej cag uas pub txojsia. Thiab Vajtswv yuav so lawv txhua ncos kua muag ntawm lawv qhov muag.’ ” Thaum tus Menyuam Yaj tev lub cim uas xya, saum ntuj ceeb tsheej txawm nyob ntsiag to kwvlam ib txhais teev. Mas kuv pom xya tus tubtxib saum ntuj uas sawv ntawm Vajtswv lub xubntiag, thiab tau txais xya lub raj xyu. Thiab muaj dua ib tug tubtxib saum ntuj tuav rawv lub yias tseem kub uas rau ncaig taws los sawv ntawm lub thaj xyeem, thiab muab tshuaj tsw qab ntau pub rau tus tubtxib saum ntuj ntawd thiaj coj mus xyeem nrog cov xov dawb tej lus thov ua ke rau saum lub thaj kub uas nyob ntawm lub zwm txwv xubntiag. Tej pa tshuaj tsw qab ntawd thiaj nce nrog cov xov dawb tej lus thov ua ke ntawm tus tubtxib saum ntuj txhais tes mus txog Vajtswv lub xubntiag. Tus tubtxib saum ntuj ntawd txawm coj lub yias rau ncaig taws mus muab ncaig taws ntawm lub thaj rau puv nkaus thiab muab lub yias pov rau hauv ntiajteb, ces xob txawm nroo tej niag rhev, xob laim laim liab vog thiab ntuj qeeg. Xya tus tubtxib saum ntuj uas tuav rawv xya lub raj xyu kuj npaj txhij yuav tshuab raj. Thawj tug tubtxib saum ntuj tshuab nws lub raj ces txawm muaj lawg thiab hluavtaws xyaw ntshav laim poob los rau hauv ntiajteb. Lub ntiajteb thiaj raug hlawv kub hnyiab ib feem hauv peb, thiab tej xyoob ntoo kuj raug hlawv ib feem hauv peb thiab tej nroj tsuag ntsuab kuj raug hlawv kub tag huvsi. Tus tubtxib saum ntuj uas ob tshuab nws lub raj ces txawm muaj ib yam zoo li lub roob loj uas tabtom kub hnyiab raug muab pov rau hauv hiavtxwv. Dej hiavtxwv ib feem hauv peb thiaj txia ua ntshav tag nrho, txhua yam uas muaj sia nyob hauv hiavtxwv kuj tuag tag ib feem hauv peb, thiab tej nkoj kuj raug puam tsuaj tag ib feem hauv peb. Tus tubtxib saum ntuj uas peb tshuab nws lub raj, txawm muaj ib lub hnub qub loj cig plaws yam li tes tsau poob saum ntuj los poob rau saum tej niag dej ib feem hauv peb thiab poob rau saum tej qhov dej txhawv. Lub hnub qub ntawd npe hu ua “Iab.” Tej dej ib feem hauv peb kuj iab tag, thiab neeg tuag coob vim tej dej ntawd iab tag. Tus tubtxib saum ntuj uas plaub tshuab nws lub raj, ces lub hnub ib feem hauv peb thiab lub hli ib feem hauv peb thiab tej hnub qub ib feem hauv peb kuj ntsoog tag, thiaj tsaus ntuj nti ib feem hauv peb. Nruab hnub ib feem hauv peb kuj tsis kaj lawm, thiab hmo ntuj ib feem hauv peb kuj ib yam nkaus. Kuv saib thiab hnov ib tug dav ya saum nruab ntug quaj nrov hais tias, “Txom nyem, txom nyem, txom nyem rau cov neeg uas nyob hauv lub ntiajteb vim tej suab raj uas peb tug tubtxib saum ntuj tabtom yuav tshuab.” Tus tubtxib saum ntuj uas tsib tshuab nws lub raj xyu, kuv txawm pom ib lub hnub qub poob saum ntuj los rau hauv ntiajteb, thiab muab tus yuam sij uas qheb lub niag qhov tob tob pub rau lub hnub qub ntawd. Thaum nws qheb lub niag qhov tob tob ntawd, muaj pa taws tshwm hauv lub qhov ntawd tuaj zoo yam li tej pa ncho hauv lub qhov hluavtaws hlob hlob. Lub hnub thiab saum nruab ntug kuj tsaus ntuj nti vim cov pa ncho uas tawm hauv lub qhov ntawd. Ib pab kooj txig txawm tawm hauv cov pa ncho ntawd los rau hauv lub ntiajteb, thiab pub cov kooj ntawd muaj peevxwm ib yam li raub ris teb hauv ntiajteb, tsis kheev cov kooj ntawd ua phem rau tej nyom hauv ntiajteb lossis tej nplooj ntsuab lossis tej xyoob ntoo tiamsis ua phem rau cov neeg uas tsis muaj Vajtswv lub cim nias rau ntawm hauv pliaj xwb, tsis kheev muab cov neeg ntawd tua tiamsis muab tsim txom tsib lub hlis. Qhov uas lawv raug tsim txom ntawd mob ib yam li thaum raub ris teb plev. Ncua sijhawm ntawd cov neeg yuav nrhiav txojkev tuag tiamsis nrhiav tsis ntsib. Lawv xav tuag tiamsis txojkev tuag yuav khiav ntawm lawv lawm. Cov kooj txig ntawd lub cev zoo ib yam li tej nees npaj txhij yuav ua rog. Saum lawv taubhau muaj ib yam zoo li lub mom kub, thiab lawv lub ntsej muag zoo li neeg. Lawv cov plaubhau zoo ib yam li cov pojniam, thiab lawv cov kaus hniav zoo ib yam li kaus hniav tsov ntxhuav. Lawv muaj ib cov nplai zoo ib yam li daim hlau thaiv hauv siab. Lawv phab tis lub suab nrov ib yam li tej tsheb nees coob coob dhia mus ua rog. Lawv muaj kotw thiab muaj ple ib yam li raub ris teb, lawv tus kotw muaj hwjchim tsim txom neeg tsib lub hlis. Lawv muaj tus tubtxib saum ntuj uas kav lub niag qhov tob tob ua vajntxwv kav lawv. Nws lub npe Henplais hu ua Anpadoo, lus Kili hu ua Apauliyoo. Thawj yam kev txom nyem dhau lawm. Saib maj, tseem tshuav ob yam kev txom nyem yuav los thiab. Tus tubtxib saum ntuj uas rau txawm tshuab nws lub raj xyu mas kuv hnov ib lub suab ntawm plaub tug kub uas nyob plaub ceg kaum thaj kub ntawm Vajtswv lub xubntiag tuaj hais rau tus tubtxib saum ntuj uas rau uas tuav lub raj xyu hais tias, “Cia li tso plaub tug tubtxib saum ntuj uas raug khi rau ntawm tus niag dej loj Yufeti.” Ces plaub tug tubtxib saum ntuj txawm raug muab tso. Lawv twb npaj txhij rau teev twg hnub twg hli twg xyoo twg uas yuav tua neeg ib feem hauv peb. Cov tub rog caij nees yog 200,000,000 leej. Kuv hnov lawv coob li ntawd. Hauv zaj yog toog kuv pom cov nees zoo li no. Cov uas caij nees hnav daim hlau thaiv hauv siab uas liab ploog li nplaim taws thiab tsamxem li qe zeb phaithu thiab daj li lawj faj. Cov nees li taubhau zoo yam li taubhau tsov ntxhuav, thiab muaj hluavtaws, pa taws thiab lawj faj tawm hauv lawv lub qhov ncauj los. Neeg raug peb yam vij sub vij sw no tua tag ib feem hauv peb, yog raug hluavtaws thiab pa taws thiab lawj faj uas tawm hauv cov nees qhov ncauj los tua. Cov nees no lub hwjchim nyob ntawm lawv lub qhov ncauj thiab ntawm lawv tus kotw. Lawv tus kotw zoo li tus nab muaj taubhau uas lawv siv ua phem rau neeg. Cov neeg tseem tshuav nyob uas tsis raug tej vij sub vij sw no tua lawv kuj tsis ntxeev dua siab tshiab ntawm tej uas lawv txhais tes ua, thiab tsis tseg qhov uas pe dab thiab tej dab mlom nyiaj dab mlom kub dab mlom pob zeb dab mlom ntoo uas tsis txawj pom tsis txawj hnov tsis txawj mus kev. Thiab lawv kuj tsis ntxeev dua siab tshiab ntawm qhov uas tua neeg, ua khawv koob, ua nkauj ua nraug thiab ua tub sab. Mas kuv pom dua ib tug tubtxib saum ntuj uas muaj hwjchim nqes saum ntuj los, muaj huab qhwv rawv nws lub cev thiab muaj ib tug zaj sawv saum nws taubhau, thiab nws lub ntsej muag zoo yam li lub hnub, nws txhais ceg zoo ib yam li ncej hluavtaws. Nws tuav ib thooj ntawv me me uas qheb lug rau hauv nws txhais tes. Nws muab nws txhais kotaw sab xis txawb rau saum hiavtxwv thiab muab sab laug txawb rau saum nruab nqhuab, thiab nws qw suab nrov ib yam li tsov ntxhuav nyooj. Thaum nws qw, xob nroo xya suab. Thaum xob nroo xya suab kuv twb yuav nqes tes sau, tiamsis kuv hnov ib lub suab saum ntuj hais tias, “Cia li nias cim npog tej lus uas xob quaj xya suab ntawd, tsis txhob sau cia.” Tus tubtxib saum ntuj uas kuv pom sawv saum dej hiavtxwv thiab saum nruab nqhuab ntawd txawm tsa txhais tes xis rau saum ntuj, thiab tuav tus uas muaj txojsia nyob mus ib txhis tsis kawg lub npe, yog tus uas tsim lub ntuj thiab txhua yam saum ntuj, thiab tsim lub ntiajteb thiab txhua yam hauv ntiajteb thiab tsim hiavtxwv thiab txhua yam hauv hiavtxwv, twv hais tias, “Yuav tsis tos ntev lawm. Tiamsis thaum tus tubtxib saum ntuj uas xya tshuab lub raj xyu nrov, tej uas Vajtswv muab npog cia tob tob lawd yuav tiav, raws li nws twb hais tseg rau cov xibhwb cev Vajtswv lus uas yog nws cov tub qhe.” Lub suab uas kuv hnov saum ntuj tuaj ntawd hais dua rau kuv tias, “Cia li mus txais thooj ntawv uas qheb lug hauv tus tubtxib saum ntuj uas sawv saum hiavtxwv thiab saum nruab nqhuab ntawd txhais tes.” Kuv thiaj mus cuag tus tubtxib saum ntuj thiab thov nws muab thooj ntawv me ntawd rau kuv. Nws hais rau kuv tias, “Cia li coj mus noj, yuav iab rau hauv koj lub plab tiamsis yuav qab zib li zib ntab rau hauv koj lub qhov ncauj.” Kuv txawm txais thooj ntawv me ntawm tus tubtxib saum ntuj txhais tes los noj, kuj qab zib yam li zib ntab rau hauv kuv qhov ncauj, tiamsis thaum noj nqos lawm kuj iab rau hauv kuv lub plab. Muaj ib tug hais rau kuv tias, “Koj yuav tsum cev lus pom tom hauv ntej dua ib zaug txog ntau haiv neeg ntau lub tebchaws ntau yam lus thiab ntau tus vajntxwv.” Thiab muab ib tug pas ntsuas uas zoo li ib tug pas nrig pub rau kuv thiab hais rau kuv tias, “Cia li sawv tsees mus ntsuas Vajtswv lub tuam tsev thiab lub thaj xyeem, thiab suav cov neeg uas pe hawm Vajtswv hauv lub tuam tsev, tiamsis tsis txhob ntsuas lub tshav puam sab nraum lub tuam tsev. Tsis txhob ntsuas vim qhov ntawd muab rau lwm haiv neeg lawm, mas lawv yuav tsuj lub nroog dawb huv mus tag plaub caug ob lub hlis. Thiab kuv yuav pub kuv ob tug timkhawv uas hnav ntaub seev tsaj muaj hwjchim cev lus mus tag ib txhiab ob puas rau caum hnub.” Ob tug timkhawv ntawd yog ob tsob txiv aulib thiab ob tug ncej txawb teeb uas txawb rau ntawm tus Tswv uas kav ntiajteb lub xubntiag. Yog leejtwg yuav ua phem rau ob tug timkhawv ntawd, hluavtaws yuav tawm plaws hauv ob tug qhov ncauj hlawv cov yeeb ncuab ntawd. Leejtwg xav ua phem rau ob tug kuj yuav tsum raug muab tua li ntawd. Ob tug muaj hwjchim kaw tau lub ntuj tsis pub nag los rau ncua sijhawm uas ob tug tabtom cev lus, thiab ob tug muaj hwjchim ua kom tej dej txia ua ntshav thiab tso vij sub vij sw txhua yam los raug lub ntiajteb tsawg zaum kuj tau raws li ob tug xav. Thaum ob tug tej haujlwm ua timkhawv tiav lawm, tus tsiaj qus uas tawm hauv lub niag qhov tob tob los yuav tawm tsam ob tug thiab yuav kov yeej thiab muab ob tug tua pov tseg. Ob tug lub cev tuag yuav nyob saum txojkev hauv lub nroog loj uas ua piv lus hu tias Xaudoo thiab Iyi, yog lub nroog uas ob tug tus Tswv raug teem rau saum khaublig ntoo. Muaj neeg hauv txhua haiv txhua xeem txhua yam lus thiab txhua lub tebchaws ntsia ntsoov ob tug lub cev tuag peb hnub thiab ib tav su, thiab tsis kheev kom muab tso rau hauv qhov ntxa li. Ib tsoom neeg hauv ntiajteb yuav hnyos ob tug thiab yuav xyiv fab thiab ib leeg pub tshav ntuj rau ib leeg, vim ob tug uas cev lus ntawd tau tsim txom cov neeg hauv ntiajteb. Dhau peb hnub thiab ib tav su ntawd Vajtswv tej pa uas pub txojsia txawm nkag rau hauv ob tug ntawd, ces ob tug txawm sawv tsees nres nroos thiab cov neeg uas pom ob tug ntshai kawg nkaus. Ob tug txawm hnov ib lub suab hais saum ntuj tuaj rau ob tug hais tias, “Cia li nce los saum no lauj.” Thaum cov yeeb ncuab tseem ntsia ntsoov, ob tug txawm mus hauv ib tauv huab nce rau saum ntuj lawm. Lub sijhawm ntawd ntuj txawm qeeg heev thiab lub nroog ntawd pob tag ib feem hauv kaum. Neeg tuag xya txhiab leej rau thaum ntuj qeeg ntawd, mas cov neeg uas tseem tshuav nyob ntshai heev kawg thiab qhuas Vajtswv ntuj. Kev txom nyem yam ob dhau lawm. Saib maj, kev txom nyem yam peb yuav tuaj txog sai sai no. Tus tubtxib saum ntuj uas xya kuj tshuab nws lub raj xyu, muaj ntau lub suab nrov nrov saum ntuj hais tias, “Lub ntiajteb ntxeev ua peb tus Tswv thiab nws tus Khetos li tebchaws, mas nws yuav kav mus ib txhis tsis kawg.” Nees nkaum plaub tug kev txwj laus uas zaum saum tej zwm txwv ntawm Vajtswv lub xubntiag txawm khwb nkaus pe hawm Vajtswv, thiab hais tias, “Vajtswv, tus Tswv uas muaj hwjchim loj kawg nkaus, tus uas muaj txojsia thiab ib txwm yeej los muaj nyob, peb ua koj tsaug vim koj siv koj lub hwjchim loj kawg pib kav lawm. Ib tsoom tebchaws kuj chim heev tiamsis koj txojkev npau taws los txog lawm, thiab txog lub sijhawm uas koj txiav txim rau cov neeg uas tuag lawm thiab pub nqe zog rau koj cov tub qhe, uas yog cov xibhwb cev lus, thiab pub rau koj cov xov dawb thiab cov uas paub ntshai koj lub npe, tsis hais tus hlob tus yau, thiab txog sijhawm uas koj yuav rhuav tshem cov uas rhuav tshem lub ntiajteb.” Ces Vajtswv lub tuam tsev saum ntuj txawm qheb kiag thiab pom nws lub phij xab sib cog lus nyob hauv lub tuam tsev ntawd. Ces txawm muaj xob laim laim liab vog, xob nroo nthe tej niag rhev, ntuj qeeg thiab los lawg hlob heev. Muaj ib yam txujci tseem ceeb tshwm rau saum nruab ntug, yog ib tug pojniam muab lub hnub hnav thiab lub hli nyob hauv nws qab kotaw, saum nws taubhau nws ntoo lub mom vajntxwv uas muaj kaum ob lub hnub qub. Nws suab ib plab menyuam thiab quaj vim mob plab heev yuav yug menyuam. Thiab muaj dua ib yam txujci tseem ceeb tshwm rau saum nruab ntug, yog muaj ib tug zaj loj liab ploog. Nws muaj xya lub taubhau thiab kaum tus kub, thiab saum xya lub taubhau muaj xya lub mom kub. Nws xuas nws tus kotw nplawm tej hnub qub saum nruab ntug poob tag ib feem hauv peb, thiab muab pov los rau hauv ntiajteb. Tus zaj ntawd nyob ntawm tus pojniam uas tabtom yuav yug menyuam hauv ntej, xwv thiaj noj tau tus menyuam rau thaum yug kiag los. Tus pojniam txawm yug tau ib tug tub, yog tus uas yuav xuas qws hlau kav tag nrho ib tsoom tebchaws sawvdaws, tiamsis nws tus menyuam raug muab txeeb kiag coj mus rau ntawm Vajtswv thiab ntawm Vajtswv lub zwm txwv lawm. Ces tus pojniam txawm khiav mus rau hauv tebchaws moj sab qhua. Qhov ntawd muaj ib lub chaw uas Vajtswv npaj cia rau nws xwv luag thiaj yug tau nws ib txhiab ob puas rau caum hnub. Ces txawm ua rog saum ntuj, Mikha‑ee thiab nws cov tubtxib saum ntuj ua rog rau tus zaj ntawd, mas tus zaj thiab nws cov tubtxib saum ntuj kuj tawm tsam, tiamsis tus zaj tog swb lawm thiab tsis muaj chaw nyob saum ntuj dua li lawm. Tus niag zaj yog tus nab txwj nab laug thaum ub uas hu tias Ntxwg Nyoog thiab Xatas, yog tus uas dag ntxias neeg thoob ntiajteb. Nws raug muab pov los rau hauv lub ntiajteb, thiab nws cov tubtxib saum ntuj kuj raug muab pov nrog nws ua ke los thiab. Thiab kuv hnov ib lub suab saum ntuj hais tias, “Nimno txojkev dim thiab hwjchim thiab Vajtswv lub tebchaws thiab nws tus Khetos lub hwjchim los txog lawm, vim tus uas iab hiam peb cov kwvtij raug muab pov los lawm, yog tus uas iab hiam rau ntawm Vajtswv lub xubntiag nruab hnub hmo ntuj. Lawv kov yeej nws vim yog tus Menyuam Yaj cov ntshav thiab vim yog lawv tej lus timkhawv, txawm yog yuav tuag los lawv tsis khuvxim lawv txojsia. Vim li no, lub ntuj ceeb tsheej thiab sawvdaws uas nyob hauv 'e, cia li zoo siab xyiv fab. Tiamsis lub ntiajteb thiab dej hiavtxwv 'e, nej yuav raug txom nyem vim Ntxwg Nyoog twb nqes los rau hauv nej ua npau taws vog, rau qhov nws paub tias nws lub sijhawm tshuav tsis ntev lawm.” Thaum tus zaj pom tias nws raug muab pov nqes los rau hauv ntiajteb lawm, nws txawm raws caum tus pojniam uas yug tus tub ntawd qab. Tiamsis muab ob phab kooj tis pub rau tus pojniam ntawd ib yam li kooj tis dav loj kom nws thiaj ya khiav tus zaj ntawd mus rau hauv tebchaws moj sab qhua tau, mus rau lub chaw uas luag yuav yug nws ib ncua sijhawm, ob ncua thiab ib nrab ncua. Tus zaj txawm tsuag dej tawm hauv nws lub qhov ncauj los zoo yam li ib tug niag dej los caum tus pojniam qab xwv thiaj kuav tau kiag nws mus. Tiamsis lub ntiajteb pab tus pojniam, ces txawm qheb kiag qhov ncauj nqos tej dej uas tawm hauv tus zaj lub qhov ncauj ntws los. Tus zaj txawm chim heev rau tus pojniam ntawd thiab mus ua rog rau tus pojniam caj ces uas tshuav nyob, yog cov uas tuav rawv Vajtswv tej lus nkaw thiab Yexus tej lus timkhawv. Ces tus zaj txawm mus sawv hauv cov xuab zeb ntawm ntug hiavtxwv. Kuv pom ib tug tsiaj tawm hauv hiavtxwv los muaj kaum tus kub thiab xya lub taubhau, thiab muaj kaum lub mom kub saum cov kub ntawd, thiab muaj tej npe uas saib tsis taus Vajtswv sau rau ntawm nws cov taubhau. Tus tsiaj uas kuv pom ntawd zoo ib yam li tsov pom txwv, txhais kotaw zoo li kotaw dais, lub qhov ncauj zoo li tsov ntxhuav lub. Tus zaj txawm pub nws lub zog thiab nws lub zwm txwv thiab hwjchim loj kawg rau tus tsiaj ntawd. Nws li ib lub taubhau muaj tej qhov txhab uas mob yuav tuag, tiamsis tej qhov txhab ntawd kho tau zoo lawm. Neeg thoob ntiajteb phimhwj kawg thiab raws tus tsiaj ntawd qab mus. Lawv pe hawm tus zaj vim nws pub nws lub hwjchim rau tus tsiaj ntawd, thiab lawv kuj pe hawm tus tsiaj thiab hais tias, “Leejtwg zoo cuag li tus tsiaj no thiab leejtwg yuav tawm tsam tau tus tsiaj no?” Muab lub ncauj uas hais lus khav theeb thiab hais lus saib tsis taus Vajtswv pub rau tus tsiaj ntawd, thiab muab hwjchim rau nws ua haujlwm plaub caug ob lub hlis. Nws qheb nws lub qhov ncauj hais lus tuam mom Vajtswv. Nws hais lus tuam mom Vajtswv lub npe thiab Vajtswv lub chaw nyob thiab cov uas nyob saum ntuj ceeb tsheej. Tso cai rau nws ua rog rau cov xov dawb thiab kov yeej lawv, thiab muab hwjchim pub rau nws kav txhua xeem txhua haiv neeg txhua yam lus thiab txhua lub tebchaws. Txhua tus uas nyob hauv ntiajteb yuav pe hawm tus tsiaj ntawd, yog txhua tus uas tsis muaj npe sau cia rau hauv tus Menyuam Yaj uas raug muab tua txij thaum tsim ntuj tsim teb los li phau ntawv txojsia. Leejtwg muaj qhov ntsej kuj cia li mloog. Tus uas npaj rau luag ntes mus, tus ntawd kuj yuav raug luag ntes mus, Tus uas tu cia rau hniav ntaj tua, tus ntawd yeej yuav raug hniav ntaj tua. No yog qhov uas cov xov dawb yuav tsum ua siab ntev thev thiab ntseeg. Thiab kuv pom dua ib tug tsiaj tawm hauv nruab nqhuab los muaj ob tug kub zoo ib yam li ib tug menyuam yaj thiab hais lus ib yam li ib tug zaj. Nws siv thawj tug tsiaj lub hwjchim huvsi tab meeg thawj tug tsiaj ntawd thiab ua rau lub ntiajteb thiab tej neeg uas nyob hauv pe hawm thawj tug tsiaj uas muaj qhov txhab twb yuav tuag uas ho kho zoo lawm. Nws ua txujci tseem ceeb loj, thiab ua tau hluavtaws poob saum ntuj los rau hauv ntiajteb tab meeg neeg sawvdaws. Vim yog tej txujci tseem ceeb uas pub rau nws ua tab meeg thawj tug tsiaj ntawd nws thiaj dag ntxias tej neeg hauv ntiajteb. Nws hais kom neeg hauv ntiajteb tsim ib tug dab mlom rau tus tsiaj uas muaj qhov txhab vim raug hniav ntaj tiamsis tseem ciaj sia nyob. Thiab pub nws ua pa rau tus dab mlom tsiaj ntawd kom tus dab mlom tsiaj ntawd hais tau lus thiab muab cov uas tsis yeem pe tus dab mlom tsiaj ntawd ua kom tuag. Thiab nws tseem yuam txhua tus tsis hais tus hlob tus yau tus muaj tus pluag tus nyob ywj pheej thiab tus ua qhev kom ntaus cim rau ntawm txhais tes xis lossis ntawm hauv pliaj, mas yog leejtwg tsis muaj lub cim uas yog tus tsiaj ntawd lub npe lossis tus tsiaj ntawd lub npe lej, mas tus ntawd yuav muag thiab yuav, tsis tau dabtsi kiag li. Tej no yuav tsum siv tswvyim tib zoo. Tus uas nkag siab cia li xam raws li tus tsiaj ntawd cov lej, vim cov lej ntawd yog ib tug neeg li lej. Cov lej ntawd yog rau pua rau caum rau. Kuv saib mas pom tus Menyuam Yaj sawv saum lub roob Xi‑oo, thiab cov uas nrog nws ua ke muaj 144,000 leej uas muaj nws lub npe thiab muaj nws leej Txiv lub npe sau rau ntawm lawv hauv pliaj. Kuv hnov ib lub suab saum ntuj zoo ib yam li dej hlob ntsawj thiab yam li xob nroo nrov heev. Lub suab uas kuv hnov ntawd nrov yam nkaus li cov uas tabtom ntaus nkauj nog ncas lub suab. Lawv hu ib zaj nkauj tshiab rau ntawm lub zwm txwv lub xubntiag thiab ntawm plaub tug tsiaj ciaj sia thiab cov kev txwj laus xubntiag. Tsis muaj leejtwg kawm tau zaj nkauj ntawd tsuas yog 144,000 leej uas twb txhiv hauv ntiajteb lawm xwb. Cov neeg no yog cov uas dawb huv vim lawv yeej tsis tau ti dua pojniam. Lawv raws tus Menyuam Yaj qab mus rau txhua qhov. Lawv twb raug txhiv hauv neeg los ua thawj phaum uas muab xyeem rau Vajtswv thiab rau tus Menyuam Yaj, thiab tsis pom muaj tej lus dag hauv lawv lub qhov ncauj kiag li, lawv tsis muaj chaw thuam. Kuv pom dua ib tug tubtxib saum ntuj ya mus rau saum nruab ntug coj txoj xov zoo uas nyob ib txhis mus piav rau cov uas nyob hauv lub ntiajteb, yog piav rau txhua lub tebchaws txhua xeem txhua yam lus thiab txhua haiv neeg. Nws qw nrov nrov hais tias, “Cia li paub ntshai Vajtswv thiab qhuas nws, vim lub sijhawm uas nws yuav txiav txim los txog lawm. Thiab pe hawm tus uas tsim lub ntuj ntiajteb dej hiavtxwv thiab tej qhov dej txhawv huvsi.” Muaj dua ib tug tubtxib saum ntuj yog tus uas ob raws nws qab mus hais tias, “Lub nroog loj Npanpiloo pob tag, pob tag lawm, yog lub nroog uas yuam ib tsoom tebchaws sawvdaws haus nws tej cawv txiv hmab uas yog nws txojkev ntshaw ua nkauj ua nraug.” Muaj dua ib tug tubtxib saum ntuj uas yog tus peb raws ob tug qab mus qw nrov hais tias, “Yog leejtwg pe hawm tus tsiaj thiab nws tus dab mlom thiab ntaus nws lub cim rau ntawm hauv pliaj lossis ntawm txhais tes, tus ntawd yuav haus cov cawv txiv hmab uas yog Vajtswv txojkev npau taws uas muab hliv rau hauv Vajtswv txojkev chim lub khob uas tsis muaj lwm yam tov li, thiab tus ntawd yuav raug tsim txom hauv hluavtaws thiab lawj faj tab meeg cov tubtxib saum ntuj dawb huv thiab tus Menyuam Yaj lub xubntiag. Cov pa ncho hauv qhov uas lawv raug tsim txom yuav ncho qas lug mus ib txhis tsis kawg. Cov uas pe hawm tus tsiaj thiab nws tus dab mlom thiab cov uas ntaus lub cim uas yog nws lub npe yuav tsis tau so nruab hnub hmo ntuj kiag li.” No yog qhov uas cov xov dawb yuav tsum ua siab ntev thev, yog cov uas tuav Vajtswv tej lus nkaw thiab txojkev ntseeg Yexus. Thiab kuv hnov ib lub suab hais saum ntuj tuaj hais tias, “Cia li sau li no tias, Txij no mus cov uas tuag rau hauv tus Tswv kuj nyob kaj siab lug.” Thiab Vaj Ntsuj Plig hais tias, “Muaj tseeb li ntawd. Lawv yuav tau so tej haujlwm uas lawv ua khwv khwv, vim tej haujlwm uas lawv tau ua ntawd yuav nrog lawv mus.” Kuv saib mas pom ib tauv huab dawb thiab muaj ib tug zaum saum tauv huab ntawd zoo li Neeg leej Tub, nws ntoo lub mom kub rau saum taubhau thiab tuav rawv ib rab liag ntse ntse hauv nws txhais tes. Muaj dua ib tug tubtxib saum ntuj tawm hauv lub tuam tsev los hu nrov nrov rau tus uas zaum saum tauv huab hais tias, “Cia li muab koj rab liag hlais lauj, vim twb txog caij hlais lawm, rau qhov tej qoob uas yuav hlais hauv ntiajteb twb siav tag lawm.” Tus uas zaum saum tauv huab txawm cev nws rab liag los rau hauv lub ntiajteb, mas thiaj hlais tej qoob hauv ntiajteb. Muaj dua ib tug tubtxib saum ntuj tawm hauv lub tuam tsev saum ntuj los, nws kuj tuav rawv ib rab liag ntse ntse. Thiab muaj dua ib tug tubtxib saum ntuj muaj hwjchim kav hluavtaws tawm hauv lub thaj xyeem los, hu nrov nrov rau tus uas tuav rawv rab liag ntse hais tias, “Cia li cev koj rab liag hlais tej tauv txiv hmab ntawm cov txiv hmab hauv ntiajteb vim tej txiv hmab siav lawm.” Tus tubtxib saum ntuj txawm cev nws rab liag los rau hauv lub ntiajteb hlais tej txiv hmab hauv ntiajteb sau los ua ke thiab muab nchuav rau hauv lub rhawv tsuam txiv hmab loj uas yog Vajtswv txojkev npau taws, muab tsuam rau hauv lub rhawv tsuam txiv hmab nraum ntug moos, thiab ntshav ntws hauv lub rhawv ntawd los siab txij nees nplooj pus ntws mus deb peb puas kilumeb. Kuv pom dua ib yam txujci tseem ceeb uas loj thiab phimhwj saum nruab ntug. Muaj xya tus tubtxib saum ntuj tuav xya yam sub tawg sub ntsha zaum kawg vim Vajtswv txojkev npau taws yuav kawg rau tej sub tawg sub ntsha no. Thiab kuv pom ib yam zoo li lub hiavtxwv iav xyaw hluavtaws thiab pom cov uas kov yeej tus tsiaj ntawd thiab nws tus dab mlom thiab nws lub npe lej, sawvdaws sawv ntawm ntug hiavtxwv iav tuav rawv Vajtswv tej nkauj nog ncas. Lawv hu Vajtswv tus tub qhe Mauxe zaj nkauj thiab tus Menyuam Yaj zaj nkauj hais tias, “Au Vajtswv, tus Tswv uas muaj hwjchim loj kawg nkaus, koj tes haujlwm loj thiab phimhwj kawg. Au vajntxwv uas kav ib tsoom tebchaws, koj tej kev mas ncaj ncees thiab muaj tseeb. Au tus Tswv, leejtwg yuav tsis ntshai koj thiab tsis qhuas koj lub npe? Vim koj tib leeg yog tus uas dawb huv. Ib tsoom tebchaws yuav tuaj pe hawm koj ntawm koj lub xubntiag, vim koj tes haujlwm ncaj ncees tshwm los lawm.” Dhau ntawd kuv pom lub tuam tsev yog lub tsev ntaub saum ntuj ceeb tsheej uas muaj Vajtswv tej lus, qheb lug, thiab xya tus tubtxib saum ntuj uas nqa xya yam sub tawg sub ntsha tawm hauv lub tuam tsev los. Lawv hnav tsoos tsho ntaub mag dawb huv ci nplas thiab sia ib txoj siv kub ntawm hauv siab. Mas plaub tug tsiaj ciaj sia muaj ib tug muab xya lub phaj kub uas rau Vajtswv uas muaj txojsia nyob mus ib txhis tsis kawg txojkev npau taws puv nkaus cev rau xya tus tubtxib saum ntuj ntawd. Mas tej pa ncho uas tawm ntawm Vajtswv lub hwjchim ci ntsa iab thiab ntawm nws lub hwjchim loj ncho puv nkaus lub tuam tsev, thiab tsis muaj leejtwg nkag tau rau hauv lub tuam tsev mus txog thaum xya tus tubtxib ntawd xya yam sub tawg sub ntsha tiav tag. Thiab kuv hnov ib lub suab nrov hauv lub tuam tsev tuaj hais rau xya tus tubtxib saum ntuj ntawd tias, “Cia li mus muab xya lub phaj uas rau Vajtswv kev npau taws nchuav rau saum lub ntiajteb.” Thawj tug tubtxib saum ntuj thiaj mus muab nws lub phaj nchuav rau saum lub ntiajteb, mas cov uas nias tus tsiaj lub cim thiab pe hawm nws tus dab mlom txawm ua kiav txhab qawj kiav txhab yaig thoob plaws ib ce. Tus tubtxib saum ntuj uas ob nchuav nws lub phaj rau hauv hiavtxwv, mas dej hiavtxwv txia ua ntshav zoo yam nkaus li ntshav neeg tuag, mas txhua yam ciaj sia hauv hiavtxwv kuj tuag tag huvsi. Tus tubtxib saum ntuj uas peb nchuav nws lub phaj rau tej hav dej thiab tej qhov dej txhawv mas tej dej ntawd kuj txia ua ntshav tag. Kuv txawm hnov tus tubtxib saum ntuj uas saib xyuas tej dej hais tias, “Au tus uas muaj txojsia nyob thiab ib txwm muaj nyob thiab yog tus Dawb Huv, qhov uas koj txiav txim li no koj ua ncaj lawm. Vim lawv ua rau cov xov dawb thiab cov xibhwb cev lus tej ntshav los, koj thiaj muab ntshav rau lawv haus. Tej no tsim nyog rau lawv lawm.” Thiab kuv hnov lub thaj xyeem qw hais tias, “Yog lawm lauj. Vajtswv, tus Tswv uas muaj hwjchim loj kawg nkaus, qhov uas koj txiav txim no muaj tseeb thiab ncaj ncees.” Tus tubtxib saum ntuj uas plaub nchuav nws lub phaj rau saum lub hnub, ces ua rau lub hnub tawm hluavtaws txhiab neeg. Qhov uas kub heev ntawd txhiab neeg, lawv thiaj cem foom Vajtswv uas muaj hwjchim kav tej sub tawg sub ntsha ntawd lub npe, los lawv tsis yeem ntxeev dua siab thiab qhuas Vajtswv. Tus tubtxib saum ntuj uas tsib nchuav nws lub phaj rau saum tus tsiaj lub zwm txwv, ces nws lub tebchaws txawm tsaus ntuj nti lawm. Tej neeg thiaj mob heev tom nplaig qas nrees, thiab cem foom Vajtswv vim yog raug tej mob thiab tej kiav txhab ntawd, los lawv tsis yeem ntxeev dua siab ntawm tej uas lawv ua. Tus tubtxib saum ntuj uas rau nchuav nws lub phaj rau saum tus niag dej loj Yufeti, ua rau tus dej ntawd qhuav tag thiaj npaj kev rau tej vajntxwv uas tuaj sab hnub tuaj tuaj. Thiab kuv pom peb tus ntsuj plig qias zoo yam li qav tawm hauv tus zaj qhov ncauj thiab hauv tus tsiaj thiab tus cuav xibhwb cev lus li qhov ncauj los. Cov ntsuj plig ntawd yog tej dab uas ua txujci thiab tawm mus nrhiav tej vajntxwv thoob ntiajteb yuav sau zog tej vajntxwv ntawd mus ua rog rau hnub loj kawg uas Vajtswv uas muaj hwjchim loj kawg nkaus teem cia. “Saib maj, kuv tabtom los ib yam li tub sab tuaj. Tus uas tsis tsaug zog thiab ua tib zoo npaj nws tej tsoos tsho txhij nws thiaj tsis mus liab qab rau luag pom nws qhov txaj muag, yuav tau nyob kaj siab lug.” Peb tus dab ntawd txawm sau zog tej vajntxwv mus rau lub chaw uas hu raws li lus Henplais hais tias Amakedoo. Tus tubtxib saum ntuj uas xya nchuav nws lub phaj rau saum nruab ntug, ces txawm muaj ib lub suab nrov ntawm lub zwm txwv hauv lub tuam tsev tuaj hais tias, “Tiav lawm.” Ces txawm muaj xob laim laim liab vog, xob nroo nthe tej niag rhev, thiab ntuj qeeg heev txij thaum muaj neeg nyob hauv lub ntiajteb los tsis txeev muaj ntuj qeeg heev kawg li zaum no kiag li. Lub nroog loj txawm tawg ua peb feem thiab tej moos hauv ib tsoom tebchaws kuj pob tag thiab Vajtswv nco ntsoov lub tuam ceeb Npanpiloo, thiab muab lub khob cawv txiv hmab uas yog nws txojkev npau taws heev rau lub nroog ntawd haus. Ces txhua lub koog povtxwv txawm ploj tag thiab tej roob kuj tsis pom muaj lawm, thiab tej lub lawg loj loj hnyav plaub caug tsib kilu poob saum ntuj los rau saum ib tsoom neeg, mas neeg txawm cem foom Vajtswv vim tej sub tawg sub ntsha ntawm cov lawg ntawd rau qhov tej sub tawg sub ntsha ntawd loj heev. Xya tus tubtxib saum ntuj uas nqa xya lub phaj ntawd ib tug hais rau kuv tias, “Cia li los, kuv yuav qhia koj pom qhov uas txiav txim rau tus poj muag cev loj uas zaum saum ntau tus dej, yog tus uas tej vajntxwv hauv ntiajteb tau deev lawm, thiab tej neeg hauv ntiajteb kuj qaug nws tej cawv txiv hmab uas yog kev sib deev.” Nws txawm coj kuv hauv Vaj Ntsuj Plig mus rau hauv tebchaws moj sab qhua thiab kuv pom ib tug pojniam zaum saum ib tug tsiaj liab ploog uas muaj tej npe saib tsis taus Vajtswv sau puv nkaus nws lub cev, thiab tus tsiaj ntawd muaj xya lub taubhau thiab kaum tus kub. Tus pojniam ntawd hnav ib ce tsoos tsamxem thiab liab ploog thiab coj npauj kub thiab tej qe zeb hlaws thiab tej qe qwj muaj nqes. Nws txhais tes tuav ib lub tais kub uas rau tej kev qias vuab tsuab thiab tej kev qias kev phem uas nws deev luag puv nkaus. Thiab ntawm nws hauv pliaj muaj ib lub npe uas lub ntsiab muab npog cia lawd sau cia hais tias, “Lub tuam ceeb Npanpiloo, yog cov uas muag cev thiab tej kev qias vuab tsuab hauv lub ntiajteb leej niam.” Thiab kuv pom tias tus pojniam ntawd haus cov xov dawb thiab cov uas ua timkhawv txog Yexus tej ntshav qaug lawm. Thaum kuv pom tus pojniam ntawd kuv kuj phimhwj kawg. Tus tubtxib saum ntuj txawm hais rau kuv tias, “Ua cas koj phimhwj? Kuv yuav qhia koj paub lub ntsiab uas muab npog cia hais txog tus pojniam ntawd thiab hais txog tus tsiaj uas muaj xya lub taubhau thiab kaum tus kub uas tus pojniam ntawd caij. Tus tsiaj uas koj pom ntawd txeev muaj nyob tiamsis nimno tsis muaj nyob thiab tseem yuav nce tawm hauv lub qhov tob tob los thiab yuav mus raug kev puam tsuaj. Cov neeg hauv ntiajteb uas tsis muaj npe sau cia rau hauv phau ntawv txojsia txij thaum tsim ntuj tsim teb los, kuj yuav phimhwj rau thaum uas pom tus tsiaj vim tus tsiaj ntawd txeev muaj nyob thiab nimno kuj tsis muaj nyob thiab tseem yuav los. “Tej no yuav tsum siv tswvyim tib zoo. Xya lub taubhau yog xya lub pov roob uas tus pojniam zaum, thiab yog xya tus vajntxwv. Tsib tug dua tag lawm, ib tug tabtom muaj nyob, tshuav dua ib tug tseem tsis tau los. Thaum tus ntawd los lawd nws yuav nyob ib nyuag ntu xwb. Tus tsiaj uas txeev muaj nyob thiab nimno tsis muaj nyob ntawd, yog tus vajntxwv uas yim, tiamsis tseem koom xya tus ntawd thiab yuav mus raug kev puam tsuaj. Kaum tus kub uas koj pom ntawd yog kaum tus vajntxwv uas tsis tau txais lub tebchaws kav, tiamsis lawv yuav tau hwjchim ua vajntxwv nrog tus tsiaj ntawd kav ib nyuag teev xwb. Cov vajntxwv kuj koom ua ib lub siab thiab yuav muab lawv tus peevxwm thiab lub hwjchim cob rau tus tsiaj ntawd. Lawv yuav ua rog rau tus Menyuam Yaj, tiamsis tus Menyuam Yaj yuav kov yeej lawv, vim nws yog cov uas muaj hwjchim tus Tswv thiab yog ib tsoom vajntxwv tus Vajntxwv thiab cov uas koom nrog nws kuj yog cov uas raug hu los thiab xaiv cia lawm thiab yog cov uas muaj siab xib rau nws.” Thiab tus tubtxib saum ntuj hais rau kuv tias, “Cov dej uas koj pom tus poj muag cev zaum saud yog tej haiv neeg tej pab neeg coob tej tebchaws thiab tej yam lus. Kaum tus kub uas koj pom thiab tus tsiaj yuav ntxub tus poj muag cev ntawd. Lawv yuav ua rau nws nyob do cuas nyob liab qab thiab yuav noj nws li nqaij thiab muab hluavtaws hlawv nws. Vim Vajtswv tshum lawv lub siab kom ua raws li Vajtswv xav tseg, yog qhov uas lawv koom ua ib lub siab muab lawv lub hwjchim kav cob rau tus tsiaj mus txog thaum Vajtswv tej lus tiav. Tus pojniam uas koj pom yog lub tuam ceeb uas muaj hwjchim kav tej vajntxwv hauv ntiajteb.” Dhau ntawd kuv pom dua ib tug tubtxib saum ntuj nqes saum ntuj los, nws muaj hwjchim loj heev. Nws lub hwjchim ci ntsa iab ua rau lub ntiajteb kaj lug. Nws qw nrov nrov hais tias, “Lub tuam ceeb Npanpiloo pob tag, pob tag lawm lauj, ua lub chaw rau dab nyob thiab ua chaw rau txhua tus plig qias vuab tsuab nkaum, thiab ua chaw rau txhua yam noog qias uas ntxim ntxub nyob. Vim ib tsoom tebchaws tau haus tej cawv txiv hmab uas yog nws txojkev ntshaw ua nkauj ua nraug, thiab tej vajntxwv hauv ntiajteb tau nrog nws sib deev, thiab tej tub lag tub luam hauv ntiajteb kuj nplua nuj tuaj ntawm qhov uas nws siv phum lam qas ntsuav.” Thiab kuv hnov dua ib lub suab nrov saum ntuj tuaj hais tias, “Kuv haiv neeg, cia li tawm hauv lub nroog ntawd los, xwv nej thiaj tsis nrog nws muaj txim thiab tsis nrog nws raug sub tawg sub ntsha, vim nws lub txim muab tib ua ib pawg siab mus nto ntuj lawm thiab Vajtswv cim ntsoov lub nroog ntawd tej kev txhaum. Cia li ua rau lub nroog ntawd ib yam li nws tau ua rau lwm tus. Cia li ua pauj tej uas nws tau ua lawd ob npaug. Hauv lub khob uas nws tov rau luag haus cia li tov ob npaug rau nws. Nws qhuas nws tus kheej thiab siv phum lam qas ntsuav npaum li cas, cia li muab kev tsim txom thiab kev quaj ntsuag rau nws npaum li ntawd. Nws xav hauv lub siab tias, ‘Kuv zaum ua poj vaj, kuv tsis yog poj ntsuam, kuv yuav tsis ntsib kev quaj ntsuag li.’ Vim li no tej sub tawg sub ntsha yuav ua tib hnub los raug nws, yog kev mob kis, kev quaj ntsuag thiab kev tshaib nqhis thiab yuav raug hluavtaws hlawv, rau qhov tus Tswv Vajtswv uas txiav txim rau nws, loj kawg nkaus. “Thaum tej vajntxwv hauv ntiajteb uas nrog lub nroog ntawd sib deev thiab nrog nws siv phum lam qas ntsuav, pom tej pa ncho uas kub ntawd lawv yuav quaj thiab quaj ntsuag. Lawv yuav sawv deb deb vim ntshai qhov uas nws raug tsim txom thiab hais tias, “ ‘Txom nyem lauj! Txom nyem lauj! Lub nroog uas loj kawg, lub nroog Npanpiloo uas muaj zog heev. Ib txoog teev xwb koj raug txiav txim lawm.’ “Cov tub luam hauv ntiajteb kuj quaj thiab quaj ntsuag nws vim tsis muaj leejtwg yuav lawv tej qhov txhia chaw dua li lawm, yog tej nyiaj tej kub tej qe zeb hlaws thiab tej qe qwj muaj nqes, ntaub mag zoo zoo, ntaub tsamxem ntaub xov kab ntaub liab, txhua yam ntoo tsw qab, txhua yam uas xuas kaus ntxhw, xuas ntoo muaj nqes, xuas tooj liab, hlau thiab pob zeb mog ua, hmoov ntoo tuv, tej txuj lom, hmoov tshuaj tsw qab, roj tsw qab, roj ntoos tsw qab, cawv txiv hmab, roj txiv aulib, hmoov mog zoo zoo thiab tej mog, nyuj thiab yaj, nees thiab tsheb nees, thiab muag neeg ua qhev. “Lawv yuav hais tias, ‘Tej uas koj lub siab ntshaw twb ploj tag ntawm koj lawm, thiab txhua yam nqaij qhauv zoo thiab tej uas zoo nkauj ci nplas twb ploj ntawm koj lawm, nrhiav tsis tau dua li lawm.’ Cov tub lag luam uas muag tej no nplua nuj vim lub nroog no, yuav sawv deb deb vim ntshai qhov uas nws raug tsim txom thiab lawv yuav quaj thiab quaj ntsuag hais tias. “ ‘Txom nyem lauj! Txom nyem lauj! Lub nroog loj kawg uas hnav ntaub mag zoo zoo, hnav ntaub tsamxem thiab ntaub liab, thiab coj nyiaj coj kub coj tej qe zeb hlaws thiab tej qe qwj muaj nqes, tib txoog teev xwb tej cuab txhiaj cuab tam no huvsi raug puam tsuaj tag.’ “Cov tsav nkoj thiab cov uas caij nkoj thiab cov tub zog hauv nkoj thiab txhua tus uas nrhiav noj hauv hiavtxwv txhua tus sawv deb deb, thiab thaum lawv pom tej pa ncho uas kub lub nroog ntawd lawv quaj hais tias, ‘Lub nroog twg zoo thooj li lub nroog loj no?’ thiab lawv tsuab hmoov av w rau saum lawv taubhau thiab quaj thiab quaj ntsuag qw hais tias, “ ‘Txom nyem lauj! Txom nyem lauj! Lub tuam ceeb loj kawg uas txhua tus muaj nkoj txwg dhia hauv hiavtxwv, txeev muaj txiag ntawm lub nroog tej kev nplua nuj, tib txoog teev xwb nws raug kev puam tsuaj tag huvsi. Lub ntuj 'e thiab cov xov dawb thiab cov tubtxib thiab cov xibhwb cev Vajtswv lus 'e, cia li xyiv fab hnyos lub nroog ntawd, vim Vajtswv txiav txim rau nws pauj nej lawm.’ ” Ces muaj ib tug tubtxib saum ntuj uas muaj hwjchim loj txawm nqa ib txhib zeb zoo li txhib txiv zeb pov rau hauv hiavtxwv thiab hais tias, “Lub tuam ceeb Npanpiloo yuav raug siv zog muab pov ib yam li no ntag thiab yuav tsis rov pom dua li lawm, thiab yuav tsis hnov lub suab ntaus nkauj nog ncas suab hu nkauj suab tshuab raj tshuab xyu rau hauv koj dua li lawm, thiab yuav tsis pom cov niag Kws txawj ua txhua yam haujlwm hauv koj dua li lawm, thiab yuav tsis hnov lub suab zom zeb hauv koj dua li lawm. Yuav tsis muaj tus duab teeb ci hauv koj dua li lawm, thiab yuav tsis hnov lub suab nraug vauv nkauj nyab dua li lawm. Koj cov tub luam puavleej yog neeg loj hauv lub ntiajteb thiab ib tsoom tebchaws raug koj tej khawv koob dag ntxias. Thiab luag pom cov xibhwb cev Vajtswv lus thiab cov xov dawb thiab txhua tus uas raug tua hauv lub ntiajteb tej ntshav nyob hauv koj.” Dhau ntawd kuv hnov ib lub suab nrov yam li ib pab neeg coob coob lub suab nrov saum ntuj hais tias, “Haleluya, txojkev dim thiab koob meej thiab lub hwjchim loj yog peb tus Vajtswv li, vim qhov uas nws txiav txim muaj tseeb thiab ncaj ncees. Nws txiav txim rau tus niag poj muag cev loj uas ua qias puas tsuas lub ntiajteb ntawm qhov uas nws deev luag, thiab nws pauj nws cov tub qhe tej ntshav rau tus pojniam ntawd.” Lawv qw nrov dua ib zaug hais tias, “Haleluya. Lub nroog tej pa ncho mus ib txhis tsis kawg.” Thiab nees nkaum plaub tug kev txwj laus thiab plaub tug tsiaj ciaj sia txawm khwb nkaus pe hawm Vajtswv uas zaum saum lub zwm txwv hais tias, “Amee, Haleluya.” Thiab muaj ib lub suab tawm hauv lub zwm txwv tuaj hais tias, “Vajtswv txhua tus tub qhe uas paub ntshai nws, tsis hais tus hlob tus yau, cia li qhuas peb tus Vajtswv.” Thiab kuv hnov ib lub suab yam li ib pab neeg coob coob lub suab nrov yam li dej hlob ntsawj nrov saum ntuj thiab yam li xob nroo nrov heev qw hais tias, “Haleluya, vim tus Tswv uas yog peb tus Vajtswv muaj hwjchim loj kawg nkaus ua vajntxwv kav lawm. Peb cia li zoo siab thiab xyiv fab thiab qhuas nws, vim tus Menyuam Yaj lub rooj tshoob los txog lawm thiab nws tus nkauj nyab twb npaj txhij lawm. Twb pub tus nkauj nyab hnav taub mag zoo zoo ci nplas dawb huv.” Tej ntaub mag zoo ntawd yog cov xov dawb tej haujlwm ncaj ncees. Thiab tus tubtxib saum ntuj hais rau kuv tias, “Cia li sau hais tias, ‘Cov uas raug hu tuaj koom tus Menyuam Yaj lub rooj tshoob tau nyob kaj siab lug.’ ” Thiab nws hais rau kuv tias, “Tej no yog Vajtswv tej lus tseeb.” Ces kuv txawm khwb nkaus rau ntawm nws kotaw yuav pe hawm nws, tiamsis nws hais rau kuv tias, “Tsis txhob ua li kod. Kuv yog ib tug tub qhe ib yam li koj thiab koj cov kwvtij uas tuav rawv Yexus tej lus timkhawv xwb. Cia li pe hawm Vajtswv xwb. Rau qhov Yexus tej lus timkhawv yog lub tseem ntsiab hauv cov xibhwb cev lus tej lus.” Kuv pom rooj ntug ceeb tsheej qheb ua ciav muaj ib tug nees dawb. Tus uas caij tus nees ntawd lub npe hu ua Ncaj thiab Tseeb thiab nws txiav txim thiab ua rog ncaj ncees. Nws lub qhov muag zoo ib yam li nplaim taws, thiab saum nws taubhau muaj ntau lub mom kub, thiab muaj ib lub npe sau rau ntawm nws lub cev uas tsis muaj leejtwg paub tsuas yog nws paub xwb. Nws hnav lub tsho uas muab raus ntshav lawm, thiab nws lub npe hu ua Vajtswv Txojlus. Thiab cov tub rog saum ntuj sawvdaws hnav ntaub mag zoo dawb paug dawb huv caij nees dawb raws nws qab mus. Muaj ib rab ntaj ntse tawm hauv nws qhov ncauj los uas nws yuav siv ntaus ib tsoom tebchaws thiab nws yuav xuas qws hlau kav lawv. Nws yuav tsuj lub rhawv tsuam txiv hmab uas yog Vajtswv uas muaj hwjchim loj kawg nkaus txojkev npau taws heev. Muaj ib lub npe sau rau ntawm nws lub tsho thiab ntawm nws ncej qab hais tias “Ib tsoom vajntxwv tus Vajntxwv thiab cov uas muaj hwjchim tus Tswv.” Thiab kuv pom ib tug tubtxib saum ntuj sawv hauv lub hnub, nws qw nrov rau tej nas noog huvsi uas ya saum nruab ntug hais tias, “Cia li los, cia li tuaj txoos ua ke rau hauv Vajtswv rooj noj haus loj kawg, es yuav noj tej vajntxwv thiab cov thawj tub rog thiab cov uas muaj zog li nqaij thiab noj tej nees thiab cov uas caij nees thiab ib tsoom neeg tsis hais cov uas nyob ywj pheej cov uas ua qhev cov hlob cov yau sawvdaws li nqaij.” Thiab kuv pom tus tsiaj thiab tej vajntxwv hauv ntiajteb thiab lawv cov tub rog tuaj txoos ua ke yuav ua rog rau tus uas caij nees thiab nws cov tub rog. Tiamsis tus tsiaj ntawd raug muab ntes nrog tus cuav xibhwb uas ua tej txujci tab meeg tus tsiaj thiab siv tej txujci ntawd dag ntxias cov uas nias tus tsiaj lub cim thiab cov uas pe hawm tus dab mlom tsiaj. Ob tug no raug muab pov rau hauv ntuj tawg lawj faj uas cig hlob. Rab ntaj uas tawm hauv tus uas caij nees lub qhov ncauj los muab cov uas tseem tshuav nyob tua thiab tej nas noog huvsi kuj noj lawv cev nqaij tsau npo. Thiab kuv pom ib tug tubtxib saum ntuj nqes saum ntuj los, nws tuav tus yuam sij uas qheb lub qhov tob tob thiab nqa txoj saw hlau loj hauv nws txhais tes. Mas nws ntes tus zaj uas yog tus nab txwj nab laug uas yog Ntxwg Nyoog thiab yog Xatas, mas muab khi cia ib txhiab xyoo, muab pov rau hauv lub qhov tob tob ntawd, muab kaw thiab nias cim rau, kom nws thiaj ntxias tsis tau ib tsoom tebchaws ntxiv mus txog thaum puv ib txhiab xyoo. Dhau ntawd yuav tsum muab tso tawm ib nyuag ntu. Thiab kuv pom muaj tej zwm txwv thiab cov uas zaum saum tej zwm txwv ntawd tau txais hwjchim txiav txim. Thiab kuv pom cov uas raug txiav caj dab li ntsuj plig vim yog ua timkhawv txog Yexus thiab txog Vajtswv txojlus. Lawv tsis tau pe hawm tus tsiaj thiab tus dab mlom tsiaj, thiab tsis tau nias tus tsiaj lub cim rau ntawm hauv pliaj lossis ntawm txhais tes. Lawv sawvdaws rov muaj txojsia thiab nrog Khetos kav ib txhiab xyoo. Dua li cov uas tuag lawm tsis rov tau txojsia mus txog thaum tag ib txhiab xyoo ntawd. No yog thawj zaug uas sawv hauv qhov tuag rov los. Tus uas muaj feem ciaj sawv hauv qhov tuag rov los zaum ib tau nyob kaj siab lug thiab dawb huv. Txojkev tuag zaum ob tsis muaj hwjchim kav lawv lawm tiamsis lawv yuav ua Vajtswv thiab Khetos li pov thawj, thiab yuav nrog nws kav ib txhiab xyoo. Thaum puv ib txhiab xyoo Xatas yuav raug muab tso tawm hauv nkuaj los, mas nws yuav tawm mus ntxias ib tsoom tebchaws thoob plaub ceg kaum ntuj, yog Kau thiab Makau, kom sau zog tuaj ua ke yuav ua rog. Lawv muaj coob yam li tej xuab zeb ntawm ntug hiavtxwv. Mas lawv tawm mus thoob plaws ntiajteb thiab vij nkaus Vajtswv cov xov dawb lub yeej thiab lub nroog uas nws hlub, tiamsis hluavtaws poob saum ntuj los kub cov neeg ntawd. Thiab Ntxwg Nyoog uas ntxias lawv raug muab pov rau hauv ntuj tawg lawj faj, yog lub chaw uas tus tsiaj thiab tus cuav xibhwb cev lus nyob hauv lawm, mas lawv yuav raug tsim txom nruab hnub hmo ntuj mus ib txhis tsis kawg. Thiab kuv pom ib lub zwm txwv loj dawb paug thiab pom tus uas zaum saum lub zwm txwv ntawd. Lub ntuj thiab lub ntiajteb txawm yaj ntshis ntawm nws lub xubntiag mus, tsis muaj chaw rau tej ntawd nyob dua li lawm. Kuv pom cov neeg tuag lawd tus hlob tus yau sawv ntsug ntawm lub zwm txwv xubntiag thiab tej phau ntawv kuj raug muab nthuav. Thiab muaj dua ib phau ntawv raug muab nthuav, yog phau ntawv txojsia. Cov neeg tuag lawd kuj raug txiav txim raws li lawv tau ua uas sau cia rau tej phau ntawv ntawd. Dej hiavtxwv kuj tso cov uas tuag hauv hiavtxwv los, Txojkev Tuag thiab Tub Tuag Teb kuj tso cov neeg uas tuag rau hauv los, thiab txhua tus raug txiav txim raws li lawv tau ua. Mas Txojkev Tuag thiab Tub Tuag Teb raug muab pov rau hauv ntuj tawg. Ntuj tawg no yog txojkev tuag zaum ob. Yog pom tias leejtwg tsis muaj npe sau cia rau hauv phau ntawv txojsia, tus ntawd kuj raug muab pov rau hauv ntuj tawg. Thiab kuv pom lub ntuj tshiab thiab lub ntiajteb tshiab rau qhov lub ntuj qub thiab lub ntiajteb qub twb dua tag lawm thiab dej hiavtxwv tsis muaj dua li lawm. Kuv pom lub nroog dawb huv uas yog lub nroog Yeluxalees tshiab nqes saum ntuj ntawm Vajtswv los, twb npaj txhij yam nkaus li tus nkauj nyab tu cev rau nws tus nraug vauv. Thiab kuv hnov ib lub suab nrov ntawm lub zwm txwv tuaj hais tias, “Saib maj, Vajtswv lub chaw nyob nrog neeg nyob lawm. Nws yuav nrog lawv nyob thiab lawv yuav ua nws haiv neeg. Vajtswv yeej yuav nrog lawv nyob thiab ua lawv tus Vajtswv. Nws yuav so txhua ncos kua muag ntawm lawv qhov muag, txojkev tuag yuav tsis muaj dua li lawm, txojkev quaj ntsuag txojkev quaj thiab kev mob yuav tsis muaj dua li lawm, vim tej qub twb dua tag lawm.” Mas tus uas zaum saum lub zwm txwv hais tias, “Saib maj, kuv tsim txhua yam dua tshiab.” Nws kuj hais tias, “Cia li sau tej no cia vim tej lus no tso siab tau thiab muaj tseeb.” Thiab nws hais rau kuv tias, “Tiav lawm lauj. Kuv yog Alafa thiab Aumeka, yog chiv keeb thiab qhov kawg. Tus uas nqhis, kuv yuav pub nws tau haus lub qhov dej txhawv uas pub txojsia tsis txog them nqe kiag li. Tus uas kov yeej yuav tau tej no ua qub txeeg qub teg, thiab kuv yuav ua nws tus Vajtswv thiab nws yuav ua kuv li menyuam. Tiamsis cov neeg siab yau, cov uas tsis ntseeg, cov uas ua qias vuab tsuab, cov tua neeg, cov ua nkauj ua nraug, cov ua khawv koob yees siv, cov pe dab mlom thiab txhua tus neeg dag, lawv li feem yog nyob hauv ntuj tawg lawj faj, uas yog txojkev tuag zaum ob.” Xya tus tubtxib saum ntuj uas tuav xya lub phaj uas rau xya yam sub tawg sub ntsha zaum kawg ntawd ib tug hais rau kuv hais tias, “Cia li los, kuv yuav qhia koj pom tus nkauj nyab uas yog tus Menyuam Yaj li pojniam.” Nws txawm coj kuv hauv Vaj Ntsuj Plig nce rau saum lub roob loj siab heev thiab qhia kuv pom lub nroog Yeluxalees uas dawb huv nqes saum ntuj ntawm Vajtswv los. Lub nroog ntawd muaj Vajtswv lub hwjchim ci ntsa iab ib yam li qe zeb hlaws tsim txiaj, ib yam li qe zeb hlaws daj tshiab tshiab, ntshiab li qe zeb iav. Lub nroog muaj ntsa loog loj thiab siab, muaj kaum ob lub rooj loog thiab muaj kaum ob tug tubtxib saum ntuj ib tug zov ib lub rooj loog. Saum lub qhov rooj muaj cov Yixayee kaum ob xeem li npe sau cia. Sab hnub tuaj muaj peb lub rooj loog, sab ped muaj peb lub, sab nram muaj peb lub thiab sab hnub poob muaj peb lub. Lub nroog no lub ntsa loog muaj kaum ob ntu taw tiag, thiab muaj tus Menyuam Yaj kaum ob tug tubtxib li npe sau cia rau saum tej ntu taw tiag ntawd, ib lub npe rau ib ntu taw tiag. Tus tubtxib saum ntuj uas hais rau kuv ntawd tuav rawv ib tug pas ntsuas uas xuas kub ua, yuav ntsuas lub nroog thiab tej rooj loog thiab lub ntsa loog. Lub nroog plaub fab dav xwm fab xwm meem ib yam nkaus. Nws xuas tus pas ntsuas lub nroog muaj ob txhiab plaub puas kilumeb, qhov dav qhov ntev thiab qhov siab sib npaug ib yam nkaus. Nws ntsuas lub ntsa loog muaj ib puas plaub caug plaub tshim raws li neeg tus pas ntsuas uas tus tubtxib saum ntuj siv. Lub ntsa loog muab tej qe zeb daj tshiab tshiab ua, lub nroog yog xuas tej tseem kub uas ntshiab li iav ua. Tej taw uas tiag lub ntsa loog muab txhua yam qe zeb hlaws lo kom zoo nkauj. Thawj ntu yog qe zeb hlaws daj tshiab tshiab, ntu ob yog qe zeb phaithu tsamxem, ntu peb yog qe zeb txho taws, ntu plaub yog qe zeb ntsuab txho, ntu tsib yog qe zeb iav txho ci lam, ntu rau yog qe zeb liab tsim tseb, ntu xya yog qe zeb ntsuab lam lug, ntu yim yog qe zeb ntsuab pes xiab, ntu cuaj yog qe zeb daj pes lis, ntu kaum yog qe zeb yimlab xiav, ntu kaum ib yog qe zeb ntsuab xiav, ntu kaum ob yog qe zeb tsamxem zem ziv. Kaum ob lub rooj loog yog xuas kaum ob lub qe qwj muaj nqes ua, ib lub rooj loog xuas ib lub qe qwj ua. Txojkev loj hauv lub nroog ntawd yog xuas cov tseem kub uas pom kev tshab plaws li iav ua. Kuv tsis pom muaj lub tuam tsev nyob hauv lub nroog rau qhov tus Tswv uas yog Vajtswv muaj hwjchim loj kawg nkaus thiab tus Menyuam Yaj yog lub tuam tsev hauv lub nroog ntawd. Lub nroog tsis txog muaj lub hnub lub hli li duab ci, rau qhov Vajtswv lub hwjchim ci ntsa iab ci pom kev thiab tus Menyuam Yaj yog lub teeb hauv lub nroog ntawd. Ib tsoom tebchaws yuav taug kev hauv lub nroog tus duab ci kaj thiab tej vajntxwv hauv ntiajteb yuav coj lawv tej meej mom nyiaj txiag tuaj rau hauv lub nroog ntawd. Nruab hnub lub nroog tej rooj loog yeej tsis kaw, thiab tsis muaj hmo ntuj kiag li. Luag yuav coj ib tsoom tebchaws tej meej mom nyiaj txiag thiab lub koob meej tuaj rau hauv thiab. Tsis muaj ib yam qias tsis huv lossis ib tug neeg uas ua qias vuab tsuab lossis dag ntxias yuav nkag tau rau hauv lub nroog ntawd, tsuas yog cov uas muaj npe sau cia rau hauv tus Menyuam Yaj phau ntawv txojsia xwb thiaj nkag tau. Thiab tus tubtxib saum ntuj qhia kuv pom tus niag dej uas yog dej pub txojsia, ci ib yam li qe zeb iav ntws ntawm Vajtswv thiab tus Menyuam Yaj lub zwm txwv los, mus hauv nruab nrab txojkev loj hauv lub nroog ntawd. Ob sab ntug dej muaj tsob txiv ntoo uas pub txojsia txi kaum ob yam txiv thiab txi rau txhua lub hli. Cov nplooj ntoo ntawd siv kho txhua haiv neeg li mob. Txhua yam uas raug tsawm foom yuav tsis nyob hauv dua li lawm tiamsis Vajtswv thiab tus Menyuam Yaj lub zwm txwv nyob qhov ntawd thiab Vajtswv cov tub qhe yuav pe hawm Vajtswv. Lawv yuav pom Vajtswv lub ntsej muag thiab nws lub npe yuav nyob ntawm lawv lub hauv pliaj. Yuav tsis muaj hmo ntuj dua li lawm. Lawv tsis cheem tsum muaj tus duab teeb pom kev lossis lub hnub tus duab ci vim tus Tswv uas yog Vajtswv yog tus duab uas ci rau lawv, thiab lawv yuav kav mus ib txhis tsis kawg. Tus tubtxib saum ntuj hais rau kuv tias, “Tej lus no tso siab tau thiab muaj tseeb. Tus Tswv uas yog Vajtswv uas qhia cov xibhwb cev Vajtswv lus lub siab, tau txib nws tus tubtxib saum ntuj tuaj qhia tej uas yuav muaj tshwm los sai sai no rau nws cov tub qhe.” “Saib maj, kuv yuav los sai sai no. Tus uas tuav rawv tej lus hais pom tom hauv ntej hauv phau ntawv no yuav tau nyob kaj siab lug.” Kuv yog Yauhas uas tau hnov thiab pom tej xwm txheej no. Thaum kuv hnov thiab pom, kuv txawm khwb nkaus pe hawm rau ntawm tus tubtxib saum ntuj uas qhia tej no rau kuv txhais kotaw. Tiamsis nws hais rau kuv tias, “Tsis txhob ua li kod. Kuv yog ib tug tub qhe ib yam li koj thiab koj cov kwvtij uas cev Vajtswv lus thiab cov uas tuav rawv tej lus hauv phau ntawv no. Cia li pe hawm Vajtswv xwb.” Thiab nws hais rau kuv tias, “Tsis txhob nias cim npog tej lus hais pom tom hauv ntej hauv phau ntawv no, vim twb ze lub sijhawm lawm. Cia tus uas ua phem ua qhov phem mus, cia tus uas ua qias ua qhov qias mus, cia tus uas ncaj ncees ua qhov ncaj ncees mus thiab tus uas dawb huv ua neeg dawb huv mus.” “Saib maj, kuv yuav los sai sai no, thiab kuv yuav coj kuv tej nqe zog los pauj rau txhua tus raws li uas lawv tau ua lawd. Kuv yog Alafa thiab Aumeka, yog lub hauv paus thiab lub ntsis, yog chiv keeb thiab qhov kawg. “Cov uas ntxhua nws cev tsoos tsho huv lawd thiaj muaj feem noj tsob txiv ntoo uas pub txojsia thiab nkag mus tau ntawm lub rooj loog rau hauv lub nroog, kuj tau nyob kaj siab lug. Sab nraud tsuas yog muaj cov dev thiab cov uas ua khawv koob yees siv, cov uas ua nkauj nraug, cov uas tua neeg, cov uas pe dab mlom thiab txhua tus uas nyiam xyaum raws li tej lus dag ntxias. “Kuv yog Yexus, kuv txib kuv tus tubtxib saum ntuj mus ua timkhawv txog tej no rau nej kom nej qhia rau cov pawg ntseeg. Kuv yog Davi tus cag thiab nws caj ces, yog lub hnub qub toog uas ci thaum yuav kaj ntug.” Vaj Ntsuj Plig thiab tus Nkauj Nyab hais tias, “Cia li los.” Cia tus uas tau hnov hais tias, “Cia li los.” Tus uas nqhis cia li los, thiab tus uas xav yuav cia li txais cov dej uas pub txojsia tsis txog them nqe kiag li. Kuv nkaw lus rau txhua tus uas hnov tej lus hais pom tom hauv ntej hauv phau ntawv no, yog leejtwg tsav ntxiv ib yam dabtsi rau tej lus no, Vajtswv yuav tsav ntxiv tej sub tawg sub ntsha uas sau hauv phau ntawv no rau tus ntawd. Thiab yog leejtwg muab tej lus uas hais pom tom hauv ntej hauv phau ntawv no ib los txiav tseg, Vajtswv yuav muab tus ntawd li feem ntawm tsob txiv ntoo uas pub txojsia thiab nws lub chaw nyob hauv lub nroog dawb huv raws li uas sau hauv phau ntawv no txiav tseg. Tus uas ua timkhawv rau tej xwm txheej no hais tias, “Kuv yeej yuav los sai sai no tiag tiag li.” Amee. Tswv Yexus, cia li los lauj. Thov tus Tswv Yexus txojkev hlub nrog nraim txhua tus. Amee.